ഓണച്ചന്തകള്‍ക്കായി 100 കോടി അനുവദിച്ചു: മന്ത്രി ശശീന്ദ്രന്‍
1586970
Wednesday, August 27, 2025 1:05 AM IST
കാഞ്ഞങ്ങാട്: വിലക്കയറ്റവും അവശ്യവസ്തുക്കളുടെ ക്ഷാമവും ഈ ഓണക്കാലത്ത് ജനങ്ങളെ അലട്ടില്ലെന്നും എല്ലാവര്‍ക്കും സബ്സിഡി നിരക്കില്‍ ആവശ്യവസ്തുക്കള്‍ ലഭ്യമാക്കുമെന്നും മന്ത്രി എ.കെ. ശശീന്ദ്രന്‍. ജില്ലാ സപ്ലൈകോ ഓണം ഫെയര്‍ കാഞ്ഞങ്ങാട്ട് ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം.
ഓണക്കാലത്ത് കൃത്രിമ ക്ഷാമം മൂലം ജനങ്ങളെ കൊള്ളയടിക്കപ്പെടുന്നതു തടയുന്നതിനായി 100 കോടി രൂപ സര്‍ക്കാര്‍ സിവില്‍ സപ്ലൈസ് കോര്‍പറേഷനു അനുവദിച്ചു. വെളിച്ചെണ്ണയുടെ വിലവര്‍ധന ജനങ്ങളെ ആശങ്കപ്പെടുത്തിയിരുന്നുവെങ്കിലും സര്‍ക്കാരിന്‍റെ ഇടപെടലിലൂടെ സിവില്‍ സപ്ലൈസ് കോര്‍പറേഷന്‍ കുറഞ്ഞ നിരക്കില്‍ ശുദ്ധമായ വെളിച്ചെണ്ണ വിതരണം ചെയ്യാന്‍ സാധിച്ചു. ഗുണമേന്മയുള്ള ഭക്ഷ്യവസ്തുക്കള്‍ ന്യായവിലക്ക് ജനങ്ങള്‍ക്ക് ലഭ്യമാക്കാന്‍ സപ്ലൈസ് കോര്‍പറേഷനു കഴിഞ്ഞിട്ടുണ്ടെന്നും മന്ത്രി കൂട്ടിച്ചേര്‍ത്തു.
കാഞ്ഞങ്ങാട് വൈറ്റ് ലൈന്‍ കോംപ്ലക്സിനോട് ചേര്‍ന്നാണ് ഓണച്ചന്ത നടക്കുക. സപ്ലൈകോ സബ്സിഡി-നോണ്‍സബ്സിഡി ഉത്പന്നങ്ങള്‍ക്കു പുറമെ കൈത്തറി, കുടുംബശ്രീ, മില്‍മ ഉത്പന്നങ്ങളും പച്ചക്കറിയും പ്രത്യേക സ്റ്റാളുകളില്‍ ലഭ്യമാവും. ഓണക്കാലത്ത് നിലവില്‍ നല്കിവരുന്ന എട്ടുകിലോ സബ്സിഡി അരിയ്ക്കു പുറമെ കാര്‍ഡൊന്നിന് 20 കിലോ പച്ചരിയോ, പുഴുക്കലരിയോ 25 രൂപ നിരക്കില്‍ സ്പെഷല്‍ അരിയായി ലഭ്യമാക്കും. സബ്സിഡി നിരക്കില്‍ നല്‍കുന്ന മുളകിന്‍റെ അളവ് അരക്കിലോയില്‍ നിന്നും ഒരു കിലോയായി വര്‍ധിപ്പിക്കുകയും ചെയ്തിട്ടുണ്ട്. സെപ്റ്റംബര്‍ നാലു വരെയാണ് ജില്ലാ ഫെയര്‍ സംഘടിപ്പിക്കുക.
ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍ അധ്യക്ഷത വഹിച്ചു. സപ്ലൈകോ കോഴിക്കോട് മേഖലാ മാനേജര്‍ ഷെല്‍ജി ജോര്‍ജ്, നഗരസഭ ചെയര്പേഴ്സണ് കെ.വി. സുജാത, ജില്ലാ സപ്ലൈ ഓഫീസര്‍ കെ.എന്‍.ബിന്ദു. ബ്ലോക്ക് പവൈസ് പ്രസിഡന്‍റ് കെ.വി. ശ്രീലത, പി.കെ. നിഷാന്ത്, പി.വി. സുരേഷ്, ബങ്കളം കുഞ്ഞികൃഷ്ണന്‍, ബഷീര്‍ വെള്ളിക്കോത്ത്, കുര്യാക്കോസ് പ്ലാപ്പറമ്പില്‍, വി. വെങ്കിടേഷ്, കെ.വി. രാമചന്ദ്രന്‍, ഉദിനൂര്‍ സുകുമാരന്‍, കെ.സി. മുഹമ്മദ്കുഞ്ഞി, പ്രമോദ് കരുവളം, പി.ടി. നന്ദകുമാര്‍ എന്നിവര്‍ പ്രസംഗിച്ചു.