മലയാളി യുവാവ് ഷാർജയിൽ മരിച്ചു

നെന്മാറ: കയറാടി കല്ലമ്പറമ്പ്‌വീട്ടിൽ മായന്‍റെ മകൻ മനീഷ് (35) ഷാർജയിൽ അന്തരിച്ചു. വാഹനാപകടത്തിലാണ് മരണമെന്നാണ് പ്രാഥമികവിവരം.

ADVERTISEMENT

മെഡിസെപ് പ്രീമിയം തുക വർധിപ്പിക്കരുത്: സർവീസ് പെൻഷണേഴ്സ് അസോസിയേഷൻ

പാലക്കാട്: ആരോഗ്യ ഇൻഷ്വറൻസ് പദ്ധതിയെ ജിഎസ്ടിയിൽനിന്നും കേന്ദ്ര ജിഎസ്ടി കൗൺസിൽ ഒഴിവാക്കിയതിനാൽ സർവീസ് പെൻഷൻകാരുടെ മെഡിസെപ് പ്രീമിയം തുക വർധിപ്പിക്കുവാനുള്ള സർക്കാറിന്‍റെ നീക്കം ഉപേക്ഷിക്കണമെന്നു കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ ജില്ലാ നേതൃയോഗം ആവശ്യപ്പെട്ടു. സംഘടനകളുമായി കൂടിയാലോചനകൾ നടത്താതെയും മെഡിസെപിൽ നിലവിലുള്ള അപാകതകൾ പരിഹരിക്കാതെയും ഏകപക്ഷീയമായി പ്രീമിയം മാത്രം ഒറ്റയടിക്ക് വർധിപ്പിക്കുവാനുള്ള നീക്കം പെൻഷൻകാരോടു കാണിക്കുന്ന ക്രൂരതയാണെന്ന് യോഗം അഭിപ്രായപ്പെട്ടു. സംസ്ഥാന വൈസ് പ്രസിഡന്‍റ് സി. ബാലൻ യോഗം ഉദ്ഘാടനം ചെയ്തു. ജില്ലാ പ്രസിഡന്‍റ് കെ. ബാലകൃഷ്ണൻ അധ്യക്ഷത വഹിച്ചു. ജില്ലാ സെക്രട്ടറി കെ.എം.എം. റഷീദ്, സംസ്ഥാന സെക്രട്ടറിയേറ്റ് അംഗം എം .പോൾ, എം. ഉണ്ണികൃഷ്ണൻ, പുത്തൂർ രാമകൃഷ്ണൻ, എ. ഗോപിനാഥൻ, ആർ. മണി, വി. ആന്‍റണി, കെ.കെ. ശൈലജ, സി.ടി. രമണി, ജമീലറഷീദ്, കെ. നാരായണൻ, പോൾ പി. ആലിസ്, പി.ഡി. ഗ്രേസി എന്നിവർ പ്രസംഗിച്ചു.

ബസിനുനേരേ കാട്ടാനയുടെ ആക്രമണം

നീലഗിരി: ഓവേലി മൂലക്കാട്ട് റോഡിൽ ബസിനുനേരെ കാട്ടാനയുടെ ആക്രമണം. മൂലക്കാട്ട് റോഡിൽ യാത്രക്കാരെ കയറ്റി നീങ്ങുകയായിരുന്ന സർക്കാർബസിനു മുന്നിലേക്ക് കാട്ടാന പാഞ്ഞടുത്തു. ബസിന്‍റെ മുൻവശം തലകൊണ്ട് ഇടിച്ചുതകർത്തു. ബസ് ഓടിച്ചുപോകാൻ ശ്രമിച്ചെങ്കിലും കാട്ടാന പ്രകോപനം തുടർന്നു. യാത്രികർ ബഹളംവച്ചതിനെത്തുടർന്ന് ആന പിന്നീട് കാടുകയറി. യാത്രികർ ആർക്കും പരിക്കില്ല. വഴിയാത്രക്കാർ പകർത്തിയ വീഡിയോ പിന്നീട് സോഷ്യൽ മീഡിയയിൽ വൈറലാവുകയും ചെയ്തു.

പട്ടിത്തറയില്‍ സമൂഹ ഞാറ്റടി തയാറാക്കലിനു തുടക്കം

പട്ടാന്പി: പട്ടിത്തറയില്‍ സമൂഹ ഞാറ്റടിക്ക് തുടക്കമായി. പട്ടിത്തറ ഒതളൂരിലെ 20 ഏക്കറോളം വരുന്ന പാടത്താണ് നെല്‍കൃഷിക്കായുള്ള ഞാറ്റടി തയാറാക്കലിനു തുടക്കം കുറിച്ചത്. പാലക്കാട് കൃഷി വിജ്ഞാന കേന്ദ്രം, കൃഷി വകുപ്പ്, പട്ടിത്തറ പഞ്ചായത്ത് എന്നിവരുടെ സംയുക്ത ആഭിമുഖ്യത്തിലാണ് പദ്ധതി നടപ്പാക്കുന്നത്. രോഗപ്രതിരോധ ശേഷി വര്‍ധിപ്പിക്കുന്നതിനായി സ്യൂഡോമൊണസ് ലായനിയില്‍ മുക്കിയ വിത്തുകളാണ് ഞാറ്റടിയില്‍ വിതച്ചത്. പട്ടിത്തറ ഗ്രാമപഞ്ചായത്ത് പ്രസിഡന്‍റ് പി. ബാലന്‍ ഞാറ്റടിയുടെ ഉദ്ഘാടനം നിര്‍വഹിച്ചു. പട്ടിത്തറ വികസനകാര്യ സ്റ്റാന്‍റിംഗ് കമ്മിറ്റി ചെയര്‍പേഴ്സണ്‍ കെ. ശശിരേഖ അധ്യക്ഷയായി. സ്ഥിരം സമിതി അധ്യക്ഷ ചെയര്‍പേഴ്സണ്‍ കെ.പി. രാധ, വാര്‍ഡ് അംഗങ്ങളായ എ.കെ. നന്ദകുമാര്‍, വി. അബ്ദുള്ളക്കുട്ടി, കൃഷി വിജ്ഞാന കേന്ദ്രം മേധാവി ഡോ.കെ.വി. സുമിയ, പട്ടിത്തറ കൃഷിഓഫീസര്‍ ശ്രീലക്ഷ്മി, ഗ്രാമപഞ്ചായത്ത് അസിസ്റ്റന്‍റ് സെക്രട്ടറി ബിജു കെ. ഫ്രാന്‍സിസ്, കൃഷി വിജ്ഞാന കേന്ദ്രത്തിലെയും കൃഷി വകുപ്പിലെയും മറ്റുദ്യോഗസ്ഥര്‍, കര്‍ഷകര്‍ തുടങ്ങിയവര്‍ പങ്കെടുത്തു.

നന്ദിയോട് കമ്യൂണിറ്റി ഹെല്‍ത്ത് സെന്‍ററില്‍ പുതിയ കെട്ടിടംനിർമാണം അന്തിമഘട്ടത്തിൽ

വണ്ടിത്താവളം: നന്ദിയോട് കമ്യൂണിറ്റി ഹെല്‍ത്ത് സെന്‍ററില്‍ പുതിയ ഐപി/ഒപി ബ്ലോക്കിന്‍റെ ഒന്നാം ഘട്ട നിര്‍മാണം അവസാനഘട്ടത്തിൽ. ചിറ്റൂര്‍ എംഎല്‍എയും മന്ത്രിയുമായ കെ. കൃഷ്ണന്‍കുട്ടിയുടെ പ്രത്യേക ഇടപെടലിനെ തുടര്‍ന്നാണ് 300 ലക്ഷം രൂപ അനുവദിച്ച് പുതിയ ബ്ലോക്ക് നിര്‍മിക്കുന്നത്. 2021-22 സാമ്പത്തിക വര്‍ഷത്തെ ബജറ്റില്‍ ഉള്‍പ്പെടുത്തിയാണ് തുക വകയിരുത്തിയിട്ടുള്ളത്. മൂന്ന് നിലകളിലായി നിര്‍മിക്കുന്ന കെട്ടിടത്തിന്‍റെ ഒന്നാംഘട്ടത്തില്‍ 640 ചതുരശ്ര മീറ്റര്‍ വിസ്തീര്‍ണമുള്ള ആദ്യനിലയാണ് പൂര്‍ത്തിയാക്കുന്നത്. അത്യാഹിത വിഭാഗം, ഫാര്‍മസി, നഴ്സ് സ്റ്റേഷന്‍, ചികിത്സാ- ഇന്‍ജക്്ഷന്‍ റൂമുകള്‍, കോള്‍ഡ് ചെയിന്‍ റൂം, കണ്‍സള്‍ട്ടേഷന്‍ റൂമുകള്‍, വിശാലമായ കാത്തിരിപ്പ് സ്ഥലങ്ങള്‍, ശുചിമുറികള്‍, സ്റ്റോര്‍ റൂമുകള്‍ തുടങ്ങിയ സൗകര്യങ്ങളാണ് ആദ്യനിലയില്‍ ഉള്‍പ്പെടുത്തിയിട്ടുള്ളത്. മൂന്നു മാസത്തിനകം നിര്‍മാണം പൂര്‍ത്തിയാക്കി പുതിയ കെട്ടിടം പ്രവര്‍ത്തനസജ്ജമാക്കാനാണ് ലക്ഷ്യമിടുന്നത്.

എസ്ബിഐ പെൻഷണേഴ്സ് ആൻഡ് റിട്ടയറീസ് അസോസിയേഷൻ ജില്ലാ സമ്മേളനം

പാലക്കാട്: എസ്ബിഐ പെൻഷണേഴ്സ് ആൻഡ് റിട്ടയറീസ് അസോസിയേഷൻ ജില്ലാ സമ്മേളനം സംസ്ഥാന പ്രസിഡന്‍റ് രാധാകൃഷ്ണൻ പുല്ലഞ്ചേരി ഉദ്ഘാടനം ചെയ്തു. ജില്ലാ പ്രസിഡന്‍റ് രാമകൃഷ്ണൻ കുട്ടിനാത്ത് അധ്യക്ഷത വഹിച്ച യോഗത്തിൽ സംസ്ഥാന ജനറൽ സെക്രട്ടറി ഫിലിപ് കോശി മുഖ്യപ്രഭാഷണം നടത്തി. ഭഗവത്ഗീത ഹിന്ദിയിൽനിന്നും മലയാളത്തിലേക്ക് തർജമചെയ്ത എം. ഗിരിജാബായിയെ യോഗത്തിൽ ആദരിച്ചു. ബാങ്കുകളിൽ മൂന്നു ദശാബ്ദ കാലമായിട്ടും പെൻഷൻ പരിഷ്കരിക്കാത്തതിൽ യോഗം പ്രതിഷേധിച്ചു. ബാങ്കുകളിൽ പെൻഷൻ പരിഷ്കരണം ഉടൻ നടപ്പിലാക്കുക, ആരോഗ്യ ഇൻഷ്വറൻസ് പ്രീമിയം ബാങ്കുകൾ വഹിക്കുക, കമ്യൂട്ടേഷൻ അപാകത പരിഹരിക്കുക, സ്പെഷൽ അലവൻസ് പെൻഷനുകൂടി കണക്കാക്കുക എന്നീ ആവശ്യങ്ങൾ യോഗത്തിൽ ഉന്നയിച്ചു. സംസ്ഥാന അസിസ്റ്റന്‍റ് ജനറൽ സെക്രട്ടറി എസ്. ബാലകൃഷ്ണൻ, ജില്ലാ സെക്രട്ടറി കെ.എൻ. ഹർഷൻ, ജില്ലാ ട്രഷറർ വി. രാജാമണി പ്രസംഗിച്ചു. ജില്ലാ വൈസ് പ്രസിഡന്‍റ് പി. അച്ചുതനുണ്ണി സ്വാഗതവും ജില്ലാ ജോയിന്‍റ് സെക്രട്ടറി കെ.എൻ. രഘുപതി നന്ദിയും പറഞ്ഞു.

പുതുവൃന്ദാവനമാകാൻ മലന്പുഴ ഉദ്യാനം

മലമ്പുഴ: പുതുമോടിക്കായി മലന്പുഴ ഉദ്യാനം ഒരുങ്ങുന്നു. കഴിഞ്ഞദിവസം അടച്ചിട്ട ഉദ്യാനം മാസങ്ങൾക്കുശേഷം തുറക്കുന്പോൾ അക്ഷരാർഥത്തിൽ കേരളത്തിന്‍റെ ഉദ്യാനറാണിയെന്ന പദവി അന്വർഥമാക്കുമെന്നാണ് അധികൃതർ പറയുന്നത്. കേന്ദ്ര സർക്കാരിന്‍റെ സ്വദേശി ദർശൻ 2.0 പദ്ധതിയിൽ ഉൾപ്പെടുത്തി 75.87 കോടി രൂപ ചെലവിൽ നവീകരണ പ്രവൃത്തികൾ നടത്തുന്നതിനായിട്ടാണ് മലമ്പുഴ ഉദ്യാനം വ്യാഴാഴ്ച മുതൽ അടച്ചിട്ടത്. ഇനിയൊരു അറിയിപ്പുണ്ടാകുന്നതുവരെ ഉദ്യാനം അടച്ചിടും. ജലസേചന വകുപ്പിന്‍റെ സംയുക്ത സഹകരണത്തോടെയാണ് സംസ്ഥാന ടൂറിസം വകുപ്പ് പദ്ധതി നടപ്പിലാക്കുന്നത്. മലമ്പുഴയുടെ പ്രകൃതിഭംഗിക്ക് കോട്ടംതട്ടാതെ സന്ദർശകരെ തൃപ്തിപ്പെടുത്തുന്ന തരത്തിലായിരിക്കും ഉദ്യാനം നവീകരിക്കുക. പദ്ധതിയുടെ ഭാഗമായി വാട്ടർ തീം പാർക്കുകൾ, വാട്ടർ ഫൗണ്ടനുകൾ, കുട്ടികൾക്കും മുതിർന്നവർക്കുമായി പ്രത്യേകം റൈഡുകൾ, പുതിയ വിനോദ കേന്ദ്രങ്ങൾ, ഓർക്കിഡ് പുഷ്പങ്ങൾക്കായി ഓർക്കിഡ് പാർക്കുകൾ എന്നിവയും സജ്ജമാക്കുന്നുണ്ട്. നിലവിലുള്ള ഉദ്യാനത്തിന്‍റെ രൂപകല്പനയിൽ മാറ്റംവരുത്തി ഉദ്യാനത്തിനകത്ത് സന്ദർശകർക്കായി നടപ്പാതകളും വിശ്രമകേന്ദ്രങ്ങളും ഒരുക്കുന്നുണ്ട്. പരിസ്ഥിതിസൗഹൃദ മാലിന്യ സംസ്കരണവും ഭിന്നശേഷിക്കാർക്ക് സുഗമസഞ്ചാരത്തിനായുള്ള പ്രത്യേകം റാമ്പുകളും നിർമിക്കും. മാന്പഴത്തോട്ടങ്ങളും പരന്പരാഗത കലാരൂപങ്ങൾ അവതരിപ്പിക്കാൻ ഉദ്യാനത്തിനകത്ത് പ്രത്യേക വേദികളും ഒരുക്കും.

അന്പതിന പരിപാടികളുമായി ഒരുവർഷക്കാലം നീണ്ടുനിൽക്കുന്ന ആഘോഷപരിപാടികൾ

മണ്ണാർക്കാട്: കോട്ടോപ്പാടം കല്ലടി അബ്ദുഹാജി ഹയർസെക്കൻഡറി സ്‌കൂൾ സുവർണ ജൂബിലിയുടെ ഭാഗമായി ഒരുവർഷക്കാലം നീണ്ടുനിൽക്കുന്ന ആഘോഷ പരിപാടികൾ നടത്തുമെന്ന് സംഘാടക സമിതി ഭാരവാഹികൾ അറിയിച്ചു. മികച്ച അധ്യാപകനുള്ള സംസ്ഥാന പുരസ്കാരം ഗണിത ശാസ്ത്രാധ്യാപകൻ പി. ഗിരീഷിനെ തേടിയെത്തിയത് ആഘോഷ പരിപാടികളുടെ മാറ്റുകൂട്ടുമെന്നും ഇവർ പറഞ്ഞു. മൂന്നാം തവണയാണ് മികച്ച അധ്യാപക പുരസ്‌കാരം വിദ്യാലയത്തിന് ലഭിക്കുന്നത്. മുൻ പ്രധാനാധ്യാപകരായ പി.എൻ. മോഹനൻ, കെ. ഹസ്സൻ എന്നിവർ സംസ്ഥാന അധ്യാപക അവാർഡ് കരസ്ഥമാക്കിയിരുന്നു. സുവർണ ജൂബിലി ബ്ലോക്കിന്‍റെ നിർമാണം പുരോഗമിക്കുകയാണ്. സെമിനാർ ഹാൾ, ലൈബ്രറി, സ്‌റ്റാഫ് റൂം, സ്കൂ‌ൾ ഗ്രൗണ്ട്, ഇംഗ്ലീഷ് മീഡിയം ക്ലാസുകൾക്ക് പ്രത്യേക ബ്ലോക്ക് എന്നിവയുടെ നിർമാണം പൂർത്തിയായി. വിദ്യാഭ്യാസ, സാമൂഹ്യ പിന്നോക്കാവസ്ഥ അനുഭവിച്ചിരുന്ന കോട്ടോപ്പാടം മേഖലയിലെ വിദ്യാർഥികൾക്ക് പ്രൈമറി സ്‌കൂൾ പഠനത്തിനുശേഷം ഹൈസ്‌കൂൾ വിദ്യാഭ്യാസത്തിനായി കിലോമീറ്ററുകൾ അകലെയുള്ള വിദ്യാലയങ്ങളെ ആശ്രയിക്കേണ്ട ദുരവസ്ഥക്ക് പരിഹാരമായാണ് സാമൂഹ്യപ്രവർത്തകനായിരുന്ന കല്ലടി അബ്ദുഹാജി 1976 ൽ കോട്ടോപ്പാടം ഹൈസ്കൂൾ സ്ഥാപിച്ചത്. 1979 ൽ യുപി വിഭാഗവും 2002 മുതൽ ഹയർ സെക്കൻഡറി വിഭാഗവും അനുവദിച്ചു. അഞ്ചുമുതൽ 12 വരെ ക്ലാസുകളിലായി രണ്ടായിരത്തിലധികം വിദ്യാർഥികളും നൂറിലേറെ അധ്യാപകരും ജീവനക്കാരുമാണ് വിദ്യാലയത്തിലുളളത്. ഒരു വർഷക്കാലം നീണ്ടുനിൽക്കുന്ന ആഘോഷ പരിപാടികളുടെ ഭാഗമായി സുവർണ ജൂബിലി ലോഗോ പ്രകാശനം, വിളംബര റാലി, രക്തദാന ക്യാമ്പ്, മീഡിയ സെമിനാർ, പൂർവ അധ്യാപക, വിദ്യാർഥി സംഗമം, ആരോഗ്യ സെമിനാർ, മെഡിക്കൽ ക്യാമ്പ്, വിദ്യാഭ്യാസ, ശാസ്ത്ര സാങ്കേതിക പ്രദർശനം, ജില്ലാതല കലാ,കായിക മത്സരങ്ങൾ, ഇന്‍റർ സ്‌കൂൾ ക്വിസ്, ജീവകാരുണ്യ സേവന പ്രവർത്തനങ്ങൾ, പ്രത്യേക പരിഗണന അർഹിക്കുന്ന കുട്ടികൾക്കായി വിനോദയാത്ര, രക്ഷാകർതൃ സംഗമം, വർണോത്സവം, പ്രകൃതി പഠന ക്യാമ്പ്, നോ ടു ഡ്രഗ്‌സ് കാമ്പയിൻ, ട്രാഫിക്, സൈബർ സുരക്ഷാ ബോധവൽകരണ പരിപാടികൾ, വിദ്യാഭ്യാസ സാംസ്‌കാരിക സെമിനാറുകൾ, ഫോട്ടോഗ്രാഫി, റീൽസ് മത്സരങ്ങൾ, വൃക്ഷതൈ നടൽ, സ്നേഹാദരം, ഗുരുവന്ദനം, ഫിലിം ഫെസ്റ്റ്, സീനിയർ സിറ്റിസൺസ് മീറ്റ്, എഴുത്തുകൂട്ടം സാഹിത്യ ശിൽപശാല, സർഗോത്സവം, സ്മരണിക പ്രകാശനം, ഭക്ഷ്യമേള, തൊഴിൽ പരിശീലന ശില്പ‌ശാലകൾ, കാർഷിക മേള, ഗോൾഡൻ ജൂബിലി കെട്ടിട സമർപ്പണവുംസമാപന സമ്മേളനവുമുൾപ്പെടെ 50 പരിപാടികളാണ് ആസൂത്രണം ചെയ്തിരിക്കുന്നത്. സ്കൂൾ മാനേജിംഗ് ട്രസ്റ്റ് ചെയർമാൻ കല്ലടി അബൂബക്കർ, പ്രിൻസിപ്പൽ എം.പി. സാദിഖ്, പ്രധാനാധ്യാപകൻ കെ.എസ്. മനോജ്, പിടിഎ പ്രസിഡന്‍റ് കെ.ടി. അബ്ദുള്ള, സംഘാടക സമിതി ഓർഗനൈസിംഗ് കൺവീനർ കെ. മൊയ്തുട്ടി, മീഡിയ കമ്മിറ്റി ചെയർമാൻ ഹമീദ് കൊമ്പത്ത്, കൺവീനർ ബാബു ആലായൻ, സി.പി. വിജയൻ, പി. സൈനുൽ ആബിദ്, പി. മനോജ് എന്നിവർ പത്രസമ്മേളനത്തിൽ പങ്കെടുത്തു.

പൊറ്റശേരി സർവീസ് സഹകരണ ബാങ്ക് സായാഹ്നശാഖ തുറന്നു

കാഞ്ഞിരപ്പുഴ: അറുപത് വർഷത്തെ പ്രവർത്തന പാരമ്പര്യമുള്ള പൊറ്റശേരി സർവീസ് സഹകരണ ബാങ്കിന്‍റെ സായാഹ്നശാഖ കാഞ്ഞിരം ഹെഡ് ഓഫീസിനു മുകളിൽ ഒന്നാംനിലയിൽ പ്രവർത്തനമാരംഭിച്ചു. വി.കെ. ശ്രീകണ്ഠൻ എംപി ഉദ്ഘാടനം ചെയ്തു. ബാങ്ക് പ്രസിഡന്‍റ് ജോയ് ജോസഫ് അധ്യക്ഷനായി. സ്ട്രോംഗ് റൂം ഉദ്ഘാടനം എൻ. ഷംസുദ്ദീൻ എംഎൽഎ നിര്‍വഹിച്ചു. ബാങ്ക് സെക്രട്ടറി ശോഭ അലക്സാണ്ടർ റിപ്പോര്‍ട്ട് അവതരിപ്പിച്ചു. ആദ്യ നിക്ഷേപ സ്വീകരണം കാഞ്ഞിരപ്പുഴ പഞ്ചായത്ത് പ്രസിഡന്‍റ് സതി രാമരാജൻ നിര്‍വഹിച്ചു. മുതിർന്ന സഹകാരികളെ ഡിസിസി സെക്രട്ടറി സി. അച്യുതൻ ആദരിച്ചു. തച്ചമ്പാറ പഞ്ചായത്ത് പ്രസിഡന്‍റ് ബാബു, കാഞ്ഞിരപ്പുഴ സഹകരണ അർബൻ ക്രെഡിറ്റ് സൊസൈറ്റി പ്രസിഡന്‍റ് ചെറൂട്ടി മുഹമ്മദ്, ബിജി ടോമി, കെ. താജുദ്ദീൻ, അസിസ്റ്റന്‍റ് രജിസ്ട്രാർ സി.ജി. സാബു, വാർഡ് മെംബർമാരായ ദിവ്യ, പി. രാജൻ, ടി. കുമാരൻ, ടി.കെ. റഫീഖ്, ഹുസൈനാർ വളവുള്ളി, എൻ.എം. സെബാസ്റ്റ്യൻ, ഓമനക്കുട്ടൻ, അനൂപ് പാലക്കൽ, മോഹൻ ഐസക്, ജോർജ് നമ്പുശേരിൽ, അരുൺ സക്കറിയ, ബാലൻ പൊറ്റശേരി, എ. രാജഗോപാല്‍, ടോജി ജോസഫ്, ബാങ്ക് ഡയറക്ടര്‍ റഫീഖ്, ബിജുമോൻ ജോസഫ് കടുകുമാക്കൽ എന്നിവർ പ്രസംഗിച്ചു.

കസ്റ്റഡിമർദനം: കൊല്ലങ്കോട് പോലീസ് സ്റ്റേഷനിലേക്ക് മാർച്ച്

കൊല്ലങ്കോട്: കൊല്ലങ്കോട് പോലീസ് സ്റ്റേഷനിൽ ലോക്കപ്പ് മർദനം നടത്തിയ ഉദ്യോഗസ്ഥരെ സർവീസിൽ നിന്നും പുറത്താക്കണമെന്ന് ആവശ്യപ്പെട്ട് യൂത്ത് കോണ്‍ഗ്രസ് ജില്ലാ കമ്മിറ്റി കൊല്ലങ്കോട് പോലീസ് സ്റ്റേഷനിലേക്ക് നടത്തിയ മാർച്ചിൽ സംഘർഷം. നിരപരാധിയായ വിജയകുമാറിനെ കള്ളക്കേസിൽ കുടുക്കിയും ലോക്കപ്പിൽ ക്രൂരമായി മർദിക്കുകയും ചെയ്ത അന്നത്തെ കൊല്ലങ്കോട് സിഐയും നിലവിൽ തൃശൂർ എസിപിയുമായ സലീഷ് എം. ശങ്കരനെയും മർദനത്തിന് നേതൃത്വം നൽകിയ പോലീസുകാരെയും സർവീസിൽ നിന്ന് പുറത്താക്കണമെന്ന് ആവശ്യപ്പെട്ടാണ് മാർച്ച് നടത്തിയത്. പൊള്ളാച്ചി റോഡിൽ നിന്നും ആരംഭിച്ച മാർച്ച് പോലീസ് സ്റ്റേഷന് സമീപം ബാരിക്കേഡ് വച്ച് തടഞ്ഞു. പ്രതിഷേധവുമായി എത്തിയ യൂത്ത് കോണ്‍ഗ്രസ് പ്രവർത്തകർ ബാരിക്കേഡ് മറികടക്കാനും മറിച്ചിടാനും ശ്രമിച്ചതോടെ പോലീസും പ്രവർത്തകരും തമ്മിൽ ഉന്തും തള്ളും ഉണ്ടായി. ഇതിന് പിന്നാലെ പോലീസ് പ്രവർത്തകർക്ക് നേരെ ജലപീരങ്കി പ്രയോഗിച്ചു. പലതവണ ജലപീരങ്കി പ്രയോഗിച്ചിട്ടും പ്രവർത്തകർ പിരിഞ്ഞു പോകാൻ കൂട്ടാക്കിയില്ല. തുടർന്ന് പോലീസും പ്രവർത്തകരും തമ്മിൽ സംഘർഷമുണ്ടായി. ഇതിന് പിന്നാലെ യൂത്ത് കോണ്‍ഗ്രസ് നേതാക്കളായ മനു പല്ലാവൂർ, ശ്യാം ദേവദാസ്, സി. വിഷ്ണു, കെ.ജി. രാഹുൽ, പ്രദീപ് നെന്മാറ, ബാബു കൊല്ലങ്കോട് എന്നിവരെ പോലീസ് അറസ്റ്റ് ചെയ്തു. നേതാക്കളുടെ അറസ്റ്റിൽ പ്രതിഷേധിച്ച് യൂത്ത് കോണ്‍ഗ്രസ് പ്രവർത്തകർ കൊല്ലങ്കോട് ടൗണിൽ പ്രതിഷേധ പ്രകടനം നടത്തി. യൂത്ത് കോണ്‍ഗ്രസ് ജില്ലാ പ്രസിഡന്‍റ് കെ.എസ്. ജയഘോഷ് മാർച്ച് ഉദ്ഘാടനം ചെയ്തു. നെന്മാറ നിയോജകമണ്ഡലം പ്രസിഡന്‍റ്് മനു പല്ലാവൂർ അധ്യക്ഷനായി.

മണ്ണാർക്കാട് ലയൺസ് ക്ലബ് കലാഭിവന്ദനം സംഘടിപ്പിച്ചു

മണ്ണാർക്കാട്: കല, സേവനം, സാമൂഹികം എന്നീ മേഖലയിൽ നേട്ടങ്ങൾ കൈവരിച്ച വ്യക്തികളെ ആദരിക്കുന്നതിന് ലയൺസ് ക്ലബ് മണ്ണാർക്കാട് കലാഭിവന്ദനം 2025 സംഘടിപ്പിച്ചു. നെല്ലിപ്പുഴ പാലാട്ട് റസിഡൻസിയിൽ നടന്ന പരിപാടിയിൽ ദേശീയ ചലച്ചിത്രപുരസ്കാരജേതാവ് പി. മോഹൻദാസ്, രാഷ്ട്രപതിയിൽ നിന്ന് പോലീസ്മെഡൽ നേടിയ എസ്പി ഫിറോസ് എം. ഷഫീക്ക്, ഗവർണറിൽ നിന്ന് കേരളകൗമുദി അവാർഡ് നേടിയ ഡോ. ഷിബു, സംസ്ഥാന അധ്യാപക അവാർഡ് നേടിയ ഗിരീഷ്, മുഖ്യമന്ത്രിയുടെ പോലീസ് മെഡൽ ജേതാക്കളായ പി.വി. ബിജുമോൻ, എം.സി. ഷാഫി, ഫോറസ്റ്റ് മെഡൽ നേടിയ സി. സുരേഷ് ബാബു എന്നിവരെ ആദരിച്ചു. മാധ്യമ രംഗത്ത് രണ്ടു പതിറ്റാണ്ട് പിന്നിട്ടവരെയും ബിസിനസ് രംഗത്തെ മികവുറ്റ ലയൺസ് ക്ലബ് മെംബർമാരെയും ആദരിച്ചു. എൻ. ഷംസുദ്ദീൻ എംഎൽഎ ഉദ്ഘാടനം ചെയ്തു. പ്രസിഡന്‍റ് സാംസൺ അധ്യക്ഷനായി. ആലങ്കോട് ലീലാകൃഷ്ണൻ മുഖ്യപ്രഭാഷണം നടത്തി. കെടിഡിസി ചെയർമാൻ പി.കെ. ശശി, നഗരസഭ ചെയർമാൻ സി. മുഹമ്മദ് ബഷീർ, നഗരസഭ പ്രതിപക്ഷ നേതാവ് ടി.ആർ. സെബാസ്റ്റ്യൻ, ലയൺസ് ക്ലബ് ഡിസ്ട്രിക്റ്റ് ഗവർണർ ടി. ജയകൃഷ്ണൻ, ലയൺസ് സോൺ ചെയർമാൻ ഷൈജു ചിറയിൽ, പി.എം. സുബ്രഹ്മണ്യൻ, വി.ജെ. ജോസഫ്, പ്രോഗ്രാം കമ്മിറ്റി ചെയർമാൻ ഡോ. ഷിബു, റെജിമോൻ ജോസഫ് തുടങ്ങിയവർ പങ്കെടുത്തു. മണ്ണാർക്കാട് പാലിയേറ്റീവ് കെയറിന്‍റെ സാന്ത്വന പ്രവർത്തനങ്ങൾക്ക് ധനസഹായം നൽകി. മണ്ണാർക്കാട് എഎൽപി സ്കൂളിലെ കുട്ടികളുടെ കലാവിരുന്നും ഉണ്ടായിരുന്നു.

നെന്മാറ-ഒലിപ്പാറ റോഡ് നിർമാണം; രാത്രിയിൽ യന്ത്രങ്ങൾ കടത്താനുള്ള ശ്രമം തടഞ്ഞു

നെന്മാറ: നെന്മാറ- ഒലിപ്പാറ റോഡിലെ നിർമാണ യന്ത്രസാമഗ്രികൾ കടത്താൻ വീണ്ടും ശ്രമം. രണ്ടുമാസത്തിലേറെയായി നിർമാണപ്രവർത്തനം മുടങ്ങിക്കിടക്കുന്നതിനാൽ വിവിധ യന്ത്രങ്ങൾ കൈപ്പഞ്ചേരിയിൽ മറ്റു നിർമാണ വസ്തുക്കളോടൊപ്പം പ്ലാസ്റ്റിക് കവറുകളും ടാർപ്പായയും കെട്ടി പൊതിഞ്ഞുവെച്ചിരിക്കുകയായിരുന്നു. കഴിഞ്ഞദിവസം രാത്രി 11 ന് ലോറികൾ എത്തി യന്ത്രസാമഗ്രികൾ കടത്തിക്കൊണ്ടു പോകാൻ കരാറുകാരൻ നടത്തിയ ശ്രമമാണ് പ്രദേശവാസികളുടെ ശ്രദ്ധയിൽപ്പെട്ടതോടെ തടഞ്ഞത്. രാത്രി 11 ന് ശേഷമായതിനാൽ പ്രദേശവാസികൾ മോഷണശ്രമം ആണെന്ന ധാരണയിലായിരുന്നു. പിന്നീടാണ് കരാറുകാരന്‍റെ ആൾക്കാരാണ് യന്ത്രങ്ങൾ കടത്തിക്കൊണ്ടുപോകാൻ വന്നതെന്ന് അറിയുന്നത്. ഇതോടെ ആക്‌ഷൻ കൗൺസിൽ പ്രവർത്തകരെ വിവരമറിയിക്കുകയും ചെയ്തു. ആക്‌ഷൻകമ്മിറ്റി ഭാരവാഹികളായ കെ. രഘുകുമാർ, എസ്.എം. ഷാജഹാൻ, എസ്. ഉമ്മർ, റഷീദ് ഒലിപ്പാറ, വി. വിനേഷ് എന്നിവരുടെ നേതൃത്വത്തിൽ പ്രദേശവാസികളുടെ സഹായത്തോടെ തടഞ്ഞു. നെന്മാറ പോലീസിൽ വിവരം അറിയിച്ചതിന് തുടർന്ന് രാത്രി പോലീസ് സ്ഥലത്തെത്തി യന്ത്രസാമഗ്രികൾ കൊണ്ടുപോകുന്നത് നിർത്തിവച്ചു. ഇന്നലെ പോലീസ് സ്റ്റേഷനിൽ കരാറുകാരന്‍റെ പ്രതിനിധികളും ആക്‌ഷൻ കൗൺസിൽ പ്രതിനിധികളും പോലീസ് സാന്നിധ്യത്തിൽ പൊതുമരാമത്ത് ദേശീയപാത അധികൃതരുമായി ചർച്ച നടത്തി. 17ന് പൊതുമരാമത്ത് അധികൃതർ കരാറുകാരന് നോട്ടീസ് നൽകി വിളിച്ചുവരുത്തി പ്രശ്നം ചർച്ച ചെയ്യുമെന്ന് അറിയിച്ചു. കഴിഞ്ഞ ജൂലൈ 30നും കരാറുകാരൻ റോഡുപണിക്ക് കൊണ്ടുവന്ന യന്ത്രസാമഗ്രികൾ ഇടുക്കി ജില്ലയിലെ നിർമാണപ്രവർത്തനത്തിനായി കൊണ്ടുപോകാൻ ശ്രമം നടത്തിയിരുന്നു. തുടർന്ന് യന്ത്രസാമഗ്രികൾ മാസങ്ങളായി ടാർപോളിൻ കൊണ്ട് മൂടി പൊതിഞ്ഞുകെട്ടി വച്ചിരിക്കുകയായിരുന്നു.

കാഴ്ചശേഷിയില്ലാത്ത ഗൃഹനാഥയ്ക്ക് ലോട്ടറിവില്പനയ്ക്കു തണലൊരുക്കി

വടക്കഞ്ചേരി: കാഴ്ചശേഷിയില്ലാത്ത നിർധനഗൃഹനാഥയ്ക്ക് ലോട്ടറിവില്പനയ്ക്കുള്ള തണലൊരുക്കി വടക്കഞ്ചേരി ലയൺസ് ക്ലബ്. വടക്കഞ്ചേരി ബസ് സ്റ്റാൻഡിൽ ലോട്ടറിവില്പന നടത്തി ഉപജീവനമാർഗം കണ്ടെത്തുന്ന സരോജിനി പൊന്മലയ്ക്കാണ് ലയൺസ് ക്ലബിന്‍റെ താങ്ങായത്. വെയിലും മഴയും ഏൽക്കാതെ തൊഴിൽ ചെയ്യാൻ വലിയൊരു കളർഫുൾ കുടയാണ് ക്ലബ് നൽകിയത്. ടിക്കറ്റുകൾ പ്രദർശിപ്പിക്കാനുള്ള സ്റ്റാൻഡ്, കസേര, മേശ, ബാഗ് തുടങ്ങിയവയും ക്ലബിന്‍റെ വകയായി നൽകി. ചടങ്ങിനെത്തിയവരെല്ലാം ലോട്ടറി ടിക്കറ്റ് എടുത്തും സഹായിച്ചു. പഞ്ചായത്ത് വൈസ് പ്രസിഡന്‍റ് വി.ജെ. ഉസനാർ പരിപാടി ഉദ്ഘാടനം ചെയ്തു. വാർഡ് മെംബർ ഗിരിജ, ക്ലബ് പ്രസിഡന്‍റ് കെ.പി. രാജേന്ദ്രൻ, സെക്രട്ടറി സജോ ജോർജ്, പ്രശാന്ത് മേനോൻ, ബേബി വർഗീസ്, ഡോ. കുട്ടമണി, ജോസ് ജോർജ്, ബാബു പീറ്റർ, കെ.പി. എൽദോസ്, ജ്യോതി തോമസ് പ്രസംഗിച്ചു.

വിധവയും രണ്ടു പെൺമക്കളുമുള്ള കുടുംബത്തിന് വീടൊരുക്കി വാട്സാപ്പ് കൂട്ടായ്മ

വടക്കഞ്ചേരി: നിരാശ്രയരായ കുടുംബത്തിന് സുരക്ഷിതമായ വീടൊരുക്കി വാട്സാപ്പ് കൂട്ടായ്മ. കിഴക്കഞ്ചേരി വക്കാലയിലെ ഓമന ശിവരാമൻ, ഇവരുടെ പതിമൂന്നും പതിനഞ്ചും വയസുള്ള പെൺമക്കളായ അപർണക്കും അനുപമയ്ക്കുമാണ് കാഴ്ച എന്ന വാട്സാപ്പ് കൂട്ടായ്മ താങ്ങായത്. വീടിന്‍റെ താക്കോൽദാനവും ഗൃഹപ്രവേശനവും നാളെ വൈകുന്നേരം മൂന്നിന് നടക്കുമെന്ന് കൂട്ടായ്മ പ്രവർത്തകർ അറിയിച്ചു. ഏതാനും മാസം മുമ്പാണ് ഇവരുടെ അച്ഛൻ ശിവരാമൻ പനി ബാധിച്ച് മരിച്ചത്. റബർ ടാപ്പിംഗ് തൊഴിലാളിയായിരുന്ന അച്ഛന്‍റെ മരണത്തോടെ കുടുംബത്തിന്‍റെ വരുമാനം നിലച്ചു. നിത്യചെലവുകൾക്ക് വഴിയില്ലാതായി. പ്രായപൂർത്തിയായി വരുന്ന രണ്ട് പെൺമക്കൾ, അവരുടെ പഠനം, വീടില്ലാത്ത സാഹചര്യം, സഹായത്തിന് അടുത്ത ബന്ധുക്കളോ വീട്ടുകാരോ ഇല്ലാത്ത സ്ഥിതി. എല്ലാം ആലോചിച്ച് അമ്മ ഓമനയും ഏറെ വിഷമത്തിലായിരുന്നു. ടാർപോളിൻ കൊണ്ട് മൂടിയ കുടിലിലാണ് ഏറെ വർഷങ്ങളായി കുടുംബം കഴിയുന്നത്. മൺതറയും സുരക്ഷിതമല്ലാത്ത ഷെഡുമായതിനാൽ മഴക്കാലങ്ങളെല്ലാം കടന്നുപോകാൻ ഇവർ ഏറെ പ്രയാസപ്പെട്ടു. ഇതിനിടെയാണ് കുടുംബത്തിന്‍റെ ദൈന്യസ്ഥിതി കൂട്ടായ്മ പ്രവർത്തകർ അറിഞ്ഞത്. 450 അംഗങ്ങളുള്ള വാട്സ്ആപ്പ് കൂട്ടായ്മ കുടുംബത്തിന് സുരക്ഷിതമായ വീട് ഒരുക്കാനുള്ള പ്രവർത്തനങ്ങളുമായി രംഗത്തിറങ്ങി. വീട് നിർമാണ സാധനങ്ങൾ സ്പോൺസർ ചെയ്തും മറ്റു സഹായങ്ങളുമായി പ്രദേശത്തെ പലരും മനുഷ്യത്വപ്രവൃത്തിക്ക് പ്രോത്സാഹനം നൽകി. കൂട്ടായ്മയിലെ കെ. കൃഷ്ണൻകുട്ടിയും കെ.ജെ. പൗലോസും ബൈജുവുമെല്ലാം പ്രവർത്തനങ്ങൾക്ക് ചുക്കാൻ പിടിച്ചതോടെ കുറഞ്ഞ സമയത്തിനുള്ളിൽ കുടുംബത്തിന്‍റെ സ്വപ്നഭവനം യാഥാർഥ്യമായി. സുരക്ഷിതമായി കഴിയാൻ വീടായതിന്‍റെ സന്തോഷത്തിലാണ് അമ്മ ഓമനയ്ക്കൊപ്പം വിദ്യാർഥികളായ അപർണയും അനൂപമയുമിപ്പോൾ. ക്ലാസിലെ അടുത്ത കൂട്ടുകാരികളോടൊക്കെ പുതിയ വീട് ഒരുങ്ങുന്ന കാര്യം ഇവർ പറഞ്ഞിട്ടുണ്ട്. ഗൃഹപ്രവേശനത്തിന് അവരും എത്തും. വരുന്നവരെയൊക്കെ സ്വീകരിക്കാനുള്ള തയ്യാറെടുപ്പിലാണ് ഇവർ. വാട്സ്ആപ്പ് കൂട്ടായ്മയിലെ പകുതിയിലേറെ പേരും കുടുംബത്തിന്‍റെ ഗൃഹപ്രവേശനത്തിൽ പങ്കെടുക്കുമെന്ന് കെ. കൃഷ്ണൻകുട്ടി പറഞ്ഞു.കൂടായ്മയിൽ എല്ലാ വിഭാഗം ആളുകളുമുണ്ട്. വിവിധ രാഷ്ടീയ പാർട്ടിക്കാരും സർക്കാർ ജീവനക്കാർ ഉൾപ്പെടെ വിവിധ തൊഴിൽ മേഖലയിലുള്ളവരുമുണ്ട്. ഇതിനാൽ തന്നെ താക്കോൽദാനത്തിന് വിഐപികളെയൊന്നും പ്രത്യേകം ക്ഷണിച്ചിട്ടില്ല. കൂട്ടായ്മയിലെ പ്രവർത്തകർ തന്നെയാകും ഉദ്ഘാടകർ.

അപകടങ്ങൾ ഒഴിവാക്കാൻ വടക്കഞ്ചേരി ടൗണിൽ ട്രാഫിക് ഐലൻഡ് സ്ഥാപിക്കണം

വടക്കഞ്ചേരി: വാഹനത്തിരക്കേറിയ ടൗൺ റോഡിലെ പ്രധാന ജംഗ്‌ഷനുകളിൽ ട്രാഫിക് ഐലൻഡോ ബാരിക്കേഡുകളോ സ്ഥാപിച്ച് വാഹനങ്ങളുടെ ദിശ നിയന്ത്രിച്ചുവിടണമെന്ന ആവശ്യം ശക്തം. മെയിൻ റോഡിൽ മന്ദം, സുനിതമുക്ക് എന്നീ രണ്ട് ജംഗ്ഷനുകളിലാണ് ബാരിക്കേഡുകൾ സ്ഥാപിച്ച് വാഹനങ്ങൾ തിരിച്ചുവിടേണ്ട ആവശ്യകത കൂടുതലുള്ളത്. ഇവിടെ പലഭാഗത്തേക്കായി വഴികൾ തിരിഞ്ഞുപോകുന്നതിനാൽ വാഹനങ്ങൾ തലങ്ങും വിലങ്ങും പായുന്ന സ്ഥിതിയാണിപ്പോൾ. ട്രാഫിക് സിഗ്നലുകൾ തെറ്റിച്ച് വലതുവശം ചേർന്നാണ് പല വാഹനങ്ങളും ചെറിയ വഴികളിലേക്ക് തിരിയുന്നത്. ഇതുമൂലം അപകടങ്ങളും നിത്യസംഭവമാണെന്ന്സമീപത്തെ വ്യാപാരികൾ പറയുന്നു. ബുധനാഴ്ച രാത്രിയാണ് സുനിത ജംഗ്ഷനടുത്ത് പിക്കപ്പും ബുള്ളറ്റും കൂട്ടിയിടിച്ച് ബാങ്ക് മാനേജരായ യുവാവ് മരിച്ചത്. ട്രാഫിക് നിയമങ്ങൾ തെറ്റിച്ചുള്ള വാഹനങ്ങളുടെ ഓട്ടത്തിൽ കാൽനടയാത്രക്കാരാണ് ഏറെ കഷ്ടപ്പെടുന്നത്. റോഡിനു കുറുകെകടക്കാൻ പ്രായമായവർ പരസഹായം തേടണം. ബാരിക്കേഡുകളോ ട്രാഫിക് ഐലൻഡോ ഈ ജംഗ്ഷനുകളിൽ സ്ഥാപിച്ചാൽ വാഹനങ്ങൾ ഏതു വഴി തിരിയും എന്നൊക്കെ കണ്ട് കാൽനടയാത്രക്കാർക്കു കടന്നുപോകാനും സൗകര്യപ്രദമാകും. മന്ദം ജംഗ്ഷനിൽനിന്നു ഗ്രാമം റോഡിലേക്കുള്ള വഴി വൺവേ ആക്കിയിട്ടുണ്ടെങ്കിലും ഇതു തിരിച്ചറിയാനുള്ള ബോർഡുകളോ മറ്റു സംവിധാനങ്ങളോ ഇവിടെയില്ല. ഇതിനാൽ ടൗൺ അറിയാത്തവർ രണ്ടു ദിശയിലേക്കും വാഹനങ്ങൾ ഓടിച്ചുപോകും. മെയിൻ റോഡിലെ അനധികൃത കച്ചവടങ്ങളും വാഹന പാർക്കിംഗ് തുടരുന്നതും അപകടങ്ങൾക്കു കാരണമാകുന്നുണ്ട്.

മംഗലംഡാമിന്‍റെ ആയക്കെട്ട് പ്രദേശങ്ങളിൽ വൻകുറവെന്നു കണക്കുകൾ

വടക്കഞ്ചേരി: നെൽകൃഷി ചെയ്യുന്ന മംഗലംഡാമിന്‍റെ ആയക്കെട്ട് പ്രദേശങ്ങളിൽ വലിയ കുറവ് വന്നതായി കണക്കുകൾ. 1956 ൽ മംഗലംഡാം കമ്മീഷൻ ചെയ്യുമ്പോഴുള്ള ആയക്കെട്ട് പ്രദേശത്തിന്‍റെ മൂന്നിലൊരുഭാഗവും ഇപ്പോൾ ഇല്ലാതായെന്നാണ് വിലയിരുത്തൽ. നെൽപ്പാടങ്ങൾ മണ്ണിട്ടു നികത്തി മറ്റുവിളകൾ നിറഞ്ഞതും അനധികൃത നിലംനികത്തലും കെട്ടിടനിർമാണവുമെല്ലാം ഡാമിലെ വെള്ളം ഉപയോഗിച്ച് നെൽകൃഷി ചെയ്യുന്ന കൃഷിഭൂമിയുടെ വിസ്തൃതിയിൽ ഭീമമായ കുറവുണ്ടാക്കി. അനധികൃത ഭൂ ഉപയോഗംമൂലം കനാൽ വെള്ളം എത്താതെ ഹെക്ടർ കണക്കിന് ഭൂമി തരിശിടുകയും പിന്നീട് അതെല്ലാം പറമ്പുകളും താമസസ്ഥലങ്ങളും കെട്ടിടങ്ങളുമായി മാറുകയായിരുന്നു. നെൽപ്പാടങ്ങളുടെ വിസ്തൃതി കുറഞ്ഞപ്പോൾ ഡാമിൽ നിന്നുള്ള മെയിൻ കനാലുകൾ പോലും പലയിടത്തും ഉപയോഗശൂന്യമായി. അഞ്ചുമൂർത്തി മംഗലത്ത് ഫയർ സ്റ്റേഷന് പിറകിലായി ഏറെ ദൂരത്തിൽ വലതുകര മെയിൻ കനാലിൽ നിന്നുള്ള സബ് കനാൽ ഉപയോഗശൂന്യമായാണ് കിടക്കുന്നത്. വർഷങ്ങളായി ഈ കനാലിലൂടെ വെള്ളം വിടുന്നില്ല. വെള്ളം വിട്ടാലും വാലറ്റത്ത് കൃഷിഭൂമിയില്ല. കനാലും കനാൽ പുറംപോക്ക് പ്രദേശങ്ങളും സ്വകാര്യ വ്യക്തികൾ കൈയേറി വില്പന നടത്തുന്നതും തകൃതിയാണ്. കനാല്‍ മൂടി വഴികളും റോഡുകളുമായി. മുമ്പൊക്കെ കനാലിനു കുറുകെ ചെറിയ നടപ്പാതയുണ്ടാക്കണമെങ്കിൽ പല തവണ ഓഫീസുകൾ കയറിയിറങ്ങിയാലെ അനുമതി ലഭിക്കു.എന്നാൽ ഇപ്പോൾ ആർക്കും കനാൽ മൂടി സൗകര്യത്തിന് വഴിയുണ്ടാക്കാമെന്ന സ്ഥിതിയായി. ചില സബ് കനാലുകളുടെ വാലറ്റം എവിടെയാണെന്ന് തിരിച്ചറിയാൻ പോലും കഴിയാത്ത വിധം കൈയേറ്റങ്ങൾ വ്യാപകമാണ്. കാടുമൂടി കിടക്കുന്ന ഇത്തരം കനാലുകൾ മാലിന്യ നിക്ഷേപ കേന്ദ്രമായും മാറി. വടക്കഞ്ചേരി ബസ് സ്റ്റാൻഡിൽ നിന്നുള്ള റോഡുകൾ പലതും നിർമിച്ചിട്ടുള്ളത് കനാലുകൾ നികത്തിയാണെന്ന് പറയുന്നു. മംഗലംഡാമിൽ നിന്നും ഇടതു, വലതുകര മെയിൻ കനാലുകളുടെ ദൂരം 45 കിലോമീറ്ററോളമാണ്. വലതുകര കനാൽ വണ്ടാഴി, വടക്കഞ്ചേരി, കാവശേരി എന്നീ പഞ്ചായത്തുകൾ കടന്നാണ് പോകുന്നത്. ഇടതുകര കനാൽ കിഴക്കഞ്ചേരി, വടക്കഞ്ചേരി, കണ്ണമ്പ്ര, പുതുക്കോട് എന്നീ പഞ്ചായത്തുകളിലൂടെയുമാണുള്ളത്. കഴിഞ്ഞ കുറച്ചു വർഷങ്ങളായി കനാലുകളുടെ മെയിന്‍റനൻസ് വർക്കുകളും കാടുവെട്ടലും കാര്യക്ഷമമല്ലാത്തതിനാൽ വാലറ്റങ്ങളിലേക്ക് വെള്ളം എത്താതെ നെൽകൃഷി ഒരു പൂ കൃഷിയായി കർഷകർ ചുരുക്കി. കൂർക്ക, ഇഞ്ചി തുടങ്ങി മറ്റു കൃഷികളിലേക്ക് കർഷകർ മാറി. ഇതുവഴിയും നെൽകൃഷിയിൽ കുറവുവന്നിട്ടുണ്ട്. 73.2 കിലോമീറ്ററായിരുന്ന ഫീൽഡ് കനാലുകളുടെ ദൈർഘ്യത്തിലും കുറവുണ്ടായി. കനാലുകളും ഹെക്ടർ കണക്കിന് വരുന്ന കനാൽ പുറമ്പോക്കുകളും സംരക്ഷിക്കാൻ ബന്ധപ്പെട്ട വകുപ്പുകളും നടപടി സ്വീകരിക്കുന്നില്ല.

നെൽപ്പാടവരമ്പുകളിലെ വെണ്ടകൃഷി കർഷകർക്ക് അധികവരുമാനമാകുന്നു

വണ്ടിത്താവളം: വയൽവരമ്പുകൾ ക്കുചുറ്റും വെണ്ടയും ചീരയും കൃഷിയിറക്കിയത് കർഷകർക്ക് ഇടവരുമാനമായി. നാടൻ വെണ്ട, ചീര എന്നിവക്ക് വിപണിയിൽ ആവശ്യക്കാരും ഏറെയാണ്. മുന്പ് പയറിനങ്ങളാണ് കൃഷിയിറക്കിയിരുന്നത്. ഉദ്ദേശിച്ച വരുമാനം ലഭിക്കാതായപ്പോഴാണ് വെണ്ട, ചീരകൃഷിയിലേക്ക് തിരിഞ്ഞത്. വയലുകളിൽ ഈർപ്പം ഉള്ളതിനാൽ ജലവിതരണവും വേണ്ടിവരുന്നില്ല. മാത്രമല്ല ചെടികൾക്ക് മരുന്നു തളിയോ മറ്റു പരിചരണമില്ലെന്നതിനാൽ കർഷകന് പ്രത്യേക ചെലവ് വരുന്നുമില്ല. രാത്രി സമയങ്ങളിൽ പന്നി വരമ്പുകൾ കുത്തിമറിക്കുന്നത് തടയാനാവുന്നില്ലെന്നതാണ് കർഷകന്‍റെ ആവലാതി.

ഹരിതകർമസേനക്ക് അഭിമാനമായി ഗിരിജയും ചന്ദ്രികയും

വടക്കഞ്ചേരി: വണ്ടാഴി പഞ്ചായത്ത് രണ്ടാം വാർഡിലെ ഹരിതകർമസേനാംഗങ്ങളായ ഗിരിജക്കും ചന്ദ്രികക്കും നാട്ടുകൂട്ടങ്ങളുടെ അഭിനന്ദനങ്ങൾ. ഇല്ലായ്മയിലും സത്യസന്ധത ഉയർത്തി പ്പിടിച്ചതിനാണ് ഈ ജനാംഗീകാരം. വീടുകളിൽ നിന്നും ശേഖരിച്ച അജൈവവസ്തുക്കൾ തരംതിരിക്കുന്നതിനിടെ കിട്ടിയ സ്വർണമോതിരം ഉടമയെ കണ്ടെത്തി ഇവർ തിരിച്ചേൽപ്പിക്കുകയായിരുന്നു. പാഴ് വസ്തുക്കളിൽ നിന്നും അപ്രതീക്ഷിതമായി സ്വർണമോതിരം കിട്ടിയ വിവരം പഞ്ചായത്ത് അധികൃതരെ അറിയിക്കുകയുണ്ടായി. ഉടമയെ കണ്ടെത്താൻ പിന്നെ അന്വേഷണമായി. ഒടുവിൽ മോതിരത്തിന്‍റെ ഉടമയായ ചല്ലുപടി പുല്ലയിലെ വാസുവും കുടുംബവുമാണെന്ന് തിരിച്ചറിഞ്ഞു. കുടുംബത്തെ പഞ്ചായത്ത് ഓഫീസിലേക്ക് വിളിച്ചുവരുത്തി മോതിരം കൈമാറി. പഞ്ചായത്ത് പ്രസിഡന്‍റ് കെ.എൽ. രമേഷ്, വൈസ് പ്രസിഡന്‍റ് പി. ശശികല, സ്റ്റാൻഡിംഗ് കമ്മിറ്റി ചെയർമാൻമാരായ ഷക്കീർ, പി. ശശികുമാർ, ചെയർപേഴ്സൺ സുബിത, മെംബർമാരായ മീനാകുമാരി, ഡിനോയ് കോമ്പാറ, സെക്രട്ടറി കെ.ജി. സജീവ് കുമാർ, അസിസ്റ്റന്‍റ് സെക്രട്ടറി കെ. ചെന്താമരാക്ഷൻ, ജൂണിയർ സൂപ്രണ്ട് എം. ഹംസ, ജൂണിയർ ഹെൽത്ത്‌ ഇൻസ്‌പെക്ടർ പി. മഞ്ജു തുടങ്ങിയവർ ഉടമക്ക് മോതിരം കൈമാറുന്നതിൽ പങ്കെടുത്തു.

കേളി അവാർഡ് തുവ്വൂർ വിമലഹൃദയാശ്രമത്തിന്

മണ്ണാർക്കാട്: പ്രമുഖ സാംസ്കാരികസംഘടനയായ കേളി കലാസാഹിത്യവേദിയുടെ ഒമ്പതാം വാർഷികാഘോഷവും അഞ്ചാമത് കേളി അവാർഡ് ദാനവും നാളെ വൈകുന്നേരം അഞ്ചിന് മണ്ണാർക്കാട് റൂറൽ ബാങ്ക് ഹാളിൽ നടക്കും. വയോജന സംരക്ഷണ പ്രവർത്തനങ്ങൾ മാതൃകാപരമായി നടത്തുന്ന വ്യക്തികൾക്കോ സംഘടനക്കോ ആണ് അവാർഡ് നൽകുന്നത്. 25,000 രൂപയും വെങ്കലശില്പവുമാണ് കേളി അവാർഡ്. ഈ വർഷം അവാർഡ് നൽകുന്നത് 148 വയോജനങ്ങളെ സംരക്ഷിച്ചു വരുന്ന "ആകാശപ്പറവകൾ’ നടത്തുന്ന മലപ്പുറം ജില്ലയിലെ തുവ്വൂർ വിമല ഹൃദയാശ്രമത്തിനാണ്. പ്രഭാഷകൻ വി.കെ. സുരേഷ്ബാബു കണ്ണൂർ ആണ് ഉദ്ഘാടകൻ. മണ്ണാർക്കാട്ടെ കലാകാരൻമാർ അവതരിപ്പിക്കുന്ന കലാവിരുന്നും ഒരുക്കിയിട്ടുണ്ട്. കേളി പ്രസിഡന്‍റ് എം. ചന്ദ്രദാസൻ അധ്യക്ഷത വഹിക്കും. കേളി രക്ഷാധികാരികളായ ടി.ആർ. സെബാസ്റ്റ്യൻ, രംഗനാഥൻ, എം. പുരുഷോത്തമൻ, കേരള സ്റ്റേറ്റ് ലൈബ്രറി കൗൺസിലർ പി.എൻ. മോഹനൻ എന്നിവർ പ്രസംഗിക്കും. വിമല ഹൃദയാശ്രമത്തിനുവേണ്ടി സിസ്റ്റർ കിരൺ എംഎസ്ജെ മറുപടിപ്രസംഗം നടത്തും. പത്രസമ്മേളനത്തിൽ കേളി രക്ഷാധികാരി ടി.ആർ. സെബാസ്റ്റ്യൻ, പ്രസിഡന്‍റ് എം. ചന്ദ്രദാസൻ, വൈസ് പ്രസിഡന്‍റ് ഹസൻ മുഹമ്മദ്, ജോയിന്‍റ് സെക്രട്ടറി എം.വി. കൃഷ്ണൻകുട്ടി, എക്സിക്യൂട്ടീവ് മെംബർ മനോജ് എന്നിവർ പങ്കെടുത്തു.

ജനവാസമേഖലയിലെ ക്വാറി പ്രവർത്തനം നിർത്താൻ ഗ്രാമസഭായോഗ തീരുമാനം

കൊഴിഞ്ഞാമ്പാറ: പൊതുജനങ്ങളുടെ ജീവനും സുരക്ഷയ്ക്കും വെല്ലുവിളിയായ എരുത്തേമ്പതി പഞ്ചായത്ത് മലയാണ്ടികൗണ്ടന്നൂരിലെ കരിങ്കൽക്വാറിയുടെ പ്രവർത്തനം നിർത്തിവയ്ക്കാൻ തീരുമാനം. കഴിഞ്ഞ ദിവസം ചേർന്ന പ്രത്യേക ഗ്രാമസഭയിലാണ് തീരുമാനമായത്. ക്വാറി പ്രവർത്തനം മൂലം ദുരിതത്തിലായ നാട്ടുകാരുടെ പരാതിയുടെ അടിസ്ഥാനത്തിലാണ് പ്രത്യേക ഗ്രാമസഭ കൂടിയത്. ക്വാറിയുടെ പ്രവർത്തനത്തിൽ വിയോജിപ്പ് രേഖപ്പെടുത്തി 130 ഓളം വരുന്ന പ്രദേശവാസികളുടെ നിവേദനം അടുത്ത ഭരണസമിതി യോഗത്തിൽ ചർച്ചക്ക് വെക്കും. തുടർന്ന് ക്വാറി ഉടമയ്ക്ക് പ്രവർത്തനം നിർത്തിവക്കണമെന്ന് കാണിച്ച ്നോട്ടീസ് നൽകുമെന്ന് ഗ്രാമപഞ്ചായത്ത് വൈസ് പ്രസിഡന്‍റ് ആർ.സി. സമ്പത്ത്കുമാർ അറിയിച്ചു. മുൻവർഷവും നാട്ടുകാരുടെ ഇടപെടലിനെ തുടർന്ന് ക്വാറിക്ക് സ്റ്റോപ്പ് മെമ്മോ നൽകി നിർത്തിയിരുന്നു. കുടുംബങ്ങൾ താമസിക്കുന്നതിനു നൂറുമീറ്റർ ദൂരപരിധിയിൽ പാറ പൊട്ടിക്കലും അനുബന്ധ ഇടപാടുകളും പാടില്ലെന്ന നിയമവ്യവസ്ഥ ലംഘിച്ച് അനുമതി നൽകിയെന്നതായിരുന്നു ആരോപണം. വിവിധ വകുപ്പുകളിൽ നിന്നും ലഭിച്ചപതിനൊന്നോളം അനുമതികളുമായാണ് ക്വാറിയുടമ പഞ്ചായത്തിൽ ലൈസൻസിനായി അനുമതി തേടിയതെന്നും രേഖകളുടെ അടിസ്ഥാനത്തിലാണ് അന്ന് അനുമതി നൽകിയതെന്നും പഞ്ചായത്ത് സെക്രട്ടറി ജയാനന്ദൻ പറഞ്ഞു. എഴുത്തേമ്പതി പഞ്ചായത്തിലെ പ്രധാനപ്പെട്ട രണ്ട് പഞ്ചായത്ത് റോഡുകളിലൂടെ ക്വാറിയിൽ നിന്നുമുള്ള കല്ലുമായെത്തുന്ന ടോറസ് ലോറികൾ പോകരുതെന്ന നിബന്ധന വെച്ചാണ് ലൈസൻസ് നൽകിയിരുന്നതെന്ന് പഞ്ചായത്ത് ഉപാധ്യക്ഷൻ അറിയിച്ചു. എന്നാൽ ആഴ്ചകൾക്ക് മുൻപ് കരിങ്കല്ലു കയറ്റി ലോറി ഇതിലൂടെ കടന്നുപോയതായും നാട്ടുകാർ പറയുന്നുണ്ട്. ക്വാറിയിൽ നിന്നുള്ള വാഹനങ്ങൾ കടന്നുപോകുന്നതിനാൽ പ്രദേശത്തെ റോഡുകൾ തകരുന്നതായും നാട്ടുകാർ പറഞ്ഞു.

പാസഞ്ചർ ട്രെയിനുവേണ്ടി മുറവിളി

കൊല്ലങ്കോട്: പാസഞ്ചർ ട്രെയിനിനായി മുതലമട, കൊല്ലങ്കോട് പ്രദേശത്തുകാരുടെ മുറവിളി തുടരുന്നു. നാഗർപാടം, ചെട്ടിയാർച്ചള്ള, പതിക്കാട്ടുച്ചള്ള, തിരിഞ്ഞകുളമ്പ് പാറക്കാട്ടുചള്ള, പാറയ്ക്കൽചള്ള, ചെമ്മണംതോടെ പള്ളം , ഉൾപ്പെടെ പ്രദേശങ്ങളിലുള്ളവർ പാലക്കാട് പൊള്ളാച്ചി , ചിറ്റൂർ കൊല്ലങ്കോട് ഉൾപ്പെടെ സ്ഥലങ്ങളിലേക്ക് പോവണമെങ്കിൽ കിലോമീറ്ററുകളോളം നടന്നു വേണം പ്രധാന പാതയിലെത്താൻ. നേരത്തെ പാലക്കാട് - പൊള്ളാച്ചി മീറ്റർഗേജിൽ ആറ് പെയർ പാസഞ്ചർ രാവും പകലും ഓടിയിരുന്നതിനാൽ സമീപവാസികൾക്ക് ചുരുങ്ങിയ ചിലവിൽ യാത്ര ചെയ്യാൻ കഴിയുമായിരുന്നു. എന്നാൽ നിലവിലെ യാത്ര വിവരിക്കാനാവാത്ത വിധം സങ്കീർണമായിരിക്കുകയാണ്. മീറ്റർ ഗേജ് ബ്രോഡ്ഗേജാക്കിയാൽ നിലവിലുള്ളതിനേക്കാൾ കൂടുതൽ ട്രെയിനുകൾ ഇതുവഴി ഓടിക്കുമെന്നായിരുന്നു നാട്ടുകാരുടെ പ്രതീക്ഷ. ഏറെ കാലയളവിനുശേഷം ബ്രോഡ്ഗേജ് നിർമാണം പൂർത്തിയായെങ്കിലും പാലക്കാട്- പഴനി റൂട്ടിലുണ്ടായിരുന്ന ട്രെയിനുകളെല്ലാം പൂർണമായും നിർത്തി. ഇപ്പോൾ പാലക്കാട്- തിരുച്ചെന്തൂർ പാസഞ്ചർ മാത്രമാണ് മുതലമട സ്റ്റേഷനിലൂടെ ഒരു തവണ സർവീസ് നടത്തുന്നത്. ഇതാകട്ടെ രാത്രിയിലാണ് കടന്നുപോകുന്നതും. ഇതുവഴി തിരുവനന്തപുരം അമൃത എക്സ്പ്രസും , ചെന്നൈ എക്സ്പ്രസും ഓടുന്നുണ്ടെങ്കിലും മുതലമടയിൽ സ്റ്റോപ്പ് ഇല്ലാത്തതും ഇവിടത്തുകാർക്കു വിനയായി.

കുണ്ടളശേരി- പൊറ്റയില്‍പടി റോഡ് നാടിനു സമർപ്പിച്ചു

മുണ്ടൂർ: കേരളശ്ശേരി ഗ്രാമ പഞ്ചായത്ത് അഞ്ചാം വാര്‍ഡില്‍ നിര്‍മാണം പൂര്‍ത്തീകരിച്ച കുണ്ടളശ്ശേരി-പൊറ്റയില്‍പടി റോഡിന്‍റെ ഉദ്ഘാടനം ഗ്രാമപഞ്ചായത്ത് പ്രസിഡന്‍റ് ഷീബ സുനില്‍ നിര്‍വഹിച്ചു. കേരളശ്ശേരി ഗ്രാമ പഞ്ചായത്തിന്‍റെ 2024- 25 വര്‍ഷത്തെ വാര്‍ഷിക വികസന ഫണ്ടില്‍ നിന്നും 13 ലക്ഷം രൂപ വിനിയോഗിച്ചാണ് റോഡിന്‍റെ പ്രവൃത്തി പൂര്‍ത്തീകരിച്ചത്. പരിപാടിയില്‍ ബ്ലോക്ക് പഞ്ചായത്ത് മെംബര്‍ നന്ദിനി അധ്യക്ഷത വഹിച്ചു. വാര്‍ഡ് മെംബര്‍ ഷാജിത, വാര്‍ഡ് വികസന സമിതി ചെയര്‍മാന്‍ ജയരാജ്, വാര്‍ഡ് വികസന സമിതി അംഗം ശിവപ്രസാദ് എന്നിവര്‍ പ്രസംഗിച്ചു. മറ്റു വാര്‍ഡ് വികസന സമിതി അംഗങ്ങള്‍, ജനപ്രതിനിധികള്‍, പ്രദേശവാസികള്‍ തുടങ്ങിയവര്‍ ചടങ്ങില്‍ പങ്കെടുത്തു.

കൊല്ലങ്കോട് ഊട്ടറ പാലത്തിന്‍റെ നിര്‍മാണോദ്ഘാടനം നാളെ

കൊല്ലങ്കോട്: നെന്മാറ നിയോജകമണ്ഡലത്തിലെ ഊട്ടറ പാലത്തിന്‍റെ നിര്‍മാണോദ്ഘാടനം നാളെ ഉച്ചയ്ക്കുശേഷം മൂന്നിന് പൊതുമരാമത്ത് മന്ത്രി പി.എ. മുഹമ്മദ് റിയാസ് നിര്‍വഹിക്കും. വൈദ്യുതിമന്ത്രി കെ. കൃഷ്ണന്‍കുട്ടി, കെ. രാധാകൃഷ്ണന്‍ എംപി എന്നിവര്‍ മുഖ്യാതിഥികളാവുന്ന പരിപാടിയില്‍ കെ.ബാബു എംഎല്‍എ അധ്യക്ഷത വഹിക്കും. കൊല്ലങ്കോട് പ്രദേശത്തെയും പുതുനഗരം പ്രദേശത്തെയും ബന്ധിപ്പിക്കുന്നതിന് ഗായത്രിപുഴക്ക് കുറുകെ ഊട്ടറ പഴയ പുഴപ്പാലത്തിനു സമാന്തരമായാണ് പുതിയപാലം നിര്‍മിക്കുന്നത്. കിഫ്ബി ഫണ്ടുപയോഗിച്ച് റോഡ്‌സ് ആന്‍ഡ് ബ്രിഡ്ജസ് ഡെവലപ്പ്മെന്‍റ് കോര്‍പറേഷന്‍ ഓഫ് കേരള ലിമിറ്റഡാണ് നിര്‍മാണം നടത്തുന്നത്. 7.67 കോടി രൂപ ചെലവഴിച്ചു ഇരുവശത്തും നടപ്പാതയോടുകൂടി 11.05 മീറ്റര്‍ വീതിയിലാണ് നിര്‍മാണം.

ജില്ലാ സ്പോർട്‌സ് കൗൺസിൽ തെരഞ്ഞെടുപ്പ് ഒക്ടോബർ ആറിന്

പാലക്കാട്: ജില്ലാ സ്പോർട്സ് കൗൺസിൽ തെരഞ്ഞെടുപ്പ് ഒക്ടോബർ ആറിന് നടക്കും. മുനിസിപ്പൽ കൗൺസിൽ ചെയർപേഴ്സ‌ൺമാരിൽ നിന്നും ബ്ലോക്ക് പഞ്ചായത്ത് പ്രസിഡന്‍റുമാരിൽ നിന്നും ഒരാൾ വീതവും ഗ്രാമ പഞ്ചായത്ത് പ്രസിഡന്‍റുമാരുടെ എണ്ണം അമ്പതിൽ കുറവാണെങ്കിൽ മൂന്നുപേര്‍, അമ്പതിൽ കൂടതലാണെങ്കിൽ അഞ്ചുപേർ എന്നിങ്ങനെയാണ് പ്രതിനിധികളെ ജില്ലാ സ്പോർട്‌സ് കൗൺസിലുകളിലേക്ക് തെരഞ്ഞെടുക്കുക. നാമനിർദ്ദേശ പത്രികയുടെ സൂക്ഷ്മപരിശോധന 20നും , സ്ഥാനാർഥിത്വം പിൻവലിക്കാനുള്ള അവസാന തീയതി 24 ഉച്ചയ്ക്ക് രണ്ടുമണിക്കും ആയിരിക്കും. വോട്ടെടുപ്പ് ഒക്ടോബർ ആറിന് രാവിലെ 10 മണി മുതൽ ഉച്ചയ്ക്ക് രണ്ടുവരെയാണ്. വോട്ടെണ്ണലും ഫലപ്രഖ്യാപനവും അന്നേ ദിവസം വൈകുന്നേരം അഞ്ചിനു നടക്കും. നാമനിർദ്ദേശ പത്രികകൾ ഈമാസം 15 വരെയുള്ള പ്രവൃത്തി ദിവസങ്ങളിൽ രാവിലെ 11നും വൈകുന്നേരം അഞ്ചിനും ഇടയിൽ ജില്ലാ വരണാധികാരിയുടെ ഓഫീസിൽനിന്ന് ലഭിക്കും. പൂരിപ്പിച്ച പത്രികകൾ തപാൽ വഴിയോ, അല്ലെങ്കിൽ ജില്ലാ സ്പോർട്‌സ് കൗൺസിൽ ഓഫീസിലെ പെട്ടിയിൽ നേരിട്ടോ സമർപ്പിക്കാം. വിവരങ്ങള്‍ 0471- 2326644 നന്പറിൽ ലഭിക്കും.

എക്സൈസ് ഓണം സ്പെഷല്‍ ഡ്രൈവ്: പിടിയിലായത് 231 പേര്‍

പാലക്കാട്: എക്സൈസ് വകുപ്പ് നടത്തിയ ഓണം സ്പെഷ്യല്‍ ഡ്രൈവില്‍ ജില്ലയില്‍ 195 അബ്കാരി കേസുകളും, 78 മയക്കുമരുന്ന് കേസുകളിലുമായി പിടിയിലായത് 231 പേര്‍. എക്സൈസ് കമ്മീഷണറുടെ നിര്‍ദേശപ്രകാരം ഓഗസ്റ്റ് നാലുമുതല്‍ സെപ്റ്റംബര്‍ പത്തുവരെയായിരുന്നു സ്പെഷല്‍ ഡ്രൈവ് നടത്തിയത്. അബ്കാരി കേസുകളിലായി 653.300 ലിറ്റര്‍ ഇന്ത്യന്‍ നിര്‍മിത വിദേശ മദ്യം, 95.8 ലിറ്റര്‍ ചാരായം, 8264 ലിറ്റര്‍ വാഷ്, 22.975 ലിറ്റര്‍ അന്യസംസ്ഥാന വിദേശമദ്യം, പത്തുലിറ്റര്‍ കള്ള്, രണ്ടുലിറ്റര്‍ വ്യാജമദ്യം, 6.5 ലിറ്റര്‍ ബീയര്‍ എന്നിവ പിടിച്ചെടുത്തു. മയക്കുമരുന്ന് കേസുകളില്‍ 33.824 കിലോ ഗ്രാം കഞ്ചാവ്, 216 കഞ്ചാവ് ചെടികള്‍, 1183 ഗ്രാം ഹാഷിഷ് ഓയില്‍, 466.376 ഗ്രാം മെത്താഫിറ്റമിന്‍, 11 ഗ്രാം നൈട്രോസെപാം ടാബ്ലെറ്റ് എന്നിവ പിടിച്ചെടുത്തു. പുകയില ഉത്പന്നങ്ങളുമായി ബന്ധപ്പെട്ട് 1052 കേസുകളിലായി 96.724 കിലോഗ്രാം പുകയില ഉത്പന്നങ്ങള്‍ പിടിച്ചെടുത്തു. 1451 കള്ളുഷാപ്പുകളും 110 ബാറുകളും പരിശോധന നടത്തിയിയതില്‍ 317 കള്ളുസാമ്പിളുകളും 47 വിദേശമദ്യ സാമ്പിളുകളും ശേഖരിച്ചു. തുടര്‍ന്നും എന്‍ഫോഴ്സ്മെന്‍റ് പ്രവര്‍ത്തനങ്ങള്‍ ശക്തമാക്കുമെന്നു ഡെപ്യൂട്ടി എക്സൈസ് കമ്മീഷണര്‍ അറിയിച്ചു. അന്യ സംസ്ഥാന തൊഴിലാളികള്‍ താമസിക്കുന്ന ലേബര്‍ ക്യാമ്പുകളില്‍ പരിശോധിക്കാനും അതിര്‍ത്തി വഴികളിലൂടെയുള്ള ലഹരികടത്ത് കര്‍ശനമായി നിരീക്ഷിച്ച് നടപടിയെടുക്കാനും തീരുമാനിച്ചതായി ഡെപ്യൂട്ടി എക്സൈസ് കമ്മിഷണര്‍ പി.കെ സതീഷ് അറിയിച്ചു.

പ്രതിഷേധം ശക്തം, കുഴികൾ അപകടക്കെണി

കല്ലടിക്കോട്‌: പാലക്കാട്‌- കോഴിക്കോട്‌ ദേശീയപാതയിൽ മയിലംപുള്ളിയിൽ നിർമിക്കുന്ന ടോൾപ്ലാസയ്ക്കെതിരേ പ്രതിഷേധം ശക്തമാകുന്നു. മയിലംപുള്ളി ബസ് സ്റ്റോപ്പിനോടു ചേർന്നാണ്‌ ടോൾ പ്ലാസ നിർമിക്കാൻ കുഴിയെടുത്തിട്ടുള്ളത്‌. കുഴിയിൽനിന്നുള്ള മണ്ണ് റോഡിന്‍റെ വശത്താണ് കൂട്ടിയിട്ടിരിക്കുന്നത്‌. മണ്ണെടുത്ത ഭാഗത്തിനുചുറ്റും കമ്പികൾ പ്ലാസ്റ്റിക്‌ വള്ളികെട്ടിവെച്ചിരിക്കുകയാണ്. വാഹനങ്ങൾ അടുത്തെത്തുമ്പോൾ മാത്രമാണ്‌ ഈകുഴി കാണുന്നത്‌. പെട്ടെന്ന് ബ്രേക്ക് ചവിട്ടുമ്പോൾ വണ്ടി അപകടപ്പെടുന്നതിനു സാധ്യത കൂടുതലാണ്. കരിങ്കല്ലത്താണി മുതൽ ഒലവക്കോട്‌ താണാവ്‌ വരെ നിർമിച്ച ദേശീയപാതയിൽ മുണ്ടൂർ പൊരിയാനിയിലാണ് നേരത്തെ ടോൾപ്ലാസ നിർമിക്കാൻ തീരുമാനിച്ചിരുന്നത്‌. അതിനുവേണ്ട അടിസ്ഥാന സൗകര്യങ്ങൾ ഒരുക്കുകയും 100 അടി വീതിയിലും 500 അടി നീളത്തിലും റോഡ്‌ കോൺക്രീറ്റ്‌ ചെയ്ത്‌ ബലപ്പെടുത്തുകയും ചെയ്തിരുന്നു. എന്നാൽ മലമ്പുഴ എംഎൽഎ എ. പ്രഭാകരന്‍റെയും വി.കെ. ശ്രീകണ്ഠൻ എംപിയുടെയും നാട്ടുകാരുടേയും എതിർപ്പിനെതുടർന്ന് ടോൾപ്ലാസ മയിലംപുള്ളിയിലേക്കു മാറ്റാൻ തീരുമാനിക്കുകയായിരുന്നു. തൂത ചെർപ്പുളശേരി സംസ്ഥാന പാതയിലൂടെ വരുന്ന വാഹനങ്ങളും ടോൾ നൽകണമെന്നതിനാലാണ്‌ മുണ്ടൂർ പൊരിയാനിയിലെ ടോൾപ്ലാസയ്ക്കെതിരെ ശക്തമായ എതിർപ്പുണ്ടായത്‌. തുടർന്ന് മയിലംപുള്ളിയിലേക്കു മാറ്റാൻ തീരുമാനിക്കുകയും നിർമാണ പ്രവർത്തനങ്ങൾ ആരംഭിക്കുകയും ചെയ്തു. കുഴിയെടുത്തിട്ട്‌ മാസങ്ങളായെങ്കിലും തുടർനിർമാണ പ്രവർത്തനങ്ങൾ നിർത്തിവച്ചിരിക്കുകയാണ് ‌. ബൈക്ക്‌ യാത്രക്കാരടക്കമുള്ളവർ കുഴിയിൽ വീഴാതിരിക്കാൻ സുരക്ഷാവേലി നിർമിക്കണമെന്ന ആവശ്യം ശക്തമാണ്. മയിലംപുള്ളിയിൽ നിർമിക്കുന്ന ടോൾപ്ലാസയ്ക്കെതിരെ പ്രദേശവാസികളും യാതക്കാരും വാഹനഉടമകളും പ്രതിഷേധവുമായി ദേശീയപാത അഥോറിറ്റിയെ സമീപിച്ചിട്ടുണ്ട്‌.

എലിപ്പനി: പൊതുജനങ്ങള്‍ ജാഗ്രത പാലിക്കണമെന്നു ആരോഗ്യവകുപ്പ്

പാലക്കാട്: ജില്ലയിൽ വിവിധ പ്രദേശങ്ങളിൽ എലിപ്പനി കേസുകൾ വർധിക്കുന്ന സാഹചര്യത്തിൽ പൊതുജനങ്ങൾ ജാഗ്രത പാലിക്കണമെന്നു ജില്ലാ മെഡിക്കൽ ഓഫീസർ (ആരോഗ്യം) അറിയിച്ചു. ജില്ലയില്‍ എലിപ്പനി മരണങ്ങളും കൂടുതലായി റിപ്പോർട്ട് ചെയ്യപ്പെടുന്നുണ്ട്. സ്വയം ചികിത്സ ഒഴിവാക്കണം. മഞ്ഞപ്പിത്തമാണെന്ന് തെറ്റിദ്ധരിച്ച് നാടൻ ചികിത്സകൾ ചെയ്യുന്നത് അപകടകരമാണ്. മണ്ണിലോ വെള്ളത്തിലോ സമ്പർക്കമുണ്ടായിട്ടുണ്ടെങ്കിൽ ഡോക്ടറെ അറിയിക്കണമെന്നും ജില്ലാ മെഡിക്കല്‍ ഓഫീസര്‍ നിർദേശിച്ചു. എലി, കന്നുകാലികൾ, നായ, പൂച്ച, പന്നി തുടങ്ങിയ മൃഗങ്ങളുടെ മൂത്രത്തിലൂടെ മനുഷ്യരിലേക്ക് പകരുന്ന രോഗമാണ് എലിപ്പനി. മലിനജലത്തിലൂടെയോ ചെളിയിലൂടെയോ ഇവ മനുഷ്യശരീരത്തിലെ മുറിവുകളിലൂടെയോ നേർത്ത തൊലിയിലൂടെയോ പ്രവേശിക്കാം. കണ്ണ്, മൂക്ക്, വായ തുടങ്ങിയ ഭാഗങ്ങളിലെ മൃദുലമായ ചർമ്മത്തിലൂടെയും രോഗം പകരാൻ സാധ്യതയുണ്ട്. നിലവിൽ വയലുകളിൽ പണിയെടുക്കുന്നവർ, കനാലുകളും കുളങ്ങളും വൃത്തിയാക്കുന്നവർ എന്നിവരിലാണ് സാധാരണയായി എലിപ്പനി കണ്ടുവരുന്നത്. എന്നാൽ, ഇപ്പോൾ വിദ്യാർഥികൾ, ക്ഷീര കർഷകർ, ലോട്ടറി വില്പനക്കാർ, ഡ്രൈവർമാർ, പെയിന്‍റിംഗ് തൊഴിലാളികൾ, വീട്ടമ്മമാർ എന്നിവരിലും രോഗം സ്ഥിരീകരിച്ചിട്ടുണ്ട്. മരിച്ചവരിൽ ഭൂരിഭാഗവും 40 വയസിനു മുകളിലുള്ളവരും ജീവിതശൈലി രോഗങ്ങളുള്ളവരുമാണ്. മദ്യപാന ശീലമുള്ളവരിൽ രോഗം ഗുരുതരമാകാനുള്ള സാധ്യത കൂടുതലാണ്. ക്ഷീണത്തോടെയുള്ള പനി, തലവേദന, പേശി വേദന, കണ്ണിൽ ചുവപ്പ്, മൂത്രക്കുറവ്, മഞ്ഞപ്പിത്തം എന്നിവയാണ് എലിപ്പനിയുടെ ലക്ഷണങ്ങൾ. ഈ ലക്ഷണങ്ങൾ കണ്ടാൽ ഉടൻതന്നെ ഡോക്ടറെ സമീപിക്കണം. ചികിത്സ വൈകിയാൽ കരൾ, വൃക്ക, ശ്വാസകോശം തുടങ്ങിയ ആന്തരികാവയവങ്ങളെ ബാധിച്ച് മരണം സംഭവിക്കാം. ജില്ലയിൽ എലിപ്പനി ബാധിച്ച് മരിച്ചവരിൽ ഭൂരിഭാഗവും രോഗലക്ഷണങ്ങൾ കണ്ടപ്പോൾ സ്വയംചികിത്സ തേടിയവരാണെന്നും അധികൃതർ അറിയിച്ചു. എലിപ്പനി പ്രതിരോധിക്കാൻ ചില മുൻകരുതലുകൾ എടുക്കണം. വെള്ളക്കെട്ടുള്ള സ്ഥലങ്ങളിലും മലിനമായ ഇടങ്ങളിലും ഗംബൂട്ടുകളും ഗ്ലൗസും ധരിക്കാതെ ഇറങ്ങരുത്. കുട്ടികളെ ചെളിയിൽ കളിക്കാൻ അനുവദിക്കരുത്. കാർഷിക, ശുചീകരണ പ്രവർത്തനങ്ങളിൽ ഏർപ്പെടുന്നവർ ഗംബൂട്ടുകളും കൈയ്യുറകളും നിർബന്ധമായും ധരിക്കുക. മുറിവുകളുള്ളവർ മുറിവ് ഉണങ്ങുന്നതുവരെ ഇത്തരം ജോലികളിൽ നിന്ന് വിട്ടുനിൽക്കുക. ജോലിക്ക് പോകുമ്പോൾ ആരോഗ്യപ്രവർത്തകരുടെ നിർദ്ദേശമനുസരിച്ച് ഡോക്സിസൈക്ലിൻ ഗുളികകൾ കഴിക്കുന്നത് രോഗം തടയാൻ സഹായിക്കും. മരിച്ചവരിൽ ഭൂരിഭാഗവും ഈ ഗുളികകൾ കഴിക്കാത്തവരാണെന്ന് കണ്ടെത്തിയിട്ടുണ്ടെന്നും ആരോഗ്യ വകുപ്പ് അറിയിച്ചു.

പാറ മണ്ണുക്കാട് പാലം ഉദ്ഘാടനം നാളെ

പാലക്കാട്: മലമ്പുഴ നിയോജകമണ്ഡലത്തിലെ എലപ്പുള്ളി, പുതുശ്ശേരി ഗ്രാമപഞ്ചായത്തുകളെ ബന്ധിപ്പിച്ച് കോരയാര്‍ പുഴക്കുകുറുകെ നിര്‍മിച്ചിട്ടുള്ള പാറ മണ്ണുക്കാട് പാലത്തിന്‍റെ ഉദ്ഘാടനം നാളെ നടക്കും. ഉച്ചയ്ക്ക് 12 ന് നടക്കുന്ന ചടങ്ങില്‍ പൊതുമരാമത്ത് മന്ത്രി പി.എ. മുഹമ്മദ് റിയാസ് ഉദ്ഘാടനം നിര്‍വഹിക്കും. പരിപാടിയില്‍ വി.കെ. ശ്രീകണ്ഠന്‍ എംപി മുഖ്യാതിഥിയാവും. എ. പ്രഭാകരന്‍ എംഎല്‍എ അധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്‍റ് കെ. ബിനുമോള്‍ പങ്കെടുക്കും. കിഫ്ബി പദ്ധതിയില്‍ ഉള്‍പ്പെടുത്തി 8.6 കോടി രൂപ ചെലവില്‍ കേരള റോഡ് ഫണ്ട് ബോര്‍ഡാണ് പാലത്തിന്‍റെ നിര്‍മാണം പൂര്‍ത്തീകരിച്ചത്. ഇരുവശത്തും 1.50 മീറ്റര്‍ വീതിയുള്ള നടപ്പാതയടക്കം 11 മീറ്റര്‍ വീതിയും 77.7 മീറ്റര്‍ നീളവുമാണ് പാലത്തിനുള്ളത്. അത്യാധുനിക സാങ്കേതികവിദ്യകള്‍ ഉപയോഗിച്ചാണ് പാലം നിര്‍മിച്ചിരിക്കുന്നത്. സുരക്ഷ ഉറപ്പാക്കാന്‍ സംരക്ഷണ ഭിത്തികളും ക്രാഷ് ബാരിയറുകളും സ്ഥാപിച്ചിട്ടുണ്ട്.

ട്രാൻസ്ഫോർമറിനുസമീപം യുവാവ് മരിച്ചനിലയിൽ

ചെർപ്പുളശേരി: യുവാവിനെ ട്രാൻസ്ഫോർമറിനുസമീപം മരിച്ചനിലയിൽ കണ്ടെത്തി. കാറൽമണ്ണ തൃക്കടീരി മനപ്പടി വീട്ടിൽ മണികണ്ഠനെ(36)യാണ്എകെജി റോഡിൽ ട്രാൻസ്ഫോർമറിനുസമീപം ഇന്നലെ രാവിലെ മരിച്ചനിലയിൽ കണ്ടെത്തിയത്. ഷോക്കേറ്റു മരിച്ചതാവാമെന്നാണ് പോലീസ് നിഗമനം. അവിവാഹിതനാണ്. ചെർപ്പുളശേരി പോലീസ് കേസെടുത്തു.

നൊച്ചൂർപാതയിൽ സിഗ്നൽലൈറ്റുകൾ അണഞ്ഞിട്ട് മാസങ്ങൾ

കൊടുവായൂർ: നൊച്ചൂർ അപകടപാതയിലെ വാഹനവേഗത നിയന്ത്രിക്കാൻ സ്ഥാപിച്ച സിഗ്നൽലൈറ്റ് പ്രവർത്തനക്ഷമമാക്കണമെന്ന് ആവശ്യം. മാസങ്ങളായി ലൈറ്റ് അണഞ്ഞുകിടക്കുകയാണ്. എസ് ആകൃതിയിലുള്ള കൊടുംവളവിൽ എതിർവശത്ത് വരുന്ന വാഹനങ്ങൾ മുഖാമുഖമെത്തുമ്പോൾ മാത്രമാണ് അപകടാവസ്ഥ തിരിച്ചറിയിരുന്നത്. കാളവണ്ടിയിൽ കാറിടിച്ച് മൂന്ന്പേർ മരണപ്പെട്ടതുൾപ്പെടെ പത്തിൽ കൂടുതൽ പേരുടെ ജീവൻ ഇവിടെ നിരത്തിൽ പൊലിഞ്ഞിട്ടുണ്ട്. മൂന്ന് വർഷം മുൻപാണ് താത്കാലിക പരിഹാരമെന്ന നിലയിൽ സ്ഥലപരിചയമില്ലാത്തവർക്ക് അപകടാവസ്ഥ മുന്നറിയിപ്പ് നൽകാൻ സിഗ്നൽലൈറ്റുകൾ സ്ഥാപിച്ചത്. ഇതിനുശേഷം അപകടങ്ങൾ കുറയുകയും ചെയ്തു. സിഗ്നൽലൈറ്റ് പ്രവർത്തനരഹിതമായതോടെ വാഹനങ്ങളുടെ വേഗത വീണ്ടും കൂടി. വാഹനങ്ങൾ കൂട്ടിയിടിച്ച് അപകടങ്ങൾ സംഭവിക്കുമ്പോഴാണ് പരിഹാര നടപടികളുമായി അധികൃതർ രംഗത്തെത്തുന്നത്.

കുന്നംകുളത്തെ കസ്റ്റഡി മർദനം: കോൺഗ്രസ് പോലീസ് സ്റ്റേഷൻ മാർച്ച് നടത്തി

പാലക്കാട്: കുന്നംകുളം ചൊവ്വനൂർ യൂത്ത് കോൺഗ്രസ് മണ്ഡലം പ്രസിഡന്‍റ് സുജിത്തിനെ ക്രൂരമായി മർദിച്ചതിലും സംസ്ഥാനത്തെ പോലീസ് നരനായാട്ട് അവസാനിപ്പിക്കണമെന്നും പോലീസ് ക്രിമിനലുകളെ ഉടൻ പിരിച്ചുവിടണമെന്നും ആവശ്യപ്പെട്ടും പാലക്കാട് ടൗൺ ഈസ്റ്റ്, സൗത്ത്, നോർത്ത്, കണ്ണാടി മണ്ഡലം കമ്മിറ്റികളുടെ നേതൃത്വത്തിൽ പാലക്കാട് ടൗൺ സൗത്ത് പോലീസ് സ്റ്റേഷനു മുന്നിൽ നടത്തിയ ജനകീയ പ്രതിഷേധസദസ് ഡിസിസി പ്രസിഡന്‍റ് എ. തങ്കപ്പൻ ഉദ്ഘാടനം ചെയ്തു. ഈസ്റ്റ് മണ്ഡലം കോൺഗ്രസ് പ്രസിഡന്‍റ് എസ്. സേവ്യർ അധ്യക്ഷത വഹിച്ചു. യുഡിഎഫ് ജില്ലാ കൺവീനർ പി. ബാലഗോപാൽ, ഡിസിസി സെക്രട്ടറി പ്രകാശൻ കാഴ്ചപറമ്പിൽ, ബ്ലോക്ക് കോൺഗ്രസ് പ്രസിഡന്‍റ് സി.വി. സതീഷ് , കെപിസി സി മെംബർ കെ.ഐ. കുമാരി, യൂത്ത് കോൺഗ്രസ് ജില്ലാ പ്രസിഡന്‍റ് കെ.എസ്. ജയഘോഷ്, പി.എച്ച്. മുസ്തഫ, സുധാകരൻ പ്ലാക്കാട്ട്, എസ്.എം. താഹ, എ. രമേശ് പുത്തൂർ, പി. പ്രസാദ്, കെ. ഭവദാസ്, സി. കിദർ മുഹമ്മദ്, രാജീവ് രാമനാഥ്. എ. കൃഷ്ണൻ, സാജോ ജോൺ, എച്ച്. മുബാറക്ക്, മോഹനൻ കാഴ്ചപറമ്പിൽ, ഹരിദാസ് മച്ചിങ്ങൽ, ജവഹർ രാജ്, അനുപമ പ്രശോഭ്, കെ.ആർ. ശരരാജ്, നവാസ് മാങ്കാവ്, എസ്. കുപ്പേലൻ, കെ. ബൽറാം, പ്രഭുൽ കുമാർ, വി. മോഹനൻ, എം. പ്രശോഭ്, കെ. അനീഷ്, എം. വത്സ കുമാർ, എ.എം. അബ്ദുള്ള, കാജ എച്ച്. ജൈലാവുദ്ദീൻ, വി. മോഹനൻ, മോഹൻ ബാബു, മനോജ് കളത്തിൽ, എ. സലിം, എം.കെ. സിദ്ധാർഥൻ, ചന്ദ്രൻ യാക്കര, കണ്ണാടി പഞ്ചായത്ത് മെംബർമാരായ എം. കലാവതി, രമേശ്, എസ്. ശെൽവൻ, മുരളി എലന്തിയൻകോട്, എം. ശരവണൻ, പി.വി. മോഹൻദാസ് പങ്കെടുത്തു. വടക്കഞ്ചേരി പോലീസ് സ്റ്റേഷൻ വടക്കഞ്ചേരി: ചൊവ്വന്നൂരിൽ കോൺഗ്രസ് നേതാവ് സുജിത്തിനെ ക്രൂരമായി മർദിച്ച പോലീസുകാരെ സർവീസിൽ നിന്നും പിരിച്ചുവിടണമെന്നാവശ്യപ്പെട്ട് കോൺഗ്രസ് വടക്കഞ്ചേരി, കണ്ണമ്പ്ര, പുതുക്കോട് എന്നീ മണ്ഡലം കമ്മിറ്റികളുടെ നേതൃത്വത്തിൽ വടക്കഞ്ചേരി പോലീസ് സ്റ്റേഷനിലേക്ക് മാർച്ചും സ്റ്റേഷനു മുന്നിൽ ജനകീയ പ്രതിഷേധസദസും നടത്തി. യൂത്ത് കോൺഗ്രസ് സംസ്ഥാന മുൻ സെക്രട്ടറി അഡ്വ. എൻ.എസ്. ശില്പ ഉദ്ഘാടനം ചെയ്തു. വടക്കഞ്ചേരി മണ്ഡലം പ്രസിഡന്‍റ് ഇല്യാസ് പടിഞ്ഞാറെക്കളം അധ്യക്ഷതവഹിച്ചു. യൂത്ത് കോൺഗ്രസ് തൃശൂർ ജില്ലാ സെക്രട്ടറി വിനീഷ് പ്ലാച്ചേരി മുഖ്യപ്രഭാഷണം നടത്തി. ഡിസിസി സെക്രട്ടറി ഡോ. അർസലൻ നിസാം, കണ്ണമ്പ്ര മണ്ഡലം പ്രസിഡന്‍റ് സുദേവൻ, പുതുക്കോട് മണ്ഡലം പ്രസിഡന്‍റ് ഉദയൻ, സഹകരണ ബാങ്ക് പ്രസിഡന്‍റ് റെജി കെ. മാത്യു , എ.പി. ശശികല ടീച്ചർ, വി.എച്ച്. ബഷീർ, കെ. മോഹൻദാസ്, നന്ദകുമാർ, ബാബു മാധവൻ, സി. മുത്തു, ജി. സതീഷ് കുമാർ, ദേവദാസ്, സുനിൽ ചുവട്ടുപാടം, ശ്രീനാഥ് വെട്ടത്ത്, ജോണി ഡയൻ, സന്തോഷ്, മൊയ്തു, സുധാകരൻ, ശിവൻ, സഹദേവൻ, വിനോദ്, കാരയങ്കാട് ശിവരാമകൃഷ്ണൻ, പ്രിയ സുരേഷ് പ്രസംഗിച്ചു. മംഗലംഡാം പോലീസ് സ്റ്റേഷൻ മംഗലംഡാം: വി.എസ്. സുജിത്തിനെ അകാരണമായി മർദിച്ച പോലീസുകാരെ സർവീസിൽ നിന്നും പിരിച്ചുവിടണമെന്നാവശ്യപ്പെട്ട് വണ്ടാഴി, കിഴക്കഞ്ചേരി മണ്ഡലം കമ്മിറ്റികളുടെ നേതൃത്വത്തിൽ മംഗലംഡാം പോലീസ് സ്റ്റേഷനിലേക്ക് മാർച്ചും പ്രതിഷേധസദസും നടത്തി. ഡിസിസി ജനറൽ സെക്രട്ടറി കെ.ജി. എൽദോ ഉദ്ഘാടനം ചെയ്തു. കോൺഗ്രസ് വണ്ടാഴി മണ്ഡലം പ്രസിഡന്‍റ് കെ.എം. ശശീന്ദ്രൻ അധ്യക്ഷത വഹിച്ചു. ഡിസിസി മെംബർ പ്രദീപ്‌ നെന്മാറ, കിഴക്കഞ്ചേരി മണ്ഡലം പ്രസിഡന്‍റ് സി. ചന്ദ്രൻ, ബ്ലോക്ക്‌ വൈസ് പ്രസിഡന്‍റ് അരവിന്ദാക്ഷൻ മാസ്റ്റർ, ഡിനോയ് കോമ്പാറ, കെ.വി. കുര്യാക്കോസ്, വി.ജെ. ജോസഫ്, രാജു പുതുശേരി, പി.ജെ. മോളി പ്രസംഗിച്ചു. ചിറ്റൂർ പോലീസ് സ്റ്റേഷൻ ചിറ്റൂർ: ചൊവ്വന്നൂർ യൂത്ത് കോൺഗ്രസ്‌ മണ്ഡലം പ്രസിഡന്‍റ് സുജിത്തിനെ തല്ലിച്ചതച്ച പോലീസ് ഉദ്യോഗസ്ഥരെ സർവീസിൽനിന്ന് പുറത്താക്കണമെന്ന് ആവശ്യപ്പെട്ടുകൊണ്ട് കെപിസിസിയുടെ നിർദേശപ്രകാരം ചിറ്റൂർ, തത്തമംഗലം, പൊൽപ്പുള്ളി, നല്ലേപ്പുള്ളി കോൺഗ്രസ്‌ മണ്ഡലം കമ്മിറ്റികളുടെ നേതൃത്വത്തിൽ ചിറ്റൂർ പോലീസ് സ്റ്റേഷനിലേക്ക് പ്രതിഷേധ മാർച്ച് സംഘടിപ്പിച്ചു. ഡിസിസി വൈസ് പ്രസിഡന്‍റ് സുമേഷ് അച്യുതൻ ഉദ്ഘാടനം ചെയ്തു. മുൻ ചെയർമാൻ കെ. മധു, മുരളി തറക്കളം, സൈദ് ഇബ്രാഹിം, ദാമോദരൻ, എ. ഷഫീക്, കെ. സാജൻ, രാമൻകുട്ടി, ആർ. ബാബു, ആർ.പി. സതീഷ്, രാഹുൽ കൃഷ്ണ, സോനു പ്രണവ്, അനൂപ്‌ തുടങ്ങിയവർ നേതൃത്വം നൽകി. പുതൂർ പോലീസ് സ്റ്റേഷൻ അഗളി: പുതൂർ, ഷോളയൂർ പോലീസ് സ്റ്റേഷനുകളിലേക്ക് മണ്ഡലം കോണ്‍ഗ്രസ് കമ്മിറ്റിയുടെ നേതൃത്വത്തിൽ പ്രതിഷേധ ധർണ നടത്തി. പ്രതിഷേധസദസ്‌ കോണ്‍ഗ്രസ് ബ്ലോക്ക് പ്രസിഡന്‍റ് പി.എം. ഹനീഫ ഉദ്ഘാടനം ചെയ്തു. ഷോളയൂരിൽ മണ്ഡലം പ്രസിഡന്‍റ് കനകരാജ് അധ്യക്ഷനായി. നേതാക്കളായ ഷിബു സിറിയക്ക്, എൻ.കെ. രഘുത്തമൻ, എം.എം. തോമസ്, എം. സി. ഗാന്ധി, വിശ്വനാഥൻ, ജി. ഷാജു, മണികണ്ഠൻ, സുബ്രഹ്മണ്യൻ, സന്തോഷ്, കെ.ജെ. മാത്യു, ടിറ്റു വർഗീസ്, വാസു, ബാലൻ, സാന്‍റോ കോയിപുറത്ത്, അജിത്ത്, ജി. അശോക്, മൂർത്തി, വില്യംസ് പ്രസംഗിച്ചു. പുതൂരിൽ മണ്ഡലം പ്രസിഡന്‍റ് സെന്തിൽകുമാർ അധ്യക്ഷനായി. നേതാക്കളായ ഷിബു സിറിയക്, കുറുന്താചലം, കനകരാജ്, രാധാകൃഷ്ണൻ, ജോജി, സതീഷ്, സമീഷ്, സുമേഷ്, ഉദയകുമാർ, രംഗൻ, അഭിജിത്ത്, കുമാരൻ, ഷിജി, ചെല്ലമ്മ, നടരാജ് പ്രസംഗിച്ചു. ആനക്കര: യൂത്ത് കോണ്‍ഗ്രസ് നേതാവ് വി.എസ.് സുജിത്തിനെ കസ്റ്റഡിയിൽ മർദിച്ച പോലീസുകാരെ സർവീസിൽ നിന്നും പുറത്താക്കണമെന്നാവശ്യപ്പെട്ട് ബ്ലോക്ക് കോണ്‍ഗ്രസ് കമ്മിറ്റി നേതൃത്വത്തിൽ തൃത്താല പോലീസ് സ്റ്റേഷനു മുന്നിൽ ജനകീയ പ്രതിഷേധസദസ് സംഘടിപ്പിച്ചു. കെപിസിസി നിർവാഹക അംഗം സി.വി. ബാലചന്ദ്രൻ ഉദ്ഘാടനം ചെയ്തു. ബ്ലോക്ക് കോണ്‍ഗ്രസ് പ്രസിഡന്‍റ് കെ. വിനോദ് അധ്യക്ഷത വഹിച്ചു. പി.വി. മുഹമ്മദ് അലി, പി. ബാലൻ, വി. അബ്ദുള്ളകുട്ടി, പി.കെ. അപ്പുണ്ണി, പി.എ. വാഹിദ്, സെയ്ത് മോൻ, എം. മണികണ്ഠൻ, സി.പി. മുഹമ്മദ്, കെ.പി. സുധീഷ്, എസ്.ടി. നിസാർപ്രസംഗിച്ചു.

കഞ്ചാവ് മൊത്തവില്പനക്കാരൻ അറസ്റ്റിൽ

വടക്കഞ്ചേരി: അയൽസംസ്ഥാനങ്ങളിൽനിന്നും കഞ്ചാവ് എത്തിച്ച് മൊത്തവില്പന നടത്തുന്നയാളെ പോലീസ് അറസ്റ്റ് ചെയ്തു. നെന്മാറ പടപ്പാടത്ത് വീട്ടിൽ ഗോപകുമാറാണ്(52) അറസ്റ്റിലായത്. ആന്ധ്ര, ഒഡീഷ തുടങ്ങിയ സംസ്ഥാനങ്ങളിൽനിന്നും ചരക്ക് കടത്തുന്നതിനൊപ്പം കഞ്ചാവും എത്തിക്കുകയാണ് ഇയാളുടെ രീതിയെന്നു പോലീസ് പറഞ്ഞു. കഴിഞ്ഞമാസം എട്ടിനു കിഴക്കഞ്ചേരി നൈനാങ്കാട് വാടകവീട്ടിൽനിന്നും പതിമൂന്നര കിലോ കഞ്ചാവ് കണ്ടെത്തിയ സംഭവത്തിൽ പോലീസ് നടത്തിയ അന്വേഷണത്തിലാണ് ഗോപകുമാർ വലയിലായത്. വീട്ടിൽ കഞ്ചാവ് സൂക്ഷിച്ചതിന് അന്ന് കിഴക്കഞ്ചേരി സ്വദേശി സുന്ദരൻ എന്നയാൾ പിടിയിലായിരുന്നു. കഞ്ചാവ് സൂക്ഷിക്കാൻ ഏൽപ്പിച്ച സുന്ദരന്‍റെ ബന്ധുവും അണക്കപ്പാറ സ്വദേശിനിയുമായ സ്വപ്നയെയും പിടികൂടിയിരുന്നു. ഇവർ രണ്ടുപേരും ഇപ്പോൾ റിമാൻഡിലാണ്. സ്വപ്നയ്ക്കു സ്ഥിരം കഞ്ചാവ് എത്തിക്കുന്നതും ഗോപകുമാറാണെന്നു പോലീസ് പറഞ്ഞു. അയൽസംസ്ഥാനങ്ങളിൽനിന്നും ഇയാളുടെ ലോറിയിൽ കടത്തിക്കൊണ്ടുവരുന്ന കഞ്ചാവ് വടക്കഞ്ചേരി, ആലത്തൂർ, മുടപ്പല്ലൂർ, മംഗലംഡാം, നെന്മാറ എന്നീ മേഖലകളിൽ വില്പനക്കാർക്ക് എത്തിച്ചുകൊടുക്കും. ഇയാളെ പിടികൂടിയതോടെ ജില്ലയിലെ വിവിധ പ്രദേശങ്ങളിൽ ഇയാൾ കഞ്ചാവ് കൈമാറുന്നവരെപ്പറ്റിയും പോലീസിനു വിവരം ലഭിച്ചിട്ടുണ്ട്. ഡിവൈഎസ്പിമാരായ മുരളീധരൻ, അബ്ദുൾ മുനീർ, ഗോപകുമാർ, വടക്കഞ്ചേരി സിഐ കെ.പി. ബെന്നി എന്നിവരുടെ നേതൃത്വത്തിൽ വടക്കഞ്ചേരി പോലീസും ജില്ലാ ലഹരിവിരുദ്ധ സ്ക്വാഡും ചേർന്നാണ് ഗോപകുമാറിനെ പിടികൂടിയത്.

പൂർണസാക്ഷരത: മൂന്നാംഘട്ട പ്രവർത്തനങ്ങൾക്കു തുടക്കം

പാലക്കാട്: ലോക സാക്ഷരതാദിനാചരണത്തിന്‍റെ ജില്ലാതല ഉദ്ഘാടനം ഷൊർണൂർ എസ്എൻ കോളജിൽ നഗരസഭ ചെയർമാൻ കെ. ജയപ്രകാശ് നിർവഹിച്ചു. ജില്ലാ പഞ്ചായത്ത് സ്റ്റാൻഡിംഗ് കമ്മിറ്റി ചെയർപേഴ്സണ്‍ എ. ഷാബിറ അധ്യക്ഷയായി. ജില്ലാ പഞ്ചായത്ത് സെക്രട്ടറി എം. രാമൻകുട്ടി സാക്ഷരതദിന സന്ദേശം നൽകി. ജില്ലാ സാക്ഷരതാസമിതി അംഗങ്ങളായ ഒ. വിജയൻ മാസ്റ്റർ, ഡോ.പി സി. ഏലിയാമ്മ, ജില്ലാ കോ-ഓർഡിനേറ്റർ സജി തോമസ്, അസിസ്റ്റന്‍റ് കോ-ഓർഡിനേറ്റർ പി.വി. പാർവതി, എസ്എൻ കോളജ് എൻഎൻഎസ് പ്രോഗ്രാം ഓഫീസർ സി. ഗിരിജ, പ്രോഗ്രാം ഓഫീസർ രാജേഷ്, ആർപി മാരായ വി.പി. ജയരാജൻ, കെ.വി. ജയൻ എന്നിവർ പ്രസംഗിച്ചു. പരിപാടിയിൽ സാക്ഷരതാ പ്രവർത്തകരായ വിജയൻ മാസ്റ്റർ, ഡോ. ഏലിയാമ്മ ടീച്ചർ എന്നിവരെ നഗരസഭ ചെയർമാൻ കെ. ജയപ്രകാശ് ആദരിച്ചു. കേന്ദ്ര-സംസ്ഥാന സർക്കാരുകളുടെ സംയുക്തപദ്ധതിയായ ന്യൂ ഇന്ത്യ ലിറ്ററസി പ്രോഗ്രാം (ഉല്ലാസ്) മൂന്നാംഘട്ട പ്രവർത്തനങ്ങളുടെ ഭാഗമായി ഗുണഭോക്താക്കളെ കണ്ടെത്തുന്നതിനുള്ള സർവേ സംബന്ധിച്ച് എൻഎസ്എസ് യൂണിറ്റ് അംഗങ്ങൾക്കുള്ള പരിശീലനവും നടന്നു. അവശേഷിക്കുന്ന നിരക്ഷരരെ കണ്ടെത്തി സാക്ഷരരാക്കി പരിപൂർണസാക്ഷരത കൈവരിക്കുക എന്നതാണ് പദ്ധതിയുടെ ലക്ഷ്യം. പദ്ധതിയുടെ ഒന്നും രണ്ടും ഘട്ടങ്ങൾ ജില്ലയിൽ തദ്ദേശസ്വയംഭരണ സ്ഥാപനങ്ങളുടെ നേതൃത്വത്തിൽ വിജയകരമായി പൂർത്തിയാക്കി. സർവെയിലൂടെ കണ്ടെത്തുന്ന നിരക്ഷരരെ എട്ട് മുതൽ പത്ത് പേർക്ക് ഒരു ക്ലാസ് എന്ന നിലയിൽ സാക്ഷരതാ മിഷൻ തയ്യാറാക്കിയ സാക്ഷരതാ പാഠപുസ്തകത്തെ അടിസ്ഥാനപ്പെടുത്തി 120 മണിക്കൂർ പഠനം നൽകി. മികവുത്സവം സാക്ഷരതാ പരീക്ഷയിൽ പങ്കെടുപ്പിച്ച് വിജയികൾക്ക് സർട്ടിഫിക്കറ്റ് നൽകും. നവസാക്ഷരെയും തുടർപഠനം ആഗ്രഹിക്കുന്നവരെയും ഈ സർവെയിലൂടെ കണ്ടെത്തി തുല്യത കോഴ്സുകളിലേക്ക് രജിസ്റ്റർ ചെയ്യുന്നതിനുള്ള പ്രവർത്തനങ്ങളും ഇതോടൊപ്പം നടത്തും.

അങ്കണവാടി കുട്ടികൾക്കു മുട്ടബിരിയാണി; ഗ്രാമപഞ്ചായത്തുതല ഉദ്ഘാടനം നടത്തി

പാലക്കാട്: അകത്തേത്തറ ഗ്രാമപഞ്ചായത്തിലെ അങ്കണവാടികളിൽ പരിഷ്കരിച്ച പുതിയ മെനുവിന്‍റെ ഭാഗമായി കുട്ടികൾക്ക് മുട്ട ബിരിയാണി നൽകി ഗ്രാമപഞ്ചായത്ത്തല ഉദ്ഘാടനം നിർവഹിച്ചു. അകത്തേത്തറ കോരത്തൊടി അങ്കണവാടിയിലെ കുട്ടികൾക്ക് ഉച്ചഭക്ഷണം നൽകി അകത്തേത്തറ ഗ്രാമപഞ്ചായത്ത് പ്രസിഡന്‍റ് സുനിത അനന്തകൃഷ്ണൻ ഉദ്ഘാടനം നിർവഹിച്ചു. 10 പ്രീസ്കൂൾ കുട്ടികളാണ് അങ്കണവാടിയിൽ ഉള്ളത്. പ്രാതലിൽ പാൽ, പിടി, കൊഴുക്കട്ട, ഇലയട, ന്യൂട്രി ലഡ്ഡു, കടല മിട്ടായി, റാഗി എന്നിങ്ങനെയുള്ള വിഭവങ്ങൾ ഉൾപ്പെടുന്നു. ഉച്ചഭക്ഷണത്തിന് ചോറ്, ചെറുപയർ, ഇലക്കറി, ഉപ്പേരി, തോരൻ, മുട്ട ബിരിയാണി, മുട്ട പുലാവ്, ഫ്രൂട്ട് കപ്പ്, പയർ കഞ്ഞി, വെജ് കിഴങ്ങ് കൂട്ടുകറി സോയ/കടല, മുളപ്പിച്ച പയർ, അവിയൽ, വെജിറ്റബിൾ പുലാവ് എന്നിങ്ങനെയുള്ള വിഭവങ്ങൾ ഓരോ ദിവസങ്ങളിലായി നൽകും. ധാന്യം, പരിപ്പ് പായസം, റാഗി അട, ഇഡലി-സാന്പാർ, പുട്ട്-ഗ്രീൻപീസ്, അവൽ-ശർക്കരപഴം മിക്സ്, ഗോതന്പ് നുറുക്ക്, ധാന്യപായസം എന്നിങ്ങനെയുള്ളവ പൊതുഭക്ഷണത്തിൽ ഉൾപ്പെടുന്നു. ഐസിഡിഎസ് സൂപ്പർവൈസർ ഹസീന അധ്യക്ഷയായി. അങ്കണവാടി വർക്കർ ഗിരിജ, രക്ഷിതാക്കൾ, എഎൽഎസി കമ്മിറ്റിഅംഗങ്ങൾ പങ്കെടുത്തു.

കെസിവൈഎം ഒലവക്കോട് ഫെറോനയുടെ ഓണാഘോഷം- ഓണാരവം 2കെ25

ഒലവക്കോട്: കെസിവൈഎം ഒലവക്കോട് ഫൊറോനയുടെ ഓണാഘോഷപരിപാടി - ഓണാരവം 2കെ25 മൈലംപുള്ളി സെന്‍റ് മേരീസ് പള്ളിയിൽ നടത്തി. ഫൊറോന ഡയറക്ടർ ഫാ. അജി ഐക്കര, കെസിവൈഎം മൈലംപുള്ളി യൂണിറ്റ് ഡയറക്ടർ ഫാ. ജോർജ് തെരുവൻകുന്നേൽ എന്നിവരുടെ ആശിർവാദത്തോടെ ഓണാരവത്തിനു തുടക്കംകുറിച്ചു. യുവജനങ്ങൾക്കായി വിവിധ മത്സരങ്ങൾ നടത്തി. കെസിവൈഎം പ്രസിഡന്‍റ് തോമസ് ബാബു, സെക്രട്ടറി ജോസ്‌വിൻ ജേക്കബ് എന്നിവർ നേതൃത്വം നൽകി.

സാമൂഹികക്ഷേമത്തിന് ഊന്നൽനൽകി വടക്കഞ്ചേരി ലയൺസ് ക്ലബ്

വടക്കഞ്ചേരി: സാമൂഹിക ക്ഷേമ പ്രവർത്തനങ്ങൾക്ക് ഊന്നൽനൽകി കൂടുതൽപേർക്ക് സഹായങ്ങളുമായി വടക്കഞ്ചേരി ലയൺസ് ക്ലബ്. ഇതിന്‍റെ ഭാഗമായി ബിപിഎൽ കാർഡ് ഉടമകൾക്കെല്ലാം വർഷത്തിൽ 360 ദിവസവും ഫ്രീ-ഷുഗർ ചെക്കപ്പിന് സൗകര്യമൊരുക്കിയിട്ടുണ്ടെന്ന് സെക്രട്ടറി സജോ ജോർജ് തേവർകാട് പറഞ്ഞു. കാൻസർ രോഗികൾക്കുള്ള ചികിത്സാ സഹായങ്ങൾക്കൊപ്പം അനാഥരും നിരാലംബരുമായവരെ സംരക്ഷിക്കുന്ന സ്ഥാപനങ്ങൾക്ക് ഗ്ലൂക്കോമീറ്റർ ഉൾപ്പെടെ ചികിത്സാ ഉപകരണങ്ങളും വിതരണം ചെയ്യുന്നുണ്ട്. വൈകല്യമുള്ള കുട്ടികളെ സംരക്ഷിക്കുന്ന ചിറ്റടിയിലെ അനുഗ്രഹ ഭവന് തുടർച്ചയായി പതിനെട്ടാം വർഷവും സാമ്പത്തിക സഹായം കൈമാറിയതായി ഭാരവാഹികൾ അറിയിച്ചു. ഈ വർഷത്തെ ധനസഹായ വിതരണം ക്ലബ് പ്രസിഡന്‍റ് കെ.പി. രാജേന്ദ്രൻ, സെക്രട്ടറി സജോ ജോർജ് തേവർകാട്, ട്രഷറർ സി.എൻ. ഷിനു, ചാർട്ടർ മെംബർ എം.വി. തോമസ് എന്നിവർ ചേർന്ന് അനുഗ്രഹ ഭവൻ മദർ സുപ്പീരിയർ സിസ്റ്റർ മേബലിന് കൈമാറി. ഫ്രീ ഷുഗർ ചെക്കപ്പ് ഉൾപ്പെടെയുള്ള ക്ലബി സഹായങ്ങൾക്ക് 9497251142 എന്ന നമ്പറിൽ സെക്രട്ടറിയുമായി ബന്ധപ്പെടണമെന്നു അധികൃതർ അറിയിച്ചു.

അന്പെയ്ത്ത് മത്സരങ്ങളിൽ പങ്കെടുക്കാൻ പരിശീലനം: അപേക്ഷ നാളെയുംകൂടി

പാലക്കാട്: ഫിസിക്കലി ചലഞ്ച്ഡ് ഓൾ സ്പോർട്സ് അസോസിയേഷൻ കേരളയും ഫ്യൂച്ചർ ഒളിമ്പ്യൻസ് പ്രഫഷണൽ ആർച്ചറി ട്രെയിനിംഗ് അക്കാദമിയും സംയുക്തമായി ഭിന്നശേഷിക്കാർക്കും ഭിന്നശേഷി ഇല്ലാത്തവർക്കും അന്പെയ്ത്തിൽ പരിശീലനം നൽകും. ഒക്ടോബർ, നവംബർ മാസങ്ങളിൽ നടക്കുന്ന സ്കൂൾ ഗെയിംസ്, കേരളോത്സവം, പാരാ ആർച്ചറി ചാമ്പ്യൻഷിപ്പ് എന്നീ മത്സരങ്ങളിൽ പങ്കെടുക്കാൻ പരിശീലനം നൽകുന്നതിന് ജില്ലയിലെ സ്കൂളുകൾക്ക് അപേക്ഷിക്കാം. പരിശീലനം നടത്തുന്നതിന് ആവശ്യമായ 50000 രൂപയോളം വില വരുന്ന ആർച്ചറി ഉപകരണങ്ങളായ ബോ, ടാർഗറ്റ്, ആരോ തുടങ്ങിയവ സൗജന്യമായി നൽകും. നിരവധി കായിക ഇനങ്ങളിൽ ദേശീയ അന്തർദേശീയ മെഡലുകൾ കരസ്ഥമാക്കിയിട്ടുള്ള ആർച്ചറി കോച്ച് എ.എം. കിഷോറിന്‍റെ നേതൃത്വത്തിൽ ഏഴാം ക്ലാസ് മുതലുള്ള ആൺകുട്ടികൾക്കും പെൺകുട്ടികൾക്കുമാണ് പരിശീലനം നൽകുക. പരിശീലനത്തിനായി 100 മീറ്റർ സ്ഥലമുള്ള സ്കൂളുകൾ നാളെ വൈകുന്നേരം അഞ്ചിനകം ഇ-മെയിലിലൂടെ അപേക്ഷിക്കാം. അപേക്ഷാഫോമനും കൂടുതൽ വിവരങ്ങൾക്കും https://pcasak.weebly.com/ എന്ന വെബ്സൈറ്റ് സന്ദർശിക്കാം. വിവരങ്ങൾ 9809921065 നന്പറിൽ ലഭിക്കും.

നെന്മാറയിലും പോലീസിനെതിരേ പ്രതിഷേധം

നെന്മാറ: യൂത്ത് കോൺഗ്രസ് ചൊവ്വന്നൂർ മണ്ഡലം പ്രസിഡണ്ട് സുജിത്തിനെ അകാരണമായി പോലീസ് മർദിച്ചതിൽ പ്രതിഷേധിച്ച് മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ നെന്മാറ പോലീസ് സ്റ്റേഷനുമുന്നിൽ പ്രതിഷേധ സദസ് സംഘടിപ്പിച്ചു. ഡിസിസി ജനറൽ സെക്രട്ടറി അഡ്വ.സി.സി. സുനിൽ ഉദ്ഘാടനം ചെയ്തു. നെന്മാറ കോൺഗ്രസ് മണ്ഡലം പ്രസിഡന്‍റ് ആർ. സുരേഷ് അധ്യക്ഷത വഹിച്ചു. യുഡിഎഫ് ചെയർമാൻ കെ.ആർ. പത്മകുമാർ, ബ്ലോക്ക് കോൺഗ്രസ് പ്രസിഡന്‍റ് എസ്. വിനോദ്, കെപിഎസ്ടിഎ ജില്ലാ പ്രസിഡന്‍റ് ഷാജി തെക്കേതിൽ, മുൻ.ഡിസിസി സെക്രട്ടറി കെ.ഐ. അബ്ബാസ്, എം.ആർ. നാരായണൻ, പല്ലശ്ശന കോൺഗ്രസ് മണ്ഡലം പ്രസിഡന്‍റ് രാമനാഥൻ, എലവഞ്ചേരി കോൺഗ്രസ് മണ്ഡലം പ്രസിഡന്‍റ് ദേവൻ, പഞ്ചായത്ത് പ്രസിഡന്‍റ് പ്രബിതാ ജയൻ, കെ.പി. ജോഷി എന്നിവർ പ്രസംഗിച്ചു.

കുന്നംകുളം പോലീസ് മർദനത്തിൽ നാടെങ്ങും കോൺഗ്രസ് പ്രതിഷേധം

കൊല്ലങ്കോട്: നിയമപാലകരിലെ ക്രിമിനലുകളെ സംരക്ഷിക്കുന്ന സംസ്ഥാന സർക്കാറിന്‍റെ നയം പൊതുസമൂഹത്തോടുള്ള കടുത്ത വെല്ലുവിളിയാണെന്നു ഡിസിസി ജനറൽ സെക്രട്ടറി കെ.സി. പ്രീത്. കുന്നംകുളം പോലീസ് സ്റ്റഷനിൽ വി.എസ്. സുജിത്തിനെ കൂരമായ മർദിച്ച പോലീസുകാരെ പുറത്താക്കുന്നതിൽ കുറഞ്ഞൊരു നടപടിയും കോൺഗ്രസിന് അംഗീകരിക്കുവാൻ കഴിയില്ലെന്നും കെ.സി. പ്രീത് പറഞ്ഞു. പോലീസ് അതിക്രമത്തിനെതിരെ ഇന്ത്യൻ നാഷണൽ കോൺഗ്രസിന്‍റെ നേതൃത്വത്തിൽ കൊല്ലങ്കോട് നടത്തിയ ജനകീയ പ്രതിഷേധ സദസ് ഉദ്ഘാടനം ചെയ്യുകയായിരുന്നു അദ്ദേഹം. കൊല്ലങ്കോട് ബ്ലോക്ക് കോൺഗ്രസ് പ്രസിഡന്‍റ് കെ. ഗുരുവായൂരപ്പൻ അധ്യക്ഷതവഹിച്ചു. ഡിസിസി ജനറൽ സെക്രട്ടറി പി. മാധവൻ, യൂത്ത് കോൺഗ്രസ് സംസ്ഥാന സെക്രട്ടറി സി. വിഷ്ണു. മണ്ഡലം കോൺഗ്രസ് പ്രസിഡന്‍റുമാരായ ആർ. ശിവരാമൻ, വി. ശശി, ആർ. ബിജോയ്, മഹിളാ കോൺഗ്രസ് ജില്ലാ ജനറൽ സെക്രട്ടറി ശാരദ തുളസീദാസ്, ദളിത് കോൺഗ്രസ് ജില്ലാ സെക്രട്ടറി പൊന്നപ്പൻ, വി.ശിവദാസ്, സുലോചന രാജൻ എന്നിവർ പ്രസംഗിച്ചു.

മലയോരത്തെ വന്യജീവിശല്യം ലഘൂകരിക്കാൻ ജാഗ്രതാസമിതി

കല്ലടിക്കോട്: മലയോര കർഷകർക്ക് കാട്ടാനയുൾപ്പടെയുള്ള വന്യജീവികളിൽ നിന്നുള്ള ശല്യം ലഘൂകരിക്കുന്നതിനായി വനാതിർത്തികളുള്ള പഞ്ചായത്തുകളിൽ പ്രത്യേക ജനജാഗ്രതാ സമിതികൾ രൂപീകരിക്കും. ഇതിന്‍റെ ആദ്യഘട്ടമെന്ന നിലയിൽ വന്യജീവിശല്യം സംബന്ധിച്ചുള്ള പരാതികൾ പരിഹരിക്കുന്നതിനായി പഞ്ചായത്ത് തലത്തിൽ ഹെൽപ്പ് ഡെസ്ക് സജ്ജമാക്കും. വന്യജീവികൾ ജനവാസ മേഖലയിലേയ്ക്ക് കടക്കുന്നതു തടയുന്നതിനായി വനംവകുപ്പ് സ്റ്റേഷൻ ഫോറസ്റ്റ് ഓഫീസറുടെ മേൽനോട്ടത്തിൽ പഞ്ചായത്ത് തലത്തിൽ പ്രൈമറി റെസ്ക്യൂടീം രൂപീകരിച്ച് ഇതിനുള്ള പ്രത്യേക പരിശീലനം നൽകും. പഞ്ചായത്തുകളുടെ സഹായത്തോടെ വനാതിർത്തികളിൽ വൈദ്യുത വേലികളും പ്രകൃതിദത്തമായ പ്രതിരോധ മാർഗങ്ങളും നടപ്പാക്കും. ജനകീയ പങ്കാളിത്തത്തോടെയുള്ള വിവിധങ്ങളായ കർമപദ്ധതികളാകും ജനജാഗ്രതാ സമിതികളിലൂടെ നടപ്പാക്കുക. കരിമ്പ ഗ്രാമപഞ്ചായത്ത് തലത്തിലുള്ള ജനജാഗ്രതാ സമിതിയുടെ പ്രാരംഭയോഗം ശിരുവാണി ശിങ്കപ്പാറ ഫോറസ്റ്റ് സ്റ്റേഷനിൽ പഞ്ചായത്ത് പ്രസിഡന്‍റ് പി.എസ്. രാമചന്ദ്രന്‍റെ അധ്യക്ഷതയിൽ ചേർന്നു. ജനപ്രതിനിധികളും വനംവകുപ്പ് കർഷക പ്രതിനിധികളും പങ്കെടുത്ത യോഗത്തിൽ മണ്ണാർക്കാട് ഫോറസ്റ്റ് റേഞ്ച് ഓഫീസർ ഇംബ്രാസ് എലിയാസ് നവാസ്, ഡെപ്യൂട്ടി റേഞ്ച് ഓഫീസർ കെ. മനോജ്, കല്ലടിക്കോട് സ്റ്റേഷൻ ഫോറസ്റ്റ് ഓഫീസർ എം. കിത്തലൻ, പാലക്കയം സ്പെഷൽ വില്ലേജ് ഓഫീസർ അബ്ബാസ് അലി എന്നിവർ പ്രസംഗിച്ചു.

യുവതി ഭർതൃവീട്ടിൽ തൂങ്ങിമരിച്ച നിലയിൽ

പാലക്കാട്: പുതുപ്പരിയാരത്തു യുവതിയെ ഭർതൃവീട്ടിൽ തൂങ്ങിമരിച്ചനിലയിൽ കണ്ടെത്തി. പുതുപ്പരിയാരം പൂച്ചിറ സ്വദേശി അനൂപിന്‍റെ ഭാര്യ മീര(32)യെയാണ് മരിച്ച നിലയിൽ കണ്ടെത്തിയത്. ഭർത്താവുമായി പിണങ്ങിയ മീര ചൊവ്വാഴ്ച മാട്ടുമന്ത ചോളോടുള്ള സ്വന്തം വീട്ടിലെത്തിയിരുന്നു. രാത്രി 11 മണിയോടെ അനൂപെത്തി മീരയെ തിരികെ കൊണ്ടുപോയിരുന്നു. പിന്നീട് മീരയുടെ മരണവിവരമാണ് കുടുംബം അറിയുന്നത്. ഇരുവരും തമ്മിലുള്ള വഴക്കാവാം മരണത്തിലേക്കു നയിച്ചതെന്നു മീരയുടെ കുടുംബം ആരോപിച്ചു. ആദ്യവിവാഹം വേർപിരിഞ്ഞശേഷം ഒരുവർഷംമുന്പാണ് മീര അനൂപിനെ വിവാഹം ചെയ്തത്. മീര ഒരിക്കലും ജീവനൊടുക്കില്ലെന്നും മരണത്തിൽ ദുരൂഹതയുണ്ടെന്നുമാണ് കുടുംബത്തിന്‍റെ ആരോപണം. വിവാഹശേഷം ഇരുവരും തമ്മിൽ നിരന്തരം പ്രശ്നമുണ്ടായിരുന്നതായി ബന്ധുക്കൾ പറഞ്ഞു. അടുത്തകാലത്താണ് ഇക്കാര്യം വീട്ടുകാരെ അറിയിച്ചതത്രെ. പോലീസിൽ പരാതി നൽകാനിരിക്കെയാണ് അനൂപ് വീട്ടിലെത്തി ക്ഷമാപണംനടത്തി തിരികെ കൊണ്ടുപോയതെന്നു ബന്ധുക്കൾ പറഞ്ഞു. മൃതദേഹം ജില്ലാ ആശുപത്രിയിൽ പോസ്റ്റുമോർട്ടത്തിനുശേഷം മാട്ടുമന്ത വൈദ്യുതശ്മശാനത്തിൽ സംസ്കരിച്ചു. മകൾ: എയ്ഞ്ചൽ. അച്ഛൻ: സുന്ദരൻ. അമ്മ: സുശീല. ഹേമാംബികനഗർ പോലീസ് അസ്വാഭാവികമരണത്തിനു കേസെടുത്ത് അന്വേഷണം ആരംഭിച്ചു.

റിസോർട്ട് ഉടമയെ പിടികൂടിയില്ലെങ്കിൽ സമരമെന്നു നാട്ടുകാർ

മുതലമട: ഊരുകുളം സ്വകാര്യ റിസോർട്ടിൽ ആദിവാസിയെ മുറിയിൽ തടവിലാക്കി മർദിച്ച സംഭവത്തിൽ ഒളിവിലായ പ്രതിയെ പിടികൂടാൻ പോലീസ് നടപടി ശക്തമാക്കണമെന്നു നാട്ടുകാർ. ഊരുകുളം പ്രഭു (21) ആണ് ഒളിവിൽ കഴിയുന്നത്. സംഭവവുമായി ബന്ധപ്പെട്ട് പ്രതിയുടെ അമ്മ റിമാൻഡിൽ കഴിയുകയാണ്. ഇക്കഴിഞ്ഞ ഓഗസ്റ്റ് 21 നാണ് മുതലമട കറുപ്പൻ മകൻ വെള്ളയനെ (51) നാട്ടുകാർ സംഘടിച്ചെത്തി പോലീസിന്‍റെ സഹായത്തിൽ മുറിപൊളിച്ച് രക്ഷപ്പെടുത്തിയത്. അഞ്ചു ദിവസം ഭക്ഷണം നൽകാതെ ഇയാളെ മർദ്ദിച്ച് പീഡിപ്പിച്ചെന്നാണ് കേസ്. സംഭവത്തിലെ പ്രധാന പ്രതിക്കെതിരെ പോലീസ് ആദിവാസി സംരക്ഷണ നിയമങ്ങൾ ഉൾപ്പെടുത്തി കേസെടുത്തിരുന്നു. എന്നാൽ സംഭവത്തിനു ശേഷം മൂന്നാഴ്ച കഴിഞ്ഞിട്ടും പ്രഭുവിനെ പിടികൂടാൻ കഴിയാത്തതിൽ പൊതുജനപ്രതിഷേധം ശക്തമാണ്. പത്തുദിവസം മുൻപ് സമാന ആവശ്യമുന്നയിച്ച് കാമ്പ്രത്ത്ച്ചള്ളയിൽനടന്ന പ്രതിഷേധ മാർച്ചിലും പൊതുയോഗത്തിലും വൻജനപങ്കാളിത്തമാണുണ്ടായിരുന്നത്. പ്രതിയെ പിടികൂടുന്നതിൽ കാലതാമസമുണ്ടായാൽ ശക്തമായ സമരങ്ങളുമായി രംഗത്തുവരുമെന്ന് മുൻപഞ്ചായത്ത് പ്രസിഡന്‍റ് പി. കൽപ്പനാദേവി, മുൻ വൈസ് പ്രസിഡന്‍റ് എം. താജുദീൻ, ആദിവാസി സംരക്ഷണ സമിതി ജില്ലാ പ്രസിഡന്‍റ് മാരിയപ്പൻ നീളിപ്പാറ എന്നിവർ മുന്നറിയിപ്പു നൽകി. ഇതേ റിസോർട്ടിൽ പണി ചെയ്യുന്ന മറ്റൊരു തൊഴിലാളിയായ തിരുനാവുക്കരശ് വിഷയം പൊതുജനത്തിനു കൈമാറിയതാണ് വെള്ളയ്യൻ രക്ഷപ്പെടാൻ സഹായമായത്. പ്രഭുവിൽനിന്നും ആക്രമണമുണ്ടാവുമെന്ന ഭയത്തിൽ തിരുനാവുക്കരശു ഇപ്പോൾ നാട്ടുകാരുടെ സംരക്ഷണത്തിലാണ് കഴിയുന്നത്.

പോലീസിലെ ക്രിമിനലുകളെ സര്‍വീസില്‍നിന്നു പുറത്താക്കണം: ഗാന്ധിദര്‍ശന്‍ സമിതി

പാലക്കാട്: കേരള പോലീസിലെ ഒരുകൂട്ടം ക്രിമിനലുകള്‍ നടത്തിയ ക്രൂരമര്‍ദനങ്ങള്‍ സംബന്ധിച്ച വിവരങ്ങള്‍ തെളിവ് സഹിതം തുടര്‍ച്ചയായി പുറത്തുവന്നിട്ടും ആഭ്യന്തര വകുപ്പിന്‍റെ ചുമതലയുള്ള മുഖ്യമന്ത്രി മൗനം തുടരുന്നതില്‍ ദുരൂഹതയുണ്ടെന്നു ഗാന്ധിദര്‍ശന്‍ സമിതി കുറ്റപ്പെടുത്തി. കുന്നംകുളത്ത് യൂത്ത് കോണ്‍ഗ്രസ് മണ്ഡലം പ്രസിഡന്‍റ് സുജിത്തിനെ മര്‍ദിച്ച പോലീസുകാര്‍ക്കെതിരായ നടപടി സസ്‌പെന്‍ഷനില്‍ ഒതുക്കാമെന്നു മുഖ്യമന്ത്രിയും സര്‍ക്കാരും കരുതരുത്. നരാധമന്മാരായ ക്രിമിനലുകളെ സര്‍വീസില്‍നിന്നും പുറത്താക്കണമെന്നും കെപിസിസി ഗാന്ധിദര്‍ശന്‍ സമിതി പാലക്കാട് ജില്ലാകമ്മിറ്റി ആവശ്യപ്പെട്ടു. പോലീസ് മര്‍ദനങ്ങള്‍ക്കെതിരെ ഗാന്ധിദര്‍ശന്‍ സമിതി ജില്ലാ കമ്മിറ്റി പാലക്കാട്ട് സംഘടിപ്പിച്ച പ്രതിഷേധ യോഗം സംസ്ഥാന ജനറല്‍ സെക്രട്ടറി ബൈജു വടക്കുംപുറം ഉദ്ഘാടനം ചെയ്തു. ജില്ലാ പ്രസിഡന്‍റ് എം. ഷാജു അധ്യക്ഷത വഹിച്ചു. ജില്ലാ ജനറല്‍ സെക്രട്ടറി രാജന്‍ മുണ്ടൂര്‍, അബ്ദുള്‍ അസീസ്, ടി. രാജന്‍, വി. മോഹനന്‍, എം. മുരളീധരന്‍, കെ. ശശീന്ദ്രന്‍ പ്രസംഗിച്ചു.

ടൗൺഹാൾ നിർമാണം വൈകുന്നതിനുപിന്നിൽ നിക്ഷിപ്ത താത്പര്യമെന്ന് എൻസിപി-എസ്

പാലക്കാട്‌: മുൻസിപ്പൽ ടൗൺഹാളും മിനി ടൗൺഹാളും പൊളിച്ച് എട്ടുവർഷമായിട്ടും നിർമാണം പൂർത്തീകരിക്കാത്തതിനു പിന്നിൽ നഗരസഭാ ഭരണനേതൃത്വവും ചില സ്വകാര്യ ഓഡിറ്റോറിയം ഉടമകളുമായി ചേർന്നുള്ള നിക്ഷിപ്ത താത്പര്യങ്ങളാണെന്നു നഗരസഭ മുൻ ചെയർമാൻ എ. രാമസ്വാമി ആരോപിച്ചു. വിജിലൻസ് അന്വേഷണം നടത്തുമെന്നു നഗരസഭ നേതൃത്വം പ്രഖ്യാപിച്ചെങ്കിലും ഇപ്പോൾ മൗനം പാലിക്കുകയാണെന്നും നഗരത്തിലെ വൻകിട സ്ഥാപനങ്ങളിൽ ഇത്തരത്തിൽ നടത്തിയ നികുതി വെട്ടിപ്പുകളെകുറിച്ച് സമഗ്രഅന്വേഷണം നടത്തണമെന്നും ആവശ്യപ്പെട്ടു. പാലക്കാട് നഗരസഭ ഭരണത്തിനെതിരേ എൻസിപി- എസ് പാലക്കാട് ബ്ലോക്ക് കമ്മിറ്റി സംഘടിപ്പിച്ച കുറ്റവിചാരണ സദസ് ഉദ്ഘാടനം ചെയ്യുകയായിരുന്നു അദ്ദേഹം. ബ്ലോക്ക്‌ പ്രസിഡന്‍റ് കബീർ വെണ്ണക്കര അധ്യക്ഷത വഹിച്ചു. ഷെനിൻ മന്ദിരാട്, സൈഫുദ്ദീൻ കിച്ചലു, നാഷണലിസ്റ്റ് ലേബർ കോൺഗ്രസ് സംസ്ഥാന ജനറൽ സെക്രട്ടറി പി.ടി. ഉണ്ണികൃഷ്ണൻ, ജില്ലാ ഭാരവാഹികളായ റെജി ഉള്ളിരിക്കൽ, കെ.എസ്. രാജഗോപാൽ, ആർ. ബാലസുബ്രഹ്മണ്യൻ, എസ്.ജെ.എൻ. നജീബ് പ്രസംഗിച്ചു.

പന്നിക്കൂട്ടം നശിപ്പിച്ച പാടശേഖരങ്ങൾ സന്ദർശിച്ച് കൃഷിവകുപ്പധികൃതർ

ചിറ്റൂർ: നല്ലേപ്പിള്ളിയിലെ കതിരായ നെൽപ്പാടം കാട്ടുപന്നികൂട്ടം നശിപ്പിച്ചതു സംബന്ധിച്ച് വ്യാപക പരാതിയിൽ കർഷകരുടെ നെൽപ്പാടങ്ങൾ നല്ലേപ്പിള്ളി കൃഷിഓഫീസറുടെ നേതൃത്വത്തിൽ സംഘം നിരീക്ഷണം നടത്തി. ചിറ്റൂർ ബ്ലോക്ക് അസിസ്റ്റന്‍റ് ഡയറക്ടർ സുഹൈന, നല്ലേപ്പിള്ളി കൃഷി അസിസ്റ്റന്‍റ് കെ. നദീറബാനു, മൂച്ചിക്കുന്ന്- നരിച്ചിറ പാടശേഖരസമിതിയിലെ കർഷകരായ ടി. കൃഷ്ണൻകുട്ടി, സി. വാസു, പ്രഭലൻ, നരിച്ചിറ പാടശേര സമിതി സെക്രട്ടറി വി. രാജൻ എന്നിവരും സംഘത്തെ അനുഗമിച്ചിരുന്നു.

കമ്പിളിച്ചുങ്കം- കല്ലുകുട്ടിയാല്‍ റോഡിലെ പാര്‍ശ്വഭിത്തി പൂർത്തീകരണ ഉദ്ഘാടനം

ചിറ്റൂർ: പൊല്‍പ്പള്ളി ഗ്രാമപഞ്ചായത്ത് കമ്പിളിച്ചുങ്കം- കല്ലുകുട്ടിയാല്‍ റോഡിലെ പാര്‍ശ്വഭിത്തി നിര്‍മാണം പൂര്‍ത്തീകരിച്ചതിന്‍റെ ഉദ്ഘാടനം മന്ത്രി കെ. കൃഷ്ണന്‍കുട്ടി നിര്‍വഹിച്ചു. കണ്യാര്‍കുളമ്പിലാണ് പരിപാടി നടന്നത്. 2024- 2025 ലെ എംഎല്‍എയുടെ പ്രത്യേക വികസന പദ്ധതിയില്‍ ഉള്‍പ്പെടുത്തി 14 ലക്ഷം രൂപ ചെലവഴിച്ചാണ് പാര്‍ശ്വഭിത്തി നിര്‍മിച്ചിരിക്കുന്നത്. പരിപാടിയില്‍ പൊല്‍പ്പുള്ളി ഗ്രാമപഞ്ചായത്ത് എല്‍എസ്ജിഡി എൻജിനീയർ സി.വി. ശ്രീജ റിപ്പോര്‍ട്ട് അവതരിപ്പിച്ചു. പൊല്‍പ്പുള്ളി ഗ്രാമപഞ്ചായത്ത് സെക്രട്ടറി എം. പ്രസാദ്, പൊല്‍പ്പുള്ളി ഗ്രാമ പഞ്ചായത്ത് വികസനകാര്യ സ്റ്റാന്‍റിംഗ് കമ്മിറ്റി ചെയര്‍മാന്‍ കെ. സുബ്രഹ്മണ്യന്‍, പൊല്‍പ്പള്ളി ഗ്രാമപഞ്ചായത്ത് മെംബര്‍ ബീന ശിവകുമാര്‍, മറ്റു ജനപ്രതിനിധികള്‍, വിവിധ രാഷ്ട്രീയ പാര്‍ട്ടി പ്രതിനിധികള്‍ എന്നിവര്‍ പങ്കെടുത്തു.

കുമരംപുത്തൂർ ഒലിപ്പുഴ റോഡിൽ അറ്റകുറ്റപ്പണികൾ തുടങ്ങി

മണ്ണാർക്കാട്: വിവാദങ്ങൾക്കും പ്രതിഷേധങ്ങൾക്കുമൊടുവിൽ കുമരംപുത്തൂർ ഒലിപ്പുഴ റോഡിൽ അറ്റകുറ്റപ്പണികൾ തുടങ്ങി. ഉപരിതലം പാടെതകർന്ന് ഗതാഗതം ദുഷ്കരമായ റോഡിൽ അറ്റകുറ്റപ്പണി നടത്താത്തതിനെതിരേ കോൺഗ്രസും വിവിധ രാഷ്ട്രീയപാർട്ടികളും സംഘടനകളും പ്രതിഷേധവുമായി രംഗത്തെത്തിയിരുന്നു. കോൺഗ്രസ് മണ്ണാർക്കാട് ബ്ലോക്ക് കമ്മിറ്റി കുമരംപുത്തൂർ ജംഗ്ഷനിൽ റോഡ് ഉപരോധിക്കൽസമരവും കഴിഞ്ഞദിവസം നടത്തുകയുണ്ടായി. റോഡ് തകർന്നത് അറ്റകുറ്റപ്പണി നടത്താത്തതിന് ഉത്തരവാദി എംഎൽഎയാണെന്നും കോൺഗ്രസിന്‍റെ സമരം എംഎൽഎക്കെതിരാണെന്നും എൽഡിഎഫ് ആരോപിച്ചിരുന്നു. എന്നാൽ പൊതുമരാമത്ത് റോഡിന്‍റെ അറ്റകുറ്റ പണികൾ നടത്താൻ വൈകിയത് മന്ത്രിയുടെ വീഴ്ചയാണെന്ന് യുഡിഎഫും പ്രതികരിച്ചിരുന്നു. വാദപ്രതിവാദങ്ങൾക്കൊടുവിൽ കഴിഞ്ഞദിവസം റോഡിന്‍റെ ആറ്റകുറ്റപ്പണിക്കായി 30 ലക്ഷം രൂപ അനുവദിച്ചിട്ടുണ്ടെന്ന് എൻ. ഷംസുദ്ദീൻ എംഎൽഎ അറിയിച്ചിരുന്നു. ഇന്നലെ കുമരംപുത്തൂർ ജംഗ്ഷനിൽ നിന്നാണ് അറ്റകുറ്റപണി ആരംഭിച്ചത്. മഴ വിട്ടുനിൽക്കുകയാണെങ്കിൽ രണ്ടോ മൂന്നോ ദിവസത്തിനുള്ളിൽ അറ്റകുറ്റപ്പണി തീർക്കാനാവുമെന്ന് കരാറുകാർ അറിയിച്ചു. മഴകാരണമാണ് അറ്റകുറ്റപ്പണികൾ വൈകാൻ കാരണമായതെന്നും കരാറുകാർ പറഞ്ഞു. മലയോര ഹൈവേയുടെ ഭാഗമായി കുമരംപുത്തൂർ മുതൽ മലപ്പുറം അതിർത്തിയായ ഒലിപ്പുഴ വരെ റോഡിന്‍റെ നവീകരണ പ്രവർത്തികൾ ആരംഭിച്ചിട്ടുണ്ട്. രണ്ടു വർഷത്തിനുള്ളിൽ നവീകരണ പ്രവർത്തികൾ പൂർത്തിയാക്കാനാണ് നിർദേശം.

ഗ്രന്ഥശാലകള്‍ സമൂഹപുരോഗതിക്കു വഴികാട്ടുന്ന കേന്ദ്രങ്ങളാകണം: മന്ത്രി കെ. കൃഷ്ണന്‍കുട്ടി

ചിറ്റൂർ: ഗ്രന്ഥശാലകള്‍ വെറും പുസ്തകപ്പുരകള്‍ മാത്രമല്ല സമൂഹത്തിന്‍റെ പുരോഗതിക്ക് വഴികാട്ടുന്ന കേന്ദ്രങ്ങള്‍ കൂടിയായി മാറണമെന്നു മന്ത്രി കെ. കൃഷ്ണന്‍കുട്ടി. പെരുമാട്ടി ഗ്രാമപഞ്ചായത്തിലെ വിളയോടി ഗ്രാമീണ ഗ്രന്ഥശാല കമ്യൂണിറ്റി ഹാള്‍ നിര്‍മാണ ഉദ്ഘാടനം നിർവഹിക്കുകയായിരുന്നു മന്ത്രി. കുട്ടികളുടെ ബൗദ്ധിക വികാസത്തിനും അറിവ് വര്‍ധിപ്പിക്കുന്നതിനും ഗ്രന്ഥശാലകള്‍ക്ക് വലിയ പങ്കുണ്ട്. പഠനത്തില്‍ പിന്നാക്കം നില്‍ക്കുന്ന കുട്ടികള്‍ക്ക് ട്യൂഷന്‍ നല്‍കാനും ഗ്രന്ഥശാലയ്ക്കു കഴിയണമെന്നും മന്ത്രി പറഞ്ഞു. എം.എല്‍.എയുടെ ആസ്തി വികസന പദ്ധതിയില്‍ ഉള്‍പ്പെടുത്തി 72 ലക്ഷം രൂപ ചെലവിലാണ് കമ്യൂണിറ്റി ഹാള്‍ നിര്‍മിക്കുന്നത്. പെരുമാട്ടി ഗ്രാമപഞ്ചായത്ത് പ്രസിഡന്‍റ് ഷീബ രാധാകൃഷ്ണന്‍ അധ്യക്ഷത വഹിച്ചു. പരിപാടിയില്‍ പെരുമാട്ടി ഗ്രാമപഞ്ചായത്ത് വൈസ് പ്രസിഡന്‍റ് എ. കൃഷ്ണകുമാര്‍, പഞ്ചായത്ത് മെംബര്‍ കെ. നാരായണന്‍കുട്ടി, ആരോഗ്യ വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ കെ. സുരേഷ്, വിളയോടി വായനശാല സെക്രട്ടറി ബാലസുബ്രഹ്മണ്യന്‍, മറ്റു ജനപ്രതിനിധികള്‍, വിവിധ രാഷ്ട്രീയ പാര്‍ട്ടി പ്രതിനിധികള്‍ എന്നിവര്‍ പങ്കെടുത്തു.

അകമ്പാടം സെന്‍റ് ജോൺസ് ഹൈസ്കൂളിൽ വിദ്യാർഥിനിയുടെ പുസ്തകപ്രകാശനം

പോത്തുണ്ടി: അകമ്പാടം സെന്‍റ് ജോൺസ് ഹൈസ്കൂൾ പത്താംക്ലാസ് വിദ്യാർഥിനി എം. തനിഹ രചിച്ച 15 കഥകൾ അടങ്ങിയ പുസ്തകം- നീഹാരം കെ. ബാബു എംഎൽഎ പ്രകാശനം ചെയ്തു. ജീവിത വഴിയിലെ പലവിധ കാഴ്ചകൾ തുറന്നെഴുതിയ കഥകളിൽ വേർപാട്, പ്രണയം, ജോലി, വിവാഹം, സ്വയം സ്നേഹിക്കേണ്ടതിന്‍റെ ആവശ്യകത, മദ്യപാനികളായ മനുഷ്യരുടെ കുടുംബങ്ങളിലെ അവസ്ഥ എന്നിവ വളരെ ലളിതമായി വിവരിക്കുന്നു. പിടിഎ പ്രസിഡന്‍റ് കെ . രാജൻ അധ്യക്ഷത വഹിച്ചു. പിടിഎ വൈസ് പ്രസിഡന്‍റ് വിനോദ് കുമാർ, ഹെഡ്മിസ്ട്രസ് സിസ്റ്റർ റോഷ്നി സിഎസ്‌സി, അധ്യാപകർ, രക്ഷിതാക്കൾ, വിദ്യാർഥികൾ തുടങ്ങിയവർ പ്രസംഗിച്ചു. നെന്മാറ വിത്തനശ്ശേരി പഴത്തറക്കാട് ഏരിയൽ വീട്ടിൽ മുരളിയുടെയും അഹല്യയുടെയും മകളാണ് എം. തനിഹ.

പട്ടത്തുപാറ റോഡ് നാടിനു സമർപ്പിച്ചു

മുണ്ടൂർ: കേരളശ്ശേരി ഗ്രാമപഞ്ചായത്ത് മൂന്നാം വാർഡിലെ നിർമാണം പൂർത്തിയായ പട്ടത്തുപാറ റോഡിന്‍റെ ഉദ്ഘാടനം കെ. ശാന്തകുമാരി എംഎൽഎ നിർവഹിച്ചു. കോങ്ങാട് മണ്ഡലം എംഎൽഎയുടെ 2024- 25 വർഷത്തെ മുഖ്യമന്ത്രി- പ്രാദേശിക റോഡ് പുനർനിർമാണ പദ്ധതിയിൽനിന്നും 15 ലക്ഷം രൂപ ഫണ്ട് വിനിയോഗിച്ചാണ്, 260 മീറ്റർ ദൂരം റോഡ് നിർമാണം പൂർത്തീകരിച്ചത്. കേരളശ്ശേരി ഗ്രാമപഞ്ചായത്ത് പ്രസിഡന്‍റ് ഷീബാ സുനിൽ അധ്യക്ഷയായി. ബ്ലോക്ക് പഞ്ചായത്ത് മെംബർ എ. രജനി, വാർഡ് മെംബർ രമ മുരളി, വാർഡ് വികസന സമിതി അംഗം രാജേഷ് കുമാർ എന്നിവർ പ്രസംഗിച്ചു. മറ്റു ഗ്രാമപഞ്ചായത്ത് മെംബർമാർ, രാഷ്ട്രീയകക്ഷി പ്രതിനിധികൾ, പൊതുപ്രവർത്തകർ, പ്രദേശവാസികൾ തുടങ്ങിയവർ ചടങ്ങിൽ പങ്കെടുത്തു.

ഓപ്പറേഷൻ സിന്ദൂറിൽ പങ്കെടുത്ത സൈനികനു ജന്മനാടിന്‍റെ ആദരം

വടക്കഞ്ചേരി: കാശ്മീരിലെ പഹൽഗാമിൽ പാക്കിസ്ഥാന്‍റെ ഭീകര ആക്രമണത്തിനെതിരെ ഇന്ത്യ നടത്തിയ സൈനിക ആക്രമണമായ ഓപ്പറേഷൻ സിന്ദൂറിൽ പങ്കെടുത്ത് അവധിക്കു നാട്ടിലെത്തിയ സൈനികൻ പുതുക്കോട് പാട്ടോല സ്വദേശി ഇരുപത്തിരണ്ടുകാരൻ അനിലിന് അഭിനന്ദനങ്ങൾ ചൊരിഞ്ഞ് ജന്മനാട്. തിങ്കളാഴ്ചയാണ് അനിൽ വീട്ടിലെത്തിയത്. നാട്ടിലെത്തിയതറിഞ്ഞ് നിരവധി പേരാണ് അഭിനന്ദനങ്ങൾ അറിയിച്ച് വീട്ടിലെത്തുന്നത്. ഏപ്രിൽ ഏഴിനുതുടങ്ങി മൂന്നുഘട്ടങ്ങളിലായി നടന്ന സൈനീക നീക്കങ്ങൾ ഏറെ പേടിപ്പെടുത്തിയെങ്കിലും മാസങ്ങൾക്കുശേഷം മകൻ വീട്ടിലെത്തിയതിന്‍റെ സന്തോഷത്തിലാണ് അച്ഛൻ ചെന്താമരയും അമ്മ പുഷ്പയും സഹോദരി പ്രവീണയും ബന്ധുക്കളുമെല്ലാം. ഓപ്പറേഷൻ സിന്ദൂറിൽ പങ്കെടുത്ത മുഴുവൻ സൈനികരെയും ക്യാമ്പിൽ വച്ചുതന്നെ മെഡൽ നൽകി സൈനിക മേധാവികൾ ആദരിച്ചിരുന്നു. പാക്കിസ്ഥാൻ അതിർത്തിയിലേക്ക് ഏഴു കിലോമീറ്റർ മാത്രം ദൂരമുള്ള ലഡാക്കിലെ ക്യാമ്പിലാണ് അനിൽ ജോലി ചെയ്യുന്നത്. യുദ്ധത്തിൽ പങ്കെടുത്ത സൈനികനെന്ന നിലയിൽ വർഷത്തെ 30 ദിവസത്തെ ലീവിനുപുറമെ 10 ദിവസം കൂടി കൂടുതൽ അനിലിന് ലീവ് അനുവദിച്ചിട്ടുണ്ട്. കർഷക കുടുംബമാണ് അനിലിന്‍റേത്. അച്ഛൻ ചെന്താമര മികച്ച കർഷകനാണ്. ചിങ്ങം ഒന്നിന് കൃഷിഭവൻ അച്ഛനെ ആദരിച്ചിരുന്നു. മദ്രാസ് റെജിമെന്‍റ്സ് സെന്‍ററിലാണ് അനിൽ ജോലിയിൽ പ്രവേശിച്ചത്. പിന്നീട് ലഡാക്കിലേക്ക് സ്ഥലംമാറ്റം കിട്ടി. ബിജെപി വടക്കഞ്ചേരി മണ്ഡലം കമ്മിറ്റി ഇന്നലെ അനിലിന് നൽകിയ ആദരം പരിപാടിയിൽ മണ്ഡലം പ്രസിഡന്‍റ് അഡ്വ. ശ്രീരാജ് വള്ളിയോട് ഉപഹാരം നൽകി അനുമോദിച്ചു. മറ്റു ഭാരവാഹികളായ കൃഷ്ണപ്രതാപ്, രമേഷ്, ആർ. രമണി, പി.കെ. ഗുരു, അജീഷ്, പ്രവീൺദാസ്, രാധാകൃഷ്ണൻ എന്നിവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]