പെരുമാട്ടിയിൽ വിളവെടുപ്പിനൊരുങ്ങി ചെണ്ടുമല്ലിപ്പാടങ്ങൾ
1586985
Wednesday, August 27, 2025 1:28 AM IST
വണ്ടിത്താവളം: ഓണവിപണിയിൽ വർണം വിതറാൻ പെരുമാട്ടിയിലെ ചെണ്ടുമല്ലി പാടങ്ങൾ. അത്തപ്പൂക്കളം ഒരുക്കാൻ പെരുമാട്ടിയിലെ ചെണ്ടുമല്ലി പാടങ്ങൾ ഒരുങ്ങി. പെരുമാട്ടി കൃഷിഭവൻ പരിധിയിലായി ഇത്തവണ ജനകീയ ആസൂത്രണപദ്ധതിയിലൂടെ കർഷകർക്ക് 75 ശതമാനം സബ്സിഡി നിരക്കിൽ 31,000 ചെണ്ടുമല്ലിത്തൈകൾ വിതരണം ചെയ്തിരുന്നു.
ഓണവിപണിയെ ലക്ഷ്യമാക്കി കർഷകർ വളരെ ശാസ്ത്രീയമായി തന്നെ കൃഷി ഇറക്കുകയും കൃത്യസമയത്ത് വിളവെടുക്കാൻ കഴിയുകയും ചെയ്തു. ഇനിയുള്ള ഓണദിവസങ്ങളിൽ പെരുമാട്ടിയിലെ ചെണ്ടുമല്ലി പൂക്കൾ വിപണിയിൽ എത്തും. കൃഷിഭവനിൽ നിന്നും ഹൈബ്രിഡ് ഇനങ്ങൾ ആയ മഞ്ഞ, ഓറഞ്ച് എന്നീ നിറങ്ങലുള്ള ചെണ്ടുമല്ലി തൈകളാണ് വിതരണം ചെയ്തിരുന്നത്.
2021-22 സാമ്പത്തിക വർഷം മുതൽ എല്ലാ സീസണിലും കൃഷിഭവൻതലത്തിൽ ഗ്രാമപഞ്ചായത്തിന്റെ ജനകീയാസൂത്രണം പദ്ധതിയിൽ ഉൾപ്പെടുത്തി ചെണ്ടുമല്ലി തൈകൾ വിതരണം ചെയ്തുവരുന്നു. ഇത് മറ്റ് വനിതാ കർഷകരെയും വിദ്യാർഥി കർഷകരെയും കൂടി പൂകൃഷിയിലേക്ക് കൊണ്ടുവരാൻ വഴിയൊരുക്കി.