ADVERTISEMENT

ADVERTISEMENT

ബിജെപിയും കോണ്‍ഗ്രസും ഒരേ തൂവൽപക്ഷികൾ: സ്റ്റീഫൻ ജോർജ്

പാലക്കാട്: ന്യൂനപക്ഷ പീഡന നിയമനിർമാണ കലയിൽ ബിജെപിയും കോണ്‍ഗ്രസും ഉത്തരേന്ത്യയിലും വടക്ക് കിഴക്കൻ സംസ്ഥാനങ്ങളിലും ഒരേ തൂവൽപക്ഷികളാണെന്ന് കേരള കോണ്‍ഗ്രസ്-എം സംസ്ഥാന ഓഫീസ് ചാർജ് ജനറൽസെക്രട്ടറി സ്റ്റീഫൻ ജോർജ്. കോണ്‍ഗ്രസ് നിയമമാക്കിയതും ബിജെപി ഇപ്പോൾ പിന്തുടർന്നതുമായ നിയമങ്ങൾ കാരണമാണ് ഛത്തീസ്ഗഡിൽ രണ്ട് മലയാളി കന്യാസ്ത്രീകൾ തടവിലായത്. ഇവരുടെ ജാമ്യാപേക്ഷയെ കോടതിയിൽ ബിജെപി സർക്കാർ എതിർത്തത് കോണ്‍ഗ്രസ് രൂപപ്പെടുത്തിയ നിയമത്തിലെ വ്യവസ്ഥകൾ മൂലമാണെന്നും സ്റ്റീഫൻ ജോർജ് പറഞ്ഞു. കേരള കോണ്‍ഗ്രസ്-എം ജില്ലാ പ്രതിനിധി സമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം.

ADVERTISEMENT

മികവിന്‍റെ കേന്ദ്രമായി ഒറ്റപ്പാലം സർക്കാർ ബധിര വിദ്യാലയം

ഒറ്റപ്പാലം: വിദ്യാലയത്തിന്‍റെ ഭൗതിക അക്കാദമിക് നിലവാരം ഉയർത്തുക എന്ന ലക്ഷ്യത്തോടെ ഒറ്റപ്പാലം സർക്കാർ ബധിര വിദ്യാലയത്തിൽ നടപ്പാക്കുന്ന മികവിന്‍റെ കേന്ദ്രം പദ്ധതിയുടെ ഉദ്ഘാടനം അഡ്വ.കെ. പ്രേംകുമാർ എംഎൽഎ നിർവഹിച്ചു. വിദ്യാലയത്തിലെ കുട്ടികളുടെ പാർക്കിന് മേൽക്കൂര നിർമിക്കാൻ എംഎൽഎ ഫണ്ടിൽനിന്നും അഞ്ചുലക്ഷംരൂപ അനുവദിച്ചതായി എംഎൽഎ അറിയിച്ചു. പൊതുവിദ്യാഭ്യാസ വകുപ്പിന്‍റെ 2024- 25 വർഷത്തെ പ്ലാൻ ഫണ്ടിൽ നിന്നും 25 ലക്ഷം രൂപ വിനിയോഗിച്ച് അക്കാദമിക്, ഭൗതികം, സാമൂഹ്യം, സൗന്ദര്യവത്കരണം എന്നിങ്ങനെ നാല് മേഖലകളായി തിരിച്ചാണ് പദ്ധതികൾ യാഥാർഥ്യമാക്കുന്നത്. അക്കാദമിക് നിലവാരം ഉയർത്തുന്നതിന്‍റെ ഭാഗമായി ഫിസിക്സ്, കന്പ്യൂട്ടർ, സ്പീച്ച് ലാബുകളും ഓഡിയോളജി, ലൈബ്രറി മുറികളും നവീകരിച്ചു. ശ്രവണ വൈകല്യമുള്ള കുട്ടികൾക്ക് ഗ്രൂപ്പ് ഹിയറിംഗ് സിസ്റ്റം ഉപയോഗിച്ചുള്ള പ്രവർത്തനവും ഓഡിയോഗ്രാം നടത്താനുള്ള പ്രാഥമിക സൗകര്യങ്ങളും ഒരുക്കിയിട്ടുണ്ട്. കുട്ടികൾക്ക് വേണ്ടി കളിസ്ഥലം, പ്രത്യേക പാർക്ക്, ലോംഗ് ജംപ് പിറ്റ് എന്നിവ തയാറാക്കി വിദ്യാലയത്തിന്‍റെ ഭൗതിക സാഹചര്യവും മെച്ചപ്പെടുത്തി. കൂടാതെ വിദ്യാലയത്തിലെ ചുമരുകൾ വർണചിത്രങ്ങളാലും മനോഹരമാക്കി. പഠനത്തോടൊപ്പം കുട്ടികൾക്ക് സ്വയം പര്യാപ്തത കൈവരിക്കുന്നതിനായി തയ്യൽ പരിശീലനവും വിദ്യാലയത്തിനോടുചേർന്ന് നടത്തുന്നുണ്ട്. ഹൈസ്കൂൾ, ഹയർസെക്കൻഡറി വിദ്യാർഥികൾക്കും രക്ഷിതാക്കൾക്കുമാണ് തയ്യൽ പരിശീലനം നൽകുന്നത്. പരിശീലനം ലഭിച്ച രക്ഷിതാക്കളാണ് ഈ വർഷത്തെ വിദ്യാർഥികളുടെ യൂണിഫോം തയാറാക്കിയത് എന്നതു പദ്ധതിയുടെ വിജയമാണ്. 30 സെന്‍റിൽ വിപുലമായ കൃഷിയിടവും വിദ്യാലയത്തിൽ മികവിന്‍റെ കേന്ദ്രം പദ്ധതിയുടെ ഭാഗമായി നടത്തി വരുന്നുണ്ട്. വാഴത്തോട്ടം തക്കാളി, പച്ചമുളക്, വഴുതനങ്ങ, ചേന, ചേന്പ് തുടങ്ങിയ പച്ചക്കറികൾ കൃഷി ചെയ്തു വിദ്യാലയത്തിലെ ഉച്ചഭക്ഷണത്തിനു പ്രയോജനപ്പെടുത്തും. ഒറ്റപ്പാലം നഗരസഭ ചെയർപേഴ്സണ്‍ ജാനകീദേവി അധ്യക്ഷയായി. സ്ഥിരം സമിതി അധ്യക്ഷൻ അബ്ദുൾ നാസർ, വാർഡ് കൗണ്‍സിലർ മണികണ്ഠൻ, സ്കൂൾ പ്രധാന അധ്യാപിക മിനികുമാരി, പ്രിൻസിപ്പൽ ലബീന, പിടിഎ പ്രസിഡന്‍റ് ശിവശങ്കരൻ, സ്റ്റാഫ് സെക്രട്ടറി സാജിത, രാഷ്ട്രീയ പാർട്ടി പ്രതിനിധികൾ, അധ്യാപകർ, രക്ഷിതാക്കൾ തുടങ്ങിയവർ പങ്കെടുത്തു. വിദ്യാർഥികൾ തയാറാക്കിയ കരകൗശല വസ്തുക്കളുടെ പ്രദർശനവും നടത്തി.

ചിറ്റൂർ സബ് രജിസ്ട്രാർ ഓഫീസ് കോമ്പൗണ്ടിൽ നായശല്യം

ചിറ്റൂർ: കച്ചേരിമേട്ടിലുള്ള ചിറ്റൂർ സബ് രജിസ്ട്രാർ ഓഫീസിലേക്കുള്ള പ്രവേശന കവാടത്തിൽ തെരുവുനായകളുടെ വിളയാട്ടം ഭീതിജനകം. നാലും ,അഞ്ചും നായകൾ കൂട്ടമായാണ് അലയുന്നത്. രജിസ്ട്രാർഓഫീസിൽ എത്തുന്നവർ നിർത്തിയിടുന്ന കാറുകൾക്കടിയിലാണ് ശുനകപ്പട തമ്പടിക്കുന്നത്. അശ്രദ്ധമായി കാറിൽകയറാൻ ശ്രമിച്ചാൽ അടിയിൽ കിടക്കുന്ന നായ അക്രമണത്തിനു തുനിയും. സ്ഥലത്തെ ആൽവൃക്ഷത്തണലുള്ളതിനാലാണ് കാറുകൾ താഴെ നിർത്തിയിടുന്നത്. ഓഫീസ് അടച്ച് ജീവനക്കാർ ഇറങ്ങിയാൽ പിന്നെ നേരം പുലരും വരെ നായകൾ പരസ്പരം കടിച്ചുകീറി അക്രമ പ്രകടനം നടത്താറുണ്ട്. ഈ സ്ഥലത്തെ നായകളെ പിടികൂടി വിജനമായ സ്ഥലത്ത് വിടണമെന്നതാണ് പരക്കെയുള്ള ആവശ്യം.

വടക്കഞ്ചേരിക്കാർക്ക് രാത്രിയാത്ര പേടിസ്വപ്നം

വടക്കഞ്ചേരി: വടക്കഞ്ചേരി ടൗണിലൂടെ രാത്രികാലങ്ങളിൽ യാത്രചെയ്യുന്നവർ ശ്രദ്ധിക്കണം. നായ്ക്കൾ കൂട്ടത്തോടെ കുരച്ചുചാടും. വാഹനങ്ങൾക്കു പിന്നാലെ കുരച്ച് പാഞ്ഞെത്തും. ഒന്നും രണ്ടും എണ്ണമല്ല. എട്ടും പത്തും എണ്ണംവരുന്ന കൂട്ടങ്ങളാണ് ഓടിയെത്തുക. വാഹനത്തിനുചുറ്റുംനിന്ന് കുരച്ച് യാത്രികരെ പേടിപ്പെടുത്തും. കാറുകൾക്ക് മുകളിൽ കയറിയും നായ്ക്കൾ ഭീഷണി ഉയർത്തും. പുതിയ കാറാണെങ്കിൽ നായ്ക്കൾ മാന്തി കേടുവരുത്തും. കുറേസമയം കാറിലിരുന്ന് നായ്ക്കൾ പിൻമാറിയാൽ മാത്രമേ ഡോർതുറന്ന് പുറത്ത് ഇറങ്ങാനാകു. ചെറുപുഷ്പം ജംഗ്ഷനിലും റോയൽ ജംഗ്ഷൻ റോഡിലും ഗ്രാമം റോഡിലും കിഴക്കഞ്ചേരി റോഡിലും സുനിതാ മുക്കിലും ബസ്റ്റാൻഡിലും കരയങ്കാട് കവലയിലുമൊക്കെയുണ്ട് നായ്ക്കൂട്ടങ്ങൾ. ടൗണിൽ നായപിടുത്തം നടക്കുന്നുണ്ടെങ്കിലും മികതും കെണികളിൽ വീഴുന്നില്ല. വാക്സിനേഷൻ നൽകി ഇവയെ വീണ്ടും അതേസ്ഥലത്ത് വിടുന്നത് ഒഴിവാക്കണമെന്നാണ് ആവശ്യമുയരുന്നത്. വന്ധ്യംകരണം നടത്തി നായ്ക്കളെ പാർപ്പിക്കാൻ പഞ്ചായത്ത്തലത്തിൽ ഷെൽറ്ററുകൾ സ്ഥാപിക്കണമെന്ന നിർദേശം നടപ്പിലാക്കണമെന്ന ആവശ്യവും ശക്തമാണ്. അതല്ലെങ്കിൽ എല്ലാവർഷവും ഇവയെ പിടികൂടി വാക്സിനേഷൻ നൽകുന്നത് പ്രായോഗികമല്ലെന്നാണ് ചൂണ്ടിക്കാട്ടുന്നത്.

ആണ്ടിമഠം അങ്കണവാടി കെട്ടിടം ഉദ്ഘാടനം

ഒലവക്കോട്: അകത്തേത്തറ ഗ്രാമപഞ്ചായത്തിലെ എട്ടാം വാർഡ് ആണ്ടിമഠം അങ്കണവാടി കെട്ടിടത്തിന്‍റെ ഉദ്ഘാടനം എ. പ്രഭാകരൻ എംഎൽഎ നിർവഹിച്ചു. എംഎൽഎയുടെ ആസ്തി വികസന ഫണ്ടിൽ നിന്നും 24 ലക്ഷം വകയിരുത്തിയാണ് അങ്കണവാടി കെട്ടിട നിർമാണം പൂർത്തീകരിച്ചത്. അകത്തേത്തറ ഗ്രാമപഞ്ചായത്ത് വിഹിതമായ ആറ് ലക്ഷം രൂപയും, കൊളുന്പിൽ ബീമാളുമ്മ സ്മരണാർത്ഥം കൊളുന്പിൽ വീട്ടുകാർ സ്പോണ്‍സർ ചെയ്ത 4.50 ലക്ഷം രൂപയും ചേർത്താണ് അങ്കണവാടിക്കായി സ്ഥലം വാങ്ങിയത്. അകത്തേത്തറ ഗ്രാമപഞ്ചായത്ത് പ്രസിഡന്‍റ് സുനിത അനന്തകൃഷ്ണൻ പരിപാടിയിൽ അധ്യക്ഷയായി. മലന്പുഴ ബ്ലോക്ക് പഞ്ചായത്ത് പ്രസിഡന്‍റ് വി. ബിജോയ്, വൈസ് പ്രസിഡന്‍റ് എൻ. മോഹനൻ, സ്ഥിരം സമിതി അധ്യക്ഷ മഞ്ജു മുരളി, സിഡിപിഒ എസ്. ശുഭ, ആസൂത്രണ സമിതി ഉപാധ്യക്ഷൻ ഡി. സദാശിവൻ, കിൻഫ്ര ഡയറക്ടർ ടി.കെ. അച്യുതൻ, സഹകരണ ആശുപത്രി ചെയർമാൻ ടി. രാമാനുജൻ, ആസൂത്രണ സമിതി അംഗം കെ. ജയകൃഷ്ണൻ പ്രസംഗിച്ചു.

മേലാർകോട് എടക്കാട് നായാടി നഗറിൽ അംബേദ്കർഗ്രാമം പദ്ധതി നിർമാണം

നെന്മാറ: മേലാർകോട് ഗ്രാമപഞ്ചായത്തിലെ എടക്കാട് നായാടി നഗറിൽ അംബേദ്കർ ഗ്രാമം പദ്ധതിയുടെ നിർമാണ ഉദ്ഘാടനം കെ.ഡി. പ്രസേനൻ എംഎൽഎ നിർവഹിച്ചു. ചടങ്ങിൽ മേലാർകോട് ഗ്രാമപഞ്ചായത്ത് പ്രസിഡന്‍റ് ടി. വത്സല അധ്യക്ഷയായി. പട്ടികജാതി വിഭാഗങ്ങളുടെ സമഗ്ര പുരോഗതി ലക്ഷ്യമാക്കി സർക്കാർ നടപ്പാക്കുന്ന പദ്ധതിയാണ് അംബേദ്കർ ഗ്രാമം പദ്ധതി. ഒരു കോടി രൂപ ഉപയോഗിച്ച് ഉന്നതികളുടെ മുഖച്ഛായ മാറ്റുന്ന തരത്തിലുള്ള സമഗ്ര വികസനമാണ് പദ്ധതിയിലൂടെ ലക്ഷ്യമിടുന്നത്. മൂന്നുമാസത്തിനകം പദ്ധതി പൂർത്തീകരിക്കും. പരിപാടിയിൽ നെന്മാറ ബ്ലോക്ക് പഞ്ചായത്ത് പ്രസിഡന്‍റ് സി. ലീലാമണി, മേലാർക്കോട് ഗ്രാമപഞ്ചായത്ത് വൈസ് പ്രസിഡന്‍റ് ഐ. മൻസൂർ അലി ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സണ്‍ സജ്ന ഹാസൻ, വികസന സ്റ്റാൻഡിംഗ് കമ്മിറ്റി ചെയർപേഴ്സണ്‍ വിജയലക്ഷ്മി, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ എം. ചെന്താമര, ബ്ലോക്ക് പഞ്ചായത്ത് ആരോഗ്യം വിദ്യാഭ്യാസം സ്റ്റാൻഡിംഗ് കമ്മിറ്റി ചെയർപേഴ്സണ്‍ പ്രേമലത, മറ്റു ജനപ്രതിനിധികൾ എന്നിവർ പങ്കെടുത്തു.

അട്ടപ്പാടിയിലെ വിദ്യാർഥികൾക്ക് വിദ്യാശ്രയ പദ്ധതിയുമായി അലനല്ലൂർ വിഎച്ച്എസ്ഇ എൻഎസ്എസ് യൂണിറ്റ്

അലനല്ലൂർ: അട്ടപ്പാടി പാലൂർ ഗവ. യുപി സ്കൂളിലെ വിദ്യാർഥികൾക്ക് പഠനസഹായവുമായി അലനല്ലൂർ ഗവ. വൊക്കേഷണൽ ഹയർ സെക്കൻഡറി സ്കൂൾ വിഎച്ച്എസ്ഇ വിഭാഗം നാഷണൽ സർവീസ് സ്കീം യൂണിറ്റ് മാതൃകയായി. നാഷണൽ സർവീസ് സ്കീം വിദ്യാശ്രയം പദ്ധതിയുടെ ഭാഗമായാണ് സ്കൂളിലെ എഴുപതോളം വിദ്യാർഥികൾക്ക് എൻഎസ്എസ് യൂണിറ്റിന് കീഴിൽ പഠനോപകരണങ്ങൾ സമാഹരിച്ച് വിതരണം ചെയ്തത്. നോട്ടുപുസ്തകം, കുട, ബാഗ്, ഇൻസ്ട്രുമെന്‍റ് ബോക്സ്, ക്രയോൺ, വാട്ടർ ബോട്ടിൽ തുടങ്ങിയ സാധനങ്ങളാണ് സ്കൂളിൽ എത്തിച്ചു നൽകിയത്. സ്കൂളിലെ മുഴുവൻ വിദ്യാർഥികൾക്കും മധുരപലഹാരങ്ങളും വിതരണം ചെയ്തു. എൻഎസ്എസ് വിദ്യാർഥികൾ കുട്ടികൾക്കായി വിവിധ കലാപരിപാടികളും അവതരിപ്പിച്ചു. പാലൂർ ജിയുപിഎസ് പ്രധാനാധ്യാപിക വി. രങ്കി, സീനിയർ അസിസ്റ്റന്‍റ് സി.പി. തമ്പി, എൻഎസ്എസ് പ്രോഗ്രാം ഓഫീസർ എൻ. ഷാജി, വി.ആർ. രതീഷ്, കെ. പ്രകാശ്, എം.ടി. സൗമ്യ, എൻ.എസ്.എസ്. വോളന്‍റിയർമാരായ സി. ശ്രീലക്ഷ്മി, കെ. സഞ്ജയ്‌ പ്രസാദ് പ്രസംഗിച്ചു.

പപ്പാടി ആരോഗ്യകേന്ദ്രം- വൃന്ദാവൻനഗർ റോഡ് നാടിനു സമർപ്പിച്ചു

ഒലവക്കോട്: അകത്തേത്തറ ഗ്രാമ പഞ്ചായത്തിൽ വാർഡ് രണ്ടിലെ നവീകരിച്ച പപ്പാടി കുടുബാരോഗ്യ കേന്ദ്രം വൃന്ദാവൻ നഗർ റോഡ് എ. പ്രഭാകരൻ എംഎൽഎ ഉദ്ഘാടനം ചെയ്തു. എ. പ്രഭാകരൻ എംഎൽഎയുടെ 2024- 25 ആസ്തി വികസന ഫണ്ടിൽ നിന്നും 25 ലക്ഷം രൂപ ചെലവഴിച്ചാണ് റോഡിന്‍റെ നിർമ്മാണം പൂർത്തീകരിച്ചത്. അകത്തേത്തറ ഗ്രാമപഞ്ചായത്ത് പ്രസിഡന്‍റ് സുനിത അനന്തകൃഷ്ണൻ പരിപാടിയിൽ അധ്യക്ഷയായി. വൈസ് പ്രസിഡന്‍റ് എൻ. മോഹനൻ, വികസന സ്ഥിരം സമിതി ചെയർപേഴ്സണ്‍ മഞ്ജു മുരളി, മെഡിക്കൽ ഓഫീസർ രഞ്ജിത്ത്, ആസുത്രണ സമിതി ഉപാധ്യക്ഷൻ ഡി. സദാശിവൻ, കിൻഫ്ര ഡയറക്ടർ ടി.കെ അച്ചുതൻ, സഹകരണ ആശുപത്രി ചെയർമാൻ ടി. രാമനുജൻ, വാർഡ് മെംബർമാരായ ഹേമലത, ലളിതാംബിക, ആസൂത്രണ സമിതി അംഗം കെ. ജയകൃഷ്ണൻ, വൃന്ദാവൻ നഗർ റസിഡൻസി അസോസ്‌സിയേഷൻ പ്രസിഡന്‍റ് ബാലൻ, വാർഡ് അംഗം രേഖ ശിവദാസ് എന്നിവർ പങ്കെടുത്തു.

കല്യാണമണ്ഡപത്തിനായി ജനങ്ങളുടെ കാത്തിരിപ്പ് നീളുന്നു

ജോജി തോമസ് നെന്മാറ: പഞ്ചായത്ത് കല്യാണ മണ്ഡപവും തിയേറ്റർ കെട്ടിട നിർമാണവും വർഷങ്ങളായി പണിതീരാതെ കിടക്കുകയാണ്. നെന്മാറ പഞ്ചായത്തും എംഎൽഎയും സാങ്കേതിക കാരണങ്ങൾ നിരത്തുന്നുണ്ടെങ്കിലും നിർമ്മാണ പ്രവർത്തി വർഷങ്ങളായി മുടങ്ങിക്കിടക്കുന്നു. കെ.ബാബു എംഎൽഎ യുടെ ആസ്തി വികസന ഫണ്ടിൽ നിന്നും വകയിരുത്തിയ 3.35കോടി രൂപയിൽ ആദ്യഘട്ടമായി അനുവദിച്ച രണ്ടു കോടി രൂപയുടെ പ്രവൃത്തി പൂർത്തിയായെങ്കിലും അടുത്ത ഘട്ടമായി അനുവദിച്ച ഒരു കോടി രൂപയുടെ കരാർ നടപടികൾ കഴിഞ്ഞ നിയമസഭ തിരഞ്ഞെടുപ്പ് പ്രഖ്യാപിച്ചതോടെയാണ് നിലച്ചത്. നാലുനില വരെ ഉയർത്താൻ കഴിയുന്നവിധം 62 തൂണുകളിലുള്ള നിർമാണമാണ് നടന്നുവന്നത്. 500 പേർക്ക് ഇരിക്കാവുന്ന10,000 ചതുരശ്ര അടി വിസ്തീർണം വരുന്ന കെട്ടിടത്തിൽ രണ്ടാംനിലയിൽ കല്യാണ മണ്ഡപം കൂടാതെ താമസിക്കാനുള്ള മുറികളും മുകൾ ഭാഗത്ത് മിനി തിയേറ്ററുകളും അടങ്ങിയതാണ് പദ്ധതി. 2022 വരെയാണ് നിർമാണ കാലാവധി കാലാവധി ഉണ്ടായിരുന്നെങ്കിലും കഴിഞ്ഞ മൂന്നു വർഷമായി കാര്യമായ ജോലികൾ ഒന്നും മുന്നോട്ടു പോയില്ല. നെന്മാറ പ‍ഞ്ചായത്തിന്‍റെ ഉടമസ്ഥതയിൽ വക്കാവ് റോഡിൽ നിർമലഭവൻ കോൺവെന്‍റ് സ്കൂളിനു സമീപമായി 55 സെന്‍റ് സ്ഥലത്തുണ്ടായിരുന്ന പഴയ പഞ്ചായത്ത് കല്യാണമണ്ഡപം പൊളിച്ചു നീക്കിയാണ് പുതിയ കെട്ടിടം പണിയുന്നത്. നെന്മാറ പഞ്ചായത്ത് ഭരണസമിതിയും സ്ഥലം എംഎൽഎയും ഭരണപ്രതിപക്ഷ പാർട്ടികളായതാണ് പ്രതിസന്ധിയിൽ ആവാൻ കാരണമെന്ന് പ്രദേശവസികൾ ചൂണ്ടിക്കാണിക്കുന്നു.

കുഞ്ചൻ നമ്പ്യാർ സ്മാരകം തകർച്ചയിലേക്ക്

ഒറ്റപ്പാലം: കുഞ്ചൻ നമ്പ്യാർ സ്മാരകം തകർച്ചയിലേക്ക്...? വിശ്വമഹാകവി കുഞ്ചൻ നമ്പ്യാർ ജനിച്ച കലക്കത്ത് ഭവനമാണ് ജീർണാവസ്ഥയിൽ തകർച്ചാഭീഷണി നേരിടുന്നത്. ബലക്ഷയം ബാധിച്ച മേൽകൂരയും, ജീർണിച്ച ചുമരുകളും ഏത് നിമിഷവും നിലംപൊത്തിയേക്കാം. ദേശീയ സ്മാരകമെന്ന് ഖ്യാതിയുള്ള കുഞ്ചൻ സ്മാരകത്തിനാണ് ഈ ദുർഗതി. സുരക്ഷ പരിഗണിച്ച് സ്മാരകം സന്ദർശിക്കുന്നതിന്ന് വിലക്കേർപ്പെടുത്തിയിരിക്കുകയാണ്. ചോർന്നൊലിക്കുന്ന മേൽക്കൂരയും അടർന്നു നിൽക്കുന്ന ചുമരുകളും സ്മാരകത്തിന്‍റെ ദുർഗതിയെ തുറന്നു കാണിക്കുകയാണ്. മേൽക്കൂരയിൽ പല സ്ഥലത്തും പ്ലാസ്റ്റിക് കെട്ടിയാണു ചോർച്ച തടയുന്നത്. കെട്ടിടത്തിന്‍റെ ശോച്യാവസ്ഥയെ തുടർന്നാണ് സ്മാരകത്തിൽ സന്ദർശകർക്കു വിലക്കേർപ്പെടുത്തിയത്. 2024ലെ ബജറ്റിൽ അനുവദിച്ച 1.96 കോടി രൂപയുടെ സഹായം കാത്തിരിക്കുകയാണു ഭരണസമിതി. ആദ്യ ഗഡു ഉടൻ ലഭിക്കുമെന്നും അതു ലഭ്യമാകുന്ന മുറയ്ക്കു കെട്ടിടത്തിന്‍റെ അറ്റകുറ്റപ്പണി ആരംഭിക്കുമെന്നുമാണ് സെക്രട്ടറി എൻ.എം. നാരായണൻ നമ്പൂതിരി പറയുന്നത്. സ്മാരകത്തിൽ പ്രവർത്തിക്കുന്ന കലാപീഠത്തിൽ തുള്ളൽ, മോഹിനിയാട്ടം, മൃദംഗം, ശാസ്ത്രീയ സംഗീതം എന്നീ കലാവിഭാഗങ്ങൾ പ്രവർത്തിച്ചു വരുന്നുണ്ട്. സാംസ്കാരിക വകുപ്പ് അനുവദിക്കുന്ന 5 ലക്ഷം രൂപയുടെ ഗ്രാൻഡ് ഉപയോഗിച്ചാണു സ്മാരകത്തിന്‍റെ പ്രവർത്തനം. 5 മാസത്തിലധികമായി ജീവനക്കാർക്കും അധ്യാപകർക്കും ശമ്പളം മുടങ്ങിയിരിക്കുകയാണ്. സ്മാരകം സന്ദർശിക്കാനെത്തുന്നവരിൽ നിന്നു പിരിച്ചെടുക്കുന്ന സന്ദർശക ഫീസാണ് അടിസ്ഥാന കാര്യങ്ങൾക്കു ചെലവഴിക്കുന്നത്.

പൊറ്റശേരി ഗവ. ഹയർ സെക്കൻഡറി സ്കൂളിൽ സ്ട്രീം ഹബ് ലാബ് ഉദ്ഘാടനം ഇന്ന്

പൊറ്റശേരി: സർവശിക്ഷ കേരള മണ്ണാർക്കാട് ബി.ആർ.സി യുടെ ഏക സ്ട്രീം എക്കോ സിസ്റ്റം ഹബ് പൊറ്റശേരി ഗവ. ഹയർ സെക്കൻഡറി സ്കൂളിൽ കോങ്ങാട് എംഎൽഎ അഡ്വ. കെ ശാന്തകുമാരി ഇന്ന് ഉദ്ഘാടനം ചെയ്യും. 20 ലക്ഷം രൂപ ചെലവിട്ട് നിർമിച്ച ലബോറട്ടറിയുടെ സജ്ജീകരണങ്ങൾക്ക് നേതൃത്വം നൽകിയത് കൊച്ചിൻ യൂണിവേഴ്സിറ്റിയാണ്. സയൻസ്, ടെക്നോളജി, ഗണിതം, ആർട്ട്സ് തുടങ്ങി വിവിധ വിഷയങ്ങളിൽ പ്രൊജക്റ്റ് അധിഷ്ഠിത പഠനത്തിനുള്ള സൗകര്യങ്ങളാണ് ലാബിലുള്ളത്. ശനിയാഴ്ചകളിൽ നടക്കുന്ന ക്ലാസ്‌സുകൾക്ക് വിദഗ്ധരായ പരിശീലകരുടെ സേവനവും ലഭ്യമാണ്. കാഞ്ഞിരപ്പുഴ ഗ്രാമപഞ്ചായത്ത് പ്രസിഡന്‍റ് സതി രാമരാജൻ അധ്യക്ഷത വഹിക്കും. ജില്ലാ പഞ്ചായത്ത് അംഗം റെജി ജോസ്, വാർഡ് മെന്പർ പി. രാജൻ , ഡിപിസി (എസ്.എസ്.കെ) ജയപ്രകാശ് , പി.എസ് ഷാജി (ഡിപിസി), കെ.കെ മണികണ്ഠൻ (ബി പി.സി), പ്രിൻസിപ്പൽ പി. സന്തോഷ് കുമാർ, പ്രധാനാധ്യാപിക ടി. സബിത, പിടിഎ പ്രസിഡന്‍റ് കെ.എസ് സുനേഷ് തുടങ്ങിയവർ പ്രസംഗിക്കും. എസ്പിസിദിനാഘോഷം ‌പൊറ്റശേരി: ഗവ. ഹയർ സെക്കൻഡറി സ്കൂളിൽ എസ്.പി.സി ദിനാഘോഷം സംഘടിപ്പിച്ചു. ഹൈസ്കൂൾ, ഹയർ സെക്കൻഡറി വിഭാഗം സ്റ്റുഡന്‍റ് പൊലീസ് കേഡറ്റ് യൂണിറ്റുകൾ സംയുക്തമായാണ് ആഘോഷം നടത്തിയത്. കാഞ്ഞിരപ്പുഴ ഗ്രാമപഞ്ചായത്ത് പ്രസിഡന്‍റ് സതി രാമരാജൻ ഉദ്ഘാടനം ചെയ്തു. മണ്ണാർക്കാട് സബ് ഇൻസ്പെക്ടർ ജെസ്‌വിൻ ജോയ് മുഖ്യാതിഥിയായി പങ്കെടുത്തു. പിടിഎ പ്രസിഡന്‍റ് കെ.എസ്. സുനേഷ് അധ്യക്ഷത വഹിച്ചു. പ്രധാനാധ്യാപിക ടി. സബിത, സിപിഒമാരായ മൈക്കിൾ ജോസഫ്, കെ.സി. മുരുകൻ, ഒ.എസ്. അനീഷ, അധ്യാപകരായ എൻ. രംഗസ്വാമി, വി. വിജയലക്ഷ്മി, ലീഡർമാരായ ഹൃദ്യ കൃഷ്ണ, എം. റിതിക, ഹിറ ഫാത്തിമ, നന്ദു കൃഷ്ണ എന്നിവർ പ്രസംഗിച്ചു. ദിനാഘോഷത്തിന്‍റെ ഭാഗമായി സംഘടിപ്പിച്ച നേതൃത്വ പരിശീലന പരിപാടി ട്രെയ്നർ സുധീർ ഖാൻ നയിച്ചു. കേഡറ്റുകൾക്കായി കായിക പരിശീലന പരിപാടികളും നടന്നു.

നെന്മാറയിൽ നെൽകൃഷിയിൽ കീടരോഗബാധകൾ ഒഴിയുന്നില്ല

നെന്മാറ: നെൽകൃഷി മേഖലകളിൽ കീട രോഗബാധകൾ ഒഴിയുന്നില്ലെന്ന് കർഷകർ. ഒന്നാംവിള കൃഷിയിറക്കിയ നാൾ മുതൽ തുടങ്ങിയതാണ് കാർഷിക മേഖലയിലെ ദുരിതങ്ങൾ. ഇപ്പോൾ ഒരു മാസത്തിലേറെ പ്രായമായ നെൽപ്പാടങ്ങളിൽ കീടബാധകളും, വൈറസ്, ഫംഗസ് അസുഖങ്ങളും വ്യാപകമായി പടരുന്നു. ആഴ്ചയിൽ ഒരു ദിവസമെങ്കിലും ഏതെങ്കിലും അസുഖത്തിന് മരുന്ന് പ്രയോഗിക്കേണ്ട അവസ്ഥയിലാണ്. നടീൽ കഴിഞ്ഞ ആദ്യ ആഴ്ചയിൽ ഞണ്ട് ശല്യത്തിനും, തുടർന്ന് ഓലകരിച്ചിൽ, പോള അഴുകൽ, തണ്ടു തുരപ്പൻ, വേരു ചീയൽ, വേരു പുഴു തുടങ്ങി വിവിധ രോഗ കീടബാധകൾക്ക് മാറിമാറി മരുന്നു തളിയും മറ്റും നടത്തിക്കൊണ്ടിരിക്കുകയാണ്. ചെറുമഴയുള്ള സമയങ്ങളിൽ തളിച്ച മരുന്ന് മഴയിൽ ഒഴുകിപ്പോകുന്നതിനാൽ ഇലകളിൽ പിടിച്ചുനിൽക്കുന്നതിന് പശ ചേർത്ത് തളിക്കേണ്ടി വരുന്നുണ്ടെന്നും കർഷകർ പറയുന്നു. നെൽച്ചെടികൾ ഉള്ളിലേക്ക് വലിച്ചെടുക്കുന്ന അന്തർ വ്യാപന ശേഷിയുള്ള മരുന്നുകൾ വില കൂടുതലായതിനാൽ ബഹുഭൂരിപക്ഷം കർഷകരും വില കുറവ് നോക്കി സ്പർശനശേഷിയിൽ നശിക്കുന്ന കീടനാശിനികളാണ് ഉപയോഗിക്കുന്നത്.

ഛത്തീസ്ഗഡിൽ ജയിൽവിമുക്തരായ കന്യാസ്ത്രീകളുടെ കേസ് റദ്ദാക്കണം: രാമനാഥപുരം രൂപത

കോയമ്പത്തൂർ: ഛത്തീസ്ഗഡിൽ അകാരണമായി അറസ്റ്റ് ചെയ്യപ്പെട്ട് ഒമ്പതു ദിവസത്തെ ജയിൽ വാസത്തിനു ശേഷം കന്യാസ്ത്രീകൾ മോചിതരായതിൽ ഏറെ സന്തോഷിക്കുന്നുവെങ്കിലും അവരുടെ പേരിൽ ആൾക്കൂട്ട വിചാരണയിലൂടെ ആരോപിക്കപ്പെട്ട കുറ്റങ്ങൾ പിൻവലിച്ച് കേസ് റദ്ദാക്കി ഭാരതത്തിന്‍റെ ജനാധിപത്യത്തിനും മതേതരത്വത്തിനും ഏറ്റ തിരിച്ചടികൾക്കെതിരെ ശക്തമായ നടപടികൾ സ്വീകരിച്ച് രാജ്യത്ത് പൗരാവകാശം ഉറപ്പ് വരുത്തണമെന്ന് ഇന്ന് രാവിലെ രാമനാഥപുരം ഹോളി ട്രിനിറ്റി കത്തീഡ്രലിൽ ചേർന്ന പൊതുസമ്മേളനം ആവശ്യപ്പെട്ടു. കത്തീഡ്രൽ ഇടവക വികാരി ഫാ. മാർട്ടിൻ പട്ടരുമഠത്തിലിന്‍റെ അധ്യക്ഷതയിൽ കത്തീഡ്രൽ അങ്കണത്തിൽ നടന്ന പ്രതിഷേധ സമ്മേളനത്തിൽ രാമനാഥപുരം രൂപത വികാരി ജനറാൾ മോൺ. ജോസഫ് ആലപ്പാടൻ സന്ദേശം നല്കി. ഇടവക അസിസ്റ്റന്‍റ് വികാരി ഫാ. മെൽവിൻ ചൊവ്വല്ലൂർ, എഫ്സിസി സന്യാസ സമൂഹം മദർ സുപ്പീരിയർ സിസ്റ്റർ ആൻസി മരിയ, കൈക്കാരന്മാർ ,വിവിധ സംഘടനാ പ്രതിനിധികൾ എന്നിവർ ഉൾപ്പെടെ നിരവധി ആളുകൾ പ്രതിഷേധ സമ്മേളനത്തിൽ പങ്കെടുത്തു.

കുഴിയും കുരുക്കും; വടക്കഞ്ചേരി മേഖലയിൽ യാത്ര ദുഷ്കരം

വടക്കഞ്ചേരി: മേഖലയിൽ സംസ്ഥാനപാത, പഞ്ചായത്ത് റോഡുകൾ എന്നീ വ്യത്യാസമില്ലാതെ എല്ലാ റോഡുകളും തകർന്നു. ദേശീയപാതയിലെ കുരുക്കുകൾക്കും ശമനമില്ല. കുഴികളിൽ നിന്നും കുഴികളിലേക്ക് ഇറങ്ങി കയറി വേണം എത്ര അത്യാവശ്യങ്ങൾക്കുള്ള വാഹനങ്ങൾക്കും കടന്നുപോകാൻ. നിശ്ചിത സമയത്ത് എത്തേണ്ട കാര്യങ്ങൾക്ക് ഏറെ മണിക്കൂറുകൾക്കു മുമ്പ് യാത്ര ആരംഭിക്കേണ്ട ഗതികേടിലാണ് ജനങ്ങളിപ്പോൾ. വാഹനങ്ങൾ കേടുവന്ന് ഈ മഴക്കാലം വാഹന ഉടമകൾക്ക് വലിയ സാമ്പത്തിക നഷ്ടങ്ങളാണ് ഉണ്ടാക്കുന്നത്. കുഴികളിൽ ചാടി വാഹനം കേടുവന്നും വാഹനങ്ങൾ തമ്മിൽ ഉരസിയും ഇടിച്ചുമൊക്കെ നിരവധി കേസുകളാണ് ഉണ്ടാകുന്നത്. എന്നാൽ വാഹനം ഓടിക്കാനാകാത്ത വിധം റോഡ് തകർന്ന് കിടക്കുമ്പോഴും റോഡ് ടാക്സ് അടക്കാത്തവരെ പിടികൂടലിന് കുറവില്ല. ഹെൽമറ്റ് ധരിക്കാത്തവരെ പിടികൂടി പോലീസും ക്വാട്ട തികക്കുന്നുണ്ട്. വാഹന കുരുക്കുകളിൽപ്പെട്ട് യാത്ര തുടരാനാകാത്ത സ്ഥിതി ദേശീയപാതകളിൽ തുടരുമ്പോൾ ടോൾ കമ്പനികൾ നടത്തുന്ന പിരിവ് നിർത്തിവെപ്പിക്കണമെന്ന ജനങ്ങളുടെ ആവശ്യം ചെവികൊള്ളാനും ഭരണ സംവിധാനങ്ങളില്ല. ദേശീയപാതയിൽ വാണിയംപാറ മുതൽ ചാലക്കുടി വരെയുള്ള ഭാഗത്ത് മാത്രം ആറിടത്താണ് ഒരേ സമയം വാഹനങ്ങൾ തടഞ്ഞ് മേൽപ്പാലങ്ങളുടെയും മറ്റും പണികൾ നടക്കുന്നത്. ആധുനിക യന്ത്രസംവിധാനങ്ങളില്ലാതെ ഒച്ചിഴയും മട്ടിലാണ് പണികൾ. മേൽപ്പാലങ്ങളുടെ നിർമാണം പൂർത്തിയാകാൻ എത്ര കാലം വേണ്ടിവരും എന്നൊക്കെ കണ്ടറിയേണ്ടി വരും. ഇവിടെയെല്ലാം സർവീസ് റോഡുകൾ വഴി വേണം ആയിരകണക്കിന് വരുന്ന വാഹനങ്ങൾക്ക് ഇരു ദിശകളിലേക്കും പോകാൻ. ഈ സർവീസ് റോഡുകളെങ്കിലും കുഴികളില്ലാത്ത വിധം നിരപ്പുള്ളതാക്കിയിരുന്നെങ്കിൽ വാഹന യാത്രികർക്ക് ഏറെ ആശ്വാസകരമായിരുന്നു. എന്നാൽ അതിന് നിർദേശം നൽകാൻ പോലും സംവിധാനമില്ലാത്ത വിധമാണ് കാര്യങ്ങൾ.

കെട്ടിടത്തിനു മുകളിൽനിന്ന് വീണുമരിച്ചു

ആലത്തൂർ: കെട്ടിടത്തിനു മുകളിൽനിന്നും വീണ സ്ത്രീ മരിച്ചു. കാവശേരി കഴനി ചുങ്കം മന്ദംപറമ്പിൽ ചാമുക്കുട്ടന്‍റെ മകൾ രുഗ്മിണി (59) ആണ് കെട്ടിടത്തിനു മുകളിൽ നിന്ന് വീണു മരിച്ചത്. ഇന്നലെ ഉച്ചയ്ക്കാണ് സംഭവം. വീടിനു മുകൾഭാഗത്ത് അലക്കിയിട്ട തുണികൾ എടുക്കാനായി പോയപ്പോഴാണ് അപകടം സംഭവിച്ചത്. മൃതദേഹം ആലത്തൂർ താലൂക്ക് ആശുപത്രി മോർച്ചറിയിൽ. ഇന്ന് പോസ്റ്റുമോർട്ടത്തിന് ശേഷം സംസ്കാരം നടക്കും. സഹോദരങ്ങൾ: ലത, പരേതയായ സത്യഭാമ.

കാറും ബൈക്കും കൂട്ടിയിടിച്ച് ബൈക്ക് യാത്രക്കാരൻ മരിച്ചു

ശ്രീകൃഷ്ണപുരം: കടമ്പഴിപ്പുറം തിയ്യേറ്റർ ജംഗ്ഷനിൽ കാറും ബൈക്കും കൂട്ടിയിടിച്ചു ഉണ്ടായ അപകടത്തിൽ ബൈക്ക് യാത്രക്കാരൻ മരിച്ചു. കടമ്പഴിപ്പുറം ഖാദി ജംഗ്ഷനിൽ കുരുവംപാടം വീട്ടിൽ മണികണ്ഠൻ- ജ്യോതി ദമ്പതികളുടെ മകൻ അശ്വിൻ (25)ആണ് മരിച്ചത്. കടമ്പഴിപ്പുറം ഭാഗത്ത്‌ നിന്നും പാലക്കാട്‌ ഭാഗത്തേക്ക് വരുകയായിരുന്ന തൃശൂർ സ്വദേശിയുടെ കാർ അശ്വിൻ സഞ്ചരിച്ച ബൈക്കിൽ ഇടിച്ചു തെറിപ്പിക്കുകയായിരുന്നു. ഉടൻതന്നെ അശ്വിന് കടമ്പഴിപ്പുറത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഇന്നലെ രാവിലെ ഒമ്പതിനായിരുന്നു അപകടം. പ്രവാസിയായ അശ്വിൻ കഴിഞ്ഞ മാസമാണ് ഒമാനിൽ നിന്നും നാട്ടിലെത്തിയത്. അവിവാഹിതനാണ്. സഹോദരി:അതുല്യ.

ദേശീയപാതയിൽ ചരക്കുവാഹനങ്ങളുടെ രാത്രിയാത്ര തോന്നുംമട്ടിൽ

വടക്കഞ്ചേരി: റോഡപകടങ്ങൾ ഒഴിവാക്കുക, യാത്രക്കാരുടെ സുരക്ഷ ഉറപ്പാക്കുക തുടങ്ങിയവ മുൻനിർത്തിയുള്ള ലൈൻ ട്രാഫിക് വാളയാർ മുതൽ ചേർത്തല വരെയുള്ള റോഡിൽ കർശനമാക്കിയിട്ടുണ്ടെന്ന് ഇടക്കിടെ മോട്ടോർ വാഹനവകുപ്പ് മുന്നറിയിപ്പുകൾ നൽകുന്നുണ്ടെങ്കിലും അതൊന്നും ചരക്ക് വാഹനങ്ങൾ ഓടിക്കുന്നവർ ചെവികൊള്ളുന്നില്ല. പ്രത്യേകിച്ച് അന്യസംസ്ഥാന ചരക്ക് വാഹനങ്ങളാണ് വടക്കഞ്ചേരി -മണ്ണുത്തി ആറുവരി ദേശീയപാതയിൽ തോന്നും മട്ടിൽ പോകുന്നത്. രാത്രിയായാൽ യാത്രാവാഹനങ്ങളുടെ വഴിമുടക്കിയാണ് മൂന്ന് വരി പാതയിലൂടെയും ചരക്കുവാഹനങ്ങൾ നിരയായി പോവുക. ഒരു ദിശയിലേക്കുള്ള മൂന്ന് വരി പാതയിൽ ഇടത്പാത പല ഭാഗത്തും ചരക്കുലോറികളുടെ പാർക്കിംഗിനായാണ് ഉപയോഗിക്കുന്നത്. ഇതുമൂലം അത്യാവശ്യങ്ങൾക്ക് പോകുന്ന യാത്രക്കാർ പിറകിലൂടെ പോകേണ്ട സ്ഥിതിയാണ്. എല്ലാ റോഡുകളിലും കീപ്പ് ലെഫ്റ്റ് നടപ്പിലാക്കാൻ ലക്ഷ്യം വച്ചായിരുന്നു 2023 ജനുവരിയിൽ പന്നിയങ്കരയിൽ വച്ച് ലൈൻ ട്രാഫിക് പദ്ധതി ആരംഭിച്ചത്. ട്രാൻസ്പോർട്ട് കമ്മീഷണർ എസ്. ശ്രീജിത്ത് സ്ഥലത്ത് എത്തിയാണ് അന്ന് പദ്ധതി ഉദ്ഘാടനം ചെയ്തത്. വേഗത കുറഞ്ഞ വാഹനങ്ങൾ പാതയുടെ ഇടത് ഭാഗത്തെ ലൈനിലൂടെയും വേഗത കൂടിയവ വലത് ട്രാക്കിലൂടെയും പോകണം. സ്പീഡ് ലൈൻ മറ്റൊരു വാഹനത്തെ മറിക്കടക്കാൻ മാത്രം ഉപയോഗിക്കുക എന്നതായിരുന്നു വടക്കഞ്ചേരി - മണ്ണുത്തി ആറ് വരി പാതയിലുള്ള നിർദേശം. ഒരു മാസത്തിനുള്ളിൽ തന്നെ ട്രാഫിക് നിയമങ്ങൾ പൂർണമായും പാലിച്ചുകൊണ്ടുള്ള വാഹനഗതാഗതം ദേശീയപാതയിൽ നടപ്പിലാക്കും. അങ്ങനെ ഉറപ്പുകൾ പലതുമുണ്ടായി. ഇപ്പോഴും വേഗതകുറഞ്ഞ ചരക്കുലോറികൾ സ്പീഡ് ലൈനിലൂടെയാണ് പോകുന്നത്. ലൈൻ കീപ്പ് ചെയ്ത് വാഹനം ഓടിക്കണമെന്ന നിർദേശങ്ങളും പാതകളിൽ പാലിക്കപ്പെടുന്നില്ല. സിഗ്നൽപോലും നൽകാതെ ചരക്കുവാഹനങ്ങൾ ലൈൻ മാറുന്നതും അപകടങ്ങൾ ഉണ്ടാക്കുന്നുണ്ട്. ലൈൻ ട്രാഫിക് സംവിധാനം നടപ്പിലാക്കിയിട്ടുള്ള വടക്കഞ്ചേരി വഴിയുള്ള വാളയാർ-ചേർത്തല പാതയിൽ വാഹനം ഓടിക്കുന്നവർക്കായി ഇടക്ക് ലഘുലേഖകളെങ്കിലും വിതരണം ചെയ്താൽ കുറച്ചെങ്കിലും വാഹനങ്ങൾ ലൈൻ ട്രാഫിക്കും കീപ്പ് ലെഫ്റ്റും പാലിച്ച് പോകുമായിരുന്നെന്നാണ് ചൂണ്ടിക്കാട്ടുന്നത്.

സംസ്ഥാനത്തു സാനിറ്ററി മാലിന്യം സംസ്കരിക്കാൻ നാല് പ്ലാന്‍റുകൾ ആരംഭിക്കും: മന്ത്രി

പാലക്കാട്: സംസ്ഥാനത്ത് സാനിറ്ററി മാലിന്യം സംസ്കരിക്കാനായി നാലു പ്ലാന്‍റുകൾ പുതുതായി ആരംഭിക്കുമെന്ന് മന്ത്രി എം.ബി. രാജേഷ്. പാലക്കാട് ബ്ലോക്ക് പഞ്ചായത്ത് സംയുക്ത പദ്ധതിയായി ഏറ്റെടുത്ത് നിർമാണം പൂർത്തിയാക്കിയ മൃഗപ്രജനന നിയന്ത്രണ കേന്ദ്രം കെട്ടിടത്തിന്‍റെ ഉദ്ഘാടനം നിർവഹിച്ചു പ്രസംഗിക്കുകയായിരുന്നു മന്ത്രി. കണ്ണൂർ, മലപ്പുറം, എറണാകുളം, കൊല്ലം ജില്ലകളിൽ ആരംഭിക്കുന്ന ഈ പ്ലാന്‍റുകളിൽ പ്രതിദിനം 100 ടണ്‍ സാനിറ്ററി മാലിന്യം സംസ്കരിക്കാൻ സാധിക്കും. ഇവയുടെ നിർമാണം അഞ്ചുമാസത്തിനുള്ളിൽ പൂർത്തിയാക്കും. ഇതോടെ സംസ്ഥാനത്തെ സാനിറ്ററി മാലിന്യവുമായി ബന്ധപ്പെട്ട പ്രശ്നങ്ങൾ പൂർണമായും പരിഹരിക്കാൻ സാധിക്കുമെന്നും മന്ത്രി പറഞ്ഞു. ശുചിത്വസംരക്ഷണത്തിൽ സമൂഹം വളരെ മുന്നോട്ട് പോയി. രാജ്യത്ത് ഏറ്റവും വൃത്തിയുള്ള 100 നഗരങ്ങളിൽ എട്ടെണ്ണം കേരളത്തിൽ നിന്നാണെന്നുള്ളത് അഭിനന്ദനാർഹമാണെന്നും മന്ത്രി കൂട്ടിചേർത്തു. ജില്ലയിൽ പ്രവർത്തിക്കുന്ന ഒറ്റപ്പാലം, ആലത്തൂർ, ചിറ്റൂർ, പാലക്കാട് എന്നിവിടങ്ങളിലെ നാല് എബിസി കേന്ദ്രങ്ങളിൽ് പ്രതിവർഷം ആറായിരത്തോളം നായകളെ വന്ധ്യംകരിക്കാൻ സാധിക്കും. വീടുകളിൽ ജൈവമാലിന്യം സംസ്കരിക്കാൻ സൗകര്യം ഒരുക്കുന്നവർക്ക് അഞ്ചു ശതമാനം നികുതിയളവ് നൽകുമെന്നും അന്പതിനായിരത്തോളം വിദ്യാർത്ഥികൾക്ക് ശുചിത്വ സ്കോളർഷിപ്പ് ഏർപ്പെടുത്തുമെന്നും മന്ത്രി കൂട്ടിച്ചേർത്തു. ജില്ലയിൽ നാല് എബിസി സെന്‍ററുകളാണ് പ്രവർത്തിക്കുന്നത്. ജില്ലയിൽ അഞ്ചാമത്തെ സെന്‍ററാണ് പറളിയിലേത്. ഓരോ സെന്‍ററുകളിലുമായി 120 ഓളം നായ്ക്കളെ വന്ധ്യംകരണം നടത്തുന്നു. അടുത്ത മാസത്തോടുകൂടി പട്ടാന്പിയിലെയും, ഡിസംബറോടെ മണ്ണാർക്കാടുമുള്ള കേന്ദ്രങ്ങളുടെ നിർമാണം പൂർത്തിയാവും. ജില്ലാ പഞ്ചായത്ത് 10 ലക്ഷം രൂപ, ബ്ലോക്ക് പഞ്ചായത്ത് 5 ലക്ഷം രൂപ, ഗ്രാമപഞ്ചായത്ത് മൂന്നര ലക്ഷം രൂപ എന്നിങ്ങനെ ഫണ്ട് വകയിരുത്തിയാണ് സെന്‍ററുകൾ പ്രവർത്തിക്കുന്നത്. പറളി ഗ്രാമപഞ്ചായത്ത് കല്യാണമണ്ഡപത്തിൽനടന്ന പരിപാടിയിൽ കെ. ശാന്തകുമാരി എംഎൽഎ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ മുഖ്യാതിഥിയായി.

ആലാംകടവ് പുഴയിൽ കുളിക്കാനിറങ്ങി ഒഴുക്കിൽപ്പെട്ട രണ്ടു കോളജ് വിദ്യാർഥികളെ ഫയർഫോഴ്സ് രക്ഷിച്ചു

ചിറ്റൂർ: ആലാംകടവ് പുഴയിൽ കുളിക്കാനിറങ്ങിയ തമിഴ്നാട് സ്വദേശികളായ രണ്ടു കോളജ് വിദ്യാർഥികൾ ഒഴുക്കിൽപ്പെട്ടു. തിരുനെൽവേലി സ്വദേശി വിഘ്നേശ് (21), മിഖിലേഷ് (21) എന്നിവരാണ് അപകടത്തിൽപ്പെട്ടത്. ഇന്നലെ വൈകുന്നേരം അഞ്ചിന് ആലാംകടവ് പുഴയിൽ തടയണ ഭാഗത്താണ് അപകടം. തമിഴ്നാട്ടിൽ നിന്നും 13 പേരടങ്ങിയ ഉല്ലാസസംഘത്തിൽപ്പെട്ട രണ്ടു വിദ്യാർഥികളാണ് പുഴയിൽ കുളിക്കാനിറങ്ങിയത്. പരന്നൊഴുകിയ പുഴയുടെ മധ്യഭാഗത്ത് ശക്തമായ ഒഴുക്കിൽപ്പെടുകയായിരുന്നു. അപകടാവസ്ഥ മനസിലാക്കി കൂടെവന്നവർ ബഹളംവെച്ചതിനെ തുടർന്ന് സംഭസ്ഥലത്തുണ്ടായിരുന്നവരാണ് വിവരം നാട്ടുകാരെ അറിയിച്ചത്. സംഭവസ്ഥലത്ത് കുതിച്ചെത്തിയ അഗ്നിരക്ഷാസേനാംഗങ്ങൾ പുഴയുടെ മധ്യഭാഗത്തുണ്ടായിരുന്നവരെ സുരക്ഷിതസ്ഥാനത്തേക്ക് മാറ്റിനിർത്തി. പിന്നീട് റോപ്പ് ഉപയോഗിച്ച് ഇരുവരേയും സുരക്ഷിതമായി കരയിലെത്തിച്ചു. സ്റ്റേഷൻ ഓഫീസർ ജി. മധു, എസ്എഫ്ആർഒ സതീഷ് കുമാർ, എഫ്എഫ്ഒ മാരായ പ്രതീഷ്, ജിജു, ലിജു, മനോജ് എന്നിവരടങ്ങിയ അഗ്നിരക്ഷ സേനയാണ് ഇരുവരേയും രക്ഷപ്പെടുത്തിയത്. ചിറ്റൂർ ഫയർഫോഴ്സ് സേനാംഗങ്ങളേയും നാട്ടുകാരേയും നന്ദി അറിയിച്ച് കോളജ് വിദ്യാർഥികൾ നാട്ടിലേക്ക് തിരിച്ചുപോയി. ആലാംകടവിൽ ഒഴുക്കിൽപ്പെട്ട് മുന്പ് ആന്ധ്രാ സ്വദേശികളായ രണ്ടുപേർ മരണപ്പെട്ടിരുന്നു. പത്തിലധികം പേരെ അഗ്നിരക്ഷാസേനയുടെ സാഹസീയ രക്ഷാപ്രവർത്തനത്തിലൂടെ രക്ഷപ്പെടുത്തിയ സംഭവങ്ങൾ നടന്നിട്ടുണ്ട്. ചിറ്റൂർ പുഴയിൽ ജലനിരപ്പ് കൂടുമ്പോഴെല്ലാം ആലാംകടവിൽ കുളിക്കാനിറങ്ങുന്നവർ അപകടത്തിൽപ്പെടുന്ന സംഭവങ്ങൾ തുടർന്നുവരുന്നതിനാൽ ഇത് ഫലപ്രദമായ നടപടികൾ ജലസേചനവകുപ്പ് അധികൃതരിൽനിന്നുണ്ടാവണമെന്ന ജനകീയാവശ്യം ശക്തമാണ്.

പരന്പരാഗതവ്യവസായങ്ങൾ നിലനിർത്തുന്നതിനു സർക്കാരിന്‍റെ പിന്തുണ: മന്ത്രി എം.ബി. രാജേഷ്

പാലക്കാട്: പരന്പരാഗത വ്യവസായങ്ങൾ നിലനിർത്താൻ സർക്കാരിന്‍റെ വലിയ പിന്തുണയുണ്ടെന്ന് മന്ത്രി എം.ബി. രാജേഷ്. സംസ്ഥാന ഖാദി ഗ്രാമവ്യവസായ ബോർഡും അംഗീകൃത ഖാദി സ്ഥാപനങ്ങളും സംയുക്തമായി സംഘടിപ്പിക്കുന്ന ഓണം ഖാദിമേളയുടെ ജില്ലാതല ഉദ്ഘാടനം നിർവഹിച്ച് പ്രസംഗിക്കുകയായിരുന്നു മന്ത്രി. കേരളത്തിലെ പ്രധാന പരന്പരാഗത വ്യവസായമായ ഖാദി 12000 കുടുംബങ്ങളുടെ ഉപജീവന മാർഗം കൂടിയാണ്. ആധുനിക സാങ്കേതിക വിദ്യയും പുതിയ വ്യവസായങ്ങളും ഉത്പന്നങ്ങളും വരുന്പോൾ പ്രതിസന്ധി നേരിടാറുണ്ടെന്നും സർക്കാരിന്‍റെ വലിയ പിന്തുണയോടെയാണ് പരന്പരാഗത വ്യവസായങ്ങൾ നിലനിന്ന് പോരുന്നതെന്നും മന്ത്രി പറഞ്ഞു. ‘എനിക്കും വേണം ഖാദി ’ എന്ന സന്ദേശം എല്ലായിടത്തും എത്തിക്കാൻ സാധിക്കണം. പുതുതലമുറയിൽപ്പെട്ടവരെയും ആകർഷിക്കുന്നതിനായി പല കളറിലും ഡിസൈനിലുള്ള തുണിത്തരങ്ങൾ ഖാദി ബോർഡ് പുറത്തിറക്കുന്നുണ്ട്. ജില്ലാ ഖാദി ഗ്രാമവ്യവസായ കാര്യാലയ അങ്കണത്തിൽ നടന്ന പരിപാടിയിൽ രാഹുൽ മാങ്കൂട്ടത്തിൽ എംഎൽഎ അധ്യക്ഷനായി. ജില്ലാ പഞ്ചായത്ത് പ്രസിഡന്‍റ് കെ.ബിനുമോൾ ആദ്യ വില്പന നിർവഹിച്ചു. നഗരസഭാ ചെയർപേഴ്സണ്‍ പ്രമീള ശശിധരൻ സമ്മാന കൂപ്പണ്‍ പ്രകാശനം ചെയ്തു. ഖാദി ബോർഡിന്‍റെ കീഴിൽ പ്രവർത്തിക്കുന്ന കോട്ടമൈതാനം, ഖാദി ഗ്രാമസൗഭാഗ്യ, പാലക്കാട് ടൗണ്‍ ബസ് സ്റ്റാൻഡ് കോംപ്ലക്സ്, തൃത്താല, കുന്പിടി, കൊല്ലങ്കോട് എന്നിവിടങ്ങളിലുള്ള ഖാദി ഷോറൂമുകളിലും, മണ്ണൂർ, ശ്രീകൃഷ്ണപുരം, പട്ടഞ്ചേരി, കളപ്പെട്ടി, വിളയോടി, എലപ്പുള്ളി, കിഴക്കഞ്ചേരി, മലക്കുളം, ചിതലി എന്നീ ഗ്രാമസൗഭാഗ്യകളിലും, മൊബൈൽ സെയിൽസ് വാനിലും പ്രത്യേക മേളകൾ നടക്കും. മേളയുടെ ഭാഗമായി എല്ലാ വില്പനശാലകളിലും ഖാദി കോട്ടൻ, സിൽക്ക്, മനില ഷർട്ടിംഗ് എന്നീ തുണിത്തരങ്ങളും ഉന്നകിടക്കകൾ, തേൻ മറ്റ് ഗ്രാമവ്യവസായ ഉല്പന്നങ്ങൾ എന്നിവയും ലഭിക്കും. മേളയിൽ ഖാദിവസ്ത്രങ്ങൾക്ക് 30 ശതമാനം വരെ ഗവ. റിബേറ്റും, സമ്മാനങ്ങളും, സർക്കാർ അർദ്ധ സർക്കാർ ജീവനക്കാർക്ക് ഒരു ലക്ഷം രൂപവരെ ക്രെഡിറ്റ് സൗകര്യവും ഒരുക്കിയിട്ടുണ്ട്.

കണ്ടമംഗലം മേഖലയിലെ വന്യമൃഗശല്യത്തിന് പരിഹാരം വേണം

മണ്ണാർക്കാട്: കണ്ടമംഗലം, പുറ്റാനിക്കാട്, മേക്കളപ്പാറ പ്രദേശങ്ങളിൽ വർധിച്ചുവരുന്ന വന്യമൃഗശല്യങ്ങൾക്ക് ശാശ്വതപരിഹാരം കാണണമെന്നാവശ്യപ്പെട്ട് തണൽ, സാംസ്കാരികവേദിയുടെ നേതൃത്വത്തിൽ മണ്ണാർക്കാട് ഡിഎഫ്ഒക്ക് പരാതി നൽകി. കഴിഞ്ഞദിവസം വളർത്തുമൃഗത്തെ പുലികടിച്ച സംഭവത്തിൽ ആ പ്രദേശത്ത് ഉടൻ കാമറ സ്ഥാപിക്കുമെന്നും കേടായ തെരുവുവിളക്കുകൾ ഉടൻ മാറ്റി സ്ഥാപിക്കുമെന്നും ഡിഎഫ്ഒ ഉറപ്പു നൽകി. ചെയർമാൻ ശ്രീധരൻ കല്യാട്ടിൽ, കൺവീനർ മൊയ്തീൻകുട്ടി, അംഗങ്ങളായ കെ. ഹരിദാസ്, കുഞ്ഞുണ്ണി ചാലിയം പറമ്പിൽ, അബുതാഹിർ വളപ്പിൽ എന്നിവരാണ് പരാതി നൽകിയത്.

പാലക്കുഴിയിൽ കാട്ടുകൊമ്പന്‍റെ വിളയാട്ടം

വടക്കഞ്ചേരി: പാലക്കുഴി പിസിആറിൽ കാട്ടുകൊമ്പനിറങ്ങി വിളകൾ നശിപ്പിച്ചു. തോട്ടങ്ങളിലെ കടപ്ലാവിന്‍റെ തൊലി പത്തടിയിലേറെ ഉയരത്തിൽ കുത്തിപ്പൊളിച്ച് തിന്നിരിക്കുകയാണ്. തൊലിക്ക് ചെറിയ മധുരമുള്ളതാണ് ആനകൾക്ക് കടപ്ലാവ് ഇത്രയേറെ ഇഷ്ടപ്പെടാൻ കാരണമെന്നു പറയുന്നു. തീറ്റയുടെ രസത്തിൽ മരത്തിൽനിന്നും പശ ഒഴുകുന്നതൊന്നും ആനകൾക്ക് പ്രശ്നമല്ല. വർഷങ്ങൾക്കു മുമ്പ് പിസിആറിൽ തന്നെ വനംവകുപ്പിന്‍റെ ക്യാമ്പ് ഷെഡ് ആന തകർത്തതിന് പിന്നിലും സമീപത്തുനിന്നിരുന്ന കടപ്ലാവ് മരമായിരുന്നു. കൃഷിയിടത്തിൽ കടപ്ലാവ് ഉണ്ടെങ്കിൽ അത് തിന്നു നശിപ്പിച്ചിട്ടെ വാഴയും മറ്റു വിളകളിലേക്കും ആനകൾ മാറൂ എന്നാണ് കർഷകരുടെ അനുഭവം. അതിനാൽ വനാതിർത്തിയിലോ ആനകൾ കാണുന്നിടത്തോ കടപ്ലാവ് വച്ച് പിടിപ്പിക്കാറില്ലെന്ന് കർഷകർ പറയുന്നു. വനാതിർത്തിയിലെ ട്രഞ്ച് വഴിയാണ് ആന എത്തിയിട്ടുള്ളത്. ട്രഞ്ചിന്‍റെ വശങ്ങൾ ചവിട്ടി ഇടിച്ച് ഇറങ്ങി അതിലൂടെ നടന്ന് ഉയരം കുറഞ്ഞ സ്ഥലം വഴിയാണ് തോട്ടത്തിലേക്ക് കയറിയിട്ടുള്ളത്. മൂന്ന് കിലോമീറ്റർ നടന്ന് പാലക്കുഴിയുടെ പ്രധാന സെന്‍ററുകളിലൊന്നായ മൂന്ന്മുക്കിനടുത്തുവരെ ആന എത്തിയിട്ടുണ്ട്. പെരുമാന്തടത്തിൽ തങ്കച്ചൻ, പാറേപുരക്കൽ ജോസഫ് (20 ന്‍റെ തോട്ടം), പൊട്ടനാനിയിൽ സേവ്യർ എന്നിവരുടെ തോട്ടങ്ങളിലെ വിളകളാണ് നശിപ്പിച്ചിട്ടുള്ളത്. ഇതിൽ സേവ്യറിന്‍റെ തോട്ടത്തിലെ വാഴകൾക്കാണ് കൂടുതൽ നാശം.

ആലത്തൂർ ഗ്രാമപഞ്ചായത്തിൽ ഔഷധസസ്യകൃഷിക്കു തുടക്കമായി

ആലത്തൂർ: സംസ്ഥാന കൃഷി വകുപ്പ്, സംസ്ഥാന ഔഷധ സസ്യ ബോർഡ്, തൊഴിലുറപ്പ് പദ്ധതി, നിറ ഹരിതമിത്ര സൊസൈറ്റി, ആലത്തൂർ കോ-ഓപ്പറേറ്റീവ് മാർക്കറ്റിംഗ് സൊസൈറ്റി, കൃഷികൂട്ടങ്ങൾ എന്നിവയുടെ സംയുക്‌ത ആഭിമുഖ്യത്തിൽ 2025-26 സാമ്പത്തിക വർഷത്തിൽ ആലത്തൂർ ഗ്രാമപഞ്ചായത്തിന്‍റെ കീഴിൽ നടപ്പിലാക്കുന്ന ഔഷധസസ്യകൃഷിക്ക് തുടക്കമായി. വാണിജ്യ ഔഷധസസ്യകൃഷിയുടെ ഉദ്ഘാടനം പഞ്ചായത്ത്‌ പ്രസിഡന്‍റ് എ. ഷൈനി കർഷകൻ കെ.ഡി. ഗൗതമന്‍റെ കൃഷിയിടത്തിൽ തൈകൾ നട്ടുകൊണ്ട് നിർവഹിച്ചു. 13 ഏക്കർ സ്ഥലത്താണ് കുറുന്തോട്ടി, നെല്ലി, അശോകം, ചെത്തികൊടുവേലി, ശതാവരി, ചിറ്റരത്ത, കാട്ടുപനികൂർക്ക, തിപ്പലി, കറ്റാർവാഴ, ആടലോടകം, തുടങ്ങിയ ഔഷധസസ്യങ്ങൾ കൃഷി ഇറക്കുന്നത്. കൃഷി ചെയ്തു ഉണ്ടാക്കുന്ന ഔഷധചെടികൾ സംഭരിച്ച് അംഗീകൃത ഏജൻസികൾ മുഖാന്തിരം വിപണനം നിർവഹിക്കുന്നതിന് ചുമതലപ്പെടുത്തിയിരിക്കുന്നത് ആലത്തൂർ കോ-ഓപ്പറേറ്റീവ് മാർക്കറ്റിംഗ് സൊസൈറ്റിയെയാണ്.

കോൺഗ്രസ് മേഖലാ കമ്മിറ്റി ഓഫീസ് ഉദ്ഘാടനം ചെയ്തു

കല്ലടിക്കോട്: കോൺഗ്രസ് കരിമ്പ മണ്ഡലം കമ്മിറ്റിയുടെ കല്ലടിക്കോട് മേഖല ഓഫീസ് ഡിസിസി പ്രസിഡന്‍റ് എ. തങ്കപ്പൻ ഉദ്ഘാടനം ചെയ്തു. കരിമ്പ മണ്ഡലം പ്രസിഡന്‍റ് സി.എം. നൗഷാദ് അധ്യക്ഷത വഹിച്ചു. കോങ്ങാട് ബ്ലോക്ക് പ്രസിഡന്‍റ് വി.കെ. ഷൈജു, ആന്‍റണി മതിപ്പുറം, എം.കെ. മുഹമ്മദ് ഇബ്രാഹിം, മുഹമ്മദ് കരിമ്പനക്കൽ, മാത്യു കല്ലടിക്കോട്, എൻ.പി. രാജൻ എന്നിവർ പ്രസംഗിച്ചു.

നിപ്പ കണ്‍ട്രോൾ റൂം പ്രവർത്തനം അവസാനിപ്പിച്ചു

പാലക്കാട്: നിപ്പ വൈറസ് പ്രതിരോധ പ്രവർത്തനങ്ങളുടെ ഭാഗമായി പാലക്കാട് ഗവണ്‍മെന്‍റ് മെഡിക്കൽ കോളജിൽ പ്രവർത്തിച്ചുവന്ന കണ്‍ട്രോൾ റൂം പ്രവർത്തനം അവസാനിപ്പിച്ചു. ജില്ലയിൽ നിപ്പ സ്ഥിരീകരിച്ചതിനെ തുടർന്ന് ജൂലൈ മൂന്നിനാണ് കണ്‍ട്രോൾ റൂം പ്രവർത്തനം തുടങ്ങിയത്. വിവിധ വകുപ്പുകളുടെ ഏകോപിച്ചുള്ള പ്രവർത്തനം നിപ്പ പ്രതിരോധത്തിൽ വലിയ വിജയമായി. ജില്ലാ ഭരണകൂടം, ജില്ലാ മെഡിക്കൽ ഓഫീസ് (ആരോഗ്യം), ഹോമിയോ, ആയുർവേദ, വനം വന്യജീവി, സിവിൽ സപ്ലൈസ് വകുപ്പ്, പൊലീസ്, മൃഗസംരക്ഷണം തുടങ്ങിയ വകുപ്പുകളുടെ കൂട്ടായ പ്രവർത്തനം രോഗവ്യാപനം തടയുന്നതിൽ നിർണായക പങ്ക് വഹിച്ചു. നിപ്പ പ്രതിരോധ പ്രവർത്തനങ്ങൾക്ക് നേതൃത്വം നൽകിയ 27 കമ്മിറ്റികളെയും ജില്ലാ കളക്ടർ അഭിനന്ദിച്ചു. നിപ്പ ബാധിത പ്രദേശമായിരുന്ന മണ്ണാർക്കാട് താലൂക്കിൽ മികച്ച സേവനം നൽകിയ ആരോഗ്യപ്രവർത്തകർ, സന്നദ്ധപ്രവർത്തകർ എന്നിവരെയും കളക്ടർ പ്രത്യേകം അനുമോദിച്ചു. കണ്‍ട്രോൾ റൂം പ്രവർത്തനം അവസാനിപ്പിച്ചെങ്കിലും, നിപ്പ പ്രതിരോധത്തിനായി എല്ലാവരും ജാഗ്രത തുടരണമെന്ന് ജില്ലാ കളക്ടർ അറിയിച്ചു.

അട്ടപ്പാടിയിൽ ജില്ലാ കളക്ടറുടെ നേതൃത്വത്തിൽ അദാലത്ത്

അഗളി: ജില്ലാ ഭരണകൂടത്തിന്‍റെ നേതൃത്വത്തിൽ അട്ടപ്പാടി മേഖലയുടെ സമഗ്രവികസനത്തിനായി രൂപകൽപ്പന ചെയ്ത ‘തുണൈ' കർമപദ്ധതിയുടെ ഭാഗമായി അദാലത്ത് നടത്തി. അട്ടപ്പാടി വട്ട്‌ലക്കി കോ-ഓപ്പറേറ്റീവ് ഫാമിംഗ് സൊസൈറ്റി ഹാൾ ഓഫ് ഹാർമണിയിൽ ജില്ലാ കളക്ടർ ജി. പ്രിയങ്കയുടെ നേതൃത്വത്തിൽ നടന്ന അദാലത്തിൽ 139 പരാതികൾ ലഭിച്ചു. ഇതിൽ 100 പരാതികൾ ജില്ലാ കളക്ടർ നേരിട്ട് പരിശോധിച്ച് നടപടികൾ സ്വീകരിച്ചു. 39 പരാതികൾ ആവശ്യമായ നിർദേശങ്ങൾ നൽകി തുടർനടപടിക്കായി ബന്ധപ്പെട്ട വകുപ്പുകൾക്ക് ജില്ലാ കളക്ടർ കൈമാറി. ജില്ലാകളക്ടറുടെ നേതൃത്വത്തിൽ ജില്ലാതല ഉദ്യോഗസഥർ അടങ്ങുന്ന സംഘം ഓരോമാസവും ബന്ധപ്പെട്ട ഓരോ ഗ്രാമപഞ്ചായത്തുകളിൽ നേരിട്ടെത്തി മേഖലയിലെ ജനങ്ങളുടെ പ്രശ്നങ്ങൾക്ക് ജനപ്രതിനിധികളുടെ പങ്കാളിത്തതോടെ പരിഹാരം കണ്ടെത്തുക എന്ന ലക്ഷ്യത്തോടെയാണ് തുണൈ അദാലത്ത് നടത്തുന്നത്. പ്രദേശത്ത് നടപ്പിലാക്കുന്ന വികസനപദ്ധതികളുടെ അവലോകനം, ഉന്നതികളുടെ ചുമതല ഉദ്യോഗസഥർക്ക് നൽകുകയും അവ സന്ദർശിച്ച് വികസന പ്രശ്നങ്ങൾ പരിഹരിക്കുന്നതിനാവശ്യമായ കുടുംബാധിഷ്ഠിത മൈക്രോപ്ലാനുകൾ വിവിധ പദ്ധതികളുടെ സംയോജനത്തോടെ തയ്യാറാക്കുക, നിർവഹണം നടത്തുക എന്നിവയാണ് തുണെെ കർമപദ്ധതിയുടെ ഭാഗമായി വരുന്നത്. പരിപാടിയിൽ അട്ടപ്പാടി ബ്ലോക്ക് പഞ്ചായത്ത്‌ പ്രസിഡന്‍റ് മരുതി മുരുകൻ, അഗളി ഗ്രാമപഞ്ചായത് പ്രസിഡന്‍റ് അംബിക ലക്ഷ്മണൻ, ഷോളയൂർ ഗ്രാമപഞ്ചായത്ത് പ്രസിഡന്‍റ് പി. രാമമൂർത്തി, പുതൂർ ഗ്രാമപഞ്ചായത്ത് പ്രസിഡന്‍റ് ജ്യോതി അനിൽകുമാർ, സബ് കളക്ടർ മിഥുൻ പ്രേംരാജ്, അസിസ്റ്റന്‍റ് കളക്ടർ രവി മീണ, പുതൂർ, ഷോളയൂർ ഗ്രാമപഞ്ചായത്ത് ജനപ്രതിനിധികൾ, ജില്ലാ തല ഉദ്യോഗസ്ഥരും പങ്കെടുത്തു.

വിജനമായ റെയിൽപ്പാത മേഖലകളിൽ ഇനി റെയിൽവേയുടെ കനത്ത ജാഗ്രതാനിരീക്ഷണം

ഒറ്റപ്പാലം: റെയിൽപാതകൾ കടന്നുപോകുന്ന വിജനമായ പ്രദേശങ്ങളിൽ കനത്ത ജാഗ്രത പാലിക്കാൻ റെയിൽവേയുടെ നിർദേശം. റെയിൽവേ പോലീസും പ്രൊട്ടക്ഷൻ പോലീസിനും പുറമേ ലോക്കൽ പോലീസും ഇക്കാര്യങ്ങളിൽ ജാഗ്രത പുലർത്തും. റെയിൽവേയുടെ കീമാൻമാരും ഗ്യാംഗ്‌മാൻമാരും കൂടുതൽ ജാഗ്രത പുലർത്തണം. ഈ മേഖലകളിൽ ആധുനിക സാങ്കേതിക വിദ്യകളും ഇതിനായി പ്രയോജനപ്പെടുത്തും. വിജനമായ മേഖലകളിൽ നിരീക്ഷണ കാമറകൾ സ്ഥാപിക്കാനും നടപടികൾ തുടങ്ങിക്കഴിഞ്ഞു. ഷൊർണൂർ-പാലക്കാട് റെയിൽവേപാതയിൽ പാളത്തിൽ കഴിഞ്ഞ ദിവസം ഇരുമ്പ് ക്ലിപ്പുകൾ കണ്ടെത്തിയ സംഭവത്തെത്തുടർന്നാണ് നടപടികൾ ശക്തമാക്കുന്നത്. മായന്നൂർ പാലത്തിന് സമീപം സിസിടിവി കാമറകളും ഇതിനകം സ്ഥാപിച്ച് കഴിഞ്ഞു. കൂടാതെ കഴിഞ്ഞദിവസം മുതൽ ഡ്രോൺ നിരീക്ഷണവും ഏർപ്പെടുത്തിയിട്ടുണ്ട്. പോലീസ്, ആർപിഎഫ്, റെയിൽവേ പോലീസ് എന്നിവരുടെ നേതൃത്വത്തിലാണ് ഡ്രോൺ നിരീക്ഷണം നടത്തുന്നത്. ജില്ലാ പോലീസ് മേധാവിയുടെ നിർദേശപ്രകാരമാണ് നടപടി. ഒറ്റപ്പാലം, ഷൊർണൂർ റെയിൽവേ സ്റ്റേഷനുകൾ, ഇരുമ്പ് ക്ലിപ്പുകൾ കണ്ടെത്തിയ മായന്നൂർ പാലത്തിന് സമീപത്തെ പ്രദേശം, പാളങ്ങൾ കടന്നുപോകുന്ന വിജനമായ പ്രദേശങ്ങൾ തുടങ്ങിയ മേഖലകൾ കേന്ദ്രീകരിച്ചാവും ഇനിമുതൽ പരിശോധനകൾ. പ്രത്യേക പരിശീലനം ലഭിച്ച സംഘത്തിന്‍റെ നേതൃത്വത്തിൽ കൃത്യമായ ഇടവേളകളിൽ പരിശോധന നടത്താനാണ് ലക്ഷ്യം. ട്രയിൻ അട്ടിമറി സാധ്യതകൾക്ക് പുറമെ പാളങ്ങൾക്ക് സമീപത്തെ മറ്റ് കുറ്റകൃത്യങ്ങളും ലഹരിക്കടത്തും ഉൾപ്പെടെ നിരീക്ഷിക്കുന്നുണ്ട്. ഒറ്റപ്പാലത്ത് പാളത്തിനപ്പുറത്ത് ഇതരസംസ്ഥാന തൊഴിലാളികൾ താമസിക്കുന്ന പ്രദേശങ്ങളിലും നിരീക്ഷണം നടത്തുന്നുണ്ട്. മായന്നൂർ മേൽപ്പാലത്തിന് 300 മീറ്റർ മാറിയാണ് നേരത്തെ പാളത്തെയും കോൺക്രീറ്റ് സ്ലീപ്പറിനെയും ബന്ധിപ്പിക്കുന്ന അഞ്ച് ഇരുമ്പ് ഇആർ ക്ലിപ്പുകൾ കണ്ടെത്തിയത്. രണ്ടുവർഷം മുൻപ് ഇവിടെ ട്രെയിനിനു നേരെ കല്ലേറും നടന്നിരുന്നു. ഈ ഭാഗത്തിനോട് ചേർന്നാണ് തമിഴ്നാട്ടിൽ നിന്നും കന്നുകാലി കച്ചവടത്തിന് വരുന്ന ഒരാളെ വെട്ടിയും കുത്തിയും കൊലപ്പെടുത്താൻ ഉള്ള ശ്രമം നടന്നത്. റെയിൽവേ സ്റ്റേഷൻ പരിസരപ്രദേശങ്ങൾ സാമൂഹ്യവിരുദ്ധരുടെ താവളമായി തീരുന്ന സാഹചര്യവും പോലീസ് ഗൗരവമായി കാണുന്നുണ്ട്. റെയിൽപാളത്തിൽ ഇരുമ്പ് ക്ലിപ്പുകൾ സ്ഥാപിച്ചത് അന്യസംസ്ഥാന തൊഴിലാളികൾ ആണെന്ന സൂചനയാണ് പോലീസ് നൽകുന്നത്. ഇതിന് പിന്നിൽ ഗൂഢാലോചന അടക്കമുള്ള കാര്യങ്ങൾ നടന്നിട്ടുണ്ടോ എന്ന കാര്യവും അന്വേഷിച്ചുവരുന്നുണ്ട്. എന്നാൽ പ്രതികളെകുറിച്ച് ഇതുവരെയും പോലീസിന് ഒരു വിവരവും ലഭിച്ചിട്ടില്ല.

കുടിവെള്ള പൈപ്പ് നന്നാക്കാൻ അമിതനിരക്കെന്ന് പരാതി

കൊഴിഞ്ഞാമ്പാറ: കുടിവെള്ള പൈപ്പ് നന്നാക്കുന്നതിന് കരാറുകാർ തോന്നിയപോലെ പണം ഈടാക്കുന്നതായി ആരോപണ മുന്നയിച്ച് ബിജെപി പ്രവർത്തകർ വാട്ടർ അഥോറിറ്റി അസിസ്റ്റന്‍റ് എൻജിനീയറെ ഉപരോധിച്ചു. വീടുകളിലേക്കുള്ള പൈപ്പ് കണക്ഷനിൽ വരുന്ന അറ്റകുറ്റപ്പണികൾക്ക് അമിതമായ പണം ഈടാക്കുന്നു. ചെറിയ തോതിലുള്ള അറ്റകുറ്റപണികൾക്കും 1000 രൂപ നിർബന്ധമായും ആവശ്യപ്പെടുകയാണെന്നാണ് പരാതി. നൽകുന്ന സംഖ്യക്ക് റസീറ്റ് നൽകാറുമില്ല. ഈ കാര്യങ്ങൾ ഉന്നയിച്ച് ബിജെപി പ്രവർത്തകരുടെ നേതൃത്വത്തിൽ നാട്ടുകൽ വാട്ടർ അഥോറിറ്റി അസി. എൻജിനീയറുടെ കാര്യാലയത്തിൽ എത്തി സമരത്തിൽ എർപ്പെട്ടത്. പണം അടക്കാത്തതിനാൽ ഫെബ്രുവരിയിൽ കണക്ഷൻ കട്ട് ചെയ്തിരുന്നു. അപ്പോൾതന്നെ പിഴ അടക്കമുള്ള മുഴുവൻ തുകയും അടച്ചിട്ടും അഞ്ചുമാസം കഴിഞ്ഞും കണക്ഷൻ നൽകിയില്ലെന്ന് ബിജെപി ജില്ലാ ജനറൽ സെക്രട്ടറി എ.കെ. ഓമനക്കുട്ടൻ ആരോപിച്ചു. കണക്ഷൻ നൽകാൻ വന്നവരോട് അവരുടെ കൂലിയായി ആവശ്യപ്പെട്ട തുകയ്ക്ക് രശീതി നൽകണമെന്ന് അറിയിച്ചതോടെ അവർ പിന്നീട് വരാമെന്ന് പറഞ്ഞ് പോയതാണ്. കെ.ശ്രീകുമാർ, യുവമോർച്ച ജില്ലാ ജനറൽ സെക്രട്ടറി കെ.ഷിനു, ബിജെപി കൊഴിഞ്ഞാമ്പാറ മണ്ഡലം ജനറൽ സെക്രട്ടറി പി.വിചിത്രൻ, കെ. ഷിബു എന്നിവരുടെ നേതൃത്വത്തിൽ ആയിരുന്നു ഉപരോധ സമരം നടന്നത്.

സബ് ജയിലിനുചുറ്റും വാഹനങ്ങൾ പാർക്ക് ചെയ്യരുതെന്നു സബ് കളക്ടറുടെ നിർദേശം

ഒറ്റപ്പാലം: ഒറ്റപ്പാലം കോടതി പരിസരത്തെത്തുന്നവരുടെ ശ്രദ്ധയ്ക്ക്. സബ്ജയിലിനുസമീപം വാഹനങ്ങൾ നിർത്തിയിട്ടാൽ പണം പോകും. ഇവിടം പാർക്കിംഗ് നിരോധിത മേഖലയാണെന്നാണ് ചട്ടം. ഇക്കാര്യം ശ്രദ്ധിക്കാതെ വാഹനങ്ങൾ നിർത്തിയിട്ടതിന് ഉടമകളിൽനിന്ന്‌ പോലീസ് കഴിഞ്ഞദിവസം പിഴ ചുമത്തിയിരുന്നു. സബ് കളക്ടറുടെ നിർദേശപ്രകാരം സ്ഥാപിച്ച ‘നോ പാർക്കിംഗ്’ ബോർഡിനുതാഴെ നിർത്തിയിട്ട വാഹനങ്ങളുടെ ഉടമകളിൽനിന്നാണ് പിഴയീടാക്കിയത്. ഒറ്റപ്പാലം താലൂക്ക് ഒാഫീസ്, സബ് കളക്ടറുടെ ഓഫീസ്, സബ് രജിസ്ട്രാർ ഓഫീസ്, ജുഡീഷ്യൽ ഒന്നാംക്ലാസ് മജിസ്ട്രേട്ട് കോടതി എന്നിവ പ്രവർത്തിക്കുന്നത് ഈ റോഡിലാണ്. വീതികുറഞ്ഞ റോഡിൽ ജയിലിന്‍റെ മതിലിനോടുചേർന്നും മറുഭാഗത്തും വാഹനങ്ങൾ നിർത്തിയിടുന്നത് ഔദ്യോഗികവാഹനങ്ങൾ കടന്നുപോകുന്നതിന്‌ തടസം സൃഷ്ടിക്കാറുണ്ട്. സർക്കാർ ഓഫീസുകളും കോടതികളുമടക്കം പ്രവർത്തിക്കുന്ന ഈ ഭാഗത്തേക്ക് നൂറുകണക്കിന് വാഹനങ്ങളാണ് ദിവസവും എത്തുന്നത്. കോടതിക്കു മുൻവശത്തെ സ്ഥലത്തും റോഡരികിലുമൊക്കെയാണ് വാഹനങ്ങൾ നിർത്താറുള്ളത്. മജിസ്ട്രേറ്റ് കോടതിയിലേക്ക് പോകണമെങ്കിലും വാഹനങ്ങൾ ഇവിടെയെവിടെയെങ്കിലും നിർത്തണം. അനധികൃതപാർക്കിംഗ് ശ്രദ്ധയിൽപ്പെട്ട ഒറ്റപ്പാലം തഹസിൽദാർ നടപടിയെടുക്കാൻ പോലീസിനോട് നിർദേശിക്കുകയായിരുന്നു. നോ പാർക്കിംഗ് ബോർഡിന് താഴെ വാഹനങ്ങൾ നിർത്തിയിട്ടാൽ ഇനിയും പിഴയീടാക്കുമെന്ന് പോലീസ് അറിയിച്ചു. ഒറ്റപ്പാലത്തെ കോടതി പറമ്പിൽ സ്ഥിതിചെയ്യുന്ന വിവിധ സർക്കാർ സ്ഥാപനങ്ങളിലേക്ക് എത്താൻ ആളുകൾക്ക് വലിയ പ്രയാസം ഉണ്ട്. ഗതാഗതതടസം തന്നെയാണ് ഇതിന് കാരണം. ഇതുകൊണ്ടുതന്നെ പലരും കോടതിപറമ്പിലാണ് വാഹനങ്ങൾ നടത്തിയിരുന്നത്.

കരിമ്പ പഞ്ചായത്തിലെ വോട്ടർപട്ടികയിൽ വ്യാപകമായ ക്രമക്കേട്: യുഡിഎഫ്

കല്ലടിക്കോട്: കരിമ്പ പഞ്ചായത്തിലെ വോട്ടർപട്ടികയിൽ വ്യാപകമായ ക്രമക്കേടുകൾ കണ്ടെത്തിയതായി യുഡിഎഫ് കരിമ്പ മണ്ഡലം കമ്മിറ്റി ആരോപിച്ചു. വാർഡിന്‍റെ അതിർത്തികൾക്ക് അപ്പുറത്ത് കൂട്ടമായി വോട്ടുകൾ ഉണ്ടെന്നും പല വാർഡുകളിലും ഉള്ള ആളുകളുടെ പേരുകൾ മറ്റ് പല വാർഡുകളിലാണ് കൂട്ടിച്ചേർക്കപ്പെട്ടിട്ടുള്ളത് എന്നും കമ്മിറ്റി ചൂണ്ടിക്കാട്ടി. ഒരാളുടെ പേര് തന്നെ ഒന്നിലധികം വാർഡുകളിൽ കിടക്കുന്നുണ്ടെന്നും പലരുടെയും പേരുകൾ ലിസ്റ്റിൽനിന്ന് ഒഴിവാക്കിയിട്ടുണ്ടെന്നും ഓരോ വാർഡിലും വീടുകളുടെ എണ്ണത്തിലുള്ള വ്യത്യാസം പത്ത് ശതമാനത്തിലധികമാകരുതെന്ന ഇലക്ഷൻ കമ്മീഷന്‍റെ നിർദേശം മറികടന്ന് ചിലവാർഡുകളിൽ ആയിരത്തിൽ താഴെ വോട്ടുകളും ചിലവാർഡുകളിൽ 1500 ഓളം വോട്ടുകളും ആണുള്ളത്. ഇത് ഭരണപക്ഷത്തിന്‍റെ വ്യാപകമായ ഇടപെടൽ ആണെന്നും അതിനെതിരെ ശക്തമായ പ്രക്ഷോഭവുമായി യുഡിഎഫ് രംഗത്ത് വരുമെന്നും യുഡിഎഫ് നേതാക്കൾ പറഞ്ഞു. യുഡിഎഫ് ചെയർമാൻ കെ.കെ. ചന്ദ്രൻ അധ്യക്ഷത വഹിച്ചു. ആന്‍റണി മതിപ്പുറം, പി.കെ. അബ്ദുള്ളക്കുട്ടി, വി.കെ. ഷൈജു, എം.കെ. മുഹമ്മദ് ഇബ്രാഹിം, പി.കെ.എം. മുസ്തഫ, സി.എം. നൗഷാദ്, യൂസഫ് പാലക്കൽ, സി.കെ. മുഹമ്മദ് മുസ്തഫ, മുഹമ്മദ് ഹാരിസ്, മാത്യു കല്ലടിക്കോട്, വി.സി. ഉസ്മാൻ, യൂസഫ് ചൂരക്കോട്, ജെന്നി ജോൺ, പി. സുരേഷ്, ഇസ്മയിൽ എന്നിവർ പ്രസംഗിച്ചു.

അഹല്യ കാന്പസിൽ സെമിനാർ

പാലക്കാട്: വിമുക്തിമിഷന്‍റെയും അഹല്യ യാഡ് കമ്മിറ്റിയുടെയും ആഭിമുഖ്യത്തിൽ പാലക്കാട് എക്സൈസ് ഓഫീസേഴ്സ് അസോസിയേഷന്‍റെയും എക്സൈസ് സ്റ്റാഫ് അസോസിയേഷന്‍റെയും സഹകരണത്തോടെ അഹല്യ കാന്പസിൽ സെമിനാർ സംഘടിപ്പിച്ചു. ഹിപ്നോട്ടിസ്റ്റും മെന്‍റലിസ്റ്റും കൗണ്‍സിലറുമായ അജ്മൽ പെട്രാക്സ് അവതരണം നടത്തി. പാലക്കാട് ഡെപ്യൂട്ടി എക്സൈസ് കമ്മീഷണർ പ്രിൻസ് ബാബു ഉദ്ഘാടനം നിർവഹിച്ചു. അഹല്യ യാർഡ് കമ്മിറ്റി കോ-ഓർഡിനേറ്റർ ഡോ. ശ്രീജിത്ത് എം. നായർ സ്വാഗതം പറഞ്ഞു. എക്സിക്യൂട്ടീവ് ഡയറക്ടർ ഡോ.കൃഷ്ണകുമാർ കിഷോർ അധ്യക്ഷത വഹിച്ചു. വിമുക്തി ജില്ലാ മാനേജർ എസ്. സജീവ്, കേരള എക്സൈസ് ഓഫീസേഴ്സ് അസോസിയേഷൻ ജില്ലാ സെക്രട്ടറി കലാധരൻ, കേരള എക്സൈസ് സ്റ്റാഫ് അസോസിയേഷൻ ജില്ലാ സെക്രട്ടറി വി.പി. മഹേഷ് എന്നിവർ പ്രസംഗിച്ചു. അസോസിയേറ്റ് പ്രൊഫസർ ഡോ. പത്മാവതി നന്ദി പറഞ്ഞു.

കർഷകസംഘം ആലത്തൂർ എസ്ബിഐ ശാഖ ഉപരോധിച്ചു

ആലത്തൂർ: സംഭരിച്ച നെല്ലിന്‍റെ താങ്ങുവില നൽകുന്നതിലുള്ള കാലതാമസത്തിൽ പ്രതിഷേധിച്ച് കർഷകസംഘം ആലത്തൂർ എസ് ബി ഐ ശാഖ ഉപരോധിച്ചു. ജില്ലാ എക്സിക്യൂട്ടീവ് അംഗം വി.സി. രാമചന്ദ്രൻ ഉദ്ഘാടനം ചെയ്തു. ജില്ലാകമ്മിറ്റി അംഗം സി. സുരേഷ് ബാബു അധ്യക്ഷനായി. ആർ. വിനോദ്, എം. ഗംഗാധരൻ എന്നിവർ പ്രസംഗിച്ചു. മൂന്ന്ദിവസത്തികം നെല്ലിന്‍റെ പണം നൽകാമെന്ന ബാങ്ക് മാനേജരുടെയും റീജണൽ മാനേജരുടെയും ഉറപ്പിന്മേൽ ഉപരോധസമരം അവസാനിപ്പിച്ചു.

വർഷക്കാലത്തും കുടിവെള്ളമില്ല; പ്രതിഷേധവുമായി വരോട് നിവാസികൾ

ഒറ്റപ്പാലം: വർഷക്കാലത്തും കുടിവെള്ളത്തിന് വേണ്ടി സമരരംഗത്തിറങ്ങേണ്ട ഗതികേടിൽ വരോട് നിവാസികൾ. മഴ പെയ്യുമ്പോൾ കുളിക്കാനും മറ്റ് കാര്യങ്ങൾക്കും മഴവെള്ളം സംഭരിക്കുന്ന പ്രദേശത്തുകാർ മഴവെള്ളം സംഭരിച്ച് ചൂടാക്കിയും ഉപയോഗിക്കേണ്ട ഗതികേടിലാണ്. നാട്ടിലെ പുഴയും തോടും കരകവിഞ്ഞ് വീടുകളിൽ വെള്ളം കയറുമോയെന്ന ഭീതിയിൽ കഴിയുന്ന ഒറ്റപ്പാലം നഗരത്തിന്‍റെ ഒരു ഭാഗത്ത് ഈ അവസ്ഥയും മറുഭാഗത്ത് രൂക്ഷമായ കുടിവെള്ള ക്ഷാമവുമാണ് ബാക്കിപത്രം. വരോട് മേഖലയിൽ ഒരു മാസത്തിനടുത്തായി കുടുംബങ്ങൾക്ക് കുടിവെള്ളമില്ലാത്ത സ്ഥിതിയാണ്. അഞ്ഞൂറിനടുത്ത് കുടുംബങ്ങൾക്കാണ് കുടിവെള്ളമെത്താത്തത്. തുടർന്നാണ് വാർഡ് കൗൺസിലർമാരുടെ നേതൃത്വത്തിൽ വാട്ടർ അഥോറിറ്റി ഓഫീസിൽ പ്രതിഷേധം നടന്നത്. വീട്ടാംപാറ വാർഡിൽ ഷാപ്പുപടി, കൃഷ്ണൻകുട്ടി മാഷ് റോഡ്, വരോട് വാർഡിൽ അത്താണി, നാലാം മൈൽ, തേക്കിൻകാട്, വാരിയത്തുപടി, കാഞ്ഞിരപ്പുഴ കനാൽഭാഗം തുടങ്ങിയ സ്ഥലങ്ങളിലെ കുടുംബങ്ങളാണ് വെള്ളമില്ലാതെ ബുദ്ധിമുട്ടുന്നത്. ഒറ്റപ്പാലം-ചെർപ്പുളശേരി റോഡ് നവീകരണത്തിന്‍റെ ഭാഗമായി വിതരണപൈപ്പ് പൊട്ടിയതാണ് വെള്ളമെത്താത്തതിന് കാരണമെന്നാണ് അധികൃതരുടെ വാദം. തകരാർ ശ്രദ്ധയിൽപ്പെട്ടാലും പരിഹരിക്കാൻ വൈകുന്നുവെന്നാണ് മറുപക്ഷ ആരോപണം. പ്രശ്നം ഉടൻ പരിഹരിച്ച് ജലവിതരണം പുനഃസ്ഥാപിക്കണമെന്ന്‌ ആവശ്യപ്പെട്ടാണ് നഗരസഭാ കൗൺസിലർമാർ പ്രതിഷേധിച്ചത്. മഴയിൽ തടയണ നിറഞ്ഞുകവിഞ്ഞാണ് വെള്ളമൊഴുകുന്നത്. എന്നിട്ടാണ് വെള്ളമെത്താത്ത പ്രശ്നം.

ഐഎൻടിയുസി ജില്ലാ നേതൃത്വസമ്മേളനം

പാലക്കാട്: താൊഴിലാളികളെ ദ്രോഹിക്കുന്ന കാര്യത്തിൽ കേന്ദ്ര -സംസ്ഥാന സർക്കാരുകൾ വാശിയിലാണെന്നും ഇരു സർക്കാരുകളും തൊഴിലാളിവർഗത്താേട് യുദ്ധം പ്രഖ്യാപിച്ചിരിക്കയാണെന്നും അതിനെതിരെ ഐഎൻടിയുസി സംസ്ഥാനത്ത് പ്രത്യക്ഷ സമരപരിപാടിക്ക് തുടക്കം കുറിക്കുന്നതിന്‍റെ ഭാഗമായി ഈ മാസം അവസാനം സെക്രട്ടറിയേറ്റിൽ തൊഴിലുറപ്പ് താൊഴിലാളി കാോൺഗ്രസിന്‍റെ മാർച്ചും ധർണയും നടത്തുമെന്നും ഐഎൻടിയുസി സംസ്ഥാന പ്രസിഡന്‍റ് ആർ. ചന്ദ്രശേഖരൻ പറഞ്ഞു. ഐഎൻടിയുസി ജില്ലാ സമ്പൂർണ നേതൃത്വസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ജില്ലാ പ്രസിഡന്‍റ് എസ്.കെ. അനന്തകൃഷ്ണൻ അധ്യക്ഷത വഹിച്ചു. ഡിസിസി പ്രസിഡന്‍റ് എ. തങ്കപ്പൻ, കെപിസിസി ജനറൽ സെക്രട്ടറി സി. ചന്ദ്രൻ, നിർവാഹകസമിതി അംഗം സി.വി. ബാലചന്ദ്രൻ, പ്രദീപ് കുമാർ, ജനാർദനൻ, മുനിയാണ്ടി, കെ. അപ്പു, എം.കെ. ബാബു, വി. അബ്ദുള്ളക്കുട്ടി, എൻ. മുരളീധരൻ, ആർ. നാരായണൻ, കളത്തിൽ കൃഷ്ണൻകുട്ടി, എൻ.മുരളീധരൻ പ്രസംഗിച്ചു.

റവ. ജോൺ പീറ്റർ പീസ് ആൻഡ് ഹാർമണി അവാർഡ് ഡോ. ബി.കെ. കൃഷ്ണരാജ് വാനവാരയർക്ക് സമ്മാനിച്ചു

കോയമ്പത്തൂർ: ദിവ്യോദയ ഇന്‍റർ റിലീജിയസ് സെന്‍ററിന്‍റെ ആഭിമുഖ്യത്തിൽ ഏർപ്പെടുത്തിയ റവ. ജോൺ പീറ്റർ പീസ് ആന്‍റ് ഹാർമണി അവാർഡ് ഭാരതീയ വിദ്യാഭവൻ മേധാവി ഡോ.ബി.കെ.കൃഷ്ണരാജ് വാനവരായരെ നൽകി ആദരിച്ചു. സമൂഹത്തിന് അദ്ദേഹം നൽകിയ സംഭാവനകളെ മാനിച്ചാണ് അംഗീകാരം. ദിവ്യോദയ സ്ഥാപകൻ ഫാ.ജോൺ പീറ്ററിന്‍റെ സ്മരണാർഥമാണ് പുരസ്കാരം ഏർപ്പെടുത്തിയിട്ടുള്ളത്. ദിവ്യോദയ ഇന്‍റർറിലീയജസ് സെന്‍ററിൽ നടന്ന ചടങ്ങിൽ സിഎംഐ പ്രേഷിത പ്രൊവിൻസ് പ്രൊവിൻഷ്യൽ ഫാ. സാജു ചക്കാലക്കൽ സിഎംഐ പുരസ്കാരം സമ്മാനിച്ചു. ശാന്തി ആശ്രമം പ്രസിഡന്‍റ് ഡോ.കെസിവിനോ അരം, റോട്ടറി ക്ലബ് മുൻ ഗവർണർ ഡോ.കെ.എ. കുര്യച്ചൻ തുടങ്ങിയവർ ചടങ്ങിൽ പങ്കെടുത്തു. ദിവ്യോദയ ഡയറക്ടർ ഫാ. വിൽസൺ ചക്കിയത്ത് സിഎംഐ ചടങ്ങിന് നേതൃത്വം വഹിച്ചു.

കുണ്ടും കുഴിയും നിറഞ്ഞ് ഒറ്റപ്പാലത്തെ റോഡുകൾ

ഒറ്റപ്പാലം: നവീകരണം കാര്യക്ഷമമായില്ല, പാതയിലാകെ കുഴികൾ. രണ്ടുമാസം മുൻപ് നവീകരിച്ച പാതയിലാണ് കുഴികൾ രൂപപ്പെത്. പാലാട്ട് റോഡ് വഴി പൂളക്കാപ്പറമ്പ് മയിലുംപുറം പോകുന്ന പാതയിലാണ് കുഴികൾ നിറഞ്ഞത്. ബസുകൾ ഉൾപ്പെടെ നൂറ് കണക്കിന് വാഹനങ്ങൾ സഞ്ചരിക്കുന്ന നഗരസഭ റോഡാണ് നവീകരിച്ചയുടൻ തകർന്നത്. വീതികുറഞ്ഞ റോഡിൽ വളവുകളിൽ അടക്കം കുഴികൾ രൂപപ്പെട്ടത് അപകടഭീഷണി ഉയർത്തുന്നുണ്ട്. വാഹനങ്ങൾ കുഴി ഒഴിവാക്കി യാത്ര ചെയ്യാൻ ശ്രമിക്കുന്നത് അപകടത്തിന് കാരണമാകുന്നു. നവീകരണത്തിന് പിന്നാലെ മണ്ണുമാന്തിയന്ത്രം കടന്നുപോയതാണ് റോഡിന്‍റെ തകർച്ചയ്ക്ക്‌ കാരണമെന്നാണ് അധികൃതർ പറയുന്നത്. എന്നാൽ നിർമാണത്തിൽ അപാകമുണ്ടെന്ന് പ്രദേശവാസികൾ ആരോപിക്കുന്നു. കരാറുകാരന് പണം കൈമാറിയിട്ടില്ലെന്നും തകരാർ പരിഹരിക്കാൻ നിർദേശം നൽകിയതായും നഗരസഭ അധികൃതർ അറിയിച്ചു.

സമരപ്രഖ്യാപന കൺവൻഷൻ

വടക്കഞ്ചേരി: കേന്ദ്ര - സംസ്ഥാന സർക്കാരുകളുടെ യുവജന വഞ്ചനയ്ക്കെതിരെ യൂത്ത് കോൺഗ്രസ്‌ ജില്ലാ കമ്മിറ്റിയുടെ നേതൃത്വത്തിൽ സമര പ്രഖ്യാപന കൺവൻഷൻ നടന്നു. സംസ്ഥാന പ്രസിഡന്‍റ് രാഹുൽ മാങ്കൂട്ടത്തിൽ എംഎൽഎ ഉദ്ഘാടനം ചെയ്തു. ജില്ലാ പ്രസിഡന്‍റ് കെ.എസ്.ജയഘോഷ് അധ്യക്ഷത വഹിച്ചു. കെപിസിസി ജനറൽ സെക്രട്ടറി സി. ചന്ദ്രൻ, ഡിസിസി ജനറൽ സെക്രട്ടറി കെ.ജി. എൽദോ, യൂത്ത് കോൺഗ്രസ് സംസ്ഥാന കമ്മിറ്റി ഭാരവാഹികളായ ഒ.കെ. ഫാറൂഖ്, പ്രതീഷ് മാധവൻ, സി.വിഷ്ണു, ജിതേഷ് നാരായണൻ, ജില്ലാ ഭാരവാഹികളായ ഇ. കെ. ജസീൽ, അമ്പിളി മോഹൻദാസ്, ശ്യാം ദേവദാസ്, വിനീഷ് കരിമ്പാറ, നിയോജകമണ്ഡലം പ്രസിഡന്‍റുമാരായ റിനാസ് യൂസഫ്, മനു പ്രസാദ്, നവാസ്, നസീർ മാസ്റ്റർ, കെഎസ്‍യു ജില്ലാ പ്രസിഡന്‍റ് നിഖിൽ കണ്ണാടി, സംസ്ഥാന ജനറൽസെക്രട്ടറി അജാസ് കുഴൽമന്ദം, കോൺഗ്രസ് ബ്ലോക്ക് പ്രസിഡന്‍റ് അഡ്വ.എം.ദിലീപ്, മണ്ഡലം പ്രസിഡന്‍റ് ഇല്ല്യാസ് പടിഞ്ഞാറേക്കളം തുടങ്ങിയവർ പ്രസംഗിച്ചു.

ഓട്ടോമൊബൈൽ വർക്ക്ഷോപ്സ് വാർഷികസമ്മേളനം നടന്നു

വടക്കഞ്ചേരി: അസോസിയേഷൻ ഓഫ് ഓട്ടോമൊബൈൽ വർക്ക്ഷോപ്സ് വടക്കഞ്ചേരി യൂണിറ്റിന്‍റെ വാർഷികസമ്മേളനം നടന്നു. സംസ്ഥാന ട്രഷറർ സുധീർ മേനോൻ ഉദ്ഘാടനം ചെയ്തു. വ്യാപാര ഭവനിൽനടന്ന സമ്മേളനത്തിൽ റോയ് ജേക്കബ് അധ്യക്ഷത വഹിച്ചു. സിഐ കെ.പി. ബെന്നി മുഖ്യാതിഥിയായി. ജില്ലാ പ്രസിഡന്‍റ് പി. രാജൻ, കെ. പ്രകാശൻ, സുജിത്ത്, എം. സുനിൽ, സി.വി. ബാലചന്ദ്രൻ, പ്രേമചന്ദ്രൻ, സുകുമാരൻ, എ. ശിവദാസൻ, മുരുകൻകുട്ടി പ്രസംഗിച്ചു.

പി.എസ്. ശിവദാസ് സ്വാതന്ത്ര്യദിന പരേഡിൽ പങ്കെടുക്കും

വണ്ടിത്താവളം: സ്വാതന്ത്ര്യദിനത്തിൽ ഡൽഹിയിൽ പങ്കെടുക്കുന്ന പരേഡിൽ പങ്കെടുക്കാൻ പട്ടഞ്ചേരി ഗ്രാമപഞ്ചായത്ത് പ്രസിഡന്‍റ് പി.എസ്. ശിവദാസിന് കേന്ദ്രസർക്കാരിന്‍റെ ക്ഷണം. കഴിഞ്ഞ 38 വർഷമായി ഗ്രാമപഞ്ചായത്ത് പ്രസിഡന്‍റ്, വൈസ് പ്രസിഡന്‍റ് എന്നീ നിലകളിൽ സേവനമനുഷ്ഠിച്ചതിനുള്ള ബഹുമതിയായാണ് സ്വാതന്ത്ര്യദിനപരേഡിൽ പങ്കെടുക്കാൻ അവസരം ലഭിച്ചിരിക്കുന്നത്. മുതിർന്ന കോൺഗ്രസ് നേതാവും മുൻ എംഎൽഎയുമായ കെ. അച്യുതൻ ഷാൾ അണിയിച്ചു ആദരിച്ചു. ശിവദാസിനൊപ്പം സഹധർമിണിക്കും ഉൾപ്പെടെയാണ് ക്ഷണം. മാലിന്യ സംസ്കരണം മേഖലയിൽ മികച്ച പരിഗണന നൽകിയതും പി.എസ്. ശിവദാസിന്‍റെ സേവന മികവായി പരിഗണിച്ചിട്ടുണ്ട്.

ചിങ്ങം ഒന്ന് കരിദിനമായി ആചരിക്കും: കേരള കർഷകസംരക്ഷണ സമിതി

കൊല്ലങ്കോട്: നെല്ല് സംഭരിച്ച് മാസങ്ങൾ കഴിഞ്ഞിട്ടും നെൽവില നൽകാത്ത സപ്ലൈകോയുടേയും സർക്കാരിന്‍റെയും കർഷക ദ്രോഹ നടപടികൾക്കെതിരെ കർഷകദിനം കരിദിനമായി ആചരിക്കാൻ കേരള കർഷകസംരക്ഷണ സമിതി യോഗം തീരുമാനിച്ചു. രണ്ടാംവിളയിലെ നെല്ലളന്ന അവസാനത്തെ കർഷകനും വില ലഭ്യമാകുന്നതുവരെ കടുത്ത പ്രതിഷേധസമരങ്ങളിലേക്ക് നീങ്ങുവാൻ കർഷകർ നിർബന്ധിതരായിരിക്കയാണ്. നിലവിലെ സ്ഥിതിയനുസരിച്ച് ഓണത്തിന്നു മുമ്പായിപോലും കർഷകർക്ക് പണം ലഭിക്കുമെന്ന് ഉറപ്പില്ല. നെല്ലുസംഭരണത്തിലെ ചാക്കു നൽകുന്നതു മുതൽ നെൽവില ലഭിക്കുന്നതുവരെ ഓരോഘട്ടത്തിലും കർഷകരെ ദ്രോഹിക്കുന്ന നടപടിയിൽ പ്രതിഷേധാർഹമാണ്. താങ്ങുവില വർധിപ്പിക്കാത്തതും സംസ്ഥാന സർക്കാർ നൽകി വന്നിരുന്ന ഇൻസെന്‍റീവ് കഴിഞ്ഞ നാലുവർഷം തുടർച്ചയായി വെട്ടിക്കുറയ്ക്കുന്നതും കാർഷികമേഖലയിലെ പ്രതിസന്ധി കൂട്ടിയിരിക്കുകയാണ്. രാസവള വിലവർധനയും ക്ഷാമവും കേരളത്തിന് അർഹതപ്പെട്ട വെള്ളം മുഴുവൻ നേടിയെടുക്കുന്നതിനായി പറമ്പിക്കുളം-ആളിയാർ കരാർ പുതുക്കുന്നതിന് മുൻകൈയെടുക്കാത്തത് സർക്കാരിന്‍റെ നിരുത്തരവാദപരമായ നടപടിയാണ്. കാട്ടാന, കാട്ടുപന്നി തുടങ്ങിയ വന്യമൃഗാക്രമണങ്ങൾക്കു ശാശ്വതപരിഹാരം കാണാതെ പരസ്പരം പഴിചാരി ഒഴിഞ്ഞുമാറുന്നതാണ് കേന്ദ്ര-സംസ്ഥാന സർക്കാരുകളുടെ നിലപാട്. കർഷകനും സിനിമാനടനുമായ കൃഷ്ണപ്രസാദ് യോഗം ഉദ്ഘാടനം ചെയ്തു. ജില്ലാ പ്രസിഡന്‍റ് സി. വിജയൻ അധ്യക്ഷത വഹിച്ചു.

കിഴക്കഞ്ചേരി,കണച്ചിപരുത, വചനഗിരി പ്രദേശങ്ങളിൽ ആഫ്രിക്കൻ ഒച്ച് വ്യാപകം

വടക്കഞ്ചേരി: കിഴക്കഞ്ചേരി പഞ്ചായത്തിലെ കണച്ചിപരുത പ്രദേശത്ത് രാക്ഷസഒച്ച് എന്നറിയപ്പെടുന്ന ആഫ്രിക്കൻ ഒച്ച് വ്യാപകമാകുന്നു. വീടുകളുടെ ചുമരുകളിലും മതിലുകളിലും ചെടികൾ, വാഴ തുടങ്ങി എവിടേയും ഇവ കൂട്ടമായാണ് പറ്റിപ്പിടിച്ചിരിക്കുന്നത്. പേരുപോലെതന്നെ വലു താണ് ഈ ഒച്ചുകൾ. മണിക്കൂറുകൾകൊണ്ട് ഇവ ചെടികൾ തിന്നുതീർക്കും. കൂട്ടങ്ങളെത്തിയാൽ വാഴത്തോട്ടങ്ങൾവരെ ഇല്ലാതാകും. എന്തുംതിന്നുന്ന ഒരുതരം ക്ഷുദ്രജീവിയാണിത്. വചനഗിരി പള്ളിക്കു മുന്നിലുള്ള ഓക്സിജൻ പ്ലാന്‍റിൽ വലിയ കൂട്ടമായാണ് ഇവയെ കാണുന്നത്. ചുമരിൽ കാഷ്ഠിച്ചും കൂടിയിരുന്നും കണ്ടാൽ തന്നെ ഏറെ അറപ്പ് ഉണ്ടാക്കും. ഇവയുടെ ശ്രവമോ കാഷ്ഠമോ മനുഷ്യശരീരത്തിലായാൽ ചിലർക്ക് അലർജിയും അസ്വസ്ഥതകളും ഉണ്ടാകുന്നുണ്ട്. തലവേദന, പനി തുടങ്ങിയവരും കാണപ്പെടുന്നു. ചൊറിച്ചിൽ ഉണ്ടാവുകയും അതു വ്രണമായി പഴുക്കുന്ന സ്ഥിതിയുമുണ്ട്. ആസ്മയും കുട്ടികൾക്ക് അലർജി ഉണ്ടാകാനുള്ള സാധ്യത കൂടുതലാണെന്ന് പറയുന്നു. ചത്താലുള്ള ചീഞ്ഞമണവും ഏറെ അസഹനീയമാണെന്ന് കണച്ചിപരുത പള്ളിക്കടുത്തെ വാളിപ്ലാക്കൽ ജോണി പറഞ്ഞു. നല്ല വെയിലുള്ള സമയം ഇവ കുഴിയുണ്ടാക്കി മണ്ണിനടിയിൽ കഴിയും. രാത്രികാലങ്ങളിലും മഴസമയത്തുമാണ് പുറത്തിറങ്ങുക. ഇവയുടെ പെരുപ്പവും അതിവേഗത്തിലാണ്. ഉപ്പ്, ബ്ലീച്ചിംഗ് പൗഡർ, തുരിശും പുകയിലയും ചേർത്ത മിശ്രിതം തുടങ്ങിയ ഉപയോഗിച്ചാണ് ഇവയെ നശിപ്പിക്കുന്നതെങ്കിലും പറമ്പുകളിലും വീടിനു ചുറ്റുമെല്ലാം നിറയുന്നതിനാൽ നശിപ്പിക്കലും പ്രായോഗികമാകുന്നില്ല. ചാക്ക് കണക്കിന് ഉപ്പ് വാങ്ങി വിളകളെ സംരക്ഷിക്കുന്നവരുമുണ്ട്. ആനശല്യത്തിനു പുറമെയാണ് പുതിയ ഭീഷണി കൂടി വന്നിട്ടുള്ളതെന്ന് ഓക്സിജൻ പ്ലാന്‍റ് ഉടമ ചാലക്കൽ പീറ്റർ പറഞ്ഞു. വന്യമൃഗഭീഷണി ഉൾപ്പെടെ ഒരു വിധത്തിലും ജീവിക്കാൻ കഴിയാത്ത സ്ഥിതിയാണ് നാട്ടിലുണ്ടാകുന്നത്. കഴിഞ്ഞവർഷം ഇവിടെ അടുത്ത് പിട്ടുകാരികുളമ്പ് ഭാഗത്ത് ഇവയെ കാണപ്പെട്ടിരുന്നു. എന്നാൽ ഈ മഴക്കാലത്തോടെയാണ് വചനഗിരി ഭാഗത്തേക്ക് വ്യാപകമായിട്ടുള്ളതെന്ന് ജോണി പറഞ്ഞു. ഈ പ്രദേശത്ത് ഇവ എങ്ങനെ എത്തി എന്നതിന് ഇപ്പോഴും വ്യക്തതയില്ല. ഇവയെ തുരത്തുന്നതിനും ഉറവിടങ്ങൾ നശിപ്പിക്കുന്നതിനുമുള്ള നടപടികൾ ബന്ധപ്പെട്ട അധികൃതർ അടിയന്തരമായി സ്വീകരിക്കണമെന്നാണ് നാട്ടുകാരുടെ ആവശ്യം.

വടക്കഞ്ചേരി ടൗണിൽ തെരുവുനായ്ക്കൾക്കു കുറവില്ല

വടക്കഞ്ചേരി: പേവിഷബാധയുള്ള നായ്ക്കൾ ഉൾപ്പെടെ വടക്കഞ്ചേരി ടൗണിൽ അലഞ്ഞുനടക്കുമ്പോഴും നായ്പിടുത്തം കാര്യക്ഷമമാകുന്നില്ലെന്ന് പരാതി. കൂട്ടങ്ങളായാണ് ടൗണിലെ ചെറിയ റോഡുകളിലെല്ലാം നായ്ക്കൾ കറങ്ങുന്നത്. പിഞ്ചു കുട്ടികൾ ഉൾപ്പെടെ പഠിക്കുന്ന ടൗണിലെ ചെറുപുഷ്പം സ്കൂൾ കോമ്പൗണ്ടിലും നായ്ക്കൂട്ടങ്ങളുണ്ട്. വന്ധ്യംകരണത്തിനായി നായ്ക്കളെ ഉടൻ പിടികൂടുമെന്നും വാക്സിനേഷൻ നൽകുമെന്നൊക്കെ അധികൃതർ പറയുന്നുണ്ടെങ്കിലും ടൗണിലെ തെരുവുനായ്ക്കൾക്ക് ഇപ്പോഴും കുറവ് വന്നിട്ടില്ല. രണ്ടുദിവസമായി ടൗണിൽ നായ്പിടുത്തം നടക്കുമ്പോഴാണ് ഈ സ്ഥിതി. ഇന്നലെ ഉച്ചയ്ക്ക് ടൗണിൽ റോളക്സ് ഓഡിറ്റോറിയത്തിനോട് ചേർന്നുള്ള കറ്റുകോട്ടേക്കുള്ള വീതികുറഞ്ഞ റോഡിൽ ഒരു ഡസൻ വരുന്ന നായ്ക്കളുടെ കൂട്ടമാണ് അലഞ്ഞുനടന്നിരുന്നത്. നായ്ക്കൂട്ടത്തിന്‍റെ മുന്നിൽപ്പെട്ട സാമൂഹ്യപ്രവർത്തകനായ ഗഫൂർ മുടപ്പല്ലൂർ രക്ഷപ്പെട്ടത് ഭാഗ്യംകൊണ്ട് മാത്രം. സ്കൂട്ടറോടിച്ച് പോയിരുന്ന ഗഫൂറിനു നേരെ നായ്ക്കൾ കുരച്ച് പാഞ്ഞെത്തി. അപ്രതീക്ഷിതമായ ആക്രമണം കണ്ട് യുവാവും പകച്ചു. ധൈര്യംവിടാതെ വാഹനത്തിന്‍റെ വേഗത കൂട്ടിപോയതിനാൽ രക്ഷപ്പെടുകയായിരുന്നെന്ന് ഗഫൂർ പറഞ്ഞു. നായ്ക്കളുടെ വരവുകണ്ട് വഴിയിലൂടെ നടന്നു വന്നിരുന്നവർ സമീപത്തെ വീടുകളിൽകയറി സുരക്ഷ ഉറപ്പാക്കുകയായിരുന്നു. സ്കൂൾ സമയങ്ങളിലും മറ്റും ചെറിയ കുട്ടികൾ നടന്നുപോകുന്ന വഴികളിലാണ് നായ്പടകളുടെ ഈ കറക്കം. കഴിഞ്ഞദിവസമാണ് നാല് വയസുകാരൻ ഉൾപ്പെടെ ടൗണിൽ നിരവധി പേർക്ക് പേവിഷബാധയേറ്റ നായയുടെ കടിയേറ്റത്. ഇതേതുടർന്ന് ആരോഗ്യവകുപ്പും വെറ്ററിനറി വകുപ്പും പഞ്ചായത്തുമെല്ലാം ജാഗ്രതാനിർദേശം നൽകി നായ്ക്കളെ പിടികൂടാൻ നടപടി സ്വീകരിക്കുമെന്ന് പറഞ്ഞത്. എന്നാൽ ഉറപ്പുകളൊന്നും ഫലപ്രദമാകുന്നില്ലെന്ന് പരാതിയാണ് ഉയരുന്നത്. പേവിഷബാധയേറ്റ നായ മറ്റു നായ്ക്കളുമായി കടികൂടിയിട്ടുള്ളതിനാൽ കൂടുതൽ തെരുവ്നായ്ക്കൾക്ക് പേബാധക്ക് സാധ്യതയുണ്ടെന്നാണ് ചൂണ്ടിക്കാട്ടുന്നത്.

കന്യാസ്ത്രീകളുടെ അറസ്റ്റ്: പ്രതിഷേധം പടരുന്നു

പാലക്കാട് ബ്ലോക്ക് കോൺഗ്രസ് കമ്മിറ്റി പാലക്കാട്: ചത്തീസ്ഗഡിൽ മലയാളി കന്യാസ്ത്രീകളെ അകാരണമായി ജയിലിൽ അടച്ചതിൽ പ്രതിഷേധിച്ച് കന്യാസ്ത്രീകൾക്ക് ഉടൻ ജാമ്യം നൽകി നീതി നടപ്പാക്കണമെന്ന് ആവശ്യപ്പെട്ട് പാലക്കാട് ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ പ്രതിഷേധപ്രകടനം നടത്തി. ഡിസിസി ഓഫീസിൽ നിന്നും സ്റ്റേഡിയം ബസ് സ്റ്റാൻഡ് പരിസരത്തിലേക്ക് നടത്തിയ പ്രതിഷേധപ്രകടനം രാഹുൽ മാങ്കൂട്ടത്തിൽ എംഎൽഎ ഉദ്ഘാടനം ചെയ്തു. ബ്ലോക്ക് കോൺഗ്രസ് പ്രസിഡന്‍റ് സി.വി. സതീഷ് അധ്യക്ഷത വഹിച്ചു. യുഡിഎഫ് നിയോജക മണ്ഡലം ചെയർമാൻ സുധാകരൻ പ്ലാക്കാട്ട്, മൈനോറിറ്റി ഡിപ്പാർട്ട്മെന്‍റ് സംസ്ഥാന ജനറൽസെക്രട്ടറി പി.എച്ച്. മുസ്തഫ, ഡിസിസി അംഗം സി. കിദർ മുഹമ്മദ്, നേതാക്കളായ കെ. ഭവദാസ്, ഹരിദാസ് മച്ചിങ്ങൽ, എസ്. രവീന്ദ്രൻ, മഹിള കോൺഗ്രസ് ബ്ലോക്ക് പ്രസിഡന്‍റ് ബി. ഗൗതമി, മണ്ഡലം പ്രസിഡന്‍റുമാരായ എസ്. സേവ്യർ, രമേശ് പുത്തൂർ, എസ്‌.എം. താഹ, അനിൽ ബാലൻ, ഭാരവാഹികളായ ജവഹർരാജ്, കെ.ആർ. ശരരാജ്, ഫ്രിന്‍റോ ഫ്രാൻസിസ്, എ.കെ. റോബിൻ, എസ്. കുപ്പേലൻ, അബു പാലക്കാടൻ, പി.ഗോപി, വി. ആറുമുഖൻ, എം. പ്രശോഭ്, എസ്. ശെൽവൻ, വി. കുട്ടൻ, എച്ച്. സത്താർ, കെ. അനീഷ്, ഉമ്മർ ഫറുഖ്, എം.കെ. സിദ്ധാർഥൻ, വി. മോഹൻ, നൗഫൽ കള്ളിക്കാട്, പ്രതിഭ, കൗൺസിലർമാരായ എഫ്.ബി. ബഷീർ, ഡി. ഷജിത്ത് കുമാർ, മിനി ബാബു, അനുപമ, ഷൈലജ, എന്നിവർ പങ്കെടുത്തു. കേരള കോൺഗ്രസ് -എം പാലക്കാട്: കേരള കോണ്‍ഗ്രസ്-എം പ്രവർത്തകർ പാലക്കാട് നഗരത്തിൽ പ്രകടനവും പ്രതിഷേധയോഗവും നടത്തി. പ്രകടനത്തിന് സംസ്ഥാന ഓഫീസ് ചാർജ് ജനറൽസെക്രട്ടറി ഡോ. സ്റ്റീഫൻ ജോർജ്, ജില്ലാ പ്രസിഡന്‍റ് അഡ്വ.കെ. കുശലകുമാർ എന്നിവർ നേതൃത്വം നൽകി. പ്രതിഷേധ ജാഥ ഡോ. സ്റ്റീഫൻ ജോർജ് ഉദ്ഘാടനം ചെയ്തു. അഡ്വ.കെ. കുശലകുമാർ അധ്യക്ഷത വഹിച്ചു. ഹൈപവർ കമ്മിറ്റി അംഗം സെബാസ്റ്റ്യൻ ചൂണ്ടൽ, സ്റ്റിയറിംഗ് കമ്മിറ്റിയംഗം കെ.എം. വർഗീസ്, സെക്രട്ടറിയേറ്റ് മെംബർ ബേബി പാണുച്ചിറ, ജില്ലാ ഓഫീസ് ചാർജ് ജനറൽ സെക്രട്ടറി തോമസ് ജോണ്‍ കാരുവള്ളി, ജില്ലാ വൈസ് പ്രസിഡന്‍റ് അലക്സ് തോമസ്, ജോസ് വി. ജോർജ് വടക്കേക്കര, കെ.ബി. ഉണ്ണികൃഷ്ണൻ, കെ. സതീഷ്, റെനി രാജ്, ലില്ലി മാത്യു, മത്തായി ഐക്കര, ഖജാൻജി മധുദണ്ഡപാണി, പ്രേമ കൃഷ്ണകുമാർ, ആർ.സുരേഷ്, എൽ. കൃഷ്ണ മോഹനൻ, കെ. ഗോപി, സാജൻ ധോണി, രാമചന്ദ്രൻ കല്ലേപ്പുള്ളി, അഡ്വ. ജയപ്രകാശ്, സുന്ദരൻ കാക്കത്തറ, രാമചന്ദ്രൻ എലപ്പുള്ളി പ്രസംഗിച്ചു. പുരോഗമന കലാസാഹിത്യ സംഘം മണ്ണാർക്കാട്: ഛത്തീസ്ഗഡിൽ കന്യാസ്ത്രീകളെ അറസ്റ്റ് ചെയ്ത് ജയിലിലടച്ച നടപടിക്കെതിരെ പുരോഗമന കലാസാഹിത്യസംഘം പ്രതിഷേധകൂട്ടായ്മ സംഘടിപ്പിച്ചു. ന്യൂനപക്ഷങ്ങൾക്കും മതേതര നിലപാടുകൾക്കും എതിരെയുള്ള സംഘപരിവാർ കടന്നാക്രമണങ്ങളുടെ തുടർച്ചയാണിത്. രാജ്യത്തിന്‍റെ വിവിധ ഭാഗങ്ങളിൽ ബജ് രംഗ്ദൾപോലുള്ള സംഘടനകൾ നിയമം കയ്യിലെടുക്കുന്നത് അത്യന്തം ഗുരുതരമായ നീതിനിഷേധമാണ്. കന്യാസ്ത്രീകളെ ഒട്ടും വൈകാതെ മോചിപ്പിക്കാൻ അധികാരികൾ തയ്യാറാകണമെന്ന് കൂട്ടായ്മ ആവശ്യപ്പെട്ടു. ജിഎംയുപി സ്കൂളിനു സമീപം നടന്ന പരിപാടി സംസ്ഥാന സെക്രട്ടറി ജി.പി. രാമചന്ദ്രൻ ഉദ്ഘാടനം ചെയ്തു. ഏരിയാ പ്രസിഡന്‍റ് ടി.കെ. സുനിൽ അധ്യക്ഷനായി. ജില്ലാ പ്രസിഡന്‍റ് ഡോ.സി.പി. ചിത്രഭാനു, സെക്രട്ടറി ആർ. ശാന്തപ്പൻ, എം.ജെ. ശ്രീചിത്രൻ, പി. അപ്പുകുട്ടൻ, കെ. ചന്ദ്രൻ, കെ. സന്തോഷ് പ്രസംഗിച്ചു.

സ്വകാര്യസ്ഥാപനം ജപ്തിചെയ്ത വീട് ഡിവൈഎഫ്ഐ പ്രവർത്തകർ പൂട്ടുതകർത്ത് തുറന്നുകൊടുത്തു

നെന്മാറ: സ്വകാര്യ ധനകാര്യ സ്ഥാപനം വീട് ജപ്തിചെയത് സീൽ ചെയ്ത പൂട്ടിയ വീട് ഡിവൈഎഫ്ഐ പ്രവർത്തകർ പൂട്ട് തകർത്ത് വീട്ടുകാരെ വീട്ടിൽ കയറ്റിയിരുത്തി. അയിലൂർ കരിങ്കുളം സതീഷ്-സജിതകുമാരി ദമ്പതികളുടെ വീട് വ്യാഴാഴ്ചയാണ് ജപ്തിചെയ്തത്. വീട്ടുകാർ ജോലിക്കു പോയപ്പോഴാണ് സ്വകാര്യ ധനകാര്യസ്ഥാപന ജീവനക്കാർ ജപ്തി ചെയ്തത്. ഒമ്പതാം ക്ലാസിലും ഏഴാം ക്ലാസിലും പഠിക്കുന്ന കുട്ടികൾ സ്കൂളിൽനിന്ന് വന്നപ്പോൾ വീട് അടച്ചിട്ടതുകണ്ട് പുറത്തുനിൽക്കുമ്പോഴാണ് കുട്ടികൾ പഠിക്കുന്ന സ്കൂളിലെ അധ്യാപകരും പിടിഎ ഭാരവാഹികളും ഡിവൈഎഫ്ഐ പ്രവർത്തകരെ വിവരമറിയിച്ചത്. വിവരമറിഞ്ഞ് എത്തിയ പ്രവർത്തകരുടെ നേതൃത്വത്തിൽ വീടിന്‍റെ പൂട്ട് തകർത്ത് കുടുംബത്തെ വീടിനകത്തു കയറ്റി. ഡിവൈഎഫ്ഐ ബ്ലോക്ക് ട്രഷറർ ആർ. രാഹുൽ, ലോക്കൽ കമ്മിറ്റി അംഗം സുരേഷ് തളിപ്പാടം, ഡിവൈഎഫ്ഐ മേഖലാ പ്രസിഡന്‍റ് എ. റഫീഖ്, മേഖല എക്സിക്യൂട്ടീവ് അംഗം ശരത് മാങ്കുശി എന്നിവരാണ് കുടുംബക്കാരെ വീടിനകത്ത് കയറ്റിയത്. സമീപത്തുള്ള കുട്ടികളുടെ മുത്തശിയെയും വിളിച്ചുവരുത്തിയാണ് വീട്ടിൽ വിദ്യാർഥികളെ താമസിപ്പിച്ചത്. വിദ്യാർഥികളെ ഉൾപ്പെടെ വീട്ടിനു പുറത്താക്കി ഗൃഹനാഥൻപോലും സ്ഥലത്തില്ലാത്ത സമയത്ത് യാതൊരു മുന്നറിയിപ്പുമില്ലാതെ വീട് പൂട്ടിയതിനെതിരേ ഡിവൈഎഫ്ഐ നടപടി ആവശ്യപ്പെട്ടു. വായ്പാ കുടിശിക അടയ്ക്കാൻ സാവകാശം നൽകണമെന്നാവശ്യപ്പെട്ട ഡിവൈഎഫ്ഐ വീട്ടുകാരില്ലാത്ത സമയത്ത് വിദ്യാർഥികളെ സുരക്ഷ പോലും പരിഗണിക്കാതെ വീടിനു പുറത്താക്കിയ നടപടിയിൽ പ്രതിഷേധം രേഖപ്പെടുത്തി.

വൈദ്യുതിഭവനു മുന്നിൽ തൊഴിലാളികളുടെ പ്രതിഷേധം

പാലക്കാട്: ജനങ്ങളുടെ കണ്ണിൽ പൊടിയിടാൻ ജീവനക്കാരെ ബലിയാടാകരുതെന്ന് കേരള ഇലക്ട്രിസിറ്റി എംപ്ലോയീസ് കോൺഫെഡറേഷൻ ഐഎൻടിയുസി സംസ്ഥാന ജനറൽ സെക്രട്ടറി ഷമീം നാട്യമംഗലം ആവശ്യപ്പെട്ടു. കൊല്ലം തേവലക്കരയിൽ നടന്ന വൈദ്യുതി അപകടവുമായി ബന്ധപ്പെട്ട് ജീവനക്കാരനെ പക്ഷപാതപരമായി സസ്പെൻഡ് ചെയ്തതിനെതിരെ കേരള ഇലക്ട്രിസിറ്റി എംപ്ലോയീസ് കോൺഫെഡറേഷൻ ജില്ലാ കമ്മിറ്റി നടത്തിയ പ്രതിഷേധയോഗം ഉദ്ഘാടനം ചെയ്യുകയായിരുന്നു അദ്ദേഹം. എസ്. മണികണ്ഠന്‍റെ അധ്യക്ഷതയിൽ പാലക്കാട് വൈദ്യുതി ഭവന് മുന്നിൽനടന്ന പ്രതിഷേധയോഗത്തിൽ ജില്ലാ സെക്രട്ടറി എം. ഗോപകുമാർ, നേതാക്കളായ കെ. കാജാ, പി.സി. പ്രീദത്ത്, കെ. ഹരിദാസൻ, പി. ഉണ്ണികൃഷ്ണൻ, എൻ. അഭിലാഷ് എന്നിവർ പ്രസംഗിച്ചു.

നെല്ലിയാമ്പതിയിൽ ക്ലോറിനേഷൻ നടത്തി

നെല്ലിയാമ്പതി: മലയോര മേഖലയായ നെല്ലിയാമ്പതിയിൽ ജില്ലാ മെഡിക്കൽഓഫീസറുടെ പ്രത്യേക നിർദേശ പ്രകാരവും മഴക്കാലരോഗ പ്രതിരോധപ്രവർത്തനത്തിന്‍റെ ഭാഗമായും മുഴുവൻ കുടിവെള്ള സ്രോതസുകളും ക്ലോറിനേഷൻ നടത്തി. നെല്ലിയാമ്പതി ഹെൽത്ത്‌ ഇൻസ്‌പെക്ടർ ജെ. ആരോഗ്യം ജോയ്സനിന്‍റെ നേതൃത്വത്തിലാണ് ക്ലോറിനേഷൻ ഡ്രൈവ് നടത്തിയത്. നെല്ലിയാമ്പതിയിലെ പാടഗിരി, തൊട്ടേക്കാട്, രാജാക്കാട്, പുല്ലാല, ഓറിയന്‍റൽ, ലില്ലി, നൂറടി, പോത്തുപാറ, മീരഫ്ലോറ, കൂനംപാലം, ഏലം സ്റ്റോർ, തേനിപാടി, കൈകാട്ടി, ഓറഞ്ച് ഫാം, പുലയംപാറ, ഊത്തുക്കുഴി, സീതാർകുണ്ട്, കോട്ടയങ്ങാട്, ചന്ദ്രാമല എന്നീ പ്രദേശങ്ങളിലെ കുടിവെള്ള സ്രോതസുകളിൽ ജൂണിയർ ഹെൽത്ത്‌ ഇൻസ്‌പെക്ടർമാരായ ബി. അഫ്സൽ, എസ്. ശരൺറാം, വോളന്‍റിയർമാരായ മണികണ്ഠൻ പുല്ലുകാട്, പ്രതീപ് രാജാക്കാട് എന്നിവർ ചേർന്നാണ് ക്ലോറിനേഷൻ നടത്തിയത്.

വ്യക്തിത്വ വികസന പാസ്‌വേഡ് ക്യാമ്പ് നടത്തി

നെന്മാറ: സംസ്ഥാന ന്യൂനപക്ഷ വകുപ്പിന്‍റെ ആഭിമുഖ്യത്തിൽ ഹയർ സെക്കൻഡറി വിദ്യാർഥികൾക്കായുള്ള സൗജന്യ ഏകദിന വ്യക്തിത്വ വികസന കരിയർ ഗൈഡൻസ് പരിശീലന പാസ്‌വേർഡ് (ട്യൂണിംഗ്) ക്യാമ്പ് നെന്മാറ ബോയ്സ് ഹയർ സെക്കൻഡറി സ്കൂളിൽ സംഘടിപ്പിച്ചു. നെന്മാറ ബ്ലോക്ക് പഞ്ചായത്ത് വൈസ് പ്രസിഡന്‍റ് ശ്രീജ രാജീവ് ഉദ്ഘാടനം ചെയ്തു. പിടിഎ പ്രസിഡന്‍റ് സുരേഷ് അനന്തരാമൻ അധ്യക്ഷത വഹിച്ചു. ന്യൂനപക്ഷ യുവജന പരിശീലനം കേന്ദ്രം പ്രിൻസിപ്പൽ ഡോ.കെ. വാസുദേവൻപിള്ള മുഖ്യപ്രഭാഷണം നടത്തി. എംപിടിഎ പ്രസിഡന്‍റ് റജീന ഷെരീഫ്, അധ്യാപകൻ കെ. മുരളീധരൻ, ട്രെയിനർമാരായ ബാബു പി. മാത്യു, എസ്. അബ്ദുൾ റഹിമാൻ , പ്രിൻസിപ്പൽ എസ്. ജ്യോതി, ക്യാമ്പ് കോ- ഓർഡിനേറ്റർ സുനിതാ റാണി എന്നിവർ പ്രസംഗിച്ചു.

പുതുക്കോട് പഞ്ചായത്ത് പാട്ടോലയിൽ എംസിഎഫ് കെട്ടിടത്തിനു തറക്കല്ലിട്ടു

വടക്കഞ്ചേരി: പുതുക്കോട് ഗ്രാമപഞ്ചായത്തിൽ 2024- 25 വാർഷിക പദ്ധതിയിൽ ഉൾപ്പെടുത്തി പാട്ടോലയിൽ നിർമിക്കുന്ന എംസിഎഫ് (മെറ്റീരിയൽ കളക്്ഷൻ ഫെസിലിറ്റി) കെട്ടിടത്തിന്‍റെ ശിലാസ്ഥാപനം ഗ്രാമപഞ്ചായത്ത് പ്രസിഡന്‍റ് ഹസീന ടീച്ചർ നിർവഹിച്ചു. ജില്ലാ പഞ്ചായത്തിന്‍റെയും ശുചിത്വ മിഷന്‍റെയും സംയുക്ത സഹകരണത്തോടെ 2,284,000 രൂപ വകയിരുത്തിയാണ് കെട്ടിടം യാഥാർഥ്യമാക്കുന്നത്. പരിപാടിയിൽ ഗ്രാമപഞ്ചായത്ത് സെക്രട്ടറി ഷാജി, ഹെൽത്ത് ഇൻസ്പെക്ടർ നിഷ, എഇ ടിന്‍റു, ഓവർസിയർ മനു, വാർഡ് അംഗങ്ങൾ, ഹരിതകർമസോംഗങ്ങൾ എന്നിവർ പങ്കെടുത്തു.

"റെഡ് റണ്‍’ മാരത്തണിൽ മികച്ച പങ്കാളിത്തം

പാലക്കാട്: ജില്ലാതല യൂത്ത് ഫെസ്റ്റിന്‍റെ ഭാഗമായി ജില്ലാ മെഡിക്കൽ ഓഫീസ് (ആരോഗ്യം), ജില്ലാ എയ്ഡ്സ് കണ്‍ട്രോൾ സൊസൈറ്റി, ജില്ലാ നാഷണൽ സർവീസ് സ്കീം എന്നിവയുടെ സംയുക്താഭിമുഖ്യത്തിൽ മലന്പുഴ റോക്ക് ഗാർഡൻ റോഡിൽ റെഡ് റണ്‍ മാരത്തണ്‍ സംഘടിപ്പിച്ചു. മലന്പുഴ ഗ്രാമപഞ്ചായത്ത് പ്രസിഡന്‍റ് രാധിക മാധവൻ മാരത്തണ്‍ ഫ്ലാഗ് ഓഫ് ചെയ്തു. മത്സര വിജയികൾക്ക് വാളയാർ ഫോറസ്റ്റ് റേഞ്ച് ഓഫീസർ ആർ.എസ്. പ്രവീണ്‍ സർട്ടിഫിക്കറ്റുകളും മെഡലുകളും വിതരണം ചെയ്തു. ജില്ലാ എയ്ഡ്സ് കണ്‍ട്രോൾ ഓഫീസർ ഡോ.ബി. റിയാസ്, കേരള എയ്ഡ്സ് കണ്‍ട്രോൾ സൊസൈറ്റി പാലക്കാട് ക്ലസ്റ്റർ പ്രോഗ്രാം മാനേജർ എസ്. സുനിൽകുമാർ, സംസ്ഥാന സ്പോർട്സ് കൗണ്‍സിൽ അംഗം എം. രാമചന്ദ്രൻ, ജില്ലാ എഡ്യുക്കേഷൻ ആൻഡ് മീഡിയ ഓഫീസർ എസ്. സയന്, എൻഎസ്എസ് പ്രോഗ്രാം ഓഫീസർമാരായ കെ. ഷെരീഫ്, വി.എം. അരുണ്‍, ഡോ.എം.ജെ. എൽദോസ്, ഡെപ്യൂട്ടി എഡ്യുക്കേഷൻ ആൻഡ് മീഡിയ ഓഫീസർമാരായ രജീന രാമകൃഷ്ണൻ, പി.പി. രജിത തുടങ്ങിയവർ മാരത്തണിനു നേതൃത്വം നൽകി. പെണ്‍കുട്ടികളുടെ വിഭാഗത്തിൽ പാലക്കാട് മേഴ്സി കോളജിലെ ഐറിൻ തോമസ് ഒന്നാം സ്ഥാനവും ഗവ. വിക്ടോറിയ കോളജിലെ നേഹ കെ. ദാസ് രണ്ടാം സ്ഥാനവും മേഴ്സി കോളജിലെ പി.എം. അനുശ്രീ മൂന്നാംസ്ഥാനവും കരസ്ഥമാക്കി. ആണ്‍കുട്ടികളുടെ വിഭാഗത്തിൽ ഗവ. വിക്ടോറിയ കോളജിലെ എ. അരുണ്‍കുമാർ ഒന്നാം സ്ഥാനവും സി.ആർ. അർജുൻ രണ്ടാം സ്ഥാനവും ധോണി ക്രിസ്റ്റഫർ ഐടിഐയിലെ പി.എസ്. നവനീത് മൂന്നാംസ്ഥാനവും നേടി. ജില്ലാതല വിജയികൾക്ക് 11 ന് തൃശൂരിൽ നടക്കുന്ന സംസ്ഥാനതല യൂത്ത് ഫെസ്റ്റിൽ മത്സരിക്കാനും അവസരം ലഭിക്കും.

തൃത്താല ബ്ലോക്കിൽ വനിതകൾക്കു സൗജന്യ കൗൺസലിംഗിനായി "പെണ്ണിടം' തുറന്നു

തൃത്താല: തൃത്താല ബ്ലോക്ക് പഞ്ചായത്തിൽ വനിതകൾക്ക് സൗജന്യ കൗണ്‍സലിംഗിനായി പെണ്ണിടമൊരുങ്ങി. ബ്ലോക്ക് പഞ്ചായത്ത് ഓഫീസിനോടുചേർന്ന കെട്ടിടത്തിലാണ് പെണ്ണിടം സജ്ജീകരിച്ചിട്ടുള്ളത്. ബ്ലോക്ക് പഞ്ചായത്തിന്‍റെ 2024- 25 വാർഷിക പദ്ധതിയിൽ ഉൾപ്പെടുത്തി അഞ്ചുലക്ഷം രൂപയോളം വിനിയോഗിച്ചാണ് ആദ്യത്തെ കൗണ്‍സിലിംഗ് കേന്ദ്രം യാഥാർഥ്യമാക്കിയത്. സ്ത്രീകൾ നേരിടുന്ന മാനസിക പിരിമുറുക്കങ്ങൾക്ക് ആശ്വാസം നൽകുന്നതോടൊപ്പം ശാരീരിക മാനസിക ഉല്ലാസം നൽകുകയാണ് പദ്ധതിയിലൂടെ ലക്ഷ്യമിടുന്നത്. ഇതിനായി വനിതകൾക്ക് വായനാമൂലയും ഫിറ്റ്നസ് സൗകര്യവും ഒരുക്കിയിട്ടുണ്ട്. മുലയൂട്ടുന്ന അമ്മമാർക്ക് പ്രത്യേക മുറിയും ഇൻസിനറേറ്റർ എന്നിവയും സജ്ജീകരിച്ചിട്ടുണ്ട്. വനിതാ സൗഹൃദ കേന്ദ്രമായ പെണ്ണിടത്തിന്‍റെ ഉദ്ഘാടനം ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ നിർവഹിച്ചു. തൃത്താല ബ്ലോക്ക് പഞ്ചായത്ത് പ്രസിഡന്‍റ് അഡ്വ.വി.പി. റജീന അധ്യക്ഷയായി.വൈസ് പ്രസിഡന്‍റ് പി.ആർ. കുഞ്ഞുണ്ണി, സ്ഥിരംസമിതി അധ്യക്ഷർ, ജില്ലാ പഞ്ചായത്ത് അംഗങ്ങളായ ഷാനിബ ടീച്ചർ, അനു വിനോദ് എന്നിവർ പ്രസംഗിച്ചു.

ലഹരിവിരുദ്ധ പ്രവര്‍ത്തനങ്ങളില്‍ വിദ്യാര്‍ഥികള്‍ അണിചേരണമെന്ന് എം.എം. ഹസന്‍

വടക്കഞ്ചേരി: ലഹരിവിരുദ്ധ പ്രവര്‍ത്തനങ്ങളില്‍ വിദ്യാര്‍ഥികള്‍ അണിചേരണമെന്നും സമൂഹത്തെയാകെ കാര്‍ന്നുതിന്നുകൊണ്ടിരിക്കുന്ന ലഹരിക്കെതിരേ കുട്ടികളും മുതിര്‍ന്നവരും ഒറ്റക്കെട്ടായി പോരാടണമെന്നും കെപിസിസി മുന്‍ പ്രസിഡന്‍റ് എം.എം. ഹസന്‍. വിദ്യാര്‍ഥികളിലും യുവാക്കളിലും വര്‍ധിച്ചുവരുന്ന ലഹരി ഉപയോഗത്തിന്‍റെ വ്യാപനത്തിനെതിരേ ശക്തമായ നടപടി വേണമെന്നാവശ്യപ്പെട്ട് മുഖ്യമന്ത്രിക്ക് ഒരുലക്ഷംപേരുടെ ഒപ്പുശേഖരണം നടത്തുന്നതിന്‍റെ ഭാഗമായി ഗാന്ധിദര്‍ശന്‍ സമിതി ജില്ലാ കമ്മിറ്റി വള്ളിയോട് ശ്രീനാരായണ പബ്ലിക് സ്കൂളില്‍ സംഘടിപ്പിച്ച ലഹരിവിരുദ്ധ സിഗ്നേച്ചര്‍ കാമ്പയിന്‍ ഉദ്ഘാടനം ചെയ്യുകയായിരുന്നു അദേഹം. ജില്ലാ പ്രസിഡന്‍റ് എം. ഷാജു അധ്യക്ഷത വഹിച്ചു. സംസ്ഥാന പ്രസിഡന്‍റും മുൻ മന്ത്രിയുമായ വി.സി. കബീര്‍മാസ്റ്റർ, സംസ്ഥാന ജനറല്‍ സെക്രട്ടറി ബൈജു വടക്കുംപുറം, പ്രിന്‍സിപ്പൽ കെ. മായ, അഡ്വ.വി. വിജയന്‍, രാജന്‍ മുണ്ടൂര്‍, എന്‍. അശോകന്‍, എം. മുരളീധരന്‍, വി. ഉണ്ണികൃഷ്ണന്‍മാസ്റ്റർ, ഗോകുല്‍ദാസ് പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]