ADVERTISEMENT

ADVERTISEMENT

ലോക തപാൽ ദിനാചരണം

കോന്നി: ലോക തപാൽ ദിനാചരണത്തിന്‍റെ ഭാഗമായി കോന്നി പബ്ലിക്ക് ലൈബ്രറിയുടെ നേതൃത്വത്തിൽ കോന്നി തപാൽ ഓഫീസിലെ ജീവനക്കാരനായ കെ ആർ ഷൈലേന്ദ്രനെപുസ്തകം നൽകി ആദരിച്ചു.

ലൈബ്രറി പ്രസിഡന്‍റ് സലിൽ വയലാത്തലയുടെ അദ്ധ്യക്ഷതയിൽ കൂടിയ യോഗത്തിൽ പോസ്റ്റ് മാസ്റ്റർ ആഷ്ലി മേരി വർഗീസ്, എൻ.എസ്. മുരളിമോഹൻ, എസ്. കൃഷ്ണകുമാർ, അഞ്ജു എസ്.പിള്ള, മേഘമിഥുൻ, അമിത് വീണ, ഗിരീഷ്ശ്രീനിലയം, ശശിധരൻനായർ എന്നിവർ പ്രസംഗിച്ചു.

ADVERTISEMENT

തദ്ദേശ തെരഞ്ഞെടുപ്പ്: സംവരണ വാര്‍ഡുകളുടെ നറുക്കെടുപ്പ് 13 മുതല്‍

പത്തനംതിട്ട:തദ്ദേശ സ്വയംഭരണ സ്ഥാപനങ്ങളിലേക്കുള്ള പൊതു തെരഞ്ഞെടുപ്പിന് മുന്നോടിയായി സംവരണ മണ്ഡലങ്ങള്‍ നിശ്ചയിക്കുന്നതിനുള്ള നറുക്കെടുപ്പ് ഒക്‌ടോബര്‍ 13, 14, 15, 18, 21 തീയിതികളില്‍ കളക്‌ടറേറ്റ് കോണ്‍ഫറന്‍സ് ഹാളില്‍ നടക്കും. 13 ന് രാവിലെ 10 മുതല്‍ മല്ലപ്പള്ളി ബ്ലോക്ക് പഞ്ചായത്തിലെ ഗ്രാമപഞ്ചായത്തുകളിലെയും ഉച്ചയ്ക്ക് രണ്ടു മുതല്‍ കോന്നി ബ്ലോക്ക് പഞ്ചായത്തിലെ ഗ്രാമപഞ്ചായത്തുകളിലെയും നറുക്കെടുപ്പ് നടക്കും. 14 ന് രാവിലെ 10 മുതല്‍ കോയിപ്രം ബ്ലോക്ക് പഞ്ചായത്തിലെ ഗ്രാമപഞ്ചായത്തുകളിലെയും 11 മുതല്‍ പുളിക്കീഴ് ബ്ലോക്ക് പഞ്ചായത്തിലെ ഗ്രാമപഞ്ചായത്തുകളിലെയും രണ്ട് മുതല്‍ റാന്നി ബ്ലോക്ക് പഞ്ചായത്തിലെ ഗ്രാമപഞ്ചായത്തുകളിലെയും നറുക്കെടുപ്പ് നടക്കും. 15 ന് രാവിലെ 10 മുതല്‍ ഇലന്തൂര്‍ ബ്ലോക്ക് പഞ്ചായത്തിലെ ഗ്രാമപഞ്ചായത്തുകളിലെയും 11 മുതല്‍ പന്തളം ബ്ലോക്ക് പഞ്ചായത്തിലെ ഗ്രാമപഞ്ചായത്തുകളിലെയും രണ്ട് മുതല്‍ പറക്കോട് ബ്ലോക്ക് പഞ്ചായത്തിലെ ഗ്രാമപഞ്ചായത്തുകളിലെയും നറുക്കെടുപ്പ് നടക്കും. 18 ന് രാവിലെ 10 മുതല്‍ ജില്ലയിലെ ബ്ലോക്ക് പഞ്ചായത്തുകളിലെ സംവരണ വാര്‍ഡുകളുടെ നറുക്കെടുപ്പും 21 ന് രാവിലെ 10 മുതല്‍ ജില്ലാ പഞ്ചായത്ത് സംവരണ വാര്‍ഡുകളുടെയും നറുക്കെടുപ്പ് നടക്കും. രാഷ്‌ട്രീയ പാര്‍ട്ടികളുടെ രണ്ട് പ്രതിനിധികള്‍ക്ക് നറുക്കെടുപ്പ് നടപടിക്രമം വീക്ഷിക്കാന്‍ അവസരമുണ്ടെന്ന് ജില്ലാ കലക്ടര്‍ എസ്. പ്രേം കൃഷ്ണന്‍ അറിയിച്ചു.

റവ ഡോ. നിരപ്പേൽ ബിസിനസ് ഐക്കൺ ഓഫ് ദ ഇയർ പുരസ്കാരങ്ങൾ ഇന്ന് നൽകും

റാന്നി: പെരുവന്താനം സെന്‍റ് ആന്‍റണീസ് കോളേജും, റവ.ഡോ. നിരപ്പേൽ ഫൗണ്ടേഷനും സംയുക്തമായി ഏർപ്പെടുത്തിയിരിക്കുന്ന ഈ വർഷത്തെ റവ.ഡോ. നിരപ്പേൽ ബിസിനസ് ഐക്കൺ ഓഫ് ദ ഇയർ പുരസ്കാരങ്ങൾഇന്ന് ഉച്ചകഴിഞ്ഞ് മൂന്നിന് റാന്നി മാർത്തോമ കൺവെൻഷൻ സെന്‍ററിൽ നടക്കുന്ന മെഗാ എഡ്യു കാർണിവൽ സമ്മേളനത്തിൽ കോളേജ് ചെയർമാൻ ബെന്നി തോമസ് പുരസ്കാരം നൽകുന്നു. 2024-2025 കാലഘട്ടത്തിൽ സാമൂഹിക പ്രതിബദ്ധതയിൽ ഊന്നിയ പ്രവർത്തനങ്ങൾ പരിഗണിച്ചാണ് ഈ അവാർഡ് നൽകുന്നതെന്ന് അധികൃതർ അറിയിച്ചു. സമ്മേളനത്തിൽ രാജു ഏബ്രഹാം, ചലച്ചിത്രതാരം ഡയാന ഹമീദ്, പ്രജ്ഞാനാനന്ദ തീർത്ഥ പാദസ്വാമികൾ, റാന്നി പഴവങ്ങാടി ഗ്രാമപഞ്ചായത്ത് പ്രസിഡന്‍റ് റൂബി കോശി, മഹാത്മാഗാന്ധി യൂണിവേഴ്സിറ്റി സിൻഡിക്കേറ്റ് മെംബർ അഡ്വ.പി.ബി സതീഷ് കുമാർ, അജയ് ഹാച്ചറീസ് സിഇഒ പി.വി ജയന്‍, പിറ്റിഎ പ്രസിഡന്‍റ് ജോര്‍ജ് കൂരമറ്റം, കൺവീനർമാരായ ജോസ് ആന്‍റണി, റ്റിജോ മോൻ ജേക്കബ്‌, സുപർണ്ണ രാജു, രതീഷ് പി.ആർ, ജസ്റ്റിൻ ജോസ്, അഞ്ജലി ആര്‍.നായര്‍, ഷാന്‍റിമോള്‍ എസ്, കിഷോർ ബേബി, ജിനു തോമസ്‌, ക്രിസ്റ്റി ജോസ്, ഡോ. ഷിജിമോള്‍ തോമസ്‌ എന്നിവരും പ്രസംഗിക്കും. ഓക്സിജൻ ഗ്രൂപ്പ് സിഇഒ ഷിജോ കെ തോമസും ഫാ. ആന്‍റണി തോക്കനാട്ടും പുരസ്കാരങ്ങൾക്ക് അർഹരായി. മെഗാ എഡ്യു കാർണിവലിനോടനുബന്ധിച്ച് പത്തനംതിട്ട ജില്ലയിൽ നിന്നും കാഞ്ഞിരപ്പള്ളി വിദ്യാഭ്യാസ ജില്ലയിൽ നിന്നും ഇക്കഴിഞ്ഞ പത്താം ക്ലാസ് പരീക്ഷയിൽ ഫുൾ എ പ്ലസ് നേടിയവരെയും പ്ലസ് വൺ പരീക്ഷയിൽ ഉയർന്ന വിജയം നേടിയ വിദ്യാർഥികളെയും ആദരിക്കും.

മണ്ണീറ വെള്ളച്ചാട്ടം: ആദ്യഘട്ടനിർമാണം പൂർത്തിയാകുന്നു

തണ്ണിത്തോട്: തണ്ണിത്തോട് പഞ്ചായത്തിലെ മണ്ണീറ കേന്ദ്രീകരിച്ച് ദിനംപ്രതി നൂറു കണക്കിന് വിനോദ സഞ്ചാരികൾ എത്തിച്ചേരുന്ന മണ്ണീറ വെള്ളച്ചാട്ടം കേന്ദ്രീകരിച്ച് ബ്ലോക്ക് നടപ്പാക്കുന്ന വികസന പദ്ധതികളുടെ ആദ്യഘട്ടം പൂർത്തിയാക്കുന്നു. ബ്ലോക്ക് പഞ്ചായത്ത് 2021- 22, 2022 -23 വാർഷിക പദ്ധതികളിലായി 15,18,100 ലക്ഷം രൂപ വകയിരുത്തിയ ആദ്യ ഘട്ട പ്രവർത്തനങ്ങളാണ് പൂർത്തീകരണത്തിലേക്ക് എത്തിച്ചേരുന്നത്. ടോയ്‌ലറ്റുകൾ, വസ്ത്രം മാറുന്നതിനുള്ള മുറി ഉൾപ്പെടെ ക്ലോക്ക് റൂം, ലഘുഭക്ഷണശാല, കവാടം എന്നിവയാണ് ആദ്യ ഘട്ടമായി പൂർത്തീകരിക്കുന്നത്. തുടർന്ന് രണ്ടാം ഘട്ടമായി മുകൾനിലയിൽ വിശ്രമകേന്ദ്രം, വ്യൂ പോയിന്‍റ്, വൈദ്യുതീകരണം, എന്നിവ കൂടി നിർമ്മിക്കുന്നതിനായി 19,04,000 ലക്ഷം രൂപ 2024-25 വാർഷിക പദ്ധതിയിൽ ഉൾപ്പെടുത്തിയിട്ടുണ്ട്. ഇതിന്‍റെയും നിർമ്മാണം ആരംഭിച്ചു. രണ്ടാംഘട്ട നിർമ്മാണ പ്രവർത്തനങ്ങളുടെ ഭാഗമായി രണ്ടാം നിലയുടെ നിർമ്മാണം പൂർത്തിയായി വരുന്നു. തണ്ണിത്തോട് ഗ്രാമ പഞ്ചായത്ത് പ്രസിഡന്‍റ് ഷാജി കെ ശമുവേൽ, ബ്ലോക്ക് പഞ്ചായത്ത് ഡിവിഷൻ അംഗം പ്രവീൺ പ്ലാവിളയിൽ, തണ്ണിത്തോട് ഗ്രാമ പഞ്ചായത്ത് ക്ഷേമകാര്യ സ്ഥിരം സമിതി അംഗം പ്രീത പി.എസ്, ബ്ലോക്ക് പഞ്ചായത്ത് അസിസ്റ്റന്‍റ് എൻജിനീയർ ശ്രീജ കുഞ്ഞമ്മ, ഓവർസിയർ ശ്രീകുമാർ, എന്നിവർ സ്ഥലം സന്ദർശിച്ച് പ്രവർത്തനം വിലയിരുത്തി. ബിജു മാത്യു, ഷിജോ ഇഞ്ചക്കാടൻ എന്നിവരും ഒപ്പം ഉണ്ടായിരുന്നു.

വീട് കുത്തിത്തുറന്ന് മോഷണം

റാന്നി: നാറാണംമൂഴി മൂക്കത്ത് വീട് കുത്തിത്തുറന്ന് മോഷണം; പത്ത് ലക്ഷത്തോളം രൂപയുടെ സ്വർണ്ണവും മറ്റ് വസ്തുക്കളും നഷ്ടപ്പെട്ടു. നാറാണംമൂഴി എരുത്തിക്കൽ ആദർശ്.ആർ, രഘുനാഥിന്‍റെ വീട്ടിലാണ് കഴിഞ്ഞ ചൊവ്വ രാത്രിയിൽ മോഷണം നടന്നത്. കുടുംബം വീട് പൂട്ടി ഗുരുവായൂർ ദർശനത്തിനു പോയ സമയത്താണ് മോഷണം നടന്നിരിക്കുന്നത്. വീടിന്‍റെ മുന്നിലെ വാതിൽ കമ്പിപോലുള്ള വസ്തു ഉപയോഗിച്ച് തള്ളി കതകിന് നാശം വരുത്തിയാണ് കള്ളൻ അകത്ത് കടന്നിരിക്കുന്നത്. അലമാരയിൽ സൂക്ഷിച്ചിരുന്ന സ്വർണാഭരങ്ങളും രണ്ട് നിലവിളക്കും ഒരു ആറന്മുള കണ്ണാടിയുമാണ് മോഷണം പോയിരിക്കുന്നത്. സ്ഥലത്തെത്തിയ പെരുനാട് പോലീസ് വിഷയത്തിൽ കേസെടുക്കുകയും അന്വേഷണം ആരംഭിക്കുകയും ചെയ്തു. സ്ഥലത്ത് ഫോറൻസിക് വിഭാഗവും, ഡോഗ് സ്‌കോഡും പരിശോധന നടത്തി

ഡോ. എം .എസ്. സുനിലിന്‍റെ സ്നേഹഭവനം ആദിവാസി കുടുംബത്തിന്

പത്തനംതിട്ട: സാമൂഹിക പ്രവർത്തക ഡോ. എം. എസ് .സുനിൽ ഭവനരഹിതരായ കുടിലുകളിൽ കഴിയുന്ന നിരാലംബർക്ക് പണിത് നൽകുന്ന 361- ാമത് സ്നേഹഭവനം ഷെല്ലി പോളിന്‍റെ സഹായത്താൽ ചിറ്റാർ വേളിമല മുരുപ്പേൽ രാജി ഭവീദിനും രണ്ട് പെൺകുഞ്ഞുങ്ങൾക്കുമായി നിർമിച്ച് നൽകി. വീടിന്‍റെ താക്കോൽദാനവും ഉദ്ഘാടനവും പത്തനംതിട്ട ജില്ലാ ലീഗൽ സർവീസസ് അതോറിറ്റി സെക്രട്ടറി സബ് ജഡ്ജ് അരുൺ ബച്ചു.എൻ.എൻ. നിർവഹിച്ചു. വർഷങ്ങളായി സ്വന്തമായി വീട് വയ്ക്കുവാൻ നിവൃത്തിയില്ലാതെ വനാവകാശപ്രകാരം പട്ടയം ലഭിച്ച ഭൂമിയിൽ നാലാം ക്ലാസിലും രണ്ടാം ക്ലാസിലും പഠിക്കുന്ന രണ്ട് പെൺകുഞ്ഞുങ്ങളുമായി സുരക്ഷിതമല്ലാത്ത കുടിലിൽ വന്യമൃഗ ഭീഷണിയിൽ കഴിഞ്ഞിരുന്ന കുടുംബത്തിന്‍റെ അവസ്ഥ മുൻ ലീഗൽ സർവീസസ് അതോറിറ്റി സെക്രട്ടറി ബീനാ ഗോപാൽ ടീച്ചറിന്‍റെ ശ്രദ്ധയിൽ പെടുത്തുകയും അതിൻപ്രകാരം ഇവരുടെ അവസ്ഥ നേരിൽ കണ്ട് മനസ്സിലാക്കി ഇവർക്കായി ഷെല്ലി പോൾ നൽകിയ തുക ഉപയോഗിച്ച് മൂന്നു മുറികളും അടുക്കളയും ഹാളും ശുചിമുറിയും സിറ്റൗട്ടും അടങ്ങിയ വീട് നിർമ്മിച്ചു നൽകുകയായിരുന്നു. വന്യമൃഗങ്ങളിൽ നിന്നും ഇഴ ജന്തുക്കളിൽ നിന്നും സംരക്ഷണം ഒരുക്കുന്നതിനായി മുകളിൽ രണ്ടുകിടപ്പുമുറികളോട് കൂടിയ സുരക്ഷിത ഭവനമാണ് ആദിവാസി കുടുംബത്തിനായി പ്രത്യേക രൂപകൽപ്പന ചെയ്തു നിർമ്മിച്ച് നൽകിയത്. ചടങ്ങിൽ പ്രോജക്ട് കോഓഡിനേറ്റർ കെ. പി. ജയലാൽ, സി.ഡി.എസ്. ചെയർപേഴ്സൺ അംബിക മിനി, സൂര്യ. എസ്.നായർ, സുധർമൻ. സി. കെ, മധു ചിറ്റാർ എന്നിവർ പ്രസംഗിച്ചു.

കാർ നിയന്ത്രണം വിട്ട് ഓട്ടോറിക്ഷയിലും ബൈക്കിലും ഇടിച്ച് നാലു പേർക്ക് പരിക്ക്

പത്തനംതിട്ട: കാർ നിയന്ത്രണം വിട്ട് ഓട്ടോറിക്ഷയിലും ബൈക്കിലുമിടിച്ച് പിഞ്ചുകുട്ടിയടക്കം നാലു പേർക്ക് പരിക്ക്. ഓട്ടോറിക്ഷ ഓടിച്ചിരുന്ന പത്തനംതിട്ട വെട്ടിപ്രം മുറിയിൽ കുമ്പാങ്കൽ താഹമൻസിൽ സെയ്ദ് മുഹമ്മദ് (35), സഹോദരി ഷാനി (30), തമീം (14) ഹെൻസ (ഒന്നര) എന്നിവർക്കാണ് പരിക്കേറ്റത്. പത്തനംതിട്ട ജില്ല പോലീസ് ഓഫീസിനു സമീപമാണ് അപകടം നടന്നത്. റാന്നി കൃഷി ഓഫീസർ കൊട്ടാരക്കര സ്വദേശി സുരേഷ് കുമാർ ആണ് കാർ ഓടിച്ചത്. നിയന്ത്രണം വിട്ട കാർ ആദ്യം ഓട്ടോറിക്ഷയിലും പിന്നാലെയെത്തിയ ബൈക്കിലും ഇടിക്കുകയായിരുന്നു. വൈദ്യ പരിശോധനയിൽ കാർ ഓടിച്ചയാൾ മദ്യപിച്ചിരുന്നതായി തെളിഞ്ഞുവെന്ന് പോലീസ് അറിയിച്ചു. ഇയാൾ മൊബൈലിൽ സംസാരിച്ചാണ് വാഹനം ഓടിച്ചത്. പരിക്കേറ്റവരെ പോലീസും നാട്ടുകാരും ചേർന്ന് ആശുപത്രിയിൽ എത്തിച്ചു.

കോടികൾ ചെലവഴിച്ച് നിർമിച്ച റോഡ് കുളമാക്കി

പത്തനംതിട്ട: കോടികൾ ചെലവഴിച്ച് ബിഎം-ബിസി നിലവാരത്തിൽ ടാർ ചെയ്ത റോഡ് ജലവകുപ്പ് കുത്തിയിളക്കി നാശമാക്കി. ടോറസ് ലോറികൾ അടക്കം അതിവേഗം പാഞ്ഞു കൊണ്ടിരുന്ന പാതയിലൂടെ ഇപ്പോൾ കാളവണ്ടിക്കുപോലും സഞ്ചരിക്കാൻ കഴിയാത്ത സ്ഥിതി. പത്തനംതിട്ട - ആലപ്പുഴ ജില്ലകളുടെ അതിർത്തിയിൽ കൂടി കടന്നു പോകുന്ന പുത്തൻകാവ് - മുളക്കുഴ മൂന്നര കിലോമീറ്റർ പാതയ്ക്കാണ് ഈ ദുരവസ്ഥ. ദിവസേന നൂറുകണക്കിന് വാഹനങ്ങൾ കടന്നു പോകുന്ന റോഡ് രണ്ടു വർഷം മുമ്പ് മന്ത്രി സജി ചെറിയാന്‍റെ താത്പര്യപ്രകാരമാണ് ഉന്നത നിലവാരത്തിൽ ടാർ ചെയ്തത്. മാവേലിക്കര - തെക്കേമല റോഡിനെയും എംസി റോഡിനെയും ബന്ധിപ്പിക്കുന്ന പാതയാണിത്. നിലവാരമുള്ള റോഡായതിനാൽ വാഹനങ്ങൾ അമിത വേഗതയിൽ പായുന്നു എന്ന പരാതി മാത്രമേ നാട്ടുകാർക്ക് ഉണ്ടായിരുന്നുള്ളു. കായംകുളം, മാവേലിക്കര, കാരയ്ക്കാട് തുടങ്ങിയ സ്ഥലങ്ങളിലുള്ളവർക്ക് കിലോമീറ്ററുകൾ ലാഭിച്ച് കോഴഞ്ചേരി, പത്തനംതിട്ട, ശബരിമല എന്നിവിടങ്ങളിൽ എത്തിച്ചേരാൻ കഴിയുന്ന പാതയാണ് ജലസേചന വകുപ്പ് കുളമാക്കിയത്. പാതയുടെ ഓരത്തുകൂടി കുഴിയെടുത്ത് പൈപ്പ് സ്ഥാപിക്കാൻ കഴിയുമെന്നിരിക്കെയാണ് അധികൃതർ റോഡ് ഭാഗികമായി വെട്ടിപ്പൊളിച്ചതെന്ന് നാട്ടുകാർ പറയുന്നു. അഞ്ചു മീറ്റർ വീതിയിൽ ടാർ ചെയ്ത റോഡിന്‍റെ നേർ പകുതി ഭാഗം ജെസിബി ഉപയോഗിച്ച് ഇളക്കിയാണ് കുഴിയെടുത്തിട്ടുള്ളത്. മഴ പെയ്യുന്നതിനാൽ പൂട്ടിയടിച്ച വയൽ പോലെയാണ് റോഡിന്‍റെ അവസ്ഥ. എതിരേ വരുന്ന വാഹനങ്ങൾക്ക് സൈഡ് കൊടുക്കണമെങ്കിൽ ടാറിൽ നിന്നും വാഹനം ചെളിയിലേക്ക് ഇറക്കണം. ഇങ്ങനെ ചെയ്യുമ്പോൾ ചക്രങ്ങൾ ചെളിയിൽ പുതഞ്ഞു പോകാനുള്ള സാധ്യതയുണ്ട്. ചില വാഹനങ്ങൾ ഇത്തരത്തിൽ ചെളിയിൽ പുതഞ്ഞതായി നാട്ടുകാർ പറയുന്നു. എത്രയും വേഗം റോഡ് ഉന്നത നിലവാരത്തിൽ തന്നെ ടാർ ചെയ്ത് ഗതാഗതം സുഗമമാക്കണമെന്ന് നാട്ടുകാർ ആവശ്യപ്പെടുന്നു.

തിരുവനന്തപുരം-അങ്കമാലി ഗ്രീൻഫീൽഡ് ഹൈവേ: നടപടികൾ വേഗത്തിലാക്കും

പത്തനംതിട്ട: ഭാരത്‌മാല പരിയോജനയുടെ ഭാഗമായിരുന്ന തിരുവനന്തപുരം-അങ്കമാലി ഗ്രീൻഫീൽഡ് ഹൈവേയുടെ വിശദമായ പദ്ധതി റിപ്പോർട്ട് (ഡിപിആർ) നാഷണൽ ഹൈവേ അഥോറിറ്റി ഓഫ് ഇന്ത്യ (എൻഎച്ച്എഐ) അവസാനിപ്പിച്ചതോടെ തെക്കൻ കേരളത്തിലെയും മധ്യ - വടക്കൻ കേരളത്തിലെയും യാത്ര വേഗത്തിൽ ആക്കുന്ന പദ്ധതിക്ക് ഉണ്ടായ തിരിച്ചടി എത്രയും വേഗം പരിഹരിക്കാനുള്ള ശ്രമങ്ങൾ തുടങ്ങി. നിലവിൽ 2024-25 ൽനിർമ്മാണവുമായി ബന്ധപ്പെട്ട നടപടികൾ തുടങ്ങാനിരിക്കെയാണ് പദ്ധതിക്ക് താത്കാലിക വിലക്കു വീണത്. ഗതാഗത, ഹൈവേ മന്ത്രാലയത്തിന്‍റെ വിഷൻ 2047-ന് അനുസൃതമായി പദ്ധതിയെ യോജിപ്പിച്ച് എൻഎച്ച്എഐ ഉടൻ തന്നെ ഒരു പുതിയ ഡിപിആർ തയ്യാറാക്കുമെന്ന് പദ്ധതിയോട് അടുത്ത വൃത്തങ്ങൾ അറിയിച്ചു.പുതുക്കിയ പദ്ധതിയിൽ അലൈൻമെന്‍റിലും സ്പെസിഫിക്കേഷനുകളിലും മാറ്റങ്ങൾ വരുത്തും. പുതിയ ഹൈവേയിൽ പരിമിതമായ എക്സിറ്റ്, എൻട്രി പോയിന്‍റുകളുള്ള ഒരു നിയന്ത്രിത ആക്‌സസ് സിസ്റ്റം ഉണ്ടായിരിക്കും. തുടക്കത്തിൽ ആറുവരി പാതയായി നിർദേശിച്ചിരുന്ന ഇത് ഇപ്പോൾ നാലുവരി പാതയായി വികസിപ്പിക്കാനാണ് തീരുമാനം.കൂടാതെ, ഒരു ആധുനിക ജിപിഎസ് നിയന്ത്രിത ടോൾ സംവിധാനവും നടപ്പിലാക്കും. പദ്ധതിയിൽ ചില മാറ്റങ്ങൾ വരുത്തേണ്ടതിനാൽ ആണ് മുൻ ഡിപിആർ അവസാനിപ്പിച്ചത് എന്നും ബന്ധപ്പെട്ടവർ പറഞ്ഞു. എന്നാൽ നിലവിൽ പദ്ധതി വിഷൻ 2047 പദ്ധതിയിൽ ഉൾപ്പെടുത്തിയിട്ടുണ്ട്. ഭാരത്‌മാല പരിയോജന പദ്ധതിക്കു കീഴിലുള്ള പ്രാരംഭ അലൈൻമെന്‍റിനെ അടിസ്ഥാനമാക്കിയുള്ളതായിരുന്നു മുൻ ഡിപിആർ. എന്നിരുന്നാലും, അടിസ്ഥാന അലൈൻമെന്‍റ് അതേപടി തുടരും. കേന്ദ്ര പരിസ്ഥിതി, വനം, കാലാവസ്ഥാ വ്യതിയാന മന്ത്രാലയം കഴിഞ്ഞ വർഷം അലൈൻമെന്‍റ് അംഗീകരിച്ചിരുന്നു. നിലവിലുള്ള എംസി റോഡിന് സമാന്തരമായി 257 കിലോമീറ്റർ ദൈർഘ്യത്തിലാണ് നിർദ്ദിഷ്ട ഹൈവേ കടന്നു പോകുന്നത്. തിരുവനന്തപുരത്തിനും അങ്കമാലിക്കും കൊട്ടാരക്കര വഴിയും കോട്ടയം ജില്ലയുടെ ചില ഭാഗങ്ങൾ വഴിയും മെച്ചപ്പെട്ട യാത്രാസൗകര്യം വാഗ്ദാനം ചെയ്യുന്നതാണ് പുതിയ പാത. പദ്ധതിയുടെ മേൽനോട്ടത്തിനായി, എൻ‌എച്ച്‌എ‌ഐ കോട്ടയം ആസ്ഥാനമായി പ്രവർത്തിക്കുന്ന ഒരു പ്രോജക്ട് ഡയറക്ടറെ നിയമിച്ചിരുന്നു. ജില്ല തിരിച്ചുള്ള പബ്ലിക് ഹിയറിംഗ് നടത്തുക എന്നതാണ് അടുത്ത ഘട്ടത്തിൽ ഉൾപ്പെടുന്നത്. പബ്ലിക് ഹിയറിംഗ് ഉടൻ ആരംഭിക്കാനിരിക്കെ, ഭൂമി ഏറ്റെടുക്കൽ പ്രക്രിയ ആരംഭിക്കാൻ ഇനിയും മാസങ്ങൾ എടുക്കും.അലൈൻമെന്‍റ് അന്തിമമാക്കുന്നതിൽ വെല്ലുവിളികൾ ഉണ്ടായിരുന്നിട്ടും, മന്ത്രാലയത്തിൽ നിന്ന് അനുമതി ലഭിച്ചിരുന്നു. ഭൂമി ഏറ്റെടുക്കൽ ഉറപ്പാക്കാൻ പ്രോജക്ട് ഡയറക്ടറെയും നിയമിച്ചിട്ടുണ്ട്, കൂടാതെ ഓരോ ജില്ലയിലും പൊതുജനങ്ങളുടെ അഭിപ്രായം കേൾക്കും. ഹൈവേ നിർമ്മാണ നടപടികൾ മുന്നോട്ട് പോകുന്നതിനുമുമ്പ് പൊതുജനങ്ങളെ വിശ്വാസത്തിലെടുക്കാനാണ് തീരുമാനം. പരിസ്ഥിതി അനുമതിയും നിർണായക ഘട്ടമാണ്. ഹൈവേ ആറ് ജില്ലകളിലൂടെ കടന്നുപോകും പുതിയ ഹൈവേയുടെ ആകെ വീതി 45 മീറ്റർ (148 അടി) ആയിരിക്കും. ഇത് പുളിമാത്തിൽ (തിരുവനന്തപുരം) ആരംഭിച്ച്, പുളിമാത്ത്, കല്ലറ, കടയ്ക്കൽ, അഞ്ചൽ, പത്തനാപുരം, കോന്നി,കുമ്പളാംപൊയ്ക, കാഞ്ഞിരപ്പള്ളി, തിടനാട്, പ്രവിത്താനം, തൊടുപുഴ, മലയാറ്റൂർ എന്നീ സ്ഥലങ്ങൾ കടന്നുപോകുന്ന രീതിയിലാണ് നിർദേശിച്ചിരിക്കുന്നത്. അങ്കമാലിയിൽ ഹൈവേ അവസാനിക്കും. ഇതിലൂടെ കേരളത്തിലെ ആറ് ജില്ലകളിലെ 13 താലൂക്കുകൾ ഹൈവേയിൽ ഉൾപ്പെടും.തുടക്കത്തിൽ, നിലവിലുള്ള എംസി റോഡ് നാലുവരിയായിവികസിപ്പിക്കാനായിരുന്നു പദ്ധതി. എന്നാൽ, ജനവാസമേഖലകളിലൂടെയുള്ള വികസനം വലിയ നഷ്ടം വരുത്തും എന്നതിനാലാണ് പുതിയ റോഡ് എന്ന ആശയം വന്നത്. ഗതാഗതം മെച്ചപ്പെടും നിർദ്ദിഷ്ട ഹൈവേ വിഴിഞ്ഞം-നാവായിക്കുളം ഔട്ടർ റിങ് റോഡുമായി ബന്ധിപ്പിക്കുകയും ചെയ്യും. ഇതോടെ തിരുവനന്തപുരത്തേക്കും, വിഴിഞ്ഞം തുറമുഖം പോലുള്ള പ്രധാനപ്പെട്ട പദ്ധതികളുമായി ഗതാഗത ബന്ധം കൂടുതൽ മെച്ചപ്പെടുത്താനുമാവും. പുതിയ ഹൈവേയുടെ ലക്ഷ്യം തിരുവനന്തപുരം മുതൽ അങ്കമാലിവരെയുള്ള യാത്രാസമയം കുറഞ്ഞു, അതിനോടൊപ്പം കൊട്ടാരക്കര, കോട്ടയം, തൊടുപുഴ, കോന്നി, അഞ്ചൽ, പത്തനാപുരം തുടങ്ങിയ മേഖലകളുടെ വികസനത്തിനും ഗതാഗതത്തിനും മെച്ചപ്പെട്ട വഴിവെക്കുന്നതാണ്. പദ്ധതിയുടെ പ്രവർത്തനങ്ങൾ വേഗത്തിലാക്കാൻ കേന്ദ്ര സർക്കാർ മുൻഗണന നൽകണമെന്ന് ആവശ്യപ്പെട്ട് ആന്‍റോ ആന്‍റണി എംപി, ഉപരിതല ഗതാഗതമന്ത്രി നിതിൻ ഗഡ്ഗരിക്ക് നിവേദനം നൽകിയിട്ടുണ്ട്.

മാർച്ചും ധർണയും സംഘടിപ്പിച്ചു

തിരുവല്ല: ശബരിമലയിലെ സ്വർണക്കൊള്ളയിൽ പ്രതിഷേധിച്ച് ഹിന്ദു ഐക്യ വേദി തിരുവല്ല താലൂക്ക് കമ്മിറ്റി ടെ നേതൃത്വത്തിൽ തിരുവല്ലം മതിൽഭാഗത്തെ തിരുവിതാംകൂർ ദേവസ്വം ബോർഡ് അസി. കമ്മീഷണറുടെ ഓഫീസിലേക്ക് മാർച്ചും ധർണയും സംഘടിപ്പിച്ചു. കാവുംഭാഗത്തുനിന്നും ആരംഭിച്ച മാർച്ച് കമ്മീഷണർ ഓഫീസിന് മുമ്പിൽ സമാപിച്ചു. ധർണ ഹിന്ദു ഐക്യ വേദി സംസ്ഥാന ജനറൽ സെക്രട്ടറി മഞ്ഞപ്പാറ സുരേഷ് ഉദ്ഘാടനം ചെയ്തു. ജില്ലാ സംഘടന സെക്രട്ടറി അശോക് കുമാർ, വർക്കിംഗ്‌ പ്രസിഡന്‍റ് രഘുത്തമൻ, താലൂക്ക് വർക്കിംഗ്‌ പ്രസിഡന്‍റ് ജി. മനോഹർ, താലൂക്ക് ജനറൽ സെക്രട്ടറിമാരായ ദിവാകരൻ പിള്ള, രതീഷ് ശർമൻ തുടങ്ങിയവർ നേതൃത്വം നൽകി. ദേവസ്വം വകുപ്പ് മന്ത്രി വി എൻ വാസവന്‍റെ കോലം പ്രതിഷേധക്കാർ കമ്മീഷണർ ഓഫീസിനു മുമ്പിൽ കത്തിച്ചു.

കേരള കോൺഗ്രസ് ജന്മദിനാഘോഷം

കല്ലൂപ്പാറ: സർക്കാർ ഖജനാവിലെ പണം ഉപയോഗിച്ച് തെരഞ്ഞെടുപ്പ് പ്രചരണം നടത്താനുള്ള തരംതാണ നിഗൂഢ പദ്ധതിയാണ് പിണറായി സർക്കാർ പയറ്റുന്നതെന്നും അതിന്‍റെ ഭാഗമാണ് ജനുവരി, ഫെബ്രുവരി മാസങ്ങളിൽ എല്ലാ വീടുകളും നടത്താൻ പോകുന്ന സർവ്വേ എന്നും കേരള കോൺഗ്രസ് വൈസ് ചെയർമാൻ ജോസഫ് എം പുതുശേരി. കേരള കോൺഗ്രസ് 62-ാം ജന്മദിനത്തോടനുബന്ധിച്ച് കല്ലൂപ്പാറ മണ്ഡലം കമ്മിറ്റി നടത്തിയ ജന്മദിനാഘോഷം ഉദ്ഘാടനം ചെയ്യുകയായിരുന്നു പുതുശേരി.പാർട്ടി മണ്ഡലം പ്രസിഡന്‍റ് ടി. എം. മാത്യു അധ്യക്ഷത വഹിച്ചു. ജയിംസ് കാക്കനാട്ടിൽ, വർഗീസുകുട്ടി മാമൂട്ടിൽ, സണ്ണി ഫിലിപ്പ്, ഒ.എം. മാത്യു, സി. എ. ചാക്കോ, സുരേഷ് സ്രാമ്പിക്കൽ, ടി. കെ. മാത്യു, എലിസബത്ത് ആന്‍റണി, തങ്കമണി ഗോവിന്ദൻ, ഉമ്മൻ ചാണ്ടപിള്ള, ഐപ്പ് പുലിപ്ര, സജൻ പുതിയ വീട്ടിൽ തുടങ്ങിയവർ പ്രസംഗിച്ചു. സി. ജെ. കുര്യൻ, ബാബു നീരുവിലായിൽ, ഇ. എം. ജോർജ്, ടോണി പടിഞ്ഞാറെമണ്ണിൽ, സാബു മണ്ണഞ്ചേരി, കെ. ജെ. രാജൻ, കോശി ഫീലിപ്പോസ്, എം. കെ. മാത്യു, വർഗീസ് ജോർജ് എന്നിവർ പ്രസംഗിച്ചു. മണ്ഡലം പ്രസിഡന്‍റ് ടി. എം. മാത്യു പതാക ഉയർത്തി. ജന്മദിനാഘോഷത്തിനു മുന്നോടിയായി പ്രകടനവും നടത്തി.

ഉന്നതപഠനപ്രദർശനം

തിരുവല്ല: പൊതുവിദ്യാഭ്യാസ വകുപ്പിന്‍റെയും ഹയർ സെക്കൻഡറി വിഭാഗം കരിയർ ഗൈഡൻസ് ആൻഡ് അഡോളസെന്‍റ് കൗൺസിലിംഗ് സെല്ലിന്‍റെയും നേതൃത്വത്തിൽ മിനി ദിശ ഉന്നത പഠന പ്രദർശനം തിരുവല്ല എസ് സി എസ് എച്ച് എസ് എസിൽ മാത്യു ടി. തോമസ് എംഎൽ എ ഉദ്ഘാടനം ചെയ്തു. യോഗത്തിൽ തിരുവല്ല മുനിസിപ്പൽ വൈസ് ചെയർമാൻ ജിജി വട്ടശ്ശേരിൽ അധ്യഷതവഹിച്ചു. തിരുവല്ല വിദ്യാഭ്യസ ജില്ല കൺവീനർ ഡോ. അനിത ബേബി പദ്ധതി അവതരണം നടത്തി. ഹയർ സെക്കൻഡറി കോഓർഡിനേറ്റർസജി വർഗീസ്‌, പ്രിൻസിപ്പൽമാരായ വർഗീസ് കെ. തോമസ്, ഡോ. ജേക്കബ്, ജെ.ലീന, ബാബു മാത്യു, എസ്. സന്തോഷ്‌, സി.ബിന്ദു, പിടിഎ പ്രസിഡന്‍റ് വർഗീസ്‌ മാത്യു, സ്കൂൾ മാനേജർകുരുവിള മാത്യു, .തോമസ് കോശി, അഞ്ജു, പി. ചാന്ദ്നി, ഡോ. സുനിൽ അങ്ങാടിക്കൽ എന്നിവർ പ്രസംഗിച്ചു.

ലോക കാഴ്ചദിനം ആചരിച്ചു

റാന്നി: അങ്ങാടി ഗ്രാമ പഞ്ചായത്തും,കാഴ്ച നേത്രദാന സേനയും സംയുക്തമായി ആചരിച്ചു. അങ്ങാടി ഗ്രാമ പഞ്ചായത്ത് പ്രസിഡന്‍റ് ബിന്ദു റെജി ഉദ്ഘാടനം നിർവഹിച്ചു. കാഴ്ച നേത്രദാന സേന ജനറൽ സെക്രട്ടറി അഡ്വ. റോഷൻ റോയി മാത്യു അധ്യക്ഷനായിരുന്നു. വൈസ് പ്രസിഡന്‍റ് ബിച്ചു ഐക്കാട്ടുമണ്ണിൽ, പഞ്ചായത്തംഗങ്ങളായ ജെവിൻ കെ. വിൽസൺ, അഞ്ചു ജോൺ, കാഴ്ച ക്യാംപ് കോ -ഓർഡിനേറ്റർ അനു ടി. ശാമുവേൽ എന്നിവർ പ്രസംഗിച്ചു. പഞ്ചായത്ത് പ്രസിഡന്‍റ് ബിന്ദു റെജിയും കുടുംബവും, വൈസ്. പ്രസിഡന്‍റ് ബിച്ചു ഐക്കാട്ടു മണ്ണിലും കുടുംബവും,പഞ്ചായത്തംഗങ്ങളായ ജെവിൻ കെ. വിൽസൺ, അഞ്ചു ജോൺ ഉൾപ്പെടെ മരണശേഷം കണ്ണുകൾ ദാനമായി നൽകുവാൻ സന്നദ്ധരായവരുടെ സമ്മതപത്രം കാഴ്ച ജനറൽ സെക്രട്ടറി റോഷൻ റോയി മാത്യു ഏറ്റുവാങ്ങി. മരണശേഷം കണ്ണുകൾ ദാനമായി നൽകുന്നവരുടെ സംഘടനയാണ് കാഴ്ച. ഇതുവരെ കാഴ്ച സംഘടനയിൽ അംഗങ്ങളായ 15 ആളുകൾ മരണപ്പെട്ടതോടെ 30 പേർക്ക് വെളിച്ചമേകുവാൻ സാധിച്ചു.സൗജന്യ നേത്ര ചികിത്സ, തിമിര ശസ്ത്രക്രിയ ക്യാമ്പുകൾ, ജീവകാരുണ്യ പ്രവർത്തനങ്ങൾ എന്നിവ കാഴ്ച സംഘടന ഏറ്റെടുത്ത് നടപ്പിലാക്കി.

റോഡിൽ വാഴ നട്ട് പ്രതിഷേധം

മല്ലപ്പള്ളി: മല്ലപ്പള്ളി -ചെങ്ങരൂർ റോഡിന്‍റെ തകർച്ചയിൽ സഹികെട്ടു വാഴവച്ച് പ്രതിഷേധം. തിരുവല്ല - കുന്നന്താനം - മല്ലപ്പള്ളി -ചേലക്കൊമ്പ് റോഡിലെ കുണ്ടും കുഴികളും കാരണം ഗതാഗതം അസാധ്യമായ സാഹചര്യത്തിലാണ് കേരള കോൺഗ്രസ് കല്ലൂപ്പാറ മണ്ഡലം കമ്മിറ്റിയുടെ നേതൃത്വത്തിൽ ഇത്തരമൊരു പ്രതിഷേധം സംഘടിപ്പിച്ചത്. ഒന്നാം പിണറായി സർക്കാരിന്‍റെ ആദ്യവർഷം എം.എൽ.എ മാത്യു ടി. തോമസ് ബഡ്ജറ്റ് വർക്കായി പ്രഖ്യാപിച്ച റോഡാണിത്. എന്നാൽ നാളിതുവരെയും ഒരു ഒരു പണിയും ഇവിടെ നടന്നില്ല.പലയിടങ്ങളിലും രൂപപ്പെട്ട അഗാധ ഗർത്തങ്ങളിലൂടെയുള്ള ദുരിതയാത്രയാണ് നാട്ടുകാർക്ക്‌ വിധിച്ചിരിക്കുന്നത്. ഇവിടേക്ക് പ്രകടനമായി എത്തിയ കേരളാ കോൺഗ്രസ്‌ പ്രവർത്തകർ കുഴിയിൽ വാഴ വയ്ക്കുകയായിരുന്നു.പ്രതിഷേധസമരം കേരളാ കോൺഗ്രസ്‌ വൈസ് ചെയർമാൻ ജോസഫ് എം. പുതുശേരി ഉദ്ഘാടനം ചെയ്തു. കഴിഞ്ഞ 10 വർഷമായി തുടർച്ചയായി പ്രഖ്യാപനങ്ങൾ നടത്തുന്നതല്ലാതെ റോഡ് നന്നാക്കാൻ എംഎൽഎ ഒരു നടപടിയും സ്വീകരിച്ചില്ലെന്നു അദ്ദേഹം പറഞ്ഞു.രണ്ടു സർക്കാരുകളുടെ ഭരണകാലാവധി പൂർത്തീകരിക്കാറായിട്ടും ഒന്നും ചെയ്യാത്തത് ജനങ്ങളോടുള്ള വെല്ലുവിളിയാണെന്നു പുതുശേരി പറഞ്ഞു. പാർട്ടി മണ്ഡലം പ്രസിഡന്‍റ് ടി. എം. മാത്യു അധ്യക്ഷത വഹിച്ചു.ജയിംസ് കാക്കനാട്ടിൽ, വർഗീസുകുട്ടി മാമൂട്ടിൽ,സി. ജെ. കുര്യൻ, സണ്ണി ഫിലിപ്പ്, സജൻ പുതിയവീട്ടിൽ, ഇ. എം. ജോർജ്, സുരേഷ് സ്രാമ്പിക്കൽ, എലിസബത്ത് ആന്‍റണി, തങ്കമണി ഗോവിന്ദൻ, ഒ.എം. മാത്യു, ഉമ്മൻ ചാണ്ടപിള്ള, ഐപ്പ് പുലിപ്ര, സി.എ. ചാക്കോ, ബാബു നീരുവിലായിൽ തുടങ്ങിയവർ പ്രസംഗിച്ചു. പടിഞ്ഞാറേ കവലയിൽ നിന്ന് ആരംഭിച്ച പ്രകടനത്തിനു ടി. കെ. മാത്യു, ടോണി പടിഞ്ഞാറെമണ്ണിൽ, സാബു മണ്ണഞ്ചേരി, കെ. ജെ. രാജൻ, കോശി ഫീലിപ്പോസ്, എം. കെ. മാത്യു, വർഗീസ് ജോർജ് തുടങ്ങിയവർ നേതൃത്വം നൽകി.

വോട്ടുകൊള്ള ജനാധിപത്യം നേരിടുന്ന വെല്ലുവിളി: പഴകുളം മധു

പത്തനംതിട്ട: അധികാരത്തിൽ തുടരാൻ തെരഞ്ഞെടുപ്പ് കമ്മീഷനെ സ്വാധീനിച്ചു ബിജെപി നടത്തുന്ന വോട്ട് കൊള്ള ഇന്ത്യൻ ജനാധിപത്യം സ്വാതന്ത്ര്യത്തിന് ശേഷം നേരിടുന്ന ഏറ്റവും വലിയ വെല്ലുവിളി ആണെന്ന് കെപിസിസി ജനറൽ സെക്രട്ടറി അഡ്വ.പഴകുളം മധു. രാഹുൽ ഗാന്ധിയുടെ നേതൃത്വത്തിൽ അഞ്ചുകോടി ഒപ്പുകൾ രാഷ്‌ട്രപതിക്ക് സമർപ്പിക്കുന്നതിന്‍റെ ഭാഗമായി മഹിളാ കോൺഗ്രസ്സ് നടത്തുന്ന വോട്ട് ചോരി സിഗ്നേച്ചർ കാമ്പയിന്‍റെ ജില്ലാതല ഉദ്ഘാടനം അടൂരിൽ നിർവ്വഹിച്ചു പ്രസംഗിക്കുകയായിരുന്നു അദ്ദേഹം. കേരളത്തിൽ സ്പെഷൽ റിവിഷൻ നടത്തുന്നതും അട്ടിമറി ലക്ഷ്യം വെച്ചാണ്. കേന്ദ്ര സർക്കാരിനെ പിന്തുടർന്ന് കേരളത്തിലെ പഞ്ചായത്ത്‌ മുനിസിപ്പൽ വോട്ടർ പട്ടികയിൽ സിപിഎം വ്യാപകമായി തിരിമറി നടത്തുകയാണെന്നും പഴകുളം മധു പറഞ്ഞു. മഹിള കോൺഗ്രസ് ജില്ലാ പ്രസിഡന്‍റ് രജനി പ്രദീപ് അധ്യക്ഷത വഹിച്ചു. സചി ദേവി, ജിനു കളീയ്ക്കൽ, മഞ്ജു വിശ്വനാഥ്, രഞ്ജനി സുനിൽ, വസന്തകുമാർ, ലീലാ രാജൻ, വിമല മധു, സജിനി മോഹൻ, അനിത കീഴൂട്ട്, ഉഷാകുമാരി, ശാന്ത ദേവി, ലീലാമ്മ പീറ്റർ, സരള ലാൽ, മറിയാമ്മ ജേക്കബ്, സുധാ പത്മകുമാർ, ലേഖ, വിജയലക്ഷമി ഉണ്ണിത്താൻ എന്നിവർ പ്രസംഗിച്ചു.

ലഹരി മുക്ത സന്ദേശവുമായി കുടുംബശ്രീ

പത്തനംതിട്ട: ഉന്നതികളെ ലഹരിമുക്തമാക്കുക എന്ന ലക്ഷത്തോടെ കുടുംബശ്രീ ജില്ലാമിഷനും ജില്ലാ എക്സൈസ് വിമുക്തി മിഷനും സംയുക്തമായി കൊല്ലം ഹാഗിയോസ് എന്ന സന്നദ്ധ സംഘടനയുമായി സംയോജിച്ച് നടപ്പിലാക്കി വരുന്ന ലഹരി വിരുദ്ധ കാമ്പയിൻ ‘ബോധ 2025'ന്‍റെ ഭാഗമായി സംഘടിപ്പിച്ച പാവനാടകം ഇടത്താവളം ജംഗ്ഷനിൽ റാന്നി ബ്ലോക്ക് പ്രസിഡന്‍റ് കെ.എസ്. ഗോപി ഉദ്ഘാടനം ചെയ്തു. പഞ്ചായത്ത് പ്രസിഡന്‍റ്സ് അസോസിയേഷൻ പ്രസിഡന്‍റ് പി.എസ് മോഹനൻ അധ്യക്ഷത വഹിച്ചു. കുടുംബശ്രീ ജില്ലാ മിഷൻ സ്നേഹിത ജെൻഡർ ഹെൽപ്പ് ഡെസ്ക് പട്ടിക വർഗ്ഗ മേഖലയിലെ ഉന്നമനത്തിനായി വിവിധ അവബോധ പ്രവർത്തനങ്ങൾ സംഘടിപ്പിച്ചു വരുന്നു. ഇതിന്‍റെ ഭാഗമായാണ് ജില്ലയിലെ റാന്നി പെരുനാട് പഞ്ചായത്തിലെ അട്ടത്തോട് കിഴക്കേകര, അട്ടത്തോട് പടിഞ്ഞാറെക്കര, ളാഹ എന്നീ ഉന്നതികളിലും പെരുനാട് ഇടത്താവളം ജംഗ്ഷനിലും ചിറ്റാർ പഞ്ചായത്തിലെ കൊടുമുടി, കോതയാട്ടുപാറ, പാമ്പിനി എന്നീ ഉന്നതികളിലും ചിറ്റാർ ബസ് സ്റ്റാൻഡുമായി എട്ടുവേദികളിലായി പാവനാടകം സംഘടിപ്പിച്ചത്. കുടുംബശ്രീ ജില്ലാ മിഷൻ കോഓർഡിനേറ്റർ എസ് ആദില, കുടുംബശ്രീ ജെൻഡർ ജില്ലാ പ്രോഗ്രാം മാനേജർ പി. ആർ. അനൂപ്, സിഡിഎസ് ചെയർപേഴ്സൺ ഷീല സന്തോഷ്, അസിസ്റ്റന്‍റ് എക്സൈസ് ഇൻസ്പെക്ടർ ബിജു ഫിലിപ്പ്, എക്സൈസ് പ്രിവന്‍റീവ് ഓഫീസർ ബിനു വർഗീസ്, വിമുക്തി മിഷൻ ജില്ലാ കോഓർഡിനേറ്റർ ജോസ് കളീക്കൽ, പെരുനാട് പഞ്ചായത്ത് വൈസ് പ്രസിഡന്‍റ് ഡി.ശ്രീകല, വാർഡ് മെംബർ എം. എസ്. ശ്യാം, ഹാഗിയോസ് കോഓർഡിനേറ്റർ ജോമോൻ ഹാഗിയോസ്, സ്നേഹിതാ സർവീസ് പ്രൊവൈഡർ കെ.എം. റസിയ, സിഡിഎസ് വൈസ് ചെയർപേഴ്സൺ ഹസീന എന്നിവർ പ്രസംഗിച്ചു.

യുഡിഎഫ് കൺവീനർ കാതോലിക്കാ ബാവയുമായി കൂടിക്കാഴ്ച നടത്തി

പത്തനംതിട്ട: യു.ഡി.എഫ് കൺവീനർ അടൂർ പ്രകാശ് എംപി മലങ്കരസഭാ ആസ്ഥാനമായ ദേവലോകം കാതോലിക്കേറ്റ് അരമന സന്ദർശിച്ചു. സഭാധ്യക്ഷനും മലങ്കര മെത്രാപ്പോലീത്തായുമായ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവായുമായി അദ്ദേഹം കൂടിക്കാഴ്ച നടത്തി. ജില്ലാ പഞ്ചായത്ത് അംഗം റോബിൻ പീറ്ററും ഒപ്പമുണ്ടായിരുന്നു. സഭാ ആസ്ഥാനത്ത് ദേവലോകം അരമന മാനേജർ ഫാ. യാക്കോബ് തോമസ് റമ്പാൻ, സഭാ വക്താവ് മലങ്കര മൽപ്പാൻ ഫാ.ഡോ. ജോൺസ് ഏബ്രഹാം കോനാട്ട് റീശ് കോർ എപ്പിസ്കോപ്പാ എന്നിവർ യുഡിഎഫ് കൺവീനറെ സ്വീകരിച്ചു. കൺവീനറായി ചുമതലയേറ്റ ശേഷം ആദ്യമായാണ് അടൂർ പ്രകാശ് എം.പി മലങ്കരസഭാ ആസ്ഥാനത്ത് എത്തുന്നത്.

ശബരിമല സ്വർണപ്പാളി വിവാദം: ദേവസ്വം ഡെപ്യൂട്ടി കമ്മീഷണർ ഓഫീസിലേക്ക് മാർച്ച്‌ നടത്തി

പത്തനംതിട്ട :ശബരിമലയിലെ ദാരുശില്പത്തിലെ സ്വർണപ്പാളി നഷ്ടമായ സംഭവത്തിലടക്കം ഹൈക്കോടതിയുടെ നിരീക്ഷണത്തിൽ സിബിഐ അന്വേഷണം നടത്തുക, ദേവസ്വം ബോർഡ്‌ രാജി വയ്ക്കുക തുടങ്ങിയ ആവശ്യങ്ങളുന്നയിച്ചുകൊണ്ട് ആർഎസ്പി ജില്ലാ കമ്മിറ്റിയുടെ നേതൃത്വത്തിൽ ദേവസ്വം ഡെപ്യൂട്ടി കമ്മീഷണർ ഓഫീസിലേക്ക് മാർച്ച്‌ നടത്തി. മാർച്ച്‌ സംസ്ഥാന സെക്രട്ടറിയേറ്റഗം അഡ്വ. ബി.രാജശേഖരൻ ഉദ്ഘാടനം ചെയ്യ്തു. ദേവസ്വം ബോർഡിന് കീഴിലെ ക്ഷേത്രങ്ങളിലെ ആസ്തി സംബന്ധിച്ച് നിരവധി ആരോപണങ്ങൾ ഉയർന്നുവരുന്നുണ്ട്. ഇവയെല്ലാം അന്വേഷിച്ചാൽ മാത്രമേ ഈ വകുപ്പിൽ നടക്കുന്ന അഴിമതിയുടെ ആഴം പുറത്ത് വരികയുള്ളൂ. ഇക്കാര്യത്തിൽ ജനങ്ങൾ ശക്തമായി പ്രതികരിക്കണം ഇല്ലെങ്കിൽ മുഖ്യമന്ത്രി ഉൾപ്പെടെ ആരോപണ വിധേയനായ സ്വർണക്കടത്ത് ഒതുക്കിത്തീർത്തതുപോലെ ഈ അന്വേഷണവും യഥാർത്ഥ പ്രതികളിലേക്ക് എത്താതെ ഭരണ സ്വാധീനം ഉപയോഗിച്ച് ഒതുക്കി തീർക്കും എന്ന് അദ്ദേഹം പറഞ്ഞു. സംസ്ഥാന കമ്മിറ്റിയറ്റംഗം ആർ.എം. ഭട്ടതിരിയുടെ അദ്ധ്യക്ഷതയിൽ ചേർന്ന യോഗത്തിൽ പി. ജി. പ്രസന്നകുമാർ, അഡ്വ. ജോർജ് വർഗീസ്, ടി.എം. സുനിൽകുമാർ, തോമസ് ജോസഫ്, കെ.പി. മധുസൂദനൻ പിള്ള, പൊടിമോൻ കെ. മാത്യു, സജി നെല്ലുവേലിൽ, ബാബു ചാക്കോ, രവി പിള്ള, ഈപ്പൻ മാത്യു, എസ്. സതീഷ്, പുരുഷോത്തമൻ പിള്ള, ജോയ് ജോൺ, ബി. ശ്രീപ്രകാശ്, ജോൺസ് യോഹന്നാൻ, പി.എം.ചാക്കോ, ഷാഹിദ ഷാനവാസ്‌, ഇസ്മെയിൽ തുടങ്ങിയവർ പ്രസംഗിച്ചു.

ശബരിമല സർണക്കൊള്ളയിൽ കേന്ദ്ര ഏജൻസി അന്വേഷണം വേണമെന്ന് ബിജെപി

പത്തനംതിട്ട: ശബരിമലയിൽ നടന്ന സ്വർണക്കൊള്ളയെപ്പറ്റി കേന്ദ്ര ഏജൻസി അന്വേഷിക്കണമെന്ന് ബിജെപി സംസ്ഥാന ജനറൽ സെക്രട്ടറി എസ്. സുരേഷ്. സർണാപഹരണത്തിൽ പ്രതിഷേധിച്ച് ബിജെപി നടത്തിയ പത്തനംതിട്ട സിവിൽ സ്റ്റേഷൻ മാർച്ചിൽ പ്രസംഗിക്കുകയായിരുന്നു അദ്ദേഹം. കേരളത്തിൽ മാത്രം ഒതുങ്ങിനിൽക്കുന്ന ഒരു കേസല്ല ഇത്. തമിഴ്നാട്, കർണാടക, ആന്ധ്രാപ്രദേശ് തുടങ്ങിയ സംസ്ഥാനങ്ങളുമായി ഇതിന് ബന്ധമുണ്ട്. പോലീസോ ദേവസ്വം വിജിലൻസോ അന്വേഷിച്ചാൽ കേസ് പൂർണമായി തെളിയിക്കാൻ കഴിയില്ല. അതിനാലാണ് കേന്ദ്ര ഏജൻസിയുടെ അന്വേഷണം ആവശ്യപ്പെടുന്നത്. ശബരിമലയിൽ കാലാകാലങ്ങളിൽ ഭരണം നടത്തിയ ഇടതു വലതു പാർട്ടികൾ പലപ്പോഴായി കൊള്ളയ്ക്ക് കൂട്ടു നിന്ന ചരിത്രമാണുള്ളത്. നൂറുകണക്കിന് ബിജെപി പ്രവർത്തകർ അബാൻ ജംഗ്ഷനിൽ ഒത്തുകൂടി. സിവിൽ സ്റ്റേഷൻ നടയിൽ കൂടിയ പ്രതിഷേധ യോഗത്തിൽ ജില്ലാ പ്രസിഡന്‍റ് അഡ്വ. വി. എ. സൂരജ് അധ്യക്ഷത വഹിച്ചു . സംസ്ഥാന സമിതി അംഗവും ജില്ലാ പ്രഭാരിയുമായ അഡ്വ. രാധാകൃഷ്ണ മേനോൻ മുഖ്യപ്രഭാഷണം നടത്തി. മുൻ ദേശീയ സമിതി അംഗം വി.എൻ. ഉണ്ണി, ദേശീയ സമിതി അംഗം വിക്ടർ ടി. തോമസ്, സംസ്ഥാന സമിതി അംഗം ടി.ആർ. അജിത്കുമാർ, കർഷകമോർച്ച സംസ്ഥാന പ്രസിഡൻറ് ഷാജി രാഘവൻ, നൂനപക്ഷ മോർച്ച സംസ്ഥാന വൈസ്പ്രസിഡൻറ് ബിജു മാത്യു, ജില്ലാ ജനറൽ സെക്രട്ടറിമാരായ പ്രദീപ് അയിരൂർ, ബിനു മോൻ എന്നിവർ പ്രസംഗിച്ചു.

തപാൽ ദിനത്തിൽ ചങ്ങാതിക്ക് കത്തയച്ച് കുരുന്നുകൾ

വെണ്ണിക്കുളം: തപാൽ ദിനത്തിൽ വിശേഷങ്ങൾ ചോദിച്ചും ആശംസകൾ അറിയിച്ചും കൂട്ടുകാർക്ക് കത്തെഴുതി പോസ്റ്റ് ചെയ്തപ്പോൾ വെണ്ണിക്കുളം എംഡിഎൽപി സ്കൂളിലെ നാലാം ക്ലാസിലെ കുട്ടികൾക്ക് തപാൽ ദിനം വേറിട്ട അനുഭവമായി. കത്ത് വിലാസക്കാരന് എത്തുന്ന വഴിയും മറ്റ് തപാൽ സേവനങ്ങളെ പറ്റിയും കുട്ടികൾ മനസ്സിലാക്കി. വിലാസം എഴുതി തപാൽ പെട്ടിയിൽ നേരിട്ട് നിക്ഷേപിച്ചപ്പോൾ തപാൽ വകുപ്പിന്‍റെ സേവനം അടുത്തറിഞ്ഞു. പോസ്റ്റൽ അസിസ്റ്റന്‍റ് രമ്യരാജ്, പ്രധാന അധ്യാപിക മിനി സൂസൻ ഫിലിപ്പ്,പോസ്റ്റ് വുമൺ സി. സന്ധ്യ,ജി പ്രിയാ മോൾ, അധ്യാപകരായ ലാബി ജോർജ് ജോൺ, റോബി അന്ന ജോസഫ്, ജോൺ എം തോമസ് എന്നിവർ നേതൃത്വം നൽകി

വിദേശ മലയാളികളെ കബളിപ്പിച്ച് 26 ലക്ഷം തട്ടിയെടുത്തു

അടൂർ: സഹോദരങ്ങളായ വിദേശ മലയാളികളെ തെറ്റിദ്ധരിപ്പിച്ച് 26 ലക്ഷം രൂപ തട്ടിയെടുത്തതായി പരാതി. അടൂർ ട്രഷറിയുമായി ബന്ധപ്പെട്ടാണ് സംഭവത്തിന്‍റെ തുടക്കം. ദുബായ് കേന്ദ്രമാക്കി ബിസിനസ് നടത്തുന്ന പത്തനംതിട്ട ഓമല്ലൂർ സ്വദേശികൾക്കാണ് പണം നഷ്ടമായത് അവരുടെ വിശ്വസ്തനും ഓമല്ലൂരിൽ വാടകയ്ക്ക് താമസിക്കുന്നതുമായ എറണാകുളം സ്വദേശി ജോസഫ് പി.ജി ക്ക് എതിരെയാണ് ഇപ്പോൾ പരാതി നൽകിയിരിക്കുന്നത്. ഇവരിൽ നിന്നും പലപ്പോഴായി അടൂർ സബ് ട്രഷറി ഓഫീസിൽ അടയ്ക്കാൻ വാങ്ങിയ 26 ലക്ഷം രൂപ ചെല്ലാനിൽ കൃത്രിമം കാട്ടി അവഹരിച്ചു എന്നാണ് കേസ് സഹോദരങ്ങളുടെ പേരിൽ പത്തനംതിട്ടയിലും ഓമല്ലൂരും ഉള്ള രണ്ട് ഏക്കർ സ്ഥലം നിയമാനുസരണം ജിയോളജി വകുപ്പിൽ നിന്നും അനുവാദം വാങ്ങി തുകചെല്ലാൻ വഴി ട്രഷറിയിൽ അടച്ച് മണ്ണിട്ട് കൃഷി യോഗ്യമാക്കി തീർക്കാമെന്ന് സമ്മതിച്ച് എഗ്രിമെന്‍റ് വെച്ചാണ് ഇയാൾ തുക കൈപ്പറ്റിയത്. പത്ത് പ്രാവശ്യമായി ഇവരിൽ നിന്നും 26 ലക്ഷം രൂപ കൈപ്പറ്റിയെങ്കിലും 1600 രൂപ മാത്രമാണ് ട്രഷറിയിൽ അടച്ചത്. ഓരോ പ്രാവശ്യവും ലക്ഷങ്ങൾ വാങ്ങി അത് അടൂർ ട്രഷറിയിൽ അടച്ചതായി രേഖപ്പെടുത്തി ട്രഷറിയുടെ ഒറിജിനൽ സീൽ ഉൾപ്പെടെ പതിപ്പിച്ച് ഉടമസ്ഥർക്ക് നൽകി വിശ്വാസം ആർജിച്ചാണ് തട്ടിപ്പ് നടത്തിയിരിക്കുന്നത്. ജോസഫ് ഓമല്ലൂരിൽ ഇവരുടെ തന്നെ ഒരു വീട്ടിൽ വാടകയ്ക്ക് താമസിക്കുന്ന ആളായതിനാലും ഇവരുടെ വീട് പണിയുമായി ബന്ധപ്പെട്ട കാര്യങ്ങൾ നടത്തുന്ന ആൾ ആയതിനാലും യാതൊരു സംശയവും തോന്നിയില്ല എന്നാണ് വിദേശ മലയാളികൾ പറയുന്നത്. 2022 പന്ത്രണ്ടാം മാസം മുതൽ 2025 വരെയുള്ള കാലയളവിലാണ് ഇയാൾ പണം അപഹരിച്ചത്. ആവശ്യപ്പെട്ട പ്രകാരം കാര്യങ്ങൾ നടക്കാതെ വന്നപ്പോൾ പരാതിക്കാർ നേരിട്ട് അടൂർ ട്രഷറിയിൽ എത്തി വിവരങ്ങൾ അന്വേഷിച്ചപ്പോഴാണ് പറ്റിക്കപ്പെട്ടതായി മനസിലാക്കുന്നത്. ട്രഷറിയിൽ നടന്ന ഇടപാടിൽ ഇതേ അഡ്രസ്സിലും നമ്പറിലും നാമമാത്രമായ തുക അടച്ച് രസീത് വാങ്ങി പിന്നീട് ഡ്യൂപ്ലിക്കേറ്റ് ചെല്ലാൻ രസീത് ഉണ്ടാക്കി അതിൽ അതേ തീയതിയും നമ്പറും ഇട്ട് തുക കൂട്ടിയെഴുതി ഉടമസ്ഥർക്ക് നൽകിയതായാണ് പ്രാഥമിക നിഗമനം. അന്വേഷണത്തിലും വീഴ്ച ഇതുമായി ബന്ധപ്പെട്ട് ഈ വർഷം മാർച്ച് 12 - ന് പത്തനംതിട്ട ജില്ലാ പോലീസ് മേധാവിക്ക് പരാതി നൽകിയെങ്കിലും കേസ് രജിസ്റ്റർ ചെയ്ത് അന്വേഷണം നടത്താൻ തയ്യാറായില്ല. ഇതേ തുടർന്ന് ഇളയ സഹോദരൻ വിദേശത്തുനിന്ന് വന്ന് വീണ്ടും ജില്ലാ പോലീസ് മേധാവിക്ക് പരാതി നൽകിയെങ്കിലും അതിനും എഫ്ഐആർ ഇട്ട് പോലീസ് അന്വേഷണം നടത്തിയില്ല. അന്നേദിവസം തന്നെ അടൂർ സബ് ട്രഷറി ഓഫീസർക്കും പരാതി നൽകിയിരുന്നു. എന്നാൽ ട്രഷറി ഓഫീസിൽനിന്ന് ഇതുമായി ബന്ധപ്പെട്ട് യാതൊരു നടപടിയും സ്വീകരിക്കാൻ കഴിയില്ല എന്ന് മറുപടിയാണ് ലഭിച്ചത്. പിന്നീട് 6-10-2025-ൽ സംസ്ഥാന പോലീസ് മേധാവിക്കും പത്തനംതിട്ട ഡിവൈഎസ്പിക്കും പരാതി നൽകി. അതിന്‍റെ അടിസ്ഥാനത്തിൽ കഴിഞ്ഞദിവസം കേസ് രജിസ്റ്റർ ചെയത് അന്വേഷണം ആരംഭിച്ചതായി പറയുന്നു മണ്ണ് മാഫിയ ബന്ധവും ഇത് ഒറ്റപ്പെട്ട സംഭവമല്ല എന്നാണ് വിജിലൻസിലെ ചില ഉദ്യോഗസ്ഥർ സൂചിപ്പിക്കുന്നത്. സംസ്ഥാനത്ത് ഉടനീളം ഇത്തരം സംഭവങ്ങൾ നടക്കുന്നുണ്ട് . ഇതിന് പിന്നിൽ വൻ ഗൂഢാലോചനയും മണ്ണ് മാഫിയയുടെ കൈകളും ഉണ്ടെന്ന് വിജിലൻസിലെ ഒരു ഉന്നത ഉദ്യോഗസ്ഥൻ പറഞ്ഞു. സ്വകാര്യ വ്യക്തികൾ തമ്മിലുള്ള പണമിടപാട് ആയതിനാലും ഗവൺമെന്‍റിന് ഇതിൽ നഷ്ടം ഒന്നും സംഭവിച്ചിട്ടില്ലാത്തതിനാലും ട്രഷറി ഉദ്യോഗസ്ഥരുടെ പങ്ക് പ്രത്യക്ഷത്തിൽ കണ്ടെത്താൻ കഴിയാത്തതിനാലും വിജിലൻസിന് നേരിട്ട് കേസെടുക്കാൻ പറ്റില്ലെന്ന് അവർ പറഞ്ഞു. ഓരോ പ്രാവശ്യവും വൻ തുക കൈപ്പറ്റി ഇയാൾ നാമമാത്രമായ തുക മാത്രമാണ് ട്രഷറിയിൽ അടച്ചിരുന്നത്. പരാതിക്കാർക്ക് ഇയാൾ നൽകിയിരുന്ന ചെല്ലാനിലെ സീലുകൾ ട്രഷറിയുടെ ഒറിജിനൽ സീൽ തന്നെയാണെന്ന് ട്രഷറി ഓഫീസർ തന്നെ സമ്മതിച്ചിട്ടുണ്ട്.

റോഡ് ഉദ്ഘാടനം

തിരുവല്ല: പെരിങ്ങര ഗ്രാമപഞ്ചായത്ത് ഏഴാം വാര്‍ഡില്‍ ചാലക്കുഴി-പുത്തന്‍തോട്, ഞവരാന്തിപ്പടി - കളത്തില്‍പ്പടി കമ്യൂണിറ്റി ഹാള്‍ റോഡുകളുടെ ഉദ്ഘാടനം പഞ്ചായത്ത് പ്രസിഡന്‍റ് ഏബ്രഹാം തോമസ് നിര്‍വഹിച്ചു. പഞ്ചായത്ത് മെയിന്‍റനന്‍സ് ഫണ്ട് 23 ലക്ഷം രൂപയും എംജിഎന്‍ആര്‍ഇജിഎസ് ഫണ്ടും ഉപയോഗിച്ചാണ് നിര്‍മാണം പൂര്‍ത്തീകരിച്ചത്. വികസനകാര്യ സ്ഥിരം സമിതി ചെയര്‍പേഴ്സണ്‍ റിക്കു മോനി വര്‍ഗീസ് അധ്യക്ഷത വഹിച്ചു. വൈസ് പ്രസിഡന്‍റ് ഷീനാ മാത്യു, അംഗങ്ങളായ ശാന്തമ്മ നായർ‌, ആനന്ദന്‍, ഓമന സുഗതൻ എന്നിവര്‍ പ്രസംഗിച്ചു.

വീടിന് തീപിടിച്ചു

മല്ലപ്പള്ളി: കീഴ്‌വായ്പൂര് പോലീസ് സ്റ്റേഷന് സമീപമുള്ള പുളിമല രാമൻകുട്ടിയുടെ വീടിന് തീപിടിച്ച് ഭാര്യ ലതാ കുമാരിക്ക് (60) പൊള്ളലേറ്റു. ഇന്നലെ വൈകുന്നേരം 5.15-നാണ് സംഭവം. തിരുവല്ല ഫയർഫോഴ്സ് എത്തിയെങ്കിലും വീട്ടിലേക്ക് വാഹനം എത്തിക്കാൻ കഴിയാത്തതിനാൽ രാമൻകുട്ടിയുടെ വീട്ടിലെ വാട്ടർ ടാങ്കിലെ വെള്ളം ഉപയോഗിച്ച് തീ അണച്ചു. തീപിടിത്തത്തിന്‍റെ കാരണം വ്യക്തമല്ല. കീഴ്‌വായ്പൂര് പോലീസ് അന്വേഷണം ആരംഭിച്ചു. ലതാകുമാരിയെ കോട്ടയം മെഡിക്കൽ കോളേജിൽ പ്രവേശിപ്പിച്ചു.

‘മിനി ദിശ 2025’ ഉന്നതപഠന പ്രദർശനം ഇന്നും നാളെയും

തിരുവല്ല: മിനി ദിശ ഉന്നതപഠന പ്രദർശനം ഇന്നും നാളെയും തിരുവല്ല എസ്‌സിഎസ്എച്ച്എസ്എസിൽ നടക്കും. രാവിലെ പത്തിന് മാത്യു ടി. തോമസ് എംഎൽഎ ഉദ്ഘാടനം ചെയ്യും. പൊതുവിദ്യാഭ്യാസ വകുപ്പ് ഹയർ സെക്കൻഡറി വിഭാഗം കരിയർ ഗൈഡൻസ് ആൻഡ് അഡോളസെന്‍റ് കൗൺസലിംഗ് സെല്ലിന്‍റെ നേതൃത്വത്തിലാണ് പ്രദർശനം. പത്താം ക്ലാസിനും പ്ലസ്ടുവിനും ശേഷം പഠിക്കാവുന്ന ഹ്രസ്വകാല കോഴ്സുകൾ, വിവിധതരം സ്കോളർഷിപ്പുകൾ, വിവിധ മത്സരപരീക്ഷകൾ, ഇരുപത്തിയൊന്നാം നൂറ്റാണ്ടിലെ ലൈഫ് സ്കിൽസ് എന്നിവയെക്കുറിച്ചുള്ള വിദഗ്ധരുടെ സെഷനുകളും രണ്ടു ദിവസത്തെ എക്സ്പോയിൽ ഉണ്ടായിരിക്കും. കേരളത്തിലെ 40ഓളം വിവിധ സർക്കാർ സ്ഥാപനങ്ങൾ അവരുടെ കോഴ്സുകൾ പരിചയപ്പെടുത്തുന്നതിന് മിനി ദിശയിൽ എത്തിച്ചേരും. വിദ്യാർഥി കൾക്കും അധ്യാപകർക്കും രക്ഷിതാക്കൾക്കും ആധുനിക കോഴ്സുകൾ, തുടർപഠന സാധ്യതകൾ, വ്യത്യസ്ത തൊഴിൽ മേഖലകൾ എന്നിവയെക്കുറിച്ചുള്ള ആധികാരികമായ അറിവ് നേടുന്നതിന് മിനി ദിശ ഉപകരിക്കും. മുൻകൂട്ടി രജിസ്റ്റർ ചെയ്ത കുട്ടികൾക്കായി കെ ഡാറ്റിന്‍റെ കീഴിൽ അഭിരുചി പരീക്ഷ, സി ജി ആൻഡ്എസിയുടെ കീഴിൽ വിവിധ കോഴ്സുകളെ പരിചയപ്പെടുത്തുന്ന 14 സ്റ്റാളുകൾ, കരിയർ കൗൺസിലിംഗ് എന്നിവയും രണ്ടു ദിവസത്തെ മിനി ദിശയിൽ ഉൾപ്പെടുത്തിയിട്ടുണ്ട്. ഹയർ സെക്കൻഡറി ആർഡിഡി കെ. സുധ, എസ്‌സിഎസ് പ്രിൻസിപ്പൽ ജോൺ കെ. തോമസ്, ഡോ. സുനിൽ കുമാർ, ഡോ. അനിത ബേബി തുടങ്ങിയവർ നേതൃത്വം നൽകുമെന്ന് പബ്ലിസിറ്റി കൺവീനർ പി. ചാന്ദ്നി അറിയിച്ചു.

ത്രിതല പഞ്ചായത്ത് തെരഞ്ഞെടുപ്പ് : യുഡിഎഫിനും ബിജെപിക്കും കനത്ത തോൽവിയുണ്ടാകും: സ്റ്റീഫൻ ജോർജ്

തിരുവല്ല: പ്രാദേശിക വികസനവും അടിസ്ഥാനസൗകര്യ വിപുലീകരണവും മുഖമുദ്രയാക്കിയ എൽഡിഎഫ് ഭരണത്തിനു സ്വീകാര്യത വർധിച്ചതായും ത്രിതല പഞ്ചായത്ത് തെഞ്ഞെടുപ്പിൽ യുഡിഎഫിനും ബിജെപി മുന്നണിക്കും കനത്ത തോൽവിയുണ്ടാകുമെന്ന് കേരള കോൺഗ്രസ് എം സംസ്ഥാന ഓഫീസ് ചാർജ് ജനറൽ സെക്രട്ടറി ഡോ. സ്റ്റീഫൻ ജോർജ്. കേരള കോൺഗ്രസ് -എം ജില്ലാ നേതൃസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പതിറ്റാണ്ടുകളായി കർഷകർ ഉന്നയിച്ചുകൊണ്ടിരുന്ന പ്രധാനപ്പെട്ട ജനകീയ പ്രശ്നങ്ങൾക്ക് കേരള കോൺഗ്രസ് - എം, എൽഡിഎഫിന്‍റെ ഭാഗമായതിനുശേഷം പരിഹാരം കാണാൻ സാധിച്ചുവെന്ന് സ്റ്റീഫൻ ജോർജ് ചൂണ്ടിക്കാട്ടി. ബഫർ സോൺ വിഷയത്തിലെ കൃത്യമായ ഇടപെടലുകളും ഭൂപതിവ് നിയമ ഭേദഗതിയും വന്യജീവി സംരക്ഷണം കേരള ഭേദഗതിയും നിറഞ്ഞ മനസോടെയാണ് ജനം സ്വീകരിച്ചത്. 2026 നിയമസഭാ തെരഞ്ഞെടുപ്പിലും എൽഡിഎഫിന് അനുകൂലമായി കേരളം വിധിയെഴുതുമെന്ന് അദ്ദേഹം പറഞ്ഞു. പത്തനംതിട്ട ജില്ലയിൽ നിലവിലുള്ളതിനേക്കാൾ ഇരട്ടിയിലധികം കേരള കോൺഗ്രസ്-എം ജനപ്രതിനിധികൾ ത്രിതല പഞ്ചായത്ത് തെരഞ്ഞെടുപ്പിൽ വിജയിച്ചവരുമെന്ന് ജില്ലാ പ്രവർത്തകസമ്മേളനം വിലയിരുത്തി. പാർട്ടിക്ക് വിജയിക്കാൻ കഴിയുന്ന സീറ്റുകൾ സംബന്ധിച്ച് എൽഡിഎഫ് നേതൃത്വവുമായി വിശദമായ ചർച്ച നടത്തും. ഓരോ പഞ്ചായത്തിലും പാർട്ടിക്ക് മത്സരിക്കാൻ സാധിക്കുന്ന സീറ്റുകൾ സംബന്ധിച്ച കൃത്യമായ വിവരങ്ങൾ മണ്ഡലം പ്രസിഡന്‍റുമാർ ജില്ലാ നേതൃത്വത്തിന് കൈമാറി. ജില്ലാ പ്രസിഡന്‍റ് സജി അലക്സിന്‍റെ അധ്യക്ഷതയിൽ ഉന്നതാധികാര സമിതി അംഗങ്ങളായ ചെറിയാൻ പോളച്ചിറയ്ക്കൽ, ടി.ഒ. ഏബ്രഹാം, മനോജ് മാത്യു, ജോർജ് ഏബ്രഹാം, ഷെറി തോമസ്, ജേക്കബ് മാമൻ വട്ടശേരിൽ, മാത്യു മരോട്ടിമൂട്ടിൽ, ജേക്കബ് ഇരട്ടപുളിക്കൽ, സോമൻ താമരച്ചാലിൽ, രാജീവ് വഞ്ചിപ്പാലം, കുര്യൻ മടക്കൽ, സാം കുളപ്പള്ളിൽ, അജി പാണ്ടിക്കുടി , സന്തോഷ് കുമാർ, മായ അനിൽകുമാർ , കെ.ആർ. രാജപ്പൻ, ബെന്നി മനക്കൽ, തോമസ് മോദി, എം.സി. ജയകുമാർ, ബോസ് തെക്കേടം, ജോയി ആറ്റുമാലിൽ, കെ. രാജു, ചെറിയാൻ കോശി, ബേബി തേക്കുംമൂട്ടിൽ വള്ളക്കുളം, ഏബ്രഹാം തോമസ്, സജി വിഴലിൽ, പി.കെ. കുര്യൻ, തോമസ് വർഗീസ്, ബഹനാൻ ജോസഫ്, തോമസ്, പോൾ മാത്യു, ശർമിള സുനിൽ, വി.എം. യോഹന്നാൻ, ബാബു പുല്ലേരി കാട്ടിൽ, മനോജ് മടുത്തുമൂട്ടിൽ, ലിറ്റി കൈപ്പള്ളിൽ, ആനി സ്ലീബ, കുഞ്ഞുമോൻ കിങ്കിരേത്ത്, വി.സി. തോമസ്, സൂരജ് ചാത്തങ്കരി, അനില ബാലചന്ദ്രൻ, രാജപ്പൻ നായർ, തോമസ് ജോർജ് തുടങ്ങിയവർ പ്രസംഗിച്ചു.

സെൻട്രൽ ബ്യൂറോ ഓഫ് കമ്യൂണിക്കേഷൻസ് സംയോജിത ബോധവത്കരണ പരിപാടി

തുമ്പമൺ: വികസനപദ്ധതികൾ ജനങ്ങളിലേക്ക് എത്തിക്കുന്നതിന് ബോധവത്കരണ പരിപാടികൾ ശക്തി പകരുന്നുണ്ടെന്ന് ആന്‍റോ ആന്‍റണി എംപി. സെൻട്രൽ ബ്യൂറോ ഓഫ് കമ്യൂണിക്കേഷൻ കോട്ടയം ഓഫീസ് പത്തനംതിട്ട ഐസിഡിഎസ് പ്രോഗ്രാം സെല്ലുമായി ചേർന്ന് സംഘടിപ്പിച്ച സംയോജിത ബോധവത്കരണ പരിപാടിയുടെ ഉദ്ഘാടനം നിർവഹിച്ചു പ്രസംഗിക്കുകയായിരുന്നു അദ്ദേഹം. സർക്കാർ പദ്ധതികളെക്കുറിച്ചും വിവിധ സർക്കാർ വകുപ്പുകളുടെ സേവനങ്ങളെക്കുറിച്ചും നടത്തിയ ബോധവത്കരണ പരിപാടിയിൽ തുമ്പമൺ ഗ്രാമപഞ്ചായത്ത് പ്രസിഡന്‍റ് റോണി സക്കറിയ അധ്യക്ഷത വഹിച്ചു. തുമ്പമൺ വൈസ് പ്രസിഡന്‍റ് തോമസ് ടി. വർഗീസ്, സ്ഥിരം സമിതി അധ്യക്ഷരായ രാജേഷ്, ഗീതാ റാവു, സെൻട്രൽ ബ്യൂറോ ഓഫ് കമ്യൂണിക്കേഷൻ ഫീൽഡ് എക്സിബിഷൻ ഓഫീസർ ജൂണി ജേക്കബ്, ഫീൽഡ് പബ്ലിളിസിറ്റി അസിസ്റ്റന്‍റ് ടി. സരിൻ ലാൽ, ഐസിഡിഎസ് സിഡിപിഒ ജി. അജിത എന്നിവർ പ്രസംഗിച്ചു. ഫയർ ആൻഡ് സേഫ്റ്റി പരിശീലനം, സാമ്പത്തിക സാക്ഷരത, ഓൺലൈൻ തട്ടിപ്പുകൾക്കെതിരായ പ്രതിരോധം, സൈബർ സുരക്ഷാ ക്ലാസുകൾ, ഹോമിയോ മെഡിക്കൽ ക്യാമ്പ് എന്നിവയും നടന്നു. പന്തളം നഗരസഭ, തുമ്പമൺ, പന്തളം തെക്കേക്കര എന്നീ ഗ്രാമപഞ്ചായത്തുകൾ, ഹോമിയോപ്പതി വകുപ്പ്, പത്തനംതിട്ട സൈബർ പോലീസ് സ്റ്റേഷൻ, അടൂർ ഫയർ ആൻഡ് റെസ്‌ക്യൂ സ്റ്റേഷൻ, പത്തനംതിട്ട ലീഡ് ബാങ്ക് എന്നിവയുടെ സഹകരണത്തോടെയാണ് പരിപാടി സംഘടിപ്പിച്ചത്.

പന്തളം തെക്കേക്കരയില്‍ ചിത്രപ്രദര്‍ശനം

പന്തളം: വികസനസദസിന് മുന്നോടിയായി പന്തളം തെക്കേക്കര ഗ്രാമപഞ്ചായത്ത് സംഘടിപ്പിച്ച ചിത്രപ്രദര്‍ശനം ശ്രദ്ധേയമായി. പഞ്ചായത്തിലെ അഞ്ചു വര്‍ഷത്തെ ഭരണനേട്ടം അക്കമിട്ട് നിരത്തിയ ചിത്രപ്രദര്‍ശനം, തദ്ദേശ വകുപ്പ് ഡെപ്യൂട്ടി ഡയറക്ടര്‍ പി. രാജേഷ്കുമാറും വികസനസദസിന് മുന്നോടിയായി നടന്ന യോഗം പഞ്ചായത്ത് പ്രസിഡന്‍റ് എസ്. രാജേന്ദ്ര പ്രസാദും ഉദ്ഘാടനം ചെയ്തു. വൈസ് പ്രസിഡന്‍റ് റാഹേല്‍ അധ്യക്ഷയായി. സര്‍ക്കാരിന്‍റെ സമ്പൂര്‍ണ പാര്‍പ്പിട പദ്ധതിയായ ലൈഫ് മിഷന്‍, ആരോഗ്യമേഖലയില്‍ നടപ്പാക്കിയ ആര്‍ദ്രം, പൊതുവിദ്യാഭ്യാസ യജ്ഞം, മാലിന്യനിര്‍മാര്‍ജനവും ഹരിത സംസ്‌കാരവും ലക്ഷ്യമാക്കി ആവിഷ്‌കരിച്ച ഹരിത കേരളം മിഷന്‍ തുടങ്ങിയവയിലൂടെ കൈവരിച്ച നേട്ടം പ്രദര്‍ശിപ്പിച്ചു. ഗ്രാമപഞ്ചായത്ത് സ്ഥിരം സമിതി അധ്യക്ഷരായ വി.പി. വിദ്യാധരപ്പണിക്കര്‍, പ്രിയ ജ്യോതികുമാര്‍, എന്‍.കെ. ശ്രീകുമാര്‍, സെക്രട്ടറി സി.എസ്. കൃഷ്ണകുമാര്‍, കൃഷി ഓഫീസര്‍ സി. ലാലി, വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

ശബരിമല വിഷയത്തിൽ ശക്തമായ പ്രതിഷേധം തുടരും: അടൂർ പ്രകാശ്

പത്തനംതിട്ട: സിപിഎം എംഎൽഎമാരുടെ സംസ്കാരം എത്രമാത്രമാണെന്ന് അവരുടെ വാക്കുകളിൽനിന്ന് മനസിലാകുമെന്ന് യുഡിഎഫ് സംസ്ഥാന കൺവീനർ അടൂർ പ്രകാശ്. ഇന്നലെ നിയമസഭസഭയിൽ നടന്നത് സംസ്കാര ശൂന്യമായ സംഭവങ്ങളാണെന്ന് കൺവീനർ പറഞ്ഞു. സ്പീക്കർ നിഷ്പക്ഷനായി പ്രവർത്തിക്കേണ്ട ആളാണ്. പല അവസരങ്ങളിലും നിയമസഭയിൽ യുഡിഫിന് അവസരം നിഷേധിക്കുന്നു. സ്പീക്കറുടെ പ്രവർത്തനങ്ങൾക്ക് വിലങ്ങിട്ടിരിക്കയാണ്. യുഡിഎഫ് ഭരണകാലത്ത് കെ.എം. മാണി ബജറ്റ് അവതരിപ്പിച്ചപ്പോൾ എൽഡിഎഫ് ചെയ്തത് എല്ലാവർക്കും അറിയാം.അത് യു ഡിഎഫ് ചെയ്യില്ല. മുഖ്യമന്ത്രി കാണിച്ചു കൊടുക്കുന്ന പാതയാണ് ബാക്കി എൽഡിഎഫ് എംഎൽഎമാരും സ്വീകരിക്കുന്നത്. അവരെ നിയന്ത്രിക്കാൻ മുഖ്യമന്ത്രി തയാറാകണം. ശബരിമല വിഷയത്തിൽ ശക്തമായ പ്രതിഷേധം തുടരും. നാലു മേഖലാ ജാഥകൾ നടക്കും സ്വർണപ്പാളി വിഷയം കേരളത്തിലെ ജനങ്ങൾക്ക് അറിയാൻ അവകാശുണ്ട്. ആരൊക്കെ സ്വർണപ്പാളി കൊണ്ടുപോയി എന്നറിയാനും ജനങ്ങൾ ആഗ്രഹിക്കുന്നു. യുഡിഎഫിലേക്ക് വരാൻ‍ ഇനിയും ഒരുപാട് ആളുകൾ തയാറായി നിൽക്കുന്നുണ്ട്, അതൊക്കെ പിന്നീട് പറയാം. ചർച്ചകൾ നടക്കുന്നു. സർക്കാരിന്‍റെ തെറ്റായ നയം പുറത്തു കൊണ്ടുവരിക എന്നതാണ് പ്രതിപക്ഷ എംഎൽഎമാരുടെ ധർമം. വെൽഫെയർ പാർട്ടി മുന്നണി പ്രവേശനവും അദ്ദേഹം തള്ളിയില്ല. എൽഡിഎഫിനൊപ്പം വെൽഫയർ പാർട്ടി നിൽക്കുമ്പോൾ അവർക്ക് പ്രശ്നമില്ലല്ലോ എന്നും അദ്ദേഹം പറഞ്ഞു.

തണ്ണിത്തോട് കുടുംബാരോഗ്യകേന്ദ്രത്തിൽ ഐപി വാർഡുകൾ തുറക്കണം

കോന്നി: തണ്ണിത്തോട് സർക്കാർ ആശുപത്രിയിൽ ഐപി വാർഡുകൾ തുറക്കണമെന്ന ആവശ്യം ശക്തമായി. ഇവിടെ കിടത്തിച്ചികിത്സ നിലച്ചിട്ട് നാളേറെയായെങ്കിലും തുടർനടപടികൾ ഉണ്ടായിട്ടില്ല. തണ്ണിത്തോട് തേക്കുതോട് വനാന്തര മലയോര മേഖലയിലെ ഏക ചികിത്സാകേന്ദ്രമെന്ന പരിഗണന നൽകി ഇവിടെ കിടത്തിച്ചികിത്സ ആരംഭിക്കണമെന്നാണ് നാട്ടുകാരുടെ ആവശ്യം. രാവിലെ തുടങ്ങുന്ന ഒപി വിഭാഗം ഉച്ചയോടെ നിർത്തും. ഉച്ചകഴിഞ്ഞാൽ ചികിത്സയ്ക്കായി ഉൾപ്രദേശങ്ങളിൽനിന്ന് കിലോമീറ്ററുകൾ സഞ്ചരിച്ച് കോന്നിയിലെത്തേണ്ട സ്‌ഥിതിയാണ്. മറ്റു ചികിത്സാ സൗകര്യങ്ങളും തണ്ണിത്തോട്ടിൽ നിലവിലില്ല. ഇവിടെ മെച്ചപ്പെട്ട ചികിത്സാകേന്ദ്രമുണ്ടായാൽ ചിറ്റാർ സീതത്തോട് മേഖലകളിലെ ജനങ്ങൾക്കും ആശ്വാസമാകും. ഇവിടെ ഒപി വൈകുന്നേരം വരെയാക്കണമെന്നത് ഏറെക്കാലമായുള്ള ആവശ്യമാണ്. ആശുപത്രിയിൽ നഴ്സിംഗ് അസിസ്റ്റന്‍റ്, അറ്റൻഡർ ഗ്രേഡ് 2 എന്നിവരുടെ ഒഴിവും നികത്തിയിട്ടില്ല. സർക്കാരിന്‍റെ ആർദ്രം പദ്ധതിയിൽ 2019-ലാണ് പ്രാഥമികാരോഗ്യകേന്ദ്രത്തെ കുടുംബാരോഗ്യ കേന്ദ്രമാക്കി ഉയർത്തിയത്. ഇതോടെ രാവിലെ 9 മുതൽ 6 വരെ ഡോക്ടർമാരുടെ സേവനം ലഭിക്കേണ്ടതാണ്. എന്നാൽ, തുടക്കത്തിൽ വളരെക്കുറച്ചു കാലം മാത്രമാണ് വൈകുന്നേരം വരെ ഡോക്ടറുടെ സേവനം ലഭിച്ചത്. നാലു ഡോക്ടർമാർ വേണ്ട സ്ഥാനത്ത് ഒരു താത്കാലിക ഡോക്‌ടർ ഉൾപ്പെടെ മൂന്നുപേർ മാത്രമാണുള്ളത്. ഓരോ കാലത്തും ജീവനക്കാരുടെയും ഡോക്ടർമാരുടെയും കുറവു കാരണം ഒപി സേവനം ഉച്ചവരെ മാത്രമാണ് ലഭിക്കുന്നത്. ആശുപത്രിയിൽ കൂടുതൽ സൗകര്യങ്ങൾ ഒരുക്കി കുട്ടികൾക്കും സ്ത്രീകൾക്കും പ്രത്യേക പരിഗണന ലഭിക്കുന്ന കേന്ദ്രമാക്കണമെന്ന ആവശ്യവും ഉയർന്നിട്ടുണ്ട്. ചിക്കുൻഗുനിയ വ്യാപകമായിരുന്ന സമയത്ത് ഇത്രയേറെ അടിസ്ഥാനസൗകര്യമില്ലാതിരുന്നിട്ടും പ്രാഥമികാരോഗ്യ കേന്ദ്രമായിരുന്ന ഇവിടെ കിടത്തിച്ചികിത്സ നടത്തിയിരുന്നതായി നാട്ടുകാർ ചൂണ്ടിക്കാണിക്കുന്നു. വനമേഖലകളാൽ ചുറ്റപ്പെട്ടു കിടക്കുന്ന ഇവിടെ വന്യമൃഗങ്ങളുടെ ആക്രമണങ്ങളിൽ പെടുന്നവരും പാമ്പുകടി ഏൽക്കുന്നവരും ഏറെയാണ്. ഹൃദ്രോഗബാധിതരായി അടിയന്തര ചികിത്സ വേണ്ടവരും ഇവിടെ ഏറെയുണ്ട്. തണ്ണിത്തോട്ടിൽ മെച്ചപ്പെട്ട ചികിത്സാകേന്ദ്രം എന്ന ആവശ്യത്തിൽ ഉറച്ചു നിൽക്കുമെന്നും ഇതിനായി സർക്കാർ തലത്തിൽ ശ്രമങ്ങൾ തുടങ്ങിയതായും ബ്ലോക്ക് പഞ്ചായത്ത് അംഗം പ്രവീൺ പ്ലാവിളയിൽ പറഞ്ഞു. തണ്ണിത്തോട്ടിൽ മെച്ചപ്പെട്ട ചികിത്സ എന്ന ആവശ്യവുമായി പ്രചാരണ പരിപാടികൾ തുടങ്ങുമെന്നു നാട്ടുകാർ പറഞ്ഞു.

ബേക്ക് എക്സ്പോയിൽ എഴുനൂറിലധികം സ്റ്റാളുകൾ

പത്തനംതിട്ട: ബേക്കറി - കൺഫെക്‌ഷണറി മേഖലകളിലെ ഏറ്റവും പുതിയ ട്രെൻഡുകളും സാങ്കേതികവിദ്യകളും ഒരിടത്തുതന്നെ അണിനിരത്തുന്ന ബേക്ക് എക്സ്പോ 10, 11, 12 തീയതികളിൽ കൊച്ചി അഡ്‌ലക്സ് ഇന്‍റർനാഷണൽ കൺവൻഷൻ ആൻഡ് എക്സിബിഷൻ സെന്‍ററിൽ നടക്കുമെന്ന് ബേക്കേഴ്സ് അസോസിയേഷൻ കേരള ഭാരവാഹികൾ പത്രസമ്മേളനത്തിൽ അറിയിച്ചു. ജോയ് ആലുക്കാസ് ഗ്രൂപ്പ് ചെയർമാൻ ജോയി ആലുക്കാസ് എക്സിബിഷൻ ഉദ്ഘാടനം ചെയ്യും. മൂന്നു ദിവസം നീണ്ടുനിൽക്കുന്ന ഈ പ്രദർശനത്തിൽ ഇന്ത്യയിൽനിന്നും വിദേശത്തുനിന്നുമുള്ള 700ലധികം സ്റ്റാളുകൾ ഉണ്ടായിരിക്കും. ബേക്കറി ഉടമകൾ, ജീവനക്കാർ, ഷെഫുകൾ, വിതരണക്കാർ, വ്യവസായികൾ, മൊത്ത വിതരണക്കാർ, റീട്ടെയിലർമാർ എന്നിവർക്ക് കൂടിച്ചേരാനും പുതിയ ബിസിനസ് പങ്കാളിത്തം കണ്ടെത്താനും എക്സ്പോയിലൂടെ അവസരം ലഭിക്കും. സംസ്ഥാന സെക്രട്ടറി സുരേഷ് ബാബു, ജില്ലാ പ്രസിഡന്‍റ് വി. എം. സാദിഖ്‌, ജില്ലാ ജനറൽ സെക്രട്ടറി ഇ. റിനീഷ്, ട്രഷറര്‍ കെ. എം. സാമുവേൽ, കോ-ഓർഡിനേറ്റർ എ.എം. റാഫി എന്നിവർ പത്രസമ്മേളനത്തിൽ പങ്കെടുത്തു.

കോന്നിയിലെ പട്ടയപ്രശ്നം പരിഹരിക്കാൻ തീരുമാനം

കോന്നി: മണ്ഡലത്തിലെ മുഴുവൻ കൈവശക്കാരുടെയും പട്ടയപ്രശ്നങ്ങൾ പരിഹരിക്കാൻ ലാൻഡ് റവന്യു ജോയിന്‍റ് കമ്മീഷണറുടെ നേതൃത്വത്തിൽ പ്രത്യേക സംവിധാനം ഏർപ്പെടുത്തിയാതായി റവന്യു മന്ത്രി കെ. രാജൻ നിയമസഭയിൽ അറിയിച്ചു. അഡ്വ. കെ.യു. ജനീഷ് കുമാർ എംഎൽഎ അവതരിപ്പിച്ച സബ് മിഷനു മറുപടിയായാണ് മന്ത്രി ഇക്കാര്യം അറിയിച്ചത്. കോന്നിത്താഴം വില്ലേസിൽ തണ്ണിത്തോട് പഞ്ചായത്തിൽ (10-ാ വാർഡ്) ഉൾപ്പെട്ട എലിമുള്ളുംപ്ലാക്കൽ പ്രദേശവും കോന്നി പഞ്ചായത്തിൽ ആറാം വാർഡ് ഉൾപ്പെട്ട ആവോലിക്കുഴി, ഞള്ളൂർ പ്രദേശങ്ങളും ആണ് ഫുഡ് പ്രൊഡക്‌ഷൻ ഏരിയയിൽ ഉൾപ്പെട്ടത്. ഫുഡ് പ്രൊഡക്‌ഷൻ ഏരിയയ്ക്കുവേണ്ടി വനം വകുപ്പ്, മുൻപ് റവന്യു വകുപ്പിനു നൽകിയ കുമരംപേരൂർ ഫോറസ്റ്റ് ഡിവിഷനിൽപ്പെട്ട ആവോലിക്കുഴി, എലിമുള്ളുംപ്ലാക്കൽ എന്നീ പ്രദേശങ്ങളിലെ 333.1659 ഹെക്ടർ സ്ഥലം ഇതിൽ ഉൾപ്പെടും. പട്ടയപ്രശ്നങ്ങൾ രണ്ടു തരം ഗ്രോ മോർ ഫുഡിനുവേണ്ടി ഡിസ് -റിസർവ് ചെയ്ത മേഖലയിൽ പട്ടയം ലഭിക്കാത്ത ആളുകളുടെ പ്രശ്നങ്ങൾ: അതിൽ ഡിജിറ്റൽ സർവേ പൂർത്തിയാകുന്ന സമയത്ത് നോട്ടിഫിക്കേഷനിൽ ഉൾപ്പെടുന്ന കൈവശക്കാർക്ക് അവരുടെ അർഹത പരിഗണിച്ചു പട്ടയം നൽകാനാണ് തീരുമാനം. കുടിയേറ്റ കർഷകർ കൃഷിചെയ്തു ജീവിച്ചുവരുന്ന, എന്നാൽ ഡിസ്-റിസർവ് നോട്ടിഫിക്കേഷൻ പ്രസിദ്ധീകരിക്കാത്തതും വനത്തിന്‍റെ ജണ്ടയ്ക്ക് പുറത്തുള്ളതുമായ പ്രദേശങ്ങളിൽ ഭൂമി കൈവശം വച്ച് വരുന്നവരുടെ പട്ടയപ്രശ്നങ്ങൾ: കൈവശക്കാർക്കു പട്ടയം നൽകാൻ കേന്ദ്രാനുമതിക്കായി പത്തനംതിട്ട ജില്ലയിലെ കോന്നി, റാന്നി, മല്ലപ്പള്ളി എന്നീ താലൂക്കുകളിൽനിന്നായി ആകെ 1970.04 ഹെക്ടർ വനഭൂമി പരിവേഷ് പോർട്ടൽ മുഖേന സമർപ്പിച്ചിട്ടുണ്ട്. അതിൽ കോന്നി താലൂക്കിലെ ചിറ്റാർ, സീതത്തോട്, കോന്നിത്താഴം, അരുവാപ്പുലം, കലഞ്ഞൂർ, തണ്ണിത്തോട് എന്നീ വില്ലേജുകളിലായി ആകെ 5286 കൈവശങ്ങളും 1642.166 ഹെക്ടറും ഉൾപ്പെട്ടിട്ടുണ്ട്. 1977-നു മുൻപുള്ള കുടിയേറ്റമാണ് എന്നതിനുള്ള സർക്കാർ വേരിഫിക്കേഷൻ രേഖകൾ, റിമോട്ട് സെൻസിംഗ് മാപ്പ്, ജോയിന്‍റ് റിപ്പോർട്ടിനോടൊപ്പം ഇതിലേക്കായുള്ള നടപടിക്രമം മാനദണ്ഡങ്ങൾ എന്നിവ കൂടി നൽകണമെന്ന് കേന്ദ്ര പരിസ്ഥിതി കാലാവസ്ഥാ വ്യതിയാന വകുപ്പ് അറിയിച്ചിട്ടുണ്ട്. ലഭ്യമായ രേഖകൾ അഡീഷണൽ പ്രിൻസിപ്പൽ ചീഫ് കൺസർവേറ്റർ ഓഫ് ഫോറസ്റ്റിനു ജില്ലാ കളക്ടർ നൽകുകയും ചെയ്തിട്ടുണ്ട്. മേഖലയിലെ പട്ടയ പ്രശ്നങ്ങൾ പരിഹരിക്കാൻ റവന്യൂ ജോ കമ്മീഷണറുടെ നേതൃത്വത്തിലാണ് പ്രത്യേക സംവിധാനം.

വികസനസദസിന് ഇന്നു തുടക്കം

പത്തനംതിട്ട: നവകേരള നിര്‍മിതിയെ സംബന്ധിക്കുന്ന ജനകീയ കാഴ്ചപ്പാടുകളും ആശയങ്ങളും സമാഹരിക്കുന്നതിന് തദ്ദേശ സ്വയംഭരണ സ്ഥാപനങ്ങള്‍ സംഘടിപ്പിക്കുന്ന വികസനസദസിന് ജില്ലയില്‍ ഇന്നു തുടക്കം. ജില്ലാതല ഉദ്ഘാടനം രാവിലെ 10ന് പന്തളം തെക്കേക്കര ഗ്രാമപഞ്ചായത്ത് ജനകീയാസൂത്രണ സില്‍വര്‍ ജൂബിലി ഹാളില്‍ ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ നിര്‍വഹിക്കും. ഗ്രാമപഞ്ചായത്ത് പ്രസിഡന്‍റ് എസ്. രാജേന്ദ്രപ്രസാദ് അധ്യക്ഷനാകും. സര്‍ക്കാരിന്‍റെയും ഗ്രാമപഞ്ചായത്തുകളുടെയും വികസനനേട്ടം അവതരിപ്പിച്ച് പൊതുജനാഭിപ്രായം സ്വീകരിക്കുകയും ഭാവിയിലേക്കുള്ള ആശയവും നിര്‍ദേശവും കണ്ടെത്തുകയുമാണ് വികസന സദസിന്‍റെ ലക്ഷ്യം. ജില്ലയിലെ എല്ലാ ഗ്രാമപഞ്ചായത്തുകളിലും നഗരസഭകളിലും വികസന സദസ് സംഘടിപ്പിക്കും. സര്‍ക്കാരിന്‍റെ കഴിഞ്ഞ 10 വര്‍ഷത്തെ വികസനനേട്ടം വീഡിയോയിലൂടെ സദസില്‍ പ്രദര്‍ശിപ്പിക്കും. പഞ്ചായത്ത് സെക്രട്ടറിമാര്‍ ക്ഷേമപ്രവര്‍ത്തനങ്ങളുടെ റിപ്പോര്‍ട്ട് അവതരിപ്പിക്കും. തുടര്‍ന്ന് ചര്‍ച്ചകളിലൂടെ ലഭിക്കുന്ന ആശയങ്ങള്‍ ക്രോഡീകരിച്ച് ഭാവി പ്രവര്‍ത്തനം ആസൂത്രണം ചെയ്യും. സര്‍ക്കാര്‍ സേവനങ്ങളുടെ ഗുണഭോക്താക്കള്‍ ഉള്‍പ്പെടെ പങ്കെടുക്കും. തദ്ദേശ സ്ഥാപനങ്ങള്‍ കൈവരിച്ച നേട്ടങ്ങളും ഭാവിയില്‍ നടപ്പാക്കേണ്ട പദ്ധതിയും സദസില്‍ ചര്‍ച്ച ചെയ്യും. പ്രാദേശിക വികസന ഭാവി വിഭാവനം ചെയ്യുകയാണ് ഉദ്ദേശ്യം. പന്തളം തെക്കേക്കരയ്ക്ക് പുറമേ മൈലപ്ര, കുളനട ഗ്രാമപഞ്ചായത്തുകളിലും വികസനസദസ് ഇന്ന് അരങ്ങേറും. മൈലപ്ര കൃഷിഭവന്‍ ഓഡിറ്റോറിയത്തില്‍ രാവിലെ പത്തിന് കെ.യു. ജനീഷ് കുമാര്‍ എംഎല്‍എ ഉദ്ഘാടനം നിര്‍വഹിക്കും. ഗ്രാമപഞ്ചായത്ത് പ്രസിഡന്‍റ് രജനി ജോസഫ് അധ്യക്ഷയാകും. ഗ്രാമപഞ്ചായത്ത് സെക്രട്ടറി കെ.കെ. ദിലീന റിപ്പോര്‍ട്ട് അവതരിപ്പിക്കും. ജില്ലാ പഞ്ചായത്ത് അംഗം ജിജോ മോഡി, ത്രിതല പഞ്ചായത്തംഗങ്ങള്‍ തുടങ്ങിയവര്‍ പങ്കെടുക്കും. കുളനടയില്‍ ഗ്രാമപഞ്ചായത്ത് ഹാളില്‍ രാവിലെ 10.30ന് സദസ് ആരംഭിക്കും.

യൂത്ത് ഫ്രണ്ട് മാർച്ച് നടത്തി

തിരുവല്ല: പൊന്നന്പലമായിരുന്ന ശബരിമലയെ ചെന്പ് അന്പലമാക്കി മാറ്റിയ മായാജാലമാണ് എൽഡിഎഫ് സർക്കാരിന്‍റെ ഭരണനേട്ടമെന്ന് യൂത്ത് ഫ്രണ്ട് ജില്ലാ കമ്മിറ്റി. ശബരിമലയിലെ കൊള്ളയുടെ പേരിൽ ദേവസ്വം മന്ത്രിയും ദേവസ്വം ബോർഡും രാജിവയ്ക്കണമെന്നും യൂത്ത് ഫ്രണ്ട് ആവശ്യപ്പെട്ടു. ഇതേ ആവശ്യമുന്നയിച്ച് തിരുവല്ല ദേവസ്വം അസിസ്റ്റന്‍റ് കമ്മീഷണർ ഓഫീസിലേക്കു നടത്തിയ പ്രതിഷേധമാർച്ച് കേരള കോൺഗ്രസ് ജില്ലാ പ്രസിഡന്‍റ് വർഗീസ് മാമ്മൻ ഉദ്ഘാടനം ചെയ്തു. യൂത്ത് ഫ്രണ്ട് ജില്ലാ പ്രസിഡന്‍റ് ബിനു കുരുവിള അധ്യക്ഷത വഹിച്ചു. ഉന്നതാധികാര സമിതി അംഗങ്ങളായ സാം ഈപ്പൻ, ഷിബു പുതുക്കേരി, സക്കറിയ കരുവേലി, സംസ്ഥാന ജനറൽ സെക്രട്ടറി വി.ആർ. രാജേഷ്, ജോമോൻ ജേക്കബ്, സജി കൂടാരത്തിൽ, ഷാനു മാത്യു, ടിന്‍റു മാത്യു, ടിജു ചാക്കോ, ജോസ് തേക്കാട്ടിൽ, മാത്യു മുളമൂട്ടിൽ, ബിജു അലക്സ് മാത്യു, ഫിലിപ്പ് ജോർജ്, ദിലീപ് മത്തായി, ജോർജി മാത്യു, ജോയ് പഴിയാരത്ത്, ഫിജി ഫെലിക്സ് എന്നിവർ പ്രസംഗിച്ചു.

ജില്ലാ ഭക്ഷ്യപരിശോധനാ ലബോറട്ടറി കെട്ടിടം പൂർത്തിയായി

പത്തനംതിട്ട: ജില്ലയ്ക്കു പുതിയ ഭക്ഷ്യപരിശോധനാ ലബോറട്ടറി. പത്തനംതിട്ട നഗരത്തിലെ അണായിപ്പാറയിലാണ് പുതിയ കെട്ടിടം പൂർത്തിയായത്. നിർമാണജോലികൾ ഏറെക്കുറെ പൂർത്തിയായി. അവാസനഘട്ടം മിനുക്കുപണികളാണ് ബാക്കിയുള്ളത്. 11 സെന്‍റ് വസ്തുവിൽ 2022 നവബംറിലാണ് ലാബിന് തറക്കല്ലിട്ടത്. 3.1 കോടി രൂപ ചെലവിൽ മൂന്നു നിലകളിലായാണ് ലാബ് നിർമാണം. കൗൺസിൽ ഫോർ ഫുഡ് റിസർച്ച് ആൻഡ് ഡെവലപ്മെന്‍റിന്‍റെ ഫണ്ടിലാണ് നിർമാണം. കഴിഞ്ഞ സാന്പത്തികവർഷംതന്നെ ലാബ് പൂർത്തിയാക്കാൻ ലക്ഷ്യമിട്ടിരുന്നതാണ്. കെട്ടിടത്തിന്‍റെ ഒന്നാം നിലയിൽ ഓഫീസ്, മൈക്രോ ബയോളജി ലാബ്, സ്റ്റോർ, ശൗചാലയങ്ങൾ എന്നിവ ഉണ്ടാകും. രണ്ടാംനിലയിൽ ലാബും മൂന്നാം നിലയിൽ വിശദ പരിശോധനകൾക്കുള്ള അത്യാധുനിക ഉപകരണങ്ങളും സ്ഥാപിക്കും. ഭക്ഷണവും വെള്ളവും പരിശോധിക്കും ലാബ് വരുന്നതോടെ ജില്ലയ്ക്ക് വിവിധ സൂക്ഷ്മാണു പരിശോധനകൾ, കീടനാശിനി പരിശോധനകൾ എന്നിവ നടത്താൻ മറ്റു സ്ഥലങ്ങളെ ആശ്രയിക്കേണ്ടി വരില്ല. എല്ലാത്തരം ഭക്ഷണസാധനങ്ങളും വെള്ളവും പരിശോധിക്കും. നിലവിൽ ആരോഗ്യവകുപ്പും ഭക്ഷ്യസുരക്ഷാ വകുപ്പും ഭക്ഷണസാധനങ്ങൾ തിരുവനന്തപുരത്തെ ലാബിൽ അയച്ചാണ് പരിശോധിക്കുന്നത്. ജില്ലയിൽനിന്ന് 40 സാമ്പിളുകളെങ്കിലും ഒരു മാസം പരിശോധനയ്ക്കായി അയയ്ക്കുന്നുണ്ട്. ഒരുമാസം വൈകിയാണ് പരിശോധനാഫലം ലഭിക്കുക. പത്തനംതിട്ട മാർക്കറ്റ് റോഡിനു സമീപമുള്ള പഴയ ലാബിൽ കുടിവെള്ള പരിശോധനയ്ക്കുള്ള സൗകര്യം മാത്രമാണുള്ളത്. സൂക്ഷ്മാണു പരിശോധന, കീടനാശിനി പരിശോധനകൾക്ക് മറ്റു ജില്ലകളെയാണ് ആശ്രയിച്ചുവന്നിരുന്നത്. 9 പുതിയ തസ്തികകൾ ടെക്‌നിക്കൽ അസിസ്റ്റന്‍റ്, റിസർച്ച് ഓഫീസർ, ഓഫീസ് അറ്റൻഡർ എന്നിങ്ങനെ മൂന്ന് തസ്തികകളിൽ ഒരാൾ വീതമാണ് നിലവിലെ ലാബിലുള്ളത്. പുതിയ ലാബിലേക്ക് ഒന്പത് പുതിയ നിയമനങ്ങൾ നടത്തിയിട്ടുണ്ട്. അനലിസ്റ്റ്, റിസർച്ച് ഓഫീസർ, രണ്ട് ജൂണിയർ റിസർച്ച് ഓഫീസർ, രണ്ട് ലാബ് അസിസ്റ്റന്‍റ്, കെമിസ്റ്റ് എന്നിങ്ങനെയാണ് പുതിയ നിയമനം. മുപ്പതിലധികം ജീവനക്കാർക്ക് ജോലി ചെയ്യാൻ കഴിയുന്ന രീതിയിലാണ് ലാബ് ക്രമീകരിച്ചിരിക്കുന്നത്. പരിശോധനയ്ക്കാവശ്യമായ മൈക്രോ ബയോളജി ഉപകരണങ്ങൾ തിരുവനന്തപുരം, എറണാകുളം എന്നിവിടങ്ങളിൽനിന്ന് എത്തിക്കും.

മലങ്കര കാത്തലിക് അസോസിയേഷൻ

തിരുവല്ല: മലങ്കര സുറിയാനി കത്താലിക്കാ സഭയുടെ ദ്വിതീയ മെത്രാപ്പോലീത്ത ആർച്ച്ബിഷപ് ബനഡിക്‌ട് മാർ ഗ്രിഗോറിയോസ് തിരുമേനിയുടെ മുപ്പത്തിയൊന്നാമത് ഓർമപ്പെരുന്നാളിനോടനുബന്ധിച്ച് നാളെ രാവിലെ 10 മുതൽ ഒന്നുവരെ കോട്ടൂർ തുരുത്തേൽ ദിവ്യകാരുണ്യാലയത്തിൽ തിരുവല്ല മേഖലാ മലങ്കര കത്തലിക് അസോസിയേഷന്‍റെ നേതൃത്വത്തിൽ അനുസ്മരണ പ്രഭാഷണവും സമ്മേളനവും മാർ ഗ്രിഗ്രോറിയോസ് മണ്ഡപത്തിൽ പുഷ്പാർച്ചനയും നടത്തും. എംസിവൈഎം അതിഭദ്രാസന ഡയറക്ടർ ഫാ. ചെറിയാൻ കുരിശുംമൂട്ടിൽ അനുഗ്രഹപ്രഭാഷണം നടത്തും. തുടർന്ന് അനുസ്‌മരണ സമ്മേളനം തിരുവല്ല സോഷ്യൽ സർവീസ് സൊസൈറ്റി ഡയറക്ടർ ഫാ. തോമസ് കാഞ്ഞിരത്തിങ്കൽ ഉദ്ഘാടനം ചെയ്യും. ബിജു ജോർജ്, ഫാ. മാത്യു വാഴയിൽ, ജോൺ മാമ്മൻ, ഷിബു ഏബ്രഹാം, റെജി എ.സി., ജെയ്മോൻ, മിനി ഡേവിഡ്, വത്സമ്മ ജോൺ ,എന്നിവർ നേതൃത്വം നൽകും.

ശബരിമല സുരക്ഷായാത്ര സംഘടിപ്പിച്ചു

ശബരിമല: തീര്‍ഥാടനത്തോടനുബന്ധിച്ച് ജില്ലാ കളക്‌ടര്‍ എസ്. പ്രേം കൃഷ്ണന്‍റെ നേതൃത്വത്തില്‍ സുരക്ഷായാത്ര സംഘടിപ്പിച്ചു. നിലയ്ക്കലില്‍നിന്ന് സന്നിധാനം വരെ സുരക്ഷാ ക്രമീകരണം വിലയിരുത്തി. വഴിയിലേക്ക് ചാഞ്ഞുനില്‍ക്കുന്ന മരച്ചില്ലകള്‍ വെട്ടിമാറ്റാന്‍ കളക്ടര്‍ നിര്‍ദേശിച്ചു. മുന്നറിയിപ്പ് ബോര്‍ഡുകള്‍ അതത് സ്ഥലങ്ങളില്‍ ഉറപ്പാക്കണം. ആവശ്യമെങ്കില്‍ പുതിയ ബോര്‍ഡുകള്‍ സ്ഥാപിക്കണം. വഴിയരികിലെ മരത്തടികള്‍ അടിയന്തരമായി മാറ്റണം. തദ്ദേശ- വനം വകുപ്പുകളുടെ നേതൃത്വത്തില്‍ വഴിയിലെ കാട് വെട്ടിത്തെളിക്കും. ശബരിമല പാതയില്‍ തെരുവുവിളക്കുകള്‍ പ്രവര്‍ത്തിക്കുന്നുണ്ടെന്ന് ഉറപ്പു വരുത്തണം. റോഡുകളില്‍ ആവശ്യമെങ്കില്‍ പുതിയ ബാരിക്കേഡുകള്‍ സ്ഥാപിച്ച് അപകടരഹിതമായ സാഹചര്യം സൃഷ്ടിക്കാനും ജില്ലാ കളക്ടര്‍ ആവശ്യപ്പെട്ടു. ജില്ലാ പോലിസ് മേധാവി ആര്‍. ആനന്ദ്, തിരുവല്ല സബ് കളക്ടര്‍ സുമിത് കുമാര്‍ താക്കൂര്‍, റാന്നി ഡിഎഫ്ഒ ആയുഷ് കുമാര്‍ കോറി, ഡെപ്യൂട്ടി കളക്ടര്‍ ആര്‍. രാജലക്ഷ്മി തുടങ്ങിയവര്‍ സുരക്ഷാ യാത്രയില്‍ പങ്കെടുത്തു.

വിളപരിപാലന കേന്ദ്രമൊരുക്കി പ്രമാടം ഗ്രാമപഞ്ചായത്ത്

പ്രമാടം: കര്‍ഷകര്‍ക്ക് കരുതലായി പ്രമാടം ഗ്രാമപഞ്ചായത്ത് കൃഷിഭവനില്‍ വിള ആരോഗ്യപരിപാലന കേന്ദ്രം. കാര്‍ഷിക വിളകളുടെ വളര്‍ച്ചയും ആരോഗ്യവും മെച്ചപ്പെടുത്തുകയെന്ന ലക്ഷ്യത്തോടെയാണ് പഞ്ചായത്ത് കേന്ദ്രം ആരംഭിച്ചത്. വിളകളെ ബാധിക്കുന്ന കീടങ്ങളെയും രോഗങ്ങളെയും കണ്ടെത്തി ശാസ്ത്രീയ പരിഹാരം കര്‍ഷകര്‍ക്ക് നല്‍കുന്നതിനുള്ള സജീകരണങ്ങളാണുള്ളത്. വിളരോഗങ്ങള്‍, മൂലകങ്ങളുടെ അപര്യാപ്തത എന്നിവമൂലം വിളകള്‍ക്കുണ്ടാകുന്ന ആരോഗ്യപ്രശ്‌നങ്ങളുടെ കാരണം കണ്ടെത്തി കൃത്യമായ നിര്‍ദേശങ്ങള്‍ കേന്ദ്രം വഴി കര്‍ഷകര്‍ക്ക് ലഭ്യമാക്കും. ആവശ്യമെങ്കില്‍ ജൈവരാസ കീടനാശിനികളും സൗജന്യമായി നല്‍കും. എല്ലാ വെള്ളിയാഴ്ചയുമാണ് ആരോഗ്യകേന്ദ്രത്തിന്‍റെ പ്രവര്‍ത്തനം. മറ്റു ദിവസങ്ങളില്‍ വിളകളുടെ പ്രശ്‌നങ്ങളുമായി സമീപിക്കുന്ന കര്‍ഷകരുടെ കൃഷിയിടങ്ങളില്‍ നേരിട്ടെത്തി പരിശോധന നടത്തി ആവശ്യമായ മാര്‍ഗനിര്‍ദേശങ്ങളും ആരോഗ്യകേന്ദ്രത്തില്‍നിന്ന് നല്‍കും. ജൈവകീടനാശിനികള്‍ക്കു പ്രാധാന്യം നല്‍കിയാണ് വിളകള്‍ക്ക് ചികിത്സ നല്‍കുന്നത്. കര്‍ഷകര്‍ക്ക് വിളകളുടെ ഉത്പാദനക്ഷമത വര്‍ധിപ്പിക്കാനും വരുമാനം കൂട്ടാനും വിളപരിപാലനകേന്ദ്രം സഹായമാകും. വിളകളുടെ ക്രമീകരണം, തെരഞ്ഞെടുപ്പ്, വിത്ത് പരിപാലനം, ജലസേചനം, വളപ്രയോഗം, കളനിയന്ത്രണം എന്നിവ സംബന്ധിച്ച് കേന്ദ്രത്തിലൂടെ ബോധവത്കരണം നല്‍കും. മണ്ണ് സംരക്ഷണത്തിനും മണ്ണൊലിപ്പ് തടയുന്നതിനും ആവശ്യമായ നിര്‍ദേശങ്ങളും നല്‍കും. വിളകളുടെ രോഗലക്ഷണങ്ങളുമായെത്തുന്ന കര്‍ഷകര്‍ക്ക് ശാസ്ത്രീയമായ കാരണം കണ്ടെത്തി പരിഹരിക്കാന്‍ സാധിക്കാത്ത വിഷയങ്ങള്‍ ജില്ലാതലത്തില്‍ അറിയിക്കാനും സൗകര്യമുണ്ട്.

വികസനസദസുകൾ നടത്തിയില്ലെങ്കിൽ പദ്ധതികൾക്ക് അംഗീകാരമില്ല?

പത്തനംതിട്ട: സംസ്ഥാന സർക്കാരിന്‍റെ വികസന നേട്ടങ്ങൾ ജനങ്ങളിലെത്തിക്കുകയെന്ന ലക്ഷ്യത്തോടെ പ്രഖ്യാപിച്ച വികസന സദസുകൾക്കു ഫണ്ട് നീക്കിവച്ചില്ലെങ്കിൽ പദ്ധതിക്ക് അംഗീകാരം നൽകുന്നില്ലെന്ന്. ജില്ലാ ആസൂത്രണസമിതിയിൽ ഇത്തരത്തിൽ പദ്ധതി തടയപ്പെട്ടതായി യുഡിഎഫ് ഭരണത്തിലുള്ള പഞ്ചായത്തു പ്രസിഡന്‍റുമാർ പരാതിപ്പെട്ടു. തദ്ദേശ തെരഞ്ഞെടുപ്പ് പ്രഖ്യാപിക്കുന്നതിനു മുന്പായി പഞ്ചായത്ത്, നഗരസഭ തലങ്ങളിൽ വികസന സദസുകൾ നടത്തണമെന്നാണ് നിർദേശം. എന്നാൽ, യുഡിഎഫ് ഭരിക്കുന്ന തദ്ദേശ സ്ഥാപനങ്ങൾ ഇതിനു തയാറായിട്ടില്ല. ഇതേത്തുടർന്ന് വികസന സദസുകൾക്കു ഫണ്ട് നീക്കിവയ്ക്കാത്ത തദ്ദേശ സ്ഥാപനങ്ങളുടെ പദ്ധതികൾ ജില്ലാ ആസൂത്രണസമിതിയിൽ തടയപ്പെട്ടു. പദ്ധതി വിഹിതം ചെലവഴിക്കുന്നതിൽ ഏറെ പിന്നാക്കം നിൽക്കുന്ന ജില്ലയിൽ പദ്ധതികൾ സമയബന്ധിതമായി അംഗീകരിക്കാതെ വരുന്നതും പ്രശ്നമാകുകയാണ്. പ്രതിരോധിക്കുമെന്ന് കോൺഗ്രസ് വികസനസദസുകൾ സംഘടിപ്പിച്ചില്ലെന്ന പേരിൽ പദ്ധതികൾ തള്ളിക്കളയാനുള്ള ജില്ലാ ആസൂത്രണസമിതിയുടെ നീക്കത്തെ ശക്തമായി നേരിടുമെന്നു കോൺഗ്രസ്. തദ്ദേശ തെരഞ്ഞെടുപ്പ് നടപടി നടന്നുവരവേ വികസന സദസ് പ്രഹസനമാണ്. കഴിഞ്ഞ അഞ്ചു വർഷമായി എൽഡിഎഫ് നേതൃത്വം കൊടുത്ത ത്രിതല ഭരണസംവിധാനം ജില്ലയിൽ പരാജയമായിരുന്നെന്ന് കോൺഗ്രസ് പത്തനംതിട്ട ബ്ലോക്ക് കമ്മിറ്റി പ്രസിഡന്‍റ് ജെറി മാത്യു സാം കുറ്റപ്പെടുത്തി. ‌ജില്ലാ പഞ്ചായത്ത് ക്രെഡിറ്റ് അവകാശപ്പെട്ട കൊടുമൺ റൈസ് മില്ല് പൂട്ടി. കുന്നന്താനത്തെ പ്ലാസ്റ്റിക് ഫാക്ടറിയുമായി ബന്ധപ്പെട്ട് അഴിമതി ആരോപണമുണ്ട്. മെഷീനുകളുടെ ഗുണമേന്മയില്ലാത്തത് പ്രതിസന്ധിയാകും. കുരുമുളക് പദ്ധതിയടക്കം ജില്ലാ പഞ്ചായത്ത് പദ്ധതികൾ പാഴായി. ഇതെല്ലാം ജനങ്ങളിൽനിന്നു മറച്ചുപിടിക്കാനാണ് വികസന സദസ് നടത്തുന്നത്. രാഷ്‌ട്രീയമായി പദ്ധതികളെ വിലയിരുത്താനുള്ള നീക്കത്തിനെതിരേ ശക്തമായ സമരം സംഘടിപ്പിക്കുമെന്നും ജെറി മാത്യു സാം അറിയിച്ചു.

പദ്ധതി വിഹിതം പെട്ടിയിൽത്തന്നെ : ജില്ലയിൽ ചെലവഴിച്ചത് 17.95 ശതമാനം മാത്രം

പത്തനംതിട്ട: തെരഞ്ഞെടുപ്പിന് ആഴ്ചകൾ മാത്രം ശേഷിക്കേ, ജില്ലയിലെ തദ്ദേശസ്ഥാപനങ്ങൾ ചെലവഴിച്ചത് പദ്ധതി വിഹിതത്തിന്‍റെ 17.95 ശതമാനം തുക മാത്രം. സംസ്ഥാനതലത്തിൽ ആറാം സ്ഥാനത്താണ് ജില്ല. ആകെ വിഹിതത്തിന്‍റെ 20.93 ശതമാനം ചെലവഴിച്ച കൊല്ലം ജില്ലയാണ് സംസ്ഥാനത്ത് ഒന്നാമത്. പാലക്കാടാണ് രണ്ടാമത് (19.88). ജില്ല, ബ്ലോക്ക്, ഗ്രാമപഞ്ചായത്തുകളും നഗരസഭകളും അടക്കം ജില്ലയിൽ മൊത്തം 66 തദ്ദേശ സ്ഥാപനങ്ങളാണുള്ളത്. ഇതിൽ ഏറ്റവും കൂടുതൽ തുക ചെലവഴിച്ചിരിക്കുന്നത് ഇലന്തൂർ ബ്ലോക്ക് പഞ്ചായത്താണ്. 31.75 ശതമാനം. ഏറത്ത് ഗ്രാമ‌പഞ്ചായത്താണ് ജില്ലയിൽ രണ്ടാമത്. തിരുവല്ല നഗരസഭയാണ് ഏറ്റവും പിന്നിൽ. 6.63 ശതമാനം തുക മാത്രമാണ് തിരുവല്ലയിൽ ആറു മാസത്തിനിടെ ചെലവഴിച്ചിരിക്കുന്നത്. ജില്ലാ പഞ്ചായത്ത് 13.56 ശതമാനം തുക മാത്രം ചെലവഴിച്ചു. നഗരസഭ 21.26 ശതമാനം നഗരസഭകളിൽ പത്തനംതിട്ട മുനിസിപ്പാലിറ്റിയാണ് മുന്നിൽ. 21.26 ശതമാനം തുകയാണ് ജില്ലാ ആസ്ഥാനം സ്ഥിതി ചെയ്യുന്ന നഗരസഭ ചെലവിട്ടിരിക്കുന്നത്. ബ്ലോക്ക് അടിസ്ഥാനത്തിൽ ഇലന്തൂർ കഴിഞ്ഞാൽ മല്ലപ്പള്ളിയാണ് കൂടുതൽ പദ്ധതികൾ നടപ്പിലാക്കിയിരിക്കുന്നത് (24.02). മല്ലപ്പള്ളി-24.02, കോന്നി-10.58, പന്തളം-14.88, പുളിക്കീഴ്-15.97, പറക്കോട്-23.18 എന്നിങ്ങനെയാണ് മറ്റ് ബ്ലോക്കുകളുടെ കണക്ക്. ഇനി തെരഞ്ഞെടുപ്പു കാലം പദ്ധതിവിഹിതത്തിൽ കാര്യമായ മുന്നേറ്റം ഇനിയുണ്ടാകില്ലെന്നു തദ്ദേശ സ്ഥാപന അധ്യക്ഷരും പറയുന്നു. നവംബർ, ഡിസംബർ മാസങ്ങളിലായി തെരഞ്ഞെടുപ്പ് നടക്കാനിരിക്കെ, പദ്ധതി നടത്തിപ്പിൽ തദ്ദേശസ്ഥാപനങ്ങൾക്കു വീഴ്ച വന്നുവെന്ന ആക്ഷേപവും ഉയരുന്നുണ്ട്. പകുതി തുക പോലും ചെലവിടാൻ കഴിയാത്തത് ഭരണസമിതികളുടെ അനാസ്ഥമൂലമാണെന്നും ആരോപണം ഉയരുന്നുണ്ട്. എന്നാൽ, ഭരണസമിതികൾ ഇതു തള്ളുകയാണ്. തെരഞ്ഞെടുപ്പ് വർഷത്തിൽ ചെലവഴിക്കുന്ന തുകയിൽ കുറവുണ്ടാകുന്നത് പുതിയ സംഭവമല്ല. മുൻ തവണയും ഇതായിരുന്നു സ്ഥിതി. പദ്ധതി അംഗീകരിക്കുന്നതിലും വിഹിതം ലഭിക്കുന്നതിലും കാലതാമസമുണ്ടായി. സാമ്പത്തികവർഷത്തിന്‍റെ പകുതി പിന്നിടുന്ന ഘട്ടത്തിലാണ് തെരഞ്ഞെടുപ്പ് എത്തുന്നത്. സാധാരണ സാമ്പത്തികവർഷത്തിന്‍റെ അവസാന മാസങ്ങളിലാണ് തുക ചെലവഴിക്കൽ പ്രവൃത്തികൾക്ക് സാധാരണ നിലയിൽ വേഗം കൈവരുന്നത്. ഇത്തവണ തെരഞ്ഞെടുപ്പായതിനാൽ ഏഴ് മാസം മാത്രമാണ് ലഭിക്കുക. പദ്ധതി വിഹിതം: മുന്നിലുള്ളവർ ഇലന്തൂർ ബ്ലോക്ക് പഞ്ചായത്ത്- 31.75 ഏറത്ത് പഞ്ചായത്ത് - 31.23 എനാദിമംഗലം പഞ്ചായത്ത്-30.22 കടമ്പനാട് പഞ്ചായത്ത്-29.91 റാന്നി-28.49 പിന്നിൽ തിരുവല്ല നഗരസഭ-6.63 ചിറ്റാർ പഞ്ചായത്ത്-7.75 നിരണം പഞ്ചായത്ത്-9.05 കോന്നി ബ്ലോക്ക് പഞ്ചായത്ത്- 10.58 പന്തളം നഗരസഭ-11.22 നഗരസഭകൾ പത്തനംതിട്ട- 21.26 അടൂർ-14.56 പന്തളം-11.22 തിരുവല്ല-6.63.

മല്ലപ്പള്ളി ബ്ലോക്ക് പഞ്ചായത്ത് ഐസിഡിഎസ് രജത ജൂബിലി ആഘോഷം

മല്ലപ്പള്ളി: ബ്ലോക്ക് പഞ്ചായത്ത് ഐസിഡിഎസ് രജത ജൂബിലി ആഘോഷം നിറവ് 2025, 11നു രാവിലെ 9.30 മുതൽ മല്ലപ്പള്ളി സെന്‍റ് ജോൺസ് ബഥനി ഓർത്തഡോക്സ് പള്ളി ഓഡിറ്റോറിയത്തിൽ നടക്കും. 9.30 ന് വിളംബര ഘോഷയാത്ര മല്ലപ്പള്ളി സെൻട്രൽ ജംഗ്ഷനിൽ നിന്നും ആരംഭിക്കും. തുടർന്ന് കലാപരിപാടികൾ, സ്നേഹവിരുന്ന്. ഉച്ചകഴിഞ്ഞ് മൂന്നിന് പൊതുസമ്മേളനത്തിൽ മല്ലപ്പള്ളി ബ്ലോക്ക് പഞ്ചായത്ത് പ്രസിഡന്‍റ് ബാബു കൂടത്തിൽ അധ്യക്ഷത വഹിക്കും. ആന്‍റോ ആന്‍റണി എംപി ര‌ജത ജൂബിലി ഉദ്ഘാടനം ചെയ്യും. 25 അങ്കണവാടികൾ സ്‌മാർട്ട് അങ്കണവാടികളായി നവീകരിക്കുന്ന പ്രവൃത്തികളുടെ ഉദ്ഘാടനം മാത്യു ടി. തോമസ് എംഎൽഎ നിർവഹിക്കും. ഭിന്നശേഷി ഡയറക്ട‌റിയുടെ പ്രകാശനം പ്രമോദ് നാരായൺ എംഎൽഎ നിർവഹിക്കും. പത്തനംതിട്ട ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം , വനിതാ ശിശു വികസന വകുപ്പ് ജില്ലാ ഓഫീസർ കെ.വി. ആശാമോൾ എന്നിവർ സന്ദേശം നൽകും.

റാന്നിയിലെ നിർമാണ ജോലികൾ ടെൻഡർ ചെയ്തു

റാന്നി: നിയോജക മണ്ഡലത്തിലെ വിവിധ പ്രവൃത്തികൾ ടെൻഡർ ചെയ്തതായി പ്രമോദ് നാരായൺ എംഎൽഎ പറഞ്ഞു. നാല് അങ്കണവാടി കെട്ടിടങ്ങൾ, രണ്ട് റോഡുകൾ, 14 മിനി മാസ്റ്റ് ലൈറ്റുകൾ എന്നിവയുടെ 1.12 കോടി രൂപയുടെ നിർമാണ പ്രവൃത്തികളാണ് ടെൻഡർ ചെയ്തിരിക്കുന്നത്. എംഎൽഎയുടെ ആസ്തി വികസന ഫണ്ട് പദ്ധതിയിൽ ഉൾപ്പെടുത്തിയാണ് ഇവയ്ക്കുള്ള പണം അനുവദിച്ചിരിക്കുന്നത്. അങ്കണവാടികൾക്ക് 16 ലക്ഷം രൂപ വീതം 64 ലക്ഷം രൂപയും റോഡുകൾക്ക് പത്ത് ലക്ഷം രൂപ വീതം 20 ലക്ഷം രൂപയും മിനിമാസ്റ്റ് ലൈറ്റുകൾക്ക് 28 ലക്ഷം രൂപയുമാണ് വകയിരുത്തിയിരിക്കുന്നത്. അയിരൂർ പഞ്ചായത്ത് വാർഡ് 12 അങ്കണവാടി (നമ്പർ 76) കെട്ടിടം, വാർഡ് 13 അങ്കണവാടി (നമ്പർ 75 ) കെട്ടിടം, റാന്നി പഞ്ചായത്ത് പുതുശേരിമല അങ്കണവാടി (നമ്പർ 14) കെട്ടിടം,വെച്ചൂച്ചിറ പഞ്ചായത്ത് എണ്ണൂറാം വയൽ അങ്കണവാടി കെട്ടിടം കൊറ്റനാട് പഞ്ചായത്തിലെ കരിയംപ്ലാവ് - ചുട്ടു മൺറോഡ് , റാന്നി പഞ്ചായത്തിലെ വെട്ടിമേപ്രത്തുപടി - കല്ലുങ്കൽ പടി - കുഴിമണ്ണിൽ പടി - ചിറ്റേടത്ത് പടി റോഡ് എന്നിവയ്ക്കാണ് ഫണ്ട് അനുവദിച്ചിരിക്കുന്നത്.

കളിയങ്കണം പദ്ധതിക്ക് റാന്നി ബിആർസിയിൽ തുടക്കം

റാന്നി: സമഗ്ര ശിക്ഷ കേരളം സ്റ്റാർസ് 2024-25 പദ്ധതിയുടെ ഭാഗമായി പ്രീ-പ്രൈമറി, 1, 2 ക്ലാസുകളിലെ കുട്ടികളുടെ ശാരീരിക മാനസിക വികസനത്തിനു വേണ്ടി ആവിഷ്കരിച്ച കളിയങ്കണം (കിഡ്സ് അത്‌ലറ്റിക്സ്) പദ്ധതിയുടെ പ്രാരംഭ പ്രവർത്തനങ്ങൾക്ക് റാന്നിയിൽ തുടക്കമായി. സ്പോർട്സ് കേരള ഫൗണ്ടേഷനുമായി സഹകരിച്ചാണ് പദ്ധതി നടപ്പാക്കുന്നത്. ബിപിസി ഷാജി എ. സലാം ഉദ്ഘാടനം ചെയ്തു. ഹെഡ്മാസ്റ്റേഴ്സ് ഫോറം കൺവീനർ സുരേഷ് വർക്കി അധ്യക്ഷത വഹിച്ചു. സി.പി. സുനിൽ, എസ്. ദീപ്തി, എൻ.എസ്. അനിത അനൂഷ ശശി എന്നിവർ പ്രസംഗിച്ചു. വിവിധ പഞ്ചായത്തുകളിലെ ക്ലസ്റ്റർ റിസോഴ്സ് സെന്‍റർ ചുമതലയുള്ള പ്രഥമാധ്യാപകരായ പി.എസ്. സിനിമോൾ, ജയശ്രീ ദേവി, സി.പി. സുനിൽ, ഷിബി സൈമൺ, റോയ് ജോൺ എന്നിവർ വിവിധ പഞ്ചായത്തിലെ വിദ്യാലയങ്ങൾക്കുള്ള ഉപകരണങ്ങളടങ്ങിയ കിറ്റ് വിതരണം ചെയ്തു. പരിപാടിയിൽ വിവിധ വിദ്യാലയങ്ങളിലെ പ്രഥമാധ്യാപകർ പങ്കെടുത്തു. ഹർഡിൽ, ഫ്ലാറ്റ് റിംഗ്, ബീൻ ബാഗ്, സോക്സർ കോൺ തുടങ്ങിയ എട്ട് ഇനങ്ങൾ അടങ്ങിയ കിറ്റാണ് വിതരണം ചെയ്തത്. ഉപകരണങ്ങൾ കൈകാര്യം ചെയ്യാൻ അധ്യാപകർക്ക് പ്രത്യേക പരിശീലനം നൽകും.

തിലകൻ സ്മാരകവേദി നാടക അവാർഡുകൾ പ്രഖ്യാപിച്ചു

പത്തനംതിട്ട: സാംസ്കാരിക വകുപ്പ്, തിലകൻ സ്‌മാരക വേദി, റാന്നി ഫാസ് എന്നിവയുടെ സംയുക്താഭിമുഖ്യത്തിൽ റാന്നിയിൽ നടന്ന തിലകൻ സ്മാരക സംസ്ഥാന പ്രഫഷണൽ നാടകമത്സരത്തിലെ വിജയികളെ പ്രഖ്യാപിച്ചു. ഒന്നാംസ്‌ഥാനം തിരുവനന്തപുരം അജന്തയുടെ വംശം നാടകത്തിനും രണ്ടാം സ്ഥാനങ്ങൾ ഓച്ചിറ സരിഗയുടെ സത്യമംഗലം ജഗ്ഷനും, കായംകുളം പീപ്പിൾസിന്‍റെ അങ്ങാടിക്കുരുവികൾ എന്നീ നാടകങ്ങൾക്കും ലഭിച്ചു. മികച്ച നാടക രചന വൈക്കം മാളവികയുടെ ജീവിത ത്തിന് ഒരാമുഖം എന്ന നാടകത്തിന്‍റെ രചയിതാവ് മുഹാദ് വെമ്പായം. തിരുവനന്തപുരം അജന്തയുടെ വംശം എന്ന നാടകത്തിലെ സുരേഷ് ദിവാകരൻ മികച്ച സംവിധായകനും അതേ നാടകത്തിലെ ഭീമസേനനായി അഭിനയിച്ച അനിൽ ചെങ്ങന്നൂർ മികച്ച നടനും ഹിഡുംബി എന്ന കഥാ പാത്രത്തെ അവതരിപ്പിച്ച സുനിതാ മനോജ് മികച്ച നടിയുമായി. രണ്ടാമത്തെ നടനായി ജീവിതത്തിന് ഒരാമുഖം എന്ന നാടകത്തിൽ രാജേന്ദ്രൻ എന്ന കഥാപാത്രത്തെ അവതരിപ്പിച്ച പ്രദീപ് മാളവികയെ തെരഞ്ഞെടുത്തു. അവാർഡുകൾ ഈ മാസം പത്തനംതിട്ട പ്രസ്ക്ലബിൽ നടക്കുന്ന ചടങ്ങിൽ വിതരണം ചെയ്യും. തിലകൻ സ്മാരകവേദി ജനറൽ സെക്രട്ടറി കൊടുമൺ ഗോപാലകൃഷ്‌ണൻ, റാന്നി ഫാസ് പ്രസിഡന്‍റ് ബാജി രാധാകൃഷ്‌ണൻ, ഫാസ് സെക്രട്ടറി എസ്. അജിത്ത് എന്നിവർ പത്രസമ്മേളനത്തിൽ പങ്കെടുത്തു.

58 പവൻ സ്വർണം കാണാനില്ലെന്ന്; ആറന്മുള ക്ഷേത്രത്തിൽ ഇന്ന് പരിശോധന

പത്തനംതിട്ട: ആറന്മുള പാർഥസാരഥി ക്ഷേത്രത്തിൽ നിന്നും കാണാതായെന്ന് പറയുന്ന സ്വർണ ഉരുപ്പടികൾ കണ്ടെത്താൻ ഇന്ന് പരിശോധന നടത്തും. വർഷങ്ങൾക്ക് മുൻപ് ക്ഷേത്രത്തിലെ വിഗ്രഹം പൊതിയാൻ സമർപ്പിച്ച 58 പവൻ സ്വർണം കാണുന്നില്ലെന്ന ആരോപണം അയിരൂർ സ്വദേശിയായ രാമചന്ദ്രൻ നായരാണ് ഉന്നയിച്ചത്. 2013 ലാണ് രാമചന്ദ്രൻ നായർ 58 പവൻ സ്വർണ്ണം വഴിപാടായി സമർപ്പിച്ചത്. പാർത്ഥസാരഥി വിഗ്രഹത്തിന്‍റെ കൈ ഭാഗത്തിന് അഭിഷേകത്തിനിടെ കുടം വീണ് പരിക്കുണ്ടായിരുന്നു. ഇത് കെട്ടി പൊതിഞ്ഞുവച്ചിരുന്നുവത്രേ. ഇത് മാറ്റാനായാണ് അദ്ദേഹം തന്ത്രിയുടെ അനുമതി വാങ്ങി സ്വർണം സമർപ്പണം നടത്തിയത്. അതിനെക്കുറിച്ച് പിന്നീട് അന്വേഷിച്ചില്ല. എന്നാൽ രണ്ടു വർഷം മുൻപ് വിഗ്രഹത്തിലെ സ്വർണം എടുത്തുമാറ്റുകയും പകരം വെള്ളി പൊതിഞ്ഞതായും സൂചന ലഭിച്ചു. ഇത് വേഗത്തിൽ നടപ്പിലാക്കുകയും ചെയ്തു. ഇതേ തുടർന്ന് നടത്തിയ അന്വേഷണത്തിലാണ് സ്വർണം ഇല്ലെന്നും പരിശോധിക്കട്ടെ എന്നും ദേവസ്വം അധികൃതർ അറിയിച്ചത്. വൈകാതെ വെള്ളി പൊതിയുകയും ചെയ്തു. പരാതി അന്വേഷിക്കാനാണ് ഇന്ന് ദേവസ്വം അധികൃതർ പരിശോധന നടത്തുന്നത്.

റഷീദ് ആനപ്പാറ സൗഹൃദസംഗമം

പത്തനംതിട്ട: സാമൂഹ്യപ്രവർത്തകൻ റഷീദ് ആനപ്പാറ അഡ്മിൻ ആയ റഷീദിന്‍റെ സുഹൃത്തുക്കൾ എന്ന പേരിലുള്ള വാട്സ്ആപ്പ് ഗ്രൂപ്പിന്‍റെ ഒമ്പതാമത് വാർഷികവും സൗഹൃദ കുടുംബ സംഗമവും പത്തനംതിട്ടയിൽ നടന്നു. മന്ത്രി വീണാ ജോർജ് ഉദ്ഘാടനം ചെയ്തു. കേരള ഹൈക്കോടതി മുൻ ജഡ്ജി ജസ്റ്റീസ്റ്റ് പി.എസ്.ഗോപിനാഥൻ, മുൻ വിവരാവകാശ കമ്മീഷണർ പി.എൻ. വിജയകുമാർ എന്നിവ മുഖ്യപ്രഭാഷണം നടത്തി. പത്തനംതിട്ട നഗരസഭാ മുൻ ചെയർമാൻ പി.കെ. ജേക്കബ് അധ്യക്ഷത അധ്യക്ഷത വഹിച്ചു. പത്തനംതിട്ട ജില്ലാ പഞ്ചായത്തംഗം റോബിൻ പീറ്റർ, സ്പോർട്സ് കൗൺസിൽ പ്രസിഡന്‍റ് കെ. അനിൽകുമാർ, പത്തനംതിട്ട പ്രസ് ക്ലബ് സെക്രട്ടറി ജി. വിശാഖൻ, പത്തനംതിട്ട നഗരസഭ മുൻ ചെയർപേഴ്സൺ രജനി പ്രദീപ്, നഗരസഭ കൗൺസിലർ അംബിക വേണു, മുൻ കൗൺസിലർ വി. മുരളീധരൻ, അലങ്കാർ അഷറഫ്, ജോർജ് വർഗീസ് തെങ്ങുംതറയിൽ, ശശികുമാർ തുരുത്തിയിൽ, സിബി മോൾ, ഇഖ്ബാൽ അത്തിമൂട്ടിൽ,ഷീജ, സുശീല, റ്റി.വി. മിത്രൻ, കെ. കെ. നവാസ്, കെ. എം. രാജ, സജി കോശി, സുനിത കോഴിക്കോട്, ജി. കൃഷ്ണകുമാർ, യശോധരപ്പണിക്കാർ റഹ്‌മാൻ മുണ്ടോണ, മുരളീധരൻ വടകര, സുലൈമാൻ കോഴിക്കോട്,ടോംസി കാഞ്ഞിരപ്പള്ളി എന്നിവർ പ്രസംഗിച്ചു. സമാപന സമ്മേളനം ജസ്റ്റീസ് പി. എസ്. ഗോപിനാഥൻ ഉദ്ഘാടനം ചെയ്തു. ജസ്റ്റീസ് പി. എൻ. വിജയകുമാർ സമ്മാനദാനം നിർവഹിച്ചു.

ഉപജില്ലാ ശാസ്ത്രമേള 24,25 തീയതികളിൽ റാന്നി എംഎസ്എച്ച്എസ്എസിൽ

റാന്നി: ഉപജില്ലാ സ്കൂൾ ശാസ്ത്ര, ഗണിതശാസ്ത്ര, സാമൂഹ്യശാസ്ത്ര പ്രവൃത്തിപരിചയ, ഐടി മേള നവംബർ 24, 25 തീയതികളിൽ റാന്നി എം എസ് ഹയർ സെക്കൻഡറി സ്കൂളിൽ നടക്കും. മേളയുടെ നടത്തിപ്പിനായി സംഘാടകസമിതി രൂപീകരിച്ചു. സംഘാടകസമിതി രൂപീകരണയോഗം റാന്നി ഗ്രാമപഞ്ചായത്ത് പ്രസിഡന്‍റ് കെ.ആർ. പ്രകാശ് ഉദ്ഘാടനം ചെയ്തു. ഉപജില്ലാ സീനിയർ സൂപ്രണ്ട് മോളി അലക്സ് അധ്യക്ഷത വഹിച്ചു. സ്കൂൾ മാനേജർ കെ.സി. ജേക്കബ്, ബ്ലോക്ക് പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ ജേക്കബ് സ്റ്റീഫൻ, ബിപിസി ഷാജി എ.സലാം, പ്രിൻസിപ്പൽ സ്മിജു ജേക്കബ്, എച്ച്എം ഫോറം കൺവീനർ സുരേഷ് കെ.വർക്കി, രവി കുന്നക്കാട്ട്, ജി. അനിൽകുമാർ, സന്തോഷ് ബാബു, ലിബികുമാർ, സിംല മോൾ ഏബ്രഹാം എന്നിവർ പ്രസംഗിച്ചു. രണ്ട് ദിവസങ്ങളിലായി നടക്കുന്ന മേളയുടെ നടത്തിപ്പിനായി 101 സ്വാഗതസംഘം രൂപീകരിച്ചു. ഭാരവാഹികളായി, കെ.ആർ.പ്രകാശ് - ചെയർമാൻ, സ്മിജു ജേക്കബ് - ജനറൽ കൺവീനർ, ബിനോയ് കെ. ഏബ്രഹാം - ജോയിന്‍റ് ജനറൽ കൺവീനർ, മെറിൻ സക്കറിയ -ട്രഷറാർ എന്നിവരെ തെരഞ്ഞെടുത്തു.

കലുഷിതമായ അന്തരീക്ഷത്തിൽ ആശ്വാസം പകരുന്നത് ആധ്യാത്മികത: മാർ അപ്രേം

അടൂർ: കലുഷിതമായ ജീവിതസാഹചര്യത്തിൽ ആശ്വാസം കണ്ടെത്തുവാൻ ആധ്യാത്മിക ജീവിതത്തിന് കഴിയുമെന്ന് ഡോ. സഖറിയാസ് മാര്‍ അപ്രേം പറഞ്ഞു. ചായലോട് സെന്‍റ് ജോർജ് ആശ്രമത്തിൽ ചൊവ്വാഴ്ചകളിൽ ആരംഭിച്ച ധ്യാനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഭയാനകമായ അന്തരീക്ഷത്തിലേക്കാണ് മനുഷ്യരാശി അടുത്തുകൊണ്ടിരിക്കുന്നത്. മനുഷ്യവംശത്തെ തുടച്ചുനീക്കാനുള്ള കൃത്രിമ ജീവികളുടെ കാലം വരികയാണ്. ആർട്ടിഫിഷ്യൽ ഇന്‍റലിജൻസിന്‍റെ കൃത്രിമ മനുഷ്യൻ എത്ര ഉപകാരിയെണെങ്കിലും മനുഷ്യരാശിക്ക് ഭീഷണിതന്നെയാണെന്ന് മെത്രാപ്പോലീത്ത അഭിപ്രായപ്പെട്ടു. ഫാ. ജോൺ ടി. സാമുവേൽ, ഫാ. റ്റിജു തോമസ് എന്നിവർ പ്രസംഗിച്ചു. ഭദ്രാസന വൈദിക സംഘത്തിന്‍റെ ഗാന ശുശ്രൂഷയും നടന്നു. എല്ലാ ചൊവ്വാഴ്ചയും ധ്യാനം ക്രമീകരിച്ചിട്ടുണ്ടെന്ന് ഡോ. സഖറിയാസ് മാർ അപ്രേം പറഞ്ഞു.

കളക്‌ഷൻ ഏജന്‍റിന്‍റെ കൈയിൽ നിന്നു പണം അടങ്ങിയ ബാഗ് തട്ടിയെടുത്ത കേസിൽ ഒരാൾകൂടി പിടിയിൽ

അടൂർ: ബൈക്കിൽ സഞ്ചരിക്കുകയായിരുന്ന സ്വകാര്യ ധനകാര്യ സ്ഥാപനത്തിലെ കളക്‌ഷൻ ഏജന്‍റിന്‍റെ കൈയിൽ നിന്നു പണമടങ്ങിയ ബാഗ് തട്ടിയെടുത്ത കേസിൽ പ്രധാന സൂത്രധാരകൻ പോലീസ് പിടിയിൽ. അടൂർ വടക്കടത്തുകാവ് മുരുകൻകുന്ന് മുല്ലവേലിൽ പടിഞ്ഞാറ്റേതിൽ എ. സൂരജ് (പക്രു25)-നെയാണ് അടൂർ പോലീസ് അറസ്റ്റ് ചെയ്തത്. സൂരജിന്‍റെ നിർദേശപ്രകാരം സ്കൂട്ടറിൽ പോയി കളക്‌ഷൻ ഏജന്‍റിനെ പിന്തുടർന്ന് പണം തട്ടിയെടുത്ത സംഭവത്തിൽ രണ്ടാഴ്ച മുന്പ് അടൂർ മുണ്ടപ്പള്ളി പാറക്കൂട്ടം കാർത്തിക നിവാസിൽ എസ്.ജെ. ആലേഖ് (സൂര്യ, 20), അടൂർ പന്നിവിഴ കൃഷ്ണവിലാസം വീട്ടിൽ വരുൺ കൃഷ്ണൻ (ഉണ്ണി, 26) എന്നിവരെ അടൂർ പോലീസ് അറസ്റ്റ് ചെയ്തിരുന്നു. ഇവർ ഇപ്പോൾ ജയിലിലാണ്. ഇവരിൽ നിന്നും ലഭിച്ച വിവരങ്ങളുടെ അടിസ്ഥാനത്തിലാണ് സൂരജാണ് പ്രധാന സൂത്രധാരനെന്ന് പോലീസിന് മനസിലാകുന്നത്. സ്വകാര്യ ധനകാര്യ സ്ഥാപനത്തിലെ ജീവനക്കാരനായ ഏനാത്ത് സ്വദേശി ശ്രീദേവി (ഹരീഷ്) ന്‍റെ കൈയിൽനിന്നും 1.90 ലക്ഷം രൂപ അടങ്ങിയ ബാഗാണ് തട്ടിയെടുത്തത്. സെപ്റ്റംബർ 12-ന് അടൂർ പെരിങ്ങനാട് ചെറുപുഞ്ച ഭാഗത്താണ് സംഭവം. അടൂർ ഭാഗത്തു നിന്നും ജോലിയുടെ ഭാഗമായി ചെറുപുഞ്ചയിലേക്ക് പോയപ്പോഴാണ് ശ്രീദേവിനെ യുവാക്കൾ നമ്പർ പ്ലേറ്റ് മറച്ച സ്കൂട്ടറിൽ പിന്തുടർന്നെത്തി ബാഗ് തട്ടിയെടുത്തത്. സംഭവത്തേ തുടർന്ന് ഒളിവിൽ പോയ സൂരജിനെ രണ്ടുതവണ പോലീസ് പിടികൂടാൻ ശ്രമിച്ചെങ്കിലും രക്ഷപ്പെടുകയായിരുന്നു. ഒടുവിൽ ചൊവ്വാഴ്ച ഇയാൾ താമസിക്കുന്ന സ്ഥലത്തു നിന്നും സാഹസികമായിട്ടാണ് പോലീസ് പിടികൂടിയത്. അടൂർ ഡിവൈഎസ്പി ജി.സന്തോഷ് കുമാറിന്‍റെ നിർദേശപ്രകാരം എസ്ഐമാരായ സുനിൽ കുമാർ, ജയ്മോൻ, സിപിഒമാരായ രാഹുൽ ജയപ്രകാശ്, പി.എസ്.രാഹുൽ, വിജയ് ജി. കൃഷ്ണൻ, എം.നിഥിൻ എന്നിവർ അറസ്റ്റിന് നേതൃത്വം നൽകി.

ശബരി വിമാനത്താവളം കൊടുമൺ പ്ലാന്‍റേഷനിൽ സ്ഥാപിക്കണം; ആക്്ഷൻ കമ്മിറ്റി കളക്ടറേറ്റ് മാർച്ച് നടത്തി

പത്തനംതിട്ട: നിർദിഷ്ട ശബരി വിമാനത്താവളം സർക്കാരിന്‍റെ ഉടമസ്ഥതയിലുള്ള കൊടുമൺ പ്ലാന്‍റേഷനിൽ സ്ഥാപിക്കണമെന്നും വിമാനത്താവളം സംബന്ധിച്ച സാമൂഹിക ആഘാത പഠനം നടത്തുന്നതിന് പ്ലാന്‍റേഷൻ കോർപറേഷന്‍റെ കൊടുമൺ എസ്റ്റേറ്റ് കൂടി പരിഗണിക്കണമെന്ന ഹൈക്കോടതി ഉത്തരവ് കളക്ടർ നടപ്പാക്കണമെന്നും ആവശ്യപ്പെട്ട് ശബരി വിമാനത്താവള ആക്‌ഷൻ കമ്മിറ്റി കളക്ടറേറ്റ് മാർച്ച് നടത്തി. വിമാനത്താവളം സംബന്ധിച്ച് പഠനം നടത്തുന്നതിന് കൊടുമൺ എസ്റ്റേറ്റ് കൂടി പരിഗണിക്കണമെന്ന് സംസ്ഥാന സർക്കാരിന് ഹൈക്കോടതി നിർദേശം നൽകിയിട്ടും സർക്കാർ യാതൊരു നടപടികളും സ്വീകരിക്കുന്നില്ലെന്ന് ഭാരവാഹികൾ പറഞ്ഞു. തോമസ് മുട്ടുവേലി കോർ‌ എപ്പിസ്കോപ്പ ഉദ്ഘാടനം ചെയ്തു. ആക്ഷൻ കമ്മിറ്റി പ്രസിഡന്‍റ് ഡോ. വർഗീസ് പേരയിൽ അധ്യക്ഷത വഹിച്ചു. കേരള കോൺഗ്രസ് ജനറൽ സെക്രട്ടറി ഡോ. ജോർജ് വർഗീസ് കൊപ്പാറ, വ്യാപാരി വ്യവസായി ഏകോപന സമിതി ജില്ലാ സെക്രട്ടറി ഏഴംകുളം മഹൻകുമാർ, വൈസ് മെൻസ് ക്ലബ് സെക്രട്ടറി വിനോദ് വാസുക്കുറപ്പ്, ഐഎൻടിയുസി ജില്ലാ സെക്രട്ടറി സുരേഷ് കുഴിവേലി, കോൺഗ്രസ് ബ്ലോക്ക് പ്രസിഡന്‍റ് ബിജു വർഗീസ്,അടൂർ റോയി, ഫാ. ജോസഫ് സാമുവൽ തറയിൽ, മണി വിജയൻ, മാത്യു പാലക്കുന്നത്ത്, ടി. തുളസീധരൻ, ആർ. പത്മകുമാർ, ജോൺസൺ കുളത്തും കരോട്ട്, ജോസ് പള്ളിവാതുക്കൽ, ശ്രീജിത്ത് ഭാനുദേവ് തുടങ്ങിയവർ പ്രസംഗിച്ചു.

ലൈഫിൽ അത്ര പ്രതീക്ഷ പോരാ; ഫ്ലാറ്റ് നിർമാണം നിലച്ചിട്ട് അഞ്ചു വർഷം

ലക്ഷ്യമിട്ടത് ആറുമാസം കൊണ്ട് തീർക്കാൻ അടൂർ: സംസ്ഥാന സർക്കാരിന്‍റെ ലൈഫ് മിഷൻ ഭവന പദ്ധതിയുടെ ഭാഗമായി ഏഴംകുളം പഞ്ചായത്തിലെ ഏനാത്ത് കേന്ദ്രീകരിച്ച് ഏഴംകുളം ഗ്രാമപഞ്ചായത്തിന്‍റെ ഉടമസ്ഥതയിലുള്ള സ്ഥലത്ത് ആരംഭിച്ച ഫ്ലാറ്റ് നിർമാണം നിലച്ചിട്ട് അഞ്ചു വർഷം. 7.27 കോടി ചെലവിൽ ഭൂരഹിതരായ 54 കുടുംബങ്ങളെ പുനരധിവസിപ്പിക്കാനായി രണ്ട് ഫ്ലാറ്റ് സമുച്ചയങ്ങളാണ് 92 സെന്‍റ് വസ്തുവിൽ നിർമാണം നടന്നിരുന്നത്. 2020 സെപ്റ്റംബർ 24നാണ് മുഖ്യമന്ത്രി വീഡിയോ കോൺഫറൻസിലൂടെ പദ്ധതിയുടെ നിർമാണോദ്ഘാടനം നടത്തിയത്. ആറു മാസത്തിനുള്ളിൽ പണി പൂർത്തീകരിക്കുമെന്ന വ്യവസ്ഥയിലായിരുന്നു നിർമാണം ആരംഭിച്ചത്. നിലവിൽ ഒരു കെട്ടിടത്തിന്‍റെ പകുതി പണികൾ മാത്രമാണ് പൂർത്തിയായിട്ടുള്ളത്. രണ്ടാമത്തെ കെട്ടിടത്തിന്‍റെ അടിത്തറ മാത്രം കെട്ടിയിട്ടുണ്ട്. നിർമാണ കരാർ ഏറ്റെടുത്തത് അഹമ്മദാബാദിൽനിന്നുള്ള കമ്പനിയായിരുന്നു. ലൈറ്റ് വെയ്റ്റ് സ്റ്റീൽ ഫ്രെയിം സാങ്കേതിക വിദ്യ ഉപയോഗിച്ചുള്ള ഫ്ലാറ്റ് നിർമാണമാണ് ഉദ്ദേശിച്ചിരുന്നത്. കെട്ടിടത്തിന്‍റെ ചട്ടക്കൂട് പൂർത്തീകരിച്ച് അസ്ഥിപഞ്ജരം പോലെ നിൽക്കുകയാണിപ്പോൾ. അഭിമാന പദ്ധതി, പക്ഷേ എൽഡിഎഫ്‌ സർക്കാരിന്‍റെ അഭിമാന പദ്ധതിയായ ലൈഫ് ഭവനപദ്ധതിയുടെ ഭാഗമായ ഫ്ലാറ്റ് സമുച്ചയത്തിന്‍റെ നിർമാണം പൂർണമായി നിലച്ചിട്ടും യാതൊരു ഇടപെടലും ഭരണാധികാരികളുടെ ഭാഗത്ത് നിന്നുണ്ടാകുന്നില്ല. തുടക്കം മുതൽ അഴിമതി ആരോപണങ്ങളുയർന്നതാണ് സംസ്ഥാനത്തെ ലൈഫ് ഫ്ലാറ്റ് പദ്ധതി. ഏനാത്ത് ലൈഫ് ഫ്ലാറ്റ് സമുച്ചയം നിർമാണം സ്തംഭിച്ചതോടെ ഭൂരഹിതരായ 59 കുടുംബങ്ങൾ ആശങ്കയിലാണ്. സംസ്ഥാനതലത്തിൽ ആദ്യ ഉദ്ഘാടനം നടന്ന പുനലൂരിലെ ഫ്ലാറ്റ് സമുച്ചയം ആറ് വർഷം പിന്നിട്ടാണ് നിർമാണം പൂർത്തിയാക്കിയത്. പന്തളത്ത് ആരംഭിച്ച നിർമാണവും പാതിവഴിയിൽ മുടങ്ങി. ഫ്ലാറ്റ് നിർമാണം മുടങ്ങിയ സ്ഥലത്തു മാലിന്യനിക്ഷേപവും മദ്യക്കുപ്പികളും കുന്നുകൂടുകയാണ്. രാത്രികാലങ്ങളിൽ സാമൂഹ്യവിരുദ്ധരുടെ കേന്ദ്രവുമാണ്. കോവിഡ് കാലത്തിനു ശേഷം നിർമാണ സാമഗ്രികൾക്കു വില കൂടിയതിനാൽ കരാർ പുതുക്കി നിശ്ചയിക്കണമെന്നു കരാർ കമ്പനി മുന്പ് ആവശ്യപ്പെട്ടതായാണ് വിവരം. ലൈഫ് മിഷന്‍റെ അലംഭാവമാണ് പദ്ധതി വൈകാൻ കാരണമെന്നാരോപിച്ചു സിപിഎം പോഷക സംഘടനയായ കർഷകസംഘം മുന്പ് രംഗത്തു വന്നിരുന്നു.

കാറിടിച്ചു വീണ സ്കൂട്ടർ യാത്രികൻ ടിപ്പർ ലോറി കയറി മരിച്ചു

അടൂർ: കെപി റോഡിൽ ഇന്നോവകാർ ഇടിച്ചു റോഡിലേക്കു വീണ സ്കൂട്ടർ യാത്രക്കാരൻ ടിപ്പർ ലോറി കയറി മരിച്ചു. അയ്യപ്പൻപാറ മയൂരി ഭവനത്തിൽ മധുസൂധനന്‍റെ മകൻ മേഘനാഥ് (19) ആണ് മരിച്ചത്. ഇന്നലെ രാവിലെ 9.30ന് ഇളമണ്ണൂർ ഹൈസ്കൂൾ ഭാഗത്ത് ഇരുപത്തിമൂന്നാം മൈൽ ജംഗ്ഷന് സമീപത്തായിരുന്നു അപകടം. പത്തനാപുരം ഭാഗത്തുനിന്ന് അടൂർ ഭാഗത്തേക്കു വരികയായിരുന്ന സ്കൂട്ടറിൽ അതേ ദിശയിൽ നിന്ന് വന്ന കാറിടി ക്കുകയായിരുന്നു. ഇടിച്ച ഇന്നോവ കാർ നിർത്താതെ പോയി. കാറിനായി അടൂർ പോലീസ് അന്വേഷണം ആരംഭിച്ചു. മാതാവ്: മായ. സഹോദരി: മയൂരി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]