ADVERTISEMENT

ADVERTISEMENT

ഫുസ്കോ സ്കൂളിൽ ശാസ്ത്ര പരീക്ഷണ ബോധവത്കരണം നടത്തി

ചെമ്പേരി: സ്കൂൾ വിദ്യാർഥികളിൽ ശാസ്ത്ര അഭിരുചി വളർത്താനായി ചെമ്പേരി റോട്ടറി ക്ലബിന്‍റെ ആഭിമുഖ്യത്തിൽ സംഘടിപ്പിക്കുന്ന "വിജ്ഞാൻ രഥ്' (സയൻസ് ഓൺ വീൽസ്) ശാസ്ത്ര പരീക്ഷണ ബോധവത്കരണ ക്ലാസ് പൂപ്പറമ്പ് ഫുസ്കോ ഇംഗ്ലീഷ് മീഡിയം സീനിയർ സെക്കൻഡറി സ്കൂളിൽ നടന്നു. കുടിയാന്മല എസ്ഐ രാധാകൃഷ്ണൻ ഉദ്ഘാടനം ചെയ്തു.

സ്കൂൾ പ്രിൻസിപ്പൽ സിസ്റ്റർ സലോമി അധ്യക്ഷത വഹിച്ചു. പ്രഫ. വാസുദേവൻ നായർ പദ്ധതി വിശദീകരിച്ചു. ചെമ്പേരി റോട്ടറി ക്ലബ് പ്രസിഡന്‍റ് ജിജി ഏബ്രഹാം, പ്രോഗ്രാം ഡയറക്ടർ സുനിൽ പീറ്റർ എന്നിവർ പ്രസംഗിച്ചു. സയൻസ് ഓൺ വീൽസ് പ്രോഗ്രാം കോ-ഓർഡിനേറ്റർ അറിവരശൻ ക്ലാസ് നയിച്ചു. നവീൻകുമാർ, സതീഷ് കുമാർ, സണ്ണി മംഗലത്ത്കരോട്ട്, അധ്യാപകരായ ഷാജിമോൻ, സോണിയ എന്നിവർ നേതൃത്വം നൽകി.

ADVERTISEMENT

പെരുമഴയിൽ വിറങ്ങലിച്ച് മലയോരം

ശ്രീകണ്ഠപുരം: പെരുമഴയിൽ മലയോര മേഖല വിറങ്ങലിക്കുന്നു. ചെറിയ തോടുകളെല്ലാം നിറഞ്ഞൊഴുകുകയാണ്. ശ്രീകണ്ഠപുരം, പരിപ്പായി, കൊയ്യം, പാറക്കാടി, ചെങ്ങളായി, ചെമ്പന്തൊട്ടി, ചുഴലി, വയക്കര തുടങ്ങിയ ഭാഗങ്ങളിൽ താഴ്ന്നപ്രദേശങ്ങൾ വെള്ളത്തിനടിയിലായി. മടമ്പം പുഴയിൽ ജലനിരപ്പ് കുത്തനെ ഉയർന്നിട്ടുണ്ട്. മടമ്പം പുഴയോട് ചേർന്ന അലക്സ് നഗർവരെയുള്ള ഭാഗത്ത് വെള്ളക്കെട്ട് രൂപപ്പെട്ടു. പൊടിക്കളം റോഡിലും വെള്ളക്കെട്ടുണ്ടായി. ശ്രീകണ്ഠപുരം നഗരസഭ, ചെങ്ങളായി പഞ്ചായത്ത്, പയ്യാവൂർ, ഏരുവേശി പഞ്ചായത്തുകൾ എന്നിവിടങ്ങളിലെ തോടുകൾ നിറഞ്ഞുകവിഞ്ഞാണ് ഒഴുകുന്നത്. മഴ ഇനിയും കനക്കുകയാണെങ്കിൽ അപകട സാധ്യതയുള്ള മേഖലകളിലുള്ളവരെ മാറ്റിപ്പാർപ്പിക്കാനുള്ള മുന്നൊരുക്കങ്ങൾ തദ്ദേശസ്ഥാപനങ്ങൾ നടത്തി കഴിഞ്ഞു. മഴയെ തുടർന്ന് തൊഴിൽ മേഖലകളും സ്തംഭിച്ചു. റബർ ടാപ്പിംഗും പലയിടത്തും നിർത്തി വച്ചു.

54 കാരിയെ പീഡിപ്പിച്ച് സ്വർണവും പണവും കവർന്ന പ്രതി അറസ്റ്റിൽ

പഴയങ്ങാടി: പഴയങ്ങാടി പോലീസ് സ്റ്റേഷൻ പരിധിയിലെ വിധവയായ 54കാരിയെ വ്യാജ രേഖയുണ്ടാക്കി വിവാഹം കഴിച്ചതായി തെറ്റിധരിപ്പിച്ച് പ്രലോഭിപ്പിച്ച് പീഡിപ്പിച്ചതിന് ശേഷം സ്വർണവും പണവും കാറും തട്ടിയെടുത്ത കേസിൽ പ്രതി പിടിയിൽ. എടക്കാട് കടമ്പൂർ മമ്മാക്കുന്ന് സ്വദേശി ഫാലിലി (50) നെയാണ് കണ്ണപുരം സിഐ ബാബുമോനും ഗ്രേഡ് എസ്ഐ അസ്കർ, സിപിഒ മഹേഷ് തുടങ്ങിയവർ ചേർന്ന് പടന്ന പയ്യാങ്കലിലെ വാടകവീട്ടിൽ നിന്ന് പിടികൂടിയത്. 2025 ജനുവരി മുതൽ മാർച്ച് വരെയുള്ള കാലയളവിൽ പഴയങ്ങാടി സ്റ്റേഷൻ പരിധിയിലെ 54 കാരിയുടെ സുഹൃത്തായ സ്ത്രീയുടെ പരിചയത്തിൽ എടക്കാട് സ്വദേശിയായ ഫാലിലുമായി പരിചയത്തിലാകുകയുമായിരുന്നു. തുടർന്ന്, ഇയാൾ വാടകയ്ക്ക് താമസിക്കുന്ന അപ്പാർട്ട്മെന്‍റിൽ കൊണ്ടുപോയി പീഡിപ്പിക്കുകയും 23 പവൻ സ്വർണാഭാരണങ്ങൾ തട്ടിയെടുക്കുകയും ചെയ്തുവെന്നാണ് പരാതി. കൂടാതെ, 54 കാരിയുടെ പേരിൽ ലോണെടുത്ത് കാർ വാങ്ങുകയും അത് കൈക്കലാക്കുകയും ചെയ്തു. സ്ത്രീയുടെ സ്വത്ത് വിറ്റ് കിട്ടിയ 30 ലക്ഷം രൂപ കൈക്കലാക്കിയെന്നും പരാതിയിൽ പറഞ്ഞിരുന്നു. കണ്ണൂർ, കാസർഗോഡ് ജില്ലകളിൽ വിവിധ പോലീസ് സ്റ്റേഷനുകളിൽ നിരവധി കേസുകളിൽ പ്രതിയാണ് ഫാലീൽ. തലശേരി, വടകര, കാഞ്ഞങ്ങാട് സ്റ്റേഷനുകളിലെ വാറണ്ട് പ്രതികൂടിയാണ് ഇയാളെന്ന് പോലീസ് പറഞ്ഞു.

"നമ്മുടെ കുടുംബങ്ങളാകണം നമുക്ക് ലഹരി'

വിളക്കന്നൂർ: ലഹരി ഒന്നിനും പരിഹാരമാർഗമല്ലെന്നും നമ്മുടെ കുടുംബങ്ങളും അവിടെയുള്ള സ്നേഹ ബന്ധങ്ങളുമാണ് നാം ലഹരിയാക്കി മാറ്റേണ്ടതെന്നും തലശേരി അതിരൂപത ഫാമിലി അപ്പോസ്തലേറ്റ് ഡയറക്ടർ ഫാ. ജോബി കോവാട്ട്. ലോക ലഹരിവിരുദ്ധ ദിനാചരണത്തിന്‍റെ ഭാഗമായി തലശേരി അതിരൂപത അമല പ്രോലൈഫിന്‍റെ ആഭിമുഖ്യത്തിൽ വിളക്കന്നൂർ ക്രിസ്തുരാജ പള്ളി ഓഡിറ്റോറിയത്തിൽ സംഘടിപ്പിച്ച ലഹരിക്കെതിരെയുള്ള ബോധവത്കരണം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. അമല പ്രോലൈഫ് അതിരൂപത പ്രസിഡന്‍റ് ലോറൻസ് കടിക്കാട്ട് അധ്യക്ഷത വഹിച്ചു. അതിരൂപത സെക്രട്ടറി ഷീബ തെക്കേടത്ത്, സിസ്റ്റർ ലിന്‍റ സിഎച്ച്എഫ്, സിസ്റ്റർ സ്റ്റെല്ല എംഎസ്എംഐ, സണ്ണി ആശാരിപറമ്പിൽ, ഡിംപിൾ ജോസ് കൂട്ടുങ്കൽ, ഷൈനി കണ്ടത്തിൽ, ലിൻസി കുന്നുംപുറത്ത്, ടോമി ഓലിയ്ക്കൽ, ജോമോൻ കരികണ്ടത്തിൽ, സെലസ്റ്റിൻ വടക്കേൽ എന്നിവർ പ്രസംഗിച്ചു. യോഗത്തിൽ പങ്കെടുത്തവർ ലഹരിവിരുദ്ധ പ്രതിജ്ഞയെ‌ടുത്തു.

കുറ്റവാളികൾക്ക് "പരസ്പര സഹായ' വാട്‌സ്ആപ്പ് ഗ്രൂപ്പ്; 20 പേർക്കെതിരേ കേസ്

രാജപുരം: കുറ്റകൃത്യങ്ങളിൽ ഏർപ്പെടുന്നവർക്ക് പരസ്പര സഹായമെന്ന നിലയിൽ പോലീസിന്‍റെ നീക്കങ്ങൾ നിരീക്ഷിച്ച് അപ്പപ്പോൾ അറിയിക്കാൻ വാട്‌സ്ആപ്പ് ഗ്രൂപ്പ്. കഴിഞ്ഞദിവസം കോളിച്ചാലിൽ അളവിൽ കൂടുതൽ മദ്യം കൈവശം വച്ചതിന് അറസ്റ്റ് ചെയ്യപ്പെട്ട ആളിന്‍റെ മൊബൈൽ ഫോൺ പരിശോധിച്ചപ്പോഴാണ് അതിൽ ഫാമിലി എന്ന പേരിലുള്ള വാട്‌സ് ആപ്പ് ഗ്രൂപ്പിൽ പോലീസ് സ്റ്റേഷനും വാഹനങ്ങൾക്കും പ്രത്യേക കോഡുകൾ നല്കി പോലീസിന്‍റെ നീക്കങ്ങളുടെ വിവരങ്ങൾ ഷെയർ ചെയ്യപ്പെട്ടതായി കണ്ടെത്തിയത്. പോലീസിന്‍റെ നീക്കങ്ങൾ ഗ്രൂപ്പിലെ ഏതെങ്കിലും അംഗത്തിന്‍റെ ശ്രദ്ധയിൽപെട്ടാൽ ഉടനടി രഹസ്യ കോഡുകൾ ഉപയോഗിച്ച് ആ വിവരം ഗ്രൂപ്പിൽ പോസ്റ്റ് ചെയ്ത് മറ്റംഗങ്ങളെ അറിയിക്കുകയാണ് രീതി. 80 അംഗങ്ങളാണ് ഗ്രൂപ്പിൽ ഉള്ളത്. ഇതിൽ ഗ്രൂപ്പ് അഡ്‌മിൻമാരായ അപ്പു റിഷി, ഷെട്ടി, വൈശാഖ്, സുജി എന്നിവർക്കും ഗ്രൂപ്പിൽ കഴിഞ്ഞദിവസം പോലീസിന്‍റെ നീക്കങ്ങളെക്കുറിച്ച് വോയിസ് മെസേജുകൾ ഇട്ട മറ്റ് 16 പേർക്കെതിരെയുമാണ് കേസ് രജിസ്റ്റർ ചെയ്തിട്ടുള്ളത്. മദ്യ, ലഹരിമരുന്ന് കടത്തും ഓൺലൈൻ ലോട്ടറിയുമടക്കമുള്ള കുറ്റകൃത്യങ്ങളിൽ ഏർപ്പെടുന്നവരാണ് ഗ്രൂപ്പിൽ ഉൾപ്പെട്ടിട്ടുള്ളതെന്നാണ് പ്രാഥമിക വിവരം. ഇതിൽ ചിലർക്കെതിരെ നേരത്തേ രാജപുരം പോലീസ് കേസെടുത്തിട്ടുണ്ട്. ഗ്രൂപ്പ് അഡ്‌മിൻമാരെ കസ്റ്റഡിയിൽ എടുക്കുന്നതിനായി പോലീസ് വീടുകളിലെത്തിയെങ്കിലും ആരെയും കണ്ടെത്താനായില്ല. രാജപുരം എസ്എച്ച്ഒ പി.രാജേഷ്, പ്രിൻസിപ്പൽ എസ്ഐ പ്രദീപ് കുമാർ, എഎസ്ഐ ഓമനക്കുട്ടൻ, സതീഷ് കുമാർ, വിജിത്ത്, മനു, സജിത്ത് എന്നിവരടങ്ങിയ സംഘത്തിന്‍റെ നേതൃത്വത്തിലാണ് അന്വേഷണം നടക്കുന്നത്.

വട്ട്യാംതോടിൽ കാർ പുഴയിലേക്ക് മറിഞ്ഞു; യാത്രക്കാർ അദ്ഭുതകരമായി രക്ഷപ്പെട്ടു

ഉളിക്കൽ: കനത്ത മഴയിൽ കവിഞ്ഞൊഴുകുന്ന വയത്തൂർ പുഴയിലെ വട്ട്യാംതോട് പാലത്തിലൂടെ കടന്നു പോകുകയായിരുന്ന കാർ പുഴയിലേക്ക് മറിഞ്ഞു. മറിഞ്ഞ കാർ പുഴയോട് ചേർന്നുനിൽക്കുന്ന പൊന്തക്കാടുകളിൽ തട്ടിനിന്നതിനാൽ യാത്രക്കാർ അദ്ഭുതകരമായി പരിക്കേൽക്കാതെ രക്ഷപ്പെട്ടു. മണിപ്പാറഭാഗത്തുനിന്ന് വന്ന കാർ പാലത്തിൽ കയറുന്നതിനിടെ ഇറക്കത്തിൽ കൈവരിക്കൾക്കിടയിലൂടെ തെന്നി മറിയുകയായിരുന്നു. രണ്ടു പേരാണ് കാറിലുണ്ടായിരുന്നത്. ഓടിക്കൂടിയ നാട്ടുകാർ യാത്രക്കാരെ പുറത്തെത്തിക്കുകയും വടം കെട്ടി കാർ പുഴയിലേക്ക് വീഴുന്നത് തടഞ്ഞുനിർത്തുകയും ചെയ്തു. നാട്ടുകാരുടെ ശ്രമഫലമായി നിർമിച്ച പാലത്തിന്‍റെ കൈവരികൾ കാലപ്പഴക്കത്താൽ തകരുകയായിരുന്നു.

മദ്യവും ലഹരി വസ്തുക്കളും നിരോധിച്ചില്ലെങ്കിൽ രാജ്യം നശിക്കും: റവ. ഡോ. ജോസഫ് മുട്ടത്തുകുന്നേൽ

ഇരിട്ടി: മദ്യവും ലഹരി വസ്തുക്കളും നിരോധിക്കാനുള്ള ആർജവം ഭരണകർത്താക്കൾ കാണിക്കണമെന്നും അല്ലാത്തപക്ഷം ലഹരിയുടെ ദുരന്തഫലത്തിൽ രാജ്യത്തിന്‍റെ നാശം കാണേണ്ടി വരുമെന്നും തലശേരി അതിരൂപത ചാൻസലർ റവ. ഡോ. ജോസഫ് മുട്ടത്തുകുന്നേൽ. തലശേരി അതിരൂപത കെസിബിസി മദ്യവിരുദ്ധസമിതി അന്താരാഷ്‌ട്ര ലഹരി വിരുദ്ധദിനത്തോടനുബന്ധിച്ച് നടത്തിയ ലഹരി വിമോചന സന്ദേശ യാത്ര ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ലഹരി വസ്തുക്കൾ സുലഭമായ സാഹചര്യത്തിൽ യുവതലമുറ ലഹരിക്കടിമപ്പെട്ട് നാശത്തിന്‍റെ പാതയിലാണെന്നത് അത്യന്തം ഞെട്ടിപ്പിക്കുന്ന കാര്യമാണെന്നും റവ. ഡോ. മുട്ടത്തുകുന്നേൽ പറഞ്ഞു. ഫാ. മനോജ് കിടാരത്തിൽ അധ്യക്ഷത വഹിച്ചു. ഇരിട്ടിയിൽനിന്ന് ആരംഭിച്ച ലഹരി വിമോചന സന്ദേശയാത്ര മണിക്കടവിൽ സമാപിച്ചു. നെല്ലിക്കാംപൊയിൽ ഫൊറോന വികാരി ഫാ. ജോസഫ് കാവനാടിയിൽ മുഖ്യപ്രഭാഷണം നടത്തി. ഇരിട്ടി സിഐ എ. കുട്ടികൃഷ്ണൻ മുഖ്യാതിഥിയായിരുന്നു. അതിരൂപത ഡയറക്ടർ ഫാ. ജയ്സൺ കോലക്കുന്നേൽ, മദ്യവിരുദ്ധ സമിതി അതിരൂപത പ്രസിഡന്‍റ് ടോമി വെട്ടിക്കാട്ട്, മുക്തിശ്രീ പ്രസിഡന്‍റ് ഷിനോ പാറയ്ക്കൽ, വിദ്യാർഥി പ്രതിനിധി അർളിൻ അന്ന ഷിബു എന്നിവർ പ്രസംഗിച്ചു. അങ്ങാടിക്കടവ് ഡോൺ ബോസ്കോ കോളജ് വിദ്യാർഥികൾ ഫ്ലാഷ് മോബ് അവതരിപ്പിച്ചു.

സൈബർത്തട്ടിപ്പ്: മട്ടന്നൂരിലെ ഡോക്ടറുടെ 4.43 കോടി നഷ്ടമായി

കണ്ണൂർ: നിക്ഷേപിക്കുന്ന തുകയുടെ ഇരട്ടി നൽകാമെന്ന വാട്സ്ആപ്പ് സന്ദേശത്തിൽ വിശ്വസിച്ച് കണ്ണൂരിൽ ഡോക്ടർക്ക് നഷ്ടമായത് 4,43,20,000 രൂപ. മട്ടന്നൂർ സ്വദേശിയായ ഡോക്ടർക്കാണ് ഇത്രയും തുക നഷ്ടമായത്. ഏപ്രിൽ മുതൽ ജൂൺ 25 വരെയുള്ള കാലയളവിലാണ് പലതവണകളിലായി പണം തട്ടിയെടുത്തത്. വാട്സ്ആപ്പ് വഴി മെസേജ് കണ്ട് വ്യാജ ഷെയർ ട്രേഡിംഗ് പ്ലാറ്റ്ഫോം വഴി ട്രേഡിംഗ് ചെയ്യാൻ ശ്രമിച്ച പരാതിക്കാരനെക്കൊണ്ട് പ്രതികൾ വിവിധ അക്കൗണ്ടുകളിലേക്ക് പണം നിക്ഷേപിപ്പിക്കുകയായിരുന്നു. പരാതിക്കാരൻ പണം പിൻവലിക്കാൻ ശ്രമിച്ചപ്പോൾ വിവിധ ചാർജുകൾ എന്ന് പറഞ്ഞു വീണ്ടും പണം വാങ്ങിയെടുക്കുകയും നിക്ഷേപിച്ച പണമോ വാഗ്ദാനം ചെയ്ത ലാഭമോ നല്‍കാതെ ചതി ചെയ്തതായുമാണ് പരാതി. മേൽ പരാതിയിൽ കണ്ണൂർ സിറ്റി സൈബർ ക്രൈം പോലീസ് സ്റ്റേഷനിൽ കേസ് രജിസ്റ്റർ ചെയ്ത് അന്വേഷണം ആരംഭിച്ചു. വാട്സ്ആപ്പ് വഴി പാർട്ട് ടൈം ജോലി ചെയ്യുന്നതിനായി പ്രതികളുടെ നിർദേശപ്രകാരം വിവിധ ടാസ്കുകൾക്ക് പണം നല്കിയ പിണറായി സ്വദേശിയുടെ 6,25,000 രൂപ നഷ്‌ടമായി. ടെലഗ്രാം വഴി പാര്‍ട്ട് ടൈം ജോലി ചെയ്യുന്നതിനായി പ്രതികളുടെ നിര്‍ദേശപ്രകാരം വിവിധ ടാസ്കുകൾക്കു വിവിധ അക്കൗണ്ടുകളിലേക്ക് പണം നിക്ഷേപിച്ച ചക്കരക്കല്ല് സ്വദേശിയുടെ 2,05,000 രൂപ നഷ്‌ടമായി. ഫെയ്സ്ബുക്കിൽ പരസ്യം കണ്ട് പർച്ചേസ് ചെയ്യുന്നതിനായി പണം നല്കിയ പിണിറായി സ്വദേശിയുടെ 74,000 രൂപ നഷ്‌ടമായി. ഓൺലൈൻ ലോൺ നൽകാമെന്ന് പറഞ്ഞു ലോൺ ലഭിക്കാനുള്ള വിവിധ ചാർജുകൾ എന്ന് പറഞ്ഞു പിണറായി സ്വദേശിയിൽ നിന്നും 64,999 രൂപയും തട്ടിയെടുത്തു. ഓൺലൈൻ പരസ്യം കണ്ട് വാട്സ്ആപ്പ് വഴി ചാറ്റ് ചെയ്ത് കാമറ പർച്ചേസ് ചെയ്യുന്നതിനായി പണം നല്കിയ കതിരൂർ സ്വദേശിയുടെ 43,000 രൂപ നഷ്‌ടമായി. ഫേസ്ബുക്ക് പരസ്യം കണ്ട് പർച്ചേസ് ചെയ്യുന്നതിനായി പണം നല്കിയ പിണറായി സ്വദേശിയുടെ 21,400 രൂപ നഷ്ടമായി.

വീട്ടമ്മയുടെ കഴുത്തിൽ കത്തിവച്ച് ആഭരണം കവർന്നു

പയ്യന്നൂര്‍: വീട്ടിൽ കയറി വീട്ടമ്മയുടെ കഴുത്തിൽ കത്തി വച്ച് വധഭീഷണി മുഴക്കി സ്വർണാഭരണം കവർന്ന മോഷ്ടാവിനെ മണിക്കൂറുകൾക്കുള്ളിൽ അറസ്റ്റ് ചെയ്ത് പയ്യന്നൂർ പോലീസ്. അന്നൂര്‍ കൊരവയലിലെ കുണ്ടത്തില്‍ സാവിത്രിയുടെ (66) മാല കവരുകയും ഇവരെ തള്ളി താഴെയിട്ട പരിക്കേൽപ്പിക്കുകയും ചെയ്ത കരിവെള്ളൂര്‍ കൂക്കാനത്തെ രാജേന്ദ്രനാണ് (55) അറസ്റ്റിലായത്. സംഭവം നടന്ന് പത്തുമണിക്കൂറിനുള്ളിലാണ് പ്രതിയെ പോലീസ് അറസ്റ്റ് ചെയ്തത്. ഇന്നലെ രാവിലെ പത്തരയോടെയാണ് സാവിത്രി കൊള്ളയ്ക്കും അക്രമത്തിനും ഇരയായത്. വർക്ക്ഷോപ്പ് ജീവനക്കാരനായ ഭർത്താവ് രവീന്ദ്രൻ രാവിലെ ജോലിക്ക് പോയതിനു പിന്നാലെയാണ് സംഭവം. കോളിംഗ് ബെൽ കേട്ട് വാതിൽ തുറന്നപ്പോൾ നീല നിറത്തിലുള്ള മഴക്കോട്ട് ധരിച്ചയാളെയാണ് കണ്ടത്. വാതിൽ തുറന്നയുടൻ ഇയാൾ അകത്തേക്ക് കടന്ന് വാതിലിന്‍റെ കുറ്റിയിട്ടു. ബഹളം വയ്ക്കാൻ ശ്രമിച്ച ഇവരുടെ വായിലൂടെ തൊണ്ടയിലേക്ക് കൈകടത്തി നിശബ്ദയാക്കുകയും കഴുത്തിൽ കത്തിവച്ച് ഭീഷണിപ്പെടുത്തി രണ്ടേകാൽ പവൻ മാലയും ഒരു കമ്മലും പറിച്ചെടുക്കുകയായിരുന്നു. തുടർന്ന് തള്ളി നിലത്തിട്ട ശേഷം ഓടി രക്ഷപ്പെട്ടു. സാവിത്രിയുടെ കരച്ചില്‍ കേട്ടെത്തിയ അയല്‍വാസികളാണ് വിവരം മറ്റുള്ളവരെ അറിയിച്ചത്. തൊണ്ടയില്‍നിന്നും രക്തമൊഴുകി അവശനിലയിലായ ഇവരെ പയ്യന്നൂര്‍ താലൂക്ക് ആശുപത്രിയില്‍ പ്രവേശിപ്പിച്ചു. കമ്മലിന്‍റെ ആണിയും മോഷ്ടാവ് കൊണ്ടുവന്ന കത്തിയും മുറിയില്‍ നിന്നും കണ്ടുകിട്ടിയിരുന്നു. വിവരമറിഞ്ഞെത്തിയ പോലീസിന് സംഭവത്തിനുശേഷം മോഷ്ടാവ് ഓടി പോകുന്ന ദൃശ്യം നിരീക്ഷണ കാമറയിൽ നിന്ന് ലഭിച്ചു. മറ്റു നിരീക്ഷണ കാമറ ദൃശ്യങ്ങൾ ശേഖരിച്ചപ്പോൾ സ്കൂട്ടർ നിർത്തിയിടുന്നതിന്‍റെയും നടന്നു വരുന്നതിന്‍റെയും ദൃശ്യങ്ങളും ലഭിച്ചു. ഈ ദൃശ്യങ്ങൾ കേന്ദ്രീകരിച്ചു നടത്തിയ അന്വേഷണത്തിൽ പ്രതിയെ പിലാത്തറയിൽ വച്ച് അറസ്റ്റ് ചെയ്യുകയായിരുന്നു. കവർച്ചയ്ക്ക് ശേഷം പ്രതി സ്കൂട്ടർ കണ്ടോത്ത് നിർത്തിയിട്ട ശേഷം ബസിൽ കാഞ്ഞങ്ങാടേക്ക് പോയി അവിടത്തെ ജ്വല്ലറിയിൽ നിന്നും സ്വർണം മാറ്റി വാങ്ങി. പിന്നീട് മറ്റൊരു ജ്വല്ലറിയൽ ഇത് വിൽക്കുകയായിരുന്നു. സ്വർണം വിറ്റശേഷം തിരിച്ച് പിലാത്തറയിലെത്തിയ പ്രതി ഇവിടെയുള്ള ഒരു കടയിൽ നിന്നും ഷർട്ട് വാങ്ങി പുറത്തിറങ്ങുന്നതിനിടെയാണ് പോലീസിന്‍റെ പിടിയിലായത്. കവർച്ച നടത്തിയ വീടിനു സമീപം നേരത്തെ പ്രതി മരം മുറിക്കാനായി എത്തിയിരുന്നു. ഇവിടെനിന്ന് വീടിനെക്കുറിച്ച് മനസിലാക്കിയ ശേഷമാണ് കവർച്ച നടത്തിയതെന്ന് പോലീസ് പറഞ്ഞു. എസ്‌ഐ പി. യദുകൃഷ്ണന്‍റെ നേതൃത്വത്തില്‍ പ്രൊബേഷനറി എസ്‌ഐമാരായ മഹേഷ്, നിഥിന്‍, സീനിയര്‍ സിവില്‍ പോലീസ് ഓഫീസര്‍മാരായ നൗഫല്‍ അഞ്ചില്ലത്ത്, പ്രമോദ് കടമ്പേരി, ഏ. ജി. അബ്ദുള്‍ ജബ്ബാര്‍, ബിജു ജോസഫ്, സ്പെഷൽ ബ്രാഞ്ച് എഎസ്‌ഐ മനോജന്‍ മമ്പലം, ഡ്രൈവര്‍ രാജേഷ് എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്.

ആറളം ഫാമിൽ കാട്ടാനയെ ചെരിഞ്ഞ നിലയിൽ കണ്ടെത്തി

ഇരിട്ടി: ആറളം ഫാമിലെ പന്ത്രണ്ടാം ബ്ലോക്കിന് സമീപം കാട്ടാനയെ ചെരിഞ്ഞനിയിൽ കണ്ടെത്തി. തവരഞ്ഞാലിലാണ് 30-35 വയസ് പ്രായം തോന്നിക്കുന്ന കൊമ്പനാനയുടെ ജഡം കണ്ടെത്തിയത്. ദുർഗന്ധം വമിക്കുന്ന നിലയിൽ കണ്ടെത്തിയ ജഡത്തിന് മൂന്നു ദിവസത്തെയെങ്കിലും പഴക്കമുണ്ടെന്നാണ് കരുതുന്നത്. ദുർഗന്ധത്തെ തുടർന്ന് ഇന്നലെ ഉച്ചയോടെ നടത്തിയ പരിശോധനയിലാണ് കാട്ടുകൊന്പനെ ചെരഞ്ഞ നിലയിൽ കണ്ടെത്തിയത്. ആറളം റേഞ്ച് ഓഫീസർ നിധിൻ രാജിന്‍റെ നേതൃത്വത്തിലുള്ള വനം വകുപ്പ് സംഘം സ്ഥലത്തെത്തി പരിശോധന നടത്തി. കാട്ടാന ചരിഞ്ഞതിൽ അസ്വാഭാവികതയില്ലെന്നാണ് പ്രാഥമിക പരിശോധന നടത്തിയ വനം വകുപ്പുദ്യോഗസ്ഥരുടെ പ്രാഥമിക നിഗമനം. വനം വകുപ്പ് വെറ്ററിനറി സർജന്‍റെ നേതൃത്വത്തിൽ ഇന്നു രാവിലെ ഒൻപതിന് പോസ്റ്റുമോർട്ടം നടത്തും. ആറളം പോലീസും സ്ഥലത്തെത്തിയിരുന്നു. കഴിഞ്ഞ രണ്ടുവർഷത്തിനിടയിൽ ആറളംഫാമിൽ ചെരിഞ്ഞ നിലയിൽ കണ്ടെത്തുന്ന ആറാമത്തെ കാട്ടാനയാണിത്. കഴിഞ്ഞ വർഷം ഇതേ സ്ഥലത്ത് മറ്റൊരാന ചെരിഞ്ഞിരുന്നു. ആറളം ഫാമിൽ അമ്പതിൽ അധികം കാട്ടാനകൾ വിഹരിക്കുന്നുണ്ടെന്നാണ് കണക്ക്.

ബിജു മാഷിനൊപ്പം നീന്തിക്കയറിയത് മൂവായിരത്തിലേറെ പേർ

പാലാവയൽ: എട്ടുവർഷം കൊണ്ട് മൂവായിരത്തിലേറെ പേരെ നീന്തൽ പഠിപ്പിക്കാൻ കഴിഞ്ഞതിന്‍റെ അഭിമാനനേട്ടവുമായി പാലാവയൽ സെന്‍റ് ജോൺസ് നീന്തൽക്കുളത്തിലെ പരിശീലകൻ ബിജു സെബാസ്റ്റ്യൻ മാത്തശേരിൽ. 2015 ൽ പാലാവയൽ സെന്‍റ് ജോൺസ് സ്കൂളിനു സമീപം അത്യാധുനിക സൗകര്യങ്ങളുള്ള നീന്തൽക്കുളം സജ്ജമാക്കിയ കാലം മുതലേ ബിജുവാണ് മുഖ്യപരിശീലകൻ. കോവിഡ് നിയന്ത്രണങ്ങൾ മൂലം രണ്ടു വർഷത്തോളം നീണ്ട ഇടവേള ഒഴിച്ചുനിർത്തിയാൽ മറ്റെല്ലാ സമയങ്ങളിലും നീന്തൽക്കുളവും ബിജുമാഷും സജീവമായിരുന്നു. 60 വയസിനു മേൽ പ്രായമുള്ളവർ മുതൽ ആറു വയസുള്ള കുട്ടികൾ വരെ ഇവിടെനിന്ന് നീന്തൽ പഠിച്ചിട്ടുണ്ട്. ബിജുവിന്‍റെ ശിക്ഷണത്തിൽ നീന്തൽ പഠിച്ച കുട്ടികൾ ദേശീയ, സംസ്ഥാന തലങ്ങളിലും അന്തർ സർവകലാശാല നീന്തൽ മത്സരങ്ങളിൽ മെഡൽത്തിളക്കങ്ങൾ സ്വന്തമാക്കിയിട്ടുണ്ട്. സ്കൂൾ കായികമേളകളിൽ പാലാവയൽ സെന്‍റ് ജോൺസ് ഹയർ സെക്കൻഡറി സ്കൂളിനെ തുടർച്ചയായി ജില്ലയിൽ ഒന്നാമതെത്തിക്കുന്നതും സംസ്ഥാനതലത്തിൽ മെഡലുകൾ വാരിക്കൂട്ടുന്നതും ബിജുവിന്‍റെ ശിഷ്യഗണങ്ങളാണ്. കുടിയേറ്റത്തിന്‍റെ ആദ്യനാളുകളിൽ പുളിങ്ങോം പുഴയ്ക്ക് പാലമില്ലാതിരുന്ന കാലത്ത് മുളകൾ കൂട്ടിക്കെട്ടിയ പാണ്ടി തുഴഞ്ഞ് ആളുകളെ മറുകരയിലെത്തിച്ചിരുന്ന പിതാവ് ദേവസ്യാച്ചൻ മാത്തശേരിയിൽനിന്നാണ് ബിജു നീന്തലിന്‍റെ ബാലപാഠങ്ങൾ അഭ്യസിച്ചത്. പിന്നീട് പാലാവയലിലെ കുട്ടികളുടെ നീന്തലിലെ മികവ് തേച്ചുമിനുക്കാൻ പാലായിൽ നിന്നെത്തിയ പരിശീലകൻ തോപ്പിൽ സിറിയക്കിന്‍റെ കീഴിൽ ശാസ്ത്രീയ പരിശീലനം നേടി. നാലാം ക്ലാസ് മുതൽ ജില്ലാ സംസ്ഥാന മത്സരങ്ങളിൽ പങ്കെടുത്ത് മെഡലുകൾ കരസ്ഥമാക്കി. പാലാ സെന്‍റ് തോമസ് കോളജിൽ പഠിക്കുന്ന കാലത്ത് തോമസ് തോപ്പിലിന്‍റെ ശിക്ഷണത്തിൽ അന്തർ സർവകലാശാല മത്സരങ്ങളിൽ പങ്കെടുത്ത് നേട്ടങ്ങൾ സ്വന്തമാക്കി. നീന്തലിലെ മികവിന്‍റെ അടിസ്ഥാനത്തിൽ ബംഗളൂരുവിൽ ആർമിയുടെ മദ്രാസ് എൻജിനിയറിംഗ് ഗ്രൂപ്പിൽ സ്വിമ്മിംഗ് ടീമിന്‍റെ ഭാഗമായി 1994 വരെ സേവനമനുഷ്ഠിച്ചു. അവിടെനിന്ന് പിരിഞ്ഞതിനു ശേഷം 1997 വരെ ബംഗളൂരുവിൽ തന്നെയുള്ള കെ.സി.റെഡ്ഡി സ്വിമ്മിംഗ് സെന്‍ററിൽ ദേശീയ ടീം പരിശീലകരായിരുന്ന ജയരാജ്‌, നിഹാർ എന്നിവർക്കൊപ്പം ജോലിചെയ്തു. പിന്നീട് ദുബായിലുള്ള ജുമൈറ ഇന്‍റർനാഷണലിൽ ലൈഫ് ഗാർഡ്, ബോട്ട് ക്യാപ്റ്റൻ, സ്വിമ്മിംഗ് ഇൻസ്‌ട്രക്ടർ എന്നീ നിലകളിൽ പ്രവർത്തിച്ച കാലത്ത് രണ്ടു തവണ യുഎഇക്ക് വേണ്ടി ഇന്‍റർനാഷണൽ ലൈഫ് സേവിംഗ് മത്സരങ്ങളിൽ പങ്കെടുത്തു. അതിനുശേഷമാണ് ജന്മനാട്ടിൽ നീന്തൽ പരിശീലകനായെത്തിയത്. ബിജു മാഷിന്‍റെ കീഴിൽ പാലാവയൽ നീന്തൽക്കുളത്തിൽ നടത്തിയ ലൈഫ് ഗാർഡ് കോഴ്സ് പഠിച്ചിറങ്ങിയ സംസ്ഥാനത്തിന്‍റെ വിവിധ ഭാഗങ്ങളിൽ നിന്നുള്ള നാല്പതിലേറെ പേർക്ക് വിദേശരാജ്യങ്ങളിൽ ജോലി ലഭിക്കുകയുണ്ടായി. ഇപ്പോൾ ജില്ലാ അക്വാട്ടിക് അസോസിയേഷന്‍റെ ജോയിന്‍റ് സെക്രട്ടറിയായും ബിജു പ്രവർത്തിക്കുന്നു. ജെനിയാണ് ഭാര്യ. വെല്ലൂർ സിഎംസിയിലെ നഴ്സിംഗ് വിദ്യാർഥിനി ലി ആൻ എലിസബത്ത്, ചെമ്പേരി വിമൽ ജ്യോതി എൻജിനിയറിംഗ് കോളജ് വിദ്യാർഥിനി ജോ ആൻ മരിയ, പാലാവയൽ സെന്‍റ് ജോൺസ് എച്ച്എസ്എസിലെ പ്ലസ് വൺ വിദ്യാർഥി കെവിൻ സെബാസ്റ്റ്യൻ എന്നിവർ മക്കളാണ്. മൂന്നുപേരും നീന്തലിലും മികവ് തെളിയിച്ചിട്ടുണ്ട്.

കണ്ണൂരിൽ മയക്കുമരുന്നു വേട്ട: യുവതിയടക്കം 2 പേർ അറസ്റ്റിൽ

കണ്ണൂർ: കണ്ണൂരിൽ വൻ മയക്കുമരുന്ന് വേട്ട. 184.43 ഗ്രാം മെത്തഫിറ്റാമിനും 89.423 ഗ്രാം എംഡിഎംഎയും 12.446 ഗ്രാം ഹാഷിഷ് ഓയിലുമായി യുവതിയടക്കം രണ്ടു പേർ അറസ്റ്റിൽ. കരിപ്പാൽ പണ്ടികശാല സ്വദേശി പി. മുഹമ്മദ് മഷൂദ് (29), അഴീക്കോട് സ്വദേശി ഇ. സ്നേഹ എന്നിവരെയാണ് എക്സൈസ് എൻഫോഴ്സ്മെന്‍റ് ആൻഡ് ആന്‍റി നർകോട്ടിക് സ്പെഷൽ സ്ക്വാഡ് ഓഫീസിലെ സർക്കിൾ ഇൻസ്പെക്ടർ സി. ഷാബുവിന്‍റെ നേതൃത്വത്തിൽ പിടികൂടിയത്. കണ്ണൂർ കുറുവക്ക് സമീപമുള്ള സ്വകാര്യ ടൂറിസ്റ്റ് ഹോമിലും വാഹനത്തിലും അഴീക്കോട്‌ ഭാഗത്തെ വീട്ടിലും നടത്തിയ പരിശോധനയിലാണ് വില്പനയ്ക്കായി സൂക്ഷിച്ച മയക്കുമരുന്നുകൾ പിടികൂടിയത്. എക്സൈസ് കമ്മീഷണർ സ്‌ക്വാഡ് അംഗങ്ങളായ പി. ജലീഷിനും പി.വി. ഗണേഷ് ബാബുവിനും ലഭിച്ച രഹസ്യ വിവരത്തിന്‍റെ അടിസ്ഥാനത്തിലാണ് പരിശോധന നടത്തിയത്. തിങ്കളാഴ്ച രാത്രി കുറുവ ബീച്ചിന് അടുത്തുള്ള സ്വകാര്യ ടൂറിസ്റ്റ് റിസോർട്ടിൽ നടത്തിയ പരിശോധനയിൽ 4.8 ഗ്രാം മെത്താഫിറ്റമിനാണ് പിടിച്ചെടുത്തത്. തുടർന്ന് ഇരുവരുടെയും വാഹനമായ കെഎൽ 13 എആർ 6657 സ്‌കൂട്ടർ പരിശോധിച്ചപ്പോൾ 12.446 ഗ്രാം ഹാഷിഷ് ഓയിലും പിടികൂടി. പ്രതികളുടെ മൊഴിയുടെ അടിസ്ഥാനത്തിൽ അഴീക്കോട് ഭാഗത്തുള്ള യുവതിയുടെ വീട്ടിൽ പരിശോധന നടത്തിയപ്പോൾ 184.43 ഗ്രാം മെത്താഫിറ്റമിനും 89.423 ഗ്രാം എംഡിഎംഎയും പിടിച്ചെടുത്തു. കണ്ണൂർ ജില്ലയിൽ മയക്കുമരുന്ന് വില്പന നടത്തുന്ന സംഘത്തിലെ പ്രധാനികളാണ് അറസ്റ്റിലായ പ്രതികളെന്ന് എക്സൈസ് സംഘം പറഞ്ഞു. മുമ്പും മയക്കുമരുന്നുകേസുകളിൽ ഉൾപ്പെട്ടവരാണ് ഇരുവരും. കഴിഞ്ഞ വർഷം കണ്ണൂർ താളിക്കാവ് ഭാഗത്തു വച്ച് 207 ഗ്രാം മെത്താഫിറ്റമിൻ കൈവശംവച്ച കേസിൽ ഒന്നാം പ്രതി മഷൂദ് ഒരു മാസം മുമ്പാണ് ജാമ്യത്തിൽ ഇറങ്ങിയത്. പ്രതികൾ ജില്ലയുടെ പലഭാഗത്തും രാസ ലഹരികൾ വില്പന നടത്തുന്നുണ്ടെന്ന വിവരത്തിന്‍റെ അടിസ്ഥാനത്തിൽ എക്സൈസിന്‍റെ നിരീക്ഷണത്തിലായിരുന്നു. പ്രതികളെ കണ്ടുപിടിക്കുന്നതിന് എടിഎസ് കേരളയുടെ സഹായം ലഭിച്ചിട്ടുണ്ടെന്ന് എക്സൈസ് ഉദ്യോഗസ്ഥർ പറഞ്ഞു. അസിസ്റ്റന്‍റ് ഇസ്പെക്ടർമാരായ സന്തോഷ്‌ തൂനോളി, പി.കെ.അനിൽകുമാർ, ആർ.പി. അബ്ദുൽ നാസർ, പ്രിവന്‍റീവ് ഓഫീസർ ഗ്രേഡ്മാരായ ടി. ഖാലിദ്, പി.പി. സുഹൈൽ, പി. ജലീഷ്, അസിസ്റ്റന്‍റ് എക്സൈസ് ഇൻസ്‌പെക്ടർ ഡ്രൈവർ സി. അജിത്, ഷാമജിത്ത്, സിവിൽ എക്സൈസ് ഓഫീസർമാരായ അജ്മൽ, സായൂജ്, വനിത സിവിൽ എക്സൈസ് ഓഫീസർമാരായ പി.സീമ, ഷബ്‌ന എക്സൈസ് കമ്മീഷണർ സ്‌ക്വാഡ് അംഗം പി.വി. ഗണേഷ് ബാബു എന്നിവരും പ്രതികളെ പിടികൂടിയ സംഘത്തിൽ ഉണ്ടായിരുന്നു. പ്രതികളെ കോടതിയിൽ ഹാജരാക്കി റിമാൻഡ് ചെയ്തു.

വയോധികയുടെ മാലപൊട്ടിച്ച വിരുതൻ പിടിയില്‍

പയ്യന്നൂര്‍: എടാട്ട് പിഇഎസ് വിദ്യാലയത്തിന് സമീപത്തെ ദേശീയപാതയിലൂടെ നടന്നുപോകുകയായിരുന്ന വയോധികയുടെ മാല പൊട്ടിച്ചെടുത്ത് സ്‌കൂട്ടറില്‍ രക്ഷപ്പെട്ട വിരുതനെ പോലീസ് പിടികൂടി. പാലക്കാട് മണ്ണാര്‍ക്കാട് കൊട്ടോപ്പാടത്തെ പി.ജെ. സണ്ണിയേയാണ് (58) പയ്യന്നൂര്‍ പോലീസ് പിടികൂടിയത്. ഈ മാസം ഏഴിന് രാവിലെ എട്ടോടെയാണ് പുറച്ചേരിയിലെ കുഞ്ഞിരാമന്‍റെ ഭാര്യ എം.വി. തങ്കമണിയുടെ (69) താലിമാല മോഷ്ടാവ് വലിച്ചുപൊട്ടിച്ചശേഷം കടന്നുകളഞ്ഞത്. എടാട്ട് കോളജ് സ്റ്റോപ്പില്‍ ബസിറങ്ങി ജോലി ചെയ്യുന്ന വനിതാ ഹോട്ടലിലേക്ക് നടന്നുപോകുന്നതിനിടയിലായിരുന്നു സംഭവം. തങ്കമണി ബഹളം വച്ച് പിറകെ ഓടിയെങ്കിലും യുവാവ് സ്‌കൂട്ടറില്‍ അതിവേഗത്തില്‍ രക്ഷപ്പെടുകയായിരുന്നു. ഒന്നേമുക്കാല്‍ ലക്ഷത്തോളം വിലവരുന്ന താലിയുള്‍പ്പെടെയുള്ള രണ്ടര പവനോളം വരുന്ന മാലയാണ് അപഹരിക്കപ്പെട്ടതെന്ന തങ്കമണിയുടെ പരാതിയില്‍ പയ്യന്നൂര്‍ പോലീസ് കേസെടുത്ത് നടത്തിവന്ന അന്വേഷണത്തിനൊടുവിലാണ് പോലീസ് പ്രതിയെ പിടികൂടിയത്.

തളിപ്പറമ്പ്-മുല്ലക്കൊടി-മയ്യിൽ റോഡിൽ ഗതാഗത തടസമായി കുഴി

കണ്ണൂർ: കണ്ണൂർ വിമാനത്താവളത്തിലേക്കുള്ള തിരക്കേറിയ റോഡിൽ ജപ്പാൻ കുടിവെള്ളപൈപ്പ് ലൈൻ അറ്റകുറ്റപ്പണിക്കായെടുത്ത കുഴി പൂർണമായും മൂടാത്തതിൽ ഗതാഗത തടസം. തളിപ്പറമ്പ്-മുല്ലക്കൊടി-മയ്യിൽ പ്രധാന റോഡിൽ ചെക്യാട്ടുകാവിനു സമീപത്തെ കവലയിലാണ് മാസങ്ങളായി വാഹനയാത്രക്കാരടക്കം ദുരിതം പേറുന്നത്. മയ്യിലിൽ നിന്നും മുല്ലക്കൊടി,നണിച്ചേരി വഴി തളിപ്പറമ്പ് ഭാഗത്തേക്കും കണ്ണൂർ വിമാനത്താവളത്തിലേക്കും ദിനംപ്രതി ബസുകളടക്കം നൂറിലധികം വാഹനങ്ങൾ കടന്നുപോകുന്ന പ്രധാന മെക്കാഡം റോഡിലാണ് തീരാദുരിതം. കാലവർഷം ആരംഭിച്ചതോടെ കുഴിയിൽ വെള്ളം കെട്ടിക്കിടക്കുന്നത് കാരണം കാൽനടയാത്രക്കാർക്കും വാഹന യാത്രക്കാർക്കും ഒരു പോലെ പ്രയാസമുണ്ടാക്കുകയാണ്.

സ്കൂളിന് മുന്നിൽ റോഡിലെ കുഴി അടയ്ക്കണം

ചെറുപുഴ: ചെറുപുഴ-പുളിങ്ങോം റോഡിൽ കന്നിക്കളം ആർക്ക് ഏയ്ഞ്ചൽസ് സ്കൂളിന് മുന്നിലെ കുഴി അപകടത്തിനു കാരണമാകുന്നു. സ്കൂളിന് മുന്നിലെ കലുങ്കിനോടു ചേർന്നാണ് വലിയ കുഴിയുളളത്. നൂറു കണക്കിന് വാഹനങ്ങൾ കടന്നുപോകുന്ന റോഡിലെ കുഴിയിൽ നിരവധി ഇരുചക്രവാഹനങ്ങൾ അപകടത്തിൽപ്പെട്ടിട്ടുണ്ട്. കുഴി അടയ്ക്കണമെന്ന് ആവശ്യപ്പെട്ട് സ്കൂൾ അധികൃതർ ബന്ധപ്പെട്ടവർക്ക് പരാതി നൽകിയെങ്കിലും യാതൊരു നടപടിയും ഉണ്ടായിട്ടില്ല.

റോഡിൽ മണ്ണിട്ടത് സംബന്ധിച്ച് തർക്കം; സിപിഐ ബ്രാഞ്ച് സെക്രട്ടറിക്ക് മർദനം

ശ്രീകണ്ഠപുരം: റോഡിൽ മണ്ണിട്ടതുമായി ബന്ധപ്പെട്ടുള്ള തർക്കത്തിനിടെ സിപിഐ ബ്രാഞ്ച് സെക്രട്ടറിയെ സിപിഎം ബ്രാഞ്ച് സെക്രട്ടറിയുടെ നേതൃത്വത്തിലുള്ള സംഘം മർദിച്ചതായി പരാതി. സിപിഐ പയറ്റിയാൽ ബ്രാഞ്ച് സെക്രട്ടറി. സി.സി. റോയി ചുക്കാനാനിക്കാണ് മർദനമേറ്റത്. ഹൃദ്രോഗിയായ റോയി മർദനമേറ്റു വീണതിനെ തുടർന്ന് തളിപ്പറന്പ് സഹകരണ ആശുപത്രിയിലും പിന്നീട് കണ്ണൂരിലെ സ്വകാര്യ ആശുപത്രിയിലും പ്രവേശിപ്പിച്ചു. ചൊവ്വാഴ്ച രാത്രിയായിരുന്നു സംഭവം. അതേസമയം, സംഭവത്തിൽ രാഷ്‌ട്രീയമില്ലെന്ന് പോലീസ് പറഞ്ഞു. സംഭവത്തിൽ പ്രതിഷേധിച്ച് ഇന്നലെ വൈകുന്നേരം ചെമ്പന്തൊട്ടി ടൗണിൽ സിപിഐ പ്രകടനവും യോഗവും നടത്തി. ഇരിക്കൂർ മണ്ഡലം സെക്രട്ടറി പി. രവീന്ദ്രൻ ഉദ്ഘാടനം ചെയ്തു.

റോഡിലെ വെള്ളക്കെട്ട് ദുരിതമാകുന്നു

നെല്ലിക്കുറ്റി: ഏറ്റുപാറയിൽ നിന്ന് നെല്ലിക്കുറ്റിയിലേക്കുള്ള റോഡിൽ അങ്കണവാടിക്ക് സമിപത്തെ വെള്ളക്കെട്ട് യാത്രക്കാർക്ക് ദുരിതമാകുന്നു. ഒരു ചെറിയമഴ പെയ്താൽ പോലും റോഡിൽ വെള്ളക്കെട്ട് രൂപപ്പെടും. റോഡിലുള്ള കുഴികളും റോഡരികിലെ കുടിവെള്ള പൈപ്പിന്‍റെ കുഴി മൂടിയ സ്ഥലത്തും അപകടം പതിയിരിക്കുകയാണ്. റോഡ് കാണാത്ത വിധം വെള്ളം കെട്ടി നിൽക്കുന്നതിനാൽ സമീപത്തെ അങ്കണവാടിയിലേക്ക് കുട്ടികളെ അയയ്ക്കാൻ രക്ഷിതാക്കൾ മടിക്കുകയാണ്. രണ്ടുദിവസത്തിനകം പരിഹരിക്കുമെന്ന് പഞ്ചായത്തധികൃതർ ഉറപ്പ് നൽകിയിട്ടും നടപടി ഉണ്ടായില്ലെന്ന് നാട്ടുകാർ പറഞ്ഞു.

ലഹരിക്കെതിരേ മനുഷ്യച്ചങ്ങല നടത്തി

ആലക്കോട്: ലോക ലഹരിവിരുദ്ധ ദിനത്തിന്‍റെ ഭാഗമായി മനുഷ്യച്ചങ്ങല നടത്തി. കരുവഞ്ചാൽ ടൗൺ മുതൽ വെള്ളാട് വരെ നൂറുകണക്കിനാളുകൾ പങ്കെടുത്ത മനുഷ്യച്ചങ്ങല നടന്നത്. രാഷ്‌ട്രീയ സാമൂഹിക സാമുദായിക സാംസ്കാരിക സംഘടനകളുടെയും വിദ്യാഭ്യാസ സ്ഥാപനങ്ങളുടെയും വ്യാപാരി-തൊഴിലാളി വിഭാഗത്തിന്‍റെയും സഹകരണത്തോടെയാണ് പരിപാടി സംഘടിപ്പിച്ചത്. വായാട്ടുപറമ്പ് സെന്‍റ് ജോസഫ്സ് ഫൊറോന വികാരി റവ. ഡോ. തോമസ് തെങ്ങുംപള്ളിയിൽ പൊതുസമ്മേളനം ഉദ്ഘാടനം ചെയ്തു. സംഘാടകസമിതി ചെയർമാൻ ജനാർദന വലമറ്റം അധ്യക്ഷത വഹിച്ചു. ഫാ. ജോസഫ് ഈനാച്ചേരിയിൽ, ആലക്കോട് പഞ്ചായത്ത് പ്രസിഡന്‍റ് ജോജി കന്നിക്കാട്ട്, രാജീവൻ, ടി.ഡി. ബാബു, ടോമി കുമ്പിടിയാമാക്കൽ, വി.എ. റഹീം, ജയിംസ് പുത്തൻപുര, ബാബു പള്ളിപ്പുറം, എൻ.യു. അബ്ദുള്ള, കെ.പി. നൗഷാദ്, പി.കെ. പ്രകാശൻ എന്നിവർ പ്രസംഗിച്ചു.

ഇരിക്കൂര്‍ ജിഎച്ച്എസ്എസിൽ സ്‌കൂഫേ

ഇരിക്കൂർ: ഇരിക്കൂര്‍ ഗവ. ഹയര്‍ സെക്കന്‍ഡറി സ്‌കൂളില്‍ സ്‌കൂഫെ ജില്ലാ പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ വി.കെ. സുരേഷ് ബാബു ഉദ്ഘാടനം ചെയ്തു. ഇരിക്കൂർ പഞ്ചായത്ത് പ്രസിഡന്‍റ് ടി.പി. ഫാത്തിമ അധ്യക്ഷത വഹിച്ചു. ജില്ലാ പഞ്ചായത്തിന്‍റെ വാര്‍ഷിക പദ്ധതിയില്‍ ഉള്‍പ്പെടുത്തി ഹൈസ്‌കൂളുകളിലും ഹയര്‍ സെക്കന്‍ഡറി സ്‌കൂളുകളിലും നടപ്പിലാക്കുന്ന കഫേ അറ്റ് സ്‌കൂള്‍ പദ്ധതിയുടെ ഭാഗമായാണ് സ്‌കൂഫെ ആരംഭിച്ചത്. കുട്ടികള്‍ക്ക് ശുദ്ധവും ഗുണനിലവാരമുള്ളതുമായ ഭക്ഷണവസ്തുക്കൾ, പഠനോപകരണങ്ങള്‍ എന്നിവ സ്‌കൂള്‍ വളപ്പിനുള്ളില്‍ ലഭ്യമാക്കുക എന്ന ലക്ഷ്യത്തോടെ കുടുംബശ്രീയുടെ നേതൃത്വത്തില്‍ ആരംഭിച്ച പദ്ധതിയാണ് സ്‌കൂഫെ. ഒരു സ്‌കൂളിന് സ്‌കൂഫെ ആരംഭിക്കുന്നതിന് രണ്ടരലക്ഷം രൂപയാണ് ജില്ലാ പഞ്ചായത്ത് ധനസഹായം നല്‍കുന്നത്. കുടുംബശ്രീ ജില്ലാ മിഷന്‍ കോ-ഓര്‍ഡിനേറ്റര്‍ എം.വി. ജയന്‍, പഞ്ചായത്തംഗങ്ങളായ കെ.ടി. നസീര്‍, ടി.സി. നസിയത്ത്, എന്‍.കെ. സുലൈഖ, എം.പി. ശബ്‌നം, എന്‍.കെ.കെ. മുഫീദ, സ്‌കൂള്‍ പ്രിന്‍സിപ്പല്‍ ടി. റീന, മുഖ്യാധ്യാപകൻ പി.പി. അഷ്‌റഫ്, സിഡിഎസ് ചെയര്‍പേഴ്‌സണ്‍ ടി.പി. ജുനൈദ എന്നിവര്‍ പ്രസംഗിച്ചു.

മാത്തിൽ ഗുരുദേവ് കോളജിൽ വായന വാരാഘോഷം

ചെറുപുഴ: മാത്തിൽ ഗുരുദേവ് ആർട്സ് ആൻഡ് സയൻസ് കോളജ് മലയാളം സാഹിത്യവേദി "മാമ്പ്', എൻഎസ്എസ് യൂണിറ്റ് 51, ഐക്യുഎസി എന്നിവയുടെ സംയുക്താഭിമുഖ്യത്തിൽ വായന വാരാഘോഷ പരിപാടി "അക്ഷരപ്പാത' സംഘടിപ്പിച്ചു. കോളജ് സെമിനാർ ഹാളിൽ നടന്ന പരിപാടി മാത്തിൽ ഗവ. ഹയർ സെക്കൻഡറി സ്കൂൾ അധ്യാപകൻ എൻ. സുരേഷ് ഉദ്ഘാടനം ചെയ്തു. കോളജ് പ്രിൻസിപ്പൽ റവ. ഡോ. സാമുവൽ പുതുപ്പാടി അധ്യക്ഷത വഹിച്ചു. കോളജ് ബർസർ ഫാ. ഏബ്രഹാം പുന്നവിള, വൈസ് പ്രിൻസിപ്പൽ പി. വിനോദ്കുമാർ, എൻഎസ്എസ് പ്രോഗ്രാം കോ-ഓർഡിനേറ്റർ ഷജ്ന ഗോവിന്ദൻ, എൻഎസ്എസ് വോളന്‍റിയർ അർഥന, മലയാള വിഭാഗം മേധാവി എൻ.എസ്. ബബിത എന്നിവർ പ്രസംഗിച്ചു. സെമിനാർ ഹാളിലും ലൈബ്രറിയിലുമായി മാസ് റീഡിംഗും ഉണ്ടായിരുന്നു. വിദ്യാർഥികളും അധ്യാപകരും ഒന്നിച്ചിരുന്നു പുസ്തകങ്ങൾ വായിച്ചു.

ലഹരി വിരുദ്ധ കാമ്പയിന് തുടക്കം

ആലക്കോട്: തളിപ്പറമ്പ് ലൂര്‍ദ് കോളജ് ഓഫ് നഴ്സിംഗ് പിടിഎ കമ്മിറ്റിയുടെ നേതൃത്വത്തിൽ സംഘടിപ്പിക്കുന്ന ലഹരിവിരുദ്ധ കാമ്പയിന് ആലക്കോട് തുടക്കമായി. വിദ്യാർഥികളെയും രക്ഷിതാക്കളെയും ബോധവത്കരിക്കുക എന്ന ലക്ഷ്യത്തോടെ ഒരുവര്‍ഷം നീണ്ടുനില്‍ക്കുന്ന വിവിധ പരിപാടികളാണ് "ശ്രദ്ധ' എന്ന പേരില്‍ മലയോരം ഉള്‍പ്പടെയുള്ള പ്രദേശങ്ങളില്‍ സംഘടിപ്പിക്കുന്ന്. ആലക്കോട് എസ്ഐ ഇ.എസ്. റെജികുമാര്‍ ഉദ്ഘാടനം ചെയ്തു. നഴ്സിംഗ് കോളജ് പിടിഎ പ്രസിഡന്‍റ് നൗഷാദ് നടുവില്‍ അധ്യക്ഷത വഹിച്ചു. ലൂര്‍ദ് കോളജ് ഡയറക്ടര്‍ രാഖി ജോസഫ്, വൈസ് പ്രിന്‍സിപ്പൽ എല്‍. കെ. ജോണ്‍സൺ, ആലക്കോട് പഞ്ചായത്ത് അംഗങ്ങളായ കെ.പി. സാബു, ഖലീല്‍ റഹ്മാന്‍, ഷെൽസ ലിജേഷ്, ലിന്‍ഷ നൗഷാദ്, നൂര്‍ ഫാത്തിമ, നൗറിന്‍ ഫാത്തിമ, വിജയകുമാര്‍ എന്നിവർ പ്രസംഗിച്ചു.

മുന്നറിയിപ്പില്ലാതെ പഴശിയിലെ ഷട്ടറുകൾ ഉയർത്തി

മട്ടന്നൂർ: കർണാടക വനമേഖലയിലും മലയോരത്തെയും കനത്ത മഴയെ തുടർന്ന് പുഴകളിലും റിസർവോയറിലും വെള്ളം നിറഞ്ഞതിനെ തുടർന്ന് അടിയന്തര സാഹചര്യത്തിൽ മുന്നറിയിപ്പില്ലാതെ പഴശി അണക്കെട്ടിന്‍റെ ഷട്ടറുകൾ ഉയർത്തി. ഇന്നലെ വൈകുന്നേരമാണ് ഷട്ടറുകൾ ഉയർത്തിയത്. ഇതേതുടർന്ന് താഴ്ന്ന പ്രദേശങ്ങൾ വെള്ളത്തിനടിയിലായി. കൊട്ടാരം-പെരിയത്തിൽ റോഡിൽ വെള്ളം കയറി ഗതാഗതം തടസപ്പെട്ടു. നിരവധി കന്നുകാലികൾ ഒഴുക്കിൽപ്പെട്ടു. മുന്നറിയിപ്പില്ലാതെ ഷട്ടറുകൾ ഉയർത്തിയതിൽ പ്രതിഷേധിച്ച് നാട്ടുകാർ പഴശി ഇറിഗേഷൻ ഓഫീസ് ഉപരോധിച്ചു. നാട്ടുകാരും ഉദ്യോഗസ്ഥരും നടത്തിയ ചർച്ചയിൽ ജലനിരപ്പ് നിയന്ത്രിക്കാൻ മഴയുടെ ശക്തി കുറയുന്നതുവരെ ഷട്ടറുകൾ ഉയർത്തിയിടാൻ ധാരണയായി. മഴക്കാലം ആരംഭിച്ചതോടെ ഷട്ടറുകൾ ചെറിയ തോതിൽ ഉയർത്തിട്ടിരുന്നു. ഇതാണ് ഇന്നലെ കൂടുതലായി ഉയർത്തിയത്. വളപട്ടണം പുഴയോരത്തുള്ളവർജാഗ്രത പാലിക്കണം പഴശി അണക്കെട്ടിന്‍റെ ഷട്ടറുകൾ ഇനിയും ഏത് സമയത്തും ഉയർത്തേണ്ടി വരുമെന്നതിനാൽ വളപട്ടണം പുഴയോരത്തുള്ളവർ ജാഗ്രത പാലിക്കണമെന്ന് പഴശി ജലസേചന വകുപ്പ് എക്സിക്യൂട്ടീവ് എൻജിനിയർ അറിയിച്ചു.

ദേശീയ മെഡിക്കല്‍ കമ്മീഷന്‍ കാസര്‍ഗോട്ടേക്ക്; മെഡിക്കല്‍ കോളജിനുള്ള ഒരുക്കങ്ങള്‍ തകൃതി

കാസര്‍ഗോഡ്: കാസര്‍ഗോഡ് മെഡിക്കല്‍ കോളജിന് എംബിബിഎസ് കോഴ്‌സ് അനുവദിക്കുന്നതിനു മുന്നോടിയായി ദേശീയ മെഡിക്കല്‍ കമ്മീഷന്‍ പരിശോധന ഉടന്‍ നടക്കും. ബദിയഡുക്കയിലെ മെഡിക്കല്‍ കോളജ് കെട്ടിടനിര്‍മാണം പൂര്‍ത്തിയാകാത്ത സാഹചര്യത്തില്‍ കാസര്‍ഗോഡ് ജനറല്‍ ആശുപത്രിയെ മെഡിക്കൽ കോളജ് ആശുപത്രിയായി സര്‍ക്കാര്‍ നോട്ടിഫിക്കേഷന്‍ പുറപ്പെടുവിച്ചിരുന്നു. പരിയാരം മെഡിക്കല്‍ കോളജില്‍നിന്നു 40 ഓളം ഡോക്ടര്‍മാരെ ഇവിടേക്ക് സ്ഥലംമാറ്റിയിട്ടുണ്ട്. കഴിഞ്ഞദിവസം അധികൃതര്‍ ആശുപത്രിക്കു മുന്നില്‍ കാസര്‍ഗോഡ് മെഡിക്കല്‍ കോളജ് ആശുപത്രി എന്ന ബോര്‍ഡ് സ്ഥാപിച്ചു. എംബിബിഎസ് കോഴ്‌സ് അനുവദിക്കുന്നതിന് ദേശീയ മെഡിക്കല്‍ കമ്മീഷന് അപേക്ഷ നല്‍കുന്നത് അടക്കമുള്ള നടപടിക്രമങ്ങള്‍ ഡയറക്ടര്‍ ഓഫ് മെഡിക്കല്‍ എഡ്യുക്കേഷന്‍ നേരത്തെ പൂര്‍ത്തിയാക്കിയിരുന്നു. കേരള ആരോഗ്യസര്‍വകലാശാലയുടെ അംഗീകാരവും ലഭിച്ചു. ഇനി മെഡിക്കല്‍ കമ്മീഷന്‍റെ അംഗീകാരം കൂടി ലഭ്യമായാല്‍ ഈ അധ്യയനവര്‍ഷം തന്നെ എംബിബിഎസ് കോഴ്‌സ് ആരംഭിക്കാനും സാധ്യതയുണ്ട്. എംബിബിഎസ് കോഴ്‌സ് ആരംഭിക്കുന്നതിന് 220 കിടക്കകളുള്ള ആശുപത്രി, മൂന്നുവര്‍ഷത്തെ കിടത്തിചികിത്സാപ്രവര്‍ത്തനപരിചയം തുടങ്ങി ദേശീയ മെഡിക്കല്‍ കമ്മീഷന്‍റെ മാനദണ്ഡങ്ങള്‍ പാലിക്കേണ്ടതുണ്ട്. ജനറല്‍ ആശുപത്രി വര്‍ഷങ്ങളായി പ്രവര്‍ത്തിക്കുന്നതിനാല്‍ മൂന്നുവര്‍ഷത്തെ കിടത്തിചികിത്സ എന്ന മാനദണ്ഡം പാലിക്കപ്പെടും. 2013 നവംബര്‍ 30ന് അന്നത്തെ മുഖ്യമന്ത്രി ഉമ്മന്‍ചാണ്ടി തറക്കല്ലിട്ട മെഡിക്കല്‍ കോളജ് വെറും ഒപി ചികിത്സ മാത്രമുള്ള പിഎച്ച്‌സി നിലവാരത്തിലാണ് പ്രവര്‍ത്തിക്കുന്നത്. ബിഎസ്‌സി നഴ്‌സിംഗ് കോഴ്‌സ് ആരംഭിച്ചിട്ടുണ്ട്. ഉമ്മന്‍ചാണ്ടി സര്‍ക്കാരിന്‍റെ കാലത്ത് തറക്കല്ലിട്ടതില്‍ കാസര്‍ഗോഡും വയനാടും മാത്രമാണ് മെഡിക്കല്‍ കോളജ് യാഥാര്‍ഥ്യമാകാതിരിക്കുന്നത്. മെഡിക്കല്‍ കോളജ് യാഥാര്‍ഥ്യമാക്കാന്‍ ഇടതുസര്‍ക്കാരിന്‍റെ ഭാഗത്തുനിന്നും ആത്മാര്‍ഥമായ യാതൊരു ശ്രമവും നടത്തിയില്ലെന്ന് വ്യാപകമായ വിമര്‍ശനമുയര്‍ന്നിരുന്നു. തദ്ദേശ തെരഞ്ഞെടുപ്പും നിയമസഭാ തെരഞ്ഞെടുപ്പും ആസന്നമായിരിക്കെ തങ്ങളുടെ ഭരണനേട്ടമായി ഉയര്‍ത്തിക്കാണിക്കാനും ഇടതുസര്‍ക്കാരിന് മെഡിക്കല്‍ കോളജ് യാഥാര്‍ഥ്യമാക്കേണ്ടത് അത്യാവശ്യമാണ്.

മലപ്പട്ടത്ത് ഗാന്ധി പ്രതിമ അനാച്ഛാദനം ചെയ്തു

മലപ്പട്ടം (കണ്ണൂര്‍): സിപിഎമ്മുകാര്‍ ഇനിയെങ്കിലും സ്വാതന്ത്ര്യ സമരചരിത്രം പഠിക്കണമെന്നും അക്രമ മനോഭാവം തിരുത്തണമെന്നും കെപിസിസി പ്രസിഡന്‍റ് സണ്ണി ജോസഫ് എംഎല്‍എ. മലപ്പട്ടത്ത് ജില്ലാ കോണ്‍ഗ്രസ് കമ്മിറ്റി സംഘടിപ്പിച്ച ഗാന്ധി സ്മൃതിയാത്രയും ഗാന്ധി പ്രതിമ അനാച്ഛാദനവും ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. അഹിംസാ മാര്‍ഗത്തിലധിഷ്ഠിതമായ സ്വാതന്ത്ര്യ സമരപോരാട്ടത്തിന് നേതൃത്വം കൊടുത്ത ഗാന്ധിജിയെ വര്‍ഗീയ ശക്തികള്‍ വധിച്ചപ്പോള്‍ മറ്റൊരു കൂട്ടര്‍ ഗാന്ധിപ്രതിമകളുടെ തല വെട്ടിമാറ്റുകയാണ്. ക്വിറ്റിന്ത്യാ സമരത്തെ ഒറ്റിക്കൊടുത്ത ചരിത്രമുള്ള പാര്‍ട്ടിയുടെ ആളുകള്‍ സ്വാതന്ത്ര്യസമര ചരിത്രം മനസിലാക്കിയിട്ടുണ്ടാകില്ല. അക്രമങ്ങളോട് കോൺഗ്രസിന് താത്പര്യമില്ല. ഗാന്ധിജി ആഹ്വാനം ചെയ്തതുപോലെ അക്രമരഹിത, അഹിംസാ മാര്‍ഗത്തിലൂടെ കടന്നുപോകാനാണ് കോണ്‍ഗ്രസ് ശ്രമിക്കുന്നത്. ഇരുട്ടിന്‍റെ മറവില്‍ സാമൂഹ്യവിരുദ്ധര്‍ ഗാന്ധി സ്തൂപം തകര്‍ത്തപ്പോൾ മലപ്പട്ടത്തിനു കളങ്കമുണ്ടാക്കി. ഗാന്ധി പ്രതിമ സ്ഥാപിച്ചതിലൂടെ കളങ്കം മാറ്റിയെടുത്തതായും അദ്ദേഹം പറഞ്ഞു. ഡിസിസി പ്രസിഡന്‍റ് മാര്‍ട്ടിന്‍ ജോര്‍ജ് അധ്യക്ഷത വഹിച്ചു. സജീവ് ജോസഫ് എംഎല്‍എ, കെപിസിസി വര്‍ക്കിംഗ് പ്രസിഡന്‍റുമാരായ പി.സി. വിഷ്ണുനാഥ് എംഎല്‍എ, എ.പി.അനില്‍കുമാര്‍ എംഎല്‍എ, ജനറല്‍ സെക്രട്ടറിമാരായ സോണി സെബാസ്റ്റ്യന്‍, പി.എം. നിയാസ്, കെ. ജയന്ത്, എഐസിസി മെംബര്‍ വി.എ.നാരായണന്‍, പി.ടി. മാത്യു, സജീവ് മാറോളി, അബിൻ വർക്കി, ചന്ദ്രൻ തില്ലങ്കേരി, ടി.ഒ. മോഹനന്‍, റിജിൽ മാക്കുറ്റി, മുഹമ്മദ് ബ്ലാത്തൂർ, കെ.സി. ഗണേശൻ, കെ.വി. ഫിലോമിന, എം.പി. ഉണ്ണികൃഷ്ണന്‍, വിജില്‍ മോഹന്‍, രാജീവന്‍ എളയാവൂര്‍, വി.പി. അബ്ദുൾ റഷീദ്, കെ.പി. ശശിധരന്‍, എം.പി. രാധാകൃഷ്ണൻ, ശ്രീജ മഠത്തില്‍, മധുഎരമം, ജോസ് ജോർജ് പ്ലാന്തോട്ടം, എം.സി. അതുൽ എന്നിവര്‍ പ്രസംഗിച്ചു. ഗാന്ധി പ്രതിമ സ്ഥാപിക്കാന്‍ മലപ്പട്ടത്ത് സ്ഥലം നല്‍കിയ കോണ്‍ഗ്രസ് നേതാവ് കെ.സി. കൃഷ്ണന്‍ നമ്പ്യാരെ പൊന്നാട അണിയിച്ച് ആദരിച്ചു. പി.സി. വിഷ്ണുനാഥ് എംഎല്‍എ മുഖേനയാണ് മലപ്പട്ടത്ത് സ്ഥാപിക്കാന്‍ ഗാന്ധിപ്രതിമയെത്തിച്ചത്. ആലപ്പുഴയിലെ ബിജു ജോസഫ് നിര്‍മിച്ച ഗാന്ധി ശില്പത്തില്‍ സബര്‍മതിയിലെ മണ്ണ് നിക്ഷേപിച്ചിട്ടുണ്ട്. മലപ്പട്ടം ഹയർസെക്കൻഡറി സ്കൂൾ പരിസരത്തുനിന്ന് ആരംഭിച്ച ഗാന്ധിയാത്രയിൽ നേതാക്കളും പ്രവർത്തകരും പങ്കെടുത്തു. കണ്ണൂർ, കാസർഗോഡ്, വയനാട്, കോഴിക്കോട് ജില്ലകളിൽ നിന്നായി 400 ഓളം പോലീസുകാരെ വിന്യസിച്ചിരുന്നു. അടുവാപ്പുറത്തും ഗാന്ധി സ്തൂപം സ്ഥാപിച്ച മലപ്പട്ടം സെന്‍ററിലും നിലവിലുളള പോലീസ് കാവൽ തുടരും.

ബിഷപ് വള്ളോപ്പിള്ളി സ്മാരക കുടിയേറ്റ മ്യൂസിയം ഉദ്ഘാടനം: സംഘാടക സമിതി രൂപീകരിച്ചു

ചെമ്പന്തൊട്ടി: മലയോരത്തിന്‍റെ കുടിയേറ്റ ചരിത്രത്തെയും സാംസ്‌കാരിക പൈതൃകത്തെയും അനാവരണം ചെയ്യുന്ന ബിഷപ് വള്ളോപ്പിള്ളി സ്മാരക കുടിയേറ്റ മ്യൂസിയത്തിന്‍റെ ഉദ്ഘാടനത്തിനായുള്ള സംഘാടക സമിതി രൂപീകരണ യോഗം ചെമ്പന്തൊട്ടി സെന്‍റ് ജോർജ് പാരിഷ് ഹാളിൽ നടന്നു. ഓഗസ്റ്റ് ആദ്യവാരത്തിൽ മ്യൂസിയം നാടിന് സമർപ്പിക്കും. സജീവ് ജോസഫ് എംഎൽഎ, തലശേരി ആർച്ച്ബിഷപ് മാർ ജോസഫ് പാംപ്ലാനി, കണ്ണൂർ ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരി എന്നിവർ രക്ഷാധികാരികളായും ശ്രീകണ്ഠപുരം നഗരസഭാധ്യക്ഷ ഡോ. കെ.വി. ഫിലോമിന ചെയർമാനും എബി എൻ. ജോസഫ് ജനറൽ കൺവീനറായും 501 അംഗ സംഘാടക സമിതി രൂപീകരിച്ചു. യോഗത്തിൽ സജീവ് ജോസഫ് എംഎൽഎ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് കെ. കെ. രത്നകുമാരി, ഡോ. കെ.വി. ഫിലോമിന, മന്ത്രിയുടെ പ്രതിനിധി കെ.കെ. ദിവാകരൻ, ഫാ. ആന്‍റണി മഞ്ഞളാംകുന്നേൽ, ഫാ. തോമസ് തെങ്ങുംപള്ളിൽ, ബേബി ഓടമ്പള്ളി, പി.ടി. മാത്യു, എം.സി. രാഘവൻ, എ.ജെ. ജോസഫ്, ടി.സി. പ്രിയ, ജോഷി കണ്ടത്തിൽ, കെ.ജെ. ചാക്കോ, ബിനു ഇലവുങ്കൽ, വർഗീസ് വയലാമണ്ണിൽ, ഷംസീർ, ബന്നറ്റ്, റനീഷ്, ടി.കെ.വൽസൻ, ജിയോ ജേക്കബ്, ടി.കെ. പ്രകാശൻ, സദു തെക്കലം തുടങ്ങിയവർ പങ്കെടുത്തു.

മരം വീണ് ഓട്ടോ തകർന്നു

നടുവിൽ: മരം പൊട്ടി വീണ് വീട്ടുമുറ്റത്ത് നിർത്തിയിട്ട പുതിയ ഓട്ടോ പൂർണമായും തകർന്നു. നടുവിൽ പടിഞ്ഞാറ് പൂങ്ങോട്ടാണ് സംഭവം. സെബാസ്റ്റ്യൻ ജോസഫിന്‍റെ ഉടമസ്ഥതയിലുള്ള ഓട്ടോ റിക്ഷയാണ് തകർന്നത്. ഉച്ച ഭക്ഷണം കഴിക്കാനായി വീട്ടിലേക്ക് വന്ന സെബാസ്റ്റ്യൻ ജോസഫ് അയൽ വീടിനു മുന്നിൽ നിർത്തിയിട്ടതായിരുന്നു. അഞ്ചു മാസം മുന്പായിരുന്നു ഓട്ടോ വാങ്ങിയത്. ശക്തമായ കാറ്റിൽ വീടിനു മുന്നിലുണ്ടായിരുന്ന കൂറ്റൻ മരുതും കാട്ടുകടുക്കയും ഒടിഞ്ഞു വീഴുകയായിരുന്നു.

ഡോ. ടി. രാധാകൃഷ്ണനെ അനുസ്മരിച്ചു

ചപ്പാരപ്പടവ്: കൂവേരിയിലെ സാമൂഹിക സാംസ്കാരിക രാഷ്‌ട്രീയ രംഗത്ത് നിറഞ്ഞു നിന്ന വ്യക്തിയും കൂവേരി ജവഹർ സ്മാരക ഗ്രന്ഥാലയത്തിന്‍റെ പ്രസിഡന്‍റുമായിരുന്ന ഡോ. ടി. രാധാകൃഷ്ണനെ കൂവേരി ജവഹർ സ്മാരക ഗ്രന്ഥശാലയിൽ അനുസ്മരിച്ചു. കണ്ണൂർ ജില്ലാ ലൈബ്രറി കൗൺസിൽ അംഗം വി.വി. റീത്ത ഉദ്ഘാടനം ചെയ്തു. ഗ്രന്ഥശാല പ്രസിഡന്‍റ് എം. ലക്ഷ്മണൻ അധ്യക്ഷത വഹിച്ചു. പി.പി. ഭാർഗവൻ അനുസ്മരണ പ്രഭാഷണം നടത്തി. ഹരിദാസ് കൊട്ടക്കാനം, സി.വി.കെ. പണിക്കർ, കെ.വി. രാജീവൻ, കെ.എം. കൃഷ്ണൻ, കെ. വി. സുരേഷ് ബാബു എന്നിവർ പ്രസംഗിച്ചു.

'വിജ്ഞാൻ രഥ് ' ശാസ്ത്ര പരീക്ഷണ ബോധവത്കരണത്തിന് തുടക്കം

ചെമ്പേരി: സ്കൂൾ വിദ്യാർഥികളിൽ ശാസ്ത്ര അഭിരുചി വളർത്താനായി ചെമ്പേരി റോട്ടറി ക്ലബിന്‍റെ ആഭിമുഖ്യത്തിൽ സംഘടിപ്പിക്കുന്ന വിജ്ഞാൻ രഥ് (സയൻസ് ഓൺ വീൽസ്) ശാസ്ത്ര പരീക്ഷണ ബോധവത്കരണ പരിപാടിക്ക് ചെമ്പേരി നിർമല ഹയർ സെക്കൻഡറി സ്കൂളിൽ തുടക്കമായി. തമിഴ് നാട്ടിലും കർണാടകയിലുമായി ഇതുവരെ ഒരു ലക്ഷത്തിലേറെ വിദ്യാർഥികളിൽ അറിവ് പകർന്ന ശാസ്ത്ര സത്യങ്ങൾ വിശദമാക്കുന്ന പരീക്ഷണ പ്രദർശന ബോധവത്കരണ പരിപാടിയാണിത്. ചെമ്പേരി നിർമല ഹയർ സെക്കൻഡറി സ്കൂൾ ഓഡിറ്റോറിയത്തിൽ സ്കൂൾ മാനേജരും ചെമ്പേരി ലൂർദ് മാതാ ബസിലിക്ക റെക്ടറുമായ റവ.ഡോ.ജോർജ് കാഞ്ഞിരക്കാട്ട് ഉദ്ഘാടനം ചെയ്തു. ചെമ്പേരി റോട്ടറി ക്ലബ് പ്രസിഡന്‍റ് മാർട്ടിൻ കോട്ടയിൽ അധ്യക്ഷത വഹിച്ചു. ഏരുവേശി പഞ്ചായത്ത് പ്രസിഡന്‍റ് മിനി ഷൈബി മുഖ്യ പ്രഭാഷണം നടത്തി. സ്കൂൾ പ്രിൻസിപ്പൽ സി.ഡി.സജീവ്, പിടിഎ പ്രസിഡന്‍റ് മാത്തുക്കുട്ടി അലക്സ്, പ്രഫ.വാസുദേവൻ നായർ എന്നിവർ പ്രസംഗിച്ചു. സയൻസ് ഓൺ വീൽസ് പ്രോഗ്രാം കോ-ഓർഡിനേറ്റർ അറിവരശൻ ക്ലാസുകൾ നയിച്ചു. റോട്ടറി ക്ലബ് പ്രോഗ്രാം ഡയറക്ടർ സുനിൽ കെ.പീറ്റർ, ജിജി ഏബ്രഹാം, സണ്ണി മംഗലത്ത്കരോട്ട്, നവീൻകുമാർ, സതീഷ് കുമാർ, ബിനു എക്സ്പ്രസ്, സിബി പുന്നക്കുകുഴി എന്നിവർ നേതൃത്വം നൽകി. ചെമ്പേരി മേഖലയലെ മുഴുവൻ സ്കൂൾ വിദ്യാർഥികൾക്കും സയൻസ് ഓൺ വീൽസ് പ്രോഗ്രാം ലഭ്യമാക്കുമെന്ന് റോട്ടറി ക്ലബ് ഭാരവാഹികൾ അറിയിച്ചു.

പയ്യാവൂർ വണ്ണായിക്കടവിൽ ചുഴലിക്കാറ്റ്: ലക്ഷങ്ങളുടെ നാശനഷ്ടം

പയ്യാവൂർ: വണ്ണായിക്കടവിലും പരിസര പ്രദേശങ്ങളിലും ഇന്നലെ ഉച്ചയോടെ ആഞ്ഞടിച്ച ചുഴലിക്കാറ്റിൽ ലക്ഷങ്ങളുടെ നാശനഷ്ടം. മരങ്ങൾ വീണ് തെക്കേപ്പുതുപ്പറമ്പിൽ ടി.ടി.സെബാസ്റ്റ്യൻ , കുഴിക്കാട്ട് ദേവസ്യ, വടശേരി ബിനു എന്നിവരുടെ വീടുകൾ ഭാഗികമായി തകർന്നു. പൈമ്പള്ളിൽ റോയ്, കുറുവത്താഴെ തോമസ്, തെക്കേടത്ത് സാന്‍റി, തെക്കേടത്ത് ബിനോയി, പനച്ചേപ്പള്ളിൽ പാപ്പച്ചൻ, പൈങ്ങനാമഠത്തിൽ ബാബു, മാണിവേലിൽ ജോയി, പൈസക്കരിയിലെ കുടകപ്പള്ളിൽ ഫ്രാൻസീസ്, കഴിപ്പള്ളിൽ ജോർജ് എന്നിവരുടെ റബർ, തെങ്ങ് , കമുക്, തേക്ക്, മാവ്, പ്ലാവ് , കപ്പ എന്നിവ ചുഴലിക്കാറ്റിൽ നശിച്ചു. വൈദ്യുത ലൈനിൽ മരംവീണും തെങ്ങ് കടപുഴകിയും ഏറെ നേരം റോഡ് ഗതാഗതവും വൈദ്യുതിയും തടസപ്പെട്ടു. പൈസക്കരി ഫൊറാന വികാരി ഫാ.നോബിൾ ഓണംകുളം, പഞ്ചായത്തംഗങ്ങളായ ടെൻസൺ കണ്ടത്തിൻകര, ടി.പി.അഷ്റഫ്, പയ്യാവൂർ വില്ലേജ് ഓഫിസർ, പയ്യാവൂർ പോലീസ്, റവന്യൂ, കെഎസ്ഇബി അധികൃതർ, കത്തോലിക്ക കോൺഗ്രസ് ഫൊറോന നേതാക്കൾ എന്നിവർ സ്ഥലം സന്ദർശിച്ചു. വിവിധ വകുപ്പുകളിലെ ഉദ്യോഗസ്ഥരുടെയും ജീവനക്കാരുടെയും നാട്ടുകാരുടെയും കഠിന പരിശ്രമത്തിലൂടെയാണ് വീടുകൾക്ക് മേൽ വീണ മരങ്ങൾ മുറിച്ചു മാറ്റുകയും ഗതാഗതടസവും വൈദ്യുത ബന്ധം പുനസ്ഥാപിക്കുകയും ചെയ്തത്.

സമ്പൂർണ പുകയില വിമുക്ത വിദ്യാലയ പ്രഖ്യാപനം നടത്തി

ചെറുപുഴ: ചെറുപുഴ ജെഎം യുപി സ്കൂൾ പ്ലാറ്റിനം ജൂബിലി ആഘോഷത്തിന്‍റെ ഭാഗമായി ലഹരി വിരുദ്ധ ബോധവത്കരണ ക്ലാസ് നടത്തി. സ്കൂൾ മുഖ്യാധ്യാപകൻ പി.എൻ. ഉണ്ണികൃഷ്ണൻ പുകയില വിമുക്ത വിദ്യാലയ പ്രഖ്യാപനം നടത്തി. പ്രശസ്ത സൈബർ പ്രഭാഷകനും പോലീസ് ഓഫീസറുമായ രംഗീഷ് കടവത്ത് ക്ലാസ് നയിച്ചു. ചെറുപുഴ പഞ്ചായത്ത് പ്രസിഡന്‍റ് കെ.എഫ്. അലക്സാണ്ടർ പുകയില വിരുദ്ധ പ്രതിജ്ഞ ചൊല്ലിക്കൊടുത്തു. ആരോഗ്യ വിദ്യാഭ്യാസ സ്ഥിരം സമിതി അധ്യക്ഷൻ എം. ബാലകൃഷ്ണൻ, പുളിങ്ങോം കുടുംബാരോഗ്യ കേന്ദ്രം ഹെൽത്ത് ഇൻസ്പെക്‌‌ടർ വി. മുഹമ്മദ് ഷെരീഫ്, കെ.എസ്. ബിന്ദു, റോബിൻ വർഗീസ് എന്നിവർ പ്രസംഗിച്ചു. കുട്ടികൾ പുകയില വിരുദ്ധ ബോധവത്കരണ മൈം അവതരിപ്പിച്ചു.

അനുമോദനവും ലഹരി വിരുദ്ധ ബോധവത്കരണ ക്ലാസും നടത്തി

ചെറുപുഴ: ചുണ്ട ചൈതന്യ റസിഡന്‍റ്സ് അസോസിയേഷന്‍റെ നേതൃത്വത്തിൽ എസ്എസ്എൽസി, പ്ലസ് ടു, എൽഎസ്എസ്, യുഎസ്എസ് പരീക്ഷകളിൽ ഉന്നത വിജയം നേടിയ വിദ്യാർഥികളെ അനുമോദിച്ചു. ലഹരി വിരുദ്ധ ബോധവത്കരണ ക്ലാസും നടത്തി. ഗ്രേസി ജോൺ മുക്കുടിക്കാട്ടിൽ ഉദ്ഘാടനം ചെയ്തു. ചൈതന്യ റസിഡന്‍റ്സ് അസോസിയേഷൻ പ്രസിഡന്‍റ് രാജു ചുണ്ട അധ്യക്ഷത വഹിച്ചു. ചെറുപുഴ പോലീസ് സ്റ്റേഷൻ സിവിൽ പോലീസ് ഓഫീസർ കെ.സി. രതീഷ് ലഹരി വിരുദ്ധ ബോധവത്കരണ ക്ലാസിനു നേതൃത്വം നൽകി വിദ്യാർഥികൾക്ക് ഉപഹാരങ്ങളും നൽകി. ബിജു ഇരണക്കൽ, കുടിയിൽ കൃഷ്ണൻ നമ്പ്യാർ, അഗസ്റ്റ്യൻ ജോസഫ്, അഭിൻ ബാലകൃഷ്ണൻ, മിനി ജോസഫ് എന്നിവർ പ്രസംഗിച്ചു.

കൊട്ടിയൂരിൽ ആലിംഗന പുഷ്പാഞ്ജലി

കൊട്ടിയൂർ: ഓംകാര വിളികളുടെ അകമ്പടിയോടെ തുളസിക്കതിർമൂടിയ സ്വയംഭൂ ശിവലിംഗത്തെ ആലിംഗനം ചെയ്ത് കൊട്ടിയൂർ പെരുമാളിന് പൂജ. കുറുമാത്തൂർ ഇല്ലത്തെ നായ്ക്കൻ സ്ഥാനികൻ കൃഷ്ണൻ നമ്പൂതിരിപ്പാടാണ് ആലിംഗന പുഷ്പാഞ്ജലി നടത്തിയത്. സ്ഥാനികൻ തറയിൽ കയറിയതോടെ വാദ്യങ്ങളും ഹരി ഓം വിളികളും അക്കരെ സന്നിധാനത്ത് മുഴങ്ങി. തുളസിക്കതിരുകൊണ്ട് പൂജ ചെയ്തശേഷം നമ്പൂതിരിപ്പാട് സ്വയംഭൂവിഗ്രഹത്തെ ആലിംഗനം ചെയ്തു. ഇന്നലെ ഉച്ചയ്ക്ക് പൊന്നിൻ ശീവേലിയും നടന്നു. തിരുവാതിര ചതുശ്ശതവും തൃക്കൂർ അരിയളവും 26ന് നടക്കും. 30ന് മകം നാളിൽ കലംവരവ് നടക്കും. അന്നേ ദിവസം ഉച്ച ശീവേലി കഴിഞ്ഞാൽ സ്ത്രീകൾക്ക് അക്കരെ കൊട്ടിയൂരിൽ പ്രവേശനമുണ്ടാകില്ല.

വായന വാരാചരണം സംഘടിപ്പിച്ചു

ഇരിട്ടി: പേരട്ട സെന്‍റ് ആന്‍റണീസ് യുപി സ്കൂളിൽ വിവിധ പരിപാടികളോടെ വായന വാരാചരണം സംഘടിപ്പിച്ചു. വായന ക്വിസ്, പുസ്തക പരിചയം, കാവ്യ മുഖം, വായനാവീട്, പുസ്തകച്ചങ്ങല, അക്ഷരക്കൂട് എന്നിങ്ങനെ വിവിധ പരിപാടികളാണു സംഘടിപ്പിക്കുന്നത്. കാവ്യമുഖം പരിപാടിയുടെ ഭാഗമായി ചിത്ര പ്രദർശനവും സ്കൂൾ സംഘടിപ്പിച്ചു. സ്കൂൾ മാനേജർ ഫാ. മാത്യു ശാസ്താംപടവിൽ വായന വാരാചരണം ഉദ്ഘാടനം ചെയ്തു. പിടിഎ പ്രസിഡന്‍റ് സന്തോഷ് വെട്ടിക്കാട്ടിൽ അധ്യക്ഷത വഹിച്ചു. സ്കൂൾ മുഖ്യാധ്യാപിക ജെസി ആന്‍റണി, ജിജോ ജോസഫ്, ദീപ കെ. ജോസ്, ജീന തോമസ്, പി.കെ. ലിജോമോൻ, മദർ പിടിഎ പ്രസിഡന്‍റ് ജൂലിയറ്റ് സുനിൽ എന്നിവർ പ്രസംഗിച്ചു.

"അന്നം അഭിമാനം’പദ്ധതി മൂന്നാം വർഷത്തിലേക്ക്

ഇരിട്ടി: ഇരിട്ടി പോലീസും ജെസിഐ ഇരിട്ടിയും ഇരിട്ടി പൗരാവലിയുടെ സഹകരണത്തോടെ നടപ്പാക്കി വരുന്ന അന്നം അഭിമാനം - വിശപ്പു രഹിത ഇരിട്ടി പദ്ധതി മൂന്നാം വർഷത്തിലേക്ക്. ഇരിട്ടി സ്റ്റേഷന് സമീപം കാടുപിടിച്ചുകിടന്ന സ്ഥലത്ത് അന്നത്തെ ഡിവൈഎസ്പി സജേഷ് വാഴാളപ്പിലിന്‍റെ നേതൃത്വത്തിൽ കെട്ടിടം ഉൾപ്പെടെ നിർമിച്ചായിരുന്നു പദ്ധതിയുടെ തുടക്കം . 2023 ജൂൺ 26 ന് ഇരിട്ടി പോലീസ് സ്റ്റേഷന് സമീപത്തായി പ്രവർത്തനം ആരംഭിച്ച അന്നം അഭിമാനം വിശപ്പുരഹിത ഇരിട്ടി ഇതുവരെ 20000 പേർക്ക് ഉച്ചഭക്ഷണം നൽകി. ഒരു ദിവസം 15 ൽ അധികം പേർക്കുള്ള ഭക്ഷണമാണ് ഇപ്പോൾ നൽകിവരുന്നത് . ഒരു മാസത്തെ ഭക്ഷണം സ്പോൺസർ ചെയ്തു അന്നം അഭിമാനം പദ്ധതി പ്രകാരം കെപിസിസി പ്രസിഡന്‍റ് അഡ്വ: സണ്ണി ജോസഫ് എംഎൽഎക്ക് ലാൽ ലക്ഷ്മി ലോട്ടറി ഏജൻസി ഉടമ കെ.എം. മണികണ്ഠൻ ഒരു മാസത്തെ ഭക്ഷണത്തിന്‍റെ തുക കൈമാറി. ഇരിട്ടി പോലീസ് എസ്എച്ഒഎ. കുട്ടികൃഷ്ണൻ, ഒ. വിജേഷ് എന്നിവർ പ്രസംഗിച്ചു. സബ് ഇൻസ്‌പെക്ടർ കെ. ഷറഫുദീൻ, ബെന്നി തോമസ്, ഇബ്രാഹിം മുണ്ടേരി, പി.കെ. മുസ്തഫ, ഡോ. ജി. ശിവരാമകൃഷ്ണൻ, കെ. സുരേഷ് ബാബു, പി. അശോകൻ, സിനോജ് മാക്സ്, ഷാജി ജോസ്, പി.കെ. ജോസ്, നിജിത്ത് നെട്ടൂരാൻ എന്നിവർ പങ്കെടുത്തു.

പയ്യന്നൂര്‍ കൊറ്റിയില്‍ വീടുകളിൽ മോഷണം; മൊബൈലുകളും തേങ്ങകളും മോഷ്‌ടിച്ചു

പയ്യന്നൂര്‍: കൊറ്റിയിലെ അടുത്തടുത്ത വീടുകളില്‍ മോഷണം. രണ്ട് മൊബൈല്‍ ഫോണുകളും തേങ്ങകളും മോഷ്‌ടിച്ചു. കഴിഞ്ഞ ദിവസം പുലര്‍ച്ചെ മൂന്നോടെയാണ് പയ്യന്നൂര്‍ കൊറ്റി വാടിപ്പുറത്തെ എം. ചന്ദ്രന്‍റെ വീട്ടില്‍ കള്ളന്‍ കയറിയത്. അകത്തുനിന്ന് കുറ്റിയിടാതെ ചാരിയിട്ടിരുന്ന വാതില്‍ തള്ളിത്തുറന്ന് അകത്തു കയറിയ മോഷ്‌ടാവ് രണ്ട് മൊബൈല്‍ ഫോണുകളുമായി കടന്നുകളയുകയായിരുന്നു. മോഷ്‌ടാവിന്‍റേതെന്നു കരുതുന്ന ഒരു സൈക്കിള്‍ വീടിനടുത്ത റോഡില്‍ ഉപേക്ഷിച്ച നിലയില്‍ രാവിലെ കണ്ടെത്തിയിരുന്നു. മൊബൈല്‍ ഫോണ്‍ കവര്‍ച്ച ചെയ്ത സംഭവത്തില്‍ പോലീസ് അന്വേഷണം ആരംഭിച്ചിട്ടുണ്ട്. സമീപത്തെ പി. അമ്പുവിന്‍റെ വീട്ടുമുറ്റത്ത് മോഷ്‌ടാവെന്നു സംശയിക്കുന്ന ആള്‍ നടക്കുന്നതിന്‍റെയും വീട്ടുവരാന്തയില്‍ വച്ചിരുന്ന കുട എടുക്കുന്നതിന്‍റെയും ദൃശ്യം നിരീക്ഷണ കാമറയില്‍ പതിഞ്ഞിട്ടുണ്ട്. ഈ മോഷണം നടന്നതിന്‍റെ ഒരുദിവസം മുന്പാണ് ഇതിനടുത്ത സി.സി. രാമകൃഷ്ണന്‍റെ വീട്ടുപരിസരത്ത് കൂട്ടിയിട്ട നൂറ്റിയറുപതോളം തേങ്ങകള്‍ മോഷണം പോയത്. ഇവിടെ നിന്നുതന്നെ തേങ്ങ പൊതിച്ച് മോഷ്‌ടാവ് കടന്നുകളയുകയായിരുന്നു.

ന്യൂ മാഹി ഇരട്ടക്കൊലപാതകം: വിചാരണ പൂർത്തിയായി

തലശേരി: ബിജെപി-ആർഎസ്എസ് പ്രവർത്തകരായ ഈസ്റ്റ് പള്ളൂരിലെ മടോൻ പുറൽകണ്ടി വിജിത്ത് (25), കുറുന്തോടത്ത് ഷിനോജ് (32) എന്നിവരെ ബോംബെറിഞ്ഞും വെട്ടിയും കൊലപ്പെടുത്തിയ കേസിന്‍റെ വിചാരണ അഡീഷണൽ സെഷൻസ് ഫ്രാസ്റ്റ് ട്രാക്ക് (മൂന്ന്) ജഡ്ജ് റൂബി കെ. ജോസ് മുമ്പാകെ പൂർത്തിയായി. വിചാരണയുടെ അടിസ്ഥാനത്തിൽ പ്രതികളെ ഇന്നലെ കോടതി ചോദ്യം ചെയ്തു. തുടർന്ന് കേസ് 30 ലേക്ക് മാറ്റി. കേസിൽ 44 സാക്ഷികളെയാണ് വിസ്തരിച്ചത്. 140 രേഖകൾ മാർക്ക് ചെയ്തു. 63 തൊണ്ടി മുതലുകൾ ഹാജരാക്കി. വിചാരണ വേളയിൽ പ്രതികളെയും കൊലയ്ക്കുപയോഗിച്ച ആയുധങ്ങളും ഷിനോജ് സഞ്ചരിച്ച ബൈക്കും കൊല്ലപ്പെട്ടവരുടെ ചോര പുരണ്ട വസ്ത്രങ്ങളും സാക്ഷികൾ കോടതിയിൽ തിരിച്ചറിഞ്ഞിരുന്നു. ടി.പി. ചന്ദ്രശേഖരൻ കേസിലെ പ്രതികളായ കൊടി സുനിയും ഷാഫിയും ഉൾപ്പെടെയുള്ള മുഴുവൻ പ്രതികളും വിചാരണ വേളയിൽ കോടതിയിൽ ഹാജരായിരുന്നു. 2010 മേയ് 28ന് രാവിലെ പതിനൊന്നിനാണ് കേസിനാസ്പദമായ സംഭവം. മാഹി കോടതിയിൽ നിന്നും കേസ് കഴിഞ്ഞ് വരികയായിരുന്ന വിജിത്തിനെയും ഷിനോജിനെയും ന്യൂമാഹി പരിങ്ങാടിയിൽ വച്ച് അക്രമിസംഘം ബോംബെറിഞ്ഞ് വീഴ്ത്തി വെട്ടിക്കൊലപ്പെടുത്തിയെന്നാണ് പ്രോസിക്യൂഷൻ കേസ്. 16 പ്രതികളാണ് കേസിലുള്ളത്. രണ്ട് പ്രതികൾ മരണപ്പെട്ടു. കേസിൽ സ്പെഷൽ പ്രോസിക്യൂട്ടറായി പി. പ്രേമരാജനും പ്രതികൾക്കായി സി.കെ. ശ്രീധരനുമാണ് ഹാജരാകുന്നത്.

വിടവാങ്ങിയത് നിസ്വാർത്ഥനായ പൊതുപ്രവർത്തകൻ

കൊട്ടിയൂർ: ഒരു പൊതുപ്രവർത്തകൻ എങ്ങനെയായിരിക്കണം എന്നതിന് പുതിയ തലമുറയ്ക്ക് മാതൃകയാക്കാവുന്ന വ്യക്തിത്വമായിരുന്നു നാട്ടുകാർ കുഞ്ഞേട്ടൻ എന്ന് വിളിക്കുന്ന തുരുത്തിയിൽ ടി എസ്. സ്കറിയ. ഒരു പൊതുകാര്യത്തിനിറങ്ങിയാൽ ലക്ഷ്യപ്രാപ്തിയിൽ കുറഞ്ഞൊന്നു കൊണ്ടും തൃപ്തിപ്പെടാത്ത വ്യക്തിത്വത്തിനുടമയായിരുന്നു. കണ്ണൂർ-വയനാട് ജില്ലകളെ ബന്ധിപ്പിക്കുന്ന ചുരംരഹിത 44ാംമൈൽ പാത കണ്ടുപിടിച്ചതും പ്രാഥമികമായി നിർമിച്ചതും ഇതിലൂടെ ഗതാഗതം യോഗ്യമാക്കിയതും കുഞ്ഞേട്ടനായിരുന്നു. പിന്നീട് അത് മുടങ്ങിപ്പോയപ്പോൾ ആ റോഡ് യാഥാർഥ്യമാക്കാനുള്ള പ്രവർത്തനത്തിൽ അവസാനകാലം വരെയും പ്രവർത്തിച്ചു വരികയായിരുന്നു. ദീർഘകാലം കൊട്ടിയൂർ പഞ്ചായത്തംഗം, കൊട്ടിയൂർ സർവീസ് സഹകരണ ബാങ്ക് പ്രസിഡന്‍റ് എന്ന നിലകളിലും പ്രവർത്തിച്ചിട്ടുണ്ട്. അമ്പായത്തോട് സ്കൂളിന്‍റെ ആദ്യകാല മാനേജരായും പ്രവർത്തിച്ചു. പിന്നീട് സ്കൂൾ യാതൊരു പ്രതിഫലവും വാങ്ങാതെ മാനന്തവാടി കോർപറേറ്റ് ഏജൻസിക്ക് കൈമാറുകയായിരുന്നു. കൊട്ടിയൂർ നെഹ്റു ഗ്രന്ഥാലയത്തിന് കെട്ടിടം നിർമിക്കാനായി സ്ഥലംവിട്ടു നൽകിയതും ഇദ്ദേഹമായിരുന്നു. ആറളം പുനരധിവാസ മേഖലയിൽ ഭൂമി ലഭിച്ചവർക്ക് ആദ്യഘട്ട ഭവന നിർമാണം നടത്തി നൽകുകയും ചെയ്തു. ഇദ്ദേഹം നിർമിച്ച വീടുകൾ മാത്രമാണ് ഇന്നും നിലനിൽക്കുന്നത്. നിരവധി വീടുകൾ സൗജന്യമായും നിർമിച്ചു നൽകിയിട്ടുണ്ട്. പ്രതിഫലം പറ്റാതെ വീട് നിർമാണത്തിന്‍റെ ചുമതല ഏറ്റെടുത്ത കരാറുകാരനായും പ്രവർത്തിച്ചിട്ടുണ്ട്. വ്യാപാര മേഖലയിലും അദ്ദേഹം സജീവമായിരുന്നു. 50 വർഷങ്ങൾക്ക് മുമ്പ് ആരംഭിച്ച തുരുത്തിയിൽ ഫർണിച്ചർ ഇന്ന് മലയോര മേഖലയിലെ മികച്ച സ്ഥാപനമാണ്.

വന്യജീവി ആക്രമണം; 28 ജനജാഗ്രത സമിതികൾ പുനഃസംഘടിപ്പിച്ചു

കണ്ണൂർ: വന്യജീവി ആക്രമണവുമായി ബന്ധപ്പെട്ട വിവരങ്ങൾ എല്ലാ വകുപ്പുകൾക്കും കൈമാറു ന്നതിനും പ്രതിരോധ പ്രവർത്തനങ്ങൾ ഏകോപിപ്പിക്കുന്നതിനായി വനംവകുപ്പിന്‍റെ അടിയന്തര സേവന വിഭാഗവും ജില്ലാ എമർജൻസി ഓപറേഷൻ സെന്‍ററും യോജിച്ച് പ്രവർത്തിക്കും. ജില്ലാ കളക്ടർ അരുൺ കെ. വിജയന്‍റെ അധ്യക്ഷതയിൽ ചേർന്ന ജില്ലാ മനുഷ്യ വന്യജീവി സംഘർഷ ലഘൂകരണ സമിതി അവലോകന യോഗത്തിന്‍റേതാണ് തീരുമാനം. വന്യജീവികളുടെ സാന്നിധ്യം ശ്രദ്ധയിൽപ്പെട്ടാൽ പ്രാഥമിക പ്രവർത്തനങ്ങൾക്കായി ജില്ലയിൽ 28 ജനജാഗ്രതാ സമിതികൾ പുനഃസംഘടിപ്പിച്ചതായും കൊട്ടിയൂർ, കേളകം, അയ്യങ്കുന്ന്, പയ്യാവൂർ, ആറളം എന്നിവിടങ്ങളിൽ പ്രാഥമിക പ്രതികരണ സേന രൂപീകരിച്ചതായും വിഷയം അവതരിപ്പിച്ച ഡിഎഫ്ഒ എസ്. വൈശാഖ് അറിയിച്ചു.പ്രാഥമിക പ്രതികരണ സേനയിലെ അംഗങ്ങൾക്ക് വനം വകുപ്പ് പരിശീലനം നല്കും. കൂടാതെ വന്യമൃഗ സാന്നിധ്യം തിരിച്ചറിയുന്നതിനുള്ള അടയാളങ്ങളെക്കുറിച്ചും ക്ലാസുകൾ നൽകും. ജനജാഗ്രത സമിതികൾ എല്ലാ മൂന്നുമാസം കൂടുമ്പോഴും യോഗം ചേർന്ന് പ്രവർത്തനങ്ങൾ വിലയിരുത്തണം. കണ്ണൂർ നഗരത്തിൽ പാമ്പുകടിയേറ്റുള്ള മരണങ്ങൾ വർധിക്കുന്നത് സംബന്ധിച്ച് പഠനം നടത്താൻ യോഗത്തിൽ നിർദേശമുയർന്നു. പാമ്പിൻ വിഷത്തിനുള്ള പ്രതിരോധമരുന്ന് ലഭ്യമായ ആശുപത്രി കൾ ഏറ്റവും കൂടുതലുള്ള കണ്ണൂർ നഗരത്തിൽ മറ്റു പ്രദേശങ്ങളെ അപേക്ഷിച്ച് മരണ നിരക്ക് കൂടുതലാണ്. ഇതിന്‍റെ കാരണം കണ്ടെത്തുന്നതിന് കോളജുകളിലെ ഗവേഷണ വിഭാഗവുമായി ബന്ധപ്പെട്ട് പഠനം നടത്തുന്നതിന് സാധ്യതകൾ പരിശോധിക്കാനാണ് നിർദേശം. പാമ്പുകളെ പിടിക്കുന്നതിനായി 84 സന്നദ്ധപ്രവർത്തകർക്ക് വനംവകുപ്പ് പരിശീലനം നല്കിയതായി ഡിഎഫ്ഒ അറിയിച്ചു. തൊഴിലുറപ്പ് തൊഴിലാളികൾ പാമ്പുകടിയേൽക്കാതിരിക്കാനായി ബൂട്ട്, കൈയുറകൾ എന്നിവ ഉപയോഗിക്കുന്നുവെന്ന് തദ്ദേശസ്ഥാപനങ്ങളിലെ ബന്ധപ്പെട്ട വിഭാഗങ്ങൾ ഉറപ്പുവരുത്തണം. ഹെൽത്ത് ഇൻസ്‌പെക്ടർമാരുടെ നേതൃത്വത്തിൽ ഇതിനായി തൊഴിലാളികൾക്ക് ബോധവത്കരണ ക്ലാസുകൾ സംഘടിപ്പിക്കണമെന്നും നിർദേശം ഉയർന്നു. മനുഷ്യജീവന് ഭീഷണിയാകുന്ന കാട്ടുപന്നികളെ വെടിവച്ചു കൊല്ലുന്നതിന് തദ്ദേശ സ്ഥാപനങ്ങൾ അടിയന്തര നടപടിയെടുക്കാൻ യോഗത്തിൽ കളക്ടർ നിർദേശിച്ചു. ഇതിനായി ലൈസൻസുള്ള തോക്ക് കൈവശമുള്ളവരുടെ ലിസ്റ്റ് തയാറാക്കി വനം വകുപ്പിൽ അറിയിക്കണം. ഇതു സംബന്ധിച്ച് രജിസ്റ്റർ എല്ലാ തദ്ദേശ സ്ഥാപനങ്ങൾ സൂക്ഷിക്കുകയും കണക്കുകൾ വനം വകുപ്പിനെ അറിയിക്കുകയും ചെയ്യണമെന്നും നിർദേശിച്ചു. വനത്തോട് ചേർന്നുള്ള മേഖലകളിൽ കൃഷിരീതികൾ മാറ്റം വരുത്തുന്നതിനായി കർഷകർക്ക് കൃഷി വിജ്ഞാൻ കേന്ദ്രയുടെ സഹായത്തോടെ ക്ലാസുകൾ ജൂലൈ ആദ്യവാരം നടത്തുന്നതിന് കൃഷിവകു പ്പിന് നിർദേശം നൽകി. കാടുമൂടികിടക്കുന്ന സ്വകാര്യവ്യക്തികളുടെ ഭൂമിയിലെ കാടുതെളിക്കുന്നതിന് തദ്ദേശസ്ഥാപനങ്ങൾ നടപടിയെടുക്കണ മെന്നും ഡിഎഫ്ഒ നിർദേശിച്ചു. ജില്ലാ കളക്ടര്‍ അരുണ്‍ കെ വിജയന്‍, ഡിഎഫ്ഒ എസ്. വൈശാഖ്, അഗ്രിക്കള്‍ച്ചര്‍ ഡെപ്യൂട്ടി ഡയക്ടര്‍ വിഷ്ണു എസ് നായര്‍, ആറളം വന്യജീവി സങ്കേതം വൈല്‍ഡ് ലൈഫ് വാര്‍ഡന്‍ വി. രതീശന്‍, ഡെപ്യൂട്ടി ഡിഎംഒ ഡോ. കെ.സി. സച്ചിൻ വിവിധ വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

വാർഡ് സംഗമം സംഘടിപ്പിച്ചു

ഇരിട്ടി: കോൺഗ്രസ് കരിക്കോട്ടക്കരി മണ്ഡലം എടപ്പുഴ വാർഡ് കുടുംബ സംഗമം വാളത്തോട്ടിൽ നടന്നു. കെപിസിസി മെംബർ ചന്ദ്രൻ തില്ലങ്കേരി ഉദ്ഘാടനം ചെയ്തു. വാർഡ് പ്രസിഡന്‍റ് ഫ്രാൻസിസ് തകിടിയേൽ അധ്യക്ഷത വഹിച്ചു. കോൺഗ്രസ് ബ്ലോക്ക് പ്രസിഡന്‍റ് പി.എ. നസീർ മുഖ്യാതിഥിയായിരുന്നു. മുതിർന്ന കോൺഗ്രസ് കുടുംബാംഗങ്ങളെയും എസ്എസ്എൽസി പ്ലസ് ടു പരീക്ഷകളിൽ ഉന്നത വിജയം നേടിയവരെയും ആദരിച്ചു. മണ്ഡലം പ്രസിഡന്‍റുമാരായ മനോജ് എം. കണ്ടത്തിൽ, ജയിൻസ് ടി. മാത്യു, മഹിളാ കോൺഗ്രസ് പ്രസിഡന്‍റ് റോസിലി വിൽസൺ, ടി.ടി. ബേബി, ജിതിൻ തോമസ്, ജോർജ് വടക്കുംകര, ഷിജോ ജോർജ്, രാജു ആലുംപറമ്പിൽ, പി.കെ. ഷിബു, ജിന്‍റു, ജോയ എലിസബത്ത്, എന്നിവർ പ്രസംഗിച്ചു.

മുന്നറിയിപ്പില്ലാതെ കണ്ണൂർ നഗരത്തിൽ റോഡ് തടസപ്പെടുത്തി മരംമുറി

കണ്ണൂർ: മുന്നറിയിപ്പില്ലാതെ മക്കാനിയിൽ ദേശീയപാത അതോറിറ്റിയുടെ നേതൃത്വത്തിൽ മരംമുറിച്ച് മാറ്റാനായി റോഡ് തടസപ്പെടുത്തിയത് വൻ ഗതാഗതകുരുക്കിന് കാരണമായി. മണിക്കൂറുകളോളമാണ് വാഹനങ്ങൾ കുടുങ്ങി കിടന്നത്. മക്കാനിയിൽ അപകടഭീഷണിയുയർത്തിയ മരം മുറിച്ച് മാറ്റാനുള്ള കോടതി ഉത്തരവിനെ തുടർന്നാണ് ഇന്നലെ രാവിലെ മുതൽ മരം മുറി ആരംഭിച്ചത്. എട്ട് മണിക്കൂറാണ് മരം മുറിച്ച് മാറ്റാനായി ദേശീയ പാത അഥോറിറ്റി ആവശ്യപ്പെട്ടത്. രാവിലെ ഏഴോടെ ഈ ഭാഗത്തേക്കുള്ള ഗതാഗതവും തടസപ്പെടുത്തി. എകെജി ആശുപത്രിയുടെ മുൻവശത്ത് നിന്ന് റോഡ് തടസപ്പെടുത്തി വാഹനം വഴി തിരിച്ച് വിട്ടാണ് മരം മുറിച്ചത്. യാതൊരു മുന്നറിയിപ്പും നല്കാത്തതിനെ തുടർന്ന് പല വാഹനങ്ങളും മണിക്കൂറുകളോളം കുടുങ്ങി കിടന്നു. ഇതോടെ സർക്കാർ ജീവനക്കാരും സ്കൂൾ, കോളജ് വിദ്യാർഥികളും മറ്റ് ആവശ്യങ്ങൾക്കായി കണ്ണൂരിലെത്തിയ യാത്രക്കാരും ഏറെ ബുദ്ധിമുട്ടി.

വിജയോത്സവം സംഘടിപ്പിച്ചു

ഇരിട്ടി: എടൂർ സെന്‍റ് മേരീസ് ഹയർ സെക്കൻഡറി സ്കൂൾ ഹൈസ്കൂൾ, യുപി വിഭാഗങ്ങളുടെ വിജയോത്സവം, വിദ്യാരംഗം കലാസാഹിത്യവേദി, വിവിധ ക്ലബുകളുടെ ഉദ്ഘാടനവും സംഘടിപ്പിച്ചു. വിജയോത്സവം സ്കൂൾ മാനേജർ ഫാ. തോമസ് വടക്കേമുറിയിൽ ഉദ്ഘാടനം ചെയ്തു. ആറളം ഗ്രാമപഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർമാൻ ജോസ് അന്ത്യാംകുളം അധ്യക്ഷത വഹിച്ചു. വിദ്യാരംഗം കലാസാഹിത്യവേദി, ക്ലബുകൾ എന്നിവ ഫാ. ജിതിൻ വയലുങ്കൽ ഉദ്ഘാടനം ചെയ്തു. മുൻ കോർപറേറ്റ് മാനേജർ ഫാ. മാത്യു ശാസ്താംപടവിൽ മുഖ്യാതിഥിയായിരുന്നു. ഫാ. അഭിലാഷ് ചെല്ലങ്കോട്ട്, മുഖ്യാധ്യാപിക സിസിലി ജോസഫ്, ലിൻസി പി. സാം, ബെന്നി കെ. മാത്യു, ജിമ്മി വട്ടംതൊട്ടിയിൽ, കെ. മനോജ്, ലീമാ സന്തോഷ്, വി.ജെ. അശ്വതി, സ്റ്റാഫ് സെക്രട്ടറി ഫാ. ബിജു ആന്‍റണി എന്നിവർ പ്രസംഗിച്ചു. എസ്എസ്എൽസി ഫുൾ എ പ്ലസ്, ഒന്പത് എ പ്ലസ്, യുഎസ് എസ് എന്നിവ നേടിയ വിദ്യാർഥികളെ ആദരിച്ചു. തുടർന്ന് വിവിധ കലാപരിപാടികളും അരങ്ങേറി.

പുഴക്കരയിൽ നിന്ന് നടരാജ ശില്പം കണ്ടെത്തി

ഇരിട്ടി: പായം മുക്കിലെ പഴയ തോണിക്കടവിന് സമീപം പുഴക്കരയിൽ നിന്ന് നടരാജ ശില്പം കണ്ടെത്തി. പുഴയ്ക്ക് സമീപത്തെ വീട്ടുകാർ പശുവിനെ മേയ്ക്കാൻ പോയ സമയത്താണ് പുഴക്കരയിൽ ശില്പം ആദ്യം കാണുന്നത്. നാട്ടുകാർ വിവരമറിയിച്ചതിനെ തുടർന്ന് ഇരിട്ടി പോലീസ് സ്ഥലത്തെത്തി ശില്പം സ്റ്റേഷനിലേക്ക് മാറ്റി. ' പഴക്കം തോന്നിക്കുന്ന ശില്പം എങ്ങനെ പുഴക്കരയിൽ എത്തിയെന്നും ശില്പം എന്തുതരം ലോഹം ആണെന്നതിനെക്കുറിച്ചുള്ള പ്രാഥമിക അന്വേഷണം പോലീസ് നടത്തിവരികയാണ്.

തിരുഹൃദയ തിരുസ്വരൂപ പ്രയാണം നടത്തി

പേരാവൂർ: പേരാവൂർ സെന്‍റ് ജോസഫ്സ് മേജർ ആർക്കി എപ്പിസ്ക്കോപ്പൽ തീർഥാടന ഇടവകയും തിരുഹൃദയ സന്യാസിനീ സമൂഹം തലശേരി സെന്‍റ് ജോസഫ്സ് പ്രൊവിൻസും സംയുക്തമായി തിരുഹൃദയ തിരുസ്വരൂപ പ്രയാണം നടത്തി. പേരാവൂർ സെന്‍റ് ജോസഫ് മേജർ ആർക്കി എപ്പിസ്കോപ്പൽ തീർഥാടന കേന്ദ്രത്തിൽ നിന്നാരംഭിച്ച പ്രയാണം മാവടി, കല്ലടി കുരിശുപള്ളികൾ സന്ദർശിച്ച് തിരികെയെത്തി. പ്രയാണത്തിന് ആർച്ച് പ്രീസ്റ്റ് ഫാ. മാത്യു തെക്കേമുറിയും, അസിസ്റ്റന്‍റ് വികാരി ഫാ. പോൾ മുണ്ടയ്ക്കലും നേതൃത്വം നൽകി. തിരുഹൃദയ സന്യാസിനീ സമൂഹത്തിന്‍റെ പ്രൊവിൻഷ്യൽ സുപ്പീരിയർ സിസ്റ്റർ ഡോ. ട്രീസ പാലയ്ക്കൽ എസ്എച്ച്, സിസ്റ്റർ ഡോ. റിൻസി അഗസ്റ്റിൻ എസ്എച്ച്, സിസ്റ്റർ അലീന മാത്യു എസ്എച്ച് എന്നിവർ സന്ദേശം നൽകി.

മയക്കുമരുന്നിനെതിരായ സന്ദേശവുമായി ഒളിന്പിക് റണ്‍

കണ്ണൂർ: അന്താരാഷ്‌ട്ര ഒളിന്പിക് ദിനത്തിന്‍റെ ഭാഗമായി "മയക്കുമരുന്നിനെതിരേ കായികം' എന്ന സന്ദേശമുയര്‍ത്തി ജില്ലാ ഒളിന്പിക് അസോസിയേഷന്‍റെ നേതൃത്വത്തില്‍ ഒളിന്പിക് റണ്‍ സംഘടിപ്പിച്ചു. കെ.പി. മോഹനന്‍ എംഎല്‍എ, ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരി എന്നിവര്‍ സംയുക്തമായി ഫ്ലാഗ് ഓഫ് ചെയ്തു. മുനിസിപ്പല്‍ ജവഹര്‍‌ സ്റ്റേഡിയത്തില്‍ നിന്ന് ആരംഭിച്ച ഒളിന്പിക് റണ്‍ കണ്ണൂര്‍ നഗരം ചുറ്റി മുനിസിപ്പല്‍ സ്റ്റേഡിയത്തില്‍ത്തന്നെ സമാപിച്ചു. മയക്കുമരുന്നിനെതിരായ സന്ദേശം പ്രചരിപ്പിക്കുന്നതിന്‍റെ ഭാഗമായി 15 മുതല്‍ 22 വരെ ജില്ലയിലെ വിവിധ സര്‍ക്കാര്‍, വിദ്യാഭ്യാസ സ്ഥാപനങ്ങള്‍, സാമൂഹ്യ സാംസ്‌കാരിക സംഘടനകള്‍ എന്നിവയുടെ സഹകരണത്തോടെ ഷട്ടില്‍, ബാസ്‌കറ്റ്ബോള്‍, വോളിബോള്‍, ഫുട്ബോള്‍, ജൂഡോ, സൈക്ലിംഗ്, കരാട്ടെ, കബഡി, റൈഫിള്‍ തുടങ്ങിയ കായിക മത്സരങ്ങളും വിദ്യാഭ്യാസ സ്ഥാപനങ്ങളില്‍ ക്വിസ് മത്സരങ്ങളും സംഘടിപ്പിച്ചിരുന്നു. കാനന്നൂര്‍ സൈക്ലിംഗ് ക്ലബിന്‍റെ നേതൃത്വത്തില്‍ സൈക്കിള്‍ റൈഡും ജില്ലാതലത്തില്‍ ചിത്രരചന, പ്രസംഗ മത്സരം എന്നിവയും ഭാഗമായി നടന്നു.

തെരുവുനായ ശല്യം: എല്ലാ തദ്ദേശസ്ഥാപനങ്ങളും ഷെല്‍ട്ടര്‍ ഹോമുകള്‍ സ്ഥാപിക്കണം

കണ്ണൂർ: തെരുവുനായ ശല്യം ചെറുക്കാന്‍ ജില്ലയിലെ മുഴുവന്‍ തദ്ദേശസ്വയംഭരണ സ്ഥാപനങ്ങളും ഷെല്‍ട്ടര്‍ ഹോമുകള്‍ സ്ഥാപിക്കണമെന്നും ബ്ലോക്ക് പഞ്ചായത്ത്, മുനിസിപ്പാലിറ്റികള്‍ കേന്ദ്രീകരിച്ച് മൊബൈല്‍ വന്ധ്യംകരണ കേന്ദ്രങ്ങളും തുടങ്ങണമെന്ന് ജില്ലാ ആസൂത്രണസമിതി യോഗത്തില്‍ തീരുമാനം. ഒരു മാസത്തിനുള്ളില്‍ ഷെല്‍ട്ടര്‍ ഹോമുകളും എബിസി കേന്ദ്രങ്ങളും സ്ഥാപിക്കണം. എബിസി കേന്ദ്രങ്ങള്‍ സ്ഥാപിക്കുന്നതിന് ആവശ്യമായി വരുന്ന ചെലവിന്‍റെ ഒരുഭാഗം ബ്ലോക്ക് പഞ്ചായത്ത് പരിധിയില്‍ വരുന്ന ഗ്രാമപഞ്ചായത്തുകള്‍ വഹിക്കണമെന്നും ജില്ലാ ആസൂത്രണ സമിതി ചെയര്‍പേഴ്‌സൺ‍ കെ.കെ. രത്‌നകുമാരിയുടെ അധ്യക്ഷതയില്‍ ചേര്‍ന്ന യോഗം തീരുമാനിച്ചു. ഷെല്‍ട്ടര്‍ ഹോമുകളുടെ നടത്തിപ്പിന് തദ്ദേശ സ്ഥാപനങ്ങള്‍ ജീവനക്കാരെ നിയോഗിക്കണം. നായ്ക്കള്‍ക്ക് ഭക്ഷണം നല്‍കുന്നത് ഉള്‍പ്പെടെയുള്ളവയ്ക്ക് മൃഗസ്‌നേഹികളുടെ സഹായവും തേടാം. സന്നദ്ധസംഘടനകളുടെ സഹായത്തോടെ സഞ്ചരിക്കുന്ന എബിസി കേന്ദ്രം സ്ഥാപിക്കുന്നതിനെക്കുറിച്ചും തദ്ദേശ സ്ഥാപനങ്ങള്‍ക്ക് ആലോചിക്കാം. ഷെല്‍ട്ടര്‍ ഹോമുകള്‍ സ്ഥാപിക്കുന്നതുമായി ബന്ധപ്പെട്ട് എതിര്‍പ്പുകള്‍ മറികടക്കുന്നതിന് തദ്ദേശ സ്ഥാപനങ്ങള്‍ മൃഗസംരക്ഷണ വകുപ്പുമായി ചേര്‍ന്ന് പ്രാദേശികതലത്തില്‍ ബോധവത്കരണ കാമ്പയിനുകള്‍ നടത്തണം. തദ്ദേശ സ്ഥാപനങ്ങള്‍ തെരുവുനായ്ക്കളെ പിടിക്കുന്നത് സന്നദ്ധരായവരെ കണ്ടെത്തി മൃഗസംരക്ഷണ വകുപ്പിനെ അറിയിച്ചാല്‍ ജില്ലാതലത്തില്‍ പരിശീലനം നല്‍കും. തദ്ദേശഭരണ സ്ഥാപനങ്ങളുടെ 2025-26 വാര്‍ഷിക പദ്ധതി അംഗീകാരത്തിന്‍റെ പുരോഗതിയും യോഗ ത്തില്‍ അവലോകനം ചെയ്തു. തദ്ദേശസ്ഥാപനങ്ങളില്‍ നിര്‍മാണ പ്രവൃത്തിക്ക് അനുബന്ധമായി വരുന്ന ഇലക്‌ട്രിക്കല്‍ പ്രവൃത്തികള്‍ക്ക് യഥാസമയം എസ്റ്റിമേറ്റ് ലഭ്യമാകുന്നില്ലെന്ന പരാതി പരിഹരിക്കു ന്നതിന് കൂടുതല്‍ അംഗങ്ങളെ ഉള്‍പ്പെടുത്തി കമ്മിറ്റി വിപുലീകരിക്കുമെന്ന് ഡിപിസി അറിയിച്ചു. മയ്യില്‍ പഞ്ചായത്തിന്‍റെ 2025-26 വാര്‍ഷിക പദ്ധതി ഭേദഗതിക്ക് അംഗീകാരം നല്‍കി. പയ്യാവൂര്‍, ചപ്പാരപ്പടവ്, കൊട്ടിയൂര്‍, രാമന്തളി, കണിച്ചാര്‍ പഞ്ചായത്തുകളുടെയും പയ്യന്നൂര്‍ ബ്ലോക്ക് പഞ്ചായത്തിന്‍റെയും 2025-26 ഹെല്‍ത്ത് ഗ്രാന്‍ഡ് പ്രോജക്ടിന് അംഗീകാരം നല്‍കി. ഡിപിസി ചെയര്‍പേഴ്‌സണ്‍ രത്‌നകുമാരി, മെംബര്‍ സെക്രട്ടറി ജില്ലാ കളക്ടര്‍ അരുണ്‍ കെ. വിജയന്‍, ഡിപിസി അംഗങ്ങളായ ബിനോയ് കുര്യന്‍, വി. ഗീത, കെ. താഹിറ, ലിസി ജോസഫ്, ടി.ഒ. മോഹനന്‍, സര്‍ക്കാര്‍ നോമിനി കെ.വി. ഗോവിന്ദന്‍, ജില്ലാ പ്ലാനിംഗ് ഓഫീസര്‍ നെനോജ് മേപ്പടിയത്ത്, തദ്ദേശ അധ്യക്ഷന്‍മാര്‍, ജില്ലാ ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

കെവിവിഇഎസ് വാർഷിക പൊതുയോഗവും ആശ്രയ പദ്ധതി വിതരണവും

കരുവഞ്ചാൽ: വ്യാപാരി വ്യവസായി ഏകോപനസമിതി കരുവാഞ്ചൽ യൂണിറ്റ് വാർഷിക പൊതുയോഗവും ആശ്രയ പദ്ധതിയുടെ 10 ലക്ഷം രൂപ വിതരണവും നടന്നു. കല്ലോടി നടുപറമ്പിൽ ഓഡിറ്റോറിയത്തിൽ നടന്ന പൊതുയോഗം ദേവസ്യ മെച്ചേരി ഉദ്ഘാടനം ചെയ്തു. ജയിംസ് പുത്തൻപുര അധ്യക്ഷത വഹിച്ചു. ആശ്രയ പദ്ധതി 10 ലക്ഷം രൂപ നൽകി സജിവ് ജോസഫ് എംഎൽഎ ഉദ്ഘാടനം ചെയ്തു. എസ്എസ്എൽസി, പ്ലസ് ടു പരീക്ഷകളിൽ മികച്ച വിജയം കൈവരിച്ച വിദ്യാർഥികൾക്കും അവാർഡുകൾ നൽകി. യോഗത്തിൽ എം.എ. ജോൺസൺ, പി.എസ് അബ്‌ദുൾ മജീദ്, റോയി ജോസ്, ടോമി ജോസഫ്, ടി.ജെ. ജോൺ, എൽസമ്മ ബേബി, വി.പി സുരേന്ദ്രൻ, എം.കെ. സെബാസ്റ്റ്യൻ, സി.കെ. അബ്ദു എന്നിവർ പ്രസംഗിച്ചു. കുടുംബവും വ്യാപാരവും എന്ന വിഷയത്തിൽ ചൈൽഡ് വെൽഫെയർ കമ്മറ്റി അംഗം ഹസക്കുട്ടി ക്ലാസ് നയിച്ചു.

ഉന്നത വിജയികളെ അനുമോദിച്ചു

തടിക്കടവ്: തടിക്കടവ് ഗവ. ഹൈസ്കൂളിൽ വിജയോത്സവം 2025 സംഘടിപ്പിച്ചു. ജില്ലാ പഞ്ചായത്ത് അംഗം തോമസ് വെക്കത്താനം ഉദ്ഘാടനം ചെയ്തു. എസ്എസ്എൽസി പരീക്ഷയിൽ ഉന്നത വിജയം നേടിയ പ്രതിഭകളെയും എൽഎസ്എസ്, യുഎസ്എസ്, എൻഎംഎംഎസ് നേടിയ പ്രതിഭകളെയും ചടങ്ങിൽ ആദരിച്ചു. ചപ്പാരപ്പടവ് പഞ്ചായത്ത് പ്രസിഡന്‍റ് സുനിജ ബാലകൃഷ്ണൻ അധ്യക്ഷത വഹിച്ചു. സിനി ആർട്ടിസ്റ്റ് ബിജോയ് മുഖ്യാതിഥിയായി. പി. രജനി, ആൻസി സണ്ണി, പി.എൻ. സുനിൽകുമാർ, സി.എം. ഹംസ, കെ.ജെ. ജോസഫ്, പി.പി. വിചിത്ര എന്നിവർ പ്രസംഗിച്ചു. പയ്യാവൂർ: എസ്എസ്എൽസി, പ്ലസ് ടു, എൽഎസ്എസ്, യുഎസ്എസ്, സംസ്കൃതം സ്കോളർഷിപ്പുകൾ എന്നിവയിൽ ഉന്നത വിജയം നേടിവരെ ഏരുവേശി യുവജന ക്ലബ് ആൻഡ് ഗ്രന്ഥാലയം, എകെജി യൂത്ത് സെന്‍റർ എന്നിവയുടെ സംയുക്താഭിമുഖ്യത്തിൽ അനുമോദിച്ചു. യുവജന കമ്മീഷൻ ചെയർമാൻ എം. ഷാജർ ഉദ്ഘാടനം ചെയ്തു. ഗ്രന്ഥാലയം പ്രസിഡന്‍റ് എം. നാരായണൻ അധ്യക്ഷത വഹിച്ചു. വാർഡ് മെംബർ എം.ഡി. രാധാമണി, ഇ.പി. ബാലകൃഷ്ണൻ, എം. സന്തോഷ്കുമാർ, പി.എസ്. രജീഷ്, വസന്തകുമാരി, കെ. അക്ഷയ്, എ. ആദർശ്, പി.കെ.വി. മഞ്ജുള എന്നിവർ പ്രസംഗിച്ചു.

ഇന്‍റർ സ്കൂൾ ക്വിസ് മത്സരം നടത്തി

ചെറുപുഴ: ചെറുപുഴ നവജ്യോതി കോളജിലെ ഫ്ലോറ നേച്ചർ ക്ലബിന്‍റെ നേതൃത്വത്തിൽ പരിസ്ഥിതി മാസാചരണ ഭാഗമായി ഇന്‍റർ സ്കൂൾ ക്വിസ് മത്സരം നടത്തി. കോളജ് ഡയറക്ടർ ഫാ. സിജോയ് പോൾ, കൊമേഴ്സ് വിഭാഗം മേധാവി എം.ജെ. മാത്യു, പ്രിൻസിപ്പൽ ഡോ. കെ.കെ. സോമശേഖരൻ എന്നിവർ ചേർന്ന് വിജയികൾക്ക് കാഷ് അവാർഡും മെമന്‍റോയും വിതരണം ചെയ്തു. ചെറുപുഴ സെന്‍റ് മേരീസ് സ്കൂൾ വിദ്യാർഥികളായ മിഷേൽ പ്രണേഷ്, മാത്യു മനോ, വയക്കര ജിഎച്ച്എസ്എസിലെ ശിവധ രാജീവൻ, കെ.എസ്. ശിവ, കോഴിച്ചാൽ ജിഎച്ച്എസ്എസിലെ ഡിമൽ ഡിജോ, ആദർശ് ബിന്‍റോ എന്നീ ടീമുകൾ യഥാക്രമം ഒന്ന്, രണ്ട്, മൂന്ന് സ്ഥാനങ്ങൾ നേടി. മത്സരത്തിന് ഫ്ലോറ നേച്ചർ ക്ലബ് അംഗങ്ങളായ സിസ്റ്റർ ആഷ്ന, എ.വി. ജസീൽ, അദ്വൈത് കുമാർ, ജിനു ഷാജി എന്നിവർ നേതൃത്വം നൽകി.

വിടപറഞ്ഞത് മലയോരത്തിന്‍റെ സ്വന്തം കായിക പരിശീലകൻ

ചെമ്പന്തൊട്ടി: സെന്‍റ് ജോർജ് ഹൈസ്കൂളിൽ മുപ്പത് വർഷക്കാലം കായികാധ്യാപകനായിരുന്ന എം.ജെ. ജോർജ് മാനാമ്പുറത്തിന്‍റെ (67) ആകസ്മിക വേർപാട് നാടിനും കായികലോകത്തിനും തീരാനഷ്ടം. ഹൃദയാഘാതത്തെ തുടർന്ന് ശനിയാഴ്ചയായിരുന്നു മരണം. ഇന്നു വൈകുന്നേരം അഞ്ചിന് ചെമ്പന്തൊട്ടിയിലെ വസതിയിൽ എത്തിക്കുന്ന മൃതദേഹം നാളെ രാവിലെ 10ന് ചെമ്പന്തൊട്ടി സെന്‍റ് ജോർജ് ഫൊറോന പള്ളിയിൽ സംസ്കരിക്കും. നിരവധി കായികതാരങ്ങളെ നാടിന് സമ്മാനിച്ച പരിശീലകനെയാണ് നാടിന് ജോർജ് മാനാന്പുറത്തിന്‍റെ വിയോഗത്തിലൂടെ നഷ്ടമായത്. സ്കൂൾ കായികമേളകളിലൂടെ വളർന്ന് സംസ്ഥാന-ദേശീയതലത്തിൽ അത്‌ലറ്റിക്സ് വിഭാഗത്തിൽ റിക്കാർഡ് സൃഷ്ടിച്ചവർ ഉൾപ്പടെയുള്ള നിരവധി ശിഷ്യ സന്പത്തിനുടമയാണ് ജോർജ് മാനാന്പുറം. ശിഷ്യരായ പലരും കായികമികവിലൂടെ ഇന്ത്യൻ റെയിൽവേയിലും, കേന്ദ്ര, സംസ്ഥാന സർക്കാർ സർവീസുകളിലും ജോലി നേടിയിട്ടുണ്ട്. കായികാധ്യാപനത്തിൽനിന്ന് വിരമിച്ച ശേഷം സംസ്ഥാന, ദേശീയ മാസ്റ്റേഴ്സ് മീറ്റുകളിൽ ഇദ്ദേഹം മെഡലുകൾ നേടിയിട്ടുണ്ട്. മികച്ച സംഘാടകൻ കൂടിയായിരുന്ന ജോർജ് പൊതുരംഗത്തും സജീവ സാന്നിധ്യമായിരുന്നു. സർവീസിൽനിന്ന് വിരമിച്ച ശേഷം ചെമ്പന്തൊട്ടി ടൗണിൽ വ്യാപാരം തുടങ്ങിയ അദ്ദേഹം നിലവിൽ കേരള വ്യാപാരി വ്യവസായി ഏകോ‌പന സമിതി ചെമ്പന്തൊട്ടി യൂണിറ്റ് ട്രഷററായിരുന്നു.

ഒരു തൈ നടാം, ഓര്‍മയുടെ ഒരു തണല്‍ നടാം; ഓര്‍മമരം നട്ട് ജില്ലാ പഞ്ചായത്തംഗങ്ങള്‍

കണ്ണൂർ: "കാലാവസ്ഥാ വ്യതിയാനത്തിന് മരമാണ് മറുപടി' എന്ന മുദ്രാവാക്യവുമായി ജില്ലാ പഞ്ചായത്തിലെ 35 അംഗങ്ങളും ഓര്‍മ മരങ്ങള്‍ നട്ടു. മയ്യില്‍ പഞ്ചായത്തിലെ ചട്ടുകപ്പാറ ഹയര്‍ സെക്കന്‍ഡറി സ്‌കൂളിന് സമീപമുള്ള ആരൂഡം കാമ്പസിലാണ് ജില്ലാ പഞ്ചായത്ത് അംഗങ്ങള്‍ ഓര്‍മ മരം നട്ടത്. ജില്ലാ പഞ്ചായത്ത് പ്രസിഡന്‍റ് കെ.കെ. രത്‌നകുമാരി ആദ്യ തൈ നട്ടു. മുഴുവന്‍ ജില്ലാ പഞ്ചായത്ത് അംഗങ്ങളും ബ്ലോക്ക് പഞ്ചായത്ത് പ്രസിഡന്‍റുമാരും ഓര്‍മ മരം നട്ടു. 35 ഫലവൃക്ഷ തൈകളാണ് നട്ടത്. ഒരു തൈ നടാം-വൃക്ഷവത്കരണ പരിപാടിയുടെ ഭാഗമായാണ് ഫലവൃക്ഷത്തൈകള്‍ നട്ടത്. സംസ്ഥാനത്ത് ഹരിത കേരളം മിഷന്‍റെ നേതൃത്വത്തിലാണ് സെപ്റ്റംബര്‍ മാസത്തോടെ ഒരുകോടി വൃക്ഷത്തൈകള്‍ നട്ടുപിടിപ്പിക്കുക എന്ന ലക്ഷ്യത്തോടെ "ഒരു തൈ നടാം' കാമ്പയിന്‍ നടക്കുന്നത്. ജില്ലാ പഞ്ചായത്ത് വൈസ്പ്രസിഡന്‍റ് ബിനോയ് കുര്യന്‍ അധ്യക്ഷത വഹിച്ചു.

ഓണത്തിന് ഒരുകൊട്ടപ്പൂവ്: തൈകള്‍ വിതരണം ചെയ്തു

കണ്ണൂർ: ജില്ലാ പഞ്ചായത്ത് വാര്‍ഷിക പദ്ധതിയില്‍ ഉള്‍പ്പെടുത്തി "ഓണത്തിന് ഒരുകൊട്ടപ്പൂവ്' പദ്ധതിയുടെ ഭാഗമായി ചെണ്ടുമല്ലി-വാടാമല്ലി തൈകളുടെ ജില്ലാതല വിതരണോദ്ഘാടനം ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരി നിര്‍വഹിച്ചു. ജില്ലാ പഞ്ചായത്ത് മീറ്റിംഗ് ഹാളില്‍ നടന്ന പരിപാടിയില്‍ വൈസ് പ്രസിഡന്‍റ് ബിനോയ് കുര്യന്‍ അധ്യക്ഷത വഹിച്ചു. വികസനകാര്യ സ്ഥിരസമിതി അധ്യക്ഷ യു.പി. ശോഭ പദ്ധതി വിശദീകരിച്ചു. ഓണത്തിന് തദ്ദേശീയമായി പൂക്കള്‍ ഉത്പാദിപ്പിക്കുക, ജില്ലയിലെ വനിതാ ഗ്രൂപ്പുകളെ കൃഷിയില്‍ പ്രോത്സാഹിപ്പിക്കുക, വരുമാനം വര്‍ധിപ്പിക്കുക എന്നീ ലക്ഷ്യത്തോടെയാണ് പദ്ധതി നടപ്പിലാക്കുന്നത്. 16 ലക്ഷം രൂപയാണ് ചെലവ്. ജില്ലയിലെ അഞ്ചു ഫാമുകളില്‍ ഉത്പാദിപ്പിച്ച രണ്ടര ലക്ഷം തൈകള്‍ വിവിധ ഗ്രാമപഞ്ചായത്തുകളിലെ വനിതാ ഗ്രൂപ്പുകള്‍ക്ക് നല്‍കും. തദ്ദേശസ്ഥാപനങ്ങളിലെ കൃഷിഭവന്‍ മുഖേനയാണ് തൈകളുടെ വിതരണം.

കൊക്കായിപാലം താത്കാലിക അപ്രോച്ച് റോഡ് കോൺക്രീറ്റ് ചെയ്തു

ചെമ്പന്തൊട്ടി: ചെമ്പന്തൊട്ടി-നടുവിൽ റോഡിലെ കൊക്കായിപാലം താത്കാലിക അപ്രോച്ച് റോഡ് കോൺക്രീറ്റ് ചെയ്തു. തോട്ടിലെ വെള്ളത്തിന്‍റെ കുത്തൊഴുക്ക് കാരണം റോഡ് ഒലിച്ചുപോയിരുന്നു. നാട്ടുകാരുടെ സമ്മർദത്തെ തുടർന്ന് സജീവ് ജോസഫ് എംഎൽഎ ഇടപെട്ടതിനെ തുടർന്നാണ് കോൺക്രീറ്റ് ചെയ്തത്. കഴിഞ്ഞയാഴ്ച ബസുകളടക്കം കടന്നുപോയതിന് ശേഷം വലിയ ലോറി കയറിയപ്പോൾ റോഡിന്‍റെ അടിഭാഗത്ത് സ്ഥാപിച്ച പൈപ്പുകൾ പൊട്ടിയതോ‌ടെയാണ് ശക്തമായ കുത്തൊഴുക്കിൽ റോഡ് ഒലിച്ചുപോയത്. കൊക്കായിയിൽ പാലം പൂർത്തിയാകാൻ ഇനിയും സമയമെടുക്കും. കൊക്കായിയിലെ ദുരിതം കാരണം ചെമ്പന്തൊട്ടി ടൗൺ ഒറ്റപ്പെട്ടിരുന്നു. മറ്റ് റോഡുകൾ വഴി ചുറ്റികറങ്ങിയാണ് വാഹനങ്ങൾ ലക്ഷ്യത്തിലെത്തുന്നത്. സ്കൂൾ തുറന്നതോടെ രണ്ടു പാലങ്ങളുടെ അപ്രോച്ച് റോഡുകൾ തകർന്നതും ഗതാഗത സ്തംഭനവും വിദ്യാർഥികൾക്കും സ്കൂൾ അധികാരികൾക്കും ദുരിതമായത് ദീപിക റിപ്പോർട്ട് ചെയ്തിരുന്നു. കാലവർഷം കഴിഞ്ഞാലുടൻ ശ്രീകണ്ഠപുരം-ചെമ്പന്തൊട്ടി-നടുവിൽ റോഡിലെ യാത്രാദുരിതം പരിഹരിക്കാനുള്ള തയാറെടുപ്പിലാണ് പ്രദേശവാസികളും രാഷ്‌ട്രീയ പ്രതിനിധികളും.

ചെമ്പേരി വൈഎംസിഎ സ്ഥാനരോഹണവും കുടുംബ സംഗമവും

ചെമ്പേരി: വൈഎംസിഎ ചെമ്പേരി യൂണിറ്റ് കുടുംബ സംഗമവും ഭാരവാഹികളുടെ സ്ഥാനാരോഹണ വും പുതിയ അംഗങ്ങൾക്ക് സ്വീകരണവും ചെമ്പേരി വൈഎംസിഎ ഹാളിൽ നടന്നു. സജീവ് ജോസഫ് എംഎൽഎ ഉൽഘാടനം ചെയ്തു. വൈഎംസിഎ ചെമ്പേരി യൂണിറ്റ് പ്രസിഡന്‍റ് ജോമി ജോസ് ചാലിൽ അധ്യക്ഷത വഹിച്ചു. ചെമ്പേരി ലൂർദ് മാതാ ബസിലിക്ക റെക്ടർ റവ. ഡോ. ജോർജ് കാഞ്ഞിരക്കാട്ട് അനുഗ്രഹപ്രഭാഷണവും വൈഎംസിഎ ഏഷ്യ പസഫിക് കമ്മിറ്റി മെംബർ ഡോ.കെ.എം. തോമസ് മുഖ്യ പ്രഭാഷണവും നടത്തി. വൈഎംസിഎ കണ്ണൂർ സബ് റീജിയൻ ചെയർമാൻ ബെന്നി ജോസഫ്, പുതിയ പ്രസിഡന്‍റ് ഷീൻ ഏബ്രഹാം വേലിയ്ക്കകത്ത്, വൈസ് പ്രസിഡന്‍റുമാരായ ഷാജി വർഗീസ് കളപ്പുര, നിബിൻ ജോയ് ഉറുമ്പിൽ, സെക്രട്ടറി റോബി ഇലവുങ്കൽ, ജോയിന്‍റ് സെക്രട്ടറി ദീപു കണ്ടത്തിൽ, ട്രഷറര്‍ സാജു കൊട്ടാരത്തിൽ എന്നിവരും മറ്റു ഭാരവാഹികളും സ്ഥാനമേറ്റു. പഠന മികവ് തെളിയിച്ച പ്രതിഭകളെയും എക്സലൻസ് അവാർഡ് നേടിയ പ്രവർത്തകരെയും ആദരിച്ചു. കണ്ണൂർ സബ് റീജിയൻ വിമൻസ് ഫോറം പ്രസിഡന്‍റ് ടിന്‍റു ബിജി ചെമ്പേരി വൈഎംസിഎ വിമൻസ് ഫോറം പ്രസിഡന്‍റ് ലിസിയാമ്മ ജോസഫിന്‍റെ നേതൃത്വത്തിലുള്ള ഭരണ സമിതിക്കു ചുമതല കൈമാറി. സബ് റീജണൽ ജനറൽ കൺവീനർ ഷാജി ജോസഫ് പുതിയ എട്ട് കുടുംബങ്ങളെ സത്യവാചകം ചൊല്ലിക്കൊടുത്തു സ്വീകരിച്ചു. കേരള റീജിയൻ മുൻ ചെയർമാൻ ജിയോ ജേക്കബ്, റീജണൽ ട്രെയിനർ ജോസ് മേമടം എന്നിവർ പ്രസംഗിച്ചു. കലാപരിപാടികളും അരങ്ങേറി. പ്രോഗ്രാം ഡയറക്ടർമാരായ സിബി പുന്നക്കുഴിയിൽ, ജ്യോതിരാജ് അയ്യങ്കാനായിൽ തുടങ്ങിയവർ നേതൃത്വം നൽകി.

തെരുവുനായ ശല്യം: എല്ലാ തദ്ദേശസ്ഥാപനങ്ങളും ഷെല്‍ട്ടര്‍ ഹോമുകള്‍ സ്ഥാപിക്കണം

കണ്ണൂർ: തെരുവുനായ ശല്യം ചെറുക്കാന്‍ ജില്ലയിലെ മുഴുവന്‍ തദ്ദേശസ്വയംഭരണ സ്ഥാപനങ്ങളും ഷെല്‍ട്ടര്‍ ഹോമുകള്‍ സ്ഥാപിക്കണമെന്നും ബ്ലോക്ക് പഞ്ചായത്ത്, മുനിസിപ്പാലിറ്റികള്‍ കേന്ദ്രീകരിച്ച് മൊബൈല്‍ വന്ധ്യംകരണ കേന്ദ്രങ്ങളും തുടങ്ങണമെന്ന് ജില്ലാ ആസൂത്രണസമിതി യോഗത്തില്‍ തീരുമാനം. ഒരു മാസത്തിനുള്ളില്‍ ഷെല്‍ട്ടര്‍ ഹോമുകളും എബിസി കേന്ദ്രങ്ങളും സ്ഥാപിക്കണം. എബിസി കേന്ദ്രങ്ങള്‍ സ്ഥാപിക്കുന്നതിന് ആവശ്യമായി വരുന്ന ചെലവിന്‍റെ ഒരുഭാഗം ബ്ലോക്ക് പഞ്ചായത്ത് പരിധിയില്‍ വരുന്ന ഗ്രാമപഞ്ചായത്തുകള്‍ വഹിക്കണമെന്നും ജില്ലാ ആസൂത്രണ സമിതി ചെയര്‍പേഴ്‌സൺ‍ കെ.കെ. രത്‌നകുമാരിയുടെ അധ്യക്ഷതയില്‍ ചേര്‍ന്ന യോഗം തീരുമാനിച്ചു. ഷെല്‍ട്ടര്‍ ഹോമുകളുടെ നടത്തിപ്പിന് തദ്ദേശ സ്ഥാപനങ്ങള്‍ ജീവനക്കാരെ നിയോഗിക്കണം. നായ്ക്കള്‍ക്ക് ഭക്ഷണം നല്‍കുന്നത് ഉള്‍പ്പെടെയുള്ളവയ്ക്ക് മൃഗസ്‌നേഹികളുടെ സഹായവും തേടാം. സന്നദ്ധസംഘടനകളുടെ സഹായത്തോടെ സഞ്ചരിക്കുന്ന എബിസി കേന്ദ്രം സ്ഥാപിക്കുന്നതിനെക്കുറിച്ചും തദ്ദേശ സ്ഥാപനങ്ങള്‍ക്ക് ആലോചിക്കാം. ഷെല്‍ട്ടര്‍ ഹോമുകള്‍ സ്ഥാപിക്കുന്നതുമായി ബന്ധപ്പെട്ട് എതിര്‍പ്പുകള്‍ മറികടക്കുന്നതിന് തദ്ദേശ സ്ഥാപനങ്ങള്‍ മൃഗസംരക്ഷണ വകുപ്പുമായി ചേര്‍ന്ന് പ്രാദേശികതലത്തില്‍ ബോധവത്കരണ കാമ്പയിനുകള്‍ നടത്തണം. തദ്ദേശ സ്ഥാപനങ്ങള്‍ തെരുവുനായ്ക്കളെ പിടിക്കുന്നത് സന്നദ്ധരായവരെ കണ്ടെത്തി മൃഗസംരക്ഷണ വകുപ്പിനെ അറിയിച്ചാല്‍ ജില്ലാതലത്തില്‍ പരിശീലനം നല്‍കും. തദ്ദേശഭരണ സ്ഥാപനങ്ങളുടെ 2025-26 വാര്‍ഷിക പദ്ധതി അംഗീകാരത്തിന്‍റെ പുരോഗതിയും യോഗ ത്തില്‍ അവലോകനം ചെയ്തു. തദ്ദേശസ്ഥാപനങ്ങളില്‍ നിര്‍മാണ പ്രവൃത്തിക്ക് അനുബന്ധമായി വരുന്ന ഇലക്‌ട്രിക്കല്‍ പ്രവൃത്തികള്‍ക്ക് യഥാസമയം എസ്റ്റിമേറ്റ് ലഭ്യമാകുന്നില്ലെന്ന പരാതി പരിഹരിക്കു ന്നതിന് കൂടുതല്‍ അംഗങ്ങളെ ഉള്‍പ്പെടുത്തി കമ്മിറ്റി വിപുലീകരിക്കുമെന്ന് ഡിപിസി അറിയിച്ചു. മയ്യില്‍ പഞ്ചായത്തിന്‍റെ 2025-26 വാര്‍ഷിക പദ്ധതി ഭേദഗതിക്ക് അംഗീകാരം നല്‍കി. പയ്യാവൂര്‍, ചപ്പാരപ്പടവ്, കൊട്ടിയൂര്‍, രാമന്തളി, കണിച്ചാര്‍ പഞ്ചായത്തുകളുടെയും പയ്യന്നൂര്‍ ബ്ലോക്ക് പഞ്ചായത്തിന്‍റെയും 2025-26 ഹെല്‍ത്ത് ഗ്രാന്‍ഡ് പ്രോജക്ടിന് അംഗീകാരം നല്‍കി. ഡിപിസി ചെയര്‍പേഴ്‌സണ്‍ രത്‌നകുമാരി, മെംബര്‍ സെക്രട്ടറി ജില്ലാ കളക്ടര്‍ അരുണ്‍ കെ. വിജയന്‍, ഡിപിസി അംഗങ്ങളായ ബിനോയ് കുര്യന്‍, വി. ഗീത, കെ. താഹിറ, ലിസി ജോസഫ്, ടി.ഒ. മോഹനന്‍, സര്‍ക്കാര്‍ നോമിനി കെ.വി. ഗോവിന്ദന്‍, ജില്ലാ പ്ലാനിംഗ് ഓഫീസര്‍ നെനോജ് മേപ്പടിയത്ത്, തദ്ദേശ അധ്യക്ഷന്‍മാര്‍, ജില്ലാ ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

കണ്ണൂർ വിമാനത്താവളത്തിൽ യാത്രക്കാർ 27 ശതമാനം വർധിച്ചു

മട്ടന്നൂർ: കണ്ണൂർ രാജ്യാന്തര വിമാനത്താവളത്തിൽ കഴിഞ്ഞ സാമ്പത്തിക വർഷം യാത്രക്കാരുടെ എണ്ണം 27 ശതമാനം വർധിച്ചു. 13.4 ലക്ഷം യാത്രക്കാരാണ് 2024-25 വർഷം കണ്ണൂർ വിമാനത്താവളം വഴി യാത്ര ചെയ്തത്. ആകെ 11,430 വിമാന സർവീസുകളാണ് നടത്തിയത്. അന്താരാഷ്‌ട്ര സർവീസുകളുടെ എണ്ണത്തിൽ 32 ശതമാനവും ചരക്കുനീക്കത്തിൽ 25 ശതമാനവും വർധനയുണ്ടായി. 4150 ടൺ ചരക്കുനീക്കം നടന്നു. 195 കോടി രൂപയുടെ വരുമാനമാണ് 2024-25 വർഷത്തിൽ കിയാലിനുണ്ടായത്. മുൻവർഷത്തേക്കാൾ വരുമാനത്തിൽ 93 ശതമാനത്തിന്‍റെ വർധന രേഖപ്പെടുത്തി. 101 കോടി രൂപയായിരുന്നു 2023-24 വർഷത്തെ വരുമാനം. പുതിയ സാമ്പത്തിക വർഷവും യാത്രക്കാരുടെ എണ്ണത്തിൽ മികച്ച വളർച്ചയുണ്ട്. ഏപ്രിലിൽ 1.38 ലക്ഷം പേരും മേയിൽ 1.48 ലക്ഷം പേരും കണ്ണൂർ വിമാനത്താവളം വഴി യാത്ര ചെയ്തു. ഏപ്രിലിൽ മുൻവർഷത്തെക്കാൾ 39 ശതമാനത്തിന്‍റെ വർധന യാത്രക്കാരുടെ എണ്ണത്തിലുണ്ടായി. ഏപ്രിലിൽ 20 കോടിയും മേയിൽ 21 കോടിയും വരുമാനവും കിയാൽ നേടി. ഈ സാമ്പത്തിക വർഷം 20 ലക്ഷം യാത്രക്കാരും 250 കോടി രൂപ വരുമാനവുമാണ് കിയാൽ ലക്ഷ്യം വയ്ക്കുന്നത്. നിരവധി പുതിയ സർവീസുകൾ ഒരു വർഷത്തിനിടെ കണ്ണൂരിൽ തുടങ്ങി. ഇൻഡിഗോ എയർലൈൻസ് ഡൽഹി, ഫുജൈറ, മസ്‌ക്കറ്റ്, ദമാം എന്നിവിടങ്ങളിലേക്ക് സർവീസുകൾ തുടങ്ങി. എയർഇന്ത്യ എക്‌സ്പ്രസ് മുംബൈ, ഹൈദരാബാദ് എന്നിവിടങ്ങളിലേക്കും സർവീസുകൾ തുടങ്ങി. കൂടുതൽ സർവീസുകൾ തുടങ്ങുന്നതിന് ആകാശ എയർ, സ്‌പൈസ് ജെറ്റ്, എയർകേരള, അൽഹിന്ദ് എയർ, സ്പിരിറ്റ് എയർ തുടങ്ങിയ കമ്പനികളുമായി ചർച്ചകൾ പുരോഗമിക്കുന്നതായി കിയാൽ അധികൃതർ അറിയിച്ചു. എയർപോർട്സ് കൗൺസിൽ ഇന്‍റർനാഷണൽ 2024 ൽ നടത്തിയ എയർപോർട്ട് സർവീസ് ക്വാളിറ്റി സർവേയിൽ എഷ്യാ-പസഫിക് മേഖലയിലെ മികച്ച വിമാനത്താവളമായി കണ്ണൂർ തെരഞ്ഞെടുക്കപ്പെട്ടിരുന്നു. രണ്ടു മില്യൺ യാത്രക്കാരിൽ കുറവുള്ള വിമാനത്താവളങ്ങളുടെ വിഭാഗത്തിലാണ് കിയാലിന്‍റെ നേട്ടം. വിമാനത്താവളത്തിൽ സ്ഥാപിക്കുന്ന നാലു മെഗാവാട്ടിന്‍റെ സോളാർ പവർ പദ്ധതിയുടെ ഉദ്ഘാടനം ജനുവരിയോടെ നടക്കും. ഇതോടൊപ്പം ഇലക്‌ട്രിക് വാഹനങ്ങളുടെ ചാർജിംഗ് സ്റ്റേഷൻ തുടങ്ങാനും പദ്ധതിയുണ്ട്. 59,000 ടൺ സംഭരണശേഷിയുള്ള പുതിയ കാർഗോ ടെർമിനലും വിമാനത്താവളത്തിൽ സജ്ജമാക്കിയിട്ടുണ്ട്.

453.6 ലിറ്റര്‍ മദ്യം പിടികൂടി; ഒരാള്‍ അറസ്റ്റില്‍

കാസര്‍ഗോഡ്: കാറിലും ഓട്ടോറിക്ഷയിലുമായി കടത്തിയ 453.6 ലിറ്റര്‍ മദ്യം പിടികൂടി. ഇതില്‍ 108 ലിറ്റര്‍ കര്‍ണാടക മദ്യവും 345.6 ലിറ്റര്‍ ഗോവന്‍ മദ്യവുമാണ് പിടികൂടിയത്. കാസര്‍ഗോഡ് കുഡ്‌ലു രാംദാസ് നഗറിലെ പുരുഷോത്തമയെ (31) അറസ്റ്റ് ചെയ്തു. മുഖ്യപ്രതിയായ അരവിന്ദാക്ഷ എന്ന അണ്ണു ഓടിരക്ഷപെട്ടു. ഞായറാഴ്ച രാത്രി എട്ടോടെ കാസര്‍ഗോഡ് എക്‌സൈസ് എന്‍ഫോഴ്സ്മെന്‍റ് ആന്‍ഡ് ആന്‍റി നര്‍ക്കോട്ടിക് സ്‌പെഷല്‍ സ്‌ക്വാഡിലെ എക്‌സൈസ് ഇന്‍സ്‌പെക്ടര്‍ ജെ. ജോസഫും സംഘവും അടുക്കത്ത്ബയലില്‍ നടത്തിയ പരിശോധയലാണ് മദ്യക്കടത്ത് പിടികൂടിയത്. ഒന്നാംപ്രതിയായ അരവിന്ദാക്ഷ അന്തര്‍സംസ്ഥാന മദ്യക്കടത്ത് സംഘത്തിലെ പ്രധാനിയാണ്. ഇയാള്‍ക്കെതിരെ സ്പിരിറ്റ് കടത്ത്, കര്‍ണാടക മദ്യം, ഗോവന്‍ മദ്യം എന്നിവ കടത്തിയതിന് കേസ് നിലവിലുണ്ട്. കേരള-കര്‍ണാടക അതിര്‍ത്തിയായ തലപ്പാടി കേന്ദ്രീകരിച്ചാണ് മദ്യക്കടത്തു സംഘം പ്രവര്‍ത്തിക്കുന്നത്. മാസങ്ങളോളം നീണ്ട നിരീക്ഷണത്തിന് ശേഷമാണ് കേസ് കണ്ടെത്തിയത്.

കോട്ടയം അതിരൂപത മലബാർ റീജിയന്‍ വിശ്വാസപരിശീലന വാർഷികം

മാലക്കല്ല്: കോട്ടയം അതിരൂപത വിശ്വാസ പരിശീലനം കമ്മീഷൻ മലബാർ റീജിയൻ വാർഷികവും മാലക്കല്ല് സെന്‍റ് മേരീസ് സൺഡേസ്കൂൾ വാർഷികവും മാലക്കല്ല് ലൂർദ് മാതാ പാരിഷ് ഹാളിൽ കോട്ടയം അതിരൂപത സഹായ മെത്രാൻ മാർ ജോസഫ് പണ്ടാരശേരിൽ ഉദ്ഘാടനം ചെയ്തു. അതിരൂപത മലബാർ മേഖല വിശ്വാസ പരിശീലന കമ്മീഷൻ ഡയറക്ടർ ഫാ. സൈജു മേക്കര അധ്യക്ഷത വഹിച്ചു. രാജപുരം ഫൊറോന വികാരി ഫാ. ജോസ് അരീച്ചിറ അനുഗ്രഹ പ്രഭാഷണം നടത്തി. പിടിഎ പ്രതിനിധി ബിനീഷ് വാണിയംപുരയിടത്തിൽ പ്രസംഗിച്ചു. വിശ്വാസ പരിശീലന മലബാർ സെക്രട്ടറി സിസ്റ്റർ ഷൈന എസ്‌വിഎം, മാലക്കല്ല് സൺഡേ സ്കൂൾ മുഖ്യാധ്യാപകൻ റിങ്കു ചിറപ്പുറത്ത് എന്നിവർ റിപ്പോർട്ടുകൾ അവതരിപ്പിച്ചു. മാലക്കല്ല് പള്ളി വികാരി ഫാ. ഡിനോ കുമ്മനിക്കാട്ട് സ്വാഗതവും ടോമി ചട്ടിക്കതോട്ടത്തിൽ നന്ദിയും പറഞ്ഞു. സെന്‍റ് മേരീസ് സൺഡേ സ്കൂൾ കുട്ടികളുടെ വിവിധ കലാപരിപാടികൾ അരങ്ങേറി. അസി. വികാരി ഫാ. ടിനോ ചാമക്കാല നേതൃത്വം നൽകി.

കൊട്ടിയൂരിൽ മൂന്ന് വർഷത്തിനുശേഷം ഇന്ന് ആലിംഗന പുഷ്പാഞ്ജലി

കൊട്ടിയൂർ: മൂന്ന് വർഷത്തിനുശേഷം ഇന്ന് കൊട്ടിയൂരിൽ വൈശാഖ ഉത്സവത്തിലെ ആലിംഗന പുഷ്പാഞ്ജലി നടക്കും. വൈശാഖ മഹോത്സവത്തിലെ പ്രധാന ആരാധനകളിൽ ഒന്നായ രോഹിണി ആരാധന നാളിൽ നടക്കുന്ന സുപ്രധാന ചടങ്ങാണ് ആലിംഗന പുഷ്പാഞ്ജലി. കുറുമാത്തൂർ നായ്ക്കൽ സ്ഥാനികനാണ് ആലിംഗന പുഷ്പാഞ്ജലി നടത്തുക. വാർധക്യ സഹജമായ കാരണങ്ങളാൽ നായ്ക്കൻ സ്ഥാനികന് ക്ഷേത്രത്തിലെത്താനാവാത്ത സാഹചര്യത്തിലാണ് മൂന്നു വർഷമായി ആലിംഗന പുഷ്പാഞ്ജലി നടക്കാതിരുന്നത്. പുതിയ നായ്ക്കൻ ചുമതല ഏറ്റെടുത്തതിനെ തുടർന്നാണ് ഇത്തവണ ആലിംഗന പുഷ്പാഞ്ജലി നടത്തുന്നത്. ദക്ഷൻ കൊട്ടിയൂരിൽ യാഗം നടത്തുന്നതറിഞ്ഞെത്തിയ മകൾ സതീദേവിയെയും ഭർത്താവ് ശിവനെയും ദക്ഷൻ അധിക്ഷേപിച്ചതിനെ തുടർന്ന് സതീദേവി യാഗാഗ്നിയിൽ ചാടി ആത്മഹത്യ ചെയ്തുവെന്നാണ് ഐതിഹ്യം. പത്നിയുടെ മരണവാർത്തയറിഞ്ഞ് ദുഃഖിതനായ ശിവനെ വിഷ്ണു ചേർത്തുപിടിച്ച് ആശ്വസിപ്പിച്ചതിന്‍റെ പ്രതീകമാണ് ആലിംഗന പുഷ്പാഞ്ജലി. പൂജ നടത്തുന്നയാൾ വിഗ്രഹത്തെ ആലിംഗനം ചെയ്തു നടത്തുന്ന പൂജാകർമം നടക്കുന്ന ഏക ക്ഷേത്രമാണ് കൊട്ടിയൂർ. ഈ വർഷത്തെ തൃക്കൂർ അരിയളവ് 26ന് നടക്കും.

കേന്ദ്ര കിസാന്‍ കൗണ്‍സില്‍ യോഗം 28 മുതൽ കണ്ണൂരിൽ

കണ്ണൂർ: അഖിലേന്ത്യാ കിസാന്‍ സഭയുടെ കേന്ദ്ര കിസാന്‍ കൗണ്‍സില്‍ യോഗം 28, 29, 30 തീയതികളില്‍ കണ്ണൂര്‍ നായനാര്‍ അക്കാഡമിയില്‍ നടക്കും. അഖിലേന്ത്യ കിസാന്‍ സഭ പ്രസിഡന്‍റ് അശോക് ധാവ്‌ളെ, സെക്രട്ടറി വിജൂ കൃഷ്ണന്‍, രാജസ്ഥാന്‍ എംപി അംറാ റാം ഉള്‍പ്പെടെയുള്ള ദേശീയ നേതാക്കള്‍ യോഗത്തില്‍ പങ്കെടുക്കുമെന്ന് സെക്രട്ടറി വത്സൻ പനോളി പത്രസമ്മേളനത്തിൽ അറിയിച്ചു. യോഗത്തിന്‍റെ സമാപനം കുറിച്ച് കണ്ണൂർ ടൗൺ സ്ക്വയറിൽ സ്വീകരണ സമ്മേളനവും നടക്കും. അഞ്ചാം ദേശീയ സമ്മേളനത്തിന് ശേഷം ആദ്യമായാണ് കേന്ദ്ര കിസാന്‍ കൗണ്‍സില്‍ യോഗം കണ്ണൂരില്‍ നടക്കുന്നത്. പരിപാടിയുടെ വിജയത്തിനായി എഐകെഎസ് അഖിലേന്ത്യാ വൈസ് പ്രസിഡന്‍റ് ഇ.പി. ജയരാജന്‍ ചെയര്‍മാനും എം. പ്രകാശൻ കൺവീനറുമായുള്ള സംഘാടക സമിതി രൂപീകരിച്ച് പ്രവർത്തനം ഊർജിതമാക്കി. കാർഷികരംഗം അതിസങ്കീർണമായ പ്രതിസന്ധിയിലൂടെയാണ് കടന്നുപോകുന്നത്. നേരത്തെ കോൺഗ്രസ് സർക്കാരും കഴിഞ്ഞ പത്തു വർഷത്തിലേറെയായി നരേന്ദ്ര മോദി സർക്കാരും നടപ്പാക്കിക്കൊണ്ടിരുന്ന കർഷക വിരുദ്ധ നയങ്ങൾ ഇന്ത്യയിലെ കൃഷിക്കാരെ തകർക്കുകയാണ്. ന്യായവില ലഭ്യമാകാതെയും കടക്കെണിയിൽപ്പെട്ടും ലക്ഷക്കണക്കിന് കൃഷിക്കാരാണ് ആത്മഹത്യ ചെയ്യുന്നത്. അമേരിക്കൻ പ്രസിഡന്‍റായി ട്രംപ് തെരഞ്ഞെടുക്കപ്പെട്ടതിനെ തുടർന്ന് ഇന്ത്യൻ കന്പോളം അമേരിക്കൻ കാർഷികോത്പന്നങ്ങൾ വിറ്റഴിക്കാനുള്ള ഒന്നാക്കി മാറ്റിയിരിക്കുകയാണെന്നും നേതാക്കൾ ആരോപിച്ചു. പത്രസമ്മേളനത്തിൽ എം. പ്രകാശൻ, പി. ഗോവിന്ദൻ, പി. പ്രശാന്തൻ എന്നിവരും പങ്കെടുത്തു.

എസ്എസ്എൽസി പരീക്ഷാ ചെലവുകൾ സ്കൂളുകൾക്ക് ബാധ്യതയായി

പെരുമ്പടവ്: എസ്എസ്എൽസി പരീക്ഷാ ചെലവുകൾ ബാധ്യതയായി സ്കൂളുകൾ. എസ്എസ്എൽ സി പരീക്ഷയ്ക്ക് മറ്റുള്ള സ്കൂളുകളിൽ നിന്നെത്തുന്ന അധ്യാപകരുടെ ചെലവുകൾ വഹിക്കേണ്ട ബാധ്യത അതതു സ്കൂളുകൾക്കാണ്. ഈ തുക പിന്നീട് സർക്കാർ നൽകുകയാണ് പതിവ്. കൂടാതെ എസ്എസ്എൽസി പരീക്ഷ എഴുതുന്ന വികലാംഗരായ കുട്ടികൾക്ക് ഒരു കുട്ടിക്ക് ഒരു ദിവസം നൂറു രൂപ വീതം നൽകണം. ഇങ്ങനെ ഒന്പതു ദിവസം 900 രൂപ ഒരു കുട്ടിക്ക് നൽകണം. പല സ്കൂളിലും ഈ വിഭാഗത്തിലെ നിരവധി കുട്ടികൾ പരീക്ഷ എഴുതാറുണ്ട്. കൂടാതെ സ്റ്റേഷനറി ചെലവ് ഉൾപ്പെടെ സ്കൂളുകൾക്ക് വലിയ ബാധ്യതയാണുണ്ടാകുന്നത്. ഇത് സർക്കാർ നൽകുമെന്ന് പറയുന്നെങ്കിലും കഴിഞ്ഞ നാലു വർഷമായി സർക്കാർ ഈ തുക സ്കൂളുകൾക്ക് നൽകിയിട്ടില്ല. ഇത് ഒരു വലിയ ബാധ്യതയായി നിലനിൽക്കുമ്പോഴാണ് കുട്ടികൾക്ക് ഒരു ദിവസം ബിരിയാണി കൂടി നൽകണമെന്ന പുതിയ ഉത്തരവ്. ഇതിന് ആവശ്യമായ ഫണ്ട് എപ്പോൾ എങ്ങനെ ലഭ്യമാക്കും എന്നു പറയുന്നില്ല. ഇപ്പോൾ തന്നെ മൂന്നും നാലും മാസം കൂടുമ്പോഴാണ് ഉച്ചഭക്ഷണത്തിന്‍റെ തുക നൽകുന്നത്. മാത്രവുമല്ല ബിരിയാണി പാകം ചെയ്യണമെങ്കിൽ വിദഗ്ധ തൊഴിലാളികൾ വേണ്ടിവരും. നിലവിൽ സ്കൂളിൽ ഉച്ചഭക്ഷണം തയാറാക്കുന്ന പലർക്കും ബിരിയാണി പാകം ചെയ്യാൻ അറിയില്ല. അതിനാവശ്യമായ വിദഗ്ധ തൊഴിലാളികളെ എത്തിക്കാൻ വലിയ തുക കണ്ടെത്തേണ്ടി വരും.

തേങ്ങവില പുതിയ ഉയരങ്ങളിലേക്ക്; തടം തുറക്കലിന്‍റെ തിരക്കിൽ കർഷകർ

കാസർഗോഡ്: പൊതുവിപണിയിൽ പച്ചത്തേങ്ങയുടെ വില 70 മുതൽ 80 വരെ രൂപയായി ഉയർന്നതോടെ തെങ്ങ് കർഷകർക്ക് വീണ്ടും നല്ലകാലമായി. വിപണിയിലെ ആവശ്യത്തിനൊത്ത് തേങ്ങ കിട്ടാനില്ലാത്ത സാഹചര്യത്തിൽ അടുത്തുതന്നെ വില 100 തൊടുമെന്നാണ് വ്യാപാരികളുടെ കണക്കുകൂട്ടൽ. കേരളത്തോടൊപ്പം അയൽസംസ്ഥാനങ്ങളായ തമിഴ്നാട്ടിലും കർണാടകത്തിലുമെല്ലാം കാലാവസ്ഥാ മാറ്റം മൂലം തേങ്ങ ഉത്പാദനം ഗണ്യമായി കുറഞ്ഞതാണ് വില ഉയരാൻ കാരണമായി പറയുന്നത്. വെളിച്ചെണ്ണയുടെ വിലയാണെങ്കിൽ ലിറ്ററിന് 400 രൂപയിലേക്ക് അടുക്കുകയാണ്. മഴക്കാലമായതോടെ കൊപ്രയ്ക്കും ക്ഷാമം തുടങ്ങിയത് വെളിച്ചെണ്ണ വില ഇനിയും ഉയരാനിടയാക്കുമെന്നാണ് കണക്കുകൂട്ടൽ. ഓണക്കാലമാകുമ്പോഴേക്കും തേങ്ങയും വെളിച്ചെണ്ണയുമെല്ലാം ഇതുവരെ എത്താത്ത പുതിയ ഉയരങ്ങളിലെത്തിയേക്കും. കഴിഞ്ഞ ഏതാനും വർഷങ്ങളിൽ വിലയിടിവ് മൂലം മനസ്സുമടുത്ത് തെങ്ങിന്‍റെ പരിചരണം തന്നെ ഉപേക്ഷിച്ചിരുന്ന കർഷകർ ഈ മഴക്കാലത്ത് വീണ്ടും തടംതുറക്കാനും വളമിടാനും തുടങ്ങിയിട്ടുണ്ട്. വിലയിടിവിനൊപ്പം തൊഴിലാളികളുടെ കൂലിച്ചെലവ് കൂടി താങ്ങാനാകാതെയാണ് ഇടക്കാലത്ത് തെങ്ങുകളുടെ പരിചരണം നിർത്തിവയ്ക്കേണ്ടിവന്നത്. വരും മാസങ്ങളിലും വില സാമാന്യം ഉയർന്നുതന്നെ നിന്നാൽ കൂലിച്ചെലവ് അതിലൂടെ നികത്താനാകുമെന്നാണ് കർഷകരുടെ പൊതുവേയുള്ള കണക്കുകൂട്ടൽ. ഇതോടൊപ്പം തെങ്ങിന്‍റെ മണ്ട വൃത്തിയാക്കാനും ചെല്ലികളെ നശിപ്പിക്കാനുമെല്ലാം ഈ വർഷം കർഷകർ മുന്നിട്ടിറങ്ങുന്നുണ്ട്. കഴിഞ്ഞവർഷം കൃഷിഭവനുകൾ മുഖേന തെങ്ങിൻതൈകൾ വിതരണം ചെയ്തപ്പോൾ അധികമാരും വാങ്ങാനില്ലാതെ കെട്ടിക്കിടന്നതിന്‍റെ സ്ഥാനത്ത് ഇപ്പോൾ പിലിക്കോട് കാർഷിക ഗവേഷണ കേന്ദ്രത്തിൽ നേരിട്ടെത്തി തൈകൾ വാങ്ങുന്നവരുടെ എണ്ണവും ഗണ്യമായി ഉയർന്നിട്ടുണ്ട്. പെട്ടെന്ന് കായ് ക്കുന്ന സങ്കരയിനം തൈകൾക്കാണ് ആവശ്യക്കാർ കൂടുതലുള്ളത്. നാടൻ തൈകൾക്ക് 50 രൂപയും സങ്കരയിനം തൈകൾക്ക് 125 രൂപയുമാണ് ഇവിടെ വിലയീടാക്കുന്നത്. സ്വകാര്യ നഴ്സറികളിൽ സങ്കരയിനം തൈകൾക്ക് 300 രൂപ മുതൽ 800 രൂപ വരെ വാങ്ങുന്നുണ്ട്. അടയ്ക്കയുടെ കാര്യത്തിലെന്നപോലെ വിലയേറുമ്പോഴും തേങ്ങയുടെ ഉല്പാദനക്കുറവും രോഗങ്ങളും കീടബാധയും കർഷകരെ കാര്യമായി വലയ്ക്കുന്നുണ്ട്. തേങ്ങയുടെയും വെളിച്ചെണ്ണയുടെയും വില കുത്തനെ ഉയർന്നത് ഇടത്തരം കുടുംബങ്ങളുടെ അടുക്കള ബജറ്റിനെയും താളംതെറ്റിച്ചിട്ടുണ്ട്. തേങ്ങയും വെളിച്ചെണ്ണയും പതിവായി ലകൊടുത്ത് വാങ്ങിയിരുന്ന നഗരമേഖലകളിലെ അണുകുടുംബങ്ങളെ വിലക്കയറ്റം കാര്യമായി ബാധിച്ചു. ഒരു തേങ്ങയ്ക്കു തന്നെ അൻപത് രൂപ നല്കി വാങ്ങേണ്ട അവസ്ഥയായെന്ന് പലരും പറയുന്നു. വെളിച്ചെണ്ണയും തൊട്ടാൽ പൊള്ളുന്ന നിലയായി. വെളിച്ചെണ്ണ വില ഉയർന്നതോടെ നേന്ത്രക്കായ ചിപ്സ് പോലുള്ള ഉത്പന്നങ്ങൾ നിർമിക്കുന്നവരിലധികവും മറ്റ് എണ്ണകൾ തേടിപ്പോകുന്ന നിലയിലാണ്.

പാൽവില വർധന നിർദേശവുമായി മിൽമ മേഖലാ യൂണിയനുകൾ

വൈ.എസ്. ജയകുമാർ കണ്ണൂർ: സംസ്ഥാനത്ത് പാൽ വില വർധിപ്പിക്കണമെന്ന നിർദേശവുമായി മിൽമ മേഖലാ യൂണിയനുകൾ. നിലവിൽ 52 രൂപയാണ് ഒരു ലിറ്റർ പാലിന്‍റെ വില. ക്ഷീര കർഷകർക്ക് സംഘങ്ങൾ നൽകുന്ന വില 46-48 രൂപയാണ്. മലബാർ മേഖലാ യൂണിയൻ യോഗം 28-ന് ചേർന്ന് പാൽവില സംബന്ധിച്ച തീരുമാനമെ‌ടുക്കും. തിരുവനന്തപുരം മേഖലാ യൂണിയൻ 25-ന് യോഗം വിളിച്ചിട്ടുണ്ട്. ക്ഷീരസംഘത്തിന് പാൽ നൽകുന്ന കർഷകർക്ക് ഉത്പാദനച്ചെലവ് കൂടിയിട്ടില്ലെന്ന കണക്കുകൂട്ടലാണ് മിൽമയുടേത്. ക്ഷീരകർഷകർക്ക് നൽകുന്ന സൈലേജ്, ചോളത്തണ്ട്, പുല്ല് എന്നിവയു‌ടെ വില ആറുവർഷം മുന്പ് നൽകിയിരുന്ന വിലയ്ക്കാണ് നൽകുന്നത്.കാലിത്തീറ്റയ്ക്ക് ഉൾപ്പെടെ സബ്സിഡി തുടരുകയും ചെയ്യുന്നു. അതിനാൽ മിൽമയ്ക്ക് പാൽ നൽകുന്ന കർഷകന് കാര്യമായ ഉത്പാദന ച്ചെലവ് കൂടിയിട്ടില്ലെന്നാണ് വിലയിരുത്തുന്നത്. അതേസമയം മറ്റ് കാലിത്തീറ്റകൾ, പിണ്ണാക്ക്, തവിട് എന്നിവയുടെ വില വർധിച്ചിട്ടുണ്ട്. ഇത് ഉത്പാദനച്ചെലവ് കൂട്ടാൻ ഇടയാക്കിയോന്ന് പരിശോധിച്ചശേഷം ആവശ്യമെങ്കിൽ പാൽ വില കൂട്ടും. ഉത്പാദനച്ചെലവ് വർധിച്ചിട്ടുണ്ടെങ്കിൽ പാൽ വില കൂട്ടാതെ ക്ഷീര കർഷകന് ആശ്വാസം നൽകുന്ന കാര്യവും പരിഗണനയിലുണ്ട്. മിൽമ പാൽ വില കൂട്ടിയാൽ അതിന്‍റെ ഗുണം സ്വകാര്യ ഡയറികൾക്കാകും ലഭിക്കുക. സംസ്ഥാനത്തിനു പുറത്തുനിന്ന് പാൽ എത്തിച്ച് നഗരങ്ങൾ മാത്രം കേന്ദ്രീകരിച്ച് കുറഞ്ഞ വിതരണ ചെലവിൽ പാൽ വിതരണം നടത്തുന്ന സ്വകാര്യ ഡയറികൾക്ക് വില വർധന നേട്ടമാകുമെന്നും പാൽ വാങ്ങുന്നവർ കൂടുതൽ വില നൽകേണ്ടിവരുമെന്നും ചൂണ്ടിക്കാണിക്കപ്പെടുന്നു. കടുത്ത വേനലുണ്ടായിരുന്ന ഏപ്രിൽ, മേയ് മാസങ്ങളിൽ സംസ്ഥാനത്ത് 16 ശതമാനം പാൽ ഉത്പാദനം കൂടി. മുൻ വർഷങ്ങളിലേതിനേക്കാൾ 1,70,000 ലിറ്റർ പാൽ മിൽമ കൂടുതൽ സംഭരിച്ചു. അതിനാൽ മുൻ വർഷങ്ങളിൽ ഏഴു ലക്ഷം ലിറ്റർ പാൽ ഇതര സംസ്ഥാനങ്ങളിൽനിന്നു വാങ്ങിയിരുന്നത് അഞ്ചര ലക്ഷമാക്കി കുറയ്ക്കാനായി. അതിനാൽ പാൽ വില വർധിപ്പിക്കാതെ ക്ഷീര കർഷകർക്ക് ആശ്വാസം നൽകുന്ന പദ്ധതികൾ നടപ്പാക്കുന്നത് പരിഗണനയിലുണ്ടെന്ന് മിൽമ ചെയർമാൻ കെ.എസ്. മണി പറഞ്ഞു. കഴിഞ്ഞ 12 മാസവും കർഷകന് കാലിത്തീറ്റ സബ്സിഡി നൽകി. കഴിഞ്ഞ വർഷം 253 കോടി രൂപയും മുൻവർഷം 148 കോടി രൂപയും മിൽമ ക്ഷീര കർഷകന് സഹായം നൽകി. അടുത്ത വർഷവും സഹായം തുടരുന്നത് പരിഗണിക്കുന്നതായി അദ്ദേഹം വ്യക്തമാക്കി. മേഖലാ യൂണിയനുകൾ പാൽ വില വർധന ആവശ്യപ്പെടുകയും മിൽമ തീരുമാനിക്കുകയും ചെയ്താലും സർക്കാർ അംഗീകരിച്ചാൽ മാത്രമേ നടപ്പാക്കാനാകൂ.

ആറളം ഫാമിൽ നാടൻ തോക്ക് കണ്ടെടുത്തു

ഇരിട്ടി : ആറളം ഫാമിലെ ബ്ലോക്ക് ഒന്നിനും അഞ്ചിനുമിടയിലായുള്ള സ്ഥലത്തുനിന്ന് നാടൻ തോക്ക് കണ്ടെത്തി. മരത്തിനു ചുവട്ടിൽ ഒളിപ്പിച്ചുവച്ച നിലയിലുള്ള തോക്ക് തൊഴിലാളികളാണ് കണ്ടത്. തുടർന്ന് ഫാം എംഡിയെ വിവരമറിയിക്കുകയായിരുന്നു. ഫാം അധികൃതർ അറിയിച്ചതിനെ തുടർന്ന് പോലീസും വനംവകുപ്പും സ്ഥലത്തെത്തി പരിശോധിച്ചു. തോക്ക് ആറളം പോലീസ് കസ്റ്റഡിയിലെടുത്ത് സ്റ്റേഷനിലേക്ക് മാറ്റി. മണ്ണ് കയറി തുരുമ്പിച്ച നിലയിലായിരുന്നു തോക്ക്. നായാട്ടുസംഘം ഒളിപ്പിച്ച ശേഷം തിരിച്ചെടുക്കാൻ കഴിയാത്തതായിരിക്കുമെന്നാണ് പ്രാഥമിക നിഗമനം. ആറളം ഫാം മേഖലയിൽ നായാട്ട് സംഘം സജീവമാണെന്ന് വ്യക്തമാക്കുന്നതാണ് തോക്ക് കണ്ടെത്തിയ സംഭവം. ആറളം ഫാമിൽ നിന്ന് കണ്ടെത്തുന്ന മൂന്നാമത്ത് തോക്കാണ് ഇത്. ആന ചവിട്ടിയൊടിച്ച നിലയിലും ബാരൽ വളഞ്ഞനിലയിലുമായിരുന്നു നേരത്തെ രണ്ട് തോക്കുകൾ കണ്ടെത്തിയത്.ആദ്യം തോക്ക് കണ്ടെത്തിയ സ്ഥലത്തും മറ്റിടങ്ങളിലും ബോംബ് സ്‌ക്വാഡും പോലീസും പരിശോധന നടത്തിയിരുന്നെങ്കിലും ഒന്നും കിട്ടിയിരുന്നില്ല.

റാഫ്റ്റിംഗിനിടെ കുഴഞ്ഞുവീണു മരിച്ചു

ചെറുപുഴ: റാഫ്റ്റിംഗിനിടെ മാഹി പെരിങ്ങാടി സ്വദേശി പുഴയിൽ കുഴഞ്ഞുവീണു മരിച്ചു. പെരിങ്ങാടി, വയലക്കണ്ടി സ്പിന്നിംഗ് മിൽ റോഡിൽ പനച്ചുള്ളതിൽ സൂബൈദ വില്ലയിൽ തലശേരിയിലെ കൊളത്തായി യൂസഫ് (55) ആണ് മരിച്ചത്. ഇന്നലെ ഉച്ചയ്ക്ക് 12 ഓടെ കാര്യങ്കോടു പുഴയുടെ പൊയ്യക്കടവ് ഭാഗത്തായിരുന്നു സംഭവം. റാഫ്റ്റിംഗ് അവസാനിക്കുന്നതിനിടെ പുഴയിൽ കുളിച്ചുകൊണ്ടിരിക്കെ ക്ഷീണം അനുഭവപ്പെട്ട യൂസഫിനെ ഉടൻ തന്നെ കൂടെയുണ്ടായിരുന്ന ബന്ധുക്കൾ ചെറുപുഴ സെന്‍റ് സെബാസ്റ്റ്യൻസ് ആശുപത്രിയിൽ എത്തിച്ചുവെങ്കിലും ജീവൻ രക്ഷിക്കാനായില്ല. ഇന്നലെ രാവിലെ 10 ഓടെയാണ് യൂസഫ് ഉൾപ്പെടെയുള്ള ആറംഗ സംഘം റാഫ്റ്റിംഗിനായി ചെറുപുഴയിൽ എത്തിയത്.മൃതദേഹം പരിയാരം മെഡിക്കൽ കോളജിൽ. ഭാര്യ: പെരിങ്ങാടി സുബൈദ വില്ലയിൽ സുബൈദ. മക്കൾ: ഷഹബാസ് (ദുബായ്), ഷക്കീബ്, ഷയാൻ.

വാടക വീട്ടില്‍ മരിച്ച നിലയില്‍

പരിയാരം: വിളയാങ്കോട് വാടക വീട്ടില്‍ കഴിഞ്ഞിരുന്നയാള്‍ മരിച്ച നിലയില്‍. മാതമംഗലം താറ്റ്യേരി സ്വദേശി അക്കരക്കാരന്‍ കമലാക്ഷനെയാണ് (57) മരിച്ച നിലയില്‍ കണ്ടെത്തിയത്. ഇന്നലെ ഉച്ചകഴിഞ്ഞ് രണ്ടോടെയാണ് കമലാക്ഷന്‍ വിളയാങ്കോട് സ്വാമീസ് ഹോട്ടലിനു സമീപത്തെ വാടകവീട്ടില്‍ മരിച്ചു കിടക്കുന്നതായി കണ്ടെത്തിയത്. ഭാര്യയുമായ വേര്‍പിരിഞ്ഞ കമലാക്ഷന്‍ വര്‍ഷങ്ങളായി ഇവിടെയായിരുന്നു താമസം. കുറച്ചുനാളുകളായി ചികിത്സയിലായിരുന്നു. മൃതദേഹത്തിന് രണ്ടുദിവസത്തെ പഴക്കമുണ്ട്. പരിയാരം മെഡിക്കല്‍ കോളജ് പോലീസ് ഇന്‍ക്വസ്റ്റ് നടത്തിയ മൃതദേഹം മെഡിക്കല്‍ കോളജ് മോര്‍ച്ചറിയില്‍. പരേതരായ വര്‍ഗീസ്-ജാനകി ദമ്പതികളുടെ മകനാണ്. മക്കള്‍: അഭിജിത്ത്, അശ്വജിത്ത്, അമല്‍ജിത്ത്. സഹോദരങ്ങള്‍: സുഹാസിനി, ബാബു, ബീന, സുഭാഷ്, സുധീഷ്.

കുറ്റിക്കകം പ്രദേശത്ത് മൂന്നു പേർക്കു പേപ്പട്ടിയുടെ കടിയേറ്റു

എടക്കാട്: കുറ്റിക്കകം മുനമ്പിലെ എരിഞ്ഞിക്കൽ അമ്പലം, അയ്യാറകത്ത് പാലം പ്രദേശത്ത് മൂന്നുപേർക്കു പേപ്പട്ടിയുടെ കടിയേറ്റു. ഇന്നലെ ഉച്ചയോടെ രണ്ട് സ്ത്രീകളെ വീട്ടുമുറ്റത്ത് നിന്നും മറ്റൊരാളെ വഴിയിൽ നിന്നുമാണ് ആക്രമിച്ചത്. കാലിനും കൈക്കും കടിയേറ്റ കുറ്റിക്കകം മുനമ്പ് സ്വദേശികളായ സി.പി. നിവാസിൽ പ്രീജ (55), തറമ്മൽ ശാന്താലയത്തിൽ എം. ശൈലജ (52), ചെമ്പിലോടൻ ഹൗസിൽ സി. അനിൽകുമാർ (55) എന്നിവരെ തലശേരി ഗവ. ആശുപത്രിയിൽ പ്രവേശിപ്പിച്ചു. രണ്ടുദിവസം മുമ്പ് ഏഴരയിലും കിഴുന്നപ്പാറയിലും കുറുനരിയുടെ കടിയേറ്റ് നാലുപേർക്ക് പരിക്കേറ്റിരുന്നു. ഇതിൽ ഒരാളുടെ കൈവിരലും നഷ്ടപ്പെട്ടിരുന്നു. നിരന്തരം കുറുനരിയുടെയും തെരുവുനായ്ക്കളുടെയും ആക്രമണം നടക്കുന്നതിൽ കുറ്റിക്കകം, കിഴുന്ന നിവാസികൾ ഭീതിയിലാണ്.

യുവതിയുടെ ആത്മഹത്യ: സിപിഎം ജില്ലാ സെക്രട്ടറിയുടെ പ്രസ്താവനകൾ ജനരോഷം മറച്ചുവയ്ക്കാൻ- എസ്ഡിപിഐ

കണ്ണൂര്‍: ധര്‍മടം കായലോട് പറമ്പായിയില്‍ ഭര്‍തൃമതിയായ യുവതി ജീവനൊടുക്കിയ സംഭവത്തില്‍ സിപിഎം നടത്തിയ നുണ പ്രചാരണങ്ങൾക്കെതിരെയുള്ള നാട്ടുകാരുടെ പ്രതിഷേധം മറച്ചു വെക്കാൻ ജില്ലാ സെക്രട്ടറി കെ.കെ.രാഗേഷ് ജല്പനങ്ങൾ നടത്തുകയാണെന്ന് എസ്ഡിപിഐ സംസ്ഥാന ജനറല്‍ സെക്രട്ടറി കെ.കെ. അബ്ദുല്‍ ജബ്ബാര്‍. പാര്‍ട്ടിയംഗങ്ങളായ യുവതിയുടെ മാതാപിതാക്കള്‍ക്ക് നീതി വാങ്ങിക്കൊടുക്കാന്‍ ശ്രമിക്കേണ്ട സിപിഎം അതിനു വിരുദ്ധമായ നിലപാട് സ്വീകരിക്കുന്നത് എന്തടിസ്ഥാനത്തിലാണെന്ന് കെ.കെ. രാഗേഷ് വ്യക്തമാക്കണമെന്നും അബ്ദുൾ ജബ്ബാർ ആവശ്യപ്പട്ടു. അസാന്മാര്‍ഗികതയ്ക്കു കൂട്ടുനില്‍ക്കുന്നത് ന്യായീകരിക്കാനാണ് സദാചാര വിചാരണയെന്ന വാദം സിപിഎം ഉന്നയിക്കുന്നത്. എസ്ഡിപിഐ സ്ത്രീ വിരുദ്ധമെന്ന രാഗേഷിന്‍റെ വാദം ശുദ്ധ അസംബന്ധമാണ്. എസ്ഡിപിഐ പാര്‍ട്ടി ഓഫീസിനു മുന്നിലൂടെ സ്ത്രീകള്‍ക്ക് നടക്കാന്‍ കഴിയുന്നില്ല എന്ന ആക്ഷേപം ഉന്നയിക്കുന്നവര്‍ ഇത് മുഖ്യമന്ത്രിയുടെ നാടാണെന്ന് ഓർക്കണം. അങ്ങിനെ ഒരു സാഹചര്യമുണ്ടെങ്കിൽ ആഭ്യന്തര ചുമതല വഹിക്കുന്ന മുഖ്യമന്ത്രി രാജി വയ്ക്കുകയാണ് ആദ്യം ചെയ്യേണ്ടതെന്നും കെ.കെ. അബ്ദുല്‍ ജബ്ബാര്‍ പത്രസമ്മേളനത്തിൽ ആവശ്യപ്പെട്ടു. പത്രസമ്മേളനത്തിൽ എസ്ഡിപിഐ കണ്ണൂര്‍ ജില്ലാ പ്രസിഡന്‍റ് ബഷീര്‍ കണ്ണാടിപ്പറമ്പ്, ജില്ലാ സെക്രടറി പി.സി. ഷെഫീഖ്, ജില്ലാ കമ്മിറ്റിയംഗം റുബീന എന്നിവരും പങ്കെടുത്തു.

ഓൺലൈൻ ട്രേഡിംഗ്; തലശേരി സ്വദേശിനിയുടെ 12 ലക്ഷം തട്ടിയെടുത്ത പാലക്കാട് സ്വദേശികൾ ‍അറസ്റ്റിൽ

കണ്ണൂർ: ഫേസ്ബുക്ക് വഴി ബന്ധപ്പെട്ട് ഓൺലൈൻ ട്രേഡിംഗ് വഴി പണം സമ്പാദിക്കാം എന്നു പറഞ്ഞു വിശ്വസിപ്പിച്ച് തലശേരി സ്വദേശിനിയുടെ പണം തട്ടിയ രണ്ടു പേർ അറസ്റ്റിൽ. തലശേരി സ്വദേശിനി യുടെ 12,06,000 രൂപ തട്ടിയെടുത്ത കേസിൽ പാലക്കാട് സ്വദേശികളായ ടി.എം. മുഹമ്മദ് മൊയിനുദ്ദീൻ, വി.പി. അഖിൽ എന്നിവരേയാണ് കണ്ണൂർ സിറ്റി അഡീഷണൽ എസ്പി സജേഷ് വാഴാളാപ്പിലിന്‍റെ നിർദേശ പ്രകാരം കണ്ണൂർ സൈബർ ക്രൈം പോലീസ് ഇൻസ്പെക്ടർ മഹേഷ് കണ്ടബേത്ത് അറസ്റ്റു ചെയ്തത്. പരാതിക്കാരിയെ ഫേസ്ബുക്ക് വഴി ബന്ധപ്പെട്ട് ഓൺലൈൻ ട്രേഡിംഗ് വഴി പണം സമ്പാദിക്കാം എന്നു പറഞ്ഞു വിശ്വസിപ്പിച്ച് വിവിധ അക്കൗണ്ടുകളിലേക്ക് 12,06,000 രൂപ പല തവണകളായി നിക്ഷേപിപ്പിക്കുകയായിരുന്നു. അറസ്റ്റിലായ മുഹമ്മദ് മൊയിനുദ്ദീൻ എന്നയാളുടെ അക്കൗണ്ടിലേക്ക് 1,35,000 രൂപ ട്രാൻസ്ഫർ ചെയ്യിപ്പിച്ചാണ് തട്ടിപ്പ് നടത്തിയത്. അറസ്റ്റു ചെയ്ത പ്രതി അഖിൽ എന്നയാളാണ് അക്കൗണ്ടുകൾ സംഘടിപ്പിച്ച് സൈബർ തട്ടിപ്പുകാർക്ക് എത്തിച്ച് കൊടുക്കുന്നത്. ടിയാന്‍റെ കൈയിൽനിന്ന് മറ്റ് ആൾക്കാരുടെ പേരിൽ എടുത്തതായ15 ഓളം ബാങ്ക് പാസ്ബുക്കുകളും എടിഎം കർഡുകളും ചെക്ക് ബുക്കുകളും കണ്ടെടുത്തിട്ടുണ്ട്. പിടിച്ചെ ടുത്ത അക്കൗണ്ടുകളുമായി ബന്ധപ്പെട്ട് കേരളത്തിലും പുറത്തുമായി ധാരാളം പരാതികൾ രജിസ്റ്റർ ചെയ്തതായി കണ്ടെത്തിയിട്ടുണ്ട്. സബ് ഇൻസ്പെക്ടർ ടി.പി. പ്രജീഷ്, അസിസ്റ്റന്‍റ് സബ് ഇൻസ്പെക്ടർ ജ്യോതി, സിപിഒ മാരായ സുനിൽ, ഷിനോജ് എന്നിവരാണ് അന്വേഷണ സംഘത്തിൽ ഉണ്ടായിരുന്നത്.

മണികണ്ഠന്‍റെ രാജിക്കു കാരണം അയോഗ്യതാഭീഷണി: കോണ്‍ഗ്രസ്

കാസര്‍ഗോഡ്: ശരത്‌ലാല്‍-കൃപേഷ് ഇരട്ട കൊലപാതകത്തില്‍ ശിക്ഷിക്കപ്പെട്ട കാഞ്ഞങ്ങാട് ബ്ലോക്ക് പഞ്ചായത്ത് പ്രസിഡന്‍റും സിപിഎം നേതാവുമായ കെ. മണികണ്ഠന്‍ ഇപ്പോള്‍ രാജിവെച്ചത് തെരഞ്ഞെടുപ്പ് കമ്മീഷന്‍ ഇയാളെ അയോഗ്യന്‍ ആക്കുമെന്ന സൂചനയെ തുടര്‍ന്നാണെന്ന് ഡിസിസി പ്രസിഡന്‍റ് പി.കെ. ഫൈസല്‍. മണികണ്ഠനെ അയോഗ്യനാക്കണമെന്ന് ആവശ്യപ്പെട്ടുകൊണ്ട് കോണ്‍ഗ്രസ് പാര്‍ട്ടി നേതൃത്വത്തിന്‍റെ നിര്‍ദേശ പ്രകാരം കാഞ്ഞങ്ങാട് ബ്ലോക്ക് പഞ്ചായത്ത് അംഗവും കോണ്‍ഗ്രസ് നേതാവുമായ അഡ്വ. ബാബുരാജ് ഇലക്ഷന് കമ്മീഷണര്‍ക്ക് പരാതി നല്‍കിയിരുന്നു. ജൂണ്‍ 26 ന് അന്തിമ വാദം പൂര്‍ത്തീകരിക്കുകയാണ്. മണികണ്ഠനെ ഇലക്ഷന്‍ കമ്മീഷന്‍ അയോഗ്യനാക്കുന്നതിനു വേണ്ടിയുള്ള നിയമ പോരാട്ടങ്ങളുമായി പാര്‍ട്ടിനേതൃത്വം മുന്നോട്ട് പോകുമെന്നും കേസില്‍ ശിക്ഷിക്കപ്പെട്ട ഉടനെ തന്നെ മണികണ്ഠന്‍ രാജി വെക്കാനുള്ള ധാര്‍മികബോധം കാണിക്കണമായിരുന്നു എന്നും ഫൈസല്‍ പറഞ്ഞു.

മലപ്പട്ടത്ത് ഗാന്ധിയാത്രയും പ്രതിമ അനാഛാദനവും നാളെ

കണ്ണൂർ: മലപ്പട്ടത്ത് ജില്ലാ കോൺഗ്രസ് കമ്മിറ്റി സംഘടിപ്പിക്കുന്ന ഗാന്ധിയാത്രയും ഗാന്ധി പ്രതിമ അനാഛാദനവും നാളെ നടക്കും. രാഷ്‌ട്രപിതാവ് മഹാത്മാഗാന്ധിയുടെയും ഇന്ത്യയുടെ പ്രഥമ പ്രധാനമന്ത്രി ജവഹർലാൽ നെഹ്റുവിന്‍റെയും സ്മരണകളെ പോലും തമസ്കരിക്കുന്ന രീതിയിൽ ചരിത്രം മാറ്റിയെഴുതുന്ന കേന്ദ്ര-സംസ്ഥാന ഭരണകൂടങ്ങളെ തുറന്നുകാട്ടിയാണ് ഗാന്ധി യാത്ര സംഘടിപ്പിക്കുന്നതെന്ന് ഡിസിസി പ്രസിഡന്‍റ് മാർട്ടിൻ ജോർജ് അറിയിച്ചു. ഈ മാസം ആറിന് നടത്താനിരുന്ന പരിപാടി കെപിസിസി മുൻ പ്രസിഡന്‍റ് തെന്നല ബാലകൃഷ്ണ പിള്ളയുടെ നിര്യാണത്തെ തുടർന്നാണ് മാറ്റിവച്ചത്. മലപ്പട്ടം സ്ക്വയറിലാണ് ഗാന്ധി പ്രതിമ അനാഛാദനം ചെയ്യുക. ഗാന്ധിജിയേയും നെഹ്റുവിനെയും ഇകഴ്ത്തി നമ്മുടെ മഹത്തായ പൈതൃകത്തെ തകർക്കുന്ന രീതിയിൽ അഭിനവ ഗോഡ്‌സേമാർ വിളയാടുന്ന വർത്തമാന സാഹചര്യത്തിൽ അതിനെതിരായ പ്രതിരോധം തീർക്കുകയെന്ന ലക്ഷ്യത്തോടെയാണ് ഗാന്ധിയാത്ര. നമ്മുടെ ജനാധിപത്യത്തെ ദുർബലപ്പെടുത്തുന്ന സമീപനങ്ങളെ തുറന്നു കാട്ടുകയെന്ന ലക്ഷ്യവും യാത്രയ്ക്കുണ്ട്. -മാർട്ടിൻ പറഞ്ഞു. നാളെ ഉച്ചകഴിഞ്ഞ് മൂന്നിന് മലപ്പട്ടം ഗവ. സ്കൂൾ പരിസരത്തുനിന്നും ആരംഭിക്കുന്ന യാത്ര മലപ്പട്ടം സ്ക്വയറിൽ സമാപിക്കും. കെപിസിസി പ്രസിഡന്‍റ് സണ്ണി ജോസഫ്, കെപിസിസി വർക്കിംഗ് പ്രസിഡന്‍റുമാരായ പി.സി. വിഷ്ണുനാഥ് എംഎൽഎ, എ.പി. അനിൽകുമാർ എംഎൽഎ, ഷാഫി പറമ്പിൽ എംപി, യൂത്ത് കോൺഗ്രസ് സംസ്ഥാന പ്രസിഡന്‍റ് രാഹുൽ മാങ്കൂട്ടത്തിൽ എംഎൽഎ തുടങ്ങി പ്രമുഖ നേതാക്കൾ സംബന്ധിക്കുമെന്ന് മാർട്ടിൻ ജോർജ് അറിയിച്ചു.

കാലിത്തീറ്റയുമായി വന്ന ലോറി മറിഞ്ഞു

ആലക്കോട്: കാപ്പിമലയിൽ മിൽമ കാലിത്തീറ്റയുമായി വന്ന ലോറി അപകടത്തിൽപ്പെട്ടു. ശനിയാഴ്ച രാത്രിയിലാണ് സംഭവം. ആനക്കുഴി വലിയവളവിൽ നിയന്ത്രണം വിട്ടു മറിഞ്ഞ ലോറി മുകളിൽ നിന്ന് താഴത്തേവളവിലെ റോഡിലേക്ക് പതിക്കുകയായിരുന്നു. വണ്ടിയുടെ ബ്രേക്ക് നഷ്ടപ്പെട്ടതാണ് അപകട കാരണമെന്ന് പറയപ്പെടുന്നു. ഡ്രൈവർ വണ്ടിയിൽ നിന്ന് ചാടിയതിനാൽ പരിക്കേൽക്കാതെ രക്ഷപ്പെട്ടു.

ഹോമിയോ പ്രതിരോധ മരുന്ന് വിതരണം

കരുവഞ്ചാൽ: ടിഎസ്എസ്എസ് ട്രസ്റ്റ് കരുവഞ്ചാൽ, കരുവഞ്ചാൽ ലിറ്റിൽ ഫ്ലവർ ഇടവക മാതൃവേദി, നടുവിൽ ആയുഷ് ഹോമിയോ എന്നിവയുടെ സംയുക്താഭിമുഖ്യത്തിൽ ഡെങ്കിപ്പനിക്കെതിരെയുള്ള ഹോമിയോ പ്രതിരോധ മരുന്ന് വിതരണവും ബോധവത്കരണ ക്ലാസും നടത്തി. ഇടവക കോ-ഓർഡിനേറ്റർ തോമസ് ചാഞ്ഞപ്ലാക്കലിന് പ്രതിരോധ മരുന്ന് നൽകി പഞ്ചായത്തംഗം ബാലകൃഷ്ണൻ ഉദ്ഘാടനം ചെയ്തു. യൂണിറ്റ് ഡയറക്ടർ ഫാ. ജോസഫ് ഈനാച്ചേരിയിൽ അധ്യക്ഷത വഹിച്ചു. ടിഎസ്എസ്എസ് ട്രസ്റ്റ് കരുഞ്ചാൽ യൂണിറ്റ് പ്രസിഡന്‍റ് ബെന്നി ഇലവുങ്കൽ, തോമസ് ചാഞ്ഞപ്ലാക്കൽ, ജസി ജയിംസ് മറ്റത്തിൽ എന്നിവർ പ്രസംഗിച്ചു. ഡോ. വിധു ബോധവത്കരണ ക്ലാസ് നയിച്ചു. വായാട്ടുപറമ്പ്: തടിക്കടവ് സർക്കാർ ഹോമിയോ ആശുപത്രിയുടെ ആഭിമുഖ്യത്തിൽ കർഷക സ്നേഹ ജനശ്രീ യൂണിറ്റ് ബാലപുരം, വെൽഫയർ സൊസൈറ്റി ബാലപുരം എന്നിവയുടെ സഹകരണത്തോടെ വായാട്ടുപറമ്പ് അങ്കണവാടിയിൽ സൗജന്യ ഹോമിയോ മെഡിക്കൽ ക്യാമ്പും പകർച്ചപ്പനി പ്രതിരോധ മരുന്ന് വിതരണവും നടന്നു. ചപ്പാരപ്പടവ് പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ തങ്കമ്മ സണ്ണി ഉദ്ഘാടനം ചെയ്തു. ജോസ് വെട്ടുകല്ലാംകുഴിയിൽ അധ്യക്ഷത വഹിച്ചു. സെബാസ്റ്റ്യൻ പറമ്പിൽ, ജോഷി പൂങ്കുടിയിൽ, സജി നിരപ്പേൽ എന്നിവർ പ്രസംഗിച്ചു. ഡോ. ജി. മേഘ, ഡോ. വി.എസ്. വിധു എന്നിവർ ക്ലാസുകൾക്ക് നേതൃത്വം നൽകി.

കരുവഞ്ചാൽ വൈഎംസിഎക്ക് പുതിയ ഭാരവാഹികൾ

കരുവഞ്ചാൽ: കരുവഞ്ചാൽ വൈഎംസിഎയുടെ പുതിയ ഭാരവാഹികൾ സ്ഥാനമേറ്റു. ആശാനഗറിലെ വൈഎംസിഎ ഇൻഡോർ കോർട്ടിൽ നടന്ന സ്ഥാനാരോഹണ ചടങ്ങ് സജീവ് ജോസഫ് എംഎൽഎ ഉദ്ഘാടനം ചെയ്തു. പ്രസിഡന്‍റ് സാബു ചാണാക്കാട്ടിൽ അധ്യക്ഷത വഹിച്ചു. പോൾ ജോർജ് മേച്ചേരിൽ-പ്രസിഡന്‍റ്, പ്രിൻസ് ആന്‍റണി-സെക്രട്ടറി, കെ.വി. ജോർജ്കുട്ടി-ട്രഷറർ എന്നിവരുടെ നേതൃത്വത്തിലുള്ള ഭാരവാഹികളാണ് സ്ഥാനമേറ്റത്. കണ്ണൂർ സബ് റീജിയൻ ചെയർമാൻ ബെന്നി ജോൺ, വനിതാ ഫോറം സബ്-റീജിയൻ ചെയർപേഴ്സൺ ടിന്‍റു ബിജി ഇൻസ്റ്റലേഷൻ നിർവഹിച്ചു. മത്തായി വീട്ടിയാങ്കൽ, ഫാ. ജോസഫ് ഈനാച്ചേരിൽ, പോൾ ജോർജ് മേച്ചേരിൽ, ഷാജി ജോസഫ്, പി.എ. ബേബി, ജയിംസ് പുത്തൻപുര, ഡോ. കെ.എം. തോമസ് എന്നിവർ പ്രസംഗിച്ചു.

കർഷക സംഘം വില്ലേജ് സമ്മേളനം

പയ്യാവൂർ: വളത്തിന്‍റെയും കീടനാശിനികളുടെയും അമിതമായ വിലവർധന ഉടൻ പിൻവലിക്കണമെന്നും കർഷകർ ഏറ്റവും അധികം ഉപയോഗിക്കുന്ന യൂറിയ ഉൾപ്പെടെയുള്ള വളങ്ങൾക്ക് നൽകിയിരുന്ന സബ്സിഡി ഗണ്യമായി കുറച്ചത് പുനഃസ്ഥാപിക്കണമെന്നും കേരള കർഷക സംഘം പയ്യാവൂർ വില്ലേജ് സമ്മേളനം ആവശ്യപ്പെട്ടു. പയ്യാവൂർ പുളുക്കൂൽ കുഞ്ഞിരാമൻ സ്മാരക മന്ദിരത്തിൽ ചേർന്ന കർഷക സംഘം ജില്ലാ കമ്മിറ്റിയംഗം പി.വി. ബാബുരാജ് സമ്മേളനം ഉദ്ഘാടനം ചെയ്തു. പി.സി. ജയിംസ് അധ്യക്ഷത വഹിച്ചു. എം.സി. നാരായണൻ, കെ.പി. കുമാരൻ, ജിൽസൺ ആന്‍റണി, സാജു സേവ്യർ എന്നിവർ പ്രസംഗിച്ചു. ഭാരവാഹികളായി പി.സി. ജയിംസ്-പ്രസിഡന്‍റ്, ബിജു തളിയിൽ, കെ. ദാസൻ- വൈസ് പ്രസിഡന്‍റുമാർ, ഷൈലേഷ് കുമാർ-സെക്രട്ടറി, കെ.കെ. ഷൈലജ, കെ.ആർ. ഗിരീഷ്-ജോയിന്‍റ് സെക്രട്ടറിമാർ, ടിറ്റി ജോസഫ്-ട്രഷറർ എന്നിവരെ തെരഞ്ഞെടുത്തു. ചെറുപുഴ: കേരള കർഷക സംഘം ചെറുപുഴ വില്ലേജ് സമ്മേളനം ചെറുപുഴ എൻഎസ്എസ് ഓഡിറ്റോറിയത്തിൽ നടന്നു. വില്ലേജ് പ്രസിഡന്‍റ് എം.വി. ശശി പതാക ഉയർത്തി. ജില്ലാ കമ്മിറ്റിയംഗം പി. ഗംഗാധരൻ ഉദ്ഘാടനം ചെയ്തു. എം.വി. ശശി അധ്യക്ഷത വഹിച്ചു. വില്ലേജ് സെക്രട്ടറി എം.ആർ. രതീഷ്, പി.ജെ. ജോസ്, കെ.പി. രമേശൻ, എൻ.കെ. ഗംഗാധരൻ , ആർ.കെ. പദ്മനാഭൻ, കെ.വി. ദാമോദരൻ, രാധാ മധു, ടി.എസ്. ശ്രീലത പി. ഉമേഷ്, കെ.എം. ശ്രീകാന്ത്, പി. കൃഷ്ണൻ, ടി.വി. കുഞ്ഞിക്കണ്ണൻ എന്നിവർ പ്രസംഗിച്ചു.

ഉന്നത വിജയികളെ അനുമോദിച്ചു

ആലക്കോട്: ആലക്കോട് പഞ്ചായത്ത് പരിധിയിലെ സ്കൂളുകളിലെ എസ്എസ്എൽസി, പ്ലസ്‌ടു പരീക്ഷകളിൽ മുഴുവൻ വിഷയങ്ങളിൽ എ പ്ലസ് നേടിയവരെയും യുഎസ്എസ്, എൽഎസ്എസ് വിജയികളെയും അനുമോദിക്കുന്ന ചടങ്ങ് "വിജയാരവം' നടത്തി. സജീവ് ജോസഫ് എംഎൽഎ പരിപാടി ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് ജോജി കന്നിക്കാട്ട് അധ്യക്ഷത വഹിച്ചു. വൈസ് പ്രസിഡന്‍റ് പി.സി. ആയിഷ, ജോൺസൺ താരാമംഗലം, കവിതാ ഗോവിന്ദൻ, കെ.പി. സാബു, മുഹമ്മദ് ഷാഫി, നിഷാ വിനു, എം.എ. സ്മിനി, മാത്യു പുതിയേടം, മേഴ്സ‌ി എടാട്ടേൽ, വത്സലാ പ്രകാശ്, ജയാ മുരളീധരൻ, സി.എം. രജിത, എം.എ. ഖലീൽ റഹ്മാൻ, സതി സജി എന്നിവർ പ്രസംഗിച്ചു. കോട്ടൂർ: പത്ത്, പന്ത്രണ്ട് ക്ലാസുകളിൽ ഉന്നത വിജയം കരസ്ഥമാക്കിയവരെ കത്തോലിക്ക കോൺഗ്രസ് ശ്രീകണ്ഠപുരം കോട്ടൂർ യൂണിറ്റ് സ്നേഹോപഹാരം നല്കി അനുമോദിച്ചു. കോട്ടൂർ സെന്‍റ് തോമസ് പള്ളിയിൽ ഇടവക വികാരി ഫാ. ജോബി എടത്തിനാൽ ഉദ്ഘാടനം ചെയ്തു. കത്തോലിക്ക കോൺഗ്രസ് കോട്ടൂർ യൂണിറ്റ് പ്രസിഡന്‍റ് അനുപ് കാഞ്ഞിരത്തിങ്കൽ അധ്യക്ഷത വഹിച്ചു. വിജയികൾക്ക് ചെമ്പന്തൊട്ടി ഫൊറോന പ്രസിഡന്‍റ് ജോസഫ് മാത്യു കൈതമറ്റം, സുരേഷ് ജോർജ് കാഞ്ഞിരത്തിങ്കൽ, പാട്രിക് കുരുവിള, ജോബിൻ കൈപ്രമ്പാടൻ എന്നിവർ ഉപഹാരങ്ങൾ കൈമാറി. കത്തോലിക്ക കോൺഗ്രസ് പ്രവർത്തകരായ മനേഷ് കാഞ്ഞിരത്തിങ്കൽ, ജോഷി പെരുമ്പറമ്പിൽ, അരുൺ ഏറത്തേടത്ത്, ജോബി മാടശേരി എന്നിവർ പങ്കെടുത്തു. നെടിയേങ്ങ: ശ്രീകണ്ഠപുരം നഗരസഭ ഇരുപത്തിയെട്ടാം വാർഡിലെ നെടിയേങ്ങയിൽ എൽഎസ്എസ്, യുഎസ്എസ്, എസ്എസ്എൽസി, പ്ലസ് ടു, എൻജിനിയറിംഗ്, എംബിഎ, എൽഎൽബി പരീക്ഷകളിൽ ഉന്നത വിജയം കരസ്ഥമാക്കിയവരെയും എൽഎസ്എസ്, യുഎസ്എസ് എന്നിവയിൽ മികച്ച വിജയം കൈവരിച്ച നെടിയേങ്ങ ഗവ. യുപി സ്കൂളിനെയും അനുമോദിച്ചു. സമ്മേളനം ശ്രീകണ്ഠപുരം നഗരസഭാധ്യക്ഷ കെ.വി. ഫിലോമിന ഉദ്ഘാടനം ചെയ്തു. വാർഡ് കൗൺസിലർ കെ.വി. കുഞ്ഞിരാമൻ അധ്യക്ഷത വഹിച്ചു. വാർഡ് വികസന സമിതി കൺവീനർ പി.വി. ജയൻ, എം. പുരുഷോത്തമൻ, അങ്കണവാടി അധ്യാപിക അസ്മ എന്നിവർ പ്രസംഗിച്ചു.

വി.കെ. രാഘവൻ പുരസ്കാരം സമ്മാനിച്ചു

ചെറുപുഴ: കേരളാ വ്യാപാരി വ്യവസായി സമിതി പാടിയോട്ടുചാൽ യൂണിറ്റ് ഏർപ്പെടുത്തിയ വി.കെ. രാഘവൻ സ്മാരക പുരസ്കാരം ചെറുപുഴ കുണ്ടംതടം എയ്ഞ്ചൽ ഹോം സ്പെഷൽ സ്കൂൾ അധ്യാപിക കെ. സ്മിതയ്ക്ക് സമ്മാനിച്ചു. പാടിയോട്ടുചാലിൽ നടന്ന ചടങ്ങിൽ കേരളാ വ്യാപാരി വ്യവസായി സമിതി ജില്ലാ സെക്രട്ടറി പി.എം. സുഗുണൻ പുരസ്കാര സമർപ്പണം നടത്തി. യൂണിറ്റ് പ്രസിഡന്‍റ് എം.എസ്. സനൂപ് അധ്യക്ഷത വഹിച്ചു. ഏരിയാ സെക്രട്ടറി ധനജ്ഞയൻ എസ്എസ്എൽസി, പ്ലസ്ടു പരീക്ഷകളിൽ ഉന്നത വിജയം നേടിയ വിദ്യാർഥികളെ അനുമോദിച്ചു. പെരിങ്ങോം വയക്കര പഞ്ചായത്ത് വൈസ് പ്രസിഡന്‍റ് ബിന്ദു രാജൻകുട്ടി, പഞ്ചായത്തംഗങ്ങളായ ആർ. രാധാമണി, പുഷ്പ മോഹൻ, കേരളാ വ്യാപാരി വ്യവസായി സമിതി ജില്ലാ കമ്മിറ്റിയംഗം സുലേഖ വിജയൻ, കെ. അൻസാരി, എം.വി. രവീന്ദ്രൻ, സി.വി. സുകന്യ എന്നിവർ പ്രസംഗിച്ചു. ചെറുപുഴ കുണ്ടംതടം എയ്ഞ്ചൽ ഹോം സ്പെഷൽ സ്കൂൾ പ്രിൻസിപ്പൽ സിസ്റ്റർ ജാസ്മിൻ, സ്കൂളിലെ അധ്യാപകർ, വിദ്യാർഥികൾ, രക്ഷിതാക്കൾ, വ്യാപാരികൾ എന്നിവർ പങ്കെടുത്തു.

ബൈക്ക് ഓവുചാലിൽ വീണ് യുവാവിനു പരിക്ക്

രയറോം: മലയോര ഹൈവേയിൽ രയറോം കാക്കടവിൽ ഞായറാഴ്ച്ച പുലർച്ചെ ഉണ്ടായ ബൈക്ക് അപകടത്തിൽ യുവാവിനു പരിക്കേറ്റു. രയറോം ബീംബുംകാട്ടെ ജിന്‍റോ റോയിയ്ക്കാണ് പരിക്കേറ്റത്. കണ്ണൂരിൽ നിന്നും ബിംബുകാട് ഭാഗത്തേക്ക് വന്ന ബൈക്ക് കനത്ത മഴയിൽ റോഡിൽ നിന്നും തെന്നി മാറി റോഡരിലെ ഓവുചാലിൽ വിഴുകയായിരുന്നു.

മുന്നറിയിപ്പ് ബോർഡുകൾ ഇല്ല: വെമ്പുവ പാലത്തിൽ അപകടങ്ങൾ തുടർക്കഥ

പയ്യാവൂർ: മലയോര ഹൈവേയിലെ വെമ്പുവ പാലത്തിൽ അപകടങ്ങൾ തുടർക്കഥയാകുന്നു. പയ്യാവൂരിൽ നിന്ന് പൂപ്പറമ്പ് വഴി ചെമ്പേരിയിലേക്കുള്ള റോഡിൽ മൂരിക്കടവ് പുഴയിൽ പുതിയ പാലം നിർമിച്ചിട്ട് ഒന്നര പതിറ്റാണ്ടിലേറെയായി. ഇതുവരെ ഇരുപതിൽപരം അപകടങ്ങൾ നടന്നതായി പരിസരവാസികൾ പറയുന്നു. പയ്യാവൂരിൽ നിന്ന് ചെമ്പേരിയിലേക്ക് പോയ ബൈക്കും ചെമ്പേരിയിൽ നിന്നെത്തിയ വാനും തമ്മിലാണ് കഴിഞ്ഞ ദിവസം രാത്രിയിൽ കൂട്ടിയിടിച്ചത്. വാഹനങ്ങളിലുണ്ടായിരുന്നവർക്ക് നിസാര പരിക്കേറ്റു. അപകട മുന്നറിയിപ്പ് ബോർഡുകൾ സ്ഥാപിക്കണമെന്ന് പാലത്തിന്‍റെ ഉദ്ഘാടനം കഴിഞ്ഞതു മുതൽ നാട്ടുകാർ ആവശ്യപ്പെടുന്നുണ്ട്. രണ്ട് മഞ്ഞ സിഗ്നലുകൾ മാത്രമാണ് നിലവിലുള്ളത്. ഇത് വാഹനം ഓടിക്കുന്നവരുടെ ശ്രദ്ധയിൽപ്പെടാൻ പ്രയാസവുമാണ്. റോഡിലെ വളവും ഇറക്കവുമാണ് അപകടങ്ങൾക്കിടയാക്കുന്നത്. ഈ സാഹചര്യത്തിൽ കൂടുതൽ സിഗ്നലുകളും മുന്നറിയിപ്പ് ബോർഡുകളും സ്ഥാപിക്കേണ്ടതുണ്ട്. വളവിലെ തെരുവു വിളക്ക് കത്താതായിട്ടും നാളുകളേറെയായി. കർക്കിടക വാവ് ദിനത്തിൽ നൂറുകണക്കിനാളുകൾ ബലിതർപ്പണം നടത്താനെത്തുന്ന വാസവപുരം ക്ഷേത്രം അപകടസ്ഥലത്തിന് സമീപമാണ്. കർക്കിടക വാവിന് മുമ്പായി ആവശ്യമായ സുരക്ഷാ നടപടികൾ സ്വീകരിക്കാൻ പൊതുമരാമത്ത് വകുപ്പ് തയാറാകണമെന്ന് പ്രദേശവാസികൾ ആവശ്യപ്പെടുന്നു.

നാഷണൽ എക്സ് സർവീസ്മെൻ കോ-ഓർഡിനേഷൻ കമ്മിറ്റി ജില്ലാ ഓഫീസ് ഉദ്ഘാടനം ചെയ്തു

മട്ടന്നൂർ: നാഷണൽ എക്സ് സർവീസ്മെൻ കോ-ഓർഡിനേഷൻ കമ്മിറ്റിയുടെ ജില്ലാ ഓഫീസ് ചാവശേരിയിൽ പ്രവർത്തനം ആരംഭിച്ചു. ഇരിട്ടി നഗരസഭ ചെയർപേഴ്സൺ കെ. ശ്രീലത ഉദ്ഘാടനം ചെയ്തു. ജില്ലാ പ്രസിഡന്‍റ് മൈക്കിൾ ചാണ്ടിക്കൊല്ലിയിൽ അധ്യക്ഷത വഹിച്ചു. ചടങ്ങിൽ ഓപ്പറേഷൻ സിന്ദൂരിൽ പങ്കെടുത്ത ജവാൻ ചാവശേരിയിലെ അർജുവിനെ ആദരിച്ചു. എൻ.വി. തോമസ് മുഖ്യപ്രഭാഷണം നടത്തി. എം. പവിത്രൻ അഫിലിയേഷൻ സർട്ടിഫിക്കറ്റ് വിതരണവും ഓഫീസ് താക്കോൽ കൈമാറ്റവും നിർവഹിച്ചു. നഗരസഭ കൗൺസിലർ വി. ശശി, മധു തൊട്ടിയിൽ, പി.വി. രാജൻ, കെ.പി. സതീഷ് ചന്ദ്രൻ, സുരേഷ് ബാബു, കെ.പി. ലക്ഷ്മണൻ, ബിജു ചാവശേരി, ജോഷി ജേക്കബ് എന്നിവർ പ്രസംഗിച്ചു.

പയ്യന്നൂരും കരിവെള്ളൂരിലുമായി രണ്ടപകടം: അദ്ഭുതകരമായ രക്ഷപ്പെടല്‍

പയ്യന്നൂര്‍: പയ്യന്നൂരും കരിവെള്ളൂരിലുമായി ഇന്നലെ രാവിലെ നടന്ന രണ്ടപകടങ്ങളിലെ രക്ഷപ്പെടല്‍ അദ്ഭുതകരമായി. പയ്യന്നൂരില്‍ വിഠോബ ക്ഷേത്രത്തിന് മുമ്പിലും കരിവെള്ളൂര്‍ പള്ളി സ്‌റ്റോപ്പിനു സമീപവുമായാണ് അപകടങ്ങളുണ്ടായത്. പയ്യന്നൂര്‍ സൗത്ത് ബസാറിന് സമീപം വിഠോബ ക്ഷേത്രത്തിന് മുന്നിലുണ്ടായ അപകടത്തില്‍ തലനാരിഴക്ക് രക്ഷപ്പെട്ടത് പയ്യന്നൂരിലെ ജില്ലാ ബാങ്ക് ജീവനക്കാരനും മാധ്യമ പ്രവര്‍ത്തകനുമായ എന്‍.എം. രാമചന്ദ്രനാണ്. സൈക്കിളില്‍ യാത്ര ചെയ്യുന്നതിനിടയില്‍ ക്ഷേത്രത്തിന് മുന്നില്‍ പ്രാര്‍ഥിക്കാന്‍ സൈക്കിള്‍ നിര്‍ത്തി ഇറങ്ങുന്നതിനിടയില്‍ അബദ്ധത്തില്‍ കാല്‍തെറ്റി മറിഞ്ഞുവീഴുകയായിരുന്നു. അതേസമയം അതു വഴിയെത്തിയ ടിപ്പറിന്‍റെ പിന്‍ചക്രം തലയുടെ തൊട്ടരികിലൂടെയാണ് കടന്നുപോയത്. തലനാരിഴയുടെ വ്യത്യാസത്തിലാണ് അപകടം തലയ്ക്കരികിലൂടെ കടന്നുപോയത്. നഴ്‌സറിയില്‍ നിന്നു നടീല്‍ വസ്തുക്കളുമായി പോയ വാന്‍ കരിവെള്ളൂര്‍ ദേശീയപാതയില്‍ പള്ളി സ്‌റ്റോപ്പിന് സമീപം ഡിവൈഡറില്‍ത്തട്ടി മറിയുകയായിരുന്നു. അപകടത്തില്‍ വാനോടിച്ചിരുന്ന ഡ്രൈവര്‍ പരിക്കേല്‍ക്കാതെ രക്ഷപ്പെടുകയായിരുന്നു.

അയ്യൻകുന്നിലും ആറളത്തും വിത്തൂട്ട് നടത്തി

ഇരിട്ടി: അയ്യൻകുന്ന് പഞ്ചായത്തും, തുടിമരം വനസംരക്ഷണ സമിതിയും, ഇരിട്ടി ഫോറസ്റ്റ് സെക്‌ഷനും സംയുക്തമായി തുടിമരം ഫോറസ്റ്റിൽ നടത്തിയ വിത്തൂട്ട് പരിപാടി അയ്യൻകുന്ന് പഞ്ചായത്ത് പ്രസിഡന്‍റ് കുര്യാച്ചൻ പൈന്പള്ളിക്കുന്നേൽ ഉദ്ഘാടനം ചെയ്തു. സ്ഥിരം സമിതി അധ്യക്ഷന്മാരായ ഐസക് ജോസഫ്, സിന്ധു ബെന്നി, പഞ്ചായത്ത് അംഗങ്ങളായ സജി മച്ചിത്താന്നി, ബിജോയ് പ്ലാത്തോട്ടം, മിനി വിശ്വനാഥൻ, സെലീന ബിനോയ്, എൽസമ്മ ജോസഫ്, ഫിലോമിന മാണി, ഫോറസ്റ്റ് ഓഫീസർ സുനിൽ, ബീറ്റ് ഫോറസ്റ്റ് ഓഫിസർമാരായ കൃഷ്ണശ്രീ, രാജേഷ്, രാഹുൽ, അമൽ, ഉത്തര, വനം സംരക്ഷണ സമിതി പ്രസിഡന്‍റ് രാജപ്പൻ മേട്ടേൽ എന്നിവർ പങ്കെടുത്തു. ഇരിട്ടി: കേരള വനം വന്യജീവി വകുപ്പിന്‍റെ മിഷൻ ഫുഡ് ഫോഡ്‌ഡർ വാട്ടറിന്‍റെ ഭാഗമായി ആറളം വന്യജീവി സങ്കേതത്തിൽ പെരങ്ങത്തൂർ എൻഎഎം ഹയർ സെക്കൻഡറി സ്കൂൾ അധ്യാപകരും ആറളം വന്യജീവി സങ്കേതം ജീവനക്കാരും ചേർന്ന് വിത്തൂട്ട് നടത്തി. ആറളം വൈൽഡ്‌ ലൈഫ് വാർഡൻ ജി പ്രദീപ്‌, അസിസ്റ്റന്‍റ് വൈൽഡ്‌ ലൈഫ് വാർഡൻ രമ്യ രാഘവൻ, എൻ‌എഎം ഹയർ സെക്കൻഡറിസ്കൂൾ പ്രിൻസിപ്പൽ ഡോ. എൻ.എ. മുഹമ്മദ്‌ റഷീദ് എന്നിവർ നേതൃത്വം നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]