ADVERTISEMENT

ADVERTISEMENT

കുളപ്പട എൽപി സ്കൂളിൽ വർണക്കൂടാരം ഉദ്ഘാടനം

നെടുമങ്ങാട് : കുളപ്പട എൽപി സ്കൂളിൽ സമഗ്ര ശിക്ഷാ വകുപ്പ് സ്റ്റാർസ് പദ്ധതിയിൽ ഉൾപ്പെടുത്തി 10 ലക്ഷം രൂപ വിനോയോഗിച്ചു നിർമിച്ച വർണക്കൂടാരത്തിന്‍റെ ഉദ്ഘാടനം അഡ്വ. ജി. സ്റ്റീഫൻ എംഎൽഎ നിർവഹിച്ചു. ഉഴമലയ്‌ക്കൽ പഞ്ചായത്ത്‌ പ്രസിഡന്‍റ് ജെ. ലളിത അധ്യക്ഷത വഹിച്ചു. എസ്എസ്കെ ഡിപിസി നജീബ് പദ്ധതി വിശദീകരിച്ചു.

ഉഴമലയ്‌ക്കൽ പഞ്ചായത്ത്‌ വൈസ് പ്രസിഡന്‍റ് എസ്. ശേഖരൻ, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ ഒ.എസ്. ലത, വികസന സ്റ്റാൻഡിംഗ് കമ്മിറ്റി ചെയർപേഴ്സൺ സജീന കാസിം, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ എ. ഒസ്സൻകുഞ്ഞ്, ബ്ലോക്ക്‌ പഞ്ചായത്ത്‌ അംഗം കണ്ണൻ എസ്. ലാൽ, ബ്ലോക്ക്‌ പഞ്ചായത്ത്‌ അംഗം അഡ്വ. എ. റഹീം, പഞ്ചായത്ത്‌ അംഗം എ. സനൂജ, എസ്എസ്കെ ഡിപിഒ ബിന്ദു ജോൺസ്, നെടുമങ്ങാട് എഇഒ ബിനു എന്നിവർ പ്രസംഗിച്ചു. പിടിഎ പ്രസിഡന്‍റ് ആർ. രാഗിണി സ്വാഗതവും ഹെഡ്മാസ്റ്റർ എസ്. രാജീവ്‌ നന്ദിയും പറഞ്ഞു.

ADVERTISEMENT

വിഴിഞ്ഞം അന്താരാഷ്ട്ര തുറമുഖം: രണ്ടാംഘട്ട നിർമാണത്തിന് ഇനിയും തുടക്കമായില്ല

വിഴിഞ്ഞം: വിഴിഞ്ഞം അന്താരാഷ്ട്ര തുറമുഖത്തിന്‍റെ ഒന്നാം ഘട്ട വിജയം ആഘോഷിച്ചെങ്കിലും രണ്ടാം ഘട്ട നിർമാണത്തിന് ഇനിയും തുടക്കമായില്ല. ഉടൻ തുടങ്ങുമെന്നു മാസങ്ങൾക്കു മുൻപേ അധികൃതർ അറിയിച്ചെങ്കിലും ഒന്നും നടന്നില്ല. കടൽക്ഷോഭവും കാലാവസ്ഥാവ്യതിയാനവും പുലിമുട്ടിനായുള്ള കല്ലിടലിനും തടസമായി. ഏകദേശം 1000 കോടിയിൽപ്പരം രൂപയാണ് രണ്ടാംഘട്ട നിർമാണത്തിന് അധികൃതർ പ്രതീക്ഷിക്കുന്നത്. രണ്ടും മൂന്നും ഘട്ടങ്ങൾ പൂർത്തിയാകുന്നതും പ്രതീക്ഷിച്ചു ലോകത്തിലെ നിരവധി കപ്പൽ കമ്പനികൾ രംഗത്തുണ്ട്. ഇവർക്കു വിഴിഞ്ഞത്ത് കപ്പൽ അടുപ്പിക്കണമെങ്കിൽ തുറമുഖം പൂർണ സജ്ജമാകണം. നിലവിൽ 800 മീറ്റർ നീളവും 400 മീറ്റർവീതിയുമുള്ള ബർത്തിനെ എംഎസ്സി ഷിപ്പിംഗ് കമ്പനി കൈ യടക്കിയിരിക്കുകയാണ്. മാസത്തിൽ 40 മുതൽ 50 വരെ അടുക്കുന്ന കപ്പലുകളിൽ മിക്കവയും എംഎസ്‌സിയുടേതു മാത്രമാണ്. ലോകത്തിലെ മറ്റ് അഞ്ചോളം പ്രമുഖ കമ്പനികൾ ഇതിനോടകം വിഴിഞ്ഞത്തിന്‍റെ സാധ്യതകൾ തേടിയെത്തിയതായാണറിവ്. ബർത്ത് ഒഴിവില്ലാത്തത് ഈകമ്പനികൾക്ക് തിരിച്ചടിയായി. 2024 ജൂലൈ 11 നാണ് സാൻഫെർണാണ്ടോ എന്ന ആദ്യകപ്പൽ വിഴിഞ്ഞത്ത് അടുപ്പിച്ച് തുടക്കം കുറിച്ചത്. ട്രയൽ റൺ കഴിഞ്ഞ് ഡിസംബറിൽ വ്യാവസായിക തുറമുഖമായി മാറിയ വിഴിഞ്ഞത്തു കഴിഞ്ഞ ദിവസം വരെ ചരക്കുമായി 425 കപ്പൽ അടുത്തു. ഒന്പതുലക്ഷം കണ്ടെയ്നറുകളും സുഗമമായി കൈകാര്യം ചെയ്തു. ലോകത്തിലെ ഏതു തരം തുറമുഖങ്ങളോടും കിടപിടിക്കാൻ പാകത്തിൽ വിഴിഞ്ഞം തുറമുഖം വളർന്നെങ്കിലും കൂടുതൽ കപ്പലുകളെ അടുപ്പിക്കാൻ പാകത്തിൽ എത്തണമെങ്കിൽ രണ്ടും മൂന്നും ഘട്ടം പൂർണ്ണമാകണം. 2028-ൽ രണ്ടാംഘട്ടം പൂർണമാക്കുമെന്ന് പ്രഖ്യാപിച്ചിട്ടു പുലിമുട്ടുപോലും പൂർ ത്തിയാക്കാനായിട്ടില്ല.

അന്താരാഷ്ട്ര ലോകം സംഘർഷാത്മകമായിരിക്കുന്നു: രാഷ്ട്രീയ നിരീക്ഷകൻ ഡോ. മോഹൻ വർഗീസ്

നാലാഞ്ചിറ: അന്താരാഷ്ട്ര ലോകം സംഘർഷാത്മകമായിരിക്കുന്നുവെന്ന് പ്രമുഖ രാഷ്ട്രീയ നിരീക്ഷകനും ടെലിവിഷൻ ഡിബേറ്ററുമായ ഡോ. മോഹൻ വർഗീസ് അഭിപ്രായപെട്ടു. നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂളിന്‍റെ പ്ലസ്ടു വിഭാഗം രജത ജൂബിലി ആഘോഷത്തിന്‍റെ ഭാഗമായി നടത്തുന്ന പ്രഭാഷണ പരമ്പരയിൽ പ്രസംഗിക്കുകയായിരുന്നു അദ്ദേഹം. അമേരിക്കയുടെ നിലവിലെ നിലപാടുകൾ മറ്റു രാജ്യങ്ങൾക്ക് ഒരു ഭീഷണി തന്നെയാണ്. മൈഗ്രേഷൻ അടക്കമുള്ള വിഷയങ്ങൾ കൈ കൊള്ളുന്ന ട്രമ്പിന്‍റെ നിലപാട് ഒരു ഭീഷണിയാണ്. റഷ്യയിലും ഉക്രയിനിലും ഇ സ്രായിലുമൊക്കെ സംഘർഷ ഭരിത മാക്കാനുള്ള ശ്രമങ്ങൾ ഗുരുതര പ്രത്യാഘാതങ്ങൾ സൃഷ്ടിക്കും- അദ്ദേഹം കൂട്ടി ച്ചേർത്തു. ജൂബിലിയുടെ ഭാഗമായി 12 വിഷയങ്ങളിൽ പ്രഭാഷണങ്ങളും ചർച്ചകളും സംഘടിപ്പിച്ചു വരുന്നതായി പ്രിൻസിപ്പൽ ഫാ. ജോസ് ചരുവിൽ പറഞ്ഞു. ‌സാഹിത്യം, ചരിത്രം, ഭരണ ഘടന തുടങ്ങിയ വിഷയങ്ങളിൽ വരും നാളുകളാൽ പ്രഭാഷണങ്ങൾ സംഘടിപ്പിക്കുമെന്നും അദ്ദേഹം പറഞ്ഞു. പ്രിൻസിപ്പൽ ഫാ. ജോസ് ചരുവിൽ അധ്യക്ഷത വഹിച്ചു. വൈസ് പ്രിൻസിപ്പൽ അജീഷ് കുമാർ, ജൂബിലി കൺവീനർ ബിന്നി സാഹിതി, പൊളിറ്റിക്കൽ അധ്യാപകൻ ടി. ഷിജു എന്നിവർ പ്രസംഗിച്ചു.

പപ്പ നാടകം കാണാൻ വന്ന കഥ പങ്കുവച്ച് ഹാരിസ് ഡാനിയൽ

തിരുവനന്തപുരം: യൂണിവേഴ് സിറ്റി കോളജിൽ പഠിക്കുന്ന കാലത്ത് താൻ അഭിനയിച്ച തമിഴ്നാടകം കാണാൻ പപ്പ യൂണിവേഴ്സിറ്റി കോളജിന്‍റെ മതിൽ ചാടി വന്നിരുന്നുവെന്ന് ഹാരിസ് ഡാനിയൽ. മലയാള സിനിമയുടെ പിതാവ് ജെ. സി. ഡാനിയൽ തന്‍റെ നാടകം കാണാൻ മതിൽ ചാടി കടന്നുവന്ന കാര്യം ഹാരിസ് ഡാനിയൽ ഇന്നലെ ഓർമിച്ചത് പൊട്ടിച്ചിരിയോടെയാണ്. ഹോട്ടൽ റീജൻസി ഗ്രാൻഡിൽ ജെ.സി. ഡാനിയൽ ഫൗണ്ടേഷൻ സംഘടിപ്പിച്ച ഹാരിസ് ഡാനിയലിന്‍റെ നവതി ആഘോഷ ചടങ്ങിൽ വച്ചാണ് ഏഴുപതിറ്റാണ്ടിനു പിന്നിലെ നാടകാഭിനയ നിമിഷങ്ങളിലേക്കു അദ്ദേഹം നടന്നു പോയത്. കോളജിൽ ഒരു തമിഴ് ഹാസ്യ നാടകമാണ് ഞാനും കൂട്ടുകാരും ചേർന്ന് അവതരിപ്പിച്ചത്. അതിൽ സ്ത്രീ വേഷമായിരുന്നു എനിക്ക്. ഹാരിസ് ഡാനിയൽ പറഞ്ഞു. എന്‍റെ അഭിനയം കാണാൻ പപ്പയ്ക്കു വലിയ ആഗ്രഹമുണ്ടെന്നറിഞ്ഞപ്പോൾ എനിക്കാകെ അങ്കലാപ്പായി. പപ്പ മുന്നിൽ വന്നിരുന്നാൽ അഭിനയിക്കാൻ പ്രയാസം വരുമെന്നതിനാൽ നാടകം കാണാനുള്ള പാസ് ഞാൻ പപ്പയ്ക്ക് നല്കിയില്ല. യൂണിവേഴ്സിറ്റി കോളജിന്‍റെ മുക്കുംമൂലയും നല്ല പരിചയമുണ്ടായിരുന്നു പപ്പയ്ക്ക്. അതിനാൽ യൂണിവേഴ്സിറ്റി ഓഫീസിന്‍റെ മുൻ വശത്തുള്ള റോഡുവഴി വന്ന് കോളജിന്‍റെ മതിൽ ചാടിക്കടന്നു നാടകവേദിയിൽ എത്തി. സദസിൽ നിന്നുമുയർന്ന വൻ കരഘോഷത്തിനിടയിൽ ഹാരിസ് ഡാനിയൽ പറഞ്ഞു. യൂണിവേഴ്സിറ്റി കോളജ് വിദ്യാർഥിയായിരുന്ന കാലത്ത് തനിക്കു മലയാളം നല്ല വശമുണ്ടായിരുന്നില്ല എന്നും ഹാരിസ് ഡാനിയൽ കൂട്ടിച്ചേർത്തു. മലയാളം പാട്ടുകൾ എനിക്കു വലിയ ഇഷ്ടമായിരുന്നു. കൂട്ടുകാർ പാടാൻ പറയുന്പോൾ തമിഴിൽ പാട്ടെഴുതി എടുത്താണ് പാടിയിരുന്നത്. ജെ. സി. ഡാനിയൽ ഫൗണ്ടേഷൻ ചെയർപേഴ്സണ്‍ സോന എസ്. നായരുടെ സ്നേഹനിർബന്ധത്തിനു വഴങ്ങി കളിയ്ക്കല്ലെ എന്ന് ചൊല്ലും പെണ്ണല്ലെ നീ... എന്ന ഗാനവും ഹാരിസ് ഡാനിയൽ പാടി. ഹാരിസ് ഡാനിയലിന്‍റെ സഹധർമിണി സുശീലാറാണി ഡാനിയൽ, മകൾ അഡലിൻ ഡാനിയൽ, മരുമകൻ ഡോ. രാജ്കുമാർ ഡാനിയൽ എന്നിവർ വേദിയിൽ ഹാരിസ് ഡാനിയലിനൊപ്പം ഉണ്ടായിരുന്നു. നവതി ആഘോഷച്ചടങ്ങിന്‍റെ ഭാഗമായി പിറന്നാൾ കേക്ക് ഹാരിസ് ഡാനിയലും മന്ത്രി രാമചന്ദ്രൻ കടന്നപ്പള്ളിയും സോന എസ്. നായരും ചേർന്നു മുറിച്ചു. ചലച്ചിത്ര അക്കാഡമി ചെയർമാൻ പ്രേംകുമാർ, നെയ്യാറ്റിൻകര മുൻസിപ്പാലിറ്റി ചെയർമാൻ പി. കെ. രാജ്മോഹനൻ, ഭാരത് ഭവൻ മെന്പർ സെക്രട്ടറി ഡോ. പ്രമോദ് പയ്യന്നൂർ, ചലച്ചിത്ര സംവിധായകൻ ജോയ് കെ. മാത്യു, ഡോ. പ്രകാശൻ ഗുരുക്കൾ, ജെ.സി. ഡാനിയൽ ഫൗണ്ടേഷൻ സെക്രട്ടറി സാബു കൃഷ്ണ, ആറ്റുകാൽ തന്പി തുടങ്ങിയവർ ആശംസാപ്രസംഗം നടത്തി. എം. വിൻസന്‍റ് എംഎൽഎ, ചലച്ചിത്ര നിർമാതാവ് ദിനേശ് പണിക്കർ, സൂര്യ കൃഷ്ണമൂർത്തി, ഹാരിസ് ഡാനിയലിന്‍റെ കുടുംബാംഗങ്ങൾ, എൽഐസി അസോസിയേഷൻ ഭാരവാഹികൾ തുടങ്ങിയവർ ഹാരിസ് ഡാനിയലിനെ പൊന്നാട ചാർത്തി ആദരിച്ചു. ‌അഗസ്തീശ്വരം കെഎൻഇ ഐഎൽ മെമ്മോറിയൽ പാസ്റ്ററേറ്റ് പള്ളി പാസ്റ്റർ റവ. എം. കിത്തിയൻ, പള്ളി കമ്മിറ്റി അംഗം തമിലൻ ഡി. ജാനി എന്നിവർ ജന്മദിന പ്രാർഥനയും ആശംസാ പ്രസംഗവും നടത്തി. രഞ്ജു പിറവത്തിന്‍റെ സംഗീത വിരുന്നും ഉണ്ടായിരുന്നു. സ്വന്തം ലേഖിക

ജീവൻ രക്ഷിക്കുന്നവർ സ്വയരക്ഷയ്ക്കു വേണ്ടി നിലവിളിക്കുന്നു: വി.ഡി. സതീശൻ

തിരുവനന്തപുരം: ലൈഫ് ഗാർഡ്മാരുടെ തൊഴിൽ പ്രശ്നങ്ങൾ പരിഹരിക്കണമെന്ന് ആവശ്യപ്പെട്ട് കേരളാ ലൈഫ്ഗാർഡ് എംപ്ലോയീസ് യൂണിയൻ (ഐഎൻടിയുസി) നേതൃത്വത്തിൽ ലൈഫ്ഗാഡുമാർ സെക്രട്ടറിയേറ്റ് മാർച്ചും ധർണ്ണയും നടത്തി. ടൂറിസം വകുപ്പിന് കീഴിൽ 30 വർഷത്തിലധികമായി ജോലി ചെയ്യുന്ന ലൈഫ് ഗാർഡ്മാരെ സ്ഥിരപ്പെടുത്തുക, സേവനത്തിനിടെ മരണമടഞ്ഞവരുടെ ആശ്രിതർക്ക് ആശ്രിത നിയമനം നൽകുക, സാമൂഹ്യ സുരക്ഷാ പദ്ധതികളായ ഇഎസ്ഐ, ഇപിഎഫ്, പെൻഷൻ എന്നിവ നടപ്പാക്കുക, ഗ്രാറ്റുവിറ്റി ഏർപ്പെടുത്തുക, വനിതകളെ കൂടി ലൈഫ് ഗാർഡുമാരായി നിയമിക്കുക, വേതന വർധന നടപ്പാക്കുക. ഇടതുമുന്നണി ഗവൺമെന്‍റ് റദ്ദുചെയ്ത ഫുഡ്, യൂണിഫോം വാഷിംഗ് അലവൻസുകൾ പുനഃസ്ഥാപിക്കുക, 2021നു ശേഷമുള്ള യൂണിഫോം, റെസ്ക്യൂ ഉപകരണങ്ങൾ അടിയന്തരമായി വിതരണം ചെയ്യുക തുടങ്ങിയ ആവശ്യങ്ങൾ ഉന്നയിച്ചാണ് തൊഴിലാളികൾ സെക്രട്ടേറിയേറ്റ് മാർച്ചും ധർണ്ണയും നടത്തിയത്. കേരളാ ലൈഫ്ഗാർഡ് എംപ്ലോയീസ് യൂണിയൻ (ഐഎൻടിയുസി) സംസ്ഥാന പ്രസിഡന്‍റ് വി.ആർ. പ്രതാപൻ അധ്യക്ഷത വഹിച്ചു. എം. വിൻസന്‍റ് എംഎൽഎ സമരപ്രഖ്യാപന സന്ദേശം നടത്തി. വി.ജെ. ജോസഫ്, ചെമ്പഴന്തി അനിൽ, എസ്. സുന്ദരേശൻ, റോജിൻഗോമസ്, ബാബുജി, ആന്‍റ ണി ആൽബർട്ട്, ജലിൻ ജയരാജ്, മലയം ശ്രീകണ്ഠൻ നായർ, കൃഷ്ണവേണി ജി. ശർമ, എം.എസ്. താജുദ്ദീൻ, എം. ഉണ്ണികൃഷ്ണൻ, ശങ്കർ വർക്കല, അക്ഷയ്, അനിൽ ജസ്റ്റസ്, അനൂപ്, യു. പ്രദീപ് തുടങ്ങിയവർ പ്രസംഗിച്ചു.

അദാനി റോയൽസ് കപ്പ് ക്രിക്കറ്റ്: വിഴിഞ്ഞം ബാച്ച്മേറ്റ്സിന് കിരീടം

കോവളം: പ്രഥമ അദാനി റോയൽസ് കപ്പ് ക്രിക്കറ്റ് ടൂർണമെന്‍റിൽ വിഴിഞ്ഞം ബാച്ച്മേറ്റ്സിനു കിരീടം. അവസാന പന്തുവരെ ആവേശം അലതല്ലിയ കലാശപ്പോരാട്ടത്തിൽ ഹിറ്റേഴ്സ് എയർപോർട്ടിനെ പരാജയപ്പെടുത്തിയാണ് വിഴിഞ്ഞം കിരീടത്തിൽ മുത്തമിട്ടത്. ഫൈനലിൽ ആദ്യം ബാറ്റ് ചെയ്ത ഹിറ്റേഴ്സ് എയർപോർട്ട്, നിശ്ചിത അഞ്ച് ഓവറിൽ നാല് വിക്കറ്റ് നഷ്ടത്തിൽ 62 റണ്‍സെടുത്തു. മറുപടി ബാറ്റിംഗിനിറങ്ങിയ വിഴിഞ്ഞം ബാച്ച്മേറ്റ്സ് ഒൻപത് വിക്കറ്റിന്‍റെ തകർപ്പൻ വിജയം സ്വന്തമാക്കി. വിഴിഞ്ഞത്തിനു വേണ്ടി ഓപ്പണർ ഇമ്മാനുവേൽ തകർപ്പൻ പ്രകടനം കാഴ്ച്ചവച്ചപ്പോൾ അവസാന ഓവറിലെ അവസാന പന്തിൽ ബൗണ്ടറി നേടിക്കൊണ്ട് ബാച്ച്മേറ്റ്സ് ലക്ഷ്യം മറികടന്നു (64/1).22 പന്തിൽനിന്ന് 56 റണ്‍സ് അടിച്ചുകൂട്ടിയ ഇമ്മാനുവേലിന്‍റെ ഒറ്റയാൾ പോരാട്ടമാണ് ടീമിന് വിജയമൊരുക്കിയത്. ടൂർണമെന്‍റിൽ 207 റണ്‍സ് നേടിയ ഇമ്മാനുവേൽ തന്നെയാണ് കളിയിലെ താരവും ടൂർണമെന്‍റിലെ താരവും. മികച്ച ബൗളറായി മച്ചന്പീസ് വിഴിഞ്ഞത്തിന്‍റെ താരം വിജയിയെയും തിരഞ്ഞെടുത്തു. 16 ടീമുകൾ പങ്കെടുത്ത ടൂർണമെന്‍റിൽ ആദ്യ സെമിയിൽ അരോമ എയർപോർട്ടിനെ പരാജയപ്പെടുത്തിയാണ് വിഴിഞ്ഞം ബാച്ച്മേറ്റ്സ് ഫൈനലിൽ ഇടംപിടിച്ചത്. രണ്ടാം സെമിയിൽ ക്രേസി 11 വിഴിഞ്ഞത്തെ തകർത്ത് ഹിറ്റേഴ്സ് എയർപോർട്ടും കലാശക്കളിക്ക് യോഗ്യത നേടി. വിജയികൾക്കുള്ള സമ്മാനങ്ങൾ കോവളം എംഎൽഎ എം. വിൻസെന്‍റ്, വിഴിഞ്ഞം വോയേജ് ചർച്ച് വികാരി ഫാ.ഡോ. നിക്കോളാസ് എന്നിവർ വിതരണം ചെയ്തു. കൗണ്‍സിലർ പനത്തുറ ബൈജു, സർക്കിൾ ഇൻസ്പെക്ടർ പ്രകാശ്, അദാനി പോർട്ട് കോർപ്പറേറ്റ് അഫയേഴ്സ് ഹെഡ് ഡോ. അനിൽ ബാലകൃഷ്ണൻ,അദാനി ട്രിവാൻഡ്രം എയർപോർട്ട് ചീഫ് ഓഫീസർ രാഹുൽ ഭട്കോട്ടി, കേരള റീജിയണൽ കോർപ്പറേറ്റ് കമ്മ്യൂണിക്കേഷൻസ് ഹെഡ് മഹേഷ് ഗുപ്തൻ, ട്രിവാൻഡ്രം റോയൽസ് മാനേജ്മെന്‍റ് പ്രതിനിധി മനോജ് മത്തായി, ടീം പി.ആർ മേധാവി ഡോ. മൈതിലി, ട്രിവാൻഡ്രം റോയൽസ് ഫീൽഡിംഗ കോച്ച് മഥൻ മോഹൻ തുടങ്ങിയവർ പങ്കെടുത്തു.

ജവഹർ നഗർ വസ്തുതട്ടിപ്പ് : അനന്തപുരി മണികണ്ഠനെയും സുനിലിനെയും കസ്റ്റഡിയില്‍ വാങ്ങി

പേരൂര്‍ക്കട: ജവഹര്‍ നഗറിലെ വസ്തുതട്ടിപ്പുമായി ബന്ധപ്പെട്ട് അനന്തപുരി മണികണ്ഠനെയും സുനില്‍ ബാബു തോമസിനെയും മ്യൂസിയം പോലീസ് കസ്റ്റഡിയില്‍ വാങ്ങി. നാലുദിവസത്തേക്കാണ് കോടതിയില്‍ അപേക്ഷ സമര്‍പ്പിച്ച് പ്രതികളെ കസ്റ്റഡിയില്‍ വാങ്ങിയത്. ചൊവ്വാഴ്ച മുതല്‍ പ്രതികളെ വിവിധ സ്ഥലങ്ങളില്‍ തെളിവെടുപ്പിനായി കൊണ്ടുപോകും. മണികണ്ഠനെ ഇയാളുടെ പുത്തന്‍കോട്ടയിലെ വീട്ടിലും മേലാംകോട്ടെ വാടകവീട്ടിലും കിള്ളിപ്പാലത്തെ ആധാരമെഴുത്ത് ഓഫീസിലും ശാസ്തമംഗലം സബ് രജിസ്ട്രാര്‍ ഓഫീസിലും തെളിവെടുപ്പിന് എത്തിക്കുമെന്നാണു സൂചന. ‌ അനില്‍ തമ്പിക്കുവേണ്ടി ഡോറ അസറിയ ക്രിപ്‌സിന്‍റെ പേരിലുള്ള 10 കോടിയിലേറെ മതിപ്പുവില വരുന്ന വസ്തുവും വീടും തട്ടിയെടുക്കുന്നതിനുവേണ്ടി വ്യാജ രേഖകള്‍ ഉപയോഗിച്ച് ആധാരം രജിസ്റ്റര്‍ ചെയ്തുവെന്നതാണ് മണികണ്ഠനെതിരേയുള്ള കുറ്റം. അതേസമയം ഇയാളുടെ സുഹൃത്ത് സുനില്‍ ബാബു തോമസാണ് കരകുളം സ്വദേശിനിയായ വസന്തയെ മണികണ്ഠന് പരിചയപ്പെടുത്തിയത്. ഡോറയുമായി പ്രായത്തിലും രൂപത്തിലും സാദൃശ്യമുള്ളയാളെ കണ്ടെത്തേണ്ടുന്നത് ആധാരം രജിസ്റ്റര്‍ ചെയ്യാന്‍ അനിവാര്യമായിരുന്നു. ഇതുകൂടാതെ ധനനിശ്ചയ പ്രമാണത്തില്‍ കള്ളസാക്ഷിയായി ഒപ്പിട്ടിരിക്കുന്നതും സുനിലാണ്. സുനിലിനെയും സബ്‌രജിസ്ട്രാര്‍ ഓഫീസിലെത്തിച്ച് തെളിവെടുപ്പ് നടത്തും. കേസിലെ പ്രധാന പ്രതി അനില്‍ തമ്പി ഇപ്പോഴും ഒളിവിലാണെങ്കിലും ഇയാളെക്കുറിച്ച് കൂടുതല്‍ വിവരങ്ങള്‍ അറിയുന്നതിനും കേസിന്‍റെ മര്‍മ്മപ്രധാനമായ ഭാഗം കണ്ടെത്തുന്നതിനും അനന്തപുരി മണികണ്ഠനെ ചോദ്യം ചെയ്യേണ്ടതുണ്ട്. എന്നാല്‍ എല്ലാ കള്ളത്തരവും തന്നെക്കൊണ്ടു ചെയ്യിച്ചത് അനില്‍ തമ്പിയാണെന്നു മാത്രമായിരുന്നു അറസ്റ്റിലായ ദിവസം മണികണ്ഠനു പറയാനുണ്ടായിരുന്നത്. ആഴ്ചകളായി ഒഴിവില്‍ക്കഴിഞ്ഞു വരുന്ന അനില്‍ തമ്പിയെ കണ്ടെത്തുന്നതിനുള്ള അന്വേഷണം പോലീസ് ഊര്‍ജ്ജിതമായി നടത്തുന്നുണ്ട്.

എക്‌സ് റേ യൂണിറ്റ് പ്രവര്‍ത്തനം നിര്‍ത്തിയിട്ട് അഞ്ചു ദിവസം; യൂത്ത് കോണ്‍ഗ്രസ് പ്രതിഷേധിച്ചു

പാറശാല: പാറശാല താലൂക്ക് ആശുപത്രിയില്‍ അഞ്ചു ദിവസമായി എക്‌സ് റേ യൂണിറ്റ് പ്രവര്‍ത്തിക്കുന്നില്ല. കാരണം തിരക്കിയപ്പോഴാണ് അറിയുന്നത് ആറു മാസം മുമ്പ് എക്‌സ് റേ മെഷീനു തകരാർ സംഭവിച്ചിരുന്നുവെന്നും അക്കാര്യം അപ്പോ തന്നെ എക്‌സ് റേ വിഭാഗത്തിലെ ജീവനക്കാര്‍ മേല്‍തട്ടില്‍ അറിയിച്ചിരുന്നും. എന്നാല്‍ തകരാര്‍ പരിഹരിക്കാതെ മുന്നോട്ട് പോയതാണു ഇപ്പോൾ മെഷീനു വലിയ തകരാര്‍ സംഭവിക്കാന്‍ കാരണം. ആശുപത്രി അധികൃതരുടെ വീഴ്ച തന്നെയാണ് എക്‌സ് റേ തകരാറിലായതിന് കാരണം. നിരവധി രോഗികളാണു ദുരിതത്തിലായത്. യൂത്ത് കോണ്‍ഗ്രസ് പാറശാല നിയോജക മണ്ഡലം പ്രസിഡന്‍റ് ബ്രമിന്‍ ചന്ദ്രന്‍റെ നേതൃത്വത്തില്‍ പ്രവര്‍ത്തകര്‍ എക്‌സ് റേ റൂമിനു മുന്നില്‍ കുത്തിയിരുന്ന് പ്രതിഷേധിച്ചു. ഒടുവില്‍ ആശുപത്രി അധികൃതരും പോലീസും പ്രവര്‍ത്തകരുമായി നടത്തിയ ചര്‍ച്ചയില്‍ നാളെ തന്നെ തകരാര്‍ പരിഹരിച്ച് പ്രവര്‍ത്തനം ആരംഭിക്കുമെന്ന് ആശുപത്രി സൂപ്രണ്ട് രേഖ മൂലം ഉറപ്പു നല്‍കി തുടര്‍ന്നു പ്രതിഷേധം അവസാനിച്ച് സമരക്കാര്‍ പിരിഞ്ഞു. കൊല്ലയില്‍ ശാം ലാല്‍, വിനയനാഥ്, ശാലിനി രാജേഷ്, അജയന്‍, പാറശാല അഭിലാഷ്, വിബിന്‍ തുടങ്ങിയവര്‍ പ്രസംഗിച്ചു.

നെട്ടുകാൽത്തേരി തുറന്ന ജയിലിൽ മത്സ്യകൃഷി വിളവെടുപ്പ്

നെയ്യാർഡാം: നെട്ടുകാൽത്തേരി തുറന്ന ജയിലിൽ മത്സ്യകൃഷി വിളവെടുത്തു. പാറശാല എംഎൽഎ സി.കെ. ഹരീന്ദ്രൻ ഉദ്ഘാടനം നിർവ്വഹിച്ചു. ഫിഷറീസ് വകുപ്പിന്‍റെ സഹായത്താൽ നടപ്പാക്കിയ പദ്ധതിയിൽ റോഹു, കട്‌ല, ഗ്രാസ്‌കാർപ്പ്, ഇനത്തിൽപെട്ട 1,000 കിലോ മത്സ്യമാണ് ജയിലിലെ ചെക്ക് ഡാമിൽ നിന്നും വിളവെടുത്തത്. തിരുവനന്തപുരം ജില്ലയിലെ സെൻട്രൽ ജയിൽ ഉൾപ്പെടെ‌‌യുള്ള ജയിലുകളിലെ അന്തേവാസികൾക്ക് ആവശ്യമായ മത്സ്യം വിളവെടുപ്പു ദിവസം എത്തിക്കാനായി. കൂടാതെ തുറന്ന ജയിലിനു പുറത്തുള്ള സെയിൽസ് കൗണ്ടർ വഴി പൊതുജനങ്ങൾക്കും മത്സ്യം വിറ്റഴിച്ചു. തുറന്ന ജയിൽ സൂപ്രണ്ട് എസ്. സജീവ്, കള്ളിക്കാട് പഞ്ചായത്ത് പ്രസിഡന്‍റ് പന്ത ശ്രീകുമാർ, വാർഡ് അംഗം ശ്രീകല, ഫിഷറീസ് അസിസ്റ്റന്‍റ് ഡയറക്ടർ സജീവ്, ഫിഷറീസ് കോ - ഓർഡിനേറ്റർ ജീന, ഫിഷറീസ് പ്രമോട്ടർ അജയകുമാർ എന്നിവർ പങ്കെടുത്തു.

വയോധികനെ വീട്ടില്‍ കയറി മര്‍ദിച്ച പ്രതി അറസ്റ്റില്‍

പൂന്തുറ: വീട്ടില്‍ അതിക്രമിച്ചുകയറി വയോധികനെ മര്‍ദിച്ച കേസിലെ പ്രതിയെ പൂന്തുറ പോലീസ് അറസ്റ്റ് ചെയ്തു. കമലേശ്വരം ഗംഗാനഗര്‍ സ്വദേശി രാഹുല്‍ (27) ആണ് അറസ്റ്റിലായത്. കഴിഞ്ഞ ശനിയാഴ്ച വൈകുന്നേരം ആറരയോടെ കമലേശ്വരം ഗംഗാനഗര്‍ സ്വദേശി അഹമ്മദ് കുഞ്ഞിന്‍റെ (63) വീട്ടില്‍ അതിക്രമിച്ചുകയറിയ രാഹുലും ഇയാളുടെ സുഹൃത്ത് കമലേശ്വരം സ്വദേശി ശ്യാമും ചേര്‍ന്ന് അഹമ്മദ് കുഞ്ഞിനെ ക്രൂരമായി മര്‍ദിക്കുകയായിരുന്നു. പരാതിക്കാരന്‍റെ അയല്‍വാസിയായ രാഹുല്‍, അഹമ്മദ് കുഞ്ഞിന്‍റെ വീടിനു സമീപം മാലിന്യനിക്ഷേ പം നടത്തിയതു ചോദ്യം ചെയ് തതിലുള്ള വിരോധത്തിലാണ് വീട്ടില്‍ കയറി അക്രമണം നടത്തിയത്. രാഹുല്‍ ഫോര്‍ട്ട് പോലീസ് സ്റ്റേഷനിലെ റൗഡി ലിസ്റ്റില്‍ ഉള്‍പ്പെട്ടയാളാണ്. അഹമ്മദ് കുഞ്ഞു നല്‍കിയ പരാതിയില്‍ കേസെടുത്ത പോലീസ് നടത്തിയ അന്വേഷണത്തിലാണ് രാഹുല്‍ പിടിയിലായത്. ഒളിവില്‍ കഴിയുന്ന ശ്യാമിനായുളള അന്വേഷണം ഊര്‍ജിതമാക്കിയതായി പോലീസ് പറഞ്ഞു. പൂന്തുറ എസ്എച്ച്ഒ സജീവിന്‍റെ നേതൃത്വത്തില്‍ എസ്ഐ ശ്രീജേഷ്, ജൂണിയര്‍ എസ്ഐ നവീന്‍, സിപിഒമാരായ ഗിരീഷ്, അരുണ്‍ എന്നിവരുള്‍പ്പെട്ട പോലീസ് സംഘം അറസ്റ്റ് ചെയ്ത പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

കേരളത്തിലേക്ക് എംഡിഎംഎ എത്തിക്കുന്ന ഇടനിലക്കാരി പിടിയില്‍

പേരൂര്‍ക്കട: കേരളത്തിലേക്ക് എംഡിഎംഎ എത്തിക്കുന്ന ഇടനിലക്കാരിയെ ഫോര്‍ട്ട് പോലീസ് പിടികൂടി. കര്‍ണ്ണാടക ഡാക്ഷിന ബല്‍ത്താങ്കടി സ്വദേശിനി അനുഷ (22) ആണ് പിടിയിലായത്. കഴിഞ്ഞ ദിവസം പോലിസ് 32 ഗ്രാം എംഡിഎംഎയുമായി മുട്ടത്തറ സ്വദേശി ഗോപകുമാറിനെ പിടികൂടിയിരുന്നു. ഇയാളെ ചോദ്യം ചെയ്തതില്‍ നിന്നാണ് ഇതിന്‍റെ ഉറവിടം ബംഗളൂരുവാണെന്നു മനസിലായത്. തുടര്‍ന്ന് പ്രത്യേക അന്വേഷണ സംഘം ബംഗളൂരുവിലെത്തുകയും ഇടനിലക്കാരിയായി പ്രവര്‍ത്തിച്ചുവന്ന അനുഷയെ പിടികൂടുകയുമായിരുന്നു. പേയിംഗ് ഗസ്റ്റ് ഹോസ്റ്റലുകള്‍ കേന്ദ്രീകരിച്ചുള്ള അന്വേഷണം ഇടനിലക്കാരിയെ പിടികൂടാന്‍ പോലീസിനു സഹായകമായി. കേരളത്തിലെ മറ്റു ജില്ലകളിലേക്ക് എംഡിഎംഎ എത്തുന്നതിലും ഇവര്‍ക്കു പങ്കുള്ളതായി പോലീസ് കണ്ടെത്തിയിട്ടുണ്ട്. കഴിഞ്ഞ രണ്ടു വര്‍ഷമായി ഇവര്‍ ലഹരിമരുന്നിന്‍റെ ഇടനിലക്കാരിയായ പ്രവര്‍ത്തിച്ചു വരികയായിരുന്നു. കഴിഞ്ഞ ഒരു വര്‍ഷത്തിനിടയില്‍ ലക്ഷക്കണക്കിന് രൂപയുടെ മയക്കു മരുന്ന്, സിന്തറ്റിക് ഡ്രഗ്‌സ് എന്നിവ കേരളത്തിലേക്ക് എത്തിച്ചതായി വിവരം ലഭിച്ചിട്ടുണ്ട്. സോഷ്യല്‍ മീഡിയ വഴി പരിചയപ്പെടുന്ന യുവാക്കളെയും യുവതികളെയുമാണ് ഇപ്രകാരം യുവതി ചതിക്കുഴിയില്‍പ്പെടുത്തുന്നത്. ആദ്യം ചെറിയ രീതിയില്‍ ഉപയോഗത്തിനായി ഇവരെ സമീപിക്കുന്ന യുവതിയുവാക്കളെ പിന്നീട് ലഹരിക്കച്ചവടത്തിലേക്ക് വഴിതിരിച്ചുവിടുകയാണ് ചെയ്യുന്നത്. അറസ്റ്റിലായ പ്രതിയെ കോടതിയില്‍ ഹാജരാക്കി.

നെയ്യാർ ഡാം കുടുംബാരോഗ്യ കേന്ദ്രത്തിൽ കള്ളിക്കാട് പഞ്ചായത്ത് ഭരണസമിതിയുടെ ധർണ

നെയ്യാർഡാം: നെയ്യാർഡാം കുടുംബാരോഗ്യ കേന്ദ്രത്തിൽ കള്ളിക്കാട് പഞ്ചായത്ത് ഭരണസമിതിയുടെ നേതൃത്വത്തിൽ ധർണ നടത്തി. നെയ്യാർ ഡാം കുടുംബാരോഗ്യ കേന്ദ്രത്തിലെ ഡോക്ടർ, എംഎൽഎയുമായി ചേർന്ന് ആരോഗ്യ സംവിധാനത്തെ തകർക്കുന്നു എന്നാരോപിച്ചായിരുന്നു ധർണ നടത്തിയത്. കള്ളിക്കാട് പഞ്ചായത്ത് പ്രസിഡന്‍റ് പന്ത ശ്രീകുമാർ ധർണ ഉദ്ഘാടനം ചെയ്തു. പഞ്ചായത്ത് നിരന്തരമായി ഡോക്ടറെ മാറ്റണമെന്ന് ആവശ്യപ്പെട്ടിട്ടും, അതു ചെയ്യാത്തത് രാഷ്ട്രീയത്തിന്‍റെ പേരിലെന്നും പന്ത ശ്രീകുമാർ ആരോപിച്ചു. ആശുപത്രിയിൽ മരുന്നുകൾ വാങ്ങുന്നതിന് പഞ്ചായത്ത് ഭരണസമിതി ആറു ലക്ഷം രൂപയോളം വകയിരുത്തിയിട്ടും സമയബന്ധിതമായി മരുന്നടുക്കുവാൻ ഡോക്ടർ തയാറാകുന്നില്ല. അതെപ്പറ്റി അന്വേഷിച്ചാൽ ഡിഎംഒ മെഡിസിൻ തരുന്നില്ലെന്നാണ് ഡോക്ടർ പറയുന്നതെന്നും പഞ്ചായത്ത് പ്രസിഡന്‍റ് പറയുന്നു. ജനങ്ങളുടെ ആരോഗ്യത്തെ താറുമാറാക്കി പഞ്ചായത്തു ഭരണത്തെ ഇകഴ്ത്തി കാണിക്കാനുള്ള രാഷ്ട്രീയം കളിക്കുകയാണ് ഡോക്ടറെന്നും പന്ത ശ്രീകുമാർ പറഞ്ഞു. പഞ്ചായത്ത് ഭരിക്കുന്ന ബിജെപിയിലെ അംഗങ്ങളും ധർണയിൽ പങ്കെടുത്തു.

വാര്‍ഷികാഘോഷം നടത്തി

പേരൂര്‍ക്കട: വട്ടിയൂര്‍ക്കാവ് അഞ്ചാംമട സ്‌കൂളിലെ മുന്‍ അധ്യാപകന്‍ യു. കേശവന്‍ നാടാരുടെ അനുസ്മരണവും ഭാരത് പ്രസിന്‍റെ 40-ാമതു വാര്‍ഷികവും കൊടുങ്ങാനൂര്‍ ഭാരത് പ്രസ് അങ്കണത്തില്‍ നടത്തി. വി.കെ. പ്രശാന്ത് എംഎല്‍എ ഉദ്ഘാടനം ചെയ്തു. മുന്‍ ജീവനക്കാരെ ചടങ്ങില്‍ ആദരിക്കുകയും എസ്എല്‍എല്‍സി, പ്ലസ്ടു പരീക്ഷകളിൽ വിജയിച്ചവരെ അനുമോദിക്കുകയും ചെയ്തു. കേരള പ്രിന്‍റേഴ്സ് അസോസിയേഷന്‍ സംസ്ഥാന പ്രസിഡന്‍റ് വൈ. വിജയന്‍, കേരളസംസ്ഥാന യുവജന കമ്മീഷന്‍ മെമ്പര്‍ ശ്രീജിത്ത് ഹരികുമാര്‍, സീനിയേഴ്‌സ് കോണ്‍ഗ്രസ് സംസ്ഥാന പ്രസിഡന്റ് പി.ആര്‍. ചന്ദ്രമോഹന്‍ തുടങ്ങിയവര്‍ പങ്കെടുത്തു.

സിപിഎം പ്രതിഷേധ യോഗം

നെടുമങ്ങാട്: ഛത്തീസ്ഗഡിൽ കന്യാസ്ത്രികളെ ജയിലിലടച്ച നടപടിയിലും ഫാസിസ്റ്റ് ഭീകരതയിലും പ്രതിഷേധിച്ച് സിപിഎം പഴകുറ്റി ലോക്കൽ കമ്മിറ്റി സംഘടിപ്പിച്ച പ്രതിഷേധ യോഗം ജില്ലാ സെക്രട്ടേറിയറ്റംഗം ബി. സത്യൻ ഉദ്ഘാടനം ചെയ്തു. ഏരിയ കമ്മിറ്റി അംഗങ്ങളായ പി. ഹരികേശൻ, മന്നൂർക്കോണം രാജേന്ദ്രൻ, എസ്‌. ശ്രീകേശ്, ലോക്കൽ കമ്മിറ്റി സെക്രട്ടറി സി.ബി. ദിലീപ്, ബ്രാഞ്ച് സെക്രട്ടറി അയൂബ് ഖാൻ, ഇരുമരം സിഎസ്‌ഐ ചർച്ച് വികാരി പുഷ്പരാജ് തുടങ്ങിയവർ പങ്കെടുത്തു.

പഠനോപകരണ വിതരണം നടന്നു

വെള്ളറട: ഭാരതീയ ജനതാ പാര്‍ട്ടി ആര്യന്‍കോട് വാര്‍ഡ് കമ്മിറ്റി സംഘടിപ്പിച്ച പഠനോപകരണ വിതരണം കുറ്റിയായണിക്കാട് ജംഗ്ഷനില്‍ പാര്‍ട്ടി സൗത്ത് ജില്ലാ അധ്യക്ഷന്‍ മുക്കംപാലംമൂട് ബിജു ഉദ്ഘാടനം നിര്‍വഹിച്ചു. സിനിമ സീരിയല്‍ താരം വിവേക് ഗോപന്‍ മുഖ്യാതിഥിയായിരുന്നു. കൂടാതെ സി. സിന്ധു, ആര്‍.എസ്. അഖില്‍, കീഴാറൂര്‍ രതീഷ്, രാജേഷ്, പ്രഭാകരന്‍ മലയില്‍ തുടങ്ങിയവര്‍ പങ്കെടുത്തു. ഉന്നത പരീക്ഷകളില്‍ വിജയം കൈവരിച്ച വിദ്യാര്‍ഥികളെ അനുമോദിക്കലും വാര്‍ഡില്‍ നിന്നും ഓപ്പറേഷന്‍ സിന്ദൂറിന്‍റെ ഭാഗമായി പങ്കെടുത്ത സൈനികരെ ആദരിക്കുകയും ചെയ്തു.

മാറനല്ലൂർ ക്രൈസ്റ്റ് നഗർ പബ്ലിക് സീനിയർ സെക്കൻഡറിയിൽ മെറിറ്റ് ഡേ

മാറനല്ലൂർ: ക്രൈസ്റ്റ് നഗർ പബ്ലിക് സീനിയർ സെക്കൻഡറി സ്കൂളിൽ കഴിഞ്ഞ അധ്യായന വർഷത്തിൽ എസ്എസ്എൽസി, പ്ലസ്ടു പരീക്ഷകളിൽ ഉന്നതവിജയം നേടിയ വിദ്യാർഥികളെ ആദരിച്ചു മെറിറ്റ് ഡേ ആഘോഷിച്ചു. പോലീസ് ഹെഡ്ക്വാർട്ടേഴ്സ് എഡിജിപി എസ്. ശ്രീജിത്ത് വിശിഷ്ടാതിഥിയായിരുന്നു. വിദ്യാർഥികൾക്ക് അദ്ദേഹം ഉപഹാരം സമ്മാനിച്ചു. പ്രിൻസിപ്പൽ ഫാ. ചാക്കോ പുതുകുളം സിഎംഐ അധ്യക്ഷത വഹിച്ചു. സ്കൂളിലെ എല്ലാ വിദ്യാർത്ഥികൾകും വൈസ് പ്രിൻസിപ്പൽ ഫാ. മാത്യു പുത്തൻപുരക്കൽ സിഎംഐ, കെജി ഇൻ ചാർജ് ലളിതകുമാരി, അക്കാദമിക് കോ-ഓർഡിനേറ്റർ വി.വി. സുചിത്ര, സ്റ്റാഫ് സെക്രട്ടറി വിജിത് കുമാർ എന്നിവരും വിദ്യാർഥികൾക്ക് ഉപഹാരം സമ്മാനിച്ചു. പി‌ടിഎ ഭാരവാഹികൾ, രക്ഷിതാക്കൾ തുടങ്ങിയവർ പരിപാടിയിൽ പങ്കെടുത്തു. പിടിഎ പ്രസിഡന്‍റ് പ്രേംജിത്ത് കുട്ടികളെ അനുമോദിച്ചും സംസാരിച്ചു. തുടർന്നു വിദ്യാർഥികളുടെ വിവിധ കലാപരിപാടികളും അരങ്ങേറി.

ബഹിരാകാശ രംഗത്ത് ഇന്ത്യ മുന്നേറുന്നു: ഐഎസ്ആര്‍ഒ ചെയര്‍മാന്‍

നേമം: ബഹിരാകാശ രംഗത്ത് വികസിത രാഷ്ട്രങ്ങളോടൊപ്പം ഇന്ത്യ തുല്യ പങ്കാളിത്തത്തോടെ മുന്നേറുകയാണെന്ന് ഐഎസ് ആര്‍ഒ ചെയര്‍മാന്‍ ഡോ. വി. നാരായണന്‍. സിഎസ്‌ഐആര്‍-നിസ്റ്റ് സ്വര്‍ണജൂബിലി ആഘോഷങ്ങളുടെ ഭാഗമായി സംഘടിപ്പിച്ച ദേശീയ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. എന്‍ഐഎസ്എആര്‍ വിക്ഷേപണം ചരിത്രപരമായ നേട്ടമാണെന്നും അതിന്‍റെ വിക്ഷേപണ വാഹനം രൂപകല്‍പന ചെയ്യുന്നതില്‍ ഇന്ത്യ നിര്‍ണായക പങ്ക് വഹിച്ചതായും ഡോ. നാരായണന്‍ പറഞ്ഞു. നിസ്റ്റ് ഡയറക്ടര്‍ ഡോ. സി. അനന്തരാമകൃഷ്ണന്‍ അധ്യക്ഷത വഹിച്ചു. നിരവധി ശാസ്ത്രജ്ഞരും പരിപാടിയില്‍ പങ്കെടുത്തു. സമ്മേളനത്തിന്‍റെ ഭാഗമായി സ്റ്റാര്‍ ആലുക്കാസ്, പ്രോട്ടോണ്‍ പോളിമേഴ്‌സ്, ടൈറ്റന്‍ ഇന്‍ഡസ്ട്രീസ് എന്നിവയുമായി നിസ്റ്റ് ധാരണാപത്രങ്ങള്‍ ഒപ്പുവച്ചു.

കവടിയാർ സാൽവേഷൻ ആർമി എച്ച്എസിൽ നമ്മുടെ ഭാഷ പദ്ധതി

തിരുവനന്തപുരം: വിദ്യാർഥികളിൽ വായനാശീലം പ്രോത്സാഹിപ്പിക്കുക എന്ന ലക്ഷ്യത്തോടെ ദീപിക ദിനപത്രം നടപ്പാക്കുന്ന നമ്മുടെ ഭാഷാ പദ്ധതിയുടെ ഭാഗമായി കവടിയാർ സാൽവേഷൻ ആർമി എച്ച്എസിൽ സൂര്യപ്രഭ ഗ്രൂപ്പ് സ്പോൺസർ ചെയ്ത ദീപിക ദിനപത്രത്തിന്‍റെ ഉദ്ഘാടനം സൂര്യപ്രഭ ഗ്രൂപ്പ് എംഡി കെ.പി മോഹൻ നിർവഹിച്ചു. സാൽവേഷൻ ആർമി പ്രോഗ്രാം സെക്രട്ടറി ലെഫ്. കേണൽ എൻ.ഡി. ജോഷ്വാ അധ്യക്ഷനായി. സാൽവേഷൻ ആർമി പ്രോഗ്രാം സെക്രട്ടറി ലെഫ്. കേണൽ എൻ.ഡി. ജോഷ്വാ അധ്യക്ഷനായി. സാൽവേഷൻ ആർമി പബ്ലിക്ക് റിലേഷൻ സെക്രട്ടറി മേജർ ടി.ഇ. സ്റ്റീഫൻസണ്‍, എഡ്യൂക്കേഷൻ സെക്രട്ടറി മേജർ സുഷാ റോയി, മാർത്തോമാസഭ ഭദ്രാസന കൗണ്‍സിൽ അംഗം ടി.ജെ. മാത്യു മാരാമണ്‍, സ്കൂൾ ഹെഡ്മിസ്ട്രസ് ബി.പുഷ്പിത, എഎച്ച്ടി കോ-ഓർഡിനേറ്റർ മേജർ ലീലാമ്മ സ്റ്റീഫൻസണ്‍, സൂര്യ മോഹൻ, വി.ടി ജയരാജ്, ദീപിക സർക്കുലേഷൻ മാനേജർ ഇ.വി. വർക്കി എന്നിവർ പ്രസംഗിച്ചു.

സിപിഐ ജില്ലാ സമ്മേളനത്തിനു നാളെ തുടക്കമാകും

തിരുവനന്തപുരം : സിപിഐ ജില്ലാ സമ്മേളനു നാളെ തുടങ്ങും. എട്ട്, ഒൻപതു തീയതികളിൽ വഴുതക്കാട് ടാഗോർ തീയേറ്ററിലാണു പ്രതിനിധി സമ്മേളനം. എട്ടിനു രാവിലെ 10ന് സിപിഐ ദേശീയ എക് സിക്യൂട്ടീവ് അംഗം കെ. പ്രകാശ് ബാബു പ്രതിനിധി സമ്മേളനം ഉദ്ഘാടനം ചെയ്യും. മന്ത്രിമാരായ ജി.ആർ. അനിൽ, ജെ. ചിഞ്ചുറാണി, നേതാക്കളായ സത്യൻ മൊകേരി, രാജാജി മാത്യു തോമസ്, കെ.ആർ. ചന്ദ്രമോഹൻ, സി.പി. മുരളി എന്നിവർ പ്രതിനിധി സമ്മേളനത്തിൽ പങ്കെടുക്കും. ഒന്പതിനു വൈകുന്നേരം പുതിയ ജില്ലാ കൗണ്‍സിലിന്‍റെ രൂപീകരണ ശേഷം സമ്മേളനം സമാപിക്കും. സമ്മേളനത്തിന്‍റെ ഭാഗമായുള്ള പതാക- ബാനർ-കൊടിമര ജാഥകളുടെ സംഗമവും സാംസ്കാരിക സമ്മേളനവും നാളെ നടക്കും. നെടുമങ്ങാട് പി.എം. സുൽത്താൻ സ്മൃതി മണ്ഡപത്തിൽനിന്നും ആരംഭിക്കുന്ന പതാക ജാഥ വി. ശശി എംഎൽഎ ഉദ്ഘാടനം ചെയ്യും. നെയ്യാറ്റിൻകരയിൽ കെ.കെ. ശ്രീധറിന്‍റെ സ്മൃതി മണ്ഡപത്തിൽ നിന്നും ആരംഭിക്കുന്ന ബാനർ ജാഥ ഡെപ്യൂട്ടി മേയർ പി.കെ. രാജു ഉദ്ഘാടനം ചെയ്യും. ചാക്കയിലെ എൻ. അരവിന്ദൻ സ്മൃതി മണ്ഡപത്തിൽനിന്നും കൊടിമര ജാഥ ആരംഭിക്കും. പള്ളിച്ചൽ വിജയൻ ഉദ്ഘാടനം ചെയ്യും. മൂന്നു ജാഥകളും വൈകുന്നേരം നാലിനു പാളയം രക്തസാക്ഷി മണ്ഡപത്തിൽ കേന്ദ്രീകരിച്ച ശേഷം പൊതുസമ്മേളന നഗരിയായ പുത്തരിക്കണ്ടം മൈതാനിയിൽ എത്തിച്ചേരും. പതാക മന്ത്രി ജി.ആർ. അനിലും ബാനർ പാർട്ടി ജില്ലാ സെക്രട്ടറി മാങ്കോട് രാധാകൃഷ്ണനും കൊടിമരം എൻ. രാജനും ഏറ്റുവാങ്ങിയശേഷം പൊതുസമ്മേളന നഗരിയിൽ പതാക ഉയരും. തുടർന്നു നടക്കുന്ന സാംസ്കാരിക സമ്മേളനം മന്ത്രി ജി.ആർ. അനിൽ ഉദ് ഘാടനം ചെയ്യും. സിപിഐ സംസ്ഥാന എക്സിക്യൂട്ടീവ് അംഗം മുല്ലക്കര രത്നാകരൻ മുഖ്യപ്രഭാഷണം നടത്തും. കവി കുരീപ്പുഴ ശ്രീകുമാർ, സംവിധായകൻ വി.സി. അഭിലാഷ്, വി.പി. ഉണ്ണികൃഷ്ണൻ, ജയചന്ദ്രൻ കല്ലിങ്കൽ തുടങ്ങിയവർ പ്രസംഗിക്കും. സമ്മേളനത്തിന്‍റെ ഭാഗമായി യുവകലാസാഹിതി ഗായക സംഘം അവതരിപ്പിക്കുന്ന വിപ്ലവ ഗാനമേളയും നടക്കും. സമ്മേളനത്തിന്‍റെ രണ്ടാം ദിനമായ ഏഴിനു വൈകുന്നേരം മൂന്നിന് പാളയം ആശാൻ സ്ക്വയറിൽ നിന്നും റെഡ് വോളണ്ടിയർ മാർച്ച് ആരംഭിക്കും. രക്തസാക്ഷി മണ്ഡപത്തിൽ നിന്നും റാലി നടക്കും. പുത്തരിക്കണ്ടം മൈതാനത്തു നടക്കുന്ന പൊതുസമ്മേളനം സിപിഐ സംസ്ഥാന സെക്രട്ടറി ബിനോയ് വിശ്വം ഉദ്ഘാടനം ചെയ്യും. 410 പ്രതിനിധികൾ ജില്ലാ സമ്മേളനത്തിൽ സമ്മേളനത്തിൽ പങ്കെടുക്കുമെന്നു സിപിഐ ജില്ലാ സെക്രട്ടറി മാങ്കോട് രാധാകൃഷ്ണൻ പത്രസമ്മേളനത്തിൽ പറഞ്ഞു.

വെള്ളറടയിൽ ജവഹര്‍ലാല്‍ നെഹ്‌റു സ്റ്റേഡിയം ഉദ്ഘാടനം ചെയ്തു

വെള്ളറട: വെള്ളറട പഞ്ചായത്തില്‍ ആറാട്ടുകുഴിയില്‍ നിര്‍മിച്ച ജവഹര്‍ലാല്‍ നെഹ്‌റു സ്റ്റേഡിയത്തിന്‍റെ ഉദ്ഘാടനം പ്രതിപക്ഷ നേതാവ് വി.ഡി. സതീശന്‍ നിർവഹിച്ചു. പഞ്ചായത്ത് നിവാസികള്‍ക്ക് വെള്ളറട പഞ്ചായത്ത് നല്‍കുന്ന ഓണസമ്മാനമാണു സ്റ്റേഡിയമെന്നു പ്രതിപക്ഷ നേതാവ് വി.ഡി. സതീശന്‍ പറഞ്ഞു. പാറശാല എംഎല്‍എ സി.കെ. ഹരീന്ദ്രന്‍ അധ്യക്ഷത വഹിച്ച യോഗത്തില്‍ ചാണ്ടി ഉമ്മന്‍ മുഖ്യപ്രഭാഷണം നടത്തി. അന്‍ സജിതാ റസല്‍, സരളാ വിന്‍സന്‍റ്, കെ.ജി. മംഗള്‍ദാസ്, അശോക് കുമാര്‍, കെ. ഷൈന്‍കുമാര്‍, അഡ്വ. ഗിരീഷ് കുമാര്‍, മണലി സ്റ്റാന്‍ലി, ആനി പ്രസാദ്, ശ്യാം, ആനപ്പാറ രവി, ശ്രീകണ്ഠന്‍, തുടങ്ങി നിരവധി നേതാക്കള്‍ പ്രസംഗിച്ചു.എം രാജ്‌മോഹന്‍ സ്വാഗതവും ജയന്തി നന്ദിയും പറഞ്ഞു.

ഗണേശോത്സവ ആഘോഷം 24 മുതല്‍

തിരുവനന്തപുരം: ഗണേശോത്സവ ട്രസ്റ്റ് കമ്മിറ്റിയുടെ ആഭിമുഖ്യത്തില്‍ നടത്തിവരുന്ന ഗണേശോത്സവ ആഘോഷങ്ങള്‍ക്ക് 30 വയസ്. ഈ വര്‍ഷത്തെ ആഘോഷ പരിപാടികള്‍ ഈ മാസം 24 മുതല്‍ സെപ്റ്റംബര്‍ ഒന്നു വരെ സംസ്ഥാന വ്യാപകമായി ആഘോഷിക്കുമെന്നു ട്രസ്റ്റ് ഭാരവാഹികള്‍ പത്രസമ്മേളനത്തില്‍ അറിയിച്ചു. 24ന് തുടങ്ങി ഒന്‍പതു ദിവസം നീണ്ടുനില്‍ക്കുന്ന പൂജകള്‍ക്കുശേഷം സെപ്റ്റംബര്‍ ഒന്നിനു നടക്കുന്ന ഗണേശ വിഗ്രഹ ഘോഷയാത്രയോടും ശഖുംമുഖത്ത് നടക്കുന്ന നിമജ്ജന കര്‍മത്തോടും കൂടി ആഘോഷ പരിപാടികള്‍ പൂര്‍ണമാകും. പത്രസമ്മേളനത്തില്‍ ആഘോഷ കമ്മിറ്റി ചെയര്‍മാന്‍ ജി. രാജ്‌മോഹന്‍, ട്രസ്റ്റ് മുഖ്യകാര്യദര്‍ശി എം.എസ് ഭുവനചന്ദ്രന്‍, ട്രസ്റ്റ് കണ്‍വീനര്‍ ആര്‍ ഗോപിനാഥന്‍ നായര്‍ തുടങ്ങിയവര്‍ പങ്കെടുത്തു.

മകനെ പിതാവ് വെട്ടിപ്പരിക്കേൽപ്പിച്ച്

പോത്തൻകോട്: മദ്യലഹരിയിൽ മകനെ വെട്ടുകത്തി ഉപയോഗിച്ച് വെട്ടിപ്പരിക്കേൽപ്പിച്ച് പിതാവ്. അണ്ടൂർക്കോണം കീഴാവൂർ വിളയിൽ വീട്ടിൽ വിജയൻ നായരാ (65) ണു മകനായ വിനീതി (35) നെ വെട്ടുകത്തികൊണ്ട് വെട്ടിയത്. ഗുരുതരമായി പരിക്കേറ്റ വിനീതിനെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

തകര്‍ന്നുവീണ കെട്ടിടത്തിന്‍റെ ഭാഗങ്ങള്‍ നീക്കം ചെയ്തു

പേരൂര്‍ക്കട: തകര്‍ന്നുവീണ കെട്ടിടത്തിന്‍റെ അവശിഷ്ടങ്ങള്‍ തിരുവനന്തപുരം നഗരസഭ ഇടപെട്ടു നീക്കം ചെയ്തു. വട്ടിയൂര്‍ക്കാവ് തിട്ടമംഗലത്തെ ക്ഷീരസംഘം കെട്ടിടത്തിന്‍റെ ഭാഗങ്ങളാണു നീക്കിയത്. രണ്ടുദിവസം മുമ്പാണു ദ്രവിച്ചിരുന്ന കെട്ടിടത്തിന്‍റ മേല്‍ക്കൂര ഉള്‍പ്പെടെ പൂര്‍ണമായും നിലംപൊത്തിയത്. കൂറ്റന്‍ തടികളും മണ്‍കട്ടകളും മറ്റും റോഡിലേക്കുവീണു ഗതാഗത തടസമുണ്ടായിരുന്നു. ഇതാണ് പൂര്‍ണമായും നീക്കം ചെയ്തത്. ഇതു രണ്ടാംതവണയാണു കെട്ടിട ഭാഗങ്ങള്‍ നിലംപൊത്തുന്നത്. കുറച്ചുനാള്‍ മുമ്പ് കനത്ത മഴയില്‍ ചുമര്‍ ഇടിഞ്ഞുവീണു ചില വാഹനങ്ങള്‍ക്കു കേടുപാടുണ്ടായിരുന്നു. അന്നുതന്നെ നഗരസഭ കെട്ടിടം ഇടിച്ചുനീക്കുന്നതിനുള്ള നടപടികള്‍ സ്വീകരിച്ചിരുന്നുവെങ്കില്‍ ഇപ്പോഴത്തെ വിഷയങ്ങള്‍ ഉണ്ടാകില്ലായിരുന്നുവെന്നാണു പ്രദേശവാസികള്‍ പറയുന്നത്.

ഉദ്ഘാടനത്തിന് ഒരുങ്ങി ഇ.കെ. നായനാർ പാർക്ക്

പേരൂർക്കട: കിണവൂർ വാർഡിൽ പുതുതായി നിർമാണം പൂർത്തീകരിച്ചുവരുന്ന ഇ.കെ. നായനാർ പാർക്ക് ഉദ്ഘാടനത്തിനൊരുങ്ങുന്നു. നാലാഞ്ചിറ വലിയ കുളത്തിനു സമീപമാണ് പാർക്ക് ഒരുങ്ങുന്നത്. അങ്കണവാടിയോടു ചേർന്നാണ് പാർക്കിന്‍റെ നിർമാണം തുടങ്ങിയത്. പാർക്കിനു നാലു ഭാഗത്തും സംരക്ഷണവേലി കെട്ടുകയും ഇന്‍റർലോക്ക് ചെയ്ത് നടപ്പാത നിർമിക്കുകയും ചെയ്തിട്ടുണ്ട്. മനോഹരമായ പുൽത്തടിയും പാർക്കിനുള്ളിലുണ്ട്. കുട്ടികൾക്കും വയോധികർക്കും ഉൾപ്പെടെ രാവിലെയും വൈകുന്നേരങ്ങളിലും വിശ്രമ അവസരം ഒരുക്കുക എന്നതാണ് പാർക്കിന്‍റെ നിർമാണവുമായി ബന്ധപ്പെട്ട് പ്രധാന ഉദ്ദേശ്യം. കുട്ടികൾക്ക് ആവശ്യമായ കളിക്കോപ്പുകളും വയോധികർക്കുള്ള ഇരിപ്പിടങ്ങളും ഇവിടെ ഒരുക്കുന്നുണ്ട്. പാർക്കിന്‍റെ ഉദ്ഘാടനം ഈ മാസം തന്നെ മേയർ ആര്യ രാജേന്ദ്രൻ നിർവഹിക്കുമെന്ന് വാർഡ് കൗൺസിലർ ആർ. സുരകുമാരി അറിയിച്ചു.

റിയാദില്‍ ജോലിക്കിടിയല്‍ കുഴഞ്ഞുവീണ് മരിച്ചു

വെള്ളറട: റിയാദില്‍ ജോലിക്കിടിയല്‍ കുഴഞ്ഞുവീണ് മരിച്ചു. വെള്ളറട കരക്കാട്ടുവിള അനില്‍ ഭവനില്‍ രാമചന്ദ്രന്‍ (അനി-57) ആണ് ഞായറാഴ്ച വൈകുന്നേരം ജോലി സ്ഥലത്ത് കുഴഞ്ഞുവീണ് മരിച്ചതായി ബന്ധുക്കള്‍ക്ക് വിവരം ലഭിച്ചിട്ടുണ്ട്. മൃതദേഹം നാട്ടില്‍ എത്തിക്കാനുള്ള നടപടികള്‍ നടന്നുവരുന്നു. ഭാര്യ: ദീപ്തി ജലജ. മക്കൾ: ആദിത്യ അനില്‍, ആദര്‍ശ് അനില്‍.

നന്മ ജില്ലാ സമ്മേളനം നടന്നു

പാറശാല: കലാകാരന്മാരുടെ ദേശീയ സംഘടനയായ നന്മയുടെ ജില്ലാ സമ്മേളനം നടന്നു. നന്മ മുന്‍ സംസ്ഥാന വൈസ് പ്രസിഡന്‍റും കാഥികനുമായിരുന്ന അയിലം ഉണ്ണികൃഷ്ണന്‍റെ സ്മൃതികുടീരത്തില്‍നിന്നും ആരംഭിച്ച വിളംബര കലാജാഥ മാനവിയം വീഥി, കാട്ടാക്കട, നെയ്യാറ്റിന്‍കര, വെള്ളറട, പാറശാല തുടങ്ങിയ മേഖലകളിലൂടെ കടന്നായിരുന്നു സമ്മേളന നഗരിയില്‍ എത്തിയത്. കാര്യവട്ടം ശ്രീകുമാരന്‍ നായരുടെ അധ്യക്ഷതയില്‍ നടന്ന പ്രതിനിധി സമ്മേളനം നന്മ സംസ്ഥാന പ്രസിഡന്‍റ് സേവ്യര്‍ പുല്‍പ്പാട്ട് ഉദ്ഘാടനം ചെയ്തു. ജില്ലാ സെക്രട്ടറി സുരേഷ് ഒഡേസ, സംസ്ഥാന കമ്മറ്റി അംഗങ്ങളായ വില്‍സണ്‍ സാമുവേല്‍, സുനില്‍ പട്ടിമറ്റം, ചലച്ചിത്ര താരം രമാദേവി, ജില്ലാ ട്രഷറര്‍ കെ. എസ് ദാസ്, ശോഭന ബാലരാമപുരം, ബാലരാമപുരം ജോയ്, മനോജ് നെയ്യാറ്റിന്‍കര തുടങ്ങിയവര്‍ പ്രസംഗിച്ചു. പ്രതിനിധി സമ്മേളനം പഞ്ചായത്ത് പ്രസിഡന്‍റ് വി. മോഹനൻ അധ്യക്ഷതയില്‍ കെ. ആന്‍സലന്‍ എംഎല്‍എ ഉദ്ഘാടനം ചെയ്തു. കവി വിനോദ് വൈശാഖിയെ ബിയാട്രിക്‌സ് ഗോമസ് പുരസ്‌കാരം നല്‍കി ആദരിച്ചു. കരിക്കകം ശ്രീകുമാര്‍, തിരുവനന്തപുരം ജില്ലാ പഞ്ചായത്ത് പ്രസിഡന്‍റ് അഡ്വ. ഡി. സുരേഷ് കുമാര്‍, ചലച്ചിത്ര പ്രവര്‍ത്തകന്‍ പാറശാല വിജയന്‍, പ്രഫ. രമാദേവി തുടങ്ങിയവര്‍ സംസാരിച്ചു.

ആലുംമൂട് ജംഗ്ഷനില്‍ അവധിനാളിലും ഗതാഗതക്കുരുക്ക്

നെയ്യാറ്റിന്‍കര: നെയ്യാറ്റിന്‍കര ആലുംമൂട് ജംഗ്ഷനില്‍ അവധി ദിനമായ ഇന്നലെയും ഗതാഗതക്കുരുക്ക് അനുഭവപ്പെട്ടു. പ്രവൃത്തി ദിവസങ്ങളിലേതുപോലെ യാത്രക്കാര്‍ വലഞ്ഞു. നെയ്യാറ്റിന്‍കര- ബാലരാമപുരം റോഡും നെയ്യാറ്റിന്‍കര -കാട്ടാക്കട റോഡും സംഗമിക്കുന്ന പ്രധാന ജംഗ്ഷനായ ആലുംമൂട് മുഖ്യവാണിജ്യകേന്ദ്രങ്ങളിലൊന്നാണ്. ഇതേ ജംഗ്ഷനിലാണ് നെയ്യാറ്റിന്‍കര കോണ്‍വെന്‍റ് റോഡും വന്നു ചേരുന്നത്. കാട്ടാക്കട റോഡിലും കോണ്‍വെന്‍റ് റോഡിലുമുള്ള വിദ്യാലയങ്ങളടക്കമുള്ള സ്ഥാപനങ്ങള്‍ ഞായറാഴ്ചയായതിനാല്‍ ഇന്നലെ അവധിയായിരുന്നിട്ടും ജംഗ്ഷനില്‍ രാവിലെ മുതല്‍ വാഹനങ്ങള്‍ ഗതാഗതക്കുരുക്കില്‍ അകപ്പെട്ടു. വീതി കുറഞ്ഞ പാത, കേബിളിന്‍റെ കുഴി, പാതയോരത്തെ അനധികൃത വാഹന പാര്‍ക്കിംഗ് എന്നിങ്ങനെ വിവിധ കാരണങ്ങള്‍ ആലുംമൂട് ജംഗ്ഷനിലെ ഗതാഗതക്കുരുക്കിന് ഇടയാക്കുന്നു. ബി.എസ്.എന്‍.എല്ലിന്‍റെ കേബിള്‍ കുഴി അടയ്ക്കല്‍ പ്രവൃത്തികള്‍ കഴിഞ്ഞ ദിവസം ആരംഭിച്ചു. ഇന്നലെ പകല്‍ മഴ പെയ്ത സമയത്തും ആലുംമൂട് ജംഗ്ഷനില്‍ ഗതാഗതക്കുരുക്ക് തുടര്‍ന്നതായി യാത്രക്കാര്‍ പറഞ്ഞു.

വാർഷിക അറ്റകുറ്റപ്പണികൾ ഇല്ല : അത്യാഹിത വിഭാഗത്തില്‍ മൂന്നു തിയേറ്ററുകള്‍ മാത്രം

മെഡിക്കല്‍കോളജ്: വര്‍ഷാവര്‍ഷ അറ്റകുറ്റപ്പണികൾ നടക്കാത്തതിനാല്‍ തിരുവനന്തപുരം മെഡിക്കല്‍ കോളജിലെ ഓപ്പറേഷന്‍ തിയേറ്ററുകളുടെ അവസ്ഥ ദയനീയം. മെഡിക്കല്‍കോളജിലേക്ക് ആവശ്യമായ ഫണ്ട് സര്‍ക്കാരില്‍നിന്ന് കൃത്യമായി ലഭിക്കാത്തതാണ് ഇതിനു കാരണം. അത്യാഹിതവിഭാഗത്തില്‍ അഞ്ച് എമര്‍ജന്‍സി തിയേറ്ററുകള്‍ ഉള്ളതില്‍ മൂന്നെണ്ണം മാത്രമാണ് ഇപ്പോള്‍ പ്രവര്‍ത്തിക്കുന്നത്. മാസങ്ങള്‍ക്കു മുമ്പ് അത്യാഹിതവിഭാഗം കെട്ടിടത്തിന്‍റെ സീലിംഗ് ഇളകിവീണ സംഭവം ഉണ്ടായിരുന്നു. ഇതുകൂടാതെ ഇവിടെയുള്ള ടേബിളുകളില്‍ ഒരെണ്ണം തുരുമ്പെടുത്ത് ഒടിഞ്ഞുവീഴുകയും ചെയ്തിരുന്നു. ഇതെല്ലാം അധികൃതര്‍ രഹസ്യമാക്കി വച്ചിരിക്കുകയാണ്. എ ബ്ലോക്ക് തിയേറ്റര്‍, ബി ബ്ലോക്ക് തിയേറ്റര്‍, സൂപ്പര്‍ സ്‌പെഷ്യാലിറ്റി തിയേറ്റര്‍, മള്‍ട്ടി സ്‌പെഷ്യാലിറ്റി തിയേറ്റര്‍ എന്നിവയെല്ലാം കൃത്യമായി അറ്റകുറ്റപ്പണി വേണ്ടുന്നവയാണ്. വാര്‍ഷിക ന വീകരണം ഇല്ലാതെ വരികയാണെങ്കില്‍ അതു പാവപ്പെട്ട രോഗികളുടെ ചികിത്സയെയാണ് ബാധിക്കുക. അനസ്തീഷ്യ ഡിപ്പാര്‍ട്ട്‌മെന്‍റാണു തിയേറ്ററുമായി ബന്ധപ്പെട്ട അറ്റകുറ്റ പ്പണികളുടെ ഉത്തരവാദിത്തം ഏറ്റെടുക്കേണ്ടത്. വാര്‍ഷിക അറ്റകുറ്റപ്പണികൾ സംബന്ധിച്ച് ഒരു കമ്മിറ്റി കുറച്ചുനാള്‍ മുമ്പ് വിളിച്ചുകൂട്ടിയിരുന്നു. എന്നാല്‍ കമ്മിറ്റിയെടുത്ത തീരുമാനങ്ങള്‍ ഇതുവരെയും നടപ്പായിട്ടില്ല.

കുത്തുകല്ലിന്‍മൂട്ടില്‍ കത്തിക്കുത്ത്; മൂന്നുപേര്‍ ചികിത്സയില്‍

കടം തിരികെ ചോദിച്ച് സംഘര്‍ഷം മെഡിക്കല്‍കോളജ്: കടംവാങ്ങിയ തുക തിരികെ ചോദിച്ചതു സംബന്ധിച്ചു വാക്കുതര്‍ക്കവും സംഘര്‍ഷവും. കത്തികൊണ്ടുള്ള കുത്തേറ്റ് ഒരാളും ഹെല്‍മെറ്റ് കൊണ്ടുള്ള അടിയേറ്റ് രണ്ടുപേരും ആശുപത്രിയില്‍ ചികിത്സയില്‍. ശംഖുംമുഖം സ്വദേശി മൊട്ട ഷാജി എന്ന ഷാജി (40), ആറ്റുകാല്‍ കൊഞ്ചിറവിള കല്ലടിമുഖം ഫ്‌ളാറ്റില്‍ താമസിച്ചു വരുന്ന അനൂപ് (18), ഇയാളുടെ സുഹൃത്തും കൊഞ്ചിറവിള സ്വദേശിയുമായ വിഷ്ണു (28) എന്നിവര്‍ക്കാണ് സാരമായി പരിക്കേറ്റത്. ശനിയാഴ്ച രാത്രി 10.30നായിരുന്നു കേസിന്നാസ്പദമായ സംഭവം. മൊട്ട ഷാജി 8,000 രൂപ കടമായി വിഷ്ണുവിന്‍റെ അമ്മയ്ക്ക് നല്‍കിയിരുന്നു. ഈ പണം ഏഴു മാസമായിട്ടും തിരികെ കൊടുക്കാത്തതിനെച്ചൊല്ലി വാക്കുതര്‍ക്കം നിലനിന്നിരുന്നു. സംഭവദിവസം കുത്തുകല്ലിന്‍മൂട് ജംഗ്ഷനില്‍ ഷാജിയും സുഹൃത്ത് ആനന്ദും നില്‍ക്കുന്ന സമയത്ത് അനൂപും വിഷ്ണുവും ബൈക്കില്‍ അതുവഴിവന്നു. പണത്തെച്ചൊല്ലി ഷാജിയും വിഷ്ണുവും തമ്മില്‍ തര്‍ക്കമായി. വാക്കേറ്റം രൂക്ഷമായതോടെ തന്‍റെ കൈയില്‍ കരുതിയിരുന്ന കത്തി ഉപയോഗിച്ച് ഷാജി വിഷ്ണുവിനെ കുത്താന്‍ ശ്രമിച്ചു. എന്നാല്‍ ദിശമാറി വയറ്റില്‍ കുത്തേറ്റത് അനൂപിനായിരുന്നു. സുഹൃത്തിന് കുത്തേറ്റതോടെ വിഷ്ണു തന്‍റെ കൈയില്‍ കരുതിയിരുന്ന ഹെല്‍മെറ്റ് ഉപയോഗിച്ച് ഷാജിയെയും ആനന്ദിനെയും ആക്രമിച്ചു. ആനന്ദിനു നിസാര പരിക്കേറ്റു. ഹെല്‍മെറ്റുകൊണ്ടുള്ള അടിയില്‍ ഷാജിയുടെ ഇടതുകൈയ് ക്ക് പൊട്ടലേറ്റു. ഇയാളെ ആദ്യം തിരുവനന്തപുരം മെഡിക്കല്‍കോളജ് ആശുപത്രിയിലും തുടര്‍ന്ന് ഫോര്‍ട്ട് താലൂക്കാശുപത്രിയിലും പ്രവേശിപ്പിച്ചു. കുത്തേറ്റ അനൂപിനെ ഗുരുതരാവസ്ഥയില്‍ തിരുവനന്തപുരം മെഡിക്കല്‍കോളജ് ആശുപത്രിയിലെ ഐസിയുവില്‍ പ്രവേശിപ്പിച്ചിരിക്കുകയാണ്. വിഷ്ണുവും മെഡിക്കല്‍കോളജില്‍ ചികിത്സയിലുണ്ട്. അനൂപിന്‍റെ മൊഴിയില്‍ ഫോര്‍ട്ട് പോലീസ് കേസെടുത്ത് അന്വേഷണം ആരംഭിച്ചു.

ഒടിഞ്ഞ ഇലക്‌ട്രിക് പോസ്റ്റിനെ വടംകെട്ടി നിര്‍ത്തി "മാതൃക'യായി കെഎസ്ഇബി

വെള്ളറട: അപകടാവസ്ഥയില്‍ നില്‍ക്കുന്ന ഇലക്ട്രിക് പോസ്റ്റിനെ മാറ്റി സ്ഥാപിക്കുന്നതിനു പകരം വടംകെട്ടി നിര്‍ത്തി കെഎസ്ഇബി. കള്ളിമൂട് വാര്‍ഡില്‍ മുണ്ടറപ്പന്‍ കുഴിയിലാണ് കെഎസ്ഇബിയുടെ അസാധാരണമായ വടംകെട്ട് പരിപാടി. കീഴ്ക്കാംതൂക്കായ റോഡില്‍ ഇലക്ട്രിക് പോസ്റ്റ് പൊട്ടിയിട്ട് മൂന്നുമാസത്തോളമായി. സമീപവാസികള്‍ അറിയിച്ചതിനെ തുടര്‍ന്നു കെഎസ്ഇബി ജീവനക്കാരെത്തി വടംകെട്ടി നിര്‍ത്തി സ്ഥലം വിടുകയായിരുന്നു. ഓഫീസില്‍ പ്രദേശവാസികള്‍ എ. ഇ. അടക്കമുള്ളവരെ നേരില്‍ കണ്ടു വിഷയം പറഞ്ഞുവെങ്കിലും പോസ്റ്റ് മാറ്റുവാനുള്ള ഏതൊരു നടപടിയും സ്വീകരിച്ചില്ലെന്നുള്ളതാണ് പരാതി. കീഴ്ക്കാംതൂക്കായ പ്രദേശമായതുകൊണ്ട് ഇലക്ട്രിക് കമ്പികള്‍ വളരെയേറെ താഴ്ന്നാണ് കിടക്കുന്നത്. പലയിടങ്ങളിലും കൈയെത്തും ദൂരത്താണ് ഇലക്ട്രിക് കമ്പി കടന്നുപോകുന്നത്. സ്‌കൂള്‍ വിദ്യാര്‍ഥികള്‍ അടക്കം നിരവധി പേര്‍ സഞ്ചരിക്കുന്ന സഞ്ചാര പാതയിലാണ് കെഎസ്ഇബിയുടെ വടംകെട്ട് പ്രയോഗം. കാറ്റൊന്നു ശക്തമായി വീശിയടിച്ചാല്‍ ഇലക്ട്രിക് പോസ്റ്റ് പൊട്ടിയ ഭാഗത്തു നിന്നും ഏതു ദിശയിലേക്കു പോകുമെന്ന് ആര്‍ക്കും ഒരു രൂപവുമില്ല. പൊട്ടിയ ഇലക്ട്രിക് പോസ്റ്റ് മാറ്റി വടംകെട്ട് ചികിത്സ അവസാനിപ്പിച്ചു പുതിയ ഇലക്ട്രിക് പോസ്റ്റ് സ്ഥാപിക്കണമെന്നുള്ളതാണ് പ്രദേശവാസികളുടെ ആവശ്യപ്പെടുന്നത്.

പ്രേംനസീര്‍ സുഹൃത് സമിതി എറണാകുളം ചാപ്റ്റര്‍

കൊച്ചി: മലയാള സിനിമയ്ക്ക് ഒരു വഴിത്താര ഒരുക്കിയ മഹാനടനാണ് പ്രേംനസീറെന്നും ആ നടന്‍ പ്രകടിപ്പിച്ച ശോഭ ഇന്നും മലയാള സിനിമയില്‍ നിറഞ്ഞുനില്‍ക്കുന്നുവെന്നും ചലച്ചിത്രനടന്‍ സിജോയ് വര്‍ഗീസ്. പ്രേംനസീര്‍ സുഹൃത് സമിതി എറണാകുളം ചാപ്റ്റര്‍ പ്രവര്‍ത്തന ലോഗോ പ്രകാശനം മൗണ്ട് കാര്‍മല്‍ പള്ളിയിലെ പരിഷത് ഹാളില്‍ നടന്ന ചടങ്ങില്‍ നിര്‍വഹിക്കുകയായിരുന്നു അദ്ദേഹം. സമിതി സംസ്ഥാന ജനറല്‍ സെക്രട്ടറി അധ്യക്ഷത വഹിച്ചു. ജില്ലാ ചാപ്റ്റര്‍ രക്ഷാധികാരി ചന്ദ്ര താര പ്രൊഡക്ഷന്‍സ് ടി.പി. മുഹമ്മദ് അലി, ചാപ്റ്റര്‍ പ്രസിഡണ്ട് വില്ലറ്റ് കൊറെയ, ചാപ്റ്റര്‍ സെക്രട്ടറിയും ചലച്ചിത്രനടനുമായ ബൈജു മാധവ്, ഗായിക കലാഭവന്‍ ഡെല്‍മ എന്നിവര്‍ സംസാരിച്ചു.

പോലീസിനെ ആക്രമിച്ച കേസ്: പ്രതി പിടിയിൽ

നെടുമങ്ങാട്: ഫ്ളാറ്റിൽ ബഹളം വച്ചതിനെ തുടർന്നു പോലീസെത്തി പിടികൂടാൻ ശ്രമിക്കവെ ആക്രമണം നടത്തിയ ആൾ അറസ്റ്റിൽ. മണ്ണന്തല മരുതൂർ ഇടയിലക്കോണം കാർത്തിക ഭവനാൽ സുഭാഷ് (34) ആണ് അറസ്റ്റിലായത്. ഇയാൾ പള്ളിമുക്ക് സൗപർണിക ഫ്ളറ്റിലെ 10 ജി യിലാണ് കുടുംബത്തോടൊപ്പം വാടകയ്ക്ക് താമസിക്കുന്നത്. ലഹരിക്ക് അടിമയായ ഇയാൾ ഫ്ളാറ്റിൽ സ്ഥിരം പ്രശ്നക്കാരനാണെന്നു സമീപവാസികൾ പറഞ്ഞു. ഇതിന്‍റെ പേരിൽ നിരവധി തവണ ഫ്ളാറ്റിലെ മറ്റു താമസക്കാർ പോലീസിൽ പരാതി നൽകിയിരുന്നു. തുടർന്ന് ഇന്നലെയും പ്രശ്നമുണ്ടായപ്പോൾ മണ്ണന്തല പോലീസെത്തി പിടികൂടാൻ ശ്രമിക്കവെ പോലീസിനെയും അക്രമിക്കുകയായിരുന്നു. ബലപ്രയോഗത്തിലൂടെ കീഴടക്കിയ ഇയാളെ നെടുമങ്ങാട് പോലീസിനു കൈമാറി. കൃത്യനിർവഹണം തടസപ്പെടുത്തിയതിനു കേസെടുത്ത പോലീസ് ഇയാളെ കോടതിയിൽ ഹാജരാക്കി റിമാൻഡ് ചെയ്തു.

സഞ്ചാരികളെ ചിറ്റിപ്പാറ വിളിക്കുന്നു

ആർ.സി. ദീപു നെടുമങ്ങാട്: പ്രകൃതി രമണീയമായ കാഴ്ചകൾ ആസ്വദിക്കാൻ ചിറ്റിപ്പാറയിലേക്ക് എത്തുന്നത് നിരവധി പേർ. ചെങ്കുത്തായി കിടക്കുന്ന കയറ്റം കയറി സാഹസികമായി പാറകൾ താണ്ടി വേണം ചിറ്റിപ്പാറയുടെ മുകളിൽ എത്താൻ. ഇവിടെ എത്തിയാൽ കാണുന്നതാകട്ടെ അവർണനീയമായ കാഴ്ചകളും. തിരുവനന്തപുരം ജില്ലയിലെ നഗര-ഗ്രാമ പ്രദേശങ്ങളുടെ വിദുര ദൃശ്യങ്ങൾ ചിറ്റിപ്പാറയുടെ മുകളിൽനിന്നും കാണാം. അതി രാവിലെ എത്തിയാൽ സൂര്യോദയവും കാണാം. പൊൻപാറ സെറ്റിൽമെന്‍റ് പ്രദേശത്താണ് ഈ പാറക്കൂട്ടം സ്ഥിതി ചെയ്യുന്നത്. തിരുവനന്തപുരത്തു നിന്നും വിതുരയ്ക്കു പോകുന്ന വഴിയിൽ ഇരുത്തലമൂല ജംഗ്ഷനിൽനിന്നും വലത്തോട്ടു തിരിഞ്ഞ് 2,350 അടി ഉയരത്തിൽ സഞ്ചരിച്ചാൽ ചിറ്റിപ്പാറയുടെ മുകളിൽ എത്താം. വിനോദ സഞ്ചാര കേന്ദ്രമായ പൊന്മുട്ടി റൂട്ടിൽ ആണ് ഈ സ്ഥലമെന്നതു കൊണ്ട് നിരവധി ടൂറിസ്റ്റുകളാണ് പാറയുടെ മുകളിൽ എത്തുന്നത്. എന്നാൽ അടിസ്ഥാന സൗകര്യങ്ങളുടെ അഭാവം സന്ദർശകരെ ബുദ്ധിമുട്ടിക്കുന്നുണ്ട്. ഇവിടെ ടൂറിസ്റ്റുകൾ വന്നു പോകുന്നതിനു യാതൊരു നിയന്ത്രണവുമില്ല. ട്രൈബൽ സെറ്റിൽമെന്‍റ് പ്രദേശത്താണ് ഈ സ്ഥലം സ്ഥിതി ചെയ്യുന്നത്. ഈ പശ്ചാത്തലത്തിലാണ് ഇവിടം ടൂറിസ്റ്റ് മേഖലയായി പ്രഖ്യാപിക്കണമെന്നു നാട്ടുകാർ ആവശ്യം ഉന്നയിക്കുന്നത്. ഇതിലൂടെ സർക്കാരിന്‍റെ മേൽനോട്ടവുമുണ്ടാകും. കൂടാതെ ആദിവാസി ഊരുകളിലെ യുവതി യുവാക്കൾക്കു ജോലി സാധ്യതകൾ എറെയാണ്. ആവശ്യമുന്നയിച്ചു നാട്ടുകാർ എംപിക്കും എംഎൽഎക്കും നിവേദനം നൽകിയിട്ടുണ്ട്. കേന്ദ്ര സംസ്ഥാന സർക്കാരുകളുടെ ഇടപെടൽ ഉണ്ടാവുമെന്ന പ്രതീക്ഷയിലാണ് നാട്ടുകാർ. യു ട്യൂബ് ബ്ലോഗാർമാരുടേയും സാഹസിക യാത്രക്കാരുടേയും ഇഷ്ടകേന്ദ്രം കൂടിയാണ് ചിറ്റിപ്പാറ.

വിഴിഞ്ഞം പ്ലാസ്റ്റിക് മാലിന്യ സംസ്‌കരണ കേന്ദ്രത്തിന് ശാപമോക്ഷം

വിഴിഞ്ഞം: പണി പൂർത്തിയായി ഉദ്ഘാടനം കാത്തു കിടന്ന വിഴിഞ്ഞത്തെ പ്ലാസ്റ്റിക് മാലിന്യ സംസ്‌കരണ കേന്ദ്രത്തിനു ശാപമോക്ഷമാകുന്നു. ആവശ്യം വേണ്ട യന്ത്രങ്ങളിൽ രണ്ടെണ്ണം കേന്ദ്രത്തിൽ എത്തി. ഉദ്ഘാടനം ഉടനുണ്ടാകുമെന്ന് അധികൃതർ പറയുന്നു. സാങ്കേതിക സംവിധാനം പൂർത്തിയാകുന്നതോടെ കൂടുതൽ യന്ത്രങ്ങൾ എത്തിക്കുമെന്നും അധികൃതർ വ്യക്തമാക്കി. പ്ലാസ്റ്റിക് പൊടിയാക്കുന്നതിനും തരംതിരിക്കുന്നതിനും കെട്ടുകളാക്കുന്നതിനുമുള്ള യന്ത്രങ്ങളാണ് ഇവിടെ വേണ്ടത്. ഇതിൽ പൊടിക്കു ന്നതിനുള്ള യന്ത്രമാണ് ഇനി യെത്താനുള്ളത്. യഥാസമയം ഫണ്ട് ലഭിക്കാത്തതിനാലാണ് ഉപകരണങ്ങൾ വാങ്ങാൻ വൈകി യതെന്നാണറിവ്. ദിവസവും ഒരുടൺ പ്ലാസ്റ്റിക് പൊടിയാക്കാൻ കഴിയുന്ന വിധത്തിലാണ് പ്ലാന്‍റി ന്‍റെ നിർമാണം. പ്രദേശ വാസികളായ നിരവധി പേർക്കു തൊഴിൽ ലഭിക്കുന്നതിനൊപ്പം നഗരസഭയ്ക്ക് മികച്ച വരുമാനവും കിട്ടും. നഗരസഭയിലെ അഞ്ചു വാർഡുകളിൽനിന്നു ശേഖരിക്കുന്ന പ്ലാസ്റ്റിക് മാലിന്യം പ്ലാന്‍റിലെ ത്തിച്ച് സംസ്കരിച്ച് പുനരുപയോഗിക്കുന്നതാണ് പദ്ധതി. ഹാർബർ എൻജിനിയറിംഗ് വകുപ്പ് നഗരസഭയ്ക്കു നൽകിയ സ്ഥലത്താണ് പ്ലാന്‍റ് സ്ഥാപിച്ചത്. നിലവിൽ 3500 ചതുരശ്രയടിയുള്ള പദ്ധതിയെക്കുറിച്ച് പ്ലാന്‍റിന്‍റെ നടത്തിപ്പ്‌ ചുമതല ക്ലീൻ കേരള മിഷനാണ് ഹരിതകർമസേനാംഗങ്ങൾക്കാണ് പ്ലാസ്റ്റിക് ശേഖരണത്തിന്‍റെ ചുമതല. കെട്ടിട നിർമാണത്തിന് 70 ലക്ഷവും 20ലക്ഷം പ്ലാ ന്‍റ് സ്ഥാപിക്കാനും ചെലവഴിച്ചു.

അമ്പൂരി കുമ്പിച്ചൽകടവ് പാലം നിർമാണം അവസാനഘട്ടത്തിൽ

അമ്പൂരി: അമ്പൂരി എന്ന പിന്നോക്ക മലയോര കുടിയേറ്റ ഗ്രാമത്തിന്‍റെ നെടുനാളത്തെ സ്വപ്‌നം ഒടുവിൽ യാഥാർഥ്യത്തിലേയ്ക്ക്. കാടു കടന്നു നെയ്യാർഡാം താണ്ടിയെത്തുന്ന മലയോര മക്കൾക്ക് ഇനി വാഹനങ്ങളിൽ അപ്പുറം ഇപ്പുറം എത്താം. കരിപ്പയാറാണ് ഇപ്പോൾ നെയ്യാർഡാമിന്‍റെ ഭാഗമായി മാറിയത്. അമ്പൂരി കുമ്പിച്ചൽകടവ് പാലത്തിന്‍റെ നിർമാണ പ്രവർത്തനങ്ങളാണ് ഇപ്പോൾ അവസാനഘട്ടത്തിലായിരിക്കു ന്നത്. കിഫ്ബിയുടെ ധനസഹായത്തോടെ 24 കോടിരൂപ അടങ്കലിലാണ് പദ്ധതിയുടെ നിർവഹണം. കരിപ്പയാറിന്‍റെ മറുകരയിൽ നെയ്യാർഡാം റിസർവോയറിന്‍റെ തുരുത്തിൽ ഒറ്റപ്പെട്ടുപോയ കാരിക്കുഴി, ചാക്കപ്പാറ, ശങ്കുംകോണം, കയ്പൻപ്ലാവിള, തൊടുമല, തെന്മല, കുന്നത്തുമല തുടങ്ങി പതിനൊന്നോളം ആദിവാസി ഊരുകളിൽ താമസിക്കുന്ന ആയിരത്തിലധികം കുടുംബങ്ങളുടെയും അമ്പൂരി നിവാസികളുടെയും ഏറെക്കാലത്തെ ആവശ്യമാണ് കുമ്പിച്ചൽ കടവ് പാലത്തിന്‍റെ നിർമാണം. അതാണ് ഇപ്പോൾ യാഥാർഥ്യമായി രിക്കുന്നത്. 36.2 മീറ്റർ വീതം അകലത്തിലുള്ള ഏഴു സ്പാനുകളിലായി 253.4 മീറ്റർ നീളത്തിലാണ് നിർമിക്കുന്നത്. 11 മീറ്റർ വീതിയുള്ള പാലത്തിൽ എ‌ട്ടു മീറ്റർ വീതിയിൽ റോഡും ഇരു വശത്തും ഫുഡ്പാത്തും ഉൾപ്പെടുത്തിയിട്ടുണ്ട്. ഈ പ്രദേശത്തിന്‍റെ ടൂറിസം സാധ്യതകൾ മുൻനിർത്തി ഭൂനിരപ്പിൽ നിന്നും 12.5 മീറ്റർ ഉയരത്തിൽ നിർമിക്കുന്ന പാലത്തിനടിയിലൂടെ നെയ്യാർ ഡാമിൽ നിന്നും വിനോദസഞ്ചാരികളുമായി വരുന്ന ബോട്ടിന് കടന്നുപോകുന്നതിനുള്ള സൗകര്യവും ഒരുക്കിയിട്ടുണ്ട്. അതിനാൽ തന്നെ ഈ പാലം അമ്പൂരിയുടെ ടൂറിസം സാധ്യതകളെ വർധിപ്പിക്കാനും ഉതകും. അതിനിടെ കുമ്പിച്ചൽക്കടവു പാലത്തിന്‍റെ ഇരുവശത്തുമുള്ള അപ്രോച്ച് റോഡിന്‍റെ ആദ്യഘട്ടത്തിന്‍റെ ടാറിംഗും പൂർത്തിയായി. പാലത്തിന്‍റെ ഒരുവശത്തു പൂച്ചുമുക്കുവരെയും മറുവശത്ത് നെയ്യാർ സംഭരണിക്ക് അപ്പുറത്ത് കാരക്കുഴിയിലെ റേഷൻകട വരെയുമുള്ള 1.25 കിലോമീറ്റർ ദൂരത്തിലെ റോഡാണ് ടാറിംഗ് നടത്തിയത്. ബിഎംആൻഡ് ബിസി നിലവാരത്തിലാണ് റോഡ് ടാറിടുന്നത്. പാലത്തിലും സമീപത്തും 7.5 മീററ്ററിലും മറ്റു ഭാഗങ്ങളിൽ അഞ്ചുമീറ്റർ വീതിയിലുമാണ് ടാറിങ് ചെയ്യുന്നത്. ഇതിൽ ഒന്നാംഘട്ട ബിഎം ടാറിംഗാണ് പൂർത്തിയായത്. ആവശ്യമായിടങ്ങളിൽ ഓടയും സരുക്ഷാവേലിയും നിർമിച്ചുകഴിഞ്ഞു. ടാറിട്ട ഭാഗങ്ങളോടുചേർന്ന് ഇരുവശത്തും കോൺക്രീറ്റ് ചെയ്യാനുണ്ട്. അതിനുശേഷമായിരിക്കും രണ്ടാംഘട്ട ബിസി ടാറിങ് ചെയ്യുക. പാലത്തിന്‍റെ വശങ്ങളിൽനിന്നു ജലസംഭരണിയിലേക്ക് ഇറങ്ങാനുള്ള പാതയുടെ നിർമാണവും പാലത്തിന്‍റെ അവസാന മിനുക്കുപണികളും നടന്നുവരുകയാണ്.

പട്ടം എസ്‌യുടി ആശുപത്രിയില്‍ മുലയൂട്ടല്‍ വാരം ആചരിച്ചു

തിരുവനന്തപുരം: ലോക മുലയൂട്ടല്‍ വാരത്തോടനുബന്ധിച്ച് എസ്‌യുടി ആശുപത്രിയില്‍ 'ലാച്ച് ആൻഡ് ലവ് - നര്‍ച്ചര്‍ നാച്ചുറലി' എന്ന പേരില്‍ മുലയൂട്ടല്‍ അവബോധ പരിപാടി സംഘടിപ്പിച്ചു. ആശുപത്രിയുടെ കോണ്‍ഫറന്‍സ് ഹാളില്‍ ന‌ടന്ന ചടങ്ങ് മാനേജിംഗ് ഡയറക്ടറും ചീഫ് എക്‌സിക്യൂട്ടീവ് ഓഫീസറുമായ കേണല്‍ രാജീവ് മണ്ണാളി ഉദ്ഘാടനം ചെയ്തു. ആശുപത്രിയുടെ മെഡിക്കല്‍ സൂപ്രണ്ട് ഡോ. വി. രാജശേഖരന്‍ നായര്‍ 2025 ലെ മുലയൂട്ടല്‍ വാരത്തിന്‍റെ പ്രമേയത്തിന്‍റെ പ്രാധാന്യം പങ്കുവച്ചു. എച്ച് ആര്‍ ജനറല്‍ മാനേജര്‍ ദേവി കൃഷ്ണ സ്വാഗതം പറഞ്ഞു. ചൈല്‍ഡ് ഡെവലപ്‌മെന്‍റ് തെറാപ്പിസ്റ്റ് എ. രശ്മി മോഹന്‍ മോഡറേറ്ററായിരുന്നു. ഒബ്സ്റ്റട്രിക്‌സ് ആൻഡ് ഗൈനക്കോളജി സീനിയര്‍ കണ്‍സള്‍ട്ടന്‍റ് ഡോ. എസ്. ശ്രീകല, പീഡിയാട്രിക്‌സ് ആൻഡ് നിയോനാറ്റോളജി ജൂണിയര്‍ കണ്‍സള്‍ട്ടന്‍റ് ഡോ. പി. റോഷിൻ, പീഡിയാട്രിക്‌സ് കണ്‍സള്‍ട്ടന്‍റ് ഡോ. എം.ജി. അഞ്ജന, ഒബ്സ്റ്റട്രിക്‌സ് ആൻഡ് ഗൈനക്കോളജി ഡിഎന്‍ബി റെസിഡന്‍റ് ഡോ. ആര്യ കൃഷ്ണന്‍ എന്നിവർ പാനൽ ചർച്ചകളിൽ പങ്കെടുത്തു. പരിപാടിയുടെ ഭാഗമായി 'രോഗപ്രതിരോധ കുത്തിവയ്പ്പ്', 'മുലയൂട്ടല്‍' എന്നിവയെപ്പറ്റി അവബോധം സൃഷ്ടിക്കുന്നതിനായി തയാറാക്കിയ രണ്ട് ബുക്ക്‌ലറ്റുകള്‍ പ്രകാശനം ചെയ്തു.

സ്കൂൾതല ക്ലബ് പ്രവർത്തനം വരുംകാല ജീവിതത്തിനു സഹായകരം: അസി. കളക്ടർ ഡോ. സി. ശിവ ശക്തിവേൽ

തിരുവനന്തപുരം: സ്കൂൾതല ക്ലബ് പ്രവർത്തനങ്ങളിലൂടെ കുട്ടികൾക്ക് വരും കാല ജീവിതത്തിന് പരിശീലനമാകുമെന്ന് അസിസ്റ്റന്‍റ് കളക്ടർ ഡോ. സി. ശിവ ശക്തിവേൽ അഭിപ്രായപെട്ടു. നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂളിലെ വിവിധ ക്ലബുകളുടെ ഉദ്ഘാടനം നിർവഹിക്കുകയായിരുന്നു അദ്ദേഹം. തളർച്ചയിൽ ആത്മവിശ്വാസം കൈവിടാതെ സൂക്ഷിക്കുക എന്നതാണ് ജീവിത വിജയത്തിന്‍റെ അടിസ്ഥാനം. പരീക്ഷയ്ക്ക് ലഭിക്കുന്ന മാർക്കുകളേക്കാൾ വലുതാണ് ആത്മവിശ്വാസത്തിലൂടെ മുന്നേറുക എന്നുള്ളതെന്നും അദ്ദേഹം ഓർമിപ്പിച്ചു.പ്രിൻസിപ്പൽ ഫാ. ജോസ് ചരുവിൽ അധ്യക്ഷത വഹിച്ചു. സാഹിത്യ സമാജത്തിന്‍റെ ഉദ്ഘാടനം പ്രമുഖ സിനിമ പിന്നണി ഗായിക അപർണ രാജീവ് ഉദ്ഘാടനം ചെയ്തു. വൈസ് പ്രിൻസിപ്പൽ അജീഷ് കുമാർ, പിടിഎ പ്രസിഡന്‍റ് ഡോ. ജോജു ജോൺ എന്നിവർ പ്രസംഗിച്ചു.

ആഭരണവും പണവും മോഷ്ടിച്ച പ്രതി പിടിയിൽ

കോവളം: വീടിന്‍റെ അലമാരയിൽ സൂക്ഷിച്ചിരുന്ന പണവും സ്വർണാഭരണവും മോഷ്ടിച്ച കേസിലെ പ്രതിയെ കോവളം പൊലീസ് പിടി കൂടി. വെള്ളാർ മൂപ്പന്‍റെ വിള അനിൽ ഭവനിൽ അരുൺ (19) ആണ് പിടിയിലായത്. ഇക്കഴിഞ്ഞ 30നു പുലർച്ചയോടെ ഹാർബർ റോഡിൽ വട്ടവിള ഹീരയിൽ അമീലാ സലാമിന്‍റെ വീട്ടിലെ അലമാരയിൽ സൂക്ഷിച്ചിരുന്ന 40,000 രൂപയും ആറു ഗ്രാം തൂക്കം വരുന്ന സ്വർണാഭരണവും മോഷ്ടിച്ച കേസിലാണ് അറസ്റ്റ്. സംഭവത്തിനു ശേഷം ഒളിവിലായിരുന്നു. തമിഴ്നാട്ടിലെ വാഹന മോഷണക്കേസുമായി ബന്ധപ്പെട്ടു നടന്ന മറ്റൊരു കേസിന്‍റെ അന്വേഷണത്തിലാണ് പ്രതി കുടുങ്ങിയത്. പ്രതിയെ കോടതി റിമാൻഡ് ചെയ്തു. കേസിൽ ഉൽപ്പെട്ട മറ്റൊരു പ്രതിക്കായുള്ള അന്വേഷണം നടന്നുവരുന്നതായി കോവളം പോലീസ് പറഞ്ഞു.

മാറനല്ലൂരിൽ ബൈക്ക് ഇലക്ട്രിക്ക് പോസ്റ്റിലിടിച്ചു യുവാവിന് പരിക്ക്

മാറനല്ലൂർ: മാറനല്ലൂരിൽ ബൈക്ക് ഇലക്ട്രിക്ക് പോസ്റ്റിലിടിച്ചു യുവാവിനു ഗുരുതര പരിക്ക്. ഞായറാഴ്ച പുലർച്ചെ രണ്ടോട് അടുപ്പിച്ച് വെള്ളൂർക്കോണത്തായിരു ന്നു അപകടം. ഗുരുതര പരിക്കേറ്റ തൂങ്ങാംപാറ മാവുവിള സ്വദേശി സഞ്ജയ് ചികിത്സയിലാണ്. ഞായറാഴച്ച പുലർച്ചെ സഞ് ജയ് ഓടിച്ചിരുന്ന ബൈക്ക് നിയന്ത്രണം തെറ്റി ഇലക്ട്രിക്ക് പോസ്റ്റിൽ ഇടിച്ചു നിൽക്കുകയായിരുന്നു. തുടർന്ന് സഞ്ജയ് റോഡിൽ വീണു ബോധരഹിതനായി. ഇലക്ടിക് പോസ്റ്റ് ഇടിയുടെ ആഘാതത്തിൽ രണ്ടായി മുറിഞ്ഞു. സഞ്ജയ് ഓടിച്ച ബൈക്ക് ഇടിയുടെ ആഘാതത്തിൽ മൂന്നായി മുറിഞ്ഞു. വൻ ഇടിയാണ് നടന്നതെന്ന് പോലീസ് പറയുന്നു. റോഡിൽ വീണ സഞ്ജയിനെ മണിക്കൂറുകൾ കഴിഞ്ഞ് അതുവഴി വന്ന ബൈക്ക് യാത്രികരാണ് ആശുപത്രിയിൽ എത്തിച്ചത്. എതിരെ വന്ന വാഹനത്തെ മറികടക്കാൻ ശ്രമിക്കവെ നിയന്ത്രണം തെറ്റിയതാകാമെന്നും ചൂണ്ടി കാട്ടപ്പെടുന്നു. മാറനല്ലൂർ പോലീസ് കേസ്സെടുത്തു.

ജവഹർനഗർ വസ്തുതട്ടിപ്പ് കേസ് : ഒളിവിലുള്ള അനില്‍ തമ്പിക്ക് വമ്പന്‍ രാഷ്ട്രീയ സ്വാധീനം

പേരൂര്‍ക്കട: ജവഹര്‍ നഗറിലെ വസ്തുതട്ടിപ്പിലെ പ്രധാന കണ്ണി അനില്‍ തമ്പിയുടേത് വമ്പന്‍ രാഷ്ട്രീയ സ്വാധീനം. കേരളത്തിലെ എല്ലാ രാഷ്ട്രീയ പാര്‍ട്ടികളുമായും സംഘടനകളുമായും ഇയാള്‍ക്ക് വളരെ അടുപ്പമുണ്ട്. ഒരു ബിസിനസ് മാഗ്നറ്റായി അറിയപ്പെടുന്ന അനില്‍ തമ്പിയുടെ സ്വാധീനം കേരളത്തിനകത്തു മാത്രമല്ല, പുറത്തും വിദേശ രാജ്യങ്ങളിലും വരെയുണ്ടെന്നാണു സൂചന. അനില്‍ തമ്പിക്കുവേണ്ടി വസ്തു തട്ടിപ്പില്‍ ഭാഗഭാക്കായിരുന്ന മെറിന്‍ ജേക്കബും സെയ്ദാലിയും ജനീവയിലെ അന്താരാഷ്ട്ര സമ്മേളനത്തിലും വിദേശ രാജ്യങ്ങളിലെ കോണ്‍ഫറന്‍സുകളിലും പങ്കെടുത്തിട്ടുണ്ട്. ഇവര്‍ക്ക് രാഷ്ട്രീയ സ്വാധീനവുമുണ്ട്. ജവഹര്‍ നഗറില്‍ സെയ്ദാലി സെക്രട്ടറിയായി വി ഗ്രോ ഫോറസ്റ്റ് ഫൗണ്ടേഷന്‍ എന്ന ഒരു പരിസ്ഥിതി സംഘടനയുണ്ട്. ഇതിലെ മാനേജിംഗ് ട്രസ്റ്റിയായിരുന്നു മെറിന്‍ ജേക്കബ്. അനില്‍ തമ്പിക്ക് ആധാരമെഴുത്തുകാരനായ അനന്തപുരി മണികണ്ഠനെ സ്വാധീനിക്കാനും ഇയാള്‍വഴി വ്യാജ രേഖകള്‍ ഹാജരാക്കി 10 കോടിയില്‍പ്പരം രൂപയുടെ സ്വത്തുക്കള്‍ കൈക്കലാക്കുന്നതിനായി വിവിധ കണ്ണികളെ സ്വാധീനിച്ചെടുക്കാനും സാധിച്ചു. ഈ കണ്ണികളില്‍ ഭൂരിഭാഗവും അറസ്റ്റിലായിട്ടുണ്ടെങ്കിലും അനില്‍ തമ്പി ഇപ്പോഴും ഒളിവിലാണ്. ഇയാള്‍ കേരളം വിട്ടതായി പോലീസ് കരുതുന്നു. എന്നാല്‍ രാജ്യം വിട്ടുപോകാതിരിക്കാനുള്ള എല്ലാ മുന്‍കരുതലുകളും പോലീസ് കൈക്കൊണ്ടിട്ടുണ്ട്. മെറിന്‍ ജേക്കബ് വസ്തു വിലയാധാരമായി എഴുതി നല്‍കിയ ചന്ദ്രസേനന്‍ പറയുന്നത് തന്‍റെ മരുമകനായ അനില്‍ തമ്പി തന്നെ നിര്‍ബന്ധിച്ച് പ്രമാണത്തില്‍ ഒപ്പുവച്ചുവെന്നാണ്. ഈ പ്രമാണം ഇപ്പോഴും അനില്‍ തമ്പിയുടെ കൈവശമുണ്ട്. ഇതുമായാണ് ഇയാള്‍ മുങ്ങിയിരിക്കുന്നത്. പ്രമാണം റദ്ദുചെയ്യുന്നതിനുള്ള നടപടികള്‍ അധികൃതര്‍ സ്വീകരിച്ചു വരുന്നതിനാല്‍ ജവഹര്‍ നഗറിലെ വസ്തുവും വീടും തട്ടിയെടുക്കാനുള്ള അനില്‍ തമ്പിയുടെ പദ്ധതി ഒടുവില്‍ വഴിപിഴച്ചു പോകുകയായിരുന്നു. അനില്‍ തമ്പിയുടെ ഉന്നത രാഷ്ട്രീയ സ്വാധീനം ഉപയോഗിച്ച് അയാള്‍ തന്നെ രക്ഷിച്ചുകൊള്ളുമെന്നായിരുന്നു അനന്തപുരി മണികണ്ഠന്‍റെ വിശ്വാസം. അതാണ് കോടികളുടെ സ്വത്ത് തട്ടിയെടുപ്പിനു മണികണ്ഠന്‍ കൂട്ടുനില്‍ക്കാന്‍ കാരണമായത്. അനില്‍ തമ്പിക്ക് ഒരു സ്വകാര്യ കമ്പനിയുമായി ഉന്നത ബന്ധമുണ്ടെന്നു പോലീസ് പറയുമ്പോള്‍ എത്രമാത്രം സ്വാധീനമാണ് ഇയാള്‍ക്ക് സമൂഹത്തിലുള്ളതെന്നു വ്യക്തമാകുന്നു. ഏതായാലും അനില്‍ തമ്പിയെ പടികൂടി നിയമത്തിനു മുന്നില്‍ കൊണ്ടുവരാനുള്ള ശ്രമം പോലീസ് ശക്തമായി തുടരുകയാണ്. ഇന്നലെയും അനില്‍ തമ്പിക്കുവേണ്ടി ബന്ധുവീടുകളിലും സുഹൃത്തുക്കളുടെ വീടുകളിലും രഹസ്യകേന്ദ്രങ്ങളിലും പോലീസ് അന്വേഷണം നടത്തുകയുണ്ടായി.

തൂങ്ങി മരിച്ച നിലയില്‍ കണ്ടെത്തി

വെള്ളറട : മരം കയറ്റ തൊഴിലാളിയായ ആറുകാണി ശാന്തിനഗര്‍ റോഡരികത്ത് വീട്ടില്‍ സതീഷ് കുമാര്‍ (42)ആണ് തൂങ്ങി മരിച്ച നിലയില്‍ കണ്ടെത്തിയത്. 10 ദിവസം മുന്പാണ് ഇയാള്‍ വലിയൊരു മഹാകണി മരത്തില്‍ കയറി തൂങ്ങുകയായിരുന്നു എന്നാണ് നിഗമനം. ഇന്നലെ രാവിലെ വിറക് ശേഖരിക്കാന്‍ പോയവരാണ് ജീര്‍ണിച്ച നിലയില്‍ മൃതദേഹം കണ്ടത്. തുടര്‍ന്ന് വെള്ളറട പോലീസിനെ വിവരം അറിയിക്കുകയായിരുന്നു. അമ്പൂരി പഞ്ചായത്ത് വാര്‍ഡ് മെമ്പര്‍ സ്റ്റേഷനില്‍ മൊഴി നല്‍കിയതനുസരിച്ച് വെള്ളറട പോലീസ് സംഭവസ്ഥലത്തെത്തി മേല്‍നടപടികള്‍ സ്വീകരിച്ചു. തുടര്‍ന്ന് പാറശാലയില്‍ നിന്നും എത്തിയ ഫയര്‍ഫോഴ്സ് സംഘം മൃതദേഹം താഴ്ചയില്‍ ഉള്ള സ്ഥലത്ത് നിന്നും നീക്കി മെഡിക്കല്‍ കോളജിലേക്ക് മാറ്റി. പോസ്റ്റ്മോര്‍ട്ടം നടപടി പൂര്‍ത്തിയാക്കിയാലേ മരണത്തില്‍ ദുരൂഹതയുണ്ടോ എന്ന് പോലീസിന് പറയാന്‍ കഴിയൂ. ഭാര്യ : അനിത. മക്കള്‍ : സല്‍മോന്‍, സ്നേഹാമോള്‍.

യുവാവ് കുഴഞ്ഞുവീണ് മരിച്ചു

വിഴിഞ്ഞം: ഹോട്ടലിൽ ആഹാരം കഴിക്കുന്നതിനിടയിൽ കുഴഞ്ഞ് വീണ യുവാവ് മരിച്ചു. വിഴിഞ്ഞം അടിമലത്തുറ സിൽവ ഹൗസിൽ സിൽവയുടെ മകൻ മുത്തപ്പൻ (36) ആണ് മരിച്ചത്. ഇന്നലെ ഉച്ചയോടെയാണ് സംഭവം. സുഹൃത്തുക്കളായ നാലുപേരോടൊപ്പം ചപ്പാത്തിലെ ഒരു ഹോട്ടലിലെത്തി ഭക്ഷണം കഴിക്കുന്നതിനിടയിൽ മുത്തപ്പൻ കുഴഞ്ഞ് വീഴുകയായിരുന്നു. കൂടെയുള്ളവർ ആംബുലൻസിൽ മെഡിക്കൽ കോളജിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം പോസ്റ്റ്മോർട്ടത്തിനായി മോർച്ചറിയിലേക്ക് മാറ്റി.

പുസ്തക പ്രകാശനം

പൂവാർ: തിരുവനന്തപുരം സെന്‍റ് ജോസഫ് സ്കൂളിലെ ഹയർ സെക്കൻഡിറി അധ്യാപകൻ ഗ്ലേവിയസ് ടി. അലക്സാണ്ടറുടെ രണ്ടാമത്തെ ഇംഗ്ളീഷ് കവിതാ സമാഹാരം ന്യൂ സീ ലാന്‍റിന്‍റെ പ്രകാശനം ചെയ്തു. തിരുവനന്തപുരം ലത്തീന്‍ അതിരൂപതാ ആര്‍ച്ച്ബിഷപ് റവ. ഡോ. തോമസ് ജെ. നെറ്റോ കവി വിനോദ് വൈശാഖിക്കു പുസ്തകം നൽകി പ്രകാശനം ചെയ്തു. റവ. ഡോ. ഡൈസണ്‍ യേശുദാസ്, ലിറ്റി ലൂസിയ സൈമണ്‍, ഡോ. ഐറിസ് കൊയിലിയോ, ഡോ. ജെ. ആന്‍റണി, ബര്‍ഗ്മാന്‍ തോമസ്, ബര്‍ണാര്‍ഡ് മൊറായിസ്, ഡോ. എം രാജീവ് കുമാർ എന്നിവര്‍ സംസാരിച്ചു.

തുറന്ന ജയിൽ വളപ്പിലെ തീറ്റപ്പുല്ലുകൾ കോട്ടൂർ ആനപരിപാലനകേന്ദ്രത്തിലേക്ക്

നെയ്യാർഡാം: നെയ്യാർഡാം നെട്ടുകാൽത്തേരി തുറന്ന ജയിലിലെ തീറ്റപ്പുല്ലുകൾ ഇനി കോട്ടൂർ കാപ്പുകാട് ആന പരിപാലന കേന്ദ്രത്തിലെ ആനകൾക്ക് ഭക്ഷണമാകും. ഇതിന്‍റെ വിതരണ ഉദ്ഘാടനം പ്രിസൺസ് ആൻഡ് കറക്‌ഷണൽ സർവീസസ് ഡിജിപി ബൽറാം കുമാർ ഉപാധ്യായ നിർവഹിച്ചു. തുടർന്ന് നെട്ടുകാൽത്തേരി തുറന്ന ജയിലിൽ റംബുട്ടാൻ, ഡ്രാഗൺ ഫ്രൂട്ട് എന്നിവയുടെ വിളവെടുപ്പും, ജയിൽ വളപ്പിലെ ചെറിയ കുളത്തിൽ മത്സ്യക്കുഞ്ഞുങ്ങളെ തുറന്ന വിട്ടു മത്സ്യ കൃഷിയുടെ ഉദ്ഘാടനവും നിർവഹിച്ചു. തുറന്ന ജയിൽ ആൻഡ് കുറക്്ഷണൽ ഹോം നെട്ടുകാൽത്തേരി സൂപ്രണ്ട് എസ്. സജീവ്, ജയിൽ ആസ്ഥാന കാര്യാലയം ഡിഐജി എംകെ വിനോദ് കുമാർ, കള്ളിക്കാട് പഞ്ചായത്ത് പ്രസിഡന്‍റ് പന്ത ശ്രീകുമാർ, സാക്ഷരത കോ- ഓർഡിനേറ്റർ മുരുകദാസ്, രാജീവ്, പ്രിയ തുടങ്ങിയവർ വിവിധ പരിപാടികളിൽ സന്നിഹിതരായി. നെട്ടുകാൽത്തേരി തുറന്ന ജയിലിൽ 10 ഏക്കറിൽ വ്യാപിച്ചു കിടക്കുന്ന തീറ്റപ്പുൽ കൃഷി, സമീപപ്രദേശങ്ങളിലെ ഫാമുകൾക്കും, സർക്കാർ നിയന്ത്രണത്തിലുള്ള സ്ഥാപനങ്ങൾക്കും ആവശ്യാനുസരണം ലഭ്യമാക്കാൻ കഴിയുന്ന തരത്തിലാണ് ജയിൽ വകുപ്പ് പദ്ധതി ആസൂത്രണം ചെയ്തിരിക്കുന്നത്. നിലവിൽ കോട്ടൂർ ആനപരിപാലനകേന്ദ്രത്തിൽ 16 ആനകൾക്കായി, ദിനംപ്രതി ഏകദേശം 2,500 കിലോഗ്രാം തീറ്റപ്പുൽ ആവശ്യമായി വരുന്നുണ്ട്. ഇതിനായി ദൂരസ്ഥലങ്ങളിൽ നിന്നാണ് തീറ്റപ്പൽ എത്തിക്കുന്നത്. എന്നാൽ കോട്ടൂർ ആനപരിപാലന കേന്ദ്രത്തിൽ നിന്നും അഞ്ചുകിലോമീറ്റർ മാത്രം ദൂരമുള്ള ജയിലിൽ നിന്നുള്ള പുതിയ പദ്ധതിയിലൂടെ സംസ്ഥാന സർക്കാരിന് നിലവിലെ ചെലവിൽ നിന്നും ആശ്വാസമാകും. ലാഭകരമായ രീതിയിൽ ഇരു വകുപ്പുകളിലും പദ്ധതി നിർവഹണം കാര്യക്ഷമമായി നടത്തുവാൻ കഴിയുമെന്നതാണ് പ്രതീക്ഷയിലാണ് അധികൃതർ.

ശ്രീ ഗോകുലം മെഡിക്കൽ കോളജിൽ ബിരുദദാന ചടങ്ങ്

വെഞ്ഞാറമൂട്: ശ്രീ ഗോകുലം മെഡിക്കൽ കോളജിൽ നടന്ന എംബിബിഎസ് വിദ്യാർഥികളുടെ ബിരുദദാന ചടങ്ങുകളുടെ ഉദ്ഘാടനം ശ്രീ ഗോകുലം മെഡിക്കൽ കോളജ് ചെയർമാൻ ഗോകുലം ഗോപാലൻ നിർവഹിച്ചു. ആരോഗ്യ സർവകലാശാല വൈസ് ചാൻസിലർ ഡോ. മോഹൻ കുന്നുമ്മൽ മുഖ്യാതിഥിയായിരുന്നു. ശ്രീ ഗോകുലം മെഡിക്കൽ കോളജ് പ്രിൻസിപ്പൽ ഡോ. വി.ആർ. നന്ദിനി സ്വാഗതം ആശംസിച്ചു. ഡോ: കൃഷ്ണകുമാർ, ഗോകുലം മെഡിക്കൽ കോളജ് ഡീൻ ഡോ. ചന്ദ്രമോഹൻ, ഡോ: ലളിതാ കൈലാസ്, ഡോ: ഹരികുമാരൻ നായർ, ഡോ: കൃഷ്ണ ഡോ രാജൻ എന്നിവർ സംസാരിച്ചു.

മണികണ്ഠന്‍ ചെലവിട്ടത് ലക്ഷങ്ങള്‍ : വസ്തുതട്ടിപ്പിന്‍റെ തലച്ചോര്‍ അനില്‍ തമ്പിയുടേത്

പേരൂര്‍ക്കട: ജവഹര്‍ നഗറിലെ വസ്തുതട്ടിപ്പുമായി ബന്ധപ്പെട്ടുള്ള പ്രധാന തലച്ചോര്‍ അനില്‍ തമ്പിയുടേതെന്നു പോലീസ്. അതേസമയം വസ്തു രജിസ്റ്ററാക്കി നല്‍കുന്നതുവരെയുള്ള കാര്യങ്ങള്‍ക്കായി അനന്തപുരി മണികണ്ഠന്‍ ചെലവിട്ടത് ലക്ഷക്കണക്കിന് രൂപയാണെന്നു പോലീസ് പറയുന്നു. വസ്തു ഉടമ ഡോറ അസറിയ ക്രിപ്‌സ് വര്‍ഷങ്ങളായി അമേരിക്കയില്‍ സ്ഥിരതാമസക്കാരിയാണെന്നും ഇവിടെ ഒരു വീടുസൂക്ഷിപ്പുകാരന്‍ മാത്രമാണ് ഉള്ളതെന്നും പ്രതികള്‍ക്ക് അറിയാമായിരുന്നു. ഏകദേശം 10 വര്‍ഷമായി വസ്തു തട്ടിയെടുക്കുന്നതിന് അനില്‍ തമ്പി ആസൂത്രണം നടത്തിവരികയായിരുന്നു. ഡോറയുടെ വീടിനു വസ്തുവിനുമായി 10 കോടിയിലേറെ മതിപ്പുവില വരും. 14 സെന്‍റ് വസ്തുവിലാണ് വീട് ഇരിക്കുന്നത്. മെറിന്‍ ജേക്കബാണ് ചന്ദ്രസേനന്‍ എന്നയാള്‍ക്ക് വിലയാധാരം എഴുതി നല്‍കിയതെങ്കിലും ഇതിനു പിന്നിലെ പ്രവര്‍ത്തനങ്ങള്‍ അനന്തപുരി മണികണ്ഠന്‍റേതായിരുന്നു. ഇതിലൂടെ 1.10 കോടി രൂപ മണികണ്ഠനു ലഭിച്ചിരുന്നു. ഈ തുക ഉപയോഗിച്ച് കാറും വീടും വസ്തുവും വാങ്ങിക്കൂട്ടുകയായിരുന്നു അനന്തപുരി മണികണ്ഠന്‍ ചെയ്തത്. ആധാരം രജിസ്റ്റര്‍ ചെയ്യാനുള്ള ഫീസ്, ഇ-സ്റ്റാമ്പ് ചെലവ് എന്നിവ ഉള്‍പ്പടെ ഇയാള്‍ എട്ടുലക്ഷത്തിലേറെ രൂപ ചെലവാക്കി. ഡോറയുമായി രൂപസാദൃശ്യമുള്ള കല്ലയം സ്വദേശിനി വസന്തയെ കണ്ടെത്തി മണികണ്ഠന്‍റെ മുന്നില്‍ എത്തിച്ചത് ഇയാളുടെ സുഹൃത്തായ സുനില്‍ ബാബു തോമസാണ്. അനന്തപുരി മണികണ്ഠന്‍റെ നിർദേശപ്രകാരം ശാസ്തമംഗലത്തെ സബ്‌രജിസ്ട്രാര്‍ ഓഫീസില്‍ കള്ളസാക്ഷിയായി ഒപ്പിടുന്നതിനും ഇയാള്‍ എത്തിയിരുന്നു. സുഹൃത്തിനുവേണ്ടിയും മണികണ്ഠന്‍ നല്ലൊരു സംഖ്യ ചെലവിട്ടു. ഡോറയുടെ വളര്‍ത്തുപുത്രിയെന്നു കാണിച്ച് ആധാരം രജിസ്റ്റര്‍ ചെയ്യുന്നതിനു മെറിന്‍ ജേക്കബിനെ എത്തിച്ചത് മണികണ്ഠന്‍റെ മറ്റൊരു സുഹൃത്തായ സെയ്ദാലിയാണ്. ഇതിനുവേണ്ടി 25 ലക്ഷം രൂപയാണ് മണികണ്ഠന്‍ സുഹൃത്തായ സെയ്ദാലിക്കു നല്‍കിയത്. സഹോദരനായ സിഐ മഹേഷിന്‍റെ യൂസര്‍ ഐഡിയും പാസ്‌വേര്‍ഡും ഉപയോഗിച്ച് ലോഗിന്‍ ചെയ്താണ് മണികണ്ഠന്‍ ട്രഷറിയില്‍ തുക അടച്ചത്. മഹേഷ് നേരത്തെ അറസ്റ്റിലായിരുന്നു. മണികണ്ഠനു മൊത്തം ഒരുകോടി 10 ലക്ഷം രൂപ കൈമാറിയത് ചന്ദ്രസേനന്‍റെ മരുമകനായ അനില്‍ തമ്പിയാണ്. ജവഹര്‍ നഗറില്‍ തന്നെയാണ് അനില്‍ തമ്പിയും താമസിച്ചുവന്നത്. എന്നാല്‍ ഇപ്പോള്‍ ഇയാള്‍ ഒളിവിലാണ്. അസ്സല്‍ പ്രമാണം അനില്‍ തമ്പിയുടെ പക്കലുണ്ടെങ്കിലും ഇതു ഹാജരാക്കാന്‍ പോലീസ് ആവശ്യപ്പെട്ടിട്ട് അനില്‍ തമ്പി ഹാജരാക്കാതെ ഒളിവില്‍പ്പോകുകയായിരുന്നു. 50 ലക്ഷത്തോളം രൂപ മണികണ്ഠന്‍ രജിസ്റ്റര്‍ ഓഫീസിലെ വിവിധ ആവശ്യങ്ങള്‍ക്കും പിന്നെ സുഹൃത്തുക്കള്‍ക്കും മറ്റും നല്‍കിയായിരുന്നു വ്യാജരേഖ ചമച്ച് വസ്തു തട്ടുക്കുന്നതിന് അനില്‍ തമ്പിക്കു കൂട്ടുനിന്നത്.

കന്യാസ്ത്രീകൾക്ക് ജാമ്യം നൽകിയത് കൊണ്ട് മാത്രം പ്രശ്നം തീരില്ലെന്ന്

തിരുവനന്തപുരം: ഛത്തീസ്ഗഡിൽ കന്യാസ്ത്രീകളെ അന്യായമായി അറസ്റ്റ് ചെയ്ത് ജയിലിൽ അടച്ചിട്ടു ജാമ്യം നൽകിയതു കൊണ്ടു മാത്രം ന്യൂനപക്ഷ സമുദായങ്ങൾ തൃപ് തരല്ലെന്നു കേരള ലാറ്റിൻ കാത്തലിക് അസോസിയേഷൻ മുൻ പ്രസിഡന്‍റ് പി. സ്റ്റെല്ലസ്. മതപരിവർത്തനമാണ് സഭയുടെ അജൻഡ ആയിരുന്നെങ്കിൽ രാജ്യം മുഴുവൻ കത്തോലിക്കരായി മാറുമായിരുന്നു. കന്യാസ്ത്രീകളുടെ മേൽ ചുമത്തിയ കുറ്റപത്രം പിൻവലിക്കണം. അതിനൊപ്പം ന്യൂനപക്ഷ അവകാശങ്ങളും സ്വാതന്ത്ര്യവും ഹനിക്കപ്പെടാൻ പാടില്ലെന്ന് ഉറപ്പു വരുത്തണമെന്നും അദ്ദേഹം പറഞ്ഞു.

നൂറുൽ ഇസ്‌ലാം സർവകലാശാല ഏഴാമത് എ.പി.ജെ അവാർഡ് ദാന ചടങ്ങ് നാളെ

തിരുവനന്തപുരം: നൂറുൽ ഇസ്‌ലാം സർവകലാശാല ഏഴാമത് എ.പി.ജെ അവാർഡ് ദാന ചടങ്ങ് നാളെ നടക്കും. കർമ മണ്ഡലങ്ങളിലെ അനിതരസാധാരണമായ മികവ് പുലർത്തുകയും അതുല്യമായ നേട്ടങ്ങൾകൊണ്ട് രാജ്യത്തിന്‍റെ യശസ് വർധിപ്പിക്കുകയും ചെയ്‌ത പ്രതിഭകളെ ആദരിക്കുവാൻ നൂറുൽ ഇസ്‌ലാം സർവകലാശാലയും നിംസ് മെഡിസിറ്റിയും ഏർപ്പെടുത്തിയിരിക്കുന്ന എ.പി.ജെ അവാർഡ് ഐ.എസ്.ആർ.ഒ. ചെയർമാനായ ഡോ. വി. നാരായണന് സമ്മാനിക്കും. ഒരു ലക്ഷം രൂപയും ഫലകവും പ്രശസ്തി പത്രവുമടങ്ങുന്നതാണ് പുരസ്കാരം. നാളെ രാവിലെ പത്തിനു നിംസ് മെഡിസിറ്റിയിൽ നടക്കുന്ന ചടങ്ങിൽ കേരള ഗവർണർ രാജേന്ദ്ര വിശ്വനാഥ് അർലേക്കർ അവാർഡ് സമ്മാനിക്കും. നിംസ് മെഡിസിറ്റി ജനറൽ മാനേജർ ഡോ. കെ.എ. സജു സ്വാഗതം പറയും. കെ. ആൻസലൻ എംഎൽഎ അധ്യക്ഷത വഹിക്കും. നിംസ് മെഡിസിറ്റി എം.ഡിയും നൂറുൽ ഇസ്‌ലാം സർവകലാശാല പ്രൊ ചാൻസലറുമായ എം.എസ്. ഫൈസൽ ഖാൻ ആമുഖ പ്രഭാഷണം നടത്തും. നൂറുൽ ഇസ്‌ലാം സർവകലാശാല വൈസ് ചാൻസലർ ഡോ. ടെസ്സി തോമസ് മുഖ്യപ്രഭാഷണം നടത്തും. ഗവർണർ രാജേന്ദ്ര വിശ്വനാഥ് അർലേക്കറിനു നൂറുൽ ഇസ്‌ലാം സർവകലാശാല ചാൻസലർ ഡോ. മജീദ് ഖാൻ ആദരവ് നൽകും. നൂറുൽ ഇസ്‌ലാം എഡ്യൂക്കേഷണൽ ട്രസ്റ്റ് എക്സിക്യൂട്ടീവ് ഡയറക്ടർ ഷബ്നം ഷഫീക്ക്, മുൻ മന്ത്രി പന്തളം സുധാകരൻ തുടങ്ങിയവർ ചടങ്ങിൽ പങ്കെടുക്കും. 18 വയസിനു താഴെ പ്രായമുള്ള ഭിന്നശേഷി കുട്ടികൾക്ക് നിംസ് നടത്തിവരുന്ന നെയ്യാറ്റിൻകര പെൻഷൻ പ്ലാൻ പദ്ധതിയിൽ കാഞ്ഞിരംകുളം പഞ്ചായത്തിനെയും, പൂന്തുറ വാർഡിനെയും ഉൾപ്പെടുത്തുന്ന ചടങ്ങും നടക്കും.

ക്യൂ പോസിറ്റിവ് ക്ലബിന്‍റെ ഉദ്ഘാടനവും ഇന്‍റർസ്കൂൾ ക്വിസ് ചാന്പ്യൻഷിപ്പും

നെടുമങ്ങാട്: നെടുമങ്ങാട് അമൃത കൈരളി വിദ്യാഭവനിലെ ക്യൂ പോസിറ്റിവ് ക്ലബിന്‍റെ ഉദ്ഘാടനം ഇന്ത്യൻ ഇൻസ്റ്റിറ്റ്യൂട്ട് ഓഫ് സ്പേസ് സയൻസ് ആൻഡ് ടെക്നോളജി (ഐഐഎസ്ടി) പ്രൊ വൈസ് ചാൻസലറും അക്കാദമിക്ക് വിഭാഗം ഡീനുമായ പ്രഫ. കുരുവിള ജോസഫ് നിർവഹിച്ചു. ചടങ്ങിൽ അമൃത വിദ്യാലയം അഡ്മിനിസ്ട്രേറ്റീവ് ഡയറക്ടർ സജികുമാർ, അമൃത കൈരളി വിദ്യാഭവൻ പ്രിൻസിപ്പൽ സിന്ധു, ഐക്യൂഎ കേരള ഓപ്പറേഷൻസ് ഹെഡ് ജിസ് ജോണ്‍ സെബാസ്റ്റ്യൻ, അഭിഷേക് പ്രസന്നൻ എന്നിവർ പങ്കെടുത്തു. വിദ്യാർഥികൾക്ക് ക്വിസ് മത്സരങ്ങൾ മുഖേന പഠനം രസകരമാക്കാൻ തയാറാക്കിയ പദ്ധതിയായ ക്യൂ പോസിറ്റിവ് ക്ലബിന്‍റെ ഉദ്ഘാടനത്തിന്‍റെ ഭാഗമായി വിദ്യാർഥികൾക്കായി ഇന്‍റർസ്കൂൾ ക്വിസ് ചാന്പ്യൻഷിപ്പും സംഘടിപ്പിച്ചു. അമൃത വിശ്വവിദ്യാപീഠം, ഇന്‍റർനാഷണൽ ക്വിസിംഗ് അസോസിയേഷൻ (ഐക്യൂഎ), ക്യൂ ഫാക്ടറി എന്നിവരുമായി സഹകരിച്ച് നടത്തിയ ഇന്‍റർസ്കൂൾ ക്വിസ് ചാന്പ്യൻഷിപ്പിൽ സബ് ജൂണിയർ, ജൂണിയർ, സീനിയർ വിഭാഗങ്ങളിലായി മത്സരം നടന്നു. പ്രശസ്ത ക്വിസ് മാസ്റ്റർ മഹാദേവ് നന്പ്യാർ ക്വിസ് മത്സരം നയിച്ചു. സബ് ജൂണിയർ വിഭാഗത്തിൽ എ.എസ്. അമർനാഥ്, ഡി.എസ്. ഇന്ദ്രജിത്, പി.എസ്. ഹരിഗോവിന്ദ്, ജൂണിയർ വിഭാഗത്തിൽ ഡി. ഗോകുൽ, എസ്.എസ്. സാരംഗ്, റയാൻ മുഹമ്മദ്, സീനിയർ വിഭാഗത്തിൽ എഡ്ലിൻ ഐവിൻ ജൗണ്‍, കീർത്തന, ആവണി ബിനു എന്നിവർ വിജയികളായി.

സുഹൃത്തിനെ കൊലപ്പെടുത്തിയ പ്രതിക്ക് ഏഴു വർഷം കഠിനതടവ്

തിരുവനന്തപുരം: തമാശ പറയുന്നതിനിടെ പ്രകോപിതനായി സുഹൃത്തിനെ കുത്തിക്കൊലപ്പെടുത്തിയ ആൾക്ക് ഏഴു വർഷം കഠിനതടവും 50,000 രൂപ പിഴയും ശിക്ഷ. പിഴ ഒടുക്കിയില്ലെങ്കിൽ മൂന്നു മാസം അധിക തടവ് അനുഭവിക്കണം. കരമന നെടുങ്കാട് സോമൻ നഗർ തുണ്ടുവിള വീട്ടിൽ വിക്രമനെയാണ് കോടതി ശിക്ഷിച്ചത്. കവടിയാർ പദ്മവിലാസം റോഡ് കാട്ടുവിളാകം പുത്തൻവീട്ടിൽ ബോസിനെയാണ് വിക്രമൻ കൊലപ്പെടുത്തിയത്. ആറാം അഡീഷണൽ സെഷൻസ് ജഡ്ജി ആർ. രേഖയാണ് ശിക്ഷ വിധിച്ചത്. 2022 ഏപ്രിൽ 29 നായിരുന്നു സംഭവം. തമാശയ്ക്കു കളിയാക്കിയതിനിടെ പ്രകോപിതനായ വിക്രമൻ ബോസി നെ കുത്തുകയായിരുന്നു. നെഞ്ചിലേറ്റ ആഴത്തിലുളള മുറിവ് മരണ കാരണമായി മാറി. മെഡിക്കൽ കോളജ് ആശുപത്രിയിൽ ചികിത്സയിൽ കഴിയവെ അടുത്ത ദിവസം ബോസ് മരണമടഞ്ഞു. പ്രോസിക്യൂഷനു വേണ്ടി അഡീഷണൽ പബ്ലിക് പ്രോസിക്യൂട്ടർ എ.ആർ. ഷാജി ഹാജരായി.

ഐഎസ്ആർഒ തൊഴിൽ തട്ടിപ്പ് കേസ്: ജാഗ്രത പാലിക്കണമെന്ന് മുന്നറിയിപ്പ്

തിരുവനന്തപുരം: കേന്ദ്ര ബഹിരാകാശ വകുപ്പിനു കീഴിൽ തിരുവനന്തപുരത്ത് സ്ഥിതി ചെയ്യുന്ന ഐഎസ്ആർഒ വിക്രം സാരാഭായി സ്പേസ് സെന്‍ററിൽ ജോലി വാഗ്ദാനം ചെയ്യുന്ന വ്യാജ തൊഴിൽ റാക്കറ്റുകൾക്കെതിരെ ജാഗ്രത പാലിക്കണമെന്ന് വിഎസ്എസ്‌സി മുന്നറിയിപ്പു നൽകി. തൊഴിൽ തട്ടിപ്പു കേസിൽ സംസ്ഥാനത്ത് അഞ്ചു പേർ അറസ്റ്റിലായ സാഹചര്യത്തിലാണ് മുന്നറിയിപ്പ്. വിഎസ്എസ്‌സിയിൽ നിയമനത്തിനായി ഏതെങ്കിലും ഏജന്‍റുമാരെയോ ഏജൻസികളെയോ അധികാരപ്പെടുത്തിയിട്ടില്ല. ഒഴിവുകൾ വിഎസ്എസ് സിയുടെയോ ഐഎസ്ആർഒയുടെയോ ഒൗദ്യോഗിക വെബ്സൈറ്റ് വഴി പരസ്യപ്പെടുത്തുന്നതാണ്. വിജ്ഞാപനം ചെയ്തിരിക്കുന്ന തസ്തികകളിലേക്കു നിയമനം നടത്തുന്നത് ഡിപ്പാർട്ട്മെന്‍റ് ഓഫ് സ്പേസ് തയാറാക്കിയ മാനദണ്ഡങ്ങൾക്കു അനുസൃതമായ തെരഞ്ഞെടുപ്പ് പ്രക്രിയയിലൂടെ മാത്രമാണ്. ഒഴിവുകൾ തികച്ചും മെറിറ്റ് അനുസൃതമായാണ് നികത്തുന്നത്. കൂടാതെ ചില വ്യാജ വെബ്സൈറ്റുകളിലും /സാമൂഹിക മാധ്യമങ്ങളിലും വ്യാജനിയമന വാർത്തകൾ വരുന്നതായി ശ്രദ്ധയിൽപ്പെട്ടിട്ടുണ്ട്. ഇത്തരം വ്യാജ നിയമന വാർത്തകൾക്കെതിരെ ഉദ്യോഗാർഥികൾ ജാഗരൂകരാകണം. വിഎസ്എസ്‌സി പരസ്യപ്പെടുത്തുന്ന തൊഴിൽ അവസരങ്ങൾക്ക് അപേക്ഷകൾ സമർപ്പിക്കുവാൻ ആഗ്രഹിക്കുന്ന ഉദ്യോഗാർഥികൾ വിഎസ്എസ്്സിയുടെയും ഐഎസ്ആർഒയുടെയും ഒൗദ്യോഗിക വെബ്സൈറ്റുകൾ (www.vssc.gov.in) / (www.siro.gov.in) പതിവായി സന്ദർശിക്കുക.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]