കട്ടപ്പന വൈഎംസിഎ

കട്ടപ്പന: കട്ടപ്പന വൈഎംസിഎയുടെ ഓണാഘോഷം വൈഎംസിഎ ഹാളിൽ നടന്നു. കട്ടപ്പന വൈഎംസിഎ പ്രസിഡന്‍റ്് കെ.ജെ. ജോസഫ് അധ്യക്ഷത വഹിച്ച യോഗം വൈ എം സി എ സംസ്ഥാന ചെയർമാൻ പ്രഫ. അലക്സ് തോമസ് ഉദ്ഘാടനം ചെയ്തു. കട്ടപ്പന വൈഎംസിഎ യുടെ നേതൃത്വത്തിൽ അങ്കണവാടി അധ്യാപകരെയും ഹെൽപ്പർമാരെയും ആദരിക്കുന്ന ചടങ്ങ് പ്രഫ. അലക്സ് തോമസ് നിർവഹിച്ചു.

വൈഎംസിഎ പബ്ലിക് റിലേഷൻ സംസ്ഥാന ചെയർമാൻ ജോർജ് ജേക്കബ്, കട്ടപ്പന മുനിസിപ്പൽ ചെയർപേഴ്സൺ ബീന ടോമി, നാഷണൽ എക്സിക്യൂട്ടീവ് മെംബർ വർഗീസ് അലക്സാണ്ടർ, സെക്രട്ടറി ടോമി ഫിലിപ്പ്, പി.ഡി. തോമസ് എന്നിവർ പ്രസംഗിച്ചു.

ADVERTISEMENT

നോക്കെത്താ ദൂരത്തോളം പൂപ്പാടം; തമിഴ്‌നാട്ടില്‍ വിളവെടുപ്പ് തുടങ്ങി

നെടുങ്കണ്ടം: ഓണത്തെ പ്രതീക്ഷയോടെ കാത്തിരിക്കുന്ന നിരവധി ഗ്രാമങ്ങള്‍ തമിഴ്‌നാട്ടിലുണ്ട്. കേരളത്തില്‍ പൂക്കളം ഒരുക്കാന്‍ വസന്തം തീര്‍ക്കുന്ന ഗ്രാമങ്ങളാണ് ഇവ. തേനി ജില്ലയിലെ പല്ലവരായന്‍പെട്ടിയുടെ ഗ്രാമവഴിയുടെ ഇരുവശത്തും നോക്കെത്താ ദൂരത്തോളം പൂപ്പാടങ്ങളാണ്. ജമന്തിയും ചെണ്ടുമല്ലിയും മുല്ലയും റോസും അരളിയും വാടാമല്ലിയും ഒക്കെ ഇവിടെ പൂത്തുനില്‍ക്കുന്നു. കേരളത്തിനൊപ്പം കര്‍ണാടകയിലേക്കും ആന്ധ്രാപ്രദേശിലേക്കും വിദേശത്തേക്കുമെല്ലാം ഇവിടെനിന്നു പൂക്കള്‍ കയറ്റുമതി ചെയ്യാറുണ്ട്. എന്നാല്‍, പ്രധാന മാര്‍ക്കറ്റ് കേരളം തന്നെ. ഓണക്കാലമാണ് പ്രധാന സീസണ്‍. പല്ലവരായന്‍പെട്ടിയിലെ അഞ്ഞൂറോളം കര്‍ഷകര്‍ 1,000 ഏക്കറിലധികം സ്ഥലത്തു പൂക്കൃഷി നടത്തുന്നുണ്ട്. ഓണം ഇവര്‍ക്കും പ്രതീക്ഷയുടെ ഉത്സവമാണ്. കര്‍ഷകര്‍ പല്ലവരായന്‍പെട്ടിയിലെ മാര്‍ക്കറ്റിലാണ് പൂക്കള്‍ വില്‍ക്കുന്നത്. ഇവിടെനിന്ന് ആവശ്യക്കാര്‍ ലേലം വിളിച്ച് വാങ്ങും. ചെണ്ടുമല്ലി - 30, ജമന്തി - 50, വാടാമല്ലി - 120, മുല്ല 900, അരളി - 260 എന്നിങ്ങനെയാണ് നിലവിലെ കിലോ വില. മറ്റ് സമയങ്ങളിലും കേരളത്തിലേക്കു പൂക്കള്‍ എത്താറുണ്ടെങ്കിലും ഓണനാളുകളാണ് ഈ ഗ്രാമത്തിന്‍റെ മുഴുവന്‍ പ്രതീക്ഷകളും.

കാര്‍ വീട്ടിലേക്ക് ഇടിച്ചുകയറി; കുടുംബനാഥന് പരിക്ക്

കട്ടപ്പന: വെള്ളിലാങ്കണ്ടത്ത് നിയന്ത്രണം നഷ്ടപ്പെട്ട കാര്‍ വീട്ടിലേക്ക് ഇടിച്ചുകയറി ഒരാള്‍ക്ക് പരിക്ക്. കുഴല്‍പ്പാലം തേക്കലക്കാട്ടില്‍ അച്ചന്‍കുഞ്ഞിനാണ് പരിക്കേറ്റത്. ചൊവ്വാഴ്ച രാവിലെയാണ് അപകടം. വീടിനുള്ളില്‍ ടിവി കാണുകയായിരുന്ന അച്ചന്‍കുഞ്ഞിന്‍റെ ദേഹത്തേക്ക് സിമന്‍റ് കട്ട വീഴുകയായിരുന്നു. വീടിന്‍റെ മുന്‍വശം പൂര്‍ണമായി തകര്‍ന്നു. കാറിനുള്ളില്‍ ഉണ്ടായിരുന്നവര്‍ നിസാര പരിക്കുകളോടെ രക്ഷപ്പെട്ടു. കല്‍ത്തൊട്ടി സ്വദേശികള്‍ സഞ്ചരിച്ചിരുന്ന കാര്‍ അമിത വേഗത്തിലായിരുന്നുവെന്ന് ദൃക്‌സാക്ഷികള്‍ പറയുന്നു. മലയോര ഹൈവേയുടെ നിര്‍മാണം പൂര്‍ത്തിയായതോടെ കട്ടപ്പന - കുട്ടിക്കാനം സംസ്ഥാനപാതയില്‍ ദിനംപ്രതി വാഹനാപകടങ്ങള്‍ തുടര്‍ക്കഥയാകുകയാണ്.

നിർമാണം നടത്തി ആറുമാസം: പൈപ്പ് പൊട്ടി റോഡ് തകർന്നു

തൊടുപുഴ: ആധുനിക നിലവാരത്തിൽ ടാറിംഗ് നടത്തിയ കാരിക്കോട്- തെക്കുംഭാഗം റോഡ് നിർമാണം പൂർത്തിയായി ആറ് മാസം തികയും മുൻപേ തകർന്നു. വഴിനീളെ പൈപ്പുകൾ പൊട്ടിയാണ് റോഡ് തകർന്നത്. ഇന്നലെ രാവിലെ കല്ലാനിക്കൽ ഹൈസ്കൂൾ ജംഗ്ഷനു സമീപം പൈപ്പ് പൊട്ടിയതിനെത്തുടർന്ന് റോഡിന്‍റെ പകുതി ഭാഗവും തകർന്ന നിലയിലാണ്. ഈ ഭാഗത്തെ ടാറിംഗും മെറ്റലും മണ്ണുമെല്ലാം ഒലിച്ചുപോയി. ഒരു മാസം മുൻപാണ് ഇതിന് ഏതാനും മീറ്റർ അകലെ ഓറഞ്ച് വില്ലയ്ക്ക് സമീപം മഞ്ഞമാക്കൽ വളവിൽ പൈപ്പ് പൊട്ടി റോഡ് തകർന്നത്. ഈ ഭാഗത്തെ പൈപ്പ് അറ്റകുറ്റപ്പണി നടത്തിയെങ്കിലും തകർന്ന ഭാഗത്തെ റോഡ് ഇപ്പോഴും കുഴിയായിത്തന്നെ കിടക്കുന്നു. വളവിനു സമീപം കുഴിയുള്ളത് വാഹന യാത്രക്കാർക്ക് അപകട ഭീഷണിയാണ്. ഇന്നലെ പൈപ്പ് പൊട്ടിയ ഭാഗത്ത് ജല അഥോറിറ്റി ജീവനക്കാർ അറ്റകുറ്റപ്പണി നടത്തിയെങ്കിവും തകർന്ന റോഡ് ആരു നന്നാക്കുമെന്ന ചോദ്യമാണ് ഉയരുന്നത്. പൈപ്പ് പൊട്ടി തകരുന്ന റോഡ് നന്നാക്കേണ്ട ചുമതല ജല അഥോറിറ്റിക്കാണെന്നാണ് പൊതുമരാമത്ത് അധികൃതർ പറയുന്നത്. എന്നാൽ ഇവരാകട്ടെ റോഡിലെ തകരാർ പരിഹരിക്കാൻ യാതൊരു നടപടിയും സ്വീകരിക്കാറില്ല. റോഡിന്‍റെ ഉടമസ്ഥാവകാശം പേറുന്ന പൊതുമരാമത്ത് അധികൃതരാകട്ടെ പൊട്ടിയ പൈപ്പ് ഭാഗം നന്നാക്കിയോ എന്നു പോലും അന്വേഷിക്കാൻ മെനക്കെടാറില്ല. റോഡ് ആധുനിക നിലവാരത്തിൽ നന്നാക്കുമെങ്കിലും ഇതിനടിയിലൂടെ നേരത്തേ സ്ഥാപിച്ചിട്ടുള്ള പൈപ്പുകൾ പൊട്ടുന്നത് പതിവായിരിക്കുകയാണ്. വർഷങ്ങൾക്ക് മുൻപ് സ്ഥാപിച്ച നിലവാരം കുറഞ്ഞ പൈപ്പുകളാണ് പലഭാഗത്തും റോഡിന്‍റെ അടിയിൽ കിടക്കുന്നതെന്നാണ് നാട്ടുകാരുടെ ആക്ഷേപം.

മോഷണം നടത്തിയ ആൾ പിടിയിൽ

മൂന്നാർ: മൂന്നാർ പള്ളിവാസൽ റിസോർട്ടു മുറിയിൽ മോഷണം നടത്തി മുങ്ങിയ പ്രതിയെ പൊലീസ് തമിഴ്നാട്ടിൽനിന്ന് അറസ്റ്റു ചെയ്തു. രാജസ്ഥാൻ കോട്ട ജില്ലയിൽ വിജയനഗറിൽ അജയ് രവീന്ദ്രനാണ് പിടിയിലായത്. മൊബൈൽ ഫോണും സിസിടിവി യും കേന്ദ്രീകരിച്ച് പോലീസ് നടത്തിയ അന്വേഷണമാണ് പ്രതിയെ കുടുക്കിയത്. തമിഴ്നാട് തിരുനെൽവേലിയിൽ നിന്നുമാണ് മൂന്നാർ പൊലീസ് പ്രതിയായ രാജസ്ഥാൻ സ്വദേശിയെ അറസ്റ്റു ചെയ്തത്. വെള്ളിയാഴ്ച്ച രാവിലെയാണ് പള്ളിവാസൽ മൂലക്കടയിലുളള റിസോർട്ടിൽ താമസിച്ചിരുന്ന ഡിണ്ടുക്കൽ സ്വദേശി ജാഫർ സാദിഖിന്‍റെ മുറിയിൽ സൂക്ഷിച്ചിരുന്ന ലാപ്ടോപ്, ഐഫോണ്‍, എടിഎം കാർഡുകൾ, വില കൂടിയ വാച്ച് എന്നിവ മോഷണം പോയത്. പരാതിയുടെ അടിസ്ഥാനത്തിൽ പോലീസ് നടത്തിയ അന്വേഷണമാണ് പ്രതിയെ കുടുക്കിയത്. പ്രതി എടിഎം കാർഡുകൾ ഉപയോഗിച്ച് 1.81 ലക്ഷം രൂപയും പിൻവലിച്ചിരുന്നു. ആറു ലക്ഷം രൂപയുടെ നഷ്ടമാണ് ജാഫർ സാദിഖിനുണ്ടായത്. മൂന്നാർ എസ്എച്ച്ഒ ബിനോദ് കുമാർ, പ്രിൻസിപ്പൽ എസ്ഐ കെ.പി. അനിൽകുമാർ, എസ്ഐ പങ്കജ് കൃഷ്ണ, എസ്‌സിപിഒമാരായ എം. മണികണ്ഠൻ, ഹിലാൽ എന്നിവരുടെ നേതൃത്വത്തിലാണ് പ്രതിയെ തമിഴ്നാട്ടിൽനിന്നു പിടികൂടിയത്. പ്രതി മോഷ്ടിച്ച തുക ക്രിപ്സോ കറൻസിയിൽ നിക്ഷേപിച്ചതായാണ് വിവരം

വനംവകുപ്പിന്‍റെ തടസം നീക്കണം: ഡീൻ കുര്യാക്കോസ് എംപി

ചെറുതോണി: ഇടുക്കി -ഉടുമ്പന്നൂർ റോഡിന്‍റെ ഭാഗമായ ഉടുമ്പന്നൂർ -കൈതപ്പാറ- മണിയാറൻകുടി പിഎംജിഎസ് വൈ റോഡിന് വനംവകുപ്പ് സ്ഥലം വിട്ടുനൽകുന്നതിന് പരിവേഷ് പോർട്ടലിൽ അപ്‌ലോഡ് ചെയ്യുന്നതിന് അടിയന്തരമായി ഉന്നതതല യോഗം വിളിച്ചുചേർക്കണമെന്ന് ആവശ്യപ്പെട്ട് ഡീൻ കുര്യാക്കോസ് എംപി മന്ത്രി എ.കെ. ശശീന്ദ്രന് കത്ത് നൽകി. പിഎംജിഎസ്‌വൈയിൽ ഉൾപ്പെടുത്തി അംഗീകാരം ലഭിച്ച റോഡിന് സാങ്കേതിക തടസങ്ങൾ മറികടന്ന് 18-07-2023 ആണ് സാങ്കേതികാനുമതി ലഭ്യമായത്. 03-11-2023 ൽ കരാർ ഒപ്പിട്ടു. ഇതോടൊപ്പം തന്നെ വനംവകുപ്പിൽനിന്ന് ഭൂമി വിട്ടുകിട്ടുന്നതിനും പരിവേഷ് പോർട്ടലിൽ ഈ പ്രവൃത്തി അപ്‌ലോഡ് ചെയ്യുന്നതിനുമുള്ള പ്രവർത്തനങ്ങൾ നടന്നുവരുകയായിരുന്നു. നടപടിക്രമങ്ങളെല്ലാം പൂർത്തിയാക്കി വനംവകുപ്പ് പരിഹാര വനവത്കരണത്തിനായി കാന്തല്ലൂർ വില്ലേജിലെ റവന്യു ഭൂമി വിട്ടു നൽകി. 2024 ജനുവരിയിൽ വനംവകുപ്പ് ബന്ധപ്പെട്ട സൈറ്റിൽ പരിഹാര വനവത്കരണ ഭൂമി അപ്‌ലോഡ് ചെയ്തു. ഒന്നര വർഷം കഴിയുമ്പോഴും വനംവകുപ്പ് നടപടികളൊന്നും സ്വീകരിക്കാത്തത് ഖേദകരവും പ്രതിഷേധാർഹവുമാണ്. റോഡിനായി 2019 മുതൽ ആരംഭിച്ച നടപടികളിൽ വനംവകുപ്പ് മെല്ലപ്പോക്കു നടത്തുകയാണ്. നിയമപരമായ എല്ലാ നടപടികളും പൂർത്തിയാക്കിയിട്ടും പരിവേഷ് പോർട്ടലിൽ വിട്ടുകിട്ടുന്ന ഭൂമി അപ് ലോഡ് ചെയ്യാൻ തയാറാകാതെ ഉന്നത വനം ഉദ്യോഗസ്ഥർ ഒളിച്ചുകളി നടത്തുകയാണ്. എംപി യെന്ന നിലയിൽ ബന്ധപ്പെട്ട എല്ലാവരേയും സമന്വയിപ്പിച്ചുകൊണ്ട് പതിറ്റാണ്ടുകളായി മലയോരജനതയുടെ പൊതു ആവശ്യത്തിനായി പരിശ്രമിച്ചുവരികയാണ്. പിഎംജിഎസ്‌വൈ ഫേസ് മൂന്നിന്‍റെ കാലാവധി കേന്ദ്ര ഗവൺമെന്‍റ്് അവസാനിപ്പിക്കുന്നതിന് അധികകാലമില്ല. പിഎംജിഎസ്‌വൈ നാലിന്‍റെ പ്രവർത്തനങ്ങൾ ആരംഭിച്ചുകഴിഞ്ഞു. ഈ അവസരത്തിൽ വനംവകുപ്പ് ഈ കാര്യത്തിൽ സത്വരനടപടി സ്വീകരിക്കേണ്ടതിന്‍റെ ആവശ്യകത വനംമന്ത്രിയെ ബോധ്യപ്പെടുത്തിയതായി എംപി അറിയിച്ചു.

അസ്മിത ഖേലോ ഇന്ത്യ വിമന്‍സ് ജൂഡോ ലീഗ്

നെടുങ്കണ്ടം: അസ്മിത ഖേലോ ഇന്ത്യ വിമന്‍സ് ജൂഡോ ലീഗ് നെടുങ്കണ്ടം പഞ്ചായത്ത് കമ്യൂണിറ്റി ഹാളില്‍ നടന്നു. ദേശീയ കായികദിനാഘോഷം, ഇടുക്കി ഒളിമ്പ്യന്മാരുടെ ഫോട്ടോ പ്രദര്‍ശനം, ഓണാഘോഷം തുടങ്ങിയവയും ഇതോടൊപ്പം സംഘടിപ്പിച്ചു. ജില്ലാ ജൂഡോ അസോസിയേഷന്‍, ഖേലോ ഇന്ത്യ, ജില്ലാ സ്‌പോര്‍ട്‌സ് കൗണ്‍സില്‍, നെടുങ്കണ്ടം ഗ്രാമപഞ്ചായത്ത്, നെടുങ്കണ്ടം സ്‌പോര്‍ട്‌സ് അസോസിയേഷന്‍ എന്നിവ സംയുക്തമായാണ് പരിപാടി സംഘടിപ്പിച്ചത്. പരിപാടികള്‍ പഞ്ചായത്ത് പ്രസിഡന്‍റ് പ്രീമി ലാലിച്ചന്‍ ഉദ്ഘാടനം ചെയ്തു. ജൂഡോ അസോസിയേഷന്‍ പ്രസിഡന്‍റ് പി.കെ. ഷാജി യോഗത്തില്‍ അധ്യക്ഷത വഹിച്ചു. സെക്രട്ടറി സച്ചിന്‍ ജോണി, റൈസണ്‍ പി. ജോസഫ്, സൈജു ചെറിയാന്‍, ഷിഹാബ് ഈട്ടിക്കല്‍, യൂനസ് സിദ്ധിഖ്, അനില്‍ കാട്ടുപാറ തുടങ്ങിയവര്‍ പ്രസംഗിച്ചു. ഖേലോ ഇന്ത്യ ദേശീയ ചാമ്പ്യന്‍ മേഘ സണ്ണിയെ ചടങ്ങില്‍ ആദരിച്ചു. സമാപന സമ്മേളനവും സമ്മാനദാനവും ബ്ലോക്ക് പഞ്ചായത്ത് പ്രസിഡന്‍റ് കെ.ടി. കുഞ്ഞ് ഉദ്ഘാടനം ചെയ്തു. തുടര്‍ന്ന് ഓണക്കളികളും വിവിധ കലാപരിപാടികളും നടന്നു.

ക്ഷീരസംഘം പൊതുയോഗവും ബോണസ് വിതരണവും

കുമളി: മലനാട് ക്ഷീരോല്പാദക സംഘം വെള്ളാരംകുന്ന്, മൂക്കിലാർ, മുരിക്കടി യൂണിറ്റുകളുടെ സംയുക്ത വാർഷിക പൊതുയോഗം വെള്ളാരംകുന്ന് പാരീഷ് ഹാളിൽ നടന്നു. എംഎംപിഎസ് ഡയറക്ടർ ഫാ. തോമസ് മറ്റമുണ്ടയിൽ യോഗം ഉദ്ഘാടനം ചെയ്തു. രക്ഷാധികാരി ഫാ. അഗസ്റ്റിൻ പുതുപ്പറമ്പിൽ അധ്യക്ഷതവഹിച്ചു. വാർഷിക പൊതുയോഗത്തിൽ എസ്എസ്എൽസി പരീക്ഷയ്ക്ക് സംഘാംഗങ്ങളുടെ മക്കളിൽ ഏറ്റവും കൂടുതൽ മാർക്ക് വാങ്ങിയ ആരോമൽ രമേശിനെ കാഷ് അവാർഡ് നൽകി ആദരിച്ചു. മാർച്ചിൽ പാൽ അളന്ന കർഷകർക്ക് ലിറ്ററിന് പത്തു രൂപ വീതം നൽകി. കൂടുതൽ പാൽ അളന്ന കർഷകർ മുരുക്കടി യൂണിറ്റിലെ ബേബി ഗണപതിപ്ലാക്കൽ, സിറിൽ മലമാക്കൽ, വെള്ളാരംകുന്ന് യൂണിറ്റിലെ അന്നമ്മ ഓലിക്കര, തോമസ് മങ്ങാട്ട്, മൂങ്കിലാർ യൂണിറ്റിലെ രാജേഷ് പുതിയങ്കം, രവീന്ദ്രൻ പനച്ചേരിയിൽ എന്നിവരെ ആദരിച്ചു. യോഗത്തിൽ ബേബി സെബാസ്റ്റ്യൻ, രവീന്ദ്രൻ പനച്ചേരിയിൽ, ഇ.ടി. മാത്യു ഇടകഴിക്കൽ എന്നിവർ പ്രസംഗിച്ചു.

കട്ടപ്പന മാർക്കറ്റിംഗ് കോ ഓപ്പറേറ്റീവ് സൊസൈറ്റി ക്രിക്കറ്റ് ടീം വിജയികൾ

കട്ടപ്പന: നാഷണൽ അഗ്രിക്കൾച്ചറൽ ഫെഡറേഷൻ ഓഫ് ഇന്ത്യ നടത്തിയ ഓൾ കേരള ക്രിക്കറ്റ് ടൂർണമെന്‍റിൽ കട്ടപ്പന മാർക്കറ്റിംഗ് കോ ഓപ്പറേറ്റീവ് സൊസൈറ്റി ടീം വിജയികളായി. കൊച്ചിയിൽ നടന്ന ടൂർണമെന്‍റിൽ വിജയികളായി ടീമിനെ സംഘം പ്രസിഡന്‍റ് ജോർജ് ജോസഫ് പടവൻ, വൈസ് പ്രസിഡന്‍റ് വിനോദ് നെല്ലിക്കൽ തുടങ്ങിയവർ അനുമോദിച്ചു. സംഘം സെക്രട്ടറി ജിജോമോൻ ജോർജായിരുന്നു ടീം ക്യാപ്റ്റൻ. ഹൈദരാബാദിൽ നടക്കുന്ന സൗത്ത് ഇന്ത്യ മത്സരത്തിൽ ടീം പങ്കെടുക്കും.

ഭൂപതിവ്: പ്രതിഷേധസദ‌സ്

കട്ടപ്പന: ഭൂപതിവു ചട്ടഭേദഗതിയുടെ മറവിൽ ജനങ്ങളെ കൊള്ളയടിക്കുന്ന ഗവണ്മെന്‍റിന്‍റെ ജനവഞ്ചനയ്ക്കെതിരേ കോണ്‍ഗ്രസ് കട്ടപ്പന ബ്ലോക്ക് കമ്മിറ്റിയുടെ നേതൃത്വത്തിൽ കട്ടപ്പനയിൽ പ്രതിഷേധസദസ് നടത്തി. നഗരസഭാ മിനിസ്റ്റേഡിയത്തിൽ നടന്ന പരിപാടിയിൽ പ്രവർത്തകർ ചട്ടഭേദഗതിയുടെ പകർപ്പ് കത്തിച്ചു. എഐസിസി അംഗം അഡ്വ. ഇ.എം. ആഗസ്തി ഉദ്ഘാടനം ചെയ്തു. ഭൂപതിവ് നിയമഭേദഗതി ചട്ടത്തിന് മന്ത്രിസഭ അംഗീകാരം നൽകിയത്തോടെ ജില്ലയിലെ ഭൂപ്രശ്നങ്ങൾക്ക് പരിഹാരമായെന്ന ഗവണ്മെന്‍റിന്‍റെയും ഇടുപക്ഷത്തിന്‍റെയും അവകാശവാദം യഥാർഥ്യങ്ങൾക്ക് നിരക്കാത്തതാണെന്നും മലയോരജനതയെ കൊള്ളയടിക്കാനുള്ള സുവർണാവസരമായി ഭൂനിയമ ഭേദഗതിയെ സർക്കാർ മാറ്റിയെന്നും അദ്ദേഹം ആരോപിച്ചു. ബ്ലോക്ക് കമ്മിറ്റി പ്രസിഡന്‍റ് തോമസ് മൈക്കിൾ അധ്യക്ഷത വഹിച്ചു. യുഡിഎഫ് ജില്ലാ ചെയർമാൻ ജോയി വെട്ടിക്കുഴി മുഖ്യപ്രഭാഷണം നടത്തി. ഡിസിസി ജനറൽ സെക്രട്ടറി അഡ്വ. കെ. ജെ. ബെന്നി, കട്ടപ്പന മണ്ഡലം പ്രസിഡന്‍റ് സിജു ചക്കുംമൂട്ടിൽ, കാഞ്ചിയാർ മണ്ഡലം പ്രസിഡന്‍റ് അനീഷ് മണ്ണൂർ, നേതാക്കളായ ജോസ് മുത്തനാട്ട്, ജോയി ഈഴക്കുന്നേൽ, ജോയി ആനിത്തോട്ടം തുടങ്ങിയവർ പ്രസംഗിച്ചു.

പഠനത്തിനൊപ്പം പായസത്തിന്‍റെ രുചിയും...

വണ്ടമറ്റം: പഠനത്തോടൊപ്പം പായസം വിൽപ്പനയിലൂടെ മികച്ച വരുമാനം കണ്ടെത്തി അർജുനും സഹോദരൻ അനന്തുവും മാതൃകയാകുന്നു. മൂന്ന് വർഷം മുന്പാണ് പായസം വിൽപ്പന തുടങ്ങിയത്. ഓണക്കാലമെത്തിയതോടെ പായസത്തിന് ആവശ്യ ക്കാരേറി. ഏഴ് വർഷം മുന്പ് ഇവരുടെ അച്ഛൻ ഷൈമോനും അമ്മ ബിന്ദുവും ചേർന്ന് വണ്ടമറ്റം ബൈപാസിൽ ചെറിയ കട തുടങ്ങി. അവശ്യവസ്തുക്കളും ചായയുമായിരുന്നു വിൽപ്പന. മാതാപിതാക്കളെ സഹായിക്കണമെന്ന ലക്ഷ്യത്തോടെയാണ് മക്കൾ പായസം കച്ചവടത്തിലേക്ക് തിരിയുന്നത്. മൂന്ന് വർഷം മുന്പ് ഓണക്കാലത്തായിരുന്നു തുടക്കം. അമ്മ ബിന്ദുവും അർജുനും ചേർന്ന് പായസം തയാറാക്കും. സഹോദരങ്ങൾ സ്റ്റേഷനറി കടയുടെ വരാന്തയിൽ മേശയിട്ട് പായസം വിൽപ്പന ആരംഭിച്ചു. പായസത്തിനു പ്രിയമേറിയതോടെ വർഷം മുഴുവൻ പായസം വിൽക്കാൻ തീരുമാനിക്കുകയായിരുന്നു. ഓണക്കാലത്താണ് കൂടുതൽ വിൽപ്പന നടക്കുന്നത്. ഇത്തവണയും പായസം വാങ്ങാൻ വിവിധ സ്ഥലങ്ങളിൽനിന്ന് ആൾക്കാരെത്തുന്നുണ്ട്. ആവശ്യക്കാർക്ക് പായസം ഓർഡർ അനുസരിച്ച് എത്തിച്ചുനൽകുന്ന ഡെലിവറി സംവിധാനത്തെപ്പറ്റിയും ഇവർ ആലോചനയിലാണ്. അർജുൻ മെക്കാനിക്കൽ എൻജിനിയറിംഗ് ഡിപ്ലോമ പാസായി ഇഗ്നോയിൽ ബിഎ സൈക്കോളജി പഠനം നടത്തുന്നു. അനന്തു ബിപിഎഡ് കഴിഞ്ഞ് ഇഗ്നോയിൽ ഡിഗ്രി വിദ്യാർഥിയാണ്.

അമീബിക്ക് മസ്തിഷ്ക ജ്വരം; കാന്പയിൻ തുടങ്ങി

തൊടുപുഴ: സുരക്ഷിത ജലലഭ്യതയും ജലജന്യ പ്രതിരോധവും ലക്ഷ്യമിട്ട് ഹരിത കേരള മിഷൻ തദ്ദേശ സ്വയംഭരണ സ്ഥാപനങ്ങളുമായി ചേർന്ന് വിവിധ വകുപ്പുകളുടെ സഹകരണത്തോടെ സംഘടിപ്പിക്കുന്ന ജലമാണ് ജീവൻ കാന്പയിൻ പ്രവർത്തനങ്ങൾക്ക് ജില്ലയിൽ തുടക്കമായി. സംസ്ഥാനത്തെ കിണറുകളും പൊതുജലസ്രോതസുകളും വൃത്തിയാക്കുന്നതിനുള്ള സംയുക്ത കാന്പയിനാണിത്. മുഴുവൻ വീടുകളിലെയും സ്ഥാപനങ്ങളിലെയും കിണറുകൾ, മറ്റ് കുടിവെള്ള സ്രോതസുകൾ എന്നിവ ക്ലോറിനേറ്റ് ചെയ്യും. ആവശ്യമായ ബ്ലീച്ചിംഗ് പൗഡറും ക്ലോറിൻ ഗുളികകളും തദ്ദേശസ്വയംഭരണ സ്ഥാപനങ്ങൾ വഴി ലഭ്യമാക്കും. കിണറുകൾക്ക് പുറമേ ജല സംഭരണ ടാങ്കുകൾ കഴുകി വൃത്തിയാക്കും. വീടുകൾ, ആശുപത്രികൾ, വിദ്യാഭ്യാസ സ്ഥാപനങ്ങൾ, ഹോസ്റ്റലുകൾ തുടങ്ങിയവയിലെ ജലസംഭരണ ടാങ്കുകളും വൃത്തിയാക്കും. അമീബിക്ക് മസ്തിഷ്ക ജ്വരം കൂടുതലായി റിപ്പോർട്ട് ചെയ്യപ്പെടുന്ന സാഹചര്യത്തിൽ പ്രതിരോധ പ്രവർത്തനങ്ങൾ ശക്തമാക്കാൻ മുഖ്യമന്ത്രിയുടെ നേതൃത്വത്തിൽ ചേർന്ന യോഗത്തിൽ തീരുമാനിച്ചതിന്‍റെ അടിസ്ഥാനത്തിലാണ് കാന്പയിൻ നടക്കുന്നത്. കഴിഞ്ഞ 30, 31 തീയതികളിൽ ജില്ലയിലെ തദ്ദേശസ്വയംഭരണ സ്ഥാപനങ്ങളിൽ 51,460 സ്വകാര്യ കിണറുകളും 986 പൊതു സ്ഥാപന കിണറുകളും 1163 പൊതു കിണറുകളിലും ജലത്തിന്‍റെ അളവ് അനുസരിച്ച് ശാസ്ത്രീയമായ ക്ലോറിനേഷൻ നടത്തുകയും 22462 പൊതു ടാങ്കുകൾ ശുചീകരിക്കുകയും ചെയ്തു. ജില്ലയിൽ 77 തദ്ദേശ സ്വയംഭരണ സ്ഥാപന തല യോഗങ്ങളും കാന്പയിനുമായി ബന്ധപ്പെട്ടു 325 മറ്റു യോഗങ്ങളും ചേർന്നു. 157 പരിശീലന ക്ലാസുകൾ നടത്തി. തുടർന്ന് എല്ലാ വീടുകളിലും ബോധവത്കരണ പ്രവർത്തനങ്ങളും നടത്തും.

എൻഎസ്എസ് വോളണ്ടിയർമാർ ശുചീകരണം നടത്തി

മൂലമറ്റം: സെന്‍റ് ജോസഫ്സ് കോളജിലെ എൻഎസ്എസ് വോളണ്ടിയർമാർ കാഞ്ഞാർ വാട്ടർ ഷെഡ് തീം പാർക്ക്, മലങ്കര ജലാശയതീരം എന്നിവിടങ്ങൾ ശുചീകരിച്ചു. തൊടുപുഴ-പുളിയൻമല പാതയുടെ വശങ്ങളിലായി 300-ഓളം ചെടികൾ നട്ടുപിടിപ്പിച്ചു. കോളജ് മാനേജർ റവ. ഡോ. തോമസ് പുതുശേരി, പ്രിൻസിപ്പൽ ഡോ. ജോസഫ് ജോർജ്, സിഎഫ്ഒ റവ. ഡോ. അലക്സ് ലൂയിസ്, പ്രോഗ്രാം ഓഫീസർമാരായ ഡോ. കെ.വി. ജോബി, അഖില മരിയ റീഗൽ, അനു സാജു, എസ്. ഷൈജു എന്നിവർ നേതൃത്വം നൽകി.

ഓണാഘോഷം

സീനിയർ സിറ്റിസൺസ് അസോ. കരിമണ്ണൂർ: സീനിയർ സിറ്റിസണ്‍സ് അസോസിയേഷന്‍റെ നേതൃത്വത്തിൽ ഓണാഘോഷവും അമേരിക്കയിലെ നവകേരള മലയാളി അസോസിയേഷനുമായി സഹകരിച്ച് നിർധനരായ ഡയാലിസിസ് രോഗികൾക്കുള്ള സഹായ വിതരണവും ഇന്ന് 12.30ന് എസ്‌സിഎ ഓഡിറ്റോറിയത്തിൽ നടക്കും. കരിമണ്ണൂർ ഫൊറോന വികാരി റവ. ഡോ. ജോസഫ് കൊച്ചുപറന്പിൽ മുഖ്യാതിഥിയാകും. ആനിക്കുഴ യംഗ് കേരള പബ്ലിക് ലൈബ്രറി കൊടുവേലി: ആനിക്കുഴ യംഗ് കേരള പബ്ലിക് ലൈബ്രറിയുടെ നേതൃത്വത്തിൽ ഓണാഘോഷം നടത്തി. താലൂക്ക് ലൈബ്രറി കൗണ്‍സിൽ പ്രസിഡന്‍റ് ജോർജ് അഗസ്റ്റിൻ ഉദ്ഘാടനം ചെയ്തു. ജിമ്മിച്ചൻ വണ്ണപ്പുറം മുഖ്യാതിഥി ആയിരുന്നു. ടി.എം. രൂപൻ, കെ.എം. ഉണ്ണി, തങ്കച്ചൻ ജോസഫ്, പി.പി. ജോർജ്, സാബു മാത്യു, ബെന്നി ജോർജ്, ജോ ജോസഫ്, ജിതിൻ ജോണി, കെ.വി. സേവ്യർ എന്നിവർ പ്രസംഗിച്ചു. പോലീസ് അസോ. ഇടുക്കി: കേരള പോലീസ് അസോസിയേഷൻ, പോലീസ് ഓഫീസേഴ്സ് അസോസിയേഷൻ, ജില്ലാ ഹെഡ്ക്വാർട്ടേഴ്സ്, ജില്ലാ പോലീസ് സഹകരണസംഘം എന്നിവയുടെ സംയുക്താഭിമുഖ്യത്തിൽ "പോലീസോണം' സംഘടിപ്പിച്ചു. ജില്ലാ സായുധസേന അങ്കണത്തിൽ നടന്ന വടംവലി മത്സരവും അത്തപ്പൂക്കള മത്സരവും ജില്ലാ പോലീസ് മേധാവി കെ.എം. സാബു മാത്യു ഉദ്ഘാടനം ചെയ്തു. എഎസ്പി ഇമ്മാനുവൽ പോൾ, ഡിവൈഎസ്പി മാരായ കെ.ആർ. ബിജു, വി.എ. നിഷാദ്മോൻ, മാത്യു ജോർജ്, വിശാൽ ജോണ്‍സണ്‍, രാജൻ കെ. അരമന, ടി.എ. യൂനുസ്, പി.എച്ച്. ജമാൽ, അസോസിയേഷൻ ഭാരവാഹികളായ എച്ച്. സനൽ കുമാർ, അബ്ദുൾ റസാഖ്, ഇ.ജി. മനോജ്കുമാർ എന്നിവർ പ്രസംഗിച്ചു. വടംവലി മത്സരത്തിൽ മൂന്നാർ സബ് ഡിവിഷനും അത്തപ്പൂക്കളം മത്സരത്തിൽ ഇടുക്കി സ്പെഷൽ ബ്രാഞ്ചും ജേതാക്കളായി. കാഡ്സ് ഓണച്ചന്ത തൊടുപുഴ: നാട്ടുചന്തയിൽനിന്നുള്ള ഉത്പന്നങ്ങളുമായി കാഡ്സ് ഓണച്ചന്ത ആരംഭിച്ചു. ഇളംദേശം ബ്ലോക്ക് പഞ്ചായത്ത് പ്രസിഡന്‍റ് ടോമി കാവാലം ഉദ്ഘാടനം ചെയ്തു. നഗരസഭാ കൗണ്‍സിലർ പി.ജി. രാജശേഖരൻ ആദ്യ വില്പന നിർവഹിച്ചു. കാഡ്സ് പ്രസിഡന്‍റ് കെ.ജി. ആന്‍റണി, സജി മാത്യു. എൻ.ജെ. മാമച്ചൻ, വി.പി. സുകുമാരൻ, വി.പി. ജോർജ്, കെ.എം. ജോസ്, ജിജി മാത്യു, കെ.എം. മത്തച്ചൻ എന്നിവർ പ്രസംഗിച്ചു. ഈ വർഷം ഉപ്പേരി മുതൽ പായസം വരെയുള്ള 33 ഇനം കാഡ്സിന്‍റെ സ്വന്തം ഉത്പന്നങ്ങൾ കുറഞ്ഞവിലയ്ക്ക് കൊടുക്കുമെന്ന് ഭാരവാഹികൾ പറഞ്ഞു.

ഓണം വാരാഘോഷം ഇന്നുമുതൽ

ആഘോഷത്തിന്‍റെയും കാഴ്ചകളുടെയും നാളുകൾ ഘോഷയാത്ര, കലാപരിപാടികൾ ഇടുക്കി: ജില്ലാ ഭരണകൂടം, ജില്ലാ ടൂറിസം പ്രൊമോഷൻ കൗണ്‍സിൽ, വാഴത്തോപ്പ് പഞ്ചായത്ത് എന്നിവയുടെ ആഭിമുഖ്യത്തിൽ ഇന്നു ുതൽ ഒൻപതുവരെ ചെറുതോണിയിൽ ജില്ലാ ഓണം വാരാഘോഷം സംഘടിപ്പിക്കും. ഇന്നു രാവിലെ 10ന് ജില്ലാ കളക്ടർ ഡോ.ദിനേശൻ ചെറുവാട്ട് പതാക ഉയർത്തും. വൈകുന്നേരം 6.30 ന് ഗാനമേള. നാലിനു വിവിധ മത്സരങ്ങൾ ചെറുതോണി വ്യാപാരഭവൻ ഹാളിൽ നടക്കും. തിരുവോണ ദിനത്തിൽ പഞ്ചായത്ത് തലത്തിൽ മത്സരങ്ങൾ നടക്കും. ആറിന് ഫൈവ്സ് ഫുട്ബോൾ മത്സരം വാഴത്തോപ്പ് എച്ച്ആർസി ഗ്രൗണ്ടിൽ സംഘടിപ്പിക്കും. എട്ടിന് മൂന്നു മുതൽ ചെറുതോണിയിലെ വേദിയിൽ കൈകൊട്ടിക്കളി, ഇടുക്കി കലാജ്യോതിയുടെ നൃത്തം എന്നിവ അരങ്ങേറും. ഒൻപതിന് ഉച്ചയ്ക്ക് 2.30 ന് ഓണം വാരാഘോഷ സമാപനത്തിന്‍റെ ഭാഗമായുള്ള ഘോഷയാത്ര ചെറുതോണി പെട്രോൾ പന്പിനു സമീപത്തുനിന്ന് ആരംഭിക്കും. 3.30ന് സമാപന സമ്മേളനം മന്ത്രി റോഷി അഗസ്റ്റിൻ ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ അധ്യക്ഷത വഹിക്കും. ഡീൻ കുര്യാക്കോസ് എംപി സന്ദേശം നൽകും. എംഎൽഎ മാരായ എം. എം.മണി, പി.ജെ.ജോസഫ്, എ.രാജ, മുൻ എംപി ജോയ്സ് ജോർജ്, ഇടുക്കി ബ്ലോക്ക് പഞ്ചായത്ത് പ്രസിഡന്‍റ് ഡോളി സുനിൽ, ജില്ലാ പഞ്ചായത്ത് ആസൂത്രണ സമിതി ഉപാധ്യക്ഷൻ സി.വി. വർഗീസ്, പഞ്ചായത്ത് പ്രസിഡന്‍റുമാരായ ജോർജ് പോൾ, ജിൻസി ജോയി, അനുമോൾ ജോസ്, ജോർജ് ജോസഫ്, ജോസ്മി ജോർജ്, കെ.എസ്.വിനോദ്, എഡിഎം ഷൈജു പി.ജേക്കബ് എന്നിവർ പ്രസംഗിക്കും. വൈകുന്നേരം ആറിന് ഇടുക്കി കലാസാഗർ അവതരിപ്പിക്കുന്ന ഗാനമേള. പച്ചക്കറിക്കു പിന്നാലെ വാഴയിലയും പുറപ്പെട്ടു! തൊടുപുഴ: ഓണത്തോടനുബന്ധിച്ച് മലയാളിക്ക് ഒഴിവാക്കാനാകാത്ത വാഴയിലയ്ക്ക് ഇത്തവണയും ആശ്രയം അന്യ സംസ്ഥാനംതന്നെ. നാട്ടിൽ ഇലയ്ക്കു ക്ഷാമം ഉണ്ടായതോടെ ഇതിനു ഡിമാന്‍ഡും വിലയും ഏറി. രുചിക്കൂട്ടുകൾ സംഗമിക്കുന്ന ഓണസദ്യ വിളന്പുന്നത് നല്ല തൂശനിലയിൽ ആയിരിക്കണമെന്നത് മലയാളികൾക്കു നിർബന്ധം. സദ്യവട്ടമൊരുക്കാനുള്ള പച്ചക്കറികൾക്കു പുറമെയാണ് തൂശനിലയും വലിയ തോതിൽ അതിർത്തി കടന്നെത്തുന്നത്. തമിഴ്നാട്ടിലെ കന്പം, തേനി, ശീലയംപെട്ടി, മേട്ടുപ്പാളയം, കോയന്പത്തൂർ, തൂത്തുക്കുടി, തഞ്ചാവൂർ, തെങ്കാശി, തിരുനെൽവേലി എന്നിവിടങ്ങളിൽനിന്നാണ് കേരളത്തിലേക്കു വാഴയില എത്തുന്നത്. പ്രാദേശികമായി വാഴയില ലഭിക്കുന്നുണ്ടെങ്കിലും ഓണക്കാലത്ത് ആയിരക്കണക്കിനു കെട്ട് ഇലയാണ് ആവശ്യമായി വരുന്നത്. ഇതിന്‍റെ ഏറിയ പങ്കും തമിഴ്നാട്ടിൽനിന്നു തന്നെയെത്തണം. മേന്മയേറിയ വടിവൊത്ത തൂശനില തമിഴ്നാട്ടിൽനിന്നുതന്നെ വന്നാലേ തികയൂയെന്ന് കച്ചവടക്കാർ പറയുന്നു. വില കുതിച്ചു രണ്ടാഴ്ച മുൻപു വരെ അഞ്ചു രൂപ മുതൽ ഏഴു രൂപ വരെയായിരുന്നു തൂശനിലയ്ക്കു വില. ഓണമെത്തിയതോടെ 10 രൂപ വരെയായി ഉയർന്നു തുടങ്ങി. അടുത്ത ദിവസങ്ങളിൽ വില ഇനിയും ഉയരാനാണ് സാധ്യത. ഇല ശേഖരിക്കാൻ മാത്രം തമിഴ്നാട്ടിൽ പ്രത്യേകയിനം വാഴകൾ കൃഷി ചെയ്യുന്നുണ്ട്. ഇത്തരം വാഴയിലെ കുലകൾക്ക് ആവശ്യക്കാർ കുറവാണ്. അവിയൽ, സാന്പാർ എന്നിവയിൽ ഇടാനാണ് ഇതിന്‍റെ കായകൾ കൂടുതലായി ഉപയോഗിക്കുന്നത്. നാലു ദിവസം വരെ ഈ ഇലകൾ വാടാതിരിക്കും. പെട്ടെന്നു കീറില്ലെന്നതും തമിഴ്നാട്ടിൽനിന്നുള്ള ഇലകളുടെ പ്രത്യേകതയാണ്. പ്രാദേശിക തലത്തിൽ ഞാലിപ്പൂവൻ വാഴയുടെ ഇലയാണ് കൂടുതലായി ഉപയോഗിക്കുന്നത്. മറ്റ് ഇലകളെ അപേക്ഷിച്ച് ഇതു പെട്ടെന്നു പൊട്ടിപ്പോകില്ലെന്നു മാത്രമല്ല നേർത്തതുമാണ്. ഇത്തവണ മഴക്കാലത്തു വാഴക്കൃഷിയിൽ ഉണ്ടായ നാശനഷ്ടം കാരണം നാടൻ വാഴയിലയ്ക്കു വലിയ ക്ഷാമമുണ്ടായിട്ടുണ്ട്. കാറ്റിലും മഴയിലും കീറുന്ന ഇലകൾ സാധാരണ ഉപയോഗിക്കാറില്ല.

കെസിവൈഎം നേതൃത്വ പരിശീലനക്യാന്പ് സമാപിച്ചു

തൊടുപുഴ: തൊടുപുഴ ഫൊറോന കെസിവൈഎമ്മിന്‍റെ നേതൃത്വത്തിൽ നേതൃത്വ പരിശീലന ക്യാന്പ് നടത്തി. ന്യൂമാൻ കോളജിൽ നടന്ന ദ്വിദിന ക്യാന്പിന്‍റെ ഉദ്ഘാടനം ബർസാർ ഫാ. ബെൻസണ്‍ എൻ. ആന്‍റണി നിർവഹിച്ചു. യുവജനങ്ങളിൽ നേതൃത്വഗുണങ്ങൾ വളർത്തിയെടുക്കുക, സാമൂഹ്യ പ്രശ്നങ്ങളെക്കുറിച്ചുള്ള അവബോധം വളർത്തുക, രാഷ‌്ട്രനിർമാണ പ്രക്രിയയിൽ സർഗാത്മകമായി ഇടപെടുന്ന നിലയിലേക്ക് യുവശക്തിയെ പരിശീലിപ്പിച്ചെടുക്കുക എന്നീ ലക്ഷ്യങ്ങളോടെയാണ് ക്യാന്പ് സംഘടിപ്പിച്ചത്. തൊടുപുഴ ഫൊറോനയിലെ വിവിധ ഇടവകകളിൽനിന്നു നൂറോളം യുവജനങ്ങൾ പങ്കെടുത്തു. ഫൊറോന ഡയറക്ടർ ഫാ. ജോർജ് പീച്ചാനിക്കുന്നേൽ, അസി. ഡയറക്ടർ ഫാ. അലൻ വെള്ളാംകുന്നേൽ, ആനിമേറ്റർ സിസ്റ്റർ മരിയ തോമസ് എഫ്സിസി, പ്രസിഡന്‍റ് അൽഫോൻസ് തങ്കച്ചൻ എന്നിവർ പ്രസംഗിച്ചു. എബിൻ ഫിലിപ്പ്, അഡ്വ. ഹേമന്ത് ജോസഫ്, പി.എ. സെബാസ്റ്റ്യൻ എന്നിവർ നേതൃത്വം നൽകി.

കെസിവൈഎം നവീകരണയാത്രയ്ക്ക് സ്വീകരണം

തൊടുപുഴ: യുവത്വത്തിന്‍റെ കണ്ണിലൂടെ കേരള സമൂഹത്തിന്‍റെ വികസനം എന്ന ആപ്തവാക്യവുമായി കെസിവൈഎം സംസ്ഥാന പ്രസിഡന്‍റ് എബിൻ കണിവയലിൽ നയിക്കുന്ന കേരള നവീകരണ യാത്രയ്ക്ക് തൊടുപുഴ സെന്‍റ് സെബാസ്റ്റ്യൻസ് പള്ളിയിൽ സ്വീകരണം നൽകി. രൂപതാ പ്രസിഡന്‍റ് സാവിയോ തോട്ടുപുറം അധ്യക്ഷത വഹിച്ചു. സ്വീകരണ യോഗം തൊടുപുഴ ഫൊറോന അസി. വികാരി ഫാ. ആൻഡ്രൂസ് മൂലയിൽ ഉദ്ഘാടനം ചെയ്തു. സംസ്ഥാന ഡയറക്ടർ ഫാ. ഡിറ്റോ, രൂപതാ ഡയറക്ടർ ഫാ. സെബാസ്റ്റ്യൻ വള്ളോപ്പിള്ളിൽ എന്നിവർ പ്രസംഗിച്ചു. സംസ്ഥാന വൈസ് പ്രസിഡന്‍റ് അനൂപ് പള്ളിയോട്, സംസ്ഥാന സെക്രട്ടറിമാരായ സനു സാജൻ പടിയറയിൽ, വിപിൻ ജോസഫ്, രൂപത അസി. ഡയറക്ടർ ഫാ. ആന്‍റണി വിളയപ്പിള്ളിൽ, രൂപത ആനിമേറ്റർ സിസ്റ്റർ റെറ്റി എഫ്സിസി, തൊടുപുഴ ഫൊറോന ഡയറക്ടർ ഫാ. ജോർജ് പീച്ചാനിക്കുന്നേൽ, രൂപത ജനറൽ സെക്രട്ടറി അനു മേക്കുഴിക്കാട്ട്, സംസ്ഥാന ജനറൽ സെക്രട്ടറി ജോബിൻ ജോസ് എന്നിവർ നേതൃത്വം നൽകി.

നിർമാണം വൈകുന്നു, ഫണ്ട് പോകാൻ സാധ്യത

ഉടുന്പന്നൂർ- ഇടുക്കി റോഡിന് മോക്ഷം കിട്ടില്ലേ? തൊടുപുഴ: ഉടുന്പന്നൂർ-കൈതപ്പാറ-ഇടുക്കി റോഡ് നിർമാണത്തിന് അനുവദിച്ച ഫണ്ട് പാഴാകുമോയെന്ന് ആശങ്ക. പിഡബ്ല്യുഡിയും ജില്ലാ ഭരണകൂടവും റോഡ് നിർമാണത്തിന് എല്ലാ സഹായവുമായി രംഗത്തുണ്ടെങ്കിലും വനംവകുപ്പിന്‍റെ അനാവശ്യ തടസമാണ് നിർമാണം ആരംഭിക്കാൻ ഇനിയും വൈകുന്നത്. അടുത്ത മാർച്ചിനു മുന്പ് നിർമാണം പൂർത്തീകരിക്കാനാ യില്ലെങ്കിൽ ഫണ്ട് പാഴാകും. നേരത്തെ പിഎംജിഎസ്‌വൈ പദ്ധതിയിൽ ഉൾപ്പെടുത്തിയാണ് റോഡ് നിർമാണത്തിനു പണം അനുവദിച്ചത്. റോഡിന്‍റെ നിർമാണത്തിനു വിട്ടുനൽകുന്ന ഭൂമിക്കു പകരമായി കാന്തല്ലൂരിൽ 30 ഏക്കർ റവന്യുഭൂമി വനംവകുപ്പിനു കൈമാറുകയും ചെയ്തിരുന്നു. ഏറെനാളത്തെ കാത്തിരിപ്പിനൊടുവിലാണ് റോഡിന്‍റെ ടെൻഡർ നടപടി മാസങ്ങൾക്കു മുന്പു പൂർത്തിയാക്കിയത്. പിഎംജിഎസ്‌വൈ ഫേസ്-3 പദ്ധതിയിൽ ഉൾപ്പെടുത്തിയാണ് ഫണ്ട് അനുവദിച്ചത്. പ്രധാന പാത, എന്നിട്ടും ഉടുന്പന്നൂർ മുതൽ കൈതപ്പാറ വരെയുള്ള 8.8 കിലോമീറ്റർ റോഡിന് 7.80 കോടിയും, കൈതപ്പാറ മുതൽ മണിയാറൻകുടിവരെയുള്ള 9.77 കിലോമീറ്റിന് 7.08 കോടിയുമാണ് അനുവദിച്ചത്. ഈ പദ്ധതിയിൽ റോഡ് നിർമിക്കാൻ ആറുമീറ്റർ മുതൽ എട്ടു മീറ്റർ വരെ വീതി അനിവാര്യമാണ്. നിലവിലുള്ള റോഡിനു പലഭാഗത്തും ഈ വീതി ലഭ്യമല്ല. തൊടുപുഴ- ചെറുതോണി പട്ടണങ്ങളെ കുറഞ്ഞ ദൂരത്തിൽ ബന്ധിപ്പിക്കാനാവുമെന്നതാണ് ഉടുന്പന്നൂർ-കൈതപ്പാറ-മണിയാറൻകുടി റോഡിന്‍റെ പ്രത്യേകത. ഉടുന്പന്നൂർ, കഞ്ഞിക്കുഴി പഞ്ചായത്തുകളിലെ അവികസിത മേഖലകളുടെ വികസനത്തിൽ കുതിച്ചുചാട്ടമുണ്ടാക്കാനും ഇതിലൂടെ കഴിയും. കുടിയേറ്റ ഗ്രാമമായ കൈതപ്പാറയിലെ ജനങ്ങൾ യാത്രാസൗകര്യങ്ങളുടെ അഭാവം മൂലം പതിറ്റാണ്ടുകളായി കടുത്ത ദുരിതമാണ് അനുഭവിച്ച് വന്നിരുന്നത്. ഇതുമൂലം നിരവധികുടുംബങ്ങൾ ഇവിടെനിന്നു സ്ഥലം വിറ്റ് മറ്റിടങ്ങളിലേക്കു പോകാനും നിർബന്ധിതരായി. കുടിയൊഴിഞ്ഞവർ വനംവകുപ്പിന്‍റെ സ്വയം സന്നദ്ധപുനരധിവാസ പദ്ധതിയിൽ കൈതപ്പാറ, മനയത്തടം പ്രദേശങ്ങളിൽ നിന്നു ഇരുപത്തഞ്ചോളം കുടുംബങ്ങളാണ് ഭൂമി വനംവകുപ്പിനു വിട്ടുനൽകി കുടിയൊഴിഞ്ഞത്. റോഡ് വികസനത്തിന്‍റെ ഭാഗമായി വേളൂരിൽ പുതിയ പാലവും നിർമിക്കേണ്ടിവരും. നിലവിൽ ഇവിടെയുള്ള ചപ്പാത്ത് മഴക്കാലത്തു വെള്ളംകയറി മുങ്ങുന്ന സ്ഥിതിയാണ്. ഇതു കൈതപ്പാറ, മനയത്തടം പ്രദേശങ്ങളിലുള്ളവർക്കു കടുത്ത യാത്രാദുരിതമാണ് സൃഷ്ടിക്കുന്നത്. മറുകരയെത്താൻ ചപ്പാത്തിലെ വെള്ളം ഇറങ്ങുന്നതും കാത്ത് ദിവസങ്ങളോളം കഴിയേണ്ട സ്ഥിതി. റോഡ് പൂർത്തിയാകുന്നതോടെ തൊടുപുഴയിൽനിന്നു കുറഞ്ഞ ദൂരത്തിൽ ഇടുക്കിയിലും എത്താനാകും. നിലവിലുള്ള ഉടുന്പന്നൂർ-ഉപ്പുകുന്ന്-പാറമട -ഇടുക്കി റോഡിനേക്കാൾ കുറഞ്ഞ ദൂരമാണ് കൈതപ്പാറ-മണിയാറൻകുടി റോഡിനുള്ളത്. പ്രളയകാലത്ത് 2018ലെ മഹാപ്രളയത്തിൽ ഇടുക്കിയിൽ വ്യാപക മണ്ണിടിച്ചിലുണ്ടായി തൊടുപുഴ-പുളിയൻമല സംസ്ഥാന പാതയിലൂടെയുള്ള യാത്രയ്ക്കു തടസം നേരിട്ടപ്പോൾ ഇടുക്കിയിൽനിന്നു തൊടുപുഴയിലെത്താൻ മണിയാറൻകുടി, കൈതപ്പാറ, ഉടുന്പന്നൂർ റോഡാണ് ഉപയോഗപ്പെടുത്തിയത്. അന്നുമുതൽ ഈ റോഡിന്‍റെ വികസനത്തിനായി മന്ത്രി റോഷി അഗസ്റ്റിൻ, ഡീൻ കുര്യാക്കോസ് എംപി ഉൾപ്പെടെയുള്ളവർ ഒട്ടേറെ ശ്രമം നടത്തിയിരുന്നു. വനംവകുപ്പിന്‍റെ അനാവശ്യ ഇടപെടലുകൾ ഒഴിവായാൽ ആയിരങ്ങൾക്ക് ഗുണകരമാകുന്ന റോഡ് യാഥാർഥ്യമാകും.

ഓണത്തിനു നാലുനാൾ, നാടെങ്ങും ആവേശപ്പൂരം

തൊടുപുഴ: ഓണത്തോടനുബന്ധിച്ച് നാടെങ്ങും ഉയരുന്നത് ആഘോഷങ്ങളുടെ മേളം. കലാലയങ്ങളിലെ ഓണാഘോഷങ്ങൾ അവസാനിച്ചതിനു പിന്നാലെയാണ് തദ്ദേശ സ്ഥാപനങ്ങൾ, ക്ലബുകൾ, പൗരസമിതികൾ, റെസിഡന്‍റ്സ് അസോസിയേഷൻ, മർച്ചന്‍റ്സ് അസോയേഷൻ തുടങ്ങി വിവിധ സംഘടനകളുടെ നേതൃത്വത്തിൽ ഓണാഘോഷം തകൃതിയായത്. വർണാഭമായ ഘോഷയാത്രയും സാംസ്കാരിക ഘോഷയാത്രയും ഉണ്ടെങ്കിലും വിവിധ മത്സരങ്ങളാണ് ഓണാഘോഷത്തിന്‍റെ മുഖ്യ ആകർഷണം. മുൻകാലങ്ങലിൽ ഉണ്ടായിരുന്ന ഓണക്കളികളിൽ പലതും അന്യംനിന്നു കഴിഞ്ഞു. തലപ്പന്തുകളി, കിളിത്തട്ടുകളി, പുലികളി, കൈകൊട്ടിക്കളി, ഉറിയടി, തുന്പിതുള്ളൽ, കുട്ടിയും കോലും എന്നിവയൊക്കെയായിരുന്നു പ്രധാന ഓണക്കളികൾ. ഇതിനു പുറമേ തിരുവാതിരക്കളിയും പകിട കളിയും സംഘടിപ്പിച്ചിരുന്നു. ഇതിൽ പല കളികളും ഇപ്പോൾ പുത്തൻ തലമുറയ്ക്ക് പരിചിതമല്ല. ചിലയിടങ്ങളിൽ തലപ്പന്തുകളി നിലവിലുണ്ടെങ്കിലും ജില്ലയിൽ അത്ര പ്രചാരമില്ല. വടംവലിയാണ് ഇപ്പോൾ ഓണക്കാലത്തെ പ്രധാന കായികവിനോദം. ചെറുതും വലുതുമായ വടം വലി മത്സരങ്ങൾ എല്ലാ ഓണാഘോഷങ്ങളിലും ഉണ്ടാകും. വൻകിട ടീമുകൾ മാറ്റുരയ്ക്കുന്നതും വലിയ തുക സമ്മാനമായി ലഭിക്കുന്ന മത്സരങ്ങൾക്കു പുറമേ ഓണത്തിന്‍റെ ആവേശം കൂട്ടാൻ സംഘടിപ്പിക്കുന്ന വടം വലി മത്സരം വരെയുണ്ട്. സമ്മാനത്തിനും ഉണ്ടാകും പ്രത്യേകത. കാഷ് അവാർഡിനു പുറമേ മുട്ടനാടും കോഴിയും പഴക്കുലയുമൊക്കെയാണ് സമ്മാനമായി നൽകുക. എന്തായാലും ഓണാഘാഷത്തിൽ ഒഴിച്ചുനിർത്താൻ കഴിയാത്ത വിനോദമാണ് വടംവലി. പൂക്കളമിടീലും പ്രധാന മത്സരയിനമാണ്. വയലുകളിൽ നടക്കുന്ന മരമടി മത്സരവും കാണികളിൽ ആവേശം നിറയ്ക്കുന്നതാണ്. കൊയ്ത്തു കഴിഞ്ഞ പാടങ്ങളിലാണ് കാളയോട്ട മത്സരം നടത്തുന്നത്. തീറ്റ മത്സരവും ഓണാഘോഷത്തോടനുബന്ധിച്ച് സംഘടിപ്പിക്കാറുണ്ട്. ഉൗഞ്ഞാലാട്ടം, വടത്തിൽ കയറ്റം, ചാക്കിലോട്ടം, വാഴയിൽ കയറ്റം എന്നിവയെല്ലാം ഇക്കാലത്തെ മത്സരയിനങ്ങളാണ്. സ്ത്രീകൾക്കും കുട്ടികൾക്കുമായി പ്രത്യേക മത്സരങ്ങളും സംഘടിപ്പിക്കും. തിരുവോണ നാളിൽ വരെ വിവിധ സംഘടനകളുടെ നേതൃത്വത്തിൽ മത്സരങ്ങൾ സംഘടിപ്പിക്കുന്ന പതിവാണുള്ളത്.

നന്ദിയുടെ വാക്കുകളുമായി മാര്‍ വാണിയപ്പുരയ്ക്കല്‍

കാഞ്ഞിരപ്പള്ളി: നിയുക്ത കല്യാണ്‍ ആര്‍ച്ച് ബിഷപ് മാര്‍ സെബാസ്റ്റ്യന്‍ വാണിയപ്പുരയ്ക്കല്‍ ഇന്നലെ മാതൃരൂപതയായ കാഞ്ഞിരപ്പള്ളിയിലെത്തി ധന്യമായ പഴയ ഓര്‍മകള്‍ നന്ദിയോടെ അനുസ്മരിച്ചു. വാണിയപ്പുരയ്ക്കല്‍ കുടുംബവും മാതാപിതാക്കളും സഹോദരങ്ങളും തനിക്ക് പ്രഥമ ഭവനവും കാഞ്ഞിരപ്പള്ളി രൂപത രണ്ടാമത്തെ വിശാലമായ കുടുംബമാണെന്ന് അദ്ദേഹം പറഞ്ഞു. മേരിമാതാ മൈനര്‍ സെമിനാരി പരിശീലനം മുതല്‍ ഇന്നേവരെയുള്ള പ്രയാണത്തില്‍ കാഞ്ഞിരപ്പള്ളി രൂപതാ കുടുംബം നല്‍കിയ കരുതലും മാര്‍ ജോസഫ് പവ്വത്തില്‍, മാര്‍ മാത്യു വട്ടക്കുഴി, മാര്‍ മാത്യു അറയ്ക്കല്‍, മാര്‍ ജോസ് പുളിക്കല്‍ എന്നീ പിതാക്കന്‍മാരും വൈദികഗണവും സന്യസ്തരും വിശ്വാസികളും നല്‍കിയ കരുതലും പ്രാര്‍ഥനകളും വലിയ ബലം പകര്‍ന്നു. രൂപതയില്‍ വിവിധ ചുമതലകളില്‍ ലഭിച്ച അവസരങ്ങളും പ്രോത്സാഹനങ്ങളും അവിസ്മരണീയമായി സൂക്ഷിക്കുന്നു. യുവദീപ്തി ഡയറക്ടര്‍ ശുശ്രൂഷയ്ക്കുശേഷം റോമില്‍ ഉപരിപഠനത്തിന് പോയി മടങ്ങിയെത്തിയപ്പോള്‍ മാര്‍ മാത്യു അറയ്ക്കല്‍ പിതാവ് ജുഡീഷ്യല്‍ വികാരിയായി നിയമിച്ചു. ജനങ്ങളോട് ഒപ്പം കഴിയാനുള്ള ആഗ്രഹത്തില്‍ ഏതെങ്കിലുമൊരു ചെറിയ പള്ളിയില്‍ അസിസ്റ്റന്‍റ് വികാരി സ്ഥാനംകൂടി തരുമോ എന്നു ചോദിച്ചപ്പോള്‍ അറയ്ക്കല്‍ പിതാവ് വികാരി സ്ഥാനം തന്നെയാണ് ഏല്‍പ്പിച്ചത്. തുടര്‍ന്ന് പൂമറ്റം, ചെന്നാക്കുന്ന്, മുളംകുന്ന് പള്ളികളില്‍ വികാരിയായി. നല്ല ബന്ധങ്ങള്‍ വളര്‍ത്തുക മാത്രമല്ല എല്ലാവരെയും തുറവിയോടെ കേള്‍ക്കുക എന്നത് ഒരുപാട് അറിവും അനുഭവവും പകര്‍ന്നു കിട്ടാന്‍ ഇടയായി. രൂപതയിലും പുറത്തും അനേകരുമായി സ്ഥാപിച്ച ആത്മബന്ധമാണ് ജീവിതത്തിലെ ഏറ്റവും വലിയ കരുതല്‍. രൂപതയില്‍ ഇപ്പോള്‍ വലിയ ചുമതലകള്‍ വഹിക്കുന്ന വൈദികരേറെയും മൈനര്‍ സെമിനാരി പഠനം മുതല്‍ സഹപാഠികളും സഹപ്രവര്‍ത്തകരും ആത്മസ്‌നേഹിതരുമാണെന്നത് വലിയൊരു ബലമായി മാറി. മാര്‍ ജോസ് പുളിക്കല്‍ പിതാവുമായി മൈനര്‍ സെമിനാരിയില്‍ തുടങ്ങിയ സഹോദരബന്ധം ഇന്നും എന്നും ഊഷ്മളമായി സൂക്ഷിക്കുന്നു. മാര്‍ സെബാസ്റ്റ്യന്‍ വാണിയപ്പുരയ്ക്കല്‍ കാഞ്ഞിരപ്പള്ളി പ്രീസ്റ്റ് ഹോമില്‍ കഴിയുന്ന മുന്‍ മൈനര്‍ സെമിനാരി റെക്ടര്‍ ഫാ. മാത്യു ഏറത്തേടത്തെ സന്ദര്‍ശിച്ച് ഇന്നലെ അനുഗ്രഹം തേടി. പാസ്റ്ററല്‍ സെന്‍ററില്‍ ഒരുക്കിയ സ്വീകരണത്തിനുശേഷം മേജർ ആർക്കി എപ്പിസ്കോപ്പൽ മരിയൻ തീർഥാടന കേന്ദ്രമായ പഴയപള്ളിയില്‍ എട്ടുനോമ്പു തിരുനാള്‍ പ്രമാണിച്ച് വിശുദ്ധ കുര്‍ബാന അര്‍പ്പിച്ച ശേഷമാണു മടങങിയത്. പാസ്റ്ററൽ ആനിമേഷൻ ഡയറക്ടർ ഫാ. സ്റ്റാൻലി പുള്ളോലിക്കൽ, പ്രൊക്യുറേറ്റര്‍ ഫാ. ഫിലിപ്പ് തടത്തില്‍, സിബിസിഐ ലെയ്റ്റി കൗൺസിൽ സെക്രട്ടറി ഷെവ. അഡ്വ. വി.സി. സെബാസ്റ്റ്യൻ, രൂപത പാസ്റ്ററല്‍ കൗണ്‍സില്‍ സെക്രട്ടറി ഡോ. ജൂബി മാത്യു എന്നിവര്‍ ക്രമീകരണങ്ങള്‍ക്ക് നേതൃത്വം നല്‍കി.

പാലായിലെ യുവജനങ്ങളിൽ വലിയ പ്രതീക്ഷ: മാര്‍ ജോസഫ് കല്ലറങ്ങാട്ട്

പാലാ: പാലായിലെ യുവജനങ്ങള്‍ കരുത്തന്മാരാണെന്നും അവരില്‍ വലിയ പ്രത്യാശയുണ്ടെന്നും ബിഷപ് മാര്‍ ജോസഫ് കല്ലറങ്ങാട്ട് . പാലാ രൂപത എപ്പാര്‍ക്കിയല്‍ യൂത്ത് അസംബ്ലിയുടെ രണ്ടാം ദിനത്തില്‍ യുവജനങ്ങളെ അഭിസംബോധന ചെയ്ത് പ്രസംഗിക്കുകയായിരുന്നു അദേഹം. പാലാ രൂപത മുഖ്യവികാരി ജനറാള്‍ മോൺ. ഡോ. ജോസഫ് തടത്തില്‍, രൂപതയിലെ വിവിധ ഡിപ്പാര്‍ട്ട്‌മെന്‍റ് ഡയറക്ടര്‍മാര്‍, വിവിധ ക്രൈസ്തവ യുവജന സംഘടനാ പ്രതിനിധികള്‍ എന്നിവര്‍ യുവജനങ്ങളുമായി സംവദിച്ചു. രൂപതാ ഡയറക്ടര്‍ ഫാ. മാണി കൊഴുപ്പന്‍കുറ്റി, പ്രസിഡന്‍റ് അന്‍വിന്‍ സോണി ഓടച്ചുവട്ടില്‍, ജനറല്‍ സെക്രട്ടറി റോബിന്‍ ടി. ജോസ് താന്നിമല, ജോസഫ് വടക്കേല്‍ എന്നിവര്‍ നേതൃത്വം നല്‍കി. സമാപന ദിനമായ ഇന്നു വിവിധ സെഷനുകളിലായി പാലാ രൂപതാ വികാരി ജനറാള്‍മാരായ റവ. ഡോ. സെബാസ്റ്റ്യന്‍ വേത്താനത്ത്, റവ. ഡോ. ജോസഫ് കണിയോടിക്കല്‍ എന്നിവര്‍ പങ്കെടുക്കും.

കോപ്പിയടി പിടിച്ചതിന് പീഡന പരാതി: അധ്യാപകനെ കുറ്റവിമുക്തമാക്കി

തൊടുപുഴ: കോപ്പിയടി പിടിച്ച വിരോധത്തിന് ലൈംഗിക പീഡനക്കേസിൽ പ്രതിയാക്കിയ അധ്യാപകനെ കുറ്റക്കാരനല്ലെന്ന് കണ്ട് കോടതി വിട്ടയച്ചു. അഡീഷണൽ ചീഫ് എക്സാമിനർ പ്രഫ.ആനന്ദ് വിശ്വനാഥനെയാണ് തൊടുപുഴ അഡീഷനൽ സെഷൻസ് ജഡ്ജി ലൈജു മോൾ ഷെരീഫ് കുറ്റവിമുക്തനാക്കിയത്. മൂന്നാർ ഗവ. കോളജിൽ 2014 ഓഗസ്റ്റ് 27നും സെപ്റ്റംബർ അഞ്ചിനും ഇടയിൽ നടന്ന എംഎ ഇക്കണോമിക്സ് രണ്ടാം സെമസ്്റ്റർ പരീക്ഷാ ഹാളിൽ കോപ്പിയടിച്ച അഞ്ച് വിദ്യാർഥിനികളെ അഡീഷനൽ ചീഫ് എക്സാമിനറും കോളജിലെ ഇക്കണോമിക്സ് വിഭാഗം മേധാവിയുമായ പ്രഫ. ആനന്ദ് പിടികൂടിയിരുന്നു. സംഭവം സർവകലാശാലയിലേക്കു റിപ്പോർട്ട് ചെയ്യാനായി ഇൻവിജിലേറ്റർ പ്രഫ.അജീഷിനെ ചുമതലപ്പെടുത്തി. എന്നാൽ പിടിക്കപ്പെട്ടവർ എസ്എഫ്ഐ പ്രവർത്തകരായിരുന്നതിനാൽ നിർദേശം അനുസരിക്കാൻ ഇൻവിജിലേറ്റർ തയാറായില്ല. രണ്ടു കേസുകളിൽ അധ്യാപകനെ നേരത്തേ കോടതി വിട്ടയച്ചിരുന്നു. മറ്റു രണ്ടു കേസുകളിൽ മൂന്നു വർഷം തടവിനു ശിക്ഷിച്ചു. ഇതു ചോദ്യം ചെയ്തു സമർപ്പിച്ച അപ്പീലിലാണു തൊടുപുഴ അഡിഷനൽ സെഷൻസ്കോടതിയുടെ വിധി. ആനന്ദ് വിശ്വനാഥനു വേണ്ടി അഭിഭാഷകരായ എസ്. അശോകൻ, ഷാജി ജോസഫ്, റെജി ജി. നായർ, പ്രസാദ് ജോസഫ്, സണ്ണി മാത്യു, പ്രേംജി സുകുമാർ, അഭിജിത് സി. ലാൽ എന്നിവർ ഹാജരായി.

വിഎഫ്പിസികെ കർഷകച്ചന്തകൾ തുറന്നു

തൊടുപുഴ: വെജിറ്റബിൾ ആന്‍ഡ് ഫ്രൂട്ട്സ് പ്രമോഷൻ കൗണ്‍സിലിന്‍റെ നേതൃത്വത്തിൽ ഓണത്തോടനുബന്ധിച്ച് ജില്ലയിൽ ഏഴ് കർഷകച്ചന്തകൾ ആരംഭിച്ചു. തോപ്രാംകുടി, തങ്കമണി, അടിമാലി മച്ചിപ്ലാവ്, വെസ്റ്റ് കോടിക്കുളം, ഉടുന്പന്നൂർ, ആലക്കോട്, മുട്ടം എന്നിവിടങ്ങളിലാണ് ചന്തകൾ ആരംഭിച്ചത്. സർക്കാരിന്‍റെ വിപണി ഇടപെടൽ പദ്ധതിയുടെ ഭാഗമായി ആരംഭിച്ച വിപണികൾ നാലു വരെ പ്രവർത്തിക്കും. സ്വാശ്രയ കർഷക സമിതികളിൽനിന്നു നേരിട്ട് സംഭരിക്കുന്ന ഉത്പന്നങ്ങൾ കൂടാതെ വട്ടവടയിൽനിന്നുള്ള കിഴങ്ങ്, കാബേജ്, കാരറ്റ്, വെളുത്തുള്ളി, ബീറ്റ്റൂട്ട്, ബീൻസ്, മറയൂർ ശർക്കര എന്നിവയും ലഭ്യമാണ്. മറുനാടൻ ഉത്പന്നങ്ങളായ സവാള. തക്കാളി, ചെറിയ ഉള്ളി, മുരിങ്ങക്കായ, മാങ്ങ തുടങ്ങിയല ഹോർട്ടികോർപ്പ് വഴി ലഭ്യമാക്കി. കർഷകരിൽനിന്ന് അധികവില നൽകി സംഭരിക്കുന്ന നാടൻ ഉത്പന്നങ്ങൾ 30 ശതമാനം വിലക്കുറവിലാണ് പഴങ്ങളും പച്ചക്കറിയും വിൽക്കുന്നതെന്ന് ജില്ലാ മാനേജർ എ. സുൾഫിക്കർ പറഞ്ഞു. ജില്ലാ കൃഷി ഓഫീസ്, വിഎഫ്പിസികെ, ഹോർട്ടികോർപ്പ് എന്നിവയുടെ പ്രതിനിധികളടങ്ങിയ കമ്മിറ്റിയാണ് പൊതു വിപണിയിലെ വില അവലോകനം ചെയ്ത് അതതു ദിവസത്തെ വില നിശ്ചയിക്കുന്നത്.

മുട്ടത്ത് ഓണോത്സവം നാളെ മുതൽ

തൊടുപുഴ: മുട്ടം കലാകൈരളി സാംസ്കാരിക വേദിയുടെയും പബ്ലിക് ലൈബ്രറിയുടെയും ആഭിമുഖ്യത്തിൽ നാളെ മുതൽ 14 വരെ ഓണോത്സവം സംഘടിപ്പിക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. വൈകുന്നേരം മൂന്നിന് മുട്ടം ടാക്സി സ്റ്റാൻഡിൽ വടംവലി മത്സരം നടക്കും. മന്ത്രി റോഷി അഗസ്റ്റിൻ ഉദ്ഘാടനം ചെയ്യും. ഏഴുപേർ ഉൾപ്പെടുന്ന ടീമുകൾക്ക് മത്സരിക്കാം. രജിസ്ട്രേഷൻ ഫീസ് 500 രൂപ. ഒന്നാം സ്ഥാനക്കാർക്ക് 5,001 രൂപയും ഏത്തക്കുലയും. 4,001 രൂപയും രണ്ട് കോഴികളുമാണ് രണ്ടാം സമ്മാനം. മൂന്ന് മുതൽ അഞ്ച് വരെ സ്ഥാനക്കാർക്ക് യഥാക്രമം 3,001, 2,001, 1,001 രൂപ വീതം സമ്മാനം കിട്ടും. വ്യാഴാഴ്ച വൈകുന്നേരം നാലിന് മുട്ടം കോടതി ജംഗ്ഷനിൽനിന്ന് ടാക്സി സ്റ്റാൻഡിലേക്ക് സാംസ്കാരിക ഘോഷയാത്ര നടക്കും. തുടർന്ന് നടക്കുന്ന സാംസ്കാരിക സമ്മേളനം ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ ഉദ്ഘാടനം ചെയ്യും. കരാക്കെ ഗാനമേള, കതിർക്കൊയ്ത്ത് നാടൻ കലാ ദൃശ്യവിസ്മയം എന്നിവയും അരങ്ങേറും. മറ്റ് ദിവസങ്ങളിൽ സെമിനാർ ഉൾപ്പെടെയുള്ള പരിപാടികൾ നടക്കും. പത്രസമ്മേളനത്തിൽ സംഘാടകസമിതി ചെയർമാൻ ടി.കെ. മോഹനൻ, കണ്‍വീനർ അഖിൽ സദാശിവൻ, ട്രഷറർ ബെന്നി പ്ലാക്കൂട്ടം, മുട്ടം പബ്ലിക് ലൈബ്രറി സെക്രട്ടറി വിൻസന്‍റ് ഉലഹന്നാൻ എന്നിവർ പങ്കെടുത്തു.

ശുചിത്വ മിഷന്‍ പൂക്കള മത്സരം

തൊടുപുഴ: മാലിന്യമുക്തവുമായി ബന്ധപ്പെട്ട ക്രിയാത്മക ആശയങ്ങൾ പ്രോത്സാഹിപ്പിക്കുന്നതിനായി ശുചിത്വ മിഷൻ ശുചിത്വ പൂക്കള മത്സരം സംഘടിപ്പിക്കുന്നു. മാലിന്യമുക്തം നവകേരളം എന്നതാണ് വിഷയം. മാലിന്യ സംസ്കരണം, തരംതിരിക്കൽ, മാലിന്യങ്ങളുടെ അളവുകുറയ്ക്കൽ, പാഴ്‌വസ്തുക്കളുടെ പുനരുപയോഗം, പുന:ചംക്രമണം, ഹരിതകർമസേനയുടെ പ്രവർത്തനം, ദേശീയ ശുചിത്വ സർവേയിലെ കേരളത്തിന്‍റെ നേട്ടങ്ങൾ എന്നിവയുമായി ബന്ധപ്പെട്ട ആശയങ്ങൾ പൂക്കളത്തിലൂടെ അവതരിപ്പിക്കണം. ജില്ലാതലത്തിലെ ഒന്നാം സ്ഥാനക്കാർക്ക് 10,000 രൂപ വീതം സമ്മാനം നൽകും. സംസ്ഥാനതല വിജയിക്ക് സംസ്ഥാന ശുചിത്വ മിഷൻ 25,000 രൂപ കാഷ് അവാർഡ് സമ്മാനിക്കും. പൂക്കളും ഇലകളും പോലുള്ള പ്രകൃതിദത്ത വസ്തുക്കൾ മാത്രം പൂക്കളം ഇടുന്നതിന് ഉപയോഗിക്കണം. പ്ലാസ്റ്റിക്, രാസവസ്തുക്കൾ, കൃത്രിമ അലങ്കാരങ്ങൾ എന്നിവ ഒഴിവാക്കണം. പൂക്കളത്തിലെ ഓരോ ഭാഗവും വൃത്തിയും വെടിപ്പും അച്ചടക്കവും പ്രതിഫലിക്കണം. മത്സരാർഥികൾ ശുചിത്വ മിഷന്‍റെ ഒൗദ്യോഗിക സോഷ്യൽ മീഡിയ പേജുകൾ ഫോളോ ചെയ്തിരിക്കണം. ഒരു വ്യക്തിക്കോ ഗ്രൂപ്പിനോ ഒരു എൻട്രി മാത്രമേ അയയ്ക്കാൻ സാധിക്കൂ. പൂക്കളത്തിന്‍റെ ഫോട്ടോ ഡോക്യുമെന്‍റായി അയയ്ക്കണം. പൂക്കളം മാലിന്യമുക്ത കേരളം എന്ന ആശയം വ്യക്തമായി പ്രതിനിധീകരിക്കണം. പൂക്കളത്തിന്‍റെ ഫോട്ടോയും, നിർമിച്ചവരുടെ ഫോട്ടോ അവരുടെ തന്നെ സോഷ്യൽ മീഡിയയിൽ അപ്ലോഡ് ചെയ്യണം. ജില്ലാ ശുചിത്വ മിഷന്‍റെ ഫേസ്ബുക്ക്, ഇൻസ്റ്റഗ്രാം പേജുകൾ ടാഗ് ചെയ്യുക. തുടർന്ന് ജില്ലയും പങ്കെടുത്ത വ്യക്തിയുടെ അല്ലെങ്കിൽ ഗ്രൂപ്പിന്‍റെ വിലാസവും രേഖപ്പെടുത്തി ചിത്രങ്ങൾ onampookalam [email protected] എന്ന ഇ-മെയിൽ വിലാസത്തിൽ ഏഴിനകം അയയ്ക്കണം.

സ്വാശ്രയസംഘ ജൂബിലിയും ഓണാഘോഷവും

ചെറുതോണി: കോട്ടയം അതിരൂപതയുടെ സാമൂഹ്യ സേവന വിഭാഗമായ ഗ്രീൻവാലി ഡെവലപ്മെന്‍റ് സൊസൈറ്റിയുടെ നേതൃത്വത്തിൽ സ്വാശ്രയസംഘ ജൂബിലിയും ഓണാഘോഷവും നടന്നു. ജില്ലയിൽ സ്വാശ്രയ സംഘ പ്രവർത്തനങ്ങളിൽ 25 വർഷം പൂർത്തിയാക്കിയ സംഘങ്ങളെ ആദരിക്കുന്നതോടൊപ്പം വിവിധ ഗ്രാമങ്ങളിൽ ഓണാഘോഷങ്ങളും നടന്നു. നാരകക്കാനം സെന്‍റ് ജോസഫ് പാരിഷ് ഹാളിൽ നടന്ന ഓണാഘോഷ പരിപാടികൾ ഗ്രീൻവാലി ഡെവലപ്മെന്‍റ് സൊസൈറ്റി പ്രസിഡന്‍റ് ഫാ. തോമസ് ആനിമൂട്ടിൽ ഉദ്‌ഘാടനം ചെയ്തു. സെക്രട്ടറി ഫാ. സുജിത്ത് കാഞ്ഞിരത്തുംമൂട്ടിൽ അധ്യക്ഷത വഹിച്ചു. മരിയാപുരം പഞ്ചായത്തു വൈസ് പ്രസിഡന്‍റ് ബിൻസി റോബി ജൂബിലി സന്ദേശം നൽകി. പ്രോഗ്രാം ഓഫീസർ സിറിയക് പറമുണ്ടയിൽ, പ്രോഗ്രാം കോ-ഓർഡിനേറ്റർ സിസ്റ്റർ ജിജി വെളിഞ്ചായിൽ, മെറിൻ ഏബ്രഹാം, ജസ്റ്റിൻ നന്ദികുന്നേൽ, ബിജു അഗസ്റ്റിൻ, അനിമേറ്റർ മിനി ജോണി, ബിന്ദു റോണി എന്നിവർ പ്രസംഗിച്ചു. ആഘോഷങ്ങളോടനുബന്ധിച്ച് വിവിധ മത്സരങ്ങൾ, കലാപരിപാടികൾ, ഓണവിരുന്ന് എന്നിവയും സംഘടിപ്പിച്ചു.

ഉപ്പുതറ സെന്‍റ് മേരീസ് ഫൊറോന പള്ളിയിൽ തിരുനാളിനെ കൊടിയേറി

ഉപ്പുതറ: മലനാട്ടിലെ മാതൃദേവാലയമായ ഉപ്പുതറ സെന്‍റ്് മേരീസ് ഫൊറോന പള്ളിയിൽ എട്ടുനോമ്പാചരണത്തിനും മരിയൻ തീർഥാടനത്തിനും കൊടിയേറി. വികാരി ഫാ. ഡൊമിനിക് കാഞ്ഞിരത്തിനാൽ കൊടിയേറ്റി. ആഘോഷകരമായ വിശുദ്ധ കുർബാന, ജപമാല പ്രദക്ഷിണം, വചനപ്രഘോഷണം, നേർച്ചഭക്ഷണം എന്നിവ തിരുനാളിനോടനുബന്ധിച്ച് നടക്കും. അഞ്ചുവരെ ദിവസവും 6.15ന് ജപമാലയും വിശുദ്ധ കുർബാന, വൈകുന്നേരം അഞ്ചിന് വിശുദ്ധ കുർബാന, 6.30ന് ജപമാല പ്രദീക്ഷണം, നേർച്ച ഭക്ഷണം. ആറിന് രാവിലെ 6.15 ജപമാലയും വിശുദ്ധ കുർബാനയും 9.45ന് മരിയൻ റാലിയും നടക്കും. വിശുദ്ധ യുദാസ് തദ്ദേവൂസ് പള്ളിയിൽനിന്ന് ഉപ്പുതറ ഫൊറോന പള്ളിയിലേക്കാണ് മരിയൻ റാലി, വിശുദ്ധ കുർബാന - വികാരി ജനറാൾ ഫാ.ജോസഫ് വെള്ളമറ്റം, 11.30ന് പരിശുദ്ധ കുർബാന, ജപമാല പ്രദക്ഷിണം, നേർച്ച ഭക്ഷണം. എട്ടിന് പരിശുദ്ധ കന്യാമറിയത്തിന്‍റെ ജനനത്തിരുനാൾ, 6.15ന് ജപമാല, 6.30നും അഞ്ചിനും ആഘോഷകരമായ ദിവ്യബലി, 6.30ന് ജപമാല, പ്രദക്ഷിണം, ലദീഞ്ഞ്.

ആര്‍മി റിക്രൂട്ട്‌മെന്‍റ്: ടെന്‍റുകള്‍ ഫീല്‍ഡില്‍നിന്ന് ഒഴിവാക്കി

നെടുങ്കണ്ടം: നെടുങ്കണ്ടം പഞ്ചായത്ത് സിന്തറ്റിക് ട്രാക് സ്റ്റേഡിയത്തില്‍ നടക്കുന്ന ആര്‍മി റിക്രൂട്ട്‌മെന്‍റുമായി ബന്ധപ്പെട്ടു കായികപ്രേമികൾക്ക് ആശങ്ക. റിക്രൂട്ട്‌മെന്‍റിനായി ടെന്‍റുകള്‍ സ്ഥാപിക്കുന്നത് സ്റ്റേഡിയത്തിന്‍റെ നാശത്തിനു കാരണമാകുമെന്നു ചൂണ്ടിക്കാട്ടി നെടുങ്കണ്ടം പഞ്ചായത്ത് അധികൃതരും വിവിധ കായിക സംഘടനകളും ജില്ലാ കളക്ടര്‍ക്കു പരാതി നൽകി. തുടർന്നു കാര്യങ്ങള്‍ വിലയിരുത്താനായി എഡിഎം ഷൈജു പി. ജേക്കബ്, ആര്‍മി ഉദ്യോഗസ്ഥര്‍ തുടങ്ങിയവര്‍ സ്റ്റേഡിയത്തില്‍ സന്ദര്‍ശനം നടത്തി. റിക്രൂട്ട്‌മെന്‍റിനായി ഫീല്‍ഡില്‍ ഇറ്റാലിയന്‍ ടെന്‍റ് നിര്‍മിക്കാനായിരുന്നു തീരുമാനം. എന്നാല്‍, ഇതിനായി ഫീല്‍ഡ് കുഴിക്കുമ്പോള്‍ വൈദ്യുതി, ഡ്രെയിനേജ്, കേബിളുകള്‍ തുടങ്ങിയവ നശിക്കാന്‍ സാധ്യതയുണ്ട്. ഇതു ചൂണ്ടിക്കാട്ടിയാണ് കായിക പ്രേമികള്‍ പരാതി നല്‍കിയത്. ഉദ്യോഗസ്ഥരുടെ സന്ദര്‍ശനത്തിനു ശേഷം ചേര്‍ന്ന അവലോകന യോഗത്തില്‍ ഫീല്‍ഡില്‍ ടെന്‍റുകള്‍ സ്ഥാപിക്കുന്നത് ഒഴിവാക്കി. പകരം ട്രാക്കിനു വെളിയിലും സ്റ്റേഡിയത്തിലെ മറ്റ് സ്ഥലങ്ങളിലുമായി ടെന്‍റുകള്‍ നിര്‍മിക്കാന്‍ തീരുമാനിച്ചു. പ്രതീക്ഷിക്കുന്നത് അയ്യായിരം പേരെ നെടുങ്കണ്ടം: 10 മുതല്‍ 16 വരെ നെടുങ്കണ്ടം പഞ്ചായത്ത് ഹൈ ആള്‍ട്ടിറ്റ്യൂഡ് സ്റ്റേഡിയത്തില്‍ നടക്കുന്ന ആര്‍മി റിക്രൂട്ട്മെന്‍റ് റാലിയിൽ ഏഴു ജില്ലകളിൽനിന്നായി അയ്യായിരത്തോളം പേർ പങ്കെടുക്കുമെന്നാണ് പ്രതീക്ഷ. ഒരുക്കങ്ങള്‍ വിലയിരുത്താനായി എഡിഎമ്മിന്‍റെയും ആര്‍മി ഉദ്യോഗസ്ഥരുടെയും നേതൃത്വത്തില്‍ നെടുങ്കണ്ടത്തു സന്ദര്‍ശനം നടത്തി. തഹസില്‍ദാരുടെ ചേംബറില്‍ നടന്ന അവലോകന യോഗത്തില്‍ പൊതുമരാമത്ത്, വൈദ്യുതി, ആരോഗ്യം, വാട്ടര്‍ അഥോറിറ്റി, പോലീസ്, ഫയര്‍ ഫോഴ്‌സ്, കെഎസ്ആര്‍ടിസി, വിദ്യാഭ്യാസം, പഞ്ചായത്ത് തുടങ്ങി വിവിധ വകുപ്പുകളിലെ ഉദ്യോഗസ്ഥര്‍ പങ്കെടുത്തു. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം എന്നീ ഏഴ് ജില്ലകളിലെ ഉദ്യോഗാര്‍ഥികള്‍ക്കായാണ് റിക്രൂട്ട്മെന്‍റിന്‍റെ റാലി. 120 ആര്‍മി ഉദ്യോഗസ്ഥര്‍ നേതൃത്വം നല്‍കും. റാലിക്കെത്തുന്ന ഉദ്യോഗാര്‍ഥികള്‍ക്കായി കെഎസ്ആര്‍ടിസി അധിക സര്‍വീസുകളും നടത്തും.

കട്ടപ്പനയിൽ സംഗീതോത്സവം

കട്ടപ്പന: കേരള സംഗീത നാടക അക്കാദമി ഇടുക്കി കേന്ദ്ര കലാസമിതിയുടെ നേതൃത്വത്തിൽ റോട്ടറി ക്ലബ് ഓഫ് കട്ടപ്പന അപ്ടൗണിന്‍റെയും വിവിധ കലാസാംസ്കാരിക സംഘടനകളുടെയും സഹകരണത്തോടെ സംഗീതോത്സവം നടന്നു. സാംസ്കാരിക സമ്മേളനം മന്ത്രി റോഷി അഗസ്റ്റിൻ ഉദ്ഘാടനം ചെയ്തു. കലാസമിതി ജില്ലാ പ്രസിഡന്‍റ്് കാഞ്ചിയാർ രാജൻ അധ്യക്ഷത വഹിച്ചു. നഗരസഭാ ചെയർപേഴ്സൺ ബീന ടോമി സമ്മാനദാനം നിർവഹിച്ചു. ആനയടി പ്രസാദ്, കലാശ്രീ കോട്ടയം വീരമണി, കേരള സാഹിത്യ അക്കാദമി അംഗം മോബിൻ മോഹൻ, നോവലിസ്റ്റ് പുഷ്പമ്മ, എസ്. സൂര്യലാൽ, സിജു ചക്കുംമൂട്ടിൽ തുടങ്ങിയവർ പ്രസംഗിച്ചു. സംഗീതജ്ഞൻ ഹരികൃഷ്ണൻ മൂഴിക്കുളവും സംഘവുമാണ് സംഗീതക്കച്ചേരി അവതരിപ്പിച്ചത്.

ഭൂപതിവ് നിയമ ഭേദഗതി അപാകതകൾ പരിഹരിക്കണം: കത്തോലിക്കാ കോൺഗ്രസ്

കരിമ്പൻ: ഭൂപതിവ് നിയമഭേദഗതിയിലെ അപാകതകൾ അടിയന്തരമായി പരിഹരിച്ച് മലയോര ജനതയ്ക്ക് അനുകൂലമാക്കുവാൻ നടപടികൾ സ്വീകരിക്കണമെന്ന് കത്തോലിക്കാ കോൺഗ്രസ് ഇടുക്കി രൂപതാ സമിതി സംസ്ഥാന സർക്കാരിനോട് ആവശ്യപ്പെട്ടു. സർക്കാരിന്‍റെ വിവിധ വകുപ്പുകളുടെ നിയമമനുസരിച്ച് അപേക്ഷ ഫീസും നികുതിയും അടച്ച് അനുമതിയോടുകൂടി നിർമിച്ച കെട്ടിടങ്ങൾ ഇനിയും അപേക്ഷയും പിഴയും നൽകി ക്രമവത്കരിക്കണം എന്നു പറയുന്നത് അവർ കൈയേറ്റക്കാരാണ് എന്ന് സ്വയം സമ്മതിക്കുന്നതിന് തുല്യമാണ്. ഇത് മലയോര ജനതയുടെ ആത്മാഭിമാനത്തെ ചോദ്യം ചെയ്യുന്ന നടപടിയാണ്. തങ്ങളും തങ്ങളുടെ പൂർവികരും കൈയേറ്റം നടത്തിയവരാണെന്നും അതു മാപ്പാക്കി ഞങ്ങളെ സംരക്ഷിക്കണമെന്നും കുടിയേറ്റ ജനതയെക്കൊണ്ട് തത്വത്തിൽ സമ്മതിപ്പിക്കുന്ന ഈ നടപടി ആത്മാഭിമാനമുള്ള ഏതൊരു മലയോര ജനതയ്ക്കും അംഗീകരിക്കാൻ കഴിയാത്തതാണ്. നിലവിലുള്ള നിർമാണങ്ങൾക്ക് ക്രമവത്കരണ അപേക്ഷയും ഫീസും ഈടാക്കുന്നത് വലിയ ഉദ്യോഗസ്ഥരാജിനും അഴിമതിക്കും സാമ്പത്തിക നഷ്ടത്തിനും ഇടവരുത്തും. മലയോര മേഖലയിൽ വരുംനാളുകളിലെ നിർമാണ പ്രവർത്തനങ്ങൾക്ക് എങ്ങനെ അനുമതി ലഭിക്കും എന്നതും സർക്കാർ വ്യക്തമാക്കേണ്ടതാണ്. ജില്ലയിൽ അധിവസിക്കുന്ന ആളുകളെ സംബന്ധിച്ച് അവരുടെ ജീവിതനിലവാരം മെച്ചപ്പെടുത്തുന്നതിനനുസരിച്ച് അനിവാര്യമായ നിർമാണപ്രവർത്തനങ്ങളും നടത്തേണ്ടതുണ്ട്. സംസ്ഥാനത്തെ മറ്റ് പ്രദേശങ്ങളിലുള്ള ആളുകളെപോലെ വികസനവും പുരോഗതിയും നേടിയെടുക്കുവാൻ അവർക്കും അവകാശം ഉണ്ട്. ജില്ലയിലെമ്പാടും നിലനിൽക്കുന്ന നിർമാണ നിരോധനത്തിന് ഇനിയും മാറ്റം ഉണ്ടായിട്ടില്ല. ഇത് ജനങ്ങളുടെ പൗരാവകാശത്തിന് മേലുള്ള കടന്നുകയറ്റമാണ്. ക്രമവത്കരണം സാധ്യമാകണമെങ്കിൽ അതിനനുസരിച്ചുള്ള ഒട്ടേറെ നടപടികൾ ഇനിയും പൂർത്തീകരിക്കേണ്ടതുണ്ട്. ക്രമവത്കരണത്തിനും ഭൂമി തരംമാറ്റുന്നതിനും അധികാരികളെ നിശ്ചയിക്കേണ്ടതും ചട്ടങ്ങൾ ഉണ്ടാക്കേണ്ടതുമാണ്. നിയമഭേദഗതിയും ചട്ടനിർമാണവും മലയോരജനതക്കുമേൽ കൂടുതൽ കുരുക്കൾ സൃഷ്ടിക്കുന്ന അവസ്ഥ ഒഴിവാക്കാൻ സംസ്ഥാന സർക്കാരിന് കഴിയും. ഇക്കാര്യങ്ങളിൽ ആവശ്യമായ നടപടികൾ സർക്കാർ ഭാഗത്തുനിന്ന് ഉണ്ടാവണമെന്ന് കത്തോലിക്കാ കോൺഗ്രസ് ഇടുക്കി രൂപത സമിതി ആവശ്യപ്പെട്ടു. കത്തോലിക്ക കോൺഗ്രസ് രൂപത പ്രസിഡന്‍റ്് ജോർജ് കോയിക്കലിന്‍റെ അധ്യക്ഷതയിൽ ചേർന്ന യോഗത്തിൽ ഡയറക്ടർ ഫാ. ഫ്രാൻസിസ് ഇടവക്കണ്ടം, ജനറൽ സെക്രട്ടറി സിജോ ഇലന്തൂർ, ട്രഷറർ ജോസഫ് ചാണ്ടി തേവർപറമ്പിൽ തുടങ്ങിയവർ പ്രസംഗിച്ചു.

കുടുംബശ്രീ ജില്ലാതല ഓണം വിപണനമേള

തൊടുപുഴ: കുടുംബശ്രീ ജില്ലാതല ഓണം വിപണനമേളയ്ക്ക് ചെറുതോണിയിൽ തുടക്കമായി. ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ ഉദ്ഘാടനം ചെയ്തു. ഇടുക്കി ബ്ലോക്ക് പഞ്ചായത്ത് പ്രസിഡന്‍റ് ഡോളി സുനിൽ അധ്യക്ഷത വഹിച്ചു. സംരംഭക സ്റ്റാളുകളുടെ ഉദ്ഘാടനം വാഴത്തോപ്പ് പഞ്ചായത്ത് പ്രസിഡന്‍റ് ജോർജ് പോൾ നിർവഹിച്ചു. പഞ്ചായത്ത് വൈസ് പ്രസിഡന്‍റ് മിനി ജേക്കബ് ആദ്യവിൽപ്പന നിർവഹിച്ചു. ബ്ലോക്ക് പഞ്ചായത്ത് അംഗം ഡിറ്റാജ് ജോസഫ്, പഞ്ചായത്തംഗങ്ങളായ നിമ്മി ജയൻ, പ്രഭ തങ്കച്ചൻ, ടി.ഇ. നൗഷാദ്, കുടുംബശ്രീ ജില്ലാ മിഷൻ കോ-ഓർഡിനേറ്റർ ജി. ഷിബു എന്നിവർ പ്രസംഗിച്ചു. നാലു വരെയാണ് കുടുംബശ്രീയുടെ നേതൃത്വത്തിൽ ചെറുതോണിയിൽ ഓണം പ്രദർശന വിപണനമേള നടക്കുന്നത്. കുടുംബശ്രീ സംരംഭകരുടെ മായമില്ലാത്ത ഉത്പന്നങ്ങൾ, പച്ചക്കറികൾ, പായസം, ട്രൈബൽ ഉത്പന്നങ്ങൾ, ഫുഡ് സ്റ്റാൾ തുടങ്ങിയവ മേളയിൽ ഒരുക്കിയിട്ടുണ്ട്. കുടുംബശ്രീ കർഷക സംഘങ്ങൾ ഉത്പാദിപ്പിക്കുന്ന കാർഷികോത്പന്നങ്ങളും സൂക്ഷ്മ സംരംഭകർ തയാറാക്കുന്ന ഭക്ഷ്യ, ഭക്ഷ്യേതര ഉത്പന്നങ്ങളും വിപണിയിലുണ്ട്. കാർഷികപദ്ധതി നിറപ്പൊലിമയുടെ ഭാഗമായി വിളവെടുക്കുന്ന പൂക്കളും വിപണിയിലെത്തിക്കുന്നുണ്ട്. ഉപ്പേരി, വിവിധതരം പായസങ്ങൾ,അച്ചാറുകൾ, ശർക്കരവരട്ടി, പച്ചക്കറികൾ, വസ്ത്രങ്ങൾ, കരകൗശല വസ്തുക്കൾ തുടങ്ങി ഓണത്തിനാവശ്യമായ എല്ലാം ഒരു കുടക്കീഴിൽ ലഭ്യമാക്കിയിരിക്കുകയാണ് കുടുംബശ്രീ സംരംഭകർ. ഓണസദ്യയും റെഡി ഇത്തവണ ഓണസദ്യയുടെ വിപണനവും കുടുംബശ്രീയുടെ നേതൃത്വത്തിൽ ജില്ലയിൽ പുരോഗമിക്കുകയാണ്. ബ്ലോക്കുകളിൽ ഒരുക്കിയിരിക്കുന്ന കോൾ സെന്‍റർ മുഖേനയാണ് ഓണസദ്യയുടെ ബുക്കിംഗ്. രണ്ടിനം പായസം ഉൾപ്പെടെ ഇരുപതിലേറെ വിഭവങ്ങളടങ്ങുന്നതാണ് കുടുംബശ്രീ സംരംഭകർ ഒരുക്കുന്ന ഓണസദ്യ. സർക്കാർ, അർധസർക്കാർ, സ്വകാര്യ സ്ഥാപനങ്ങൾ, ബാങ്കുകൾ, സ്കൂളുകൾ, മാധ്യമ സ്ഥാപനങ്ങൾ, റെസിഡന്‍റ്സ് അസോസിയേഷനുകൾ, വീടുകൾ എന്നിവിടങ്ങളിൽ നിന്ന് ഓർഡറുകൾ സ്വീകരിക്കുന്നുണ്ട്.

ഓണസദ്യയാണോ, ഇലയിൽ ഉപ്പേരി വേണം...

തൊടുപുഴ: നല്ല നാടൻ നേന്ത്രക്കായ വറുത്തെടുത്ത ഉപ്പേരിയില്ലാതെ എന്തോണം. കനം കുറച്ച് അരിഞ്ഞ നേന്ത്രക്കായ വെളിച്ചെണ്ണയിൽ വറുത്തു കോരിയെടുക്കുന്ന ഉപ്പേരിയും ശർക്കര വരട്ടിയുമില്ലാത്ത ഓണത്തെക്കുറിച്ച് ചിന്തിക്കാൻ പോലും മലയാളിക്ക് കഴിയില്ല. അതിനാൽ ഓണക്കാലത്ത് ഉപ്പേരിയുടെ വൻ വ്യാപാരമാണ് നടക്കുന്നത്. ഇവിടെ നടക്കുന്ന വിൽപ്പന കൂടാതെ വിദേശ രാജ്യങ്ങളിലെ ഓണാഘോഷങ്ങളിൽ സദ്യയുടെ ഭാഗമാകാൻ ഉപ്പേരി വലിയ തോതിൽ കടൽകടന്നും പോകുന്നുണ്ട്. ഓണവിപണി ഉണർന്നതോടെ ഉപ്പേരി വിൽപ്പന സജീവമായി. ഓണക്കാലം മുൻനിർത്തി പലരും മറ്റ് ഉത്പന്നങ്ങളുടെ നിർമാണം മാറ്റിവച്ചാണ് ഉപ്പേരിയുടെ നിർമാണത്തിലേക്ക് കടന്നിരിക്കുന്നത്. വീടുകളിലും ചെറുകിട സംരംഭമെന്ന നിലയിൽ ഉപ്പേരി നിർമാണം നടക്കുന്നുണ്ട്. വഴിയോരങ്ങളിലും ഉപ്പേരിയുടെ വിൽപ്പന വ്യാപകമായി നടക്കുന്നുണ്ട്. വെള്ളിച്ചെണ്ണ വില ഉയർന്നത് ഉപ്പേരി വിപണിയെ ബാധിച്ചിട്ടുണ്ട്. മഴയും വിൽപ്പനയെ ബാധിച്ചിട്ടുണ്ടെങ്കിലും ഇന്നു മുതൽ കച്ചവടം തകൃതിയാകുമെന്ന പ്രതീക്ഷയിലാണ് വ്യാപാരികൾ. മുൻകാലങ്ങളിൽ വീടുകളിൽതന്നെ ഉപ്പേരിയും ശർക്കരവരട്ടിയും മറ്റും വറുത്തെടുക്കുന്നതായിരുന്നു രീതി. ഇങ്ങനെ വറുത്തെടുത്ത ഉപ്പേരി ഭരണികളിലോ ടിന്നുകളിലോ സൂക്ഷിക്കും. ഓണനാളിൽ ഇതു പുറത്തെടുക്കും. എന്നാൽ ഇപ്പോൾ പായ്ക്കറ്റ് ഉപ്പേരിയുടെ കാലമാണ്. ബേക്കറികളിലും ഹോട്ടലുകളിലും മറ്റെല്ലാ വിൽപ്പനമേഖലകളിലും പായ്ക്കറ്റ് ഉപ്പേരി സ്ഥാനം പിടിച്ചു. വെള്ളിച്ചെണ്ണയിൽ വറുത്ത കായ ഉപ്പേരിക്ക് കിലോയ്ക്ക് 560 രൂപയാണ് വില. കഴിഞ്ഞ വർഷം കിലോയ്ക്ക് 400 രൂപയായിരുന്നു വില. വെളിച്ചെണ്ണ വില കൂടിയതാണ് വില വർധിക്കാൻ കാരണമായി കച്ചവടക്കാർ പറയുന്നത്. കായ വറുത്ത ഉപ്പേരി കൂടാതെ വ്യത്യസ്ത തരത്തിലുള്ള ചിപ്സുകളും ഇപ്പോൾ വിപണിയിൽ ലഭ്യമാണ്. പുതിന ഉപ്പേരി, ടൊമാറ്റോ ഉപ്പേരി, ചീസ് ഉപ്പേരി, റോബസ്റ്റ കൊണ്ടുള്ള ഉപ്പേരി, പഴം ഉപ്പേരി എന്നിവയും ശ്രദ്ധ നേടിയിട്ടുണ്ട്. സദ്യക്ക് വിളന്പുന്ന നാലുപ്പേരിക്കും ഓണം പ്രമാണിച്ച് ഡിമാൻഡ് കൂടിയിട്ടുണ്ട്. അന്യസംസ്ഥാനങ്ങളിൽ നിന്നെത്തുന്ന നേന്ത്രക്കായയാണ് ഇപ്പോൾ പ്രധാനമായും ഉപ്പേരി നിർമാണത്തിനായി ഉപയോഗിക്കുന്നത്. ഇതിനു പുറമേ നാടൻ വാഴക്കുലകളും ഉപയോഗിക്കുന്നുണ്ട്. ഇതിനു വില കൂടുതലാണ്. മൂന്ന് കിലോയോളം കായ വേണം ഒരു കിലോ ഉപ്പേരി തയാറാക്കാനെന്ന് വ്യാപാരികൾ പറയുന്നു. ഹൈറേഞ്ചിലെ വാഴക്കർഷകർ ഉത്പാദിപ്പിക്കുന്ന ഏത്തക്കുലകളും ജില്ലയിൽ പ്രധാനമായും എത്തുന്നുണ്ട്. ഒരു കിലോ എത്തക്കായ്ക്ക് 50-60 എന്ന നിരക്കിലാണ് വില.

ദേശീയ ശുചിത്വ സർവേ: നഗരസഭകൾക്ക് ആദരം

തൊടുപുഴ: സ്വച്ഛ് സർവേക്‌ഷൻ 2024-25 ദേശീയ ശുചിത്വ സർവേ റാങ്കിംഗിൽ മികച്ച മുന്നേറ്റം നടത്തിയ തൊടുപുഴ, കട്ടപ്പന നഗരസഭകളെ ജില്ലാ വികസന സമിതി യോഗത്തിൽ ജില്ലാ കളക്ടർ ഡോ. ദിനേശൻ ചെറുവാട്ട് ആദരിച്ചു. നഗരസഭകൾക്കു ജില്ലാ ശുചിത്വമിഷന്‍റെ പ്രശസ്തി ഫലകവും സർട്ടിഫിക്കറ്റും കളക്ടർ കൈമാറി. രണ്ടു നഗരസഭകളും ദേശീയ തലത്തിൽ അഞ്ഞൂറിൽ താഴെ റാങ്കു നേടി. കട്ടപ്പന നഗരസഭയ്ക്ക് 2023 - 24 ൽ 3425 സ്കോറും ദേശീയ തലത്തിൽ 1721-ാം റാങ്കും ആയിരുന്നു. ഈ വർഷം കട്ടപ്പന 8012 സ്കോർ നേടി ദേശീയതലത്തിൽ 331-ാം റാങ്ക് കരസ്ഥമാക്കി. ഒഡിഎഫ് പ്ലസ് പദവി നിലനിർത്താനും നഗരസഭയ്ക്ക് സാധിച്ചു. ഗാർബേജ് ഫ്രീ സിറ്റി സ്റ്റാർ റേറ്റിംഗ് ദേശീയ റാങ്കിംഗിലും കട്ടപ്പന നഗരസഭയ്ക്ക് തിളക്കമാർന്ന നേട്ടമുണ്ട്. സംസ്ഥാനത്ത് ഗാർബേജ് ഫ്രീ സിറ്റി സ്റ്റാർ റേറ്റിംഗിൽ റാങ്ക് നേടിയ 23 നഗരങ്ങളിൽ ഒന്നായ കട്ടപ്പന നഗരസഭ ഒരു സ്റ്റാർ നേടിയാണ് ഈ നേട്ടം കൈവരിച്ചത്. ചെയർപേഴ്സണ്‍ ബീന ടോമി, ക്ലീൻ സിറ്റി മാനേജർ ജിൻസ് സിറിയക്, ഹെൽത്ത് ഇൻസ്പെക്ടർ കെ.എസ്. അനുപ്രിയ, കെ.ജി. പ്രവീണ എന്നിവർ ആദരവ് ഏറ്റുവാങ്ങി. തൊടുപുഴ നഗരസഭ 2023-24 ൽ 2745 സ്കോർ നേടി ദേശീയ തലത്തിൽ 2912-ാം റാങ്ക് നേടിയിരുന്നു. ഈ വർഷം 7307 സ്കോർ നേടി ദേശീയതലത്തിൽ 342-ാം റാങ്ക് നേടാനായി. കൂടാതെ ഒഡിഎഫ് പ്ലസ് പദവി നിലനിർത്താനും സാധിച്ചു. നഗരസഭ സ്റ്റാൻഡിംഗ് കമ്മിറ്റി ചെയർമാൻ എം.എ. കരിം, ഹെൽത്ത് ഇൻസ്പെക്ടർ ബിജോ മാത്യു, അഖില ശിവൻ എന്നിവർ പ്രശസ്തി ഫലകവും സർട്ടിഫിക്കറ്റും ഏറ്റുവാങ്ങി.

പരിക്കേറ്റ് ചികിത്സയിലിരുന്ന വയോധികൻ മരിച്ചു

ഉപ്പുതറ: കട്ടപ്പന - കുട്ടിക്കാനം മലയോര ഹൈവേയിൽ കാറും ഓട്ടോറിക്ഷയും കൂട്ടിയിടിച്ച് സാരമായി പരിക്കേറ്റയാൾ ചികിത്സയിലിരിക്കെ മരിച്ചു. അയ്യപ്പൻകോവിൽ പരപ്പ് കാരക്കാട്ട് കെ.എസ്. ഭാസ്കരൻ (74) ആണ് മരിച്ചത്. മാട്ടുക്കട്ട ടൗണിനു സമീപം വ്യാഴാഴ്ച ഉച്ചയ്ക്കാണ് അപകടം ഉണ്ടായത്. ഭാസ്കരനും ഭാര്യ ലീലയും അയൽവാസിയായ പുത്തൻപുരയ്ക്കൽ സോബിന്‍റെ ഓട്ടോറിക്ഷയിൽ കട്ടപ്പനയിലെ ആശുപത്രിയിലേക്ക് പോകുന്പോൾ എതിർ ദിശയിൽനിന്ന് വന്ന കാർ ഇവർ സഞ്ചരിച്ചിരുന്ന ഓട്ടോറിക്ഷയിൽ ഇടിക്കുകയായിരുന്നു. ഹൃദയസംബന്ധമായ രോഗമുള്ള ഭാസ്കരനെ കോട്ടയം മെഡിക്കൽ കോളജ് ആശുപത്രിയിലേക്ക് മാറ്റി. എന്നാൽ, രാത്രി പന്ത്രണ്ടോടെ മരിച്ചു. മെഡിക്കൽ കോളജ് ആശുപത്രിയിൽ പോസ്റ്റ്മോർട്ടം നടത്തി. ഉപ്പുതറ പോലീസ് മേൽനടപടി സ്വീകരിച്ചു. മക്കൾ: ശ്രീദേവി, പ്രിയ, പ്രീത, ശരത് ശങ്കർ. മരുമക്കൾ: പി.പി. സന്തോഷ് (കട്ടപ്പന), എ.ഡി. സന്തോഷ് ( കണ്ണൂർ), സജി ഗോപിനാഥൻ, പരേതയായ ടിന്‍റു .സംസ്കാരം ഇന്ന് 11ന് വീട്ടുവളപ്പിൽ.

ദേശീയപാത 85ലെ നിര്‍മാണ പ്രതിസന്ധി ; മന്ത്രിയുടെ ഓഫീസിനു മുമ്പില്‍ ഇന്ന് ഉപവാസം

അടിമാലി: ദേശീയപാത -85ന്‍റെ ഭാഗമായ നേര്യമംഗലം മുതൽ വാളറ വരെയുള്ള ഭാഗത്തെ നിർമാണപ്രതിസന്ധി മറികടക്കാന്‍ സര്‍ക്കാര്‍ ശരിയായ സത്യവാങ്മൂലം നല്‍കണമെന്നാവശ്യപ്പെട്ട് ഇന്ന് മന്ത്രി റോഷി അഗസ്റ്റിന്‍റെ ഇടുക്കിയിലെ ഓഫീസിന് മുന്നില്‍ ദേശീയപാത സംരക്ഷണസമിതിയുടെ നേതൃത്വത്തില്‍ ഉപവാസ സമരം നടത്തും. ഹൈക്കോടതിയില്‍ ദേശീയപാത - 85 സംബന്ധിച്ച കേസെടുത്തപ്പോള്‍ ഈ ഭാഗം വനമല്ലെന്ന് തെളിയിക്കാന്‍ സര്‍ക്കാര്‍ കൈവശമുള്ള രേഖകള്‍ സമര്‍പ്പിക്കാത്തതിനാല്‍ കേസ് മാറ്റിവച്ചിരിക്കുകയാണെന്ന് ദേശീയപാത സംരക്ഷണ സമിതി ആരോപിക്കുന്നു. ദേശീയപാത അധികൃതര്‍ ഹൈക്കോടതിയില്‍ ഹാജരാകുകയും നേര്യമംഗലം മുതല്‍ വാളറ വരെയുള്ള റോഡ് വികസനം നടക്കുന്ന ഭാഗം വനമല്ലെന്നും പൊതുമരാമത്ത് വകുപ്പിന്‍റെ കൈവശമുള്ള റവന്യൂ ഭൂമിയാണെന്നും രേഖകള്‍ സഹിതം സത്യവാങ്മൂലം സമര്‍പ്പിച്ചിരുന്നു. എന്നാല്‍, സര്‍ക്കാരിനുവേണ്ടി ഹാജരായ അഡ്വക്കറ്റ് ജനറല്‍ വനമല്ലെന്ന സര്‍ക്കാര്‍ നിലപാട് വാക്കാല്‍ പറയുകയാണ് ഉണ്ടായത്. ഇത് ഇക്കാര്യത്തിലുള്ള സംസ്ഥാന സര്‍ക്കാരിന്‍റെ ഇരട്ടത്താപ്പാണെന്ന് ദേശീയപാത സംരക്ഷണസമിതി ആരോപിക്കുന്നു. സമരത്തില്‍ സാമൂഹിക, സാംസ്‌കാരിക, രാഷ‌്ട്രീയ രംഗത്തെ ആളുകള്‍ പങ്കെടുക്കുമെന്ന് ദേശീയപാത സംരക്ഷണസമിതി ഭാരവാഹികള്‍ അറിയിച്ചു. രാവിലെ ഒൻപതിനു അടിമാലിയില്‍നിന്നു സമരത്തില്‍ പങ്കെടുക്കാനുള്ള വാഹനങ്ങളും ആളുകളും ചെറുതോണിക്ക് പുറപ്പെടുമെന്നും ദേശീയപാത സംരക്ഷണസമിതി വ്യക്തമാക്കി.

പാലാ രൂപത യൂത്ത് അസംബ്ലിക്ക് പ്രൗഢോജ്വല തുടക്കം

പാലാ: രൂപതയുടെ എപ്പാര്‍ക്കിയല്‍ യൂത്ത് അസംബ്ലിക്ക് പ്രൗഢോജ്വലമായ തുടക്കം. അല്‍ഫോന്‍സിയന്‍ പാസ്റ്ററല്‍ ഇന്‍സ്റ്റിറ്റ്യൂട്ടില്‍ നടത്തപ്പെടുന്ന യൂത്ത് അസംബ്ലിക്ക് എസ്എംവൈഎം രൂപത പ്രസിഡന്‍റ് അന്‍വിന്‍ സോണി ഓടച്ചുവട്ടില്‍ പതാക ഉയര്‍ത്തി. രാഷ്‌ട്രീയചിന്തയും പങ്കാളിത്തവും എന്ന വിഷയത്തില്‍ പാനല്‍ചര്‍ച്ച നടന്നു. രാഷ്‌ട്രീയപ്രവര്‍ത്തകരായ ഡോ. ജിന്‍റോ ജോണ്‍, റോണി മാത്യു, ഷോണ്‍ ജോര്‍ജ് എന്നിവര്‍ മാധ്യമപ്രവര്‍ത്തകന്‍ ടോം കുര്യാക്കോസിനൊപ്പം ചര്‍ച്ചയില്‍ പങ്കെടുത്തു. ഇന്നു നടക്കുന്ന അസംബ്ലിയില്‍ വിവിധ സെഷനുകളിലായി മാര്‍ ജോസഫ് കല്ലറങ്ങാട്ട്, രൂപത മുഖ്യ വികാരി ജനറാള്‍ മോണ്‍. ജോസഫ് തടത്തില്‍ എന്നിവര്‍ യുവജനങ്ങളുമായി സംവദിക്കും. രൂപതയിലെ വിവിധ ഡിപ്പാര്‍ട്ട്‌മെന്‍റ് ഡയറക്ടര്‍മാരും അസംബ്ലിയില്‍ പങ്കെടുക്കും. രൂപത വികാരി ജനറാള്‍ മോണ്‍. സെബാസ്റ്റ്യന്‍ വേത്താനത്ത്, എസ്എംവൈഎം പാലാ രൂപത ഡയറക്ടര്‍ ഫാ. മാണി കൊഴുപ്പന്‍കുറ്റി, പ്രസിഡന്‍റ് അന്‍വിന്‍ സോണി ഓടച്ചുവട്ടില്‍, ജനറല്‍ സെക്രട്ടറി റോബിന്‍ ടി. ജോസ് താന്നിമല, ബില്‍ന സിബി, ജോസഫ് വടക്കേല്‍ തുടങ്ങിയവര്‍ നേതൃത്വം നല്‍കുന്ന അസംബ്ലി നാളെ ഉച്ചകഴിഞ്ഞ് ഒന്നോടെ അവസാനിക്കും.

രാജകുമാരി ദൈവമാതാ പള്ളി

രാജകുമാരി: ഇടുക്കി രൂപതയുടെ മരിയൻ തീർഥാടന കേന്ദ്രമായ രാജകുമാരി ദൈവമാത പള്ളിയിൽ എട്ടുനോമ്പ് തിരുനാളിന് കൊടിയേറി. ഇടുക്കി രൂപത വികാരി ജനറാൾ മോൺ. ഏബ്രാഹം പുറയാറ്റ് കൊടിയേറ്റി. ആഘോഷമായ വിശുദ്ധ കുർബാനയർപ്പിച്ച് സന്ദേശവും നൽകി. ഇന്നുരാവിലെ ആറിന് വിശുദ്ധ കുർബാന, 7.15 ന് നൊവേന, 7.30 ന് ആഘോഷമായ വിശുദ്ധ കുർബാന, സന്ദേശം - ഫാ. ജോമിൻ പഴുക്കുടിയിൽ, 8.45 ന് പ്രദക്ഷിണം ടൗൺ കപ്പേളയിലേക്ക്, 11ന് നൊവേന, ആഘോഷമായ വിശുദ്ധ കുർബാന, സന്ദേ ശം - ഫാ. ജോർജ് തകിടിയേൽ, ഉച്ചകഴിഞ്ഞ് 2.30ന് ജപമാല, മൂന്നിന് നൊവേന,ആഘോഷമായ വിശുദ്ധ കുർബാന, സന്ദേശം - ഫാ.കുര്യൻ കാരിശേരിൽ, അഞ്ചിന് നൊവേന, ആഘോഷമായ പൊന്തിഫിക്കൽ കുർബാന, സന്ദേശം മാർ. ജോൺ നെല്ലിക്കുന്നേൽ, 6.30 ന് ജപമാല പ്രദക്ഷിണം. നാളെ രാവിലെ ആറിന് വിശുദ്ധ കുർബാന, 7.15ന് നൊവേന, ആഘോഷമായ വിശുദ്ധ കുർബാന, സന്ദേശം ഫാ. റോണി വരകുകാലായിൽ, 9.30ന് നൊവേന,ആഘോഷമായ വിശുദ്ധ കുർബാന, സന്ദേശം ഫാ. റിജോ പ്ലാത്തറ, 11ന് നൊവേന, ആഘോഷമായ വിശുദ്ധ കുർബാന, സന്ദേശം ഫാ. സെബാസ്റ്റ്യൻ മച്ചുകാട്ട്,. ഉച്ചകഴിഞ്ഞ് 2.30ന് ജപമാല, മൂന്നിന് നൊവേന, ആഘോഷമായ വിശുദ്ധ കുർബാന, സന്ദേശം ഫാ. ജോമോൻ പള്ളിവാതുക്കൽ, അഞ്ചിന് നൊവേന,ആഘോഷമായ വിശുദ്ധ കുർബാന, സന്ദേശം ഫാ. സിജോ ചുനയമ്മാക്കൽ 6.30ന് ജപമാല പ്രദക്ഷിണം വികാരി മോൺ ജോസ് നരിതൂക്കിൽ, സഹവികാരിമാരായ ഫാ. ജോബി മാതാളികുന്നേൽ, ഫാ. അലക്സ് ചേന്നംകുളം എന്നിവർ തിരുക്കർമങ്ങൾക്ക് നേതൃത്വം നൽകും. മേരിലാൻഡ് സെന്‍റ് മേരീസ് പളളി വെള്ളത്തൂവൽ: മേരിലാൻഡ് സെന്‍റ് മേരീസ് പള്ളിയിൽ എട്ടുനോന്പാചരണവും പരിശുദ്ധ മാതാവിന്‍റെ പിറവിത്തിരുനാളും എട്ടുവരെ ആചരിക്കും. ഇന്ന് വൈകുന്നേരം 4.30ന് കൊടിയേറ്റ്, ലദീഞ്ഞ്, കാഴ്ച സമർപ്പണം, അഞ്ചിന് ആഘോഷമായ വിശുദ്ധ കുർബാന, തിരുനാൾ സന്ദേശം - ഫാ. ആന്‍റണി പനച്ചിക്കൽ. നാളെ വൈകുന്നേരം നാലിന് ജപമാല, അഞ്ചിന് ആഘോഷമായ വിശുദ്ധ കുർബാന, സന്ദേശം - ഫാ. ജോസഫ് വട്ടപ്പാറയിൽ. മൂന്നിന് വൈകുന്നേരം 4.30ന് ജപമാല, ആഘോഷമായ വിശുദ്ധ കുർബാന, സന്ദേശം - ഫാ. ജോണ്‍ കല്ലൂർ. നാലിന് വൈകുന്നേരം അഞ്ചിന് ആഘോഷമായ വിശുദ്ധ കുർബാന, സന്ദേശം - ഫാ. തോമസ് ശൗര്യാംകുഴി. തെക്കുംഭാഗം കുരിശുപള്ളി തെക്കുംഭാഗം: കല്ലാനിക്കൽ സെന്‍റ് ജോർജ് പള്ളിയുടെ തെക്കുംഭാഗം വേളാങ്കണ്ണി മാതാ കുരിശു പള്ളിയിൽ പരിശുദ്ധ കന്യകമറിയത്തിന്‍റെ പിറവിത്തിരുനാളും എട്ടു നോന്പ് ആചരണവും ഇന്ന് ആരംഭിക്കും. ഇന്ന് 4.30ന് ജപമാല, അഞ്ചിന് വിശുദ്ധ കുർബാന, നൊവേന - ഫാ. സോട്ടർ പെരിങ്ങാരപ്പിള്ളിൽ, 5.15ന് മരിയൻ ധ്യാനം- ബേബി ജോണ്‍ കലയന്താനി. നാളെ 4.30ന് ജപമാല, വിശുദ്ധ കുർബാന, നൊവേന- ഫാ. ജോസഫ് കുന്നുംപുറത്ത്. മൂന്നിന് 4.30ന് ജപമാല, വിശുദ്ധ കുർബാന, നൊവേന - ഫാ. ജോണ്‍ വടക്കൻ. നാലിന് 4.30ന് ജപമാല, വിശുദ്ധ കുർബാന, നൊവേന ഫാ.അലക്സ് താണികുന്നേൽ. അഞ്ചിന് 4.30ന് ജപമാല, കുർബാന, നൊവേന - ഫാ. കുര്യാക്കോസ് കൊടകല്ലിൽ. ആറിന് 4.30ന് ജപമാല, വിശുദ്ധ കുർബാന, നൊവേന - ഫാ ജോർജ് പീച്ചാനിക്കുന്നേൽ. ഏഴിന് 4.30ന് ജപമാല, വിശുദ്ധ കുർബാന, നൊവേന - ഫാ. ജോർജുകുട്ടി കൊച്ചുചക്കാലയ്ക്കൽ. എട്ടിന് 4.30ന് നൊവേന, തിരുനാൾ കുർബാന, സന്ദേശം - ഫാ. ആന്‍റണി പുത്തൻകുളം, തുടർന്ന് പ്രദക്ഷിണം. സഹായഗിരി പള്ളിയിൽ മറയൂർ: സഹായഗിരി പള്ളിയിൽ എട്ടുനോന്പാചരണവും പരിശുദ്ധ കന്യകമറിയത്തിന്‍റെ പിറവിത്തിരുനാളും ഇന്നുമുതൽ എട്ടു വരെ നടക്കുമെന്ന് വികാരി ഫാ. ജോയ്സ് അഴിമുഖത്ത് അറിയിച്ചു. ഇന്ന് മുതൽ എല്ലാ ദിവസവും വൈകുന്നേരം 4.15ന് ദിവ്യകാരുണ്യ ആരാധന, ജപമാല, അഞ്ചിന് നൊവേന, വിശുദ്ധ കുർബാന, സന്ദേശം, 6.15ന് ലദീഞ്ഞ്, നേർച്ച എന്നിവ നടക്കും. വിവിധ ദിവസങ്ങളിൽ ഫാ. നിതിൻ കല്ലറയ്ക്കൽ, ഫാ. ജോയ്സ് അഴിമുഖത്ത്, ഫാ. സിബിൾ ഇരുപുളം കാട്ടിൽ, ഫാ. ഫ്രാൻസിസ് പുല്ലാട്ട്, ഫാ. അഗസ്റ്റിൻ കുത്താനാപ്പള്ളിൽ, ഫാ. ഏബ്രഹാം ഇരട്ടചിറയിൽ, ഫാ. സാവിയോ കാട്ടുപാലം, ഫാ. മാത്യു പുഴുക്കുടിയിൽ, ഫാ. തോമസ് വേലിക്കകത്ത്, ഫാ. ടോണി കുഴിപ്പിള്ളിൽ എന്നിവർ നേതൃത്വം നൽകും.

പള്ളികളിൽ എട്ടുനോന്പാചരണത്തിനു കൊടിയേറി

മാങ്കുളത്ത് മാർ ജോൺ നെല്ലിക്കുന്നേൽ അടിമാലി: മാങ്കുളം സെന്‍റ് മേരീസ് ഫൊറോന തീര്‍ഥാടന ദൈവാലയത്തില്‍ പരിശുദ്ധ കന്യകമറിയത്തിന്‍റെ ജനനത്തിരുനാളിന് ഇടുക്കി ബിഷപ് മാര്‍ ജോണ്‍ നെല്ലിക്കുന്നേല്‍ കൊടിയേറ്റി. തുടർന്ന് ആഘോഷമായ പൊന്തിഫിക്കൽ കുർബാന നടന്നു. ഹൈറേഞ്ച് മേഖലയിൽ പരിസ്ഥിതി സംഘടനകൾ പിടിമുറുക്കുകയാണ്. കർഷകരെ മലയോര മേഖലയിൽനിന്നു കുടിയിറക്കുന്നതിനുള്ള ശ്രമമാണ് നടത്തുന്നതെന്നും മാർ ജോൺ നെല്ലിക്കുന്നേൽ പറഞ്ഞു. മാങ്കുളത്തമ്മയുടെ അഭയകേന്ദ്രത്തിലേക്ക് നാലു ദിക്കുകളിൽനിന്നും ആളുകൾ എത്തുന്നുണ്ടെങ്കിൽ അതിനു കാരണം പരിശുദ്ധ അമ്മയുടെ സംരക്ഷണവും മാതൃസ്നേഹവും തുളുമ്പുന്ന കരുതലുമാണ്. അതിനാൽ എല്ലാവരും അമ്മയാകുന്ന അഭയകേന്ദ്രത്തെ മുറുകെപ്പിടിച്ച്, അമ്മയുടെ ജീവിതം നമ്മളിൽ പ്രാവർത്തികമാക്കുമ്പോഴാണ് നമ്മുടെ ജീവിതം ധന്യമാകുന്നതെന്ന് പിതാവ് വചനസന്ദേശത്തിൽ പറഞ്ഞു. ഇന്നുമുതൽ നാലുവരെ മരിയന്‍ ധ്യാനം നടക്കും. എല്ലാ ദിവസവും വൈകുന്നേരം ആഘോഷമായ വിശുദ്ധ കുര്‍ബാനയും ജപമാല പ്രദക്ഷിണവും നേര്‍ച്ചയും ഉണ്ടായിരിക്കും. ഏഴിന് ഉച്ചയ്ക്ക് രണ്ടിന് മരിയന്‍ റാലി. അടിമാലി സെന്‍റ്് ജൂഡ് ഫൊറോന പള്ളിയില്‍നിന്ന് അടിമാലി, കൂമ്പന്‍പാറ, മാങ്കുളം ഫൊറോനകളിലെ യുവജനങ്ങളുടെ നേതൃത്വത്തിലാണ് റാലി. വൈകുന്നേരം ആഘോഷമായ പാട്ടുകുര്‍ബാനയ്ക്ക് ശേഷം തിരി പ്രദക്ഷിണം നടക്കും. ജനനത്തിരുന്നാളിന്‍റെ ഭാഗമായി എട്ടിനു ജപമാല, നൊവേന, വിശുദ്ധ കുര്‍ബാന എന്നിവക്ക് ശേഷം മേരി നാമധാരികളുടെ സംഗമവും സമര്‍പ്പര്‍ണവും നടക്കും. തിരുനാള്‍ പാട്ട് കുര്‍ബാനയ്ക്ക് കോതമംഗലം രൂപത മാതൃവേദി ഡയറക്ടര്‍ ഫാ. ആന്‍റണി പുത്തന്‍കുളം കാര്‍മികത്വം വഹിക്കും. റവ. ഡോ. ബെന്നോ പുതിയാപറമ്പില്‍ വചനസന്ദേശം നല്‍കും. തുടര്‍ന്ന് ജപമാല പ്രദക്ഷിണവും ഊട്ടുനേര്‍ച്ചയും നടക്കും. 15ന് പള്ളിയില്‍ എട്ടാമിടം. വികാരി ഫാ. ജോര്‍ജ് കൊല്ലംപറമ്പില്‍, അസി. വികാരി ഫാ. അമല്‍ ഞാവള്ളിക്കുന്നേല്‍ തുടങ്ങിയവർ നേതൃത്വം നൽകും.

ഓണവിപണിയിൽ ട്രെൻഡ് കസവ് മുണ്ടും സാരിയും

തൊടുപുഴ: ഓണം പടിവാതിലിൽ എത്തി നിൽക്കെ വസ്ത്രവ്യാപാര സ്ഥാപനങ്ങളിൽ തിരക്കേറി. മുതിർന്നവർക്കും കുട്ടികൾക്കും ഓണ സമ്മാനമായി പുത്തൻ വസ്ത്രങ്ങൾ കൈമാറുന്നത് ഓണക്കാലത്താണ്. ഓണക്കോടിയെന്നു കേൾക്കുന്പോൾത്തന്നെ മനസിലെത്തുന്ന കേരളീയ വസ്ത്രങ്ങൾക്കു തന്നെയാണ് ഇത്തവണയും പ്രിയം കൂടുതൽ. കസവു സാരിയും കസവു മുണ്ടുമാണ് ഓണക്കാലത്തെ ട്രെൻഡ്. ഓഫ് വൈറ്റ് നിറവും സ്വർണ കസവുമുള്ള ജോഡി ഉപയോഗിച്ചു നൂതന പരീക്ഷണങ്ങളാണു വസ്ത്രങ്ങളിൽ നടക്കുന്നത്. കേരള സാരിയും സെറ്റും മുണ്ടും വേണ്ടെങ്കിൽ ഓണം മൂഡുള്ള അനാർക്കലി സ്യൂട്ടും ചുരിദാറും വിപണിയിൽ ലഭ്യമാണ്. സെറ്റ് സാരിയിലും പുതുമ ഓണം ഡിസൈൻ ചെയ്ത വസ്ത്രങ്ങൾ വാങ്ങാനാണ് ഈ ദിവസങ്ങളിൽ തിരക്ക്. നേരത്തെ ഓണ്‍ ലൈനിലും മറ്റുമായിരുന്നു ഇത്തരം ഡിസൈൻ വസ്ത്രങ്ങൾ ലഭിച്ചിരുന്നതെങ്കിൽ ഇപ്പോൾ വസ്ത്രശാലകളിൽ ഇതു സുലഭമായി ലഭിക്കും. കോളജ് വിദ്യാർഥിനികൾക്കു കസവു സാരിയും സെറ്റുമാണ് പ്രിയം. നേരത്തെ ദാവണിയായിരുന്നു ഓണക്കാലത്തു പെണ്‍കുട്ടികൾ ഉപയോഗിച്ചിരുന്നതെങ്കിൽ ഇപ്പോൾ ഇതിനോടു താത്പര്യം കുറഞ്ഞു. വിവിധ വർണങ്ങളിലുള്ള നീളൻ പട്ടു പാവാടകളും വിവിധ ഡിസൈനിലുള്ള ബ്ലൗസുമാണ് പെണ്‍കുട്ടികളുടെ ഇഷ്ട ഓണക്കാല വേഷം. ഇപ്പോൾ സെറ്റിലും കേരള സാരിയിലും ഏറെ പുതുമകളുമുണ്ട്. ബോർഡറിൽ മയിൽപ്പീലിയും ശ്രീകൃഷ്ണനും അത്തപ്പൂക്കളവും വരുന്ന സെറ്റു മുണ്ടും സാരിയുമുണ്ട്. പഴയ കാലത്തെ പുളിയിലക്കരയ്ക്കും ആവശ്യക്കാരുണ്ട്. കരയൻ മുണ്ടുകൾ ഷർട്ടുകളാണ് യുവാക്കളെയും വിദ്യാർഥികളെയും ആകർഷിക്കുന്നത്. കടും നിറമുള്ള ഷർട്ടുകളും കരയൻ മുണ്ടുകളുമാണ് ഇവരുടെ ഓണവേഷം. കഥകളിയുടെയും പുലിമുഖത്തിന്‍റെയും കേരളീയ കലകളുടെയും ചിത്രങ്ങൾ പകുതിയായും മുഴുവനായും പ്രിന്‍റു ചെയ്തെടുത്ത ഷർട്ടുകൾക്ക് ആവശ്യക്കാരേറെ. ഒരു വർഷത്തെ ഏറ്റവും വലിയ വ്യാപാര സീസണായ ഓണത്തിന് ദിവസങ്ങൾ മാത്രമുള്ളപ്പോൾ മഴ തുടർച്ചയായി പെയ്യുന്നത് വ്യാപാരികളെ തെല്ല് ആശങ്കപ്പെടുത്തിയിട്ടുണ്ടെങ്കിലും കച്ചവടം മുന്നോട്ടുപോകുമെന്നു തന്നെയാണ് പ്രതീക്ഷ. കഴിഞ്ഞ വാരം കലാലയങ്ങളിലെ ഓണാഘോഷങ്ങളോടനുബന്ധിച്ച് കച്ചവടം മെച്ചപ്പെട്ടിരുന്നു. അടുത്ത ദിവസങ്ങളിൽ ബാങ്കുകളിലും മറ്റു സ്ഥാപനങ്ങളിലും ഓണാഘോഷം നടക്കുന്നതിനാൽ വ്യാപാരം കൂടുതൽ മെച്ചപ്പെടുമെന്ന പ്രതീക്ഷയിലാണ് വ്യാപാരികൾ.

ഓണത്തിന് പൂപ്പാടങ്ങളൊരുങ്ങി

പനംകുട്ടി പള്ളിയങ്കണത്തിൽ ചെണ്ടുമല്ലി ചെറുതോണി: പനംകുട്ടി പള്ളിയിൽ ചെണ്ടുമല്ലി വസന്തകാലം. ഓണത്തെ വരവേൽക്കാൻ നൂറുകണക്കിന് ചെണ്ടുമല്ലികളാണ് വിരിഞ്ഞിരിക്കുന്നത്. കൊന്നത്തടി പഞ്ചായത്തിലെ പനംകൂട്ടി സെന്‍റ് ജോസഫ് പള്ളിയങ്കണത്തിൽ ജൂൺ അഞ്ചിലെ പരിസ്ഥിതിദിനത്തിൽ പള്ളിക്ക് ചുറ്റുമായി ഇടവക വികാരി ഫാ. ജോസഫ് പൗവത്തിലിന്‍റെ നേതൃത്വത്തിൽ 250 ചെടിച്ചട്ടികളിൽ നട്ടുപിടിപ്പിച്ച ചെണ്ടുമല്ലികളാണ് ഓണത്തെ വരവേൽക്കാൻ മൊട്ടിട്ടത്. ചെടികൾ നടാനും പരിപാലിക്കാനും ഇടവകയിലെ കെസിവൈഎം, മിഷൻ ലീഗ്, മാതൃവേദി, തിരുബാലസഖ്യം പ്രവർത്തകർ അണിചേർന്നു. ഓണക്കാലമായതോടെ പൂക്കളമൊരുക്കാൻ നിരവധിപ്പേരാണ് പള്ളിയിലെ ചെണ്ടുമല്ലി തേടിയെത്തുന്നത്. എട്ടുനോമ്പ് തിരുനാളിൽ പള്ളികളിൽ അലങ്കരിക്കാനും ചെണ്ടുമല്ലിപൂവുകൾ നേരത്തേ ബുക്കുചെയ്യുന്നവരുണ്ട്. പൂക്കൾ വാങ്ങാൻ മാത്രമല്ല, ഈ മനോഹരകാഴ്ച മൊബൈൽ ഫോണിൽ പകർത്താനും പൂക്കളുടെ നടുവിൽ നിന്നു ഫോട്ടോയെടുക്കാനും എത്തുന്നവരും കുറവല്ല. മഞ്ഞ, ഓറഞ്ച് നിറത്തിലുള്ള പൂക്കളാണ് പള്ളിയങ്കണത്തിൽ വിരിഞ്ഞുനിൽക്കുന്നത്. ഇടുക്കി - അടിമാലി റൂട്ടിൽ പനംകുട്ടിയിൽനിന്നും ചപ്പാത്തു വഴി അര കിലോമീറ്റർ സഞ്ചരിച്ചാൽ പള്ളിയിലെത്താം. കമ്പിളികണ്ടം, മങ്കുവ, പാറത്തോട്, പണിക്കൻകുടി, മുനിയറ, മുരിക്കാശേരി, ഇടുക്കി, അടിമാലി തുടങ്ങിയ പ്രദേശങ്ങളിൽനിന്നെല്ലാം ഇവിടെ ആളുകളെത്തുന്നുണ്ട്. ഹൈറേഞ്ചിൽ അപൂർവം സ്ഥലങ്ങളിൽ മാത്രമെ ചെണ്ടുമല്ലി കൃഷിയുള്ളൂ. തമിഴ്നാട്ടിൽ നിന്ന് കിലോയ്ക്ക് 300 രൂപ വിലയ്ക്കാണ് പൂവ് ലഭിക്കുന്നത്. ഇവിടെ പൂവ് വാങ്ങാനെത്തുന്നവരിൽനിന്ന് ചെറിയ വിലയും ഈടാക്കാറുണ്ട്. ഉടുന്പന്നൂരിൽ മഴയെയും അതിജീവിച്ച് ഉടുന്പന്നൂർ: ഓണത്തെ വരവേൽക്കാൻ ഉടുന്പന്നൂരിലെ പൂപ്പാടങ്ങൾ ഒരുങ്ങി. പ്രതികൂല കാലാവസ്ഥയെത്തുടർന്ന് കഴിഞ്ഞ വർഷത്തെ അപേക്ഷിച്ച് വിളവ് കുറഞ്ഞെങ്കിലും കനത്ത മഴയെ അതിജീവിച്ച ചെണ്ടുമല്ലിത്തൈകളെ പരിപാലിച്ച് പൂ വിരിയിക്കുകയാണ് ഉടുന്പന്നൂരിലെ കർഷകർ. 14,000 തൈകൾ നട്ടാണ് കഴിഞ്ഞ വർഷം മികച്ച വിളവെടുത്തത്.

ഇത്തവണ 20,000 തൈകളാണ് നട്ടി പിടിപ്പിച്ചത്. അഞ്ചു രൂപയുടെ തൈകൾ പഞ്ചായത്തിന്‍റെ സബ്സിഡിയോടെ കർഷകർക്ക് 1.25 രൂപയ്ക്ക് നൽകി. ഹെക്ടർ ഒന്നിന് 16,000 രൂപ നിരക്കിൽ കൂലിചെലവിന് സബ്സിഡിയും നൽകി. വിവിധ കൃഷിക്കൂട്ടങ്ങളുടെയും കുടുംബശ്രീ ഗ്രൂപ്പുകളുടെയും നേതൃത്വത്തിൽ 19 ഇടങ്ങളിൽ കൃഷിയിറക്കി. ആയിരം കിലോയോളം പൂക്കൾ കഴിഞ്ഞ തവണ വിൽപ്പന നടത്താൻ കഴിഞ്ഞിരുന്നു. പക്ഷേ കാലം തെറ്റി പെയ്ത കനത്ത മഴയും മഴ മാറിയപ്പോൾ വന്ന കഠിനമായ വെയിലും ഇത്തവണ വില്ലനായി. വിളവ് പകുതിയോളം കുറഞ്ഞെങ്കിലും പഞ്ചായത്തിന്‍റെയും കൃഷിഭവന്‍റെയും പിൻതുണയോടെ ശേഷിച്ച പൂപ്പാടങ്ങൾ വിളവെടുത്തു. ഒരു കിലോയ്ക്ക് 200 രൂപയ്ക്കാണ് വിൽപ്പന. വിളവെടുപ്പ് പഞ്ചായത്ത് പ്രസിഡന്‍റ് എം. ലതീഷ് ഉദ്ഘാടനം ചെയ്തു. സ്റ്റാൻഡിംഗ് കമ്മിറ്റി ചെയർപേഴ്സണ്‍ ബീന രവീന്ദ്രൻ, മെംബർ ജിൻസി സാജൻ, സെക്രട്ടറി ജെ.എസ് ഷമീന തുടങ്ങിയവർ പ്രസംഗിച്ചു.

വർണം വിരിയിച്ച് തൊടുപുഴയിൽ ഓണോത്സവ് നാളെ മുതൽ

തൊടുപുഴ: മർച്ചന്‍റ്സ് അസോസിയേഷൻ, നഗരസഭ, ജില്ലാ ടൂറിസം പ്രമോഷൻ കൗണ്‍സിൽ എന്നിവർ സംയുക്തമായി വിപുലമായ രീതിയിൽ ഓണാഘോഷം സംഘടിപ്പിക്കുമെന്ന് അധികൃതർ പത്രസമ്മേളനത്തിൽ അറിയിച്ചു. നാളെ വൈകുന്നേരം അഞ്ചിന് വിളംബരജാഥയോടെ ആരംഭിക്കും. മർച്ചന്‍റ്സ് യൂത്ത് വിംഗിന്‍റെ ആഭിമുഖ്യത്തിൽ നൂറിൽപരം ഇരുചക്രവാഹനങ്ങൾ വിളംബരജാഥയിൽ അണിനിരക്കും. മൂന്നിന് കുട്ടികൾക്കുള്ള ചിത്രരചനാ മൽസരം മർച്ചന്‍റ്സ് ട്രസ്റ്റ്ഹാൾ ഓഡിറ്റോറിയത്തിൽ രാവിലെ 9.30മുതൽ നടക്കും. എൽപി, യുപി, എച്ച്എസ് തിരിച്ചാണ് മൽസരം. ഇതോടൊപ്പം ചെസ് മൽസരവും നടക്കും. മൂന്നിന് വ്യാപാരസ്ഥാപനങ്ങൾ, ബാങ്കുകൾ, പൊതുമേഖലാ സ്ഥാപനങ്ങൾ എന്നിവരെ പങ്കെടുപ്പിച്ച് ഓണപ്പൂക്കള മൽസരം നടത്തും. ഒന്പതിന് ഉച്ചകഴിഞ്ഞ് മൂന്നിന് പ്രൈവറ്റ് ബസ് സ്റ്റാന്‍റ് പരിസരത്തുനിന്നും ആരംഭിക്കുന്ന സാംസ്കാരിക ഘോഷയാത്ര മങ്ങാട്ടുകവലയിൽ സമാപിക്കും. വാദ്യമേളങ്ങളും നിശ്ചല ദൃശ്യങ്ങളും ഘോഷയാത്രയ്ക്ക് കൊഴുപ്പേകും. റസിഡന്‍റ്സ് അസോസിയേഷൻ, കുടുംബശ്രീ, നഗരസഭ സിഡിഎസ്, മർച്ചന്‍റ്സ് യൂത്ത് വിംഗ്, മർച്ചന്‍റ്സ് വനിതാവിംഗ് തുടങ്ങിയവർ അണിചേരും. ഘോഷയാത്രയെ തുടർന്നു ഒൗസേപ്പ് ജോണ്‍ പുളിമൂട്ടിൽ മെമ്മോറിയൽ എവറോളിംഗ് ട്രോഫിക്കായുള്ള അഖില കേരള വടംവലി മൽസരം നടക്കും. പത്തിന് ജില്ലയിലെ ഓണംടൂറിസം വാരാഘോഷത്തിന്‍റെ സമാപനം നടക്കും. മന്ത്രി റോഷി അഗസ്റ്റിൻ, ഡീൻ കുര്യാക്കോസ് എംപി, എംഎൽഎമാരായ പി.ജെ. ജോസഫ്, എം.എം. മണി, എ. രാജ, ജില്ലാ കളക്ടർ ഡോ. ദിനേശൻ ചെറുവാട്ട്, നഗരസഭ ചെയർമാൻ കെ. ദീപക്, കെവിവിഇഎസ് ജില്ലാ പ്രസിഡന്‍റ് സണ്ണി പൈന്പിള്ളിൽ, മർച്ചന്‍റ്സ് അസോസിയേഷൻ പ്രസിഡന്‍റ് രാജു തരണിയിൽ, ഡിടിപിസി സെക്രട്ടറി ജിതേഷ് ജോസ തുടങ്ങിയവർ പ്രസംഗിക്കും. വൈകുന്നേരം ആറിന് ആലപ്പുഴ ബ്ലൂഡയമണ്ട്സിന്‍റെ ഗാനമേളയോടെ ഓണാഘോഷം സമാപിക്കും. വാരാഘോഷത്തിന്‍റെ ഭാഗമായി വ്യാപാരസ്ഥാപനങ്ങൾ ദീപാലംകൃതമാക്കും. പത്രസമ്മേളനത്തിൽ നഗരസഭ ചെയർമാൻ കെ. ദീപക്ക്, മർച്ചന്‍റ്സ് അസോസിയേഷൻ പ്രസിഡന്‍റ് രാജു തരണിയിൽ, ജനറൽ സെക്രട്ടറി സി.കെ.നവാസ്, നഗരസഭ കൗണ്‍സിലർ പി.ജി. രാജശേഖരൻ, ട്രഷറർ അനിൽ പീടികപറന്പിൽ, വർക്കിംഗ് പ്രസിഡന്‍റ് സാലി എസ്.മുഹമ്മദ്, വൈസ് പ്രസിഡന്‍റുമാരായ ഷെരീഫ് സർഗം, കെ.പി.ശിവദാസ് തുടങ്ങിയവർ പങ്കെടുത്തു. പഴയവിടുതിയിൽ മാവേലി എഴുന്നള്ളത്ത് രാജാക്കാട്: പഴയകാല ഓണാഘോഷങ്ങൾ പുതിയ തലമുറയിൽ എത്തിക്കുക എന്ന ലക്ഷ്യത്തോടെ പഴയവിടുതി ഗ്രാമീണ ഗ്രന്ഥശാലയുടെ നേതൃത്വത്തിൽ നടത്തുന്ന ഓണാഘോഷ പരിപാടികളുടെ ഭാഗമായി സെപ്റ്റംബർ രണ്ടിനും മൂന്നിനും മാവേലി എഴുന്നുള്ളത്തും വീട്ടുമുറ്റത്തെ പൂക്കള സന്ദർശനവും വിവിധ മത്സരങ്ങളും കലാപരിപാടികളും നടത്തും. രണ്ടിന് രാവിലെ 10 ന് രാജാക്കാട് ബസ് സ്റ്റാൻഡിൽ നിന്നാരംഭിക്കുന്ന മാവേലി എഴുന്നള്ളത്ത് പഞ്ചായത്ത് പ്രസിഡന്‍റ് നിഷ രതീഷ് ഉദ്ഘാടനം ചെയ്യും. മാവേലിയുടെ കിരീടധാരണം മർച്ചന്‍റ് അസോസിയേഷൻ പ്രസിഡന്‍റ് വി.എസ്. ബിജു നിർവഹിക്കും. ലൈബ്രറി കൗൺസിൽ താലൂക്ക് സെക്രട്ടറി ജോസ് കൊച്ചറ ഫ്ലാഗ് ഓഫ് ചെയ്യും. രാജാക്കാട് മതസൗഹാർദ കൂട്ടായ്മ കൺവീനർ ഫാ. മാത്യു കരോട്ട് കൊച്ചറയ്ക്കൽ ആശീർവാദം നടത്തും. മാവേലി എഴുന്നള്ളത്ത് ഘോഷയാത്ര രാജാക്കാട് ടൗൺ ചുറ്റി പഴയവിടുതിയുടെ വിവിധ മേഖലകളിലുള്ള വീട്ടുമുറ്റത്തെ പൂക്കളം സന്ദർശിച്ച് ഗ്രന്ഥശാലാ അങ്കണത്തിൽ സമാപിക്കും. വൈകുന്നേരം ആറിന് തിരുവോണ സന്ദേശസമ്മേളനവും പ്രാദേശിക കലാകാരന്മാരുടെ ജനകീയ ഗാനമേളയും നടക്കും. സമ്മേളനം ഡീൻ കുര്യാക്കോസ് എംപി ഉദ്ഘാടനം ചെയ്യും. എം.എം. മണി എംഎൽഎ തിരുവോണസന്ദേശം നൽകും. ചെയർമാൻ കെ. ജീവൻകുമാർ അധ്യക്ഷത വഹിക്കും. കൺവീനർ മിനി ബേബി, ജനപ്രതിനിധികളായ ഉഷ മോഹൻകുമാർ, കെ.ടി. കുഞ്ഞ്, കിങ്ങിണി രാജേന്ദ്രൻ, വിൻസു തോമസ്, പ്രിൻസ് തോമസ്, സജിമോൻ കോട്ടയ്ക്കൽ, ജെ. പ്രദീപ്, പ്രിൻസ് മാത്യു, ഒ.ഡി. മനോജ് എന്നിവർ പ്രസംഗിക്കും. മൂന്നിന് രാവിലെ 10 മുതൽ വായനശാലാ അങ്കണത്തിൽ കുട്ടികളുടെ വിവിധ കലാപരിപാടികളും ഉച്ചകഴിഞ്ഞ് മൂന്നു മുതൽ വനിതകളുടെ വടംവലി മത്സരവും നടക്കും. രാജാക്കാട് മതസൗഹാർദ കൂട്ടായ്മാ ചെയർമാൻ എം.ബി. ശ്രീകുമാർ സമ്മാനദാനം നിർവഹിക്കും.തുടർന്ന് മൂന്നുപറ നെല്ലും നിലവിളക്കും ജനകീയ ലേലവും, പായസ സദ്യയും നടക്കും.

ഇടമലക്കുടിക്കു പ്രത്യേക പരിഗണന നൽകും

ഇടുക്കി: സംസ്ഥാനത്തെ ഏകഗോത്ര വർഗ പഞ്ചായത്തായ ഇടമലക്കുടിയിൽ പദ്ധതി നടപ്പാക്കുന്നതിൽ വകുപ്പുകൾ പ്രത്യേക പരിഗണന നൽകണമെന്നു ജില്ലാ കളക്ടർ ഡോ. ദിനേശൻ ചെറുവാട്ട്. ജില്ലാ വികസനസമിതി യോഗത്തിൽ അധ്യക്ഷത വഹിക്കുകയായിരുന്നു അദ്ദേഹം. ഇടമലക്കുടിയിലേക്കുള്ള കോണ്‍ക്രീറ്റ് റോഡിന്‍റെ അവശേഷിക്കുന്ന ഭാഗം അടിയന്തര പ്രാധാന്യം നൽകി പൂർത്തിയാക്കാൻ പൊതുമരാമത്ത് റോഡ് വിഭാഗത്തിനു നിർദേശം നൽകി. ഇടമലക്കുടിയിൽ തയ്യൽ പരിശീലന പദ്ധതി നടപ്പാക്കാനുള്ള പദ്ധതി പുരോഗമിക്കുകയാണെന്നു ജില്ലാ വ്യവസായ കേന്ദ്രം ജനറൽ മാനേജർ സമിതിയെ അറിയിച്ചു. വർക്ക്ഷോപ്പ് സാങ്കേതിക പരിശീലനം ഉൾപ്പെടെ നൽകാനുള്ള സാധ്യതകളും പരിശോധിക്കും. ഇടമലക്കുടിയിൽ കുടുംബശ്രീയുടെ പ്രവർത്തനം കാര്യക്ഷമമാക്കാനും കളക്ടർ നിർദേശിച്ചു. വൈദ്യുതി കേബിളിന്‍റെ ഇലക്‌ട്രിക്കൽ തകരാർ മഴ മാറിയാൽ ഉടൻ പരിഹരിക്കുമെന്നും മഴ തുടരുന്ന സാഹചര്യത്തിൽ കേബിൾ ജോയിന്‍റ് ചെയ്യുന്നത് സാങ്കേതിക തകരാറുകൾക്കു കാരണമാകുമെന്നും കെഎസ്ഇബി യോഗത്തിൽ അറിയിച്ചു. അപകടമരങ്ങൾ മുറിക്കും വട്ടവടയിൽനിന്നു മൂന്നാറിൽ എത്തുന്ന ചിലന്തിയാർ സ്വാമിയാറളക്കുടി റോഡ് നിർമാണത്തിന് പിഎംജിഎസ് വൈ പദ്ധതിയിൽ ഉൾപ്പെടുത്തി നടപടി പുരോഗമിക്കുകയാണെന്ന് എക്സിക്യൂട്ടീവ് എൻജനിയർ സമിതിയെ അറിയിച്ചു. ദേശീയപാത 85ൽ വാളറ നേര്യമംഗലം സ്ട്രക്ചറിൽ 259 മരങ്ങൾ മുറിക്കാൻ അനുമതി നൽകിയിട്ടുണ്ടെന്നും യൂസർ ഏജൻസി ഇതു മുറിച്ചു നീക്കിയതായും അപകട ഭീഷണിയായി നിന്നിരുന്ന 682 മരങ്ങളിൽ 303 മരങ്ങൾ മുറിച്ചു നീക്കിയതായും മൂന്നാർ ഡിഎഫ്ഒ അറിയിച്ചു. നഗരസഭകൾക്ക് അനുമോദനം സ്വച്ഛ് സർവേഷൻ പദ്ധതിയിൽ ദേശീയ തലത്തിൽ മികച്ച ശുചിത്വ നഗരസഭകളിൽ ഉൾപ്പെട്ട കട്ടപ്പന, തൊടുപുഴ നഗരസഭകളെ ജില്ലാ വികസനസമിതിയിൽ അനുമോദിച്ചു. പുരസ്കാരങ്ങളും കൈമാറി. അന്തരിച്ച പീരുമേട് എംഎൽഎ വാഴൂർ സോമന് യോഗത്തിൽ അനുശോചനം രേഖപ്പെടുത്തി. എഡിഎം ഷൈജു പി.ജേക്കബ്, ജില്ലാ പ്ലാനിംഗ് ഓഫീസർ ദീപാ ചന്ദ്രൻ എന്നിവർ പ്രസംഗിച്ചു.

ആനച്ചാൽ കൊലപാതകം: പ്രതിക്ക് ജീവപര്യന്തം

മുട്ടം: ആനച്ചാൽ ഈട്ടിസിറ്റി വലിയപറന്പിൽ മുഹമ്മദ് കനിയെ കുത്തിക്കൊലപ്പെടുത്തിയ കേസിൽ ആനച്ചാൽ കുറ്റിവേലിൽ സുനിലിന് ജീവപര്യന്തം തടവ് വിധിച്ചു. തൊടുപുഴ അഡീഷണൽ ജില്ലാ ജഡ്ജി ലൈജമോൾ ഷെരീഫാണ് ശിക്ഷിച്ചത്. 2012 ഏപ്രിൽ എട്ടിനാണ് കേസിനാസ്പദമായ സംഭവം. സുനിലുമായി പിണങ്ങിക്കഴിഞ്ഞിരുന്ന ഭാര്യ ഗീതയ്ക്ക് മുഹമ്മദ് കനിയുമായി അടുപ്പമുണ്ടായിരുന്നു. ഇതിൽ പ്രകോപിതനായ സുനിൽ സംഭവദിവസം രാത്രി 7.30 ഓടെ ഗീതയുടെ വീട്ടിലെത്തിയ മുഹമ്മദ് കനിയെ പിടികൂടി കുത്തിക്കൊലപ്പെടുത്തുകയായിരുന്നു. സുനിൽ കനിയെ പിടിച്ചു കൊണ്ടു പോകുന്നതു കണ്ടെന്ന ഗീതയുടെയും മകളുടെയും മൊഴികളും, സുനിൽ കൃത്യത്തിന് ഉപയോഗിച്ച കത്തി മകൾ തിരിച്ചറിഞ്ഞതുമാണ് കേസിൽ നിർണായകമായത്. സംഭവമറിഞ്ഞ് സ്ഥലത്തെത്തിയ പഞ്ചായത്ത് മെംബർ അടക്കമുള്ള സമീപവാസികൾ കൂറുമാറിയതും അന്വേഷണ ഉദ്യോഗസ്ഥരായിരുന്ന ആർ. പ്രദീപ്, എ.ഇ. കുര്യൻ എന്നിവരുടെ മരണവും പ്രോസിക്യൂഷന് തലവേദന സൃഷ്ടിച്ചിരുന്നു. അടിമാലി സിഐ ആയിരുന്ന കെ. ജിനദേവനാണ് കേസിൽ അന്വേഷണം പൂർത്തിയാക്കി കുറ്റപത്രം സമർപ്പിച്ചത്. പ്രോസിക്യൂഷനുവേണ്ടി അഡീഷണൽ പ്രോസിക്യൂട്ടർ വി.എസ്. അഭിലാഷ് ഹാജരായി.

മകന്‍റെ മർദനത്തെത്തുടർന്ന് പരിക്കേറ്റ് ചികിത്സയിലിരുന്ന പിതാവ് മരിച്ചു

രാജാക്കാട്: മകന്‍റെ മർദനത്തിൽ ഗുരുതരമായി പരിക്കേറ്റ് മധുര മെഡിക്കൽ കോളജിൽ ചികിത്സയിലായിരുന്ന പിതാവ് മരിച്ചു. രാജകുമാരി പഞ്ചായത്ത് മുൻ വൈസ് പ്രസിഡന്‍റും സിപിഎം നേതാവുമായിരുന്ന രാജകുമാരി ഖജനാപ്പാറ സ്വദേശി എസ്.ആണ്ടവർ(84) ആണ് മരിച്ചത്. സംഭവത്തോടനുബന്ധിച്ച് രാജാക്കാട് പോലീസ് അറസ്റ്റ് ചെയ്ത ആണ്ടവരുടെ മകൻ മണികണ്ഠനെ(43) കോടതിയിൽ ഹാജരാക്കി റിമാൻഡ് ചെയ്തിരുന്നു. കഴിഞ്ഞ 24നു രാത്രി പതിനൊന്നരയോടെയാണ് മകൻ സ്വത്തുത്തുർക്കത്തെ തുടർന്ന് പിതാവിനെ ക്രൂരമായി മർദിച്ചത്. ഈ സമയം വീട്ടിൽ മറ്റാരുമുണ്ടായിരുന്നില്ല.ബഹളം കേട്ടെത്തിയ നാട്ടുകാരും ബന്ധുക്കളും ചേർന്ന് ആണ്ടവരെ തേനി മെഡിക്കൽ കോളജിലെത്തിക്കുകയായിരുന്നു.പരിക്ക് ഗുരുതരമായതിനാൽ മധുര മെഡിക്കൽ കോളജിലേക്ക് മാറ്റി. രാജാക്കാട് പോലീസ് ആശുപത്രിയിലെത്തി മേൽ നടപടികൾ സ്വീകരിച്ചു. പോസ്റ്റ് മോർട്ടത്തിനു ശേഷം മൃതദേഹം ബന്ധുക്കൾക്ക് വിട്ട് നൽകി. സംസ്കാരം നടത്തി. ഭാര്യ: പരേതയായ മുത്തുലക്ഷ്മി. മറ്റ് മക്കൾ: ജ്യോതിമണി, ധനലക്ഷ്മി. മരുമക്കൾ: ഗോവിന്ദരാജ്, ഗണേശൻ, പ്രീതിമ കാർത്ത്യായനി.

ആലക്കോട് ഗവ. ആയുർവേദ ഡിസ്പെൻസറിക്ക് പുരസ്കാരം

തൊടുപുഴ: ആരോഗ്യരംഗത്ത് മികച്ച പ്രവർത്തനം കാഴ്ചവയ്ക്കുന്ന സർക്കാർ ആയുഷ് സ്ഥാപനങ്ങൾക്ക് സംസ്ഥാന സർക്കാർ നൽകുന്ന പ്രഥമ കായകൽപ അവാർഡ് ആലക്കോട് ഗവ.ആയുർവേദ ഡിസ്പെൻസറിക്കു ലഭിച്ചു.തിരുവനന്തപുരം ജിമ്മി ജോർജ് സ്റ്റേഡിയത്തിൽ നടന്ന അവാർഡ് ദാന ചടങ്ങിൽ മന്ത്രി വീണ ജോർജിൽ നിന്നുആലക്കോട് പഞ്ചായത്ത് പ്രസിഡന്‍റ് ജാൻസി മാത്യു, വൈസ് പ്രസിഡന്‍റ് ബൈജു ജോർജ്, ഗവ. ആയുർവേദ ഡിസ്പെൻസറി മെഡിക്കൽ ഓഫീസർ ഡോ.എം.അനിത ബേബി എന്നിവർ ചേർന്ന് പുരസ്കാരം ഏറ്റുവാങ്ങി. ഭാരതീയ ചികിത്സാ വകുപ്പ് ജില്ല മെഡിക്കൽ ഓഫീസർ ഡോ.ജെറോം വി. കുര്യൻ, കായകല്പ ജില്ലാ ക്വാളിറ്റി നോഡൽ ഓഫീസർ ഡോ. വിജിത ആർ. കുറുപ്പ് എന്നിവർ പ്രസംഗിച്ചു.ആശുപത്രികളിലെ മാലിന്യ പരിപാലനം, ശുചിത്വം, അണുബാധ നിയന്ത്രണം, രോഗീപരിചരണം, മറ്റ് സേവന പശ്ചാത്തല സൗകര്യങ്ങൾ തുടങ്ങിയ മേഖലകളിലെ മികവ് പരിഗണിച്ചാണ് സംസ്ഥാന തല കായകൽപ കമ്മിറ്റി അവാർഡ് നിർണയിക്കുന്നത്. ജീവിതശൈലീരോഗ ക്ലിനിക്ക്, പാലിയേറ്റീവ് ഗൃഹ സന്ദർശനം, യോഗ പരിശീലനം, മെഡിക്കൽ ക്യാന്പുകൾ, ബോധവത്കരണ ക്ലാസുകൾ തുടങ്ങിയ വിവിധ സേവനങ്ങൾ ഈ സ്ഥാപനത്തിൽ ലഭ്യമാണ്.

ഇടുക്കിയിലെ ഭൂപ്രശ്നം: ചട്ടഭേദഗതിയുടെ മറവിൽ ജനങ്ങളെ കൊള്ളയടിക്കാൻ ശ്രമം- സി.പി. മാത്യു

തൊടുപുഴ: ജില്ലയിലെ ഭൂ പ്രശ്നങ്ങളുടെ പരിഹാരമല്ല ചട്ടഭേദഗതിയുടെ മറവിൽ ജനങ്ങളെ കൊള്ളയടിക്കാനാണ് സർക്കാർ ലക്ഷമെന്ന് വ്യക്തമായതായി ഡിസിസി പ്രസിഡന്‍റ് സി.പി. മാത്യു പത്രസമ്മേളനത്തിൽ പറഞ്ഞു. പാർട്ടി ഫണ്ട് പിരിക്കുന്ന മോഡലിൽ കർഷകരിൽ നിന്ന് ക്രമവത്ക്കരണത്തിന്‍റെ പേരിൽ കോടികളാണ് സർക്കാർ പിരിച്ചെടുക്കാൻ പോകുന്നത്. സിപിഎം നിയന്ത്രണത്തിലുള്ള ഉദ്യോഗസ്ഥ വാഴ്ചയാണ് ഇടുക്കിയിലെ ജനങ്ങളെ കാത്തിരിക്കുന്നത്. ഇതാണോ നവകേരളമെന്ന് സിപിഎം വ്യക്തമാക്കണം. തദ്ദേശസ്ഥാപനങ്ങളിൽ നിന്ന് നന്പർ ലഭിച്ച്, കെട്ടിട നികുതിയും ഭൂ നികുതിയുമടച്ച് ഒരു പ്രശ്നങ്ങളുമില്ലാതെ പ്രവർത്തിക്കുന്ന കെട്ടിടങ്ങളും വീടുകളും നിയമവിരുദ്ധമാക്കി ഇവ ക്രമവത്ക്കരിക്കാൻ ജനങ്ങളുടെമേൽ അധികഭാരം അടിച്ചേൽപ്പിക്കുകയാണ് സർക്കാർ ചെയ്തത്. നിലവിൽ ജനങ്ങളെ ബാധിക്കുന്ന നിർമാണനിരോധനം, സിഎച്ച്ആറിലെ പ്രശ്നങ്ങൾ, വിവിധ വില്ലേജുകളിൽ പട്ടയവിതരണത്തിനുള്ള തടസങ്ങൾ, പഴയ റിസർവ് വനങ്ങളുടെ വിഞ്ജാപനത്തിൽ ഉൾപ്പെട്ടതിന്‍റെ പേരിൽ പട്ടയ കൈവശഭൂമിയിൽ വനം വകുപ്പ് അവകാശം സ്ഥാപിക്കുന്നതുൾപ്പടെയുള്ള വിഷയങ്ങളും പരിഹരിക്കാൻ ഒരു നടപടിയും ഉണ്ടായിട്ടില്ല. ഈ പ്രശ്നങ്ങളെല്ലാം നിലനിൽക്കേയാണ് ആറുപതിറ്റാണ്ടായി ജില്ലയിൽ നിലനിൽക്കുന്ന ഭൂ പ്രശ്നങ്ങളെല്ലാം ശാശ്വതമായി പരിഹരിച്ചുവെന്ന് വ്യാജപ്രചാരണവുമായി മുഖ്യമന്ത്രിയും മന്ത്രി റോഷി അഗസ്റ്റിൻ ഉൾപ്പെടെയുള്ള ഇടതു നേതാക്കളും രംഗത്ത് എത്തിയിരിക്കുന്നതെന്നും ജില്ലയിൽ കർഷകസ്നേഹം പറയുന്ന ഇടതു നേതാക്കൾ കോടതിയിൽ കർഷക താത്പര്യം സംരക്ഷിക്കാൻ നടപടി സ്വീകരിക്കാത്തതാണ് തിരിച്ചടിയായത്. ജില്ലയിലെ ജനങ്ങളെ ബാധിക്കുന്ന പല വിഷയങ്ങളിലും തങ്ങൾക്കുണ്ടായ വീഴ്ച എംപിയുടെ തലയിൽ കെട്ടിവയ്ക്കാനാണ് എൽഡിഎഫ് ശ്രമിക്കുന്നത്. മുട്ടം നിയോജകമണ്ഡലത്തിലെ കോണ്‍ഗ്രസിലെ പ്രശ്നങ്ങൾ പരിഹരിക്കുമെന്നും അദ്ദേഹം പറഞ്ഞു.പത്രസമ്മേളനത്തിൽ ഡിസിസി ജനറൽ സെക്രട്ടറിമാരായ ബിജോ മാണി, എൻ.ഐ.ബെന്നി, ഇന്ദു സുധാകരൻ, ചാർളി ആന്‍റണി, ടി.ജെ. പീറ്റർ, ജോസ് അഗസ്റ്റിൻ എന്നിവർ പങ്കെടുത്തു.

എട്ടുനോന്പാചരണം

മുണ്ടൻമുടി പള്ളിയിൽ നവീകരിച്ച അൾത്താര വെഞ്ചരിപ്പും മുണ്ടൻമുടി: മുണ്ടൻമുടി സെന്‍റ് മേരീസ് പള്ളിയിൽ ഇടവക മധ്യസ്ഥയായ പരിശുദ്ധ കന്യകമറിയത്തിന്‍റെ പിറവിത്തിരുനാൾ ഇന്നു മുതൽ സെപ്റ്റംബർ എട്ടുവരെ ആഘോഷിക്കും. ഇന്നു രാവിലെ 9.15നു കൊടിയേറ്റ്, നവീകരിച്ച അൾത്താര വെഞ്ചരിപ്പ്,വിശുദ്ധകുർബാന-മോണ്‍. വിൻസെന്‍റ് നെടുങ്ങാട്ട്. നാളെ മുതൽ നാലുവരെ വൈകുന്നേരം അഞ്ചിന് ജപമാല, വിശുദ്ധകുർബാന, നൊവേന എന്നിവ നടക്കും. യഥാക്രമം ഫാ. പോൾ ആക്കപ്പടിക്കൽ, ഫാ.സിറിയക് മഞ്ഞക്കടന്പിൽ.ഫാ. അലക്സ് താണികുന്നേൽ. ഫാ. സെബാസ്റ്റ്യൻ പന്നാരക്കുന്നേൽ എന്നിവർ കാർമികത്വം വഹിക്കും. അഞ്ചിന് രാവിലെ 6.30നു ജപമാല, വിശുദ്ധ കുർബാന, നൊവേന-ഫാ. ജോസഫ് കുന്നുംപുറത്ത്. ആറിന് വൈകുന്നേരം അഞ്ചിന് ജപമാല, വി.കുർബാന, നൊവേന-ഫാ. സ്കറിയ കുന്നത്ത്. ഏഴിന് രാവിലെ 6.30നു ജപമാല, വിശുദ്ധകുർബാന, നൊവേന- ഫാ.ജോസ് കാഞ്ഞിരക്കൊന്പിൽ. എട്ടിന് വൈകുന്നേരം 4.15ന് ലദീഞ്ഞ്, തിരുനാൾ കുർബാന, സന്ദേശം-ഫാ. ജോസ് കുളത്തൂർ. തുടർന്ന് പ്രദക്ഷിണം നേർച്ച എന്നിവയാണ് പരിപാടികളെന്നു വികാരി റവ.ഫാ.പോൾ ആക്കപ്പടിക്കൽ അറിയിച്ചു. മണിയാറൻകുടി പള്ളിയിൽ ചെറുതോണി: മണിയാറൻകുടി സെന്‍റ് മേരീസ് പള്ളിയിൽ എട്ടുനോമ്പാചരണവും പരിശുദ്ധ കന്യകമാതാവിന്‍റെ പിറവിത്തിരുനാളും ഇന്നുമുതൽ സെപ്റ്റംബർ എട്ടു വരെ ആഘോഷിക്കുമെന്ന് ഇടവക വികാരി ഫാ.തോമസ് കുളമാക്കൽ അറിയിച്ചു. ഇന്നു വൈകുന്നേരം 4.30ന് ജപമാല, അഞ്ചിന് കൊടിയേറ്റ്, നൊവേന, വിശുദ്ധ കുർബാന, പ്രസംഗം- ഫാ. ടോമി ആനിക്കുഴിക്കാട്ടിൽ, സെമിത്തേരി സന്ദർശനം. സെപ്റ്റംബർ ഒന്നു മുതൽ ആറുവരെ വൈകുന്നേരം 4.30 ന് ജപമാല, നൊവേന, അഞ്ചിന് വിശുദ്ധ കുർബാന - ഫാ.ജോസഫ് മേക്കുന്നേൽ, ഫാ. സിജോ തേക്കുംകാട്ടിൽ സിഎംഐ, ഫാ. സന്തോഷ് കോയിക്കൽ, ഫാ. ജോസ് കാവുങ്കൽ, ഫാ. ജോയൽ വള്ളിക്കാട്ട്, ഫാ. ജോൺസൺ ചെറുകുന്നേൽ എന്നിവർ കാർമികത്വം വഹിക്കും. ഏഴിന് ഉച്ചകഴിഞ്ഞ് 3.30 ന് ജപമാല, നൊവേന, 4.15 ന് തിരുനാൾ കുർബാന - ഫാ. മാത്യു മേക്കൽ, സന്ദേശം - ഫാ. സെബാസ്‌റ്റ്യൻ മനക്കലേട്ട്, പ്രദക്ഷിണം ആനക്കൊമ്പൻ കുരിശടിയിലേക്ക് . എട്ടിന് ഉച്ചകഴിഞ്ഞ് 3.30 ന് ജപമാല, നൊവേന, 4.15 ന് തിരുനാൾ കുർബാന-ഫാ.ജോസഫ് തോമസ് കുഴിയംപ്ലാവിൽ, പ്രസംഗം- ഫാ.ആന്‍റണി പാലാപുളിക്കൽ, ആറിന് പ്രദക്ഷിണം മണിയാറൻകുടി കപ്പേളയിലേക്ക്, തുടർന്ന് സ്നേഹവിരുന്ന്. കഞ്ഞിക്കുഴി പള്ളിയിൽ ചെറുതോണി: കഞ്ഞിക്കുഴി സെന്‍റ് മേരീസ് പള്ളിയിൽ എട്ടുനോമ്പാചരണവും പരിശുദ്ധ കന്യകമാതാവിന്‍റെ പിറവിത്തിരുനാളും ഇന്നുമുതൽ സെപ്റ്റംബർ എട്ടു വരെ ആഘോഷിക്കുമെന്ന് ഇടവക വികാരി ഫാ. ജെയിംസ് ശൗര്യാംകുഴി അറിയിച്ചു. ഇന്നു വൈകുന്നേരം നാലിന് കൊടിയേറ്റ്, വിശുദ്ധ കുർബാന, നൊവേന - ഫാ. സെബാൻ മേലേട്ട്. സെപ്റ്റംബർ ഒന്നു മുതൽ ആറുവരെ രാവിലെ ആറിനും ഒൻപതിനും വിശുദ്ധ കുർബാന, വൈകുന്നേരം 4.15ന് ജപമാല, നൊവേന, അഞ്ചിന് വിശുദ്ധ കുർബാന - ഫാ.ടോമി ലൂക്ക് ആനിക്കുഴിക്കാട്ടിൽ, ഫാ. ജോർജ് ചിറയ്ക്കൽ പുരയിടത്തിൽ സിഎംഎഫ് , ഫാ.ജോസഫ് പൈമ്പിള്ളിൽ, ഫാ. ആന്‍റണി പാലാപുളിക്കൽ, ഫാ. ജോൺ ആനിക്കോട്ടിൽ, ഫാ. ഗോഡ്സൺ കണ്ണംപ്ലാക്കൽ എന്നിവർ കാർമികത്വം വഹിക്കും. ഏഴിന് രാവിലെ ആറിനും 9.30 നും വിശുദ്ധ കുർബാന, ഉച്ചകഴിഞ്ഞ് 3.30ന് ജപമാല, നൊവേന, തിരുനാൾ കുർബാന - ഫാ.ഫിലിപ്പ് ഐക്കര. എട്ടിന് രാവിലെ ആറിന് വിശുദ്ധ കുർബാന, 10ന് തിരുനാൾ കുർബാന - റവ. ഡോ. ജോസ് മാറാട്ടിൽ. 11.30 ന് ജപമാല പ്രദക്ഷിണം. പട്ടുമല ദേവാലയത്തിൽ വണ്ടിപ്പെരിയാർ: ഹൈറേഞ്ചിലെ പ്രശസ്ത മരിയൻ തീർഥാടന കേന്ദ്രമായ പട്ടുമലമാതാ പള്ളിയിൽ മാതാവിന്‍റെ പിറവിത്തിരുനാളും എട്ടുനോന്പാചരണവും തിരുസുരൂപ പ്രതിഷ്ഠയുടെ 44-ാമത് വാർഷികാഘോഷവും ഇന്നുമുതൽ സെപ്റ്റംബർ എട്ടുവരെ നടക്കും. ഇന്ന് ഉച്ചകഴിഞ്ഞ് 2.30ന് കൊടിയേറ്റ്. തുടർന്നുള്ള എട്ടു ദിവസങ്ങളിലും പ്രത്യേക ദിവ്യബലി, ദിവ്യകാരുണ്യ ആരാധന, നൊവേന എന്നിവ നടത്തും. എട്ടിനു രാവിലെ ഏഴിനു ഫാ. ജോസ് കുരുവിള കടുംതുരുത്തേലിന്‍റെ മുഖ്യകാർമികത്വത്തിൽ ദിവ്യബലി, 10ന് പൊന്തിഫിക്കൽ ദിവ്യബലി, തിരുനാൾ സന്ദേശം - വിജയപുരം രൂപത ബിഷപ് റവ. ഡോ. സെബാസ്റ്റ്യൻ തെക്കത്തെേച്ചേരിൽ, ഉച്ചകഴിഞ്ഞ് മൂന്നിന് വിശുദ്ധ കുർബാന (തമിഴിൽ). പന്നൂർ യാക്കോബായ പള്ളിയിൽ കരിമണ്ണൂർ: പന്നൂർ സെന്‍റ് ജോണ്‍സ് യാക്കോബായ സുറിയാനി പള്ളിയിൽ എട്ടുനോന്പ് ആചരണവും ശ്രാദ്ധപ്പെരുന്നാളും നാളെ മുതൽ എട്ടു വരെ നടക്കും. ഇന്ന് രാവിലെ 8.30ന് വിശുദ്ധ കുർബാന, 10ന് കൊടിയേറ്റ്. നാളെ രാവിലെ എട്ടിന് വിശുദ്ധ കുർബാന, ഒൻപതിന് പ്രസംഗം. രണ്ടു മുതൽ ആറു വരെ രാവിലെ എട്ടിന് വിശുദ്ധ കുർബാന, ഒൻപതിന് പ്രസംഗം, ഏഴിന് രാവിലെ 8.30ന് വിശുദ്ധ കുർബാന, 9.45ന് പ്രസംഗം. എട്ടിന് രാവിലെ 8.30ന് വിശുദ്ധ മൂന്നിൻമേൽ കുർബാന, 10ന് പ്രസംഗം.

ടി.എ. നസീറിന്‍റെ രക്തസാക്ഷിദിനം ആചരിച്ചു

തൊടുപുഴ: ഡിവൈഎഫ്ഐയുടെ നേതൃത്വത്തിൽ ടി.എ.നസീറിന്‍റെ രക്തസാക്ഷി ദിനം ആചരിച്ചു. ഡിവൈഎഫ്എ ജില്ലാ വൈസ് പ്രസിഡന്‍റായിരുന്ന നസീറിനെ 1989 ഓഗസ്റ്റ് 30ന് നടന്ന ഭാരത് ബന്ദിനാണ് കീരികോട് വച്ച് കൊലപ്പെടുത്തിയത്. സമ്മേളനം എസ്എഫ്ഐ സംസ്ഥാന പ്രസിഡന്‍റ് എം.ശിവപ്രസാദ് ഉദ്ഘാടനം ചെയ്തു. ഡിവൈഎഫ്ഐ ബ്ലോക്ക് വൈസ് പ്രസിഡന്‍റ് കെ.എം.അൽത്താഫ് അധ്യക്ഷത വഹിച്ചു. സിപിഎം തൊടുപുഴ ഈസ്റ്റ് ഏരിയാ സെക്രട്ടറി ലിനു ജോസ്, ഏരിയ കമ്മിറ്റിയംഗം വി.ടി. പാപ്പച്ചൻ എന്നിവർ പ്രസംഗിച്ചു. കോലാനിയിൽ നടന്ന അനുസ്മരണ യോഗം ജില്ലാ സെക്രട്ടറി രമേശ് കൃഷ്ണൻ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് ടിനു ശശി അധ്യക്ഷത വഹിച്ചു. ആൽവിൻ വടശേരി, കെ.എസ്.അനന്തുമോൻ, പി. സി. അനൂപ്, ആർ. പ്രശോഭ്, പി.വി.ഷിബു എന്നിവർ പ്രസംഗിച്ചു. മണക്കാട് കുന്നത്തുപാറയിൽ സിപിഎം ലോക്കൽ സെക്രട്ടറി ബി. ഹരി സമ്മേളനം ഉദ്ഘാടനം ചെയ്തു. അനന്തു കൃഷ്ണദാസ് അധ്യക്ഷത വഹിച്ചു.

ലീഗൽ മെട്രോളജി വകുപ്പിന്‍റെ ഓണക്കാല പരിശോധന

തൊടുപുഴ: ഓണത്തോടനുബന്ധിച്ച് ഉപഭോക്തൃ സംരക്ഷണം ഉറപ്പുവരുത്തുന്നതിനും പൊതുവിപണിയിലെ ക്രമക്കേടുകൾ തടയുന്നതിനുമായി ലീഗൽ മെട്രോളജി വകുപ്പ് പരിശോധനകൾ ശക്തമാക്കി. ജില്ലയിലെ ഡെപ്യൂട്ടി കണ്‍ട്രോളർമാരുടെ നേതൃത്വത്തിൽ എല്ലാ താലൂക്കുകളിലും പരിശോധന നടത്തിവരികയാണ്. അളവിലും തൂക്കത്തിലും കുറവ് വരുത്തി വില്പന നടത്തുക, പരമാവധി വിൽപന വിലയേക്കാൾ കൂടിയ വില ഈടാക്കുക, വില മായ്ക്കുക, തിരുത്തുക, മുദ്രപതിപ്പിക്കാത്ത അളവുതൂക്ക ഉപകരണങ്ങൾ ഉപയോഗിക്കുക, പാക്കേജ്ഡ് കമ്മോഡിറ്റീസ് നിയമപ്രകാരമുള്ള പ്രഖ്യാപനങ്ങളില്ലാത്ത പായ്ക്കറ്റുകൾ വില്പന നടത്തുക തുടങ്ങിയ ക്രമക്കേടുകൾക്കെതിരേ കർശന നടപടി സ്വീകരിക്കും. അളവ് തൂക്ക ഉപകരണങ്ങൾ ഉപഭോക്താവിന് കാണത്തക്കവിധം പ്രവർത്തിപ്പിക്കണം. അളവു തൂക്ക ഉപകരണങ്ങൾ പരിശോധിച്ച് മുദ്ര ചെയ്തത്തിന്‍റെ സർട്ടിഫിക്കറ്റ് വ്യക്തമായി കാണത്തക്ക വിധം വ്യാപാര സ്ഥാപനത്തിൽ പ്രദർശിപ്പിക്കണം. ഇന്ധനവിതരണ പന്പുകളിലെ അളവ് സംബന്ധിച്ചും പരിശോധനകൾ നടത്തും. വിതരണം നടത്തുന്ന ഇന്ധനത്തിന്‍റെ അളവ് സംബന്ധിച്ച് സംശയം തോന്നുന്ന പക്ഷം പന്പുകളിൽ സൂക്ഷിച്ചിരിക്കുന്ന ലീഗൽ മെട്രോളജി വകുപ്പ് മുദ്ര ചെയ്ത അഞ്ച് ലിറ്റർ അളവ് പാത്രം ഉപയോഗിച്ച് അളവ് ബോധ്യപ്പെടുത്താൻ ഉപഭോക്താവിന് ആവശ്യപ്പെടാം. ഉപഭോക്താക്കൾക്ക് പരാതി അറിയിക്കുന്നതിനായി കണ്‍ട്രോൾ റൂമിലോ ജില്ലാ, താലൂക്ക് ലീഗൽ മെട്രോളജി ഓഫീസുകളിലെ ഹെൽപ് ഡെസ്കിലോ ബന്ധപ്പെടാം. സുതാര്യം മൊബൈൽ ആപ്പ് മുഖേനയും പരാതി അറിയിക്കാം. ഹെൽപ്പ് ഡെസ്ക്: ഡെപ്യൂട്ടി കണ്‍ട്രോളർ ഓഫീസ് തൊടുപുഴ കണ്‍ട്രോൾ റൂം -04862 222638.

മനം നിറയ്ക്കുമോ കുറിഞ്ഞിപ്പൂക്കൾ...

മൂന്നാർ: മഴക്കാലം കഴിഞ്ഞതോടെ ഹരിതശോഭയേറിയ മൂന്നാറിന്‍റെ വിവിധയിടങ്ങളിലായി നീലക്കുറിഞ്ഞി പൂവിട്ടത് സഞ്ചാരികൾക്ക് ആവേശം പകരുന്നു. അപൂർവ കാഴ്ചയായ കുറിഞ്ഞി പൂവിടുന്നത് കാണാൻ പ്രതീക്ഷയോടെ കാത്തിരുക്കുന്നവർക്ക് സന്തോഷം പകർന്നാണ് മാട്ടുപ്പെട്ടി റോഡിലെ ചില ഭാഗങ്ങളിലും ഗ്രാം സ്ലാൻഡ് എസ്റ്റേറ്റിലുമായി കുറിഞ്ഞിപ്പൂക്കൾ വിടർന്നു നിൽക്കുന്നത്. പന്ത്രണ്ടു വർഷത്തിലൊരിക്കൽ പൂക്കുന്ന അപൂർവയിനം കുറിഞ്ഞി കഴിഞ്ഞ 2018 ലാണ് മൂന്നാർ നിലകളിൽ പൂത്തത്. കൊളക്കുമലയിൽ വ്യാപകമായും ഇരവികുളം നാഷണർ പാർക്കിന്‍റെ ഭാഗമായ രാജമലയിലുമാണ് അന്നു കുറിഞ്ഞി പൂത്തത്. അന്ന് ആയിരക്കണക്കിന് സഞ്ചാരികളാണ് കുറിഞ്ഞി വസന്തം കാണാൻ മൂന്നാറിലെത്തിയത്. അടുത്തതായി 2030 ലാണ് കുറിഞ്ഞി പൂവിടുവാൻ സാധ്യതയുള്ളത്. അതിനിടയിലാണ് സഞ്ചാരികളിൽ പ്രതീക്ഷയുണർത്തി മൂന്നാറിൽനിന്ന് മാട്ടുപ്പെട്ടിക്ക് പോകുന്ന വഴിയിലെ ചിലയിടങ്ങളിലും ഗ്രാംലസ്ലാൻഡ് എസ്റ്റേറ്റിന്‍റെ ചിലയിടങ്ങളിലും കുറിഞ്ഞി പ്രത്യക്ഷപ്പെട്ടിട്ടുള്ളത്. സാധാരണയായി കുറിഞ്ഞി പൂക്കൾ വ്യാപകമായി മലനിരകളിൽ പൂത്തുലയുന്നതിനു മുന്പായി ഇത്തരത്തിൽ ചിലയിടങ്ങളിൽ പൂവിടുന്നത് പതിവാണ്.

ഓണാവധി: വിനോദസഞ്ചാര കേന്ദ്രങ്ങൾ തിരക്കിലേക്ക്

തൊടുപുഴ: ഓണത്തോടനുബന്ധിച്ച് ജില്ലയിലേക്കു വിനോദ സഞ്ചാരികളുടെ ഒഴുക്ക് കൂടി. ഇടവിട്ടുള്ള മഴ ആശങ്കപ്പെടുത്തുന്നുണ്ടെങ്കിലും ഇന്നലെ മുതൽ വിദ്യാലയങ്ങൾ അടച്ചതിനാൽ ഇന്നു മുതൽ സഞ്ചാരികളുടെ വലിയ പ്രവാഹംതന്നെയാണ് പ്രതീക്ഷിക്കുന്നത്. വാഗമണിലെയും മൂന്നാറിലെയും മഞ്ഞും തണുപ്പും ആസ്വദിക്കാൻ ഒട്ടേറെ വിനോദ സഞ്ചാരികൾ ഇപ്പോൾ എത്തുന്നുണ്ട്. ഹോട്ടലുകളിലും റിസോർട്ടുകളിലും ബുക്കിംഗ് വർധിച്ചതായി ടൂറിസം വകുപ്പ് അധികൃതർ അറിയിച്ചു. വെള്ളച്ചാട്ടങ്ങളും സജീവം ഓണം അവധി ആഘോഷമാക്കാൻ അന്യസംസ്ഥാനങ്ങളിൽനിന്നടക്കം സഞ്ചാരികളെത്തും. ഒട്ടേറെ പേർ മാസങ്ങൾക്കു മുന്പുതന്നെ പ്രധാന ഹോട്ടലുകളിലെയും റിസോർട്ടുകളിലെയും മുറികൾ ബുക്ക് ചെയ്തിട്ടുണ്ട്. സന്ദർശകർക്കായി ടൂർ ഓപ്പർമേറ്റർമാർ മുഖേന പാക്കേജുകളും ഒരുക്കിയിട്ടുണ്ട്. മഴ പെയ്തു നിൽക്കുന്നതിനാൽ വെള്ളച്ചാട്ടങ്ങളും ജലസമൃദ്ധമാണ്. വാഹനം നിർത്തി വെള്ളച്ചാട്ടത്തിന്‍റെ സൗന്ദര്യം ആസ്വദിക്കാനും ചിത്രങ്ങളെടുക്കാനും സഞ്ചാരികൾ സമയം കണ്ടെത്തുന്നുണ്ട്. ഇതിനു പുറമെ ജില്ലയിലെ ചില മലഞ്ചെരിവുകളിൽ നീലക്കുറിഞ്ഞി പൂവിട്ടതും ദൃശ്യാനുഭവമാകും. നല്ലൊരു വിഭാഗം സഞ്ചാരികൾ തമിഴ്നാട്ടിലെ കന്പത്ത് മുന്തിരിപ്പാടം കാണാനും എത്തും. ഒാണം വാരാഘോഷം ടൂറിസം വകുപ്പിന്‍റെ നേതൃത്വത്തിൽ ജില്ലയിൽ ഓണം വാരാഘോഷം സംഘടിപ്പിക്കും. മൂന്നാർ, തേക്കടി, രാമക്കൽമേട്, തൊടുപുഴ എന്നിവിടങ്ങളിലാണ് വിനോദ സഞ്ചാരികളെ ആകർഷിക്കാൻ പരിപാടി. ഇതിനു 11 ലക്ഷം രൂപയാണ് സർക്കാർ അനുവദിച്ചിരിക്കുന്നത്. ജില്ലയിലെ ടൂറിസം കേന്ദ്രങ്ങളിൽ വിനോദസഞ്ചാരികളെ സ്വീകരിക്കാൻ ഒരുക്കങ്ങളെല്ലാം പൂർത്തിയാക്കിയതായി അധികൃതരും ഹോട്ടൽ, റിസോർട്ട് ഉടമകളും പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]