ADVERTISEMENT

ADVERTISEMENT

വായന ദിനാചരണം നടത്തി

കണ്ണൂർ: സെന്‍റ് തെരേസാസ് ആംഗ്ലോ ഇന്ത്യൻ ഹയർസെക്കൻഡറി സ്കൂളിൽ വായനവാരത്തിന്‍റെയും വിവിധ ക്ലബുകളുടെയും ഉദ്ഘാടം മാധ്യമപ്രവർത്തകനും എഴുത്തുകാരനുമായ നാരായണൻ കാവുന്പായി നിർവഹിച്ചു. 70 പുസ്തകങ്ങൾ വായിച്ച് ആസ്വാദനക്കുറിപ്പ് തയാറാക്കിയ എട്ടാം ക്ലാസ് വിദ്യാർഥിനി ആൻസിയ ബിനീഷിനെ ഉപഹാരം നൽകി അനുമോദിച്ചു.വിദ്യാരംഗം സ്കൂൾ കൺവീനർ കെ.കെ. ശ്രീമതി അധ്യക്ഷത വഹിച്ചു. മുഖ്യാധ്യാപിക സിസ്റ്റർ രോഷ്നി മാനുവൽ പ്രസംഗിച്ചു.

അസോസിയേഷൻ ഓഫ് ഓർഫനേജസ് ആൻഡ് ചാരിറ്റബിൾ ഇൻസ്റ്റിറ്റ്യൂഷൻസ് കണ്ണൂർ ജില്ലാ കമ്മിറ്റിയുടെ ആഭിമുഖ്യത്തിൽ വായന ദിനം ആചരിച്ചു. ജില്ലയിൽ അനാഥാലയങ്ങളിലെ വിദ്യാർഥികൾക്കുള്ള പുസ്തകങ്ങൾ സംസ്ഥാന ജനറൽ സെക്രട്ടറി പി.വി. സൈനുദ്ദീൻ ജില്ലാ ഭാരവാഹികൾക്ക് കൈമാറി ഉദ്ഘാടനം നിർവഹിച്ചു. ജില്ലാ പ്രസിഡന്‍റ് ബ്രദർ സജി അധ്യക്ഷത വഹിച്ചു. ജില്ലാ സെക്രട്ടറി സി.എച്ച്. മൊയ്തു ഹാജി ആമുഖപ്രഭാഷണം നടത്തി.

ടി.എ. തങ്ങൾ, സിസ്റ്റർ വിനീത, കെ.കെ.അഹമ്മദ് ഹാജി, കെ. മോഹനൻ, കെ.എൻ. മുസ്തഫ, എം. അസൈനാർ ഹാജി, സി. സമീർ, സിസ്റ്റർ ഡെയ്സി, സി. രൂപേഷ്, ഡോ. താജുദ്ദീൻ വാഫി, സിസ്റ്റർ ഡിന, എസ്.എ.പി. ആസാദ്, ഷമീമ ഇസ്‌ലാഹിയ എന്നിവർ പ്രസംഗിച്ചു.

കണിച്ചാര്‍: കാപ്പാട് ഗ്രാമീണ വായനശാല ആന്‍ഡ് ഗ്രന്ഥാലയത്തില്‍ വായന പക്ഷാചരണവും പി.എൻ. പണിക്കര്‍ അനുസ്മരണവും ഇരിട്ടി താലൂക്ക് ലൈബ്രറി കൗണ്‍സില്‍ എക്‌സിക്യുട്ടീവ് അംഗം പി.ജി. സന്തോഷ് ഉദ്ഘാടനം ചെയ്തു. കാപ്പാട് സാംസ്‌കാരിക വേദി പ്രസിഡന്‍റ് എം.വി. രാജീവന്‍ അധ്യക്ഷത വഹിച്ചു.

ഇ.കെ.നായനാര്‍ സ്മാരക വായനശാലയുടെ നേതൃത്വത്തില്‍ പി.എന്‍. പണിക്കര്‍ അനുസ്മരണത്തോടനുബന്ധിച്ച് വായനാ പക്ഷാചരണത്തിന്‍റെയും സാഹിത്യ ചര്‍ച്ചയുടെയും ഉദ്ഘാടനം എഴുത്തുകാരി ഡാലിയ ജോണി നിര്‍വഹിച്ചു. വായനശാലാ പ്രസിഡന്‍റ് വി.വി. ബാലകൃഷ്ണൻ അധ്യക്ഷത വഹിച്ചു. ലൈബ്രറി കൗണ്‍സില്‍ സംസ്ഥാന കൗണ്‍സില്‍ അംഗം കെ.എ. ബഷീര്‍ മുഖ്യപ്രഭാഷണം നടത്തി.

ADVERTISEMENT

എട്ടിക്കുളം റോഡിൽ അപകടഭീഷണിയായി ഗര്‍ത്തം; രണ്ടാഴ്ചയായിട്ടും പരിഹാരമായില്ല

പയ്യന്നൂര്‍: രണ്ടാഴ്ച മുമ്പ് രൂപപ്പെട്ട റോഡിലെ വിണ്ടുകീറലും ഗര്‍ത്തവും അപകട ഭീഷണിയായി മാറിയിട്ടും പരിഹാര നടപടികളില്ലാത്തതില്‍ പ്രതിഷേധമുയരുന്നു. രാമന്തളി എട്ടിക്കുളം-പള്ളിക്കോളനി റോഡിലെ കുതിരക്കല്ല് റോഡിലാണ് അപകടം പതിയിരിക്കുന്നത്. ചെങ്കുത്തായ പ്രദേശത്തെ റോഡിന് താഴെ വലിയ ഗര്‍ത്തമായതിനാല്‍ ഇവിടെ സംരക്ഷണ വേലി സ്ഥാപിക്കണമെന്ന മുറവിളികള്‍ ഉയരുന്നതിനിടയിലാണ് അപകട ഭീഷണിയുയര്‍ത്തി വലിയ കുഴി രൂപപ്പെട്ടത്. ഇതേതുടര്‍ന്ന് ബസ് സര്‍വീസുള്ള റോഡില്‍ അപകട മുന്നറിയിപ്പ് നല്‍കാനായി നാട്ടുകാര്‍ റിബണുകള്‍ കെട്ടി കല്ലെടുത്തുവച്ചിട്ടുമുണ്ട്. എന്നാല്‍, രണ്ടാഴ്ചയായിട്ടും അധികൃതരാരും ഇതുവഴി വന്നില്ലെന്നും അപകട സാധ്യത ഒഴിവാക്കാനുള്ള നടപടികള്‍ സ്വീകരിച്ചില്ലെന്നും നാട്ടുകാര്‍ക്ക് ആക്ഷേപമുണ്ട്. ഇവിടെ സംരക്ഷണ വേലി സ്ഥാപിക്കണമെന്ന നാട്ടുകാരുടെ മുറവിളിക്ക് വര്‍ഷങ്ങളുടെ പഴക്കമുണ്ട്. ഈ അവശ്യത്തോടും അധികൃതര്‍ മുഖംതിരിച്ചു നില്‍ക്കുന്നതിനിടയിലാണ് റോഡില്‍ വലിയ ഗര്‍ത്തം രൂപപ്പെട്ടത്.

ആഫ്രിക്കൻ ഒച്ച് ശല്യം: ‌പത്തു കുടുംബങ്ങൾ ദുരിതത്തിൽ

ഇരിട്ടി: ഒരിടവേളക്ക് ശേഷം ഇരിട്ടിയിൽ വീണ്ടും ആഫ്രിക്കൻ ഒച്ച് ശല്യം. ഇരിട്ടി പയഞ്ചേരി മുക്കിൽ പഴശി ജലസംഭരണിയുടെ ഭാഗമായ പ്രദേശത്തെ പത്തു വീട്ടുകാർ ആഫ്രിക്കൻ ഒച്ചു ശല്യത്തെ തുടർന്ന് ദുരിതത്തിലായിരിക്കുകയാണ്. മൂന്നുവർഷം മുന്പാണ് ഈ മേഖലയിൽ ആഫ്രിക്കൻ ഒച്ചിനെ ആദ്യമായി കാണുന്നത്. ഇവയെ ഉൻമൂലനം ചെയ്യാൻ നടപടികളെടുക്കാഞ്ഞതാണ് ഇവ പെരുകാൻ കാരണമെന്ന് പ്രദേശവാസികൾ പറയുന്നു. പറന്പുകളിലെ ചെടികൾ തിന്നു നശിപ്പിക്കുന്നതിനൊപ്പം വീടുകൾക്കകത്ത് എത്തുന്ന ഒച്ചുകൾ വീടിനകം മലിനമാക്കുന്നുണ്ട്. പ്രദേശത്തെ കണ്ണിയത്ത് സുശീലൻ, പുതിയ പറമ്പിൽ മായൻ, കലീഫ, റോഷൻ, സി. സുനിൽകുമാർ, രാജീവൻ, മനോജ് എന്നിവരുടെ വീടുകളിലാണ് ഇപ്പോൾ ശല്യം രൂക്ഷമായത്. ഉപ്പും കുമ്മായവും ഉപയോഗിച്ചാണ് പ്രദേശവാസികൾ ഇതിനെ പ്രതിരോധിക്കുന്നത്. ആഫ്രിക്കൻ ഒച്ചിനെ നശിപ്പിക്കാനായി മാത്രം ചാക്കുകണക്കിന് ഉപ്പും കുമ്മായവുമാണ് വീട്ടുകാർ ശേഖരിച്ചു വയ്ക്കുന്നത്. രാത്രി സമയങ്ങളിൽ മാത്രമാണ് ഇവ പുറത്തിറങ്ങുന്നതെന്നതിനാൽ ശേഖരിച്ച് നശിപ്പിക്കലും ശ്രമകരാണ്. ബന്ധപ്പെട്ട അധികൃതർ ഒച്ച് നശീകരണത്തിന് നടപടികൾ സ്വീകരിക്കണമെന്ന ആവശ്യം ശക്തമാണ്.

കോർപറേഷൻ യോഗം എൽഡിഎഫ് ബഹിഷ്കരിച്ചു

കണ്ണൂര്‍: തെരുവുനായ ശല്യത്തിനെതിരെ നടപടി സ്വീകരിക്കുന്നതുമായി ബന്ധപ്പെട്ട് കോര്‍പറേഷനിൽ മേയർ മുസ്‌ലിഹ് മഠത്തിൽ വിളിച്ചു ചേര്‍ത്ത യോഗത്തില്‍ എൽഡിഎഫ്, യുഡിഎഫ് പ്രതിനിധികൾ തമ്മിൽ വാക്കേറ്റം. വാക്കേറ്റത്തിനൊടുവിൽ എൽഡിഎഫ് പ്രതിനിധികൾ യോഗം ബഹിഷ്കരിച്ചു. പ്രതിപക്ഷ പാർട്ടി നേതാവ് എൻ. സുകന്യയുടെ നേതൃത്വത്തിൽ കോർപറേഷനിലെ എൽഡിഎഫ് അംഗങ്ങളാണ് യോഗം ബഹിഷ്കരിച്ചത്. തെരുവുനായശല്യം നിയന്ത്രിക്കുന്നതുമായി ബന്ധപ്പെട്ട് കോർപറേഷൻ നടപ്പാക്കുന്ന പദ്ധതികളെക്കുറിച്ച് ചർച്ച ചെയ്യുന്നതിനു പകരം ജില്ലാ പഞ്ചായത്തിനും സർക്കാരിനുമെതിരെ യുഡിഎഫ് പ്രതിനിധികൾ നടത്തിയ വിമർശനത്തിൽ പ്രതിഷേധിച്ചായിരുന്നു ബഹിഷ്കരണം. ലീഗ് പ്രതിനിധികളായ സി. സമീറും സി. എറമുള്ളാനും വിഷയത്തില്‍ സര്‍ക്കാരിനെതിരെയും ജില്ലാ പഞ്ചായത്തിനെയും കുറ്റപ്പെടുത്തിയിരുന്നു. ഇതില്‍ മേയര്‍ ഇടപെട്ടില്ലെന്ന് എല്‍ഡിഎഫ് ചൂണ്ടിക്കാട്ടിയതിനെ തുടർന്നായിരുന്നു ബഹളം ആരംഭിച്ചത്. എൽഡിഎഫ് പ്രതിനിധികളില്ലാതെ തുടർന്ന നടന്ന് സർവകക്ഷിയോഗത്തിൽ തെരുവുനായകൾക്കായി ഷെൽട്ടറുകൾ സ്ഥാപിക്കാനും പദ്ധതി അംഗീകാരത്തിനായി സമർപ്പിക്കാനും തീരുമാനിച്ചു. പിടികൂടുന്ന തെരുവുനായകൾക്ക് കോർപറേഷൻ വാക്സിനേഷൻ നൽകും. നായകളെ പിടികൂടുന്നതിന് കോര്‍പറേഷനിലെ കണ്ടിജന്‍റ് വര്‍കര്‍മാര്‍ക്ക് പരിശീലനം നൽകും. ജൈവമാലിന്യങ്ങള്‍ വലിച്ചെറിയുന്നത് തടയുന്നതിലേക്ക് ഉറവിടങ്ങളില്‍ നിന്നും മാലിന്യം ശേഖരിച്ച് വളമാക്കി മാറ്റുന്ന ഒരു പദ്ധതി കോര്‍പറേഷന്‍റെ പരിഗണനയിലുണ്ടെന്നും എത്രയും പെട്ടെന്ന് അത് നടപ്പിലാക്കുമെന്നും മേയര്‍ പറഞ്ഞു. ഉത്തരവാദിത്തത്തില്‍ നിന്നും മനപൂര്‍വം ഒഴിവാകാനാണ് സര്‍ക്കാരും ജില്ലാ പഞ്ചായത്തും ശ്രമിക്കുന്നതെന്ന് മേയര്‍ പിന്നീട് പറഞ്ഞു. ഡപ്യൂട്ടി മേയര്‍ പി. ഇന്ദിര, പി. ഷമീമ, വി.കെ. ശ്രീലത, സുരേഷ് ബാബു എളയാവൂര്‍, ടി.ഒ. മോഹനന്‍, എം. പ്രകാശന്‍, വി.കെ. ഷൈജു, വ്യാപാരി പ്രതിനിധികളായ കെ.പി. ബാസിത്, കെ.വി. സലീം, പി.സി. രാജേഷ് കെ. ശ്യാം, കന്‍റോൺമെന്‍റ് പ്രതിനിധി കെ.വി. ദാസന്‍, റെയിൽവേ പ്രതിനിധി എൻ.എസ്. ജിനേഷ്, വെറ്ററിനറി ഡോക്ടർ വിനോദ് കുമാര്‍ എന്നിവർ പങ്കെടുത്തു.

ചപ്പാരപ്പടവ്-ചാണോക്കുണ്ട് റോഡിൽ കുഴികൾ

ചപ്പാരപ്പടവ്: ചപ്പാരപ്പടവ്-ചാണോക്കുണ്ട് റോഡിൽ ചപ്പാരപ്പടവിലെ സ്വകാര്യ ആശുപത്രിക്ക് മുന്നിലെ റോഡിൽ രൂപപ്പെട്ട കുഴികൾ അപകടക്കെണിയാകുന്നു. ഏറെ പ്രതിഷേധങ്ങൾക്ക് ഒടുവിലാണ് കാട്ടാമ്പള്ളി-ചപ്പാരപ്പടവ്-ചാണോക്കുണ്ട്-തടിക്കടവ് റോഡ് ബിറ്റുമിനസ് മെക്കാഡം രീതിയൽ ടാറിംഗ് നടത്തിയത്. പണി നടക്കുമ്പോൾ നിർമാണത്തിലെ അപാകതകൾ ചൂണ്ടിക്കാട്ടി നിരവധി പരാതികളും ഉയർന്നിരുന്നു. രണ്ടുവർഷം മുമ്പാണ് ടാറിംഗ് കഴിഞ്ഞത്. ചപ്പാരപ്പടവ് സ്വകാര്യ ആശുപത്രിയുടെ മുന്നിലെ റോഡിൽ വലിയ കുഴികളാണ് ഇപ്പോൾ രൂപപ്പെട്ടിരിക്കുന്നത്. ഇവിടെ വാഹനങ്ങൾ വേഗതയിൽ വരുമ്പോൾ ഇരുചക്ര വാഹനങ്ങൾ കുഴിയിൽ വീഴുന്നത് പതിവായിട്ടുണ്ട്. റോഡ് അപകടസ്ഥിതി ഒഴിവാക്കി യാത്രാ യോഗ്യമാക്കണമെന്നാണ് പ്രദേശവാസികളുടെ ആവശ്യം.

മലയോര ഹൈവേയിൽ രയറോം പള്ളിക്ക് സമീപം വെള്ളക്കെട്ട്; യാത്രക്കാർ ദുരിതത്തിൽ

ആലക്കോട്: മലയോര ഹൈവേയിൽ രയറോം പള്ളിക്ക് സമീപം റോഡിൽ വെള്ളക്കെട്ട് രൂപപ്പെട്ടത് യാത്രാ ദുരിതത്തിനും അപകട മേഖലയാകാനും കാരണമാകുന്നു. റോഡിന് സമീപ പ്രദേശം മണ്ണിട്ട് ഉയർത്തിയതോടെയാണ് റോഡിന് സമീപം പലയിടത്തും ഉറവകൾ രൂപപ്പെട്ട് വെള്ളക്കെട്ട് രൂപപ്പെടുന്നതിനു കാരണമായത്. മലയോര ഹൈവേയിൽ ഉറവകൾ രൂപപ്പെട്ടതോടെ റോഡിന്‍റെ പലഭാഗവും തകർന്നു തുടങ്ങിയിട്ടുണ്ട്. റോഡിന്‍റെ കോൺക്രീറ്റ് കാനകൾ കല്ലും മണ്ണും വീണു നിറഞ്ഞു കി‌ടക്കുന്നത് നീക്കം ചെയ്യുന്നില്ല. അതിനാൽ, റോഡിലൂടെ ദീർഘദൂരം വെള്ളം ഒഴുകാൻ ഇടയാകുന്നു. വാഹനങ്ങൾ വേഗത്തിൽ പോകുന്പോൾ കാൽനടയാത്രികരുടെയും ഇരുചക്രവാഹന യാത്രികരു‌ടെയും മേൽ ചെളിവെള്ളം തെറിക്കുന്നതിനും കാരണമാകുന്നുണ്ട്. മുൻകാലങ്ങളിൽ രയറോം സെന്‍റ് സെബാസ്റ്റ്യൻസ് പാരിഷ് കൗൺസിൽ അംഗങ്ങളുടെ നേതൃത്വത്തിലാണ് ഓവുചാൽ വൃത്തിയാക്കിയിരുന്നത്. എന്നാൽ, ഓവുചാലിൽ മാലിന്യം കൂടുതലായി അടിഞ്ഞതോടെ ജെസിബി ഉപയോഗിച്ച് നീക്കം ചെയ്യേണ്ട അവസ്ഥയാണുള്ളത്. മഴക്കാലം ആരംഭിച്ചിട്ടും പൊതുമരാമത്ത് വകുപ്പ് ഓവുചാൽ വൃത്തിയാക്കി ജലത്തിന്‍റെ ഒഴുക്ക് സുഗമമാക്കാത്തതിൽ നാട്ടുകാർ പ്രതിഷേധത്തിലാണ്. ശക്തമായ മഴയിൽ മലയോര ഹൈവേ റോഡിലൂടെ കല്ലും മണ്ണും വെള്ളവും ഒഴുകിവരുന്നത് ഇരുചക്ര വാഹനങ്ങൾ അപകടത്തിൽപ്പെടുന്നതിന് കാരണമാകുന്നു. രയറേം സെന്‍റ് സെബാസ്റ്റ്യൻസ് ഇംഗ്ലീഷ് മീഡിയം യുപി സ്കൂളിലേക്കും, രയറോം ഗവൺമെന്‍റ് ഹൈസ്കൂളിലേക്കും അനേകം കുട്ടികളും പള്ളിയിലേക്കും നിരവധിയാളുകൾ വെള്ളക്കെട്ട് നിറഞ്ഞ ഭാഗത്തുകൂടിയാണ് നടന്നു പോകുന്നത്.

അപകടമേഖലയായി കൂവേരി തൂക്കുപാലം

ചപ്പാരപ്പടവ്: കാലവർഷം കനത്തതോടെ മലയോരമേഖലയിലെ പുഴകളും കുളങ്ങളും നിറഞ്ഞു. അതോടൊപ്പം ജലാശയങ്ങളിൽ ഇറങ്ങുന്നവരുടെ മുങ്ങിമരണങ്ങൾ ആശങ്കപ്പെടുത്തുകയാണ്. ജില്ലയിലെ പ്രധാന പുഴയായ കുപ്പം പുഴയുടെ ഭാഗമായ ചപ്പാരപ്പടവ് കൂവേരി തൂക്കുപാലത്തിനു സമീപം പുഴയിൽ കഴിഞ്ഞദിവസം യുവാവ് മരണപ്പെട്ടിരുന്നു. പരിയാരം പഞ്ചായത്തിലെ നെല്ലിപ്പറമ്പ് സ്വദേശി മുഹമ്മദ് ഷാഹിദാണ് (19) കൂട്ടുക്കാരോടൊത്തു കുളിക്കുന്നതിനിടയിൽ കൂവേരി തൂക്കുപാലത്തിനു സമീപം പുഴയിൽ മുങ്ങിത്താണത്. അവധി ദിവസങ്ങൾ ആഘോഷിക്കാനെത്തുന്ന യുവാക്കളും വിദ്യാർഥികളും ജലാശയങ്ങളിൽ ഇറങ്ങുന്നത് പതിവായിരിക്കുകയാണ്. പുഴയുടെ ആഴമോ ഒഴുക്കോ അറിയാതെയാണ് പലരും കുളിക്കാനിറങ്ങുന്നത്. ചപ്പാരപ്പടവ് പഞ്ചായത്തിലെ കൂവേരി തൂക്കുപാലവും പരിസരവും ധാരാളം ആളുകൾ നിത്യവും എത്തുന്ന ടൂറിസ്റ്റ് കേന്ദ്രമായി മാറിയിട്ടുണ്ട്. തൂക്കുപാലത്തിനു മുകളിൽ കൂട്ടത്തോടെ എത്തുന്നവർ ഫോട്ടോയും വീഡിയോകളും എടുക്കുന്നത് അപകടകരമായ നിലയിലാണ്. ഇവിടെ അപകടം സംബന്ധിച്ച യാതൊരു മുന്നറിയിപ്പു ബോർഡും സ്ഥാപിച്ചിട്ടില്ല. മാത്രമല്ല യുവാക്കളെ ആ കർഷിക്കുന്നതിനായി ഒരു യുവജന സംഘടന പാലത്തിന് സമീപം സെൽഫി പോയിന്‍റ് സ്ഥാപിച്ചിട്ടുമുണ്ട്. ഏതാനും വർഷങ്ങൾക്കുമുമ്പ് തൊട്ടടുത്തുള്ള തേറണ്ടിക്കടവിൽ പുഴയുടെ അരികിൽ നിന്ന് സെൽഫി എടുക്കുകയായിരുന്ന യുവാവു മണൽത്തിട്ടയിടിഞ്ഞു ഒഴുക്കിൽപ്പെട്ടു മരണപ്പെട്ടിരുന്നു. പുഴയിൽ ഇറങ്ങുന്നതിനെതിരെ മുന്നറിയിപ്പു ബോർഡുകൾ സ്ഥാപിക്കാൻ ജില്ലാ ദുരന്തനിവാരണസമിതി ശിപാർശ ചെയ്യാറുണ്ടെങ്കിലും പല തദ്ദേശ സ്വയംഭരണസ്ഥാപനങ്ങളും പാലിക്കാറില്ല. മലയോരത്തെ പ്രധാന വെള്ളച്ചാട്ടങ്ങൾ ഇപ്പോൾ ജലസമൃദ്ധമാണ്. കാപ്പിമല, ഏഴരക്കുണ്ട്, കാഞ്ഞിര ക്കൊല്ലി എന്നിവിടങ്ങളിലും സഞ്ചാരികൾ ധാരാളമായെത്തുന്നുണ്ട്. തൂക്കുപാലത്തിന്‍റെ അരികിൽ സംരക്ഷണത്തിനായി തീർത്തിരിക്കുന്ന ഗ്രില്ലുകൾ പല സ്ഥലത്തും ദ്രവിച്ചിട്ടുണ്ട്. കുട്ടികൾ ഉൾപ്പെടെ പുഴയിലേക്ക് വീഴാനും സാധ്യത ഏറെയാണ്. വർഷങ്ങൾക്കുമുമ്പ് നിർമിച്ച തൂക്കുപാലത്തിന്‍റെ സംരക്ഷണ പ്രവർത്തനങ്ങൾ അത്യാവശ്യമായി നടത്തണമെന്ന് നാട്ടുകാർ ആവശ്യപ്പെടുന്നു. കൂടുതൽ കാഴ്ചക്കാർ ഒരേ സമയം പാലത്തിൽ കയറുന്നത് പാലത്തിന്‍റെ സുരക്ഷയ്ക്ക് ഭീഷണിയാകുകയാണ്. കൂടാതെ യാത്രികർക്ക് ബുദ്ധിമുട്ടു സൃഷ്ടിക്കുകയും ചെയ്യുന്നു. ഇതിനെതിരെ നാട്ടുകാർ മുന്നറിയിപ്പു നൽകുന്നുണ്ടെങ്കിലും പലരും ഇത് അവഗണിക്കുന്നതായാണ് ആക്ഷേപമുയരുന്നത്. പാലത്തിലെയും സമീപത്തെയും പ്രവേശനം നിയന്തിക്കണമെന്നും മുന്നറിയിപ്പു ബോർഡുകൾ സ്ഥാപിക്കണമെന്നും പോലീസ്, പഞ്ചായത്ത് വകുപ്പുകളോട് നാട്ടുകാർ ആവശ്യപ്പെടുന്നു.

തൈകൾ വിതരണം ചെയ്തു

ചെറുപുഴ: ജില്ലാ പഞ്ചായത്തിന്‍റെ ഓണത്തിനൊരുകൊട്ടപ്പൂവ് പദ്ധതിയുടെ ഭാഗമായി ചെറുപുഴ കൃഷിഭവന്‍റെ നേതൃത്വത്തിൽ 18 ജെഎൽജി ഗ്രൂപ്പുകൾക്ക് ചെണ്ടുമല്ലി തൈകളും വാടാർമല്ലി തൈകളും വിതരണം ചെയ്തു. സിഡിഎസ് ചെയർപേഴ്സൺ കെ.വി. സുനിത കുമാരി വിതരണോദ്ഘാടനം നിർവഹിച്ചു. കൃഷി ഓഫീസർ പി. അഞ്ജു അധ്യക്ഷത വഹിച്ചു. അസിസ്റ്റന്‍റ് കൃഷി ഓഫീസർ പി. ഗീത, കൃഷി അസിസ്റ്റന്‍റ് സുരേഷ് കുറ്റൂർ എന്നിവർ പ്രസംഗിച്ചു. ഇരിക്കൂർ: ഇരിക്കൂർ പഞ്ചായത്ത് കൃഷിഭവൻ മുഖേന കുടുംബശ്രീ ജെഎൽജി ഗ്രൂപ്പുകൾക്ക് നല്കുന്ന ചെണ്ടുമല്ലി വാടാമല്ലി തൈകളുടെ വിതരണോദ്ഘാടനം പഞ്ചായത്ത് പ്രസിഡന്‍റ് ടി.പി. ഫാത്തിമ നിർവഹിച്ചു. ആരോഗ്യ വിദ്യാഭ്യാസ ചെയർ പേഴ്സൺ എൻ.കെ. സുലൈഖ അധ്യക്ഷത വഹിച്ചു. കൃഷി ഓഫീസർ പി. നീതു, പഞ്ചായത്തംഗം എം.പി. ഷബ്‌നം, സി ഡി എസ് ചെയർപേഴ്സൺ ടി. പി. ജുനൈദ എന്നിവർ പ്രസംഗിച്ചു.

ശ്രീകണ്ഠപുരം-നടുവിൽ റോഡ് നിർമാണം വേഗത്തിലാക്കണം: സജീവ് ജോസഫ് എംഎൽഎ

ചെമ്പന്തൊട്ടി: ശ്രീകണ്ഠപുരം-നടുവിൽ റോഡ് പണി വേഗത്തിലാക്കി ജനങ്ങളുടെ യാത്രാക്ലേശം പരിഹരിക്കാൻ അടിയന്തര നടപടി സ്വീകരിക്കണമെന്ന് സജീവ് ജോസഫ് എംഎൽഎ ഉദ്യോഗസ്ഥർക്കും കോൺട്രാക്ടർക്കും നിർദേശം നൽകി. പ്രസ്തുത റോഡിന്‍റെ നിർമാണവുമായി ബന്ധപ്പെട്ട അവലോകന യോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പള്ളം പാലത്തിന്‍റെ അപ്രോച്ച് റോഡ് പണി വേഗത്തിലാക്കാനും കൊക്കായി പാലം സമാന്തര റോഡ് കോൺക്രീറ്റ് ചെയ്ത് ഉടൻ ഗതാഗതയോഗ്യമാക്കാനും കൊട്ടൂർവയൽ ഭാഗത്തെ യാത്രാക്ലേശം പരിഹരിക്കാനും എംഎൽഎ നിർദേശിച്ചു. കൊക്കായി ബൈപാസ് റോഡും പള്ളം-കട്ടായി, ചെമ്പന്തൊട്ടി-കട്ടായി, നെടിയങ്ങ-കട്ടായി, നെടിയങ്ങ എകെജി, സ്വാമിമഠം സർവീസ് റോഡുകൾ ഉടൻ ഗതാഗതയോഗ്യമാക്കാനും ചെമ്പന്തൊട്ടി ടൗണിൽ പൂർണമായി സ്ലാബുകളിട്ട് ഡ്രെയ്നേജിന്‍റെ പണി പൂർത്തീകരിക്കാനും കരയത്തുംചാൽ റോഡ് ആരംഭത്തിലെ ഇരുവശത്തെയും പണികൾ പൂർത്തിയാക്കാനും കമ്മിറ്റി നിർദേശിച്ചു. നഗരസഭാധ്യക്ഷ കെ.വി. ഫിലോമിന അധ്യക്ഷത വഹിച്ചു. ഫാ. ആന്‍റണി മഞ്ഞളാംകുന്നേൽ, നഗരസഭ സ്ഥിരംസമിതി അധ്യക്ഷന്മാരായ ജോസഫീന വർഗീസ്, കെ.സി. ജോസഫ്, കൗൺസിലർമാരായ കെ.ജെ. ചാക്കോ കൊന്നയ്ക്കൽ, കെ.വി. കുഞ്ഞിരാമൻ, എക്സിക്യുട്ടീവ് എൻജിനിയർ സജിത്ത്, ടി.കെ. പ്രകാശൻ, ജിയോ ജേക്കബ്, വർഗീസ് വയലാമണ്ണിൽ, കെ.എം. ഷംസീർ, ബിനു ഇലവുങ്കൽ, ബെന്നറ്റ് വട്ടക്കുഴി, ജോർജ് ആലപ്പാട്, ജോണി പെരുമ്പള്ളിൽ, ആർ. ശശിധരൻ, ജോസ് മാളക്കാരൻ, ഇരിക്കൂർ കൺസ്ട്രക്‌ഷൻ കമ്പനി പ്രതിനിധികളായ ശിഹാബ്, ശ്രീജേഷ് എന്നിവർ പ്രസംഗിച്ചു.

വായന ദിനാചരണം നടത്തി

പയ്യാവൂർ: മടമ്പം പികെഎം കോളജ് ഓഫ് എഡ്യുക്കേഷൻ ലൈബ്രറി, എൻഎസ്എസ്, ഇംഗ്ലീഷ് വിഭാഗം, ഇന്‍റേണൽ ക്വാളിറ്റി അഷ്വറൻസ് സെൽ എന്നിവ സംയുക്തമായി വായന ദിനാചരണം നടത്തി. കോളജ് ഹാളിൽ നടന്ന സമ്മേളനം വൈസ് പ്രിൻസിപ്പൽ ഡോ. പ്രശാന്ത് മാത്യു ഉദ്ഘാടനം ചെയ്തു. ലൈബ്രേറിയൻ ദീപാ ജോൺ ആമുഖപ്രഭാഷണം നടത്തി. ഫിസിക്കൽ എഡ്യുക്കേഷൻ വിഭാഗം മേധാവി ഡോ. സിനോജ് ജോസഫ്, ഇംഗ്ലീഷ് വിഭാഗം മേധാവി ഡോ. ജിഷ ജയിംസ് എന്നിവർ വായന ദിന സന്ദേശം നൽകി. കോളജ് യൂണിയൻ ചെയർമാൻ അമിൻ മാത്യു പ്രസംഗിച്ചു. ഏറ്റവും കൂടുതൽ സമയം കോളജ് ലൈബ്രറി ഉപയോഗിച്ച വിദ്യാർഥിയെ വൈസ് പ്രിൻസിപ്പൽ അനുമോദിച്ചു. 25 വരെ നടത്തപ്പെടുന്ന വായന വാരാചരണത്തിൽ സമീപപ്രദേശങ്ങളിലെ സ്കൂൾ വിദ്യാർഥികൾക്ക് ലൈബ്രറി പരിചയപ്പെടുത്തൽ, പുസ്തക പ്രദർശനം, ബുക്ക് ഡൊണേഷൻ തുടങ്ങി വിവിധ പരിപാടികൾ നടത്തും. ഇതിന്‍റെ ആദ്യഘട്ടമായി പികെഎം കോളജിലെ അധ്യാപകർ, വിദ്യാർഥികൾ എന്നിവരിൽ നിന്ന് സമാഹരിച്ച നൂറ്റമ്പതോളം പുസ്തകങ്ങൾ കാഞ്ഞിലേരി എഎൽപി സ്കൂളിന് കൈമാറി. കോളജ് ഫിസിക്കൽ എഡ്യുക്കേഷൻ വിഭാഗം മേധാവി ഡോ. സിനോജ് ജോസഫ്, കോളജ് ലൈബ്രേറിയൻ ദീപാ ജോൺ, ഇംഗ്ലീഷ് വിഭാഗം അധ്യാപിക ഡോ. ജിഷ ജയിംസ്, കോളജ് വിദ്യാർഥികൾ എന്നിവർ ചടങ്ങിൽ പങ്കെടുത്തു. സ്കൂൾ മുഖ്യാധ്യാപകൻ സി.പി. ചന്ദ്രൻ പ്രസംഗിച്ചു. വായാട്ടുപറമ്പ്: വായാട്ടുപറമ്പ് സെന്‍റ് ജോസഫ്സ് യുപി സ്കൂളിൽ വായന ദിനം ആചരിച്ചു. വിദ്യാർഥികൾക്കായി വിവിധ മത്സരങ്ങൾ സംഘടിപ്പിച്ചു. സ്പെഷൽ സ്കൂൾ അസംബ്ലിയിലേക്ക് പുസ്തക താലപ്പൊലിയേന്തിയ വിദ്യാർഥികൾ റാലിയായി കടന്നുവന്നതോടെ വായനദിനാഘോഷത്തിന് തുടക്കം കുറിച്ചു. അധ്യാപകരായ രാഖി, മിനു എന്നിവർ നേതൃത്വം നൽകി. രയറോം: രയറോം ഗവ. ഹൈസ്കൂളിൽ വായന ദിന-മാസാചരണവും വിവിധ ക്ലബുകളുടെ ഉദ്ഘാടനവും ജില്ലാ പഞ്ചായത്തംഗം തോമസ് വെക്കത്താനം നിർവഹിച്ചു. പി.കെ. ഹനീഫ അധ്യക്ഷത വഹിച്ചു. പി.ടി. സുരേഷ് ബാബു മുഖ്യാതിഥിയായിരുന്നു. കണ്ണൂർ: അസോസിയേഷൻ ഓഫ് ഓർഫനേജസ് ആൻഡ് ചാരിറ്റബിൾ ഇൻസ്റ്റിറ്റ്യൂഷൻസ് കണ്ണൂർ ജില്ലാ കമ്മിറ്റിയുടെ ആഭിമുഖ്യത്തിൽ വായന ദിനം ആചരിച്ചു. ജില്ലയിൽ അനാഥാലയങ്ങളിലെ വിദ്യാർഥികൾക്കുള്ള പുസ്തകങ്ങൾ സംസ്ഥാന ജനറൽ സെക്രട്ടറി പി.വി. സൈനുദ്ദീൻ ജില്ലാ ഭാരവാഹികൾക്ക് കൈമാറി ഉദ്ഘാടനം നിർവഹിച്ചു. ജില്ലാ പ്രസിഡന്‍റ് ബ്രദർ സജി അധ്യക്ഷത വഹിച്ചു. ജില്ലാ സെക്രട്ടറി സി.എച്ച്. മൊയ്തു ഹാജി ആമുഖപ്രഭാഷണം നടത്തി. ടി.എ. തങ്ങൾ, സിസ്റ്റർ വിനീത, കെ.കെ.അഹമ്മദ് ഹാജി, കെ. മോഹനൻ, കെ.എൻ. മുസ്തഫ, എം. അസൈനാർ ഹാജി, സി. സമീർ, സിസ്റ്റർ ഡെയ്സി, സി. രൂപേഷ്, ഡോ. താജുദ്ദീൻ വാഫി, സിസ്റ്റർ ഡിന, എസ്.എ.പി. ആസാദ്, ഷമീമ ഇസ്‌ലാഹിയ എന്നിവർ പ്രസംഗിച്ചു.

തീരദേശ സംരക്ഷണ സമരത്തിന് കെസിവൈഎം ഐക്യദാർഢ്യം

പിലാത്തറ: പുത്തന്‍തോട് മുതല്‍ വടക്കോട്ട് പശ്ചിമ കൊച്ചി വരെയുള്ള തീരദേശ ജനത അനുഭവിക്കുന്ന കടലാക്രമണത്തിന് ശാശ്വത പരിഹാരം ആവശ്യപ്പെട്ട് നടത്തുന്ന ജനകീയ സമരത്തിന് കെസിവൈഎം കണ്ണൂര്‍ രൂപത ഐക്യദാർഢ്യം പ്രഖ്യാപിച്ചു. പിലാത്തറ സെന്‍റ് ജോസഫ്‌സ് കോളജില്‍ നടന്ന ഐക്യദാർഢ്യ സദസ് കെസിവൈഎം കണ്ണൂര്‍ രൂപത ഡയറക്ടര്‍ ഫാ. ജസ്റ്റിന്‍ എടത്തില്‍ ഉദ്ഘാടനം ചെയ്തു. കെസിവൈഎം കണ്ണൂര്‍ രൂപത പ്രസിഡന്‍റ് ഫെബിന ഫെലിക്‌സ് അധ്യക്ഷത വഹിച്ചു. പുത്തന്‍തോട് മുതല്‍ ഫോര്‍ട്ടുകൊച്ചി വരെയുള്ള രണ്ടാംഘട്ട ടെട്രാപോഡ് കടൽഭിത്തി നിർമാണം യുദ്ധകാലാടിസ്ഥാനത്തില്‍ പൂര്‍ത്തിയാക്കി തീരദേശ ജനതയ്ക്ക് ജനിച്ചുവളര്‍ന്ന മണ്ണില്‍ കടലാക്രമണഭീതി കൂടാതെ ജീവിക്കുവാനുള്ള സാഹചര്യമൊരുക്കുന്നതിനൊപ്പം ദുരിതബാധിതര്‍ക്ക് അര്‍ഹമായ നഷ്ടപരിഹാരം നല്‍കണമെന്നും ഐക്യദാര്‍ഢ്യ സദസ് സര്‍ക്കാരിനോട് ആവശ്യപ്പെട്ടു.

ഒരാഴ്ചയ്ക്കിടെ കണ്ണൂരിൽ 2.49 കോടിയുടെ കൃഷിനാശം

കണ്ണൂർ: കാലവർഷം ശക്തിപ്രാപിച്ചതോടെ ജില്ലയിൽ കഴിഞ്ഞ ഒരാഴ്ചയ്ക്കിടെയുണ്ടായത് 2.49 കോടിയുടെ കൃഷിനാശം. ഈമാസം 12 മുതൽ ഇന്നലെ വരെയുള്ള കണക്കനുസരിച്ച് 2,49, 00,000 രൂപയുടെ നഷ്ടമാണ് ഉണ്ടായത്. മലയോര മേഖലയിലാണ് കൂടുതലായും നാശം. 23.21 ഹെക്ടർ കൃഷിയാണ് കനത്തമഴയിൽ നശിച്ചത്. 1984 കർഷകർക്കാണ് നഷ്ടം സംഭവിച്ചത്. വാഴ, തെങ്ങ്, റബർ, കശുമാവ്, കവുങ്ങ്, കൊക്കൊ, ജാതി, പച്ചക്കറികൾ എന്നിവയാണ് മഴയിൽ നശിച്ചത്. വാഴക്കൃഷിയാണ് കൂടുതലും നശിച്ചത്. 21835 വാഴകൾ നശിച്ചതായാണ് കണക്ക്. ഓണം വിപണി ലക്ഷ്യമിട്ട് നടത്തിയ വാഴക്കൃഷിയാണ് നശിച്ചത്. ഇരിട്ടി, ഇരിക്കൂർ, പേരാവൂർ, തളിപ്പറമ്പ്, ആലക്കോട്, പയ്യന്നൂർ, എടക്കാട്, തലശേരി, പാനൂർ, കുത്തുപറന്പ് എന്നിവിടങ്ങളിലാണ് കൂടുതൽ നാശം റിപ്പോർട്ട് ചെയ്തിരിക്കുന്നത്. വെള്ളക്കെട്ട് മൂലവും പല സ്ഥലങ്ങളിലും കൃഷിനാശം സംഭവിച്ചിട്ടുണ്ട്. മലയോര മേഖലയായ ഇരിക്കൂർ, ഇരിട്ടി, പേരാവൂർ, തളിപ്പറന്പ് എന്നിവിടങ്ങളിൽ റബർ, തെങ്ങ്, കൊക്കോ, കവുങ്ങ് എന്നിവയ്ക്കാണ് വ്യാപനാശമുണ്ടാത്. മഴയ്ക്കൊപ്പം വീശിയടിക്കുന്ന കാറ്റാണ് കൃഷിനാശത്തിന് ഇടയാക്കന്നതെന്ന് അധികൃതർ പറഞ്ഞു.

കോഴിഫാമിനു നേരെ തെരുവുനായ ആക്രമണം; 50 കോഴികളെ കൊന്നു

കാസർഗോഡ്: മധൂർ പട്ള ചെന്നിക്കൂടലിൽ നാടൻ കോഴി വളർത്തുകേന്ദ്രത്തിനു നേരെ തെരുവുനായ്ക്കളുടെ ആക്രമണം. പ്രത്യുത്പാദനത്തിനായി വളർത്തിയെടുത്ത മികച്ച ഇനത്തിൽപ്പെട്ട ആറു പൂവൻ കോഴികളുൾപ്പെടെ 50ഓളം കോഴികളെ കൊന്നൊടുക്കി. അപകടം മൂലം അംഗപരിമിതി സംഭവിച്ച ചെങ്കള നെല്ലിക്കട്ടയിലെ സഫ്‌വാൻ സ്വയംതൊഴിൽ സംരംഭമായി തുടങ്ങിയ കോഴിവളർത്തൽ കേന്ദ്രമാണ് തകർക്കപ്പെട്ടത്. വ്യാഴാഴ്ച വൈകുന്നേരം കോഴികൾക്ക് തീറ്റയും വെള്ളവും കൊടുത്ത് കൂട് അടച്ചതായിരുന്നു. ഇന്നലെ പുലർച്ചെ 5.30ഓടെ കോഴികളുടെ കരച്ചിലും ബഹളവും കേട്ട് സമീപവാസികൾ വന്ന് നോക്കിയപ്പോഴാണ് തെരുവുനായ്ക്കൾ കോഴിക്കൂടിന്‍റെ വലയും വാതിലും തകർത്ത് കോഴികളെ കടിച്ചുകുടയുന്നതു കണ്ടത്. ഇവർ വടിയെടുത്ത് നായ്ക്കളെ ഓടിച്ചാണ് ബാക്കിയുള്ള കോഴികളെ രക്ഷിച്ചത്. അര ലക്ഷത്തിലധികം രൂപയുടെ നഷ്ടം സംഭവിച്ചതായി സഫ്വാൻ പറഞ്ഞു. ഇലക്ട്രീഷ്യനായിരുന്ന സഫ്‌വാൻ ഒരു വർഷം മുമ്പ് കട്ടർ മെഷീൻ തട്ടി ഇരുകൈകൾക്കും ഗുരുതരമായി പരിക്കേറ്റതിനെ തുടർന്ന് ദീർഘനാൾ ചികിത്സയിലായിരുന്നു. 25 ലക്ഷം രൂപയോളം ചെലവഴിച്ച് നടത്തിയ ചികിത്സയ്ക്കു ശേഷമാണ് ജീവിതത്തിലേക്ക് തിരികെ വന്നത്. ഇതിനു ശേഷമാണ് സ്വയംതൊഴിൽ സംരംഭമായി നാടൻ കോഴിവളർത്തുകേന്ദ്രം തുടങ്ങിയത്. സർക്കാരിന്‍റെ സബ്സിഡിയോടെ ഫാം വിപുലീകരിക്കാനുള്ള ശ്രമങ്ങൾ നടത്തുന്നതിനിടയിലാണ് തെരുവുനായ്ക്കളുടെ ആക്രമണത്തിൽ കനത്ത നഷ്ടം സംഭവിച്ചത്.

നാട് ആഘോഷത്തിരക്കിലാണ്; ഡോ. അസ്നയ്ക്ക് കല്യാണമായി

കൂത്തുപറമ്പ്: പുതുജീവിതത്തിലേക്കുള്ള ഒരുക്കത്തിലാണ് ചെറുവാഞ്ചേരിയിലെ ഡോ. അസ്ന. അടുത്ത മാസം അഞ്ചിന് വീട്ടുമുറ്റത്ത് ഉയരുന്ന പന്തലിൽ അസ്നയെ ആലക്കോട് സ്വദേശിയും ഷാർജയിൽ എൻജിനിയറുമായ നിഖിൽ താലി കെട്ടും. വിവാഹം ആഘോഷമാക്കാനുള്ള ഒരുക്കത്തിലാണ് അസ്നയുടെ വീട്ടുകാരും നാടൊന്നാകെയും. ‌ ആരും മറന്നു കാണില്ല, ചെറുവാഞ്ചേരി പൂവത്തൂരിലെ തരശിപറമ്പത്ത് വീട്ടിൽ അസ്നയെ. കണ്ണൂരിലെ അക്രമ രാഷ്‌‌ട്രീയത്തിന് ഇരയായവൾ. 2000 സെപ്റ്റംബർ 27 ന് നടന്ന പഞ്ചായത്ത് തെരഞ്ഞെടുപ്പിനിടെയുണ്ടായ രാഷ്‌‌ട്രീയ സംഘർഷത്തിനിടെ എറിഞ്ഞ ബോംബുകളിൽ ഒന്ന് വന്ന് പതിച്ചത് വീട്ടുമുറ്റത്ത് കളിക്കുകയായിരുന്ന അസ്നയ്ക്ക് നേരെ. അമ്മശാന്തയ്ക്കും സഹോദരനും പരിക്കേറ്റു. അന്ന് അസ്നക്ക് പ്രായം മൂന്ന് വയസ്. ബോംബേറിൽ അസ്നയുടെ വലതുകാലിന് ഗുരുതരമായി പരിക്കേറ്റു. ചികിത്സയ്ക്കിടെ മുട്ടിനു കീഴെ വച്ച് കാൽ മുറിച്ചുമാറ്റി. പിന്നീട് കൃത്രിമ കാലുമായി വിധിക്ക് മുന്നിൽ പകച്ചു നിൽക്കാതെ നിശ്ചയദാർഢ്യത്തോടെ അസ്ന വിജയത്തിന്‍റെ പടികൾ ഓരോന്നായി ചവിട്ടിക്കയറി. കോഴിക്കോട് മെഡിക്കൽ കോളജിൽനിന്നും 2013ൽ എംബിബിഎസ് നേടി. ഇതിനിടെ സ്വന്തം പഞ്ചായത്തിലെ ആരോഗ്യ കേന്ദ്രത്തിലും ഡോക്ടറായി സേവനം അനുഷ്ഠിച്ചു. ഇപ്പോൾ വടകരയിലെ ക്ലിനിക്കിൽ ഡോക്ടറാണ് അസ്‌ന. അമ്മ ശാന്തയ്ക്കും സഹോദരൻ ആനന്ദിനും ഒപ്പമാണ് അസ്‌നയുടെ താമസം. ആലക്കോട് അരങ്ങം വാഴയിൽ വീട്ടിൽ വി.കെ.നാരായണൻ - ലീന ദമ്പതികളുടെ മകനാണ് വരൻ നിഖിൽ.

പത്തിടങ്ങളിൽ കാട്ടാനയിറങ്ങി

ഇരിട്ടി: ആറളം പുനരധിവാസ മേഖലയിൽ വ്യാഴാഴ്ച രാത്രിയും ഇന്നലെ പുലർച്ചെയുമായി ആന ഇറങ്ങിയത് പത്തിടങ്ങളിൽ. പലരുടെയും വീട്ടുമുറ്റത്ത് കൊന്പനാന മണിക്കൂറുകളോളം ചെലവഴിച്ചു. ഇതോടെ, പലർക്കും ഉറക്കമില്ലാത്ത രാത്രികളായിമാറി. ബ്ലോക്ക് ഒൻപതിലെ കാളിക്കയത്തിൽ അശോകന്‍റെ വീടിന്‍റെ മുറ്റത്ത് എത്തിയ കൊമ്പൻ ഭീതിവിതച്ചത് അരമണിക്കൂറോളം. ഇന്നലെ പുലർച്ചെ 1.30 തോടെ വീട്ടുമുറ്റത്ത് എത്തിയ കൊമ്പൻ മുറ്റത്തെ പ്ലാവിൽനിന്നും ചക്ക പറിച്ച് തിന്ന ശേഷം അവിടെത്തന്നെ നിലയുറപ്പിക്കുകയായിരുന്നു. ആർആർടി എത്തി തുരത്തിയപ്പോഴാണ് ആന വീട്ടുമുറ്റത്തുനിന്നും പിന്മാറിയത്. ചക്ക വീഴുന്ന ശബ്ദം കേട്ട് ഉണർന്ന അശോകനും കുടുംബവും ഭീതിയോടെയാണ് വീട്ടിൽ ചെലവഴിച്ചത്. ബ്ലോക്ക് 13 ലേക്ക് വഴിയില്ല, ആർആർടി വാഹനങ്ങൾ താഴുന്നു പുനരധിവാസ മേഖലയിൽ ഏറ്റവും കൂടുതൽ കാട്ടാന ശല്യം നിലനിൽക്കുന്ന പ്രദേശമാണ് ബ്ലോക്ക് 13/55. ഇവിടേക്കുള്ള റോഡ് ടാർ ചെയ്യണമെന്ന ആവശ്യത്തിന് പുനരാധവാസത്തിന്‍റെ അത്രയും പഴക്കമുണ്ട്. മാറിമാറി വരുന്ന സർക്കാരുകൾ തങ്ങളെ അവഗണിക്കുകയാണെന്നാണ് പ്രദേശവാസികൾ പറയുന്നത്. മൂന്നുകിലോമീറ്ററിൽ അധികം വരുന്ന മൺറോഡ് ഇപ്പോൾ കാൽനട യാത്രക്കാർക്ക് പോലും ഉപയോഗിക്കാൻ കഴിയാത്ത സാഹചര്യമാണ്. ആനയുണ്ടെന്ന വിവരത്തെ തുടർന്ന് എത്തിയ ആർആർടിയുടെ രണ്ടു വാഹനവും ചെളിയിൽ താഴ്ന്നിരുന്നു. മണിക്കൂറുകൾ എടുത്താണ് വാഹനം വെളിയിൽ എടുത്തത്. റോഡിനായി ലക്ഷങ്ങൾ പാസായിട്ടുണ്ടെന്ന വാഗ്ദാനം മാത്രമാണ് ഇവർക്ക് ലഭിക്കുന്നത്. അടിയന്തര ആശുപത്രി ആവശ്യങ്ങൾക്ക് പോലും ജനങ്ങൾക്ക് വെളിയിൽ എത്താൻ മഴക്കാലമായാൽ ഈ വഴിയിലൂടെ സാധിക്കുന്നില്ല. പുനരധിവാസ മേഖലയിൽ വഴിവിളക്കുകൾ സ്ഥാപിക്കാൻ പോലീസിനെ ഉപയോഗിച്ച് കണക്കെടുപ്പുകൾ നടത്തിയെങ്കിലും നടപടികളായില്ല. അടിക്കാടുകൾ വെട്ടിത്തെളിക്കണം എന്ന ഉത്തരവ് പണമില്ലെന്ന പേരിൽ ഫയലിൽ ഉറങ്ങുന്നു. മാസത്തിൽ ഒരിക്കൽ നടക്കുന്ന അവലോകന യോഗം മിനിട്സിൽ ഒതുങ്ങുന്ന പ്രഹസനങ്ങൾ മാത്രമായി തീരുന്നു.

ഫ്രഷ് ജ്യൂസില്‍ ചത്ത കൂറ!

പയ്യന്നൂര്‍: പയ്യന്നൂരിലെ ഹോട്ടലില്‍ നിന്നും പാര്‍സലായി എത്തിച്ച ഫ്രഷ് ജ്യൂസില്‍ ചത്ത കൂറയെന്ന് പരാതി. എടാട്ട് സ്വദേശിനിയായ യുവതി പയ്യന്നൂര്‍ പോലീസിലും നഗരസഭ അധികൃതര്‍ക്കുമാണ് പരാതി നല്‍കിയത്. വ്യാഴാഴ്ച വൈകുന്നേരം ആറേമുക്കാലോടെ നഗരസഭാ കാര്യാലയത്തിന് സമീപത്തെ ഹോട്ടലിലാണ് പരാതിക്കാസ്പദമായ സംഭവം. പരാതിക്കാരി വീട്ടിലേക്കുള്ള പാര്‍സലായി ഓര്‍ഡര്‍ നല്‍കിയ പീസ് മസാല, ഫ്രഷ് ലൈം ജ്യൂസ്, വട ചട്ണി എന്നീ ഭക്ഷണ സാധനങ്ങള്‍ രാത്രി എഴരയോടെ ഡോര്‍ ഡെലിവറിയായി വീട്ടിലെത്തി ച്ചിരുന്നു. എഴേമുക്കാലോടെ കഴിക്കാന്‍ നേരത്താണ് കുട്ടിക്ക് കൊടുത്ത ഫ്രഷ് ലൈം ജ്യൂസില്‍ ചത്തകൂറയെ കണ്ടെത്തിയത്.

വനിതാ പോലീസിനെ ആക്രമിച്ച യുവതി അറസ്റ്റിൽ

കണ്ണൂർ: അക്രമം തടയാനെത്തിയ വനിതാ പോലീസിനെ മർദിച്ച സംഭവത്തിൽ യുവതി അറസ്റ്റിൽ. വടക്കുമ്പാട് സ്വദേശിനി റസീനയെയാണ് ധർമടം പോലീസ് അറസ്റ്റ് ചെയ്തത്. നിരവധി കേസുകളിൽ പ്രതിയായ റസീന അമ്മ യെയും സഹോദരിയേയും ആക്രമിക്കുന്നതായി സ്റ്റേഷനിൽ ലഭിച്ച വിവരത്തിന്‍റെ അടിസ്ഥാനത്തിലാണ് പോലീസ് സംഘം സ്ഥലത്തെത്തിയത്. വീട്ടിലേക്ക് അതിക്രമിച്ച് എത്തിയ റസീന അമ്മയോട് പണം ആവശ്യപ്പെടുകയായിരുന്നു. പണം നൽകാത്തതിനെ തുടർന്നാണ് റസീന ആക്രമിച്ചത്. സഹോദരിയുടെ മകളെ അടിക്കുന്നത് കണ്ട് അതു തടയാൻ ശ്രമിച്ച വനിതാ പോലീസിനെ തള്ളി താഴെയിടുകയായിരുന്നു. വീടിന്‍റെ ജനലും വീട്ടുമുറ്റത്ത് നിർത്തിയിട്ട കാറിന്‍റെ ഗ്ലാസും അടിച്ചുതകർത്തു. പ്രതിയെ റിമാൻഡ് ചെയ്തു.

യുവതിയുടെ ആത്മഹത്യയ്ക്ക് കാരണം സദാചാര ഗുണ്ടായിസം: കമ്മീഷണർ

കണ്ണൂർ: കായലോട് പറന്പായിയിൽ റസീന മൻസിലിൽ റസീന ആത്മഹത്യ ചെയ്യാൻ കാരണമായത് സദാചാര ഗുണ്ടായിസമെന്നും തെളിവുകളുടെ അടിസ്ഥാനത്തിലാണ് പ്രതികളെ അറസ്റ്റ് ചെയ്തതെന്നും കണ്ണൂർ സിറ്റി പോലീസ് കമ്മീഷണർ പി. നിധിൻരാജ്. മകളുടെ മരണത്തിൽ പോലീസ് അറസ്റ്റിലായവർ നിരപരാധികളാണെന്ന റസീനയുടെ മാതാവ് ഫാത്തിമ പറഞ്ഞതിനു പിന്നാലെയാണ് സിറ്റി പോലീസ് കമ്മീഷണർ ഇക്കാര്യം വ്യക്തമാക്കിയത്. യുവതിയുടെ ആത്മഹത്യാക്കുറിപ്പ് പോലീസിന് ലഭിച്ചിരുന്നു. ഇതിലെ തെളിവുകളുടെ അടിസ്ഥാനത്തിലാണ് എസ്ഡിപിഐ പ്രവർത്തകരെ അറസ്റ്റ് ചെയ്തത്. സുഹൃത്തുമായി സംസാരിച്ചുനിൽക്കുന്നതിനിടെയാണ് ഒരു സംഘം ഇരുവർക്കുമെതിരെ ഭീഷണി മുഴക്കിയത്. ഇരുവരുടെയും കൈകളിൽനിന്ന് മൊബൈൽ ഫോൺ ഈ സംഘം തട്ടിയെടുക്കുകയും ചെയ്തു. ഈ ഫോണുകൾ അറസ്റ്റിലായവരിൽനിന്നും പോലീസ് പിടിച്ചെടുത്തിട്ടുണ്ട്. അറസ്റ്റിലായ ഒരാൾ മരിച്ച റസീനയുടെ ബന്ധുകൂടിയാണ്. സംഭവത്തിൽ കൂടുതൽ പ്രതികൾ ഉണ്ടോ എന്ന കാര്യം അന്വേഷിച്ചുവരികയാണ്. യുവതിയുടെ സുഹൃത്തായ യുവാവ് കേസിൽ പ്രതിയല്ലെന്നും ഇയാളെ കണ്ടെത്താനായിട്ടില്ലെന്നും സിറ്റി കമ്മീഷണർ നിധിൻ രാജ് പറഞ്ഞു.

ഭീതിയകറ്റാൻ തദ്ദേശ സ്ഥാപനങ്ങൾ അടിയന്തരമായി ഇടപെടാൻ നിർദേശം

കണ്ണൂർ: കണ്ണൂർ നഗരത്തിലെ തെരുവുനായ ശല്യം ഒഴിവാക്കുന്നതിനും ജനങ്ങളുടെ ഭീതി അകറ്റുന്നതിനും കണ്ണൂർ കോർപറേഷൻ, ജില്ലാ പഞ്ചായത്ത് എന്നീ തദ്ദേശസ്ഥാപനങ്ങൾ അടിയന്തിര ഇടപെടലുകൾ നടത്തണമെന്ന് മന്ത്രി കടന്നപ്പള്ളി രാമചന്ദ്രൻ നിർദേശിച്ചു. നിരവധി പേർക്ക് കടിയേറ്റ സാഹചര്യം കണ്ണൂർ നഗരത്തിൽ അടിയന്തര സാഹചര്യമാണ് സൃഷ്ടിച്ചിരിക്കുന്നതെന്ന് മന്ത്രിയുടെ അധ്യക്ഷതയിൽ ചേർന്ന യോഗം വിലയിരുത്തി. ജനങ്ങളുടെ ആശങ്ക അകറ്റുകയാണ് പ്രധാനം. അതിനായി തെരുവുനായകൾക്ക് ഷെൽട്ടർ ഹോമുകൾ ഒരുക്കുന്ന കാര്യത്തിൽ ജില്ലാതലത്തിൽ അടിയന്തര നടപടി കൈക്കൊളളണമെന്ന് കെ.വി സുമേഷ് എംഎൽഎ നിർദേശിച്ചു. തെരുവുനായ വിഷയത്തിൽ ഊർജിത ഇടപെടൽ നടത്താൻ എല്ലാ തദ്ദേശ സ്ഥാപനങ്ങളും രംഗത്തിറങ്ങണമെന്ന് ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരിയും ആവശ്യപ്പെട്ടു. നായശല്യം തടയുന്നതുമായി ബന്ധപ്പെട്ട പ്രോജക്ടുകൾ വാർഷിക പദ്ധതിയിൽ തദ്ദേശസ്ഥാപനങ്ങൾ ഉൾപ്പെടുത്തണം. കന്‍റോൺമെന്‍റ് പ്രദേശത്തെ മാലിന്യകൂമ്പാരത്തിന് അടിയന്തിരമായി പരിഹാരം കാണണമെന്നും മാലിന്യം തള്ളുന്നവർക്കെതിരെ കർശന നടപടി സ്വീകരിക്കണമെന്നും കന്‍റോൺമെന്‍റ് സിഇഎയ്ക്ക് ജില്ലാ കളക്ടർ നിർദേശം നൽകി.എതെങ്കിലും തരത്തിൽ ബുദ്ധിമുട്ട് ഉണ്ടായാൽ പ്രതിരോധ പ്രവർത്തനങ്ങൾക്ക് പോലീസിന്‍റെയും ജില്ലാ ഭരണകൂടത്തിന്‍റെയും സഹായം തദ്ദേശ സ്ഥാപനങ്ങൾക്ക് തേടാമെന്ന് സിറ്റി പോലീസ് കമ്മീഷണർ നിതിൻരാജ് യോഗത്തെ അറിയിച്ചു. ഇതിനായി ജില്ലാ പോലീസ് ആസ്ഥാനത്ത് നോഡൽ ഓഫീസറെ നിയോഗിക്കുമെന്നും അദ്ദേഹം പറഞ്ഞു. തെരുവുനായ ശല്യം പരിഹരിക്കാൻ പ്രായോഗികമായി ചെയ്യാനാകുന്ന കാര്യങ്ങൾ കോർപറേഷൻ വളരെ വേഗം നടപ്പാക്കുമെന്ന് സ്റ്റാൻഡിംഗ് ചെയർമാൻ സുരേഷ് ബാബു എളയാവൂർ യോഗത്തെ അറിയിച്ചു. യോഗത്തിൽ കെ.വി. സുമേഷ് എംഎൽ എ, എഡിഎം കല ഭാസ്‌കർ, അസി. കളക്ടർ എഹ്തെദ മുഫസിർ, ഡെപ്യൂട്ടി കളക്ടർ കെ.വി. ശ്രുതി, കണ്ണൂർ കന്‍റോൺമെന്‍റ് സിഇഒ മാധവി ഭാർഗവി, കണ്ണൂർ കോർപ്റേഷൻ സെക്രട്ടറി വിനു സി. കുഞ്ഞപ്പൻ, കണ്ണൂർ റെയിൽവേ സ്റ്റേഷൻ മാനേജർ സജിത്ത് കുമാർ, എൽഎസ്ജിഡി അസി. ഡയറക്ടർ ടി.വി സുഭാഷ്, ആർസിഎച്ച് ഓഫീസർ ഡോ. അശ്വിൻ, മൃഗസംരക്ഷണ വകുപ്പ് ജില്ലാ ഓഫീസർ ഡോ.എസ് സന്തോഷ്, ശുചിത്വ മിഷൻ പ്രോഗ്രാം ഓഫീസർ എൽന ജോസഫ് എന്നിവർ യോഗത്തിൽ പങ്കെടുത്തു.

കണ്ണൂർ നഗരത്തിൽ മൂന്ന് ഷെൽട്ടർ ഹോമുകൾ ഒരുക്കും

കണ്ണൂർ: നഗരത്തിലെ തെരുവുനായ ശല്യം പരിഹരിക്കുന്നതിനായി കണ്ണൂരിൽ രണ്ടു ദിവസത്തിനകം മൂന്ന് ഷെൽട്ടർ ഹോമുകൾ സജ്ജമാക്കുമെന്ന് മന്ത്രി കടന്നപ്പള്ളി രാമചന്ദ്രൻ അറിയിച്ചു.കോർപറേഷനിൽ രണ്ടും കന്‍റോൺമെന്‍റ് പരിധിയിൽ ഒരു ഷെൽട്ടർ ഹോമും ഒരുക്കാനാണ് തീരുമാനം. നഗരത്തിൽ തെരുവുനായകൾ നിരവധി പേരെ കടിച്ചു പരിക്കേൽപ്പിച്ചതിന്‍റെ പശ്ചാത്തലത്തിൽ മന്ത്രിയുടെ അധ്യക്ഷതയിൽ കളക്ടറേറ്റ് കോൺഫറൻസ് ഹാളിൽ ചേർന്ന യോഗത്തിന് ശേഷം സംസാരിക്കുകായായിരുന്നു അദ്ദേഹം. രണ്ടു ദിവസത്തിനുള്ളിൽ മൂന്ന് ഷെൽട്ടർ ഹോമുകളും സ്ഥാപിച്ച് നഗരത്തിൽ അലഞ്ഞു തിരിയുന്ന നായ്ക്കളെ പിടികൂടി ഇവിടങ്ങളിലേക്ക് മാറ്റാനാണ് തീരുമാനം. പഞ്ചായത്ത്, കോർപറേഷൻ, കന്‍റോൺമെന്‍റ് എന്നിവയുമായും പോലീസ്, മൃഗസംരക്ഷണം, ആരോഗ്യം ഉൾപ്പെടെയുള്ള ബന്ധപ്പെട്ട വകുപ്പുകളുമായും നടത്തിയ ചർച്ചയുടെ അടിസ്ഥാനത്തിലാണ് നടപടികൾ. പടിയൂർ എബിസി കേന്ദ്രത്തിനു കീഴിലുള്ള പട്ടിപിടിത്തക്കാരുടെ സേവനം ഇതിനായി ഉപയോഗപ്പെടുത്തും. തെരുവുനായ്ക്കളെ പിടികൂടുക, ഷെൽട്ടർ ഹോമിലേക്ക് മാറ്റുക, തെരുവുനായ്ക്കളുടെ വന്ധ്യംകരണം, പ്രതിരോധ കുത്തിവയ്പ് ഉൾപ്പെടെയുള്ള പ്രവർത്തനങ്ങൾ ഏകോപിപ്പിക്കുക എന്നിവയ്ക്ക് മൃഗസംരക്ഷണ വകുപ്പിനെ ചുമതലപ്പെടുത്തി. കണ്ണൂർ നഗരസഭയിൽ അടിയന്തരമായി മൃഗഡോക്ടറുടെ സേവനം ലഭ്യമാക്കണമെന്ന് നിർദേശിച്ചിട്ടുണ്ടെന്ന് മന്ത്രി അറിയിച്ചു. മൃഗസംരക്ഷണ വകുപ്പിന് കീഴിലുള്ള പടിയൂർ എബിസി കേന്ദ്രത്തിലെ ഡോക്ടർമാരുടെ സേവനവും ലഭ്യമാക്കും. കന്‍റോൺമെന്‍റ് പരിധിയിൽ വരുന്ന ഭാഗങ്ങളിൽ അലഞ്ഞുതിരിയുന്ന ആക്രമണകാരികളായ തെരുവ് നായ്ക്കളെ പിടികൂടി അവിടെ സ്ഥാപിക്കുന്ന ഷെൽട്ടർ ഹോമിൽ പാർപ്പിക്കുന്നതിന് കന്‍റോൺമെന്‍റ് സിഇഒ ക്ക് നിർദേശം നൽകി. ദുരന്തനിവാരണ നിയമപ്രകാരം ജില്ലാ കളക്ടർക്കാണ് പ്രവർത്തനങ്ങളുടെ ഏകോപനച്ചുമതലയെന്നും മന്ത്രി പറഞ്ഞു. കഴിഞ്ഞ ദിവസം നിരവധിപേരെ കടിച്ച തെരുവുനായ മറ്റ് നായളെയും ആക്രമിച്ചിരുന്നു. രണ്ട് ആഴ്ചക്കുള്ളിൽ ഇവയും രോഗലക്ഷണങ്ങൾ പ്രകടമാക്കാൻ സാധ്യതയുണ്ടെന്ന് മൃഗസംരക്ഷണ വകുപ്പ് റിപ്പോർട്ട് നൽകിയിരുന്നു. ഇതിന്‍റെ അടിസ്ഥാനത്തിൽ തെരുവ് നായകളെ പിടികൂടി ഷെൽട്ടർ ഹോമുകളിലാക്കുന്നതിനൊപ്പം പേ വിഷ പ്രതിരോധ കുത്തിവയ്പ് നൽകാനും തീരുമാനിച്ചിട്ടുണ്ട്. പയ്യാമ്പലത്ത് തെരുവുനായയുടെ കടിയേറ്റ് പ്രതിരോധ കുത്തിവയ്പ് എടുത്ത കുട്ടി പേവിഷബാധയേറ്റ് ഗുരുതരാവസ്ഥയിലായതിനാൽ അടിയന്തര സാഹചര്യം നിലനിൽക്കുന്നുവെന്ന് ആരോഗ്യവകുപ്പും റിപ്പോർട്ട് നൽകിയിട്ടുണ്ട്. നിലവിലെ സാഹചര്യത്തിൽ നായ്ക്കൾക്ക് തെരുവിലും വഴിയോരത്തും മറ്റും ഭക്ഷണം കൊടുക്കുന്ന മൃഗസ്നേഹികൾക്ക് ഷെൽട്ടർ ഹോമുകളിൽ എത്തി അവയ്ക്ക് ഭക്ഷണം നൽകാവുന്നതാണെന്നും മന്ത്രി പറഞ്ഞു.പത്രസമ്മേളനത്തിൽ കെ.വി. സുമേഷ് എംഎൽഎ, ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരി, ജില്ലാ കളക്ടർ അരുൺ കെ. വിജയൻ, സിറ്റി പോലീസ് കമ്മീഷണർ സി. നിതിൻ രാജ് പങ്കെടുത്തു.

ഭരണഘടന വിഭാവനം ചെയ്യുന്ന കാര്യങ്ങള്‍ സാധാരണക്കാർ‌ക്ക് അനുഭവഭേദ്യമായിട്ടില്ല: ജസ്റ്റീസ് ജെ. ചെലമേശ്വര്‍

കണ്ണൂർ: ഇന്ത്യൻ ഭരണഘടന 75 വർഷം പിന്നിട്ടിട്ടും ഭരണഘടന വിഭാവനം ചെയ്യുന്ന കാര്യങ്ങള്‍ സാധാരണക്കാരയ ജനങ്ങള്‍ക്ക് ഇപ്പോഴും അനുഭവഭേദ്യമായിട്ടില്ലെന്ന് റിട്ട. ജസ്റ്റിസ് ജെ.ചെലമേശ്വര്‍. സിപിഐ ജില്ലാ സമ്മേളനത്തിന്‍റെ ഭാഗമായി സി.എച്ച്. രാഘവൻ - എം.നാരായണൻ നഗറിൽ നടന്ന ഇന്ത്യൻ ഭരണഘടന 75 വർഷങ്ങൾ എന്ന വിഷയത്തിൽ നടന്ന സെമിനാർ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. രാജ്യത്തെ സാധാരണക്കാരന്‍റെ ജീവിതം മെച്ചപ്പെടുത്താൻ ഇത്രയും വർഷങ്ങൾ പിന്നിട്ടിട്ടും നമ്മുടെ ഭരണഘടന സഹായകമായിട്ടുണ്ടോയെന്നത് സംശയമാണ്. നമ്മള്‍ ഇപ്പോഴും വര്‍ഷങ്ങള്‍ക്ക് പിറകിലെവിടെയോ തങ്ങിനില്‍ക്കുകയാണ്. ഇനിയും ഒരുപാട് മുന്നേറേണ്ടിയിരിക്കുന്നു. ശാസ്ത്ര സാങ്കേതിക രംഗത്തെല്ലാം നമ്മള്‍ വളരെയേറെ നേട്ടം കൈവരിച്ചെങ്കിലും നമ്മുടെ പോലീസ്, ജുഡീഷ്യറി മേഖലകളിലെല്ലാം സമഗ്രമായ നവീകരണം ഇനിയും ആവശ്യമുണ്ട്. പഴയ ബ്രിട്ടീഷ് ഭരണ കാലത്തിന്‍റെ ധാരാളം അംശങ്ങള്‍ ഇപ്പോഴും നമ്മുടെ സംവിധാനങ്ങളില്‍ തങ്ങി കിടക്കുന്നുണ്ട്. ഇക്കാലത്തും ഗവര്‍ണമാര്‍ ബില്ലുകള്‍ തടഞ്ഞുവയ്ക്കുന്നത് ബ്രിട്ടീഷ് കാലത്തെ അനുസ്മരിപ്പിക്കുന്നു. ആ കാലത്ത് വൈസ്രോയി ജനറല്‍മാര്‍ പല ബില്ലുകളും തടഞ്ഞുവച്ച സംഭവങ്ങളുണ്ട്. ഇന്നും അത് ആവര്‍ത്തിക്കപ്പെടുന്നു. രാജ്യത്തെ തെരഞ്ഞെടുപ്പ് രീതികളും വളരെ അപകടകരമായ ദിശയിലേക്കാണ് പോയിക്കൊണ്ടിരിക്കുന്നത്. ഓരോ രാഷ്‌ട്രീയകക്ഷികളും ഒരു സീറ്റിന് വേണ്ടി ചെലവഴിക്കുന്ന തുക നൂറ് കോടിക്കും മുകളിലാണെന്നത് ഏറ്റവും അപകടകരമായ സൂചനയാണ്. മറുവശത്ത് പട്ടിണി മാറ്റാൻ തുച്ഛമായ ദിവസ കൂലിക്ക് വേണ്ടി പത്ര വില്പന നടത്തുന്നവർ ജീവിക്കുന്നതും ഇതേ രാജ്യത്ത് തന്നെയാണെന്നും ജസ്റ്റീസ് ചെലമേശ്വര്‍ പറഞ്ഞു. ഡോ. വി. ശിവദാസന്‍ എംപി, പി. സന്തോഷ് കുമാര്‍ എംപി, സി.പി. സന്തോഷ്കുമാര്‍, സി.എന്‍. ചന്ദ്രന്‍, സി.പി. ഷൈജന്‍ എന്നിവര്‍ പ്രസംഗിച്ചു.

വയോധികയുടെ മാല പൊട്ടിച്ച വിരുതന്‍ അറസ്റ്റില്‍

പയ്യന്നൂര്‍: പട്ടാപ്പകല്‍ വയോധികയുടെ മാല പൊട്ടിച്ച് കടന്നുകളഞ്ഞ വിരുതനെ പയ്യന്നൂര്‍ പോലീസ് അറസ്റ്റ് ചെയ്തു. കാസര്‍ഗോഡ് ചെന്നടുക്കത്തെ വാടക ക്വാര്‍ട്ടേഴ്‌സിലെ താമസക്കാരനായ ചാലക്കര ഹൗസില്‍ ഇബ്രാഹിം ഖലീലിനെയാണ് (43) പോലീസ് പിടികൂടിയത്. ഈ മാസം ആറിന് രാവിലെ പതിനൊന്നരയോടെയാണ് കോളോത്തെ പരേതനായ പുരുഷോത്തമന്‍റെ ഭാര്യ മായി ഹൗസില്‍ കാര്‍ത്യായനിയുടെ (70) ഒരു പവനിലധികം തൂക്കമുള്ള മാല പൊട്ടിച്ചെടുത്ത് സ്‌കൂട്ടറില്‍ കടന്നത്. വീടിന് മുമ്പിലെ റോഡരികില്‍ നില്‍ക്കുകയായിരുന്ന കാര്‍ത്യായനി. എണ്‍പതിനായിരം രൂപയുടെ നഷ്ടമുണ്ടായെന്നുള്ള വയോധികയുടെ പരാതിയിൽ പയ്യന്നൂര്‍ പോലീസ് കേസെടുത്തിരുന്നു. നിരവധി നിരീക്ഷണ കാമറ ദൃശ്യങ്ങളും മൊബൈല്‍ ടവര്‍ കേന്ദ്രീകരിച്ചുള്ള ഫോണ്‍കോളുകളും പരിശോധിച്ചതിലൂടെയാണ് പോലീസിന്‍റെ അന്വേഷണം പന്ത്രണ്ടാം ദിവസം പ്രതിയിലേക്കെത്തിയത്. പയ്യന്നൂര്‍ എസ്‌ഐ പി. യദുകൃഷ്ണന്‍റെ നേതൃത്വത്തിലുള്ള പോലീസ് സംഘം താമസ സ്ഥലത്തെത്തിയാണ് ഇയാളെ പിടികൂടിയത്. അന്വേഷണസംഘത്തില്‍ പയ്യന്നൂര്‍ പോലീസ് സ്റ്റേഷനിലെ സീനിയര്‍ സിപിഒമാരായ പ്രമോദ് കടമ്പേരി, എ.ജി. അബ്ദുള്‍ ജബ്ബാര്‍, അബി സിനാന്‍, സ്‌ക്വാഡംഗങ്ങളായ എസ്‌ഐ അബ്ദുള്‍ റൗഫ്, എഎസ്‌ഐ നൗഫല്‍ അഞ്ചില്ലത്ത്, സ്‌പെഷല്‍ ബ്രാഞ്ച് എഎസ്‌ഐ കെ.വി. മനോജന്‍ എന്നിവരും ഉണ്ടായിരുന്നു. പ്രതിയെ കോടതിയില്‍ ഹാജരാക്കും. വിദ്യാനഗര്‍, മേല്‍പ്പറമ്പ, ഹൊസ്ദുര്‍ഗ് സ്റ്റേഷനുകളിലായി നടന്ന പത്തോളം മാലപൊട്ടിക്കല്‍ കേസുകളിലെ പ്രതിയാണ് ഇബ്രാഹിം ഖലീലെന്ന് പോലീസ് പറഞ്ഞു. മാല പൊട്ടിക്കാനിറങ്ങുന്നത് മോഷ്ടിച്ച സ്‌കൂട്ടറുകളില്‍ ഇബ്രാഹിം ഖലീല്‍ മാല പൊട്ടിക്കാനിറങ്ങുന്നത് മോഷ്ടിക്കുന്ന സ്‌കൂട്ടറുകളിലാണെന്നാണ് പോലീസ്. വിദ്യാനഗര്‍, മേല്‍പ്പറമ്പ്, ഹൊസ്ദുര്‍ഗ് സ്റ്റേഷനുകളിലായി നടന്ന പത്തോളം മാലപൊട്ടിക്കല്‍ സംഭവങ്ങളിലും ഇയാള്‍ സ്വീകരിച്ചത് ഈ അടവാണ്. ആരെങ്കിലും നമ്പര്‍ നോക്കി സ്‌കൂട്ടര്‍ ഉടമയെ കണ്ടെത്തിയാല്‍പോലും ഇയാള്‍ക്ക് രക്ഷപ്പെടാന്‍ കഴിയുമെന്നതിനാലാണ് സ്‌കൂട്ടര്‍ മോഷണം ഇയാള്‍ പതിവാക്കാന്‍ കാരണം. ഈ രീതിയില്‍ മോഷ്ടിച്ച സ്‌കൂട്ടര്‍ ഉപയോഗിച്ച് ഈ മാസം അഞ്ചിന് തലശേരിയില്‍ ഒരു മാലപൊട്ടിക്കല്‍ ശ്രമം നടത്തി പരാജയപ്പെട്ടിരുന്നതായി പോലീസ് കണ്ടെത്തി. യുവതി മാല മുറുകെ പിടിച്ച് ഒച്ചവച്ചതിനാല്‍ ഇയാള്‍ സ്‌കൂട്ടറില്‍ രക്ഷപ്പെടുകയായിരുന്നു. ഇതിന്‍റെ തൊട്ടടുത്ത ദിവസമാണ് പയ്യന്നൂര്‍ കേളോത്ത് വയോധികയുടെ മാല പൊട്ടിച്ചെടുത്തത്.

കാട്ടുപന്നി ആക്രമണത്തിൽ ബൈക്ക് യാത്രികർക്ക് പരിക്ക്

തലശേരി: കുട്ടിമാക്കൂൽ പെരിങ്കളത്ത് കാട്ടുപന്നിയുടെ അക്രമത്തിൽ ബൈക്ക് യാത്രികരായ യുവാക്കൾക്ക് പരിക്കേറ്റു. കൈക്കും കാലിനും പരിക്കേറ്റ മൂഴിക്കര സ്വദേശികളായ കെ. പ്രണവ്, സഹോദരൻ അനുവിൻ എന്നിവർ തലശേരി ഇന്ദിരാഗാന്ധിസഹകരണ ആശുപത്രിയിൽ ചികിത്സ തേടി. കഴിഞ്ഞദിവസം രാത്രി കണ്ണിച്ചിറ പെരിങ്കളം റോഡിലായിരുന്നു അപകടം. തലശേരി ജഗന്നാഥ ക്ഷേത്രത്തിലെ ഇളനിർവയ്പ് ചടങ്ങിൽ പങ്കെടുത്തശേഷം മൂഴിക്കരയിലെ വീട്ടിലേക്ക് മടങ്ങുകയായിരുന്നു ഇരുവരും. കണ്ണിച്ചിറ പെരിങ്കളം റോഡിലെത്തിയപ്പോൾ സമീപത്തെ കുറ്റിക്കാട്ടിൽ നിന്ന് എത്തിയ കാട്ടുപന്നി ബൈക്കിൽ ഇടിച്ച് റോഡിന് മറുവശത്തേക്ക് കടക്കുകയായിരുന്നു. ഇടിയുടെ ആഘാതത്തിൽ റോഡിലേക്കാണ് തെറിച്ചു വീണാണ് ഇരുവർക്കും പരിക്കേറ്റത്. പിന്നാലെ എത്തിയ കാർ യാത്രികരാണ് ഇരുവരെയും ആശുപത്രിയിൽ എത്തിച്ചത്. ഏതാനും ദിവസങ്ങൾക്കു മുന്പ് ഇതേ സ്ഥലത്ത് ബൈക്ക് യാത്രികൻ തലനാരിഴയ്ക്കാണ് കാട്ടുപന്നിയുടെ ആക്രമത്തിൽ നിന്നും രക്ഷപ്പെട്ടത്.

ആൾക്കൂട്ട വിചാരണയിൽ യുവതി ജീവനൊടുക്കിയ സംഭവം: കൂടുതൽ പേർ പ്രതികളായേക്കും

പിണറായി: കായലോട് പറമ്പായിയില്‍ ആൾക്കൂട്ട വിചാരണയിൽ യുവതി ജീവനൊടുക്കിയെന്ന കേസിൽ കൂടുതൽ പേർ പ്രതികളാകുമെന്ന് പോലീസ്. കായലോട്- പറമ്പായിയിലെ റസീന മന്‍സിലില്‍ റസീന (40)യെ ആണ് ചൊവ്വാഴ്ച വീടിനുള്ളില്‍ തൂങ്ങിമരിച്ചനിലയില്‍ കണ്ടെത്തിയത്. സംഭവത്തില്‍ ആത്മഹത്യാ പ്രേരണ കുറ്റം ചുമത്തി മൂന്ന് എസ്ഡിപിഐ പ്രവര്‍ത്തകരെ പിണറായി പോലീസ് അറസ്റ്റു ചെയ്തിരുന്നു. യുവതിയുടെ ആത്മഹത്യക്കുറിപ്പില്‍ നിന്ന് ലഭിച്ച സൂചനയുടെ അടിസ്ഥാന ത്തിൽ പറമ്പായി സ്വദേശികളായ എം.സി. മന്‍സിലില്‍ വി.സി. മുബഷീര്‍ (28), കണിയാന്‍റെ വളപ്പില്‍ കെ.എ. ഫൈസല്‍(34), കൂടത്താന്‍ കണ്ടി ഹൗസില്‍ വി.കെ. റഫ്‌നാസ് (24) എന്നിവരെയാണ് അറസ്റ്റു ചെയ്തത്. സംഭവത്തിൽ കൂടുതൽ പ്രതികൾ ഉൾപ്പെട്ടിട്ടുണ്ടെന്നാണ് പോലീസ് നിഗമനം. പ്രതികളെ തലശേരി കോടതി റിമാൻഡ് ചെയ്തു. ഞായറാഴ്ച ഉച്ചകഴിഞ്ഞു മൂന്നോടെ കായലോട് അച്ചങ്കര പള്ളിക്കു സമീപം കാറിനരികില്‍ യുവതി ആണ്‍സുഹൃത്തിനോട് സംസാരിച്ചു നില്‍ക്കുന്നത് ഒരു സംഘം ചോദ്യം ചെയ്യുകയായിരുന്നു. അതിനുശേഷം യുവതിയെ വീട്ടിലേക്ക് തിരിച്ചയച്ച പ്രതികള്‍ മയ്യില്‍ സ്വദേശിയായ ആണ്‍സുഹൃത്തിനെ കൈയേറ്റം ചെയ്ത് സമീപത്തുള്ള മൈതാനത്തെത്തിച്ചു. അഞ്ച് മണിക്കൂറോളം യുവാവിനെ കൂറ്റവിചാരണ നടത്തിയ സംഘം മൊബൈല്‍ ഫോണും ടാബും പിടിച്ചെടുത്ത് 8.30ഓടെ പറമ്പായിയിലെ എസ്ഡിപിഐ ഓഫീസിലെത്തിച്ചു. ഇരുവരുടെയും ബന്ധുക്കളെ ഓഫീസിലേക്ക് വിളിച്ചുവരുത്തി. രാത്രി വൈകിയാണ് യുവാവിനെ ബന്ധുക്കള്‍ക്കൊപ്പം വിട്ടയച്ചതെന്ന് പോലീസ് പറഞ്ഞു. ഇതുമായി ബന്ധപ്പെട്ട് സാമൂഹ്യ മാധ്യമങ്ങളിൽ ഉൾപ്പെടെ റസീനയെയും കുടുംബത്തെയും അപമാനിക്കുന്ന രൂപത്തിൽ പ്രചാരണമുണ്ടായതിൽ മനംനൊന്താണ് റസീന ആത്മഹത്യ ചെയ്തതെന്നാണ് ആരോപണം. യുവാവിന്‍റെ കൈയില്‍ നിന്ന് പിടിച്ചെടുത്ത ടാബും മൊബൈല്‍ ഫോണും വിട്ടുനല്‍കാന്‍ സംഘം തയാറായില്ല. അറസ്റ്റിലായ പ്രതികളില്‍ നിന്ന് പിന്നീട് ഇവ രണ്ടും പോലീസ് കണ്ടെത്തുകയായിരുന്നു. കൂടുതല്‍ പ്രതികളുണ്ടെന്നും അന്വേഷണം നടക്കുകയാണെന്നും പോലീസ് ഇന്‍സ്‌പെക്ടര്‍ എന്‍. അജീഷ് കുമാര്‍ പറഞ്ഞു. സബ് ഇന്‍സ്‌പെക്ടര്‍ ബി.എസ്. ബാവിഷിനാണ് അന്വേഷണച്ചുമതല.

തെരുവുനായ്ക്കളുടെ എണ്ണം കുറയ്ക്കണം,നിയമങ്ങളിൽ മാറ്റം അനിവാര്യം: ഇന്ത്യൻ വെറ്ററിനറി അസോസിയേഷൻ

കണ്ണൂർ: സംസ്ഥാനത്ത് വർഷങ്ങളായി അനിമൽ ബർത്ത് കൺട്രോൾ പദ്ധതി തുടർച്ചയായി നടന്നിട്ടും തെരുവ് നായ്ക്കളുടെ എണ്ണവും തെരുവുനായ്ക്കളുടെ ആക്രമണവും റാബീസ് കേസുകളും വർധിച്ചു വരുന്നതിനാൽ എബിസി മാത്രമല്ല ഏക പോംവഴിയെന്നും നിയമങ്ങളിൽ മാറ്റങ്ങൾ വേണമെന്നും അല്ലാത്തപക്ഷം പേവിഷബാധ കേസുകൾ വർധിക്കുമെന്നും വെറ്ററിനറി ഡോക്ടർമാരുടെ സംഘടനയായ ഇന്ത്യൻ വെറ്ററിനറി അസോസിയേഷൻ. തെരുവുനായ പ്രശ്നത്തിനുള്ള അടിയന്തര പരിഹാരമാർഗമായി നായ്ക്കളുടെ വന്ധ്യംകരണത്തെ കാണാൻ സാധിക്കില്ല. ദീർഘകാല അടിസ്ഥാനത്തിൽ ഒരു പരിധിവരെ നായ്ക്കളുടെ എണ്ണം വർധിക്കുന്നത് തടയുന്നതിനും സംതുലിതാവസ്ഥ നിലനിർത്തുന്നതിനും മാത്രമാണ് എബിസി ഉപകാരപ്പെടുക. തെരുവ് നായ്ക്കളെ റാബീസ് സംശയിക്കുന്ന നായ കടിച്ചാൽ ആ കൂട്ടത്തെ മുഴുവനായി ഷെൽട്ടർ ചെയ്ത് ഗൈഡ്‌ലൈൻ പ്രകാരമുള്ള 0,3,7,14,28 ദിവസങ്ങളിലെ കുത്തിവയ്പുകൾ നൽകി 120 ദിവസത്തെ നിരീക്ഷണത്തിന് ശേഷം തുറന്ന് വിടാനുള്ള നടപടികൾ സ്വീകരിക്കണം. അല്ലെങ്കിൽ പേ നായ്ക്കളുടെ എണ്ണത്തിൽ ഇനിയും വർധനവ് ഉണ്ടാകും. ഇത് സാധ്യമാകുന്നില്ലെങ്കിൽ അക്രമകാരിക ളെയും റാബീസ് സംശയിക്കുന്നവയെയും ദയാവധത്തിന് വിധേയമാക്കാൻ നിയമങ്ങളിൽ മാറ്റം വരുത്തണമെന്നും അസോസിയേഷൻ ചൂണ്ടിക്കാട്ടി.

39.6 ഗ്രാം എംഡിഎംഎയുമായി കോഴിക്കോട് സ്വദേശി പിടിയിൽ

തളിപ്പറമ്പ്: തളിപ്പറമ്പില്‍ ലക്ഷങ്ങൾ വിലമതിക്കുന്ന 39.6 ഗ്രാം എംഡിഎംഎയുമായി കോഴിക്കോട് സ്വദേശി അറസ്റ്റിൽ. വാണിമേല്‍ കൊടിയൂറ സ്വദേശി പി.ഹഫീസിനെയാണ് (31) ബുധനാഴ്ച രാത്രി തളിപ്പറമ്പ് നഗരസഭാ ബസ്‌സ്റ്റാൻഡിൽ പോലീസ് എയ്ഡ് പോസ്റ്റിന് സമീപം വച്ച് റൂറല്‍ ജില്ലാ പോലീസ് മേധാവിയുടെ മേല്‍നോട്ടത്തില്‍ പ്രവര്‍ത്തിക്കുന്ന ഡാന്‍സാഫ് ടീം പിടികൂടിയത്. ബംഗളൂരുവില്‍ നിന്ന് എംഡിഎംഎ വാങ്ങി തളിപ്പറമ്പിലെ സബ് ഏജന്‍റുമാര്‍ക്ക് വിൽക്കാൻ എത്തിയതാണ് ഇയാളെന്ന് ചോദ്യം ചെയ്യലില്‍ വ്യക്തമായതായി പോലീസ് പറഞ്ഞു. മാസങ്ങളായി ഡാന്‍സാഫ്ടീം ഹഫീസിനെ നിരീക്ഷിച്ചുവരികയായിരുന്നു.ഡാന്‍സാഫ് ടീമംഗങ്ങളും സീനിയര്‍ സിപിഒമാരുമായ അനൂപ്, ഷൗക്കത്ത്, സജിത്ത് എന്നിവര്‍ ചേര്‍ന്നാണ് പ്രതിയെ പിടികൂടിയത്. തളിപ്പറമ്പ് എസ്ഐ ദിനേശന്‍ കൊതേരി, പ്രൊബേഷനറി എസ്ഐ വി.രേഖ, ഡ്രൈവര്‍ സിപിഒ നവാസ് എന്നിവരുടെ നേതൃത്വത്തിലാണ് പ്രതിയെ അറസറ്റ് ചെയ്തത്.

വീട്ടിലെ അലമാരയിൽ മൂർഖൻ !

കണ്ണൂർ: ചക്കരക്കൽ പോലീസ് സ്റ്റേഷൻ പരിധിയിലെ ചെന്പിലോട്ടെ ഒരു വീട്ടിനുള്ളിലെ അലമാരയിൽനിന്ന് മൂർഖൻ പാന്പിനെ പിടികൂടി. വങ്കണയിലെ നാസറിന്‍റെ വീട്ടിലെ അലമാരയിൽനിന്നാണ് വലിയ മൂർഖൻ പാന്പിനെ പിടികൂടിയത്. അലമാരയിൽ തുണി അടുക്കിവയ്ക്കുന്നതിനിടെ അനക്കം കണ്ട് സംശയം തോന്നിയ വീട്ടുകാർ സ്നേക്ക് റസ്ക്യു ടീമിലെ സന്ദീപ് കണയന്നൂരിനെ വിളിച്ചുവരുത്തുകയും അലമാരയിൽനിന്ന് മൂർഖൻ പാന്പിനെ പിടികൂടുകയുമായിരുന്നു. കഴിഞ്ഞദിവസം വൈകുന്നേരം 6.30 ഓടെയായിരുന്നു സംഭവം.

സണ്ണി ജോസഫ് എംഎൽഎ അക്കരകൊട്ടിയൂരിൽ സന്ദർശനം നടത്തി

കൊട്ടിയൂർ: കെപിസിസി പ്രസിഡന്‍റ് സണ്ണി ജോസഫ് എംഎൽഎ അക്കരകൊട്ടിയൂരിൽ സന്ദർശനം നടത്തി. അക്കര കൊട്ടിയൂർ ദേവസ്വം ഓഫീസിൽ എത്തിയ എംഎൽഎ ചെയർമാൻ തിട്ടയിൽ നാരായണൻ നായർ, പാരമ്പര്യേതര ട്രസ്റ്റി എൻ. പ്രശാന്ത്, എക്സിക്യൂട്ടീവ് ഓഫീസർ കെ. ഗോകുൽ എന്നിവരുമായി ചർച്ച നടത്തി. ശനി ഞായർ ദിവസങ്ങളിൽ അഭൂതപൂർവമായ തിരക്കാണ് അനുഭവപ്പെട്ടത്. റോഡ്, പാർക്കിംഗ് എന്നിവയിൽ പരിമിതിയുണ്ട്. സമാന്തര റോഡിന്‍റെ പ്രവൃത്തി പൂർത്തിയാക്കാൻ കഴിഞ്ഞിട്ടില്ല. ഇത് അനുഭവ പാഠമാക്കി എടുത്ത് നേരത്തെ തന്നെ റോഡുകളുടെ നവീകരണം നടത്തണമെന്ന് സണ്ണി ജോസഫ് എംഎൽഎ ആവശ്യപ്പെട്ടു. അടിസ്ഥാന വിഷയങ്ങൾ പരിഹരിക്കുന്നതിനായി സർക്കാരിനോട് ആവശ്യപ്പെടുമെന്നും എംഎൽഎ പറഞ്ഞു. എംഎൽഎയോടൊപ്പം കൊട്ടിയൂർ പഞ്ചായത്ത് മെംബർ ജോണി ആമക്കാട്ട്, ഹരിദാസ് ചോടത്ത്, പി.സി. രാമകൃഷ്ണൻ, ജിജോ ആന്‍റണി, ജിബിൻ എന്നിവരും ഉണ്ടായിരുന്നു.

തെരുവുനായ്ക്കളെ പാർപ്പിക്കാൻ കോര്‍പറേഷന്‍ പരിധിയില്‍ ഷെല്‍ട്ടര്‍ ഹോം നിര്‍മിക്കും

കണ്ണൂര്‍: കോർപറേഷൻ പരിധിയിൽ അക്രമകാരികളായ തെരുവുനായ്ക്കളെ പാര്‍പ്പിക്കാന്‍ ഷെല്‍ട്ടര്‍ ഹോം നിര്‍മിക്കാന്‍ ഇന്നലെ ചേർന്ന സ്പെഷൽ കൗൺസിൽ യോഗത്തിൽ തീരുമാനം. ഒരാഴ്ചയ്ക്കുള്ളില്‍ ഷെല്‍ട്ടര്‍ നിര്‍മിക്കാനാവശ്യമായ സ്ഥലം കോര്‍പറേഷന്‍ പരിധിയില്‍ കണ്ടെത്തുമെന്ന് മേയര്‍ മുസ്‌ലിഹ് മഠത്തില്‍ പറഞ്ഞു. നായകള്‍ക്കായി ഷെല്‍ട്ടര്‍ ഹോം ഒരുക്കുക എന്നത് കൗണ്‍സിലര്‍മാരും നാട്ടുകാരും നിരന്തരം ഉന്നയിക്കുന്ന കാര്യമാണ്. ഇതിനായുള്ള സ്ഥലം കണ്ടെത്താന്‍ സാധിക്കാത്തതിനാലാണ് പദ്ധതി നടപ്പിലാക്കാന്‍ വൈകിയത്. എന്നാല്‍, നിലവില്‍ വര്‍ധിച്ച് വരുന്ന തെരുവുനായ ശല്യം നിയന്ത്രിക്കാന്‍ ഷെല്‍ട്ടര്‍ ഹോം അനിവാര്യമായിരിക്കുകയാണ്. ഇതുമായി ബന്ധപ്പെട്ട ചര്‍ച്ച നടത്താന്‍ ഇന്ന് രാവിലെ 11ന് കോര്‍പറേഷന്‍ ഹാളില്‍ സര്‍വകക്ഷിയോഗം വിളിച്ച് ചേര്‍ത്തിട്ടുണ്ട്. എല്ലാവരോടും ചര്‍ച്ച് ചെയ്ത് ശേഷമാണ് ഷെല്‍ട്ടര്‍ നിര്‍മിക്കാനുള്ള സ്ഥലം കണ്ടെത്തുക. കൂടാതെ തെരുവുനായ വന്ധ്യംകരണവുമായി ബന്ധപ്പെട്ട് കോര്‍പറേഷന്‍ സ്വന്തം നിലയില്‍ എബിസി സംവിധാനം പ്രാവര്‍ത്തികമാക്കുന്നതും ആലോചിച്ച് നടപ്പിലാക്കുമെന്ന് മേയര്‍ പറഞ്ഞു. നിലവില്‍ ജില്ലയില്‍ പടിയൂരില്‍ പ്രവര്‍ത്തിക്കുന്ന ഒരു എബിസി സെന്‍റര്‍ മാത്രമാണുള്ളത്. ജില്ലയിലെ എല്ലാ തദ്ദേശസ്വയംഭരണ സ്ഥാപനങ്ങളില്‍ നിന്നും നായകളെ വന്ധ്യംകരണം നടത്താന്‍ ഇവിടെയാണ് എത്തിക്കുന്നത്. ഇതിനൊരു പരിഹാരം എന്ന നിലയിലാണ് കോര്‍പറേഷന്‍റെ നേതൃത്വത്തില്‍ എബിസി സംവിധാനം നടപ്പാക്കുന്ന കാര്യം ആലോചിക്കുന്നത്. അതുപോലെ നായകള്‍ക്ക് വന്ധ്യംകരണം നടത്താനുള്ള മൊബൈല്‍ പോര്‍ട്ടബിള്‍ യൂണിറ്റ് സംസ്ഥാനത്ത് എല്ലായിടത്തുമുണ്ടെന്നും അത് കോര്‍പറേഷന് അനുവദിക്കണമെന്ന് സര്‍ക്കാരിനോട് ആവശ്യപ്പെടുമെന്നും കോര്‍പറേഷന്‍ സെക്രട്ടറി പറഞ്ഞു. നിലവില്‍ എല്ലാ എച്ച്ഐമാര്‍ക്കും നായയെ വന്ധ്യംകരണം ചെയ്യുന്നതുമായി ബന്ധപ്പെട്ട നടപടികള്‍ സത്വരം ചെയ്യണമെന്ന് നിര്‍ദേശം നല്‍കിയിട്ടുണ്ട്. നായ്ക്കളെ പിടികൂടാന്‍ കൂടുതല്‍ നായ പിടുത്തക്കാരെയും നായ്ക്കളെ പിടികൂടി മാറ്റാന്‍ നൂറോളം കൂടുകളും വേണമെന്ന കാര്യവും സെക്രട്ടറി പറഞ്ഞു. കഴിഞ്ഞ ദിവസങ്ങളിലായി തെരുവുനായ ആക്രമണത്തില്‍ കടിയേറ്റവര്‍ക്ക് നഷ്ടപരിഹാരം നല്‍കുന്നതുമായി ബന്ധപ്പെട്ട നിയമപരമായ കാര്യങ്ങള്‍ പരിശോധിച്ച് ചെയ്യുമെന്നും മേയര്‍ പറഞ്ഞു. കന്‍റോണ്‍മെന്‍റില്‍ ഭക്ഷണ മാലിന്യം ഉള്‍പ്പെടെ തള്ളുന്നത് കാരണമാണ് നഗരത്തില്‍ ഇത്രയധികം തെരുവുനായ ശല്യമെന്നത് കൗണ്‍സിലര്‍മാര്‍ ചൂണ്ടിക്കാട്ടിയിരുന്നു. ഈ വിഷയം കന്‍റോണ്‍മെന്‍റ് അധികൃതരുടെ ശ്രദ്ധയില്‍പ്പെടുത്തുമെന്നും കന്‍റോൺമെന്‍റ് അധികാരികളെ ഉള്‍പ്പെടെ ഇന്നത്തെ യോഗത്തില്‍ പങ്കെടുപ്പിക്കാനും കൗണ്‍സിലില്‍ തീരുമാനിച്ചു. വളര്‍ത്തു നായകള്‍ക്കെല്ലാം ലൈസന്‍സ് എടുക്കാന്‍ കര്‍ശന നിര്‍ദേശം നല്‍കും. കോര്‍പറേഷനില്‍ വെറ്ററിനറി ഡോകറുടെ പോസ്റ്റിംഗ് നടത്താനുള്ള പ്രപ്പോസല്‍ സര്‍ക്കാറിലേക്ക് നല്‍കാനും തീരുമാനിച്ചു.

എക്സൈസ് സ്റ്റാഫ് അസോ. ജില്ലാ സമ്മേളനം

കണ്ണൂർ: കേരള സ്റ്റേറ്റ് എക്‌സൈസ് സ്റ്റാഫ് അസോസിയേഷൻ 45-ാം കണ്ണൂർ ജില്ലാ സമ്മേളനവും വിരമിച്ചവർക്കുള്ള യാത്രയയപ്പും കെ.വി. സുമേഷ് എംഎൽഎ ഉദ്ഘാടനം ചെയ്തു. അസോസിയേഷൻ ജില്ലാ പ്രസിഡന്‍റ് കെ. രാജേഷ് അധ്യക്ഷത വഹിച്ചു. സർവീസിൽ നിന്നും വിരമിക്കുന്ന നിസാർ കൂലോത്തിന് യാത്രയയപ്പ് നല്കി. സംസ്ഥാന പ്രസിഡന്‍റ് ടി. സജുകുമാർ, സംസ്ഥാന ജന. സെക്രട്ടറി കെ.സന്തോഷ്കുമാർ, ഡപ്യൂട്ടി എക്സൈസ് കമ്മീഷണർ പി.കെ. സതീഷ്കുമാർ, അസി. എക്സൈസ് കമ്മീഷണർ പി. സജിത്ത്കുമാർ, വിവിധ സംഘടനാ നേതാക്കളായ പി.ആർ. സ്മിത, ഇ.പി. അബ്ദുള്ള, വി.വി. സന്ദീപ്കുമാർ, കെ.കെ. ബൈജു, എം.എ.കെ. ഫൈസൽ, വി.ഡി. പ്രസാദ്, എം.ബി. സുരേഷ് ബാബു, വി.വി. ഷാജി, നെൽസൺ ടി. തോമസ്, ജസ്ന ജോസഫ്, ജില്ലാ സെക്രട്ടറി പി. പ്രനിൽകുമാർ, കെ.വി. ഷൈജു എന്നിവർ പ്രസംഗിച്ചു.

കൊട്ടിയൂർ തീർഥാടനകാലത്തെ ഗതാഗത സ്തംഭനത്തിന് പരിഹാരം ഉണ്ടാക്കണം: താലൂക്ക് വികസന സമിതി

ഇരിട്ടി: കൊട്ടിയൂർ തീർഥാടന കാലത്തെ രൂക്ഷമായ ഗതാഗത സ്തംഭനത്തിന് ശാശ്വത പരിഹാരം ഉണ്ടാക്കണമെന്ന് ഇരിട്ടി താലൂക്ക് വികസന സമിതി യോഗം ആവശ്യപ്പെട്ടു. നിലവിലെ താത്കാലിക സംവിധാനങ്ങൾ ശക്തിപ്പെടുത്താനും അടുത്തവർഷം മുതൽ ഇതിനൊരു ശാശ്വത പരിഹാരം ഉണ്ടാക്കുന്നതിന് സർക്കാരും മലബാർ ദേവസ്വം ബോർഡും പൊതുമരാമത്ത് വകുപ്പും നടപടി സ്വീകരിക്കണമെന്നും യോഗത്തിൽ അധ്യക്ഷത വഹിച്ച സണ്ണി ജോസഫ് എംഎൽഎ ആവശ്യപ്പെട്ടു. ശനി, ഞായർ ഒഴിവുദിവസങ്ങളിൽ മാനന്തവാടി ഭാഗത്തുനിന്നു തീർഥാടന കേന്ദ്രത്തിലേക്കു വരുന്ന വാഹനങ്ങൾ ചുരമിറങ്ങാതെ നെടുംപൊയിൽ വഴി തിരിച്ചുവിടാനുള്ള സംവിധാനത്തെ പറ്റി ആലോചിച്ചു കൂടെയെന്ന് ഇരിട്ടി തഹസിൽദാർ സി.വി. പ്രകാശൻ അഭിപ്രായപ്പെട്ടു. ഇക്കാര്യം പോലീസ്, ക്ഷേത്രം ഭാരവാഹികൾ, പഞ്ചായത്ത് എന്നിവരുടെ നിർദേശം കൂടി കണക്കിലെടുത്ത് മാത്രമേ പരിഗണിക്കാവൂ എന്ന് എംഎൽഎ നിർദേശിച്ചു. ക്ഷേത്രത്തിലേക്കുള്ള പ്രധാന റോഡുകളുടെ ഇരുവശങ്ങളിലേയും കാടുകൾ വെട്ടി തെളിയിക്കാത്തതും ഓവുചാൽ സംവിധാനം ഒരുക്കാത്തതിനും പൊതുമരാമത്ത് വകുപ്പിന്‍റെ അനാസ്ഥ യോഗത്തിൽ എല്ലാവരും ഉന്നയിച്ചു. പേരാവൂർ താലൂക്ക് ആശുപത്രിയിൽ രാത്രികാല കാഷ്വാലിറ്റി സംവിധാനം പൂട്ടിപ്പോകുന്ന അവസ്ഥയിലാണെന്ന് ജില്ലാ പഞ്ചായത്ത് അംഗം ജൂബിലി ചാക്കോ പറഞ്ഞു. ഇക്കാര്യത്തിൽ അടിയന്തര ഇടപെടൽ വേണമെന്നും അവർ ആവശ്യപ്പെട്ടു. ആശുപത്രിയിൽ 15 ഡോക്ടർമാരുടെ തസ്തികളിൽ ആറുപേർ മാത്രമാണ് ഇപ്പോൾ ജോലിക്ക് ഹാജരാകുന്നള്ളു. പിഎസ്‌സി വഴി നിയമനം കിട്ടിയ മൂന്നുപേരിൽ രണ്ടുപേർ ജോലിക്ക് ഹാജരായിട്ടില്ലെന്നും ആശുപത്രി സൂപ്രണ്ട് യോഗത്തെ അറിയിച്ചു. ഒപിയിൽ മുന്നൂറോളം പേരെ ഒരു ഡോക്ടർ പരിശോധിക്കേണ്ട അവസ്ഥയാണ് ഇപ്പോൾ ഉള്ളത്. എട്ടു ഡോക്ടർമാർ ഉണ്ടെങ്കിൽ മാത്രമേ ഇപ്പോഴത്തെ പ്രതിസന്ധിക്ക് ചെറിയൊരു പരിഹാരം ഉണ്ടാകുകയുള്ളുവെന്നും സൂപ്രണ്ട് പറഞ്ഞു. ഇക്കാര്യങ്ങളെല്ലാം ഡിഎംഒയെ ബോധ്യപ്പെടുത്താൻ എംഎൽഎ നിർദേശിച്ചു. അണക്കെട്ടുകളോട് ചേർന്നുള്ള പ്രദേശങ്ങളെ ബഫർ സോണാക്കിയ സർക്കാർ ഉത്തരവ് പിൻവലിച്ചെങ്കിലും ഇക്കാര്യത്തിൽ ജനങ്ങളെ ദ്രോഹിക്കുന്ന സമീപനമാണ് ബന്ധപ്പെട്ട വകുപ്പിൽ നിന്നും ഉണ്ടാവുന്നതെന്ന് ആക്ഷേപം യോഗത്തിൽ ഉയർന്നു. സർക്കാർ ഉത്തരവ് ഇറങ്ങിയിട്ടും പദ്ധതി പ്രദേശത്തെ ജനങ്ങൾക്ക് നിർമാണത്തിന് നിരാക്ഷേപ പത്രം നല്കുന്നില്ലെന്ന പരാതി ശക്തമാണെന്ന് പായം പഞ്ചായത്ത് പ്രസിഡന്‍റ് പി. രജനിയും, കെ. സുധാകരൻ എംപിയുടെ പ്രതിനിധി പി.കെ. ജനാർദനനുംപറഞ്ഞു. കരിന്തളം മാനന്തവാടി 400 കെവി ലൈനുമായി ബന്ധപ്പെട്ട് കേളകം, കണിച്ചാർ പഞ്ചായത്തുകളിൽ നിലനില്ക്കുന്ന തകർക്കം പരിഹരിക്കാൻ ഉടൻ നടപടിയുണ്ടാക്കണമെന്ന് സജീവ് ജോസഫ് എംഎൽഎയുടെ പ്രതിനിധി തോമസ് വർഗീസ് ആവശ്യപ്പെട്ടു. യോഗത്തിൽ തില്ലങ്കേരി പഞ്ചായത്ത് പ്രസിഡന്‍റ് പി. ശ്രീമതി, ഇരിട്ടി ബ്ലോക്ക് പഞ്ചായത്ത് പ്രസിഡന്‍റ് കെ. വേലായുധൻ, തഹസിൽദാർ സി.വി. പ്രകാശൻ, ജില്ലാ പഞ്ചായത്ത് അംഗം ജൂബിലി ചാക്കോ, പായം പഞ്ചായത്ത് പ്രസിഡന്‍റ് പി. രജനി വിവിധ രാഷ്ട്രീയപാർട്ടി പ്രതിനിധികളായ ഇബ്രാഹിം മുണ്ടേരി, പായം ബാബുരാജ്, കെ.പി. ഷാജി, മാത്തുക്കുട്ടി പന്തപ്ലാക്കൽ എന്നിവർ എന്നിവർ പ്രസംഗിച്ചു.

ട്രാൻസ്ഫോർമറിന് തീപിടിച്ചു

മട്ടന്നൂർ: മട്ടന്നൂരിൽ കെഎസ്ഇബിയുടെ ട്രാൻസ്ഫോർമറിൽ തീപിടിത്തം. ഇന്നലെ ഉച്ചകഴിഞ്ഞ് മൂന്നോടെയായിരുന്നു സംഭവം. മട്ടന്നൂർ-തലശേരി റോഡിൽ എൻഎസ്എസ് ബിൽഡിംഗിന് സമീപത്തുള്ള കെഎസ്ഇബിയുടെ ട്രാൻസ്ഫോർമറിലാണ് തീപിടിത്തമുണ്ടായത്. ട്രാൻസ്ഫോർമറിന്‍റെ അടി ഭാഗത്ത് നിന്നാണ് തീപിടിത്തമുണ്ടായത്. വിവരം അറിയിച്ചതിനെ തുടർന്നു അഗ്നിശമന വിഭാഗമെത്തി തീയണച്ചതിനാൽ വൻ നാശനഷ്ടം ഒഴിവായി.

വായിച്ചു വളരാൻ

കണ്ണൂർ: ജില്ലാ ഇൻഫർമേഷൻ ഓഫീസിന്‍റെ ആഭിമുഖ്യത്തിൽ പട്ടുവം മോഡൽ റെസിഡൻഷ്യൽ ഹയർ സെക്കൻഡറി സ്‌കൂളിൽ ജില്ലാതല വായന മാസാചരണവും പി.എൻ. പണിക്കർ അനുസ്മരണവും സംഘടിപ്പിച്ചു. എം. വിജിൻ എംഎൽഎ ഉദ്ഘാടനം ചെയ്തു. വായനയുടെയും പഠനത്തിന്‍റെയും ആത്യന്തിക ലക്ഷ്യം നല്ല മനുഷ്യനാവുക എന്നതാണെന്ന് വിദ്യാർഥി സമൂഹം തിരിച്ചറിയണമെന്ന് വിജിൻ എംഎൽഎ പറഞ്ഞു. പട്ടുവം പഞ്ചായത്ത് പ്രസിഡന്‍റ് പി. ശ്രീമതി അധ്യക്ഷത വഹിച്ചു. ചലച്ചിത്ര സംവിധായകൻ മനോജ് കാന, പട്ടുവം പഞ്ചായത്തംഗം എം. സുനിത, ഡപ്യൂട്ടി കളക്ടർ (എൽഎ) എ.കെ. അനീഷ്, ജില്ലാ ഇൻഫർമേഷൻ ഓഫീസർ പി.പി. വിനീഷ്, സമഗ്രശിക്ഷാ കേരളം ജില്ലാ മിഷൻ കോ-ഓർഡിനേറ്റർ ഇ.സി. വിനോദ്, വിദ്യാകിരണം മിഷൻ ജില്ലാ കോ-ഓർഡിനേറ്റർ കെ.സി. സുധീർ, കണ്ണൂർ ഡയറ്റ് പ്രിൻസിപ്പൽ ഡോ. കെ. വിനോദ്കുമാർ, തളിപ്പറമ്പ് ജില്ലാ വിദ്യാഭ്യാസ ഓഫീസർ എസ്. വന്ദന, ഐടിഡിപി ജില്ലാ പ്രൊജക്ട് ഓഫീസർ ഇൻ ചാർജ് കെ. ബിന്ദു തുടങ്ങിയവർ പ്രസംഗിച്ചു. ജില്ലാ സാക്ഷരതാ മിഷന്‍റെ ആഭിമുഖ്യത്തില്‍ സംഘടിപ്പിക്കുന്ന വായന പക്ഷാചരണത്തിന്‍റെ ജില്ലാതല ഉദ്ഘാടനം ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരി നിര്‍വഹിച്ചു. ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യന്‍ അധ്യക്ഷത വഹിച്ചു. കെപിസിസി കലാ സാംസ്കാരിക വിഭാഗമായ സംസ്കാരസാഹിതി ജില്ലാ കമ്മറ്റിയുടെ നേതൃത്വത്തിൽ വായനാ ദിനാചരണം സംഘടിപ്പിച്ചു. ജവഹർ ലൈബ്രറി മിനി ഹാളിൽ സംഘടിപ്പിച്ച പരിപാടിയിൽ സുധാ മേനോന്‍റെ "ഇന്ത്യ എന്ന ആശയം' എന്ന പുസ്തകമാണ് ചർച്ച ചെയ്തത്. സംസ്ഥാന വൈസ് ചെയർമാൻ എം. പ്രദീപ്കുമാർ പയ്യന്നൂർ ഉദ്ഘാടനം ചെയ്തു. ജില്ലാ ചെയർമാൻ സുരേഷ് കൂത്തുപറമ്പ് അധ്യക്ഷത വഹിച്ചു. വി.ആർ. പ്രീത പുസ്തകാവതരണം നടത്തി. ഇരിട്ടി: വായന ദിനത്തിന്‍റെ ഭാഗമായി ഇരിട്ടി താലൂക്ക് ലൈബ്രറി കൗൺസിലിന്‍റെ നേതൃത്വത്തിൽ പരിധിയിലെ വിവിധ ഗ്രന്ഥശാലകളിൽ പി.എൻ. പണിക്കർ ചരമദിനം മുതൽ ഐ.വി. ദാസ് ജന്മദിനം വരെ വിവിധ പരിപാടികൾ നടക്കും. താലൂക്ക്തല ഉദ്ഘാടനം ഇരിട്ടി നന്മ പബ്ലിക് ലൈബ്രറിയിൽ സാഹിത്യകാരൻ അനിൽകുമാർ ആലത്തുപറമ്പ് ഉദ്ഘാടനം ചെയ്തു. താലൂക്ക് ലൈബ്രറി കൗൺസിൽ പ്രസിഡന്‍റ് എം. ബിജു അധ്യക്ഷനായിരുന്നു. അങ്ങാടിക്കടവ് സേക്രഡ് ഹാർട്ട് യുപി സ്കൂളിൽ വായന ദിനാചരണവും വിദ്യാരംഗം കലാസാഹിത്യ വേദിയുടെയും വിവിധ ക്ലബുകളുടെ ഉദ്ഘാടനവും കുട്ടികളുടെ അവധിക്കാല രചന പ്രകാശനവും അയ്യൻകുന്ന് പഞ്ചായത്ത് പ്രസിഡന്‍റ് കുര്യാച്ചൻ പൈമ്പള്ളിക്കുന്നേൽ നിർവഹിച്ചു. സ്കൂൾ മാനേജർ ഫാ. ഫ്രാൻസിസ് റാത്തപ്പള്ളി അധ്യക്ഷത വഹിച്ചു. കേരള ഫോക്‌ലോർ അക്കാദമി അവാർഡ് ജേതാവ് മാത്യൂസ് വയനാട് മുഖ്യാതിഥിയായിരുന്നു. പേരട്ട സെന്‍റ് ജോസഫ് സ്കൂളിൽ വായന ദിനാചരണവും വിവിധ ക്ലബുകളുടെ ഉദ്ഘാടനവും സീരിയൽ-സിനിമ നടൻ റെനിൽകുമാർ കണ്ണൂർ നിർവഹിച്ചു. സ്കൂൾ മുഖ്യാധ്യാപിക സിസ്റ്റർ ടെക്സി മാത്യു, പിടിഎ പ്രസിഡന്‍റ് ബിജു വെങ്ങലപ്പള്ളി, സജി മാത്യു, സിസ്റ്റേഴ്സ്, മറ്റ് അധ്യാപകർ എന്നിവർ പങ്കെടുത്തു. മഞ്ഞളാംപുറം: മഞ്ഞളാംപുറം യുപി സ്കൂളിൽ വായന വാരാചരണത്തോടനുബന്ധിച്ച് വിദ്യാരംഗം കലാസാഹിത്യ വേദിയുടെയും വിവിധ ക്ലബുകളുടെയും ഉദ്ഘാടനം നടന്നു. യുവ കവി അനിൽ പുനർജനി ഉദ്ഘാടനം ചെയ്തു. സ്കൂൾ മാനേജർ ഫാ. ജോർജ് ചേലമരം അധ്യക്ഷത വഹിച്ചു. ഉളിക്കൽ: വയത്തൂർ യുപി സ്കൂളിൽ വായന വാരാചരണം റിട്ട. ചരിത്ര അധ്യാപകനും സാഹിത്യകാര നുമായ പി.എം. ജോൺ ഉദ്ഘാടനം ചെയ്തു. സ്കൂൾ മാനേജർ ഫാ. മനോജ്‌ കിടാരത്തിൽ അധ്യക്ഷത വഹിച്ചു. മട്ടന്നൂർ: തില്ലങ്കേരി പള്ള്യം എൽപി സ്കൂൾ വിദ്യാരംഗം കലാസാഹിത്യ വേദിയുടെ ആഭിമുഖ്യത്തിൽ വായനാദിനാചരണം സംഘടിപ്പിച്ചു. ചാവശേരി വായനശാല ഗ്രന്ഥാലയം പ്രസിഡന്‍റ് കെ.കെ. സുരേന്ദ്രൻ ഉദ്ഘാടനം ചെയ്തു. പിടിഎ പ്രസിഡന്‍റ് സുരേഷ് അധ്യക്ഷത വഹിച്ചു. കൂത്തുപറമ്പ്: വായന ദിനത്തോടനുബന്ധിച്ച് നിർമലഗിരി കോളജ് മലയാള വിഭാഗം വായനദിനം ആചരിച്ചു. കോളജ് പ്രിൻസിപ്പൽ സിസ്റ്റർ ഡോ. സെലിൻ മാത്യു ഉദ്ഘാടനം ചെയ്തു. ബോട്ടണി വിഭാഗം അധ്യാപകനും എഴുത്തുകാരനുമായ ഡോ. ആർ.ഡി. അൻപിൻ രാജ മുഖ്യപ്രഭാഷണം നടത്തി. വായന ദിനത്തോടനുബന്ധിച്ച് നടത്തിയ ക്വിസ്, പുസ്തക പരിജയം എന്നീ മത്സരത്തിൽ വിജയികളായ കെ. അഞ്ജന, റിഫ നിസാർ, പി.പി. നൈതിക, ദർശന എന്നിവർക്ക് സമ്മാനങ്ങൾ നൽകി. ഐക്യുഎസി കോ-ഓർഡിനേറ്റർ റവ. ഡോ. മാർട്ടിൻ ജോസഫ്, കോളജ് വൈസ് പ്രിൻസിപ്പൽ റവ.ഡോ. ജോബി ഫിലിപ്പ്, ഡോ. ജയ്സൺ ജോസഫ്, കെ.വി. ജോസഫ്, മലയാളം വിഭാഗം മേധാവി ഡോ. ദീപാ മോൾ മാത്യു, കെ. ദേവാനന്ദ് എന്നിവർ പ്രസംഗിച്ചു.

പന്നിയോട്ടു വയലിൽ വീട്ടുകിണർ ഇടിഞ്ഞുതാഴ്ന്നു

മലപ്പട്ടം: കനത്ത മഴയിൽ മലപ്പട്ടത്ത് കിണർ ഇടിഞ്ഞ് താഴ്ന്നു. മലപ്പട്ടം-മയ്യിൽ റൂട്ടിൽ പന്നിയോട്ട് വയൽ ബസ് സ്റ്റോപ്പിനടുത്ത് പി.വി. മോഹനന്‍റെ 17 കോൽ ആഴമുള്ള വീട്ടുകിണറാണ് ഇന്നലെ രാവിലെ ഇടിഞ്ഞു താഴ്ന്നത്. കിണറിൽ സ്ഥാപിച്ച മോട്ടോർ പൂർണമായും ചെളിയിലമർന്നു. ഏകദേശം ഒന്നരലക്ഷം രൂപയുടെ നഷ്ടം കണക്കാക്കുന്നു. കർഷക സംഘം നേതാക്കൾ സ്ഥലം സന്ദർശിച്ചു.

നരയൻകല്ല് അങ്കണവാടി കെട്ടിടം നാശത്തിന്‍റെ വക്കിൽ

നടുവിൽ: നടുവിൽ പഞ്ചായത്തിലെ ആറാം വാർഡായ പാത്തൻപാറയിലെ നരയൻകല്ല് അങ്കണവാടി പ്രവർത്തനരഹിതമായിട്ട് രണ്ടുവർഷം. നിലവിൽ കാട് മൂടിയും ശരിയായ അറ്റകുറ്റപ്പണി നടത്താതെയും കെട്ടിടം നശിക്കുകയാണ്. 2012ൽ അന്നത്തെ ഇരിക്കൂർ എംഎൽഎയും മന്ത്രിയുമായിരുന്ന കെ.സി. ജോസഫ് ഉദ്ഘാടനം ചെയ്തതാണ് അങ്കണവാടി കെട്ടിടം. ആറുലക്ഷം രൂപ ചെലവിൽ പുതിയതായി നിർമിച്ച കെട്ടിടത്തിൽ ഏതാനും വർഷങ്ങൾ മാത്രമാണ് അങ്കണവാടി പ്രവർത്തിച്ചത്. തൊട്ടടുത്ത് സ്ഥിതി ചെയ്യുന്ന കരിങ്കൽ ക്വാറിയിലെ സ്ഫോടനങ്ങൾ നിമിത്തം അങ്കണവാടി കെട്ടിടം അപകടാവസ്ഥയിലായപ്പോൾ രക്ഷിതാക്കൾ കുട്ടികളെ അയക്കാതിരുന്നതിനെ തുടർന്ന് അങ്കണവാടി പ്രവർത്തനം വാടക കെട്ടിടത്തിലേക്ക് മാറ്റുകയായിരുന്നു. തുടർന്ന് അങ്കണവാടി കെട്ടിടം അടഞ്ഞു കിടക്കുകയും പ്രദേശം കാടുമൂടുകയും ചെയ്തു. ഇപ്പോൾ ഈ കെട്ടിടത്തിൽ ഹരിത കർമസേന ശേഖരിക്കുന്ന പ്ലാസ്റ്റിക് മാലിന്യം സംഭരിച്ചു സൂക്ഷിക്കുകയാണ്.

കെവിവിഇഎസ് യൂണിറ്റ് വാർഷികവും കുടുംബ സംഗമവും നടത്തി

ചെമ്പേരി: കേരള വ്യാപാരി വ്യവസായി ഏകോപന സമിതി (കെവിവിഇഎസ്) ചെമ്പേരി യൂണിറ്റിന്‍റെ 43-ാമത് വാർഷിക ജനറൽ ബോഡിയും വ്യാപാരി കുടുംബ സംഗമവും ചെമ്പേരി മദർ തെരേസ ഓഡിറ്റോറിയത്തിൽ നടന്നു. കെവിവിഇഎസ് ജില്ലാ പ്രസിഡന്‍റ് ദേവസ്യ മേച്ചേരി സംഗമം ഉദ്ഘാടനം ചെയ്തു. യൂണിറ്റ് പ്രസിഡന്‍റ് സാബു മണിമല അധ്യക്ഷത വഹിച്ചു. ചെമ്പേരി ലൂർദ് മാതാ ബസിലിക്ക റെക്ടർ റവ. ഡോ. ജോർജ് കാഞ്ഞിരക്കാട്ട് വ്യാപാരമേഖലയിൽ അമ്പത് വർഷം പിന്നിടുന്ന ഇപ്പോഴും സജീവമായ വ്യാപാരികളായവരെ ആദരിച്ചു. ഏരുവേശി പഞ്ചായത്ത് പ്രസിഡന്‍റ് മിനി ഷൈബി വ്യാപാരികളുടെ മക്കളിൽ ഉന്നത വിജയം കരസ്ഥമാക്കിയ വിദ്യാർഥികളെ അനുമോദിച്ചു. യൂണിറ്റ് സെക്രട്ടറി റെജി പവൻ റിപ്പോർട്ടുകൾ അവതരിപ്പിച്ചു. ട്രഷർ രാജു ആൽബിൻ, വൈസ് പ്രസിഡന്‍റുമാരായ സാജു മണ്ഡപത്തിൽ, ജോയിച്ചൻ മണിമല എന്നിവർ പ്രമേയം അവതരിപ്പിച്ചു. പയസ് മരിയ, ക്ലമന്‍റ് കൊട്ടാരം, അനീഷ് തോണക്കര, പ്രകാശ് ജോൺ, ജോമോൻ മടുക്കക്കുഴി, വനിതാ വിംഗ് പ്രസിഡന്‍റ് ജിറ്റി പ്രകാശ്, സെക്രട്ടറി നിഷ കുളത്തറ എന്നിവർ പ്രസംഗിച്ചു. വ്യാപാരി കുടുംബാംഗങ്ങളുടെ വിവിധ കലാപരിപാടികളും കണ്ണൂർ സ്പീഡ് ഓർക്കസ്ട്രയുടെ ഗാനമേളയും സ്നേഹവിരുന്നും നടന്നു.

മെറിറ്റ് ഡേ ആഘോഷിച്ചു

പൈസക്കരി: ദേവമാതാ ഹൈസ്കൂളിൽ മെറിറ്റ് ഡേ ആഘോഷിച്ചു. നെടുങ്ങോം ഗവ. ഹയർ സെക്കൻഡറി സ്കൂൾ അധ്യാപിക പി.പി. ഹരിതമോൾ ഉദ്ഘാടനം ചെയ്തു. പയ്യാവൂർ പഞ്ചായത്ത് പ്രസിഡന്‍റ് സാജു സേവ്യർ അധ്യക്ഷത വഹിച്ചു. പൈസക്കരി ദേവമാതാ സ്കൂൾ മാനേജർ ഫാ. നോബിൾ ഓണംകുളം, ഹൈസ്കൂൾ മുഖ്യാധ്യാപിക ബീന അഗസ്റ്റിൻ, പൈസക്കരി സെന്‍റ് മേരീസ് യുപി സ്കൂൾ മുഖ്യാധ്യാപകൻ സോജൻ ജോർജ്, വാർഡ് മെംബർ ടെൻസൺ കണ്ടത്തിൻകര, സ്കൂൾ പിടിഎ പ്രസിഡന്‍റ് സോജൻ നെട്ടനാനിയ്ക്കൽ, മദർ പിടിഎ പ്രസിഡന്‍റ് റാണി ചോങ്കര, വിദ്യാരംഗം കലാ സാഹിത്യ വേദി കോ-ഓർഡിനേറ്റർ ഐറിൻ സോജൻ എന്നിവർ പ്രസംഗിച്ചു. വിശിഷ്ടാതിഥിക്ക് ആദരവും വിജയികൾക്ക് അനുമോദനവും നൽകി.

കുരുമുളക് കൃഷി പരിശീലന ക്ലാസ്

കരുവഞ്ചാൽ: പൈതൽ ഹിൽസ് ഫാർമേഴ്സ് പ്രൊഡ്യൂസർ കമ്പനിയുടെയും റോയൽ പെപ്പർ ഫാർമിംഗ് കമ്പനിയുടെയും ആഭിമുഖ്യത്തിൽ ആധുനിക രീതിയിലുള്ള കുരുമുളക് കൃഷി സൗജന്യ പരിശീലന ക്ലാസ് സംഘടിപ്പിച്ചു. കരുവഞ്ചാൽ ലീഡേഴ്സ് ക്ലബിൽ നടന്ന പരിപാടി ആലക്കോട് പഞ്ചായത്ത് പ്രസിഡന്‍റ് ജോജി കന്നിക്കാട്ട് ഉദ്ഘാടനം ചെയ്തു. കെ.എം. തോമസ് അധ്യക്ഷത വഹിച്ചു. പി.ടി. ലൂക്കോസ്, ജോസ്റ്റിൻ കെ. അഗസ്റ്റിൻ, എ.പി. സെബാസ്റ്റ്യൻ, ജമീർജാൻ, അമൽ ജോസ്, സിബിച്ചൻ അബ്രഹാം, കെ.ടി. മാത്യു, ഡെന്നിസ് അബ്രഹാം എന്നിവർ പ്രസംഗിച്ചു.

വായിച്ചു വളരാൻ

കണ്ണൂർ: ജില്ലാ ഇൻഫർമേഷൻ ഓഫീസിന്‍റെ ആഭിമുഖ്യത്തിൽ പട്ടുവം മോഡൽ റെസിഡൻഷ്യൽ ഹയർ സെക്കൻഡറി സ്‌കൂളിൽ ജില്ലാതല വായന മാസാചരണവും പി.എൻ. പണിക്കർ അനുസ്മരണവും സംഘടിപ്പിച്ചു. എം. വിജിൻ എംഎൽഎ ഉദ്ഘാടനം ചെയ്തു. വായനയുടെയും പഠനത്തിന്‍റെയും ആത്യന്തിക ലക്ഷ്യം നല്ല മനുഷ്യനാവുക എന്നതാണെന്ന് വിദ്യാർഥി സമൂഹം തിരിച്ചറിയണമെന്ന് വിജിൻ എംഎൽഎ പറഞ്ഞു. പട്ടുവം പഞ്ചായത്ത് പ്രസിഡന്‍റ് പി. ശ്രീമതി അധ്യക്ഷത വഹിച്ചു. ചലച്ചിത്ര സംവിധായകൻ മനോജ് കാന, പട്ടുവം പഞ്ചായത്തംഗം എം. സുനിത, ഡപ്യൂട്ടി കളക്ടർ (എൽഎ) എ.കെ. അനീഷ്, ജില്ലാ ഇൻഫർമേഷൻ ഓഫീസർ പി.പി. വിനീഷ്, സമഗ്രശിക്ഷാ കേരളം ജില്ലാ മിഷൻ കോ-ഓർഡിനേറ്റർ ഇ.സി. വിനോദ്, വിദ്യാകിരണം മിഷൻ ജില്ലാ കോ-ഓർഡിനേറ്റർ കെ.സി. സുധീർ, കണ്ണൂർ ഡയറ്റ് പ്രിൻസിപ്പൽ ഡോ. കെ. വിനോദ്കുമാർ, തളിപ്പറമ്പ് ജില്ലാ വിദ്യാഭ്യാസ ഓഫീസർ എസ്. വന്ദന, ഐടിഡിപി ജില്ലാ പ്രൊജക്ട് ഓഫീസർ ഇൻ ചാർജ് കെ. ബിന്ദു തുടങ്ങിയവർ പ്രസംഗിച്ചു. പയ്യാവൂർ: ചാമക്കാൽ ഗവ. എൽപി സ്കൂളിൽ വായന ദിനാചരണത്തിന്‍റെ ഭാഗമായി ഒഴിവു സമയങ്ങളിൽ വിദ്യാർഥികൾക്ക് വായനക്കുള്ള ഇടമായി സ്കൂൾ ഗ്രൗണ്ടിൽ സജ്ജമാക്കിയ വായന കൂടാരം സ്കൂൾ ലീഡർ എഡ്വിൻ റജീഷ് ഉദ്ഘാടനം ചെയ്തു. സ്കൂൾ മുഖ്യാധ്യാപകൻ ഇ.പി. ജയപ്രകാശ്, ജോസ്മി ജോസ്, ടി.വി. ദീപ, പി. ശില്പ, ടി. സ്വപ്ന, എം.ടി. മധുസൂദനൻ, രജനി റിൻസ്, സൗമ്യ ദിനേശ്, സോണിയ തോമസ്, അമിത ബാബു എന്നിവർ നേതൃത്വം നൽകി. നെല്ലിക്കുറ്റി: ഗാന്ധി മെമ്മോറിയൽ യുപി സ്കൂളിൽ വായന ദിനാചരണവും പി.എൻ. പണിക്കർ അനുസ്മരണവും നടത്തി. അധ്യാപകരുടെ നേതൃത്വത്തിൽ നെല്ലിക്കുറ്റി കേരളോദയ വായനശാല കുട്ടികൾ സന്ദർശിക്കുകയും കുട്ടികൾക്കായി വിവിധ മത്സരങ്ങൾ സംഘടിപ്പിക്കുകയും ചെയ്തു. മുഖ്യാധ്യാപകൻ വി.എം. തോമസ്, വിദ്യാരംഗം കൺവീനർ പി.വി. കൃഷ്ണദാസ്, ടോമി ചാമക്കാലായിൽ, സാവിയോ ഇടയാടിയിൽ, ജോയ് പെരുമാലിൽ, ബിനി സജി എന്നിവർ നേതൃത്വം നൽകി. ചെമ്പേരി: ഏരുവേശി യുവജന ക്ലബ് ആൻഡ് ഗ്രന്ഥാലയത്തിന്‍റെ ആഭിമുഖ്യത്തിൽ വായനവാരാചര ണവും പി.എൻ. പണിക്കർ അനുസ്മരണവും നടത്തി. എം.സി. നാരായണൻ ഉദ്ഘാടനം ചെയ്തു. ഗ്രന്ഥാലയം പ്രസിഡന്‍റ് എം.നാരായണൻ അധ്യക്ഷത വഹിച്ചു. എം.സന്തോഷ് കുമാർ, ഇ.പി.ബാലകൃഷ്ണൻ എന്നിവർ പ്രസംഗിച്ചു. പയ്യാവൂർ: ദേശീയ വായന വാരാചരണത്തിന്‍റെ ഭാഗമായി പയ്യാവൂർ ചാമക്കാൽ എസ്എൻ യുപി സ്കൂൾ വിദ്യാർഥികൾ കുന്നത്തൂർ ജ്ഞാനോദയ വായനശാല ആൻഡ് ഗ്രന്ഥാലയം സന്ദർശിച്ചു. വായനശാലയുടെ ചരിത്രം, പ്രവർത്തനങ്ങൾ, പുസ്തകങ്ങളുടെ ക്രമീകരണം എന്നിവ വിദ്യാർഥികൾ നേരിട്ട് മനസിലാക്കി. പരിപാടിയിൽ വായനശാല സെക്രട്ടറി ജോസ് നെട്ടനാനിയ്ക്കൽ അധ്യക്ഷത വഹിച്ചു. ലൈബ്രേറിയൻ ജോണി ആമുഖ പ്രഭാഷണം നടത്തി. കമ്മിറ്റിയംഗം ജോസഫ്, സ്കൂൾ മുഖ്യാധ്യാപിക എം. ഷീജ, അധ്യാപകരായ എ.കെ. ആശ, പി.എം. രശ്മി, പി. സ്മിത, പി.കെ. ഹോളി, കൃപ സുരേന്ദ്രൻ, വനജ വിജയൻ എന്നിവർ നേതൃത്വം നൽകി. ഉദയഗിരി: വായനദിനത്തോടനുബന്ധിച്ച് ഉദയഗിരി പ്രത്യാശ യുപി സ്കൂളിൽ വിദ്യാരംഗം കലാസാഹിത്യവേദിയുടെയും വിവിധ ക്ലബുകളുടെയും ഉദ്ഘാടനം സാംസ്കാരിക പ്രവർത്തകൻ എ.ആർ. പ്രസാദ് നിർവഹിച്ചു. സ്കൂൾ മാനേജർ ഫാ. സേവ്യർ പുത്തൻപുരയ്ക്കൽ അധ്യക്ഷത വഹിച്ചു.

കഞ്ചാവുമായി മൂന്നുപേർ പിടിയിൽ

ആലക്കോട്: മലയോരത്തെ വിവിധ കേന്ദ്രങ്ങളിൽ ആലക്കോട് എക്സൈസ് സംഘം നടത്തിയ പരിശോധനയിൽ കഞ്ചാവ് സഹിതം മൂന്നുപേരെ പിടികൂടി. നാലു ഗ്രാം കഞ്ചാവുമായി പുത്തൂരിലെ സച്ചിൻ (20), കരുവഞ്ചാലിൽ നിന്ന് 10 ഗ്രാം കഞ്ചാവ് സഹിതം മുക്കടയിലെ സാജൻ (21), ആലക്കോട് ടൗണിൽ നിന്നും നാലുഗ്രാം കഞ്ചാവുമായി നടുവിൽ പുത്തൂരിലെ അഭിരാജ് (24) എന്നിവരെയാണ് ആലക്കോട് എക്സൈസ് ഇൻസ്പെക്ടർ സി.എച്ച്. നസീബിന്‍റെ നേതൃത്വത്തിൽ പിടികൂടിയത്. അസി. ഇൻസ്പെക്ടർമാരായ പ്രകാശൻ ആലക്കൽ, വി.വി. ബിജു, ടി.കെ. തോമസ്, സിവിൽ ഓഫീസർമാരായ ഇ.പി. സബീഷ്, വി. ധനേഷ്, പ്രജിൽകുമാർ, എൻ.കെ. അനുജ, പി.കെ. രാജീവ്, ടി. പ്രണവ്, എ. മുനീറ എന്നിവരും പരിശോധന സംഘത്തിൽ ഉണ്ടായിരുന്നു.

കണിക്കുന്ന് മഞ്ചക്കുഴിയിലെ ഗതാഗതം പുനഃസ്ഥാപിക്കാനുള്ള ശ്രമങ്ങൾ പുരോഗമിക്കുന്നു

തളിപ്പറമ്പ്: ചിറവക്ക്-പുളിമ്പറമ്പ്-പട്ടുവം റോഡിൽ കണിക്കുന്ന് മഞ്ചക്കുഴിയിലെ താത്കാലിക പാതയിലെ മണ്ണിടിച്ചിൽ തടഞ്ഞ് ഗതാഗതം പുനഃസ്ഥാപിക്കാനുള്ള ശ്രമങ്ങൾ പുരോഗമിക്കുന്നു. രണ്ടു ദിവസത്തിനു ശേഷം ഇതുവഴി പൂർണതോതിൽ ഗതാഗതം അനുവദിക്കാനുള്ള പ്രവൃത്തിയാണ് പുരോഗമിക്കുന്നത്. മഴയുടെ ശക്തി കുറഞ്ഞതോടെ മണ്ണിടിച്ചിലിന് ശമനമുണ്ടായി. മണ്ണിടിച്ചിൽ രൂക്ഷമായ സ്ഥലങ്ങളിൽ കരിങ്കൽ ജില്ലി നിറയ്ക്കുകയാണ് ചെയ്യുന്നത്. മണ്ണിടിച്ചിൽ രൂക്ഷമായി സ്ഥിതി സങ്കീർണ്ണമായിരുന്ന കുപ്പം കപ്പണത്തട്ടിൽ കരിങ്കൽ ജില്ലികൾ നിറച്ചാണ് മണ്ണിടിച്ചിൽ തടഞ്ഞത്. അതേ മാതൃകയിലാണ് മഞ്ചക്കുഴിയിലും ജില്ലി നിറയ്ക്കുന്നത്. താത്കാലിക പാതയുടെ മാന്തംകുണ്ട് ഭാഗത്താണ് മണ്ണിടിച്ചിൽ ഉണ്ടായത്. ഈ ഭാഗത്ത് മണ്ണിന് പുറത്ത് കരിങ്കൽ ജില്ലി കൊണ്ട് കവചം ഒരുക്കുകയും മഴവെള്ളം ഭൂമിയിലേക്ക് ഇറങ്ങാതിരിക്കാൻ പ്രതലത്തിൽ പ്ലാസ്റ്റിക്ക് ഷീറ്റ് വിരിക്കുകയും ചെയ്യും. ഇതോടെ മണ്ണിടിച്ചിൽ പൂർണമായി തടയാനാകുമെന്നാണ് കരുതുന്നത്. നിലവിൽ ചെറു വാഹനങ്ങൾ നിയന്ത്രിതമായ രീതിയിൽ കടത്തിവിടുന്നുണ്ട്. രണ്ടുദിവസം കൊണ്ട് കരിങ്കൽ ജില്ലി ഇടുന്നത് പൂർത്തിയാക്കി ബസുകൾ ഉൾപ്പെടെ കടത്തിവിടാനുള്ള സാഹചര്യം ഒരുക്കാനാകുമെന്നാണ് പ്രതീക്ഷിക്കുന്നത്.

സ്ഥാനാരോഹണം നടത്തി

പെരുമ്പടവ്: കരിപ്പാൽ പെരുമ്പടവ് വൈസ്മെൻ ക്ലബിന്‍റെ 2025-26 വർഷത്തെ ഭാരവാഹികളുടെ സ്ഥാനാരോഹണം നടന്നു. വൈസ്മെൻ മുൻ ഇന്‍റർനാഷണൽ ട്രഷറർ ടി.എൻ. ജോസ് ഉദ്ഘാടനം ചെയ്തു. ക്ലബ് പ്രസിഡന്‍റ് കുര്യാക്കോസ് കട്ടത്തറ അധ്യക്ഷത വഹിച്ചു. ഭാരവാഹികളുടെ സ്ഥാനാരോഹണം ഡിസ്ട്രിക്ട് ഗവർണർ ടോമി തോമസ് നടത്തി. സാമൂഹിക സേവനങ്ങളുടെ ഈ വർഷത്തെ തുടക്കം റീജണൽ ട്രഷറർ ഷിജു പനച്ചിക്കൽ നിർവഹിച്ചു. ചടങ്ങിൽ പ്ലസ്ടു പരീക്ഷയിൽ ഉന്നത വിജയം നേടിയവരെ മാത്യു വട്ടോത്ത് ഉപഹാരം നൽകി. ജോബി മൂത്തേടത്ത്- പ്രസിഡന്‍റ്, ബെന്നി മുടയാനിക്കൽ- സെക്രട്ടറി, ജോമി പുല്ലംപ്ലാവിൽ- ട്രഷറർ, സിസിലി തങ്കച്ചൻ- വനിതാ വിഭാഗം പ്രസിഡന്‍റ്, ആഷ്ന ആൻ ജോസഫ്- കുട്ടികളുടെ വിഭാഗം പ്രസിഡന്‍റ് എന്നിവർ സ്ഥാനമേറ്റു. ജോർജ് അലക്സ്, എം.സി. ബെന്നി, റെജി പ്ലാക്കാട്ട്, ഷാനി ജോബി, അലീന ജോസഫ്, തങ്കച്ചൻ വെള്ളരിങ്ങാട്ട് എന്നിവർ പ്രസംഗിച്ചു.

കെവിവിഇഎസ് യൂണിറ്റ് വാർഷിക യോഗം

ആലക്കോട്: കേരള വ്യാപാരി വ്യവസായി ഏകോപനസമിതി ആലക്കോട് യൂണിറ്റ് വാർഷിക പൊതുയോഗവും അനുമോദനവും വ്യാപാരഭവനിൽ സംസ്ഥാന ജനറൽ സെക്രട്ടറി ദേവസ്യ മേച്ചേരി ഉദ്ഘാടനം ചെയ്‌തു. യൂണിറ്റ് പ്രസിഡന്‍റ് കെ.എം. ഹരിദാസ് അധ്യക്ഷത വഹിച്ചു. ചടങ്ങിൽ എസ്എസ്എൽസി, പ്ലസ്‌ടു പരീക്ഷകളിൽ ഉന്നത വിജയം നേടിയ മെംബർമാരുടെ മക്കളെ അനുമോദിച്ചു. ജില്ലാ, യൂണിറ്റ് ക്ഷേമനിധി വിതരണവും നടത്തി. സൈബർ കുറ്റകൃത്യങ്ങളെ കുറിച്ച് ആലക്കോട് സ്റ്റേഷനിലെ സിവിൽ പോലീസ് ഓഫീസർ കെ.കെ. രാജേഷ് ബോധവത്കരണ ക്ലാസെടുത്തു. മേഖല പ്രസിഡന്‍റ് എം.എ. ജോൺസൺ, എൻ.വി. സജീവ്, പി.എ. അഗസ്റ്റിൻ, ജോൺ പടിഞ്ഞാത്ത്, ഷാജു പോൾ, റോയി പുളിക്കൽ, ജോബിൻ ജോസ്, ഷാല റോമി, എൻ.എം. മൊയ്‌തീൻ, കെ.എസ്. പദ്മകുമാർ എന്നിവർ പ്രസംഗിച്ചു.

ക്രിയേറ്റീവ് കോർണർ ഉദ്ഘാടനം ചെയ്തു

ഏരുവേശി: കൊച്ചി ശാസ്ത്ര സാങ്കേതിക സർവകലാശാലയുടെ സഹകരണത്തോടെ സമഗ്രശിക്ഷാ കേരളം സ്റ്റാർസ് പദ്ധതിയിൽ ഉൾപ്പെടുത്തി ഏരുവേശി ഗവ. യുപി സ്കൂളിൽ ഒരുക്കിയ ക്രിയേറ്റീവ് കോർണർ ഏരുവേശി പഞ്ചായത്ത് പ്രസിഡന്‍റ് മിനി ഷൈബി ഉദ്ഘാടനം ചെയ്തു. വാർഡ് മെംബർ പി.വി. കമലാക്ഷി അധ്യക്ഷത വഹിച്ചു. സ്കൂൾ മുഖ്യാധ്യാപിക എ.വി. ശ്രീജ ആമുഖ പ്രഭാഷണം നടത്തി. ഇരിക്കൂർ ബിപിസി എം.കെ. ഉണ്ണിക്കൃഷ്ണൻ പദ്ധതി വിശദീകരിച്ചു. എസ്എംസി ചെയർമാൻ കെ.പി. ദിലീപ്, പി.കെ. അജിത, അഞ്ജലി ദീപു, എം. അനിതകുമാരി, കെ.എം. സരസ്വതി എന്നിവർ പ്രസംഗിച്ചു.

പെൻഷൻ പരിഷ്കരണ നടപടികൾ ഉടൻ ആരംഭിക്കണം: കെഎസ്എസ്പിഎ

പയ്യാവൂർ: സംസ്ഥാന സർക്കാർ പെൻഷൻ പരിഷ്കരണ നടപടികൾ എത്രയും വേഗത്തിൽ ആരംഭിക്കണമെന്ന് കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ (കെഎസ്എസ്പിഎ) പയ്യാവൂർ മണ്ഡലം കമ്മിറ്റി ആവശ്യപ്പെട്ടു. പയ്യാവൂർ ഇന്ദിരാഭവനിൽ നടന്ന അർധ വാർഷിക സമ്മേളനവും പുതുതായി അംഗങ്ങളായവർക്ക് നൽകിയ സ്വീകരണവും കെഎസ്എസ്പിഎ ജില്ലാ സെക്രട്ടറി സുഖദേവൻ ഉദ്ഘാടനം ചെയ്തു. മണ്ഡലം പ്രസിഡന്‍റ് ടി.ടി. സെബാസ്റ്റ്യൻ അധ്യക്ഷത വഹിച്ചു. പി.പി. ചന്ദ്രാംഗദൻ, ജോസഫ് സക്കറിയാസ്, കോൺഗ്രസ് മണ്ഡലം പ്രസിഡന്‍റ് ഇ.കെ. കുര്യൻ, എം.പി. കുഞ്ഞുമൊയ്തീൻ, ദിവാകരൻ, കെ. ബാബു, ജോസ് അഗസ്റ്റിൻ, എൽസമ്മ മാത്യു, പോൾ വർക്കി, വിൽസൺ മാത്യു, വി. അരവിന്ദാക്ഷൻ, ബെന്നി ഫിലിപ്പ്, പയ്യാവൂർ ബാലകൃഷ്ണൻ എന്നിവർ പ്രസംഗിച്ചു. സംഘടനയിൽ പുതുതായി അംഗങ്ങളായി ചേർന്ന പത്ത് പേരെ ജില്ലാ സെക്രട്ടറി ഷാൾ അണിയിച്ച് സ്വീകരിച്ചു. തുടർന്ന് വിവിധ കലാപരിപാടികളും അരങ്ങേറി.

എടക്കോത്തെ തണലിടം വായനയുടെ പകലിടം

പെരുമ്പടവ്: ഒരു കാലത്ത് മാലിന്യം വലിച്ചെറിയാൻ മാത്രം ആളുകൾ തെരഞ്ഞെടുത്തിരുന്ന സ്ഥലത്തെ വായനയുടെ ഇടമാക്കി മാറ്റി സ്വാശ്രയ ഗ്രൂപ്പ്. എടക്കോത്ത് നിന്ന് താഴെ എടക്കോത്തേക്ക് തിരിയുന്ന ജംഗ്ഷനെയാണ് എടക്കോം തണൽ സ്വാശ്രയ ഗ്രൂപ്പ് മാലിന്യത്തിൽ നിന്ന് വായനയുടെ ഇടമാക്കി മാറ്റിയത്. തണൽ പ്രവർത്തകർ ഇവിടുയുള്ള മാലിന്യങ്ങൾ നീക്കം ചെയ്തു. ഇവിടെ നേരത്തെ വച്ചു പിടിപ്പിച്ചു വളർന്നു തുടങ്ങിയ മാവിൻ ചുവടുകൾ കെട്ടി മനോഹരമാക്കുകയും ചെയ്തു. മാലിന്യമുക്തമാക്കി ആരെയും ആകർഷിക്കുന്ന കേന്ദ്രമാക്കിയെടുത്ത സ്ഥലത്തെ കഴിഞ്ഞ ക്രിസ്മസിനോടനുബന്ധിച്ചാണ് തണൽ സ്വാശ്രയ ഗ്രൂപ്പ് തണലിടമാക്കി മാറ്റിയിരുന്നു. ഈ തണലിടത്തെ ഇപ്പോൾ വായനയുടെ പകലിടമാക്കിയും മാറ്റിയിരിക്കുകയാണ്. വിശ്രമ കേന്ദ്രം എന്നതിനൊപ്പം ഇവിടെ എത്തുന്നവർക്ക് വായിക്കാൻ പത്രങ്ങളും ആനുകാലികങ്ങളും ഒരുക്കിയിട്ടുണ്ട്. തന്‍റെ വായനയക്ക് ശേഷം മറ്റുള്ളവരും വായിക്കാനുണ്ടെന്ന തിരിച്ചറിവിൽ പത്രം വൃത്തികേടാക്കരുതെന്നും എടുത്ത് കൊണ്ടു പോകരുതെന്നും മാത്രമാണ് നിബന്ധന.

കൊട്ടിയൂരിൽ ഇളനീരാട്ടം

കൊട്ടിയൂർ: ഭക്തജനങ്ങളെ സാക്ഷിയാക്കി കൊട്ടിയൂർ വൈശാഖ മഹോത്സവത്തിലെ പ്രധാന ചടങ്ങായ ഇളനീരാട്ടം നടന്നു. ഇളനീരാട്ടത്തിനുള്ള കാവുകൾ എരുവട്ടി, മേക്കിലേരി, കുറ്റ്യാടി തണ്ടയാന്മാരുടെ നേതൃത്വത്തിലായിരുന്നു ചൊവ്വാഴ്ച അക്കരെ സന്നിധിയിൽ എത്തിച്ചത്. രാവിലെ ഉഷഃപൂജയ്ക്ക് ശേഷം കൈക്കോളന്മാർ ഇളനീരുകൾ ചെത്തി അഭിഷേകത്തിനായി ഒരുക്കി മണിത്തറയിൽ എത്തിച്ചു. അർധരാത്രിയോടെയാണ് ഇളനീരാട്ടം നടന്നത്. ഇളനീരാട്ടത്തിന് മുന്നോടിയായി ദൈവംവരവ് നടന്നു. ഇളനീർചെത്തി വെള്ളിക്കുടത്തിലും സ്വർണക്കുടത്തിലും നമ്പൂതിരിമാർ പകർന്നു നൽകിയ ഇളനീർ ജലം ഉഷകാമ്പ്രം സ്ഥാനീകൻ സ്വയം ഭൂവിൽ അഭിഷേകം ചെയ്തതോടെയാണ് ഇളനീരാട്ടം പൂർണമാകുന്നത്.

ഇരിട്ടി അമല ആശുപത്രിയിൽ സമ്പൂർണ ഹൃദ്രോഗ വിഭാഗം പ്രവർത്തനം ആരംഭിച്ചു

ഇരിട്ടി: ഇരിട്ടി അമല മൾട്ടി സ്പെഷ്യാലിറ്റി ആശുപ്രതിയിൽ സമ്പൂർണ ഹൃദ്രോഗ വിഭാഗം പ്രവർത്തനമാരംഭിച്ചു. ആധുനിക സംവിധാനങ്ങളോടു കൂടിയ അസുരിയൻ കാത്ത് ലാബ് യൂണിറ്റാണ് ആശുപത്രിയിൽ സജ്ജമാക്കിയത്. നിലവിൽ ആൻജിയോഗ്രാം, ആൻജിയോപ്ലാസ്‌റ്റി ഉൾപ്പെടെ ഹൃദയസബന്ധമായ എല്ലാ സേവനങ്ങളും ആശുപത്രിയിൽ നടത്തുന്നുണ്ട്. 24 മണിക്കൂറും പ്രവർത്തിക്കുന്ന കാത്ത് ലാബിനൊപ്പം സിടി സ്കാൻ, എക്കോ, ഇസിജി, ടിഎംടി, ഐസിഡി, അടിയന്തര രക്ത‌പരിശോധന സൗകര്യങ്ങളും ഏർപ്പെടുത്തിയിട്ടുണ്ട്. എമർജൻസി മെഡിസിൻ ഡോക്ടർമാരുടെ സേവനവും ലഭ്യമാണ്. അമല കാർഡിയാക് സെന്‍ററിൽ ഇരുപതോളം ഹെൽത്ത് ഇൻഷ്വറൻസ് കമ്പനികളുടെ സേവനവും ലഭിക്കും. അമല ആശുപത്രിയിൽ മലയോര മേഖലയിൽ ആദ്യത്തെ ഹൃദ്രോഹ ചികിത്സാ സംവിധാനം സജ്ജമായതോടെ 40 കിലോമീറ്റർ ചുറ്റളവിലുള്ളവർക്ക് ഹൃദ്രോഗ ചികിത്സാ സേവനം വേഗത്തിൽ ലഭ്യമാകും. ഹൃദയാഘാതം ഉൾപ്പെടെയുള്ള ആരോഗ്യ പ്രശ്‌നങ്ങളിൽ 'ഗോൾഡൻ അവർ' എന്നറിയപ്പെടുന്ന ഒരു മണിക്കൂറിനുള്ളിൽ ചികിത്സ ലഭ്യമാക്കാനുള്ള സൗകര്യമാണ് അമലയിൽ സജ്ജമാക്കിയിരിക്കുന്നതെന്ന് ആശുപത്രി ചെയർമാൻ അഡ്വ. മാത്യു കുന്നപ്പള്ളി, മെഡിക്കൽ സൂപ്രണ്ട് ഡോ. വി.കെ. ബാബു, ഇന്‍റർവെൻഷൻ കാർഡിയോളജിസ്‌റ്റ് ഡോ. ആൻജോസ് പി. തങ്കച്ചൻ, ഡയറക്‌ടർമാരായ ഡോ. അന്നമ്മ മാത്യു, ഡോ. അമല മാത്യു എന്നിവർ പറഞ്ഞു. രണ്ടാഴ്ചയ്ക്കുള്ളിൽ24 മണിക്കൂറും പ്രവർത്തിക്കുന്ന ബ്ലഡ് ബാങ്കും പ്രവർത്തനം ആരംഭിക്കും. ഒരു വർഷത്തിനുള്ളതിൽ അമല ഹോസ്പിറ്റലിലെ മലയോര മേഖലയിലെ സമ്പൂർണ സൂപ്പർ സ്പെഷ്യാലിറ്റി ആശുപത്രിയായി മാറ്റുകയാണ് ലക്ഷ്യമെന്നും അധികൃതർ അറിയിച്ചു.

ബക്കളത്ത് ദേശീയപാതയുടെ കോൺക്രീറ്റ് ഭിത്തി പുറത്തേക്ക് തള്ളി

തളിപ്പറന്പ്: ബക്കളത്ത് ദേശീയപാതാ നിർമാണത്തിന്‍റെ ഭാഗമായി സ്ഥാപിച്ച കോൺക്രീറ്റ് ഭീത്തി ഏതുസമയവും തകർന്നു വീഴുമെന്ന നിലയിൽ. ബക്കളം വായനശാലക്ക് സമീപം ഇന്നലെ രാവിലെയാണ് കോൺക്രീറ്റ് സ്ലാബുകൾ കൊണ്ട് നിർമിച്ച ഭിത്തിയുടെ അടിഭാഗത്തെ സ്ലാബുകൾ സർവീസ് റോഡിലേക്ക് തള്ളിയ നിലയിൽ കണ്ടെത്തിയത്. ഇതേത്തുടർന്ന് കുറച്ചുസമയം ഇതുവഴിയുള്ള ഗതാഗതം തടസപ്പെട്ടു. സ്ഥലത്ത് എത്തിയ ദേശീയപാത നിർമാണ കമ്പനി അധികൃതർ പരിശോധന നടത്തി. ആശങ്കപ്പെടേണ്ട സാഹചര്യമില്ലെന്നും അറ്റകുറ്റപണി നടത്തി പ്രശ്നം പരിഹരിക്കുമെന്നും അറിയിച്ചതിനെ തുടർന്ന് ഗതാഗതം പുനഃസ്ഥാപിക്കുകയായിരുന്നു.

ഉത്തര മലബാറിലെ ആദ്യ വൃക്ക മാറ്റിവയ്ക്കല്‍ ശസ്ത്രക്രിയ വിജയകരമായി കണ്ണൂര്‍ ആസ്റ്റർ മിംസില്‍

കണ്ണൂര്‍: ഉത്തര മലബാറിലെ ആദ്യ വൃക്കമാറ്റിവയ്ക്കല്‍ ശസ്ത്രക്രിയ കണ്ണൂര്‍ ആസ്റ്റര്‍ മിംസ് ഹോസ്പിറ്റലില്‍ വിജയകരമായി പൂര്‍ത്തീകരിച്ചു. വൃക്കമാറ്റിവയ്ക്കല്‍ ശസ്ത്രക്രിയ ആവശ്യമായവര്‍ മംഗളൂരുവിനെയോ കോഴിക്കോടിനേയോ ആശ്രയിക്കേണ്ടിവരുന്ന സാഹചര്യത്തിന് അറുതി വരുത്തുവാനും ഇതോടെ സാധിക്കും. ഗുരുതരമായ വൃക്കരോഗത്തെ തുടര്‍ന്ന് ഡയാലിസിസ് വിധേയനായിരുന്ന തലശേരി സ്വദേശിയായ 51 വയസുകാരനാണ് അവയവമാറ്റിവയ്ക്കല്‍ ശസ്ത്രക്രിയയിലൂടെ പുതിയ ജീവിതം നേടിയെടുത്തത്. ഉത്തര കേരളത്തില്‍ ഏറ്റവും കുറഞ്ഞ നിരക്കില്‍, ഏറ്റവും ഗുണനിലവാരത്തോട് കൂടി വൃക്കമാറ്റിവയ്ക്കല്‍ ശസ്ത്രക്രിയാ സംവിധാനങ്ങള്‍ സജ്ജീകരിക്കുമെന്ന് ഏതാനും മാസങ്ങള്‍ക്ക് മുന്പ് ആസ്റ്റര്‍ കേരള മെഡിക്കൽ ഡയറക്ടർ ഡോ. കെ.എം.സൂരജും കണ്ണൂര്‍ ആസ്റ്റര്‍ മിംസ് സിഒഒ ഡോ. അനൂപ് നമ്പ്യാരും നല്‍കിയ വാഗ്ദാനമാണ് ഇതോടെ യാഥാര്‍ഥ്യമായത്. നെഫ്രോളജി വിഭാഗം മേധാവി ഡോ. ബിജോയ് ആന്‍റണി, ഡോ. വി.ആർ. പ്രദീപ്, ഡോ. സാരംഗ് വിജയന്‍, യൂറോളജി വിഭാഗം മേധാവി ഡോ. സത്യേന്ദ്രന്‍ നമ്പ്യാര്‍, ഡോ. അക്ബര്‍ സലീം, അനസ്തേഷ്യ വിഭാഗം ഡോ.അനീഷ്, ഡോ.വന്ദന, ഡോ.പ്രശാന്ത് നഴ്സിംഗ് വിഭാഗം സോണിയ, രമ്യ തുടയവർ വൃക്ക മാറ്റിവയ്ക്കലിന് നേതൃത്വം നല്കി. മാറ്റിവയ്ക്കുന്ന വ്യക്തിക്ക് അനുയോജ്യമായ വൃക്ക ലഭിക്കാനുള്ള ബുദ്ധിമുട്ടാണ് നിലവില്‍ പ്രധാന വെല്ലുവിളി. മസ്തിഷ്‌ക മരണം സംഭവിച്ച വ്യക്തികളുടെ അവയവവും അടുത്ത ബന്ധുക്കളുടെ അവയവവുമാണ് പ്രധാനമായും വൃക്കമാറ്റിവയ്ക്കലിന് നിലവില്‍ സ്വീകരിക്കുന്നത്. ഈ സാഹചര്യം ഉയര്‍ത്തുന്ന വെല്ലുവിളികളെ അതിജീവിക്കുവാന്‍ വൃക്ക ആവശ്യമായി വരികയും എന്നാല്‍ സ്വീകര്‍ത്താവിന് യോജിക്കാതെ വരികയും ചെയ്യുന്നവര്‍ അനുയോജ്യമായ വൃക്കകള്‍ പരസ്പരം കൈമാറാനുള്ള സ്വാപ് ട്രാന്‍സ്പ്ലാന്‍റ് സംവിധാനം വ്യാപകമാക്കുമെന്ന് ആംസ്റ്റര്‍ മിംസ് കണ്ണൂര്‍ സിഒഒ ഡോ.അനൂപ് നമ്പ്യാർ അറിയിച്ചു. പത്രസമ്മേളനത്തിൽ ആസ്റ്റർ മിംസ് സിഒഒ ഡോ.അനൂപ് നമ്പ്യാർ, സിഎംഎസ് ഡോ.സുപ്രിയ രഞ്ജിത്, ഡിജിഎം ഓപ്പറേഷൻസ് വിവിൻ ജോർജ്, നെഫ്രോളജി വിഭാഗം മേധാവി ഡോ. ബിജോയ് ആന്‍റണി, ഡോ. വി.ആർ. പ്രദീപ്, ഡോ. സാരംഗ് വിജയന്‍, യൂറോളജി വിഭാഗം മേധാവി ഡോ. സത്യേന്ദ്രന്‍ നമ്പ്യാര്‍, ഡോ. അക്ബര്‍ സലീം തുടങ്ങിയവര്‍ പങ്കെടുത്തു.

ആനമതിൽ കടന്ന് ആളെക്കൊല്ലി മോഴയാന ജനവാസ മേഖലയിൽ

കേളകം: ആറളം പുനരധിവാസ മേഖലയിൽ ആളുകളെ കൊല്ലുകയും നാശം വിതയ്ക്കുകയും ചെയ്ത മോഴയാന ചീങ്കണ്ണി പുഴയോരത്തെ ആനമതിൽ കടന്ന് പൂക്കുണ്ടിലെ ജനവാസ മേഖലയിൽ. ചൊവ്വാഴ്ച രാത്രി ജനവാസമേഖലയിലെത്തിയ മോഴയാന വ്യാപകമായി കൃഷി നശിപ്പിച്ചു. പൂക്കുണ്ടിലെ കർഷകരായ ഷിനോജ് തയ്യിൽ, രാജൻ വടക്കേപറമ്പിൽ, റെക്സിൻ ഉള്ളാഹയിൽ, സാജൻ പാലത്തിങ്കൽ, ഷാജി പാലത്തിങ്കൽ, ബെസ്സി പാലത്തിങ്കൽ എന്നിവരുടെ കൃഷിയിടങ്ങളിലാണ് മോഴയാന നാശം വിതച്ചത്. അടയ്ക്കാത്തോട് -കണിച്ചാർ റോഡരികിലെ ആനപ്രതിരോധ മതിൽ മുൻകാലുകൾ ഉയർത്തിവച്ച് കടന്നുവെന്നാണ് നിഗമനം. ജനവാസ മേഖലയിൽ മോഴയാന എത്തിയതിനെ തുടർന്ന് വീട്ടുകാർ വനംവകുപ്പിനെ വിവരമറിയിക്കുകയും വനംവകുപ്പുദ്യോഗസ്ഥരും താമസക്കാരും ചേർന്ന് വിരട്ടി ഓടിക്കുകയുമായിരുന്നു. ഇവിടെ നിന്ന് ആനമതിൽ ചാടിക്കടന്ന ആന ആറളം വന്യജീവി സങ്കേതത്തിലേക്കാണ് പോയത്. ദുരന്തങ്ങൾ ആവർത്തിക്കാതിരിക്കാൻ മോഴയാനയെ വെടിവച്ചു കൊല്ലണമെന്നാണ് പ്രദേശവാസികളുടെ ആവശ്യം. വനംവകുപ്പിന്‍റെ രാത്രികാല പട്രോളിംഗോ, മറ്റ് ഇടപെടലുകളോ പ്രദേശത്തുണ്ടാകാറില്ലെന്നും നാട്ടുകാർ കുറ്റപ്പെടുത്തി. ജീവനും സ്വത്തിനും സുരക്ഷ ഉറപ്പാക്കണമെന്നാവശ്യപ്പെട്ട് ആറളം വന്യജീവി സങ്കേതത്തിനു മുന്നിൽ പ്രക്ഷോഭമാരംഭിക്കാനുള്ള ഒരുക്കത്തിലാണ് പ്രദേശവാസികൾ.

ഊരത്തൂരിലെ എബിസിയിൽ കൂട് നിറയെ നായ്ക്കൾ; ഇനിയും വേണം കൂടുകൾ

കണ്ണൂർ: ജില്ലാ പഞ്ചായത്തിന്‍റെ കീഴിൽ പടിയൂർ പഞ്ചായത്തിലെ ഊരത്തൂരിൽ പ്രവർത്തിക്കുന്ന എബിസി കേന്ദ്രം നിറയെ തെരുവുനായ്ക്കളാണ്. ജില്ലയുടെ വിവിധ ഭാഗങ്ങളിൽ നിന്നും പിടികൂടി വന്ധ്യംകരണം നടത്തുകയാണ്. നിലവിൽ വന്ധ്യംകരണം കഴിഞ്ഞു വിശ്രമിക്കുന്ന തെരുവുനായ്ക്കളുണ്ട്. കൂടുകളുടെ എണ്ണം നൂറാക്കാനുള്ള പദ്ധതി തയാറാക്കി വരികയാണ് ജില്ലാ പഞ്ചായത്ത്. ഇതിന്‍റെ പ്രവൃത്തി നടക്കുകയാണ്. നിലവിൽ 48 തെരുവുനായ്ക്കളെ സംരക്ഷിക്കുന്നതിനുള്ള കൂടുകളാണ് ഇവിടെയുള്ളത്. ജില്ലാ പഞ്ചായത്തിന്‍റെ നേതൃത്വത്തിൽ 78 ലക്ഷം രൂപ മുടക്കി ഊരത്തൂരിലെ പൊതു ശ്മശാനത്തിനരികിൽ 50 സെന്‍റ് സ്ഥലത്താണ് എബിസി കേന്ദ്രം പ്രവർത്തിക്കുന്നത്. 2022 ഒക്ടോബർ 4നാണ് പ്രവർത്തനം ആരംഭിച്ചത്. കേന്ദ്രത്തിൽ ഇതുവരെയായി 4271 തെരുവുനായ്ക്കളെ വന്ധ്യംകരിച്ചു. വന്ധ്യംകരണത്തിനു വിധേയമാകുന്ന നായ്ക്കളെ അഞ്ചുദിവസം പൂർണ നിരീക്ഷണത്തിലാക്കിയ ശേഷം പിടിച്ച സ്ഥലത്തു തന്നെ തിരികെ വിടും. ഊരത്തൂർ കേന്ദ്രത്തിനു കീഴിൽ നാല് കാച്ചർമാരാണുള്ളത്. ഇവർ മുണ്ടയാട് പ്രാദേശിക മൃഗസംരക്ഷണ കേന്ദ്രത്തിൽ വിദഗ്ധ പരിശീലനം ലഭിച്ചവരാണ്. മുലയൂട്ടുന്നവ, അസുഖം ബാധിച്ചവ, ഗർഭിണികൾ തുടങ്ങിയവയെ വന്ധ്യംകരിക്കില്ല. അബദ്ധത്തിൽ കാച്ചർമാരുടെ കയ്യിൽപെട്ടാൽ ഇവരെ തിരിച്ചു പിടിച്ച സ്ഥലത്തുതന്നെ വിടുമെന്ന് എബിസി കേന്ദ്രത്തിലെ ഡോക്ടർ അമ്മു കൃഷ്ണ യാദവ് പറഞ്ഞു. വന്ധ്യംകരിക്കപ്പെട്ട നായ്ക്കളുടെ വലതുചെവിയിൽ മായാത്ത അടയാളം ഇട്ടാണു പുറത്തു വിടുന്നത്. എബിസി കേന്ദ്രത്തിലെത്തുന്ന നായ്ക്കൾക്ക് ചോറ്,ചെറുപയർ, കാരറ്റ്, മുട്ട, ചിക്കൻ അല്ലെങ്കിൽ മത്സ്യം എന്നിവയാണ് ഭക്ഷണം. കുടിക്കാൻ കിടപ്പുമുറിക്കു സമീപം തന്നെ കുടിവെള്ളം. രണ്ടു ഡോക്ടറും, ഒരു തിയറ്റർ അസിസ്റ്റന്‍റ്, രണ്ട് പരിചാരകരും, നാലു കാച്ചർമാരും, ഒരു ഡ്രൈവറും ജീവനക്കാരായിട്ടുണ്ട്.

കണ്ണൂരിൽ നായക്കലി തുടരുന്നു; നിരവധി പേർക്ക് കടിയേറ്റു

കണ്ണൂർ: കണ്ണൂർ നഗരത്തിൽ ഇന്നലെയും തെരുവ് നായയുടെ പരാക്രമം. ഭിന്നശേഷിക്കാരനടക്കം കടിയേറ്റ 21 പേർ ജില്ലാ ആശുപത്രിയിൽ ചികിത്സ തേടി. റെയിൽവേ സ്റ്റേഷൻ പരിസരം, പ്ലാസ, എസ്ബിഐ പരിസരം എന്നിവിടങ്ങളിൽ വച്ചാണ് ആളുകൾക്ക് കടിയേറ്റത്. തോട്ടടയിലെ ഭിന്നശേഷിക്കാരായ യജാസ് (21), മംഗളൂരു സ്വദേശികളായ മുഹമ്മദ് നാസർ (40), ഇരിട്ടിയിലെ തൗസീഫ് (21), നെല്ലൂരിയിലെ കുഞ്ഞികൃഷ്ണൻ (66), എറണാകുളം സ്വദേശി സാജു കെ.തങ്കപ്പൻ (59), മട്ടന്നൂരിലെ സജീവൻ (52), കാട്ടാന്പള്ളിയിലെ സുനിൽകുമാർ (59), കണ്ണൂർ സ്വദേശികളായ റഹാൻ (23), പ്രദീപൻ (63), പ്രണവ്കുമാർ (29), മുണ്ടേരിയിലെ ഗോപിനാഥൻ (60), കടുമേനിയിലെ മുഹമ്മദ് റാഷിദ് (18), കുയിലൂരിലെ ശ്രീലത (70), ബ്ലാത്തൂരിലെ കരുണാകരൻ (78), തമിഴ്നാട് ചിന്നസേലം സ്വദേശിയായ ഭൂപതി (40), ചെറുപുഴയിലെ ജോയൽ (17),കണ്ണാടിപ്പറന്പ് സ്വദേശികളായ എൻ.കെ.റിയാസ് (33), ദിവിൻ (37) ഉൾപ്പടെയുള്ളവർക്കാണ് കടിയേറ്റത്. എല്ലാവരുടെയും കാലുകൾക്കാണ് കടിയേറ്റത്. അതിനിടെ ഇന്നലെ നഗരത്തിൽ ഒരു തെരുവ് നായയെ ചത്തനിലയിൽ കണ്ടെത്തി. ചൊവ്വാഴ്ചയും നഗരത്തിൽ നിരവധി പേർക്ക് നായയുടെ കടിച്ചു പരിക്കേൽപ്പിച്ച നായയെയും രാത്രിയോടെ ചത്ത നിലയിൽ കണ്ടെത്തിയിരുന്നു. തെരുവ് നായ ആളുകളെ കടിച്ചു പരിക്കേൽപ്പിക്കുന്ന സാഹചര്യത്തിൽ നഗരതതിൽ നായപിടിത്തം ആരംഭിച്ചിട്ടുണ്ട്. ഇവയെ വന്ധ്യംകരണം ചെയ്യും ഇന്നലെ ഏഴ് നായകളെയാണ് പിടികൂടിയത്. ചിലയിടങ്ങളിൽ നാട്ടുകാർ തെരുവ് നായകളെ അടിച്ചു കൊല്ലുകയും ചെയ്തിട്ടുണ്ട്. മൂന്നു പേർക്ക് കുറുക്കന്‍റെ കടിയേറ്റു കണ്ണൂർ: തോട്ടട കിഴുന്നപ്പാറയിൽ അന്യസംസ്ഥാന തൊഴിലാളിയുൾപ്പടെ മൂന്നു പേർക്ക് കുറുക്കന്‍റെ കടിയേറ്റു. കിഴുന്നപ്പാറ വരപ്രത്ത് വീട്ടിൽ ശോഭന (40), അയൽവാസി സബീറ (30) എന്നിവർക്ക് വീട്ടു പറന്പിൽ വച്ചാണ് കടിയേറ്റത്. അന്യസംസ്ഥാന തൊഴിലാളിക്ക് നടന്നു പോകുന്നതിനിടെയാണ് കടിയേറ്റത്. മൂവരും ജില്ലാ ആശുപത്രിയിൽ ചികിത്സ തേടി.

വായനയിലൂടെ എഴുത്തിന്‍റെ വിസ്മയ ലോകത്തേക്ക് മെസ്ന

ശ്രീകാന്ത് പാണപ്പുഴ തളിപ്പറമ്പ്: കുറുമാത്തൂരിലെ പ്ലസ് വൺ വിദ്യാർഥി കെ.വി. മെസ്നയ്ക്ക് വായന ഒരു ലഹരിയാണ്. കവയിത്രി എന്ന പേരിലേക്ക് ഈ പതിനാറുകാരിയെ എത്തിച്ചതും വായന തന്നെയാണ്. ഈ കൊച്ചു മിടുക്കി എഴുതിയ കാലം തെറ്റിയ മഴ എന്ന കവിത സിബിഎസ്ഇ ഏഴാം ക്ലാസ് മലയാള പാഠപുസ്ത കത്തിൽ കുട്ടികൾക്ക് പഠിക്കാനുള്ള ഒരു പാഠമായി ഉൾപ്പെടുത്തിയതു തന്നെ മെസ്നയുടെ ഉള്ളിലുള്ള കവിയെ അടയാളപ്പെടുത്തുന്നതാണ്. ഇക്കാലയളവിൽ തന്നെ കവിതാ രചനയിൽ സംസ്ഥാനതലത്തിൽ നിരവധി പുരസ്കാരങ്ങൾ കരസ്ഥമാക്കാൻ പ്രാപ്തമാക്കിയത് ഒന്നാം ക്ലാസ് മുതൽ ആരംഭിച്ച പുസ്തക വായനയാണെന്ന് മെസ്ന പറയുന്നു. സ്കൂൾ ലൈബ്രറിയിൽ നിന്നും വായനശാലകളിൽ നിന്നും പുസ്തകങ്ങൾ എടുത്തു വായിക്കുന്ന മെസ്നയ്ക്ക് വീട്ടിൽ സ്വന്തമായി ഒരു ലൈബ്രറിയും ഉണ്ട്. പുസ്തകങ്ങൾ വായിക്കുമ്പോഴാണ് ഏറ്റവും സന്തോഷം ലഭിക്കുന്നതെന്ന് മെസ്ന പറഞ്ഞു. വായനയിലൂടെ എഴുത്തിലേക്ക് കടന്ന മെസ്ന കവിതയും കഥയും ലേഖനങ്ങളും എഴുതാറുണ്ട്. മലയാളം പുസ്തകങ്ങളോടൊപ്പം ഇംഗ്ലീഷ് പുസ്തകങ്ങളും വായിക്കുന്ന മെസ്ന, വായിച്ച പുസ്തക ങ്ങളെക്കുറിച്ച് കുറിപ്പുകളും എഴുതി സൂക്ഷിക്കുന്നു. വായിച്ച പുസ്തകങ്ങളിൽ മെസ്നക്ക് ഏറ്റവും ഇഷ്ടപ്പെട്ടത് പൗലോ കൊയ്‌ലോയുടെ ആൽക്കെമിസ്റ്റ് ആണ്. വിക്ടർ ഹ്യൂഗോ എഴുതി നാലപ്പാട്ട് നാരായണ മേനോൻ വിവർത്തനം ചെയ്ത പാവങ്ങൾ എന്ന പുസ്തക വായനയിലാണ് ഇപ്പോൾ ഈ കൊച്ചു കവയിത്രി. പുസ്തക വായന പഠനത്തിന് ഊർജം പകർന്നതിലൂടെയാണ് തനിക്ക് എൽഎസ്എസ്, യുഎസ്എസ് തുടങ്ങിയ സ്കോളർഷിപ്പുകൾ നേടാനും എസ്എസ്എൽസിക്ക് മുഴുവൻ വിഷയങ്ങൾക്കും എ പ്ലസ് നേടാനും കഴിഞ്ഞതെന്ന് മെസ്ന പറഞ്ഞു. വായനയുടെ ഗുണങ്ങൾ കൊണ്ടാണ് ലൈബ്രറി കൗൺസിൽ സംസ്ഥാന തല മത്സരങ്ങളിൽ പങ്കെടു ക്കാൻ സാധിച്ചത്. ജില്ലയിലെ മികച്ച വായനക്കാരിയായി തെരഞ്ഞെടുത്തതോടൊപ്പം സംസ്ഥാന സർക്കാരിന്‍റെ 2020 ലെ ഉജ്ജ്വല ബാല്യം പുരസ്കാരവും 2021ലെ മുല്ലനേഴി കാവ്യ പ്രതിഭാ പുരസ്കാ രവും ലഭിച്ചിട്ടുണ്ട്. സംസ്ഥാന സ്കൂൾ കലോത്സവത്തിൽ കവിതാരചനയിൽ രണ്ടു തവണ എ ഗ്രേഡ് കരസ്ഥമാക്കിയി ട്ടുണ്ട്. ഗാന്ധിദർശൻ വേദിയുടെ ഗാന്ധി പുരസ്കാരവും ലഭിച്ചിട്ടുണ്ട്. തളിപ്പറമ്പ് ടാഗോർ വിദ്യാനി കേതൻ ഗവ. ഹയർ സെക്കൻഡറി സ്കൂൾ പ്ലസ് വൺ വിദ്യാർഥിനിയാണ് മെസ്ന. കുറുമാത്തൂർ സ്വദേശികളും അധ്യാപക ദന്പതികളുമായ കെ.വി. മെസ്മർ -കെ.കെ. ബീന ദന്പതികളുടെ ഏക മകളാണ് മെസ്ന.

ആറുപതിറ്റാണ്ടിന്‍റെ വായനാനുഭവ ശേഖരവുമായി മുകുന്ദൻ

ഷെൽമോൻ പൈനാടത്ത് പെരുമ്പടവ്: ആറുപതിറ്റാണ്ടുകാലം വായിച്ച പത്രം-മാസിക-ബുക്കുകളുടെ ശേഖരവുമായി കൂവേരിയിലെ ആനോത്ത് മുകുന്ദൻ. കൂവേരി കടവിന് സമീപം കൂവേരി സർവീസ് സഹകരണ ബാങ്കിന്‍റെ ഹെഡ് ഓഫീസിന് പിന്നിലാണ് മുകുന്ദന്‍റെ (74) വീട്. വീട്ടിലെത്തിയാൽ ഒരു വലിയ ലൈബ്രറി തന്നെ ഇവിടെ കാണാം. രണ്ടു മുറികളിലായി അനേകം പത്ര-മാസിക കെട്ടുകൾ ഉണ്ട്. 1968 മുതലുള്ള ശേഖരം ഇദ്ദേഹത്തിന്‍റെ കൈയിൽ നിലവിലുണ്ട്. 1967ൽ പുറത്തിറക്കിയ അന്നത്തെ തെരഞ്ഞെടുപ്പ് ഗൈഡ് മുതൽ ഇപ്പോഴത്തെ തെരഞ്ഞെടുപ്പുകളുടെ വിവരങ്ങളും തരംതിരിച്ചുവച്ച ശേഖരണവും ഉണ്ട്. 1968 കൂവേരിയിലെ തപാൽ ഓഫീസ് ആരംഭിച്ചപ്പോൾ ജീവനക്കാരനായി ജോലിക്ക് കയറിയ ആനോത്ത് മുകുന്ദൻ അന്ന് ലഭിച്ചിരുന്ന 68 രൂപ ശമ്പളത്തിൽ നിന്നാണ് കിട്ടാവുന്ന പത്രങ്ങളും മാസികകളും എല്ലാം വാങ്ങി വായന തുടങ്ങിയത്. വായിച്ചു കഴിഞ്ഞവ നശിപ്പിച്ചു കളയാതെ സൂക്ഷിച്ചുവയ്ക്കുന്ന പതിവ് ഇപ്പോഴും തുടരുകയാണ്. അതുകൊണ്ടുതന്നെ ഇപ്പോഴത്തെ തലമുറ റഫറൻസിനായി ഇവിടെ എത്തുന്നുണ്ട്. ജോലി മതിയാക്കിയപ്പോഴും എഴുത്തും പത്രപ്രവർത്തനവുമായി ജീവിതം മുന്നോട്ടു നീങ്ങിയപ്പോഴും വരുമാനത്തിന്‍റെ ഏറിയപങ്കും പ്രസിദ്ധീകരണങ്ങൾ വാങ്ങാൻ ചെലവഴിച്ചു. ഒരു അലമാരയിൽ തുടങ്ങിയ പത്രശേഖരം പിന്നീട് വലുതായി രണ്ടു മുറികൾ നിറഞ്ഞു കവിഞ്ഞപ്പോൾ അലമാരകൾ വാങ്ങിയും സ്റ്റാൻഡുകൾ നിർമിച്ചും സൂക്ഷിക്കാൻ തുടങ്ങി. ഇതുകൂടാതെ ബാരലുകളിലും പഴയകാല പത്രക്കെട്ടുകൾ അടുക്കി സൂക്ഷിച്ചു. അടിയന്തരാവസ്ഥക്കാലത്തെ പത്രക്കെട്ടുകൾ ഉൾപ്പെടെ ഇവിടെയുണ്ട്. ഇന്ദിരാഗാന്ധി ഉൾപ്പെടെ പ്രമുഖ വ്യക്തികളുടെ മരണവാർത്തകളുടെ പത്രങ്ങളും ഇവിടെയുണ്ട്. ഇതെല്ലാം വിവിധ ഫയലുകളായി ഇപ്പോഴും സൂക്ഷിച്ചുവച്ചിരിക്കുകയാണ്. ഇന്ത്യയിലെ നാലാമത്തെ പൊതുതെരഞ്ഞെടുപ്പ് മുതൽ ഇതുവരെയുള്ള ലോകസഭ, നിയമസഭ തെരഞ്ഞെടുപ്പുകളുടെ നല്ലൊരു ശേഖരവും ഇദ്ദേഹത്തിന്‍റെ പക്കൽ ഭദ്രം. അടിയന്തരാവസ്ഥക്കാലത്തെ പാർട്ടി ലഘുലേഖകളും മുകുന്ദന്‍റെ സൂക്ഷിപ്പിലുണ്ട്. കൂടാതെ സർവവിജ്ഞാന കോശങ്ങൾ, ഗൈഡുകൾ, റഫറൻസ് പുസ്തകങ്ങൾ, വിവിധ പ്രസിദ്ധീകരണ സ്ഥാപനങ്ങൾ ഇറക്കിയ രാമായണങ്ങൾ പ്രസിദ്ധീകരണം നിലച്ച വിവിധ മാസികകളും വാരികകളും ഉണ്ട്. മുകുന്ദൻ പുസ്തകങ്ങളും രചിച്ച് പ്രസിദ്ധീകരിച്ചിട്ടുണ്ട്. ഇനിയും മരിക്കാത്ത കൃഷ്ണപിള്ള, ഇഎംഎസ് മുതൽ നായനാർവരെ തുടങ്ങിയ പുസ്തകങ്ങൾ എഴുതിയിട്ടുണ്ട്. നല്ലൊരു സാംസ്കാരിക പ്രവർത്തകൻ കൂടിയായ മുകുന്ദൻ ഒരു വാഹനാപകടത്തെത്തുടർന്ന് പരിക്കേറ്റതിന് ശേഷം ഇപ്പോഴും ചികിത്സയിൽ തുടരുകയാണ്. 74 വയസായ ഇദ്ദേഹം അനാരോഗ്യത്താൽ വീട്ടിൽ തന്നെ കഴിയുകയും ഇതോടൊപ്പം ചികിത്സയും തുടരുകയാണ്. ഇദ്ദേഹത്തിന്‍റെ ശേഖരണം അറിഞ്ഞ് ജില്ലയ്ക്ക് പുറത്തുനിന്നു പോലും ഗവേഷണ വിദ്യാർഥികൾ ഉൾപ്പെടെ റഫറൻസിനായി ഇവിടെ എത്തുന്നുണ്ട്. ഇവരിൽ പലരും തിരിച്ചു തരാം എന്ന് പറഞ്ഞുകൊണ്ട് പ്രസിദ്ധീകരണങ്ങൾ കൊണ്ടുപോകുന്നുണ്ടെങ്കിലും പിന്നീട് തിരിച്ചുതരാറില്ല എന്നും മുകുന്ദൻ പറയുന്നു.

പുലിമുട്ട് നിർമാണം പൂർത്തിയായില്ല; അഴിമുഖത്ത് മണൽത്തിട്ട ഉയർന്നു

പയ്യന്നൂര്‍: നിർമാണം പൂര്‍ത്തീകരിക്കാനുള്ള കാലാവധി പുതുക്കി നല്‍കിയിട്ടും പുതിയങ്ങാടി-പാലക്കോട് പുലിമുട്ട് നിർമാണം പൂർത്തിയാക്കാതെ കരാറുകാരൻ. പണി പൂർത്തിയാകാത്തത് കാരണം അഴിമുഖത്ത് ഉയർന്ന മണൽത്തിട്ട മത്സ്യതൊഴിലാളികളുടെ ജീവനും സ്വത്തിനും ഭീഷണി ഉയർത്തുകയാണ്. റീബില്‍ഡ് കേരള ഇനിഷ്യേറ്റീവില്‍ ഉള്‍പ്പെടുത്തി 26.60കോടി രൂപ ചെലവ് കണക്കാക്കിയാണ് പുലിമുട്ട് നിർമാണം ആരംഭിച്ചത്. ചൂട്ടാട് ഭാഗത്ത് 210 മീറ്റര്‍ നീളത്തിലുള്ള പ്രവൃത്തിയില്‍ നൂറ് മീറ്ററോളം മാത്രമാണ് ഭാഗികമായി പൂര്‍ത്തീകരിച്ചത്. പാലക്കോട് ഭാഗത്ത് 365 മീറ്റര്‍ നീളത്തിലുള്ള പ്രവൃത്തിയില്‍ നൂറ് മീറ്ററോളമാണ് പൂര്‍ണമായും പൂര്‍ത്തീകരിച്ചതെന്നും 2025 ഫെബ്രുവരി 15ന് പൂര്‍ത്തീകരിക്കാന്‍ കഴിയുമെന്നാണ് പ്രതീക്ഷയെന്നും മത്സ്യബന്ധന മന്ത്രി നിയമസഭയില്‍ പറഞ്ഞിരുന്നു. ഇതേ കരാറുകാരന്‍ ഏറ്റെടുത്ത മാട്ടൂല്‍ പുലിമുട്ട് നിർമാണവും നിലച്ചുകിടന്നിരുന്ന അവസ്ഥചൂണ്ടിക്കാണിച്ച് കരാറുകാരനെ മാറ്റണമെന്ന ആവശ്യവും മത്സ്യത്തൊഴിലാളികളില്‍ നിന്നുണ്ടായി. എന്നാല്‍ ഇതൊന്നും മുഖവിലക്കെടുക്കാതെ ഇയാള്‍ക്കുതന്നെ കരാര്‍ പുതുക്കി നല്‍കിയതില്‍ ദുരൂഹതയുണ്ടെന്ന് മത്സ്യത്തൊഴിലാളികള്‍ ആരോപിക്കുന്നു. കരാര്‍ പുതുക്കിനല്‍കിയതോടെ ചെറിയ ചലനങ്ങളുണ്ടായിരുന്നതായും യുദ്ധകാലാടിസ്ഥാനത്തില്‍ പൂര്‍ത്തീകരിക്കേണ്ട പുലിമുട്ട് നിര്‍മാണം ഇപ്പോള്‍ ഇഴഞ്ഞുനീങ്ങുന്ന അവസ്ഥയിലാണെന്നും മത്സ്യത്തൊഴിലാളികള്‍ പറയുന്നു.വകുപ്പുദ്യോഗസ്ഥർ ഇടയ്ക്കിടെ വന്നു പോകുന്നതല്ലാതെ നിർമാണം പൂർത്തികരിക്കാൻ കരാറുകാരനിൽ ഇടപെടൽ നടത്തുന്നില്ലെന്നും ആരോപണമുണ്ട്. പുലിമുട്ട് നിര്‍മാണം പൂര്‍ത്തീകരിക്കാഞ്ഞതോടെയാണ് നേരത്ത ഡ്രഡ്ജിംഗ് നടത്തിയിടത്ത് മണൽതിട്ട രൂപപ്പെട്ടിരിക്കുന്നത്.

ക്ഷീരകർഷകർ വ്യത്യസ്ത മേഖലകൾ പരീക്ഷിക്കാൻ തയാറാകണം: വി. ശിവദാസൻ എംപി

കണ്ണൂർ: ഭക്ഷ്യ സംസ്‌കാരത്തിൽ വന്ന മാറ്റങ്ങളുടെ സാധ്യതകൾ പ്രയോജനപ്പെടുത്തി ക്ഷീരകർഷകർ ഉപോത്പന്നങ്ങളുടെ വിപണനം ഉൾപ്പെടെയുള്ള വ്യത്യസ്ത മേഖലകൾ പരീക്ഷിക്കാൻ തയാറാകണമെന്നും ഇതിലൂടെ കർഷകരുടെ സാമൂഹ്യ അന്തസ് ഉയരുമെന്നും ഡോ.വി. ശിവദാസൻ എംപി. വനിതാ കമ്മീഷൻ സംഘടിപ്പിച്ച വനിതാ ക്ഷീര കർഷകരുടെ പബ്ലിക് ഹിയറിംഗ് കണ്ണൂർ പോലീസ് കോ-ഓപ്പറേറ്റീവ് സൊസൈറ്റി ഹാളിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.വനിതാ കമ്മീഷൻ അംഗം പി. കുഞ്ഞായിഷ അധ്യക്ഷത വഹിച്ചു. ക്ഷീര കർഷകർക്ക് സമൂഹത്തിൽ അന്തസോടെ തൊഴിലെടുക്കുന്നതിന് ആവശ്യമായ സാമൂഹികാന്തരീക്ഷം സൃഷ്ടിക്കാൻ വനിതാ കമ്മീഷൻ ഇടപെടണമെന്ന് വനിതാ ക്ഷീരകർഷകർ ആവശ്യപ്പെട്ടു. ചാണകവും തൊഴുത്തും കാണുന്നത് പോലും ദുസഹമാണെന്ന രീതിയിലാണ് സമൂഹത്തിൽ ചില ആളുകൾ പെരുമാറുന്നത്. ക്ഷീരകർഷകരെ അവജ്ഞയോടെയാണ് ഇവർ കാണുന്നത്. ഇത്തരം മാനസികാവസ്ഥ ഇല്ലാതാ ക്കുന്നതിന് വനിതാ കമ്മീഷൻ പോലുള്ള സംവിധാനങ്ങൾ അടിയന്തരമായി ഇടപെടണമെന്നും കർഷകർ ആവശ്യപ്പെട്ടു. മൃഗ ഡോക്ടർമാരുടെ സേവനം 24 മണിക്കൂറും ലഭ്യമാക്കാനും കന്നുകാലികൾക്ക് ചികിത്സ നൽകുന്ന തിന് പണം ചോദിച്ചു വാങ്ങുന്ന ഡോക്ടർമാർക്കെതിരേ നടപടി സ്വീകരിക്കാനും സർക്കാരിനോട് ശിപാർശ ചെയ്യണമെന്നും കർഷകർ ആവശ്യപ്പെട്ടു. 60 വയസ് കഴിഞ്ഞ ക്ഷീരകർഷകർക്ക് ക്ഷേമനിധി പെൻഷൻ കുറഞ്ഞത് 1000 രൂപയെങ്കിലും അനുവദിക്കുക, ബിപിഎൽ-എപിഎൽ മാനദണ്ഡങ്ങൾ നോക്കാതെ ക്ഷീരകർഷകർക്ക് ആനുകൂല്യങ്ങൾ അനുവദിക്കുക, കന്നുകാലികൾ ചത്തുപോയാൽ ഇൻഷ്വറൻസ് തുക ലഭ്യമാക്കുന്നതിന് നടപടിയെടുക്കുക എന്നീ ആവശ്യങ്ങളും കർഷകർ ഉന്നയിച്ചു. ജില്ലാപഞ്ചായത്ത് പ്രസിഡന്‍റ് കെ.കെ..രത്‌നകുമാരി മുഖ്യാതിഥിയായിരുന്നു. ക്ഷീരവികസന വകുപ്പ് അസിസ്റ്റന്‍റ് ഡയറക്ടർ ലാവണ്യ, തളിപ്പറമ്പ് ഡയറി എക്സ്റ്റൻഷൻ ഓഫീസർ ബീന, ക്ഷീരവികസന വകുപ്പ് എക്സ്റ്റൻഷൻ ഓഫീസർ ബോബി, വനിതാ കമ്മീഷൻ പ്രോജക്ട് ഓഫീസർ എൻ. ദിവ്യ എന്നിവർ പ്രസംഗിച്ചു.

കനത്ത മഴയിൽ കിണർ ഇടിഞ്ഞു

കൂത്തുപറമ്പ്: കനത്ത മഴയിൽ നിർമിണത്തിലിരിക്കുന്ന വീടിനോട് ചേർന്ന കിണർ ഇടിഞ്ഞു താഴ്ന്നു. ആമ്പിലാട് കുഞ്ഞല്ലൂർ ഹൗസിൽ സനോഷിന്‍റെ പണിപൂർത്തിയായ കിണറാണ് മഴയിൽ തകർന്നത്. 14 കോൽ താഴ്ചയുള്ള കിണർ പൂർണമായും ചെങ്കല്ല് കൊണ്ട് കെട്ടിയതായിരുന്നു. കിണർ ഇടിഞ്ഞതിനെ തുടർന്ന് വീടിന് വേണ്ടി കെട്ടിയ തറയും അപകടാവസ്ഥയിലാണുള്ളത്.

നിലാവിനൊരു സന്ദേശവുമായി ദിയ ദിനചന്ദ്രൻ

ഇരിട്ടി: വായനാദിനത്തിൽ കിളിയന്തറ സെന്‍റ് തോമസ് സെന്‍റ് തോമസ് ഹയർ സെക്കൻഡറി സ്കൂളിൽ വലിയ ആഘോഷങ്ങളൊന്നുമില്ലെങ്കിലും അസംബ്ലിയിൽ ഒരു കുട്ടി കഥ വായിക്കും. സ്കൂളിലെ പ്ലസ് ടു വിദ്യാർഥിനി ദിയ ദിനചന്ദ്രൻ എഴുതിയ . "നിലാവിനൊരു സന്ദേശം’ എന്ന കഥയാണ് വായിക്കുക. സ്വന്തം പ്രകാശത്തെ തിരിച്ചറിയാതെ ഇരുട്ടിലാണെന്ന് സ്വയം പഴിക്കുന്ന നിലാവിനോട് ഒരു കുട്ടി സംവദിക്കുന്നതാണ കഥയുടെ പ്രമേയം. സൂര്യനിൽ നിന്ന് നീ കടം കൊണ്ട പ്രകാശത്തിന്‍റെ കുളിർമയിൽ ഞങ്ങൾ മനുഷ്യർ ആന്ദനം കണ്ടെത്തുന്നു. മുറിവേറ്റ മനുഷ്യ ഹൃദയങ്ങൾക്ക് നിന്‍റെ പ്രകാശം ഒരു വരമാണെന്ന് ഓർമിപ്പിച്ചുകൊണ്ടുള്ള വരികളിൽ അങ്ങിങ്ങ് കൂട്ടിവായിക്കാൻ കഴിയാതെ ഒളിഞ്ഞുകിടക്കുന്ന ഒരായിരം ഓർമപ്പെടുത്തലുകൾ കണ്ടെത്താൻ കഴിയും. എസ്എസ്എൽസിയിലും പ്ലസ് വണ്ണിലും മുഴുവൻ എ പ്ലസ് നേടിയ ദിയ എഴുത്തിൽ മാത്രമല്ല പഠനത്തിലും മിടുക്കിയാണ്. കഥയെഴുത്തിൽ 2023-24 വർഷത്തെ സംസ്ഥാനതല വിജയി കൂടിയാണ് ദിയ ദിനചന്ദ്രൻ. അധ്യാപക ദമ്പതികളായ ദിനചന്ദ്രൻ- മിനി ദന്പതികളുടെ മകളാണ് ദിയ.

പ്ലസ് വൺ പ്രവേശനോത്സവം നടത്തി

കണ്ണൂർ: സംസ്ഥാന പൊതുവിദ്യാഭ്യാസ വകുപ്പിന് കീഴിൽ ഹയർ സെക്കൻഡറി വിഭാഗം ഒന്നാംവർഷ വിദ്യാർഥികൾക്കുള്ള ജില്ലാതല പ്രവേശനോത്സവം കണ്ണൂർ ചെറുകുന്ന് ഗവ. വെൽഫെയർ ഹയർ സെക്കൻഡറി സ്കൂളിൽ എം. വിജിൻ എംഎൽഎ ഉദ്‌ഘാടനം ചെയ്തു. ചെറുകുന്ന് പഞ്ചായത്ത് പ്രസിഡന്‍റ് ടി.നിഷ അധ്യക്ഷത വഹിച്ചു. ഹയർ സെക്കൻഡറി വിഭാഗം ആർഡിഡി പി.എക്സ്. ബിയാട്രിസ് മരിയ പ്രവേശനോത്സവ സന്ദേശം നൽകി. അധ്യാപക അവാർഡ് ജേതാവും കരിയർ കൗൺസിലിംഗ് വിദഗ്ധനുമായ പി.ഒ. മുരളീധരൻ ഓറിയന്‍റേഷൻ ക്ലാസെടുത്തു. ബ്ലോക്ക് പഞ്ചായത്ത് അംഗം രേഷ്മ പരാഗൻ, ഗ്രാമപഞ്ചായത്ത് വൈസ് പ്രസിഡന്‍റ് വി.പി. സജീവൻ, വിദ്യാഭ്യാസ സ്ഥിരസമിതി അധ്യക്ഷ കെ.അനിത, വാർഡ് അംഗം കെ.കൃഷ്ണൻ തുടങ്ങിവർ പ്രസംഗിച്ചു. പ്ലസ് വൺ സ്‌കൂൾതല പ്രവേശനോത്സവം രാമന്തളി ഗവ. ഹയർ സെക്കൻഡറി സ്‌കൂളിൽ ജില്ലാ പഞ്ചായത്ത് അംഗം സി.പി ഷിജു ഉദ്ഘാടനം ചെയ്തു. പിടിഎ പ്രസിഡന്‍റ് കെ.വി. സുരേന്ദ്രൻ അധ്യക്ഷത വഹിച്ചു. ഇരിട്ടി: വെളിമാനം സെന്‍റ് സെബാസ്റ്റ്യന്‍സ് ഹയര്‍ സെക്കന്‍ഡറി സ്‌കൂളില്‍ പ്ലസ് വൺ വിദ്യാർഥികൾക്ക് വരവേല്‍പ് -2025 എന്ന പേരിൽ സ്വീകരണം നൽകി. സോഫ്റ്റ് സ്‌കില്‍ പരിശീലകന്‍ കെ.സി. ഷാജു ഉദ്ഘാടനം ചെയ്തു. സ്കൂൾ മാനേജര്‍ ഫാ. മാര്‍ട്ടിന്‍ കിഴക്കേതലക്കല്‍ അധ്യക്ഷത വഹിച്ചു. പ്രിന്‍സിപ്പൽ ഡാഫി കെ. മാണി, മുഖ്യാധ്യാപകൻ ബെന്നി മാത്യു, പിടിഎ പ്രസിഡന്‍റ് ടൈറ്റസ് മുള്ളീകുഴിയില്‍, മദര്‍ പിടിഎ പ്രസിഡന്‍റ് ബിന്‍സി റോയി, സ്റ്റാഫ് സെക്രട്ടറി റിന്‍സി, മരിയ സെബാസ്റ്റ്യന്‍, അനില സജി എന്നിവര്‍ പ്രസംഗിച്ചു. ഇരിട്ടി: എടൂർ സെന്‍റ് മേരീസ് ഹയർ സെക്കൻഡറി സ്കൂളിൽ പ്ലസ് വൺ പ്രവേശനോത്സവം സ്കൂൾ മാനേജർ ഫാ. തോമസ് വടക്കേമുറിയിൽ ഉദ്ഘാടനം ചെയ്തു. പി ടി എ പ്രസിഡന്‍റ് ജിമ്മി വട്ടംതൊട്ടിയിൽ അധ്യക്ഷത വഹിച്ചു. പ്രിൻസിപ്പൽ ലിൻസി പി. സാം , ഡെന്നി തോമസ്, ബിനു .കെ. ആന്‍റണി, കെ. അഭിരാമി, ജോസഫ് ബിനു എന്നിവർ പ്രസംഗിച്ചു. പരിപാടിക്ക് എൻഎസ്എസ് വോളന്‍റിയർമാർ നേതൃത്വം നൽകി. ഇരിട്ടി: കിളിയന്തറ സെന്‍റ് തോമസ് ഹയർ സെക്കൻഡറി സ്കൂളിൽ നടന്ന പ്ലസ് വൺ പ്രവേശനോത്സവം പായം പഞ്ചായത്ത് അംഗം അനിൽ എം. കൃഷ്ണൻ ഉദ്ഘാടനം ചെയ്തു . പി ടി എ പ്രസിഡന്‍റ് ജോമി ജോസ് അധ്യക്ഷത വഹിച്ചു. പ്രിൻസിപ്പൽ എം.ജെ. വിനോദ് , ജിനിൽ മാർക്കോസ്, അൽക്ക റോസ് എന്നിവർ പ്രസംഗിച്ചു. തുടർന്ന് കൂടെയുണ്ട് കരുത്തേകാൻ ബോധവൽക്കരണ ക്ലാസും നടത്തി. അധ്യാപകർ, എൻഎസ്എസ് വോളന്‍റിയർമാർ, സ്കൗട്ട്സ് ആൻഡ് ഗൈഡ്സ് എന്നിവർ നേതൃത്വം നൽകി. മട്ടന്നൂർ: മട്ടന്നൂർ ഹയർ സെക്കൻഡറി സ്കൂൾ പ്ലസ് വൺ പ്രവേശനോത്സവം നഗരസഭ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ വി.കെ. സുഗതൻ ഉദ്ഘാടനം ചെയ്തു. നഗരസഭ വാർഡ് കൗൺസിലർ പി.ശ്രീജ അധ്യക്ഷത വഹിച്ചു. പ്രസിദ്ധ മിമിക്രി കലാകാരനും സിനി ആർട്ടിസ്റ്റുമായ ശിവദാസ് മട്ടന്നൂർ വിശിഷ്ടാഥിതിയായിരുന്നു. തുടർന്ന് താങ്ങായി തണലായി മികവാർന്ന രക്ഷാകർതൃത്വം എന്നവിഷയത്തിൽ സൗഹൃദ കോ -ഓർഡിനേറ്റർ കെ.പി. ശ്രീജ, എൻഎസ്എസ് പ്രോഗ്രാം ഓഫീസർ രൂപ എന്നിവർ ക്ലാസെടുത്തു.

തെരുവുനായ ആക്രമണം; കോർപറേഷൻ യോഗത്തിൽ ബഹളവും സംഘർഷവും

കണ്ണൂര്‍: നഗരത്തിലെ തെരുവുനായ ആക്രമണത്തെ ചൊല്ലി കോർപറേഷൻ യോഗത്തിൽ പ്രതിപക്ഷ ബഹളം വാക്കേറ്റത്തിലും സംഘർഷത്തിലും കലാശിച്ചു.മേയര്‍ മുസ്‌ലിഹ് മഠത്തില്‍ കൗണ്‍സില്‍ യോഗ ഹാളിലെത്തി ഉടൻ എൽഡിഎഫ് കൗണ്‍സിലര്‍മാര്‍ തെരുവ്‌നായ ഭീതിയില്‍ ജനം വലയുന്നു, കോര്‍പറേഷന്‍റെ അനങ്ങാപ്പാറ നയം അവസാനിപ്പിക്കുക തുടങ്ങിയ പ്ലക്കാര്‍ഡ് ഉയര്‍ത്തി മുദ്രാവാക്യം വിളിച്ച് പ്രതിഷേധിച്ചു. ഇതിനിടെ മേയറുടെ ഡയസിനടുത്തെത്തിയ സിപിഎം കൗൺസിലർ മേയർ സംസാരിക്കാൻ തുടങ്ങുന്നതിനിടെ മൈക്ക് പിടിച്ചു വാങ്ങി. ഇതോടെ ഭരണപക്ഷകൗൺസിലർമാരും ഡയസിനടുത്തേക്ക് എത്തി പ്രതിപക്ഷത്തെ തടയാൻ ശ്രമിച്ചു. ഇരുവരും തമ്മിൽ വാക്കേറ്റമാരംഭിക്കുകയായിരുന്നു. ബഹളത്തിനിടെ മേയർ മുസ്‌ലിഹ് മഠത്തിൽ അജണ്ടകൾ വായിച്ചു തീർത്ത് കൗൺസിൽ യോഗം പൂർത്തിയായതായി പ്രഖ്യാപിച്ച് ഡയസിൽ നിന്നും ഇറങ്ങിപ്പോയി. ഇതിനിടെ പ്രതിപക്ഷം യോഗം ബഹിഷ്കരിക്കുന്നെന്ന് പ്രഖ്യാപിച്ച് വാക്ക് ഔട്ട് നടത്തി. എന്‍ സുകന്യ, ടി രവീന്ദ്രന്‍, എന്‍ ഉഷ, പി പ്രദീപന്‍ തുടങ്ങിയവരുടെ നേതൃത്വത്തിലായിരുന്നു പ്രതിഷേധം. യോഗ നടപടികള്‍ ബഹിഷ്‌കരിച്ച് പുറത്തിറങ്ങിയ പ്രതിപക്ഷ കൗണ്‍സിലര്‍മാര്‍ പ്രതിഷേധിച്ചു. തെരുവ് നായ ആക്രണമണത്തെ ചൊല്ലി കോര്‍പറേഷന് പുറത്തും എല്‍ഡി എഫ് പ്രവര്‍ത്തകര്‍ പ്രതിഷേധിച്ചു. കൗണ്‍സില്‍ യോഗം ആരംഭിക്കുന്നതിന് മുമ്പ് തന്നെ പ്രവര്‍ത്തകര്‍ കൗണ്‍സില്‍ ഹാളിന് മുന്നിലെത്തി മുദ്രാവാക്യം വിളിച്ചാണ് പ്രതിഷേധിച്ചത്. ഹാളിനുള്ളിലേക്ക് കടക്കാന്‍ ശ്രമിച്ച പ്രവര്‍ത്തകരെ പൊലിസുകാര്‍ തടഞ്ഞുനിര്‍ത്തി. തുടര്‍ന്ന് കൗണ്‍സിലര്‍മാരും സി.പി.എം പ്രവര്‍ത്തകരും പ്രതിഷേധവുമായി പുറത്തേക്ക് പോകുകയായിരുന്നു. പിന്നാലെ ബി.ജെ.പി പ്രവര്‍ത്തകരും പ്രതിഷേധവുമായി എത്തി. പ്രതിപക്ഷത്തിന്‍റേത് തെരഞ്ഞെടുപ്പ് സ്റ്റണ്ട്: മേയർ മുസ്‌ലിഹ് മഠത്തിൽ കണ്ണൂര്‍: പ്രതിപക്ഷ അംഗങ്ങൾ അനാവശ്യ വിവാദങ്ങളുണ്ടാക്കുകയാണെന്നും തെരഞ്ഞെടുപ്പ് സ്റ്റണ്ടാണെന്നും മേയര്‍ മുസ്‌ലിഹ് മഠത്തില്‍. തദ്ദേശ സ്ഥാപനമെന്ന നിലയില്‍ കോര്‍പറേഷന് തെരുവുനായ ശല്യം പരിഹരിക്കാന്‍ എന്തൊക്കെ ചെയ്യാനാകുമെന്ന് പ്രതിപക്ഷത്തിനും നല്ലതുപോലെ അറിയാവുന്നതാണ്. എന്നാൽ ഇത് മറച്ച് വച്ച് ജനങ്ങളുടെ കണ്ണിൽ പൊടിയിടാനുള്ള പ്രതിഷേധമാണ് നടത്തുന്നതെന്ന് മേയർ പത്രസമ്മേളനത്തിൽ ആരോപിച്ചു. ജില്ലയിൽ എൽഡിഎഫ് ഭരിക്കുന്ന തദ്ദേശസ്ഥാപനങ്ങളുടെ പരിധിയിലും തെരുവ്നായ ശല്യമുണ്ട്. തെരുവ് നായ ശല്യത്തിനെതിരെ ശക്തമായ നടപടി കോര്‍പ്റേഷന്‍ സ്വീകരിച്ച് വരുന്നുണ്ട്. രണ്ട് ദിവസങ്ങളിലായി അഞ്ചു നായകളെ പിടികൂടി. നായപിടിത്തം നടത്തുന്പോൾ മൃഗസ്നേഹികൾ പ്രതിഷേധവുമായി വരുന്ന അവസ്ഥയുണ്ട്. ഇന്ന് രാവിലെ 11 മണിക്ക് അടിയന്തര കൗണ്‍സില്‍ വിളിച്ച് ചേര്‍ത്തിട്ടുണ്ടെന്നും മേയര്‍ പറഞ്ഞു. പത്രസമ്മേളനത്തിൽ ഡെപ്യൂട്ടി മേയര്‍ പി ഇന്ദിര, സ്റ്റാൻഡിംഗ് കമ്മിറ്റി അംഗങ്ങളായ വി.കെ ശ്രീലത, ഷാഹിന മൊയ്തീന്‍, പി.ഷമീമ, അംഗങ്ങളായ ടി.ഒ. മോഹനന്‍, കെ.പി. അബ്ദുല്‍ റസാഖ് എന്നിവരും പങ്കെടുത്തു. കോർപറേഷൻ നടപടി സ്വീകരിക്കുന്നില്ല: എൻ. സുകന്യ കണ്ണൂര്‍: നഗരത്തിലേക്ക് വരാൻ ആളുകൾ ഭയക്കുകയാണെന്നും തെരുവുനായകളെ നിയന്ത്രിക്കാൻ കോർപറേഷൻ ഒരു നടപടികളും സ്വീകരിക്കുന്നില്ലെന്നും എൽഡിഎഫ് കോർപറേഷൻ പ്രതിപക്ഷ നേതാവ് എൻ. സുകന്യ. എബിസി കേന്ദ്രമെന്ന ആവശ്യം കോര്‍പറേഷന്‍ പരിഗണിക്കുന്നില്ലന്നും അവര്‍ പറഞ്ഞു. കോര്‍പറേഷന്‍ പരിധിയില്‍ എബിസി കേന്ദ്രം തുടങ്ങാന്‍ പ്രതിപക്ഷം നിരന്തരം ആവശ്യപ്പെടുന്നതാണ്. എന്നാല്‍ ഇതുവരെ നടപടിയുണ്ടായില്ല. തെരുവുനായകളെ പിടികൂടുക മാത്രമല്ല അവയെ പാര്‍പ്പിക്കാനുള്ള ഷെല്‍ട്ടര്‍ കൂടി ഒരുക്കണം. ഇപ്പോഴുള്ള രണ്ട് കൂടുകള്‍ അപര്യാപ്തമാണ്. കൂടുതല്‍ കൂടുകള്‍ സ്ഥാപിക്കാന്‍ കോര്‍പറേഷന്‍ തയാറാകണമെന്നും അവര്‍ ആവശ്യപ്പെട്ടു.

കളിക്കുന്നതിനിടെ പുഴയില്‍ വീണ് വിദ്യാര്‍ഥി മരിച്ചു

കണ്ണൂര്‍: കളിക്കുന്നതിനിടെ പുഴയില്‍ വീണ് വിദ്യാര്‍ഥി മരിച്ചു. കക്കാട് അതിരകം നഫീസാ മന്‍സിലില്‍ നസീര്‍-സാഹിദ ദമ്പതികളുടെ മകന്‍ മുഹമ്മദ് നാഷിദ് (ഒന്പത്) ആണ് മരിച്ചത്. ഇന്നലെ വൈകുന്നേരത്തോടെയാണ് കക്കാട് പുഴയില്‍ കുട്ടി വീണത്. ഉടന്‍ കണ്ണൂരിൽ നിന്നെത്തിയ അഗ്നിരക്ഷാസേന കുട്ടിയെ മുങ്ങിയെടുത്ത് കണ്ണൂര്‍ ധനലക്ഷ്മി ആശുപത്രിയില്‍ എത്തിച്ചെങ്കിലും മരിച്ചു. കക്കാട് വി.പി മുഹമ്മദ് ഹാജി മെമ്മോറിയല്‍ ഹൈസ്‌കൂള്‍ നാലാം ക്ലാസ് വിദ്യാർഥിയാണ്. മഴയെ തുടര്‍ന്ന് കക്കാട് പുഴയില്‍ വെള്ളം കയറിയതിനാല്‍ ഇന്നലെ സ്‌കൂളിന് അവധിയായിരുന്നു. സഹോദരി: ഷാനിദ.

ബാവലി പുഴയിൽ കാണാതായ യുവാവിന്‍റെ മൃതദേഹം കണ്ടെത്തി

കൊട്ടിയൂർ: കൊട്ടിയൂർ വൈശാഖ മഹോത്സവത്തിന് എത്തി ബാവലി പുഴയിൽ കുളിക്കവേ ഒഴുക്കിൽ പ്പെട്ട രണ്ടാമത്തെ യുവാവിന്‍റെ മൃതദേഹവും കണ്ടെത്തി. കാഞ്ഞങ്ങാട് ചാമുണ്ഡിക്കുന്ന് സ്വദേശി അഭിജിത്തിന്‍റെ (23) മൃതദേഹമാണ് കണ്ടെത്തിയത്. ബാവലി പുഴയുടെ ഭാഗമായ ആറളം ഫാം ചപ്പാത്തിന് സമീപത്തായാണ് മൃതദേഹം കണ്ടെത്തിയത്. പേരാവൂരിൽ നിന്നെത്തിയ അഗ്നിരക്ഷാ സേനയാണ് പുഴയിൽനിന്നു മൃതദേഹം കരയ്ക്കെത്തിച്ചത്. പേരാവൂർ പോലീസ് സ്ഥലത്തെത്തി ഇൻക്വസ്റ്റ് നടത്തി. കഴിഞ്ഞ15നാണ് അക്കരക്കൊട്ടിയൂരിന് സമീപം ഇടബാവലിയിൽ കുളിക്കവേ യുവാവ് ഒഴുക്കിൽപ്പെട്ടത്. ഇലക്‌ട്രീഷനാണ് മരിച്ച അഭിജിത്ത്. കാഞ്ഞങ്ങാട് ചിത്താരിയിലെ മീത്തല്‍ വീട്ടില്‍ ചന്ദ്രൻ-പരേതയായ ഭാരതി ദന്പതികളുടെ മകനാണ്. സഹോദരി: അഭിത. ഒഴുക്കിൽപ്പെട്ട നിഷാദിന്‍റെ മൃതദേഹം തിങ്കളാഴ്ച കണ്ടെത്തിയിരുന്നു.

ഓട്ടോറിക്ഷയിൽ ഡ്രൈവറെ മരിച്ച നിലയിൽ കണ്ടെത്തി

തലശേരി: നിർത്തിയിട്ട ഓട്ടോറിക്ഷയിൽ ഡ്രൈവറെ മരിച്ചനിലയിൽ കണ്ടെത്തി. കണ്ണിച്ചിറ പുതിയ റോഡിൽ ഹിന്ദി മഹാവിദ്യാലയത്തിനു സമീപം ലക്ഷ്മി നിലയത്തിൽ ലിജേഷിനെയാണ് (48) ജഗന്നാഥ ക്ഷേത്രത്തിന്‍റെ കോമ്പൗണ്ടിൽ ചൊവ്വാഴ്ച രാത്രിയിൽ നിർത്തിയിട്ട ഓട്ടോറിക്ഷയിൽ അബോധാവസ്ഥയിൽ കണ്ടെത്തിയത്. ഉടൻ ആശുപത്രിയിൽ എത്തിച്ചെങ്കിലും പരിശോധിച്ച ഡോക്‌ടർ മരണം സ്ഥിരീകരിക്കുകയായിരുന്നു. സംസ്കാരം ഇന്നുരാവിലെ 10ന് വീട്ടുവളപ്പിൽ. പരേതനായ രാഘവൻ-ജയലക്ഷ്മി ദന്പതികളുടെ മകനാണ്. ഭാര്യ: നിഷ. സഹോദരങ്ങൾ: ജിഗേഷ്, ബ്രിജേഷ്.

കോടതി വിധി വരാനിരിക്കെ കഞ്ചാവ് കേസിലെ കുറ്റാരോപിതൻ തൂങ്ങി മരിച്ച നിലയിൽ

തളിപ്പറമ്പ്: കഞ്ചാവ് കേസിൽ കുറ്റാരോപിതനായ യുവാവ് ഇന്ന് കോടതി വിധി വരാനിരിക്കെ തൂങ്ങിമരിച്ചു. ചിറ്റാരിക്കാല്‍ കമ്പല്ലൂരിലെ വാഴവളപ്പില്‍ വീട്ടില്‍ ഷിഹാബുദ്ദീന്‍ (35) ആണ് മരിച്ചത്. തളിപ്പറമ്പ് സര്‍ സയ്യിദ് കോളജ് മെന്‍സ് ഹോസ്റ്റൽ മുറിയിലെ ഫാനിൽ ചൊവ്വാഴ്ച രാത്രി 10 ഓടെയാണ് ഇയാളെ തൂങ്ങിയ നിലയിൽ കാണുന്നത്. ഉടന്‍ കെട്ടറുത്ത് ആശുപത്രിയില്‍ എത്തിച്ചെങ്കിലും മരിച്ചിരുന്നു. ഒരാഴ്ച മുമ്പാണ് ഷിഹാബുദ്ദീൻ ഹോസ്റ്റല്‍ മെസില്‍ കുക്കായി ജോലിക്ക് ചേര്‍ന്നത്. കര്‍ണാടകയിലെ മംഗളൂരുവില്‍ കഞ്ചാവ് കടത്തിയ കേസില്‍ പ്രതിയായിരുന്നു ഷിഹാബുദ്ദീനെന്ന് പോലീസ് പറഞ്ഞു. പച്ചക്കറി വാഹനത്തിൽ കഞ്ചാവ് കടത്തിയതിന് പോലീസ് പിടികൂടിയ ഇയാൾ ഏറെക്കാലം ജയിലിൽ റിമാൻഡിലായിരുന്നു. പ്രസ്തുത കേസില്‍ ഇന്ന് വിധി വരാനിരിക്കെയാണ് ഷിഹാബുദ്ദീന്‍ തൂങ്ങിമരിച്ചത്.

പുസ്തകം പ്രകാശനം ചെയ്തു

തലശേരി: മാധ്യമ പ്രവർത്തകൻ നവാസ് മേത്തറിന്‍റെ കൈരളി ബുക്സ് പ്രസിദ്ധീകരിക്കുന്ന"ആ താലിമാല തേടി ആരും വന്നില്ല' എന്ന പുസ്തകം പ്രകാശനം ചെയ്തു. തലശേരി പേൾ വ്യൂ ഹോട്ടൽ ഓഡിറ്റോറിയത്തിൽ നടന്ന പരിപാടിയിൽ സ്പീക്കർ എ.എൻ. ഷംസീർ തലശേരി ആർച്ച്ബിഷപ് മാർ ജോസഫ് പാംപ്ലാനിക്ക് പുസ്തകം നൽകി പ്രകാശനം നിർവഹിച്ചു. തലശേരി മുനിസിപ്പൽ ചെയർപേഴ്സൺ ജമുനാ റാണി അധ്യക്ഷത വഹിച്ചു. ഷാർജ ആസ്ഥാനമായി പ്രവർത്തിക്കുന്ന ഡെക്കാൻ ഇംപ്രിന്‍റ് പ്രസിദ്ധീകരിക്കുന്ന പുസ്തകത്തിന്‍റെ ഇംഗ്ലീഷ് പതിപ്പ് "അൺക്ലെയിംഡ് മംഗൽ സൂത്ര'യുടെ കവർ പ്രകാശനം രാഷ്‌‌ട്രദീപിക മാനേജിംഗ് ഡയറക്ടർ മോൺ. മൈക്കിൾ വെട്ടിക്കാട്ട് നിർവഹിച്ചു. നവാസ് മേത്തർ ആമുഖ പ്രഭാഷണം നടത്തി. ബിജെപി മുൻ സംസ്ഥാന പ്രസിഡന്‍റ് സി.കെ. പദ്മനാഭൻ മുഖ്യപ്രഭാഷണം നടത്തി. കൈരളി ബുക്സ് മാനേജിംഗ് ഡയറക്ടർ ഒ. അശോക് കുമാർ പുസ്തക പരിചയം നടത്തി. സംഘാടക സമിതി ജനറൽ കൺവീനർ പ്രിൻസ് ഏബ്രഹാം സ്വാഗതവും കൺവീനർ അനീഷ് പാതിരിയാട് നന്ദിയും പറഞ്ഞു. രമേശ് പറമ്പത്ത് എംഎൽഎ, നിയമ പരിഷ്കരണ കമ്മീഷൻ അംഗവും മുൻ ജില്ലാ ജഡ്ജിയുമായ ടി.ഇന്ദിര, രാഷ്‌‌ട്രദീപിക ഡയറക്ടറും ഇന്തോനേഷ്യ മലയാളി സമാജം പ്രസിഡന്‍റുമായ ബെന്നി മാത്യു വാഴപ്പള്ളി, ബാംഗ്ലൂർ നാഷണൽ ബ്രോഡ് കാസ്റ്റിംഗ് കൺസൾട്ടന്‍റ് എം. ശിവപ്രസാദ്, കെഎസ്എ ഇന്‍റർനാഷണൽ ട്രെയ്നർ ഡോ. പോൾ തോമസ്, എഴുത്തുകാരി റഫ്‌സാന ഖാദ, സിപിഎം നേതാവും മുൻ ആഭ്യന്തരമന്ത്രിയുമായിരുന്ന കോടിയേരി ബാലകൃഷ്ണന്‍റെ പത്നി വിനോദിനി തുടങ്ങിയവർ പങ്കെടുത്തു.

ഓണക്കനി-നിറപൊലിമ പദ്ധതിയുടെ പഞ്ചായത്ത്തല ഉദ്ഘാടനം

ഉളിക്കൽ: കുടുംബശ്രീ മിഷന്‍റെ നേതൃത്വത്തിൽ ഓണത്തിന് ആവശ്യമായ വിഷരഹിത പച്ചക്കറികളുടെയും പൂവിന്‍റെയും ഉത്പാദനം ലക്ഷ്യമിട്ട് കുടുംബശ്രീ ഉളിക്കൽ സിഡിഎസിന്‍റെ നേതൃത്വത്തിൽ നടത്തുന്ന ഓണക്കനി-നിറപൊലിമ പദ്ധതിയുടെ പഞ്ചായത്ത്തല ഉദ്ഘാടനം ഉളിക്കൽ പഞ്ചായത്ത് പ്രസിഡന്‍റ് പി.സി. ഷാജി നിർവഹിച്ചു. തേർമല വാർഡിലെ ഹരിശ്രീ ജെഎൽജി ഗ്രൂപ്പിന്‍റെ നേതൃത്വത്തിൽ രണ്ടര ഏക്കർ കൃഷിയിടത്താണ് പദ്ധതി നടപ്പാക്കുന്നത്. തേർമല വാർഡ് മെംബർ രാമകൃഷ്ണൻ കോയാടൻ അധ്യക്ഷത വഹിച്ചു. സിഡിഎസ് ചെയർപേഴ്സൺ വി.ജി. ശശി, പഞ്ചായത്ത് അംഗം ജോളി ഫിലിപ്പോസ്, ജെഎൽജി ഗ്രൂപ്പ് കൺവീനർ ഗിരിജ നാരായണൻ, സിഡിഎസ് അംഗം ഷീബ സിജു തുടങ്ങിയവർ പങ്കെടുത്തു.

ആറളത്ത് കാട്ടാന ഷെഡും തൊഴുത്തും തകർത്തു

ഇരിട്ടി: ആറളത്ത് തിങ്കളാഴ്ച രാത്രി രണ്ട് വ്യത്യസ്ത സംഭവങ്ങളിൽ ഒരു വീടിന്‍റെ അടുക്കള ഷെഡും മറ്റൊരു വീട്ടിലെ തൊഴുത്തും കാട്ടാന തകർത്തു. കുട്ടികടക്കം വീട്ടുകാർ തലനാരിഴയ്ക്കാണ് രക്ഷപ്പെട്ടത് വ്യാപകമായി കൃഷിയും നശിപ്പിച്ചിട്ടുണ്ട്. ബ്ലോക്ക് 10 ൽ സരോജിനിയുടെ വീടിന്‍റെ അടുക്കള ഷെഡാണ് കാട്ടാന തകർത്തത്. രാത്രി പന്ത്രണ്ടോടെയായിരുന്നു സംഭവം. സരോജിനിയുടെ മകൾ സന്ധ്യയും കുട്ടികളും ആനക്ക് മുന്നിൽ നിന്ന് ഭാഗ്യം കൊണ്ടാണ് രക്ഷപെട്ടത്. കുട്ടികളെ മൂത്രം ഒഴിപ്പിക്കാനായി വീടിന് വെളിയിൽ എത്തിയപ്പോൾ പുറത്തുണ്ടായിരുന്ന കാട്ടാന ഇവർക്ക് നേരെ പാഞ്ഞടുക്കുകയായിരുന്നു. സന്ധ്യയ്ക്കും കുട്ടികൾക്കും വീടിനകത്തേക്ക് ഓടിക്കയറാനായതിനാലാണ് ജീവൻ തിരിച്ചു കിട്ടിയത്. ബ്ലോക്ക് 11 ലെ സജി കൈമയുടെ വീടിനു സമീപത്തെ തൊഴുത്താണ് കാട്ടാന തകർത്തത്.പറമ്പിലെ വാഴയും മറ്റ് വിളകളും നശിപ്പിച്ചു. വീടിനു സമീപത്തെ പ്ലാവിൽ നിന്ന് ചക്കകൾ പറിച്ചെടുത്ത് തിന്നശേഷമാണ് കാട്ടാന മടങ്ങിയത്. സജിയുടെ അയൽവാസിയുടെ കൃഷിയും നശിപ്പിച്ചിട്ടുണ്ട്.മൂന്ന് മാസത്തിനുള്ളിൽ പുനരധിവാസ മേഖലയിൽ പതിനാറിലേറെ ഷെഡുകളാണ് ആനകൾ തകർത്തത്. വാളത്തോടും ആനയിറങ്ങി ആറളം വാളത്തോട് നിർമലഗിരി മേഖലയിലും തിങ്കളാഴ്ച രാത്രി കാട്ടാനയിറങ്ങി വീടിനോട് ചേർന്ന വിറകുപര തകർത്തു. ഐക്കര വടക്കേതിൽ പ്രസന്നന്‍റെ വിറക് പുരയാണ് തകർത്തത്. പെരുവാമല ജോയി , ജീരകശേരി സണ്ണി , ജീരകശേരി ജോസുകുഞ്ഞ് എന്നിവരുടെ തെങ്ങ്, കവുങ്ങ്, വാഴ തുടങ്ങിയ കാർഷിക വിളകളും നശിപ്പിച്ചു.

ഉളിക്കലിൽ പാലങ്ങൾ വെള്ളത്തിനടിയിലായി; മണിക്കടവ് ഒറ്റപ്പെട്ടു

ഉളിക്കൽ: ഉളിക്കൽ പഞ്ചായത്തിൽ കനത്ത മഴയെ തുടർന്ന് വയത്തൂർ പുഴ കരകവിഞ്ഞ് ഒഴുകുകയാണ്. പുഴയിലെ ജലനിരപ്പ് ഉയർന്നതോടെ താഴ്ന്ന പ്രദേശങ്ങളിൽ വെള്ളം കയറി. കുടക് വനമേഖല ഉൾപ്പെടെ പ്രദേശത്ത് ശക്തമായ മഴ തുടരുകയാണ്. മലവെള്ള പാച്ചിലിൽ ഉളിക്കൽ പഞ്ചായത്തിലെ വട്ട്യാംതോട്, മണിക്കടവ്, വയത്തൂർ ചപ്പാത്ത് പാലങ്ങൾ വെള്ളത്തിനടിയിലായി.മണിക്കടവ്, വയത്തൂർ പാലങ്ങളിൽ ഇന്നലേയും വെള്ളം കയറിയിരുന്നു. ഇതോടെ ഇതുവഴിയുള്ള ഗതാഗതം തടപെട്ടു. പാലങ്ങൾ എല്ലാം വെള്ളത്തിൽ മൂങ്ങിയതോടെ മണിക്കടവ് മേഖല ഏതാണ്ട് ഒറ്റപ്പെട്ട നിലയിലാണ്. പ്രദേശത്തുകാർക്ക് കിലോമീറ്ററുകൾ ചുറ്റി സഞ്ചരിക്കേണ്ട അവസ്ഥയാണ്. മഴയിൽ പ്രധാന റോഡുകളിലും പഞ്ചായത്ത് റോഡുകളിലും വലിയ വെള്ളക്കെട്ടുകൾ രൂപപെടുന്നത് യാത്രക്കാർക്ക് ഭീഷണിയാണ്.

കനത്ത മഴ: മണ്ണിടിച്ചിലും വെള്ളക്കെട്ടും വ്യാപകം

കണ്ണൂർ: ജില്ലയില്‍ തുടര്‍ച്ചയായി പെയ്യുന്ന മഴയില്‍ മണ്ണിടിച്ചിലും വെള്ളക്കെട്ടും വ്യാപകമായി. കൂവേരി വില്ലേജില്‍ ചപ്പാരപ്പടവ് ടൗണ്‍, പന്നിയൂര്‍ വില്ലേജില്‍ പന്നിയൂര്‍ പൂമംഗലം കൂളി കുണ്ട്, പൂമംഗലം മാഴൂര്‍ റോഡ്, തളിപ്പറമ്പ് വില്ലേജില്‍ തൃച്ചംബരം ഭാഗത്തുള്ള റോഡ്, കാക്കാത്തോട് ബസ് സ്റ്റാൻഡ്, കുറുമാത്തൂര്‍ വില്ലേജില്‍ കുറുമാത്തൂര്‍ കാണിച്ചമല്‍ എന്നിവിടങ്ങളാണ് കനത്തമഴയില്‍ വെള്ളക്കെട്ടിലായത്. പരിയാരം ദേശീയപാതയില്‍ വെള്ളക്കെട്ടായതോടെ സമീപത്തെ വി.വി. കരുണാകരന്‍റെ വീട്ടില്‍ വെള്ളം കയറി. കുറുമാത്തൂര്‍ കാണിച്ചമലില്‍ വെള്ളക്കെട്ട് ഉണ്ടായതോടെ നാല് കുടുംബങ്ങള്‍ ബന്ധുവീടുകളിലേക്ക് മാറി. പരിയാരം ഇരിങ്ങള്‍ നിവാസി കെ.പി. മിഥുന്‍റെ വീടിനോട് ചേര്‍ന്നുള്ള മതില്‍ ഇടിഞ്ഞു വീടിന്‍റെ പോര്‍ച്ച് തകര്‍ന്നു. ആളപായമില്ല. എടക്കാട് വില്ലേജ് കണ്ണൂര്‍ കരാര്‍ ദേശം കുറുവ പാലത്തിനു സമീപം കോട്ടമ്മല്‍ കുന്ന് കനത്ത മഴയില്‍ ഇടിഞ്ഞുവീണു. അപകട സാധ്യതയുള്ളതിനാല്‍ സമീപത്തെ മൂന്ന് കുടുംബങ്ങളോടും ബന്ധു വീടുകളിലേക്ക് മാറി താമസിക്കുവാന്‍ സ്ഥലം സന്ദര്‍ശിച്ച ഡപ്യൂട്ടി തഹസില്‍ദാര്‍ പ്രമോദ് പുല്ലാഞ്ഞിക്കാട് നിര്‍ദേശം നല്‍കി. ചെക്കിക്കടവ് പാലത്തിനു സമീപം വലിയവളപ്പില്‍ ഷാജിയുടെ വീടിനു സമീപം വീണ്ടും കരയിടിച്ചില്‍ ഉണ്ടായതോടെ കുടുംബത്തോട് മാറി താമസിക്കുന്നതിനു റവന്യു അധികൃതര്‍ നിര്‍ദേശം നല്‍കി. മട്ടന്നൂർ: വെളിയമ്പ്ര കൊട്ടാരം പെരിയത്തിൽ റോഡിൽ മരം കടപുഴകി വീണ് ഗതാഗതം തടസപ്പെട്ടു. ഇന്നലെ വൈകുന്നേരം അഞ്ചോടെയായിരുന്നു സംഭവം. റോഡരികിലെ മരം വൈദ്യുത ലൈനിൽ വീഴുകയായിരുന്നു. വിവരമറിഞ്ഞെത്തിയ കെഎസ്ഇബി ജീവനക്കാരും നാട്ടുകാരും ചേർന്നു മരം മുറിച്ചുനീക്കി ഗതാഗതം പുനഃസ്ഥാപിച്ചു. പയ്യന്നൂരില്‍ 30 വീട്ടുകാരെ മാറ്റിപ്പാര്‍പ്പിച്ചു പയ്യന്നൂര്‍: ശക്തമായ മഴയില്‍ വെള്ളം കയറിയ കാപ്പാട്, കാനായി, തോട്ടം കടവ്, പരവന്തട്ട, മുത്തത്തി പ്രദേശത്തെ വീടുകളില്‍ നിന്നും ആള്‍ക്കാരെ ബന്ധുവീടുകളിലേക്കും സിപിഎം ഓഫീസിലേക്കും മാറ്റിപ്പാര്‍പ്പിച്ചു. സന്നദ്ധസംഘടനകളുടെയും നാട്ടുകാരുടെയും സഹായത്തോടെ പരവന്തട്ട-കാപ്പാട് പ്രദേശത്തെ 15 വീടുകളിലെയും വെള്ളം കയറിയ മറ്റ് സ്ഥലങ്ങളിലെ 15 വീടുകളിലുള്ളവരേയുമാണ് മാറ്റിയത്. മഴ ശക്തമായി തുടരുകയാ ണെങ്കില്‍ ഇവിടങ്ങളിൽ കഴിയുന്നവരേയും മാറ്റിപ്പാര്‍പ്പിക്കാനാവശ്യമായ സൗകര്യങ്ങള്‍ ഒരുക്കുമെന്നും അതിനാവശ്യമായ ക്രമീകരണങ്ങള്‍ മുത്തത്തി സ്‌കൂളിലും വേങ്ങയില്‍, കാനായി സ്‌കൂളുകളിലും ഒരുക്കിയിട്ടുണ്ടെന്ന് ചെയര്‍പേഴ്‌സണ്‍ കെ.വി. ലളിത അറിയിച്ചു. പരവന്തട്ട കാപ്പാട് പ്രദേശത്തെ വീടുകളിലെ കന്നുകാലികളെ പരവന്തട്ട ക്ഷേത്ര മൈതാനിയിലെക്ക് മാറ്റി. അപകടകരമായ രീതിയില്‍ ജലനിരപ്പ് ഉയര്‍ന്നതിനെ തുടര്‍ന്ന് സംസ്ഥാന ജലസേചന വകുപ്പും കേന്ദ്ര ജല കമ്മീഷനും പെരുമ്പ പുഴയിലും കവ്വായി പുഴയിലും യെല്ലോ അലര്‍ട്ട് പ്രഖ്യാപിച്ചു. ഈ പുഴകളുടെ തീരത്തുള്ളവര്‍ ജാഗ്രത പാലിക്കണമെന്നും യാതൊരു കാരണവശാലും പുഴകളില്‍ ഇറങ്ങാനോ പുഴ മുറിച്ച് കടക്കാനോ പാടില്ലെന്നും നിര്‍ദേശമുണ്ട്.

മഴയും വെള്ളക്കെട്ടും: സ്കൂളുകൾക്ക് പ്രാദേശിക അവധി

കണ്ണൂർ: ജില്ലയിൽ കനത്ത മഴ കാരണവും വെള്ളക്കെട്ട് മൂലവും കുട്ടികളുടെ സുരക്ഷ മുൻനിർത്തി അസി. എഡ്യൂക്കേഷണൽ ഓഫീസർമാർമാർ ചൊവ്വാഴ്ച 50 ലേറെ സ്‌കൂളുകൾക്ക് പ്രാദേശിക അവധി നൽകി. ചില സ്കൂളുകൾക്ക് രാവിലെയും ചിലതിന് ഉച്ചയ്ക്ക് ശേഷവുമാണ് പ്രാദേശിക അവധി നൽകിയത്. കണ്ണൂർ സൗത്ത് ഉപജില്ല: മുഴപ്പിലങ്ങാട് സൗത്ത് യുപി സ്കൂൾ. തലശേരി നോർത്ത് ഉപജില്ല: എരഞ്ഞോളി നോർത്ത് എൽപി സ്കൂൾ, കതിരൂർ മുസ്‌ലിം എൽപി സ്കൂൾ, കതിരൂർ ഈസ്റ്റ് എൽ പി സ്കൂൾ. പയ്യന്നൂർ ഉപജില്ല: പിബികെഎൽപി സ്കൂൾ കുണിയൻ, പാട്ടിയമ്മ ഏൽപി സ്കൂൾ, ഏറ്റു കുടുക്ക യുപി. സ്കൂൾ, ജിയുപി സ്കൂൾ പാലക്കോട്, ചന്തൻ മെമ്മോറിയൽ എഎൽപി സ്കൂൾ വെള്ളൂർ, മുക്കോത്തടം എൽപി സ്കൂൾ കോറോം, ജിഎൽപി സ്കൂൾ വെള്ളൂർ, ജിഎൽപി സ്കൂൾ പയ്യന്നൂർ, കുന്നരു എയുപി സ്കൂൾ, കാങ്കോൽ എഎൽപി സ്കൂൾ, ജിഎം യുപി സ്കൂൾ രാമന്തളി, എരമം സൗത്ത് എൽപി സ്കൂൾ, കണ്ടോത്ത് എഎൽപി സ്കൂൾ, വടശേരി എഎൽപി സ്കൂൾ, ചിദംബരനാഥ് യുപി സ്കൂൾ രാമന്തളി, ജിഎൽപി സ്കൂൾ പെരിന്തട്ട സൗത്ത്, പുത്തൂർ എഎൽപി സ്കൂൾ, രാമന്തളി പഞ്ചായത്ത് ഗവ. എൽപി സ്കൂൾ, ബഡ്‌സ് സ്പെഷൽ സ്കൂൾ പുത്തൂർ, ജിയുപിഎസ് കൂക്കാനം, ജിഎംയുപി സ്കൂൾ പെരുമ്പ, ജിഎൽപി സ്കൂൾ പടന്ന, കരിവെള്ളൂർ നോർത്ത് എയുപി സ്കൂൾ, കരിവെള്ളൂർ സെൻട്രൽ എഎൽപി സ്കൂൾ, മാന്യഗുരു യുപി സ്കൂൾ, എവിഎസ്ജിഎച്ച്എസ്എസ് കരിവെള്ളൂർ, ജിഎംഎൽപി സ്കൂൾ പാലക്കോട്, എകെഎസ്എസ് പയ്യന്നൂർ. പാനൂർ ഉപജില്ല: ജിഎൽപി സ്കൂൾ നരിക്കോട്ട് മല, കൊളവല്ലൂർ ഈസ്റ്റ് എൽപി സ്കൂൾ കണ്ണൂർ നോർത്ത് ഉപജില്ല: മുണ്ടയാട് എൽപി സ്കൂൾ, കാഞ്ഞിരോട് എഎൽപി സ്കൂൾ തലശേരി ജില്ല: ഇരിട്ടി ലിറ്റിൽ ഫ്ലവർ ഇഎംഎച്ച്എസ്.

ബാരാപോൾ പദ്ധതി കനാലിനോട് ചേർന്ന റോഡിന്‍റെ സംരക്ഷണ ഭിത്തി തകർന്നു

ഇരിട്ടി: രണ്ടു ദിവസമായി പെയ്യുന്ന കനത്ത മഴയിൽബാരാപോൾ ചെറുകിട ജലവൈദ്യുത പദ്ധതിയുടെ കനാലിനോട് ചേർന്നുള്ള റോഡിന്‍റെ സംരക്ഷണ ഭിത്തി തകർന്നു. ഇലവുങ്കൽ പടിക്ക് സമീപം കനാലിനോട് ചേർന്നുള്ള റോഡിന്‍റെ സംരക്ഷണ ഭിത്തിയാണ് ഇടിഞ്ഞു വീണത്. കനാൽ നിർമാണ സമയത്ത് റോഡിന്‍റെ സുരക്ഷയ്ക്കായി നിർമിച്ചതായിരുന്നു. സുരക്ഷാ ഭിത്തി തകർന്നത് നിലവിൽകനാലിനെ ബാധിക്കില്ലെങ്കിലും മണ്ണിടിച്ചിൽ ഉണ്ടായാൽ അത് കനാലിന്‍റെ സുരക്ഷയ്ക്കും ഭീഷണിയാകും. സംരക്ഷണ ഭിത്തി തകർന്നതിന്‍റെ താഴെ ഭാഗത്തായി പത്തു കുടുംബങ്ങൾ താമസിക്കുന്നുണ്ട്. മണ്ണിടിച്ചിൽ ഉണ്ടായാൽ ഇവിടുത്തെ താമസക്കാരെയും ബാധിക്കും. ബാരാപോൾ എക്‌സിക്യൂട്ടീവ് എൻജിനിയർ പി.എസ്. യദുലാലിന്‍റെ നേതൃത്വത്തിലുള്ള സംഘം സ്ഥലത്തെത്തി പരിശോധന നടത്തി. നിലവിൽ ആശങ്കപ്പെടേണ്ട സാഹചര്യമില്ലെന്നും റോഡിന്‍റെ സംരക്ഷണ ഭിത്തി പുനർനിർമിക്കണമെന്ന് കാണിച്ച് ബന്ധപ്പെട്ടവർക്ക് നിർദേശം നൽകിയിട്ടുണ്ടെന്നും പി.എസ്. യദുലാൽ പറഞ്ഞു. അയ്യൻകുന്ന് പഞ്ചായത്ത് പ്രസിഡന്‍റ് കുര്യാച്ചൻ പൈമ്പള്ളിക്കുന്നേൽ, സ്റ്റാൻഡിംഗ് കമ്മിറ്റി അംഗങ്ങളായ ഐസക്ക് ജോസഫ്, സീമ സനോജ്, സിന്ധു ബെന്നി, അംഗങ്ങളായ ബിജോയി പ്ലാത്തോട്ടം, സജി മച്ചിത്താനി എന്നിവർ പ്രദേശം സന്ദർശിച്ച് അപകടാവസ്ഥ വിലയിരുത്തി. ജലവൈദ്യുത പദ്ധതിയുടെ മൂന്ന് ജനറേറ്ററുകളും പ്രവർത്തിക്കുന്നതിനാൽ കനാൽ വഴിയുള്ള നീരൊഴുക്ക് ശക്തമാണ്. സംരക്ഷണ ഭിത്തി ഇടിഞ്ഞ റോഡിലിലൂടെയുള്ള ഗതാഗതം നിരോധിക്കാൻ പഞ്ചായത്ത് പ്രസിഡന്‍റ് കെഎസ്ഇബി അധികൃതർക്ക് നിർദേശം നൽകി.

വിജയോത്സവം സംഘടിപ്പിച്ചു

പെരുമ്പടവ്: പെരുമ്പടവ് ബിവിജെഎം ഹയർ സെക്കൻഡറി സ്കൂളിൽ കഴിഞ്ഞ അധ്യയന വർഷം എസ്എസ്എൽസി വിജയിച്ച മുഴുവൻ കുട്ടികളെയും ആദരിക്കുന്ന ചടങ്ങ് വിജയോത്സവം സംഘടിപ്പിച്ചു. വിദ്യാരംഗം കലാസാഹിത്യവേദിയുടെ ഉദ്ഘാടനവും നടത്തി. ചപ്പാരപ്പടവ് പഞ്ചായത്ത് പ്രസിഡന്‍റ് സുനിജ ബാലകൃഷ്ണൻ പരിപാടി ഉദ്ഘാടനം ചെയ്തു. സ്കൂൾ മാനേജർ ഫാ. ജോർജ് തൈക്കുന്നുംപുറം അധ്യക്ഷത വഹിച്ചു. മുഖ്യാധ്യാപകൻ ജോസി മാത്യു, പ്രിൻസിപ്പൽ ഇ.പി. ജോസുക്കുട്ടി, കരിപ്പാൽ സ്കൂൾ മുഖ്യാധ്യാപിക പി.പി. ബിന്ദു, സെന്‍റ് ജോസഫ് സ്കൂൾ പ്രിൻസിപ്പൽ സിസ്റ്റർ ബിൻസി റാഫേൽ, പിടിഎ പ്രസിഡന്‍റ് ഷാബു ആന്‍റണി, മദർ പിടിഎ പ്രസിഡന്‍റ് എം.പി. ജ്യോതിലക്ഷ്മി, അധ്യാപകനായ ജിയോ തോമസ്, വിദ്യാർഥി പ്രതിനിധി സ്വാതിക എസ്. നമ്പ്യാർ, സിസ്റ്റർ മേരിക്കുട്ടി അഗസ്റ്റിൻ എന്നിവർ പ്രസംഗിച്ചു.

മാർ കുര്യാക്കോസ് കുന്നശേരി അനുസ്മരണം നടത്തി

പയ്യാവൂർ: മടമ്പം പികെഎം കോളജ് ഓഫ് എഡ്യൂക്കേഷൻ സ്ഥാപക രക്ഷാധികാരിയും കോട്ടയം അതിരൂപതയുടെ പ്രഥമ മെത്രാപ്പോലീത്തയുമായിരുന്ന മാർ കുര്യാക്കോസ് കുന്നശേരിയുടെ എട്ടാം ചരമ വാർഷികത്തോടനുബന്ധിച്ച് മാർ കുന്നശേരി അനുസ്മരണവും എൻഡോവ്മെന്‍റ് വിതരണവും നടത്തി. കോളജ് ഓഡിറ്റോറിയത്തിൽ വൈസ് പ്രിൻസിപ്പൽ ഡോ. പ്രശാന്ത് മാത്യു അധ്യക്ഷത വഹിച്ചു. സ്റ്റാഫ് അസോസിയേഷൻ സെക്രട്ടറി ജോബി മാത്യു ആമുഖ പ്രഭാഷണവും പയ്യാവൂർ സെന്‍റ് സെബാസ്റ്റ്യൻസ് ഇടവക വികാരി ഫാ.ബേബി കട്ടിയാങ്കൽ കുന്നശേരി അനുസ്മരണ പ്രഭാഷണവും നടത്തി. സ്റ്റാഫ്‌ അസോസിയേഷൻ ഏർപ്പെടുത്തിയ മാർ കുന്നശേരി എൻഡോവ്മെന്‍റ് വിതരണവും ഫാ.ബേബി കട്ടിയാങ്കൽ നിർവഹിച്ചു. മാത്തമാറ്റിക്സ് വിഭാഗം മേധാവി ഡോ.ഷോളി ജോസഫ്, ലൈബ്രേറിയൻ ദീപാ ജോൺ, യൂണിയൻ ചെയർപേഴ്സൺ അമിൻ മാത്യു എന്നിവർ പ്രസംഗിച്ചു.

നായനാർ മലയിലെ ക്വാറി വേസ്റ്റ് താഴേക്കൊഴുകി; ജനങ്ങൾ ആശങ്കയിൽ

ചെമ്പന്തൊട്ടി: കഴിഞ്ഞ മൂന്നു ദിവസങ്ങളായി പെയ്യുന്ന ശക്തമായ മഴയിൽ ചെമ്പന്തൊട്ടി നായനാർ മലയിലെ മൂളിയാൻ ക്വാറിയിൽ നിന്ന് ഉരുൾപൊട്ടലിന് സമാനമായ രീതിയിൽ മലവെള്ളത്തിനൊപ്പം കല്ലും മണ്ണും താഴേക്കൊഴുകുന്നതു മൂലം കൊക്കായി നിവാസികൾ ആശങ്കയിലായി. കഴിഞ്ഞ ദിവസം ക്വാറിയിൽ ചില പണികൾ നടത്തിയതാണ് ഈ ദുരവസ്ഥയ്ക്ക് കാരണം. മാസങ്ങളായി പ്രവർത്തനരഹിതമായിരുന്ന ക്വാറിയിൽ ഉറച്ചു കിടന്ന കല്ലും മണ്ണും ഇളക്കിയതു മൂലമാണ് ഇപ്പോൾ ക്വാറി അവശിഷ്ടങ്ങളും മലിന ജലവും താഴേക്കൊഴുകി അടിവാരത്തിലുള്ള കൃഷിയിടങ്ങളിൽ നാശം സംഭവിച്ചതും കുടിവെള്ളം ഉപയോഗശൂന്യമായതും. ജിയോളജി വകുപ്പിന്‍റെ സ്റ്റോപ്പ് മെമ്മോ അവഗണിച്ച് നിയമവിരുദ്ധമായി ക്വാറിയിൽ നടത്തിയ പണികൾക്കെതിരേ ജനകീയ കമ്മിറ്റി യോഗം ചേരുകയും ക്വാറിയിലേക്ക് മാർച്ച് നടത്താൻ തീരുമാനിക്കുകയും ചെയ്തിട്ടുണ്ട്. ശ്രീകണ്ഠപുരം നഗരസഭ കൗൺസിലർ കെ.ജെ. ചാക്കോ കൊന്നയ്ക്കൽ നൽകിയ പരാതിയെ തുടർന്ന് നഗരസഭാധ്യക്ഷയും സെക്രട്ടറിയും ക്വാറി സന്ദർശിച്ചിരുന്നു. ക്വാറി മാലിന്യം താഴെക്കൊഴുകുന്നത് തടയാൻ അടിയന്തര നടപടി വേണമെന്നും ക്വാറിയുടെ പ്രവർത്തനം സ്ഥിരമായി നിരോധിക്കണമെന്നുമാണ് പ്രദേശവാസികളുടെ ആവശ്യം.

വണ്ണായിക്കടവ് വലിയ പാലം അതിജീവിക്കുമോ ഇൗ മഴക്കാലം

പൈസക്കരി: പതിവായി വെള്ളം കയറി അപകടാവസ്ഥയിലായ പയ്യാവൂർ പഞ്ചായത്തിലെ വണ്ണായി ക്കടവ് പാലം ഇനിയൊരു പ്രളയത്തെ അതിജീവിക്കുമോയെന്ന ആശങ്കയിലാണ് പ്രദേശവാസികൾ. എല്ലാ വർഷവും വെള്ളത്തിനടിയിലാകുന്ന ഈ പാലത്തിന്‍റെ കൈവരികൾ ഉൾപ്പെടെ തകർന്ന നിലയിലാണ്. അപകടാവസ്ഥയിലായി വർഷങ്ങൾ കഴിഞ്ഞിട്ടും അറ്റകുറ്റപ്പണി നടത്താൻപോലും അധികൃതർ തയാറായിട്ടില്ല. പുഴയെടുക്കുന്നതിന് മുന്പ് പുതിയ വലിയ പാലംവേണമെന്ന ആവശ്യവുമായി ജനകീയ പ്രക്ഷോഭ ത്തിനൊരുങ്ങുകയാണ് നാട്ടുകാർ. ഇതിന് മുന്നോടിയായി അടുത്ത മാസം ജനകീയ കമ്മിറ്റി വിളിച്ചു ചേർക്കാനും തീരുമാനിച്ചു. 1982ലാണ് വണ്ണായിക്കടവിൽ പാലം നിർമിച്ചത്. വണ്ണായിക്കടവ്, പൈസക്കരി, കുന്നത്തൂർ തുടങ്ങിയ സ്ഥലങ്ങളിൽ നിന്നും ചെമ്പേരി, നെല്ലിക്കുറ്റി, ആലക്കോട്, കുടിയാൻമല തുടങ്ങിയ പ്രദേശങ്ങളി ലേക്ക് പോകാനുള്ള എളുപ്പവഴിയാണിത്. ബസുകൾ ഒഴികെയുളള ചെറിയ വാഹനങ്ങൾ ഇതുവഴി രാത്രി കടന്നുപോവുന്നത് നിയന്ത്രിച്ചിട്ടുണ്ട്. ഉയരം കുറഞ്ഞ പാലമാണ് ഇവിടെയുള്ളത്. ഈ പാലത്തിൽ ചെറിയ മഴയിൽ പോലും വെള്ളം കയറുന്നതും കൈവരികൾ തകരുന്നതും പതിവാണ്. ഇനി പുതിയ പാലം മാത്രമാണ് നാട്ടുകാരുടെ പ്രതീക്ഷ. കഴിഞ്ഞ വർഷങ്ങളിലുണ്ടായ പ്രളയത്തിന് ശേഷം പാലത്തിന്‍റെ തൂണുകളുടെ കോൺക്രീറ്റും ഇളകിയ അവസ്ഥയിലാണ്.

കനത്ത മഴ: മണ്ണിടിച്ചിലും വെള്ളക്കെട്ടും വ്യാപകം

കണ്ണൂർ: ജില്ലയില്‍ തുടര്‍ച്ചയായി പെയ്യുന്ന മഴയില്‍ മണ്ണിടിച്ചിലും വെള്ളക്കെട്ടും വ്യാപകമായി. കൂവേരി വില്ലേജില്‍ ചപ്പാരപ്പടവ് ടൗണ്‍, പന്നിയൂര്‍ വില്ലേജില്‍ പന്നിയൂര്‍ പൂമംഗലം കൂളികുണ്ട്, പൂമംഗലം മാഴൂര്‍ റോഡ്, തളിപ്പറമ്പ് വില്ലേജില്‍ തൃച്ചംബരം ഭാഗത്തുള്ള റോഡ്, കാക്കാത്തോട് ബസ് സ്റ്റാൻഡ്, കുറുമാത്തൂര്‍ വില്ലേജില്‍ കുറുമാത്തൂര്‍ കാണിച്ചമല്‍ എന്നിവിടങ്ങളാണ് കനത്തമഴയില്‍ വെള്ളക്കെട്ടിലായത്. പരിയാരം ദേശീയപാതയില്‍ വെള്ളക്കെട്ടായതോടെ സമീപത്തെ വി.വി. കരുണാകരന്‍റെ വീട്ടില്‍ വെള്ളം കയറി. കുറുമാത്തൂര്‍ കാണിച്ചമലില്‍ വെള്ളക്കെട്ട് ഉണ്ടായതോടെ നാല് കുടുംബങ്ങള്‍ ബന്ധുവീടുകളിലേക്ക് മാറി. പരിയാരം ഇരിങ്ങള്‍ നിവാസി കെ.പി. മിഥുന്‍റെ വീടിനോട് ചേര്‍ന്നുള്ള മതില്‍ ഇടിഞ്ഞു വീടിന്‍റെ പോര്‍ച്ച് തകര്‍ന്നു. ആളപായമില്ല. പന്നിയൂര്‍ പൂമംഗലം കൂളിക്കുണ്ടില്‍ പി.പി. ലക്ഷമണന്‍, സത്യന്‍ ഉപ്പേരി, രാധ, സുമേഷ്, കൃഷ്ണന്‍ എന്നിവരുടെ വീടുകളില്‍ വെള്ളം കയറി. കുടുംബങ്ങള്‍ ബന്ധുവീടുകളിലേക്ക് മാറണമെന്ന് അധികൃതര്‍ നിര്‍ദേശം നല്‍കി. പൂമംഗലം- മഴൂര്‍ റോഡില്‍ വെള്ളം കയറിയതോടെ ഗതാഗതം പ്രതിസന്ധിയിലായി. ‌ പട്ടുവം വില്ലേജില്‍ മുതുകുടയില്‍ മഠത്തില്‍ അബ്ദുള്‍ സലാം, കയ്യം കാനാമഠത്തില്‍ പ്രകാശന്‍ എന്നിവരുടെ വീടുകള്‍ മണ്ണിടിഞ്ഞ് അപകടാവസ്ഥയിലായി. കുടുംബങ്ങളോട് മാറി താമസിക്കുവാന്‍ സ്ഥലം സന്ദര്‍ശിച്ച വില്ലേജ് അധികൃതര്‍ നിര്‍ദേശിച്ചു. തളിപ്പറമ്പ് മുയ്യം റോഡില്‍ ഭ്രാന്തന്‍ കുന്നില്‍ മതില്‍ തകര്‍ന്ന് ബൈക്ക് യാത്രികന്‍ കൂനം സ്വദേശി പി.പി സുനേഷിന് പരിക്കേറ്റു. സുനേഷിനെ തളിപ്പറമ്പ് സഹകരണ ആശുപത്രിയില്‍ പ്രവേശിപ്പിച്ചു. ഉദയഗിരി മണക്കടവ് ടൗണില്‍ മണ്ണിടിഞ്ഞത് ശ്രീപുരം ഗവ. ഹയര്‍ സെക്കന്ററി സ്‌കൂളിന് ഭീഷണിയായി. ശക്തമായ മഴയില്‍ ആലക്കോട് ദേവകിയുടെ മുറ്റം ഇടിഞ്ഞുതാഴ്ന്നു വീട് അപകടാവസ്ഥയിലായി. താമസക്കാരായ ദേവകിയും മകള്‍ അമ്പിളിയും മകന്‍റെ വീട്ടിലേക്ക് മാറി താമസിക്കാന്‍ സ്ഥലം സന്ദര്‍ശിച്ച റവന്യൂ അധികൃതര്‍ നിര്‍ദേശം നല്‍കി. ചെക്കിക്കടവ് പാലത്തിനു സമീപം വലിയവളപ്പില്‍ ഷാജിയുടെ വീടിനു സമീപം വീണ്ടും കരയിടിച്ചില്‍ ഉണ്ടായതോടെ കുടുംബത്തോട് മാറി താമസിക്കുന്നതിനു റവന്യു അധികൃതര്‍ നിര്‍ദേശം നല്‍കി. മടമ്പം: കനത്തമഴയിൽ മടമ്പം പുഴയടക്കം കരകവിഞ്ഞ് താഴ്ന്ന പ്രദേശങ്ങളിൽ വെള്ളംകയറി. വളപട്ടണം പുഴയുടെ ഭാഗമായ ചെങ്ങളായി, കൊയ്യം, പെരുമ്പാറക്കടവ് ഭാഗങ്ങളിൽ പുഴ കരകവിഞ്ഞ് വയലുകൾ വെള്ളത്തിലായി. പുഴ കരകവിഞ്ഞ് പൊടിക്കളം മേരിഗിരി സീനിയർ സെക്കൻഡറി സ്കൂൾ മൈതാനിയിലും വെള്ളം കയറി. പൊടിക്കളം മടമ്പം റോഡും വെള്ളത്തിലാണ്. കൈതപ്രം ഭാഗത്തും ജലനിരപ്പ് ഉയർന്നു. കോട്ടൂർപുഴയിൽ വെള്ളം നിറഞ്ഞതു കാരണം മത്സ്യമാർക്കറ്റ് പരിസരത്ത് വെള്ളം കയറുമോ എന്ന ആശങ്കയുണ്ട്. മടമ്പം റെഗുലേറ്റർ കം ബ്രിഡ്ജിന്‍റെ ഭാഗത്ത് ജലനിരപ്പ് ഉയർന്നതോടെ മേരിലാൻഡ് ഹൈസ്കൂൾ മൈതാനത്ത് വെള്ളപ്പൊക്ക ഭീഷണിയുണ്ട്. മടമ്പം മുതൽ അലക്സ് നഗർ വരെ പലയിടത്തും വെള്ളക്കെട്ട് രൂക്ഷമാണ്. ഇടയ്ക്കിടെ ജാഗ്രതാ നിർദേശം നൽകി വരുന്നതായി നഗരസഭാകൗൺസിലർ മീനാ സജി അറിയിച്ചു. കാഞ്ഞിലേരി, അലക്സ് നഗർ, തുമ്പേനി, തേർളായി, തവറൂൽ, മുങ്ങം, ചെങ്ങളായി, അടിച്ചേരി ഭാഗങ്ങളിലും വെള്ളപ്പൊക്ക ഭീഷണി നിലനിൽക്കുന്നു. കേരള കർണാടക അതിർത്തി വനത്തിൽ കനത്ത മഴ പെയ്യുന്നുണ്ട്. ഇവിടെ മഴ പെയ്താലാണ് സാധാരണയായി പുഴകളിൽ വെള്ളം ഉയരുന്നത്. ഉരുൾപൊട്ടൽ പതിവായ വനമേഖലയാണിത്. ചെങ്ങളായി പഞ്ചായത്തിലെ തേർളായി ദ്വീപിൽ നൂറിലേറെ കുടുംബങ്ങളുണ്ട്. കഴിഞ്ഞ പ്രളയകാല ത്ത് വെള്ളം കയറി മുങ്ങിയ ദ്വീപാണിത്. പയ്യാവൂർ പഞ്ചായത്തിലെ വിവിധ ഭാഗങ്ങളിൽ വെമ്പുവ പുഴയടക്കം നിറഞ്ഞുകിടക്കുകയാണ്. ഏരുവേശി, ചന്ദനക്കാംപാറ, വണ്ണായികടവ്, വഞ്ചിയം, പുഴകളിൽ വെള്ളം ഉയർന്നതോടെ ആശങ്കയിലാണ് പ്രദേശവാസികൾ. പാറക്കടവ്, കണ്ടകശേരി ഭാഗത്തെല്ലാം വെള്ളം ഉയർന്നിട്ടുണ്ട്. പൂപ്പറമ്പ് പാലത്തിനടയിൽ ശക്തമായ നീരൊഴുക്കുണ്ട്. മലയോരത്തെ തോടുകളെല്ലാം നിറഞ്ഞൊഴുകുകയാണ്. പെരുമ്പടവ്: വളപട്ടണം പുഴയിലെ ജലനിരപ്പ് കുത്തനെ ഉയർന്നതിനെ തുടർന്ന് ചപ്പാരപ്പടവ് ടൗണിൽ വെള്ളം കയറി. ഗതാഗതം തടസപ്പെട്ടു. വ്യാപാരസ്ഥാപനങ്ങളിൽ വെള്ളം കയറിയതിനെ തുടർന്ന് സാധനങ്ങൾ നശിച്ചു. മിക്ക വ്യാപാരികളും സാധനങ്ങൾ സുരക്ഷിത സ്ഥാനങ്ങളിലേക്ക് മാറ്റി. മാതമംഗലം ടൗണിലും വ്യാപാരസ്ഥാപനങ്ങളിലും വെള്ളം കയറി. വാഹനഗതാഗതവും തടസപ്പെട്ടു. മാതമംഗലത്ത് ടൗണിൽ വെള്ളം കയറിയത് സന്ദർശിക്കാൻ എത്തിയ തഹസില്‍ദാറും എംഎൽഎയും വ്യാപാരികളെ സന്ദർശിക്കാൻ തയാറാകഞ്ഞതിൽ വ്യാപാരികൾക്കിടയിൽ കനത്ത പ്രതിഷേധമുണ്ട്. പലയിടത്തും കൃഷിയിടങ്ങളിൽ വെള്ളം കയറിയ നിലയിലാണ്. ദിവസങ്ങൾക്കു മുമ്പ് വച്ച പുതിയ തൈകൾ ഒഴുകി പോയിട്ടുണ്ട്. കൃഷി നാശം സംഭവിച്ച കർഷകർക്ക് അടിയന്തരസഹായം ലഭ്യമാക്കണമെന്ന ആവശ്യം ശക്തമാണ്. തളിപ്പറമ്പ്: തളിപ്പറമ്പ് മുയ്യം റോഡിൽ ഭ്രാന്തൻ കുന്നിൽ മതിൽ തകർന്ന് റോഡിലേക്കു വീണ് ബൈക്ക് യാത്രക്കാരന് പരിക്കേറ്റു. കൂനം സ്വദേശി പി.പി. സുനേഷിനാണ് പരിക്കേറ്റത്. ഇന്നലെ രാവിലെ പത്തോടെയാണ് അപകടം. പരിക്കേറ്റ സുനേഷിനെ തളിപ്പറന്പ് സഹകരണ ആശുപത്രിയിൽ പ്രവേശിപ്പിച്ചു. ചെറുപുഴ: കനത്ത മഴയിൽ വീടിന്‍റെ സരക്ഷണ ഭിത്തിയിടിഞ്ഞതിനെ തുടർന്ന് തോടിനോട് ചേർന്ന വീട് അപകടാവസ്ഥയിലായി. പക്കഞ്ഞിക്കാട്ടെ ചിങ്ങംതോട്ടത്തിൽ മാർഷൽ ജോസിന്‍റെ വീടാണ് അപകടാവസ്ഥയിലായത്. തിങ്കളാഴ്ച രാത്രിയുണ്ടായ കനത്ത മഴയിൽ വീടിനോട് ചേർന്ന് മുറ്റത്തിന്‍റെ കെട്ടിടിഞ്ഞ് വീഴുകയായിരുന്നു. ബാക്കിഭാഗം വിള്ളൽ സംഭവിച്ച് ഏത് സമയവും തകർന്നേക്കാമെന്ന അവസ്ഥയിലാണ് പക്കഞ്ഞിക്കാട്ട് തോടിനോട് ചേർന്നാണ് വീട്. തോട്ടില ശക്തമായ ഒഴുക്കിൽ മണ്ണിടിച്ചിൽ ഉണ്ടായാൽ മുറ്റമുൾപ്പെടെ ഇടിഞ്ഞു വീഴുകയും വീടിന്‍റെ നിലനിൽപിനെ ബാധിക്കുകയും ചെയ്യും. ചെമ്പന്തൊട്ടി: ചെമ്പന്തൊട്ടി -നടുവിൽ റോഡിലെ കൊക്കായിപാലം താത്കാലിക അപ്രോച്ച് റോഡും ഒലിച്ചുപോയി. ഇന്നലെ ഉച്ചവരെ ബസുകളടക്കം കടന്നുപോയതിന് ശേഷം വലിയ ലോറി കയറിയപ്പോഴാണ് റോഡിന്‍റെ അടിഭാഗത്ത് സ്ഥാപിച്ച പൈപ്പുകൾ പൊട്ടിയതും, തുടർന്നുണ്ടായ ശക്തമായ കുത്തൊഴുക്കിൽ റോഡ് ഒലിച്ചുപോയതെന്നാണ് നാട്ടുകാർ പറയുന്നത്. ശരിയായ രീതിയിൽ റോഡ് പണിയാത്തതാണ് റോഡ് തകർച്ചയ്ക്ക് കാരണമെന്ന ആക്ഷേപവും ഉയരുന്നുണ്ട്. ഇതോടെ ചെമ്പന്തൊട്ടി ടൗൺ പെരുമഴയിൽ വീണ്ടും ഒറ്റപ്പെട്ടു. മറ്റ് റോഡുകൾ വഴി ചുറ്റിക്കറങ്ങിയാണ് വാഹനങ്ങൾ ലക്ഷ്യത്തിലെത്തുന്നത്. സ്കൂൾ തുറന്നതോടെ രണ്ടു പാലങ്ങളുടെ അപ്രോച്ച് റോഡുകൾ തകർന്നതും ഗതാഗത സ്തംഭനവും വിദ്യാർഥികൾക്കടക്കം വലിയ ദുരിതമായിട്ടുണ്ട്. കുപ്പം സിഎച്ച് നഗറിൽ വീണ്ടും ചെളിവെള്ളം കയറി തളിപ്പറമ്പ്: കപ്പണത്തട്ട് മേഖലയിൽ നിന്ന് കുപ്പം സി.എച്ച് നഗറിലേക്ക് വീണ്ടും വെള്ളവും ചെളിയും കുത്തിയൊഴുകി എത്തി. അബ്‌ദുൾ ഹാജി, നാസർ, ആമിന തുടങ്ങിയവരുടെ വീടുകളിലേക്ക് ചെളിവെള്ളം കയറി. കഴിഞ്ഞ മഴക്കാലത്തും ഇപ്രാവശ്യത്തെ കാലവർഷാരംഭത്തിലും ഇവരുടെ വീടുകളിലേക്ക് നിരവധി തവണ വെള്ളം കയറിയിരുന്നു. കപ്പണത്തട്ടിലെ നിർമാണ പ്രവൃത്തി കാരണം അവിടെ നിന്ന് വരുന്ന ചെളിവെള്ളം ജെസിബി ഉപയോഗിച്ച് വഴിതിരിച്ചു വിട്ടിരുന്നുവെങ്കിലും തിങ്കളാഴ്ച രാത്രി മുതൽ മഴയിൽ വീണ്ടും ശക്തിയായി ചെളിവെള്ളം കുത്തിയൊലിച്ച് സി.എച്ച് നഗറിലെത്തുകയായിരുന്നു. കഴിഞ്ഞ മാസം അവസാനവാരം ശാശ്വത പരിഹാരമുണ്ടാക്കണമെന്ന് ആവശ്യപ്പെട്ട് സ്ത്രീകളും കുട്ടികളും ഉൾപ്പെടെയുള്ളവർ ദേശീയപാതയിൽ വാഹനങ്ങൾ തടഞ്ഞ് കൊണ്ടുള്ള ഉപരോധ പ്രതിഷേധം അരങ്ങേറിയിരുന്നു. തുടർന്ന് ആർഡിഒ നേതൃത്വം നൽകിയ ചർച്ചയിൽ മേയ് 27 നുള്ളിൽ ചെളിവെള്ളം ഒഴുകിയെത്തുന്നതിന് ശാശ്വത പരിഹാരം കണ്ടെത്തുമെന്നും ചെളിയും വെള്ളവും കയറി നാശനഷ്‌ടം സംഭവിച്ച വീടിനും മറ്റുള്ളവയ്ക്കും നിർമാണ കമ്പനിയുമായി ബന്ധപ്പെട്ട് വെളളം കയറി നശിച്ചു പോയ രേഖകൾക്കും സർട്ടിഫിക്കറ്റുകൾക്കും പകരം പുതിയത് അനുവദിക്കുവാനുള്ള നടപടി സ്വീകരിക്കുമെന്നും പ്രതിഷേധക്കാർക്ക് ഉറപ്പു നൽകിയിരുന്നു.

കണിക്കുന്നിൽ മണ്ണിടിച്ചിൽ ഭീഷണിയിലായ ‌വീടിന് പകരം കരാർ കന്പനി പുതിയത് നിർമിച്ചുനല്കും

തളിപ്പറമ്പ്: രൂക്ഷമായ മണ്ണിടിച്ചിൽ കാരണം തുടർന്ന്‌ തകർന്നു വീഴാറായ തളിപ്പറമ്പ് കണികുന്നിലെ വള്ളിയോട്ട് ശ്രീധരനും കുടുംബത്തിനും ദേശീയപാത നിർമാണ കരറുകാരായ മേഘ കൺസ്ട്രക്‌ ഷൻസ് പുതിയ വീടുവച്ച്‌ നൽകും. നിലവിൽ ശ്രീധരന്‍റെ വീടിരുന്ന സ്ഥലത്ത്‌ തന്നെ ബലപ്പെടുത്തി മണ്ണിട്ടുയർത്തിയാണ്‌ വീട്‌ നിർമിക്കുക. ശ്രീധരനുണ്ടായിരുന്ന പതിനഞ്ചിൽ അഞ്ചുസെന്‍റ് ദേശീയപാത ബൈപാസിനായി ഏറ്റെടുത്തിരുന്നു. ബാക്കിയുള്ള പത്ത് സെന്‍റ് സ്ഥലമാണ് ഇപ്പോൾ ഇടിഞ്ഞുവീണ് തീരാറായത്. ഈ സ്ഥലത്തോട് ചേർന്ന് കോൺക്രീറ്റ് മതിൽ നിർമിക്കും. ബൈപാസിന്‍റെ ഇരുവശത്തും കോൺക്രീറ്റ് ചുമർ നിർമിച്ച് ബലപ്പെടുത്തി മണ്ണിട്ട് നികത്തുന്നതോടെ പ്രശ്‌നം അവസാനിക്കുമെന്നും കമ്പനി ഉറപ്പുപറയുന്നു. വീട് നിർമിക്കാൻ ശ്രീധരന് മറ്റൊരു സ്ഥലമില്ലാത്തതിനാൽ ഇവിടെ തന്നെ മണ്ണിട്ടുയർത്തിയ സ്ഥലത്ത്‌ വീട് നിർമിക്കാമെന്നാണ് മേഘ കമ്പനി നൽകിയ വാഗ്‌ദാനം. അതോടൊപ്പം ഉപജീവനമാർഗമായി പട്ടുവം റോഡിന്‌ അഭിമുഖമായി വലിയ കടമുറിയും നിർമിച്ചു നൽകും. നിലിലുള്ള വീടിന്‍റെ വിസ്‌തീർണം എത്രയാണോ അതിനേക്കാൾ പത്ത് ശതമാനം കൂടുതൽ തറവിസ്‌തീർണമുള്ള വീടാകും നിർമിച്ചു നൽകുകയെന്ന്‌ മേഘയുടെ പ്രതിനിധി അബ്ദുൽ നിസാർ പറഞ്ഞു. മഴക്കാലം കഴിഞ്ഞാലുടൻ വീടിന്‍റെ പണി തുടങ്ങും. വീടും കടയും നൽകാമെന്ന് കമ്പനി ഉറപ്പു പറഞ്ഞതായും നിർമാണ കരാർ പിന്നീട്‌ തയാറാക്കുമെന്നും ശ്രീധരന്‍റെ മകൻ പ്രമോദ്‌ പറഞ്ഞു.

മഴയും വെള്ളക്കെട്ടും: സ്കൂളുകൾക്ക് പ്രാദേശിക അവധി

കണ്ണൂർ: ജില്ലയിൽ കനത്ത മഴ കാരണവും വെള്ളക്കെട്ട് മൂലവും കുട്ടികളുടെ സുരക്ഷ മുൻനിർത്തി അസി. എഡ്യൂക്കേഷണൽ ഓഫീസർമാർമാർ ചൊവ്വാഴ്ച 50 ലേറെ സ്‌കൂളുകൾക്ക് പ്രാദേശിക അവധി നൽകി. ചില സ്കൂളുകൾക്ക് രാവിലെയും ചിലതിന് ഉച്ചയ്ക്ക് ശേഷവുമാണ് പ്രാദേശിക അവധി നൽകിയത്. തളിപ്പറമ്പ സൗത്ത് ഉപജില്ല: വടക്കാഞ്ചേരി ഗവ. എൽപി സ്കൂൾ. പാപ്പിനിശേരി ഉപജില്ല: അഴീക്കൽ കിഫായത്തുൽ ഇസ്ലാം എംഎൽപി സ്കൂൾ, താജുൽ ഉലും സ്കൂൾ. ഇരിക്കൂർ ഉപജില്ല: പട്ടുവം വാണിവിലാസം എഎൽപി സ്കൂൾ തളിപ്പറമ്പ നോർത്ത് ഉപജില്ല: പട്ടുവം ജിഎൽപി സ്കൂൾ സ്കൂൾ തളിപ്പറമ്പ ഉപജില്ല: ഗവ ബോയ്‌സ് ഹയർ സെക്കൻഡറി സ്കൂൾ, മെക്ക ഇംഗ്ലീഷ് മീഡിയം പഴയങ്ങാടി, ഗവ വെൽഫയർ ഹയർ സെക്കൻഡറി സ്കൂൾ ചെറുകുന്ന്, ഗവ ഹൈസ്കൂൾ കുറ്റേരി, എസ്എസ്ജി എച്ച്എസ്എസ് പയ്യന്നൂർ, ജിഎച്ച്എസ്എസ് മാതമംഗലം, നജാത് എച്ച്എസ് മാട്ടൂൽ.

ബാത്ത്റൂം ഫിറ്റിംഗ്സിന്‍റെ പണവുമായി മുങ്ങിയ ഗുഡ്സ് ഓട്ടോ ഡ്രൈവർ അറസ്റ്റിൽ

കണ്ണൂർ: വ്യാപാര സ്ഥാപനത്തിൽ നിന്നും ഇടപാടുകാരന് സാധനങ്ങൾ എത്തിച്ചുനൽകിയ ശേഷം പണവുമായി മുങ്ങിയ താത്കാലിക ജീവനക്കാരനായ ഗുഡ്സ് ഓട്ടോ ഡ്രൈവർ അറസ്റ്റിൽ. തിലാന്നൂർ സ്വദേശി സി. ഷംസീറിനെയാണ് (48) ടൗൺ സിഐ ശ്രീജിത്ത് കൊടേരിയുടെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. കാൾടെക്സിലെ എബിസി എംപോറിയത്തിൽ നിന്നും ഇടപാടുകാരന് സാധനങ്ങൾ എത്തിച്ച് നല്കിയ ശേഷം പണവുമായി മുങ്ങി ആർഭാട ജീവിതം നയിക്കുന്നതിനിടെയാണ് തിങ്കളാഴ്ച രാത്രി പർശിനിക്കടവിൽനിന്നു പ്രതി പിടിയിലാകുന്നത്. ഈ മാസം അഞ്ചിന് ഉച്ചയ്ക്ക് ഒന്നോടെയാണ് പരാതിക്കാസ്പദമായ സംഭവം. സ്ഥാപനത്തിന്‍റെ ബിസിനസ് ഡവലപ്പ്മെന്‍റ് ഓഫീസർ താവം പള്ളിക്കര പുതുവക്കലിലെ കെ.പി. സയ്യിദ് മുഹമ്മദാലിയുടെ പരാതിയിലാണ് ടൗൺ പോലീസ് കേസെടുത്തത്. സംഭവ ദിവസം പ്രതി കെഎൽ 59 എസ് 4915 നമ്പർ ഗുഡ്സിൽ ഇടപാടുകാരനായി കൊണ്ടുപോയ 2,22,650രൂപയുടെ ബാത്റൂം ഫിറ്റിംഗ് സാധനങ്ങൾ ഇടപാടുകാരനെ ഏൽപ്പിച്ച് പണം കൈപ്പറ്റിയ ശേഷം സ്ഥാപനത്തിൽ അടയ്ക്കാതെ വഞ്ചിക്കുകയായിരുന്നു.

വിരമിക്കുന്ന ദിവസം എസ്‌ഐയെ അപമാനിച്ചു; പയ്യന്നൂരിലെ എസ്‌ഐ മനോജ്കുമാറിന് സസ്‌പെന്‍ഷന്‍

പയ്യന്നൂര്‍: എസ്‌ഐയെ വിരമിക്കുന്ന ദിവസം സാമൂഹിക മാധ്യമത്തിലൂടെ അപമാനിച്ച സംഭവത്തില്‍ പയ്യന്നൂരിലെ ഗ്രേഡ് എസ്‌ഐ മനോജ്കുമാറിന് സസ്‌പെന്‍ഷന്‍. രണ്ടു മാസത്തിനകം അന്വേഷണ റിപ്പോര്‍ട്ട് സമര്‍പ്പിക്കാനാണ് കണ്ണൂര്‍ റൂറല്‍ അഡിഷണല്‍ എസ്പിയോട് ഡിജിപി നിര്‍ദേശിച്ചിരിക്കുന്നത്. മനോജ്കുമാര്‍ പയ്യന്നൂര്‍ പോലീസ് സ്റ്റേഷനില്‍ ജോലിചെയ്തു വരവെ കഴിഞ്ഞ ഏപ്രില്‍ 30 ന് രാത്രി ഇദ്ദേഹത്തിന്‍റെ 8075184524 എന്ന വാട്സ് ആപ് നമ്പറില്‍ വിരമിക്കുന്ന എസ്‌ഐ എന്‍. പി. കൃഷ്ണന്‍റെ യൂണിഫോ മിലുള്ള ഫോട്ടോ സ്റ്റാറ്റസാക്കി അതിന് താഴെ അദ്ദേഹത്തെ അവഹേളിക്കുകയും അപമാനിക്കുന്ന വിധത്തിലും സന്ദേശം പ്രചരിപ്പിച്ചതായി സസ്‌പെന്‍ഷന്‍ ഉത്തരവില്‍ പറയുന്നു. "ലഭ്യമായ ജീവിത സൗകര്യങ്ങളില്‍ മറ്റു ജീവനുകള്‍ക്ക് പ്രസക്തി കൊടുക്കാതെ ജോലിയില്‍ പ്രതികാരം മാത്രം കണക്കാക്കി തീര്‍പ്പാക്കുന്ന വ്യക്തികളോട് ഒന്നു മാത്രമേ പറയാനുള്ളൂ. നാളെ നീ എന്ന വ്യക്തിയും പടിയിറങ്ങും അതാണ് കാലത്തിന്‍റെ നീതി. കാലം അതു ഭംഗിയായി നടപ്പിലാക്കും...'എന്നായിരുന്നു എസ്‌ഐ മനോജ്കുമാര്‍ കുറിച്ചിട്ടത്. മുപ്പത് വര്‍ഷത്തിലേറെക്കാലം പോലീസില്‍ സേവനം ചെയ്ത എസ്‌ഐ കൃഷ്ണന്‍ സര്‍വീസില്‍നി ന്നു വിരമിക്കുന്ന ദിവസമായിരുന്നു ഈ കുറിപ്പിട്ടത്. ഈ കുറിപ്പ് എസ്‌ഐ കൃഷ്ണന് മാനസിക പ്രയാസമുണ്ടാക്കിയതിനെ തുടര്‍ന്ന് അദ്ദേഹം പരാതി നല്‍കിയിരുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]