ADVERTISEMENT

ADVERTISEMENT

വിശ്വജ്യോതിയില്‍ എംബിഎ ബാച്ച്

വാഴക്കുളം: വിശ്വജ്യോതി സ്‌കൂള്‍ ഓഫ് മാനേജ്‌മെന്‍റ് സ്റ്റഡീസിലെ എംബിഎ ബാച്ച് 2025-27ലെ പുതിയ അധ്യയന വര്‍ഷത്തിന്‍റെ ഉദ്ഘാടനം ജിയോജിത്ത് ഫിനാന്‍ഷ്യല്‍ സര്‍വീസസ് സിഇഒ സി.ജെ. ജോര്‍ജ് നിര്‍വഹിച്ചു.

കോളജ് മാനേജര്‍ മോണ്‍. ഡോ. പയസ് മലേക്കണ്ടത്തില്‍, ഡയറക്ടര്‍ റവ. ഡോ. പോള്‍ പാറത്താഴം, പ്രിന്‍സിപ്പല്‍ ഡോ. കെ.കെ. രാജന്‍, വൈസ് പ്രിന്‍സിപ്പല്‍ പ്രഫ. സോമി പി. മാത്യു, ഡിപ്പാര്‍ട്ട്‌മെന്‍റ് കണ്‍സള്‍ട്ടന്‍റ് ഫാ. ജിനോ പുന്നമറ്റത്തില്‍, എംബിഎ വിഭാഗം മേധാവി ഡോ. ഷെല്ലി ജോസ്, ട്രഷറര്‍ കെ.വി. തോമസ്, അധ്യാപകര്‍, പുതിയ ബാച്ചിലെ വിദ്യാര്‍ഥികള്‍, രക്ഷിതാക്കള്‍ എന്നിവര്‍ പങ്കെടുത്തു.

ADVERTISEMENT

വിനായകൻ പൊതുശല്യം: മുഹമ്മദ് ഷിയാസ്

കൊച്ചി: നടൻ വിനായകൻ പൊതുശല്യമെന്ന് ഡിസിസി പ്രസിഡന്‍റ് മുഹമ്മദ് ഷിയാസ്.സാംസ്കാരികമായി മുന്നാക്കം നിൽക്കുന്ന നാട്ടിൽ വിനായകൻ വിദ്വേഷം വിതയ്ക്കുകയാണ്. ഇത് തുടർന്നാൽ രഷ്ട്രീയത്തിനതീതമായി ജനങ്ങൾ വിനായകനെ തെരുവിൽ കൈകാര്യം ചെയ്യുന്ന സ്ഥിതിയുണ്ടാകും. എല്ലാ കലാകാരൻമാർക്കും അപമാനമാണ് വിനായകൻ. നാടിന്‍റെ സംസ്‌കാരത്തിന് ചേരാത്ത പെരുമാറ്റമാണ് അയാളിൽ നിന്നുണ്ടാകുന്നത്. ലഹരി ഉപയോഗിക്കുന്ന കലാകാരന്മാർക്ക് ലഭിക്കുന്ന പരിരക്ഷ തെറ്റായ സന്ദേശം നൽകും. സിനിമാമേഖലയിൽ ലഹരി ഉപയോഗം വ്യാപകമാണെന്നും മുഹമ്മദ് ഷിയാസ് ചൂണ്ടിക്കാട്ടി.

14കാരന് മുത്തശിയുടെ സുഹൃത്ത് : കത്തികാട്ടി ഭീഷണിപ്പെടുത്തി മദ്യവും കഞ്ചാവും നൽകി

കൊച്ചി: മുത്തശിയുടെ സുഹൃത്ത് 14 വയസുകാരനെ കത്തികാട്ടി ഭീഷണിപ്പെടുത്തി മദ്യം കഴിക്കാനും കഞ്ചാവ് വലിക്കാനും നിർബന്ധിച്ചതായി പരാതി. സംഭവത്തിൽ കുട്ടിയുടെ അമ്മയുടെ പരാതിയിൽ തിരുവനന്തപുരം കടയ്ക്കാവൂർ സ്വദേശിയായ പ്രബി(40)നെതിരെ എറണാകുളം നോർത്ത് പേലീസ് കേസ് എടുത്ത് അന്വേഷണം ആരംഭിച്ചു. സംഭവത്തെക്കുറിച്ച് പോലീസ് പറയുന്നത്: നഗരത്തിലെ ഒരു സ്‌കൂളിൽ ഒമ്പതാം ക്ലാസ് വിദ്യാർഥിയായ ഇര അമ്മയ്ക്കും മുത്തശിക്കുമൊപ്പം വാടക വീട്ടിലാണ് താമസിക്കുന്നത്. കുട്ടിയുടെ മാതാപിതാക്കൾ ഒരുമിച്ചല്ല താമസിക്കുന്നത്. അമ്മ വടുതല പ്രദേശത്ത് ശുചീകരണ തൊഴിലാളിയാണ്. മുത്തശി നഗരത്തിലെ അപ്പാർട്ടുമെന്‍റുകളിൽ വീട്ടുജോലി ചെയ്ത് വരുന്നു. 58കാരിയായ മുത്തശിയെ, പ്രബിൻ ഇടയ്ക്കിടെ സന്ദർശിക്കാറുണ്ടായിരുന്നു. 2024 ഡിസംബർ 24ന് കുട്ടിയുടെ അമ്മ വീട്ടിലില്ലാത്ത സമയത്ത് ഇയാൾ അവിടെയെത്തി. കുട്ടിയുടെ മുന്നിൽ വച്ച് മദ്യം കുടിച്ച ശേഷം ബട്ടൺ ഉപയോഗിച്ച് പ്രവർത്തിക്കുന്ന ചെറിയ കത്തി വച്ച് കുട്ടിയെ ഭീഷണിപ്പെടുത്തുകയും നിർബന്ധിച്ച് മദ്യം കുടിപ്പിക്കുകയും ചെയ്തു. പിന്നീട് കുട്ടിയുടെ ജന്മദിനമായ കഴിഞ്ഞ ജനുവരി നാലിന് വൈകിട്ടോടെ വീട്ടിലെത്തിയ ഇയാൾ അടുക്കളയിൽ വച്ച് കുട്ടിയുടെ കഴുത്തിൽ കത്തിവച്ച് ഭീഷണിപ്പെടുത്തി കഞ്ചാവ് ബീഡി വലിപ്പിക്കുകയും ചെയ്തു. കഴിഞ്ഞ ദിവസം കുട്ടി സ്കൂളിലെ സുഹൃത്തിനോട് കാര്യങ്ങൾ പറഞ്ഞതോടെയാണ് സംഭവം പുറത്തറിഞ്ഞത്. സുഹൃത്ത് സ്വന്തം അമ്മയെ വിവരം അറിയിച്ചു. ഇവരാണ് കുട്ടിയുടെ അമ്മയെ കണ്ട് വിവരം പറഞ്ഞത്. പ്രബിനോട് ഇക്കാര്യം ചോദിച്ചപ്പോൾ അമ്മയെ ഭീഷണിപ്പെടുത്തി. തുടർന്ന് ഇവർ ആദ്യം വനിതാ പോലീസ് സ്റ്റേഷനിനും പിന്നീട് കൊച്ചി സിറ്റി പോലീസ് കമ്മീഷണർക്കും പരാതി നൽകുകയായിരുന്നു. കുട്ടിക്ക് കൗൺസലിംഗ് നൽകി വരികയാണ് ഇപ്പോൾ.

ദീപിക കളർ ഇന്ത്യ സീസൺ 4 : വർണങ്ങളിൽ ഒന്നായി വിദ്യാലയങ്ങൾ

കൊച്ചി: വൈവിധ്യങ്ങൾക്കിടയിലും മതേതര, ജനാധിപത്യ ഭാരതത്തിൽ നമ്മളെല്ലാവരും ഒന്നാണെന്ന ഐക്യബോധവും അഖണ്ഡതയും ഉദ്ഘോഷിച്ച് ദീപിക കളർ ഇന്ത്യ സീസൺ 4. വരകളും വർണങ്ങളുമായി വിദ്യാലയങ്ങളിൽ ദേശസ്നേഹത്തിന്‍റെ ഉത്സവഛായ പകർന്ന പെയിന്‍റിംഗ് മത്സരത്തിൽ വിദ്യാർഥികൾ ആവേശത്തോടെയാണു പങ്കെടുത്തത്. ഭാരതത്തിന്‍റെ 79-ാം സ്വാതന്ത്യദിനാഘോഷത്തിന്‍റെ ഭാഗമായി ദീപിക നടത്തിയ കളർ ഇന്ത്യ സീസൺ 4ന്‍റെ എറണാകുളം ജില്ലാതല ഉദ്ഘാടനം കൊച്ചി നൈപുണ്യ പബ്ലിക് സ്കൂളിൽ നടന്നു. ഉമ തോമസ് എംഎൽഎ ഉദ്ഘാടനം നിർവഹിച്ചു. രാഷ്ട്രദീപിക ഡയറക്ടറും നൈപുണ്യ എക്സിക്യൂട്ടീവ് ഡയറക്ടറുമായ ഫാ. സൈമൺ പള്ളുപ്പെട്ട അധ്യക്ഷത വഹിച്ചു. ദീപിക ജനറൽ മാനേജർ ഫാ. ജിനോ പുന്നമറ്റത്തിൽ, സ്കൂൾ പ്രിൻസിപ്പൽ ബോബി ജോസഫ്, ദീപിക സർക്കുലേഷൻ മാനേജർ ബിനോ വർഗീസ് എന്നിവർ പ്രസംഗിച്ചു. സ്കൂൾ ജനറൽ‌ ക്യാപ്റ്റൻ ഇഷ ഹക്കിം വിദ്യാർഥികൾക്കു ദേശീയോദ്ഗ്രഥന പ്രതിജ്ഞ ചൊല്ലിക്കൊടുത്തു. എറണാകുളം ജില്ലയിലെ 700 സ്കൂളുകളിലായി എൽകെജി മുതൽ പ്ലസ്ടു വരെയുള്ള 1.20 ലക്ഷത്തോളം വിദ്യാർഥികൾ ദീപിക കളർ ഇന്ത്യ സീസൺ 4ൽ പങ്കെടുത്തു. മത്സരത്തോടനുബന്ധിച്ചു വിവിധ സ്കൂളുകളിൽ ദേശഭക്തിയുണർത്തുന്ന ഗാന, നൃത്ത അവതരണങ്ങൾ ഉണ്ടായിരുന്നു. മാധ്യമരംഗത്തെ മാതൃക: ഉമ തോമസ് എംഎൽഎ വിദ്യാർഥികളിൽ ദേശബോധവും കൂട്ടായ്മയും പ്രോത്സാഹിപ്പിക്കുന്നതിനു ദീപിക നടത്തുന്ന കളർ ഇന്ത്യ മത്സരം, മാധ്യമരംഗത്തെ മാതൃകയാണെന്ന് ഉമ തോമസ് എംഎൽഎ പറഞ്ഞു. രാജ്യത്തെ അധികമായി സ്നേഹിക്കുകയും ഭരണഘടനാ മൂല്യങ്ങൾക്കു മുറിവുകളേൽക്കാതെ സംരക്ഷിക്കപ്പെടുകയും ചെയ്യേണ്ട സവിശേഷ കാലഘട്ടമാണിത്. പത്തു ലക്ഷത്തോളം വിദ്യാർഥികൾ കളർ ഇന്ത്യ മത്സരത്തിൽ പങ്കെടുക്കുന്നത് അഭിമാനം പകരുന്നതാണെന്നും എംഎൽഎ പറഞ്ഞു.

ജില്ലാ അത്‌ലറ്റിക് ചാമ്പ്യന്‍ഷിപ്പ് : മൂക്കന്നൂര്‍ എസ്എച്ച്ഒയും കോതമംഗലം മാർ ബേസിലും ഓവറോൾ ചാമ്പ്യന്മാര്‍

കൊച്ചി: ജില്ലാ അത്‌ലറ്റിക് ചാമ്പ്യന്‍ഷിപ്പില്‍ സീനിയര്‍ വിഭാഗത്തില്‍ അങ്കമാലി മൂക്കന്നൂര്‍ സേക്രഡ് ഹാര്‍ട്ട് ഓര്‍ഫനേജ് ഹൈസ്‌കൂള്‍ (എസ്എച്ച്ഒഎച്ച്എസ്) സ്‌പോര്‍ട്‌സ് അക്കാദമിയും, ജൂണിയര്‍ വിഭാഗത്തില്‍ കോതമംഗലം മാര്‍ബേസില്‍ എച്ച്എസ്എസും ഓവറോ ൾ ചാമ്പ്യന്‍മാരായി. 170 പോയിന്‍റ് നേടിയാണ് സീനിയര്‍ ചാമ്പ്യന്‍ഷിപ്പില്‍ മൂക്കന്നൂര്‍ എഎസ്എച്ച്ഒഎച്ച്എസ് അക്കാദമി കിരീടം സ്വന്തമാക്കിയത്. നിലവിലെ ചാമ്പ്യന്‍മാരായ കോതമംഗലം എംഎ കോളജ് 138 പോയിന്‍റുമായി റണ്ണേഴ്‌സ് അപ്പായി, കോതമംഗലം മാര്‍ബേസില്‍ സ്‌കൂളിനാണ് മൂന്നാം സ്ഥാനം (136). വൈപ്പിന്‍ നായരമ്പലം ഭഗവതി വിലാസം ഹൈസ്‌കൂള്‍ (ബിവിഎച്ച്എസ്എസ്) 67 പോയിന്‍റുമായി നാലാം സ്ഥാനത്തെത്തി. വടുതല ചിന്‍മയ വിദ്യാലയ ടീം 34 പോയിന്‍റോടെ അഞ്ചാം സ്ഥാനത്തുമെത്തി. ജൂണിയര്‍ വിഭാഗത്തില്‍ 464 പോയിന്റുകള്‍ നേടിയാണ് മാര്‍ബേസിലിന്‍റെ നേട്ടം, മൂക്കന്നൂര്‍ എസ്എച്ച്ഒഎച്ച്എസ് അക്കാദമി 445 പോയിന്‍റോടെ രണ്ടാം സ്ഥാനക്കാരായി. കോതമംഗലം എംഎ കോളജിനാണ് മൂന്നാം സ്ഥാനം (222). വിദ്യോദയ സ്‌കൂള്‍ തേവക്കല്‍ (160), വടുതല ചിന്‍മയ വിദ്യാലയ (160) സ്‌കൂളുകള്‍ യഥാക്രമം നാലും അഞ്ചും സ്ഥാനങ്ങള്‍ നേടി. ജൂണിയര്‍ ആണ്‍-പെണ്‍ വിഭാഗങ്ങളില്‍ അണ്ടര്‍ 16, അണ്ടര്‍ 18 കാറ്റഗറികളിലും, സീനിയര്‍ വനിതാ വിഭാഗത്തിലും മാര്‍ബേസില്‍ ചാമ്പ്യന്‍മാരായി. ജൂണിയര്‍ അണ്ടര്‍ 14 പെണ്‍വിഭാഗത്തില്‍ മൂക്കന്നൂര്‍ എസ്എച്ച്ഒഎച്ച്എസ് സ്‌പോര്‍ട്‌സ് അക്കാദമി മുന്നിലെത്തി. ജില്ലാ ചാമ്പ്യന്‍ഷിപ്പിലെ ആദ്യ മൂന്ന് സ്ഥാനക്കാര്‍ക്ക് ഈ മാസം 16,17,18 തീയതികളില്‍ തിരുവനന്തപുരത്ത് നടക്കുന്ന സംസ്ഥാന ചാമ്പ്യന്‍ഷിപ്പില്‍ പങ്കെടുക്കാം. വിവിധ വിഭാഗങ്ങളില്‍ ആദ്യസ്ഥാനങ്ങള്‍ നേടിയവര്‍ ആണ്‍കുട്ടികളുടെ വിഭാഗം അണ്ടര്‍ 14: വിദ്യോദയ സ്‌കൂള്‍ തേവക്കല്‍ 62, മൂക്കന്നൂര്‍ എസ്എച്ച്ഒഎച്ച്എസ് സ്‌പോര്‍ട്‌സ് അക്കാദമി 45. അണ്ടര്‍ 16: കോതമംഗലം മാര്‍ബേസില്‍ എച്ച്എസ്എസ് 48, മൂക്കന്നൂര്‍ എസ്എച്ച്ഒഎച്ച്എസ് സ്‌പോര്‍ട്‌സ് അക്കാദമി 48, ചിന്മയ വിദ്യാലയ വടുതല 32. അണ്ടര്‍ 18: മാര്‍ബേസില്‍ എച്എസ്എസ് 94, മൂക്കന്നൂര്‍ എസ്എച്ച്ഒഎച്ച്എസ് സ്‌പോര്‍ട്‌സ് അക്കാദമി 92. അണ്ടര്‍ 20: എം.എ കോളജ് കോതമംഗലം 71, മാര്‍ബേസില്‍ എച്ച്എസ്എസ് കോതമംഗലം 68. പെണ്‍കുട്ടികളുടെ വിഭാഗം അണ്ടര്‍ 14: മൂക്കന്നൂര്‍ എസ്എച്ച്ഒഎച്ച്എസ് സ്‌പോര്‍ട്‌സ് അക്കാദമി 61, കാക്കനാട് ഭവന്‍സ് ആദര്‍ശ് വിദ്യാലയ 27.5. അണ്ടര്‍ 16: കോതമംഗലം മാര്‍ബേസില്‍ എച്ച്എസ്എസ് 85, മൂക്കന്നൂര്‍ എസ്എച്ച്ഒഎച്ച്എസ് സ്‌പോര്‍ട്‌സ് അക്കാദമി 59. അണ്ടര്‍ 18: കോതമംഗലം മാര്‍ബേസില്‍ എച്ച്എസ്എസ് 88, മൂക്കന്നൂര്‍ എസ്എച്ച്ഒഎച്ച്എസ് സ്‌പോര്‍ട്‌സ് അക്കാദമി 66. അണ്ടര്‍ 20: സെന്റ് സേവ്യേഴ്‌സ് കോളജ് ഫോര്‍ വിമണ്‍ ആലുവ 56.5, മാര്‍ബേസില്‍ എച്ച്എസ്എസ് കോതമംഗലം 43. സീനിയര്‍ പുരുഷ വിഭാഗം: എം.എ കോളജ് കോതമംഗലം 87, മൂക്കന്നൂര്‍ എസ്എച്ച്ഒഎച്ച്എസ് സ്‌പോര്‍ട്‌സ് അക്കാദമി 59. വനിതാവിഭാഗം: മാര്‍ബേസില്‍ എച്ച്എസ്എസ് കോതമംഗലം 122, മൂക്കന്നൂര്‍ എസ്എച്ച്ഒഎച്ച്എസ് സ്‌പോര്‍ട്‌സ് അക്കാദമി 111.

കത്തോലിക്കാ കോണ്‍ഗ്രസ് ഫൊറോന സംഗമം

മൂവാറ്റുപുഴ: കത്തോലിക്കാ കോണ്‍ഗ്രസ് കോതമംഗലം രൂപത മൂവാറ്റുപുഴ ഫൊറോന യൂണിറ്റുകളിലെ ഭാരവാഹികള്‍ ഹോളി മാഗി ഫൊറോന പള്ളി കോണ്‍ഫറന്‍സ് ഹാളില്‍ ഫൊറോന സംഗമം സംഘടിപ്പിച്ചു. രൂപത ഡയറക്ടര്‍ റവ.ഡോ. മാനുവല്‍ പിച്ചളക്കാട്ട് ഉദ്ഘാടനം നിര്‍വഹിച്ചു. ഫൊറോന പ്രസിഡന്‍റ് ജോസ് പറമ്പന്‍ അധ്യക്ഷത വഹിച്ചു. രൂപത പ്രസിഡന്‍റ് സണ്ണി കടൂത്താഴെ മുഖ്യപ്രഭാഷണം നടത്തി. കര്‍ഷക അവഗണന, കാര്‍ഷിക ഉത്പന്നങ്ങളുടെ വില തകര്‍ച്ച, സര്‍ക്കാര്‍ വാഗ്ദാന ലംഘനങ്ങള്‍, സമൂഹത്തില്‍ നടമാടികൊണ്ടിരിക്കുന്ന സാമൂഹ്യ തിന്മകള്‍ തുടങ്ങിയവയ്‌ക്കെതിരേ പ്രതികരിക്കേണ്ടത് കത്തോലിക്ക കോണ്‍ഗ്രസിന്‍റെ കടമയാണെന്ന് യോഗം വിലയിരുത്തി. ഛത്തീസ്ഗഡിലും ഒഡീഷയിലും നടന്ന കന്യാസ്ത്രീകളെയും വൈദികരെയും ആക്രമിച്ച് ആള്‍ക്കൂട്ട വിചാരണ നടത്തിയതിനെതിരേ യോഗം പ്രതിഷേധിച്ചു. രൂപത ജനറല്‍ സെക്രട്ടറി മത്തച്ചന്‍ കളപ്പുരക്കല്‍, സെക്രട്ടറി ആന്‍റണി പുല്ലന്‍, ഗ്ലോബല്‍ ജനറല്‍ സെക്രട്ടറി ഡോ. ജോസ്‌കുട്ടി ഒഴുകയില്‍, ജോയ്‌സ് മേരി ആന്‍റണി, ചാക്കോ വിളയപ്പിള്ളി, ജോസ് തെക്കേക്കൂറ്റ്, ഡോ. ജോണി സ്‌കറിയ, മാത്യൂസ് കുരിക്കൂര്‍, ജോസ് കൊട്ടംപുഴയില്‍, ജിന്‍റോ പൈനാടത്ത്, ജോര്‍ജ് കാക്കനാട്, ജിജി തോട്ടുപുറം, ഷാബു അരയത്തിനാല്‍ എന്നിവര്‍ പ്രസംഗിച്ചു. മൂവാറ്റുപുഴ ഫൊറോന സമിതി നേതൃത്വം നല്‍കി. ചിങ്ങം ഒന്നിന് കര്‍ഷക വഞ്ചന ദിനമായി ആചരിക്കാനും യോഗം തീരുമാനിച്ചു.

മംഗലത്തുതാഴത്ത് കലുങ്ക് പുനർനിർമാണം തുടങ്ങി

കൂത്താട്ടുകുളം: കൂത്താട്ടുകുളം - പാലാ റോഡിൽ മംഗലത്തുതാഴത്ത് തകർന്ന കലുങ്കിന്‍റ പുനർനിർമാണ പ്രവൃത്തികൾ ആരംഭിച്ചു. ഇതിന്‍റെ ഭാഗമായി ഇതുവഴിയുള്ള ഗതാഗതം ഭാഗികമായി നിയന്ത്രിച്ചിരിക്കുകയാണ്. റോഡിന്‍റെ പകുതി വരെയുള്ള ഭാഗത്തെ നിർമാണമാണ് ആദ്യഘട്ടത്തിൽ നടക്കുന്നത്. കലുങ്കിന്‍റെ തകർന്ന സ്ലാബ് ബ്രേക്കറിന്‍റെ സഹായത്തോടെ പൊളിച്ചു നീക്കി. ഈ ഭാഗത്തെ നിർമാണം പൂർത്തിയാകുന്ന മുറയ്ക്ക് മറുഭാഗത്തെ നിർമാണപ്രവൃത്തികൾ ആരംഭിക്കും. 28 ദിവസത്തെ ക്യൂയറിംഗ് കാലാവധിക്ക് ശേഷമാകും നിർമാണം പൂർത്തിയാക്കുന്ന ഭാഗം ഗതാഗതത്തിന് തുറന്നു നല്കുക. നിർമാണത്തിൽ തുടർന്നും വീഴ്ചകൾ ഉണ്ടാകാതിരിക്കാൻ പ്രദേശവാസികളുടെ മേൽനോട്ടവും ഇവിടെയുണ്ട്. പൊളിച്ച ഭാഗത്ത് നടത്തിയ പരിശോധനയിൽ നിലവിലുണ്ടായിരുന്ന കലുങ്കിന്‍റെ സ്ലാബിന് അഞ്ച് ഇഞ്ച് കനം പോലും ഇല്ലായിരുന്നെന്ന് കണ്ടെത്തി. കലുങ്ക് തകർന്ന സാഹചര്യത്തിൽ വ്യാഴാഴ്ച രാവിലെ പ്രദേശത്ത് കോൺഗ്രസ് മണ്ഡലം കമ്മിറ്റിയുടെ നേതൃത്വത്തിൽ റോഡ് തടഞ്ഞ് ഉപരോധ സമരം നടത്തിയിരുന്നു. സമരത്തെ തുടർന്ന് പിഡബ്ല്യുഡി ഉദ്യോഗസ്ഥർ സ്ഥലത്തെത്തുകയും കലുങ്ക് പുനർനിർമിക്കുമെന്ന് ഉറപ്പ് നൽകുകയും ചെയ്തു. ഉച്ചയോടെ പ്രദേശത്ത് എൽഡിഎഫിന്‍റെ സൂചനാ സമരവും നടന്നു.

ഹിരോഷിമ നാഗസാക്കി ദിനാചരണം

കോതമംഗലം: കറുകടം മൗണ്ട് കാർമൽ കോളജ് എൻഎസ്എസ് യൂണിറ്റിന്‍റെയും പീസ് ക്ലബിന്‍റെയും സൈക്കോളജി ഡിപ്പാർട്ട്മെന്‍റിന്‍റെയും സംയുക്ത ആഭിമുഖ്യത്തിൽ ഹിരോഷിമ നാഗസാക്കി ദിനാചരണം നടത്തി. വിദ്യാർഥികൾ നടത്തിയ സമാധാന റാലിയുടെ ഫ്ലാഗ് ഓഫ് കോളജ് പ്രിൻസിപ്പൽ ഫാ. ഷാജി മംഗലത്ത് നിർവഹിച്ചു. അമിതാ സജി മുഖ്യ പ്രഭാഷണം നടത്തി.

ന്യൂനപക്ഷ വേട്ട ഭരണഘടനാവിരുദ്ധം: മാത്യു കുഴല്‍നാടന്‍

മൂവാറ്റുപുഴ: ന്യൂനപക്ഷങ്ങളെയും പിന്നോക്ക ജനവിഭാഗങ്ങളെയും ആള്‍ക്കൂട്ട വിചാരണക്ക് ഇരയാക്കുന്നത് ഭരണഘടനാ മൂല്യങ്ങള്‍ക്ക് വിരുദ്ധമാണെന്ന് മാത്യു കുഴല്‍നാടന്‍ എംഎല്‍എ. കോണ്‍ഗ്രസ് പായിപ്ര മണ്ഡലം കമ്മിറ്റി സംഘടിപ്പിച്ച സഹന ജ്വാല ഉദ്ഘാടനം ചെയ്യുകയായിരുന്നു അദേഹം. അപകടകരമായ അവസ്ഥയിലൂടെയാണ് രാജ്യം സഞ്ചരിക്കുന്നത്. കഴിഞ്ഞ ദിവസം ഒഡീഷയില്‍ വൈദികരും കന്യാസ്ത്രീകള്ളും നേരിട്ടതും ഇതേ ആള്‍ക്കൂട്ട വിചാരണയാണ്. പിന്നോക്ക ആദിവാസി ദളിത് സമൂഹങ്ങളും ഈ അവഗണനകള്‍ക്കും പീഡനങ്ങള്‍ക്കും ഇരയാകേണ്ടി വരികയാണ്. പിന്നോക്ക ജനവിഭാഗങ്ങളെ സംരക്ഷിക്കേണ്ട കേന്ദ്ര സര്‍ക്കാര്‍ അക്രമികള്‍ക്ക് എല്ലാവിധ സഹായവും നല്‍കുകയാണെന്നും എംഎല്‍എ ആരോപിച്ചു. പായിപ്ര മണ്ഡലം പ്രസിഡന്‍റ് പി.എം. ഷാന്‍ പ്ലാക്കുടി അധ്യക്ഷത വഹിച്ചു. ജാമിഅ ബദ്‌രിയ അറബിക് കോളജ് പ്രിന്‍സിപ്പല്‍ മുഹമ്മദ് തൗഫീഖ് മൗലവി എംഎഫ്ബി മുഖ്യ പ്രഭാഷണം നടത്തി. തൃക്കളത്തൂര്‍ സെന്‍റ് ജോര്‍ജ് യാക്കോബായ പള്ളി വികാരി ഫാ. ജേക്കബ് കൊച്ചുപറമ്പില്‍, ബ്ലോക്ക് പ്രസിഡന്‍റ് സാബു ജോണ്‍, പായിപ്ര കൃഷ്ണന്‍, കെ.പി. ജോയി, മാത്യൂസ് വര്‍ക്കി, കെ.കെ. ഉമ്മര്‍, പി.സി മത്തായി, മാത്യു ഇട്ടന്‍ എന്നിവര്‍ പ്രസംഗിച്ചു.

രണ്ടാഴ്ച മുന്പ് സ്ഥാപിച്ച ഹൈമാസ്റ്റ് ലൈറ്റ് നശിപ്പിച്ചു

മൂവാറ്റുപുഴ: ഡീന്‍ കുര്യാക്കോസ് എംപിയുടെ പ്രാദേശിക വികസന ഫണ്ട് ഉപയോഗിച്ച് രണ്ടാഴ്ച മുമ്പ് കായനാട് ഗവ. എല്‍പി സ്‌കൂളിന് മുന്‍ വശത്ത് സ്ഥാപിച്ചിരുന്ന ഹൈമാസ്റ്റ് ലൈറ്റ് നശിപ്പിച്ചതായി പരാതി. മദ്യപിച്ചെത്തിയ ഒരു വ്യക്തി ലൈറ്റിന്‍റെ മീറ്റര്‍ പിടിപ്പിച്ചിരുന്ന ഭാഗം പൊളിക്കുകയും ഇതിനോടനുബന്ധിച്ച് സ്ഥാപിച്ചിരുന്ന ശിലാഫലകത്തിന്‍റെ ഇരുമ്പ് ഫ്രെയിം എടുത്തുകൊണ്ട് പോകുകയും ചെയ്തതായാണ് പരാതി ഉയര്‍ന്നിരിക്കുന്നത്. ഇതിനിടെ കായനാട് ഗവ. എല്‍പി സ്‌കൂളിന്‍റെ പ്രധാന ഗേറ്റിന്‍റെ താഴ് പൊളിക്കുകയും ചെയ്തിട്ടുണ്ട്. ഇതു സംബന്ധിച്ച് മാറാടി പഞ്ചായത്ത് സെക്രട്ടറി രാമമംഗലം പോലീസില്‍ പരാതി നല്‍കിയിട്ടുണ്ട്. ഉചിതമായ നടപടി സ്വീകരിച്ചില്ലെങ്കില്‍ ശക്തമായ സമര പരിപാടികള്‍ ആരംഭിക്കുമെന്ന് മാറാടി പഞ്ചായത്ത് പ്രസിഡന്‍റ് ഒ.പി. ബേബി, കോണ്‍ഗ്രസ് മാറാടി മണ്ഡലം പ്രസിഡന്‍റ് പി.പി. ജോളി എന്നിവര്‍ അറിയിച്ചു.

പിറവത്ത് പുതിയ ഗതാഗത പരിഷ്കരണം

പിറവം: പിറവം നഗരസഭയിൽ ഗതാഗത ഉപദേശക സമിതി യോഗം ചേർന്ന് ടൗണിലെ ഗതാഗത സംവിധാനങ്ങൾ പരിഷ്കരിച്ചുള്ള നിർദേശങ്ങൾ നടപ്പിലാക്കും. കിഴക്കൻ മേഖലയിൽനിന്നും വരുന്ന വാഹനങ്ങൾ ടൗണിൽ എംഎൽഎ റോഡിലേക്ക് പ്രവേശിക്കുന്നത് ബോർഡ് സ്ഥാപിച്ച തടയാനും ടൗണിൽ നേരത്തെ സ്ഥാപിച്ച സൈൻ ബോർഡുകൾ പുനസ്ഥാപിക്കാനും തീരുമാനിച്ചു. താലൂക്ക് ആശുപത്രിക്ക് മുന്നിലെ പൊളിഞ്ഞു വീഴാറായ ബസ് കാത്തിരിപ്പ് കേന്ദ്രം നീക്കംചെയ്ത് കുന്നേപ്പള്ളി കുരിശിന് എതിർവശം നിർമിച്ചിരിക്കുന്ന മുന്നിലേക്ക് ബസ് സ്റ്റോപ്പ് മാറ്റും. പ്രൈവറ്റ് സ്റ്റാൻഡിൽനിന്നും ബസുകൾ പുറപ്പെടുന്നതിനു മുമ്പ് സ്റ്റാൻഡിൽ വട്ടം പാർക്ക് ചെയ്യാതെ കടന്നുപോകണമെന്ന് യോഗം നിർദേശിച്ചു. ടൗണിലെ പുതിയ വ്യാപാര സ്ഥാപനങ്ങൾക്ക് മുന്നിലെ പാർക്കിംഗ് പൂർണമായും തടയും. ബന്ധപ്പെട്ട സ്ഥാപനങ്ങൾക്ക് ഇത് സംബന്ധിച്ചു നോട്ടീസ് നൽകാൻ തീരുമാനിച്ചു. നഗരസഭ ചെയർപേഴ്സൺ ജൂലി സാബു, വൈസ് ചെയർമാൻ കെ.പി. സലിം, സെക്രട്ടറി പ്രകാശ് കുമാർ, പോലീസ്, ഗതാഗത, വൈദ്യുതി വകുപ്പ് അധികൃതർ എന്നിവർ പങ്കെടുത്തു.

പിറവം പിഒ ജംഗ്ഷനിൽ അപകടം തുടർക്കഥ

പിറവം: പിറവത്തെ പോസ്റ്റോഫീസ് ജംഗ്ഷൻ അപകട മേഖലയായി മാറുന്നു. കഴിഞ്ഞ ദിവസവും ഇവടെ കാറും ബൈക്കുമായി കൂട്ടിയിടിച്ചു. അപകടത്തിൽ ബൈക്ക് യാത്രികൻ തെറിച്ചു വീണത് പിക്കപ്പ് വാനിന്‍റെ മുന്നിലേക്കാണങ്കിലും അത്ഭുതകരമായി രക്ഷപ്പെടുകയായിരുന്നു. വൺവേ റോഡിൽനിന്നും വന്ന കാർ തിരിഞ്ഞ് പാലത്തിലേക്ക് പ്രവേശിക്കുന്നതിനിടെയാണ് എതിരേ വന്ന ബൈക്കുമായി കൂട്ടിയിടിച്ചത്. ഒരോ അര മണിക്കൂറിലും നൂറുക്കണക്കിന് വാഹനങ്ങൾ കടന്നുപോകുന്ന ഇവിടെ അപകടങ്ങൾ നിത്യ സംഭവമാണ്. നാലു റോഡുകൾ കൂടി ചേരുന്ന പി ഒ ജംഗ്ഷനിൽ ആഴ്ചയിൽ മൂന്നു ദിവസമെങ്കിലും ചെറുതും, വലുതുമായ അപകടങ്ങൾ നടക്കുന്നുണ്ട്. ഭൂരിഭാഗവും ഭാഗ്യം കൊണ്ട് രക്ഷപെടുമ്പോൾ, ചിലർക്ക് സാരമായി പരിക്കേൽക്കാറുണ്ട്. നാലുഭാഗങ്ങളിൽനിന്നും വരുന്ന വാഹന ഡ്രൈവർമാർക്ക് പരസ്പരം കാണാൻ സാധിക്കാതിരിക്കുകയും, സിഗ്നലുകൾ ലഭിക്കാത്തതുമാണ് പ്രധാന അപകട കാരണം. പി ഒ ജംഗ്ഷൻ മുതൽ പള്ളിക്കവലവരെ റോഡിന്‍റെ ഇരു ഭാഗങ്ങളിലും സ്വകാര്യ വാഹനങ്ങളുടെ പാർക്കിംഗും അപകടവും, ഗതാഗത തടസവും സൃഷ്ടിക്കുന്നുണ്ട്.

ദുരിതയാത്ര : നാട്ടുകാരെ കുഴിയിലാക്കാൻ

മൂവാറ്റുപുഴ: ദിനംപ്രതി നൂറുകണത്തിന് വാഹനങ്ങള്‍ സഞ്ചരിക്കുന്ന മൂവാറ്റുപുഴ കാവുംപടി റോഡില്‍ രൂപപ്പെട്ടിരിക്കുന്ന കുഴി യാത്രക്കാര്‍ക്ക് ദുരിതമാകുന്നു. മൂവാറ്റുപുഴ നിര്‍മല ഹയര്‍സെക്കന്‍ഡറി സ്‌കൂളിന് സമീപം സെന്‍റ് മേരീസ് കപ്പേളയോട് ചേര്‍ന്നാണ് യാത്രക്കാരുടെ നടുവൊടിക്കുംവിധമുള്ള വലിയ കുഴി രൂപപ്പെട്ടിരിക്കുന്നത്. നഗരത്തില്‍ ഗതാഗത നിയന്ത്രണം പ്രാബല്യത്തില്‍ ഇരിക്കെ പ്രധാനമായും തൊടുപുഴ ഭാഗത്തേക്ക് ഉൾപ്പെടെ പോകേണ്ട യാത്രക്കാര്‍ ആശ്രയിക്കുന്ന കാവുംപടി റോഡിന്‍റെ നടുവിലായി രൂപപ്പെട്ടിരിക്കുന്ന വലിയ കുഴി യാത്രക്കാര്‍ക്ക് ദുരിതമായി മാറിയിരിക്കുകയാണ്. മഴ പെയ്ത് കുഴിയില്‍ വെള്ളം നിറയുന്നതോടെ വാഹനങ്ങള്‍ അപകടത്തിൽപ്പെടാനുള്ള സാധ്യത ഏറെയാണ്. വെള്ളം നിറഞ്ഞു നില്‍ക്കുമ്പോള്‍ കുഴിയുടെ വ്യാപ്തി അറിയാതെ എത്തുന്ന വാഹനങ്ങള്‍ കുഴിയില്‍ ചാടുന്നത് പതിവായി. ഇരുചക്ര വാഹന യാത്രക്കാരാണ് കൂടുതലായും ദുരിതത്തിലായിരിക്കുന്നത്. വാഹനങ്ങള്‍ കുഴിയില്‍ ചാടുമ്പോള്‍ ദേഹത്തേക്ക് ചെളിവെള്ളം തെറിക്കുന്നത് കാല്‍നട യാത്രക്കാരെയും ബുദ്ധിമുട്ടിലാക്കുന്നുണ്ട്. ടാറിംഗ് ഇളകി മെറ്റിലുകള്‍ റോഡില്‍ ചിതറിക്കിടക്കുന്നതും അപകടം വരുത്തിവയ്ക്കുന്നുണ്ട്. രണ്ട് സ്‌കൂളുകള്‍, പോലീസ് സ്റ്റേഷന്‍, കോടതി സമുച്ചയം, നഗരസഭ കാര്യാലയം തുടങ്ങി നിരവധി സ്ഥാപനങ്ങള്‍ പ്രവര്‍ത്തിക്കുന്ന കാവുംപടി റോഡില്‍ ചെറുതും, വലുതുമായ നിരവധി കുഴികളാണ് രൂപപ്പെട്ടിരിക്കുന്നത്. കുഴി നികത്തി റോഡിലെ അപകടക്കെണിക്ക് പരിഹാരം കാണണമെന്നാണു പ്രദേശവാസികളുടെ ആവശ്യം.

കോടനാട് പ്രദേശത്തെ മഴയളക്കാൻ വിദ്യാർഥികൾ

പെരുമ്പാവൂർ: കോടനാട് പ്രദേശത്ത് പെയ്യുന്ന മഴയുടെ അളവെടുക്കുവാൻ വിദ്യാർഥികൾ രംഗത്തിറങ്ങി. ബസേലിയോസ് പബ്ലിക് സ്കൂളിലെ വിദ്യാർഥികളാണ് 17 മഴ മാപിനികൾ വിവിധ വിദ്യാർഥികളുടെ വീടുകളിൽ സ്ഥാപിച്ചത്. ശാസ്ത്രീയമായി മഴ അളക്കുന്നതിനുള്ള മഴമാപിനികൾ സ്കൂളിലെ നേച്ചർ ക്ലബ്ലിന്‍റെ നേതൃത്വത്തിലാണ് നിർമിച്ചത്. നേച്ചർ ക്ലബ്ബിലെ 50 ഓളം വിദ്യാർഥികൾ റെയിൻ ഗേജ് നിർമാണത്തിൽ പങ്കെടുത്തു. മഴയുടെ അളവ് ഓരോ ദിവസവും അളന്നെടുക്കാനുള്ള ക്രമീകരണം ആണ് ചെയ്തിട്ടുള്ളത്. സ്കൂൾ ഗ്രൗണ്ടിലും മഴമാപിനി സ്ഥാപിച്ചിട്ടുണ്ട്. പ്രിൻസിപ്പൽ വിജി വി. ജോൺ, അധ്യാപകരായ റിയ വർഗീസ്, ഡി. ധന്യ മോൾ എന്നിവർ നേതൃത്വം നൽകി.

ഡ്രൈവറുടെ അശ്രദ്ധ; ഇലവൻ കെവി ലൈനും ട്രാൻസ്ഫോർമറും തകർന്നു

അരൂർ: ഡ്രൈവറുടെ അശ്രദ്ധമൂലം ഇലവൻ കെവി ലൈനും ട്രാൻഫോമറും തകർന്നു. ചന്തിരൂർ കുമർത്തുപടി ക്ഷേത്രത്തിന് മുന്നിൽ പ്രവത്തിക്കുന്ന സ്ഥാപനത്തിലേക്ക് മിറ്റൽ കയറ്റി വന്ന ടോറസ് ആണ് അപകടത്തിൽപ്പെട്ടത്. വെള്ളിയാഴ്ച ഉച്ചയ്ക്ക് പന്ത്രണ്ടോടെയായിരുന്നു സംഭവം. മിറ്റൽ ഇറക്കിയതിന് ശേഷം കാബിൻ താഴ്ത്താൻ ഡ്രൈവർ മറന്നുപോയതാണ് അപകടത്തിന് കാരണം. മുപ്പത് അടി ഉയരമുള്ള പോസ്റ്റിൽ ഇലവൻ കെവിയുടെ കേബിളുകളിൽ ഉയർന്നു നിന്ന കാബിൻ ഉടക്കിയതോടെയാണ് സമീപത്തെ ബെൽ സീഫുഡ് കമ്പനിയിൽ സ്ഥാപിച്ചിരുന്ന ട്രാൻസ്ഫോർ സംരക്ഷണ വേലി ഉൾപ്പെടെ തകർന്ന് താഴെ വീണത്. അപകടത്തിന് പിന്നാലെ ഡ്രൈവർ ഓടിരക്ഷപ്പെട്ടു. ഇവിടെകന്പിക്കു പകരം കേബിളുകൾ ആയതിനാൽ വൻ അപകടം ഒഴിവായി.

കളമശേരിയില്‍ കൗണ്‍സിലര്‍മാരും ട്രാഫിക് പോലീസും തമ്മില്‍ വാക്കേറ്റം

കളമശേരി: റോഡരികില്‍ പാര്‍ക്ക് ചെയ്തിരുന്ന വാഹനങ്ങള്‍ക്ക് പിഴ ചുമത്തിയതുമായി ബന്ധപ്പെട്ട് കളമശേരിയിൽ കൗണ്‍സിലര്‍മാരും ഇടപ്പള്ളി ട്രാഫിക് പോലീസും തമ്മില്‍ വാക്കേറ്റം. എച്ച്എംടി റോഡരികില്‍ വാഹനങ്ങള്‍ പാര്‍ക്ക് ചെയ്തതിന് പോലീസ് പിഴ ചുമത്തുന്നത് വ്യാപാരികളും കൗണ്‍സിലര്‍മാരും ചേര്‍ന്ന് ചോദ്യം ചെയ്തതാണ് വാക്കേറ്റത്തിന് വഴിവച്ചത്. എച്ച്എംടി ജംഗ്ഷന്‍ മുതല്‍ ഐടിഐക്ക് സമീപം വരെ റോഡരികില്‍ നിര്‍ത്തിയിട്ട വാഹനങ്ങള്‍ക്ക് ഇടപ്പള്ളി ട്രാഫിക് സിഐ എം.പി. സാഗറിന്‍റെ നേതൃത്വത്തില്‍ പിഴയിട്ടു വരുന്നതിനിടെയാണ് എതിര്‍പ്പ് തുടങ്ങിയത്. സ്ഥാപനങ്ങളിലും കച്ചവട സ്ഥാപനങ്ങളിലും എത്തുന്നവര്‍ക്ക് വരെ പിഴ ഇടാന്‍ തുടങ്ങിയതോടെ വ്യാപാരികള്‍ ഇക്കാര്യം എച്ച്എംടി കൗണ്‍സിലര്‍ നഷീദ സലാമിനെയും, പൈപ്പ് ലൈന്‍ കൗണ്‍സിലര്‍ ബഷീര്‍ അയ്യമ്പ്രാത്തിനെയും അറിയിക്കുകയായിരുന്നു. തുടര്‍ന്ന് ഇവര്‍ സ്ഥലത്തെത്തി സിഐയുമായി ചര്‍ച്ച നടത്തി. എന്നാല്‍ ട്രാഫിക് സിഐ ക്ഷുഭിതനായി ചര്‍ച്ചയ്ക്ക് തയാറാകാതെ പോയതിനെ തുടര്‍ന്ന് കൗണ്‍സിലന്മാരുടെ നേതൃത്വത്തില്‍ തടയുകയും വാക്കേറ്റമുണ്ടാകുകയുമായിരുന്നു. എതിര്‍പ്പ് ശക്തമായതോടെ പിന്നീട് പോലീസ് മടങ്ങി. എന്നാല്‍ നടപടി തുരുമെന്നാണ് ട്രാഫിക് പോലീസ് പറയുന്നത്. രേഖാമൂലമല്ലാതെ നിരവധി പരാതികള്‍ ലഭിച്ചതിന്‍റെ അടിസ്ഥാനത്തിലാണ് നടപടിയെന്നും പോലീസ് പറഞ്ഞു. കച്ചവട സ്ഥാപനങ്ങളിലേക്കെത്തുന്നവരുടെ വാഹനങ്ങള്‍ക്കും പിഴ ഈടാക്കുന്നതിനാല്‍ ആളുകളുടെ വരവ് കുറഞ്ഞുവെന്ന് വ്യാപാരികള്‍ പറഞ്ഞു.

വന്യജീവി ശല്യം തടയാൻ നടപടിയില്ല; പ്രതിഷേധം

കാലടി: മലയാറ്റൂർ-നീലീശ്വരം പഞ്ചായത്തിൽ യൂക്കാലി ഭാഗത്ത് കന്നുകാലികളെ പുലി ഉൾപ്പെടെ ഉള്ള വന്യമൃഗങ്ങൾ വന്നു പിടിച്ചു തിന്നുന്നത് ജനജീവിതത്തിന് ഭീഷണിയാകുന്നത് തടയുന്നതിനോ കൂടു വച്ചു പിടിക്കുന്നതിനോ വനം വകുപ്പതികൃതർ അനാസ്ഥ കാണിക്കുന്നതിൽ കർഷക കോൺഗ്രസ് മണ്ഡലം യോഗം പ്രതിഷേധിച്ചു. കർഷക കോൺഗ്രസ് മണ്ഡലം പ്രസിഡന്‍റ് ജോഷി പൂണെലി അധ്യക്ഷത വഹിച്ച യോഗം ബ്ലോക്ക് പ്രസിഡന്‍റ് തോമസ് ചെന്നൈക്കാടൻ ഉദ്ഘാടനം ചെയ്തു. കോൺഗ്രസ് ബ്ലോക്ക് വൈസ് പ്രസിഡന്‍റ് പോൾസൺ കളംപറമ്പിൽ, മണ്ഡലം പ്രസിഡന്‍റ് ബിജു കണിയാംകുടി,ജോയ് മുട്ടംതൊട്ടി ,വർഗീസ് കരിങ്ങൻ ,ആനി ഷാജു എന്നിവർ പ്രസംഗിച്ചു.

അങ്കമാലി എൽഎഫിൽ ലോക മുലയൂട്ടൽ വാരാചരണം

അങ്കമാലി: ലിറ്റിൽ ഫ്ലവർ ആശുപത്രി, ഇന്ത്യൻ അക്കാദമി ഓഫ് പീഡിയാട്രിക്സ്, ലിറ്റിൽ ഫ്ലവർ നഴ്സിംഗ് വിദ്യാർഥികൾ എന്നിവരുടെ നേതൃത്വത്തിൽ ലോക മുലയൂട്ടൽ വാരാചരണം നടത്തി. ആശുപത്രിയിൽ നടന്ന ചടങ്ങ് കസ്റ്റംസ് വകുപ്പ് അഡീഷണൽ ഡയറക്ടർ രാജേശ്വരി ആർ. നായർ ഉദ്ഘാടനം ചെയ്തു. ആശുപത്രി ഡയറക്ടർ ഫാ. ജേക്കബ് ജി.പാലയ്ക്കാപ്പിള്ളി അധ്യക്ഷത വഹിച്ചു. നവജാത ശിശു വിഭാഗത്തിലെ ഡോ. സോളി മാനുവൽ, സൈക്കാട്രി വിഭാഗത്തിലെ ഡോ. സി. ജെ. ജോസഫ്, ഗൈനക്കോളജിയിലെ ഡോ. കൊച്ചുത്രേസ്യ പുതുമന എന്നിവർ സെമിനാർ നയിച്ചു. ആശുപത്രി അസിസ്റ്റന്‍റ് ഡയറക്ടർ ഫാ. എബിൻ കളപ്പുരക്കൽ, ഗൈനക്കോളജി മേധാവി ഡോ. റാണി പോൾ, ഡോ.സന്ദീപ് ജോർജ്, ഡോ. വിനോദ് പോൾ, ഡോ. എലിസബത്ത് ജോസഫ്, നഴ്സിംഗ് സൂപ്രണ്ട് സിസ്റ്റർ പൂജിത എന്നിവർ പ്രസംഗിച്ചു. നഴ്സിംഗ് വിദ്യാർഥികളുടെ വിവിധ കലാപരിപാടികളും ഉണ്ടായിരുന്നു.

പള്ളുരുത്തി സെന്‍റ് ലോറൻസ് പള്ളിയിൽ തിരുനാൾ

ഫോർട്ടുകൊച്ചി: പള്ളുരുത്തി സെന്‍റ് ലോറൻസ് പള്ളിയിൽ വിശുദ്ധ ലോറൻസിന്‍റെ തിരുനാൾ ആരംഭിച്ചു. ബിഷപ് ഡോ. ജോസഫ് കരിയിൽ കൊടിയേറ്റ് നിർവഹിച്ചു. ഇന്നു നടക്കുന്ന വചനശുശ്രൂഷയ്ക്ക് ഫാ. ജോഷി മയ്യാറ്റിൽ നേതൃത്വം നല്കും. ഫാ. ജോപ്പി കൂട്ടുങ്കൽ ദിവ്യബലി അർപ്പിക്കും. സമാപന ദിവസമായ നാളെ വൈകുന്നേരം 4.30 ന് സമൂഹ ദിവ്യബലിക്ക് വരാപ്പുഴ സഹായ മെത്രാൻ ഡോ. ആന്‍റണി വാലുങ്കൽ മുഖ്യകാർമികനാകും. തുടർന്ന് പ്രദക്ഷിണം. തിരുനാൾ കർമങ്ങൾക്ക് വികാരി ഫാ. വർഗീസ് പള്ളിപ്പറമ്പിൽ, സഹവികാരി ഫാ. ടെറൂൺ ജോർജ്, പ്രസുദേന്തി കോച്ചേരി അഗസ്റ്റിൻ എന്നിവരാണ് നേതൃത്വം നല്കുന്നത്.

നെടുങ്ങാട് പള്ളിപ്പാലത്തിന്‍റെ അപ്രോച്ച് റോഡ് ഇടിയുന്നു

വൈപ്പിൻ : നെടുങ്ങാട് പള്ളി പാലത്തിന്‍റെ രണ്ട് ഭാഗത്തേയും അപ്പ്രോച്ച് ഇടിഞ്ഞ് താഴുന്നു. ആറു വർഷം മുമ്പ് പൊതുമരാമത്ത് വകുപ്പ് നിർമിച്ച പാലത്തിന്‍റെ ഇരു ഭാഗത്തും താഴേക്ക് ഇരുന്നതിനാൽ പാലവും അപ്രോച്ച് റോഡും തമ്മിലുള്ള ഉയര വ്യത്യാസം വാഹനങ്ങൾക്കും കാൽ നടക്കാർക്കും അപകടക്കെണിയായി മാറിയിരിക്കുകയാണ്. അപ്രോച്ചിൽ വിരിച്ചിരുന്ന കോൺക്രീറ്റ് ടൈലുകൾ ഇളകിയതും വിനയായിട്ടുണ്ട്. അടിയന്തരമായി അറ്റകുറ്റപ്പണികൾ നടത്തണമെന്നാവശ്യപ്പെട്ട് വൈപ്പിൻ പഞ്ചായത്ത് അംഗം അഗസ്റ്റിൻ മണ്ടോത്ത്പറവൂർ പിഡബ്ല്യുഡി എൻജിനീയർക്ക് പരാതി നൽകിയിട്ടുണ്ട്.

ഗൂഗിൾ മാപ്പ് വില്ലനായി : കണ്ടയ്‌നർ ലോറി ഇടറോഡിൽ കുടുങ്ങി

പെരുമ്പാവൂർ: ഗൂഗിൾ മാപ്പ് പണി കൊടുത്തതോടെ കണ്ടെയ്‌നർ ലോറി ഇടറോഡിൽ കുടുങ്ങി. സമീപത്തെ രണ്ട് മതിൽക്കെട്ടുകൾ തകർത്ത ലോറി കാനയിൽ വീണ് ഗതാഗതം തടസപ്പെടുകയും ചെയ്തു. പെരുമ്പാവൂർ ഓൾഡ് വല്ലം റോഡിൽ ഇന്നലെ രാവിലെയാണ് സംഭവം. പൂനെയിൽനിന്ന് കിഴക്കമ്പലത്തേക്ക് വരികയായിരുന്ന കണ്ടെയ്‌നർ ലോറിയാണ് ഗൂഗിൾ മാപ്പ് വില്ലനായതോടെ ഇടറോഡിൽ കുടുങ്ങിയത്. എംസി റോഡ് വഴിപോകേണ്ട ലോറി ഗൂഗിൾ മാപ്പിലെ നിർദേശമനുസരിച്ചാണ് ഇടറോഡിലേക്ക് പ്രവേശിച്ചത്. എന്നാൽ വാഹനത്തിന്‍റെ വലിപ്പം ഗൂഗിൾ മാപ്പിൽ സെറ്റ് ചെയ്യാതിരുന്നതാണ് ഇത്തരത്തിലുള്ള അമളിക്ക് കാരണമായതെന്നാണ് നിഗമനം. എന്നാലും വാഹനം തെറ്റായ റോഡിലേക്കാണ് പ്രവേശിച്ചതെന്ന് മനസിലാക്കിയ ഡ്രൈവർ വാഹനം ഇടറോഡിൽ തിരിക്കാനുള്ള ശ്രമത്തിനിടെ സ്വകാര്യവ്യക്തികളുടെ രണ്ടു മതിലുകൾ തകർക്കുകയും കാനയിലേക്ക് പതിക്കുകയും ചെയ്തു. ഇതോടെ നാട്ടുകാർ രംഗത്തുവരികയും മതിയായ നഷ്ടം തന്നതിനുശേഷം മാത്രം വാഹനം കൊണ്ടുപോയാൽ മതിയെന്ന നിലപാടിലേക്ക് എത്തുകയുമായിരുന്നു. വാഹനത്തിന്‍റെ ഡ്രൈവർ തനിക്ക് പറ്റിയ അബദ്ധം ഇവരോട് പറഞ്ഞതോടെ പോലീസിനെ വിവരം അറിയിക്കുകയായിരുന്നു.

ജില്ലയിലെ പെട്രോള്‍ പമ്പുകളില്‍ മിന്നല്‍ പരിശോധന

കൊച്ചി: എറണാകുളം ജില്ലയിലെ പെട്രോള്‍ പമ്പുകളില്‍ ലീഗല്‍ മെട്രോളജി പരിശോധന നടത്തി. അഞ്ച് കിലോഗ്രാം ചോട്ടു ഗ്യാസ് സിലണ്ടറുകളില്‍ അമിതവില ഈടാക്കി എല്‍പിജി ഗ്യാസ് ഫില്ലിംഗ് ചെയ്യുന്നതായ പരാതിയുടെ അടിസ്ഥാനത്തിലാണ് ലീഗല്‍ മെട്രോളജി മധ്യമേഖല ജോയിന്‍റ് കണ്‍ട്രോളര്‍ രാജേഷ് സാമിന്‍റെ നേതൃത്വത്തില്‍ അസി. കണ്‍ട്രോളര്‍ ആര്‍. സുധ, ഫ്‌ളൈയിംഗ് സ്‌ക്വാഡ് ഇന്‍സ്‌പെക്ടര്‍ ആര്‍.വി. മഞ്ജു, ജിനു വിന്‍സെന്‍റ്, ശ്രീജിത്ത് എന്നിവര്‍ ഉള്‍പ്പെടുന്ന അന്വേഷണ ടീം ജില്ലയിലെ പമ്പുകളില്‍ മിന്നല്‍ പരിശോധന നടത്തിയത്. തിരുവാണിയൂരിലുള്ള ഐഒസി പെട്രോള്‍പമ്പില്‍ അഞ്ച് കിലോഗ്രാം ചോട്ടു ഗ്യാസ് സിലണ്ടറുകൾക്ക് അമിത വില ഈടാക്കിയതിന് ലീഗല്‍ മെട്രോളജി പാക്കേജ്ഡ് കമ്മോഡിറ്റി റൂള്‍സ് പ്രകാരം 10000 രൂപ പിഴ ഈടാക്കി കേസ് രജിസ്റ്റര്‍ ചെയ്തു. സ്ഥിര താമസക്കാരല്ലാത്ത, വാടക ചീട്ടോ മറ്റു അനുബന്ധ രേഖകളോ ഇല്ലാത്ത പാവപ്പെട്ട ഉപഭോക്താക്കള്‍ക്ക് 14.2 കിലോഗ്രാം വരുന്ന ഗാര്‍ഹിക സിലണ്ടറിന്‍റെ കണക്ഷന്‍ കിട്ടാന്‍ ബുദ്ധിമുട്ടാണ്. അത്തരം ആളുകളാണ് അഞ്ച് കിലോഗ്രാം ചോട്ടു ഗ്യാസ് കണക്ഷനുകള്‍ എടുക്കാറുള്ളത്. 14.2 കിലോഗ്രാം ഗ്യാസ് സിലണ്ടറിന് 860 രൂപയാണ് കമ്പനി ഈടാക്കുന്നത് എന്നാല്‍ അഞ്ച് കിലോഗ്രാം ചോട്ടു ഗ്യാസിന് കമ്പനി നിശ്ചയിച്ചിരിക്കുന്ന വില 477.50 രൂപയാണ്. ഇതിനാണ് പമ്പ് ഉടമകള്‍ 530 മുതല്‍ 550 വരെ രൂപ ഈടാക്കുന്നത്. ഓയില്‍ കമ്പനികള്‍ നിശ്ചയിക്കുന്ന നിരക്കില്‍ മാത്രമേ ഇന്ധന പമ്പുകള്‍ വില്പന നടത്താവൂ എന്നിരിക്കെ അമിതവില ഈടാക്കി ഉപഭോക്താക്കളെ വഞ്ചിക്കുകയാണ് ഇത്തരം സ്ഥാപനങ്ങള്‍. നിയമലംഘനങ്ങളുമായി ബന്ധപ്പെട്ട പരാതികള്‍ 8281698003, 8281698067 എന്നീ നമ്പറുകളില്‍ അറിയിക്കാം.

കളിമണ്ണ് ഖനന നിരോധനം : ഓണത്തപ്പൻ നിർമാണം പ്രതിസന്ധിയിൽ

ആലുവ: പാടശേഖരങ്ങളിൽ നിന്നുള്ള കളിമണ്ണ് ഖനനം തടഞ്ഞുള്ള 2015ലെ ഉത്തരവ് പിൻവലിക്കാത്തതും അയൽസംസ്ഥാനങ്ങളിൽനിന്നുള്ള കളിമണ്ണിന് വിലകൂടിയതും ഓണത്തപ്പൻ നിർമാണം പ്രതിസന്ധിയിലാക്കിയെന്ന് പരമ്പരാഗത മൺപാത്ര നിർമാണ തൊഴിലാളികൾ. നിലവിൽ തഞ്ചാവൂർ, ബംഗളൂരു, കോൽക്കത്ത മേഖലകളിൽ നിന്നാണ് മൺപാത്ര നിർമാണത്തിനായി കേരളത്തിലേക്ക് കളിമണ്ണ് എത്തിക്കുന്നത്. 12 കിലോ വരുന്ന ഒരു ബ്ലോക്ക് കളിമണ്ണിന് 150 രൂപയായിരുന്നത് ഇപ്പോൾ 325 രൂപയായി. ഏജൻസികളിൽനിന്ന് ഉയർന്ന തുക നൽകി കളിമണ്ണ് വാങ്ങിച്ചാൽ ആവശ്യത്തിനുള്ള ഓണത്തപ്പൻ നിർമാണം നടത്താനാകില്ലെന്നാണ് തൊഴിലാളികൾ പറയുന്നു. മറ്റു കളിമൺ പാത്രങ്ങൾ, കരകൗശല വസ്തുക്കൾ എന്നിവ നിർമിക്കുന്നതിനും കളിമൺ ക്ഷാമം തൊഴിലാളികൾ നേരിടുന്നുണ്ട്. ജില്ലയിൽ കളിമണ്ണ് ലഭിക്കുന്ന ധാരാളം പാടശേഖരങ്ങൾ ഉണ്ടായിട്ടും മണ്ണ് ഖനനത്തിനുള്ള അനുമതി നൽകാതെ റവന്യൂ, ജിയോളജി, പോലീസ് വകുപ്പുകൾ നിസഹകരിക്കുകയാണെന്ന് പരമ്പരാഗത മൺപാത്ര നിർമാണ തൊഴിലാളി എറണാകുളം ജില്ലാ പ്രസിഡന്‍റ് സി.കെ. സുബ്രഹ്മണ്യൻ പറഞ്ഞു. തൊഴിൽ കാർഡുള്ള ഒരു തൊഴിലാളിക്ക് പ്രതിവർഷം 50 ടൺ കളിമണ്ണ് ഖനനം ചെയ്ത് തൊഴിലിടങ്ങളിലേക്ക് കൊണ്ടു പോകാമെന്ന് നിയമം ഉണ്ടെങ്കിലും നിരോധനം കാരണം ഒന്നും സാധ്യമാകുന്നില്ലെന്നും ജില്ലാ പ്രസിഡന്‍റ് പറഞ്ഞു. പരമ്പരാഗത മൺപാത്ര കുടിൽ വ്യവസായത്തെ സംരക്ഷിക്കുന്നതിന് അടിയന്തരമായി വ്യവസായ, തൊഴിൽ വകുപ്പ് മന്ത്രിമാർ ഇടപെടണമെന്ന് അഖില ഭാരതീയ പ്രജാപതി സംസ്ഥാന അധ്യക്ഷൻ അഡ്വ. സി. ശശികുമാർ ആവശ്യപ്പെട്ടു. ജില്ലാ കമ്മിറ്റി യോഗത്തിൽ ജില്ലാ സെക്രട്ടറി സുരേഷ് തൃക്കാക്കര നെടുവത്തൂർ ചന്ദ്രശേഖരൻ, പ്രകാശ് വിളങ്ങറ, ഗോപി തമ്പി, അജിതാ തങ്കപ്പൻ എന്നിവർ പ്രവർത്തിച്ചു.

ബാലചന്ദ്രമേനോനെ ഭീഷണിപ്പെടുത്തി പണം തട്ടാന്‍ ശ്രമിച്ചയാൾ അറസ്റ്റില്‍

കൊച്ചി: നടന്‍ ബാലചന്ദ്രമേനോനെ സമൂഹമാധ്യമങ്ങളിലൂടെ വ്യക്തിഹത്യ ചെയ്തും ഭീഷണിപ്പെടുത്തിയും പണം തട്ടാന്‍ ശ്രമിച്ച കേസിലെ പ്രതി അറസ്റ്റില്‍. തൃശൂര്‍ അയ്യന്തോളില്‍ താമസിക്കുന്ന കൊല്ലം കുണ്ടറ സ്വദേശി അഡ്വ. സംഗീത് ലൂയിസിനെയാണ്(46) കൊച്ചി സിറ്റി സൈബര്‍ പോലീസ് അറസ്റ്റ് ചെയ്തത്. നിരവധി കേസുകളില്‍ പ്രതിയായ സംഗീതിനെ ദിവസങ്ങളോളം നിരീക്ഷിച്ചുവരികയായിരുന്ന പോലീസ് ഇന്നലെ പുലര്‍ച്ചെ അയ്യന്തോളില്‍നിന്ന് സാഹസികമായാണ് പിടികൂടിയത്. കഴിഞ്ഞ സെപ്റ്റംബറിലായിരുന്നു കേസിന് ആസ്പദമായ സംഭവം. കേസിലെ ഒന്നാം പ്രതിയായ നടി മിനു മുനീറിനെ സൈബര്‍ പോലീസ് നേരത്തെ അറസ്റ്റ് ചെയ്തിരുന്നു.

അമ്മമാരുടെ ശാപമാണ് ഇടതു സര്‍ക്കാര്‍ അനുഭവിക്കുന്നത്: ഉമ തോമസ് എംഎല്‍എ

കൊച്ചി: നിത്യചെലവിനു പോലും മതിയായ വരുമാനം ഇല്ലാതെ കുടുംബാംഗങ്ങളെ കണ്ണീരിലാഴ്ത്തിയതിന്‍റെ ശാപമാണ് സംസ്ഥാന സര്‍ക്കാരിനെ പിന്തുടരുന്നതെന്ന് ഉമ തോമസ് എംഎല്‍എ. കേരള സ്‌റ്റേറ്റ് പെന്‍ഷനേഴ്‌സ് അസോയിയേഷന്‍ (കെഎസ്എസ്പിഎ) ജില്ലാ കമ്മിറ്റി കളക്ട്രേറ്റിനു മുന്നില്‍ സംഘടിപ്പിച്ച രണ്ടാം ദിവസ വനിതകളുടെ ധര്‍ണ ഉദ്ഘാടനം ചെയ്യുകയായിരുന്നു എംഎല്‍എ. പെന്‍ഷന്‍കാരുടെ വീടുകളില്‍ സംതൃപ്തിയോടെ ഒരു തിരിനാളം പോലും പ്രകാശിക്കുന്നില്ല.ക്ഷാമബത്ത കുടിശിക നല്‍കാതെയും ശമ്പള കമ്മീഷനെ നിയമിക്കാതെയും പെന്‍ഷന്‍കാരെ ഇടത് സര്‍ക്കാര്‍ നിരാശയുടെ പാതാളക്കുഴിയിലാക്കിയെന്നും എംഎല്‍എ പറഞ്ഞു.കെഎസ്എസ്പിഎ സംസ്ഥാന സെക്രട്ടറി ടി.എസ്. രാധാമണി, വനിതാ ഫോറം സംസ്ഥാന കമ്മിറ്റി അംഗം ബീന്‍, വി.എ. ചിന്നമ്മ, കെഎസ്എസ്പിഎ സംസ്ഥാന വൈസ് പ്രസിഡന്‍റ് കെ.വി. മുരളി, ജില്ലാ പ്രസിഡന്‍റ് എ.ഡി. റാഫേല്‍, സെക്രട്ടറി സി.എ. അലിക്കുഞ്ഞ്, ട്രഷറര്‍ വി.എ. അപ്‌സലന്‍, നേതാക്കളായ എല്‍സി,രാധാമണി പിള്ള, ഡോ. അബ്ദുൾ അസീസ്, ടി.വി. വത്സല, റാണി, എല്‍. ശ്യാമള ദേവി, ലൗലി ജോയ്, കെ.എം. റജീന എന്നിവര്‍ പ്രസംഗിച്ചു.

ബിരിയാണിയിൽ ജീവനുള്ള പുഴു; ഹോട്ടൽ അടപ്പിച്ചു

തൃപ്പൂണിത്തുറ: ചിക്കൻ ബിരിയാണിയിൽ ജീവനുള്ള പുഴുവിനെ കണ്ടെത്തിയെന്ന പരാതിയെതുടർന്ന് ഹോട്ടൽ അടപ്പിച്ചു. പേട്ട ഗാന്ധിസ്ക്വയർ റോഡിൽ പേട്ട ജംഗ്ഷനടുത്തായുള്ള ബിരിയാണി ഡോട്ട് കോം എന്ന ഹോട്ടലാണ് കൊച്ചി കോർപറേഷൻ ആരോഗ്യവിഭാഗം അന്വേഷണം നടത്തി താത്ക്കാലികമായി അടപ്പിച്ചത്. കഴിഞ്ഞ ദിവസം ഇവിടെ വാഴയിലയിൽ നൽകിയ ചിക്കൻ ബിരിയാണി ഒരാൾ കഴിച്ചുകൊണ്ടിരിക്കെയാണ് പുഴുവിനെ കണ്ടത്. ഹോട്ടൽ നടത്തിപ്പുകാർക്ക് കാരണം കാണിക്കൽ നോട്ടീസ് നൽകിയിട്ടുണ്ടെന്നും കൊച്ചി കോർപറേഷൻ വൈറ്റില മേഖലാ ഓഫീസ് ഹെൽത്ത് ഇൻസ്പെക്ടർ ജി. കൃഷ്ണകുമാർ പറഞ്ഞു.

ചന്ദേര്‍കുഞ്ച് അപ്പാര്‍ട്ട്മെന്‍റ് : സിബിഐ അന്വേഷണത്തിനായുള്ള അപ്പീല്‍ഹര്‍ജി ഫയലില്‍ സ്വീകരിച്ചു

കൊച്ചി: വൈറ്റിലയിലെ ചന്ദേര്‍കുഞ്ച് അപ്പാര്‍ട്ട്മെന്‍റ് നിര്‍മാണത്തിലെ ക്രമക്കേടുകളില്‍ സിബിഐ അന്വേഷണം ആവശ്യപ്പെടുന്ന അപ്പീല്‍ ഹര്‍ജി ഹൈക്കോടതി ഫയലില്‍ സ്വീകരിച്ച് എതിര്‍കക്ഷികള്‍ക്ക് നോട്ടീസയച്ചു. സിബിഐ അന്വേഷണ ആവശ്യമുന്നയിച്ച് നല്‍കിയ ഹര്‍ജി സിംഗിള്‍ബെഞ്ച് തള്ളിയതിനെ തുടര്‍ന്ന് ഹര്‍ജിക്കാരനായ ഫ്ലാറ്റിലെ അന്തേവാസി റിട്ട. കേണല്‍ സിബി ജോര്‍ജ് നല്‍കിയ അപ്പീലാണ് ജസ്റ്റീസ് എ. മുഹമ്മദ് മുഷ്താഖ്, ജസ്റ്റീസ് ഹരിശങ്കര്‍ വി. മേനോന്‍ എന്നിവരടങ്ങുന്ന ഡിവിഷന്‍ ബെഞ്ച് പരിഗണിച്ചത്. ബലക്ഷയത്തിലായ ആര്‍മി ടവറുകള്‍ പൊളിച്ചു നീക്കുന്നതിനും തെളിവുകള്‍ നഷ്ടപ്പെടുന്നതിനും മുമ്പ് സിബിഐ അന്വേഷണം നടത്തണമെന്നാണ് ഹര്‍ജിയിലെ ആവശ്യം. നിര്‍മാണം കഴിഞ്ഞ് 2018 മെയില്‍ കൈമാറിയ ഫ്ലാറ്റുകള്‍ അഞ്ചാം വര്‍ഷം തകര്‍ച്ച ഭീഷണിയിലായി. ഈമാസം 31നകം താമസക്കാരെ ഒഴിപ്പിച്ച് ടവറുകള്‍ പൊളിച്ച് പുനര്‍നിര്‍മിക്കാന്‍ ജില്ലാ കളക്ടര്‍ അധ്യക്ഷനായ കമ്മിറ്റിയെ ചുമതലപ്പെടുത്തി ഫെബ്രുവരിയില്‍ ഹൈക്കോടതി ഉത്തരവിട്ടിരുന്നു. ദുരന്ത നിവാരണ നിയമ പ്രകാരം എഫ്‌ഐആര്‍ രജിസ്റ്റര്‍ ചെയ്ത് അന്വേഷണത്തിന് സിബിഐക്ക് നിര്‍ദേശം നല്‍കണമെന്നാണ് അപ്പീലിലെ ആവശ്യം.

കടയുടെ പൂട്ട് തകർത്ത് 30 ലിറ്റർ വെളിച്ചെണ്ണ കവർന്നു

ആലുവ: പച്ചക്കറികടയുടെ പൂട്ട് തകർത്ത് അകത്തുകടന്ന കള്ളൻ പൊക്കിയതിലേറെയും പൊന്നുംവിലയുള്ള വെളിച്ചെണ്ണ കുപ്പികൾ. 16000 രൂപയോളം വില മതിക്കുന്ന വെളിച്ചെണ്ണയാണ് ആലുവ തോട്ടുമുഖം പാലത്തിന് സമീപം ഷാ വെജിറ്റബിൾസ് ആൻഡ് ഫ്രൂട്‌സ് കടയിൽനിന്ന് കവർന്നത്. 540 രൂപ വീതം വരുന്ന പ്രീമിയം ബ്രാൻഡ് വെളിച്ചെണ്ണയ്ക്കൊപ്പം 10 ലിറ്റർ പാൽ പായ്ക്കറ്റും മോഷ്ടിച്ചിട്ടുണ്ട്. കടയുടെ തറ തുരന്നു കയറാൻ ശ്രമിച്ച് പരാജയപ്പെട്ടപ്പോൾ പുട്ടുതല്ലിപ്പൊളിച്ചാണ് അകത്തുകയറിയത്. ഫ്രിഡ്ജിൽ നിന്ന് സോഫ്റ്റ് ഡ്രിങ്ക് കുടിച്ച് ക്ഷീണമകറ്റിയശേഷം കടയിലെ ചാക്കിലാക്കിയാണ് സാധനങ്ങൾ കൊണ്ടുപോയത്. സിസി ടിവി കാമറയുടെ വയർ മുറിച്ചിട്ടിട്ടുണ്ട്. എന്നാൽ ദ്യശ്യങ്ങൾ നേരത്തെ പതിഞ്ഞിരുന്നതിനാൽ ഇവയുടെ സഹായത്താൽ ആലുവ പോലീസ് അന്വേഷണം ആരംഭിച്ചു.

ഹംഗറിയിൽ ജോലി വാഗ്ദാനം ചെയ്ത് തട്ടിപ്പ്: 2.27 ലക്ഷം തട്ടിയ ദന്പതികൾ ഒളിവിൽ

വൈപ്പിൻ: ഹംഗറിയിൽ ജോലി വാഗ്ദാനം ചെയ്ത് ദന്പതികൾ ലക്ഷങ്ങൾ തട്ടിയതായി പരാതി. പറവൂർ കെടാമംഗലം സ്വദേശിയായ മധ്യവയസ്കനിൽ നിന്നും 2.27 ലക്ഷം രൂപ തട്ടിയെടുത്തെന്ന പരാതിയിൽ ആലുവ സ്വദേശികളായ ദമ്പതികൾക്കെതിരെ ഞാറയ്ക്കൽ പോലീസ് കേസെടുത്തു. സംഭവത്തിന് പിന്നാലെ ആലുവ റേഷൻ കട കവല ഉമപ്പറമ്പിൽ വിജയ്, ഭാര്യ അനുപമ എന്നിവർ ഒളിവിലാണ്. ഇവർക്കായി പോലീസ് അന്വേഷണം ആരംഭിച്ചു. ഹംഗറിയിൽ ഡ്രൈവർ ജോലി വാഗ്ദാനം ചെയ്ത ദമ്പതികൾ കഴിഞ്ഞവർഷം സെപ്റ്റംബർ 20 മുതൽ നവംബർ ആറ് വരെയുള്ള കാലയളവിൽ ഫോൺ പേ, അക്കൗണ്ട് ട്രാൻസ്ഫർ എന്നീ വഴികളിലൂടെ അഞ്ച് തവണകളായിട്ടാണ് പരാതിക്കാരനിൽ നിന്നും പണം കൈപ്പറ്റിയത്. ബംഗളൂരുവിലുള്ള വേഗ കൺസൾട്ടൻസിയുടെ സബ് ഏജന്‍റ് ആണെന്ന് തെറ്റിദ്ധരിപ്പിച്ചാണ് ഇവർ തട്ടിപ്പ് നടത്തിയതെന്ന് പോലീസ് പറഞ്ഞു. പണം നൽകിയിട്ടും ജോലി തരപ്പെടുത്താതെ വന്നപ്പോൾ നൽകിയ പണം തിരികെ ആവശ്യപ്പെട്ടെങ്കിലും കൊടുത്തില്ല. ഞാറയ്ക്കലുള്ള ഒരു ദേശസാൽകൃത ബാങ്കിൽ നിന്നാണ് പരാതിക്കാരൻ പണം ട്രാൻസ്ഫർ ചെയ്തിട്ടുള്ളത്. ഇതിന്‍റെ അടിസ്ഥാനത്തിലാണ് ഞാറക്കൽ പോലീസിൽ പരാതി നൽകിയതും പോലീസ് കേസ് എടുത്തതും.

ജി. പ്രിയങ്ക ജില്ലാ കളക്ടറായി ചുമതലയേറ്റു

കൊച്ചി: ജില്ലയുടെ പുതിയ കളക്ടറായി ജി. പ്രിയങ്ക ചുമതലയേറ്റു. എന്‍.എസ്.കെ. ഉമേഷില്‍ നിന്നും പദവി ഏറ്റെടുത്ത പ്രിയങ്ക ജില്ലയുടെ ചരിത്രത്തിലെ മൂന്നാമത്തെ വനിതാ കളക്ടറാണ്. ഡോ. എം. ബീന, ഡോ. രേണുരാജ് എന്നിവരാണ് പ്രിയങ്കയുടെ മുന്‍ഗാമികളായ വനിതാ കളക്ടര്‍മാര്‍. പാലക്കാട് കളക്ടര്‍ സ്ഥാനത്തു നിന്നാണ് പ്രിയങ്ക എറണാകുളത്തേക്കെത്തുന്നത്. കര്‍ണാടക സ്വദേശിയായ പ്രിയങ്ക ഐഎഎസ് 2017 ബാച്ച് ഉദ്യോഗസ്ഥയാണ്. കോഴിക്കോട് സബ് കളക്ടര്‍, സാമൂഹിക നീതി വകുപ്പ് ഡയറക്ടര്‍, വനിത ശിശുക്ഷേമ ഡയറക്ടര്‍ എന്നീ പദവികളിലും പ്രവര്‍ത്തിച്ചിട്ടുണ്ട്. എന്‍ജിനീയറിംഗ് ബിരുദധാരിയാണ്. പബ്ലിക് മാനേജ്‌മെന്‍റിലും പബ്ലിക് അഡ്മിനിസ്‌ട്രേഷനിലും ബിരുദാനന്തര ബിരുദവും നേടിയിട്ടുണ്ട്. സിവില്‍ സ്റ്റേഷന്‍ കവാടത്തില്‍ അസി. കളക്ടര്‍ പാര്‍വതി ഗോപകുമാര്‍, അഡീഷണല്‍ ജില്ലാ മജിസ്‌ട്രേറ്റ് വിനോദ് രാജ് എന്നിവരുടെ നേതൃത്വത്തില്‍ പ്രിയങ്കയെ സ്വീകരിച്ചു. തുടര്‍ന്ന് ചേംബറിലെത്തി എന്‍.എസ്.കെ. ഉമേഷില്‍ നിന്നും ചുമതല ഏറ്റെടുത്തു. ആന്‍റണി ജോണ്‍ എംഎല്‍എ, ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍, ഡെപ്യൂട്ടി കളക്ടര്‍മാര്‍, വിവിധ വകുപ്പുകളുടെ ജില്ലാതല മേധാവികള്‍ അടക്കമുള്ളവര്‍ സന്നിഹിതരായിരുന്നു. കളക്ടർക്കും സബ്‌കളക്ടർക്കും യാത്രയയപ്പ് കൊച്ചി: സ്ഥലം മാറിപ്പോകുന്ന ജില്ലാ കളക്ടർ എൻ. എസ്.കെ. ഉമേഷ്, സബ് കളക്ടർ കെ. മീര എന്നിവർക്ക് കൊച്ചി മണ്ഡലത്തിന്‍റെ നേതൃത്വത്തിൽ യാത്രയയപ്പ് നല്കി. ഹെറിറ്റേജ് സൊസൈറ്റി നോഡൽ ഓഫീസർ ബോണി തോമസ് അധ്യക്ഷത വഹിച്ചു. ചടങ്ങിൽ എംൽഎമാരായ കെ.ജെ. മാക്സി, കെ.എ. ഉണ്ണികൃഷ്ണൻ എന്നിവർ പങ്കെടുത്തു.

ഇടമലയാറിലും പൂയംകുട്ടിയിലുമായി നാല് കാട്ടാനകൾ ചരിഞ്ഞ നിലയിൽ

കോതമംഗലം: ഇടമലയാറിലും പൂയംകുട്ടിയിലുമായി നാല് കാട്ടാനകളെ ചരിഞ്ഞനിലയിൽ കണ്ടെത്തി. മലയാറ്റൂര്‍ ഡിവിഷന് കീഴിലെ കുട്ടമ്പുഴ ഫോറസ്റ്റ് ഡിവിഷനില്‍ രണ്ടും ഇടമലയാര്‍ റേഞ്ച് പരിധിയില്‍ പിടിയാനയും കുഞ്ഞുമാണ് ചെരിഞ്ഞത്. കനത്ത മഴയെ തുടര്‍ന്നുള്ള മലവെള്ളപ്പാച്ചിലില്‍ കുത്തൊഴുക്കിൽ പെട്ടതാകാമെന്നാണ് നിഗമനം. മലവെള്ളപ്പാച്ചിലില്‍ പുഴ കുറുകെ കടക്കുമ്പോള്‍ ഒഴുക്കില്‍പ്പെട്ട് പാറക്കെട്ടില്‍ വീണുണ്ടായ ക്ഷതമാണ് രണ്ട് ആനകളുടെ മരണകാരണമെന്നാണ് പോസ്റ്റുമോര്‍ട്ടം റിപ്പോര്‍ട്ട്. കുട്ടമ്പുഴ പഞ്ചായത്തിലെ പൂയംകുട്ടിപുഴയില്‍ മണികണ്ഠന്‍ചാല്‍ ചപ്പാത്തിന് സമീപത്ത് പിടിയാനയുടെ ജഡവും ചപ്പാത്തില്‍നിന്ന് ഉദേശം 300 മീറ്റര്‍ മാറി കണ്ടംപാറ ഭാഗത്ത് കൊമ്പന്‍റെ ജഡവുമാണ് കണ്ടെത്തിയത്. രണ്ട് ആനകള്‍ക്കും ഉദ്ദേശം 15 വയസില്‍ താഴെ പ്രായം കണക്കാക്കുന്നതായി അധികൃതര്‍ പറഞ്ഞു. രണ്ട് ആനകളും ഒരുമിച്ച് ഒഴുക്കില്‍പ്പെട്ടതാകാനാണ് സാധ്യത. ജഡത്തിന് രണ്ടു ദിവസത്തെ പഴക്കം ഉണ്ട്. കൊമ്പന്‍റെ ജഡം ബുധനാഴ്ച വൈകിട്ടും പിടിയാനയുടേത് ഇന്നലെ ഉച്ചയ്ക്ക് 12.30 ഓടെയുമാണ് കണ്ടെത്തിയത്. പൂയംകുട്ടി പുഴയിലെ പീണ്ടിമേട് വെള്ളച്ചാട്ടത്തില്‍നിന്ന് താഴേക്കു പതിച്ചതാകാമെന്നാണ് നിഗമനം. വീഴ്ചയില്‍ രണ്ട് ആനകളുടെയും വാരിയെല്ലുകള്‍ ഒടിഞ്ഞ് രക്തസ്രാവം സംഭവിച്ചത് മൂലമാണ് ചരിഞ്ഞതെന്ന് വനം വകുപ്പ് അധികൃതര്‍ പറഞ്ഞു. പരിശോധനയ്ക്കായി ആന്തരികാവയവങ്ങളുടെ സാമ്പിള്‍ ശേഖരിച്ചിട്ടുണ്ട്. അസിസ്റ്റന്‍റ് ഫോറസ്റ്റ് വെറ്ററിനറി ഓഫീസര്‍ ഡോ. ബിനോയ് സി.ബാബു, ഡോ.സിറിള്‍ അലോഷ്യസ്, കുട്ടമ്പുഴ റേഞ്ച് ഓഫീസര്‍ വി.പി.മുരളീദാസ് എന്നിവരുടെ നേതൃത്വത്തില്‍ പോസ്റ്റുമോര്‍ട്ടം നടത്തി ജഡങ്ങള്‍ വനത്തില്‍ സംസ്‌കരിച്ചു. ഇടമലയാര്‍ ഡാമില്‍ കണ്ടെത്തിയ പിടിയാനയുടെയും കുഞ്ഞിന്‍റെയും ജഡത്തിന് ഒരാഴ്ചയിലേറെ പഴക്കമുണ്ട്. ഡാം സൈറ്റില്‍നിന്ന് 20 കിലോമീറ്റര്‍ മാറി വെണ്‍മുഴി ഭാഗത്ത് വെള്ളച്ചാട്ടത്തിന് താഴെയാണ് പിടിയാനയുടെ ജഡം കണ്ടത്. വെള്ളച്ചാട്ടത്തിന്‍റെ ഒരു കിലോമീറ്റര്‍ മാറിയാണ് കുഞ്ഞിന്‍റെ ജഡം കിടന്നത്. വെള്ളച്ചാട്ടം കുറുകെ കടക്കുമ്പോള്‍ കുഞ്ഞും അമ്മയും താഴ്ചയിലേക്ക് വീണുണ്ടായ മരണമെന്നാണ് നിഗമനം. അടിച്ചില്‍തൊട്ടി ആദിവാസി ഉന്നതിയിലെ ആദിവാസികളാണ് ഇന്നലെ ആനകളുടെ ജഡം ഡാമില്‍ കിടക്കുന്നത് കണ്ട് വനപാലകരെ വിവരം അറിയിച്ചത്. കുഞ്ഞിന് ആറു മാസത്തെ പ്രായമേയുള്ളൂവെന്ന് അധികൃതര്‍ പറഞ്ഞു. ഇന്ന് ഇവയുടെ പോസ്റ്റുമോര്‍ട്ടം നടത്തും.

ഗതാഗതം ഭാഗികമായി തടസപ്പെടും

കൂത്താട്ടുകുളം: കൂത്താട്ടുകുളം-പാലാ റോഡിൽ മംഗലത്തുതാഴം ജംഗ്‌ഷനു സമീപം കലുങ്ക് പുനർനിർമാണ പ്രവർത്തനങ്ങൾ ആരംഭിക്കുന്നതിനാൽ ഇന്നു മുതൽ ഇതുവഴിയുള്ള വാഹനഗതാഗതം ഭാഗികമായി തടസപ്പെടും. നിർമാണം പൂർത്തിയാകുന്നതു വരെ ഇതുവഴിയുള്ള ഗതാഗതം ഒറ്റവരി ആയിരിക്കുമെന്ന് കൂത്താട്ടുകുളം പിഡബ്ല്യുഡി റോഡ്‌സ് വിഭാഗം അസിസ്റ്റന്‍റ് എൻജിനീയർ അറിയിച്ചു.

റാങ്ക് തിളക്കത്തിൽ സഹോദരിമാർ

മൂവാറ്റുപുഴ: മഹാത്മാഗാന്ധി യൂണിവേഴ്‌സിറ്റി പരീക്ഷയില്‍ റാങ്കിന്‍റെ തിളക്കവുമായി മൂവാറ്റുപുഴ സ്വദേശിനികളായ സഹോദരിമാർ. സിഐടിയു ടിംബര്‍ യൂണിയന്‍ തൊഴിലാളി സൗത്ത് മാറാടി കക്കാട്ടില്‍ ബിജുവിന്‍റെയും, ഷൈബിയുടെയും മക്കളായ കെ.ബി. അഞ്ജനയും, കെ.ബി. കാഞ്ചനയുമാണ് റാങ്ക് നേടി നാടിന് അഭിമാനമായത്. അഞ്ജന മലയാളം പരീക്ഷയിലും, കാഞ്ചന എംഎസ്‌സി മൈക്രോബയോളജിയിലുമാണ് ഏഴാംറാങ്ക് നേടിയത്. ഇരുവരും ഒരുപോലെ ഏഴാം റാങ്ക് നേടിയതും ശ്രദ്ധേയമാണ്. ജീവിത പ്രാരാബ്ദങ്ങളോട് പൊരുതി നേട്ടം കൊയ്ത സഹോദരങ്ങളെ സിപിഎം ലോക്കല്‍ സെക്രട്ടറി എം.എന്‍. മുരളി, ലോക്കല്‍ കമ്മിറ്റി അംഗം വി.കെ. രാജേഷ്, വ്യാപാരി വ്യവസായി ഏകോപന സമിതി പ്രസിഡന്‍റ് വി.ടി. സുനില്‍, സെക്രട്ടറി ടി.എസ്. മനേഷ്, ട്രഷറര്‍ ടി. ഗണേഷ്, യുവധാര ആര്‍ട്‌സ് ആൻഡ് സ്‌പോര്‍ട്‌സ് ക്ലബ് ഭാരവാഹികളായ അരുണ്‍ പി. ഉല്ലാസ്, പി.എസ്. സന്തോഷ്, യദു നാരായണന്‍ എന്നിവര്‍ വീട്ടിലെത്തി മെമന്‍റോ നല്‍കി ആദരിച്ചു. അഞ്ജന മൂവാറ്റുപുഴ നിര്‍മല കോളജിലെയും, ഇളയ മകള്‍ കാഞ്ചന നെല്ലിക്കുഴി ഇന്ദിരാഗാന്ധി കോളജിലെയും വിദ്യാര്‍ഥികളാണ്.

റോഡ് ഉപരോധിച്ചു

കൂത്താട്ടുകുളം: കോൺഗ്രസ് മണ്ഡലം കമ്മിറ്റിയുടെ നേതൃത്വത്തിൽ മംഗലത്തുതാഴത്ത് റോഡ് ഉപരോധിച്ചു. കൂത്താട്ടുകുളം-പാലാ റോഡിൽ മംഗലത്തുതാഴം കവലയ്ക്കു സമീപത്തെ കലുങ്ക് നിർമാണത്തിലെ അഴിമതി അന്വേഷിക്കണമെന്ന് ആവശ്യപ്പെട്ടാണ് റോഡ് ഉപരോധ സമരം നടന്നത്. സമരം പിറവം ബ്ലോക്ക്‌ കോൺഗ്രസ്‌ പ്രസിഡന്‍റ് പി.സി. ജോസ് ഉദ്ഘാടനം ചെയ്തു. മണ്ഡലം കോൺഗ്രസ്‌ കമ്മിറ്റി പ്രസിഡന്‍റ് റെജി ജോൺ അധ്യക്ഷത വഹിച്ചു.

കാശിനാഥിന് വിടചൊല്ലി കൂട്ടുകാർ

വാഴക്കുളം: കല്ലൂർക്കാട്‌ വീടിനു മുമ്പിൽ വാഹനമിടിച്ചു മരിച്ച വാഴക്കുളം സെന്‍റ് ലിറ്റിൽ തെരേസാസ് ഹൈസ്കൂൾ അഞ്ചാം ക്ലാസ് വിദ്യാർഥിയായ കുഴികണ്ടത്തിൽ കാശിനാഥിന് വിടചൊല്ലി കൂട്ടൂകാർ. കളിചിരികളോടെ സ്കൂളിൽനിന്നും വീട്ടിലേക്കു പോയ കാശിനാഥിന്‍റെ ചേതനയറ്റ ശരീരം കണ്ട് കൂട്ടുകാർ പൊട്ടിക്കരഞ്ഞു. മൃതദേഹം ഇന്നലെ ഉച്ചക്ക് പന്ത്രണ്ടോടെയാണ് സ്കൂളിൽ പൊതുദർശനത്തിന് എത്തിച്ചത്. വിദ്യാർഥികൾ കാശിനാഥിന് അന്തിമോപചാരമർപ്പിച്ചു. തുടർന്നു കല്ലൂർക്കാട്ടെ വീട്ടിലെത്തിച്ച മൃതദേഹം ഉച്ചകഴിഞ്ഞ് മൂന്നോടെ വീട്ടുവളപ്പിൽ സംസ്കാരം നടത്തി. ബുധനാഴ്ച വൈകുന്നേരം ആറരയോടെ വീടിനെതിർവശത്തുള്ള കടയിൽനിന്ന് സാധനങ്ങൾ വാങ്ങി തിരികെ റോഡു മുറിച്ചു കടക്കുന്നതിനിടയിലായിരുന്നു കാശിനാഥിനെ വാഹനമിടിച്ചത്.

മൂവാറ്റുപുഴ സബ് രജിസ്ട്രാർ ഓഫീസിൽ പരിശോധന നടത്തി വിജിലൻസ്

മൂവാറ്റുപുഴ: സബ് രജിസ്ട്രാർ ഓഫിസിൽ വിജിലൻസിന്‍റെ മിന്നൽ പരിശോധന. ഇന്നലെ ഉച്ചയോടെ ആരംഭിച്ച പരിശോധന രാത്രി വൈകിയാണ് അവസാനിച്ചത്. വിജിലൻസ് സംഘം എത്തുമ്പോൾ ഓഫിസിൽ സബ് രജിസ്ട്രാർ ഉണ്ടായിരുന്നില്ല. സൂപ്രണ്ടിനായിരുന്നു ഓഫീസിന്‍റെ ചുമതല. വിജിലൻസ് സംഘം ഓഫീസിലെ രേഖകൾ ഉൾപ്പെടെ പരിശോധിച്ചു. സബ് രജിസ്ട്രാർ ഓഫിസിൽ നടക്കുന്ന ക്രമക്കേടുകളെ കുറിച്ച് ലഭിച്ച പരാതിയെ തുടർന്നാണ് വിജിലൻസ് സംഘം എത്തിയത്. തെളിവുകൾ അന്വേഷണ സംഘത്തിനു ലഭിച്ചതയാണ് സൂചന.

ചെസ് ചാമ്പ്യന്‍ഷിപ്പ് നാളെ

മൂവാറ്റുപുഴ: സെന്‍റ് തോമസ് പബ്ലിക് സ്‌കൂളിന്‍റെ ആതിഥേയത്വത്തില്‍ സിബിഎസ്ഇ സ്‌കൂളുകളുടെ സംഘടനയായ സെന്‍ട്രല്‍ കേരള സഹോദയയുടെ ചെക്ക്‌മേറ്റ് ചാമ്പ്യന്‍ഷിപ്പ് നാളെ സ്‌കൂള്‍ ഓഡിറ്റോറിയത്തില്‍ നടക്കും. 42 ഓളം സ്‌കൂളുകള്‍ പങ്കെടുക്കുന്ന ചെസ് മത്സരത്തില്‍ 700 ഓളം മത്സരാര്‍ഥികള്‍ മാറ്റുരയ്ക്കും. ചെക്ക്‌മേറ്റ് ചാമ്പ്യന്‍ഷിപ്പിന്‍റെ ഉദ്ഘാടനം രാവിലെ 8.30ന് മൂവാറ്റുപുഴ ജില്ലാ ജഡ്ജി കെ.എന്‍. ഹരികുമാര്‍ നിര്‍വഹിക്കും. ഫാ. മാത്യു കരീത്തറ അധ്യക്ഷത വഹിക്കും. കട്ടപ്പന സബ് കോര്‍ട്ട് സബ് ജഡ്ജി ബി. അരവിന്ദ് എടയോടി മത്സരാര്‍ഥികള്‍ക്ക് സത്യവാചകം ചൊല്ലിക്കൊടുക്കും. സ്‌കൂള്‍ മാനേജര്‍ ഫാ. ജോണ്‍ പുത്തൂരാന്‍, സ്‌കൂള്‍ പ്രിന്‍സിപ്പല്‍ മേരി സാബു എന്നിവര്‍ പ്രസംഗിക്കും. വൈകുന്നേരം 5.30ന് മാത്യു കുഴല്‍നാടന്‍ എംഎല്‍എ സമാപന സമ്മേളനം ഉദ്ഘാടനം ചെയ്യും. നഗരസഭാധ്യക്ഷന്‍ പി.പി. എല്‍ദോസ് അധ്യക്ഷത വഹിക്കും. സ്‌കൂള്‍ പ്രിന്‍സിപ്പല്‍ മേരി സാബു, നഗരസഭാംഗം കെ.ജി. അനില്‍കുമാര്‍, സികെഎസ് സ്‌പോര്‍ട്‌സ് കോ-ഓര്‍ഡിനേറ്റര്‍ ജോജു ജോസഫ്, പിടിഎ പ്രസിഡന്‍റ് ഡോ. എബ്രഹാം മാത്യു, സികെഎസ് ജനറല്‍ സെക്രട്ടറി ജയ്ന പോള്‍ എന്നിവര്‍ പ്രസംഗിക്കും.

കോതമംഗലം മാർ അത്തനേഷ്യസ് കോളജിൽ "സത്വ 2025' ഫെസ്റ്റ്

കോതമംഗലം: കോതമംഗലം മാർ അത്തനേഷ്യസ്(ഓട്ടോണമസ്) കോളജിന്‍റെ സപ്തതി ആഘോഷങ്ങളുടെ ഭാഗമായി 10, 11, 12 ക്ലാസുകളിലെ വിദ്യാർഥികൾക്കായി ‘സത്വ 2025’ ഫെസ്റ്റ് 12, 13 തീയതികളിൽ സംഘടിപ്പിക്കുന്നു. കോളജിൽവച്ചു നടക്കുന്ന വിവിധ മത്സരങ്ങൾക്ക് മൂന്നു വിഭാഗങ്ങളിലായി 2.8 ലക്ഷം രൂപയാണ് സമ്മാനമായി നൽകുന്നത്. പങ്കെടുക്കുന്നവർക്ക് സർട്ടിഫിക്കറ്റും നൽകും. മികച്ച പ്രകടനം നടത്തുന്ന സ്കൂളിന് അത്തനേഷ്യസ് ട്രോഫിയും നൽകും. കാറ്റഗറി ഒന്നിലെ ഐഡിയത്തോൺ, എസ്കേപ്പ് റൂം ചലഞ്ച്, മിസ്ട്രി റൂം, ക്വിസ്, ഫുട്ബോൾ ടൂർണമെന്‍റ് തുടങ്ങിയ മത്സരങ്ങളിൽ ഒന്ന്, രണ്ട്, മൂന്ന് സ്ഥാനങ്ങൾ നേടുന്നവർക്ക് യഥാക്രമം 10,000, 7,500, 5,000 രൂപ എന്നിങ്ങനെയാണ് സമ്മാനത്തുക. കാറ്റഗറി രണ്ടിലെ ഫെയ്സ് പെയിന്‍റിംഗ്, സ്പ്ലിറ്റ് ഡാൻസ് ചലഞ്ച് എന്നീ മത്സരങ്ങളിൽ ആദ്യ മൂന്ന് സ്ഥാനങ്ങൾക്ക് യഥാക്രമം 8,000, 5,000, 3,000 രൂപ എന്നിങ്ങനെ സമ്മാനങ്ങൾ നൽകും. കാറ്റഗറി മൂന്നിൽ സ്മാർട്ട് ഫോട്ടോഗ്രാഫി, ക്ലേ ക്രിയേഷൻസ്, ഓൺ-ദി-സ്പോട്ട് സ്പീച്ച് ചലഞ്ച്,(ഇംഗ്ലീഷ്), കാർട്ടൂൺ കാൻവാസ് തുടങ്ങിയ മത്സരങ്ങളിൽ ആദ്യ മൂന്ന് സ്ഥാനങ്ങൾക്ക് യഥാക്രമം 5,000, 3,000, 2,000 രൂപ എന്നിങ്ങനെയാണ് സമ്മാനത്തുക. രജിസ്ട്രേഷനുള്ള അവസാന തീയതി നാളെ. വെബ്സൈറ്റ്: www.macollege.ac.in, ഫോൺ: 9447587789.

വന്യമൃഗശല്യം : വേട്ടാമ്പാറ നിവാസികൾ സമരത്തിനൊരുങ്ങുന്നു

കോതമംഗലം: വന്യമൃഗശല്യം രൂക്ഷമാകുന്നതിനെ തുടർന്ന് സമരത്തിനൊരുങ്ങി വേട്ടാമ്പാറ നിവാസികൾ. വേട്ടാമ്പാറയിൽ നിർമാണം നിർത്തിവച്ചിരിക്കുന്ന ഫെൻസിംഗ് പണി ഉടൻ പുനരാരംഭിക്കണമെന്നും ഫെൻസിംഗ് ലൈനോട് ചേർന്നു നിക്കുന്ന മരങ്ങൾ എത്രയും വേഗം വെട്ടിമാറ്റണമെന്നും പൗരസമിതി ആവശ്യപ്പെട്ടു. അനുദിനം പ്രദേശത്ത് വന്യമൃഗശല്യം വർധിച്ചുവരികയാണ്. അതിനാൽ തന്നെ ജനങ്ങൾ കുടിയിറക്ക് ഭീക്ഷണി നേരിടുകയാണ്. കർഷകർക്ക് കൃഷിയിക്കാൻ കഴിയുന്നില്ല. കൃഷിചെയ്തവർക്കു വിളവെടുക്കാനും കഴിയാത്ത സാഹചര്യമാണുള്ളതെന്നും ഇതിന് പരിഹാരം ഉണ്ടാവണമെന്നും അധികൃതരോട് യോഗം ആവശ്യപ്പെട്ടു. പൗരസമിതി രക്ഷാധികാരി ഫാ. ജോഷി നിരപ്പേൽ അധ്യക്ഷത വഹിച്ചു. ഫെൻസിംഗ് നിർമാണം അശാസ്ത്രീയമെന്ന് ജാഗ്രത സമിതി കോതമംഗലം: വേട്ടാമ്പാറ പ്രദേശത്ത് ഫെൻസിംഗ് നിർമാണം നടത്തിയിരിക്കുന്നത് അശാസ്ത്രീയമായിട്ടെന്ന് ജന ജാഗ്രതാ സമിതി. മരങ്ങൾ വെട്ടിമാറ്റാത്തതിനാൽ ഫെൻസിംഗ് നിർമിക്കുന്നത് കൊണ്ട് വേണ്ടത്ര ഫലം ഉണ്ടാകുന്നില്ല എന്നും ചിലയിടത്ത് ആന ഫെൻസിംഗ് നശിപ്പിച്ചു തുടങ്ങിയതായും വേട്ടാമ്പാറ പബ്ലിക് ലൈബ്രറിയിൽ ചേർന്ന ജാഗ്രതാ സമിതി യോഗം വിലയിരുത്തി. വനംവകുപ്പിന്‍റെ ഭാഗത്തുനിന്നും മെല്ലെപോക്കു തുടർന്നാൽ ശക്തമായ നടത്തുമെന്ന് യോഗം മുന്നറിയിപ്പ് നൽകി. പഞ്ചായത്ത് പ്രസിഡന്‍റ് ജെസി സാജു ജാഗ്രത സമിതി യോഗം ഉദ്ഘാടനം ചെയ്തു.

കോലഞ്ചേരിയിൽ ലീഗൽ മെട്രോളജി വകുപ്പിന്‍റെ മിന്നൽ പരിശോധന

കോലഞ്ചേരി: കോലഞ്ചേരി ടൗണിൽ ലീഗൽ മെട്രോളജി വകുപ്പ് മിന്നൽ പരിശോധന നടത്തി. കൊച്ചി - ധനുഷ്കോടി ദേശീയ പാതയിൽനിന്ന് പ്രൈവറ്റ് ബസ് സ്റ്റാൻഡിലേക്ക് പോകുന്ന വഴിയിൽ പഴം പച്ചക്കറി, ഇറച്ചി, മീൻ തുടങ്ങിയവ വിലക്കുന്ന വ്യാപാര സ്ഥാപനങ്ങളിലാണ് ഇന്നലെ ഉച്ചയ്ക്ക് രണ്ടോടെ ലീഗൽ മെട്രോളജി പെരുമ്പാവൂർ താലൂക്ക് സർക്കിൾ ഒന്ന്, രണ്ട് ഇൻസ്പെക്ടർമാരുടെ നേതൃത്വത്തിൽ മിന്നൽ പരിശോധന നടത്തിയത്. ആറു കേസുകളിൽനിന്ന് 18,000 രൂപ പിഴ ചുമത്തിയിട്ടുണ്ട്. വ്യാപാര സ്ഥാപനങ്ങളിലെ അളവ് തൂക്കം നടത്തുന്ന ത്രാസുകൾ മുദ്രവയ്ക്കാത്തതിനും, പ്രഖ്യാപനമില്ലാത്ത പാക്കേജ് ഫുഡ്സ് വില്പനയ്ക്ക് വച്ചിരുന്നതിനുമാണ് ലീഗൽ മെട്രോളജി വകുപ്പ് നടപടിയെടുത്തത്. തിരക്കേറിയ വ്യാപാര സ്ഥാപനങ്ങളിലാണ് പരിശോധന നടന്നത്. ലീഗൽ വകുപ്പ് ഇൻസ്പെക്ടർമാരായ എൽദോ ജോർജ്, എ.സി. സന്ദീപ് തുടങ്ങിയവർ പരിശോധനയ്ക്ക് നേതൃത്വം നൽകി. കഴിഞ്ഞ ദിവസം തിരുവാണിയൂരിൽ അഞ്ചു കിലോ കുറ്റി ഗ്യാസ് നിറച്ചതിന് അമിത വില ഈടാക്കിയ കുറ്റത്തിന് നടപടി സ്വീകരിച്ചിരുന്നു. വരും ദിവസങ്ങളിലും ശക്തമായ പരിശോധന വ്യാപാര സ്ഥാപനങ്ങളിൽ ഉണ്ടാകുമെന്ന് ഉദ്യോഗസ്ഥർ അറിയിച്ചു.

തൃക്കളത്തൂരിൽ ടാക്‌സി കാറും മിനിലോറിയും കൂട്ടിയിടിച്ചു

മൂവാറ്റുപുഴ: എംസി റോഡില്‍ തൃക്കളത്തൂരിൽ ടാക്‌സി കാറും മിനിലോറിയും കൂട്ടിയിടിച്ചു. ഇന്നലെ രാവിലെ ഏഴോടെ തൃക്കളത്തൂര്‍ പള്ളിത്താഴത്തുണ്ടായ അപകടത്തില്‍ കാറോടിച്ചിരുന്ന തൃശൂര്‍ സ്വദേശി സിജോ ജോസഫിന് പരിക്കേറ്റു. മൂവാറ്റുപുഴ ഭാഗത്തുനിന്ന് പെരുമ്പാവൂര്‍ ഭാഗത്തേക്ക് പോവുകയായിരുന്ന മിനി ലോറിയും എതിരേവന്ന ടാക്‌സി കാറുമാണ് കൂട്ടിയിടിച്ചത്. പരിക്കേറ്റ സിജോയെ നാട്ടുകാര്‍ മൂവാറ്റുപുഴയിലെ സ്വകാര്യ ആശുപത്രിയില്‍ പ്രവേശിപ്പിച്ചു. പ്രാഥമിക ചികിത്സയ്ക്കുശേഷം ആലുവയിലെ സ്വകാര്യ ആശുപത്രിയിലേക്ക് മാറ്റി. ഇടിയുടെ ആഘാതത്തില്‍ കാറിന്‍റെ മുന്‍ഭാഗം പൂര്‍ണമായും, ലോറിയുടെ മുന്‍ഭാഗം ഭാഗികമായും തകര്‍ന്നു. മൂവാറ്റുപുഴ ഫയര്‍ഫോഴ്‌സെത്തി വാഹനങ്ങള്‍ റോഡില്‍നിന്ന് നീക്കം ചെയ്താണ് ഗതാഗതം പുനസ്ഥാപിച്ചത്.

റോഡ് നിലവാരം ഉയർന്നിട്ടും കുറയാതെ അപകടങ്ങള്‍

മൂവാറ്റുപുഴ: കക്കടാശേരി - കാളിയാര്‍, മൂവാറ്റുപുഴ - തേനി റോഡുകളില്‍ അപകടങ്ങള്‍ പെരുകുന്നു. നിത്യേന ഉണ്ടാകുന്ന വാഹനാപകടങ്ങള്‍ ഒഴിവാക്കാന്‍ അധികാരികളുടെ അടിയന്തിര ഇടപെടല്‍ ഉണ്ടാകണമെന്ന ആവശ്യം ശക്തം. റോഡ് ഉന്നത നിലവാരത്തിലാക്കിയതിനു ശേഷം കഴിഞ്ഞ രണ്ട് വര്‍ഷത്തിനിടെ നൂറില്‍ അധികം വാഹനാപകടങ്ങളാണ് സംഭവിച്ചത്. ആയങ്കരയില്‍ ഓട്ടോയും ബസും തമ്മില്‍ കൂട്ടിമുട്ടി രണ്ടു പേരും ആയവന കടുംപിടിയില്‍ കാറും ബൈക്കും കൂട്ടിയിടിച്ച് ഒരു യുവാവും കടവൂരില്‍ റോഡ് മുറിച്ച് കടന്ന വിദ്യാര്‍ഥി കാര്‍ തട്ടിയും പുന്നമറ്റത്ത് വൈദ്യുത പോസ്റ്റില്‍ ബൈക്ക് ഇടിച്ച് എംവിഐപി ജീവനക്കാരനും മരിച്ചത് അടുത്ത നാളിലാണ്. കഴിഞ്ഞ ദിവസം വാഴക്കുളം സെന്‍റെ ലിറ്റില്‍ തെരേസാസ് സ്‌കൂളിലെ അഞ്ചാം ക്ലാസ് വിദ്യാര്‍ഥി കാശിനാഥന്‍ കല്ലൂര്‍ക്കാട് കോടക്കവലയില്‍ റോഡ് മുറിച്ച് കടക്കുന്നതിനിടെ പിക്കപ് വാന്‍ തട്ടി മരിച്ചതാണ് അപകടങ്ങളിൽ ഒചുവിലത്തേത്. റീബില്‍ഡ് കേരളയില്‍ ഉള്‍പ്പെടുത്തി 155 കോടി ചെലവഴിച്ചാണ് കക്കടാശേരി - കാളിയാര്‍, മൂവാറ്റുപുഴ - തേനി റോഡുകളുടെ നിര്‍മാണം നടത്തിയത്. ശരാശരി ഒരു കിലോമീറ്റര്‍ റോഡ് നിര്‍മാണത്തിനായി സര്‍ക്കാര്‍ ചെലവഴിച്ചത് 3.50 കോടി രൂപയാണ്. ഒന്നാം എല്‍ഡിഎഫ് സര്‍ക്കാരിന്‍റെ കാലത്ത് തയാറാക്കിയ ഡിപിആറില്‍ അനാവശ്യമായ ഭേദഗതികള്‍ വരുത്തി പദ്ധതി നടപ്പാക്കിയതാണ് വാഹനാപകടങ്ങള്‍ വര്‍ധിക്കുന്നതിന് മുഖ്യകാരണമെന്ന് മുന്‍ എംഎല്‍എ എല്‍ദോ ഏബ്രഹാം കുറ്റപ്പെടുത്തി. വളവുകള്‍ നിവര്‍ത്താതെയും കുന്നുകളുടെ ഉയരം കുറയ്ക്കാതെയും റോഡ് നിര്‍മിച്ചത് അപകടം വര്‍ധിപ്പിച്ചു. മൂവാറ്റുപുഴ - തേനി റോഡില്‍ കുന്നുകള്‍ താഴ്ത്തി റോഡ് നിര്‍മിക്കാത്തത് മൂലം യാത്രക്കാര്‍ക്ക് എതിരെ വരുന്ന വാഹനങ്ങള്‍ കാണാത്ത സ്ഥിതിയാണുള്ളത്. കക്കടാശേരി - കാളിയാര്‍ റോഡില്‍ അപകടം വരുത്തിവയ്ക്കുന്ന വിധം റോഡിന്‍റെ മധ്യഭാഗത്ത് നില്‍ക്കുന്ന വൈദ്യുതി പോസ്റ്റുകള്‍ നാളിതു വരെ മാറ്റി സ്ഥാപിച്ചിട്ടില്ല. ജല അഥോറിറ്റി അധികൃതരാകട്ടെ ബിഎംബിസി റോഡിന്‍റെ പലഭാഗത്തും നിര്‍മാണ പ്രവര്‍ത്തനം നടത്തിയത് കുഴികള്‍ രൂപപ്പെട്ട് അപകടം ക്ഷണിച്ചുവരുത്തി. യാത്രക്കാര്‍ക്ക് ബോധ്യമാകുന്ന വിധം അപകട സൂചനാ ബോര്‍ഡുകള്‍ സ്ഥാപിച്ചിട്ടില്ലാത്തതും സീബ്രാ ലൈനുകള്‍, റിഫ്‌ളക്ടറുകള്‍, ഡിവൈഡറുകള്‍ ആവശ്യം വേണ്ട ഇടങ്ങളിലില്ലാത്തതും അപകടങ്ങളുടെ ആക്കം കൂട്ടി. റോഡ് നിര്‍മാണത്തിന് മുന്‍പ് പുറമ്പോക്ക് ഭൂമി കണ്ടെത്തി റോഡിന്‍റെ ആവശ്യത്തിന് ഉപയോഗപ്പെടുത്തുന്നതില്‍ വീഴ്ചയുണ്ടായി. പുഴയ്ക്ക് കുറുകെയുള്ള കക്കടാശേരി പാലത്തിന്‍റെ വശങ്ങളില്‍ കാല്‍നടയാത്രക്കാര്‍ക്ക് വേണ്ടി നിര്‍മിക്കാന്‍ ഉദ്ദേശിച്ച സ്റ്റീല്‍ ബ്രിഡ്ജ് പദ്ധതിയില്‍ നിന്ന് ഒഴിവാക്കിയത് അധികാരികളുടെ ഗുരുതര വീഴ്ചയാണെന്നും ആരോപണം ഉയര്‍ന്നിട്ടുണ്ട്. വിദ്യാലയങ്ങള്‍ സ്ഥിതി ചെയ്യുന്ന പോത്താനിക്കാട്, പൈങ്ങോട്ടൂര്‍, കടവൂര്‍ കവലകളില്‍ ട്രാഫിക് പോലീസ് സേവനം കാര്യക്ഷമമാക്കണമെന്നും റോഡ് നിര്‍മാണത്തിലെ അപാകത പരിഹരിക്കാന്‍ വിദഗ്ധ സംഘത്തിന്‍റെ പരിശോധന നടത്തി ആവശ്യമായ നടപടികള്‍ സ്വീകരിക്കണമെന്നും എല്‍ദോ എബ്രഹാം ആവശ്യപ്പെട്ടു.

മുതിര്‍ന്ന പൗരന്മാരുടെ കരട് നയം : വൈപ്പിനിൽ കൂട്ടായ്മകൾ 10 മുതൽ

വൈപ്പിൻ: മുതിർന്ന പൗരൻമാരുടെ സംരക്ഷണവും പരിചരണവും ഉറപ്പാക്കാൻ സർക്കാർ പരിഷ്കരിക്കുന്ന നയം വിശദീകരിക്കുന്നതിനായി ഈ മാസം 10 മുതൽ വൈപ്പിൻ മണ്ഡലത്തിൽ ഇവരുടെ കൂട്ടായ്മകൾ സംഘടിപ്പിക്കുമെന്ന് കെ .എൻ. ഉണ്ണികൃഷ്ണൻ എംഎൽഎ അറിയിച്ചു. നയത്തിന്‍റെ കരട് പ്രസിദ്ധീകരിച്ചിട്ടുണ്ട്. ഇതുപ്രകാരം സമഗ്ര ക്ഷേമപെൻഷൻ അവകാശമാക്കും. സാമ്പത്തികമായി പിന്നാക്കം നിൽക്കുന്നവർക്ക് പ്രാഥമികാരോഗ്യ കേന്ദ്രങ്ങളിലെത്താൻ ഗതാഗത സൗകര്യമൊരുക്കും. പൊതു ജനാരോഗ്യ കേന്ദ്രങ്ങളിൽ പ്രത്യേക വാർഡും ടെലി മെഡിസിൻ സൗകര്യവും സുരക്ഷ ഉറപ്പാക്കാൻ ജിയോ ടാഗ് സംവിധാനവും ഉറപ്പാക്കും. വിദ്യാർത്ഥികൾക്ക് വയോജന പരിപാലന പരിശീലനം നൽകും. മൂന്നിലേറെ കിടപ്പുമുറികളുള്ള വീട്ടിൽ ഒരു മുറി വയോജന സൗഹൃദമാക്കണമെന്നും കരടിൽ വ്യക്തമാക്കിയിട്ടുള്ളതായി എംഎൽഎ വ്യക്തമാക്കി. വൈപ്പിനിലെ പഞ്ചായത്തുകളിൽ കൂട്ടായ്മ നടക്കുന്ന തീയതിയും സമയവും: ഓഗസ്റ്റ് 10 രാവിലെ 10ന് പള്ളിപ്പുറം. വൈകിട്ട് മൂന്നിന്- മുളവുകാട്. 11ന് വൈകുന്നേരം നാലിന് കടമക്കുടി.15ന് രാവിലെ 10 നായരമ്പലം. വൈകുന്നേരം നാലിന് ഞാറക്കല്‍. 16ന് വൈകുന്നേരം മൂന്നിന് എളങ്കുന്നപ്പുഴ.17ന് വൈകുന്നേരം മൂന്നിന് എടവനക്കാട്. 19ന് വൈകുന്നേരം നാലിന് കുഴുപ്പിള്ളി.

കനാലില്‍ വീണയാളെ രക്ഷപ്പെടുത്തി

കൊച്ചി: എറണാകുളം മാര്‍ക്കറ്റ് കനാലില്‍ വീണയാളെ അഗ്നിരക്ഷാ സേന രക്ഷപ്പെടുത്തി. ഇന്നലെ രാത്രി 9.15 ഓടെയാണ് മാര്‍ക്കറ്റിനടുത്തുള്ള കനാലില്‍ യുവാവ് വീണത്. തുടര്‍ന്ന് വെള്ളത്തിനടയില്‍ ചെളിയില്‍ പുതഞ്ഞുപോയ ഇയാളെ ക്ലബ് റോഡ് അഗ്നി രക്ഷാസേന എത്തിയാണ് രക്ഷപ്പെടുത്തിയത്. യുവാവിനെ എറണാകുളം ജനറല്‍ ആശുപത്രിയില്‍ പ്രവേശിപ്പിച്ചു.

നെടുന്പാശേരി സഹ. ബാങ്ക് ക്രമക്കേട്: സമഗ്രാന്വേഷണം വേണം-സിപിഎം

നെടുന്പാശേരി: നെടുമ്പാശേരി സഹകരണ ബാങ്കിൽ ഭരണകക്ഷിയായ കോൺഗ്രസ് ഡയറക്ടർ ബോർഡ് അംഗങ്ങളുടെ നേതൃത്വത്തിൽ വൻ ക്രമക്കേടുകൾ നടന്നെന്ന പ്രസിഡന്‍റായിരുന്ന പി.പി. ഐസക് വെളിപ്പെടുത്തിയ സാഹചര്യത്തിൽ സമഗ്ര അന്വേഷണം നടത്തി കുറ്റക്കാർക്കെതിരെ നടപടി സ്വീകരിക്കണമെന്ന് സിപിഎം നെടുമ്പാശേരി വെസ്റ്റ് ലോക്കൽ കമ്മിറ്റി പ്രസ്താവനയിൽ ആവശ്യപ്പെട്ടു. ബാങ്കുമായി ബന്ധപ്പെട്ട് കഴിഞ്ഞ കാലങ്ങളിലുണ്ടായ വൻ ക്രമക്കേടുകൾ പുറത്തുകൊണ്ടുവന്ന് സഹകരണ മേഖലയുടെ വിശ്വാസ്യത വർധിപ്പിക്കാൻ സഹകരണ വകുപ്പ് അടിയന്തര അന്വേഷണത്തിന് ഉത്തരവിടണമെന്ന് സിപിഎം നെടുമ്പാശേരി വെസ്റ്റ് ലോക്കൽ സെക്രട്ടറി പി.സി. സോമശേഖരൻ ആവശ്യപ്പെട്ടു.

കൊച്ചി രൂപത മിഷൻ ലീഗ് പ്രവർത്തന വർഷ ഉദ്ഘാടനം

ഫോർട്ടുകൊച്ചി: ചെറുപുഷ്പ മിഷൻലീഗ് കൊച്ചി രൂപതയുടെ 59ാമത് പ്രവർത്തന വർഷ ഉദ്ഘാടനം നസ്രത്ത് ഹോളി ഫാമിലി ഇടവകയിൽ കൊച്ചി രൂപത പ്രൊക്യുറേറ്റർ ഫാ. മാക്സൺ കുറ്റിക്കാട്ട് നിർവഹിച്ചു. രൂപത പ്രസിഡന്‍റ് കെ.വി. ജിതിൻ അധ്യക്ഷനായി. പ്രവർത്തനവർഷ മാർഗരേഖ പ്രകാശനം നസ്രത്ത് ഇടവക വികാരി ഫാ. ജോസഫ് ടൈറ്റസ് കണ്ടത്തിപ്പറമ്പിൽ നിർവഹിച്ചു. രൂപത ഡയറക്ടർ ഫാ. ഷിനോജ് പുന്നക്കൽ, ഫാ.ഡാനി പൈലി, ഫാ. ആഷ്ബൽ, ജോയിന്‍റ് ഡയറക്ടർ സിസ്റ്റർ ജാസ്മിൻ ജോസഫ്, രൂപത സെക്രട്ടറി സോനു നാനാട്ട്, വൈസ് പ്രസിഡന്‍റ് കെ.കെ. സൂസൻ, ജോയിന്‍റ് സെക്രട്ടറി ടി.ജെ. ഷിബി, ഓർഗനൈസർ ഡിക്സൺ ജേക്കബ്, സംസ്ഥാന സമിതിയംഗം ശരത് ബാവക്കാട്ട്, അനോഷ് ഇമ്മാനുവൽ, മെയ്ജോ മംഗലത്ത്എന്നിവർ പ്രസംഗിച്ചു. മിഷൻലീഗ് സ്ഥാപക നേതാവ് പി.സി. ഏബ്രഹാം പല്ലാട്ടുകുന്നേൽ അനുസ്മരണ പ്രഭാഷണം നടത്തി.

ആലുവയിലെ 60 വർഷം പഴക്കമുള്ള സൈറൺ വീണ്ടും മുഴങ്ങി

ആലുവ: ആലുവ നഗരസഭയുടെ സമയ സൈറൺ പ്രവർത്തിപ്പിക്കുന്നതിന് 38 ദിവസം മുമ്പ് ഏർപ്പെടുത്തിയ നിരോധനം പിൻവലിച്ച് ജില്ലാ കളക്‌ടർ ജില്ലാ കളക്‌ടർ എൻ.എസ്.കെ. ഉമേഷ് സ്ഥാനമൊഴിഞ്ഞു. ഒരു അഭിഭാഷകൻെറ പരാതിയെ തുടർന്ന് ഏർപ്പെടുത്തിയ സൈറൺ നിരോധനമാണ് മലിനീകരണ നിയന്ത്രണ ബോർഡ് നൽകിയ വിശദീകരണത്തിൻെറ അടിസ്ഥാനത്തിൽ കളക്ടർ സ്ഥലം മാറ്റത്തിന് മണിക്കൂറുകൾ മുമ്പ് തീരുമാനമെടുത്തത്. രാവിലെ ഉത്തരവ് ലഭിച്ചതോടെ ഇന്നലെ വൈകീട്ട് 5 മുതൽ സൈറൺ വീണ്ടും മുഴങ്ങി. യുദ്ധം നടക്കുന്ന സമയത്ത് ജനങ്ങൾക്ക് മുന്നറിയിപ്പ് നൽകാനായാണ് ഇംഗ്ലണ്ടിൽ നിർമിച്ച സൈറൺ സ്ഥാപിച്ചത്. 1965 മുതൽ പൊതുജനങ്ങൾക്ക് സമയത്തെക്കുറിച്ച് അറിയിപ്പ് നൽകാൻ ഇത് ഉപയോഗിച്ചു തുടങ്ങി. ദിവസത്തിൽ അഞ്ച് തവണയാണ് സൈറൺ മുഴങ്ങിയിരുന്നത്. രാവിലെ അഞ്ച്,എട്ട്,ഉച്ചക്ക് ഒന്ന്,വൈകിട്ട് അഞ്ച്,രാത്രി എട്ട് എന്നീ സമയങ്ങളിൽ 20 സെക്കൻഡ് സമയമാണ് സൈറൺ പ്രവർത്തിപ്പിക്കുക. ഇതിതന്‍റെ ശബ്ദതോത് അനുവദനീയമായ 65 ഡെസിബെല്ലിന് മുകളിൽ 77.4 ഡെസിബെൽ ആണ് ആലുവ നഗരസഭ ഓഫീസ് സ്ഥിതി ചെയ്യുന്ന പമ്പ് ജംഗ്ഷൻ മേഖലയിൽ ഉള്ളത്. സെെറൻ സമയത്ത് 93.5 ആയി ഉയരുമെന്നാണ് കങ്ങരപ്പടി സ്വദേശിയായ പരാതിക്കാരൻ ചൂണ്ടിക്കാട്ടിയത്. എന്നാൽ 20 സെക്കൻഡ് മാത്രമുള്ള സൈറൺ ഒരു ശബ്ദമലിനീകരണമായി പരിഗണിക്കാനാകില്ലെന്ന് പിസിബി എക്സി. എൻജിനീയർ വിഭാഗം ജില്ലാ കളക്ടർക്ക് വിശദീകരണം നൽകി. ഇതംഗീകരിച്ചാണ് നിരോധനം നീക്കിയത്. മഹാപ്രളയത്തിനു ശേഷം ദുരന്തനിവാരണ സമിതിയുടെ നേതൃത്വത്തിൽ പെരിയാർ തീരത്ത് സൈറനുകൾ സ്ഥാപിച്ചു തുടങ്ങിയ സമയത്താണ് പ്രധാന നഗരത്തിലെ സൈറൺ ജില്ലാ കളക്ടർ ഇടപെട്ട് നിർത്തിവച്ചത്. ഇതിനെതിരെ ഭരണ, പ്രതിപക്ഷ കൗൺസിലർമാർ പ്രതിഷേധിച്ചിരുന്നു.

കൂനമ്മാവ് ചാവറ സ്‌പെഷല്‍ സ്‌കൂളില്‍ ചില്‍ഡ്രന്‍സ് വില്ലേജ് തുറന്നു

വരാപ്പുഴ: കൂനമ്മാവ് ചാവറ സ്‌പെഷല്‍ സ്‌കൂളില്‍ പുതിയതായി ആരംഭിച്ച ചില്‍ഡ്രന്‍സ് വില്ലേജിന്‍റെ ഉദ്ഘാടനം നടത്തി. ജസ്റ്റീസ് ദേവന്‍ രാമചന്ദ്രന്‍ ഉദ്ഘാടനം ചെയ്തു. ചാലക്കുടി എംഎല്‍എ സനീഷ്‌കുമാര്‍ ജോസഫ് അധ്യക്ഷത വഹിച്ചു. പറവൂര്‍ ബ്ലോക്ക് പഞ്ചായത്ത് പ്രസിഡന്‍റ് കമല സദാനന്ദന്‍, കോട്ടുവള്ളി പഞ്ചായത്ത് പ്രസിഡന്‍റ് കെ.എസ്. ഷാജി, ജില്ലാ പഞ്ചായത്തംഗം ഷാരോണ്‍ പനയ്ക്കല്‍, പഞ്ചായത്ത് വിദ്യാഭ്യാസകാര്യ സ്ഥിരംസമിതി അധ്യക്ഷൻ ബിജു പഴമ്പിള്ളി, സിസ്റ്റര്‍ വിമല ജോസ്, ഫാ. ജോബി കോഴിക്കോട്ട്, ചിറ്റിലപ്പിള്ളി ഫൗണ്ടേഷന്‍ പ്രതിനിധി എസ്.എം. വിനോദ്, പ്രാര്‍ഥന ഫൗണ്ടേഷന്‍ ചീഫ് വൊളന്‍റിയര്‍ കുര്യന്‍ ജോര്‍ജ്,സെന്‍റ് ട്രീസാസ് കോണ്‍വന്‍റ് മദര്‍ സുപ്പീരിയര്‍ സിസ്റ്റര്‍ ജില്‍സി, ചാവറ സ്‌പെഷല്‍ സ്‌കൂള്‍ മാനേജര്‍ സിസ്റ്റര്‍ ജെസ്‌ലിന്‍, സ്‌കൂള്‍ പ്രധാനനാധ്യാപിക സിസ്റ്റര്‍ ജിത തോമസ് എന്നിവര്‍ പ്രസംഗിച്ചു. ചാവറ സ്‌പെഷല്‍ സ്‌കൂള്‍, പ്രാര്‍ഥന ഫൗണ്ടേഷന്‍, ചിറ്റലപ്പിള്ളി ഫൗണ്ടേഷന്‍ എന്നിവര്‍ സഹകരിച്ചാണ് ചില്‍ഡ്രന്‍സ് വില്ലേജിന്‍റെ പ്രവര്‍ത്തനം ആരംഭിച്ചിരിക്കുന്നത്. ബുദ്ധി, ചലന, കാഴ്ച, ശ്രവണ പരിമിതികളെ ലഘൂകരിക്കുന്നതിനായുള്ള ഫിസിയോ തെറാപ്പി, സ്പീച്ച് തെറാപ്പി, ഒക്യുപേഷണല്‍ തെറാപ്പി, ബിഹേവിയര്‍ തെറാപ്പി തുടങ്ങിയ സേവനങ്ങളാണ് സ്‌കൂളില്‍ ഒരുക്കിയിട്ടുള്ളത്. ചെറുപ്രായത്തിലെ തന്നെ ഭിന്നശേഷിക്കാരായ കുട്ടികളുടെ പരിമിതികള്‍ കണ്ടെത്തി പരിശീലനത്തിലൂടെ അവ ലഘൂകരിക്കുക എന്നതാണ് ചില്‍ഡ്രന്‍സ് വില്ലേജിലൂടെ ലക്ഷ്യമിട്ടിട്ടുള്ളത്. 12 വയസുവരെയുള്ള കുട്ടികള്‍ക്കാണ് പരിശീലനം നല്‍കുന്നത്. ആധുനിക സൗകര്യങ്ങളോടെ സജ്ജീകരിച്ചിട്ടുള്ള വ്യത്യസ്തമായ തെറാപ്പികളിലൂടെ ഒരു ദിവസം 40 മുതല്‍ 50 വരെ കുട്ടികള്‍ക്ക് പരിശീലനം നല്‍കുന്നതിനായുള്ള സൗകര്യം ചില്‍ഡ്രന്‍സ് വില്ലേജിലുണ്ട്.

എൽഡിഎഫിൽ മുറുമുറുപ്പ് : കന്യാസ്ത്രീകളുടെ അറസ്റ്റിൽ കൊച്ചിയിൽ വെവ്വേറെ പ്രതിഷേധം

ഫോർട്ടുകൊച്ചി: ഛത്തീസ്ഗഢില്‍ കന്യാസ്ത്രീകളെ അറസ്റ്റ് ചെയ്ത സംഭവവുമായി ബന്ധപ്പെട്ട് എല്‍ഡിഎഫ് സംസ്ഥാന വ്യാപകമായി നിയോജക മണ്ഡലം അടിസ്ഥാനത്തില്‍ സംഘടിപ്പിച്ച പ്രതിഷേധ സദസ് കൊച്ചി മണ്ഡലത്തില്‍ വെവ്വേറെ നടത്തി സിപിഐയും സിപിഎമ്മും. സിപിഎം എല്‍ഡിഎഫ് ബാനറില്‍ തോപ്പുംപടി പ്യാരി ജംഗ്ഷനില്‍ പരിപാടി സംഘടിപ്പിച്ചപ്പോള്‍ സിപിഐ ഒറ്റയ്ക്ക് തോപ്പുംപടി കെഎസ്ഇബി ഓഫിസിനു സമീപം പരിപാടി സംഘടിപ്പിച്ചു. രണ്ടു പരിപാടികളും ഒരേ സമയത്തുമായിരുന്നു. എല്‍ഡിഎഫ് പരിപാടി സിപിഎം ജില്ലാ സെക്രട്ടറിയേറ്റംഗം ജോണ്‍ ഫെര്‍ണാണ്ടസ് ഉദ്ഘാടനം ചെയ്തു. പി.എസ്. രാജം അധ്യക്ഷത വഹിച്ചു.കെ.ജെ. മാക്സി എംഎല്‍എ, പി.എ. പീറ്റര്‍, സോണി.കെ ഫ്രാന്‍സിസ് തുടങ്ങിയവർ സംസാരിച്ചു. സിപിഐയുടെ പരിപാടി മണ്ഡലം സെക്രട്ടറി എം.കെ. അബ്ദുൾ ജലീല്‍ ഉദ്ഘാടനം ചെയ്തു. എം. ഉമ്മര്‍ അധ്യക്ഷത വഹിച്ചു. ടി.കെ. ഷബീബ്,പി.എ. അയൂബ് ഖാന്‍, പി.കെ. ഷിഫാസ്, ഡെപ്യൂട്ടി മേയര്‍ കെ.എ. അന്‍സിയ,എ. അഫ്സല്‍ തുടങ്ങിയവര്‍ സംസാരിച്ചു.

നിയന്ത്രണം വിട്ട് പൊഴിച്ചാലിൽ വീണ കാറിടിച്ച് കടത്തുവള്ളം മുങ്ങി

അരൂർ : ചെല്ലാനം -ചേരുങ്കൽ കടത്തിനു സമീപം നിയന്ത്രണം വിട്ട കാർ പൊഴിച്ചാലിൽ വീണു. പൊഴിച്ചാലിൽ കിടന്ന കടത്തുവള്ളത്തിൽ ഇടിച്ചു കാർ നിന്നതിനാൽ കാറിലുണ്ടായിരുന്ന മൂന്നു പേർ അത്ഭുതകരമായി രക്ഷപ്പെട്ടു. കാർ ഇടിച്ചതോടെ കടത്തുവള്ളം മുങ്ങി. കടത്തുകാരൻ ചേരുങ്കൽ ഷിബുവിനു കാലിനു നിസാര പരിക്കേറ്റു. വല്ലേതോട്ടിൽ നിന്നും ചേരുങ്കലിലിലേക്ക് വിനോദ സഞ്ചാരത്തിനു വന്നതായിരുന്ന കാറിലുള്ളവർ. കോടന്തരുത്ത് കമ്പോത്തു തറ ബാബുവിന്‍റെ ഉടമസ്ഥതയിലുള്ള കാറാണ് അപകടത്തിൽപ്പെട്ടത്. ഇന്നലെ ഉച്ചയ്ക്കു ശേഷമായിരുന്നു സംഭവം.

യാത്രാദുരിതത്തിലായ ദേശീയപാത 66ൽ ഭാഗിക ടാറിംഗ്

പറവൂർ: മഴ പെയ്താൽ ചെളിയും വെള്ളക്കെട്ടും മൂലവും വെയിൽ തെളിയുന്നതോടെ പൊടിശല്യത്താലും യാത്രക്കാർ ദുരിതത്തിലായ ദേശീയപാത 66 ലെ കുറെ ഭാഗം ടാറിംഗ് നടത്തുന്നു. ഏറ്റവും മേശമായ മുനമ്പം കവല മുതൽ പറവൂർ പാലം വരെയാണ് ടാറിംഗ് നടത്തുന്നത്. പകൽ ഗതാഗത തിരക്കായതിനാൽ രാത്രികാലത്താണ് ജോലികൾ തീർക്കുന്നത്. മഴ ആരംഭിച്ചതു മുതൽ പലവട്ടം അറ്റകുറ്റപണി എന്ന പേരിൽ കുഴിയടയ്ക്കൽ നടത്തിയെങ്കിലും കോൺക്രീറ്റ് ഉപയോഗിച്ച് നടത്തിയ കുഴിയടയ്ക്കൽ വാഹനങ്ങൾ നിരന്തരമായി കടന്നുപോയതോടെ പൊളിഞ്ഞു റോഡിൽ പരക്കുകയായിരുന്നു. മഴ മാറി നിൽക്കുന്നത് കുറച്ചു സമയമാണെങ്കിൽ പോലും ഇതോടെ ഈ ഭാഗമാകെ പൊടിശല്യം രൂക്ഷമായി. മൂത്തകുന്നം മുതൽ ഇടപ്പിള്ളി വരെ റോഡിന്‍റെ സ്ഥിതി മോശമാണ്. ഇത് പൂർണമായി നന്നാക്കുന്നതിനു് നടപടികൾ സ്വീകരിച്ചുവരുന്നുണ്ട് എന്നാൽ ഇക്കാര്യങ്ങൾക്ക് കാലതാമസമുണ്ടാകും. അതിനു മുമ്പായി ഏറ്റവും ഗുരുതരമായ സ്ഥിതിവിശേഷം നിലനിൽക്കുന്ന ഭാഗം നന്നാക്കണമെന്ന ചിറ്റാറ്റുകര പഞ്ചായത്തിന്‍റെ സമ്മർദം പരിഗണിച്ചാണ് ഒന്നര കിലോമീറ്റർ ദൂരം ടാറിംഗ് നടത്തുന്നത്.

പെരുന്പാവൂർ പാപ്പൻപടിയിൽ റോഡിന്‍റെ വീതി കുറച്ച് അശാസ്ത്രീയ കാന നിർമാണം

പെരുമ്പാവൂർ: പെരുമ്പാവൂർ - കോടനാട് റോഡിൽ പാപ്പൻപടിയിൽ വെള്ള ക്കെട്ട് ഒഴിവാക്കാൻ അശാസ്ത്രീയമായി നിർമിച്ച കാന റോഡിന്‍റെ വീതികുറച്ചു. പുറംമ്പോക്ക് ഭൂമിയിൽ കാന നിർമിച്ച് വെള്ള കെട്ട് ഒഴിവാക്കുന്നതിനു പകരം റോഡിന് അനുവദിച്ച സ്ഥലത്ത് കാന കീറിയതോടെ രണ്ട് വാഹനങ്ങൾക്കു കടന്നുപോകാൻ കഴിയാത്ത അവസ്ഥയാണ്. നാട്ടുകാർ ഇക്കാര്യം കോൺട്രാക്ടറെ അറിയിച്ചെങ്കിലും യാതൊരു നടപടിയുമില്ലാതെ നിർമാണം പുരോഗമിക്കുകയാണ്. പൂപ്പാനി മുതൽ അയ്മുറി കവലവരെ വീതി കൂട്ടി റോഡ് പണിയാനാണ് നിർദേശം. ഒരു വർഷത്തിനുള്ളിൽ പണി പൂർത്തീകരിക്കുമെന്ന് എംഎൽഎ അടക്കമുള്ളവർ ഉറപ്പു നൽകിയെങ്കിലും വർഷം മൂന്നു കഴിഞ്ഞിട്ടും പൂർത്തിയായിട്ടില്ല. കാന നിർമാണം ഉൾപ്പെടെയുള്ള കാര്യങ്ങളിൽ കോൺട്രാക്ടർ സ്വന്തം ഇഷ്ടത്തിനാണ് പ്രവൃത്തികൾ ചെയ്യുന്നത്. പിഡബ്ല്യൂഡി അധികൃതർ ഇവിടേക്ക് തിരിഞ്ഞുനോക്കുന്നില്ലെന്ന് നാട്ടുകാർ പറയുന്നു. ടാറിംഗിന്‍റെ ഇരുവശവും കോൺക്രീറ്റ് ചെയ്തത് മഴയത്ത് ഒഴിച്ചു പോയി. ഇതു പരിഹരിക്കാനും അധികൃതർ തയാറായിട്ടില്ല. തുടക്കം മുതൽ റോഡ് പണിയിൽ അഴിമതി ഉണ്ടെന്ന് കാണിച്ച് നിരവധി പേർ ഇതിനകം പരാതി നൽകിയിട്ടുണ്ട്. പാപ്പൻപടി കവലയിൽ വെള്ളകെട്ട് ഒഴിവാക്കാൻ റോഡിന്‍റെ വീതി കൂട്ടി കാന നിർമിക്കണമെന്നും അയ്മുറി കവലമുതൽ പെരുമ്പാവൂർ വരെ റോഡ് പുറമ്പോക്ക് അളന്ന് വീതി കൂട്ടണമെന്നുമാണ് ജനങ്ങളുടെ ആവശ്യം. പഞ്ചായത്തംഗം ഉൾപ്പെടെയുള്ളവർ പ്രശ്നത്തിൽ ഇടപെട്ടിട്ടും പരിഹാരമായിട്ടില്ല. പാപ്പൻപടി കഴിഞ്ഞുള്ള കാനയിൽ സ്വകാര്യ വ്യക്തി കെട്ടിട നിർമാണ വേസ്റ്റിട്ട് നികത്തിയ നിലയിലുമാണ്.

പനി ബാധിച്ചു മരിച്ചു

ആലങ്ങാട്: പനി ബാധിച്ച് ചികിത്സയിലായിരുന്ന തത്തപ്പിള്ളി കാരടി പറമ്പിൽ അനിൽകുമാർ (52) മരിച്ചു. കഴിഞ്ഞദിവസം പനി കൂടിയതോടെ ചാലാക്ക മെഡിക്കൽ കോളജിൽ പ്രവേശിപ്പിച്ചു. ചികിത്സയിലിരിക്കെ ഇന്നലെ പുലർച്ചെയാണ് മരിച്ചത്. ഹൃദയസംബന്ധമായ മറ്റ് അസുഖങ്ങൾ ഉണ്ടായിരുന്നു. ഭാര്യ: സീന. മകൻ: അനൂപ്.

അമേരിക്കൻ മലയാളിയുടെ സഹായം; വിധവയ്ക്ക്‌ വീടൊരുങ്ങി

തിരുമാറാടി: അമേരിക്കൻ മലയാളിയുടെ തണലിൽ വിധവയ്ക്ക്‌ വീടൊരുങ്ങി. തിരുമാറാടി പഞ്ചായത്തിലെ ഒന്നാം വാർഡിൽ വെട്ടിമൂട് പുത്തൻകുളങ്ങരയിൽ വിധവയായ ഏലിയാമ്മ നാരായണനാണ് അമേരിക്കൻ മലയാളിയായ ഊരമന പാടിയേടത്തു ജോയ് ഇട്ടൻ വീട് നിർമിച്ചു നൽകിയത്. വാർഡ് അംഗം അനിത ബേബിയുടെ ആവശ്യപ്രകാരമാണ് സഹായം നൽകിയത്. വെസ്റ്റ്‌ ചെസ്റ്റർ മലയാളി അസോസിയേഷൻ പ്രസിഡന്‍റും മലങ്കര യാക്കോബായ അമേരിക്കൻ ഭദ്രാസന കൗൺസിൽ അംഗവും മലയാളി ചേമ്പർ ഓഫ് കോമേഴ്സ് നോർത്ത് അമേരിക്ക ജനറൽ സെക്രട്ടറിയും അമേരിക്കൻ പ്രവാസി സംഘടനയായ ഫൊക്കാനയുടെ മുൻ വൈസ് പ്രസിഡന്‍റ് കൺവൻഷൻ ചെയർമാനുമാണ് ജോയി. വീടിന്‍റെ താക്കോൽദാനം അനൂപ് ജേക്കബ് എംഎൽഎ നിർവഹിച്ചു. തിരുമാറാടി പഞ്ചായത്ത് പ്രസിഡന്‍റ് സന്ധ്യമോൾ പ്രകാശ് അധ്യക്ഷത വഹിച്ചു.

എട്ടു വർഷത്തെ ദുരിതത്തിന് അവസാനം : പുന്നേക്കാട് കവലയിൽ സിമന്‍റ് പടികൾ നിർമിക്കാൻ അനുമതി

കോതമംഗലം: പുന്നേക്കാട് കവലയിലെ വ്യാപാരസ്ഥാപനങ്ങളിലേക്ക് കയറുവാൻ സിമന്‍റ് പടികൾ നിർമിക്കാൻ അനുമതിയായി. എട്ട് വർഷം മുമ്പ് കീരംപാറ പഞ്ചായത്ത് പുന്നേക്കാട് കവലയിൽ വികസനത്തിന്‍റെ ഭാഗമായി റോഡ് താഴ്ത്തിയതിനാൽ റോഡിൽനിന്നും വ്യാപാരികൾക്കും ഉപഭോക്താക്കൾക്കും സ്ഥാപനങ്ങളിലേക്കു പ്രവേശിക്കാൻ പ്രയാസമായിരുന്നു. ‌ദുരിതാവസ്ഥയ്ക്കു പരിഹാരം ആവശ്യപ്പെട്ട് യുഡിഎഫ് നിരവധി സമരങ്ങൾ സംഘടിപ്പിച്ചിരുന്നു. പ്രതിപക്ഷനേതാവ് വി.ഡി. സതീശൻ, ഡീൻ കുര്യാക്കോസ് എംപി, മാത്യു കുഴലനാടൻ എംഎൽഎ എന്നിവർ വിവിധ ഘട്ടങ്ങളിൽ ദുരിതാവസ്ത നേരിട്ട് സന്ദർശിച്ച് ബോധ്യപെട്ടിട്ടുണ്ട്. യുഡിഎഫ് മണ്ഡലം കമ്മറ്റിയുടെ നേതൃത്വത്തിൽ പൊതു മരാമത്ത് വകുപ്പിന് നൽകിയ നിവേദനത്തിന്‍റെ അടിസ്ഥാനത്തിൽ വ്യാപാരികളുടെ സ്ഥാപനങ്ങളിലേക്ക് കവറുവാൻ സിമന്‍റ് ഉപയോഗിച്ചുള്ള ചവിട്ടുപടികൾ നിർമിക്കാൻ അനുമതിയാകുകയായിരുന്നു. എട്ടു വർഷമായുള്ള ദുരിതത്തിന് പരിഹാരമായതിൽ യുഡിഎഫ് ആഹ്ലാദം പ്രകടിപ്പിച്ചു. വ്യാപാരി വ്യവസായി ഏകോപന സമിതി പ്രസിഡന്‍റ് വി.ജെ. മത്തായി കുഞ്ഞിന്‍റെ സ്ഥാപനത്തിന് മുന്നിൽ ശാപമോക്ഷ ആഹ്ലാദ സമ്മേളനം നടത്തി. യുഡിഎഫ് ജില്ലാ കൺവീനർ ഷിബു തെക്കുംപുറം ഉദ്ഘാടനം ചെയ്തു. മണ്ഡലം ചെയർമാൻ രാജു പള്ളിത്താഴത്ത് അധ്യക്ഷത വഹിച്ചു.

മരണക്കെണിയൊരുക്കി കൂത്താട്ടുകുളം- പാലാ റോഡിലെ പുതിയ കലുങ്ക്

കൂത്താട്ടുകുളം: പാലാ പിഡബ്ല്യുഡി റോഡിൽ മംഗലത്തുതാഴം കവലയ്ക്ക് സമീപത്തെ കലുങ്ക് തകർന്നു. കൂത്താട്ടുകുളം - പാലാ റോഡിന്‍റെ പുനർനിർമാണ പ്രവർത്തനങ്ങളുടെ ഭാഗമായി പുതിയതായി നിർമിച്ച കലുങ്കിന്‍റെ മധ്യഭാഗമാണ് തകർന്നിട്ടുള്ളത്. ഈ ഭാഗത്തെ കോൺക്രീറ്റ് അടർന്ന് കമ്പികൾ മാത്രം അവശേഷിക്കുന്ന നിലയിലാണ്. അപകടാവസ്ഥയിൽ തുടരുന്ന കലുങ്കിലെ കുഴിയിൽ പ്രദേശവാസികളും നഗരസഭ കൗൺസിലറും ചേർന്ന് അപായ സൂചക അടയാളം സ്ഥാപിച്ചു. കലുങ്കിന്‍റെ അപകടാവസ്ഥ അറിഞ്ഞ് അനൂപ് ജേക്കബ് എംഎൽഎ സ്ഥലത്ത് എത്തി. പ്രഥമ ദൃഷ്ടിയിൽ നിർമാണത്തിൽ ഉണ്ടായ അപാകത തന്നെയാണെന്നും നിർമാണത്തിൽ അഴിമതി നടന്നിട്ടുണ്ടോ എന്ന് പരിശോധിക്കണമെന്നും എംഎൽഎ ആവശ്യപ്പെട്ടു. അടിയന്തര പ്രാധാന്യത്തോടെ കലുങ്ക് പൊളിച്ചു പണിയാനുള്ള നടപടികൾ സ്വീകരിക്കാനുള്ള നിർദേശവും എംഎൽഎ ഉദ്യോഗസ്ഥർക്ക് നൽകി. ഒരു കോടി നാല് ലക്ഷം രൂപ മുടക്കിൽ ബിഎംബിസി നിലവാരത്തിൽ ടാർ ചെയ്ത് റോഡിലെ കലുങ്കാണ് അപകടത്തിൽ ആയത്. എസ്റ്റിമേറ്റിൽ ഈ കലുങ്ക് നിർമാണത്തിനും തുക അനുവദിച്ചിരുന്നു. കലുങ്കിന്‍റെ നിർമാണ പ്രവർത്തികൾ നടന്നുകൊണ്ടിരുന്നപ്പോൾ നിർമാണത്തിലെ അപാകത ചൂണ്ടിക്കാട്ടിയിരുന്നെങ്കിലും നടപടിയുണ്ടായില്ല. നഗരസഭ കൗൺസിലർമാരായ പ്രിൻസ് പോൾ ജോൺ, ബോബൻ വർഗീസ്, ബേബി കിരാംന്തരം, ജിജോ ടി. ബേബി, സമീപവാസികളായ ജോബി തൊണ്ടിക്കാട്ടിൽ, സുരേഷ് ചേരിക്കവാഴയിൽ, ജോബി തോമസ്, സിപിഐ നേതാവ് എ.കെ. ദേവദാസ് എന്നിവരും എംഎൽഎയ്ക്ക്‌ ഒപ്പം ഉണ്ടായിരുന്നു. കോൺഗ്രസ് ഇന്നു വഴി തടഞ്ഞ് സമരം നടത്തും അഴിമതിക്കു കൂട്ടുനിന്ന ഉദ്യോഗസ്ഥർക്കെതിരേ കർശനമായ നടപടി സ്വീകരിക്കണമെന്ന് ആവശ്യപ്പെട്ടുകൊണ്ടു കൂത്താട്ടുകുളം മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ ഇന്നു മംഗലത്തുതാഴത്ത് വഴി തടയൽ സമരം നടത്തുമെന്നു മണ്ഡലം കോൺഗ്രസ് കമ്മിറ്റി പ്രസിഡന്‍റ് റെജി ജോൺ, നഗരസഭ കൗൺസിലർമാരായ പ്രിൻസ് പോൾ ജോൺ, കൗൺസിലർ ബോബൻ വർഗീസ് എന്നിവർ അറിയിച്ചു.

ഹിരോഷിമ ദിനം ആചരിച്ചു

മൂവാറ്റുപുഴ: എസ്എന്‍ഡിപി ഹയര്‍ സെക്കന്‍ഡറി സ്‌കൂളില്‍ ഹിരോഷിമ ദിനം ആചരിച്ചു. സ്‌കൂള്‍ പ്രധാനാധ്യാപിക വി.എസ്. ധന്യ ഉദ്ഘാടനം നിര്‍വഹിച്ചു. തുടര്‍ന്ന് പോസ്റ്റര്‍ പ്രദര്‍ശനം സഡാക്കോ പക്ഷികള്‍ ഉണ്ടാക്കല്‍ എന്നീ വ്യത്യസ്തങ്ങളായ പരിപാടികള്‍ നടന്നു. സോഷ്യല്‍ സയന്‍സ് ക്ലബിന്‍റെ നേതൃത്വത്തില്‍ നടന്ന പരിപാടിക്ക് കെ.ആര്‍. സുമ, എന്‍.എസ്. മായ എന്നിവര്‍ നേതൃത്വം നല്‍കി. കോലഞ്ചേരി: വൈഎംസിഎ യുടെ ആഭിമുഖ്യത്തിൽ ഹിരോഷിമ ദിനം ആചരിച്ചു. പ്രസിഡന്‍റ് ഡോ. ശശി എളൂർ അധ്യക്ഷത വഹിച്ചു. വൈഎംസിഎ മുൻ സംസ്ഥാന ചെയർമാൻ പ്രഫ. ജോയി സി. ജോർജ് മുഖ്യപ്രഭാഷണം നടത്തി. പ്രഫ. ജോർജ് കെ. ഐസക്ക്, സെക്രട്ടറി സി.കെ. ബാബു, സാജു എം. കറുത്തേടം, ചാക്കോ പത്രോസ്, സി.പി. മോനി, തമ്പി നെച്ചി എന്നിവർ പ്രസംഗിച്ചു.

പള്ളിയിലെ ഭണ്ഡാരക്കുറ്റി തകർത്ത് മോഷണം

മൂവാറ്റുപുഴ: ആരക്കുഴ സെന്‍റ് മേരീസ് മേജര്‍ ആര്‍ക്കി എപ്പിസ്‌കോപല്‍ പള്ളിയിലെ ഭണ്ഡാരക്കുറ്റി തകര്‍ത്ത് മോഷണം. മോഷ്ടാവിനെ നാട്ടുകാര്‍ തല്‍ക്ഷണം പിടികൂടി. മുടവൂര്‍ തവളകവല വെട്ടിക്കാക്കുടിയില്‍ മുരളി (46)യെയാണ് നാട്ടുകാര്‍ പിടികൂടി പോലീസില്‍ ഏല്പിച്ചത്. ചൊവ്വാഴ്ച പുലര്‍ച്ചെ 12:30ഓടെ ആരക്കുഴ സെന്‍റ് മേരീസ് പള്ളിയുടെ പുറത്തുള്ള ഭണ്ഡാരം തകര്‍ക്കുന്നതിനിടെയാണ് ഇയാള്‍ പിടിയിലായത്. സമീപത്തെ മലേകുരിശ് പള്ളിയുടെ കവാടത്തിലുള്ള ഭണ്ഡാരത്തിലെ പണം മോഷ്ട്ടിച്ച ശേഷം ആരക്കുഴ സെന്‍റ് മേരീസ് പള്ളിയുടെ കവാടത്തിലെ ഭണ്ഡാരത്തില്‍ മോഷണം നടത്തുനിടെയാണ് പിടിയിലായത്. നോട്ടുകള്‍ കൈക്കലാക്കിയ ശേഷം മൊബൈല്‍ ഫോണിന്‍റെ ടോര്‍ച് ലൈറ്റ് ഉപയോഗിച്ച് ഭണ്ഡാരം പരിശോധിക്കുന്നത്തിനിടെ ഫോണ്‍ ഭണ്ഡാരത്തിലേക്ക് വീഴുകയായിരുന്നു. തുടര്‍ന്ന് ഫോണ്‍ എടുക്കാനുള്ള ശ്രമം നടത്തുന്നതിടെ ശബ്ദം കേട്ട് സമീപവാസികള്‍ സ്ഥലത്തെത്തി. ഇതോടെ രക്ഷപെടാന്‍ ശ്രമിച്ച പ്രതിയെ ഓടിച്ചിട്ട് പിടികൂടുകയായിരുന്നു. പോലീസിന് കൈമാറിയ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

ശനിദശ മാറാതെ മൂവാറ്റുപുഴ ഇഇസി മാര്‍ക്കറ്റ്

മൂവാറ്റുപുഴ: പുരോഗതി ലക്ഷ്യംവച്ച് പുതിയ കമ്പനിക്കു കീഴിയില്‍ കൊണ്ടുവന്നിട്ടും മൂവാറ്റുപുഴ ഇഇസി മാര്‍ക്കറ്റ് മാറ്റമില്ലാതെ തുടരുന്നു. മൂന്നു പതിറ്റാണ്ട് മുമ്പ് കര്‍ഷകരുടെ ഉന്നമനത്തിനായി കൊണ്ടുവന്ന ഇഇസി മാര്‍ക്കറ്റിന്‍റെ പ്രവര്‍ത്തനമാണ് പഴയതുപോലെ തുടരുന്നത്. കര്‍ഷകരുടെ ഉന്നമനത്തിനായി മാര്‍ക്കറ്റിനെ കരകയറ്റാന്‍ അഗ്രോ ബിസിനസ് കമ്പനിയുടെ കീഴിലാക്കുകയായിരുന്നു. മാര്‍ക്കറ്റിന്‍റെ ആറ് ഏക്കര്‍ ഭൂമിയും കെട്ടിടങ്ങളും മറ്റു സംവിധാനങ്ങളും രണ്ട് വര്‍ഷം മുമ്പാണ് അഗ്രോ ബിസിനസ് കമ്പനിയായ കാബ്‌കോയുടെ ഉടമസ്ഥതയിലേക്കു മാറ്റിയത്. ഇതോടെ കര്‍ഷകര്‍ക്ക് ഗുണകരമായ മാറ്റങ്ങള്‍ ഉണ്ടാകുമെന്നായിരുന്നു പ്രതീക്ഷ. എന്നാല്‍ പിന്നീടും മാര്‍ക്കറ്റിന്‍റെ പ്രവര്‍ത്തനങ്ങള്‍ ഒന്നും നടന്നില്ല. കാബ്‌കോ സാങ്കേതിക കുരുക്കില്‍പ്പെട്ടതോടെ ഇഇസി മാര്‍ക്കറ്റിന്‍റെ വികസനം മുരടിക്കുകയും ചെയ്തു. കാര്‍ഷിക ഉത്പ്പന്നങ്ങളുടെ മൂല്യവര്‍ദ്ധനയ്ക്കും സംസ്‌കരണത്തിനും ഊന്നല്‍ നല്‍കുന്നതിനായി അഗ്രി പാര്‍ക്കുകളും ഫ്രൂട്ട് പാര്‍ക്കുകളും സ്ഥാപിക്കുന്നതിനും ഏകോപിപ്പിക്കുന്നതിനുമാണ് കാബ്‌കോ രൂപവത്ക്കരിച്ചത്. എന്നാല്‍ ഇപ്പോള്‍ മാര്‍ക്കറ്റിന്‍റെ പ്രവര്‍ത്തനം താളം തെറ്റിയിരിക്കുകയാണെന്ന് പരക്കെ ആക്ഷേപം ഉയര്‍ന്നിട്ടുണ്ട്. കെട്ടിടങ്ങള്‍ നാശത്തിന്‍റെ വക്കിലുമാണ്. മൂവാറ്റുപുഴയിലെ മാര്‍ക്കറ്റിന് പുറമെ സംസ്ഥാനത്തെ മറ്റ് അഞ്ച് ഇഇസി മാര്‍ക്കറ്റുകളും കാബ്‌കോയുടെ കീഴിലേക്ക് മാറിയിരിന്നു. കാര്‍ഷിക മേഖലയുടെ ഉന്നമനത്തിനായി 1995ല്‍ സ്ഥാപിച്ചതാണ് കാര്‍ഷിക മാര്‍ക്കറ്റ്. ആഴ്ചയിലൊരിക്കല്‍ നടക്കുന്ന സ്വതന്ത്ര കാര്‍ഷിക വിപണിയുടെ പ്രവര്‍ത്തനങ്ങള്‍ ഒഴിച്ചു നിര്‍ത്തിയാല്‍ മറ്റൊന്നും കാര്യമായി നടക്കുന്നില്ല. ചൊവ്വാഴ്ചതോറും നടക്കുന്ന വിപണിയില്‍ കുറച്ചു കര്‍ഷകര്‍ മാത്രമാണ് ഉത്പന്നങ്ങളുമായി എത്തുന്നത്. ഉത്പന്നങ്ങള്‍ വാങ്ങാന്‍ വ്യാപാരികള്‍ എത്താത്തതിനാല്‍ അര്‍ഹമായ വില ലഭിക്കുന്നില്ലെന്ന പരാതിയും വ്യാപകമാണ്. 30 ലക്ഷത്തോളം രൂപ ചെലവഴിച്ചു നിര്‍മാണം പൂര്‍ത്തിയാക്കിയ വെയര്‍ഹൗസ് കെട്ടിടം വര്‍ഷങ്ങള്‍ പിന്നിട്ടിട്ടും പ്രവര്‍ത്തനമാരംഭിക്കാന്‍ കഴിഞ്ഞിട്ടില്ല. ഇഇസി മാര്‍ക്കറ്റില്‍ ഒട്ടേറെ കെട്ടിടങ്ങള്‍ ഉപയോഗിക്കാനാകാതെ കിടക്കുമ്പോഴാണ് ലക്ഷങ്ങള്‍ ചെലവഴിച്ചു വെയര്‍ഹൗസ് കെട്ടിടം നിര്‍മിച്ചത്. കോടികള്‍ ചെലവഴിച്ചു സ്ഥാപിച്ച മാര്‍ക്കറ്റിലെ കൂറ്റന്‍ ശീതീകരണ സംവിധാനങ്ങള്‍ ആർക്കും പ്രയോജനപ്പെടാതെ നശിക്കുകയാണ്. അഞ്ച് കൂറ്റന്‍ ശീതീകരണ സംവിധാനങ്ങളില്‍ ഒന്നു പോലും ഇപ്പോള്‍ പ്രവര്‍ത്തിക്കുന്നില്ലെന്നാണറിയുന്നത്. കര്‍ഷകരുടെ ഉത്പ്പന്നങ്ങള്‍ കേടുകൂടാതെ സൂക്ഷിക്കുന്നതിനായിരുന്നു ശീതീകരണ സംവിധാനം ഒരുക്കിയത്. സ്മാര്‍ട് മാര്‍ക്കറ്റ് ആക്കാനുള്ള പദ്ധതിയും എങ്ങും എത്തിയില്ല. കര്‍ഷകര്‍ക്ക് ഏറെ ഗുണകരമാകുന്ന ഇഇസി മാര്‍ക്കറ്റിന്‍റെ വിപുലീകരണത്തിന് അധികൃതര്‍ വേണ്ട നടപടി സ്വീകരിക്കണമെന്നാണ് ആവശ്യമുയര്‍ന്നിരിക്കുന്നത്.

അൻസിൽ കൊലക്കേസ് പ്രതിയെ വീണ്ടും റിമാൻഡ് ചെയ്തു തെളിവെടുപ്പ് പൂർത്തിയാക്കി

കോതമംഗലം: കോതമംഗലം അൻസിൽ കൊലക്കേസ് പ്രതി അഥീനയെ തെളിവെടുപ്പും ചോദ്യം ചെയ്യലും പൂര്‍ത്തിയാക്കി വീണ്ടും റിമാൻഡ് ചെയ്തു. രണ്ട് ദിവസങ്ങളിലായാണ് പോലീസ് തെളിവെടുപ്പ് നടപടികള്‍ പൂര്‍ത്തിയാക്കിയത്. ഇന്നലെ മാലിപ്പാറയിലെ അഥീനയുടെ വീട്ടിലായിരുന്നു തെളിവെടുപ്പ്. ഉച്ചയോടെ പ്രതിയുമായി വീട്ടിലെത്തി അര മണിക്കൂര്‍ തെളിവെടുപ്പ് പൂര്‍ത്തിയാക്കി പോലീസ് മടങ്ങി. ശാസ്ത്രീയ തെളിവുകള്‍ ശേഖരിക്കുന്നതിനായി ഫോറന്‍സിക് സംഘവും സ്ഥലത്തെത്തിയിരുന്നു. വീട്ടിലെ സിസിടിവിയുടെ ഡിവിആര്‍ കണ്ടെടുക്കാന്‍ പോലീസിന് കഴിഞ്ഞില്ല. ഡിവിആര്‍ നശിപ്പിച്ചതായാണ് പോലീസ് സംശയിക്കുന്നത്. എനര്‍ജി ഡ്രിങ്കില്‍ കളനാശിനി കലര്‍ത്തിയാണ് അന്‍സിലിന് നല്‍കിയതെന്നാണ് പോലീസ് നിഗമനം. വീടിന്‍റെ പരിസരത്ത് നിന്ന് എനര്‍ജി ഡ്രിങ്ക് ബോട്ടിലിന്‍റെ അവശിഷ്ടം പോലീസ് കണ്ടെടുത്തിരുന്നു. കേസുമായി ബന്ധപ്പെട്ട കൂടുതല്‍ വിവരങ്ങള്‍ അന്വേഷണത്തെ ബാധിക്കുന്നതിനാല്‍ അന്വേഷണ സംഘം വെളിപ്പെടുത്തുന്നില്ല.

റാങ്കുകളുടെ തിളക്കത്തിൽ നിർമല കോളജ്

മൂവാറ്റുപുഴ: നിര്‍മല കോളജിന് റാങ്കുകളുടെ തിളക്കം. വിവിധ വിഭാഗങ്ങളില്‍ എംജി സര്‍വകലാശാല 2025 അധ്യയന വര്‍ഷത്തില്‍ നടത്തിയ പരീക്ഷയില്‍ 27 വിദ്യാര്‍ഥികള്‍ യൂണിവേഴ്സിറ്റി റാങ്കുകള്‍ നേടി. എംഎസ്‌സി സ്റ്റാറ്റിസ്റ്റിക്സ് വിഭാഗത്തില്‍ ആദ്യ പത്ത് റാങ്കുകളും നിര്‍മല കോളജിലെ വിദ്യാര്‍ഥികള്‍ക്കാണ് ലഭിച്ചത്. ഗാരന്‍ റോയ് ഒന്നാം റാങ്കും, നിമ ജിജോ, ബിനിത ലില്ലി ബിനോയ്, സോന സോണി, എയ്ഞ്ചല്‍ നിക്സണ്‍, മെറിന്‍ ജോണ്‍, സുരമ്യ സുരേന്ദ്രന്‍, ആതിര ലാലു, അലീന ജോജി, ഫിലോമിന്‍ റോയ് എന്നിവര്‍ യഥാക്രമം ആദ്യ പത്ത് റാങ്കുകള്‍ നേടി. എംഎസ്‌സി കെമിസ്ട്രി പരീക്ഷയില്‍ എം. ഗാഥ രണ്ടാം റാങ്കും, എംഎ ഹിന്ദി പരീക്ഷയില്‍ അന്നു ടോമി രണ്ടും, എം.എസ്. അല്‍ഫാന അഞ്ചും, അലീന ജോഷി ഏഴും, രവീണ രവി എട്ടും റാങ്കുകള്‍ നേടി. എംഎ എച്ച്ആര്‍എം വിഭാഗത്തില്‍ ആന്‍മേരി ജോണ്‍ മൂന്നാം റാങ്കും, ആനി സന്തോഷ് ഏഴാം റാങ്കും നേടി. മലയാളം വിഭാഗത്തില്‍ അഞ്ചലി സജീവ് രണ്ടാം റാങ്കും, എന്‍. ഗോപിക ദേവി മൂന്നാം റാങ്കും, കെ.ബി അഞ്ചന ഏഴാം റാങ്കും കരസ്ഥമാക്കി. എംസിഎ പരീക്ഷയില്‍ ജോസ്ന സോജന്‍ പത്താം റാങ്കും നേടി. ടൂറിസം വിഭാഗത്തില്‍ അശ്വതി സുബ്രഹ്മണ്യന്‍ ഒന്നാം റാങ്കും, നാല്, അഞ്ച്, ആറ് റാങ്കുകള്‍ മീനു സജിയും, സൈഫാന നൗഷാദും, എം.എന്‍ ശ്യാമ എന്നിവര്‍ യഥാക്രമം നേടി. എംഎസ്‌സി സൂവോളജി വിഭാഗത്തില്‍ അഹ്സാന ഫാത്തിമ ഒന്നാം റാങ്കും, സൗപര്‍ണിക സതീശന്‍ ഏഴാം റാങ്കും കരസ്ഥമാക്കി.

മയക്കുമരുന്ന് കേസ്: യുവതി കരുതൽ തടങ്കലിൽ

പെരുമ്പാവൂർ: മയക്കുമരുന്ന് കേസുകളിൽ ഉൾപ്പെട്ട യുവതിയെ പിറ്റ് എൻഡിപിഎസ് ആക്ട് പ്രകാരം കരുതൽ തടങ്കലിലടച്ചു. കൂവപ്പടി കാവുംപുറം വയൽത്തറ വീട്ടിൽ സ്വാതി കൃഷ്ണ (31) യെയാണ് തിരുവനന്തപുരം വനിതാ ജയിലിലടച്ചത്. മാർച്ചിൽ 20 ഗ്രാം എംഡിഎംഎയുമായി അങ്കമാലിയിൽ വച്ച് പോലീസ് സ്വാതിയെ പിടികൂടിയിരുന്നു. ബംഗളൂരുവിൽ നിന്ന് കാറിൽ കടത്തുകയായിരുന്ന രാസലഹരി പോലീസ് സാഹസികമായി പിന്തുടർന്നാണ് പിടികൂടിയത്. വേറെയും മയക്കുമരുന്ന് കേസുകളിൽ ഇവർ പ്രതിയാണ്. ഇൻസ്പെക്ടർ ജി.പി മനുരാജിന്‍റെ നേതൃത്വത്തിലായിരുന്നു അറസ്റ്റ്. ഇതോടെ റൂറൽ ജില്ലയിൽ പിറ്റ് നിയമപ്രകാരം ജയിലിലടച്ചവരുടെ എണ്ണം പതിനെട്ടായി. മയക്ക് മരുന്ന് കടത്തുകാരെ കരുതലായി ജയിലിലടയ്ക്കാനുള്ള നിയമമാണ് പ്രിവൻഷൻ ഓഫ് ഇല്ലിസിറ്റ് ട്രാഫിക് ഇൻ നർകോട്ടിക്ക് ഡ്രഗ്സ് ആൻഡ് സൈക്കോട്രോപ്പിക്ക് സബ്സ്റ്റൻസസ് ആക്ട് .

ട്രെയിനിൽ വിദ്യാർഥിനികളെ ശല്യപ്പെടുത്തിയ യുവാവ് അറസ്റ്റിൽ

ആലുവ: ബംഗളൂരുവിൽ നിന്ന് കൊച്ചിയിലേക്ക് വിനോദയാത്രയ്ക്ക് വന്ന വിദ്യാർഥിനികളെ ട്രെയിനിൽ ശല്യം ചെയ്ത യുവാവ് ആലുവ റെയിൽവേ പോലീസിന്‍റെ പിടിയിലായി.തമിഴ്നാട് തിരുപ്പതി സ്വദേശി വിജയ് രാജേന്ദ്രനാണ് (35)പിടിയിലായത്. ഇന്നലെ രാവിലെ ബംഗളൂരു - എറണാകുളം ട്രെയിൻ തൃശൂർ വിട്ടശേഷമാണ് സംഭവമുണ്ടായത്. ടോയ്‌ലറ്റിലേക്ക് പോയ വിദ്യാർഥിനികളെ പ്രതി കയറിപ്പിടിക്കാൻ ശ്രമിച്ചെന്നാണ് പരാതി. ആലുവ റെയിൽവേ സ്റ്റേഷനിൽ ട്രെയിൻ എത്തിയപ്പോൾ വിദ്യാർഥിനികൾ റെയിൽവേ പോലീസിനെ വിവരമറിയിച്ചപ്പോഴാണ് പ്രതിയെ അറസ്റ്റ് ചെയ്തത്. എറണാകുളം റെയിൽവേ പോലീസ് കേസെടുത്ത് പ്രതിയെ കോടതിയിൽ ഹാജരാക്കി.

ആശങ്കയൊഴിഞ്ഞു; ഉത്തരാഖണ്ഡിലേക്കു പോയ തൃപ്പൂണിത്തുറ സ്വദേശികൾ സുരക്ഷിതർ

തൃപ്പൂണിത്തുറ: ഉത്തരാഖണ്ഡിലേക്ക് വിനോദയാത്ര പോയവരിൽ കൊച്ചിയിൽനിന്ന് ടൂർ പാക്കേജിലുണ്ടായിരുന്ന തൃപ്പൂണിത്തുറ പള്ളിപ്പറമ്പുകാവ് ദേവിനഗറിൽ ശ്രീനാരായണീയത്തിൽ നാരായണൻ നായർ, ശ്രീദേവി പിള്ള എന്നിവർ സുരക്ഷിതരാണെന്ന് വിവരം ലഭിച്ചു. ഉത്തരാഖണ്ഡിലുണ്ടായ മേഘവിസ്ഫോടനത്തെ തുടർന്നാണ് ടൂർ പാക്കേജിൽ ഉൾപ്പെട്ടിരുന്ന മലയാളി കുടുംബങ്ങളുടെ ബന്ധുക്കൾ ആശങ്കയിലായത്. 28 മലയാളികളായിരുന്നു ടൂറിലുണ്ടായിരുന്നത്. ഇതിൽ 20 മുംബൈ മലയാളികളും, എട്ടുപേർ കേരളത്തിൽ നിന്നുള്ളവരുമായിരുന്നു. അപകട വാർത്തയറിഞ്ഞതിനെ തുടർന്ന് തൃപ്പൂണിത്തുറയിൽ നിന്നും ടൂർ പോയവരുടെ ബന്ധുക്കൾ ഇവരെ ബന്ധപ്പെടാൻ ശ്രമിച്ചെങ്കിലും കഴിയാതെ വന്നതോടെയാണ് ആശങ്കയേറിയത്. ബന്ധുക്കളുടെ ഒരു ദിവസത്തെ ആശങ്കയ്ക്കു വിരാമമിട്ടാണ് ഇവരുടെ മകൻ ശ്രീരാമിന്‍റെ വിളിയെത്തിയത്. മാതാപിതാക്കൾ സുരക്ഷിതരാണെന്നുള്ള വിവരം ആർമി ഉദ്യോഗസ്ഥർ അറിയിച്ചതായും അവരെ ആർമി സംഘം സുരക്ഷിത സ്ഥാനത്തേക്ക് നീക്കിയെന്നുമാണ് അറിയാൻ കഴിഞ്ഞതെന്നായിരുന്നു വിവരം. വാർത്താ വിനിമയ സംവിധാനങ്ങൾ തകരാറിലായതുകൊണ്ടാണ് മാതാപിതാക്കളെ ബന്ധപ്പെടാൻ കഴിയാതെ വന്നതെന്നും അവരെ അവിടെനിന്നു മാറ്റാൻ രണ്ടു ദിവസമെടുക്കുമെന്ന് അറിയിച്ചതായും പറഞ്ഞു. രണ്ട് ദിവസം മുൻപ് അവിടെ മണ്ണിടിച്ചിലുണ്ടായതിന്‍റെ വീഡിയോ അവർ അയച്ചു കൊടുത്തിരുന്നു. ഇവർ ഉണ്ടായിരുന്ന സ്ഥലത്തുനിന്നും രണ്ടു കിലോമീറ്റർ ദൂരെയാണ് മണ്ണിടിച്ചിലുണ്ടായതെന്നാണ് അന്ന് പറഞ്ഞതെന്നും മകൻ പറഞ്ഞു.

നെടുമ്പാശേരി ബാങ്ക് അഴിമതി: കുറ്റക്കാർക്കെതിരെ നടപടി വേണമെന്ന്

നെടുമ്പാശേരി: നെടുമ്പാശേരി സഹ. ബാങ്കിൽ ഭരണകക്ഷിയായ കോൺഗ്രസ് ഡയറക്ടർ ബോർഡ് അംഗങ്ങളുടെ നേതൃത്വത്തിൽ വൻ ക്രമക്കേടുകൾ നടന്നുവെന്ന് പ്രസിഡന്‍റായിരുന്ന പി.പി. ഐസക്ക് വെളിപ്പെടുത്തിയ സാഹചര്യത്തിൽ സമഗ്ര അന്വേഷണം നടത്തി കുറ്റക്കാർക്കെതിരെ നടപടി സ്വീകരിക്കണമെന്ന് സിപിഎം നെടുമ്പാശേരി വെസ്റ്റ് ലോക്കൽ കമ്മിറ്റി പ്രസ്താവനയിൽ ആവശ്യപ്പെട്ടു. തുടർച്ചയായി കോൺഗ്രസ് ഭരണത്തിലുള്ള ബാങ്കിൽ വായ്പ അനുവദിക്കുന്നതിൽ ഉൾപ്പടെ ക്രമക്കേടുകൾ നടക്കുന്നതായി നേരത്തെ പരാതി ഉയർന്നിരുന്നു. ഭരണത്തിന് നേതൃത്വം നൽകിയ പ്രസിഡന്‍റ് തന്നെ വാർത്താ സമ്മേളനത്തിലൂടെ കോടികളുടെ അഴിമതി നടന്നതായി വെളിപ്പെടുത്തിയത് അതീവ ഗൗരവമാണ്. സഹകരണ മേഖലയുടെ വിശ്വാസ്യത വർധിപ്പിയ്ക്കാൻ സഹകരണ വകുപ്പ് അടിയന്തിര അന്വേഷണത്തിന് ഉത്തരവിടണമെന്ന് സിപിഎം നെടുമ്പാശേരി വെസ്റ്റ് ലോക്കൽ സെക്രട്ടറി പി.സി. സോമശേഖരൻ ആവശ്യപ്പെട്ടു.

കല്ലുപാലം റോഡിന്‍റെ നിര്‍മാണോദ്ഘാടനം നടത്തി

അങ്കമാലി: അങ്കമാലി നഗരസഭയിലെ വാര്‍ഡ് 5, 6 ലൂടെ കടന്ന് പോകുന്ന കല്ലുപാലം റോഡിന്‍റെ നിര്‍മാണോദ്ഘാടനം റോജി എം. ജോണ്‍ എംഎല്‍എ നിര്‍വഹിച്ചു. നഗരസഭാ ചെയര്‍മാന്‍ അഡ്വ. ഷിയോപോള്‍ അധ്യക്ഷത വഹിച്ചു. എംഎല്‍എ മുന്‍കകൈയെടുത്ത് സംസ്ഥാന ബജറ്റില്‍ ഉള്‍പ്പെടുത്തി 1.56 കോടി രൂപ അനുവദിച്ച പ്രവര്‍ത്തിയാണിത്. ദേശീയപാതയില്‍ കോതകുളങ്ങര മുതല്‍ കര്‍ഷകന്‍ കവല വരെയുള്ള ഭാഗം ടൈല്‍ വിരിച്ചും കര്‍ഷകന്‍ കവല മുതല്‍ മഞ്ഞപ്ര വരെയുള്ള ഭാഗം ബിഎം ആൻഡ് ബിസി നിലവാരത്തിലും പണിയുന്നതിനാണ് തുക അനുവദിച്ചിരിക്കുന്നത്. ചടങ്ങില്‍ ഡിസ്ട്രിക്ട് പ്ലാനിംഗ് കമ്മിറ്റിയംഗം റീത്താ പോള്‍, നഗരസഭാ കൗണ്‍സിലര്‍മാരായ ബെന്നി മൂഞ്ഞേലി, സന്ദീപ് ശങ്കര്‍, മുന്‍ വെസ് ചെയര്‍മാന്‍ അഡ്വ. കെ.എസ്. ഷാജി, റെസിഡന്‍റ്സ് അസോ. ഭാരവാഹികളായ ടി.കെ. രാജീവ്, ബെന്നി പളളിപ്പാട്ട്, കെ.ഡി. ജയന്‍, നന്ദകുമാര്‍, പൗലോസ് പള്ളിപ്പാടന്‍, വി.ടി ഉണ്ണിക്കൃഷ്ണന്‍ , ഫ്രാന്‍സിസ് മുട്ടത്തില്‍, സിജു പുളിയ്ക്കല്‍, ഇ.ടി. ജേക്കബ്, അഡ്വ. ഡൊമിനിക്, ഡാര്‍വിന്‍ ജോസഫ് എന്നിവര്‍ സന്നിഹിതരായിരുന്നു.

കൂവപ്പടിയിലെ എസ്‌സി കമ്യൂണിറ്റി ഹാൾ : ഉദ്ഘാടനം കഴിഞ്ഞ് പത്തുമാസമായിട്ടും തുറന്നില്ല

പെരുമ്പാവൂർ: കൂവപ്പടി പഞ്ചായത്തിൻ എസ്‌സി കമ്യൂണിറ്റി ഹാൾ ഉദ്ഘാടനം കഴിഞ്ഞിട്ട് 10 മാസങ്ങൾ പിന്നിട്ടു, നാളിതുവരെ എസ് സി വിഭാഗത്തിൻ ഉപയോഗിക്കാൻ ഹാൾ അനുവദിക്കുന്നില്ല. കൂവപ്പടി പഞ്ചായത്തിലെ 12-ാം വാർഡിൽ സ്ഥിതി ചെയ്യുന്ന എസ് സി കമ്യൂണിറ്റി ഹാൾ 2021 നിർമാണം ആരംഭിച്ച് വർഷങ്ങൾ എടുത്ത് 2024-ൽ ഉദ്ഘാടനം നടത്തി. ജില്ലാ പഞ്ചായത്ത് വിഹിതം ഉപയോഗിച്ച് 25 ലക്ഷത്തോളം രൂപ ചെലവഴിച്ചാണ് നിർമാണം പൂർത്തിയാക്കിയത്. വിവാദമായ എസ് സി ഫ്ലാറ്റിന് അടുത്ത് തന്നെയാണിത്. എസ് സി വിഭാഗത്തിന് വിവിധ ആവശ്യങ്ങൾ നടത്താൻ വേണ്ടി ഹാൾ കിട്ടാതിരിക്കുബോൾ പണി പൂർത്തിയായി ഉദ്ഘാടനമാമാങ്കം നടത്തിയ ഹാൾ എത്രയും പെട്ടെന്ന് തുറന്ന് കൊടുത്തില്ലെങ്കിൽ പ്രക്ഷോഭ പരിപാടികളുമായി മുന്നോട്ട് പോകുമെന്ന് എൽഡിഎഫ് പാർലമെൻറി പാർട്ടി സെക്രട്ടറി എം.വി. സാജു , മെമ്പർമാരായ പ്രിൻസ് ആന്‍റണി, സാംസൺ ജേക്കബ്, ബിന്ദു കൃഷ്ണകുമാർ തുടങ്ങിയവർ വ്യക്തമാക്കി.

മലയാറ്റൂർ കുരിശുമുടി പള്ളിയിലെ മോഷണം: രണ്ടുപേർ പിടിയിൽ

കാലടി: മലയാറ്റൂർ കുരിശുമുടി പള്ളിയിലെ ഭണ്ഡാരത്തിൽനിന്നു പണം മോഷ്ടിച്ച കേസിൽ രണ്ടുപേർ അറസ്റ്റിൽ. ഒക്കൽ ആന്‍റോപുരം നെല്ലാടൻ വീട്ടിൽ പ്രവീൺ (21), കുവപ്പടി കൂടാലപ്പാട് വാടകയ്ക്ക് താമസിക്കുന്ന ഇടുക്കി വാഴത്തോപ്പ് തടിയൻ പാടം തേവറാണിയിൽ വീട്ടിൽ ജിതേഷ് (20) എന്നിവരെയാണ് കാലടി പോലീസ് അറസ്റ്റ് ചെയ്തത്. കഴിഞ്ഞ അഞ്ചിന് മലയാറ്റൂർ സെന്‍റ് തോമസ് പള്ളിയുടെ കുരിശുമുടി പള്ളി ഭണ്ഡാരത്തിൽ നിന്നാണ് മോഷണം നടത്തിയത്. കനം കുറഞ്ഞ കോലിൽ ഡബിൾ സൈഡ് സ്റ്റിക്കർ ഒട്ടിച്ച് ഭണ്ഡാരത്തിലിട്ടാണ് മോഷണം നടത്തിയത് . 15,000 രൂപയോളം മോഷ്ടിച്ചിരുന്നു. ഇവർക്കെതിരെ വേറെയും കേസുകൾ നിലവിലുണ്ട്. അന്വേഷണസംഘത്തിൽ ഇൻസ്പെക്ടർ അനിൽകുമാർ ടി. മേപ്പിള്ളി, എസ്ഐമാരായ ജോസി എം. ജോൺസൻ, അഭിജിത്ത്, മുഹമ്മദ് ആഷിക്ക്, എം.ടി. ജോഷി, എഎസ്ഐ നൈജോ സെബാസ്റ്റ്യൻ എന്നിവരാണ് ഉണ്ടായിരുന്നത്.

മുതിര്‍ന്നവര്‍ക്കും പ്രതിരോധ വാക്‌സിനുകള്‍ അനിവാര്യം: ഐഎംഎ

കൊച്ചി: പകര്‍ച്ചവ്യാധികള്‍ വര്‍ധിച്ചുവരുന്ന സാഹചര്യത്തില്‍ കുട്ടികള്‍ക്ക് പുറമേ മുതിര്‍ന്നവരും പ്രതിരോധകുത്തിവയ്പ്പുകള്‍ എടുക്കേണ്ടത് അനിവാര്യമെന്ന് ഐഎംഎ കൊച്ചി പ്രസിഡന്‍റ് ഡോ. ജേക്കബ് ഏബ്രഹാം പത്രസമ്മേളനത്തിൽ പറഞ്ഞു. പകര്‍ച്ചവ്യാധികളുടെ വ്യാപനം ആരോഗ്യമേഖലയ്ക്ക് വലിയ വെല്ലുവിളിയാണ് സൃഷ്ടിക്കുന്നത്. പ്രതിരോധ കുത്തിവയ്പുകളിലൂടെ ഇത് പരിധിവരെ തടഞ്ഞുനിര്‍ത്താന്‍ സാധിക്കും. പ്രതിരോധ കുത്തിവയ്പുകള്‍ നല്‍കുന്നത് സര്‍ക്കാരിന്‍റെ പദ്ധതിയില്‍ വരണം. എങ്കില്‍ മാത്രമെ വാക്‌സിനുകളുടെ വില കുറയുകയുള്ളൂ. സര്‍ക്കാര്‍ ഇക്കാര്യത്തില്‍ ഇടപെടണം. ഇന്‍ഫ്ളുവന്‍സ, മഞ്ഞപ്പിത്തം, ചിക്കന്‍പോക്‌സ്, ഷിംഗിള്‍സ്, ബാക്ടീരിയല്‍ ന്യൂമോണിയ എന്നിവയ്‌ക്കെതിരെയുള്ള വാക്‌സിനുകള്‍ ഫലപ്രദമാണ്. ഹെപ്പറ്റൈറ്റിസ് എ ഈ വര്‍ഷം ഇതുവരെ കേരളത്തില്‍ 7,326 പേര്‍ക്ക് ബാധിച്ചുവെന്നാണ് വ്യക്തമാകുന്നത്. ഇതില്‍ 49 പേര്‍ മരിച്ചതായിട്ടാണ് ഒദ്യോഗിക കണക്കുകള്‍. എലിപ്പനി, ഡെങ്കിപ്പനി എന്നിവയ്‌ക്കെതിരെ നിലവില്‍ വാക്‌സിനുകളില്ല. എലിപ്പനിക്കെതിരെ പ്രതിരോധ ഗുളിക ഉണ്ട്. ഡെങ്കിപ്പനിക്കെതിരെയുള്ള വാക്‌സിൻ ട്രയല്‍ ഘട്ടത്തിലാണെന്നാണ് അറിയാന്‍ കഞ്ഞിട്ടുള്ളതെന്നും ഭാരവാഹികള്‍ വ്യക്തമാക്കി. ഐഎംഎ സെക്രട്ടറി ഡോ. സച്ചിന്‍ സുരേഷ്, ട്രഷറര്‍ ഡോ. ബെന്‍സീര്‍ ഹുസൈന്‍, സയന്‍റിഫിക് ചെയര്‍മാന്‍ ഡോ. രാജീവ് ജയദേവന്‍ തുടങ്ങിയവർ പത്രസമ്മേളനത്തില്‍ പങ്കെടുത്തു.

സാനു സ്മൃതിയിൽ ചാവറ : ഗുരുക്കന്മാരിൽ സാനു മാഷ് അതുല്യൻ: ജസ്റ്റീസ് ദേവൻ രാമചന്ദ്രൻ

കൊച്ചി : സാംസ്‌കാരിക കൊച്ചിയിൽ സാനുമാഷിന് ഏറെ പ്രിയപ്പെട്ട ചാവറ കൾച്ചറൽ സെന്‍ററിൽ അദ്ദേഹത്തിന്‍റെ ദീപ്തജീവിതം അനുസ്മരിച്ചു സാനുസ്മൃതി. സാനു മാഷിനൊപ്പം സർഗസഞ്ചാരം നടത്തിയവർ, അടുത്തറിഞ്ഞവർ, അകലെ നിന്ന് ആദരവോടെ ആ ജീവിതം വായിച്ചവർ... ഗുരുസ്ഥാനീയനായ പ്രഫ. എം. കെ. സാനുവിനെക്കുറിച്ച് വാചാലമായി ചാവറയുടെ സന്ധ്യ. പലവട്ടം സാനുമാഷ് പ്രസംഗിച്ച വേദിയിൽ, എല്ലാവരും അദ്ദേഹത്തെക്കുറിച്ചു മാത്രം പ്രസംഗിച്ച ദിനം...! ചാവറ കൾച്ചറൽ സെന്‍റർ വിവിധ സംഘടനകളുടെ സഹകരണത്തോടെയാണ് ഇന്നലെ പ്രഫ. എം. കെ. സാനു അനുശോചന സമ്മേളനം നടത്തിയത്. ജസ്റ്റീസ് ദേവൻ രാമചന്ദ്രൻ മുഖ്യ പ്രഭാഷണം നടത്തി. ഗുരുനാഥന്മാരിൽ അതുല്യ പ്രഭാവമുള്ള വ്യക്തിത്വമാണ് സാനുമാഷിന്‍റേതെന്നു അദ്ദേഹം അനുസ്മരിച്ചു. എല്ലാവരെയും പ്രചോദിപ്പിച്ച ജീവിതമായിരുന്നു സാനു മാഷിന്‍റേതെന്നും ജസ്റ്റീസ്‌ അഭിപ്രായപ്പെട്ടു. സിഎംഐ സഭ സാമൂഹ്യ സേവന വിഭാഗം ജനറൽ കൗൺസിലർ ഫാ. ബിജു വടക്കേൽ, ചാവറ ഡയറക്ടർ ഫാ. അനിൽ ഫിലിപ്പ്, ഡൽഹിയിലെ കേരളത്തിന്‍റെ പ്രത്യേക പ്രതിനിധി പ്രഫ. കെ. വി.തോമസ്, ജസ്റ്റീസ്‌ പി.കെ. ഷംസുദ്ദീൻ, കോർപറേഷൻ കൗൺസിലർ പത്മജ എസ്. മേനോൻ, പ്രഫ. എം. തോമസ് മാത്യു, ഉപഭോക്തൃ തർക്ക പരിഹാര കമ്മീഷൻ ജില്ലാ പ്രസിഡന്‍റ് ഡി. ബി. ബിനു, എറണാകുളം കരയോഗം ജനറൽ സെക്രട്ടറി പി. രാമചന്ദ്രൻ, ജസ്റ്റിസ് പി.എസ്. ഗോപിനാഥൻ, ഡൊമിനിക് പ്രസന്‍റേഷൻ, കെസിബിസി മീഡിയ കമ്മീഷൻ സെക്രട്ടറി ഫാ. സെബാസ്റ്റ്യൻ മിൽട്ടൺ, മുൻ മേയർ സൗമിനി ജയ്ൻ, കെ. എൽ. മോഹനവർമ, എറണാകുളം പ്രസ് ക്ലബ്‌ പ്രസിഡന്‍റ് ആർ. ഗോപകുമാർ,പി.ജെ. ചെറിയാൻ, അബ്ദുൽ കലാം, തനൂജ ഭട്ടതിരിപ്പാട്, ഗീത സദനം, അശോകൻ അർജുനൻ, ജോൺസൺ സി. ഏപബ്രഹാം, സി.ജി രാജഗോപാൽ, എം. എസ്. രഞ്ജിത് തുടങ്ങിയവർ പ്രസംഗിച്ചു.

വാഹനമിടിച്ച് മരണം: ഡ്രൈവർ പിടിയിൽ

ആലുവ: കാൽനടയാത്രക്കാരനെ ഇടിച്ചു വീഴ്ത്തിയ ശേഷം കടന്നു കളഞ്ഞ പിക്ക് അപ് ലോറിയും ഡ്രൈവറും ആലുവ പോലീസിന്‍റെ കസ്റ്റഡിയിൽ. സിസിടിവി ദൃശ്യങ്ങളുടെ സഹായത്താലാണ് പത്തനംതിട്ട സ്വദേശി എബ്രഹാം പിടിയിലായത്. പാലസ് റോഡിലൂടെ പ്രഭാതസവാരി നടത്തിയ തളിയത്ത് ബോബി ജോർജിനെയാണ് ( 74) കഴിഞ്ഞ ദിവസം വാഹനം ഇടിച്ചിട്ടത്. ഏറെ നേരം റോഡിൽ കിടന്ന ശേഷമാണ് ആശുപത്രിയിൽ എത്തിക്കാനായത്. വൈകിട്ടോടെ മരണമടയുകയായിരുന്നു. ഡ്രൈവറെ ആലുവ കോടതിയിൽ ഹാജരാക്കും.

സഹൃദയയിൽ പരിശീലനം പൂർത്തിയായവർക്ക് സര്‍ട്ടിഫിക്കറ്റുകള്‍ വിതരണം ചെയ്തു

കൊച്ചി: എറണാകുളം-അങ്കമാലി അതിരൂപത സാമൂഹ്യപ്രവര്‍ത്തന വിഭാഗമായ സഹൃദയ, നബാര്‍ഡിന്‍റെ സഹകരണത്തോടെ തൊഴില്‍ രഹിതരായ യുവജനങ്ങള്‍ക്കായി സംഘടിപ്പിച്ച മുപ്പതു ദിവസത്തെ മൈക്രോ ഫിനാന്‍സ് ആന്‍ഡ് റിലേഷന്‍ഷിപ് മാനേജ്‌മെന്‍റ് പരിശീലനം പൂര്‍ത്തിയാക്കിയവര്‍ക്കുള്ള സര്‍ട്ടിഫിക്കറ്റ് വിതരണം നടത്തി. പൊന്നുരുന്നി സഹൃദയ ഓഡിറ്റോറിയത്തില്‍ നബാര്‍ഡ് എറണാകുളം ജില്ലാ ഡവലപ്‌മെന്‍റ് മാനേജര്‍ അജീഷ് ബാലു ഉദ്ഘാടനം ചെയ്തു. ഡയറക്ടര്‍ ഫാ. ജോസ് കൊളുത്തുവെള്ളില്‍ അധ്യക്ഷത വഹിച്ചു. പരിശീലനം പൂര്‍ത്തിയാക്കിയ 30 പേര്‍ക്ക് കൗണ്‍സിലര്‍ സക്കീര്‍ തമ്മനം സര്‍ട്ടിഫിക്കറ്റുകള്‍ വിതരണം ചെയ്തു. സഹൃദയ അസിസ്റ്റന്‍റ് ഡയറക്ടര്‍ ഫാ. സിബിന്‍ മനയംപിള്ളി, പ്രോഗ്രാം ഓഫീസര്‍ കെ.ഒ. മാത്യുസ്, ജെഎല്‍ജി ഡവലപ്‌മെന്‍റ് ഓഫീസര്‍ സി.ജെ. പ്രവീണ്‍, പ്രോഗ്രാം കോ ഓര്‍ഡിനേറ്റര്‍ സെബിന്‍ ജോസഫ്, റാണി റോയ് എന്നിവര്‍ പ്രസംഗിച്ചു.

പൈപ്പ് പൊട്ടി : കളമശേരി, ഏലൂർ ഭാഗങ്ങളിൽ കുടിവെള്ളം മുടങ്ങും

കളമശേരി: ആലുവയിൽനിന്ന് കൊച്ചിയിലേക്ക് ശുദ്ധജല വിതരണം നടത്തുന്ന പൈപ്പിൽ അറ്റകുറ്റപ്പണികൾ നടന്നുവരുന്നതിനാൽ കളമശേരി, ഏലൂർ ഭാഗങ്ങളിൽ ഇന്നും കുടിവെള്ളം മുടങ്ങുമെന്ന് വാട്ടർ അഥോറിട്ടി അറിയിച്ചു. ഇന്നലെ മേഖലയിൽ കുടിവെള്ള വിതരണം നിർത്തിവച്ച് അറ്റകുറ്റപ്പണി നടത്തിയിരുന്നു. ഇതിനിടെ കളമശേരി മുതലക്കുഴിക്കു സമീപം ഇന്നലെ പൈപ്പിൽ ചോർച്ച കണ്ടെത്തിയതോടെ ഇന്നും അറ്റകുറ്റപ്പണി തുടരുകയായിരുന്നു.

മരണമടഞ്ഞവർക്ക് പെൻഷൻ : ചൂർണിക്കര പഞ്ചായത്ത് തുക തിരിച്ചുപിടിച്ചു

ആലുവ: മരണമടഞ്ഞവർക്ക് മാസങ്ങളോളം നൽകിയ സാമൂഹ്യ സുരക്ഷാ പെൻഷൻ തുക പഞ്ചായത്തുകൾ ബന്ധുക്കളിൽനിന്നു തിരിച്ചുപിടിച്ചു തുടങ്ങി. ചൂർണിക്കര പഞ്ചായത്തിൽ 11 പേർക്കായി അഞ്ച് മാസം വരെ 1600 രൂപ വീതം അനുവദിച്ചത് തിരിച്ചുപിടിച്ചു. ചൂർണ്ണിക്കര സ്വദേശി കെ.ടി. രാഹുലിനു ലഭിച്ച വിവരാവകാശ രേഖയിലാണ് ചൂർണിക്കര പഞ്ചായത്ത് സെക്രട്ടറി ബിനി ഐപ്പ് ഈ വിവരം അറിയിച്ചത്. വാർത്തകൾ വന്നതോടെ ജില്ലാ കളക്ടർ എല്ലാ പഞ്ചായത്തുകൾക്കും അധിക തുക തിരിച്ചുപിടിക്കാൻ നിർദ്ദേശം നൽകിയിരുന്നു. ഡയറക്റ്റ് ബെനഫിറ്റ് ട്രാൻസ്ഫർ (ഡിബിടി) എന്ന സെല്ലിലേക്കാണ് തുക മാറ്റുന്നത്. കേരള ബാങ്കിന് കീഴിലുള്ള സോഷ്യൽ സെക്യൂരിറ്റി ഫണ്ട് എന്ന അക്കൗണ്ടിലേക്ക് തുക നിക്ഷേപിക്കും. തദ്ദേശ സ്വയംഭരണ സ്ഥാപനങ്ങളുടെ ഓഡിറ്റിംഗ് വിഭാഗമാണ് 2023- 24 സാമ്പത്തിക വർഷത്തിൽ ആലുവ താലൂക്കിലെ അഞ്ച് പഞ്ചായത്തുകളിൽ സാമ്പത്തിക ക്രമക്കേട് കണ്ടെത്തിയത്. ചൂർണിക്കര, കീഴ്മാട്, ശ്രീമൂലനഗരം, പാറക്കടവ്, ചെങ്ങമനാട് ഗ്രാമപഞ്ചായത്തുകളിലാണ് മരിച്ചവർക്ക് മാസങ്ങളോളം പെൻഷൻ നൽകിയത്. മറ്റ് പഞ്ചായത്തുകളും തുക ഉടൻ കൈമാറും. ഓഡിറ്റ് റിപ്പോർട്ട് വിവരങ്ങൾ 'ദീപിക' യിൽ വന്ന അടിസ്ഥാനത്തിൽ മരണശേഷവും പെൻഷൻ തുടരുന്നുണ്ടോ എന്ന വിവരാവകാശ പ്രവർത്തകരുടെ ചോദ്യത്തിന് അറിയില്ലായെന്ന മറുപടിയാണ് പല പഞ്ചായത്തുകളും നൽകിയിരുന്നത്. എന്നാൽ ജില്ലാ കളക്ടർ നിർദേശം നൽകിയതോടെ തുക അവകാശികളിൽ നിന്ന് തിരിച്ചുപിടിക്കാനുള്ള നടപടികൾ പഞ്ചായത്തുകൾ ആരംഭിക്കുകയായിരുന്നു.

ജില്ലാ സബ് ജൂണിയര്‍ ബാസ്‌കറ്റ്‌ബോള്‍ ചാമ്പ്യന്‍ഷിപ്പ് സെന്‍റ് തെരേസാസും രാജഗിരിയും ചാമ്പ്യന്മാര്‍

കൊച്ചി: എറണാകുളം ജില്ലാ ബാസ്‌കറ്റ്‌ബോള്‍ അസോസിയേഷന്‍ കൂനമാവിലെ ചാവറ ദര്‍ശന്‍ സിഎംഐ പബ്ലിക് സ്‌കൂളില്‍ സംഘടിപ്പിച്ച എറണാകുളം ജില്ലാ സബ് ജൂണിയര്‍ ബാസ്‌കറ്റ്‌ബോള്‍ ചാമ്പ്യന്‍ഷിപ്പില്‍ ആണ്‍കുട്ടികളുടെ വിഭാഗത്തില്‍ കളമശേരി രാജഗിരി സ്‌കൂളും, പെണ്‍കുട്ടികളുടെ വിഭാഗത്തില്‍ എറണാകുളം സെന്‍റ് തെരേസാസ് സ്‌കൂളും ചാമ്പ്യന്മാരായി. തേവര എസ്എച്ചിനെ 49-12ന് പരാജയപ്പെടുത്തിയാണ് രാജഗിരി ജേതാക്കളായത്. ആതിഥേയരായ കൂനമ്മാവ് ചാവറ ദര്‍ശന്‍ സിഎംഐ പബ്ലിക് സ്‌കൂളിനെ 19-2നാണ് ഫൈനലില്‍ സെന്‍റ് തെരേസാസ് പരാജയപ്പെടുത്തിയത്. ആണ്‍കുട്ടികളുടെ വിഭാഗത്തില്‍ മികച്ച കളിക്കാരനുള്ള ട്രോഫി രാജഗിരിയിലെ ഏഥാന്‍ ജോസഫിന് ജൂണിയര്‍ ഇന്‍റര്‍നാഷണല്‍ ബാസ്‌കറ്റ്‌ബോള്‍ താരം ഷിനുമോന്‍ അഗസ്റ്റിന്‍ സമ്മാനിച്ചു. പെണ്‍കുട്ടികളുടെ വിഭാഗത്തില്‍ എറണാകുളം സെന്‍റ് തെരേസസിലെ ദിയ രാധാകൃഷ്ണന്‍ മികച്ച താരമായി. അഡ്വ. കെ.എ. സലിം ട്രോഫി സമ്മാനിച്ചു. സമാപന ചടങ്ങില്‍ വോളിബോള്‍ താരം ടോം ജോസഫ് ട്രോഫികളും മെഡലും സമ്മാനിച്ചു. ഇഡിബിഎ. പ്രസിഡന്‍റ് ശിഹാബ് നീറുങ്കല്‍ അധ്യക്ഷത വഹിച്ചു എറണാകുളം ജില്ലാ ബാസകറ്റ് ബോള്‍ അസോസിയേഷന്‍ സെക്രട്ടറി ജെയ്‌സണ്‍ പീറ്റര്‍, ചാവറ ദര്‍ശന്‍ സിഎംഐ പബ്ലിക് സ്‌കൂളിന്‍റെ മാനേജരും പ്രിന്‍സിപ്പലുമായ ഫാ. മാര്‍ട്ടിന്‍ മുണ്ടാടന്‍, വൈസ് പ്രിന്‍സിപ്പല്‍ ഫാ. മെജിറ്റ് വട്ടോലി, അഡ്മിനിസ്‌ട്രേറ്റര്‍ ഫാ. ജോബി കോഴിക്കോട്ട്, ഇഡിബിഎ വൈസ് പ്രസിഡന്‍റ് പി.ബി അനീഷ്, ഇഡിബിഎ ടെക്ക്‌നിക്കല്‍ കമ്മറ്റി ചെയര്‍മാന്‍ ജീവന്‍ രാജ് എന്നിവര്‍ പ്രസംഗിച്ചു. 28 മുതല്‍ ആലപ്പുഴ ജ്യോതിനികേതന്‍ സ്‌കൂളില്‍ നടക്കുന്ന 50ാമത് കേരള സംസ്ഥാന സബ് ജൂണിയര്‍ ബാസ്‌കറ്റ്‌ബോള്‍ ചാമ്പ്യന്‍ഷിപ്പിനു മുന്നോടിയായി നടത്തിയ ചാമ്പ്യന്‍ഷിപ്പില്‍ ആണ്‍കുട്ടികളുടെയും പെണ്‍കുട്ടികളുടെയും 13 ടീമുകള്‍ പങ്കെടുത്തു.

എംഡിഎംഎയുമായി യുവാവ് അറസ്റ്റില്‍

കൊച്ചി: വില്പനയ്ക്കായി എത്തിച്ച കാൽകിലോ എംഡിഎംഎയുമായി യുവാവ് അറസ്റ്റില്‍. എറണാകുളം ഐജിഎം പബ്ലിക് സ്കൂളിനു സമീപം കണ്ണാമ്പള്ളി ആല്‍ഫ്രിന്‍ കെ. സണ്ണി(27)യെയാണ് നാര്‍ക്കോട്ടിക് സെല്‍ എസി കെ.ബി. അബ്ദുൾ സലാമിന്‍റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. ഇയാളുടെ പക്കൽനിന്ന് 277. 21 ഗ്രാം എംഡിഎംഎ പിടിച്ചെടുത്തു. അല്‍ഫ്രിനും സുഹൃത്ത് എളമക്കര സ്വദേശി സച്ചിനും ചേര്‍ന്ന് ബംഗളൂരുവില്‍ നിന്ന് വന്‍ തോതില്‍ എംഡിഎംഎ കൊച്ചിയിലേക്ക് എത്തിക്കുന്നുവെന്ന രഹസ്യ വിവരത്തിന്‍റെ അടിസ്ഥാനത്തില്‍ ഇയാള്‍ നാളുകളായി നാര്‍ക്കോട്ടിക് സെല്ലിന്‍റെ നിരീക്ഷണത്തിലായിരുന്നു. ചൊവ്വാഴ്ച രാത്രി ഇയാളുടെ വീടിനു സമീപത്തുനിന്നാണ് ആല്‍ഫ്രിനെ പിടികൂടിയത്. അവിടെ പാര്‍ക്ക് ചെയ്തിരുന്ന ഇയാളുടെ സഹോദരിയുടെ ഉടമസ്ഥതയിലുള്ള വാഹനത്തിന്‍റെ പുറകിലെ ഡോറിനുള്ളില്‍ ഒളിപ്പിച്ച നിലയിലാണ് എംഡിഎംഎ കണ്ടെത്തിയത്. കൂട്ടാളി സച്ചിനെ പിടികൂടുന്നതിനായി പോലീസ് അന്വേഷണം ആരംഭിച്ചു. പ്രതിയെ പാലാരിവട്ടം പോലീസിനു കൈമാറി.

സ്‌കൂളില്‍ ഒരു റോബോട്ടിനെ ഉണ്ടാക്കുന്നോ, കിറ്റ് റെഡിയാണ്

കൊച്ചി: ഈ വര്‍ഷം പത്താം ക്ലാസ് വിദ്യാര്‍ഥികള്‍ക്കു റോബോട്ടിക് മേഖലയില്‍ പഠനവും പ്രായോഗിക പരിശീലനവും നല്‍കുന്നതിന്‍റെ ഭാഗമായി ജില്ലയിലെ 280 സ്‌കൂളുകളില്‍ 2794 റോബോട്ടിക് കിറ്റുകള്‍ വിതരണം ചെയ്തു. കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എഡ്യൂക്കേഷന്‍റെ (കൈറ്റ്) നേതൃത്വത്തിലാണ് റോബോട്ടിക് കിറ്റുകള്‍ വിതരണം ചെയ്തത്. ഇതില്‍ സര്‍ക്കാര്‍, എയ്ഡഡ് സ്‌കൂളുകളാണ് ഉള്‍പ്പെടുന്നത്. പത്താം ക്ലാസിലെ പുതിയ ഐസിടി പാഠപുസ്തകത്തിലെ റോബോട്ടുകളുടെ ലോകം എന്ന ആറാം അധ്യായത്തിലാണ് സര്‍ക്യൂട്ട് നിര്‍മാണം, സെന്‍സറുകളുടെയും ആക്ചുവേറ്ററുകളുടേയും ഉപയോഗം, കംപ്യൂട്ടര്‍ പ്രോഗ്രാമിംഗ് വഴി ഇലക്ട്രോണിക് ഉപകരണങ്ങളെ നിയന്ത്രിക്കുക തുടങ്ങിയ പ്രവര്‍ത്തനങ്ങളിലൂടെ റോബോട്ടിക്‌സിന്‍റെ പുതിയ ആശയങ്ങളും ആശയമാതൃകകളും കണ്ടെത്താന്‍ കുട്ടികള്‍ക്ക് അവസരം ലഭിക്കുന്നത്. വൈകാതെ കൂടുതല്‍ സ്‌കൂളുകളിലേക്ക് പദ്ധതിയെത്തും. പത്താം ക്ലാസില്‍ ഐസിടി പാഠപുസ്തകം പഠിപ്പിക്കേണ്ട ജില്ലയിലെ 795 അധ്യാപകര്‍ക്ക് റോബോട്ടിക്‌സിനായുള്ള പ്രത്യേക പരിശീലനം കൈറ്റ് നാളെയോടെ പൂര്‍ത്തിയാക്കും. നിലവില്‍ നല്‍കിയ റോബോട്ടിക് കിറ്റുകള്‍ക്ക് പുറമെ ചലിക്കുന്ന റോബോട്ടുകള്‍ ഉള്‍പ്പെടെ നിര്‍മിക്കാന്‍ കഴിയുന്ന അഡ്വാന്‍സ്ഡ് കിറ്റുകള്‍ ഈ വര്‍ഷം തന്നെ ലിറ്റില്‍ കൈറ്റ്‌സ് യൂണിറ്റുകള്‍ക്ക് ലഭ്യമാക്കും. ഈ വര്‍ഷം സ്‌കൂളുകളില്‍ പ്രത്യേക റോബോഫെസ്റ്റുകളും കൈറ്റ് സംഘടിപ്പിക്കും. ആദ്യം സാനിറ്റൈസര്‍ ഡിസ്‌പെന്‍സര്‍ സ്‌കൂളുകള്‍ക്കു നല്‍കിയ റോബട്ടിക് കിറ്റിലെ ആര്‍ഡിനോ, ബ്രഡ്‌ബോര്‍ഡ്, ഐആര്‍ സെന്‍സര്‍, സെര്‍വോ മോട്ടര്‍, ജംപര്‍ വയര്‍ തുടങ്ങിയവ ഉപയോഗിച്ച്, കൈകളുടെ സാന്നിധ്യം തിരിച്ചറിഞ്ഞു പ്രവര്‍ത്തിക്കുന്ന ഓട്ടമാറ്റിക് സാനിറ്റൈസര്‍ ഡിസ്‌പെന്‍സര്‍ തയാറാക്കലാണ് ആദ്യ പ്രവര്‍ത്തനം. എഐ ഉപയോഗിച്ചുള്ള ഹോം ഓട്ടമേഷന്‍ സംവിധാനത്തിലൂടെ മുഖം തിരിച്ചറിഞ്ഞു സ്വയം തുറക്കുന്ന സ്മാര്‍ട്ട് വാതിലുകള്‍ തയാറാക്കലാണ് അടുത്ത പ്രവര്‍ത്തനം.

ദുർഘട വീഥികൾ; ദുരിത യാത്ര

കൊച്ചി:കുഴികളും വെള്ളക്കെട്ടും ഗതാഗതക്കുരുക്കും-ജനങ്ങളുടെ യാത്രാദുരിതം ഇരട്ടിയാക്കി ജില്ലയിലെ റോഡുകള്‍. മഴ കനത്തതോടെ എല്ലാ മേഖലകളിലെയും റോഡുകള്‍ സഞ്ചാരയോഗ്യമല്ലാത്ത അവസ്ഥയിലെത്തി. യാത്രികരുടെ നടുവൊടിക്കുന്ന വലിയ കുഴികളുള്‍പ്പെടെ പാടെ തകര്‍ന്ന നിലയിലാണ് എല്ലാ റോഡുകളും. ഹൈക്കോടതിയുടെ രൂക്ഷ വിമര്‍ശനമുണ്ടായിട്ടും കൊച്ചി നഗരത്തിലേതടക്കം പ്രധാന റോഡുകളും ഇടറോഡുകളും കുഴികളാല്‍ നിറഞ്ഞിരിക്കുകയാണ്. കൂടുതലും ശോച്യാവസ്ഥയിലായി ഹൈക്കോടതി പരാമര്‍ശിച്ച കലൂര്‍-കടവന്ത്ര റോഡ്, സ്റ്റേഡിയം ലിങ്ക് റോഡ്, തമ്മനം-പുല്ലേപ്പടി റോഡ് എന്നിവിടങ്ങളിലൂടെയുള്ള യാത്ര ഏറെ ദുസ്സഹമാണ്. ഇതു കൂടാതെ കടവന്ത്ര-ചെലവന്നൂര്‍ റോഡ്, അരൂര്‍-ഫോര്‍ട്ടുകൊച്ചി റോഡ്, കലൂര്‍-കടവന്ത്ര റോഡ് എന്നിവയെല്ലാം തകര്‍ന്ന നിലയിലാണ്. റോഡുകളുടെ മോശം അവസ്ഥ ഗതാഗതക്കുരുക്കിനും കാരണമാകുന്നു. ശക്തമായ മഴ പെയ്താല്‍ വെള്ളക്കെട്ടും രൂക്ഷമാണ്. ഇരുചക്രവാഹന യാത്രികര്‍ക്ക് ഈ കുഴികളില്‍ വീണ് പരിക്കേല്‍ക്കുന്നതും പതിവാണ്. എറണാകുളം അംബേദ്കര്‍ സ്റ്റേഡിയത്തിന് മുന്‍വശത്തെ വലിയ കുഴികള്‍ മൂലം ഇവിടെ മഴയത്തും തിരക്കേറിയ സമയങ്ങളിലും വാഹനങ്ങള്‍ക്ക് സുഗമമായി കടന്നു പോകാന്‍ പറ്റാത്ത അവസ്ഥയാണ്. കെഎസ്ആര്‍ടിസി ഭാഗത്ത് നിന്നും ചിറ്റൂര്‍ റോഡ്, പുല്ലേപ്പടി ഭാഗങ്ങളില്‍ നിന്നും വരുന്ന വാഹനങ്ങള്‍ ഈ ജംഗ്ഷനിലെ കുഴികളിലൂടെ കടന്നു പോകാന്‍ ഏറെ സമയമെടുക്കുന്നു. ഈ ഭാഗത്ത് രാത്രി വെളിച്ചമില്ലാത്തതിനാല്‍ ഇരുചക്രവാഹന യാത്രികര്‍ കുഴികളില്‍ വീഴുന്നതും പതിവാണ്. ബാനര്‍ജി റോഡിലെ ഏതാനും ഭാഗങ്ങള്‍, ഗോശ്രീ ഒന്നാം പാലം ആരംഭിക്കുന്ന ഭാഗം, എറണാകുളം കെഎസ്ആര്‍ടിസി സ്റ്റാൻഡിന് മുന്‍വശം, പാലാരിവട്ടം പുതിയറോഡ് ജംഗ്ഷന്‍, ഗാന്ധിനഗര്‍, കുണ്ടന്നൂര്‍ ജംഗ്ഷന്‍, തേവര-കുണ്ടന്നൂര്‍ പാലം എന്നിവിടങ്ങളിലെല്ലാം സ്ഥിതി വ്യത്യസ്തമല്ല. ഗോശ്രീ സമാന്തര പാലം ഈമാസം 26ന് പൂര്‍ത്തീകരിക്കുമെന്നാണ് അധികൃതര്‍ നല്‍കിയിരിക്കുന്ന ഉറപ്പ്. പാലത്തിലെ പണികള്‍ ദ്രുതഗതിയില്‍ നടക്കുന്നുണ്ട്. എന്നാല്‍ ഇടയ്ക്കിടെയുള്ള മഴയാണ് ചെറിയ തടസം.അറ്റകുറ്റപ്പണികള്‍ പൂര്‍ത്തിയാകുന്നതു വരെ രണ്ടാംപാലത്തിലെ ബ്ലോക്കും യാത്രാ ദുരിതവും തുടരും. ഓണക്കാലമായാല്‍ തിരക്ക് പതിന്മടങ്ങാകും. നഗരത്തിനു പുറത്തുള്ള പ്രദേശങ്ങളിലെയും റോഡുകളുടെ അവസ്ഥ പരിതാപകരമാണ്. തൃപ്പൂണിത്തുറയിൽ ചതിക്കുഴികള്‍ പാടെ തകര്‍ന്ന് കുണ്ടും കുഴിയുമായി കിടക്കുകയാണ് തൃപ്പൂണിത്തുറയിലെ റോഡുകള്‍. റോഡിന് നടുവില്‍ തന്നെ വലിയ കുഴികളാണ്. വാഹനങ്ങള്‍ മാറ്റിക്കൊണ്ടുപോകാന്‍ പറ്റാത്ത വിധം റോഡിന്‍റെ ഇരുഭാഗങ്ങളും പൊട്ടിപ്പൊളിഞ്ഞ അവസ്ഥയിലും. റോഡുകളുടെ ശോച്യാവസ്ഥ മൂലം മഴയുള്ള സമയങ്ങളില്‍ ഇരുചക്ര വാഹനയാത്രക്കാര്‍ നിയന്ത്രണം തെറ്റി വീഴുന്നതും പതിവുകാഴ്ച. തൃപ്പൂണിത്തുറയില്‍ നിന്നും സീ പോര്‍ട്ട്-എയര്‍പോര്‍ട്ട് റോഡിലേക്ക് പോകുന്നതിനുള്ള പ്രധാന പാലമായ എസ്എന്‍ ജംഗ്ഷന്‍ മേല്‍പ്പാലത്തില്‍ നിറ‍യെ കുഴികളാണ്. സ്പാനുകളോടു ചേര്‍ന്നുള്ള ജോയിന്‍റുകളുടെ ഭാഗങ്ങളിലാണ് കുഴികള്‍ കൂടുതൽ. വാഹനങ്ങള്‍ നിരങ്ങി നീങ്ങുന്നതിനാല്‍ തിരക്കുള്ള സമയങ്ങളില്‍ പാലത്തില്‍ നീണ്ടനിരയാണ്. എസ്എന്‍ ജംഗ്ഷന്‍ മേല്‍പ്പാലത്തിന് അരികിലൂടെയുളള ആസാദ് റോഡും തകര്‍ന്ന നിലയിലാണ്. അപകടം പതിയിരിക്കുന്ന‍ ആലുവ ആലുവയിലെ റോഡുകൾ നിറയെ അപകടക്കുഴികളാണ്. ആലുവ-മൂന്നാര്‍ റോഡ്, കെഎസ്ആര്‍ടിസി, സ്വകാര്യ ബസ് റൂട്ടുകള്‍ എന്നിവിടങ്ങളിലെല്ലാം വലിയ കുഴികളാണ്. ഗതാഗതക്കുരുക്കിന് കാരണമാകുന്നു എന്ന് മാത്രമല്ല കാലവര്‍ഷം തുടരുന്നതോടെ ഇരുചക്രവാഹനങ്ങള്‍ അപകടത്തില്‍ പെടുന്നതും പതിവായി. കുഴികള്‍ ഒഴിവാക്കാന്‍ വാഹനങ്ങള്‍ വെട്ടിക്കുന്നതും കുപ്പിക്കഴുത്തു പോലെയുളള സീനത്ത് ജംഗ്ഷനില്‍ അപകട സാധ്യത വര്‍ധിപ്പിക്കുന്നു. ബിഎംബിസി നിലവാരത്തില്‍ ടാറിംഗ് നടത്തുന്നതിന് അഞ്ചു കോടി രൂപയുടെ ടെന്‍ഡര്‍ നടപടികള്‍ പൂര്‍ത്തിയായിട്ടും നിര്‍മാണം നടക്കുന്നില്ലെന്നാണ് പരാതി. കാലാവര്‍ഷം കഴിഞ്ഞാല്‍ ടാറിംഗ് നടത്താമെന്നാണ് ഉദ്യോഗസ്ഥരുടെ നിലപാട്. കെഎസ്ആര്‍ടിസി പെരുമ്പാവൂര്‍ റൂട്ടില്‍ തോട്ടുമുഖത്താണ് കൂടുതല്‍ ഗതാഗതക്കുരുക്ക്. ഇവിടെ പലയിടത്തും കോണ്‍ക്രീറ്റ്, ടൈല്‍ തുടങ്ങിയവ പരീക്ഷിച്ചെങ്കിലും ആഴ്ചകളുടെ ആയുസ് മാത്രമേ ഉണ്ടായുള്ളൂ. സീനത്ത് ജംഗ്ഷനിലെ കുഴികള്‍ മണ്ണിട്ട് നികത്താറുണ്ടെങ്കിലും ഇതേ അവസ്ഥയാണെന്ന് നാട്ടുകാര്‍ പറയുന്നു. മൂന്നാര്‍ റോഡിലൂടെ കണ്ടെയ്‌നര്‍ ലോറികളും നിരന്തരം പോകുന്നതാണ് റോഡ് അതിവേഗം തകരാന്‍ കാരണം. മഴവെള്ളം സുഗമമായി ഒഴുകിപ്പോകാന്‍ വേണ്ട സംവിധാനവും ഇല്ല. അടിയന്തരമായി നിലവാരമുള്ള രീതിയില്‍ ടാര്‍ ചെയ്യണമെന്ന് പ്രദേശവാസികള്‍ ആവശ്യപ്പെട്ടു. ശാപമോക്ഷമില്ലാതെ പെരുന്പാവൂർ പ്രദേശവാസികളുടെ വ്യാപക പ്രതിഷേധമുണ്ടായിട്ടും പെരുന്പാവൂരിലെ റോഡുകള്‍ക്ക് ശാപമോക്ഷമില്ല.പെരുമ്പാവൂരിന്‍റെ പരിസര പ്രദേശങ്ങളായ മുടക്കുഴ, ഒക്കല്‍, കൂവപ്പടി, വെങ്ങോള, അശമന്നൂര്‍ പഞ്ചായത്തുകളിലെ പല റോഡുകളും തകര്‍ന്ന് സഞ്ചാരം ദുഷ്‌കരമായ അവസ്ഥയിലാണ്. പൂപ്പാനി കോടനാട് റോഡില്‍ അയ്മുറി കവല പോസ്‌റ്റോഫീസിന് സമീപം ടാറിംഗ് കഴിഞ്ഞയിടത്ത് വീണ്ടും കുഴികള്‍ രൂപപ്പെട്ടു. ഓള്‍ഡ് വല്ലം റോഡ് തകര്‍ന്ന് തരിപ്പണമായി. പ്രദേശവാസികളും കോണ്‍ഗ്രസ് കമ്മിറ്റിയും ചേര്‍ന്ന് പ്രതിഷേധവുമായി രംഗത്ത് വന്നിട്ടുണ്ട്. മഴ ശക്തമായതും അറ്റകുറ്റപ്പണികള്‍ നടത്താത്തതുമാണ് റോഡുകളെ മോശമാക്കിയതെന്നാണ്ആക്ഷേപം. പൊതുമരാമത്ത് വകുപ്പിനെതിരെ വ്യാപകമായ പരാതികളാണ് ഉയര്‍ന്നിട്ടുള്ളത്. മന്ത്രിയുടെ പാഴ്‌വാക്കുകള്‍ മാത്രമാണ് കേള്‍ക്കാനുള്ളതെന്നും ഉദ്യോഗസ്ഥര്‍ക്ക് കെടുകാര്യസ്ഥതയെന്നും പരാതിയുണ്ട്. മഴ മാറിനില്‍ക്കുന്ന സാഹചര്യത്തില്‍ അടിയന്തര നടപടികള്‍ വേണമെന്നാണ് പൊതുജനാവശ്യം. പാരയായി കാനപണി കാന നിര്‍മാണത്തിന്‍റെ പേരില്‍ മാസങ്ങളായി പൊളിച്ചിട്ടിരിക്കുകയാണ് അങ്കമാലി കിഴക്കേപ്പള്ളി വാപ്പാലശേരി റോഡ്. എയര്‍പോര്‍ട്ടിലേക്ക് ഏറ്റവും കുറഞ്ഞ ദൂരത്തില്‍ എത്താവുന്ന ഒരു റോഡാണിത്. റോഡിന്‍റെ ഈ അവസ്ഥ കാരണം റൂട്ടിലോടുന്ന സ്‌കൂള്‍ ബസുകളുടെ കാര്യവും ഏറെ ബുദ്ധിമുട്ടിലാണ്. കാനനിര്‍മാണം റോഡിന്‍റെ നടുവിലൂടെയാണ്. ഭാരവാഹനങ്ങള്‍ ധാരാളമായി ഓടുന്ന വഴിയായതിനാല്‍ നിർമാണം എന്താകുമെന്നതും കണ്ടറിയണം. ഉദ്ഘാടനം നടന്ന് ഏഴാംദിനം തകർന്നു റോഡ് നിര്‍മാണത്തിലെ ക്രമക്കേട് മൂലം കാലങ്ങളായി പൊളിഞ്ഞു കിടക്കുകയാണ് കൂത്താട്ടുകുളം പാലാ റോഡിലെ രാമപുരം കവല മുതല്‍ മംഗലത്തുതാഴം വരെയുള്ള ഭാഗം. കാല്‍നട യാത്രയ്ക്ക് പോലും കഴിയാത്ത സ്ഥിതിയാണ്. റോഡ് നിര്‍മാണത്തിന്‍റെ പല ഘട്ടങ്ങളിലും പോരായ്മകള്‍ ചൂണ്ടിക്കാണിച്ച് കൂത്താട്ടുകുളത്തെ കോണ്‍ഗ്രസ് നേതൃത്വം രംഗത്തു വന്നിരുന്നു. പലപ്പോഴും നഗരസഭയിലെ യുഡിഎഫ് കൗണ്‍സിലര്‍മാര്‍ നിര്‍മാണ പ്രവര്‍ത്തനങ്ങള്‍ തടഞ്ഞു. നിര്‍മാണം പൂര്‍ത്തീകരിച്ച് ഉദ്ഘാടനം നടത്തി ഏഴാം ദിവസം തകര്‍ന്ന റോഡിലെ ക്രമക്കേടുകള്‍ കണ്ടുപിടിക്കണമെന്ന് ആവശ്യപ്പെട്ട് നഗരസഭ കൗണ്‍സിലര്‍ ബോബന്‍ വര്‍ഗീസ് വിജിലന്‍സില്‍ പരാതി നല്‍കിയിരുന്നു. പരാതികളും പ്രക്ഷോഭങ്ങളും തുടരുന്നതല്ലാതെ യാതൊരു നടപടിയും ഉണ്ടായിട്ടില്ല. വഴിയേത്, കുഴിയേത് ‍? കഴിഞ്ഞ നാലു വര്‍ഷമായി കുണ്ടും കുഴിയുമായി തകര്‍ന്നു കിടക്കുകയാണ് കിഴക്കമ്പലം-പോഞ്ഞാശേരി പിഡബ്ല്യുഡി റോഡ്. റോഡിലെ ഏകദേശം മൂന്നര കിലോമീറ്റര്‍ വലിയ കുഴികളാണ്. കൂടാതെ കെട്ടിക്കിടക്കുന്ന മഴവെള്ളവും. പണി ചെയ്യാതെയും പണിയാന്‍ വരുന്നവര്‍ക്ക് പണി കൊടുത്തും രാഷ്ട്രീയ തര്‍ക്കങ്ങള്‍ മുറുകുന്ന പോഞ്ഞാശേരി റോഡിൽ വഴിയേത് കുഴിയേതെന്ന് അറിയാതെ വഴി യാത്രക്കാരും ബുദ്ധിമുട്ട് അനുഭവിക്കുന്നു. കാക്കനാടുമായി ബന്ധിപ്പിക്കുന്ന പഴങ്ങനാട്- കപ്പേളപ്പടി-വട്ടോലിക്കര-എ പി വര്‍ക്കി റോഡും സഞ്ചാരയോഗ്യമല്ലാത്ത അവസ്ഥയിലാണ്. പൂര്‍ണ തകര്‍ച്ചയിൽ എംസി റോഡും എൻഎച്ചും മൂവാറ്റുപുഴയില്‍ നഗരത്തിലൂടെ കടന്നുപോകുന്ന എംസി റോഡും ദേശീയപാതയും പൂര്‍ണമായും തകര്‍ന്ന് സഞ്ചാരയോഗ്യമല്ലാതായി. കാല്‍നടയാത്ര പോലും ഇവിടെ അസാധ്യം. വെള്ളൂര്‍ക്കുന്നം, എവറസ്റ്റ് കവല മാര്‍ക്കറ്റ്, കിഴക്കേക്കര അടൂപറമ്പ്, വാഴക്കുളം കല്ലൂര്‍ക്കാട്, കീച്ചേരിപ്പടി വണ്‍വേ ജംഗ്ഷന്‍, അമ്പലംപടി റാക്കാട്, ഈസ്റ്റ് മാറാടി പെരുവംമുഴി, കച്ചേരിത്താഴം കാവുംപടി, തൃക്കളത്തൂര്‍ കാവുംപടി ചാരപ്പാട്ട്, ആനിക്കാട് ഏനാനല്ലൂര്‍, കടാതി കാരനാട്ട് കാവുംപടി, കടാതി ശക്തിപുരം, അമ്പലംപടി വീട്ടൂര്‍, കല്ലൂര്‍ക്കാട് പേരമംഗലം കലൂര്‍ തുടങ്ങി നിരവധി റോഡുകളും തകര്‍ന്ന അവസ്ഥയിലാണ്. മൂവാറ്റുപുഴ നഗരവികസനം നടക്കുന്നതിനാല്‍ ഏറെ പണിപ്പെട്ടാണ് യാത്രക്കാര്‍ നഗരത്തിലൂടെ കടന്നുപോകുന്നത്. റോഡ് വികസനത്തിന്‍റെ ഭാഗമായി കച്ചേരിത്താഴം മുതല്‍ പിഒ ജംഗ്ഷന്‍ വരെ എംസി റോഡ് പൊളിച്ചിട്ടിരിക്കുന്നു. കച്ചേരിത്താഴം പാലത്തിലും ലതാ പാലത്തിലും കുഴികള്‍ രൂപപ്പെട്ടിട്ടുണ്ട്. കുഴികളില്‍ വീണ് ഇരുചക്രവാഹന യാത്രികര്‍ക്ക് പരിക്കേല്‍ക്കുന്നതും വാഹനങ്ങള്‍ കുഴിയില്‍ ചാടുമ്പോള്‍ ചെളിവെള്ളം ദേഹത്തേക്ക് തെറിക്കുന്നതും ഇവിടെ പതിവു കാഴ്ചയായി. തകർന്നടിഞ്ഞ് എടവനക്കാട് റോഡ് വൈപ്പിനിലെ എടവനക്കാടിനു ശാപമോക്ഷമില്ലാത്ത ഒന്നാണ് തീരദേശ റോഡ്. 20 കിലോമീറ്റര്‍ വരുന്ന തീരദേശ റോഡില്‍ എടവനക്കാട് ഭാഗത്ത് രണ്ടു കിലോമീറ്ററോളം റോഡ് കാണാനേയില്ല. അത്രമേല്‍ തകര്‍ന്നടിഞ്ഞു കിടക്കുകയാണ്. അത്യാവശ്യകാരങ്ങള്‍ക്ക് ഇവിടെ എത്തിച്ചേരാന്‍ ദുരിതമേറെയാണ്. ഒരു രോഗിയെ അടിയന്തരമായി ആശുപത്രി എത്തിക്കേണ്ടി വന്നാല്‍ തലയ്ക്ക് ചുമന്നു കൊണ്ടുപോകേണ്ട അവസ്ഥയാണ്. രണ്ടുപതിറ്റാണ്ടായി അനുഭവിക്കുന്ന ദുരിതമാണിത്. തീരദേശ റോഡ് മുനമ്പം മുതല്‍ തെക്കോട്ട് എടവനക്കാട് ചാത്തങ്ങാട് ബീച്ച് വരെ ഈയടുത്ത് വീതികുട്ടി പുനര്‍നിര്‍മിച്ചിരുന്നു. എന്നാല്‍ പതിവായി കടല്‍ കയറുന്ന സ്ഥലം എന്നുപറഞ്ഞ് ഇവിടെ നിന്നും തെക്കോട്ട് അണിയില്‍ ബീച്ച് വരെയുള്ള രണ്ടുകിലോമീറ്റര്‍ ഭാഗം പുനര്‍നിര്‍മിക്കാന്‍ കരാറുകാരന്‍ കൂട്ടാക്കുന്നില്ലെന്നാണ് അറിവ്.

ടാക്സി കാർ ഡ്രൈവറെ മരിച്ചനിലയിൽ കണ്ടെത്തി

മരട്: ടാക്സി കാർ ഡ്രൈവറെ വാടകവീട്ടിൽ മരിച്ചനിലയിൽ കണ്ടെത്തി. തൃശൂർ കൊടുങ്ങല്ലൂർ സ്വദേശി വിഷ്ണു (26) ആണ് മരിച്ചത്. നെട്ടൂർ അറേബ്യൻ അസ്ക ഹോട്ടലിന് പിൻവശത്തെ വാടകവീട്ടിലാണ് തൂങ്ങി മരിച്ച നിലയിൽ കണ്ടെത്തിയത്. ഇന്നലെ രാവിലെ ഫോണിൽ ബന്ധപ്പെട്ടിട്ട് കിട്ടാത്തതിനെ തുടർന്ന് സഹപ്രവർത്തകർ വന്ന് മുറി പരിശോധിച്ചപ്പോഴാണ് മരിച്ചനിലയിൽ കണ്ടത്. പനങ്ങാട് പോലീസ് സ്ഥലത്തെത്തി നടപടികൾ സ്വീകരിച്ച് മൃതദേഹം ജനറൽ ആശുപത്രി മോർച്ചറിയിലേക്ക് മാറ്റി. രണ്ട് ദിവസം മുൻപാണ് ഇയാൾ നാട്ടിൽ നിന്നെത്തിയത്.

യുവാവ് ട്രെയിൻ തട്ടി മരിച്ചു

കളമശേരി: കളമശേരി എച്ച്എംടി ജംഗ്ഷനു സമീപം യുവാവ് ട്രെയിൻ തട്ടി മരിച്ചു. ചൊവ്വാഴ്ച വൈകുന്നേരം 5.30 ഓടെയായിരുന്നു അപകടം. കളമശേരി അറക്കൽ വീട്ടിൽ ബെന്നിയുടെ മകൻ എബിൻ ബെന്നി(38) ആണ് മരിച്ചത്. മൃതദേഹം പോലീസ് നടപടികൾക്കുശേഷം ചൊവ്വാഴ്ച തന്നെ മെഡിക്കൽ കോളേജിലേക്ക് മാറ്റിയിരുന്നു. ഇന്നലെ പോസ്റ്റ്മോർട്ടത്തിനുശേഷം ബന്ധുക്കൾക്ക് വിട്ടു നൽകി.സംസ്കാരം നടത്തി. അമ്മ: ബേബി ബെന്നി, സഹോദരൻ: ജിതിൻ ബെന്നി. സഹോദര ഭാര്യ: ടീന ജിതിൻ.

പിക്അപ് വാനിടിച്ച് വിദ്യാർഥി മരിച്ചു

കല്ലൂർക്കാട്‌ : റോഡു മുറിച്ചു കടക്കവെ, പിക്അപ് വാനിടിച്ച് സ്കൂൾ വിദ്യാർഥി മരിച്ചു. കല്ലൂർക്കാട് കുഴികണ്ടത്തിൽ കെ.എ. മണിയുടെ മകൻ കാശിനാഥ് കെ.മണി (10) യാണ് മരിച്ചത്. വാഴക്കുളം സെന്‍റ് ലിറ്റിൽ തെരേസാസ് ഹൈസ്കൂൾ അഞ്ചാം ക്ലാസ് വിദ്യാർഥിയാണ്. ഇന്നലെ വൈകുന്നേരം ആറരയോടെ മൂവാറ്റുപുഴ -തേനി ഹൈവേയിൽ കോട്ടക്കവലയ്ക്കു സമീപമായിരുന്നു അപകടം. വീടിനു സമീപമുള്ള കടയിൽനിന്ന് സാധനങ്ങൾ വാങ്ങുന്നതിനായി റോഡു മുറിച്ചു കടക്കുന്പോൾ മൂവാറ്റുപുഴ ഭാഗത്തേക്കു പോവുകയായിരുന്ന പിക്അപ് വാൻ ഇടിക്കുകയായിരുന്നു. ഗുരുതരമായി പരിക്കേറ്റ കുട്ടിയെ മുവാറ്റുപുഴയിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. മാതാവ്: ആതിര. സഹോദരി: ദേവിക (പ്ലസ് വൺ വിദ്യാർഥിനി).

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]