ADVERTISEMENT

ADVERTISEMENT

ലഹരിവിരുദ്ധസമിതി മലബാർ മേഖലാ സമ്മേളനം

പാലക്കാട്: ലഹരിയോടു നോ പറഞ്ഞും ജീവിതത്തോടു യെസ് പറഞ്ഞും ജീവിതവിജയം നേടാൻ വിദ്യാർഥികൾക്കു കഴിയണമെന്നു മലങ്കര ഓർത്തഡോക്സ് സുറിയാനിസഭ ലഹരിവിരുദ്ധസമിതി പ്രസിഡന്‍റ് ഡോ. യൂഹാനോൻ മാർ പോളികാർപ്പോസ് മെത്രാപ്പോലീത്ത പറഞ്ഞു. സുഖസൗകര്യങ്ങളിൽ പ്രലോഭിതരായി വഴിതെറ്റാതെ റോൾ മോഡലുകളെ മാതൃകയാക്കാൻ വിദ്യാർഥികൾക്കു കഴിയണം. ലഹരിവിരുദ്ധസമിതിയുടെ മലബാർ മേഖലാ സമ്മേളനം അഗളി സെന്‍റ് ഗ്രിഗോറിയോസ് ഇംഗ്ലീഷ് മീഡിയം സ്കൂളിൽ ഉദ്ഘാടനം ചെയ്ത് പ്രസംഗിക്കുകയായിരുന്നു മെത്രാപ്പോലീത്ത.

ലഹരിവിരുദ്ധസമിതി മലബാർ മേഖലാ വൈസ് പ്രസിഡന്‍റ് ഫാ. മാത്യൂസ് വട്ടിയാനിക്കൽ അധ്യക്ഷത വഹിച്ച യോഗത്തിൽ കേന്ദ്ര സെക്രട്ടറി അലക്സ് മണപ്പുറത്ത്, ട്രഷറർ ഡോ. റോബിൻ പി. മാത്യു, ഫാ. വർഗീസ് മാത്യു, കെ.എം. ദാസ് എന്നിവർ പ്രസംഗിച്ചു. ലഹരി ബോധവത്്കരണ ക്ലാസിന് വി.കെ. ബിജു നേതൃത്വം നൽകി. സ്കൂൾ ഡാൻസ് ടീം ലഹരിക്കെതിരേ തീം ഡാൻസ് അവതരിപ്പിച്ചു. ലഹരിവിരുദ്ധ പ്രതിജ്ഞയോടെയാണ് ചടങ്ങ് സമാപിച്ചത്.

ADVERTISEMENT

മണ്ണാർക്കാട്-ആനക്കട്ടി റോഡ് അറ്റകുറ്റപ്പണികൾ ഉടൻ പൂർത്തിയാക്കണം: കത്തോലിക്ക കോൺഗ്രസ്

താവളം: മണ്ണാർക്കാട്-ആനക്കട്ടി റോഡിന്‍റെ അറ്റകുറ്റപണികൾ അടിയന്തരമായി പൂർത്തിയാക്കണമെന്ന് കത്തോലിക്ക കോൺഗ്രസ് അട്ടപ്പാടി മേഖല കൺവൻഷൻ ആവശ്യപ്പെട്ടു. വന്യജീവിശല്യവും കാർഷിക ഉത്പന്നങ്ങളുടെ വിലതകർച്ചയും മൂലം കഷ്ടപ്പെടുന്ന അട്ടപ്പാടി മേഖലയിലേക്ക് ഉള്ള ഏക ഗതാഗത മാർഗമായ മണ്ണാർക്കാട്-ആനക്കട്ടി റോഡ് വർഷങ്ങളായി അറ്റകുറ്റപണികൾ നടത്താതെ തകർന്നു കിടക്കുകയാണ്. ആനമൂളി വരെ പണികൾ ഏറ്റെടുത്ത കരാറുകാരൻ കൃത്യസമയത്ത് പണിതീർക്കാത്തതിനാൽ ഈ പ്രദേശത്തെ ജനങ്ങൾ ഏറെ ദുരിതത്തിലാണ്. പൂഞ്ചോല വഴി നിർമിക്കാം എന്ന് വാഗ്ദാനം നൽകിയ ബദൽ റോഡിന്‍റെ അംഗീകാരം, എസ്റ്റിമേറ്റ് ഉൾപ്പെടെ പണികൾ ആരംഭിക്കാൻ മുഖ്യമന്ത്രി നേരിട്ട് ഇടപെട്ട് നടപടി സ്വീകരിക്കണം. കേരള ഭൂപതിവ് ചട്ടത്തിൽ വരുത്തിയ മാറ്റങ്ങൾ പട്ടയഭൂമിയിൽ താമസിക്കുന്ന അട്ടപ്പാടി മേഖലയിലെ ആദിവാസികളെയും സാധാരണക്കാരെയും പ്രതികൂലമായി ബാധിക്കും എന്ന് യോഗം വിലയിരുത്തി . കൺവൻഷൻ മേഖല ഡയറക്ടർ ഫാ. ജോസ് ചെനിയറ ഉദ്ഘാടനം ചെയ്തു. രൂപത പ്രസിഡന്‍റ് ബോബി പൂവ്വത്തുങ്കൽ മുഖ്യപ്രഭാഷണം നടത്തി. തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിൽ കത്തോലിക്ക കോൺഗ്രസിന്‍റെ നേതൃത്വത്തിൽ സമുദായഅംഗങ്ങളെ ചേർത്തുപിടിച്ച് പ്രദേശത്തിന്‍റെ സമഗ്രവികസനത്തിനായി പ്രവർത്തിക്കാൻ തീരുമാനിച്ചു. അട്ടപ്പാടി മേഖലയിലെ യുവാക്കൾക്ക് തൊഴിൽ ലഭിക്കുന്നതിന് അട്ടപ്പാടിയിൽ സർക്കാർ നേതൃത്വത്തിൽ കാർഷിക മേഖല വ്യവസായങ്ങൾ ആരംഭിക്കണം. വന്യമൃഗശല്യം പരിഹരിക്കുവാൻ വനംകുപ്പിന്‍റെ തീവ്രയജ്ഞ പരിപാടിയിൽ പരമാവധി പരാതികൾ നൽകും. ഫൊറോന പ്രസിഡന്‍റ് തിമോത്തി അധ്യക്ഷത വഹിച്ചു. ജനറൽ സെക്രട്ടറി ആന്‍റണി കുറ്റിക്കാടൻ, വൈസ് പ്രസിഡന്‍റ് ജോമി മാളിയേക്കൽ, ഫാ. ജോസഫ് അറയ്ക്കൽ, സിജി കോയിപ്പുറത്ത്, ബിനോയ് പൊരുനോലിൽ, ഫ്രാൻസിസ് കുന്നുമ്മേൽ എന്നിവർ പ്രസംഗിച്ചു.

വട്ടന്പലത്ത് അഞ്ച് ആടുകളെ കടിച്ചുകൊന്നു; പുലിയെന്നു നാട്ടുകാർ, തെരുവുനായ്ക്കളെന്നു വനംവകുപ്പ്

മണ്ണാർക്കാട്: വട്ടമ്പലത്ത് അഞ്ച് ആടുകളെ അജ്ഞാതജീവികൾ കടിച്ചുകൊന്നു. വട്ടമ്പലം ടൗണിനോട് ചേർന്ന് തോണിപ്പുറം അയ്യപ്പക്ഷേത്രത്തിന് സമീപം പാലത്ത് സെബാസ്റ്റ്യന്‍റെ ഗർഭിണികളായ അഞ്ച് ആടുകളെയാണ് അജ്ഞാത ജീവികൾ കടിച്ചുകൊന്നത്. ബുധൻ രാത്രിയാണ് സംഭവം. സെബാസ്റ്റ്യനും ഭാര്യയും രാത്രി ബന്ധുവീട്ടിൽ പോയതായിരുന്നു. രാവിലെ തിരിച്ചെത്തിയപ്പോഴാണ് അഞ്ച് ആടുകളെയും കടിച്ചുകൊന്ന നിലയിൽ കണ്ടത്. ഒരാടിനെ പൂർണമായും ഭക്ഷിച്ചിട്ടുണ്ട്. മറ്റ് ആടുകളുടെ കാലുകളും മറ്റും കടിച്ചുതിന്ന അവസ്ഥയിലാണ്. കൂടും കടിച്ച് പൊളിച്ചിട്ടുണ്ട്. വിവരമറിയിച്ചതിനെ തുടർന്ന് വനപാലകരെത്തി പരിശോധന നടത്തി. തെരുവുനായ്ക്കളാവാം ആടുകളെ കടിച്ചുകൊന്നതെന്നാണ് വനംവകുപ്പിന്‍റെ നിഗമനം. കാൽപ്പാടുകൾ നായ്ക്കളുടേതെന്നാണ് വനംവകുപ്പിന്‍റെ സ്ഥിരീകരണം. സംഭവമറിഞ്ഞ് തടിച്ചുകൂടിയ നാട്ടുകാരും സെബാസ്റ്റ്യനും പറയുന്നത് തെരുവുനായ്ക്കളല്ല മറിച്ച് ആടുകളെ കൊന്നത് പുലിയെന്നാണ്. തുടർന്ന് വെറ്ററിനറി ഡോക്ടറെ വിവരമറിയിച്ചപ്പോൾ കുമരംപുത്തൂരും മണ്ണാർക്കാടും ഡോക്ടർ ഇല്ലെന്നാണ് മറുപടി ലഭിച്ചത്. ഇതേതുടർന്ന് പോലീസിൽ വിവരം അറിയിച്ചു. മണ്ണാർക്കാട് പോലീസ് സ്ഥലത്തെത്തി പരിശോധന നടത്തി. ഒന്നര ലക്ഷം രൂപയുടെ നഷ്ടം സംഭവിച്ചതായി സെബാസ്റ്റ്യൻ പറഞ്ഞു. നഷ്ടപരിഹാരം ലഭിക്കുന്നതിനുള്ള നടപടി ഉണ്ടാവണമെന്നും അദ്ദേഹം ആവശ്യപ്പെട്ടു.

സൗജന്യചികിത്സയ്ക്ക് പ്രഥമ പരിഗണന: മന്ത്രി വീണാ ജോർജ്

പാലക്കാട്: സൗജന്യചികിത്സ ഉറപ്പാക്കുന്നതിന് സംസ്ഥാന സർക്കാർ വലിയ പ്രാധാന്യം നൽകുന്നുണ്ടെന്നും രോഗങ്ങൾക്ക് മുന്നിൽ ആരും നിസഹായരാകില്ലെന്നും ആരോഗ്യ വകുപ്പ് മന്ത്രി വീണാ ജോർജ് പറഞ്ഞു. എലപ്പുള്ളി താലൂക്ക് ആശുപത്രിക്ക് വേണ്ടി നിർമിക്കുന്ന പുതിയ കെട്ടിടത്തിന്‍റെ പ്രവൃത്തി ഉദ്ഘാടനം നിർവഹിച്ച് പ്രസംഗിക്കുകയായിരുന്നു മന്ത്രി. 2021ൽ രണ്ടര ലക്ഷം പേർക്കാണ് സൗജന്യ ചികിത്സ ലഭിച്ചതെങ്കിൽ 2024 ആയപ്പോഴേക്കും അത് ആറര ലക്ഷം പേർക്ക് നൽകാൻ സർക്കാരിന് കഴിഞ്ഞു. ലോകോത്തര നിലവാരത്തിലേക്ക് കേരളത്തിന്‍റെ പൊതുജനാരോഗ്യം ഉയർന്നു കഴിഞ്ഞു. അമേരിക്കയിലെ ശിശുമരണ നിരക്ക് 5.6 ആയിരിക്കുന്പോൾ കേരളത്തിൽ അത് അഞ്ചായി കുറക്കാൻ സാധിച്ചു. കോടിക്കണക്കിന് രൂപ ചെലവഴിച്ചുകൊണ്ടാണ് ആശുപത്രികളുടെ അടിസ്ഥാന സൗകര്യങ്ങൾ മെച്ചപ്പെടുത്തുന്നതെന്നും മന്ത്രി കൂട്ടിച്ചേർത്തു. എലപ്പുള്ളിയിൽ ആധുനിക സജ്ജീകരണത്തോടുകൂടി നിർമിക്കുന്ന കെട്ടിടത്തിന് 17.5 കോടി രൂപയാണ് വകയിരുത്തിയിട്ടുള്ളത്. അഞ്ച് നിലകളിലായാണ് ആശുപത്രി കെട്ടിടം നിർമിക്കുന്നത്. എ. പ്രഭാകരൻ എംഎൽഎ അധ്യക്ഷത വഹിച്ച പരിപാടിയിൽ ജില്ലാ പഞ്ചായത്ത് പ്രസിഡന്‍റ് കെ.ബിനുമോൾ മുഖ്യാതിഥിയായിരുന്നു.

കോട്ടത്തറയില്‍ 13.66 കോടിയുടെ വികസന പ്രവര്‍ത്തനങ്ങള്‍ ഉദ്ഘാടനം ചെയ്തു

അഗളി: കൂട്ടായ പ്രവര്‍ത്തനത്തിലൂടെ സംസ്ഥാനത്തെ ശിശുമരണ നിരക്ക് കുറക്കാന്‍ സാധിച്ചതായി മന്ത്രി വീണാ ജോര്‍ജ്. അട്ടപ്പാടി കോട്ടത്തറ താലൂക്ക് സ്‌പെഷ്യാലിറ്റി ആശുപത്രിയില്‍ 13.66 കോടിയുടെ വികസന പ്രവര്‍ത്തനങ്ങള്‍ ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. ദേശീയതലത്തില്‍ കേരളത്തിന്‍റെ ശിശുമരണനിരക്ക് അഞ്ച് ആയി കുറഞ്ഞു. അട്ടപ്പാടിയില്‍ 6.8 ആയി കുറക്കാനായത് സംസ്ഥാനത്തിന്‍റെ വിജയമാണ്. അട്ടപ്പാടി ജനതയുടെ ശാരീരിക-മാനസിക ആരോഗ്യം സംരക്ഷിക്കാന്‍ സര്‍ക്കാര്‍ ഒപ്പം നില്‍ക്കുന്നുണ്ട്. ഗര്‍ഭിണികള്‍ക്കായി 28 ജനകീയ ആരോഗ്യകേന്ദ്രങ്ങള്‍ അട്ടപ്പാടിയില്‍ തുടങ്ങാന്‍ കഴിഞ്ഞു. 174 അങ്കണവാടികള്‍ കേന്ദ്രീകരിച്ച് പെണ്‍ട്രിക ( ആദിവാസി സ്ത്രീകളുടെ ആരോഗ്യ വിവരശേഖരണം) കൂട്ടായ്മയുടെ പ്രവര്‍ത്തനങ്ങള്‍ ഉന്നതികളില്‍ നടക്കുന്നുണ്ട്. 13.66 കോടി രൂപയുടെ വികസന പദ്ധതികളാണ് മന്ത്രി ഉദ്ഘാടനം ചെയ്തത്. പരിപാടിയില്‍ അഡ്വ. എന്‍. ഷംസുദ്ദീന്‍ എംഎല്‍എ അധ്യക്ഷനായി. ജില്ലാ പഞ്ചായത്ത് പ്രസിഡന്‍റ് കെ. ബിനുമോള്‍, അട്ടപ്പാടി ബ്ലോക്ക് പഞ്ചായത്ത് പ്രസിഡന്‍റ് മരുതി മുരുകന്‍, വൈസ് പ്രസിഡന്‍റ് കെ.കെ. മാത്യു, ഗ്രാമപഞ്ചായത്ത് പ്രസിഡന്‍റുമാരായ അംബിക ലക്ഷ്മണന്‍, പി. രാമമൂര്‍ത്തി, ബ്ലോക്ക് പഞ്ചായത്ത് സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍മാരായ എസ്. സനോജ്, കാളിയമ്മ മുരുകന്‍, ഐടിഡിപി പ്രൊജക്ട് ഓഫീസര്‍ ഇന്‍ ചാര്‍ജ് കെ.പി. സാദിക്കലി, കുടുംബശ്രീ അസിസ്റ്റന്‍റ് പ്രോജക്ട് ഓഫീസര്‍ ബി.എസ്. മനോജ്, കോട്ടത്തറ ട്രൈബല്‍ താലൂക്ക് സ്‌പെഷ്യാലിറ്റി ആശുപത്രി സൂപ്രണ്ട് ഡോ.എം.എസ്. പത്മനാഭന്‍, ജില്ലാ മെഡിക്കല്‍ ഓഫീസര്‍ ഡോ. ടി.വി. റോഷ്‍ പങ്കെടുത്തു.

മാലിന്യം വലിച്ചെറിയുന്നവർക്കു വൻപിഴ ചുമത്തണം: മന്ത്രി എം.ബി. രാജേഷ്

വടക്കഞ്ചേരി: പൊതുവഴിയിലും ജലസ്രോതസുകളിലും മാലിന്യം വലിച്ചെറിയുന്നവർക്കെതിരെ കണ്ണിൽ ചോരയില്ലാത്തവിധം വൻതുക പിഴ ഈടാക്കണമെന്ന് മന്ത്രി എം.ബി. രാജേഷ്. വണ്ടാഴി പഞ്ചായത്തിൽ മാത്തൂരിനടുത്ത് പെരണംകാട് മാലിന്യ സംസ്കരണ പ്ലാന്‍റ്്, ജൈവ അജൈവ വളം നിർമാണ യൂണിറ്റ് എന്നിവയുടെ ഉദ്ഘാടനം നിർവഹിച്ച് പ്രസംഗിക്കുകയായിരുന്നു മന്ത്രി. 1,52,000 ടൺ മാലിന്യമാണ് ഓരോ ദിവസവും ഹരിതകർമ സേന സംഭരിക്കുന്നത്. ഇതുകൂടാതെ പഞ്ചായത്തുകളിലെല്ലാം ബോട്ടിൽ ബൂത്തുകളും വേയ്സ്റ്റ് ബിന്നുകളും സ്ഥാപിച്ചിട്ടുണ്ട്. ഇതിലും മാലിന്യങ്ങൾ നിറയുന്നു. ഈ സംവിധാനങ്ങളൊന്നും ഇല്ലായിരുന്നെങ്കിൽ മാലിന്യം നിറഞ്ഞ് നാട്ടിൽ നടക്കാനാകാത്ത സ്ഥിതി ഉണ്ടാകുമായിരുന്നെന്നും മന്ത്രി ചൂണ്ടിക്കാട്ടി. ബീവറേജസ് ഔട്ട് ലെറ്റുകളിൽ നിന്നും മദ്യം വാങ്ങി കഴിച്ച ശേഷം കുപ്പി വലിച്ചെറിയുന്ന ശീലത്തിന് മാറ്റം വന്നിട്ടുണ്ട്. വർഷം 70 കോടി മദ്യകുപ്പികളാണ് ഇത്തരത്തിൽ വലിച്ചെറിഞ്ഞിരുന്നതെന്നാണ് കണക്ക്. ഇതിന് പരിഹാരമായി കാലി കുപ്പിക്ക് ഒന്നിന് 20 രൂപ തിരിച്ചുകൊടുക്കുന്ന സംവിധാനം കൊണ്ടുവന്നു. ഇതുവഴി കുപ്പികൾ വഴിയിൽ വലിച്ചെറിയുന്ന സ്ഥിതിമാറി. കുപ്പി തിരിച്ചു നൽകാൻ നാണക്കേടോ അഭിമാനപ്രശ്നമോ ഉള്ളവർക്ക് ഓട്ടോമാറ്റിക് സ്കാനിംഗ് സംവിധാനം കൊണ്ടുവരാൻ ഉദ്ദേശിക്കുന്നുണ്ട്. നിശ്ചിത സ്ഥലത്ത് കുപ്പികൾ നിക്ഷേപിച്ചാൽ അത് സ്കാൻ ചെയ്ത് അപ്പോൾ തന്നെ ഉടമയ്ക്ക് കൂപ്പൺ കിട്ടും. കൂപ്പൺ കൊടുത്താൽ പണം തിരികെ കിട്ടാനുള്ള സംവിധാനമാണ് ഏർപ്പെടുത്തിയിട്ടുള്ളത്. അതല്ലെങ്കിൽ അക്കൗണ്ടിലേക്ക് പണം വരും. ഈ സംവിധാനം ജനുവരിയിൽ നടപ്പിലാക്കുമെന്നും മന്ത്രി പറഞ്ഞു. യോഗത്തിൽ കെ.ഡി. പ്രസേനൻ എംഎൽഎ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് കെ.എൽ. രമേഷ് ആമുഖപ്രസംഗം നടത്തി. ബ്ലോക്ക് പഞ്ചായത്ത് പ്രസിഡന്‍റ് സി. ലീലാമണി മുഖ്യാതിഥിയായിരുന്നു. പഞ്ചായത്ത് സെക്രട്ടറി സജീവ് കുമാർ റിപ്പോർട്ട് അവതരിപ്പിച്ചു. മറ്റു വിവിധ പ്രതിനിധികളായ ടി.എം. ശശി, രജനി, ആർ. ചന്ദ്രൻ, സെയ്താലി, ശശികുമാർ, സുബിത മുരളീധരൻ, ഷക്കീർ, സീമ, ദിവ്യ, ഗംഗാധരൻ, അസിസ്റ്റന്‍റ് സെക്രട്ടറി ചെന്താമര എന്നിവർ പ്രസംഗിച്ചു.

കൂടുതൽ മാലിന്യ പ്ലാന്‍റുകളും ശ്മശാനങ്ങളും ഉദ്ഘാടനംചെയ്ത മന്ത്രി താനെന്ന് രാജേഷ്

വടക്കഞ്ചേരി: ഏറ്റവും കൂടുതൽ മാലിന്യ പ്ലാന്‍റുകളും ആധുനിക ശ്മശാനങ്ങളും ഉദ്ഘാടനം ചെയ്ത മന്ത്രി എന്ന സൽപ്പേര് തനിക്ക് സ്വന്തമെന്ന് മന്ത്രി എം.ബി. രാജേഷ് പറഞ്ഞു. ഇതുവരെ തന്നെ കടത്തിവെട്ടി ആരും ഉണ്ടായിട്ടില്ല. ഇനി ഉണ്ടാകുമോ എന്നറിയില്ല. വണ്ടാഴി പഞ്ചായത്തിലെ പെരണംകാട് മാലിന്യ സംസ്കരണ പ്ലാന്‍റ് ഉദ്ഘാടനം ചെയ്ത് പ്രസംഗിക്കുന്നതിനിടെയാണ് മന്ത്രി ശുചിത്വ സംസ്കാരവുമായി ബന്ധപ്പെട്ട് ഇക്കാര്യം പറഞ്ഞത്. കഴിഞ്ഞ ഒരാഴ്ചയ്ക്കിടെ ഇന്നലെ രാവിലെ പുതുക്കോട് പാട്ടോലയിൽ നടന്ന വാതകശ്മശാനം ഉൾപ്പെടെ അരഡസനിലേറെ ശ്മശാനങ്ങളുടെ ഉദ്ഘാടനമാണ് നടത്തിയത്. ചില ശ്മശാനങ്ങളുടെ മനോഹാരിതയും വൃത്തിയും കണ്ടാൽ മരിക്കാൻ തോന്നും എന്നായിരുന്നു മന്ത്രിയുടെ കമന്‍റ്. തിരുവനന്തപുരം ടൗണിനടുത്ത് മുട്ടത്തറയിൽ കക്കൂസ് മാലിന്യത്തിൽ നിന്നും വൈദ്യുതി ഉത്പാദിപ്പിക്കാനുള്ള സംവിധാനമാണ് ഒരുക്കിയിട്ടുള്ളത്. കേട്ടാൽ അവിശ്വസനീയമാണെന്ന് തോന്നും. ലോകത്ത്തന്നെ ഇത്തരത്തിലുള്ള പ്ലാന്‍റുകൾ നാലിടത്ത് മാത്രമെയുള്ളു. ഇതിൽ ആദ്യത്തേത് വഡോദരയിലും രണ്ടാമത്തേതാണ് തിരുവനന്തപുരത്തേത്. ടൂറിസ്റ്റ് കേന്ദ്രം പോലെ അതിമനോഹരമാണ് കൂട്ടത്തറയിലെ മാലിന്യ പ്ലാന്‍റ്. 36 കോടിയുടേതാണ് പദ്ധതി. സ്പോൺസർഷിപ്പിലാണ് അത് നടപ്പിലാക്കുന്നത്. സർക്കാരിന് ഒരൊറ്റ പൈസ ചെലവില്ല. പത്തു കോടി എഴുപത് ലക്ഷം ലിറ്റർ കക്കൂസ് മാലിന്യം സംസ്ക്കരിക്കാനുള്ള സംവിധാനമാണ് ഒരുക്കിയിട്ടുള്ളത്. സിംഗപ്പൂർ പോലെ അതിവികസിത രാജ്യങ്ങളിൽ കക്കൂസ് മാലിന്യത്തിൽ നിന്നും വെള്ളം ശുദ്ധീകരിച്ചെടുത്ത് കുടിവെള്ളമാക്കുന്നുണ്ടെന്നും മന്ത്രി ചൂണ്ടിക്കാട്ടി. നമ്മുടെ നാട്ടിൽ കുടിവെള്ളത്തിൽ ഉൾപ്പെടെ ക്വാളിഫോം ബാക്ടീരിയയുടെ അളവ് വളരെ ഉയർന്ന നിലയിലാണിപ്പോൾ. മനുഷ്യവിസർജ്യം വെള്ളത്തിൽ കലർന്നാണ് ഇത് സംഭവിക്കുന്നത്. ഈ സ്ഥിതി അപകടകരമാണ്. ഇതിനാൽ കക്കൂസ് മാലിന്യ സംസ്കരണ പ്ലാന്‍റുകൾ കേരളത്തിൽ എല്ലായിടത്തും നടപ്പിലാക്കേണ്ടതുണ്ടെന്നും മന്ത്രി കൂട്ടിച്ചേർത്തു.

യുവജാഗരൺ കലാജാഥയ്ക്ക് കോട്ടോപ്പാടത്തു സ്വീകരണം

മണ്ണാർക്കാട്: സമഗ്ര ആരോഗ്യ സുരക്ഷ യുവജനങ്ങളിലൂടെഎന്ന സന്ദേശവുമായി നടത്തുന്ന യുവജാഗരൺ കലാജാഥക്ക് കോട്ടോപ്പാടം കല്ലടി അബ്ദുഹാജി ഹയർ സെക്കൻഡറി സ്കൂൾ എൻഎസ്എസ് യൂണിറ്റിന്‍റെ നേതൃത്വത്തിൽ സ്വീകരണം നൽകി. എയ്ഡ്‌സ് രോഗബാധ തടയുന്നതിനും ലഹരി ഉപയോഗത്തിനെതിരേയും നാഷണൽ സർവീസ് സ്കീം സംസ്ഥാന കാര്യാലയവും സംസ്ഥാന എയ്ഡ്‌സ് കൺട്രോൾ സൊസൈറ്റിയും സംയുക്തമായാണ് ജാഥ നടത്തുന്നത്. രോഗകാരണങ്ങൾ, രോഗാവസ്ഥ, മുൻകരുതലുകൾ, ചികിത്സ തുടങ്ങിയ വിഷയങ്ങൾ ഉൾക്കൊള്ളിച്ച് ജാഥാംഗങ്ങൾ അവതരിപ്പിച്ച നാടോടി കലാരൂപം അലാമിക്കളി വിദ്യാർഥികൾക്ക് നവ്യാനുഭവമായി. അൺ എയ്ഡഡ് വിഭാഗം പ്രിൻസിപ്പൽ കെ.സജ്‌ല ഉദ്ഘാടനം ചെയ്തു. പ്രിൻസിപ്പൽ എം.പി. സാദിഖ് അധ്യക്ഷനായി. എൻഎസ്എസ് പ്രോഗ്രാം ഓഫീസർ സി. സമീറ, വോളണ്ടിയർലീഡർമാരായ ടി. ഹരീഷ്മ ദാസ്, മുഹമ്മദ് അദ്നാൻ, എൻ. ഹബീബ് റഹ്മാൻ, ബാബു ആലായൻ, ദിശ പ്രസംഗിച്ചു.

പുതുക്കോട് പാട്ടോല വാതകശ്മശാനം നാടിനു സമർപ്പിച്ചു

വടക്കഞ്ചേരി: പുതുക്കോട് ഗ്രാമപഞ്ചായത്തിലെ നിര്‍മാണം പൂര്‍ത്തികരിച്ച വാതക ശ്മശാനത്തിന്‍റെ ഉദ്ഘാടനം മന്ത്രി എം.ബി. രാജേഷ് നിര്‍വഹിച്ചു. എംസിഎഫ് കെട്ടിട നിര്‍മാണം, പഞ്ചായത്ത് ഗ്രൗണ്ട് നവീകരണം എന്നിവയുടെ ഉദ്ഘാടനവും ഇതോടൊപ്പം നടന്നു. 2021- 22 വര്‍ഷത്തെ ശാമപ്രസാദ് മുഖര്‍ജി റൂര്‍ബന്‍ മിഷന്‍ പദ്ധതിയില്‍ ഉള്‍പ്പെടുത്തി 93,25,301 രൂപ ചെലവിലാണ് പുതുക്കോട് ഗ്രാമ പഞ്ചായത്തിലെ വാതക ശ്മശാനം നിര്‍മാണം പൂര്‍ത്തീകരിച്ചത്. പുതുക്കോട് ഗ്രാമപഞ്ചായത്തിന്‍റെ ആസ്തിയില്‍ ഉള്‍പ്പെട്ട സ്ഥലത്താണ് ശ്മശാനം. ഗ്രാമപഞ്ചായത്ത്, ബ്ലോക്ക് പഞ്ചായത്ത്, ധനകാര്യ കമ്മീഷന്‍ ഗ്രാന്‍റായ 25 ലക്ഷം രൂപ ചെലവിലാണ് എംസിഎഫ് കെട്ടിടം നിര്‍മിക്കുന്നത്. 2024- 25 ബജറ്റില്‍ വകയിരുത്തിയ ഒരു കോടി രൂപ ചെലവഴിച്ചാണ് ഗ്രാമ പഞ്ചായത്ത് ഗ്രൗണ്ട് നവീകരണ പ്രവര്‍ത്തനങ്ങള്‍ നടത്തുന്നത്. പാട്ടോല വാതക ശ്മശാന പരിസരത്ത് നടന്ന പരിപാടിയില്‍ പി.പി. സുമോദ് എംഎല്‍എ അധ്യക്ഷനായി. ജില്ലാ പഞ്ചായത്ത് അംഗം പി.എം. അലി, ആലത്തൂര്‍ ബ്ലോക്ക് പഞ്ചായത്ത് വൈസ് പ്രസിഡന്‍റ് കെ.സി. ബിനു, വികസനകാര്യ ചെയര്‍പേഴ്സണ്‍ കെ.സുലോചന, പുതുക്കോട് ഗ്രാമപഞ്ചായത്ത് പ്രസിഡന്‍റ് ഐ. ഹസീന ടീച്ചര്‍, വൈസ് പ്രസിഡന്‍റ് കെ.കെ. രാജേന്ദ്രന്‍ മാസ്റ്റര്‍, ജനപ്രതിനിധികൾ, വിവിധ രാഷ്ട്രീയ പാര്‍ട്ടി പ്രതിനിധികള്‍ പങ്കെടുത്തു.

"സ്നേഹാരാമം' ചിത്രശലഭോദ്യാനം നിർമാണത്തിനു തുടക്കം

കുഴൽമന്ദം: തേങ്കുറിശ്ശി ഗ്രാമപഞ്ചായത്തിൽ സ്നേഹരാമം ചിത്രശലഭോദ്യാനത്തിന്‍റെ നിർമാണത്തിന് തുടക്കമായി. ഗ്രാമപഞ്ചായത്ത് പ്രസിഡന്‍റ് ആർ. ഭാർഗവൻ ഉദ്ഘാടനം നിർവഹിച്ചു. ശുചിത്വോത്സവത്തിന്‍റെ ഭാഗമായി ഹരിതാഭമായ തേങ്കുറിശ്ശി എന്ന ലക്ഷ്യത്തോടെ ചിത്രശലഭോദ്യാനം ഒരുങ്ങുന്നത്. ശുചിത്വോത്സവം നവംബർ ഒന്ന് വരെ നീണ്ടുനിൽക്കും. ഇതിന്‍റെ ഭാഗമായി 1500 പൂച്ചെടികൾ ഗ്രാമപഞ്ചായത്തിലെ വിവിധ സ്ഥലങ്ങളിൽ നട്ടുപിടിപ്പിക്കും. ഗ്രാമപഞ്ചായത്തും ഹരിതകർമസേനയും സംയുക്തമായി ഉദ്യാനത്തിന്‍റെ സംരക്ഷണചുമതല നിർവഹിക്കും. ചടങ്ങിൽ ഗ്രാമപഞ്ചായത്ത് വൈസ് പ്രസിഡന്‍റ് കെ. സ്വർണമണി, സ്റ്റാൻഡിംഗ് കമ്മിറ്റിയംഗങ്ങൾ, പഞ്ചായത്ത് സെക്രട്ടറി കെ. കിഷോർ, ഹരിത കർമസേനാംഗങ്ങൾ, പഞ്ചായത്ത് ജീവനക്കാർ എന്നിവർ പങ്കെടുത്തു.

തച്ചനാട്ടുകര ഗ്രാമപഞ്ചായത്തിൽ "അമ്മയ്ക്കൊരു തൈ' പദ്ധതി

മണ്ണാർക്കാട്: തച്ചനാട്ടുകര ഗ്രാമപഞ്ചായത്തിന്‍റെ വാർഷിക പദ്ധതിയിൽ ഉൾപ്പെടുത്തി ഗ്രാമപഞ്ചായത്തിലെ മുഴുവൻ അങ്കണവാടികളിലെയും കുട്ടികളുടെ അമ്മമാർക്ക് വൃക്ഷതൈകൾ വിതരണം ചെയ്യുന്ന അമ്മക്കൊരു തൈ പദ്ധതിക്ക് തുടക്കമായി. ഗ്രാമപഞ്ചായത്ത് പ്രസിഡന്‍റ് കെ.പി.എം. സലീം ഉദ്ഘാടനം ചെയ്തു. പദ്ധതിയുടെ ഭാഗമായി ഗ്രാമപഞ്ചായത്തിന് കീഴിൽ പ്രവർത്തിക്കുന്ന 26 അങ്കണവാടികളിലെ മുന്നൂറോളം കുട്ടികളുടെ അമ്മമാർക്ക് പേര, ചാന്പ തുടങ്ങിയ ഫലവൃക്ഷ തൈകൾ വിതരണം ചെയ്തു. അങ്കണവാടികളിൽ പോഷകത്തോട്ടമൊരുക്കുന്ന പദ്ധതിയും ഇതിനോടൊപ്പം ആരംഭിച്ചു. നാട്ടുകൽ അങ്കണവാടിയിൽ നടന്ന പരിപാടിയിൽ വൈസ് പ്രസിഡന്‍റ് പാർവതി ഹരിദാസ് അധ്യക്ഷയായി. മെംബർമാരായ പി. മൻസൂറലി, സി.പി. സുബൈർ, കെ.പി. ഇല്യാസ്, എ.കെ. വിനോദ്, ഇ.എം. നവാസ്, ഐസിഡിഎസ് സൂപ്പർവൈസർ രമാദേവി, ഹെൽത്ത് ഇൻസ്പെക്ടർ കെ. ബാലകൃഷ്ണൻ, ജൂണിയർ ഹെൽത്ത് ഇൻസ്പെക്ടർ പ്രിയൻ, അങ്കണവാടി ജീവനക്കാർ, രക്ഷിതാക്കൾ പങ്കെടുത്തു.

അട്ടപ്പാടിയിലെ ആദ്യ മാ-കെയർ സെന്‍റർ ഷോളയൂർ സ്കൂളിൽ പ്രവർത്തനം തുടങ്ങി

അഗളി: അട്ടപ്പാടിയിലെ ആദ്യത്തെ മാ കെയർ സെന്‍റർ ഷോളയൂർ ഗവ. ട്രൈബൽ ഹയർ സെക്കൻഡറി സ്കൂളിൽ പ്രവർത്തനമാരംഭിച്ചു. വിദ്യാർഥികൾക്ക് കുറഞ്ഞ വിലയിൽ ലഘുഭക്ഷണമുൾപ്പടെയുള്ള സാധനങ്ങൾ ലഭ്യമാക്കാനാണ് മാ- കെയർ സെന്‍റർ ആരംഭിച്ചത്. പൊതുവിദ്യാഭ്യാസവകുപ്പിന്‍റെ നേതൃത്വത്തിൽ നടപ്പാക്കുന്ന കുടുംബശ്രീ സംരംഭമാണ് മാ കെയർ സെന്‍റർ. കുടുംബശ്രീ അട്ടപ്പാടി സമഗ്ര ആദിവാസി വികസന പദ്ധതിയുടെ കീഴിൽ ഷോളയൂർ ഊരുസമിതിയിലെ രാധ രാഹുൽ, അനിത പഴനിസ്വാമി, രാജേശ്വരി മണികണ്ഠൻ, ജയലക്ഷ്മി രാജൻ എന്നിവർ ആണ് പദ്ധതിക്ക് നേതൃത്വം നൽകുന്നത്. സെന്‍ററിന്‍റെ ഉദ്ഘാടനം ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ നിർവഹിച്ചു. അട്ടപ്പാടി ബ്ലോക്ക് പഞ്ചായത്ത് പ്രസിഡന്‍റ് മരുതി മുരുകൻ അധ്യക്ഷയായി. ഹയർ സെക്കൻഡറി സ്കൂൾ പ്രിൻസിപ്പൽ ഡോ.എം.എസ്. സുമ, കുടുംബശ്രീ അസിസ്റ്റന്‍റ് പ്രോജക്റ്റ് ഓഫീസർ ബി.എസ്. മനോജ് , കുടുംബശ്രീ ഷോളയൂർ പഞ്ചായത്ത് സമിതി പ്രസിഡന്‍റ് സെലീന ഷണ്മുഖൻ, ജനപ്രതിനിധികൾ പങ്കെടുത്തു.

ജില്ലയില്‍ ഡിജിറ്റല്‍ റീസര്‍വേ നടപടികള്‍ ദ്രുതഗതിയിൽ

പാലക്കാട്: ഭൂമി സംബന്ധമായ തര്‍ക്കങ്ങള്‍ക്ക് ശാശ്വത പരിഹാരം കാണുക എന്ന ലക്ഷ്യത്തോടെ സംസ്ഥാനസര്‍ക്കാര്‍ നടപ്പാക്കുന്ന ഡിജിറ്റല്‍ റീ സര്‍വേ നടപടികള്‍ ജില്ലയില്‍ അതിവേഗം പുരോഗമിക്കുന്നു. മൂന്നുഘട്ടങ്ങളിലായി ജില്ലയിലെ 45 വില്ലേജുകളിലാണ് സര്‍വേ പുരോഗമിക്കുന്നത്. ഡ്രോണ്‍ ഉള്‍പ്പെടെയുള്ള ആധുനിക സാങ്കേതിക വിദ്യകള്‍ ഉപയോഗിച്ചാണ് സര്‍വേ പ്രവര്‍ത്തനങ്ങള്‍. സര്‍വേ നടപടികള്‍ പൂര്‍ത്തിയാക്കിയ വില്ലേജുകളില്‍ ഭൂമിയുടെ അതിരുകളും അളവുകളും രേഖപ്പെടുത്തിയ ഡ്രാഫ്റ്റ് രേഖകള്‍ പൊതുജനങ്ങളുടെ പരിശോധനയ്ക്കായി പ്രദര്‍ശിപ്പിക്കും. ഇതില്‍ പരാതികളില്ലെങ്കില്‍ അന്തിമ വിജ്ഞാപനം പുറത്തിറങ്ങും. ഒന്നാംഘട്ടത്തില്‍ മണ്ണാര്‍ക്കാട്, പട്ടാമ്പി താലൂക്കുകളിലെ 14 വില്ലേജുകളില്‍ സര്‍വേ ആരംഭിച്ചതില്‍ തിരുമിറ്റക്കോട്-1, തിരുമിറ്റക്കോട്-2, തച്ചനാട്ടുകര-1, തച്ചനാട്ടുകര-2, അലനല്ലൂര്‍-1, അലനല്ലൂര്‍-2, കോട്ടോപ്പാടം-2, കോട്ടോപ്പാടം-3 എന്നീ വില്ലേജുകളിലെ പ്രസിദ്ധീകരണത്തിനുള്ള ജോലികള്‍ പൂര്‍ത്തിയായി. മറ്റുവില്ലേജുകളില്‍ പ്രദര്‍ശനവും പൂര്‍ത്തിയായിട്ടുണ്ട്. രണ്ടാംഘട്ടത്തില്‍ വിവിധ താലൂക്കുകളിലായി 15 വില്ലേജുകളിലാണ് സര്‍വേ പുരോഗമിക്കുന്നത്. പാലക്കാട് താലൂക്കിലെ കോങ്ങാട്-1, ഒറ്റപ്പാലം താലൂക്കിലെ വാണിയംകുളം-1 എന്നീ വില്ലേജുകളിലെ നടപടികള്‍ പൂര്‍ത്തിയായി. കണ്ണാടി-1, അകത്തേത്തറ, നെന്മാറ, ചാലിശ്ശേരി, കുത്തനൂര്‍-1, ആലത്തൂര്‍ താലൂക്കിലെ വണ്ടാഴി-1 എന്നീ വില്ലേജുകളിലെ സര്‍വെ പൂര്‍ത്തിയാക്കി പ്രദര്‍ശനവും നടത്തി. മൂന്നാം ഘട്ടത്തില്‍ ഉള്‍പ്പെട്ട 16 വില്ലേജുകളില്‍ ഏഴെണ്ണത്തില്‍ സര്‍വേ ജോലികള്‍ പുരോഗമിക്കുകയാണ്. ഡിജിറ്റല്‍ റീ-സര്‍വെ പൂര്‍ത്തിയാകുന്നതോടെ ഭൂമിയുടെ ഉടമസ്ഥാവകാശ രേഖകളിലും കൈമാറ്റ നടപടികളിലും സുപ്രധാനമായ മാറ്റങ്ങളുണ്ടാകും. സര്‍ക്കാര്‍ ആരംഭിച്ച എന്‍റെ ഭൂമി പോര്‍ട്ടലിലൂടെ ഭൂമിയുമായി ബന്ധപ്പെട്ട എല്ലാ സേവനങ്ങളും ഓണ്‍ലൈനായി ലഭിക്കും. റവന്യൂ, സര്‍വെ, രജിസ്‌ട്രേഷന്‍ വകുപ്പുകളുമായി ബന്ധപ്പെട്ട സേവനങ്ങള്‍ ഏകീകൃത ഓണ്‍ലൈന്‍ സംവിധാനത്തിലൂടെ ലഭിക്കുന്നത് നടപടിക്രമങ്ങള്‍ ലളിതമാക്കും. ഈ ഡിജിറ്റല്‍ രേഖകള്‍ അതിര്‍ത്തി തര്‍ക്കങ്ങള്‍ പരിഹരിക്കാനും ഭൂമി വാങ്ങുമ്പോഴും വില്‍ക്കുമ്പോഴും കബളിപ്പിക്കപ്പെടാതിരിക്കാനും സഹായകമാകും. ദുരന്തനിവാരണ പ്രവര്‍ത്തനങ്ങള്‍ക്കും ലൊക്കേഷന്‍ സ്‌കെച്ച് പോലുള്ള രേഖകള്‍ക്ക് ഫീല്‍ഡ് പരിശോധന ഒഴിവാക്കാനും ഉപകാരപ്പെടും.

ഒന്പതു കുടുംബങ്ങൾക്കു വീടും സ്ഥലവും നൽകുന്നതിന് അനുമതിപത്രം കൈമാറി

കല്ലടിക്കോട്: സ്വന്തമായി ഒരുസെന്‍റ് ഭൂമി പോലുമില്ലാത്ത അതിദരിദ്രരായ ഒന്പതു കുടുംബങ്ങൾക്ക് സൗജന്യമായി വീടും സ്ഥലവും നൽകുന്ന ഭവനനിർമാണ പദ്ധതിയുടെ പെർമിറ്റ് കൈമാറൽ ഉദ്ഘാടനം എംഎൽഎ അഡ്വ.കെ. ശാന്തകുമാരി നിർവഹിച്ചു. ചടങ്ങിൽ ഗ്രാമപഞ്ചായത്ത് പ്രസിഡന്‍റ് പി.എസ്. രാമചന്ദ്രൻ അധ്യക്ഷനായി. കരിന്പ കുനിയങ്കാട് പഞ്ചായത്തിന്‍റെ ഉടമസ്ഥതയിലുള്ള സ്ഥലത്താണ് അതിദരിദ്ര നിർമാർജന പദ്ധതി പ്രകാരം ഒന്പതു വീടുകൾ നിർമിക്കുന്നത്. വീടും സ്ഥലവും സൗജന്യം എന്ന നിലയിൽ ഒരു തദ്ദേശ സ്ഥാപനം ഇത്തരമൊരു പദ്ധതി ഏറ്റെടുത്ത് നടപ്പാക്കുന്നതും ജില്ലയിൽ അപൂർവമാണ്. ഒരാൾക്ക് നാലുസെന്‍റ് വീതം ഭൂമി അളന്നു തിരിക്കുന്ന നടപടികൾക്കു ശേഷം ഒന്പത് കുടുംബങ്ങൾക്കും സ്ഥലവും വീടും ഉടൻ പൂർത്തീകരിച്ച് ഒന്നിച്ചുനൽകും.

ബാരിക്കേഡുകൾ "മറന്ന്' വാഹനയാത്രികർ

വടക്കഞ്ചേരി: മംഗലംപാലം ബൈപാസ് ജംഗ്ഷനിൽ ദേശീയപാതയിലെ ബാരിക്കേഡുകൾക്കിടയിലൂടെ ചെറുവാഹനങ്ങൾ കടക്കുന്നത് അപകടസാധ്യത കൂട്ടുന്നതായി ആക്ഷേപം. നെന്മാറ റോഡിൽ നിന്നും ബൈപ്പാസ് റോഡിലൂടെ ദേശീയപാത പാലക്കാട് ലൈനിലേക്കാണ് വാഹനങ്ങൾ കടക്കുന്നത്. ഈ ലൈനിൽനിന്നും ബൈപാസ് റോഡിലേക്കും ഇരുചക്രവാഹനങ്ങൾ ഉൾപ്പെടെയുള്ള വാഹനങ്ങൾ കടന്നുവരുന്നുണ്ട്. കാറുകൾ ഉൾപ്പെടെ ദീർഘദൂര വാഹനങ്ങൾ അതിവേഗത്തിൽ കടന്നുപോകുന്ന ദേശീയപാതയിലേക്കാണ് ഇത്തരത്തിൽ അപകടസാധ്യത നോക്കാതെ അലക്ഷ്യമായി വാഹനങ്ങൾ കടക്കുന്നത്. തുടർച്ചയായ അപകടങ്ങളെ തുടർന്നാണ് വാഹനപ്രവേശനം തടഞ്ഞ് ഇവിടെ ബാരിക്കേഡുകൾ സ്ഥാപിച്ചിരുന്നത്. ദേശീയപാത അഥോറിറ്റിയും ബന്ധപ്പെട്ട വകുപ്പ് അധികൃതരും ഈ അനധികൃത പ്രവേശനം തടയാൻ നടപടി സ്വീകരിക്കണം. അതല്ലെങ്കിൽ ജംഗ്ഷനിൽ സിഗ്നൽ സംവിധാനം ഒരുക്കി അപകടരഹിതമായ പ്രവേശനം സാധ്യമാക്കണമെന്നാണ് ആവശ്യം.

യുവാവിനെ മർദിച്ച് കൊലപ്പെടുത്താൻ ശ്രമിച്ച പരാതിയിൽ നാലുപേർ അറസ്റ്റിൽ

കൊഴിഞ്ഞാമ്പാറ: യുവാവിനെ മർദിച്ചു കൊലപ്പെടുത്താൻ ശ്രമിച്ചതായ പരാതിയിൽ നാലുപേർ അറസ്റ്റിൽ. പെരുമ്പാറച്ചള്ള കെ. ജയൻ (30), സി. രഞ്ജിത് (26), കെ. ജിബി (20), കെ. അഭിജിത്ത്(23) എന്നിവരെയാണ് കൊഴിഞ്ഞാമ്പാറ പോലീസ് അറസ്റ്റ് ചെയ്തത്. തിങ്കളാഴ്ച രാത്രി 10.30 നു കൊഴിഞ്ഞാമ്പാറ പെരുമ്പാറച്ചള്ളയിലാണ് കേസിനാസ്പദമായ സംഭവം. കൊഴിഞ്ഞാമ്പാറ പെരുമ്പാറച്ചള്ള മൂച്ചിക്കൽ വീട്ടിൽ സി. രാജനാണ് (47) പരാതിക്കാരൻ. ചൊവ്വാഴ്ചയാണ് രാജൻ കൊഴിഞ്ഞാമ്പാറ പോലീസിൽ പരാതി നൽകിയത്. തുടർന്നുനടത്തിയ പരിശോധനയിലാണ് പ്രതികൾ പിടിയിലായത്. കൊഴിഞ്ഞാമ്പാറ ഇൻസ്പെക്ടർ എം.ആർ. അരുൺകുമാർ, എസ്ഐ കെ. ഷിജു, ഗ്രേഡ് എസ്ഐ മാരായ എം. മുഹമ്മദ് റാഫി, ജി. സുരേഷ് ബാബു, സീനിയർ സിവിൽ പോലീസ് ഓഫീസർമാരായ എസ്. അനീഷ്, വി. ഹരിദാസ്, യു. സതീഷ്, രാജേഷ് എന്നിവരുടെ നേതൃത്വത്തിലാണ് പ്രതികളെ പിടികൂടിയത്. ചിറ്റൂർ കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

കോട്ടോപ്പാടം മേഖലയിൽ കാട്ടുപന്നികളെ വെടിവച്ചുകൊന്നു

കോട്ടോപ്പാടം: തിരുവിഴാംകുന്ന് ഫോറസ്റ്റ് സ്റ്റേഷൻ പരിധിയിൽ കോട്ടോപ്പാടം പഞ്ചായത്തിലെ കച്ചേരിപ്പറമ്പ്, പുറ്റാനിക്കാട്, കാഞ്ഞിരംകുന്ന്, മേക്കളപ്പാറ, കണ്ടമംഗലം, ഭാഗങ്ങളിൽനിന്നായി 16 കാട്ടുപന്നികളെ വെടിവച്ചു കൊന്നു. കഴിഞ്ഞദിവസം രാത്രി 8.30 മുതൽ പുലർച്ചെ 4.30 വരെ നടത്തിയ വേട്ടയിലാണ് കാട്ടുപന്നികളെ വെടിവച്ചുകൊന്നത്. പുറ്റാനിക്കാട് ക്യാമ്പ് ഷെഡ് പരിസരത്ത് വനത്തിനുള്ളിൽ സംസ്കരിച്ചു. കോട്ടോപ്പാടം ഗ്രാമപഞ്ചായത്തിലെ മലയോര മേഖലകളിൽ കാട്ടുപന്നിശല്യം രൂക്ഷമാണ്. കൃഷിവിഭവങ്ങൾ നശിപ്പിക്കുന്നതിനുപുറമേ കാട്ടുപന്നികൾ ജനവാസകേന്ദ്രങ്ങളിൽ ഇറങ്ങി യാത്രക്കാർക്കും ബുദ്ധിമുട്ട് സൃഷ്ടിച്ചിരുന്നു. നിരവധി ഇരുചക്രവാഹനങ്ങൾ കാട്ടുപന്നി ഇടിച്ച് അപകടത്തിൽപെട്ടിരുന്നു. കാട്ടുപന്നിശല്യം ഇല്ലാതാക്കുന്നതിന് ഗ്രാമപഞ്ചായത്ത് ഇടപെടണമെന്ന ആവശ്യം ശക്തമായിരുന്നു. തുടർന്നാണ് പഞ്ചായത്തിന്‍റെ നടപടി.

വീഴുമല വനത്തിൽനിന്ന് ചന്ദനമരം കടത്താൻ ശ്രമം; മൂന്നുപേർ പിടിയിൽ

വടക്കഞ്ചേരി: ആലത്തൂർ വനം റേഞ്ചിൽപ്പെട്ട വീഴുമല വനത്തിൽ നിന്നു ചന്ദനമരങ്ങൾ മുറിച്ചുകടത്താൻ ശ്രമിച്ച അച്ഛനും മകനും ഉൾപ്പെടെ മൂന്നുപേരെ വനംവകുപ്പ് പിടികൂടി. മലമ്പുഴ അകത്തേത്തറ സ്വദേശികളായ മരുതക്കോട് വീട്ടിൽ രാജൻ (60), മകൻ രാജേഷ് (26), ഇവരുടെ സുഹൃത്ത് മലമ്പുഴ കൊട്ടേക്കാട് കാഞ്ഞിരക്കടവ് അക്കരപ്പൊറ്റ വീട്ടിൽ ഗണേശൻ (65) എന്നിവരാണ് പിടിയിലായത്. ചന്ദനമരം മുറിച്ചുകടത്താൻ ശ്രമിച്ച രണ്ടു കേസുകളിലാണ് നടപടി. മരംമുറിക്കാൻ ഉപയോഗിച്ച ആയുധങ്ങളും തൊണ്ടിസാധനങ്ങളും കണ്ടെടുത്തിട്ടുണ്ട്. റേഞ്ച് ഓഫീസർ എൻ. സുബൈർ, വടക്കഞ്ചേരി സെക‌്ഷൻ ഫോറസ്റ്റ് ഓഫീസർ എ. സലിം, ബീറ്റ് ഫോറസ്റ്റ് ഓഫീസർമാരായ യു. സുരേഷ്ബാബു, എസ്. നാസർ, സി. സച്ചു, പി.കെ. ധന്യ, കെ.ആർ. രേഷ്മ, കെ. ആർ. നന്ദിനി, വാച്ചർമാരായ പ്രകാശൻ, ഗിന്നസ്, ബിജുജോസഫ്, അഖിൽകുമാർ, അബു എന്നിവരടങ്ങിയ സംഘമാണ് പ്രതികളെ പിടികൂടിയത്. ആലത്തൂർ ഫസ്റ്റ് ക്ലാസ് ജുഡീഷ്യൽ മജിസ്ട്രേറ്റ് കോടതിയിൽ ഹാജരാക്കിയ ഇവരെ ഒക്ടോബർ എട്ടുവരെ റിമാൻഡ് ചെയ്തു. കേസിലെ മറ്റു പ്രതികൾക്കായുള്ള അന്വേഷണം ഊർജിതമാക്കിയിട്ടുണ്ടെന്നു റേഞ്ച് ഓഫീസർ എൻ. സുബൈർ, സെ‌ക‌്ഷൻ ഫോറസ്റ്റ് ഓഫീസർ എ. സലിം എന്നിവർ അറിയിച്ചു.

ബൊമ്മക്കൊലുവിൽ വൈവിധ്യമൊരുക്കി ശെൽവി ശിവകുമാർ

പാലക്കാട്: നവരാത്രിദിനങ്ങൾക്കു സുകൃതം പകർന്ന് ബൊമ്മക്കൊലുവിൽ വൈവിധ്യമൊരുക്കി കുഴൽമന്ദം കുളവൻമുക്ക് സ്വദേശിനി ശെൽവി ശിവകുമാർ. തമിഴ്ബ്രാഹ്മണരുടെ നവരാത്രി ആചാരങ്ങളുടെ ഭാഗമാണ് ബൊമ്മക്കൊലു വയ്ക്കൽ. ബൊമ്മക്കൊലു വെറുമൊരു പ്രദർശനത്തിനുവേണ്ടിയല്ലെന്നും പ്രാധാന്യമുള്ളതും പുരാതന ഹിന്ദുഗ്രന്ഥങ്ങളുമായി ബന്ധപ്പെട്ടതാണെന്നും സൂര്യ ഗോൾഡ് ലോണ്‍ എംഡി ശിവകുമാറിന്‍റെ ഭാര്യയായ ശെൽവി പറഞ്ഞു. രാമായണം, പുരാണങ്ങൾ, ദശാവതാരം എന്നിവപോലെ ഒരു തലമുറയിൽനിന്നു മറ്റൊന്നിലേക്കു കൈമാറ്റംചെയ്യപ്പെടുന്ന കഥകളെ ആഘോഷിക്കുന്ന തരത്തിലാണ് ബൊമ്മക്കൊലു ക്രമീകരിച്ചിരിക്കുന്നത്. ദേവിപ്രീതിക്കായി അലങ്കരിച്ച വിവിധ ബൊമ്മകൾ തട്ടുകളിൽ നിരത്തിവച്ച് പൂജ നടത്തുന്നതാണ് ആചാരം. ഭക്തിയുടെയും സമർപ്പണത്തിന്‍റെയും ഒന്പതു ദിനരാത്രങ്ങളിൽ ബൊമ്മക്കൊലുവിനു മുന്നിൽ പൂജയും ഭജനയുമുണ്ടാവും.

കശുമാവുകൃഷിയിൽ ഭീമനഷ്ടമെന്ന് വനംവകുപ്പിനു കർഷകന്‍റെ പരാതി

മംഗലംഡാം: കുരങ്ങ്, മലയണ്ണാൻ, മുളൻപന്നി, കടവാവൽ എന്നിവയുടെ ശല്യംമൂലം ജീവിതമാർഗം ഇല്ലാതായതായി ചൂണ്ടിക്കാട്ടി 74കാരനായ കർഷകൻ വനംവകുപ്പിന് പരാതി നൽകി. കരിങ്കയം എർത്ത്ഡാമിൽ കശുമാവ് കൃഷി നടത്തുന്ന ഇലഞ്ഞിമറ്റം തോമസ് മാത്യുവാണ് ഇതു സംബന്ധിച്ച് നെന്മാറ ഡിഎഫ്ഒ ക്ക് പരാതി നൽകിയിട്ടുള്ളത്. കശുമാവ് കൃഷിയിലാണ് കർഷകന് ഭീമമായ നഷ്ടം ഉണ്ടായത്. കശുമാവുകളിൽ കായ്ഫലമാകുമ്പോൾ കുരങ്ങ്, കടവാവൽ എന്നിവയുടെ വലിയ കൂട്ടങ്ങൾ തോട്ടത്തിലെത്തി കശുവണ്ടിയോടെ കശുമാങ്ങ പറിച്ചു കൊണ്ടുപോകും. ഇതുമൂലം ഭീമമായ നഷ്ടമാണ് ഉണ്ടായിട്ടുള്ളതെന്ന് ചൂണ്ടിക്കാട്ടിയാണ് പരാതി. നൂറുകണക്കിന് കുരങ്ങുകളും ആയിരക്കണക്കിന് വരുന്ന വലിയ ഇനം വാവലുകളുമാണ് ഭീഷണിയായി മാറിയിട്ടുള്ളത്. ഇതിന് പരിഹാരം കാണണമെന്നും അപേക്ഷയിൽ ആവശ്യപ്പെട്ടിട്ടുണ്ട്. വനംവകുപ്പ് നേതൃത്വം നൽകുന്ന വന്യമൃഗ നിയന്ത്രണ യജ്ഞത്തിന്‍റെ ഭാഗമായാണ് ഇത്തരത്തിൽ വന്യമൃഗശല്യത്തിനെതിരെ കർഷകർ പരാതികളുമായി രംഗത്തെത്തിയിട്ടുള്ളത്.

ലഹരിക്കെതിരേ ജനകീയ പ്രതിരോധം തീർത്ത് രമേശ് ചെന്നിത്തലയുടെ വാക്കത്തോണ്‍

പാലക്കാട്: രമേശ് ചെന്നിത്തല നയിച്ച പ്രൗഡ് കേരളയുടെ വാക്ക് എഗെൻസ്റ്റ് ഡ്രഗ്സ് ജനകീയ പ്രതിരോധത്തിന്‍റെ ഐക്യദാർഢ്യപ്രഖ്യാപനമായി. തനത് കലാരൂപങ്ങളുടെയും വാദ്യമേളങ്ങളുടെയും അകന്പടിയോടെ രാവിലെ ആറിന് വിക്ടോറിയ കോളജിനു മുന്നിൽ നിന്ന് ആരംഭിച്ച ലഹരിക്കെതിരെ സമൂഹനടത്തം കോട്ടമൈതാനത്ത് സമാപിച്ചു. പാലക്കാട്ടെ സാമൂഹ്യ സാംസ്കാരിക നായകർ ഈ നടത്തത്തിൽ അണി ചേർന്നു. വിക്ടോറിയ കോളജിനു മുന്നിൽ വി.കെ. ശ്രീകണ്ഠൻ എംപി ജാഥ ഫ്ളാഗ് ഓഫ് ചെയ്തു. ലഹരിക്കെതിരെയുള്ള സമരം മാനവികതയ്ക്കു വേണ്ടിയുള്ള സമരമാണെന്നും ഓരോ മനുഷ്യനും ഇതിൽ അണി ചേരേണ്ടതുണ്ടെന്നും എംപി പറഞ്ഞു. ഓരോ വീടുകളിൽ നിന്നും പ്രതിരോധം ആരംഭിക്കണം. സ്നേഹം നിറഞ്ഞുനിന്ന വീടുകളിൽ ഇന്ന് ചോര വീഴുകയാണ്. മക്കൾ മാതാപിതാക്കളെ വെട്ടിക്കൊല്ലുന്ന കാലമാണ്. രാസലഹരിയാണ് ഇതിനു കാരണം. ഇതിന്‍റെ വേരുകൾ പറിച്ചെറിയേണ്ടിയിരിക്കുന്നു. ഈ ധർമസമരം ജനത ഏറ്റെടുക്കണമെന്നും ശ്രീകണ്ഠൻ പറഞ്ഞു. പ്രൗഡ് കേരളയുടെ നേതൃത്വത്തിൽ ജില്ലാ ആസ്ഥാനങ്ങളിൽ നടക്കുന്ന പതിനൊന്നാമത് വാക്കത്തോണാണ് പാലക്കാട് അരങ്ങേറിയത്. സമൂഹത്തിൽ ആഴത്തിൽ വേരുകളാഴ്ത്തിയ ലഹരിമാഫിയയെ തകർത്തെറിയാൻ ഓരോരുത്തരും പ്രതിജ്ഞ എടുക്കേണ്ടതുണ്ടെന്ന് രമേശ് ചെന്നിത്തല പറഞ്ഞു. നമ്മുടെ കുട്ടികൾ ലഹരിക്കടിമകൾ മാത്രമല്ല ലഹരിവാഹകർ കൂടിയാകുന്ന സ്ഥിതിവിശേഷമാണ്. ചെന്നിത്തല പറഞ്ഞു. തുടർന്ന് അദ്ദേഹം ജാഥാംഗങ്ങൾക്ക് ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. ഡിസിസി പ്രസിഡന്‍റ് എ. തങ്കപ്പൻ അധ്യക്ഷനായിരുന്നു.കെപിസിസി വൈസ് പ്രസിഡന്‍റ് വി.ടി. ബൽറാം, മുൻ യുഎൻ ജോയിന്‍റ് സെക്രട്ടറി അജിത് കുമാർവർമ, കെപിസിസി ജനറൽ സെക്രട്ടറിമാരായ അബ്ദുൾ മുത്തലിബ്, സി. ചന്ദ്രൻ, പ്രഫ.കെ.എ. തുളസി, കെപിസിസി വക്താവ് സന്ദീപ് വാര്യർ, നിർവാഹക സമിതി അംഗം സി.വി. ബാലചന്ദ്രൻ, മുൻ എം.പി വി.എസ്. വിജയരാഘവൻ, അഡ്വ.എൻ. ഷംസുദ്ദീൻ എംഎൽഎ, കെ.എ. ചന്ദ്രൻ, കെപിസിസി സെക്രട്ടറിമാരായ പി.വി. രാജേഷ്, പി. ബാലഗോപാൽ, പി. ഹരിഗോവിന്ദൻ, ഡിസിസി വൈസ് പ്രസിഡന്‍റുമാരായ സുമേഷ് അച്യുതൻ, ടി.എച്ച്. ഫിറോസ് ബാബു, മഹിളാ കോണ്‍ഗ്രസ് ജില്ലാ പ്രസിഡന്‍റ് സിന്ധു രാധാകൃഷ്ണൻ, ഐഎൻടിയുസി ജില്ലാ പ്രസിഡന്‍റ് എസ്.കെ. അനന്തകൃഷ്ണൻ, ദേശീയ അത്‌ലറ്റിക് താരം ഹരിദാസ്, കിദർ മുഹമ്മദ്, പത്മ ഗിരീശൻ, ഫെബിൻ, പ്രൗഡ് കേരള ചെയർമാൻ മലയിൻകീഴ് വേണുഗോപാൽ, ഡോ. ആർ. വത്സലൻ തുടങ്ങിയവർ നേതൃത്വം നൽകി.

ഒറ്റപ്പാലം മണ്ഡലം കാർഷിക മഹോത്സവം: സംഘാടക സമിതി രൂപീകരിച്ചു

ഒറ്റപ്പാലം: നിയോജകമണ്ഡലത്തിലെ കാർഷിക മേഖലകളിലെ വികസന പ്രവർത്തനങ്ങൾ ഉൗർജ്ജിതമാക്കാനായി നടത്തുന്ന കാർഷിക മഹോത്സവം ഒക്ടോബർ 23 മുതൽ 25 വരെ നടക്കും. കാർഷിക മഹോത്സവത്തിന്‍റെ സംഘാടകസമിതി രൂപീകരിച്ചു. കാർഷിക മഹോത്സവത്തിന്‍റെ ഉദ്ഘാടനം ഒക്ടോബർ 24ന് രാവിലെ പത്തിനു കൃഷിമന്ത്രി പി. പ്രസാദ് നിർവഹിക്കും. വിവിധ ദിവസങ്ങളിലായി മന്ത്രിമാരായ കെ. കൃഷ്ണൻകുട്ടി, എം.ബി. രാജേഷ്, സജി ചെറിയാൻ, ജി.ആർ. അനിൽ തുടങ്ങിയവർ പങ്കെടുക്കും. മണ്ഡലത്തിലെ തദ്ദേശസ്വയംഭരണ സ്ഥാപനങ്ങൾ വിവിധ സർക്കാർ വകുപ്പുകൾ തുടങ്ങിയവയുടെ പിന്തുണയോടെയാണ് ഒറ്റപ്പാലം നഗരത്തിൽ കാർഷിക മഹോത്സവം സംഘടിപ്പിക്കുന്നത്. ഇതിന്‍റെ ഭാഗമായി കൃഷി, മൃഗസംരക്ഷണം, ഫിഷറീസ്, അനുബന്ധ ഉപജീവന മേഖലകൾ എന്നിവയെ മുൻ നിർത്തി സെമിനാറുകൾ,കാർഷിക ഉത്പന്നങ്ങളുടെ പ്രദർശന വിപണന മേളകൾ,കർഷകരെയും യുവകർഷകരെയും ആദരിക്കൽ, അസാപ്പുമായി സഹകരിച്ച് തൊഴിൽമേള, രുചി ഭേദങ്ങളുടെ വൈധ്യമൊരുക്കി ഭക്ഷ്യമേള, എല്ലാ ദിവസവും സാംസ്കാരിക സദസ്‌ എന്നിവയുണ്ടാകും. അഡ്വ.കെ. പ്രേംകുമാർ എംഎൽഎ സംഘാടക സമിതി യോഗം ഉദ്ഘാടനം ചെയ്തു. ഒറ്റപ്പാലം നഗരസഭ ചെയർപേഴ്സണ്‍ കെ. ജാനകീദേവി അധ്യക്ഷയായി.

ഉന്നത് ഭാരത് അഭിയാൻ റീജണൽ ശില്പശാല ഇന്ന് പാലക്കാട്ട്

പാലക്കാട്: ഉന്നത് ഭാരത് അഭിയാൻ റീജണൽ കോ-ഓർഡിനേറ്റിംഗ് സ്ഥാപനമായ പാലക്കാട് ഐഐടിയുടെ നേതൃത്വത്തിൽ സംഘടിപ്പിക്കുന്ന റീജണൽ ശില്പശാല ഇന്നു ഗവ. വിക്ടോറിയ കോളജിൽ നടക്കും. ഉന്നത വിദ്യാഭ്യാസ സ്ഥാപനങ്ങളെ ഉപയോഗപ്പെടുത്തി ഗ്രാമീണ സമൂഹങ്ങൾക്ക് പ്രയോജനകരമായ പദ്ധതികളും സേവനങ്ങളും മെച്ചപ്പെടുത്തുക എന്ന ലക്ഷ്യത്തോടെ സംഘടിപ്പിക്കുന്ന ശില്പശാലയിൽ ഉന്നത് ഭാരത് അഭിയാൻ: സാധ്യതകളും വെല്ലുവിളികളും എന്ന വിഷയത്തിൽ ചർച്ച നടക്കും. യുബിഎ പ്രവർത്തനങ്ങൾ ആസൂത്രണം ചെയ്യുന്നതിനും അവയെ പദ്ധതികളാക്കി മാറ്റുന്നതിനും ചർച്ച വേദിയാകും. ഗാന്ധിഗ്രാം റൂറൽ ഇൻസ്റ്റിറ്റ്യൂട്ട് - ഡിംഡ് യൂണിവേഴ്സിറ്റി സീനിയർ പ്രഫസർ ഡോ.കെ. രവിചന്ദ്രൻ നേതൃത്വം നൽകും. പാലക്കാട് ഐഐടി ഹ്യുമാനിറ്റീസ് ആൻഡ് സോഷ്യൽ സയൻസസ് വിഭാഗം മേധാവി ഡോ. അനൂപ് ജോർജ് മുഖ്യാതിഥിയാകും. യുബിഎ റീജണൽ കോ-ഓർഡിനേറ്റർ ഡോ. സുദർശൻ ആർ. കോട്ടായി, പ്രോജക്ട് കോ-ഓർഡിനേറ്റർ ആർ. പ്രഭുല്ലദാസ് എന്നിവർ പങ്കെടുക്കും. സംസ്ഥാനത്തെ വടക്കൻ ജില്ലകളിൽനിന്ന് അറുപതോളംപേർ പരിപാടിയുടെ ഭാഗമാകും.

ആയുർവേദ ദിനാചരണത്തിനു തുടക്കം

പാലക്കാട്: ഭാരതീയ ചികിത്സാ വകുപ്പിന്‍റെയും നാഷണൽ ആയുഷ് മിഷന്‍റെയും സംയുക്താഭിമുഖ്യത്തിൽ പത്താമത് ദേശീയ ആയുർവേദ ദിനാചരണത്തിന്‍റെ ഭാഗമായി ജില്ലയിൽ ഒരാഴ്ച നീണ്ടുനിൽക്കുന്ന പരിപാടികൾക്ക് തുടക്കമായി. വിളംബര ജാഥയോടെ ആരംഭിച്ച പരിപാടിയുടെ ജില്ലാതല ഉദ്ഘാടനം ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ നിർവഹിച്ചു. ഭാരതീയ ചികിത്സാ വകുപ്പ് പാലക്കാട് ജില്ലാ മെഡിക്കൽ ഓഫീസർ ഡോ. ആഗ്നസ് ക്ലീറ്റസ് അധ്യക്ഷനായി. ക്ഷീരകർഷകർ, ഔഷധസസ്യ കർഷകർ, സ്കൂൾ വിദ്യാർഥികൾ, മെഡിക്കൽ ഓഫീസർമാർ, മറ്റുജീവനക്കാർ തുടങ്ങിയവർ സെമിനാറിൽ പങ്കെടുത്തു.

"അമ്മമാനസം 2.0' പദ്ധതി ജില്ലാതല ഉദ്ഘാടനം

പാലക്കാട്: അമ്മമാനസം 2.0 പെരിനാറ്റൽ മാനസികാരോഗ്യ പരിപാടിയുടെ ജില്ലാതല ഉദ്ഘാടനം ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ നിർവഹിച്ചു. തദ്ദേശ സ്വയംഭരണ വകുപ്പ്, ജില്ലാ കുടുംബശ്രീ ജില്ലാമിഷൻ ജൻഡർ പദ്ധതി എന്നിവയുടെ സംയുക്താഭിമുഖ്യത്തിലാണ് പരിപാടി സംഘടിപ്പിച്ചത്. ഗർഭകാലത്തും പ്രസവാനന്തര ഘട്ടത്തിലും സ്ത്രീകൾക്കുണ്ടാകുന്ന മാനസികാരോഗ്യ പ്രശ്നങ്ങളെക്കുറിച്ച് അവബോധം വളർത്തുക എന്നതാണ് പരിപാടിയുടെ ലക്ഷ്യം. കേരളശ്ശേരി ഗ്രാമപഞ്ചായത്ത് ഹാളിൽ നടന്ന പരിപാടിയിൽ ഗ്രാമപഞ്ചായത്ത് പ്രസിഡന്‍റ് ഷീബ സുനിൽ അധ്യക്ഷനായി. കമ്യൂണിറ്റി കൗണ്‍സിലർ ഹേമ, ജെൻഡർ ജില്ലാ പ്രോഗ്രാം മാനേജർ ഗ്രീഷ്മ എന്നിവർ വിഷയാവതരണം നടത്തി.

വടക്കഞ്ചേരി പഞ്ചായത്തിൽ ജൈവവൈവിധ്യ കർമപദ്ധതി രൂപീകരണ ശില്പശാല

വടക്കഞ്ചേരി: വടക്കഞ്ചേരി പഞ്ചായത്തിലെ പ്രാദേശിക ജൈവവൈവിധ്യ പരിപാലന കർമപദ്ധതി തയാറാക്കുന്നതിനുള്ള ഏകദിന ശില്പശാല നടത്തി. പഞ്ചായത്ത് ഹാളിൽ നടന്ന ശില്പശാല പഞ്ചായത്ത് പ്രസിഡന്‍റ് ലിസി സുരേഷ് ഉദ്ഘാടനം ചെയ്തു. വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ അഡ്വ.കെ.പി. ശ്രീകല അധ്യക്ഷത വഹിച്ചു. ജൈവ വൈവിധ്യ ബോർഡ് ജില്ലാ കോ-ഓർഡിനേറ്റർ വി. സിനിമോള്‍, ബിഎംസി അംഗങ്ങളായ എം.വി. അപ്പുണ്ണി നായർ, കെ.എം. രാജു, വി. രാമചന്ദ്രൻ , എൻ. രവിദാസൻ, കെ. അംബിക, പഞ്ചായത്ത് സെക്രട്ടറി ടി.എസ്. അബിൻ പ്രസംഗിച്ചു.

"ആരോഗ്യജീവിതത്തിനു പോഷകാഹാരം അനിവാര്യം'

കൊല്ലങ്കോട്: ദേശീയ പോഷകാഹാര മാസാചരണത്തിന്‍റെ ഭാഗമായി ജില്ലാതല പോഷകാഹാര പ്രദർശനവും ബോധവത്കരണ ക്ലാസും നടന്നു. കൊല്ലങ്കോട് വാസുദേവൻ മേനോൻ മെമ്മോറിയൽ ഹാളിൽ നടന്ന പരിപാടി കെ.ബാബു എംഎൽഎ ഉദ്ഘാടനം ചെയ്തു. ആരോഗ്യകരമായ ജീവിതത്തിന് പോഷകാഹാരത്തിന്‍റെ പ്രാധാന്യത്തെക്കുറിച്ച് ബോധവത്ക്കരിക്കുക എന്നതാണ് ദേശീയ പോഷകാഹാര മാസാചരണത്തിന്‍റെ ലക്ഷ്യം. ജില്ല മെഡിക്കൽ ഓഫീസ്, ദേശീയ ആരോഗ്യ ദൗത്യം, കൊല്ലങ്കോട് കുടുംബാരോഗ്യ കേന്ദ്രം, കൊല്ലങ്കോട് ബ്ലോക്ക് ഐ സി ഡി എസ് പ്രൊജക്ട് എന്നിവയുടെ സഹകരണത്തോടെയാണ് പരിപാടി സംഘടിപ്പിച്ചത്. പരിപാടിയുടെ ഭാഗമായി ആശാ പ്രവർത്തകരുടെയും അങ്കണവാടി ജീവനക്കാരുടെയും ബോധവത്കരണ നാടകം, സ്ത്രീകളുടെയും കുട്ടികളുടെയും വിളർച്ച നിർണയ പരിശോധന, ജീവിതശൈലി രോഗനിർണയ പരിശോധന, എച്ച്ഐവി പരിശോധന എന്നിവ നടന്നു. കൊല്ലങ്കോട് ഗ്രാമപഞ്ചായത്ത് പ്രസിഡന്‍റ് കെ സത്യപാൽ പരിപാടിയിൽ അധ്യക്ഷത വഹിച്ചു. ജില്ലാ മെഡിക്കൽ ഓഫീസർ (ആരോഗ്യം) ഡോ. ടി.വി റോഷ് വിഷയാവതരണം നടത്തി. ജില്ലാ ആർ.സി.എച്ച് ഓഫീസർ ഡോ. എ.കെ അനിത ബോധവൽക്കരണ ക്ലാസ് എടുത്തു. ജില്ലാ പഞ്ചായത്ത് അംഗം ശാലിനി കറുപ്പേഷ്, ഡെപ്യൂട്ടി ഡിഎംഒ ആൻഡ് ജില്ലാ നോഡൽ ഓഫീസർ ഡോ.കെ.പി. അഹമ്മദ് അഫ്സൽ, ജില്ലാ എഡ്യൂക്കേഷൻ ആൻഡ് മീഡിയ ഓഫീസർ എസ്. സയന, കൊല്ലങ്കോട് കുടുംബാരോഗ്യ കേന്ദ്രം മെഡിക്കൽ ഓഫീസർ ഡോ. ബോബി മാണി, കൊല്ലങ്കോട് ബ്ലോക്ക് ട്രൈബൽ എക്സ്റ്റൻഷൻ ഓഫീസർ അജീഷ് ഭാസ്കരൻ പങ്കെടുത്തു.

ആലത്തൂർ താലൂക്ക് നിക്ഷേപകസംഗമം

ആലത്തൂർ: വ്യവസായ വാണിജ്യ വകുപ്പ്, ജില്ലാ വ്യവസായകേന്ദ്രം, ആലത്തൂർ താലൂക്ക് വ്യവസായ ഓഫീസ് എന്നിവയുടെ ആഭിമുഖ്യത്തിൽ താലൂക്ക്തല നിക്ഷേപക സംഗമം സംഘടിപ്പിച്ചു. കെ.ഡി. പ്രസേനൻ എംഎൽഎ ഉദ്ഘാടനം ചെയ്തു. ആലത്തൂർ ബ്ലോക്ക് പഞ്ചായത്ത് പ്രസിഡന്‍റ് രജനി ബാബു അധ്യക്ഷത വഹിച്ചു. വിദഗ്ധർ വിവിധ വിഷയങ്ങളിൾ ക്ലാസെടുത്തു. ആലത്തൂർ ഉപജില്ലാ വ്യവസായ ഓഫീസർ ടി.സി. ഷിഹാബുൾ അക്ബർ, കുഴൽമന്ദം ബ്ലോക്ക്‌ വ്യവസായ വികസന ഓഫീസർ പി. ദീപ എന്നിവർ പ്രസംഗിച്ചു. ആലത്തൂർ താലൂക്ക് പരിധിയിലെ വിവിധ പഞ്ചായത്തുകളിൽ നിന്ന് എത്തിയ നിക്ഷേപകരുടെ പ്രോജക്റ്റ് അവതരണം, ധനകാര്യ സ്ഥാപനങ്ങളുടെ പ്രതിനിധികളുമായി മുഖാമുഖം ചർച്ച , കേന്ദ്ര- സംസ്ഥാന വ്യവസായ വാണിജ്യ വകുപ്പിന്‍റെ വിവിധ പദ്ധതികളെക്കുറിച്ച് നിക്ഷേപകർക്ക് അവബോധം നൽകൽ എന്നിവയുണ്ടായിരുന്നു. 76 സംരംഭകർ സംഗമത്തിൽ പങ്കെടുത്തു. നിക്ഷേപ സംഗമത്തിൽ പങ്കെടുത്ത സംരംഭകരിൽ ആലത്തൂർ താലൂക്കിൽ അഞ്ചുകോടി ഒൻപതുലക്ഷം നിക്ഷേപ വാഗ്ദാനം ലഭിച്ചതായി സംഘാടകർ പറഞ്ഞു.

അട്ടപ്പാടിയിൽ കുടുംബശ്രീയുടെ ഓപ്പൺ ഡിഗ്രി പ്രോഗ്രാമിനു തുടക്കം

പാലക്കാട്: കുടുംബശ്രീ അട്ടപ്പാടി ആദിവാസി സമഗ്ര വികസന പദ്ധതി, ജില്ലാ പഞ്ചായത്ത്, ശ്രീനാരായണഗുരു ഓപ്പൺ യൂണിവേഴ്സിറ്റിയുമായി സംയുക്തമായി നടപ്പിലാക്കുന്ന ഓപ്പൺ ഡിഗ്രി പ്രോഗ്രാമിന്‍റെ ബോധവത്കരണവും പദ്ധതിയുടെ ഉദ്ഘാടനവും അട്ടപ്പാടി വട്ടലക്കി ഫാമിംഗ് സൊസൈറ്റി ഹാളിൽ ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ നിർവഹിച്ചു. അട്ടപ്പാടി ബ്ലോക്ക് പഞ്ചായത്ത് പ്രസിഡന്‍റ് മരുതി മുരുകൻ അധ്യക്ഷത വഹിച്ചു. കുടുംബശ്രീ കോ-ഓർഡിനേറ്റർ കെ.ജെ. ജോമോൻ സ്വാഗതം പറഞ്ഞു. കുടുംബശ്രീ അസിസ്റ്റന്‍റ് പ്രോജക്ട് ഓഫീസർ ബി.എസ്. മനോജ് പദ്ധതി വിശദീകരണം നടത്തി. അട്ടപ്പാടിയിലെ വിവിധ ഉന്നതികളിൽ നിന്നും പ്ലസ്ടു പാസായിട്ടും ഡിഗ്രി ചെയ്യാൻ സാധിക്കാതിരുന്ന എൺപതോളം പേരെ കുടുംബശ്രീ ആനിമേറ്റർമാർ കണ്ടെത്തിയിരുന്നു. ഇവർക്കു വേണ്ടിയുള്ള ബോധവത്കരണമാണ് സംഘടിപ്പിച്ചത്.

മുതിർന്ന കോൺഗ്രസ് നേതാവ് പി.ജെ. പൗലോസ് അന്തരിച്ചു

മണ്ണാർക്കാട്: മുതിർന്ന കോണ്‍ഗ്രസ് നേതാവും കെപിസിസി മുന്‍ സെക്രട്ടറിയുമായ പനയാരംപിള്ളില്‍ പി.ജെ. പൗലോസ് (79) അന്തരിച്ചു. സംസ്കാരം ഇന്ന് ഉച്ചയ്ക്കു 12 നു വെള്ളപ്പാടം സെന്‍റ് ജോൺസ് യാക്കോബായ സുറിയാനി പള്ളിയിൽ. ഭാര്യ: ലീലാമ്മ. മക്കള്‍: ജോഷി പോള്‍, മിനി പോള്‍, സൗമിനി. മരുമക്കള്‍: ജോജു, ബാബു. പാലക്കാട് ജില്ലാ പഞ്ചായത്ത് പ്രതിപക്ഷനേതാവ്, പാലക്കാട് ജില്ലാ സഹകരണബാങ്ക് ഡയറക്ടര്‍, കോണ്‍ഗ്രസ് കോട്ടോപ്പാടം മണ്ഡലം പ്രസിഡന്‍റ്, യൂത്ത് കോണ്‍ഗ്രസ് മണ്ണാര്‍ക്കാട് ബ്ലോക്ക് പ്രസിഡന്‍റ്, പാലക്കാട് ജില്ലാ യൂത്ത് കോണ്‍ഗ്രസ് പ്രസിഡന്‍റ്, ഡിസിസി സെക്രട്ടറി, ഡിസിസി വൈസ് പ്രസിഡന്‍റ് എന്നീ സ്ഥാനങ്ങള്‍ വഹിച്ചിട്ടുണ്ട്. നിലവില്‍ കെപിസിസി അംഗമായിരുന്നു. മണ്ണാര്‍ക്കാടും അട്ടപ്പാടി ഉള്‍പ്പടെയുള്ള പരിസരപ്രദേശങ്ങളിലും കോണ്‍ഗ്രസ് കെട്ടിപ്പടുക്കാന്‍ അഹോരാത്രം പരിശ്രമിച്ച നേതാവാണ് പി.ജെ. പൗലോസ്. മുതിർന്ന കോൺഗ്രസ് നേതാക്കളായ രമേശ് ചെന്നിത്തല, ബെന്നി ബഹനാൻ എംപി, കെപിസിസി ജനറൽ സെക്രട്ടറിമാരായ അബ്ദുൽ മുത്തലിബ്, സി. ചന്ദ്രൻ, മുൻ എംപി കെ.പി. ധനപാലൻ, മുൻമന്ത്രി കെ.ഇ. ഇസ്മയിൽ, മുൻ ഡെപ്യൂട്ടി സ്പീക്കർ ജോസ് ബേബി, മുൻ എംഎൽഎമാരായ കെ.എ. ചന്ദ്രൻ, കളത്തിൽ അബ്ദുള്ള, സി.പി. മുഹമ്മദ്, ഡിസിസി പ്രസിഡന്‍റ് എ. തങ്കപ്പൻ, മുസ്ലിം ലീഗ് ജില്ലാ പ്രസിഡന്‍റ് മരയ്ക്കാർ മാരായമംഗലം, പാലക്കാട് യുഡിഎഫ് കൺവീനർ പി. ബാലഗോപാൽ, എംഎൽഎമാരായ എൻ. ഷംസുദീൻ, രാഹുൽ മാങ്കൂട്ടത്തിൽ, പാലക്കാട് രൂപത ബിഷപ് എമരിറ്റസ് മാര്‍ ജേക്കബ് മനത്തോടത്ത് തുടങ്ങിയവർ അന്ത്യോപചാരമർപ്പിക്കാൻ എത്തിയിരുന്നു.

തമിഴ്നാട് സ്വദേശി കനാലിൽ മരിച്ച നിലയിൽ

ചിറ്റൂർ: ഗവ.ടെക്നിക്കൽ ഹയർ സെക്കൻഡറി സ്കൂളിനു സമീപത്തുള്ള മാഞ്ചിറ കനാലിൽ തമിഴ്നാട് സ്വദേശിയെ മരിച്ച നിലയിൽ കണ്ടെത്തി. കോയമ്പത്തൂർ ശെൽവപുരം സ്വദേശി സുരേഷ് ബാബു(51)വാണ് മരിച്ചത്. ഇന്നലെ രാവിലെ 11.30 ഓടെ കനാലിൽ മൃതദേഹം കണ്ട നാട്ടുകാർ പോലീസിനെ വിവരമറിയിക്കുകയായിരുന്നു. ചൊവ്വാഴ്ച രാത്രിയോടെ മാഞ്ചിറയിലെ സുഹൃത്തിന്‍റെ വീട്ടിൽ എത്തിയതായിരുന്നു സുരേഷ് ബാബു. രാവിലെ ക്ഷേത്രദർശനം കഴിഞ്ഞു നാട്ടിലേക്കു മടങ്ങുകയാണെന്നു പറഞ്ഞാണ് വീട്ടിൽനിന്ന് ഇറങ്ങിയതെന്നു സുഹൃത്ത് പറഞ്ഞു. മരണത്തിൽ അസ്വാഭാവികതയൊന്നും ഇല്ലെന്നും കനാലിനു സമീപത്ത് എത്തിയപ്പോൾ കാൽവഴുതി വീണതാകാം മരണകാരണമെന്നും പോലീസ് പറഞ്ഞു. സുരേഷ് ബാബുവിന് അപസ്മാരമുള്ളതായി വീട്ടുകാർ അറിയിച്ചതായും പോലീസ് പറഞ്ഞു. ശെൽവപുരത്തു ബാർബർ ഷോപ്പ് നടത്തിവരികയാണ് സുരേഷ് ബാബു. ചിറ്റൂർ പോലീസ് ഇൻക്വസ്റ്റ് നടത്തി ജില്ലാ ആശുപത്രി യിൽ പോസ്റ്റുമോർട്ടത്തിനുശേഷം മൃതദേഹം ബന്ധുക്കൾക്കു വീട്ടുനൽകി.

പാലക്കുഴിമലയിലേക്ക് സഞ്ചാരികളുടെ പ്രവാഹം; വൈദ്യുതോത്പാദനം തുടങ്ങിയാൽ വെള്ളച്ചാട്ടം ഇല്ലാതാകുമെന്ന് ആശങ്ക

വടക്കഞ്ചേരി: പാലക്കുഴിമലയിലെ ഈ പ്രകൃതിസൗന്ദര്യത്തിന് ഇനി അല്പായുസ് മാത്രം. ഈ വർഷം അവസാനത്തോടെ മലയിൽനിന്നുള്ള വെള്ളച്ചാട്ടം സ്രോതസാക്കി മിനി ജലവൈദ്യുത പദ്ധതി കമ്മീഷൻ ചെയ്യുന്നതോടെ ഈ കാട്ടരുവിയുടെ മനോഹാരിതയ്ക്കു മങ്ങലേൽക്കും. പിന്നെ മൂന്നുതട്ടുകളിലായി തുള്ളിക്കളിച്ചുള്ള ജലപാതം ഓർമയായി മാറും. മഴക്കാലമാസങ്ങളിൽ ചെക്ക്ഡാം നിറഞ്ഞ് സ്പിൽവേ വഴി ഒഴുകുന്ന വെള്ളമാകും പിന്നെ വെള്ളച്ചാട്ടമായി പരിണമിക്കുക. വൈദ്യുതോത്പാദനം തടസപ്പെടാതെ നടന്നാൽ ഓവർഫ്ളോയ്ക്കുള്ള സാധ്യത കുറവാണെന്നാണ് അധികൃതർ പറയുന്നത്. ഇതിനാൽ അരുവിയുടെ കലപിലാരവങ്ങളുടെ സ്വാഭാവികത ഇപ്പോൾമാത്രമേ തനിമയോടെ ആസ്വദിക്കാനാകു. പാറപ്പുറങ്ങൾക്കരികിലൂടെ പാഞ്ഞുപോകുന്ന വെള്ളത്തിന്‍റെ ഈ കുത്തൊഴുക്കും നിലയ്ക്കും. വിനോദസഞ്ചാരികൾക്ക് കുളിർതെന്നലിന്‍റെ ആസ്വാദനവും ഇത്രമാത്രം ഇനി കിട്ടില്ല. ജലവൈദ്യുത പദ്ധതിക്കായി നിർമിച്ചിട്ടുള്ള ചെക്ക്ഡാമിൽനിന്നു രണ്ടായിരം അടി താഴെ കൊന്നക്കൽകടവിലുള്ള പവർഹൗസിലേക്ക് പൈപ്പ് സ്ഥാപിക്കൽ പ്രവൃത്തികൾ നടന്നുവരികയാണ്. ചെക്ക് ഡാമിൽ വെള്ളം സംഭരിച്ച് പിന്നീട് പൈപ്പ് വഴിയാകും വെള്ളം പവർഹൗസിൽ എത്തി വൈദ്യുതി ഉത്പാദനം നടക്കുക. വൈദ്യുതി ഉത്പാദനത്തിനുശേഷം വെള്ളം ഇതേ കാട്ടരുവിയിലേക്കുതന്നെ ഒഴുക്കിവിടുമെങ്കിലും വെള്ളച്ചാട്ടം ഉണ്ടാകില്ല. പവർഹൗസും കാട്ടരുവിയും ഒരേ നിരപ്പിലായതിനാലാണിത്. ഏറെ കിലോമീറ്ററുകൾ ദൂരെ തൃശൂർ - പാലക്കാട് ദേശീയപാതയിൽനിന്നുവരെ കാണാൻ കഴിയുന്ന വെള്ളച്ചാട്ടത്തിന് ഇനി മാസങ്ങളുടെ ആയുസ് മാത്രം. ഇതിനാൽ അവധിദിവസങ്ങളിൽ പാലക്കുഴിമലയിലേക്കുള്ള സന്ദർശകരുടെ എണ്ണവും കൂടിയിരിക്കുകയാണ്. പ്രായമായവരും കുട്ടികളും ഉൾപ്പെടെ നിരവധി പേരാണ് ജൈവഗ്രാമമായ പാലക്കുഴിയിലെ വിസ്മയക്കാഴ്ചകൾ കാണാനെത്തുന്നത്. വൈദ്യുതോല്പാദനം തുടങ്ങിയാൽപിന്നെ പാലക്കുഴി വേറൊരു ലെവലാകും. കുടിയേറ്റ ഗ്രാമത്തിന്‍റെ ഖ്യാതി കൂടുതൽ വിദൂരതയിലേക്ക് കടന്നുചെല്ലും. ഈ വർഷം തന്നെ പദ്ധതിയുടെ കമ്മീഷനിംഗും വൈദ്യുതി ഉത്പാദനത്തിന്‍റെ ട്രയൽ റണ്ണും നടക്കുമെന്നു പദ്ധതി നടപ്പിലാക്കുന്ന ജില്ലാ പഞ്ചായത്ത് അധികാരികൾ സ്ഥലം സന്ദർശിച്ച് ഉറപ്പ് പറഞ്ഞിട്ടുണ്ട്. നിശ്ചിതസമയപരിധിക്കുള്ളിൽതന്നെ കമ്മീഷനിംഗ് നടത്തുന്നതിനുള്ള വർക്കുകളും അതിവേഗം പുരോഗമിക്കുകയാണെന്ന് വർക്ക് സൈറ്റിലുള്ള എൻജിനീയർ ഷാരോൺ സാം പറഞ്ഞു. സമുദ്രനിരപ്പിൽനിന്ന് 3,000 അടി ഉയരമുള്ള പാലക്കുഴി അതിശയങ്ങളുടെ ഹരിതഭൂമികയാണ്. കറുത്ത പൊന്നായ കുരുമുളകാണ് പാലക്കുഴിമലയിലെ മുഖ്യവിള. റബറും ജാതിയും ഏലവും കൊക്കോയും അപൂർവപഴവർഗങ്ങളും കാപ്പി തുടങ്ങി കൗതുകക്കാഴ്ചയുണ്ട് പാലക്കുഴിയിൽ. ഏതോ പുരാതനസംസ്കൃതിയുടെ ശേഷിപ്പുകളും ഇന്നും പാലക്കുഴിയിൽ മലയിലെ പോത്തുമട ഭാഗത്തുണ്ട്. കണച്ചിപരുതയിൽനിന്നു പാലക്കുഴി മലയിലേക്കുള്ള റോഡിന്‍റെ വലതുവശം പീച്ചി വന്യമൃഗസംരക്ഷണ കേന്ദ്രമാണ്. ആറുകിലോമീറ്റർ യാത്രയിൽ താഴേക്കുള്ള മനോഹരമായ വ്യു പോയിന്‍റുകളും കർഷകർ വിയർപ്പൊഴുക്കി മണ്ണിൽ പൊന്നുവിളയിക്കുന്ന കാർഷിക സമൃദ്ധിയും കാണാനാകും.

ഓടുന്ന കെഎസ്ആർടിസിക്ക് മുകളിൽ മരക്കൊമ്പ് വീണു

നെല്ലിയാമ്പതി: നെന്മാറ -നെല്ലിയാമ്പതി റോഡിൽ ഇന്നലെ ഓടിക്കൊണ്ടിരുന്ന കെഎസ്ആർടിസി ബസിനുമുകളിൽ ഉണങ്ങിയ മരം പൊട്ടിവീണ് ഡ്രൈവർക്കു പരിക്കേറ്റു. ഉച്ചയ്ക്ക് ഒന്നരയോടെ നെന്മാറയിൽനിന്നു നെല്ലിയാമ്പതി പോത്തുപാറയിലേക്കു പുറപ്പെട്ട കെഎസ്ആർടിസി ബസാണ് കുണ്ടർചോലയ്ക്കു സമീപം അപകടത്തിൽപെട്ടത്. അപകടത്തിൽ ബസിന്‍റെ മുൻഭാഗത്തെ ചില്ല് പൂർണമായും തകർന്നു. ഇതേതുടർന്ന് ഡ്രൈവർ ഗിരീഷിന്‍റെ ഇരുകൈകളിലും പരിക്കേറ്റു. അപകടത്തെത്തുടർന്ന് കുണ്ടർചോലയിൽ ബസ് സർവീസ് അവസാനിപ്പിച്ചതിനെതുടർന്ന് ബസിലെ യാത്രക്കാർ പെരുവഴിയിലായി. പിന്നീട് ഒന്നര മണിക്കൂറിനുശേഷം പിറകിൽ വന്ന സ്വകാര്യബസിൽ യാത്ര ചെയ്താണ് യാത്രക്കാർ നെല്ലിയാമ്പതിയിൽ എത്തിച്ചേർന്നത്.

ഉൾനാടൻ മത്സ്യമേഖലാ വികസനപദ്ധതി പോത്തുണ്ടിയിൽ

നെന്മാറ: ഉൾനാടൻ മത്സ്യമേഖലാ വികസന പദ്ധതി ഉദ്ഘാടനവും സാധനസാമഗ്രികളുടെ വിതരണവും നടത്തി. കേന്ദ്ര ആവിഷ്‌കൃത പദ്ധതിയായ എസ്‌സിഎസ്പിയുടെ ഭാഗമായി ജില്ലയിലെ റിസർവോയർ ഫിഷറീസ് വികസനവും ഉൾനാടൻ മത്സ്യമേഖലാ വികസന പദ്ധതിയും ലക്ഷ്യമാക്കി കേന്ദ്ര സർക്കാർ സ്ഥാപനമായ ഐസി എആർ - സിഫ്റ്റ് എറണാകുളത്തിന്‍റെ ആഭിമുഖ്യത്തിലാണ് പദ്ധതി നടപ്പിലാക്കുന്നത്. പോത്തുണ്ടി ഡാമിലെ കൂട് കൃഷി നവീകരണവും മംഗലം, മീങ്കര ഡാമുകളിൽ വളപ്പുമത്സ്യ കൃഷി എന്നിവയിലൂടെ മത്സ്യബന്ധനമേഖലയിലെ പട്ടികജാതി സമൂഹങ്ങളുടെ സാമ്പത്തിക സാമൂഹിക വികസനമാണ് പദ്ധതി ലക്ഷ്യമിടുന്നത്. പദ്ധതിയുടെ ഭാഗമായി അടിസ്ഥാന സൗകര്യ സാമഗ്രികളും ജീവൻ രക്ഷാഉപാധികളും വിതരണം ചെയ്തു. സെൻട്രൽ ഇൻസ്റ്റിറ്റ്യൂട്ട് ഓഫ് ഫിഷറീസ് ടെക്നോളജി (സിഐഎഫ്ടി) ഡയറക്ടർ ഇൻ ചാർജ് എം.പി. രമേശൻ ഉദ്ഘാടനം ചെയ്തു. ഐസിഎആർ-സിഫ്റ്റ് പ്രിൻസിപ്പൽ സയന്‍റിസ്റ്റ് ഡോ.വി. ഗീതാലക്ഷ്മി സ്വാഗതം പറഞ്ഞ ചടങ്ങിൽ പഞ്ചായത്ത് അംഗം പി.ജി. ജയൻ അധ്യക്ഷനായി.പ്രിൻസിപ്പൽ സയന്‍റിസ്റ്റ് ആൻഡ് നോഡൽ ഓഫീസർ ഡോ.എ. സുരേഷ് പദ്ധതി വിശദീകരണം നടത്തി. മലമ്പുഴ ഫിഷറീസ് ഡെപ്യൂട്ടി ഡയറക്‌ടർ കെ.എസ്. രാജി, മഞ്ജുഷ, ഫാത്തിമ എസ്. ഹമീദ്, സബ്ന, സി.സി. മാത്യു, അയന രാജപ്പൻ, ശ്രുതി ആർ. നായർ, എം. രമ്യ, ശ്രീധരൻ കുഞ്ഞുമണി, എൻ. രാധാകൃഷ്‌ണൻ, സി.എം.അരുൺ ബേബി എന്നിവർ പ്രസംഗിച്ചു.

യൂത്ത് കോൺഗ്രസ് മാർച്ചിൽ സംഘർഷം: പോലീസ് ജലപീരങ്കി പ്രയോഗിച്ചു

ചിറ്റൂർ: കോൺഗ്രസ് പ്രവർത്തകർക്ക് എതിരേ പോലീസ് അതിക്രമം നടത്തുന്നു എന്നാരോപിച്ച് യൂത്ത് കോൺഗ്രസ് ചിറ്റൂർ, നെന്മാറ നിയോജകമണ്ഡലം കമ്മിറ്റികൾ സംയുക്തമായി സംഘടിപ്പിച്ച ചിറ്റൂർ ഡിവൈഎസ്പി ഓഫീസ് മാർച്ചിൽ സംഘർഷം. പോലീസ് പ്രവർത്തകർക്കുനേരേ രണ്ടുതവണ ജലപീരങ്കി പ്രയോഗിച്ചു. ഇന്നലെ രാവിലെ പന്ത്രണ്ടോടെ അണിക്കോടുനിന്നു പ്രകടനമായി എത്തിയ പ്രവർത്തകരെ പോലീസ് സ്റ്റേഷന് സമീപത്ത് ബാരിക്കേഡ് സ്ഥാപിച്ച് തടഞ്ഞു. പ്രവർത്തകർ ബാരിക്കേഡിന് മുകളിലേക്ക് കയറുകയും മറിച്ചിടാൻ ശ്രമം നടത്തിയതോടെ പോലീസ് ജലപീരങ്കി പ്രയോഗിച്ചു. ഇതിനിടെ ഒരു പ്രവർത്തകനെ പോലീസ് അറസ്റ്റ്ചെയ്ത് നീക്കുകയും ചെയ്തു. അറസ്റ്റ് ചെയ്ത പ്രവർത്തകനെ വിട്ടുതരണമെന്ന് ആവശ്യപ്പെട്ട് പ്രവർത്തകർ ബാരിക്കേഡ് തള്ളിയിട്ട് പ്രതിഷേധിക്കാൻ ശ്രമിച്ചതോടെ പോലീസ് രണ്ടാം തവണജലപീരങ്കി പ്രയോഗിച്ചത്. പ്രതിഷേധമാർച്ച് ഡിസിസി ഉപാധ്യക്ഷൻ സുമേഷ് അച്യുതൻ ഉദ്ഘാടനം ചെയ്തു. യൂത്ത് കോൺഗ്രസ് മണ്ഡലം പ്രസിഡന്‍റ് കെ. സാജൻ അധ്യക്ഷത വഹിച്ചു. ജില്ലാ പ്രസിഡന്‍റ് കെ.എസ്. ജയഘോഷ്, സംസ്ഥാന ജനറൽ സെക്രട്ടറിമാരായ പ്രതീഷ് മാധവൻ, ഷെഫീഖ് അത്തിക്കോട്, സംസ്ഥാന സെക്രട്ടറി ജിതേഷ് നാരായണൻ, കെഎസ്‌യു സംസ്ഥാന സെക്രട്ടറി അജാസ് കുഴൽമന്ദം, യൂത്ത് കോൺഗ്രസ് ജില്ലാ ജനറൽസെക്രട്ടറിമാരായ പി.വി. വത്സൻ, എ. ഷെഫീഖ്, ശ്യാം ദേവദാസ്, മനു പല്ലാവൂർ എന്നിവർ പ്രസംഗിച്ചു.

മാലിന്യ സംസ്കരണ പ്ലാന്‍റ് ഉദ്ഘാടനം; കോൺഗ്രസ് പ്രതിഷേധിച്ചു

വടക്കഞ്ചേരി: വണ്ടാഴി പഞ്ചായത്തിലെ പെരണംകാട് നിർമിച്ച മാലിന്യസംസ്കരണ പ്ലാന്‍റിന്‍റെ ഉദ്ഘാടനം സിപിഎം നേതൃത്വത്തിലുള്ള പഞ്ചായത്ത്‌ ഭരണക്കാർ ഏകപക്ഷീയമായി തീരുമാനിച്ചതിൽ കോൺഗ്രസ് വണ്ടാഴി മണ്ഡലം കമ്മിറ്റി പ്രതിഷേധിച്ചു. സംഘാടക സമിതി രൂപീകരണം മറ്റു പാർട്ടികളെ അറിയിക്കാതെ ഏകപക്ഷീയമായി തീരുമാനിക്കുകയായിരുന്നെന്നു നേതാക്കൾ പറയുന്നു. മണ്ഡലം പ്രസിഡന്‍റ് കെ.എം. ശശീന്ദ്രൻ, ഡിസിസി മെംബർ കെ. രാമകൃഷ്ണൻ, ബ്ലോക്ക്‌ വൈസ് പ്രസിഡന്‍റ് എൻ. അശോകൻ, ബ്ലോക്ക്‌ സെക്രട്ടറി രതീഷ്, വി. രമേഷ്, കെ. ഗൗതമൻ, എസ്. ബിബിൻ എന്നിവരുടെ നേതൃത്വത്തിലായിരുന്നു പ്രതിഷേധം.

വടകരപ്പതി കുടിൽകെട്ടി സമരത്തിനു ഡിസിസി പിന്തുണ

കൊഴിഞ്ഞാമ്പാറ: വടകരപ്പതി വില്ലേജ് ഓഫീസിനു മുന്നിൽ കുടിൽകെട്ടി സമരത്തിന്‍റെ ഒൻപതാം ദിനമായ ഇന്നലെ കോൺഗ്രസ് ഭാരവാഹികൾ എത്തി ഐക്യദാർഢ്യം പ്രഖ്യാപിച്ചു. ഡിസിസി വൈസ് പ്രസിഡന്‍റ് സുമേഷ് അച്യുതൻ, സെക്രട്ടറി തനികാചലം, വടകരപ്പതി മണ്ഡലം പ്രസിഡന്‍റ് കെ.യു. പ്രസാദ് എന്നിവരുടെ നേതൃത്വത്തിൽ അമ്പതോളം പേർ മോനോൻപാറ ടൗണിൽ നിന്നും പ്രകടനമായാണ് സമരപ്പന്തലിലെത്തിയത്. സമരക്കാരുടെ ധാർമികസമരത്തിന് ഡിസിസി പൂർണപിന്തുണയും പ്രഖ്യാപിച്ചു. വടകരപ്പതിയിലെ സ്വകാര്യ വ്യക്തിയുടെ പത്തേക്കർ ഭൂമി ഉടമ അറിയാതെ നൽകുകയും പോക്കുവരവ് ചെയ്തുകൊടുത്ത് വ്യാജ ആധാരം ഉണ്ടാക്കാൻ സഹായിക്കുകയും ചെയ്ത വില്ലേജ് ഉദ്യോഗസ്ഥരെ ഉടൻ സസ്പെൻഡ് ചെയ്ത് അന്വേഷണം നടത്തണമെന്നാവശ്യപ്പെട്ടാണ് അനിശ്ചിതകാല സമരം നടത്തിവരുന്നത്. വിവിധ രാഷ്ട്രീയ സേവന സംഘടനകളും സമരത്തിനു പിന്തുണ പ്രഖ്യാപിച്ചിരിക്കുകയാണ്.

കാലാവധി കഴിഞ്ഞും ക്വാറിയുടെ പ്രവർത്തനം തുടരുന്നത് അന്വേഷിക്കണമെന്നു നാട്ടുകാർ

വടക്കഞ്ചേരി: പ്രവർത്തനാനുമതിയുടെ കാലാവധി കഴിഞ്ഞും ഏറെക്കാലം കരിങ്കൽ ക്വാറി പ്രവർത്തിച്ചതു സംബന്ധിച്ച് അന്വേഷണം നടത്തി കുറ്റക്കാർക്കെതിരേ നടപടി വേണമെന്ന ആവശ്യവുമായി നാട്ടുകാർ. തൃശൂർ - പാലക്കാട് ദേശീയപാതയ്ക്കടുത്ത് അണക്കപ്പാറയിലെ കരിങ്കൽ ക്വാറിക്കെതിരേയാണ് നാട്ടുകാർ രംഗത്തെത്തിയിട്ടുള്ളത്. ക്വാറി പ്രവർത്തിപ്പിക്കാൻ അനുമതി നൽകിയത് എത്രകാലത്തേക്കാണെന്നും എത്ര സ്ഥലത്താണ് പാറ പൊട്ടിക്കാൻ അനുമതി നൽകിയിട്ടുള്ളതെന്നും ബന്ധപ്പെട്ട അധികൃതർക്കെല്ലാം വ്യക്തമായി അറിയാമെന്നിരിക്കെ ഇതു പരിശോധിക്കാതെ ക്വാറി പ്രവർത്തിക്കുന്നത് ആരുടെയൊക്കെയോ പിൻബലത്തിലാണെന്ന ആക്ഷേപമാണ് നാട്ടുകാർ ഉന്നയിക്കുന്നത്. രാത്രികാലങ്ങളിലും വലിയ ടോറസുകളിൽ കല്ലുകയറ്റി പോകുന്നത് ആരും അറിഞ്ഞില്ല എന്ന് വിശ്വസിക്കാനാവില്ലെന്ന് നാട്ടുകാർ പറയുന്നു. ബന്ധപ്പെട്ടവരുടെ ഭാഗത്തുനിന്നും ന്യായമായ നടപടി ഉണ്ടായില്ലെങ്കിൽ നിയമലംഘന നടപടികൾ ചൂണ്ടിക്കാട്ടി കോടതിയെ സമീപിക്കാനാണ് നാട്ടുകാരുടെ തീരുമാനം. രണ്ടുവർഷം മുമ്പ് തന്നെ ക്വാറി പ്രവർത്തിപ്പിക്കാൻ ആവശ്യമായ അനുമതി അവസാനിച്ചെന്നാണ് സമരരംഗത്തുള്ളവർ പറയുന്നത്. ഏതാനും സെന്‍റ് സ്ഥലത്ത് മാത്രം പാറ പൊട്ടിക്കാൻ സമ്പാദിച്ച ലൈസൻസിന്‍റെ മറവിൽ പ്രദേശമാകെ പാറ ഖനനം നിർബാധം തുടരുകയാണ്. അനധികൃത ഖനനം നടത്തി കല്ല് പുറത്തു കൊണ്ടു പോകുന്നത് കഴിഞ്ഞദിവസം നാട്ടുകാർ തടഞ്ഞിരുന്നു. ഇത് പോലീസിന്‍റെ ഇടപെടലിൽ എത്തിയെങ്കിലും ക്വാറിയുടെ പ്രവർത്തനം ഇപ്പോഴും പൂർണമായും നിർത്തിവച്ചിട്ടില്ലെന്നാണ് നാട്ടുകാർ ആരോപിക്കുന്നത്. ഞായറാഴ്ച ദിവസങ്ങളിൽ പാറപൊട്ടിക്കൽ പോലെയുള്ള എക്സ്പ്ലോസീവ് വർക്കുകൾ നടത്തരുതെന്ന് വ്യവസ്ഥയുണ്ടെങ്കിലും ഇത് കാറ്റിൽ പറത്തിയും ക്വാറി പ്രവർത്തിക്കുന്നതായി പറയുന്നു.

നെന്മാറ-ഒലിപ്പാറ റോഡ് തകർച്ച; 26 ന് സ്വകാര്യബസ് സൂചനാപണിമുടക്ക്

നെന്മാറ: നെന്മാറ -ഒലിപ്പാറ റൂട്ടിൽ സ്വകാര്യബസുകൾ സൂചനാപണിമുടക്ക് നടത്തുമെന്ന് ബസ് ഉടമകൾ അറിയിച്ചു. രണ്ടുവർഷം കഴിഞ്ഞിട്ടും നവീകരണത്തിനായി പൊളിച്ച നെന്മാറ-ഒലിപ്പാറ പാതയുടെ നിർമാണം പൂർത്തിയാക്കാതെ നീണ്ടുപോകുന്നതിനെതിരെയാണ് വെള്ളിയാഴ്ച സൂചനാ പണിമുടക്ക് നടത്തുന്നത്. നെന്മാറ, അയിലൂർ പഞ്ചായത്തുകളിലെ വിവിധ ഭാഗങ്ങളിലേക്ക് നെന്മാറയിൽ നിന്ന് ദിവസേന 35 ലധികം ട്രിപ്പുകളിലാണ് ആയാണ് സ്വകാര്യ ബസ് സർവീസ് നടത്തുന്നത്. സമയത്തിന് ഓടിയെത്താൻ കഴിയാത്തതും കേടുപാടുകൾ സംഭവിക്കുന്നതും അപകടങ്ങളും പതിവായതോടെയാണ് സർവീസ് നിർത്തിവെക്കാൻ ഉടമകൾ തീരുമാനിച്ചത്. പാതയുടെ അവശേഷിക്കുന്ന നവീകരണപ്രവർത്തനങ്ങൾ ഉടൻ പൂർത്തിയാക്കണമെന്നും, യാത്രക്കാർക്ക് ദുരിതമുണ്ടാകാതിരിക്കണമെന്നും ആവശ്യപ്പെട്ടാണ് സമരം സംഘടിപ്പിക്കുന്നത്. എന്നാൽ ഇതേ റൂട്ട് റോഡിലൂടെ ഭാഗികമായി സഞ്ചരിക്കുന്ന അയിലൂർ പാലമുക്ക് മേഖലകളിലേക്ക് സർവീസ് നടത്തുന്ന ബസുകൾ സമരം പ്രഖ്യാപിച്ചിട്ടില്ല. 25 നകം നിർമാണ പ്രവർത്തനം ആരംഭിച്ചാൽ സൂചനാ പണിമുടക്ക് പിൻവലിക്കുമെന്നും ബസുടമ സംഘം അറിയിച്ചു.

മുസ്ലിം ലീഗ് ജില്ലാ സമ്മേളനത്തിനു നാളെ തുടക്കം

പാലക്കാട്: അതിജീവന രാഷ്ട്രീയത്തിന്‍റെ ഏഴരപ്പതിറ്റാണ്ട് എന്ന വിഷയത്തിൽ പാലക്കാട് ഖാഇദേമില്ലത്ത് നഗറിൽ നടക്കുന്ന മുസ്ലിംലീഗ് ജില്ലാ സമ്മേളനത്തിനു നാളെ തുടക്കമാകുമെന്ന് ജില്ലാ ഭാരവാഹികൾ പത്രസമ്മേളനത്തിൽ അറിയിച്ചു. നാളെ ഉച്ചയ്ക്കു രണ്ടിന് പുതുനഗരത്തുനിന്നും പതാകജാഥ പുറപ്പെടും. മൂന്നുമണിക്ക് കോട്ടമൈതാനത്ത് ജില്ലാ പ്രസിഡന്‍റ് മരയ്ക്കാർ മാരായമംഗലം പതാക ഉയർത്തും. വൈകുന്നേരം 3.30ന് ടോപ്പ് ഇൻ ടൗണിൽ നടക്കുന്ന പ്രതിനിധിസമ്മേളനം മുസ്ലിംലീഗ് ദേശീയ സെക്രട്ടറി പാണക്കാട് സയ്യിദ് മുനവറലി ശിഹാബ് തങ്ങൾ ഉദ്ഘാടനം ചെയ്യും. സംസ്ഥാന സെക്രട്ടറിയേറ്റ് അംഗം അഡ്വ. കെ.എൻ.എ. ഖാദർ മുഖ്യപ്രഭാഷണം നടത്തും. സംസ്ഥാന വൈസ് പ്രസിഡന്‍റ് സി.എ.എം.എ. കരീം, വൈസ് പ്രസിഡന്‍റ് സി.എച്ച്. റഷീദ്, സെക്രട്ടറി അഡ്വ. എൻ. ഷംസുദ്ദീൻ എംഎൽഎ, സംസ്ഥാന സെക്രട്ടേറിയറ്റ് അംഗങ്ങളായ കളത്തിൽ അബ്ദുള്ള, എം.എ. സമദ് പ്രസംഗിക്കും. മരയ്ക്കാർ മാരായമംഗലം അധ്യക്ഷത വഹിക്കും. 26ന് വൈകുന്നേരം മൂന്നിന് ജനപ്രതിനിധി സെമിനാർ ദേശീയ സെക്രട്ടറി അഡ്വ. ഹാരിസ് ബീരാൻ എംപി ഉദ്ഘാടനം ചെയ്യും. 27ന് വൈകുന്നേരം നാലിന്് വിക്ടോറിയ കോളജ് പരിസരത്തുനിന്നും കോട്ടമൈതാനത്തേക്ക് പ്രകടനം ആരംഭിക്കും. ആറുമണിക്ക് നടക്കുന്ന സമാപന പൊതുസമ്മേളനം സംസ്ഥാന പ്രസിഡന്‍റ് പാണക്കാട് സയ്യിദ് സാദിഖലി ശിഹാബ് തങ്ങൾ ഉദ്ഘാടനം ചെയ്യും. ദേശീയ പ്രസിഡന്‍റ് പ്രഫ. ഖാദർ മൊയ്തീൻ മുഖ്യാതിഥിയാകും. ദേശീയ ജനറൽ സെക്രട്ടറി പി.കെ കുഞ്ഞാലിക്കുട്ടി മുഖ്യപ്രഭാഷണം നടത്തും. ജില്ലാ പ്രസിഡന്‍റ് മരയ്ക്കാർ മാരായമംഗലം അധ്യക്ഷത വഹിക്കും. പത്രസമ്മേളനത്തിൽ ജില്ലാ പ്രസിഡന്‍റ് മരക്കാർ മാരായമംഗലം, ജനറൽ സെക്രട്ടറി അഡ്വ. ടി.എ. സിദ്ദിഖ്, ട്രഷറർ പി.ഇ.എ. സലാം മാസ്റ്റർ, സംസ്ഥാന കമ്മിറ്റി അംഗങ്ങളായ എം.എം. ഹമീദ്, കെ.കെ.എ. അസീസ്, ജില്ലാ വൈസ് പ്രസിഡന്‍റ് കെ.ടി.എ ജബ്ബാർ, കല്ലടി അബൂബക്കർ, സെക്രട്ടറിമാരായ എം.എസ്. നാസർ, എം.എച്ച്. മുജീബ് റഹ്്മാൻ എന്നിവർ പങ്കെടുത്തു.

13.67 കോടിയുടെ വികസനവുമായി കോട്ടത്തറ ട്രൈബൽ താലൂക്ക് സ്പെഷാലിറ്റി ആശുപത്രി

അഗളി: അട്ടപ്പാടി കോട്ടത്തറ ട്രൈബൽ താലൂക്ക് സ്പെഷാലിറ്റി ആശുപത്രിയിൽ 13.67 കോടി രൂപയുടെ വികസന പ്രവർത്തനങ്ങൾ പൂർത്തിയായി. പൂർത്തീകരിച്ച പദ്ധതികളുടെ ഉദ്ഘാടനം നാളെ രാവിലെ പത്തിന് ആരോഗ്യമന്ത്രി വീണാ ജോർജ് നിർവഹിക്കും. നവജാതശിശുമരണം തടയാൻ മൂന്നുകോടി 20 ലക്ഷം രൂപ ചെലവിൽ അത്യാധുനികസൗകര്യങ്ങളോടുകൂടിയ ലക്ഷ്യ സ്റ്റാൻഡേഡ് അനുസരിച്ചുള്ള ലേബർ റൂം, ഓപ്പറേഷൻ തിയറ്റർ, ലേബർ ഒപി, ലിഫ്റ്റ്, സ്ക്രീനിംഗ് ബ്ലോക്ക്, മൂന്നുകോടിരൂപ ചെലവിൽ സിടി സ്കാൻ യൂണിറ്റ് എന്നിങ്ങനെയാണ് ഒരുക്കിയിട്ടുള്ളത്. സിടി സ്കാനിംഗിനായി മണ്ണാർക്കാട്, കോയന്പത്തൂർ, പാലക്കാട് തുടങ്ങിയ സ്ഥലങ്ങളിലേക്ക് കിലോമീറ്ററുകൾ സഞ്ചരിക്കേണ്ട സ്ഥിതിയായിരുന്നു അട്ടപ്പാടിക്കാർക്ക് നേരത്തേ ഉണ്ടായിരുന്നത്. ഇതിനു പരിഹാരമായാണ് സിടി സ്കാൻ യൂണിറ്റ് പ്രവർത്തനമാരംഭിക്കുന്നത്. 34 ലക്ഷം ചെലവിൽ പുതിയ ഒപി കെട്ടിടം, 40 ലക്ഷം ചെലവിൽ പുതിയ ഫിസിയോ തെറാപ്പി സ്പെഷൽ എഡ്യുക്കേഷൻ കൗണ്‍സലിംഗ് ഡേ കെയർ ആൻഡ് ഫിറ്റ്നസ് സെന്‍റർ, 2.60 കോടി ചെലവിൽ സ്റ്റാഫ് ക്വാർട്ടേഴ്സ്, വൈദ്യുതിക്ഷാമം പരിഹരിക്കാൻ 68 ലക്ഷം ചെലവിൽ 250 കെവി ഹൈ ടെൻഷൻ ട്രാൻസ്ഫോർമർ, 1.40 കോടി ചെലവിൽ ഫയർ ഫൈറ്റിംഗ് സംവിധാനം, എസ്കേപ്പിംഗ് സ്റ്റെയർ, പാരപ്പറ്റ്, റാംപ്, സ്റ്റോർ ഓണ്‍ കാന്‍റീൻ, ഒരു കോടി ചെലവിൽ ഡയാലിസിസ് കീമോ തെറാപ്പി കേന്ദ്രം, 22 ലക്ഷം രൂപയിൽ ലോൺട്രി യൂണിറ്റ് എന്നീ പ്രവർത്തനങ്ങളാണ് അട്ടപ്പാടി കോട്ടത്തറ ട്രൈബൽ താലൂക്ക് സ്പെഷാലിറ്റി ആശുപത്രിയിൽ പൂർത്തീകരിച്ചിട്ടുള്ളത്. ഉദ്ഘാടനപരിപാടിയിൽ അഡ്വ.എൻ. ഷംസുദീൻ എംഎൽഎ അധ്യക്ഷനാകും. വി.കെ. ശ്രീകണ്ഠൻ എംപി മുഖ്യാതിഥിയാകും.

ഒന്നാംവിള കൊയ്ത്തിനായി "നിറ'യുടെ യന്ത്രങ്ങൾ വയലുകളിലേക്ക്

ആലത്തൂർ: കൊയ്ത്തിനൊരു കൈത്താങ്ങുമായി നിറയുടെ കൊയ്ത്തുയന്ത്രങ്ങൾ ഒന്നാംവിളവെടുപ്പിനായി വയലുകളിലേക്കെത്തുന്നു. നിറ ഹരിതമിത്ര സൊസൈറ്റി മുഖേനെ ചെയിൻ യന്ത്രങ്ങൾ 2500 രൂപ നിരക്കിൽ ലഭിക്കും. നെല്ല് കാറ്റത്തിടുന്ന വിന്നോവർ 1000 രൂപ ദിവസ വാടകക്കും ലഭ്യമാവും.സർക്കാർ അധീനതയിലുള്ള തദ്ദേശീയരിൽ നിന്നും കെയ്കോ മുഖേനയും അന്യസംസ്ഥാനങ്ങളിൽ നിന്നുമുള്ള യന്ത്രങ്ങളും ഉൾപ്പടെ 55 യന്ത്രങ്ങളാണ് തയാറാക്കിയിരിക്കുന്നത്. കൂടാതെ പ്രാദേശിക ഉടമകളുടെ സംഘടനയുമായി സഹകരിച്ച് പുതിയ യന്ത്രങ്ങളും എത്തിക്കും. അന്യസംസ്ഥാന കൊയ്ത്തുയന്ത്രങ്ങൾ കർഷകരിൽനിന്നു കൂടിയനിരക്ക് വാടകയായി വാങ്ങുന്നതു തടയിടുന്നതിനാണ് കെ.ഡി. പ്രസേനൻ എംഎൽഎയുടെ നിയോജക മണ്ഡലം സമഗ്ര കാർഷിക വികസന പദ്ധതിയുടെ ഭാഗമായി നിറ ഹരിതമിത്ര സൊസൈറ്റി മുഖേനെ ഇടപെടുന്നത്. കഴിഞ്ഞ ഒമ്പതുവർഷമായി കൊയ്ത്തു യന്ത്രങ്ങളുടെ നിരക്ക് പിടിച്ചു നിർത്താൻ ഇതിലൂടെ കഴിഞ്ഞുവെന്നു നിറ അധികൃതർ പറഞ്ഞു. അന്യസംസ്ഥാന, സ്വകാര്യ ഏജൻസികളുടെ നിരക്കിനേക്കാൾ മിതമായ നിരക്കിൽ നിറയിലൂടെ കർഷകർക്ക് യന്ത്രങ്ങൾ ലഭിക്കും. നിറയുടെ യന്ത്രങ്ങൾ ആവശ്യമുള്ള കർഷകർ മേഖല കോ- ഓർഡിനേറ്റർമാരെ ബന്ധപ്പെടണം. കിഴക്കഞ്ചേരി 1- അബ്ദുൾ നാസർ -9961588496, കിഴക്കഞ്ചേരി 2-സുന്ദരൻ -8547130147, മംഗലംഡാം - ഗോപിനാഥ്-9447053263,വണ്ടാഴി -സന്തോഷ് - 9446639041, മുടപ്പല്ലൂർ-മണിദീപം -9645132100, ചിറ്റിലഞ്ചേരി- സി കെ മോഹനൻ - 9447889253, മേലാർകോട്- കെ ബാലൻ - 9539572400, കുനിശ്ശേരി - ബാബുരാജ്- 9446291400, എരിമയൂർ- മുരുകേശൻ -9605257667, കാട്ടുശേരി- പ്രകാശൻ - 9747620681, ആലത്തൂർ- അനിൽ - 9946252503, മഞ്ഞളൂർ -നസീർ -9946302715, തേങ്കുറിശ്ശി - കൃഷ്ണദാസ് - 9847081561, ചിതലി- മോഹൻദാസ് - 8129474131, കുഴൽമന്ദം- ശെൽവൻ - 9847607764, വിന്നോവർ - സന്തോഷ് - 9446639041 നന്പറുകളിൽ ബന്ധപ്പെടാം.

റോഡരികിൽ നാൽക്കാലികളെ കെട്ടിയിടുന്നതു ദുരിതമായി

ചിറ്റൂർ: പശുക്കളെ റോഡരികിൽ മേയാനായി കെട്ടിയിടുന്നതു വാഹനയാത്രികർക്കു ദുരിതമായി. വാഹനങ്ങൾ ഹോൺമുഴക്കിയാൽ പലപ്പോഴും നാൽക്കാലികൾ റോഡിലേക്കു ചാടുന്നതാണ് ദുരിതമാകുന്നത്. കഴിഞ്ഞ ദിവസം പുതുശേരിയിൽ പശു റോഡിനു കുറുകെ ചാടി ബൈക്ക് മറിഞ്ഞ് രണ്ടുപേർക്കു പരിക്കേറ്റിരുന്നു. റോഡരികിൽ നാൽക്കാലികളെ മേയാൻ വിടുന്നതിനെതിരേ പഞ്ചായത്ത് അധികൃതർ മുന്നറിയിപ്പ് ബോർഡ് സ്ഥാപിക്കണമെന്നും യാത്രികർ ആവശ്യപ്പെടുന്നു.

ഗാന്ധിദർശൻവേദി ദേശീയ ഖാദിദിനം ആചരിച്ചു

പാലക്കാട്: കേരള പ്രദേശ് ഗാന്ധിദർശൻവേദി ജില്ലാ കമ്മിറ്റിയുടെ ആഭിമുഖ്യത്തിൽ ദേശീയ ഖാദി ദിനം ആചരിച്ചു. സർവോദയ സംഘം സ്റ്റാഫ് ആൻഡ് ഖാദി ആർട്ടിസാൻസ് അസോസിയേഷൻ സംസ്ഥാന പ്രസിഡന്‍റും ഗാന്ധി ദർശൻവേദി ജില്ലാ ചെയർമാനുമായ ഡോ.പി.പി. വിജയകുമാർ ഉദ്ഘാടനം ചെയ്തു. ജില്ലാ ജനറൽ സെക്രട്ടറി ഡോ.എ. ശിവരാമകൃഷ്ണൻ അധ്യക്ഷത വഹിച്ചു. എ. ഗോപിനാഥൻ, കെ.ടി. പുഷ്പവല്ലി നമ്പ്യാർ, വി.ആർ. കുട്ടൻ, പി.എസ്. നാരായണൻ, എച്ച്.എ. സത്താർ, ഡി. വിജയലക്ഷ്മി, രാധാ ശിവദാസ്, വി.എൻ. രഘുനന്ദനൻ പ്രസംഗിച്ചു.

അച്ചനാംകോട് സെന്‍റ് മേരീസ് സ്കൂളിൽ ചങ്ങാതിക്കൊരു തൈ കാന്പയിൻ

കൊല്ലങ്കോട്: ബ്ലോക്ക്‌ പഞ്ചായത്ത്‌ ഹരിതകേരളം മിഷൻന്‍റെ നേതൃത്വത്തിൽ അച്ചനാംകോട് സെന്‍റ് രീസ് സ്കൂളിൽ ചങ്ങാതിക്കൊരുതൈ കാമ്പയിൻ നടത്തി. എൽപി വിഭാഗം വിദ്യാർഥികളിൽ 220 കുട്ടികൾ തൈകൾ കൊണ്ടുവന്ന് ചങ്ങാതിമാർക്കു കൈമാറി. പ്രധാന അധ്യാപകൻ സി. രവിചന്ദ്രൻ അധ്യക്ഷത വഹിച്ച ചടങ്ങിൽ കൊല്ലങ്കോട് ബ്ലോക്ക്‌ പഞ്ചായത്ത്‌ എക്സ്റ്റൻഷൻ ഓഫീസർ സി. രഞ്ജിത് ഉദ്ഘാടനം നിർവഹിച്ചു. അധ്യാപിക കെ. ഷിബിന, പി.എസ്. അജിത്ത്, ഹരിത ക്ലബ് അധ്യാപിക കെ. സബിത എന്നിവർ പ്രസംഗിച്ചു.

ദേശീയ ആയുർവേദ ദിനാചരണം

തെങ്കര: പത്താമത് ദേശീയ ആയുർവേദ ദിനത്തോടനുബന്ധിച്ച് തെങ്കര ആയുർവേദാശുപത്രിയിൽ ഒരാഴ്ചക്കാലം നടത്തുന്ന വിവിധ പരിപാടികളുടെ ഉദ്ഘാടനം തെങ്കര പഞ്ചായത്ത് പ്രസിഡന്‍റ് കെ. ഷൗക്കത്തലി നിർവഹിച്ചു. ഗ്രാമപഞ്ചായത്ത് ആരോഗ്യ സ്ഥിരംസമിതി ചെയർമാൻ കെ.പി. ജഹീഫ് അധ്യക്ഷനായി. ചീഫ് മെഡിക്കൽ ഓഫീസർ ഡോ.പി.എം. ദിനേശൻ, മെഡിക്കൽ ഓഫീസർമാരായ ഡോ. കൃഷ്ണകുമാർ, ഡോ. ശ്രീലക്ഷ്മി, ഡോ. ഷാന പ്രസംഗിച്ചു.

യുവക്ഷേത്ര കോളജിൽ ഡിമൻഷ്യ ബോധവത്കരണ സെമിനാർ

മുണ്ടൂർ: യുവക്ഷേത്ര കോളജ് സൈക്കോളജി വിഭാഗത്തിന്‍റെ നേതൃത്വത്തിൽ വേൾഡ് അൽഷിമേഴ്സ് ഡേയോടനുബന്ധിച്ച് എക്കോസ് ഓഫ് മെമ്മറി എന്ന ബോധവത്കരണ സെമിനാർ ഇസ്റ്റാർട്ട് അംബാസഡറും സൈക്കോളജിസ്റ്റും അലുമിനിയുമായ നിഖിത എസ്. കുമാർ ഉദ്ഘാടനം ചെയ്തു. വൈസ് പ്രിൻസിപ്പൽ റവ.ഡോ. ജോസഫ് ഓലിക്കൽകൂനൽ അധ്യക്ഷനായിരുന്നു. സൈക്കോളജി വിഭാഗം മേധാവി സിസ്റ്റർ സുമൻ ആന്‍റണി, അസിസ്റ്റന്‍റ് പ്രഫ ജിഷ, വിദ്യാർഥിനി എം. അനുഷ പ്രസംഗിച്ചു.

കൊല്ലങ്കോട് റേഞ്ചിൽ വന്യജീവിശല്യ ലഘൂകരണ പദ്ധതിക്കു തുടക്കം

കൊല്ലങ്കോട്: വന്യജീവിശല്യം ലഘൂകരിക്കുന്നതിന്‍റെ ഭാഗമായി തീവ്രയജ്ഞ പരിപാടിക്കു കൊല്ലങ്കോട് ഫോറസ്റ്റ് റേഞ്ച് പരിധിയിൽ തുടക്കം. കൊല്ലങ്കോട്ടിൽ ഗ്രാമപഞ്ചായത്ത് പ്രസിഡന്‍റ് ഉദ്ഘാടനം ചെയ്ത പരിപാടിയിൽ പഞ്ചായത്തംഗങ്ങൾ, കർഷക സംഘടനാ പ്രതിനിധികൾ, വനം, റവന്യൂ, കൃഷി വകുപ്പ്, ഉദ്യോസ്ഥരും പങ്കെടുത്തു. റേഞ്ച് ഫോറസ്റ്റ് ഓഫീസർ കെ.സി. സനൂപ് പദ്ധതി വിശദീകരണ ബോധവത്കരണ പ്രഭാഷണം നടത്തി. ഡെപ്യൂട്ടി റേഞ്ച് ഓഫീസർ ബി. രഞ്ജിത്, സെക്്ഷൻ ഫോറസ്റ്റ് ഓഫീസർമാരായ കെ. കൃഷ്ണകുമാർ, വി. മണികണ്ഠൻ, ബിഎഫ്ഒ മാരായ ഗോപി, ബിൻസി മോൾ എന്നിവരും പങ്കെടുത്തു. കൊല്ലങ്കോട് റേഞ്ച് ഓഫീസ് പരിധിയിലുള്ള മുതലമട, എലവഞ്ചേരി, കൊല്ലങ്കോട് പഞ്ചായത്തുകളിലാണ് വനംവകുപ്പിന്‍റെ ത്രീവ്രയജ്ഞ പരിപാടിക്കു തുടക്കമായത്. പരാതി പരിഹാരത്തിനു പഞ്ചായത്ത്, റേഞ്ച് ഓഫീസുകളിൽ ഹെൽപ് ഡെസ്കും തുറന്നിട്ടുണ്ട്.

ഭൂതയാർ റോഡ് ഗതാഗതയോഗ്യമാക്കണം: മനുഷ്യാവകാശ കമ്മീഷൻ

പാലക്കാട്: അട്ടപ്പാടി പുതൂർ മേലെഭൂതയാർ ഗോത്ര ഊരിലേക്കുള്ള റോഡ് കാലതാമസം കൂടാതെ ഗതാഗത യോഗ്യമാക്കണമെന്നു മനുഷ്യാവകാശ കമ്മീഷൻ ചെയർപേഴ്സൺ ജസ്റ്റിസ് അലക്സാണ്ടർ തോമസ് പുതൂർ ഗ്രാമപഞ്ചായത്ത് സെക്രട്ടറിക്കു നിർദേശം നൽകി. ഊരിലേക്ക് റോഡില്ലാത്തതിനാൽ അത്യാസന്ന നിലയിലായ രോഗിയെ കമ്പിൽകെട്ടി ചുമന്ന് ആംബുലൻസിലെത്തിച്ചെന്ന മാധ്യമവാർത്തയുടെ അടിസ്ഥാനത്തിൽ സമർപ്പിച്ച പരാതിയിലാണ് നടപടി. പുതൂർ പഞ്ചായത്ത് സെക്രട്ടറിയിൽനിന്നും കമ്മീഷൻ റിപ്പോർട്ട് വാങ്ങി. ഈ സാമ്പത്തിക വർഷം റോഡ് പൂർണമായി ഗതാഗതയോഗ്യമാക്കുമെന്ന് റിപ്പോർട്ടിൽ പറയുന്നു. ദുർഘടമായ പ്രദേശങ്ങളുടെ ഭൂപ്രകൃതിയും മറ്റും കാരണം പദ്ധതികൾ നടപ്പിലാക്കാൻ തടസം നേരിടുന്നതായി റിപ്പോർട്ടിൽ പറയുന്നു. ഊരിൽ ഇരുചക്രവാഹനമുള്ളവരുണ്ടെങ്കിലും മറ്റ് വാഹന സൗകര്യങ്ങൾ ലഭ്യമല്ലെന്നും റിപ്പോർട്ടിൽ പറയുന്നു.

തുരിശുമൊക്കിലെ പാടങ്ങളിൽ കാട്ടുപന്നികളുടെ വിളയാട്ടം

വണ്ടിത്താവളം: കൊശവൻകോട് പ്രദേശത്ത് കതിരിട്ട പാടങ്ങളിൽ പന്നിശല്യം അതിരൂക്ഷം. പടക്കം പൊട്ടിച്ചിട്ടും മറ്റു മാർഗങ്ങളുപയോഗിച്ചിട്ടും പന്നിശല്യത്തിനു പരിഹാരമാവുന്നില്ല ജീവഭയം കാരണം വയലുകളിൽ കാവൽനിൽക്കാൻ തൊഴിലാളികളും മുന്നോട്ടുവരുന്നില്ല. തുരിശ്മൊക്ക്, മാങ്ങോട് മേട്ടുക്കട, പീടികക്കോട്, വിളക്കനാംകോട് ഉൾപ്പെടെ സ്ഥലങ്ങളിലാണ് രാത്രിയാവുന്നതോടെ വയലുകളിൽ പന്നിക്കൂട്ടമിറങ്ങി നെൽകൃഷി നശിപ്പിക്കുന്നത്. വെള്ളംതേടി പന്നികൾ വീടുകളിലും എത്തിത്തുടങ്ങിയതോടെ എല്ലാവരും ഭീതിയിലാണ്.

"പ്രവാസി കെയർ ഇൻഷ്വറൻസ് പദ്ധതിയിൽ തിരിച്ചെത്തിയ പ്രവാസികളെ ഉൾപ്പെടുത്തണം'

മണ്ണാർക്കാട്: തൊഴിൽ നഷ്ടപ്പെട്ടും മറ്റു കാരണത്താലും തിരിച്ചുവന്ന കേരളത്തിലെ മുൻ പ്രവാസികളെയും പ്രവാസി കെയർ ഇൻഷ്വറൻ പദ്ധതിയിൽ ഉൾപ്പെടുത്താത്തതു അനീതിയാണെന്നു പ്രവാസി ലീഗ് സംസ്ഥാന ഭാരവാഹികൾ പത്രസമ്മേളനത്തിൽ ആരോപിച്ചു. ഇൻഷ്വറൻസ് പരിരക്ഷ വേണ്ടത് തിരിച്ചുവന്ന പ്രവാസികൾക്കാണ്. തിരിച്ചുവന്ന കേരളത്തിലെ മുൻ പ്രവാസികളുടെ സർക്കാർ കണക്ക് പ്രകാരമുള്ള 14 ലക്ഷത്തോളം വരുന്ന പ്രവാസികളെ പദ്ധതിയിൽ ഉൾപ്പെടുത്തിയിട്ടില്ല. നിലവിൽ പോളിസിക്ക് അർഹതയുള്ളവരുടെ മാതാപിതാക്കളെയും ഉൾപ്പെടുത്തിയിട്ടില്ല. പുതിയതായി ആരംഭിക്കുന്ന ഇൻഷ്വറൻസ് പദ്ധതിയിൽ പോളിസിക്ക് ചെലവാകുന്ന തുക സർക്കാർ വഹിക്കണമെന്നും പ്രവാസി ലീഗ് ആവശ്യപ്പെട്ടു. മണ്ണാർക്കാട് നടത്തിയ പത്ര സമ്മേളനത്തിൽ പ്രവാസി ലീഗ് സംസ്ഥാന പ്രസിഡന്‍റ് ഹനീഫ മൂന്നിയുർ, ജനറൽ സെക്രട്ടറി കെ.പി. ഇമ്പിച്ചി മമ്മുഹാജി, സംസ്ഥാന കമ്മറ്റി അംഗങ്ങളായ കെ.ടി. കുഞ്ഞിമുഹമ്മദ്, ബഷീർ തെക്കൻ എന്നിവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]