ഷോപ്പിംഗ് കോംപ്ലക്സിൽ കടമുറികളുടെ ഉദ്ഘാടനം

തൊടുപുഴ: നഗര വികസനത്തിനു മുതൽക്കൂട്ടായി തൊടുപുഴ നഗരസഭയുടെ മങ്ങാട്ടുകവല ബസ് സ്റ്റാൻഡ് ഷോപ്പിംഗ് കോംപ്ലക്സിൽ ലേലത്തിൽ പോയിട്ടുള്ള കടമുറികളുടെ പ്രവർത്തനോദ്ഘാടനം നടത്തി. നഗരസഭാ ചെയർമാൻ കെ. ദീപക് അധ്യക്ഷത വഹിച്ചു. ഡീൻ കുര്യാക്കോസ് എംപി പ്രവർത്തനോദ്ഘാടനം നിർവഹിച്ചു.

മുറികളുടെ താക്കോൽദാനം പി.ജെ. ജോസഫ് എംഎൽഎ നിർവഹിച്ചു. സ്റ്റാൻഡിംഗ് കമ്മിറ്റി ചെയർമാൻമാരായ സനു കൃഷ്ണൻ, എം.എ. കരിം, ഷീജ ഷാഹുൽ ഹമീദ്, പി.ജി. രാജശേഖരൻ, ഡിസിസി പ്രസിഡന്‍റ് സി.പി. മാത്യു, യുഡിഎഫ് ജില്ലാ ചെയർമാൻ ജോയി വെട്ടിക്കുഴി, കണ്‍വീനർ എം.ജെ. ജേക്കബ്, മു‌‌സ‌‌‌‌്‌ലിം ലീഗ് സംസ്ഥാന വൈസ് പ്രസിഡന്‍റ് ടി.എം. സലിം, സിപിഎം ജില്ലാ സെക്രട്ടേറിയറ്റംഗം മുഹമ്മദ് ഫൈസൽ, മർച്ചന്‍റ്സ് അസോസിയേഷൻ പ്രസിഡന്‍റ് രാജു തരണിയിൽ, കൗണ്‍സിലർ മുഹമ്മദ് അഫ്സൽ എന്നിവർ പ്രസംഗിച്ചു.

ADVERTISEMENT

മാങ്കുളം സെന്‍റ് മേരീസ് ഫൊറോന ദേവാലയത്തിലേക്ക് മരിയൻ വാഹനറാലി

അടിമാലി: മാങ്കുളം സെന്‍റ്് മേരീസ് ഫൊറോന തീര്‍ഥാടന ദേവാലയത്തില്‍ പരിശുദ്ധ കന്യകമറിയത്തിന്‍റെ ജനനത്തിരുനാളിനോടനുബന്ധിച്ച് മരിയൻ വാഹന റാലി സംഘടിപ്പിച്ചു. അടിമാലി, കൂമ്പൻപാറ, മാങ്കുളം എന്നീ ഫൊറോനകളുടെ നേതൃത്വത്തിലാണ് കെസിവൈഎം മേഖല വാഹന റാലി സംഘടിപ്പിച്ചത്. ഞായറാഴ്ച ഉച്ചകഴിഞ്ഞ് അടിമാലി നെഞ്ചോട് ദേവാലയത്തിൽനിന്നു വാഹന റാലിക്ക് തുടക്കമായി. നിരവധി വാഹനങ്ങൾ അണിചേർന്ന റാലി വൈകുന്നേരത്തോടെ മാങ്കുളം ദേവാലയത്തിൽ എത്തിച്ചേർന്നു. വാഹനറാലിക്ക് അടിമാലി ഇടവക വികാരി ഫാ. ജോർജ് പാട്ടത്തേക്കുഴി, കൂമ്പൻപാറ ഇടവക വികാരി ഫാ. ജോസഫ് വെളിഞ്ഞാലിൽ, മാങ്കുളം ഇടവക വികാരി ഫാ.ജോർജ് കൊല്ലംപറമ്പിൽ, കെസിവൈഎം ഇടുക്കി രൂപത ഡയറക്ടർ ഫാ. സെബാസ്റ്റ്യൻ മനയ്ക്കലേട്ട്, അടിമാലി, കൂമ്പൻപാറ, മാങ്കുളം മേഖല ഡയറക്ടർ ഫാ. വിനീത് മേയ്ക്കൽ, കെസിവൈഎം സംസ്ഥാന പ്രസിഡന്‍റ് അലക്‌സ് പുളിമൂട്ടിൽ, രൂപത പ്രസിഡന്‍റ്് സാം സണ്ണി, ഷൈജിൻ ജയിംസ്, എബിൻ ബിനോയി തുടങ്ങിയവർ നേതൃത്വം നൽകി. തിരുനാളിന്‍റെ സമാപന ദിവസമായ ഇന്ന് ജപമാല, നൊവേന, വിശുദ്ധ കുര്‍ബാന എന്നിവയ്ക്ക് ശേഷം മേരി നാമധാരികളുടെ സംഗമവും സമര്‍പ്പര്‍ണവും നടക്കും. തിരുനാള്‍ പാട്ട് കുര്‍ബാനയ്ക്ക് കോതമംഗലം രൂപത മാതൃവേദി ഡയറക്ടര്‍ ഫാ. ആന്‍റ്ണി പുത്തന്‍കുളം കാര്‍മികത്വം വഹിക്കും. റവ. ഡോ. ബെന്നോ പുതിയാപറമ്പില്‍ വചനസന്ദേശം നല്‍കും. തുടര്‍ന്ന് ജപമാല പ്രദക്ഷിണവും ഊട്ടുനേര്‍ച്ചയും നടക്കും. 15ന് പള്ളിയില്‍ എട്ടാമിടം നടക്കും.

അയ്യപ്പൻകോവിൽ തൂക്കുപാലത്തിൽ സഞ്ചാരികളുടെ തിരക്ക്

ഉപ്പുതറ: അയ്യപ്പൻകോവിലിലെ ദുർബലമായ തൂക്കുപാലത്തിൽ ഒരേസമയം 25 പേരിൽ കൂടുതൽ കയറരുതെന്ന ജില്ലാ കളക്ടറുടെ ഉത്തരവ് പാളി. ഇരുവശങ്ങളിലും പോലീസ് നോക്കിനിൽക്കേ അനുവദിച്ചതിലും ഇരട്ടിയിലധികം ആളുകളാണ് തൂക്കുപാലത്തിൽ കയറുന്നത്. ഓണാവധി ആയതോടെ നൂറുകണക്കിന് വിനോദസഞ്ചാരികളാണ് ഓരോ ദിവസവും തൂക്കുപാലം കാണാനെത്തുന്നത്. ഇരുകരയിലും ഓരോ പോലീസുകാരൻ ഡ്യൂട്ടിയിലുണ്ടെങ്കിലും സഞ്ചാരിക്കളെ നിയന്ത്രിക്കാൻ കഴിയുന്നില്ല. 40ൽ കൂടുതലാളുകൾ പാലത്തിൽ കയറരുതെന്ന് നേരത്തേ ജില്ലാ കളക്ടർ നിർദേശിച്ചിരുന്നു. വർഷങ്ങളായി അറ്റകുറ്റപ്പണികൾ നടത്താത്തതിനാൽ നട്ടും ബോൾട്ടും അയഞ്ഞും കൂട്ടിച്ചേർക്കലുകളിൽ തുരുമ്പെടുത്തും അടുത്തകാലത്ത് തൂക്കുപാലത്തിന് കാര്യമായ ബലക്ഷയം സംഭവിച്ചിട്ടുണ്ട്. അതിനാലാണ് നിയന്ത്രണം നടപ്പിലാക്കാൻ കളക്ടർ ഉത്തരവിട്ടത്. ഓഗസ്റ്റ് നാല് മുതൽ ഒൻപതുവരെയാണ് നിയന്ത്രണം ഏർപ്പെടുത്തിയത്. എന്നാൽ തിരുവോണ ദിവസം മുതൽ നിയന്ത്രണങ്ങളെല്ലാം തകിടംമറിഞ്ഞു. നിയന്ത്രണം ഉറപ്പുവരുത്താൻ കൂടുതൽ പോലീസിനെ നിയോഗിക്കാൻ അധികൃതർ തയാറായുമില്ല. 2012-13ൽ ജില്ലാ റിവർ മാനേജ്മെന്‍റാണ് 2.5 കോടി രൂപ ചെലവിട്ട് കാഞ്ചിയാർ - അയ്യപ്പൻകോവിൽ പഞ്ചായത്തുകളെ ബന്ധിപ്പിച്ച് തൂക്കുപാലം നിർമിച്ചത്. 1.2 മീറ്റർ വീതിയും 200 മീറ്റർ നീളവുമുള്ള തൂക്കുപാലത്തിൽ കയറി ഇടുക്കി ജലാശയത്തിന്‍റെ വിദൂരദൃശ്യം കാണാൻ നൂറുകണക്കിന് വിനോദസഞ്ചാരികൾ ഇവിടെയെത്തുന്നുണ്ട്. സ്കൂൾ കുട്ടികൾ ഉൾപ്പെടെ കോഴിമല, രാജപുരം, അമ്പലമേട് പ്രദേശങ്ങളിലെ അഞ്ഞൂറോളം കുടുംബങ്ങൾ പുറംലോകത്തെത്തുന്നത് ഇതുവഴിയാണ്. പുരാതന ധർമശാസ്താ ക്ഷേത്രത്തിലേക്കു പോകുന്നതും ഇതുവഴിയാണ്. പ്രശ്നം പരിഹരിക്കാൻ സഞ്ചാരികളെ നിയന്ത്രിക്കാൻ കൂടുതൽ പോലീസിനെ നിയമിക്കുകയും തൂക്കുപാലം നവീകരിക്കേണ്ടതും അത്യാവശ്യമാണ്.

ആശംസാകാർഡുകൾ വിതരണം ചെയ്തില്ല; പോസ്റ്റ് ഓഫീസിനു മുമ്പിൽ വിദ്യാർഥിനിയുടെ പ്രതിഷേധം

നെടുങ്കണ്ടം: അധ്യാപകദിനത്തോടനുബന്ധിച്ച് അധ്യാപകര്‍ക്ക് അയച്ച ആശംസാ കാര്‍ഡുകള്‍ കൃത്യമായി വിതരണം ചെയ്തില്ലെന്ന പരാതിയുമായി നെടുങ്കണ്ടം പോസ്റ്റ്ഓഫീസിനു മുന്‍പില്‍ ആറാം ക്ലാസുകാരി കുത്തിയിരുന്ന് പ്രതിഷേധിച്ചു. നെടുങ്കണ്ടം പഞ്ചായത്ത് യുപി സ്‌കൂളിലെ വിദ്യാര്‍ഥിനി ആദിശ്രീയാണ് നെടുങ്കണ്ടം പോസ്റ്റ് ഓഫീസിനു മുന്‍പില്‍ പ്രതിഷേധിച്ചത്. കഴിഞ്ഞ നാലു വര്‍ഷമായി എല്ലാ അധ്യാപക ദിനത്തിലും ആദിശ്രീ അധ്യാപകര്‍ക്ക് ആശംസാ കാര്‍ഡുകള്‍ അയയ്ക്കാറുണ്ട്. ഇക്കൊല്ലവും 35 അധ്യാപകര്‍ക്ക് കാര്‍ഡുകള്‍ അയച്ചു. അധ്യാപകദിനത്തിനു മുന്‍പേ ലഭിക്കാന്‍ ഓഗസ്റ്റ് 30നുതന്നെ നെടുങ്കണ്ടം പോസ്റ്റ്ഓഫീസില്‍നിന്നു കാര്‍ഡുകള്‍ അയച്ചെങ്കിലും നാലാം തീയതിയും പലര്‍ക്കും കാര്‍ഡുകള്‍ ലഭിച്ചില്ല. ഇതറിഞ്ഞതോടെ ആദിശ്രീയും പിതാവും നെടുങ്കണ്ടം പോസ്റ്റ് ഓഫീസില്‍ എത്തുകയായിരുന്നു. കാര്‍ഡ് ലഭിക്കാത്തത് ചോദ്യംചെയ്തതോടെ അധികൃതര്‍ കൈമലര്‍ത്തിയെന്ന് ആദിശ്രീയുടെ പിതാവ് അനില്‍കുമാര്‍ പറഞ്ഞു. ഇതോടെയാണ് ഒരു മണിക്കൂറോളം ആദിശ്രീ പോസ്റ്റോഫിസിനു മുന്‍പിലിരുന്ന് പ്രതിഷേധിച്ചത്. ഇരുന്ന സമയത്തിനുള്ളില്‍ പലര്‍ക്കും കാര്‍ഡുകള്‍ വിതരണം ചെയ്തുവെന്ന് അനില്‍കുമാര്‍ പറഞ്ഞു. രണ്ട് വര്‍ഷം മുന്‍പും സമാന അനുഭവം ഉണ്ടായിട്ടുണ്ടെന്നും ഇത്തവണ അയച്ച പത്തോളം കാര്‍ഡുകള്‍ ഇനിയും ലഭിക്കാനുണ്ടെന്നും സംഭവത്തില്‍ ഉന്നത തപാല്‍ ഉദ്യോഗസ്ഥര്‍ക്ക് പരാതി നല്‍കുമെന്നും അനില്‍കുമാര്‍ പറഞ്ഞു. അതേസമയം, ജീവനക്കാരുടെ ഭാഗത്തുനിന്നു വീഴ്ച സംഭവിച്ചിട്ടില്ലെന്ന് പോസ്റ്റ് ഓഫീസ് അധികൃതര്‍ പ്രതികരിച്ചു. പോസ്റ്റ് ഓഫീസ് പരിധിയില്‍ വിതരണം ചെയ്യേണ്ടവ സമയബന്ധിതമായി വിലാസക്കാര്‍ക്ക് നല്‍കിയെന്നും ഇവിടെനിന്ന് അയയ്ക്കേണ്ടവയും കൃത്യമായിത്തന്നെ അയച്ചിട്ടുണ്ടെന്നും അധികൃതര്‍ പറഞ്ഞു.

രാഷ‌്ട്ര പുനർനിർമാണത്തിൽ അധ്യാപകരുടെ പങ്ക് വിലപ്പെട്ടത്: മോൺ. ജോസ് കരിവേലിക്കൽ

ചെറുതോണി: രാഷ‌്ട്ര പുനർ നിർമാണത്തിൽ നിർണായക സ്വാധീനം ചെലുത്തുന്നവരാണ് അധ്യാപകരെന്ന് ഇടുക്കി രൂപത വികാരി ജനറാൾ മോൺ. ജോസ് കരിവേലിക്കൽ. വാഴത്തോപ്പ് സെന്‍റ്് ജോർജ് സ്കൂളിലെ അധ്യാപകദിനാഘോഷത്തിൽ അധ്യാപകരെ ആദരിച്ച് അനുഗ്രഹ പ്രഭാഷണം നടത്തുകയായിരുന്നു അദ്ദേഹം. വ്യക്തികളുടെ വ്യക്തിത്വ രൂപീകരണത്തിന് ഏറെ സ്വാധീനം ചെലുത്തുവാൻ അധ്യാപകർക്കാവും. അത്രയേറെ ഗൗരവമേറിയ ഉത്തരവാദിത്വമാണ് അവരേറ്റെടുത്തിരിക്കുന്നത്. ഒരു ജോലി എന്നതിലുപരി ജീവിതചര്യയാണ് അധ്യാപനം. അവർ നാടിന് നൽകുന്ന സംഭാവനകളാണ് ലക്ഷ്യബോധമുള്ള വിദ്യാർത്ഥികളെന്ന് മോൺ. കരിവേലിക്കൽ പറഞ്ഞു. പിടിഎ കമ്മിറ്റിയുടെ നേതൃത്വത്തിൽ അധ്യാപകരെ ആദരിക്കുന്നതിലൂടെ വിദ്യാർഥികൾക്ക് നൽകുന്നത് നല്ല മാതൃകകൂടിയാണന്നും അദ്ദേഹം പറഞ്ഞു. എൽപി മുതൽ ഹയർ സെക്കൻഡറി വരെയുള്ള മുഴുവൻ അധ്യാപകരെയും മോൺ. ജോസ് കരിവേലിക്കൽ ആദരിച്ചു. സമ്മേളനം സ്കൂൾ മാനേജർ ഫാ. ടോമി ആനിക്കുഴിക്കാട്ടിൽ ഉദ്ഘാടനം ചെയ്തു. ഹയർ സെക്കൻഡറി സ്കൂൾ പിടിഎ പ്രസിഡന്‍റ്് ജോളി ആലപ്പുരക്കൽ അധ്യക്ഷത വഹിച്ചു. ഹയർ സെക്കൻഡറി പ്രിൻസിപ്പൽ ജിജോ ജോർജ്, ഹൈസ്കൂൾ ഹെഡ്മിസ്ട്രസ് അർച്ചന തോമസ്, യുപി സ്കൂൾ ഹെഡ്മിസ്ട്രസ് സിസ്റ്റർ അനിത എസ്എബിഎസ്, എൽപി സ്കൂൾ പ്രിൻസിപ്പൽ സിസ്റ്റർ ഉഷ എഫ്എസ്എൽജി, ഫാ. തോമസ് കുളമാക്കൽ, യുപി സ്കൂൾ പിടിഎ പ്രസിഡന്‍റ് ബിജു കലയത്തിനാൽ, എൽപി സ്കൂൾ പിടിഎ പ്രസിഡന്‍റ ് ഷാജി കുളക്കാട്ട്, എംപിടിഎ പ്രസിഡന്‍റുമാരായ സോണിയ ബിനോജ്, ജോസിറ്റ റോയി, സുമി മഞ്ജേഷ്, പിടിഎ ഭാരവാഹികളായ ജിമ്മി മാപ്രയിൽ, ജോബി ജോസഫ്, മനോജ് വർഗീസ്, കണ്ണൻ എം. അരുണാന്തലിൽ, ഷാജി മലേപ്പറമ്പിൽ, ഷിജു മീനത്തേരിൽ എന്നിവർ പ്രസംഗിച്ചു.

ഭൂപതിവ്: സെക്രട്ടേറിയറ്റിനു മുൻപിൽ സത്യഗ്രഹസമരവുമായി വ്യാപാരികൾ

തൊടുപുഴ: ഭൂപതിവ് ചട്ടഭേദഗതിയുടെ ഭാഗമായി കൊണ്ടുവന്ന ചട്ടങ്ങളിൽ ജനദ്രോഹപരമായവ ഒഴിവാക്കുന്നതിനു നടപടി സ്വീകരിക്കണമെന്ന് കേരള വ്യാപാരിവ്യവസായി ഏകോപന സമിതി ജില്ലാ ഭാരവാഹികൾ പത്രസമ്മേളനത്തിൽ ആവശ്യപ്പെട്ടു. ഭേദഗതിയിലൂടെ നേരത്തേ എല്ലാ നിയമങ്ങളും പാലിച്ച് പട്ടയ ഭൂമിയിൽ കഴിഞ്ഞ 65 വർഷങ്ങളായി നിർമിച്ച കെട്ടിടങ്ങളാണ് വൻ പിഴയൊടുക്കി ക്രമവത്കരിക്കേണ്ടിവരുന്നത്. 1960-ലെ ഭൂ പതിവ് നിയമത്തിന്‍റെ പരിധിയിൽ കൊണ്ടുവന്നിട്ടുള്ള ചട്ടങ്ങളനുസരിച്ച് പതിച്ചു കൊടുത്തിട്ടുള്ള ഭൂമിയുടെ ഉടമസ്ഥരെയും അവരുടെ പിന്തുടർച്ചക്കാരെയും അവരിൽനിന്ന് വിലയ്ക്ക് വാങ്ങിയിട്ടുള്ള കൈവശക്കാരെയും ഉൾപ്പെടെ വാണിജ്യ ആവശ്യത്തിന് കെട്ടിടങ്ങൾ നിർമിച്ചവരെയും ഗുരുതരമായി ബാധിക്കുന്നതാണ് 2023-ലെ പട്ടയ നിയമ ഭേദഗതിയും പുതിയ ചട്ടങ്ങളും. നിലവിൽ വിപണിവിലയേക്കാൾ കൂടിയ ന്യായവില രേഖപ്പെടുത്തിയ പല സ്ഥലങ്ങളും കേരളത്തിലുണ്ട്. ഇതുമൂലം ക്രമവത്കരണത്തിന് ഏർപ്പെടുത്തിയിട്ടുള്ള വിവിധ സ്ലാബുകൾ അശാസ്ത്രീയവും വൻ ബാധ്യത വരുത്തുന്നതുമാണ്.1960-ലെ നിയമത്തിന്‍റെ അടിസ്ഥാനത്തിൽ ഉണ്ടാക്കിയിട്ടുള്ള ചട്ടങ്ങൾ പ്രകാരം പതിച്ചുനൽകിയിട്ടുള്ള ഭൂമിയിൽ പുതിയ നിർമിതികൾ നടത്തുന്നതിന് അനുമതിയില്ല. ഇക്കാരണത്താൽ നിയമ ഭേദഗതിയും ചട്ടങ്ങളും ഉണ്ടായപ്പോഴും നിർമാണ നിരോധനത്തിന് പരിഹാരം ഉണ്ടായിട്ടില്ല. നിലവിലിരിക്കുന്ന നിയമങ്ങൾക്കും വ്യവസ്ഥകൾക്കും അനുസൃതമായി കെട്ടിട നിർമാണങ്ങൾ അനുവദിക്കുമെന്ന് പറയുന്നതിന് പകരം സർക്കാരിന് ബോധ്യപ്പെട്ടാൽ കെട്ടിടം നിർമിക്കാൻ അനുമതി നൽകും എന്ന് പറയുന്നത് ഉദ്യോഗസ്ഥ അഴിമതിക്കും സ്വജന പക്ഷപാതത്തിനും വഴിയൊരുക്കും. അന്തഃസത്ത അട്ടിമറിച്ചു 1960-ലെ പട്ടയ നിയമത്തിന്‍റെ അന്തഃസത്ത തന്നെ നിയമ ഭേദഗതിയിലൂടെ അട്ടിമറിക്കപ്പെട്ടിരിക്കുന്നു എന്നതാണ് യാഥാർഥ്യം. ഭൂമിയുടെ മൂല്യം കുറയുന്നത് മൂലം അധിക ഈടു വസ്തു ആവശ്യപ്പെടാൻ ബാങ്കുകൾ നിർബന്ധിതരാവും.വൻ പിഴയടയ്ക്കേണ്ടിവരുന്ന കെട്ടിട ഉടമയ്ക്കുണ്ടാകുന്ന അധികഭാരം വാടകക്കാരിലേക്കും നീളും. കർഷകരെയും ഇതു പ്രതികൂലമായി ബാധിക്കും. കർഷകരുടെ കൈവശമുള്ള ഭൂമി റോഡ്, ടൂറിസം വികസനം വളർന്നുവരുന്പോൾ വാണിജ്യ മൂല്യമുള്ളതായി മാറുന്ന സാഹചര്യം നിയമഭേദഗതിയിലൂടെ തടഞ്ഞിരിക്കുകയാണ്. പുതിയ ചട്ടം വന്നാലും വാണിജ്യാവശ്യത്തിനു ഉപയോഗിക്കണമെങ്കിൽ വലിയ തുക ഫീസ് അടച്ച് ഭൂമി തരം മാറ്റേണ്ടി വരും. നിർമാണ പ്രവർത്തനങ്ങൾക്ക് നിയന്ത്രണങ്ങൾ ഏർപ്പെടുത്തുന്നതോടെ നേരിട്ടും അല്ലാതെയുമുള്ള തൊഴിൽ മേഖലകൾ പ്രതിസന്ധിയിലാവുകയും തൊഴിലാളികൾക്ക് ഉപജീവനമാർഗം പോലും ഇല്ലാതാവുകയും ചെയ്യും. 2024 ജൂണ്‍ ഏഴുവരെ നിർമിച്ചിട്ടുള്ളവയ്ക്കു മാത്രമേ നിയമ ഭേദഗതി ബാധകമാകൂ. ഇടുക്കിയിൽ ഇനിയും ലഭിക്കാനുള്ള ഒരു ലക്ഷം പട്ടയങ്ങൾ നിയമത്തിന് പുറത്താകുന്പോൾ പട്ടയമില്ലാത്ത ഇടുക്കിയിലെ 50ശതമാനം വ്യാപാര സ്ഥാപനങ്ങളും നിയമവിരുദ്ധ നിർമാണമായി മുദ്രയടിക്കപ്പെടും. നിയമങ്ങളും വ്യവസ്ഥകളും പാലിച്ച് സർക്കാർ നിശ്ചയിച്ച എല്ലാ ഫീസുകളും അടച്ച് നിർമിക്കപ്പെട്ട കെട്ടിടങ്ങൾ മറ്റൊരു നിയമത്തിലൂടെ നിയമവിരുദ്ധമാക്കുകയും അതിനു പിഴ അടയ്ക്കാൻ നിർബന്ധിക്കുകയും ചെയ്യുന്നത്‌ ഭരണഘടനാവിരുദ്ധമാണ്. ബാധ്യത അടിച്ചേൽപ്പിക്കും സങ്കീർണതകൾ നിറഞ്ഞതും ജനങ്ങളുടെ മേൽ സാന്പത്തിക ബാധ്യതകൾ അടിച്ചേൽപ്പിക്കുന്നതുമായ പുതിയ ചട്ടത്തിലെ വ്യവസ്ഥകൾ പിൻവലിച്ച് 1964ലെ ചട്ടം നാലിൽ ഉൾപ്പെടെ 12 വിവിധ ചട്ടങ്ങളിൽ വീടിനും കൃഷിക്കും എന്നു പറയുന്ന ഭാഗത്ത് മുൻകാലപ്രാബല്യത്തോടെ മറ്റാവശ്യങ്ങൾക്കും എന്ന് രേഖപ്പെടുത്തി പുതിയ ചട്ടം കൊണ്ടുവന്ന് പ്രശ്നം പരിഹരിക്കാൻ തയാറാകണമെന്നതാണ് വ്യാപാരി വ്യവസായി ഏകോപന സമിതിയുടെ ആവശ്യം. ഈ വിഷയം ഉന്നയിച്ച് പതിനഞ്ചിന് തിരുവനന്തപുരത്ത് സെക്രട്ടേറിയറ്റിനു മുന്നിൽ രാവിലെ 11 മുതൽ സത്യഗ്രഹ സമരം നടത്തും. കേരള വ്യാപാരി വ്യവസായി ഏകോപന സമിതി സംസ്ഥാന പ്രസിഡന്‍റ് രാജു അപ്സര ഉദ്ഘാടനം ചെയ്യുമെന്ന് ജില്ലാ പ്രസിഡന്‍റ് സണ്ണി പൈന്പിള്ളിൽ പത്ര സമ്മേളനത്തിൽ അറിയിച്ചു. ചട്ടഭേദഗതിയുമായി ബന്ധപ്പെട്ടുള്ള ജനകീയ ബോധവത്കരണത്തിന്‍റെ ഭാഗമായി ഒന്പതിന് നെടുങ്കണ്ടം, പത്തിന് രാജാക്കാട്, രാജകുമാരി, 11നു കുമളി, കട്ടപ്പന, 12നു അടിമാലി എന്നിവിടങ്ങളിൽ യോഗങ്ങൾ നടത്തും. പത്ര സമ്മേളനത്തിൽ ജില്ലാ വർക്കിംഗ് പ്രസിഡന്‍റ് കെ.ആർ. വിനോദ്, സെക്രട്ടേറിയറ്റ് മെംബർ ഡയസ് ജോസ്, തൊടുപുഴ മർച്ചന്‍റ്സ് അസോസിയേഷൻ പ്രസിഡന്‍റ് ടി.സി. രാജു, ട്രഷറർ ആർ. രമേശ്, ഓർഗനൈസർ സിബി കൊല്ലംകുടി, നിയോജക മണ്ഡലം പ്രസിഡന്‍റ് എൻ.പി. ചാക്കോ, ജില്ലാ സെക്രട്ടേറിയറ്റംഗം സി.കെ. നവാസ് എന്നിവർ പങ്കെടുത്തു.

തലചായ്ക്കാൻ ഇടമില്ലാത്തവർക്ക് ഇനി സ്വപ്നവീട്

തൊടുപുഴ: ഈസ്റ്റ് വിജ്ഞാന മാതാ വിൻസെന്‍റ് ഡിപോൾ കോണ്‍ഫറൻസിന്‍റെ നേതൃത്വത്തിൽ സ്വന്തമായി ഭവനമില്ലാത്ത 12 കുടുംബങ്ങൾക്ക് സ്വപ്നവീടൊരുക്കുന്ന പ്രവർത്തനങ്ങൾക്ക് തിരുവോണദിനത്തിൽ തുടക്കമായി. സ്വന്തമായി വീടും സ്ഥലവും ഇല്ലാത്തവരും സാന്പത്തികമായി പിന്നാക്കം നിൽക്കുന്നവരും രോഗത്താൽ വലയുന്നവരുമായ വനിതകൾ, വിധവകൾ എന്നിവരെയുമാണ് ഈ പദ്ധതിയിൽ ഉൾപ്പെടുത്തിയിരിക്കുന്നത്. നാലു സെന്‍റ് സ്ഥലത്ത് 500 ചതുരശ്രയടി വീതമുള്ള 12 വീടുകൾ നിർമിക്കാനുള്ള പദ്ധതിക്കാണ് തുടക്കം കുറിച്ചത്. കുമാരമംഗലം പഞ്ചായത്തിലെ ഏഴല്ലൂരിലാണ് പദ്ധതി നടപ്പാക്കുന്നത്. സുമനസുകൾ സംഭാവന ചെയ്ത 60 സെന്‍റ് സ്ഥലത്താണ് വീടുകൾ ഒരുങ്ങുന്നത്. വീടുകളുടെ ശിലാസ്ഥാനം കോതമംഗലം രൂപത വികാരി ജനറാൾ മോണ്‍. വിൻസെന്‍റ് നെടുങ്ങാട്ട് നിർവഹിച്ചു. വിജ്ഞാന മാതാ വിൻസെന്‍റ് ഡിപോൾ കോണ്‍ഫറൻസ് പ്രസിഡന്‍റ് കെ.കെ. ആന്‍റണി കോറോത്ത് അധ്യക്ഷത വഹിച്ചു. പ്രോജക്ട് ഷെൽട്ടർ ഡയറക്ടർ റവ. ഡോ. ജോർജ് കണ്ണന്താനം മുഖ്യ പ്രഭാഷണം നടത്തി. വിജ്ഞാനമാതാ പള്ളി വികാരി ഫാ. തോമസ് വിലങ്ങുപാറയിൽ, സെന്‍റ് വിൻസെന്‍റ് ഡിപോൾ സൊസൈറ്റി സി.സി. പ്രസിഡന്‍റ് ബേബി ജോസഫ് തെക്കേചെരുവിൽ, സെന്‍റ് വിൻസെന്‍റ് ഡി പോൾ എ.സി. പ്രസിഡന്‍റ് മൈക്കിൾ പ്ലാത്തോട്ടം, പഞ്ചായത്ത് പ്രസിഡന്‍റ് ഗ്രേസി തോമസ്, പഞ്ചായത്തംഗങ്ങളായ സാജൻ ചിമ്മിനിക്കാട്ട്, സജി ചെന്പകശേരിൽ, ഡോ. പി.സി. ജോർജ്, പ്രഫ. ജോണ്‍സണ്‍ നെടുന്പുറം എന്നിവർ പ്രസംഗിച്ചു.

"പുഴയോര ബൈപാസ് ഗതാഗതയോഗ്യമാക്കണം'

തൊടുപുഴ: പുഴയോര ബൈപാസ് റോഡിന്‍റെ പ്രവേശന കവാടം പൊളിച്ച് ഗതാഗതയോഗ്യമാക്കുന്നതിനുള്ള നടപടി സ്വീകരിക്കണമെന്ന് തൊടുപുഴ മർച്ചന്‍റ്സ് അസോസിയേഷൻ ആവശ്യപ്പെട്ടു. തൊടുപുഴ - പാലാ റോഡിനെയും വെങ്ങല്ലൂർ - കോലാനി ബൈപാസിനെയും ബന്ധിപ്പിക്കുന്ന റോഡ് പൂർണതോതിൽ ഗതാഗത യോഗ്യമാക്കണമെന്ന് ആവശ്യപ്പെട്ട് പ്രസിഡന്‍റ് രാജു തരണിയിലിന്‍റെ നേതൃത്വത്തിൽ പി.ജെ. ജോസഫ് എംഎൽഎയ്ക്ക് നിവേദനം നൽകി. വ്യാപാര സ്ഥാപനങ്ങൾ, ആശുപത്രി, സ്കൂൾ, കോണ്‍വെന്‍റുകൾ തുടങ്ങി നിരവധി സ്ഥാപനങ്ങളിലേക്ക് പോകാനുള്ള പാതയാണ് ഈ റോഡ്. റോഡ് നിർമാണം പൂർത്തിയാക്കാനാവശ്യമായ പണം ഇതിനോടകം അനുവദിച്ചെന്ന് പറയുന്നു. പിഡബ്ല്യുഡിയുടെ അനാസ്ഥ മൂലമാണ് റോഡ് ഇനിയും തുറന്നുകൊടുക്കുവാൻ സാധിക്കാത്തത്. റോഡിന്‍റെ പ്രവേശനകവാടത്തിൽ യാത്രക്കാർക്കും വാഹനങ്ങൾക്കും വെല്ലുവിളിയായി നിൽക്കുന്ന കെട്ടിടം അപകടാവസ്ഥയിലുമാണ്. വിഷയം അടിയന്തരമായി പരിഹരിക്കണമെന്ന് തൊടുപുഴ മർച്ചന്‍റ്സ് അസോസിയേഷൻ എംഎൽഎയോട് ആവശ്യപ്പെട്ടു. ഭാരവാഹികളായ സി.കെ. നവാസ്, അനിൽ പീടികപറന്പിൽ, നാസർ സൈര, ഷെരീഫ് സർഗം, കെ.പി. ശിവദാസ്, ജോസ് തോമസ് കളരിക്കൽ, എം.എച്ച്. ഷിയാസ്, ലിജോണ്‍സ് ഹിന്ദുസ്ഥാൻ, ജഗൻ ജോർജ്, സന്തോഷ് കമൽ സ്റ്റുഡിയോ, വി.എസ്. നസീർ എന്നിവർ പങ്കെടുത്തു.

ഐക്യം വിളിച്ചോതി മഹാജൂബിലി വിളംബരറാലി

മുട്ടം: സിബിഗിരി സെന്‍റ് സെബാസ്റ്റ്യൻസ് ഇടവകയുടെ നേതൃത്വത്തിൽ മുട്ടത്ത് മിശിഹായുടെ മനുഷ്യാവതാരത്തിന്‍റെ 2025-ാം മഹാജൂബിലിയോടനുബന്ധിച്ച് നൂറുകണക്കിന് വിശ്വാസികൾ പങ്കെടുത്ത മഹാജൂബിലി വിളംബര റാലി നടത്തി. ക്രിസ്തു ജീവിതത്തിലെ പ്രധാന സംഭവങ്ങൾ വിവരിക്കുന്ന ഫ്ലോട്ടുകൾക്കു പുറമേ നൂറിൽപ്പരം ക്രിസ്തു സാക്ഷ്യങ്ങൾ വിളിച്ചോതുന്ന ബാനറുകൾ, ഇടവകയിലെ 140 കുടുംബങ്ങൾ എഴുതി തയാറാക്കിയ 140 ബൈബിൾ കൈയെഴുത്ത് പ്രതികൾ എന്നിവ കൈയിലേന്തിയായിരുന്നു വിളംബര റാലി. നിയുക്ത കല്യാണ്‍ അതിരൂപത ആർച്ച്ബിഷപ് മാർ സെബാസ്റ്റ്യൻ വാണിയപ്പുരയ്ക്കൽ ജൂബിലി റാലി ഫ്ളാഗ് ഓഫ് ചെയ്തു. മുട്ടം മർത്ത്മറിയം ടൗണ്‍ പള്ളിയിൽ റാലി സമാപിച്ചു. തുടർന്ന് നടന്ന സമ്മേളനം മന്ത്രി റോഷി അഗസ്റ്റിൻ ഉദ്ഘാടനം ചെയ്തു. സെന്‍റ് സെബാസ്റ്റ്യൻസ് പള്ളി വികാരി ഫാ. ജോണ്‍ പാളിത്തോട്ടം അധ്യക്ഷത വഹിച്ചു. കത്തോലിക്ക കോണ്‍ഗ്രസ് ഗ്ലോബൽ പ്രസിഡന്‍റ് രാജീവ് കൊച്ചുപറന്പിൽ, ഇവാഞ്ചലൈസേഷൻ പാലാ രൂപത ഡയറക്ടർ റവ. ഡോ. ജോസഫ് അരിമറ്റം, അസി. വികാരി ഫാ. ജോണ്‍സണ്‍ പാക്കരന്പേൽ, കത്തോലിക്ക കോണ്‍ഗ്രസ് പാലാ രൂപത സെക്രട്ടറി എഡ്‌വിൻ ഐസക് പാന്പാറ, കുടുംബക്കൂട്ടായ്മ ഇടവകാതല പ്രസിഡന്‍റ് ജിമ്മി മ്ലാക്കുഴി, മാതൃവേദി പ്രസിഡന്‍റ് സീമ കുഴിപ്പിള്ളിൽ തുടങ്ങിയവർ പ്രസംഗിച്ചു.

ഓണം മൂഡ്: ആഘോഷിക്കാൻ എത്തിയത് 81,105 സന്ദർശകർ

തൊടുപുഴ: ഇടവിട്ടു പെയ്ത മഴ ആഘോഷങ്ങളുടെ പൊലിമ കുറച്ചെങ്കിലും ഓണാവധി ആഘോഷിക്കാൻ ജില്ലയിലേക്ക് സഞ്ചാരികളുടെ ഒഴുക്ക്. ഓണത്തോടനുബന്ധിച്ച് ജില്ലയിലെ വിനോദസഞ്ചാര കേന്ദ്രങ്ങളിലെല്ലാം വലിയ തിരക്കാണ് അനുഭവപ്പെട്ടത്. ഉത്രാടം മുതൽ അവിട്ടം വരെയുള്ള ദിവസങ്ങളിലാണ് വലിയ തോതിൽ സന്ദർശകർ എത്തിയത്. ഓണത്തിനു പിറ്റേന്ന് വാഗമണ്‍, പാഞ്ചാലിമേട്, രാമക്കൽമേട് എന്നിവിടങ്ങളിലേക്ക് സന്ദർശകപ്രവാഹമായിരുന്നു. ഈ മാസം ഒന്നുമുതൽ ആറു വരെ ഡിടിപിസിയുടെ നിയന്ത്രണത്തിലുള്ള വിനോദസഞ്ചാര കേന്ദ്രങ്ങളിലേക്കെത്തിയത് 81,105 സന്ദർശകരാണ്. ഓണത്തിനു പിറ്റേന്നാണ് ഏറ്റവും കൂടുതൽ സഞ്ചാരികൾ എത്തിയത്. 32,689 പേരാണ് അന്നു മാത്രം ജില്ലയിലെ 10 വിനോദ സഞ്ചാര കേന്ദ്രങ്ങളിലേക്ക് എത്തിയത്. ഓണത്തിന് 15,295 പേരും ഉത്രാടനാളിൽ 9,575 പേരും സന്ദർശനം നടത്തി. വാഗമണ്ണിന്‍റെ മനം മയക്കുന്ന ദൃശ്യസൗന്ദര്യം ആസ്വദിക്കാനാണ് കൂടുതൽ പേരും എത്തിയത്. മൊട്ടക്കുന്ന്, അഡ്വഞ്ചർ പാർക്ക് എന്നിവിടങ്ങളിലേക്ക് സഞ്ചാരികളുടെ ഒഴുക്കായിരുന്നു. ഓണത്തിന് വാഗമണ്‍ മൊട്ടക്കുന്നിൽ 4017 പേരും പിറ്റേന്ന് 10,195 പേരും സന്ദർശനം നടത്തി. അഡ്വഞ്ചർ പാർക്കിൽ ഓണത്തിന് 4274 പേരും പിറ്റേന്ന് 5702 സന്ദർശകരും എത്തി. രാമക്കൽമേട്ടിൽ ഒന്നു മുതൽ ആറു വരെ സന്ദർശനം നടത്തിയത് 7026 സഞ്ചാരികളാണ്. മാട്ടുപ്പെട്ടി-2318, അരുവിക്കുഴി- 1172, ശ്രീനാരായണപുരം-4101, പാഞ്ചാലിമേട്-8093, ഹിൽവ്യൂപാർക്ക് -5273, മൂന്നാർ ബൊട്ടാണിക്കൽ ഗാർഡൻ- 6098, ആമപ്പാറ-2222 എന്നിങ്ങനെയാണ് ഡിടിപിസിയുടെ മറ്റ് വിനോദസഞ്ചാര കേന്ദ്രങ്ങളിലെത്തിയവരുടെ കണക്ക്. കഴിഞ്ഞ വർഷം ഓണം നാളുകളിൽ എത്തിയതിനേക്കാൾ കൂടുതൽ സന്ദർശകർ ഇത്തവണ ജില്ലയിൽ എത്തിയതായാണ് കണക്കുകൾ സൂചിപ്പിക്കുന്നത്. കഴിഞ്ഞ വർഷം ഓണത്തിന് 13,724 പേർ സന്ദർശിച്ചപ്പോൾ ഈ വർഷം 15,295 പേരാണ് ഓണനാളിൽ വിവിധ ടൂറിസം കേന്ദ്രങ്ങൾ സന്ദർശിച്ചത്. അവിട്ടം നാളിൽ കഴിഞ്ഞ വർഷം 27725 പേർ എത്തിയ സ്ഥാനത്ത് ഈ വർഷം 32689 പേരെത്തി ഏതാനും മാസങ്ങളായി പ്രതികൂല കാലാവസ്ഥ മൂലം പ്രതിസന്ധി നേരിടുകയായിരുന്ന ജില്ലയിലെ ടൂറിസം മേഖലയ്ക്ക് ഉണർവു നൽകാൻ ഓണം നാളുകൾക്കായി. എന്നാൽ, കാലാവസ്ഥ പ്രതികൂലമായതിനാൽ പ്രതീക്ഷിച്ച അത്രയും സന്ദർശകരുടെ ഒഴുക്ക് ഇത്തവണ ഓണത്തിന് ഉണ്ടായില്ലെന്ന് ടൂറിസം രംഗത്ത് പ്രവർത്തിക്കുന്നവർ പറഞ്ഞു. ഇതിനു പുറമേ വനംവകുപ്പിന്‍റെ നിയന്ത്രണത്തിലുള്ള തേക്കടി, ഇരവികുളം ദേശീയോദ്യാനം, തൊമ്മൻകുത്ത്, മലങ്കര, അയ്യപ്പൻകോവിൽ, ആനയിറങ്കൽ എന്നിവിടങ്ങളിലും ഒട്ടേറെ സന്ദർശകർ ഓണത്തോടനുബന്ധിച്ച് അവധി ആഘോഷിക്കാനെത്തി. ഇടുക്കി, ചെറുതോണി ഡാമുകൾ സന്ദർശിക്കാൻ ഓണക്കാലത്ത് അവസരം ലഭിച്ചതോടെ ഇവിടേക്ക് കുടുംബസമേതം ആളുകൾ എത്തി. ഈ മാസം ഒന്നിനാണ് ഇടുക്കി, ചെറുതോണി അണക്കെട്ടുകൾ കാണാൻ സന്ദർശകർക്ക് അനുമതി നൽകിയത്. നവംബർ 30 വരെ സന്ദർശിക്കാൻ അനുമതിയുണ്ട്. സന്ദർശകർക്കായി ബോട്ടിംഗും ഒരുക്കിയിട്ടുണ്ട്. മുതിർന്നവർക്ക് 150 രൂപയും കുട്ടികൾക്ക് 100 രൂപയുമാണ് ഡാം സന്ദർശനകത്തിന് ഈടാക്കുന്നത്. ഓണത്തോടനുബന്ധിച്ച് കേരള -തമിഴ്നാട് അതിർത്തിയായ കന്പത്തെ മുന്തിരിപ്പാടങ്ങൾ സന്ദർശിക്കാനും മലയാളി കുടുംബങ്ങൾ കൂട്ടത്തോടെയെത്തി. പന്തലുകളിൽ പഴുത്തു പാകമായിക്കിടക്കുന്ന മുന്തിരിക്കുലകൾ കാണാൻ ആയിരക്കണക്കിന് സന്ദർശകരാണ് കന്പത്തെ മുന്തിരിപ്പാടങ്ങളിലേക്ക് ഒഴുകിയെത്തിയത്.

വിശ്വാസികളുടെ സംഗമഭൂമിയായി ഇടുക്കി മരിയൻ തീർഥാടനം

രാജകുമാരി: മരിയൻ ഭക്തരുടെ സംഗമഭൂമിയായി രൂപതാ മരിയൻ തീർഥാടനം. രാജകുമാരി ദൈവമാതാ പള്ളിയിലെ എട്ടുനോമ്പാചരണത്തിന്‍റെയും പരിശുദ്ധ കന്യകമറിയത്തിന്‍റെ പിറവിത്തിരുനാളാഘോഷത്തിന്‍റെയും ഭാഗമായാണ് ഇടുക്കി രൂപത മരിയൻ തീർഥാടനം നടത്തിയത്. വെള്ളിയാഴ്ച ഉച്ചകഴിഞ്ഞ് മൂന്നിന് അടിമാലി സെന്‍റ് ജൂഡ് തീർഥാടന ദേവാലയത്തിൽനിന്ന് ആരംഭിച്ച തീർഥാടനത്തിൽ 15000ത്തോളം തീർഥാടകർ പങ്കെടുത്തു. രാത്രി 12ന് രാജാക്കാട് പള്ളിയിൽ സമാപിച്ചു. രണ്ടാം ദിവസമായ ഇന്നലെ രാവിലെ 9.45ന് രാജാക്കാട് ക്രിസ്തുരാജാ ഫൊറോന ദേവാലയത്തിൽനിന്നാണ് രാജകുമാരി ദൈവമാതാ തീർഥാടന ദേവാലയത്തിലേക്ക് തീർഥാടനം നടത്തിയത്. ഇടുക്കി ബിഷപ് മാർ ജോൺ നെല്ലിക്കുന്നേലിന്‍റെ നേതൃത്വത്തിൽ നടന്ന തീർഥാടനം രാജകുമാരിയിലെത്തിയപ്പോൾ സീറോ മലബാർ സഭാ മേജർ ആർച്ച്ബിഷപ് മാർ റാഫേൽ തട്ടിലും പങ്കുചേർന്നു. വികാരി ജനറാൾമാരായ മോൺ. ജോസ് കരിവേലിക്കൽ, മോൺ. ഏബ്രാഹം പുറയാറ്റ്, രാജാക്കാട് ഫൊറോന വികാരി ഫാ. മാത്യു കരോട്ടുകൊച്ചറയ്ക്കൽ, വിവിധ ഫൊറോന വികാരിമാർ എന്നിവർ നേതൃത്വം നൽകി. രൂപതയിലെ മുഴുവൻ വൈദികരും സമർപ്പിതരും നൂറ്റൻപതിലേറെ ഇടവകകളിൽനിന്നുള്ള വിശ്വാസികളുമാണ് തീർഥാടനത്തിൽ അണിനിരന്നത്. പതിനയ്യായിരത്തോളം വിശ്വാസികൾ തീർഥാടനത്തിൽ പങ്കെടുത്തു. വെള്ളിയാഴ്ച വരെയുണ്ടായിരുന്ന മഴയെത്തുടർന്ന് സംഘാടകർക്ക് ഏറെ ആശങ്കയുണ്ടായിരുന്നെങ്കിലും മഴ മാറിനിന്നതോടെ ജനപങ്കാളിത്തം കൊണ്ട് ശ്രദ്ധേയമായ തീർഥാടനയാത്രയിൽ നാനാജാതി മതസ്ഥർ പങ്കെടുത്തെന്ന് മാർ ജോൺ നെല്ലിക്കുന്നേൽ പറഞ്ഞു. തീർഥാടകരെ രാജാക്കാട് ടൗണിൽ മതസൗഹാർദ കൂട്ടായ്മ ഭാരവാഹികളുംഎൻആർ സിറ്റി, രാജകുമാരി എന്നിവിടങ്ങളിൽ എസ്എൻഡിപി, മർച്ചന്‍റ്സ്, വൈഎംസിഎ, യാക്കോബായ,ക്നാനായ പള്ളി കമ്മിറ്റി ഭാരവാഹികളും സ്വീകരിച്ചു.രാജാക്കാട്നിന്നുള്ള തീർഥാടന യാത്രയ്ക്ക് മുമ്പായി ചെമ്മണ്ണാറിൽനിന്നും മുരിക്കുംതൊട്ടിയിൽനിന്നും തീർഥാടന പദയാത്രകൾ രാജകുമാരി പള്ളിയിലെത്തി. ജപമാല കൈയിലേന്തി പ്രാർഥനകളുമായാണ് വിശ്വാസികൾ തീർഥാടനത്തിൽ പങ്കെടുത്തത്. ഇടവക വികാരി മോൺ. ജോസ് നരിതൂക്കിലിന്‍റ നേതൃത്വത്തിൽ രാജകുമാരി പള്ളിയങ്കണത്തിൽ മരിയൻ തീർഥാടനത്തിന് സ്വീകരണം നൽകി.നിരവധിയായ വാഹനങ്ങളിൽ ക്രമീകരിച്ച ഫ്ലോട്ടുകളും റാലിയിൽ അണിനിരന്നിരുന്നു. മതസൗഹാർദ കൂട്ടായ്മ തീർഥാടത്തിന് സ്വീകരണം നൽകി രാജാക്കാട്: രാജാക്കാട് മത സൗഹാർദ കൂട്ടായ്മയുടെ നേതൃത്വത്തിൽ ഇടുക്കി രൂപത മരിയൻ തീർഥാടനത്തിന് സ്വീകരണം നൽകി. 2019 ൽ ഒന്നാം തീർഥാടനം നടന്നപ്പോൾ മുതൽ വികസന കൂട്ടായ്മ ഭാരവാഹികൾ ഇടുക്കി മെത്രാൻ മാർ ജോൺ നെല്ലിക്കുന്നേലിന് സ്വീകരണം നൽകിയിരുന്നു.

രാജാക്കാട് പള്ളി വികാരി ഫാ. ജോബി വാഴയിൽ കൺവീനറായിട്ടാണ് ആറു വർഷങ്ങൾക്ക് മുമ്പ് രാജാക്കാട്ടെ എല്ലാ മതനേതാക്കളെയും മർച്ചന്‍റ്സ് അസോസിയേഷൻ ഭാരവാഹികളെയും തൊഴിലാളി നേതാക്കളെയും കൂട്ടി രാജാക്കാട് വികസന കൂട്ടായ്മ എന്ന പേരിൽ മത സൗഹാർദ കൂട്ടായ്മയ്ക്ക് രൂപം നൽകിയത്. തുടർന്ന് രാജാക്കാട് പള്ളിത്തിരുനാൾ, ക്ഷേത്രം ഉത്സവം, ഇഫ്താർ വിരുന്ന്, ക്രിസ്മസ് കരോൾ ഇവയെല്ലാം എല്ലാ മതസ്ഥരും വ്യാപാരികളും ഒന്നുചേർന്ന് നടത്തി സമൂഹത്തിന് മാതൃക കാട്ടിയിരുന്നു. അതിന്‍റെ ഭാഗമായാണ് അഞ്ചാം വർഷവും ഇടുക്കി രൂപത മരിയൻ തീർഥാടനത്തിന് സ്വീകരണമൊരുക്കിയത്. റോഡിൽ ചുവപ്പ് പരവതാനി വിരിച്ച് പൂക്കൾ വിതറിയാണ് തീർഥാടകരെ വരവേറ്റത്. മതസൗഹാർദ കൂട്ടായ്മ ചെയർമാൻ എം.ബി. ശ്രീകുമാർ, കൺവീനർ ഫാ. മാത്യു കരോട്ടുകൊച്ചറയ്ക്കൽ, കോ-ഒാഡിനേറ്റർ വി.എസ്. ബിജു, ഇമാം മൻസൂർ ബാഖവി, കെ.എം. സുധീർ, പി.ബി. മുരളിധരൻനായർ, എം.ആർ. അനിൽകുമാർ, ജമാൽ ഇടശേരിക്കുടി, സജിമോൻ കോട്ടയ്ക്കൽ, വി.സി. ജോൺസൺ, അബ്ദുൾകലാം, സിബി കൊച്ചുവള്ളാട്ട്, കെ.ജി. മഹേഷ്, വി.വി. ബാബു, ജോഷി കന്യാക്കുഴി, ടൈറ്റസ് ജേക്കബ് എന്നിവർ ചേർന്ന് മരിയൻതീർഥാടന ക്യാപ്റ്റൻ മാർ ജോൺ നെല്ലിക്കുന്നേലിന് സ്വീകരണം നൽകി. രാജാക്കാട്ട് വൈഎംസിഎ ഭാരവാഹികളും എൻആർ സിറ്റിയിൽ എസ്എൻഡി പി ഭാരവാഹികളും സെന്‍റ്് മേരീസ് ക്നാനായ പള്ളി ഭാരവാഹികളും മർച്ചന്‍റ്്സ് അസോസിയേഷൻ ഭാരവാഹികളും രാജകുമാരിയിൽ ഗ്രാമപഞ്ചായത്ത് അംഗങ്ങളും രാജകുമാരി ഗലീലക്കുന്ന് യാക്കോബായ പള്ളി ഭാരവാഹികളും രാജകുമാരി വൈഎംസിഎ ഭാരവാഹികളും തീർഥാടനത്തിന് സ്വീകരണം നൽകി. പ്രേഷിതപ്രവർത്തനം ഈശോയിലേക്ക് നയിക്കുന്നതാകണം: റവ. ഡോ. ജോസഫ് വെള്ളമറ്റം ഉപ്പുതറ: പ്രേഷിത പ്രവർത്തനം ഈശോയിലേക്ക് നയിക്കുന്നതാകണമെന്ന് രൂപത പ്രോട്ടോ സിഞ്ചെല്ലൂസ് റവ.ഡോ. ജോസഫ് വെള്ളമറ്റം. ഉപ്പുതറയിൽ നടത്തിയ കാഞ്ഞിരപ്പള്ളി രൂപത വിശ്വാസജീവിതപരിശീലനത്തിന്‍റെ ഭാഗമായി ഹൈറേഞ്ച് മേഖല മരിയൻ തീർഥാടനത്തിൽ സന്ദേശം നൽകുകയായിരുന്നു റവ. ഡോ. ജോസഫ് വെള്ളമറ്റം. പരിശുദ്ധ അമ്മ ജീവിതം കൊണ്ടും പ്രവൃത്തി കൊണ്ടും എല്ലാവരേയും ഈശോയിലേക്ക് ആനയിച്ചു. എല്ലാ കാര്യങ്ങളിലും ദൈവഹിതം ദർശിച്ച പരിശുദ്ധ അമ്മയുടെ മാതൃക അനുകരണാർഹമാണെന്നും അദ്ദേഹം കൂട്ടിച്ചേർത്തു. ഹൈറേഞ്ച് മേഖലയിൽ വിശ്വാസപരിശീലനത്തിൽ ഏർപ്പെട്ടിരിക്കുന്ന ഒമ്പതാം ക്ലാസ് വിദ്യാർഥികൾക്കായി ഒരുക്കിയ തീർഥാടനം രാവിലെ 9.30ന് യൂദാ തദേവൂസ് കപ്പേളയിൽനിന്നു ഉപ്പുതറ ഫൊറോന വികാരി ഫാ. ഡൊമിനിക് കാഞ്ഞിരത്തിനാൽ ഫ്ലാഗ് ഓഫ് ചെയ്തു. തുടർന്ന് ജപമാല പ്രാർഥനയോടുകൂടി മരിയൻ റാലി ഉപ്പുതറ സെന്‍റ് മേരീസ് പള്ളിയിലേക്ക് നടത്തി. മരിയൻ തീർഥാടനത്തിന് രൂപത വിശ്വാസജീവിതപരിശീലന കേന്ദ്ര ഡയറക്ടർ ഫാ. തോമസ് വാളന്മനാൽ, മിഷൻ ലീഗ് അസിസ്റ്റന്‍റ് ഡയറക്ടർ ഫാ. ബോബി വേലിക്കകത്ത്‌, രൂപത എക്സിക്യൂട്ടീവ് അംഗങ്ങൾ എന്നിവർ നേതൃത്വം നൽകി. ആനിക്കുഴിക്കാട്ടിൽ പിതാവിനെ അനുസ്മരിച്ച് വലിയ ഇടയൻ അഞ്ചാമത് ഇടുക്കി രൂപത മരിയൻ തീർഥാടനത്തിൽ മാർ മാത്യു ആനക്കുഴിക്കാട്ടിലിനെ സീറോ മലബാർ സഭയുടെ തലവൻ മാർ റാഫേൽ തട്ടിൽ വൈകാരികമായി അനുസ്മരിച്ചു. കോതമംഗലം രൂപത വിഭജിച്ച് ഇടുക്കി രൂപത ആരംഭിച്ചപ്പോൾ ഈ രൂപതയ്ക്കും പറയാനുണ്ടായിരുന്നത് പരാധീനതകളുടെ കഥകളാണ്. യൗവനത്തിലേക്ക് കാലൂന്നിയ ഈ രൂപതയെ നാം ഇന്ന് കാണുന്ന അവസ്ഥയിലേക്ക് വളർത്തുവാൻ വലിയ പങ്കു വഹിച്ച വ്യക്തിത്വമാണ് രൂപതയുടെ പ്രഥമ മെത്രാനായ മാർ മാത്യു ആനക്കുഴിക്കാട്ടിൽ. ഇവിടത്തെ സാധാരണക്കാരന്‍റെ ദുരിതങ്ങൾക്ക് പരിഹാരം കാണാൻ ഇവിടത്തെ കുടുംബങ്ങളെ ഭദ്രമാക്കാൻ അദ്ദേഹത്തിന് സാധ്യമായ പ്രവർത്തനങ്ങൾ എല്ലാം നിർവഹിച്ചിട്ടുണ്ട്. അതുപോലെതന്നെ പൂർവികരായ പഴയ തലമുറയുടെ കഠിനാധ്വാനവും നിസ്വാർഥമായ ശുശ്രൂഷകളുമാണ് ഈ നാടിനെ വളർച്ചയുടെ കുതിപ്പിലേക്ക് കൈപിടിച്ചുയർത്തിയത്. മാർ മാത്യു ആനിക്കുഴിക്കാട്ടിൽ പിതാവിന്‍റെയും പൂർവികരായ പഴയ തലമുറയുടെയും ദീപ്തമായ ഓർമകൾക്ക് മുന്പിൽ സീറോ മലബാർ സഭയുടെ പ്രണാമം അർപ്പിക്കുന്നുവെന്ന് മാർ റാഫേൽ തട്ടിൽ പറഞ്ഞു. കുടിയേറ്റജനത വിശ്വാസത്തിന്‍റെ സൂക്ഷിപ്പുകാർ: മാർ റാഫേൽ തട്ടിൽ രാജാക്കാട്: പഴമക്കാരുടെ ജീവിത സുകൃതങ്ങളെയും വിശ്വാസബോധ്യങ്ങളെയും നാം നന്ദിയോടെ അനുസ്മരിക്കണമെന്ന് സീറോ മലബാർ സഭാ മേജർ ആർച്ച്ബിഷപ് മാർ റാഫേൽ തട്ടിൽ. കുടിയേറ്റ ജനതയുടെ കരുത്തുള്ള വിശ്വാസത്തിൽ പടുത്തുയർത്തപ്പെട്ട നാടാണ് ഇടുക്കി എന്നും അദ്ദേഹം പറഞ്ഞു. കുടിയേറ്റ കാലത്തെ കഷ്ടതകളുടെ നാളുകളിൽ ജീവിതത്തോട് ചേർത്തുപിടിച്ച വിശ്വാസമാണ് ഈ നാടിനെ നാം ഇന്ന് അനുഭവിക്കുന്ന വിധത്തിലേക്ക് എത്തിച്ചത്.

തീർഥാടനം രാജകുമാരി ദേവാലയത്തിൽ എത്തിച്ചേർന്നപ്പോൾ വിശുദ്ധ കുർബാനയ്ക്ക് മുഖ്യകാർമി കത്വം വഹിച്ച് പ്രസംഗിക്കുക യായിരുന്നു അദ്ദേഹം. മലയോര പ്രദേശത്ത് നടത്തുന്ന ഈ സുദീർഘമായ തീർഥാടനം പഴമക്കാർ പകർന്നു നൽകിയ കരുത്തുള്ള വിശ്വാസത്തിന്‍റെ പരസ്യമായ പ്രകടനം ആണെന്നും അദ്ദേഹം പറഞ്ഞു. രൂപത വികാരി ജനറാൾമാരായ മോണ്‍. ജോസ് കരിവേലിക്കൽ, മോണ്‍. ഏബ്രാഹം പുറയാറ്റ്, മോണ്‍. ജോസ് നരിതൂക്കിൽ, ഫാ. മാത്യു കരോട്ട്കൊച്ചറയ്ക്കൽ, ഫാ. മാർട്ടിൻ പൊൻപനാൽ, ഫാ. ജിൻസ് കാരയ്ക്കാട്ട്, ഫാ. ജോസഫ് മാതാളികുന്നേൽ, ജോർജ് കോയിക്കൽ, സാം സണ്ണി, സെസിൽ ജോസ് എന്നവർ നേതൃത്വം നൽകി.

ഷോപ്പിംഗ് കോംപ്ലക്സ് കടമുറികളുടെ താക്കോൽദാനം ഇന്ന്

തൊടുപുഴ: നഗരസഭയുടെ മങ്ങാട്ടുകവലയിലുള്ള ബസ് സ്റ്റാൻഡ് ഷോപ്പിംഗ് കോംപ്ലക്സിലെ കടമുറികളുടെ പ്രവർത്തനോദ്ഘാടനവും താക്കോൽദാനവും ഇന്നു രാവിലെ 10ന് നടക്കും. പി.ജെ. ജോസഫ് എംഎൽഎ താക്കോൽദാനവും നിർവഹിക്കും. മുനിസിപ്പൽ ചെയർമാൻ കെ. ദീപക് അധ്യക്ഷത വഹിക്കും. ഹാരീസ് ബീരാൻ എംപി മുഖ്യാതിഥിയായിരിക്കും. നഗരസഭാ സ്ഥിരം അധ്യക്ഷൻമാർ, കൗണ്‍സിലർമാർ, വിവിധ കക്ഷി നേതാക്കൾ, വ്യാപാരി വ്യവസായികൾ, ബസ് ഓണേഴ്സ് അസോസിയേഷൻ, റെസിഡന്‍റ് അസോസിയേഷൻ പ്രതിനിധികൾ എന്നിവർ പങ്കെടുക്കും. ഗ്രൗണ്ട് ഫ്ളോറിൽ 43, ഒന്നാം നില-41, രണ്ടാം നില -40 എന്നി ക്രമത്തിൽ 125 മുറികളാണ് പൂർത്തീകരിച്ചിട്ടുള്ളത്. കിഴക്കൻ മേഖലയുടെ വികസനത്തിന് വഴിയൊരുക്കുന്നതാണ് ഷോപ്പിംഗ് കോംപ്ലക്സ് സമുച്ചയം. താലൂക്ക് ആശുപത്രി, ആയുർവേദ ആശുപത്രി, മൃഗാശുപത്രി,കോളജ് എന്നിങ്ങനെ പ്രധാനപ്പെട്ട നിരവധി സ്ഥാപനങ്ങൾ ഇതിനു സമീപത്തായി പ്രവർത്തിക്കുന്നുണ്ട്. ആറുവർഷം മുന്പ് നിർമാണം പൂർത്തീകരിച്ച ഷോപ്പിംഗ് കോംപ്ലക്സ് സാങ്കേതിക കാരണങ്ങളാലാണ് ഉദ്ഘാടനം നടന്നിട്ടും തുറന്നുനൽകാൻ കഴിയാതിരുന്നത്.ഫയർ എൻഒസി, 30,000 ലിറ്റർ സംഭരണ ശേഷിയുള്ള വാട്ടർ ടാങ്ക് എന്നിവ പൂർത്തിയാക്കാതിരുന്നതുമൂലമാണ് അനുമതി തടസപ്പെട്ടിരുന്നത്. ഇതു രണ്ടും പൂർത്തിയാക്കിയതോടെയാണ് ഷോപ്പിംഗ് കോംപ്ലക്സ് തുറന്നുപ്രവർത്തിക്കാനായത്. കെയുആർഡിസിയിൽനിന്നു 9.90 കോടി വായ്പയെടുത്താണ് നിർമാണം പൂർത്തീകരിച്ചത്. നഗരസഭയുടെ 10 ശതമാനം തനതുഫണ്ടും നിർമാണത്തിനായി ചെലവഴിച്ചു. എന്നാൽ 10 കോടിയിൽ താഴെ മാത്രമാണ് നിർമാണത്തിനായി ചെലവഴിക്കേണ്ടി വന്നത്. വായ്പ തുക രണ്ടുവർഷത്തിനുള്ളിൽ പൂർണമായും തിരിച്ചടയ്ക്കുകയും ചെയ്തിരുന്നു. പത്രസമ്മേളനത്തിൽ നഗരസഭാ ചെയർമാൻ കെ. ദീപക്, സ്റ്റാൻഡിംഗ് കമ്മിറ്റി ചെയർമാൻമാരായ എം.എ. കരിം, സനു കൃഷ്ണൻ, പി.ജി. രാജശേഖരൻ എന്നിവർ പങ്കെടുത്തു.

മുൻ അധ്യാപകരുടെ അനുഗ്രഹം തേടി വഴിത്തല സ്കൂളിലെ അധ്യാപകർ

വഴിത്തല: ദേശീയ അധ്യാപക ദിനാഘോഷത്തിന് മുന്നോടിയായി വഴിത്തല സെന്‍റ് സെബാസ്റ്റ്യൻസ് ഹയർ സെക്കൻഡറി സ്കൂളിലെ എട്ട് മുൻ അധ്യാപകരെ അവരുടെ വീടുകളിൽ സന്ദർശിക്കുകയും അനുഗ്രഹം തേടിയും സ്കൂളിലെ നിലവിലെ അധ്യാപകർ. പൊന്നാടയും പൂക്കളും പ്രത്യേകം തയാറാക്കിയ ആശംസാ കാർഡുകളുമായാണ് മുൻ ഹെഡ്മാസ്റ്റർമാർ ഉൾപ്പെടെയുള്ളവരുടെ വീടുകൾ സന്ദർശിച്ചത്. 1989ൽ പ്രഥമ അധ്യാപികയായി വിരമിച്ച എം.ജെ. ചിന്നമ്മ, മുൻ ഹെഡ്മാസ്റ്റർമാരായ മാത്യു ടി. പെരുന്പനാനി, സണ്ണിച്ചൻ ആന്‍റണി, എം.എ. ഒൗസേഫ്, എ. ഏലിക്കുട്ടി, എം.എ. സെബാസ്റ്റ്യൻ, മേരി സെബാസ്റ്റ്യൻ, ഇ.എ. അന്ന എന്നിവരെയാണ് സന്ദർശിച്ചത്. ഹെഡ്മിസ്ട്രസ് ജിജി ജയിംസ്, സ്റ്റാഫ് സെക്രട്ടറി ജോയൽ ചെറിയാൻ, അധ്യാപകരായ ജയ്സണ്‍ ജോസ്, സാബു ജോസ്, അമൃത ആർ. നായർ എന്നിവരുടെ നേതൃത്വത്തിലായിരുന്നു സന്ദർശനം.

റബറിന് 250 രൂപ താങ്ങുവില പ്രഖ്യാപിക്കണം: കർഷക യൂണിയൻ

മുട്ടം: റബറിന് 250 രൂപ താങ്ങുവില പ്രഖ്യാപിക്കണമെന്ന് കേരള കർഷക യൂണിയൻ മുട്ടം മണ്ഡലം കമ്മിറ്റി ആവശ്യപ്പെട്ടു. റബറിന്‍റെ ഉത്പാദനക്കുറവുള്ള സമയത്തും വിലക്കുറവ് കർഷകരെ വലയ്ക്കുകയാണ്. ഇടതുമുന്നണിയുടെ പ്രകടനപത്രിയിൽ റബറിന് 250 രൂപ വാഗ്ദാനം ചെയ്തിരുന്നുവെങ്കിലും ഇനിയും വാക്ക് പാലിച്ചിട്ടില്ലെന്നും യോഗം കുറ്റപ്പെടുത്തി. മണ്ഡലം പ്രസിഡന്‍റ് ജെയിൻ മ്ലാക്കുഴി അധ്യക്ഷത വച്ചു. കേരള കോണ്‍ഗ്രസ് സംസ്ഥാന കോ-ഓർഡിനേറ്റർ അപു ജോണ്‍ ജോസഫ് ഉദ്ഘാടനം ചെയ്തു. മികച്ച കർഷകരായി തെരഞ്ഞെടുത്തവരെ യോഗത്തിൽ ആദരിച്ചു. സംസ്ഥാന പ്രസിഡന്‍റ് വർഗീസ് വെട്ടിയാങ്കൽ മുഖ്യപ്രഭാഷണം നടത്തി. പാർട്ടി തൊടുപുഴ നിയോജക മണ്ഡലം പ്രസിഡന്‍റ് ബ്ലെയ്സ് ജി. വാഴയിൽ, സംസ്ഥാന ജനറൽ സെക്രട്ടറി എം. മോനിച്ചൻ, മണ്ഡലം പ്രസിഡൻ് അഗസ്റ്റിൻ കള്ളികാട്ട്, കെ.എ. പരീത്, പഞ്ചായത്ത് പ്രസിഡന്‍റ് മേഴ്സി ദേവസ്യ, ബ്ലോക്ക് പഞ്ചായത്തംഗം ഗ്ലോറി പൗലോസ് തുടങ്ങിയവർ പ്രസംഗിച്ചു.

ഇടമലക്കുടിയുടെ ദുരിതം അവസാനിക്കുന്നില്ല; രോഗിയെ ആശുപത്രിയിൽ എത്തിച്ചത് കാട്ടിലൂടെ ചുമന്ന്

മൂന്നാർ: റോഡില്ലാത്തതു മൂലം ഇടമലക്കുടിയിൽനിന്നു രോഗിയെ ആശുപത്രിയിൽ എത്തിച്ചത് നാലു കിലോമീറ്റർ ചുമന്ന്. ഇടമലക്കുടി കൂടല്ലാർകുടി സ്വദേശിയായ രാജകണ്ണിയെ (60) ആണ് ആദിവാസികൾ ചുമന്ന് ആശുപത്രിയിൽ എത്തിച്ചത്. ദുർഘടമായ കാനനപാതയിലൂടെ നാട്ടുകാർ മാറിമാറി ചുമന്നാണ് ആനക്കുളത്ത് എത്തിക്കുകയും അവിടെനിന്നു മാങ്കുളത്തെ സ്വകാര്യ ആശുപത്രിയിൽ എത്തിച്ചത്. രണ്ടു ദിവസമായി പനിയും ഛർദ്ദിയും ഉണ്ടായിരുന്നു. ശനിയാഴ്ച രാവിലെ ശ്വാസംമുട്ടലിനെത്തുടർന്ന് അവശനിലയിൽ ആയതോടെയാണ് നാട്ടുകാർ ആശുപത്രിയിൽ എത്തിച്ചത്. ഓഗസ്റ്റ് 24ന് സമാനമായ സാഹചര്യത്തിൽ കുടല്ലാർ ആദിവാസി കുടി സ്വദേശികളായ മൂർത്തി - ഉഷ ദന്പതികളുടെ അഞ്ചുവയസുകാരൻ മകൻ കാർത്തി മരിച്ചിരുന്നു. കാർത്തിയുടെ മുത്തശിയാണ് രാജകണ്ണി. ഇടമലക്കുടിയിലെ എത്തിച്ചേരുവാൻ വളരെ പ്രയാസമുള്ള കുടികളിൽ ഒന്നാണ് കൂടല്ലാർകുടി. ഉൾവനത്തിലുള്ള ദുർഘട പ്രദേശമായതിനാൽ പെട്ടെന്ന് എത്തിപ്പെടാനാവാത്ത കുടിയിൽനിന്നു പുറത്ത് പെട്ടെന്ന് എത്തിപ്പെടാൻ സാധിക്കുന്ന വഴിയാണ് മാങ്കുളം. കൃത്യസമയത്ത് ചികിത്സ നൽകാവാനാത്തതു മൂലം നവജാത ശിശുക്കൾ മരിച്ച സംഭവം ഉണ്ടായിരുന്നു.

പട്ടാപ്പകൽ മോഷണം: രണ്ടുപേർ പിടിയിൽ

കട്ടപ്പന: പുളിയന്മല ഗണപതി പാലം ഭാഗത്തുള്ള അഡ്വക്കറ്റ് അരുൺ വർഗീസിന്‍റെ വീട്ടിൽനിന്നു പട്ടാപ്പകൽ ഏലക്ക മോഷ്ടിച്ച രണ്ടുപേർ പിടിയിൽ. പുളിയന്മല കഞ്ഞിപ്പാറ പ്രിയ ഭവനിൽ പ്രവീൺ അയ്യപ്പൻ ( 25) പുളിയന്മല കഞ്ഞിപ്പാറ പാറക്കൽ വീട്ടിൽ വിഷ്ണു കൃഷ്ണൻ ( 24 )എന്നിവരെ വണ്ടൻമേട് പോലീസ് അറസ്റ്റ് ചെയ്തു. സ്റ്റോറിൽ ഉണക്കാൻ സൂക്ഷിച്ച രണ്ടു ചാക്ക് പച്ച ഏലക്ക വിൽപ്പന നടത്തിയ പ്രവീണിനെ തമിഴ്നാട് തേനിയിൽനിന്നും വിഷ്ണുവിനെ കഞ്ഞിപ്പാറയിൽ വച്ചും ആണ് അറസ്റ്റ് ചെയ്തത്. കട്ടപ്പന ഡിവൈഎസ്പി നിഷാദ് മോന്‍റെ നിർദേശപ്രകാരം വണ്ടൻമേട് പോലീസ് സ്റ്റേഷൻ എസ്എച്ഒ ഷൈൻകുമാർ, എസ്ഐ ബിനോയി ഏബ്രഹാം, പ്രകാശ് ജി, വിനോദ് കുമാർ കെ എൻ , എ എസ് ഐ മാരായ കെ ടി ഷിജോ, ജോസ് സെബാസ്റ്റ്യൻ, ജയിംസ് ജോർജ്, എസ്‌സിപിഒമാരായ എൻ. ജയൻ, ജയമോൻ മാത്യു, സലിം മുഹമ്മദ്, പ്രശാന്ത് കെ. മാത്യു, സിപിഒമാരായ സ്റ്റെനിൻ, ബിനു കെ. ജോൺ എന്നിവർ ചേർന്നാണ് പ്രതിയെ അറസ്റ്റ് ചെയ്തത്.

സാമൂഹ്യവിരുദ്ധ വിളയാട്ടം; ജീപ്പിന്‍റെ ബ്രേക്ക് കേബിൾ മുറിച്ചുമാറ്റി; കുടുംബാംഗങ്ങൾ രക്ഷപ്പെട്ടത് തലനാരിഴയ്ക്ക്

അടിമാലി: കൊന്നത്തടി മുനിയറയിൽ വീടിനോടു ചേർന്ന് നിർത്തിയിട്ടിരുന്ന ജീപ്പിന്‍റെ ബ്രേക്ക് കേബിൾ സാമൂഹ്യവിരുദ്ധർ മുറിച്ചനിലയിൽ കണ്ടെത്തി. മുനിയറ തിങ്കൾക്കാട് ബിനു ഇലവുങ്കലിന്‍റെ ജീപ്പിന്‍റെ ബ്രേക്ക് കേബിളാണ് മുറിച്ച നിലയിൽ കണ്ടെത്തിയത്. കേബിൾ മുറിച്ചത് അറിയാതെ ജീപ്പ് ഇറക്കം ഇറങ്ങിയപ്പോൾ ബ്രേക്ക് നഷ്ടപ്പെട്ട് ഒരു കല്ലിൽ തട്ടി നിൽക്കുകയായിരുന്നു. ബിനുവിന്‍റെ മക്കൾ രണ്ടുപേരുമായിരുന്നു ജീപ്പിൽ ഉണ്ടായിരുന്നുത്. ഇരുവരും തലനാരിഴയ്ക്കാണ് രക്ഷപ്പെട്ടത്. സംഭവത്തെത്തുടർന്ന് ബിനു വെള്ളത്തൂവൽ പോലീസ് സ്റ്റേഷനിൽ പരാതി നൽകി. പോലീസ് സ്ഥലത്തെത്തി അന്വേഷണം ആരംഭിച്ചു. സാമൂഹ്യവിരുദ്ധരുടെ ശല്യം മേഖലയിൽ രൂക്ഷമാണ്. രാത്രികാലങ്ങളിൽ പോലീസ് പട്രോളിംഗ് അടിയന്തരമായി ഏർപ്പെടുത്തണമെന്നും നാട്ടുകാർ ആവശ്യപ്പെട്ടു.

സബ് രജിസ്ട്രാർ ഓഫീസ് ആലക്കോട്ട് സ്ഥാപിക്കും

ആലക്കോട്: കാരിക്കോട് സബ് രജിസ്ട്രാർ ഓഫീസ് ആലക്കോട്ടേക്കു മാറ്റിസ്ഥാപിക്കുന്ന നടപടികൾക്ക് തുടക്കമായി. ഇതിന്‍റെ ഭാഗമായി നിർമിക്കുന്ന കെട്ടിടത്തിന്‍റെ ശിലാസ്ഥാപനം ആലക്കോട് ഡെവലപ്മെന്‍റ് സൊസൈറ്റി ചെയർമാൻ തോമസ് മാത്യു കക്കുഴി, കണ്‍വീനർ കെ.സി. ജോർജ്, ജില്ലാ രജിസ്ട്രാർ പി.കെ. ബിജു എന്നിവർ ചേർന്ന് നിർവഹിച്ചു. സ്വകാര്യ വ്യക്തി നൽകിയ 10 സെന്‍റ് സ്ഥലത്താണ് സബ് രജിസ്റ്റർ ഓഫീസ് നിർമിക്കുന്നത്. ആലക്കോട് ഡവലപ്മെന്‍റ് സൊസൈറ്റിയാണ് നിർമാണം ഏറ്റെടുത്തിരിക്കുന്നത്. മാത്യു വാരികാട്ട് ചടങ്ങിൽ അധ്യക്ഷത വഹിച്ചു. ഇളംദേശം ബ്ലോക്ക് പഞ്ചായത്ത് പ്രസിഡന്‍റ് ടോമി കാവാലം, സിപിഎം ജില്ലാ സെക്രട്ടേറിയറ്റംഗം മുഹമ്മദ് ഫൈസൽ, സിപിഎം ജില്ലാ കമ്മിറ്റിയംഗം കെ. എൽ. ജോസഫ്, മൂലമറ്റം ഏരിയ കമ്മിറ്റി സെക്രട്ടറി ടി .കെ. ശിവൻ നായർ, പഞ്ചായത്ത് പ്രസിഡന്‍റുമാരായ ജാൻസി മാത്യു, ബിൻസി മാത്യു, മോഹൻദാസ് പുതുശേരി, കോണ്‍ഗ്രസ് ബ്ലോക്ക് വൈസ് പ്രസിഡന്‍റ് വി.എം. ചാക്കോ, സി.വി.ജോമോൻ എന്നിവർ പ്രസംഗിച്ചു.

ചെങ്കളാറിലെ ജലക്ഷാമം ഒൻപത് കോടിയുടെ പദ്ധതി: മന്ത്രി റോഷി

തൊടുപുഴ: കാന്തല്ലൂർ ചെങ്കളാർ മേഖലയിലെ ജലക്ഷാമം പരിഹരിക്കുന്നതിന് തലച്ചൂർ കടവിൽനിന്ന് പട്ടിശേരി ഡാമിലേക്ക് വിയർ നിർമിക്കുന്നതിന് ഒൻപതു കോടിയുടെ ഭരണാനുമതി നൽകിയതായി മന്ത്രി റോഷി അഗസ്റ്റിൻ. മറയൂർ - കാന്തല്ലൂർ പ്രദേശത്ത് കൃഷി സുഗമമാക്കുന്നതിനൂം കാവേരി ട്രിബ്യൂണലിന്‍റെ ഉത്തരവ് പ്രകാരം ലഭിച്ച ജലം വിനിയോഗിക്കുന്നതിനും പാന്പാർ നദീതടത്തിലെ ജലം ഉപയോഗിക്കുന്നതിനുമായുള്ള പദ്ധതിയാണ് പട്ടിശേരി ഡാം.

നാകപ്പുഴ പള്ളിയിൽ എട്ടുനോന്പ്; പ്രധാന തിരുനാൾ നാളെ

നാകപ്പുഴ: മരിയൻ തീർഥാടന കേന്ദ്രമായ നാകപ്പുഴ സെന്‍റ് മേരീസ് പള്ളിയിൽ എട്ടുനോന്പിലെ പ്രധാന തിരുനാൾ നാളെ ആഘോഷിക്കും. ഇന്നു രാവിലെ 5.30നും ഏഴിനും വിശുദ്ധ കുർബാന, നൊവേന. 8.30നു വിശുദ്ധ കുർബാന, നൊവേന-ഫാ. പോൾ പാറക്കാട്ടേൽ, പത്തിന് വിശുദ്ധ കുർബാന, സന്ദേശം-മോണ്‍. പയസ് മലേക്കണ്ടത്തിൽ. 11.30നു ജപമാല പ്രദക്ഷിണം. 12.30നു വിശുദ്ധ കുർബാന-ഫാ.ജോണ്‍സണ്‍ വെട്ടിക്കുഴി. രണ്ടിന് വിശുദ്ധ കുർബാന-ഫാ. തോമസ് കൊട്ടാരത്തിൽ. 4.15നു പൊന്തിഫിക്കൽ കുർബാന-ബിഷപ് മാർ ജോണ്‍ നെല്ലിക്കുന്നേൽ. 6.30നു പ്രദക്ഷിണം. എട്ടിന് ആരാധന, അഖണ്ഡ ജപമാല. നാളെ പരിശുദ്ധ കന്യാമറിയത്തിന്‍റെ പിറവിത്തിരുനാളിനോടനുബന്ധിച്ച് പുലർച്ചെ മൂന്നിന് തിരിപ്രദക്ഷിണം.നാലിന് വിശുദ്ധകുർബാന-റവ. ഡോ. ജോസ് കുളത്തൂർ. 5.30നും ഏഴിനും വിശുദ്ധ കുർബാന.8.30നു വിശുദ്ധ കുർബാന-റവ. ഡോ. സെബാസ്റ്റ്യൻ നാമറ്റത്തിൽ. പത്തിന് പൊന്തിഫിക്കൽ കുർബാന, സന്ദേശം-ബിഷപ് മാർ ജോർജ് മഠത്തിക്കണ്ടത്തിൽ. 12നു പ്രദക്ഷിണം. രണ്ടിന് വിശുദ്ധ കുർബാന-ഫാ. ജോസഫ് കാരക്കുന്നേൽ, 3.30നു വിശുദ്ധകുർബാന-ഫാ.ജോസഫ് മൂർക്കാട്ടിൽ, അഞ്ചിന് വിശുദ്ധ കുർബാന-ഫാ.പോൾ കാരക്കൊന്പിൽ. ഏഴിന് വിശുദ്ധ കുർബാന-ഫാ. ബോബി തളികപറന്പിൽ. 8.30നു വിശുദ്ധ കുർബാന-ഫാ. ജീവൻ മഠത്തിൽ. എട്ടാമിടം 15നുആഘോഷിക്കും.

മർത്ത്മറിയം ടൗണ്‍പള്ളിയിൽ ശക്തീകരണ സമ്മേളനം

മുട്ടം: മർത്ത്മറിയം ടൗണ്‍പള്ളിയിൽ സമുദായ ശക്തീകരണ സമ്മേളനവും എട്ടുനോന്പിനോടനുബന്ധിച്ചുള്ള തിരുക്കർമങ്ങളും ഇന്നു നടക്കും. രാവിലെ 6.30ന് സിബിഗിരി പള്ളിയിൽ പൊന്തിഫിക്കൽ കുർബാന-ബിഷപ് മാർ സെബാസ്റ്റ്യൻ വാണിയപ്പുരയ്ക്കൽ. എട്ടിന് ഈശോയുടെ മനുഷ്യാവതാരത്തിന്‍റെ മഹാജൂബിലി വിളംബര റാലി സിബിഗിരി പള്ളിയിൽനിന്നു മർത്ത്മറിയം പളളിയിലേക്ക് നടക്കും. കുടുംബക്കൂട്ടായ്മകളും ഭക്തസംഘടനകളും റാലിക്ക് നേതൃത്വം നൽകും. 9.30നു സ്നേഹവിരുന്ന്, പത്തിന് നടക്കുന്ന സമുദായ ശക്തീകരണ സമ്മേളനം മന്ത്രി റോഷി അഗസ്റ്റിൻ ഉദ്ഘാടനം ചെയ്യും. കത്തോലിക്ക കോണ്‍ഗ്രസ് ഗ്ലോബൽ പ്രസിഡന്‍റ് രാജീവ് കൊച്ചുപറന്പിൽ മുഖ്യപ്രഭാഷണവും റവ. ഡോ. ജോസഫ് അരിമറ്റം അനുഗ്രഹ പ്രഭാഷണവും നടത്തും. 4.30നു വിശുദ്ധകുർബാന, സന്ദേശം-ഫാ. ജോണ്‍സണ്‍ പാക്കരന്പേൽ. 5.45ന് ജപമാല പ്രദക്ഷിണം, ലദീഞ്ഞ്.

എയ്ഡഡ് അധ്യാപക നിയമനം: സർക്കാരിന്‍റേത് നീതിനിഷേധം: പി.ജെ. ജോസഫ് എംഎൽഎ

തൊടുപുഴ: ഭിന്നശേഷി സംവരണത്തിന്‍റെ പേരിൽ അർഹരായ അധ്യാപകർക്ക് നിയമന അംഗീകാരവും ശന്പളവും നൽകാത്ത സർക്കാർ നിലപാട് പ്രതിഷേധാർഹമാണെന്നും അതു തിരുത്തണമെന്നും കേരള കോണ്‍ഗ്രസ് ചെയർമാനും മുൻ വിദ്യാഭ്യാസ മന്ത്രിയുമായ പിജെ. ജോസഫ് എഎൽഎ ആവശ്യപ്പെട്ടു. പതിനാറായിരത്തോളം അധ്യാപകരാണ് വർഷങ്ങളായി ശന്പളമില്ലാതെ കേരളത്തിൽ ജോലി ചെയ്യുന്നത്. ജോലി ചെയ്തിട്ടും കൂലി കൊടുക്കാത്തത് കടുത്ത മനുഷ്യാവകാശ ലംഘനമാണ്. മനുഷ്യത്വവിരുദ്ധമായ നടപടികൾ സർക്കാർ പിൻവലിക്കണം. കുഞ്ഞുങ്ങൾക്ക് അറിവ് പകർന്നുകൊടുക്കുന്ന, നാളത്തെ സമൂഹത്തെ വാർത്തെടുക്കേണ്ട അധ്യാപകരെ സംരക്ഷിക്കേണ്ട മുഖ്യ ഉത്തരവാദിത്വം സർക്കാരിനുണ്ട്. ഭിന്നശേഷി സംബന്ധമായ നിയമപ്രശ്നം വിദ്യാഭ്യാസ വകുപ്പിന്‍റെ തെറ്റിദ്ധാരണാജനകമായ ഉത്തരവുകൾ വഴി സങ്കീർണമാക്കിക്കൊണ്ടിരിക്കുകയാണ്. എൻഎസ്എസ് കേസിൽ സുപ്രീംകോടതി നടത്തിയ വിധിന്യായത്തിൽ തന്നെ സമാന സ്വഭാവമുള്ള സൊസൈറ്റികൾക്കും വിഭാഗങ്ങൾക്കും ഈ വിധിന്യായം നടപ്പാക്കാം എന്ന കാര്യം വ്യക്തമാക്കിയിരുന്നു. 2025 ഏപ്രിൽ ഏഴിന് ഹൈക്കോടതിയും ഇത്തരത്തിലൊരു നിരീക്ഷണം നടത്തുകയും സർക്കാർ ഇക്കാര്യത്തിൽ അനുഭാവപൂർവകമായ നടപടി സ്വീകരിക്കണമെന്ന് നിർദേശവും നൽകിയിരുന്നു. എന്നാൽ ഹൈക്കോടതി ഉത്തരവ് വന്ന് മൂന്നു മാസത്തിനുശേഷം ജൂലൈ 30ന് പൊതു വിദ്യാഭ്യാസ വകുപ്പ് ഇറക്കിയ ഉത്തരവിൽ പറയുന്നത് സുപ്രീംകോടതി ഉത്തരവ് എൻഎസ്എസ് മാനേജ്മെന്‍റിന് കീഴിലുള്ള സ്ഥാപനങ്ങൾക്ക് മാത്രമാണെന്നും മറ്റ് സ്ഥാപനങ്ങളിൽ ഇത് നടപ്പാക്കണമെങ്കിൽ പ്രത്യേക കോടതി ഉത്തരവ് വേണമെന്നുമാണ് സർക്കാർ നിലപാട്. സുപ്രീംകോടതി വിധിപ്രകാരം സർക്കാരിന് നടപടി കൈക്കൊള്ളാമെന്നിരിക്കെയാണ് വർഷങ്ങളായി നിയമന അംഗീകാരം പ്രതീക്ഷിക്കുന്ന അധ്യാപകരെയും വിവിധ മാനേജ്മെന്‍റുകളെയും ഒരേപോലെ പ്രയാസപ്പെടുത്തുന്ന നിലപാട് സർക്കാർ സ്വീകരിച്ചിരിക്കുന്നത്. എൻഎസ്എസിന് നൽകിയ ഉത്തരവ് വിവേചനം കൂടാതെ ക്രിസ്ത്യൻ മാനേജ്മെന്‍റ് ഉൾപ്പെടെയുള്ള ഇതര മാനേജ്മെന്‍റുകൾക്കും ബാധകമാക്കണം. സർക്കാരിന്‍റെ നീതി നിഷേധത്തിന്‍റെ ഇരകളായി അധ്യാപകർ മാറുന്നത് സാംസ്കാരിക കേരളത്തിന് ഭൂഷണമല്ല. ഈ പ്രശ്നങ്ങൾക്ക് പരിഹാരം കാണാൻ അടിയന്തര നടപടികൾ സർക്കാർ സ്വീകരിക്കണമെന്നും നീതിക്കുവേണ്ടി പോരാടുന്ന അധ്യാപകരുടെ ധർമസമരത്തിന് എല്ലാ പിന്തുണയും നൽകുമെന്നും ജോസഫ് പറഞ്ഞു.

ശിഷ്യർക്ക് ഓണസമ്മാനം ലിൻസി ടീച്ചറുടെ വക വീട്

കട്ടപ്പന: മുരിക്കാട്ടുകുടി ഗവണ്‍മെന്‍റ് ട്രൈബൽ ഹയർ സെക്കൻഡറി സ്കൂളിലെ പ്രൈമറി വിഭാഗം അധ്യാപിക ലബ്ബക്കട കൊച്ചുപറന്പിൽ സെബാസ്റ്റ്യന്‍റെ ഭാര്യ ലിൻസി ജോർജ് ഈ വർഷത്തെ തിരുവോണ-അധ്യാപകദിനത്തിൽ സ്കൂളിലെ രണ്ടു വിദ്യാർഥികൾക്കായി നിർമിച്ച പുതിയ വീടിന്‍റെ താക്കോൽ സമ്മാനിക്കും. ഏഴരലക്ഷത്തിലധികം രൂപ ചെലവിൽ വിദ്യാർഥികൾക്കായി നിർമിച്ച വീടിന്‍റെ കൈമാറ്റം ഇന്ന് രാവിലെ എട്ടിന് കോഴിമലയിൽ നടക്കും. കാൻസർ ബാധിച്ച് മാതാവിനെ നഷ്ടപ്പെട്ട ആറ്, പത്ത് ക്ലാസുകളിലെ വിദ്യാർഥികൾ മാതൃസഹോദരിയുടെ സംരക്ഷണത്തിലാണ് കഴിഞ്ഞിരുന്നത്. പ്രായാധിക്യവും രോഗബാധിതനുമായ വല്യപ്പനും കിടപ്പുരോഗിയായ വല്യമ്മയ്ക്കുമൊപ്പംചോർന്നൊലിക്കുന്ന മണ്‍കട്ട വീട്ടിൽ കഴിയേണ്ടി വന്ന ഇവരുടെ ദുരവസ്ഥ അധ്യാപകരായ ടി.സി. വിജിയും ലിൻസി ജോർജും ഭവനസന്ദർശനത്തിനിടെ മനസിലാക്കി. ഇക്കാര്യം ലിൻസി അമേരിക്കയിലെ ചിക്കാഗോയിൽ താമസിക്കുന്ന വൈക്കം സ്വദേശികളായ റീത്ത ജോർജ്, ആന്‍റണി ജോർജ് ദന്പതികളെ അറിയിച്ചു. തുടർന്ന് ഇവരുടെ മകൾ എമി ജോർജിന്‍റെ സഹായത്താലാണ് വീടിന്‍റെ നിർമാണം സാധ്യമായത്. ലിൻസി ജോർജിന്‍റെ നേതൃത്വത്തിൽ സുമനസുകളുടെ സഹായത്തോടെ പത്ത് വീടുകളാണ് സാമൂഹ്യ പ്രതിബദ്ധതയോടെ ഇതുവരെ മുരിക്കാട്ടുകുടി സ്കൂളിലെയും സമീപ സ്കൂളിലെയും വിദ്യാർഥികൾക്കായി നിർമിച്ചുനൽകിയത്. വിദ്യാഭ്യാസത്തിനൊപ്പം വിദ്യാർഥികളുടെ ജീവിതനിലവാരം മെച്ചപ്പെടുത്താൻ നിരവധി പദ്ധതികളും നടപ്പാക്കിയിട്ടുണ്ട്.

പതിനാലാം വർഷത്തിലും ഓണക്കിറ്റുമായി ജോഷി

രാജാക്കാട്: തുടര്‍ച്ചയായ പതിനാലാം വര്‍ഷവും നിര്‍ധന കുടുംബങ്ങളില്‍ ഓണക്കോടിയും ഓണക്കിറ്റും എത്തിച്ചുനല്‍കി പൊതുപ്രവര്‍ത്തകര്‍ നാടിന് മാതൃകയായി. കോണ്‍ഗ്രസ് രാജാക്കാട് മണ്ഡലം പ്രസിഡന്‍റ് ജോഷി കന്യാക്കുഴിയുടെ നേതൃത്വത്തിലാണ് കിടപ്പുരോഗികള്‍ക്കടക്കം ഓണക്കിറ്റും ഓണക്കോടിയും നല്‍കിയത്. 14വര്‍ഷം മുമ്പ് യൂത്ത് കോണ്‍ഗ്രസിന്‍റെ മണ്ഡലം പ്രസിഡന്‍റായിരിക്കുമ്പോഴാണ് ഓണക്കാലത്ത് ഓണക്കിറ്റ് നൽകിത്തുടങ്ങിയത്. പതിനാല് കുടുംബങ്ങളില്‍ സഹായമെത്തിച്ചായിരുന്നു തുടക്കം. ഇന്നത് 60ലേറെ കുടുംബങ്ങളിലേക്ക് എത്തുന്നുണ്ട്. വീടുകളില്‍ നേരിട്ടെത്തി ഓണക്കോടിയും കിറ്റുകളും വിതരണം നടത്തി. വ്യാപാരികളുടെയും മറ്റും സഹായത്തോടെയാണ് ഇത്തവണ ഓണക്കിറ്റും ഓണക്കോടിയും നൽകുന്നതെന്ന് ജോഷി പറഞ്ഞു. ജോഷിയോടൊപ്പം ജോയി തമ്പുഴ, അർജുൻ ഷിജു എന്നിവവരും ഉണ്ടായിരുന്നു.

ആകാശപ്പറവകളുടെ കൂടാരത്തിൽ പൂക്കളം

കുമളി: അഗതികളുടെ കൂടാരത്തിൽ ആകാശപ്പറവളായി മിന്നുന്നവർക്ക് മുന്നിൽ പൂക്കളം വിരിയിച്ച് കുമളി ഗവ. ഹയർ സെക്കൻഡറി സ്കൂളിലെ പൂർവ വിദ്യാർഥീ സംഘം. "ഒരു കുടക്കീഴിൽ ജിഎച്ച്എസ്’ എന്ന പേരിലുള്ള സംഘമാണ് അഗതികൾക്കായി ഓണസദ്യയും പൂക്കളവും ഒരുക്കിയത്. സന്നദ്ധസംഘടനയായി പ്രവർത്തിക്കുന്ന ഈ കൂട്ടായ്മയിലെ അംഗങ്ങൾ കുടുംബാംഗവുമായി എത്തിയാണ് അഗതികൾക്കൊപ്പം ഓണം പങ്കിട്ടത്. അന്തേവാസികളോടൊപ്പം ഓണസദ്യയും പങ്കിട്ടാണ് സംഘം മടങ്ങിയത്. ആകാശപ്പറവ ഡയറക്ടർ ഫാ.ഫ്രാൻസിസ് ഓണസന്ദേശം നൽകി. സീനിയർ പൂർവ വിദ്യാർഥി നാഗൂർ മിരാൻ സാഹി ന്പ്, അൻവർ , കെ. എം. സുലൈമാൻ, കെ. എ. സുരേഷ് മാമൂടൻ, റഹിം, ദോഹ റഹിം തുടങ്ങിയവർ ചടങ്ങിന് നേതൃത്വം നൽകി.

ഇടുക്കിക്കാർക്ക് സർക്കാർ നൽകിയ ഓണസമ്മാനം കീറച്ചാക്ക്: ഇ.എം. ആഗസ്തി

കട്ടപ്പന: ഇടുക്കിയിലെ ഭൂപ്രശ്നങ്ങൾ എല്ലാം പരിഹരിച്ച് ഇടുക്കിക്കാർക്ക് ഓണസമ്മാനം നൽകിയെന്ന മന്ത്രിമാരായ റോഷി അഗസ്റ്റിന്‍റെയും കെ. രാജന്‍റെയും പ്രസ്താവനകൾ അസംബന്ധമാണെന്ന് എഐസിസി അംഗം അഡ്വ. ഇ.എം. ആഗസ്തി. സർക്കാരിന്‍റെ ഓണസമ്മാനം കീറച്ചാക്കായി. 2023ൽ സർക്കാർ പാസാക്കിയ ഭൂ പതിവു ഭേദഗതി നിയമവും കഴിഞ്ഞ 27ന് മന്ത്രിസഭ പാസാക്കിയ ചട്ടവും സംസ്ഥാനത്തെ ഭൂ പ്രശ്നങ്ങൾ പരിഹരിക്കാൻ പര്യാപ്തമല്ല. ഇതിന്‍റെ പേരിൽ ജനങ്ങളെ കൊള്ളയടിക്കാനാണ് ശ്രമിക്കുന്നത്. പകൽകൊള്ളയ്ക്ക് സർക്കാർ അംഗീകാരം നൽകിയിരിക്കുകയാണ്. 27ന് മന്ത്രിസഭ അംഗീകരിച്ചെന്നു പറയുന്ന ചട്ടം ഇതുവരെ പുറത്തിറങ്ങിയിട്ടില്ല. ഇതു സംബന്ധിച്ച് മുഖ്യമന്ത്രി നടത്തിയ പത്രസമ്മേളനം അനുസരിച്ച് ഇടുക്കിയിലെ ഭൂ വിഷയങ്ങൾ കൂടുതൽ സങ്കീർണമാക്കുകയാണ് ചെയ്തിരിക്കുന്നത്. പ്രശ്നങ്ങൾ സങ്കീർമാക്കി കൊള്ളയടിക്കാൻ ശ്രമം 1960ലെ നിയമപ്രകാരം 1964ൽ രൂപീകരിച്ച ചട്ടമനുസരിച്ച് നൽകിയ ഭൂമിയിൽ വ്യവസ്ഥാപിത നടപടിക്രമങ്ങൾ എല്ലാം പാലിച്ചു നിർമിച്ചിരിക്കുന്ന കെട്ടിടങ്ങൾ ക്രമവത്കരിക്കാനുള്ള അധികാരമാണ് 2023ലെ നിയമഭേദഗതിയിലൂടെ സർക്കാനിനുള്ളത്. 6-7-24 വരെയുള്ള നിർമാണങ്ങൾ ക്രമവത്്കരിക്കുമെന്നും അതിനു ശേഷമുള്ളവ ക്രമീകരിക്കാൻ പുതിയ ചട്ടം ഉണ്ടാകുമെന്നാണ് മുഖ്യമന്ത്രി പറയുന്നത്. ഇത് അപ്രായോഗികമാണ്. ഒരു നിയമത്തിൽ ഒരുചട്ടം ഉണ്ടാക്കിയതിനു ശേഷം വേറെ ചട്ടം പിന്നാലെ വരുമെന്നു പറയുന്നത് ജനങ്ങളെ വിഡ്ഢികളാക്കാനാണ്. ഷോപ് സൈറ്റുകൾക്ക് പട്ടയം നൽകാൻ പ്രത്യേക ഉത്തരവു പുറപ്പെടുവിക്കുമെന്നാണ് സിപിഎം ജില്ലാ സെക്രട്ടറി സി.വി. വർഗീസും പറയുന്നത്. ഇതിനു നിലവിൽ നിയമമില്ല. 1960ലെ മൂല നിയമത്തിന്‍റെ അഞ്ചാം വകുപ്പിൽ കൃഷിക്കും ഭവന നിർമാണത്തിനും എന്നതിനോടൊപ്പം ഇതര നിർമാണങ്ങൾക്കും എന്നുകൂടി ചേർക്കുകയും അതിന് 1964 മുതൽ മുൻകാല പ്രാബല്യം നൽകുകയുമാണ് ചെയ്യേണ്ടത്. യുഡിഎഫ് സർക്കാർ അധികാരത്തിൽ വരുന്പോൾ ഫീസ് ഈടാക്കാതെ ക്രവത്കരിക്കും. കോണ്‍ഗ്രസ് നേതാവ് അഡ്വ. മാത്യു കുഴൽനാടൻ എംഎൽഎ ആണ് കോടതിയിൽ നിർമാണനിരോധനം ഏർപ്പെടുത്തണമെന്ന് ആവശ്യപ്പെട്ടതെന്ന സി.വി. വർഗീസിന്‍റെ പ്രചാരണം വിവരക്കേടാണ്. കേരളത്തിൽ ആകെ ബാധകമായ നിയമമനുസരിച്ചുള്ള നിർമാണ നിരോധനം ഇടുക്കി ജില്ലയ്ക്കു മാത്രം ബാധകമാക്കിയത് വിവേചനമാണെന്നാണ് കുഴൽനാടൻ കോടതിയിൽ വാദിച്ചത്. ഇത് അംഗീകരിച്ചാണ് നിയമം കേരളം മുഴുവൻ ബാധകമാണെന്നു കോടതി വിധിച്ചത്. എന്നിട്ടും ഇടുക്കി ജില്ലയിൽ മാത്രമാണ് സർക്കാർ നിർമാണ നിരോധനം ഏർപ്പെടുത്തിയത്. ഇടുക്കി ജില്ലാ കളക്ടറാണ് നിരോധന ഉത്തരവു പുറപ്പെടുവിച്ചത്. ഇതിന് ഉത്തരം പറയേണ്ടതു സർക്കാരാണ്. ജില്ലയിൽനിന്നുള്ള മന്ത്രി എന്ന നിലയ്ക്ക് റോഷി അഗസ്റ്റിനും മറുപടിപറയണം. ആർ. ശങ്കർ സർക്കാരാണ് കിരാത ഭൂനിയമം ഏർപ്പെടുത്തിയതെന്നുള്ള സി.വി. വർഗീസിന്‍റെ ആരോപണവും ചരിത്രബോധമില്ലായ്മയാണ്. ഈ നിയമവും ചട്ടവുമനുസരിച്ചാണ് എൽഡിഎഫ് സർക്കാർ നിൽകിയെന്ന് അവകാശപ്പെടുന്ന 55000 പട്ടയങ്ങളും നൽകിയിട്ടുള്ളതെന്നു ആഗസ്തി പത്രസമ്മേളനത്തിൽ പറഞ്ഞു. കോണ്‍ഗ്രസ് കട്ടപ്പന ബ്ലോക്ക് കമ്മിറ്റി പസിഡന്‍റ് തോമസ് മൈക്കിൾ, മണ്ഡലം പ്രസിഡന്‍റ് സിജു ചക്കുംമൂട്ടിൽ എന്നിവരും ആഗസ്തിയോടൊപ്പമുണ്ടായിരുന്നു.

ഓണത്തിനായി വട്ടവട ചെയ്തത് 1,800 ഏക്കർ പച്ചക്കറി കൃഷി

തൊടുപുഴ: ഓണവിപണി ലക്ഷ്യമിട്ടു വട്ടവടയിൽ കൃഷി ചെയ്തത് 1,800 ഏക്കർ ശീതകാല പച്ചക്കറി. പ്രതികൂല കാലാവസ്ഥയും വന്യമൃഗശല്യവും ആദ്യം തിരിച്ചടിയായെങ്കിലും വില മെച്ചപ്പെട്ടതു കർഷകർക്കു നേട്ടമായി. വിളവെടുപ്പിന്‍റെ സമയമായപ്പോൾ കാലാവസ്ഥ അനുകൂലമായതാണ് കർഷകർക്കു മെച്ചപ്പെട്ട വില ലഭിക്കാൻ ഇടയാക്കിയത്. തമിഴ്നാട്ടിലേക്കും മറ്റു ജില്ലകളിലേക്കുമാണ് വട്ടവടയിൽ ഉത്പാദിപ്പിക്കുന്ന പച്ചക്കറി കൂടുതലായി കയറ്റി അയയ്ക്കുന്നത്. അവിടെനിന്ന് അതു കേരളത്തിലേക്ക് എത്തും. വട്ടവട പഞ്ചായത്തിലെ പ്രധാന കാർഷിക മേഖലകളായ വട്ടവട, കോവിലൂർ, ചിലന്തിയാർ, കടവരി, കൊട്ടക്കന്പൂർ തുടങ്ങിയ പ്രദേശങ്ങളിലാണ് ഓണത്തോടനുബന്ധിച്ചു പച്ചക്കറികളുടെ വിളവെടുപ്പ് നടന്നത്. കാരറ്റ്, കാബേജ്, ബട്ടർ ബീൻസ്, ഉരുളക്കിഴങ്ങ്, വെളുത്തുള്ളി, ബീൻസ് എന്നിവയുടെ വിളവെടുപ്പാണ് നിലവിൽ നടന്നത്. കനത്ത മഴയിൽ ആദ്യം നട്ട പച്ചക്കറിത്തൈകൾ വ്യാപകമായി നശിച്ചു നഷ്ടം വന്നെങ്കിലും ഓണസീസൺ കണക്കിലെടുത്തു വീണ്ടും കൃഷിയിറക്കി. പിന്നീട് കാലാവസ്ഥ അനുകൂലമായതോടെ മെച്ചപ്പെട്ട വിളവ് ലഭിച്ചു. ഹോർട്ടികോർപിന്‍റെ അനാസ്ഥ വിഎഫ്പിസികെയിൽ അംഗങ്ങളായ കർഷകരാണ് ഇവിടെ പച്ചക്കറി കൃഷി ചെയ്യുന്നത്. എന്നാൽ, സംഭരിച്ച പച്ചക്കറിയുടെ വില ഹോർട്ടികോർപ് ഏതാനും വർഷമായി നൽകാത്തതിനാൽ പച്ചക്കറി ഇവർക്കു നൽകേണ്ടതില്ലെന്നു കർഷക കൂട്ടായ്മകൾ തീരുമാനിക്കുകയായിരുന്നു. ഇടനിലക്കാരാണ് ഇപ്പോൾ കർഷകരിൽനിന്നു പ്രധാനമായി പച്ചക്കറി ശേഖരിക്കുന്നത്. മുൻകൂട്ടി പണവും മറ്റും നൽകി സംഭരിക്കുന്നതിനാൽ പലപ്പോഴും ഇവർ നിശ്ചയിക്കുന്ന വിലയ്ക്കു ഉത്പന്നം വിൽക്കാൻ കർഷകർ നിർബന്ധിതരാകും. ഇടനിലക്കാർ സംഭരിക്കുന്ന പച്ചക്കറിയാകട്ടെ തമിഴ്നാട് മാർക്കറ്റുകളിലേക്കാണ് കയറ്റിവിടുന്നത്. കുടികളിൽ ഉരുളക്കിഴങ്ങ് വട്ടവടയിലെ കുടികളിലാണ് ഉരുളക്കിഴങ്ങ് കൂടുതലായി കൃഷി ചെയ്യുന്നത്. നേരത്തെ ഉരുളക്കിഴങ്ങ്, കാരറ്റ്, കാബേജ് എന്നിവയായിരുന്നു മേഖലയിൽ വ്യാപകമായി കൃഷി ചെയ്തിരുന്നത്. എന്നാൽ, ഇതിന്‍റെ ഉത്പാദനം ഇപ്പോൾ വലിയ തോതിൽ കുറഞ്ഞു. വന്യമൃഗശല്യം പച്ചക്കറി കൃഷിക്കു വലിയ ഭീഷണിയായി മാറിയിട്ടുണ്ടെന്ന് കർഷകർ പറയുന്നു. കാട്ടാനകൾ ഉൾപ്പെടെ ഭീഷണിയുള്ളതിനാൽ ഇവ കൃഷി ചെയ്യാൻ കഴിയാത്ത അവസ്ഥയാണ്. എന്നാൽ, ഇത്തരം മേഖലകളിൽ വെളുത്തുള്ളി കൂടുതലായി കൃഷി ചെയ്യുന്നുണ്ട്. വെല്ലുവിളികൾ കൂടിയതോടെ വട്ടവടയിൽ കൃഷിയിടങ്ങളിൽ ജോലി ചെയ്തിരുന്ന പലരും ടൂറിസം റിസോർട്ടുകളിലും മറ്റും ജോലി തേടിയിട്ടുണ്ട്. എന്നാൽ, പ്രതിസന്ധികൾക്കിടയിലും ശീതകാല പച്ചക്കറി കൃഷി ചെയ്യുന്ന നല്ലൊരു ശതമാനം കർഷകർ ഇപ്പോഴും ഇവിടെയുണ്ട്. വെളുത്തുള്ളിയാണ് താരം വെളുത്തുള്ളിയാണ് വട്ടവടയിൽ ഇപ്പോൾ വ്യാപകമായി കൃഷി ചെയ്യുന്ന വിള. ഇത്തവണ 900 ഏക്കറിലാണ് വെളുത്തുള്ളി കൃഷി ചെയ്തത്. കൂടുതൽ കർഷകരും തമിഴ്നാട്ടിൽനിന്നെത്തുന്ന കച്ചവടക്കാരുടെ പക്കൽനിന്നു വെളുത്തുള്ളിയുടെ വിത്തും പണവും മുൻകൂർ വാങ്ങിയാണ് കൃഷി. വിളവെടുക്കുന്പോൾ ഉത്പന്നവും ഇവർ കൊണ്ടുപോയ്ക്കോളും. ഇതോടെ നിരവധി പേർ വെളുത്തുള്ളി കൃഷിയിലേക്കു തിരഞ്ഞിട്ടുണ്ട്. ഉരുളക്കിഴങ്ങ് -500 ഏക്കർ, കാബേജ്- 200, കാരറ്റ്- 100, ബീൻസ്- 50, കോളിഫ്ളവർ, ബീറ്റ്റൂട്ട് -50 ഏക്കർ എന്നിങ്ങനെയാണ് മറ്റ് ശീതകാല പച്ചക്കറികൾ കൃഷി ചെയ്തത്. വെളുത്തുള്ളിക്കു പുറമേ ബട്ടർബീൻസും മുരിങ്ങ ബീൻസും കൃഷിയിടങ്ങളിൽ വ്യാപകമായിട്ടുണ്ട്. ഉത്പാദനച്ചെലവ് കുറവായതിനാലാണ് കർഷകർ ഈ കൃഷിയോട് താത്പര്യം കാട്ടുന്നത്. വെളുത്തുള്ളി കിലോയ്ക്ക് 120 രൂപ മുതൽ 200 രൂപ വരെ കഴിഞ്ഞ ദിവസങ്ങളിൽ കർഷകർക്കു വില ലഭിച്ചു. ഹോർട്ടികോർപ് സംഭരിച്ചാൽ നേരിട്ടു കേരള വിപണിയിലേക്ക് എത്തേണ്ട പച്ചക്കറിയാണ് ഇടനിലക്കാർ തമിഴ്നാട്ടിലേക്കു കൊണ്ടുപോയിട്ട് കറങ്ങി വീണ്ടും കേരളത്തിലേക്കെത്തുന്നത്. ഇതു വില കൂടാനും കാരണമാകുന്നു. കാരറ്റ്-34, കാബേജ് -13, ബീൻസ് -58, ബ്രോക്കോളി-34 എന്നിങ്ങനെയാണ് മറ്റ് ഉത്പന്നങ്ങൾക്കു കഴിഞ്ഞ ദിവസം ലഭിച്ച വില.

മന്ത്രി റോഷി ഇടുക്കി മെഡി. കോളജിൽ ഓണം ആഘോഷിക്കും , പിജെയ്ക്ക് സ്വന്തം വീട്ടിൽ

തൊടുപുഴ: ഇടുക്കി മെഡിക്കൽ കോളജിൽ ഡോക്ടർമാർ, നഴ്സുമാർ, ജീവനക്കാർ, രോഗികൾ എന്നിവർക്കൊപ്പമാണ് ഓണാഘോഷമെന്ന് മന്ത്രി റോഷി അഗസ്റ്റിൻ പറഞ്ഞു. ഓണസദ്യയും ഇവിടെയാണ്. ഇടുക്കി എന്‍റെ കുടുംബമാണ്. അവിടെ സ്നേഹവും സൗഹൃദവും പുതുക്കി രാവിലെ മുതൽ വൈകുന്നേരം വരെ മണ്ഡലത്തിലെ വിവിധ ഓണാഘോഷ പരിപാടികളിലും പങ്കെടുക്കും. വേദനിക്കുന്നവർക്കും സമൂഹനന്മയ്ക്കായി കഷ്ടപ്പെടുന്നവർക്കുമൊപ്പം ഓണം എന്നതാണ് എന്‍റെ ആഗ്രഹം. പിജെയ്ക്ക് സ്വന്തം വീട്ടിൽ തൊടുപുഴ: പി.ജെ. ജോസഫ് എംഎൽഎ തിരുവോണനാളിൽ പുറപ്പുഴയിലെ വീട്ടിൽ കുടുംബാംഗങ്ങളോടൊപ്പം ലളിതമായി ഓണം ആഘോഷിക്കും. പി.ജെ. ജോസഫിന്‍റെ ഭാര്യ ഡോ. ശാന്തയുടെ മരണത്തെത്തുടർന്നു കഴിഞ്ഞതവണയും ഓണം ലളിതമായാണ് ആഘോഷിച്ചത്. ഇത്തവണയും ഓണാഘോഷത്തിന് അടുത്തബന്ധുക്കൾമാത്രമാണ് ഉണ്ടാകുക. പുറമേയുള്ള ഓണാഘോഷപരിപാടികളിൽ പങ്കെടുക്കുന്നില്ലെങ്കിലും ഹൃദയംകൊണ്ട് എല്ലാവരുടേയും ഓണാഘോഷത്തിൽ പങ്കുചേരുന്നതായി അദ്ദേഹം പറഞ്ഞു.

കാർ കൊക്കയിലേക്കു മറിഞ്ഞ് അഞ്ചുപേർക്ക് പരിക്ക്

മൂലമറ്റം: കാർ കൊക്കയിലേക്കു മറിഞ്ഞ് അഞ്ചു പേർക്ക് പരിക്ക്. ക്രാഷ് ബാരിയറിൽ തട്ടി നിന്നതിനാൽ വൻ അപകടം ഒഴിവായി. കാഞ്ഞാർ ലബ്ബ വീട്ടിൽ അബ്ദുള്ള ബുഹാരി (44), ഹാസിന ബുഹാരി (38), മുഹാദിമ (19), ഖദീജ ജഹൻ ഖാൻ (11) ഹസീന ബുഹാരി (9) എന്നിവർക്കാണ് പരിക്കേറ്റത്. ബുധനാഴ്ച വൈകുന്നേരം നാലോടെയായിരുന്നു സംഭവം. കാഞ്ഞാർ- പുളളിക്കാനം റോഡിൽ പുത്തേടാണ് അപകടം. ഇവിടെ വർഷങ്ങൾക്കു മുന്പ് കാർ കൊക്കയിലേക്ക് മറിഞ്ഞ് രണ്ട് എറണാകുളം സ്വദേശികൾ മരണമടഞ്ഞിരുന്നു. ഇതേത്തുടർന്ന് ഇവിടെ ക്രാഷ് ബാരിയർ സ്ഥാപിച്ചിരുന്നു.

ഇടുക്കി പ്രസ് ക്ലബ് ഓണാഘോഷം

തൊടുപുഴ: ഇടുക്കി പ്രസ് ക്ലബ് ഓണാഘോഷവും കുടുംബസംഗമവും വിമല പബ്ലിക് സ്കൂൾ ഓപ്പണ്‍ സ്റ്റേഡിയത്തിൽ നടത്തി. പി.ജെ. ജോസഫ് എംഎൽഎ ഉദ്ഘാടനം ചെയ്തു. പ്രസിഡന്‍റ് വിനോദ് കണ്ണോളിൽ അധ്യക്ഷത വഹിച്ചു. നഗരസഭാ ചെയർമാൻ കെ.ദീപക്, കെപിസിസി ജനറൽ സെക്രട്ടറി അഡ്വ. എസ്. അശോകൻ, അൽ അസ്ഹർ ഗ്രൂപ്പ് ഓഫ് ഇൻസ്റ്റിറ്റ്യൂഷൻ മാനേജിംഗ് ഡയറക്ടർ കെ.എം. മിജാസ്, ഗോകുലം ഗ്രൂപ്പ് മാനേജിംഗ് ഡയറക്ടർ കെ.കെ. പുഷ്പാംഗദൻ, തൊടുപുഴ കാർഷിക വികസനബാങ്ക് പ്രസിഡന്‍റ് റോയി കെ. പൗലോസ്, കേരള കോണ്‍ഗ്രസ്-എം നിയോജക മണ്ഡലം പ്രസിഡന്‍റ് ജിമ്മി മറ്റത്തിപ്പാറ, സിപിഎം തൊടുപുഴ വെസ്റ്റ് ഏരിയാ സെക്രട്ടറി ടി.ആർ. സോമൻ, കേരള കോണ്‍ഗ്രസ് നിയോജക മണ്ഡലം പ്രസിഡന്‍റ് ബ്ലെയിസ് ജി. വാഴയിൽ, മു‌സ്‌ലിംലീഗ് സംസ്ഥാന സെക്രട്ടറി പി.എം. അബ്ബാസ്, മർച്ചന്‍റ്സ് അസോസിയേഷൻ പ്രസിഡന്‍റ് രാജു തരണിയിൽ, സെക്രട്ടറി സി.കെ. നവാസ്, നഗരസഭാ കൗണ്‍സിലർ ജയലക്ഷ്മി ഗോപൻ, തൊടുപുഴ ബ്ലോക്ക് കോണ്‍ഗ്രസ് പ്രസിഡന്‍റ് ഷിബിലി സാഹിബ്, ഹൊറൈസണ്‍ ഗ്രൂപ്പ് സിഇഒ സാബു ജോണ്‍, മർച്ചന്‍റ്സ് യൂത്ത് വിംഗ് പ്രസിഡന്‍റ് പ്രശാന്ത് കുട്ടപ്പാസ്, ലയണ്‍സ് ക്ലബ് സോണ്‍ ചെയർമാൻ സി.സി. അനിൽകുമാർ, നിസാർ പഴേരി, ഇടുക്കി പ്രസ് ക്ലബ് സെക്രട്ടറി ജെയിസ് വാട്ടപ്പിള്ളിൽ, കെയുഡബ്ല്യുജെ സംസ്ഥാന കമ്മിറ്റിയംഗം വിൽസണ്‍ കളരിക്കൽ, ഇടുക്കി പ്രസ് ക്ലബ് ട്രഷറർ ആൽവിൻ തോമസ്, വൈസ് പ്രസിഡന്‍റ് പി.കെ. ലത്തീഫ്, ജോയിന്‍റ് സെക്രട്ടറി അഖിൽ സഹായി, കമ്മിറ്റിയംഗങ്ങളായ വി.വി. നന്ദു, ഷിയാമി, അനീഷ് ടോം, എൻ.വി. വൈശാഖ്, മുൻ പ്രസിഡന്‍റ് സോജൻ സ്വരാജ്, പത്രപ്രവർത്തക സഹകരണസംഘം പ്രസിഡന്‍റ് എയ്ഞ്ചൽ അടിമാലി തുടങ്ങിയവർ നേതൃത്വം നൽകി. ഗായകൻ ഡി. മുരളി ഓണപ്പാട്ടുകൾ ആലപിച്ചു. വിവിധ മത്സരങ്ങളും ഓണസദ്യയും ആഘോഷത്തിന് മാറ്റുകൂട്ടി.

വണ്ണപ്പുറത്തെ ജനകീയ ഡോക്ടർ വിടപറഞ്ഞു

വണ്ണപ്പുറം: ജനകീയ ഡോക്ടർ ബേബി വർഗീസ് (72) വിടപറഞ്ഞു. 1978ൽ അർച്ചന ആശുപത്രി ആരംഭിച്ചാണ് ഡോക്ടർ വണ്ണപ്പുറത്തെത്തുന്നത്. കിടത്തി ചികിത്സ ഉൾപ്പെടെയുള്ള ക്ലിനിക്കായിരുന്നു ആദ്യമുണ്ടായിരുന്നത്. ചുരുങ്ങിയ നാളുകൾക്കുള്ളിൽ തന്നെ ഡോക്ടർ നാട്ടുകാരുടെ പ്രിയങ്കരനായി മാറി. സാധാരണക്കാരോട് എന്നും കരുണയോടെ ഇടപെട്ടിരുന്ന ഇദ്ദേഹം ചികിത്സയ്ക്ക് ചെറിയ തുകമാത്രമാണ് ഈടാക്കിയിരുന്നത്. വണ്ണപ്പുറത്തിന്‍റ കുടിയേറ്റകാലം മുതൽ ഡോക്ടറുടെ സേവനം സാധാരണകുടുംബങ്ങൾക്ക് ഏറെ പ്രയോജനപ്പെട്ടിരുന്നു. അർച്ചന ആശുപത്രിയിൽനിന്നു മാറി വണ്ണപ്പുറം പ്ലാന്‍റേഷൻ കവലയിൽ ഏതാനും വർഷങ്ങളായി എംജിഎം ആശുപത്രിനടത്തിവരികയായിരുന്നു. ഹൃദയാഘാതത്തെത്തുടർന്ന് ബുധനാഴ്ച വൈകുന്നേരത്തോടെയായിയിരുന്നു അന്ത്യം.

ഉത്രാടപ്പാച്ചിലിൽ കച്ചവടം പൊടിപൂരം

തൊടുപുഴ: ഉത്രാടത്തിനു പൂരത്തിരക്ക്. ഇന്ന് ഓണം ആഘോഷിക്കാനുള്ള മുന്നൊരുക്കങ്ങൾക്കായി ജനങ്ങൾ കൂട്ടത്തോടെ ഉത്രാടപ്പാച്ചിലിനിറങ്ങിയപ്പോൾ നാടും നഗരവും വൻ തിരക്കിലമർന്നു. ഓണസദ്യ ഒരുക്കാനുള്ള തയാറെടുപ്പുകൾക്കായുള്ള സാധനങ്ങൾ വാങ്ങാനാണ് ജനങ്ങൾ കുടുംബസമേതം ടൗണുകളിലേക്കെത്തിയത്. ഇതോടെ പ്രധാനപ്പെട്ട ടൗണുകളിലെല്ലാംതന്നെ വലിയ ഗതാഗതക്കുരുക്കാണ് അനുഭവപ്പെട്ടത്. ഓണത്തോടനുബന്ധിച്ച് ഏറ്റവും വലിയ വ്യാപാരം നടക്കുന്ന ദിവസമായിരുന്നു ഉത്രാടദിനമായ ഇന്നലെ. തൂശനില മുതൽ സദ്യ വിളന്പാനുള്ള തൂശനില മുതൽ വില്പനയ്ക്കുണ്ടായിരുന്നു. പതിവിൽനിന്നു ഭിന്നമായി പച്ചക്കറിക്കു വില കാര്യമായി ഉയരാത്തതു ജനങ്ങൾക്ക് ആശ്വാസമായി. വഴിയോരക്കച്ചവടവും തകൃതിയായി നടന്നു. ഇവിടെ വലിയ ജനത്തിരക്കാണ് അനുഭവപ്പെട്ടത്. പച്ചക്കറിവില നിയന്ത്രിക്കാൻ കൃഷിവകുപ്പ്, ഹോർട്ടികോർപ്, വിഎഫ്പിസികെ എന്നിവയുടെ നേതൃത്വത്തിൽ ആരംഭിച്ച ഓണച്ചന്തകളും ഇന്നലെ വരെ പ്രവർത്തിച്ചു. ചെറുതും വലുതുമായ വസ്ത്ര വ്യാപാര സ്ഥാപനങ്ങളിൽ ഓണക്കച്ചവടം പൊടി പൊടിച്ചു. ഓണക്കോടി വാങ്ങാൻ കുട്ടികളടക്കമുള്ളവർ കടകളിലേക്കെത്തി. കുട്ടികൾക്കായുള്ള ഓണ മുണ്ടുകളുടെയും പല വർണങ്ങളിലുള്ള ഷർട്ടുകളുടെയും കസവു സാരികളുടെയും മുണ്ടുകളുടെയും വിൽപ്പന വൻ തോതിലാണ് നടന്നത്. കസവ് ഉത്പന്നങ്ങളുടെ ഏറ്റവും വലിയ വില്പന നടക്കുന്ന സമയമാണ് ഓണക്കാലം. മുല്ലപ്പൂ മുഴം കണക്കിൽതന്നെ പൂക്കളുടെ വില്പനയും സജീവമായിരുന്നു. മുല്ലപ്പൂവിനും മറ്റും വലിയ വിലയാണ് കച്ചവടക്കാർ ഈടാക്കിയത്. മുല്ലൂപ്പ മുഴം കണക്കിനു നൽകാതെ മീറ്റർ കണക്കിനു നൽകണമെന്ന ലീഗൽ മെട്രോളജി വകുപ്പിന്‍റെ നിർദേശം ആരും കണക്കിലെടുത്തില്ല. എല്ലായിനം പൂക്കൾക്കും വില വർധിച്ചിരുന്നു. ഓണസദ്യ തയാറാക്കാൻ കഴിയാത്തവർക്ക് ഇന്നു വിവിധ ഹോട്ടലുകളും കേറ്ററിംഗ് സ്ഥാപനങ്ങളും പാഴ്സലായി സദ്യ വീട്ടിലെത്തിച്ചു നൽകും. ഹോട്ടലുകളിലെത്തി സദ്യ കഴിക്കാനും വിപുല ക്രമീകരണമൊരുക്കിയിട്ടുണ്ട്. തിരക്ക് കണക്കിലെടുത്ത് ടൗണുകളിൽ പോലീസ് പ്രത്യേക നിരീക്ഷണം ഏർപ്പെടുത്തിയിരുന്നു.

ഇടുക്കി മരിയൻ തീർഥാടനം: ഒരുക്കങ്ങൾ പൂർത്തിയായി

ചെറുതോണി: ഇടുക്കി രൂപത അഞ്ചാമത് മരിയൻ തീർഥാടനത്തിനുള്ള ഒരുക്കങ്ങൾ പൂർത്തിയായതായി രൂപത മെത്രാൻ മാർ ജോൺ നെല്ലിക്കുന്നേൽ അറിയിച്ചു. ആറിന് രൂപതയുടെ വിവിധ ഇടവകകളിൽനിന്നുള്ള ആയിരക്കണക്കിന് വിശ്വാസികൾ രാജാക്കാട് ക്രിസ്തുരാജാ ഫൊറോനാ പള്ളിയിൽനിന്നു രാജകുമാരി ദൈവമാതാ തീർഥാടന ദേവാലയത്തിലേക്ക് കാൽനടയായി എത്തും. ബിഷപ് മാർ ജോൺ നെല്ലിക്കുന്നേൽ തീർഥാടനത്തിന് നേതൃത്വം നൽകും. തീർഥാടനം ഉച്ചയ്ക്ക് ഒന്നിന് രാജകുമാരി പള്ളിയിൽ എത്തിച്ചേരും. തുടർന്ന് സീറോമലബാർ സഭ മേജർ ആർച്ച്ബിഷപ്് മാർ റാഫേൽ തട്ടിലിന്‍റെ മുഖ്യ കാർമികത്വത്തിൽ വിശുദ്ധ കുർബാന അർപ്പിക്കും. രൂപതയിലെ മുഴുവൻ വൈദികരും സഹകാർമികരാകും. തീർഥാടനത്തിൽ എത്തിച്ചേരുന്ന മുഴുവൻ ആളുകൾക്കും നേർച്ചക്കഞ്ഞിയും ക്രമീകരിച്ചിട്ടുണ്ട്. തീർഥാടനത്തിന്‍റെ ഭാഗമായി അടിമാലി സെന്‍റ് ജൂഡ് ഫൊറോനാ ദൈവാലയത്തിൽ നിന്ന് അഞ്ചിന് ഉച്ചകഴിഞ്ഞ് മൂന്നിന് ഇടുക്കി രൂപതാധ്യക്ഷന്‍റെ നേതൃത്വത്തിൽ കാൽനട തീർഥാനം ആരംഭിക്കും. അടിമാലി, ആയിരമേക്കർ, കല്ലാർകുട്ടി, വെള്ളത്തൂവൽ, പന്നിയാർകുട്ടി വഴി തീർഥാടനം രാത്രി രാജാക്കാട് പള്ളിയിൽ എത്തും. ആറിനു രാവിലെ 9.30ന് പ്രത്യേക പ്രാർഥനകൾക്ക് ശേഷം തീർഥാടനം ആരംഭിക്കും. പതിനായിരത്തിലധികം വിശ്വാസികൾ തീർത്ഥാടനത്തിൽ പങ്കെടുക്കും. ആയിരങ്ങൾ ത്യാഗപൂർവം കാൽനടയായി നടത്തുന്ന തീർഥാടനം ഹൈറേഞ്ചിന് ആത്മീയ ഉണർവിന് കാരണമാകുമെന്ന് മാർ ജോൺ നെല്ലിക്കുന്നേൽ പറഞ്ഞു. ഇടുക്കി രൂപത കാര്യാലയത്തിൽ നടന്ന യോഗത്തിൽ വികാരി ജനറാൾമാരായ മോൺ. ജോസ് കരിവേലിക്കൽ, മോൺ. ഏബ്രഹാം പുറയാറ്റ്, മോൺ. ജോസ് നരിതൂക്കിൽ, ഫാ. ജിൻസ് കാരക്കാട്ട് എന്നിവർ പ്രസംഗിച്ചു. ഗതാഗത-പാർക്കിംഗ് ക്രമീകരണം ഇടുക്കി രൂപതയുടെ നേതൃത്വത്തിൽ രാജാക്കാട് ക്രിസ്തുരാജ ഫൊറോന പള്ളിയിൽനിന്നു രാജകുമാരി ദൈവമാതാ പള്ളിയിലേക്ക് ആറിനു നടക്കുന്ന അഞ്ചാമത് മരിയൻ തീർഥാടനത്തിനുള്ള ഗതാഗത -പാർക്കിംഗ് ക്രമീകരണം. കല്ലാർകുട്ടി, പന്നിയാർകുട്ടി ഭാഗങ്ങളിൽനിന്നു വരുന്ന ചെറിയ വാഹനങ്ങൾ രാജാക്കാട് പെട്രോൾ പമ്പിന് തൊട്ടുമുമ്പ് ഇടത്തേക്ക് തിരിഞ്ഞ് പഞ്ചായത്ത് റോഡ് വഴി ഗവൺമെന്‍റ് സ്കൂൾ ഗ്രൗണ്ടിൽ തീർഥാടകരെ ഇറക്കി അവിടെ പാർക്ക് ചെയ്യണം. മുല്ലക്കാനം ഭാഗത്തുനിന്നു വരുന്ന ചെറിയ വാഹനങ്ങൾ രാജാക്കാട് എൻഎസ്എസ് ബിൽഡിംഗിന് മുന്നിൽ തീർഥാടകരെ ഇറക്കി വലത്തേക്ക് തിരിഞ്ഞ് ക്ഷേത്രം റോഡിലൂടെ പ്രവേശിച്ച് സ്കൂൾ ഗ്രൗണ്ടിൽ പാർക്ക് ചെയ്യണം. തിങ്കൾക്കാട്, സ്ലീവാമല, കുത്തുങ്കൽ, പഴയവിടുതി ഭാഗങ്ങളിൽനിന്ന് വരുന്ന ചെറിയ വാഹനങ്ങൾ ബസ് സ്റ്റാൻഡിൽ തീർഥാടകരെ ഇറക്കി അവിടെ ഒതുക്കി പാർക്ക് ചെയ്യണം. രാവിലെ 10 മുതൽ തീർഥാടനം സമാപിക്കുന്നത് വരെ പൂപ്പാറ ഭാഗത്തുനിന്ന് രാജാക്കാട് ഭാഗത്തേക്ക് പോകുന്ന ഭാരവാഹനങ്ങൾ കുരുവിളാസിറ്റിയിൽനിന്ന് കടുക്കാസിറ്റി ഖജനാപ്പാറ വഴി രാജാക്കാട്ടേക്ക് പോകണം. 10ന് തീർഥാടനം ആരംഭിച്ചതിന് ശേഷം രാജകുമാരി ഭാഗത്തേക്ക് പോകേണ്ട എല്ലാ വാഹനങ്ങളും മാങ്ങാത്തൊട്ടി വഴിയും ശാന്തമ്പാറ ഭാഗത്തേക്കുള്ള വാഹനങ്ങൾ സേനാപതി വഴിയും പോകേണ്ടതാണ്. രാജകുമാരിയിൽനിന്നു രാജാക്കാട് ഭാഗത്തേക്കുള്ള വാഹനങ്ങൾ ഇടതുവശം ചേർന്ന് ഒറ്റവരിയായി പോകണം. 10ന് മുമ്പായി തീർഥാടകരുമായി രാജാക്കാട് വരുന്ന വലിയ വാഹനങ്ങൾ രാജാക്കാട്ട് ആളെ ഇറക്കിയശേഷം രാജാക്കാട് ക്രിസ്തുജ്യോതി സ്കൂൾ ഗ്രൗണ്ടിലോ രാജകുമാരിയിലെ നിർദിഷ്ട പാർക്കിംഗ് ഗ്രൗണ്ടുകളിലോ പാർക്കു ചെയ്യേണ്ടതാണ്. നിർദേശം ലഭിക്കുന്നതനുസരിച്ച് പളളിയിലെത്തി തീർഥാടകരെ കൊണ്ടുപോകുകയും ചെയ്യണം. തീർഥാടനം ആരംഭിച്ചതിന് ശേഷമെത്തുന്ന വാഹനങ്ങൾ റാലിയുടെ പിന്നിലായി മാത്രം രാജകുമാരിക്ക് വരേണ്ടതാണ്. തീർഥാടനത്തിന് രാജാക്കാട്ടെത്തുന്ന ചെറുവാഹനങ്ങൾ രാജാക്കാടുളള പാർക്കിംഗ് ഗ്രൗണ്ടുകളിൽ പാർക്കുചെയ്യേണ്ടതാണ്. രാജാക്കാട്ടെത്തുന്ന വൈദികരുടെ വാഹനങ്ങൾ രാജാക്കാട് പാരീഷ് ഹാളിന് സമീപമുളള ഗ്രൗണ്ടിൽ പാർക്ക് ചെയ്യണം. തീർഥാടകരെ രാജകുമാരിയിൽനിന്നു ബസിൽ തിരികെ രാജാക്കാട്ടെത്തിക്കുന്നതിന് 12 ബസുകൾ ക്രമീകരിച്ചിട്ടുണ്ട്. രാജകുമാരിയിൽ എത്തുന്ന വൈദികരുടെ വാഹനങ്ങൾ രാജകുമാരി പള്ളി ഗ്രൗണ്ടിൽ പാർക്ക് ചെയ്യണം. പോലീസിന്‍റെയും േവാളണ്ടിയേഴ്സിന്‍റെയും നിർദേശങ്ങൾ തീർഥാടകർ അനുസരിക്കണമെന്നും ഭാരവാഹികൾ അറിയിച്ചു. പാർക്കിംഗ് സ്ഥലങ്ങൾ രാജാക്കാട് മേഖല ഗവ.ഹയർ സെക്കൻഡറി സ്കൂൾ ഗ്രൗണ്ട് (രാജാക്കാട്), ക്രിസ്തുജ്യോതി സ്കൂൾ ഗ്രൗണ്ട് (രാജാക്കാട്), രാജാക്കാട് ബസ് സ്റ്റാൻഡ് ഗ്രൗണ്ട് രാജകുമാരി മേഖല സെന്‍റ്് മേരീസ് സെൻട്രൽ സ്കൂൾ ഗ്രൗണ്ട് (രാജകുമാരി), ഗവ. വിഎച്ച്എസ്എസ് ഗ്രൗണ്ട് (രാജകുമാരി നോർത്ത്), സെന്‍റ് ജോൺസ് യാക്കോബായ പള്ളി ഗ്രൗണ്ട് (രാജകുമാരി നോർത്ത്), സെന്‍റ് ജോർജ് പബ്ലിക് സ്കൂൾ ഗ്രൗണ്ട് (കുരുവിളാസിറ്റി), മാർ. മാത്യൂസ് പബ്ലിക് സ്കൂൾ ഗ്രൗണ്ട് (മുരിക്കുംതൊട്ടി), മോണ്ട്ഫോർട്ട് വാലി സ്കൂൾ ഗ്രൗണ്ട് (മുരിക്കുംതൊട്ടി).

ക്ഷീരകർഷകർക്ക് സ്പെഷൽ ഇൻസന്‍റീവ്

ചെറുതോണി: ഉപ്പുതോട് ക്ഷീരോത്പാദക സഹകരണസംഘത്തിൽ 2024-25 സാമ്പത്തിക വർഷം പാൽ അളന്ന മുഴുവൻ കർഷകർക്കും ഓണത്തോടനുബന്ധിച്ച് സ്പെഷൽ ഇൻസന്‍റീവ് വിതരണം ചെയ്തു. മുഴുവൻ ക്ഷീരകർഷകർക്കും ലിറ്ററിന് 1.20 രൂപ വീതം ഇൻസന്‍റീവ് നൽകി. ഇടുക്കി ബ്ലോക്കു പഞ്ചായത്ത് പ്രസിഡന്‍റ്് ഡോളി സുനിൽ വിതരണം ഉദ്ഘാടനം ചെയ്തു. സംഘം ഓഡിറ്റോറിയത്തിൽ നടന്ന യോഗത്തിൽ പ്രസിഡന്‍റ് സണ്ണി പുൽക്കുന്നേൽ അധ്യക്ഷത വഹിച്ചു. ഡയറക്ടർ ബോർഡംഗംങ്ങളായ സാബു ചാറാടിയിൽ, ബെന്നി നെയ്‌വേലിക്കുന്നേൽ, ഡെയ്സി അരീപ്പറമ്പിൽ, സോണിയ വേങ്ങത്താനത്ത്, സെക്രട്ടറി രാധേഷ് കൃഷ്ണ എന്നിവർ പ്രസംഗിച്ചു. കഴിഞ്ഞ സാമ്പത്തിക വർഷം കൂടുതൽ പാൽ ഉത്പാദിപ്പിച്ച ബെന്നി പാറേക്കുടി, സോണിയ സ്രാട്ടേൽ, ഏറ്റവും പ്രായംകൂടിയ കർഷക മേരി വലിയവീട്ടിൽ എന്നിവരെ യോഗത്തിൽ ആദരിച്ചു.

ക്രൈസ്റ്റ് ടീൻ കോണ്‍ഫറൻസ്: അൾത്താരബാല സംഗമം

വാഴക്കുളം: കോതമംഗലം രൂപത അൾത്താരബാലസംഗമം വാഴക്കുളം സെന്‍റ് ജോർജ് ഫൊറോന പള്ളിയിൽ നടന്നു. രൂപതയിലെ 111 ഇടവകകളിൽനിന്നായി 1500ലധികം അൾത്താര ബാലന്മാർ സംഗമത്തിൽ പങ്കെടുത്തു. വൈദികർ, സിസ്റ്റേഴ്സ്, വൈദിക വിദ്യാർഥികൾ, മിഷൻലീഗ് രൂപത ഭാരവാഹികൾ എന്നിവർ സംഗമത്തിന് നേതൃത്വം നൽകി. നിർമല കോളജ് ബർസാർ ഫാ. ലിൻസ് കളത്തൂർ, കോതമംഗലം മൈനർ സെമിനാരി വൈസ് റെക്ടർ ഫാ. ജയിംസ് പറയ്ക്കനാൽ, മുൻ രൂപത പ്രസിഡന്‍റ് ജിബിൻ പുൽപ്പറന്പിൽ എന്നിവർ ക്ലാസുകൾ നയിച്ചു. രൂപത മ്യൂസിക് ബാന്‍റ് ഹെയ്ൽ മേരി മ്യൂസിക് ബാന്‍റ് നേതൃത്വം നൽകിയ മ്യൂസിക്കൽ കണ്‍സർട്ടും അൾത്താര ബാലന്മാർക്കായി ഒരുക്കിയിരുന്നു. ഉച്ചകഴിഞ്ഞ് നടന്ന സമ്മേളനത്തിൽ കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ അനുഗ്രഹപ്രഭാഷണം നടത്തി. രൂപത വികാരി ജനറാൾ മോണ്‍ പയസ് മലേക്കണ്ടത്തിൽ ആമുഖപ്രഭാഷണം നടത്തി. മോണ്‍ വിൻസെന്‍റ് നെടുങ്ങാട്ട്, കോതമംഗലം സെന്‍റ് ജോസഫ് മൈനർ സെമിനാരി റെക്ടർ ഫാ. സെബാസ്റ്റ്യൻ നാമറ്റത്തിൽ, വാഴക്കുളം സെന്‍റ് ജോർജ് ഫൊറോന പള്ളി വികാരി ഫാ. ജോർജ് പൊട്ടക്കൽ, വിജ്ഞാനഭവൻ ഡയറക്ടർ ഫാ. ജോസഫ് കല്ലറയ്ക്കൽ, മിഷൻ ലീഗ് രൂപത ഡയറക്ടർ ഫാ. മാത്യു രാമനാട്ട്, വാഴക്കുളം മേഖല ഡയറക്ടർ ഫാ. ജിൻസ് പുളിക്കൽ എന്നിവർ പ്രസംഗിച്ചു. സംഗമത്തിൽ പങ്കെടുത്ത കുട്ടികൾക്ക് രൂപതയുടെ സ്നേഹോപഹാരം നൽകി.

പുതിയ ചട്ടരൂപീകരണം ഇടുക്കിക്ക് പുതിയ മുഖം നൽകും: മന്ത്രി റോഷി അഗസ്റ്റിൻ

ചെറുതോണി: പട്ടയഭൂമിയിലെ നിർമാണവുമായി ബന്ധപ്പെട്ട് നിലനിന്നിരുന്ന അനിശ്ചിതാവസ്ഥയ്ക്ക് പരിഹാരം കാണുന്നതാണ് പുതിയ ചട്ട രൂപീകരിച്ചതെന്ന് മന്ത്രി റോഷി അഗസ്റ്റിൻ. നിലവിലെ നിർമാണങ്ങളെ ക്രമവത്കരിക്കുന്നതിനോടൊപ്പം പുതിയ നിർമാണങ്ങൾക്കായുള്ള ചട്ടവും രൂപീകരിക്കും. ഇതിലൂടെ നിർമാണ മേഖലയിൽ നിലനിൽക്കുന്ന അനിശ്ചിതാവസ്ഥ പരിഹരിക്കുമെന്നും ജില്ലയ്ക്ക് വികസനത്തിന്‍റെ പുതിയ മുഖം കൈവരുമെന്നും റോഷി അഗസ്റ്റിൻ പറഞ്ഞു. കേരള കോണ്‍ഗ്രസ്-എം വാഴത്തോപ്പ് മണ്ഡലം കണ്‍വൻഷൻ ഉദ്ഘാടനം ചെയ്യുകയായിരുന്നു മന്ത്രി. വാഹനാപകടത്തിൽ അംഗവൈകല്യം സംഭവിച്ചിട്ടും മനക്കരുത്തിലൂടെ സ്വന്തം ജീവിതം മുന്നോട്ട് നയിച്ച ലാലു മുണ്ടനാനിയിൽ അതിജീവനത്തിനത്തിനുള്ള മാതൃകയാണെന്ന് പാർട്ടി മണ്ഡലം കമ്മിറ്റി ഏർപ്പെടുത്തിയ ശ്രേഷ്ഠ കർമ പുരസ്കാരം നേടിയ ലാലുവിനെ അഭിനന്ദിച്ച് മന്ത്രി പറഞ്ഞു. പാർട്ടിയിലെ മുതിർന്ന നേതാക്കളെയും വിവിധ പരീക്ഷകളിൽ ഉന്നതവിജയം നേടിയവരെയും വാഴത്തോപ്പിലെ മികച്ച കർഷകരെയും യോഗത്തിൽ അഭിനന്ദിച്ചു. മണ്ഡലം പ്രസിഡന്‍റ് ജേക്കബ് പിണക്കാട്ട് അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റും പാർട്ടി ജില്ലാ ജനറൽ സെക്രട്ടറിയുമായ രാരിച്ചൻ നീറണാക്കുന്നേൽ,ഷാജി കാഞ്ഞമല,ജോസ് കുഴികണ്ടം,കെ. എൻ. മുരളി,ഷിജോ തടത്തിൽ തുടങ്ങിയവർ പ്രസംഗിച്ചു.

നഷ്ടപരിഹാരം നൽകിയില്ല; മിനി സിവിൽ സ്റ്റേഷൻ ജപ്തി ചെയ്തു

തൊടുപുഴ: ലാൻഡ് അക്വിസിഷൻ കേസിൽ വിധി പ്രകാരമുള്ള നഷ്ട പരിഹാരത്തുക നൽകാത്തതിന് തൊടുപുഴ മിനി സിവിൽ സ്റ്റേഷൻ ജപ്തി ചെയ്തു. അരിക്കുഴ പൂവത്തുകുന്നേൽ ഭാരതിയുടെ (90) ഉടമസ്ഥതയിലുള്ള വസ്തുവും അതിലുള്ള വീടിന്‍റെ മുൻഭാഗം ഉൾപ്പെടെയുള്ള വസ്തുക്കൾ തൊടുപുഴ - രാമമംഗലം റോഡിന് വീതി കൂട്ടുന്നതിനായി പൊന്നുംവിലയ്ക്ക് ഏറ്റെടുത്തിരുന്നു. എന്നാൽ ഈ വസ്തുവിന് സർക്കാർ നിശ്ചയിച്ച വില കുറഞ്ഞു പോയെന്ന് കാട്ടി ഉടമ സബ് കോടതിയിൽ കേസ് ഫയൽ ചെയ്തു. ഇതേത്തുടർന്ന് 2022 ജൂലൈ 30ന് നഷ്ടപരിഹാരത്തുക കൂട്ടി വിധി വന്നു. എന്നാൽ ഈ തുക വാദിക്ക് നൽകിയില്ല. വിധിപ്രകാരം 27 ലക്ഷം രൂപയോളം നഷ്ട പരിഹാരമായി ലഭിക്കാനുണ്ട്. ഇത് ഈടാക്കുന്നതിനായാണ് സിവിൽ സ്റ്റേഷൻ തൊടുപുഴ സബ് കോടതി ഉത്തരവ് പ്രകാരം ജപ്തി ചെയ്തത്. വാദിക്കു വേണ്ടി അഡ്വ. ജോർളി കുര്യൻ ഹാജരായി.

ആലുവ -മൂന്നാര്‍ രാജപാത തുറക്കാതെ പിന്നോട്ടില്ല

അടിമാലി: രാജഭരണകാലത്തു നിര്‍മിച്ച ആലുവ - മൂന്നാര്‍ രാജപാത സഞ്ചാരത്തിനായി തുറന്നു നല്‍കണമെന്ന ആവശ്യത്തിനു വീണ്ടും ശക്തിയേറുന്നു. ഇടുക്കിയുടെ വിനോദ സഞ്ചാരമേഖലയ്ക്കും മാങ്കുളമടക്കമുള്ള കാര്‍ഷിക ഗ്രാമങ്ങളുടെ വികസനത്തിനും വിവിധ ആദിവാസി ഊരുകളുടെ അടിസ്ഥാന സൗകര്യവികസനത്തിനും സഹായിക്കുന്ന റോഡ് നവീകരണം സാധ്യമാക്കി തുറക്കണമെന്നാണ് ആവശ്യം. എങ്ങനെ അധികാരം കിട്ടി? 1924ലെ വെള്ളപ്പൊക്കത്തിനു ശേഷമാണ് പഴയ ആലുവ - മൂന്നാര്‍ രാജപാതയിലൂടെയുള്ള യാത്ര തടസപ്പെട്ടത്. വെള്ളപ്പൊക്കത്തെത്തുടര്‍ന്ന് കരിന്തിരിമലയില്‍ ഉരുള്‍പൊട്ടല്‍ ഉണ്ടാവുകയും റോഡിന്‍റെ ചില ഭാഗങ്ങൾ തകരുകയും ചെയ്തു. ഇതോടെയാണ് യാത്ര ഇവിടെ തടസപ്പെട്ടത്. പ്രളയത്തിനു ശേഷം അടിമാലി വഴി ആലവയെയും മൂന്നാറിനെയും ബന്ധിപ്പിച്ച് പുതിയ റോഡ് നിർമിച്ചതോടെ രാജപാത ഉപേക്ഷിക്കപ്പെട്ടു. വൈകാതെ ഇതു വനംവകുപ്പിന്‍റെ അധീനതയിലായി. പൊതുമരാമത്ത് വകുപ്പിന്‍റെ ഉടമസ്ഥതയിലുള്ള റോഡ് വനംവകുപ്പിന് എങ്ങനെ അധികാരം കിട്ടിയെന്നാണ് നാട്ടുകാരുടെ ചോദ്യം. 20 കിലോമീറ്റർ കുറയും കോതമംഗലത്തുനിന്ന് അടിമാലി വഴി മൂന്നാറിലേക്ക് ഇപ്പോള്‍ ഉപയോഗിക്കുന്ന റോഡിന്‍റെ ദൂരം 80 കിലോമീറ്ററാണ്. ഈ റോഡിൽ ജംഗ്ഷനുകളും മറ്റും പെരുകി യാത്രക്കാരുടെ എണ്ണം കൂടിയതോടെ യാത്ര അത്ര സുഗമമല്ല. ആംബുലൻസുകളും മറ്റും പലപ്പോഴും ഗതാഗതക്കുരുക്കിൽ പെടുന്നതും പതിവ്. എന്നാൽ, രാജപാത തുറന്നാൽ 60 കിലോമീറ്റര്‍ യാത്ര ചെയ്താല്‍ മൂന്നാറിലെത്താം. കുട്ടമ്പുഴ, പൂയംകുട്ടി, കുറത്തി, പെരുമ്പന്‍കുത്ത് എന്നിവിടങ്ങളിലൂടെയാണ് റോഡ് മൂന്നാറിലെത്തുന്നത്. പൂയംകുട്ടിയില്‍നിന്നു പെരുമ്പന്‍കുത്ത് വരെയുള്ള 27 കിലോമീറ്റര്‍ റോഡാണ് വനമേഖലയിലൂടെ കടന്നുപോകുന്നത്. നിലവില്‍ പെരുമ്പന്‍കുത്തില്‍നിന്നു കുറത്തിയിലേക്കുള്ള റോഡ് മാങ്കുളം ജലവൈദ്യുതി പദ്ധതിയുടെ നിര്‍മാണജോലികളുമായി ബന്ധപ്പെട്ടു നവീകരിച്ചിട്ടുണ്ട്. വനംവകുപ്പിന്‍റെ അനാവശ്യ തടസവാദങ്ങള്‍ പിൻവലിച്ച് സഞ്ചാരസ്വാതന്ത്ര്യം അനുവദിച്ചാൽ രാജപാത ഇടുക്കിയുടെ വികസനത്തിനു പുതിയ വഴിത്തിരിവേകുമെന്നു ചൂണ്ടിക്കാണിക്കപ്പെടുന്നു.

അധ്യാപകനെതിരേ വ്യാജപരാതി: കുറ്റക്കാർക്കെതിരേ നടപടി വേണം

തൊടുപുഴ: കോപ്പിയടി പിടികൂടിയ അധ്യാപകനെതിരേ വ്യാജ പീഡന പരാതി നൽകിയവർക്കും അതിന് പ്രേരിപ്പിച്ചവർക്കും എതിരേ ശക്തമായ നടപടി സ്വീകരിക്കണമെന്ന് ഗവ. കോളജ് ടീച്ചേഴ്സ് ഓർഗനൈസേഷൻ ആവശ്യപ്പെട്ടു. മൂന്നാർ ഗവ.കോളജിലെ അധ്യാപകനായിരുന്ന ആനന്ദ് വിശ്വനാഥിനെതിരേയുള്ള ലൈംഗിക പീഡന പരാതി വ്യാജമാണെന്ന് കോടതി കണ്ടെത്തിയിരുന്നു. കോളജിലെ ജിസിടിഒ യുടെ ഭാരവാഹിയായിരുന്ന ആനന്ദ് വിശ്വനാഥനെ അപകീർത്തിപ്പെടുത്തുന്നതിൽ ഗൂഢാലോചന നടന്നിട്ടുണ്ട്. അത്തരം ഗൂഢാലോചനയിൽ പങ്കെടുത്തവരെ മാതൃകാപരമായി ശിക്ഷിക്കണമെന്നും തടഞ്ഞുവച്ചിരിക്കുന്ന എല്ലാ ആനുകൂല്യങ്ങളും അദ്ദേഹത്തിന് ഉടനടി നൽകണമെന്നും സംഘടന ആവശ്യപ്പെട്ടു. കലാലയങ്ങളിൽ അനീതിക്കെതിരേ ശബ്ദമുയർത്തുന്ന അധ്യാപകരെ ഇല്ലായ്മ ചെയ്യാനുള്ള ശ്രമം വർധിച്ചുവരുന്നു. ഇത്തരം പ്രവണതകൾ ഒരു കാരണവശാലും പ്രോത്സാഹിപ്പിക്കപ്പെടാൻ പാടില്ലെന്നും പ്രസിഡന്‍റ് ഡോ.പി.പി. ജാഫർ സാദിഖ്, സെക്രട്ടറി എബിൻ ടി.മാത്യൂസ് എന്നിവർ പറഞ്ഞു.

ആദ്യവെള്ളി കൺവൻഷൻ

അടിമാലി: വെള്ളത്തൂവൽ സെന്‍റ്് ജോർജ് പള്ളിയിൽ ആദ്യവെള്ളി കൺവൻഷനും അഭിഷേക ശുശ്രൂഷയും അഞ്ചിന് നടക്കുമെന്ന് വികാരി ഫാ. ജോർജ് കരിവേലിക്കൽ അറിയിച്ചു. രാവിലെ ഒൻപതിന് ജപമാല 9.30ന് സ്തുതി ആരാധന, 10ന് ദൈവവചനപ്രഘോഷണം, 11.30ന് ദിവ്യകാരുണ്യ ആരാധന, സൗഖ്യ പ്രാർഥന, നിയോഗ സമർപ്പണം, 12.30ന് വിശുദ്ധ ഗീവർഗീസിന്‍റെ നൊവേന, ഉച്ചയ്ക്ക് ഒന്നിന് ആഘോഷമായ വിശുദ്ധ കുർബാന, രണ്ടിന് നേർച്ചക്കഞ്ഞി വിതരണം. അടിമാലി: അടിമാലി സെന്‍റ് ജൂഡ്‌പള്ളിയിൽ ആദ്യവെള്ളി ആചരണം നടക്കുമെന്ന് വികാരി ഫാ. ജോർജ് പാട്ടത്തേക്കുഴി, ഫാ. ജോസഫ് ആലുങ്കൽതാഴെ എന്നിവർ അറിയിച്ചു. രാവിലെ 5.45ന് ആരാധന ജപമാല സമർപ്പണം, 6.15ന് നൊവേന, വിശുദ്ധ കുർബാന, 9.30ന് ജപമാല സമർപ്പണം, 10ന് വചനപ്രഘോഷണം - ഫാ. വിനീത് വാഴേക്കുടിയിൽ, ആരാധന, ദിവ്യകാരുണ്യ പ്രദക്ഷിണം. ആഘോഷമായ വിശുദ്ധ കുർബാന, നൊവേന, നേർച്ച, വൈകുന്നേരം നാലിന് നൊവേന, വിശുദ്ധ കുർബാന. പരിശുദ്ധ കന്യകമറിയത്തിന്‍റെ ജനനത്തിരുനാളിനോടനുബന്ധിച്ച് നടത്തുന്ന മരിയൻ കാൽനട തീർഥാടനയാത്രയ്ക്കും തുടക്കം കുറിക്കും. ഉച്ചകഴിഞ്ഞ് മൂന്നിന് ഇടുക്കി ബിഷപ് മാർ ജോൺ നെല്ലിക്കുന്നേൽ നേതൃത്വം നൽകും. വണ്ണപ്പുറം: മാർ സ്ലീവ ടൗണ്‍ പള്ളിയിൽ ആദ്യവെള്ളി ആചരണവും ഉണ്ണീശോയുടെ നൊവേനയും വചനസന്ദേശവും നാളെ നടക്കും. രാവിലെ ആറിന് വിശുദ്ധ കുർബാന, നൊവേന, ആരാധന - ഫാ. ജയിംസ് ഏഴാനിക്കാട്ട്, 9.30ന് ജപമാല, 10ന് ആഘോഷമായ വിശുദ്ധ കുർബാന, നൊവേന, ആരാധന, സന്ദേശം- ഫാ. ജിജോ കൊട്ടക്കാവിൽ, വൈകുന്നേരം അഞ്ചിന് വിശുദ്ധ കുർബാന, നൊവേന, ആരാധന- ഫാ. ലിറ്റോ ചെറുവള്ളിൽ എന്നിവയാണ് തിരുകർമങ്ങളെന്ന് വികാരി റവ. ഡോ. ജിയോ തടിക്കാട്ട് അറിയിച്ചു.

അയ്യപ്പൻകോവിൽ തൂക്കുപാലത്തിൽ നിയന്ത്രണം

ഇടുക്കി: കാഞ്ചിയാർ, അയ്യപ്പൻകോവിൽ പഞ്ചായത്തുകളെ ബന്ധിപ്പിക്കുന്ന അയ്യപ്പൻകോവിൽ തൂക്കുപാലത്തിൽ ഒരേസമയം 25 പേരിൽ കൂടുതൽ കയറുന്നത് നിരോധിച്ച് ജില്ലാ കളക്ടർ ഉത്തരവിട്ടു. അറ്റകുറ്റപ്പണികൾ നടത്താത്തതിനാൽ നട്ടും ബോൾട്ടും അയഞ്ഞും കൂട്ടിച്ചേരലുകളിൽ തുരുന്പ് പിടിച്ചും തൂക്കുപാലത്തിന് ബലക്ഷയം ഉണ്ടായിട്ടുണ്ട്. ഓണം പ്രമാണിച്ച് ധാരാളം വിനോദസഞ്ചാരികൾ എത്തിച്ചരുമെന്നതിനാൽ അപകടം ഒഴിവാക്കാനാണ് നിയന്ത്രണം. ഉത്തരവ് കർശനമായി നടപ്പിലാക്കുന്നതിന് ജില്ലാ പോലീസ് മേധാവി, ഇടുക്കി തഹസിൽദാർ, കാഞ്ചിയാർ, അയ്യപ്പൻകോവിൽ പഞ്ചായത്ത് സെക്രട്ടറിമാർ എന്നിവരെ ചുമലതപ്പെടുത്തി. അവധിദിനങ്ങളായ ഇന്നു മുതൽ ഒൻപതു വരെയുള്ള തീയതികളിൽ പാലത്തിന്‍റെ ഇരുവശത്തും പോലീസ് ഉദ്യോഗസ്ഥരെ ഡ്യൂട്ടിക്ക് നിയോഗിക്കും. പാലത്തിൽ ഒരേസമയം 25 പേരിൽ കൂടുതൽ കയറുന്നില്ലെന്ന് ഉറപ്പു വരുത്തും. ഒരേസമയം 40 പേരിൽ കൂടുതൽ ആളുകൾ പാലത്തിൽ കയറുന്നത് നേരത്തേ നിരോധിച്ചിരുന്നു. 120 മീറ്റർ വീതിയും, 200 മീറ്റർ നീളവുമുള്ള തൂക്കുപാലത്തിൽ കയറി ഇടുക്കി ജലാശയത്തിന്‍റെ റിസർവോയറിന്‍റെ ദൃശ്യഭംഗി ആസ്വദിക്കാൻ ദിവസവും നൂറുകണക്കിന് വിനോദസഞ്ചാരികളാണ് ഇവിടെയെത്തുന്നത്.

ഭൂപതിവ് ചട്ടഭേദഗതി ഇടതു സർക്കാരിന്‍റെ ജനവഞ്ചന

തൊടുപുഴ: 2023ൽ നിയമസഭ പാസാക്കിയ ഭൂപതിവ് ഭേദഗതി ബില്ലിന് ഗവർണർ അനുമതി നൽകി ഒരു വർഷത്തിന് ശേഷം ഉണ്ടാക്കിയ ചട്ടങ്ങൾ ജനവിരുദ്ധവും തുല്യനീതി നടപ്പാക്കാത്തതുമാണെന്ന് കേരള കോണ്‍ഗ്രസ് ജില്ലാ പ്രസിഡന്‍റ് പ്രഫ. എം.ജെ. ജേക്കബ്. പുതുതായി നിർമിച്ച ചട്ടങ്ങൾ ജില്ലയിലെ ഭൂപ്രശ്നങ്ങൾ കൂടുതൽ സങ്കീർണമാക്കിയിരിക്കുകയാണ്. 1964ലെയും 1993ലെയും ചട്ടപ്രകാരമുള്ള പട്ടയസ്ഥലത്ത് നിലവിലുള്ള എല്ലാ നടപടികളും പൂർത്തീകരിച്ചാണ് കെട്ടിടങ്ങൾ നിർമിച്ചിരിക്കുന്നത്. പുതിയ ചട്ടങ്ങൾ വന്നതോടെ കർഷകന്‍റെ കൈവശമുള്ള ഭൂമിയിൽ പുതുതായി നിർമാണം നടത്തുന്നത് നിയമവിരുദ്ധമായിരിക്കുകയാണ്. പുതുതായി ഫീസ് ഈടാക്കുന്പോൾ ഭൂമിയുടെ അടിസ്ഥാന വിലയുടെ അഞ്ച് മുതൽ മുകളിലേക്ക് ഈടാക്കാം എന്നുള്ള വ്യവസ്ഥ ജനങ്ങൾക്കുള്ള തുല്യനീതി നിഷേധിക്കലാണ്. ഭൂപതിവ് നിയമങ്ങളും ചട്ടങ്ങളുമായി ബന്ധപ്പെട്ട കാര്യങ്ങൾ ജനങ്ങളെ ബോധ്യപ്പെടുത്തുന്നതിന് കേരള കോണ്‍ഗ്രസ് ജില്ലാ കമ്മിറ്റി പ്രചാരണ പരിപാടികൾ സംഘടിപ്പിക്കുമെന്നും അദ്ദേഹം അറിയിച്ചു.

വീടുകൾ ക്രമവത്കരിക്കണമെന്ന ചട്ടം പിൻവലിക്കണം: ബിജോ മാണി

കട്ടപ്പന: വീടുകൾ ചട്ടലംഘനമാണെന്നും ക്രമവത്കരിക്കണമെന്നുമുള്ള നിർദേശം മലയോര ജനതയെ രണ്ടാംകിട പൗരൻമാരാക്കുന്നതാണെന്നും ഈ നിർദേശം പിൻവലിക്കണമെന്നും ഡിസിസി ജനറൽ സെക്രട്ടറി ബിജോ മാണി. അപേക്ഷഫീസും മുദ്രപത്രത്തിന്‍റെ വിലയുമടച്ച് ക്രമവത്കരിക്കാനാണ് സർക്കാർ പറയുന്നത്. കാർഷിക ആവശ്യത്തിനു പതിച്ചു നൽകിയ ഭൂമിയിൽ റിസോർട്ട് നിർമിക്കുന്നത് പട്ടയ വ്യവസ്ഥകളുടെ ലംഘനമാണെന്ന പിണറായി സർക്കാരിന്‍റെ നിലപാട് ശരിവെച്ചുകൊണ്ടുള്ള ഹൈക്കോടതി ഉത്തരവാണ് നിലവിലുള്ളത്. റിസോർട്ട് നിർമാണത്തിനു നിരോധന ഉത്തരവ് നൽകിയതിനെതിരെ 2016 ഒക്ടോബറിൽ നൽകിയ ഡബ്ലുപി (സി) ) 32143/2016, 32145/2016 എന്നീ കേസുകളിലാണ് സർക്കാരിനു വേണ്ടി ഹാജരായ സിപിഐ നേതാവായ അഡീഷണൽ അഡ്വക്കേറ്റ് ജനറൽ രഞ്ജിത്ത് തന്പാൻ 1964ലെ ഭൂപതിവ് നിയമപ്രകാരമുള്ള പട്ടയഭൂമി കൃഷിചെയ്യാനും വീട് നിർമിക്കാനും മാത്രമുള്ളതാണെന്ന നിലപാട് സ്വീകരിച്ചത്. സർക്കാരിന്‍റെ ഈ വാദം അംഗീകരിച്ചാണ് പട്ടയവ്യവസ്ഥ ലംഘിച്ചുള്ള നിർമാണം പാടില്ലെന്നു കോടതി പറഞ്ഞത്. ഈ കോടതി വിധിയെത്തുടർന്നാണ് ജില്ലയിൽ ഭൂപതിവ് നിയമം ലംഘിച്ചുള്ള നിർമാണം പാടില്ലെന്ന ഉത്തരവ് 22/8/2019 ൽ ഒന്നാം പിണറായി സർക്കാർ ഇറക്കിയത്. ഇതിനെ തുടർന്നാണ് ജില്ലയിലെ ഭൂ പ്രശ്നങ്ങൾ സങ്കീർണമായത്. സ്വന്തം സർക്കാരിന്‍റെ വീഴ്ച മൂലമുണ്ടായ പ്രശ്നങ്ങൾ കോടതി ഉത്തരവിന്‍റെ പേരിലാക്കി രക്ഷപ്പെടാനാണ് സിപിഎം ജില്ലാ സെക്രട്ടറിയടക്കമുള്ളവർ ശ്രമിക്കുന്നത്. ചട്ടഭേദഗതിയുടെ മറവിൽ നടക്കുന്ന കൊള്ളയെ ന്യായീകരിക്കാനുള്ള സിപിഎം ജില്ലാ സെക്രട്ടറിയുടെ നീക്കം അംഗീകരിക്കില്ല. ജില്ലയിൽ നിലവിലുള്ള ഭൂപ്രശ്നങ്ങളൊന്നും പരിഹരിക്കാൻ നിലവിലെ ചട്ടഭേദഗതികൊണ്ട് കഴിയില്ല. നിർമാണ നിരോധനം അതേപടി തുടരും. ദുരന്തനിവാരണ നിയമപ്രകാരം നിർമാണ നിയന്ത്രണമുള്ള 13 പഞ്ചായത്തുകളിലെ നിർമാണങ്ങളും നിയമവിരുദ്ധമായി തുടരും. കട്ടപ്പനയിലേതടക്കമുള്ള ഷോപ്പ് സൈറ്റുകളുടെ വിതരണത്തെ ചട്ടഭേദഗതി പ്രതികൂലമായി ബാധിക്കുമെന്നും ബിജോ മാണി പത്രസമ്മേളനത്തിൽ ചൂണ്ടിക്കാട്ടി. ഡിസിസി വൈസ്പ്രസിഡന്‍റ് മുകേഷ് മോഹൻ, ബ്ലോക്ക് പ്രസിഡന്‍റ് തോമസ് മൈക്കിൾ, മണ്ഡലം പ്രസിഡന്‍റ് സിജു ചക്കുംമൂട്ടിൽ, യൂത്ത് കോണ്‍ഗ്രസ് ഉടുന്പൻചോല നിയോജകമണ്ഡലം പ്രസിഡന്‍റ് ആനന്ദ് തോമസ് എന്നിവരും പത്രസമ്മേളനത്തിൽ പങ്കെടുത്തു.

ജില്ലാ ഓണം ടൂറിസം വാരാഘോഷത്തിന് ചെറുതോണിയിൽ തുടക്കം

ഇടുക്കി: ജില്ലാതല ഓണം ടൂറിസം വാരാഘോഷത്തിന് ചെറുതോണിയിൽ തുടക്കമായി. ജില്ലാ കളക്ടർ ഡോ. ദിനേശൻ ചെറുവാട്ട് പതാക ഉയർത്തി ഓണസന്ദേശം നൽകി. വാഴത്തോപ്പ് പഞ്ചായത്ത് പ്രസിഡന്‍റ് ജോർജ് പോൾ അധ്യക്ഷത വഹിച്ചു. വൈസ് പ്രസിഡന്‍റ് മിനി ജേക്കബ്, ജില്ലാ പഞ്ചായത്തംഗം കെ.ജി. സത്യൻ, പഞ്ചായത്ത് അംഗങ്ങളായ പ്രഭ തങ്കച്ചൻ, രാജു കല്ലറക്കൽ, ടി. നൗഷാദ്, നിമ്മി ജയൻ, ടിന്‍റു സുഭാഷ്, സെലിൻ വിൻസന്‍റ് , ഡിടിപിസി സെക്രട്ടറി ജിതേഷ് ജോസ്, അനിൽ കൂവപ്ലാക്കൽ എന്നിവർ പ്രസംഗിച്ചു. സമാപന ദിവസം ഉച്ചയ്ക്ക് 2.30ന് വർണാഭമായ ഘോഷയാത്ര ചെറുതോണി പെട്രോൾ പന്പിന് സമീപത്തുനിന്ന് ആരംഭിക്കും. 3.30ന് നടക്കുന്ന സമ്മേളനം മന്ത്രി റോഷി അഗസ്റ്റിൻ ഉദ്ഘാടനം ചെയ്യും. ഗ്രീൻവാലി ഡെവ. സൊസൈറ്റി ചെറുതോണി: കോട്ടയം അതിരൂപതയുടെ സാമൂഹ്യസേവന വിഭാഗമായ ഗ്രീൻവാലി ഡെവലപ്മെന്‍റ് സൊസൈറ്റിയുടെ നേതൃത്വത്തിൽ പ്രവർത്തന ഗ്രാമങ്ങളിൽ ഒരുമിച്ചൊരോണം പദ്ധതിക്ക് തുടക്കമായി. ജില്ലയിലെ 14 ഗ്രാമപഞ്ചായത്തുകളിൽ സ്വാശ്രയസംഘ പ്രവർത്തകർക്ക് കുറഞ്ഞ ചെലവിൽ ഓണമുണ്ണാനുള്ള അവസരം ഒരുക്കുക എന്നതാണ് പദ്ധതിയുടെ ലക്ഷം. 25 ശതമാനം സബ്‌സിഡിയും ബാക്കി തുക വായ്പയായും നൽകി അരി ഉൾപ്പെടെ 23 ഇനം പലവ്യഞ്ജന സാധങ്ങനങ്ങൾ ഭവനങ്ങളിൽ എത്തിച്ചുനൽകിയാണ് പദ്ധതി നടപ്പിലാക്കുന്നത്. പദ്ധതിയുടെ ഉദ്‌ഘാടനം മരിയാപുരം പഞ്ചായത്ത് പ്രസിഡന്‍റ് ജിൻസി ജോയി നിർവഹിച്ചു. ഗ്രീൻവാലി ഡെവലപ്മെന്‍റ് സൊസൈറ്റി പ്രസിഡന്‍റ് ഫാ. തോമസ് ആനിമൂട്ടിൽ അധ്യക്ഷത വഹിച്ചു. ഗ്രീൻവാലി ഡെവലപ്മെന്‍റ് സൊസൈറ്റി സെക്രട്ടറി ഫാ. സുജിത്ത് കാഞ്ഞിരത്തുംമൂട്ടിൽ, പ്രോഗ്രാം ഓഫീസർ സിറിയക് പറമുണ്ടയിൽ, പ്രോഗ്രാം കോ-ഓർഡിനേറ്റർ സിസ്റ്റർ ജിജി വെളിഞ്ചായിൽ, മെറിൻ ഏബ്രാഹം, ജസ്റ്റിൻ നന്ദികുന്നേൽ, അനിമേറ്റർമാരായ രജനി റോയി, സിനി സജി, ബിൻസി സജി എന്നിവർ പ്രസംഗിച്ചു. വ്യാപാരി കൂട്ടായ്മ രാജാക്കാട്: മുല്ലക്കാനം വ്യാപാരി കൂട്ടായ്മയുടെ നേതൃത്വത്തിൽ ഓണാഘോഷ പരിപാടി സംഘടിപ്പിച്ചു. ഓണോത്സവ പരിപാടിക്ക് കൂട്ടായ്മ പ്രസിഡന്‍റ്് ബേബി കരോട്ടുകിഴക്കേൽ അധ്യക്ഷത വഹിച്ചു. രാജാക്കാട് മർച്ചന്‍റ്സ് അസോസിയേഷൻ പ്രസിഡന്‍റ്് വി.എസ്. ബിജു ഉദ്ഘാടനം നിർവഹിച്ചു. ജില്ലാ പഞ്ചായത്ത് വൈസ് പ്രസിഡന്‍റ്് ഉഷാകുമാരി മോഹൻകുമാർ, രാജാക്കാട് ഗ്രാമപഞ്ചായത്ത് പ്രസിഡന്‍റ്് നിഷ രതീഷ്, രാജാക്കാട് സ്റ്റേഷൻ എസ്എച്ച്ഒ വി. വിനോദ്കുമാർ, കിങ്ങിണി രാജേന്ദ്രൻ, ബെന്നി പാലക്കാട്ട്, പുഷ്പലത, സോമൻ കെ.പി. സുബീഷ്, സിബി കൊച്ചുവള്ളാട്ട്, സജി കോട്ടയ്ക്കൽ, വി.സി. ജോൺസൺ, വ്യാപാരികൂട്ടായ്മ ഭാരവാഹികളായ സഞ്ജയൻ വാലുപറമ്പിൽ, ഷാജി മൈലംപറമ്പിൽ, ജോർജ് തെക്കുംചേരിക്കുന്നേൽ എന്നിവർ പ്രസംഗിച്ചു. കാക്കാസിറ്റി പൗരാവലി അടിമാലി: കാക്കാസിറ്റി പൗരാവലിയുടെയും നന്മ പുരുഷ സ്വയംസഹായ സംഘം, ടിംബർ യൂണിയൻ, യുവധാര ക്ലബ്, വ്യാപാരി വ്യവസായി യൂണിറ്റ്, കുടുംബശ്രീ യൂണിറ്റുകൾ എന്നിവയുടെ ആഭിമുഖ്യത്തിൽ ഓണാഘോഷ പരിപാടികൾ നടത്തും. ഹോട്ടൽ അസോ. രാജാക്കാട്: കേരള ഹോട്ടൽ ആൻഡ് റെസ്റ്ററന്‍റ് അസോസിയേഷൻ രാജാക്കാട് യൂണിറ്റ്, വനിതാ വിംഗ്, കാരുണ്യ എസ്എച്ച്ജി എന്നിവയുടെ ആഭിമുഖ്യത്തിൽ ഓണാഘോഷം സംഘടിപ്പിച്ചു. കെ.കെ. സോമൻ അധ്യക്ഷത വഹിച്ചു. കെഎച്ച്ആർഎ ജില്ലാ പ്രസിഡന്‍റ് എം.എസ്. അജി ഉദ്ഘാടനം ചെയ്തു. രാജാക്കാട് ഗ്രാമപഞ്ചായത്ത് പ്രസിഡന്‍റ് നിഷ രതീഷ് ഭദ്രദീപം തെളിയിച്ചു. ഓണഫണ്ട് വിതരണം കെഎച്ച്ആർഎ ജില്ല സെക്രട്ടറി പി.കെ. മോഹനൻ നിർവഹിച്ചു. ഗ്രാമീണ ഗ്രന്ഥശാല രാജാക്കാട്: പഴയവിടുതി ഗ്രാമീണ ഗ്രന്ഥശാലയുടെ നേതൃത്വത്തിൽ നടത്തുന്ന ഓണാഘോഷ പരിപാടികളുടെ ഭാഗമായി മാവേലി എഴുന്നുള്ളത്തും വീട്ടുമുറ്റത്തെ പൂക്കളസന്ദർശനവും വിവിധ മത്സരങ്ങളും കലാപരിപാടികളും നടത്തി. രാജാക്കാട് ബസ് സ്റ്റാൻഡിൽ നിന്നാരംഭിച്ച മാവേലി എഴുന്നുള്ളത്ത് ഗ്രാമ പഞ്ചായത്ത് പ്രസിഡന്‍റ് നിഷ രതീഷ് ഉദ്ഘാടനം ചെയ്തു. മാവേലിയുടെ കിരീടധാരണം മർച്ചന്‍റ്സ് അസോസിയേഷൻ പ്രസിഡന്‍റ് വി.എസ്. ബിജു നിർവഹിച്ചു. രാജാക്കാട് മതസൗഹാർദ്ദ കൂട്ടായ്മ കൺവീനർ ഫാ. മാത്യു കരോട്ടുകൊച്ചറയ്ക്കൽ ഓണസന്ദേശം നൽകി. മാവേലി എഴുന്നുള്ളത്ത് ഘോഷയാത്ര രാജാക്കാട് ടൗൺ ചുറ്റി പഴയവിടുതിയുടെ വിവിധ മേഖലകളിലുള്ള വീട്ടുമുറ്റത്തെ പൂക്കളം സന്ദർശിച്ച് ഗ്രന്ഥശാല അങ്കണത്തിൽ സമാപിച്ചു. തുടർന്ന് തിരുവോണ സന്ദേശ സമ്മേളനവും പ്രാദേശിക കലാകാരന്മാരുടെ ജനകീയ ഗാനമേളയും നടത്തി. ചെയർമാൻ കെ. ജീവൻകുമാർ അധ്യക്ഷത വഹിച്ചു. കൺവീനർ മിനി ബേബി, ജനപ്രതിനിധികളായ ഉഷ മോഹൻകുമാർ, കെ.ടി കുഞ്ഞ്, കിങ്ങിണി രാജേന്ദ്രൻ, വിജി സന്തോഷ്, വിൻസു തോമസ്, പ്രിൻസ് തോമസ് തുടങ്ങിയവർ പ്രസംഗിച്ചു.

മനം നിറഞ്ഞോണം: ഇന്ന് ഉത്രാടപ്പാച്ചിൽ

തൊടുപുഴ: തിരുവോണത്തെ വരവേൽക്കാൻ നിറഞ്ഞ മനസോടെ മലയാളികൾ ഒരുങ്ങിയതോടെ നാടും നഗരവും ഇന്ന് ഉത്രാടപ്പാച്ചിലിലമരും. അവസാനവട്ട ഒരുക്കങ്ങൾക്കായി അവശ്യസാധനങ്ങൾ വാങ്ങാനും മറ്റുമായി ജനങ്ങൾ ഇന്നു കുടുംബസമേതം പുറത്തിറങ്ങും. സദ്യവട്ടം ഒരുക്കാനും വിട്ടുപോയ സാധനങ്ങൾ വാങ്ങാനുമുള്ള നെട്ടോട്ടം കൂടിയാണിന്ന്. ഓണക്കോടിയെടുക്കാനും സദ്യവട്ടങ്ങൾക്കുള്ള വിഭവങ്ങൾ വാങ്ങാനും ഒട്ടേറെ പേർ ഇന്നു വ്യാപാര സ്ഥാപനങ്ങളിലെത്തും. പകൽ മഴ മാറിനിന്നാൽ ഓണവിപണിക്ക് ഉണർവേകും. എന്നാൽ, കഴിഞ്ഞ ദിവസങ്ങളിൽ ഇടവിട്ടുള്ള മഴ പെയ്തത് വ്യാപാരികൾക്ക് ആശങ്ക സമ്മാനിച്ചിരുന്നു. ആഘോഷ പൊടിപൂരം മുൻ വർഷങ്ങളെ അപേക്ഷിച്ച് ആഘോഷങ്ങളുടെ പൊടിപൂരമാണ് നഗര- ഗ്രാമ ഭേദമില്ലാതെ ആവേശം വിതറി അരങ്ങേറുന്നത്. വിവിധ ക്ലബുകളുടെയും റസിഡന്‍റ്സ് അസോസിയേഷനുകളുടെയും സംഘടനകളുടെയും നേതൃത്വത്തിൽ മത്സരങ്ങൾ, ഓണസദ്യ, കലാപരിപാടികൾ തുടങ്ങി വിപുലമായ ആഘോഷ പരിപാടികളാണ് സംഘടിപ്പിച്ചിട്ടുള്ളത്. ഒൻപതു വരെ നടക്കുന്ന ജില്ലാതല ഓണം വാരാഘോഷത്തിന് ഇന്നലെ ചെറുതോണിയിൽ തുടക്കമായി. ഓണം റിലീസ് സിനിമകൾ മികച്ച അഭിപ്രായം നേടിയതോടെ തിയറ്ററുകളിലേക്കും പ്രേക്ഷകരുടെ ഒഴുക്കായി. ഓണാവധിയായതോടെ, ജില്ലയിലെ വിനോദസഞ്ചാര മേഖലയും ഏറെ പ്രതീക്ഷയിലും കുതിപ്പിലുമാണ്. തിരക്കോടു തിരക്ക് വസ്ത്രവ്യാപാര ശാലകൾ, ഗൃഹോപകരണ വിപണി, ചിപ്സ് കടകൾ, പൂ വിപണി, ഓണം വിപണന മേളകൾ തുടങ്ങി എല്ലായിടത്തും തിരക്കോടു തിരക്കാണ്. പ്രധാന ടൗണുകളെല്ലാം തന്നെ വാഹനത്തിരക്കിൽ വീർപ്പുമുട്ടുകയാണ്. നാളെ തിരുവോണം ആയതിനാൽ വിവിധ ഇടങ്ങളിൽനിന്നു വീട്ടിലെത്താനുള്ളവരുടെ തിരക്കും ബസ് സ്റ്റാൻഡുകളിൽ അനുഭവപ്പെട്ടു. വസ്ത്രവ്യാപാര ശാലകളിൽ മത്സരക്കച്ചവടമായിരുന്നു ഇന്നലെയും. ഓണക്കച്ചവടം പ്രതീക്ഷിച്ച് പല വ്യാപാര സ്ഥാപനങ്ങളും കൂടുതൽ സമയം തുറന്നു പ്രവർത്തിച്ചു. സപ്ലൈകോ ഓണം ഫെയറുകൾ, കണ്‍സ്യൂമർ ഫെഡ് ഓണം സഹകരണ വിപണി തുടങ്ങി ഓണം വിപണന മേളകളിലെല്ലാം തിരക്കിനു കുറവില്ല. സപ്ലൈക്കോയിൽ റിക്കാർഡ് വില്പനയാണ് നടന്നത്. ജില്ലാ ഫെയറിൽ എട്ടു ദിവസം കൊണ്ട് 21 ലക്ഷത്തോളം രൂപയുടെ വിറ്റുവരവാണ് നേടാനായത്. പച്ചക്കറി ദിനം ഉത്രാടദിനമായ ഇന്നു പച്ചക്കറിക്കാണ് ഏറ്റവും കൂടുതൽ ആവശ്യക്കാർ. ഇത്തവണ കാര്യമായ വിലക്കയറ്റമില്ലെന്നാണ് വ്യാപാരികൾ പറയുന്നത്. വള്ളിപ്പയർ, കാരറ്റ് തുടങ്ങി ചുരുക്കം ചില ഇനങ്ങളുടെ വിലയിൽ മാത്രമാണ് വർധന. ജില്ലയിൽ മിക്കയിടങ്ങളിലും വഴിയോരക്കച്ചവടം ഉൾപ്പെടെ പച്ചക്കറി വില്പന തകൃതിയാണ്. ഓണത്തിനു പച്ചക്കറി വില നിയന്ത്രിക്കാനും കർഷകർക്കു ന്യായവില ഉറപ്പാക്കാനും കൃഷിവകുപ്പ്, ഹോർട്ടികോർപ്, വിഎഫ്പിസികെ എന്നിവയുടെ ഓണച്ചന്തകൾ ജില്ലയിൽ പ്രവർത്തിക്കുന്നുണ്ട്. ഇതു സാധാരണക്കാർക്ക് ആശ്വാസമാണ്. ഓണസദ്യ, പായസം ഓണസദ്യ വീട്ടിലൊരുക്കാൻ സമയമില്ലാത്തവർക്കു പല ഹോട്ടലുകളും കേറ്ററിംഗ് സർവീസുകളും ഓണസദ്യ തയാറാക്കി നൽകുന്നുണ്ട്. തിരുവോണ ദിവസം വരെ സദ്യ ലഭ്യമാകും. സദ്യയ്ക്കുള്ള ഇലയുൾപ്പടെയാണ് നൽകുന്നത്. എന്നാൽ, ചില ഹോട്ടലുകൾ സദ്യയ്ക്ക് അമിത വില ഈടാക്കുന്നുവെന്ന പരാതിയുമുണ്ട്. ഓണക്കാലത്തു വില നിയന്ത്രിക്കാൻ യാതൊരു സംവിധാനവുമില്ലാത്തതിനാൽ തോന്നുംപടിയാണ് വില്പന. പായസ മേളകളാണ് വിപണിയിലെ മറ്റൊരു ആകർഷണം. പാലട, അടപ്രഥമൻ, പരിപ്പ്, ഗോതന്പ് പായസം എന്നിവയാണ് പ്രധാന ഇനങ്ങൾ. ഓണ സദ്യയുടെയും പായസത്തിന്‍റെയും ബുക്കിംഗിന് ഇന്നലെയും വൻ തിരക്കായിരുന്നു. നഗര പ്രദേശങ്ങളിലാണ് പാഴ്സൽ ഓണസദ്യയ്ക്കു ആവശ്യക്കാർ കൂടുതൽ. ഉപ്പേരി, ശർക്കരവരട്ടി എന്നിവയുടെ വില്പനയും പൊടിപൊടിക്കുന്നു.

സ്കൂട്ടർ മറിഞ്ഞ് ഒരാൾ മരിച്ചു

വണ്ണപ്പുറം: സ്കൂട്ടർ നിയന്ത്രണംവിട്ടു മറിഞ്ഞ് കളമശേരി സ്വദേശി മരിച്ചു. തലവറപ്പറന്പിൽ ഫ്രാൻസിസ് (50) ആണ് മരിച്ചത്. ഒപ്പമുണ്ടായിരുന്ന മുളവുകാട് സ്വദേശി എ.ദീപു സാബു നിസാര പരിക്കുകളോടെ രക്ഷപ്പെട്ടു. ഇന്നലെ വൈകുന്നേരം ഏഴോടെ വണ്ണപ്പുറം - ചേലച്ചുവട് റോഡിലായിരുന്നു അപകടം. വെണ്മണിയിൽനിന്ന് ഇറങ്ങിവന്ന സ്കൂട്ടർ നിയന്ത്രണം നഷ്ടപ്പെട്ട് മുണ്ടൻമുടിയിൽവച്ച് ട്രാൻസ്ഫോർമറിനോട് ചേർന്നുള്ള ഭിത്തിയിൽ ഇടിച്ചു മറിയുകയായിരുന്നു. ഫ്രാൻസിസിനെ ഉടൻ വണ്ണപ്പുറത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

നോക്കെത്താ ദൂരത്തോളം പൂപ്പാടം; തമിഴ്‌നാട്ടില്‍ വിളവെടുപ്പ് തുടങ്ങി

നെടുങ്കണ്ടം: ഓണത്തെ പ്രതീക്ഷയോടെ കാത്തിരിക്കുന്ന നിരവധി ഗ്രാമങ്ങള്‍ തമിഴ്‌നാട്ടിലുണ്ട്. കേരളത്തില്‍ പൂക്കളം ഒരുക്കാന്‍ വസന്തം തീര്‍ക്കുന്ന ഗ്രാമങ്ങളാണ് ഇവ. തേനി ജില്ലയിലെ പല്ലവരായന്‍പെട്ടിയുടെ ഗ്രാമവഴിയുടെ ഇരുവശത്തും നോക്കെത്താ ദൂരത്തോളം പൂപ്പാടങ്ങളാണ്. ജമന്തിയും ചെണ്ടുമല്ലിയും മുല്ലയും റോസും അരളിയും വാടാമല്ലിയും ഒക്കെ ഇവിടെ പൂത്തുനില്‍ക്കുന്നു. കേരളത്തിനൊപ്പം കര്‍ണാടകയിലേക്കും ആന്ധ്രാപ്രദേശിലേക്കും വിദേശത്തേക്കുമെല്ലാം ഇവിടെനിന്നു പൂക്കള്‍ കയറ്റുമതി ചെയ്യാറുണ്ട്. എന്നാല്‍, പ്രധാന മാര്‍ക്കറ്റ് കേരളം തന്നെ. ഓണക്കാലമാണ് പ്രധാന സീസണ്‍. പല്ലവരായന്‍പെട്ടിയിലെ അഞ്ഞൂറോളം കര്‍ഷകര്‍ 1,000 ഏക്കറിലധികം സ്ഥലത്തു പൂക്കൃഷി നടത്തുന്നുണ്ട്. ഓണം ഇവര്‍ക്കും പ്രതീക്ഷയുടെ ഉത്സവമാണ്. കര്‍ഷകര്‍ പല്ലവരായന്‍പെട്ടിയിലെ മാര്‍ക്കറ്റിലാണ് പൂക്കള്‍ വില്‍ക്കുന്നത്. ഇവിടെനിന്ന് ആവശ്യക്കാര്‍ ലേലം വിളിച്ച് വാങ്ങും. ചെണ്ടുമല്ലി - 30, ജമന്തി - 50, വാടാമല്ലി - 120, മുല്ല 900, അരളി - 260 എന്നിങ്ങനെയാണ് നിലവിലെ കിലോ വില. മറ്റ് സമയങ്ങളിലും കേരളത്തിലേക്കു പൂക്കള്‍ എത്താറുണ്ടെങ്കിലും ഓണനാളുകളാണ് ഈ ഗ്രാമത്തിന്‍റെ മുഴുവന്‍ പ്രതീക്ഷകളും.

കാര്‍ വീട്ടിലേക്ക് ഇടിച്ചുകയറി; കുടുംബനാഥന് പരിക്ക്

കട്ടപ്പന: വെള്ളിലാങ്കണ്ടത്ത് നിയന്ത്രണം നഷ്ടപ്പെട്ട കാര്‍ വീട്ടിലേക്ക് ഇടിച്ചുകയറി ഒരാള്‍ക്ക് പരിക്ക്. കുഴല്‍പ്പാലം തേക്കലക്കാട്ടില്‍ അച്ചന്‍കുഞ്ഞിനാണ് പരിക്കേറ്റത്. ചൊവ്വാഴ്ച രാവിലെയാണ് അപകടം. വീടിനുള്ളില്‍ ടിവി കാണുകയായിരുന്ന അച്ചന്‍കുഞ്ഞിന്‍റെ ദേഹത്തേക്ക് സിമന്‍റ് കട്ട വീഴുകയായിരുന്നു. വീടിന്‍റെ മുന്‍വശം പൂര്‍ണമായി തകര്‍ന്നു. കാറിനുള്ളില്‍ ഉണ്ടായിരുന്നവര്‍ നിസാര പരിക്കുകളോടെ രക്ഷപ്പെട്ടു. കല്‍ത്തൊട്ടി സ്വദേശികള്‍ സഞ്ചരിച്ചിരുന്ന കാര്‍ അമിത വേഗത്തിലായിരുന്നുവെന്ന് ദൃക്‌സാക്ഷികള്‍ പറയുന്നു. മലയോര ഹൈവേയുടെ നിര്‍മാണം പൂര്‍ത്തിയായതോടെ കട്ടപ്പന - കുട്ടിക്കാനം സംസ്ഥാനപാതയില്‍ ദിനംപ്രതി വാഹനാപകടങ്ങള്‍ തുടര്‍ക്കഥയാകുകയാണ്.

നിർമാണം നടത്തി ആറുമാസം: പൈപ്പ് പൊട്ടി റോഡ് തകർന്നു

തൊടുപുഴ: ആധുനിക നിലവാരത്തിൽ ടാറിംഗ് നടത്തിയ കാരിക്കോട്- തെക്കുംഭാഗം റോഡ് നിർമാണം പൂർത്തിയായി ആറ് മാസം തികയും മുൻപേ തകർന്നു. വഴിനീളെ പൈപ്പുകൾ പൊട്ടിയാണ് റോഡ് തകർന്നത്. ഇന്നലെ രാവിലെ കല്ലാനിക്കൽ ഹൈസ്കൂൾ ജംഗ്ഷനു സമീപം പൈപ്പ് പൊട്ടിയതിനെത്തുടർന്ന് റോഡിന്‍റെ പകുതി ഭാഗവും തകർന്ന നിലയിലാണ്. ഈ ഭാഗത്തെ ടാറിംഗും മെറ്റലും മണ്ണുമെല്ലാം ഒലിച്ചുപോയി. ഒരു മാസം മുൻപാണ് ഇതിന് ഏതാനും മീറ്റർ അകലെ ഓറഞ്ച് വില്ലയ്ക്ക് സമീപം മഞ്ഞമാക്കൽ വളവിൽ പൈപ്പ് പൊട്ടി റോഡ് തകർന്നത്. ഈ ഭാഗത്തെ പൈപ്പ് അറ്റകുറ്റപ്പണി നടത്തിയെങ്കിലും തകർന്ന ഭാഗത്തെ റോഡ് ഇപ്പോഴും കുഴിയായിത്തന്നെ കിടക്കുന്നു. വളവിനു സമീപം കുഴിയുള്ളത് വാഹന യാത്രക്കാർക്ക് അപകട ഭീഷണിയാണ്. ഇന്നലെ പൈപ്പ് പൊട്ടിയ ഭാഗത്ത് ജല അഥോറിറ്റി ജീവനക്കാർ അറ്റകുറ്റപ്പണി നടത്തിയെങ്കിവും തകർന്ന റോഡ് ആരു നന്നാക്കുമെന്ന ചോദ്യമാണ് ഉയരുന്നത്. പൈപ്പ് പൊട്ടി തകരുന്ന റോഡ് നന്നാക്കേണ്ട ചുമതല ജല അഥോറിറ്റിക്കാണെന്നാണ് പൊതുമരാമത്ത് അധികൃതർ പറയുന്നത്. എന്നാൽ ഇവരാകട്ടെ റോഡിലെ തകരാർ പരിഹരിക്കാൻ യാതൊരു നടപടിയും സ്വീകരിക്കാറില്ല. റോഡിന്‍റെ ഉടമസ്ഥാവകാശം പേറുന്ന പൊതുമരാമത്ത് അധികൃതരാകട്ടെ പൊട്ടിയ പൈപ്പ് ഭാഗം നന്നാക്കിയോ എന്നു പോലും അന്വേഷിക്കാൻ മെനക്കെടാറില്ല. റോഡ് ആധുനിക നിലവാരത്തിൽ നന്നാക്കുമെങ്കിലും ഇതിനടിയിലൂടെ നേരത്തേ സ്ഥാപിച്ചിട്ടുള്ള പൈപ്പുകൾ പൊട്ടുന്നത് പതിവായിരിക്കുകയാണ്. വർഷങ്ങൾക്ക് മുൻപ് സ്ഥാപിച്ച നിലവാരം കുറഞ്ഞ പൈപ്പുകളാണ് പലഭാഗത്തും റോഡിന്‍റെ അടിയിൽ കിടക്കുന്നതെന്നാണ് നാട്ടുകാരുടെ ആക്ഷേപം.

മോഷണം നടത്തിയ ആൾ പിടിയിൽ

മൂന്നാർ: മൂന്നാർ പള്ളിവാസൽ റിസോർട്ടു മുറിയിൽ മോഷണം നടത്തി മുങ്ങിയ പ്രതിയെ പൊലീസ് തമിഴ്നാട്ടിൽനിന്ന് അറസ്റ്റു ചെയ്തു. രാജസ്ഥാൻ കോട്ട ജില്ലയിൽ വിജയനഗറിൽ അജയ് രവീന്ദ്രനാണ് പിടിയിലായത്. മൊബൈൽ ഫോണും സിസിടിവി യും കേന്ദ്രീകരിച്ച് പോലീസ് നടത്തിയ അന്വേഷണമാണ് പ്രതിയെ കുടുക്കിയത്. തമിഴ്നാട് തിരുനെൽവേലിയിൽ നിന്നുമാണ് മൂന്നാർ പൊലീസ് പ്രതിയായ രാജസ്ഥാൻ സ്വദേശിയെ അറസ്റ്റു ചെയ്തത്. വെള്ളിയാഴ്ച്ച രാവിലെയാണ് പള്ളിവാസൽ മൂലക്കടയിലുളള റിസോർട്ടിൽ താമസിച്ചിരുന്ന ഡിണ്ടുക്കൽ സ്വദേശി ജാഫർ സാദിഖിന്‍റെ മുറിയിൽ സൂക്ഷിച്ചിരുന്ന ലാപ്ടോപ്, ഐഫോണ്‍, എടിഎം കാർഡുകൾ, വില കൂടിയ വാച്ച് എന്നിവ മോഷണം പോയത്. പരാതിയുടെ അടിസ്ഥാനത്തിൽ പോലീസ് നടത്തിയ അന്വേഷണമാണ് പ്രതിയെ കുടുക്കിയത്. പ്രതി എടിഎം കാർഡുകൾ ഉപയോഗിച്ച് 1.81 ലക്ഷം രൂപയും പിൻവലിച്ചിരുന്നു. ആറു ലക്ഷം രൂപയുടെ നഷ്ടമാണ് ജാഫർ സാദിഖിനുണ്ടായത്. മൂന്നാർ എസ്എച്ച്ഒ ബിനോദ് കുമാർ, പ്രിൻസിപ്പൽ എസ്ഐ കെ.പി. അനിൽകുമാർ, എസ്ഐ പങ്കജ് കൃഷ്ണ, എസ്‌സിപിഒമാരായ എം. മണികണ്ഠൻ, ഹിലാൽ എന്നിവരുടെ നേതൃത്വത്തിലാണ് പ്രതിയെ തമിഴ്നാട്ടിൽനിന്നു പിടികൂടിയത്. പ്രതി മോഷ്ടിച്ച തുക ക്രിപ്സോ കറൻസിയിൽ നിക്ഷേപിച്ചതായാണ് വിവരം

വനംവകുപ്പിന്‍റെ തടസം നീക്കണം: ഡീൻ കുര്യാക്കോസ് എംപി

ചെറുതോണി: ഇടുക്കി -ഉടുമ്പന്നൂർ റോഡിന്‍റെ ഭാഗമായ ഉടുമ്പന്നൂർ -കൈതപ്പാറ- മണിയാറൻകുടി പിഎംജിഎസ് വൈ റോഡിന് വനംവകുപ്പ് സ്ഥലം വിട്ടുനൽകുന്നതിന് പരിവേഷ് പോർട്ടലിൽ അപ്‌ലോഡ് ചെയ്യുന്നതിന് അടിയന്തരമായി ഉന്നതതല യോഗം വിളിച്ചുചേർക്കണമെന്ന് ആവശ്യപ്പെട്ട് ഡീൻ കുര്യാക്കോസ് എംപി മന്ത്രി എ.കെ. ശശീന്ദ്രന് കത്ത് നൽകി. പിഎംജിഎസ്‌വൈയിൽ ഉൾപ്പെടുത്തി അംഗീകാരം ലഭിച്ച റോഡിന് സാങ്കേതിക തടസങ്ങൾ മറികടന്ന് 18-07-2023 ആണ് സാങ്കേതികാനുമതി ലഭ്യമായത്. 03-11-2023 ൽ കരാർ ഒപ്പിട്ടു. ഇതോടൊപ്പം തന്നെ വനംവകുപ്പിൽനിന്ന് ഭൂമി വിട്ടുകിട്ടുന്നതിനും പരിവേഷ് പോർട്ടലിൽ ഈ പ്രവൃത്തി അപ്‌ലോഡ് ചെയ്യുന്നതിനുമുള്ള പ്രവർത്തനങ്ങൾ നടന്നുവരുകയായിരുന്നു. നടപടിക്രമങ്ങളെല്ലാം പൂർത്തിയാക്കി വനംവകുപ്പ് പരിഹാര വനവത്കരണത്തിനായി കാന്തല്ലൂർ വില്ലേജിലെ റവന്യു ഭൂമി വിട്ടു നൽകി. 2024 ജനുവരിയിൽ വനംവകുപ്പ് ബന്ധപ്പെട്ട സൈറ്റിൽ പരിഹാര വനവത്കരണ ഭൂമി അപ്‌ലോഡ് ചെയ്തു. ഒന്നര വർഷം കഴിയുമ്പോഴും വനംവകുപ്പ് നടപടികളൊന്നും സ്വീകരിക്കാത്തത് ഖേദകരവും പ്രതിഷേധാർഹവുമാണ്. റോഡിനായി 2019 മുതൽ ആരംഭിച്ച നടപടികളിൽ വനംവകുപ്പ് മെല്ലപ്പോക്കു നടത്തുകയാണ്. നിയമപരമായ എല്ലാ നടപടികളും പൂർത്തിയാക്കിയിട്ടും പരിവേഷ് പോർട്ടലിൽ വിട്ടുകിട്ടുന്ന ഭൂമി അപ് ലോഡ് ചെയ്യാൻ തയാറാകാതെ ഉന്നത വനം ഉദ്യോഗസ്ഥർ ഒളിച്ചുകളി നടത്തുകയാണ്. എംപി യെന്ന നിലയിൽ ബന്ധപ്പെട്ട എല്ലാവരേയും സമന്വയിപ്പിച്ചുകൊണ്ട് പതിറ്റാണ്ടുകളായി മലയോരജനതയുടെ പൊതു ആവശ്യത്തിനായി പരിശ്രമിച്ചുവരികയാണ്. പിഎംജിഎസ്‌വൈ ഫേസ് മൂന്നിന്‍റെ കാലാവധി കേന്ദ്ര ഗവൺമെന്‍റ്് അവസാനിപ്പിക്കുന്നതിന് അധികകാലമില്ല. പിഎംജിഎസ്‌വൈ നാലിന്‍റെ പ്രവർത്തനങ്ങൾ ആരംഭിച്ചുകഴിഞ്ഞു. ഈ അവസരത്തിൽ വനംവകുപ്പ് ഈ കാര്യത്തിൽ സത്വരനടപടി സ്വീകരിക്കേണ്ടതിന്‍റെ ആവശ്യകത വനംമന്ത്രിയെ ബോധ്യപ്പെടുത്തിയതായി എംപി അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]