അപകടം മൂക്കിൻതുന്പത്ത്!

രോഗം വരുന്നത്

അമീബ രോഗാണു തലച്ചോറിനെ ബാധിക്കുമ്പോൾ

അമീബ ചെയ്യുന്നത്

മൂക്കിനെയും തലച്ചോറിനെയും വേര്‍തിരിക്കുന്ന നേര്‍ത്ത പാളിയിലുള്ള സുഷിരങ്ങള്‍ വഴിയോ കര്‍ണപടത്തിലുണ്ടാകുന്ന സുഷിരങ്ങള്‍ വഴിയോ തലച്ചോറിലേക്കു കടക്കുന്നു.

കേരളത്തിൽ ആശങ്ക വിതച്ച് അമീബിക് മസ്തിഷ്ക ജ്വരം. ഇതിനകം 18 പേർ ചികിത്സയിൽ

സാധ്യത കൂടുതൽ

കെട്ടിക്കിടക്കുന്ന വെള്ളത്തിൽ നീന്തുന്നവരിലും മുങ്ങിക്കുളിക്കുന്നവരിലും

പ്രധാന ലക്ഷണങ്ങൾ

അമീബ ശരീരത്തിൽ കടന്നുകഴിഞ്ഞാൽ അഞ്ചുമുതൽ 10 ദിവസത്തിനുള്ളിൽ രോഗലക്ഷണങ്ങൾ. കടുത്ത തലവേദന, പനി, ഒാക്കാനം, ഛർദി, കഴുത്ത് തിരിക്കാൻ പ്രയാസം, വെളിച്ചത്തിലേക്കു നോക്കാൻ ബുദ്ധിമുട്ട്..രോഗം മൂർച്ഛിക്കുന്പോൾ അപസ്മാരം, ബോധക്ഷയം, പരസ്പരബന്ധമില്ലാത്ത സംസാരം.

ശ്രദ്ധിക്കേണ്ട കാര്യങ്ങൾ

=കെട്ടിക്കിടക്കുന്നതും മലിനമായതുമായ വെള്ളത്തിൽ കുളിക്കരുത്. =മൂക്കിൽ വെള്ളം കയറാതിരിക്കാൻ നോസ് ക്ലിപ് ഉപയോഗിക്കുക. =ശുദ്ധമല്ലാത്ത വെള്ളത്തില്‍ മുഖവും വായും കഴുകരുത്. =കിണര്‍വെള്ളം ക്ലോറിനേറ്റ് ചെയ്യുക. =പാര്‍ക്കുകളിലെയും പൂളുകളിലെയും വെള്ളം കൃത്യമായി ക്ലോറിനേറ്റ് ചെയ്യുക. =സ്വിമ്മിംഗ് പൂളിന്‍റെ വശങ്ങളും തറയും ബ്രഷ് ഉപയോഗിച്ച് ഉരച്ചുകഴുകി പ്രതലങ്ങള്‍ ഉണക്കുക. =നീന്തല്‍ കുളങ്ങളിലെ വെള്ളം ആഴ്ചയില്‍ ഒരു ദിവസം പൂര്‍ണമായും ഒഴുക്കിക്ക ളഞ്ഞ് ക്ലോറിനേഷന്‍ ഉറപ്പാക്കുക. =ഫില്‍റ്ററുകള്‍ വൃത്തിയാക്കി വെള്ളം നിറച്ച് ക്ലോറിനേറ്റ് ചെയ്യണം. =വാട്ടർ ടാങ്കുകള്‍ കഴുകി വെള്ളം ക്ലോറിനേറ്റ് ചെയ്ത ശേഷം ഉപയോഗിക്കുക. =മൂക്കിലോ ചെവിയിലോ ഓപ്പറേഷന്‍ കഴിഞ്ഞവരും ചെവി പഴുപ്പുള്ളവരും
മലിനജലത്തില്‍ ഇറങ്ങരുത്.

ADVERTISEMENT

ജലോത്സവപ്പിറ്റേന്ന് നഗരശുചീകരണത്തിന്‍റെ മേളം

ആലപ്പുഴ: നെഹ്റുട്രോഫി ജലമേള മഹാ ആഘോഷമായി കടന്നുപോയി. ചവിട്ടിമെതിച്ച ഉത്സവപ്പറമ്പ് പോലെ നഗരം. പ്ലാസ്റ്റിക് മാലിന്യങ്ങളും മറ്റ് അവശിഷ്ടങ്ങളും റോഡരികിലും കായലോരങ്ങളിലും കാഴ്ചക്കാർ കൂടിയ പ്രദേശങ്ങളിലും. നഗരസഭയുടെ നേതൃത്വത്തിൽ നഗരശുചീകരണത്തിന് ആരോഗ്യവിഭാഗത്തിന്‍റെ നേതൃത്വത്തിൽ കർമസേന ഇന്നലെ സജ്ജരായി രംഗത്തിറങ്ങി. നഗരത്തിലും നെഹ്റു പവലിയനിലും റോസ് പവലിയന്‍ വിക്ടറി പവലിയനിലും കായലിലുമുള്ള വെള്ളക്കുപ്പികളും മറ്റ് മാലിന്യങ്ങളും ആരോഗ്യ വിഭാഗത്തിന്‍റെ നേതൃത്വത്തില്‍ നീക്കം ചെയ്തു. മത്സരവിജയികളെ പ്രഖ്യാപിച്ചതിനു ശേഷം ഫിനിഷിംഗ് പോയിന്‍റിൽനിന്ന് ആരംഭിച്ച ശുചീകരണയജ്ഞം നഗരസഭ ചെയര്‍പേഴ്സണ്‍ കെ.കെ. ജയമ്മ ഉദ്ഘാടനം ചെയ്തു. ആലൂക്കാസ് പാലം മുതല്‍ കിഴക്കോട്ട് പുന്നമട ബോട്ട് ജെട്ടി വരെയും ബോട്ടുജെട്ടി പരിസരവും ഗ്രീന്‍ സോണ്‍ ആയി പ്രഖ്യാപിച്ച് ഒറ്റത്തവണ ഉപയോഗിക്കുന്ന പ്ലാസ്റ്റിക് ഉത്പന്നങ്ങള്‍ പൂര്‍ണമായും നിരോധിച്ചിരുന്നു. കുടിവെള്ള കുപ്പികള്‍, ഭക്ഷണപ്പൊതികള്‍ സ്നാക്സ് പാക്കറ്റ് എന്നിവയില്‍ സ്റ്റിക്കറുകള്‍ പതിച്ച് 20 രൂപ ഈടാക്കുകയും ജലോത്സവം കഴിഞ്ഞ് സ്റ്റിക്കര്‍ പതിച്ച കുപ്പികള്‍, പാക്കറ്റുകള്‍ തിരികെ ഹാജരാക്കിയവര്‍ക്ക് തുക തിരികെ നല്‍കി. ഹരിതചട്ടം പാലിക്കുന്നതിന്‍റെ ഭാഗമായി ഗ്രീന്‍ സോണ്‍ മേഖലയില്‍ മാലിന്യം തരംതിരിച്ച് നിക്ഷേപിക്കുന്നതിന് താല്‍ക്കാലിക ബിന്നുകള്‍ സ്ഥാപിച്ച് ബിന്നുകള്‍ക്കു സമീപം നഗരസഭ പ്രത്യേകം സജ്ജീകരിച്ചിട്ടുള്ള വോളന്‍റിയര്‍മാര്‍മാരുടെ സേവനം ഉറപ്പാക്കി. രാവിലെ 6 മുതല്‍ ഔട്ട്പോസ്റ്റ് പാലത്തിനു സമീപം, പുന്നമട ഫിനിഷിംഗ് പോയിന്‍റ്, മാതാ ജെട്ടി, അച്ചായന്‍സ് പാര്‍ക്ക് എന്നിവിടങ്ങളില്‍ ഗ്രീന്‍ ചെക്ക് പോസ്റ്റുകള്‍ സ്ഥാപിച്ച് ഹെല്‍ത്ത് ഇന്‍സ്പെക്ടര്‍മാരുടെ നേതൃത്വത്തില്‍ ഹരിതചട്ടം പാലിക്കുന്നതിനു ആവശ്യമായ പരിശോധന കര്‍ശനമാക്കി. പ്രധാനകേന്ദ്രങ്ങളിലെല്ലാം താത്കാലിക ബിന്നുകള്‍ സ്ഥാപിച്ച് സന്നദ്ധ പ്രവര്‍ത്തകരുടെ സേവനം ഉറപ്പാക്കിയിരുന്നു. ആരോഗ്യ സ്ഥിരം സമിതി അധ്യക്ഷ എ.എസ്. കവിതയുടെ നേതൃത്വത്തില്‍ നഗരസഭയിലെ മുഴുവൻ ഹെൽത്ത് ഇൻസ്പെക്ടർമാരും ആരോഗ്യവിഭാഗം ജീവനക്കാരും തൊഴിലാളികളും ഹരിതകർമ സേനാംഗങ്ങളും വോളന്‍റിയര്‍മാരും പങ്കെടുത്തു.

ഭാര്യയെയും മക്കളെയും ദുരൂഹ സാഹചര്യത്തിൽ കാണാതായി; യുവാവിനെ തൂങ്ങിമരിച്ചനിലയിൽ കണ്ടെത്തി

തിരുവല്ല: നിരണത്തുനിന്നും മക്കള്‍ക്കൊപ്പം കാണാതായ റീനയുടെ ഭര്‍ത്താവ് കവിയൂര്‍ ഞാലിക്കണ്ടം മാറമല വീട്ടില്‍ അനീഷ് മാത്യു (32)വിനെ തൂങ്ങിമരിച്ചനിലയില്‍ കണ്ടെത്തി. ഞാലിക്കണ്ടത്തെ കുടുംബവീട്ടില്‍ ഞായറാഴ്ച വൈകുന്നേരം 4.30 നാണ് അനീഷിനെ മരിച്ചനിലയില്‍ കണ്ടെത്തിയത്. റീനയും മക്കളും ഓട്ടോറിക്ഷ ഡ്രൈവറായ ഭര്‍ത്താവ് അനീഷ് മാത്യുവിനൊപ്പം ആലുംതുരുത്തി ചന്തയ്ക്ക് സമീപത്തെ വാടകവീട്ടിലാണ് താമസിച്ചുവന്നിരുന്നത്. രണ്ടാഴ്ച മുന്പ് യുവതിയെയും രണ്ടു പെൺകുട്ടികളെയും കാണാതായ വിവരം റീനയുടെ സഹോദരന്‍ റിജോയാണ് പുളിക്കീഴ് പോലീസില്‍ അറിയിച്ചത്. പരാതി നല്‍കിയതിനു പിന്നാലെ അനീഷിനെ പോലീസ് ചോദ്യം ചെയ്യലിനായി ദിവസവും വിളിപ്പിച്ചിരുന്നതായി ബന്ധുക്കള്‍ പറഞ്ഞു. നിരണം അഞ്ചാം വാര്‍ഡില്‍ കാടുവെട്ടില്‍ വീട്ടില്‍ റീന കെ. ജയിംസ്, മക്കളായ അക്ഷര (എട്ട്), അല്‍ക്ക (ആറ്) എന്നിവരെയാണ് കാണാതായത്. ഇവരുമായി ബന്ധപ്പെട്ട സിസിടിവി ദൃശ്യങ്ങള്‍ പോലീസിനു ലഭിച്ചിട്ടുണ്ട്. ജില്ലാ പോലീസ് മേധാവി നിയോഗിച്ച പ്രത്യേക സംഘമാണ് അന്വേഷിക്കുന്നത്. ഇവരെ കാണാതായി രണ്ടു ദിവസത്തിനുശേഷമാണ് പോലീസിൽ പരാതി ലഭിക്കുന്നത്. ഇത് അന്വേഷണത്തിന്‍റെ തുടക്കത്തില്‍ ഏറെ ദുരൂഹതകള്‍ ഉണ്ടാക്കിയിരുന്നു. എന്നാല്‍, ഇപ്പോള്‍ ലഭിച്ച സിസിടിവി ദൃശ്യങ്ങള്‍ റീനയും മക്കളും എവിടെയോ യാത്രപോകാന്‍ ഉറപ്പിച്ച രീതിയിലാണുളളത്. ഇവരുടെ കൈവശം ബാഗുകളുണ്ട്. ഇവര്‍ക്കായുളള അന്വേഷണം സംസ്ഥാനത്തൊട്ടാകെ നടക്കുകയാണെന്ന് പോലീസ് അറിയിച്ചു.

അധികൃതര്‍ അവഗണിച്ച സ്‌കൂളില്‍ ഓണാഘോഷം ഗംഭീരമാക്കി രക്ഷിതാക്കള്‍

എടത്വ: അധികൃതര്‍ അവഗണിച്ച കോഴിമുക്ക് എല്‍പി സ്‌കൂളില്‍ ഓണാഘോഷം ഗംഭീരമാക്കി രക്ഷിതാക്കള്‍. ഫിറ്റ്‌നസിന്‍റെ പേരില്‍ സ്‌കൂള്‍ നടത്തിപ്പ് ചുമതലയുള്ള എടത്വ പഞ്ചായത്തും സ്‌കൂള്‍ പിടിഎയും തമ്മിലുള്ള തര്‍ക്കം കുരുന്നുകളുടെ ഓണാഘോഷത്തിലും പ്രകടമായി. ഓണാഘോഷവുമായി ബന്ധപ്പെട്ട് പഞ്ചായത്ത് പ്രസിഡന്‍റിനെയും വാര്‍ഡ് മെംബറെയും സ്‌കൂളില്‍ ക്ഷണിച്ചെങ്കിലും ആരും തിരിഞ്ഞുനോക്കിയില്ലെന്നാണ് പിടിഎ പറയുന്നത്. അധികൃതര്‍ അവഗണിച്ചെങ്കിലും ഓണാഘോഷം സ്‌കൂളില്‍ ഗംഭീരമായി നടന്നു. കുട്ടികള്‍ വിവിധ കലാപരിപാടികള്‍ അവതരിപ്പിച്ചു. തുടര്‍ന്ന് വിഭവസമൃധമായ ഓണസദ്യ നല്‍കി കുട്ടികളെ വിട്ടയച്ചു. ഒരുമാസം മുന്‍പ് സ്‌കൂളിലെ പഴയ കെട്ടിടത്തിന്‍റെ ശോച്യാവസ്ഥ മൂലം കുട്ടികളെ ക്ലാസ് റൂമില്‍ ഇരുത്തി പഠിപ്പിക്കാന്‍ രക്ഷിതാക്കള്‍ വിസമ്മതിച്ചിരുന്നു. പഴയ സ്‌കൂള്‍ കെട്ടിത്തിന് സമീപം പുതിയ കെട്ടിടം നിര്‍മിച്ചെങ്കിലും വരാന്തയിലെ കൈവിരിയുടെ പേരില്‍ ഫിറ്റ്‌നസ് നിഷേധിച്ചിരുന്നു. ഇതേത്തുടര്‍ന്ന് നടത്തിയ ചര്‍ച്ചയില്‍ പുതിയ കെട്ടിടത്തിന് താത്കാലിക ഫിറ്റ്‌നസ് നല്‍കി പഠനം ആരംഭിച്ചു. പഠനം തുടങ്ങി ഒരുമാസം കഴിഞ്ഞിട്ടും വരാന്തയുടെ കൈവിരി സ്ഥാപിച്ചിട്ടില്ല. വരാന്തയ്ക്കു ചുറ്റും റെക്‌സിന്‍ വലിച്ചുകെട്ടിയാണ് ക്ലാസ് നടത്തുന്നത്. ഫിറ്റ്‌നസ് പ്രശ്‌നവുമായി ബന്ധപ്പെട്ട് സ്‌കൂളിന്‍റെ ചുമതലയുള്ള പഞ്ചായത്തും പിടിഎ ഭാരവാഹികളും രണ്ടു തട്ടിലായിരുന്നു. ഇതേത്തുടര്‍ന്ന് പിടിഎ തോമസ് കെ. തോമസ് എംഎല്‍എ യുമായി ബന്ധപ്പെട്ടു. എംഎല്‍എ കഴിഞ്ഞദിവസം സ്‌കൂള്‍ സന്ദര്‍ശിച്ച് അടിയന്തര സഹായങ്ങള്‍ വാഗ്ദാനം ചെയ്തതായി പിടിഎ പറഞ്ഞു.

ചേര്‍ത്തല വള്ളംകളിക്കു തുടക്കമായി

ചേര്‍ത്തല: പ്രഥമ എഎസ് കനാൽ എവറോളിംഗ് ട്രോഫി സബീഷ് നയിച്ച പറയൻചാൽ വള്ളത്തിന്. ചേർത്തല നഗരസഭയുടെ നേതൃത്വത്തില്‍ നടത്തിയ ആദ്യ വള്ളംകളി മത്സരമായിരുന്നു. ചേർത്തല നഗരസഭയുടെയും സേവ് എഎസ് കനാൽ കമ്മിറ്റിയുടെയും നേതൃത്വത്തില്‍ ഓണാഘോഷ പരിപാടികളുടെ ഭാഗമായാണ് വള്ളംകളി മത്സരവും സംഘടിപ്പിച്ചത്. നഗരസഭാ ചെയർപേഴ്സൺ ഷേർളി ഭാർഗവൻ ഫ്ലാഗ് ചെയ്തു. വൈസ് ചെയർമാൻ ടി.എസ്. അജയകുമാർ, നഗരസഭ സെക്രട്ടറി ടി.കെ. സുജിത്ത്, ക്ലീൻ സിറ്റി മാനേജർ സന്ദേശ് തുടങ്ങിയവർ നേതൃത്വം നൽകി. രണ്ടുദിവസങ്ങളിലായാണ് ഓണാഘോഷ പരിപാടികൾ സംഘടിപ്പിച്ചത്. അത്തപ്പുക്കള മത്സരം, ചൂണ്ടയിടൽ മത്സരം, ചകിരിപിരി മത്സരം, ഓലമടയൽ മത്സരം, വടംവലി മത്സരം എന്നിവ സംഘടിപ്പിച്ചു. സമാപനസമ്മേളനത്തിൽ വൈസ് ചെയർമാൻ ടി.എസ്. അജയകുമാർ അധ്യക്ഷത വഹിച്ചു.

ദുരന്തങ്ങളെ നീന്തിത്തോൽപ്പിക്കാം: കടലിൽ നീന്തൽ പരിശീലനം

ആലപ്പുഴ: കേരളത്തിൽ വ്യാപകമായി നടക്കുന്ന മുങ്ങിമരണങ്ങളെ പ്രതിരോധിക്കുവാൻ മൈൽസ്റ്റോൺ സ്വിമ്മിംഗ് പ്രമോട്ടിംഗ് ചാരിറ്റബിൾ സൊസൈറ്റി ഫൊക്കാനയുമായി സഹകരിച്ച് വൈക്കത്ത് നടത്തിവന്ന നീന്തൽ പരിശീലന പദ്ധതി സ്വിം കേരള സ്വിം മൂന്നാം ഘട്ടത്തിന്‍റെ ഭാഗമായുള്ള സുരക്ഷ അവബോധ ക്ലാസും കടലിലെ നീന്തൽ പരിശീലനവും നടത്തി. അർത്തുങ്കൽ ബീച്ചിൽ കൃഷിമന്ത്രി പി. പ്രസാദ് ഉദ്ഘാടനം ചെയ്തു. മൈൽസ്റ്റോൺ സൊസൈറ്റി വൈസ് പ്രസിഡന്‍റ് മാമ്പുഴക്കരി വി.എസ്. ദിലീപ് കുമാർ അധ്യക്ഷത വഹിച്ചു. കവിയും ഗാനരചയിതാവുമായ വയലാർ ശരത്ചന്ദ്രവർമ മുഖ്യ പ്രഭാഷണം നടത്തി. വേമ്പനാട് കായലിൽ കൈകൾ ബന്ധിച്ചു പതിനൊന്നു കിലോമീറ്റർ നീന്തിക്കടന്ന പത്തു വയസുകാരി സൂര്യഗായത്രി. എസിനു ലഭ്യമായ വേൾഡ് വൈഡ് ബുക്ക് ഓഫ് റെക്കോർഡ്, ഇൻഡ്യൻ ബുക്ക് ഓഫ് റെക്കോഡ്, എലൈറ്റ് ബുക്ക് ഓഫ് റെക്കോഡ് എന്നിവ മന്ത്രിയും വയലാർ ശരത്ചന്ദ്ര വർമയും വി.എസ്. ദിലീപ്കുമാറും ചേർന്ന് സമ്മാനിച്ചു. കോസ്റ്റൽ പോലീസ് അർത്തുങ്കൽ യൂണിറ്റ് എസ്ഐ ജോസഫ്, കടൽ സുരക്ഷയെക്കുറിച്ച് കുട്ടികൾക്ക് ക്ലാസ് നല്കി. സേനാംഗം തോമസ് ടി.ജെ, മൈൽസ്റ്റോൺ സൊസൈറ്റി സെക്രട്ടറി ഡോ. ആർ. പൊന്നപ്പൻ, സ്വിം കേരള സ്വിം കോ-ഓർഡിനേറ്റർ ഷിഹാബ് കെ. സൈനു, അർത്തുങ്കൽ ബീച്ച് ഫെസ്റ്റ് സൊസൈറ്റി രക്ഷാധികാരി ബാബു ആന്‍റ ണി തുടങ്ങിയവർ ചടങ്ങിൽ പങ്കെടുത്തു.

വാഹനാപകടത്തിൽ പരിക്കേറ്റയാൾ മരിച്ചു

മാന്നാർ: ഓട്ടോറിക്ഷ ഇടിച്ച് പരിക്കേറ്റ് വണ്ടാനം മെഡിക്കൽ കോളജ് ആശുപത്രിയിൽ ചികിത്സയിലായിരുന്ന വയോധികൻ മരിച്ചു. ബുധനൂർ ആലപ്പുറത്ത് പുത്തൻവീട്ടിൽ സദാശിവൻ നായർ (82) ആണ് മരിച്ചത്. ഓഗസ്റ്റ് 16 നായിരുന്നു അപകടം. ഭാര്യ: തങ്കമ്മ. മക്കൾ: സി.എസ്. മുരളീധരൻ, ശ്രീലത. മരുമക്കൾ: എം.എൻ. ശശികുമാർ.

സ്‌കൂട്ടറിൽനിന്നു വീണ യുവാവ് ബസ് കയറി മരിച്ചു

ഹരിപ്പാട്: കടലാക്രമണത്തെത്തുടർന്ന് റോഡിലേക്കു കയറിക്കിടക്കുന്ന മണലിൽ കയറി നിയന്ത്രണം വിട്ട സ്‌കൂട്ടറിൽനിന്നു വീണ യുവാവ് ബസ് കയറി മരിച്ചു. ആറാട്ടുപുഴ കോണിപ്പറമ്പിൽ താജുദ്ദീൻ മുസ്‌ലിയാരുടെ (വീയപുരം മങ്കോട്ടച്ചിറ തൈക്കാവ് ഇമാം) മകൻ മിഥിലാജാണ് (24) മരിച്ചത്. കാർത്തിക ജംഗ്ഷന് തെക്ക് ഭാഗത്ത് ഞായറാഴ്ച വൈകുന്നേരം ആറരയോടെയാണ് സംഭവം. ബസ് സ്റ്റാൻഡ് ഭാഗത്തേക്ക് സ്കൂട്ടറിൽ പോകുമ്പോൾ മണ്ണിൽ കയറി നിയന്ത്രണം വിട്ട സ്കൂട്ടർ മറിഞ്ഞതിനെത്തുടർന്ന് റോഡിലേക്ക് വീണ മിഥിലാജിന്‍റെ ദേഹത്തുകൂടി പത്മം എന്ന സ്വകാര്യ ബസ് കയറിയിറങ്ങുകയായിരുന്നു. ഉടൻ തന്നെ ആലപ്പുഴ മെഡിക്കൽ കോളജിൽ എത്തിച്ചെങ്കിലും ജീവൻ രക്ഷിക്കാനായില്ല. ആറാട്ടുപുഴ എആർ സ്കൂട്ടർ വർക്ക് ഷോപ്പിലെ ജോലിക്കാരനായിരുന്നു മിഥിലാജ്. മാതാവ്: മുംതാസ്. സഹോദരി: മിസ്‌രിയ. മൃതദേഹം ആലപ്പുഴ മെഡിക്കൽ കോളജ് ആശുപത്രി മോർച്ചറിയിൽ.

മാന്നാർ മഹാത്മാഗാന്ധി ജലോത്സവം ഇന്ന്

മാന്നാർ: മാന്നാർ മഹാത്മാഗാന്ധി ജലോത്സവം ഇന്ന് രണ്ടിന് പമ്പാനദിയിലെ മാന്നാർ കുര്യത്ത് കടവിലുള്ള മഹാത്മാ വാട്ടർ സ്റ്റേഡിയത്തിൽ നടക്കും. ദേശീയ നേതാക്കൾ, സംസ്ഥാന മന്ത്രിമാർ, ചലച്ചിത്രതാരങ്ങൾ, എംപിമാർ, എംഎൽഎമാർ, വിദേശ പൗരന്മാർ ഉൾപ്പെടെ പതിനായിരങ്ങൾ ജലമേള കാണാൻ എത്തിച്ചേരും. 12 ചുണ്ടൻ വള്ളങ്ങളും ഒൻപത് വെപ്പുവള്ളങ്ങളും ഉൾപ്പെടെ 50ൽപരം കളിവള്ളങ്ങൾ മത്സരത്തിൽ പങ്കെടുക്കുമെന്ന് ജനറൽ കൺവീനർ അഡ്വ. എൻ. ഷൈലാജും ജനറൽ സെക്രട്ടറി ടി.കെ. ഷാജഹാനും അറിയിച്ചു. നെട്ടയത്തിലെ വലിയ വളവ് ഒഴിവാക്കാൻ 300 മീറ്റർ നീളം കുറച്ച് മുമ്പോട്ട് നീക്കിയാണ് ഇത്തവണ സ്റ്റാർട്ടിംഗ് പോയിന്‍റ് ഒരുക്കുന്നതെന്ന് ഭാരവാഹികൾ പറഞ്ഞു. വള്ളം ചൂടിക്കുന്നതും ഫൈനലിലെ തർക്കങ്ങൾ ഒഴിവാക്കാനും ഇതുകൊണ്ട് സാധിക്കും. ഒന്നാമത് എത്തുന്ന ചുണ്ടൻ വള്ളത്തിന് മഹാത്മാഗാന്ധി ട്രോഫിയും ഒന്നാമത് എത്തുന്ന എ ഗ്രേഡ് വെപ്പ് വള്ളത്തിന് ഉമ്മൻ ചാണ്ടി മെമ്മോറിയൽ ട്രോഫിയും സമ്മാനിക്കും. ഇതോടനുബന്ധിച്ച് ഇന്നു രാവിലെ മുതൽ വിവിധ മത്സരങ്ങളും സംഘടിപ്പിച്ചിട്ടുണ്ട്. വടംവലി, കസേരകളി, അത്തപ്പൂവിടൽ, വഞ്ചിപ്പാട്ട് എന്നീ മത്സരങ്ങളാണ് നടത്തുക. മാസ്ഡ്രില്ലിൽ പങ്കെടുക്കാതിരിക്കുകയോ, മത്സരത്തിൽ വള്ളം ചൂടിക്കാൻ ശ്രമിക്കുകയോ ചെയ്താൽ ബോണസ് തുകയുടെ 50% വരെ കട്ട് ചെയ്യുമെന്ന് ഭാരവാഹികൾ പറഞ്ഞു.

വ്യാവസായിക ട്രെയിനിംഗ്

ചേർത്തല: ഗുരുദർശനം വ്യാവസായിക ഗ്രൂപ്പും ബോബി ചെമ്മണ്ണൂർ ഇന്‍റർനാഷണൽ ഗ്രൂപ്പും സംയുക്തമായി സംഘടിപ്പിച്ച വ്യാവസായിക ട്രെയിനിംഗ് പ്രോഗ്രാം മന്ത്രി പി. പ്രസാദ് ഉദ്ഘാടനം ചെയ്തു. ഇതിനോടനുബന്ധിച്ച് 10 ലക്ഷം തെങ്ങിൻതൈ വിതരണവും ഒരു കോടിയിലധികം ഫലവൃക്ഷത്തൈകൾ നട്ടുപിടിപ്പിച്ച പള്ളം ശങ്കറിന് ഇന്ത്യൻ കർമരത്ന അവാർഡും നൽകി ആദരിച്ചു. ചേർത്തല റോട്ടറി ക്ലബ്ബ് ഹാളിൽ നടന്ന സമ്മേളനത്തിൽ ചെയർമാൻ ബിജു ദേവരാജ് അധ്യക്ഷത വഹിച്ചു. വ്യവസായി ബോബി ചെമ്മണ്ണൂർ മുഖ്യാതിഥിയായി. നഗരസഭാ ചെയർപേഴ്സൺ ഷേർളി ഭാർഗവൻ, കാർഷിക വികസന ബാങ്ക് പ്രസിഡന്‍റ് സി.കെ. ഷാജിമോഹൻ, ഗുരുദർശനം ഗ്രൂപ്പ് ചെയർമാൻ സുരാജ്കുമാർ, കൃഷ്ണകുമാർ എന്നിവർ പ്രസംഗിച്ചു.

ബിഎസ്എന്‍എല്ലിനെ തകര്‍ക്കുന്നതില്‍ ഉദ്യോഗസ്ഥ ലോബിക്കും പങ്കെന്ന്

എടത്വ: പൊതുമേഖല സ്ഥാപനമായ ബിഎസ്എന്‍എല്ലിനെ തളര്‍ത്തി സ്വകാര്യസ്ഥാപനങ്ങളെ വളര്‍ത്താന്‍ ഉദ്യോഗസ്ഥരുടെ ഭാഗത്തുനിന്ന് ശ്രമങ്ങള്‍ ഉണ്ടാകുന്നുവെന്ന് ആലപ്പുഴ ഡിസിസി വൈസ് പ്രസിഡന്‍റ് സജി ജോസഫ് ആരോപിച്ചു. കോണ്‍ഗ്രസ് തലവടി നോര്‍ത്ത് മണ്ഡലം കമ്മിറ്റി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഉപഭോക്താക്കളുടെ പരാതികളില്‍ തീര്‍പ്പ് കല്‍പ്പിക്കാതെ സ്വകാര്യമേഖലയിലേക്ക് അവരെ ചെന്നെത്തിക്കുന്നതില്‍ ഉദ്യോഗസ്ഥ അലംഭാവം നടക്കുന്നു. പുതിയ കണക്ഷനുകള്‍ എടുക്കാന്‍ വരുന്ന ഉപഭോക്താക്കളെ തിരിച്ചുവിടുന്ന സമീപനമാണ് ഉദ്യോഗസ്ഥരുടെ ഭാഗത്തുനിന്നുള്ളതെന്ന് സജി ജോസഫ് പറഞ്ഞു. മണ്ഡലം പ്രസിഡന്‍റ് വര്‍ഗീസ് കോലത്തുപറമ്പില്‍ അധ്യക്ഷത വഹിച്ചു. വര്‍ഗീസ് നാല്പത്തഞ്ചില്‍, ബിജു പാലത്തിങ്കല്‍, എം.എസ്. പ്രതാപന്‍, ഷാജി മാമ്മൂട്ടില്‍, വിജയ ബാലകൃഷ്ണന്‍, ജോര്‍ജുകുട്ടി, അശോകന്‍ കുന്നേല്‍, തങ്കച്ചന്‍ ചക്കാലയില്‍, മോനിച്ചന്‍ പൂവക്കാട്, മനോജ് അമ്പ്രയില്‍, ജോയി ശ്രാമ്പിക്കല്‍, മോനി ഉമ്മന്‍, യോഹന്നാന്‍ മാത്യു എന്നിവര്‍ പ്രസംഗിച്ചു.

ഹരിത പൂക്കളം ഒരുക്കാം, 10,000 രൂപ സമ്മാനം നേടാം

ആലപ്പുഴ: ശുചിത്വ മിഷന്‍റെ ആഭിമുഖ്യത്തിൽ ഇന്നു മുതൽ ഏഴു വരെ സംസ്ഥാനതലത്തിൽ ഓണപ്പൂക്കള മത്സരം സംഘടിപ്പിക്കുന്നു. മാലിന്യമുക്ത കേരളം എന്ന പ്രമേയത്തിലാണ് മത്സരം നടക്കുന്നത്. ശാസ്ത്രീയ മാലിന്യസംസ്കരണം, വേർതിരിക്കൽ, പുനഃചംക്രമണം, ഹരിതകർമ സേനയുടെ പ്രവർത്തനം തുടങ്ങിയ മാലിന്യസംസ്കാരണവുമായി ബന്ധപ്പെട്ട ആശയങ്ങൾ പൂക്കളത്തിലൂടെ ജനങ്ങളിലേക്ക് എത്തിക്കുകയാണ് ലക്ഷ്യം. ജില്ലാതല വിജയികൾക്ക് ഓരോരുത്തർക്കും 10,000 രൂപയും സംസ്ഥാനതല വിജയിക്ക് 25,000 രൂപയും സമ്മാനമായി നൽകും. പ്രകൃതിദത്ത വസ്തുക്കൾ മാത്രം ഉപയോഗിച്ച് പൂക്കളങ്ങൾ ഒരുക്കണം. പ്ലാസ്റ്റിക്, രാസവസ്തുക്കൾ, കൃത്രിമ അലങ്കാരങ്ങൾ എന്നിവ ഉപയോഗിക്കാൻ പാടില്ല. പങ്കെടുക്കുന്നവർ ശുചിത്വ മിഷന്‍റെ ഔദ്യോഗിക സോഷ്യൽ മീഡിയ പേജുകൾ പിന്തുടരണം. പൂക്കളത്തിന്‍റെ ചിത്രം [email protected] എന്ന വിലാസത്തിൽ ഡോക്യുമെന്‍റായി അയക്കണം. കൂടാതെപൂക്കളത്തിന്‍റെ ചിത്രം വ്യക്തിഗത സോഷ്യൽ മീഡിയ പേജിൽ അപ്‌ലോഡ് ചെയ്ത് ആലപ്പുഴ ജില്ലാ ശുചിത്വ മിഷൻ പേജ് ടാഗ് ചെയ്യണം. #suchitwapookkalam, #Harithaonam, #Suchitwamission എന്നീ ഹാഷ്‌ടാഗുകൾ ഉപയോഗിച്ചായിരിക്കും എൻട്രികൾ സ്വീകരിക്കുക. വിദഗ്ധസമിതി തെരഞ്ഞെടുത്ത എൻട്രികൾ സംസ്ഥാന ശുചിത്വ മിഷനിലേക്ക് അയയ്ക്കും. സംസ്ഥാനതല വിജയിയെ പിന്നീട് പ്രഖ്യാപിക്കും.

ഓണാട്ടുകരയുടെ ഓണസദ്യ ഒരുക്കാൻ പച്ചക്കറി വിളവെടുപ്പ്

മാങ്കാംകുഴി: ഓണാട്ടുകരയിൽ ഓണസദ്യ ഒരുക്കാൻ ജില്ലാ കൃഷി ത്തോട്ടത്തിൽ പച്ചക്കറി വിളവെടുപ്പ് ആരംഭിച്ചു. ഓണവിപണിക്ക് ഇന്നു തുടക്കമാവും. തഴക്കര പഞ്ചായത്തിലെ മാങ്കാംകുഴി കോട്ടമുക്കിലുള്ള നൂറേക്കർ ജില്ലാ കൃഷിത്തോട്ടത്തിലാണ് സ്വന്തം കാർഷിക ഉത്പന്നങ്ങളുമായി ഓണവിപണി ആരംഭിക്കുന്നത്. ഇതിനായി പച്ചക്കറിയുടെ വിളവെടുപ്പ് ഇന്നലെ ആരംഭിച്ചു. ഇന്നുമുതൽ ഉത്രാടം വരെയാണ് ഇവിടെ ഓണവിപണി ഒരുക്കുന്നത്. മറ്റ് എല്ലാ ദിവസങ്ങളിലും രാവിലെ പത്തുമുതൽ വൈകുന്നേരം അഞ്ചുവരെ സാധാരണ പച്ചക്കറി വിപണി സ്റ്റാളും പ്രവർത്തിക്കുന്നുണ്ട്. ഫാമിനോട് ചേർന്നാണ് വിപണിക്കായി പ്രത്യക വിൽപ്പന സ്റ്റാൾ പ്രവർത്തിക്കുന്നത്. പച്ചക്കറിക്കൊപ്പം കൃഷിക്കുവേണ്ട തൈകളും വിത്തുകളും ലഭിക്കുന്നുണ്ടെതാണ് ജില്ലാകൃഷിത്തോട്ടത്തിലെ പ്രത്യേകത. അതിനാൽ നാടൻ പച്ചക്കറികളും തൈകളും വിത്തുകളും വാങ്ങാൻ നിരവധിപ്പേർ ഇവിടെ എത്തുന്നുണ്ട്. വെള്ളരി, മത്തങ്ങ, കുമ്പളങ്ങ, ചുരക്ക, കപ്പ, വഴുതനങ്ങ, മുളക്, ഏത്തക്കുല, ചേന, ചേമ്പ്, പയർ തുടങ്ങിയവയുടെ വിളവെടുപ്പാണ് ഇപ്പോൾ നടക്കുന്നത്. വിളവെടുക്കുന്ന കാർഷിക ഉത്പന്നങ്ങൾ നേരിട്ട് വിപണി വഴി ആവശ്യക്കാർക്ക് വിലകുറച്ച് വില്പന നടത്തുകയാണ്. വരും ദിവസങ്ങളിൽ കൂടുതലായി പച്ചക്കറികളും കാർഷിക വിളകളും വിളവെടുക്കും. ഓണവിപണി ലക്ഷ്യമിട്ടും അല്ലാതയും ജില്ലാ കൃഷിത്തോട്ടത്തിലെ ജീവനക്കാരുടെയും തൊഴിലാളികളുടെയും അധ്വാനത്തിന്‍റെ ഫലമായാണ് പച്ചക്കറി കൃഷിയിൽ വലിയ നേട്ടം കൈവരിക്കുന്നത്. വിവിധ ഇനം വിത്തുകളും ഇവിടെ ഉൽപ്പാദിപ്പിക്കുന്നുണ്ട്, കൂടാതെ വിവിധ ഇനം ചെടികളുടെ തൈകളും ഫല വൃക്ഷത്തൈകളും ഇവിടെ ലഭ്യമാണ്. ഫാം സൂപ്രണ്ട് ബി സുനിൽകുമാർ, കൃഷി ഓഫീസർ ഹൃദ്യ വി. രജീന്ദ്രൻ, കൃഷി അസിസ്റ്റന്‍റുമാരായ രഞ്ജിത്ത്, ശ്യാംകുമാർ, നദിയ എന്നിവരുടെ മേൽനോട്ടത്തിലാണ് പച്ചക്കറി കൃഷി നടത്തുന്നത്.

സൈക്കിള്‍ അഗർബത്തി അഖണ്ഡ ജ്യോതി പ്രകാശിപ്പിച്ചു

ആലപ്പുഴ: പുന്നമട കായലിൽ നടന്ന 71-ാമത് നെഹ്‌റുട്രോഫി വള്ളംകളിയുടെ ഭാഗമായുള്ള അഖണ്ഡ ജ്യോതി പ്രകാശനം മന്ത്രി മുഹമ്മദ് റിയാസ് നിർവഹിച്ചു. വള്ളംകളിയുടെ ഗോൾഡ് സ്‌പോൺസറും രാജ്യത്തെ പ്രമുഖ അഗർബത്തി ബ്രാൻഡുമായ സൈക്കിൾ പ്യുവർ അഗർബത്തിയാണ് വള്ളംകളി ഉദ്ഘാടനത്തോടനുബന്ധിച്ച് ആറടി നീളമുള്ള അഖണ്ഡ ജ്യോതി ഒരുക്കിയത്. കൃഷിമന്ത്രി പി. പ്രസാദ്, സിംബാബ്‌വേ ഡെപ്യൂട്ടി മന്ത്രി രാജേഷ് ഇന്ദുകാന്ത് മോദി എന്നിവരും ചടങ്ങിൽ പങ്കെടുത്തു. ‌ ജില്ലാ കളക്ടറും നെഹ്‌റുട്രോഫി ബോട്ട് റേസ് സൊസൈറ്റി ചെയർമാനുമായ അലക്‌സ് വർഗീസ്, ആലപ്പുഴ സബ് കളക്ടറും എൻടിബിആർ സൊസൈറ്റി സെക്രട്ടറിയുമായ സമീർ കിഷൻ എന്നിവർ മുഖ്യാതിഥികളായി. ഇന്ത്യയുടെ സമ്പന്നമായ പാരമ്പര്യവും സാംസ്കാരിക വൈവിധ്യവും ആഘോഷിക്കുന്നതിൽ സൈക്കിൾ പ്യുവർ അഗർബത്തി എക്കാലവും വിശ്വസിക്കുന്നതായി മാനേജിംഗ് ഡയറക്ടർ അർജുൻ രംഗ പറഞ്ഞു. സൈക്കിൾ പ്യുവർ അഗർബത്തിയുടെ ലോഗോ തുഴച്ചിൽ ജഴ്‌സികളിലും നെഹ്‌റു ട്രോഫിയിലും പ്രദർശിപ്പിച്ചിരുന്നു.

തൊഴിലാളിയുടെ കൂലി മേലോട്ട്, കർഷകന് വരുമാനം താഴോ‌ട്ട്

ചമ്പക്കുളം: കുട്ടനാട്ടിൽ ഇത് രണ്ടാം കൃഷിയുടെ കാലം. പല കാരണങ്ങൾ കൊണ്ടും രണ്ടാം കൃഷി ഉപേക്ഷിച്ചവർ പുഞ്ച കൃഷിയുടെ ഒരുക്കത്തിലാണ്. എന്നാൽ, കാർഷിക മേഖലയിലെ കൂലി സാധാരണ കർഷകർക്ക് താങ്ങാനാവാത്തവിധം അവന്‍റെ കൃഷിച്ചെലവ് വർധിപ്പിച്ചിരിക്കുന്നു. കുട്ടനാട്ടിലെ കാർഷിക മേഖലയിൽ ജോലി ചെയ്യുന്ന കർഷകത്തൊഴിലാളികളുടെ കൂലി കാലാകാലങ്ങളിൽ കൂട്ടിനല്ക്കാൻ വേണ്ടപ്പെട്ടവർ താത്പര്യം കാട്ടുന്നത് അഭിനന്ദനാർഹമാണ്. ഏറ്റവും അവസാനമായി കാർഷിക മേഖലയിലെ വർധിപ്പിച്ച കൂലി പ്രകാരം പുരുഷ തൊഴിലാളിക്ക് 1100 രൂപയും സ്ത്രീ തൊഴിലാളിക്ക് 650 രൂപയുമാണ്. ഇന്നത്തെ വിലസൂചികയുടെ അടിസ്ഥാനത്തിൽ ഇത് ഒരു അമിതകൂലി അല്ല എന്നതാണ് വാസ്തവം. 1975ൽ കുട്ടനാട്ടിൽ ഒരു പുരുഷ തൊഴിലാളിക്ക് 10-15 രൂപ വരെ ആയിരുന്നു. 1975ൽ ഒരുപറ നെല്ലിന് കിട്ടിയിരുന്ന ഏകദേശവില ഏഴു രൂപയായിരുന്നു. ഇന്നത്തെ നെല്ലുവില അടിസ്ഥാനപ്പെടുത്തിയാൽ ഒരുപറ നെല്ലിന് (ഒരു പറ= 6 കിലോ) കിട്ടുന്ന വില 168 രൂപയാണ്. അതായത് ഒരു പുരുഷ തൊഴിലാളിയുടെ കൂലി 15 രൂപയിൽനിന്നു 1100 ലേക്കു മാറുകയും സ്ത്രീ തൊഴിലാളിയുടേത് ഏഴു രൂപയിൽനിന്നു 650ലേക്ക് ഉയരുകയും ചെയ്തപ്പോൾ നെല്ലുവില ഏഴു രൂപയിൽനിന്ന് വെറും 168 രൂപ മാത്രമായിട്ടാണ് ഉയർന്നിട്ടുള്ളത്. സഹായധനം കുറച്ചു പുരുഷ തൊഴിലാളിയുടെ കൂലി 73 ഇരട്ടിയും സ്ത്രീ തൊഴിലാളിയുടേത് 92 ഇരട്ടിയും വർധിച്ചപ്പോൾ നെല്ലുവില വർധിച്ചത് 28 ഇരട്ടി മാത്രമാണ്. അതായത് കർഷകന്‍റെ കൂലിച്ചെലവ് നെല്ലുവിലയുടെ പതിൻമടങ്ങായിട്ട് വർധിച്ചു. അതുപോലെ തന്നെ മറ്റ് കൃഷിച്ചെലവുകളും. കാർഷിക മേഖലയിൽ ചുമട്ടു കൂലിയും കർഷകത്തൊഴിലാളികളുടെ കൂലിയും വർധിപ്പിക്കുന്നതിന് ഒപ്പവും ആനുപാതികമായും നെല്ലുവിലയും വർധിപ്പിക്കുന്ന ഒരുരീതി നടപ്പിൽ വരുത്തണം. പലവർഷങ്ങളായി നെല്ലിന്‍റെ താങ്ങുവില കേന്ദ്രസർക്കാർ വർധിപ്പിക്കുന്നതനുസരിച്ച്‌ സംസ്ഥാന സർക്കാർ നല്കുന്ന സഹായധനം കുറച്ച് കൊണ്ടുവരുന്നതിനാൽ കഴിഞ്ഞ ആറു വർഷമായി നെല്ലുവിലയിൽ യാതൊരു മാറ്റവും ഉണ്ടായിട്ടില്ല. എന്നാൽ, ഒന്നിലധികം തവണ തൊഴിലാളികളുടെ കൂലി വർധിപ്പിക്കുകയും ചെയ്തു. യാതൊരു മാനദണ്ഡവും പാലിക്കാതെ ഉത്തരവാദിത്വപ്പെട്ടവർ കൂലി കൂട്ടാൻ വേണ്ട തീരുമാനം എടുക്കുമ്പോൾ എന്തേ ആനുപാതികമായി നെല്ലുവില ഉയർത്തുന്നതിനുള്ള നടപടി സ്വീകരിക്കുന്നില്ല എന്നതാണ് കർകർ ഉന്നയിക്കുന്ന ആക്ഷേപം. തൊഴിലാളിയുടെ മാത്രം ജീവിതനിലവാരം ഉയർത്തിയാൽ മതിയോ? കാര്യം ഓർക്കണം ഈ ചോദ്യം കർഷകർ ഉയർത്താൻ തുടങ്ങിയിട്ട് നാളേറെയായി. കൃഷി ഉണ്ടെങ്കിലേ തൊഴിലാളികളെ ആവശ്യം വരൂ എന്ന കാര്യം ഓർക്കണം. കഴിഞ്ഞ പല വർഷങ്ങളായും നെല്ലുവില സ്ഥിരമായി നില്ക്കുമ്പോൾ തൊഴിലാളിയുടെ കൂലി വർധിപ്പിക്കാൻ ശ്രമിക്കുന്നവർ സത്യത്തിൽ തൊഴിലാളികളുടെയും കർഷകരുടെയും ശത്രുക്കളാണ് എന്ന് മനസിലാക്കണം. അന്യായമായി കൂലി കൂട്ടുമ്പോൾ ആനുപാതികമായി നെല്ലുവില കൂടുന്നില്ലെങ്കിൽ തൊഴിലാളികളുടെ തൊഴിൽ ദിനങ്ങൾ വെട്ടിച്ചുരുക്കാൻ കർഷകർ നിർബന്ധിതരാകുന്നു. കർഷകത്തൊഴിലാളികളുടെ കൂലിയെക്കാൾ അധികം ഭാരം കർഷകനിൽ വരുത്തിവയ്ക്കുന്നത് അന്യായമായ നെല്ല് ചുമട്ട് കൂലിയാണ്. മറ്റ് ഒരു മേഖലയിലും നിലവിലില്ലാത്ത കിന്‍റലിന് 120 മുതൽ 140 വരെ കൂലി നല്കാൻ വിധിക്കപ്പെട്ട നെൽകർഷകന്‍റെ ദുരിതത്തിന് ആക്കം കൂട്ടുന്ന ചുമട്ടുകൂലിക്കാര്യത്തിൽ ഒരു പുനർചിന്ത വേണ്ടിയിരിക്കുന്നു. ഭൂമിതരം മാറ്റത്തിലൂടെ ലഭിക്കുന്ന ഫണ്ട് നെൽകർഷക സംരക്ഷണത്തിനുവേണ്ടി വിനിയോഗിക്കും എന്നു പറഞ്ഞ സർക്കാർ എന്തേ കോടികൾ ഈ വഴിക്ക് ലഭിച്ചിട്ടും നെല്ലുവിലവർധിപ്പിച്ച് നല്കാനോ, കർഷകർക്ക് മറ്റ് ആനുകൂല്യങ്ങൾ നല്കാനോ ശ്രമിക്കുന്നില്ല. തൊഴിലാളി വർഗം സംഘടിതരും കർഷകർ അസംഘടിതരുമായി നിലനില്ക്കുന്നതിന്‍റെ ഒരു പരിണിത ഫലം കൂടിയാണ് നെല്ല് വില കൂടാതെ കൂലി കൃത്യമായ ഇടവേളകളിൽ കൂടുന്നത്. ഇതിന് മാറ്റം വരണമെന്ന് കർഷകർ ആവശ ്യപ്പെടുന്നു. കൂലിക്കൊപ്പം അല്ലെങ്കിലും ന്യായമായ നിരക്കിലെങ്കിലും നെല്ലുവില കൂടണം എന്നാണ് കർഷകരുടെ ആഗ്രഹം.

സപ്ലൈകോ ഓണം ഫെയർ

ചേർത്തല: സപ്ലൈകോയുടെ നേതൃത്വത്തിൽ തുടങ്ങിയ ഓണം ഫെയർ-2025 മന്ത്രി പി. പ്രസാദ് ഉദ്ഘാടനം ചെയ്തു. ഇരുമ്പുപാലത്തിനു സമീപമുള്ള പീപ്പിൾ ബസാറിൽ തുടങ്ങിയ ഓണം ഫെയറിൽ 13 ഇനം ഭക്ഷ്യവസ്തുക്കൾ സബ്സിഡി നിരക്കിൽ വിതരണം ചെയ്യുന്നത് കൂടാതെ പ്രമുഖ ബ്രാൻഡുകളുടെ ഉത്പന്നങ്ങൾക്ക് 10 ശതമാനം മുതൽ 50 ശതമാനം വരെ വിലക്കുറവിൽ ലഭ്യമാണ്. നഗരസഭാ ചെയർപേഴ്സൺ ഷേർളി ഭാർഗവൻ അധ്യക്ഷത വഹിച്ചു. വൈസ് ചെയർമാൻ ടി.എസ്. അജയകുമാർ, താലൂക്ക് സപ്ലൈ ഓഫീസർ വി. സുരേഷ്, ജില്ലാ പഞ്ചായത്ത് വൈസ് പ്രസിഡന്‍റ് എൻ.എസ്. ശിവപ്രസാദ്, വാർഡ് കൗൺസിലർ മിത്ര വിന്ദാഭായി, കെ.എസ്. സലീം, എം.ഇ. രാമചന്ദ്രൻ, സിറിയക്ക് കാവിൽ, വി.എസ്. ജബ്ബാർ, ജയിംസ് കണ്ണാട്ട്, സൗമ്യ സോമനാഥൻ എന്നിവർ സംസാരിച്ചു.

ഫൺ വണ്ടർ, ത്രില്ലർ; വില്ലേജുകാർക്കിതു മധുരപ്രതികാരം

മങ്കൊമ്പ് : കഴിഞ്ഞ വർഷത്തെ നെഹ്റു ട്രോഫി വള്ളംകളിക്കുശേഷം നിറഞ്ഞ കണ്ണുകളോടെയാണ് കൈനകരി വില്ലേജ് ബോട്ട് ക്ലബ് താരങ്ങൾ പുന്നമടക്കായൽ വിട്ടത്. ചുണ്ടിനും കപ്പിനുമിടയിലാണ് അന്നവർക്ക് വള്ളംകളിയിലെ ഓസ്‌കർ ആയ നെഹൃട്രോഫി നഷ്ടമായത്. അന്നു കൈനകരിയെന്ന ഗ്രാമമൊന്നാകെ താരങ്ങൾക്കൊപ്പം കണ്ണീരൊഴുക്കിയിരുന്നു. പക്ഷേ, അന്നു വില്ലേജ് ബോട്ട് ക്ലബ് താരങ്ങളും, നാട്ടുകാരും ഒരു തീരുമാനമെടുത്തിരുന്നു. പുന്നമടക്കായലിൽ ഇനിയൊരു ജലപ്പൂരം നടന്നാൽ അന്നു ട്രോഫി തങ്ങൾ കൈനകരിയിലെത്തിച്ചിരിക്കുമെന്ന്. ആ ദൃഢനിശ്ചയമാണ് യാഥാർഥ്യമായിരിക്കുന്നത്. വില്ലേജ് ബോട്ട് ക്ലബ് ഇതാദ്യമായല്ല നെഹ്റു ട്രോഫി തങ്ങളുടെ നാട്ടിലെത്തിക്കുന്നത്. 1986, 87 വർഷങ്ങളിലും ടീം ട്രോഫിയിൽ മുത്തമിട്ടിരുന്നു. സണ്ണി അക്കരക്കളമാണ് അന്നു ടീം ക്ലബിനെ നയിച്ചിരുന്നത്. പിന്നീട് പല വർഷങ്ങളിലും വില്ലേജ് ബോട്ട് ക്ലബ് നെഹ്റു ട്രോഫിയിൽ മത്സരിക്കാനെത്തിയിരുന്നെങ്കിലും വിജയം കൈപ്പിടിയിലാക്കാനായിരുന്നില്ല. കടുത്ത സാമ്പത്തിക പ്രതിസന്ധിയിലാണ് ടീം പരിശീലനം നടത്തിയിരുന്നത്. പക്ഷേ, ഒരു നാടു മുഴുവൻ കട്ടയ്ക്കു കൂടെനിന്നതോടെ പരാധീനതകൾ വഴിമാറി. വള്ളംകളിക്കു അന്യമായിക്കൊണ്ടിരിക്കുന്ന ഒരു നാടിന്‍റെ ഒത്തൊരുമ ഇന്നും കാത്തുസൂക്ഷിക്കുന്ന അപൂർവം ക്ലബുകളിലൊന്നാണിത്. നാട്ടിലെ കുട്ടികൾ മുതൽ വയോധികർ വരെ ക്ലബിനായി പ്രാർഥനയോടെ കഴിയുകയായിരുന്നു, കഴിഞ്ഞ ഒരുമാസത്തിലേറെയായി. ഇവരുടെ പ്രാർഥനകൾക്കും പരിശ്രമങ്ങൾക്കുമാണ് വെള്ളിക്കപ്പിലൂടെ താരങ്ങൾ മറുപടി കൊടുത്തത്. കൈനകരിക്കിന്നലെ ആഘോഷത്തിമർപ്പിന്‍റെ രാവായിരുന്നു. കാലങ്ങളുടെ കാത്തിരിപ്പിനു ഫലംകണ്ടതിന്‍റെ ആഹ്‌ളാദത്തിലായിരുന്നു നാട്ടുകാർ. മഴ നനഞ്ഞ് ചുണ്ടൻ ഒന്നാം ഹീറ്റ്സ് ആലപ്പുഴ: ചുണ്ടൻവള്ളങ്ങളുടെ മത്സരത്തോടെ തുള്ളികുത്തി പെയ്യും മഴയായി. അതുവരെയും മേഘാവൃതമെങ്കിലും രാവിലെ മത്സരങ്ങൾ തുടങ്ങുമ്പോൾ മഴ പെയ്തതുപോലെ ചുണ്ടൻ വള്ളങ്ങളുടെ മത്സരാരംഭത്തിലും മഴയായി. ആദ്യ ഹീറ്റ്സ് കഴിഞ്ഞതോടെ സ്വിച്ചിട്ടപോലെ മഴ നിന്നു. കാണികൾക്കും കളിക്കാർക്കും ഒപ്പം മഴയും ആർത്തലച്ചു സന്തോഷം പങ്കുവച്ച പ്രതീതി.

ആവേശം ചോരാതെ ഹരിത വള്ളംകളി

ആലപ്പുഴ: നെഹ്റു ട്രോഫി വള്ളംകളിയോടനുബന്ധിച്ച് പുന്നമട കായലും സമീപ പ്രദേശങ്ങളും മാലിന്യമുക്തമായി സൂക്ഷിക്കാന്‍ ആലപ്പുഴ നഗരസഭ നടത്തിയത് കൃത്യമായ ആസൂത്രണം. നെഹ്‌റുട്രോഫി ജലോത്സവം ഇക്കുറി പൂര്‍ണമായും ഹരിതചട്ടങ്ങള്‍ പാലിച്ചാണ് സംഘടിപ്പിച്ചത്. വള്ളംകളി ആവേശത്തിനിടയിലും നാടിന്‍റെ വൃത്തിക്ക് പ്രധാന പ്രാധാന്യം നല്‍കുകയായിരുന്നു ആലപ്പുഴ നഗരസഭയുടെ ലക്ഷ്യം. താത്കാലിക പാലം മുതല്‍ പുന്നമട സ്റ്റാര്‍ട്ടിംഗ് പോയിന്‍റ് വരെയും കെഎസ്ആര്‍ടിസിക്കു കിഴക്കുവശവും ഗ്രീന്‍ സോണ്‍ ആയി പ്രഖ്യാപിച്ചു. ഗ്രീന്‍ സോണില്‍ ഒരു തരത്തിലുള്ള പ്ലാസ്റ്റിക് ഉത്പന്നങ്ങളും അനുവദിച്ചില്ല. ഗ്രീന്‍ സോണില്‍ വള്ളംകളി കാണാന്‍ എത്തുന്നവര്‍ ഗ്രീന്‍ ചെക്ക് പോസ്റ്റ് വഴിയാണ് നെഹ്റു പവലിയനില്‍ പ്രവേശിച്ചത്. യാതൊരുവിധ മാലിന്യങ്ങളും പ്ലാസ്റ്റിക്കുകളും ഉള്ളില്‍ കടക്കാതിരിക്കാന്‍ ഗ്രീന്‍ ചെക്ക് പോസ്റ്റില്‍ നില്‍ക്കുന്ന നഗരസഭ ജീവനക്കാരും സന്നദ്ധപ്രവര്‍ത്തകരും സദാസമയം നിരീക്ഷിച്ചു. വാട്ടര്‍ ബോട്ടിലുകളും, വലിച്ചെറിയപ്പെടാവുന്ന ഭക്ഷണ പായ്ക്കറ്റുകളും ഇവിടെ പൂര്‍ണമായും നിരോധിക്കുകയും ചെയ്തു. കുടുംബാംഗങ്ങളുമായി എത്തിയവര്‍ക്ക് ഇതില്‍ ചെറിയ ഇളവു നല്‍കി. ഇവര്‍ക്ക് ഗ്രീന്‍ ചെക്ക് പോസ്റ്റില്‍ 20 രൂപ അടച്ച് സ്റ്റിക്കര്‍ പതിച്ചു നല്‍കി. തിരികെവന്ന് സ്റ്റിക്കര്‍ അടങ്ങുന്ന ബോട്ടിലോ, ഫുഡ് പാക്കറ്റോ ഏല്‍പ്പിച്ചവര്‍ക്ക് 20 രൂപ തിരികെ നല്‍കി. ഗ്രീന്‍ ചെക്ക് പോസ്റ്റില്‍ ആലപ്പുഴ നഗരസഭയും ജില്ലാ ശുചിത്വമിഷനും ചേര്‍ന്ന് പ്ലാസ്റ്റിക് ബാഗില്‍ ഫുഡ് പാക്കറ്റുകളും പേഴ്‌സ് മുതലായ അവശ്യവസ്തുക്കള്‍ കൊണ്ടുവന്നവര്‍ക്ക് നല്‍കാനായി തുണി സഞ്ചികളും സജ്ജമാക്കിയിരുന്നു. പവലിയനിലും ഗ്യാലറിയിലും കായല്‍ തീരത്തും ഗ്രീന്‍ പ്രോട്ടോക്കോള്‍ ഉറപ്പു വരുത്തുന്നതിനായി 500 ല്‍ അധികം ഗ്രീന്‍ വോളണ്ടിയര്‍മാരെയാണ് നിയോഗിച്ചത്. ഗ്രീന്‍ സോണുകളില്‍ 20 മീറ്റര്‍ അകലത്തില്‍ ബോട്ടില്‍ ബിന്നുകളും നെഹ്‌റു പവലിയനില്‍ ഗ്ലാസ് ബോട്ടിലും മറ്റ് ഇടങ്ങളില്‍ വാട്ടര്‍ കിയോസ്‌ക്കുകളും സ്ഥാപിച്ചു.

നെഹ്‌റു ട്രോഫിക്ക് 10 കോടി: മന്ത്രി മുഹമ്മദ് റിയാസ്

ആലപ്പുഴ: നവകേരള സദസിന്‍റെ ഭാഗമായി നെഹ്‌റു ട്രോഫി പവലിയന് ഏഴു കോടി രൂപ അനുവദിച്ചതായി ടൂറിസം വകുപ്പ് മന്ത്രി അഡ്വ. പി.എ. മുഹമ്മദ് റിയാസ് പറഞ്ഞു. പി.പി. ചിത്തരഞ്ജന്‍ എംഎല്‍എ രണ്ടു കോടി രൂപയും ടൂറിസം വകുപ്പ് ഒരു കോടി രൂപയും അനുവദിച്ചിട്ടുണ്ട്. ഇത്തവണ അങ്ങനെ ആകെ 10 കോടി രൂപയാണ് വള്ളംകളിയ്ക്കായി സര്‍ക്കാര്‍ അനുവദിച്ചിരിക്കുന്നത്. ചരിത്രത്തിലാദ്യമായാണ് സംസ്ഥാന സര്‍ക്കാര്‍ വള്ളംകളിക്കായി ഇത്രയും തുക അനുവദിക്കുന്നത്. കേരളത്തിന്‍റെ പ്രധാനപ്പെട്ട ടൂറിസം ഉത്പന്നമായി നെഹ്‌റു ട്രോഫി വള്ളം കളിയെ മാറ്റും എന്നും എഴുപത്തിയൊന്നാമത് നെഹ്‌റു ട്രോഫി വള്ളം കളി നെഹ്‌റു പവലിയനില്‍ ഉദ്ഘാടനം ചെയ്തു മന്ത്രി പറഞ്ഞു. കേരളത്തിന്‍റെ ടൂറിസം മേഖലയ്ക്ക് വലിയ കുതിപ്പാകുന്ന ഈ വള്ളം കളികണ്ണിലെ കൃഷ്ണമണിപോലെ സംസ്ഥാന സര്‍ക്കാര്‍ സംരക്ഷിക്കും. ഇതിനോടൊപ്പം അധികം വൈകാതെതന്നെ ചാമ്പ്യന്‍സ് ബോട്ട് ലീഗ് ആലപ്പുഴയില്‍നിന്നുതന്നെയായിരിക്കും ആരംഭിക്കുക എന്നും മന്ത്രി പറഞ്ഞു. എട്ടു വള്ളങ്ങളില്‍ തുടങ്ങിയ ഈ വള്ളംകളിയില്‍ ഇന്ന് പങ്കെടുക്കുന്നത് 21 ചുണ്ടന്‍ വള്ളങ്ങള്‍ ഉള്‍പ്പെടെ 71 വള്ളങ്ങളാണ്. ഇത് ഏറെ ആവേശകരമായ അനുഭവമാണ്. ഈ വള്ളംകളിയെ വലിയ പ്രാധാന്യത്തോടെയാണ് സംസ്ഥാന സര്‍ക്കാര്‍ കണ്ടിട്ടുള്ളത്. ജില്ലാ ഭരണകൂടവും ടൂറിസം വകുപ്പും സംയുക്തമായി 30 ടണ്‍ മാലിന്യം വേമ്പനാട് കായലില്‍നിന്നു നീക്കം ചെയ്തത് മാതൃകാപരമാണെന്നും മന്ത്രി പറഞ്ഞു. കേരളം ലോകത്തിനു കാഴ്ചവയ്ക്കുന്ന മഹത്തായൊരു ദൃശ്യാനുഭവമാണ് പുന്നമടക്കായലിലെ ഈ ജലോത്സവമെന്ന് ചടങ്ങില്‍ അധ്യക്ഷത വഹിച്ച കൃഷി വകുപ്പ് മന്ത്രി പി. പ്രസാദ് പറഞ്ഞു. ഒരു ജനതയുടെ അധ്വാനത്തിന്‍റെയും കൂട്ടായ്മയുടെയും പ്രതീകം കൂടിയാണ് ഈ ജലോത്സവമെന്നും അദ്ദേഹം പറഞ്ഞു. വള്ളങ്ങളുടെ മാസ്ഡ്രില്‍ സിംബാബ്‌വേ വ്യവസായ വാണിജ്യ ഡെപ്യൂട്ടി മന്ത്രി രാജേഷ് കുമാര്‍ ഇന്ദുകാന്ത് മോദി ഫ്‌ലാഗ് ഓഫ് ചെയ്തു. വള്ളംകളി മേഖലയ്ക്കു വീശിഷ്ട സംഭാവനകള്‍ നല്‍കിയ മുന്‍ എംഎല്‍എ സി.കെ. സദാശിവന്‍, കെ.എം അഷ്റഫ്, ഉമാ മഹേശ്വരന്‍ ആചാരി എന്നിവരെ മന്ത്രിമാരായ മുഹമ്മദ് റിയാസും പി. പ്രസാദും ജില്ലാ ഭരണകൂടവും ചേര്‍ന്ന് ആദരിച്ചു. മാസ്റ്റര്‍ ഓഫ് സെറിമണിക്ക് നെഹ്റു ട്രോഫി എക്‌സിക്യൂട്ടീവ് കമ്മിറ്റി അംഗം ആര്‍.കെ. കുറുപ്പ് നേതൃത്വം നല്‍കി. ചടങ്ങില്‍ ഓസ്‌ട്രേലിയ വൈസ് കോണ്‍സുല്‍ കാല്‍വിന്‍ ബോവെന്‍, ഭൂട്ടാന്‍ കോണ്‍സുല്‍ ജനറല്‍ ഓഫ് ഇന്ത്യ ജി. അജിത്ത് കുമാര്‍ എന്നിവര്‍ വിശിഷ്ട സാന്നിധ്യമായി. കൊടിക്കുന്നില്‍ സുരേഷ് എംപി, എംഎല്‍എ മാരായ പി.പി. ചിത്തരഞ്ജന്‍, എച്ച്. സലാം, തോമസ് കെ. തോമസ്, യു. പ്രതിഭ, ജില്ലാ കളക്ടര്‍ അലക്‌സ് വര്‍ഗീസ്, നഗരസഭാധ്യക്ഷ കെ.കെ. ജയമ്മ, സബ് കളക്ടര്‍ സമീര്‍ കിഷന്‍ തുടങ്ങിയവര്‍പങ്കെടുത്തു.

പായുന്ന വള്ളങ്ങൾ, നീളുന്ന ആരവങ്ങൾ

ആലപ്പുഴ: ചുണ്ടൻവള്ളങ്ങൾക്കൊപ്പം കരകളിലെ ആരവങ്ങളും മുന്നോട്ടുപായും. പുന്നമടയിലെത്തി ആ കാഴ്ച കാണാൻ കഴിയാത്തവർക്കായി കമന്‍റേറ്റർമാർ വരച്ചിടുന്നത് ഗാലറിയിലും കർണസുഖം. പീപ്പികളുടെയും ആരവങ്ങളുടെയും നടുവിൽ വാശിയേറിയ വള്ളയോട്ടം. അതിൻ്റെ ദൃശ്യവിരുന്ന് വാക്കുകളിലൂടെ പകർന്ന് കമന്‍റേറ്റർമാർ. ഡപ്യൂട്ടി കളക്ടറും പുഞ്ചക്കൃഷി സ്പെഷൽ ഓഫിസറുമായിരുന്ന എൻ.പി. ചെല്ലപ്പൻ നായരിൽനിന്നാണു കമന്‍ററിയെന്ന ആശയം ഓളമിളക്കിയത്. അദ്ദേഹം ആകാശവാണിയിലെ നാടകകൃത്തും റേഡിയോ നാടക അഭിനേതാവുമായിരുന്നു. വള്ളംകളിയുടെ മുഖ്യ സംഘാടകരിൽ ഒരാൾ. ആകാശവാണിയിലെ സുഹൃത്തുക്കളോട് ദൃക്സാക്ഷി വിവരണമെന്ന ആശയം അദ്ദേഹം പങ്കുവച്ചു. കുട്ടനാട്ടുകാരനായ നാഗവള്ളി ആർ.എസ്. കുറുപ്പ് പൂർണ പിന്തുണ നൽകി. അവിടെനിന്നാണു വള്ളംകളി കമന്‍ററിയെന്ന കലാരൂപത്തിന്‍റെ തുടക്കം. ഇന്നു ദൃശ്യവിരുന്നൊരുക്കുന്ന കാലത്ത് കമന്‍ററി കാര്യമല്ലെങ്കിലും പുന്നമടയുടെ ഗാലറികളിൽ അതു വിതയ്ക്കുന്ന ആവേശം ആവശ്യംതന്നെ. നെഹ്റുവിന് പുഷ്പാർച്ചന, വിഎസിന് ആദരം ആലപ്പുഴ: നെഹ്റു പ്രതിമയിൽ പുഷ്പാർച്ചന നടത്തിയായിരുന്നു ഉദ്ഘാടനച്ചടങ്ങിന്‍റെ തുടക്കം. പൊതുമരാമത്ത്, ടൂറിസം മന്ത്രി മുഹമ്മദ് റിയാസ് എത്തിയതോടെയാണ് ഉദ്ഘാടനച്ചടങ്ങ് ആരംഭിച്ചത്. നെഹ്റു പവലിയനിലെ ജവഹർലാൽ നെഹ്റുവിന്‍റെ പൂർണകായ പ്രതിമയ്ക്കു മുന്നിൽ മന്ത്രി പുഷ്പാർച്ചന നടത്തി. തുടർന്നാണ് പതാക ഉയർത്തൽ ചടങ്ങ് മന്ത്രി റിയാസ് നിർവഹിച്ചത്. കൃഷി മന്ത്രി പി. പ്രസാദ് അധ്യക്ഷനായി. ദീപം തെളിക്കൽ ചടങ്ങിനു മുമ്പ് അന്തരിച്ച മുൻ മുഖ്യമന്ത്രി വി.എസ്. അച്യുതാനന്ദനോടുള്ള ആദരസൂചകമായി ഒരു നിമിഷം മൗനാചരണം നടത്തിയായിരുന്നു ഉദ്ഘാടനച്ചടങ്ങിന്‍റെ ആരംഭം. ദൃശ്യ സജിയും സുമയയും ഈശ്വരപ്രാർഥന നടത്തി. കർമോത്സുകരായി ഹരിതകർമസേന ആലപ്പുഴ: ഇത്തവണത്തെ നെഹ്റു ട്രോഫി വള്ളംകളിയുടെ ഭാഗമായുള്ള ശുചീകരണ പ്രവർത്തനങ്ങൾക്ക് ഹരിതകർമസേന പ്രവർത്തകരുടെ പ്രവർത്തനങ്ങൾ പ്രശംസനീയം. വള്ളംകളി കാണാൻ എത്തിയവരുടെ പ്ലാസ്റ്റിക് കുപ്പി, പ്ലാസ്റ്റിക് ബാഗ് തുടങ്ങിയവയുടെ ഉപയോഗം കർശനമായി നിയന്ത്രിക്കുന്നതിൽ ഹരിതകർമ സേന വിജയിച്ചു. മുൻ വർഷങ്ങളിൽ വള്ളംകളി കഴിയുമ്പോൾ ടൺകണക്കിന് പ്ലാസ്റ്റിക് മാലിന്യങ്ങളാണ് പുന്നമടക്കായലിലും കരയിലും മറ്റും ഉണ്ടാകുന്നത്. എന്നാൽ, ഇത്തവണ ഹരിതകർമ സേനയുടെ ആത്മാർഥമായ പ്രവർത്തനത്തിൽ വള്ളംകളിക്കു ശേഷവും കായലും കായൽക്കരയും പ്ലാസ്റ്റിക് മാലിന്യമുക്തമാക്കി സംരക്ഷിക്കാൻ ഹരിതകർമസേനയ്ക്കു സാധിച്ചു. ആലപ്പുഴ മുനിസിപ്പാലിറ്റിയുടെ പരിധിയിലെ മുഴുവൻ ഹരിതകർമസേനയും പുന്നമടക്കായലും കായൽക്കരയും മാലിന്യമുക്തമാക്കാൻ അണിനിരന്നു. ട്രയൽ റൺ കിടുക്കൻ ആലപ്പുഴ: ഒറ്റക്കൊമ്പൻമാർ വൺ ബൈ വൺ വരുന്നതുപോലെ ട്രയൽ റൺ. മാസ്ഡ്രില്ലിൽ അണിനിരക്കാൻ സ്റ്റാർട്ടിംഗ് പോയിന്‍റിൽനിന്ന് ഫുൾഫോമിൽ തുഴഞ്ഞുള്ള ഒറ്റയാൻ വരവു കാണേണ്ട കാഴ്ചതന്നെ. മത്സരത്തിനു മുമ്പുള്ള ആ വരവ് ഇടംവലം നോക്കാതുള്ള വരവുതന്നെ. നെഹ്റു പവലിയന്‍റെ മുനമ്പത്തിരുന്ന് കാണുന്ന കാഴ്ച ജലോപരിതലത്തിലൂടെ ആയിരം ചിറകുള്ള അരയന്നം നീന്തിവരുന്ന പോലെ മനോഹരം. നെഞ്ചിടിക്കുന്ന പോലെയുള്ള ഇടിത്താളത്തിൽ മുഴുകിയുള്ള മുഴങ്ങുന്ന ഹർഷാരവത്തിൽ പുന്നമട പൊൻതിര കായലായി. ചുണ്ടൻവള്ളങ്ങളുടെ നാലു ട്രാക്കിലൂടെയുള്ള മത്സരയോട്ടത്തിൽ നിറയുന്നത് വാശിയും വീറുംആണെങ്കിൽ മാസ് ഡ്രില്ലിന് മുമ്പുള്ള ഈ മാസ് വരവിൽ മാരിവില്ലിനെ തോല്പിക്കും അഴകിനാണ് പ്രാധാന്യം. ടയറിൽ കുടുങ്ങി മീഡിയ ബോട്ട് ആലപ്പുഴ: ബോട്ടിനെ കുടുക്കാൻ കായലിൽ പഴയ ടയറുകളും മാലിന്യങ്ങളും. മാധ്യമപ്രവർത്തകരെയും വഹിച്ചു വന്ന പിആർഡി അറേഞ്ച് ചെയ്തിരുന്ന ബോട്ടിനാണ് പണി കിട്ടിയത്. രണ്ടു പോയിന്‍റുകളിലാണ് മീഡിയ പ്രവർത്തകരെ എത്തിക്കേണ്ടിയിരുന്നത്. ഫിനിഷിംഗ് പോയിന്‍റിൽ എത്തിക്കേണ്ടവരെ അവിടെയിറക്കി തിരിച്ച് നെഹ്റു പവലിയനിലേക്ക് ബാക്കി മീഡിയ പ്രവർത്തകരെ എത്തിക്കാൻ ബോട്ട് റിവേഴ്സ് എടുക്കുമ്പോഴാണ് അടിയിൽ പിടിച്ചത്. ബോട്ടിന് കീഴിലെ പ്രൊപ്പലറിൽ ചവറു പിടിച്ച് സ്റ്റക്കായി. ബോട്ടു മുന്നോട്ടോ പിന്നോട്ടോയില്ല. ഒടുവിൽ മറ്റ് സ്പീഡ് ബോട്ടെത്തിച്ചാണ് മീഡിയ പ്രവർത്തകരെ നെഹ്റു പവലിയനിൽ എത്തിച്ചത്. മത്സരങ്ങൾ നടക്കുന്ന ട്രാക്കിന് സമീപം കിടന്ന ബോട്ട് ഏറെ ശ്രമകരമായി മറ്റു ബോട്ടെത്തിച്ച് വലിച്ചു മാറ്റുകയായിരുന്നു. കാലാവസ്ഥ കൂൾ, മത്സരത്തുഴച്ചിൽ ഹോട്ട് ആലപ്പുഴ: മൂടിക്കെട്ടിയ ആകാശത്തിൽ പുന്നമടക്കായൽ പൂണ്ടുനിൽക്കുമ്പോഴും ഇരുകരയും കവിഞ്ഞ് കാണികൾ മനംനിറഞ്ഞ് മത്സരങ്ങളിൽ പങ്കാളികളായി. കത്തിക്കാളുന്ന വെയിലില്ലാതെ കൂൾ ഫീലായിരുന്നു, മത്സരാവസാനം വരെ. ഉദ്ഘാടനമത്സരങ്ങൾ രാവിലെ 11ന് ആരംഭിക്കുമ്പോൾ മഴ ചെറുതായി പെയ്തത് നല്ല ഐശ്വര്യമായി കമന്‍റേറ്റർ വിളിച്ചുപറയുന്നുണ്ടായിരുന്നു. അതു ശരിവയ്ക്കുന്ന അനുഭവമായിരുന്നു തുടർന്നു കണ്ട അനുകൂല കാലാവസ്ഥ. ടൂറിസം വകുപ്പ് മന്ത്രി മുഹമ്മദ് റിയാസും കൃഷി വകുപ്പ് മന്ത്രി പി.പ്രസാദുമായിരുന്നു ഉദ്ഘാടകനും അധ്യക്ഷനും. അതിൽ ഉദ്ഘാടകനായ മന്ത്രി മുഹമ്മദ് റിയാസ് എത്താൻ അൽപം വൈകിയത് പരിപാടിയിലാകെ ഡിലേ വരുത്തി. മേലെ ഇരുണ്ടുമൂടിയ ആകാശം, താഴെ ഇരുട്ടുകുത്തിയുടെ മത്സരം ആലപ്പുഴ: രാവിലത്തെ മത്സരങ്ങൾ പറഞ്ഞ സമയത്തുതന്നെ തുടങ്ങി. പത്തോ പതിനഞ്ചോ മിനിറ്റ് വൈകിയെങ്കിലായി. ആകാശം കറുത്തിരുണ്ടിരുന്നു. ആവേശം അതിനെ കാര്യമാക്കിയില്ല. മീഡിയക്കാരെ വഹിച്ചുള്ള ബോട്ട് നെഹ്റു പവലിയനിൽ അടുക്കുന്ന നേരത്താണ് ഇരുട്ടുകുത്തികളുടെ വരവ്.

ആവേശത്തിൽ ആഞ്ഞു തുഴയുന്നവരുടെ വീര്യം ചുറ്റുപാടിനെ ശ്രദ്ധിക്കുന്നില്ല. തുഴത്താളത്തിൽ മഴത്താളം ചേർന്നു. രാവിലെ തുടങ്ങിവച്ച മത്സരങ്ങളുടെ നിരയിൽ ഇരുട്ടുകുത്തികൾ പ്രഥമ ശ്രദ്ധയായി. മുൻ വർഷങ്ങളിൽനിന്ന് വ്യത്യസ്തമായി വിവിധ ഗാലറികൾ അധികമായി ക്രമീകരിച്ചിരുന്നു. പരാതിയുമായി പിബിസി പുന്നമടയുടെ ലീഡിംഗ് ക്യാപ്റ്റൻ ആലപ്പുഴ: എൻടിബിആർ സൊസൈറ്റിക്ക് പരാതിയുമായി അഡ്വ. കുര്യൻ ജയിംസ്. നിരണം ചുണ്ടനും മേൽപാടം ചുണ്ടനും നിയമലംഘനം നടത്തിയുള്ള തുഴയാണ് ഉപയോഗിച്ചതെന്നാണ് പരാതി. കൂടാതെ നിലവിലെ നിയമം അനുവദിക്കുന്നതിലും കൂടുതൽ ഇതരസംസ്ഥാന തുഴക്കാർ വള്ളത്തിലുണ്ടായിരുന്നെന്നും കുര്യന്‍റെ പരാതിയിൽ പറയുന്നു. ഇതു രണ്ടും പരിശോധിച്ച് നടപടിയെടുക്കണമെന്നാണ് പിബിസി പുന്നമടയുടെ ലീഡിംഗ് ക്യാപ്റ്റനായ കുര്യൻ ജയിംസിന്‍റെ പരാതി. വിജയിയെ പ്രവചിച്ച് മുരളീധരൻ ആലപ്പുഴ: നെഹ്റു ട്രോഫിയില്‍ വില്ലേജ് ബോട്ട് ക്ലബ്ബിന്‍റെ വീയപുരം ചുണ്ടന്‍ മുത്തമിട്ടപ്പോള്‍ വീയപുരം ജേതാക്കള്‍ ആകുമെന്ന് പ്രവചിച്ച് സമ്മാനം നേടിയത് പഴവീട് സ്വദേശി. ആലപ്പുഴ പഴവീട് രാജധാനി മുരളീധരനാണ് നെഹ്‌റു ട്രോഫി വള്ളംകളി ജേതാക്കളാകുന്ന ശരിയായ ടീമിനെ പ്രവചിച്ച് നറുക്കെടുപ്പിലൂടെ സമ്മാനം നേടിയത്. മന്ത്രി പി. പ്രസാദാണ് വിജയിയെ തെരഞ്ഞെടുത്തത്. നെഹ്റു ട്രോഫി പബ്ലിസിറ്റി കമ്മിറ്റിയാണ് പ്രവചന മത്സരം സംഘടിപ്പിച്ചത്. പാലത്ര ഫാഷന്‍ ജൂവലറി നല്‍കുന്ന പി.ടി. ചെറിയാന്‍ സ്മാരക കാഷ് അവാര്‍ഡായ 10,001 രൂപയുടെ പ്രൈസാണ് സമ്മാനം. 200 ഓളം ആളുകള്‍ മത്സരത്തില്‍ പങ്കെടുത്തു. ഇതില്‍ 24 പേരാണ് വീയപുരം ജേതാവാകുമെന്ന്പ്രവചിച്ചത്.

ഇങ്ങനെയൊരു സിവിൽ സ്റ്റേഷൻ കുട്ടനാട്ടിൽ മാത്രം!

മങ്കൊന്പ്: ഇത്രയും അസൗകര്യങ്ങളുള്ള ഒരു മിനി സിവിൽ സ്റ്റേഷൻ കേരളത്തിൽ വേറെയുണ്ടോയെന്നു സംശയം. 2005ൽ ആയിരുന്നു കുട്ടനാട്ടിൽ പുതിയ സിവിൽ സ്റ്റേഷൻ കെട്ടിടം ഉദ്ഘാടനം ചെയ്തത്. എന്നാൽ, ഇന്നും പല അടിസ്ഥാന സൗകര്യങ്ങളും ഇവിടെയില്ല. ഇതിൽ പ്രവർത്തിക്കുന്ന 18 ഓഫിസുകളിലേക്കു ദിവസേന നൂറു കണക്കിന് ആളുകളാണ് എത്തുന്നത്. പ്രായമായവരും ഭിന്നശേഷി ക്കാരുമുൾപ്പെടെ. എന്നാൽ, റാന്പോ ലിഫ്റ്റോ ഇല്ലാത്തതിനാൽ ഇവർ നട്ടം തിരിയുകയാണ്. റീസർവേ ഓഫീസിൽ എത്താൻ 72 പടികൾ കയറണം. അതുതന്നെയാണ് കൃഷി അസി. ഡയറക്ടർ ഓഫിസിന്‍റെയും അവസ്ഥ. പലപ്പോഴും ഇവിടെ എത്തുന്ന ഭിന്നശേഷിക്കാരെ കാണാനും അവരുടെ ആവലാതികൾ കേൾക്കാനും മുകൾ നിലയിൽനിന്നു താഴേക്കിറങ്ങി വരേണ്ട അവസ്ഥയിലാണ് മുകൾ നിലയിലെ ഓഫീസുകളിൽ ജോലി ചെയ്യുന്ന ഉദ്യോഗസ്ഥർ. ഇതുമൂലം വലിയ സമയനഷ്ടവും അസൗകര്യവുമാണ് അനുഭവപ്പെടുന്നത്. ഈ കെട്ടിടത്തിലെ വിവിധ ഓഫീസുകളിൽ ജോലി ചെയ്യുന്ന ഭിന്നശേഷിക്കാരുടെ അവസ്ഥ തികച്ചും ദയനീയം. പരസഹായത്തോടെയാണ് പലരും തങ്ങളുടെ സീറ്റുകളിൽ എത്തുന്നത്. കയറിയാൽ ഭക്ഷണം കഴിക്കാൻ പോലും താഴേക്ക് ഇറങ്ങാൻ പറ്റാത്ത ദുരവസ്ഥ. ഭിന്നശേഷി സൗഹൃദമല്ല നാലു നിലകളിലായി നിർമിച്ചതാണ് കെട്ടിടം. താഴത്തെ നിലയിലെ കുട്ടനാട് താലൂക്ക് ഓഫീസിൽ എത്തുന്നതിനു പോലും ഭിന്നശേഷിക്കാരൻ നിരവധി പടികൾ കയറണം. സർക്കാർ ഓഫീസുകളും വിദ്യാലയങ്ങളും ഭിന്നശേഷി സൗഹൃദമാക്കുന്നതിന്‍റെ ഭാഗമായി റാമ്പ് സൗകര്യം ഒരുക്കണമെന്നു വ്യവസ്ഥ ഉണ്ടായിരിക്കെ കുട്ടനാട് മിനി സിവിൽ സ്റ്റേഷന് ഇതു ബാധകമായിട്ടില്ല. ഓരോ മാസവും കൂടുന്ന താലൂക്കുതല വികസന സമിതി യോഗത്തിൽ റാമ്പ് നിർമാണം അജൻഡയായി ചർച്ച ചെയ്യാറുണ്ടെങ്കിലും നടപ്പായിട്ടില്ല. പൊതുമരാമത്ത് വകുപ്പിന്‍റെ കെട്ടിട വിഭാഗമാണ് ഇക്കാര്യത്തിൽ നടപടിയെടുക്കേണ്ടത്. കുട്ടനാടിന് എന്തിനാ ലിഫ്റ്റ്! ഈ കെട്ടിടം നിർമിച്ചപ്പോൾത്തന്നെ ലിഫ്റ്റ് നിർമിക്കാനുള്ള ക്രമീകരണം ചെയ്തിരുന്നു. താഴത്തെ നില ഒഴിവാക്കി ബാക്കി മൂന്നു നിലകളെ തമ്മിൽ ബന്ധിപ്പിക്കുന്ന തരത്തിലായിരുന്നു ഇവിടെ ലിഫ്റ്റ് മുറികൾ തയാറാക്കിയത്. വിചിത്രമായ ഈ നിർമാണരീതികൊണ്ടാണോ എന്നറിയില്ല ലിഫ്റ്റ് വയ്ക്കുന്നതു നടപ്പായിട്ടില്ല. വെള്ളപ്പൊക്ക ബാധിത പ്രദേശമായതിനാലാണ് താഴത്തെ നില ഒഴിവാക്കിയതെന്നു പറയുന്നുണ്ടെങ്കിലും സാങ്കേതികവിദ്യ വളർച്ച പ്രാപിച്ച ഇക്കാലത്തും ഇത് ഇങ്ങനെതന്നെ നിലനിർത്തിയിരിക്കുന്നതാണ് അദ്ഭുതപ്പെടുത്തുന്നത്. കോൺഫറൻസ് ഹാൾ ഇല്ല താലൂക്ക് ഓഫീസ്, ഐസിഡിഎസ് ഓഫീസ്, എംപ്ലോയിമെന്‍റ് ഓഫീസ്, ഉപജില്ല വിദ്യാഭ്യാസ ഓഫീസ്, ലേബർ ഓഫീസ് തുടങ്ങി വിവിധങ്ങളായ ഓഫീസുകൾ ഇവിടുണ്ട്. എന്നാൽ, ഉദ്യോഗസ്ഥരുടെ ഒരു മീറ്റിംഗ് നടത്തണമെങ്കിൽ സമീപത്തുള്ള ചമ്പക്കുളം ബ്ലോക്ക് പഞ്ചായത്തോ നെല്ല് ഗവേഷണകേന്ദ്രമോ കനിയണം. ഇലക്‌ഷൻ കാലത്തു പല പരീശീലനങ്ങളും മീറ്റിംഗുകളും സംഘടിപ്പിക്കാൻ ഉദ്യോഗസ്ഥർ നെട്ടോട്ടമോടേണ്ട സ്ഥിതിയാണ്. മിനി സിവിൽ സ്റ്റേഷനോടു ചേർന്ന് ഒരു മിനി കോൺഫറൻസ് ഹാൾ നിലവിലുണ്ടായിരുന്നു. കാലപ്പഴക്കം മൂലം പൊളിച്ചുമാറ്റിയിട്ട് വർഷങ്ങൾ കഴിഞ്ഞു. അതേസമയം, സിവിൽ സ്റ്റേഷൻ കെട്ടിടത്തിനു വടക്കുവശത്തു നിലനില്ക്കുന്ന ഉപയോഗയോഗ്യമല്ലാത്ത കെട്ടിടം പൊളിച്ചുമാറ്റാത്തത് ശല്യമാകുന്നുണ്ട്. ഇവിടം മാലിന്യകേന്ദ്രമായി മാറിയിരിക്കുകയാണ്. അനക്സ് നിർമിക്കണം മിനി സിവിൽ സ്റ്റേഷൻ നിർമിക്കാൻ മുൻകൈയെടുത്ത അന്നത്തെ എംഎൽഎ ഡോ. കെ.സി. ജോസഫ് വിവിധ സർക്കാർ ഓഫീസുകൾക്കായി മിനി സിവിൽ സ്റ്റേഷനോട് ചേർന്ന് ഒരു അനുബന്ധ ബഹുനില കെട്ടിടവും കൂടി നിർമിക്കാൻ പദ്ധതിയിട്ടിരുന്നു. എന്നാൽ, തുടർന്നുവന്ന ജനപ്രതിനിധികൾ ഇക്കാര്യത്തിൽ വേണ്ട താത്പര്യം കാട്ടിയില്ല. പലതവണയായി പുതുക്കിപ്പണിത മങ്കൊമ്പ് സബ് ട്രഷറി കെട്ടിടം വീണ്ടും വെള്ളക്കെട്ടിലാണ്. ഇതു പുതുക്കിപണിയാനുളള നടപടി നടന്നുവരുന്നു. എന്നാൽ, ചെറിയ കെട്ടിടങ്ങൾ നിർമിക്കുന്നതിനു പകരം ഇലക്‌ഷൻ കാലത്ത് സാമഗ്രികൾ വിതരണം ചെയ്യാനും ദുരിതാശ്വാസ പ്രവർത്തനങ്ങളുടെ ഏകോപനം ഉൾപ്പെടെ നിർവഹിക്കാനും പര്യാപ്തമായ വിധത്തിൽ വിശാലമായ ഹാൾ സൗകര്യത്തോടുകൂടിയ ഒരു ആധുനിക ബഹുനില മിനി സിവിൽ സ്റ്റേഷൻ അനക്സ് ആണ് കുട്ടനാടിന് ആവശ്യം.ആവശ്യമായ സ്ഥലം ഇവിടെ ലഭ്യമാണെങ്കിലും ബന്ധപ്പെട്ട ഉദ്യോഗസ്ഥരോ ജനപ്രതിനിധികളോ അതിനുള്ള ശ്രമം നടത്തുന്നില്ല.

പട്ടണക്കാട് പഞ്ചായത്തില്‍ എല്‍ഡിഎഫ്-യുഡിഎഫ് പോര്

ചേര്‍ത്തല: ആധുനിക സൗകര്യങ്ങളോടെ പുനര്‍നിര്‍മിച്ച പട്ടണക്കാട് പഞ്ചായത്ത് ഓഫീസ് മന്ദിര ഉദ്ഘാടനം മാറ്റി. 30ന് നിശ്ചയിച്ച ഉദ്ഘാടനം പ്രോട്ടോകോള്‍ ലംഘിച്ചതിന്‍റെ പേരില്‍ പഞ്ചായത്ത് വകുപ്പ് ഇടപെട്ടാണ് മാറ്റിയത്. 29ന് രാത്രി 9.30നാണ് ചടങ്ങ് മാറ്റാന്‍ സെക്രട്ടറിക്ക് വകുപ്പധികൃതര്‍ കത്തു നല്‍കിയത്. കെ.സി. വേണുഗോപാല്‍ എംപിയെയാണ് ഉദ്ഘാടകനായി നിശ്ചയിച്ചിരുന്നത്. എന്നാല്‍ മന്ത്രിയും സ്ഥലം എംഎല്‍എയുമായ പി. പ്രസാദിനെയും തദ്ദേശ വകുപ്പുമന്ത്രി എം.ബി. രാജേഷിനെയും പങ്കെടുപ്പിക്കാത്തത് ഉയര്‍ത്തി എല്‍ഡിഎഫ് പരാതി നല്കിയിരുന്നു. ഇതേത്തുടര്‍ന്നാണ് സ്പീക്കറടക്കം ഇടപെട്ട് പരിശോധന നടത്തി പരിപാടി മാറ്റാന്‍ നിര്‍ദേശിച്ചത്. പഞ്ചായത്തിന്‍റെ ഒരു കോടി തനതു ഫണ്ട് ഉപയോഗിച്ചാണ് പുതിയ മന്ദിരം നിര്‍മിച്ചത്. കോണ്‍ഗ്രസ് നേതൃത്വത്തിലാണ് പഞ്ചായത്ത് ഭരണം. ജനാധിപത്യ മര്യാദകള്‍ പാലിക്കാതെ ഏകാധിപത്യനടപടിയാണ് പഞ്ചായത്തില്‍ നടത്തുന്നതെന്നു കാട്ടി എല്‍ഡിഎഫ് പഞ്ചായത്തിലേക്കു പ്രകടനവും ധര്‍ണയും നടത്തി. പഞ്ചായത്തിന്‍റെ വികസനത്തിനു ചുക്കാന്‍ പിടിക്കുന്ന സര്‍ക്കാരിനെയും വകുപ്പുമന്ത്രിയെയും സ്ഥലം എംഎല്‍എയെ ഒഴിവാക്കി പ്രോട്ടോകോള്‍ ലംഘനം നടത്തിയെന്ന് ആരോപിച്ചായിരുന്നു സമരം. പഞ്ചായത്തിനു മുന്നില്‍ നടത്തിയ ധര്‍ണയില്‍ സി.കെ. മോഹനന്‍ അധ്യക്ഷനായി. ടി.എം. ഷെറിഫ് ഉദ്ഘാടനം ചെയ്തു. അതേസമയം, പുനര്‍നിര്‍മിച്ച മന്ദിരം ചിങ്ങം ഒന്നിന് ഔദ്യോഗികമായി ഉദ്ഘാടനം ചെയ്തെന്ന് പഞ്ചായത്ത് പ്രസിഡന്‍റ് ടി.എസ്. ജാസ്മിന്‍ പറയുന്നു. 17ന് മന്ദിര ഉദ്ഘാടനത്തിന് മന്ത്രിയെയും എംപിയെയും സമീപിച്ചിരുന്നതാണ്. ഇരുവര്‍ക്കു എത്താനാകാത്ത സാഹചര്യത്തിലാണ് പ്രസിഡന്‍റുതന്നെ തിരി തെളിച്ചു പ്രവേശിച്ചത്. തുടര്‍ന്ന് എംപി 30ന് സമയം അനുവദിച്ചതിനാലാണ് ചടങ്ങായി ഉദ്ഘാടനം നിശ്ചയിച്ചത്. ഇതില്‍ പ്രോട്ടോകോള്‍ ലംഘനം നടന്നിട്ടില്ലെന്നും ഇക്കാര്യത്തില്‍ നിയമപരമായി പരിശോധന നടത്തുമെന്നും ടി.എസ്. ജാസ്മിന്‍ പറഞ്ഞു. ഇതിനിടയില്‍ പഞ്ചായത്ത് അധികൃതരുടെ തീരുമാനത്തിനെതിരേ ഭരണപക്ഷത്തും അഭിപ്രായ വ്യത്യാസം ഉടലെടുത്തിട്ടുണ്ട്. കൂടിയാലോചനകളില്ലാതെ ഏകപക്ഷീയമായ തീരുമാനങ്ങളാണ് ഇത്തരത്തിലുള്ള പ്രതിസന്ധികള്‍ക്കു കാരണമെന്ന് കോണ്‍ഗ്രസിനുളളില്‍നിന്നും ചിലര്‍ വിമര്‍ശനം ഉയര്‍ത്തിയിട്ടുണ്ട്.

ആനപ്രമ്പാല്‍ ജലോത്സവം രണ്ടിന്, വിളംബര ട്രോഫി ഘോഷയാത്ര ഇന്ന്

എടത്വ: കുട്ടനാട് സംസ്‌കാരിക വേദിയുടെ നേതൃത്വത്തില്‍ നടത്തപ്പെടുന്ന ശ്രീനാരായണ എവർ റോളിംഗ് ട്രോഫിക്കു വേണ്ടിയുള്ള ആറാമത് ആനപ്രമ്പാല്‍ ജലോത്സവത്തിനു മുന്നോടിയായി ഇന്ന് ഉച്ചകഴിഞ്ഞ് രണ്ടിന് ട്രോഫി ഘോഷയാത്ര നടക്കും. പാരേത്തോട് അരീക്കല്‍ ഗോപിനാഥന്‍റെ വസതിയില്‍നിന്ന് ആരംഭിക്കുന്ന ഘോഷയാത്രയുടെ ഫ്‌ളാഗ് ഓഫ് കര്‍മം എടത്വ എസ്‌ഐ രാജേഷ് നിര്‍വഹിക്കും. മോനിച്ചന്‍ കൊച്ചുവീട് നേതൃത്വം നല്‍കും. സെപ്റ്റംബര്‍ രണ്ടിന് നടക്കുന്ന ജലോസവത്തിന്‍റെ പൊതുസമ്മേളനം സഹകരണ-ദേവസ്വം-തുറമുഖ വകുപ്പ് മന്ത്രി വി.എന്‍. വാസവന്‍ ഉദ്ഘാടനം നിര്‍വഹിക്കും. ജലോത്സവ സമിതി ചെയര്‍മാന്‍ ബിജു പറമ്പുങ്കല്‍ അധ്യക്ഷത വഹിക്കും. കൊടിക്കുന്നില്‍ സുരേഷ് എംപി ജലോത്സവ ഉദ്ഘാടനവും ആര്‍സി ചാരിറ്റബിള്‍ ട്രസ്റ്റ് ചെയര്‍മാന്‍ റെജി ചെറിയാന്‍ സമ്മാനദാനവും നിര്‍വഹിക്കും. ഡെപ്യൂട്ടി എക്‌സൈസ് കമ്മീഷണര്‍ എസ്. അശോക് കുമാര്‍ ലഹരിവിരുദ്ധ സന്ദേശം നല്‍കും. ആനന്ദ് പട്ടമന, ബിഷപ് തോമസ് കെ. ഉമ്മന്‍, സുജിത്ത് തന്ത്രികള്‍ എന്നിവര്‍ അനുഗ്രഹ പ്രഭാഷണം നടത്തും. വിവിധ മേഖലകളില്‍ പുരസ്‌കാരം ലഭിച്ച വ്യക്തികളെ ആദരിക്കും. വെപ്പ് എ, ബി ഗ്രേഡ്, ചുരുളന്‍, വടക്കനോടി വിഭാഗങ്ങളിലായി 25 കളിവള്ളങ്ങള്‍ മല്‍സരത്തില്‍ പങ്കെടുക്കും.

യുകെഡി വിദ്യാലയത്തില്‍ ഓണാഘോഷം

അമ്പലപ്പുഴ: അത്തപ്പൂക്കളമൊരുക്കി ആര്‍പ്പുവിളികളോടെ ഊഞ്ഞാലാടിയും ഓണസദ്യ ഒരുക്കിയും കലാപരിപാടികള്‍ സംഘടിപ്പിച്ചും പുന്നപ്ര യുകെഡി വിദ്യാലയത്തില്‍ ഓണാഘോഷം സംഘടിപ്പിച്ചു. ശാന്തി ഭവൻ മാനേജിംഗ് ട്രസ്റ്റി ബ്രദർ മാത്യു ആൽബിൻ ഭദ്രദീപം കൊളുത്തി ഓണാഘോഷ പരിപാടികള്‍ ഉദ്ഘാടനം ചെയ്തു. വിളംബരജാഥ യോടെയാണ് ചടങ്ങുകൾ ആരംഭിച്ചത്. യുകെഡി പ്രിൻസിപ്പൽ ഉണ്ണിക്കൃഷ്ണന്‍ പരിപാടികള്‍ക്കു നേതൃത്വം നല്‍കി. ബ്രദർ മാത്യു ആൽബിനും ഭാര്യ മേരി ആൽബിനും ഓണക്കോടികള്‍ നൽകി. ശാന്തിഭവനിലെ അന്തേവാസികൾക്ക് ഓണത്തിന് സദ്യ നടത്താൻ അരി ഉൾപ്പടെയുള്ള പലവ്യഞ്ജനങ്ങളും പച്ചക്കറികളും പായസകിറ്റും നൽകി. അധ്യാപകരായ ഉനൈസ്, സുവേഷ് കൃഷ്ണ, എസ്. ഉണ്ണിക്കൃഷ്ണൻ, സുരേഷ് ബാബു, വിജേഷ്, താര, അഫ്സില, ശ്രീല തുടങ്ങിയവർ സംബന്ധിച്ചു.

ഓർമയിൽ ഒരു ഓണംകൂടി

ചേർത്തല: സ്റ്റേജ് ആർട്ടിസ്റ്റ് ആൻഡ് വർക്കേഴ്സ് അസോസിയേഷൻ ഓഫ് കേരള (സവാക്) ചേർത്തല താലൂക്ക് കമ്മിറ്റിയുടെ ആഭിമുഖ്യത്തിൽ സംഘടിപ്പിച്ച ഓർമയിൽ ഒരു ഓണം കൂടി പ്രശസ്ത പ്രഭാഷകൻ ഡോ. സജിത്ത് ഏവൂരേത്ത് ഉദ്ഘാടനം ചെയ്തു. വയലാർ ഗുദേവ ഹാളിൽ നടന്ന സമ്മേളനത്തിൽ പ്രസിഡന്‍റ് ഷാജി മഞ്ജരി അധ്യക്ഷത വഹിച്ചു. ജില്ലാ സെക്രട്ടറിയും സ്വാഗതസംഘം രക്ഷാധികാരിയുമായ പി. നളിനപ്രഭ പതാക ഉയർത്തി. സവാക്കിന്‍റെ അംഗങ്ങളിൽ വിവിധ പുരസ്കാരം ലഭിച്ചവരെ കാർഷിക വികസന ബാങ്ക് പ്രസിഡന്‍റ് സി.കെ ഷാജിമോഹൻ ആദരിച്ചു. ജില്ലാ പഞ്ചായത്ത് വൈസ് പ്രസിഡന്‍റ് എൻ.എസ്. ശിവപ്രസാദ്, ചേർത്തല താലൂക്ക് സെക്രട്ടറി സുനിജാലക്ഷ്മി, തുറവൂർ മേഖലാ സെക്രട്ടറി മഞ്ജുളാദേവി എന്നിവർ പ്രസംഗിച്ചു. തുടര്‍ന്നു നടന്ന കലാമേള വനിതാ കമ്മീഷൻ അംഗം വി.ആർ. മഹിളാമണി ഉദ്ഘാടനം ചെയ്തു. സംഘാടകസമിതി ചെയർമാൻ കെ.പി. മോഹനൻ അധ്യക്ഷത വഹിച്ചു.

ബസ് തട്ടി നിയന്ത്രണംവിട്ട ഓട്ടോറിക്ഷ വൈദ്യുതിത്തൂണിൽ ഇടിച്ചു

മാങ്കാംകുഴി: സ്വകാര്യബസ് തട്ടി നിയന്ത്രണംവിട്ട ഓട്ടോ വൈദ്യുതിത്തൂണിൽ ഇടിച്ചു. അപകടത്തിൽ ഓട്ടോയിൽ സഞ്ചരിച്ച കുട്ടികൾ ഉൾപ്പെടെയുള്ള യാത്രക്കാർ നിസാര പരിക്കുകളോടെ അദ്ഭുതകരമായി രക്ഷപ്പെട്ടു. ഓട്ടോ ഡ്രൈവർക്കും പരിക്കേറ്റു. ഇന്നലെ ഉച്ചകഴിഞ്ഞായിരുന്നു അപകടം. ഓട്ടോറിക്ഷ പെട്ടന്ന് ബ്രേക്കിട്ടപ്പോൾ ബസ് വെട്ടിച്ചുമാറ്റിയപ്പോഴാണ് ഓട്ടോയിൽ തട്ടിയതെന്നാണ് ബസ് ജീവനക്കാർ പറയുന്നത്. വൈദ്യുതി പോസ്റ്റ് തകരാറിലായതിനെത്തു ടർന്ന് വൈദ്യുതി വിതരണവും തടസപ്പെട്ടു. രാത്രിയോടെ വൈദ്യുതിവിതരണം പുനഃസ്ഥാപിച്ചു.

കത്തോലിക്കാ കോണ്‍ഗ്രസ് വാര്‍ഷികം ഇന്ന്

ആലപ്പുഴ: തത്തംപള്ളി കത്തോലിക്കാ കോണ്‍ഗ്രസ് വാര്‍ഷികവും ആദരവും ഇന്ന് തത്തംപള്ളി ഓഡിറ്റോറിയത്തില്‍ നടക്കും. ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും. അതിരൂപതാ കത്തോലിക്കാ കോണ്‍ഗ്രസ് പ്രസിഡന്‍റ് ബിജു സെബാസ്റ്റ്യന്‍ മുഖ്യപ്രഭാഷണം നടത്തും. യൂണിറ്റ് പ്രസിഡന്‍റ് ബിനു സ്‌കറിയ അധ്യക്ഷത വഹിക്കും. എസ്എസ്എല്‍സി, പ്ലസ് ടു തുടങ്ങി വിവിധ മേഖലകളില്‍ നേട്ടങ്ങള്‍ കൈവരിച്ചവരെ മാര്‍ തോമസ് തറയില്‍ ആദരിക്കും. ഇടവകയിലെ അസംഘടിത മേഖലയിലെ തൊഴിലാളികളുടെ ഡയറക്ടറി ജാലകം മാര്‍ തറയില്‍ പ്രകാശനം ചെയ്യും. ഇടവക വികാരി ഫാ. ജോസ് മുകളേല്‍ അനുഗ്രഹ പ്രഭാഷണം നടത്തും. യൂണിറ്റ് ഡയറക്ടര്‍ ഫാ. നവീന്‍ മാമ്മൂട്ടില്‍ ആമുഖ സന്ദേശം നല്‍കും. കത്തോലിക്കാ കോണ്‍ഗ്രസ് ഫൊറോന പ്രസിഡന്‍റ് ദേവസ്യ പുളിക്കാശേരി, തോമസ് കൊരണ്ടക്കാട്, ഡയാന ജോയിക്കുട്ടി, റ്റോമി കടവില്‍, മോളമ്മ, ശ്രീമതി രഞ്ജിനി, ജോമോന്‍, സിജോ ജോണ്‍, ചാക്കോ തോമസ്, ലനു തോമസ്, ടോമി പൂണിയില്‍ തുടങ്ങിയവർ ‍പ്രസംഗിക്കും.

വാസ്‌കോ ഫുട്‌ബോള്‍മേള ഒന്നുമുതല്‍

ചേര്‍ത്തല: വാരനാട് വാസ്‌കോ ഒരുക്കുന്ന 40-ാമത് അഖില കേരള സെവന്‍സ് ഫുട്‌ബോള്‍ ടൂര്‍ണമെന്‍റ് ഒന്നു മുതല്‍ ഏഴുവരെ വാസ്‌കോ ഫ്‌ളെഡ്‌ലൈറ്റ് മൈതാനിയില്‍ നടക്കും. സംസ്ഥാനത്തെ വിവിധ ഭാഗങ്ങളില്‍നിന്നുള്ള എട്ടു ടീമുകളാണ് മാറ്റുരയ്ക്കുന്നത്. ഇതിനൊപ്പം മുതിര്‍ന്നവരുടെയും പതിനെട്ടു വയസിനു താഴെ പ്രായമുള്ളവരുടെയും പ്രദര്‍ശനമത്സരവും ടൂര്‍ണമെന്‍റിന്‍റെ ഭാഗമായി ഒരുക്കുമെന്ന് രക്ഷാധികാരി തങ്കച്ചന്‍ വി. തോട്ടങ്കര, സെക്രട്ടറി എസ്. ഹരികൃഷ്ണന്‍, ടി.എം. അദ്വൈത് എന്നിവര്‍ പത്രസമ്മേളനത്തില്‍ അറിയിച്ചു. ഒന്നിന് വൈകുന്നേരം ചേര്‍ത്തല പോലീസ് ഇന്‍സ്പക്ടര്‍ ജി. അരുണ്‍ ഉദ്ഘാടനം ചെയ്യും. വാസ്‌കോ പ്രസിഡന്‍റ് സുധി പിഷാരത്ത് അധ്യക്ഷനാകും. അഖിലാഞ്ജലി ഗ്രൂപ്പ് ചെയര്‍മാന്‍ പി.ഡി. ലക്കി മുഖ്യാതിഥിയാകും. രാത്രി 7.30 മുതലാണ് മത്സരങ്ങള്‍. ഏഴിന് രാത്രി സമാപനസമ്മേളനം മന്ത്രി പി. പ്രസാദ് ഉദ്ഘാടനം ചെയ്യും. ഫ്രഷ് ടു ഹോം സിഇഒ മാത്യുജോസഫ് വിശിഷ്ടാതിഥിയാകും. വാരനാട് ദേവസ്വം സെക്രട്ടറി വെള്ളിയാകുളം പരമേശ്വരന്‍ സമ്മാനദാനം നടത്തും. രക്ഷാധികാരി സജി ആന്‍റണി അധ്യക്ഷനാകും. 31ന് വൈകുന്നേരം വാരനാട് കവലയില്‍നിന്ന് തുടങ്ങുന്ന വിളംബര റാലി ലിസ്യൂനഗര്‍ പള്ളി വികാരി ഫാ. ജോസഫ് തെക്കിനേഴത്ത് ഫ്‌ളാഗ് ഓഫ് ചെയ്യും.

ആശാപ്രവര്‍ത്തകര്‍ക്കും ഹരിതകര്‍മ സേനാംഗങ്ങള്‍ക്കും ആദരവും ഓണക്കോടിയും

ആലപ്പുഴ: ആശാപ്രവര്‍ത്തകര്‍ക്കും ഹരിതകര്‍മ സേനാംഗങ്ങള്‍ക്കും ആദരവും ഓണക്കോടിയുമൊരുക്കി കെ.സി. വേണുഗോപാല്‍ എംപി. ആദ്യഘട്ടം എന്ന നിലയിൽ പാർലമെന്‍റ്തല വിതരണോദ്ഘാടനം ആലപ്പുഴ നഗരസഭാ അതിര്‍ത്തിയിലെ ആശാപ്രവര്‍ത്തകര്‍ക്കും ഹരിതകര്‍മ സേനാംഗങ്ങൾക്കുമായി ഇന്നു നടക്കും. രാവിലെ 10ന് സെന്‍റ് ജോസഫ് വിമന്‍സ് കോളജ് ഓഡിറ്റോറിയത്തില്‍ നടക്കുന്ന സമ്മേളനം കെ.സി. വേണുഗോപാല്‍ എംപി ഉദ്ഘാടനം ചെയ്യും. മറ്റു നിയമസഭാ മണ്ഡലങ്ങളില്‍ തദ്ദേശസ്ഥാപനങ്ങള്‍ വഴി വിതരണം നടക്കും. കരുനാഗപ്പള്ളിയിൽ സി.ആർ. മഹേഷ് എംഎൽഎയുടെ പ്രത്യേക പരിപാടിവഴി ഓണക്കോടി വിതരണം ചെയ്യും. നഗരസഭാ ചെയര്‍പേഴ്‌സണ്‍ കെ.കെ. ജയമ്മ അധ്യക്ഷത വഹിക്കും. റിഗോ രാജു, ആലപ്പുഴ മെഡിക്കല്‍ കോളജ് പ്രിന്‍സിപ്പല്‍ ഡോ. ബി. പത്മകുമാര്‍, എന്‍എച്ച്എം ഡിസ്ട്രിക്ട് പ്രോഗ്രാം മാനേജര്‍ ഡോ. കോശി പണിക്കര്‍, ഹരിതകര്‍മ സേന ജില്ലാ കോ-ഓര്‍ഡിനേറ്റര്‍ രാജേഷ് , സെന്‍റ് ജോസഫ്‌സ് കോളജ് പ്രിന്‍സിപ്പല്‍ ഡോ. സിസ്റ്റര്‍ എ.എ. ഉഷ തുടങ്ങിയവര്‍ പങ്കെടുക്കും. ഓണോത്സവം - 2025 ഹരിപ്പാട്: ഗാന്ധിഭവൻ സ്നേഹവീട് ഓണാഘോഷം ഓണോത്സവം 2025 എന്ന പേരിൽ നടക്കും. ഗാന്ധിഭവൻ അന്തേവാസികളുടെ വിവിധ കലാപരിപാടികൾ, സൗഹൃദ തിരുവാതിര കൈകൊട്ടിക്കളി മത്സരം, വഞ്ചിപ്പാട്ട് മത്സരം, എന്നിവ നടക്കും തുടർന്നു നടക്കുന്ന സാംസ്കാരിക സംഗമത്തിന് ചെറുതന പഞ്ചായത്ത് പ്രസിഡന്‍റ് എബി മാത്യു അധ്യക്ഷത വഹിക്കും ആലപ്പുഴ ജില്ലാ ചൈൽഡ് വെൽഫെയർ കമ്മിറ്റി ചെയർപേഴ്സൺ അഡ്വ. വസന്തകുമാരി ഉദ്ഘാടനം നിർവഹിക്കും ആലപ്പുഴ ജില്ലാ പഞ്ചായത്ത് അംഗം എ.ശോഭ, ഹരിപ്പാട് ബ്ലോക്ക് പഞ്ചായത്ത് മെംബർ പ്രസാദ് കുമാർ, എസ്. അനില, തിരക്കഥാകൃത്ത് സതീഷ് മുതുകുളം, ഡോ. പുനലൂർ സോമരാജൻ എന്നിവർ പങ്കെടുക്കും.

നെഹ്റു ട്രോഫി മാധ്യമ അവാർഡ് വിതരണം

ആലപ്പുഴ: നെഹ്‌റുട്രോഫി ബോട്ട് റേസ് സൊസൈറ്റി ഏര്‍പ്പെടുത്തിയ എഴുപതാമത് നെഹ്‌റു ട്രോഫി മാധ്യമ അവാര്‍ഡുകള്‍ വിതരണം ചെയ്തു. പുന്നമട നെഹ്‌റു പവലിയനില്‍ നടന്ന 71 -ാമത് നെഹ്‌റുട്രോഫി വള്ളംകളി ഉദ്ഘാടനച്ചടങ്ങില്‍ കൃഷി വകുപ്പ് മന്ത്രി പി. പ്രസാദ്, കൊടിക്കുന്നില്‍ സുരേഷ് എം പി, എംഎല്‍എ മാരായ എച്ച്. സലാം, പി.പി. ചിത്തരഞ്ജന്‍ എന്നിവര്‍ ജേതാക്കള്‍ക്ക് 10,001 രുപ കാഷ് അവാര്‍ഡും മെമന്‍റോയും പ്രശസ്തിപത്രവും സമ്മാനിച്ചു. അച്ചടി മാധ്യമ വിഭാഗത്തില്‍ മികച്ച റിപ്പോര്‍ട്ടര്‍ക്കുള്ള പുരസ്‌കാരം മാധ്യമം സീനിയര്‍ റിപ്പോര്‍ട്ടര്‍ പി.എസ്. താജുദ്ദീനും മികച്ച വാര്‍ത്താ ചിത്രത്തിനുള്ള പുരസ്‌കാരം മലയാള മനോരമ ചീഫ് ഫോട്ടോഗ്രഫര്‍ നിഖില്‍ രാജും ദൃശ്യമാധ്യമ വിഭാഗത്തില്‍ ഏഷ്യാനെറ്റ് ന്യൂസ് ചീഫ് റിപ്പോര്‍ട്ടര്‍ ബിദിന്‍ ദാസും ഏറ്റുവാങ്ങി. ശ്രവ്യമാധ്യമ വിഭാഗത്തില്‍ റേഡിയോ മാംഗോ, ക്ലബ് എഫ് എം എന്നിവക്ക് പ്രത്യേക ജ്യൂറി പരാമര്‍ശത്തിനുള്ള മെമന്‍റോയും സമ്മാനിച്ചു. ചടങ്ങില്‍ തോമസ് കെ. തോമസ് എംഎല്‍എ, ജില്ലാ കളക്ടര്‍ അലക്‌സ് വര്‍ഗീസ്, സബ് കളക്ടര്‍ സമീര്‍ കിഷന്‍, ജില്ലാ ഇന്‍ഫര്‍മേഷന്‍ ഓഫീസര്‍ കെ.എസ്. സുമേഷ് എന്നിവര്‍ പങ്കെടുത്തു.

ഫിനിഷിംഗ് പോയിന്‍റില്‍ സ്ഥിരം പവലിയന്‍ നിര്‍മിക്കും: മന്ത്രി

ആലപ്പുഴ: നെഹ്‌റു ട്രോഫി ഫിനിഷിംഗ് പോയിന്‍റില്‍ അടുത്ത വര്‍ഷം സ്ഥിരം പവലിയന്‍ നിര്‍മിക്കുമെന്നു മന്ത്രി എം.ബി. രാജേഷ്. ആലപ്പുഴ നഗരസഭ അമൃത് പദ്ധതിയില്‍പ്പെടുത്തി നിര്‍മിച്ച നെഹ്‌റു ട്രോഫി ഫുട്ട് ഓവര്‍ ബ്രിഡ്ജ് ഉദ്ഘാടനം ചെയ്യുകയായിരുന്നു അദ്ദേഹം. നെഹ്‌റു ട്രോഫി വാര്‍ഡിലെ ജനങ്ങളുടെ യാത്രാദുരിതം അവസാനിച്ചതായും 3.5 കോടി രൂപ ചെലവിലാണ് പാലത്തിന്‍റെ നിര്‍മാണം പൂര്‍ത്തീകരിച്ചതെന്നും മന്ത്രി പറഞ്ഞു. വൃത്തി ശീലിക്കണം ടൂറിസം വികസനത്തിനും സാധ്യതയ്ക്കും അനുയോജ്യമായ തരത്തിലാണ് ആലപ്പുഴയില്‍ വികസന പദ്ധതികള്‍ നടപ്പാക്കുന്നത്. ഇതിലൂടെ ജനങ്ങള്‍ക്കു വരുമാനവും തൊഴിലും ഉറപ്പുവരുത്താനാകും. നല്ല റോഡ്, നല്ല പാലം,നല്ല ആശുപത്രി, നല്ല സ്‌കൂള്‍ കെട്ടിടം വേണം എന്ന കാര്യത്തില്‍ നമുക്കു നിര്‍ബന്ധമുണ്ട്. എന്നാല്‍, നല്ല വൃത്തി വേണം എന്ന കാര്യത്തില്‍ നിര്‍ബന്ധമില്ല. ആവശ്യം കഴിഞ്ഞ് സാധനങ്ങള്‍ വലിച്ചെറിയുന്ന ശീലമുണ്ട്. ഈ അപരിഷ്‌കൃത സ്വഭാവം ഉപേക്ഷിക്കേണ്ടതുണ്ട്. ഡെങ്കിപ്പനി പകര്‍ന്നു പിടിച്ചപ്പോള്‍ നടത്തിയ പരിശോധനയില്‍ ഡെങ്കി ഹോട്ട്‌ സ്‌പോട്ടുകളെല്ലാം വൃത്തിഹീനങ്ങളായിരുന്നു. ഹരിത ഒാണം‌ ഇത്തവണത്തെ ഓണം പ്ലാസ്റ്റിക് ഒഴിവാക്കി ഹരിത ഓണമാണ്. ഇത്തവണത്തെ മഹാബലി പഴയ മഹാബലി അല്ല. വൃത്തിയുടെ ചക്രവര്‍ത്തിയാണ്. ഓണം കൂടുതല്‍ മാലിന്യം സൃഷ്ടിക്കാതെ ശ്രദ്ധിക്കണം- മന്ത്രി പറഞ്ഞു. പി.പി. ചിത്തരഞ്ജന്‍ എം എല്‍ എ അധ്യക്ഷത വഹിച്ചു. എച്ച്. സലാം എംഎല്‍എ മുഖ്യാതിഥിയായി. മുനിസിപ്പല്‍ എന്‍ജിനിയര്‍ ഷിബു എല്‍ നാല്‍പ്പാട്ട് റിപ്പോര്‍ട്ട് അവതരിപ്പിച്ചു. ജില്ലാ കളക്ടര്‍ അലക്‌സ് വര്‍ഗീസ്, നഗരസഭ ചെയര്‍പേഴ്‌സണ്‍ കെ.കെ. ജയമ്മ, നഗരസഭ വൈസ് ചെയര്‍പേഴ്‌സണ്‍ പി.എസ്. എം. ഹുസൈന്‍, നഗരസഭ സ്ഥിരംസമിതി അധ്യക്ഷരായ എം.ആര്‍. പ്രൈം, എസ്. കവിത, നസീര്‍ പുന്നക്കല്‍, കൗണ്‍സിലര്‍മാരായ അമ്പിളി അരവിന്ദ്, പി. രതീഷ്, സലീം മുല്ലാത്ത്, സൗമ്യ രാജ്, മറ്റ് ജനപ്രതിനിധികള്‍, ഉദ്യോഗസ്ഥര്‍, രാഷ്‌ട്രീയ പാര്‍ട്ടി പ്രതിനിധികള്‍ തുടങ്ങിയവര്‍ പങ്കെടുത്തു. നടപ്പാലത്തിന്‍റെ ആകെ നീളം 59.80 മീറ്ററാണ്. 35 മീറ്റര്‍ ആഴത്തില്‍ നിര്‍മിച്ച 20 പൈലുകളില്‍ നിര്‍മിച്ച നടപ്പാലത്തിന് അഞ്ചു മുതല്‍ എട്ടു മീറ്റര്‍ വരെ ഉയരമുണ്ട്.

സബ് ജൂണിയർ സംസ്ഥാന ബാസ്കറ്റ്ബോൾ: ആലപ്പുഴയെ റക്സണും ഫേബയും നയിക്കും

ആലപ്പുഴ: 50-ാമത് സബ് ജൂനിയർ കേരള സംസ്ഥാന ബാസ്കറ്റ്ബോൾ ചാമ്പ്യൻഷിപ്പ്-2025ൽ ആലപ്പുഴ ജില്ലാ ടീമുകളെ റക്സണും ഫേബയും നയിക്കും. ആൺകുട്ടികൾ: റക്സൺ അന്‍റണി കെ.വൈ - ക്യാപ്റ്റൻ, വിധു കൃഷ്ണ ബി, കാശിനാഥ് കെ. ആർ, നിദാൽ അൽദിൻ .എൻ, ജിയോ ജോർജ്, ആർവി വിനോദ്, നിരഞ്ജൻ ആർ, മഹാദേവൻ എസ്, മുഹമ്മദ് അജ്വാദ് ഷാജഹാൻ, അഭിനവ് മാധവ് പി, അൽ സഹദ് ബിൻ ഫൈസൽ, ഹാസിഫ് മുഹമ്മദ് വി.എസ്. പെൺകുട്ടികൾ: ഫേബ ബെൽബിൻ - ക്യാപ്റ്റൻ, സന വിമൽ, കാവ്യ ആർ, സായി കൃപ എ, അതുല്യ സുധീഷ്, അഞ്ജന റാം, ദക്ഷിണ ആർ, പൂജ ബൈജു, ഹന്ന ഫാത്തിമ, അന്ന എൽസ ജോർജ്, നിവിയ ആഗ്നസ് ജയേഷ്, സഹദിയ എസ്. ടീമുകൾക്കുള്ള ജഴ്‌സി വിതരണം ജ്യോതിനികേതനിൽ പ്രിൻസിപ്പൽ സെൻ കല്ലുപുര നിർവഹിച്ചു. എഡിബിഎ പ്രസിഡന്‍റ് റോണി മാത്യു അധ്യക്ഷത വഹിച്ചു. പിആർഒ തോമസ് മത്തായി കരിക്കംപള്ളിൽ, ജോർജ് ജോസഫ്, കോച്ചുമാരായ ബിനു എം, ഷഹബാസ് എസ് എന്നിവർ പങ്കെടുത്തു. മെഡിവിഷൻ സ്പോൺസർ ചെയ്യുന്ന ബാബു ജെ. പുന്നൂരാൻ മെമ്മോറിയൽ ട്രോഫിക്കു വേണ്ടിയുള്ള ചാമ്പ്യൻഷിപ്പ് ആലപ്പുഴ പുന്നപ്ര കപ്പക്കടയിലുള്ള ജ്യോതി നികേതൻ സീനിയർ സെക്കൻഡറി സ്കൂളിൽ ഓഗസ്റ്റ് 30 മുതൽ സെപ്റ്റംബർ 2 വരെയാണ് സംഘടിപ്പിക്കുന്നത്.

കളഞ്ഞുകിട്ടിയ പണം തിരികെ നൽകി വിദ്യാർഥികൾ

ഹരിപ്പാട്: റോഡിൽനിന്നു കിട്ടിയ വയോധികരുടെ പെൻഷൻതുക തിരികെ നൽകി വിദ്യാർഥികൾ മാതൃകയായി. ഒന്നാം വർഷ ബിബിഎ വിദ്യാർഥിളായ കണ്ടല്ലൂർ വടക്ക് ചൈതന്യയിൽ ആദർശ്, പുതിയവിള ബിനുഭവനത്തിൽ രോഹിത് എന്നിവരാണ് കളഞ്ഞുകിട്ടിയ തുക തിരികെ നൽകിയത്. പുതിയവിള സ്വദേശികളായ സരസ്വതിയമ്മ, രാധാമണിയമ്മ എന്നിവരുടെ വാർധക്യ പെൻഷൻ തുകയായ 4600 രൂപയാണ് നഷ്ടപ്പെട്ടത്. പേരാത്ത് മുക്കിനു പടിഞ്ഞാറു ഭാഗത്തുവച്ചാണ് യുവാക്കൾക്ക് പണം കിട്ടിയത്. ഇവർ പണം കനകക്കുന്ന് പോലീസിനെ ഏല്പിച്ചു. ഇതോടൊപ്പമുണ്ടായിരുന്ന രേഖകളിൽ ഫോൺ നമ്പർ ഉണ്ടായിരുന്നു. പോലീസ് സ്‌റ്റേഷനിലേക്ക് ഉടമകളിലൊരാളായ സരസ്വതിയമ്മയെ വിളിച്ചു വരുത്തിയാണ് തുക കൈമാറിയത്.

സ്ത്രീയെ വീട്ടിൽ മരിച്ച നിലയിൽ കണ്ട സംഭവം: സൈനുലാബ്ദീനുമായി തെളിവെടുപ്പ് നടത്തി

അമ്പലപ്പുഴ: തോട്ടപ്പള്ളി ഒറ്റപ്പനയിൽ സ്ത്രീയെ വീട്ടിൽ മരിച്ച നിലയിൽ കണ്ട സംഭവത്തിലെ ഒന്നാം പ്രതി സൈനുലാബ്ദീനുമായി അമ്പലപ്പുഴ പോലീസ് തെളിവെടുപ്പ് നടത്തി. ഇയാളുടെ കരുനാഗപ്പള്ളിയിലെ വാടക വീട്ടിലെത്തിച്ചാണ് തെളിവെടുപ്പ് നടത്തിയത്.മരണമടഞ്ഞ വയോധികയുടെ വീട്ടിൽനിന്ന് സൈനുലാബ്ദീൻ കവർന്ന ഒരു ജോഡി കമ്മൽ ഇവിടെനിന്ന് കണ്ടെടുത്തു. ഇയാളുടെ ഭാര്യയും രണ്ടാം പ്രതിയുമായ അനീഷയെ കസ്റ്റഡിയിൽ ലഭിക്കാൻ അമ്പലപ്പുഴ പോലീസ് കോടതിയിൽ അപേക്ഷ നൽകി.ഇരുവരെയും തോട്ടപ്പള്ളി ഒറ്റപ്പനയിലെ വയോധികയുടെ വീട്ടിലെത്തിച്ച് അടുത്ത ദിവസം തെളിവെടുപ്പും നടത്തും.

ജനകീയ ട്രോഫി ജലോത്സവം സെപ്റ്റംബര്‍ 12ന്

എടത്വ: നീരേറ്റുപുറം പമ്പാ ബോട്ട് റേസ് ക്ലബ് നേതൃത്വം നല്‍കുന്ന ജനകീയ ട്രോഫി ജലോത്സവം സെപ്റ്റംബര്‍ 12ന് ഉച്ചകഴിഞ്ഞു രണ്ടിന് നീരേറ്റുപുറം പമ്പാ വാട്ടര്‍ സ്റ്റേഡിയത്തില്‍ നടക്കും. 9 ചുണ്ടന്‍ വള്ളങ്ങള്‍ ഉള്‍പ്പെടെ 30 കളിവള്ളങ്ങള്‍ ഇത്തവ ണ മാറ്റുരയ്ക്കും വിദേശ മലയാളികളും വിദേശ ടൂറിസ്റ്റുകളും വള്ളംകളി വീക്ഷിക്കാന്‍ എത്തുന്നതിനാല്‍ വിപുലമായക്രമീകരണങ്ങളാണ് ഒരുക്കിയിരിക്കുന്നത്. കേന്ദ്ര-സംസ്ഥാന മന്ത്രിമാര്‍, കായികതാരങ്ങള്‍, സിനിമ നടി-നടന്‍ന്മാരും പങ്കെടുക്കും. മത്‌സരം കുറ്റമറ്റതാക്കാന്‍ സ്റ്റില്‍ സ്റ്റാര്‍ട്ടിംഗ് ഡിജിറ്റല്‍ ട്രാക്കുകള്‍ ക്രമീകരിക്കും. സെപ്റ്റംബര്‍ ആറ് മുതല്‍ നീരേറ്റുപുറം എഎന്‍സി ജംഗ്ഷനുകളില്‍ വടംവലി, അയല്‍കൂട്ടങ്ങളുടെ കസരകളി, വഞ്ചിപ്പാട്ടു മല്‍സരം, തിരുവാതിര, കൈകൊട്ടിക്കളി ഉള്‍പ്പെടെവിവിധ കലാപരിപാടികള്‍ നടക്കും. തിരുവല്ല, എടത്വ പ്രദേശത്ത് വിവിധ പഞ്ചായത്തുകളുടെ നേതൃത്വത്തില്‍ സാംസ്‌കാരിക ഘോഷയാത്രയും സമ്മേളനവും നടക്കും. സെപ്റ്റംബര്‍ 10ന് തിരുവല്ലാ കുട്ടനാട് എന്നിവിടങ്ങളിലെ പ്രധാന പ്രദേശങ്ങളിലൂടെ ജനകീയ ട്രോഫി ഉള്‍പ്പെടെ 50 ട്രോഫികളുമായി പ്രയാണം നടത്തും. പി.റ്റി. പ്രകാശ്, കെ.കെ. രാജു, അനില്‍ വെറ്റിലക്കണ്ടം, സാനു കല്ലുപുരയ്ക്കല്‍, രാജേഷ് നീരേറ്റുപുറം, കെ.ഒ. തോമസ്, അജികുമാര്‍ കലവറശ്ശേരി, കെ.റ്റി. ജനാര്‍ദനന്‍, സത്യജിത്ത്, ലീമോന്‍ അലക്‌സ് തോമസ്, തങ്കച്ചന്‍ മാലിയില്‍, തങ്കച്ചന്‍ ചക്കാലയില്‍, ആനന്ദന്‍ കുതിരച്ചാല്‍, ശ്രീനിവാസന്‍ ചക്കുളം, ഏബ്രഹാം ജോര്‍ജ്ജ്, സി.കെ. സോമന്‍ എന്നിവരുടെ നേതൃത്വത്തില്‍ വിവിധ കമ്മറ്റികൾ പ്രവര്‍ത്തിച്ചുവരുന്നതായി ഭാരവാഹികളായ റെജി ഏബ്രഹാം തൈക്കടവില്‍, പ്രകാശ് പനവേലി എന്നിവര്‍ അറിയിച്ചു.

എബിസി കേന്ദ്രത്തിനെതിരേയുള്ള പ്രചാരണം അവസാനിപ്പിക്കണമെന്ന്

ഹരിപ്പാട്: തെരുവുനായ നിയന്ത്രണത്തിനും പേവിഷ നിയന്ത്രണത്തിനും മുതുകുളം ബ്ലോക്ക് പഞ്ചായത്തിന്‍റെ നേതൃത്വത്തിൽ തുടങ്ങുന്ന എബിസി കേന്ദ്രത്തിനെതിരേ നടത്തുന്ന തെറ്റായ പ്രചാരണങ്ങൾ അവസാനിപ്പിക്കണമെന്ന് ബ്ലോക്ക് പഞ്ചായത്ത് ഭാരവാഹികൾ വാർത്താസമ്മേളനത്തിൽ ആവശ്യപ്പെട്ടു. തദ്ദേശ തെരഞ്ഞെടുപ്പ് ലക്ഷ്യം വച്ച് ജനങ്ങളെ തെറ്റിദ്ധരിപ്പിക്കാൻ ചിലർ നടത്തുന്ന പ്രവർത്തനങ്ങൾ പ്രദേശവാസികൾ തിരിച്ചറിയണം. മുതുകുളം എട്ടാം വാർഡിൽ 20.25 സെന്‍റ് ഭൂമിയിൽ തുടങ്ങുന്നത് നായ വളർത്തൽ കേന്ദ്രമല്ല.മറിച്ച് തെരുവുനായ്ക്കളെ എബിസി സെന്‍ററിലെ ഷെൽട്ടർ ഹോമിൽ എത്തിച്ച് വന്ധ്യംകരണ ശസ്ത്രക്രിയയും അനന്തരപരിചരണവും പേവിഷ പ്രതിരോധ വാക്‌സിനും നൽകിയശേഷം ഇവയെ പിടിച്ച സ്ഥലങ്ങളിൽതന്നെ തിരികെ വിടുന്ന പദ്ധതിയാണിത്. പരിസരവാസികൾക്ക് യാതൊരുവിധ ശല്യവും ഉണ്ടാകാതിരിക്കുന്നതിനായി എബിസി കേന്ദ്രത്തിന് ചുറ്റും ഉയരമുള്ള മതിലും സ്ഥാപിക്കുന്നതാണ്. മാലിന്യ സംസ്‌കരണത്തിനുള്ള ഏറ്റവും ആധുനിക സംവിധാനവും ഉണ്ടാകും. തെരുവുനായ നിയന്ത്രണത്തിനും പേവിഷ നിയന്ത്രണത്തിനും ലോകാരോഗ്യ സംഘടന അംഗീകരിച്ച ഏറ്റവും ഫലപ്രദവുംശാസ്ത്രീയവുമായ സംവിധാനമാണ് എബിസിയെന്നും ഭാരവാഹികൾ പറഞ്ഞു. ബ്ലോക്ക് പഞ്ചായത്ത് പ്രസിഡന്‍റ് ഡി.അംബുജാക്ഷി, വൈസ് പ്രസിഡന്‍റ് ജി. ഉണ്ണികൃഷ്ണൻ, മുതുകുളം ഡിവിഷൻ അംഗം ബിന്ദു സുഭാഷ് എന്നിവർ വാർത്താസമ്മേളനത്തിൽ പങ്കെടുത്തു.

വെട്ടിയാർ സെന്‍റ് മേരീസ് പള്ളിയിൽ തിരുനാളിന് നാളെ കൊടിയേറും

മാങ്കാംകുഴി: വെട്ടിയാര്‍ സെന്‍റ് മേരീസ് മലങ്കര സുറിയാനി കത്തോലിക്കാ പള്ളിയില്‍ പരിശുദ്ധ ദൈവമാതാവിന്‍റെ ജനനത്തിരുനാളിനും ഇടവകത്തിരുനാളിനും നാളെ കൊടിയേറും. രാവിലെ എട്ടിന് ഫാ. ജോണ്‍ തോട്ടത്തിലിന്‍റെ മുഖ്യ കാര്‍മികത്വത്തില്‍ നടക്കുന്ന വിശുദ്ധ കുര്‍ബാനയ്ക്കു ശേഷം കോടിയേറ്റ് നടക്കും. വൈകുന്നേരം അഞ്ചിന് ഭക്തസംഘടനകളുടെ വാര്‍ഷികവും കലാ സന്ധ്യയും. ഫാ. മാത്യു ചെങ്കിലാത്ത് ഉദ്ഘാടനം ചെയ്യും. സെപ്തംബര്‍ ഒന്നു മുതല്‍ നാലുവരെ വൈകുന്നേരം അഞ്ചിനുള്ള കുര്‍ബാനയ്ക്ക് ഫാ. ഗീവര്‍ഗീസ് മണിപ്പറമ്പില്‍, ഫാ. ജയിംസ് ഇല്ലിത്തറ, ഫാ. സ്ലീബാദാസ് ചരിവുപുരയിടം, ഫാ. ഷാജി തുമ്പേച്ചിറ എന്നിവര്‍ കാര്‍മികത്വം വഹിക്കും. അഞ്ചിന് വൈകിട്ട് അഞ്ചിന് ഇടവകയിലെ മുന്‍ വികാരിമാരും വിശുദ്ധ കുര്‍ബാന അര്‍പ്പിക്കും തുടര്‍ന്ന് വിശുദ്ധ മദര്‍ തെരേസയുടെ തിരുശേഷിപ്പ് വണക്കം. ആറിന് വൈകുന്നേരം അഞ്ചിന് സെമിത്തേരിയിലേക്ക് മെഴുകുതിരി പ്രദക്ഷിണവും ഏഴിനു രാവിലെ എട്ടിന് ഫാ. ജോണ്‍ എസ്. പുത്തന്‍വിളയുടെ കാര്‍മികത്വത്തില്‍ വി. കുര്‍ബാനയും വൈകുന്നേരം 6.30 ന് റാസയും നടക്കും. എട്ടിനു രാവിലെ എട്ടിന് പത്തനംതിട്ട ഭദ്രാസനത്തിന്‍റെ പ്രഥമ അധ്യക്ഷന്‍ യൂഹാനോന്‍ മാര്‍ ക്രിസോസ്റ്റത്തിന്‍റെ മുഖ്യകാര്‍മികത്വത്തില്‍ പൊന്തിഫിക്കല്‍ വിശുദ്ധ കുര്‍ബാന, ആദ്യകുര്‍ബാന സ്വീകരണം കൊടിയിറക്ക്, നേര്‍ച്ച വിതരണം എന്നിവ നടക്കും. എല്ലാ ദിവസവും പരിശുദ്ധ ദൈവമാതാവിന്‍റെ ജപമാലയും മധ്യസ്ഥ പ്രാര്‍ഥനയും നേര്‍ച്ച വിതരണവും ക്രമീകരിച്ചിട്ടുണ്ടന്ന് ഇടവക വികാരി ഫാ. ഡോ. ഗീവര്‍ഗീസ് കൈതവന, ട്രസ്റ്റി ജി.ജോണ്‍, സെക്രട്ടറി അജി തോമസ് ജോ. സെക്രട്ടറി ആന്‍സി ജിജോ എന്നിവര്‍ അറിയിച്ചു.

ഓണാവധി കഴിഞ്ഞാല്‍ പഠിക്കാന്‍ സ്‌കൂളില്ല; തീരുമാനമില്ലാതെ ചർച്ച

എടത്വ: ഓണാവധി കഴിഞ്ഞ് പഠിക്കാന്‍ കുട്ടികള്‍ക്ക് സ്‌കൂളില്ലാതാകും. ജനപ്രതിനിധികളും രക്ഷിതാക്കളും തമ്മിലുള്ള ചര്‍ച്ച തീരുമാനമാകാതെ പിരിഞ്ഞു. പ്രതിഷേധത്തിനൊരുങ്ങി രക്ഷിതാക്കള്‍. നൂറ്റാണ്ടുകളുടെ പൈതൃകമുള്ള തലവടി പഞ്ചായത്തിനു കീഴില്‍ വരുന്ന ആനപ്രമ്പാല്‍ ഗവ. എല്‍പി സ്‌കൂളാണ് അടച്ചുപൂട്ടല്‍ വക്കിലെത്തിയിരിക്കുന്നത്. മേല്‍ക്കൂര ആസ്ബസ്‌റ്റോസ് ഷീറ്റായതിനാല്‍ താത്കാലിക ഫിറ്റ്‌നസ് നല്‍കിയാണ് സ്‌കൂള്‍ പ്രവര്‍ത്തിക്കുന്നത്. ഫിറ്റ്‌നസ് കാലാവധി നാളെ കഴിയുമെന്നിരിക്കെ രക്ഷിതാക്കള്‍ നിരവധിത്തവണ പഞ്ചായത്ത് അധികൃതരുമായി ബന്ധപ്പെട്ടിരുന്നു. ഇന്നലെ ഓണാഘോഷ പരിപാടി സ്‌കൂളില്‍ നടക്കുന്നതിനിടെ പ്രസിഡന്‍റ് ഉള്‍പ്പെടെയുള്ള ജനപ്രതിനിധികളും ജീവനക്കാരും സ്‌കൂളില്‍ എത്തിയിരുന്നു. ഇരു വിഭാഗവും തമ്മിലുള്ള ചര്‍ച്ച തീരുമാനമാകാതെ പിരിയുകയും വഴക്കില്‍ കലാശിക്കുകയും ചെയ്തു. മേല്‍ക്കൂര നിര്‍മാണത്തിനുള്ള ടെൻഡര്‍ നാലു വര്‍ഷം മുന്‍പ് കരാറുകാരന് നല്‍കിയെങ്കിലും നിര്‍മാണം ആരംഭിച്ചിരുന്നില്ല. ഓണാവധി കഴിയുന്നതിന് മുന്‍പ് പണി തുടങ്ങണമെന്ന് രക്ഷിതാക്കള്‍ പഞ്ചായത്ത് അധികൃതരോട് ആവശ്യപ്പെട്ടു. എന്നാല്‍ കൃത്യമായ ഉറപ്പ് നല്‍കാന്‍ അധികൃതര്‍ തയാറായില്ല. സ്‌കൂള്‍ മറ്റൊരു സ്ഥലത്തേക്ക് മാറ്റാനാണ് പഞ്ചായത്ത് നിര്‍ദേശം വച്ചതെന്ന് രക്ഷിതാക്കള്‍ പറയുന്നു . പഞ്ചായത്തിന്‍റെ നിര്‍ദേശത്തില്‍ രക്ഷിതാക്കള്‍ വിയോജിപ്പ് രേഖപ്പെടുത്തിയതോടെ ഇരു വിഭാഗങ്ങളും തമ്മില്‍ വാക്കേറ്റമായി. ചര്‍ച്ചയില്‍ കരാറുകാരനെ വിളിക്കാനുള്ള നിര്‍ദേശം അധികൃതര്‍ തള്ളിക്കളഞ്ഞു. തുടര്‍ന്ന് രക്ഷിതാക്കള്‍ കരാറുകാരനുമായി ഫോണില്‍ ബന്ധപ്പെട്ടു. റീ-ടെൻഡര്‍ അനുമതി ലഭ്യമാകുന്ന മുറയ്ക്ക് പണി തുടങ്ങാമെന്ന് കരാറുകാരന്‍ അറിയിച്ചു. നിര്‍മാണ കാലാവധി നീണ്ടുപോയാല്‍ ഓണാവധി കഴിയുന്പോൾ കുട്ടികളുടെ പഠനത്തെ ബാധിക്കുമെന്ന് രക്ഷിതാക്കള്‍ പറഞ്ഞു. കൃത്യമായി എന്നു തുടങ്ങാമെന്നോ എന്നു തീര്‍ക്കുമെന്നോ കരാറുകാരൻ ഉറപ്പ് നല്‍കിയില്ല. കരാറുകാരനെ കരിന്പട്ടികയില്‍ ഉള്‍പ്പെടുത്തണമെന്ന് രക്ഷിതാക്കള്‍ ആവശ്യപ്പെട്ടെങ്കിലും പഞ്ചായത്ത് അധിക്യതര്‍ കരാറുകാരനെ സംരക്ഷിക്കുന്ന നടപടിയാണ് സ്വീകരിക്കുന്നതെന്നാണ് രക്ഷിതാക്കള്‍ പറയുന്നത്. രണ്ടു ദിവസത്തിന് ശേഷം പഞ്ചായത്ത് പടിക്കല്‍ ധര്‍ണയും പ്രതിഷേധവും സംഘടിപ്പിക്കാനാണ് രക്ഷിതാക്കള്‍ തീരുമാനിച്ചിരിക്കുന്നത്.

നെഹ്റു ട്രോഫി തുരുത്ത് നിവാസികളുടെ സ്വപ്നം പൂവണിഞ്ഞു

ആലപ്പുഴ: വെള്ളത്താല്‍ ചുറ്റപ്പെട്ട നെഹ്രുട്രോഫി തുരുത്തില്‍ നൂറ്റാണ്ടുകളായി കടത്തുവള്ളത്തെ മാത്രം ആശ്രയിച്ച് നഗരവുമായി ബന്ധപ്പെട്ടിരുന്ന 625 കുടുംബങ്ങള്‍ക്ക് ആശ്രയമായും ആലപ്പുഴയ്ക്ക് അഴകായും നടപ്പാലം യാഥാര്‍ഥ്യമായി. നെഹ്റു ട്രോഫി വള്ളംകളിയുടെ ആവേശം അലതല്ലുന്ന പുന്നമട സ്റ്റാര്‍ട്ടിംഗ് പോയിന്‍റില്‍ കായലിനു കുറുകെ ആലപ്പുഴ നഗരസഭ നിർമിച്ച ആധുനിക നടപ്പാലം തദ്ദേശ സ്വയംഭരണ എക്സൈസ് വകുപ്പ് മന്ത്രി എം.ബി. രാജേഷ് നാടിനു തുറന്നുകൊടുത്തു. ആലപ്പുഴ എംഎല്‍എ പി.പി. ചിത്തരഞ്ജന്‍ അധ്യക്ഷത വഹിച്ചു. നെഹ്റു ട്രോഫി ദ്വീപിലെ മൂവായിരത്തോളം പേർ നൂറ്റാണ്ടുകളായി അത്യാഹിതങ്ങള്‍ സംഭവിക്കുമ്പോഴും ആശുപത്രി, വിദ്യാഭ്യാസ സ്ഥാപനങ്ങള്‍, കളക്‌ടറേറ്റ്, നഗരസഭ, തൊഴിലിടങ്ങള്‍, കോടതി തുടങ്ങി എവിടെ പോകണമെങ്കിലും കടത്തു വള്ളത്തെ ആശ്രയിച്ചിരുന്ന ു ജനവിഭാഗത്തിന് ആശ്രയമാകുകയാണ് നടപ്പാലം. ആലപ്പുഴയുടെ ടൂറിസം മേഖലയുടെ വികസനത്തിനു കൂടി പാലം മുതൽക്കൂട്ടാവും. അമൃത് 1.0 യില്‍ ഉള്‍പ്പെട്ടതിനാല്‍ 2025 ഡിസംബറില്‍ പൂര്‍ത്തീകരിക്കാന്‍ പറ്റാത്ത സാഹചര്യത്തില്‍ മന്ത്രിസഭായോഗം നഗരസഭയ്ക്ക് പ്രത്യേക അനുമതി നൽകിയാണ് പാലം നിർമാണം ആരംഭിക്കാനായത്. സംസ്ഥാന സര്‍ക്കാരിനൊപ്പം ടെന്‍റര്‍ എക്സസ് തുകയുടെ 50 ശതമാനം നഗരസഭ തനതു ഫണ്ടില്‍ നിന്നു വഹിക്കാന്‍ തീരുമാനിച്ചാണ് പദ്ധതി യാഥാര്‍ത്ഥ്യമാക്കിയത്.

കായൽ സംരക്ഷണത്തിന് കർമപദ്ധതി വേണമെന്ന് വേമ്പനാട് സംരക്ഷണ സമിതി

ആലപ്പുഴ: കായൽ സംരക്ഷണത്തിന് ഊന്നൽ നൽകിയുള്ള കർമപദ്ധതികൾ വേണം ആവിഷ്കരിക്കാനെന്ന ആവശ്യവുമായി വേമ്പനാട് കായൽ സംരക്ഷണ സമിതി രംഗത്ത്. വിവിധ ആവശ്യങ്ങൾക്കുവേണ്ടി മണ്ണെടുക്കുമ്പോൾ ദേശീയ ജലപാതയിൽ നിന്ന് മാത്രം മണ്ണ് എടുക്കണമെന്ന് സമിതി ആവശ്യപ്പെട്ടു. ഒരേ സ്ഥലത്തുനിന്ന് സ്ഥിരമായി മണ്ണെടുക്കുന്ന നീക്കം ഒഴിവാക്കുക, രാത്രി 10 ന് ശേഷം യന്ത്രം പ്രവർത്തിക്കുന്നത് നിർത്തുക, മലിനജലവും ചെളിയും തിരികെ കായലിലേക്ക് ഒഴുക്കാതിരിക്കുക, ബന്ധപ്പെട്ട ഉദ്യോഗസ്ഥർ സ്ഥിരമായി മേൽനോട്ടം കൊടുക്കുക, വേമ്പനാട്ടുകായലിലെ ശുദ്ധീകരണം, ദേശീയ ജലപാതയുടെ നിർമാണം തുടങ്ങിയ പദ്ധതികളുടെ വിശദാംശകൾ പുറത്തുവിടുക തുടങ്ങിയവയാണ് വേമ്പനാട് സംരക്ഷണം സമിതിയുടെ ആവശ്യങ്ങൾ. ജോർജ് ജോസഫ് തോണ്ടുങ്കൽ, വി.ടി. മാത്യു വരയത്തുചിറ, ബിജു കെ എം കണ്ടത്തിൽ, ബിജു കെ. ആർ പുതുവൽചിറ, ഷൈജു പുത്തൻ തയ്യിൽ, പി.എസ്. ബാബു ശങ്കരമംഗലം തുടങ്ങിയവർ പത്രസമ്മേളനത്തിൽ പങ്കെടുത്തു.

ഇന്നു ജലപ്പൂരം

എം.ജെ. ജോസ് ആലപ്പുഴ: ആലപ്പുഴയിൽ ഇന്നു ജലപ്പൂരം. പുരുഷാരം വഞ്ചിപ്പാട്ടും തുഴത്താളവുമായി പുന്നമടക്കായലിൽ ഇന്നു ഒന്നു ചേരും. വള്ളംകളി പ്രേമികൾക്ക് ഇന്ന് ഉത്സവദിനം. 2025ലെ നെഹ്റു ട്രോഫി ആരടിക്കും? ആലപ്പുഴ കാത്തിരിക്കുന്നു. ആയിരക്കണക്കിനു സഞ്ചാരികൾ ഇന്നു പുന്നമടയിൽ ഒത്തുചേരും. ജലപൂരത്തിൽ തുഴവെഞ്ചാമരം വീശി കൊമ്പ് കുലുക്കി പായുന്ന ഗജചുണ്ടന്മാരെ കണ്ട് ഇരുകരകളിലെയും പുരുഷാരം ആരവം മുഴക്കും. നെഹ്‌റു ട്രോഫി വള്ളംകളി എന്നത് ഒരു മത്സരത്തേക്കാൾ വള്ളങ്ങളുടെ കണ്ണും മനസും നിറയ്ക്കുന്ന ഒരു ഘോഷയാത്രയാണ്. ചുണ്ടൻ വള്ളങ്ങൾ , മറ്റുതരം വള്ളങ്ങൾ, നൂറുകണക്കിനു തുഴക്കാർ എന്നിങ്ങനെ അണിനിരക്കുന്ന മനോഹര ഘോഷയാത്ര. ഒരുമയുടെയും സ്നേഹത്തിന്‍റെയും ഐക്യത്തിന്‍റെയും സന്ദേശം വിളിച്ചോതി കേരളം ഇന്നു നെഹ്റു ട്രോഫി ജലമേളയ്ക്കു സാക്ഷ്യം വഹിക്കും. ഇന്നു നടക്കുന്ന 71-ാമത് നെഹ്‌റു ട്രോഫി വള്ളംകളി ലോഗോ ആരോഗ്യ, വനിതാ, ശിശുക്ഷേമ മന്ത്രി വീണ ജോർജും ചലച്ചിത്ര താരം കാളിദാസ് ജയറാമും സംയുക്തമായി അനാച്ഛാദനം ചെയ്തായിരുന്നു പ്രചാരണങ്ങളുടെ തുടക്കം. കാക്കത്തമ്പുരാട്ടി വള്ളം തുഴയുന്ന ചിത്രമാണത്. ആലപ്പുഴ വട്ടായലിലെ കാക്കരിയിൽനിന്നുള്ള എസ്. അനുപമയാണ് ലോഗോ രൂപകല്പന ചെയ്തത്. ആലപ്പുഴയ്ക്ക് ഇനി ഉദ്വേഗം ജനിപ്പിക്കുന്ന കാത്തിരിപ്പിന്‍റെ നിമിഷങ്ങളാണ്. 2025ലെ നെഹ്റുട്രോഫിയിൽ ആരു മുത്തമിടുമെന്ന ആകാംക്ഷ ഒാളമടിക്കുന്ന പുന്നമടയിലേക്ക് എല്ലാ ചുവടുകളും എല്ലാ കണ്ണുകളും. ഇന്ന് പുന്നമടക്കായലില്‍ നടക്കുന്ന 71-ാമത് നെഹ്റു ട്രോഫി വള്ളംകളിയുടെ ട്രാക്കും ഹീറ്റ്‌സും . 21 ചുണ്ടന്‍ വള്ളങ്ങളടക്കം 71 വള്ളങ്ങളാണ് ഇത്തവണ മത്സരത്തിനുള്ളത്. ഹീറ്റ്സില്‍ മികച്ച സമയം കുറിക്കുന്ന നാലു വള്ളങ്ങളാണ് ഫൈനലില്‍ മാറ്റുരയ്ക്കുക. സമയത്തിന്‍റെ അടിസ്ഥാനത്തില്‍ ആദ്യമെത്തുന്ന 16 ചുണ്ടന്‍ വള്ളങ്ങളാണ ഫൈനലില്‍ മാറ്റുരയ്ക്കുക. ട്രാക്ക് ചുവടെ: ചുണ്ടന്‍ 16,15,14,13 തേർഡ് ലൂസേഴ്‌സ് ഫൈനൽ ട്രാക്ക് 1- 13 ട്രാക്ക് 2- 15 ട്രാക്ക് 3- 14 ട്രാക്ക് 4- 16 ചുണ്ടന്‍ 12,11,10,09 സെക്കന്‍റ് ലൂസേഴ്‌സ് ഫൈനൽ ട്രാക്ക് 1- 9 ട്രാക്ക് 2- 12 ട്രാക്ക് 3- 10 ട്രാക്ക് 4- 11 ചുണ്ടന്‍ 08,07,06,05 ലൂസേഴ്‌സ് ഫൈനൽ ട്രാക്ക് 1- 06 ട്രാക്ക് 2- 07 ട്രാക്ക് 3- 05 ട്രാക്ക് 4-08 ചുണ്ടന്‍ 04,03,02,01 ഫൈനൽ ട്രാക്ക് 1- 04 ട്രാക്ക് 2- 02 ട്രാക്ക് 3- 01 ട്രാക്ക് 4- 03 ഇരുട്ടുകുത്തി സി ഫൈനല്‍ ട്രാക്ക് 1- 04 ട്രാക്ക് 2- 02 ട്രാക്ക് 3- 01 ട്രാക്ക് 4- 03 ഇരുട്ടുകുത്തി ബി ഫൈനല്‍ ട്രാക്ക് 1- 01 ട്രാക്ക് 2- 04 ട്രാക്ക് 3- 03 ട്രാക്ക് 4- 0 വള്ളങ്ങളുടെ ഹീറ്റ്‌സുകളും ട്രാക്കുകളും ചുണ്ടന്‍ ഹീറ്റ്സ് 1 ട്രാക്ക് 1- ആനാരി ചുണ്ടൻ ട്രാക്ക് 2- വെള്ളംകുളങ്ങര ട്രാക്ക് 3- ശ്രീവിനായകൻ ട്രാക്ക് 4- കാരിച്ചാൽ ഹീറ്റ്സ് 2 ട്രാക്ക് 1- കരുവാറ്റ ട്രാക്ക് 2- ചെറുതന പുത്തൻചുണ്ടൻ ട്രാക്ക് 3- നടുവിലെ പറമ്പൻ ട്രാക്ക് 4- പായിപ്പാടൻ 2 ഹീറ്റ്സ് 3 ട്രാക്ക് 1- ചമ്പക്കുളം ട്രാക്ക് 2- തലവടി ചുണ്ടന്‍ ട്രാക്ക് 3- മേൽപ്പാടം ചുണ്ടൻ ട്രാക്ക് 4- ആലപ്പാടൻ ഹീറ്റ്സ് 4 ട്രാക്ക് 1- സെന്‍റ് ജോർജ് ട്രാക്ക് 2- നടുഭാഗം ട്രാക്ക് 3- നിരണം ട്രാക്ക് 4- വലിയ ദിവാൻജി ഹീറ്റ്സ് 5 ട്രാക്ക് 1- സെന്‍റ് പയസ് ടെൻത് ട്രാക്ക് 2- ജവഹർ തായങ്കരി ട്രാക്ക് 3- പായിപ്പാടൻ ട്രാക്ക് 4- വള്ളമില്ല ഹീറ്റ്സ് 6 ട്രാക്ക് 1- വീയപുരം ട്രാക്ക് 2- ആയാപറമ്പ് പാണ്ടി ട്രാക്ക് 3- വള്ളമില്ല ട്രാക്ക് 4- വള്ളമില്ല ചുരുളന്‍ ഫൈനല്‍ മാത്രം ട്രാക്ക് 1- വേലങ്ങാടന്‍ ട്രാക്ക് 2- കോടിമത ട്രാക്ക് 3- മൂഴി ട്രാക്ക് 4- വള്ളമില്ല ഇരുട്ടുകുത്തി എ ഗ്രേഡ്‌ (ഫൈനല്‍ മാത്രം) ട്രാക്ക് 1- തുരുത്തിത്തറ ട്രാക്ക് 2- പി.ജി. കർണന്‍ ട്രാക്ക് 3- പടക്കുതിര ട്രാക്ക് 4- മൂന്നുതൈക്കൽ ട്രാക്ക് 5-മാമ്മുടൻ ഇരുട്ടുകുത്തി ബി ഗ്രേഡ് ഹീറ്റ്സ് 1 ട്രാക്ക് 1- തുരുത്തിപ്പുറം ട്രാക്ക് 2- താണിയൻ ദ ഗ്രേറ്റ് ട്രാക്ക് 3- ശ്രീഭദ്ര ട്രാക്ക് 4- ഗോതുരുത്ത് പുത്രന്‍ ഹീറ്റ്സ് 2 ട്രാക്ക് 1- സെന്‍റ് ആന്‍റണീസ് ട്രാക്ക് 2- സെന്‍റ് സെബാസ്റ്റ്യൻ നമ്പർ 1 ട്രാക്ക് 3- ശ്രീമുത്തപ്പൻ ട്രാക്ക് 4- ഹനുമാൻ നമ്പർ 1 ഹീറ്റ്സ് 3 ട്രാക്ക് 1- ദാനിയേൽ ട്രാക്ക് 2- സെന്‍റ് ജോസഫ് ട്രാക്ക് 3- പുത്തൻ പറമ്പൻ ട്രാക്ക് 4- പൊഞ്ഞനത്തമ്മ ഹീറ്റ്സ് 4 ട്രാക്ക് 1- കുറുപ്പ് പറമ്പന്‍ ട്രാക്ക് 2- വള്ളമില്ല ട്രാക്ക് 3- വെണ്ണക്കലമ്മ ട്രാക്ക് 4- ജലറാണി ഹീറ്റ്സ് 5 ട്രാക്ക് 1- ശ്രീ ഗുരുവായൂരപ്പന്‍ ട്രാക്ക് 2- വലിയ പണ്ഡിതൻ ട്രാക്ക് 3- വള്ളമില്ല ട്രാക്ക് 4- രവണൻ ഇരുട്ടുകുത്തി സി ഗ്രേഡ് ഹീറ്റ്്സ് 1 ട്രാക്ക് 1- ചെറിയപണ്ഡിതൻ ട്രാക്ക് 2- പമ്പാവാസൻ ട്രാക്ക് 3- മയിൽവാഹനൻ ട്രാക്ക് 4- തട്ടകത്തമ്മ ഹീറ്റ്സ് 2 ട്രാക്ക് 1- ഹനുമാൻ നമ്പർ 2 ട്രാക്ക് 2- ശ്രീമുരുകൻ ട്രാക്ക് 3- മയില്‍പ്പീലി ട്രാക്ക് 4- വടക്കുംപുറം ഹീറ്റ്സ് 3 ട്രാക്ക് 1- സെന്‍റ് ജോസഫ് നമ്പർ 2 ട്രാക്ക് 2- -- സെന്‍റ് സെബാസ്റ്റ്യൻ നമ്പർ 2 ട്രാക്ക് 3- കാശിനാഥൻ ട്രാക്ക് 4- വള്ളമില്ല ഹീറ്റ്സ് 4 ട്രാക്ക് 1- മാടപ്ലാത്തുരുത്ത് ട്രാക്ക് 2- ജിബി തട്ടകൻ ട്രാക്ക് 3- വള്ളമില്ല ട്രാക്ക് 4- ഗോതുരുത്ത് വെപ്പ് എ ഗ്രേഡ് ഹീറ്റ്സ് 1 ട്രാക്ക് 1- ആശ പുളിക്കക്കളം ട്രാക്ക് 2- ജയ് ഷോട്ട് ട്രാക്ക് 3- നെപ്പോളിയൻ ട്രാക്ക് 4- അമ്പലക്കടവൻ ട്രാക്ക് 5 -ഷോട്ട് പുളിക്കത്തറ വെപ്പ് ബി ഗ്രേഡ് ഫൈനല്‍ മാത്രം ട്രാക്ക് 1- പി.ജി കരിപ്പുഴ ട്രാക്ക് 2- വള്ളമില്ല ട്രാക്ക് 3- പുന്നത്രപുരയ്ക്കൽ ട്രാക്ക് 4- ചിറമേൽ തോട്ടുകടവൻ

ബീയാർ പ്രസാദ് ജീവിക്കുന്നു, പാട്ടുകളിലൂടെ...

കുട്ടനാടിന്‍റെ കഥ പറഞ്ഞ് ജലോത്സവത്തിലെ പാട്ടെഴുതാൻ ആലപ്പുഴക്കാരനായ സിബി മലയിലാണ് ബീയാറിനെ ക്ഷണിച്ചത്. ഗാനത്തിലൂടെ കുട്ടനാടിനെയാണ് ബീയാര്‍ അവതരിപ്പിച്ചതെങ്കിലും നിറഞ്ഞു നിന്നത് കേരളംതന്നെ. അല്‍ഫോണ്‍സ് സംഗീതം നല്‍കിയ ഗാനത്തില്‍ കുട്ടനാടന്‍ ചേറിന്‍റെ മണവും ചേര്‍ന്നതോടെ ആസ്വാദകര്‍ക്ക് ആ മണ്ണില്‍ ചവിട്ടിയ സുഖം. കുട്ടനാടന്‍ പ്രകൃതിയും മണ്ണും കാറ്റും സ്വര്‍ണമണി നിറമുള്ള പൊന്നാര്യന്‍ കതിരുമൊക്കെ മനസിലേക്ക് ആവാഹിച്ച് ബീയാർ എഴുതിയ പാട്ടിലുണ്ടായിരുന്നു, അതിനുള്ള ഈണം, താളം എല്ലാം. മറ്റൊരു ആലപ്പുഴക്കാരൻ കുഞ്ചാക്കോ ബോബൻ അഭിനയിച്ച ‘ജലോത്സവം’ കുട്ടനാടിനെ കൂടുതൽ ദൃശ്യാനുഭവമാക്കി. കവിത പാടുന്ന കുട്ടനാടന്‍ കാറ്റിന്‍റെ തലോടല്‍ ബീയാറിന്‍റെ പാട്ടുകളിലെല്ലാമുണ്ട്. കിളിച്ചുണ്ടന്‍ മാമ്പഴം പോലെ മധുരമുള്ള പാട്ടുകള്‍ മലയാളിക്ക് പകര്‍ന്നുതന്ന്, മഴത്തുള്ളികള്‍ പൊഴിഞ്ഞ നാടന്‍ വഴികളിലൂടെ ബീയാര്‍ പ്രസാദ് നമ്മെ കൈപിടിച്ചു കൊണ്ടുപോയത് പാട്ടിന്‍റെ പച്ചത്തുരുത്തിലേക്കായിരുന്നു. അവിടെ കേരനിരകളും ഒന്നാംകിളി പൊന്നാണ്‍കിളിയും കസവിന്‍റെ തട്ടമിട്ട മൊഞ്ചത്തിയുമൊക്കെ ചേര്‍ന്ന് നമ്മെ സ്വീകരിച്ചു. പൊന്നോടു പൂവായതും മാംചുനപോൽ പൊള്ളുന്നതുമായ പാട്ടുകള്‍ നമുക്കായി എഴുതി. ജലം പുഷ്പതീർഥമായ് തളിക്കുവാന്‍ നദികള്‍ മത്സരിച്ചപോല്‍ ബീയാര്‍ പ്രസാദിന്‍റെ പാട്ടുകള്‍ ആസ്വാദകരുടെ ഉള്ളില്‍ ഏതാണ് പ്രിയപ്പെട്ടതെന്നറിയാതെ മത്സരിച്ചു നിന്നു. മങ്കൊമ്പിലെ മേളവാദ്യ കലാകാരനായ അച്ഛന്‍ ബാലകൃഷ്ണപ്പണിക്കരുടെ താളബോധം പകര്‍ന്നു കിട്ടിയത് ബീയാറിന്‍റെ പാട്ടുകളിലൂടെ തുടരുന്നു. ബീയാറിന്‍റെ അനുഭവങ്ങളും അനുഭൂതികളും അദ്ദേഹത്തിന്‍റെ വിയോഗത്തിലും അനുവാചകരിൽ തുടരുന്നു. നാടക പ്രവര്‍ത്തനവും അഭിനയവും സംവിധാനവും നാടകരചനയും പാട്ടെഴുത്തുമൊക്കെയായി കുട്ടനാടിന്‍റെ മാറിൽ ജീവിച്ച് കുട്ടനാടിന്‍റെ ശ്വാസമായി മാറിയ ബീയാർ പ്രസാദില്ലാത്ത മൂന്നാമത് ഓണമാണിത്. മസ്തിഷ്കാഘാതത്തെത്തുടർന്ന് ചികിത്സയിലിരിക്കെ 2023 ജനുവരി നാലിന് അന്തരിച്ചു.

പാഴ്സൽ ലോറി അപകടത്തിൽപ്പെട്ടു; ഡ്രൈവർക്കു പരിക്ക്

അമ്പലപ്പുഴ: പാഴ്സൽ ലോറി അപകടത്തിൽപ്പെട്ട് ഡ്രൈവർക്കു പരിക്ക്. തിരുവനന്തപുരം എസ്.എൻ നിവാസിൽ ചന്ദ്രചൂഡ(21)നാണ് പരിക്കേറ്റത്. ഇയാളെ വണ്ടാനം മെഡിക്കൽ കോളജ് ആശുപത്രിയിൽപ്രവേശിപ്പിച്ചു. ഇന്നലെ രാവിലെ ഏഴിന് വണ്ടാനം ശാസ്താ ക്ഷേത്രത്തിനു മുന്നിലായിരുന്നു അപകടം. ലോറിയുടെ മുൻഭാഗം പൂർണമായും തകർന്നു. എറണാകുളത്തുനിന്ന് കായംകുളത്തേക്കു പാഴ്സൽ സാമഗ്രഹികളുമായി പോകുകയായിരുന്നു. ദേശിയപാത നിർമാണവുമായി ബന്ധപ്പെട്ടു റോഡിന്‍റെ വശങ്ങൾ പലഭാഗത്തും മരണക്കെണിയാകുകയാണ്.

പാർക്കിംഗ് നിയന്ത്രണം ഇങ്ങനെ

നാളെ രാവിലെ മുതൽ നഗരത്തിൽ ജനറൽ ആശുപത്രി ജംഗ്ഷന് വടക്കുവശം മുതൽ കൈചൂണ്ടി ജംഗ്ഷൻ, കൊമ്മാടി ജംഗ്ഷൻ വരെയുള്ള റോഡരികിൽ പാർക്കിംഗ് പാടില്ല. പോലീസ് കൺട്രോൾ റൂം ജംഗ്ഷൻ മുതൽ കിഴക്കോട്ട് തത്തംപള്ളി കായൽ കുരിശടി ജംഗ്ഷൻ വരെ വാഹനഗതാഗതം അനുവദിക്കില്ല. തണ്ണീർ മുക്കം റോഡിലൂടെ വടക്കു ഭാഗത്തുനിന്നു വരുന്ന വാഹനങ്ങളും എറണാകുളം ഭാഗത്തുനിന്ന് നാഷണൽ ഹൈവേയിലൂടെ വരുന്ന വാഹനങ്ങളും കൊമ്മാടി, ശവക്കോട്ടപ്പാലം, കോൺവെന്റ് സ്ക്വയർ വഴി ആലപ്പുഴ ബീച്ച്, പോലീസ് പരേഡ് ഗ്രൗണ്ട്, കനാൽ ബങ്ക് റോഡ് എന്നിവിടങ്ങളിൽ പാർക്ക് ചെയ്യണം. തെക്കുനിന്നു വരുന്ന വാഹനങ്ങൾ എസ് ഡി കോളജ് ഗ്രൗണ്ട്, ചിൻമയ സ്ക്കൂൾ ഗ്രൗണ്ട്, ചുടുകാട് പമ്പ് ഹൗസ്, റ്റിഡി സ്ക്കൂൾ ഗ്രൗണ്ട് എന്നിവടങ്ങളിൽ പാർക്ക് ചെയ്യണം. ചങ്ങനാശേരി ഭാഗത്തുനിന്നു കൈതവന ഭാഗത്തുകൂടി വരുന്ന വാഹനങ്ങൾ തിരുവാമ്പാടി സ്കൂൾ ഗ്രൗണ്ട്, കാർമൽ സ്കൂൾ ഗ്രൗണ്ടിൽ പാർക്കുചെയ്യണം. ജില്ലാക്കോടതിപ്പാലത്തിന്‍റെ നിർമാണം നടക്കുന്നതിനാൽ നാളെ രാവിലെ മുതൽ രാത്രി ഒൻപതു വരെ കെഎസ്ആർടിസി ഓർഡിനറി ബസുകളും ആലപ്പുഴ സ്റ്റാൻഡിൽ യാത്ര അവസാനിപ്പിക്കുന്ന ബസുകളും ഒഴികെയുള്ള ബസുകൾ ബൈപാസിലൂടെ മാത്രമേ സർവീസ് നടത്തൂ. ഡ്രോൺ അനുവദിക്കില്ല ഡ്രോൺ റൂൾ 2021 പ്രകാരം നെഹ്റുട്രോഫി ജലമേള നടക്കുന്ന ട്രാക്കിന് 100 മീറ്റർ ചുറ്റളവിലുള്ള പ്രദേശം ടെമ്പററി റെഡ് സോൺ ആയി പ്രഖ്യാപിച്ചു. ഔദ്യോഗിക ആവശ്യത്തിനല്ലാതെ ഡ്രോൺ കാമറകൾ പ്രവർത്തിപ്പിക്കുന്നവരുടെ ഡ്രോൺ/ഹെലികാമറ പിടിച്ചെടുത്തു നിയമ നടപടി സ്വീകരിക്കും.

കൊണ്ടൽ വഞ്ചി മിഥുനക്കാറ്റിൽ...ഓണപ്പാട്ടുകളുടെ തമ്പുരാൻ ശ്രീകുമാരൻ തമ്പി

ആലപ്പുഴയിലാണ് ജനനം. അവിടെ കുട്ടിക്കാലം. ഹരിപ്പാട് പുന്നൂർ കൊട്ടാരത്തിന്‍റെ ശാഖയായ കരിമ്പാലത്ത്. സ്കൂൾ-കോളജ് വിദ്യാഭ്യാസവും എല്ലാം ആലപ്പുഴയിൽ. കുട്ടനാടിന്‍റെ ചൈതന്യവും അമ്പലപ്പുഴ ശ്രീകൃഷ്ണ ഭക്തിയും ആലപ്പുഴയുടെ തനിമയും തമ്പിയിലെ കവിയെ, കലാകാരനെ ഉണർത്തി. മലയാള സിനിമയിൻ ഏറ്റവും കൂടുതൽ ഓണപ്പാട്ടുകൾ എഴുതിയതും ഓണത്തെക്കുറിച്ച് ഏറ്റവും കൂടുതൽ ലളിതഗാനങ്ങൾ എഴുതിയതും ഓണത്തോടുള്ള പ്രേമം മൂത്ത് തിരുവോണം എന്ന പേരിൽ സിനിമ സംവിധാനം ചെയ്തതും ശ്രീകുമാരൻ തമ്പി. കവി, ചലച്ചിത്ര സംവിധായകൻ തിരക്കഥാകൃത്ത്, നിർമാതാവ്, സംഗീത സംവിധായകൻ തുടങ്ങി കൈവച്ച മേഖലകളിലെല്ലാം പൊന്നാക്കിയ പ്രതിഭ. അപ്പോഴും കുട്ടിക്കാലത്തെ ഓണസ്മൃതികൾ പാട്ടുകളിൽ നിറഞ്ഞുനിൽക്കുന്നു. ഉത്രാടപ്പൂ നിലാവേ വാ.. ആസ്വദിക്കാത്ത മലയാളിയുണ്ടോ? മലയാളത്തിൽ ഓണപ്പാട്ടുകളുടെ നിരയാണ് അദ്ദേഹത്തിന്‍റെ പേരിൽ. ആലപ്പുഴ പട്ടണത്തിൽ അതിമധുരം വിതറിയോളെ... എന്ന ഗാനത്തിലൂടെ മലയാളികളുടെ മനസിൽ ആലപ്പുഴ പട്ടണത്തെ അദ്ദേഹം വരച്ചിട്ടു. നിരവധി സൂപ്പർ ഹിറ്റ് ഓണപ്പാട്ടുകൾ. എം.കെ. അർജുനൻ- യേശുദാസ് കൂട്ടുകെട്ടിൽ പൂവണിപ്പൊന്നിന്‍ ചിങ്ങം വിരുന്നുവന്നു, ദക്ഷിണാമൂർത്തി- പി.ലീല ടീമിൽ പൊന്നിൻ ചിങ്ങത്തേര് വന്നു, എം. എസ്. വിശ്വനാഥൻ - യേശുദാസ് ടീമിൽ ആ നിമിഷത്തിന്‍റെ നിർവൃതിയിൽ.. സലിൽ ചൗധരി - യേശുദാസ് കൂട്ടുകെട്ടിൽ പൂവിളി പൂവിളി പൊന്നോണമായി.. തുടങ്ങി തിരുവോണവുമായി ബന്ധപ്പെട്ട് എത്രയോ നല്ല പാട്ടുകൾ. ശ്രീകുമാരൻ തമ്പി രചനയും സംഗീതവും നൽകി ചിത്രയും വേണുഗോപാലും പാടിയ പൂവണി എന്ന ആൽബത്തിലെ വെണ്ണിലാവിൻ പൂക്കളൊഴുകും വേമ്പനാടിൻ തിരകളേ..., കാരിച്ചാൽ ചുണ്ടൻ കണ്ണായ ചുണ്ടൻ... തുടങ്ങി മലയാളികൾ മറക്കാത്ത നിരവധി ജലോത്സവം നിറഞ്ഞുനിൽക്കുന്ന ഓണപ്പാട്ടുകളുമുണ്ട്. ശ്രീകുമാരൻ തമ്പിയിലെ കലാകാരനെ പാകപ്പെടുത്തി ഉണർത്തി വളർത്തിയ ആലപ്പുഴയെയും ഹരിപ്പാടിനെയും കുട്ടനാടിനെയും ശ്രീകുമാരൻ തമ്പി ജീവിതത്തിനു മുതൽ കൂട്ടായി കൊണ്ടുനടക്കുന്നു.

ആഹ്ളാദം... ആവേശം... ആരവം...

നാളെ വൈകിട്ടോടെ പുന്നമട പോലീസ് വലയത്തിൽ എം.ജെ. ജോസ് ആലപ്പുഴ: നെഹ്റുട്രോഫി വള്ളംകളിക്കു മണിക്കൂറുകൾ മാത്രം ശേഷിക്കെ നഗരം സുരക്ഷാ വലയത്തിൽ. ഡ്യൂട്ടിക്കും ട്രാഫിക് ക്രമീകരണങ്ങൾക്കും പുന്നമടയും പരിസര പ്രദേശങ്ങളും 15 സെക്‌ടറുകളായി തിരിച്ചു. ജില്ലാ പോലീസ് മേധാവിയുടെ നേതൃത്വത്തിൽ 16 ഡിവൈഎസ്എസ്പി, 40 ഇൻസ്പെക്‌ടർ, 360 എസ്ഐ എന്നിവരുൾപ്പടെ 1500 ഓളം പോലീസ് ഉദ്യോഗസ്ഥരാണ് കാവൽ. കരയിലെ പോലെ കായലിലും 50 ബോട്ടുകളിലായി പോലീസ് വിന്യാസം. കാമറ നിരീക്ഷണം ആലപ്പുഴ നഗരവും പുന്നമട ഭാഗവും പൂർണമായും സിസിടിവി കാമറ നിരീക്ഷണത്തിലാണ്. ജനത്തിരക്കിനിടയിൽ മാലമോഷണം, പോക്കറ്റടി മറ്റ് സാമൂഹ്യവിരുദ്ധ പ്രവർത്തനങ്ങൾ തടയാൻ ഷാഡോ പോലീസ് ഉദ്യോഗസ്ഥരും സ്പെഷൽ ബ്രാഞ്ച് ഉദ്യോഗസ്ഥരും ഉണ്ടാകും. വള്ളംകളി നിയമങ്ങൾ അനുസരിക്കാത്ത വള്ളങ്ങളെയും അതിലുള്ള തുഴച്ചിൽക്കാരെയും കണ്ടെത്തുന്നതിനും വീഡിയോ കാമറകളുണ്ടാകും. പാസുള്ളവർക്ക് സീറ്റ് പാസ് എടുത്തവർക്കു സീറ്റ് ലഭിക്കുന്നില്ലെന്ന ആക്ഷേപം ഒഴിവാക്കാൻ പാസ്സുള്ളവരെ മാത്രം പരിശോധിച്ചു കടത്തി വിടും. ഇതിനായി ഫിനിഷിംഗ് പോയിന്‍റ് പ്രധാന കവാടത്തിലേക്കുള്ള റോഡിൽ ബാരിക്കേഡ് സ്ഥാപിച്ചു. 30ന് രാവിലെ 10 ന് ശേഷം ഡിടിപിസി ജെട്ടിമുതൽ പുന്നമടക്കായലിലേക്കും തിരിച്ചും ഒരു ബോട്ടും സർവീസ് നടത്താൻ അനുവദിക്കുന്നതല്ലെന്ന് അധികൃതർ. ഗാലറികളിൽ പ്രവേശിക്കുന്നവരും മറ്റ് കരഭാഗത്തു നിൽക്കുന്നവരും കനാലിലേക്കും മറ്റും പ്ലാസ്റ്റിക് കുപ്പികളോ മറ്റ് സാധന സാമഗ്രികളോ വലിച്ചെറിഞ്ഞാൽ പിടിവീഴും. പരസ്യമദ്യപാനം തടയാൻ റെയ്‌ഡുകൾ നടത്താൻ ഷാഡോ പോലീസ് ഉദ്യോഗസ്ഥരുമുണ്ട്. പരസ്യമായി മദ്യക്കുപ്പികൾ കൊണ്ടുനടക്കുന്നവരെയും പരസ്യ മദ്യപാനം നടത്തുന്നവരെയും മറ്റുള്ളവർക്കു ശല്യമുണ്ടാക്കുന്നവരെയും കസ്റ്റഡിയിലെടുക്കും. കലാപരിപാടികൾ ഇന്നു സമാപിക്കും ആലപ്പുഴ: നെഹ്റുട്രോഫി വള്ളംകളിയുടെ ഭാഗമായി ജോൺസ് ഗ്രൗണ്ടിൽ സംഘടിപ്പിച്ച സാംസ്കാരിക, കലാപരിപാടികള്‍ ഇന്നു സമാപിക്കും. സമാപനദിവസമായ ഇന്നു വൈകിട്ട് 5.30ന് ആലപ്പുഴ ഗ്യാലക്സി ഓർക്കസ്ട്ര അവതരിപ്പിക്കുന്ന ഗാനമേള അരങ്ങേറും. തുടര്‍ന്ന് 7.30ന് പ്രശസ്ത കലാകാരന്‍ സ്റ്റീഫൻ ദേവസ്യ നയിക്കുന്ന മ്യൂസിക് ഷോ വേമ്പനാട് വൈബ്സും നടക്കും.

ബോട്ട് ക്ലബിനു പിന്നാലെ ചങ്ങനാശേരിയിൽ ടർഫ് വരുന്നു, കായികമേഖലയിൽ കൂടുതൽ പദ്ധതികൾക്കു സിബിസി

ജോൺസൺ പൂവന്തുരുത്ത് കോട്ടയം: നെഹ്റുട്രോഫി ജലമേളയ്ക്കു മണിക്കൂറുകൾ ശേഷിക്കെ അവസാനവട്ട തയാറെടുപ്പിന്‍റെയും ഒരുക്കങ്ങളുടെയും ആരവമാണെങ്ങും. കേരളത്തിന്‍റെ സാംസ്കാരികത്തനിമയുടെ പ്രതീകമായ വള്ളംകളിയുടെ ആരവങ്ങളിൽ അലിഞ്ഞുചേരുകയെന്നത് ഏതൊരു മലയാളിയുടെയും മോഹമാണ്. കോട്ടയം ജില്ലയിലെ നഗരമാണെങ്കിലും ആലപ്പുഴ ജില്ലയോടും ഹൃദയബന്ധം സൂക്ഷിക്കുന്ന പ്രദേശമാണ് ചങ്ങനാശേരി. പ്രളയം പോലെയുള്ള ദുരന്തങ്ങൾ തേടിയെത്തിയ കാലത്തൊക്കെ ആലപ്പുഴയ്ക്കു താങ്ങും തണലും അഭയവുമായി മാറിയതും ചങ്ങനാശേരിയാണ്. അപ്പോൾ ആലപ്പുഴയുടെ ഹൃദയത്തുടിപ്പായ നെഹ്റുട്രോഫി വള്ളം കളിയിൽനിന്നു ചങ്ങനാശേരിക്ക് എങ്ങനെ മാറിനിൽക്കാനാകും. അങ്ങനെയാണ് രണ്ടു വർഷം മുന്പ് ചങ്ങനാശേരി ബോട്ട് ക്ലബി(സിബിസി)ന്‍റെ പിറവി. റേഡിയോ മീഡിയ വില്ലേജിന്‍റെ നേതൃത്വത്തിൽ ചങ്ങനാശേരിയിലെയും സമീപപ്രദേശങ്ങളിലെയും നാനാജാതി മതസ്ഥരായ സംരംഭകരെയും വള്ളംകളി പ്രേമികളെയുമൊക്കെ ഒറ്റ ചരടിൽ കോർത്തായിരുന്നു ചങ്ങനാശേരി ബോട്ട് ക്ലബിന്‍റെ രൂപീകരണം. പണ്ടേ വള്ളംകളി പ്രേമിയും കഴിഞ്ഞ അഞ്ചു വർഷമായി വള്ളംകളി രംഗത്ത് സജീവ സാന്നിധ്യവുമായ ഇടിമണ്ണിക്കൽ ജ്വല്ലറി ഗ്രൂപ്പിന്‍റെ അമരക്കാരൻ സണ്ണി തോമസ് ഇടിമണ്ണിക്കൽ ക്യാപ്റ്റൻസ്ഥാനം ഏറ്റെടുത്തതോടെ ആവേശം പതിന്മടങ്ങായി. ആ ആവേശം ഹൃദയത്തിലേറ്റിയാണ് കഴിഞ്ഞ തവണ കന്നി മത്സരത്തിൽ ആദ്യ ഒൻപതിൽ എത്തി സിബിഎല്ലിനു യോഗ്യത നേടിയത്. ഇത്തവണ ചന്പക്കുളം ചുണ്ടനിലേറിയാണ് സിബിസി പോരാട്ടത്തിന് ഇറങ്ങുന്നത്. മീഡിയ വില്ലേജ് എക്സിക്യൂട്ടീവ് ഡയറക്ടർ ഫാ. ജോബി പുതുപ്പറന്പ്, ബർസാർ ഫാ. ലിബിൻ തുണ്ടുകളം, സിബിസി രക്ഷാധികാരി ഫാ. സെബാസ്റ്റ്യൻ പുന്നശേരി എന്നിവരുടെ നേതൃത്വത്തിലാണ് പരിശീലനവും ഒരുക്കങ്ങളും. ഒാർഗനൈസിംഗ് കമ്മിറ്റി അംഗങ്ങളും ഡയറക്ടർ ബോർഡ് അംഗങ്ങളും ഒപ്പമുണ്ട്. ബൈജപ്പനാണ് ലീഡിംഗ് ക്യാപ്റ്റൻ. കിടങ്ങറ സെന്‍റ് ഗ്രിഗോറിയോസ് പള്ളി പാരീഷ്ഹാളിൽ നടന്ന ചിട്ടയായ പരിശീലനത്തിനു ശേഷമാണ് പുന്നമടയിലേക്ക് എത്തുന്നത്. പരിശീലന സമയത്ത് ആവേശം പകരാൻ നൂറുകണക്കിനു പേർ ഇരുകരകളിലുമെത്തിയിരുന്നു. എന്നാൽ, വള്ളംകളിയിൽ മാത്രം ഒതുങ്ങുകയല്ല ഈ കൂട്ടായ്മയുടെ ലക്ഷ്യമെന്നു ക്യാപ്റ്റൻ സണ്ണി തോമസ് ഇടിമണ്ണിക്കൽ പറയുന്നു. അദ്ദേഹത്തിന്‍റെ പ്രതികരണത്തിലേക്ക്. ചങ്ങനാശേരിയും വള്ളംകളിയും തമ്മിൽ? ഒരേ മനസും താളവുമാണ് ആലപ്പുഴയ്ക്കും ചങ്ങനാശേരിക്കും. വള്ളംകളിയുടെ കാര്യത്തിലും അങ്ങനെ തന്നെ. കുട്ടനാട് മേഖലയിൽനിന്നു കുടിയേറിയ നൂറു കണക്കിനു കുടുംബങ്ങൾ ചങ്ങനാശേരിക്കു പരിസരത്തുണ്ട്. അവരുടെയെല്ലാം സ്വപ്നസാഫല്യമായിരുന്നു ചങ്ങനാശേരിക്ക് ഒരു ബോട്ട് ക്ലബ്. ഒരു മികച്ച വള്ളംകളി ടീമിനെയും വാർത്തെടുക്കാൻ അതുവഴി കഴിഞ്ഞു. ബിസിനസുകാർ പലരും വള്ളംകളി രംഗത്ത് ഇടയ്ക്കൊക്കെ മിന്നിമറയാറുണ്ട്. എന്നാൽ, കഴിഞ്ഞ കുറെ വർഷങ്ങളായി അങ്ങ് ഈ രംഗത്ത് സജീവസാന്നിധ്യമാണല്ലോ? ബിസിനസ് പ്രമോഷൻ മാത്രം ലക്ഷ്യമിട്ട് ഈ രംഗത്തേക്കു വന്ന ആളല്ല ഞാൻ. ചങ്ങനാശേരി ബോട്ട് ക്ലബിനു മുന്പ് കൈനകരി എസ്എച്ച് ബോട്ട് ക്ലബ് ആയിരുന്നു എന്‍റെ പ്രവർത്തന രംഗം. ജനത്തിന്‍റെ കൂട്ടായ്മയും മതസൗഹാർദവും നാടിന്‍റെ പുരോഗതിയും ലക്ഷ്യമാക്കിയാണ് ഈ രംഗത്തു സജീവമായി നിൽക്കുന്നത്. ചങ്ങനാശേരി ബോട്ട് ക്ലബിന്‍റെ ലക്ഷ്യം വള്ളംകളി മാത്രമാണോ? ഒരിക്കലുമല്ല. എല്ലാവരെയും കോർത്തിണക്കി പുതിയൊരു കായികസംസ്കാരം രൂപപ്പെടുത്തിയെടുക്കാനുള്ള പരിശ്രമങ്ങളിലാണ് ഞങ്ങൾ. വള്ളംകളിക്ക് അപ്പുറത്തേക്ക് യുവതലമുറയെ ആകർഷിക്കുന്ന മറ്റു കായിക മേഖലകളിലും വരും വർഷങ്ങളിൽ ബോട്ട് ക്ലബ് സജീവമാകും. ചങ്ങനാശേരിക്ക് ഒരു ടർഫ് എന്നത് ആലോചനയിലുണ്ട്. വൈകാതെ അതു സഫലമാകുമെന്നാണ് പ്രതീക്ഷ. ഇതോടെ ചങ്ങനാശേരി, ആലപ്പുഴ മേഖലയിലെ കായികരംഗം കൂടുതൽ മെച്ചപ്പെടും. വള്ളംകളി മേഖലയിൽ സജീവമായി ഇറങ്ങിയപ്പോഴുള്ള അനുഭവം? ഒരു കായിക വിനോദം എന്നതിനേക്കാൾ നമ്മുടെ നാടിനോടുള്ള സ്നേഹവും കൂട്ടായ്മയും ഉള്ളിലുറപ്പിക്കാനുള്ള അവസരംകൂടിയാണിത്. ഇത്തരം വിനോദങ്ങളിൽ യുവതലമുറയെ കൂടുതൽ ഉൾപ്പെടുത്തണം. ഇതിന്‍റെ ഹരം ഉള്ളിൽ പതിഞ്ഞാൽ ലോകത്ത് ഏതു കോണിലേക്കു പറന്നാലും ഈ നാട്ടിലേക്കു തിരിച്ചുവരാനുള്ള മോഹം ഉണ്ടാകും. ലഹരിവിപത്ത് യുവതയ്ക്കു മേൽ കരിനിഴൽ വീഴ്ത്തുകയല്ലേ? ലഹരിയെ പ്രതിരോധിക്കാനുള്ള ഏറ്റവും മികച്ച മാർഗം യുവതലമുറയെ കായികവിനോദങ്ങളിലേക്കു കൊണ്ടുവരിക എന്നതാണ്. എസ്ബി കോളജും അസപ്ഷനുമൊക്കെ കായികരംഗത്തു നിരവധി പ്രതിഭകളെ സമ്മാനിച്ച കലാലയങ്ങളാണ്. അതേ മാതൃകയിൽ കൂടുതൽ പേരെ കായികരംഗത്തേക്ക് ആകർഷിക്കാൻ സിബിസി പദ്ധതിയൊരുക്കും. ടർഫ് അത്തരമൊരു കാൽവയ്പാണ്. കുട്ടികൾക്ക് ഇത്തരം കാര്യങ്ങൾ കൂടുതൽ സൗകര്യവും പ്രോത്സാഹനവും നൽകുക എന്നതാണ് പ്രധാനം. യുവതലമുറയിൽ വലിയൊരു വിഭാഗം മറ്റു രാജ്യങ്ങളിലേക്കു കുടിയേറുകയാണല്ലോ? അവിടെയാണ് ഈ വള്ളംകളി പോലുള്ള കൂട്ടായ്മകളുടെ പ്രാധാന്യം. മികച്ച ജോലിയും സൗകര്യങ്ങളും തേടി യുവാക്കൾ പൊയ്ക്കൊള്ളട്ടെ. എന്നാൽ, കാശും സൗകര്യങ്ങളുമൊക്കെ മെച്ചപ്പെടുന്പോൾ നാട്ടിലേക്കു തിരികെ വരാൻ പ്രേരിപ്പിക്കുന്ന ഒരു ഇന്ധനം അവർക്കുള്ളിലുണ്ടാകണം. ആ ഇന്ധനമാണ് ഇതുപോലുള്ള വിനോദങ്ങൾ ആളുകളുടെ ഉള്ളിൽ നിറയ്ക്കുന്നത്. നാടിനോടും രാജ്യത്തോടുമുള്ള കലർപ്പില്ലാത്ത സ്നേഹത്തിന്‍റെ ആവേശത്തുഴകൾ പുന്നമടയിൽ ഉയരട്ടെ.

അടിമന ഭദ്രകാളീക്ഷേത്രത്തിൽ മോഷണം

അമ്പലപ്പുഴ: അമ്പലപ്പുഴ റെയിൽവേ സ്റ്റേഷന് പടിഞ്ഞാറ് വിശ്വഹിന്ദു പരിഷത്തിന്‍റെ നേതൃത്വത്തിൽ പ്രവർത്തിക്കുന്ന അടിമന ഭദ്രകാളീക്ഷേത്രത്തിൽ‌ മോ ഷണം. മൂന്നു കാണിക്കവഞ്ചികൾ തകർത്ത് പണം കവർന്നു. ഇന്നലെ രാവിലെ ക്ഷേത്രം ജീവനക്കാരെത്തിയപ്പോഴാണ് മോഷണവിവരമറിയുന്നത്. ഓഫീസിന്‍റെയും തൊട്ടടുത്ത സ്റ്റോർ റൂമിന്‍റെയും താഴുകൾ പൊളിച്ച നിലയിലായിരുന്നു. ഓഫീസിൽ വച്ചിരുന്ന മൂന്നു കാണിക്കവഞ്ചികൾ തകർത്ത് ഇതിൽനിന്ന് പണം കവർന്നശേഷം കാണിക്കവഞ്ചികൾ ക്ഷേത്രപരിസരത്ത് ഉപേക്ഷിക്കുകയായിരുന്നു. ക്ഷേത്രത്തിനു മുന്നിൽ വച്ചിരുന്ന രണ്ടു കുത്തുവിളക്കുകളിൽ ഒന്നുപയോഗിച്ചാണ് താഴുകൾ പൊളിച്ചിരിക്കുന്നത്. ഈ കുത്തുവിളക്ക് ഓഫീസിനു മുന്നിൽ വച്ചിരുന്നു. മറ്റൊരു കുത്തുവിളക്ക് കാണാനില്ല. ഓഫീസിന്‍റെ താഴ് ഉപേക്ഷിച്ച നിലയിൽ കണ്ടെങ്കിലും സ്റ്റോർ റൂമിന്‍റെ താഴ് കാണാനില്ലായിരുന്നു. അമ്പലപ്പുഴ പോലീസെത്തി അന്വേഷണമാരംഭിച്ചു. സമീപത്തെ വീടുകളിലെയും സ്വകാര്യ സ്ഥാപനങ്ങളിലെയും സിസിടിവി ദൃശ്യങ്ങളും പോലീസ് ശേഖരിക്കുന്നുണ്ട്.

ചെറിയനാട് റെയിൽവേ സ്റ്റേഷന് ഒരുകോടി രൂപയുടെ വികസന പദ്ധതി

ചെങ്ങന്നൂർ: ചെറിയനാട് റെയിൽവേ സ്റ്റേഷന്‍റെ വികസനത്തിനായി ഒരുകോടി രൂപ അനുവദിച്ച് റെയിൽവേ ബോർഡ്. ഗ്രേഡ് -2 ഹാൾട്ട് സ്റ്റേഷനായ ചെറിയനാട് സ്റ്റേഷന്‍റെ സമഗ്ര വികസനത്തിനായി റെയിൽവേ ബോർഡിൽനിന്ന് ഒരുകോടി രൂപയുടെ പദ്ധതിക്ക് അനുമതി ലഭിച്ചതായി കൊടിക്കുന്നിൽ സുരേഷ് എംപി പറഞ്ഞു. യാത്രക്കാർക്ക് ആവശ്യമായ അടിസ്ഥാന സൗകര്യങ്ങൾ സ്റ്റേഷനിൽ ലഭ്യമല്ലെന്ന് ചൂണ്ടിക്കാട്ടി നിരവധി യാത്രക്കാരും സംഘടനകളും എംപിയെ സമീപിച്ചിരുന്നു. ഇതിന്‍റെ അടിസ്ഥാനത്തിൽ, റെയിൽവേ മന്ത്രിയെയും റെയിൽവേ ബോർഡ് ചെയർമാനെയും നേരിൽ കണ്ട് കാര്യങ്ങൾ അവതരിപ്പിക്കുകയും ആവശ്യകത ബോധ്യപ്പെടുത്തുകയും ചെയ്തു. തുടർന്ന്, തിരുവനന്തപുരത്ത് നടന്ന ദക്ഷിണ റെയിൽവേ ജനറൽ മാനേജർ വിളിച്ചുചേർത്ത എംപിമാരുടെ യോഗത്തിൽ വിഷയം ശക്തമായി ഉന്നയിക്കുകയും വിശദമായ പ്രൊപ്പോസൽ സമർപ്പിക്കുകയും ചെയ്തു. മൂന്നുമാസത്തിനുള്ളിൽ ടെൻഡർ നടപടികൾ ആരംഭിക്കുമെന്നും പദ്ധതിയുടെ സമയബന്ധിത പൂർത്തീകരണത്തിനായി തുടർന്നും ഇടപെടലുകൾ നടത്തുമെന്നും കൊടിക്കുന്നിൽ സുരേഷ് എംപി പറഞ്ഞു.

ചേർത്തല സെന്‍റ് മേരീസ് പാലം ഗതാഗതത്തിനായി തുറന്നുകൊടുത്തു

ചേർത്തല: സെന്‍റ് മേരീസ് പാലം ഗതാഗതത്തിനായി തുറന്നുകൊടുത്തു. ഓണത്തോടനുബന്ധിച്ച് നഗരത്തിലെ ഗതാഗതക്കുരുക്കിനു പരിഹാരമായി പാലം തുറന്നു നൽകുന്നതിന് മന്ത്രി പി. പ്രസാദ് കളക്‌ടറേറ്റിൽ വിളിച്ചുചേർത്ത യോഗത്തിൽ തീരുമാനമായിരുന്നു. വ്യാപാരി-വ്യവസായികളും പാലം തുറന്നുനൽകണമെന്ന ആവശ്യം ഉയർത്തിയിരുന്നു. 6.33 കോടി രൂപ അടങ്കലിൽ നിർമിക്കുന്ന പാലത്തിന്‍റെ കൈവരി, സംരക്ഷണഭിത്തി എന്നിവയുടെ നിർമാണം പൂർത്തിയാക്കി മെറ്റൽ വിരിച്ചാണ് ഗതാഗത്തിന് തയാറാക്കിയത്. ബിഎംബിസി ടാറിംഗ്, റിഫ്ലക്ടർ അടക്കമുള്ള റോഡ് സുരക്ഷാക്രമീകരണങ്ങൾ, നടപ്പാതയിൽ ടൈൽവിരിക്കൽ എന്നിവയാണ് അവശേഷിക്കുന്ന ജോലികൾ. പാലത്തിന്‍റെ ഉയരം സംബന്ധിച്ച് ഉൾനാടൻ ജലഗതാഗതവകുപ്പിന്‍റെ എതിർപ്പ് കൃഷിമന്ത്രിയുടെ ഇടപെടലിലൂടെ മറികടന്നാണ് തടസപ്പെട്ടപാലം പണി പുനരാരംഭിച്ചത്. പാലത്തിന്‍റെ അവശേഷിക്കുന്ന നിർമാണപ്രവർത്തനങ്ങൾ സെപ്റ്റംബർ അവസാനത്തോടെ പൂർത്തിയാക്കി പൂർണമായി ഗതാഗതത്തിന് തുറന്നുകൊടുക്കാൻ സാധിക്കുമെന്ന് കൃഷി മന്ത്രി അറിയിച്ചു. ചേർത്തല നഗരസഭാധ്യക്ഷ ഷേർളി ഭാർഗവൻ, വൈസ് ചെയർമാൻ ടി.എസ്. അജയകുമാർ, കൗൺസിലർ ലിസി ടോമി, ബി. വിനോദ്, എം.സി. സിദ്ധാർഥൻ തുടങ്ങിയവർ പങ്കെ ടുത്തു.

എന്‍സിസി ദേശീയ ക്യാമ്പിന് മാന്നാറിൽ തുടക്കമായി

മാന്നാര്‍: എന്‍സിസി ദേശീയ ക്യാമ്പിന് മാന്നാര്‍ നായര്‍ സമാജം ഹയര്‍ സെക്കന്‍ഡറി സ്‌കൂളില്‍ തുടക്കമായി. കൊല്ലം ഗ്രൂപ്പ് കാമാന്‍ഡര്‍ കേണല്‍ ജി. സുരേഷ് ഉദ്ഘാടനം ചെയ്തു. 10 കേരള ബറ്റാലിയന്‍ കമാന്‍ഡിംഗ് ഓഫീസര്‍ കേണല്‍ അല്‍ഫോന്‍സ് അധ്യക്ഷത വഹിച്ചു. രാജ്യസ്‌നേഹത്തിനും ക്ഷേമ ജീവകാരുണ്യ പ്രവര്‍ത്തനങ്ങള്‍ക്കും എന്‍ സിസി കേഡറ്റുകള്‍ സജ്ജരാകണമെന്നും ഏത് പ്രതിസന്ധി ഘട്ടത്തിലും ആത്മധൈര്യം വെടിയാതെ പങ്കുചേരാന്‍ കേഡറ്റുകള്‍ക്ക് കഴിയണമെന്നും അദ്ദേഹം കുട്ടിച്ചേര്‍ത്തു. കേണല്‍ ജിതേഷ് കുമാര്‍, സുബൈദര്‍ മേജര്‍ ഗുരുവയ്യ, എന്‍സിസി ഓഫീസര്‍മാരായ സിബി മത്തായി, അനുപ് ആര്‍, റ്റീന ഏബ്രഹാം, ജയലക്ഷ്മി, സുബൈദര്‍മാരായ വിക്രം, സജീവ്, പ്രദീപ്, ജയേഷ്, രതീഷ്, അജികുമാര്‍, ബല്‍ജിത്ത്, അനന്‍ എന്നിവര്‍ പ്രസംഗിച്ചു. വിവിധ സംസ്ഥാനങ്ങളില്‍നിന്ന് 300 കേഡറ്റുകളാണ് ക്യാമ്പില്‍ പങ്കെടുക്കുന്നത്. യോഗ, ദേശീയസുരക്ഷ, പ്രതിരോധ സംവിധാനത്തെക്കുറിച്ചുള്ള പഠനം, കലാ-കായിക മത്സരങ്ങള്‍, ആലപ്പുഴ കൊല്ലം ജില്ലകളിലെ ചരിത്രസ്മാരകങ്ങള്‍, വിനോദസഞ്ചാരകേന്ദ്രങ്ങളിലേക്കുള്ള പഠനയാത്ര, കരകൗശല ഓട്ടുപാത്ര നിര്‍മാണശാല സന്ദര്‍ശനം എന്നിവ ഇതിനോടനുബന്ധിച്ച് ക്രമീകരിച്ചിട്ടുണ്ട്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]