ADVERTISEMENT

ADVERTISEMENT

ഡോ. ജോസഫ് മാര്‍ത്തോമ്മാ മെത്രാപ്പോലീത്ത സ്മാരക പ്രഭാഷണം

തിരുവല്ല: മലങ്കര മാര്‍ത്തോമ്മാ സുറിയാനി സഭയുടെ ആഭിമുഖ്യത്തിലുള്ള അഞ്ചാമത് ഡോ. ജോസഫ് മാര്‍ത്തോമ്മാ മെത്രാപ്പോലിത്ത സ്മാരക പ്രഭാഷണം നാളെ രാവിലെ 11 ന് എറണാകുളം ശാലേം മാര്‍ത്തോമ്മാ പള്ളിയില്‍ നടക്കും.

മാര്‍ത്തോമ്മാ സഭാധ്യക്ഷന്‍ ഡോ. തിയഡോഷ്യസ് മാര്‍ത്തോമ്മാ മെത്രാപ്പോലീത്ത സമ്മേളനം ഉദ്ഘാടനം ചെയ്യും. കോട്ടയം-കൊച്ചി ഭദ്രാസനാധ്യക്ഷന്‍ തോമസ് മാര്‍ തിമോത്തിയോസ് എപ്പിസ്‌കോപ്പ അധ്യക്ഷത വഹിക്കും.

യാക്കോബായ സുറിയാനി സഭാധ്യക്ഷന്‍ മാര്‍ ബസേലിയോസ് ജോസഫ് കാതോലിക്കാ ബാവ സ്മാരക പ്രഭാഷണം നടത്തും. എറണാകുളം ശാലേം മാര്‍ത്തോമ്മാ പള്ളി ഗായക സംഘം ഗാനശുശ്രൂഷയ്ക്കു നേതൃത്വം നല്‍കും.

ADVERTISEMENT

ആർദ്ര കേരളം പദ്ധതിയിൽ ഏഴംകുളം ഒന്നാമത്; ആദരം ഇന്ന്

അടൂർ: ആര്‍ദ്ര കേരളം പദ്ധതിയില്‍ ജില്ലയില്‍ ഒന്നാം സ്ഥാനം നേടിയ ഏഴംകുളം ഗ്രാമപഞ്ചായത്തിനെ ഇന്ന് വൈകുന്നേരം നാലിന് കൈതപ്പറമ്പ് കുടുബാരോഗ്യ കേന്ദ്രത്തില്‍ മന്ത്രി വീണാ ജോര്‍ജ് ആദരിക്കും. നിയമസഭാ ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ അധ്യക്ഷത വഹിക്കും. കുടുംബാരോഗ്യ കേന്ദ്രം മെഡിക്കല്‍ ഓഫീസര്‍ ഡോ. ദിവ്യ മോഹന്‍ റിപ്പോര്‍ട്ട് അവതരിപ്പിക്കും. ജില്ലാ പഞ്ചായത്ത് വൈസ് പ്രസിഡന്‍റ് ബീനാ പ്രഭ, പറക്കോട് ബ്ലോക്ക് പഞ്ചായത്ത് പ്രസിഡന്‍റ് എം. പി. മണിയമ്മ, ഏഴംകുളം ഗ്രാമപഞ്ചായത്ത് പ്രസിഡന്‍റ് വി. എസ്. ആശ, വൈസ് പ്രസിഡന്‍റ് വിനോദ് തുണ്ടത്തില്‍, ത്രിതല പഞ്ചായത്തംഗങ്ങൾ തുടങ്ങിയവർ പ്രസംഗിക്കും.

ഡോ.യൂഹാനോൻ മാർത്തോമ്മ ഫൗണ്ടേഷൻ ഉദ്ഘാടനവും അവാർഡുദാനവും 18ന്

പത്തനംതിട്ട: മാർത്തോമ്മാ സഭാധ്യക്ഷനും ഡബ്ല്യുസിസിയുടെ പ്രഥമ പ്രസിഡന്‍റുമായിരുന്ന ഡോ.യൂഹാനോൻ മാർത്തോമ്മ മെത്രാപ്പോലീത്തയുടെ പേരിലുള്ള ഫൗണ്ടേഷൻ ഉദ്ഘാടനവും പ്രഥമ പുരസ്കാര സമർപ്പണവും 18നു നടക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. പാർശ്വവത്കരിക്കപ്പെട്ട പൊതുസമൂഹത്തെ ചേർത്തുപിടിച്ച യൂഹാനോൻ മാർത്തോമ്മ മെത്രാപ്പോലീത്തയുടെ ആശയങ്ങളും പ്രവർത്തങ്ങളും തുടർന്നും സമൂഹത്തിൽ പ്രാവർത്തികമാക്കുകയെന്ന ലക്ഷ്യത്തോടെയാണ് ഫൗണ്ടേഷൻ പ്രവർത്തിക്കുകയെന്നും ഭാരവാഹികൾ പറഞ്ഞു. ജീവകാരുണ്യ, സാമൂഹിക സേവന പ്രവർത്തനങ്ങൾക്കായിരിക്കും മുൻഗണന നൽകുക. 18നു രാവിലെ പത്തിന് അയിരൂർ ചെറുകോൽപ്പുഴ കലാലയം കൺവൻഷൻ സെന്‍ററിൽ നടക്കുന്ന യോഗത്തിൽ പ്രതിപക്ഷ നേതാവ് വി.ഡി. സതീശൻ ഫൗണ്ടേഷൻ ഉദ്ഘാടനം നിർവഹിക്കും. ഫൗണ്ടേഷന്‍റെ പ്രഥമ പുരസ്കാരം കർദിനാൾ മാർ ബസേലിയോസ് ക്ലീമിസ് കാതോലിക്കാ ബാവയ്ക്ക് അദ്ദേഹം സമ്മാനിക്കും. ഫൗണ്ടേഷൻ ചെയർമാൻ റെജി താഴമൺ അധ്യക്ഷത വഹിക്കും. ഡോ. ജോസഫ് മാർ ബർണബാസ് സഫ്രഗൻ മെത്രാപ്പോലീത്ത, രാജ്യസഭ മുൻ ഉപാധ്യക്ഷൻ പ്രഫ. പി.ജെ. കുര്യൻ എന്നിവർ അനുസ്മരണ പ്രഭാഷണം നടത്തും. ജീവകാരുണ്യ പ്രവർത്തനങ്ങളുടെ ഉദ്ഘാടനം അടൂർ പ്രകാശ് എംപി നിർവഹിക്കും. കുര്യാക്കോസ് മാർ ക്ലീമിസ് വലിയ മെത്രാപ്പോലീത്ത, പത്തനംതിട്ട രൂപതാധ്യക്ഷൻ ഡോ.സാമുവേൽ മാർ ഐറേനിയോസ് മെത്രാപ്പോലീത്ത, പ്രമോദ് നാരായൺ എംഎൽഎ, മുൻഎംഎൽഎ രാജു ഏബ്രഹാം, മുൻ പ്രധാനമന്ത്രിയുടെ പ്രിൻസിപ്പൽ സെക്രട്ടറി ടി.കെ.എ. നായർ എന്നിവർ പ്രസംഗിക്കും. അവാർഡ് നിർണയ സമിതി ചെയർമാൻ ആന്‍റോ ആന്‍റണി എംപി, ഫൗണ്ടേഷൻ ചെയർമാൻ റെജി താഴമൺ, വൈസ് ചെയർമാൻ റവ.തോമസ് സി. അലക്സാണ്ടർ, ജനറൽ സെക്രട്ടറി കെ.എ. അലക്സാണ്ടർ എന്നിവർ പത്രസമ്മേളനത്തിൽ പങ്കെടുത്തു.

വെല്ലുവിളികളിൽ ആത്മവിശ്വാസം കരുത്താകണം: വി.ഡി. സതീശൻ

തിരുവല്ല: വെല്ലുവിളികളിൽ പതറാതെ ആത്മവിശ്വാസത്തോടെ അതിനെ നേരിടുകയാണ് വേണ്ടതെന്ന് പ്രതിപക്ഷ നേതാവ് വി.ഡി. സതീശൻ. മാർത്തോമ്മാ സഭയുടെ ആഭിമുഖ്യത്തിലുള്ള പുരസ്കാർ 2025 അവാർഡ് സമർപ്പണ സമ്മേളനത്തിൽ മുഖ്യപ്രഭാഷണം നടത്തുകയായിരുന്നു അദ്ദേഹം. വിവര വിസ്ഫോടനകാലത്ത് ചിന്തിക്കാൻ വേണ്ടിയുള്ള പോരാട്ടമാണ് നടക്കുന്നതെന്ന് സതീശൻ അഭിപ്രായപ്പെട്ടു. എഐ കാലഘട്ടത്തിൽ എല്ലാറ്റിനെയും സസൂക്ഷ്മം വീക്ഷിക്കേണ്ടിയിരിക്കുന്നു. വിജ്ഞാനത്തെ ഓരോ ഘട്ടത്തിലും പുതുക്കിയെടുക്കേണ്ടതും അനിവാര്യമാണെന്ന് പ്രതിപക്ഷ നേതാവ് പറഞ്ഞു. ഡോ.തിയഡോഷ്യസ് മാർത്തോമ്മ മെത്രാപ്പോലീത്ത സമ്മേളനം ഉദ്ഘാടനം ചെയ്തു. ഡോ.യുയാക്കിം മാർ കൂറിലോസ് സഫ്രഗൻ മെത്രാപ്പോലീത്ത അധ്യക്ഷത വഹിച്ചു. ദേശീയ ചലച്ചിത്ര പുരസ്കാര ജേതാവ് വിജയരാഘവൻ മുഖ്യാതിഥിയായിരുന്നു. വികാരി ജനറാൾ റവ.മാത്യു ജോൺ പ്രാരംഭ പ്രാർഥന നയിച്ചു. ഡോ. മാത്യൂസ് മാർ മക്കാറിയോസ്, ഡോ.തോമസ് മാർ തീത്തോസ്, ഡോ.മാത്യൂസ് മാർ സെറാഫിം, സഭാ സെക്രട്ടറി റവ.എബി ടി. മാമ്മൻ, വൈദിക ട്രസ്റ്റി റവ.ഡേവിഡ് ദാനിയേൽ, അല്മായ ട്രസ്റ്റി അൻസിൽ സഖറിയ, വികാരി ജനറാൾ റവ.ഡോ. ഈശോ മാത്യു, ഡോ.ജോർജ് എം.ഏബ്രഹാം, കൺവീനർ തോമസ് കോശി എന്നിവർ പ്രസംഗിച്ചു. 2024ലെ സഭാ പ്രതിനിധി മണ്ഡലയോഗത്തിനുശേഷം സജീവ സേവനത്തിൽ നിന്നും വിരമിച്ച വൈദികരെ സമ്മേളനം ആദരിച്ചു. സഭയുടെ വിവിധ പുരസ്കാരങ്ങളാണ് സമ്മേളനത്തിൽ വിതരണം ചെയ്തത്.

സ്കൗട്ട് ആൻഡ് ഗൈഡ്സ് ക്യാന്പ്

പത്തനംതിട്ട: സാമൂഹിക പ്രതിബദ്ധതയുള്ള ഒരു സമൂഹത്തിന്‍റെ സൃഷ്ടിക്ക് സ്കൗട്ട് ആൻഡ് ഗൈഡ്സ് പ്രസ്ഥാനം വഹിക്കുന്ന പങ്ക് നിസ്തുലമെന്ന് പത്തനംതിട്ട ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം. പത്തനം തിട്ട മാർത്തോമ്മ ഹയർ സെക്കൻഡറി സ്കൂളിൽ സ്കൗട്ട് ആൻഡ് ഗൈഡ് ത്രിദിന ക്യാമ്പ് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പിടിഎ പ്രസിഡന്‍റ് ജോൺപോൾ മാത്യു അധ്യക്ഷത വഹിച്ച സമ്മേളനത്തിൽ പ്രിൻസിപ്പൽ ജിജി മാത്യു സ്കറിയ, ഹെഡ്മിസ്ട്രസ് മിനി തോമസ്, ഗൈഡ് ക്യാപ്റ്റൻ മറിയാമ്മ ഉമ്മൻ, സ്കൗട്ട് മാസ്റ്റർ മീന എലിസബത്ത് മത്തായി എന്നിവർ പ്രസംഗിച്ചു. നാളെ ഉച്ചയ്ക്ക് ക്യാമ്പ് സമാപിക്കും. ഹൈ കിംഗ്, മറ്റു വിവിധ പരിശീലനങ്ങൾ എന്നിവ ക്യാമ്പിൽ ക്രമീകരിച്ചിരിക്കുന്നു.

സർക്കാരും ദേവസ്വം ബോർഡും ശബരിമലയുടെ പവിത്രത തകർക്കുന്നു: വിഷ്ണുനാഥ്

കോൺഗ്രസ് പ്രതിഷേധ സമ്മേളനം ഒന്പതിന് പത്തനംതിട്ട: ശബരിമലയുടെ പവിത്രതയ്ക്കു കോട്ടം തട്ടുന്ന സംഭവവികാസങ്ങളാണ് വെളിച്ചത്തുവന്നുകൊണ്ടിരിക്കുന്നതെന്നും ഇതു സംബന്ധിച്ച് നിഷ്പക്ഷവും സമഗ്രവുമായ അന്വേഷണം നടത്തണമെന്നും കെപിസിസി വർക്കിംഗ് പ്രസിഡന്‍റ് പി. സി. വിഷ്ണുനാഥ് എംഎൽഎ. ജില്ലാ കോൺഗ്രസ് കമ്മിറ്റി നേതൃസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ദേവസ്വം ബോർഡ് വിജിലൻസ് നടത്തുന്ന അന്വേഷണം ബോർഡിനെ വെള്ളപൂശാനേ ഉതകു എന്നതിനാൽ ഹൈക്കോടതി മേൽനോട്ടത്തിലുള്ള അന്വേഷണം ആവശ്യമാണെന്ന് പി. സി. വിഷ്ണുനാഥ് പറഞ്ഞു. ഓരോ ദിവസവും പുറത്തുവന്നുകൊണ്ടിരിക്കുന്ന വെളിപ്പെടുത്തലുകളും മറ്റു വിവരങ്ങളും ഞെട്ടിക്കുന്നതും വിശ്വാസ സമൂഹത്തിന് വേദന ഉളവാക്കുന്നതുമാണ്. നിലവിലെ തിരുവിതാംകൂർ ദേവസ്വം ബോർഡിനും സംസ്ഥാന സർക്കാരിനും ഗുരുതരമായ അലംഭാവവും നിരുത്തരവാദിത്വവുമാണ് ഈ വിഷയത്തിലുള്ളതെന്നും അദ്ദേഹം പറഞ്ഞു. ശബരിമലയിലെ സമീപകാല സംഭവങ്ങളിൽ പ്രതിഷേധിച്ച് ഒന്പതിന് പത്തനംതിട്ടയിൽ പ്രതിഷേധ സംഗമം സംഘടിപ്പിക്കാൻ ജില്ലാ കോൺഗ്രസ് കമ്മിറ്റി നേതൃയോഗം തീരുമാനിച്ചു. എഐസിസി സംഘടനാകാര്യ ജനറൽ സെക്രട്ടറി കെ. സി. വേണുഗോപാൽ എംപി ഉൾപ്പെടെയുള്ള നേതാക്കൾ പങ്കെടുക്കും. ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിൽ അധ്യക്ഷത വഹിച്ചു. കെപിസിസി രാഷ്‌ട്രീയകാര്യസമിതി അംഗം ആന്‍റോ ആന്‍റണി എംപി, കെപിസിസി ജനറൽ സെക്രട്ടറിമാരായ പഴകുളം മധു, എം. എം. നസീർ, മുൻ ഡിസിസി പ്രസിഡന്‍റുമാരായ കെ. ശിവദാസൻ നായർ, പി. മോഹൻരാജ്, കെപിസിസി നയരൂപീകരണ സമിതി ചെയർമാൻ ജെ. എസ്. അടൂർ, യുഡിഎഫ് ജില്ലാ കൺവീനർ എ. ഷംസുദ്ദീൻ, മുൻ എംഎൽഎ മാലേത്ത് സരളാദേവി, ജോർജ് മാമ്മൻ കൊണ്ടൂർ, നേതാക്കളായ റിങ്കു ചെറിയാൻ, അനീഷ് വരിക്കണ്ണാമല, സാമുവൽ കിഴക്കുപുറം, ജി സതീഷ് ബാബു, ജോൺസൺ വിളവിനാൽ, വെട്ടൂർ ജ്യോതിപ്രസാദ്, എ. സുരേഷ് കുമാർ, റോബിൻ പീറ്റർ, അനിൽ തോമസ്, ടി. കെ. സാജു, കെ. ജാസിംകുട്ടി, തോപ്പിൽ ഗോപകുമാർ, കെ. ജയവർമ, സജി കൊട്ടയ്ക്കാട്, കാട്ടൂർ അബ്ദുൾസലാം, ഏബ്രഹാം മാത്യു പനച്ചമൂട്ടിൽ, റോബിൻ പരുമല, സുനിൽ എസ്. ലാൽ, അഹമ്മദ് ഷാ, ബിജിലി ജോസഫ്, ലിജു ജോർജ്, ഏബ്രഹാം കുന്നുകണ്ടത്തിൽ, വിനീത അനിൽ, ഹരികുമാർ പൂതങ്കര, സി. കെ. ശശി, എലിസബത്ത് അബു, സിന്ധു അനിൽ, എൻ. സി. മനോജ്, ഉണ്ണികൃഷ്ണൻ നായർ, രമാ ജോഗീന്ദർ, റോജിപോൾ ദാനിയേൽ, രജനി പ്രദീപ്, വിജയ് ഇന്ദുചൂഡൻ, എ. കെ. ലാലു, അലൻ ജിയോ മൈക്കിൾ എന്നിവർ പ്രസംഗിച്ചു.

ശബരിമലയിൽ പുറത്തുവരുന്നത് വൻ ക്രമക്കേടുകൾ; 49 പവൻ സ്വർണം ചെമ്പായി

പത്തനംതിട്ട: ശബരിമല ക്ഷേത്രത്തിലെ സ്വര്‍ണപ്പാളി വിവാദത്തില്‍ പുറത്തുവരുന്നത് ഗുരുതര ക്രമക്കേടുകൾ. ഹൈക്കോടതി നിര്‍ദേശ പ്രകാരം ദേവസ്വം വിജിലന്‍സാണ് നിലവില്‍ അന്വേഷിക്കുന്നത്. പ്രാഥമികാന്വേഷണ റിപ്പോര്‍ട്ട് കോടതിക്കു കൈമാറും. ഇതോടെ അന്വേഷണം ക്രൈംബ്രാഞ്ചിനു വിടാന്‍ സര്‍ക്കാര്‍ ശിപാര്‍ശ ചെയ്യുമെന്നാണ് സൂചന.ദ്വാരപാലക ശില്പത്തിലെ സ്വര്‍ണം പൂശലുമായി ബന്ധപ്പെട്ട വിവാദത്തിനിടെ പുറത്തുവന്ന ഞെട്ടിപ്പിക്കുന്ന വിവരങ്ങള്‍ ദേവസ്വം ബോര്‍ഡിനും സര്‍ക്കാരിനും കീറാമുട്ടിയായി മാറിയിരിക്കുകയാണ്. മാറിമാറിവന്ന ദേവസ്വം ബോര്‍ഡുകള്‍ക്ക് ഇക്കാര്യത്തില്‍ പങ്കുണ്ടെന്ന തരത്തിലും തെളിവുകള്‍ പുറത്തുവരികയും ചെയ്തു. ബി ഗ്രൂപ്പ് ചെയര്‍മാന്‍ വിജയ് മല്ല്യ 1998 ല്‍ ശ്രീകോവിലിനൊപ്പം ദ്വാരപാലക ശില്പവും സ്വര്‍ണം പൊതിഞ്ഞു നല്‍കിയിരുന്നു. 30.3 കിലോഗ്രാം സ്വർണവും 1900 കിലോഗ്രാം ചെമ്പും ഉപയോഗിച്ചായിരുന്നു നിർമിതി. ഇരുപത് വർഷങ്ങൾക്ക് ശേഷം 2019-ൽ ദ്വാരപാലക ശില്പങ്ങൾക്ക് മങ്ങൽ സംഭവിച്ചു എന്ന കാരണത്താൽ ഇളക്കി മാറ്റിയത് വെറും ചെമ്പുപാളികളായിരുന്നുവെന്നാണ് പറയുന്നത്. 2019ല്‍ 14 ചെമ്പു പാളികളാണ് സ്വര്‍ണം പൂശാന്‍ നല്‍കിയതെന്ന് കരാറുകാരനായി അറിയപ്പെട്ട ഉണ്ണിക്കൃഷ്ണന്‍ പോറ്റി വിജിലന്‍സിനു മൊഴി നല്‍കിയിരിക്കുന്നത്. എന്നാല്‍ കൈമാറ്റത്തിനു മുമ്പ് ശില്പങ്ങളുടെ മൂല്യനിര്‍ണയം ദേവസ്വം ഉദ്യോഗസ്ഥര്‍ നടത്തിയിട്ടില്ല. 2019ല്‍ ദാരുശില്പത്തില്‍ നിന്ന് അറ്റകുറ്റപ്പണികള്‍ക്കായി പാളികള്‍ ഇളക്കിയെടുത്തപ്പോള്‍ ദേവസ്വം മഹസറില്‍ ചെമ്പ് പാളികളാണെന്നാണ് രേഖപ്പെടുത്തിയിരിക്കുന്നത്. 42.8 കിലോഗ്രാം തൂക്കമുണ്ടായിരുന്ന പാളികള്‍ തിരികെ എത്തിയപ്പോള്‍ 4.41 കിലോഗ്രാം കുറഞ്ഞുവെന്നാണ് പറയുന്നത്. ഇത് ദേവസ്വം ബോര്‍ഡ് രേഖപ്പെടുത്തിയിട്ടുമുണ്ട്. 1998-ൽ നേർത്ത സ്വർണ പാളികളാണ് കട്ടിയുള്ള ചെമ്പിനു മീതെ പൊതിഞ്ഞതെങ്കിൽ 2019-ൽ സ്വർണം പ്ലേറ്റ് ചെയ്യുകയായിരുന്നു. ദ്വാരപാലക പാളികള്‍ സ്വര്‍ണം പൂശാനായി പുറത്തുകൊണ്ടുപോയത് ആരുടെ അനുമതിയോടെയെന്നും വ്യക്തമല്ല. ദേവസ്വം ചട്ടപ്രകാരം ഇതു സാധ്യമല്ലെന്നാണ് പറയുന്നത്. എന്നാല്‍ ദ്വാരപാലക പാളികള്‍ക്ക് 40 വര്‍ഷം വാറണ്ടിയുള്ളതാണെന്നും ചെന്നൈയില്‍ സ്വര്‍ണ പൂശിയ സ്ഥാപനം തന്നെ ഇതു ശരിയാക്കി നല്‍കുമെന്നും ഉണ്ണിക്കൃഷ്ണന്‍ പോറ്റി പറഞ്ഞതുപ്രകാരമാണ് കൊടുത്തുവിട്ടതെന്നാണ് ദേവസ്വം ബോര്‍ഡിന്‍റെ നിലപാട്.

സന്ധ്യ മയങ്ങിയാൽ കുന്പളത്താമണ്ണിനെ ബന്ദിയാക്കാൻ കാട്ടാനകൾ

പത്തനംതിട്ട: സന്ധ്യ മയങ്ങുന്നതോടെ ഒരു ഗ്രാമത്തെയാകാതെ കാട്ടാന ബന്ദികളാക്കുകയാണ്. വടശേരിക്കര - കുന്പളത്താമൺ നിവാസികളുടേതാണ് ദുർഗതി. ശബരിമല പാതയായ മണ്ണാരക്കുളഞ്ഞി - ചാലക്കയം പ്രധാന പാതയിൽ വടശേരിക്കരയ്ക്കു സമീപത്തു നിന്നാരംഭിക്കുന്ന കുന്പളത്താമൺ റോഡിലൂടെ വൈകുന്നേരം ആറിനുശേഷം യാത്ര പാടില്ലെന്ന മുന്നറിയിപ്പ് നൽകിയിരിക്കുന്നതും ആനക്കൂട്ടമാണ്. സന്ധ്യ മയങ്ങിയാൽ നാട്ടുകാർക്ക് ഇവിടെ ഒരു കാര്യവുമില്ല. റോഡിൽ ആനകൾ നിറയും. പിന്നീട് അവരുടെ വിഹാര കേന്ദ്രമാണ്. അബദ്ധത്തിലെങ്ങാനും ആരെങ്കിലും റോഡ് വഴി വന്നാൽ ജീവനിൽ കൊതിയുണ്ടെങ്കിൽ എങ്ങനെയെങ്കിലും രക്ഷപ്പെട്ടോണം എന്നതാണ് സ്ഥിതി. കുന്പളത്താമൺ, മുക്കുഴി തുടങ്ങിയ പ്രദേശങ്ങളിലേക്കുള്ള യാത്രക്കാർ ഇത്തരമൊരു അവസ്ഥയിലെത്തിയിട്ടു നാളുകളേറെയായി. എല്ലാ ദിവസവും രാത്രി എട്ടോടെ വനപാലകർ റോന്ത് ചുറ്റാനെത്തും. ഉദ്യോഗസ്ഥരുടെ വാഹനം ആനയും തടയാറില്ലെന്നാണ് നാട്ടുകാർ പറയുന്നത്. അവരെത്തി പടക്കം പൊട്ടിച്ചും തീ കൂട്ടിയും ആനയെ ഓടിക്കും. അല്പ സമയത്തേക്ക് റോഡിൽനിന്നു മാറിനിൽക്കുന്ന ആനക്കൂട്ടം വനപാലകർ മടങ്ങിയാൽ തിരികെ എത്തും. വനപാലകർ റോന്ത് ചുറ്റുന്ന സമയത്ത് ആന സമീപത്തെ ആറ്റിലേക്കിറങ്ങി വെള്ളം കുടിച്ചും കുളിച്ചും ഉല്ലസിക്കുകയാണ് പതിവ്. തിരികെയെത്തുന്ന കാട്ടാനകൾ പിന്നീട് കൃഷിയിടങ്ങളിൽ കയറി നാശമുണ്ടാക്കുകയാണ്. ഒന്നും വച്ചേക്കില്ല കൃഷിയിടങ്ങളിൽ കാട്ടാനകളുടെ ശല്യം വർധിച്ചതായി കർഷകർ പറയുന്നു. കുന്പളത്താമൺ ചക്കാലമണ്ണിൽ കെ.വി. പീലിപ്പോസിന്‍റെ (മോനച്ചൻ) പുരയിടത്തിൽ കഴിഞ്ഞ രാത്രിയിൽ ക‍യറിയ കാട്ടാനകൾ പത്ത് മൂട് വാഴ നശിപ്പിച്ചു. ഇതിനൊപ്പം കമുകും പിഴുതെറിഞ്ഞു. കൃഷിയിടത്തിൽ തന്പടിച്ച് ഇവയെല്ലാം തിന്നു തീർത്താണ് ആനക്കൂട്ടം മടങ്ങിയതെന്ന് പീലിപ്പോസ് പറഞ്ഞു. ബഹളം കൂട്ടിയാലും ആന പിന്തിരിയാറില്ല. കൃഷിയിടങ്ങളിലെ കൈയാലകളും വ്യാപകമായി നശിപ്പിച്ചു. തെങ്ങ് മൂടോടെ പിഴുതെറിഞ്ഞ സംഭവങ്ങളുമുണ്ട്. കഴിഞ്ഞ അഞ്ചുമാസത്തിനിടെ വ്യാപകമായ കൃഷിനാശമാണ് പ്രദേശത്ത് കാട്ടാനക്കൂട്ടം വരുത്തിവയ്ക്കുന്നതെന്ന് കണ്ണാട്ടുമണ്ണിൽ ജോയി ചൂണ്ടിക്കാട്ടി. കാട്ടുപന്നി, മ്ലാവ്, കുരങ്ങ്, മലയണ്ണാൻ തുടങ്ങിയവ വരുത്തിവയ്ക്കുന്ന നാശത്തിനു പുറമേയാണ് ഇപ്പോൾ കാട്ടാനകൾ സ്ഥിരമായി തന്പടിക്കുന്നത്. നാളികേരത്തിനു മെച്ചപ്പെട്ട വിലയുണ്ടെങ്കിലു വിളവെടുക്കാനാകുന്നില്ലെന്ന് കർഷകർ പറഞ്ഞു. കുരങ്ങും മലയണ്ണാനും നാളികേരം നശിപ്പിക്കുകയാണ്. ഇതിനൊപ്പം ആന തെങ്ങ് പിഴുതെറിയുന്ന സാഹചര്യവുമുണ്ട്. ജോലിക്കു പോകുന്നവർ ദുരിതത്തിൽ കുന്പളത്താമൺ, മുക്കുഴി ഭാഗങ്ങളിൽ നിന്നു പുറംജോലിക്കു പോകുന്നവർ മടങ്ങിയെത്തുന്നത് ഭീതിയോടെയാണ്. പത്തനംതിട്ട, റാന്നി ടൗണുകളിലേക്കാണ് ഇവിടെയുള്ളവരിൽ നല്ലൊരു പങ്കും ജോലിക്കു പോകുന്നത്. ഇവർ മടങ്ങുന്നത് വൈകുന്നേരങ്ങളിലായിരിക്കും. എന്നാൽ സന്ധ്യ ആകുന്നതോടെ റോഡിൽ ആനക്കൂട്ടം സ്ഥിരം കാഴ്ചയായതോടെ കാൽനടയാത്ര അസാധ്യമായി. വടശേരിക്കരയിൽ ഇറങ്ങി കുന്പളത്താമൺ ഭാഗത്തേക്ക് പോകാൻ ഓട്ടോറിക്ഷ പോലും വരാത്ത സാഹചര്യമാണ്. ബൈക്കുകളിലും മറ്റും യാത്ര ചെയ്യാനും സാധ്യമല്ല. ആനയുടെ മുന്പിൽപ്പെട്ട ബൈക്ക് യാത്രക്കാർ തലനാരിഴയ്ക്കാണ് രക്ഷപ്പെട്ടത്.

വില്പന സാധനങ്ങൾ നശിപ്പിച്ചതായി പരാതി

പത്തനംതിട്ട: നഗരത്തിലെ ട്രാവൻകൂർ ഇലക്‌ട്രിക്കൽസിന്‍റെ ഗോഡൗണിൽ വിൽപനയ്ക്കു വേണ്ടിയുള്ള സാധന സാമഗ്രികൾ കഴിഞ്ഞദിവസം രാത്രി നശിപ്പിച്ചതായി പരാതി. ബിജു ജോസിന്‍റെ ഉടമസ്ഥതയിലുള്ളതാണ് സ്ഥാപനം. റോഡിലെ ഓട നിർമാണത്തിന്‍റെ മാലിന്യങ്ങളും വലിയ തടികളും മറ്റും വില്പന സാധനങ്ങൾക്ക് മുകളിലേക്കാണ് ജെസിബി ഉപയോഗിച്ച് നിക്ഷേപിച്ചത്. വ്യാപാര സ്ഥാപനങ്ങൾ പൂട്ടി പോയതിനു ശേഷമാണ് ഇത്തരമൊരു പ്രവൃത്തി നടത്തിയിരിക്കുന്നത്. പിഡബ്ല്യുഡി ഓട നിർമാണത്തിന്‍റെ മറവിൽ നടത്തുന്ന നാശനഷ്ട ങ്ങൾക്ക് അധികൃതർ നഷ്ടപരിഹാരം വാങ്ങിതരണമെന്നും നടപടി സ്വീകരിക്കണമെന്നും കേരള വ്യാപാരി വ്യവസായി ഏകോപനസമിതി ജില്ലാ പ്രസിഡന്‍റ് പ്രസാദ് ജോൺ മാമ്പ്ര ആവശ്യപ്പെട്ടു. പരാതിയുടെ അടിസ്ഥാനത്തിൽ പോലീസും പിഡബ്ല്യുഡി അധികൃതരും സ്ഥലത്തെത്തി പരിശോധന നടത്തി. സംഭവത്തിൽ വ്യാപാരി വ്യവസായി ഏകോപനസമിതി യോഗം പ്രതിഷേധിച്ചു. യൂണിറ്റ് ജനറൽ സെക്രട്ടറി ആലിഫ് ഖാൻ മേധാവി, ട്രഷറാർ ബെന്നി ഡാനിയേൽ, സാബു ചരിവുകാലായിൽ, അലക്സാണ്ടർ വിളവിനാൽ, ജോഷ്വ ജോസ്, ബൈജു പയനിയർ, അശ്വിൻ മോഹൻ, ജയിംസ് ശ്യാമ, ലീനാ വിനോദ്, സൂര്യ ഗിരീഷ്, മാത്യു, ഷിബു, അയൂബ് ഖാൻ, ഉല്ലാസ് തുടങ്ങിയവർ പ്രസംഗിച്ചു.

വയാറ്റുപുഴ സ്കൂളിലെ നിയമന നീക്കത്തിനെതിരേ കെവിഎംഎസ്

പത്തനംതിട്ട: കേരള വെള്ളാള മഹാസഭയുടെ (കെവിഎംഎസ്) ഉടമസ്ഥതയിലുള്ള വയ്യാറ്റുപുഴയിലെ എയ്ഡഡ് സ്‌കൂളിൽ മാനേജ്മെന്‍റിന്‍റെ പേരിൽ നിയമന നീക്കം നടക്കുന്നതായി ആരോപണം. വിദ്യാഭ്യാസ ഡെപ്യൂട്ടി ഡയറക്ടറെ സ്വാധീനിച്ച് സ്‌കൂൾ സൊസൈറ്റിയുടെ ബൈലോ തിരുത്തി തെറ്റായി അംഗീകരിപ്പിച്ചാണ് നിയമനം നടത്താനുള്ള നീക്കം നടക്കുന്നതെന്നും വെള്ളാള മഹാസഭ ഭാരവാഹികൾ പത്രസമ്മേളനത്തിൽ ആരോപിച്ചു. തിരുവല്ല വിദ്യാഭ്യാസ ഡെപ്യൂട്ടി ഡയറക്ടറെ സ്വാധീനിച്ച് ബൈലോ തിരുത്തി അംഗീകരിപ്പിച്ചാണ് തങ്ങൾക്ക് നിയമനാധികാരമുണ്ടെന്ന് തെറ്റിധരപ്പിച്ചാണ് ഒരു വിഭാഗം നിയമനനീക്കം നടത്തുന്നത്. ഇല്ലാത്ത തസ്തികയിലേക്ക് നിയമനം നടത്താനുള്ള ശ്രമം നേരത്തെ വിദ്യാഭ്യാസ വകുപ്പ് തടഞ്ഞിരുന്നു. 2000-ൽ പൊതുയോഗം ചർച്ച ചെയ്ത് പത്തനംതിട്ട രജിസ്‌ട്രാർ അംഗീകാരം നൽകിയ സൊസൈറ്റി ബൈലോ നാളിതുവരെ തിരുത്തിയിട്ടില്ലെന്നാണ് കെവിഎംഎസ് പറയുന്നത്. വിദ്യാഭ്യാസ ഡെപ്യൂട്ടി ഡയറക്ടർ അംഗീകരിച്ച ബൈലോയിൽ ഈ വിവരം സത്യവാങ്മൂലമായി എഴുതിച്ചേർത്തിട്ടുമുണ്ട്. എന്നാൽ, പത്തനംതിട്ട ജില്ലാ വിദ്യാഭ്യാസ ഓഫീസിൽനിന്ന് വിവരാവകാശം വഴി ലഭിച്ച രേഖയിൽ രണ്ട് വ്യത്യസ്ത ബൈലോകളാണ് ലഭിച്ചത്. ഇതിനെതിരേ മുഖ്യമന്ത്രി, വിദ്യാഭ്യാസ മന്ത്രി, സെക്രട്ടറി, ഡയറക്ടർ ജനറൽ, ഡെപ്യൂട്ടി ഡയറക്ടർ, ജില്ലാ വിദ്യാഭ്യാസ ഓഫീസർ എന്നിവർക്ക് പരാതി നൽകിയിട്ടും നടപടി ഉണ്ടായില്ല. റാന്നി പോലീസ്, പത്തനംതിട്ട പോലീസ് സൂപ്രണ്ട് എന്നിവർക്കും പരാതി നൽകിയിരുന്നതാണെന്ന് ഭാരവാഹികൾ പറഞ്ഞു. മഹാസഭയുടെ ഡയറക്ടർ ബോർഡിന്‍റെയും കീഴ്ഘടകങ്ങളുടെയും ഉടമസ്ഥതയിലാണ് സ്‌കൂൾ. 2023 ഒക്ടോബർ ഒന്നിന് റാന്നി മുനിസിഫ് കോടതി ഉത്തരവിന്‍റെ അടിസ്ഥാനത്തിൽ പൊതുയോഗത്തിൽനിന്ന് പുറത്താക്കപ്പെട്ട എൻ. മഹേശന്‍റെ നേതൃത്വത്തിലുള്ള ഒരു വിഭാഗമാണ് അനധികൃത നിയമനതതിന് ശ്രമിക്കുന്നത്. വിദ്യാഭ്യാസ ഡെപ്യൂട്ടി ഡയറക്ടർ തെറ്റായി അംഗീകരിച്ച ബൈലോ പ്രധാന തെളിവായി ഹാജരാക്കി മഹേശനും വേണുഗോപാലപിള്ളയും വിദ്യാഭ്യാസ വകുപ്പിനെതിരേ ഹൈക്കോടതിയിൽ ഫയൽ ചെയ്ത കേസിൽ, സർക്കാർ അഭിഭാഷകൻ ബൈലോ തിരുത്തിയ വിവരം മറച്ചുവെച്ച് ഉപാധികളോടെ വിധി സമ്പാദിക്കുകയുണ്ടായി. തുടർന്ന്, ഹൈക്കോടതി നിർദേശിച്ച ഉപാധികൾ അംഗീകരിക്കാതെ പത്തനംതിട്ട ഡിഇഒ എൻ. മഹേശനെ മാനേജരായി നിയമിച്ചതായി വെള്ളാള മഹാസഭ ആരോപിച്ചു. എന്നാൽ, ഈ അപ്പീലിൽ ഹൈക്കോടതി ഡിവിഷൻ ബഞ്ച് സ്‌കൂളിൽ നിയമനം നടത്തരുതെന്ന് ഇടക്കാല ഉത്തരവിട്ടിരുന്നു. നിയമവിരുദ്ധ നിയമന ശ്രമങ്ങൾ അവസാനിപ്പിക്കാൻ ഉടനടി നടപടിയെടുക്കണമെന്ന് കെവിഎംഎസ് സംസ്ഥാന കമ്മിറ്റി അധികൃതരോട് ആവശ്യപ്പെട്ടു. കെവിഎംഎസ് സംസ്ഥാന പ്രസിഡന്‍റ് കെ. മുകേഷ് കുമാർ, സംസ്ഥാന ജനറൽ സെക്രട്ടറി മണക്കാട് വി. സുരേഷ്, കുമാര പിള്ള, ജനാർദ്ദനൻ പിള്ള, കുമരൻ വേലപ്പൻ, സിന്ധുരാജ് എന്നിവർ പത്രസമ്മേളനത്തിൽ പങ്കെടുത്തു.

നായ കടിച്ചതിനെത്തുടര്‍ന്ന് ചികില്‍സയിലായിരുന്ന വീട്ടമ്മ പനി ബാധിച്ച് മരിച്ചു

പത്തനംതിട്ട: നായ കടിച്ചതിനെത്തുടര്‍ന്ന് ചികില്‍സയിലായിരുന്ന വീട്ടമ്മ പനി ബാധിച്ച് മരിച്ചു. ഓമല്ലൂര്‍ മണ്ണാറമല കളര്‍നില്‍ക്കുന്നതില്‍ കെ. മോഹനന്‍റെ ഭാര്യ കൃഷ്ണമ്മ (57) യാണ് മരിച്ചത്. കഴിഞ്ഞ മാസം നാലിന് കൃഷ്ണമ്മയെ നായ കടിച്ചിരുന്നു. പുരികത്താണ് കടിയേറ്റത്. വാക്‌സിനേഷനും പൂര്‍ത്തിയാക്കിയിരുന്നതായി പറയുന്നു. മൂന്നു ദിവസം മുമ്പ് കടുത്ത പനിയെത്തുടര്‍ന്ന് കൃഷ്ണമ്മയെ കോട്ടയം മെഡിക്കല്‍ കോളജിൽ പ്രവേശിപ്പിക്കുകയായിരുന്നു. പേവിഷ ബാധയാണോ മരണകാരണമെന്നറിയാൻ കൂടുതൽ പരിശോധന വേണ്ടിവരുമെന്ന് അധികൃതർ പറഞ്ഞു. ഇതിനായി സ്രവങ്ങൾ ശേഖരിച്ചിട്ടുണ്ട്. സംസ്‌കാരം നാളെ 11 ന് വീട്ടുവളപ്പില്‍. മക്കള്‍: ആര്യ മോഹന്‍, ആതിര മോഹന്‍. മരുമക്കള്‍: സുശാന്ത്, അനൂപ്.

വാഹനാപകടത്തിൽ പരിക്കേറ്റു ചികിത്സയിലിരുന്ന യുവാവ് മരിച്ചു

അടൂർ: വാഹനാപകടത്തിൽ പരിക്കേറ്റ് ചികിൽസയിലായിരുന്ന യുവാവ് മരിച്ചു. പഴകുളം പടിഞ്ഞാറ് സതിഭവനിൽ കൃഷ്ണൻകുട്ടി നായരുടെ മകൻ പ്രദീപ് കെ. നായർ (27) ആണ് മരിച്ചത്. കഴിഞ്ഞ ഞായറാഴ്ച രാത്രി 12.45 ഓടെ കെപി റോഡിൽ തെങ്ങുംതാര അമ്പാടി ജങ്ഷനിൽ പ്രദീപ് സഞ്ചരിച്ച ബൈക്കും കാറും കൂട്ടിയിടിച്ചായിരുന്നു അപകടം. ഗുരുതരമായി പരിക്കേറ്റ പ്രദീപിനെ വെഞ്ഞാറുമൂട്ടിലെ സ്വകാര്യ മെഡിക്കൽ കോളജിൽ പ്രവേശിപ്പിച്ചിരുന്നു. വെള്ളിയാഴ്ച ഉച്ചയോടാണ് മരിച്ചത്. അമ്മ: സതി. ഭാര്യ: ദീപ്തി. മകൾ: പ്രദീപ്ത. സഹോദരങ്ങൾ: പ്രശാന്ത്, പ്രസാദ്

ടി.ജെ.എസ്. ജോർജ് തുന്പമണ്ണിന്‍റെ അഭിമാനം

പത്തനംതിട്ട: മാധ്യമ ലോകത്തിന് എന്നും അഭിമാനമുയർത്തിയ ടി.ജെ.എസ്. ജോർജിന്‍റെ ജന്മനാട് തുന്പമണ്ണാണ്. മജിസ്‌ട്രേറ്റ് ആയിരുന്ന ടി.ടി. ജേക്കബിന്‍റെയും ചാച്ചിയാമ്മ ജേക്കബിന്‍റെയും മകനായി പത്തനംതിട്ട ജില്ലയിലെ തുമ്പമണിൽ 1928 മേയ് ഏഴിനായിരുന്നു തയ്യില്‍ ജേക്കബ് സോണി ജോര്‍ജ് എന്ന ടി.ജെ. എസ്. ജോര്‍ജിന്‍റെ ജനനം. ഇന്ത്യയിലും വിദേശത്തുമായി അരനൂറ്റാണ്ടിലധികം മാധ്യമപ്രവര്‍ത്തനം നടത്തി. 1950 ല്‍ മുംബൈയിലെ ഫ്രീ പ്രസ് ജേര്‍ണലില്‍ പത്രപ്രവര്‍ത്തനജീവിതം ആരംഭിച്ച അദ്ദേഹം ഇന്‍റര്‍നാഷണല്‍ പ്രസ് ഇന്‍സ്റ്റിറ്റ്യൂട്ട്, ദി സെര്‍ച്ച്ലൈറ്റ്, ഫാര്‍ ഈസ്റ്റേണ്‍ എക്കണോമിക് റിവ്യൂ എന്നിവയില്‍ മാധ്യമപ്രവര്‍ത്തകനായി പ്രവര്‍ത്തിച്ചു. സ്വതന്ത്രഭാരതത്തില്‍ അഭിപ്രായസ്വാതന്ത്ര്യം ഉപയോഗിച്ചതിന്‍റെ പേരില്‍ ആദ്യമായി ജയിലിലടക്കപ്പെട്ട പത്രാധിപരാണ് ടി.ജെ.എസ്. മാധ്യമ പ്രവർത്തനത്തോടൊപ്പം ഗ്രന്ഥരചനയും നിർവഹിച്ച അദ്ദേഹം ഇംഗ്ലീഷിലും മലയാളത്തിലുമായി നിരവധി പുസ്തകങ്ങൾ രചിച്ചു. 2011 ല്‍ രാജ്യം പത്മഭൂഷണ്‍ പുരസ്‌കാരം നല്‍കി ആദരിച്ചു. 2017ല്‍ സ്വദേശാഭിമാനി പുരസ്‌കാരവും ലഭിച്ചിരുന്നു. ഡൽഹിയിലും ബംഗളൂരുവിലുമായി കഴിഞ്ഞിരുന്ന ടി.ജെ.എസ്. ജോർജിന് പത്മഭൂഷൺ ലഭിച്ചപ്പോൾ ജന്മനാട് ആദരിച്ചിരുന്നു.

ജില്ലയിലെ സ്കൂളുകളില്‍ 72,728 കുട്ടികൾ; യുഐഡി ഇല്ലാത്തവര്‍ 1027

പത്തനംതിട്ട: ആറാം പ്രവൃത്തിദിനത്തില്‍ യുഐഡി സമര്‍പ്പിച്ചില്ലെന്ന പേരില്‍ പ്രവേശന നടപടികളില്‍ ഉള്‍പ്പെടാതെ പോയവരില്‍ പത്തനംതിട്ട ജില്ലയില്‍ 1027 കുട്ടികൾ. പത്തനംതിട്ട വിദ്യാഭ്യാസ ജില്ലയില്‍ 683 കുട്ടികളും തിരുവല്ലയില്‍ 344 കുട്ടികളുമാണ് യുഐഡി ഇല്ലാതെ പുറത്തു നില്‍ക്കുന്നത്. 72,728 കുട്ടികളാണ് ഒന്ന് മുതല്‍ പത്തുവരെയുള്ള ക്ലാസുകളിലായി ഇക്കൊല്ലം ജില്ലയിലെ സര്‍ക്കാർ, എയ്ഡഡ് സ്‌കൂളുകളില്‍ പ്രവേശനം നേടിയിരിക്കുന്നത്. ഇവരില്‍ 48,473 കുട്ടികള്‍ പത്തനംതിട്ട വിദ്യാഭ്യാസ ജില്ലയില്‍ പ്രവേശനം നേടിയപ്പോള്‍ 47,108 പേര്‍ക്കും യുഐഡി ഉണ്ട്. 26,255 കുട്ടികള്‍ തിരുവല്ല വിദ്യാഭ്യാസ ജില്ലയില്‍ പ്രവേശനം നേടിയതില്‍ 25,620 പേര്‍ക്കും യുഐഡി ലഭിച്ചു. യുഐഡി ഇല്ലാതെ പട്ടികയില്‍ ഉള്‍പ്പെടാതെ പോയവരില്‍ ഏറെയും പ്രൈമറി ക്ലാസുകളിലെ വിദ്യാര്‍ഥികളാണ്. ഇവരില്‍ നല്ലൊരു പങ്കും ജൂണ്‍ 30നകം യുഐഡി സ്വന്തമാക്കി സമര്‍പ്പിച്ചെങ്കിലും ഇതുകൂടി ഉള്‍പ്പെടുത്താന്‍ വിദ്യാഭ്യാസ വകുപ്പ് അനുമതി നല്‍കിയിട്ടില്ല. ആറാം പ്രവൃത്തിദിന കണക്കെടുപ്പിലെ യുഐഡി മാത്രമേ ഇപ്പോഴും പരിഗണിച്ചിട്ടുള്ളൂ. പിന്നോക്ക മേഖലകളിൽപ്പെട്ട സ്കൂളുകളിലാണ് യുഐഡി പ്രശ്നം പ്രധാനമായും ബാധിച്ചത്. കുട്ടികളുടെ കുറവു കാരണം പ്രതിസന്ധിയില്‍ നില്‍ക്കുന്ന എല്‍പി സ്‌കൂളുകളെയാണ് യുഐഡി പ്രശ്‌നവും സാരമായി ബാധിച്ചിരിക്കുന്നത്. ഇത്തരം സ്‌കൂളുകളില്‍ തസ്തിക പ്രശ്‌നം ഇല്ലെങ്കിലും കുട്ടികളുടെ കുറവ് പരിഹരിക്കാന്‍ നടത്തിയ ശ്രമങ്ങള്‍ക്കാണ് വിലങ്ങുതടിയുണ്ടായത്. യുഐഡി കുരുക്കില്‍ തസ്തികകള്‍ നഷ്ടപ്പെടുന്ന സാഹചര്യം പത്തനംതിട്ട ജില്ലയില്‍ കാര്യമായി ഉണ്ടാകില്ലെന്നാണ് പറയുന്നത്. എല്‍പി, യുപി എയ്ഡഡ് വിദ്യാലയങ്ങളില്‍ നേരത്തെ തന്നെ പുതിയ തസ്തിക സര്‍ക്കാര്‍ അനുവദിക്കുന്നില്ല. പാഠപുസ്തകം, യൂണിഫോം വിതരണ നടപടികളെയും യുഐഡി വിഷയം ബാധിച്ചേക്കാമെന്ന ആശങ്ക ജില്ലയിലുമുണ്ട്.പാഠപുസ്തക ഇന്‍ഡന്‍റ് മുന്‍കൂട്ടി രേഖപ്പെടുത്തുന്നതിനാല്‍ ആകെ കുട്ടികളുടെ രണ്ട് ശതമാനം മാത്രമേ അധികരിച്ചു നല്‍കാന്‍ അനുമതിയുള്ളൂ. എന്നാല്‍ ഇക്കുറി അതിലുമേറെയാണ് പല സ്‌കൂളുകളിലും യുഐഡി ഉള്ളവരും ഇല്ലാത്തവരും തമ്മിലുള്ള അന്തരം. യുഐഡി ലഭ്യതയുടെ അടിസ്ഥാനത്തില്‍ നടപ്പാക്കുന്ന സൗജന്യ യൂണിഫോം പദ്ധതിയെയും യുഐഡി പ്രശ്‌നം ബാധിച്ചേക്കാം. ഇത്തരം പ്രശ്‌നങ്ങള്‍ മൂലമുള്ള തലവേദന പ്രഥമാധ്യാപകര്‍ക്കാണ് ഉണ്ടാകുന്നത്. പ്രശ്‌ന പരിഹാരത്തിനയി സര്‍ക്കാരിലേക്കു നല്‍കിയ നിര്‍ദേശങ്ങളിലാകട്ടെ തീരുമാനങ്ങള്‍ വൈകുകയുമാണ്.

ആറന്മുളയിൽ വള്ളസദ്യക്കാലം സമാപിച്ചു

ആറന്മുള: പാർഥസാരഥി ക്ഷേത്രത്തിലെ പ്രസിദ്ധമായ വള്ളസദ്യകൾ ഇന്നലെ പൂർത്തിയായി. ജൂലൈ 13ന് തുടങ്ങിയ വള്ളസദ്യ 82 ദിവസം പിന്നിട്ട് 524 വള്ളസദ്യകൾ നടത്തിയാണ് ചടങ്ങുകൾ അവസാനിച്ചത്. അവസാന ദിവസം 12 വള്ളസദ്യകളാണ് നടന്നത്. അടുത്ത വർഷത്തേക്ക് 29 വള്ളസദ്യകൾ വിവിധ കാരണങ്ങളാൽ മാറ്റിവച്ചു. അടുത്തവർഷത്തെ വള്ളസദ്യ ബുക്കിംഗ് നവംബറിൽ ആരംഭിക്കും. പഞ്ചപാണ്ഡവ ക്ഷേത്രദർശന ടൂർ പാക്കേജിൽ കെഎസ്ആർ‌ടിസി 344 ട്രിപ്പുകൾ കേരളത്തിന്‍റെ വിവിധ ഡിപ്പോകളിൽ നിന്ന് ആറന്മുളയിലേക്ക് വരികയും 15,000 ത്തിൽ പരം ആളുകൾ ആറന്മുള സദ്യയിൽ പങ്കെടുക്കുകയും ചെയ്തു. കൂടാതെ പന്ത്രണ്ടായിരത്തോളം ആളുകൾ സ്പെഷൽ പാസ് മുഖേനയും ആറന്മുള സദ്യയിൽ പങ്കെടുത്തു. അഷ്ടമിരോഹിണി ഉൾപ്പെടെ ഇക്കൊല്ലം മൂന്നു ലക്ഷത്തിൽപ്പരം ആളുകൾ ആറന്മുള വള്ളസദ്യകളിൽ വിവിധ ദിവസങ്ങളിലായി പങ്കെടുത്തു. 14 സദ്യ കരാറുകാരാണ് സദ്യകൾ ഒരുക്കിയത്. തിരുവിതാംകൂർ ദേവസ്വം ബോർഡും പള്ളിയോട സേവാസംഘവും നിർവഹണസമിതിയുടെ നിർദ്ദേശപ്രകാരം വള്ളസദ്യകൾ ക്രമീകരിച്ചിരുന്നു. നിർവഹണ സമിതിയിൽ ഭക്തജന പ്രതിനിധിയായി ക്യാപ്റ്റൻ രവീന്ദ്രൻ നായർ, ഉപദേശക സമിതി പ്രതിനിധിയായി ശശി കണ്ണങ്കരിലും ദേവസ്വം പ്രതിനിധിയായി അഡ്മിനിസ്ട്രേറ്റീവ് ഓഫീസർ രേവതി, അസിസ്റ്റന്‍റ് കമ്മീഷണർ ആർ. ശ്രീലേഖ എന്നിവരാണുണ്ടായിരുന്നത്. പള്ളിയോട സേവാസംഘം പ്രസിഡന്‍റ് കെ. വി. സാംബദേവൻ, സെക്രട്ടറി പ്രസാദ് ആനന്ദഭവൻ, വൈസ് പ്രസിഡന്‍റ് കെ. എസ‌്. സുരേഷ്, ജോയിന്‍റ് സെക്രട്ടറി അജയ് ഗോപിനാഥ് എന്നിവർ നേതൃത്വം നൽകി. സമാപന ദിവസം പ്രതിപക്ഷ നേതാവ് വി. ഡി. സതീശൻ മുഖ്യാതിഥിയായിരുന്നു. അദ്ദേഹം കൊടിമരച്ചുവട്ടിൽ പറനിറയ്ക്കുകയും പള്ളിയോടങ്ങൾക്ക് വെറ്റില പുകയില സമർപ്പിക്കുകയും സദ്യയിൽ പങ്കെടുക്കുകയും ചെയ്തു. photo: ആറന്മുളയിൽ ഇക്കൊല്ലത്തെ വള്ളസദ്യകൾക്കു സമാപനം കുറിച്ച് ഇന്നലെ ക്ഷേത്രത്തിലെത്തിയ പള്ളിയോട കരക്കാരെ പ്രതിപക്ഷ നേതാവ് വി.ഡി. സതീശൻ ദക്ഷിണ നൽകി സ്വീകരിക്കുന്നു.

മഞ്ഞിനിക്കര ദയറായിൽ അഖണ്ഡ പ്രാർഥന 11ന്

മഞ്ഞിനിക്കര: പരിശുദ്ധ ഇഗ്നാത്തിയോസ് ഏലിയാസ് തൃതീയൻ പാത്രിയർക്കീസ് ബാവായുടെ കബറിങ്കൽ നടത്തി വരുന്ന അഖണ്ഡ പ്രാർഥനാ യജ്ഞം 11ന് ആരംഭിച്ച് 12നു സമാപിക്കും. 11നു പുലർച്ചെ അഞ്ചിന് പ്രഭാത പ്രാർഥനയോടെയും തുടർന്ന് കുർബാനയോടെയുമാണ് പ്രാർഥനാ യജ്ഞം ആരംഭിക്കുന്നത്. മാത്യൂസ് മാർ സേവേറിയോസ് മെത്രാപ്പോലീത്ത കുർബാന അർപ്പിക്കും. പത്തിന് മഞ്ഞനിക്കര ദയറാ തലവൻ ഗീവർഗീസ് മാർ അത്താനാസിയോസ് മെത്രാപ്പോലീത്ത അധ്യക്ഷത വഹിക്കും. മാത്യൂസ് മാർ സേവേറിയോസ് മെത്രാപ്പോലീത്ത ഉദ്ഘാടനം ചെയ്യും. ജേക്കബ് തോമസ് മാടപ്പാട്ട് കോർ എപ്പിസ്കോപ്പ പ്രസംഗിക്കും. 11ന് ഫാ. സോബിൻ ഏലിയാസ് ധ്യാനം നയിക്കും. 2:30 ന് ബേസിൽ മഴുവന്നൂർ ധ്യാനം നയിക്കും. 5:30 ന് സന്ധ്യാ നമസ്കാരം, തുടർന്ന് ഫാ. റെജി മാത്യു തിരുവല്ല ധ്യാനം നയിക്കും. 7:30 ന് സങ്കീർത്തന വായനയും പ്രാർഥനാ ഗീതങ്ങളും. പുലർച്ചെ മൂന്നുവരെ സങ്കീർത്തന പാരായണം. തുടർന്ന് ദയറായ്ക്ക് സമീപമുള്ള കുരിശുംതൊട്ടിയിലേയ്ക്ക് പ്രദക്ഷിണം നടത്തും. നാലിന് പ്രഭാത പ്രാർഥനയേ തുടർന്ന് കുർബാന, ധൂപപ്രാർഥന, നേർച്ചവിളന്പ് എന്നിവയോടെ പ്രാർഥനാ യജ്ഞം സമാപിക്കും.

ഫുട്ബോൾ ടൂർണമെന്‍റ്

ഇരവിപേരൂർ: സെന്‍റ് മേരീസ് ക്നാനായ പള്ളി കെവൈഎ യൂണിറ്റ് സംഘടിപ്പിച്ച അഖില ക്നാനായ ഇന്‍റർ ചർച്ച് ഫുട്ബോൾ ടൂർണമെന്‍റ് ഇരവിപേരൂർ ടർഫ് ഗ്രൗണ്ടിൽ പത്തനംതിട്ട ഫുട്ബോൾ അസോസിയേഷൻ സെക്രട്ടറി ജോയ് പൗലോസ് ഉദ്ഘാടനം ചെയ്തു. 16 ടീമുകൾ പങ്കെടുത്തു. ഫൈനലിൽ ചിങ്ങവനം പുത്തൻ പള്ളി വിജയികളായി. ക്നാനായ സമുദായ വലിയ മെത്രാപ്പോലീത്ത കുര്യാക്കോസ് മാർ സേവേറിയോസ് വിജയികൾക്ക്സമ്മാനദാനം നിർവഹിച്ചു. സമാപന സമ്മേളനത്തിൽ സംസ്ഥാന ഫുട്ബോൾ അസോസിയേഷൻ അഫയേഴ്സ് കമ്മിറ്റി മെംബർ ഡോ. റെജിനോൾഡ് വറുഗീസ് മുഖ്യാതിഥി ആയിരുന്നു. ഇടവക വികാരി ഫാ. ബെന്നി മാത്യു മാമലശേരിൽ അധ്യക്ഷത വഹിച്ചു. ട്രസ്റ്റി സജി തോമസ്, വാർഡ് മെംബർ അമ്മിണിചാക്കോ, ടോമിൻ വാഴുവേലിൽ, മെൽവിൻ, കെവിൻ, ആരോൺ സോജി എന്നിവർ പ്രസംഗിച്ചു.

ടേബിൾ ടെന്നീസ് ഹാൾ ഉദ്ഘാടനവും ചാന്പ്യൻഷിപ്പും

തിരുവല്ല: പത്തനംതിട്ട ജില്ലാ ടേബിൾ ടെന്നിസ് അസോസിയേഷനും തിരുവല്ല വൈഎംസിഎ ടേബിൾ അക്കാഡമിയും സംഘടിപ്പിക്കുന്ന യുടിടി, ജില്ലാ ടേബിൾ ടെന്നീസ് ചാന്പ്യൻഷിപ്പും അതിനോടനുബന്ധിച്ചു ദേശീയ വൈഎംസിഎയുടെ സഹായത്താൽ ‌2.75 ലക്ഷം രൂപമുടക്കി അന്താരാഷ്‌ട്ര നിലവാരത്തിൽ പണികഴിപ്പിച്ചു നവീകരിച്ച ഇൻഡോർ ടേബിൾ ടെന്നീസ് ഹാളിന്‍റെ ഉദ്ഘാടനവും നടന്നു. തിരുവല്ല വൈഎംസിഎ പ്രസിഡന്‍റ് ഇ. വി. തോമസിന്‍റെ അധ്യക്ഷതയിൽ കൂടിയ സമ്മേളനത്തിൽ ഇൻഡോർ ടേബിൾ ടെന്നീസ് ഹാളിന്‍റെ ഉദ്ഘാടനം നാഷണൽ കൗൺസിൽ ഓഫ് വൈഎംസിഎ ട്രഷറാർ റെജി ജോർജും ടൂർണമെന്‍റിന്‍റെ ഉദ്ഘാടനം മാത്യു ടി. തോമസ് എംഎൽഎയും നിർവഹിച്ചു. ഡയറക്ടർ ബോർഡ് അംഗങ്ങളായ പ്രസാദ് തോമസ് കോടിയാട് , ലോണി ടൈറ്റസ്, മുൻ ക്രിക്കറ്റ് അസോസിയേഷൻ പ്രസിഡന്‍റ് സാജൻ വർഗീസ്, ടിടി അക്കാഡമി കൺവീനർ അലക്സ് കൊച്ചിയിൽ, സെക്രട്ടറി ജോയ് ജോൺ തുടങ്ങിയവർ പ്രസംഗിച്ചു. 9,11,13,15,17,19 വയസിനു താഴെയുള്ള ആൺകുട്ടികൾക്കും പെൺകുട്ടികൾക്കും പുരുഷ, വനിതാ വിഭാഗങ്ങളിൽ 40 വയസിനു മുകളിലുള്ളവർക്കുമായിട്ടാണ് മത്സരം.

രക്ഷിതിനെ ആദ്യാക്ഷരമെഴുതിക്കാൻ മന്ത്രിതന്നെ എത്തി

പത്തനംതിട്ട: ഇലവുംതിട്ട മൂലൂര്‍ സ്മാരകത്തില്‍ രാജേഷ് - രേഷ്മ ദമ്പതികളുടെ മകന്‍ രക്ഷിതിന് മന്ത്രി വീണാ ജോര്‍ജ് ആദ്യാക്ഷരം കുറിച്ചു. മന്ത്രി തന്നെ രക്ഷിതിന് ആദ്യാക്ഷരം കുറിച്ചതില്‍ വളരെയധികം സന്തോഷമുണ്ടെന്നും സംസ്ഥാന ആരോഗ്യവകുപ്പിന്‍റെ പ്രത്യേക കരുതലിൽ ജീവൻ തിരികെ പിടിച്ച കുഞ്ഞാണ് രക്ഷിതെന്നും മാതാപിതാക്കളായ രാജേഷും രേഷ്മയും. 770 ഗ്രാം തൂക്കവുമായി ആറാംമാസത്തിൽ ജനിച്ച കുഞ്ഞിനെ തിരുവനന്തപുരം എസ്എടി ആശുപത്രിയിലെ ചികിത്സയിലൂടെയാണ് രക്ഷിച്ചെടുത്തത്. അഞ്ചു മാസത്തോളം എസ്എടി ആശുപത്രിയില്‍ ചികിത്സയില്‍ ഉണ്ടായിരുന്നു. ഒരു സ്വകാര്യ ആശുപത്രിയില്‍ നിന്നു താനും കുഞ്ഞും രക്ഷപ്പെടില്ലെന്നു പറഞ്ഞ് അത്യാസന്ന നിലയിലാണ് എസ്എടിയിലെത്തിയത്. അവിടെ നിന്നാണ് കുഞ്ഞിനെ രക്ഷിച്ചെടുത്തതെന്ന് രേഷ്മ പറഞ്ഞു. കുഞ്ഞ് രണ്ടു മാസത്തോളം വെന്‍റിലേറ്ററിലായിരുന്നു. സ്വകാര്യ ആശുപത്രിയില്‍ പത്ത്, ഇരുപത് ലക്ഷത്തോളം ചെലവുവരുന്നതാണ്. മൂന്ന് ദിവസത്തിലേറെ ജീവിക്കില്ല എന്നു പറഞ്ഞ കുഞ്ഞ് ഇന്നിപ്പോൾ 770 ഗ്രാമില്‍ നിന്ന് ഇപ്പോള്‍ രണ്ടര വയസുള്ള 10 കിലോഗ്രാം തൂക്കമുള്ള മിടുക്കനായി. എസ്എടിയിലെ നവജാതശിശു വാരാചരണത്തില്‍ പങ്കെടുത്തപ്പോഴാണ് മന്ത്രിയുമായി ഇക്കാര്യം പങ്കുവച്ചത്. അന്ന് കുഞ്ഞിനെ വീണാ ജോർജ് എടുത്തു ലാളിക്കുകയുണ്ടായി. കുഞ്ഞിനെ ആദ്യാക്ഷരം എഴുതിക്കുന്നതും മന്ത്രി തന്നെയാകണമെന്ന് അന്നുമുതൽ തങ്ങൾക്ക് ആഗ്രഹമുണ്ടായിരുന്നതായും എന്തായാലും അതു സാധ്യമായെന്നും അച്ഛൻ രാജേഷ് പറഞ്ഞു.

മുഖ്യമന്ത്രിയുടെ സന്ദേശം; അവധി ദിനത്തിൽ പൊല്ലാപ്പായി

പത്തനംതിട്ട: ഗാന്ധിജയന്തിയുമായി ബന്ധപ്പെട്ട് മുഖ്യമന്ത്രി പിണറായി വിജയൻ പുറത്തിറക്കിയ സന്ദേശത്തിന്‍റെ പ്രിന്‍റഡ് കോപ്പികൾ പൊതു വിദ്യാലയങ്ങളിലെ വിദ്യാർ‌ഥികൾക്ക് എത്തിക്കണമെന്ന കർശന നിർ‌ദേശം അവധിദിനത്തിൽ അധ്യാപകർക്ക് പൊല്ലാപ്പായി. ഇങ്ങനെയൊരു സന്ദേശത്തിന്‍റെ വിവരം പുറത്തുവന്നത് ചൊവ്വാഴ്ചയാണ്. ചൊവ്വാഴ്ച മുതൽ മൂന്നുദിനം സ്കൂൾ അവധിയായിരുന്നു. സന്ദേശം പ്രിന്‍റു ചെയ്ത് വിദ്യാഭ്യാസ ഓഫീസർമാർ മുഖേന എത്തുമെന്നും ഇത് പ്രഥമാധ്യാപകർ ഏറ്റുവാങ്ങി ഗാന്ധിജയന്തി ദിനത്തിൽ കുട്ടികൾക്ക് കൈമാറാനുമായിരുന്നു പൊതുവിദ്യാഭ്യാസ വകുപ്പിൽ നിന്നുള്ള നിർദേശം. എന്നാൽ പ്രിന്‍റഡ് കോപ്പി ലഭിക്കാനുണ്ടായ കാലതാമസം കാരണം രണ്ടുദിവസവും അധ്യാപകർ‌ക്കു പണി കിട്ടിയപോലെയായി. പത്തനംതിട്ട വിദ്യാഭ്യാസ ഡെപ്യൂട്ടി ഡയറക്ടർ ഓഫീസിൽ നിന്ന് കോപ്പികൾ വിതരണം ചെയ്തത് ബുധനാഴ്ച രാവിലെ 11നുശേഷം. മഹാനവമിയുടെ അവധിയായിരുന്നിട്ടും എല്ലാ വിദ്യാഭ്യസാ ഓഫീസുകളിലും ജീവനക്കാർക്ക് സന്ദേശവിതരണം പൊല്ലാപ്പായി മാറി. രാവിലെ ക്ഷേത്രങ്ങളിൽ പോകാൻ പോലും പലർക്കുമായില്ല. വിദ്യാഭ്യാസ ഓഫീസർമാർ കോപ്പികൾ ഏറ്റുവാങ്ങി ഓഫീസുകളിലെത്തിച്ച് പ്രഥമാധ്യാപകർക്ക് ബുധനാഴ്ച ഉച്ചയോടെ നൽ‌കി. ഗാന്ധിജയന്തി ദിനത്തിൽ ചില സ്കൂളുകളിൽ മാത്രമാണ് ശുചീകരണ പരിപാടികളും മറ്റും ക്രമീകരിച്ചിരുന്നത്. മറ്റിടങ്ങളിലാകട്ടെ സന്ദേശങ്ങൾ എത്തിക്കുകയെന്നത് ബാധ്യതയായി മാറി. പ്രഥമാധ്യാപകർ അധ്യാപകരുടെ സഹകരണത്തോടെ ഇവ കുട്ടികളുടെ വീടുകളിലെത്തിക്കാനായിരുന്നു നിർദേശം. പൂജ അവധിക്കാലത്ത് മറ്റ് പരിപാടികൾ ആലോചിച്ചുറപ്പിച്ചിരുന്ന അധ്യാപക സമൂഹത്തിന് സന്ദേശം വിതരണം അങ്ങനെ പൊല്ലാപ്പായി മാറി. സന്ദേശവിതരണം ബഹിഷ്കരിച്ചതായി കെപിഎസ്ടിഎ പത്തനംതിട്ട: ഗാന്ധിജയന്തി ദിനത്തിൽ മുഖ്യമന്ത്രിയുടെ സന്ദേശം പൊതു വിദ്യാലയങ്ങളിലെ വിദ്യാർഥികൾക്ക് വിതരണം ചെയ്യണമെന്ന് ഇറക്കിയ സർക്കാർ ഉത്തരവ് രാഷ്‌ട്രീയപ്രേരിതവും ഗാന്ധിജിയോടുള്ള അനാദരവുമാണെന്ന് കേരള പ്രദേശ് സ്കൂൾ ടീച്ചേഴ്സ് അസോസിയേഷൻ ജില്ലാ കമ്മിറ്റി ആരോപിച്ചു. ഗാന്ധിജയന്തിയും പൂജ അവധിയും നേരത്തേ അറിയുന്നതാണ്. അധ്യാപകരുടെ ഒഴിവുദിനം നഷ്ടപ്പെടുത്തിയിട്ടുള്ള സന്ദേശ വിതരണത്തിൽ നിന്നും സംഘടന വിട്ടുനിന്നതായും ഭാരവാഹികൾ അറിയിച്ചു. ഗാന്ധിജയന്തി ദിനത്തിൽ ഗാന്ധിയെ അനുസ്മരിക്കുന്നതിനു പകരം രാഷ്‌ട്രീയ നേട്ടങ്ങൾക്കു വേണ്ടി അധ്യാപകരേയും വിദ്യാർഥികളെ ഉപയോഗപ്പെടുത്താനുള്ള ഗൂഢശ്രമം അധ്യാപകർ തള്ളിയെന്നും സംഘടനാ നേതാക്കൾ അറിയിച്ചു.

സാംസ്കാരിക കേന്ദ്രങ്ങളിലും ആരാധനാലയങ്ങളിലും അക്ഷരമെഴുതാൻ തിരക്ക്

അറിവിന്‍റെ ആദ്യാക്ഷരം നുകർന്ന് കുരുന്നുകൾ പത്തനംതിട്ട: അറിവിന്‍റെ ആദ്യാക്ഷരമെഴുതാൻ ജില്ലയിലെ സാംസ്കാരിക കേന്ദ്രങ്ങളിലും ആരാധനാലയങ്ങളിലും തിരക്ക്. വിജയദശമി ദിനമായ ഇന്നലെ രാവിലെ മുതൽ അക്ഷര ലോകത്തേക്ക് പിച്ചവയ്ക്കുന്ന കുരുന്നുകളുമായി രക്ഷിതാക്കൾ എത്തിത്തുടങ്ങിയിരുന്നു. ജില്ലയിലെ പ്രധാനപ്പെട്ട സാംസ്കാരിക കേന്ദ്രമായ ഇലവുംതിട്ട മൂലൂർ സ്മാരകത്തിലും ‌നിരണം കണ്ണശ സ്മാരകത്തിലും കുട്ടികളെ എഴുത്തിനിരുത്തി. മൂലൂർ സ്മാരകത്തിൽ മന്ത്രി വീണാ ജോർജും ഗുരുവായി എത്തി. കൂടാതെ കവി ഏഴാച്ചേരി രാമചന്ദ്രൻ, ഫാ.കെ.ജി. ഏബ്രഹാം കോട്ടോമഠത്തിൽ, എഴുത്തുകാരൻ പ്രഫ. മാലൂർ മുരളീധരൻ എന്നിവരും കുഞ്ഞുങ്ങൾക്ക് ആദ്യാക്ഷരം പകർന്നു കൊടുത്തു. കണ്ണശ സ്മാരകത്തിലും സാംസ്കാരിക നായകൻമാരും എഴുത്തുകാരും വിദ്യാരംഭ ചടങ്ങിനു നേതൃത്വം നൽകി. വെണ്ണിക്കുളത്ത് പ്രവാസി സംസ്കൃതി അസോസിയേഷന്‍റെയും മഹാകവി വെണ്ണിക്കുളം ഗോപാലക്കുറുപ്പ് സ്മാരക സമിതിയുടെയും സംയുക്താഭിമുഖ്യത്തിൽ വിജയദശമിയോടനുബന്ധിച്ചുള്ള വിദ്യാരംഭം വെണ്ണിക്കുളം എംഡിഎൽപി സ്കൂളിൽ നടത്തി. തുരുത്തിക്കാട് ബി.എ.എം കോളജ് മുൻ പ്രിൻസിപ്പൽ ഡോ. ജോസ് പാറക്കടവിൽ, അസോസിയേഷൻ സംസ്ഥാന പ്രസിഡന്‍റ് സാമുവേൽ പ്രക്കാനം എന്നിവർ കുട്ടികളെ എഴുത്തിനിരുത്തി. സ്കൂൾ പ്രധാന അധ്യാപിക മിനി സൂസൻ ഫിലിപ്പ്, ജനറൽ സെക്രട്ടറി ബിജു ജേക്കബ് കൈതാരം, വർഗീസ് മാത്യു , സൗമ്യ സന്തോഷ് എന്നിവർ വിദ്യാരംഭത്തിന് നേതൃത്വം നൽകി. ഇരവിപേരൂർ ഒഇഎം ഇംഗ്ലീഷ് മീഡിയം സ്കൂളിൽ നടന്ന വിദ്യാരംഭത്തിന് ബിഷപ് ഗീവർഗീസ് മാർ അപ്രേം, ഡോ. റൂബിൾ രാജ് എന്നിവർ നേതൃത്വം നൽകി. അടൂർ കണ്ണങ്കോട് സെന്‍റ് തോമസ് കത്തീഡ്രലിൽ ഇടുക്കി ഭദ്രാസനാധിപൻ ഡോ.സഖറിയ മാർ സേവേറിയോസ് മെത്രാപ്പോലീത്ത കുഞ്ഞുങ്ങളെ ആദ്യാക്ഷരം എഴുതിപ്പിച്ചു. രാവിലെ വിശുദ്ധ കുർബാനയ്ക്കുശേഷമാണ് വിദ്യാരംഭം നടന്നത്. ജില്ലയിലെ എല്ലാ ക്ഷേത്രങ്ങളിലും വിജയദശമിയോടനുബന്ധിച്ച് എഴുത്തിനിരുത്ത് ചടങ്ങുകൾ നടന്നു. ആറന്മുള പാർഥസാരഥി ക്ഷേത്രം, മൂർത്തിട്ട ഗണപതി ക്ഷേത്രം, കല്ലേലിക്കാവ്, ചക്കുളത്തുകാവ് ഭഗവതി ക്ഷേത്രം, പന്തളം നവരാത്രി മണ്ഡപം, തട്ട ഒരിപ്പുറത്ത് ഭഗവതി ക്ഷേത്രം, ഇലന്തൂർ ഭഗവതികുന്ന് ക്ഷേത്രം, മലയാലപ്പുഴ ദേവീക്ഷേത്രം, റാന്നി തോട്ടമൺ കാവ് ക്ഷേത്രം എന്നിവിടങ്ങളിൽ എഴുത്തിനിരുത്തിന് തിരക്കേറെ ഉണ്ടായി. അടൂർ ഈവി കലാമ‌ണ്ഡലം, ഓമല്ലൂർ സരസ്വതി കലാക്ഷേത്രം എന്നിവിടങ്ങളിൽ വിപുലമായ രീതിയിൽ വിദ്യാരംഭച്ചടങ്ങുകൾ നടന്നു. ആദ്യാക്ഷരമെഴുതിയതിനൊപ്പം വിവിധ കലകളിൽ ആരംഭം കുറിക്കാനും വേദിയൊരുക്കിയിരുന്നു.

വില്പനക്കായി വീട്ടില്‍ സൂക്ഷിച്ച ചാരായവുമായി വയോധികന്‍ അറസ്റ്റില്‍

പത്തനംതിട്ട: അടൂര്‍ പന്നിവിഴയില്‍ വില്പനയ്ക്കായി വീട്ടില്‍ സൂക്ഷിച്ച നിലയില്‍ 10 ലിറ്റര്‍ ചാരായവും 50 ലിറ്റര്‍ കോടയും പിടിച്ചെടുത്തു. പന്നിവിഴ പോത്രാട് സൂര്യതേജസ് എ. ചെല്ലപ്പന്‍ (65) ആണ് അറസ്റ്റിലായത്. രഹസ്യ വിവരത്തേ തുടര്‍ന്ന് നടത്തിയ പരിശോധനയിലാണ് പത്തനംതിട്ട എക്‌സൈസ് എന്‍ഫോസ്‌മെന്റ് ആന്‍ഡ് ആന്റി നര്‍കോട്ടിക് സ്പെഷല്‍ സ്‌ക്വാഡ് എക്‌സൈസ് സര്‍ക്കിള്‍ ഇന്‍സ്‌പെക്ടര്‍ എം. ഒ. വിനോദിന്‍റെ നേതൃത്വത്തിലുള്ള സംഘം ഇയാളെ അറസ്റ്റ് ചെയ്തത്. അസിസ്റ്റന്‍റ് എക്സൈസ് ഇന്‍സ്‌പെക്ടര്‍ എസ്.എസ്. ജയകുമാര്‍, സിവില്‍ എക്സൈസ് ഓഫീസര്‍മാരായ അഭിജിത്, രാഹുൽ, അജിത, കൃഷ്ണകുമാര്‍, വനിതാ സിവില്‍ എക്സൈസ് ഓഫീസര്‍ സുബ്ബലക്ഷ്മി, ഡ്രൈവര്‍ വിജയന്‍ എന്നിവര്‍ പരിശോധനയില്‍ പങ്കെടുത്തു.

വിദ്യാരംഭവും സാംസ്കാരിക സമ്മേളനവും

കോന്നി: പത്തനംതിട്ട എൻഎസ്എസ് താലൂക്ക് യൂണിയന്‍റെ നേതൃത്വത്തിൽ കോന്നി മഠത്തിൽകാവ് ക്ഷേത്രത്തിൽ വിദ്യാരംഭംവും സാംസ്കാരിക സമ്മേളനവും നടത്തി. യൂണിയൻ പ്രസിഡന്‍റും എൻഎസ്എസ് ഡയറക്ടർ ബോർഡ് മെംബറുമായ ആർ. ഹരിദാസ് ഇടത്തിട്ട ഉദ്ഘാടനം ചെയ്ത‌ു. യൂണിയൻ സെക്രട്ടറി വി. ഷാബു, കെ.സരോജ് കുമാർ, അഖിലേഷ് കാര്യാട്ട്, രാജേന്ദ്രനാഥ് കമലകം, ഹരിശ്ചന്ദ്രൻ നായർ, സത്യൻ നായർ, വനിതാ യൂണിയൻ പ്രസിഡന്‍റ് പി.സി. ശ്രീദേവി, കമലാസനൻ കാര്യാട്ട്, മുരളീധരൻ നായർ, എ.ആർ.രാജേഷ് കുമാർ, യൂണിയൻ ഇൻസ്പെകടർ ആർ.രാജേഷ് കുമാർ, ക്ഷേത്ര ഉപദേശക സമിതി പ്രസിഡന്‍റ്ശിവകുമാർ, സെക്രട്ടറി അജിത്ത് മണ്ണിൽ, ബാലകൃഷ്ണൻ നായർ, രവീന്ദ്രനാഥ് നീരേറ്റ് എന്നിവർ നേതൃത്വം നൽകി. കോന്നി എംഎം എൻഎസ്എസ്. കോളജ് പ്രിൻസിപ്പൽ ഡോ.ബീനയുടെ നേതൃത്വത്തിൽ കവി കോന്നിയൂർ ബാലചന്ദ്രൻ, ഡോ.കെ.ആർ.സുകുമാരൻ നായർ, ആർ.ശ്രീകുമാർ എന്നിവർ കുട്ടികൾക്ക് അറിവിന്‍റെ ആദ്യാക്ഷരം കുറിച്ചു.

ദൈവസൃഷ്ടിയെ മുഴുവൻ ഒന്നായി കാണാനാകണം: കാതോലിക്കാ ബാവ

തിരുവല്ല: എല്ലാ സൃഷ്ടി ജാലങ്ങളും മനുഷ്യരും ഒന്നാണ് എന്ന വലിയ ചിന്തയാണ് വസുധൈവ കുടുംബദർശനം വയ്ക്കുന്നതെന്നും സമാനമായ ചിന്താഗതിയാണ് എക്യുമെനിസമെന്നും ബസേലിയോസ് മാർത്തോമ്മ മാത്യൂസ് തൃതീയൻ കാതോലിക്കാ ബാവ. ഗ്ലോറിയ ന്യൂസ് ലൈറ്റ് ടു ലൈഫ് ചാരിറ്റബിൾ ഫൗണ്ടേഷനും ചേർന്ന സംഘടിപ്പിച്ച സ്നേഹാദരം പരിപാടി വൈഎംസിഎയിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സ്വാർഥതയും അഹങ്കാരവും പെരുകി, സ്നേഹവും കരുതലും നഷ്ടപ്പെട്ട സാഹചര്യത്തിൽ ദൈവ സ്നേഹത്തിലൂടെ മനുഷ്യരെ സ്നേഹിക്കാൻ കഴിയണമെന്നും കാതോലിക്കാ ബാവ അഭിപ്രായപ്പെട്ടു. ചെയർമാൻ ഫാ. ബിജു പി. തോമസ് അധ്യക്ഷത വഹിച്ചു. ഡോ. യൂയാക്കിം മാർ കൂറിലോസ് സഫ്രഗൻ മെത്രാപ്പോലീത്ത മുഖ്യാതിഥിയായിരുന്നു. ഡോ. പി. മുഹമ്മദ് അലി ഗൾഫാർ മുഖ്യപ്രഭാഷണം നടത്തി. പ്രഫ. പി.ജെ കുര്യൻ, മാത്യു റ്റി. തോമസ് എംഎൽ എ, ജോസഫ് എം.പുതുശേരി , മലങ്കര ഓർത്തഡോക്സ് സഭ അസോസിയേഷൻ സെക്രട്ടറി അഡ്വ. ബിജു ഉമ്മൻ, യുഡിഎഫ് ജില്ലാ ചെയർമാൻ വർഗീസ് മാമ്മൻ, ഡോ. സിദ്ദിഖ് അഹമ്മദ്‌ , പി രാമചന്ദ്രൻ വികാരി ജനറൽ റവ. വി. റ്റി. ജോൺ, സക്കറിയ പനക്കാമറ്റം എപ്പിസ്കോപ്പ, ജനറൽ കൺവീനർ ലിനോജ് ചാക്കോ, കൺവീനർ അഭിജിത്ത് പാറയിൽ എന്നവർ പ്രസംഗിച്ചു. എക്യൂമെനിക്കൻ മേഖലയിലെ നേതൃത്വവും ജീവകാരുണ്യ പ്രവർത്തനങ്ങൾക്കും നല്കുന്ന ഗ്ലോറിയ ന്യൂസ് കീർത്തി മുദ്ര അവാർഡ് ബസേലിയോസ് മാർത്തോമ്മ മാത്യൂസ് തൃതിയൻ കാതോലിക്ക ബാവയ്ക്കും ജീവകാരുണ്യ പ്രവർത്തനങ്ങൾക്കുള്ള ലൈറ്റ് ടു ലൈഫ് കുരുണ്യ അവാർഡ് എറാം ഹോൾഡിംഗ്സിന്‍റെ മാനേജിംഗ് ഡയറക്ടർ ഡോ. സിദ്ദിഖ് അഹമ്മദിനും മതസൗഹാർദവും മാനവ മൈത്രിയും പ്രോത്സാഹിപ്പിക്കുന്നതിന് നല്കുന്ന ലൈറ്റ് ടു ലൈഫ് മൈത്രി അവാർഡ് കൗൺസിൽ ഫോർ കമ്യൂണിറ്റി കോർപറേഷൻ ജനറൽ സെക്രട്ടറി പി. രാമചന്ദ്രനും സമ്മാനിച്ചു.

ഗാന്ധിസ്മൃതിയിൽ നാട്

ഗാന്ധിജയന്തി ദിനത്തിൽ വിപുലമായ പരിപാടികൾ പത്തനംതിട്ട: ഗാന്ധിജയന്തി ദിനമായ ഇന്നലെ അനുസ്മരണ പരിപാടികളും സേവന പ്രവർത്തനങ്ങളുമായി ആചരണം നടന്നു. പത്തനംതിട്ട നഗരത്തിൽ ഗാന്ധി സ്ക്വയറിൽ രാവിലെ അനുസ്മരണ പരിപാടി നടന്നു. മഹാത്മാഗാന്ധിയുടെ പ്രതിമയിൽ ജില്ലാ കളക്ടർ എസ്. പ്രേംകൃഷ്ണൻ, നഗരസഭ ചെയർമാൻ ടി‌. സക്കീർ ഹുസൈൻ, ജില്ലാ പോലീസ് മേധാവി ആർ. ആനന്ദ്, എഡിഎം ബി. ജ്യോതി എന്നിവർ ഹാരാർപ്പണവും പുഷ്പാർച്ചനയും നടത്തി. അടൂർ ഗാന്ധിപാർക്ക് മൈതാനത്തും ഇലന്തൂർ ഗാന്ധി സ്മൃതി മന്ദിരത്തിലും പ്രത്യേക അനുസ്മരണ പരിപാടികൾ നടന്നു. ആറന്മുള: രാഷ്ട്രപിതാവായ മഹത്മാഗാന്ധി 1937 ജനുവരി 20 ന് നടത്തിയ ആറന്മുള സന്ദര്‍ശനത്തിന്റെ അനുസ്മരണവും ഗാന്ധി ജയന്തി ആഘോഷവും ആറന്മുള വികസന സമിതിയുടെ നേതൃത്വത്തില്‍ ആറന്മുള സത്രപരിസരത്ത് നടത്തി. ആറന്മുള എൻജിനിയറിംഗ് കോളജ് കുട്ടികള്‍ പാടിയ മാനവഗീതത്തോടുകൂടിയാണ് ചടങ്ങുകള്‍ ആരംഭിച്ചത്. മഹാത്മാ ഗാന്ധിയുടെ ജനനത്തെ ആസ്പദമാക്കി വഞ്ചിപ്പാട്ട് ആശാന്‍ പ്രഫ. രാധാകൃഷ്ണന്‍ ഇടനാട്, വള്ളപ്പാട്ട് പാടി. പത്തനംതിട്ട ജില്ലാ പഞ്ചായത്ത് ആരോഗ്യ, വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ ആർ. അജയകുമാര്‍ അധ്യക്ഷത വഹിച്ചു. ആറന്മുള ഗ്രാമ പഞ്ചായത്ത് പ്രസിഡന്‍റ് ഷീജ റ്റി. ടോജി, മല്ലപ്പുഴശേരി പഞ്ചായത്ത് പ്രസിഡന്‍റ് മിനി ജിജു ജോസഫ്, പള്ളിയോട സേവാസംഘം പ്രസിഡന്‍റ് കെ. വി. സാംബദേവൻ, പന്തളം ബ്ലോക്ക് പഞ്ചായത്ത് അംഗം അനില സുനിൽ, സിപിഎം ജില്ലാ സെക്രട്ടറി രാജു ഏബ്രഹാം എക്‌സ് എംഎൽഎ, ഗ്രാമ പഞ്ചായത്ത് അംഗം പ്രസാദ് വേരുങ്കൽ, ആറന്മുള വികസനസമിതി ഭാരവാഹികളായ പി. ആർ. രാധാകൃഷ്ണന്‍, ഗിരീഷ് കണ്ണങ്കേരിൽ, തോമസ് മാത്യു കുന്നത്ത്, അശോകന്‍ മാവുനില്‍ക്കുന്നതിൽ,ആറന്മുള എൻജിനിയറിംഗ് കോളജ് എന്‍ എസ്. എസ്. കോഓര്‍ഡിനേറ്റര്‍ അനു ജി. സോമൻ, അംഗങ്ങളായ ദിലീപ് കുമാർ, രാജേഷ്, ചരിത്ര ഗവേഷകനായ ശ്രീരങ്കനാഥൻ, ഡി. റ്റി. പി. സി. കമ്മിറ്റി അംഗം എസ്. മുരളീകൃഷ്ണൻ, ഭാരത് വാഴുവേലില്‍ തുടങ്ങിയവര്‍ പ്രസംഗിച്ചു. മദ്യം, മയക്കുമരുന്ന് ഉപയോഗത്തിനെതിരേ സമൂഹത്തെ ബോധവത്കരിക്കുന്നതിനുള്ള പ്രതിജ്ഞ അജയകുമാര്‍ ചൊല്ലിക്കൊടുത്തു. കവിയൂർ: ഗാന്ധിജയന്തിയോടനുബന്ധിച്ച് വൈസ് മെൻ ഇന്‍റർനാഷണൽ കവിയൂർ മുണ്ടിയപ്പള്ളി ക്ലബിന്‍റെ നേതൃത്വത്തിൽ സെമിനാറും സ്കൂൾ വിദ്യാർഥികൾക്കായി ചിത്രരചന മത്സരവും നടത്തി. മുൻ എംഎൽഎ ജോസഫ് എം. പുതുശേരി ഉദ്ഘാടനം ചെയ്തു. പ്രസിഡന്‍റ് കുര്യൻ ചെറിയാൻ അധ്യക്ഷത വഹിച്ചു. വൈൻമെൻ ഇന്‍റർനാഷണൽ കവിയൂർ മുണ്ടിയപ്പള്ളി ക്ലബ് പ്രസിഡന്‍റ് കുര്യൻ ചെറിയാൻ അധ്യക്ഷത വഹിച്ചു. വൈസ് മെൻ ഇന്‍റർനാഷണൽ ഡിസ്ട്രിക്ട് ഗവർണർ ജോൺ ഫിലിപ്പ് മുഖ്യപ്രഭാഷണം നടത്തി. സെക്രട്ടറി റോയി വർഗീസ് ഇലവുങ്കൽ, സ്കൂൾ പ്രിൻസിപ്പൽ ജിജി പി മാത്യു, റെജി പോൾ എന്നിവർ പ്രസംഗിച്ചു. പത്തനംതിട്ട: ഡിസിസിയുടെ നേതൃത്വത്തിൽ രാജീവ്ഭവനിൽ നടന്ന ഗാന്ധിജയന്തി ദിനാചരണ പരിപാടികൾ ഡിസിസി പ്രസിഡന്‍റ് പ്രഫ. സതീഷ് കൊച്ചുപറന്പിൽ ഉദ്ഘാടനം ചെയ്തു. വൈസ് പ്രസിഡന്‍റ് വെട്ടൂര്‍ ജ്യോതിപ്രസാദ് അധ്യക്ഷത വഹിച്ചു. മുന്‍ എംഎല്‍എ മാലേത്ത് സരളാദേവി, യുഡിഎഫ് ജില്ലാ കണ്‍വീനര്‍ എ. ഷംസുദ്ദീൻ, ഡിസിസി വൈസ് പ്രസിഡന്‍റ് എ. സുരേഷ് കുമാർ, ജനറല്‍ സെക്രട്ടറിമാരായ സാമുവല്‍ കിഴക്കുപുറം, സുനില്‍ എസ്. ലാല്‍, സജി കൊട്ടയ്ക്കാട്, എസ്.വി. പ്രസന്നകുമാര്‍, ബി. നരേന്ദ്രനാഥ്, ബ്ലോക്ക് പ്രസിഡന്‍റ് ജെറി മാത്യു സാം തുടങ്ങിയവർ പ്രസംഗിച്ചു. പത്തനംതിട്ട: എൻസിപി - എസ് ആറന്മുള ബ്ലോക്ക് കമ്മിറ്റിയുടെ നേതൃത്വത്തിൽ ഗാന്ധിജയന്തി ആഘോഷങ്ങളുടെ ഭാഗമായി നടത്തിയ ഗാന്ധി സ്മൃതി സദസ് സംസ്ഥാന ജനറൽ സെക്രട്ടറി മാത്യൂസ് ജോർജ് ഉദ്ഘാടനം ചെയ്തു. ആറന്മുള ബ്ലോക്ക് പ്രസിഡന്‍റ് സോണി അധ്യക്ഷത വഹിച്ചു. ചെറിയാൻ ജോർജ് തമ്പു, മാത്തൂർ സുരേഷ്, എം. മുഹമ്മദ് സാലി, മണിലാൽ വല്യത്ത്, നൈസാം മുഹമ്മദ്, വിജയൻ, ഷാഫി വലഞ്ചൂഴി, സുഷമ കരിമ്പനാകുഴിയിൽ എന്നിവർ പ്രസംഗിച്ചു. പത്തനംതിട്ട: കോൺഗ്രസ് - എസ് ജില്ലാ കമ്മിറ്റിയുടെ ആഭിമുഖ്യത്തിൽ പത്തനംതിട്ടയിൽ നടന്ന ഗാന്ധിജയന്തി ദിനാചരണ പരിപാടികൾ സംസ്ഥാന ജനറൽ സെക്രട്ടറി പി.പി. ജോർജുകുട്ടി ഉദ്ഘാടനം ചെയ്തു. ജില്ലാ പ്രസിഡന്‍റ് ഷാഹുൽ ഹമീദ് അധ്യക്ഷത വഹിച്ചു. ജില്ലാ ഭാരവാഹികളായ ജോബി ജോർജ്, മാത്യൂസ് ഡാനിയേൽ, റയ്നാ ജോർജ്, മേഴ്സി തോമസ്, രാജൻ ചാലാപ്പള്ളി, സുനിൽ ജോൺ, പ്രസന്നകുമാർ, ജോയൽ ജോർജ് തുടങ്ങിയവർ പ്രസംഗിച്ചു. ഏഴംകുളം :ഏഴംകുളം മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ ഗാന്ധി ജയന്തി ആഘോഷംനടന്നു. കെ.വി രാജന്‍റെ അദ്ധ്യക്ഷതയിൽ കൂടിയ യോഗത്തിൽ മുതിർന്ന നേതാവ് തേരകത്ത് മണി യോഗം ഉദ്ഘാടനം ചെയ്തു. ഏഴംകുളം അജു, ബിജു വർഗീസ് , കൃഷ്ണകുമാർ , പി. കെ. മുരളി, ഇ.എ. ലത്തീഫ്, നെടുമൺ ഗോപൻ തുടങ്ങിയവർ പ്രസംഗിച്ചു. കെഎസ്ആർടിസി ബസുകൾ ശുചീകരിച്ചു മല്ലപ്പള്ളി: നാഷണൽ സർവീസ് സ്കീം കർത്തവ്യവാരത്തിന്‍റെ ഭാഗമായി, മല്ലപ്പള്ളി ടെക്നിക്കൽ എച്ച്എസ്എസ് യൂണിറ്റുകൾ മല്ലപ്പള്ളി കെഎസ്ആർടിസി ഡിപ്പോയിലെ ബസുകൾ ശുചീകരിച്ചു. സ്കൂൾ പ്രിൻസിപ്പൽ സൈജു മാത്യുവിന്‍റെയും പ്രോഗ്രാം ഓഫീസർ ആഫ്സൽ അഷ്‌റഫിന്‍റെയും നേതൃത്വത്തിൽ എൻഎസ്എസ് വോളണ്ടിയർമാർ ശുചീകരണ പ്രവർത്തനത്തിൽ പങ്കെടുത്തു. കെഎസ്ആർടിസി സ്റ്റേഷൻ ഇൻസ്‌പെക്ടർ രാജേഷ്, ടൂറിസം കോഓർഡിനേറ്റർ സുനിൽ എന്നിവർ വിദ്യാർഥികളെയും അധ്യാപകരെയും അഭിനന്ദിച്ചു. കുട്ടവഞ്ചി സവാരികേന്ദ്രം ശുചീകരിച്ചു കോന്നി: ഗാന്ധിജയന്തി ദിനത്തിൽ സീനിയർ ചേംബർ കോന്നി ലീജിയൻറ് നേതൃത്വത്തിൽ അടവി കുട്ടവഞ്ചി കേന്ദ്രവും കല്ലാറിൻറ് തീരവും ശുചീകരിച്ചു. പ്രസിഡന്‍റ് ജയിംസ് വർഗീസിന്‍റെ അധ്യഷതയിൽ ഫോറസ്റ്റ് റേഞ്ച് ഓഫീസർ എം. നൗഷാദ് ഉദ്ഘാടനം ചെയ്തു. സെക്‌ഷൻ ഓഫീസർ എ. നജീമുദ്ദീൻ, ബീറ്റ് ഫോറസ്റ്റ് ഓഫീസർ ബി. അജിത്കുമാർ, ഇക്കോ ടൂറിസം സെക്രട്ടറി എസ്. അഖിൽ, സെക്രട്ടറി രാജീസ് കൊട്ടാരം,ദേശീയ കോഓർഡിനേറ്റർ ഡോ. സുരേഷ്കുമാർ, മനോഹരൻ, മാത്യു കെ. ചെറിയാൻ, ഫിലിപ്പ് മാത്യു, മാത്യു ജോൺ, സന്തോഷ്കുമാർ തുടങ്ങിയവർ പ്രസംഗിച്ചു.

89 സ്കൂൾ കെട്ടിടങ്ങൾക്ക് സുരക്ഷാ സർട്ടിഫിക്കറ്റില്ല

പത്തനംതിട്ട: ജില്ലയിലെ പൊതുവിദ്യാലയങ്ങളിൽ 89 കെട്ടിടങ്ങൾക്കു സുരക്ഷാ സർട്ടിഫിക്കറ്റ് ഇല്ല. സർക്കാർ, എയഡഡ് മേഖലയിൽ പ്രവർത്തിക്കുന്ന വിദ്യാലയങ്ങൾക്ക് അധ്യയന വർഷാരംഭത്തിലും തൊട്ടുപിന്നാലെയുമായി നടന്ന പരിശോധനകളിലാണ് ഫിറ്റ്നസ് സർട്ടിഫിക്കറ്റ് നിഷേധിച്ചത്. അധ്യയന വർഷാരംഭത്തിൽ ഫിറ്റ്നസ് ലഭിച്ച പല കെട്ടിടങ്ങൾ‌ക്കും തേവലക്കര ഗവൺമെന്‍റ് ബോയ്സ് സ്കൂളിലെ വിദ്യാർഥി വൈദ്യുതാഘാതമേറ്റു മരിച്ച സംഭവത്തിനു പിന്നാലെ നടന്ന പരിശോധയിൽ സുരക്ഷാ സർട്ടിഫിക്കറ്റ് നിഷേധിച്ചു. പകുതി എയ്ഡഡ് മേഖലയിൽ സുരക്ഷാ പരിശോധനയിൽ കെട്ടിടങ്ങൾ അധ്യയനത്തിനു യോജിച്ചതല്ലെന്നു റിപ്പോർട്ട് ലഭിച്ചിട്ടുള്ള 89 സ്കൂളുകളിൽ പകുതിയോളം എയ്ഡഡ് വിദ്യാലയങ്ങളുമുണ്ട്. നേരത്തെതന്നെ ഫിറ്റ്നസ് സർട്ടിഫിക്കറ്റ് ഇല്ലാതെ ഒഴിച്ചിട്ടിരുന്നതും എന്നാൽ, പൊളിച്ചുനീക്കാൻ അനുമതി ലഭിക്കാത്തതുമായ കെട്ടിടങ്ങളും ഇക്കൂട്ടത്തിലുണ്ട്. ഇത്തരം കെട്ടിടങ്ങൾ നേരത്തെ തന്നെ ഒഴിച്ചിട്ടുള്ളവയാണെന്നാണ് സ്കൂൾ അധികൃതർ പറയുന്നത്. അപകടകരമായ അവസ്ഥയിലായിട്ടും ഈ കെട്ടിടങ്ങൾ പൊളിച്ചു നീക്കാൻ അനുമതി വിദ്യാഭ്യാസ വകുപ്പ് നൽകിയിരുന്നില്ല. വകുപ്പ് അനുമതി നൽകിയാൽതന്നെ പൊതുമരാമത്ത് കെട്ടിട വിഭാഗമാണ് തുടർ നടപടി സ്വീകരിക്കേണ്ടത്. സ്കൂൾ കെട്ടിടങ്ങളുടെ മേൽക്കൂര ഓട് മാറി ജിഐ ഷീറ്റ് ഇട്ടവയ്ക്ക് ഉൾപ്പെടെ അനുമതി നിഷേധിച്ചവയിൽ ഉൾപ്പെടുന്നു. വാടകക്കെട്ടിടങ്ങളിൽ മൂന്ന് എൽപിഎസുകൾ ജില്ലയിലെ മൂന്ന് എൽപി സ്കൂളുകൾ നിലവിൽ വാടക കെട്ടിട്ങളിലാണ് പ്രവർത്തിക്കുന്നത്. ഇവയുടെ കെട്ടിടങ്ങൾ‌ ശോച്യാവസ്ഥയിലായതിനെത്തുടർന്ന് പുതിയ കെട്ടിടം നിർമിക്കാനുള്ള നടപടിക്കായി പൊളിച്ചുമാറ്റിയതാണ് പ്രശ്നമായത്. പുതിയ കെട്ടിടം സമയബന്ധിതമായി പണി പൂർത്തീകരിക്കുമെന്ന പ്രതീക്ഷയിൽ വാടകകെട്ടിടങ്ങളിലേക്കാണ് സ്കൂളുകൾ മാറ്റിയത്. എന്നാൽ, പണികൾ അനിശ്ചിതമായി നീളുന്നുവെന്ന പരാതി നിലനിൽക്കുന്നു. പ്ലാങ്കമൺ ഗവൺമെന്‍റ് എൽപി സ്കൂളിനു പുതിയ കെട്ടിടം നിർമിക്കുന്നതിലേക്കു സ്കൂളിന്‍റെ പ്രവർത്തനം തൊട്ടടുത്ത അയിരൂർ കർമേൽ അഗതി മന്ദിരത്തിലേക്കാണ് മാറ്റിയത്. മാസങ്ങൾ ഏറെ കഴിഞ്ഞിട്ടും സ്കൂൾ കെട്ടിടത്തിന്‍റെ പണി തുടങ്ങാനായിട്ടില്ല. ഇതോടെ മന്ദിരത്തിന്‍റെ കെട്ടിടം ഒഴിഞ്ഞുകിടക്കാൻ ആവശ്യപ്പെട്ടിരിക്കുകയാണ്. ജിഎൽപിഎസ്, കോട്ടാങ്ങൽ, ഗവ. ന്യൂ എൽപിഎസ്, ചാത്തങ്കരി എന്നിവയും തൊട്ടടുത്ത വാടക കെട്ടിടങ്ങളിലാണ് പ്രവർത്തിക്കുന്നത്. കെട്ടിടത്തിനു സുരക്ഷയില്ലെന്ന പേരിൽ ചില എയ്ഡഡ് സ്കൂളുകളും നിലവിൽ വീടുകളിലോ സമീപത്തെ കെട്ടിടങ്ങളിലോ ഒക്കെ പ്രവർത്തിക്കുന്നുണ്ട്. ഉത്തരവാദി വിദ്യാഭ്യാസ വകുപ്പ് പത്തനംതിട്ട: സ്കൂളുകളിൽ ഭൗതിക സാഹചര്യങ്ങൾ ഒരുക്കുന്നതിൽ സർക്കാർ പരാജയപ്പെട്ടതാണ് പല സ്കൂൾ കെട്ടിടങ്ങൾക്കും സുരക്ഷാ പരിശോധനകളിൽ സർട്ടിഫിക്കറ്റ് ലഭിക്കാതെ പോകാൻ കാരണമെന്ന് എയ്ഡഡ് ഹയർ സെക്കൻഡറി ടീച്ചേഴ്സ് അസോസിയേഷൻ. വിദ്യാർഥികളുടെയും അധ്യാപകരുടെയും ജീവനു സംരക്ഷണം നൽകേണ്ട പൊതുവിദ്യാഭ്യാസ വകുപ്പ് ഉത്തരവാദിത്വത്തിൽനിന്ന് ഒളിച്ചോടുന്നതു കൊണ്ടാണ് ഇത്രയധികം സ്കൂളുകളിൽ ഫിറ്റ്നസ് സർട്ടിഫിക്കറ്റ് ലഭിക്കാതെ പോയതെന്നു ജില്ലാ പ്രസിഡന്‍റ് പി. ചാന്ദിനി പറഞ്ഞു. പഴയ കെട്ടിടങ്ങൾ പൊളിച്ചുമാറ്റാനും നിർമാണാനുമതി ലഭിച്ചവ സമയബന്ധിതമായി പൂർത്തിയാക്കാനും വിദ്യാഭ്യാസ വകുപ്പിനു കഴിയുന്നില്ലെന്നും എഎച്ച്എസ്ടിഎ കുറ്റപ്പെടുത്തി. ആറന്മുള വിഎച്ച്എസ്എസിൽ അടഞ്ഞത് പ്രധാന കെട്ടിടം ആറന്മുള ഗവൺമെന്‍റ് എച്ച്എസ്എസിലെ ഒരു കെട്ടിടത്തിനുള്ള പ്രവർത്തനാനുമതി നിഷേധിച്ചത് രണ്ടാമത്തെ പരിശോധനയ്ക്കു ശേഷമാണ്. ഇതോടെ പ്രധാന കെട്ടിടങ്ങളിലൊന്നാണ് അടച്ചിട്ടത്. ആറന്മുള വിഎച്ച്എസ്എസിൽ ഹൈസ്കൂൾ ക്ലാസുകൾ പ്രവർത്തിച്ചിരുന്ന കെട്ടിടത്തിന്‍റെ മേൽ‌ക്കൂരയിൽ നിന്നു സീലിംഗ് അടർന്നു വീഴുന്നത് ശ്രദ്ധയിൽപെട്ടതിനെത്തുടർന്നാണ് അടച്ചിട്ടത്. വിഎച്ച്എസ്എസ് വിഭാഗത്തിന്‍റെ രണ്ട് ക്ലാസ്മുറികളും വിവിധ ലാബുകളും ഈ കെട്ടിടത്തിലാണ് പ്രവർത്തിച്ചിരുന്നത്. സ്കൂൾ ഓഡിറ്റോറിയത്തിലാണ് നിലവിൽ ക്ലാസ് മുറികൾ പുനഃക്രമീകരിച്ചതെങ്കിലും സ്ഥലപരിമിതിയും ക്ലാസുകൾ തമ്മിൽ വേർതിരിവുകൾ ഇല്ലാത്തതും പ്രശ്നമാകുന്നുണ്ട്. സമാനമായ സാഹചര്യത്തിൽ കെട്ടിട അനുമതി നിഷേധിക്കപ്പെട്ട സ്കൂളുകളിലും ക്ലാസ് മുറികളുടെ കുറവ് പഠാനന്തരീക്ഷത്തെ പ്രതികൂലമായി ബാധിച്ചിട്ടുണ്ട്.

നദികളിലെ മൈക്രോപ്ലാസ്റ്റിക് സാന്നിധ്യം ഭീഷണി ഉയർത്തുന്നു: ഷെയ്ക്ക് ഹസൻ ഖാൻ

അടൂർ: നദികളിലെ വർധിച്ചുവരുന്ന മൈക്രോ പ്ലാസ്റ്റിക് സാന്നിധ്യം ആരോഗ്യരംഗത്ത് ഗുരുതര ഭീഷണികൾ ഉയർത്തുന്നതായി മലയാളി പർവതാരോഹകൻ ഷേക്ക് ഹസൻ ഖാൻ . ലോക നദീ ദിനത്തിൽ‌ പത്തനംതിട്ടയിലെ നദി സ്നേഹികൾ അടൂർ ഗ്രീൻവാലിയിലെ പള്ളിക്കലാറിന്‍റെ പ്രഭവസ്ഥാനത്തു സംഘടിപ്പിച്ച പരിപാടി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഗ്രന്ഥകാരൻ എൻ. അനിൽകുമാർ അധ്യക്ഷത വഹിച്ചു. കേരളത്തിലെ ജലാശയങ്ങളിലെ വെള്ളത്തിന്‍റെയും മണലിന്‍റെയും ശേഖരം സമ്പാദകനായ പരിസ്ഥിതി പ്രവർത്തകൻ നെബു തടത്തിൽ പ്രദർശിപ്പിച്ചു. ഗ്രന്ഥകാരനും പാവനാടക കലാകാരനുമായ എം. എം. ജോസഫ് മേക്കൊഴൂർ നദിദിന ക്ലാസെടുത്തു. ജില്ലാ പഞ്ചായത്തംഗം ശ്രീനാദേവി കുഞ്ഞമ്മ, മുൻ നഗരസഭാധ്യക്ഷ ദിവ്യ റെജി മുഹമ്മദ്, നഗരസഭാംഗമായ സുധാ പത്മകുമാർ, ശാസ്ത്രസിനിമാ സംവിധായകൻ ധനോജ് നായിക്, ഛായാഗ്രാഹകൻ റെജി രാമഞ്ചിറ, ബോണി കോശി തോമസ് എന്നിവർ പ്രസംഗിച്ചു.

കേരള കോൺഗ്രസ് ധർണ നടത്തി

അടൂർ: കേന്ദ്ര, സംസ്ഥാന സർക്കാരുകളുടെ നികുതി വർധനയും പെട്രോളിയം ഉത്പന്നങ്ങളെ ജിഎസ്ടിയിൽ ഉൾപ്പെടുത്താത്തതും സാധാരണ ജനങ്ങൾക്കു നേരേയുള്ള വെല്ലുവിളിയാണെന്ന് കേരള കോൺഗ്രസ് ജില്ലാ പ്രസിഡന്‍റ് വർഗീസ് മാമ്മൻ. കേന്ദ്ര, കേരള സർക്കാരുകളുടെ ജനവിരുദ്ധ നയങ്ങൾക്കെതിരേ കേരള കോൺഗ്രസ് അടൂർ നിയോജകമണ്ഡലം കമ്മിറ്റി നടത്തിയ സായാഹ്ന ധർണ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മലയോര മേഖലയിൽ കർഷകർ നേരിടുന്ന വന്യമൃഗ ശല്യത്തിനും കാർഷിക വസ്തുക്കളുടെ വിലയിടിവിനും അടിയന്തരമായി പരിഹാരം കാണണമെന്നും വർഗീസ് മാമ്മൻ ആവശ്യപ്പെട്ടു. കേരള കോൺഗ്രസ് വൈസ് ചെയർമാൻ പ്രഫ. ഡി.കെ ജോൺ മുഖ്യപ്രഭാഷണം നടത്തി. നിയോജക മണ്ഡലം പ്രസിഡന്‍റ് വൈ. രാജൻ അധ്യക്ഷത വഹിച്ചു. ഡോ. ജോർജ് വർഗീസ് കൊപ്പാറ, ജേക്കബ് ജോർജ് കുറ്റിയിൽ, സാം ഏബ്രഹാം, അനിൽ പി. വർഗീസ്,ജെൻസി കടുവങ്കൽ, പി.ജി. വർഗീസ്, മണ്ണടി രാജേന്ദ്രൻ നായർ, വി.എസ്. ഇടിക്കുള, തോമസ് കോശി, എന്നിവർ പ്രസംഗിച്ചു.

നൂതന തൊഴിൽ, സ്ഥിരവരുമാനം; കുടുംബശ്രീയുടെ പുതിയ ചുവട്

പത്തനംതിട്ട: എല്ലാ കുടുംബത്തിനും ഒരു സ്ഥിര വരുമാനം ഉറപ്പു വരുത്താനായി ജില്ലാ കുടുംബശ്രീ മിഷനും വ്യവസായ വകുപ്പും ചേർന്നു റാന്നി നിയോജക മണ്ഡലത്തിലുള്ള 12 ഗ്രാമപഞ്ചായത്തുകളിലായി തൊഴില്‍ - നൈപുണ്യ പദ്ധതി ഷീ റൈസിനു തുടക്കമിടുന്നു. ജില്ലാ കുടുംബശ്രീ മിഷന്‍റെ നേതൃത്വത്തില്‍ വിവിധങ്ങളായ ആറു കോഴ്‌സുകളിലേക്കു പ്രവേശനം നല്‍കി പരിശീലന പരിപാടി ഉടന്‍ സംഘടിപ്പിക്കും. കുടുംബശ്രീ അംഗങ്ങൾ, കുടുംബശ്രീ കുടുംബാംഗങ്ങള്‍, ഓക്‌സിലറി ഗ്രൂപ്പ് അംഗങ്ങള്‍ എന്നിവര്‍ക്ക് പദ്ധതിയില്‍ ഗുണഭോക്താക്കളാകാം. വിവിധ പരിശീലനങ്ങള്‍ക്ക് കേന്ദ്ര സര്‍ക്കാര്‍ അംഗീകൃതമായ എന്‍എസ്‌ക്യുഎഫ്എല്‍ സര്‍ട്ടിഫിക്കറ്റാണ് ലഭിക്കുന്നത്. അസിസ്റ്റന്‍റ് ഡ്രസ് മേക്കര്‍ (ടെയ്‌ലറിംഗ്), ഹെല്‍ത്ത് കെയര്‍ അസിസ്റ്റന്‍റ്, ഡാറ്റാ അനലിസ്റ്റ്, സൈബര്‍ സെക്യൂരിറ്റി, ഫ്രണ്ട് ഓഫീസ് അസിസ്റ്റന്‍റ്, ഹോസ്പിറ്റല്‍ അഡ്മിനിസ്‌ട്രേഷന്‍ , മോണ്ടിസോറി ടീച്ചേഴ്സ് ട്രെയിനിംഗ് എന്നീ കോഴ്‌സുകളാണുള്ളത്. ഇതില്‍ ടെയ്‌ലറിംഗ് കോഴ്‌സുകള്‍ എട്ടിന് എല്ലാ പഞ്ചായത്തുകളിലും ക്രമീകരിച്ചിരിക്കുന്ന സെന്‍ററുകളില്‍ ആരംഭിക്കും. പ്രമോദ് നാരായൺ എംഎൽഎയുടെ നേതൃത്വത്തിലാണ് റാന്നി നിയോജക മണ്ഡലത്തിൽ പദ്ധതിക്കു തുടക്കം കുറിച്ചിരിക്കുന്നത്. സേവനശ്രീ തൊഴിൽ കൂട്ടായ്മ ജില്ലാ കുടുംബശ്രീ മിഷന്‍ ആരംഭിക്കുന്ന മറ്റൊരു നൂതന പദ്ധതിയാണ് സേവനശ്രീ. വിവിധ മേഖലകളില്‍ തൊഴില്‍ പ്രാവീണ്യം ഉള്ളവരെയും തൊഴില്‍ താത്പര്യം ഉള്ളവരെയും കൂട്ടി യോജിപ്പിച്ചു തങ്ങളുടെ പ്രദേശത്തുതന്നെ തൊഴില്‍ കൂട്ടായ്മ രൂപീകരിക്കും. തദ്ദേശ പ്രദേശത്തു സിഡിഎസ് ഭരണ സമിതിയും ബ്ലോക്ക് തലത്തില്‍ എംഇആര്‍സിയുമാണ് പദ്ധതിയുടെ ഏകോപനവും നടത്തിപ്പും ചെയ്യുന്നത്. ബ്ലോക്ക് തലത്തില്‍ ആരംഭിച്ചിട്ടുള്ള എംഇആര്‍സികളില്‍ തയാറാക്കുന്ന കാള്‍ സെന്‍ററുകളിലേക്ക് ബന്ധപ്പെട്ട് ഉപഭോക്താവിന് ആവശ്യമുള്ള സര്‍വീസ് ബുക്ക് ചെയ്യാവുന്നതും ഏത് സിഡിഎസ് പരിധിയിലാണോ സര്‍വീസ് വേണ്ടത് അവിടെ രജിസ്റ്റര്‍ ചെയ്തിരിക്കുന്ന തൊഴിലാളിയെ ഉപഭോക്താവുമായി കണക്ട് ചെയ്തു കൊടുക്കുകയുമാണ് ചെയ്യുന്നത്.‌‌ ‌‌ ആദ്യഘട്ടത്തില്‍ ഹോം കെയര്‍ ആന്‍ഡ് ഗൈനക് കെയർ, ഹൗസ് കീപ്പിംഗ് ആന്‍ഡ് കുക്കിംഗ് സര്‍വീസ് എന്നിവയാണ് തുടങ്ങുന്നത്. അതോടൊപ്പം സര്‍വീസ് ടെക്‌നീഷന്‍, ഇലക്‌ട്രിക്കല്‍ ആന്‍ഡ് പ്ലന്പിംഗ്, മൊബൈല്‍ ഫോണ്‍ സര്‍വീസ് തൊഴിലിനു താത്പര്യമുള്ളവരെ കണ്ടെത്തി പരിശീലനങ്ങള്‍ ആരംഭിക്കാനും ജില്ലാ മിഷൻ തീരുമാനിച്ചിട്ടുണ്ട്. ലോണ്‍ഡ്രി ആന്‍ഡ് അയണിംഗ്, മൊബൈല്‍ കാര്‍ വാഷ് ആന്‍ഡ് ഹൗസ് ക്ലീനിംഗ്, പര്‍ച്ചേസ് ആന്‍ഡ് പേയ്‌മെന്‍റ് അസിസ്റ്റന്‍സ്, ഗാര്‍ഡനിംഗ്, അഗ്രിക്കള്‍ച്ചര്‍ വര്‍ക്കേഴ്സ്, ഇവന്‍റ് മാനേജ്മെന്‍റ് എന്നിവയാണ് മറ്റ് തൊഴില്‍ മേഖലകൾ. കുടുംബശ്രീ ഓക്സലോ കുടുംബശ്രീ മിഷന്‍റെ നേതൃത്വത്തില്‍ ഓക്‌സിലറി ഗ്രൂപ്പുകള്‍ വിപുലീകരിക്കാനും പുനഃസംഘടിപ്പിക്കാനും വേണ്ടി സ്‌പെഷല്‍ ഓക്സെല്ലോ കാമ്പയിനുകള്‍ സംഘടിപ്പിക്കും. കുടുംബശ്രീ ഓക്‌സിലറി നവകേരളത്തിന്‍റെ യുവശക്തി എന്നതാണ് ടാഗ് ലൈന്‍. വാര്‍ഡ്, പഞ്ചായത്ത് തലങ്ങളിലും ഓക്‌സിലറി ഗ്രൂപ്പുകളുടെ കണ്‍സോര്‍ഷ്യം രൂപീകരിക്കും. കുടുംബശ്രീ വഴി നൂതനമായ ബിസിനസ് സംരംഭങ്ങള്‍ ആരംഭിക്കാനും അവയിലൂടെ വരുമാനം ഉണ്ടാക്കാനും ഓക്‌സിലറി ഗ്രൂപ്പ് അംഗങ്ങളെ പ്രാപ്തരാക്കുക എന്നതും ലക്ഷ്യമിടുന്നു. കേരളത്തിലെ എല്ലാ സിഡിഎസുകളിലും പരമാവധി ഓക്‌സിലറി ഗ്രൂപ്പുകള്‍ രൂപീകരിക്കുക, നിലവിലുള്ള ഗ്രൂപ്പുകളുടെ പുനഃസംഘടനയും ശാക്തീകരണം എന്നിവയാണ് പ്രധാന ലക്ഷ്യങ്ങൾ. ഇതിനായി സിഡിഎസുകളുടെ നേതൃത്വത്തില്‍എല്ലാ അയല്‍ക്കൂട്ടങ്ങളുടെയും പരിധിയില്‍ വരുന്ന 18 മുതല്‍ 40 വയസുവരെയുള്ള യുവതികളുടെ ഡാറ്റ ശേഖരണം മൈക്രോ ലെവല്‍ മാപ്പിംഗിലൂടെ ഇതിനോടകം പൂര്‍ത്തിയാക്കി. സ്ക്വാഡുകൾ ജനപ്രതിനിധികൾ, സിഡിഎസ്അംഗങ്ങള്‍, ഓക്‌സിലറി ഗ്രൂപ്പ് അംഗങ്ങൾ, എഡിഎസ് അംഗങ്ങള്‍, അയല്‍ക്കൂട്ടാംഗങ്ങള്‍ എന്നിവരെ ഉള്‍പ്പെടുത്തി വാര്‍ഡ് തലത്തില്‍ ഗൃഹസന്ദര്‍ശനത്തിനായി പ്രത്യേക സ്‌ക്വാഡുകള്‍ രൂപീകരിച്ചു പ്രവര്‍ത്തനം നടത്തിവരുന്നു. റോഡ്‌ഷോ, തെരുവ് നാടകം, ഫ്ളാഷ് മോബ്, ടോക്ക് ഷോകള്‍ വിജയ ഗാഥകളുടെ പ്രദര്‍ശനം തുടങ്ങിയവ സിഡിഎസ്, ബ്ലോക്ക് തലങ്ങളില്‍ പൊതു ഇടങ്ങളില്‍ സംഘടിപ്പിക്കും. ഓക്‌സിലറി ഗ്രാമയാത്രയുടെ ഭാഗമായിട്ടുള്ള പ്രവര്‍ത്തനങ്ങള്‍ സര്‍ക്കാർ, എയ്ഡഡ്, പോളിടെക്‌നിക് കോളജ് കാമ്പസുകളിലും സംഘടിപ്പിക്കും. ഓക്‌സിലറി ചാമ്പ്യന്‍മാർ‌, ഓക്‌സിലറി ഗ്രൂപ്പ് അംഗങ്ങള്‍ എന്നിവര്‍ പ്രവര്‍ത്തനങ്ങള്‍ക്കു നേതൃത്വം നല്‍കും.

പന്തളം സ്വാമി അയ്യപ്പൻ ബസ് ടെർമിനൽ ഉദ്ഘാടനം ചെയ്തു

പന്തളം: ജനങ്ങളുടെ പിന്തുണയിലും ഐക്യത്തിലുമാണ് നരേന്ദ്ര മോദി സർക്കാരിന് രാജ്യത്തിന്‍റെ വികസനം ത്വരിതപ്പെടുത്താനായതെന്ന് കേന്ദ്ര സഹമന്ത്രി ജോർജ് കുര്യൻ. പന്തളം നഗരസഭയുടെ സ്വാമി അയ്യപ്പൻ മുനിസിപ്പൽ ബസ് ടെർമിനൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. രാജ്യത്തെ ഏതു സംസ്ഥാനത്തെത്തിയാലും ഇന്നിപ്പോൾ ദേശീയപാതകൾ ഉന്നത നിലവാരത്തിൽ തന്നെ കാണാനാകും. ഇവയ്ക്ക് അനുയോജ്യമായ ബസ് ടെർമിനലുകൾ പട്ടണങ്ങളിലുണ്ടാകണം. ഇന്ത്യയിൽ 100 വിമാനത്താവളങ്ങളുടെ നിർമാണം നടന്നുവരികയാണ്. പോർട്ടുകളുടെയും റെയിൽവേയുടെയും വികസനം ഇന്ത്യയിലെ ഏതൊരു സംസ്ഥാനത്തും കാണാം. ജനങ്ങളുടെ ഒത്തൊരുമ്മയാണ് വികസന പ്രവർത്തനങ്ങൾ നടത്താൻ ശക്തി. ഓപ്പറേഷൻ സിന്ദൂറിന് ജവാന്മാർക്ക് ശക്തി പകർന്നത് ജനങ്ങളായിരുന്നുവെന്നും 140 കോടി ജനങ്ങളുടെ വിജയമായിരുന്നു അതെന്നും കേന്ദ്രമന്ത്രി അനുസ്മരിച്ചു. നഗരസഭ 75 ലക്ഷം രൂപ ചെലവഴിച്ചാണ് സ്വാമി അയ്യപ്പൻ ബസ് ടെർമിനൽ നിർമിച്ചിരിക്കുന്നത്. നഗരസഭ ചെയർമാൻ അച്ചൻകുഞ്ഞ് ജോൺ അധ്യക്ഷത വഹിച്ച ചടങ്ങിൽ വൈസ് ചെയർപേഴ്സൺ യു.രമ്യ, മുൻ ചെയർപേഴ്സൺ സുശീല സന്തോഷ്, സെക്രട്ടറി ഇ.ബി. അനിത, സ്ഥിരം സമിതി അധ്യക്ഷരായ ബെന്നി മാത്യു, കെ. സീന, രാധാ വിജയകുമാർ, സൗമ്യ സന്തോഷ്, രാധാകൃഷ്ണനുണ്ണിത്താൻ, കൗൺസിലർമാരായ കെ.ആർ. രവി, സൂര്യ എസ്.നായർ, ബിന്ദു കുമാരി, മഞ്ജുഷസുമേഷ്, പുഷ്പവല്ലി , ബിജെപി നേതാക്കളായ വി.എ. സൂരജ്, രാധാകൃഷ്ണ മേനോൻ, കളനട അശോകൻ, വിക്ടർ ടി. തോമസ്, നഗരസഭ എഇ ജയകുമാർ, കെ.പ്രതാപൻ, ആനന്ദരാജ് എന്നിവർ പ്രസംഗിച്ചു.

വടശേരിക്കര കുടുംബശ്രീ സിഡിഎസിനു ഐഎസ്ഒ അംഗീകാരം

വടശേരിക്കര: ഗ്രാമപഞ്ചായത്ത് കുടുംബശ്രീ സിഡിഎസിനു ഐഎസ്ഒ 9001: 2015 സര്‍ട്ടിഫിക്കേഷന്‍ ലഭിച്ചു. ഗുണനിലവാര മാനദണ്ഡങ്ങള്‍ കര്‍ശനമായി പാലിച്ച് ഫയലുകളുടെ ക്രമീകരണം, മൂന്ന് മിനിറ്റില്‍ വിവരങ്ങളുടെ ലഭ്യത, ധനകാര്യ ഇടപാടുകളുടെ കൃത്യത, എന്‍എച്ച്ജി വിവരങ്ങളുടെ തുടര്‍ച്ചയായ പുതുക്കൽ, ഓഫീസ് സംവിധാനങ്ങളുടെ കാര്യക്ഷമത, പൊതുജനങ്ങള്‍ക്ക് നല്‍കുന്ന സേവനങ്ങളുടെ ഗുണമേന്മ തുടങ്ങിയവയാണ് സര്‍ട്ടിഫിക്കേഷനിലേക്ക് നയിച്ച പ്രധാന ഘടകങ്ങൾ. കുടുംബശ്രീ പ്രവര്‍ത്തനങ്ങള്‍ സുതാര്യവും കാര്യക്ഷമവുമാക്കുന്നതിനാണ് ഈ നേട്ടം. കൊല്ലം ശ്രീ കേശവമെമ്മോറിയല്‍ ടൗണ്‍ ഹാളില്‍ നടന്ന ചടങ്ങില്‍ മന്ത്രി എം. ബി. രാജേഷ് കുടുംബശ്രീ എക്‌സിക്യൂട്ടീവ് ഡയറക്ടര്‍ ദിനേശന്‍ എന്നിവരില്‍ നിന്നും പഞ്ചായത്ത് പ്രസിഡന്‍റ് ലതാ മോഹന്‍, സിഡിഎസ് ചെയര്‍പേഴ്സണ്‍ ലേഖ രഘു, മെംബര്‍ സെക്രട്ടറി അനീഷ് പ്രഭാകർ, അക്കൗണ്ടന്‍റ് എസ് ശ്രുതി മോള്‍ എന്നിവര്‍ പുരസ്‌കാരം ഏറ്റുവാങ്ങി.

പ്രമാടം സ്കൂളിൽ മൈക്രോ ഗ്രീൻ കൃഷി വിളവെടുപ്പ്

പ്രമാടം: പത്തനംതിട്ട പ്രമാടം നേതാജി ഹയർസെക്കൻഡറി സ്കൂളിലെ ഭൂമിത്ര സേന ക്ലബ്‌ തുടർച്ചയായി മൂന്നാം വർഷവും മൈക്രോ ഗ്രീൻ കൃഷി വിളവെടുപ്പ് നടത്തി. ഈ വർഷം വിപുലമായാണ് ക്ലബ്‌ അംഗങ്ങൾ മൈക്രോഗ്രീൻ വളർത്തിയെടുത്തത്. ചെറുപയർ,വൻപയർ, കടുക്, ഉലുവ തുടങ്ങിയ വയുടെ മൈക്രോ ഗ്രീനുകൾ ക്ലബംഗങ്ങൾ വളർത്തിയെടുത്തു. യാതൊരുവിധ വളപ്രയോഗവുമില്ലാതെ ആർക്കും എപ്പോഴും എവിടെയും കൃഷി ചെയ്യാവുന്ന ഒന്നാണ് മിഫ്രൊഫ് ഗ്രീൻ കൃഷി. ഏഴു മുതൽ 10 ദിവസത്തിനകം വിളവെടുപ്പ് നടത്താൻ കഴിയും. വിളവെടുത്ത മൈക്രോ ഗ്രീനുകൾ പ്രദർശിപ്പിക്കുകയും തുടർന്ന് സ്കൂളിലെ ഏറ്റവും ചെറിയ ക്ലാസിലെ കുട്ടികളെ അവ പരിചയപ്പെടുത്തുകയും ചെയ്തു. മൈക്രോ ഗ്രീനുകളുടെ ഔഷധഗുണങ്ങളെക്കുറിച്ചും അവ വളർത്തിയെടുക്കുന്നതിന്‍റെ വിവിധ രീതികളെ കുറിച്ചും ക്ലബ് അംഗം അപർണ കുട്ടികൾക്ക് വിശദീകരിച്ചു കൊടുത്തു. ക്ലബംഗങ്ങൾ വിളയിച്ച മൈക്രോ ഗ്രീനുകൾ ഇക്കൊല്ലവും സ്കൂളിലെ ഉച്ചഭക്ഷണപരിപാടിക്കായി വിതരണം ചെയ്തു. മൈക്രോഗ്രീൻ ജീവിതത്തിന്‍റെ ഭാഗമാക്കണമെന്ന് സ്കൂൾ പ്രിൻസിപ്പൽ ബി. ആശ കുട്ടികളോട് നിർദേശിച്ചു. ഫാക്കൽറ്റി ഇൻ ചാർജ് ടി. ആർ. ഗീതു പ്രസംഗിച്ചു.

അപകടമൊഴിയാതെ എംസി റോഡ്; സുരക്ഷാ സംവിധാനങ്ങള്‍ പാളി

പന്തളം: ഒന്നാമത്തെ സംസ്ഥാന പാതയായ എംസി റോഡില്‍ കുളനടയ്ക്കും ഏനാത്തിനു മധ്യേ അപകടങ്ങള്‍ തുടര്‍ക്കഥയാകുന്നു. എംസി റോഡ് നവീകരണത്തിനു പിന്നാലെ അപകടങ്ങള്‍ ഒഴിവാക്കുന്നതിലേക്കു റോഡിനു പ്രത്യേകമായ സുരക്ഷാ പദ്ധതി തയാറാക്കി നവീകരിച്ചിരുന്നു. എന്നാല്‍, അപകടങ്ങള്‍ കുറയ്ക്കാന്‍ ഇതു പര്യാപ്തമായില്ല. സുരക്ഷാ ഇടനാഴി വികസിപ്പിച്ച് അപകടങ്ങള്‍ കുറയ്ക്കാന്‍ തയാറാക്കിയ പദ്ധതികളും പ്രയോജനപ്പെട്ടില്ല. സംസ്ഥാനത്തെ വാഹനാപകടങ്ങളുടെ എണ്ണമെടുത്താല്‍ കേരളത്തിലെ എണ്ണപ്പെട്ട ഹോട്ട്‌സ്‌പോട്ടുകളായി ഏനാത്തിനും കുളനടയ്ക്കും മധ്യേയുള്ള സ്ഥലങ്ങള്‍ ഉള്‍പ്പെടും. സംസ്ഥാനത്തുതന്നെ അപകടങ്ങള്‍ ഏറ്റവുമധികം നടക്കുന്ന സ്ഥലങ്ങള്‍ എന്ന നിലയിലാണ് എംസി റോഡിലെ സുരക്ഷ ഇടനാഴി 2021ല്‍ വികസിപ്പിച്ചത്. വളവിൽ വീതി കുറഞ്ഞു കോടിക്കണക്കിനു രൂപ മുടക്കി എംസി റോഡ് വികസിപ്പിക്കുകയും സുരക്ഷാ ഇടനാഴിക്കായി നവീകരിക്കുകയും ചെയ്‌തെങ്കിലും അപകടങ്ങള്‍ ഒഴിവാക്കാനുള്ള പ്രാഥമിക സംവിധാനങ്ങള്‍ ഇപ്പോഴുമില്ല. ഏനാത്ത്, പുതുശേരി, കിളിവയൽ, വടക്കടത്തുകാവ്, അടൂര്‍ ബൈപാസ്, പറന്തൽ, മിത്രപുരം, കുരമ്പാല, പന്തളം, കുളനട ഭാഗങ്ങളെല്ലാം അപകട സാധ്യതാ മേഖലകളായി പരിഗണിച്ചിരുന്നു. നേരത്തെയുള്ള അപകടങ്ങളുടെ നിരക്ക് കണക്കിലെടുത്ത് ഈ പ്രദേശങ്ങളെ ഹോട്ട്‌സ്‌പോട്ടുകളായി പോലീസും മോട്ടോര്‍ വാഹനവകുപ്പും നിശ്ചയിക്കുകയും ചെയ്തിരുന്നു. ഏനാത്തിനു സമീപം ഏറ്റവുമധികം അപകടം നടന്ന കുളക്കട മേഖലയില്‍ രണ്ട് പ്രധാന വളവുകളുണ്ട്. റോഡ് നവീകരിച്ചു കഴിഞ്ഞപ്പോള്‍ വളവുകളുടെ വിസ്തൃതി 25 മീറ്ററായി കുറയുകയായിരുന്നു. ഏനാത്ത് പാലം മുതല്‍ പെട്രോള്‍ പമ്പുവരെ റോഡ് നേര്‍രേഖയാണ്. മൂന്ന് ഉപറോഡുകള്‍ ചേരുന്ന പുതുശേരിഭാഗം കവലയും അപകടമേഖലയാണ്. മിത്രപുരം മുതല്‍ പറന്തല്‍വരെയുള്ള ഭാഗത്തും വളവുകളാണ് അപകടം വരുത്തിവയ്ക്കുന്നത്. കുളനടയിലും സമാനമായ വിഷയമാണുള്ളത്. അപകടങ്ങളേറെയും പുലര്‍ച്ചെ തിരക്കേറിയ എംസി റോഡിലെ അപകടങ്ങളേറെയും പുലര്‍ച്ചെയാണ് സംഭവിക്കുന്നത്. അമിത വേഗം കാരണമായി ചൂണ്ടിക്കാട്ടാമെങ്കിലും ഡ്രൈവര്‍മാരില്‍ നല്ലൊരു പങ്കും ഉറങ്ങിപ്പോകുന്നതാണ് അപകടത്തിലേക്കു നയിക്കുന്നതെന്നു കണ്ടെത്തിയിരുന്നു. വിമാനത്താവളങ്ങളിലും പോയി മടങ്ങുന്നവരടക്കമാണ് അപകടത്തില്‍പ്പെടുന്നത്. അപകടങ്ങള്‍ സംബന്ധിച്ച് നാറ്റ്പാക് നടത്തിയ നടത്തിയ പഠനവും അവഗണിച്ചു. കുരമ്പാലയില്‍ വീണ്ടും അപകടം പന്തളം: അടൂര്‍ - പന്തളം റൂട്ടില്‍ കുരമ്പാലയ്ക്കു സമീപം തോപ്പില്‍ ജംഗ്ഷനില്‍ സൂപ്പര്‍ മാര്‍ക്കറ്റിന് മുന്നിലായി വീണ്ടും അപകടം. ഇന്നലെ ഉച്ചയ്ക്ക് അടൂരില്‍ നിന്നു വരികയായിരുന്ന കാര്‍ റോഡില്‍ തിരിക്കുമ്പോള്‍ എതിര്‍ദിശയില്‍ വന്ന കെഎസ്ആര്‍ടിസി ബസില്‍ ഇടിക്കുകയായിരുന്നു. കഴിഞ്ഞ ദിവസം കുരമ്പാല പത്തിരിപ്പടിയില്‍ ഇരുചക്ര വാഹനത്തില്‍ യാത്ര ചെയ്യുകയായിരുന്ന യുവാക്കള്‍ അപകടത്തില്‍പ്പെട്ടു. അവരില്‍ ഒരാള്‍ക്ക് ജീവന്‍ നഷ്ടപ്പെടുകയും ചെയ്തു.

തിലകൻ സ്മാരകവേദി സംസ്ഥാന നാടകോത്സവം റാന്നിയിൽ അരങ്ങേറി

റാന്നി: കേരള സാംസ്കാരിക വകുപ്പും തിലകൻ സ്മാരക വേദിയും റാന്നി ഫാസും സംയുക്തമായി സംഘടിപ്പിച്ച നാടകോത്സവം മലയോര ഗ്രാമമായ റാന്നിയിൽ തീ ജ്വാലയായി മാറി. ഒന്നാം ദിവസം വൈക്കം മാളവികയുടെ ജീവിതത്തിന് ഒരു ആമുഖം എന്ന നാടകവും രണ്ടാം ദിനം തിരുവനന്തപുരം അജന്തയുടെ വംശം എന്ന നാടകവും മൂന്നാം ദിനം കായംകുളം പീപ്പിൾസ് തിയേറ്റേഴ്സിന്‍റെ അങ്ങാടി കുരുവികളും മിന്നും പ്രകടനം കാഴ്ച വെച്ചു. ഉദ്ഘാടന വേദിയിൽ എസ്എൽ പുരം സദാനന്ദൻ അവാർഡ് ജേതാവായ രാജു ഏബ്രഹാമിനെ വയലാർ ശരത്ചന്ദ്രവർമ ആദരിച്ചു. രണ്ടാം ദിവസം സംഗീതരംഗത്ത് പ്രശസ്തനായ കാട്ടൂർ ഹരികുമാറിനെ ചലച്ചിത്ര - കോമഡി ഷോ താരം നരിയാപുരം വേണുഗോപാൽ ആദരിച്ചു. മൂന്നാം ദിനം നടന്ന പ്രോഗ്രാമിൽ നാടക പ്രവർത്തകൻ അപ്പി ഹിപ്പി വിനോദിനെ കോമളം അതിരുദ്ധൻ ആദരിച്ചു. സമാപന ദിവസമായ ഇന്ന് ഓച്ചിറ സരിഗയുടെ സത്യമംഗലം ജംഗ്ഷൻ എന്ന നാടകവും അരങ്ങേറും. തിലകൻ സ്മാരക എട്ടാമത് അവാർഡ് സമർപ്പണവും പ്രഫഷണൽ നാടക മത്സര ഉദ്ഘാടനവും പ്രമോദ് നാരായൺ എംഎൽഎ നിർവഹിച്ചു. തിലകൻ സ്മാരകവേദി പ്രസിഡന്‍റ് രാജു ഏബ്രഹാം അധ്യക്ഷത വഹിച്ചു. സാഹിത്യ അവാർഡ് ജേതാക്കളായ ഡോ. രാജാവാര്യർ (നാടക ഗ്രന്ഥം), മാത്യൂസ് കുര്യൻ പറമ്പൻ(കഥാസമാഹാരം ), ഡോ. സി. ഗണേഷ് (ബംഗാൾ ചരിത്ര നോവൽ ), മീരകൃഷ്ണ (സാഹിത്യം നിരൂപണം), പ്രകാശൻ തണ്ണീർമുക്കം (കേരള ചരിത്ര നോവൽ), മനു തുമ്പമൺ (കവിത സമാഹാരം), എന്നിവർക്കുള്ള സാഹിത്യ അവാർഡുകൾ വയലാർ ശരത്ചന്ദ്രവർമ വിതരണം ചെയ്തു. ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം, സ്മാരകവേദി സെക്രട്ടറി കൊടുമൺ ഗോപാലകൃഷ്ണൻ, കെ.എം. ഏബ്രഹാം, എസ്. അജിത്ത്, ജോമോൻ കരിങ്കുറ്റിയിൽ, ബാജി രാധാകൃഷ്ണൻ, ജോർജ് എന്നിവർ പ്രസംഗിച്ചു.

രാജ്യത്തിന്‍റെ ഭരണഘടന അപകടത്തിൽ: ഹാരിസ് ബീരാൻ

പത്തനംതിട്ട: ന്യൂനപക്ഷങ്ങൾ അനർഹമായവ നേടുന്നുവെന്ന വ്യാജ പ്രചാരണം നടത്തി സമൂഹത്തിൽ സ്പർധ ഉണ്ടാക്കുവാൻ ചില കേന്ദ്രങ്ങൾ ബോധപൂർവം ശ്രമിക്കുന്നതായി സുപ്രീം കോടതി അഭിഭാഷകൻ ഹാരിസ് ബീരാൻ എംപി. കേരള മുസ് ലിം ജമാഅത്ത് ഫെഡറേഷൻ സംസ്ഥാന നേതൃസംഗമം പത്തനംതിട്ടയിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം . രാജ്യത്തിന്‍റെ ഭരണഘടന അപകടകരമായ സാഹചര്യത്തെ നേരിടുകയാണ്. ന്യൂനപക്ഷങ്ങൾക്ക് ഭരണഘടന വിഭാവനം ചെയ്യുന്ന അവകാശങ്ങൾ ഹനിക്കപ്പെടുന്ന കാലത്താണ് അനർഹമായി നേടുന്നു എന്ന പ്രചാരണങ്ങൾ അഴിച്ചുവിടുന്നത്. വിദ്വേഷം വളർത്തി ഭിന്നിപ്പാണ് ഇവർ ലക്ഷ്യമിടുന്നതെന്നും ഹാരിസ് ബീരാൻ അഭിപ്രായപ്പെട്ടു. വർക്കിംഗ് പ്രസിഡന്‍റ് മുഹമ്മദ് സക്കീർ ഈരാറ്റുപേട്ട അധ്യക്ഷത വഹിച്ചു. ദക്ഷിണ കേരള ജംഇഅത്തുൽ ഉലമ സെക്രട്ടറി തൊടിയൂർ മുഹമ്മദ് കുഞ്ഞ് മൗലവി, റ്റി.പി.എം.ഇബ്രാഹിം ഖാൻ, കെ.പി.മുഹമ്മദ് , സി.എ. മൂസ മൗലവി, കെ.എച്ച്.മുഹമ്മദ് മൗലവി, മുഹമ്മദ് സമീർ മൗലവി, പാങ്ങോട് കമറുദ്ദീൻ മൗലവി, സെയ്യദ് മുത്തുക്കോയ തങ്ങൾ ബാഫക്കി , കുറ്റിയിൽ ഷാനവാസ് തുടങ്ങിയവർ പ്രസംഗിച്ചു.

വനിതാ പ്രസിഡന്‍റിനെതിരേയുള്ള അതിക്രമത്തിൽ നടപടി വേണം: വനിതാ കോൺഗ്രസ്

മല്ലപ്പള്ളി : ആനിക്കാട് ഗ്രാമപഞ്ചായത്ത് പ്രസിഡന്‍റും വനിതാ കോൺഗ്രസ് നിയോജക മണ്ഡലം സെക്രട്ടറിയുമായ സൂസൻ ദാനിയേലിനു നേർക്കു നടന്ന അതിക്രമത്തിലും സ്ത്രീത്വത്തെ അപമാനിച്ചതിലും വനിതാ കോൺഗ്രസ് തിരുവല്ല നിയോജക മണ്ഡലം കമ്മിറ്റി പ്രതിഷേധിച്ചു. കുറ്റക്കാരെ നിയമത്തിനു മുമ്പിൽ കൊണ്ടു വരണമെന്ന് യോഗം ആവശ്യപ്പെട്ടു. നിയോജകമണ്ഡലം പ്രസിഡന്‍റ് ലൈല അലക്സാണ്ടർ അധ്യക്ഷത വഹിച്ചു. ബിന്ദു ജെ. വൈക്കത്തുശേരി, എം.എസ്. ശ്രീദേവി, എസ്.വിദ്യാമോൾ, സൂസമ്മ പൗലോസ്, മോളിക്കുട്ടി സിബി, റീനാ റേച്ചൽ മാത്യു, എന്നിവർ പ്രസംഗിച്ചു. ആനിക്കാട് : ആനിക്കാട് ഗ്രാമപഞ്ചായത്ത് ഓഫീസിൽ കടന്ന് അതിക്രമം കാണിക്കുകയും പ്രസിഡന്‍റിനെയും അംഗങ്ങളെയും ജീവനക്കാരെയും അകാരണമായി അസഭ്യം പറയുകയും ചെയ്ത സംഭവത്തിൽ കേരള കോൺഗ്രസ് മണ്ഡലം കമ്മിറ്റി പ്രതിഷേധിച്ചു. കുറ്റക്കാർക്കെതിരേ കർശന നടപടി സ്വീകരിക്കണമെന്ന് യോഗം ആവശ്യപ്പെട്ടു. മണ്ഡലം പ്രസിഡന്‍റ് തോമസ് മാത്യു അധ്യക്ഷത വഹിച്ചു. എം.എസ്.ശ്രീദേവി, ബേബി തടിയിൽ , റ്റി.ജി. മാത്യു, എം.പി. ശശിധര കൈമൾ, കെ.ജി.ശ്രീധരൻ, ടി. സി. വിജയൻ, റ്റി.റ്റി. കുഞ്ഞുമോൻ, മാത്യു തോമസ്, സിബി കൊല്ലറക്കുഴി, പ്രകാശ് കോശി, പി.എസ് ഏബ്രഹാം, മനു മാരിക്കൽ, മഞ്ചു. പി. ഐസക്, ജോസഫ് കുര്യൻ, ബെന്നി ഇടമുറിക്കൽ എന്നിവർ പ്രസംഗിച്ചു.

ഗ്രാമപഞ്ചായത്ത് പ്രസിഡന്‍റിനും അംഗങ്ങൾക്കുമെതിരേ ഭീഷണി മുഴക്കിയവർക്കെതിരേ കേസെടുത്തു

മല്ലപ്പള്ളി: കേരളോത്സവം നടത്തിപ്പുമായി ബന്ധപ്പെട്ട ചർച്ചകൾക്കിടെ ആനിക്കാട് ഗ്രാമപഞ്ചായത്ത് ഓഫീസിൽ കടന്നുകയറി വനിതാ പ്രസിഡന്‍റിനും അംഗങ്ങൾക്കുമെതിരേ ഭീഷണി മുഴക്കിയവർക്കെതിരേ കേസെടുത്തു. അജിത് ഫ്രാൻസിസ്, തേക്കനാൽ സജി എന്നിവർക്കെതിരേയാണ് കേസ്. കഴിഞ്ഞദിവസം വൈകുന്നേരം ഓഫീസിൽ അതിക്രമിച്ചുകയറി പ്രസിഡന്‍റിനെയും അംഗങ്ങളെയും അസഭ്യം പറയുകയും ജീവനക്കാരെ ഭീഷണിപ്പെടുത്തുകയുമായിരുന്നു. പ്രസിഡന്‍റിന്‍റെ പരാതിയിലാണ് കീഴ് വായ്പൂര് പോലീസ് കേസെടുത്തു.

അധ്യാപക നിയമനങ്ങളിലെ തടസം നീക്കണം: കേരള കോൺഗ്രസ്

തിരുവല്ല: ഇരവിപേരൂർ ഭിന്നശേഷി സംവരണ പ്രതിസന്ധി വിഷയത്തിന്റെ പേരിൽ പൊതുവിദ്യാഭ്യാസ മേഖലയിൽ അനിശ്ചിതത്വത്തിൽ ആയിരിക്കുന്ന അധ്യാപക, അനധ്യാപക സ്ഥിര നിയമനം എത്രയും വേഗം നടപ്പിലാക്കണമെന്ന് കേരള കോൺഗ്രസ് ഇരവിപേരൂർ മണ്ഡലം കമ്മിറ്റി ആവശ്യപ്പെട്ടു. പൊതുവിദ്യാഭ്യാസരംഗത്ത് നടപ്പിലാക്കുന്ന മറ്റു അധ്യാപക അനധ്യാപക നിയമനങ്ങൾ ദിവസ വേതന അടിസ്ഥാനത്തിൽ മാത്രം നടപ്പിലാക്കുന്നത് വ്യക്തികളുടെ അവകാശങ്ങളുടെ മേലുള്ള ലംഘന മാണെന്നും കമ്മിറ്റി ആരോപിച്ചു. മണ്ഡലം പ്രസിഡൻറ് എബി പ്രയാറ്റുമണ്ണിൽ അധ്യക്ഷത വഹിച്ച യോഗം കേരള കോൺഗ്രസ് ആറന്മുള നിയോജകമണ്ഡലം പ്രസിഡണ്ട് ദീപു ഉമ്മൻ ഉദ്ഘാടനം ചെയ്തു.കേരള കോൺഗ്രസ് ഉന്നതാധികാരസമിതി അംഗം റോയി ചാണ്ടപ്പിള്ള, സംസ്ഥാന ജനറൽ സെക്രട്ടറി സാം മാത്യു, കേരള യൂത്ത് ഫ്രണ്ട് സംസ്ഥാന വൈസ് പ്രസിഡൻറ് അനിഷ് വി ചെറിയാൻ കുറ്റിയിൽ, ബ്ലോക്ക് പഞ്ചായത്ത് വൈസ് പ്രസിഡൻറ് എൽസ തോമസ്, ജില്ലാ ജനറൽ സെക്രട്ടറിമാരായ സാബു കുന്നുംപുറത്ത്, , ടോജി കൈപ്പശേരിൽ, പി.സി. ആൻഡ്രൂസ് പുറത്തുമുറിയിൽ, എസ്. കെ പ്രദീപ് കുമാർ എന്നിവർ പ്രസംഗിച്ചു.

നോര്‍ക്ക കെയര്‍ ഇന്‍ഷ്വറന്‍സ് പദ്ധതിയില്‍ മടങ്ങിവന്ന പ്രവാസികളെ അംഗങ്ങളാക്കണം: പ്രവാസി കോണ്‍ഗ്രസ്

പത്തനംതിട്ട: സംസ്ഥാന സര്‍ക്കാര്‍ നോര്‍ക്ക വകുപ്പിന്‍റെ നേതൃത്വത്തില്‍ പ്രവാസികള്‍ക്കായി ആരംഭിച്ചിട്ടുള്ള നോര്‍ക്ക കെയര്‍ ഇൻഷ്വറന്‍സ് പദ്ധതിയില്‍ മടങ്ങിവന്ന പ്രവാസികളേയും അംഗങ്ങളാക്കണണമെന്ന് കേരളാ പ്രദേശ് പ്രവാസി കോണ്‍ഗ്രസ് ജില്ലാ നേതൃയോഗം സര്‍ക്കാരിനോട് ആവശ്യപ്പെട്ടു. കോവിഡ് സാഹചര്യം, സാമ്പത്തിക മാന്ദ്യം, ഊര്‍ജിത നിതാഖത്ത് എന്നിവ മൂലം ജോലി നഷ്ടപ്പെട്ട് ആയിരക്കണക്കിന് പ്രവാസികള്‍ നാട്ടില്‍ മടങ്ങിയെത്തിയിരിക്കുകയാണ്. ഇവര്‍ക്ക് പെന്‍ഷന്‍ പുനരധിവാസ പദ്ധതികള്‍ പ്രഖ്യാപിക്കാത്ത സാഹചര്യത്തില്‍ നോര്‍ക്ക കെയര്‍ ഇൻഷ്വറന്‍സ് പദ്ധതിയിലെങ്കിലും അംഗങ്ങളാക്കുകയും ക്ഷേമനിധി അംഗത്വത്തിനുള്ള പ്രായപരിധി 60 വയസ് എന്നത് 75 വയസ്സാക്കി ഉയര്‍ത്തണമെന്നും യോഗം ആവശ്യപ്പെട്ടു. നേതൃയോഗം പ്രവാസി കോണ്‍ഗ്രസ് സംസ്ഥാന ജനറല്‍ സെക്രട്ടറി സാമുവല്‍ കിഴക്കുപുറം ഉദ്ഘാടനം ചെയ്തു. ജില്ലാ പ്രസിഡന്‍റ് മാത്യു പാറക്കല്‍ അദ്ധ്യക്ഷത വഹിച്ചു. സംസ്ഥാന ഭാരവാഹികളായ മോനി ജോസഫ്, കോശി ജോര്‍ജ്, ഷിബു റാന്നി എന്നിവര്‍ പ്രസംഗിച്ചു.

പാടാം ആർക്കും പാടാം സവാബ് സംഗീത പരിപാടി മല്ലപ്പള്ളിയിൽ

പത്തനംതിട്ട: സ്റ്റേജ് ആർട്ടിസ്റ്റ്സ് ആൻഡ് വർക്കേഴ്സ് അസോസിയേഷൻ ഓഫ് ഭാരത് (സവാബ് ), മല്ലപ്പള്ളി താലൂക്ക് ലൈബ്രറി കൗൺസിൽ എന്നിവയുടെ നേതൃത്വത്തിൽ നാലിനു മല്ലപ്പള്ളിയിൽ പാടാം ആർക്കും പാടാം എന്ന സംഗീത പരിപാടി സംഘടിപ്പിക്കും. രാവിലെ 10 മുതൽ മല്ലപ്പള്ളി സെൻട്രൽ സ്റ്റേഡിയത്തിലാണ് പരിപാടി. സവാബ് സംസ്ഥാന പ്രസിഡന്‍റ് സാബു ഐക്കരേത്തിന്‍റെ അധ്യക്ഷതയിൽ മുൻ എംഎൽഎ ജോസഫ് എം. പുതുശേരി ഉദ്ഘാടനം പെയ്യും. വൈകുന്നേരം അഞ്ചിന് സമാപന സമ്മേളനം കാഥികൻ ഡോ.നിരണം രാജൻ ഉദ്ഘാടനംചെയ്യും. മല്ലപ്പള്ളി താലൂക്ക് ലൈബ്രറി കൗൺസിൽ പ്രസിഡൻറ് ജിനോയ് ജോർജ് സമ്മാനദാനം നിർവഹിക്കും. കൂടുതൽ വിവരങ്ങൾക്ക് 8156983201, 8281274011 . സംസ്ഥാന പ്രസിഡൻറ് സാബു ഐക്കേരത്ത് ഡോ. നിരണം രാജൻ, എം.ജി. മുരളിദാസ്, സന്തോഷ് മല്ലപ്പള്ളി, ജോയ്‌സി ഡാനിയൽ, ഹേമ ആർ. നായർ, അമ്പിളി മല്ലപ്പള്ളി എന്നിവർ പത്രസമ്മേളനത്തിൽ പങ്കെടുത്തു.

സാംസ്കാരിക കേന്ദ്രങ്ങളിൽ നാളെ വിദ്യാരംഭം

പത്തനംതിട്ട: ആദ്യാക്ഷരം കുറിക്കുന്ന കുരുന്നുകൾക്കായി നാളെ ജില്ലയിലെ സാംസ്കാരിക കേന്ദ്രങ്ങളിലും നവരാത്രി മണ്ഡപങ്ങളിലും വിദ്യാരംഭത്തിനുള്ള ക്രമീകരണം. ഇലവുംതിട്ട സരസകവി മൂലൂർ സ്മാരകം, കടപ്ര കണ്ണശ സ്മാരകം, കടമ്മനിട്ട രാമകൃഷ്ണൻ സ്മാരകം എന്നിവിടങ്ങളിൽ സാംസ്കാരിക, സാഹിത്യ രംഗത്തെ പ്രമുഖർ കുട്ടികളെ എഴുത്തിനിരുത്തും. വിദ്യാലയങ്ങളിലും ക്ഷേത്രങ്ങളിലും കുട്ടികളെ എഴുത്തിനിരുത്താനുള്ള ക്രമീകരണങ്ങളുണ്ടാകും. ഇലവുംതിട്ട സരസകവി മൂലൂർ സ്മാരകത്തിൽ രാവിലെ 7.30ന് ആരംഭിക്കുന്ന വിദ്യാരംഭ ചടങ്ങുകൾക്ക് കവി ഏഴാച്ചേരി രാമചന്ദ്രൻ, ഫാ. കെ.സി. ഏബ്രഹാം കോട്ടാമഠത്തിൽ, പ്രഫ. മാലൂർ മുരളീധരൻ എന്നിവർ നേതൃത്വം നൽകും. വെണ്ണിക്കുളം: പ്രവാസി സംസ്കൃതി അസോസിയേഷന്‍റെ ആഭിമുഖ്യത്തിൽ വിജയദശമിയോടനുബന്ധിച്ച് നാളെ രാവിലെ ഒന്പതു മുതൽ വെണ്ണിക്കുളം എംഡിഎൽപി സ്കൂളിൽ കുട്ടികളെ എഴുത്തിനിരുത്തും. തുരുത്തിക്കാട് ബിഎഎം കോളജ് മുൻ പ്രിൻസിപ്പൽ ഡോ. ജോസ് പാറക്കടവിൽ , വെണ്ണിക്കുളം സെന്‍റ് ബഹനാൻസ് ഹയർ സെക്കൻഡറി സ്കൂൾ പ്രിൻസിപ്പൽ ഡോ. ജേക്കബ് ഏബ്രഹാം മണ്ണുംമൂട്, അസോസിയേഷൻ സംസ്ഥാന പ്രസിഡന്‍റ് സാമുവേൽ പ്രക്കാനംഎന്നിവർ ഗുരുക്കന്മാരാകും. രജിസ്ട്രേഷന് 9947736043 നന്പരിൽ വിളിക്കണം.അടൂർ കണ്ണങ്കോട് സെന്‍റ് തോമസ് ഓർത്തഡോക്സ് കത്തീഡ്രലിൽ നാളെ രാവിലെ വിദ്യാരംഭം ഉണ്ടാകും. രാവിലെ വിശുദ്ധ കുർബാനയ്ക്കുശേഷം ഡോ. സഖറിയ മാർ സേവേറിയോസ് മെത്രാപ്പോലീത്ത കുട്ടികളെ ആദ്യാക്ഷരം കുറിപ്പിക്കും. ഇരവിപേരൂർ ഒഇഎം സ്കൂളിൽ രാവിലെ ഒന്പതിനാരംഭിക്കുന്ന വിദ്യാരംഭ ചടങ്ങുകൾക്ക് ബിഷപ് ഗീവർഗീസ് മാർ അപ്രേം, ഡോ. റൂബിൾ രാജ് എന്നിവർ നേതൃത്വം നൽകും. നവരാത്രി ആഘോഷങ്ങളുടെ സമാപനത്തോടനുബന്ധിച്ച് പന്തളം നവരാത്രി മണ്ഡപത്തിൽ വിദ്യാരംഭ ചടങ്ങുകൾ രാവിലെ ഏഴിന് ആരംഭിക്കും. കോട്ടാങ്ങൽ ഭദ്രകാളി ക്ഷേത്രത്തിൽ രാവിലെ 7.30 മുതൽ മേൽശാന്തി മനു നാരായണൻ ശർമയുടെ മുഖ്യ കാർമികത്വത്തിൽ വിദ്യാരംഭ ചടങ്ങുകൾ നടക്കും. കൈപ്പട്ടൂർ അമ്മൻകോവിലിൽ നവരാത്രി പൂജകളുടെ സമാപനമായി രാവിലെ ഏഴു മുതൽ വിജയദശമി ആഘോഷവും വിദ്യാരംഭവും ഉണ്ടാകും. പെരിങ്ങര എസ്എൻഡിപി ശാഖയുടെ ഗുരുവാണീശ്വരം സരസ്വതീ ക്ഷേത്രത്തിൽ നാളെ രാവിലെ 7.45 മുതൽ പൂജയെടുപ്പ്, വിദ്യാരംഭം. തട്ടയിൽ ഒരിപ്പുറത്ത് ക്ഷേത്രത്തിൽ വിദ്യാരംഭം രാവിലെ എട്ടിന് ആരംഭിക്കും. കലകളിൽ വിദ്യാരംഭം പത്തനംതിട്ട: ജില്ലാ കഥകളി ക്ലബിന്‍റെ ന്‍റെ കലാപഠനവിാഗമായ നാട്യഭാരതി കഥകളി സെന്‍ററില്‍ വിജയദശമി ആഘോഷവും വിദ്യാരംഭവും നാളെ നടക്കും. കഥകളി വേഷം, കഥകളി സംഗീതം, ചെണ്ട, മദ്ദളം, ഭരതനാട്യം, മോഹിനിയാട്ടം എന്നീ വിഭാഗങ്ങളിലാണ് വിദ്യാരംഭം കുറിച്ച് പുതിയ ക്ലാസുകൾ ആരംഭിക്കും. ഫോണ്‍ നമ്പർ: 9846727132. ഓമല്ലൂർ സഹകരണബാങ്ക് ഓഡിറ്റോറിയത്തിൽ നടന്നുവരുന്ന സരസ്വതി കലാക്ഷേത്രം വിജയദശമി സംഗീതോത്സവത്തിന്‍റെ ഭാഗമായി നാളെ രാവിലെ ഏഴു മുതൽ വിവിധ കലകളിൽ വിദ്യാരംഭം കുറിക്കാനാകും.അടൂർ ഈവി കലാമണ്ഡലത്തിലും വിവിധ കലകളിൽ നാളെ രാവിലെ മുതൽ വിദ്യാരംഭം ഉണ്ടാകും.

റാന്നി കരിയർ അക്കാഡമി ഉദ്ഘാടനം നാലിന്

റാന്നി: പ്രമോദ് നാരായൺ എംഎൽഎയുടെ നേതൃത്വത്തിലുള്ള കരിയർ അക്കാഡമി സൗജന്യ പിഎസ് സി കോച്ചിംഗ് ഒക്‌ടോബർ നാലിന് ആരംഭിക്കും. റാന്നിയിലെ യുവാക്കൾക്ക് തൊഴിൽ പരീക്ഷകളിൽ മികവാർന്ന പരിശീലനം നൽകുന്നതിനുവേണ്ടിയാണ് അക്കാഡമി പ്രവർ‌ത്തനം തുടങ്ങുന്നത്. പിഎസ് സി, യുപിഎസ് സി, സിവിൽ സർവീസ്, ബാങ്ക്, റെയിൽവേ, കമ്പനി, പോർട്ട്, കോർപറേഷൻ എന്നീ തൊഴിൽ മേഖലകളിലേക്ക് ജോലി ലഭിക്കുന്നതിന് കേരളത്തിലെ ഏറ്റവും മികച്ച പരിശീലനം ഉറപ്പാക്കുകയാണ് ലക്ഷ്യം. അക്കാദമിയുടെ ഉദ്ഘാടനം നാലിനു രാവിലെ 9. 30 ന് നിയമസഭാ ഡെപ്യൂട്ടി സ്പീക്കർ ചിറ്റയം ഗോപകുമാർ നിർവഹിക്കും. പ്രമോദ് നാരായൺ എംഎൽഎ അധ്യക്ഷത വഹിക്കും. ഡിജിപി അജിതാ ബീഗം മുഖ്യാതിഥിയാകും. കരിയർ അക്കാഡമിയുടെ ആദ്യ പരിശീലന പദ്ധതിയായ സൗജന്യ പിഎസ് സി കോച്ചിംഗ് അന്നേദിവസം ആരംഭിക്കും. കേരള പിഎസ് സിയുടെ വിവിധ പരീക്ഷ എഴുതാൻ യോഗ്യരായ നിയോജകമണ്ഡലത്തിലെ യുവതീ യുവാക്കൾക്ക് സൗജന്യ പരിശീല പദ്ധതി പ്രയോജനപ്പെടുത്താം. പിഎസ് സിയുടെ വിവിധ പരീക്ഷകൾക്ക് എങ്ങനെ തയാറാകാം എന്ന മാർഗനിർദ്ദേശ പരിശീലന ക്ലാസ് നാലിനു രാവിലെ 11ന് നടക്കും. കേരളത്തിലെ പ്രമുഖരായ പരീക്ഷാ പരിശീലകർ സെമിനാറിൽ പങ്കെടുക്കും. എൻഎസ്എസ് റാണി താലൂക്ക് യൂണിയനാണ് കരിയർ അക്കാഡമിയുടെ പരിശീലന പദ്ധതിക്കായി സ്ഥലം വിട്ടു നൽകിയിരിക്കുന്നത്. രജിസ്ട്രേഷനും മറ്റു വിവരങ്ങൾക്കുമായി ബന്ധപ്പെടേണ്ട നമ്പർ 9961606244.

കായികാധ്യാപകരെ കണികാണാനില്ല; പരിശീലനം കിട്ടാതെ കുട്ടികൾ

പത്തനംതിട്ട: ജില്ലയിലെ സ്കൂളുകളിൽ കായികാധ്യാപകരെ കണികാണാൻ പോലുമില്ല. അന്പതിൽ താഴെ അധ്യാപകരാണ് തിരുവല്ല, പത്തനംതിട്ട വിദ്യാഭ്യാസ ജില്ലകളിലായുള്ളത്. മൂന്നിലൊന്ന് സ്കളുകളിൽ പോലും കായികാധ്യാപകരില്ല. ശരാശരി പത്ത് അധ്യാപകർ ഓരോ വർഷവും പടിയിറങ്ങുന്നതിനാൽ അടുത്ത അഞ്ച് വർഷത്തിനുള്ളിൽ തസ്തികയ്ക്കുതന്നെ വംശനാശം സംഭവിച്ചേക്കാം. കഴിഞ്ഞ ഏതാനും വർഷങ്ങളായി കായികാധ്യാപകരുടെ തസ്തിക പൊതുവിദ്യാലയങ്ങളിൽ അനുവദിക്കുന്നില്ല. കുട്ടികൾ കുറഞ്ഞുവെന്നതാണ് പ്രധാന പ്രശ്നം. യുപി സ്കൂളുകളിൽ 500 കുട്ടികൾ ഉണ്ടെങ്കിൽ മാത്രമേ കായികാധ്യാപക തസ്തിക അനുവദിക്കൂ. ഹൈസ്കൂളിൽ എട്ട്, ഒന്പത്, പത്ത് ക്ലാസുകളിലായി അഞ്ച് പീരിയഡ് ലഭ്യമാകുന്നുവെങ്കിലേ കായികാധ്യാപകനെ നിയമിക്കാനാകൂ. അഞ്ച് പീരിയഡ് ലഭ്യമാകണമെങ്കിൽ 45 കുട്ടികൾ വീതമുള്ള അഞ്ച് ഡിവിഷനുകൾ ഉണ്ടാകണം. അധ്യാപകർ ഇല്ലാതാകുന്നു ജില്ലയിലെ സർക്കാർ, എയ്ഡഡ് സ്കൂളുകളിൽ കുട്ടികളുടെ എണ്ണത്തിലുണ്ടായ കുറവു കാരണം പുറത്തുപോയത് കായികാധ്യാപകരാണ്. അവശേഷിച്ചിരുന്ന തസ്തികകളിൽ നിയമനം ലഭിച്ചവർ സർവീസിൽനിന്നു വിരമിക്കുന്നതോടെ ഈ മേഖലയിൽ അധ്യാപകർതന്നെ ഇല്ലാതാകും. യുപി സ്കൂളുകളിൽ എവിടെയും കായികാധ്യാപകില്ല. 100ലധികം വിദ്യാലയങ്ങളുള്ള അടൂർ സബ് ജില്ലയിൽ വിവിധ ഹൈസ്കൂളുകളിലായി ഏഴ് കായികാധ്യാപകരാണുള്ളത്. കോന്നിയിൽ ആറു പേരുണ്ട്. ആറന്മുളയിൽ രണ്ടും കോഴഞ്ചേരിയിൽ ഒന്നുമാണ് നിലവിലുള്ളത്. ഇതര സബ്ജില്ലകളിലും സ്ഥിതി വ്യത്യസ്തമല്ല. ജോലി നഷ്ടപ്പെട്ടവരുമേറെ കുട്ടികളുടെ എണ്ണത്തിലെ കുറവ് ആദ്യം ബാധിച്ചു തുടങ്ങിയത് സ്പെഷലിസ്റ്റ് വിഭാഗത്തിൽപ്പെടുന്ന അധ്യാപകരെയാണ്. ഇതിൽത്തന്നെ കായികാധ്യാപകരുടെ തസ്തികയാണ് കൂടുതലായി നഷ്ടപ്പെട്ടത്. 2015നു മുന്പ് ജോലിയിൽ പ്രവേശിച്ചവർക്കു മാത്രമാണ് സംരക്ഷണം ലഭിക്കുന്നത്. കുട്ടികളുടെ കുറവു കാരണം മറ്റുള്ളവർ ജോലിയിൽനിന്നു പുറത്തു പോകേണ്ടിവന്നു. മറ്റു ചിലർക്കു ശന്പളമില്ലാതെ ജോലി ചെയ്യേണ്ടിവരുന്ന സാഹചര്യവുമുണ്ടായി. കായികാധ്യാപകർ ജോലിയിൽനിന്നു വിരമിച്ചാൽ പുതിയ നിയമനം നടക്കാത്തതിനാൽ ആ തസ്തിക ഒഴിഞ്ഞുകിടക്കുന്ന സ്ഥിതിയാണ്. തസ്തിക പുനഃക്രമീകരിച്ച ഉത്തരവ് കായികാധ്യാപക തസ്തിക പുനഃസ്ഥാപിക്കുന്നതിനായി സർക്കാർ കഴിഞ്ഞയിടെ പുറത്തിറക്കിയ ഉത്തരവും ഗുണകരമാകില്ലെന്നു പറയുന്നു. യുപിയിൽ അധ്യാപക വിദ്യാർഥി അനുപാതം 1: 500 എന്നത് 1: 300 എന്നാക്കിയിട്ടുണ്ട്. അപ്പോഴും തസ്തിക നിലനിർത്താനാകുന്നില്ലെങ്കിൽ യുപിയുടെ എൽപി വിഭാഗത്തിലെ കുട്ടികളുടെ എണ്ണം കൂടി കണക്കാക്കാൻ നിർദേശമുണ്ട്. ഹൈസ്കൂൾ വിഭാഗത്തിൽ മൂന്ന് ക്ലാസുകളിലായി അഞ്ച് ഡിവിഷനുകൾ പരിഗണിച്ച് നിയമനാംഗീകാരം നൽകാനും നിർദേശമുണ്ട്. എന്നാൽ, ഇക്കൊല്ലം തസ്തിക നഷ്ടമാകുന്ന അധ്യാപകർക്കു മാത്രമേ പുതിയ ഉത്തരവിന്‍റെ പ്രയോജനം ലഭിക്കൂയെന്ന് കായികാധ്യാപക സംഘടനാ നേതാക്കൾ പറഞ്ഞു. നേരത്തേതന്നെ ജോലിക്കു പുറത്തായവർക്ക് ഇതിന്‍റെ പ്രയോജനം ലഭിക്കില്ല. തന്നെയുമല്ല, ഉത്തരവിൽ നിർദേശിച്ചിരിക്കുന്ന അനുപാതം ജില്ലയിലെ പൊതുവിദ്യാലയങ്ങളിൽ പുതിയ തസ്തികയ്ക്കു പ്രയോജനപ്പെടുന്നതുമല്ല. കായികാധ്യാപകരുടെ പ്രതിഷേധം കണക്കിലെടുത്ത് പുറത്തിറക്കിയ ഉത്തരവ് തങ്ങളുടെ കണ്ണിൽ പൊടിയിടാനുള്ള ശ്രമമാണെന്നാണ് അധ്യാപകരുടെ പക്ഷം. കായികമേളകൾക്ക് ആളില്ല സ്കൂൾ കായികമേളകൾക്കു കുട്ടികളെ സജ്ജരാക്കാൻ അധ്യാപകരുടെ കുറവ് സാരമായി ബാധിക്കുന്നുണ്ട്. സ്കൂൾ ഗെയിംസ് മത്സരങ്ങളിൽ പരിശീലനമില്ലായ്മ കളിക്കളങ്ങളിൽ പ്രതിഫലിച്ചു. അത്‌ലറ്റിക്സ് മത്സരങ്ങളും വഴിപാടായി മാറും. സംസ്ഥാനാടിസ്ഥാനത്തിൽതന്നെ ശ്രദ്ധേയമായ മുന്നേറ്റം കുറിക്കാൻ കഴിവുള്ള കായികതാരങ്ങൾ ജില്ലയിലെ സ്കൂളുകളിലുണ്ടെങ്കിലും ഇവരെ പരിശീലിപ്പിച്ച് കളത്തിലിറക്കുന്നതിൽ പരാജയമാണ്. കുട്ടികൾ സ്വന്തം നിലയിൽ പരിശീലനം നേടിയാണ് കളത്തിലിറങ്ങുന്നത്. സർവീസിൽനിന്നു വിരമിച്ച അധ്യാപകരുടെയും മറ്റും കീഴിൽ പരിശീലനം നേടി വരികയാണ് കുട്ടികൾ പലരും. ഗ്രാമീണ മേഖലകളിൽ ഇതിനുള്ള സൗകര്യവും കുട്ടികൾക്കു ലഭിക്കുന്നില്ല. ഗ്രൗണ്ടുകളുടെയും കായിക ഉപകരണങ്ങളുടെയും അഭാവം പ്രശ്നമായി നിലനിൽക്കുന്പോഴാണ് പരിശീലനത്തിനും ആളില്ലാതായിരിക്കുന്നത്. നടത്തിപ്പിനും ആളിറങ്ങണം കായികാധ്യാപകരുടെ കുറവ് ഉപജില്ലാ മത്സരവേദികളെ സാരമായി ബാധിച്ചിട്ടുണ്ട്. സ്കൂൾ ഗെയിംസ് വേദികളിൽ ഇതു പ്രകടമായി. പുറമേനിന്ന് ആളെ എത്തിച്ചാണ് പലേടത്തും മത്സരങ്ങൾ പൂർത്തീകരിച്ചത്. ജില്ലാതല മത്സരം ഒക്ടോബർ 14 മുതൽ 16 വരെ കൊടുമൺ ഇഎംഎസ് സ്റ്റേഡിയത്തിലാണ്.

അത്തിക്കയം- മന്ദമരുതി റോഡിന്‍റെ നിർമാണ ജോലികൾ ആരംഭിച്ചു

റാന്നി: അത്തിക്കയം - കക്ക ുടുമൺ - മന്ദമരുതി റോഡിന്‍റെ സ്റ്റോറുംപടി വരെയുള്ള ഭാഗത്തെ നിർമാണ പ്രവൃത്തികൾ ആരംഭിച്ചതായി പ്രമോദ് നാരായൺ എംഎൽഎ അറിയിച്ചു. സംസ്ഥാന സർക്കാർ ശബരിമല റോഡ് പാക്കേജുകൾ ഉൾപ്പെടുത്തി 12 കോടി രൂപ ചെലവഴിച്ചാണ് റോഡ് ബിഎംബിസി നിലവാരത്തിൽ പുനരുദ്ധരിക്കുന്നത്. ഒരു വർഷം മുമ്പ് റോഡിന്‍റെ പണികൾ ആരംഭിച്ചിരുന്നുവെങ്കിലും മന്ദമരുതി മുതലുള്ള ഭാഗത്ത് ജല അഥോറിറ്റിയുടെ പൈപ്പുകൾ മാറ്റി സ്ഥാപിക്കുന്നതു മൂലം പ്രവൃത്തികൾ വൈകിയിരുന്നു. നടപടികൾ പൂർത്തിയാക്കിയതിനുശേഷം നിർമാണ പ്രവൃത്തികൾ ആരംഭിക്കാൻ തുടങ്ങിയെങ്കിലും കാലാവസ്ഥ അനുകൂലമല്ലാത്തതിനാലും കരാറുകാരുടെ ഭാഗത്തുനിന്നുള്ള അനാസ്ഥയും കാരണം പണികൾ നീണ്ടുപോയി. റോഡിനു സമീപം പ്രവർത്തിക്കുന്ന പാറമടയിൽ നിന്നുള്ള ഭാരവാഹനങ്ങൾ ഉൾപ്പെടെ കയറി റോഡ് കാൽനട പോലും ദുഃസഹമാകും വിധം തകർന്നിരുന്നു. പൊതുമരാമത്ത് മന്ത്രിക്കും ചീഫ് എൻജിനിയർക്കും കത്ത് നൽകിയതിന്‍റെ അടിസ്ഥാനത്തിൽ പൊതുമരാമത്തിന്‍റെ ഉന്നത ഉദ്യോഗസ്ഥർ കഴിഞ്ഞദിവസം സ്ഥലം സന്ദർശിച്ച് മോശമായ റോഡിന്‍റെ ഭാഗങ്ങളിൽ കൂടുതൽ ജിഎസ്പിയും മണലുമിട്ട് ഉറപ്പിക്കുന്നതിനുള്ള നിർദ്ദേശം കരാറുകാർക്ക് നൽകിയിട്ടുണ്ടെന്ന് എംഎൽഎ പറഞ്ഞു. ബിഎം ബിസി നിലവാരത്തിൽ പുനർ നിർമിക്കുന്ന റോഡിന്‍റെ പേമരുതി മുതൽ കക്കുടുമൺ വരെയുള്ള 1.2 കിലോമീറ്റർ റോഡിന്‍റെ ബിഎം ടാറിംഗ് പൂർത്തിയായിട്ടുണ്ട്.രണ്ടാം റീച്ചായ കക്കുടുമൺ മുതൽ സ്റ്റോറുംപടി വരെയുള്ള 3.25 കിലോമീറ്റർ റോഡിൽ ടാറിംഗും പൂർത്തിയായി. അത്തിക്കയം മുതൽ പേമരുതി വരെയുള്ള ആദ്യ റീച്ചിന്‍റെ 1.5 കിലോമീറ്റർ ടാറിംഗ് ഇതോടോപ്പം തന്നെ ആരംഭിക്കും. മന്ദമരുതി മുതലുള്ള ഭാഗത്തെ ടാറിംഗ് കൂടി പൂർത്തിയായ ശേഷം റോഡിൽ ബിസി ടാറിംഗും റോഡ് സുരക്ഷാ പ്രവർത്തികളും ആരംഭിക്കുമെന്ന് എംഎൽഎ പറഞ്ഞു.

ശുചിത്വ സന്ദേശ യാത്രയുമായി ജില്ലാ ശുചിത്വ മിഷൻ

പത്തനംതിട്ട: ശുചിത്വ സന്ദേശ യാത്രയുമായി പത്തനംതിട്ട ജില്ലാ ശുചിത്വ മിഷൻ. പോലീസ് സ്റ്റേഷനുകൾ, റസ്റ്റ് ഹൗസുകൾ, ആശുപത്രികൾ, കോളജുകൾ എന്നിവിടങ്ങളിൽ ശുചിത്വ മിഷൻ സന്ദർശനം നടത്തി. ഗാന്ധി ജയന്തി ദിനത്തിൽ അവസാനിക്കുന്നതരത്തിലുള്ള കേന്ദ്ര ജലശക്തി മന്ത്രാലയത്തിന്‍റെ നിയന്ത്രണത്തിൽ നടക്കുന്ന സ്വച്ഛ്താ ഹി സേവ 2025 കാന്പെയിൻ പ്രവർത്തനങ്ങളുമായി ബന്ധപ്പെട്ടാണ് ജില്ലാ ശുചിത്വ മിഷൻ സംഘം പര്യടനം നടത്തിയത്. ശുചിത്വ സന്ദേശ യാത്ര എന്ന പേരിൽ നടത്തുന്ന സന്ദർശത്തിന്‍റെ ഭാഗമായി ജില്ലയിലെ എല്ലാ ബ്ലോക്ക് പഞ്ചായത്ത് പരിധികളിലും സംഘം ശുചിത്വ സന്ദേശവുമായി എത്തും. ജില്ലയിലെ സ്കൂളുകൾ, കോളജുകൾ, പോലീസ് സ്റ്റേഷനുകൾ, റസ്റ്റ് ഹൗസുകൾ, ആരാധനാലയങ്ങൾ, സ്വകാര്യ ആശുപത്രികൾ, സർക്കാർ ആരോഗ്യ കേന്ദ്രങ്ങൾ, ഭക്ഷണശാലകൾ, വഴിയോര വിശ്രമ കേന്ദ്രങ്ങൾ, കുട്ടികളുടെ പാർക്കുകൾ, പബ്ലിക്ക് മാർക്കറ്റുകൾ എന്നിവയിലൂടെ മനോഭാവ മാറ്റ, ബോധവത്കരണ കാന്പെയിൻ പ്രവർത്തനമായാണ് പരിപാടി സംഘടിപ്പിക്കുന്നത്. ഇതിലൂടെ വിവിധ മേഖലകളിൽ പ്രവർത്തിക്കുന്ന വ്യക്തികളും സ്ഥാപനങ്ങളുമായി നേരിട്ടു സംവദിക്കുന്നതും യാത്രയുടെ ലക്ഷ്യമാണ്. ഇലന്തൂർ, പന്തളം, കോന്നി ബ്ലോക്ക് പഞ്ചായത്തുകളിലൂടെയുളള യാത്രസംഘം പൂർത്തിയാക്കി. ജില്ലാ ശുചിത്വ മിഷൻ അസിസ്റ്റന്‍റ് മിഷൻ കോ ഓർഡിനേറ്റർ (ഐഇസി) അനൂപ് ശിവശങ്കരപ്പിള്ള, ജില്ലാ ശുചിത്വ മിഷൻ അസിസ്റ്റന്‍റ് മിഷൻ കോ ഓർഡിനേറ്റർ (എസ്ഡബ്ല്യുഎം) ആദർശ് പി. കുമാർ, റാന്നി- മല്ലപ്പള്ളി റിസോഴ്സ് പേഴ്സൺ അശ്വതി വിജയൻ എന്നിവരാണ് ശുചിത്വ സന്ദേശയാത്രയിലെ അംഗങ്ങൾ. സ്വച്ഛ്താ ഹി സേവ 2025 കാന്പെയിന്‍റെ ഭാഗമായുളള ശുചിത്വ സന്ദേശയാത്ര ഇന്ന് പൂർത്തിയാകും.

റാന്നിയിൽനിന്ന് ചിങ്ങവനത്തേക്ക് മാർ ക്ലീമിസ് അനുസ്മരണ യാത്ര

റാന്നി: ക്നാനായ സമുദായത്തെ 52 വർഷം നയിച്ച കിഴക്കിന്‍റെ വലിയ മെത്രാപ്പോലീത്ത ഏബ്രഹാം മാർ ക്ലീമിസ് മെത്രാപ്പോലീത്തയുടെ 23 -ാമത് ശ്രാദ്ധപ്പെരുന്നാളിന്‍റെ ഭാഗമായി മാതൃദേവാലയമായ റാന്നി സെന്‍റ് തോമസ് വലിയപള്ളിയിൽ നിന്ന് ആരംഭിച്ച് മാർ ക്ലീമിസ് അനുസ്മരണയാത്ര ഇന്നലെ വൈകുന്നേരം ചിങ്ങവനം ദയറാപ്പള്ളിയിൽ എത്തി കബറിങ്കൽ ധൂപപ്രാർഥന നടത്തി അനുഗ്രഹം പ്രാപിച്ച് സമാപിച്ചു. അനുസ്മരണ പൊതുസമ്മേളനം ആന്‍റോ ആന്‍റണി എംപി ഉദ്ഘാടനം ചെയ്തു. കുര്യാക്കോസ് മാർ ഈവാനിയോസ് മെത്രാപ്പോലീത്ത അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് ജോർജ്ഏബ്രഹാം അനുസ്മരണ സന്ദേശം നൽകി. മുൻ എംഎൽഎ രാജു ഏബ്രഹാം അനുസ്മരണയാത്ര ഫ്ലാഗ് ഓഫ് ചെയ്തു. പ്രസിഡന്‍റ് ഫാ. തോമസ് ഏബ്രഹാം കടപ്പനങ്ങാട്ട്, റാന്നി വലിയപള്ളി വികാരി ഫാ. എം. സി. സക്കറിയ മധുരംകോട്ട്, സെക്രട്ടറി സ്മിജു ജേക്കബ് മറ്റക്കാട്ട്, ട്രഷറർ എം. സി. ഏബ്രഹാം മുരിക്കോലിപ്പുഴ, ഫാ. രാജൻ കുളമട, ഫാ. അനൂപ് സ്റ്റീഫൻ, ഫാ. കെ. എ. ചെറിയാൻ കൂട്ടോത്ര, ഫാ. സ്റ്റേഫിൻ പുളിമൂട്ടിൽ, ഫാ. ഫിലിപ്പ് വയലാ, ഫാ. ജിബി ജോസഫ്, തോമസുകുട്ടി മണിമലേത്ത്, പ്രസാദ് സ്റ്റീഫൻ കാവുങ്കപ്പുരയിൽ എന്നിവർ പ്രസംഗിച്ചു. റാന്നി വലിയപള്ളിയിൽ നിന്ന് ആരംഭിച്ച അനുസ്മരണ യാത്രയ്ക്ക് അങ്ങാടി ഗ്രാമപഞ്ചായത്ത് കമ്മിറ്റി, പഴവങ്ങാടി ഗ്രാമപഞ്ചായത്ത് കമ്മിറ്റി, ഐത്തല സെന്‍റ് കുറിയാക്കോസ് ക്നാനായ പള്ളി, ചെറുകുളഞ്ഞി സെന്‍റ് മേരീസ് കുരിശുപള്ളി, ഇട്ടിയപ്പാറ സെന്‍റ് മേരീസ് സിംഹാസനപള്ളി, ഇട്ടിയപ്പാറ സെന്‍റ് മേരീസ് കുരിശുപള്ളി, വ്യാപാരി വ്യവസായി ഏകോപന സമിതി, എൻഎസ്എസ് താലൂക്ക് ആസ്ഥാനം, റാന്നി ഗ്രാമപഞ്ചായത്ത് കമ്മിറ്റി, എംഎസ് ഹയർ സെക്കൻഡറി സ്കൂൾ, വൈക്കം സെന്‍റ് മേരീസ് കുരിശുപള്ളി, റാന്നി ബ്ലോക്ക് പഞ്ചായത്ത് ആസ്ഥാനം തുടങ്ങിയ സ്ഥലങ്ങളിലെ സ്വീകരണങ്ങൾ ഏറ്റുവാങ്ങി ചങ്ങവനത്ത് എത്തിച്ചേർന്നു.

രാഹുൽഗാന്ധിക്കെതിരായ ഭീഷണി: പ്രതിഷേധവുമായി കോൺഗ്രസ്

പത്തനംതിട്ട: കേന്ദ്ര സർക്കാരിന്‍റെ നെറികേടുകൾക്കും ജനാധിപത്യ ധ്വംസനങ്ങൾക്കുമെതിരേ രാജ്യവ്യാപകമായി പോരാട്ടം നയിക്കുന്ന ലോക്‌സഭാ പ്രതിപക്ഷ നേതാവ് രാഹുൽ ഗാന്ധിക്കെതിരേ വധഭീഷണി മുഴക്കിയ ബിജെപി നേതാവിന്‍റെ നടപടി അങ്ങേയറ്റം അപലപനീയവും ഭീരുത്വവുമാണെന്ന് ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിൽ. ചാനൽ ചർച്ചയിൽ രാഹുൽ ഗാന്ധിക്കെതിരേ കൊലപാതക ഭീഷണി മുഴക്കിയ ബിജെപി വക്താവിനെതിരേ വധശ്രമ ആഹ്വാനത്തിന് കേസ് രജിസ്റ്റർ ചെയ്ത് നിയമ നടപടി സ്വീകരിക്കാത്ത പിണറായി സർക്കാരിന്‍റെ നിലപാടിനെതിരേ കെപിസിസി ആഹ്വാനമനുസരിച്ച് ബ്ലോക്ക് കോൺഗ്രസ് കമ്മിറ്റികളുടെ നേതൃത്വത്തിൽ സംഘടിപ്പിച്ച പ്രതിഷേധ പ്രകടനത്തിന്‍റെയും യോഗത്തിന്‍റെയും ജില്ലാതല ഉദ്ഘാടനം പത്തനംതിട്ട ഗാന്ധി സ്‌ക്വയറിൽ നിർവഹിച്ച് പ്രസംഗിക്കുകയായിരുന്നു അദ്ദേഹം. ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് ജെറി മാത്യു സാം അധ്യക്ഷത വഹിച്ചു. ഡിസിസി വൈസ് പ്രസിഡന്‍റ് എ. സുരേഷ് കുമാർ, സംഘടനാകാര്യ ജനറൽ സെക്രട്ടറി സാമുവൽ കിഴക്കുപുറം, ജനറൽ സെക്രട്ടറിമാരായ കെ. ജാസിംകുട്ടി, ജോൺസൺ വിളവിനാൽ സജി കൊട്ടക്കാട്, ജി. രഘുനാഥ്, റോജി പോൾ ദാനിയേൽ, ബാബുജി ഈശോ, ബ്ലോക്ക് വൈസ് പ്രസിഡന്റുമാരായ പി. കെ. ഇക്ബാൽ, അജിത് മണ്ണിൽ, സജു ജോർജ്, ജോസ് കൊടുന്തറ, മണ്ഡലം പ്രസിഡന്‍റുമാരായ കെ. റെനീസ് മുഹമ്മദ്, നാസർ തോണ്ടമണ്ണിൽ, സജി വർഗീസ്, ടൈറ്റസ് കാഞ്ഞിരമണ്ണിൽ, എം. ആർ. രമേശ്, എം. ആർ. മണികണ്ഠൻ, വിൽസൺ തുണ്ടിയത്ത്, ദിലീപ് കുമാർ പൊതിപ്പാട്, സജി കെ. സൈമൺ, പി. കെ. ഗോപി, ജെയിംസ് കീക്കരിക്കാട്ട്, ഏബൽ മാത്യു, അബ്ദുൾ ഷുക്കൂർ, ജോസ് തോമസ്, മേഴ്‌സി വർഗീസ് തുടങ്ങിയവർ പ്രസംഗിച്ചു.

ജനറൽ സെക്രട്ടറിക്കെതിരേ ഓമല്ലൂരിൽ എൻഎസ്എസ് അംഗങ്ങളുടെ പ്രകടനം

ഓമല്ലൂർ: എൻഎസ്എസ് ജനറൽ സെക്രട്ടറിക്കെതിരേ ഓമല്ലൂരിൽ കരയോഗ അംഗങ്ങളുടെ പരസ്യപ്രതിഷേധ പ്രകടനം. വിവിധ കരയോഗ അംഗങ്ങൾ സംഘടിച്ച് ഓമല്ലൂർ ക്ഷേത്ര ജംഗ്ഷനിൽ നിന്നാണ് ഇന്നലെ വൈകുന്നേരം പ്രകടനം നടത്തിയത്. ഏകാധിപത്യ പ്രവണത എൻഎസ്എസിൽ അനുവദിക്കില്ലെന്ന തരത്തിലുള്ള മുദ്രാവാക്യങ്ങളുമായാണ് പ്രകടനം നടന്നത്. കഴിഞ്ഞ ദിവസങ്ങളിലെ ബാനർ പ്രതിഷേധത്തിനു പിന്നാലെയാണ് കരയോഗാംഗങ്ങൾ പ്രകടനവുമായി രംഗത്തെത്തിയതെന്നതും ശ്രദ്ധേയമാണ്. എൽഡിഎഫ് സർക്കാരിനെ പിന്തുണച്ച് സുകുമാരൻ നായർ പരസ്യ പ്രതികരണം നടത്തിയതിനു പിന്നാലെ പത്തനംതിട്ട വെട്ടിപ്പുറത്താണ് ആദ്യമായി പ്രതിഷേധ ബാനർ ഉയർന്നത്.

പത്തനംതിട്ട ബസ് സ്റ്റാൻഡിൽ ശുചിത്വ കാന്പെയിൻ

പത്തനംതിട്ട : ശുചിത്വോത്സവം കാന്പെയിന്‍റെ ഭാഗമായി പത്തനംതിട്ട മുനിസിപ്പൽ ബസ് സ്റ്റാൻഡിൽ ശുചീകരണ യജ്ഞം സംഘടിപ്പിച്ചു. സ്വച്ഛ്താ ഹി സേവ കാന്പെയിന്‍റെ ഭാഗമായി മുസലിയാർ എൻജിനിയറിംഗ് കോളജിൽ നിന്നുള്ള മുപ്പതോളം എൻഎസ്എസ് വോളണ്ടിയർമാരാണ് നഗരസഭയ്ക്കു വേണ്ടി ശുചീകരണ പ്രവർത്തനങ്ങൾ നടത്തിയത്. ശുചീകരണ യജ്ഞത്തിന്‍റെ ഉദ്ഘാടനം നഗരസഭാ ആരോഗ്യ സ്റ്റാൻഡിംഗ് കമ്മിറ്റി ചെയർമാൻ ജെറി അലക്സ് നിർവഹിച്ചു. എൻഎസ്എസ് പ്രോഗ്രാം ഓഫീസർമാരായ ജിസ്മോൾ ടി. ജെയിംസ്, ബി. പ്രമോദ് , നഗരസഭ ആരോഗ്യ വിഭാഗം ഉദ്യോഗസ്ഥർ തുടങ്ങിയവർ പങ്കെടുത്തു.

കോന്നി മെഡിക്കൽ കോളജ് ഒപിയിൽ തിരക്കേറുന്നു

കോന്നി: സർക്കാർ മെഡിക്കൽ കോളജ് ഔട്ട് പേഷ്യന്‍റ് വിഭാഗത്തിലെത്തുന്നവരുടെ എണ്ണത്തിൽ വർധന. പ്രതിദിനം 1500ൽ അധികം ആളുകൾ വിവിധ വിഭാഗങ്ങളിലായി മെഡിക്കൽ കോളജ് ഒപിയിൽ എത്തുന്നുണ്ട്. പത്തനംതിട്ട ജനറൽ ആശുപത്രിയിലെ കിടത്തി ചികിത്സാ സൗകര്യങ്ങൾ പരിമിതപ്പെടുത്തിയതിനു പിന്നാലെ മെഡിക്കൽ കോളജ് പ്രവർത്തനം കൂടുതൽ സജീവമാക്കാനായിരുന്നു തീരുമാനം. എന്നാൽ, മെഡിക്കൽ കോളജിലെത്താനുള്ള യാത്രാ സൗകര്യം കുറവായതിനാൽ രോഗികളിൽ നല്ലൊരു പങ്കും ഇപ്പോഴും ജനറൽ ആശുപത്രിയിലെത്തുകയാണ്. ഇവിടെ നിന്ന് തുടർ ചികിത്സയും ശസ്ത്രക്രിയയും ആവശ്യമുള്ളവരെ മെഡിക്കൽ കോളജിലേക്ക് റഫർ ചെയ്യുകയാണ് രീതി. രോഗികൾ പ്രാഥമിക പരിശോധനയ്ക്കുശേഷം മെഡിക്കൽ കോളജിലേക്ക് എത്തുന്നതാണ് ക്രമീകരണമെങ്കിലും നേരിട്ടെത്തുന്നവരെയും ഒപിയിൽ പരിശോധിക്കുന്നുണ്ട്. മെഡിക്കൽ കോളജിൽ പ്രധാനപ്പെട്ട എല്ലാ ചികിത്സാ വിഭാഗങ്ങളും സജീവമായതും ജനറൽ ആശുപത്രിയിലെ ഐപി വിഭാഗം അവിടേക്കു മാറ്റിയതും കാരണമാണ് തിരക്ക് വർധിച്ചത്. ഓർത്തോപീഡിക്, ഗൈനക്കോളജി വിഭാഗങ്ങളിലാണ് തിരക്ക് വർധിച്ചത്. ഈ രണ്ട് വിഭാഗങ്ങളു ജനറൽ ആശുപത്രിയിൽനിന്നു പൂർണമായി മെഡിക്കൽ കോളജിലേക്കു മാറ്റിയിരുന്നു. ഗൈനക്കോളജി വിഭാഗത്തിൽ ജനറൽ ആശുപത്രിയിൽ ചികിത്സ തേടിവന്നവരെ മെഡിക്കൽ കോളജിലേക്കു മാറ്റുകയും ചെയ്തിരിക്കുകയാണ്. കഴിഞ്ഞ ദിവസം കെഎസ്ആർ‌ടിസി പുതുതായി തുടങ്ങിയ ഓർഡിനറി സർവീസ് കോന്നി മെഡിക്കൽ കോളജിലേക്കുള്ള യാത്രാ ബുദ്ധിമുട്ട് ഒഴിവാക്കുമെന്നാണ് പ്രതീക്ഷ. കോന്നിയിൽനിന്നു മെഡിക്കൽ കോളജ് വരെയെത്താനുള്ള യാത്രാക്ലേശം ഒരു പരിധിവരെ ഒഴിവാക്കുന്ന തരത്തിലാണ് പുതിയ ബസ് സർവീസ്. ളാക്കൂരിനും ആശ്വാസം പത്തനംതിട്ട - കോന്നി മെഡിക്കൽ കോളജ് കെഎസ്ആർടിസി ബസ് വന്നെത്തിയതോടെ ളാക്കൂർ നിവാസികൾ ആവേശത്തിലായി. പത്തനംതിട്ടയിൽനിന്ന് ഇന്നലെ രാവിലെ 8.45ന് പുറപ്പെട്ട ബസ് പ്രമാടം, പൂങ്കാവ്, ളാക്കൂർ വഴി ഒന്പതിന് പ്രമാടം പഞ്ചായത്ത് ഓഫിസിന് മുന്പിലെത്തിയതോടെ നാട്ടുകാർ സ്വീകരണം നൽകി. കെ.യു.ജനീഷ് കുമാർ എംഎൽഎയ്ക്കും മന്ത്രി കെ.ബി. ഗണേഷ് കുമാറിനും അഭിനന്ദനം അർപ്പിച്ചുള്ള ബാനറും പൂമാലകളും കെട്ടി നാട്ടുകാർ ബസിനെ വർണാഭമാക്കി. ബസ് ഡ്രൈവർ, കണ്ടക്ടർ എന്നിവർക്കു സ്നേഹാദരങ്ങൾ നൽകി. സ്വീകരണത്തിനു ശേഷം ജനപ്രതിനിധികൾ ഉൾപ്പെടെ പഞ്ചായത്ത് ഓഫീസ് കവലയിൽനിന്നു ബസിൽ കയറി തൊട്ടടുത്ത ബസ് സ്റ്റോപ്പുവരെ യാത്ര ചെയ്യുകയും ചെയ്തു. ളാക്കൂർ വഴി സർവീസ് നടത്തിയിരുന്ന കെഎസ്ആർടിസി ബസ് നിർ ത്തലാക്കിയിട്ട് വർഷമേറെയായി. പുതിയ ബസ് സർവീസ് ആരംഭിച്ചത് ജനങ്ങൾക്കു വളരെ ഉപകാരമായി. സർക്കാർ പുതിയതായി നിരത്തിലിറക്കിയ ന്യൂ ബ്രാൻഡ് 9 മീറ്റർ ഓർഡിനറി ബസ് ആണിത്. പുതിയ ബസ് ആയതിനാൽ രണ്ട് ഡ്രൈവർമാർക്ക് പരിശീലനവും നൽകിയിട്ടുണ്ട്.

"ഹൃദയപൂർവം' ബോധവത്കരണ കാമ്പയിൻ

പത്തനംതിട്ട: ലോക ഹൃദയ ദിനത്തോടനുബന്ധിച്ച് ജില്ലയില്‍ ഹൃദയപൂര്‍വം സിപിആര്‍ പരിശീലന ബോധവത്കരണ കാമ്പെയിന് തുടക്കം. കാമ്പെയിന്‍റെ ജില്ലാതല ഉദ്ഘാടനം പത്തനംതിട്ട കാതോലിക്കേറ്റ് കോളജിൽ ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം നിര്‍വഹിച്ചു. കോളജ് വൈസ് പ്രിന്‍സിപ്പല്‍ ഡോ. സ്മിത സാറ പടിയറ അധ്യക്ഷത വഹിച്ചു. ഹൃദയാഘാതം ഉണ്ടാകുന്ന രോഗിക്ക് ശാസ്ത്രീയ ഹൃദയാഘാത പ്രഥമ ശുശ്രൂഷ ( സിപിആർ) നല്‍കുന്ന ആരോഗ്യവകുപ്പിന്‍റെ നേതൃത്വത്തിലുള്ള പരിശീലന ബോധവത്കരണ കാമ്പെയിനാണ് ഹൃദയപൂര്‍വം. യുവജനങ്ങളെയും മുന്‍നിര തൊഴില്‍ വിഭാഗം ജീവനക്കാരെയും പ്രഥമ ശുശ്രൂഷ നല്‍കാന്‍ പ്രാപ്തരാക്കുക, ഹൃദയസ്തംഭനത്തിന്‍റെ ലക്ഷണം നേരത്തേ തിരിച്ചറിയാനുള്ള അവബോധം സൃഷ്ടിക്കുക എന്നതാണ് ലക്ഷ്യം. കാമ്പയിന്‍റെ ഭാഗമായി വിദ്യാലയങ്ങളിലും സര്‍ക്കാര്‍ സ്ഥാപനങ്ങളിലും പ്രാദേശിക കേന്ദ്രങ്ങളിലും പരിപാടികള്‍ സംഘടിപ്പിക്കും. ജില്ലാ മെഡിക്കല്‍ ഓഫീസര്‍ ഡോ. എല്‍ അനിതകുമാരി മുഖ്യപ്രഭാഷണം നടത്തി. ആരോഗ്യ കേരളം ജില്ലാ പ്രോഗ്രാം മാനേജര്‍ ഡോ. എസ്. ശ്രീകുമാര്‍ ദിനാചരണ സന്ദേശം നല്‍കി. പത്തനംതിട്ട എംജിഎം മുത്തൂറ്റ് മെഡിക്കല്‍ സെന്‍റര്‍ അത്യാഹിത വിഭാഗത്തിലെ ഡോ. വിഷ്ണു, ഡോ. അശ്വിന്‍ എന്നിവര്‍ സിപിആര്‍ പരിശീലനം നല്‍കി. ബോധവത്കരണ സന്ദേശം അടങ്ങിയ ബോര്‍ഡുകളുടെ പ്രകാശനം ഡെപ്യൂട്ടി ഡിഎംഒ ഡോ. ഐപ്പ് ജോസഫ് നിര്‍വഹിച്ചു. പന്തളം സിഎം ആശുപത്രി മെഡിക്കല്‍ സൂപ്രണ്ട് ഡോ. ടി. ജി. വര്‍ഗീസ്, ജില്ലാ ഡെപ്യൂട്ടി മാസ് എഡ്യൂക്കേഷന്‍ ആന്‍ഡ് മീഡിയ ഓഫീസര്‍ ബിജു ഫ്രാന്‍സിസ്, പത്തനംതിട്ട കാതോലിക്കേറ്റ് കോളജ് എന്‍എസ്എസ് പ്രോഗ്രാം ഓഫീസർമാരായ ഡോ. തോമസ് ഏബ്രഹാം, ആന്‍സി സാം തുടങ്ങിയവർ പങ്കെടുത്തു. കാമ്പെയിന്‍റെ ഭാഗമായി ജില്ലയിലെ 19 കേന്ദ്രങ്ങളില്‍ സിപിആര്‍ പരിശീലനപരിപാടി സംഘടിപ്പിച്ചു. ബിലീവേഴ്സ് ആശുപത്രിയിൽ തിരുവല്ല: ബിലീവേഴ്സ് ചർച്ച് മെഡിക്കൽ കോളജ് ആശുപത്രി കാർഡിയോളജി വിഭാഗത്തിന്‍റെ ആഭിമുഖ്യത്തിൽ ലോകഹൃദയ ദിനം വിവിധ ബോധവത്കരണ - വൈജ്ഞാനിക പരിപാടികൾ നടത്തി ആചരിച്ചു. ഹൃദ്രോഗ ചികിത്സയിലെ നൂതന സാങ്കേതിക വിദ്യ ഉപയോഗിച്ചുള്ള രോഗനിർണയത്തിനും ചികിത്സയ്ക്കുമുള്ള നാല് ഉപകരണ സംവിധാനങ്ങൾ നാടിന് സമർപ്പിച്ചാണ് ലോക ഹൃദയ ദിനത്തിന് ബിലീവേഴ്സ് ആശുപത്രി തുടക്കം കുറിച്ചത്. ഇതിൽ താക്കോൽദ്വാര മുറിവുകളിലൂടെ ഹൃദയശസ്ത്രക്രിയ ചെയ്യാൻ കഴിയുന്ന മൂന്ന് അതിനൂതന ഉപകരണങ്ങളും ഹൃദയധമനികളുടെ ഉൾവശം കാണാൻ കഴിയുന്ന ഒസിറ്റി മെഷീനുമാണ് ഇന്നലെ പ്രവർത്തനം തുടങ്ങിയത്. ബിലീവേഴ്‌സ് ആശുപത്രി അസോസിയേറ്റ് ഡയറക്ടറും ബിലീവേഴ്‌സ് ഇന്‍റർനാഷണൽ ഹാർട്ട്‌ സെന്‍റർ മേധാവിയുമായ ഡോ. ജോൺ വല്യത്ത്, അസോസിയേറ്റ് ഡയറക്ടർ സണ്ണി കുരുവിള, പീഡിയാട്രിക്‌ കാർഡിയോളജി വിഭാഗം മേധാവി ഡോ. ആർ. സുരേഷ് കുമാർ, അഡൾട്ട് കാർഡിയോളജി വിഭാഗം മേധാവി ഡോ. ലീനാ തോമസ്, സീനിയർ കൺസൾട്ടന്‍റ് ഡോ. ടി. യു. സക്കറിയ, കാർഡിയോ തൊറാസിക്ക് വിഭാഗം സീനിയർ കൺസൾട്ടന്‍റ് ഡോ. കണ്ണൻ ആർ. നായർ, അഡൽട്ട് കാർഡിയോളജി സീനീയർ കൺസൾട്ടന്‍റ് ഡോ. രവി ചെറിയാൻ മാത്യു, ഡോ. മിറ്റി ജോർജ്, ഡോ. കെ.ആർ. രമിത, കാർഡിയാക് അനസ്തെറ്റിസ്റ്റുകളായ ഡോ സജിത്ത് സുലൈമാൻ, ഡോ ബെൻസൺ ഏബ്രഹാം, ഡോ ഡോണ തുടങ്ങിയവർ പങ്കെടുത്തു. ഹൃദയദിനത്തിന്‍റെ ഭാഗമായി നടന്ന ബോധവത്കരണ പരിപാടിയിൽ ഡോ. ജോൺ വല്യത്ത്, ഡോ. ആർ. സുരേഷ് കുമാർ എന്നിവർ സംശയങ്ങൾക്ക് മറുപടി നൽകി. കാർഡിയാക് ക്വിസ് മത്സരം, ഫ്ലാഷ് മോബ് അവതരണം, സിപിആർ ബോധവത്കരണം എന്നിവയും ദിനാചരണത്തിന്‍റെ ഭാഗമായി നടന്നു. ലൈഫ് ലൈൻ ആശുപത്രിയിൽ അടൂർ: ലൈഫ് ലൈൻ ആശുപത്രിയിൽ നടന്ന ലോക ഹൃദയ ദിനാചരണം പരിപാടികൾ ജില്ലാ പോലീസ് മേധാവി ആർ. ആനന്ദ് ഉദ്ഘാടനം ചെയ്തു. ലൈഫ് ലൈൻ ചെയർമാൻ ഡോ. എസ്. പാപ്പച്ചൻ അധ്യക്ഷത വഹിച്ചു. ഹൃദയാഘാതത്തെ തിരിച്ചറിയാനും അതിനെ നേരിടാനും സഹായിക്കുന്ന ബോധവത്കരണ ക്ലാസാണ് പ്രധാനമായും നടന്നത്. അടൂർ ഡിവൈഎസ്പി ജി. സന്തോഷ്‌കുമാർ മുഖ്യ പ്രസംഗം നടത്തി. ലൈഫ് ലൈൻ കാർഡിയോളജി വിഭാഗം മേധാവി ഡോ. സാജൻ അഹമ്മദ് ലോക ഹൃദയദിന സന്ദേശം നൽകി. ജീവൻ രക്ഷിക്കുന്നതിന് സിപിആർ പ്രസക്തി സീനിയർ കാർഡിയോളജിസ്റ്റ് ഡോ. സന്ദീപ് ജോർജ് വില്ലോത്ത് വിശദീകരിച്ചു. മെഡിക്കൽ ഡയറക്ടർ ഡോ. മാത്യൂസ് ജോൺ, സീനിയർ കാർഡിയോളജിസ്റ്റ് ഡോ. ചെറിയാൻ ജോർജ്, സിഇഒ ഡോ. ജോർജ് ചാക്കച്ചേരി, സീനിയർ അഡ്മിനിസ്ട്രേറ്റർ വി. വിജയകുമാർ എന്നിവർ പ്രസംഗിച്ചു. സിപിആർ പരിശീലനവും തുടർന്നു നൽകി. മുത്തൂറ്റ് ആശുപത്രിയിൽ കോഴഞ്ചേരി: മുത്തൂറ്റ് ആശുപത്രിയിൽ ലോക ഹൃദയദിനം വിവിധ പരിപാടികളോടെ ആചരിച്ചു. കേരള സർക്കാരും ഇന്ത്യൻ മെഡിക്കൽ അസോസിയേഷനും സംയുക്തമായി നടത്തുന്ന സിപിആർ ബോധവത്കരണ പദ്ധതിക്കു മുൻതൂക്കം നൽകിയാണ് പരിപാടികൾ ക്രമീകരിച്ചത്. പത്തനംതിട്ട ജില്ലയിലെ മൂന്ന് ഔദ്യോഗിക ബേസിക് ലൈഫ് സപ്പോർട്ട് (ബിഎൽഎസ്) നോഡൽ പരിശീലന കേന്ദ്രങ്ങളിലൊന്നായി കോഴഞ്ചേരി മുത്തൂറ്റ് ആശുപത്രി ത‌െരഞ്ഞെടുക്കപ്പെട്ടിരുന്നു. അത്യാവശ്യ ഘട്ടങ്ങളിൽ ഉപയോഗിക്കേണ്ട ജീവൻ രക്ഷാ മാർഗങ്ങളും അടിയന്തരസാഹചര്യങ്ങളിൽ ആത്മവിശ്വാസവും സമൂഹത്തിന് നൽകുക എന്നതാണ് പദ്ധതിയുടെ പ്രധാന ലക്ഷ്യങ്ങൾ. ദിനാചരണത്തിന്‍റെ ഭാഗമായി സെന്‍റ് തോമസ് കോളജിലും സെന്റ് തോമസ് ഹയർ സെക്കൻഡറി സ്കൂളിലും മുത്തൂറ്റ് ആശുപത്രിയിലെ ഡോക്ടർമാർ ബിഎൽഎസ് പരിശീലന പരിപാടികൾ നടത്തി. ആശുപത്രിയിടെ നേതൃത്വത്തിൽ 200 ഓളം ജീവനക്കാരെ ഉൾപ്പെടുത്തി പത്തനംതിട്ട, ചുട്ടിപ്പാറ ഹിൽ ടോപ്പ് പോയിന്റിലേക്ക് വ്യായാമപരമായ ട്രക്കിംഗും സംഘടിപ്പിച്ചു. മല്ലപ്പള്ളി: ലോക ഹൃദയരോഗ്യ ദിനം 2025 വൈസ്മെൻസ് ക്ലബ് വെണ്ണിക്കുളവും തുരുത്തിക്കാട് ബിഎഎം കോളജും ചേർന്ന് ആചരിച്ചു. ക്ലബ് പ്രസിഡന്‍റ് ജോസ് ഫിലിപ്പ് അധ്യക്ഷത വഹിച്ചു. ഡോ.സരിത സൂസൻ വർഗീസ് ബോധവത്കരണ ക്ലാസിന് നേതൃത്വം നൽകി. കോളജ് പ്രിൻസിപ്പൽ ജി.എസ്.അനീഷ് കുമാർ, ക്ലബ് ട്രഷറർ മാത്യു ചെറിയാൻ, പ്രോഗ്രാം കോർഡിനേറ്റർ റെനി ജേക്കബ് എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]