ADVERTISEMENT

ADVERTISEMENT

ജീവകാരുണ്യ പ്രവർത്തകനെ ആദരിച്ചു

തിരുവമ്പാടി: 119 തവണ രക്തദാനം നടത്തിയ ജീവകാരുണ്യ പ്രവർത്തകനെ ആദരിച്ചു. ഹോപ്പ് മുറമ്പാത്തി മെമ്പറായ കെ.ജെ. ജയ്സൺ കന്നുകുഴിയെ ആണ് മെഡിക്കൽ കോളജ് പ്രിൻസിപ്പൽ‌ ഡോ. സജിത്ത് കുമാർ മൊമെന്‍റോ നൽകി ആദരിച്ചത്. ബ്ലഡ് ബാങ്ക് മേധാവി ഡോ. ദീപ, സ്റ്റാഫ് അനു എന്നിവർ നേതൃത്വം നൽകി.

ADVERTISEMENT

നൂറാംതോട് ഗ്രൗണ്ട് ഉദ്ഘാടനം ചെയ്തു

കോടഞ്ചേരി: കോടഞ്ചേരി പഞ്ചായത്ത് 2024- 25 വാർഷിക പദ്ധതിയിൽ ഉൾപ്പെടുത്തി പൊതുജന പങ്കാളിത്തത്തോടുകൂടി നിർമ്മിച്ച നൂറാംതോട് ഗ്രൗണ്ടിന്‍റെ ഉദ്ഘാടനം പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി നിർവഹിച്ചു. വാർഡ് മെമ്പർ റിയാനസ് സുബൈർ അധ്യക്ഷത വഹിച്ചു. ചടങ്ങിൽ ഫാ. ജോർജ് മുണ്ടക്കൽ മുഖ്യാതിഥിയായിരുന്നു. സിഎസ്ഐ പള്ളി വികാരി ഫാ. ജോയ്ക്കുട്ടി, മഹല്ല് പ്രസിഡന്‍റ് അബ്ദുല്ല കുറങ്ങോട്, നൂറാംതോട് ഭഗവതി ക്ഷേത്രം പ്രസിഡന്‍റ് കുമാരൻ കരിമ്പിൽ, പഞ്ചായത്ത് വൈസ് പ്രസിഡന്‍റ് ജമീല അസീസ്, ജില്ലാ പഞ്ചായത്ത് മെമ്പർ അംബിക മംഗലത്ത്, ബ്ലോക്ക് പഞ്ചായത്ത് മെമ്പർ ബുഷ്റ ഷാഫി, ഗ്രാമപഞ്ചായത്ത് ക്ഷേമ കാര്യ സ്റ്റാൻഡിംഗ് കമ്മിറ്റി ചെയർപേഴ്സൺ സൂസൻ വർഗീസ് എന്നിവർ പ്രസംഗിച്ചു.

എലത്തൂരിലെ വിവിധ റോഡുകൾ മന്ത്രി ഉദ്ഘാടനം ചെയ്തു

കോഴിക്കോട്: എലത്തൂർ നിയോജകമണ്ഡലത്തിലെ വിവിധ റോഡുകൾ മന്ത്രി എ.കെ. ശശീന്ദ്രൻ ഉദ്ഘാടനം ചെയ്തു. ചേളന്നൂർ ഗ്രാമപഞ്ചായത്തിലെ വലോട്ടിൽ ഭഗവതി ക്ഷേത്രം -കപ്പിയിൽ റോഡ്, തലക്കുളത്തൂർ ഗ്രാമപഞ്ചായത്തിലെ പാറക്കണ്ടി-ചെറുകാട്ട് ക്ഷേത്രം റോഡ്, നടുതുരുത്തി മാട്ടുവയിൽ -തെക്കേതലക്കൽ റോഡ്, കോഴിക്കോട് കോർപറേഷനിലെ മനേടത്ത് താഴം-പാണ്ട്യാടത്ത് റോഡ് എന്നിവയാണ് മന്ത്രി ഉദ്ഘാടനം ചെയ്തത്. ചേളന്നൂർ ഗ്രാമപഞ്ചായത്ത് 16-ാം വാർഡിലെ വലോട്ടിൽ ഭഗവതി ക്ഷേത്രം -കപ്പിയിൽ റോഡ് എംഎൽഎ ആസ്തി വികസന ഫണ്ടിൽനിന്ന് ഏഴ് ലക്ഷം രൂപയും ചേളന്നൂർ ഗ്രാമപഞ്ചായത്ത് തൊഴിലുറപ്പ് പദ്ധതിയിലെ 3,50,000 രൂപയും ഉപയോഗിച്ചാണ് നിർമാണം പൂർത്തിയാക്കിയത്. ചടങ്ങിൽ റോഡിന് സ്ഥലം സൗജന്യമായി വിട്ടുനൽകിയ ടി. അഖില, ടി. ആതിര എന്നിവരെ അനുമോദിച്ചു. ഗ്രാമപഞ്ചായത്ത് പ്രസിഡന്‍റ് പി.പി. നൗഷീർ അധ്യക്ഷനായി. ബ്ലോക്ക് മെമ്പർ എൻ. ഫാസിൽ, വാർഡ് മെമ്പർ എൻ. രമേശൻ, എം.കെ. രാജേന്ദ്രൻ, വി. പ്രഭാകരൻ, സുബിൽ, വി.ടി. പുരുഷോത്തമൻ, അഖിനേഷ്, ഹരിദാസൻ, വേണുഗോപാലൻ എന്നിവർ പ്രസംഗിച്ചു. പാറക്കണ്ടി -ചെറുകാട്ട് ക്ഷേത്രം റോഡ് എംഎൽഎ ആസ്തി വികസന ഫണ്ടിൽനിന്ന് 15 ലക്ഷം രൂപ വിനിയോഗിച്ചാണ് കോൺക്രീറ്റ് പ്രവൃത്തി പൂർത്തീകരിച്ച് ഗതാഗത യോഗ്യമാക്കിയത്. ചടങ്ങിൽ തലക്കുളത്തൂർ ഗ്രാമപഞ്ചായത്ത് പ്രസിഡന്‍റ് കെ.ടി. പ്രമീള അധ്യക്ഷയായി. വൈസ് പ്രസിഡന്‍റ് കെ.കെ. ശിവദാസൻ, സ്ഥിരം സമിതി അധ്യക്ഷരായ കെ.ജി. പ്രജിത, ചേളന്നൂർ ബ്ലോക്ക് പഞ്ചായത്ത് മെമ്പർ ഐ.പി. ഗീത, വാർഡ് മെമ്പർ കെ.വി. ഗിരീഷ്, വാർഡ് കൺവീനർ പി. ഹരീഷ്, രാഷ്ട്രീയ പാർട്ടി പ്രതിനിധികൾ എന്നിവർ പ്രസംഗിച്ചു. മന്ത്രി എ.കെ. ശശീന്ദ്രന്‍റെ ശിപാർശയുടെ അടിസ്ഥാനത്തിൽ ഹാർബർ എൻജിനീയറിംഗ് വകുപ്പ് അനുവദിച്ച 91,92000 രൂപ ചെലവിട്ടാണ് നടുതുരുത്തി മാട്ടുവയിൽ -തെക്കേത്തലക്കൽ റോഡ് നവീകരിച്ചത്. ഉദ്ഘാടന ചടങ്ങിൽ തലക്കുളത്തൂർ ഗ്രാമപഞ്ചായത്ത് പ്രസിഡന്‍റ് കെ.ടി. പ്രമീള അധ്യക്ഷയായി. അസി. എക്സിക്യൂട്ടീവ് എൻജിനീയർ സൗമ്യ ഗംഗാധരൻ റിപ്പോർട്ട് അവതരിപ്പിച്ചു. വൈസ് പ്രസിഡന്‍റ് കെ.കെ. ശിവദാസൻ, ചേളന്നൂർ ബ്ലോക്ക് പഞ്ചായത്ത് മെമ്പർ ഐ.പി. ഗീത, വാർഡ് മെമ്പർ ഷൈനി ശ്രീരാജ്, രാഷ്ട്രീയ പാർട്ടി പ്രതിനിധികൾ എന്നിവർ പ്രസംഗിച്ചു. മുഖ്യമന്ത്രിയുടെ തദ്ദേശ റോഡ്‌ പുനരുദ്ധാരണ പദ്ധതിയിൽ ഉൾപ്പെടുത്തി15 ലക്ഷം രൂപ ചെലവിട്ടാണ് ‌മനേടത്ത് താഴം-പാണ്ട്യാടത്ത് ഡ്രൈനേജ് കം റോഡിന്‍റെ നിർമാണം പൂർത്തിയാക്കിയത്. പരിപാടിയിൽ കോർപറേഷൻ വാർഡ് കൗൺസിലർ വി.പി. മനോജ് അധ്യക്ഷനായി. കൗൺസിലർ എസ്.എം. തുഷാര, വാർഡ് കൺവീനർ അബൂബക്കർ സിദ്ധീഖ്, രാഷ്ട്രീയ പാർട്ടി പ്രതിനിധികൾ എന്നിവർ പ്രസംഗിച്ചു.

വന്യമൃഗാക്രമണം തടയണം: തൊഴിലാളികൾ മാർച്ച് നടത്തി

പെരുവണ്ണാമൂഴി: വന്യമൃഗങ്ങളുടെ അക്രമത്തിൽ നിന്നും പ്ലാന്‍റേഷൻ കോർപറേഷൻ പേരാമ്പ്ര എസ്റ്റേറ്റ് തൊഴിലാളികളെ സംരക്ഷിക്കാൻ മാനേജ്മെന്‍റ് തയാറാവണമെന്നാവശ്യപ്പെട്ട്സംയുക്ത തൊഴിലാളി യൂണിയന്‍റെ നേതൃത്വത്തിൽ എസ്റ്റേറ്റ് ഓഫീസിലേക്ക് മാർച്ച് നടത്തി. സിഐടിയു ഏരിയ സെക്രട്ടറി കെ. സുനിൽ ഉദ്ഘാടനം ചെയ്തു. തുടർച്ചയായ കാട്ടാനകളുടെ ശല്യം കാരണം പേരാമ്പ്ര എസ്റ്റേറ്റിലെ തൊഴിലാളികൾ പൊറുതി മുട്ടുകയാണ്. ഏറ്റവും അവസാനമായി കഴിഞ്ഞ മാസം നൈറ്റ് വാച്ചുമാനായി ജോലി ചെയ്ത എസ്റ്റേറ്റ് തൊഴിലാളി സി.എൻ ബാബു കാട്ടാനക്കൂട്ടങ്ങളുടെ അക്രമത്തിൽ ഗുരുതരമായി പരിക്കേറ്റു. കഷ്ടിച്ചു രക്ഷപ്പട്ടെങ്കിലും മെഡിക്കൽ കോളജിൽ ചികിത്സയിലാണ്. മിനിമം കൂലി പോലും ലഭ്യമാവാതെ അപകട സാധ്യത കൂടുതലുള്ള തോട്ടം തൊഴിൽ മേഖലയിൽ മതിയായ സംരക്ഷണം നൽകാൻ എസ്റ്റേറ്റ് മാനേജ്മെന്‍റ് തയാറാവണമെന്നും പരിക്കേറ്റ സി.എൻ. ബാബുവിന് തുടർ ചികിത്സയും കുടുംബത്തിന് ആവശ്യമായ ധന സഹായവും നൽകണമെന്നും കെ. സുനിൽ ആവശ്യപ്പെട്ടു. എഐടിയുസി സെക്രട്ടറി കെ.കെ ഭാസ്കരൻ അധ്യക്ഷത വഹിച്ചു. പേരാമ്പ്ര എസ്റ്റേറ്റ് ലേബർ സെന്‍റർ എച്ച്എംഎസ് യൂണിറ്റ് പ്രസിഡന്‍റ് കെ.ജി. രാമനാരായണൻ, വിജു ചെറുവത്തൂർ, പി.ജെ. റജി എന്നിവർ പ്രസംഗിച്ചു. ടി. ഭാസ്ക്കരൻ എരവട്ടൂർ, പ്രേംരാജ്, എം.സി പ്രദീപ് കുമാർ, സിന്ധു മൈക്കിൾ എന്നിവർ മാർച്ചിന് നേതൃത്വം നൽകി.

ജേതാക്കൾക്ക് സ്വീകരണം നൽകി

കൂടരഞ്ഞി: അർജുന സ്പോർട്സ് ക്ലബിന്‍റെ ആഭിമുഖ്യത്തിൽ കേരളത്തിലെ ഏറ്റവും മികച്ച റഫറിയായി തെരഞ്ഞെടുക്കപ്പെട്ട ജസ്റ്റിൻ ജോസ്, 5000 മീറ്റർ ഓട്ടമത്സരത്തിൽ ദക്ഷിണേന്ത്യൻ കിരീടം നേടിയ ബിറ്റോ ജോസഫ്, ജൂഡോ ജില്ലാ സ്വർണ മെഡൽ നേടിയ അർച്ചന രാജേഷ് എന്നിവരെ മൊമെന്‍റോ നൽകി ലിന്‍റോ ജോസഫ് എംഎൽഎ ആദരിച്ചു. ബാസ്ക്കറ്റ്ബോൾ ക്യാമ്പ് ഉദ്ഘാടനവും എംഎൽഎ നിർവഹിച്ചു. ക്ലബ് പ്രസിഡന്‍റ് വി.എം. മാത്യു അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ആദർശ് ജോസഫ് മുഖ്യപ്രഭാഷണം നടത്തി. വി.എ. ജോസ് ജേതാക്കളെ പരിചയപ്പെടുത്തി. പഞ്ചായത്ത് മെമ്പർമാരായ റോസിലി ജോസ്, വി.എസ്. രവീന്ദ്രൻ, മോളി തോമസ്, സർവീസ് ബാങ്ക് പ്രസിഡന്‍റ് പി.എം. തോമസ്, സെന്‍റ് സെബാസ്റ്റ്യൻസ് ഹൈസ്കൂൾ ഹെഡ്മാസ്റ്റർ സജി ജോൺ, വ്യാപാരി വ്യവസായി ഏകോപന സമിതി പ്രസിഡന്‍റ് മുഹമ്മദ് പാതിപ്പറമ്പിൽ, സോമനാഥൻ കുട്ടത്ത്, തങ്കച്ചൻ കൊച്ചുകൈപ്പേൽ, ടോമി പ്ലാത്തോട്ടം, ജയേഷ് സ്രാമ്പിക്കൽ, സജി പെണ്ണാപറമ്പിൽ, എം.ടി. തോമസ് എന്നിവർ പ്രസംഗിച്ചു.

കുറ്റവിചാരണ പദയാത്രക്ക് തുടക്കമായി

പെരുവണ്ണാമൂഴി: ചക്കിട്ടപാറ പഞ്ചായത്തിൽ 20 വർഷമായി തുടരുന്ന എൽഡിഎഫ് ദുർഭരണത്തിന് വിരാമമിട്ട് ജനങ്ങളുടെ ഭരണ സമിതിയെ അധികാരത്തിലേറ്റുമെന്ന മുദ്രാവാക്യമുയർത്തി കോൺഗ്രസ് ചക്കിട്ടപാറ മണ്ഡലം കമ്മിറ്റിയുടെ നേതൃത്വത്തിൽ മൂന്നു ദിവസം നീണ്ടു നിൽക്കുന്ന കുറ്റ വിചാരണ പദയാത്ര ഇന്നലെ പൂഴിത്തോട്ടിൽ നിന്നാരംഭിച്ചു. യൂത്ത് കോൺഗ്രസ് ജില്ലാ പ്രസിഡന്‍റ് ആർ. ഷഹിൻ ജാഥാ ലീഡറും പാർട്ടി മണ്ഡലം പ്രസിഡന്‍റുമായ റെജി കോച്ചേരിക്ക് പതാക കൈമാറി ഉദ്ഘാടനം ചെയ്തു. ബ്ലോക്ക് കോൺഗ്രസ് പ്രസിഡന്‍റ് കെ. മധു കൃഷ്ണൻ, യുഡിഎഫ് നിയോജക മണ്ഡലം കൺവീനർ കെ.എ. ജോസ് കുട്ടി, ജോസ് കാരിവേലി, ജിതേഷ് മുതുകാട്, പി.എസ്. സുനിൽകുമാർ, പി.സി. കുഞ്ഞമ്മദ്, ജോർജ് മുക്കള്ളിൽ, ബാബു കൂനന്തടം, ജെയിംസ് മാത്യു, ഗിരിജ ശശി, ലൈസ ജോർജ്, പാപ്പച്ചൻ കൂനന്തടം, എബിൻ കുംബ്ലാനി, ബിന്ദു ബാലകൃഷ്ണൻ, ജയേഷ് ചെമ്പനോട തുടങ്ങിയവർ പ്രസംഗിച്ചു. വി.വി. നാരായണി, അനില റെജി, കെ.കെ. ഗിരീഷ്, ജെയിംസ് തോട്ടുപുറം, പ്രമോദ് ആന്‍റണി, ജെയിൻ ജോൺ, സുമതി നരിനട, മിനി അണ്ണക്കുട്ടൻചാൽ, രഞ്ജിനി മുതുകാട്, ബോബൻ കാരിത്തടത്തിൽ, പ്രകാശ് കൊല്ലിയിൽ, മാത്യു കാലായിൽ, പി.കെ.ദിനേശൻ തുടങ്ങിയവർ നേതൃത്വം നൽകി. കുറത്തിപ്പാറ, ചെമ്പനോട, താമരമുക്ക് വഴി പന്നിക്കോട്ടൂരിൽ ഒന്നാം ദിനത്തിലെ പദയാത്ര സമാപിച്ചു.

വിദ്യാവനം പുരസ്കാരം വേനപ്പാറ ലിറ്റിൽ ഫ്ലവർ യുപി സ്കൂളിന്

താമരശേരി: വനം വന്യജീവി വകുപ്പിന്‍റെ വിദ്യാവനം പുരസ്കാരം വേനപ്പാറ ലിറ്റിൽ ഫ്ലവർ യുപി സ്കൂളിന് ലഭിച്ചു. ചേളന്നൂർ ശ്രീനാരായണ ഗുരു കോളജിൽ സംഘടിപ്പിച്ച വന്യജീവി വാരാഘോഷത്തിന്‍റെ സംസ്ഥാനതല ഉദ്ഘാടന സമ്മേളനത്തിൽ ഫോറസ്റ്റ് കൺസർവേറ്റർ ആർ. കീർത്തിയിൽ നിന്നും പ്രധാനാധ്യാപകൻ ജെയിംസ് ജോഷി, അധ്യാപകരായ ബിജു മാത്യു, അലൻ ജോൺസ് മാത്യു, വിദ്യാർഥികളായ ഡിയോൺ ബിജു എമിൽ ജോസഫ്, ബി.കെ. നവനീത്, മുഹമ്മദ് ഇർഷാൻ എന്നിവർ ചേർന്ന് പുരസ്കാരം ഏറ്റവാങ്ങി. സാമൂഹ്യ വനവൽക്കരണ വിഭാഗം വിദ്യാലയങ്ങളിൽ നടപ്പാക്കുന്ന വിദ്യാവനം പദ്ധതി മികച്ച രീതിയിൽ നടപ്പിലാക്കിയതിനാണ് പുസ്കാരം ലഭിച്ചത്.

കാട്ടുപന്നി ശല്യം; നഗരസഭക്ക് മുന്നിൽ നിരാഹാര സമരം തുടങ്ങി

മുക്കം: നഗരസഭ പരിധിയിൽ കാട്ടുപന്നി ശല്യം രൂക്ഷമായിട്ടും നടപടി സ്വീകരിക്കാത്തതിൽ പ്രതിഷേധിച്ച് കർഷകരുടെ അനിശ്ചിതകാല റിലേ നിരാഹാര സമരത്തിന് തുടക്കം. കാട്ടുപന്നികളെ വെടിവെച്ചു കൊല്ലാൻ സർക്കാർ അനുമതി നൽകിയിട്ടും നഗരസഭ ഒഴിഞ്ഞു മാറുകയാണന്നാരോപിച്ചാണ് സമരം. സമീപ പഞ്ചായത്തുകൾ നായാട്ടു നടത്തിയും മറ്റും കാട്ടുപന്നികളെ വെടിവെച്ചു കൊല്ലുന്നത് ചൂണ്ടിക്കാട്ടുമ്പോൾ നഗരസഭ കണ്ണടയ്ക്കുകയാണ്. നായാട്ടിനുള്ള സാമ്പത്തിക ചെലവ് ഏറ്റെടുക്കാൻ തയാറാവുകയും 20 ഷൂട്ടർമാർ അനുമതി രേഖകൾ നൽകിയിട്ടും മുക്കം നഗരസഭ കർഷക, ജന വിരുദ്ധ നിലപാടിൽ ഉറച്ചു നിൽക്കുകയാണന്നും സമരക്കാർ പറഞ്ഞു. രാവിലെ കൃഷിയിടത്തിൽനിന്ന് ആരംഭിച്ച ഉപവാസം വൈകുന്നേരം മൂന്നിന് നഗരസഭ കവാടത്തിൽ എത്തി തുടരുകയായിരുന്നു. വൈകിട്ട് ആറു വരെയായിരുന്നു ഇന്നലത്തെ നിരാഹാര സമരം. ഉപവാസ സമരം കർഷകൻ പൈറ്റുളി ഭാസ്കരൻ നായർ ഉദ്ഘാടനം ചെയ്തു. സമരത്തിൽ ഷാജി രാജ് ലങ്കയിൽ, സിദ്ധാർത്ഥൻ മാമ്പറ്റ, മുനീർ മുത്താലം, വിനോദ് മണാശ്ശേരി, ദാമോദരൻ കോഴഞ്ചേരി, സുധാകരൻ കപ്പിയാടത്ത്, ഗോപി കളരിക്കണ്ടി, റുക്കിയ ടീച്ചർ, സഫിയ പുൽപറമ്പ്, ബേബി മുത്താലം, ബാബു ആക്കത്തൊടി, സൈനബ മുത്താലം, കുര്യൻ ജോസ് തുടങ്ങിയവർ പങ്കെടുത്തു . സമര പന്തലിൽ നിന്ന് മടങ്ങിയ കർഷകയെ കാട്ടുപന്നി അക്രമിച്ചു മുക്കം: മുക്കം നഗരസഭ കവാടത്തിൽ കാട്ട് പന്നിയുടെ ശല്യത്തിനെത്തിരേ ഉപവാസ സമരത്തിൽ പങ്കെടുത്ത് മടങ്ങിയ കർഷകയെ കാട്ടു പന്നി അക്രമിച്ച് പരിക്കേൽപ്പിച്ചു. പുൽപ്പറമ്പ് എടോളി പാലി സഫിയ (60) ക്കാണ് കാട്ടു പന്നിയുടെ അക്രമണത്തിൽ കാലിനും കൈക്കും പരിക്കേറ്റത്. ഇന്നലെ വൈകിട്ട് 6.30 ഓടെണ് സംഭവം. തന്‍റെ കൃഷിയിടത്തിൽ വിളവെടുപ്പ് നടത്തുന്നതിനിടെ കാട്ടുപന്നി ആക്രമിക്കുകയായിരുന്നു. ഓടി രക്ഷപ്പെട്ടതിനാൽ വലിയ അപകടം ഒഴിവായി.

കൂരാച്ചുണ്ട് - ശങ്കരവയൽ - കേളോത്തുവയൽ റോഡിൽ ദുരിതയാത്ര

കൂരാച്ചുണ്ട്: കൂരാച്ചുണ്ട് പഞ്ചായത്ത് ഒന്ന്, രണ്ട്, പതിമൂന്ന് വാർഡുകൾ ഉൾപ്പെടുന്നതും നൂറ് കണക്കിന് കുടുംബങ്ങൾ ആശ്രയിക്കുന്നതുമായ കൂരാച്ചുണ്ട് - ശങ്കരവയൽ- കേളോത്തുവയൽ റോഡിലെ യാത്ര ദുഷ്കരം. കാലങ്ങളായി റോഡ് ടാറിംഗ് തകർന്ന് തരിപ്പണമായി കിടക്കുകയാണ്. കൂരാച്ചുണ്ടിൽ നിന്നും പേരാമ്പ്രയിലേക്ക് പോകാൻ ബൈപാസായി ഉപയോഗിക്കുന്ന റോഡാണ് തകർന്നിരിക്കുന്നത്. ഏറെ പ്രാധാന്യമേറിയ റോഡിന്‍റെ കൂരാച്ചുണ്ട് ടൗൺ മുതൽ അറയ്ക്കൽ താഴെ വരെയുള്ള ഒരു കിലോമീറ്റർ ദൂരം ജില്ലാ പഞ്ചായത്ത് ഒരു വർഷം മുമ്പ് നവീകരണം നടത്തിയിരുന്നു. എന്നാൽ ബാക്കി വരുന്ന കേളോത്തുവയലിനു സമീപം കണ്ണാടിപ്പാറ വരെയുള്ള റോഡിന്‍റെ മൂന്ന് കിലോമീറ്ററോളം ദൂരം വരുന്ന ഭാഗമാണ് ടാറിംഗ് തകർന്ന് കാൽനട യാത്രപോലും ദുഷ്കരമായി മാറിയത്. ഈ മേഖലയിലെ കോയിപ്പറമ്പ്, ശങ്കരവയൽ, കണ്ണാടിപ്പാറ, മറുമണ്ണ് എന്നിവിടങ്ങളിലേക്ക് യാത്ര ചെയ്യുന്ന യാത്രക്കാരാണ് ഇതുമൂലം ദുരിതത്തിലായത്. ഓട്ടോറിക്ഷകൾ അടക്കമുള്ള ടാക്‌സി വാഹനങ്ങൾ ഇതുവഴി സർവീസ് നടത്താൻ പോലും പ്രയാസപ്പെടുന്നു. റോഡിന്‍റെ ദുരവസ്ഥ പരിഹരിച്ച് ഗതാഗത യോഗ്യമാക്കാൻ അധികൃതർ അടിയന്തിര നടപടി സ്വീകരിക്കണമെന്നാണ് നാട്ടുകാർ ആവശ്യപ്പെടുന്നത്.

പ്രതിഷേധം ശക്തം : മാനദണ്ഡങ്ങൾ കാറ്റിൽ പറത്തി ജനവാസമേഖലയിൽ പെട്രോൾ പമ്പ്

കൊയിലാണ്ടി: ചേമഞ്ചേരി തിരുവങ്ങൂരിൽ മാനദണ്ഡങ്ങൾ കാറ്റിൽ പറത്തി ജനവാസമേഖലയിൽ പെട്രോൾ പമ്പ് സ്ഥാപിക്കാൻ നടത്തുന്ന നീക്കത്തിൽ പ്രദേശവാസികളുടെ പ്രതിഷേധം ശക്തമാകുന്നു. തിരുവങ്ങൂർ അണ്ടി കമ്പനിക്കും കുനിയിൽ കടവ് പാലത്തിനും ഇടയിലാണ് മൂന്ന് പെട്രോൾ പമ്പുകൾ സ്ഥാപിക്കാൻ നീക്കം നടക്കുന്നത്. ചേമഞ്ചേരി പഞ്ചായത്തിലെ 8, 9, 10 വാർഡുകളിലാണ് ഇന്ത്യൻ ഓയിൽ കോർപറേഷൻ രണ്ടു പമ്പും റിലയൻസ് കമ്പനിയുടെ മറ്റൊരു പമ്പിനും പരിസരവാസികളുടെ എതിർപ്പുകൾ മറികടന്ന് അധികൃതർ അനുമതി നൽകിയിരിക്കുന്നത്. നാഷണൽ ഗ്രീൻ ട്രൈബ്യൂണലിന്‍റെയും സെൻട്രൽ പൊലുഷൻ കൺട്രോൾ ബോർഡിന്‍റെയും സുപ്രീംകോടതിയുടെയും ഉത്തരവുകൾ മറികടന്നാണ് പെട്രോൾ പമ്പുകൾ സ്ഥാപിക്കാനുള്ള നീക്കം നടക്കുന്നത്. 50 മീറ്റർ ദൂരപരിധിക്കുള്ളിൽ സ്കൂളുകളോ ആശുപത്രികളോ പാർപ്പിടങ്ങളോ ഉണ്ടെങ്കിൽ പെട്രോൾ പമ്പ് സ്ഥാപിക്കാൻ പാടില്ലാത്തതാണ്. ജനവാസ കേന്ദ്രം ആണെന്ന് അറിഞ്ഞിട്ടും ചേമഞ്ചേരി പഞ്ചായത്ത് സെക്രട്ടറി പെട്രോൾ പമ്പ് സ്ഥാപിക്കുന്നതിന് അനുകൂലമായ റിപ്പോർട്ടാണ് എഡിഎമ്മിന് നൽകിയത്. ചേമഞ്ചേരി പഞ്ചായത്തിലെ എല്ലാ പ്രദേശവും ഡെസിഗ്നേറ്റഡ് റസിഡൻഷ്യൽ ഏരിയ ആണെന്നിരിക്കെ പൊലുഷൻ കൺട്രോൾ ബോർഡിന്‍റെ ഉത്തരവ് മറികടന്നാണ് പെട്രോൾ പമ്പ് സ്ഥാപിക്കാൻ അനുമതി നൽകിയത്. ഭൂമിക്കടിയിൽ പെട്രോൾ ടാങ്ക് സ്ഥാപിക്കേണ്ടത് ശക്തമായ കോൺക്രീറ്റ് ഭിത്തികളോട് കൂടിയ കുഴികളിലാണ്. എന്നാൽ തിരുവങ്ങൂർ അണ്ടി കമ്പനിക്ക് സമീപം പെട്രോൾ ടാങ്ക് സ്ഥാപിച്ചിരിക്കുന്നത് ഇഷ്ടിക കൊണ്ടു നിർമ്മിച്ച കുഴിയിലാണ്. പത്താം വാർഡിൽ നിർമിക്കുന്ന പെട്രോൾ പമ്പിന്‍റെ വടക്കുഭാഗത്ത് താമസിക്കുന്ന ടി.പി. രാഘവന്‍റെ വീട്ടിൽ നിന്നും, സമീപത്തെ തൈവളപ്പിൽ നഫീസ പൂക്കണ്ടിയിൽ നജൽ എന്നിവരുടെ വീട്ടിൽ നിന്നും 15 മീറ്ററിൽ താഴെയാണ് പെട്രോൾ പമ്പ് സ്ഥാപിക്കാൻ അനുമതി. 15 മീറ്ററിനുള്ളിൽ നാലു വീടുകളും 30 മീറ്ററിനുള്ളിൽ 10 വീടുകളും 50 മീറ്ററിനുള്ളിൽ 25 വീടുകളും ഇവിടെയുണ്ട്. ഈ വീട്ടുകാർ എല്ലാവരും അവരുടെ വീട്ടുപറമ്പിലെ കിണറുകളിൽ നിന്നാണ് കുടിവെള്ളം ഉപയോഗിക്കുന്നത്. പെട്രോൾ പമ്പ് വന്നാൽ കിണറുകളിലെ വെള്ളം മലിനമാകുമെന്ന ആശങ്ക ഇവർക്കുണ്ട്. മലിനീകരണ നിയന്ത്രണ ബോർഡിന്‍റെ കോഴിക്കോട് ജില്ലാ ഓഫീസിൽ നിന്നും പഞ്ചായത്ത് സെക്രട്ടറിക്ക് നൽകിയ റിപ്പോർട്ട് പ്രകരം 30 മീറ്ററിനുള്ളിൽ വീടുണ്ടെന്നും വ്യക്തമായി രേഖപ്പെടുതിയിട്ടുണ്ട്. പെട്രോൾ പമ്പ് അനുവദിക്കുന്നതിന് 30 മീറ്റർ ദൂരപരിധി കർശനമായി പാലിക്കണമെന്നും നിർദ്ദേശിക്കുന്നുണ്ട്. എന്നാൽ പ്രസ്തുത നിർദ്ദേശം ലംഘിച്ചു കൊണ്ടാണ് ചേമഞ്ചേരി പഞ്ചായത്ത് സെക്രട്ടറി അനുമതി നൽകിയത്. 100 മീറ്ററിനുള്ളിലാണ് കോട്ടക്കൽ ക്ഷേത്രപാലൻ കോട്ട ക്ഷേത്രം സ്ഥിതി ചെയ്യുന്നത്. ഇവിടെ ഉത്സവത്തിന് വെടിക്കെട്ട് ഉണ്ടാവും. പെട്രോൾ പമ്പ് സ്ഥാപിച്ചാൽ വെടിക്കെട്ട് ഒഴിവാക്കേണ്ടി വരും. ഒമ്പതാം വാർഡിലാണ് റിലയൻസ് കമ്പനിയുടെ മറ്റൊരു പെട്രോൾ പമ്പിനും അനുമതി നൽകിയിരിക്കുന്നത്. ഇതിനു സമീപവും വീടുകളും പഞ്ചായത്തിന്‍റെ പകൽവീടും തെരു ഗണപതി ക്ഷേത്രവും ഉണ്ട്. ഡിസിഗ്നേറ്റഡ് റസിഡൻഷ്യൽ ഏരിയ അല്ലെന്ന നിഗമനത്തിന്‍റെ അടിസ്ഥാനത്തിലാണ് അധികാരികൾ പെട്രോൾ പമ്പിന് അനുമതി നൽകുന്നത്. ജനങ്ങൾ തിങ്ങിപ്പാർക്കുന്ന പ്രദേശത്തെ ജനവാസ മേഖല അല്ലെന്ന് ഉദ്യോഗസ്ഥർ വിധിക്കുന്നത് തെറ്റായ നടപടിയാണ്. ഗ്രീൻ ടൂണലിന്‍റെയും പൊലൂഷൻ കൺട്രോൾ ബോർഡിന്‍റെയും സുപ്രീംകോടതിയുടെയും ഉത്തരവുകളുടെ ലംഘനമാണ് ഇവിടെ നടക്കുന്നത്. കുനിയിൽ കടവ് ഭാഗത്തെ വീട്ടുകാർ ഹൈക്കോടതിയിൽ പരാതി സമർപ്പിച്ചിട്ടുണ്ട്. പ്രദേശവാസികളുടെ എതിർപ്പ് മറികടന്ന് പെട്രോൾ പമ്പുകൾ സ്ഥാപിക്കാൻ വൻമാഫിയ തന്നെ ശ്രമിക്കുന്നുണ്ടെന്ന് പ്രദേശവാസികൾ കുറ്റപ്പെടുത്തി.

കോഴിക്കോട് വീണ്ടുമൊരു ഹൃദയം മാറ്റിവയ്ക്കൽ ശസ്‌ത്രക്രിയ

കോഴിക്കോട്: കോഴിക്കോട് വീണ്ടുമൊരു ഹൃദയം മാറ്റിവയ്ക്കൽ ശസ്‌ത്രക്രിയ കൂടി. ചാലപ്പുറം സ്വദേശിനി 46 കാരി അജിതയുടെ ഹൃദയം ഇനി മറ്റൊരു കോഴിക്കോട്ടുകാരി നോർത്ത് ബീച്ച് റോഡിലുള്ള 44 കാരി സുജറീനയിൽ തുടിക്കും. മസ്തിഷ്ക മരണം സംഭവിച്ച അജിതയുടെ കുടുംബം ഹൃദയം നൽകാൻ തയാറാവുകയായിരുന്നു. തുടർന്ന് കോഴിക്കോട് മെട്രൊമെഡ് ഇന്‍റർനാഷണൽ കാർഡിയാക് സെന്‍ററിലെ ചീഫ് കാർഡിയോ തൊറാസിക് ആൻഡ് ട്രാൻസ്‌പ്ലാന്‍റ് സർജൻ ഡോ. വി. നന്ദകുമാറിന്‍റെ നേതൃത്വത്തിലുള്ള ഡോക്ടർമാരുടെ സംഘം കോഴിക്കോടുകാരി സുജറീനയിൽ ശസ്‌ത്രക്രിയ വിജയകരമായി പൂർത്തിയാക്കുകയായിരുന്നു.

പൊലിഞ്ഞുപോയ ജീവനില്‍നിന്ന് ജീവന്‍റെ ആറ് പുതുതുടിപ്പുകള്‍ : വീട്ടമ്മയുടെ അവയവങ്ങള്‍ ദാനം ചെയ്തു

കോഴിക്കോട്: അകാലത്തില്‍ പൊലിഞ്ഞ വീട്ടമ്മ ആറു പേര്‍ക്ക് ജീവന്‍റെ തുടിപ്പുകള്‍ പകര്‍ന്നു. ഹൃദയവും കരളും വൃക്കകളും കണ്ണുകളും പകുത്തിനല്‍കിയാണ് കോഴിക്കോട് ചാലപ്പുറം വെളിയഞ്ചേരിയില്‍ പള്ളിയത്ത് വീട്ടില്‍ അജിത (46) ഈ ലോകത്തോട് വിടപറഞ്ഞത്. ഇവരുടെ സ്‌നേഹം ഇനി ആറുപേരില്‍ പ്രകാശം ചൊരിയും. സെപ്റ്റംബര്‍ 28നാണ് അജിത ബേബിമെമ്മോറിയല്‍ ആശുപത്രിയില്‍ അഡ്മിറ്റായത്. മാസ്തിഷ്‌ക്കാഘാതത്തെതുടര്‍ന്നായിരുന്നു അന്ത്യം. ബന്ധുക്കള്‍ അവയവദാനത്തിന് തയാറായി മുന്നോട്ടുവന്നതോടെയാണ് നന്‍മയുടെ തിരി തെളിഞ്ഞത്. മൃതസഞ്ജീവനിയുമായി ബന്ധപ്പെട്ട് അവയവദാനത്തിനുള്ള ക്രമീകരണങ്ങള്‍ ചെയ്തു. രണ്ടു വൃക്കകളും ദാനം ചെയ്തു. ഒന്ന് ബേബിമെമ്മോറിയലില്‍ ചികിത്സയില്‍ കഴിയുന്ന അന്‍പത്തിയേഴുകാരനും മറ്റൊന്നു മെഡിക്കല്‍ കോളജില്‍ ചികിത്സയിലുള്ള പത്തൊമ്പതുകാരനും നല്‍കി. ഹൃദയം മെട്രോമെഡ് ഹോസ്പിറ്റലില്‍ ഒരു രോഗിക്ക് മാറ്റിവച്ചു. കരള്‍ ബേബി മെമ്മോറിയലിലെ 59-കാരന് നല്‍കി.രണ്ടു കണ്ണുകളും മെഡിക്കല്‍ കോളജിലെ നേത്രബാങ്കിലേക്ക് ദാനം ചെയ്തു. കരള്‍ മാറ്റിവയ്ക്കല്‍ ശാസ്ത്രക്രിയയ്ക്ക് ഡോ. ഐ.കെ ബിജു, ഡോ ഷൈലേഷ് അയികോട്ട്, ഡോ. എം.സി രാജേഷ് എന്നിവര്‍ നേതൃത്വം നല്‍കി. വൃക്ക മാറ്റിവയ്ക്കലിന് ഡോ. സുനില്‍ ജോര്‍ജ്, ഡോ. പൗലോസ് ചാലി, ഡോ. അഞ്ജന എന്നിവരും നേതൃത്വം കൊടുത്തു. ട്രാന്‍സ്പ്ലാന്‍റ് കോ ഓര്‍ഡിനേറ്റര്‍ നിതിന്‍ രാജ് വിവിധ ക്രമീകരണങ്ങള്‍ ഏകോപിപ്പിച്ചു. കുട്ടന്‍നായരുടെയും കമലയുടെയും മകളാണ് അജിത. ഭര്‍ത്താവ്: രവീന്ദ്രന്‍ (മണി). മക്കള്‍: സാരംഗി, ശരത്ത്. മരുമകന്‍: മിഥുന്‍. സഹോദരങ്ങള്‍: ഗണേഷ്‌കുമാര്‍, അനില്‍, അനൂപ്, സബിത.

കക്കയത്തെ കടുവ സാന്നിധ്യം: ആർആർടി പരിശോധന നടത്തി

കൂരാച്ചുണ്ട്: കക്കയം ഡാം സൈറ്റ് റോഡിലെ ഏഴാം പാലത്തിന് സമീപം ജനവാസ മേഖലയിൽ കഴിഞ്ഞ ദിവസം സന്ധ്യയോടെ യുവാവ് ഇരുചക്ര വാഹനത്തിൽ യാത്ര ചെയ്യുന്നതിനിടെ കടുവയെ കണ്ടതിനെ തുടർന്ന് പ്രദേശത്ത് ആശങ്ക. തുടർന്ന് വനംവകുപ്പിന്‍റെ കക്കയം ഫോറസ്റ്റ് സ്റ്റേഷൻ ഉദ്യോഗസ്ഥരുടെ നേതൃത്വത്തിലുള്ള റാപ്പിഡ് റെസ്പോൺസ് ടീം അംഗങ്ങളും നാട്ടുകാരും ചേർന്ന് കഴിഞ്ഞദിവസം രാത്രിയിലും ഇന്നലെ രാവിലെയും ഈ മേഖലയിൽ പരിശോധന നടത്തി. എന്നാൽ കടുവയുടെ സാന്നിധ്യം കണ്ടെത്താനായില്ല. മാത്രമല്ല കാൽപ്പാടുകളോ മറ്റൊന്നും തന്നെ കണ്ടെത്താൻ കഴിഞ്ഞില്ലെന്ന് കക്കയം ഫോറസ്റ്റ് സ്റ്റേഷൻ ഡെപ്യൂട്ടി റേഞ്ച് ഓഫീസർ സി.വിജിത്ത് ദീപികയോട് പറഞ്ഞു. കഴിഞ്ഞ ഒരു മാസം മുൻപാണ് ഡാം സൈറ്റ് റോഡിലെ വനം വകുപ്പിന്‍റെ ടിക്കറ്റ് കൗണ്ടറിന് സമീപമുള്ള സിസിലി മുക്ക് മേഖലയിൽ വനംവകുപ്പ് ഉദ്യോഗസ്ഥർ തന്നെ ഇതുവഴി യാത്ര ചെയ്യുന്നതിനിടെ കടുവയെ കണ്ടിരുന്നു. ഇതു കൂടാതെ മാസങ്ങൾക്ക് മുൻപ് വാൽവ് ഹൗസിന് സമീപം വച്ചും ജീവനക്കാർ കടുവയെ കണ്ടിട്ടുണ്ട്. അനുദിനം ഒട്ടനവധിയാളുകൾ ഇതുവഴി യാത്ര ചെയ്യുന്നുണ്ട്. ജനവാസ മേഖലകൂടിയായ പ്രദേശത്ത് തുടർച്ചയായി കടുവയെ റോഡിൽ കണ്ടതോടെ പ്രദേശവാസികളിലും ഏറെ ആശങ്കക്കിടയാക്കിയിട്ടുണ്ട്. ജനങ്ങളുടെ സുരക്ഷ പരിഗണിച്ച് പ്രദേശത്ത് വനംവകുപ്പ് മേഖലയിൽ നിരീക്ഷണം ശക്തമാക്കണമെന്നും രാത്രികാല പെട്രോളിംഗ് നടത്തണമെന്നും ആവശ്യം ഉയരുന്നുണ്ട്. കക്കയം ഫോറസ്റ്റ് സ്റ്റേഷൻ ഡെപ്യൂട്ടി റേഞ്ച് ഓഫീസർ സി. വിജിത്ത്, ബീറ്റ് ഫോറസ്റ്റ് ഓഫീസർമാരായ എസ്. കെ സാരംഗ്, എസ്. അഭിനന്ദ്, ശബരിനാഥ്, വാച്ചർമാർ തുടങ്ങിയവരുടെ നേതൃത്വത്തിലാണ് പരിശോധന നടത്തിയത്. മേഖലയിൽ വഴിവിളക്കുകൾ സ്ഥാപിക്കണമെന്ന് കക്കയം ജനവാസ മേഖയിൽ നിരന്തരം കാട്ടുപോത്തും കടുവയും ഉൾപ്പെടെയുള്ള വന്യമൃഗങ്ങൾ ജനങ്ങളുടെ സ്വൈര്യജീവിതത്തിന് ഭീക്ഷണി ഉയർത്തുന്ന സാഹചര്യത്തിൽ കക്കയം ഡാം സൈറ്റ് റോഡിലെ ഏഴാം പാലം മുതൽ എട്ടാം പാലം വരെയുള്ള ജനവാസ മേഖലകളിൽ അടിയന്തിരമായി വഴിവിളക്ക് സ്ഥാപിക്കണമെന്ന് കക്കയം വാലി റസിഡൻസ് അസോസിയേഷൻ യോഗം കൂരാച്ചുണ്ട് ഗ്രാമ പഞ്ചായത്ത് അധികൃതരോട് ആവശ്യപ്പെട്ടു. ജോൺസൺ കക്കയം അധ്യക്ഷത വഹിച്ചു. സജി കൊച്ചുപുര, വിൻസെന്‍റ് ജോർജ്, ആന്‍റണി വേമ്പുവിള, ബെന്നി കുറുമുട്ടം, അമൽ കോയിക്കകുന്നേൽ, ജോൺ വേമ്പുവിള എന്നിവർ പ്രസംഗിച്ചു. വനം വകുപ്പ് നിസംഗത പാലിക്കുന്നുവെന്ന് കക്കയത്ത് വിനോദസഞ്ചാര മേഖലയിലും ജനവാസ മേഖലയിലും മാസങ്ങളായി കടുവയുടെ സാന്നിധ്യം ഉണ്ടായിട്ടും വനം വകുപ്പ് നിസംഗത പാലിക്കുകയാണെന്ന് കോൺഗ്രസ് ബ്ലോക്ക് സെക്രട്ടറി ജോൺസൺ കക്കയം ആരോപിച്ചു. കക്കയത്തെ കർഷകൻ പാലാട്ടിയിൽ ഏബ്രഹാം കാട്ടുപോത്ത് ആക്രമണത്തിൽ കൊല്ലപ്പെട്ട നാൾ മുതൽ വനം വകുപ്പ് ജനങ്ങളുടെ കണ്ണിൽ പൊടിയിടുകയാണ്. വനം വകുപ്പിന്‍റെ ഉറപ്പുകൾ ജനങ്ങൾ വിശ്വാസിക്കുന്നില്ല. ഫെൻസിംഗ് അടക്കമുള്ള വാഗ്ദാനങ്ങളെ കുറിച്ച് അധികാരികൾക്ക് മിണ്ടാട്ടമില്ലെന്ന് യോഗം കുറ്റപ്പെടുത്തി. രാത്രി സമയങ്ങളിൽ ടാപ്പിംഗിന് പോകുന്ന കർഷകരും, വിവിധ ആവശ്യങ്ങൾക്കായി പുറത്തിറങ്ങുന്ന പ്രദേശവാസി കളും കുട്ടികളുമൊക്കെ കക്കയം വാലി പ്രദേശത്ത് ഭീതിയിലാണുള്ളത്. പ്രശ്നത്തിന് പരിഹാരമായില്ലെങ്കിൽ സമര പരിപാടികൾ സംഘടിപ്പിക്കേണ്ടിവരുമെന്നും വനം വകുപ്പ് കടവയുടെ സാന്നിധ്യം കണ്ടെത്താൻ കൂടുതൽ ശാസ്ത്രീയമായി തെരച്ചിൽ തുടരണമെന്നും ജോൺസൺ കക്കയം ആവശ്യപ്പെട്ടു.

വന്യജീവിശല്യവും നഷ്ടപരിഹാരവും : നിയമസഭാ സബ്ജക്ട് കമ്മിറ്റിയുടെ ശിപാര്‍ശകളില്‍ വെള്ളം ചേര്‍ത്ത് സര്‍ക്കാര്‍

കോഴിക്കോട്: മനുഷ്യ -വന്യജീവി സംഘര്‍ഷ ലഘൂകരണമെന്ന പേരില്‍ പ്രത്യേക യജ്ഞം നടത്തുന്ന സര്‍ക്കാര്‍, വന്യജീവി ശല്യം കാരണം ജീവാപായവും മറ്റു നാശനഷ്ടങ്ങളും സംഭവിച്ചവര്‍ക്ക് മതിയായ നഷ്ടപരിഹാരം നല്‍കാന്‍ വിമുഖത കാട്ടുകയാണെന്ന ആക്ഷേപം ബലപ്പെടുന്നു. ധനകാര്യ വകുപ്പിന്‍റെ ഉടക്കുകാരണം വന്യജീവി ശല്യം പ്രതിരോധമടക്കമുള്ള പല പ്രധാന പദ്ധതികളും നടപ്പാക്കാന്‍ കഴിയാതെ വനംവകുപ്പ് വിയര്‍ക്കുന്നതിനിടെയാണ് സര്‍ക്കാരിന്‍റെ ആത്മാര്‍ഥതയെ ചോദ്യം ചെയ്യുന്ന വിധത്തില്‍ നിയമസഭയുടെ മേശപ്പുറത്തുവച്ച സബ്ജക്ട് കമ്മിറ്റി റിപ്പോര്‍ട്ടിലെ പരാമര്‍ശങ്ങള്‍ പുറത്തുവന്നത്. 2024 -25 സാമ്പത്തിക വര്‍ഷത്തില്‍ വന്യജീവി ആക്രമണങ്ങളില്‍ നഷ്ടപരിഹാരം നല്‍കാന്‍ സബ്ജക്ട് കമ്മിറ്റി ശിപാര്‍ശ ചെയ്തത് 23 കോടി രൂപയാണ്. സര്‍ക്കാര്‍ ബജറ്റ് വിഹിതമായി അനുവദിച്ചതാകട്ടെ കേവലം 1.26 കോടി രൂപ മാത്രം. പണം അനുവദിക്കാത്തത് കൊണ്ട് നഷ്ടപരിഹാര വിതരണം മന്ദഗതിയിലാണ്. വന്യജീവി ആക്രമണത്തില്‍ മരണമടയുന്നവരുടെ ആശ്രിതര്‍ക്കും പരിക്കേറ്റവര്‍ക്കും കൃഷി, വാസ്ഥലം മുതലയാവ നഷ്ടപ്പെട്ടവര്‍ക്കും ആശ്വാസധനസഹായം നല്‍കുന്നതിനായി നടപ്പു സാമ്പത്തിക വര്‍ഷം അനുവദിച്ച ബജറ്റ് വിഹിതം തീരെ അപര്യാപ്തമാണെന്നും നിയമസഭാ സബ്ജക്ട് കമ്മിറ്റി ചൂണ്ടിക്കാട്ടിയിരുന്നു. വനസംരക്ഷണം, ജീവനക്കാരുടെ പരിശീലനം, ഗവേഷണം, സാമൂഹ്യ വനവത്കരണം തുടങ്ങിയ വനം-വന്യജീവി വകുപ്പിന്‍റെ സുപ്രധാന പദ്ധതികള്‍ക്ക് വകയിരുത്തിയ തുക അപര്യാപ്തമാണെന്നും ചൂണ്ടിക്കാട്ടിയിരുന്നു. എന്നാല്‍, സാമ്പത്തിക പരിമിതികളും പദ്ധതി വിഹിതം വെട്ടിക്കുറച്ചതും കാരണം അധിക തുക അനുവദിക്കാന്‍ സാധിച്ചില്ലെന്നാണ് സര്‍ക്കാര്‍ മറുപടി നല്‍കിയത്. 2024-25 സാമ്പത്തിക വര്‍ഷത്തെ ധനാഭ്യര്‍ഥനകളിന്മേലുള്ള സബ്ജക്ട് കമ്മിറ്റിയുടെ നാലാമത് റിപ്പോര്‍ട്ടിലെ ശിപാര്‍ശകളിന്മേലുള്ള ആക്ഷന്‍ ടേക്കണ്‍ റിപ്പോര്‍ട്ടിലാണ് ഈ വിവരങ്ങള്‍ ഉള്‍പ്പെടുത്തിയിട്ടുള്ളത്. വനംമന്ത്രി എ.കെ. ശശീന്ദ്രന്‍ ചെയര്‍പേഴ്സണായ സമിതിയാണ് സെപ്തംബര്‍ 19ന് റിപ്പോര്‍ട്ട് നിയമസഭയില്‍ സമര്‍പ്പിച്ചത്. വനം, പരിസ്ഥിതി, വിനോദസഞ്ചാരം എന്നീ വകുപ്പുകളുമായി ബന്ധപ്പെട്ട് ആകെ 42 ശിപാര്‍ശകളാണ് ഈ റിപ്പോര്‍ട്ടില്‍ ഉണ്ടായിരുന്നത്. ഭൂരിഭാഗം ധനാഭ്യര്‍ഥനകളിലും ചെലവു ചുരുക്കണമെന്ന നിര്‍ദേശമാണ് സര്‍ക്കാര്‍ വനംവകുപ്പിനു നല്‍കിയത്. പ്രധാന ശിപാര്‍ശകളും സര്‍ക്കാരിന്‍റെ മറുപടിയും വനസംരക്ഷണം (ബഡ്ജറ്റ് വിഹിതം: 25 കോടി): വനാതിര്‍ത്തി സംരക്ഷണം, കാട്ടുതീ പ്രതിരോധം, മണ്ണ്-ജലസംരക്ഷണം, വനസംരക്ഷണ സമിതികള്‍ക്കുള്ള സഹായം തുടങ്ങിയ പ്രവര്‍ത്തനങ്ങള്‍ക്കായി അനുവദിച്ച 25 കോടി രൂപ അപര്യാപ്തമാണെന്നും ഏഴു കോടി രൂപ അധികമായി വകയിരുത്തണമെന്നും സമിതി ശിപാര്‍ശ ചെയ്തു. ധനകാര്യ വകുപ്പിന്‍റെ സീലിംഗ് പരിധി കാരണം അധിക തുക അനുവദിക്കാന്‍ സാധിച്ചില്ലെന്നാണ് സര്‍ക്കാര്‍ വ്യക്തമാക്കിയത്. മാനവശേഷി വികസനം (ബഡ്ജറ്റ് വിഹിതം: 3.50 കോടി): വനം വകുപ്പ് ഉദ്യോഗസ്ഥര്‍ക്കും സന്നദ്ധ സംഘടനകള്‍ക്കും പരിശീലനം നല്‍കുന്നതിനായുള്ള വിഹിതം അപര്യാപ്തമാണ്. അതിനാല്‍ 3.46 കോടി രൂപ അധികമായി നല്‍കണമെന്ന് കമ്മിറ്റി ആവശ്യപ്പെട്ടു. 2024-25 സാമ്പത്തിക വര്‍ഷത്തിലെ പദ്ധതി വിഹിതങ്ങള്‍ 50 ശതമാനമായി ചുരുക്കാന്‍ നിര്‍ദേശിച്ചിരുന്നതിനാല്‍ അധിക തുക അനുവദിക്കാനായില്ലെന്ന് സര്‍ക്കാര്‍ മറുപടി നല്‍കി. വിഭവ ആസൂത്രണവും ഗവേഷണവും (ബഡ്ജറ്റ് വിഹിതം: ഒരു കോടി): ശാസ്ത്രീയ വനപരിപാലനം, ഗവേഷണങ്ങള്‍, പ്രവര്‍ത്തന പദ്ധതികള്‍ എന്നിവയ്ക്കായി നിലവിലുള്ള തുകയ്ക്ക് പുറമെ രണ്ടു കോടി രൂപ കൂടി വകയിരുത്തണമെന്ന സമിതിയുടെ ശിപാര്‍ശയും സാമ്പത്തിക പരിധി കാരണം അംഗീകരിക്കാന്‍ സാധിച്ചില്ല.

പ്രതിഷേധത്തിനിടെ പാളയം പച്ചക്കറി മാര്‍ക്കറ്റ് കല്ലുത്താന്‍ കടവിലേക്ക് മാറ്റുന്നു

ഉദ്ഘാടനം ഈ മാസം മൂന്നാം വാരം കോഴിക്കോട്: വ്യാപാരികളുടെയും തൊഴിലാളികളുടെയും എതിര്‍പ്പിനിടെ പാളയം പച്ചക്കറി മാര്‍ക്കറ്റ് കല്ലുത്താന്‍ കടവിലേക്ക് മാറ്റുന്നതിനുള്ള ഒരുക്കങ്ങള്‍ പൂര്‍ത്തിയായി. ഈ മാസം മൂന്നാമത്തെ ആഴ്ചയില്‍ ഉദ്ഘാടനം നടക്കുമെന്ന് മേയര്‍ ഡോ. ബീന ഫിലിപ്പും ഡെപ്യൂട്ടി മേയര്‍ സി.പി മുസാഫര്‍ അഹമ്മദും വാര്‍ത്താസമ്മേളനത്തില്‍ അറിയിച്ചു. മാസ്റ്റര്‍പ്ലാനിനു വിധേയമായി വികസനപ്രവര്‍ത്തനങ്ങള്‍ നടത്തുന്നതിനാണ് പാളയം പച്ചക്കറി മാര്‍ക്കറ്റ് മാറ്റുന്നത്. ഇടതുമുന്നണിയുടെ തെരഞ്ഞെടുപ്പ് മാനിഫെസ്‌േറ്റായിലും കോര്‍പറേഷന്‍ ബജറ്റിലും ഇക്കാര്യം വ്യക്തമാക്കിയിരുന്നതാണ്. അതിനനുസരിച്ചുള്ള മാറ്റങ്ങളാണ് വരുത്തുന്നത്. മാര്‍ക്കറ്റ് മാറ്റുന്നതിനോടു എതിര്‍പ്പു പ്രകടിപ്പിച്ചിരുന്ന തൊഴിലാളി സംഘടനകള്‍ അനുകൂല നിലപാട് എടുത്തിട്ടുണ്ട്. എസ്ടിയു, ഐഎന്‍ടിയുസി, സിഐടിയു സംഘടനകള്‍ നിലപാടില്‍ മാറ്റംവരുത്തി സഹകരിക്കാന്‍ തയാറായിട്ടുണ്ട്. തൊളിലാൡളുമായും വ്യാപാരികളുമായുള്ള ചര്‍ച്ചകളില്‍ അവര്‍ ഉന്നയിച്ച മാര്‍ക്കറ്റ് മാറ്റാന്‍ പാടില്ല എന്ന ആവശ്യമൊഴികെ എല്ലാ ആവശ്യങ്ങളും കോര്‍പറേഷന്‍ അംഗീകരിച്ചിട്ടുണ്ട്. 30 വര്‍ഷം മുമ്പ് കോര്‍പറേഷന്‍ കൗണ്‍സില്‍ അംഗീകരിച്ചതാണ് ഈ പദ്ധതി. ഒരു വര്‍ഷം മുമ്പാണ് പ്രതിഷേധവുമായി ആളുകള്‍ എത്തിയത്. പ്രശ്‌നപരിഹാരത്തിനു കോര്‍പറേഷന് പോസിറ്റീവായ നിലപാടാണുള്ളത്. കഴിഞ്ഞ വര്‍ഷം ഫെബ്രുവരിയില്‍ നടന്ന ചര്‍ച്ചയില്‍ പാളയത്തെ ഫുട്പാത്ത് കച്ചവടക്കാര്‍ക്ക് പുനരധിവാസം ഉറപ്പുനല്‍കിയിട്ടുണ്ടെന്ന് അവര്‍ പറഞ്ഞു. പാളയത്തെ ലൈസന്‍സുള്ള കച്ചവടക്കാരെയെല്ലാം പുതിയ കെട്ടിടത്തിലേക്ക് മാറ്റും. നറുക്കെടുപ്പ് പ്രക്രീയ നടന്നുവരികയാണ്. ബിഒടി അടിസ്ഥാനത്തിലാണ് കെട്ടിടം നിര്‍മിച്ചിട്ടുള്ളത്. യാത്രാസൗകര്യമുണ്ട്. 380 പേര്‍ക്ക് കച്ചവടം െചയ്യാനുള്ള സൗകര്യമാണ് കെട്ടിടത്തില്‍ ഉള്ളത്. 156 എണ്ണമാണ് കോര്‍പറേഷന് അനുവദിച്ചിട്ടുള്ളത്. ബാക്കിയുള്ള മുറികളില്‍ കരാറുകള്‍ കച്ചവടക്കാരെ നിയമിക്കും. കോര്‍പറേഷന്‍ നിശ്ചയിച്ച വാടക മാത്രമേ അവരില്‍ നിന്ന് ഈടാക്കുകയുള്ളു. രണ്ടു വര്‍ഷത്തേക്ക് വാടക വര്‍ധനവ് ഉണ്ടാകില്ല. മിനിമം 100 ചതുരശ്ര അടിയാണ് ഒരു കച്ചവടക്കാരന് അനുവദിച്ചിട്ടുള്ളതെന്ന് അവര്‍ പറഞ്ഞു.

നാലു മാസം പ്രായമായ കുഞ്ഞിന്‍റെ മരണത്തില്‍ കേസെടുത്ത് പോലീസ്

കോഴിക്കോട്: നാലു മാസം പ്രായമായ പെണ്‍കുഞ്ഞിന്‍റെ മരണത്തില്‍ അസ്വാഭാവിക മരണത്തിനു കേസെടുത്ത് പോലീസ് അന്വേഷണം തുടങ്ങി. കോഴിക്കോട് കുറ്റിക്കാട്ടൂര്‍ സ്വദേശിയായ കുട്ടിയുടെ മരണത്തിലാണ് കേസെടുത്തത്. കുട്ടിയുടെ ശരീരത്തില്‍ പരിക്കുകള്‍ കണ്ടതിനെ തുടര്‍ന്നാണ് നടപടി. ശ്വാസം മുട്ടലിനെ തുടര്‍ന്ന് ബോധരഹിതയായ കുട്ടി കോഴിക്കോട് മെഡിക്കല്‍ കോളജ് ആശുപത്രിയില്‍ വച്ചാണ് മരിച്ചത്. ഡോക്ടര്‍മാരാണ് കുട്ടിയുടെ ശരീരത്തിലെ പരിക്ക് സംബന്ധിച്ച വിവരം പോലീസിനെ അറിയിച്ചത്. പോസ്റ്റ് മോര്‍ട്ടത്തിലും പരിക്ക് കണ്ടെത്തിയിട്ടുണ്ട്. പരിക്കുകള്‍ എങ്ങനെ സംഭവിച്ചുവെന്നാണ് പോലീസ് അന്വേഷിക്കുന്നത്.

തുഷാരഗിരി ടൂറിസ്റ്റ് കേന്ദ്രം ശുചീകരിച്ചു

കോടഞ്ചേരി: ജില്ലാ ടൂറിസം പ്രമോഷന്‍ കൗണ്‍സിലും ഹരിത സേനകളും കുടുംബശ്രീ യൂണിറ്റുകളും ചേര്‍ന്ന് തുഷാരഗിരി ടൂറിസ്റ്റ് കേന്ദ്രം മുതല്‍ കെഎസ്ഇബി ജംഗ്ഷന്‍ വരെ പരിസര ശുചീകരണം നടത്തി ഡിടിപിസി മാനേജര്‍ ഷെല്ലി കുന്നേല്‍ ഉദ്ഘാടനം നടത്തി. വാര്‍ഡ് മെമ്പര്‍ സിസിലി കൊട്ടുപള്ളിയുടെ നേതൃത്വത്തില്‍ തുഷാരഗിരി ഭാഗത്തുള്ള മുപ്പതോളം കുടുംബശ്രീ അംഗങ്ങളും ഹരിത സേനാംഗങ്ങളും പങ്കെടുത്തു.

അപകടമൊഴിയാതെ സംസ്ഥാന പാത; നിരവധി പേര്‍ക്ക് പരിക്ക്

മുക്കം: അപകടങ്ങള്‍ തുടര്‍ക്കഥയായ എടവണ്ണ -കൊയിലാണ്ടി സംസ്ഥാനപാതയില്‍ വീണ്ടും അപകടം. രണ്ടു ദിവസത്തിനിടെ നടന്ന രണ്ട് അപകടങ്ങളില്‍ നിരവധി പേര്‍ക്കാണ് പരിക്കേറ്റത്. ഗോതമ്പ് റോഡില്‍ കാറും ബസ്സും കൂട്ടിയിടിച്ച് അപകടമുണ്ടായത് വ്യാഴാഴ്ച രാവിലെ 11 മണിയോടെ ആയിരുന്നു. അരീക്കോട് ഭാഗത്തേക്ക് പോവുകയായിരുന്ന സ്വകാര്യ ബസില്‍ മുക്കം ഭാഗത്തേക്ക് വരികയായിരുന്ന കാര്‍ ഇടിക്കുകയായിരുന്നു. കാര്‍ പൂര്‍ണമായും തകര്‍ന്നു. കാറ് വെട്ടിപ്പൊളിച്ചാണ് യാത്രക്കാരെ പുറത്തെടുത്തത്. രണ്ടു സ്ത്രീകളും മൂന്ന് പുരുഷന്മാരുമാണ് കാറില്‍ ഉണ്ടായിരുന്നത്. ഇവരെ മുക്കത്തെ സ്വകാര്യ ആശുപത്രിയിലും കോഴിക്കോട് മെഡിക്കല്‍ കോളേജ് ആശുപത്രിയിലും പ്രവേശിപ്പിച്ചു. ബസിലെ യാത്രക്കാര്‍ക്കും ചെറിയ പരിക്കേറ്റിട്ടുണ്ട്.മുക്കം പെരുമ്പടപ്പില്‍ ആംബുലന്‍സും കാറും കൂട്ടിയിടിച്ചത് ചൊവ്വാഴ്ച രാത്രി 10.15 ഓടെയാണ്. താമരശ്ശേരി അടിവാരത്തുനിന്നും രോഗിയുമായി മുക്കത്തെ ആശുപത്രിയിലേക്ക് പോവുന്ന ആംബുലന്‍സാണ് മുക്കം ഭാഗത്തുനിന്നും വന്ന സ്വിഫ്റ്റ് കാറുമായി കൂട്ടി ഇടിച്ചത്.രോഗിയെ മറ്റൊരു ആംബുലന്‍സില്‍ ആശുപത്രിയിലേക്ക് കൊണ്ടുപോയി. ആംബുലന്‍സിന്‍റെ മുന്‍ഭാഗവും കാര്‍ പൂര്‍ണമായും തകര്‍ന്ന നിലയിലാണ്.

കാമരാജിന്‍റെ അമ്പതാം ചരമവാര്‍ഷികം ആചരിച്ചു

കോഴിക്കോട്: കാമരാജിന്‍റെ അമ്പതാം ചരമവാര്‍ഷികം കാമരാജ് ഫൗണ്ടേഷന്‍ ഓഫ് ഇന്ത്യയുടെ ആഭിമുഖ്യത്തില്‍ ആചരിച്ചു. ഡോ. കെ. മൊയ്തു അനുസ്മരണസമ്മേളനം ഉദ്ഘാടനം ചെയ്തു. മുന്‍ സംസ്ഥാന പ്രസിഡന്‍റ് പി.കെ കബീര്‍ സലാല അധ്യക്ഷനായിരുന്നു. പി.ടി.എ റഹിം എംഎല്‍എ, സംസ്ഥാന പ്രസിഡന്‍റ് കൊച്ചറ മോഹന്‍ നായര്‍, അഖിലേന്ത്യാ വൈസ് പ്രസിഡന്‍റ് കെ.എം സെബാസ്റ്റിയന്‍, കെ.കെ അബ്ദുള്ള, ജില്ലാ സെക്രട്ടറി അഡ്വ.കെ. നസീമ എന്നിവര്‍ പ്രസംഗിച്ചു. സാമൂഹ്യ പ്രവര്‍ത്തകരായ കബീര്‍ വെളിമുക്ക്, പി.കെ ഹാരിസ് എന്നിവരെ ആദരിച്ചു. കലാപരിപാടികളും നടന്നു.

യുഡിഎഫ് രാഷ്ട്രീയ വിശദീകരണ യോഗം

കൂരാച്ചുണ്ട്: കൂരാച്ചുണ്ട് പഞ്ചായത്ത് ഭരണസമിതിക്കെതിരെ എല്‍ഡിഎഫ് നടത്തിയ രാഷ്ട്രീയ പ്രചാരണത്തിന് മറുപടിയായി യുഡിഎഫ് പഞ്ചായത്ത് കമ്മിറ്റിയുടെ നേതൃത്വത്തില്‍ കൂരാച്ചുണ്ട് അങ്ങാടിയില്‍ വിശദീകരണ പൊതുയോഗം സംഘടിപ്പിച്ചു. ചക്കിട്ടപാറ ഗ്രാമപഞ്ചായത്ത് അംഗം ജിതേഷ് മുതുകാട് ഉദ്ഘാടനം ചെയ്തു. കോണ്‍ഗ്രസ് മണ്ഡലം പ്രസിഡന്‍റ് ജോസ് വെളിയത്ത് അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ഒ.കെ അമ്മദ്, വൈസ് പ്രസിഡന്‍റ് വിന്‍സി തോമസ്, പഞ്ചായത്തംഗങ്ങളായ അരുണ്‍ ജോസ്, സണ്ണി പുതിയകുന്നേല്‍, റസീന യൂസഫ്, നേതാക്കളായ ഷാജു കാരക്കട, വി.എസ് ഹമീദ്, ആന്‍ഡ്രൂസ് കട്ടിക്കാന തുടങ്ങിയവര്‍ പ്രസംഗിച്ചു.

പെയിന്‍റു കടയ്ക്ക് തീപിടിച്ചു

കോഴിക്കോട്: പെരുവയലില്‍ പെയിന്‍റുകടയ്ക്ക് തീപിടിച്ചു. ജീവനക്കാര്‍ ഓടി രക്ഷപ്പെട്ടതിനാല്‍ ആളപായമോ പരിക്കുകളോ ഇല്ല. കളര്‍ മാര്‍ട്ട് എന്ന സ്ഥാപനത്തിലാണ് തീപിടിത്തമുണ്ടായത്. ആദ്യം വെള്ളിമാടുകുന്ന് അഗ്‌നിരക്ഷാ സേനയെത്തി തീയണയ്ക്കാനുള്ള ശ്രമം നടത്തിയെങ്കിലും നിയന്ത്രണവിധേയമാക്കാന്‍ കഴിഞ്ഞില്ല. തുടര്‍ന്ന് മുക്കത്തുനിന്നും മീഞ്ചന്തയില്‍നിന്നുമെല്ലാം കൂടുതല്‍ അഗ്‌നിരക്ഷാസേനാ യൂണിറ്റുകള്‍ എത്തിയാണ് തീ നിയന്ത്രണവിധേയമാക്കിയത്. പെയിന്‍റുകടയുടെ തൊട്ടടുത്തുള്ള കടകളിലേക്ക് തീ പടരാതിരിക്കാന്‍ അഗ്‌നിരക്ഷാസേന നടത്തിയ ശ്രമം വിജയിച്ചു. എന്നാല്‍, പെയിന്‍റുകട പൂര്‍ണമായും കത്തിനശിച്ചു

കൂരാച്ചുണ്ട് സബ്ട്രഷറിക്ക് സ്വന്തമായി കെട്ടിടം നിര്‍മിക്കണമെന്ന്

കൂരാച്ചുണ്ട്: പഞ്ചായത്ത് അനുവദിച്ച സ്ഥലത്ത് പുതിയ കെട്ടിടം നിര്‍മിച്ച് കൂരാച്ചുണ്ട് സബ് ട്രഷറി അതിലേക്ക് മാറ്റുവാന്‍ അവശ്യമായ നടപടി അടിയന്തിരമായി സ്വീകരിക്കണമെന്ന് കേരള സ്റ്റേറ്റ് സര്‍വീസ് പെന്‍ഷനേഴ്‌സ് യൂണിയന്‍ കുടുംബസംഗമം ആവശ്യപ്പെട്ടു.പഞ്ചായത്ത് പ്രസിഡന്‍റ് ഒ. കെ അമ്മദ് ഉദ്ഘാടനം ചെയ്തു. യൂണിറ്റ് പ്രസിഡന്‍റ് സി.എ. തോമസുകുട്ടി അധ്യക്ഷത വഹിച്ചു. ജില്ലാ പ്രസിഡന്‍റ് കെ.വി ജോസഫ് മുഖ്യപ്രഭാഷണം നടത്തി.കെട്ടിട നിര്‍മ്മാണ രംഗത്ത് വൈദഗ്ധ്യം തെളിയിച്ച അമ്മാറമ്പത്ത് എ.വി ഗോപാലന്‍, വേള്‍ഡ് അത്ലറ്റിക് റഫറി സെലക്ഷനില്‍ ബ്രോണ്‍സ് ലെവല്‍ നേടിയ ഡോ.റോയി.വി ജോണ്‍, അഗ്രി ടെക് ഓട്ടോമേഷനില്‍ മികവ് തെളിയിച്ച യുവ സോഫ്റ്റ് വെയര്‍ എന്‍ജിനീയര്‍ അഭിനവ് ബാവോസ്, അവാര്‍ഡ് നേടിയ ജൈവ കര്‍ഷകനായ എം.ജെ അബ്രഹാം എന്നിവരെ ബാലുശ്ശേരി ബ്ലോക്ക് പ്രസിഡന്‍റ് ദേവസ്യ കെ. വര്‍ഗീസ് ആദരിച്ചു. എംസി ജോയി മറ്റത്തില്‍, ജോയ്‌സി സിറിയക്, തമ്പാന്‍ തോമസ്, ആന്‍സി ജോസഫ്, ജോളി ജോര്‍ജ്,സിറിയക് ചെറിയാന്‍, ജേക്കബ് കോച്ചേരി,ജെ.ബാവോസ് മാത്യു, സാംസ്‌കാരിക വേദി കണ്‍വീനര്‍ ഒ.ഗോപിനാഥന്‍, യൂണിറ്റ് സെക്രട്ടറി കെ.എ ചാക്കോച്ചന്‍ എന്നിവര്‍ പ്രസംഗിച്ചു.

കാത്തലിക് യംഗ് മെന്‍സ് അസോ. ബൈബിള്‍ കലോത്സവം

കോഴിക്കോട്: കാത്തലിക് യംഗ് മെന്‍സ് അസോസിയേഷന്‍ ബൈബിള്‍ കലോത്സവം സെന്റ് വിന്‍സന്റ് കോളനി ഹയര്‍ സെക്കന്‍ഡറി സ്‌കൂളില്‍ മേയര്‍ ഡോ.ബീന ഫിലിപ്പ് ഉദ്ഘാടനം ചെയ്തു . പ്രസിഡണ്ട് തോമസ് പുതുശ്ശേരി അധ്യക്ഷത വഹിച്ചു. ചാരിറ്റി സിസ്റ്റേഴ്‌സ് കോഴിക്കോട് പ്രൊവില്‍ഷ്യല്‍ സിസ്റ്റര്‍ ഫിലോ ജോസഫ് ബൈബിള്‍ സന്ദേശം നല്‍കി .ഹോളി റെഡിമര്‍ കോണ്‍വെന്റ് മദര്‍ സുപ്പീരിയര്‍ സിസ്റ്റര്‍ അജി മരിയ , ലിറ്റററി കണ്‍വീനര്‍ ജിയോ ജയ്‌സണ്‍ , സെക്രട്ടറി ജെയിന്‍ അറക്കല്‍, വിവിയന്‍ ഡിക്രൂസ് ,സ്‌കൂള്‍ ഹെഡ്മിസ്ട്രസ് പി.എം ലതിക എന്നിവര്‍ സംസാരിച്ചു. കോഴിക്കോട് നഗരത്തിലെ 19 കത്തോലിക്കാ ദേവാലയങ്ങളില്‍ നിന്നായി 600-ല്‍പരം കുട്ടികള്‍ പങ്കെടുത്ത മത്സരത്തില്‍ സിറ്റി സെന്റ് ജോസഫ് ചര്‍ച്ച് കോഴിക്കോട് ചാമ്പ്യന്മാരായി.രണ്ടാം സ്ഥാനം ചേവായൂര്‍ നിത്യസഹായമാതാ ചര്‍ച്ച് നേടി.വിജയികള്‍ക്കുള്ള ട്രോഫിയും സമ്മാനങ്ങളും ഡിസംബര്‍ 20ന് നടക്കുന്ന സിവൈഎംഎ കരോള്‍ഗാന മത്സര ദിനത്തില്‍ വിതരണം ചെയ്യും.

വിദേശമദ്യവുമായി യുവാവ് പിടിയില്‍

ബാലുശേരി: വില്പനക്കായി കൊണ്ടുവന്ന 18 കുപ്പി വിദേശ മദ്യവുമായി യുവാവ് പിടിയില്‍. ബാലുശേരി നെല്ലിക്കുന്നുമ്മല്‍ എന്‍.കെ ബിജു (38) വിനെയാണ് ബാലുശേരിയില്‍ വച്ച് കോഴിക്കോട് എക്‌സൈസ് ഇന്‍റലിജന്‍സ് ബ്യൂറോയിലെ അസി. എക്‌സൈസ് ഇന്‍സ്‌പെക്ടര്‍ പി.കെ സബീറലി നല്‍കിയ വിവരത്തെ തുടര്‍ന്ന് ബാലുശേരി റെയ്ഞ്ച് എക്‌സൈസ് ഇന്‍സ്‌പെക്ടര്‍ എസ്. ധ്രുപദും സംഘവും അറസ്റ്റ് ചെയ്തത്.

എഐവൈഎഫ് ശുചീകരണ പ്രവര്‍ത്തനങ്ങള്‍ നടത്തി

കോഴിക്കോട്: ഗാന്ധിജയന്തി ജയന്തി ദിനത്തോടനുബന്ധിച്ച് എഐവൈഎഫ് ജില്ലാ കമ്മിറ്റിയുടെ നേതൃത്വത്തില്‍ ശുചീകരണ പ്രവര്‍ത്തനങ്ങള്‍ സംഘടിപ്പിച്ചു. കോഴിക്കോട് ബീച്ച് ആശുപത്രിയില്‍ നടന്ന ജില്ലാതല ശുചീകരണ പ്രവര്‍ത്തനം എഐ വൈഎഫ് ജില്ലാ സെക്രട്ടറി അഭിജിത്ത് കോറോത്ത് ഉദ്ഘാടനം ചെയ്തു. ജില്ലാ പ്രസിഡന്റ് അഡ്വ. എ.ടി റിയാസ് അഹമ്മദ് അധ്യക്ഷത വഹിച്ചു. സിപിഐ സൗത്ത് മണ്ഡലം സെക്രട്ടറി പി.അസീസ് ബാബു, അനു കൊമ്മേരി, എന്‍. നിമിഷ എന്നിവര്‍ സംസാരിച്ചു. ഡോ. ഹസീന കരീം, ഡോ. ഷാജഹാന്‍, റംലത്, സോയുസ് ജോര്‍ജ് തുടങ്ങിയവര്‍ പങ്കെടുത്തു.

ലഹരിവിരുദ്ധ പ്രവര്‍ത്തകര്‍ വിദേശമദ്യം പിടികൂടി

കുറ്റ്യാടി: കുറ്റ്യാടിയില്‍ ലഹരിവിരുദ്ധ പ്രവര്‍ത്തകര്‍ വിദേശ മദ്യം പിടികൂടി എക്‌സൈസിനെ ഏല്‍പ്പിച്ചു. ടൗണിലെ സാംസ്‌കാരിക നിലയത്തിനടുത്തുള്ള റോഡരികില്‍ നിന്നും ഇന്ത്യന്‍ നിര്‍മ്മിത വിദേശമദ്യം പരിസരവാസികളും ലഹരി വിരുദ്ധ പ്രവര്‍ത്തകരും കണ്ടെത്തി നാദാപുരത്തെ എക്‌സൈസിനെ വകുപ്പിനെ ഏല്‍പിക്കുകയായിരുന്നു. ഏഴ് കുപ്പി വിദേശമദ്യമാണ് കണ്ടെത്തിയത്. മദ്യം കടത്താന്‍ ശ്രമിച്ചവരെ പിടികൂടിയിട്ടില്ല. മൂന്ന് ദിവസം അവധി ആയതിനാല്‍ മദ്യം ലഭിക്കില്ലെന്ന് മനസിലാക്കി മാഹിയില്‍ നിന്നും അനധികൃതമായി എത്തിച്ച കുപ്പികളാണ് പിടികൂടിയത്. റോഡരികില്‍ ഒളിപ്പിച്ച് കൈമാറാന്‍ ശ്രമിക്കുന്നതിനിടയിലാണ് ലഹരി വിരുദ്ധ പ്രവര്‍ത്തകര്‍ മദ്യം കണ്ടെത്തുന്നത്. തുടര്‍ന്ന് ലഹരി വിരുദ്ധ ജാഗ്രത സമിതി ചെയര്‍മാനും വാര്‍ഡ് മെമ്പറുമായ ഹാഷിം നമ്പാടന്‍, സിറ്റിസണ്‍സ് ഫോറം ഫോര്‍ പീസ് ആന്‍റ് ജസ്റ്റിസ് ചെയര്‍മാന്‍ മൊയ്തു കണ്ണങ്കോടന്‍ എന്നിവരെ ബന്ധപ്പെട്ട് നാദാപുരം എക്‌സൈസ് ഓഫിസില്‍ വിവരം അറിയിക്കുകയായിരുന്നു.

സിവില്‍ സ്റ്റേഷനില്‍ ഗാന്ധിപ്രതിമ അനാച്ഛാദനം ചെയ്തു

കോഴിക്കോട്: സിവില്‍ സ്റ്റേഷന്‍ അങ്കണത്തില്‍ സ്ഥാപിച്ച മഹാത്മാഗാന്ധിയുടെ അര്‍ധകായ പ്രതിമ ജില്ലാ കളക്ടര്‍ സ്‌നേഹില്‍ കുമാര്‍ സിംഗ് അനാച്ഛാദനം ചെയ്തു. ഗ്രാജ്വേറ്റ് അസോസിയേഷന്‍ ഓഫ് കണ്‍സള്‍ട്ടന്‍റ് എന്‍ജിനീയേഴ്‌സാണ് ഗാന്ധി പ്രതിമ നിര്‍മിച്ച് നല്‍കിയത്. പ്രശസ്ത ശില്‍പി ബിജു മുചുകുന്നാണ് കോണ്‍ക്രീറ്റില്‍ ശില്‍പം ഒരുക്കിയത്. ഗാന്ധി ജയന്തി ദിനത്തോടനുബന്ധിച്ച് നടന്ന ചടങ്ങില്‍ പ്രതിമയില്‍ പുഷ്പാര്‍ച്ചനയും നടന്നു.എഡിഎം പി സുരേഷ്, കളക്ടറേറ്റ് ജീവനക്കാര്‍, ഗ്രാജ്വേറ്റ് അസോസിയേഷന്‍ ഓഫ് കണ്‍സള്‍ട്ടന്‍റ് എന്‍ജിനീയേഴ്‌സ് ഭാരവാഹികള്‍ തുടങ്ങിയവര്‍ പങ്കെടുത്തു.

താമരശേരി ചുങ്കം ലിങ്ക് റോഡിന്‍റെ കല്ലിടല്‍ പ്രവൃത്തികള്‍ ആരംഭിച്ചു

താമരശേരി: താമരശേരി ചുങ്കം ലിങ്ക് റോഡിന്‍റെ ഭൂമി ഏറ്റെടുക്കല്‍ നടപടികള്‍ പുരോഗമിക്കുന്നു. ലാന്‍ഡ് അക്വിസിഷന്‍ ആക്ട് സെക്ഷന്‍ 6(1) പ്രകാരമുള്ള വിജ്ഞാപനം പ്രസിദ്ധീകരിച്ചതോടെ റോഡിനായുള്ള അതിര്‍ത്തിക്കല്ലിടല്‍ പ്രവൃത്തികള്‍ക്ക് തുടക്കമായി. ഇതോടെ, ഏറെക്കാലമായി കാത്തിരിക്കുന്ന ഈ റോഡ് നിര്‍മ്മാണം സമയബന്ധിതമായി പൂര്‍ത്തിയാക്കാന്‍ സാധിക്കുമെന്ന പ്രതീക്ഷ കൈവന്നിരിക്കുകയാണന്ന് ഡോ.എം.കെ മുനീര്‍ എംഎല്‍എയുടെ ഓഫീസ് അറിയിച്ചു. താമരശേരി ചുങ്കം മേഖലയിലെ രൂക്ഷമായ ഗതാഗതക്കുരുക്കിന് ശാശ്വത പരിഹാരമാകുന്ന ഒരു സുപ്രധാന പദ്ധതിയാണിത്. ഈ പദ്ധതിക്ക് കിഫ്ബി ഫണ്ടില്‍ ഉള്‍പ്പെടുത്തിയാണ് ഭരണാനുമതി നല്‍കിയത്. നിര്‍മ്മാണത്തിനായുള്ള സ്‌പെഷ്യല്‍ പര്‍പ്പസ് വെഹിക്കിളായി ആര്‍.ബി.ഡി.സി.കെയെ നിയമിക്കുകയും ചെയ്തു. വിശദമായ സാങ്കേതിക പഠനങ്ങള്‍ക്ക് ശേഷം തയ്യാറാക്കിയ പദ്ധതിരേഖ കിഫ്ബി അംഗീകരിക്കുകയും, ഇതിനായി 74.38 കോടി രൂപ അനുവദിക്കുകയും ചെയ്തിട്ടുണ്ട്. റോഡിനാവശ്യമായ ഭൂമി ഏറ്റെടുക്കുന്നതിനുള്ള നടപടികള്‍ക്ക് വേഗം കൈവരിക്കാന്‍ റവന്യൂ വകുപ്പിന്‍റെ ഭരണാനുമതി ലഭിച്ചു. കൂടാതെ, ഭൂമി ഏറ്റെടുക്കല്‍ നടപടികള്‍ക്കായി ഒരു പ്രത്യേക തഹസില്‍ദാരെ ചുമതലപ്പെടുത്തുകയും ചെയ്തിരുന്നു. ഈ നടപടിക്രമങ്ങളെല്ലാം പൂര്‍ത്തിയായ ശേഷമാണ് നിര്‍മ്മാണത്തിന്‍റെ ആദ്യ ഘട്ടമായ കല്ലിടല്‍ പ്രവൃത്തികള്‍ക്ക് തുടക്കമായത്. വിജ്ഞാപനം അനുസരിച്ച്, രാരോത്ത് വില്ലേജിലെ രാരോത്ത്, വെഴ്പ്പൂര്‍, അണ്ടോണ, കരിങ്കമണ്ണ എന്നീ ദേശങ്ങളിലെ സര്‍വ്വേ നമ്പര്‍ അനുസരിച്ചുള്ള ഭൂമിയാണ് റോഡ് വികസനത്തിനായി ഏറ്റെടുക്കുന്നത്. താമരശ്ശേരി ചുങ്കം ലിങ്ക് റോഡ് യാഥാര്‍ത്ഥ്യമാകുന്നതോടെ, താമരശ്ശേരി-ചുങ്കം പ്രദേശത്തെ ഗതാഗതക്കുരുക്കിന് ഏറെക്കുറെ പരിഹാരമാകുമെന്നും എംഎല്‍എ ഓഫീസ് അറിയിച്ചു.

അക്ഷരലോകത്തേക്ക് കുരുന്നുകള്‍; ആദ്യാക്ഷരംകുറിക്കല്‍ ആവേശമായി

കോഴിക്കോട്: ആദ്യാക്ഷരം കുറിച്ച് അക്ഷരലോകത്തേക്ക് കുരുന്നുകള്‍ കടന്നു.വിജയദശമി നാളില്‍ ക്ഷേത്രങ്ങളിലും സാംസ്‌കാരിക സ്ഥാപനങ്ങളിലും നടന്ന അക്ഷരംകുറിക്കല്‍ ആവേശമായി. ആയിരക്കണക്കിന് കുഞ്ഞുങ്ങളാണ് ജില്ലയില്‍ അക്ഷരം നുണഞ്ഞത്. വളയനാട് ദേവീ ക്ഷേത്രത്തില്‍ രാവിലെ ശീവേലി എഴുന്നള്ളിപ്പു നടന്നു. തുടര്‍ന്ന് ക്ഷേത്രം മേല്‍ശാന്തി പാട്ടം കൃഷ്ണന്‍ നമ്പൂതുരിയുടെ നേതൃത്വത്തില്‍ വിദ്യാരംഭം ആരംഭിച്ചു. തൊണ്ടയാട് നാരകത്ത് ഭഗവതി ക്ഷേത്രത്തിലെ ഗ്രന്ഥം എടുപ്പിനു കാടമന ഇല്ലത്ത് സന്ദീപ് നമ്പൂതിരി കാര്‍മികത്വം വഹിച്ചു. തുടര്‍ന്നു വിദ്യാരംഭവും വാഹന പൂജയും നടന്നു. അഴകൊടി ദേവീ ക്ഷേത്രത്തില്‍ മേല്‍ശാന്തി ശ്രീകൃഷ്ണ പ്രസാദിന്റെയും കീഴ് ശാന്തി കേശവന്‍ നമ്പൂതിരിയുടെയും നേതൃത്വത്തില്‍ ഗ്രന്ഥം എടുപ്പും വിദ്യാരംഭവും നടത്തി. തളി മഹാ ക്ഷേത്രത്തില്‍ രാവിലെ 8.30 ഓടെ വിദ്യാരംഭം ആരംഭിച്ചു. ശ്രീകണഠേശ്വര ക്ഷേത്രത്തിലെ മേല്‍ശാന്തി ഷിബുശാന്തിയുടെ നേതൃത്വത്തില്‍ കുട്ടികളെ എഴുത്തിനിരുത്തി. വാഹന പൂജയും നടന്നു. വെസ്റ്റ്ഹില്‍ അത്താണിക്കല്‍ ശ്രീനാരായണ ഗുരുവരാശ്രമത്തിലെ നവരാത്രി മഹോത്സവത്തിന് വിജയദശമി പൂജക്ക് ശേഷം നടന്ന വിദ്യാരംഭ ചടങ്ങുകളോടെ സമാപനം കുറിച്ചു. കഴിഞ്ഞ എട്ട് ദിവസങ്ങളായി വിദ്യാര്‍ത്ഥികള്‍ക്ക് വേണ്ടി നടന്ന മന്ത്രജപ പരിശീലനവും ഔഷധസേവയും ശ്രീശാരദാ അഷ്ടോത്തര നാമാര്‍ച്ചനയോടെ സമാപിച്ചു. വിദ്യാരംഭ ചടങ്ങുകള്‍ക്ക് ഗുരുവരാശ്രമം മേല്‍ശാന്തി പ്രസൂണ്‍ ശാന്തികള്‍ കാര്‍മികത്വം വഹിച്ചു. കൊയിലാണ്ടി: അജ്ഞതയുടെ അന്ധകാരത്തെ അകറ്റി അറിവ് പ്രദാനം ചെയ്യുന്ന സന്ദേശവുമായി മഹാനവമിയും അധര്‍മ്മത്തിനെതിരെ ധര്‍മ്മത്തിന്‍റെ വിജയം ഉദ്‌ഘോഷിക്കുന്ന വിജയദശമി ദിനവും വിവിധ ക്ഷേത്രങ്ങളില്‍ സമുചിതമായി ആഘോഷിച്ചു. കൊല്ലം പിഷാരികാവില്‍ അഞ്ഞൂറോളം കുരുന്നുകര്‍ ആദ്യാക്ഷരം കുറിക്കാനെത്തി. പയറ്റുവളപ്പില്‍ ക്ഷേത്രം, പൊയില്‍ക്കാവ് ദുര്‍ഗ്ഗാ ക്ഷേത്രം, മനയടത്ത് പറമ്പില്‍ അന്നപൂര്‍ണ്ണേശ്വരി ക്ഷേത്രം, എന്നിവിടങ്ങളില്‍ നടന്ന വിദ്യാരംഭം ഭക്തജന തിരക്കാല്‍ ശ്രദ്ധേയമായി. കൊരയങ്ങാട് കലാക്ഷേത്രം, പൂക്കാട് കലാലയം തുടങ്ങിയ കലാകേന്ദ്രങ്ങളില്‍ പുതിയ പരിശീലന ക്ലാസുകളിലേക്കുള്ള പ്രവേശനം ഇതോടൊപ്പം ആരംഭിച്ചു. വിജയദശമി ദിനത്തില്‍ കൊല്ലം പിഷാരികാവ് ക്ഷേത്രത്തില്‍ 400 ഓളം കുരുന്നുകള്‍ ആദ്യാക്ഷരം കുറിക്കാന്‍ എത്തിച്ചേര്‍ന്നു.മേല്‍ശാന്തി എന്‍ നാരായണന്‍ മൂസതിന്‍റെ നേതൃത്വത്തില്‍ നടന്ന എഴുത്തിനിരുത്തലിൽ കോഴിക്കോട് ഐ.എം.സി.എച്ച് റിട്ട്. സൂപ്രണ്ട് സി.ശ്രീകുമാര്‍, നോവലിസ്റ്റ് വി.ആര്‍.സുധീഷ്, ചന്ദ്രശേഖരന്‍ തിക്കോടി, ദേവസ്വം അസിസ്റ്റന്‍റ് കമ്മീഷണര്‍ കെ.കെ. പ്രമോദ് കുമാര്‍, എന്‍. സന്തോഷ് മൂസത് എന്നിവര്‍ പങ്കാളികളായി. കൂരാച്ചുണ്ട്: വിദ്യാരംഭത്തിന്‍റെ ഭാഗമായി കക്കയം അരുവിക്കര അര്‍ധനാരീശ്വര ക്ഷേത്രത്തില്‍ നടന്ന വിദ്യാരംഭ ചടങ്ങിന് ശാന്തി വിജിത്ത് കക്കയം കാര്‍മികത്വം വഹിച്ചു. പൊടി പ്പൂര് ഭഗവതി ക്ഷേത്രത്തില്‍ നടന്ന ചടങ്ങുകള്‍ക്ക് മേല്‍ശാന്തി ജോഷി കോഴിക്കോട് കാര്‍മികനായി. പൂവത്തുംചോല ഭഗവതി ക്ഷേത്രത്തില്‍ നടന്ന ചടങ്ങുകള്‍ക്ക് ശാന്തി കിഷോര്‍ കൊച്ചുതറ കാര്‍മികത്വം വഹിച്ചു. പേരാമ്പ്ര: പേരാമ്പ്ര ശ്രീ എളമാരന്‍കുളങ്ങര ഭഗവതി ക്ഷേത്രത്തില്‍ നൂറുകണക്കിന് കുഞ്ഞുങ്ങള്‍ ആദ്യാക്ഷരം കുറിച്ചു.ഗാനരചയിതാവും സംഗീതഞ്ജനുമായ ഇ..വി.വത്സന്‍ കുരുന്നുകളെ ആദ്യാക്ഷരം കുറിപ്പിച്ചു. ക്ഷേത്രം മേല്‍ശാന്തി ശ്രീഹരി നമ്പൂതിരിപ്പാട് ചടങ്ങുകള്‍ക്ക് നേതൃത്വം നല്‍കി.

കാട്ടുപന്നികളെക്കൊണ്ട് പൊറുതിമുട്ടി കര്‍ഷകര്‍

കൂരാച്ചുണ്ട്: കൂരാച്ചുണ്ട് പഞ്ചായത്തിലെ വിവിധ പ്രദേശങ്ങളില്‍ കാട്ടുപന്നികളുടെ ശല്യം രൂക്ഷമായി. കാര്‍ഷിക വിളകള്‍ വ്യാപകമായി നശിപ്പിക്കുകയാണ് കാട്ടുപന്നികള്‍. വിളവെടുക്കാനായ കപ്പ, ചേന, ചേമ്പ്, മറ്റു ഇടവിള കൃഷികളാണ് കൂട്ടമായി ഇറങ്ങുന്ന കാട്ടുപന്നികള്‍ നശിപ്പിക്കുന്നത്. ഗ്രാമപഞ്ചായത്തിന്‍റെ നേതൃത്വത്തില്‍ ജനജാഗ്രതാ സമിതി യോഗത്തിലെ തീരുമാനം പ്രകാരം ഷൂട്ടര്‍മാരെ ഉപയോഗിച്ച് കാട്ടുപന്നികളെ ഉന്‍മൂലനം ചെയ്യാന്‍ പഞ്ചായത്ത് അടിയന്തര നടപടി സ്വീകരിക്കണമെന്നാണ് കര്‍ഷകര്‍ ആവശ്യപ്പെടുന്നത്. കഴിഞ്ഞ ദിവസങ്ങളിലായി രണ്ടാം വാര്‍ഡില്‍ ഉള്‍പ്പെട്ട പുളിവയലിലെ കര്‍ഷകന്‍ ഒറ്റപ്ലാക്കല്‍ മൈക്കിളിന്‍റെ കൃഷിയിടത്തിലെ വിളവെടുക്കാന്‍ പ്രായമായ കപ്പ കൃഷി കാട്ടുപന്നികള്‍ തകര്‍ത്തു. പതിമൂന്നാം വാര്‍ഡ് ശങ്കരവയലിലെ ദര്‍ശന കുടുംബശ്രീയുടെ നേതൃത്വത്തില്‍ നട്ടുപരിപാലിച്ച മഞ്ഞള്‍ കൃഷിയും കാട്ടുപന്നികള്‍ നശിപ്പിച്ചു. രണ്ടാം വാര്‍ഡില്‍ ഉള്‍പ്പെട്ട കോയിപ്പറമ്പിലെ കര്‍ഷകന്‍ സ്രാമ്പിക്കല്‍ അബ്രഹാമിന്‍റെ കപ്പകൃഷി, പനോംവയലിലെ നെല്ലിക്കല്‍ സൂരജിന്‍റെ കാപ്പി, കുരുമുളക്, ഏലം തുടങ്ങിയ കൃഷിവിളകളും കാട്ടുപന്നികള്‍ നശിപ്പിച്ചു. വന്‍തുക ചെലവഴിച്ചു കൃഷി ചെയ്തുവരുന്ന വിളകളാണ് നശിപ്പിക്കുന്നത്. കൃഷിനാശത്തിന് അടിയന്തരമായി നഷ്ടപരിഹാര തുക അനുവദിക്കണമെന്നുമാണ് കര്‍ഷകര്‍ ആവശ്യപ്പെടുന്നത്. വന്യജീവി ശല്യം: പെരുവണ്ണാമൂഴി റെയ്ഞ്ചില്‍ ലഭിച്ചത് 904 പരാതികള്‍ പേരാമ്പ്ര: സെപ്റ്റംബര്‍ 16 മുതല്‍ 30 വരെ വനം വകുപ്പിന്‍റെ ആഭിമുഖ്യത്തില്‍ നടപ്പാക്കിയ മനുഷ്യ - വന്യജീവി സംഘര്‍ഷ ലഘൂകരണ തീവ്രയജ്ഞ പരിപാടിയില്‍ പെരുവണ്ണാമൂഴി ഫോറസ്റ്റ് റെയിഞ്ച് ഓഫീസിന്‍റെ പരിധിയില്‍ നിന്നു് മൊത്തം 904 പരാതികള്‍ ലഭിച്ചു. ചക്കിട്ടപാറ ഗ്രാമ പഞ്ചായത്ത് ഓഫീസില്‍ ഏര്‍പ്പെടുത്തിയ ഹെല്‍പ്പ് ഡെസ്‌ക് വഴി 502 പരാതികള്‍ കിട്ടി. റെയിഞ്ച് ഓഫീസില്‍ നേരിട്ട് 31 പരാതികളും ലഭിച്ചു. കൂരാച്ചുണ്ട് ഗ്രാമ പഞ്ചായത്തില്‍ നിന്ന് 351 പരാതികളാണ് കിട്ടിയതെങ്കില്‍ പനങ്ങാട് പഞ്ചായത്തില്‍ നിന്ന് 18 എണ്ണമാണ് ലഭിച്ചത്.

സിഎം വിത്ത് മി പരിപാടി പരാജയമെന്ന്

കോഴിക്കോട്: സംസ്ഥാന സര്‍ക്കാര്‍ നടപ്പിലാക്കിയ സിഎം വിത്ത് മി പരിപാടിയില്‍ പൊതുജനങ്ങള്‍ക്ക് കൃത്യമായി പരാതി രജിസ്റ്റര്‍ ചെയ്യാന്‍ പോലും കഴിയാത്ത സാഹചര്യമാണുള്ളതെന്ന് യൂത്ത് കോണ്‍ഗ്രസ് സംസ്ഥാന ജനറല്‍ സെക്രട്ടറി വി.പി. ദുല്‍ഖിഫില്‍. വിളിച്ചാല്‍ ഒന്നില്ലെങ്കില്‍ പരിധിക്ക് പുറത്ത് അല്ലെങ്കില്‍ ബിസിയെന്നാണ് മറുപടിയെന്ന് അദ്ദേഹം പ്രസ്താവനയില്‍ പറഞ്ഞു. ലഭിച്ചാല്‍ തന്നെ മുഖ്യമന്ത്രിയുടെ റെക്കോര്‍ഡ് ചെയ്ത് വോയിസ് കേള്‍ക്കാം എന്നല്ലാതെ കണക്ട് ചെയ്യാന്‍ പോലും കഴിയുന്നില്ലെന്നും അദ്ദേഹം പറഞ്ഞു. സര്‍ക്കാരിനെതിരേ ഉയര്‍ന്ന ഇപ്പോഴത്തെ വിവാദങ്ങളില്‍ നിന്നും മുഖം രക്ഷിക്കാന്‍ ആവിഷ്‌കരിച്ച പദ്ധതി ആദ്യദിവസം തന്നെ പരാജയപ്പെട്ടത് തെളിവ് സഹിതം പുറത്തുവന്നിരിക്കുകയാണെന്നും അദ്ദേഹം പറഞ്ഞു.

കഞ്ചാവുമായി ബസ് ഡ്രൈവര്‍ പിടിയില്‍

കോഴിക്കോട്: വില്പനയ്ക്കായി സൂക്ഷിച്ച കഞ്ചാവുമായി യുവാവ് അറസ്റ്റില്‍. കൊടുവള്ളി ഗോപുരം വീട്ടില്‍ ഷവിന്‍ലാലി (33) നെയാണ് കുന്നമംഗലം പോലീസ് പിടികൂടിയത്. തിരുവമ്പാടി -കോഴിക്കോട് റൂട്ടില്‍ ഓടുന്ന ചൈത്രം ബസിലെ ഡ്രൈവറായ പ്രതി ലഹരി ഉപയോഗിച്ചിട്ടാണ് വാഹനം ഓടിക്കുന്നതെന്ന രഹസ്യ വിവരം പോലീസിനു ലഭിച്ചിരുന്നു. ഇതിന്‍റെ അടിസ്ഥാനത്തില്‍ മുക്കം റോഡ് ജംഗ്ഷനില്‍ വച്ച് പോലീസ് ബസ് തടഞ്ഞുനിര്‍ത്തി പരിശോധിച്ചതില്‍ ഡ്രൈവറുടെ സീറ്റിന്‍റെ അടിയില്‍ വില്പനയ്ക്കായി സൂക്ഷിച്ച രണ്ടുഗ്രാം കഞ്ചാവുമായി പ്രതി പിടിയിലാവുകയായിരുന്നു. കുന്നമംഗലം എസ്‌ഐമാരായ എ. നിതിന്‍, ടി. ബൈജു എന്നിവരുടെ നേതൃത്വത്തിലാണ് അറസ്റ്റ്.

നിരവധി മോഷണ കേസുകളിലെ പ്രതിയെ വീണ്ടും കാപ്പ ചുമത്തി ജയിലിലടച്ചു

കോഴിക്കോട്: നിരവധി മോഷണ കേസുകളിലെ പ്രതിയെ കാപ്പ ചുമത്തി വീണ്ടും ജയിലില്‍ അടച്ചു. കുന്നമംഗലം പോലീസ് സ്റ്റേഷന്‍ പരിധിയിലെ അറിയപ്പെടുന്ന കുറ്റവാളിയായ പെരിങ്ങളം അറപ്പൊയില്‍ വീട്ടില്‍ മുജീബി(39)നെ ആണ് കാപ്പ ചുമത്തി ജയിലിലടച്ചത്. പ്രതിക്ക് കോഴിക്കോട്, മലപ്പുറം, കണ്ണൂര്‍ ജില്ലകളിലെ നിരവധി പോലീസ് സ്റ്റേഷനുകളിലായി പണവും ആഭരണവും പിടിച്ചുപ്പറി നടത്തിയതിനും വാഹനങ്ങള്‍ മോഷ്ടിച്ചതിനും വീടുകളും മറ്റും കുത്തി തുറന്ന് കവര്‍ച്ച നടത്തിയതിനും കേസുകള്‍ നിലവിലുണ്ടെന്ന് പോലീസ് പറഞ്ഞു. 2024ല്‍ കാപ്പ ചുമത്തപ്പെട്ട് ജയിലില്‍ ആയിരുന്ന പ്രതി ഈ വര്‍ഷം പുറത്തിറങ്ങിയശേഷം കോഴിക്കോട് ടൗണ്‍ പോലീസ് സ്റ്റേഷനില്‍ ഒരു ബൈക്ക് മോഷണ കേസിലും തലശേരിയില്‍ മറ്റൊരു മോഷണ കേസിലും ഉള്‍പ്പെട്ട് കണ്ണൂര്‍ ജില്ലാ ജയിലില്‍ റിമാന്‍ഡിലായിരുന്നു. തുടര്‍ച്ചയായി മോഷണ കേസുകളില്‍ ഉള്‍പ്പെടുകയും പൊതുസമൂഹത്തിന് ഭീഷണിയായി മാറുകയും ചെയ്തതിനെ തുടര്‍ന്നാണ് പ്രതിക്കെതിരേ കുന്നമംഗലം പോലീസ് കാപ്പ നടപടി സ്വീകരിച്ചത്. കുന്നമംഗലം പോലീസ് സ്റ്റേഷന്‍ ഇന്‍സ്‌പെക്ടര്‍ കിരണ്‍ നല്‍കിയ പ്രാഥമിക റിപ്പോര്‍ട്ട് പ്രകാരം കോഴിക്കോട് സിറ്റി ഡെപ്യൂട്ടി പോലീസ് കമ്മിഷണര്‍ അരുണ്‍ കെ. പവിത്രന്‍ സമര്‍പ്പിച്ച ശിപാര്‍ശയിലാണ് കോഴിക്കോട് ജില്ലാ കളക്ടറുടെ നടപടി.

കോഴിക്കോട് കെഎസ്ആര്‍ടിസി ടെര്‍മിനല്‍ വിദഗ്ധ സംഘം ഇന്ന് പരിശോധിക്കും

കോഴിക്കോട്: കോടികള്‍ മുടക്കി നിര്‍മിച്ച കോഴിക്കോട് കെഎസ്ആര്‍ടിസി ടെര്‍മിനലിന്‍റെ ബലക്ഷയം സംബന്ധിച്ച പരിശോധന ഇന്ന് ആരംഭിക്കും. തിരുവനന്തപുരം എന്‍ജിനിയറിംഗ് കോളജിലെ വിദഗ്ധ സംഘമാണ് രണ്ടു ദിവസങ്ങളിലായി പരിശോധന നടത്തുക. നേരത്തെ മദ്രാസ് ഐഐടി സംഘം പരിശോധന നടത്തി റിപ്പോര്‍ട്ട് നല്‍കിയതിനു പുറമേയാണിത്. കെട്ടിടം പാട്ടത്തിനെടുത്ത ആലിഫ് ബില്‍ഡേഴ്‌സിന്‍റെ ഹര്‍ജിയില്‍ തിരുവനന്തപുരം എന്‍ജിനിയറിംഗ് കോളജിലെ വിദഗ്ധ സംഘം പരിശോധിക്കണമെന്ന് ജൂലൈ പതിനെട്ടിന് ഹൈക്കോടതി ഉത്തരവിട്ടിരുന്നു. കെട്ടിടത്തിന്‍റെ തകരാര്‍ പരിഹരിക്കുന്നതിന് ആവശ്യമായ തുക നിശ്ചയിക്കാന്‍ പെതുമരാമത്ത് വകുപ്പിനെയോ തിരുവനന്തപുരം എന്‍ജിനിയറിംഗ് കോളജിലെ വിദഗ്ധ സംഘത്തേയൊ നിയോഗിക്കണമെന്നാണ് ഹര്‍ജിയില്‍ ആവശ്യപ്പെട്ടിരുന്നത്. തിരുവനന്തപുരം എന്‍ജിനിയറിംഗ് കോളജിലെ ഇന്‍ഡസ്ട്രിയല്‍ ട്രെയിനിംഗ് കണ്‍സള്‍ട്ടന്‍സി ആന്‍ഡ് സ്‌പോണ്‍സേര്‍ഡ് റിസര്‍ച്ചിലെ വിദഗ്ധരാണ് ഇന്ന് എത്തുന്നത്. 2021നാണ് ആലിഫ് ബില്‍ഡേഴ്‌സ് കെട്ടിടം പാട്ടത്തിനെടുത്തത്. കേരള ട്രാന്‍സ്‌പോര്‍ട്ട് ഡെവലപ്‌മെന്‍റ് ഫിനാന്‍സ് കോര്‍പറേഷനാണ് കെഎസ്ആര്‍ടിസി ടെര്‍മനിലിനുവേണ്ടി 75 കോടി ചെലവില്‍ രണ്ടുകെട്ടിടം നിര്‍മിച്ചത്. ബസ് പാര്‍ക്കിംഗിനുപുറമേ ബിസിനസ് ആവശ്യങ്ങള്‍ക്കുള്ള മുറികളും മറ്റും ഉള്‍പ്പെടുത്തിയായിരുന്നു നിര്‍മാണം. 2015ലാണ് നഗരത്തില്‍ വലിയ വികസനത്തിനു വഴിവയ്ക്കുമെന്ന് പ്രതീക്ഷിച്ചിരുന്ന കെട്ടിടം തുറന്നുകൊടുത്തത്. എന്നാല്‍ 2021 വരെ ആരും കെട്ടിടം പാട്ടത്തിന് എടുക്കാന്‍ മുന്നോട്ടുവന്നില്ല. അതുവരെ ഈ കെട്ടിടം ഉപയോഗിക്കാതെ കിടക്കുകയായിരുന്നു. കെട്ടിടത്തില്‍ ചോര്‍ച്ചയുണ്ടാവുകയും വെള്ളം കെട്ടിക്കിടക്കുകയും ചെയ്തു. കെട്ടിടത്തിന്‍റെ ബലക്ഷയം സംബന്ധിച്ച് പഠിക്കാന്‍ മദ്രാസ് ഐഐടിയിലെ വിദഗ്ധരെ നിയോഗിച്ചിരുന്നു. അവര്‍ പഠനം നടത്തി റിപ്പോര്‍ട്ട് നല്‍കുകയും ചെയ്തു. കെട്ടിടത്തിന്‍റെ ബീമിലും തൂണുകളിലും ബലക്ഷയമുണ്ടെന്ന് സംഘം കണ്ടെത്തിയിരുന്നു. 90 ശതമാനം തൂണുകളും 80 ശതമാനം സ്‌ളാബുകളും ബലപ്പെടുത്തണമെന്ന് സംഘം നിർദേശിച്ചിരുന്നു. തൂണുകളും വിള്ളലുകളും സിമെന്‍റും മറ്റും ഉപയോഗിച്ച് അടയ്ക്കണമെന്നും ഇതിന് ഏതാണ്ട് 32.70 കോടി രൂപ ചെലവുവരുമെന്നും റിപ്പോര്‍ട്ടില്‍ പറഞ്ഞിരുന്നു. ബസ് ടെര്‍മിനല്‍ കം ഷോപ്പിംഗ് കോംപ്ലക്‌സ് ഡിസൈന്‍ ചെയ്ത ആര്‍ക്കിടെക്ടിനു പിഴ ചുമത്തണമെന്നും റിപ്പോര്‍ട്ടില്‍ പറഞ്ഞിരുന്നു. എന്നാല്‍ കെഎസ്ആര്‍ടിസിയുടെ ഭാഗത്തുനിന്ന് യാതൊരു നടപടിയും ഉണ്ടായില്ല. ബലപ്പെടുത്തുന്നതിനുള്ള നടപടികളും ആരംഭിച്ചില്ല. ഇതിനിടയിലാണ് അറ്റകുറ്റപണി പൂര്‍ത്തീകരിച്ച് കൈമാറിയിട്ടില്ലെന്ന് കാണിച്ച് ആരിഫ് ബില്‍ഡേഴ്‌സ് ഹൈക്കോടതിയെ സമീപിച്ചത്. കെട്ടിടത്തിന്‍റെ തകരാര്‍ പരിഹരിക്കുന്നതിന് ആവശ്യമായ തുക നിശ്ചയിക്കുന്നതിന് പിഡബ്ല്യുഡിയേയോ തിരുവനന്തപുരം എന്‍ജിനിയറിംഗ് കോളജിനെയോ നിയോഗിക്കണമെന്ന് ഹര്‍ജിയില്‍ ആവശ്യപ്പെട്ടിരുന്നു. പാട്ടത്തിനെടുത്തുവെങ്കിലും കെട്ടിടത്തിന് തകരാറുള്ള സാഹചര്യത്തില്‍ വാടക നല്‍കാന്‍ ഇവര്‍ തയാറായിട്ടില്ല. പാട്ടത്തിനെടുത്ത കെട്ടിടം തങ്ങള്‍ക്കു കൈമാറിയിട്ടില്ലെന്നാണ് ഇവരുടെ വാദം. എന്നാല്‍ ടെര്‍മിനലിലെ നിലിവിലുള്ള അവസ്ഥയിലാണ് കെട്ടിടം കൈമാറിയതെന്നും കരാറുകാരാണ് അറ്റകുറ്റപണി നടത്തേണ്ടതെന്നുമാണ് സര്‍ക്കാര്‍ വാദം. ശൗചാലയത്തില്‍നിന്ന് ഫീസ് ഈടാക്കുന്നതടക്കമുള്ള കാര്യങ്ങള്‍ നിര്‍വഹിക്കുന്നത് കരാറുകാരാണെന്നും സര്‍ക്കാര്‍ പറയുന്നു.

തുഷാരഗിരി പാലത്തില്‍ യുവാവ് തൂങ്ങി മരിച്ച നിലയില്‍

കോടഞ്ചേരി: തുഷാരഗിരി ആര്‍ച്ച് പാലത്തിന്‍റെ കൈവരിയില്‍ യുവാവിനെ തൂങ്ങിമരിച്ചനിലയില്‍ കണ്ടെത്തി. പുലിക്കയം കള്ള് ഷാപ്പ് തൊഴിലാളി മൈക്കാവ് കുഴിക്കനാംകണ്ടത്തില്‍ കെ.പി. ബെന്നി (45)യാണ് മരിച്ചത്. കയര്‍ കഴുത്തില്‍ കെട്ടി പുഴയിലേക്ക് ചാടിയപ്പോള്‍ ശരീരഭാഗം വേര്‍പെട്ട് പുഴയിലേക്ക് വീണു. മൃതദേഹത്തിന്‍റെ തല കയറിലും ഉടല്‍ പാലത്തിന് താഴെ വീണുകിടക്കുന്ന നിലയിലുമാണ കാണപ്പെട്ടത്. ബുധനാഴ്ച രാവിലെ തുഷാരഗിരിയില്‍ എത്തിയ വിനോദസഞ്ചാരികളാണ് കയറിന്‍റെ അറ്റത്ത് തല തൂങ്ങിക്കിടക്കുന്ന നിലയില്‍ കണ്ടെത്തിയത്. ഭാര്യ: മേരി. മക്കള്‍: അഞ്ജന, അഭിനവ്.

കടലില്‍ കുളിക്കാനിറങ്ങിയ വിദ്യാര്‍ഥി മുങ്ങിമരിച്ചു

കോഴിക്കോട്: കൂട്ടുകാര്‍ക്കൊപ്പം കടലില്‍ കുളിക്കാനിറങ്ങിയ വിദ്യാര്‍ഥി മുങ്ങിമരിച്ചു. വെള്ളയില്‍ തോപ്പയില്‍ പറമ്പ് ഫൈജാസിന്‍റെ മകന്‍ സഹദ് സെയ്ദ് (13)ആണ് മരിച്ചത്. സെന്‍റ് ജോസഫ് ഹൈസ്‌കൂളില്‍ എട്ടാം ക്ലാസ് വിദ്യാര്‍ഥിയാണ്. ഇന്നലെ ഉച്ചകഴിഞ്ഞ് മൂന്നോടെ കൂട്ടുകാരോടൊപ്പം തോപ്പയില്‍ ഭാഗത്ത് കടലില്‍ കുളിക്കുന്നതിനിടെ മുങ്ങിപ്പോവുകയായിരുന്നു. നാട്ടുകാര്‍ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. മാതാവ്: കെ.വി. ജാസിറ. സഹോദരങ്ങള്‍: ഫാത്തിമ്മ ജന്ന, ഇഷാന്‍ അഹമ്മദ്, മുഹമ്മദ് മിയാസ്.

സുവർണ ജൂബിലി; വിളംബര റാലി നടത്തി

താമരശേരി: കട്ടിപ്പാറ നസ്രത്ത് യുപി സ്കൂൾ സുവർണ ജൂബിലി ആഘോഷങ്ങളുടെ ഭാഗമായി വിളംബര റാലി നടത്തി. സ്കൂൾ മൈതാനത്ത് നിന്ന് നൂറുകണക്കിന് രക്ഷിതാക്കളുടെയും സ്കൗട്ട്, ഗൈഡ്, ജെആർസി, ബാൻഡ് ട്രൂപ്പ് എന്നിവരുടെ അകമ്പടിയോടെ ആരംഭിച്ച റാലി പഞ്ചായത്ത് പ്രസിഡന്‍റ് പ്രേംജി ജെയിംസ് ഫ്ലാഗ് ഓഫ് ചെയ്തു. ഹെഡ്മിസ്ട്രസ് സിസ്റ്റർ ബ്ലസി അധ്യക്ഷത വഹിച്ചു. സ്കൂൾ മാനേജർ ഫാ. മിൽട്ടൺ മുളങ്ങാശേരി അനുഗ്രഹ പ്രഭാഷണം നടത്തി. ബ്ലോക്ക് പഞ്ചായത്ത് മെമ്പർ നിതീഷ് കല്ലുള്ളതോട്, പഞ്ചായത്ത് മെമ്പർമാരായ ഷാഹിം ഹാജി, സുരജ ജയപ്രകാശ്, ജിൻസി തോമസ്, താര അബ്ദുറഹിമാൻ ഹാജി, ഷാൻ കട്ടിപ്പാറ, സി.കെ.സി. അസൈനാർ, എന്നിവർ പ്രസംഗിച്ചു. ഹോളി ഫാമിലി ഹയർസെക്കൻഡറി സ്കൂൾ പ്രിൻസിപ്പൽ മഹേഷ് കെ. ബാബു വർഗീസ്, ഹൈസ്കൂൾ പ്രധാനാധ്യാപിക കെ.യു. ബെസി, എൽപി സ്കൂൾ പ്രധാനാധ്യാപിക ചിപ്പി രാജ്, അധ്യാപകരായ കെ.ജി. ഷിബു, കെ.യു. തോമസ്, പിടിഎ പ്രസിഡന്‍റ് ഷാനിഷ്, എംപിടിഎ പ്രസിഡന്‍റ് ബിന്ദു ബൈജു തുടങ്ങിയവർ വിളംബര റാലിക്ക് നേതൃത്വം നൽകി.

രാഹുൽ ഗാന്ധിക്കെതിരേ വധഭീഷണി; കോൺഗ്രസ് പ്രതിഷേധ പ്രകടനം നടത്തി

തിരുവമ്പാടി: രാഹുൽ ഗാന്ധിക്കെതിരേ വധഭീഷണി മുഴക്കിയ ആർഎസ്എസ് നേതാവിനെതിരേ നടപടി സ്വീകരിക്കാത്ത സംസ്ഥാന സർക്കാരിന്‍റെ നിലപാടിനെതിരേ തിരുവമ്പാടി ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ അങ്ങാടിയിൽ പ്രതിഷേധ പ്രകടനവും പൊതുയോഗവും നടത്തി. ബ്ലോക്ക് കോൺഗ്രസ് പ്രസിഡന്‍റ് ജോബി ഇലന്തൂർ അധ്യക്ഷത വഹിച്ചു. ഡിസിസി ജനറൽ സെക്രട്ടറി ബാബു പൈക്കാട്ടിൽ ഉദ്ഘാടനം ചെയ്തു. ഡിസിസി വൈസ് പ്രസിഡന്‍റ് അന്നമ്മ മാത്യു മുഖ്യ പ്രഭാഷണം നടത്തി. കർഷക കോൺഗ്രസ് സംസ്ഥാന സെക്രട്ടറിമാരായ ബോസ് ജേക്കബ്, സണ്ണി കാപ്പാട്ടുമല, മില്ലി മോഹൻ, പഞ്ചായത്ത് പ്രസിഡന്‍റ് ബിന്ദു ജോൺസൺ, ടി.ജെ. ക്യര്യാച്ചൻ, കെ.എം. പൗലോസ്, മനോജ് വാഴേപ്പറമ്പിൽ, വിൻസെന്‍റ് വടക്കേമുറി എന്നിവർ പ്രസംഗിച്ചു. യുഡിഎഫ് പ്രതിഷേധ പ്രകടനം നടത്തി മേപ്പയൂർ: രാഹുൽ ഗാന്ധിക്കെതിരേ വധഭീഷണിയുയർത്തിയ ബിജെപി നേതാവിനെ അറസ്റ്റ് ചെയ്ത് ജയിലിൽ അടയ്ക്കാത്ത പിണറായി സർക്കാറിന്‍റെ നടപടിയിൽ പ്രതിഷേധിച്ച് മേപ്പയ്യൂർ പഞ്ചായത്ത് യുഡിഎഫ് കമ്മിറ്റിയുടെ നേതൃത്വത്തിൽ ടൗണിൽ പ്രതിഷേധ പ്രകടനം നടത്തി. യുഡിഎഫ് ചെയർമാൻ പറമ്പാട്ട് സുധാകരൻ, കൺവീനർ കമ്മന അബ്ദുറഹിമാൻ, ഇ. അശോകൻ, പി.കെ അനിഷ്, എം.എം. അഷറഫ്, കെ.എം.എ. അസീസ്, സി.പി. നാരായണൻ, ആന്തേരി ഗോപാലകൃഷ്ണൻ, മുജീബ് കോമത്ത്, കെ.പി. മൊയ്തി, സി.എം. ബാബു, ഷബീർ ജന്നത്ത്, സത്യൻ വിളയാട്ടൂർ, എടയിലാട്ട് ഉണ്ണികൃഷ്ണൻ തുടങ്ങിയവർ നേതൃത്വം നൽകി.

സത്യത്തിനൊപ്പം നിൽക്കുക എന്നത് സമൂഹത്തോടുള്ള ധർമം: ബിഷപ് മാർ റെമീജിയോസ് ഇഞ്ചനാനിയിൽ

കോഴിക്കോട്: സത്യത്തോടൊപ്പം നിൽക്കുക എന്നതാണ് സമുഹത്തിന്‍റെ ധർമമെന്ന് താമരശേരി ബിഷപ് മാര്‍ റെമീജിയോസ് ഇഞ്ചനാനിയില്‍. ആ ധർമമാണ് ദീപിക നിർവഹിക്കുന്നത്. ദീപിക വായിക്കുന്നതിലൂടെ നീതിക്കൊപ്പം ചേർന്നു നിൽക്കുന്നവരായി നാം മാറുന്നു. നമ്മുടെ വിശ്വാസത്തിനൊപ്പം നിൽക്കുക എന്നതാണ് ഇതിലൂടെ നിറവേറ്റപ്പെടുന്നതെന്നും ബിഷപ് പറഞ്ഞു. കോഴിക്കോട് അശോകപുരം പള്ളിയില്‍ "ദീപികയ്ക്കൊപ്പം സത്യത്തിനൊപ്പം' പദ്ധതിയുടെ ചെക്ക് സ്വീകരിച്ച് സംസാ രിക്കുകയായിരുന്നു ബിഷപ്. ദീപിക പത്രം സ്‌പോണ്‍സര്‍ ചെയ്ത അഡ്വ. ജോസ് കോട്ടുപള്ളിയെ ചടങ്ങിൽ ബിഷപ് പൊന്നാടയണിയിച്ച് ആദരിച്ചു. അശോകപുരം ഇന്‍ഫന്‍റ് ജീസസ് പള്ളി വികാരി ഫാ. ബിനുകുളത്തിങ്കല്‍ അധ്യക്ഷത വഹിച്ചു. ദീപിക റസിഡന്‍റ് മാനേജര്‍ ഫാ. ഷെറിന്‍ പുത്തന്‍പുരയ്ക്കല്‍, കൗണ്‍സിലര്‍ അല്‍ഫോണ്‍സ, ഡിഎഫ്‌സി അശോകപുരം പ്രസിഡന്‍റ് ജോര്‍ജ് ചെരിയത്ത്, ഡിഎഫ്‌സി രൂപതാ പ്രസിഡന്‍റ് ജോര്‍ജ് വട്ടുകളം, ദീപിക എജിഎം പ്രിന്‍സി ജോസ് എന്നിവര്‍ പ്രസംഗിച്ചു. എ.എസ്. തോമസ് പൗവ്വത്തിൽ, ജോസഫ് കാവുകാട്ട്, ഡിഎഫ്‌സി ഫൊറോന സെക്രട്ടറി ജോര്‍ജ് തകിടിപ്പുറം, ദീപിക ന്യൂസ് എഡിറ്റര്‍ ബിജോയ് ജോസഫ്, ദീപിക യുഎഎം ബ്രിജോ ആന്‍റണി, ഗ്രേസി കാടങ്കാവില്‍, സാലി വെങ്ങാലൂര്‍, ബേബി കിഴക്കുംഭാഗം, ജയ്‌സണ്‍ കുളങ്ങര ഉള്‍പ്പെടെയുള്ളവര്‍ പങ്കെടുത്തു.

അഭിമാന നേട്ടവുമായി നടക്കാവ് ഗവ. വിഎച്ച്എസ്എസ് ഫോര്‍ ഗേള്‍സ്

കോഴിക്കോട്: രാജ്യത്തെ മികച്ച സ്‌കൂളുകളുടെ പട്ടികയില്‍ വീണ്ടും ഇടംപിടിച്ച് നടക്കാവ് ഗവ. വിഎച്ച്എസ്എസ് ഫോര്‍ ഗേള്‍സ്. 19-ാമത് എഡ്യുക്കേഷന്‍ വേള്‍ഡ് ഇന്ത്യ സ്‌കൂള്‍ റാങ്കിംഗ് പട്ടികയിലാണ് നടക്കാവ് സ്‌കൂള്‍ രണ്ടാം സ്ഥാനം നിലനിര്‍ത്തിയത്. ‘സ്റ്റേറ്റ് ഗവണ്‍മെന്‍റ് ഡേ സ്‌കൂളുകള്‍' വിഭാഗത്തിലാണ് നടക്കാവ് സ്‌കൂളിന്‍റെ നേട്ടം. യുപി മുതല്‍ ഹയര്‍ സെക്കന്‍ഡറി തലംവരെ മൂവായിരത്തിലധികം വിദ്യാര്‍ഥികള്‍ പഠിക്കുന്ന നടക്കാവ് സ്‌കൂള്‍ വിവിധ തലങ്ങളില്‍ വര്‍ഷങ്ങളായി മികച്ച പ്രകടനമാണ് കാഴ്ചവയ്ക്കുന്നത്. 2012ല്‍ ഫൈസല്‍ ആന്‍ഡ് ഷബാന ഫൗണ്ടേഷന്‍റെ പങ്കാളിത്തത്തോടെ ഈ സ്‌കൂളില്‍ ‘പ്രിസം' പദ്ധതി ആരംഭിച്ചിരുന്നു. 20 കോടിയാണ് ഫൗണ്ടേഷന്‍ സ്‌കൂളിന്‍റെ വളര്‍ച്ചക്കായി വിനിയോഗിച്ചത്. 1893ൽ മോയിന്‍ ട്രെയിനിംഗ് സ്‌കൂള്‍ എന്ന പേരിലാണ് ഈ വിദ്യാലയം സ്ഥാപിച്ചത്. ആരംഭത്തില്‍ വിദ്യാലയം ഏലിമെന്‍ററി ആന്‍ഡ് ട്രെയിനിംഗ് സ്‌കൂളായിരുന്നു. 1947ല്‍ നാലാം ഫോം ആരംഭിച്ച് ഹൈസ്‌കൂളായി ഉയര്‍ത്തപ്പെട്ടു. 1962 ല്‍ എല്‍പി വിഭാഗവും ട്രെയിനിംഗ് സ്‌കൂളും ഇവിടെ നിന്നും മാറ്റപ്പെട്ടു. 1990ല്‍ വിഎച്ച്എസ്ഇയുടെ രണ്ട് കോഴ്‌സുകള്‍ ആരംഭിച്ചുകൊണ്ട് വൊക്കേഷണല്‍ ഹയര്‍ സെക്കന്‍ഡറി സ്‌ക്കൂളായി ഉയര്‍ത്തപ്പെട്ടു. 1995 ല്‍ അഞ്ചാം ക്ലാസുമുതല്‍ സമാന്തര ഇംഗ്‌ളീഷ് മീഡിയം ഡിവിഷന്‍ആരംഭിച്ചു. 2000-ത്തില്‍ വിദ്യാലയത്തിലെ ഹയര്‍ സെക്കന്‍ഡറി വിഭാഗവും വിഎച്ച്എസ്ഇയുടെ മൂന്നാം ബാച്ചും പ്രവര്‍ത്തനമാരംഭിച്ചു. 2009ല്‍ ഇന്‍റര്‍നാഷണല്‍ സ്‌കൂളുകളായി ഉയര്‍ത്തപ്പെടുന്ന സ്‌കൂളുകളുടെ പട്ടികയില്‍ ഈ വിദ്യാലയവും ഇടംപിടിച്ചു. കോഴിക്കോട് കോര്‍പറേഷനില്‍ മൂന്നാം വാര്‍ഡില്‍ 3.42 ഏക്കര്‍ ഭൂമിയിലാണ് സ്‌കൂള്‍ സ്ഥിതി ചെയ്യുന്നത്. ഹൈസ്‌കൂളിന് അഞ്ചു കെട്ടിടങ്ങളിലായി 41 ക്ലാസ് മുറികളും ഹയര്‍ സെക്കന്‍ഡറി, വിഎച്ച്എസ്ഇ വിഭാഗങ്ങള്‍ക്ക് മൂന്ന് കെട്ടിടങ്ങളിലായി 12 ക്ലാസ് മുറികളും ലാബുകളുമുണ്ട്. ഫുട്‌ബോള്‍, ബോക്‌സിംഗ്, വെയ്റ്റ് ലിഫ്റ്റിംഗ് എന്നീ മേഖലകളില്‍ അന്താരാഷ്ട്ര തലത്തില്‍ എത്തിച്ചേരാന്‍ നടക്കാവ് സ്‌കൂളിനു കഴിഞ്ഞിട്ടുണ്ട്.

ഡോക്ടറുടെ വീട്ടിലെ കവര്‍ച്ച: പ്രതിയെ തിരിച്ചറിഞ്ഞതായി സൂചന

കോഴിക്കോട്: ഡോക്ടറുടെ അടച്ചിട്ട വീട് കുത്തിത്തുറന്ന് 45 പവന്‍ സ്വര്‍ണാഭരണങ്ങളും പണവും മോഷ്ടിച്ച കേസിലെ പ്രതിയെ പോലീസ് തിരിച്ചറിഞ്ഞതായി സൂചന. സിസിടിവി ദൃശ്യങ്ങളില്‍ നിന്നാണ് പ്രതിയെന്ന് സംശയിക്കുന്നയാളെ കുറിച്ചുള്ള വിവരങ്ങള്‍ ലഭിച്ചത്. നിരവധി മോഷണകേസുകളിലുള്‍പ്പെട്ടയാളാണ് കവര്‍ച്ച നടത്തിയതെന്നാണ് വിവരം. ചേവായൂര്‍ ഇന്‍സ്പക്ടര്‍ മഹേഷും സിറ്റി ക്രൈംസ്‌ക്വാഡും പ്രതിയെ കുറിച്ചുള്ള വിവരങ്ങള്‍ ശേഖരിച്ചിട്ടുണ്ട്. ഞായറാഴ്ച പുലര്‍ച്ചെയാണ് ചേവരമ്പലം പുതിയോട്ടില്‍ പറമ്പില്‍ അശ്വതി നിവാസില്‍ ഡോ. ഗായത്രിയുടെ വീട്ടില്‍ കവര്‍ച്ച നടന്നത്. വീടിന്‍റെ മുന്‍വാതില്‍ കുത്തിത്തുറന്ന് അകത്ത് കടന്ന മോഷ്ടാവ് അലമാര തകര്‍ത്താണ് മോഷണം നടത്തിയത്. ഡോക്ടറും കുടുംബവും വീട് പൂട്ടി തിരുവനന്തപുരത്ത് പോയതായിരുന്നു. ഞായറാഴ്ച രാവിലെ തിരിച്ചെത്തിയപ്പോഴാണ് മോഷണ വിവരമറിയുന്നത്. തുടര്‍ന്ന് ചേവായൂര്‍ പോലിസില്‍ പരാതി നല്‍കുകയായിരുന്നു.

ആക്രി വ്യാപാര മേഖല പ്രതിസന്ധിയില്‍: വ്യാപാരികള്‍ സമരത്തിലേക്ക്

കോഴിക്കോട്: അതിജീവനത്തിനായി കേരള സ്‌ക്രാപ്പ് മര്‍ച്ചന്‍റ്സ് അസോസിയേഷന്‍ (കെഎസ്എംഎ) ജില്ലാ കമ്മറ്റിയുടെ ആഭിമുഖ്യത്തില്‍ പാഴ്വസ്തു വ്യാപാരികള്‍ സമരമുഖത്തേക്ക്. ഒക്ടോബര്‍ മൂന്നിന് കളക്ടറേറ്റിലേക്ക് തൊഴില്‍ സംരക്ഷണ റാലി നടത്തുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. രാവിലെ 10ന് നടക്കുന്ന റാലി കെ.എസ്എംഎ സംസ്ഥാന സെക്രട്ടറി കെ.പി. അഹമ്മദ് ഷെരീഫ് ഉദ്ഘാടനം ചെയ്യും. തുടര്‍ന്ന് കളക്ടര്‍ക്ക് അവകാശ പത്രിക സമര്‍പ്പിക്കും. ആക്രികള്‍ നടന്നു ശേഖരിക്കുന്നവര്‍, കച്ചവടക്കാര്‍, തൊഴിലാളികള്‍, റീസൈക്ലിംഗ് മേഖലയില്‍ പ്രവര്‍ത്തിക്കുന്നവര്‍ തുടങ്ങി സംസ്ഥാനത്ത് മൂന്ന് ലക്ഷത്തോളം പേര്‍ ഈ മേഖലയെ ആശ്രയിച്ചു ജീവിക്കുന്നവരാണ്. പാഴ്‌വസ്തു വ്യാപാര മേഖലയെ തകര്‍ക്കുന്ന നിലപാടാണ് തദ്ദേശ സ്വയംഭരണ സ്ഥാപനങ്ങള്‍ കൈക്കൊള്ളുന്നതെന്ന് കെഎസ്എംഎ ജില്ലാ പ്രസിഡന്‍റ് പി.പി. മെഹബൂബ് പറഞ്ഞു. ഇത്തരം ദ്രോഹ നടപടികള്‍ക്കെതിരെ സംസ്ഥാന വ്യാപകമായി സ്‌ക്രാപ്പ് വ്യാപാരികള്‍ സമരമുഖത്താണ്. എല്ലാ ജില്ലാ ആസ്ഥാനങ്ങളിലും പ്രതിഷേധ സമരങ്ങള്‍ നടന്നു വരികയാണ്. ഒക്ടോബര്‍ എട്ടിന് സംസ്ഥാനത്തെ മൊത്തം പാഴ്‌വസ്തു വ്യാപാരികളും ചേര്‍ന്ന് നിയമസഭാ മാര്‍ച്ച് നടത്തും. വാര്‍ത്താസമ്മേളനത്തില്‍ കെഎസ്എംഎ ജില്ലാ സെക്രട്ടറി കെ. മുജ്മീര്‍, ട്രഷറര്‍ എസ്.വി. റഫീഖ്, സംസ്ഥാന കൗണ്‍സില്‍ അംഗം സി.മൊയ്തീന്‍ കോയ, കെ.അര്‍ഫാത്ത് എന്നിവരും പങ്കെടുത്തു.

ചൂരണിയിൽ വീണ്ടും കാട്ടാന: യുവാവ് രക്ഷപ്പെട്ടത് തലനാരിഴയ്ക്ക്

കുറ്റ്യാടി: കാവിലുംപാറ ചൂരണി താഴ്വാരത്തെ റോഡിൽ കാട്ടാന ഇറങ്ങി.ഇന്നലെ രാവിലെയാണ് കാട്ടാന ഇറങ്ങിയത്. റോഡിലൂടെ ജോലിക്ക് പോവുകയായിരുന്ന ചൂരണിയിലെ നരിവേലിൽ ഷിബു ആനയ്ക്ക് മുന്നിൽപ്പെട്ടു. ആനയെ കണ്ട് ഷിബു തിരിഞ്ഞ് ഓടിയെങ്കിലും ചിന്നം വിളിച്ചുകൊണ്ട് ആന ഷിബുവിന് പിന്നാലെ ഓടി. ആന തൊട്ടടുത്ത് എത്തി എന്ന് മനസിലായതോടെ ഷിബു റോഡിൽനിന്നും താഴ്ച്ചയിലേക്ക് ചാടി രക്ഷപ്പെടുകയായിരുന്നു. കൊക്കപോലുള്ള താഴ്ച്ചയിലേക്കാണ് ഷിബു ചാടിയതെങ്കിലും ചെറിയ പരിക്കുകളോടെ രക്ഷപ്പെട്ടു. തുടർന്ന് കുറ്റ്യാടി താലൂക്ക് ആശുപത്രിയിൽ ചികിത്സ തേടി. താഴെ പൂതംപാറയിൽ നിന്നും അധികം ദൂരെയല്ലാത്ത ചൂരണി താഴ്‌വാരത്ത് കൂടി ആനയെ കണ്ടതോടെ ഭീതിയിലാണ് നാട്ടുകാർ. കുറ്റ്യാടി ഫോറസ്റ്റ് അധികൃതരും, ഫോറസ്റ്റ് ആർആർടി ടീമും ചുരണിയിലെത്തി കാൽപ്പാടുകൾ പിന്തുടർന്ന് ആനയെ കാട്ടിലേക്ക് ഓടിച്ചു.

പെരുമണ്ണയിലെ രാത്രികാല പോത്ത് മോഷ്ടാവ് പിടിയിൽ

കോഴിക്കോട്: പെരുമണ്ണയിലും പരിസര പ്രദേശത്തുമായി രാത്രികാലങ്ങളിൽ പോത്തിനെ മോഷ്ടിക്കുന്ന യുവാവ് പിടിയിൽ. പൂവാട്ടുപറമ്പുള്ള നടുകാട്ടിൽ ഫാഹിദാണ് പോലീസിന്‍റെ പിടിയിലായത്. പെരുമണ്ണ വില്ലേജ് ഓഫീസിനു സമീപം നെരോത് താഴത്തുള്ള റഹീമിന്‍റെ ഉടമസ്ഥതയിലുളള ഒരോ ലക്ഷം രൂപ വിലമതിക്കുന്ന രണ്ടു പോത്തുകളാണ് മോഷണം പോയത്. ഫറോക്ക് അസിസ്റ്റന്‍റ് കമ്മീഷണർ സിദ്ധിക്കിന്‍റെ നേതൃത്വത്തിലുള്ള ക്രൈം സ്ക്വഡും, പന്തീരാങ്കാവ് ഇൻസ്പെക്ടർ ഷാജുവിന്‍റെ നേതൃത്തിലുള്ള പന്തീരാങ്കാവ് പോലീസും ചേർന്നാണ് പ്രതിയെ പിടികൂടിയത്. സംഭവ സ്ഥലത്തും സമീപ പ്രദേശങ്ങളിലുമായി ഒട്ടനവധി സിസിടിവി ക്യാമറകൾ പരിശോധിച്ചും, സമാനകുറ്റകൃത്യങ്ങളിൽ ഉൾപ്പെട്ടവരെ നിരീക്ഷിച്ചും നടത്തിയ അന്വേഷണത്തിനൊടുവിലാണ് പ്രതിയെ തിരിച്ചറിഞ്ഞത്. പ്രതിയുടെ പൂവാട്ടു പറമ്പുള്ള വീടിന് സമീപത്ത് വച്ചാണ് കസ്റ്റഡിയിലെടുത്തത്. പോത്തുകളെ ചെറൂപ്പ പ്രദേശത്തെ കശാപ്പ് ശാലകളിൽ വില്പന നടത്തിയതായി പോലീസിന് വിവരം ലഭിച്ചിട്ടുണ്ട്.

വേതന പാക്കേജ്: സര്‍ക്കാര്‍ കബളിപ്പിക്കുന്നുവെന്ന് റേഷന്‍ വ്യാപാരികള്‍

കോഴിക്കോട്: വേതന പാക്കേജിന്‍റെ പേരില്‍ സര്‍ക്കാര്‍ കബളിപ്പിക്കുന്നുവെന്ന് റേഷന്‍വ്യാപാരികള്‍.ന്യായമായ ആവശ്യങ്ങള്‍ ഉന്നയിച്ച് റേഷന്‍ വ്യാപാരികള്‍ സമരരംഗത്തേക്കു കടക്കുമ്പോള്‍ ആശ്വാസവാക്കുകളുമായി ഭക്ഷ്യമന്ത്രി പതിവായി റേഷന്‍ വ്യാപാരികളെ ആശ്വസിപ്പിച്ചു കബളിപ്പിക്കുന്നുവെന്നാണ് വ്യാപാരികളുടെ പരാതി. രണ്ട് വര്‍ഷം എംഎല്‍എ ആയവര്‍ക്ക് പോലും പെന്‍ഷന്‍ നല്‍കുന്ന കേരളത്തില്‍ 70 വയസുകഴിഞ്ഞ വ്യാപാരികള്‍ വിരമിക്കല്‍ ആനുകൂല്യങ്ങളൊന്നും ലഭിക്കാതെ പരിഞ്ഞുപോകേണ്ട അവസ്ഥയാണ്. 2018ല്‍ പ്രഥമ വേതന പാക്കേജ് അംഗീകാരവേളയില്‍ 18,000 രൂപ അടിസ്ഥാന വേതനമായി ഒരോ വ്യാപാരികള്‍ക്കും ലഭിക്കുന്നുണ്ടെന്ന തെറ്റായ സന്ദേശമാണ് പ്രചരിക്കപ്പെട്ടത്. വേതന പാക്കേജില്‍ 45 ക്വിന്‍റല്‍ ഭക്ഷ്യധാന്യങ്ങള്‍ വില്‍പ്പന നടത്തുന്ന റേഷന്‍ വ്യാപാരികള്‍ക്ക് ക്വിന്‍റലിന് 220 രൂപ തോതില്‍ 9900 കമ്മീഷനും 8100 രൂപ സപ്പോട്ടിങ്ങ് പേയ്‌മെന്‍റ് ഉള്‍പ്പെടെയാണ് 18000 രൂപ വേതനമായി ലഭിക്കുന്നത്. ഈ പാക്കേജിന്‍റെ പരിധിയിലുള്ള ആനുകൂല്യങ്ങള്‍ പോലും ലഭിക്കാത്ത മുവ്വായിരത്തോളം കടകളുടെ വരുമാനം പരമദയനീയമാണ്. 45 ക്വിന്‍റലിനു താഴെ വില്‍പ്പന നടത്തുന്ന വ്യാപാരികള്‍ക്ക് സപ്പോട്ടിംഗ് പേയ്‌മെന്‍റ് ഇല്ലാതെ കിന്‍റലിന് 220 രൂപ തോതിലുള്ള കമ്മീഷന്‍ മാത്രമാണ് ലഭിക്കുന്നത്. പ്രതിമാസം 6000 രൂപ മുതല്‍ 9899 രൂപ വരെ വേതനം ലഭിക്കുന്നവരാണ് ഇവര്‍. ഈ വേതനപാക്കേജ് അംഗീകരിച്ചവേളയില്‍ 14400 റേഷന്‍കടകള്‍ നമ്മുടെ സംസ്ഥാനത്ത് പ്രവര്‍ത്തിച്ചിരുന്നത് 13900ലും താഴെ കടകളായി ചുരുങ്ങി. ഇത്രയും കൂടുതല്‍ കടകള്‍ കൊഴിഞ്ഞു പോയത് കടുത്ത സാമ്പത്തിക പ്രതിസന്ധി അതിജീവിക്കാന്‍ കഴിയാത്തത് കൊണ്ടാണെന്ന് റീട്ടെയില്‍ റേഷന്‍ ഡീലേഴ്‌സ് അസോസിയേഷന്‍ സംസ്ഥാന ജനറല്‍ സെക്രട്ടറി ടി. മുഹമ്മദലി പറഞ്ഞു. പ്രതിമാസം 45 കിന്‍റലിനുമുകളില്‍ വില്‍പ്പന നടത്തുന്ന വ്യാപാരികള്‍ക്ക് ക്വിന്‍റലിന് 180 രൂപ തോതില്‍ കമ്മീഷന്‍ ലഭിക്കുന്നതാണ്.18000ത്തിനു മുകളില്‍ 30000 രൂപ വരെ കമ്മീഷന്‍ ലഭിക്കുന്നവരായി 8500 കടക്കാരുണ്ട്. ലൈസന്‍സിക്ക് പുറമേ ഫുള്‍ടൈം സെയില്‍സ്മാനും ഭക്ഷ്യധാന്യങ്ങള്‍ സ്റ്റോക്ക് ചെയ്യാന്‍ മിനിമം 300 സ്‌ക്വര്‍ഫീറ്റ് വിസ്തീര്‍ണ്ണമുള്ള കടമുറികളും എക്‌സ്പ്ലോസീവ് നിയമത്തിന്‍റെ പരിരക്ഷയുള്ള മണ്ണെണ്ണ സ്റ്റോക്ക് ചെയ്യുന്നതിന്ന് മറ്റൊരു അഡീഷണല്‍ കടറൂമും റേഷന്‍കടകളുടെ പ്രവര്‍ത്തനത്തിന് വേണം. ശരാശരി 30000ത്തിനു മുകളില്‍ വരുമാനം ലഭിക്കുന്ന കടകള്‍ക്ക് കൂടുതല്‍ ഭക്ഷ്യധാന്യങ്ങള്‍ സ്റ്റോക്ക് ചെയ്യുന്നതിന് ഒന്നിലധികം കടമുറികളും മണ്ണെണ്ണ സ്റ്റോക്ക് ചെയ്യുന്നതിന്ന് അഡീഷണല്‍ കടറൂമും ലൈസന്‍സിക്ക് പുറമെ ഒരു ഫുള്‍ടൈംസെയില്‍സ്മാനും പാര്‍ട്ട് ടൈമായി രണ്ടാമതൊരു ജിവനക്കാരനും അനിവാര്യമാണ്. ചിലയിടങ്ങളില്‍ ഒരു ഹെല്‍പ്പര്‍ കൂടി പ്രവര്‍ത്തിക്കുന്നുണ്ട്. മുഖ്യമന്ത്രിയുടെ നേതൃത്വത്തിലുള്ള ജനസമ്പര്‍ക്ക പരിപാടിയുമായി എത്തിയ മിക്ക കേന്ദ്രങ്ങളിലും വേതനപാക്കേജ് പരിഷ്‌കരണത്തിനു വേണ്ടിയുള്ള നിവേദനങ്ങള്‍ സമര്‍പ്പിച്ചിരുന്നു.എന്നാല്‍ നടപടിയൊന്നും ഉണ്ടായില്ല.

എയര്‍ഇന്ത്യ വിഷയത്തില്‍ കേന്ദ്ര ഇടപെടല്‍ ആവശ്യപ്പെട്ട് എം.കെ. രാഘവന്‍ എംപി

കോഴിക്കോട്: എയര്‍ ഇന്ത്യ എക്‌സ്പ്രസ് ശൈത്യകാല ഷെഡ്യൂളില്‍ സംസ്ഥാനത്തെ എഴുപത്തിയഞ്ചിലധികം ഫ്‌ളൈറ്റുകള്‍ റദ്ദാക്കിയത് വഴി കേരളത്തോട് കാട്ടുന്നത് കടുത്ത വെല്ലുവിളിയാണെന്ന് എം.കെ. രാഘവന്‍ എംപി. പ്രതിസന്ധി കാലത്ത് കമ്പനിയെ താങ്ങി നിര്‍ത്തിയ മലയാളി പ്രവാസികളെ അവഗണിക്കുന്നതില്‍ നിന്ന് ബന്ധപ്പെട്ടവര്‍ പിന്മാറണമെന്ന് ടാറ്റ എയര്‍ ഇന്ത്യ ചെയര്‍മാന്‍ എന്‍. ചന്ദ്രശേഖരന് നല്‍കിയ കത്തില്‍ എംപി ആവശ്യപ്പെട്ടു. രാജ്യത്ത് ഏറ്റവും കൂടുതല്‍ അന്താരാഷ്ട്ര യാത്രക്കാരുള്ള സംസ്ഥാനമാണ് കേരളം. രാജ്യത്തെ ഏക പ്രീമിയം എയര്‍ലൈന്‍ ആയ എയര്‍ ഇന്ത്യ കേരളത്തില്‍ നിന്ന് ഓപ്പറേറ്റ് ചെയ്യുന്നത് നാമ മാത്രമായ സര്‍വീസുകള്‍ ആണ്. ഇപ്പോള്‍ എയര്‍ ഇന്ത്യ എക്‌സ്പ്രസ് കൂടി സംസ്ഥാനത്ത് നിന്ന് വന്‍തോതില്‍ സര്‍വീസുകള്‍ പിന്‍വലിക്കുന്നുണ്ട്. വിഷയത്തില്‍ കേന്ദ്ര സര്‍ക്കാര്‍ ഇടപെടണമെന്നും സംസ്ഥാനത്തെ എംപിമാരുടെയും എയര്‍ലൈന്‍ കമ്പനിയുടെയും അടിയന്തിര യോഗം വിളിക്കണമെന്നും വ്യോമയാന മന്ത്രി റാം മോഹന്‍ നായിഡുവിനോട് ആവശ്യപ്പെട്ടതായും എം.കെ. രാഘവന്‍ എംപി അറിയിച്ചു.

മദ്യലഹരിയിൽ അടിപിടി; 48 കാരൻ കൊല്ലപ്പെട്ടു, രണ്ടുപേർ കസ്റ്റഡിയിൽ

തേഞ്ഞിപ്പലം: മദ്യലഹരിയിലുണ്ടായ അടിപിടിക്കിടെ തേഞ്ഞിപ്പലത്ത് 48 കാരൻ കൊല്ലപ്പെട്ടു. തേഞ്ഞിപ്പലം അരീപ്പാറക്കടുത്ത് മുല്ലശേരി മങ്ങാട്ടയിൽ പറന്പിൽ താമസിക്കുന്ന കളത്തുംകണ്ടി നാരായണന്‍റെ മകൻ രജീഷ് എന്ന ചെറുട്ടി (48) യാണ് കൊല്ലപ്പെട്ടത്. സംഭവത്തിൽ രണ്ട് പേരെ തേഞ്ഞിപ്പലം പോലീസ് കസ്റ്റഡിയിലെടുത്തു. കൃത്യത്തിൽ പങ്കുള്ളതായി സംശയിക്കുന്ന കള്ളിയിൽ കീഴ്ക്കുത്ത് വീട്ടിൽ അബൂബക്കർ (78), തേഞ്ഞിപ്പലം കടക്കാട്ടുപാറ സ്വദേശി പള്ളിയാളി രാമകൃഷ്ണൻ (53) എന്നിവരാണ് കസ്റ്റഡിയിലുള്ളത്. കോഴിക്കോട് മെഡിക്കൽ കോളജ് ആശുപത്രിയിൽ നടത്തിയ പോസ്റ്റ്മോർട്ടത്തിൽ ശ്വാസംമുട്ടിയാണ് രജീഷിന്‍റെ മരണമെന്നാണ് കണ്ടെത്തൽ. മുഖഭാഗത്തും ശരീരത്തിനുള്ളിലും പരിക്കുകളുള്ളതായും പോസ്റ്റ്മോർട്ടം റിപ്പോർട്ടിലുള്ളതായി പോലീസ് പറഞ്ഞു. അരീപ്പാറ കീഴ്ക്കുത്ത് കടവിന് സമീപം കള്ളിയിൽ അബൂബക്കറിന്‍റെ വീട്ടിൽ തിങ്കളാഴ്ച രാത്രിയിലാണ് സംഭവമുണ്ടായത്. രാത്രി 11 ന് ശേഷം രജീഷിന്‍റെ ബന്ധുക്കളെത്തി ചേളാരിയിലെ സ്വകാര്യ ആശുപത്രിയിൽ എത്തിക്കുന്നതിന് മുന്പ് തന്നെ മരണം സംഭവിച്ചിരുന്നതായാണ് വിവരം. തുടർന്ന് ചേളാരിയിൽ നിന്ന് കോഴിക്കോട് മെഡിക്കൽ കോളജ് ആശുപത്രിയിലേക്ക് മാറ്റുകയായിരുന്നു. സംഭവ സമയത്ത് അബൂബക്കറും രാമകൃഷ്ണനും ഒന്നിച്ചുണ്ടായിരുന്നു. രാത്രിയിൽ അബൂബക്കറിന്‍റെ വീട്ടിൽ നിന്ന് ബഹളം ഉണ്ടായതായും ദുരൂഹമായ സാഹചര്യമായിരുന്നു എന്നുമാണ് പരിസരവാസികളുടെ മൊഴി. പ്രവാസിയായിരുന്ന അബൂബക്കർ കുടുംബ പ്രശ്നങ്ങളെത്തുടർന്ന് തനിച്ചാണ് താമസം. ഭാര്യയും മൂന്ന് മക്കളും വാടകക്കാണ് താമസിക്കുന്നത്. തനിച്ച് താമസിക്കുന്ന അബൂബക്കറിന്‍റെ വീട്ടിൽ രാമകൃഷ്ണനും രജീഷും നിത്യസന്ദർശകരായിരുന്നു. ഇവർ അധിക ദിവസങ്ങളിലും ഒരുമിച്ച് മദ്യപിക്കാറുമുണ്ടായിരുന്നു. പ്രമീളയാണ് രജീഷിന്‍റെ ഭാര്യ. മക്കൾ: രമ്യഷ, അഭിരാമി. സഹോദരൻ: സജീഷ്.

കൊല്ലപ്പടി - ചാമോറ - വേനപ്പാറ റോഡ് തകർന്നു; തിരിഞ്ഞുനോക്കാതെ ഓമശേരി പഞ്ചായത്ത്

താമരശേരി: ഓമശേരി പഞ്ചായത്തിലെ കൊല്ലപ്പടി -ചാമോറ- വേനപ്പാറ റോഡ് പൊട്ടിപൊളിഞ്ഞു യാത്ര ദൃഷ്കരമായിട്ട് വർഷങ്ങൾ. പല തവണ റോഡിന്‍റെ നിജസ്ഥിതി പഞ്ചായത്ത് അധികൃതരെ ബോധ്യപ്പെടുത്തിയെങ്കിലും ഒരു നടപടിയും സ്വീകരിച്ചിട്ടില്ല. ഇപ്പോൾ‌ ഈ റോഡിലൂടെ കാൽനട യാത്ര പോലും പ്രയാസമാണ്. 85 വർഷത്തെ പഴക്കമുള്ള എട്ട് മീറ്റർ വീതിയുള്ള മലയോര മേഖലയിലെ ആദ്യകാലത്തുള്ള റോഡാണിത്. മുൻപ് ആറ് സ്വകാര്യ ബസുകളും ഒരു കെഎസ്ആർടിസി ബസും ഈ വഴി സർവീസ് നടത്തിയിരുന്നു. റോഡ് പൊട്ടിപ്പൊളിഞ്ഞ് താറുമാറായതോടെ ബസുകളുടെ ഓട്ടം നിലച്ചു. ഇപ്പോൾ നിലവിൽ ഒരു ബസ് മാത്രമാണ് സർവീസ് നടത്തുന്നത്. റോഡിന്‍റെ ശോചനീയാവസ്ഥ രൂക്ഷമായ സ്ഥിതിയ്ക്ക് ഓടിക്കൊണ്ടിരിക്കുന്ന ഏക ബസും ഓട്ടം നിർത്തുന്ന സ്ഥിതിയിലാണ്. നിലവിൽ ഇരുപതോളം സ്കൂൾ ബസുകൾ ഈ റോഡിലൂടെ ദുരിതയാത്ര നടത്തുന്നുണ്ട്. നിരവധി ആരാധനാലയങ്ങൾ, മൂന്ന് സ്കൂളുകൾ എന്നിവ ഈ പ്രദേശത്തുണ്ട്. എന്നിട്ടും പഞ്ചായത്ത് അധികാരികളോ ജനപ്രതിനിധികളോ യാതൊരുവിധ ഇടപെടലും നടത്താതെ ജനങ്ങളെ വഞ്ചിക്കുകയാണെന്ന ആരോപണമുയരുന്നുണ്ട്. നാലര കിലോമീറ്റർ ദൂരത്തിലാണ് റോഡ് പൊട്ടിപ്പൊളിഞ്ഞ് കിടക്കുന്നത്. കാലങ്ങളായി പല നിവേദനങ്ങളും അപേക്ഷകളും സ്ഥലം എംഎൽഎ, എംപി, പ്രാദേശിക ഭരണകൂട ജനപ്രതിനിധികൾ, വാർഡ് മെമ്പർമാർ എന്നിവർക്കെല്ലാം കൊടുത്തുവെങ്കിലും യാതൊരുവിധ പരിഗണനയും ലഭിച്ചിട്ടില്ല. റോഡിനോടുള്ള അധികാരികളുടെ അവഗണനയിൽ ജനകീയ കൂട്ടായ്മയിൽ പ്രതിഷേധത്തിന് തയാറെടുക്കുകയാണ് നാട്ടുകാർ. നിലവിൽ താമരശേരിയിൽ നിന്ന് തിരുവമ്പാടിയിലേക്ക് ബൈപാസാക്കി ഉപയോഗിക്കാൻ പറ്റുന്ന ഏറ്റവും ദൂരം കുറഞ്ഞ റോഡു കൂടിയാണിത്.

ജില്ലാ ക്ഷീരകർഷക അവാർഡ് തിളക്കത്തിൽ കൂരാച്ചുണ്ടിലെ യുവ കർഷകർ

കൂരാച്ചുണ്ട്: ക്ഷീരോത്പാദന മേഖലയിൽ മികവുറ്റ വിജയം കൈവരിച്ച് കൂരാച്ചുണ്ട് സ്വദേശികളായ യുവക്ഷീര കർഷകർ ജില്ലാ ക്ഷീരവികസന വകുപ്പിന്‍റെ അവാർഡിന് അർഹരായി. കൂരാച്ചുണ്ട് ക്ഷീരോത്പാദക സഹകരണ സംഘത്തിലെ അംഗങ്ങളായ കീർത്തി റാണി കരിമ്പനക്കുഴി മികച്ച വനിതാ ക്ഷീര കർഷകയായും ദീപു കിഴക്കേനകത്ത് യുവ ക്ഷീര കർഷകനായും തെരഞ്ഞെടുക്കപ്പെട്ടു. മേപ്പയ്യൂരിൽ വച്ച് നടന്ന ക്ഷീര വികസന വകുപ്പിന്‍റെ കോഴിക്കോട് ജില്ലാ ക്ഷീര സംഗമത്തിൽ ജില്ലാ പഞ്ചായത്ത് വൈസ് പ്രസിഡന്‍റ് പി. ഗവാസ് ദീപുവിനും, മിൽമ ചെയർമാൻ കെ.എസ്. മണി കീർത്തി റാണിക്കും പുരസ്‌കാരം നൽകി. ജില്ലയിലെ മികച്ച ക്ഷേമ നിധി അംഗത്തിനുള്ള കർഷക അവാർഡും കീർത്തി റാണിക്കാണ് ലഭിച്ചത്. 20 വർഷത്തിലധികമായി ക്ഷീര രംഗത്ത് സജീവമായി പ്രവർത്തിച്ചുവരുന്ന കർഷകയായ കീർത്തി റാണി പതിനൊന്ന് വർഷത്തോളമായി ഫാം നടത്തി വരികയാണ്. കൂരാച്ചുണ്ട് ക്ഷീരോല്പാദക സൊസൈറ്റിയക്ക് ഇവർ പ്രതിദിനം 300 ലിറ്ററിലധികം പാൽ അളക്കുന്നുണ്ട്. 2019 മുതൽ ജില്ലയിലെ മികച്ച ക്ഷീര കർഷകയ്ക്കുള്ള പുരസ്‌കാര ജേതാവുമാണ്. ജഴ്സി എച്ച്എഫ് വിഭാഗത്തിൽപ്പെട്ട 21 പശുക്കളും രണ്ട് എരുമകളുമുണ്ട്. ഭർത്താവ് സിജു കുര്യൻ. മക്കൾ: ജാക്സ് വർഗീസ്, ജെറിൽ വർഗീസ് എന്നിവരുടെ പ്രോത്സാഹനവും സഹായവുമാണ് കരുത്തെന്ന് കീർത്തി പറയുന്നു. 2020-ലാണ് യുവ ക്ഷീര കർഷകനായ ദീപു കിഴക്കേനകത്ത് ഫാമിന് തുടക്കം കുറിക്കുന്നത്. ക്ഷീര മേഖലയോടുള്ള താത്പര്യത്തെ തുടർന്ന് ദുബായ് എമിറേറ്റ്സ് എൻബിഡി ബാങ്കിൽ ചീഫ് കാഷ്യറായി ജോലി ചെയ്തുവന്ന ദീപു ജോലി ഉപേക്ഷിച്ചുകൊണ്ടാണ് ചെറിയതോതിൽ ഫാമിന് തുടക്കമിട്ടത്. ഇപ്പോൾ പതിനഞ്ച് കറവപശുക്കളും, കിടാങ്ങൾ, എരുമ ഉൾപ്പടെയുള്ള ഫാമായി മാറിക്കഴിഞ്ഞു. എച്എഫ് ഇനം പശുക്കളാണ് കൂടുതലായി ഫാമിലുള്ളത്. ദിവസേന 200 ലിറ്റർ പാൽ കൂരാച്ചുണ്ട് ക്ഷീരോത്പാദക സഹകരണ സംഘത്തിൽ അളന്ന് വരുന്നുണ്ട്. യന്ത്ര സഹായത്തോടെയാണ് കറവ നടത്തുന്നത്. കൂരാച്ചുണ്ട് വട്ടച്ചിറ കിഴക്കേനകത്ത് ഏബ്രഹാം- വത്സ ദമ്പതിമാരുടെ മകനാണ് ദീപു.

വയോധികയുടെ സ്വർണമാല കവർന്നു

ചക്കിട്ടപാറ: അസുഖ ബാധിതയായ വയോധികയെ കബളിപ്പിച്ച് സ്വർണ മാല കവർന്നതായി ആക്ഷേപം. ചക്കിട്ടപാറ പഞ്ചായത്തിലെ കൊത്തിയപാറ - മുടിയഞ്ചാൽ റോഡ് ഭാഗത്ത്‌ ഇന്നലെ രാവിലെ ഒമ്പതോടെയാണ് സംഭവം. കടയിൽ പോയി വരികയായിരുന്ന വയോധികയുടെ കഴുത്തിലണിഞ്ഞ ഒന്നേ കാൽ പവൻ വരുന്ന സ്വർണമാലയാണ് പരിചയം നടിച്ച് വഴി പോക്കൻ കവർന്നത്. ഇയാൾ വയോധികയോട്‌ പണം ചോദിച്ചു. ഇല്ലെന്നറിയിച്ചപ്പോൾ മാല ആവശ്യപ്പെടുകയായിരുന്നു. ഇതിനു ശേഷമാണ് മാല കാണാതായത്. വയോധികക്ക് പ്രായത്തിന്‍റെ ബുദ്ധിമുട്ടുണ്ട്. സംഭവത്തിൽ പെരുവണ്ണാമൂഴി പോലീസ് അന്വേഷണം തുടങ്ങിയിട്ടുണ്ട്.

പേരാമ്പ്ര ഉപജില്ലാ കായിക മേള ഏഴ്, എട്ട് തീയതികളിൽ കല്ലാനോട്

കൂരാച്ചുണ്ട്: പേരാമ്പ്ര ഉപജില്ലാ കായികമേള ഏഴ്, എട്ട് തിയതികളിൽ കല്ലാനോട് സെന്‍റ് മേരീസ് ഹയർ സെക്കൻഡറി സ്കൂൾ ജൂബിലി സ്റ്റേഡിയത്തിൽ നടക്കും. കായിക മേളയുടെ സ്വാഗത സംഘം രൂപീകരണ യോഗം കൂരാച്ചുണ്ട് പഞ്ചായത്ത് വൈസ് പ്രസിഡന്‍റ് വിൻസി തോമസ് നിർവഹിച്ചു. സ്കൂൾ മാനേജർ ഫാ. ജിനോ ചുണ്ടയിൽ അധ്യക്ഷത വഹിച്ചു. പേരാമ്പ്ര ഉപജില്ല എഇഒ കെ.വി. പ്രമോദ് വിശദീകരണവും മുഖ്യപ്രഭാഷണവും നടത്തി. കൂരാച്ചുണ്ട് പഞ്ചായത്ത് അംഗങ്ങളായ സിമിലി ബിജു, സണ്ണി പുതിയകുന്നേൽ, പ്രിൻസിപ്പൽ സജി കരോട്ട്, എച്ച്എം ഫോറം കൺവീനർ സജീവൻ, പിടിഎ പ്രസിഡന്‍റ് ഷാജി വലിയവീട്ടിൽ, എഎസ്ഐ രാജേഷ്, കല്ലാനോട് ഹൈസ്കൂൾ പ്രധാനാധ്യാപകൻ കെ.സി. ബിജു എന്നിവർ പ്രസംഗിച്ചു. പഞ്ചായത്ത് പ്രസിഡന്‍റ് ഒ.കെ. അമ്മദ് ചെയർമാനായും, കല്ലാനോട് സെന്‍റ് മേരീസ് ഹയർ സെക്കൻഡറി സ്കൂൾ പ്രിൻസിപ്പൽ സജി കരോട്ട് ജനറൽ കൺവീനറായും വിവിധ കമ്മിറ്റികൾ രൂപീകരിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]