ADVERTISEMENT

ADVERTISEMENT

മധ്യവയസ്കൻ ട്രെയിൻ തട്ടി മരിച്ചു

പഴയങ്ങാടി: ട്രെയിൻ തട്ടി മധ്യവയസ്കൻ മരിച്ചു. ചെറുതാഴം ചുമടുതാങ്ങി സ്വദേശി എം.കെ. അബ്ദുൾ നാസറാണ് (56) മരിച്ചത്.

പഴയങ്ങാടി റെയിൽവേ സ്റ്റേഷന് സമീപം ഞായറാഴ്ച രാത്രി ഒന്പതോടെയാണ് അപകടം. ഭാര്യ: റുബീന. മക്കൾ: ആലിയ, ഷാസിയ, ഫാഹിം. മരുമക്കൾ: റിയാസ് (കാനഡ), അബ്ദുള്ള (ചുമടുതാങ്ങി).

ADVERTISEMENT

ഐസിഎസ്ഇ, ഐഎസ്‌സി പരീക്ഷകളിൽ സെന്‍റ് ഫ്രാൻസിസിന് വിജയത്തിളക്കം

തോട്ടട: ഐസിഎസ്ഇ (ക്ലാസ്-10), ഐഎസ്‌സി ( ക്ലാസ്-12) പരീക്ഷകളിൽ തോട്ടട സെന്‍റ് ഫ്രാൻസിസ് സ്കൂളിന് തിളക്കമാർന്ന വിജയം. പരീക്ഷ എഴുതിയ മുഴുവൻ വിദ്യാർഥികളും ഉയർന്ന വിജയം കരസ്ഥമാക്കി. ഐസിഎസ്ഇ പരീക്ഷയിൽ പി.പി. അംന, കെ. എം. ദേവിക, എക്‌ത അജയ് എന്നിവർ ഉന്നത വിജയം നേടി. ഐഎസ്‌സി പരീക്ഷയിൽ വി. കിഷൻ ഒന്നാം സ്ഥാനവും നയൻ സുധീർ രണ്ടാം സ്ഥാനവും നേടി. ഉജ്വല വിജയം നേടിയ മുഴുവൻ വിദ്യാർഥികളെയും മാനേജ്മെന്‍റ് അഭിനന്ദിച്ചു.

ചുഴലിക്കാറ്റിൽ കെട്ടിടങ്ങൾക്ക് നാശനഷ്ടം, ഏക്കറുകണക്കിന് കൃഷി നാശവും

ഇരിട്ടി: ചൊവ്വാഴ്ച സന്ധ്യയോടെശക്തമായ മഴക്കൊപ്പം വീശിയടിച്ച ചുഴലിക്കാറ്റിൽ ഇരിട്ടി മേഖലയിൽ കോടികളുടെ നാശനഷ്ടം. ഇരിട്ടി നഗരസഭയിലെ ഇരിട്ടി ടൗൺ, പയഞ്ചേരി, അത്തിത്തട്ട് വാർഡുകളിലും പായം പഞ്ചായത്തിലെ എട്ട്, ഒന്പത്, പത്ത് വാർഡുകളിലുമാണ് വ്യാപകനാശനഷ്ടമുണ്ടായത്. കാറ്റിൽ മരം വീണും, മേൽക്കൂരയിലെ ഓടുകളും റൂഫിംഗ് ഷീറ്റുകളും പറന്നുപോയും നിരവധി വീടുകൾക്ക് കേടുപാടുകൾ സംഭവിച്ചു. മരങ്ങൾ വീണ് പുത്തൻ കാറുൾപ്പടെയുള്ള വാഹനങ്ങൾ തകർന്നു. ഏക്കറുകണക്കിന് സ്ഥലത്തെ വാഴകൾ, റബർ, കശുമാവ്, മാവ്, തെങ്ങ്, കവുങ്ങ്, പ്ലാവ് തുടങ്ങിയ വിളകൾ നശിച്ചു. നിരവധി വൈദ്യുതി തൂണുകൾ തകർന്നു. വൈദ്യുതി ലൈനുകളും, കേബിളുകളും, വീടുകളിലും റോഡരികുകളിലും മറ്റും നിർത്തിയിട്ടിരുന്ന കാറുകൾ അടക്കമുള്ള വാഹനങ്ങൾക്കും കേടുപാടുകൾ സംഭവിച്ചു. ഇരിട്ടി നഗരസഭയിൽപ്പെട്ട പയഞ്ചേരി, മുടച്ചാൽ, അത്തിത്തട്ട്, ഊവാപ്പള്ളി എന്നിവിടങ്ങളിലും വ്യാപക നാശ നഷ്ടമാണ് ഉണ്ടായത്. പയഞ്ചേരിയിൽ റോഡരികിലെ നിരവധി മരങ്ങൾ പൊട്ടിവീണു. വൈദ്യുതി ബന്ധം താറുമാറായി. മുടച്ചാലിൽ എളമ്പിലാൻ സുധീറിന്‍റെ വീടിന്‍റെ മേൽക്കൂരയിലെ അഞ്ഞൂറിലധികം ഓടുകൾ കാറ്റിൽ പറന്നു പോയും ഇളകി വീണും നശിച്ചു. മുറ്റത്തു നിർത്തിയിട്ട രജിസ്‌ട്രേഷൻ കഴിയാത്ത പുത്തൻ കാറിനും കേടുപാടുകൾ സംഭവിച്ചു. തൊട്ടടുത്തുതന്നെയുള്ള ശ്രീനിലയത്തിൽ ബൈജുവിന്‍റെ വീടിനോട് ചേർന്ന കൂറ്റൻ പ്ലാവ് വീട്ടു മുറ്റത്തേക്ക് കടപുഴകി വീണു. ചില്ലകൾ തട്ടി വീടിന് കേടുപാടുകൾ സംഭവിച്ചു. ഊവപ്പള്ളിയിൽ പാലമുറ്റത്ത് പ്രകാശ് കുമാറിന്‍റെ വീട്ടു മുറ്റത്ത് നിർത്തിയിട്ടിരുന്ന കാർ പ്ലാവ് കടപുഴകിവീണതിനെ തുടർന്ന് തകർന്നു. വീടിന്‍റെ മേൽക്കൂരക്കും നാശം സംഭവിച്ചു. മീത്തലെ വീട്ടിൽ മനോജ്കുമാറിന്‍റെ വീട് തെങ്ങ് വീണു തകർന്നു. അത്തിത്തട്ടിൽ സി.കെ. കുരുവിള, ആർ.കെ. രമേശൻ, അനൂപ് പടിപ്പുരക്കൽ, ധരൻ ശിവ്ദാസ്എന്നിവരുടെ വീടുകളുടെ മേൽക്കൂരയിലെ ആസ്ബസ്റ്റോസ് ഷീറ്റുകൾ കാറ്റിൽ പറന്നുപോയി. അതിത്തട്ടിൽ തന്നെ നിരവധിപേരുടെ നൂറുകണക്കിന് റബർ മരങ്ങൾ കാറ്റിൽ വീണു നശിച്ചു. നിരവധി വൈദ്യുതി തൂണുകളും മരം വീണ് നശിച്ചു. ചീങ്ങാക്കുണ്ടത്തെ ഇലവുങ്കൽ ബേബിയുടെ മുകൾ നിലയിൽ സ്ഥാപിച്ച റൂഫിംഗ് ഷീറ്റുകൾ മുഴുവൻ പാറിപ്പോയി. വീടിനകത്തെ കട്ടിൽ, കിടക്ക, മറ്റു വീട്ടുപകരണങ്ങൾ എന്നിവക്ക് കേടുപാടുകൾ സംഭവിച്ചു. കരിയാലിലെ ഇലവുങ്കൽ ബിനോയി, ഇലവുങ്കൽ ബേബി എന്നിവരുടെ വീടുകളുടെ മേൽക്കൂരയും കാറ്റിലും മരങ്ങൾ പൊട്ടിവീണും നശിച്ചു. എരുമത്തടത്തെ പുത്തൻപറമ്പിൽ രാജീവന്‍റെ വീടിനും നാശമുണ്ടായി. കരിയാലിലെ തടത്തിമാക്കൽ തോമസിന്‍റെ വീടിനു മേൽ പ്ലാവ് വീണ് തകർന്നു. വീട്ടിലുണ്ടായിരുന്നവർ പരിക്കേൽക്കാതെ രക്ഷപ്പെട്ടു. പായം ഗവ. യുപി സ്‌കൂളിന് സമീപം നിതാ ഷാജിയുടെ വീടിനുമുകളിലും മരം കടപുഴകി വീണു. കാറ്റ് നാശം വിതച്ച മേഖലകൾ സണ്ണി ജോസഫ് എംഎൽഎ, പായം പഞ്ചായത്ത് വൈസ് പ്രസിഡന്‍റ് വിനോദ്കുമാർ, കരിയാൽ പള്ളി വികാരി ഫാ. മാർട്ടിൻ പറപ്പള്ളിയാത്ത്, രാഷ്‌ട്രീയ പാർട്ടി നേതാക്കളായ പ്രിജേഷ് അളോറ, വി.എം. പ്രശോഭ് എന്നിവർ സന്ദർശിച്ചു. വിവിധ വകുപ്പുകളും നഷ്ടത്തിന്‍റെ കണക്കെടുത്തു വരികയാണ്.

ഓമ്നി വാൻ നിയന്ത്രണം വിട്ട് കാറിലും ബൈക്കിലും ഇടിച്ചു; രണ്ടുപേർക്കു പരിക്ക്

മട്ടന്നൂർ: ചാവശേരിയിൽ ഓമ്നി വാൻ നിയന്ത്രണം വിട്ട് കാറിലും ബൈക്കിലും ഇടിച്ച് അപകടം. അപകടത്തിൽ രണ്ടുപേർക്കു പരിക്കേറ്റു. ബുധനാഴ്ച ഉച്ചയ്ക്ക് ഒന്നോടെ ചാവശേരി ഗവ. ഹയർ സെക്കൻഡറി സ്കൂളിന് സമീപം മണ്ണം പഴശി ക്ഷേത്രത്തിന് മുന്നിലായിരുന്നു അപകടം. മട്ടന്നൂർ ഭാഗത്ത് നിന്ന് ഇരിട്ടി ഭാഗത്തേക്ക് പോകുകയായിരുന്ന കർണാടക രജിസ്ട്രേഷൻ ഓമ്നി വാൻ നിയന്ത്രണം വിട്ടു റോഡരികിൽ നിർത്തിയ ബൈക്കിലും കാറിലും ഇടിക്കുകയായിരുന്നു. യാത്രികൻ ബൈക്കിൽ കയറാനുള്ള ശ്രമത്തിനിടയിലായിരുന്നു ഓമ്നി വാൻ ബൈക്കിലിടിച്ചത്. ബൈക്കിന് മുകളിൽ കയറിയാണ് ഓമ്നി വാൻ നിന്നത്. ബൈക്ക് യാത്രികൻ തെറിച്ച് സമീപത്തെ വീടിന്‍റെ ഗേറ്റിന് മുന്നിലാണ് വീണത്. ബൈക്ക് യാത്രികനും ഓമ്നി വാൻ യാത്രികനുമാണ് പരിക്കേറ്റത്. ഇവരെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. വിവരം അറിഞ്ഞ് മട്ടന്നൂർ പോലീസ് സ്ഥലത്തെത്തി വാഹനങ്ങൾ സ്റ്റേഷൻ കോമ്പൗണ്ടിലേക്ക് മാറ്റി.

ഐഎസ്‌സി, ഐസിഎസ്ഇ പരീക്ഷകളിൽ ശ്രീപുരം സ്കൂളിന് മികച്ച വിജയം

കണ്ണൂർ: ഐഎസ്‌സി, ഐസിഎസ്ഇ പരീക്ഷയിൽ ശ്രീപുരം ഇംഗ്ലീഷ് മീഡിയം സ്കൂളിന് മികച്ച വിജയം. ഐഎസ്‌സി വിഭാഗത്തിൽ സയൻസ്, കൊമേഴ്സ് വിഭാഗങ്ങളിൽ 101 വിദ്യാർഥികളാണ് പരീക്ഷ എഴുതിയത്. സയൻസ് ബാച്ചിൽ ഇ.ഐ. ഹൃദ്യ (99 ശതമാനം), എ.സി. ആദിത്യ (96.5 ശതമാനം), നിയ സോണി (95.75 ശതമാനം) എന്നിവർ ആദ്യ മൂന്ന് സ്ഥാനങ്ങൾ നേടി. കൊമേഴ്സ് ബാച്ചിൽ കെ.പി. ഫാത്തിമ സുഹ (94.5 ശതമാനം), കെ. സാനിയ (92.75 ശതമാനം), ആദ്യ സതീഷ് (92.25 ശതമാനം) എന്നിവർ ആദ്യ മൂന്ന് സ്ഥാനങ്ങൾ നേടി. സയൻസ് ബാച്ചിൽ 71 വിദ്യാർഥികൾ പരീക്ഷ എഴുതിയതിൽ 16 പേർ 90 ശതമാനത്തിൽ കൂ‌ടുതൽ മാർക്ക് നേടി. 45 ഡിസ്റ്റിംഗഷനുകളും 18 ഫസ്റ്റ് ക്ലാസുകളും എട്ട് സെക്കൻഡ് ക്ലാസുകളും ലഭിച്ചു. കൊമേഴ്സ് ബാച്ചിൽ 30 വിദ്യാർഥികൾ പരീക്ഷ എഴുതിയതിൽ നാലുപേർ 90 ശതമാനത്തിൽ കൂടുതൽ മാർക്ക് നേടി. 15 പേർക്ക് ഡിസ്റ്റിംഗ്ഷൻ ലഭിച്ചു. ഒന്പത് ഫസ്റ്റ്ക്ലാസുകളും ആറു സെക്കൻഡ് ക്ലാസുകളും വിദ്യാർഥികൾ നേടി. ഐസിഎസ്ഇ വിഭാഗത്തിൽ 147 വിദ്യാർഥികളാണ് ആകെ പരീക്ഷ എഴുതിയത്. ഇ. അമേയ രാജീവ് (97.2 ശതമാനം), സിനറ സന്ദീപ് (96 ശതമാനം), ദിയ പുതിയവീട്ടിൽ (96 ശതമാനം), കെ. നിഷിൻ ശ്രീഷൻ (95.6 ശതമാനം) എന്നിവർ ആദ്യ മൂന്ന് സ്ഥാനങ്ങൾ നേടി. പരീക്ഷ എഴുതിയതിൽ 83 പേർ ഡിസ്റ്റിംഗ്ഷൻ നേടിയപ്പോൾ 60 പേർ ഫസ്റ്റ്ക്ലാസുകളും നാലുപേർ സെക്കൻഡ് ക്ലാസും നേടി വിജയിച്ചു. സ്കൂൾ പേട്രൺ കോട്ടയം അതിരൂപത സഹായ മെത്രാൻ ജോസഫ് പണ്ടാരശേരിൽ, മാനേജർ ഫാ. ജോയ് കട്ടിയാങ്കൽ, പ്രിൻസിപ്പൽ സിസ്റ്റർ അയോണ സൈമൺ എന്നിവർ കുട്ടികളെയും അധ്യാപകരെയും അഭിനന്ദിച്ചു.

വെള്ളം കൊടുത്തില്ലെങ്കിലും ബില്ല് നൽകി വാട്ടർ അഥോറിറ്റി

കണിച്ചാർ: കണിച്ചാർ പഞ്ചായത്തിൽ അണുങ്ങോട് പ്രദേശത്ത് ജലജീവൻ മിഷന്‍റെ ഭാഗമായുള്ള കുടിവെള്ള വിതരണ പൈപ്പിലൂടെ വെള്ളമെത്തിയില്ലെങ്കിലും കണ്ണു തള്ളിക്കുന്ന ബില്ല് നൽകി വാട്ടർ അഥോറിറ്റി. ജൽ ജീവൻ മിഷന്‍റെ കാളികയം കുടിവെള്ള പദ്ധതിയിൽ നിന്നാണ് കുടിവെള്ള വിതരണത്തിനായി അണുങ്ങളോട് പ്രദേശത്തേക്ക് പൈപ്പിടുകയും വീടുകളിലേക്ക് കണക്‌ഷൻ നൽകുകയും ചെയ്തത്. കേളകം കൊട്ടിയൂർ കാണിച്ചാർ എന്നീ മൂന്ന് പഞ്ചായത്തുകളിലേക്കാണ് കാളികയം കുടിവെള്ള പദ്ധതി. കണിച്ചാർ പഞ്ചായത്തിന്‍റെ വിവിധ മേഖലകളിൽ പൈപ്പിടൽ പൂർത്തിയാക്കി ട്രയൽ റൺ നടത്തി വരികയാണ്. ചുരുക്കം ചില വീടുകളിൽ മാത്രമാണ് കുടിവെള്ളമെത്തിയത്. ആണുങ്ങളോട് പ്രദേശത്ത് ഒരു വീട്ടിൽ പോലും കുടിവെള്ളമെത്തിയിട്ടുമില്ല. എങ്കിലും ഓരോ കുടുംബത്തിനും 222 മുതൽ 770 രൂപ വരെയുള്ള ബില്ലാണ് ലഭിച്ചിരിക്കുന്നത്. ഫോണിലേക്ക് എസ്എംഎസ് വഴിയാണ് ബിൽ തുക അറിയിച്ചത്. ബിൽ ലഭിച്ചതിനെ തുടർന്ന് വാട്ടർ അഥോറിറ്റിയിൽ അന്വേഷിച്ചപ്പോൾ കൃത്യമായ മറുപടി നൽകാൻ ഉദ്യോഗസ്ഥർക്കും കഴിയുന്നില്ല.ജല ഉപയോഗത്തിന്‍റെ മീറ്റർ റീഡിംഗ് എടുക്കാനായി പോലും ആരും എത്തിയിട്ടില്ലെന്നാണ് വീട്ടുകാർ പറയുന്നത്. വിതരണം ചെയ്യുന്ന വെള്ളത്തിന്‍റെ വില എത്രയാണെന്നോ മീറ്റർ വാടക എത്രയാണെന്നോ, ഫിറ്റിംഗ് ചാർജ് പൈപ്പ് വില തുടങ്ങിയത് എത്രയാണെന്നോ ഒരു ധാരണയും ജനങ്ങൾക്ക് നൽകാതെയാണ് വീടുകളിലേക്ക് കണക്‌ഷൻ നൽകിയത്. സൗജന്യമാണെന്ന് പ്രതീക്ഷിച്ചാണ് പലരും കണക്‌ഷൻ എടുത്തത്. ടാപ്പ് തുറന്നാൽ കാറ്റു മാത്രം വരുന്പോഴാണ് വെള്ളക്കരം അടയ്ക്കണമെന്ന അറിയിപ്പും ബിൽതുകയും ലഭിച്ചിരിക്കുന്നത്. -ജോയ് ചിന്താർമണി വീട്ടുടമസ്ഥൻ കണിച്ചാർ പഞ്ചായത്തിലെ ആണുങ്ങട് പ്രദേശവാസികൾ ഇത്തരത്തിൽ ഒരു പ്രശ്നം ഉന്നയിച്ചിട്ടുണ്ട്. എന്തുകൊണ്ടാണ് ഉപയോഗിക്കാതെ ബിൽ വരുന്നതെന്ന് കൃത്യമായി അറിയില്ല. നിലവിൽ ജലജീവൻ മിഷൻ നടപ്പിലാക്കുന്ന പ്രോജക്ട് ടീമിന്‍റെ കീഴിലാണ് ഈ പദ്ധതി. വാട്ടർ അഥോറ്റിക്ക് കൈമാറിയിട്ടില്ല. എന്നിരുന്നാലും കുടിവെള്ളമെത്താതെ ബില്ല് വന്നതിനെക്കുറിച്ച് അന്വേഷിക്കും. -സംഗീത, അസി എക്സിക്യൂട്ടീവ് എൻജിനിയർ വാട്ടർ അഥോറിറ്റി

കുളമ്പ് രോഗ നിയന്ത്രണ പദ്ധതി: ആറാംഘട്ടം കുത്തിവയ്പ് നാളെ മുതൽ

കണ്ണൂർ: ദേശീയ ജന്തുരോഗ നിയന്ത്രണ പദ്ധതിയുടെ ഭാഗമായി സംസ്ഥാന സർക്കാർ മൃഗസംര ക്ഷണ വകുപ്പിന്‍റെ നേതൃത്വത്തിൽ കന്നുകാലികൾക്കുള്ള ആറാംഘട്ട കുളമ്പ് രോഗനിയന്ത്രണ പ്രതിരോധ കുത്തിവയ്പ് രണ്ടുമുതൽ ആരംഭിക്കും. ജില്ലാതല ഉദ്ഘാടനം ജില്ലാ വെറ്ററിനറി കേന്ദ്രത്തിൽ രണ്ടിന് രാവിലെ 11ന് ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരി നിർവഹിക്കുമെന്ന് ജില്ലാ മൃഗസംരക്ഷണ ഓഫീസർ ഡോ. ഒ.എം. അജിത പത്രസമ്മേളനത്തിൽ അറിയിച്ചു. നാളെ മുതൽ 23 വരെ നടക്കുന്ന പരിപാടിയിൽ നാല് മാസത്തിൽ കൂടുതൽ പ്രായമുള്ള പശു/എരുമകൾക്ക് വാക്സിനേറ്റർമാർ വീടുകളിലെത്തി സൗജന്യ കുത്തിവയ്പ് നടത്തും. കുളമ്പ് രോഗ നിയന്ത്രണ പദ്ധതി സംസ്ഥാനത്ത് നിർബന്ധമാക്കിയിട്ടുണ്ട്. ലൈസൻസുകൾ, വിവിധ സർക്കാർ ആനുകൂല്യങ്ങൾ എന്നിവ ലഭിക്കുന്നതിന് കുത്തിവയ്പ് നിർബന്ധമാണ്. പ്രതിരോധ കുത്തിവയ്പുകൊണ്ട് അപകടങ്ങൾ സംഭവിച്ചാലുള്ള നഷ്ടപരിഹാരം സർക്കാർ നൽകും. പത്രസമ്മേളനത്തിൽ ഡോ. കെ.വി. സന്തോഷ്, ഡോ. കെ.എസ്. ജയശ്രീ‌, ഡോ. നിതിന കെ. ബാബുരാജ്, ഡോ. പദ്മരാജ് എന്നിവർ പങ്കെടുത്തു.

സംസ്ഥാന ജേർണലിസ്റ്റ് വോളി ലീഗ്: കണ്ണൂര്‍ ടീമിന്‍റെ ജേഴ്സി പ്രകാശനം ചെയ്തു

കണ്ണൂർ: കണ്ണൂർ പ്രസ് ക്ലബ് സംഘടിപ്പിക്കുന്ന തുളസി ഭാസ്‌കരന്‍ മെമ്മോറിയല്‍ എവര്‍റോളിംഗ് ട്രോഫിക്ക് വേണ്ടിയുള്ള ആറാമത് സംസ്ഥാന ജേർണലിസ്റ്റ് വോളി ലീഗില്‍ മത്സരിക്കുന്ന കണ്ണൂർ ടീമിന്‍റെ ജേഴ്സി പ്രകാശനം പ്രസ് ക്ലബിൽ നടന്നു. കിംസ് ശ്രീചന്ദ് ഹോസ്പിറ്റൽ കാർഡിയോളജി വിഭാഗം മേധാവി ഡോ. പി. രവീന്ദ്രൻ ജേഴ്സി പ്രകാശനം നിർവഹിച്ചു. കണ്ണൂർ ടീമിന്‍റെ ജേഴ്സി പ്രസ് ക്ലബ് കോച്ച് ഹേമന്ദ് കുമാറും ഒഫീഷ്യൽ ജേഴ്സി ടീം മാനേജർ പി. സന്ദീപും ഏറ്റുവാങ്ങി. ചടങ്ങില്‍ പ്രസ് ക്ലബ് പ്രസിഡന്‍റ് സി. സുനിൽകുമാർ അധ്യക്ഷനായിരുന്നു. കബീർ കണ്ണാടിപ്പറമ്പ്, പ്രശാന്ത് പുത്തലത്ത്, ഷമീർ ഊർപ്പള്ളി, ജയദീപ് ചന്ദ്രൻ, കെ. സതീശൻ എന്നിവർ പ്രസംഗിച്ചു.

അശാസ്ത്രീയ മാലിന്യ സംസ്കരണം; 30000 രൂപ പിഴ ചുമത്തി

തളിപ്പറമ്പ്: ജില്ലാ എൻഫോഴ്‌സ്‌മെന്‍റ് സ്‌ക്വാഡ് പട്ടുവം പഞ്ചായത്ത് പരിധിയിൽ നടത്തിയ പരിശോധനയിൽ അശാസ്ത്രീയമായി മാലിന്യ സംസ്കരിച്ചതിന് മൂന്ന് കേസുകളിലായി 30,000 രൂപ പിഴ ചുമത്തി. അരിയിൽ പ്രവർത്തിച്ചു വരുന്ന സീൽ വുഡ് ഇൻഡസ്ട്രീസിൽ സ്‌ക്വാഡ് നടത്തിയ പരിശോധനയിൽ സ്ഥാപനത്തിലെ തൊഴിലാളികൾ താമസിക്കുന്ന ക്വാട്ടേഴ്‌സിനു മുൻവശത്തു പലയിടങ്ങളിലായി പ്ലാസ്റ്റിക് ഉൾപ്പെടെയുള്ള മാലിന്യങ്ങൾ കൂട്ടിയിട്ട് കത്തിച്ചത് ശ്രദ്ധയിൽപെട്ടത്. സ്ഥാപനത്തിന്‍റെ പല ഭാഗങ്ങളിൽ നിന്നുള്ള മലിനജലം തുറസായി ഒഴുക്കി വിടുന്നതായും ഭക്ഷണാ വശിഷ്ടങ്ങൾ ഉൾപ്പെടെയുള്ള ജൈവ മാലിന്യങ്ങൾ തുറസായി കൂട്ടിയിട്ടിരിക്കുന്നതായും കണ്ടെത്തി. മാലിന്യങ്ങൾ ഉടൻ തന്നെ എടുത്തുമാറ്റാനും ദ്രവ മാലിന്യങ്ങൾ ഉൾപ്പടെയുള്ളവ ശാസ്ത്രീയമായി സംസ്‌കരിക്കാനും സ്ഥാപന ഉടമയ്ക്ക് സ്‌ക്വാഡ് നിർദേശം നല്കുകയും 20000 രൂപ പിഴ ചുമത്തുകയും ചെയ്തു. പറപ്പൂലിൽ പ്രവർത്തിച്ചു വരുന്ന ഹോട്ടൽ ന്യൂ ലാൻഡിന്‍റെ മലിനജല ടാങ്ക് ലീക്ക് ചെയ്തു വെള്ളം തുറസായി കെട്ടി കിടന്നു പ്രദേശത്ത് ദുർഗന്ധം പരത്തുന്ന അവസ്ഥ പരിശോധനയിൽ കണ്ടെത്തിയതിനെ തുടർന്ന് ഹോട്ടലിന് 5000 രൂപ പിഴ ചുമത്തി. മുള്ളൂൽ-വെള്ളിക്കീൽ റോഡിൽ പൊതുസ്ഥലത്തു റോഡിനു സമീപം മാലിന്യം തള്ളിയതിന് എടാട്ട് സ്വദേശി അഭിലാഷിനു സ്‌ക്വാഡ് 5000 രൂപ പിഴ ചുമത്തുകയും മാലിന്യങ്ങൾ സ്വന്തം ചെലവിൽ തിരികെ എടുപ്പിക്കുകയും ചെയ്തു. പരിശോധനയിൽ ജില്ലാ എൻഫോഴ്‌സ്‌മെന്‍റ് സ്‌ക്വാഡ് ലീഡർ പി.പി. അഷ്‌റഫ്‌, സ്‌ക്വാഡ് അംഗങ്ങളായ അലൻ ബേബി, സി.കെ. ദിബിൽ, പട്ടുവം പഞ്ചായത്ത് ഹെൽത്ത്‌ ഇൻസ്‌പെക്ടർ പി.പി. സോണിയ തുടങ്ങിയവർ പങ്കെടുത്തു.

ഫയലുകൾ കെട്ടിക്കിടക്കുന്നുവെന്ന് സമ്മതിച്ച പിണറായിക്ക് മുഖ്യമന്ത്രിയായി തുടരാൻ അർഹതയില്ല: മുല്ലപ്പള്ളി രാമചന്ദ്രൻ

കണ്ണൂർ: സെക്രട്ടേറിയറ്റിൽ ഫയലുകൾ കൂന്പാരമായി കെട്ടിക്കിടക്കുന്നുവെന്ന് പറഞ്ഞ പിണറായി വിജയന് മുഖ്യമന്ത്രി സ്ഥാനത്ത് തുടരാൻ അർഹതയില്ലെന്ന് മുൻ കെപിസിസി പ്രസിഡന്‍റ് മുല്ലപ്പള്ളി രാമചന്ദ്രൻ. ഓരോ ഫയലുകളും ഓരോ ജീവിതങ്ങളാണെന്ന ജവഹർലാൽ നെഹ്റുവിന്‍റെ വാക്കുകൾ കടമെടുത്ത് തന്‍റേതെന്ന രീതിയിൽ കേരള സമൂഹത്തിന് മുന്നിൽ അവതരിപ്പിച്ച കൈയടി നേടിയ പിണറായി വിജയൻ എന്ന മുഖ്യമന്ത്രി പരാജയമാണെന്നതിന്‍റെ തെളിവാണ് ഫയലുകൾ കൂന്പാരമായി കിടക്കുന്നുവെന്ന വെളിപ്പെടുത്തലെന്നും മുല്ലപ്പള്ളി പറഞ്ഞു. സംസ്കാര സാഹിതി കണ്ണൂർ ജില്ലാ കമ്മിറ്റിയുടെ ആഭിമുഖ്യത്തിൽ സംഘടിപ്പിച്ച മുൻമുഖ്യമന്ത്രിയും കോൺഗ്രസ് നേതാവുമായിരുന്ന ആർ. ശങ്കറിന്‍റെ നൂറ്റിപതിനാറാം ജൻമദിനാഘോഷം കണ്ണൂർ ജവഹർ ലൈബ്രറി ഓഡിറ്റോറിയത്തിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഫയലുകൾ നീക്കാൻ കഴിയുന്നില്ലെങ്കിൽ രാജാവിനെ പോലെ ഇരിക്കാൻ ഒരു മുഖ്യമന്ത്രിയുടെ ആവശ്യമില്ല. ഭരണസംവിധാനത്തിൽ നിർണായക പങ്കുവഹിക്കുന്ന ഐഎഎസുകാർ മുതൽ ഉദ്യോഗസ്ഥർവരെ പരസ്പരം പോരടിക്കുന്പോൾ ഇതൊന്നും പരിഹരിക്കാൻ കഴിയാതെ കാഴ്ചക്കാരനായി നോക്കി നിൽക്കുന്ന ഒരു മുഖ്യമന്ത്രിയായി പിണറായി മാറി. ഇത്തരം സാഹചര്യത്തിൽ ആർ. ശങ്കറെന്ന ക്രാന്തദർശിയായ ഭരണാധികാരിയുടെ പ്രസക്തി അനുദിനം വർധിക്കുകയാണ്. വിദ്യഭ്യാസത്തിലൂടെ മാത്രമേ യഥാർഥ സമൂഹ്യപരിഷ്കരണവും നാടിന്‍റെ വികസനവും സാധ്യമാവൂ എന്ന് ദീർഘദർശനം ചെയ്ത ആർ. ശങ്കറിനെ പോലെ ബഹുമുഖ പ്രതിഭയായ മുഖ്യമന്ത്രി കേരളത്തിൽ ഇന്നോളമുണ്ടായിട്ടില്ല. കണ്ണൂരിൽ നിന്ന് വിജയിച്ച് കേരളത്തിൽ കോൺഗ്രസിന്‍റെ ആദ്യമുഖ്യമന്ത്രിയായ ആർ. ശങ്കറിന്‍റെ പേരിൽ കണ്ണൂരിൽ ഒരു സ്മാരകമില്ലെന്നത് അദ്ദേഹത്തോട് നാം കാട്ടുന്ന അനീതിയാണ്. അദ്ദേഹത്തെ എക്കാലവും ഓർക്കാൻ ലാഭേച്ഛ കൂടാതെയുള്ള ഒരു വിദ്യാഭ്യാസ സ്ഥാപനവും അവിടെ അദ്ദേഹത്തിന്‍റെ പൂർണകായ പ്രതിമയും ഒരുക്കിയാൽ അതായിരിക്കും അദ്ദേഹത്തോടുള്ള കണ്ണൂരിന്‍റെ മികച്ച ആദരവ്. ഇതിനായി പരിശ്രമിക്കണമെന്നും മുല്ലപ്പള്ളി പറഞ്ഞു. സംസ്കാര സാഹിതി സംസ്ഥാന ജന. സെക്രട്ടറി കെ. പ്രമോദ് അധ്യക്ഷത വഹിച്ചു. ഡിസിസി പ്രസിഡന്‍റ് മാർട്ടിൻ ജോർജ് മുഖ്യാതിഥിയായിരുന്നു. സംസ്ഥാന വൈസ് ചെയർമാൻ പ്രദീപ് പയ്യന്നൂർ മുഖ്യപ്രഭാഷണം നടത്തി. ജില്ലാ ചെയർമാൻ സുരേഷ് കൂത്തുപറന്പ്, ടി. ജയകൃഷ്ണൻ, കെ.ബാലകൃഷ്ണൻ, കൂക്കിരി രാജേഷ്, ലക്ഷ്മണൻ തുണ്ടിക്കോത്ത്, കെ.എൻ.ആനന്ദ് നാറാത്ത് എന്നിവർ പ്രസംഗിച്ചു. ജോൺസൺ പുഞ്ചക്കാട്ട് ഓടക്കുഴൽ സംഗീതം അവതരിപ്പിച്ചു.

കിടക്കകൾ വിതരണം ചെയ്ത ു

ചെമ്പേരി: ഇരിക്കൂർ നിയോജക മണ്ഡലം എംഎൽഎയുടെ 2024-25 സാമ്പത്തിക വർഷത്തെ പ്രത്യേക വികസനനിധി മുഖേന ഏരുവേശി പഞ്ചായത്തിലെ 22 അങ്കണവാടികളിലെ കുട്ടികൾക്കായി അനുവദിച്ച കിടക്കകളുടെ പഞ്ചായത്തുതല വിതരണം ചെമ്പേരി മദർ തെരേസ ഓഡിറ്റോറിയത്തിൽ നടന്നു. സജീവ് ജോസഫ് എംഎൽഎ വിതരണോദ്ഘാടനം നിർവഹിച്ചു. ഏരുവേശി പഞ്ചായത്ത് പ്രസിഡന്‍റ് മിനി ഷൈബി അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് മധു തൊട്ടിയിൽ, ഇരിക്കൂർ ബ്ലോക്ക് പഞ്ചായത്ത് മെംബർ ജയിംസ് തുരുത്തേൽ, പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്‌സൺ ഷൈല ജോയി, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ മോഹനൻ മൂത്തേടൻ, ആരോഗ്യ-വിദ്യാഭ്യാസകാര്യ സ്റ്റാൻഡിംഗ് കമ്മിറ്റി ചെയർപേഴ്‌സൺ പൗളിൻ തോമസ്, പഞ്ചായത്ത് മുൻ പ്രസിഡന്‍റ് ടെസി ഇമ്മാനുവൽ, ജോസ് ചെമ്പേരി, ജോയി തെക്കേടത്ത്, രഞ്ജിത്ത്, കെവിവിഇഎസ് ചെമ്പേരി യൂണിറ്റ് പ്രസിഡന്‍റ് സാബു മണിമല, സിഡിപിഒ പി. ശ്യാമള, ഐസിഡിഎസ് സൂപ്പർവൈസർ നളിനമ്മ, അങ്കണവാടി വർക്കർമാരായ മേരി ഫ്രാൻസിസ്, സരോജിനി എന്നിവർ പ്രസംഗിച്ചു.

ഡ്രൈഡേ ആചരിക്കും

ആലക്കോട്: മഴക്കാലപൂർവ ശുചീകരണത്തിന്‍റെ ഭാഗമായി നാലിന് ആലക്കോട് പഞ്ചായത്തിലെ നെടുവോട് വാർഡിൽ ഡ്രൈഡേ ആയി ആചരിക്കും. വാർഡിലെ വ്യാപാര സ്ഥാപനങ്ങൾ ഉൾപ്പെടെയുള്ള കെട്ടിടങ്ങളും പരിസരവും ശുചീകരിക്കും. എന്‍റെ മാലിന്യം എന്‍റെ ഉത്തരവാദിത്വം എന്ന ശീർഷകത്തിൽ വീട്ടുകാരും വ്യാപാരികളും അവരുടെ ചുറ്റുപാടും ശുചീകരിക്കേണ്ടതാണ്. ആലക്കോട് പഞ്ചായത്ത് ആരോഗ്യ സ്റ്റാൻഡിംഗ് കമ്മിറ്റി ചെയർമാൻ എം.എ. ഖലീൽ റഹ്മാൻ ശുചിത്വ സന്ദേശ സദസ് ഉദ്ഘാടനം ചെയ്തു. വാർഡ് കൺവീനർ വി.വി. അബ്ദുല്ല അധ്യക്ഷത വഹിച്ചു. കൺവീനർ സിജി, ഉഷാ ബാബു, അംഗനവാടി വർക്കർമാർ, എഡിഎസ് ഭാരവാഹികൾ സംബന്ധിച്ചു.

കുടുംബശ്രീ കൃഷിക്കൂട്ടം ഫുഡ്‌ പ്രോഡക്‌ട്സ് ഉദ്ഘാടനം ചെയ്തു

ചെറുപുഴ: കണ്ണൂർ ജില്ലാ കുടുംബശ്രീ മിഷന്‍റെയും ചെറുപുഴ കൃഷിഭവന്‍റെയും സംയുക്ത സഹായത്തോടെ പാറോത്തുംനീരിൽ കീർത്തി ഫുഡ്‌ പ്രോഡക്‌ട്സ് എന്ന പേരിൽ ആരംഭിച്ച ഭക്ഷ്യോത്പാദന യൂണിറ്റിന്‍റെ ഉദ്ഘാടനം ചെറുപുഴ പഞ്ചായത്ത് പ്രസിഡന്‍റ് കെ.എഫ്. അലക്സാണ്ടർ നിർവഹിച്ചു. സിഡിഎസ് ചെയർപേഴ്സൺ സുനിതാകുമാരി അധ്യക്ഷത വഹിച്ചു. ജില്ലാ മിഷൻ എഡിഎംസി പി. രാഹുൽ, കെ. സന്തോഷ്‌, പി. ഗീത, സുരേഷ് കുറ്റൂർ, ആർ.കെ. പദ്മനാഭൻ, കെ. ശ്രീദേവി, പി. ഷീജ, പി.ആർ. ശോഭന എന്നിവർ പ്രസംഗിച്ചു. പ്രാദേശിക ഭക്ഷ്യവിഭവങ്ങളായ ചക്ക, ഏത്തവാഴയ്ക്ക, കപ്പ മുതലായവായിൽ നിന്നുള്ള മൂല്യവർധിത ഉത്പന്നങ്ങൾ നിർമിച്ച് വിപണിയിൽ എത്തിക്കുകയെന്നതാണു സംരംഭത്തിന്‍റെ ലക്ഷ്യം. 12 ഓളം അംഗങ്ങൾ ഉൾപ്പെട്ട ഗ്രൂപ്പാണു പ്രവർത്തനത്തിനു നേതൃത്വം നൽകുന്നത്. സംരംഭം പ്രവർത്തിക്കാൻ ആവശ്യമായ അടിസ്ഥാന സൗകര്യങ്ങൾ കൃഷിവകുപ്പിലൂടെയും കുടുംബശ്രീ മിഷനിലുമാണ് ലഭ്യമാക്കിയത്.

എടപ്പുഴയെ വിടാതെ കാട്ടാന; കൃഷികൾ നശിപ്പിച്ചു

ഇരിട്ടി: എടപ്പുഴയിൽ സെന്‍റ് ജോസഫ്സ് പള്ളിക്കു സമീപം തുടർച്ചയായ രണ്ടാംദിവസവും കാട്ടാന കൃഷി നശിപ്പിച്ചു. ഇന്നലെ രാത്രി 12 ഓടെയായിരുന്നു കാട്ടാനയുടെ താണ്ഡവം. എടപ്പുഴ പള്ളി, വെളിയത്ത് സിബി, കാപ്പുങ്കൽ സജി തുടങ്ങിയവരുടെ കൃഷിയിടത്തിലെ തെങ്ങ്, വാഴ, കവുങ്ങ് തുടങ്ങിയ കാർഷിക വിളകളാണ് നശിപ്പിച്ചത്. പള്ളിയുടെ പിൻവശത്ത് സെമിത്തേരിയോട് ചേർന്ന പ്രദേശത്തെ 30 വാഴകൾ ആന നശിപ്പിച്ചു. പുലർച്ചെവരെ മേഖലയിൽ തമ്പടിച്ച ആന നേരം വെളുത്തപ്പോഴാണ് തിരികെ പോയത്. പുലർച്ചെ നിരവധി ടാപ്പിംഗ് തൊഴിലാളികൾ കടന്നുപോകുന്ന വഴിയിലാണ് ആന എത്തിയത്. തലേന്ന് രാത്രിയിൽ മഴ പെയ്തതുകൊണ്ട് റബർ ടാപ്പിംഗ് തൊഴിലാളികൾ ജോലിക്ക് പോകാതിരുന്നതാണ് വലിയ ദുരന്തം ഒഴിവാക്കിയത്. ആഴ്ച്ചകളായി ആനകൂട്ടം പ്രദേശത്ത് ഭീതി സൃഷ്ടിക്കുകയാണ്. ഇവയെ ഭയന്ന് കുന്നിന്‍റെ മുകൾ ഭാഗം പോകാൻ കഴിയാത്തതിനാൽ കൃഷിനാശം കണക്കാക്കാനും കഴിഞ്ഞിട്ടില്ലെന്ന് നാട്ടുകാർ പറയുന്നു. ആറളം ഫാമിൽ ആനകളെ തുരത്താൻ ആരംഭിച്ചതോടെ പ്രദേശത്ത് ആനകളുടെ സാന്നിധ്യം അധികമാണെന്നും സർക്കാർ അടിയന്തര നടപടികൾ സ്വീകരിക്കണമെന്നും നാട്ടുകാർ പറഞ്ഞു. ഇരിട്ടി സെക്‌ഷൻ ഫോറസ്റ്റ് ഓഫീസർ സുനിൽകുമാറും സംഘവും സ്ഥലത്തെത്തി നാശനഷ്ടങ്ങൾ പരിശോധിച്ചു. പഞ്ചായത്ത് പ്രസിഡന്‍റ് കുര്യാച്ചൻ പൈമ്പള്ളികുന്നേൽ, സ്റ്റാൻഡിംഗ് കമ്മിറ്റി ചെയർമാൻ ഐസക് ജോസഫ്, പഞ്ചായത്തംഗം ഷൈനി വർഗീസ്, മണ്ഡലം കോൺഗ്രസ് പ്രസിഡന്‍റ് മനോജ് എം. കണ്ടത്തിൽ തുടങ്ങിയവർ സ്ഥലം സന്ദർശിച്ചു.

ചുഴലിക്കാറ്റിൽ ജോണി യോയാക്കിന് നഷ്‌ടം 20 ലക്ഷം

ഇരിട്ടി: കഴിഞ്ഞ ദിവസം ഇരിട്ടിയിൽ വീശിയടിച്ച ചുഴലിക്കാറ്റിൽ ഇരിട്ടി മുൻസിപ്പാലിറ്റി, പായം പഞ്ചായത്ത് പരിധികളിൽ സ്ഥലം പാട്ടത്തിനെടുത്ത് വാഴ കൃഷി നടത്തിവന്ന കർഷകൻ ജോണി യോയാക്കിന്‍റെ 3000 ത്തോളം വാഴകൾ നിലം പൊത്തി. വർഷങ്ങളായി സ്ഥലം പാട്ടത്തിനെടുത്ത് വാഴകൃഷി നടത്തിവരുന്ന ജോണിക്ക് കനത്ത പ്രഹരമാണ് ഇത്തവണത്തെ വേനൽ മഴയിലും കാറ്റിലും സംഭവിച്ചിരിക്കുന്നത്. കുലച്ചുതുടങ്ങിയ 3000 ത്തിൽ അധികം വാഴകൾ നിലം പൊത്തിയതോടെ 20 ലക്ഷം രൂപയുടെ നഷ്‍ടം സംഭവിച്ചതായാണു പ്രാഥമിക കണക്ക്. ഇരിട്ടി നേരംപോക്ക് റോഡിലെ തോട്ടത്തിൽ ഏകദേശം 2500 ഓളം വാഴകളാണ് പല സ്ഥലങ്ങളിലായി ഒടിഞ്ഞു കിടക്കുന്നത്. സമീപത്തെ മറ്റൊരു തോട്ടത്തിൽ 500 വാഴകളും പൂർണമായും നശിച്ചു. തോട്ടം ഇൻഷ്വർ ചെയ്തിട്ടുണ്ടെങ്കിലും ഏതാണ്ട് വളർച്ച പൂർണമായ തോട്ടത്തിൽ ഇൻഷ്വർ തുകയിൽ നിന്നും ലഭിക്കുന്ന നഷ്‌ടപരിഹാരം കൊണ്ടു പിടിച്ചു നിൽക്കാൻ കഴിയില്ല. ഗവൺമെന്‍റിന്‍റെ സഹായം ഉണ്ടങ്കിൽ മാത്രമേ കർഷകനു പിടിച്ചു നിൽക്കാൻ കഴിയുകയുള്ളൂ. കഴിഞ്ഞ വർഷം കാലവർഷക്കെടുതിയിൽ കൃഷി നശിച്ച ജോണിക്ക് ഗവൺമെന്‍റ് പ്രഖ്യാപിച്ച നഷ്ടപരിഹാരം ഇനിയും ലഭിച്ചിട്ടില്ല. അതുപോലെ വന്യജീവി വിള നശിപ്പിച്ചതിന്‍റെ നഷ്‌‌ട പരിഹാരത്തുക വനം വപ്പും ഇതുവരെ കൈമാറിയിട്ടില്ല. സണ്ണി ജോസഫ് എംഎൽഎ, ജനപ്രതിനിധികൾ, കൃഷി വകുപ്പ് ഡപ്യൂട്ടി ഡയറക്‌ടർ സീമ സഹദേവൻ, കെ.ആർ. ജിതൻ എന്നിവർ സ്ഥലം സന്ദർശിച്ച് നാശനഷ്‌ടങ്ങൾ വിലയിരുത്തി.

കണിയൊരുക്കുന്നതിനിടെ പൊള്ളലേറ്റ വീട്ടമ്മ മരിച്ചു

പറശിനിക്കടവ്: വിഷുദിനത്തിൽ കണിയൊരുക്കുന്നതിനിടെ വിളക്കിൽ നിന്ന് തീ പടർന്ന് ഗുരുതരമായി പൊള്ളലേറ്റ വീട്ടമ്മ മരിച്ചു. പറശിനിക്കടവ് ക്ഷേത്രത്തിനു സമീപത്തെ ശ്രീരാഗത്തിൽ എം. പ്രസന്ന (62) ആണ് ഇന്നലെ പുലർച്ചെ നാലോടെ കോഴിക്കോട്ടെ സ്വകാര്യ ആശുപത്രിയിൽ മരിച്ചത്.വിഷുക്കണി ഒരുക്കുന്നതിനിടെ വിളക്കിൽ നിന്ന് വസ്ത്രത്തിൽ തീപിടിക്കുകയായിരുന്നു. ഭർത്താവ്: രാജൻ പണിക്കർ. മക്കൾ: രാഹുൽ, രോഹൻ.

മുണ്ടേരി പുഴയിൽ തോണിമറിഞ്ഞ് കാണാതായ യുവാവിന്‍റെ മൃതദേഹം കണ്ടെത്തി

ചക്കരക്കൽ: മുണ്ടേരി പുഴയുടെ കാനച്ചേരി ഭാഗത്ത് മീൻപിടിക്കുന്നതിനിടെ തോണിമറിഞ്ഞ് കാണാതായ യുവാവിന്‍റെ മൃതദേഹം കണ്ടെത്തി. പാറാൽ സ്വദേശിയും ബസ് കണ്ടക്ടറുമായ ഷറഫുദ്ദീന്‍റെ(45) മൃതദേഹമാണ് ഇന്നലെ രാവിലെ 7.30 ഓടെ കാനിച്ചേരി ഭാഗത്തുനിന്ന് കണ്ടെത്തിയത്. ചൊവ്വാഴ്ച വൈകുന്നേരത്തോടെയായിരുന്നു സംഭവം. കനത്ത മഴയ്ക്കിടെ വലയിടുന്നതിനിടെ തോണി മറിയുകയായിരുന്നു. രാത്രി വീട്ടിൽ തിരിച്ചെത്താത്തിനെ തുടർന്ന് വീട്ടുകാരും നാട്ടുകാരും ചേർന്ന് ഫയർഫോഴ്സിനെ വിവരമറിയിച്ചു. രാത്രി 10 ഓടെ നാട്ടുകാരും ഫയർഫോഴ്സും ചേർന്ന് തെരച്ചിൽ നടത്തിയെങ്കിലും കണ്ടെത്തിയില്ല. തുടർന്ന് ഇന്നലെ പുലർച്ചെ ഒന്നോടെ തെരച്ചിൽ അവസാനിപ്പിച്ചു. തോണി മുണ്ടേരിക്കടവ് കയ്യങ്കോട് ഭാഗത്ത് കണ്ടെത്തിയിരുന്നു. ഇന്നലെ രാവിലെ വീണ്ടും നടത്തിയ തെരച്ചിലിലാണ് കാനച്ചേരി ഭാഗത്ത് മൃതദേഹം കണ്ടെത്തിയത്. കുടുക്കിമെട്ട- മുണ്ടേരി-കണ്ണൂർ ജില്ലാ ആശുപത്രി റൂട്ടിലെ ബസ് കണ്ടക്ടറാണ് ഷറഫുദ്ദീൻ. ഭാര്യ: ഷംസീറ. മക്കൾ: ഷസ, ഷാസിയ.

ഹജ്ജ് ക്യാമ്പ് സംഘാടക സമിതി ഓഫീസ് തുറന്നു

മട്ടന്നൂർ: കണ്ണൂർ വിമാനത്താവളത്തിൽ നിന്നുള്ള ഈ വർഷത്തെ ഹജ്ജ് സർവീസ് മേയ് 11 ന് ആരംഭിക്കും. 29 വരെയാണ് സർവീസ്. സംഘാടക സമിതി ഓഫീസ് മട്ടന്നൂർ റാറാവീസ് ഹോട്ടൽ കെട്ടിടത്തിൽ കെ.കെ.ശൈലജ എംഎൽഎ ഉദ്ഘാടനം ചെയ്തു. കണ്ണൂർ വിമാനത്താവളത്തിലെ കാർഗോ കോപ്ലക്സിലാണ് ഇത്തവണയും ഹജ്ജ് ക്യാമ്പ്. മൂന്നാം തവണയാണ് കണ്ണൂരിൽ ഹജ്ജ് ക്യാമ്പ് നടക്കുന്നത്. കണ്ണൂരിൽ നിന്ന് ആകെ 28 സർവീസുകളാണ് എയർ ഇന്ത്യ എക്സ്പ്രസ് നടത്തുക. 4788 പേരാണ് കണ്ണൂർ വിമാനത്താവളം വഴി ഇത്തവണ ഹജ്ജിന് പോകുന്നത്. മേയ് 11ന് പുലർച്ചെ നാലിനാണ് കണ്ണൂരിൽ നിന്നുള്ള ആദ്യ ഹജ്ജ് സർവീസ്. 29 ന് രാത്രി ഒന്നിന് അവസാന സർവീസ് പുറപ്പെടും. കഴിഞ്ഞ വർഷം 3218 പേരാണ് കണ്ണൂർ വിമാനത്താവളം വഴി സർവീസ് നടത്തിയത്. സൗദി എയർലൈൻസിന്‍റെ വൈഡ് ബോഡി വിമാനങ്ങളായതിനാൽ ഒൻപതു സർവീസ് മാത്രമാണ് നടത്തേണ്ടി വന്നത്. 171 പേർക്ക് യാത്ര ചെയ്യാവുന്ന വിമാനങ്ങളാണ് ഇത്തവണ എയർ ഇന്ത്യ എക്സ്പ്രസ് ഹജ്ജ് സർവീസിന് ഉപയോഗിക്കുന്നത്. മിക്ക ദിവസങ്ങളിലും ജിദ്ദയിലേക്ക് രണ്ടു സർവീസുകളുണ്ടാകും. സംഘാടക സമിതി ഓഫീസ് ഉദ്ഘാടനത്തിൽ പടിയൂർ പഞ്ചായത്ത് പ്രസിഡന്‍റ് ബി. ഷംസുദ്ദീൻ അധ്യക്ഷത വഹിച്ചു. ഇരിട്ടി ബ്ലോക്ക് പഞ്ചായത്ത് പ്രസിഡന്‍റ് കെ.വേലായുധൻ, ഇരിക്കൂർ പഞ്ചായത്ത് പ്രസിഡന്‍റ് ടി.പി.ഫാത്തിമ, കീഴല്ലൂർ പഞ്ചായത്ത് പ്രസിഡന്‍റ് കെ.വി. മിനി, ഇരിട്ടി നഗരസഭാ വൈസ് ചെയർമാൻ പി.പി. ഉസ്മാൻ, ഹജ്ജ് കമ്മിറ്റിയംഗങ്ങളായ പി.പി.മുഹമ്മദ് റാഫി, ഒ.വി. ജാഫർ, ഷംസുദ്ദീൻ അരിഞ്ചിറ തുടങ്ങിയവർ പങ്കെടുത്തു.

പിഴയടച്ചു; ഇസ്രയേലിൽ തടഞ്ഞുവച്ച തീർഥാടക സംഘത്തിനു യാത്രാനുമതി

ഇരിട്ടി: വിശുദ്ധ നാട് സന്ദർശിക്കാൻ കേരളത്തിൽനിന്ന് ഇസ്രയേലിലെത്തിയ സംഘത്തിലെ രണ്ടു പേരെ ബെത്‌ലേഹമിൽ വച്ച് കാണാതായതിനെത്തുടർന്ന് തടഞ്ഞുവച്ച സംഘത്തിനു പിഴയൊടുക്കിയതിനെത്തുടർന്ന് യാത്രാനുമതി ലഭിച്ചു. ട്രാവൽ ഏജൻസി ഇടപെട്ട് പിഴ അടച്ചതോടെ സംഘം ബേത്‌ലേഹമിൽനിന്ന് ഇന്നലെ യാത്ര പുനരാരംഭിച്ചു. കൊച്ചി ആസ്ഥാനമായി പ്രവർത്തിക്കുന്ന ട്രാവൽ ഏജൻസിയായിരുന്നു തീർഥയാത്ര സംഘടിപ്പിച്ചത്. സംഘത്തിലെ ഇരിട്ടി സ്വദേശികളായ ജോസഫ് മാത്യു, ജോസഫ് ഫ്രാൻസിസ് എന്നിവരെയായിരുന്നു കാണാതായത്. ഇവർക്കായുള്ള അന്വേഷണം ഊർജിതമാക്കിയിട്ടുണ്ട്.

യുവതി തൂങ്ങിമരിച്ചു; ഭർതൃപീഡനമെന്ന് ആത്മഹത്യാകുറിപ്പ്

ഇരിട്ടി: കേളൻപീടികയിൽ ഭർതൃമതിയെ തൂങ്ങിമരിച്ച നിലയിൽ കണ്ടെത്തി. കോളിത്തട്ട് ആനകുഴി യിലെ കുഴിവിള വീട്ടിൽ ജിനീഷിന്‍റെ ഭാര്യ സ്‌നേഹ (25 ) ആണ് മരിച്ചത്. കേളൻപീടികയിലുള്ള സ്വന്തം വീടിന്‍റെ അടുക്കളയിലാണ് സ്നേഹയെ തൂങ്ങിമരിച്ച നിലയിൽ കണ്ടെത്തിയത്. ഇന്നലെ വൈകുന്നേരം 5.30 നും ആറിനും ഇടയിലാണ് സംഭവം. സ്നേഹ എഴുതിയ ആത്മഹത്യാകുറിപ്പ് പോലീസ് കണ്ടെത്തിയിട്ടുണ്ട്. മരണത്തിന് കാരണം ഭർത്താവും ഭർതൃ ബന്ധുക്കളുമാണെന്നാണ് കുറിപ്പിലുള്ളത്. സ്‌നേഹയുടെ ആത്മഹത്യ ഗാർഹിക പീഡനമാണെന്ന രീതിയിൽ സ്‌നേഹയുടെ ബന്ധുക്കളുടെ വോയിസ് ക്ലിപ്പുകൾ അടക്കം സോഷ്യൽ മീഡിയകളിൽ വ്യാപകമായി പ്രചരിക്കുന്നുണ്ട്. അഞ്ചുവർഷം മുന്പ് വിവാഹിതരായ സ്‌നേഹയ്ക്കും ജിനീഷിനും മൂന്ന് വയസുള്ള ഒരു ആൺകുട്ടി യുണ്ട്. ദന്പതികൾ തമ്മിൽ നിരന്തരപ്രശ്നങ്ങൾ ഉണ്ടായിരുന്നതായി സ്നേഹയുടെ ബന്ധുക്കൾ പറയുന്നു. ഇതു സംബന്ധിച്ച് നിരവധി തവണ ഉളിക്കൽ പോലീസിൽ പരാതി നല്കിയിരുന്നു. കഴിഞ്ഞ ദിവസം ഭാര്യയും ഭർത്താവും തമ്മിലുണ്ടായ വഴക്കാണ് ആത്മഹത്യയിലേക്ക് നയിച്ചതെന്ന് പറയുന്നു. ഭർത്താവും ബന്ധുക്കളും ചേർന്ന് സ്‌നേഹയെ ദേഹോപദ്രപം ഏല്പിച്ചിരുന്നതായും പ്രചരിക്കുന്ന വോയിസ് ക്ലിപ്പിലുണ്ട്. കോളിത്തട്ടിലെ ക്രഷറിൽ ജോലിചെയ്തുവരുന്ന ജിനീഷ് നിരന്തരം മദ്യപിച്ചെത്തി വീട്ടിൽ പ്രശ്നം ഉണ്ടാക്കിയിരുന്നതായാണ് ബന്ധുക്കളും അയൽവാസികളും പറയുന്നത്. കുട്ടിയുടെ നിറത്തെ ചൊല്ലി നിരന്തരം സംശയത്തോടെ സ്നേഹയെ ഇയാൾ ഉപദ്രവിച്ചിരുന്നതായും ബന്ധുക്കൾ പറയുന്നു . ഭർത്താവിന്‍റെ മാതാപിതാക്കളും ഉപദ്രവത്തിന് കൂട്ടുനിന്നു എന്നാണ് ബന്ധുക്കളുടെ ആരോപണം . പീഡനം സഹിക്കാൻ കഴിയാതെ സ്‌നേഹ മുന്പും ആത്മഹത്യക്ക് ശ്രമിച്ചിട്ടുണ്ട് . അച്ഛൻ ലഷ്മണൻ ചെറുപ്പത്തിലേ മരിച്ചതോടെ അമ്മ രമയാണ് ബന്ധുക്കളുടെ സഹായത്തോടെ സ്നേഹയെ വളർത്തി കല്യാണം കഴിപ്പിച്ചയച്ചത്. സ്ത്രീധനത്തിന്‍റെ പേരിൽ മാനസിക പീഡനവും സംശയത്തിന്‍റെ പേരിൽ ഭർത്താവിന്‍റെ ശാരീരിക പീഡനവും സഹിക്കാൻ കഴിയാതെ വന്നതോടെ ആയിരുന്നു സ്‌നേഹ ഏതാനും ദിവസം മുന്പ് സ്നേഹ കേളൻപീടികയിലെ വീട്ടിലെത്തിയിരുന്നത്. മൃതദേഹം പരിയാരം മെഡിക്കൽ കോളജിൽ തഹസിൽദാരുടെയും ഇരിട്ടി പോലീസിന്‍റെയും സാന്നിധ്യത്തിൽ ഇൻക്വസ്റ്റ്നടപടികൾ പൂർത്തിയാക്കി പോസ്റ്റുമോർട്ടത്തിനു ശേഷം ഇന്നലെ വൈകുന്നേര ത്തോടെ വീർപ്പാട് ശ്മശാനത്തിൽ സംസ്കരിച്ചു. ഇരിട്ടി എസ്ഐ കെ. ഷംസുദ്ദീന്‍റെ നേതൃത്തിലുള്ള സംഘം കേസ് ഉടൻ ഇരട്ടി ഡിവൈഎസ്പിക്ക് കൈമാറും.

റെയിൽവേയിൽ ജോലി വാഗ്ദാനം ചെയ്ത് ലക്ഷങ്ങൾ തട്ടിയ യുവതി അറസ്റ്റിൽ

കണ്ണൂർ: റെയിൽവേയിൽ ടിടിഇയുടെ ജോലി വാഗ്ദാനം ചെയ്ത് യുവാവിൽ നിന്ന് ലക്ഷങ്ങൾ വാങ്ങി കബളിപ്പിച്ച യുവതിയെ എടക്കാട് പോലീസ് ചെന്നൈയിൽ വച്ച് അറസ്റ്റ് ചെയ്തു. ചെന്നൈ നിലാംബൽ നഗറിലെ രമ്യ മണികണ്ഠനെയാണ് (29) എടക്കാട് എസ്ഐ ഖലീലിന്‍റെ നേതൃത്വത്തിലുള്ള സംഘം അറസ്റ്റ് ചെയ്തത്. കാടാച്ചിറ സ്വദേശിയായ അഭിരാജിന്‍റെ (25) പരാതിയിലാണ് നടപടി. സമൂഹ മാധ്യമത്തിൽ ചെന്നൈയിലെ ഒരു ജോബ് റിക്രൂട്ടിംഗ് എജൻസിയുടെ പരസ്യം കണ്ടാണ് യുവാവ് നടത്തിപ്പുകാരിയായ പ്രതിയുമായി ബന്ധപ്പെടുന്നത്. റെയിൽവേയിൽ ടിടിഇയുടെ ജോലി ലഭ്യമാക്കാമെന്ന് വിശ്വസിപ്പിച്ച് രണ്ടു വർഷത്തിനുള്ളിൽ പലതവണകളായി പത്തേ മുക്കാൽലക്ഷത്തോളം കൈവശപ്പെടുത്തിയെങ്കിലും ജോലി ശരിയാക്കി നൽകിയില്ല. താൻ കബളിപ്പിക്കപ്പെട്ടെന്ന് മനസിലാക്കിയ യുവാവ് പോലീസിൽ പരാതി നൽകുകയായിരുന്നു. പ്രതിയുമായി പോലീസ് കണ്ണൂരിലേക്ക് തിരിച്ചിട്ടുണ്ട്. എസ്ഐ ഖലീലിനെ കൂടാതെ റജിൻ, അനില ആന്‍റണി എന്നിവരാണ് അന്വേഷണ സംഘത്തിലുണ്ടായിരുന്നത്.

മാഹിയിലെ കലാകാരന്മാരുടെ കരവിരുതിൽ വടകര റെയിൽവേ സ്റ്റേഷനിൽ കടത്തനാടൻ വീരഗാഥ

മാഹി: കടത്തനാടൻ കളരി പാരമ്പര്യത്തിന്‍റെ ചരിത്രമുറങ്ങുന്ന മണ്ണിലെ റെയിൽവേ സ്റ്റേഷനിൽ ഇനി യാത്രക്കാർക്ക് കടത്തനാടിന്‍റെ പാരന്പര്യം ചുമർചിത്രങ്ങളിലൂടെ മനസിലാക്കാം. വടകര റെയിൽവേ സ്റ്റേഷനിലാണ് മാഹിയിലെ കലാകാരൻമാരുടെ നേതൃത്വത്തിൽ ഉണ്ണിയാർച്ചയും തച്ചോളി ഒതേനനും ആരോമൽ ചേകവരും ആരോമലുണ്ണിയും ചന്തുവുമെല്ലാം പുനർജനിക്കുന്നത്. മാഹി ആശ്രയ വനിതാ ക്ഷേമ സഹകരണ സംഘം ചിത്രകാരന്മാരും ചിത്രകാരികളുമാണ് ചുമർചിത്രം തയാറാക്കുന്നത്. ഗ്രൂപ്പ് ലീഡറും ചിത്രകാരിയുമായ കെ.ഇ.സുലോചനയുടെ നേതൃത്വത്തിലാണ് ചിത്രങ്ങൾ വരയുന്നത്. കളരി ഗുരുക്കന്മാർക്ക് കീഴിൽ അഭ്യസിക്കുന്ന കളരിപ്പയറ്റ്, ഓതിരം - കടകം യുദ്ധം ഉൾപ്പെടെ വാളുകളും പരിചകളും ഉപയോഗിക്കുന്ന യോദ്ധാക്കളുടെ ചിത്രം വരച്ച് കാട്ടുന്നു. വടകരയുടെ സ്വന്തം ചരിത്ര കഥകളാണ് ഈ കൂട്ടായ്മയിൽ വരയുന്നത്. ചുമർചിത്രത്തിന്‍റെ എഴുപത്തിയഞ്ച് ശതമാനത്തിലേറെ പൂർത്തിയായതായി കെ.ഇ. സുലോചന പറഞ്ഞു. വികാസ് കോവൂർ, രഞ്ജിത്ത്, കൃഷ്ണകുമാർ മുക്കം, സനൽ വടകര, വിന്ധ്യാ ദാമോദരൻ, വിജിഷ പന്തക്കൽ, എന്നിവരടക്കമുള്ളവരും സംഘത്തിലുണ്ട്. അമൃത് ഭാരത് പദ്ധതിയിൽ ഉൾപ്പെടുത്തിയ വടകര സ്റ്റേഷൻ 30.82 കോടി വകയിരുത്തി നവീകരണ പ്രവൃത്തി പൂർത്തിയായി വരികയാണ്. സതേൺ റെയിൽവെ പാലക്കാട് ഡിവിഷനു കീഴിലുള്ള വടകര സ്റ്റേഷനിൽ ആധുനിക വിളക്കുകൾ, ഇരിപ്പിടം, പൂന്തോട്ടം, കവാടം എന്നിവയെല്ലാം പൂർത്തിയായി കഴിഞ്ഞിട്ടുണ്ട്.

പോലീസുകാരന് വെട്ടേറ്റ കേസിൽ സഹോദരങ്ങള്‍ക്കെതിരേ ലുക്കൗട്ട് നോട്ടീസ്

ബേഡകം: യുവാവിനെ വെട്ടിക്കൊല്ലാന്‍ ശ്രമിക്കുകയും വിവരമറിഞ്ഞെത്തിയ പോലീസുകാരനെ വെട്ടിപ്പരിക്കേല്‍പിക്കുകയും ചെയ്ത സംഭവത്തില്‍ ഒളിവില്‍പോയ പ്രതികളായ സഹോദരങ്ങളെ കണ്ടെത്താന്‍ ബേഡകം പോലീസ് ലുക്കൗട്ട് പോലീസ് പുറപ്പെടുവിച്ചു. മുന്നാട് അരിച്ചെപ്പില്‍ താമസക്കാരായ ജിഷ്ണു സുരേഷ് (24), വിഷ്ണു സുരേഷ് (25) എന്നിവര്‍ക്കെതിരെയാണ് ലുക്കൗട്ട് നോട്ടീസ് ഇറക്കിയത്. ഏപ്രില്‍ 18നു രാത്രി 11ഓടെയാണ് കേസിനാസ്പദമായ സംഭവം. ഇരുവരും അധ്യാപകദമ്പതികളുടെ വീടിനു മുന്നിലെത്തി ബഹളംവെച്ചത് തടയാനെത്തിയപ്പോഴാണ് ബീംബുങ്കാലിലെ സനീഷിന് വെട്ടേറ്റത്. വിവരമറിഞ്ഞ് സ്ഥലത്തെത്തിയ സിപിഒ സൂരജിന്റെ താടിക്കും വെട്ടേറ്റിരുന്നു. പ്രതികളെ കണ്ടെത്താന്‍ കേരളത്തിലും കര്‍ണാടകയിലും സൈബര്‍ സെല്ലിന്റെ സഹായത്തോടെ തെരച്ചില്‍ നടത്തിയെങ്കിലും ഫലം കണ്ടില്ല. ഇതേത്തുടര്‍ന്നാണ് പോലീസ് ലുക്കൗട്ട് നോട്ടീസ് പുറപ്പെടുവിച്ചത്. കോട്ടയം സ്വദേശികളായ റബര്‍ ടാപ്പിംഗ് തൊഴിലാളികളായ ഇരുവരും എട്ടുവര്‍ഷം മുമ്പാണ് മുന്നാട് താമസമാരംഭിക്കുന്നത്.

കക്കൂസ് മാലിന്യം റോഡിൽ ഒഴുക്കിയ സംഭവം: കണ്ണൂർ ഗവ. മെഡിക്കൽ കോളജിന് നോട്ടീസ്

പരിയാരം: സ്വീവേജ് ട്രീറ്റ്മെന്‍റ് പ്ലാന്‍റിൽ നിന്ന് മലിനജലം ദേശീയ പാതയോരത്ത് ഒഴുക്കിയ സംഭവത്തിൽ കണ്ണൂർ ഗവ.മെഡിക്കൽ കോളജ് അധികൃതർക്ക് നോട്ടീസ് നൽകിയതായി കടന്നപ്പള്ളി-പാണപ്പുഴ ഗ്രാമപഞ്ചായത്ത് സെക്രട്ടറി അറിയിച്ചു. ഉത്തരവാദികളായവരിൽ നിന്ന് പിഴ ഈടാക്കുമെന്നും അദ്ദേഹം പറഞ്ഞു. ഇക്കഴിഞ്ഞ 27 നാണ് മലമൂത്ര വിസര്‍ജ്യങ്ങള്‍ ദേശീയപാതയിലേക്ക് ഒഴുക്കിവിട്ടത്. കണ്ണൂര്‍ ഗവ.മെഡിക്കല്‍ കോളജ് കാമ്പസിലെ മലിനജല പ്ലാന്‍റിലെ ദുർഗന്ധം വമിക്കുന്ന വെള്ളം തമിഴ്‌നാട്ടില്‍ നിന്നും വന്ന സംഘമാണ് പട്ടാപ്പകല്‍ റോഡരികിലേക്ക് ഒഴുക്കിവിട്ടത്. സാമൂഹ്യ പ്രവർത്തകൻ നജ്മുദ്ദീൻ പിലാത്തറയാണ് ഈ സംഭവത്തിന്‍റെ വീഡിയോയും ചിത്രങ്ങളും സമൂഹമാധ്യമങ്ങളിലൂടെ പുറത്തെത്തിച്ചത്. ഈ വീഡിയോകളും ചിത്രങ്ങളും അദ്ദേഹം കടന്നപ്പള്ളി- പാണപ്പുഴ പഞ്ചായത്ത് സെക്രട്ടറിക്കും വാട്സ് ആപ്പ് മുഖേന നൽകിയിരുന്നു. എന്നാല്‍, പ്ലാന്‍റിന്‍റെ അറ്റകുറ്റപ്പണിനടത്താന്‍ കരാര്‍ എടുത്തയാളാണ് മാലിന്യം നീക്കം ചെയ്തതെന്നും തങ്ങള്‍ക്ക് ഇതുമായി യാതൊരു ബന്ധവുമില്ലെന്നും ശ്രദ്ധയിൽപ്പെട്ടതോടെ സ്റ്റോപ്പ് മെമ്മോ നൽകി പ്രവൃത്തി നിർത്തിവെപ്പിച്ചിരുന്നുവെന്നാണ് ആശുപത്രി അധികൃതതരുടെ നിലപാട്.

ടി. ഗോവിന്ദൻ മെമ്മോറി‍യൽ അഖിലേന്ത്യാ വോളിബോൾ പയ്യന്നൂരില്‍ 12 മുതൽ

പയ്യന്നൂര്‍: പയ്യന്നൂര്‍ സ്‌പോര്‍ട്‌സ് ആൻഡ് കള്‍ച്ചറല്‍ ഡവലപ്പ്‌മെന്‍റ് അസോസിയേഷന്‍റെ രജത ജൂബിലിയുടെ ഭാഗമായി സ്ഥാപക ചെയര്‍മാനും മുന്‍ എംപി യുമായിരുന്ന ടി. ഗോവിന്ദന്‍റെ സ്മരണാര്‍ത്ഥം ടി. ഗോവിന്ദന്‍ ഓൾ ഇന്ത്യ വോളി-2025 സംഘടിപ്പിക്കുന്നു. മേയ് 12 മുതല്‍ 18 വരെ പയ്യന്നൂര്‍ ഗവ. ഹൈസ്‌കൂളിലെ ഫ്‌ളഡ്‌ലിറ്റ് സ്റ്റേഡിയത്തിലാണ് ടൂർണമെന്‍റ്. ഇന്ത്യയിലെ പ്രശസ്തരായ താരങ്ങളെ ഉള്‍പ്പെടുത്തി പുരുഷ വിഭാഗത്തില്‍ കെഎസ്ഇബി, കേരള പോലീസ്, ഇന്‍കം ടാക്‌സ് ചെന്നൈ, ഇന്ത്യന്‍ എയര്‍ഫോഴ്‌സ്, കസ്റ്റംസ് കൊച്ചിന്‍, മുംബൈ സ്‌പൈക്കേഴ്‌സ് എന്നീ ടീമുകളും വനിതാ വിഭാഗത്തില്‍ സൗത്ത് സെന്‍ട്രല്‍ റെയില്‍വേ സെക്കന്തരാബാദ്, ബാങ്ക് ഓഫ് മഹാരാഷ്‌ട്ര, ഐസിഎഫ് ചെന്നൈ, കെഎസ്ഇബി എന്നീ ടീമുകളുമാണ് മാറ്റുരയ്ക്കുന്നത്. ഒരേ സമയം 6000 പേര്‍ക്ക് കളി കാണാന്‍ സാധിക്കുന്ന ഗാലറി പൂര്‍ത്തീകരണഘട്ടത്തിലാണ്. ദിവസവും രാത്രി എഴിന് മത്സരങ്ങള്‍ ആരംഭിക്കും. പ്രവേശനം പാസ് മൂലമാണ്. പോസ്റ്റര്‍ പ്രകാശനം, ലഹരിവിരുദ്ധ റാലി, സെലിബ്രിറ്റി കമ്പവലി, വാക്കത്തോണ്‍, വിളംബര ജാഥ, ഫോക്‌ലോർ പരിപാടികള്‍ തുടങ്ങിയവ ടൂര്‍ണമെന്‍റിന്‍റെ അനുബന്ധമായി സംഘടിപ്പിക്കുന്നുണ്ട്. 'ലഹരിയുടെ ഒളിയിടങ്ങളല്ല ഒരുമയുടെ കളിയിടങ്ങള്‍ തുറക്കട്ടെ' എന്നതാണ് ഇത്തവണത്തെ ടൂര്‍ണമെന്‍റിന്‍റെ മുദ്രാവാക്യമെന്ന് സംഘാടക സമിതി ചെയര്‍മാന്‍ ടി.ഐ. മധുസൂദനന്‍ എംഎല്‍എ പറഞ്ഞു. വര്‍ക്കിംഗ് ചെയര്‍മാന്‍ പ്രഫ.എം. രാജഗോപാലന്‍, ജനറല്‍ കണ്‍വീനര്‍ പി. ഗംഗാധരന്‍, ടി.എ.അഗസ്റ്റിന്‍, ശശി വട്ടക്കൊവ്വല്‍ എന്നിവരും പത്രസമ്മേളനത്തിൽ പങ്കെടുത്തു.

രാജ്യവിരുദ്ധ പോസ്റ്റ്: വനിതാ ഡോക്ടർക്കെതിരേ കേസ്

മംഗളൂരു: പഹൽഗാം ഭീകരാക്രമണവും പാക്കിസ്ഥാനുമായുള്ള സംഘർഷവുമായി ബന്ധപ്പെട്ട് സമൂഹമാധ്യമത്തിൽ രാജ്യവിരുദ്ധ പോസ്റ്റിട്ടതിന് വനിത ഡോക്ടർക്കെതിരേ കേസെടുത്തു. നഗരത്തിലെ സ്വകാര്യ ആശുപത്രിയിലെ ഡയറ്റീഷ്യൻ ഡോ.ആതിഫ ഫാത്തിമയ്ക്കെതിരേയാണ് മംഗളൂരു സിറ്റി പോലീസ് കേസെടുത്തത്. ഇവരുടെ മൊബൈൽ ഫോണും പിടിച്ചെടുത്തിട്ടുണ്ട്. ജോലിയിൽനിന്ന് ഇവരെ സസ്പെൻഡ് ചെയ്തതായി ആശുപത്രി അധികൃതർ അറിയിച്ചു.

ടയർ വർക്സ് അസോ.കേരള കൺവൻഷന് ഇന്ന് കണ്ണൂരിൽ തുടക്കം

കണ്ണൂർ: ടയർ വർക്സ് അസോസിയേഷൻ കേരള (ടിഡബ്ല്യുഎകെ) സംസ്ഥാന കൺവൻഷൻ ഇന്ന് കണ്ണൂരിൽ ആരംഭിക്കും. ജവഹർ ലൈബ്രറി ഹാളിൽ ഇന്നു വൈകുന്നേരം അഞ്ചിന് പ്രതിനിധി സമ്മേളനം നടക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. മേയ് രണ്ടിന് സമാപിക്കും. നാളെ രാവിലെ 10 ന് പൊതുസമ്മേളനം മന്ത്രി കടന്നപ്പള്ളി രാമചന്ദ്രൻ ഉദ്ഘാടനം ചെയ്യും. കെ.സുധാകരൻ എംപി, മുൻ കേന്ദ്രമന്ത്രി വി. മുരളീധരൻ, ഡോ. തോമസ് ഐസക് എന്നിവർ വിശിഷ്ടാതിഥികളായിരിക്കും. കൺവൻഷനിൽ 2025- 26വർഷത്തേക്കുള്ള ഭാരവാഹികളെ തെരഞ്ഞെടുക്കും. മേയ് രണ്ടിന് ടയർ മേഖലയിലുള്ളവരുടെയും കുടുംബാംഗങ്ങളുടെയും വിവിധ കലാ പരിപാടികൾ അരങ്ങേറും. പത്രസമ്മേളനത്തിൽ ഭാരവാഹികളായ പി.സി. ബിജു, മുണ്ടൂർ രാധാകൃഷ്ണൻ, പ്രകാശൻ മഠത്തിൽ, രാജീവൻ ചാല എന്നിവർ പങ്കെടുത്തു.

മാസ്‌ പ്ലാറ്റിനം സ്റ്റാഴ്സ് ക്യാന്പ് നടത്തി

കണ്ണൂർ: കോട്ടയം അതിരൂപതയുടെ സാമൂഹിക സേവനവിഭാഗമായ മലബാർ സോഷ്യൽ സർവീസ് സൊസൈറ്റി മലബാർ ക്നാനായ കുടിയേറ്റ പ്ലാറ്റിനം ജൂബിലിയുടെ ഭാഗമായി ആരംഭിച്ച പ്ലാറ്റിനം സ്റ്റാഴ്സ് കർമപദ്ധതിയുടെ അഞ്ച് ബാച്ചുകളിൽ ഉൾപ്പെട്ട കുട്ടികൾക്കായി കണ്ണൂർ ശ്രീപുരം ബറുമറിയം പാസ്റ്ററൽ സെന്‍ററിൽ നാല് ദിവസത്തെ അവധിക്കാല ക്യാന്പ് സംഘടിപ്പിച്ചു. കോട്ടയം അതിരൂപത ആർച്ച്ബിഷപ് മാർ മാത്യു മൂലക്കാട്ട് ഉദ്ഘാടനം നിർവഹിച്ചു. കണ്ണൂർ ശ്രീപുരം ബറുമറിയം പാസ്റ്ററൽ സെന്‍റർ ഡയറക്ടർ ഫാ. ജോയ് കട്ടിയാങ്കൽ അനുഗ്രഹപ്രഭാഷണം നടത്തി. മലബാർ സോഷ്യൽ സർവീസ് സൊസൈറ്റി സെക്രട്ടറി ഫാ. സിബിൻ കൂട്ടകല്ലുങ്കൽ സ്വാഗതമാശംസിച്ചു. ജോബി ജോണ്‍ മൂലയിൽ, ഫാ. ജോജോ തോമസ്, നിബിൻ, ഹിൽഡ, ഷോണിറ്റ് അഗസ്റ്റിൻ എന്നിവർ ക്ലാസുകൾക്ക് നേതൃത്വം നല്കി.

വീട്ടിൽനിന്ന് 16 പവൻ കവർന്നു

കണ്ണൂർ: കണ്ണൂർ സിറ്റിയിൽ വീട്ടിൽ നിന്ന് സ്വർണം മോഷ്ടിച്ചതായി പരാതി. സിറ്റിയിലെ അണ്ടത്തോട് കല്ലഞ്ചേരി പാലത്തിന് സമീപമുള്ള ജാനകി നിവാസിലെ ഇ. നിവ്യയുടെ വീട്ടിലാണ് കവർച്ച നടന്നത്. 28 ന് രാത്രി 10 നും ഇന്നലെ പുലർച്ചെ 2.20 നും ഇടയിലുള്ള സമയത്താണ് കവർച്ച നടന്നതെന്നു പരാതിയിൽ പറയുന്നു. വീടിന്‍റെ ഓട് ഇളക്കി അകത്തു കടന്ന മോഷ്ടാവ് ബെഡ്റൂമിലെ അലമാര തുറന്ന് ബാഗിനുള്ളിൽ സൂക്ഷിച്ച 16 പവൻ സ്വർണാഭരണങ്ങളാണ് കവർന്നത്. കണ്ണൂർ സിറ്റി പോലീസ് സംഭവസ്ഥലത്തെത്തി പരിശോധന നടത്തി.

ജനകീയ കമ്മിറ്റിക്ക് ലക്ഷങ്ങളുടെ ബാധ്യത; ദേവസ്വം ബോർഡ് ഭണ്ഡാരം തുറക്കുന്നത് ജനകീയ കമ്മിറ്റി തടഞ്ഞു

ഇരിട്ടി: മുണ്ടയാംപറമ്പ് തറക്കുമീത്തൽ ഭഗവതി ക്ഷേത്ര നവീകരണവുമായി ബന്ധപ്പെട്ട് ജനകീയ കമ്മിറ്റിക്ക് 24 ലക്ഷത്തിന്‍റെ ബാധ്യത നിലനിൽക്കെ മലബാർ ദേവസ്വം ബോർഡ് ക്ഷേത്ര ഭണ്ഡാരം തുറന്ന് പണം എടുക്കാനുള്ള നീക്കം നടത്തിയത് ജനകീയ കമ്മിറ്റിയംഗങ്ങൾ തടഞ്ഞു. ക്ഷേത്ര നവീകരണത്തിനും ഉത്സവ നടത്തിപ്പിനുമായി രൂപീകരിച്ച ജനകീയ കമ്മിറ്റിയെ കഴിഞ്ഞ ദിവസം ദേവസ്വം കമ്മീഷണർ പിരിച്ചു വിട്ടിരുന്നു. കമ്മിറ്റി കഴിഞ്ഞ കാലഘട്ടങ്ങളിലെ വരവ് ചെലവ് കണക്കുകൾ ഓഡിറ്റ് ചെയ്തില്ലെന്നു ചൂണ്ടിക്കാട്ടിയായിരുന്നു കമ്മിറ്റിയെ പിരിച്ചു വിട്ടത്. കഴിഞ്ഞ ദിവസം നടന്ന ക്ഷേത്രം ഉത്സവത്തിന്‍റെ ഭാഗമായി മലബാർ ദേവസ്വം ബോർഡ് അംഗങ്ങൾ ക്ഷേത്ര ഭണ്ഡാരം തുറന്ന് പണം എണ്ണി തിട്ടപ്പെടുത്താനെത്തിയപ്പോൾ പിരിച്ചു വിട്ട ജനകീയ കമ്മിറ്റി അംഗങ്ങൾ പ്രതിഷേധവുമായി എത്തി ക്ഷേത്ര എക്സിക്യുട്ടീവ് ഓഫീസറെ തടയുകയും ഭണ്ഡാരം തുറക്കുന്നത് തടയുകയുമായിരുന്നു. നവീകരണത്തിനായി കമ്മിറ്റി ചെലവഴിച്ച 24 ലക്ഷത്തോളം രൂപ ദേവസ്വം ബോർഡിൽ നിന്നും കിട്ടാനുണ്ടെന്നും തുക നൽകിയ ശേഷം ഭണ്ഡാരം തുറന്നാൽ മതിയെന്നുമായിരുന്നു ഇവരുടെ ആവശ്യം. കഴിഞ്ഞ കാലഘട്ടങ്ങളിലെ നിർമാണ പ്രവൃത്തികൾ, ആഘോഷകമ്മിറ്റിയുടെ വരവ് ചെലവ് കണക്കുകൾ എന്നിവ ജനകീയ കമ്മിറ്റി ഓഡിറ്റ് ചെയ്ത് കമ്മീഷണർക്ക് സമർപ്പിച്ചതായും ഇവർ പറഞ്ഞു. ഇന്നലെ രാവിലെ ഒൻപതിന് തുടങ്ങിയ പ്രതിഷേധം ഉച്ച കഴിഞ്ഞ മൂന്നു വരെ നീണ്ടു നിന്നു. കമ്മീഷണർ എത്തിയ ശേഷമേ ഭണ്ഡാരം തുറക്കാൻ അനുവദിക്കുകയുള്ളൂവെന്നും ഇവർ അറിയിച്ചു. തുടർന്ന് കമ്മീഷണറുമായി ബന്ധപ്പെട്ടപ്പോൾ മേയ് അഞ്ചിന് സ്ഥലത്തെത്താമെന്നും അതുവരെ ഭണ്ഡാരം തുറക്കില്ലെന്ന ഉറപ്പും നൽകി. ഇതോ‌ടെയാണ് പ്രതിഷേധം അവസാനിപ്പിച്ചത്. മുൻ ആഘോഷ കമ്മിറ്റി ഭാരവാഹികളായ എം.ആർ. സുരേഷ്, ടി.എം. വേണുഗോപാൽ , പഞ്ചായത്ത് അംഗം മിനി വിശ്വനാഥൻ, സി.കെ. സുധാകരൻ, ബാലകൃഷ്ണൻ പതിയിൽ, അനിതാ രവീന്ദ്രൻ, സ്വരസ്വതി റെജി എന്നിവരുടെ നേതൃത്വത്തിലായിരുന്നു ഭണ്ഡാരം തുറക്കുന്നത് തടഞ്ഞത്. ക്ഷേത്രം ട്രസ്റ്റി കനകത്തടത്തിൽ രത്തൻ വാഴുന്നവർ, കനകത്തടത്തിൽ കുഞ്ഞിമാധവൻ എന്നിവരും സ്ഥലത്തെത്തിയിരുന്നു. എന്നാൽ സംഭവത്തെക്കുറിച്ച് പ്രതികരിക്കാൻ ക്ഷേത്രം എക്‌സിക്യൂട്ടീവ് ഓഫീസർ തയാറായില്ല.

ചുഴലിക്കാറ്റും മഴയും ഇരിട്ടി മേഖലയിൽ വ്യാപക നാശം

ഇരിട്ടി: ഇന്നലെ സന്ധ്യയോടെ ഇരിട്ടി മേഖലയിൽ മഴയ്ക്കൊപ്പം വീശിയടിച്ച ചുഴലിക്കാറ്റിൽ വ്യാപക നാശം. കെട്ടിടങ്ങളുടെ മേൽക്കൂരയിലെ ഷീറ്റുകൾ കാറ്റിൽ പറന്നുപോയി. മയിലാടുംപാറയിൽ ഓടിക്കൊണ്ടിരുന്ന ബസിനു മുകളിൽ കൂറ്റൻ മരത്തിന്‍റെ ശിഖരം പൊട്ടി വീണു. യാത്രക്കാർ അത്ഭുതകരമായി രക്ഷപ്പെട്ടു. ഇതേ തുടർന്ന് ഒരു മണിക്കൂറോളം ഇതുവഴിയുള്ള ഗതാഗതം സ്തംഭിച്ചു. മരങ്ങൾ വീണ് മറ്റിടങ്ങളിലും വാഹനം തകർന്നിട്ടുണ്ട്. നിരവധിയിടങ്ങളിൽ വൈദ്യുത തൂണുകൾ തകർന്നു. മരങ്ങൾ വീണ് ഗതാഗതം സ്തംഭിച്ചു. ഇരിട്ടി ടൗണിലെ കൽപക ബിൽഡിംഗിനു മുകളിലെ റൂഫിംഗ് ഷീറ്റുകൾ മുഴുവനായും കാറ്റിൽ ഇളകി പറന്നു പോയി കാറ്റിൽ പറന്ന ഷീറ്റുകൾ വീണതിനെ തുടർന്ന് നിത്യസഹായമാതാ ഫൊറോന പള്ളിക്ക് സമീപം നിർത്തിയിട്ട് രണ്ടു കാറുകൾക്ക് കേടുപാടുകൾ സംഭവിച്ചു. പള്ളി ബിൽഡിംഗിൽ പ്രവർത്തിക്കുന്ന നേത്ര കണ്ണാശുപത്രയുടെ ഉടമ സലിൽ കുമാറിന്‍റെ കാറും സമീപത്തെ ജ്വല്ലറിയിലെ മനോജ് കുമാറിന്‍റെ കാറിനുമാണ് കേടുപാടുകൾ സംഭവിച്ചത്. പേരാവൂർ റോഡിൽ ഒരു മണിക്കൂറോളം വാഹനഗതാഗതം തടസപ്പെട്ടു. ഇതോടെ വാഹനങ്ങളുടെ നാലു കിലോമീറ്ററിലേറെ വാഹനങ്ങളുടെ നിര രൂപപ്പെട്ടു. അടുത്തിടെ ടാറിംഗ് നടത്തിയ റോഡിൽ ടാറിംഗിന്‍റെ ഇരു വശങ്ങളിലുംമുള്ള വലിയ താഴ്ച മണ്ണിട്ട് നികത്താത്തത് കാരണം വാഹനങ്ങൾക്ക് നീങ്ങാൻ കഴിയാതെ വന്നതും ഗതാഗതക്കുരുക്ക് രൂക്ഷമാക്കി.വ്യാപക കൃഷി നാശത്തിനൊപ്പം വീടുകൾക്കും നാശനഷ്ടം സംഭവിച്ചിട്ടുണ്ട്. പയഞ്ചേരി മുക്കുമുതൽ ഊവാപ്പള്ളിവരെ വരുന്ന ഇരിട്ടി പേരാവൂർ റോഡരികിലെ നിരവധി മരങ്ങൾ പൊട്ടിവീണു. മരങ്ങൾ വീണ് നാലു കാറുകൾക്ക് കേടുപാടുകൾ സംഭവിച്ചു. നേരംപോക്ക് റോഡിലെയും ടൗണിലെയും നിരവധി കെട്ടിടങ്ങളുടെയും കച്ചവട സ്ഥാപനങ്ങളുടെയും ഓടുകളും റൂഫിംഗി ഷീറ്റുകളും കാറ്റിൽ പറന്നുപോയി. ഇവിടെ വൈദ്യതി ബന്ധം വിഛേദിക്കപ്പിട്ടിരിക്കുകയാണ്.

മന്ത്രിയുടെ നിർദേശത്തിനും പുല്ലുവില; എങ്ങുമെത്താതെ ആനമതിൽ നിർമാണം

ഇരിട്ടി: ആറളം ഫാം പുനരധിവാസ മേഖലയിൽ ആറു കിലോമീറ്റർ ദൂരം മതിൽ ഈ മാസം പൂർത്തിയാക്കുമെന്ന മന്ത്രി എ.കെ. ശശീന്ദ്രന്‍റെ ഉറപ്പിനും പുല്ലുവില. കഴിഞ്ഞ ഫെബ്രുവരി 23 ന് ബ്ലോക്ക് 13 ൽ കരിക്കൻമുക്കിൽ വെള്ളി - ലീല ദമ്പതികളെ കാട്ടാന ചവിട്ടിക്കൊന്നതിനെ തുടർന്നുണ്ടായ പ്രതിഷേധത്തെ തുടർന്ന് മന്ത്രിയും ജില്ലാ ഭരണകൂടത്തിന്‍റെയും ജനപ്രതിനിധികളുടെയും സാന്നിധ്യത്തിൽ ചേർന്ന യോഗത്തിലാണ് അടിയന്തര പ്രാധാന്യത്തോടെ ആറു കിലോമീറ്റർ എങ്കിലും മതിൽ പൂർത്തിയാക്കാൻ നിർദേശം നിർദേശിച്ചിരുന്നത്. നേരത്തെയുള്ള തീരുമാന പ്രകാരം ഏഴു മാസം മുൻപ് നിർമാണം പൂർത്തിയാക്കേണ്ട പത്തു കിലോമീറ്റർ ദൂരം 19 മാസം കഴിഞ്ഞിട്ടും ലക്ഷ്യം കണ്ടില്ല. ഇതുവരെ വെറും 4.097 കിലോമീറ്റർ ദൂരം മാത്രമാണ് മതിൽ നിർമിച്ചത്. മന്ത്രി യോഗത്തിൽ ആവശ്യപ്പെട്ട 1.890 കിലോമീറ്ററിൽ ഇന്നേക്കകം പ്രവൃത്തി പൂർത്തീകരിക്കാൻ നിർദേശിച്ചിടത്ത് 800 മീറ്ററിൽ കരിങ്കൽകെട്ട് മാത്രമാണ് പൂർത്തിയായത്. 130 മീറ്ററിൽ പൈലിംഗ് പോലും നടത്തിയിട്ടില്ല. 550 മീറ്റർ ദൂരം റെയിൽവേലി പൂർത്തിയാക്കേണ്ട സ്‌ഥലത്ത് കൂപ്പ്റോഡ് മാത്രമാണ് കഴിഞ്ഞത്. തൊഴിലാളികളെ കിട്ടാനില്ല, കരിങ്കൽ കിട്ടാനില്ല എന്നിങ്ങനെയാണ് കരാറുകാരൻ പറയുന്നതെന്നാണ് നിർവഹണ ചുമതലയുള്ള മരാമത്ത് അധികൃതർ ഔദ്യോഗിക യോഗങ്ങളിൽ അറിയിക്കുന്നത്. വളയംചാൽ വനം ഓഫിസ് പരിസരത്ത് നിന്ന് തുടങ്ങി പരിപ്പ് തോട് 55 വരെ 10 കിലോമീറ്റർ ദൂരം വരുന്ന ആന മതിലിന്‍റെ നിർമാണ ചെലവ് 37.09 കോടി രൂപയാണ് . നിർദേശിച്ച ദൂരത്തിൽ ഇനിയും രണ്ടു കിലോമീറ്റർ ദൂരം ഇനിയും ബാക്കിയുണ്ട്. ഇതിനിടെ കരാറുകാരൻ തനിക്ക് പണി പൂർത്തിയാക്കാൻ കഴിയില്ലെന്നും കരാറിൽ നിന്ന് തന്നെ ഒഴിവാക്കണമെന്നും ആവശ്യപ്പെട്ട് സൂപ്രണ്ടിംഗ് എൻജിനിയർക്ക് കത്ത് നൽകിയതും നിർമാണത്തെ പ്രതിസന്ധിയിലാക്കുന്നുണ്ട്. മന്ത്രി വിളിച്ച യോഗത്തിൽ ബാക്കിയുള്ള പ്രവൃത്തിയിൽ 3.903 കിലോമീറ്റർ ദുരം മരം മുറിക്കാത്തതായിരുന്നു തടസമായി ആദ്യം ചൂണ്ടിക്കാട്ടിയത്. മരം മുറിച്ചുമാറ്റി 45 ദിവസം പിന്നിടുമ്പോഴാണ് തന്നെ കരാറിൽ നിന്നൊഴിവാക്കാനായി കത്ത് നൽകിയിരിക്കുന്നത്. മതിൽ നിർമാണത്തിലെ കാലതാമസം കണക്കിലെടുത്ത് ഇവിടെ 5.2 കിലോമീറ്റർ ദൂരം അനെർട്ടിന്‍റെ നേതൃത്വത്തിൽ തൂക്കുവേലി നിർമാണം നടന്നുവരികയാണ്. മതിൽ നിർമാണം നടത്താത ഭാഗത്തുകൂടി ആനകൾക്ക് സുഗമമായി ഫാമിലേക്ക് കടക്കാനാകുന്ന അവസ്ഥയാണുള്ളത്. ദന്പതികളുടെ ജീവനെടുത്തത് മതിലിന്‍റെ അഭാവം ആനമതിൽ സമയബന്ധിതമായി പൂർത്തീകരിക്കാത്തതാണ് വെള്ളി - ലീല ദമ്പതികളുടെ ജീവൻ കാട്ടാനക്കലിയിൽ പൊലിയാൻ ഇടയാക്കിയത്. 2023 സെപ്റ്റംബർ 30 നാണ് മന്ത്രി ആറളത്ത് ആനമതിൽ പ്രവൃത്തി ഉദ്ഘാടനം ചെയ്‌തത്. ഒരു വർഷം നിർമാണ കാലാവധി ഉണ്ടെങ്കിലും പുനരധിവാസ മേഖലയിലെ പ്രത്യേക സാഹചര്യം കണക്കിലെടുത്ത് വേഗം പണി പൂർത്തിയാക്കണമെന്നായിരുന്നു മന്ത്രിയുടെ നിർദേശം. വകുപ്പ് മന്ത്രിയും മുഖ്യമന്ത്രിയും യോഗങ്ങൾ വിളിച്ചു വേഗം പൂർത്തീകരിക്കാൻ നിർദേശിച്ചെങ്കിലും പ്രയോജനം ഉണ്ടായില്ല. കൂടുതൽ ജോലിക്കാരെ നിയോഗിക്കുകയോ, കൂടുതൽ റീച്ചുകളിൽ പണി വ്യാപിപ്പിക്കുകയോ ചെയ്തിട്ടില്ല.

ആനമതിൽ നിർമാണത്തിൽ അതൃപ്തി പ്രകടിപ്പിച്ച് നിരീക്ഷണ സമിതി യോഗം

ഇരിട്ടി: ആറളം പുനരധിവാസ മേഖലയിൽ ആനമതിൽ നിർമാണം വേഗത്തിലാക്കണമെന്ന നിർദേശവും അവഗണിച്ചതിൽ കടുത്ത അതൃപ്‌തി പ്രകടമാക്കി നിരീക്ഷണ സമിതി യോഗം. വന്യജീവി സംഘർഷം ലഘൂകരിക്കുന്നതിനും ആന ഓടിക്കൽ ദൗത്യം, ആനമതിൽ നിർമാണ പുരോഗതി, പുനരധിവാസ മേഖലയിലെ അടിക്കാട് വെട്ടിത്തെളിക്കൽ, സോളർ തൂക്കുവേലി നിർമാണം എന്നീ കാര്യങ്ങളിലെ പുരോഗതി വിലയിരുത്തുന്നതിനും മന്ത്രി എ.കെ.ശശീന്ദ്രന്‍റെ നിർദേശ പ്രകാരം സണ്ണി ജോസഫ് എംഎൽഎയുടെ നേതൃത്വത്തിൽ രൂപീകരിച്ച പ്രാദേശിക കമ്മിറ്റിയുടെ ഇന്നലെ ഇരിട്ടി ഐബിയിൽ ചേർന്ന അവലോകന യോഗവും നിരാശ പ്രകടിപ്പിച്ചു. പ്രവൃത്തി വേഗം നടത്തണമെന്നും കരാറുകാരനെതിരെ നടപടി സ്വീകരിക്കണമെന്നും യോഗത്തിൽ ശിപാർശ ഉണ്ടായി. അനെർട്ട് മുഖേന നിർമിക്കുന്ന 5.2 കിലോമീറ്റർ സോളർ തൂക്കുവേലി പൂർത്തിയായ ശേഷം മാത്രം ആനതുരത്തൽ നടത്തും. സോളർ തൂക്കുവേലിയുടെ പരിചരണം ടിആർഡിഎം ചെയ്യണം. എംഎൽഎ അധ്യക്ഷത വഹിച്ചു. ആറളം പഞ്ചായത്ത് പ്രസിഡന്‍റ് കെ.പി.രാജേഷ്, കൊട്ടിയൂർ റേഞ്ചർ പി.പ്രസാദ്, ടിആർഡിഎം സൈറ്റ് മാനേജർ സി.ഷൈജു, മരാമത്ത് അസി. എക്‌സിക്യൂട്ടീവ് എൻജിനിയർമാർ ലജീഷ് കുമാർ, അസി. എൻജിനിയർ പി.സനില, കെ.കെ.ഷാജി, കൊട്ടിയൂർ സെക്‌ഷൻ ഫോറസ്‌റ്റ് ഓഫിസർ പി.പ്രകാശൻ, ടി.ജി.പ്രീത, മിഥുൻ മോഹൻ, പൊലീസ്, എക്സൈസ്, പഞ്ചായത്ത്, റവന്യു, വനം വകുപ്പ് ഉദ്യോഗസ്‌ഥർ എന്നിവർ പങ്കെടുത്തു.

അറുപതുകാരനെ ആക്രമിച്ച സംഭവം: രണ്ട് പേർക്കെതിരേ കേസ്

തലശേരി: തലശേരി ജനറൽ ആശുപത്രിയിൽ എത്തിയ അറുപതുകാരനെ ആക്രമിച്ച് പരിക്കേൽപ്പിച്ച സംഭവത്തിൽ പോലീസ് കേസെടുത്തു. മട്ടാമ്പ്രം സ്വദേശികളായ മുഷ്താഖ്,ആരിഫ് എന്നിവർക്കെതിരെയാണ് തലശേരി പോലീസ് കേസെടുത്തത്. എരഞ്ഞോളി വാവാച്ചി മുക്കിലെ തെങ്ങ് കയറ്റ തൊഴിലാളിയായ പുത്തലത്ത് പറമ്പിൽ എ. ബാബുവിനെയാണ് ആക്രമിച്ച് പരിക്കേൽപ്പിച്ചത്. കഴിഞ്ഞ ദിവസം രാത്രി 10 ഓടെ തലശേരി ജനറൽ ആശുപത്രിയിലെ പ്രസവ വാർഡിന് മുന്നിലുള്ള റോഡിൽ വച്ചാണ് സംഭവം. മകന്‍റെ ഭാര്യയെ പ്രസവത്തിനായി ആശുപത്രിയിൽ അഡ്മിറ്റ് ചെയ്തിരുന്നു. രാത്രി പ്രസവ വാർഡിലേക്ക് രോഗിക്ക് പുതിയ വസ്ത്രം വാങ്ങാൻ നഴ്സ് പറഞ്ഞതിനാൽ ആശുപത്രിക്ക് പുറത്തേ റോഡിൽ ഇറങ്ങിയപ്പോൾ ഒരു യുവാവ് തന്നെ അരികിലേക്ക് വിളിച്ചെന്നും പോവാതിരുന്നപ്പോൾ രണ്ട് പേർ വന്ന് അക്രമിക്കുകയായിരുന്നുവെന്നുമാണ് പരാതി. സംഭവത്തിൽ പോലീസ് അന്വേഷണം ആരംഭിച്ചു.

നിയമ ലംഘനം നടത്തിയ വാഹനങ്ങള്‍ക്ക് പിഴ

കണ്ണൂർ: നഗരപരിധിയിലെ അനധികൃത വാഹന പാര്‍ക്കിംഗ്, സര്‍വീസ് എന്നിവ സംബന്ധിച്ച് വ്യാപകമായി പരാതി ഉയര്‍ന്ന സാഹചര്യത്തില്‍ ആര്‍ടിഒ ഇ.എസ്. ഉണ്ണികൃഷ്ണൻ നേതൃത്വത്തില്‍ പരിശോധന നടത്തി. പരിശോധനയില്‍ പെര്‍മിറ്റില്‍ അനുവദിച്ച സ്ഥലം മാറി പാര്‍ക്ക് ചെയ്ത് സര്‍വീസ് നടത്തിയ നാല് ഓട്ടോറിക്ഷകള്‍, നികുതി, ഫിറ്റ്നെസ് എന്നിവ ഇല്ലാതെ സര്‍വീസ് നടത്തിയ വാഹനം, അംഗീകൃത കളര്‍ ഇല്ലാതെ സര്‍വീസ് നടത്തിയ വാഹനം എന്നിങ്ങനെ വിവിധ നിയമ ലംഘങ്ങള്‍ കണ്ടെത്തി നടപടി സ്വീകരിച്ചു. കൂടാതെ എയര്‍ ഹോണ്‍ ഉപയോഗിച്ചതിനു സ്വകാര്യ ബസിനും അനധികൃത രൂപ മാറ്റം വരുത്തിയതിന് മോട്ടോര്‍ സൈക്കിളിനും പിഴ ചുമത്തി. ഒമ്പത് വാഹനങ്ങളില്‍ നിന്നായി 32,250 രൂപ പിഴ തുക ഈടാക്കി. വരും ദിവസങ്ങളിലും വാഹന പരിശോധന കര്‍ശനമാക്കുമെന്നും കുറ്റക്കാര്‍ക്കെതിരേ കര്‍ശന നടപടികള്‍ സ്വീകരിക്കുമെന്നും ആര്‍ടിഒ അറിയിച്ചു. പെര്‍മിറ്റ് അനുമതിക്ക് വിരുദ്ധമായി സര്‍വീസ് നടത്തുന്ന വാഹനങ്ങള്‍ കുറ്റം ആവര്‍ത്തിക്കുന്നത് ശ്രദ്ധയില്‍പ്പെട്ടാല്‍ പെര്‍മിറ്റ്, ലൈസന്‍സ് എന്നിവ റദ്ദു ചെയ്യുന്നതുള്‍പ്പെടെയുള്ള നടപടികള്‍ സ്വീകരിക്കുമെന്നും ആര്‍ടിഒ മുന്നറിയിപ്പ് നല്‍കി.

ലഹരിക്കെതിരേ പ്രചാരണത്തിനായി ഔട്ട് റീച്ച് പ്രോഗ്രാം നടത്തി

തലശേരി: എൻഎസിഐഎൻ കൊച്ചിയുടെ ആഭിമുഖ്യത്തിൽ വിദ്യാർഥികളുടെ മാതാപിതാക്കൾ, രക്ഷിതാക്കൾ, പിടിഎ അംഗങ്ങൾ എന്നിവർക്കായി ലഹരി വിരുദ്ധ ജാഗ്രതാ സന്ദേശം പ്രചരിപ്പിക്കുന്നതിനായി സൊസൈറ്റി ഔട്ട് റീച്ച് പ്രോഗ്രാം നടത്തി. ഗവ. ബ്രണ്ണൻ ടീച്ചർ എഡ്യുക്കേഷൻ കോളജിൽ കളക്ടർ അരുൺ കെ. വിജയൻ ഉദ്ഘാടനം ചെയ്തു. നാർക്കോട്ടിക്സ് കൺട്രോൾ ബ്യൂറോ ഡെപ്യൂട്ടി ഡയറക്ടർ അനീസ് മുഖ്യപ്രഭാഷണം നടത്തി. പരിപാടിയുടെ ഭാഗമായി വിമുക്തി, പ്രതീക്ഷ ഡി അഡിഷൻ കേന്ദ്രങ്ങളിൽ നിന്നുള്ള ക്ലിനിക്കൽ സൈക്കോളജിസ്റ്റുകളുമായി സംവാദവും നടന്നു. ജില്ലയിലെ എല്ലാ തദ്ദേശസ്ഥാപനങ്ങളുമായി സഹകരിച്ച് പ്രത്യേക അവബോധ ക്ലാസുകൾ സംഘടിപ്പിക്കുമെന്ന് എൻഎസിഐഎൻ അഡീഷണൽ ഡയറക്ടർ ജനറൽ മിനു പ്രമോദ് പറഞ്ഞു.‌

എന്‍ജിനിയറിംഗ് വിഭാഗം ഉദ്യോസ്ഥര്‍ക്കെതിരേ കോർപറേഷൻ കൗൺസിലിൽ രൂക്ഷവിമർശനം

കണ്ണൂര്‍: ഉദ്യോഗസ്ഥരുടെ അനാസ്ഥയും കെടുകാര്യസ്ഥതയും മൂലം കോർപറേഷൻ പരിധിയിലെ വികസനങ്ങൾ എങ്ങുമെത്താതെ അനുവദിച്ച ഫണ്ട് നഷ്ടപ്പെടുന്നതിനെതിരെ കൗൺസിൽ യോഗത്തിൽ എൻജിനിയറിംഗ് വിഭാഗത്തിനെതിരെ രൂക്ഷ വിമർശനമുയർത്തി ഭരണ-പ്രതിപക്ഷ കൗൺസിലർമാർ. റോഡ് നിർമാണം, തെരുവുവിളക്കുകൾ മാറ്റി സ്ഥാപിക്കൽ തുടങ്ങി നിരവധി വികസനപ്രവർത്തനങ്ങളാണ് ഉദ്യോഗസ്ഥരുടെ അനാസ്ഥമൂലം ഇഴഞ്ഞു നീങ്ങുന്നത്. പല സോണുകളിലും ഇതുവരെ റോഡ് നിര്‍മാണത്തിന്‍റെ ടെന്‍ഡര്‍ വിളിച്ചിട്ടില്ല. ടെന്‍ഡര്‍ വിളിച്ചിടങ്ങളില്‍ നിര്‍മാണം ആരംഭിച്ചിട്ടില്ല. ചിലയിടങ്ങളില്‍ നിര്‍മാണം ആരംഭിച്ചെങ്കിലും പകുതിയില്‍ നിര്‍ത്തിയിരിക്കുകയാണ്. വര്‍ഷങ്ങളായി ടാര്‍ ചെയ്യാത്ത റോഡുകളുമുണ്ട്. എന്‍ജിനിയറിംഗ് വിഭാഗത്തിന്‍റെ അനാസ്ഥ കാരണം ടെന്‍ഡര്‍ നടപടികളെല്ലാം നിലച്ചിരിക്കുകയാണ്. മതിയായ ജീവനക്കാരില്ലാത്തതും അടിക്കടിയുണ്ടാകുന്ന സ്ഥലംമാറ്റവും ഉദ്യോഗസ്ഥര്‍ മെഡിക്കല്‍ ലീവെടുത്ത് പോകുന്നതുമെല്ലാം കോര്‍പറേഷനിലെ പ്രവര്‍ത്തനങ്ങളെ സാരമായ രീതിയില്‍ ബാധിച്ചിരിക്കുകയാണെന്ന് കൗണ്‍സില്‍മാര്‍ ചൂണ്ടിക്കാട്ടി.

മഞ്ഞപ്പുല്ല്-പൈതൽമല ട്രക്ക്പാത്ത് ഉദ്ഘാടനം ചെയ്തു

ആലക്കോട്: ജോൺ ബ്രിട്ടാസ് എംപിയുടെ പ്രാദേശിക വികസന ഫണ്ടിൽ നിന്നും 20 ലക്ഷം രൂപ ചെലവിൽ പൈതൽമല ഇക്കോ ടൂറിസത്തിന്‍റെ ഭാഗമായി നിർമിച്ച മഞ്ഞപ്പുല്ല്- പൈതൽമല ട്രക്ക്പാത്ത് ഉദ്ഘാടനം ചെയ്തു. ജോൺ ബ്രിട്ടാസ് എംപി ഉദ്ഘാടനം നിർവഹിച്ചു. ജില്ലാ പഞ്ചായത്ത് പ്രസിഡന്‍റ്‌‌ കെ.കെ. രത്നകുമാരി അധ്യക്ഷത വഹിച്ചു. തളിപ്പറമ്പ് ഫോറസ്റ്റ് റേഞ്ച് ഓഫീസർ പി. വി.സനൂപ് കൃഷ്ണൻ, സാജൻ കെ. ജോസഫ്, വി.ജി.സോമൻ, ബിജു പുതുക്കള്ളി, റോയി ഈറ്റക്കൽ, പി .വി. ബാബുരാജ് ,കെ. പി. സാബു എന്നിവർ പ്രസംഗിച്ചു.

അങ്കണവാടി ജീവനക്കാർക്ക് യാത്രയയപ്പ്

ഇരിക്കൂർ: ഇരിക്കൂർ ഐസിഡിഎസ് അഡീഷണലിൽ നിന്ന് വിരമിക്കുന്ന അങ്കണവാടി ജീവനക്കാർക്ക് യാത്രയയപ്പ് നൽകി. ഇരിക്കൂർ ഇംഗ്ലീഷ് വാലി പബ്ലിക്ക് സ്കൂളിൽ നടന്ന പരിപാടി ഇരിക്കൂർ ബ്ലോക്ക് പഞ്ചായത്ത് വൈസ് പ്രസിഡന്‍റ് ഒ.എസ്.ലിസി ഉദ്ഘാടനം ചെയ്തു. ഉളിക്കൽ പഞ്ചായത്തിലെ മണിപ്പാറ അങ്കണവാടി വർക്കർ വി.എസ്. പൊന്നമ്മ,നെല്ലിക്കാംപൊയിലിലെ അങ്കണവാടി വർക്കർ എൻ.വിലാസിനി,കുറ്റ്യാട്ടൂർ പഞ്ചായത്തിലെ ചെമ്മാടം അങ്കണവാടി വർക്കർ ബി.തങ്കമണി, ചെറുവത്തലമെട്ട അങ്കണവാടി വർക്കർ ടി.ചിത്രലേഖ, വേശാല കോമക്കരി അങ്കണവാടി ഹെൽപ്പർ എ.രമണി,ചെക്കിക്കാട് അങ്കണവാടി വർക്കർ വി.ടി.പുഷ്പവല്ലി, പടിയൂർ പഞ്ചായത്തിലെ മണ്ണേരി അങ്കണവാടി ഹെൽപ്പർ വി.എ.ലില്ലി എന്നിവർക്കാണ് യാത്രയയപ്പ് നൽകിയത്. ഉപഹാര സമർപ്പണവും നടത്തി. ഐസിഡിഎസ് സൂപ്പർവൈസർ പി. ഷൈമ അധ്യക്ഷത വഹിച്ചു. ഇരിക്കൂർ ബ്ലോക്ക് പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ ബേബി തോലാനി,ബ്ലോക്ക് പഞ്ചായത്ത് അംഗം ചാക്കോ പാലക്കലോടി , പ്രോജക്ട് ലീഡർ ലിസിതോമസ്, സി ഡിപിഒ നിഷ പാലത്തടത്തിൽ,ഐസിഡിഎസ് സൂപ്പർവൈസർമാരായ പി.വി.പ്രഭാവതി, പി. ഷൈന എന്നിവർ പ്രസംഗിച്ചു.

അലക്സ് നഗർ സെന്‍റ് ജോസഫ്സ് ക്നാനായ പള്ളിയിൽ തിരുനാൾ തുടങ്ങി

അലക്സ് നഗർ: അലക്സ് നഗർ സെന്‍റ് ജോസഫ്സ് ക്‌നാനായ കത്തോലിക്ക പള്ളിയിൽ ഇടവക മധ്യസ്ഥനായ വിശുദ്ധ യൗസേപ്പ് പിതാവിന്‍റെ തിരുന്നാളിന് തുടക്കമായി. തിരുനാൾ നാളെ സമാപിക്കും. മടമ്പം ഫൊറോന വികാരി ഫാ.സജി മെത്താനത്ത് തിരുനാളിന് കൊടിയേറ്റി. വിശുദ്ധകുർബാന, പരേതസ്‌മരണ, സെമിത്തേരി സന്ദർശനം എന്നിവയും നടന്നു. തുടർന്ന് ഭക്തസംഘടനകളുടെ വാർഷികവും നടന്നു. ഇന്ന് വൈകുന്നേരം 4.15ന് വാദ്യമേളം, അഞ്ചിന് നടക്കുന്ന ആഘോഷമായ വിശുദ്ധ കുർബാനയ്ക്ക് കൊട്ടോടി വികാരി ഫാ. സനീഷ് കയ്യാലയ്ക്കത്ത് കാർമികത്വം വഹിക്കും. ഫാ. സിജോ കണ്ണന്പുഴ തിരുനാൾ സന്ദേശം നൽകും. ചെറുകര ഭാഗത്തേക്ക് പ്രദക്ഷിണം, തുടർന്ന് പരിശുദ്ധ കുർബാനയുടെ ആശീർവാദം, വാദ്യമേളങ്ങളുടെ ഡിസ്പ്ലേ എന്നിവ നടക്കും. നാളെ വൈകുന്നേരം അഞ്ചിന് ആഘോഷമായ തിരുനാൾ പാട്ടു കുർബാന, തിരുനാൾ സന്ദേശം എന്നിവക്ക് ഫാ. ജിൻസൺ കൊട്ടിയാനിക്കൽ, ഫാ. ജോമോൻ കൂട്ടുങ്കൽ എന്നിവർ കാർമികത്വം വഹിക്കും. തുടർന്ന് പ്രദക്ഷിണം, പരിശുദ്ധ കുർബാനയുടെ ആശീർവാദം.

കാറിൽ കടത്തിയ 65 കുപ്പി വിദേശമദ്യവുമായി യുവാവ് അറസ്റ്റിൽ

കരുവഞ്ചാൽ: കാറിൽ കടത്തിക്കൊണ്ടു വരികയായിരുന്ന ഇന്ത്യൻ നിർമിത വിദേശമദ്യവുമായി യുവാവിന എക്സൈസ് സംഘം അറസ്റ്റ് ചെയ്തു. എക്സൈസ് ഇന്‍റലിജൻസ് വിഭാഗത്തിന് ലഭിച്ച രഹസ്യ വിവരത്തെ തുടർന്ന് ആലക്കോട് റേഞ്ച് ഇൻസ്പ്കെടർ സി.എച്ച്. നസീബിന്‍റെ നേതൃത്വത്തിൽ കല്ലൊടിയിൽ നടത്തിയ പരിശോധയിലാണ് മദ്യം പിടികൂടിയത്. സംഭവവുമായി ബന്ധപ്പെട്ട് കനകക്കുന്നിലെ കെ.ജെ. ബോസിനെ (43) അറസ്റ്റ് ചെയ്തു. മദ്യം കടത്താനുപയോഗിച്ച കാറും കസ്റ്റഡിയിലെടുത്തും. കാറിൽ നിന്ന് 65 കുപ്പി വിദേശ മദ്യമാണ് പിടികൂടിയത്. എക്സൈസ് ഇൻസ്‌പെക്ടർ (ഗ്രേഡ്)കെ. വി ഗിരീഷ്, പ്രിവന്‍റീവ് ഓഫീസർ പി.യേശുദാസൻ, പ്രിവന്‍റീവ് ഓഫീസർ ഗ്രേഡ് ടി.വി.മധു,സിവിൽ എക്സൈസ് ഓഫീസർ മാരായ പി. കെ രാജീവ്, കെ.വി ഷൈജു, ടി.പ്രണവ്, ജിതിൻ ആന്‍റണി, എൻ.എം അനുജ എന്നിവരും അന്വേഷണ സംഘത്തിലുണ്ടായിരുന്നു.

ഇടിമിന്നലിൽ വീട്ടുപകരണങ്ങൾ നശിച്ചു

ചെറുപുഴ: മലയോരത്ത് കഴിഞ്ഞ ദിവസങ്ങളിൽ ഉണ്ടായ ഇടിമിന്നൽ വീടുകൾക്കും വീട്ടുപകരണങ്ങൾക്കും നാശം. ചെറുപുഴ പഞ്ചായത്തിലെ 15ാം വാർഡിൽപ്പെട്ട നെല്ലിക്കളത്ത് പി. യൂസഫിന്‍റെ വീട്ടിലെ ടിവി, അഞ്ച് ഫാനുകൾ, ഇൻവേർട്ടർ, സ്വിച്ച് ബോർഡുകൾ എന്നിവ കത്തിനശിച്ചു. വീടിന്‍റെ ചുമരിനും വിള്ളൽ വീണിട്ടുണ്ട്. ഒന്നര ലക്ഷത്താളം രൂപയുടെ നാശനഷ്ടമുണ്ടായതായി വീട്ടുടമ യൂസഫ് പറഞ്ഞു. തൊട്ടടുത്ത പി. ജാനകിയുടെ വീടിന്‍റെ മുൻഭാഗത്തായി കേബിൾ ബന്ധിപ്പിച്ച പോസ്റ്റിലാണ് മിന്നലേറ്റത്. ഇവിടുത്തെ വയറിംഗും കത്തിനശിച്ചു. ഭൂമിയിൽ ഇടി മിന്നലേറ്റ് മണ്ണ് ഇളക്കി മറിച്ച നിലയിലും സമീപത്തെ ചെടികൾ കരിഞ്ഞ നിലയിലുമാണ്.

കെവിവിഇഎസ് യൂണിറ്റ് വാർഷിക പൊതുയോഗം

ചെറുപുഴ: വ്യാപാരി വ്യവസായി ഏകോപന സമിതി പ്രാപ്പൊയിൽ യൂണിറ്റ് വാർഷിക പൊതുയോഗം വ്യാപാരഭവൻ ഓഡിറ്റോറിയത്തിൽ നടന്നു. സംസ്ഥാന ജനറൽ സെക്രട്ടറി ദേവസ്യാ മേച്ചേരി ഉദ്ഘാടനം ചെയ്തു. യൂണിറ്റ് പ്രസിഡന്‍റ് റോയി ജോസഫ് അധ്യക്ഷത വഹിച്ചു. ചടങ്ങിൽ പുസ്തകാസ്വാദനത്തിൽ സംസ്ഥാന തലത്തിൽ രണ്ടാം സ്ഥാനം നേടിയ ടി. നിഷാകുമാരിയെ ആദരിച്ചു. ജില്ലാ സെക്രട്ടറിമാരായ എൻ.വി. കുഞ്ഞിരാമൻ, ജെ. സെബാസ്റ്റ്യൻ, മേഖലാ പ്രസിഡന്‍റ് റോയി ജോസ്, ജോൺസൻ പടിഞ്ഞാത്ത്, സുജിത്ത് നമ്പ്യാർ, വൽസ ജോൺ, വിനോഷ് മാത്യു, എം.ജെ. ജോസഫ്, ടി. ബാലകൃഷ്ണൻ, രുഗ്മിണി ബാലകൃഷ്ണൻ എന്നിവർ പ്രസംഗിച്ചു.

കാറ്റിലും മഴയിലും മരം കടപുഴകി റോഡിൽ വീണു

ചെറുപുഴ: കനത്ത കാറ്റിലും മഴയിലും മരം കടപുഴകി റോഡിലേയ്ക്ക് വീണു. ഇന്നലെ വൈകുന്നേരം നാലരയോടെ പാടിയോട്ടുചാൽ ടൗണിൽ കുരിശുപള്ളിയ്ക്ക് സമീപം ചെറുപുഴ പയ്യന്നൂർ റോഡിലയിരുന്നു സംഭവം. മരം വീണതിനെ തുടർന്ന് ചെറുപുഴ പയ്യന്നൂർ റൂട്ടിൽ ഏറെ നേരം ഗതാഗതം തടസപ്പെട്ടു. അഗ്നിരക്ഷാ സേനയും നാട്ടുകാരും ചേർന്ന് മരംമുറിച്ചു മാറ്റിയാണ് ഗതാഗതം പുനസ്ഥാപിച്ചത്. ചെറുപുഴ പയ്യന്നൂർ റോഡരികിൽ അപകടകരമാം വിധം നിരവധി മരങ്ങളാണ് നിൽക്കുന്നത്.

സ്കൂൾ പാചകതൊഴിലാളി യൂണിയൻ ഏരിയാ കൺവൻഷൻ ന‌‌ടത്തി

ആലക്കോട്: ജില്ലാ സ്കൂൾ പാചകതൊഴിലാളി യൂണിയൻ (സിഐടിയു) ആലക്കോട് ഏരിയ കൺവൻഷൻ കാർത്തികപുരത്ത് നടന്നു. കണ്ണൂർ ജില്ലാ പ്രസിഡന്‍റ് ടി. പ്രകാശിനി ഉദ്ഘാടനം ചെയ്തു. ഏരിയ പ്രസിഡന്‍റ് സിന്ധു അനിൽ അധ്യക്ഷത വഹിച്ചു. കേന്ദ്രസർക്കാർ സ്കീം വർക്കർമാരോട് കാട്ടുന്ന അവഗണന അവസാനിപ്പിക്കുക, കാലാനുസൃതമായി വേതനം വർധിപ്പിക്കുക, കൂലി കുടിശികയാക്കാതെ നൽകുക, 250 കുട്ടികൾക്ക് ഒരു സ്കൂൾ പാചകതൊഴിലാളിയെ നിയമിക്കുക എന്നീ കാര്യങ്ങൾ കേന്ദ്രസർക്കാർ അംഗീകരിക്കണമെന്ന് സമ്മേളനം പ്രമേയത്തിലൂടെ ആവശ്യപ്പെട്ടു. കെ.എസ്. ചന്ദ്രശേഖരൻ, ബീന സന്തോഷ്, പത്മിനി ശശിധരൻ, സി.ലക്ഷ്മി, വത്സല രാമചന്ദ്രൻ എന്നിവർ പ്രസംഗിച്ചു.

മെക്കാഡം ടാറിംഗ് പൂർത്തിയാക്കാത്തതിൽ പ്രതിഷേധ പ്രകടനവും യോഗവും നടത്തി

ചപ്പാരപ്പടവ്: വിമലശേരി - എരുവാട്ടി - തേർത്തല്ലി റോഡ് മെക്കാഡം ടാറിംഗ് പൂർത്തിയാക്കാത്തതിൽ പ്രതിഷേധിച്ച് വിമലശേരി ഹരിത സ്വാശ്രയ സംഘത്തിന്‍റെ നേതൃത്വത്തിൽ പ്രതിഷേധപ്രകടനവും യോഗവും നടത്തി. പ്രകടനത്തിന് ഹരിത സ്വാശ്രയസംഘം പ്രസിഡന്‍റ് പി. വൈ. തോമസ് നേതൃത്വം നൽകി. പൊതുയോഗം ബ്ലോക്ക് പഞ്ചായത്തംഗം ഉനൈസ് എരുവാട്ടി ഉദ്ഘാടനം ചെയ്തു. പഞ്ചായത്ത് അംഗം ജോസഫ് ഉഴുന്നുപാറ, സുനിൽ പുത്തൻപുരയ്ക്കൽ , കെ.ജെ. ടോമി,പി. ജെ ബെന്നി,എ. ജെ ജിജോ,ഇ. ജെ റോയി, സി.റ്റി. ബാബു എന്നിവർ പ്രസംഗിച്ചു. പിഡബ്ല്യുഡി ഓഫീസ് ഉപരോധം ഉൾപ്പെടെയുള്ള ശക്തമായ സമരപരിപാടികളുമായി മുന്നാേട്ടു പോകാൻ യോഗം തീരുമാനിച്ചു.

വയക്കര ഫെസ്റ്റ്: കാൽനാട്ട് കർമം നടത്തി

ചെറുപുഴ: വയക്കര ഗവ.ഹയർ സെക്കൻഡറി സ്കൂൾ ശതാബ്ദി ആഘോഷത്തിന്‍റെ സമാപനത്തോടനുബന്ധിച്ച് നടത്തുന്ന വയക്കര ഫെസ്റ്റിന് കാൽനാട്ടി. പയ്യന്നൂർ ബ്ലോക്ക് പഞ്ചായത്ത് പ്രസിഡന്‍റ് പി.വി. വൽസല കാൽനാട്ട് കർമം നിർവഹിച്ചു. പി.എൻ. മനോജ് കുമാർ അധ്യക്ഷത വഹിച്ചു. പഞ്ചായത്തംഗം ആർ. രാധാമണി, പ്രിൻസിപ്പൽ എം.ഡി. അനിൽകുമാർ, മുഖ്യാധ്യാപിക ടി.വി.പ്രീത എന്നിവർ പ്രസംഗിച്ചു. മേയ് ആറ് മുതൽ 22 വരെയാണ് വയക്കര ഫെസ്റ്റ്.

ബഹുഭാഷാ കവി സമ്മേളനം സമാപിച്ചു

ചെറുപുഴ: പ്രാപ്പൊയിൽ കക്കോട് ചെറുശേരി ഗ്രാമത്തിലെ നവപുരം മതാതീത ദേവാലയത്തിൽ നടന്നുവന്ന ബഹുഭാഷാ കവി സമ്മേളനം സമാപിച്ചു. ഗ്രന്ഥ പ്രതിഷ്ഠയുള്ള നവപുരം ദേവാലയത്തിലെ ഉത്സവത്തോടനുബന്ധിച്ച് എല്ലാവർഷവും നടത്തപ്പെടുന്ന ബഹുഭാഷാകവി സമ്മേളനത്തിൽ ഭാരതീയ-വിദേശ ഭാഷകളിൽ കവിതകളെഴുതുന്നവരാണ് പങ്കെടുത്തത്. കന്നട സാഹിത്യകാരൻ രാധാകൃഷ്ണ ഉളിയത്തടുക്ക കവി സമ്മേളനം ഉദ്ഘാടനം ചെയ്തു. നവപുരം ദേവാലയ സ്ഥാപകൻ പ്രാപ്പൊയിൽ നാരായണൻ അധ്യക്ഷത വഹിച്ചു. സുന്ദര ബാറടുക്ക, ദിവ്യാഗട്ടി, സർമില ബജ കുഡ്ലു, രാജരാമവർമ വിട്ല, ശ്രീനിവാസ നായ്ക്, ബാലകൃഷ്ണ നായ്ക്, പ്രേമ ആർ.ഷെട്ടി, പി. ഹർഷിത, അഞ്ജു വിനയ്, വനജാക്ഷി ചെമ്പ്രകാന, പ്രഫ. ബാലകൃഷ്ണ ബരീകെ, നിർമല ശേഷപ്പ, ജോത്സന കാഡണ്ടേലു, വിന്നി ഗംഗാധരൻ, കുഞ്ഞപ്പൻ തൃക്കരിപ്പൂർ, ശരണ്യാ നാരായണൻ, ഗംഗാധരൻ മലപ്പട്ടം എന്നിവർ കവിതകൾ അവതരിപ്പിച്ചു. ചടങ്ങിൽ വെങ്കട്ട് ഭട്ട് എടനീർ, സുബാഷ് പെർല, ഹാരിഷ് സുലായ ഓടമ്പെട്ട്, പ്രേമ ആർ ഷെട്ടി, സാബു മാളിയേക്കൽ, ഷൈല നാരായണൻ, പത്മിനി ലക്ഷ്മണൻ, ലക്ഷ്മി കുന്നുൽ പ്രസംഗിച്ചു.

മഹാത്മാഗാന്ധി കുടുംബ സംഗമം

ആലക്കോട്: ആലക്കോട് മണ്ഡലം കോൺഗ്രസ് നരിയൻപാറ വാർഡ് മഹാത്മാഗാന്ധി കുടുംബ സംഗമം നടത്തി. സജീവ് ജോസഫ് എംഎൽഎ ഉദ്ഘാടനം ചെയ്തു. വാർഡ് കോൺഗ്രസ് കമ്മിറ്റി പ്രസിഡന്‍റ് ജിജി പാറേക്കാട്ടിൽ അധ്യക്ഷത വഹിച്ചു. ഡിസിസി സെക്രട്ടറി ടി. ജയകൃഷ്ണൻ മുഖ്യപ്രഭാഷണം നടത്തി. ചടങ്ങിൽ ആദ്യകാല പ്രവർത്തകരെ ആദരിച്ചു. ജോസ് വട്ടമല, ബാബു പള്ളിപ്പുറം, ജോജി കന്നിക്കാട്ട്, ജോൺസൺ ചിറവയൽ, സിബിച്ചൻ കളപ്പുര, അപ്പുക്കുട്ടൻ സ്വാമിമഠം, ബിനോയ് പാലനാനി, സിബി തെങ്ങുംപള്ളി, സിബി വളവനാട്, ആലീസ് ടോമി, ലാലിച്ചൻ കിഴക്കേതാഴെ, ബീന ജിജി, ജാനേഷ് മാത്യു, ലിയോ മൂലയിൽ, മനു മാത്യു, മെറിൻ പാറടയിൽ, മനു മമ്പള്ളി, മനോജ് തള്ളിപ്പാറ എന്നിവർ പ്രസംഗിച്ചു. പയ്യാവൂർ: കോൺഗ്രസ് പയ്യാവൂർ മണ്ഡലം നാലാം വാർഡിലെ മഹാത്മാഗാന്ധി കുടുംബ സംഗമവും മുതിർന്ന പ്രവർത്തകരെ ആദരിക്കലും ചന്ദനക്കാംപാറ മാവുന്തോട് മുതുപുന്നയ്ക്കൽ ജോസിന്‍റെ വീട്ടിൽ നടന്നു. ഡിസിസി ജനറൽ സെക്രട്ടറി സുരേഷ് ബാബു എളയാവൂർ സംഗമം ഉദ്ഘാടനം ചെയ്തു. നാലാം വാർഡ് പ്രസിഡന്‍റ് ബാലകൃഷ്ണൻ പുതിയപുരയിൽ അധ്യക്ഷത വഹിച്ചു. വാർഡ് മെംബർ സിന്ധു ബെന്നി ആമുഖ പ്രഭാഷണവും ബ്ലോക്ക് പ്രസിഡന്‍റ് ജോസഫ് ആഞ്ഞിലിത്തോപ്പിൽ മുഖ്യപ്രഭാഷണവും നടത്തി. യൂത്ത് കോൺഗ്രസ് ഇരിക്കൂർ നിയോജമണ്ഡലം പ്രസിഡന്‍റ് പ്രിൻസ് പി. ജോർജ് മുഖ്യാതിഥിയായിരുന്നു. ചടങ്ങിൽ സി.പി. ജോസ് ഇരുപതോളം മുതിർന്ന കോൺഗ്രസ് പ്രവർത്തകരെ ആദരിച്ചു. നേതാക്കളായ ഇ.കെ. കുര്യൻ, ടി.പി. അഷറഫ്, ബോക്ക് പഞ്ചായത്ത് മെംബർ പി.ആർ. രാഘവൻ, നേതാക്കളായ ഇ.കെ. കുര്യൻ, ടി.പി. അഷ്റഫ്, ബേബി മുല്ലക്കരി, പഞ്ചായത്തംഗം സിജി ഒഴാങ്കൽ, ടി.കെ. കുഞ്ഞുമോൻ, ജിജി പൂവത്തുംമൂട്ടിൽ, ജോസഫ് ജോൺ മുതുപുന്നയ്ക്കൽ, വിത്സൺ കുറുപ്പനാട്ട്, സിബി പാറയിൽ എന്നിവർ പ്രസംഗിച്ചു.

ഉപ്പൻമാക്കൽ കുടുംബയോഗവും സ്നേഹവീട് കൈമാറ്റവും ഇന്ന്

ഉദയഗിരി: ഉപ്പൻമാക്കൽ കുടുംബസംഗമവും സൗജന്യമായി നല്കുന്ന സ്നേഹവീടിന്‍റെ താക്കോൽ കൈമാറ്റവും ഇന്ന് ഉദയഗിരി ജൂബിലി നഗറിൽ നടക്കും.15 ലക്ഷം രൂപ മുടക്കി കുടുംബയോഗം പണികഴിപ്പിച്ചാണ് വീട് നിർമിച്ചത്. ഉച്ചകഴിഞ്ഞ് മൂന്നിന് ഉദയഗിരി പള്ളിയിൽ വിശുദ്ധ കുർബാന, തുടർന്ന് ഉപ്പൻമാക്കൻ ശ്യാമിന്‍റെ വസതിയിൽ നടക്കുന്ന സമ്മേളനം തലശേരി അതിരൂപത ചാൻസിലർ ഫാ. ബിജു മുട്ടത്തുകുന്നേൽ ഉദ്ഘാടനം ചെയ്യും. കുടുംബയോഗം രക്ഷാധികാരി ഫാ. ജോസ് ഉപ്പൻമാക്കൽ അധ്യക്ഷത വഹിക്കും. ഉദയഗിരി സെന്‍റ് മേരീസ് പള്ളി വികാരി ഫാ. സേവ്യർ പുത്തൻപുരക്കൽ വിശിഷ്ടാതിഥിയായിരിക്കും. തുടർന്ന് സ്നേഹവീട് കൈമാറും.

ഇരിക്കൂറിലെ അങ്കണവാടികൾക്ക്‌ കിടക്കകൾ വിതരണം ചെയ്തു

ഉളിക്കൽ: ഇരിക്കൂർ നിയോജകമണ്ഡലത്തിലെ അങ്കണവാടികളിലേക്ക് സജീവ് ജോസഫ് എംഎൽഎയുടെ പ്രത്യേക വികസന നിധി ഉപയോഗിച്ച് കിടക്കകൾ നൽകി. 268 അങ്കണവാടികളിലേക്കാണ് കുടിക്കകൾ നൽകുന്നത്.കിടക്കകളുടെ മണ്ഡലം തല വിതരണോദ്ഘാടനം ഉളിക്കലിൽ സജീവ് ജോസഫ് എംഎൽഎ നിർവഹിച്ചു. ഉളിക്കൽ പഞ്ചായത്ത് പ്രസിഡന്‍റ് പി.സി. ഷാജി അധ്യക്ഷത വഹിച്ചു. ഉളിക്കൽ ഉണ്ണിമിശിഹാ ഇടവക വികാരി ഫാ.തോമസ് കിടാരത്തിൽ അനുഗ്രഹപ്രഭാഷണം നടത്തി. ഇരിക്കൂർ ബ്ലോക്ക് പഞ്ചായത്ത്‌ വൈസ് പ്രസിഡന്‍റ് ഒ.എസ്. ലിസി, സ്റ്റാൻഡിംഗ് കമ്മിറ്റി ചെയർമാൻ ബേബി തോലാനി,ബ്ലോക്ക്‌ പഞ്ചായത്ത്‌ മെമ്പർ ചാക്കോ പാലക്കലോടി, നിഷ പാലത്തടത്തിൽ, ഉളിക്കൽ പഞ്ചായത്ത്‌ വൈസ് പ്രസിഡന്‍റ് സമീറ പള്ളിപ്പാത്ത്, ജനപ്രതിനിധികളായ ടോമി മൂക്കനോലി, സുജ ആഷി, ആയിഷ ഇബ്രാഹിം, ശ്രീദേവി പുതുശേരി, മിനി ഈറ്റിശ്ശേരി, രാഷ്ട്രീയ പാർട്ടി പ്രതിനിധികളായ കുര്യാക്കോസ് മണിപ്പാടത്ത്,പി.കെ. ശശി , ടി.എൻ.എ. ഖാദർ, ഡോജു വരിക്കമാക്കൽ, ജിജോ തോമസ്, റസാക്ക്, ബിനു മുട്ടത്തിൽ ഐസിഡിഎസ് സൂപ്പർവൈസർ പി. ഷൈന എന്നിവർ പ്രസംഗിച്ചു.

ഐക്യദാർഢ്യ പ്രതിജ്ഞയും സന്ദേശയാത്രയും നടത്തി

ചെറുപുഴ: ഭീകരാക്രമണത്തിനെതിരേ വ്യാപാരി വ്യവസായി ഏകോപന സമിതി ചെറുപുഴ മേഖലയുടെ ആഭിമുഖ്യത്തിൽ ഐക്യദാർഢ്യ പ്രതിജ്ഞയും സന്ദേശയാത്രയും തിരുമേനിയിൽ നടന്നു. മേഖലാ പ്രസിഡന്‍റ് റോയി ജോസ്, ജില്ലാ സെക്രട്ടറി ജെ. സെബാസ്റ്റ്യൻ, ജോൺസൺ സി. പടിഞ്ഞാത്ത്, സുജിത്ത് നമ്പ്യാർ, മേഖലയിലെ എക്സിക്യുട്ടീവ് കമ്മിറ്റിയംഗങ്ങൾ, തിരുമേനിയിലെ വ്യാപാരികൾ തുടങ്ങിയവർ പങ്കെടുത്തു.

ക്ഷേത്രദർശനത്തിന് പോകവെ വയോധിക മിനി ലോറിയിടിച്ച് മരിച്ചു

തലശേരി: ക്ഷേത്രദർശനത്തിനു പോകവെ വയോധിക ലോറിയിടിച്ച് മരിച്ചു. തലായി പുതിയപുരയിൽ രോഹിണിയാണ് (72) മരിച്ചത്. ഇന്നലെ പുലർച്ചെ 5.30 ഓടെയാണ് അപകടം. തലായി ബാലഗോപാല ക്ഷേത്രദർശനത്തിനായി ചക്യത്ത് മുക്കിലെ വീട്ടിൽ നിന്ന് നടന്നു പോകുന്പോഴായിരുന്നു അപകടം. കോഴിക്കോട് നിന്ന് കണ്ണൂർ ഭാഗത്തേക്ക് ചെരിപ്പു കയറ്റി വരികയായിരുന്ന മിനി കണ്ടയ്നർ ലോറിയുടെ സൈഡ് ഗ്ലാസ് തലയ്ക്കിടിക്കുകയായിരുന്നു. ഉടനെ നാട്ടുകാരും വീട്ടുകാരും ചേർന്ന് തലശേരി ജനറൽ ആശുപത്രിയിൽ പ്രഥമ ചികിത്സ നൽകിയതിനു ശേഷം കണ്ണൂരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ലോറി ഡ്രൈവറെ പോലീസ് കസ്റ്റഡിയിലെടുത്തു. ഭർത്താവ്: പരേതനായ കെ. രാജൻ. മക്കൾ: ഷീജ, ബബിത, അനിൽകുമാർ, സുനിൽകുമാർ. മരുമക്കൾ: പുഷ്കരൻ, ഷൈമ, രാധിക, പരേതനായ രാജീവൻ. സഹോദരങ്ങൾ: ഗോമതി, നളിനി, ശോഭ, ഉഷ, ഷീബ, ഷീല, ഷൈലജ, പരേതയായ ബാലൻ, വസന്ത, ബാബു.

യുവതി തൂങ്ങിമരിച്ചു; ഭർതൃ പീഡനമെന്ന് ആത്മഹത്യാകുറിപ്പ്

ഇരിട്ടി: കേളൻപീടികയിൽ ഭർതൃമതിയെ തൂങ്ങിമരിച്ച നിലയിൽ കണ്ടെത്തി. കോളിത്തട്ട് ആനകുഴി യിലെ കുഴിവിള വീട്ടിൽ ജിനീഷിന്‍റെ ഭാര്യ സ്‌നേഹ (25 ) ആണ് മരിച്ചത്. കേളൻപീടികയിലുള്ള സ്വന്തം വീടിന്‍റെ അടുക്കളയിലാണ് സ്നേഹയെ തൂങ്ങിമരിച്ച നിലയിൽ കണ്ടെത്തിയത്. ഇന്നലെ വൈകുന്നേരം 5.30 നും ആറിനും ഇടയിലാണ് സംഭവം. സ്നേഹ എഴുതിയ ആത്മഹത്യാകുറിപ്പ് പോലീസ് കണ്ടെത്തിയിട്ടുണ്ട്. മരണത്തിന് കാരണം ഭർത്താവും ഭർതൃ ബന്ധുക്കളുമാണെന്നാണ് കുറിപ്പിലുള്ളത്. സ്‌നേഹയുടെ ആത്മഹത്യ ഗാർഹിക പീഡനമാണെന്ന രീതിയിൽ സ്‌നേഹയുടെ ബന്ധുക്കളുടെ വോയിസ് ക്ലിപ്പുകൾ അടക്കം സോഷ്യൽ മീഡിയകളിൽ വ്യാപകമായി പ്രചരിക്കുന്നുണ്ട്. അഞ്ചുവർഷം മുന്പ് വിവാഹിതരായ സ്‌നേഹയ്ക്കും ജിനീഷിനും മൂന്ന് വയസുള്ള ഒരു ആൺകുട്ടി യുണ്ട്. ദന്പതികൾ തമ്മിൽ നിരന്തരപ്രശ്നങ്ങൾ ഉണ്ടായിരുന്നതായി സ്നേഹയുടെ ബന്ധുക്കൾ പറയുന്നു. ഇതു സംബന്ധിച്ച് നിരവധി തവണ ഉളിക്കൽ പോലീസിൽ പരാതി നല്കിയിരുന്നു.

കൊറ്റിയിലെ മത്സ്യവില്പനക്കാരന്‍ പരത്തിക്കാട്ട് തൂങ്ങിമരിച്ച നിലയില്‍

പയ്യന്നൂര്‍: കൊറ്റിയിലെ മത്സ്യവില്പനക്കാരനെ ഏഴിമല പരത്തിക്കാട്ടെ പഞ്ചായത്ത് കിണറില്‍ തൂങ്ങി മരിച്ചനിലയില്‍ കണ്ടെത്തി. പരിയാരം കുണ്ടപ്പാറ സ്വദേശിയും പയ്യന്നൂര്‍ മാവിച്ചേരിയില്‍ വാടകക്ക് താമസിക്കുന്നയാളുമായ നീര്‍ച്ചാല്‍ ഹൗസില്‍ എ.എന്‍. ബിജുവിനെയാണ്(40) ഇന്നലെ രാവിലെ ദുരൂഹ സാഹചര്യത്തില്‍ തൂങ്ങിമരിച്ച നിലയില്‍ കണ്ടെത്തിയത്. വിവരമറിഞ്ഞെത്തിയ പയ്യന്നൂര്‍ പോലീസ് തുടര്‍ നടപടികള്‍ സ്വീകരിച്ചു. പരത്തിക്കാട് മുത്തപ്പന്‍ ക്ഷേത്രത്തിന് താഴെയുള്ള പരത്തിക്കാട് പത്ത് സെന്‍റ് പുനരധിവാസ കോളനിയിലെ പഞ്ചായത്ത് കിണറില്‍ തൂങ്ങി മരിച്ച നിലയിലാണ് ബിജുവിന്‍റെ മൃതദേഹം കണ്ടെത്തിയത്. രാവിലെ കിണറ്റില്‍നിന്നും വെള്ളമെടുക്കാനായി എത്തിയ സമീപവാസികളാണ് പോലീസില്‍ വിവരമറിയിച്ചത്. മീന്‍ വിൽക്കാൻ ഉപയോഗിക്കുന്ന കെഎല്‍ 59 എഎ 0739 ഗുഡ്‌സ് ഓട്ടോ പരത്തിക്കാട് മാരുതി റിസോര്‍ട്ടിന് സമീപത്തെ റോഡരികില്‍ നിര്‍ത്തിയിട്ട നിലയിൽ കണ്ടെത്തി. തുടര്‍ന്നു നടത്തിയ അന്വേഷണത്തിലാണ് ആളെ തിരിച്ചറിഞ്ഞത്. ഇന്‍ക്വസ്റ്റ് നടപടികള്‍ പൂര്‍ത്തിയാക്കി അസ്വാഭാവിക മരണത്തിന് പോലീസ് കേസെടുത്തു. ബിജു രാത്രികളില്‍ പരത്തിക്കാട് വരാറുണ്ടെന്ന സൂചനകളെ തുടര്‍ന്ന് പോലീസ് അന്വേഷണം ആരംഭിച്ചു. സരസ്വതിയാണ് ഭാര്യ. രണ്ടുമക്കളുണ്ട്.

ചെറുശേരി കലാമണ്ഡപം ഉദ്ഘാടനം

ചെറുപുഴ: നവപുരം മതാതീത ദേവാലയത്തിൽ പുതുതായി നിർമിച്ച ചെറുശേരി കലാമണ്ഡപം എഴുത്തുകാരും ശിൽപികളും നർത്തകരും ചേർന്ന് ഉദ്ഘാടനം ചെയ്തു. സാബു മാളിയേക്കൽ, ഷിനോജ് കെ. ആചാരി, ഷിബുവെട്ടം, കെ.വി. താൻസൻ കോട്ടയം, ആർച്ച ആഷ, നവ്റോഷ് കോട്ടയം, തമ്പാൻ മേലാചാരി, സൗപർണ്ണിക താൻസൻ, ഹാഷിം സീരകത്ത്, രാജു പൂപ്പറമ്പ്, കുഞ്ഞപ്പൻ തൃക്കരിപ്പൂർ, ബഷീർ പെരുവളത്തുപറമ്പ്, ലിജു ജേക്കബ്, ശോഭ അനിൽകുമാർ, പ്രസന്ന ഭാസ്കരൻ, അനിൽകുമാർ ആലുവ എന്നിവർ ചേർന്നാണ് ഉദ്ഘാടനം നിർവഹിച്ചത്. തുടർന്ന് നവറോഷ് അവതരിപ്പിച്ച പാഠകവും കോട്ടയം കെ.വി. താൻസന്‍റെയും സൗപർണ്ണികാ താൻസന്‍റെയും നേതൃത്വത്തിൽ ഗസൽ ഗാനാർച്ചനയും നടന്നു. പ്രശസ്ത ബാവുൽ ഗായിക ശാന്തി പ്രിയ ബാവുൽ ഗാനങ്ങൾ ആലപിച്ചു.

റോഡ് പ്രവൃത്തി ഉദ്ഘാടനം ചെയ്തു

മണക്കടവ്: ലോവർ ചീക്കാട്-മുത്തപ്പൻ ക്ഷേത്രം കുളം റോഡ് പ്രവൃത്തി ഉദ്ഘാടനം ജില്ലാ വൈസ് പ്രസിഡന്‍റ് ബിനോയി കുര്യൻ നിർവഹിച്ചു. ഉദയഗിരി പഞ്ചായത്ത് പ്രസിഡന്‍റ് കെ.എസ്. ചന്ദ്രശേഖരൻ അധ്യക്ഷത വഹിച്ചു. ജില്ലാ പഞ്ചായത്തംഗം ടി.സി. പ്രിയ, ബ്ലോക്ക് പഞ്ചായത്തംഗം പി.കെ. ഗിരിജാമണി, കെ. ബിന്ദു, ബിന്ദു ഷാജു, കെ.ടി. സുരേഷ് കുമാർ, കെ.എസ്. അബിഷ, ഷീജ വിനോദ്, സിന്ധു തോമസ്, ഷൈലജ സുനിൽ, സി. ഷൈജു, ഉദയഗിരി പഞ്ചായത്ത് സെക്രട്ടറി എം.പി. വിനോദ്‌കുമാർ എന്നിവർ പ്രസംഗിച്ചു.

എഡിഎസ് കെട്ടിടം ഉദ്ഘാടനം ചെയ്തു

ചപ്പാരപ്പടവ്: പെരുവണയിൽ നിർമിച്ച എഡിഎസ് കെട്ടിടത്തിന്‍റെ ഉദ്ഘാടനവും എംപി ഫണ്ടുപയോഗിച്ച് ചപ്പാരപ്പടവ് പഞ്ചായത്തിൽ സ്ഥാപിച്ച 16 മിനി ഹൈമാസ്റ്റ് ലൈറ്റിന്‍റെ സ്വിച്ച് ഒാൺ കർമവും കെ.സുധാകരൻ എംപി നിർവഹിച്ചു. മികച്ച മാലിന്യ സംസ്കരണ പ്രവർത്തനം നടത്തിയതിനുള്ള അംഗീകാരം നേടിയ പഞ്ചായത്ത് ഭരണസമിതിയംഗങ്ങളെ ചടങ്ങിൽ അനുമോദിച്ചു. പഞ്ചായത്ത് പ്രസിഡന്‍റ് സുനിജ ബാലകൃഷ്ണൻ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് പി.കെ. അബ്ദുറഹ്മാൻ, ജില്ലാ പഞ്ചായത്തംഗം തോമസ് വെക്കത്താനം, ബ്ലോക്ക് പഞ്ചായത്തംഗം പി. പ്രേമലത, ഫസീല ഷംസീർ, എം മൈമൂനത്ത്, തങ്കമ്മ സണ്ണി, ജനപ്രതിനിധികൾ, പഞ്ചായത്ത് അസി. സെക്രട്ടറി ജി.അജയകുമാർ എന്നിവർ പ്രസംഗിച്ചു.

വനാതിർത്തിയിൽ വേലി നിർമിച്ചിട്ടും കൻമദപ്പാറയിൽ വീണ്ടും കാട്ടാന

പയ്യാവൂർ: കാട്ടാനകൾ ഉൾപ്പടെയുള്ള വന്യമൃഗങ്ങൾ കടന്നു വരുന്നത് തടയാൻ പയ്യാവൂർ പഞ്ചായത്തിന്‍റെ വനാതിർത്തിയിൽ വേലി നിർമിച്ചിട്ടും കാട്ടാന ശല്യത്തിന് ശാശ്വത പരിഹാരമാകുന്നില്ല. കഴിഞ്ഞ ഒന്നര മാസത്തിനിടയിൽ കൻമദപ്പാറ മേഖലയിൽ നിന്ന് കാടുകയറ്റിയ കാട്ടാനകൾ ചിലതെല്ലാം തിരിച്ചെത്തി. ശനിയാഴ്ച രാത്രിയും ഇന്നലെ പുലർച്ചെയുമായി കാട്ടാനകൾ ഈ മേഖലയിൽ എത്തിയത്. കാഞ്ഞിരക്കൊല്ലിയിലും ഏലപ്പാറയിലും ജനവാസ മേഖലയിൽ മുമ്പ് എട്ട് കാട്ടാനകളായിരുന്നു ഭീതി പരത്തിയിരുന്നത്. ഇവയെ കർണാടക വനത്തിലേക്കായിരുന്നു നേരത്തെ തുരത്തിയത്. പയ്യാവൂർ പഞ്ചായത്തിന്‍റെ 14 കിലോമീറ്റർ വനാതിർത്തികളാണ്. ഇതിൽ 11 കിലോമീറ്റർ ഭാഗത്ത് സൗരോർജ തൂക്കുവേലിയുണ്ട്. മൂന്ന് കിലോമീറ്റർ ഭാഗത്ത് നേരത്തെ വനംവകുപ്പ് പണിത ആന വേലിയുമുണ്ട്. ശാന്തിനഗർ ആനപ്പാറ മുതൽ വഞ്ചിയം വരെ കർണാടകയുമായി അതിർത്തി പങ്കിടുന്ന ഭാഗത്താണ് 80 ലക്ഷം രൂപ ചെലവിൽ തൂക്കുവേലികളൊരുക്കിയത്. വനാതിർത്തിയിൽ സരോർജ തൂക്കുവേലിയും ആനവേലിയുമുണ്ടായിട്ടും കാട്ടാനശല്യമൊഴിയാത്തതിന്‍റെ ആശങ്കയിലാണ് മലയോര കർഷകർ. തൂക്കുവേലിയുടെ അടുത്ത് ദിവസവും നാല് കാട്ടാനകൾ ആടാംപാറ,ഏലപ്പാറ ഭാഗത്ത് തമ്പടിക്കുന്നുണ്ടെന്ന് പ്രദേശവാസികൾ പറയുന്നു. പാടാംകവല, മുക്കുഴി, ഏലപ്പാറ, കന്മദപ്പാറ, മതിലേരിത്തട്ട് വരെയുള്ള വനാതിർത്തികളിലുള്ള കാട്ടാനകളെ തൂക്കുവേലിക്കപ്പുറം കർണാടക വനത്തിലേക്ക് തിരിച്ചയക്കും പിന്നീട് രാത്രി തിരിച്ചുവരും ഇതാണ് ഇപ്പോഴത്തെ അവസ്ഥ. സൗരോർജ തൂക്കുവേലികളുണ്ടെങ്കിലും അതിനാവശ്യമായ സംരക്ഷണം നൽകാത്തതിനാൽ പലയിടങ്ങളിലും പ്രവർത്തനരഹിതമാണെന്ന് പറയുന്നുണ്ട്. എന്നാൽ ഇത് വനംവകുപ്പ് നിഷേധിക്കുകയാണ്.

ചികിത്സാ സഹായം തേടുന്നു

ചെമ്പേരി: റോഡപകടത്തിൽ പരിക്കേറ്റ് ചികിത്സയിൽ കഴിയുന്ന ഏരുവേശി പഞ്ചായത്ത് ഏഴാം വാർഡിലെ മുയിപ്രയിൽ താമസക്കാരനായ എം.രാജേഷ് (രാജീവൻ മുള്ളൂൽ) കാരുണ്യമതികളിൽ നിന്നും ചികിത്സാ സഹായം തേടുന്നു. ഇക്കഴിഞ്ഞ തിരുവോണനാളിൽ പരിയാരം ആയുർവേദ മെഡിക്കൽ കോളജിന് സമീപം നടന്ന റോഡപകടത്തിൽ പരിക്കേറ്റതിനെ തുടർന്ന് അബോധാവസ്ഥയിലാണുള്ളത്. തുടർചികിത്സക്ക് വലിയ തുക ആവശ്യമാണ്. നിർധന കുടുംബാംഗമായ രാജേഷിന്‍റെ ചികിത്സക്കാവശ്യമായ പണം സമാഹരിക്കാൻ ഇരിക്കൂർ ബ്ലോക്ക് പഞ്ചായത്ത് പ്രസിഡന്‍റ് റോബർട്ട് ജോർജ്, ഏരുവേശി പഞ്ചായത്ത് പ്രസിഡന്‍റ് മിനി ഷൈബി എന്നിവർ രക്ഷാധികാരികളായും വാർഡ് മെംബർ എം.ഡി.രാധാമണി ചെയർപേഴ്സണായും ജനപ്രതിനിധികളുടെ നേതൃത്വത്തിൽ നാട്ടുകാരുടെ ജനകീയ കമ്മിറ്റി രൂപീകരിച്ച് പ്രവർത്തനം നടത്തി വരികയാണ്. ചികിത്സ സഹായം സ്വരൂപിക്കാനായി കേരള ഗ്രാമീൺ ബാങ്കിന്‍റെ ഏരുവേശി ശാഖയിൽ അക്കൗണ്ട് ആരംഭിച്ചിട്ടുണ്ട്. . A/C No: 40495101042003. IFSC: KLGB0040495.

ആലക്കോട് ‌മേഖലയിൽ സർവേ നടത്താൻ ധാരണ

ആലക്കോട്: കരിന്തളം-വയനാട് 400കെവി ലൈൻ നഷ്പരിഹാരം കണക്കാക്കുന്നതിനായുള്ള സർവേ നടപടികൾ ആരംഭിക്കാൻ ജില്ലാ കളക്ടർ അരുൺ കെ.വിജയന്‍റെ അധ്യക്ഷതയിൽ ആലക്കോട് വിളിച്ചു ചേർത്ത യോഗത്തിൽ ധാരണ. കൃഷിഭൂമിക്ക് മതിയായ നഷ്ടപരിഹാരം കിട്ടിയതിനുശേഷം മാത്രമേ കൃഷിഭൂമിയിൽ വൈദ്യുത ലൈനുമായി ബന്ധപ്പെട്ട പ്രവർത്തികൾ ആരംഭിക്കുകയുള്ളൂ എന്ന് ജില്ലാ കളക്ടറും സജീവ് ജോസഫ് എംഎൽഎയും നൽകിയ ഉറപ്പിനെ തുടർന്നാണ് സ്ഥലമുടമകൾ സർവേ നടപടികളോട് സഹകരിക്കാമെന്ന് അറിയിച്ചത്. നഷ്ടപരിഹാരം സംബന്ധിച്ച് കെഎസ്ഇബി ഉദ്യോഗസ്ഥർ സ്ഥലം നഷ്ടപ്പെടുന്ന പ്രദേശത്തെ ഭൂമി സന്ദർശിച്ച് മുറിച്ച് മാറ്റപ്പെടേണ്ട കാർഷിക വിളകളുടെയും മറ്റു മരങ്ങളുടെയും കണക്കെടുപ്പും നടത്തും. അതേസമയം മതിയായ നഷ്ടപരിഹാരം ഉറപ്പുവരുത്തിയതിനു ശേഷമേ ഭൂമിയുടെ രേഖയോ സമ്മത പത്രമോ കൈമാറുകയുള്ളു എന്ന് ഭൂ ഉടമകൾ പറഞ്ഞു. കൃഷിക്കാരുടെ ഭൂമിയുടെ യാതൊരുവിധ രേഖകളും പൂർണമായ നഷ്ടപരിഹാരം കിട്ടുന്നതുവരെ കൈമാറേണ്ടതില്ല എന്ന് കെഎസ്ഇബി ഉദ്യോഗസ്ഥരും ജില്ലാ കളക്ടറും ആക്ഷൻ കമ്മറ്റിക്ക് ഉറപ്പു നൽകിയിട്ടുണ്ട്. പൂർണ നഷ്ടപരിഹാരം ലഭിച്ച ശേഷമേ ഭൂമിയിൽ ഏതെങ്കിലും വിധത്തിലുള്ള പ്രവൃത്തി അനുവദിക്കുകയുള്ളു എന്ന് ആക്ഷൻ കമ്മറ്റി യോഗത്തെ അറിയിച്ചു. നേരത്തെ അർഹമായ നഷ്ട‌പരിഹാരം നൽകിയാൽ മാത്രമേ ഭൂമി വിട്ടു നൽകൂ എന്ന് സ്ഥല ഉടമകളും ജനപ്രതിനിധികളുമടക്കമുള്ളവർ ശക്തമായി പ്രഖ്യാപിച്ചിരുന്നു. ഇതേ തുടർന്ന് ഇരിക്കൂർ മണ്ഡലത്തിലെ ആലക്കോട്, ഉദയഗിരി, നടുവിൽ, ഏരുവേശി പഞ്ചായത്തുകളിൽ സർവേ നടത്താൻ കഴിഞ്ഞിരുന്നില്ല. ഈ സാഹചര്യത്തിലാണ് 400 കെവി വയനാട് - കാസർഗോഡ് ട്രാൻസ്മിഷൻ ലൈൻ പ്ലോട്ട് സർവേ അവലോകനം ചെയ്യുന്നതിന് ജില്ലാ കളക്ടർ ആലക്കോട് പഞ്ചായത്ത് ഓഡിറ്റോറിയത്തിൽ യോഗം വിളിച്ചു ചേർത്തത്. യോഗത്തിൽ സജീവ് ജോസഫ് എംഎൽഎ മുഖ്യപ്രഭാഷണം നടത്തി. കെഎസ്ഇബിഎൽ ട്രാൻസ്ഗ്രിഡ് ഡയറക്ടർ എസ്. ശിവദാസ് വിശദീകരണം നടത്തി. കെഎസ്ഇബി ചീഫ് എൻജിനിയർ കെ.എസ്.ഷീബ, പഞ്ചായത്ത് പ്രസിഡന്‍റുമാരായ ജോജി കന്നിക്കാട്ട്, കെ.എസ്.ചന്ദ്രശേഖരൻ, ബേബി ഓടമ്പള്ളിൽ, മിനി ഷെബി, ആക്ഷൻകമ്മിറ്റി കൺവീനർ ടോമി കുമ്പിടിയാമാക്കൽ, സാജൻ.കെ ജോസഫ് , ആയിഷ, കെ.പി സാബു, ഖലീൽ റഹ്മാൻ ,ജോസ് വട്ടമല,ബാബു പള്ളിപ്പുറം, മാത്യു പുതിയേടം, നിഷ ബിനു, കെഎസ്ഇബി ഡെപ്യൂട്ടി ചീഫ് എൻജിനിയർ, പി.കെ. സന്തോഷ് എന്നിവർ ചർച്ചയിൽ പങ്കെടുത്തു. അതേ സമയം സർവേക്ക് ധാരണയായെങ്കിലും കർഷകർ ഉന്നയിച്ച പല ചോദ്യങ്ങൾക്കും കളക്ടറുൾപ്പെടെയുള്ളവർക്ക് വ്യക്തമായ ഉത്തരം നൽകാൻ കഴിഞ്ഞിട്ടില്ല. ഇത് കർഷകരെ ആശങ്കയിലാക്കുന്നുണ്ട്.

കണ്ണൂർ യൂണിവേഴ്സിറ്റിയെ പ്രതിസന്ധിയിലാഴ്ത്തി സോഫ്‌റ്റ്‌വേർ തകരാർ

കണ്ണൂർ: പരീക്ഷാ സംവിധാനങ്ങളിലെ തുടർച്ചയായ പിഴവുകൾക്കു പിന്നാലെ സോഫ്റ്റ്‌വേറിന്‍റെ തകരാർ കണ്ണൂർ സർവകലാശാലയിൽ പ്രതിസന്ധി രൂക്ഷമാക്കുന്നു. മഹാരാഷ്‌‌ട്ര പ്രവർത്തിക്കുന്ന കന്പനി കണ്ണൂർ സർവകലാശാലയ്ക്ക് സ്ഥാപിച്ചു നൽകിയ എംകെസിഎൽ കന്പനിയുടെ ഇന്‍റേണൽ മാർക്ക് എൻട്രി നടത്താനുള്ള കെ-റീപ്പ് സോഫ്റ്റ്‌വേർ സംവിധാനമാണ് രണ്ടാംവട്ടവും തകരാറിലായത്. എഫ്‌വൈയുജിപി വിദ്യാർഥികളുടെ ഇന്‍റേണൽ മാർക്ക് സംവിധാനം എൻട്രി ചെയ്യേണ്ടത് ഈ സോഫ്‌റ്റ്‌വേറിലാണ്. ഒന്നാം സെമസ്റ്ററിന്‍റെ മാർക്ക് എൻട്രി ചെയ്യുന്ന വേളയിലും തകരാർ സംഭവിച്ചിരുന്നു. ഇപ്പോൾ രണ്ടാം സെമസ്റ്റർ ഇന്‍റേണൽ മാർക്ക് എൻട്രി ചെയ്യേണ്ട സമയത്താണ് വീണ്ടും തകരാറിലായത്. സോഫ്‌റ്റ്‌വേർ തകരാർ ശ്രദ്ധയിൽപെട്ടതിനെ തുടർന്ന് ഇന്‍റേണൽ മാർക്കുകൾ എൻട്രി ചെയ്യുന്നതിനുള്ള സമയം സർവകലാശാല ദീർഘിപ്പിച്ചിരുന്നു. ഏപ്രിൽ 23 മുതൽ മേയ് അഞ്ചുവരെയായിരുന്നു ദീർഘിപ്പിച്ച സമയം. എന്നാൽ ഇന്നലെ വരെയും സോഫ്‌റ്റ്‌വേറിന്‍റെ അപകാത പരിഹരിക്കാനായിട്ടില്ല. സോഫ്റ്റ്‌വേർ തകരാറിലായതോടെ ഇന്‍റേണൽ മാർക്ക് സമർപ്പിക്കാൻ കഴിയാതെ അധ്യാപകർ ബുദ്ധിമുട്ടുകയാണ്. ഇന്‍റേണൽ മാർക്ക് എൻട്രി ചെയ്യാനുള്ള സോഫ്റ്റ്‌വേർ തകരാറിലായത് അക്കാഡമിക് മേഖലയെ ആശങ്കയിലാക്കുന്നുണ്ട്. വിദ്യാർഥികളുടെ മാർക്ക് പ്രസ്തുത സോഫ്റ്റ്‌വേറിലൂടെ സമർപ്പിക്കുന്നത് ഭാവിയിൽ വലിയ ദുരന്തത്തിനിടയാക്കുമെന്നും വിശ്വാസ്യതയില്ലാത്ത കമ്പനിയെയാണ് സർവകലാശാല ഉത്തരവാദിത്തം ഏൽപ്പിച്ചതെന്നും കേരള പ്രൈവറ്റ് കോളജ് ടീച്ചേഴ്സ് അസോസിയേഷനും യുഡിഎഫ് സെനറ്റ് ഫോറവും തുടക്കത്തിലേ ചൂണ്ടിക്കാണിച്ചിരുന്നു. സർവകലാശാലയുടെ വാർഷിക സെനറ്റിൽ എം കെസിഎൽ കമ്പനിയുമായുള്ള ഇടപാടിൽ നിന്നും സർവകലാശാല പിന്തിരിയണമെന്ന ആവശ്യവും ഉയർന്നിരുന്നുവെങ്കിലും ഇക്കാര്യം സർവകലാശാല തള്ളുകയായിരുന്നു.

മലയോരത്ത് ഡെങ്കിപ്പനി ഭീഷണി

കേളകം: വേനൽ മഴയക്ക് പിന്നാല മലയോരത്ത് ഡെങ്കിപ്പനി ഭീഷണി. കൊട്ടിയൂര്‍, കേളകം, കണിച്ചാര്‍ പഞ്ചായത്തുകളിലായി 17 പേർ ചികിത്സ തേടി. കൊട്ടിയൂര്‍ പഞ്ചായത്തില്‍ ആറ് പേര്‍ക്കും കണിച്ചാര്‍ പഞ്ചായത്തില്‍ രണ്ട് പേര്‍ക്കും കേളകം പഞ്ചായത്തില്‍ ഒമ്പത് പേര്‍ക്കും ഡെങ്കിപ്പനി സ്ഥിരീകരിച്ചു. കൊട്ടിയൂരിലെ നാലാം വാര്‍ഡില്‍ മൂന്ന് പേര്‍ക്കും 13-ാം വാര്‍ഡില്‍ ഒരാള്‍ക്കും 14-ാം വാര്‍ഡിലെ രണ്ട് പേര്‍ക്കുമാണ് ഡെങ്കിപ്പനി ബാധിച്ചത്. കേളകത്തെ ഒന്നാം വാര്‍ഡില്‍ മൂന്ന് പേര്‍ക്കും നാലാം വാര്‍ഡില്‍ രണ്ട് പേര്‍ക്കും അഞ്ചാം വാര്‍ഡില്‍ നാല് പേര്‍ക്കുമാണ് രോഗമുളളത്. കണിച്ചാര്‍ പഞ്ചായത്തില്‍ ഒന്ന്, ഒമ്പത് വാര്‍ഡുകളിലെ ഓരോരുത്തര്‍ക്കുമാണ് പനി ബാധിച്ചത്. പറന്പിലും വീടുകളുടെ പരിസരത്തും കെട്ടിക്കിടക്കുന്ന വെള്ളത്തിൽ കൊതുകുകൾ മുട്ടയിട്ട് പെരുകിയതാണ് ഇപ്പോൾ ഡെങ്കിപ്പനിക്ക് കാരണമെന്ന് ആരോഗ്യവകുപ്പധികൃതർ പറയുന്നു. കഴിഞ്ഞ വര്‍ഷവും കേളകം പഞ്ചായത്തിലെ വിവിധയിടങ്ങളില്‍ ഡെങ്കിപ്പനി പടർന്നിരുന്നു. കഴിഞ്ഞ വർഷം ജലക്ഷാമം മൂലം വീട്ടുകാർ ശേഖരിച്ചു വച്ച വെള്ളം മൂടി വെക്കാഞ്ഞതിനെ തുടർന്ന് അതിൽ ഈഡിസ് കൊതുകുകൾ മുട്ടയിട്ട് പെരുകിയായിരുന്നു പനി പടർന്നത്. ഡെങ്കിപ്പനി പ്രതിരോധത്തിന്‍റെ ഭാഗമായി വീടുകള്‍ കയറിയുളള ബോധവത്കരണം, ഉറവിട നശീകരണം ഉള്‍പ്പെടെയുളള പ്രവര്‍ത്തനങ്ങളാണ് ആരോഗ്യ വകുപ്പ് ഉദ്യോഗസ്ഥര്‍ ആരംഭിച്ചിട്ടുണ്ട്.

ആദിവാസികളുടെ സുരക്ഷിതത്വം ഉറപ്പാക്കുന്നതിൽ സർക്കാർ അലംഭാവം തുടരുന്നു: സണ്ണി ജോസഫ്

ഇരിട്ടി: ആറളം ഫാം പുനരധിവാസ മേഖലയിലുള്ളവരുൾപ്പടെയുള്ളവരുടെ സുരക്ഷിതത്വം ഉറപ്പാക്കുന്നതിൽ സർക്കാർ അലംഭാവം തുടരുകയാണെന്ന് സണ്ണി ജോസഫ് എംഎൽഎ. ആദിവാസി ഗോത്ര ജനസഭയുടെയും ആദിവാസി ദളിത് മുന്നേറ്റ സമിതിയുടെയും നേതൃത്വത്തിൽ വളയഞ്ചാൽ ഡോ. ബി.ആർ. അംബേദ്കർ സ്ക്വയറിൽ നടന്ന ആറളം ഫാം ഭൂ അവകാശ പ്രക്ഷോഭത്തിന്‍റെ പത്തൊമ്പതാം വാർഷികാഘോഷം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പതിനാലു ജീവനുകളാണ് ആറളം ഫാമിൽ കാട്ടനക്കലയിൽ ഇല്ലാതായത്. അടുത്തിടെ ദന്പിതകൾ കൊല്ലപ്പെട്ടതിനെ തുടരുന്നുണ്ടായ ജനകീയ പ്രക്ഷോഭം ഒത്തു തീർപ്പക്കാൻ വനം മന്ത്രി നൽകിയ ഉറപ്പു പോലും പാലിക്കപ്പെട‌ുന്നില്ല. ആനമതിൽ നിർമാണം ത്വരിതപ്പെടുത്തുമെന്നും സോളാർ ഫെൻസിംഗ് സ്ഥാപിക്കുമെന്നും കാടുകൾ വെട്ടിത്തെളിയിക്കുമെന്നുമെല്ലാം മന്ത്രി ഉറപ്പ് നൽകിയിട്ടും ഇതൊന്നും പ്രവാർത്തികമാക്കിയിട്ടില്ല. രാപ്പകലില്ലാതെ കാട്ടാനകൾ ആദിവാസികളുടെ ജീവനും സ്വത്തിനും ഭീഷണി ഉയർത്തി വിഹരിക്കുകയാണ്. ആന മതിൽ നിർമാണത്തെക്കാൾ തെരഞ്ഞെടുപ്പ് മുന്നിൽ കണ്ട് ഫാമിൽ പുതിയ പട്ടയക്കാരെ സൃഷ്ടിച്ച് രാഷ്ട്രീയ ആധിപത്യം ഉറപ്പിക്കാനാണ് ഭരണകക്ഷിയിൽപ്പെട്ടവർ ശ്രമിച്ചു വരുന്നതെന്നും സണ്ണി ജോസഫ് പറഞ്ഞു. ആദിവാസി ദളിത് മുന്നേറ്റ സമിതി പ്രസിഡന്‍റ് ശ്രീരാമൻ കൊയ്യോൻ അധ്യക്ഷത വഹിച്ചു. ആദിവാസി ഗോത്ര മഹാസഭ കൺവീനർ എം. ഗീതാനന്ദൻ മുഖ്യപ്രഭാഷണം നടത്തി. ഇരിട്ടി ബ്ലോക്ക് പഞ്ചായത്ത് പ്രസിഡന്‍റ് കെ. വേലായുധൻ, ബ്ലോക്ക് പഞ്ചായത്ത് അംഗം വി. ശോഭ , മണികണ്ഠൻ പണിയൻ, പി.കെ. കരുണാകരൻ, കെ. സതീശൻ , ടി.സി. കുഞ്ഞിരാമൻ, ഭാസ്കരൻ തലക്കുളം, വെളുക്കൻ മൂപ്പൻ എന്നിവർ പ്രസംഗിച്ചു.

ജോളി സെബാസ്റ്റ്യൻ അഖിലേന്ത്യാ സേഫ്ഗാർഡിംഗ് കോ-ഓർഡിനേറ്റർ

ചെമ്പേരി: സെന്‍റ് വിൻസെന്‍റ് ഡി പോൾ സൊസൈറ്റി ചെമ്പേരി ലൂർദ് മാതാ വനിതാ കോൺഫറൻസ് അംഗവും തലശേരി അതിരൂപത സെൻട്രൽ കൗൺസിൽ ജോയിന്‍റ് സെക്രട്ടറിയും നാഷണൽ കൗൺസിൽ ഓഫ് ഇന്ത്യയുടെ വനിതാ പ്രതിനിധിയുമായ ജോളി സെബാസ്റ്റ്യൻ കാരക്കുന്നേലിനെ അഖിലേന്ത്യാ സേഫ് ഗാർഡിംഗ് കോ-ഓർഡിനേറ്ററായി നാഷണൽ കൗൺസിൽ നിയമിച്ചു. പൂപ്പറമ്പ് ഫുസ്കോ സീനിയർ സെക്കൻഡറി സ്കൂൾ അധ്യാപികയാണ് ജോളി സെബാസ്റ്റ്യൻ. ഇന്‍റർനാഷണൽ കൗൺസിലിന്‍റെ നിർദേശപ്രകാരം ഇന്ത്യയിൽ ആദ്യമായി നടപ്പാക്കുന്ന സേഫ് ഗാർഡിംഗ് എന്ന പുതിയ പദ്ധതിയുടെ ചുമതലയാണ് ജോളി സെബാസ്റ്റ്യന് നൽകിയിട്ടുള്ളത്. സെന്‍റ് വിൻസെന്‍റ് ഡി പോൾ സൊസൈറ്റിയുമായി ബന്ധപ്പെട്ട് കഴിഞ്ഞ കാലങ്ങളിൽ നടത്തിവന്ന പ്രവർത്തനങ്ങളുടെ മികവ് പരിഗണിച്ച് പുതിയ ചുമതല. ചെന്പേരി ലൂർദ്മാതാ ബസിലിക്ക ഇടവകയും ചെന്പേരി സെന്‍റ് വിൻസെന്‍റ് ഡി പോൾ സൊസൈറ്റിയും ജോളി സെബാസ്റ്റ്യനെ അനുമോദിച്ചു. ചെമ്പേരി ലൂർദ് മാതാ ബസിലിക്ക ഇടവകയ്ക്കും ചെമ്പേരി സെന്‍റ് വിൻസെന്‍റ് ഡി പോൾ സൊസൈറ്റിക്കുമുള്ള അംഗീകാരമാണ് ജോളി സെബാസ്റ്റ്യനെ തേടിയെത്തിയ പദവിയെന്ന് ചെമ്പേരി ബസിലിക്ക റെക്ടർ റവ.ഡോ. ജോർജ് കാഞ്ഞിരക്കാട്ട് പറഞ്ഞു. ജോളി സെബാസ്റ്റ്യനെ പൊന്നാടയണിയിച്ച് ആദരിച്ചു. വിൻസന്‍റ് ഡി പോൾ സൊസൈറ്റി ചെമ്പേരി ലൂർദ് മാതാ കോൺഫറൻസ് പ്രസിഡന്‍റ് സണ്ണി മൂക്കനോലിയ്ക്കൽ അധ്യക്ഷത വഹിച്ചു. വനിതാ കോൺഫറൻസ് പ്രസിഡന്‍റ് മോളിക്കുട്ടി ഇമ്മാനുവൽ ചെമ്പനാംതടത്തിൽ, ഏരിയ കൗൺസിൽ പ്രസിഡന്‍റ് ഇമ്മാനുവൽ ജോർജ് ചെമ്പനാംതടത്തിൽ, മേരി ആനിക്കുഴിക്കാട്ടിൽ, ജെസി കാവനാടിയിൽ, വിൽസൺ കാവനാടിയിൽ, ജോസഫ് പനയ്ക്കൽ, ജോസ് ചിറ്റേട്ട്, ജോസ് വെള്ളിയാംകണ്ടത്തിൽ എന്നിവർ പ്രസംഗിച്ചു.

അത്തിക്കലിൽ വാഹനാപക‌ടം പതിവാകുന്നു

ഇരിട്ടി: കീഴ്പള്ളി -മാടത്തിൽ റോഡിൽ അത്തിക്കലിൽ വാഹനപകടം പതിവാകുന്നു. റോഡിന് ഇരുവശവും വയലും തോടും ഉൾപ്പെടുന്ന വലിയ താഴ്ച്ചയിലേക്ക് പലപ്പോഴും വാഹനങ്ങൾ മറിയുന്നത്. വെളിമാനം ഭാഗത്തുനിന്നും വേഗത്തിൽ എത്തുന്ന വാഹനങ്ങൾ റോഡിലെ ചെറിയ വളവിൽ വച്ച് നിയന്ത്രണം വിട്ട് മറിയുകയാണ്. ഇന്നലെ വൈകുന്നേരം അങ്ങാടിക്കടവ് സ്വദേശികളായ കുടുംബം സഞ്ചരിച്ച വാഹനം നിയന്ത്രണംവിട്ട് താഴ്ചയിലേക്ക് മറിഞ്ഞുവെങ്കിലും യാത്രക്കാർ അത്ഭുതകരമായി പരിക്കേൽക്കാതെ രക്ഷപ്പെടുകയായിരുന്നു. അപകടമേഖലയ്ക്ക് സമീപത്തെ കലുങ്കിന്‍റെ കോൺക്രീറ്റ് സ്ലാബ് തകർന്ന് അപകടാവസ്ഥയിലായിട്ട് വർഷങ്ങളായെങ്കിലും ബന്ധപ്പെട്ടവർ ഒരു നടപടിയും സ്വീകരിച്ചിട്ടില്ല. അപകടം പതിവായിട്ടും ഒരു മുന്നറിയിപ്പ് ബോർഡ് സ്ഥാപിക്കാൻ പോലും ബന്ധപ്പെട്ടവർ തയാറായിട്ടില്ലെന്നും പ്രദേശത്തുള്ളവർ പറഞ്ഞു.

പോലീസുകാർ നല്ല സാമൂഹിക രാഷ്‌ട്രീയ ബോധമുള്ളവരായിരിക്കണം: കെ.കെ. ശൈലജ

കണ്ണൂര്‍: പോലീസുകാര്‍ക്ക് നല്ല സാമൂഹിക രാഷ്‌ട്രീയ ബോധമുണ്ടാകണമെന്ന് കെ.കെ. ശൈലജ എംഎല്‍എ. കേരള പോലീസ് അസോസിയേഷന്‍ കണ്ണൂര്‍ സിറ്റി ജില്ലാ കമ്മിറ്റി കണ്‍വന്‍ഷന്‍ ഉദ്ഘാടനം ചെയ്ത് പ്രസംഗിക്കുകയായിരുന്നു അവർ. സാമൂഹിക ബോധത്തെ അടിസ്ഥാനമാക്കിയുള്ള കൂട്ടായ്മകള്‍ പോലീസിൽ രൂപപ്പെടണം. വര്‍ഗീയ വാദത്തെ എതിര്‍ക്കാന്‍ മതേതരമായ ഇത്തരം കൂട്ടായ്മകള്‍ക്കേ സാധ്യമാകു. നാടിന്‍റെ നിലനില്‍പ്പ്, ഗവണ്‍മെന്‍റിന്‍റെ നല്ല കാര്യങ്ങള്‍ തുടങ്ങിയവ ജനങ്ങളിലേക്കെത്തിക്കുക എന്ന ഉത്തരവാദിത്വം പോലീസിനുണ്ട്. സമൂഹത്തിലെ ഓരോ പൗരനും അവസര സമത്വം ഉണ്ടാകണം. അതുണ്ടാക്കുക എന്നതും പോലീസിന്‍റെ കടമയാണെന്നും ശൈലജ പറഞ്ഞു. പോലീസിൽ ഇപ്പോഴും ജാതിബോധം നിലനിൽക്കുന്നുണ്ട്. സ്റ്റേഷനിൽ പരാതിയുമായി എത്തുന്നവരുടെ ജാതിയോ മതമോ രാഷ്ട്രീയമോ പോലീസ് നോക്കരുത്. നാടിന്‍റെ പുരോഗമനത്തിന് വേണ്ടിയുള്ള രാഷ്ട്രീയമാണ് പോലീസിന് വേണ്ടതെന്നും ശൈലജ പറഞ്ഞു.കണ്ണൂര്‍ റേഞ്ച് ഡിഐജി ജി.എച്ച്. യതീഷ് ചന്ദ്ര, സിറ്റി പോലീസ് കമ്മിഷണര്‍ നിധിന്‍ രാജ് എന്നിവർ മുഖ്യാതിഥികളായി. കെപിഎ കണ്ണൂര്‍ സിറ്റി ജില്ലാ പ്രസിഡന്‍റ് വി.വി. സന്ദീപ് കുമാര്‍ അധ്യക്ഷത വഹിച്ചു. കെ.വി. വേണുഗോപാല്‍, പി.ബി. കിരണ്‍, ഇ.വി. പ്രദീപന്‍, ജോഷി ജോസ്, എം. കൃഷ്ണന്‍, പി. രമേശന്‍, പി.വി. രാജേഷ് എന്നിവർ പ്രസംഗിച്ചു. പോലീസ് സ്റ്റേഷനുകളിലെ സ്റ്റാഫ് പാറ്റേണ്‍ ശാസ്ത്രീയമായി കാലാനുസൃതമായി പരിഷ്‌ക്കരിച്ച് പോലീസ് ഉദ്യോഗസ്ഥരുടെ ജോലിഭാരം കുറയ്ക്കുന്നതിന് ആവശ്യമായി നടപടികള്‍ സ്വീകരിക്കുക, എട്ടു മണിക്കൂര്‍ ഡ്യൂട്ടി സമ്പ്രദായം മുഴുവന്‍ സ്‌റ്റേഷനുകളിലേക്കും വ്യാപിപ്പിക്കുക, ഓരോ ജില്ലയിലും ചുരുങ്ങിയത് ഒരു കമ്പനി ബറ്റാലിയന്‍ പോലീസ് അംഗങ്ങളെയെങ്കിലും അറ്റാച്ച് ചെയ്യാനുള്ള നടപടി സ്വീകരിക്കുക, സ്റ്റേഷനുകളിലെ കാലപഴക്കമുള്ള വാഹനങ്ങള്‍ മാറ്റി പുതിയ വാഹനങ്ങള്‍ അനുവദിക്കുക തുടങ്ങി 35 ഓളം ആവശ്യങ്ങള്‍ കണ്‍വന്‍ഷന്‍ പ്രമേയമായി സര്‍ക്കാരിലേക്ക് നല്‍കി.

ബൈക്ക് മറിഞ്ഞ് ഒരാൾ മരിച്ചു

മട്ടന്നൂർ: കൊടോളിപ്രത്ത് ബൈക്ക് നിയന്ത്രണം വിട്ട് വയലിലേക്ക് മറിഞ്ഞ് യാത്രക്കാരൻ മരിച്ചു. രണ്ടു പേർക്ക് പരിക്കേറ്റു. തെരൂർ സ്വദേശി എം.കെ. ദിവാകരനാണ് (54) മരിച്ചത്. ഭാര്യ വിജിന (42), മകൻ അഹാൽ എന്നിവരെ പരിക്കുകളോടെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. ഞായറാഴ്ച രാത്രി 7.45 ഓടെ കൊടോളിപ്രം പൈപ്പ് ലൈൻ റോഡിലാണ് അപകടമുണ്ടായത്. ബൈക്ക് റോഡരികിലുള്ള പൈപ്പിന്‍റെ കോൺക്രീറ്റ് വാൾവിൽ ഇടിച്ചാണ് മറിഞ്ഞത്. ഗുരുതരമായി പരിക്കേറ്റ ദിവാകരനെ ഉടൻ കണ്ണൂരിലെ സ്വകാര്യ ആശുപത്രിയിലെത്തിച്ചെങ്കിലും രക്ഷിക്കാനായില്ല. വിമുക്ത ഭടനാണ് മരിച്ച ദിവാകരൻ.

ഭീകരവിരുദ്ധ പ്രതിജ്ഞയും പ്രതിഷേധ ജ്വാലയും

മണത്തണ: കാഷ്മീരിലുണ്ടായ ഭീകരാക്രമണത്തിൽ പ്രതിഷേധിച്ച് മണത്തണ ടൗൺ കോൺഗ്രസ് കമ്മിറ്റിയുടെ നേതൃത്വത്തിൽ ഭീകരവിരുദ്ധ പ്രതിജ്ഞയും പ്രതിഷേധ ജ്വാലയും തീർത്തു. കൊല്ലപ്പെട്ടവർക്ക് ആദരാഞ്ജലികൾ അർപ്പിച്ച് ടൗണിൽ ദീപം തെളിച്ചു നടത്തിയ അനുസ്മരണ സന്ധ്യ ഡിസിസി ജനറൽ സെക്രട്ടറി ബൈജു വർഗീസ് ഉദ്ഘാടനം ചെയ്തു. ഡിസിസി അംഗം ചോടത്ത് ഹരിദാസൻ, ബ്ലോക്ക് കോൺഗ്രസ് സെക്രട്ടറി സി.ജെ. മാത്യു, വർഗീസ് ചിരട്ടവേലിൽ, തോമസ് പാറക്കൽ, വി.കെ. രവീന്ദ്രൻ, ജോസ് വലിയവീട്ടിൽ, വി. രവീന്ദ്രൻ, സാബു പേഴ്ത്തുങ്കൽ, ജോസഫ് കദളിക്കാട്ടിൽ, പൗലോസ് പാറനാല്‍, മാത്യു കൊട്ടഞ്ചുരം, ജോഷി മുല്ലുക്കുന്നേൽ, മാത്യു മങ്കുഴിയിൽ, കെ.സി. ഹരികുമാർ എന്നിവർ നേതൃത്വം നൽകി.

പ്ലാസ്റ്റിക് മാലിന്യങ്ങൾ കത്തിച്ചതിന് 5000 രൂപ പിഴ ചുമത്തി

മട്ടന്നൂർ: കെട്ടിടത്തിന് മുകളിൽ പ്ലാസ്റ്റിക് ഉൾപ്പെടെയുള്ള മാലിന്യങ്ങൾ കൂട്ടിയിട്ട് കത്തിച്ചതിന് 5000 രൂപ പിഴ ഈടാക്കി. കളറോഡ് പാലത്തിന് സമീപത്തെ കഫെ ദിവാനിക്കാണ് ഇരിട്ടി നഗരസഭ പിഴയീടാക്കിയത്. നഗരസഭ ഹെൽത്ത്‌ സ്‌ക്വാഡ് സിസിഎം രാജീവിന്‍റെ നേതൃത്വത്തിൽ നടത്തിയ പരിശോധനയിലാണ് പ്ലാസ്റ്റിക് ഉൾപ്പെടെയുള്ള മാലിന്യങ്ങൾ കൂട്ടിയിട്ട് കത്തിച്ച നിലയിൽ കണ്ടെത്തിയത്. പിഎച്ച്ഐ സന്ദീപ്, ജീവനക്കാരായ യൂസഫ്, സന്തോഷ്‌, രാജേഷ് എന്നിവരും പരിശോധനാ സംഘത്തിലുണ്ടായിരുന്നു.

പൈപ്പ് പൊട്ടി റോഡിൽ കുഴിയായി

മട്ടന്നൂർ: കുടിവെള്ള വിതരണ പദ്ധതിയുടെ പൈപ്പ് ചോർച്ചയെ തുടർന്നു റോഡിൽ കുഴിയായി. മട്ടന്നൂർ-അഞ്ചരക്കണ്ടി റോഡിൽ വെൺമണലിലാണ് പൈപ്പിൽ ചോർച്ചയുണ്ടായത്. അടുത്തടുത്തായി മൂന്നിടങ്ങളിലാണ് വെള്ളം ഒഴുകി റോഡിൽ കുഴിയുണ്ടായത്. കണ്ണൂർ വിമാനത്താവളത്തിലേക്കടക്കം നിത്യേന നൂറു കണക്കിന് വാഹനങ്ങൾ കടന്നു പോകുന്ന റോഡിലാണ് പൈപ്പ് പൊട്ടി വെള്ളം പാഴാകുന്നത്. നിരവധി തവണ അധികൃതരെ വിവരം അറിയിച്ചിരുന്നുവെങ്കിലും നടപടിയുണ്ടായില്ല.

ജല സഭയും തോട് ശുചീകരണവും നടത്തി

മട്ടന്നൂർ: ഇരിട്ടി നഗരസഭയുടെ നേതൃത്വത്തിൽ ജല സഭയും തോട് ശുചീകരണവും നടത്തി. കളറോഡ് മുതൽ അടുവാരിവരെയുള്ള തോടിന്‍റെ ഇരുകരകളും വൃത്തിയാക്കി നിരൊഴുക്ക് പുനഃസ്ഥാപിച്ചു. തോട്ടിൽ അടിഞ്ഞു കിടന്ന മാലിന്യങ്ങളും ചരൽകൂനകളും നീക്കം ചെയ്തു. സർക്കാരിന്‍റെ മാലിന്യമുക്തം നവകേരളം പദ്ധതിയുടെ ഭാഗമായിട്ടാണ് പ്രവർത്തനങ്ങൾ സംഘടിപ്പിച്ചത്. നഗരസഭാ ചെയർപേഴ്സൻ കെ. ശ്രീലത ഉദ്ഘാടനം ചെയ്തു. വൈസ് ചെയർമാൻ പി.പി. ഉസ്മാൻ അധ്യക്ഷത വഹിച്ചു. മട്ടന്നൂർ നഗരസഭ ചെയർമാൻ എൻ. ഷാജിത്ത്, സ്റ്റാൻഡിംഗ് കമ്മിറ്റി ചെയർമാൻ വി.കെ. സുഗതൻ, ഇരിട്ടി നഗരസഭ വികസന സ്റ്റാൻഡിംഗ് കമ്മിറ്റി ചെയർപേഴ്സൻ പി.കെ. ബൽക്കിസ്, നഗരസഭ ക്ലിൻസിറ്റി മാനേജർ കെ.വി. രാജീവൻ എന്നിവർ പ്രസംഗിച്ചു. തൊഴിലുറപ്പ് തൊഴിലാളികൾ, ഹരിതസേനാംഗങ്ങൾ, ആരോഗ്യ വിഭാഗം ജീവനക്കാർ, നാട്ടുകാർ, സന്നദ്ധ സേനാംഗങ്ങൾ എന്നിവർ പ്രവർത്തനങ്ങളിൽ പങ്കെടുത്തു.

മികച്ച റോഡുണ്ടായിട്ടും ബസ് സര്‍വീസ് ഇല്ല; ജനങ്ങൾ ദുരിതത്തിൽ

പരിയാരം: ചന്തപ്പുര-കടന്നപ്പള്ളി ഹയർ സെക്കൻഡറി സ്കൂൾ-പരിയാരം റോഡ് മികച്ച നിലവാരമുള്ള റോഡായിട്ടും ബസ് സര്‍വീസ് ഇല്ലാത്തതിനാൽ ജനങ്ങൾ ബുദ്ധിമുട്ടുന്നു. മാതമംഗലം ഭാഗത്തു നിന്നും പാണപ്പുഴ ഭാഗത്തു നിന്നും ചന്തപ്പുര വഴി പരിയാരം കണ്ണൂര്‍ ഗവ. മെഡിക്കല്‍ കോളജിലേക്ക് വേഗം എത്തിച്ചേരുന്ന അഞ്ചുകിലോമീറ്റര്‍ നീളുന്ന ഈ ബൈപ്പാസ് റോഡ് ഗുണപരമായി ഉപയോഗിക്കപ്പെടുന്നില്ലെന്ന് നാട്ടുകാര്‍ ആരോപിക്കുന്നു. ഈ വഴി ബസ് ഗതാഗതം തുടങ്ങിയാൽ മലയോര മേഖലകളില്‍ നിന്നുള്ളവര്‍ക്ക് പിലാത്തറ റോഡു വഴി പോകാതെ വളരെ എളുപ്പത്തില്‍ ഗതാഗതക്കുരുക്കില്ലാതെ കണ്ണൂർ പരിയാരം ഗവ. മെഡിക്കല്‍ കോളജില്‍ എത്തിച്ചേരാന്‍ കഴിയും. ഇതു കൂടാതെ ജനസാന്ദ്രതയോറിയ ഈ പ്രദേശം കടന്നപ്പള്ളി-പാണപ്പുഴ പഞ്ചായത്തിന്‍റെ ഹൃദയഭൂമികൂടിയാണ്. ഒരു ഹയര്‍ സെക്കൻഡറി സ്കൂളും ഒരു യുപി സ്‌കൂളും ഈ റോഡരികില്‍ പ്രവര്‍ത്തിക്കുന്നുണ്ട്. സ്കൂൾ വിദ്യാർഥികൾ ഇപ്പോൾ ഒരുകിലോമീറ്ററോളം നടന്ന് ചന്തപ്പുരയിലെത്തിയാണു ബസ് കയറുന്നത്. അതുപോലെ തന്നെ ഈ റോഡ് കടന്നുപോകുന്ന പ്രദേശങ്ങളിലുള്ളവർ ഏറെ യാത്രാക്ലേശമാണ് അനുഭവിക്കുന്നത്. ആംബുലന്‍സുകള്‍ക്ക് ഉള്‍പ്പെടെ എളുപ്പത്തില്‍ മെഡിക്കല്‍ കോളജില്‍ എത്താന്‍ സാധിക്കുന്നതാണ് ഈ റോഡ്. നിര്‍മാണം പൂര്‍ത്തീകരിച്ചിട്ട് വര്‍ഷങ്ങളായിട്ടും ഒരു പോറല്‍പോലുമില്ലാതെ നല്ല രീതിയിലുള്ള ഈ റോഡിലൂടെ നിലവില്‍ ബസ് സർവീസ് ഇല്ലാത്തത് ജനങ്ങൾക്ക് ഏറെ ബുദ്ധിമുട്ട് ഉണ്ടാക്കുന്നുണ്ട്. ചന്തപ്പുരയില്‍ നിന്നും ഏഴോം കോട്ടക്കീലിലേക്കുള്ള റോഡിന്‍റെ ഭാഗമായി കല്യാശേരി എംഎല്‍എയുടെ ആസ്തി വികസന ഫണ്ട് ഉപയോഗപ്പെടുത്തിയാണു റോഡ് നിര്‍മിച്ചത്.

മട്ടന്നൂരിൽ ഡെങ്കിപ്പനി പ്രതിരോധ പ്രവർത്തനം ഊർജിതമാക്കി

മട്ടന്നൂർ: മട്ടന്നൂർ നഗരസഭയുടെയും സാമൂഹിക ആരോഗ്യ കേന്ദ്രത്തിന്‍റെയും സംയുക്താഭിമുഖ്യത്തിൽ ഡെങ്കിപ്പനി പ്രതിരോധ പ്രവർത്തനങ്ങൾ ഊർജിതമാക്കി. പഴശി ആയുഷ്മാൻ ആരോഗ്യ മന്ദിറിൽ നടന്ന "തോട്ടങ്ങളിലേക്ക് നീങ്ങാം' കാമ്പയിൻ മട്ടന്നൂർ നഗരസഭ വൈസ് ചെയർപേഴ്സൺ ഒ. പ്രീത ഉദ്ഘാടനം ചെയ്തു. കാമ്പയിനിന്‍റെ ഭാഗമായി റബർ, കവുങ്ങ് തുടങ്ങിയ തോട്ടങ്ങളിൽ പരിശോധന, തോട്ടം ഉടമകൾക്ക് നിർosശങ്ങൾ അടങ്ങിയ നോട്ടീസ് നല്കൽ, കൊതുകിന്‍റെ ഉറവിട നശീകരണം, ബോധവത്കരണം എന്നീ പരിപാടികൾ നടന്നുവരികയാണ്. മെഡിക്കൽ ഓഫീസർ ഡോ. കെ. സുഷമ, ഹെൽത്ത് ഇൻസ്പെക്ടർ കെ.ബി. ശ്രീജിത്ത്, ജൂണിയർ ഹെൽത്ത് ഇൻസ്പെക്ടർ ജനീഷ്, ആശാ പ്രവർത്തകർ എന്നിവർ നേതൃത്വം നൽകി.

അലക്സ്നഗർ സെന്‍റ് ജോസഫ്സ് പള്ളിയിൽ തിരുനാൾ ഇന്നുമുതൽ

പയ്യാവൂർ: അലക്സ് നഗർ സെന്‍റ് ജോസഫ്സ് ക്നാനായ കത്തോലിക്ക പള്ളിയിൽ തിരുനാൾ ഇന്നു മുതൽ മേയ് ഒന്നു വരെ നടക്കും. ഇന്നു വൈകുന്നേരം അഞ്ചിന് വിശുദ്ധ കുർബാന, നൊവേന. നാളെ വൈകുന്നേരം 4.30ന് മടമ്പം ഫൊറോന വികാരി ഫാ. സജി മെത്താനത്ത് കൊടിയേറ്റും. തുടർന്ന് വിശുദ്ധ കുർബാന, പരേത സ്മരണ, സെമിത്തേരി സന്ദർശനം. രാത്രി ഏഴിന് ഭക്തസംഘടനകളുടെ വാർഷികം-ഫാ. സജി മെത്താനത്ത് ഉദ്ഘാടനം ചെയ്യും. 30ന് വൈകുന്നേരം 4.15ന് വാദ്യമേളങ്ങൾ, അഞ്ചിന് ഫാ. സനീഷ് കയ്യാലയ്ക്കകത്തിന്‍റെ കാർമികത്വത്തിൽ ആഘോഷമായ വിശുദ്ധ കുർബാന. ഫാ. സിജോ കണ്ണമ്പുഴ തിരുനാൾ സന്ദേശം നല്കും. തുടർന്ന് ചെറുകര ഭാഗത്തേക്ക് തിരുനാൾ പ്രദക്ഷിണം, പരിശുദ്ധ കുർബാനയുടെ ആശീർവാദം, വാദ്യമേളങ്ങളുടെ ഡിസ്പ്ലേ എന്നിവയും ഉണ്ടായിരിക്കും. സമാപന ദിനമായ ഒന്നിന് വൈകുന്നേരം 4.15 ന് വാദ്യമേളങ്ങൾ. അഞ്ചിന് ആഘോഷമായ തിരുനാൾ പാട്ടുകുർബാനയ് ക്ക് ഫാ. ജിൻസൺ കൊട്ടിയാനിയ്ക്കൽ കാർമികത്വം വഹിക്കും. ഫാ. ജോമോൻ കൂട്ടുങ്കൽ തിരുനാൾ സന്ദേശം നല്കും. പ്രദക്ഷിണം, പരിശുദ്ധ കുർബാനയുടെ ആശീർവാദം എന്നിവയോടെ ആഘോഷച്ചടങ്ങുകൾ സമാപിക്കും.

പയ്യാവൂർ സൂപ്പർ മാർക്കറ്റിലെ കവർച്ച; രണ്ടാഴ്ചയായിട്ടും തുന്പില്ലാതെ പോലീസ്

പയ്യാവൂർ: ടൗണിന്‍റെ ഹൃദയഭാഗത്തെ സൂപ്പർ മാർക്കറ്റിൽ കവർച്ച നടന്ന് രണ്ടാഴ്ചയായിട്ടും തുന്പില്ലാ തെ പോലീസ്. ചെമ്പേരി റോഡിൽ വ്യാപാരഭവന് സമീപത്തെ പി മാർട്ട് സൂപ്പർ മാർക്കറ്റിലാണ് കഴിഞ്ഞ 17ന് പുലർച്ചെ കവർച്ച നടന്നത്. പൂട്ട് തകർത്ത് ഷട്ടർ ഉയർത്തി അകത്തു കടന്ന മോഷ്ടാവ് താഴെയും മുകളിലുമുള്ള കാഷ് കൗണ്ടറുകളിൽ സൂക്ഷിച്ച നാലു ലക്ഷത്തോളം രൂപയാണ് കവർന്നത്. രാവിലെ കട തുറക്കാനെത്തിയപ്പോഴാണ് മോഷണം ശ്രദ്ധയിൽപ്പെട്ടത്. പയ്യാവൂർ പോലീസ് കവർച്ച നടന്ന ദിവസം മുതൽ നിരവധി സിസിടിവി കാമറകൾ പരിശോധിച്ചുവെങ്കിലും ഇതുവരെ തുമ്പൊന്നും ആയിട്ടില്ലെന്നാണ് പറയുന്നത്. ടൗണിന് പുറത്തുള്ള കാമറകളും പോലീസ് പരിശോധിച്ചു വരികയാണ്. കണ്ണൂരിൽ നിന്നെത്തിയ ഡോഗ് സ്ക്വാഡും വിരലടയാള വിദഗ്ധരും പരിശോധന നടത്തിയിരുന്നു. തളിപ്പറമ്പ് ഡിവൈഎസ്പി പ്രദീപൻ കണ്ണിപൊയിൽ, പയ്യാവൂർ എസ്എച്ച്ഒ ടിങ്കിൾശശി, പയ്യാവൂർ എസ്ഐ രാജു എന്നിവരുടെ നേതൃത്വത്തിലാണ് പോലീസ് അന്വേഷണം പുരോഗമിക്കുന്നത്. കണ്ടകശേരിയിലും രണ്ട് സ്ഥാപനങ്ങളിൽ കവർച്ചാ ശ്രമം ഉണ്ടായിരുന്നു. വ്യാപാരികൾക്ക് നിർഭയമായി കച്ചവടം ചെയ്യാനുള്ള സാഹചര്യം പഞ്ചായത്തും പോലീസും ഒരുക്കി തരണമെന്ന് കേരള വ്യാപാരി വ്യവസായി ഏകോപനസമിതി നേതാക്കൾ ആവശ്യപ്പെട്ടു.

കണ്ണൂർ ഗവ. മെഡിക്കല്‍ കോളജ് കാമ്പസിലെ കക്കൂസ് മാലിന്യം റോഡരികിൽ ഒഴുക്കി

പരിയാരം: കണ്ണൂര്‍ ഗവ. മെഡിക്കല്‍ കോളജ് കാമ്പസിലെ മലിനജല പ്ലാന്‍റിലെ ദുര്‍ഗന്ധംവമിക്കുന്ന മലിനജലം റോഡരികിലേക്ക് ഒഴുക്കി വിട്ടു. തമിഴ്‌നാട്ടില്‍ നിന്നും വന്ന കരാർസംഘം ഇന്നലെ പട്ടാപ്പകലാണ് റോഡരികിലേക്ക് മാലിന്യം ഒഴുക്കിവിട്ടത്. സ്വീവേജ് പ്ലാന്‍റ് വീണ്ടും പണിമുടക്കിയതിനെ തുടർന്നാണ് കരാർ എടുത്ത കമ്പനി തൊഴിലാളികളെ ഉപയോഗിച്ച് മലമൂത്ര വിസര്‍ജ്യങ്ങള്‍ ദേശീയപാതയിലേക്ക് ഒഴുക്കിവിട്ടത്. കൊച്ചുകുട്ടികളുമായെത്തിയ സ്ത്രീകള്‍ ഉള്‍പ്പെടെയുള്ള തമിഴ്‌നാട്ടിൽ നിന്നുള്ള സംഘമാണ് പ്ലാന്‍റിന്‍റെ ടാങ്കിനകത്തേക്കിറങ്ങി മലിനജലം മുക്കിയെടുത്ത് റോഡിലേക്ക് ഒഴുക്കിയത്. നേരത്തേയും ഈ പ്ലാന്‍റില്‍ നിന്ന് മാലിന്യം പുറത്തേക്ക് ഒഴുക്കിവിട്ടത് ബഹുജനസമരത്തിന് ഇടയാക്കിയിരുന്നു. സ്വീവേജ് പ്ലാന്‍റിന്‍റെ അറ്റകുറ്റപ്പണി നടത്താന്‍ കരാര്‍ എടുത്തയാളാണ് തങ്ങളുടെ അറിവോ സമ്മത തോ കൂടാതെ മാലിന്യം ഒഴുക്കിയതെന്നും തങ്ങള്‍ക്ക് ഇതുമായി യാതൊരു ബന്ധവുമില്ലെന്നുമാണ് ആശുപത്രി അധികൃതർ പറയുന്നത്. സംഭവം അറിഞ്ഞയുടൻ സ്റ്റോപ്പ് മെമ്മോ കൊടുത്ത് പ്രവൃത്തി നിർത്തിവയ്പ്പിച്ചതായും അധികൃതര്‍ പറഞ്ഞു. കര്‍ശന നടപടിയെന്ന് സൂപ്രണ്ട് റോഡരികിലേക്ക് കക്കൂസ് മാലിന്യ ഒഴുക്കിയവർക്കെതിരേ കര്‍ശന നടപടി സ്വീകരിക്കുമെന്ന് ഗവ. മെഡിക്കല്‍ കോളജ് സൂപ്രണ്ട് ഡോ. കെ. സുദീപ് അറിയിച്ചു. മെഡിക്കല്‍ കോളജിലെ സീവേജ് ട്രീറ്റ്‌മെന്‍റ് പ്ലാന്‍റിന്‍റെ അറ്റകുറ്റപ്പണികള്‍ പൂര്‍ത്തീകരണ ഘട്ടത്തില്‍ എത്തിയിരിക്കെ കരാര്‍ പ്രകാരം പ്രവൃത്തി ചെയ്യാനേല്‍പ്പിച്ച ഏജന്‍സി മെഡിക്കല്‍ കോളജ് അധികൃതരുടെ അറിവോ സമ്മതമോ ഇല്ലാതെ കളക്ഷന്‍ ടാങ്ക് ശുദ്ധീകരണ ജോലിയുടെ ഭാഗമായി ടാങ്കിലെ പ്ലാസ്റ്റിക് മാലിന്യങ്ങളും മറ്റും കലക്ഷന്‍ ടാങ്കിന് സമീപം കൂട്ടിയിട്ടതായി ശ്രദ്ധയില്‍ പെട്ടിരുന്നു. ഇക്കാര്യം വ്യക്തമായ ഉടൻ പ്രസ്തുത പ്രവൃത്തി നിര്‍ത്തി വയ്ക്കാനുള്ള അടിയന്തര സ്റ്റോപ്പ് മെമ്മോ നല്കിയ തായും സൂപ്രണ്ട് അറിയിച്ചു. ഇക്കാര്യം അന്വേഷിച്ച് അടിയന്തരമായി റിപ്പോര്‍ട്ട് നല്കുവാനായി എൻജിനിയറിംഗ് വിഭാഗം തലവനെ ചുമതലപ്പെടുത്തിയിട്ടുണ്ടെന്നും റിപ്പോര്‍ട്ട് കിട്ടിയ ഉടനെ തന്നെ ഇക്കാര്യത്തില്‍ കര്‍ശന നടപടികള്‍ സ്വീകരിക്കുമെന്നും സൂപ്രണ്ട് അറിയിച്ചു.

മാടായിപ്പാറയിൽ വൻ തീപിടിത്തം

പഴയങ്ങാടി: ജൈവ വൈവിധ്യങ്ങളുടെ കലവറയായ മാടായിപ്പാറയിൽ വൻ തീപിടിത്തം. ഏക്കറു കണക്കിന് പുൽമേടുകൾ കത്തിനശിച്ചു. പാറക്കുളത്തിന് സമീപമുള്ള സ്വകാര്യ വ്യക്തിയുടെ സ്ഥലത്താണ് വൻ അഗ്നിബാധ ഉണ്ടായത്. ഇന്നലെ ഉച്ചയ്ക്ക് രണ്ടോടെയായിരുന്നു സംഭവം. നാട്ടുകാരുടെ ശ്രമം സമീപത്തെ വീടുകളിലേക്ക് തീ പടരുന്നത് ഒഴിവാക്കി. മാടായി മഹോത്സവത്തിന്‍റെ ഉദ്ഘാടനത്തിനെത്തിയ നാട്ടുകാരും മറ്റും തീ അണക്കാൻ നേതൃത്വം നല്കി. പയ്യന്നൂരിൽ നിന്ന് എത്തിയ അഗ്നിശമന സേനയും ചേർന്നാണ് മണിക്കൂറുകൾ നീണ്ട ശ്മത്തിനൊടുവിൽ തീ പൂർണമായും നിയന്ത്രണ വിധേയമാക്കിയത്.

ജനശ്രീ വാർഷികാഘോഷവും കുടുംബസംഗമവും നടത്തി

ചെറുപുഴ: വയലായി പ്രിയദർശിനി ജനശ്രീ ഒന്നാം വാർഷികാഘോഷവും കുടുംബസംഗമവും നടത്തി. കോൺഗ്രസ് പുളിങ്ങോം മണ്ഡലം പ്രസിഡന്‍റ് മനോജ്‌ വടക്കേൽ ഉദ്ഘാടനം ചെയ്തു. ജോയി കിഴക്കേകൊഴുവനാൽ അധ്യക്ഷത വഹിച്ചു. ചെറുപുഴ മണ്ഡലം ജനശ്രീ ചെയർമാൻ എം.കെ. ബാലചന്ദ്രൻ മുഖ്യപ്രഭാഷണം നടത്തി. ജോസ്റ്റിൻ ജെ. പുതുമന സമ്മാനദാനം നിർവഹിച്ചു. പഞ്ചായത്ത്‌ മെംബർ ജോയ്‌സി ഷാജി, വി.വി. ദാമോദരൻ, ഡെന്നി മേച്ചേരി, മജീദ് കോവുന്നേൽ, ജോജോ പുള്ളോലിക്കൽ, ഷോൺ പനക്കച്ചാലിൽ എന്നിവർ പ്രസംഗിച്ചു. വിവിധ കലാപരിപാടികളും അരങ്ങേറി.

ചെങ്ങളായിയിൽ യുവാവിന് ക്രൂരമർദനം

ശ്രീകണ്ഠപുരം: ചെങ്ങളായിയിൽ യുവാവിനു നേരെ ക്രൂരമർദനം. ടൈൽസും സോഡാ കുപ്പിയും ഉപയോഗിച്ച് യുവാവിന്‍റെ തലയ്ക്ക് അടിച്ച് പരിക്കേൽപ്പിച്ചതായി പരാതി. ചെങ്ങളായിയിലെ റിഷാദിനെയാണ് നാലംഗസംഘം വളഞ്ഞിട്ട് മർദിച്ചത്. സംഭവത്തിൽ രണ്ടു പരാതികളിൽ ശ്രീകണ്ഠപുരം പോലീസ് കേസെടുത്തു. സംഭവമിങ്ങനെ: പരാതിക്കാരനായ റിഷാദ് നസീബിനോട് സ്കൂട്ടി വാങ്ങിയിരുന്നു. ഏപ്രിൽ 25ന് രാവിലെ ഇതിന്‍റെ ആർസി മാറ്റത്തിന് ഒടിപി അറിയാൻ റിഷാദും ഉമ്മ മൈമൂനത്തും നസീബിന്‍റെ വീട്ടിൽ രാവിലെ എത്തിയപ്പോൾ ഉമ്മയെ അസഭ്യം പറഞ്ഞ് കഴുത്തിന് പിടിച്ച് തള്ളിയിരുന്നുവെന്നും പറയുന്നു. സംഭവദിവസം വൈകുന്നേരം പരിപ്പായിയിലുള്ള ടൈൽ കമ്പനിക്ക് സമീപംത്തുനിന്ന് റിഷാദിനെ നസീബും മറ്റു മൂന്നുപേരും ചേർന്ന് മർദിക്കുകയായിരുന്നുവെന്ന് പറയുന്നു. തലയ്ക്ക് ടൈൽസ് കൊണ്ടും സോഡാ കുപ്പി കൊണ്ടും അടിച്ചു. ക്രൂരമർദന ദൃശ്യങ്ങള്‍ സോഷ്യൽ മീഡിയയിൽ പ്രചരിക്കുന്നുണ്ട്. റിഷാദിനെ കണ്ണൂർ ഗവ. മെഡിക്കൽ കോളജ് ആശുപത്രിയിൽ പ്രവേശിപ്പിച്ചിരിക്കുകയാണ്. സ്കൂട്ടി വില്പനയെ തുടർന്നുണ്ടായ തർക്കമാണ് ആക്രമണത്തിൽ കലാശിച്ചത്. റിഷാദ് നൽകിയ പരാതിയിലും, മകനെ കൊല്ലുമെന്ന് ഭീഷണിപ്പെടുത്തിയതായി ആക്രമണത്തിനിരയായ ചെങ്ങളായി സ്വദേശി റിഷാദിന്‍റെ ഉമ്മ മൈമൂനത്തിന്‍റെ പരാതിയിലും പോലീസ് കേസെടുത്തു. നസീബും പോലീസിനെ സമീപിച്ചിരുന്നു.

അപകടത്തിന് കാരണമാകുന്ന സർക്കാർ ഭൂമിയിലെ മരക്കൊന്പുകൾ മുറിച്ചുമാറ്റണമെന്ന്

ആലക്കോട്: കാപ്പിമല സർക്കാർ ഭൂമിയിലുള്ള മരങ്ങളുടെ ശിഖരങ്ങൾ അപകടകരമായി റോഡിലേക്ക് ചാഞ്ഞു നിൽക്കുന്നത് സ്കൂൾ കുട്ടികൾക്കും പള്ളിയിൽ പോകുന്നവർക്കും വാഹനങ്ങളിൽ യാത്ര ചെയ്യുന്നവർക്കും ഭീഷണിയായിരിക്കുകയാണ്. മരങ്ങളുടെ ശിഖിരങ്ങൾ വൈദ്യുത ലൈനിലേക്ക് വീഴുന്നതും അപകട ഭീഷണിക്ക് കാരണമാകുന്നുണ്ട്. മരങ്ങളുടെ ശിഖരങ്ങൾ മുറിച്ചു മാറ്റുന്നതിന് പല പ്രാവശ്യം അപേക്ഷ നല്കിയിട്ടും മുറിച്ച് മാറ്റാത്ത നടപടിയെ കത്തോലിക്കാ കോൺഗ്രസ് ആലക്കോട് മേഖലാ കമ്മിറ്റി അപലപിച്ചു. അപകടകരമായ ശിഖരങ്ങൾ എത്രയും പെട്ടന്ന് നീക്കം ചെയ്യണമെന്ന് മേഖല കമ്മറ്റി ആവശ്യപ്പെട്ടു. ഫാ. ജിബിൻ വട്ടംകാട്ടേൽ ഉദ്ഘാടനം ചെയ്തു. ബേബി കോയിക്കൽ അധ്യക്ഷത വഹിച്ചു. ഫാ. ജോസഫ് കുത്തുളിയിൽ മുഖ്യപ്രഭാഷണം നടത്തി. ടോമി കണയങ്കൽ, ബേബി മുണ്ടയ്ക്കൽ, ബിന്ദു കാഞ്ഞിരത്തിനാൽ തുടങ്ങിയവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]