ADVERTISEMENT

ADVERTISEMENT

കഞ്ചാവുമായി യുവാവ് പിടിയില്‍

കൊച്ചി: കഞ്ചാവുമായി മലപ്പുറം സ്വദേശി അബ്ദുള്‍ സാലിഹി(21)നെഎറണാകുളം നോര്‍ത്ത് പോലീസ് അറസ്റ്റ് ചെയ്തു. കലൂര്‍ പൊറ്റക്കുഴി കൈപ്പിള്ളി ലൈന്‍ റോഡിന് സമീപത്ത് നടത്തിയ പരിശോധനയിലാണ് ഇയാൾ പിടിയിലായത്.

പ്രതിയുടെ പക്കൽനിന്ന് 887 ഗ്രാം കഞ്ചാവ് പിടിച്ചെടുത്തു. നോര്‍ത്ത് എസ്‌ഐ പി. പ്രദീപിന്‍റെ നേതൃത്വത്തിലുള്ള അന്വേഷണ സംഘമാണ് പ്രതിയെ പിടികൂടിയത്.

ADVERTISEMENT

മഴയിൽ വീട് തകർന്നുവീണു

പനങ്ങാട്: ശക്തമായ മഴയിൽ വീട് തകർന്ന് വീണു. കുമ്പളം പഞ്ചായത്തിലെ ഒന്നാം വാർഡിൽ നൂറ്കണ്ണിയിൽ കുഞ്ഞമ്മ കാർത്തികേയന്‍റെ വീടാണ് ഇന്നലെ പുലർച്ചെ 4.30 ഓടെ തകർന്ന് വീണത്. മകൻ ബൈജു തലനാരിഴയ്ക്കാണ് രക്ഷപ്പെട്ടത്. ഫാനിന്‍റെ ശബ്ദവ്യത്യാസം കേട്ട് ഓഫ് ചെയ്യാൻ എഴുന്നേറ്റ സമയം ഓടുകളും മറ്റും തലയിലേയ്ക്ക് വീഴുന്നത് കണ്ട് പുറത്തേയ്ക്ക് ഓടി രക്ഷപ്പെടുകയായിരുന്നു. മാതാവ് വീട്ടിലുണ്ടായിരുന്നില്ല.

നടൻ ശ്രീനിവാസനെ നെല്ല് അളന്ന് നൽകി ആദരിച്ചു

ഉദയംപേരൂർ: നെൽകർഷകരെ ആത്മാർഥമായി സ്നേഹിക്കുന്ന നടൻ ശ്രീനിവാസനെയും ധ്യാൻ ശ്രീനിവാസനെയും കേരള ദർശന വേദിയുടെ നേതൃത്വത്തിൽ ഒരു പറ നെല്ല് അളന്ന് നൽകി ആദരിച്ചു. വേദി ചെയർമാൻ എ.പി. മത്തായിയുടെ നേതൃത്വത്തിൽ ശ്രീനിവാസന്‍റെ വീട്ടിൽ നടത്തിയ ചടങ്ങിൽ കാലടി സംസ്കൃത സർവകലാശാല വൈസ് ചാൻസലർ ഡോ. എം.സി. ദിലീപ് കുമാർ, ശ്രീനിവാസനെ പൊന്നാടയണിയിച്ചു. എംജിഎം സ്കൂൾ പ്രിൻസിപ്പൽ വി. ഉമ, ദർശന വേദി സെക്രട്ടറി കുമ്പളം രവി, ടോമി മാത്യു, കണ്ടനാട് പാടശേഖര കർഷകൻ മനു ഫിലിപ്പ്, എൻ.കെ. മത്തായി തുടങ്ങിയവർ പങ്കെടുത്തു.

ആശാവർക്കർമാരുടെ സമരത്തിന് പിന്തുണയുമായി പ്രതിഷേധ സദസ്

വൈപ്പിൻ: ആശാ വർക്കർമാരുടെ സമരത്തിന് ഐക്യദാർഢ്യം പ്രഖ്യാപിച്ച് ഐക്യദാർഢ്യ സമിതിയുടെ ആഭിമുഖ്യത്തിൽ പ്രതിഷേധ സദസ് സംഘടിപ്പിച്ചു. കാളമുക്കിൽ നടന്ന പ്രതിഷേധം ഐഎൻടിയുസി ദേശീയ സെക്രട്ടറി കെ.പി. ഹരിദാസ് ഉദ്ഘാടനം ചെയ്തു. മെച്ചപ്പെട്ട സേവന വേതന വ്യവസ്ഥകൾ ആവശ്യപ്പെടുന്ന തൊഴിലാളികളോട് നിഷേധാത്മകമായ സമീപനം സ്വീകരിക്കുന്നത് തൊഴിലാളികളുടെ സർക്കാർ എന്ന അവകാശപ്പെടുന്ന ഇടതുപക്ഷ സർക്കാരിനു ഭൂഷണമല്ലെന്ന് കെ. പി. ഹരിദാസ് ചൂണ്ടിക്കാട്ടി. ഇടപ്പള്ളി ബ്ലോക്ക് പഞ്ചായത്ത് പ്രസിഡന്‍റ് സരിത സനിൽ അധ്യക്ഷയായി. സമരസഹായ സമിതി ജില്ലാ വൈസ് ചെയർമാൻ വി.പി. ജോർജ് , സമിതി മേഖലാ നേതാക്കളായ വിവേക് ഹരിദാസ്, എം.ബി. ജയഘോഷ്, പോൾ ടി. സാമുവൽ, കെ.കെ . ശോഭ, എ. റെജീന, എൻ. മോഹൻകുമാർഎന്നിവർ സംസാരിച്ചു.

റോ റോ കട്ടപ്പുറത്ത് തന്നെ; ഫോർട്ടുകൊച്ചി- വൈപ്പിൻ റൂട്ടിൽ യാത്രാക്ലേശം രൂക്ഷം

ഫോർട്ടുകൊച്ചി: ഫോർട്ടുകൊച്ചി വൈപ്പിൻ സർവീസ് നടത്തുന്ന സേതു സാഗർ ഒന്ന് യന്ത്രത്തകരാറിനെ തുടര്‍ന്ന് പ്രവര്‍ത്തനം നിലച്ചതോടെ ഫോർട്ട് കൊച്ചി-ഫോർട്ട്‌ വൈപ്പിൻ റൂട്ടിൽ റോറോ സർവീസിനെ ആശ്രയിക്കുന്നവര്‍ ദുരിതത്തിലായി. ഫോർട്ടുകൊച്ചി റോറോ ജെട്ടിയിൽ നിന്നും ആസ്പിൻ വോൾ വരെയും ഫോർട്ട് വൈപ്പിൻ ജെട്ടിയിൽ നിന്നും ഗോശ്രീ പാലം വരെയും മണിക്കൂറുകൾ ക്യൂവിൽ കിടക്കുന്ന വാഹനങ്ങൾ മൂലം വലിയ ഗതാഗതക്കുരുക്കാണ് അനുഭവപ്പെടുന്നത്. അടിയന്തരമായി റോറോയുടെ അറ്റകുറ്റപ്പണികൾ നടത്തി റോറോ സർവീസ് ആരംഭിക്കണമെന്ന് പ്രതിപക്ഷ നേതാവ് അഡ്വ. ആന്‍റണി കുരീത്തറ ആവശ്യപ്പെട്ടു. റോറോ സർവീസുമായി ബന്ധപ്പെട്ട കണക്കുകൾ പരിശോധിക്കുന്നതിന് കോർപറേഷൻ നിയോഗിച്ച ചാർട്ടേഡ് അക്കൗണ്ടന്‍റ് കണക്കുകൾ പൂർണമല്ലെന്നും കെഎസ്ഐഎൻസി കണക്കുകളിൽ പൊരുത്തക്കേട് ഉണ്ടെന്നുറിപ്പോർട്ട് നൽകിയതായും പ്രതിപക്ഷ നേതാവ് അഡ്വ. ആന്‍റണി കുരീത്തറ ആരോപിച്ചു. കൊച്ചി നഗരസഭയുടെ റോറോ സർവീസ് കോർപറേഷൻ ഏറ്റെടുത്ത് നടത്തണമെന്നും അദ്ദേഹം ആവശ്യപ്പെട്ടു.

സീപോര്‍ട്ട്-എയര്‍പോര്‍ട്ട് റോഡ്: എച്ച്എംടി, എന്‍എഡിഎ ഭൂമി കൈമാറി

കളമശേരി: സീപോർട്ട്- എയർപോർട്ട് റോഡിന്‍റെ രണ്ടാം ഘട്ട നിർമാണത്തിനായി എച്ച്എംടിയുടേയും എൻഎഡിയുടേയും ഭൂമി പദ്ധതി നിർവഹണ ഏജൻസിയായ റോഡ്‌സ് ആൻഡ് ബ്രിഡ്ജസ് ഡെവലപ്‌മെന്‍റ് കോർപറേഷന് കൈമാറി. റോഡ് നിർമാണം രണ്ട് പതിറ്റാണ്ടിലേറെ തടസപ്പെടുന്നതിന് കാരണമായ ഭൂമി പ്രശ്നം ഇതോടെ പൂർണമായി പരിഹരിക്കപ്പെട്ടതായി മന്ത്രി പി. രാജീവ് പറഞ്ഞു. ഈ ഭാഗത്തെ റോഡ് നിർമാണം ഉടനെ ആരംഭിക്കുമെന്നും അദ്ദേഹം പറഞ്ഞു. സംസ്ഥാന സർക്കാർ നടത്തിയ നിരന്തരമായ ഇടപെടലിന്‍റെ ഫലമായാണ് റോഡ് നിർമാണം പൂർത്തിയാക്കാൻ വഴിയൊരുങ്ങുന്നതെന്നും മന്ത്രി പറഞ്ഞു. സീപോർട്ട്- എയർപോർട്ട് റോഡ് നിർമാണത്തിലെ രണ്ടാം ഘട്ടത്തിൽ ഉൾപ്പെടുന്ന എച്ച്എംടി മുതൽ എൻ‌എഡി വരെയുള്ള ഭാഗത്തിനാണ് എച്ച്എംടി ഭൂമി ആവശ്യമായി വന്നത്. തൃക്കാക്കര നോർത്ത് വില്ലേജിലെ ബ്ലോക്ക് അഞ്ചിൽ ഉൾപ്പെട്ട 1.4015 ഹെക്ടർ ഭൂമിയാണ് കൈമാറിയത്. ഭൂമിക്കുള്ള വില സുപ്രീം കോടതി നിർദ്ദേശപ്രകാരം ബാങ്കിൽ നിക്ഷേപിച്ചിരുന്നു. ഭൂമി ഏറ്റെടുക്കലിനായി അനുവദിച്ച 37,90,90662 രൂപയാണ് ഇപ്രകാരം കൈമാറിയത്. ദേശസാൽകൃത ബാങ്കിൽ തുക കെട്ടിവെക്കുന്നതിനുള്ള സംസ്ഥാന സർക്കാരിന്‍റെ അപേക്ഷ സുപ്രീം കോടതി നേരത്തെ അനുവദിച്ചിരുന്നു. സീപോർട്ട്- എയർപോർട്ട് റോഡ് വികസനത്തിനായി എൻഎഡിയിൽ നിന്ന് വിട്ടു കിട്ടേണ്ട 2 .4967 ഹെക്ടർ ഭൂമിയും കൈമാറി. ഭൂമി വിലയുൾപ്പെടെ 32. 26 കോടി രൂപ സംസ്ഥാന സർക്കാർ നേരത്തെ അനുവദിച്ചിരുന്നു. സ്ഥല വിലയായി കേന്ദ്ര പ്രതിരോധ മന്ത്രാലയം കണക്കാക്കിയ 23.11 കോടി രൂപയും എൻഎഡി തൊരപ്പ് റോഡ് വീതി കൂട്ടി നിർമിക്കുന്നതിന് 8.16 കോടി രൂപയും ചുറ്റുമതിൽ നിർമാണത്തിന് 99. 43ലക്ഷം രൂപയും ഉൾപ്പെടെയാണ് ധനകാര്യ വകുപ്പ് അനുവദിച്ചിരുന്നത്. എച്ച്എംടി - എൻഎഡി ഭാഗത്തെ റോഡ് നിർമാണത്തിനായി 17.31 കോടി രൂപയുടെ ഭരണാനുമതി നൽകി കഴിഞ്ഞ മാസം സർക്കാർ ഉത്തരവ് പുറപ്പെടുവിച്ചിരുന്നു. ഈ ഭാഗത്തിന്‍റെ ടെൻഡർ നടപടികൾ പുരോഗമിക്കുകയാണ്. എച്ച്എംടി ഭാഗത്ത് 45 മീറ്റർ വീതിയിൽ 600 മീറ്റർ നീളത്തിലാണ് റോഡ് നിർമിക്കുക. എൻഎഡിയുടെ ഭാഗത്തെ സ്കെച്ച് നേരത്തെ തയാറാക്കിയതിനാൽ തുടർ നടപടികൾക്ക് കാലതാമസമുണ്ടാവില്ല. ഇതോടൊപ്പം വീതി കൂട്ടി നിർമിക്കുന്ന എൻഎഡി തൊരപ്പ് റോഡിന്‍റെ ടെൻഡറും ഉടനുണ്ടാകും. എൻഎഡി-മഹിളാലയം ഭാഗത്തിന്‍റെ ടെൻഡർ ഡിസംബറിൽ പുറപ്പെടുവിക്കും. 6.5 കി.മീറ്റർ ദൈർഘ്യമുള്ള ഈ ഭാഗത്തെ ഭൂമി ഏറ്റെടുക്കൽ പൂർത്തീകരണത്തിലേക്ക് എത്തുകയാണ്.

മഴ... മാലിന്യം ... തൃക്കാക്കര ചീഞ്ഞുനാറുന്നു

കാക്കനാട്: മഴയെപഴിചാരിമാലിന്യനീക്കംനടത്താതെ തൃക്കാക്കര നഗരസഭ. ഹരിതകർമസേനയിലെ വനിതകൾ 43 ഡിവിഷനുകളിൽ നിന്നായി ശേഖരിച്ചു കൊണ്ടുവരുന്ന ഭക്ഷണാവശിഷ്ടമടക്കമുള്ള ജൈവ മാലിന്യങ്ങൾ നഗരസഭാകാര്യാലയത്തിനു സമീപമുള്ള മാലിന്യസംഭരണിയിൽ കുട്ടിയിട്ടിരിക്കുകയാണ്. കനത്ത മഴയത്ത് ഇവയെല്ലാം റോഡിലേക്ക് ഒഴുകി പരക്കുന്നതു പതിവായിട്ടും നഗരസഭാ ആരോഗ്യ വിഭാഗം അധികൃതർ വേണ്ടത്ര ജാഗ്രതകാണിക്കുന്നില്ലെന്ന്പ്രതിപക്ഷ കൗൺസിലർമാരും പ്രദേശവാസികളും പറയുന്നു. സംസ്ഥാനത്ത് ഏറ്റവും കൂടുതൽ റവന്യൂ വരുമാനമുള്ള നഗരസഭയാണ് തൃക്കാക്കരയെങ്കിലും കുറ്റമറ്റ രീതിയിൽ മാലിന്യ സംസ്കരണത്തിന് നാളിതുവരെ ഇവിടെ സംവിധാനങ്ങളൊന്നും ഒരുക്കിയിട്ടില്ല. ഓണക്കാലത്ത് കൊണ്ടുവന്ന് നിക്ഷേപിച്ച ജൈവ മാലിന്യങ്ങളും സംഭരണിയിൽ ചീഞ്ഞഴുകി ദുർഗന്ധം വമിപ്പിക്കുന്നു. ഇതിനിടയിൽ വലിയ കുഴികുത്തി സംഭരണിക്കു സമീപം തന്നെ ഈ ജൈവ മാലിന്യം കുഴിച്ചു മുടാൻ അധികൃതർ നടത്തിയ ശ്രമങ്ങൾ പ്രതിപക്ഷ കൗൺസിലർമാർ ചേർന്ന് തടഞ്ഞു. മാലിന്യം സംഭരണിക്കു സമീപം കുഴിച്ചുമൂടാൻ നീക്കം നടത്തിയിട്ടില്ലെന്നും, മാലിന്യത്തിൽ നിന്നുള്ള സ്ലറി വെള്ളം റോഡിലേക്കും മറ്റും ഒഴുകിപ്പരക്കാതിരിക്കാൻ വേണ്ടി കുഴികുത്തി അതിലേക്ക് ഒഴുക്കി വിടുകയുമായിരുന്നുവെന്ന് നഗരസഭാധ്യക്ഷ രാധാമണിപ്പിള്ള ആരോഗ്യ സ്ഥിരം സമിതി അധ്യക്ഷൻ വർഗീസ് പ്ലാശ്ശേരി എന്നിവർ പറഞ്ഞു. അതേസമയം കാരണം കൂടാതെ ഹരിത കർമസേനാംഗത്തെ ജോലിയിൽ നിന്നും മാറ്റി നിർത്തിയെന്ന ആരോപണവുമായി പ്രതിപക്ഷ കൗൺസിലർമാരിൽ ചിലരും രംഗത്തുവന്നു. വീടുകളിൽ നിന്നും ഫ്ലാറ്റുകളിൽ നിന്നും ഭക്ഷണാവശിഷ്ടം എടുക്കാൻ നിയോഗിക്കപ്പെട്ടിട്ടുള്ള ഹരിത കർമസേനാംഗം ചട്ടവിരുദ്ധമായി പണം വാങ്ങിയെന്നും, കെ സ്മാർട്ടിലടക്കം കബളിപ്പിക്കപ്പെട്ടവപ്പെട്ടവർ പരാതി നൽകിയെന്നും ഇതേ തുടർന്ന് ഇനിയൊരറിയിപ്പുണ്ടാകുന്നതുവരെ ഒരു വനിതാ അംഗത്തെ ജോലിയിൽ നിന്നും മാറ്റി നിർത്താൻ ആരോഗ്യവിഭാഗംനോട്ടീസ് നൽകിയിട്ടുണ്ടെന്നും നഗരസഭാ സെക്രട്ടറി അറിയിച്ചു. നഗരസഭയുടെ ലെറ്റർഹെഡിൽ അമിത നിരക്ക് ആവശ്യപ്പെട്ട് ആരോപണവിധേയയായ ഹരിതകർമസേനാംഗം കത്തുനൽകിയെന്നും ഇതു ചട്ടവിരുദ്ധമാണെന്നും നഗരസഭാധ്യക്ഷയും പറയുന്നു. ഹരിത കർമസേനാംഗങ്ങളുടെ സ്വകാര്യ ഗൂഗിൾ പേ നമ്പറിലേക്ക് പണം സ്വീകരിക്കുന്നതിന് അധികൃതർ അനുമതി നൽകുന്നത് എന്തിനാണെന്ന മറുചോദ്യമാണ് ഇതേക്കുറിച്ചന്വേഷി ച്ചപ്പോൾ ഒരു ഹരിത കർമ്മസേനാംഗം പ്രതികരിച്ചത്.

പെരുന്പാവൂർ സ്‌കൂള്‍ കലോത്സവവേദിയിലേക്ക് എത്തിച്ചേരാനുള്ള റോഡ് തകര്‍ച്ചയില്‍

പെരുമ്പാവൂര്‍: പെരുന്പാവൂർ ഉപജില്ലാ സ്‌കൂള്‍ കലോത്സവം നടക്കുന്ന വെങ്ങോല ശാലേം സ്‌കൂളില്‍ എത്തിച്ചേരാനുള്ള ഏക മാര്‍ഗമായ ഓണംകുളം - ഊട്ടിമറ്റം പിഡബ്ല്യൂഡി റോഡ് തകര്‍ന്ന് കിടക്കുന്നതിനാല്‍ കലോത്സവ സ്ഥലത്തേക്ക് എത്തിചേരാന്‍ ബുദ്ധിമുട്ടായി. എൺപതില്‍പ്പരം സ്‌കൂളില്‍ നിന്നായി ആയിരക്കണക്കിന് വിദ്യാര്‍ഥികള്‍ ഉള്‍പ്പടെയുള്ളവര്‍ കലോത്സവത്തിന് എത്തിച്ചേരും. 30 വര്‍ഷത്തിലേറെയായി റീ ടാറിംഗ് ഉള്‍പ്പടെയുള്ള അറ്റകുറ്റപ്പണികള്‍ നടത്തിയിട്ട്. റോഡ് പൊട്ടിപ്പൊളിഞ്ഞ് വലിയ കുഴികള്‍ രൂപപ്പെട്ട് കാല്‍നടക്ക് പോലും കഴിയാതെ വന്നതിനാല്‍ ബസ് സര്‍വീസുകള്‍ വരെ നിര്‍ത്തിവെച്ചു. ജനങ്ങള്‍ നിരവധി നിവേദനങ്ങള്‍ സമര്‍പ്പിക്കുകയും സെക്രട്ടേറിയറ്റ് പടിക്കല്‍ വരെ സമരങ്ങള്‍ നടത്തുകയും ചെയ്തെങ്കിലും ഫലമൊന്നുമുണ്ടായില്ല. മുന്‍ പഞ്ചായത്ത് അംഗം ശിവന്‍ കദളി നവകേരള സദസില്‍ പരാതിയും നല്‍കിയിരുന്നു. നിരവധി സമരങ്ങള്‍ നടത്തിയതിനെ തുടര്‍ന്ന് റോഡ് റണ്ണിംഗ് കോണ്‍ട്രാക്ട് വ്യവസ്ഥയില്‍ നവീകരണം നടത്തുന്നതിന് ഒന്നേകാല്‍ കോടിയോളം രൂപ അനുവദിക്കുകയും, റോഡിന്‍റെ ചില ഭാഗങ്ങളില്‍ കോണ്‍ക്രീറ്റ് കട്ടകള്‍ വിരിച്ചു തുടങ്ങുകയും ചെയ്തിരുന്നു. നവകേരള പദ്ധതിയില്‍ ഉള്‍പ്പെടുത്തി ഉന്നത നിലവാരത്തില്‍ നവീകരിക്കുന്നതിനായി ഏഴ് കോടി രൂപ അനുവദിച്ചതായി പ്രഖ്യാപനം ഉണ്ടായതോടെ കട്ടവിരിക്കല്‍ പണി നിര്‍ത്തി വച്ചു. മാസങ്ങള്‍ കഴിഞ്ഞിട്ടും ഏഴ് കോടിയുടെ പദ്ധതി ആരംഭിച്ചില്ല. നടന്നുകൊണ്ടിരുന്ന പ്രവര്‍ത്തി നിര്‍ത്തിയെങ്കിലും പുതിയ പദ്ധതി ആരംഭിക്കാത്തതാണ് പുതിയ പ്രതിസന്ധിക്ക് കാരണം. ഇതു സംബന്ധിച്ച് അന്വേഷിച്ചപ്പോള്‍ ഏഴ് കോടിയുടെ പദ്ധതി ടെൻഡര്‍ നടപടികള്‍ പോലും നടത്തിയിട്ടില്ലെന്നാണ് അറിഞ്ഞത്. ഏഴ് കോടി അനുവദിച്ചതും ഭരണ-പ്രതിപക്ഷ പാര്‍ട്ടികള്‍ ബോര്‍ഡുകള്‍ മല്‍സരിച്ച് വച്ചതൊഴിച്ചാല്‍ മറ്റൊന്നും ഉണ്ടായില്ല. ടെൻഡര്‍ നടപടികള്‍ പഞ്ചായത്ത് തിരഞ്ഞെടുപ്പ് വിജ്ഞാപനത്തിന് മുന്‍പ് ഉണ്ടായില്ലെങ്കില്‍ കൂടുതല്‍ കാലതാമസത്തിന് ഇടയാകും. വെങ്ങോല സര്‍ക്കാര്‍ ആശുപത്രി, മൃഗാശുപത്രി, വെങ്ങോല സ്‌കൂള്‍ എന്നിവിടങ്ങളിലേക്കുള്ള റോഡാണിത്. നിരവധി ബസ്സുകള്‍ ഈ റോഡിലൂടെ സര്‍വീസ് നടത്തുന്നതാണ്. റോഡ് നവീകരണത്തില്‍ അധികൃതര്‍ അനാസ്ഥ കാണിക്കുന്നു. അവഗണന തുടര്‍ന്നാല്‍ നിര്‍ത്തിവച്ച സമര പരിപാടികള്‍ പുന:രാരംഭിക്കുമെന്ന് മുന്‍പഞ്ചായത്ത് അംഗം ശിവന്‍ കദളി അറിയിച്ചു.

അങ്കമാലി ഉപജില്ലാ സ്കൂൾ കലോത്സവത്തിന് തിരിതെളിഞ്ഞു

അങ്കമാലി: ഉപജില്ലാ സ്കൂൾ കലോത്സവം മൂക്കന്നൂർ സേക്രഡ് ഹാർട്ട്‌ ഓർഫനേജ് ഹൈസ്കൂളിൽ ആരംഭിച്ചു. റോജി എം. ജോൺ എംഎൽഎ ഉദ്ഘാടനം നിർവഹിച്ചു. മൂക്കന്നൂർ ഗ്രാമപഞ്ചായത്ത് പ്രസിഡന്‍റ് കെ.വി.ബിബീഷ് അധ്യക്ഷത വഹിച്ചു. എറണാകുളം ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ മുഖ്യപ്രഭാഷണവും സ്കൂൾ മാനേജർ ബ്രദർ വർഗീസ് മഞ്ഞളി അനുഗ്രഹ പ്രഭാഷണവും നടത്തി. കറുകുറ്റി പഞ്ചായത്ത് പ്രസിഡന്‍റ് ലതിക ശശികുമാർ, മഞ്ഞപ്ര പഞ്ചായത്ത് പ്രസിഡന്‍റ് വത്സലകുമാരി വേണു, പഞ്ചാ. മെമ്പർമാരായ ഗ്രേസി ചാക്കോ, എൻ.ഒ. കുരിയച്ചൻ, ജസ്റ്റി ദേവസിക്കുട്ടി, സിനി മാത്തച്ചൻ, ബിജു പാലാട്ടി, ജയ രാധാകൃഷ്ണൻ, പി.വി. മോഹനൻ, കെ.എസ്. മൈക്കിൾ, പോൾ പി. ജോസഫ്, ജൊഫീന ഷാന്‍റോ തുടങ്ങിയവർ പ്രസംഗിച്ചു.

തുറവൂർ പള്ളിയിൽ മിഷൻ ഞായർ ആചരിച്ചു

അങ്കമാലി : തുറവൂർ സെന്‍റ് അഗസ്റ്റിൻസ് പള്ളിയിൽ ജീവകാരുണ്യ പ്രവർത്തനങ്ങൾക്കായി മിഷൻ ഞായർ ആചരണം നടത്തി. വികാരി ഫാ. പോൾ കോട്ടയ്ക്കൽ ഉദ്ഘാടനം ചെയ്തു. വൈസ് ചെയർമാൻ ജോയ് പടയാട്ടിൽ അധ്യക്ഷത വഹിച്ചു. ഫാമിലി യൂണിറ്റ് കേന്ദ്ര സമിതിയുടെയും, ഭക്ത സംഘടനകളുടെയും നേതൃത്വത്തിലാണ് മിഷൻ ഞായർ സംഘടിപ്പിച്ചത്. ഉത്പന്നങ്ങളുടെ ലേലം , വിവിധ തരം ഫുഡ് സ്റ്റാളുകൾ , ഭക്ത സംഘടനാ സ്റ്റാളുകൾ , ഗെയിംസ് , ബിരിയാണി ചലഞ്ച് എന്നിവ ഉണ്ടായിരുന്നു. സഹവികാരി ഫാ. സോളമൻ കരേടൻ, മദർ സുപ്പീരിയർ സിസ്റ്റർ ഡിവോഷ്യാ എസ്ഡി എന്നിവർ ചേർന്ന് ഉത്പന്നങ്ങളുടെ സ്റ്റാളിന്‍റെ ഉദ്ഘാടനം നിർവഹിച്ചു. ഇടവക ട്രസ്റ്റിമാരായ ജോസഫ് വടക്കുംഞ്ചേരി , ബിനോയ് തളിയൻ , സെൻട്രൽ കമ്മറ്റി ജനറൽ സെക്രട്ടറി സിൽവി ബൈജു , ട്രഷറർ വിജു വളപ്പിലാൻ , ജോയിന്‍റ് സെക്രട്ടറിമാരായ ബാബു വടക്കുംതല , ജെസി ജോസഫ്, സിസ്റ്റർ അൽഫി ജോസ്, ഡോണോ ദേവസിക്കുട്ടി , ജ്വലിത്ത് ജോർജ് , സിമി ജോസഫ് ,ലിസ ബാബു , ത്രേസ്യാമ്മ പൗലോസ് , ബ്രൈറ്റോ അഗസ്റ്റിൻ തുടങ്ങിയവർ പ്രസംഗിച്ചു.

സ്പെഷൽ കാമ്പയിൻ 5.0ൽ പങ്കാളികളായി എഫ്‌സിഐ കേരള മേഖല

കൊച്ചി: ഫുഡ് കോർപറേഷൻ ഓഫ് ഇന്ത്യ (എഫ്‌സി‌ഐ), കേരള മേഖല സ്പെഷൽ കാമ്പയിൻ 5.0ൽ പങ്കാളികളായി. ഗാന്ധി ജയന്തിയോടനുബന്ധിച്ച് എഫ്‌സി‌ഐ കേരള മേഖലയിൽ ആരംഭിച്ച കാമ്പയിനിൽ ഓഫീസുകളിലും ഗോഡൗണുകളിലും പരിസര പ്രദേശങ്ങളിലും ശുചീകരണ പ്രവർത്തനങ്ങൾ നടത്തി. മാസം 31 വരെ നീളുന്ന കാമ്പയിൻ പൊതു ഓഫീസുകളിലെ ശുചിത്വം, രേഖകളുടെ ഫലപ്രദമായ മാനേജ്മെന്‍റ്, മെച്ചപ്പെട്ട ജോലി സംസ്കാരം എന്നിവ പ്രോത്സാഹിപ്പിക്കുന്നതിനായാണ് കേന്ദ്രസർക്കാർ സംഘടിപ്പിച്ചിരിക്കുന്നത്.

ഓഞ്ഞിത്തോട് കൈയേറ്റം : നാല് ചെറുപാലങ്ങൾ പൊളിച്ചു മാറ്റുന്നു

ആലുവ: കടുങ്ങല്ലൂർ, ആലങ്ങാട് പഞ്ചായത്തുകളിലൂടെ ഒഴുകുന്ന ഓഞ്ഞിത്തോട് കൈയേറി പൊതുമരാമത്ത് വിഭാഗം നിർമിച്ച നാല് പാലങ്ങൾ പൊളിച്ചുകളയണമെന്ന ഓഞ്ഞിത്തോട് സംരക്ഷണ സമിതിയുടെ വർഷങ്ങളായുള്ള ആവശ്യം നടപ്പിലാക്കുന്നു. ആദ്യഘട്ടത്തിൽ ഏലൂക്കര-കയൻറിക്കര പാലമാണ് ഉടൻ തന്നെ പൊളിച്ചുപണിയുന്നത്. ഇതിനായി പ്രധാനമന്ത്രി ഗ്രാമീണ സടക് യോജന (പിഎംജിഎസ്‌വൈ) പദ്ധതി വഴിയാണ് ചെലവ് കണ്ടത്തുന്നത്. കടുങ്ങല്ലൂർ പഞ്ചായത്തിലെ ഏലൂക്കര വരട്ടുപുഴയിൽ നിന്ന് ആരംഭിച്ച് ആലങ്ങാട് പഞ്ചായത്ത് വഴി കടുങ്ങല്ലൂർ പഞ്ചായത്തിലെ എടയാർ മേഖലയിലെ പെരിയാറിൽ തിരികെ ചേരുന്ന തോടിന് ഏകദേശം 7.5 കിലോമീറ്റർ ആണ് നീളം. 2022 മാർച്ചിൽ നടത്തിയ സർവേയിൽ മൂന്ന് ഏക്കറോളം തിരിച്ചു പിടിച്ചിരുന്നു. എന്നാൽ അതിർത്തിക്കല്ലിടാൻ വീണ്ടും രണ്ടു വർഷമെടുത്തു. പാലങ്ങൾ, കെട്ടിടങ്ങൾ, കലുങ്കുകൾ, വൃക്ഷങ്ങൾ, മതിലുകൾ തുടങ്ങിയവ ഇനി പൊളിച്ചു നീക്കേണ്ടതുണ്ട്. 40 മീറ്ററിലുണ്ടായിരുന്ന തോടിന് ഇപ്പോൾ നാലു മീറ്ററാണ് വീതി. പഴയപടിയാക്കാൻ കൈയേറ്റം ഒഴിവാക്കുക മാത്രമല്ല ആഴവും കൂട്ടണം. പായലും അഴുക്കും എക്കലും മാലിന്യവും നീക്കി ഇരുവശത്തും പാർശ്വഭിത്തി കെട്ടാനും സർക്കാരിന് പദ്ധതിയുണ്ട്. പുനരുദ്ധാരണ പ്രവർത്തികൾക്കായി മന്ത്രി പി. രാജീവ് 1.4 കോടി രൂപ അനുവദിച്ചിട്ടുണ്ട്.

തിരുനാളാഘോഷം

വല്ലം ഫൊറോന പള്ളിയില്‍ പെരുമ്പാവൂര്‍: വല്ലം ഫൊറോന പള്ളിയില്‍ വിശുദ്ധ അമ്മത്രേസ്യായുടെ തിരുനാള്‍ 23 മുതൽ 26 വരെ ആഘോഷിക്കുമെന്ന് വികാരി ഫാ. സെബാസ്റ്റ്യന്‍ മാടശേരി പത്രസമ്മേളനത്തിൽ അറിയിച്ചു. തിരുനാളിനോടനുബന്ധിച്ചുള്ള നൊവേന 13ന് തുടങ്ങി. നാളെ രാവിലെ ഏഴിന് വികാരി ഫാ. സെബാസ്റ്റ്യന്‍ മാടശേരി തിരുനാള്‍ കൊടിയേറ്റും. തുടര്‍ന്ന് കുര്‍ബാന. വൈകിട്ട് ആറിന് കുര്‍ബാന, നൊവേന, ലദീഞ്ഞ്, ഫാ. ലിധിന്‍ ചെങ്ങോട്ടുതറയില്‍ കാര്‍മികത്വം വഹിക്കും. 24ന് രാവിലെ ഏഴിന് കുര്‍ബാന, ഫാ. ജിജോ കളപ്പുരയ്ക്കല്‍ കാര്‍മികത്വം വഹിക്കും. തുടര്‍ന്ന് പന്തല്‍ വെഞ്ചിരിപ്പ്, ഓഹരി നെയ്യപ്പം ചുടല്‍. വൈകിട്ട് ആറിന് കുര്‍ബാന, നൊവേന, ലദീഞ്ഞ് ഫാ. സുശീല്‍ കിഴക്കേക്കുന്നേല്‍ കാര്‍മികത്വം വഹിക്കും. 25-ന് രാവിലെ ഏഴിന് കുര്‍ബാന. ഫാ. ജോര്‍ജ് പുത്തന്‍പറമ്പില്‍ കാര്‍മികത്വം വഹിക്കും. 9.30-ന് വി. അമ്മത്രേസ്യായുടെ തിരുശേഷിപ്പും തിരുസ്വരൂപവും എഴുന്നള്ളിച്ചുവയ്ക്കല്‍, തുടര്‍ന്ന് പാട്ടുകുര്‍ബാനയ്ക്ക് ഫാ. ജസ്‌ലിന്‍ തെറ്റയില്‍ കാര്‍മികത്വം വഹിക്കും. ഫാ. ജസ്റ്റിന്‍ കൈപ്രമ്പാടന്‍ വചനസന്ദേശം നല്‍കും. തുടര്‍ന്ന് കുട്ടികളെ എഴുത്തിനിരുത്തല്‍ -ആര്‍ച്ച് ബിഷപ് മാര്‍ ആന്‍റണി കരിയില്‍ കാര്‍മികത്വം വഹിക്കും. വൈകിട്ട് 4.30-ന് സമൂഹബലി, വചന സന്ദേശം, തുടര്‍ന്ന് അങ്ങാടി പ്രദക്ഷിണം, തുടര്‍ന്ന് കരിമരുന്ന് വിസ്മയം. 26ന് രാവിലെ 5.30-ന് കുര്‍ബാന, 10-ന് പാട്ടുകുര്‍ബാന ഫാ. ലിന്‍റോ കാട്ടുപറമ്പില്‍ കാര്‍മികത്വം വഹിക്കും, ഫാ. ജോണ്‍സണ്‍ കൂവേലി വചന സന്ദേശം നല്‍കും. തുടര്‍ന്ന് പ്രസുദേന്തി വാഴ്ച്ച, അങ്ങാടി പ്രദക്ഷിണം. വൈകിട്ട് നാലിന് ആവിലാസ്പര്‍ശം-പരീക്ഷ ഒരുക്ക ശുശ്രൂഷ ഫാ. വക്കച്ചന്‍ കൂമ്പയില്‍ കാര്‍മികത്വം വഹിക്കും. അഞ്ചിന് കുര്‍ബാന ഫാ. അലന്‍ കാളിയങ്കര കാര്‍മികത്വം വഹിക്കും. പള്ളിചുറ്റി പ്രദക്ഷിണം, രൂപം എടുത്തുവയ്ക്കല്‍. തുടര്‍ന്ന് കുന്നലകാടന്‍സ് അവതരിപ്പിക്കുന്ന മെഗാ ഫ്യൂഷന്‍ ചെണ്ടമേളം. 27ന് മരിച്ചവരുടെ ഓര്‍മദിനം. രാവിലെ 6.30-ന് കുര്‍ബാന. എട്ടാമിടം നവംബര്‍ ഒന്ന്, രണ്ട് തീയതികളില്‍ ആഘോഷിക്കും. അസി. വികാരി ഫാ. ജിഫിന്‍ മാവേലി, ജന. കണ്‍വീനര്‍ ആന്‍റണി ഇടപ്പുളവന്‍, ജോയിന്‍റ് കണ്‍വീനര്‍മാരായ പാപ്പച്ചന്‍ കരോട്ടപ്പുറം, ജോണി രോട്ടപ്പുറം, കൈക്കാരന്‍മാരായ സാബു ചുള്ളി, ലിയോ പോള്‍ ആപ്പാടന്‍, ഷിജന്‍ ഉതുപ്പാന്‍, പ്ലിസിറ്റി കണ്‍വീനര്‍ പീയൂസ് തോമസ് കോച്ചിലാന്‍ എന്നിവര്‍ പത്രസമ്മേളനത്തിൽ പങ്കെടുത്തു. മൂക്കന്നൂർ സെന്‍റ് മേരീസ് ഫൊറോന പള്ളിയിൽ അങ്കമാലി : മൂക്കന്നൂർ സെന്‍റ് മേരീസ് ഫൊറോന പള്ളിയിൽ പരിശുദ്ധ വ്യാകുല മാതാവിന്‍റെ തിരുനാൾ 24,25,26 തീയതികളിൽ ആഘോഷിക്കും. തിരുനാൾ കൊടിയേറ്റം 24ന് വൈകീട്ട് 5.30-ന് അതിരൂപത വികാരി ജനറാൾ റവ. ഡോ. ജിമ്മി പൂച്ചക്കാട്ട് നിർവഹിക്കും. ലദീഞ്ഞും വിശുദ്ധ കുർബാനയും ഉണ്ടാകും. രാത്രി ഏഴിന് സെലിബ്രിറ്റി സ്റ്റാർ സിംഗേഴ്സിന്‍റെ ഗാനമേള നടക്കും. 25-ന് രാവിലെ 5.30-നും 6.45-നും ദിവ്യബലി, വൈകീട്ട് 4.45-ന് തിരുസ്വരൂപം എഴുന്നള്ളിക്കൽ, അഞ്ചിന് ആഘോഷമായ വിശുദ്ധ കുർബ്ബാനക്ക് ഫാ ജെസ്റ്റിൻ പാലിമറ്റം കാർമികത്വം വഹിക്കും . ഫാ. ബോസ്കോ ഞാളിയത്ത് പ്രസംഗിക്കും. ഭരണി പ്പറമ്പ് കപ്പേളയിലേക്ക് പ്രദക്ഷിണം, തുടർന്ന് ആകാശ വിസ്മയം, വാദ്യമേളം, ഫ്യൂഷൻ എന്നിവ നടക്കും. 26ന് തിരുനാൾ ദിനം പ്രമാണിച്ച് രാവിലെ 6.45 നും 9.30-നും 11.30-നും വിശുദ്ധ കുർബ്ബാന, വൈകീട്ട് അഞ്ചിന് ആഘോഷമായ പാട്ടുകുർബാന - ഫാ. പോൾസൺ പെരേപ്പാടൻ, പ്രസംഗം - ഫാ. സനു പുതുശേരി, തുടർന്ന് തെക്ക് വടക്കേ അങ്ങാടി പ്രദക്ഷിണം, വാദ്യമേളം, ഫ്യൂഷൻ എന്നിവയാണ് പരിപാടികൾ. പാലാരിവട്ടം സെന്‍റ് ജോൺ ദി ബാപ്റ്റിസ്റ്റ് പള്ളിയിൽ പാലാരിവട്ടം: സെന്‍റ് ജോൺ ദി ബാപ്റ്റിസ്റ്റ് പള്ളിയിൽ വിശുദ്ധ റാഫേൽ മാലാഖയുടെ തിരുനാൾ 24 മുതൽ 26 വരെ ആഘോഷിക്കും. 24 ന് രാവിലെ 10.30 ന് ദിവ്യബലി, നൊവേന, വൈകിട്ട് അഞ്ചിന് പ്രസുദേന്തി വാഴ്ച. തുടർന്ന് കൊടിയേറ്റ്. ദിവ്യബലിക്ക് ഫാ .സെബാസ്റ്റ്യൻ കുരിശുവീട്ടിൽ കാർമികത്വം വഹിക്കും. ഫാ. സാവിയോ ആന്‍റണി തെക്കേപാടത്ത് പ്രസംഗിക്കും. 25 ന് വൈകുന്നേരം അഞ്ചിന് ഫാ.മാർട്ടിൻ തൈപ്പറമ്പിലിന്‍റെ കാർമികത്വത്തിൽ ദിവ്യബലി. ഫാ. ഷെറിൻ ചെമ്മായത്ത് പ്രസംഗിക്കും. തിരുനാൾ ദിനമായ 26ന് വൈകിട്ട് 5.30ന് ആഘോഷമായ ദിവ്യബലിക്ക് ഫാ.സിജൻ മണുവേലിപ്പറമ്പിൽ കാർമികനാകും. പ്രസംഗം: ഫാ.എബിൻ ജോസ് വാരിയത്ത്തിരുനാൾ ഏറ്റെടുത്തു നടത്തുന്നത് 20 പേർ അടങ്ങുന്ന യുവ തേജസ് അംഗങ്ങളാണെന്ന് വികാരി ഫാ.ജോജി കുത്തുകാട്ട് അറിയിച്ചു.

രക്തദാന ക്യാമ്പ് നടത്തി

കോതമംഗലം: സർവീസിലിരിക്കെ ജീവൻ നഷ്ടപ്പെട്ട പോലീസ് ഉദ്യോഗസ്ഥരെ അനുസ്മരിച്ച് പോലീസ് ഡിപ്പാർട്ട്മെന്‍റ് സംസ്ഥാനതലത്തിൽ നടപ്പാക്കുന്ന മെഗാ രക്തദാന ക്യാമ്പ് സംരക്ഷ പെരുമ്പാവൂർ ഡിവൈഎസ്പി ഓഫീസിൽ നടത്തി.കോതമംഗലം സെന്‍റ് ജോസഫ് ധർമഗിരി ആശുപത്രിയുടെ സഹകരണത്തോടെയാണ് രക്തദാന ക്യാമ്പ് നടത്തിയത്. പെരുമ്പാവൂർ മേഖലയിലെ വിവിധ സ്റ്റേഷനുകളിൽ നിന്നുള്ള പോലീസ് ഉദ്യോഗസ്ഥരും, പൊതുജനങ്ങളും ഉൾപ്പെടെ നിരവധി പേർ രക്തദാനത്തിൽ പങ്കാളികളായി. ഇൻസ്പെക്ടർമാരായ ജി.പി മനുരാജ്, ജോസി എം. ജോൺസൻ, എം.എസ്. ശിവൻ, സെന്‍റ് ജോസഫ് ഹോസ്പിറ്റൽ അസിസ്റ്റന്‍റ് നഴ്സിംഗ് സൂപ്രണ്ട് സിസ്റ്റർ റോസിൻ, പിആർഒ ജിറ്റോ ഷൈജു, ബ്ലഡ്‌ ബാങ്ക് ഇൻചാർജ് സിസ്റ്റർ സ്റ്റെല്ല മരിയ, സിസ്റ്റർ സോഫിൻ എന്നിവർ നേതൃത്വം നൽകി.

വല്ലം ഫൊറോന പള്ളിയില്‍ തിരുനാളിനു നാളെ കൊടിയേറും

പെരുമ്പാവൂര്‍: വല്ലം ഫൊറോന പള്ളിയില്‍ വിശുദ്ധ അമ്മത്രേസ്യായുടെ തിരുനാള്‍ 23 മുതൽ 26 വരെ ആഘോഷിക്കുമെന്ന് വികാരി ഫാ. സെബാസ്റ്റ്യന്‍ മാടശേരി പത്രസമ്മേളനത്തിൽ അറിയിച്ചു. തിരുനാളിനോടനുബന്ധിച്ചുള്ള നൊവേന 13ന് തുടങ്ങി. നാളെ രാവിലെ ഏഴിന് വികാരി ഫാ. സെബാസ്റ്റ്യന്‍ മാടശേരി തിരുനാള്‍ കൊടിയേറ്റും. തുടര്‍ന്ന് കുര്‍ബാന. വൈകിട്ട് ആറിന് കുര്‍ബാന, നൊവേന, ലദീഞ്ഞ് ഫാ. ലിധിന്‍ ചെങ്ങോട്ടുതറയില്‍ കാര്‍മികത്വം വഹിക്കും. 24ന് രാവിലെ ഏഴിന് കുര്‍ബാന, ഫാ. ജിജോ കളപ്പുരയ്ക്കല്‍ കാര്‍മികത്വം വഹിക്കും. തുടര്‍ന്ന് പന്തല്‍ വെഞ്ചിരിപ്പ്, ഓഹരി നെയ്യപ്പം ചുടല്‍. വൈകിട്ട് ആറിന് കുര്‍ബാന, നൊവേന, ലദീഞ്ഞ് ഫാ. സുശീല്‍ കിഴക്കേക്കുന്നേല്‍ കാര്‍മികത്വം വഹിക്കും. 25ന് രാവിലെ ഏഴിന് കുര്‍ബാന. ഫാ. ജോര്‍ജ് പുത്തന്‍പറമ്പില്‍ കാര്‍മികത്വം വഹിക്കും. 9.30ന് വി. അമ്മത്രേസ്യായുടെ തിരുശേഷിപ്പും തിരുസ്വരൂപവും എഴുന്നള്ളിച്ചുവയ്ക്കല്‍, തുടര്‍ന്ന് പാട്ടുകുര്‍ബാനയ്ക്ക് ഫാ. ജസ്‌ലിന്‍ തെറ്റയില്‍ കാര്‍മികത്വം വഹിക്കും. ഫാ. ജസ്റ്റിന്‍ കൈപ്രമ്പാടന്‍ വചനസന്ദേശം നല്‍കും. തുടര്‍ന്ന് കുട്ടികളെ എഴുത്തിനിരുത്തല്‍ ആര്‍ച്ച് ബിഷപ് മാര്‍ ആന്‍റണി കരിയില്‍ കാര്‍മികത്വം വഹിക്കും. വൈകിട്ട് 4.30ന് സമൂഹബലി, വചന സന്ദേശം, തുടര്‍ന്ന് അങ്ങാടി പ്രദക്ഷിണം, തുടര്‍ന്ന് കരിമരുന്ന് വിസ്മയം. 26ന് രാവിലെ 5.30ന് കുര്‍ബാന, 10ന് പാട്ടുകുര്‍ബാന ഫാ. ലിന്‍റോ കാട്ടുപറമ്പില്‍ കാര്‍മികത്വം വഹിക്കും, ഫാ. ജോണ്‍സണ്‍ കൂവേലി വചന സന്ദേശം നല്‍കും. തുടര്‍ന്ന് പ്രസുദേന്തി വാഴ്ച്ച, അങ്ങാടി പ്രദക്ഷിണം. വൈകിട്ട് നാലിന് ആവിലാസ്പര്‍ശം-പരീക്ഷ ഒരുക്ക ശുശ്രൂഷ ഫാ. വക്കച്ചന്‍ കൂമ്പയില്‍ കാര്‍മികത്വം വഹിക്കും. അഞ്ചിന് കുര്‍ബാന ഫാ. അലന്‍ കാളിയങ്കര കാര്‍മികത്വം വഹിക്കും. പള്ളിചുറ്റി പ്രദക്ഷിണം, രൂപം എടുത്തുവയ്ക്കല്‍. തുടര്‍ന്ന് കുന്നലകാടന്‍സ് അവതരിപ്പിക്കുന്ന മെഗാ ഫ്യൂഷന്‍ ചെണ്ടമേളം. 27ന് മരിച്ചവരുടെ ഓര്‍മദിനം. രാവിലെ 6.30ന് കുര്‍ബാന. എട്ടാമിടം നവംബര്‍ ഒന്ന്, രണ്ട് തീയതികളില്‍ ആഘോഷിക്കും. അസി. വികാരി ഫാ. ജിഫിന്‍ മാവേലി, ജന. കണ്‍വീനര്‍ ആന്‍റണി ഇടപ്പുളവന്‍, ജോയിന്‍റ് കണ്‍വീനര്‍മാരായ പാപ്പച്ചന്‍ കരോട്ടപ്പുറം, ജോണി രോട്ടപ്പുറം, കൈക്കാരന്‍മാരായ സാബു ചുള്ളി, ലിയോ പോള്‍ ആപ്പാടന്‍, ഷിജന്‍ ഉതുപ്പാന്‍, പ്ലിസിറ്റി കണ്‍വീനര്‍ പീയൂസ് തോമസ് കോച്ചിലാന്‍ എന്നിവര്‍ പത്രസമ്മേളനത്തിൽ പങ്കെടുത്തു.

ദേശീയ തപാൽ ദിനാചരണം നടത്തി

കോതമംഗലം: വൈസ്മെൻ ക്ലബ് ഓഫ് നെല്ലിമറ്റം ഡയമണ്ട്സ് ദേശീയ പോസ്റ്റൽ ദിനാചരണവും, മൈ സ്റ്റാമ്പ് പദ്ധതിയുടെ ഭാഗമായി പുതിയ സ്റ്റാമ്പ് പ്രകാശനവും നടത്തി. പ്രസിഡന്‍റ് ഷാജി മാത്യു അധ്യക്ഷത വഹിച്ചു. വൈസ്മെൻ ഡിസ്ട്രിക്ട് ഗവർണർ മിൽസൺ ജോർജ് ഉദ്ഘാടനം നിർവഹിച്ചു. ക്ലബിന്‍റെ പേരിൽ ആരംഭിച്ച സ്റ്റാമ്പിന്‍റെ പ്രകാശനം ആലുവ പോസ്റ്റൽ ഡിപ്പാർട്ട്മെന്‍റ് മാർക്കറ്റിംഗ് എക്സിക്യുട്ടിവ് ഷിനു അലിയാർ നിർവഹിച്ചു. കവളങ്ങാട് പഞ്ചായത്ത് പ്രസിഡന്‍റായി ചുമതലയേറ്റ ഷിബു വടവരമ്പത്തിനെയും, നെല്ലിമറ്റം പോസ്റ്റ് ഓഫീസിൽ കഴിഞ്ഞ 12 വർഷം സേവനം ചെയ്ത വി.ടി. സുധയെയും ആദരിച്ചു. വൈസ് മെൻ ഇന്‍റർനാഷണൽ കമ്മിറ്റി അംഗം ലൈജു ഫിലിപ്പ് , ടോമി ചെറുകാട്ട്, ബിനോയി പോൾ, ബേബിച്ചൻ നിധീരിക്കൽ, ജോർജ് എടപ്പാറ, ലിസി ടോമി എന്നിവർ പ്രസംഗിച്ചു.

കോൺഗ്രസ് പദയാത്ര നടത്തി

പോത്താനിക്കാട്: കോൺഗ്രസ് പോത്താനിക്കാട് മണ്ഡലം കമ്മിറ്റിയുടെ നേതൃത്വത്തിൽ പഞ്ചായത്തിലുടനീളം നടത്തിയ ജനപക്ഷ യാത്രയുടെ സമാപന സമ്മേളനം ഡിസിസി പ്രസിഡന്‍റ് മുഹമ്മദ് ഷിയാസ് ഉദ്ഘാടനം ചെയ്തു. ജാഥാ ക്യാപ്റ്റൻ ഷാജി ചെനയപ്പിള്ളിയുടെ നേതൃത്വത്തിൽ പറമ്പഞ്ചേരിയിൽ നിന്നാരംഭിച്ച യാത്രയ്ക്ക് മാത്യു കുഴൽനാടൻ എംഎൽഎ പതാക കൈമാറി. കോൺഗ്രസ് മഞ്ഞള്ളൂർ ബ്ലോക്ക് പ്രസിഡന്‍റ് സുബാഷ് കടയ്ക്കോട്ട്, പോത്താനിക്കാട് പഞ്ചായത്ത് പ്രസിഡന്‍റ് സജി കെ. വർഗീസ്, ആശ ജിമ്മി തുടങ്ങിയവർ പ്രസംഗിച്ചു. മൂവാറ്റുപുഴ : കേന്ദ്ര സംസ്ഥാന സര്‍ക്കാരുകളുടെ ജനദ്രോഹ നയങ്ങള്‍ക്കെതിരെ കോണ്‍ഗ്രസ് വാളകം മണ്ഡലം പ്രസിഡന്‍റ് ജോളി മോന്‍ ചുണ്ടയിലിന്‍റെ നേതൃത്വത്തിൽ ജനപക്ഷ യാത്ര വാളകം പഞ്ചായത്തിന്‍റെ വിവിധ പ്രദേശങ്ങളില്‍ നടത്തി. കാൽനടയായി നടത്തിയ യാത്ര കടാതി പാലം ജംഗ്ഷനില്‍ ഡീന്‍ കുര്യാക്കോസ് എംപി ഉദ്ഘാടനം ചെയ്തു. പദയാത്രയില്‍ മാത്യൂ കുഴല്‍നാടന്‍ എംഎല്‍എ, കെപിസിസി സെക്രട്ടറി കെ.എം. സലിം, ബ്ലോക്ക് പ്രസിഡന്‍റ് സാബു ജോണ്‍, വൈസ് പ്രസിഡന്‍റ് കെ.ഒ ജോര്‍ജ്, പഞ്ചായത്ത് പ്രസിഡന്‍റ് കെ.പി. അബ്രഹാം, ബിനോ കെ. ചെറിയാന്‍, സാബു പി. വാഴയില്‍, ഒ.വി ബാബു, തുടങ്ങിയവർ പങ്കെടുത്തു.

ബസിടിച്ച് വൈദ്യുത പോസ്റ്റ് തകര്‍ന്നു

മൂവാറ്റുപുഴ: എസ്എന്‍ഡിപി ജംഗ്ഷനിൽ ബസ് ഇടിച്ച് റോഡരികിലെ വൈദ്യുത പോസ്റ്റ് തകര്‍ന്നു. യാത്രക്കാർക്ക് ആർക്കും പരിക്കില്ല. ഇന്നലെ രാവിലെയായിരുന്നു സംഭവം. കെഎസ്ഇബി ഉദ്യോഗസ്ഥര്‍ സ്ഥലത്തെത്തി ഒടിഞ്ഞ പോസ്റ്റ് നീക്കം ചെയ്ത് പുതിയത് സ്ഥാപിച്ചു. പിഒ ജംഗ്ഷന്‍ മുതല്‍ കച്ചേരിത്താഴം വരെയുള്ള നാലുവരി വാഹന ഗതാഗതം ആരംഭിച്ചതും മീഡിയനും ഇരുവശങ്ങളിലും അഞ്ചടിയിലേറെ ഉയരത്തില്‍ ഇരുമ്പ് കൈവരികൾ സ്ഥാപിച്ചതും അപകടത്തിനു കാരണമാകുന്നുവെന്ന് നാട്ടുകാർ ആരോപിച്ചു.

വിവാദങ്ങൾക്കൊടുവിൽ കൂത്താട്ടുകുളത്തെ മിനി മാസ്റ്റ് ലൈറ്റ് ഉദ്ഘാടനം ചെയ്തു

കൂത്താട്ടുകുളം : ഉദ്ഘാടനത്തിന് മണിക്കൂറുകൾക്ക്‌ മുൻപ് മിനി മാസ്റ്റ് ലൈറ്റിന്‍റെ സപ്പോർട്ടിംഗ് പോസ്റ്റ് മാറ്റിസ്ഥാപിച്ചു. സിപിഎമ്മിന്‍റെ കൊടിമരത്തിന് മറവായ വൈദ്യുതി പോസ്റ്റാണ് പരാതിയെ തുടർന്ന് മാറ്റി സ്ഥാപിച്ചത്. കൂത്താട്ടുകുളം അരഞ്ഞാണിതാഴത്ത് ഫ്രാൻസിസ് ജോർജ് എംപി യുടെ പ്രാദേശിക വികസന ഫണ്ട് ഉപയോഗിച്ച് സ്ഥാപിച്ച മിനി മാസ്റ്റ് ലൈറ്റിലേക്ക് വൈദ്യുതി എത്തിക്കുന്നതിന് സ്ഥാപിച്ചിട്ടുള്ള പോസ്റ്റാണ് മാറ്റി സ്ഥാപിച്ചത്. ഇന്നലെ വൈകുന്നേരം ആറിന് ഉദ്ഘാടനം നടത്താനിരിക്കെയാണ് കെഎസ്ഇബിയുടെ നടപടി. ഈ ലൈറ്റ് ഇന്നലെ ഉദ്ഘാടനം ചെയ്യാൻ കഴിയില്ല എന്നാണ് കെഎസ്ഇബി ഉദ്യോഗസ്ഥർ വാർഡ് കൗൺസിലറെ അറിയിച്ചത്. പോസ്റ്റ് മൂലം സമീപമുള്ള സിപിഎമ്മിന്‍റെ കൊടിമരം മറഞ്ഞുപോകും എന്ന് സിപിഎം നേതൃത്വം കെഎസ്ഇബി എഇയ്ക്ക്‌ രേഖാമൂലം പരാതി നൽകിയിട്ടുണ്ടെന്നും പോസ്റ്റ് മാറ്റി സ്ഥാപിച്ചശേഷമേ മിനി മാസ്റ്റ് ലൈറ്റിലേക്ക്‌ വൈദ്യുതി നൽകാൻ കഴിയുകയുള്ളൂ എന്നുമായിരുന്നു കെഎസ്ഇബിയുടെ ആദ്യ നിലപാട്. പിന്നീട് കെഎസ്ഇബിയുടെ പ്രവർത്തിയെ വാർഡ് മെമ്പർ ചോദ്യം ചെയ്തതിന്‍റെ അടിസ്ഥാനത്തിൽ പോസ്റ്റ് മാറ്റി സ്ഥാപിച്ച് ഉദ്ഘാടനത്തിനുള്ള സൗകര്യം ഒരുക്കുകയായിരുന്നു. അതിനിടെ നഗരസഭാ പ്രദേശത്ത് സ്ഥാപിച്ചിട്ടുള്ള രാഷ്ട്രീയപാർട്ടികളുടെ കൊടിമരങ്ങളും ഫ്ലക്സ് ബോർഡുകളും നഗരസഭാ പരിധിയിൽ നീക്കം ചെയ്യണമെന്ന ഹൈക്കോടതി ഉത്തരവ് നിലനിൽക്കെയാണ് കെഎസ്ഇബി ഇത്തരത്തിലുള്ള ഒരു പ്രവർത്തി ചെയ്യുന്നതെന്ന് വാർഡ് കൗൺസിലർ പ്രിൻസ് പോൾ ജോൺ പറഞ്ഞു.

ശാസ്ത്ര സാങ്കേതിക മേള: ആയവന ഗവ. ടെക്‌നിക്കല്‍ ഹൈസ്‌കൂളിന് ‍ഉന്നത വിജയം

മൂവാറ്റുപുഴ : ആയവന ഗവ. ടെക്‌നിക്കല്‍ ഹൈസ്‌കൂളിന് സംസ്ഥാന ശാസ്ത്ര സാങ്കേതിക മേളയില്‍ ഉന്നത വിജയം. കൃഷ്ണപുരം ഗവ. ടെക്‌നിക്കല്‍ ഹൈസ്‌കൂളില്‍ നടന്ന ഏഴാമത് അഖിലകേരള ശാസ്ത്ര സാങ്കേതിക മേളയില്‍ ഇലക്ട്രിക്കല്‍ വിഭാഗത്തില്‍, പത്താം ക്ലാസ് വിദ്യാര്‍ഥിയായ എല്‍ഡിന്‍ എല്‍സന്‍ എ ഗ്രേഡും ഗണിതശാസ്ത്ര വിഭാഗത്തില്‍ മുഹമ്മദ് സീനാനും, ആദര്‍ശ് വിമലും എ ഗ്രേഡുകള്‍ കരസ്ഥമാക്കി. ഓട്ടോമൊബൈല്‍ വര്‍ക്കിംഗ് മോഡല്‍ വിഭാഗത്തില്‍ എല്‍വിന്‍ ഷിജോ, ത്രെഡ് പാറ്റേണ്‍ വിഭാഗത്തില്‍ മാത്യൂസ് ബിജുവും എ ഗ്രേഡുകള്‍ കരസ്ഥമാക്കിയതോടൊപ്പം പ്രൊഡക്ട് യൂസിംഗ് വേസ്റ്റ് മെറ്റീരിയല്‍ വിഭാഗത്തില്‍ ഗോവിന്ദ സുരേഷും ബി ഗ്രേഡ് നേടി.

വോട്ടർപട്ടികയിൽ നിന്ന് കന്യാസ്ത്രീകളെ ഒഴിവാക്കാൻ ശ്രമിക്കുന്നതായി പരാതി

കൂത്താട്ടുകുളം : നഗരസഭയിലെ വോട്ടർ പട്ടികയിൽ നിന്ന് കന്യാസ്ത്രീ സമൂഹത്തെ ഉൾപ്പെടെ മനപൂർവം ഒഴിവാക്കാൻ ശ്രമിക്കുന്നതായി പരാതി. നഗരസഭയിലെ ഏഴാം ഡിവിഷനിൽ ദേവമാതാ കോൺവെന്‍റിലെ പതിമൂന്ന് കന്യാസ്ത്രീകളെയും സമീപത്തു തന്നെയുള്ള കരുണാഭവനിലെ അന്തേവാസിയെയുമാണ് പട്ടികയിൽ നിന്ന് ഒഴിവാക്കാൻ ശ്രമിക്കുന്നതായി പരാതി ഉയർന്നിരിക്കുന്നത്. നിലവിൽ പ്രസിദ്ധീകരിച്ചിട്ടുള്ള വോട്ടർ പട്ടികയിൽ പെടുന്ന കന്യാസ്ത്രീകൾ അടക്കമുള്ള 14 പേർ ഇവിടുത്തെ സ്ഥിരതാമസക്കാരല്ല എന്ന് കാണിച്ച് ഡിവൈഎഫ്ഐ പ്രവർത്തകർ നഗരസഭാ സൂപ്രണ്ടിന് പരാതി നൽകിയിരുന്നു. പരാതിയുടെ അടിസ്ഥാനത്തിൽ 14 പേരെയും നഗരസഭയിൽ വിളിച്ചുവരുത്തി ബയോമെട്രിക്കൽ സംവിധാനങ്ങൾ ഉപയോഗിച്ച് രേഖകൾ പരിശോധിക്കുകയും പരാതി തള്ളുകയും ചെയ്തു. നിലവിൽ വീണ്ടും ഇതേ 14 പേർക്കെതിരെ ഡിവൈഎഫ്ഐ നേതൃത്വം പരാതി നൽകിയിരിക്കുകയാണ്. പരാതി ലഭിച്ച സാഹചര്യത്തിൽ വീണ്ടും രേഖകൾ പരിശോധിക്കുന്നതിന് ഇവർ നഗരസഭയിൽ ഹാജരാകണം എന്നാണ് നഗരസഭാധികൃതർ അറിയിച്ചിട്ടുള്ളത്. ഹാജരാക്കാത്ത പക്ഷം പുതിയ പട്ടികയിൽ നിന്ന് ഇവരെ ഒഴിവാക്കും. ഇത്തരത്തിലുള്ള നടപടികൾ വളരെയധികം ബുദ്ധിമുട്ടുകൾ ഉണ്ടാക്കുന്നുണ്ടെന്ന് ദേവമാതാ കോൺവെന്‍റിലെ മദർ സുപ്പീരിയർ സിസ്റ്റർ ആൻസി എസ്എബിഎസ്, വാർഡ് കൗൺസിലർ റോയി ഇരട്ടയാനിക്കൽ എന്നിവർ പറഞ്ഞു. കളക്ടർ ഉൾപ്പെടെയുള്ളവർക്ക് പരാതി നൽകാൻ ഒരുങ്ങുകയാണ് ഇവർ.

പ്ലൈവുഡ് കമ്പനികളിലെ മാലിന്യ പ്രശ്‌നം: പട്ടികജാതി കമ്മീഷന്‍ തെളിവെടുത്തു

മൂവാറ്റുപുഴ : പായിപ്ര മാനാറി പ്രദേശങ്ങളിലെ പ്ലൈവുഡ് കമ്പനികളിലെ മാലിന്യ പ്രവാഹത്തിനെതിരെ ജനരോഷം ശക്തമായതോടെ പട്ടികജാതി കമ്മീഷൻ തെളിവെടുപ്പ് നടത്തി. ബ്ലോക്ക് പഞ്ചായത്തംഗം എം.എ. റിയാസ്ഖാന്‍റെ പരാതിയുടെ അടിസ്ഥാനത്തിലായിരുന്നു പട്ടികജാതി കമ്മീഷന്‍റെ തെളിവെടുപ്പ്. കമ്മീഷന്‍ അംഗം പി.കെ. വാസുവിന്‍റെ നേതൃത്വത്തിലാണ് പൊതുജനങ്ങളുടെ പരാതികൾ നേരിട്ട് കേട്ടത്. തുടര്‍ന്ന് പായിപ്ര പഞ്ചായത്തിലെത്തിയ കമ്മീഷന്‍ പഞ്ചായത്ത് സെക്രട്ടറി, പൊല്യൂഷന്‍ കമ്മീഷന്‍, മെഡിക്കല്‍ ഓഫീസര്‍ എന്നിവരില്‍ നിന്നും വിവരങ്ങള്‍ ശേഖരിച്ചു. 30 ദിവസത്തിനകം പഞ്ചായത്തും, പൊല്യൂഷന്‍ കമ്മീഷനും, മെഡിക്കല്‍ ഓഫീസറും പട്ടികജാതി കമ്മീഷന് റിപ്പോര്‍ട്ട് നല്‍കണമെന്ന് നിര്‍ദേശവും നല്‍കി. ബ്ലോക്ക് പഞ്ചായത്തംഗം എം.എ. റിയാസ്ഖാന്‍, പികെഎസ് സംസ്ഥാന ട്രഷറര്‍ വി.ആര്‍. ശാലിനി, പഞ്ചായത്ത് സെക്രട്ടറി ബൈജു ബേബി, പൊല്യൂഷന്‍ ഉദ്യോഗസ്ഥന്‍ നോബി ജോണ്‍, പട്ടികജാതി വികസന ഓഫീസര്‍ പി. ചിത്ര, സിപിഎം ലോക്കല്‍ സെക്രട്ടറി ബാബു ബേബി, പായിപ്ര സഹകരണ ബാങ്ക് പ്രസിഡന്‍റ് കെ.എസ്. രങ്കേഷ്പഞ്ചായത്ത് സെക്രട്ടറി കെ.എം. രാജമോഹനന്‍ എന്നിവരും സ്ഥലത്തുണ്ടായിരുന്നു. photo: പായിപ്ര, മാനാറി പ്രദേശങ്ങളിലെ പ്ലൈവുഡ് കമ്പനികളിലെ മാലിന്യ പ്രവാഹത്തിനെതിരെ ലഭിച്ച പരാതിയുടെ അടിസ്ഥാനത്തില്‍ പട്ടികജാതി കമ്മീഷന്‍ അംഗം ടി.കെ. വാസുവിന്‍റെ നേതൃത്വത്തില്‍ തെളിവെടുപ്പ് നടത്തുന്നു

കോണ്‍ഗ്രസിന് മുഖ്യമന്ത്രിയുടെ ഒളിയമ്പ് : ഉമ്മന്‍ചാണ്ടിയുടെ പേര് പറഞ്ഞ് മറുപടി

കൊച്ചി: രണ്ടു പതിറ്റാണ്ട് മുടങ്ങിയും ഇഴഞ്ഞും നീങ്ങിയ കൊച്ചി കോര്‍പറേഷന്‍ പുതിയ ആസ്ഥാന മന്ദിരത്തിന്‍റെ നിര്‍മാണ പൂര്‍ത്തീകരണത്തിന്‍റെ ക്രെഡിറ്റ് തനിക്കോ ഈ കൗണ്‍സിലിനോ മാത്രം അവകാശപ്പെട്ടതല്ലെന്ന് മേയര്‍ എം. അനില്‍കുമാര്‍ പറഞ്ഞ അതേ വേദിയില്‍ കോൺഗ്രസിനെതിരേ മുഖ്യമന്ത്രിയുടെ ഒളിയമ്പ്. അതിനു കോണ്‍ഗ്രസ് മറുപടി നല്‍കിയാകട്ടെ, മുന്‍ മുഖ്യമന്ത്രി ഉമ്മന്‍ചാണ്ടിയുടെ പേര് എടുത്തു പറഞ്ഞും. കോര്‍പറേഷന്‍ എല്‍ഡിഎഫ് ഭരണ സമിതി കഴിഞ്ഞ അഞ്ച് വര്‍ഷക്കാലം ചെയ്ത വികസന പ്രവര്‍ത്തനങ്ങളായിരുന്നു മുഖ്യമന്ത്രി പിണറായി വിജയന്‍ പ്രസംഗത്തില്‍ ഊന്നിപ്പറഞ്ഞത്. 2006ല്‍ പുതിയ കോര്‍പറേഷന്‍ ആസ്ഥാന മന്ദിരത്തിനായി സ്ഥലം വാങ്ങുമ്പോള്‍ എത്രയും വേഗം നിര്‍മാണം പൂര്‍ത്തീകരിക്കണമെന്നതായിരുന്നു ലക്ഷ്യം. എന്നാല്‍ നിശ്ചയിച്ച സമയത്ത് പൂര്‍ത്തീകരിക്കാന്‍ കഴിഞ്ഞില്ല. ഇപ്പോള്‍ നിര്‍മാണം പൂര്‍ത്തീകരിക്കാന്‍ കഴിഞ്ഞു. മുടങ്ങിയതിന്‍റെ കാരണങ്ങള്‍ ഇപ്പോള്‍ വിശദീകരിക്കേണ്ടതില്ല എന്നും മുഖ്യമന്ത്രി പറഞ്ഞു. 20 വര്‍ഷങ്ങള്‍ക്ക് മുന്‍പ് 30 ലക്ഷം വില ഉണ്ടായിരുന്ന ഭൂമി ജിസിഡിഎയില്‍ നിന്ന് ഒരു ലക്ഷം രൂപയ്ക്ക് വാങ്ങി നല്‍കിയത് ഉമ്മന്‍ചാണ്ടി മുഖ്യമന്ത്രിയായിരുന്ന കാലത്താണെന്നും ഡിപിആറിലെ പിഴവ് മൂലം ഉണ്ടായ തടസം പരിഹരിക്കാന്‍ തുക വര്‍ധിപ്പിച്ചുള്ള എസ്റ്റിമേറ്റ് അംഗീകാരിച്ചത് കോണ്‍ഗ്രസ് ഭരണകാലത്താണെന്നുമാണ് മുഖ്യമന്ത്രിക്ക് മറുപടിയായി ഹൈബി ഈഡന്‍ എംപി പറഞ്ഞത്. തുടര്‍ന്ന് പ്രസംഗിച്ച മന്ത്രി പി.രാജീവും യുഡിഎഫ് ഭരണസമിതികളെ "കുത്തി' സംസാരിച്ചു. ആസ്ഥാന മന്ദിര നിര്‍മാണത്തില്‍ അവകാശം ഉന്നയിക്കുന്നവര്‍ നിര്‍മാണം മുടങ്ങിയതിന്‍റെ ഉത്തരവാദിത്വംകൂടി ഏറ്റെടുക്കണമെന്നായിരുന്നു മന്ത്രിയുടെ പരാമര്‍ശം. ഇതിനുള്ള മറുപടി കൂടിയായിരുന്നു ഉമ്മന്‍ചാണ്ടിയുടെ പേര് പരാമര്‍ശിച്ചുകൊണ്ടുള്ള ഹൈബി ഈഡന്‍റെ പ്രസംഗം. നിര്‍മാണത്തിന് തുടക്കമിട്ട് സ്ഥാപിച്ച ഫലകം കണ്ടെടുത്ത് പുതിയ ആസ്ഥാന മന്ദിരത്തിനു മുന്നില്‍ തന്നെ പ്രദര്‍ശിപ്പിക്കണമെന്ന് തുടര്‍ന്ന് പ്രസംഗിച്ച കോണ്‍ഗ്രസ് എംഎല്‍എമാരും ആവശ്യപ്പെട്ടു.

റവന്യൂ ജില്ലാ ശാസ്ത്രമേള: ലോഗോ ക്ഷണിച്ചു

കോതമംഗലം: എറണാകുളം റവന്യൂ ജില്ലാ ശാസ്ത്ര മേള 2025 -26 ആൻഡ് വിഎച്ച്എസ്ഇ സ്കിൽ ഫെസ്റ്റിന് ലോഗോ ക്ഷണിച്ചു. 30, 31 നവംബർ ഒന്ന് തീയതികളിൽ കോതമംഗലം സെന്‍റ് ആഗസ്റ്റിൻസ് ജിഎച്ച്എസ്എസ്, മാർ ബേസിൽ എച്ച്എസ്എസ്, സെന്‍റ് ജോർജ് എച്ച്എസ്എസ്, ശോഭന എച്ച്എച്ച്എസ് എന്നിവിടങ്ങളിൽ ജില്ലാ ശാസ്ത്രമേളയും കോട്ടപ്പടി മാർ ഏലിയാസ് എച്ച്എസ്എസിൽ വിഎച്ച്എസ്ഇ സ്കിൽ ഫെസ്റ്റും നടത്തും. റവന്യൂ ജില്ല ശാസ്ത്രമേളയ്ക്കായി ജില്ലയിലെ എല്ലാ ഗവൺമെന്‍റ്, എയ്ഡഡ്, അംഗീകൃത അൺഎയ്ഡഡ് സ്കൂൾ വിദ്യാർഥികൾക്ക് ലോഗോ മത്സരത്തിൽ പങ്കെടുക്കാം. ശാസ്ത്രമേളയിലെ വിവിധ ഇനങ്ങളുമായി ബന്ധപ്പെട്ട പ്രതീകങ്ങൾ ഉൾപ്പെടുത്തിയാകണം ലോഗോ തയാറാക്കേണ്ടത് എറണാകുളം ജില്ലയുടെതായ പ്രതീകവും ഉൾപ്പെടുത്താം. സ്കൂളുകളിൽ നൽകിയിട്ടുള്ള ഉബുണ്ടു ഓപ്പറേറ്റിംഗ് സിസ്റ്റം അടിസ്ഥാനമാക്കി സ്വതന്ത്ര സോഫ്റ്റ്‌വേർ ഉപയോഗിച്ച് വേണം ലോഗോ തയാറാക്കാൻ. ലോഗോയുടെ വലിപ്പം 720x480 പിക്സൽ സൈസിൽ ആയിരിക്കണം. തയാറാക്കുന്ന ലോഗോയുടെ എഡിറ്റ് ചെയ്യാവുന്ന തരത്തിലുള്ള ഫയൽ നാളെ [email protected] എന്ന ഈമെയിലിലേക്ക് അയക്കണം. ലോഗോയിൽ നിർബന്ധമായും റവന്യു ജില്ല ശാസ്ത്രമേള 2025-26, 2025 ഒക്ടോബർ 30, 31, നവംബർ ഒന്ന് ഉൾപ്പെടുത്തിയിരിക്കണം. ലോഗോ തയാറാക്കിയ കുട്ടിയുടെ പേര്, സ്കൂൾ, ഫോൺ നമ്പര്, കുട്ടിയുടെ ഫോട്ടോ എന്നിവ നിർബന്ധമായും നൽകിയിരിക്കണമെന്ന് എറണാകുളം ജില്ല വിദ്യാഭ്യാസ ഉപഡയറക്ടർ അറിയിച്ചു.

എസ്എൻഡിപി സ്കൂളിലും വൈദിക മഠത്തിലും മോഷണം

ആലുവ: എസ്എൻഡിപി ഹയർ സെക്കൻഡറി സ്കൂളിലും പ്രവേശന കവാടത്തിന് സമീപത്തെ വൈദിക മഠത്തിലും മോഷണം. നിലവിളക്കിൻെറ ഒരു ഭാഗം, ഭണ്ഡാരത്തിലെ തുക, സിസിടിവി കാമറയുടെ ഭാഗങ്ങൾ, സ്കൂൾ ബസിന്‍റെ ജിപിഎസ് എന്നിവയാണ് മോഷണം പോയത്. സ്കൂൾ വളപ്പിലെ വൈദിക മഠത്തിന്‍റെ വാതിൽ കുത്തിത്തുറന്ന് ശ്രീനാരായണ ഗുരുദേവ പ്രതിഷ്ഠയ്ക്ക് മുമ്പിലെ നിലവിളക്കിന്‍റെ മുകൾ ഭാഗമാണ് ഊരിയെടുത്തത്. ഭണ്ഡാരത്തിൽ നിന്ന് പണവും എടുത്തു. സ്കൂൾ പ്രിൻസിപ്പലിന്‍റെ ഓഫീസ് പൂട്ട് തകർത്ത് അകത്തു കടന്ന മോഷ്ടാവ് സിസിടിവി കാമറയുടെ ഡിവിആർ, ഇന്‍റർനെറ്റ് കണക്ഷൻ മോഡം എന്നിവയും മോഷ്ടിച്ചു. ഹെഡ്മിസ്ട്രസ് ഓഫീസിന്‍റെ പൂട്ട് പൊളിച്ച് അകത്ത് കടന്നെങ്കിലും ഒന്നും നഷ്ടമായില്ല. സ്കൂൾ മുറ്റത്ത് പാർക്ക് ചെയ്തിരുന്ന ഒന്നാം നമ്പർ സ്കൂൾ ബസിന്‍റെ ജിപിഎസും മോഷ്ടാവ് അഴിച്ചെടുത്തു. ഇന്നലെ രാവിലെ സ്കൂൾ ജീവനക്കാരെത്തിയപ്പോഴാണ് മോഷണ വിവരം അറിയുന്നത്. ഒരേ രീതിയിലാണ് പൂട്ടുകൾ തകർത്ത് വാതിൽ തുറന്നിരിക്കുന്നത്. ആലുവ ടൗൺ പോലീസ് അന്വേഷണം തുടങ്ങി.

വികസനകാര്യത്തില്‍ വിവേചനമില്ല, ഇനി ഉണ്ടാവുകയുമില്ല: മുഖ്യമന്ത്രി

കൊച്ചി: വികനസത്തിന്‍റെ ഗുണഫലം ജനങ്ങള്‍ക്ക് ലഭിക്കുന്നതില്‍ ഇതുവരെ വിവേചനം ഉണ്ടായിട്ടില്ലെന്നും ഇനിയങ്ങോട്ട് ഉണ്ടാവുകയില്ലെന്നും മുഖ്യമന്ത്രി പിണറായി വിജയന്‍. കൊച്ചിയുടെ സമഗ്രവികസനത്തിനായുള്ള ഒട്ടേറെ പദ്ധതികളാണ് നഗരസഭയുടെ നേതൃത്വത്തില്‍ നടത്തിവരുന്നതെന്നും കൊച്ചി കോര്‍പറേഷന്‍റെ പുതിയ ആസ്ഥാന മന്ദിരോദ്ഘാടനം നിര്‍വഹിച്ചു പ്രസംഗിക്കവേ മുഖ്യമന്ത്രി പറഞ്ഞു. സംസ്ഥാനത്തിന്‍റെ വികസന ക്ഷേമ പ്രവര്‍ത്തനത്തിന്‍റെ അതേ കാഴ്ചപ്പാടാണ് കൊച്ചി കോര്‍പറേഷന്‍ ഭരണസമതിക്കുമുള്ളത്. കോര്‍പറേഷന്‍റെ പുതിയ ആസ്ഥാന മന്ദിരം, തുരുത്തി കോളനിക്കാര്‍ക്കുള്ള പാര്‍പ്പിട സമുച്ചയം തുടങ്ങി മുടങ്ങിക്കിടന്ന പല വികസന, ക്ഷേമ പദ്ധതികളും ഈ ഭരണസമിതി പൂര്‍ത്തിയാക്കി. നവംബര്‍ ഒന്നോടെ അതിദരിദ്രരില്ലാത്ത സംസ്ഥാനമായി കേരളം മാറുകയാണെന്നും ലോകത്തു തന്നെ ചുരുക്കം രാജ്യങ്ങള്‍ക്ക് മാത്രമേ ഈ നേട്ടം അവകാശപ്പെടാനുള്ളൂ എന്നും മുഖ്യമന്ത്രി പറഞ്ഞു. പുതിയ ആസ്ഥാന മന്ദിരത്തിന് മുന്നില്‍ നാട മുറിച്ച് ഉദ്ഘാടനം ചെയ്ത ശേഷമാണ് ഉദ്ഘാടന പ്രസംഗത്തിനായി വേദിയിലെത്തിയത്. ചടങ്ങില്‍ മേയര്‍ എം. അനില്‍കുമാര്‍ അധ്യക്ഷത വഹിച്ചു. മന്ത്രി പി. രാജീവ് മുഖ്യപ്രഭാഷണം നടത്തി. ഹൈബി ഈഡന്‍ എംപി, എംഎംഎല്‍എമാരായ ടി.ജെ. വിനോദ്, കെ.ജെ. മാക്‌സി, കെ. ബാബു, ഉമ തോമസ്, കെ.എന്‍. ഉണ്ണികൃഷ്ണന്‍, ജിസിഡിഎ ചെയര്‍മാന്‍ കെ.ചന്ദ്രന്‍പിള്ള, മുന്‍ മേയര്‍മാരായ സി.എം. ദിനേശ്മണി, കെ.ജെ. സോഹന്‍, ടോണി ചമ്മണി, സൗമിനി ജെയിന്‍, ഡെപ്യൂട്ടി മേയര്‍ കെ.എ. അന്‍സിയ, സ്ഥിരം സമിതി അധ്യക്ഷര്‍ തുടങ്ങിയവര്‍ പ്രസംഗിച്ചു. പഴയ കെട്ടിടത്തെ ചൊല്ലി തര്‍ക്കം കൊച്ചി: കൊച്ചി കോര്‍പറേഷന്‍റെ പുതിയ ആസ്ഥാന മന്ദിരം പ്രവര്‍ത്തനമാരംഭിക്കുമ്പോള്‍ പഴയ കെട്ടിടം എന്തു ചെയ്യണമെന്ന കാര്യത്തില്‍ തര്‍ക്കം തുടങ്ങി. കെട്ടിടം പൈതൃക മ്യൂസിയമായി നിലനിര്‍ത്തണമെന്ന ആവശ്യവുമായി ഒരു വിഭാഗം മുന്നോട്ടു വന്നിട്ടുണ്ട്. ജനറല്‍ ആശുപത്രിയുടെ വികസനത്തിനായി വിട്ടുനല്‍കണമെന്ന് പറയുന്നവരുമുണ്ട്. ഈ ആവശ്യവുമായി ജനറല്‍ ആശുപത്രി അധികൃതർ തന്നെ മുന്നോട്ട് വന്നതായാണ് വിവരം. ഇന്നലെ പുതിയ ആസ്ഥാന മന്ദിരത്തിന്‍റെ ഉദ്ഘാടന വേളയില്‍ പ്രസംഗിച്ച ഹൈബി ഈഡന്‍ എംപിയും ഇക്കാര്യം ഉന്നയിച്ചു. കഴിഞ്ഞ ദിവസം പുതിയ കൗണ്‍സില്‍ ഹാളില്‍ നടത്തിയ പത്രസമ്മേളനത്തില്‍ മാധ്യമ പ്രവര്‍ത്തകര്‍ ഇക്കാര്യം ചൂണ്ടിക്കാട്ടിയപ്പോള്‍ കോര്‍പറേഷന്‍റെ സ്വത്ത് ആര്‍ക്കും വിട്ടുനല്‍കാന്‍ തയാറല്ലെന്ന നിലപാടാണ് സ്വീകരിച്ചത്. മാത്രമല്ല ഒട്ടേറെ ചരിത്ര പ്രാധാന്യമുള്ള കെട്ടിയമായതിനാല്‍ പൈതൃക മ്യൂസിയമായി മാറ്റണമെന്ന ആവശ്യത്തോടുള്ള പിന്തുണയും അദ്ദേഹം പ്രകടിപ്പിച്ചു.

ഓൺലൈൻ ട്രേഡിംഗിലൂടെ 25 കോടി തട്ടിയ കേസ്: അന്വേഷണ സംഘം ഹൈദരാബാദിലേക്ക്

കൊച്ചി: ഓൺലൈൻ ട്രേഡിംഗിലൂടെ എറണാകുളം സ്വദേശിയിൽനിന്ന്‌ 25 കോടി രൂപ തട്ടിയെടുത്ത കേസിൽ വിശദമായ അന്വേഷണത്തിനായി പോലീസ് സംഘം ഹൈദരാബാദിലേക്ക്. കോഴിക്കോടുകാരായ പ്രതികള്‍ കൈവശം വച്ചിരുന്ന വാടക അക്കൗണ്ടുകളില്‍ ചിലത് മുമ്പ് കൈകാര്യം ചെയ്തിരുന്നത് ഹൈദരാബാദ് കേന്ദ്രീകരിച്ച് പ്രവര്‍ത്തിക്കുന്ന സൈബര്‍ തട്ടിപ്പ് സംഘമാണെന്ന് പോലീസ്‌ കണ്ടെത്തിയിരുന്നു. ഈ സംഘത്തിന് തട്ടിപ്പുമായി ബന്ധമുണ്ടോയെന്ന് വിശദമായി പരിശോധിക്കുന്നതിനായി അന്വേഷണ സംഘം ഉടൻ ഹൈദരാബാദിലേക്ക് തിരിക്കും. കേസിന്‍റെ ആദ്യഘട്ടത്തില്‍ ഹൈദരാബാദ് കേന്ദ്രീകരിച്ച് പ്രവര്‍ത്തിക്കുന്ന സംഘത്തിന്‍റെ സാന്നിധ്യം കൊച്ചി സിറ്റി സൈബർ പോലീസ് സംശയിച്ചിരുന്നു. ഹൈദരാബാദിലുള്ള സംഘവുമായി പ്രതികൾ ഫോൺ വിളികൾ നടത്തിട്ടുണ്ടോയെന്നതടക്കം പരിശോധിച്ചു വരികയാണ്.ഇവർ കൈകാര്യം ചെയ്‌ത ബാങ്ക്‌ അക്ക‍ൗണ്ട്‌ വിവരങ്ങളുടെ പരിശോധനയും പുരോഗമിക്കുന്നു. തായ്‌ലൻഡ്‌, ഹോങ്കോംഗ് എന്നിവിടങ്ങളിൽ പ്രതികൾ എത്തിയെന്ന് സൂചന ലഭിച്ചതിന്‍റെ അടിസ്ഥാനത്തിൽ പ്രതികളുടെ വിദേശ ബന്ധവും പോലീസ് അന്വേഷിക്കുന്നുണ്ട്. കേസിലെ പ്രധാന പ്രതികളും കോഴിക്കോട്‌ സ്വദേശികളുമായ പി .കെ റഹീസ്‌ (39), വി. അൻസാർ (39), സി.കെ അനീസ്‌ റഹ്‌മാൻ (25) എന്നിവർ റിമാൻഡിലാണ്‌. ഇവരെ കസ്റ്റഡിയിൽ വാങ്ങി കൂടുതൽ ചോദ്യം ചെയ്യാനൊരുങ്ങുകയാണ്‌ അന്വേഷണസംഘം. ക്യാപിറ്റലിക്‌സ് എന്ന വെബ്സൈറ്റ് വഴി ട്രേഡിംഗ് നടത്തി ഉയർന്നലാഭം ലഭിക്കുമെന്ന് വിശ്വസിപ്പിച്ച് 90 തവണകളായി 25 കോടി രൂപയാണ് സംഘം എറണാകുളം സ്വദേശിയിൽ നിന്ന്‌ തട്ടിയെടുത്തത്‌. 40 ബാങ്ക് അക്ക‍ൗണ്ടുകളുടെ വിവരങ്ങൾ, 250 സിംകാർഡുകൾ, 40 മൊബൈൽ ഫോണുകൾ, നിരവധി ലാപ്ടോപ്പുകളും കംപ്യൂട്ടറുകളും നിരവധി ഡെബിറ്റ് കാർഡുകളും പ്രതികൾ കുറ്റകൃത്യത്തിനായി ഉപയോഗിച്ച കോഴിക്കോട്ടെ ഫ്ലാറ്റിൽനിന്ന്‌ പിടിച്ചെടുത്തിരുന്നു.

അമ്മത്തൊട്ടിലിനു സമീപം ഉപേക്ഷിക്കപ്പെട്ട കുഞ്ഞ് ആശുപത്രിയില്‍ തന്നെ

കൊച്ചി: എറണാകുളം ജനറല്‍ ആശുപത്രിക്ക് സമീപത്തുള്ള അമ്മത്തൊട്ടിലിനടുത്ത് ഉപേക്ഷിക്കപ്പെട്ട ആണ്‍കുഞ്ഞ് ആശുപത്രിയില്‍ തുടരുന്നു. നിലവില്‍ കുഞ്ഞിന് മറ്റ് ആരോഗ്യപ്രശ്‌നങ്ങളൊന്നുമില്ല, ജനറല്‍ ആശുപത്രിയിലെ മുലപ്പാല്‍ ബാങ്കില്‍നിന്ന് കുഞ്ഞിന് പാല്‍ കൊടുക്കുന്നുണ്ട്. മൂന്നുദിവസം കൂടി ആശുപത്രിയില്‍ തുടരേണ്ടിവരും. അതിനുശേഷം സിഡബ്ല്യുസിക്ക് കൈമാറും. പിന്നീട് സ്‌പെഷലൈസ്ഡ് അഡോപ്ഷന്‍ ഏജന്‍സിക്ക് കൈമാറും. മറ്റു നടപടികള്‍ പൂര്‍ത്തിയാക്കി നിശ്ചിത സമയപരിധിക്ക് ശേഷം അവകാശികള്‍ ആരും എത്തിയില്ലെങ്കില്‍ ദത്ത് നല്‍കാനുള്ള നടപടികളിലേക്ക് നീങ്ങും. തിങ്കളാഴ്ച രാവിലെ 6.30ഓടെയാണ് അമ്മത്തൊട്ടിലിനരികിലെ പ്ലാവിന്‍ചുവട്ടില്‍ ബെഡ്ഷീറ്റില്‍ പൊതിഞ്ഞ നിലയില്‍ ജനറല്‍ ആശുപത്രിയിലെ കാവല്‍ക്കാരന്‍ കെ. വിഷ്ണു കുഞ്ഞിനെ കണ്ടെത്തിയത്. 2.60 കിലോഗ്രാം ഭാരമുള്ള കുഞ്ഞിനെ ഉടന്‍ തീവ്രപരിചരണ വിഭാഗത്തിലേക്ക് മാറ്റുകയായിരുന്നു.

റെയില്‍വേ പാലത്തിനു താഴെ അവശനിലയില്‍ കണ്ടെത്തിയ ആളെ ആശുപത്രിയിലാക്കി

കൊച്ചി: എറണാകുളം വെണ്ടുരുത്തി റെയില്‍വേ പാലത്തിനു താഴെ അവശനിലയില്‍ കണ്ടെത്തിയ ആളെ ഫയര്‍ഫോഴ്‌സും പോലീസും ചേര്‍ന്ന് ആശുപത്രിയിലെത്തിച്ചു. കന്യാകുമാരി സ്വദേശി പി.എഫ്. ഷാജി(59)യെയാണ് എറണാകുളം ജനറല്‍ ആശുപത്രിയില്‍ പ്രവേശിപ്പിച്ചത്. ഇദ്ദേഹത്തിന് മാനസികപ്രശ്‌നമുള്ളതായി സംശയിക്കുന്നുവെന്ന് പോലീസ് പറഞ്ഞു. ഇന്നലെ രാവിലെ 10.50നാണ് റെയില്‍വേ പാലത്തിലെ പില്ലര്‍ ആറിനു താഴെ ഒരാള്‍ അവശനിലയില്‍ കിടക്കുന്ന വിവരം പോലീസ് കണ്‍ട്രോള്‍ റൂമില്‍ എത്തിയത്. ഉടന്‍ പോലീസ് ഉദ്യോഗസ്ഥര്‍ അവിടെ എത്തിയെങ്കിലും കായലിനു കുറുകെയുള്ള റെയില്‍പ്പാലത്തിന്‍റെ തൂണിലെ ഇടുങ്ങിയ സ്ഥലത്ത് അബോധാവസ്ഥയില്‍ കിടന്നിരുന്ന ആളെ അവിടെ നിന്ന് പുറത്തെത്തിക്കുക ദുഷ്കരമായിരുന്നു. തുടര്‍ന്ന് ഫയര്‍ഫോഴ്‌സിനെ വിവരം അറിയിച്ചു. 11.15ഓടെ മട്ടാഞ്ചേരി, ക്ലബ് റോഡ് എന്നിവിടങ്ങളില്‍ നിന്നെത്തിയ ഫയര്‍ഫോഴ്‌സ് അംഗങ്ങള്‍ വടംകെട്ടി റെയില്‍വേ പാലത്തിന്‍റെ താഴെയിറങ്ങി. തുടര്‍ന്ന് വലയില്‍ ഇരുത്തി റോപ്പിലൂടെ വലിച്ച് അര മണിക്കൂറിനകം ഇദ്ദേഹത്തെ പാലത്തിനു മുകളില്‍ എത്തിക്കുകയായിരുന്നു. പോലീസ്, ആംബുലന്‍സില്‍ ജനറല്‍ ആശുപത്രിയില്‍ എത്തിച്ചു. ബന്ധുക്കള്‍ ആരുമില്ലെന്നാണ് ഷാജി പോലീസിനോട് പറഞ്ഞത്.

ഫിഷ് ഫ്രൈയുമായി പൂരപ്പറമ്പിൽ; പിഴ ചുമത്തി പുറത്താക്കി

ചോറ്റാനിക്കര: ക്ഷേത്ര ദർശനത്തിനെത്തിയ ഇതര സംസ്ഥാനക്കാരായ ഭക്തർ ഫിഷ് ഫ്രൈയുമായി ഭക്ഷണം കഴിക്കാനിരുന്നത് ചോറ്റാനിക്കരയിൽ നാടകീയ രംഗങ്ങൾ സൃഷ്ടിച്ചു. ആന്ധ്രയിൽ നിന്നെത്തിയ ഭക്തരാണ് ചോറ്റാനിക്കര ക്ഷേത്രത്തിലെ പൂരപ്പറമ്പിൽ ഇന്നലെ മീൻ വറുത്തത് കൂട്ടി ഭക്ഷണം കഴിക്കാൻ തയാറെടുത്തത്. ഇത് കണ്ട് സമീപത്തെ ലോഡ്ജ് ഉടമ അവരെ വിലക്കിയെങ്കിലും അവർ ചെവിക്കൊണ്ടില്ല. ഇതോടെ ക്ഷേത്ര ജീവനക്കാരി സംഭവം മാനേജരെ അറിയിച്ചു. ദേവസ്വം ജീവനക്കാരും മാനേജരും സ്ഥലത്തെത്തിയപ്പോൾ ഒരു പാത്രം നിറയെ മീൻ വറുത്തതെടുത്ത് ഭക്ഷണം കഴിക്കാനുള്ള തയാറെടുപ്പിലായിരുന്നു സംഘം. ക്ഷേത്രം മതിൽക്കകത്ത് ഇതൊന്നും അനുവദനീയമല്ലെന്ന് പറഞ്ഞപ്പോൾ അറിയാതെ പറ്റിയതാണെന്ന് മറുപടി. വിവരമറിഞ്ഞ് പോലീസും സ്ഥലത്ത് എത്തി. കുറ്റക്കാർക്ക് എതിരെ ദേവസ്വം ഫൈൻ ചുമത്താൻ തീരുമാനിച്ചതോടെ ഭക്തരെ അനുകൂലിച്ചും ചിലർ രംഗത്തെത്തി. ഇത് ചെറിയ വാക്കുതർക്കത്തിനും കാരണമായി. പിന്നീട് ഇവിടം ശുചിയാക്കാനുള്ള തുക പിഴ ചുമത്തി ഇവരെ പുറത്താക്കുകയായിരുന്നു. അതേസമയം ക്ഷേത്രത്തിന്‍റെ പ്രധാന പാർക്കിംഗ് ഗ്രൗണ്ടായ പൂരപ്പറമ്പ് മതിൽ കെട്ടി തിരിക്കണമെന്ന് കോടതി വിധിയുണ്ടെങ്കിലും ദേവസ്വം നടപ്പാക്കാത്തതാണ് ഇത്തരം അനിഷ്ട സംഭവങ്ങളുണ്ടാകാൻ കാരണമെന്നാണ് പറയുന്നത്.

കടവന്ത്ര-പനമ്പിള്ളിനഗര്‍ മെട്രോ ഫീഡര്‍ ബസ് സർവീസ് ഇന്ന് മുതല്‍

കൊച്ചി: മെട്രോ ഇലക്ട്രിക് ഫീഡര്‍ ബസിന്‍റെ കടവന്ത്ര-പനമ്പിള്ളി നഗര്‍-കെ.പി വള്ളോന്‍ റോഡ് സര്‍ക്കുലര്‍ സര്‍വീസ് ഇന്ന് ആരംഭിക്കും. രാവിലെ എട്ട് മുതല്‍ വൈകുന്നേരം 7.50 വരെയാണ് സര്‍വീസ്. കടവന്ത്ര മെട്രോ സ്റ്റേഷനു മുന്നില്‍ നിന്നാരംഭിച്ച് മനോരമ ജംഗ്ഷന്‍ വഴി പനമ്പള്ളി നഗര്‍ റോഡ്, ജസ്റ്റീസ് കൃഷ്ണയ്യര്‍ റോഡ്, കെ.പി. വള്ളോന്‍ റോഡ്, എസ്എ റോഡ് വഴിയാണ് സര്‍വീസ്.

കൊച്ചി മെട്രോ രണ്ടാം ഘട്ടം : സ്ഥലമെടുപ്പ് സമയബന്ധിതമായി പൂര്‍ത്തിയാക്കണം: ജില്ലാ കളക്ടര്‍

കൊച്ചി: കൊച്ചി മെട്രോയുടെ രണ്ടാം ഘട്ട വികസത്തിന്‍റെ ഭാഗമായുള്ള സ്ഥലമേറ്റെടുപ്പ് നടപടികള്‍ സമയബന്ധിതമായി പൂര്‍ത്തിയാക്കണമെന്ന് ജില്ലാ കളക്ടര്‍ ജി. പ്രിയങ്ക. ജവഹര്‍ലാല്‍ നെഹ്‌റു ഇന്‍റര്‍നാഷണല്‍ സ്റ്റേഡിയം മുതല്‍ കാക്കനാട് ഇന്‍ഫോപാര്‍ക്ക് വരെയുള്ള കൊച്ചി മെട്രോയുടെ രണ്ടാം ഘട്ടത്തിലെ വിവിധ സ്റ്റേഷനുകള്‍ക്ക് ആവശ്യമായ സ്ഥലമേറ്റെടുപ്പ് നടപടികളുടെ പുരോഗതി വിലയിരുത്താന്‍ വിളിച്ചുചേര്‍ത്ത യോഗത്തിലാണ് ജില്ലാ കളക്ടര്‍ ഈ നിർദേശം നല്‍കിയത്. ചെമ്പുമുക്ക്, പടമുകള്‍ സ്റ്റേഷനുകള്‍ക്ക് വേണ്ടിയുള്ള സ്ഥലമേറ്റെടുപ്പ് നടപടികള്‍ സമയക്രമം നിശ്ചയിച്ച് പൂര്‍ത്തിയാക്കണം. ചിലവന്നൂര്‍, ഇടപ്പള്ളി കനാലുകളുടെ നവീകരണത്തിന്‍റെ ഭാഗമായി പുറമ്പോക്ക് കൈയേറ്റങ്ങള്‍ ഒഴിപ്പിക്കുന്നത്തിന് ആവശ്യമായ നടപടികള്‍ സ്വീകരിക്കണം. മൂലേപ്പാടം, പുറവങ്കര, പൈപ്പ്‌ലൈന്‍, കതൃക്കടവ്, ബിടിഎസ് റോഡ് എന്നിവിടങ്ങളിലെ മലിനജല ശുദ്ധീകരണ പ്ലാന്‍റുകള്‍ക്ക് വേണ്ടിയുള്ള സ്ഥലമെടുപ്പ് നടപടികളും സമയബന്ധിതമായി പൂര്‍ത്തിയാക്കാനും ജില്ലാ കളക്ടര്‍ ഉദ്യോഗസ്ഥര്‍ക്ക് നിര്‍ദേശം നല്‍കി. കാക്കനാട് കളക്ടറേറ്റില്‍ ചേര്‍ന്ന യോഗത്തില്‍ കൊച്ചി മെട്രോ ലിമിറ്റഡിലെയും സര്‍വേ, റവന്യു വകുപ്പുകളിലെയും ബന്ധപ്പെട്ട ഉദ്യോഗസ്ഥര്‍ പങ്കെടുത്തു.

90 ശതമാനം വനിതാ സംവരണം : ആദ്യഘട്ട സ്ഥാനാർഥി പട്ടിക പുറത്തുവിട്ട് ട്വന്‍റി 20

കിഴക്കമ്പലം: തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പ് പ്രഖ്യാപിക്കുന്നതിന് വളരെ മുമ്പേ സ്ഥാനാര്‍ഥികളെ പ്രഖ്യാപിച്ച് ട്വന്‍റി 20 പാര്‍ട്ടി. കിഴക്കമ്പലം ഗ്രാമപഞ്ചായത്തിലെ 21 വാര്‍ഡിലെയും വാഴക്കുളം ബ്ലോക്ക് പഞ്ചായത്തിലെ മൂന്ന് ഡിവിഷനുകളിലെയും എറണാകുളം ജില്ലാ പഞ്ചായത്ത് വെങ്ങോല ഡിവിഷനിലെയും അടക്കം 25 സ്ഥാനാര്‍ഥികളെയാണ് ഒന്നാം ഘട്ടമായി പ്രഖ്യാപിച്ചത്. 90 ശതമാനം സ്ത്രീ സംവരണം ഉറപ്പാക്കിയാണ് സ്ഥാനാര്‍ഥി നിര്‍ണയം പൂര്‍ത്തിയാക്കിയത്. കിഴക്കമ്പലം പഞ്ചായത്ത് പാര്‍ട്ടി എക്‌സിക്യൂട്ടീവ് കമ്മിറ്റിയാണ് ഇന്നലെ കിഴക്കമ്പലം ഗ്രാമ പഞ്ചായത്തിലെ സ്ഥാനാര്‍ഥികളെ പ്രഖ്യാപിച്ചത്. കേരള ചരിത്രത്തില്‍ ആദ്യമായാണ് രാഷ്ട്രപുനര്‍നിര്‍മാണ പ്രക്രിയയ്ക്ക് ഇത്രയധികം വനിതാ പങ്കാളിത്തം ഒരു രാഷ്ടീയ പാര്‍ട്ടി ഉറപ്പാക്കുന്നതെന്ന് പാര്‍ട്ടി അധ്യക്ഷന്‍ സാബു എം.ജേക്കബ് പറഞ്ഞു. പാര്‍ട്ടി മത്സരിക്കുന്ന മുഴുവന്‍ പഞ്ചായത്തുകളിലെയും ഒന്നാംഘട്ട പ്രചാരണം പൂര്‍ത്തിയാക്കി. പോസ്റ്റര്‍ പ്രചാരണം, വാള്‍പെയിന്‍റിംഗ്, നോട്ടീസ് വിതരണം, മൈക്ക് അനൗണ്‍സ്‌മെന്‍റ് തുടങ്ങിയവ പൂര്‍ത്തിയാക്കിയതായി സാബു വ്യക്തമാക്കി. മാങ്ങയാണ് പാര്‍ട്ടിയുടെ തെരഞ്ഞെടുപ്പ് ചിഹ്നം. സ്ഥാനാർഥികളുടെ പേരുവിവരം ജില്ലാ പഞ്ചായത്ത് വെങ്ങോല ഡിവിഷൻ: സജന നസീര്‍ വാഴക്കുളം ബ്ലോക്ക് പഞ്ചായത്ത് ചേലക്കുളം ഡിവിഷന്‍ (10) - നിഷ അലിയാര്‍, കിഴക്കമ്പലം ഡിവിഷന്‍ (11) - മറിയാമ്മ ജോണ്‍, പുക്കാട്ടുപടി ഡിവിഷന്‍ (12) - പി.എം.അസ്മ. കിഴക്കമ്പലം പഞ്ചായത്ത് അമ്പുനാട് (1) - കെ.ജി. പ്രീതി , മലയിടംതുരുത്ത് (2) - ബീന ജോസഫ്, മാക്കീനിക്കര (3) - ചിന്നമ്മ പൗലോസ്, കാരുകുളം (4) - മേരി ഏലിയാസ്, കാവുങ്ങപറമ്പ് (5) - ടി.എസ്. സുജിത മോള്‍, ചേലക്കുളം (6) - കെ.എന്‍. പ്രതിമ , കുമ്മനോട് (7) - ഇ.ആര്‍. രാജന്‍ , ചൂരക്കോട് (8) - ജോബി മാത്യു, ചൂരക്കോട് വെസ്റ്റ് (9) - വി.സി. മിനി , ഞാറള്ളൂര്‍ (10) - ദീപ ജേക്കബ്, കുന്നത്തുകുടി (11) - പ്രസീല എല്‍ദോ, വിലങ്ങ് (12) - അമ്പിളി വിജില്‍, പൊയ്യക്കുന്നം (13) - ബിനി ബിജു, കിഴക്കമ്പലം (14) - ജിന്‍സി അജി, പഴങ്ങനാട് (15) - ഷീബ ജോര്‍ജ്, മാളേയ്ക്കമോളം (16) - രാധാമണി ധരണീന്ദ്രന്‍, താമരച്ചാല്‍ (17) - ലിന്‍റ ആന്‍റണി, ഊരക്കാട് (18) - ജിന്‍സി ബിജു, കാനാമ്പുറം (19) - കെ.വി. രാജു , പൂക്കാട്ടുപടി (20) - ജിബി മത്തായി, പുക്കാട്ടുപടി നോര്‍ത്ത് (21) - എം.എം. റഹിം. photo: കിഴക്കമ്പലം പഞ്ചായത്തിലെ ട്വന്‍റി 20 സ്ഥാനാര്‍ഥികള്‍

കാൽനടയാത്രികൻ ലോറിയിടിച്ച് മരിച്ചു

തൃപ്പൂണിത്തുറ: മിനി ബൈപ്പാസിൽ കാൽനടയാത്രക്കാരൻ ലോറിയിടിച്ച് തത്ക്ഷണം മരിച്ചു. തൃപ്പൂണിത്തുറ ശ്രീവെങ്കടേശ്വര സ്കൂളിന് എതിർവശത്ത് താമസിക്കുന്ന പൂണിത്തുറ അയ്യങ്കാളി റോഡ് കളരിക്കത്തറയിൽ വീട്ടിൽ എം.എ. സാബു (56) ആണ് മരിച്ചത്. ഇന്നലെ ഉച്ചയ്ക്കായിരുന്നു അപകടം. പൂണിത്തുറ ഗാന്ധിസ്ക്വയർ മിനി പാർക്കിന് സമീപത്തുകൂടി നടന്നു പോകവെ ഗ്യാസ് സിലിണ്ടർ കയറ്റി വന്ന ലോറി ഇടിക്കുകയായിരുന്നു. കൊച്ചി കോർപറേഷൻ ഹരിത കർമ സേനാംഗമാണ്. സംസ്കാരം ഇന്ന് ഉച്ചയ്ക്ക് 12ന് തൃപ്പൂണിത്തുറ പൊതുശ്മശാനത്തിൽ. ഭാര്യ: രാജി, മക്കൾ: സാന്ദ്രാ സാബു, സാഗർ സാബു. മരുമകൻ: മുഹമ്മദ് തൻസീർ.

മഞ്ഞപ്പിത്തം ബാധിച്ച് മരിച്ചു

അങ്കമാലി: മഞ്ഞപ്പിത്തം ബാധിച്ച് വീട്ടമ്മ മരിച്ചു. മുന്നൂര്‍പ്പിള്ളി പന്തല്ലൂക്കാരന്‍ ഫിനിയുടെ (കാര്‍ഷിക ബാങ്ക് ഉദ്യോഗസ്ഥന്‍, അസോ. സംസ്ഥാന കമ്മിറ്റിയംഗം, കോണ്‍ഗ്രസ് അങ്കമാലി ബ്ലോക്ക് കമ്മിറ്റി ജനറല്‍ സെക്രട്ടറി) ഭാര്യ സിസി ഫിനി (36) ആണ് മരിച്ചത്. സംസ്‌കാരം നടത്തി. തൃശൂര്‍ ചെന്ത്രാപ്പിന്നി പുലിക്കോട്ടില്‍ കുടുംബാംഗമാണ് പരേത. മക്കള്‍: ആന്‍സിയ (പുഷ്പഗിരി സ്‌കൂള്‍), ആല്‍ഫിയ.

പുഴയിൽ കാണാതായ യുവാവിന്‍റെ ‌മൃതദേഹം കണ്ടെത്തി

വരാപ്പുഴ: സുഹൃത്തുക്കൾക്കൊപ്പം പുഴയിൽ കുളിക്കുന്നതിനിടെ കാണാതായ യുവാവിന്‍റെ മൃതദേഹം കണ്ടെത്തി. ചേരാനല്ലൂർ വിഷ്ണുപുരം തുണ്ടിപ്പറമ്പിൽ മുരളിയുടെ മകൻ രാഹുൽ മുരളി (26) ആണ് മരിച്ചത്. സംസ്കാരം നടത്തി. കടമക്കുടി നേവി പാലത്തിനു സമീപം തിങ്കളാഴ്ച വൈകുന്നേരമായിരുന്നു സംഭവം. കൂട്ടുകാരുമൊത്ത് കുളിക്കുന്നതിനിടെ സമീപത്തുള്ള തൂമ്പ് കുഴിയിലേക്കു തെന്നിനീങ്ങിയ രാഹുലിനെ കാണാതാകുകയായിരുന്നു. തുടർന്ന് അഗ്നിരക്ഷാ സേന നടത്തിയ തെരച്ചിലിൽ ഇന്നലെ ഉച്ചയോടെയാണ് മൃതദേഹം കണ്ടെത്തിയത്. അമ്മ: ദീപ.

റോഡ് റോളര്‍ കയറ്റി എയര്‍ഹോണുകൾ തവിടുപൊടി

കൊച്ചി: വാഹനങ്ങളില്‍ നിയമവിരുദ്ധമായി ഘടിപ്പിച്ചിരുന്ന എയര്‍ഹോണുകള്‍ മോട്ടോര്‍ വാഹനവകുപ്പ് പിടിച്ചെടുത്തു നശിപ്പിച്ചു. ജില്ലയില്‍ നടത്തിയ പ്രത്യേക ഡ്രൈവിന്‍റെ ഭാഗമായി പിടികൂടിയ 250ഓളം എയര്‍ ഹോളുകളാണ് മോട്ടോര്‍ വാഹനവകുപ്പ് ഉദ്യോഗസ്ഥരുടെ നേതൃത്വത്തില്‍ ജെസിബി ഉപയോഗിച്ച് നശിപ്പിച്ചത്. ഗതാഗത മന്ത്രിയുടെ നിര്‍ദേശത്തെ തുടര്‍ന്ന് ഇന്നലെ ഉച്ചയോടെ എറണാകുളം കെഎസ്ആര്‍ടിസിക്ക് സമീപം എഎല്‍ ജേക്കബ് പാലത്തിന് സമീപത്തായിരുന്നു നടപടികള്‍. ജെസിബിയില്‍ റോഡ് റോളര്‍ ഘടിപ്പിച്ചാണ് പിടിച്ചെടുത്ത എയര്‍ഹോണുകള്‍ ഉപയോഗശൂന്യമാക്കിയത്. ഇത് രണ്ടാം തവണയാണ് ജില്ലയില്‍ എയര്‍ ഹോണുകള്‍ പിടിച്ചെടുത്ത് നശിപ്പിക്കുന്നത്. കഴിഞ്ഞ് 13ന് ആരംഭിച്ച പ്രത്യേക പരിശോധനകള്‍ ജില്ലയില്‍ തുടരുകയാണ്. എയര്‍ ഹോണ്‍ പിടികൂടുന്ന വാഹനങ്ങള്‍ക്ക് എംവിഡി പിഴിയും ചുമത്തുന്നുണ്ട്. കഴിഞ്ഞയിടെ എയര്‍ഹോണ്‍ മുഴക്കി പാഞ്ഞ 211 വാഹനങ്ങള്‍ മോട്ടര്‍ വാഹന വകുപ്പ് പിടികൂടിയിരുന്നു. ഇവരില്‍ നിന്ന് 4,48,000 രൂപ പിഴയും ചുമത്തി. ഏതാനും മാസം മുമ്പ് എയര്‍ഹോണ്‍ വിമുക്ത നഗരമെന്ന ലക്ഷ്യത്തോടെ മോട്ടര്‍ വാഹന വകുപ്പും പോലീസും നടത്തിയ പരിശോധനയില്‍ ഒട്ടേറെ വാഹനങ്ങള്‍ കുടുങ്ങിയിരുന്നു. പരിശോധനകള്‍ കുറഞ്ഞതോടെ വാഹനങ്ങളില്‍ വീണ്ടും എയര്‍ഹോണുകള്‍ സ്ഥാനം പിടിക്കുന്നുണ്ടെന്നാണ് കണ്ടെത്തൽ. പരിശോധനയിൽ കണ്ടെത്താനാകാത്ത വിധമാണ് ചില വാഹനങ്ങളില്‍ ഇവ ഘടിപ്പിച്ചിട്ടുള്ളതെന്ന് ഉദ്യോഗസ്ഥര്‍ പറഞ്ഞു. അനുവദനീയ ഡെസിബെലില്‍ കൂടുതല്‍ ശബ്ദമുള്ള എയര്‍ഹോണ്‍ വില്‍ക്കുന്ന സ്ഥാപനങ്ങള്‍ക്കെതിരെ നടപടിയെടുക്കുന്നത് സംബന്ധിച്ചും എംവിഡിയുടെ പരിഗണനയിലാണ്.

വേദി കണ്ടും നിയമാവലി കേട്ടും ഞെട്ടി മത്സരാർഥികൾ; കളരിപ്പയറ്റിൽ കല്ലുകടി

തൃപ്പൂണിത്തുറ: സ്കൂൾ ഗെയിംസിന്‍റെ ചരിത്രത്തിൽ ആദ്യമായി മത്സരയിനമാക്കിയ കളരിപ്പയറ്റിൽ സർവത്ര കല്ലുകടി. തൃപ്പൂണിത്തുറ ലായം കൂത്തമ്പലത്തിൽ ജില്ലാ കളരിപ്പയറ്റ് ചാമ്പ്യൻഷിപ്പിനൊപ്പം സ്കൂൾ തല കളരിപ്പയറ്റിന്‍റെ ഉപജില്ലാ, ജില്ലാ മത്സരങ്ങൾ നടത്തിയതും നിയമാവലിയിലെ ആശയക്കുഴപ്പവുമാണ് തർക്കത്തിലും ബഹളത്തിലും കലാശിച്ചത്. സ്കൂൾ ഗെയിംസിന്‍റെ ഭാഗമായ കളരിപ്പയറ്റ് മത്സരം ഉപജില്ലാ തലത്തിലുള്ളത് ഇന്നലെ രാവിലെയും ജില്ലാ തലത്തിലുള്ളത് ഉച്ചയ്ക്ക് ശേഷവും തൃപ്പൂണിത്തുറ ലായം കൂത്തമ്പലത്തിൽ നടക്കുമെന്നായിരുന്നു കുട്ടികളെയും രക്ഷിതാക്കളെയും അറിയിച്ചിരുന്നത്. ഇതനുസരിച്ച് രാവിലെ ഒമ്പതിന് തുടങ്ങുമെന്നറിയിച്ചിരുന്ന മത്സരങ്ങളിൽ പങ്കെടുക്കാൻ വിവിധ സ്ഥലങ്ങളിൽ നിന്ന് വിദ്യാർഥികൾ നേരത്തെ തന്നെയെത്തിയിരുന്നു. ഇവിടെയെത്തിപ്പോഴാണ് എറണാകുളം ജില്ലാ സ്പോർട്സ് കൗൺസിലിന്‍റെയും ജില്ലാ കളരിപ്പയറ്റ് അസോസിയേഷന്‍റെയും ആഭിമുഖ്യത്തിൽ ഇന്നലെ നടക്കുന്ന ജില്ലാ കളരിപ്പയറ്റ് ചാമ്പ്യൻഷിപ്പിനൊപ്പമാണ് സ്കൂൾ ഗെയിംസ് മത്സരങ്ങളും നടക്കുന്നതെന്നറിഞ്ഞത്. വേദിയിൽ സംഘാടകരെ കാണാതെ വിഷമത്തിലായ കുട്ടികളും രക്ഷിതാക്കളും ബഹളം വച്ചപ്പോഴാണ് 10.30 ഓടെ രജിസ്ട്രേഷൻ തുടങ്ങിയത്. സ്കൂൾ കായികമേളയിൽ അണ്ടർ 17, 19 വിഭാഗങ്ങളിൽ ചുവടുകൾ, മെയ് പയറ്റ്, നെടുപടി പയറ്റ് എന്നീയിനങ്ങളിൽ മത്സരങ്ങൾ, സ്കൂൾ ഗെയിംസ് ഫെഡറേഷൻ ഓഫ് ഇന്ത്യ നിഷ്ക്കർഷിച്ചിരിക്കുന്ന നിയമാവലി പാലിച്ചാണ് നടത്തേണ്ടതെന്നാണ് പറഞ്ഞിരുന്നത്. എന്നാൽ ഉപജില്ലാ മത്സരങ്ങൾ തുടങ്ങാൻ മണിക്കൂറുകൾ ബാക്കി നിൽക്കെയാണ് ഇന്ത്യൻ കളരിപ്പയറ്റ് ഫെഡറേഷന്‍റെ ഇവന്‍റ്സ് റൂൾ ബുക്ക് പ്രകാരമാണ് മത്സരങ്ങൾ നടക്കുന്നതെന്ന വിവരം കുട്ടികളറിഞ്ഞത്. മൂവ്മെന്‍റ് സിലബസ് ഇല്ലാത്ത ഒരിടത്തും പബ്ലിഷ് ചെയ്തിട്ടില്ലാത്ത ഈ നിയമപ്രകാരം വിധി നിർണയിക്കാൻ സാധിക്കില്ലെന്നും വിവേചനപരമായ വിധി നിർണയത്തിന് സാധ്യതയുണ്ടെന്നും സ്കൂൾ കുട്ടികൾ വാദിച്ചു. അതേസമയംതന്നെ കളരിപ്പയറ്റ് അസോസിയേഷന്‍റെ കീഴിൽ പരിശീലനം നടത്തുന്ന കുട്ടികൾക്ക് സ്കൂൾ ഗെയിംസിൽ മികച്ച പ്രകടനം നടത്താൻ സാധിക്കുമെന്നും ആക്ഷേപമുയർന്നു. ഇതേച്ചൊല്ലി കൂത്തമ്പലം മത്സരവേദിയിൽ പലതവണ ബഹളമുണ്ടായതിനെ തുടർന്ന് ഹിൽപാലസ് പോലീസും സ്ഥലത്തെത്തി. ഉപജില്ലാ മത്സരങ്ങൾക്ക് ശേഷം ഉച്ചയ്ക്ക് മുതൽ കളരിപ്പയറ്റ് ചാമ്പ്യൻഷിപ്പിന്‍റെ യോഗവും നടന്നതിന് ശേഷമാണ് ജില്ലാതല മത്സരങ്ങൾ തുടങ്ങിയത്. ഇതിനിടെ മത്സരത്തിന് എത്തിയ പല വിദ്യാർഥികളും മത്സരിക്കാതെ തിരിച്ചു പോയി. സംസ്ഥാന സ്കൂൾ ഗെയിംസിന് കൊടി ഉയരാൻ മണിക്കൂറുകൾ മാത്രം അവശേഷിക്കുമ്പോഴാണ് ജില്ലാതല മത്സര നടത്തിപ്പ് വിവാദത്തിലായത്. സംഭവത്തിൽ പൊതുവിദ്യാഭ്യാസ ഡയറക്ടർക്ക് കുട്ടികൾ പരാതി നൽകിയിട്ടുണ്ട്.

യുവാക്കളെ തട്ടിക്കൊണ്ടുപോയി കവര്‍ച്ച: കൊടിമരം ജോസുമായി തെളിവെടുപ്പ് നടത്തി

കൊച്ചി: എറണാകുളം നോര്‍ത്ത് റെയില്‍വേ മേല്‍പ്പാലത്തിന് സമീപത്തു നിന്ന് യുവാക്കളെ തട്ടിക്കൊണ്ടുപോയി കവര്‍ച്ച നടത്തി റെയില്‍വേ ട്രാക്കില്‍ തള്ളിയ കേസിലെ പ്രതിയായ കുപ്രസിദ്ധ കുറ്റവാളിയുമായി തെളിവെടുപ്പ് നടത്തി. പിടികിട്ടാപ്പുള്ളിയും കൊല്ലം സ്വദേശിയുമായ കൊടിമരം ജോസ് (40) എന്ന ജോസിനെയാണ് തൃശൂരില്‍ നിന്ന് എറണാകുളം നോര്‍ത്ത് എസ്‌ഐ പി.പി. റെജിയുടെ നേതൃത്വത്തിലുളള പോലീസ് സംഘം കഴിഞ്ഞ ദിവസം അറസ്റ്റ് ചെയ്തത്. സംസ്ഥാനത്തെ വിവിധ പോലീസ് സ്റ്റേഷനുകളിലായി കൊലപാതകമടക്കം ഇരുപതിലേറെ ക്രിമിനല്‍ കേസുകളില്‍ ഇയാള്‍ പ്രതിയാണ്. ഇന്നലെ ഉച്ചയോടെയാണ് ഇയാളെ പോലീസ് സംഭവസ്ഥലത്ത് എത്തിച്ച് തെളിവെടുപ്പ് നടത്തിയത്. സെപ്റ്റംബര്‍ 17ന് പുലര്‍ച്ചെ 2.30നായിരുന്നു സംഭവം. എറണാകുളം നോര്‍ത്ത് റെയില്‍വേ മേല്‍പ്പാലത്തിന് അടിയില്‍ നിന്ന് സംസാരിക്കുകയായിരുന്ന പത്തനംതിട്ട സ്വദേശി അഖിലേഷ് പി. ലാലനെയും സുഹൃത്ത് വിഷ്ണുവിനെയും ജോസിന്‍റെ നേതൃത്വത്തില്‍ തട്ടിക്കൊണ്ട് പോകുകയായിരുന്നു. പാലത്തിന്‍റെ മുകളിലെത്തിച്ച് മര്‍ദിച്ച ശേഷം സൗത്ത് റെയില്‍വേ സ്റ്റേഷന് സമീപം കൊണ്ടുപോയി കത്തികാണിച്ച് ഭീഷണിപ്പെടുത്തി എടിഎമ്മില്‍ നിന്ന് ബലപ്രയോഗത്തിലൂടെ 9,500 രൂപ പിന്‍വലിപ്പിക്കുകയും ഫോണ്‍ മോഷ്ടിക്കുകയുമായിരുന്നു. കേസില്‍ ജോസിന്‍റെ കൂട്ടാളികളായ മുഹമ്മദലിയും ഫിറോസ് ഖാനും നേരത്തെ പിടിയിലായിരുന്നു. എന്നാല്‍ ഇയാള്‍ സംഭവത്തിനുശേഷം തൃശൂരിലേക്ക് മുങ്ങുകയായിരുന്നു. അവിടെ ഒളിവില്‍ കഴിയുകയായിരുന്ന പ്രതി ഞായറാഴ്ച തൃശൂര്‍ പോലീസിന്‍റെ വാഹന പരിശോധനയ്ക്കിടെയാണ് കുടുങ്ങിയത്. തുടര്‍ന്ന് പ്രതിയെ എറണാകുളം നോര്‍ത്ത് പോലീസിന് കൈമാറുകയായിരുന്നു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

സ്പാ ജീവനക്കാരനെ ഇരുമ്പുവടികൊണ്ട് തലയ്ക്കടിച്ചു കൊലപ്പെടുത്താൻ ശ്രമം

കൊച്ചി: പാലാരിവട്ടത്ത് സ്പായില്‍ കൊലപാതക ശ്രമം. ജീവനക്കാരന്‍റെ തലയില്‍ ഇരുമ്പുവടികൊണ്ട് അടിച്ചു പരിക്കേല്‍പ്പിച്ചു. കോതമംഗലം കടവൂര്‍ സ്വദേശി മിജോ(41)യ്ക്കാണ് പരിക്കേറ്റത്. തലയ്ക്കും ഇടതു കൈയിലെ വിരലിനും സാരമായി പരിക്കേറ്റ ഇയാള്‍ കൊച്ചിയിലെ സ്വകാര്യ ആശുപത്രിയില്‍ ചികിത്സയിലാണ്. സംഭവത്തില്‍ പ്രമോദ്, രാഹുല്‍ എന്നിവരടക്കം കണ്ടാലറിയാവുന്ന മൂന്നു പേര്‍ക്കെതിരെ പാലാരിവട്ടം പോലീസ് കേസെടുത്ത് അന്വേഷണം ആരംഭിച്ചു. മിജോയുടെ പെണ്‍സുഹൃത്തിനോട് കേസിലെ രണ്ടാംപ്രതിയായ പ്രമോദ് അപമര്യാദയായി പെരുമാറിയത് ചോദ്യംചെയ്തതിലുള്ള വിരോധമാണ് ആക്രമണത്തില്‍ കലാശിച്ചതെന്ന് പോലീസ് പറഞ്ഞു. വധശ്രമം അടക്കമുള്ള വകുപ്പുകള്‍ ചുമത്തിയാണ് കേസ്. കഴിഞ്ഞ വെളളിയാഴ്ച പാലാരിവട്ടം പല്ലിശേരി റോഡിലുള്ള സ്ഥാപനത്തിലായിരുന്നു സംഭവം. കേസിലെ ഒന്നാംപ്രതി ഇരുമ്പുവടികൊണ്ട് പരാതിക്കാരന്‍റെ തലയ്ക്കടിക്കുകയും പ്രമോദ് കൈയില്‍ കരുതിയിരുന്ന കത്തി വീശി പരാതിക്കാരന്‍റെ ഇടതു കൈയിലെ തള്ളവിരലിന് പരിക്കേല്പിക്കുകയുമായിരുന്നു. മിജോയുടെ സുഹൃത്തുക്കളായ ഷിന്‍സി, അനുജ എന്നിവരോട് പ്രതികള്‍ അപമര്യാദയായി പെരുമാറുകയും ആക്രമിക്കുകയും ചെയ്തതായും പരാതിയുണ്ട്.

ഓൺലൈൻ ട്രേഡ് തട്ടിപ്പ് വീണ്ടും; ദമ്പതികൾക്ക് 60.5 ലക്ഷം നഷ്ടം

വൈപ്പിൻ: ഓൺലൈൻ ഗോൾഡ് ട്രേഡിംഗ് തട്ടിപ്പിൽ ദമ്പതികൾക്ക് 6055,000 രൂപ നഷ്ടമായി. പുതുവൈപ്പിൽ വാടകയ്ക്ക് താമസിക്കുന്ന തിരുവനന്തപുരം സ്വദേശികളായ ദമ്പതികളാണ് തട്ടിപ്പിനിരയായത്. ഇത് സംബന്ധിച്ച് സോഷ്യൽ മീഡിയയിലെ മെസഞ്ചർ ആപ് വഴി പരിചയപ്പെട്ട അജ്ഞാത സ്ത്രീക്കെതിരെ ദമ്പതികൾ ഞാറക്കൽ പോലീസിൽ പരാതി നൽകിയിട്ടുണ്ട്. പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. താൻ ബിജിസി കമ്പനിയുടെ ഏജന്‍റാണെന്നും കമ്പനിയുടെ ഗോൾഡ് മൈനിംഗ് ട്രേഡിംഗ്എന്ന ഓൺലൈൻ ബിസിനസിൽ പണം നിക്ഷേപിച്ചാൽ സ്വർണവില കൂടുന്നതനുസരിച്ച് ലാഭവിഹിതം ലഭിക്കുമെന്നും തെറ്റിദ്ധരിപ്പിച്ചാണ് തട്ടിപ്പ് നടത്തിയത്. ഇവർ പറഞ്ഞ പ്രകാരം ദമ്പതികൾ ഇവരുടെ മൂന്ന് ബാങ്ക് അക്കൗണ്ടുകളിൽ നിന്നും 2025 മേയ് മുതൽ ഓഗസ്റ്റ് വരെ പലപ്പോഴായി തുക നൽകി. എന്നാൽ പറഞ്ഞതുപ്രകാരം ലാഭവിഹിതം കിട്ടാതെ വന്നപ്പോഴാണ് സംഭവം തട്ടിപ്പാണെന്ന് തിരിച്ചറിഞ്ഞതും പോലീസിൽ പരാതി നൽകിയതും .

ക്ഷേത്രം കുത്തിത്തുറന്ന് സിസി ടിവിയടക്കം മോഷ്ടിച്ചയാൾ പിടിയിൽ

ആലുവ: കുഴിവേലിപ്പടി കുഴിക്കാട്ടുകാവ് ഭഗവതി ക്ഷേത്രം കുത്തിത്തുറന്ന് സിസിടിവിയടക്കം കവർച്ച നടത്തിയ കേസിലെ പ്രതി അങ്കമാലിയിൽ എടത്തല പോലീസിന്‍റെ പിടിയിലായി. ഞാറക്കൽ നടിയതറ വീട്ടിൽ സോമരാജ് സോമശേഖരനാ(45)ണ് പിടിയിലായത്. കഴിഞ്ഞ 16ന് രാത്രിയായിരുന്നു കവർച്ച. നാല് ഭണ്ഡാരങ്ങൾ കുത്തിത്തുറന്ന് ഏകദേശം 9,000 രൂപയും ഓഫീസ് വാതിൽ കുത്തിത്തുറന്ന് അലമാരയിൽ സൂക്ഷിച്ചിരുന്ന ഒരു പവൻ തൂക്കം വരുന്ന സ്വർണ താലികളും കൂടാതെ ക്ഷേത്രത്തിലെ സിസി ടിവികളും ഡിവിആറും ഇവ സൂക്ഷിച്ചിരുന്ന ഇരുമ്പ് ബോക്സുമാണ് കവർന്നത്. ഇയാൾ നിരവധി മോഷണക്കേസുകളിൽ പ്രതിയാണ്. പ്രതിയെ ആലുവ കോടതി റിമാൻഡ് ചെയ്തു.

അമ്മത്തൊട്ടിലിന് സമീപം നവജാതശിശുവിനെ ഉപേക്ഷിച്ച നിലയില്‍

കൊച്ചി: എറണാകുളത്തെ അമ്മത്തൊട്ടിലിന് സമീപത്ത് നവജാതശിശുവിനെ ഉപേക്ഷിച്ച നിലയില്‍ കണ്ടെത്തി. ഇന്നലെ രാവിലെ 6.30 ഓടെയാണ് പ്രസവിച്ച് മണിക്കൂറുകള്‍ മാത്രമായ കുഞ്ഞിനെ എറണാകുളം ജനറല്‍ ആശുപത്രിക്ക് സമീപത്തുള്ള അമ്മത്തൊട്ടിലിനടുത്ത് കണ്ടെത്തിയത്. സെക്യൂരിറ്റി ജീവനക്കാരാണ് ആദ്യം കുഞ്ഞിനെ കണ്ടത്. ഉടന്‍ തീവ്രപരിചരണ വിഭാഗത്തിലേക്ക് മാറ്റി. 2.60 കിലോ ഗ്രാം ഭാരമുള്ള കുഞ്ഞിന്‍റെ ആരോഗ്യനില തൃപ്തികരമാണെന്ന് ജനറല്‍ ആശുപത്രി സൂപ്രണ്ട് ഡോ. ആര്‍. ഷഹീര്‍ ഷാ പറഞ്ഞു. അറ്റകുറ്റപ്പണിക്കായി അമ്മത്തൊട്ടില്‍ അടച്ചിട്ടിരിക്കുന്നതിനാല്‍ സെക്യൂരിറ്റി ജീവനക്കാര്‍ ഇവിടെ കൃത്യമായി പരിശോധന നടത്താറുണ്ട്. ഇത്തരത്തില്‍ നടത്തിയ പരിശോധനയിലാണ് കുഞ്ഞിനെ കണ്ടത്. നാലുദിവസം ആശുപത്രിയില്‍ തുടരുന്ന കുഞ്ഞിനെ പൂര്‍ണ ആരോഗ്യവാനായശേഷം സിഡബ്ല്യുസി ഏറ്റെടുക്കുമെന്ന് ചെയര്‍പേഴ്‌സണ്‍ വിന്‍സെന്‍റ് ജോസഫ് പറഞ്ഞു. പിന്നീട് സ്‌പെഷലൈസ്ഡ് അഡോപ്ഷന്‍ ഏജന്‍സിക്ക് കൈമാറും. മറ്റു നടപടികള്‍ പൂര്‍ത്തിയാക്കി നിശ്ചിത സമയപരിധിക്കുശേഷം അവകാശികള്‍ ആരും എത്തിയില്ലെങ്കില്‍ ദത്ത് നല്‍കാനുള്ള നടപടികളിലേക്ക് നീങ്ങുമെന്നും അദ്ദേഹം പറഞ്ഞു.

വിയോജിപ്പുണ്ട്, പക്ഷേ വിട്ടുനിൽക്കില്ല: പ്രതിപക്ഷം

കൊച്ചി: ഹൈക്കോടതിക്ക് സമീപം ഏബ്രഹാം മാടമാക്കല്‍ റോഡില്‍ നിര്‍മാണം പൂര്‍ത്തിയായ കൊച്ചി കോര്‍പറേഷന്‍റെ പുതിയ ആസ്ഥാന മന്ദിരത്തിന്‍റെ ഉദ്ഘാടനം ഇന്ന് വൈകുന്നേരം മൂന്നിന് മുഖ്യമന്ത്രി പിണറായി വിജയന്‍ നിര്‍വഹിക്കും. 2006 ഏപ്രില്‍ 17ന് തറക്കല്ലിട്ട് 20 വര്‍ഷത്തോളമെടുത്താണ് കെട്ടിടനിര്‍മാണം പൂര്‍ത്തീകരിച്ചത്. തദ്ദേശ തെരഞ്ഞെടുപ്പിന് തൊട്ടുമുമ്പ് ധൃതിപിടിച്ച് ഉദ്ഘാടനം നടത്തുന്നതിന് പിന്നില്‍ ലക്ഷ്യം രാഷ്ട്രീയ നേട്ടമാണെങ്കിൽകൂടി നഗരത്തിന്‍റെ പൊതുകാര്യം എന്ന നിലയില്‍ രാഷ്ട്രീയം മറന്ന് പരിപാടിയില്‍ പങ്കെടുക്കുമെന്നും പ്രതിപക്ഷം വ്യക്തമാക്കി. സി.എം. ദിനേശ് മണി മേയര്‍ ആയിരുന്ന കാലത്താണ് നിര്‍മാണം ആരംഭിച്ചതെങ്കിലും പിന്നീട് വന്ന മേയര്‍മാരും ആസ്ഥാന മന്ദിരത്തിന്‍റെ നിര്‍മാണത്തില്‍ നിര്‍ണായക സംഭാവനകള്‍ നല്‍കിയവരാണെന്ന് പ്രതിപക്ഷ നേതാവ് ആന്‍റണി കുരീത്തറയും യുഡിഎഫ് പാര്‍ലമെന്‍ററി പാര്‍ട്ടി നേതാവ് എം.ജി. അരിസ്റ്റോട്ടിലും പറഞ്ഞു. കെട്ടിടത്തില്‍ നിര്‍മാണം ഇനിയും ബാക്കിയുണ്ട്. സര്‍ക്കാര്‍ നിശ്ചയിച്ചിട്ടുള്ള മാര്‍ക്കറ്റ് നിരക്കിനേക്കാള്‍ കൂടുതല്‍ തുകയ്ക്കാണ് അവസാനഘട്ടത്തില്‍ മേയര്‍ അഡ്വ.എം. അനില്‍കുമാര്‍ കരാറുകള്‍ നല്‍കിയത്. ഇതുമൂലം നിര്‍മാണ ചെലവ് 61 കോടിയായി ഉയര്‍ന്നു. 32 കോടി മാത്രമേ ഇതുവരെ നല്‍കിയിട്ടുള്ളൂ. ശേഷിക്കുന്ന തുക നല്‍കേണ്ട ഉത്തരവാദിത്തം അടുത്ത ഭരണസമിതിയുടെ ചുമലില്‍ വച്ചുകൊണ്ടാണ് നിലവിലെ ഭരണസമിതി രാഷ്ട്രീയ നേട്ടത്തിനായി ഉദ്ഘാടനം നടത്തുന്നെന്നും ഇരുവരും ആരോപിച്ചു. മേയര്‍ അഡ്വ.എം. അനില്‍കുമാര്‍ അധ്യക്ഷത വഹിക്കുന്ന ചടങ്ങില്‍ മന്ത്രിമാരായ എം.ബി. രാജേഷ്, പി.രാജീവ്, ഹൈബി ഈഡന്‍ എംപി, എംഎല്‍എമാരായ ടി.ജെ. വിനോദ്, കെ.ജെ. മാക്‌സി, കെ.ബാബു, ഉമാ തോമസ്, ജിസിഡിഎ ചെയര്‍മാന്‍ കെ.ചന്ദ്രന്‍പിള്ള, മുന്‍ മേയര്‍മാരായ കെ.ബാലചന്ദ്രന്‍, കെ.ജെ. സോഹന്‍, ടോണി ചമ്മണി, സൗമിനി ജയിന്‍, പ്രതിപക്ഷ നേതാവ് ആന്‍റണി കുരീത്തറ, സ്ഥിരം സമിതി അധ്യക്ഷരായ സി.എ. ഷക്കീര്‍, സി.ഡി. വത്സലകുമാരി, ടി.കെ. അഷ്‌റഫ്, ജെ.സനില്‍മോന്‍, വി.എ. ശ്രീജിത്ത്, സീന ഗോകുലന്‍, മാലിനി കുറുപ്പ് തുടങ്ങിയവര്‍ പങ്കെടുക്കും.

ഇടിമിന്നൽ; ഇലഞ്ഞിയിൽ വീട് ഭാഗികമായി തകർന്നു

ഇലഞ്ഞി: കനത്ത മഴയ്ക്കൊപ്പമുണ്ടായ ഇടിമിന്നലിൽ ഇലഞ്ഞിയിൽ വീട് ഭാഗികമായി തകർന്നു. കൊല്ലകോമ്പിൽ ഗോപിനാഥന്‍റെ വീടിനാണ് കേടുപാടുകൾ സംഭവിച്ചത്. ഇന്നലെ വൈകുന്നേരം 5.45നായിരുന്നു സംഭവം. വീട്ടിലെ വൈദ്യുത ഉപകരണങ്ങളും വയറിംഗും പൂർണമായി കത്തിനശിച്ചു. ഭിത്തികൾക്കും ടെറസിനും കേടുപാടുകൾ സംഭവിച്ചിട്ടുണ്ട്. അപകട സമയത്ത് വീട്ടിൽ ഉണ്ടായിരുന്ന ഗോപിനാഥന്‍റെ ഭാര്യ ജയ, സഹോദര പുത്രി ആദിത്യ ശിവൻ എന്നിവർക്ക് നിസാര പരിക്കേറ്റു.

മുനമ്പത്തുനിന്നു വീടുവിട്ടിറങ്ങിയ 17കാരി തിരുവല്ലയിൽ

ചെറായി: മുനമ്പത്ത് നിന്നു കാണാതായ 17 കാരിയായ വിദ്യാർഥിനിയെ തിരുവല്ലയിൽ കണ്ടെത്തി. സ്കൂളിൽ നിന്നു ടൂർ പോകുന്നു എന്ന് പറഞ്ഞ് 16ന് വൈകുന്നേരം 3. 30 നാണ് വിദ്യാർഥിനി വീട് വിട്ടിറങ്ങിയത്. വീട്ടിൽ തിരികെ എത്താതെ വന്നതോടെ വീട്ടുകാർ മുനമ്പം പോലീസിൽ പരാതി നൽകി. അന്വേഷണത്തിൽ കണ്ടെത്തിയ പെൺകുട്ടിയെ കോടതിയിൽ ഹാജരാക്കിയശേഷം വീട്ടുകാർക്കൊപ്പം പറഞ്ഞു വിട്ടു.

അനുജനെ പെട്രോള്‍ ഒഴിച്ച് തീകൊളുത്തിയ ജ്യേഷ്ഠൻ അറസ്റ്റിൽ

ചോറ്റാനിക്കര: അനുജനെ പെട്രോള്‍ ഒഴിച്ച് തീകൊളുത്തിയ ജ്യേഷ്ഠനെ അറസ്റ്റ് ചെയ്തു. തമിഴ്നാട് സ്വദേശി മണികണ്ഠ(20)ന് തീപ്പൊള്ളലേറ്റ കേസിൽ സഹോദരൻ മാണിക്യനെ(25)യാണ് ചോറ്റാനിക്കര പോലീസ് അറസ്റ്റ് ചെയ്തത്. മണികണ്ഠന്‍ കളമശേരി മെഡിക്കല്‍ കോളജില്‍ ചികിത്സയിലാണ്. ഇരുവരും വര്‍ഷങ്ങളായി ചോറ്റാനിക്കരയില്‍ വാടകയ്ക്ക് താമസിക്കുകയാണ്. ഞായറാഴ്ച രാത്രി 9.30ഓടെയായിരുന്നു സംഭവം. ചോറ്റാനിക്കര പൂരപ്പറമ്പിനു സമീപത്ത് വച്ച് മദ്യലഹരിയിലായിരുന്ന ഇരുവരും തമ്മിൽ വാക്കേറ്റവും കൈയേറ്റവും ഉണ്ടാകുകയും പിന്നാലെ തീ പെട്രോളൊഴിച്ച് തീകൊളുത്തുകയുമായിരുന്നു.

ഗ്യാസ് സിലിണ്ടറിൽനിന്ന് തീപടർന്ന് വയോധികയ്ക്കും മരുമകൾക്കും പൊള്ളലേറ്റു

വൈപ്പിൻ :പാചകം ചെയ്യുന്നതിനിടെ ഗ്യാസ് സിലിണ്ടറിൽ നിന്നു തീപടർന്ന് വയോധികയ്ക്കും രക്ഷിക്കാൻ ചെന്ന മരുമകൾക്കും പൊള്ളലേറ്റു. ഇന്നലെ ഉച്ചയോടെ ചെറായി സഹോദരൻ ഹൈസ്കൂളിന് സമീപം പണ്ടാരപ്പറമ്പിൽ വീട്ടിൽ കമലത്തിനും (78) മരുമകൾ അനിത (50)യ്ക്കുമാണ് പൊള്ളലേറ്റത്. ഇരുവരെയും കളമശേരി മെഡിക്കൽ കോളജിൽ പ്രവേശിപ്പിച്ചു. പാചകത്തിനിടെ സിലിണ്ടറിൽ നിന്നും റെഗുലേറ്റർ തനിയെ ഉയർന്ന് ഗ്യാസ് ചോരുകയും തീ പിടിക്കുകയുമായിരുന്നു. പരിസരത്തുള്ള പെട്രോൾ പമ്പിലുള്ള ഫയർ എക്സ്റ്റിംഗ്യുഷർ ഉപയോഗിച്ച് നാട്ടുകാർ തീയണച്ചെങ്കിലും ഗ്യാസ് ചോർച്ച പരിഹരിക്കാൻ കഴിഞ്ഞില്ല . തുടർന്ന് പറവൂരിൽ നിന്ന് സീനിയർ ഫയർ ആൻഡ് റെസ്ക്യൂ ഓഫീസർ ബേബി ജോണിന്‍റെ നേതൃത്വത്തിൽ ഫയർഫോഴ്സ് യൂണിറ്റ് എത്തിയാണ് സിലിണ്ടറിന്‍റെ ചോർച്ച പരിഹരിച്ചത്.

ഉദ്ഘാടനം കഴിഞ്ഞ് മാസം ഒന്നാകുന്നു ; അടുപ്പ് പുകയാതെ ജിസിഡിഎ ഫുഡ്‌സ്ട്രീറ്റ്

കൊച്ചി: ഉദ്ഘാടനം കഴിഞ്ഞ ഒരു മാസം ആകാറായിട്ടും അടുപ്പ് പുകയാതെ ജിസിഡിഎയുടെ ഫുഡ്‌സ്ട്രീറ്റ്. ഫുഡ്‌കോര്‍ട്ട് പ്രവര്‍ത്തിക്കാനാവശ്യമായ എല്ലാ സൗകര്യങ്ങളും ഇവിടെ ഒരുക്കിയിട്ടും കടമുറികള്‍ ടെന്‍ഡര്‍ എടുക്കാന്‍ ആളുകള്‍ മുന്നോട്ടു വരാത്തതാണ് തടസമായിരിക്കുന്നത്. പുതുതായി ആരും വന്നില്ലെങ്കിലും നിലവില്‍ ടെൻഡര്‍ എടുത്തിട്ടുള്ള കടകള്‍ നവംബർ ഒന്ന് മുതല്‍ പ്രവര്‍ത്തിച്ച് തുടങ്ങുമെന്ന് ജിസിഡിഎ വ്യക്തമാക്കി. 120 ചതുരശ്രയടി, 60 ചതുരശ്രയടി എന്നിങ്ങനെ രണ്ടു വലിപ്പത്തില്‍ 20 ഭക്ഷണശാലകളാണ് ഫുഡ്‌സ്ട്രീറ്റില്‍ സജ്ജീകരിച്ചിട്ടുള്ളത്. ഇരിപ്പിടങ്ങള്‍, ലൈറ്റിംഗ്, വാഷ് ഏരിയകള്‍, ടോയ്‌ലെറ്റ് സംവിധാനങ്ങള്‍, ഖരദ്രാവക മാലിന്യ സംസ്‌കരണ സംവിധാനം, സുരക്ഷാ സംവിധാനങ്ങള്‍, പാര്‍ക്കിംഗ് സൗകര്യം എന്നിങ്ങനെ എല്ലാവിധ സൗകര്യങ്ങളും ഇവിടെ ഒരുക്കിയിട്ടുണ്ട്. എന്നിട്ടും ഏഴു കടകള്‍ മാത്രമേ ഏറ്റെടുക്കാന്‍ ആളുകള്‍ ഉണ്ടായിരുന്നുള്ളൂ. കടകളുടെ വലുപ്പക്കുറവും ഇവിടേക്ക് ആളുകള്‍ എത്തിപ്പെടുന്നതിലെ ബുദ്ധിമുട്ടുമൊക്കെയാണ് കടകള്‍ ഏറ്റെടുക്കുന്നതില്‍ നിന്ന് പിന്തിരിപ്പിക്കുന്നത്. 20 കടമുറികളില്‍ എട്ട് എണ്ണം ജനറല്‍ വിഭാഗത്തിനും ആറെണ്ണം വനിതകള്‍ക്കും പട്ടികജാതി വിഭാഗത്തിന് രണ്ടും പട്ടിക വര്‍ഗം, സമൃദ്ധി അറ്റ് കൊച്ചി, ട്രാന്‍സ്ജെന്‍ഡര്‍, ഭിന്നശേഷിക്കാര്‍ എന്നിവര്‍ക്കായി ഓരോന്നും കടമുറികളാണ് സംവരണം ചെയ്തിട്ടുള്ളത്. ഇതില്‍ ജനറല്‍ വിഭാഗത്തില്‍ മൂന്നു കടമുറികള്‍ ഏറ്റെടുത്തിട്ടുണ്ട്. വനിതാ വിഭാഗത്തില്‍ രണ്ടെണ്ണം ഏറ്റെടുത്തു. സമൃദ്ധി അറ്റ് കൊച്ചിക്കും ട്രാന്‍സ് ജെന്‍ഡര്‍ വിഭാഗത്തിനും നീക്കിവച്ച ഓരോ കടമുറികളും ടെൻഡര്‍ എടുത്തിട്ടുണ്ട്. ജനറല്‍ വിഭാഗത്തില്‍ അഞ്ചും പട്ടികജാതി വിഭാഗത്തിനുള്ള രണ്ടും പട്ടികവര്‍ഗം, ഭിന്നശേഷി എന്നിവര്‍ക്കായുള്ള ഓരോ കടമുറികളുമാണ് ഇനി ഏറ്റെടുക്കാനുള്ളത്. ചതുരശ്രയടിക്ക് 200 രൂപയാണ് വാടക. കൂടാതെ വെള്ളം, വൈദ്യുതി, പാര്‍ക്കിംഗ്, സെക്യൂരിറ്റി, മാലിന്യ സംസ്‌കരണം എന്നിവയ്ക്കായി 200 രൂപ വീതം സര്‍വീസ് ചാര്‍ജും നല്‍കണം. ടേബിളുകളില്‍ നിന്ന് പാത്രങ്ങളും ഭക്ഷണ മാലിന്യവും നീക്കുന്നതിനായി ജിസിഡിഎ തന്നെ ജീവനക്കാരെ ഏര്‍പ്പെടുത്തിയിട്ടുണ്ട്. ഇതും സര്‍വീസ് ചാര്‍ജില്‍ ഉള്‍പ്പടും. 120 ചതുരശ്രയടി വരുന്ന കടമുറികള്‍ക്ക് 48,000 രൂപ വരെയും 60 ചതുരശ്രയടി വരുന്ന കടമുറിക്ക് 4,000 വരെയുമാണ് വാടക. ഇതു കൂടാതെ 11 മാസത്തെ വാടക സെക്യൂരിറ്റി ഡെപ്പോസിറ്റായും നല്‍കണം. കേരളീയ വിഭവങ്ങള്‍, നോര്‍ത്ത് ഇന്ത്യന്‍, സൗത്ത് ഇന്ത്യന്‍, ചൈനീസ്, കോണ്ടിനെന്‍റല്‍, മില്ലറ്റ് അധിഷ്ഠിതം, ഫാസ്റ്റ് ഫുഡ്, ഡെസേര്‍ട്ടുകള്‍, പാനീയങ്ങള്‍ തുടങ്ങി വൈവിധ്യമാര്‍ന്ന രുചികള്‍ ഇവിടെ ലഭ്യമാകും. വൈകുന്നേരം ആരംഭിച്ച് രാത്രി വൈകി അവസാനിക്കും വിധമാകും പ്രവര്‍ത്തന സമയം. കേന്ദ്ര സര്‍ക്കാരിന്‍റെ സാമ്പത്തിക സഹായത്തോടെ കേരള സര്‍ക്കാര്‍, ജിസിഡിഎ, എന്‍എച്ച്എം, കൊച്ചി നഗരസഭ, കേരള ഭക്ഷ്യസുരക്ഷാ വകുപ്പ് എന്നിവയുടെ സംയുക്ത സംരംഭമായാണ് പദ്ധതി നടപ്പാക്കിയത്. കഴിഞ്ഞ മാസം 27നാണ് ആരോഗ്യമന്ത്രി വീണ ജോര്‍ജ് ഫുഡ്‌കോര്‍ട്ട് ഉദ്ഘാടനം ചെയ്തത്.

ആലുവയിൽ റെയിൽവേ മേൽപ്പാലം അടച്ചിട്ട് ഒരു വർഷം; തീരാതെ യാത്രാദുരിതം

ആലുവ: കെഎസ്ആർടി ബസ്‌സ്റ്റാൻഡിന് എതിരെയുള്ള ആലുവ റെയിൽവേ സ്റ്റേഷൻ മേൽനടപ്പാലം അറ്റകുറ്റപ്പണികൾക്കായി അടച്ചിട്ട് ഒരു വർഷത്തോടടുക്കുന്പോൾ ഇതിലൂടെ യാത്ര ചെയ്തിരുന്നവരുടെ യാത്രാദുരിതവും തുടരുകയാണ്. മുനിസിപ്പൽ സ്റ്റാൻഡ്, താലൂക്ക് ആസ്ഥാനമായ മിനി സിവിൽ സ്റ്റേഷൻ, ഗവ. ഹയർ സെക്കണ്ടറി സ്ക്കൂളുകൾ എന്നിവിടങ്ങളിലേക്ക് കാൽനടയായി പോയിരുന്നരാണ് ദുരിതമനുഭവിക്കുന്നത്. നിലവിൽ ഒന്നര കിലോമീറ്റർ ചുറ്റിയാണ് എല്ലാവരും യാത്ര ചെയ്യുന്നത്‌. അറ്റകുറ്റപ്പണിയുടെ ചെലവ് ആര് വഹിക്കണമെന്നതിൽ തീരുമാനമാകാതെ നവീകരണം ആരംഭിക്കാൻ മേയ് വരെ നീണ്ടെങ്കിലും ഇതിനോടകം നടപ്പാതകളുടെ കോൺക്രീറ്റിംഗ്‌ പൂർത്തിയായിട്ടുണ്ട്. തുരുമ്പെടുത്ത ചട്ടക്കൂട് മാറ്റി പെയിന്‍റ് ചെയ്യുന്നത് അവസാനഘട്ടത്തിലാണ്. ദീപാവലി ദിവസവും പണി നടക്കുന്നുണ്ട്. ഇനിയും ഒരു മാസം കൂടി വേണ്ടിവരുമെന്നാണ് സൂചന. മേൽപ്പാലത്തിനടിയിലൂടെ പോകുന്ന ഹൈവോൾട്ടേജ് വൈദ്യുതി ലൈനുകൾ ഓഫ് ചെയ്ത് മാത്രമേ അറ്റകുറ്റപ്പണികൾ നടത്താനാകൂ. ട്രെയിൻ എഞ്ചിനുകൾക്ക് വൈദ്യുതി വേണ്ടതിനാൽ ഈ സമയം ഗതാഗതം നിരോധിക്കേണ്ടി വരും. ഇതാണ് അറ്റകുറ്റപ്പണി വൈകാനുണ്ടായ പ്രധാന കാരണമെന്നും അധികൃതർ പറ‍യുന്നു.

പെരിയാറിൽ വൻതോതിൽ ചെളി; ജലശുദ്ധീകരണം കുറച്ചു

ആലുവ: കിഴക്കൻ മേഖലയിൽ മഴ ശക്തമായതിനു പിന്നാലെ ഡാമുകൾ തുറന്നുവിട്ടതോടെ പെരിയാറിൽ ചെളിയുടെ അളവ് വൻതോതിൽ വർധിച്ചു. ഇന്നലെ രാത്രി 7.15 ന് രേഖപ്പെടുത്തിയ കണക്കുകൾ പ്രകാരം 150 എൻടിയുവാണ് ചെളിയുടെ അളവ്. സാധാരണയിലും 15 ഇരട്ടിയാണിത്. ഇതേ തുടർന്ന് ആലുവ ജലശുദ്ധീകരണശാലയിൽ ജലശുദ്ധീകരണത്തിന്‍റെ അളവിൽ അഞ്ച് എംഎൽഡി കുറച്ച് 310 ആക്കി. ചെളിയുടെ തോത് ഉയർന്നാൽ കൂടുതൽ നിയന്ത്രണങ്ങൾ പരിഗണനയിലുണ്ട്. പശ്ചിമ കൊച്ചിയിലേക്കുള്ള കുടിവെള്ള വിതരണത്തെയും ഇത് പ്രതികൂലമായി ബാധിക്കും. സാധാരണ 315 എംഎൽഡി വെള്ളമാണ് ആലുവയിലെ പ്ലാന്‍റിൽ പ്രതിദിനം ശുദ്ധീകരിക്കുന്നത്.

എയർഹോൺ ഘടിപ്പിച്ച വാഹനങ്ങൾക്കെതിരെ നടപടി

പെരുമ്പാവൂര്‍: ഗതാഗത മന്ത്രിയുടെ നിര്‍ദേശപ്രകാരം നിരോധനമുള്ള എയര്‍ഹോണുകള്‍ ഘടിപ്പിച്ച് ഹോണ്‍ മുഴക്കുന്ന വാഹനങ്ങൾക്കെതിരെ നടപടി സ്വീകരിച്ചു. പെരുമ്പാവൂര്‍ സബ് ആര്‍ടി ഓഫീസ് പരിധിയിലെ വിവിധ സ്ഥലങ്ങളില്‍ നടത്തിയ പരിശോധനയിൽ 60 ഓളം കേസുകളില്‍ നിന്നായി രണ്ട് ലക്ഷത്തോളം രൂപ പിഴ ചുമത്തി. സ്ഥലത്തുവച്ചു തന്നെ എയര്‍ ഹോണുകള്‍ അഴിച്ചു മാറ്റി. രാതിയിൽ ട്രിപ്പ് മുടക്കുന്ന പ്രൈവറ്റ് ബസുകള്‍ക്കെതിരെ പരാതി ശക്തമായതിനെ തുടര്‍ന്ന് ട്രിപ്പ് മുടക്കിയതായി കണ്ടെത്തിയ 10 ഓളം ബസുകള്‍ക്കെതിരെ പിഴ ചുമത്തുകയും താക്കീതു നല്‍കുകയും ചെയ്തു. വാഹന പരിശോധനയില്‍ മോട്ടോര്‍ വെഹിക്കിള്‍ ഇൻസ്‌പെക്ടര്‍മാരായ ബിനോയ് കുമാര്‍, നോബി, അസി. മോട്ടോര്‍ വെഹിക്കിള്‍ ഇന്‍സ്‌പെക്ടര്‍മാരായ സിബിമോന്‍ ഉണ്ണി, അജിത്, ദിനേശ് കുമാര്‍, ബോണി കൃഷ്ണ എന്നിവര്‍ പങ്കെടുത്തു. വരുന്ന ആഴ്ചകളിലും പരിശോധന തുടരുമെന്ന് ജോ. ആര്‍ടിഒ എസ്.എസ്. പ്രദീപ് അറിയിച്ചു.

വാകയിലച്ചന്‍റെ സ്മരണാഘോഷം; ദീപശിഖയെത്തി

മരട്: ദൈവദാസൻ ജോർജ് വാകയിലച്ചന്‍റെ 94-ാം സ്മരണാഘോഷങ്ങളുടെ ഭാഗമായി വെണ്ടുരുത്തി മാതൃ ഇടവകയിൽ നിന്നും ഫാ. ലിതിൻ ജോസ് നെടുംപറമ്പിൽ തെളിയിച്ചു നൽകിയ ദീപശിഖ നൂറുകണക്കിന് വിശ്വാസികളുടെ യും മാരത്തൺ താരങ്ങളുടെയും വാഹനങ്ങളുടെയും അകമ്പടിയോടെ മരട് മൂത്തേടം സെമിത്തേരി ചാപ്പലിലെത്തിച്ചു. ജനറൽ കൺവീനർ സാംസൺ കളത്തിപ്പറമ്പിലും ഫാ. മിറാഷ് പുത്തൻപുരയ്ക്കലും ചേർന്ന് ഏറ്റുവാങ്ങിയ ദീപശിഖയിൽനിന്ന് വാകയിലച്ചൻ അന്ത്യവിശ്രമം കൊള്ളുന്ന ചാപ്പലിൽ പ്രത്യേകം ഒരുക്കിയിട്ടുള്ള കൂറ്റൻ മെഴുകുതിരിയിലേക്ക് ഇടവക വികാരി ഫാ. ഷൈജു തോപ്പിൽ അഗ്നി പകർന്നു. ഈ തിരിനാളത്തിൽ നിന്നാണ് നേർച്ച പായസ ഒരുക്കങ്ങൾക്കും ബൈബിൾ കൺവൻഷനും അഗ്നി പകരുന്നത്.

യൂദാപുരം തീർഥാടന കേന്ദ്രത്തിൽ യൂദാശ്ലീഹായുടെ ഊട്ടുതിരുനാൾ

അങ്കമാലി: യൂദാപുരം തീർഥാടന കേന്ദ്രത്തിൽ വിശുദ്ധ യൂദാശ്ലീഹായുടെ ഊട്ടുതിരുനാൾ വിളംബര വിശ്വാസപ്രഘോഷണ ബൈക്ക് റാലി നടത്തി. നൂറുകണക്കിന് ഇരുചക്ര വാഹനങ്ങളിൽ പ്രത്യേക ഡ്രസ് കോഡ് ധരിച്ച് യുവജനങ്ങളും പുരുഷന്മാരും സ്ത്രീകളും റാലിയിൽ പങ്കെടുത്തു. അങ്കമാലി മണ്ഡലത്തിലെ വിവിധ പഞ്ചായത്തുകളും മുനിസിപ്പാലിറ്റിയും റാലി ചുറ്റി സഞ്ചരിച്ചു. വികാരിയും റെക്ടറുമായ ഫാ. സെബസ്റ്റ്യൻ കറുകപ്പിള്ളി റാലി ഫ്ലഗ് ഓഫ് ചെയ്തു. അസി. വികാരി ഫാ. എബി ഫ്രാൻസിസ് ദുറാം , താബോർ വികാരി ഇൻചാർജ് ഫാ. മെർട്ടൻ ഡിസിൽവ, വേദപാഠം ഹെഡ്മാസ്റ്റർ ടി.ജി. സാബു തുടങ്ങിയവർ റാലിയെ അനുഗമിച്ചു. തിരുനാൾ കൺവീനർ ഹർബട്ട് ജെയിംസ്, സെക്രട്ടറി ഒ.ജി. കിഷോർ, കിഷോർ പാപ്പാളി, വില്യംസ് പ്ലാസിഡ് എന്നിവർ റാലിക്ക് നേതൃത്വം നൽകി.

ചിറ്റാറ്റുകര പഞ്ചായത്ത് ഓഫീസ്: ശിലാസ്ഥാപനം ഇന്ന്

പറവൂർ: ചിറ്റാറ്റുകര പഞ്ചായത്ത് ഓഫീസിനായി നിർമിക്കുന്ന പുതിയ കെട്ടിടത്തിന്‍റെ ശിലാസ്ഥാപനം ഇന്ന് ഉച്ചയ്ക്ക് 12ന് മന്ത്രി പി. രാജീവ് നിർവഹിക്കുമെന്ന് പഞ്ചായത്ത് ഭാരവാഹികൾ പത്രസമ്മേളനത്തിൽ പറഞ്ഞു. നിലവിലെ പഞ്ചായത്ത് ഓഫീസിനോട് ചേർന്നുള്ള സ്ഥലത്ത് 9,400 ചതുരശ്രയടിയിൽ മൂന്ന് നിലകളിലായാണ് ആധുനിക സൗകര്യങ്ങളോടുകൂടിയുള്ള കെട്ടിടം നിർമിക്കുന്നത്. പറവൂർ വടക്കേക്കര സഹകരണ ബാങ്കിൽ നടക്കുന്ന സമ്മേളനത്തിൽ പ്രതിപക്ഷ നേതാവ് വി.ഡി. സതീശൻ അധ്യക്ഷത വഹിക്കും. നെറ്റ് സീറോ കാർബൺ പദ്ധതിയുടെ ഡിപിആർ കൈമാറലും, അഞ്ചു വർഷത്തെ പഞ്ചായത്ത് ഭരണത്തിന്‍റെ വികസന നേർസാക്ഷ്യമായ വികസനരേഖ പ്രകാശിപ്പിക്കലും ചടങ്ങിൽ നടക്കും. പഞ്ചായത്തിൻ്റെ നേതൃത്വത്തിൽ നടപ്പാക്കുന്ന 24 x 7 ഓട്ടോ ആർമി പദ്ധതിക്കും ചടങ്ങിൽ തുടക്കംകുറിക്കുമെന്ന് പഞ്ചായത്ത് പ്രസിഡന്‍റ് ശാന്തിനി ഗോപകുമാർ, വൈസ് പ്രസിഡന്‍റ് പി.പി. അരൂഷ്, വി.എ. താജുദീൻ, സമീറ ഉണ്ണികൃഷ്ണൻ എന്നിവർ പറഞ്ഞു.

പ്രവാസി കോൺഗ്രസ് ധർണ നാളെ

പറവൂർ: വിവിധ ആവശ്യങ്ങളുന്നയിച്ച് കേരള പ്രദേശ് പ്രവാസി കോൺഗ്രസിന്‍റെ പറവൂർ, വടക്കേക്കര ബ്ലോക്ക് കമ്മിറ്റികൾ സംഘടിപ്പിക്കുന്ന ധർണ നാളെ പറവൂർ സിവിൽ സ്റ്റേഷനു മുന്നിൽ നടക്കും. രാവിലെ 10 മണിക്ക് തുടങ്ങുന്ന ധർണ എഐസിസി അംഗവും മുൻ എംപിയുമായ കെ.പി. ധനപാലൻ ഉദ്ഘാടനം ചെയ്യും. പ്രവാസി കോൺഗ്രസ് പറവൂർ ബ്ലോക്ക് പ്രസിഡന്‍റ് ജോൺസൺ പുളിക്കൽ അധ്യക്ഷത വഹിക്കും. പ്രവാസി കോൺഗ്രസ് ജില്ലാ പ്രസിഡന്‍റ് പി.എസ്. രഞ്ജിത്ത്, ഡിസിസി ജനറൽ സെക്രട്ടറി എം.ടി. ജയൻ, പ്രവാസി കോൺഗ്രസ് വടക്കേക്കര ബ്ലോക്ക് പ്രസിഡന്‍റ് വർഗീസ് കൈതാരൻ തുടങ്ങിയവർ സംസാരിക്കും. ക്ഷേമനിധി പെൻഷന് അർഹതയില്ലാത്ത മുഴുവൻ പ്രവാസികൾക്കും സാമൂഹ്യ ക്ഷേമപെൻഷൻ അനുവദിക്കുക, പ്രവാസി പുനരധിവാസ പദ്ധതികളുടെ വ്യവസ്ഥകൾ ലഘൂകരിക്കുക, നോർക്ക പുതുതായി ഏർപ്പെടുത്തുന്ന ആരോഗ്യ ഇൻഷ്വറൻസ് പദ്ധതിയിൽ തിരിച്ചെത്തിയ പ്രവാസികളെ കൂടി ഉൾപ്പെടുത്തുക തുടങ്ങിയ ആവശ്യങ്ങൾ ഉന്നയിച്ചാണ് ധർണ.

സെന്‍റ റീത്താസ് സ്കൂളിന് പിന്തുന്ന അർപ്പിച്ച് കുമ്പളങ്ങി ഫൊറോന

ഫോർട്ടു കൊച്ചി: പള്ളുരുത്തി സെന്‍റ് റീത്താസ് സ്കൂളിന് ഐക്യദാർഢ്യം അർപ്പിച്ച് കുമ്പളങ്ങി ഫൊറോനയിലെ വൈദികരും ഇടവകാംഗങ്ങളും കോൺവെന്‍റ് സന്ദർശിച്ചു. ഫൊറോന വികാരി ഫാ. സെബാസ്റ്റ്യൻ പുത്തൻപുരയ്ക്കലിന്‍റെ നേതൃത്വത്തിൽ അഴിക്കകം ഹോളി മേരീസ് ഇടവക വികാരി ഫാ. ഫ്രാൻസീസ് സേവ്യർ, സെന്‍റ് പീറ്റേഴ്സ് ഇടവകയിലെ ഫാ. ജോസ്‌മോൻ എന്നിവരും വിവിധ ഭക്ത സംഘടനാ ഭാരവാഹികളും സംഘത്തിലുണ്ടായിരുന്നു.

പൂതംകുറ്റി പള്ളിയില്‍ തോമസ് പ്രഥമന്‍ ബാവായുടെ ആണ്ട് ശ്രാദ്ധം നടത്തി

അങ്കമാലി: ശ്രേഷ്ഠ കാതോലിക്കയും പൂതംകുറ്റി സെന്‍റ് മേരീസ് പള്ളിയുടെ സ്ഥാപകനുമായ മാര്‍ ബസേലിയോസ് തോമസ് പ്രഥമന്‍ ബാവായുടെ ഒന്നാം ആണ്ട് ശ്രാദ്ധം പൂതംകുറ്റി സെന്‍റ് മേരീസ് പള്ളിയില്‍ വിപുലമായ പരിപാടികളോടെ നടന്നു. തോമസ് മാര്‍ അലക്‌സന്ത്രയോസ് മെത്രാപ്പോലീത്ത മുഖ്യകാര്‍മികത്വം വഹിച്ചു. അനുസ്മരണ സമ്മേളനം ബെന്നി ബഹനാന്‍ എംപി ഉദ്ഘാടനം ചെയ്തു. ചടങ്ങിൽ ഫാ. ഡോണ്‍ പോള്‍ അധ്യക്ഷത വഹിച്ചു. പള്ളിയില്‍ സ്ഥാപിച്ച ശ്രേഷ്ഠ ബാവായുടെ ഛായചിത്രത്തിന്‍റെ അനാച്ഛാദന കര്‍മം തോമസ് മാര്‍ അലക്‌സന്ത്രയോസ് മെത്രപ്പോലീത്ത നിര്‍വഹിച്ചു. മൂക്കന്നൂര്‍ പഞ്ചായത്ത് പ്രസിഡന്‍റ് കെ.വി. ബിബീഷ്, ഫാ. സാബു പാറയ്ക്കല്‍, ബ്ലോക്ക് പഞ്ചായത്ത് സ്ഥിരംസമിതി അധ്യക്ഷ ലാലി ആന്‍റു, വാര്‍ഡംഗം കെ.എസ്. മൈക്കിള്‍, പഞ്ചായത്തംഗങ്ങൾ തുടങ്ങിയവർ പ്രസംഗിച്ചു. സണ്‍ഡേ സ്‌കൂള്‍ ദേശീയ കലോത്സവത്തില്‍ സംഗീതത്തില്‍ രണ്ടാം സ്ഥാനം നേടിയ ബ്രയാന്‍ ഏല്യാസ്, റവന്യൂ ജില്ല സ്‌കൂള്‍ കായികമേളയില്‍ അഞ്ച് ഇനങ്ങളില്‍ സ്വര്‍ണമെഡല്‍ നേടി വ്യക്തിഗത ചാമ്പ്യനായ അലന്‍ ബൈജു എന്നിവരെ അനുമോദിച്ചു. തുടർന്ന് ശ്രാദ്ധ സദ്യയും നടന്നു.

ഗ്രാമവണ്ടി നാളെ മുതല്‍ മുടക്കുഴയിലൂടെ ഓടും

പെരുമ്പാവൂര്‍: മുടക്കുഴ പഞ്ചായത്ത് -ചൂരമുടി റൂട്ടില്‍ പുതിയ ഗ്രാമവണ്ടി വരുന്നു. കൂവപ്പടി ബ്ലോക്ക് പഞ്ചായത്ത് മുന്‍ പ്രസിഡന്‍റ് എ.ടി. അജിത്കുമാറിന്‍റെ ഡിവിഷന്‍ ഫണ്ട് ഉപയോഗിച്ചാണ് ഗ്രാമവണ്ടി പദ്ധതി നടപ്പിലാക്കുന്നത്. നാളെ രാവിലെ 11ന് എല്‍ദോസ് കുന്നപ്പിള്ളി എംഎല്‍എ തൃക്കേപ്പാറയില്‍ ഫ്ലാഗ് ഓഫ് ചെയ്യും. രാവിലെ 7ന് പെരുമ്പാവൂരില്‍ നിന്നും ആരംഭിച്ച് കുറുപ്പംപടി, ഐമുറി, തൃക്കപ്പടി, തൃക്കേപ്പാറ, മുടക്കുഴ പഞ്ചായത്ത്, ആനക്കല്ല്, കണ്ണന്‍ചേരിമുകള്‍, നെടുങ്കണ്ണി, മീമ്പാറ, ചൂരമുടി എന്നിങ്ങനെയാണ് വാഹനത്തിന്‍റെ റൂട്ട്. രാവിലെ 7, ഉച്ചക്ക് ഒന്ന്, വൈകിട്ട് 4.40 സമയങ്ങളിൽ പെരുമ്പാവൂരിൽ നിന്നും ചൂരമിടിയിലേക്കും , രാവിലെ 8, ഉച്ചകഴിഞ്ഞ് രണ്ട്, വൈകിട്ട് 5.30 സമയങ്ങളിൽ തിരിച്ചും ബസ് ഓടും. യാത്ര ക്ലേശം അനുഭവിക്കുന്ന തൃക്കേപ്പാറ, ആനക്കല്, മീമ്പാറ ഭാഗത്തുള്ളവര്‍ക്ക് ഗ്രാമവണ്ടി ഉപകാരപ്പെടും. മുടക്കുഴ പഞ്ചായത്ത്, കൃഷി ഭവന്‍, ആയുര്‍വേദ ആശുപത്രി, മുടക്കുഴ സര്‍വീസ് സഹകരണബാങ്ക്, മുടക്കുഴ യുപി സ്‌കൂള്‍, തൃക്ക ക്ഷേത്രം എന്നിവയെല്ലാം ഈ റൂട്ടിലാണ് സ്ഥിതി ചെയ്യുന്നത്. വാഹന സൗകര്യം കുറഞ്ഞ റൂട്ടുകളില്‍ മെച്ചപ്പെട്ട സൗകര്യം ഒരുക്കുകയാണ് പദ്ധതിയുടെ ലക്ഷ്യം. പിന്നീട് കൂടുതല്‍ റൂട്ടുകളിലേക്ക് ഗ്രാമവണ്ടി സൗകര്യം ഏര്‍പ്പെടുത്തുമെന്നും എ.ടി. അജിത്കുമാര്‍ അറിയിച്ചു.

കരുമാലൂർ പഞ്ചായത്തിൽ വികസന സദസ്

കരുമാലൂർ: കരുമാലൂർ പഞ്ചായത്ത് വികസനസദസ് മന്ത്രി പി. രാജീവ് ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് സബിത നാസർ അധ്യക്ഷയായി. സർക്കാർ സഹായത്തോടെ കഴിഞ്ഞ അഞ്ച് വർഷം പഞ്ചായത്തിൽ നടപ്പാക്കിയ വികസന പദ്ധതികളെ സംബന്ധിച്ചുള്ള ഡോക്യുമെന്‍ററി പ്രദർശിപ്പിച്ചു. പഞ്ചായത്ത് വികസനരേഖ മന്ത്രി പ്രകാശിപ്പിച്ചു. പഞ്ചായത്ത് സെക്രട്ടറി ടി.കെ. സജീവൻ റിപ്പോർട്ട് അവതരിപ്പിച്ചു. ആലങ്ങാട് ബ്ലോക്ക് പഞ്ചായത്ത് പ്രസിഡന്‍റ് രമ്യ തോമസ്, ശ്രീദേവി സുധി, റംല തോമസ്, ജയശ്രീ ഗോപീകൃഷ്ണൻ, ശ്രീലത ലാലു, കെ.എസ്. ഷംന എന്നിവർ പ്രസംഗിച്ചു.

ചാവറയിൽ ദീപാവലി ആഘോഷിച്ചു

കൊച്ചി : ചാവറ കള്‍ച്ചറല്‍ സെന്‍ററിന്‍റെ നേതൃത്വത്തില്‍ ദീപാവലി ആഘോഷം സംഘടിപ്പിച്ചു. ടി.ജെ. വിനോദ് എംഎല്‍എ ഉദ്ഘാടനം ചെയ്തു. സിറിയക് ഏലിയാസ് വോളന്‍ററി അസോസിയേഷന്‍ സെക്രട്ടറി ഫാ. മാത്യു കിരിയാന്തന്‍ അധ്യക്ഷത വഹിച്ചു. ലൈറ്റ് ടു ലൈഫ് മൈത്രി പുരസ്‌കാരത്തിനര്‍ഹനായ എറണാകുളം കരയോഗം ജനറല്‍ സെക്രട്ടറി പി. രാമചന്ദ്രനെ ടി.ജെ. വിനോദ് എംഎല്‍എ ഉപഹാരം നല്‍കി അനുമോദിച്ചു. ജോണ്‍സന്‍ സി. ഏബ്രഹാം എന്നിവര്‍ ചേര്‍ന്ന് പി. രാമചന്ദ്രനെ പൊന്നാട അണിയിച്ചു. കോര്‍പറേഷന്‍ കൗണ്‍സിലര്‍ പത്മജ എസ്. മേനോന്‍, സിഐസിസി ജയചന്ദ്രന്‍, ഷെഫ് നളന്‍, ചാവറ കള്‍ച്ചറല്‍ സെന്‍റര്‍ ഡയറക്ടര്‍ ഫാ. അനില്‍ ഫിലിപ്, ബണ്ടി സിംഗ്, സി.ജി. രാജഗോപാല്‍ എന്നിവര്‍ പ്രസംഗിച്ചു.

അരീക്കൽ വെള്ളച്ചാട്ടത്തിന്‍റെ ദൃശ്യഭംഗി പകർത്തി ചിത്രകലാ ക്യാമ്പ്

പിറവം: അരീക്കൽ വെള്ളച്ചാട്ടത്തിന്‍റെ മനോഹാരിത രേഖാചിത്രത്തിലൂടെ കാൻവാസിൽ പകർത്തിയ ചിത്രകലാ ക്യാമ്പ് ശ്രദ്ധേയമായി. കേരള ചിത്രകലാ പരിഷത്ത് ജില്ലാ സമിതിയുടെ നേതൃത്വത്തിലാണ് വരയരുവി എന്ന പേരിൽ പാമ്പാക്കുടയിലെ അരീക്കലിൽ പരിപാടി സംഘടിപ്പിച്ചത്. വെള്ളച്ചാട്ടത്തിന്‍റെ മനോഹാരിത ഓരോരുത്തരും ചിത്രങ്ങളിലൂടെ പകർത്തിയത് ഇവിടെയെത്തിയ ടൂറിസ്റ്റുകൾക്കും, നാട്ടുകാർക്കും നവ്യാനുഭവം പകർന്നു. രേഖാ ചിത്രരചന നടത്തിയതും ശ്രദ്ധേയമായി. ക്യാമ്പിന്‍റെ ഉദ്ഘാടനം ജില്ലാ പഞ്ചായത്ത് സ്ഥിരം സമിതി അധ്യക്ഷ ആശാ സനിൽ നിർവഹിച്ചു. വാർഡ് മെമ്പർ തോമസ് തടത്തിൽ അധ്യക്ഷത വഹിച്ചു. പഞ്ചായത്തംഗം റീജ മോൾ ജോബി, ചിത്രകാരന്മാരായ ശിവദാസ് എടയ്ക്കാട്ടുവയൽ, ജയൻ ടെറാക്രാഫ്റ്റ് എന്നിവർ പ്രസംഗിച്ചു. ക്യാമ്പ് കൺവീനർ ബേബി മണ്ണത്തൂർ, ജില്ലാ പ്രസിഡന്‍റ് ഗോപി സംക്രമണം, സെക്രട്ടറി ഡഗ്ലസ് കൊച്ചി, വർഗീസ് പീറ്റർ എന്നിവർ നേതൃത്വം നൽകി.

മൂവാറ്റുപുഴ നഗരത്തില്‍ വീണ്ടും പൈപ്പ് പൊട്ടി

മൂവാറ്റുപുഴ: മൂവാറ്റുപുഴ നഗരത്തില്‍ വീണ്ടും പൈപ്പ് പൊട്ടി. വെള്ളൂര്‍ക്കുന്നം കീച്ചേരിപ്പടി മാര്‍ക്കറ്റ് റോഡില്‍ മുനിസിപ്പല്‍ സ്റ്റേഡിയത്തിന് മുന്നിലാണ് ഇന്നലെ രാവിലെ പത്തരയോടെ വാട്ടര്‍ അഥോറിറ്റിയുടെ പൈപ്പ് പൊട്ടി വെള്ളം പാഴായത്. കീച്ചേരിപ്പടി, നിരപ്പ് പ്രദേശങ്ങളിലേക്കുള്ള പ്രധാന പൈപ്പാണ് തകര്‍ന്നത്. പൈപ്പ് പൊട്ടിയതിനെ തുടര്‍ന്ന് റോഡും തകര്‍ന്നു. ഒരു വര്‍ഷം മുന്‍പ് ഒരു കോടി രൂപ മുതല്‍ മുടക്കി ആധുനിക നിലവാരത്തില്‍ നവീകരിച്ച റോഡാണ് പൈപ്പ് പൊട്ടലിനെ തുടര്‍ന്ന് തകര്‍ന്നത്. പൈപ്പ് പൊട്ടി വെള്ളം റോഡിലേക്ക് ഒഴുകിയത് മൂലം വാഹന ഗതാഗതം തടസപ്പെട്ടു. തുടര്‍ന്ന് റോഡില്‍ കാല്‍നടയാത്രക്കാര്‍ക്ക് സഞ്ചരിക്കാന്‍ കഴിയാത്ത സ്ഥിതിയായിരുന്നു.

തപാൽ ഓഫീസിന്‍റെ മതിൽ ഇടിഞ്ഞു വീണു

വാഴക്കുളം: ടൗൺ മധ്യത്തിലുള്ള തപാൽ ഓഫീസിന്‍റെ മതിൽ ഇടിഞ്ഞു വീണു. ഇന്നലെ രാവിലെയാണ് മതിൽ ഇടിഞ്ഞു വീണതായി കണ്ടത്. ഇതോടെ മതിലിനോടു ചേർന്നു ഓഫീസ് വളപ്പിൽ നിന്നിരുന്ന വൈദ്യുത പോസ്റ്റ് ചെരിഞ്ഞ് അപകട ഭീഷണിയിലായി. വൈദ്യുത വകുപ്പ് അധികൃതരുടെ നേതൃത്വത്തിൽ വൈദ്യുത പോസ്റ്റ് റോഡരികിലേക്ക് മാറ്റി സ്ഥാപിച്ച് വൈകുന്നേരത്തോടെ വൈദ്യുതി ബന്ധം പുന:സ്ഥാപിച്ചു. വാഴക്കുളം ടൗണിൽ നിന്ന് കൂത്താട്ടുകുളത്തിനുള്ള തിരക്കേറിയ വഴിയോരത്താണ് തപാൽ ഓഫീസ്. നാലു പതിറ്റാണ്ടോളമായ ഓഫീസ് കെട്ടിടം അതീവ ജീർണാവസ്ഥയിലാണ്. കെട്ടിടത്തിന്‍റെ വാർക്ക പൊളിഞ്ഞ് മഴ പെയ്യുമ്പോൾ ഉള്ളിലേക്ക് വെള്ളം ഇറങ്ങുന്നുണ്ട്. ഭിത്തികൾ വിണ്ടുകീറിയിട്ടുണ്ട്. ജനലുകൾ തകർന്ന നിലയിലുമാണ്. അറ്റകുറ്റപ്പണികൾ നടത്തിയിട്ട് വർഷങ്ങളായി. ജീവനക്കാർക്കും പൊതുജനങ്ങൾക്കും തപാൽ ഓഫീസ് ഭീഷണിയായ വിവരം ചൂണ്ടിക്കാട്ടി പോസ്റ്റുമാസ്റ്റർ ജനറലിനു പരാതി നൽകിയെങ്കിലും യാതൊരു നടപടിയും സ്വീകരിച്ചില്ല..

വീടുകളിൽ വെള്ളം കയറി

കല്ലൂർക്കാട്: ചാറ്റുപാറ പ്രദേശത്തുണ്ടായ മിന്നൽ പ്രളയത്തിൽ വീടുകളിൽ വെള്ളം കയറി. ഞായറാഴ്ച രാത്രിയിൽ പെയ്ത മഴയെ തുടർന്ന് വെള്ളം കുത്തിയൊഴുകി . കുഞ്ഞ് ചെമ്പനാത്തണ്ടേൽ, സുകുമാരൻ പൂക്കുളത്ത്, രാജു തൈക്കണ്ടത്തിൽ, സതി അയ്യപ്പൻ ഇളശേരിക്കുടിയിൽ എന്നിവരുടെ വീടുകളിലാണ് വെള്ളം കയറിയത്. മണിയന്തടം മലഞ്ചെരുവിലുള്ള പാറമട ഭാഗത്തു നിന്ന് വൻതോതിൽ മണ്ണും പാറക്കഷണങ്ങളും കുത്തിയൊലിച്ചു. പ്രദേശവാസികളുടെ സഹായത്തോടെ വെള്ളം വഴിതിരിച്ചു വിട്ടാണ് വെള്ളക്കെട്ട് കുറച്ചത്. വീട്ടുപകരണങ്ങൾ പലതും വെള്ളത്തിൽ ഒഴുകിപ്പോയി. മഴ തുടരുന്നതിനാൽ അപകട ഭീഷണി കണക്കിലെടുത്ത് ഇവർ സുരക്ഷിതമായ സ്ഥലത്തുള്ള വീടുകളിലേക്ക് താമസം മാറിയിരിക്കുകയാണ്.

നെല്ലിക്കുഴി എക്കുന്നം ചിറ നവീകരണം ആരംഭിച്ചു

കോതമംഗലം: കാലങ്ങളായി ഉപയോഗശൂന്യമായി കിടന്ന നെല്ലിക്കുഴി എക്കുന്നം ചിറയുടെ നവീകരണം ബ്ലോക്ക് പഞ്ചായത്ത് ആരംഭിച്ചു. ബ്ലോക്ക് പഞ്ചായത്ത് പ്രസിഡന്‍റ് പി.എ.എം ബഷീർ ഉദ്ഘാടനം ചെയ്തു . വർഷം മുഴുവൻ സമൃദ്ധമായി ജലം നിറഞ്ഞ് കിടക്കുന്ന ചിറ ചുറ്റുമുള്ള കിണറുകളിലും, കൃഷിയിടങ്ങളിലും ജല ലഭ്യതയ്ക്ക് സഹായകരമാണ്. ബ്ലോക്ക് പഞ്ചായത്ത് 2025 - 2026 വാർഷിക പദ്ധതിയിൽ ഉൾപ്പെടുത്തി 20 ലക്ഷം രൂപ വകയിരുത്തിയാണ് നിർമാണം ആരംഭിച്ചത്. ചിറയുടെ ഉൾഭിത്തിയും, ചുറ്റും നടപ്പാതയും പദ്ധതിയിലൂടെ നിർമിക്കും. ബ്ലോക്ക് പഞ്ചായത്ത് വികസനകാര്യ സ്ഥിരംസമിതി ചെയർമാൻ ജോമി തെക്കേക്കര അധ്യക്ഷത വഹിച്ചു. ബ്ലോക്ക് പഞ്ചായത്ത് അംഗം നിസമോൾ ഇസ്മയിൽ, പഞ്ചായത്ത് അംഗം നാസർ വട്ടേക്കാടൻ , സലിം മംഗലപ്പാറ എന്നിവർ പ്രസംഗിച്ചു.

തദ്ദേശ സ്ഥാപനങ്ങളെ ശക്തിപ്പെടുത്തിയത് എൽഡിഎഫ്: മുല്ലക്കര രത്നാകരൻ

പിറവം: സംസ്ഥാനത്ത് ഫലപ്രദമായ അധികാരവികേന്ദ്രീകരണ പ്രക്രിയയിൽ കൂടി തദ്ദേശ സ്വയംഭരണ സ്ഥാപനങളെ ശകതിപ്പെടുത്തിയതു എൽഡിഎഫ് ഭരണകാലത്താണെന്ന് മുൻ മന്ത്രി മുല്ലക്കര രത്നാകരൻ പറഞ്ഞു. സിപിഐയുടെ നേതൃത്വത്തിൽ പിറവം കളമ്പൂർ കോട്ടപ്പുറത്ത് സംഘടിപ്പിച്ച വീട്ടുമുറ്റ സദസ് ഉദ്ഘാടനം ചെയ്യുകയായിരുന്നു അദ്ദേഹം. നഗരസഭാ ചെയർപേഴ്സൺ അഡ്വ. ജൂലി സാബു അധ്യക്ഷത വഹിച്ചു. സിപിഐ സംസ്ഥാന കൗൺസിൽ അംഗം അഡ്വ. കെ.എൻ. സുഗതൻ, എഐടിയുസി ജില്ലാ സെക്രട്ടറി കെ. എൻ. ഗോപി, അഡ്വ. ജിൻസൺ വി.പോൾ, അഡ്വ. ബിമൽ ചന്ദ്രൻ, സി. എൻ. സദാമണി, കെ.സി. തങ്കച്ചൻ, അനന്തു വേണുഗോപാൽ, ഡോ.സൻജിനി പ്രതീഷ്, സജി ഏബ്രാഹം, കെ.പി. ബിനേഷ് എന്നിവർ പ്രസംഗിച്ചു. മുതിർന്ന പാർട്ടി പ്രവർത്തകർ, പരീക്ഷകളിൽ ഉന്നത വിജയം നേടിയ വിദ്യാർഥികൾ തുടങ്ങിയവരെ ആദരിച്ചു.

അങ്കണവാടി ഉദ്ഘാടനം ചെയ്തു

കോതമംഗലം : കോതമംഗലം നഗരസഭയിലെ 26 -ാം വാർഡിൽ പുതുതായി പണികഴിപ്പിച്ച അങ്കണവാടിയുടെ ഉദ്ഘാടനം ആന്‍റണി ജോൺ എംഎൽഎ നിർവഹിച്ചു. മുനിസിപ്പൽ ചെയർമാൻ ടോമി ഏബ്രഹാം അധ്യക്ഷത വഹിച്ചു. നഗരസഭാ വൈസ് ചെയർപേഴ്സൺ സിന്ധു ഗണേശൻ, സ്ഥിരം സമിതി ചെയർമാൻമാരായ കെ.എ നൗഷാദ്, രമ്യ വിനോദ്, ബിൻസി സിജു, ജോസ് വർഗീസ്, വാർഡ് കൗൺസിലർമാരായ ജൂബി പ്രതീഷ്, കെ.എ. ഷിനു , ബബിത മത്തായി, പ്രവീണ ഹരീഷ്, മുൻ കൗൺസിലർ സിപിഎസ് ബാലൻ എന്നിവർ പ്രസംഗിച്ചു. നഗരസഭ 2227110 രൂപ ചെലവഴിച്ചാണ് അങ്കണവാടിയുടെ നിർമാണം പൂർത്തീകരിച്ചത്. അങ്കണവാടിക്കായി മൂന്നു സെന്‍റ് സ്ഥലം സൗജന്യമായി നൽകിയ പാലപ്പിള്ളി പി.കെ മണിയെ ചടങ്ങിൽ ആദരിച്ചു.

പെരിയാറിൽ വൻതോതിൽ ചെളി; ജലശുദ്ധീകരണം കുറച്ചു

ആലുവ: കിഴക്കൻ മേഖലയിൽ മഴ ശക്തമായതിനു പിന്നാലെ ഡാമുകൾ തുറന്നുവിട്ടതോടെ പെരിയാറിൽ ചെളിയുടെ അളവ് വൻതോതിൽ വർധിച്ചു. ഇന്നലെ രാത്രി 7.15 ന് രേഖപ്പെടുത്തിയ കണക്കുകൾ പ്രകാരം 150 എൻടിയുവാണ് ചെളിയുടെ അളവ്. സാധാരണയിലും 15 ഇരട്ടിയാണിത്. ഇതേ തുടർന്ന് ആലുവ ജലശുദ്ധീകരണശാലയിൽ ജലശുദ്ധീകരണത്തിന്‍റെ അളവിൽ അഞ്ച് എംഎൽഡി കുറച്ച് 310 ആക്കി. ചെളിയുടെ തോത് ഉയർന്നാൽ കൂടുതൽ നിയന്ത്രണങ്ങൾ പരിഗണനയിലുണ്ട്. പശ്ചിമ കൊച്ചിയിലേക്കുള്ള കുടിവെള്ള വിതരണത്തെയും ഇത് പ്രതികൂലമായി ബാധിക്കും. സാധാരണ 315 എംഎൽഡി വെള്ളമാണ് ആലുവയിലെ പ്ലാന്‍റിൽ പ്രതിദിനം ശുദ്ധീകരിക്കുന്നത്.

ഹോൺ മുഴക്കി പ്രതിഷേധം ഏറ്റു; മന്ത്രി ഉടൻ സ്ഥലംവിട്ടു

ഫോർട്ടുകൊച്ചി: പ്രതിഷേധങ്ങൾ പലതരം കണ്ടിട്ടുണ്ട്, എന്നാൽ വേറിട്ടൊരു പ്രതിഷേധം ഫോർട്ടുകൊച്ചിയിൽ നടന്നു. ഏതാണ്ട് നൂറോളം ഇരുചക്രവാഹനങ്ങളുടെ ഒരുമിച്ചുള്ള ഹോൺ മുഴക്കൽ പ്രതിഷേധം. കലാമണ്ഡലത്തിന്‍റെ പുതിയ കേന്ദ്രം ഉദ്ഘാടനം ചെയ്യാനെത്തിയതായിരുന്നു മന്ത്രി സജി ചെറിയാൻ. ഉദ്ഘാടനം നടക്കുന്ന വേദിയുടെ റോഡിന്‍റെ നേരേ എതിർ വശത്താണ് റോ-റോ ജെട്ടി. മന്ത്രിയുടെ പ്രസംഗം കഴിഞ്ഞ ഉടൻ തന്നെ മന്ത്രിയുടെ വാഹനം അക്കര കടക്കുന്നതിനായി പോലീസ് ഇടപെട്ട് റോ-റോ സർവീസ് നിർത്തിവയ്പ്പിച്ചു . ഒരു റോ-റോ വെസൽ തകരാറിലായതിനാൽ ഒരു റോ-റോ മാത്രമാണ് നിലവിൽ ഇവിടെ സർവീസ് നടത്തുന്നത്. മന്ത്രി പരിപാടി കഴിയുന്നതോടെ റോ- റോയിൽ കടന്നുപോകുമെന്നും സർവീസ് തുടങ്ങുമെന്ന ധാരണയിലായിരുന്നു അഴിമുഖം കടക്കാൻ കാത്തുനിന്നിരുന്ന യാത്രക്കാർ. എന്നാൽ ചടങ്ങിന്‍റെ നന്ദി പ്രകാശനം അടക്കം കഴിഞ്ഞിട്ടും മന്ത്രിയുടെ വാഹനം കടന്ന് പോകാതായതോടെ കാത്ത് കിടന്നിരുന്ന ഇരുചക്രവാഹനങ്ങൾ ഒരുമിച്ച് നിർത്താതെ ഹോൺ മുഴക്കി പ്രതിഷേധിക്കുകയായിരുന്നു. ചടങ്ങിനു ശേഷം നടക്കുന്ന പഞ്ചവാദ്യം കാണാനിരുന്നതായിരുന്നു മന്ത്രിയെന്നാണ് കേൾക്കുന്നത്. എന്നാൽ സംഗതി ശ്രദ്ധയിൽപെട്ടതോടെ മന്ത്രി ഉടനെ സ്റ്റേജിൽ നിന്നിറങ്ങി കാറിൽ കയറി റോ-റോയിൽ കടക്കുകയായിരുന്നു. ചെറിയ പ്രതിഷേധമായിരുന്നെങ്കിലും യാത്രക്കാർ ഒരുമിച്ച സംഭവത്തിന്‍റെ വ്യാപ്തി വലുതായിരുന്നു.

ചെടിച്ചട്ടികളും പച്ചക്കറിത്തൈകളും നൽകി

തിരുമാറാടി: പഞ്ചായത്ത് കർഷകർക്കായി പരിസ്ഥിതി സൗഹൃദ ചെടിച്ചട്ടികളും പച്ചക്കറിതൈകളും വിതരണം ചെയ്തു. 2000 രൂപ വിലയുളള ചെടിച്ചട്ടികളാണ് വിതരണം ചെയ്തത്. പഞ്ചായത്ത് വൈസ് പ്രസിഡന്‍റ് എം.എം. ജോർജ് വിതരണ ഉദ്ഘാടനം നിർവഹിച്ചു. സ്ഥിരംസമിതി അധ്യക്ഷ അനിത ബേബി, സാജു ജോൺ, രമ എം. കൈമൾ, പഞ്ചായത്ത് അംഗങ്ങളായ സി.വി. ജോയി, കെ.കെ. രാജകുമാർ, ആലീസ് ബിനു, എം.സി. അജി, പഞ്ചായത്ത് സെക്രട്ടറി പി.പി. റെജിമോൻ, കൃഷി ഓഫീസർ സി.ഡി. സന്തോഷ് തുടങ്ങിയവർ പ്രസംഗിച്ചു.

ഡിവൈൻ മേഴ്സി ഷ്റൈനിൽ വിശുദ്ധ ജോൺ പോൾ പാപ്പയുടെ തിരുനാൾ നാളെ

വാഴക്കുളം: തൊടുപുഴ ഡിവൈൻ മേഴ്സി ഷ്റൈനിൽ ദൈവകരുണയുടെ മധ്യസ്ഥനായ വി ശുദ്ധ ജോൺ പോൾ പാപ്പയുടെ തിരുനാൾ നാളെ നടത്തും. രാവിലെ 5.30ന് ദിവ്യകാരുണ്യ ആരാധന, വിശുദ്ധ കുർബാന. വൈകുന്നേരം ആറിന് ജപമാല, ലദീഞ്ഞ്, തിരുനാൾ കുർബാന. രാത്രി 7.45 ന് പ്രദക്ഷിണം, തിരുശേഷിപ്പ് വണക്കം, രാത്രി എട്ടിന് നേർച്ച.

കിണറ്റിൽ വീണ വയോധികനെ അഗ്നിരക്ഷാ സേന രക്ഷിച്ചു

പിറവം: ചുറ്റുമതിലില്ലാത്ത കിണറ്റിൽ വീണ വയോധികനെ അഗ്നിരക്ഷാ സേനാ ഉദ്യോഗസ്ഥരെത്തി രക്ഷപ്പെടുത്തി. മണീടിനടുത്ത് മേമ്മുഖം കുപ്പക്കാട്ടിൽ ചെറിയാനാ(81)ണ് വീടിനു സമീപത്തെ റബർ തോട്ടത്തിലെ ഉപയോഗശൂന്യമായ കിണറ്റിൽ വീണത്. ഇന്നലെ വൈകുന്നേരമായിരുന്നു സംഭവം. തോട്ടത്തിലൂടെ നടന്നുപോകവെ അബദ്ധത്തിൽ ചുറ്റുമതിലില്ലാത്ത കിണറ്റിൽ വീണതാണെന്ന് കരുതുന്നു. പതിനഞ്ചടിയോളം ആഴമുള്ള കിണറിനുള്ളിൽ അഞ്ചടിയോളം വെള്ളമുണ്ടായിരുന്നു. ചെറിയാനെ വീട്ടിൽ കാണാത്തതിനെ തുടർന്ന് സഹോദരൻ അന്വേഷിച്ചിറങ്ങിയപ്പോൾ കിണറ്റിൽ നിന്ന് നിലവിളി കേട്ടു. ഉടൻ പിറവത്തെ അഗ്നരക്ഷാ സേനാ ഓഫീസിൽ അറിയിച്ചു. ഇതിനിടെ വീട്ടുകാർ കയറിൽക്കെട്ടി കോണി ഇറക്കുകയും അതിൽപിടിച്ച് ചെറിയാന് നിൽക്കാനുമായി. അഗ്നിരക്ഷാ യൂണിറ്റിലെ സീനിയർ ഓഫീസർ എം.വി. ബാലചന്ദ്രന്‍റെ നേതൃത്വത്തിലെത്തിയ സേനാംഗങ്ങൾ കിണറ്റിലിറങ്ങി നെറ്റ് ഉപയോഗിച്ചാണ് ചെറിയാനെ കരയ്ക്കെത്തിച്ചത്. ശാരീരിക അസ്വസ്ഥതകൾ പ്രകടിപ്പിച്ചതിനെ തുടർന്ന് ഇദ്ദേഹത്തെ പിറവത്തെ സ്വകാര്യ ആശുപത്രിയിൽ പ്രവേശിപ്പിച്ചു.

വാഹന പ്രചാരണ ജാഥ

കൂത്താട്ടുകുളം: കേരള കോൺഗ്രസ്-ജേക്കബ് കൂത്താട്ടുകുളം മണ്ഡലം കമ്മിറ്റിയുടെ നേതൃത്വത്തിൽ നടന്ന രാഷ്ട്രീയ വിശദീകരണ വാഹന പ്രചാരണ ജാഥ പാർട്ടി ലീഡർ അനൂപ് ജേക്കബ് എംഎൽഎ ഉദ്ഘാടനം ചെയ്തു. കെടിയുസി സംസ്ഥാന പ്രസിഡന്‍റ് എം.എ. ഷാജി.അധ്യക്ഷത വഹിച്ചു. സംസ്ഥാന ജനറൽ സെക്രട്ടറി രാജു പാണാലിക്കൽ മുഖ്യപ്രഭാഷണം നടത്തി. സംസ്ഥാന ജനറൽ സെക്രട്ടറി സുനിൽ ഇടപ്പലക്കാട്ട് ജാഥാ ക്യാപ്റ്റൻ മണ്ഡലം പ്രസിഡന്‍റ് എൽ.കെ. ചാക്കോച്ചന് പതാക കൈമാറി. നിഷ ജിനോ, ജോസ് വേളൂക്കര, കെ.ജെ. സ്റ്റീഫൻ, സുധൻ കുടിലിൽ എന്നിവർ നേതൃത്വം നൽകി. ഓലക്കാട്ടിൽ നിന്ന് ആരംഭിച്ച ജാഥ നഗരസഭയിൽ വിവിധ കേന്ദ്രങ്ങളിലെ സ്വീകരണങ്ങൾ ഏറ്റുവാങ്ങി പ്രൈവറ്റ് ബസ് സ്റ്റാൻഡിൽ സമാപിച്ചു.

അജ്ഞാത യുവതി ട്രെയിൻ തട്ടി മരിച്ചനിലയിൽ

നെടുമ്പാശേരി: പുറയാർ റെയിൽവേ ഗേറ്റിന് സമീപം അജ്ഞാത യുവതിയെ ട്രെയിൻ തട്ടി മരിച്ച നിലയിൽ കണ്ടെത്തി. ഏകദേശം 35 - 40 വയസ് പ്രായം തോന്നിക്കും. 5.3 അടി ഉയരമുണ്ട്. തടിച്ച ശരീരം, ഇരുനിറം, ഇടത് കവിളിൽ കറുത്ത മറുക്, നീല ടോപ്പും കറുത്ത ഷോളും കറുത്ത പാന്‍റും ആയിരുന്നു ധരിച്ചിരുന്നത്. ഇന്നലെ ഉച്ചയ്ക്ക് 1.35 ഓടെ പുറയാർ റെയിൽവേ ഗേറ്റിൽ നിന്നും 500 മീറ്റർ വടക്ക് മാറി റെയിൽവേ ട്രാക്കിൽ നാട്ടുകാരാണ് മൃതദേഹം കണ്ടത്. മൃതദേഹം ജില്ലാ ആശുപത്രി മോർച്ചറിയിലേക്ക് മാറ്റി. നെടുമ്പാശേരി പോലീസ് കേസെടുത്തു. ഫോൺ: 04842610611, +919497933048.

മത്സ്യബന്ധന ബോട്ടിൽ നിന്നും കായലിൽ വീണ് കന്യാകുമാരി സ്വദേശി മരിച്ചു

ചെറായി: ഹാർബറിൽ കെട്ടിയിട്ടിരുന്ന മത്സ്യബന്ധന ബോട്ടിൽ നിന്നും കായലിൽ വീണ മത്സ്യത്തൊഴിലാളി മുങ്ങി മരിച്ചു. ഉലകമാതാ എന്ന മത്സ്യബന്ധന ബോട്ടിലെ തൊഴിലാളിയായ തമിഴ്നാട് കന്യാകുമാരി സ്വദേശി പോൾ രാജ്സ്റ്റൻ സിലറി - 58 ആണ് മരിച്ചത്. മുനമ്പം മാതൃകാ ഹാർബറിൽ ഞായറാഴ്ച രാത്രിയായിരുന്നു സംഭവം. കൂടെയുണ്ടായിരുന്ന തൊഴിലാളികൾ നടത്തിയ തിരച്ചിലിൽ ആളെ കണ്ടെത്തുകയായിരുന്നു. മുനമ്പം പോലീസിന്‍റെ വാഹനത്തിൽ കുഴുപ്പിള്ളിയിലെ സ്വകാര്യ ആശുപത്രിയിൽ എത്തിച്ചെങ്കിലും മരണമടഞ്ഞു. അഴീക്കോട് നിന്നും എസ്ഐ ബിജു ജോസിന്‍റെ നേതൃത്വത്തിൽ പോലീസും എത്തിയിരുന്നു. മൃതദേഹം പോസ്റ്റ്മോർട്ടത്തിന് ശേഷം നാട്ടിലേക്ക് കൊണ്ടുപോയി.

വരുമാനക്കുതിപ്പില്‍ ജില്ലയിലെ വിനോദ സഞ്ചാര കേന്ദ്രങ്ങള്‍

കൊച്ചി: വരുമാനക്കുതിപ്പില്‍ ജില്ലയിലെ വനംവകുപ്പിന്‍റെ കീഴിലെ വിനോദ സഞ്ചാര കേന്ദ്രങ്ങള്‍. കഴിഞ്ഞ മൂന്ന് വര്‍ഷത്തിനിടെ ലക്ഷങ്ങളുടെ വരുമാനമാണ് ഓരോ ടൂറിസം കേന്ദ്രങ്ങളില്‍ നിന്നും നേടാനായത്. എറണാകുളം ജില്ലയിലെ ഫോറസ്റ്റ് ഡിവിഷന്‍ ഓഫീസുകള്‍ക്ക് കീഴിലുള്ള ടൂറിസം കേന്ദ്രങ്ങളിലാണ് സമീപകാലത്തായി വരുമാന നേട്ടം ഉണ്ടായിട്ടുള്ളത്. മലയാറ്റൂര്‍ ഫോറസ്റ്റ് ഡിവിഷന് കീഴിലുള്ള മുളങ്കുഴി, പാണിയേലി പോര്, ഭൂതത്താന്‍കെട്ട് എന്നിവിടങ്ങളിലും കാലടി പ്രകൃതി പഠനകേന്ദ്രത്തിന് (എന്‍എസ്‌സി) കീഴിലെ അഭയാരണ്യം, പാണംകുഴി, മംഗളവനം, സുവര്‍ണോദ്യാനം എന്നിവിടങ്ങളിലും കോതമംഗലം ഫോറസ്റ്റ് ഡിവിഷന് കീഴിലുള്ള ഇടുക്കി ജില്ലയിലെ തൊമ്മന്‍കുത്തിലുമാണ് കഴിഞ്ഞ മൂന്നു വര്‍ഷത്തിനിടെ വരുമാനത്തില്‍ വലിയ കുതിപ്പ് ഉണ്ടായിട്ടുള്ളത്. വനം വകുപ്പിന്‍റെ പ്രവര്‍ത്തനങ്ങള്‍ക്ക് പുറമേ സമൂഹമാധ്യമങ്ങളിലടക്കം വിനോദ സഞ്ചാര കേന്ദ്രങ്ങളെക്കുറിച്ചുള്ള മനോഹര ദൃശ്യങ്ങളും ചെറു വീഡിയോകളും സഞ്ചാരികളെ ഇവിടേക്ക് എത്തിക്കുന്നതിന് സഹായകമായിട്ടുണ്ടെന്നാണ് വിലയിരുത്തല്‍. സന്ദര്‍ശകരുടെ എണ്ണം വര്‍ധിക്കുന്നതോടെ പ്രദേശങ്ങളിലെ അടിസ്ഥാന വിസകന സൗകര്യങ്ങളും വര്‍ധിപ്പിക്കണമെന്ന് ആവശ്യവും ഉയരുന്നുണ്ട്. ജില്ലയില്‍ കഴിഞ്ഞ മൂന്ന് വര്‍ഷത്തിനിടെ ഏറ്റവുമധികം വരുമാനം നേടിയത് മലയാറ്റൂര്‍ പാണിയേലി പോരിലാണ്. 1.95 കോടി രൂപയാണ് ഇവിടെ ലഭിച്ചത്. മലയാറ്റൂർ ഭൂതത്താന്‍കെട്ടാണ് തൊട്ടുപിന്നില്‍ 65.74 ലക്ഷം, എന്‍എസ്‌സി കാലടി അഭയാരണ്യം 60.01 ലക്ഷം, മലയാറ്റൂര്‍ മുളങ്കുഴി മഹാഗണി 24.83 ലക്ഷം, എന്‍എസ്‌സി കാലടി സുവര്‍ണോദ്യാനം 9.61 ലക്ഷം, എന്‍എസ്‌സി കാലടി (എറണാകുളം) മംഗളവനം 7.83 ലക്ഷം, എന്‍എസ്‌സി കാലടി പാണംകുഴി 3.88 ലക്ഷം എന്നിങ്ങനെയാണ് വകുപ്പിന് കീഴിലെ മറ്റ് വിനോദ സഞ്ചാര കേന്ദ്രങ്ങളിലെ വരുമാനം.

കാടുകയറി ഭൂതത്താൻകെട്ടിലെ ക്വാർട്ടേഴ്സുകൾ

കോതമംഗലം: ടൂറിസ്റ്റ് കേന്ദ്രമായ ഭൂതത്താൻകെട്ടിലെ ക്വാർട്ടേഴ്സുകൾ കാടുകയറി നശിക്കുന്നു. പെരിയാർവാലിയുടെ ഉടമസ്ഥതയിലുള്ളതാണ് ക്വാർട്ടേഴ്സുകൾ. കാട് മൂടിയിരിക്കുന്ന പരിസരം, ആൾത്താമസമില്ലാത്ത കെട്ടിടങ്ങൾ. ഒറ്റനോട്ടത്തിൽ സ്ഥലപ്പേരിലുള്ള ഭൂതങ്ങളിവിടെയാണോ എന്ന് പോലും തോന്നിപ്പിക്കുന്ന അന്തരീക്ഷം. മുമ്പ് പെരിയാർവാലിയിലെ ജീവനക്കാരുടെ ക്വാട്ടേഴ്സുകളായിരുന്നു ഈ കെട്ടിടങ്ങൾ. പതിനഞ്ചോളം ക്വാർട്ടേഴ്സുകളിൽ ഇപ്പോൾ ഉപയോഗിക്കുന്നത് രണ്ടെണ്ണം മാത്രം. മറ്റുള്ളവയെല്ലാം ആവശ്യത്തിന് പരിപാലനമില്ലാതെ തകർച്ചയുടെ വക്കിൽ. ഇതേ അവസ്ഥ തുടർന്നാൽ കെട്ടിടങ്ങൾ ഉപയോഗശൂന്യമാകാൻ അധികകാലം കാത്തിരിക്കേണ്ടതില്ല. ക്വാർട്ടേഴ്സ് കെട്ടിടങ്ങൾ ടൂറിസം ആവശ്യത്തിന് ഉപയോഗപ്പെടുത്താൻ മുമ്പ് തീരുമാനമെടുത്തിരുന്നതാണ്. കെടിഡിസിക്ക് കൈമാറാനും നടപടി എടുത്തിരുന്നു. വിനോദ സഞ്ചാരികൾക്കായുള്ള കോട്ടേജുകളാക്കി മാറ്റാനായിരുന്നു തീരുമാനം. ഇതിന്‍റെ ഭാഗമായി ലക്ഷക്കണക്കിന് രൂപ മുടക്കി കെട്ടിടങ്ങളുടെ അറ്റകുറ്റപ്പണി നടത്തിയതുമാണ്. കെടിഡിസിയുടെ നേതൃത്വത്തിൽ വികസന പദ്ധതികളും ആസൂത്രണം ചെയ്തിരുന്നു. ഇതിന് മുന്നോടിയായി ബിയർ പാർലർ തുടങ്ങി. ഈ നീക്കത്തിന് മുൻകൈയെടുത്തവർ സ്ഥാനങ്ങളിൽ നിന്ന് മാറിയത് പദ്ധതിക്ക് തിരിച്ചടിയായി. പിന്നീട് ബിയർ പാർലർ അടച്ചുപൂട്ടി. കെടിഡിസി ഭൂതത്താൻകെട്ടിനോട് സലാം പറഞ്ഞു. ഇറിഗേഷൻ ടൂറിസം പദ്ധതിയുടെ ഭാഗമായി പെരിയാർവാലിയുടെ കെട്ടിടങ്ങളടക്കം കരാറെടുത്ത സ്വകാര്യ കമ്പനിക്ക് കൈമാറാൻ ജലവിഭവ വകുപ്പ് തീരുമാനിച്ചിരുന്നു. ഇതിൽ ക്വാട്ടേഴ്സ് കെട്ടിടങ്ങളും ഉൾപ്പെടും. പദ്ധതിയുടെ തുടർനടപടികൾ അനിശ്ചിതത്വത്തിലാണ്. റിസർവോയറിന്‍റെയും തടാകത്തിന്‍റെയും സമീപത്താണ് ഈ കെട്ടിടങ്ങൾ. കെട്ടിടങ്ങൾ ഫലപ്രദമായി ഉപയോഗിക്കാൻ കഴിഞ്ഞാൽ ടൂറിസ്റ്റ് കേന്ദ്രത്തിന്‍റെ മുഖച്ഛായ മാറും. പൊതുഖജനാവിലേക്ക് വരുമാനവും ലഭിക്കും. ക്വാർട്ടേഴ്സുകൾക്ക് സമീപം ഡാം സൈറ്റിനോട് ചേർന്ന് നിർമിച്ചിട്ടുള്ള വാച്ച് ടവറും പ്രവേശനം നിഷേധിച്ച് നോക്കുകുത്തിയായി നിലകൊള്ളുകയാണ്. പെരിയാർവാലി എക്സിക്യുട്ടീവ് എൻജിനീയർ അടക്കമുള്ള ഉദ്യോഗസ്ഥൻ കഴിഞ്ഞ ദിവസം സ്ഥലത്ത് നേരിട്ടെത്തി പരിശോധന നടത്തി. തുടർനടപടികൾ ഉടൻ ഉണ്ടാകുമെന്ന് പ്രതീക്ഷയിലാണ് പ്രദേശവാസികൾ.

ലൈറ്റ് ഹൗസ് ബീച്ചിൽ സുരക്ഷ തീരെ പോരാ

വൈപ്പിൻ: അവധി ദിവസങ്ങളിലും വിശേഷദിവസങ്ങളിലും നിരവധി സന്ദർശകർ എത്തുന്ന പുതുവൈപ്പ് ലൈറ്റ് ഹൗസ് ബീച്ചിൽ സന്ദർശകർക്ക് സുരക്ഷ പോരെന്ന് ആക്ഷേപം. ലൈഫ് ഗാർഡുകളോ പോലീസോ സേവനത്തിൽ ഇല്ലാത്തതിനാൽ പരിധിവിട്ട് കടലിൽ കുളിക്കുന്നവരെ വിലക്കാനും നിയന്ത്രിക്കാനും ആരുമില്ല. മാത്രമല്ല, അപകടത്തിൽപ്പെട്ടാൽ രക്ഷാപ്രവർത്തനത്തിലും മറ്റും യാതൊരു സംവിധാനങ്ങളും ഇവിടെയില്ല. ഏതാനും ദിവസങ്ങൾക്കു മുമ്പ് മഹാരാജാസ് കോളജിലെ ഒരു വിദ്യാർഥി മുങ്ങിമരിച്ച ഫോർട്ട് വൈപ്പിൻ പെബിൾസ് ബീച്ചിലെ സ്ഥിതിയും ഇതുതന്നെയാണ്. നിയന്ത്രിക്കാൻ ആളില്ലാത്തതിനാൽ ഇവിടെ എത്തുന്ന സന്ദർശകർ പരിധിവിട്ട് കടലിൽ ഇറങ്ങി കുളിക്കുക പതിവാണെന്ന് പ്രാദേശവാസികൾ പറയുന്നു. ഈ സാഹചര്യത്തിൽ അവധി ദിനങ്ങളിൽ രണ്ട് ബീച്ചുകളിലും ലൈഫ് ഗാർഡുകളുടെ സേവനം ലഭ്യമാക്കണമെന്ന് നാട്ടുകാർ ജില്ലാ ടൂറിസം പ്രമോഷൻ കൗൺസിൽ അധികൃതരോട് ആവശ്യപ്പെട്ടു.

പുതിയ സിറ്റി പോലീസ് കമ്മീഷണറേറ്റ് : "നിര്‍മാണം സമയബന്ധിതമായി പൂര്‍ത്തിയാക്കണം'

കൊച്ചി: എറണാകുളം ഹൈക്കടതി ജംഗ്ഷനു സമീപം നിർമിക്കുന്ന കൊച്ചി സിറ്റി പോലീസ് കമ്മീഷണറേറ്റ് സമയബന്ധിതമായി പൂര്‍ത്തിയാക്കണമെന്ന ആവശ്യം ശക്തമാകുന്നു. നിര്‍മാണ പ്രവര്‍ത്തനങ്ങള്‍ ദ്രുതഗതിയില്‍ പൂര്‍ത്തിയാക്കാനായി സര്‍ക്കാര്‍തലത്തില്‍ കൂടുതല്‍ ഫണ്ട് അനുവദിക്കണമെന്ന ആവശ്യമാണ് പോലീസ് ഉദ്യോഗസ്ഥര്‍ക്കുളളത്. കമ്മീഷണറേറ്റിന്‍റെ നിര്‍മാണം പൂര്‍ത്തീകരിക്കുന്നതിനുള്ള ഫണ്ട് 2026- 27 പ്ലാന്‍ പ്രപ്പോസലില്‍ ഉള്‍പ്പെടുത്തുന്നതിനുള്ള നടപടി സംസ്ഥാന പോലീസ് മേധാവി തലത്തില്‍ സ്വീകരിച്ചിട്ടുണ്ടെന്ന് മുഖ്യമന്ത്രി പറയുമ്പോഴും അത് സമയബന്ധിതമായി അനുവദിക്കണമെന്ന് പോലീസ് ഉദ്യോഗസ്ഥര്‍ ആവശ്യപ്പെടുന്നു. നിലവില്‍ ഷണ്‍മുഖം റോഡിലെ റവന്യൂ ടവറില്‍ ഭവന നിര്‍മാണ ബോര്‍ഡിന്‍റെ കെട്ടിടത്തിലാണ് വലിയ തുക വാടക നല്‍കി കൊച്ചി പോലീസ് ആസ്ഥാനം പ്രവര്‍ത്തിക്കുന്നത്. പരിമിതമായ സൗകര്യത്തില്‍ സിറ്റി പോലീസ് കമ്മീഷണര്‍, മൂന്ന് ഡിസിപിമാര്‍, വിവിധ സ്‌പെഷല്‍ യൂണിറ്റുകള്‍ ഉള്‍പ്പെടെയുള്ള ഓഫീസുകളാണ് ഇവിടെയുളളത്. പുതിയ കെട്ടിടത്തിന്‍റെ നിര്‍മാണ പ്രവര്‍ത്തനങ്ങള്‍ പൂര്‍ത്തിയായാല്‍ എല്ലാ വിഭാഗങ്ങളെയും ഒരു കുടക്കീഴില്‍ കൊണ്ടുവരാനാകും. അതിലുപരി ഇപ്പോൾ നല്കിവരുന്ന വന്‍വാടകയും ഒഴിവാക്കാനാകും. 2007ലാണ് കൊച്ചി സിറ്റി പോലീസ് ആസ്ഥാനം പൊളിച്ചത്. ബഹുനിലക്കെട്ടിടം നിര്‍മിക്കുന്നതിനുള്ള പാരിസ്ഥിതിക അനുമതിയുമായി ബന്ധപ്പെട്ടതായിരുന്നു പ്രാരംഭ ഘട്ടത്തിലെ കാലതാമസം. ഇതിനായി നിര്‍ദിഷ്ട പദ്ധതിയില്‍ മാറ്റം വരുത്തി. പിന്നീട്, പോലീസ് ഓഫീസ് കം കൊമേഴ്‌സല്‍ സമുച്ചയം എന്ന ആശയത്തിലും എതിരഭിപ്രായം ഉണ്ടായി. തുടര്‍ന്ന് കെട്ടിടത്തിനുള്ളിലെ വാണിജ്യസ്ഥാപനങ്ങള്‍ ഒഴിവാക്കി പോലീസ് സമുച്ചയം മാത്രം നിര്‍മിക്കാന്‍ തീരുമാനിക്കുകയായിരുന്നു. 2021ലാണ് പുതിയ കെട്ടിടത്തിനായി അന്നത്തെ സിറ്റി പോലീസ് കമ്മീഷണർ സി.എച്ച്. നാഗരാജുവിന്‍റെ മേല്‍നോട്ടത്തില്‍ തറക്കല്ലിട്ടത്. കേരള പോലീസ് ഹൗസിംഗ് ആന്‍ഡ് കണ്‍സ്ട്രക്ഷന്‍ കോര്‍പറേഷനാണ് നിര്‍മാണ പ്രവര്‍ത്തനങ്ങള്‍ ചെയ്യുന്നത്. ഒരു ലക്ഷം ചതുരശ്ര‌യടിയിൽ 11 നിലക്കെട്ടിടത്തിന്‍റെ നിര്‍മാണം ഘട്ടങ്ങളായാണ് നടക്കുന്നത്. രണ്ടാം ഘട്ടത്തിന്‍റെ 65 ശതമാനം പൂര്‍ത്തിയായി. ഇതില്‍ 30 കോടി രൂപയുടെ പണി പൂര്‍ത്തിയായതായി ഉന്നത പോലീസ് ഉദ്യോഗസ്ഥന്‍ പറഞ്ഞു. 11 നിലകളില്‍ നാല് നിലകള്‍ പാര്‍ക്കിംഗിനായും മറ്റു നിലകള്‍ കൊച്ചി സിറ്റി പോലീസ് കമ്മീഷണറുടെ കീഴില്‍ വരുന്ന ഓഫീസുകള്‍ക്കായുമാണ് നീക്കിവച്ചിരിക്കുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]