ADVERTISEMENT

ADVERTISEMENT

അയ്യൻകുന്നിലും ആറളത്തും വിത്തൂട്ട് നടത്തി

ഇരിട്ടി: അയ്യൻകുന്ന് പഞ്ചായത്തും, തുടിമരം വനസംരക്ഷണ സമിതിയും, ഇരിട്ടി ഫോറസ്റ്റ് സെക്‌ഷനും സംയുക്തമായി തുടിമരം ഫോറസ്റ്റിൽ നടത്തിയ വിത്തൂട്ട് പരിപാടി അയ്യൻകുന്ന് പഞ്ചായത്ത് പ്രസിഡന്‍റ് കുര്യാച്ചൻ പൈന്പള്ളിക്കുന്നേൽ ഉദ്ഘാടനം ചെയ്തു.

സ്ഥിരം സമിതി അധ്യക്ഷന്മാരായ ഐസക് ജോസഫ്, സിന്ധു ബെന്നി, പഞ്ചായത്ത് അംഗങ്ങളായ സജി മച്ചിത്താന്നി, ബിജോയ് പ്ലാത്തോട്ടം, മിനി വിശ്വനാഥൻ, സെലീന ബിനോയ്, എൽസമ്മ ജോസഫ്, ഫിലോമിന മാണി, ഫോറസ്റ്റ് ഓഫീസർ സുനിൽ, ബീറ്റ് ഫോറസ്റ്റ് ഓഫിസർമാരായ കൃഷ്ണശ്രീ, രാജേഷ്, രാഹുൽ, അമൽ, ഉത്തര, വനം സംരക്ഷണ സമിതി പ്രസിഡന്‍റ് രാജപ്പൻ മേട്ടേൽ എന്നിവർ പങ്കെടുത്തു.

ഇരിട്ടി: കേരള വനം വന്യജീവി വകുപ്പിന്‍റെ മിഷൻ ഫുഡ് ഫോഡ്‌ഡർ വാട്ടറിന്‍റെ ഭാഗമായി ആറളം വന്യജീവി സങ്കേതത്തിൽ പെരങ്ങത്തൂർ എൻഎഎം ഹയർ സെക്കൻഡറി സ്കൂൾ അധ്യാപകരും ആറളം വന്യജീവി സങ്കേതം ജീവനക്കാരും ചേർന്ന് വിത്തൂട്ട് നടത്തി.

ആറളം വൈൽഡ്‌ ലൈഫ് വാർഡൻ ജി പ്രദീപ്‌, അസിസ്റ്റന്‍റ് വൈൽഡ്‌ ലൈഫ് വാർഡൻ രമ്യ രാഘവൻ, എൻ‌എഎം ഹയർ സെക്കൻഡറിസ്കൂൾ പ്രിൻസിപ്പൽ ഡോ. എൻ.എ. മുഹമ്മദ്‌ റഷീദ് എന്നിവർ നേതൃത്വം നൽകി.

ADVERTISEMENT

കുറ്റിക്കകം പ്രദേശത്ത് മൂന്നു പേർക്കു പേപ്പട്ടിയുടെ കടിയേറ്റു

എടക്കാട്: കുറ്റിക്കകം മുനമ്പിലെ എരിഞ്ഞിക്കൽ അമ്പലം, അയ്യാറകത്ത് പാലം പ്രദേശത്ത് മൂന്നുപേർക്കു പേപ്പട്ടിയുടെ കടിയേറ്റു. ഇന്നലെ ഉച്ചയോടെ രണ്ട് സ്ത്രീകളെ വീട്ടുമുറ്റത്ത് നിന്നും മറ്റൊരാളെ വഴിയിൽ നിന്നുമാണ് ആക്രമിച്ചത്. കാലിനും കൈക്കും കടിയേറ്റ കുറ്റിക്കകം മുനമ്പ് സ്വദേശികളായ സി.പി. നിവാസിൽ പ്രീജ (55), തറമ്മൽ ശാന്താലയത്തിൽ എം. ശൈലജ (52), ചെമ്പിലോടൻ ഹൗസിൽ സി. അനിൽകുമാർ (55) എന്നിവരെ തലശേരി ഗവ. ആശുപത്രിയിൽ പ്രവേശിപ്പിച്ചു. രണ്ടുദിവസം മുമ്പ് ഏഴരയിലും കിഴുന്നപ്പാറയിലും കുറുനരിയുടെ കടിയേറ്റ് നാലുപേർക്ക് പരിക്കേറ്റിരുന്നു. ഇതിൽ ഒരാളുടെ കൈവിരലും നഷ്ടപ്പെട്ടിരുന്നു. നിരന്തരം കുറുനരിയുടെയും തെരുവുനായ്ക്കളുടെയും ആക്രമണം നടക്കുന്നതിൽ കുറ്റിക്കകം, കിഴുന്ന നിവാസികൾ ഭീതിയിലാണ്.

യുവതിയുടെ ആത്മഹത്യ: സിപിഎം ജില്ലാ സെക്രട്ടറിയുടെ പ്രസ്താവനകൾ ജനരോഷം മറച്ചുവയ്ക്കാൻ- എസ്ഡിപിഐ

കണ്ണൂര്‍: ധര്‍മടം കായലോട് പറമ്പായിയില്‍ ഭര്‍തൃമതിയായ യുവതി ജീവനൊടുക്കിയ സംഭവത്തില്‍ സിപിഎം നടത്തിയ നുണ പ്രചാരണങ്ങൾക്കെതിരെയുള്ള നാട്ടുകാരുടെ പ്രതിഷേധം മറച്ചു വെക്കാൻ ജില്ലാ സെക്രട്ടറി കെ.കെ.രാഗേഷ് ജല്പനങ്ങൾ നടത്തുകയാണെന്ന് എസ്ഡിപിഐ സംസ്ഥാന ജനറല്‍ സെക്രട്ടറി കെ.കെ. അബ്ദുല്‍ ജബ്ബാര്‍. പാര്‍ട്ടിയംഗങ്ങളായ യുവതിയുടെ മാതാപിതാക്കള്‍ക്ക് നീതി വാങ്ങിക്കൊടുക്കാന്‍ ശ്രമിക്കേണ്ട സിപിഎം അതിനു വിരുദ്ധമായ നിലപാട് സ്വീകരിക്കുന്നത് എന്തടിസ്ഥാനത്തിലാണെന്ന് കെ.കെ. രാഗേഷ് വ്യക്തമാക്കണമെന്നും അബ്ദുൾ ജബ്ബാർ ആവശ്യപ്പട്ടു. അസാന്മാര്‍ഗികതയ്ക്കു കൂട്ടുനില്‍ക്കുന്നത് ന്യായീകരിക്കാനാണ് സദാചാര വിചാരണയെന്ന വാദം സിപിഎം ഉന്നയിക്കുന്നത്. എസ്ഡിപിഐ സ്ത്രീ വിരുദ്ധമെന്ന രാഗേഷിന്‍റെ വാദം ശുദ്ധ അസംബന്ധമാണ്. എസ്ഡിപിഐ പാര്‍ട്ടി ഓഫീസിനു മുന്നിലൂടെ സ്ത്രീകള്‍ക്ക് നടക്കാന്‍ കഴിയുന്നില്ല എന്ന ആക്ഷേപം ഉന്നയിക്കുന്നവര്‍ ഇത് മുഖ്യമന്ത്രിയുടെ നാടാണെന്ന് ഓർക്കണം. അങ്ങിനെ ഒരു സാഹചര്യമുണ്ടെങ്കിൽ ആഭ്യന്തര ചുമതല വഹിക്കുന്ന മുഖ്യമന്ത്രി രാജി വയ്ക്കുകയാണ് ആദ്യം ചെയ്യേണ്ടതെന്നും കെ.കെ. അബ്ദുല്‍ ജബ്ബാര്‍ പത്രസമ്മേളനത്തിൽ ആവശ്യപ്പെട്ടു. പത്രസമ്മേളനത്തിൽ എസ്ഡിപിഐ കണ്ണൂര്‍ ജില്ലാ പ്രസിഡന്‍റ് ബഷീര്‍ കണ്ണാടിപ്പറമ്പ്, ജില്ലാ സെക്രടറി പി.സി. ഷെഫീഖ്, ജില്ലാ കമ്മിറ്റിയംഗം റുബീന എന്നിവരും പങ്കെടുത്തു.

ഓൺലൈൻ ട്രേഡിംഗ്; തലശേരി സ്വദേശിനിയുടെ 12 ലക്ഷം തട്ടിയെടുത്ത പാലക്കാട് സ്വദേശികൾ ‍അറസ്റ്റിൽ

കണ്ണൂർ: ഫേസ്ബുക്ക് വഴി ബന്ധപ്പെട്ട് ഓൺലൈൻ ട്രേഡിംഗ് വഴി പണം സമ്പാദിക്കാം എന്നു പറഞ്ഞു വിശ്വസിപ്പിച്ച് തലശേരി സ്വദേശിനിയുടെ പണം തട്ടിയ രണ്ടു പേർ അറസ്റ്റിൽ. തലശേരി സ്വദേശിനി യുടെ 12,06,000 രൂപ തട്ടിയെടുത്ത കേസിൽ പാലക്കാട് സ്വദേശികളായ ടി.എം. മുഹമ്മദ് മൊയിനുദ്ദീൻ, വി.പി. അഖിൽ എന്നിവരേയാണ് കണ്ണൂർ സിറ്റി അഡീഷണൽ എസ്പി സജേഷ് വാഴാളാപ്പിലിന്‍റെ നിർദേശ പ്രകാരം കണ്ണൂർ സൈബർ ക്രൈം പോലീസ് ഇൻസ്പെക്ടർ മഹേഷ് കണ്ടബേത്ത് അറസ്റ്റു ചെയ്തത്. പരാതിക്കാരിയെ ഫേസ്ബുക്ക് വഴി ബന്ധപ്പെട്ട് ഓൺലൈൻ ട്രേഡിംഗ് വഴി പണം സമ്പാദിക്കാം എന്നു പറഞ്ഞു വിശ്വസിപ്പിച്ച് വിവിധ അക്കൗണ്ടുകളിലേക്ക് 12,06,000 രൂപ പല തവണകളായി നിക്ഷേപിപ്പിക്കുകയായിരുന്നു. അറസ്റ്റിലായ മുഹമ്മദ് മൊയിനുദ്ദീൻ എന്നയാളുടെ അക്കൗണ്ടിലേക്ക് 1,35,000 രൂപ ട്രാൻസ്ഫർ ചെയ്യിപ്പിച്ചാണ് തട്ടിപ്പ് നടത്തിയത്. അറസ്റ്റു ചെയ്ത പ്രതി അഖിൽ എന്നയാളാണ് അക്കൗണ്ടുകൾ സംഘടിപ്പിച്ച് സൈബർ തട്ടിപ്പുകാർക്ക് എത്തിച്ച് കൊടുക്കുന്നത്. ടിയാന്‍റെ കൈയിൽനിന്ന് മറ്റ് ആൾക്കാരുടെ പേരിൽ എടുത്തതായ15 ഓളം ബാങ്ക് പാസ്ബുക്കുകളും എടിഎം കർഡുകളും ചെക്ക് ബുക്കുകളും കണ്ടെടുത്തിട്ടുണ്ട്. പിടിച്ചെ ടുത്ത അക്കൗണ്ടുകളുമായി ബന്ധപ്പെട്ട് കേരളത്തിലും പുറത്തുമായി ധാരാളം പരാതികൾ രജിസ്റ്റർ ചെയ്തതായി കണ്ടെത്തിയിട്ടുണ്ട്. സബ് ഇൻസ്പെക്ടർ ടി.പി. പ്രജീഷ്, അസിസ്റ്റന്‍റ് സബ് ഇൻസ്പെക്ടർ ജ്യോതി, സിപിഒ മാരായ സുനിൽ, ഷിനോജ് എന്നിവരാണ് അന്വേഷണ സംഘത്തിൽ ഉണ്ടായിരുന്നത്.

മണികണ്ഠന്‍റെ രാജിക്കു കാരണം അയോഗ്യതാഭീഷണി: കോണ്‍ഗ്രസ്

കാസര്‍ഗോഡ്: ശരത്‌ലാല്‍-കൃപേഷ് ഇരട്ട കൊലപാതകത്തില്‍ ശിക്ഷിക്കപ്പെട്ട കാഞ്ഞങ്ങാട് ബ്ലോക്ക് പഞ്ചായത്ത് പ്രസിഡന്‍റും സിപിഎം നേതാവുമായ കെ. മണികണ്ഠന്‍ ഇപ്പോള്‍ രാജിവെച്ചത് തെരഞ്ഞെടുപ്പ് കമ്മീഷന്‍ ഇയാളെ അയോഗ്യന്‍ ആക്കുമെന്ന സൂചനയെ തുടര്‍ന്നാണെന്ന് ഡിസിസി പ്രസിഡന്‍റ് പി.കെ. ഫൈസല്‍. മണികണ്ഠനെ അയോഗ്യനാക്കണമെന്ന് ആവശ്യപ്പെട്ടുകൊണ്ട് കോണ്‍ഗ്രസ് പാര്‍ട്ടി നേതൃത്വത്തിന്‍റെ നിര്‍ദേശ പ്രകാരം കാഞ്ഞങ്ങാട് ബ്ലോക്ക് പഞ്ചായത്ത് അംഗവും കോണ്‍ഗ്രസ് നേതാവുമായ അഡ്വ. ബാബുരാജ് ഇലക്ഷന് കമ്മീഷണര്‍ക്ക് പരാതി നല്‍കിയിരുന്നു. ജൂണ്‍ 26 ന് അന്തിമ വാദം പൂര്‍ത്തീകരിക്കുകയാണ്. മണികണ്ഠനെ ഇലക്ഷന്‍ കമ്മീഷന്‍ അയോഗ്യനാക്കുന്നതിനു വേണ്ടിയുള്ള നിയമ പോരാട്ടങ്ങളുമായി പാര്‍ട്ടിനേതൃത്വം മുന്നോട്ട് പോകുമെന്നും കേസില്‍ ശിക്ഷിക്കപ്പെട്ട ഉടനെ തന്നെ മണികണ്ഠന്‍ രാജി വെക്കാനുള്ള ധാര്‍മികബോധം കാണിക്കണമായിരുന്നു എന്നും ഫൈസല്‍ പറഞ്ഞു.

മലപ്പട്ടത്ത് ഗാന്ധിയാത്രയും പ്രതിമ അനാഛാദനവും നാളെ

കണ്ണൂർ: മലപ്പട്ടത്ത് ജില്ലാ കോൺഗ്രസ് കമ്മിറ്റി സംഘടിപ്പിക്കുന്ന ഗാന്ധിയാത്രയും ഗാന്ധി പ്രതിമ അനാഛാദനവും നാളെ നടക്കും. രാഷ്‌ട്രപിതാവ് മഹാത്മാഗാന്ധിയുടെയും ഇന്ത്യയുടെ പ്രഥമ പ്രധാനമന്ത്രി ജവഹർലാൽ നെഹ്റുവിന്‍റെയും സ്മരണകളെ പോലും തമസ്കരിക്കുന്ന രീതിയിൽ ചരിത്രം മാറ്റിയെഴുതുന്ന കേന്ദ്ര-സംസ്ഥാന ഭരണകൂടങ്ങളെ തുറന്നുകാട്ടിയാണ് ഗാന്ധി യാത്ര സംഘടിപ്പിക്കുന്നതെന്ന് ഡിസിസി പ്രസിഡന്‍റ് മാർട്ടിൻ ജോർജ് അറിയിച്ചു. ഈ മാസം ആറിന് നടത്താനിരുന്ന പരിപാടി കെപിസിസി മുൻ പ്രസിഡന്‍റ് തെന്നല ബാലകൃഷ്ണ പിള്ളയുടെ നിര്യാണത്തെ തുടർന്നാണ് മാറ്റിവച്ചത്. മലപ്പട്ടം സ്ക്വയറിലാണ് ഗാന്ധി പ്രതിമ അനാഛാദനം ചെയ്യുക. ഗാന്ധിജിയേയും നെഹ്റുവിനെയും ഇകഴ്ത്തി നമ്മുടെ മഹത്തായ പൈതൃകത്തെ തകർക്കുന്ന രീതിയിൽ അഭിനവ ഗോഡ്‌സേമാർ വിളയാടുന്ന വർത്തമാന സാഹചര്യത്തിൽ അതിനെതിരായ പ്രതിരോധം തീർക്കുകയെന്ന ലക്ഷ്യത്തോടെയാണ് ഗാന്ധിയാത്ര. നമ്മുടെ ജനാധിപത്യത്തെ ദുർബലപ്പെടുത്തുന്ന സമീപനങ്ങളെ തുറന്നു കാട്ടുകയെന്ന ലക്ഷ്യവും യാത്രയ്ക്കുണ്ട്. -മാർട്ടിൻ പറഞ്ഞു. നാളെ ഉച്ചകഴിഞ്ഞ് മൂന്നിന് മലപ്പട്ടം ഗവ. സ്കൂൾ പരിസരത്തുനിന്നും ആരംഭിക്കുന്ന യാത്ര മലപ്പട്ടം സ്ക്വയറിൽ സമാപിക്കും. കെപിസിസി പ്രസിഡന്‍റ് സണ്ണി ജോസഫ്, കെപിസിസി വർക്കിംഗ് പ്രസിഡന്‍റുമാരായ പി.സി. വിഷ്ണുനാഥ് എംഎൽഎ, എ.പി. അനിൽകുമാർ എംഎൽഎ, ഷാഫി പറമ്പിൽ എംപി, യൂത്ത് കോൺഗ്രസ് സംസ്ഥാന പ്രസിഡന്‍റ് രാഹുൽ മാങ്കൂട്ടത്തിൽ എംഎൽഎ തുടങ്ങി പ്രമുഖ നേതാക്കൾ സംബന്ധിക്കുമെന്ന് മാർട്ടിൻ ജോർജ് അറിയിച്ചു.

കാലിത്തീറ്റയുമായി വന്ന ലോറി മറിഞ്ഞു

ആലക്കോട്: കാപ്പിമലയിൽ മിൽമ കാലിത്തീറ്റയുമായി വന്ന ലോറി അപകടത്തിൽപ്പെട്ടു. ശനിയാഴ്ച രാത്രിയിലാണ് സംഭവം. ആനക്കുഴി വലിയവളവിൽ നിയന്ത്രണം വിട്ടു മറിഞ്ഞ ലോറി മുകളിൽ നിന്ന് താഴത്തേവളവിലെ റോഡിലേക്ക് പതിക്കുകയായിരുന്നു. വണ്ടിയുടെ ബ്രേക്ക് നഷ്ടപ്പെട്ടതാണ് അപകട കാരണമെന്ന് പറയപ്പെടുന്നു. ഡ്രൈവർ വണ്ടിയിൽ നിന്ന് ചാടിയതിനാൽ പരിക്കേൽക്കാതെ രക്ഷപ്പെട്ടു.

ഹോമിയോ പ്രതിരോധ മരുന്ന് വിതരണം

കരുവഞ്ചാൽ: ടിഎസ്എസ്എസ് ട്രസ്റ്റ് കരുവഞ്ചാൽ, കരുവഞ്ചാൽ ലിറ്റിൽ ഫ്ലവർ ഇടവക മാതൃവേദി, നടുവിൽ ആയുഷ് ഹോമിയോ എന്നിവയുടെ സംയുക്താഭിമുഖ്യത്തിൽ ഡെങ്കിപ്പനിക്കെതിരെയുള്ള ഹോമിയോ പ്രതിരോധ മരുന്ന് വിതരണവും ബോധവത്കരണ ക്ലാസും നടത്തി. ഇടവക കോ-ഓർഡിനേറ്റർ തോമസ് ചാഞ്ഞപ്ലാക്കലിന് പ്രതിരോധ മരുന്ന് നൽകി പഞ്ചായത്തംഗം ബാലകൃഷ്ണൻ ഉദ്ഘാടനം ചെയ്തു. യൂണിറ്റ് ഡയറക്ടർ ഫാ. ജോസഫ് ഈനാച്ചേരിയിൽ അധ്യക്ഷത വഹിച്ചു. ടിഎസ്എസ്എസ് ട്രസ്റ്റ് കരുഞ്ചാൽ യൂണിറ്റ് പ്രസിഡന്‍റ് ബെന്നി ഇലവുങ്കൽ, തോമസ് ചാഞ്ഞപ്ലാക്കൽ, ജസി ജയിംസ് മറ്റത്തിൽ എന്നിവർ പ്രസംഗിച്ചു. ഡോ. വിധു ബോധവത്കരണ ക്ലാസ് നയിച്ചു. വായാട്ടുപറമ്പ്: തടിക്കടവ് സർക്കാർ ഹോമിയോ ആശുപത്രിയുടെ ആഭിമുഖ്യത്തിൽ കർഷക സ്നേഹ ജനശ്രീ യൂണിറ്റ് ബാലപുരം, വെൽഫയർ സൊസൈറ്റി ബാലപുരം എന്നിവയുടെ സഹകരണത്തോടെ വായാട്ടുപറമ്പ് അങ്കണവാടിയിൽ സൗജന്യ ഹോമിയോ മെഡിക്കൽ ക്യാമ്പും പകർച്ചപ്പനി പ്രതിരോധ മരുന്ന് വിതരണവും നടന്നു. ചപ്പാരപ്പടവ് പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ തങ്കമ്മ സണ്ണി ഉദ്ഘാടനം ചെയ്തു. ജോസ് വെട്ടുകല്ലാംകുഴിയിൽ അധ്യക്ഷത വഹിച്ചു. സെബാസ്റ്റ്യൻ പറമ്പിൽ, ജോഷി പൂങ്കുടിയിൽ, സജി നിരപ്പേൽ എന്നിവർ പ്രസംഗിച്ചു. ഡോ. ജി. മേഘ, ഡോ. വി.എസ്. വിധു എന്നിവർ ക്ലാസുകൾക്ക് നേതൃത്വം നൽകി.

കരുവഞ്ചാൽ വൈഎംസിഎക്ക് പുതിയ ഭാരവാഹികൾ

കരുവഞ്ചാൽ: കരുവഞ്ചാൽ വൈഎംസിഎയുടെ പുതിയ ഭാരവാഹികൾ സ്ഥാനമേറ്റു. ആശാനഗറിലെ വൈഎംസിഎ ഇൻഡോർ കോർട്ടിൽ നടന്ന സ്ഥാനാരോഹണ ചടങ്ങ് സജീവ് ജോസഫ് എംഎൽഎ ഉദ്ഘാടനം ചെയ്തു. പ്രസിഡന്‍റ് സാബു ചാണാക്കാട്ടിൽ അധ്യക്ഷത വഹിച്ചു. പോൾ ജോർജ് മേച്ചേരിൽ-പ്രസിഡന്‍റ്, പ്രിൻസ് ആന്‍റണി-സെക്രട്ടറി, കെ.വി. ജോർജ്കുട്ടി-ട്രഷറർ എന്നിവരുടെ നേതൃത്വത്തിലുള്ള ഭാരവാഹികളാണ് സ്ഥാനമേറ്റത്. കണ്ണൂർ സബ് റീജിയൻ ചെയർമാൻ ബെന്നി ജോൺ, വനിതാ ഫോറം സബ്-റീജിയൻ ചെയർപേഴ്സൺ ടിന്‍റു ബിജി ഇൻസ്റ്റലേഷൻ നിർവഹിച്ചു. മത്തായി വീട്ടിയാങ്കൽ, ഫാ. ജോസഫ് ഈനാച്ചേരിൽ, പോൾ ജോർജ് മേച്ചേരിൽ, ഷാജി ജോസഫ്, പി.എ. ബേബി, ജയിംസ് പുത്തൻപുര, ഡോ. കെ.എം. തോമസ് എന്നിവർ പ്രസംഗിച്ചു.

കർഷക സംഘം വില്ലേജ് സമ്മേളനം

പയ്യാവൂർ: വളത്തിന്‍റെയും കീടനാശിനികളുടെയും അമിതമായ വിലവർധന ഉടൻ പിൻവലിക്കണമെന്നും കർഷകർ ഏറ്റവും അധികം ഉപയോഗിക്കുന്ന യൂറിയ ഉൾപ്പെടെയുള്ള വളങ്ങൾക്ക് നൽകിയിരുന്ന സബ്സിഡി ഗണ്യമായി കുറച്ചത് പുനഃസ്ഥാപിക്കണമെന്നും കേരള കർഷക സംഘം പയ്യാവൂർ വില്ലേജ് സമ്മേളനം ആവശ്യപ്പെട്ടു. പയ്യാവൂർ പുളുക്കൂൽ കുഞ്ഞിരാമൻ സ്മാരക മന്ദിരത്തിൽ ചേർന്ന കർഷക സംഘം ജില്ലാ കമ്മിറ്റിയംഗം പി.വി. ബാബുരാജ് സമ്മേളനം ഉദ്ഘാടനം ചെയ്തു. പി.സി. ജയിംസ് അധ്യക്ഷത വഹിച്ചു. എം.സി. നാരായണൻ, കെ.പി. കുമാരൻ, ജിൽസൺ ആന്‍റണി, സാജു സേവ്യർ എന്നിവർ പ്രസംഗിച്ചു. ഭാരവാഹികളായി പി.സി. ജയിംസ്-പ്രസിഡന്‍റ്, ബിജു തളിയിൽ, കെ. ദാസൻ- വൈസ് പ്രസിഡന്‍റുമാർ, ഷൈലേഷ് കുമാർ-സെക്രട്ടറി, കെ.കെ. ഷൈലജ, കെ.ആർ. ഗിരീഷ്-ജോയിന്‍റ് സെക്രട്ടറിമാർ, ടിറ്റി ജോസഫ്-ട്രഷറർ എന്നിവരെ തെരഞ്ഞെടുത്തു. ചെറുപുഴ: കേരള കർഷക സംഘം ചെറുപുഴ വില്ലേജ് സമ്മേളനം ചെറുപുഴ എൻഎസ്എസ് ഓഡിറ്റോറിയത്തിൽ നടന്നു. വില്ലേജ് പ്രസിഡന്‍റ് എം.വി. ശശി പതാക ഉയർത്തി. ജില്ലാ കമ്മിറ്റിയംഗം പി. ഗംഗാധരൻ ഉദ്ഘാടനം ചെയ്തു. എം.വി. ശശി അധ്യക്ഷത വഹിച്ചു. വില്ലേജ് സെക്രട്ടറി എം.ആർ. രതീഷ്, പി.ജെ. ജോസ്, കെ.പി. രമേശൻ, എൻ.കെ. ഗംഗാധരൻ , ആർ.കെ. പദ്മനാഭൻ, കെ.വി. ദാമോദരൻ, രാധാ മധു, ടി.എസ്. ശ്രീലത പി. ഉമേഷ്, കെ.എം. ശ്രീകാന്ത്, പി. കൃഷ്ണൻ, ടി.വി. കുഞ്ഞിക്കണ്ണൻ എന്നിവർ പ്രസംഗിച്ചു.

ഉന്നത വിജയികളെ അനുമോദിച്ചു

ആലക്കോട്: ആലക്കോട് പഞ്ചായത്ത് പരിധിയിലെ സ്കൂളുകളിലെ എസ്എസ്എൽസി, പ്ലസ്‌ടു പരീക്ഷകളിൽ മുഴുവൻ വിഷയങ്ങളിൽ എ പ്ലസ് നേടിയവരെയും യുഎസ്എസ്, എൽഎസ്എസ് വിജയികളെയും അനുമോദിക്കുന്ന ചടങ്ങ് "വിജയാരവം' നടത്തി. സജീവ് ജോസഫ് എംഎൽഎ പരിപാടി ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് ജോജി കന്നിക്കാട്ട് അധ്യക്ഷത വഹിച്ചു. വൈസ് പ്രസിഡന്‍റ് പി.സി. ആയിഷ, ജോൺസൺ താരാമംഗലം, കവിതാ ഗോവിന്ദൻ, കെ.പി. സാബു, മുഹമ്മദ് ഷാഫി, നിഷാ വിനു, എം.എ. സ്മിനി, മാത്യു പുതിയേടം, മേഴ്സ‌ി എടാട്ടേൽ, വത്സലാ പ്രകാശ്, ജയാ മുരളീധരൻ, സി.എം. രജിത, എം.എ. ഖലീൽ റഹ്മാൻ, സതി സജി എന്നിവർ പ്രസംഗിച്ചു. കോട്ടൂർ: പത്ത്, പന്ത്രണ്ട് ക്ലാസുകളിൽ ഉന്നത വിജയം കരസ്ഥമാക്കിയവരെ കത്തോലിക്ക കോൺഗ്രസ് ശ്രീകണ്ഠപുരം കോട്ടൂർ യൂണിറ്റ് സ്നേഹോപഹാരം നല്കി അനുമോദിച്ചു. കോട്ടൂർ സെന്‍റ് തോമസ് പള്ളിയിൽ ഇടവക വികാരി ഫാ. ജോബി എടത്തിനാൽ ഉദ്ഘാടനം ചെയ്തു. കത്തോലിക്ക കോൺഗ്രസ് കോട്ടൂർ യൂണിറ്റ് പ്രസിഡന്‍റ് അനുപ് കാഞ്ഞിരത്തിങ്കൽ അധ്യക്ഷത വഹിച്ചു. വിജയികൾക്ക് ചെമ്പന്തൊട്ടി ഫൊറോന പ്രസിഡന്‍റ് ജോസഫ് മാത്യു കൈതമറ്റം, സുരേഷ് ജോർജ് കാഞ്ഞിരത്തിങ്കൽ, പാട്രിക് കുരുവിള, ജോബിൻ കൈപ്രമ്പാടൻ എന്നിവർ ഉപഹാരങ്ങൾ കൈമാറി. കത്തോലിക്ക കോൺഗ്രസ് പ്രവർത്തകരായ മനേഷ് കാഞ്ഞിരത്തിങ്കൽ, ജോഷി പെരുമ്പറമ്പിൽ, അരുൺ ഏറത്തേടത്ത്, ജോബി മാടശേരി എന്നിവർ പങ്കെടുത്തു. നെടിയേങ്ങ: ശ്രീകണ്ഠപുരം നഗരസഭ ഇരുപത്തിയെട്ടാം വാർഡിലെ നെടിയേങ്ങയിൽ എൽഎസ്എസ്, യുഎസ്എസ്, എസ്എസ്എൽസി, പ്ലസ് ടു, എൻജിനിയറിംഗ്, എംബിഎ, എൽഎൽബി പരീക്ഷകളിൽ ഉന്നത വിജയം കരസ്ഥമാക്കിയവരെയും എൽഎസ്എസ്, യുഎസ്എസ് എന്നിവയിൽ മികച്ച വിജയം കൈവരിച്ച നെടിയേങ്ങ ഗവ. യുപി സ്കൂളിനെയും അനുമോദിച്ചു. സമ്മേളനം ശ്രീകണ്ഠപുരം നഗരസഭാധ്യക്ഷ കെ.വി. ഫിലോമിന ഉദ്ഘാടനം ചെയ്തു. വാർഡ് കൗൺസിലർ കെ.വി. കുഞ്ഞിരാമൻ അധ്യക്ഷത വഹിച്ചു. വാർഡ് വികസന സമിതി കൺവീനർ പി.വി. ജയൻ, എം. പുരുഷോത്തമൻ, അങ്കണവാടി അധ്യാപിക അസ്മ എന്നിവർ പ്രസംഗിച്ചു.

വി.കെ. രാഘവൻ പുരസ്കാരം സമ്മാനിച്ചു

ചെറുപുഴ: കേരളാ വ്യാപാരി വ്യവസായി സമിതി പാടിയോട്ടുചാൽ യൂണിറ്റ് ഏർപ്പെടുത്തിയ വി.കെ. രാഘവൻ സ്മാരക പുരസ്കാരം ചെറുപുഴ കുണ്ടംതടം എയ്ഞ്ചൽ ഹോം സ്പെഷൽ സ്കൂൾ അധ്യാപിക കെ. സ്മിതയ്ക്ക് സമ്മാനിച്ചു. പാടിയോട്ടുചാലിൽ നടന്ന ചടങ്ങിൽ കേരളാ വ്യാപാരി വ്യവസായി സമിതി ജില്ലാ സെക്രട്ടറി പി.എം. സുഗുണൻ പുരസ്കാര സമർപ്പണം നടത്തി. യൂണിറ്റ് പ്രസിഡന്‍റ് എം.എസ്. സനൂപ് അധ്യക്ഷത വഹിച്ചു. ഏരിയാ സെക്രട്ടറി ധനജ്ഞയൻ എസ്എസ്എൽസി, പ്ലസ്ടു പരീക്ഷകളിൽ ഉന്നത വിജയം നേടിയ വിദ്യാർഥികളെ അനുമോദിച്ചു. പെരിങ്ങോം വയക്കര പഞ്ചായത്ത് വൈസ് പ്രസിഡന്‍റ് ബിന്ദു രാജൻകുട്ടി, പഞ്ചായത്തംഗങ്ങളായ ആർ. രാധാമണി, പുഷ്പ മോഹൻ, കേരളാ വ്യാപാരി വ്യവസായി സമിതി ജില്ലാ കമ്മിറ്റിയംഗം സുലേഖ വിജയൻ, കെ. അൻസാരി, എം.വി. രവീന്ദ്രൻ, സി.വി. സുകന്യ എന്നിവർ പ്രസംഗിച്ചു. ചെറുപുഴ കുണ്ടംതടം എയ്ഞ്ചൽ ഹോം സ്പെഷൽ സ്കൂൾ പ്രിൻസിപ്പൽ സിസ്റ്റർ ജാസ്മിൻ, സ്കൂളിലെ അധ്യാപകർ, വിദ്യാർഥികൾ, രക്ഷിതാക്കൾ, വ്യാപാരികൾ എന്നിവർ പങ്കെടുത്തു.

ബൈക്ക് ഓവുചാലിൽ വീണ് യുവാവിനു പരിക്ക്

രയറോം: മലയോര ഹൈവേയിൽ രയറോം കാക്കടവിൽ ഞായറാഴ്ച്ച പുലർച്ചെ ഉണ്ടായ ബൈക്ക് അപകടത്തിൽ യുവാവിനു പരിക്കേറ്റു. രയറോം ബീംബുംകാട്ടെ ജിന്‍റോ റോയിയ്ക്കാണ് പരിക്കേറ്റത്. കണ്ണൂരിൽ നിന്നും ബിംബുകാട് ഭാഗത്തേക്ക് വന്ന ബൈക്ക് കനത്ത മഴയിൽ റോഡിൽ നിന്നും തെന്നി മാറി റോഡരിലെ ഓവുചാലിൽ വിഴുകയായിരുന്നു.

മുന്നറിയിപ്പ് ബോർഡുകൾ ഇല്ല: വെമ്പുവ പാലത്തിൽ അപകടങ്ങൾ തുടർക്കഥ

പയ്യാവൂർ: മലയോര ഹൈവേയിലെ വെമ്പുവ പാലത്തിൽ അപകടങ്ങൾ തുടർക്കഥയാകുന്നു. പയ്യാവൂരിൽ നിന്ന് പൂപ്പറമ്പ് വഴി ചെമ്പേരിയിലേക്കുള്ള റോഡിൽ മൂരിക്കടവ് പുഴയിൽ പുതിയ പാലം നിർമിച്ചിട്ട് ഒന്നര പതിറ്റാണ്ടിലേറെയായി. ഇതുവരെ ഇരുപതിൽപരം അപകടങ്ങൾ നടന്നതായി പരിസരവാസികൾ പറയുന്നു. പയ്യാവൂരിൽ നിന്ന് ചെമ്പേരിയിലേക്ക് പോയ ബൈക്കും ചെമ്പേരിയിൽ നിന്നെത്തിയ വാനും തമ്മിലാണ് കഴിഞ്ഞ ദിവസം രാത്രിയിൽ കൂട്ടിയിടിച്ചത്. വാഹനങ്ങളിലുണ്ടായിരുന്നവർക്ക് നിസാര പരിക്കേറ്റു. അപകട മുന്നറിയിപ്പ് ബോർഡുകൾ സ്ഥാപിക്കണമെന്ന് പാലത്തിന്‍റെ ഉദ്ഘാടനം കഴിഞ്ഞതു മുതൽ നാട്ടുകാർ ആവശ്യപ്പെടുന്നുണ്ട്. രണ്ട് മഞ്ഞ സിഗ്നലുകൾ മാത്രമാണ് നിലവിലുള്ളത്. ഇത് വാഹനം ഓടിക്കുന്നവരുടെ ശ്രദ്ധയിൽപ്പെടാൻ പ്രയാസവുമാണ്. റോഡിലെ വളവും ഇറക്കവുമാണ് അപകടങ്ങൾക്കിടയാക്കുന്നത്. ഈ സാഹചര്യത്തിൽ കൂടുതൽ സിഗ്നലുകളും മുന്നറിയിപ്പ് ബോർഡുകളും സ്ഥാപിക്കേണ്ടതുണ്ട്. വളവിലെ തെരുവു വിളക്ക് കത്താതായിട്ടും നാളുകളേറെയായി. കർക്കിടക വാവ് ദിനത്തിൽ നൂറുകണക്കിനാളുകൾ ബലിതർപ്പണം നടത്താനെത്തുന്ന വാസവപുരം ക്ഷേത്രം അപകടസ്ഥലത്തിന് സമീപമാണ്. കർക്കിടക വാവിന് മുമ്പായി ആവശ്യമായ സുരക്ഷാ നടപടികൾ സ്വീകരിക്കാൻ പൊതുമരാമത്ത് വകുപ്പ് തയാറാകണമെന്ന് പ്രദേശവാസികൾ ആവശ്യപ്പെടുന്നു.

നാഷണൽ എക്സ് സർവീസ്മെൻ കോ-ഓർഡിനേഷൻ കമ്മിറ്റി ജില്ലാ ഓഫീസ് ഉദ്ഘാടനം ചെയ്തു

മട്ടന്നൂർ: നാഷണൽ എക്സ് സർവീസ്മെൻ കോ-ഓർഡിനേഷൻ കമ്മിറ്റിയുടെ ജില്ലാ ഓഫീസ് ചാവശേരിയിൽ പ്രവർത്തനം ആരംഭിച്ചു. ഇരിട്ടി നഗരസഭ ചെയർപേഴ്സൺ കെ. ശ്രീലത ഉദ്ഘാടനം ചെയ്തു. ജില്ലാ പ്രസിഡന്‍റ് മൈക്കിൾ ചാണ്ടിക്കൊല്ലിയിൽ അധ്യക്ഷത വഹിച്ചു. ചടങ്ങിൽ ഓപ്പറേഷൻ സിന്ദൂരിൽ പങ്കെടുത്ത ജവാൻ ചാവശേരിയിലെ അർജുവിനെ ആദരിച്ചു. എൻ.വി. തോമസ് മുഖ്യപ്രഭാഷണം നടത്തി. എം. പവിത്രൻ അഫിലിയേഷൻ സർട്ടിഫിക്കറ്റ് വിതരണവും ഓഫീസ് താക്കോൽ കൈമാറ്റവും നിർവഹിച്ചു. നഗരസഭ കൗൺസിലർ വി. ശശി, മധു തൊട്ടിയിൽ, പി.വി. രാജൻ, കെ.പി. സതീഷ് ചന്ദ്രൻ, സുരേഷ് ബാബു, കെ.പി. ലക്ഷ്മണൻ, ബിജു ചാവശേരി, ജോഷി ജേക്കബ് എന്നിവർ പ്രസംഗിച്ചു.

പയ്യന്നൂരും കരിവെള്ളൂരിലുമായി രണ്ടപകടം: അദ്ഭുതകരമായ രക്ഷപ്പെടല്‍

പയ്യന്നൂര്‍: പയ്യന്നൂരും കരിവെള്ളൂരിലുമായി ഇന്നലെ രാവിലെ നടന്ന രണ്ടപകടങ്ങളിലെ രക്ഷപ്പെടല്‍ അദ്ഭുതകരമായി. പയ്യന്നൂരില്‍ വിഠോബ ക്ഷേത്രത്തിന് മുമ്പിലും കരിവെള്ളൂര്‍ പള്ളി സ്‌റ്റോപ്പിനു സമീപവുമായാണ് അപകടങ്ങളുണ്ടായത്. പയ്യന്നൂര്‍ സൗത്ത് ബസാറിന് സമീപം വിഠോബ ക്ഷേത്രത്തിന് മുന്നിലുണ്ടായ അപകടത്തില്‍ തലനാരിഴക്ക് രക്ഷപ്പെട്ടത് പയ്യന്നൂരിലെ ജില്ലാ ബാങ്ക് ജീവനക്കാരനും മാധ്യമ പ്രവര്‍ത്തകനുമായ എന്‍.എം. രാമചന്ദ്രനാണ്. സൈക്കിളില്‍ യാത്ര ചെയ്യുന്നതിനിടയില്‍ ക്ഷേത്രത്തിന് മുന്നില്‍ പ്രാര്‍ഥിക്കാന്‍ സൈക്കിള്‍ നിര്‍ത്തി ഇറങ്ങുന്നതിനിടയില്‍ അബദ്ധത്തില്‍ കാല്‍തെറ്റി മറിഞ്ഞുവീഴുകയായിരുന്നു. അതേസമയം അതു വഴിയെത്തിയ ടിപ്പറിന്‍റെ പിന്‍ചക്രം തലയുടെ തൊട്ടരികിലൂടെയാണ് കടന്നുപോയത്. തലനാരിഴയുടെ വ്യത്യാസത്തിലാണ് അപകടം തലയ്ക്കരികിലൂടെ കടന്നുപോയത്. നഴ്‌സറിയില്‍ നിന്നു നടീല്‍ വസ്തുക്കളുമായി പോയ വാന്‍ കരിവെള്ളൂര്‍ ദേശീയപാതയില്‍ പള്ളി സ്‌റ്റോപ്പിന് സമീപം ഡിവൈഡറില്‍ത്തട്ടി മറിയുകയായിരുന്നു. അപകടത്തില്‍ വാനോടിച്ചിരുന്ന ഡ്രൈവര്‍ പരിക്കേല്‍ക്കാതെ രക്ഷപ്പെടുകയായിരുന്നു.

പലഹാര നിർമാണ യൂണിറ്റിൽ ജനറേറ്റർ പൊട്ടിത്തെറിച്ചു

ഇരിട്ടി: പലഹാര നിർമാണ യൂണിറ്റിലെ ജനറേറ്റർ പൊട്ടിത്തെറിച്ചു.അപകടത്തിൽ ആർക്കും പരിക്കില്ല. തീ പടരുന്നതിന് മുന്പ് സ്ഥാപനത്തിലെ ജീവനക്കാരും നാട്ടുകാരും ചേർന്ന് അണച്ചതിനാൽ വൻ ദുരന്തം ഒഴിവായി. പായം പഞ്ചായത്തിലെ മാടത്തിൽ ടൗണിൽ രാജീവന്‍റെ ഉടമസ്ഥതയിലുള്ള പലഹാര നിർമാണ യൂണിറ്റിലാണ് അപകടം ഉണ്ടായത്. ഇരിട്ടിയിൽ നിന്നുള്ള അഗ്നിരക്ഷാ സേനയും സ്ഥലത്തെത്തിയിരുന്നു. സ്റ്റേഷൻ ഓഫീസർ ടി.വി. ഉണ്ണികൃഷ്ണന്‍, അസിസ്റ്റന്‍റ് സ്റ്റേഷൻ ഓഫീസർ ജോബി മാത്യു, ഫയർ ആൻഡ് റസ്ക്യൂ ഓഫീസർമാരായ അനീഷ് മാത്യു, അരുൺകുമാർ, സി.വി. സൂരജ്, കെ. രാഹുൽ, ഹോം ഗാർഡുമാരായ കെ. രമേശൻ, എം.സി. രാധാകൃഷ്ണൻ, സിവിൽ ഡിഫൻസ് സേനാംഗങ്ങളായ ഡോളമി കുര്യാച്ചൻ, ജസ്റ്റിൻ സജി, വിനീത്കുമാർ എന്നിവരടങ്ങുന്ന സംഘം മറ്റു സുരക്ഷാ ക്രമീകരണങ്ങൾ നടത്തി.

ദേശീയപാത നിര്‍മാണ അപാകത: ആക്‌ഷന്‍ കമ്മിറ്റി രൂപീകരിച്ചു

പയ്യന്നൂര്‍: വെള്ളമൊഴുകിയിരുന്ന തോട് ദേശീയപാത നിര്‍മാണത്തിനിടയിൽ മൂടിയതിനെ തുടര്‍ന്ന് വീടുകളില്‍ വെള്ളം കയറിയതിന് പരിഹാരം കാണണമെന്ന് ആവശ്യപ്പെട്ട് നടത്തുന്ന പ്രക്ഷോഭങ്ങള്‍ക്കായി ആക്‌ഷന്‍ കമ്മിറ്റി രൂപീകരിച്ചു. കണ്ടോത്ത് കോത്തായിമുക്ക് അടിപ്പാത മുതല്‍ തണല്‍ ഇക്കോ പാര്‍ക്ക് വരെയുള്ള പ്രദേശം വയലും ചതുപ്പുനിലവുമായതിനാല്‍ ദേശീയപാത നിര്‍മാണം വയഡക്റ്റ് രീതിയിലാക്കണമെന്ന് അമ്പലത്തറയില്‍ ചേര്‍ന്ന ഹൈവേ ആക്‌ഷന്‍ കമ്മിറ്റി രൂപീകരണ യോഗം ആവശ്യപ്പെട്ടു. കാലവര്‍ഷാരംഭത്തിൽ രണ്ടുദിവസത്തെ മഴയിൽ പ്രദേശമാകെ വെള്ളത്തിനടിയിലായി. അന്പതിലധികം വീടുകളില്‍ വെള്ളം കയറി. കിണര്‍ വെള്ളം മലിനമായി. ടോയ്‌ലറ്റ് ഉപയോഗിക്കാന്‍ പറ്റാതായി. ഒരാഴ്ചയിലധികം മാറിത്താമസിക്കേണ്ടി വന്നു. അമ്പലത്തറ ഭാഗത്തെ അധികജലം ഒഴുക്കി പെരുമ്പപ്പുഴയിലെത്തിച്ചുകൊണ്ടിരുന്ന കൊളാഞ്ചി തോട് ദേശീയപാത നിര്‍മാണത്തിന്‍റെ ഭാഗമായി മണ്ണിട്ട് നികത്തിയതാണ് വെള്ളക്കെട്ടിന് കാരണമായത്. വളരെ ആഴത്തില്‍ കളിമണ്ണ് നിക്ഷേപമുള്ള ചതുപ്പ് പ്രദേശത്ത് അശാസ്ത്രീയമായി മണ്ണു നിറച്ച് എംബാംഗ്‌മെന്‍റ് രീതിയിലുള്ള റോഡ് നിര്‍മാണം അനുയോജ്യമല്ല. പ്രദേശത്തെ മുഴുവന്‍ നിര്‍മാണ പ്രവര്‍ത്തനങ്ങളും അന്തിമ തീരുമാനമുണ്ടാകുന്നതുവരെ നിര്‍ത്തിവയ്ക്കാനും ജലനിര്‍ഗമനത്തിനുള്ള തടസങ്ങള്‍ അടിയന്തരമായി നീക്കം ചെയ്യാനും ദേശീയപാത അതോറിറ്റിയോട് യോഗം ആവശ്യപ്പെട്ടു. അമ്പലത്തറ ഹൈവേ ആക്‌ഷന്‍ കമ്മിറ്റിയുടെ നേതൃത്വത്തില്‍ ഒപ്പുശേഖരണം നടത്താനും അധികാര സ്ഥാനങ്ങളിലേക്ക് നിവേദനങ്ങള്‍ അയയ്ക്കാനും പ്രത്യക്ഷ സമരത്തിലേക്ക് നീങ്ങാനും അടുത്തയാഴ്ച വിപുലമായ കണ്‍വന്‍ഷന്‍ വിളിച്ചു ചേര്‍ക്കാനും യോഗം തീരുമാനിച്ചു. യോഗത്തില്‍ എ. സെയ്ഫുദ്ദീന്‍ അധ്യക്ഷത വഹിച്ചു. കെ.ടി. ഷറഫുദ്ദീന്‍, പി.വി. ബിജു, സി. ദിവാകരന്‍, കെ. രാജന‍ മുരളീധരന്‍ കരിവെള്ളൂര്‍, പി.പി. രാജന്‍, കമാല്‍ റഫീക്ക്, ഡോ. ഇ. ഉണ്ണിക്കൃഷ്ണന്‍, ജില്ലാ പരിസ്ഥിതി ഏകോപന സമിതി കണ്‍വീനര്‍ കെ.ഇ. കരുണാകരന്‍ തുടങ്ങിയവര്‍ പ്രസംഗിച്ചു. എ. സൈഫുദ്ദീന്‍-ചെയര്‍മാന്‍, കെ.ടി. ഷറഫുദീന്‍-കണ്‍വീനര്‍ എന്നിവരെ ഭാരവാഹികളാക്കി 26 അംഗ ആക്‌ഷന്‍ കമ്മിറ്റിയെയും തെരഞ്ഞെടുത്തു.

ആനമതിലിന്‍റെ ഉയരം കൂട്ടാനായി ഒപ്പുശേഖരണം

ചെട്ടിയാംപറമ്പ്: പൂക്കുണ്ടിൽ ആനപ്രതിരോധ മതിൽ കാട്ടാന ഭേദിച്ച് ജനവാസ മേഖലയിൽ നാശം വിതച്ചതിനെ തുടർന്ന് മതിലിന്‍റെ ഉയരം വർധിപ്പിക്കണം എന്നാവശ്യപ്പെട്ട് ചെട്ടിയാംപറമ്പ് പള്ളിയുടെ നേതൃത്വത്തിൽ പ്രദേശവാസികളുടെ ഒപ്പുശേഖരണം നടത്തി. മുഖ്യമന്ത്രിക്ക് നിവേദനം കൈമാറുന്ന തിന്‍റെ ഭാഗമായാണ് ഒപ്പുശേഖരണം നടത്തുന്നതെന്ന് ചെട്ടിയാംപറമ്പ് പള്ളി വികാരി ഫാ. സെബാസ്റ്റ്യൻ പൊടിമറ്റം പറഞ്ഞു. പ്രതിരോധമതിലിന്‍റെ വളയൻചാൽ മുതൽ അടയ്ക്കാത്തോട് കരിയംകാപ്പു വരെയുള്ള പ്രദേശത്ത് ഉയരം കൂട്ടുക, കൊലയാളി മോഴയാനയെ ആറളം വന്യജീവി സങ്കേതത്തിൽ നിന്ന് പിടിച്ചുമാറ്റുക. മതിൽ ഉയർത്തുന്നതുവരെ താത്കാലിക ഹാഗിംഗ് ഫെൻസിംഗ് സ്ഥാപിക്കുക എന്നിവയാണ് പ്രധാന ആവശ്യങ്ങൾ. വിഷയത്തിൽ അടിയന്തര ഇടപെടലുകൾ ഉണ്ടാകണമെന്നും പള്ളി കമ്മിറ്റി ഭാരവാഹികൾ പറഞ്ഞു. കോ-ഓർഡിനേറ്റർ ഗ്രേസൺ ഉള്ളാഹയിൽ, ബെന്നി മണിമലകരോട്ട്, ബെസി ചോലമറ്റം, സണ്ണി കണിയാംഞാലിൽ, സിബി പൊരുമത്തറ തുടങ്ങിയവർ നേതൃത്വം നൽകി.

ആനമതിൽ കടക്കാൻ മോഴയാനയുടെ ശ്രമം; മതിലിന്‍റെ ഉയരം വർധിപ്പിക്കണമെന്ന്

കേളകം: ആറളം വന്യജീവി സങ്കേതത്തിൽ നിന്നും ജനവാസ മേഖലയിൽ എത്തുന്ന കാട്ടാനകളെ പ്രതിരോധിക്കാനായി കേളകം പഞ്ചായത്തിലെ വളയൻചാൽ മുതൽ അടയ്ക്കാത്തോട് കരിയംകാപ്പു വരെ നിർമിച്ച ആന പ്രതിരോധ മതിലിന്‍റെ ഉയരം കൂട്ടണമെന്ന ആവശ്യം ശക്തമാകുന്നു. 2015ലാണ് ഈ പ്രദേശത്ത് ആനപ്രതിരോധ മതിൽ നിർമിച്ചത്. 13 കോടി രൂപ ചെലവഴിച്ചാണ് 13 കിലോമീറ്റർ ദൂരത്തിൽ കരിങ്കൽ കൊണ്ട് പിരമിഡാകൃതിയിലുള്ള ഈ മതിലിന്‍റെ നിർമാണം നടത്തിയത്. കഴിഞ്ഞ 10 വർഷമായി ഒന്നോ, രണ്ടോ തവണ ഒഴിച്ചാൽ കാട്ടാന ഇത് മറികടന്ന് ജനവാസ മേഖലയിൽ എത്തിയിട്ടില്ല. എന്നാൽ, ആറളം വന്യജീവി സങ്കേതത്തിലെ കൊലയാളി മോഴയാന കഴിഞ്ഞദിവസം ഈ മതിൽ അനായാസം മറികടക്കുകയും ജനവാസ മേഖലയിലെത്തി വ്യാപക കൃഷി നാശമുണ്ടാക്കുകയും ചെയ്തിരുന്നു. ശനിയാഴ്ച രാത്രിയിലും ഇതേ മതിൽ കടക്കാനുള്ള ശ്രമം മോഴയാന നടത്തി. അസാമാന്യ വലുപ്പമുള്ള ഈ ആന മതിൽ കടക്കും എന്നാണ് പ്രദേശവാസികളുടെ ആശങ്ക. അതുകൊണ്ടുതന്നെ മതിലിന്‍റെ ഉയരം ഒരുമീറ്റർ എങ്കിലും വർധിപ്പിക്കണം എന്നാണ് പ്രദേശവാസികൾ ആവശ്യപ്പെടുന്നത്. അതുവരെ താത്കാലിക പരിഹാരം എന്ന നിലയിൽ വൈദ്യുത തൂക്കുവേലി സ്ഥാപിച്ച് പരിഹാരം കാണണമെന്നാണ് ആവശ്യം.

നഗരമധ്യത്തിൽ തമിഴ്നാട് സ്വദേശിയെ തലയ്ക്കടിച്ച് കൊലപ്പെടുത്താൻ ശ്രമം; പ്രതി പിടിയിൽ

തലശേരി: പുതിയ ബസ്‌സ്റ്റാൻഡ് ഷോപ്പിംഗ് കോംപ്ലക്സിൽ തമിഴ്നാട് സ്വദേശിയെ കല്ലുകൊണ്ട് തലയ്ക്കടിച്ച് കൊലപ്പെടുത്താൻ ശ്രമം. തലയ്ക്ക് ഗുരുതരമായി പരിക്കേറ്റ ചെന്നൈ സ്വദേശി ശിവയെ (50) പരിയാരം ഗവ. മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. സംഭവവുമായി ബന്ധപ്പെട്ട് കൊയിലാണ്ടി സ്വദേശി സിജോ സേവ്യറെ (27) തലശേരി പോലീസ് അറസ്റ്റ് ചെയ്തു. ശനിയാഴ്ച രാത്രി പത്തോടെയായിരുന്നു സംഭവം. സാമ്പത്തിക ഇടപാട് സംബന്ധിച്ച തർക്കത്തെ തുടർന്ന് ശിവയെ സിജോ ആക്രമിക്കുകയായിരുന്നു. ഗുരുതരമായി പരിക്കേറ്റ ശിവയെ തലശേരി ജനറൽ ആശുപത്രിയിൽ പ്രഥമ ശുശ്രൂഷ നൽകിയശേഷം പരിയാരത്തേക്കു മാറ്റുകയായിരുന്നു. ശിവയുടെ നില അതീവ ഗുരുതരമായി തുടരുകയാണെന്ന് ആശുപത്രി വൃത്തങ്ങൾ അറിയിച്ചു.

കുണ്ടൂർ നടപ്പാലത്തിൽ വെള്ളം കയറി; പാലം അപകടാവസ്ഥയിൽ

ഇരിട്ടി: മലയോര ഹൈവേയുടെ വള്ളിത്തോട് കരിക്കോട്ടക്കരി റീച്ചിൽ ആനപ്പന്തിയിൽ കുണ്ടൂർ പുഴയ്ക്ക് കുറുകെ നിർമിച്ചിരുന്ന താത്കാലിക നടപ്പാലത്തിന് മുകളിൽ വെള്ളം കയറിയതോടെ പാലം അപകടാവസ്ഥയിലായി. കഴിഞ്ഞ ദിവസം ഉണ്ടായ കനത്ത മഴയിലാണ് സംഭവം. ഇതോടെ പാലത്തിലൂടെയുള്ള യാത്ര താത്കാലികമായി തടഞ്ഞു. വെള്ളപ്പാച്ചിലിൽ നടപ്പാലം ഉറപ്പിച്ചിരുന്ന ഭാഗത്തെ കെട്ട് തകരുകയും പാലത്തിന് മുകളിൽ ഉറപ്പിച്ചിരുന്ന പട്ടിക ഇളകി പോകുകയും ചെയ്തതോടെയാണ് ഇതുവഴിയുള്ള യാത്ര താത്കാലികമായി തടഞ്ഞത്. നാട്ടുകാരുടെ നേതൃത്വത്തിൽ അടിയന്തര അറ്റകുറ്റപ്പണികൾ ആരംഭിച്ചിട്ടുണ്ട്. പാലം അപകടാവസ്ഥയിലായതോടെ ആനപ്പന്തി പ്രദേശവാസികൾ കിലോമീറ്ററുകൾ ചുറ്റി വളഞ്ഞാണ് യാത്ര ചെയ്യുന്നത്. പുതുക്കിപ്പയുന്ന പാലത്തിന്‍റെ നിർമാണം ഇഴഞ്ഞു നീങ്ങുകയാണ്. ഇതിനെതിരേ പ്രദേശവാസികൾ പ്രതിഷേധവുമായി രംഗത്തെത്തിയതോടെയാണ് കാറുകാരൻ പുഴയ്ക്ക് കുറുകെ താത്കാലിക നടപ്പാലം നിർമിച്ചത്. ഇതാണ് ഇപ്പോൾ അപകടാവസ്ഥയിലായിരിക്കുന്നത്.

കെ. സുരേന്ദ്രൻ അനുസ്മരണം

കണ്ണൂർ: ഐഎൻടിയുസി അഖിലേന്ത്യാ ഓർഗനൈസിംഗ് സെക്രട്ടറിയും ഡിസിസി പ്രസിഡന്‍റുമായിരുന്ന കെ. സുരേന്ദ്രന്‍റെ അഞ്ചാം ചരമവാർഷിക ദിനത്തോടനുബന്ധിച്ച് ഐഎൻടി യുസി ജില്ലാ കമ്മിറ്റിയുടെ നേതൃത്വത്തിൽ ജില്ലാ കമ്മിറ്റി ഓഫീസിൽ പുഷ്പാർച്ചനയും അനുസ്മരണ യോഗവും നടത്തി. സംസ്ഥാന പ്രസിഡന്‍റ് ആർ. ചന്ദ്രശേഖരൻ ഉദ്ഘാടനം ചെയ്തു. ജില്ലാ പ്രസിഡന്‍റ് ഡോ. ജോസ് ജോർജ് പ്ലാത്തോട്ടം അധ്യക്ഷത വഹിച്ചു. നേതാക്കളായ മനോജ് എടാനി, വി.വി. ശശീന്ദ്രൻ, എ.ടി. നിഷാത്ത്, എ.എം. വിജയൻ, എം.വി. പ്രേമരാജൻ, എം. പ്രഭാകരൻ, യു.കെ. ജലജ, ഗംഗാധരൻ, കെ.സി. ഉല്ലാസൻ, പി. ഷാജി, കെ. സുധാകരൻ, ദിനു മൊട്ടമ്മൽ, സമീർ പള്ളിപ്രം, കെ.വി. മോഹനൻ, കെ.എം. പീറ്റർ, ഷൈജുകുമാർ, കെ.വി. ജയചന്ദ്രൻ എന്നിവർ പ്രസംഗിച്ചു. ഇരിട്ടി: കെ. സുരേന്ദ്രന്‍റെ അഞ്ചാം ചരമവാർഷിക ദിനത്തിൽ ദേശീയ ചുമട്ട് തൊഴിലാളി യൂണിയൻ (ഐഎൻടിയുസി) ഇരിട്ടി ഡിവിഷൻ കമ്മിറ്റിയുടെ നേതൃത്വത്തിൽ ഇരിട്ടിയിൽ അനുസ്മരണവും ഛായാചിത്രത്തിന് മുന്നിൽ പുഷ്പാർച്ചനയും നടത്തി. ഇരിട്ടി ബ്ലോക്ക് കോൺഗ്രസ് പ്രസിഡന്‍റ് പി.എ. നസീർ ഉദ്ഘാടനം ചെയ്തു. യൂണിയൻ പ്രസിഡന്‍റ് കെ. ഇബ്രാഹിം ഹാജി അധ്യക്ഷത വഹിച്ചു.

വായന ദിനാചരണം നടത്തി

ഇരിട്ടി: തലശേരി അതിരൂപതാ കോര്‍പറേറ്റ് എഡ്യുക്കേഷണല്‍ എജന്‍സി, കാത്തലിക് ടീച്ചേഴ്സ് ഗില്‍ഡ് എന്നിവയുടെ നേതൃത്വത്തില്‍ വായന വാരം സംഘടിപ്പിച്ചു. കിളിയന്തറ സെന്‍റ് തോമസ് ഹയര്‍ സെക്കന്‍ഡറി സ്‌കൂളില്‍ പായം പഞ്ചായത്ത് പ്രസിഡന്‍റ് പി. രജനി ഉദ്ഘാടനം ചെയ്തു. മാനേജര്‍ ഫാ. ആന്‍റണി ആനക്കല്ലില്‍ അധ്യക്ഷത വഹിച്ചു. പഞ്ചായത്തംഗം അനില്‍ എം. കൃഷ്ണന്‍, പിടിഎ പ്രസിഡന്‍റ് ജോമി ജോസഫ്, പ്രിന്‍സിപ്പല്‍ എം.ജെ. വിനോദ്, സുനില്‍ കുര്യാക്കോസ് എന്നിവര്‍ പ്രസംഗിച്ചു. കുന്നോത്ത് സെന്‍റ് ജോസഫ്സ് യുപി സ്കൂളിൽ വായന ദിനത്തിന്‍റെയും വായന മാസാചരണത്തിന്‍റെയും ഉദ്ഘാടനം പായം പഞ്ചായത്ത് അംഗം ഷൈജൻ ജേക്കബ് നിർവഹിച്ചു. പായം പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ മുജീബ് കുഞ്ഞുക്കണ്ടി അധ്യക്ഷത വഹിച്ചു. ബ്ലോക്ക് പഞ്ചായത്ത് മെംബർ ഹമീദ് കണിയാട്ടയിൽ, മുഖ്യാധ്യാപകൻ ബിജു കുറുമുട്ടം, പിടിഎ പ്രസിഡന്‍റ് കെ.എം. ഷിനു, ഫൈഹ, എ. ഷഹീർ, അഞ്ജു മാത്യു എന്നിവർ പ്രസംഗിച്ചു. കണ്ണൂർ: സങ്കീർണതകൾ നിറഞ്ഞ ജീവിതത്തിൽ നിസാരമായ പ്രശ്നങ്ങളുടെയും വഴക്കുകളുടെയും പേരിൽ ജീവിതത്തിൽ നിന്നും ഓടിയൊളിക്കാൻ ശ്രമിക്കുന്നവർക്ക് വായന ജീവിക്കാനുള്ള പ്രചോദനമാകുമെന്ന് എഴുത്തുകാരൻ നാരായണൻ കാവുമ്പായി അഭിപ്രായപ്പെട്ടു. കണ്ണൂർ സെന്‍റ് മൈക്കിൾസ് ആംഗ്ലോ ഇന്ത്യൻ ഹയർ സെക്കൻഡറി സ്കൂൾ വിദ്യാരംഗം കലാസാഹിത്യ വേദി വായന മാസാചരണത്തിന്‍റെ ഭാഗമായി സംഘടിപ്പിച്ച സഹൃദയ സംഗമത്തിൽ പ്രസംഗിക്കുകയായിരുന്നു അദ്ദേഹം. വായന വീടുകളിലും വിദ്യാലയങ്ങളിലും എന്ന സന്ദേശത്തോടെയാണ് സഹൃദയ സംഗമം സംഘടിപ്പിച്ചത്. പ്രിൻസിപ്പൽ സി.കെ. മനോജ്കുമാർ അധ്യക്ഷത വഹിച്ചു. അഹാൻ ബിജേഷ്, അമൻ എൽ ബിനോയ്, പി.കെ. നിവിൻ, എ. സജിത്ത്, ശ്രാവൺ ശ്രീകാന്ത് എന്നിവർ പ്രസംഗിച്ചു. മുണ്ടയാട്: വായന വാരാചരണത്തോടനുബന്ധിച്ച് മഹിളാ കോൺഗ്രസ്‌ എളയാവൂർ മണ്ഡലം കമ്മിറ്റിയുടെ ആഭിമുഖ്യത്തിൽ യുപി, ഹൈസ്കൂൾ വിദ്യാർഥികൾക്കായി വായന മത്സരം സംഘടിപ്പിച്ചു. വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ സുരേഷ് ബാബു എളയാവൂർ ഉദ്ഘാടനം ചെയ്തു. മഹിളാ കോൺഗ്രസ്‌ മണ്ഡലം പ്രസിഡന്‍റ് ടി.സി. സിജ അധ്യക്ഷത വഹിച്ചു. ചടങ്ങിൽ വിജയികൾക്കും പങ്കെടുത്തവർക്കും പുസ്തകങ്ങൾ വിതരണം ചെയ്തു. മഹിളാ കോൺഗ്രസ്‌ ജില്ലാ പ്രസിഡന്‍റ് ശ്രീജ മഠത്തിൽ, എളയാവൂർ മണ്ഡലം കോൺഗ്രസ്‌ പ്രസിഡന്‍റ് സതീശൻ ബാവുക്കൻ, പ്രഭാവതി, എം.കെ. അഞ്ജന, കെ. റീഷ, സി. സുവർണ തുടങ്ങിയവർ പ്രസംഗിച്ചു.

ശ്രീപുരം സ്കൂളിൽ ഫുട്ബോൾ ടർഫ് ഉദ്ഘാടനം ചെയ്തു

കണ്ണൂർ: പള്ളിക്കുന്ന് ശ്രീപുരം ഇംഗ്ലീഷ് മീഡിയം ആൻഡ് ജൂണിയർ കോളജിൽ ഫുട്ബോൾ ടർഫ് കെ.വി. സുമേഷ് എംഎൽഎ ഉദ്ഘാടനം ചെയ്തു. സ്കൂൾ പേട്രനും കോട്ടയം അതിരൂപത സഹായമെത്രാനുമായ മാർ ജോസഫ് പണ്ടാരശേരിൽ അധ്യക്ഷത വഹിച്ചു. സ്കൂൾ മാനേജർ ഫാ. ജോയി കട്ടിയാങ്കൽ, പ്രിൻസിപ്പൽ സിസ്റ്റർ അയോണ സൈമൺ, കറസ്പോണ്ടന്‍റ് ഫാ. സൈജു സൈമൺ മേക്കര, മാനേജിംഗ് കമ്മിറ്റി പ്രതിനിധി പി.ജെ. മാത്യൂസ്, കായികാധ്യാപകൻ സുധീഷ് കുമാർ എന്നിവർ പ്രസംഗിച്ചു.

ജ്യൂസില്‍ ചത്ത കൂറയെ കണ്ടെത്തിയ സംഭവം; ഹോട്ടലിന് നഗരസഭ നോട്ടീസ് നല്‍കി

പയ്യന്നൂര്‍: ഹോട്ടലില്‍ നിന്നും പാര്‍സലായി എത്തിച്ച ഫ്രഷ് ജ്യൂസില്‍ ചത്ത കൂറയെ കണ്ടെത്തിയെന്ന പരാതിയില്‍ നഗരസഭ ആരോഗ്യ വിഭാഗം ഹോട്ടലിന് നോട്ടീസ് നല്‍കി. എടാട്ട് സ്വദേശിനിയായ യുവതി പയ്യന്നൂര്‍ നഗരസഭ അധികൃതര്‍ക്ക് നല്‍കിയ പരാതിയെ തുടര്‍ന്നാണ് നടപടി. വ്യാഴാഴ്ച വൈകുന്നേരം ആറേമുക്കാലോടെ നഗരസഭാ കാര്യാലയത്തിന് സമീപത്തെ ഹോട്ടലിലാണ് പരാതിക്കാസ്പദമായ സംഭവം.

തനത് വേഷവിധാനത്തോടെ മാതൃവേദി ‌ജനറൽബോഡി യോഗം

തളിപ്പറന്പ്: സമുദായ ശാക്തീകരണ വർഷത്തിൽ തനത് വേഷവിധാനത്തോടും ഭക്ഷണവിഭവങ്ങളോടും കലാരൂപങ്ങളോടും കൂടി വ്യത്യസ്തതയാർന്ന രീതിയിൽ സീറോ മലബാർ മാതൃവേദി തലശേരി അതിരൂപത ജനറൽ ബോഡി യോഗം തളിപ്പറന്പിൽ നടത്തി. അതിരൂപത പ്രസിഡന്‍റ് സിസി ആന്‍റണി പതാക ഉയർത്തി. അമ്മമാർ അണിനിരന്ന അരവഞ്ചാൽ സ്നേഹദീപം ബാൻഡ് മേളത്തിന്‍റെ അകമ്പടിയോടെ വിശിഷ്ഠാതിഥികളെ റാലിയായി വേദിയിലേക്ക് ആനയിച്ചു. തലശേരി ആർച്ച്ബിഷപ് മാർ ജോസഫ് പാംപ്ലാനി സമ്മേളനം ഉദ്ഘാടനം ചെയ്തു. സീറോ മലബാർ മാതൃവേദി ഗ്ലോബൽ പ്രസിഡന്‍റ് ബീന ജോഷി മുഖ്യപ്രഭാഷണം നടത്തി. ഫാ. മാത്യു ആശാരിപറമ്പിൽ, ഫാ. ജോയ്സ് കാരിക്കാത്തടത്തിൽ, സിസ്റ്റർ എൽസി എസ്എച്ച്, ഷൈനി, ഗ്ലോബൽ സമിതി ഭാരവാഹികളായ മോളി, ബ്രില്ലി എന്നിവർ പ്രസംഗിച്ചു. അതിരൂപത സെക്രട്ടറി ലിൻസി റിപ്പോർട്ടും അതിരൂപത ട്രഷറർ റെജീന വരവ്ചെലവ് കണക്കും അവതരിപ്പിച്ചു. അതിരൂപത ഡയറക്ടർ ഫാ. ജോബി കോവാട്ട്, ആനിമേറ്റർ സിസ്റ്റർ ലിന്‍റ, ബ്രദർ ജോയൽ, ഭാരവാഹികളായ മേഴ്‌സി, വത്സമ്മ, ജിജി, ബീന എന്നിവർ നേതൃത്വം നൽകി. മാർഗംകളി, കോൽക്കളി, നൃത്തവിസ്മയം, റമ്പാൻ പാട്ട്, സംഘഗാനം എന്നിവ വിവിധ മേഖലകളിലെ അമ്മമാർ അവതരിപ്പിച്ചു. ഭക്ഷണ വിഭവങ്ങൾ ഓരോ 19 മേഖലയിൽ നിന്നുള്ളവരും പാകം ചെയ്തു കൊണ്ടുവന്ന് പങ്കിട്ടു കഴിച്ചു. നാനൂറോളം അമ്മമാർ സംഗമത്തിൽ പങ്കെടുത്തു.

ക്രഷറിലെ കവർച്ച: സ്ത്രീകളടക്കം അഞ്ചുപേർ അറസ്റ്റിൽ

കൂത്തുപറമ്പ്: കോളയാട് എടയാറിലെ മലബാർ ക്രഷറിൽ നടന്ന കവർച്ചയുമായി ബന്ധപ്പെട്ട് നാല് സ്ത്രീകളടക്കം അഞ്ചുപേർ അറസ്റ്റിൽ. ഇപ്പോൾ മുണ്ടേരിമൊട്ട മതുക്കോത്ത് വലിയകുണ്ട് കോളനിയിലെ താമസക്കാരായ തഞ്ചാവൂർ സെൻകിപ്പട്ടി സ്വദേശിനികളായ ലക്ഷ്മി (36), രേവതി (31), ഷെൽവി (27), പാർവതി (50), മുണ്ടേരിമൊട്ട കാഞ്ഞിരോട് തെരുവിലെ എസ്.എം. ഫൈസൽ എന്നിവരാണ് അറസ്റ്റിലായത്. ലക്ഷങ്ങൾ വിലവരുന്ന കോപ്പറുകളും അനുബന്ധ ഉപകരണങ്ങളുമാണ് മോഷണം പോയത്. മോഷ്ടിച്ച സാധനങ്ങൾ കാഞ്ഞിരോട്ടെ ആക്രികച്ചവട സ്ഥാപനത്തിൽ നിന്ന് കണ്ടെടുത്തു. മോഷണവസ്തുക്കളാണെന്ന് അറിഞ്ഞുകൊണ്ട് തന്നെ ഇവ വിലയ്ക്ക് വാങ്ങിയ എന്ന കുറ്റത്തിനാണ് ഫൈസൽ കേസിൽ പ്രതിയായത്. സ്ത്രീകൾ സമാനമായ മറ്റ് കേസുകളിലും ഉൾപ്പെട്ടിട്ടുണ്ടോ എന്നതിനെ കുറിച്ചും അന്വേഷണം നടത്തി വരികയാണെന്ന് കണ്ണവം ഇൻസ്പെക്ടർ കെ.വി.ഉമേഷ് പറഞ്ഞു 14 മാസത്തോളമായി ക്രഷർ പൂട്ടിക്കിടക്കുകയായിരുന്നു. സ്ഥാപനത്തിന്‍റെ പിൻഭാഗത്തെ ഗേറ്റ് വഴിയാണ് മോഷ്ടാക്കൾ അകത്തു കയറിയത്.

അന്പത്തിനാലുകാരിയെ പീഡിപ്പിച്ച് സ്വർണവും പണവും കാറും കവർന്നു

പഴയങ്ങാടി: വിധവയായ അന്പത്തിനാലുകാരിയെ വിവാഹം കഴിച്ചതായി തെറ്റിദ്ധരിപ്പിച്ച് സ്വർണവും പണവും കാറും കവർന്നതായി പരാതി. എടക്കാട് സ്വദേശിക്കെതിരേയാണ് കണ്ണപുരം പോലീസിൽ പരാതി നല്കിയിരിക്കുന്നത്. സുഹൃത്തായ സ്ത്രീയുടെ പരിചയത്തിൽ നിന്നാണ് അന്പത്തിനാലുകാരി മധ്യവയസ്കനുമായി പരിചയത്തിലാകുന്നത്. തുടർന്ന് ഇയാൾ തന്നെ വിവാഹം കഴിച്ചതായി വ്യാജരേഖയുണ്ടാക്കിയതായി സ്ത്രീ നല്കിയ പരാതിയിൽ പറയുന്നു. 2025 ജനുവരി മുതൽ മാർച്ച് വരെയുള്ള കാലയളവിൽ ഇയാൾ ചെറുകുന്നിലെ അപ്പാർട്ട്മെന്‍റിൽ കൊണ്ടുപോയി തന്നെ പീഡിപ്പിക്കുകയും 23 പവൻ സ്വർണാഭരണങ്ങൾ തട്ടിയെടുത്തതിന് പുറമെ തന്‍റെ പേരിൽ കാർ ലോണെടുക്കുകയും അത് കൈക്കലാക്കുകയും ചെയ്തുവെന്നും പരാതിയിൽ പറയുന്നു. സ്വത്ത് വിറ്റ് കിട്ടിയ 30 ലക്ഷം രൂപ കൈക്കലാക്കിയെന്നും പരാതിയിൽ പറയുന്നു. പോലീസിന് ഇയാളെക്കുറിച്ച് സൂചനകൾ ലഭിച്ചിട്ടുണ്ട്.

സ്ഥാനാരോഹണം ഇന്ന്

തൃശൂർ: വൈസ്മെൻ ഇന്‍റർനാഷണൽ വെസ്റ്റ് ഇന്ത്യ റീജണിന്‍റെ റീജണൽ ഡയറക്ടറായി പി.എസ്. ഫ്രാൻസിസ് ഇന്ന് സ്ഥാനമേൽക്കും. കോഴിക്കോട് ഹോട്ടൽ പാരമൗണ്ട് ടവറിൽ നടക്കുന്ന മുപ്പത്തെട്ടാമതു റീജണൽ കൺവൻഷൻ മുൻ ഇന്‍റർനാഷണൽ പ്രസിഡന്‍റ് വി.എസ്. ബഷീർ ഉദ്ഘാടനംചെയ്യും. നാനൂറിലേറെ പ്രതിനിധികൾ പങ്കെടുക്കും. കോഴിക്കോട്ടെ പ്രമുഖ പരസ്യ ഏജൻസി ഫ്രന്‍റ്‌ലൈൻ കമ്യൂണിക്കേഷൻസിന്‍റെ മാനേജിംഗ് ഡയറക്ടറായ ഫ്രാൻസിസ് താമരശേരി ചമൽ പയ്യപ്പേൽ കുടുംബാംഗമാണ്. തൃശൂർ കൊരട്ടി മുതൽ മംഗലാപുരംവരെ വ്യാപിച്ചുകിടക്കുന്ന വെസ്റ്റ് ഇന്ത്യ റീജിയൻ വിപുലമായ സേവനപ്രവർത്തനങ്ങൾ ഇക്കൊല്ലം നടത്തുമെന്നു ഭാരവാഹികൾ അറിയിച്ചു.

കൊട്ടിയൂർ ഉത്സവം: അന്ത്യോദയ എക്സ്പ്രസിന് തലശേരിയിൽ സ്റ്റോപ്പ്

തലശേരി: കൊട്ടിയൂർ മഹോത്സവത്തോടനുബന്ധിച്ച് 26 മുതൽ 29 വരെ കൊച്ചുവേളി -മംഗലാപുരം ജംഗ്ഷൻ റൂട്ടിൽ സർവീസ് നടത്തുന്ന അന്ത്യോദയ സൂപ്പർഫാസ്റ്റ് എക്സ്പ്രസിന് തലശേരി താത്കാലിക സ്റ്റോപ്പ് അനുവദിച്ചു. തലശേരി റെയിൽ ആൻഡ് റോഡ് പാസഞ്ചേഴ്സ് ഫോറത്തിന്‍റെ അപേക്ഷയെ തുടർന്നാണ് സ്റ്റോപ്പ് അനുവദിച്ചത്. ‌ട്രെയിൻ പുലർച്ചെ 5.38 ന് തലശേരി റെയിൽവെ സ്റ്റേഷനിൽ എത്തുകയും 5.40 ന് പുറപ്പെടുകയും ചെയ്യും. തിരിച്ച് തിരുവനന്തപുരത്തേക്ക് 27 ,29 തീയതികളിൽ രാത്രി 10.22 ന് പുറപ്പെടുകയും ചെയ്യും.

ചന്ദനക്കാംപാറയിൽ സ്പോർട്സ് ഹോസ്റ്റൽ

ചന്ദനക്കാംപാറ: ചന്ദനക്കാംപാറ ഹൈസ്കൂളിന്‍റെ ബാസ്കറ്റ്ബോൾ പരിശീലന കേന്ദ്രത്തിൽ ആൺകുട്ടികൾക്കും പെൺകുട്ടികൾക്കും പ്രത്യേകമായി സംസ്ഥാന സ്പോർട്സ് കൗൺസിലിന്‍റെ ആഭിമുഖ്യത്തിലുള്ള സ്പോർട്സ് ഹോസ്റ്റൽ അനുവദിച്ചു. ഏഴ്, എട്ട്, ഒമ്പത് ക്ലാസുകളിലെ ആൺകുട്ടികൾക്കും പെൺകുട്ടികൾക്കുമുള്ള സെലക്ഷൻ അടുത്തയാഴ്ച കണ്ണൂർ സ്പോർട്സ് സ്കൂളിൽ നടക്കും. നൂറുകണക്കിന് ദേശീയ, അന്തർദേശീയ ബാസ്കറ്റ് ബോൾ താരങ്ങളെ സൃഷ്ടിച്ചതിലൂടെ പ്രശസ്തി നേടിയ ചന്ദനക്കാംപാറയിൽ നിന്നുള്ള ഇരുനൂറിൽപരം പേരാണ് ഇതുവരെ കേന്ദ്ര, സംസ്ഥാന സർക്കാർ തലങ്ങളിലെ ഉയർന്ന സ്ഥാനങ്ങളിൽ ജോലി നേടിയി‌ട്ടുള്ളത്. ചെറുപുഷ്പം സ്പോർട്സ് അക്കാഡമിയുടെ ആഭിമുഖ്യത്തിൽ എല്ലാ വർഷവും അഖില കേരള പുരുഷ, വനിത ബാസ്കറ്റ്ബോൾ ടൂർണമെന്‍റ് നടത്തുന്നുണ്ട്.

"യോഗ ഏക ഭൂമിക്ക് ഏകാരോഗ്യത്തിന് '

കണ്ണൂർ: പതിനൊന്നാമത് അന്താരാഷ്‌ട്ര യോഗ ദിനത്തിന്‍റെ ജില്ലാതല ഉദ്ഘാടനം കളക്ടറേറ്റ് ഓഡിറ്റോറിയത്തില്‍ മന്ത്രി കടന്നപ്പള്ളി രാമചന്ദ്രന്‍ നിര്‍വഹിച്ചു. യോഗയുടെ ദര്‍ശനകളും അനുശാസനങ്ങളും ഉള്‍ക്കൊണ്ട് അതിനെ ഒരു കലയായി സ്വീകരിച്ച് ജീവിതചര്യയായി കാണണമെന്ന് മന്ത്രി പറഞ്ഞു. പരിപാടിയില്‍ മന്ത്രി കടന്നപ്പള്ളി രാമചന്ദ്രന്‍, ജില്ലാ കളക്ടര്‍ അരുണ്‍ കെ. വിജയന്‍, എഡിഎം കല ഭാസ്‌കര്‍, ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യന്‍ എന്നിവര്‍ നാഷണല്‍ ആയുഷ് മിഷന്‍ യോഗാ ഇന്‍സ്ട്രക്ടര്‍ക്കൊപ്പം യോഗയില്‍ പങ്കാളികളായി. സംസ്ഥാന ആയുഷ് വകുപ്പിന്‍റെയും നാഷണല്‍ ആയുഷ് മിഷന്‍ കേരളത്തിന്‍റെയും സംയുക്താഭിമുഖ്യത്തിലായിരുന്നു പരിപാടി സംഘടിപ്പിച്ചത്. ഉദ്ഘാടനത്തോടനുബന്ധിച്ച് യോഗാ ഡാന്‍സ് അരങ്ങേറി. ജില്ലാ ഭരണകൂടത്തിന്‍റെയും നാഷണല്‍ ആയുഷ് മിഷന്‍റെയും ജില്ലാ ടൂറിസം പ്രൊമോഷന്‍ കൗണ്‍സിലിന്‍റെയും ആഭിമുഖ്യത്തില്‍ പയ്യാമ്പലം ബീച്ചില്‍ യോഗ സംഗമം സംഘടിപ്പിച്ചു. ജില്ലാ കളക്ടര്‍ അരുണ്‍ കെ. വിജയന്‍, അസിസ്റ്റന്‍റ് കളക്ടര്‍ എഹ്തെദ മുഫസിര്‍, സിറ്റി പോലീസ് കമ്മീഷണര്‍ പി. നിധിന്‍രാജ്, നാഷണല്‍ ആയുഷ് മിഷന്‍ ജില്ലാ പ്രോഗ്രാം മാനേജര്‍ ഡോ. കെ.സി. അജിത്കുമാര്‍ എന്നിവർ പങ്കെടുത്തു. പരിപാടിയോടനുബന്ധിച്ച് ബീച്ച് പരിസരത്ത് തണല്‍ മരങ്ങള്‍ നട്ടുപിടിപ്പിച്ചു. മട്ടന്നൂര്‍ ബഡ്‌സ് സ്‌കൂള്‍ വിദ്യാര്‍ഥികള്‍ അവതരിപ്പിച്ച യോഗ ഡാന്‍സും അരങ്ങേറി. ചേതന യോഗയും യോഗ അസോസിയേഷൻ ഓഫ് കണ്ണൂരും സംയുക്തമായി ആയിരം പേരുടെ യോഗാ പ്രദർശനവും ഫ്യൂഷൻ ഡാൻസും സംഘടിപ്പിച്ചു. കണ്ണൂർ പോലീസ്‌ ടർഫിൽ യോഗ പ്രദർശനം മന്ത്രി കെ.എൻ. ബാലഗോപാൽ ഉദ്‌ഘാടനം ചെയ്തു. കെ.വി. സുമേഷ് എംഎൽഎ അധ്യക്ഷനായിരുന്നു. സിപിഎം ജില്ലാ സെക്രട്ടറി കെ.കെ. രാഗേഷ്, ജില്ലാ സ്പോർട്സ് കൗൺസിൽ പ്രസിഡന്‍റ് കെ.കെ. പവിത്രൻ, ഡിപിഎം ഡോ. കെ.സി. അജിത്കുമാർ, ബാലകൃഷ്ണ സ്വാമി, കെ.ടി. കൃഷ്ണദാസ്, സി. വിജയൻ എന്നിവർ പ്രസംഗിച്ചു. ചേതന യോഗ സംസ്ഥാന സെക്രട്ടറി ഡോ. കെ. രാജഗോപാൽ യോഗദിന സന്ദേശം നൽകി. ചേതന യോഗ ജില്ലാ സെക്രട്ടറി ഡോ. പ്രേമരാജൻ കാന യോഗ പ്രദർശനം നയിച്ചു. തലശേരി: കണ്ണൂര്‍ സെന്‍ട്രല്‍ ബ്യൂറോ ഓഫ് കമ്യൂണിക്കേഷന്‍റെ നേതൃത്വത്തില്‍ കേന്ദ്രീയ വിദ്യാലയത്തില്‍ നടന്ന യോഗ ദിനാചരണം തലശേരി ബ്ലോക്ക് പഞ്ചായത്ത് പ്രസിഡന്‍റ് സി.പി. അനിത ഉദ്ഘാടനം ചെയ്തു. കേന്ദ്രീയ വിദ്യാലയ പ്രിന്‍സിപ്പല്‍ ശ്രീജ വിവേക് അധ്യക്ഷത വഹിച്ചു. ജില്ലാ യോഗ ടീച്ചേഴ്‌സ് അസോസിയേഷന്‍ സെക്രട്ടറി എം. രാമചന്ദ്രന്‍, ധര്‍മടം ആയുര്‍വേദ ഡിസ്‌പെന്‍സറി മെഡിക്കല്‍ ഓഫീസര്‍ ഡോ. പ്രീതി എം. പ്രദീപ് എന്നിവർ ക്ലാസെടുത്തു. ഇരിട്ടി: ബ്ലോക്ക്‌ പഞ്ചായത്തിൽ നടന്ന യോഗ ദിനാചാരണം ബ്ലോക്ക്‌ പഞ്ചായത്ത് പ്രസിഡന്‍റ് കെ. വേലായുധൻ ഉദ്ഘാടനം ചെയ്യുന്നു. ആരോഗ്യ സ്റ്റാൻഡിംഗ് കമ്മിറ്റി ചെയർമാൻ എം. രതീഷ് അധ്യക്ഷത വഹിച്ചു. കെ. പ്രകാശൻ, ഡോ. സി. പ്രത്യുഷ എന്നിവർ ക്ലാസെടുത്തു. ട്രെയിനർ എ. ഭാഗീരഥി യോഗ പരിശീലനത്തിന് നേതൃത്വം നൽകി. അയ്യൻകുന്ന് പഞ്ചായത്തിന്‍റെയും മുണ്ടയാംപറമ്പ് ആയുർവേദ ഡിസ്പെൻസറിയുടെയും സംയുക്താഭിമുഖ്യത്തിൽ മുണ്ടയാംപറമ്പ് വാർഡിൽ യോഗ ദിനാചരണവും പ്രദർശനവും സംഘടിപ്പിച്ചു. പ്രസിഡന്‍റ് കുര്യാച്ചൻ പൈമ്പള്ളിക്കുന്നേൽ ഉദ്ഘാടനം ചെയ്തു. പഞ്ചായത്ത് അംഗങ്ങളായ മിനി വിശ്വനാഥൻ, സജി മച്ചിത്താനിയിൽ, മെഡിക്കൽ ഓഫിസർ ഡോ. താര, ഡോ. ലാലുപ്രസാദ്, യോഗ പരിശീലകൻ ബിജിലാൽ എന്നിവർ പ്രസംഗിച്ചു. ബിജെപി ഇരിട്ടി മണ്ഡലം കമ്മിറ്റിയുടെ നേതൃത്വത്തിൽ കീഴൂർകുന്ന് അശ്വനി സ്മൃതി മന്ദിരത്തിൽ നടന്ന യോഗ പരിശീലന പരിപാടിയിൽ എം.എസ്. ബിജിലാൽ ക്ലാസെടുത്തു. മട്ടന്നൂർ: മട്ടന്നൂർ ഹയർ സെക്കൻഡറി സ്കൂളിൽ വിവിധ വിദ്യാലങ്ങളിൽ നിന്നായി ഇരുന്നുറ്റമ്പതോളം എൻസിസി കേഡറ്റുകളുടെ നേതൃത്വത്തിൽ നടന്ന യോഗ പ്രദർശനം ശ്രദ്ധേയമായി. മട്ടന്നൂർ ഹയർ സെക്കൻഡറി സ്കൂൾ, ഉളിക്കൽ ഗവ. ഹയർ സെക്കൻഡറി സ്കൂൾ, ഇരിട്ടി എംജി കോളജ്, മട്ടന്നൂർ പഴശി രാജാ എൻഎസ്എസ് കോളജ് എന്നിവിടങ്ങളിലെ കേഡറ്റുകളാണ് പങ്കെടുത്തത്. യോഗ ആചാര്യൻ ഗോവിന്ദൻ പായത്തിന്‍റെ നേതൃത്വത്തിൽ നിരവധി ദിവസത്തെ പരിശീലനത്തിന് ശേഷമാണ് കേഡറ്റുകൾ യോഗ ദിന പ്രദർശനം നടത്തിയത്. സ്കൂൾ മാനേജർ കൃഷ്ണകുമാർ കണ്ണോത്ത് ഉദ്ഘാടനം ചെയ്തു. എൻസിസി കേഡറ്റ് കീർത്തന അധ്യക്ഷത വഹിച്ചു. മട്ടന്നൂർ പഴശിരാജ എൻഎസ്എസ് കോളേജിൽ ഇന്‍റേണൽ ക്വാളിറ്റി സെൽ, എൻഎസ് എസ്, എൻസിസി എന്നിവയുടെ നേതൃത്വത്തിൽ അന്താരാഷ്ട്ര യോഗ ദിനം ആചരിച്ചു. പ്രിൻസിപ്പൽ ഇൻ ചാർജ് ഡോ. ആർ. കെ. ബിജു അധ്യക്ഷത വഹിച്ചു. വിദ്യാർഥികൾക്ക് ഇൻസ്ട്രക്ടർ ടി. രവികൃഷ്ണൻ യോഗ പരിശീലനം നൽകി. കൂടാളി: കൂടാളി ഹയർ സെക്കൻഡറി സ്കൂൾ എൻഎസ്എസ് യൂണിറ്റിന്‍റെ ആഭിമുഖ്യത്തിൽ യോഗ ദിനം ആചരിച്ചു. പ്രിൻസിപ്പൽ കെ.ടി. റീന ഭാസ്കർ അധ്യക്ഷത വഹിച്ചു. യോഗ ട്രെയിനർ പി.കെ. രാജേഷ് പരിശീലനം നൽകി. പയ്യന്നൂര്‍: പയ്യന്നൂര്‍ ചേംബര്‍ ഓഫ് കൊമേഴ്സ് വനിതാ വിംഗും കേരള അഡ്വഞ്ചര്‍ സ്‌പോര്‍ട്സ് പ്രമോട്ടിംഗ് അക്കാദമിയും സംയുക്തമായി സംഘടിപ്പിച്ച സൗജന്യ യോഗ പരിശീലനം സമാപിച്ചു. പയ്യന്നൂര്‍ ചേംബര്‍ ഓഫ് കോമേഴ്‌സ് ഹാളില്‍ നടന്ന സമാപന പരിപാടി പയ്യന്നൂര്‍ ഫയര്‍ സ്റ്റേഷന്‍ ഓഫീസര്‍ സി.പി. രാജേഷ് ഉദ്ഘാടനം ചെയ്തു. വനിതാ വിംഗ് പ്രസിഡന്‍റ് ഗീതാ രമേഷ് അധ്യക്ഷത വഹിച്ചു. പയ്യന്നൂര്‍ ചേംബര്‍ ഓഫ് കോമേഴ്‌സ് പ്രസിഡന്‍റ് കെ.യു. വിജയകുമാര്‍ മുഖ്യാതിഥിയായിരുന്നു. ചടങ്ങില്‍ മുഖ്യ യോഗ പരിശീലകന്‍ പ്രഫ. കെ. രഞ്ജിത്ത്, ഇന്ത്യന്‍ യോഗ ഫെഡറേഷന്‍ നാഷണല്‍ ജഡ്ജ് വി.വി. ശിവരാമന്‍, ദേശീയ യോഗ മെഡല്‍ ജേതാവ് സി. നാരായണന്‍ നായര്‍ എന്നിവരെ ആദരിച്ചു. സുരേഷ് കുട്ടമത്ത്, വി.പി. രാമചന്ദ്രന്‍, സി. പ്രമോദ് കുമാര്‍, പ്രകാശന്‍ എന്നിവര്‍ പ്രസംഗിച്ചു. തുടര്‍ന്ന് യോഗ പ്രദര്‍ശനങ്ങളും നടന്നു.

കാറ്റിൽ 200 വാഴകൾ നശിച്ചു

ചെറുപുഴ: ചെറുപുഴ മച്ചിയിൽ 200 ലേറെ വാഴകൾ വെള്ളിയാഴ്ച ഉണ്ടായ കാറ്റിൽ നശിച്ചു. മൂന്ന് കർഷകർ ചേർന്ന് തരിശുനിലം പാട്ടത്തിനെടുത്ത് കൃഷി ചെയ്ത കുലച്ച വാഴകളാണ് നശിച്ചത്. പാലവയലിലെ മനോജ്‌ തോമസ്, ജോണി വടക്കേൽ, ജയിംസ് അതംപോതിൽ എന്നിവർ ചേർന്നാണ് ചെറുപുഴ കൃഷിഭവന്‍റെ സഹായത്തോടെ 2000 ഏത്തവാഴകളും 1000 പൂവൻ വാഴകളും കൃഷി ചെയ്തത്. ഇതിലുള്ള വാഴകളാണ് കാറ്റിൽ നശിച്ചത്. ചെറുപുഴ കൃഷിഭവൻ ഉദ്യോഗസ്ഥൻ സുരേഷ് കുറ്റൂർ സ്ഥലം സന്ദർശിച്ചു. ഇൻഷ്വറൻസ് പരിരക്ഷയുള്ള വാഴകളാണെന്നും നഷ്ടപരിഹാരം നല്കാനുള്ള നടപടികൾ ആരംഭിച്ചുവെന്നും അദ്ദേഹം പറഞ്ഞു.

തോട്ടിൽ വീണ മരം മുറിച്ചുനീക്കി

ചെറുപുഴ: തിരുമേനി തോട്ടിൽ ഒഴുക്കിനെ തടസപ്പെടുത്തി മുളപ്ര തടയണയുടെ സമീപം വീണ കൂറ്റൻ മരം മുറിച്ചുനീക്കി. തടയണയുടെ സമീപം തോടരികിൽ നിന്ന കൂറ്റൻ കുളമാവാണ് വെള്ളിയാഴ്ച തോടിന് കുറുകെ വീണത്. കഴിഞ്ഞ ദിവസങ്ങളിൽ മലവെള്ളപ്പാച്ചിലിനെ തുടർന്ന് തോടിന്‍റെ കരയിടിയുകയും കുളമാവിന്‍റെ ചുവട്ടിലെ മണ്ണ് ഒഴുകിപോകുകയും ചെയ്തിരുന്നു. ഇതേ തുടർന്നാണ് മാവ് വീണത്. ഇനിയും മഴ ശക്തമായാൽ തടയണയിൽ കൂടി വെള്ളം ഒഴുകാതാവുകയും കൂടുതൽ നാശനഷ്ടം ഉണ്ടാവുകയും ചെയ്യുമായിരുന്നു. പഞ്ചായത്ത് ദുരന്തനിവാരണ സേനാംഗങ്ങളായ നിതീഷ് പ്രാപ്പൊയിൽ, പി.വി. സാലു എന്നിവരുടെ നേതൃത്വത്തിൽ നാട്ടുകാരും ചേർന്നാണ് മരങ്ങൾ മുറിച്ചത്. പഞ്ചായത്ത് പ്രസിഡന്‍റ് കെ.എഫ്. അലക്സാണ്ടർ, പഞ്ചായത്തംഗം കെ.എം. ഷാജി എന്നിവരും ഒപ്പമുണ്ടായിരുന്നു.

അന്താരാഷ്‌ട്ര യോഗ ദിനാചരണം: "യോഗ ഏക ഭൂമിക്ക് ഏകാരോഗ്യത്തിന് '

കണ്ണൂർ: പതിനൊന്നാമത് അന്താരാഷ്‌ട്ര യോഗ ദിനത്തിന്‍റെ ജില്ലാതല ഉദ്ഘാടനം കളക്ടറേറ്റ് ഓഡിറ്റോറിയത്തില്‍ മന്ത്രി കടന്നപ്പള്ളി രാമചന്ദ്രന്‍ നിര്‍വഹിച്ചു. യോഗയുടെ ദര്‍ശനകളും അനുശാസനങ്ങളും ഉള്‍ക്കൊണ്ട് അതിനെ ഒരു കലയായി സ്വീകരിച്ച് ജീവിതചര്യയായി കാണണമെന്ന് മന്ത്രി പറഞ്ഞു. പരിപാടിയില്‍ മന്ത്രി കടന്നപ്പള്ളി രാമചന്ദ്രന്‍, ജില്ലാ കളക്ടര്‍ അരുണ്‍ കെ. വിജയന്‍, എഡിഎം കല ഭാസ്‌കര്‍, ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യന്‍ എന്നിവര്‍ നാഷണല്‍ ആയുഷ് മിഷന്‍ യോഗാ ഇന്‍സ്ട്രക്ടര്‍ക്കൊപ്പം യോഗയില്‍ പങ്കാളികളായി. സംസ്ഥാന ആയുഷ് വകുപ്പിന്‍റെയും നാഷണല്‍ ആയുഷ് മിഷന്‍ കേരളത്തിന്‍റെയും സംയുക്താഭിമുഖ്യത്തിലായിരുന്നു പരിപാടി സംഘടിപ്പിച്ചത്. ഉദ്ഘാടനത്തോടനുബന്ധിച്ച് രാമന്തളി സ്വദേശി ശ്രീലക്ഷ്മി സാജന്‍, നാഷണല്‍ ആയുഷ് മിഷന്‍ യോഗാ ഇന്‍സ്ട്രക്ടര്‍ എന്നിവരുടെ യോഗാ ഡാന്‍സ് അരങ്ങേറി. "യോഗ ഫോര്‍ വണ്‍ എര്‍ത്ത്, വണ്‍ ഹെല്‍ത്ത്' എന്നതാണ് ഈ വര്‍ഷത്തെ യോഗ ദിന സന്ദേശം. ജില്ലാ ഭരണകൂടത്തിന്‍റെയും നാഷണല്‍ ആയുഷ് മിഷന്‍റെയും ജില്ലാ ടൂറിസം പ്രൊമോഷന്‍ കൗണ്‍സിലിന്‍റെയും ആഭിമുഖ്യത്തില്‍ പയ്യാമ്പലം ബീച്ചില്‍ യോഗ സംഗമം സംഘടിപ്പിച്ചു. ജില്ലാ കളക്ടര്‍ അരുണ്‍ കെ. വിജയന്‍, അസിസ്റ്റന്‍റ് കളക്ടര്‍ എഹ്തെദ മുഫസിര്‍, സിറ്റി പോലീസ് കമ്മീഷണര്‍ പി. നിധിന്‍രാജ്, നാഷണല്‍ ആയുഷ് മിഷന്‍ ജില്ലാ പ്രോഗ്രാം മാനേജര്‍ ഡോ. കെ.സി. അജിത്കുമാര്‍ എന്നിവർ പങ്കെടുത്തു. പരിപാടിയോടനുബന്ധിച്ച് ബീച്ച് പരിസരത്ത് തണല്‍ മരങ്ങള്‍ നട്ടുപിടിപ്പിച്ചു. മട്ടന്നൂര്‍ ബഡ്‌സ് സ്‌കൂള്‍ വിദ്യാര്‍ഥികള്‍ അവതരിപ്പിച്ച യോഗ ഡാന്‍സും അരങ്ങേറി. തലശേരി: കണ്ണൂര്‍ സെന്‍ട്രല്‍ ബ്യൂറോ ഓഫ് കമ്യൂണിക്കേഷന്‍റെ നേതൃത്വത്തില്‍ കേന്ദ്രീയ വിദ്യാലയത്തില്‍ നടന്ന യോഗ ദിനാചരണം തലശേരി ബ്ലോക്ക് പഞ്ചായത്ത് പ്രസിഡന്‍റ് സി.പി. അനിത ഉദ്ഘാടനം ചെയ്തു. കേന്ദ്രീയ വിദ്യാലയ പ്രിന്‍സിപ്പല്‍ ശ്രീജ വിവേക് അധ്യക്ഷത വഹിച്ചു. ജില്ലാ യോഗ ടീച്ചേഴ്‌സ് അസോസിയേഷന്‍ സെക്രട്ടറി എം. രാമചന്ദ്രന്‍, ധര്‍മടം ആയുര്‍വേദ ഡിസ്‌പെന്‍സറി മെഡിക്കല്‍ ഓഫീസര്‍ ഡോ. പ്രീതി എം. പ്രദീപ് എന്നിവർ ക്ലാസെടുത്തു. പയ്യാവൂർ: മടമ്പം പികെഎം കോളജ് ഓഫ് എഡ്യൂക്കേഷൻ എൻഎസ്എസ് യൂണിറ്റ്, ഇന്‍റേണൽ ക്വാളിറ്റി അഷ്വറൻസ് സെൽ (ഐക്യുഎസി) എന്നിവയുടെ സംയുക്താഭിമുഖ്യത്തിൽ സംഘടിപ്പിച്ച യോഗ ദിനാചാരണം കോളജ് ഓഡിറ്റോറിയത്തിൽ നടന്നു. ഐക്യുഎസി കോ-ഓർഡിനേറ്റർ ഡോ. വീണ അപ്പുക്കുട്ടൻ ഉദ്ഘാടനം ചെയ്തു. കോളജ് എൻഎസ്എസ് പ്രോഗ്രാം ഓഫീസർ ഡോ. സിനോജ് ജോസഫ് അധ്യക്ഷത വഹിച്ചു. വിദ്യാർഥി പ്രതിനിധി ക്രിസ്റ്റീൻ ജോസ് ആമുഖ പ്രഭാഷണം നടത്തി. വിദ്യാർഥികളായ കെ. മാളവിക, അനശ്വര മുരളീധരൻ എന്നിവർ പ്രസംഗിച്ചു. യോഗ പരിശീലക പി. യമുന വിദ്യാർഥികൾക്ക് യോഗ ക്ലാസ് നൽകി. ഏരുവേശി യുവജന ക്ലബ് ആൻഡ് ഗ്രന്ഥാലയം, ചേതന യോഗ ഏരുവേശി മേഖലാ കമ്മിറ്റി എന്നിവയുടെ സംയുക്താഭിമുഖ്യത്തിൽ യോഗ പരിശീലനം സംഘടിപ്പിച്ചു. ഏരുവേശി പഞ്ചായത്തംഗം എം.ഡി. രാധാമണി ഉദ്ഘാടനം ചെയ്തു. ഗ്രന്ഥാലയം പ്രസിഡന്‍റ് എം. നാരായണൻ അധ്യക്ഷത വഹിച്ചു. യോഗ ഇൻസ്ട്രക്‌‌ട്രർ കെ.കെ. രമ്യ, ചേതന യോഗ ഏരിയാ സെക്രട്ടറി ഒ. സന്തോഷ്, വനിതാവേദി കൺവീനർ പി.കെ.വി. മഞ്ജുള, എം. സന്തോഷ്കുമാർ, ഇ.പി. ബാലകൃഷ്ണൻ, പി.എസ്. രജീഷ്, എം.സി. അഭിലാഷ്, കെ. അക്ഷയ് എന്നിവർ പ്രസംഗിച്ചു. ശ്രീകണ്ഠപുരം: വിവേകാനന്ദ വിദ്യാപീഠത്തിന്‍റെ ആഭിമുഖ്യത്തിൽ നടത്തിയ യോഗ ദിനാചരണം ശ്രീകണ്ഠപുരം നഗരസഭാധ്യക്ഷ കെ.വി. ഫിലോമിന ഉദ്ഘാടനം ചെയ്തു. ശ്രീകണ്ഠപുരം ടൗൺ സ്ക്വയറിലെ ഓപ്പൺ ഓഡിറ്റോറിയത്തിൽ നടത്തിയ പരിപാടിയിൽ വിദ്യാപീഠം സെക്രട്ടറി കെ. സുരേഷ് അധ്യക്ഷത വഹിച്ചു. സ്കൂൾ പ്രിൻസിപ്പൽ ബിൻസ് മാത്യു, എം.സി. രജനി, കെ. സതീശൻ എന്നിവർ പ്രസംഗിച്ചു. ഇരിക്കൂര്‍: ഇരിക്കൂര്‍ പഞ്ചായത്ത്, സർക്കാർ ആയൂര്‍വേദ ഡിസ്പെന്‍സറി എന്നിവയുടെ ആഭിമുഖ്യത്തില്‍ നടന്ന യോഗ ദിനാചരണം ഇരിക്കൂര്‍ പഞ്ചായത്ത് പ്രസിഡന്‍റ് ടി.പി. ഫാത്തിമ ഉദ്ഘാടനം ചെയ്തു. യോഗ പരിശീലനവും ബോധവത്കരണ ക്ലാസും നടന്നു. ആയൂര്‍വേദ മെഡിക്കല്‍ ഓഫീസര്‍ ഡോ. പി. ശ്രീകല ക്ലാസിന് നേതൃത്വം നല്‍കി. ആരോഗ്യ വിദ്യാഭ്യാസ സ്ഥിരം സമിതി അധ്യക്ഷ എന്‍.കെ. സുലൈഖ അധ്യക്ഷയായി. ഡോ. പ്രീഷ, ഹെല്‍ത്ത് ഇന്‍സ്പെക്ടര്‍ രഞ്ജിത്ത്, ഹെഡ് നഴ്സ് അരുണിമ തുടങ്ങിയവര്‍ പ്രസംഗിച്ചു. ചെറുപുഴ: ചെറുപുഴ ഗ്രാമീണ വായനശാലയുടെയും യോഗ പഠനകേന്ദ്രത്തിന്‍റെയും നേതൃത്വത്തിൽ നടന്ന യോഗ ദിനാചരണം ചെറുപുഴ പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ എം. ബാലകൃഷ്ണൻ ഉദ്ഘാടനം ചെയ്തു. ചെറുപുഴ യോഗ പഠനകേന്ദ്രത്തിന്‍റെ 35-ാമത് വാർഷികാഘോഷവും ഉന്നത വിജയം നേടിയ വിദ്യാർഥികൾക്കുള്ള അനുമോദനവും നടന്നു. വായനശാലാ പ്രസിഡന്‍റ് വി. കൃഷ്ണൻ അധ്യക്ഷത വഹിച്ചു. സി.കെ. കുഞ്ഞികൃഷ്ണൻ പ്രവർത്തന റിപ്പോർട്ട് അവതരിപ്പിച്ചു. ചെറുപുഴ നവജ്യോതി കോളജ് ഡയറക്ടർ ഫാ. സിജോയ് പോൾ, ചെറുപുഴ പോലീസ് സ്റ്റേഷൻ എസ്എച്ച്ഒ സുനിൽ ഗോപി, ഡോ. കെ. ദാമോദരൻ, ആർ.കെ. പദ്മനാഭൻ, കെ.കെ. സുരേഷ്കുമാർ, ഒ.ജെ. വിൻസന്‍റ്, ജയൻ പെരിങ്ങാല, മാത്യു മുകുളേൽ എന്നിവർ പ്രസംഗിച്ചു.

ആലക്കോട്-അരങ്ങം ബൈപ്പാസ് റോഡ് തകർന്നു: യാത്രാദുരിതം രൂക്ഷം

ആലക്കോട്: ആലക്കോട്-അരങ്ങം ബൈപ്പാസ് റോഡ് തകർന്നതോടെ യാത്രാദുരിതം രൂക്ഷമായി. ദിനംപ്രതി നിരവധി വാഹനങ്ങളും വിദ്യാർഥികളടക്കം നൂറുകണക്കിനാളുകൾ കാൽനടയായും സഞ്ചരിക്കുന്ന റോഡിന്‍റെ മിക്ക ഭാഗങ്ങളും ഗതാഗതയോഗ്യമല്ലാത്ത വിധത്തിൽ തകർന്നു കിടക്കുകയാണ്. ആലക്കോട്-അരങ്ങം പ്രദേശത്തെ ഒട്ടേറെ മേഖലകളെ പുറം ലോകവുമായി ബന്ധിപ്പിച്ചുള്ളതാണ് ഈ റോഡ്. നേരത്തെ പ്രധാനമന്ത്രി യോജന പദ്ധതിയിൽ ഉൾപ്പെടുത്തി ബിറ്റുമിസ് മെക്കാഡം രീതിയിൽ ടാറിംഗ് നടത്തിയ റോഡാണിത്. നിർമാണ കാലഘട്ടത്തിൽ തന്നെ റോഡ് പണിയിൽ അഴിമതി നടക്കുന്നതായി ആരോപിച്ച് നാട്ടുകാരും വിവിധ സംഘടനങ്ങളും രംഗത്ത് വന്നിരുന്നു. വിവിധ ആഘോഷ പരിപാടികളുടെ ഭാഗമായി ആലക്കോട് ടൗണിൽ ബ്ലോക്ക് വരുന്ന സമയങ്ങളിൽ ബസ് അടക്കമുള്ള വാഹനങ്ങൾ വഴിതിരിച്ചുവിടുന്നതും ഈ റോഡിലൂടെയാണ്. രണ്ടുതവണ ലക്ഷങ്ങൾ ചിലവിട്ട് അറ്റകുറ്റപ്പണികൾ നടത്തിയെങ്കിലും റോഡിന്‍റെ ശോചനീയാവസ്ഥക്ക് മാറ്റമുണ്ടായിട്ടില്ല. റീ ടാറിംഗ് നടത്തി റോഡ് ഗതാഗതയോഗ്യ മാക്കണമെന്നാണ് നാട്ടുകാരുടെ ആവശ്യം.

കേബിൾ കുഴി മൂടാത്തത് അപകടങ്ങൾക്ക് കാരണമാകുന്നു

തേർത്തല്ലി: തേർത്തല്ലി-മൗവ്വത്താനി റോഡിൽ മണലി ഇറക്കത്തിൽ കേബിൾ കുഴി മൂടാത്തത് അപകടങ്ങൾ ക്ഷണിച്ചു വരുത്തുന്നു. കേബിൾ കുഴി മൂടാത്തതിനെതിരെ നാട്ടുകാർ പലതവണ അധികൃതർക്ക് പല പരാതി നൽകുകയും ദീപിക ഉൾപ്പെടെ വാർത്ത റിപ്പോർട്ട് ചെയ്തതും ആണ്. എന്നിട്ടും അധികൃതർ തിരിഞ്ഞുനോക്കുന്നില്ല. റോഡിൽ അപകടങ്ങൾ സ്ഥിരമാകുകയാണ്. ഇന്നലെയും ഇതുവഴി കടന്നുപോയ ട്രാവലർ കുഴിയിൽ പെട്ടുപോയി. ഏറെ നേരത്തെ ശ്രമദാനത്തിലൂടെ ആണ് ട്രാവലർ കുഴിയിൽ നിന്നു കയറ്റിയത്. കുഴി മൂടിയില്ലെങ്കിൽ നാട്ടുകാർ സമരമാർഗത്തിലേക്ക് കടക്കുമെന്ന് പ്രദേശവാസികൾ അറിയിച്ചു.

ഇരിക്കൂർ എഇ ഓഫീസ് പുതിയ ‌കെ‌ട്ടിടത്തിലേക്കുമാറ്റി

ഇരിക്കൂർ: ഇരിക്കൂർ ഉപജില്ലാ വിദ്യാഭ്യാസ ഓഫീസ് നാടിന് സമർപ്പിച്ചു. ഇരിക്കൂർ ഗവ. ഹയർസെക്കൻഡറി സ്കൂളിലെ നവീകരിച്ച കെട്ടിടത്തിൽ ഉപജില്ലാ വിദ്യാഭ്യാസ ഓഫീസിന്‍റെ ഉദ്ഘാടനം സജീവ് ജോസഫ് എംഎൽഎ നിർവഹിച്ചു. ഇരിക്കൂർ ടൗണിൽ സംസ്ഥാന പാതയോരത്തിലെ വാടകക്കെട്ടിടത്തിൽ കടമുറികളുടെ മുകളിൽ രണ്ടാംനിലയിലായി തീരെ സൗകര്യമില്ലാതെയാണ് ഓഫീസ് ദീർഘകാലം പ്രവർത്തിച്ചത്. എഇഒ ഓഫീസിന് 40 ലക്ഷം അനുവദിച്ചെങ്കിലും സ്ഥലം കിട്ടിയില്ല. ഒടുവിൽ ഇരിക്കൂർ ഗവ. ഹയർസെക്കൻഡറി സ്കൂളിന്‍റെ 10 ഏക്കർ സ്ഥലത്തുനിന്ന് 35 സെന്‍റ് സ്ഥലം അനുവദിക്കാൻ ജില്ലാ പഞ്ചായത്ത് അനുമതി നൽകുകയായിരുന്നു. സ്ഥലം അളന്ന് തിട്ടപ്പെടുത്തുകയും ചെയ്തു. തത്കാലം ഒഴിവുള്ള കെട്ടിടത്തിലേക്ക് മാറ്റിസ്ഥാപിക്കാൻ ജനകീയ സമിതിയും ജില്ലാ പഞ്ചായത്തും തീരുമാനിക്കുകയായിരുന്നു. തുടർന്ന് സ്കൂൾ കവാടത്തിന്‍റെ അടുത്തുള്ള ഇരുനില കെട്ടിടത്തിലേക്ക് പ്രവർത്തനം മാറ്റി. നിലവിലെ ഓഫീസിലെ ഫയലുകളും ഫർണിച്ചറും മാറ്റിസ്ഥാപിച്ച് കെട്ടിടം നവീകരിച്ചു.‌ ചടങ്ങിൽ ഇരിക്കൂർ പഞ്ചായത്ത് പ്രസിഡന്‍റ് ടി.പി. ഫാത്തിമ അധ്യക്ഷത വഹിച്ചു. ഇരിക്കൂർ ബ്ലോക്ക് പഞ്ചായത്ത് മെംബർ സി.വി.എൻ. യാസിറ, ആരോഗ്യ സ്ഥിരം സമിതി അധ്യക്ഷ എൻ.കെ. സുലൈഖ, പഞ്ചായത്ത് മുൻ പ്രസിഡന്‍റ് ടി.സി. നസിയത്ത്, സ്കൂൾ പ്രിൻസിപ്പൽ സി. റീന, മുഖ്യാധ്യാപകൻ പി.പി.അഷറഫ്, വിവിധ സംഘടനാ നേതാക്കളായ മടവൂർ അബ്ദുൾഖാദർ, ഇ.വി. സന്തോഷ് കുമാർ,സോജൻ ജോർജ്, കെ.കെ. കുഞ്ഞിമായൻ എന്നിവരും വിവിധ അധ്യാപക സംഘടനാ നേതാക്കളും പങ്കെടുത്തു.

വായന ദിനാചരണം നടത്തി

ഇരിട്ടി: തലശേരി അതിരൂപത കോര്‍പറേറ്റ് എഡ്യുക്കേഷണല്‍ എജന്‍സി, കാത്തലിക് ടീച്ചേഴ്സ് ഗില്‍ഡ് എന്നിവയുടെ നേതൃത്വത്തില്‍ വായന വാരം സംഘടിപ്പിച്ചു. കിളിയന്തറ സെന്‍റ് തോമസ് ഹയര്‍ സെക്കന്‍ഡറി സ്‌കൂളില്‍ പായം പഞ്ചായത്ത് പ്രസിഡന്‍റ് പി. രജനി ഉദ്ഘാടനം ചെയ്തു. മാനേജര്‍ ഫാ. ആന്‍റണി ആനക്കല്ലില്‍ അധ്യക്ഷത വഹിച്ചു. പഞ്ചായത്തംഗം അനില്‍ എം. കൃഷ്ണന്‍, പിടിഎ പ്രസിഡന്‍റ് ജോമി ജോസഫ്, പ്രിന്‍സിപ്പല്‍ എം.ജെ. വിനോദ്, സുനില്‍ കുര്യാക്കോസ് എന്നിവര്‍ പ്രസംഗിച്ചു. വായാട്ടുപറമ്പ്: സെന്‍റ് ജോസഫ്സ് ഹയർ സെക്കൻഡറി സ്കൂളിൽ വായനദിനം ആചരിച്ചു. വിദ്യാർഥികൾ ത‍യാറാക്കിയ വായനദിന ചുമർപത്രിക പ്രകാശനം നിർവഹിച്ച് മുഖ്യാധ്യാപകൻ ബിജു സി. ഏബ്രഹാം വായന ദിനം ഉദ്ഘാടനം ചെയ്തു. ലൈബ്രറി പുസ്തക വിതരണോദ്ഘാടനം സീനിയർ അസിസ്റ്റന്‍റ് കെ.ബി. മനു നിർവഹിച്ചു. മായ കെ. ജോർജ്, സിസ്റ്റർ പ്രിൻസി ജോർജ്, കെ.പി. ഡീന, സൽമ ജോസഫ്, ലൈല സെബാസ്റ്റ്യൻ, ഡിയോൺ ബിജു, ആൽഫ മോൾ റോയ് എന്നിവർ പ്രസംഗിച്ചു. വായന വാരാചരണത്തിന്‍റെ ഭാഗമായി വായനദിന ക്വിസ്, ഉപന്യാസ രചന, കഥാരചന, കവിതാലാപനം എന്നീ മത്സരങ്ങളും സംഘടിപ്പിച്ചു. ഫിദ മുഹമ്മദ്, ബ്ലസീന ജോസഫ്, എൽന ഷിജോ, അൽന തോമസ്, കെ.എസ്. ആര്യ എന്നിവർ കലാപരിപാടികൾ അവതരിപ്പിച്ചു.

സ്‌പോര്‍ട്‌സ് കോംപ്ലക്‌സിന് ചാവറയച്ചന്‍റെ പേരിടണം: വൈഎംസിഎ

തളിപ്പറമ്പ്: തളിപ്പറമ്പ് നഗരസഭയുടെ സ്‌പോര്‍ട്‌സ് കോംപ്ലക്‌സിന് വിശുദ്ധ ചാവറയച്ചന്‍റെ പേരിടണമെന്ന ആവശ്യം ശക്തം. ഈ ആവശ്യമുന്നയിച്ച് വൈഎംസിഎ തളിപ്പറമ്പ് യൂണിറ്റ് പ്രസിഡന്‍റ് പി.എം. ജോണ്‍ പേട്ടയില്‍ നഗരസഭാ ചെയര്‍പേഴ്‌സന്‍ മുര്‍ഷിദ കൊങ്ങായിക്ക് നിവേദനം നല്‍കി. കണ്‍വീനര്‍ എം.കെ. മാത്യു മൂന്നുപീടിക, ലൂക്കോസ് പള്ളിത്തറ, ടി.എസ്. ജയിംസ് മരുതാനിക്കാട്ട്, കെ.ഡി. മാര്‍ട്ടിന്‍ കൊട്ടാരത്തില്‍, ബാബു മണ്ണനാല്‍, മാത്യു വട്ടക്കുന്നേല്‍, ജോസ് പള്ളിപ്പറമ്പില്‍ എന്നിവരും നിവേദക സംഘത്തില്‍ ഉണ്ടായിരുന്നു. 40 വര്‍ഷം മുമ്പ് സിഎംഐ സഭ തളിപ്പറമ്പ് പഞ്ചായത്തിന് സൗജന്യമായി നല്‍കിയ സ്ഥലത്താണ് സ്‌പോര്‍ട്‌സ് കോംപ്ലക്‌സ് പണി പൂര്‍ത്തിയായി വരുന്നത്.

തെരുവുനായ ശല്യം: സിപിഎമ്മിന്‍റേത് നിഷേധാത്മക നിലപാട്- മേയർ

കണ്ണൂർ: കോർപറേഷൻ പരിധിയിൽ കഴിഞ്ഞദിവസം തെരുവുനായ നിരവധി ആളുകളെ കടിച്ചത് സംബന്ധിച്ച വിഷയത്തിൽ സിപിഎമ്മിന്‍റെ നിലപാട് നിഷേധാത്മകവും ജനങ്ങളോടുള്ള വെല്ലുവിളിയുമാണെന്ന് മേയർ മുസ്‌ലിഹ് മഠത്തിൽ. വിഷയം ഉണ്ടായ ഉടൻ തന്നെ കോർപറേഷൻ സത്വര നടപടികൾ സ്വീകരിച്ചിട്ടുണ്ട്. എന്നാൽ, കൗൺസിൽ യോഗവും സർവകക്ഷിയോഗവും അലങ്കോലമാക്കുകയും ബഹിഷ്കരിക്കുകയും ചെയ്തതിലൂടെ സിപിഎമ്മിന് നാടിനോടും ജനങ്ങളോടും ഒരു പ്രതിബദ്ധതയും ഇല്ല എന്നാണ് മനസിലാക്കുന്നത്. സർവകക്ഷി യോഗത്തിൽ പങ്കെടുക്കുന്ന രാഷ്‌ട്രീയ പാർട്ടി പ്രതിനിധികൾ അവരുടെ അഭിപ്രായം പറയുന്നത് സ്വാഭാവികമാണ്. എല്ലാവരുടെയും അഭിപ്രായങ്ങൾ ക്രോഡീകരിച്ചാണ് പൊതു തീരുമാനത്തിൽ എത്തുന്നത്. പ്രതിനിധികൾ അഭിപ്രായം പറഞ്ഞതിന്‍റെ പേരിൽ യോഗം ബഹിഷ്കരിച്ചു പോകുന്നത് പ്രശ്നം ഒരിക്കലും പരിഹരിക്കരുതെന്ന് ആഗ്രഹിക്കുന്നതിലാണ്. തെരുവുനായ്ക്കളുടെ വിഷയം കണ്ണൂർ കോർപറേഷനിൽ മാത്രമുള്ള വിഷയമല്ല. സിപിഎം ഭരിക്കുന്ന എത്ര തദ്ദേശ സ്ഥാപനങ്ങളിൽ സർക്കാർ നിർദേശപ്രകാരം ഷെൽട്ടർ ഹോമുകൾ സ്ഥാപിച്ചിട്ടുണ്ട് എന്ന് കോർപറേഷനെ കുറ്റം പറയുന്ന സിപിഎം നേതാക്കൾ മറുപടി പറയണം. സിപിഎം എത്രയൊക്കെ അലങ്കോലമാക്കാൻ ശ്രമിച്ചാലും ജനങ്ങളുടെ ജീവനെ ബാധിക്കുന്ന ഇത്തരം കാര്യങ്ങൾക്കെതിരേ നിയമം അനുശാസിക്കുന്ന രീതിയിലുള്ള നടപടികളുമായി കോർപറേഷൻ മുന്നോട്ട് പോകുമെന്നും മേയർ പ്രസ്താവനയിൽ പറഞ്ഞു.

ലിറ്റില്‍ കൈറ്റ്സ് നോ‍‍ഡൽ ഓഫീസര്‍മാരുടെ ജില്ലാതല ശില്പശാല പൂർത്തിയായി

കണ്ണൂർ: ഈ അധ്യയന വർഷം പത്താം ക്ലാസിലെ മുഴുവന്‍ കുട്ടികള്‍ക്കും നിർമിത ബുദ്ധിയും റോബോട്ടിക്സും പഠിക്കാനും പ്രായോഗിക പരീക്ഷണങ്ങള്‍ നടത്താനും അവസരമൊരുക്കിയിട്ടുണ്ടെന്ന് കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്നോളജി ഫോര്‍ എഡ്യുക്കേഷന്‍ (കൈറ്റ്) സിഇഒ കെ. അൻവര്‍ സാദത്ത്. ജില്ലാ പഞ്ചായത്ത് ഹാളില്‍ നടന്ന ലിറ്റില്‍ കൈറ്റ്സ് നോഡല്‍ ഓഫീസര്‍മാര്‍ക്കുള്ള ജില്ലാതല ശില്പശാലയില്‍ ഓൺലൈനായി മുഖ്യപ്രഭാഷണം നടത്തുകയായിരുന്നു അദ്ദേഹം. ജില്ലയില്‍ പ്രവര്‍ത്തിക്കുന്ന 152 യൂണിറ്റുകളിൽ നിന്നും 300 മാസ്റ്റര്‍/മിസ്ട്രസ്മാര്‍ ശില്പശാലയില്‍ പങ്കെടുത്തു. കൈറ്റ് കണ്ണൂര്‍ ജില്ലാ കോ-ഓർഡിനേറ്റര്‍ കെ. സുരേന്ദ്രൻ അടുത്തില, കെ.എം. മക്ബൂല്‍, കെ. ജലീല്‍, വി. ദിനേശൻ, എ. സിന്ധു, സജിത് കോമത്ത് തുടങ്ങിയവര്‍ പ്രസംഗിച്ചു.

വായന ദിനാചരണം നടത്തി

കണ്ണൂർ: സെന്‍റ് തെരേസാസ് ആംഗ്ലോ ഇന്ത്യൻ ഹയർസെക്കൻഡറി സ്കൂളിൽ വായനവാരത്തിന്‍റെയും വിവിധ ക്ലബുകളുടെയും ഉദ്ഘാടം മാധ്യമപ്രവർത്തകനും എഴുത്തുകാരനുമായ നാരായണൻ കാവുന്പായി നിർവഹിച്ചു. 70 പുസ്തകങ്ങൾ വായിച്ച് ആസ്വാദനക്കുറിപ്പ് തയാറാക്കിയ എട്ടാം ക്ലാസ് വിദ്യാർഥിനി ആൻസിയ ബിനീഷിനെ ഉപഹാരം നൽകി അനുമോദിച്ചു.വിദ്യാരംഗം സ്കൂൾ കൺവീനർ കെ.കെ. ശ്രീമതി അധ്യക്ഷത വഹിച്ചു. മുഖ്യാധ്യാപിക സിസ്റ്റർ രോഷ്നി മാനുവൽ പ്രസംഗിച്ചു. അസോസിയേഷൻ ഓഫ് ഓർഫനേജസ് ആൻഡ് ചാരിറ്റബിൾ ഇൻസ്റ്റിറ്റ്യൂഷൻസ് കണ്ണൂർ ജില്ലാ കമ്മിറ്റിയുടെ ആഭിമുഖ്യത്തിൽ വായന ദിനം ആചരിച്ചു. ജില്ലയിൽ അനാഥാലയങ്ങളിലെ വിദ്യാർഥികൾക്കുള്ള പുസ്തകങ്ങൾ സംസ്ഥാന ജനറൽ സെക്രട്ടറി പി.വി. സൈനുദ്ദീൻ ജില്ലാ ഭാരവാഹികൾക്ക് കൈമാറി ഉദ്ഘാടനം നിർവഹിച്ചു. ജില്ലാ പ്രസിഡന്‍റ് ബ്രദർ സജി അധ്യക്ഷത വഹിച്ചു. ജില്ലാ സെക്രട്ടറി സി.എച്ച്. മൊയ്തു ഹാജി ആമുഖപ്രഭാഷണം നടത്തി. ടി.എ. തങ്ങൾ, സിസ്റ്റർ വിനീത, കെ.കെ.അഹമ്മദ് ഹാജി, കെ. മോഹനൻ, കെ.എൻ. മുസ്തഫ, എം. അസൈനാർ ഹാജി, സി. സമീർ, സിസ്റ്റർ ഡെയ്സി, സി. രൂപേഷ്, ഡോ. താജുദ്ദീൻ വാഫി, സിസ്റ്റർ ഡിന, എസ്.എ.പി. ആസാദ്, ഷമീമ ഇസ്‌ലാഹിയ എന്നിവർ പ്രസംഗിച്ചു. കണിച്ചാര്‍: കാപ്പാട് ഗ്രാമീണ വായനശാല ആന്‍ഡ് ഗ്രന്ഥാലയത്തില്‍ വായന പക്ഷാചരണവും പി.എൻ. പണിക്കര്‍ അനുസ്മരണവും ഇരിട്ടി താലൂക്ക് ലൈബ്രറി കൗണ്‍സില്‍ എക്‌സിക്യുട്ടീവ് അംഗം പി.ജി. സന്തോഷ് ഉദ്ഘാടനം ചെയ്തു. കാപ്പാട് സാംസ്‌കാരിക വേദി പ്രസിഡന്‍റ് എം.വി. രാജീവന്‍ അധ്യക്ഷത വഹിച്ചു. ഇ.കെ.നായനാര്‍ സ്മാരക വായനശാലയുടെ നേതൃത്വത്തില്‍ പി.എന്‍. പണിക്കര്‍ അനുസ്മരണത്തോടനുബന്ധിച്ച് വായനാ പക്ഷാചരണത്തിന്‍റെയും സാഹിത്യ ചര്‍ച്ചയുടെയും ഉദ്ഘാടനം എഴുത്തുകാരി ഡാലിയ ജോണി നിര്‍വഹിച്ചു. വായനശാലാ പ്രസിഡന്‍റ് വി.വി. ബാലകൃഷ്ണൻ അധ്യക്ഷത വഹിച്ചു. ലൈബ്രറി കൗണ്‍സില്‍ സംസ്ഥാന കൗണ്‍സില്‍ അംഗം കെ.എ. ബഷീര്‍ മുഖ്യപ്രഭാഷണം നടത്തി.

എട്ടിക്കുളം റോഡിൽ അപകടഭീഷണിയായി ഗര്‍ത്തം; രണ്ടാഴ്ചയായിട്ടും പരിഹാരമായില്ല

പയ്യന്നൂര്‍: രണ്ടാഴ്ച മുമ്പ് രൂപപ്പെട്ട റോഡിലെ വിണ്ടുകീറലും ഗര്‍ത്തവും അപകട ഭീഷണിയായി മാറിയിട്ടും പരിഹാര നടപടികളില്ലാത്തതില്‍ പ്രതിഷേധമുയരുന്നു. രാമന്തളി എട്ടിക്കുളം-പള്ളിക്കോളനി റോഡിലെ കുതിരക്കല്ല് റോഡിലാണ് അപകടം പതിയിരിക്കുന്നത്. ചെങ്കുത്തായ പ്രദേശത്തെ റോഡിന് താഴെ വലിയ ഗര്‍ത്തമായതിനാല്‍ ഇവിടെ സംരക്ഷണ വേലി സ്ഥാപിക്കണമെന്ന മുറവിളികള്‍ ഉയരുന്നതിനിടയിലാണ് അപകട ഭീഷണിയുയര്‍ത്തി വലിയ കുഴി രൂപപ്പെട്ടത്. ഇതേതുടര്‍ന്ന് ബസ് സര്‍വീസുള്ള റോഡില്‍ അപകട മുന്നറിയിപ്പ് നല്‍കാനായി നാട്ടുകാര്‍ റിബണുകള്‍ കെട്ടി കല്ലെടുത്തുവച്ചിട്ടുമുണ്ട്. എന്നാല്‍, രണ്ടാഴ്ചയായിട്ടും അധികൃതരാരും ഇതുവഴി വന്നില്ലെന്നും അപകട സാധ്യത ഒഴിവാക്കാനുള്ള നടപടികള്‍ സ്വീകരിച്ചില്ലെന്നും നാട്ടുകാര്‍ക്ക് ആക്ഷേപമുണ്ട്. ഇവിടെ സംരക്ഷണ വേലി സ്ഥാപിക്കണമെന്ന നാട്ടുകാരുടെ മുറവിളിക്ക് വര്‍ഷങ്ങളുടെ പഴക്കമുണ്ട്. ഈ അവശ്യത്തോടും അധികൃതര്‍ മുഖംതിരിച്ചു നില്‍ക്കുന്നതിനിടയിലാണ് റോഡില്‍ വലിയ ഗര്‍ത്തം രൂപപ്പെട്ടത്.

ആഫ്രിക്കൻ ഒച്ച് ശല്യം: ‌പത്തു കുടുംബങ്ങൾ ദുരിതത്തിൽ

ഇരിട്ടി: ഒരിടവേളക്ക് ശേഷം ഇരിട്ടിയിൽ വീണ്ടും ആഫ്രിക്കൻ ഒച്ച് ശല്യം. ഇരിട്ടി പയഞ്ചേരി മുക്കിൽ പഴശി ജലസംഭരണിയുടെ ഭാഗമായ പ്രദേശത്തെ പത്തു വീട്ടുകാർ ആഫ്രിക്കൻ ഒച്ചു ശല്യത്തെ തുടർന്ന് ദുരിതത്തിലായിരിക്കുകയാണ്. മൂന്നുവർഷം മുന്പാണ് ഈ മേഖലയിൽ ആഫ്രിക്കൻ ഒച്ചിനെ ആദ്യമായി കാണുന്നത്. ഇവയെ ഉൻമൂലനം ചെയ്യാൻ നടപടികളെടുക്കാഞ്ഞതാണ് ഇവ പെരുകാൻ കാരണമെന്ന് പ്രദേശവാസികൾ പറയുന്നു. പറന്പുകളിലെ ചെടികൾ തിന്നു നശിപ്പിക്കുന്നതിനൊപ്പം വീടുകൾക്കകത്ത് എത്തുന്ന ഒച്ചുകൾ വീടിനകം മലിനമാക്കുന്നുണ്ട്. പ്രദേശത്തെ കണ്ണിയത്ത് സുശീലൻ, പുതിയ പറമ്പിൽ മായൻ, കലീഫ, റോഷൻ, സി. സുനിൽകുമാർ, രാജീവൻ, മനോജ് എന്നിവരുടെ വീടുകളിലാണ് ഇപ്പോൾ ശല്യം രൂക്ഷമായത്. ഉപ്പും കുമ്മായവും ഉപയോഗിച്ചാണ് പ്രദേശവാസികൾ ഇതിനെ പ്രതിരോധിക്കുന്നത്. ആഫ്രിക്കൻ ഒച്ചിനെ നശിപ്പിക്കാനായി മാത്രം ചാക്കുകണക്കിന് ഉപ്പും കുമ്മായവുമാണ് വീട്ടുകാർ ശേഖരിച്ചു വയ്ക്കുന്നത്. രാത്രി സമയങ്ങളിൽ മാത്രമാണ് ഇവ പുറത്തിറങ്ങുന്നതെന്നതിനാൽ ശേഖരിച്ച് നശിപ്പിക്കലും ശ്രമകരാണ്. ബന്ധപ്പെട്ട അധികൃതർ ഒച്ച് നശീകരണത്തിന് നടപടികൾ സ്വീകരിക്കണമെന്ന ആവശ്യം ശക്തമാണ്.

കോർപറേഷൻ യോഗം എൽഡിഎഫ് ബഹിഷ്കരിച്ചു

കണ്ണൂര്‍: തെരുവുനായ ശല്യത്തിനെതിരെ നടപടി സ്വീകരിക്കുന്നതുമായി ബന്ധപ്പെട്ട് കോര്‍പറേഷനിൽ മേയർ മുസ്‌ലിഹ് മഠത്തിൽ വിളിച്ചു ചേര്‍ത്ത യോഗത്തില്‍ എൽഡിഎഫ്, യുഡിഎഫ് പ്രതിനിധികൾ തമ്മിൽ വാക്കേറ്റം. വാക്കേറ്റത്തിനൊടുവിൽ എൽഡിഎഫ് പ്രതിനിധികൾ യോഗം ബഹിഷ്കരിച്ചു. പ്രതിപക്ഷ പാർട്ടി നേതാവ് എൻ. സുകന്യയുടെ നേതൃത്വത്തിൽ കോർപറേഷനിലെ എൽഡിഎഫ് അംഗങ്ങളാണ് യോഗം ബഹിഷ്കരിച്ചത്. തെരുവുനായശല്യം നിയന്ത്രിക്കുന്നതുമായി ബന്ധപ്പെട്ട് കോർപറേഷൻ നടപ്പാക്കുന്ന പദ്ധതികളെക്കുറിച്ച് ചർച്ച ചെയ്യുന്നതിനു പകരം ജില്ലാ പഞ്ചായത്തിനും സർക്കാരിനുമെതിരെ യുഡിഎഫ് പ്രതിനിധികൾ നടത്തിയ വിമർശനത്തിൽ പ്രതിഷേധിച്ചായിരുന്നു ബഹിഷ്കരണം. ലീഗ് പ്രതിനിധികളായ സി. സമീറും സി. എറമുള്ളാനും വിഷയത്തില്‍ സര്‍ക്കാരിനെതിരെയും ജില്ലാ പഞ്ചായത്തിനെയും കുറ്റപ്പെടുത്തിയിരുന്നു. ഇതില്‍ മേയര്‍ ഇടപെട്ടില്ലെന്ന് എല്‍ഡിഎഫ് ചൂണ്ടിക്കാട്ടിയതിനെ തുടർന്നായിരുന്നു ബഹളം ആരംഭിച്ചത്. എൽഡിഎഫ് പ്രതിനിധികളില്ലാതെ തുടർന്ന നടന്ന് സർവകക്ഷിയോഗത്തിൽ തെരുവുനായകൾക്കായി ഷെൽട്ടറുകൾ സ്ഥാപിക്കാനും പദ്ധതി അംഗീകാരത്തിനായി സമർപ്പിക്കാനും തീരുമാനിച്ചു. പിടികൂടുന്ന തെരുവുനായകൾക്ക് കോർപറേഷൻ വാക്സിനേഷൻ നൽകും. നായകളെ പിടികൂടുന്നതിന് കോര്‍പറേഷനിലെ കണ്ടിജന്‍റ് വര്‍കര്‍മാര്‍ക്ക് പരിശീലനം നൽകും. ജൈവമാലിന്യങ്ങള്‍ വലിച്ചെറിയുന്നത് തടയുന്നതിലേക്ക് ഉറവിടങ്ങളില്‍ നിന്നും മാലിന്യം ശേഖരിച്ച് വളമാക്കി മാറ്റുന്ന ഒരു പദ്ധതി കോര്‍പറേഷന്‍റെ പരിഗണനയിലുണ്ടെന്നും എത്രയും പെട്ടെന്ന് അത് നടപ്പിലാക്കുമെന്നും മേയര്‍ പറഞ്ഞു. ഉത്തരവാദിത്തത്തില്‍ നിന്നും മനപൂര്‍വം ഒഴിവാകാനാണ് സര്‍ക്കാരും ജില്ലാ പഞ്ചായത്തും ശ്രമിക്കുന്നതെന്ന് മേയര്‍ പിന്നീട് പറഞ്ഞു. ഡപ്യൂട്ടി മേയര്‍ പി. ഇന്ദിര, പി. ഷമീമ, വി.കെ. ശ്രീലത, സുരേഷ് ബാബു എളയാവൂര്‍, ടി.ഒ. മോഹനന്‍, എം. പ്രകാശന്‍, വി.കെ. ഷൈജു, വ്യാപാരി പ്രതിനിധികളായ കെ.പി. ബാസിത്, കെ.വി. സലീം, പി.സി. രാജേഷ് കെ. ശ്യാം, കന്‍റോൺമെന്‍റ് പ്രതിനിധി കെ.വി. ദാസന്‍, റെയിൽവേ പ്രതിനിധി എൻ.എസ്. ജിനേഷ്, വെറ്ററിനറി ഡോക്ടർ വിനോദ് കുമാര്‍ എന്നിവർ പങ്കെടുത്തു.

ചപ്പാരപ്പടവ്-ചാണോക്കുണ്ട് റോഡിൽ കുഴികൾ

ചപ്പാരപ്പടവ്: ചപ്പാരപ്പടവ്-ചാണോക്കുണ്ട് റോഡിൽ ചപ്പാരപ്പടവിലെ സ്വകാര്യ ആശുപത്രിക്ക് മുന്നിലെ റോഡിൽ രൂപപ്പെട്ട കുഴികൾ അപകടക്കെണിയാകുന്നു. ഏറെ പ്രതിഷേധങ്ങൾക്ക് ഒടുവിലാണ് കാട്ടാമ്പള്ളി-ചപ്പാരപ്പടവ്-ചാണോക്കുണ്ട്-തടിക്കടവ് റോഡ് ബിറ്റുമിനസ് മെക്കാഡം രീതിയൽ ടാറിംഗ് നടത്തിയത്. പണി നടക്കുമ്പോൾ നിർമാണത്തിലെ അപാകതകൾ ചൂണ്ടിക്കാട്ടി നിരവധി പരാതികളും ഉയർന്നിരുന്നു. രണ്ടുവർഷം മുമ്പാണ് ടാറിംഗ് കഴിഞ്ഞത്. ചപ്പാരപ്പടവ് സ്വകാര്യ ആശുപത്രിയുടെ മുന്നിലെ റോഡിൽ വലിയ കുഴികളാണ് ഇപ്പോൾ രൂപപ്പെട്ടിരിക്കുന്നത്. ഇവിടെ വാഹനങ്ങൾ വേഗതയിൽ വരുമ്പോൾ ഇരുചക്ര വാഹനങ്ങൾ കുഴിയിൽ വീഴുന്നത് പതിവായിട്ടുണ്ട്. റോഡ് അപകടസ്ഥിതി ഒഴിവാക്കി യാത്രാ യോഗ്യമാക്കണമെന്നാണ് പ്രദേശവാസികളുടെ ആവശ്യം.

മലയോര ഹൈവേയിൽ രയറോം പള്ളിക്ക് സമീപം വെള്ളക്കെട്ട്; യാത്രക്കാർ ദുരിതത്തിൽ

ആലക്കോട്: മലയോര ഹൈവേയിൽ രയറോം പള്ളിക്ക് സമീപം റോഡിൽ വെള്ളക്കെട്ട് രൂപപ്പെട്ടത് യാത്രാ ദുരിതത്തിനും അപകട മേഖലയാകാനും കാരണമാകുന്നു. റോഡിന് സമീപ പ്രദേശം മണ്ണിട്ട് ഉയർത്തിയതോടെയാണ് റോഡിന് സമീപം പലയിടത്തും ഉറവകൾ രൂപപ്പെട്ട് വെള്ളക്കെട്ട് രൂപപ്പെടുന്നതിനു കാരണമായത്. മലയോര ഹൈവേയിൽ ഉറവകൾ രൂപപ്പെട്ടതോടെ റോഡിന്‍റെ പലഭാഗവും തകർന്നു തുടങ്ങിയിട്ടുണ്ട്. റോഡിന്‍റെ കോൺക്രീറ്റ് കാനകൾ കല്ലും മണ്ണും വീണു നിറഞ്ഞു കി‌ടക്കുന്നത് നീക്കം ചെയ്യുന്നില്ല. അതിനാൽ, റോഡിലൂടെ ദീർഘദൂരം വെള്ളം ഒഴുകാൻ ഇടയാകുന്നു. വാഹനങ്ങൾ വേഗത്തിൽ പോകുന്പോൾ കാൽനടയാത്രികരുടെയും ഇരുചക്രവാഹന യാത്രികരു‌ടെയും മേൽ ചെളിവെള്ളം തെറിക്കുന്നതിനും കാരണമാകുന്നുണ്ട്. മുൻകാലങ്ങളിൽ രയറോം സെന്‍റ് സെബാസ്റ്റ്യൻസ് പാരിഷ് കൗൺസിൽ അംഗങ്ങളുടെ നേതൃത്വത്തിലാണ് ഓവുചാൽ വൃത്തിയാക്കിയിരുന്നത്. എന്നാൽ, ഓവുചാലിൽ മാലിന്യം കൂടുതലായി അടിഞ്ഞതോടെ ജെസിബി ഉപയോഗിച്ച് നീക്കം ചെയ്യേണ്ട അവസ്ഥയാണുള്ളത്. മഴക്കാലം ആരംഭിച്ചിട്ടും പൊതുമരാമത്ത് വകുപ്പ് ഓവുചാൽ വൃത്തിയാക്കി ജലത്തിന്‍റെ ഒഴുക്ക് സുഗമമാക്കാത്തതിൽ നാട്ടുകാർ പ്രതിഷേധത്തിലാണ്. ശക്തമായ മഴയിൽ മലയോര ഹൈവേ റോഡിലൂടെ കല്ലും മണ്ണും വെള്ളവും ഒഴുകിവരുന്നത് ഇരുചക്ര വാഹനങ്ങൾ അപകടത്തിൽപ്പെടുന്നതിന് കാരണമാകുന്നു. രയറേം സെന്‍റ് സെബാസ്റ്റ്യൻസ് ഇംഗ്ലീഷ് മീഡിയം യുപി സ്കൂളിലേക്കും, രയറോം ഗവൺമെന്‍റ് ഹൈസ്കൂളിലേക്കും അനേകം കുട്ടികളും പള്ളിയിലേക്കും നിരവധിയാളുകൾ വെള്ളക്കെട്ട് നിറഞ്ഞ ഭാഗത്തുകൂടിയാണ് നടന്നു പോകുന്നത്.

അപകടമേഖലയായി കൂവേരി തൂക്കുപാലം

ചപ്പാരപ്പടവ്: കാലവർഷം കനത്തതോടെ മലയോരമേഖലയിലെ പുഴകളും കുളങ്ങളും നിറഞ്ഞു. അതോടൊപ്പം ജലാശയങ്ങളിൽ ഇറങ്ങുന്നവരുടെ മുങ്ങിമരണങ്ങൾ ആശങ്കപ്പെടുത്തുകയാണ്. ജില്ലയിലെ പ്രധാന പുഴയായ കുപ്പം പുഴയുടെ ഭാഗമായ ചപ്പാരപ്പടവ് കൂവേരി തൂക്കുപാലത്തിനു സമീപം പുഴയിൽ കഴിഞ്ഞദിവസം യുവാവ് മരണപ്പെട്ടിരുന്നു. പരിയാരം പഞ്ചായത്തിലെ നെല്ലിപ്പറമ്പ് സ്വദേശി മുഹമ്മദ് ഷാഹിദാണ് (19) കൂട്ടുക്കാരോടൊത്തു കുളിക്കുന്നതിനിടയിൽ കൂവേരി തൂക്കുപാലത്തിനു സമീപം പുഴയിൽ മുങ്ങിത്താണത്. അവധി ദിവസങ്ങൾ ആഘോഷിക്കാനെത്തുന്ന യുവാക്കളും വിദ്യാർഥികളും ജലാശയങ്ങളിൽ ഇറങ്ങുന്നത് പതിവായിരിക്കുകയാണ്. പുഴയുടെ ആഴമോ ഒഴുക്കോ അറിയാതെയാണ് പലരും കുളിക്കാനിറങ്ങുന്നത്. ചപ്പാരപ്പടവ് പഞ്ചായത്തിലെ കൂവേരി തൂക്കുപാലവും പരിസരവും ധാരാളം ആളുകൾ നിത്യവും എത്തുന്ന ടൂറിസ്റ്റ് കേന്ദ്രമായി മാറിയിട്ടുണ്ട്. തൂക്കുപാലത്തിനു മുകളിൽ കൂട്ടത്തോടെ എത്തുന്നവർ ഫോട്ടോയും വീഡിയോകളും എടുക്കുന്നത് അപകടകരമായ നിലയിലാണ്. ഇവിടെ അപകടം സംബന്ധിച്ച യാതൊരു മുന്നറിയിപ്പു ബോർഡും സ്ഥാപിച്ചിട്ടില്ല. മാത്രമല്ല യുവാക്കളെ ആ കർഷിക്കുന്നതിനായി ഒരു യുവജന സംഘടന പാലത്തിന് സമീപം സെൽഫി പോയിന്‍റ് സ്ഥാപിച്ചിട്ടുമുണ്ട്. ഏതാനും വർഷങ്ങൾക്കുമുമ്പ് തൊട്ടടുത്തുള്ള തേറണ്ടിക്കടവിൽ പുഴയുടെ അരികിൽ നിന്ന് സെൽഫി എടുക്കുകയായിരുന്ന യുവാവു മണൽത്തിട്ടയിടിഞ്ഞു ഒഴുക്കിൽപ്പെട്ടു മരണപ്പെട്ടിരുന്നു. പുഴയിൽ ഇറങ്ങുന്നതിനെതിരെ മുന്നറിയിപ്പു ബോർഡുകൾ സ്ഥാപിക്കാൻ ജില്ലാ ദുരന്തനിവാരണസമിതി ശിപാർശ ചെയ്യാറുണ്ടെങ്കിലും പല തദ്ദേശ സ്വയംഭരണസ്ഥാപനങ്ങളും പാലിക്കാറില്ല. മലയോരത്തെ പ്രധാന വെള്ളച്ചാട്ടങ്ങൾ ഇപ്പോൾ ജലസമൃദ്ധമാണ്. കാപ്പിമല, ഏഴരക്കുണ്ട്, കാഞ്ഞിര ക്കൊല്ലി എന്നിവിടങ്ങളിലും സഞ്ചാരികൾ ധാരാളമായെത്തുന്നുണ്ട്. തൂക്കുപാലത്തിന്‍റെ അരികിൽ സംരക്ഷണത്തിനായി തീർത്തിരിക്കുന്ന ഗ്രില്ലുകൾ പല സ്ഥലത്തും ദ്രവിച്ചിട്ടുണ്ട്. കുട്ടികൾ ഉൾപ്പെടെ പുഴയിലേക്ക് വീഴാനും സാധ്യത ഏറെയാണ്. വർഷങ്ങൾക്കുമുമ്പ് നിർമിച്ച തൂക്കുപാലത്തിന്‍റെ സംരക്ഷണ പ്രവർത്തനങ്ങൾ അത്യാവശ്യമായി നടത്തണമെന്ന് നാട്ടുകാർ ആവശ്യപ്പെടുന്നു. കൂടുതൽ കാഴ്ചക്കാർ ഒരേ സമയം പാലത്തിൽ കയറുന്നത് പാലത്തിന്‍റെ സുരക്ഷയ്ക്ക് ഭീഷണിയാകുകയാണ്. കൂടാതെ യാത്രികർക്ക് ബുദ്ധിമുട്ടു സൃഷ്ടിക്കുകയും ചെയ്യുന്നു. ഇതിനെതിരെ നാട്ടുകാർ മുന്നറിയിപ്പു നൽകുന്നുണ്ടെങ്കിലും പലരും ഇത് അവഗണിക്കുന്നതായാണ് ആക്ഷേപമുയരുന്നത്. പാലത്തിലെയും സമീപത്തെയും പ്രവേശനം നിയന്തിക്കണമെന്നും മുന്നറിയിപ്പു ബോർഡുകൾ സ്ഥാപിക്കണമെന്നും പോലീസ്, പഞ്ചായത്ത് വകുപ്പുകളോട് നാട്ടുകാർ ആവശ്യപ്പെടുന്നു.

തൈകൾ വിതരണം ചെയ്തു

ചെറുപുഴ: ജില്ലാ പഞ്ചായത്തിന്‍റെ ഓണത്തിനൊരുകൊട്ടപ്പൂവ് പദ്ധതിയുടെ ഭാഗമായി ചെറുപുഴ കൃഷിഭവന്‍റെ നേതൃത്വത്തിൽ 18 ജെഎൽജി ഗ്രൂപ്പുകൾക്ക് ചെണ്ടുമല്ലി തൈകളും വാടാർമല്ലി തൈകളും വിതരണം ചെയ്തു. സിഡിഎസ് ചെയർപേഴ്സൺ കെ.വി. സുനിത കുമാരി വിതരണോദ്ഘാടനം നിർവഹിച്ചു. കൃഷി ഓഫീസർ പി. അഞ്ജു അധ്യക്ഷത വഹിച്ചു. അസിസ്റ്റന്‍റ് കൃഷി ഓഫീസർ പി. ഗീത, കൃഷി അസിസ്റ്റന്‍റ് സുരേഷ് കുറ്റൂർ എന്നിവർ പ്രസംഗിച്ചു. ഇരിക്കൂർ: ഇരിക്കൂർ പഞ്ചായത്ത് കൃഷിഭവൻ മുഖേന കുടുംബശ്രീ ജെഎൽജി ഗ്രൂപ്പുകൾക്ക് നല്കുന്ന ചെണ്ടുമല്ലി വാടാമല്ലി തൈകളുടെ വിതരണോദ്ഘാടനം പഞ്ചായത്ത് പ്രസിഡന്‍റ് ടി.പി. ഫാത്തിമ നിർവഹിച്ചു. ആരോഗ്യ വിദ്യാഭ്യാസ ചെയർ പേഴ്സൺ എൻ.കെ. സുലൈഖ അധ്യക്ഷത വഹിച്ചു. കൃഷി ഓഫീസർ പി. നീതു, പഞ്ചായത്തംഗം എം.പി. ഷബ്‌നം, സി ഡി എസ് ചെയർപേഴ്സൺ ടി. പി. ജുനൈദ എന്നിവർ പ്രസംഗിച്ചു.

ശ്രീകണ്ഠപുരം-നടുവിൽ റോഡ് നിർമാണം വേഗത്തിലാക്കണം: സജീവ് ജോസഫ് എംഎൽഎ

ചെമ്പന്തൊട്ടി: ശ്രീകണ്ഠപുരം-നടുവിൽ റോഡ് പണി വേഗത്തിലാക്കി ജനങ്ങളുടെ യാത്രാക്ലേശം പരിഹരിക്കാൻ അടിയന്തര നടപടി സ്വീകരിക്കണമെന്ന് സജീവ് ജോസഫ് എംഎൽഎ ഉദ്യോഗസ്ഥർക്കും കോൺട്രാക്ടർക്കും നിർദേശം നൽകി. പ്രസ്തുത റോഡിന്‍റെ നിർമാണവുമായി ബന്ധപ്പെട്ട അവലോകന യോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പള്ളം പാലത്തിന്‍റെ അപ്രോച്ച് റോഡ് പണി വേഗത്തിലാക്കാനും കൊക്കായി പാലം സമാന്തര റോഡ് കോൺക്രീറ്റ് ചെയ്ത് ഉടൻ ഗതാഗതയോഗ്യമാക്കാനും കൊട്ടൂർവയൽ ഭാഗത്തെ യാത്രാക്ലേശം പരിഹരിക്കാനും എംഎൽഎ നിർദേശിച്ചു. കൊക്കായി ബൈപാസ് റോഡും പള്ളം-കട്ടായി, ചെമ്പന്തൊട്ടി-കട്ടായി, നെടിയങ്ങ-കട്ടായി, നെടിയങ്ങ എകെജി, സ്വാമിമഠം സർവീസ് റോഡുകൾ ഉടൻ ഗതാഗതയോഗ്യമാക്കാനും ചെമ്പന്തൊട്ടി ടൗണിൽ പൂർണമായി സ്ലാബുകളിട്ട് ഡ്രെയ്നേജിന്‍റെ പണി പൂർത്തീകരിക്കാനും കരയത്തുംചാൽ റോഡ് ആരംഭത്തിലെ ഇരുവശത്തെയും പണികൾ പൂർത്തിയാക്കാനും കമ്മിറ്റി നിർദേശിച്ചു. നഗരസഭാധ്യക്ഷ കെ.വി. ഫിലോമിന അധ്യക്ഷത വഹിച്ചു. ഫാ. ആന്‍റണി മഞ്ഞളാംകുന്നേൽ, നഗരസഭ സ്ഥിരംസമിതി അധ്യക്ഷന്മാരായ ജോസഫീന വർഗീസ്, കെ.സി. ജോസഫ്, കൗൺസിലർമാരായ കെ.ജെ. ചാക്കോ കൊന്നയ്ക്കൽ, കെ.വി. കുഞ്ഞിരാമൻ, എക്സിക്യുട്ടീവ് എൻജിനിയർ സജിത്ത്, ടി.കെ. പ്രകാശൻ, ജിയോ ജേക്കബ്, വർഗീസ് വയലാമണ്ണിൽ, കെ.എം. ഷംസീർ, ബിനു ഇലവുങ്കൽ, ബെന്നറ്റ് വട്ടക്കുഴി, ജോർജ് ആലപ്പാട്, ജോണി പെരുമ്പള്ളിൽ, ആർ. ശശിധരൻ, ജോസ് മാളക്കാരൻ, ഇരിക്കൂർ കൺസ്ട്രക്‌ഷൻ കമ്പനി പ്രതിനിധികളായ ശിഹാബ്, ശ്രീജേഷ് എന്നിവർ പ്രസംഗിച്ചു.

വായന ദിനാചരണം നടത്തി

പയ്യാവൂർ: മടമ്പം പികെഎം കോളജ് ഓഫ് എഡ്യുക്കേഷൻ ലൈബ്രറി, എൻഎസ്എസ്, ഇംഗ്ലീഷ് വിഭാഗം, ഇന്‍റേണൽ ക്വാളിറ്റി അഷ്വറൻസ് സെൽ എന്നിവ സംയുക്തമായി വായന ദിനാചരണം നടത്തി. കോളജ് ഹാളിൽ നടന്ന സമ്മേളനം വൈസ് പ്രിൻസിപ്പൽ ഡോ. പ്രശാന്ത് മാത്യു ഉദ്ഘാടനം ചെയ്തു. ലൈബ്രേറിയൻ ദീപാ ജോൺ ആമുഖപ്രഭാഷണം നടത്തി. ഫിസിക്കൽ എഡ്യുക്കേഷൻ വിഭാഗം മേധാവി ഡോ. സിനോജ് ജോസഫ്, ഇംഗ്ലീഷ് വിഭാഗം മേധാവി ഡോ. ജിഷ ജയിംസ് എന്നിവർ വായന ദിന സന്ദേശം നൽകി. കോളജ് യൂണിയൻ ചെയർമാൻ അമിൻ മാത്യു പ്രസംഗിച്ചു. ഏറ്റവും കൂടുതൽ സമയം കോളജ് ലൈബ്രറി ഉപയോഗിച്ച വിദ്യാർഥിയെ വൈസ് പ്രിൻസിപ്പൽ അനുമോദിച്ചു. 25 വരെ നടത്തപ്പെടുന്ന വായന വാരാചരണത്തിൽ സമീപപ്രദേശങ്ങളിലെ സ്കൂൾ വിദ്യാർഥികൾക്ക് ലൈബ്രറി പരിചയപ്പെടുത്തൽ, പുസ്തക പ്രദർശനം, ബുക്ക് ഡൊണേഷൻ തുടങ്ങി വിവിധ പരിപാടികൾ നടത്തും. ഇതിന്‍റെ ആദ്യഘട്ടമായി പികെഎം കോളജിലെ അധ്യാപകർ, വിദ്യാർഥികൾ എന്നിവരിൽ നിന്ന് സമാഹരിച്ച നൂറ്റമ്പതോളം പുസ്തകങ്ങൾ കാഞ്ഞിലേരി എഎൽപി സ്കൂളിന് കൈമാറി. കോളജ് ഫിസിക്കൽ എഡ്യുക്കേഷൻ വിഭാഗം മേധാവി ഡോ. സിനോജ് ജോസഫ്, കോളജ് ലൈബ്രേറിയൻ ദീപാ ജോൺ, ഇംഗ്ലീഷ് വിഭാഗം അധ്യാപിക ഡോ. ജിഷ ജയിംസ്, കോളജ് വിദ്യാർഥികൾ എന്നിവർ ചടങ്ങിൽ പങ്കെടുത്തു. സ്കൂൾ മുഖ്യാധ്യാപകൻ സി.പി. ചന്ദ്രൻ പ്രസംഗിച്ചു. വായാട്ടുപറമ്പ്: വായാട്ടുപറമ്പ് സെന്‍റ് ജോസഫ്സ് യുപി സ്കൂളിൽ വായന ദിനം ആചരിച്ചു. വിദ്യാർഥികൾക്കായി വിവിധ മത്സരങ്ങൾ സംഘടിപ്പിച്ചു. സ്പെഷൽ സ്കൂൾ അസംബ്ലിയിലേക്ക് പുസ്തക താലപ്പൊലിയേന്തിയ വിദ്യാർഥികൾ റാലിയായി കടന്നുവന്നതോടെ വായനദിനാഘോഷത്തിന് തുടക്കം കുറിച്ചു. അധ്യാപകരായ രാഖി, മിനു എന്നിവർ നേതൃത്വം നൽകി. രയറോം: രയറോം ഗവ. ഹൈസ്കൂളിൽ വായന ദിന-മാസാചരണവും വിവിധ ക്ലബുകളുടെ ഉദ്ഘാടനവും ജില്ലാ പഞ്ചായത്തംഗം തോമസ് വെക്കത്താനം നിർവഹിച്ചു. പി.കെ. ഹനീഫ അധ്യക്ഷത വഹിച്ചു. പി.ടി. സുരേഷ് ബാബു മുഖ്യാതിഥിയായിരുന്നു. കണ്ണൂർ: അസോസിയേഷൻ ഓഫ് ഓർഫനേജസ് ആൻഡ് ചാരിറ്റബിൾ ഇൻസ്റ്റിറ്റ്യൂഷൻസ് കണ്ണൂർ ജില്ലാ കമ്മിറ്റിയുടെ ആഭിമുഖ്യത്തിൽ വായന ദിനം ആചരിച്ചു. ജില്ലയിൽ അനാഥാലയങ്ങളിലെ വിദ്യാർഥികൾക്കുള്ള പുസ്തകങ്ങൾ സംസ്ഥാന ജനറൽ സെക്രട്ടറി പി.വി. സൈനുദ്ദീൻ ജില്ലാ ഭാരവാഹികൾക്ക് കൈമാറി ഉദ്ഘാടനം നിർവഹിച്ചു. ജില്ലാ പ്രസിഡന്‍റ് ബ്രദർ സജി അധ്യക്ഷത വഹിച്ചു. ജില്ലാ സെക്രട്ടറി സി.എച്ച്. മൊയ്തു ഹാജി ആമുഖപ്രഭാഷണം നടത്തി. ടി.എ. തങ്ങൾ, സിസ്റ്റർ വിനീത, കെ.കെ.അഹമ്മദ് ഹാജി, കെ. മോഹനൻ, കെ.എൻ. മുസ്തഫ, എം. അസൈനാർ ഹാജി, സി. സമീർ, സിസ്റ്റർ ഡെയ്സി, സി. രൂപേഷ്, ഡോ. താജുദ്ദീൻ വാഫി, സിസ്റ്റർ ഡിന, എസ്.എ.പി. ആസാദ്, ഷമീമ ഇസ്‌ലാഹിയ എന്നിവർ പ്രസംഗിച്ചു.

തീരദേശ സംരക്ഷണ സമരത്തിന് കെസിവൈഎം ഐക്യദാർഢ്യം

പിലാത്തറ: പുത്തന്‍തോട് മുതല്‍ വടക്കോട്ട് പശ്ചിമ കൊച്ചി വരെയുള്ള തീരദേശ ജനത അനുഭവിക്കുന്ന കടലാക്രമണത്തിന് ശാശ്വത പരിഹാരം ആവശ്യപ്പെട്ട് നടത്തുന്ന ജനകീയ സമരത്തിന് കെസിവൈഎം കണ്ണൂര്‍ രൂപത ഐക്യദാർഢ്യം പ്രഖ്യാപിച്ചു. പിലാത്തറ സെന്‍റ് ജോസഫ്‌സ് കോളജില്‍ നടന്ന ഐക്യദാർഢ്യ സദസ് കെസിവൈഎം കണ്ണൂര്‍ രൂപത ഡയറക്ടര്‍ ഫാ. ജസ്റ്റിന്‍ എടത്തില്‍ ഉദ്ഘാടനം ചെയ്തു. കെസിവൈഎം കണ്ണൂര്‍ രൂപത പ്രസിഡന്‍റ് ഫെബിന ഫെലിക്‌സ് അധ്യക്ഷത വഹിച്ചു. പുത്തന്‍തോട് മുതല്‍ ഫോര്‍ട്ടുകൊച്ചി വരെയുള്ള രണ്ടാംഘട്ട ടെട്രാപോഡ് കടൽഭിത്തി നിർമാണം യുദ്ധകാലാടിസ്ഥാനത്തില്‍ പൂര്‍ത്തിയാക്കി തീരദേശ ജനതയ്ക്ക് ജനിച്ചുവളര്‍ന്ന മണ്ണില്‍ കടലാക്രമണഭീതി കൂടാതെ ജീവിക്കുവാനുള്ള സാഹചര്യമൊരുക്കുന്നതിനൊപ്പം ദുരിതബാധിതര്‍ക്ക് അര്‍ഹമായ നഷ്ടപരിഹാരം നല്‍കണമെന്നും ഐക്യദാര്‍ഢ്യ സദസ് സര്‍ക്കാരിനോട് ആവശ്യപ്പെട്ടു.

ഒരാഴ്ചയ്ക്കിടെ കണ്ണൂരിൽ 2.49 കോടിയുടെ കൃഷിനാശം

കണ്ണൂർ: കാലവർഷം ശക്തിപ്രാപിച്ചതോടെ ജില്ലയിൽ കഴിഞ്ഞ ഒരാഴ്ചയ്ക്കിടെയുണ്ടായത് 2.49 കോടിയുടെ കൃഷിനാശം. ഈമാസം 12 മുതൽ ഇന്നലെ വരെയുള്ള കണക്കനുസരിച്ച് 2,49, 00,000 രൂപയുടെ നഷ്ടമാണ് ഉണ്ടായത്. മലയോര മേഖലയിലാണ് കൂടുതലായും നാശം. 23.21 ഹെക്ടർ കൃഷിയാണ് കനത്തമഴയിൽ നശിച്ചത്. 1984 കർഷകർക്കാണ് നഷ്ടം സംഭവിച്ചത്. വാഴ, തെങ്ങ്, റബർ, കശുമാവ്, കവുങ്ങ്, കൊക്കൊ, ജാതി, പച്ചക്കറികൾ എന്നിവയാണ് മഴയിൽ നശിച്ചത്. വാഴക്കൃഷിയാണ് കൂടുതലും നശിച്ചത്. 21835 വാഴകൾ നശിച്ചതായാണ് കണക്ക്. ഓണം വിപണി ലക്ഷ്യമിട്ട് നടത്തിയ വാഴക്കൃഷിയാണ് നശിച്ചത്. ഇരിട്ടി, ഇരിക്കൂർ, പേരാവൂർ, തളിപ്പറമ്പ്, ആലക്കോട്, പയ്യന്നൂർ, എടക്കാട്, തലശേരി, പാനൂർ, കുത്തുപറന്പ് എന്നിവിടങ്ങളിലാണ് കൂടുതൽ നാശം റിപ്പോർട്ട് ചെയ്തിരിക്കുന്നത്. വെള്ളക്കെട്ട് മൂലവും പല സ്ഥലങ്ങളിലും കൃഷിനാശം സംഭവിച്ചിട്ടുണ്ട്. മലയോര മേഖലയായ ഇരിക്കൂർ, ഇരിട്ടി, പേരാവൂർ, തളിപ്പറന്പ് എന്നിവിടങ്ങളിൽ റബർ, തെങ്ങ്, കൊക്കോ, കവുങ്ങ് എന്നിവയ്ക്കാണ് വ്യാപനാശമുണ്ടാത്. മഴയ്ക്കൊപ്പം വീശിയടിക്കുന്ന കാറ്റാണ് കൃഷിനാശത്തിന് ഇടയാക്കന്നതെന്ന് അധികൃതർ പറഞ്ഞു.

കോഴിഫാമിനു നേരെ തെരുവുനായ ആക്രമണം; 50 കോഴികളെ കൊന്നു

കാസർഗോഡ്: മധൂർ പട്ള ചെന്നിക്കൂടലിൽ നാടൻ കോഴി വളർത്തുകേന്ദ്രത്തിനു നേരെ തെരുവുനായ്ക്കളുടെ ആക്രമണം. പ്രത്യുത്പാദനത്തിനായി വളർത്തിയെടുത്ത മികച്ച ഇനത്തിൽപ്പെട്ട ആറു പൂവൻ കോഴികളുൾപ്പെടെ 50ഓളം കോഴികളെ കൊന്നൊടുക്കി. അപകടം മൂലം അംഗപരിമിതി സംഭവിച്ച ചെങ്കള നെല്ലിക്കട്ടയിലെ സഫ്‌വാൻ സ്വയംതൊഴിൽ സംരംഭമായി തുടങ്ങിയ കോഴിവളർത്തൽ കേന്ദ്രമാണ് തകർക്കപ്പെട്ടത്. വ്യാഴാഴ്ച വൈകുന്നേരം കോഴികൾക്ക് തീറ്റയും വെള്ളവും കൊടുത്ത് കൂട് അടച്ചതായിരുന്നു. ഇന്നലെ പുലർച്ചെ 5.30ഓടെ കോഴികളുടെ കരച്ചിലും ബഹളവും കേട്ട് സമീപവാസികൾ വന്ന് നോക്കിയപ്പോഴാണ് തെരുവുനായ്ക്കൾ കോഴിക്കൂടിന്‍റെ വലയും വാതിലും തകർത്ത് കോഴികളെ കടിച്ചുകുടയുന്നതു കണ്ടത്. ഇവർ വടിയെടുത്ത് നായ്ക്കളെ ഓടിച്ചാണ് ബാക്കിയുള്ള കോഴികളെ രക്ഷിച്ചത്. അര ലക്ഷത്തിലധികം രൂപയുടെ നഷ്ടം സംഭവിച്ചതായി സഫ്വാൻ പറഞ്ഞു. ഇലക്ട്രീഷ്യനായിരുന്ന സഫ്‌വാൻ ഒരു വർഷം മുമ്പ് കട്ടർ മെഷീൻ തട്ടി ഇരുകൈകൾക്കും ഗുരുതരമായി പരിക്കേറ്റതിനെ തുടർന്ന് ദീർഘനാൾ ചികിത്സയിലായിരുന്നു. 25 ലക്ഷം രൂപയോളം ചെലവഴിച്ച് നടത്തിയ ചികിത്സയ്ക്കു ശേഷമാണ് ജീവിതത്തിലേക്ക് തിരികെ വന്നത്. ഇതിനു ശേഷമാണ് സ്വയംതൊഴിൽ സംരംഭമായി നാടൻ കോഴിവളർത്തുകേന്ദ്രം തുടങ്ങിയത്. സർക്കാരിന്‍റെ സബ്സിഡിയോടെ ഫാം വിപുലീകരിക്കാനുള്ള ശ്രമങ്ങൾ നടത്തുന്നതിനിടയിലാണ് തെരുവുനായ്ക്കളുടെ ആക്രമണത്തിൽ കനത്ത നഷ്ടം സംഭവിച്ചത്.

നാട് ആഘോഷത്തിരക്കിലാണ്; ഡോ. അസ്നയ്ക്ക് കല്യാണമായി

കൂത്തുപറമ്പ്: പുതുജീവിതത്തിലേക്കുള്ള ഒരുക്കത്തിലാണ് ചെറുവാഞ്ചേരിയിലെ ഡോ. അസ്ന. അടുത്ത മാസം അഞ്ചിന് വീട്ടുമുറ്റത്ത് ഉയരുന്ന പന്തലിൽ അസ്നയെ ആലക്കോട് സ്വദേശിയും ഷാർജയിൽ എൻജിനിയറുമായ നിഖിൽ താലി കെട്ടും. വിവാഹം ആഘോഷമാക്കാനുള്ള ഒരുക്കത്തിലാണ് അസ്നയുടെ വീട്ടുകാരും നാടൊന്നാകെയും. ‌ ആരും മറന്നു കാണില്ല, ചെറുവാഞ്ചേരി പൂവത്തൂരിലെ തരശിപറമ്പത്ത് വീട്ടിൽ അസ്നയെ. കണ്ണൂരിലെ അക്രമ രാഷ്‌‌ട്രീയത്തിന് ഇരയായവൾ. 2000 സെപ്റ്റംബർ 27 ന് നടന്ന പഞ്ചായത്ത് തെരഞ്ഞെടുപ്പിനിടെയുണ്ടായ രാഷ്‌‌ട്രീയ സംഘർഷത്തിനിടെ എറിഞ്ഞ ബോംബുകളിൽ ഒന്ന് വന്ന് പതിച്ചത് വീട്ടുമുറ്റത്ത് കളിക്കുകയായിരുന്ന അസ്നയ്ക്ക് നേരെ. അമ്മശാന്തയ്ക്കും സഹോദരനും പരിക്കേറ്റു. അന്ന് അസ്നക്ക് പ്രായം മൂന്ന് വയസ്. ബോംബേറിൽ അസ്നയുടെ വലതുകാലിന് ഗുരുതരമായി പരിക്കേറ്റു. ചികിത്സയ്ക്കിടെ മുട്ടിനു കീഴെ വച്ച് കാൽ മുറിച്ചുമാറ്റി. പിന്നീട് കൃത്രിമ കാലുമായി വിധിക്ക് മുന്നിൽ പകച്ചു നിൽക്കാതെ നിശ്ചയദാർഢ്യത്തോടെ അസ്ന വിജയത്തിന്‍റെ പടികൾ ഓരോന്നായി ചവിട്ടിക്കയറി. കോഴിക്കോട് മെഡിക്കൽ കോളജിൽനിന്നും 2013ൽ എംബിബിഎസ് നേടി. ഇതിനിടെ സ്വന്തം പഞ്ചായത്തിലെ ആരോഗ്യ കേന്ദ്രത്തിലും ഡോക്ടറായി സേവനം അനുഷ്ഠിച്ചു. ഇപ്പോൾ വടകരയിലെ ക്ലിനിക്കിൽ ഡോക്ടറാണ് അസ്‌ന. അമ്മ ശാന്തയ്ക്കും സഹോദരൻ ആനന്ദിനും ഒപ്പമാണ് അസ്‌നയുടെ താമസം. ആലക്കോട് അരങ്ങം വാഴയിൽ വീട്ടിൽ വി.കെ.നാരായണൻ - ലീന ദമ്പതികളുടെ മകനാണ് വരൻ നിഖിൽ.

പത്തിടങ്ങളിൽ കാട്ടാനയിറങ്ങി

ഇരിട്ടി: ആറളം പുനരധിവാസ മേഖലയിൽ വ്യാഴാഴ്ച രാത്രിയും ഇന്നലെ പുലർച്ചെയുമായി ആന ഇറങ്ങിയത് പത്തിടങ്ങളിൽ. പലരുടെയും വീട്ടുമുറ്റത്ത് കൊന്പനാന മണിക്കൂറുകളോളം ചെലവഴിച്ചു. ഇതോടെ, പലർക്കും ഉറക്കമില്ലാത്ത രാത്രികളായിമാറി. ബ്ലോക്ക് ഒൻപതിലെ കാളിക്കയത്തിൽ അശോകന്‍റെ വീടിന്‍റെ മുറ്റത്ത് എത്തിയ കൊമ്പൻ ഭീതിവിതച്ചത് അരമണിക്കൂറോളം. ഇന്നലെ പുലർച്ചെ 1.30 തോടെ വീട്ടുമുറ്റത്ത് എത്തിയ കൊമ്പൻ മുറ്റത്തെ പ്ലാവിൽനിന്നും ചക്ക പറിച്ച് തിന്ന ശേഷം അവിടെത്തന്നെ നിലയുറപ്പിക്കുകയായിരുന്നു. ആർആർടി എത്തി തുരത്തിയപ്പോഴാണ് ആന വീട്ടുമുറ്റത്തുനിന്നും പിന്മാറിയത്. ചക്ക വീഴുന്ന ശബ്ദം കേട്ട് ഉണർന്ന അശോകനും കുടുംബവും ഭീതിയോടെയാണ് വീട്ടിൽ ചെലവഴിച്ചത്. ബ്ലോക്ക് 13 ലേക്ക് വഴിയില്ല, ആർആർടി വാഹനങ്ങൾ താഴുന്നു പുനരധിവാസ മേഖലയിൽ ഏറ്റവും കൂടുതൽ കാട്ടാന ശല്യം നിലനിൽക്കുന്ന പ്രദേശമാണ് ബ്ലോക്ക് 13/55. ഇവിടേക്കുള്ള റോഡ് ടാർ ചെയ്യണമെന്ന ആവശ്യത്തിന് പുനരാധവാസത്തിന്‍റെ അത്രയും പഴക്കമുണ്ട്. മാറിമാറി വരുന്ന സർക്കാരുകൾ തങ്ങളെ അവഗണിക്കുകയാണെന്നാണ് പ്രദേശവാസികൾ പറയുന്നത്. മൂന്നുകിലോമീറ്ററിൽ അധികം വരുന്ന മൺറോഡ് ഇപ്പോൾ കാൽനട യാത്രക്കാർക്ക് പോലും ഉപയോഗിക്കാൻ കഴിയാത്ത സാഹചര്യമാണ്. ആനയുണ്ടെന്ന വിവരത്തെ തുടർന്ന് എത്തിയ ആർആർടിയുടെ രണ്ടു വാഹനവും ചെളിയിൽ താഴ്ന്നിരുന്നു. മണിക്കൂറുകൾ എടുത്താണ് വാഹനം വെളിയിൽ എടുത്തത്. റോഡിനായി ലക്ഷങ്ങൾ പാസായിട്ടുണ്ടെന്ന വാഗ്ദാനം മാത്രമാണ് ഇവർക്ക് ലഭിക്കുന്നത്. അടിയന്തര ആശുപത്രി ആവശ്യങ്ങൾക്ക് പോലും ജനങ്ങൾക്ക് വെളിയിൽ എത്താൻ മഴക്കാലമായാൽ ഈ വഴിയിലൂടെ സാധിക്കുന്നില്ല. പുനരധിവാസ മേഖലയിൽ വഴിവിളക്കുകൾ സ്ഥാപിക്കാൻ പോലീസിനെ ഉപയോഗിച്ച് കണക്കെടുപ്പുകൾ നടത്തിയെങ്കിലും നടപടികളായില്ല. അടിക്കാടുകൾ വെട്ടിത്തെളിക്കണം എന്ന ഉത്തരവ് പണമില്ലെന്ന പേരിൽ ഫയലിൽ ഉറങ്ങുന്നു. മാസത്തിൽ ഒരിക്കൽ നടക്കുന്ന അവലോകന യോഗം മിനിട്സിൽ ഒതുങ്ങുന്ന പ്രഹസനങ്ങൾ മാത്രമായി തീരുന്നു.

ഫ്രഷ് ജ്യൂസില്‍ ചത്ത കൂറ!

പയ്യന്നൂര്‍: പയ്യന്നൂരിലെ ഹോട്ടലില്‍ നിന്നും പാര്‍സലായി എത്തിച്ച ഫ്രഷ് ജ്യൂസില്‍ ചത്ത കൂറയെന്ന് പരാതി. എടാട്ട് സ്വദേശിനിയായ യുവതി പയ്യന്നൂര്‍ പോലീസിലും നഗരസഭ അധികൃതര്‍ക്കുമാണ് പരാതി നല്‍കിയത്. വ്യാഴാഴ്ച വൈകുന്നേരം ആറേമുക്കാലോടെ നഗരസഭാ കാര്യാലയത്തിന് സമീപത്തെ ഹോട്ടലിലാണ് പരാതിക്കാസ്പദമായ സംഭവം. പരാതിക്കാരി വീട്ടിലേക്കുള്ള പാര്‍സലായി ഓര്‍ഡര്‍ നല്‍കിയ പീസ് മസാല, ഫ്രഷ് ലൈം ജ്യൂസ്, വട ചട്ണി എന്നീ ഭക്ഷണ സാധനങ്ങള്‍ രാത്രി എഴരയോടെ ഡോര്‍ ഡെലിവറിയായി വീട്ടിലെത്തി ച്ചിരുന്നു. എഴേമുക്കാലോടെ കഴിക്കാന്‍ നേരത്താണ് കുട്ടിക്ക് കൊടുത്ത ഫ്രഷ് ലൈം ജ്യൂസില്‍ ചത്തകൂറയെ കണ്ടെത്തിയത്.

വനിതാ പോലീസിനെ ആക്രമിച്ച യുവതി അറസ്റ്റിൽ

കണ്ണൂർ: അക്രമം തടയാനെത്തിയ വനിതാ പോലീസിനെ മർദിച്ച സംഭവത്തിൽ യുവതി അറസ്റ്റിൽ. വടക്കുമ്പാട് സ്വദേശിനി റസീനയെയാണ് ധർമടം പോലീസ് അറസ്റ്റ് ചെയ്തത്. നിരവധി കേസുകളിൽ പ്രതിയായ റസീന അമ്മ യെയും സഹോദരിയേയും ആക്രമിക്കുന്നതായി സ്റ്റേഷനിൽ ലഭിച്ച വിവരത്തിന്‍റെ അടിസ്ഥാനത്തിലാണ് പോലീസ് സംഘം സ്ഥലത്തെത്തിയത്. വീട്ടിലേക്ക് അതിക്രമിച്ച് എത്തിയ റസീന അമ്മയോട് പണം ആവശ്യപ്പെടുകയായിരുന്നു. പണം നൽകാത്തതിനെ തുടർന്നാണ് റസീന ആക്രമിച്ചത്. സഹോദരിയുടെ മകളെ അടിക്കുന്നത് കണ്ട് അതു തടയാൻ ശ്രമിച്ച വനിതാ പോലീസിനെ തള്ളി താഴെയിടുകയായിരുന്നു. വീടിന്‍റെ ജനലും വീട്ടുമുറ്റത്ത് നിർത്തിയിട്ട കാറിന്‍റെ ഗ്ലാസും അടിച്ചുതകർത്തു. പ്രതിയെ റിമാൻഡ് ചെയ്തു.

യുവതിയുടെ ആത്മഹത്യയ്ക്ക് കാരണം സദാചാര ഗുണ്ടായിസം: കമ്മീഷണർ

കണ്ണൂർ: കായലോട് പറന്പായിയിൽ റസീന മൻസിലിൽ റസീന ആത്മഹത്യ ചെയ്യാൻ കാരണമായത് സദാചാര ഗുണ്ടായിസമെന്നും തെളിവുകളുടെ അടിസ്ഥാനത്തിലാണ് പ്രതികളെ അറസ്റ്റ് ചെയ്തതെന്നും കണ്ണൂർ സിറ്റി പോലീസ് കമ്മീഷണർ പി. നിധിൻരാജ്. മകളുടെ മരണത്തിൽ പോലീസ് അറസ്റ്റിലായവർ നിരപരാധികളാണെന്ന റസീനയുടെ മാതാവ് ഫാത്തിമ പറഞ്ഞതിനു പിന്നാലെയാണ് സിറ്റി പോലീസ് കമ്മീഷണർ ഇക്കാര്യം വ്യക്തമാക്കിയത്. യുവതിയുടെ ആത്മഹത്യാക്കുറിപ്പ് പോലീസിന് ലഭിച്ചിരുന്നു. ഇതിലെ തെളിവുകളുടെ അടിസ്ഥാനത്തിലാണ് എസ്ഡിപിഐ പ്രവർത്തകരെ അറസ്റ്റ് ചെയ്തത്. സുഹൃത്തുമായി സംസാരിച്ചുനിൽക്കുന്നതിനിടെയാണ് ഒരു സംഘം ഇരുവർക്കുമെതിരെ ഭീഷണി മുഴക്കിയത്. ഇരുവരുടെയും കൈകളിൽനിന്ന് മൊബൈൽ ഫോൺ ഈ സംഘം തട്ടിയെടുക്കുകയും ചെയ്തു. ഈ ഫോണുകൾ അറസ്റ്റിലായവരിൽനിന്നും പോലീസ് പിടിച്ചെടുത്തിട്ടുണ്ട്. അറസ്റ്റിലായ ഒരാൾ മരിച്ച റസീനയുടെ ബന്ധുകൂടിയാണ്. സംഭവത്തിൽ കൂടുതൽ പ്രതികൾ ഉണ്ടോ എന്ന കാര്യം അന്വേഷിച്ചുവരികയാണ്. യുവതിയുടെ സുഹൃത്തായ യുവാവ് കേസിൽ പ്രതിയല്ലെന്നും ഇയാളെ കണ്ടെത്താനായിട്ടില്ലെന്നും സിറ്റി കമ്മീഷണർ നിധിൻ രാജ് പറഞ്ഞു.

ഭീതിയകറ്റാൻ തദ്ദേശ സ്ഥാപനങ്ങൾ അടിയന്തരമായി ഇടപെടാൻ നിർദേശം

കണ്ണൂർ: കണ്ണൂർ നഗരത്തിലെ തെരുവുനായ ശല്യം ഒഴിവാക്കുന്നതിനും ജനങ്ങളുടെ ഭീതി അകറ്റുന്നതിനും കണ്ണൂർ കോർപറേഷൻ, ജില്ലാ പഞ്ചായത്ത് എന്നീ തദ്ദേശസ്ഥാപനങ്ങൾ അടിയന്തിര ഇടപെടലുകൾ നടത്തണമെന്ന് മന്ത്രി കടന്നപ്പള്ളി രാമചന്ദ്രൻ നിർദേശിച്ചു. നിരവധി പേർക്ക് കടിയേറ്റ സാഹചര്യം കണ്ണൂർ നഗരത്തിൽ അടിയന്തര സാഹചര്യമാണ് സൃഷ്ടിച്ചിരിക്കുന്നതെന്ന് മന്ത്രിയുടെ അധ്യക്ഷതയിൽ ചേർന്ന യോഗം വിലയിരുത്തി. ജനങ്ങളുടെ ആശങ്ക അകറ്റുകയാണ് പ്രധാനം. അതിനായി തെരുവുനായകൾക്ക് ഷെൽട്ടർ ഹോമുകൾ ഒരുക്കുന്ന കാര്യത്തിൽ ജില്ലാതലത്തിൽ അടിയന്തര നടപടി കൈക്കൊളളണമെന്ന് കെ.വി സുമേഷ് എംഎൽഎ നിർദേശിച്ചു. തെരുവുനായ വിഷയത്തിൽ ഊർജിത ഇടപെടൽ നടത്താൻ എല്ലാ തദ്ദേശ സ്ഥാപനങ്ങളും രംഗത്തിറങ്ങണമെന്ന് ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരിയും ആവശ്യപ്പെട്ടു. നായശല്യം തടയുന്നതുമായി ബന്ധപ്പെട്ട പ്രോജക്ടുകൾ വാർഷിക പദ്ധതിയിൽ തദ്ദേശസ്ഥാപനങ്ങൾ ഉൾപ്പെടുത്തണം. കന്‍റോൺമെന്‍റ് പ്രദേശത്തെ മാലിന്യകൂമ്പാരത്തിന് അടിയന്തിരമായി പരിഹാരം കാണണമെന്നും മാലിന്യം തള്ളുന്നവർക്കെതിരെ കർശന നടപടി സ്വീകരിക്കണമെന്നും കന്‍റോൺമെന്‍റ് സിഇഎയ്ക്ക് ജില്ലാ കളക്ടർ നിർദേശം നൽകി.എതെങ്കിലും തരത്തിൽ ബുദ്ധിമുട്ട് ഉണ്ടായാൽ പ്രതിരോധ പ്രവർത്തനങ്ങൾക്ക് പോലീസിന്‍റെയും ജില്ലാ ഭരണകൂടത്തിന്‍റെയും സഹായം തദ്ദേശ സ്ഥാപനങ്ങൾക്ക് തേടാമെന്ന് സിറ്റി പോലീസ് കമ്മീഷണർ നിതിൻരാജ് യോഗത്തെ അറിയിച്ചു. ഇതിനായി ജില്ലാ പോലീസ് ആസ്ഥാനത്ത് നോഡൽ ഓഫീസറെ നിയോഗിക്കുമെന്നും അദ്ദേഹം പറഞ്ഞു. തെരുവുനായ ശല്യം പരിഹരിക്കാൻ പ്രായോഗികമായി ചെയ്യാനാകുന്ന കാര്യങ്ങൾ കോർപറേഷൻ വളരെ വേഗം നടപ്പാക്കുമെന്ന് സ്റ്റാൻഡിംഗ് ചെയർമാൻ സുരേഷ് ബാബു എളയാവൂർ യോഗത്തെ അറിയിച്ചു. യോഗത്തിൽ കെ.വി. സുമേഷ് എംഎൽ എ, എഡിഎം കല ഭാസ്‌കർ, അസി. കളക്ടർ എഹ്തെദ മുഫസിർ, ഡെപ്യൂട്ടി കളക്ടർ കെ.വി. ശ്രുതി, കണ്ണൂർ കന്‍റോൺമെന്‍റ് സിഇഒ മാധവി ഭാർഗവി, കണ്ണൂർ കോർപ്റേഷൻ സെക്രട്ടറി വിനു സി. കുഞ്ഞപ്പൻ, കണ്ണൂർ റെയിൽവേ സ്റ്റേഷൻ മാനേജർ സജിത്ത് കുമാർ, എൽഎസ്ജിഡി അസി. ഡയറക്ടർ ടി.വി സുഭാഷ്, ആർസിഎച്ച് ഓഫീസർ ഡോ. അശ്വിൻ, മൃഗസംരക്ഷണ വകുപ്പ് ജില്ലാ ഓഫീസർ ഡോ.എസ് സന്തോഷ്, ശുചിത്വ മിഷൻ പ്രോഗ്രാം ഓഫീസർ എൽന ജോസഫ് എന്നിവർ യോഗത്തിൽ പങ്കെടുത്തു.

കണ്ണൂർ നഗരത്തിൽ മൂന്ന് ഷെൽട്ടർ ഹോമുകൾ ഒരുക്കും

കണ്ണൂർ: നഗരത്തിലെ തെരുവുനായ ശല്യം പരിഹരിക്കുന്നതിനായി കണ്ണൂരിൽ രണ്ടു ദിവസത്തിനകം മൂന്ന് ഷെൽട്ടർ ഹോമുകൾ സജ്ജമാക്കുമെന്ന് മന്ത്രി കടന്നപ്പള്ളി രാമചന്ദ്രൻ അറിയിച്ചു.കോർപറേഷനിൽ രണ്ടും കന്‍റോൺമെന്‍റ് പരിധിയിൽ ഒരു ഷെൽട്ടർ ഹോമും ഒരുക്കാനാണ് തീരുമാനം. നഗരത്തിൽ തെരുവുനായകൾ നിരവധി പേരെ കടിച്ചു പരിക്കേൽപ്പിച്ചതിന്‍റെ പശ്ചാത്തലത്തിൽ മന്ത്രിയുടെ അധ്യക്ഷതയിൽ കളക്ടറേറ്റ് കോൺഫറൻസ് ഹാളിൽ ചേർന്ന യോഗത്തിന് ശേഷം സംസാരിക്കുകായായിരുന്നു അദ്ദേഹം. രണ്ടു ദിവസത്തിനുള്ളിൽ മൂന്ന് ഷെൽട്ടർ ഹോമുകളും സ്ഥാപിച്ച് നഗരത്തിൽ അലഞ്ഞു തിരിയുന്ന നായ്ക്കളെ പിടികൂടി ഇവിടങ്ങളിലേക്ക് മാറ്റാനാണ് തീരുമാനം. പഞ്ചായത്ത്, കോർപറേഷൻ, കന്‍റോൺമെന്‍റ് എന്നിവയുമായും പോലീസ്, മൃഗസംരക്ഷണം, ആരോഗ്യം ഉൾപ്പെടെയുള്ള ബന്ധപ്പെട്ട വകുപ്പുകളുമായും നടത്തിയ ചർച്ചയുടെ അടിസ്ഥാനത്തിലാണ് നടപടികൾ. പടിയൂർ എബിസി കേന്ദ്രത്തിനു കീഴിലുള്ള പട്ടിപിടിത്തക്കാരുടെ സേവനം ഇതിനായി ഉപയോഗപ്പെടുത്തും. തെരുവുനായ്ക്കളെ പിടികൂടുക, ഷെൽട്ടർ ഹോമിലേക്ക് മാറ്റുക, തെരുവുനായ്ക്കളുടെ വന്ധ്യംകരണം, പ്രതിരോധ കുത്തിവയ്പ് ഉൾപ്പെടെയുള്ള പ്രവർത്തനങ്ങൾ ഏകോപിപ്പിക്കുക എന്നിവയ്ക്ക് മൃഗസംരക്ഷണ വകുപ്പിനെ ചുമതലപ്പെടുത്തി. കണ്ണൂർ നഗരസഭയിൽ അടിയന്തരമായി മൃഗഡോക്ടറുടെ സേവനം ലഭ്യമാക്കണമെന്ന് നിർദേശിച്ചിട്ടുണ്ടെന്ന് മന്ത്രി അറിയിച്ചു. മൃഗസംരക്ഷണ വകുപ്പിന് കീഴിലുള്ള പടിയൂർ എബിസി കേന്ദ്രത്തിലെ ഡോക്ടർമാരുടെ സേവനവും ലഭ്യമാക്കും. കന്‍റോൺമെന്‍റ് പരിധിയിൽ വരുന്ന ഭാഗങ്ങളിൽ അലഞ്ഞുതിരിയുന്ന ആക്രമണകാരികളായ തെരുവ് നായ്ക്കളെ പിടികൂടി അവിടെ സ്ഥാപിക്കുന്ന ഷെൽട്ടർ ഹോമിൽ പാർപ്പിക്കുന്നതിന് കന്‍റോൺമെന്‍റ് സിഇഒ ക്ക് നിർദേശം നൽകി. ദുരന്തനിവാരണ നിയമപ്രകാരം ജില്ലാ കളക്ടർക്കാണ് പ്രവർത്തനങ്ങളുടെ ഏകോപനച്ചുമതലയെന്നും മന്ത്രി പറഞ്ഞു. കഴിഞ്ഞ ദിവസം നിരവധിപേരെ കടിച്ച തെരുവുനായ മറ്റ് നായളെയും ആക്രമിച്ചിരുന്നു. രണ്ട് ആഴ്ചക്കുള്ളിൽ ഇവയും രോഗലക്ഷണങ്ങൾ പ്രകടമാക്കാൻ സാധ്യതയുണ്ടെന്ന് മൃഗസംരക്ഷണ വകുപ്പ് റിപ്പോർട്ട് നൽകിയിരുന്നു. ഇതിന്‍റെ അടിസ്ഥാനത്തിൽ തെരുവ് നായകളെ പിടികൂടി ഷെൽട്ടർ ഹോമുകളിലാക്കുന്നതിനൊപ്പം പേ വിഷ പ്രതിരോധ കുത്തിവയ്പ് നൽകാനും തീരുമാനിച്ചിട്ടുണ്ട്. പയ്യാമ്പലത്ത് തെരുവുനായയുടെ കടിയേറ്റ് പ്രതിരോധ കുത്തിവയ്പ് എടുത്ത കുട്ടി പേവിഷബാധയേറ്റ് ഗുരുതരാവസ്ഥയിലായതിനാൽ അടിയന്തര സാഹചര്യം നിലനിൽക്കുന്നുവെന്ന് ആരോഗ്യവകുപ്പും റിപ്പോർട്ട് നൽകിയിട്ടുണ്ട്. നിലവിലെ സാഹചര്യത്തിൽ നായ്ക്കൾക്ക് തെരുവിലും വഴിയോരത്തും മറ്റും ഭക്ഷണം കൊടുക്കുന്ന മൃഗസ്നേഹികൾക്ക് ഷെൽട്ടർ ഹോമുകളിൽ എത്തി അവയ്ക്ക് ഭക്ഷണം നൽകാവുന്നതാണെന്നും മന്ത്രി പറഞ്ഞു.പത്രസമ്മേളനത്തിൽ കെ.വി. സുമേഷ് എംഎൽഎ, ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരി, ജില്ലാ കളക്ടർ അരുൺ കെ. വിജയൻ, സിറ്റി പോലീസ് കമ്മീഷണർ സി. നിതിൻ രാജ് പങ്കെടുത്തു.

ഭരണഘടന വിഭാവനം ചെയ്യുന്ന കാര്യങ്ങള്‍ സാധാരണക്കാർ‌ക്ക് അനുഭവഭേദ്യമായിട്ടില്ല: ജസ്റ്റീസ് ജെ. ചെലമേശ്വര്‍

കണ്ണൂർ: ഇന്ത്യൻ ഭരണഘടന 75 വർഷം പിന്നിട്ടിട്ടും ഭരണഘടന വിഭാവനം ചെയ്യുന്ന കാര്യങ്ങള്‍ സാധാരണക്കാരയ ജനങ്ങള്‍ക്ക് ഇപ്പോഴും അനുഭവഭേദ്യമായിട്ടില്ലെന്ന് റിട്ട. ജസ്റ്റിസ് ജെ.ചെലമേശ്വര്‍. സിപിഐ ജില്ലാ സമ്മേളനത്തിന്‍റെ ഭാഗമായി സി.എച്ച്. രാഘവൻ - എം.നാരായണൻ നഗറിൽ നടന്ന ഇന്ത്യൻ ഭരണഘടന 75 വർഷങ്ങൾ എന്ന വിഷയത്തിൽ നടന്ന സെമിനാർ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. രാജ്യത്തെ സാധാരണക്കാരന്‍റെ ജീവിതം മെച്ചപ്പെടുത്താൻ ഇത്രയും വർഷങ്ങൾ പിന്നിട്ടിട്ടും നമ്മുടെ ഭരണഘടന സഹായകമായിട്ടുണ്ടോയെന്നത് സംശയമാണ്. നമ്മള്‍ ഇപ്പോഴും വര്‍ഷങ്ങള്‍ക്ക് പിറകിലെവിടെയോ തങ്ങിനില്‍ക്കുകയാണ്. ഇനിയും ഒരുപാട് മുന്നേറേണ്ടിയിരിക്കുന്നു. ശാസ്ത്ര സാങ്കേതിക രംഗത്തെല്ലാം നമ്മള്‍ വളരെയേറെ നേട്ടം കൈവരിച്ചെങ്കിലും നമ്മുടെ പോലീസ്, ജുഡീഷ്യറി മേഖലകളിലെല്ലാം സമഗ്രമായ നവീകരണം ഇനിയും ആവശ്യമുണ്ട്. പഴയ ബ്രിട്ടീഷ് ഭരണ കാലത്തിന്‍റെ ധാരാളം അംശങ്ങള്‍ ഇപ്പോഴും നമ്മുടെ സംവിധാനങ്ങളില്‍ തങ്ങി കിടക്കുന്നുണ്ട്. ഇക്കാലത്തും ഗവര്‍ണമാര്‍ ബില്ലുകള്‍ തടഞ്ഞുവയ്ക്കുന്നത് ബ്രിട്ടീഷ് കാലത്തെ അനുസ്മരിപ്പിക്കുന്നു. ആ കാലത്ത് വൈസ്രോയി ജനറല്‍മാര്‍ പല ബില്ലുകളും തടഞ്ഞുവച്ച സംഭവങ്ങളുണ്ട്. ഇന്നും അത് ആവര്‍ത്തിക്കപ്പെടുന്നു. രാജ്യത്തെ തെരഞ്ഞെടുപ്പ് രീതികളും വളരെ അപകടകരമായ ദിശയിലേക്കാണ് പോയിക്കൊണ്ടിരിക്കുന്നത്. ഓരോ രാഷ്‌ട്രീയകക്ഷികളും ഒരു സീറ്റിന് വേണ്ടി ചെലവഴിക്കുന്ന തുക നൂറ് കോടിക്കും മുകളിലാണെന്നത് ഏറ്റവും അപകടകരമായ സൂചനയാണ്. മറുവശത്ത് പട്ടിണി മാറ്റാൻ തുച്ഛമായ ദിവസ കൂലിക്ക് വേണ്ടി പത്ര വില്പന നടത്തുന്നവർ ജീവിക്കുന്നതും ഇതേ രാജ്യത്ത് തന്നെയാണെന്നും ജസ്റ്റീസ് ചെലമേശ്വര്‍ പറഞ്ഞു. ഡോ. വി. ശിവദാസന്‍ എംപി, പി. സന്തോഷ് കുമാര്‍ എംപി, സി.പി. സന്തോഷ്കുമാര്‍, സി.എന്‍. ചന്ദ്രന്‍, സി.പി. ഷൈജന്‍ എന്നിവര്‍ പ്രസംഗിച്ചു.

വയോധികയുടെ മാല പൊട്ടിച്ച വിരുതന്‍ അറസ്റ്റില്‍

പയ്യന്നൂര്‍: പട്ടാപ്പകല്‍ വയോധികയുടെ മാല പൊട്ടിച്ച് കടന്നുകളഞ്ഞ വിരുതനെ പയ്യന്നൂര്‍ പോലീസ് അറസ്റ്റ് ചെയ്തു. കാസര്‍ഗോഡ് ചെന്നടുക്കത്തെ വാടക ക്വാര്‍ട്ടേഴ്‌സിലെ താമസക്കാരനായ ചാലക്കര ഹൗസില്‍ ഇബ്രാഹിം ഖലീലിനെയാണ് (43) പോലീസ് പിടികൂടിയത്. ഈ മാസം ആറിന് രാവിലെ പതിനൊന്നരയോടെയാണ് കോളോത്തെ പരേതനായ പുരുഷോത്തമന്‍റെ ഭാര്യ മായി ഹൗസില്‍ കാര്‍ത്യായനിയുടെ (70) ഒരു പവനിലധികം തൂക്കമുള്ള മാല പൊട്ടിച്ചെടുത്ത് സ്‌കൂട്ടറില്‍ കടന്നത്. വീടിന് മുമ്പിലെ റോഡരികില്‍ നില്‍ക്കുകയായിരുന്ന കാര്‍ത്യായനി. എണ്‍പതിനായിരം രൂപയുടെ നഷ്ടമുണ്ടായെന്നുള്ള വയോധികയുടെ പരാതിയിൽ പയ്യന്നൂര്‍ പോലീസ് കേസെടുത്തിരുന്നു. നിരവധി നിരീക്ഷണ കാമറ ദൃശ്യങ്ങളും മൊബൈല്‍ ടവര്‍ കേന്ദ്രീകരിച്ചുള്ള ഫോണ്‍കോളുകളും പരിശോധിച്ചതിലൂടെയാണ് പോലീസിന്‍റെ അന്വേഷണം പന്ത്രണ്ടാം ദിവസം പ്രതിയിലേക്കെത്തിയത്. പയ്യന്നൂര്‍ എസ്‌ഐ പി. യദുകൃഷ്ണന്‍റെ നേതൃത്വത്തിലുള്ള പോലീസ് സംഘം താമസ സ്ഥലത്തെത്തിയാണ് ഇയാളെ പിടികൂടിയത്. അന്വേഷണസംഘത്തില്‍ പയ്യന്നൂര്‍ പോലീസ് സ്റ്റേഷനിലെ സീനിയര്‍ സിപിഒമാരായ പ്രമോദ് കടമ്പേരി, എ.ജി. അബ്ദുള്‍ ജബ്ബാര്‍, അബി സിനാന്‍, സ്‌ക്വാഡംഗങ്ങളായ എസ്‌ഐ അബ്ദുള്‍ റൗഫ്, എഎസ്‌ഐ നൗഫല്‍ അഞ്ചില്ലത്ത്, സ്‌പെഷല്‍ ബ്രാഞ്ച് എഎസ്‌ഐ കെ.വി. മനോജന്‍ എന്നിവരും ഉണ്ടായിരുന്നു. പ്രതിയെ കോടതിയില്‍ ഹാജരാക്കും. വിദ്യാനഗര്‍, മേല്‍പ്പറമ്പ, ഹൊസ്ദുര്‍ഗ് സ്റ്റേഷനുകളിലായി നടന്ന പത്തോളം മാലപൊട്ടിക്കല്‍ കേസുകളിലെ പ്രതിയാണ് ഇബ്രാഹിം ഖലീലെന്ന് പോലീസ് പറഞ്ഞു. മാല പൊട്ടിക്കാനിറങ്ങുന്നത് മോഷ്ടിച്ച സ്‌കൂട്ടറുകളില്‍ ഇബ്രാഹിം ഖലീല്‍ മാല പൊട്ടിക്കാനിറങ്ങുന്നത് മോഷ്ടിക്കുന്ന സ്‌കൂട്ടറുകളിലാണെന്നാണ് പോലീസ്. വിദ്യാനഗര്‍, മേല്‍പ്പറമ്പ്, ഹൊസ്ദുര്‍ഗ് സ്റ്റേഷനുകളിലായി നടന്ന പത്തോളം മാലപൊട്ടിക്കല്‍ സംഭവങ്ങളിലും ഇയാള്‍ സ്വീകരിച്ചത് ഈ അടവാണ്. ആരെങ്കിലും നമ്പര്‍ നോക്കി സ്‌കൂട്ടര്‍ ഉടമയെ കണ്ടെത്തിയാല്‍പോലും ഇയാള്‍ക്ക് രക്ഷപ്പെടാന്‍ കഴിയുമെന്നതിനാലാണ് സ്‌കൂട്ടര്‍ മോഷണം ഇയാള്‍ പതിവാക്കാന്‍ കാരണം. ഈ രീതിയില്‍ മോഷ്ടിച്ച സ്‌കൂട്ടര്‍ ഉപയോഗിച്ച് ഈ മാസം അഞ്ചിന് തലശേരിയില്‍ ഒരു മാലപൊട്ടിക്കല്‍ ശ്രമം നടത്തി പരാജയപ്പെട്ടിരുന്നതായി പോലീസ് കണ്ടെത്തി. യുവതി മാല മുറുകെ പിടിച്ച് ഒച്ചവച്ചതിനാല്‍ ഇയാള്‍ സ്‌കൂട്ടറില്‍ രക്ഷപ്പെടുകയായിരുന്നു. ഇതിന്‍റെ തൊട്ടടുത്ത ദിവസമാണ് പയ്യന്നൂര്‍ കേളോത്ത് വയോധികയുടെ മാല പൊട്ടിച്ചെടുത്തത്.

കാട്ടുപന്നി ആക്രമണത്തിൽ ബൈക്ക് യാത്രികർക്ക് പരിക്ക്

തലശേരി: കുട്ടിമാക്കൂൽ പെരിങ്കളത്ത് കാട്ടുപന്നിയുടെ അക്രമത്തിൽ ബൈക്ക് യാത്രികരായ യുവാക്കൾക്ക് പരിക്കേറ്റു. കൈക്കും കാലിനും പരിക്കേറ്റ മൂഴിക്കര സ്വദേശികളായ കെ. പ്രണവ്, സഹോദരൻ അനുവിൻ എന്നിവർ തലശേരി ഇന്ദിരാഗാന്ധിസഹകരണ ആശുപത്രിയിൽ ചികിത്സ തേടി. കഴിഞ്ഞദിവസം രാത്രി കണ്ണിച്ചിറ പെരിങ്കളം റോഡിലായിരുന്നു അപകടം. തലശേരി ജഗന്നാഥ ക്ഷേത്രത്തിലെ ഇളനിർവയ്പ് ചടങ്ങിൽ പങ്കെടുത്തശേഷം മൂഴിക്കരയിലെ വീട്ടിലേക്ക് മടങ്ങുകയായിരുന്നു ഇരുവരും. കണ്ണിച്ചിറ പെരിങ്കളം റോഡിലെത്തിയപ്പോൾ സമീപത്തെ കുറ്റിക്കാട്ടിൽ നിന്ന് എത്തിയ കാട്ടുപന്നി ബൈക്കിൽ ഇടിച്ച് റോഡിന് മറുവശത്തേക്ക് കടക്കുകയായിരുന്നു. ഇടിയുടെ ആഘാതത്തിൽ റോഡിലേക്കാണ് തെറിച്ചു വീണാണ് ഇരുവർക്കും പരിക്കേറ്റത്. പിന്നാലെ എത്തിയ കാർ യാത്രികരാണ് ഇരുവരെയും ആശുപത്രിയിൽ എത്തിച്ചത്. ഏതാനും ദിവസങ്ങൾക്കു മുന്പ് ഇതേ സ്ഥലത്ത് ബൈക്ക് യാത്രികൻ തലനാരിഴയ്ക്കാണ് കാട്ടുപന്നിയുടെ ആക്രമത്തിൽ നിന്നും രക്ഷപ്പെട്ടത്.

ആൾക്കൂട്ട വിചാരണയിൽ യുവതി ജീവനൊടുക്കിയ സംഭവം: കൂടുതൽ പേർ പ്രതികളായേക്കും

പിണറായി: കായലോട് പറമ്പായിയില്‍ ആൾക്കൂട്ട വിചാരണയിൽ യുവതി ജീവനൊടുക്കിയെന്ന കേസിൽ കൂടുതൽ പേർ പ്രതികളാകുമെന്ന് പോലീസ്. കായലോട്- പറമ്പായിയിലെ റസീന മന്‍സിലില്‍ റസീന (40)യെ ആണ് ചൊവ്വാഴ്ച വീടിനുള്ളില്‍ തൂങ്ങിമരിച്ചനിലയില്‍ കണ്ടെത്തിയത്. സംഭവത്തില്‍ ആത്മഹത്യാ പ്രേരണ കുറ്റം ചുമത്തി മൂന്ന് എസ്ഡിപിഐ പ്രവര്‍ത്തകരെ പിണറായി പോലീസ് അറസ്റ്റു ചെയ്തിരുന്നു. യുവതിയുടെ ആത്മഹത്യക്കുറിപ്പില്‍ നിന്ന് ലഭിച്ച സൂചനയുടെ അടിസ്ഥാന ത്തിൽ പറമ്പായി സ്വദേശികളായ എം.സി. മന്‍സിലില്‍ വി.സി. മുബഷീര്‍ (28), കണിയാന്‍റെ വളപ്പില്‍ കെ.എ. ഫൈസല്‍(34), കൂടത്താന്‍ കണ്ടി ഹൗസില്‍ വി.കെ. റഫ്‌നാസ് (24) എന്നിവരെയാണ് അറസ്റ്റു ചെയ്തത്. സംഭവത്തിൽ കൂടുതൽ പ്രതികൾ ഉൾപ്പെട്ടിട്ടുണ്ടെന്നാണ് പോലീസ് നിഗമനം. പ്രതികളെ തലശേരി കോടതി റിമാൻഡ് ചെയ്തു. ഞായറാഴ്ച ഉച്ചകഴിഞ്ഞു മൂന്നോടെ കായലോട് അച്ചങ്കര പള്ളിക്കു സമീപം കാറിനരികില്‍ യുവതി ആണ്‍സുഹൃത്തിനോട് സംസാരിച്ചു നില്‍ക്കുന്നത് ഒരു സംഘം ചോദ്യം ചെയ്യുകയായിരുന്നു. അതിനുശേഷം യുവതിയെ വീട്ടിലേക്ക് തിരിച്ചയച്ച പ്രതികള്‍ മയ്യില്‍ സ്വദേശിയായ ആണ്‍സുഹൃത്തിനെ കൈയേറ്റം ചെയ്ത് സമീപത്തുള്ള മൈതാനത്തെത്തിച്ചു. അഞ്ച് മണിക്കൂറോളം യുവാവിനെ കൂറ്റവിചാരണ നടത്തിയ സംഘം മൊബൈല്‍ ഫോണും ടാബും പിടിച്ചെടുത്ത് 8.30ഓടെ പറമ്പായിയിലെ എസ്ഡിപിഐ ഓഫീസിലെത്തിച്ചു. ഇരുവരുടെയും ബന്ധുക്കളെ ഓഫീസിലേക്ക് വിളിച്ചുവരുത്തി. രാത്രി വൈകിയാണ് യുവാവിനെ ബന്ധുക്കള്‍ക്കൊപ്പം വിട്ടയച്ചതെന്ന് പോലീസ് പറഞ്ഞു. ഇതുമായി ബന്ധപ്പെട്ട് സാമൂഹ്യ മാധ്യമങ്ങളിൽ ഉൾപ്പെടെ റസീനയെയും കുടുംബത്തെയും അപമാനിക്കുന്ന രൂപത്തിൽ പ്രചാരണമുണ്ടായതിൽ മനംനൊന്താണ് റസീന ആത്മഹത്യ ചെയ്തതെന്നാണ് ആരോപണം. യുവാവിന്‍റെ കൈയില്‍ നിന്ന് പിടിച്ചെടുത്ത ടാബും മൊബൈല്‍ ഫോണും വിട്ടുനല്‍കാന്‍ സംഘം തയാറായില്ല. അറസ്റ്റിലായ പ്രതികളില്‍ നിന്ന് പിന്നീട് ഇവ രണ്ടും പോലീസ് കണ്ടെത്തുകയായിരുന്നു. കൂടുതല്‍ പ്രതികളുണ്ടെന്നും അന്വേഷണം നടക്കുകയാണെന്നും പോലീസ് ഇന്‍സ്‌പെക്ടര്‍ എന്‍. അജീഷ് കുമാര്‍ പറഞ്ഞു. സബ് ഇന്‍സ്‌പെക്ടര്‍ ബി.എസ്. ബാവിഷിനാണ് അന്വേഷണച്ചുമതല.

തെരുവുനായ്ക്കളുടെ എണ്ണം കുറയ്ക്കണം,നിയമങ്ങളിൽ മാറ്റം അനിവാര്യം: ഇന്ത്യൻ വെറ്ററിനറി അസോസിയേഷൻ

കണ്ണൂർ: സംസ്ഥാനത്ത് വർഷങ്ങളായി അനിമൽ ബർത്ത് കൺട്രോൾ പദ്ധതി തുടർച്ചയായി നടന്നിട്ടും തെരുവ് നായ്ക്കളുടെ എണ്ണവും തെരുവുനായ്ക്കളുടെ ആക്രമണവും റാബീസ് കേസുകളും വർധിച്ചു വരുന്നതിനാൽ എബിസി മാത്രമല്ല ഏക പോംവഴിയെന്നും നിയമങ്ങളിൽ മാറ്റങ്ങൾ വേണമെന്നും അല്ലാത്തപക്ഷം പേവിഷബാധ കേസുകൾ വർധിക്കുമെന്നും വെറ്ററിനറി ഡോക്ടർമാരുടെ സംഘടനയായ ഇന്ത്യൻ വെറ്ററിനറി അസോസിയേഷൻ. തെരുവുനായ പ്രശ്നത്തിനുള്ള അടിയന്തര പരിഹാരമാർഗമായി നായ്ക്കളുടെ വന്ധ്യംകരണത്തെ കാണാൻ സാധിക്കില്ല. ദീർഘകാല അടിസ്ഥാനത്തിൽ ഒരു പരിധിവരെ നായ്ക്കളുടെ എണ്ണം വർധിക്കുന്നത് തടയുന്നതിനും സംതുലിതാവസ്ഥ നിലനിർത്തുന്നതിനും മാത്രമാണ് എബിസി ഉപകാരപ്പെടുക. തെരുവ് നായ്ക്കളെ റാബീസ് സംശയിക്കുന്ന നായ കടിച്ചാൽ ആ കൂട്ടത്തെ മുഴുവനായി ഷെൽട്ടർ ചെയ്ത് ഗൈഡ്‌ലൈൻ പ്രകാരമുള്ള 0,3,7,14,28 ദിവസങ്ങളിലെ കുത്തിവയ്പുകൾ നൽകി 120 ദിവസത്തെ നിരീക്ഷണത്തിന് ശേഷം തുറന്ന് വിടാനുള്ള നടപടികൾ സ്വീകരിക്കണം. അല്ലെങ്കിൽ പേ നായ്ക്കളുടെ എണ്ണത്തിൽ ഇനിയും വർധനവ് ഉണ്ടാകും. ഇത് സാധ്യമാകുന്നില്ലെങ്കിൽ അക്രമകാരിക ളെയും റാബീസ് സംശയിക്കുന്നവയെയും ദയാവധത്തിന് വിധേയമാക്കാൻ നിയമങ്ങളിൽ മാറ്റം വരുത്തണമെന്നും അസോസിയേഷൻ ചൂണ്ടിക്കാട്ടി.

39.6 ഗ്രാം എംഡിഎംഎയുമായി കോഴിക്കോട് സ്വദേശി പിടിയിൽ

തളിപ്പറമ്പ്: തളിപ്പറമ്പില്‍ ലക്ഷങ്ങൾ വിലമതിക്കുന്ന 39.6 ഗ്രാം എംഡിഎംഎയുമായി കോഴിക്കോട് സ്വദേശി അറസ്റ്റിൽ. വാണിമേല്‍ കൊടിയൂറ സ്വദേശി പി.ഹഫീസിനെയാണ് (31) ബുധനാഴ്ച രാത്രി തളിപ്പറമ്പ് നഗരസഭാ ബസ്‌സ്റ്റാൻഡിൽ പോലീസ് എയ്ഡ് പോസ്റ്റിന് സമീപം വച്ച് റൂറല്‍ ജില്ലാ പോലീസ് മേധാവിയുടെ മേല്‍നോട്ടത്തില്‍ പ്രവര്‍ത്തിക്കുന്ന ഡാന്‍സാഫ് ടീം പിടികൂടിയത്. ബംഗളൂരുവില്‍ നിന്ന് എംഡിഎംഎ വാങ്ങി തളിപ്പറമ്പിലെ സബ് ഏജന്‍റുമാര്‍ക്ക് വിൽക്കാൻ എത്തിയതാണ് ഇയാളെന്ന് ചോദ്യം ചെയ്യലില്‍ വ്യക്തമായതായി പോലീസ് പറഞ്ഞു. മാസങ്ങളായി ഡാന്‍സാഫ്ടീം ഹഫീസിനെ നിരീക്ഷിച്ചുവരികയായിരുന്നു.ഡാന്‍സാഫ് ടീമംഗങ്ങളും സീനിയര്‍ സിപിഒമാരുമായ അനൂപ്, ഷൗക്കത്ത്, സജിത്ത് എന്നിവര്‍ ചേര്‍ന്നാണ് പ്രതിയെ പിടികൂടിയത്. തളിപ്പറമ്പ് എസ്ഐ ദിനേശന്‍ കൊതേരി, പ്രൊബേഷനറി എസ്ഐ വി.രേഖ, ഡ്രൈവര്‍ സിപിഒ നവാസ് എന്നിവരുടെ നേതൃത്വത്തിലാണ് പ്രതിയെ അറസറ്റ് ചെയ്തത്.

വീട്ടിലെ അലമാരയിൽ മൂർഖൻ !

കണ്ണൂർ: ചക്കരക്കൽ പോലീസ് സ്റ്റേഷൻ പരിധിയിലെ ചെന്പിലോട്ടെ ഒരു വീട്ടിനുള്ളിലെ അലമാരയിൽനിന്ന് മൂർഖൻ പാന്പിനെ പിടികൂടി. വങ്കണയിലെ നാസറിന്‍റെ വീട്ടിലെ അലമാരയിൽനിന്നാണ് വലിയ മൂർഖൻ പാന്പിനെ പിടികൂടിയത്. അലമാരയിൽ തുണി അടുക്കിവയ്ക്കുന്നതിനിടെ അനക്കം കണ്ട് സംശയം തോന്നിയ വീട്ടുകാർ സ്നേക്ക് റസ്ക്യു ടീമിലെ സന്ദീപ് കണയന്നൂരിനെ വിളിച്ചുവരുത്തുകയും അലമാരയിൽനിന്ന് മൂർഖൻ പാന്പിനെ പിടികൂടുകയുമായിരുന്നു. കഴിഞ്ഞദിവസം വൈകുന്നേരം 6.30 ഓടെയായിരുന്നു സംഭവം.

സണ്ണി ജോസഫ് എംഎൽഎ അക്കരകൊട്ടിയൂരിൽ സന്ദർശനം നടത്തി

കൊട്ടിയൂർ: കെപിസിസി പ്രസിഡന്‍റ് സണ്ണി ജോസഫ് എംഎൽഎ അക്കരകൊട്ടിയൂരിൽ സന്ദർശനം നടത്തി. അക്കര കൊട്ടിയൂർ ദേവസ്വം ഓഫീസിൽ എത്തിയ എംഎൽഎ ചെയർമാൻ തിട്ടയിൽ നാരായണൻ നായർ, പാരമ്പര്യേതര ട്രസ്റ്റി എൻ. പ്രശാന്ത്, എക്സിക്യൂട്ടീവ് ഓഫീസർ കെ. ഗോകുൽ എന്നിവരുമായി ചർച്ച നടത്തി. ശനി ഞായർ ദിവസങ്ങളിൽ അഭൂതപൂർവമായ തിരക്കാണ് അനുഭവപ്പെട്ടത്. റോഡ്, പാർക്കിംഗ് എന്നിവയിൽ പരിമിതിയുണ്ട്. സമാന്തര റോഡിന്‍റെ പ്രവൃത്തി പൂർത്തിയാക്കാൻ കഴിഞ്ഞിട്ടില്ല. ഇത് അനുഭവ പാഠമാക്കി എടുത്ത് നേരത്തെ തന്നെ റോഡുകളുടെ നവീകരണം നടത്തണമെന്ന് സണ്ണി ജോസഫ് എംഎൽഎ ആവശ്യപ്പെട്ടു. അടിസ്ഥാന വിഷയങ്ങൾ പരിഹരിക്കുന്നതിനായി സർക്കാരിനോട് ആവശ്യപ്പെടുമെന്നും എംഎൽഎ പറഞ്ഞു. എംഎൽഎയോടൊപ്പം കൊട്ടിയൂർ പഞ്ചായത്ത് മെംബർ ജോണി ആമക്കാട്ട്, ഹരിദാസ് ചോടത്ത്, പി.സി. രാമകൃഷ്ണൻ, ജിജോ ആന്‍റണി, ജിബിൻ എന്നിവരും ഉണ്ടായിരുന്നു.

തെരുവുനായ്ക്കളെ പാർപ്പിക്കാൻ കോര്‍പറേഷന്‍ പരിധിയില്‍ ഷെല്‍ട്ടര്‍ ഹോം നിര്‍മിക്കും

കണ്ണൂര്‍: കോർപറേഷൻ പരിധിയിൽ അക്രമകാരികളായ തെരുവുനായ്ക്കളെ പാര്‍പ്പിക്കാന്‍ ഷെല്‍ട്ടര്‍ ഹോം നിര്‍മിക്കാന്‍ ഇന്നലെ ചേർന്ന സ്പെഷൽ കൗൺസിൽ യോഗത്തിൽ തീരുമാനം. ഒരാഴ്ചയ്ക്കുള്ളില്‍ ഷെല്‍ട്ടര്‍ നിര്‍മിക്കാനാവശ്യമായ സ്ഥലം കോര്‍പറേഷന്‍ പരിധിയില്‍ കണ്ടെത്തുമെന്ന് മേയര്‍ മുസ്‌ലിഹ് മഠത്തില്‍ പറഞ്ഞു. നായകള്‍ക്കായി ഷെല്‍ട്ടര്‍ ഹോം ഒരുക്കുക എന്നത് കൗണ്‍സിലര്‍മാരും നാട്ടുകാരും നിരന്തരം ഉന്നയിക്കുന്ന കാര്യമാണ്. ഇതിനായുള്ള സ്ഥലം കണ്ടെത്താന്‍ സാധിക്കാത്തതിനാലാണ് പദ്ധതി നടപ്പിലാക്കാന്‍ വൈകിയത്. എന്നാല്‍, നിലവില്‍ വര്‍ധിച്ച് വരുന്ന തെരുവുനായ ശല്യം നിയന്ത്രിക്കാന്‍ ഷെല്‍ട്ടര്‍ ഹോം അനിവാര്യമായിരിക്കുകയാണ്. ഇതുമായി ബന്ധപ്പെട്ട ചര്‍ച്ച നടത്താന്‍ ഇന്ന് രാവിലെ 11ന് കോര്‍പറേഷന്‍ ഹാളില്‍ സര്‍വകക്ഷിയോഗം വിളിച്ച് ചേര്‍ത്തിട്ടുണ്ട്. എല്ലാവരോടും ചര്‍ച്ച് ചെയ്ത് ശേഷമാണ് ഷെല്‍ട്ടര്‍ നിര്‍മിക്കാനുള്ള സ്ഥലം കണ്ടെത്തുക. കൂടാതെ തെരുവുനായ വന്ധ്യംകരണവുമായി ബന്ധപ്പെട്ട് കോര്‍പറേഷന്‍ സ്വന്തം നിലയില്‍ എബിസി സംവിധാനം പ്രാവര്‍ത്തികമാക്കുന്നതും ആലോചിച്ച് നടപ്പിലാക്കുമെന്ന് മേയര്‍ പറഞ്ഞു. നിലവില്‍ ജില്ലയില്‍ പടിയൂരില്‍ പ്രവര്‍ത്തിക്കുന്ന ഒരു എബിസി സെന്‍റര്‍ മാത്രമാണുള്ളത്. ജില്ലയിലെ എല്ലാ തദ്ദേശസ്വയംഭരണ സ്ഥാപനങ്ങളില്‍ നിന്നും നായകളെ വന്ധ്യംകരണം നടത്താന്‍ ഇവിടെയാണ് എത്തിക്കുന്നത്. ഇതിനൊരു പരിഹാരം എന്ന നിലയിലാണ് കോര്‍പറേഷന്‍റെ നേതൃത്വത്തില്‍ എബിസി സംവിധാനം നടപ്പാക്കുന്ന കാര്യം ആലോചിക്കുന്നത്. അതുപോലെ നായകള്‍ക്ക് വന്ധ്യംകരണം നടത്താനുള്ള മൊബൈല്‍ പോര്‍ട്ടബിള്‍ യൂണിറ്റ് സംസ്ഥാനത്ത് എല്ലായിടത്തുമുണ്ടെന്നും അത് കോര്‍പറേഷന് അനുവദിക്കണമെന്ന് സര്‍ക്കാരിനോട് ആവശ്യപ്പെടുമെന്നും കോര്‍പറേഷന്‍ സെക്രട്ടറി പറഞ്ഞു. നിലവില്‍ എല്ലാ എച്ച്ഐമാര്‍ക്കും നായയെ വന്ധ്യംകരണം ചെയ്യുന്നതുമായി ബന്ധപ്പെട്ട നടപടികള്‍ സത്വരം ചെയ്യണമെന്ന് നിര്‍ദേശം നല്‍കിയിട്ടുണ്ട്. നായ്ക്കളെ പിടികൂടാന്‍ കൂടുതല്‍ നായ പിടുത്തക്കാരെയും നായ്ക്കളെ പിടികൂടി മാറ്റാന്‍ നൂറോളം കൂടുകളും വേണമെന്ന കാര്യവും സെക്രട്ടറി പറഞ്ഞു. കഴിഞ്ഞ ദിവസങ്ങളിലായി തെരുവുനായ ആക്രമണത്തില്‍ കടിയേറ്റവര്‍ക്ക് നഷ്ടപരിഹാരം നല്‍കുന്നതുമായി ബന്ധപ്പെട്ട നിയമപരമായ കാര്യങ്ങള്‍ പരിശോധിച്ച് ചെയ്യുമെന്നും മേയര്‍ പറഞ്ഞു. കന്‍റോണ്‍മെന്‍റില്‍ ഭക്ഷണ മാലിന്യം ഉള്‍പ്പെടെ തള്ളുന്നത് കാരണമാണ് നഗരത്തില്‍ ഇത്രയധികം തെരുവുനായ ശല്യമെന്നത് കൗണ്‍സിലര്‍മാര്‍ ചൂണ്ടിക്കാട്ടിയിരുന്നു. ഈ വിഷയം കന്‍റോണ്‍മെന്‍റ് അധികൃതരുടെ ശ്രദ്ധയില്‍പ്പെടുത്തുമെന്നും കന്‍റോൺമെന്‍റ് അധികാരികളെ ഉള്‍പ്പെടെ ഇന്നത്തെ യോഗത്തില്‍ പങ്കെടുപ്പിക്കാനും കൗണ്‍സിലില്‍ തീരുമാനിച്ചു. വളര്‍ത്തു നായകള്‍ക്കെല്ലാം ലൈസന്‍സ് എടുക്കാന്‍ കര്‍ശന നിര്‍ദേശം നല്‍കും. കോര്‍പറേഷനില്‍ വെറ്ററിനറി ഡോകറുടെ പോസ്റ്റിംഗ് നടത്താനുള്ള പ്രപ്പോസല്‍ സര്‍ക്കാറിലേക്ക് നല്‍കാനും തീരുമാനിച്ചു.

എക്സൈസ് സ്റ്റാഫ് അസോ. ജില്ലാ സമ്മേളനം

കണ്ണൂർ: കേരള സ്റ്റേറ്റ് എക്‌സൈസ് സ്റ്റാഫ് അസോസിയേഷൻ 45-ാം കണ്ണൂർ ജില്ലാ സമ്മേളനവും വിരമിച്ചവർക്കുള്ള യാത്രയയപ്പും കെ.വി. സുമേഷ് എംഎൽഎ ഉദ്ഘാടനം ചെയ്തു. അസോസിയേഷൻ ജില്ലാ പ്രസിഡന്‍റ് കെ. രാജേഷ് അധ്യക്ഷത വഹിച്ചു. സർവീസിൽ നിന്നും വിരമിക്കുന്ന നിസാർ കൂലോത്തിന് യാത്രയയപ്പ് നല്കി. സംസ്ഥാന പ്രസിഡന്‍റ് ടി. സജുകുമാർ, സംസ്ഥാന ജന. സെക്രട്ടറി കെ.സന്തോഷ്കുമാർ, ഡപ്യൂട്ടി എക്സൈസ് കമ്മീഷണർ പി.കെ. സതീഷ്കുമാർ, അസി. എക്സൈസ് കമ്മീഷണർ പി. സജിത്ത്കുമാർ, വിവിധ സംഘടനാ നേതാക്കളായ പി.ആർ. സ്മിത, ഇ.പി. അബ്ദുള്ള, വി.വി. സന്ദീപ്കുമാർ, കെ.കെ. ബൈജു, എം.എ.കെ. ഫൈസൽ, വി.ഡി. പ്രസാദ്, എം.ബി. സുരേഷ് ബാബു, വി.വി. ഷാജി, നെൽസൺ ടി. തോമസ്, ജസ്ന ജോസഫ്, ജില്ലാ സെക്രട്ടറി പി. പ്രനിൽകുമാർ, കെ.വി. ഷൈജു എന്നിവർ പ്രസംഗിച്ചു.

കൊട്ടിയൂർ തീർഥാടനകാലത്തെ ഗതാഗത സ്തംഭനത്തിന് പരിഹാരം ഉണ്ടാക്കണം: താലൂക്ക് വികസന സമിതി

ഇരിട്ടി: കൊട്ടിയൂർ തീർഥാടന കാലത്തെ രൂക്ഷമായ ഗതാഗത സ്തംഭനത്തിന് ശാശ്വത പരിഹാരം ഉണ്ടാക്കണമെന്ന് ഇരിട്ടി താലൂക്ക് വികസന സമിതി യോഗം ആവശ്യപ്പെട്ടു. നിലവിലെ താത്കാലിക സംവിധാനങ്ങൾ ശക്തിപ്പെടുത്താനും അടുത്തവർഷം മുതൽ ഇതിനൊരു ശാശ്വത പരിഹാരം ഉണ്ടാക്കുന്നതിന് സർക്കാരും മലബാർ ദേവസ്വം ബോർഡും പൊതുമരാമത്ത് വകുപ്പും നടപടി സ്വീകരിക്കണമെന്നും യോഗത്തിൽ അധ്യക്ഷത വഹിച്ച സണ്ണി ജോസഫ് എംഎൽഎ ആവശ്യപ്പെട്ടു. ശനി, ഞായർ ഒഴിവുദിവസങ്ങളിൽ മാനന്തവാടി ഭാഗത്തുനിന്നു തീർഥാടന കേന്ദ്രത്തിലേക്കു വരുന്ന വാഹനങ്ങൾ ചുരമിറങ്ങാതെ നെടുംപൊയിൽ വഴി തിരിച്ചുവിടാനുള്ള സംവിധാനത്തെ പറ്റി ആലോചിച്ചു കൂടെയെന്ന് ഇരിട്ടി തഹസിൽദാർ സി.വി. പ്രകാശൻ അഭിപ്രായപ്പെട്ടു. ഇക്കാര്യം പോലീസ്, ക്ഷേത്രം ഭാരവാഹികൾ, പഞ്ചായത്ത് എന്നിവരുടെ നിർദേശം കൂടി കണക്കിലെടുത്ത് മാത്രമേ പരിഗണിക്കാവൂ എന്ന് എംഎൽഎ നിർദേശിച്ചു. ക്ഷേത്രത്തിലേക്കുള്ള പ്രധാന റോഡുകളുടെ ഇരുവശങ്ങളിലേയും കാടുകൾ വെട്ടി തെളിയിക്കാത്തതും ഓവുചാൽ സംവിധാനം ഒരുക്കാത്തതിനും പൊതുമരാമത്ത് വകുപ്പിന്‍റെ അനാസ്ഥ യോഗത്തിൽ എല്ലാവരും ഉന്നയിച്ചു. പേരാവൂർ താലൂക്ക് ആശുപത്രിയിൽ രാത്രികാല കാഷ്വാലിറ്റി സംവിധാനം പൂട്ടിപ്പോകുന്ന അവസ്ഥയിലാണെന്ന് ജില്ലാ പഞ്ചായത്ത് അംഗം ജൂബിലി ചാക്കോ പറഞ്ഞു. ഇക്കാര്യത്തിൽ അടിയന്തര ഇടപെടൽ വേണമെന്നും അവർ ആവശ്യപ്പെട്ടു. ആശുപത്രിയിൽ 15 ഡോക്ടർമാരുടെ തസ്തികളിൽ ആറുപേർ മാത്രമാണ് ഇപ്പോൾ ജോലിക്ക് ഹാജരാകുന്നള്ളു. പിഎസ്‌സി വഴി നിയമനം കിട്ടിയ മൂന്നുപേരിൽ രണ്ടുപേർ ജോലിക്ക് ഹാജരായിട്ടില്ലെന്നും ആശുപത്രി സൂപ്രണ്ട് യോഗത്തെ അറിയിച്ചു. ഒപിയിൽ മുന്നൂറോളം പേരെ ഒരു ഡോക്ടർ പരിശോധിക്കേണ്ട അവസ്ഥയാണ് ഇപ്പോൾ ഉള്ളത്. എട്ടു ഡോക്ടർമാർ ഉണ്ടെങ്കിൽ മാത്രമേ ഇപ്പോഴത്തെ പ്രതിസന്ധിക്ക് ചെറിയൊരു പരിഹാരം ഉണ്ടാകുകയുള്ളുവെന്നും സൂപ്രണ്ട് പറഞ്ഞു. ഇക്കാര്യങ്ങളെല്ലാം ഡിഎംഒയെ ബോധ്യപ്പെടുത്താൻ എംഎൽഎ നിർദേശിച്ചു. അണക്കെട്ടുകളോട് ചേർന്നുള്ള പ്രദേശങ്ങളെ ബഫർ സോണാക്കിയ സർക്കാർ ഉത്തരവ് പിൻവലിച്ചെങ്കിലും ഇക്കാര്യത്തിൽ ജനങ്ങളെ ദ്രോഹിക്കുന്ന സമീപനമാണ് ബന്ധപ്പെട്ട വകുപ്പിൽ നിന്നും ഉണ്ടാവുന്നതെന്ന് ആക്ഷേപം യോഗത്തിൽ ഉയർന്നു. സർക്കാർ ഉത്തരവ് ഇറങ്ങിയിട്ടും പദ്ധതി പ്രദേശത്തെ ജനങ്ങൾക്ക് നിർമാണത്തിന് നിരാക്ഷേപ പത്രം നല്കുന്നില്ലെന്ന പരാതി ശക്തമാണെന്ന് പായം പഞ്ചായത്ത് പ്രസിഡന്‍റ് പി. രജനിയും, കെ. സുധാകരൻ എംപിയുടെ പ്രതിനിധി പി.കെ. ജനാർദനനുംപറഞ്ഞു. കരിന്തളം മാനന്തവാടി 400 കെവി ലൈനുമായി ബന്ധപ്പെട്ട് കേളകം, കണിച്ചാർ പഞ്ചായത്തുകളിൽ നിലനില്ക്കുന്ന തകർക്കം പരിഹരിക്കാൻ ഉടൻ നടപടിയുണ്ടാക്കണമെന്ന് സജീവ് ജോസഫ് എംഎൽഎയുടെ പ്രതിനിധി തോമസ് വർഗീസ് ആവശ്യപ്പെട്ടു. യോഗത്തിൽ തില്ലങ്കേരി പഞ്ചായത്ത് പ്രസിഡന്‍റ് പി. ശ്രീമതി, ഇരിട്ടി ബ്ലോക്ക് പഞ്ചായത്ത് പ്രസിഡന്‍റ് കെ. വേലായുധൻ, തഹസിൽദാർ സി.വി. പ്രകാശൻ, ജില്ലാ പഞ്ചായത്ത് അംഗം ജൂബിലി ചാക്കോ, പായം പഞ്ചായത്ത് പ്രസിഡന്‍റ് പി. രജനി വിവിധ രാഷ്ട്രീയപാർട്ടി പ്രതിനിധികളായ ഇബ്രാഹിം മുണ്ടേരി, പായം ബാബുരാജ്, കെ.പി. ഷാജി, മാത്തുക്കുട്ടി പന്തപ്ലാക്കൽ എന്നിവർ എന്നിവർ പ്രസംഗിച്ചു.

ട്രാൻസ്ഫോർമറിന് തീപിടിച്ചു

മട്ടന്നൂർ: മട്ടന്നൂരിൽ കെഎസ്ഇബിയുടെ ട്രാൻസ്ഫോർമറിൽ തീപിടിത്തം. ഇന്നലെ ഉച്ചകഴിഞ്ഞ് മൂന്നോടെയായിരുന്നു സംഭവം. മട്ടന്നൂർ-തലശേരി റോഡിൽ എൻഎസ്എസ് ബിൽഡിംഗിന് സമീപത്തുള്ള കെഎസ്ഇബിയുടെ ട്രാൻസ്ഫോർമറിലാണ് തീപിടിത്തമുണ്ടായത്. ട്രാൻസ്ഫോർമറിന്‍റെ അടി ഭാഗത്ത് നിന്നാണ് തീപിടിത്തമുണ്ടായത്. വിവരം അറിയിച്ചതിനെ തുടർന്നു അഗ്നിശമന വിഭാഗമെത്തി തീയണച്ചതിനാൽ വൻ നാശനഷ്ടം ഒഴിവായി.

വായിച്ചു വളരാൻ

കണ്ണൂർ: ജില്ലാ ഇൻഫർമേഷൻ ഓഫീസിന്‍റെ ആഭിമുഖ്യത്തിൽ പട്ടുവം മോഡൽ റെസിഡൻഷ്യൽ ഹയർ സെക്കൻഡറി സ്‌കൂളിൽ ജില്ലാതല വായന മാസാചരണവും പി.എൻ. പണിക്കർ അനുസ്മരണവും സംഘടിപ്പിച്ചു. എം. വിജിൻ എംഎൽഎ ഉദ്ഘാടനം ചെയ്തു. വായനയുടെയും പഠനത്തിന്‍റെയും ആത്യന്തിക ലക്ഷ്യം നല്ല മനുഷ്യനാവുക എന്നതാണെന്ന് വിദ്യാർഥി സമൂഹം തിരിച്ചറിയണമെന്ന് വിജിൻ എംഎൽഎ പറഞ്ഞു. പട്ടുവം പഞ്ചായത്ത് പ്രസിഡന്‍റ് പി. ശ്രീമതി അധ്യക്ഷത വഹിച്ചു. ചലച്ചിത്ര സംവിധായകൻ മനോജ് കാന, പട്ടുവം പഞ്ചായത്തംഗം എം. സുനിത, ഡപ്യൂട്ടി കളക്ടർ (എൽഎ) എ.കെ. അനീഷ്, ജില്ലാ ഇൻഫർമേഷൻ ഓഫീസർ പി.പി. വിനീഷ്, സമഗ്രശിക്ഷാ കേരളം ജില്ലാ മിഷൻ കോ-ഓർഡിനേറ്റർ ഇ.സി. വിനോദ്, വിദ്യാകിരണം മിഷൻ ജില്ലാ കോ-ഓർഡിനേറ്റർ കെ.സി. സുധീർ, കണ്ണൂർ ഡയറ്റ് പ്രിൻസിപ്പൽ ഡോ. കെ. വിനോദ്കുമാർ, തളിപ്പറമ്പ് ജില്ലാ വിദ്യാഭ്യാസ ഓഫീസർ എസ്. വന്ദന, ഐടിഡിപി ജില്ലാ പ്രൊജക്ട് ഓഫീസർ ഇൻ ചാർജ് കെ. ബിന്ദു തുടങ്ങിയവർ പ്രസംഗിച്ചു. ജില്ലാ സാക്ഷരതാ മിഷന്‍റെ ആഭിമുഖ്യത്തില്‍ സംഘടിപ്പിക്കുന്ന വായന പക്ഷാചരണത്തിന്‍റെ ജില്ലാതല ഉദ്ഘാടനം ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരി നിര്‍വഹിച്ചു. ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യന്‍ അധ്യക്ഷത വഹിച്ചു. കെപിസിസി കലാ സാംസ്കാരിക വിഭാഗമായ സംസ്കാരസാഹിതി ജില്ലാ കമ്മറ്റിയുടെ നേതൃത്വത്തിൽ വായനാ ദിനാചരണം സംഘടിപ്പിച്ചു. ജവഹർ ലൈബ്രറി മിനി ഹാളിൽ സംഘടിപ്പിച്ച പരിപാടിയിൽ സുധാ മേനോന്‍റെ "ഇന്ത്യ എന്ന ആശയം' എന്ന പുസ്തകമാണ് ചർച്ച ചെയ്തത്. സംസ്ഥാന വൈസ് ചെയർമാൻ എം. പ്രദീപ്കുമാർ പയ്യന്നൂർ ഉദ്ഘാടനം ചെയ്തു. ജില്ലാ ചെയർമാൻ സുരേഷ് കൂത്തുപറമ്പ് അധ്യക്ഷത വഹിച്ചു. വി.ആർ. പ്രീത പുസ്തകാവതരണം നടത്തി. ഇരിട്ടി: വായന ദിനത്തിന്‍റെ ഭാഗമായി ഇരിട്ടി താലൂക്ക് ലൈബ്രറി കൗൺസിലിന്‍റെ നേതൃത്വത്തിൽ പരിധിയിലെ വിവിധ ഗ്രന്ഥശാലകളിൽ പി.എൻ. പണിക്കർ ചരമദിനം മുതൽ ഐ.വി. ദാസ് ജന്മദിനം വരെ വിവിധ പരിപാടികൾ നടക്കും. താലൂക്ക്തല ഉദ്ഘാടനം ഇരിട്ടി നന്മ പബ്ലിക് ലൈബ്രറിയിൽ സാഹിത്യകാരൻ അനിൽകുമാർ ആലത്തുപറമ്പ് ഉദ്ഘാടനം ചെയ്തു. താലൂക്ക് ലൈബ്രറി കൗൺസിൽ പ്രസിഡന്‍റ് എം. ബിജു അധ്യക്ഷനായിരുന്നു. അങ്ങാടിക്കടവ് സേക്രഡ് ഹാർട്ട് യുപി സ്കൂളിൽ വായന ദിനാചരണവും വിദ്യാരംഗം കലാസാഹിത്യ വേദിയുടെയും വിവിധ ക്ലബുകളുടെ ഉദ്ഘാടനവും കുട്ടികളുടെ അവധിക്കാല രചന പ്രകാശനവും അയ്യൻകുന്ന് പഞ്ചായത്ത് പ്രസിഡന്‍റ് കുര്യാച്ചൻ പൈമ്പള്ളിക്കുന്നേൽ നിർവഹിച്ചു. സ്കൂൾ മാനേജർ ഫാ. ഫ്രാൻസിസ് റാത്തപ്പള്ളി അധ്യക്ഷത വഹിച്ചു. കേരള ഫോക്‌ലോർ അക്കാദമി അവാർഡ് ജേതാവ് മാത്യൂസ് വയനാട് മുഖ്യാതിഥിയായിരുന്നു. പേരട്ട സെന്‍റ് ജോസഫ് സ്കൂളിൽ വായന ദിനാചരണവും വിവിധ ക്ലബുകളുടെ ഉദ്ഘാടനവും സീരിയൽ-സിനിമ നടൻ റെനിൽകുമാർ കണ്ണൂർ നിർവഹിച്ചു. സ്കൂൾ മുഖ്യാധ്യാപിക സിസ്റ്റർ ടെക്സി മാത്യു, പിടിഎ പ്രസിഡന്‍റ് ബിജു വെങ്ങലപ്പള്ളി, സജി മാത്യു, സിസ്റ്റേഴ്സ്, മറ്റ് അധ്യാപകർ എന്നിവർ പങ്കെടുത്തു. മഞ്ഞളാംപുറം: മഞ്ഞളാംപുറം യുപി സ്കൂളിൽ വായന വാരാചരണത്തോടനുബന്ധിച്ച് വിദ്യാരംഗം കലാസാഹിത്യ വേദിയുടെയും വിവിധ ക്ലബുകളുടെയും ഉദ്ഘാടനം നടന്നു. യുവ കവി അനിൽ പുനർജനി ഉദ്ഘാടനം ചെയ്തു. സ്കൂൾ മാനേജർ ഫാ. ജോർജ് ചേലമരം അധ്യക്ഷത വഹിച്ചു. ഉളിക്കൽ: വയത്തൂർ യുപി സ്കൂളിൽ വായന വാരാചരണം റിട്ട. ചരിത്ര അധ്യാപകനും സാഹിത്യകാര നുമായ പി.എം. ജോൺ ഉദ്ഘാടനം ചെയ്തു. സ്കൂൾ മാനേജർ ഫാ. മനോജ്‌ കിടാരത്തിൽ അധ്യക്ഷത വഹിച്ചു. മട്ടന്നൂർ: തില്ലങ്കേരി പള്ള്യം എൽപി സ്കൂൾ വിദ്യാരംഗം കലാസാഹിത്യ വേദിയുടെ ആഭിമുഖ്യത്തിൽ വായനാദിനാചരണം സംഘടിപ്പിച്ചു. ചാവശേരി വായനശാല ഗ്രന്ഥാലയം പ്രസിഡന്‍റ് കെ.കെ. സുരേന്ദ്രൻ ഉദ്ഘാടനം ചെയ്തു. പിടിഎ പ്രസിഡന്‍റ് സുരേഷ് അധ്യക്ഷത വഹിച്ചു. കൂത്തുപറമ്പ്: വായന ദിനത്തോടനുബന്ധിച്ച് നിർമലഗിരി കോളജ് മലയാള വിഭാഗം വായനദിനം ആചരിച്ചു. കോളജ് പ്രിൻസിപ്പൽ സിസ്റ്റർ ഡോ. സെലിൻ മാത്യു ഉദ്ഘാടനം ചെയ്തു. ബോട്ടണി വിഭാഗം അധ്യാപകനും എഴുത്തുകാരനുമായ ഡോ. ആർ.ഡി. അൻപിൻ രാജ മുഖ്യപ്രഭാഷണം നടത്തി. വായന ദിനത്തോടനുബന്ധിച്ച് നടത്തിയ ക്വിസ്, പുസ്തക പരിജയം എന്നീ മത്സരത്തിൽ വിജയികളായ കെ. അഞ്ജന, റിഫ നിസാർ, പി.പി. നൈതിക, ദർശന എന്നിവർക്ക് സമ്മാനങ്ങൾ നൽകി. ഐക്യുഎസി കോ-ഓർഡിനേറ്റർ റവ. ഡോ. മാർട്ടിൻ ജോസഫ്, കോളജ് വൈസ് പ്രിൻസിപ്പൽ റവ.ഡോ. ജോബി ഫിലിപ്പ്, ഡോ. ജയ്സൺ ജോസഫ്, കെ.വി. ജോസഫ്, മലയാളം വിഭാഗം മേധാവി ഡോ. ദീപാ മോൾ മാത്യു, കെ. ദേവാനന്ദ് എന്നിവർ പ്രസംഗിച്ചു.

പന്നിയോട്ടു വയലിൽ വീട്ടുകിണർ ഇടിഞ്ഞുതാഴ്ന്നു

മലപ്പട്ടം: കനത്ത മഴയിൽ മലപ്പട്ടത്ത് കിണർ ഇടിഞ്ഞ് താഴ്ന്നു. മലപ്പട്ടം-മയ്യിൽ റൂട്ടിൽ പന്നിയോട്ട് വയൽ ബസ് സ്റ്റോപ്പിനടുത്ത് പി.വി. മോഹനന്‍റെ 17 കോൽ ആഴമുള്ള വീട്ടുകിണറാണ് ഇന്നലെ രാവിലെ ഇടിഞ്ഞു താഴ്ന്നത്. കിണറിൽ സ്ഥാപിച്ച മോട്ടോർ പൂർണമായും ചെളിയിലമർന്നു. ഏകദേശം ഒന്നരലക്ഷം രൂപയുടെ നഷ്ടം കണക്കാക്കുന്നു. കർഷക സംഘം നേതാക്കൾ സ്ഥലം സന്ദർശിച്ചു.

നരയൻകല്ല് അങ്കണവാടി കെട്ടിടം നാശത്തിന്‍റെ വക്കിൽ

നടുവിൽ: നടുവിൽ പഞ്ചായത്തിലെ ആറാം വാർഡായ പാത്തൻപാറയിലെ നരയൻകല്ല് അങ്കണവാടി പ്രവർത്തനരഹിതമായിട്ട് രണ്ടുവർഷം. നിലവിൽ കാട് മൂടിയും ശരിയായ അറ്റകുറ്റപ്പണി നടത്താതെയും കെട്ടിടം നശിക്കുകയാണ്. 2012ൽ അന്നത്തെ ഇരിക്കൂർ എംഎൽഎയും മന്ത്രിയുമായിരുന്ന കെ.സി. ജോസഫ് ഉദ്ഘാടനം ചെയ്തതാണ് അങ്കണവാടി കെട്ടിടം. ആറുലക്ഷം രൂപ ചെലവിൽ പുതിയതായി നിർമിച്ച കെട്ടിടത്തിൽ ഏതാനും വർഷങ്ങൾ മാത്രമാണ് അങ്കണവാടി പ്രവർത്തിച്ചത്. തൊട്ടടുത്ത് സ്ഥിതി ചെയ്യുന്ന കരിങ്കൽ ക്വാറിയിലെ സ്ഫോടനങ്ങൾ നിമിത്തം അങ്കണവാടി കെട്ടിടം അപകടാവസ്ഥയിലായപ്പോൾ രക്ഷിതാക്കൾ കുട്ടികളെ അയക്കാതിരുന്നതിനെ തുടർന്ന് അങ്കണവാടി പ്രവർത്തനം വാടക കെട്ടിടത്തിലേക്ക് മാറ്റുകയായിരുന്നു. തുടർന്ന് അങ്കണവാടി കെട്ടിടം അടഞ്ഞു കിടക്കുകയും പ്രദേശം കാടുമൂടുകയും ചെയ്തു. ഇപ്പോൾ ഈ കെട്ടിടത്തിൽ ഹരിത കർമസേന ശേഖരിക്കുന്ന പ്ലാസ്റ്റിക് മാലിന്യം സംഭരിച്ചു സൂക്ഷിക്കുകയാണ്.

കെവിവിഇഎസ് യൂണിറ്റ് വാർഷികവും കുടുംബ സംഗമവും നടത്തി

ചെമ്പേരി: കേരള വ്യാപാരി വ്യവസായി ഏകോപന സമിതി (കെവിവിഇഎസ്) ചെമ്പേരി യൂണിറ്റിന്‍റെ 43-ാമത് വാർഷിക ജനറൽ ബോഡിയും വ്യാപാരി കുടുംബ സംഗമവും ചെമ്പേരി മദർ തെരേസ ഓഡിറ്റോറിയത്തിൽ നടന്നു. കെവിവിഇഎസ് ജില്ലാ പ്രസിഡന്‍റ് ദേവസ്യ മേച്ചേരി സംഗമം ഉദ്ഘാടനം ചെയ്തു. യൂണിറ്റ് പ്രസിഡന്‍റ് സാബു മണിമല അധ്യക്ഷത വഹിച്ചു. ചെമ്പേരി ലൂർദ് മാതാ ബസിലിക്ക റെക്ടർ റവ. ഡോ. ജോർജ് കാഞ്ഞിരക്കാട്ട് വ്യാപാരമേഖലയിൽ അമ്പത് വർഷം പിന്നിടുന്ന ഇപ്പോഴും സജീവമായ വ്യാപാരികളായവരെ ആദരിച്ചു. ഏരുവേശി പഞ്ചായത്ത് പ്രസിഡന്‍റ് മിനി ഷൈബി വ്യാപാരികളുടെ മക്കളിൽ ഉന്നത വിജയം കരസ്ഥമാക്കിയ വിദ്യാർഥികളെ അനുമോദിച്ചു. യൂണിറ്റ് സെക്രട്ടറി റെജി പവൻ റിപ്പോർട്ടുകൾ അവതരിപ്പിച്ചു. ട്രഷർ രാജു ആൽബിൻ, വൈസ് പ്രസിഡന്‍റുമാരായ സാജു മണ്ഡപത്തിൽ, ജോയിച്ചൻ മണിമല എന്നിവർ പ്രമേയം അവതരിപ്പിച്ചു. പയസ് മരിയ, ക്ലമന്‍റ് കൊട്ടാരം, അനീഷ് തോണക്കര, പ്രകാശ് ജോൺ, ജോമോൻ മടുക്കക്കുഴി, വനിതാ വിംഗ് പ്രസിഡന്‍റ് ജിറ്റി പ്രകാശ്, സെക്രട്ടറി നിഷ കുളത്തറ എന്നിവർ പ്രസംഗിച്ചു. വ്യാപാരി കുടുംബാംഗങ്ങളുടെ വിവിധ കലാപരിപാടികളും കണ്ണൂർ സ്പീഡ് ഓർക്കസ്ട്രയുടെ ഗാനമേളയും സ്നേഹവിരുന്നും നടന്നു.

മെറിറ്റ് ഡേ ആഘോഷിച്ചു

പൈസക്കരി: ദേവമാതാ ഹൈസ്കൂളിൽ മെറിറ്റ് ഡേ ആഘോഷിച്ചു. നെടുങ്ങോം ഗവ. ഹയർ സെക്കൻഡറി സ്കൂൾ അധ്യാപിക പി.പി. ഹരിതമോൾ ഉദ്ഘാടനം ചെയ്തു. പയ്യാവൂർ പഞ്ചായത്ത് പ്രസിഡന്‍റ് സാജു സേവ്യർ അധ്യക്ഷത വഹിച്ചു. പൈസക്കരി ദേവമാതാ സ്കൂൾ മാനേജർ ഫാ. നോബിൾ ഓണംകുളം, ഹൈസ്കൂൾ മുഖ്യാധ്യാപിക ബീന അഗസ്റ്റിൻ, പൈസക്കരി സെന്‍റ് മേരീസ് യുപി സ്കൂൾ മുഖ്യാധ്യാപകൻ സോജൻ ജോർജ്, വാർഡ് മെംബർ ടെൻസൺ കണ്ടത്തിൻകര, സ്കൂൾ പിടിഎ പ്രസിഡന്‍റ് സോജൻ നെട്ടനാനിയ്ക്കൽ, മദർ പിടിഎ പ്രസിഡന്‍റ് റാണി ചോങ്കര, വിദ്യാരംഗം കലാ സാഹിത്യ വേദി കോ-ഓർഡിനേറ്റർ ഐറിൻ സോജൻ എന്നിവർ പ്രസംഗിച്ചു. വിശിഷ്ടാതിഥിക്ക് ആദരവും വിജയികൾക്ക് അനുമോദനവും നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]