കൂടരഞ്ഞിയില്‍ കർഷകചന്ത

കൂടരഞ്ഞി: പഞ്ചായത്ത് കൃഷിഭവന്‍റെ "ഓണസമൃദ്ധി 2025' കർഷകചന്ത ലിന്‍റോ ജോസഫ് എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് ആദർശ് ജോസഫ് അധ്യക്ഷത വഹിച്ചു. കൂടരഞ്ഞി കൃഷി ഓഫീസർ കെ.എ. ഷബീർ അഹമ്മദ്,

പഞ്ചായത്ത് വൈസ് പ്രസിഡന്‍റ് മേരി തങ്കച്ചൻ, വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ജെറീന റോയ്, ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ വി.എസ്. രവീന്ദ്രൻ,

ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ റോസിലി ജോസ് തുടങ്ങിയവർ പങ്കെടുത്തു. നാല് വരെ ചന്ത ഉണ്ടാകും.

ADVERTISEMENT

ഓള്‍ഡ് ഏജ് ഹോമില്‍ ഓണം ആഘോഷിച്ചു

കോഴിക്കോട്: ദി പുവര്‍ ഹോംസ് സൊസൈറ്റിക്ക് കീഴിലുള്ള വെസ്റ്റ് ഹില്‍ ഓള്‍ഡ് ഏജ് ഹോമില്‍ ഓണാഘോഷ പരിപാടികള്‍ വിപുലമായി സംഘടിപ്പിച്ചു. സാംസ്‌കാരിക പ്രവര്‍ത്തകനും പ്രഭാഷകനുമായ എ.പി. മുരളീധരന്‍ ഉദ്ഘാടനം ചെയ്തു. പ്രസിഡന്‍റ് ഷനൂപ് താമരക്കുളം അധ്യക്ഷത വഹിച്ചു. സെക്രട്ടറി സുധീഷ് കേശവപുരി, വൈസ് പ്രസിഡന്‍റ് എം.രാജന്‍, ജോ. സെക്രട്ടറി പി. രാജനന്ദിനി, ട്രഷറര്‍ ടി.വി. ശ്രീധരന്‍ സൂപ്രണ്ട് റീജാബായി എന്നിവര്‍ സംസാരിച്ചു. ഓണപൂക്കളമിടല്‍, ഓണക്കോടി വിതരണം, ഓണസദ്യ, ഓണക്കളികള്‍ എന്നിവ സംഘടിപ്പിച്ചു. രാമകൃഷ്ണ മിഷന്‍ ഹയര്‍ സെക്കന്‍ഡറി സ്‌കൂളിലെയും റഹ്‌മാനിയ ഹയര്‍ സെക്കന്‍ഡറി സ്‌കൂളിലെയും വിദ്യാര്‍ഥികളും പരിപാടിയില്‍ പങ്കെടുത്തു.

പായസമേള സംഘടിപ്പിച്ചു

താമരശേരി: പുതുപ്പാടി കുടുംബശ്രീ സിഡിഎസിന്‍റെ ആഭിമുഖ്യത്തിൽ എഫ്എൻഎച്ച്ഡബ്ല്യു (ഫുഡ്, ന്യൂട്രീഷൻ, ഹെൽത്ത്, വാഷ്) പ്രവർത്തനങ്ങളുടെ ഭാഗമായി കുടുംബശ്രീ അംഗങ്ങൾക്കായി പായസമേള മത്സരം സംഘടിപ്പിച്ചു. 17 എഡിഎസുകളിൽ നിന്നുള്ള അംഗങ്ങൾ മേളയിൽ പങ്കെടുത്തു. പഞ്ചായത്ത് പ്രസിഡന്‍റ് നജ്മുന്നീസ ഷെരീഫ് ഉദ്ഘാടനം ചെയ്തു. സിഡിഎസ് ചെയർപേഴ്സൺ ഷീബ സജി അധ്യക്ഷത വഹിച്ചു. പഞ്ചായത്ത് മെമ്പർ ശ്രീജ ബിജു, ആയിഷ ബീവി, വൈസ് ചെയർപേഴ്സൺ ഗീത ഗോപാലൻ, ഉപസമിതി കൺവീനർ യു.പി. ഹേമലത, കമ്മ്യൂണിറ്റി കൗൺസിലർ ആതിര എന്നിവർ പ്രസംഗിച്ചു. ഹെൽത്ത് ഇൻസ്പെക്ടർമാരായ അബ്ദുൾ ബഷീർ, റീന, സിസ്റ്റർ രാജി എന്നിവർ വിധി നിർണയം നടത്തി. അടിവാരം വാർഡിലെ അക്ഷയ കുടുംബശ്രീ ഒന്നാം സ്ഥാനവും ഒടുങ്ങാക്കാട് വാർഡിലെ പുലരി കുടുംബശ്രീ രണ്ടാം സ്ഥാനവും എലോക്കര എഡിഎസിലെ പ്രതീക്ഷ കുടുംബശ്രീ, വാനിക്കര വാർഡിലെ വിസ്മയ കുടുംബശ്രീ മൂന്നാം സ്ഥാനവും നേടി. വിജയികൾക്ക് സമ്മാനങ്ങളും കൈമാറി.

ഓണക്കിറ്റ് നൽകി

തോട്ടുമുക്കം: ജാതി മത വ്യത്യാസമില്ലാതെ ഓരോ മലയാളിയും ഓണമാഘോഷിക്കുമ്പോൾ ഓണസദ്യ സമൃദ്ധമാക്കുന്നതിനായി വാർഡിലെ മുഴുവൻ കുടുംബങ്ങൾക്കും പായസം മിക്‌സും, പാലും അടങ്ങുന്ന കിറ്റുകൾ വിതരണം ചെയ്തിരിക്കുകയാണ് കൊടിയത്തൂർ പഞ്ചായത്ത് പ്രസിഡന്‍റും ആറാം വാർഡ് മെമ്പറുമായ ദിവ്യ ഷിബു. നാലര വർഷം മുമ്പ് വോട്ടഭ്യർത്ഥിക്കാനായി എത്തിയപ്പോൾ വാർഡിലെ ജനങ്ങൾ തന്നെ ഇരു കയ്യും നീട്ടിയാണ് സ്വീകരിച്ചിരുന്നതെന്നും അന്ന് മുതൽ എല്ലാ ഓണത്തിനും ഒരു ചെറിയ സമ്മാനമെന്ന നിലക്ക് കിറ്റുകൾ നൽകാറുണ്ടന്നും ദിവ്യ ഷിബു പറഞ്ഞു. വാർഡ് മെമ്പറായിരുന്നപ്പോൾ ആദ്യ രണ്ട് വർഷം പച്ചക്കറി കിറ്റുകളാണ് നൽകിയിരുന്നത്. തുടർന്നുള്ള വർഷങ്ങൾ പായസ കിറ്റും നൽകി. വാർഡിലെ സ്ഥിരതാമസക്കാരായ 450 ഓളം വീടുകളിലും വാടകക്ക് താമസിക്കുന്ന 30 ഓളം കുടുംബങ്ങളുമുൾപ്പെടെ 480 ഓളം വീടുകളിലാണ് ഇത്തവണ ഓണ സമ്മാനം എത്തിയത്. ദിവ്യ ഷിബു വിതരണോദ്ഘാടനം നിർവഹിച്ചു. അബ്ദുൾ ഗഫൂർ തിരുനിലത്തു അധ്യക്ഷത വഹിച്ചു.ഷാഫി വേലി പുറവൻ, ആന്‍റണി വട്ടോടി, ഷാലു തോട്ടുമുക്കം, ധന്യ ബാബുരാജ്, വൈ.പി. അഷ്റഫ്,ചേക്കുട്ടി തുടങ്ങിയവർ ചടങ്ങിൽ പങ്കെടുത്തു.

നാടന്‍ ചാരായവുമായി പിടിയില്‍

താമരശേരി: അഞ്ചു ലിറ്റര്‍ നാടന്‍ ചാരായവുമായി മധ്യവയസ്‌കനെ എക്‌സൈസ് സംഘം പിടികൂടി. കിഴക്കോത്ത് പഞ്ചായത്തിലെ ചളിക്കോട് - കാരക്കണ്ടി റോഡില്‍ വച്ച് കാരക്കണ്ടി കെ.കെ. പെരവകുട്ടി (55)യെയാണ് പിടികൂടിയത്. എക്‌സൈസ് ഇന്‍റലിജന്‍സിന് ലഭിച്ച രഹസ്യവിവരത്തിന്‍റെ അടിസ്ഥാനത്തില്‍ താമരശ്ശേരി എക്‌സൈസ് സര്‍ക്കിളിലെ പ്രവന്‍റിവ് ഓഫീസര്‍ ഗിരീഷും സംഘവും നടത്തിയ പരിശോധനയിലാണ് പ്രതിയെ പിടികൂടിയത്.

"നന്മ' ഓണാഘോഷ പരിപാടി സംഘടിപ്പിച്ചു

കൂരാച്ചുണ്ട്: മലയാള കലാകാരന്മാരുടെ ദേശീയ സംഘടനയായ നന്മ പേരാമ്പ്ര മേഖലയുടെ ആഭിമുഖ്യത്തിൽ കൂരാച്ചുണ്ടിൽ ഓണാഘോഷ പരിപാടികളും സാംസ്കാരിക സമ്മേളനവും സംഘടിപ്പിച്ചു. പഞ്ചായത്ത് പ്രസിഡന്‍റ് ഒ.കെ അമ്മദ് ഉദ്ഘാടനം ചെയ്തു. ശ്രീധരൻ നൊച്ചാട് അധ്യക്ഷത വഹിച്ചു. സംസ്ഥാന പ്രസിഡന്‍റ് വിൽസൺ സാമുവേൽ മുഖ്യപ്രഭാഷണം നടത്തി. ജോസ് കൂരാച്ചുണ്ട്, ജില്ലാ സെക്രട്ടറി രാജീവൻ മഠത്തിൽ, മുഹമ്മദ് പേരാമ്പ്ര, എ.ജി രാജൻ, സുരേഷ് കനവ്, ശ്രീധരൻ പെരുവണ്ണാമൂഴി തുടങ്ങിയവർ പ്രസംഗിച്ചു. ചടങ്ങിൽ വിൽസൺ സാമുവേൽ, ജോസ് കൂരാച്ചുണ്ട്, രാജീവൻ മഠത്തിൽ, സുരേഷ് കനവ്, ലത നാരായണൻ, മുഹമ്മദ് പേരാമ്പ്ര എന്നിവരെ ആദരിച്ചു. വിവിധ കലാപരിപാടികളും നടത്തി.

മരം മുറിക്കാൻ ലഭിച്ച പണം തിരികെ നൽകി അന്നമ്മ

പേരാമ്പ്ര: ചക്കിട്ടപാറ പഞ്ചായത്ത് മേഖലയിൽ ഉൾപ്പെട്ട പെരുവണ്ണാമൂഴി - മുതുകാട് പാതയോരത്ത് ജലസേചന വകുപ്പിന്‍റെ സ്ഥലത്ത് നിന്നിരുന്ന വൻ മരങ്ങൾ മുറിച്ച് മാറ്റിയ സന്തോഷത്തിലാണ് വയോധിക അന്നമ്മ. ഈ സന്തോഷത്തിൽ തനിക്ക് മരം മുറിക്കാൻ സ്വന്തം പോക്കറ്റിൽ നിന്ന് പണം നൽകിയ ചക്കിട്ടപാറ പഞ്ചായത്ത് പ്രസിഡന്‍റ് കെ. സുനിലിനെ നേരിൽ കണ്ട് പണം കൈമാറുകയും ചെയ്തു. മരം മുറിക്കണമെന്ന ആവശ്യവുമായി പഞ്ചായത്ത് ഓഫീസ് വരാന്തയിൽ കുത്തിയിരുപ്പ് സമരം നടത്തി തളർന്നു വീണ ഇവരെ പ്രസിഡന്‍റ് കെ. സുനിൽ തന്‍റെ ഓഫീസ് മുറിയിൽ എത്തിച്ച് പക്കലുണ്ടായിരുന്ന നാലായിരം രൂപ മരം മുറിക്കാനായി നൽകുകയായിരുന്നു. പഞ്ചായത്തല്ല മരം മുറിക്കേണ്ടതെന്നും ജലസേചന വകുപ്പാണെന്നും പ്രസിഡന്‍റ് അവരെ അറിയിച്ചു. ഇത് വാർത്തയായതിനെ തുടർന്ന് വൻമരങ്ങൾ കുറ്റ്യാടി ജലസേചന വകുപ്പ് മുറിച്ചു നീക്കി പ്രശ്‌നം പരിഹരിച്ചു. ഇതോടെ പണം നൽകാൻ അന്നമ്മ സന്നദ്ധത അറിയിക്കുകയായിരുന്നു. കഴിഞ്ഞ ദിവസം പഞ്ചായത്ത് ഓഫീസിലെത്തി മറ്റു ഭരണസമിതി അംഗങ്ങളുടെ സാന്നിധ്യത്തിൽ പ്രസിഡന്‍റ് കൊടുത്ത പണം തിരികെ നൽകുകയായിരുന്നു.

കെസിവൈഎം ഓണാഘോഷം സംഘടിപ്പിച്ചു

കൂരാച്ചുണ്ട്: കെസിവൈഎം കല്ലാനോട് യൂണിറ്റിന്‍റെ നേതൃത്വത്തിൽ "ഏത് മൂഡ് ഓണം മൂഡ്' എന്ന പേരിൽ ഓണാഘോഷം സംഘടിപ്പിച്ചു. യൂണിറ്റ് ഡയറക്ടർ ഫാ. ജിനോ ചുണ്ടയിൽ ഉദ്ഘാടനം ചെയ്തു. ആനിമേറ്റർ സിസ്റ്റർ ആൻസെലിറ്റ് എസ്എച്ച് അധ്യക്ഷത വഹിച്ചു. പള്ളി അങ്കണത്തിൽ പൂക്കളം തീർത്തു. വിവിധ കലാപരിപാടികളും മാതൃവേദി അംഗങ്ങൾ തിരുവാതിരയും അവതരിപ്പിച്ചു. അമൽ ചിറ്റക്കാട്ടുകുഴി, ജോസ്‌വിൻ കടുകന്മാക്കൽ, അവീൻ വെട്ടിക്കുഴി, ബിബിൻ വാഴയിൽ, അബിൻ ചോരപ്പുള്ളിയിൽ, അമൽ ചോരപ്പുള്ളിയിൽ, ആൽഡ്രിൻ പള്ളിപ്പുറം, ആൻസിയ നടുവത്താനിയിൽ, അനുപം ജോസ് കാനാട്ട്, ആഞ്ചലോ പൊതിയിട്ടേൽ, ദർശൻ കാനാട്ട് എന്നിവർ നേതൃത്വം നൽകി.

വോട്ട് അട്ടിമറി; യുഡിഎഫ് പ്രകടനം നടത്തി

കൂടരഞ്ഞി: വോട്ട് മോഷണത്തിനെതിരേ രാഹുൽ ഗാന്ധി നയിക്കുന്ന പോരാട്ടങ്ങൾക്ക് പിന്തുണ അറിയിച്ച് കൂടരഞ്ഞി പഞ്ചായത്ത് യുഡിഎഫ് കമ്മിറ്റി പ്രകടനവും പൊതുസമ്മേളനവും നടത്തി. വോട്ടർ പട്ടികയിൽ ക്രമക്കേടു നടത്തി അധികാരത്തിലെത്തിയതാണ് മോദി സർക്കാരെന്ന് യോഗം ഉദ്ഘാടനം ദിനേശ് പെരുമണ്ണ പറഞ്ഞു. ജാഗ്രതയോടെ പ്രവർത്തിക്കേണ്ട സമയമാണ് ഇതെന്നും അദ്ദേഹം ഓർമ്മിപ്പിച്ചു. ജോണി പ്ലാക്കാട്ട് അധ്യക്ഷത വഹിച്ചു. മുസ്ലീംലീഗ് നിയോജക മണ്ഡലം ജനറൽ സെക്രട്ടറി പി.ജി. മുഹമ്മദ് മുഖ്യപ്രഭാഷണം നടത്തി.

ബിലാത്തിക്കുളം നവീകരണം: വേഗത്തിലാക്കാന്‍ നടപടിയാവുന്നു

കോഴിക്കോട്: കോഴിക്കോട് നഗരത്തിലെ ബിലാത്തിക്കുളം നവീകരിക്കുന്നതിനും പരിസരം സൗന്ദര്യവത്കരിക്കുന്നതിനും ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റി (യുഎല്‍സിസിഎസ്) യുടെ ടെന്‍ഡര്‍ സ്വീകരിക്കാന്‍ സര്‍ക്കാര്‍ തീരുമാനിച്ചു. നഗര നവീകരണ, സൗന്ദര്യവത്കരണ പദ്ധതിയുടെ ഭാഗമായാണ് ഈ തീരുമാനം. ജിഎസ്ടി ഉള്‍പ്പെടെ 84,03,041 രൂപയാണ് ടെന്‍ഡര്‍ തുക. കരാര്‍ തുക 71,21,221.21 രൂപയും. ഇതിന് 18 ശതമാനം ജിഎസ്ടിയും ഉള്‍പ്പെടും. ഇത് ടെന്‍ഡര്‍ എസ്റ്റിമേറ്റ് തുകയുടെ (60,31,356 രൂപ) 18.07 ശതമാനം കൂടുതലാണ്. ബജറ്റ് പ്രസംഗത്തില്‍ പ്രഖ്യാപിച്ച 300 കോടി രൂപയുടെ നഗര നവീകരണ, സൗന്ദര്യവത്കരണ പദ്ധതിയുടെ ഭാഗമാണ് ഈ പ്രവൃത്തി. തിരുവനന്തപുരം, കൊച്ചി, കോഴിക്കോട് എന്നീ നഗരങ്ങളിലാണ് പദ്ധതി നടപ്പാക്കുന്നത്. ഇതിനായി കിഫ്ബിയില്‍ നിന്ന് 100 കോടി രൂപയുടെ സഹായം ലഭിക്കും. കോഴിക്കോട് നഗരത്തിലെ പ്രവൃത്തികള്‍ക്കായി ഇംപാക്ട് കേരള ലിമിറ്റഡിനെ സ്പെഷല്‍ പര്‍പ്പസ് വെഹിക്കിളായി ചുമതലപ്പെടുത്തിയിരുന്നു. ഇംപാക്ട് കേരള ലിമിറ്റഡ് പ്രവൃത്തിക്ക് ടെന്‍ഡര്‍ ക്ഷണിച്ചപ്പോള്‍, യുഎല്‍സിസിഎസ് 71,21,221.12 രൂപയാണ് (ജിഎസ്ടി ഇല്ലാതെ) ക്വോട്ട് ചെയ്തത്. ഇത് എസ്റ്റിമേറ്റ് തുകയുടെ 18.07 ശതമാനം കൂടുതലായിരുന്നു. കുറഞ്ഞ തുക ക്വോട്ട് ചെയ്തവരുമായി വിലപേശല്‍ നടത്താനുള്ള സര്‍ക്കാര്‍ നിര്‍ദ്ദേശമനുസരിച്ച് യുഎല്‍സിസിഎസുമായി ചര്‍ച്ച നടത്തിയെങ്കിലും നിരക്ക് കുറയ്ക്കാന്‍ അവര്‍ക്ക് കഴിഞ്ഞില്ല. തുടര്‍ന്ന്, ഇംപാക്ട് കേരള ലിമിറ്റഡിന്റെ ടെന്‍ഡര്‍ അക്‌സെപ്റ്റന്‍സ് കമ്മിറ്റി യുഎല്‍സിസിഎസ് സമര്‍പ്പിച്ച തുക പരിഗണിച്ചു. ക്വോട്ട് ചെയ്ത തുക എസ്റ്റിമേറ്റ് തുകയേക്കാള്‍ 10 ശതമാനം കൂടുതലാണെങ്കിലും ലോക്കല്‍ മാര്‍ക്കറ്റ് റേറ്റിന് ഉള്ളിലാണെന്ന് കമ്മിറ്റി കണ്ടെത്തി. ഭരണവകുപ്പിന്‍റെ അനുമതിക്ക് വിധേയമായി യുഎല്‍സിസിഎസിന്‍റെ ടെന്‍ഡര്‍ അംഗീകരിക്കാന്‍ കമ്മിറ്റി തീരുമാനിച്ചു. ഈ ശുപാര്‍ശയുടെ അടിസ്ഥാനത്തിലാണ് സര്‍ക്കാര്‍ അനുമതി നല്‍കിയത്.

ഓണലഹരിയിലാഴ്ത്തി മാവേലിക്കസ് 2025

കോഴിക്കോട്: സംസ്ഥാന സര്‍ക്കാരിന്‍റെ ഓണാഘോഷം- മാവേലിക്കസ് 2025 കോഴിക്കോടന്‍ സായാഹ്നങ്ങളെ ഓണലഹരിയുടെ കൊടുമുടിയിലേറ്റുന്നു. തിങ്ങി നിറഞ്ഞ സദസിലാണ് ഓരോ ദിവസത്തെയും കലാപരിപാടികള്‍ അരങ്ങേറുന്നത്. ചെണ്ടയുടെ താളവും ഫ്യൂഷന്‍ ചുവടുകളുമായി മാനാഞ്ചിറയെ ഇളക്കിമറിച്ച വനിതാ ശിങ്കാരിമേളമായിരുന്നു ഇന്നലത്തെ പ്രധാന ആകര്‍ഷണം. ചെണ്ടയുടെ താളത്തിനും ചുവടുകളുടെ ഭംഗിക്കുമൊപ്പം ഫ്യൂഷന്‍ നൃത്തത്തിന്‍റെ ചടുലത കൂടി കൊട്ടിക്കയറിയതോടെ നിറഞ്ഞ കരഘോഷം. അറുപതിന് മുകളില്‍ പ്രായമുള്ളവര്‍ മുതല്‍ 17 വയസുള്ള വിദ്യാര്‍ഥിനികള്‍ വരെ 33 പേരടങ്ങുന്ന കുരുവട്ടൂരിലെ സ്വരലയം വനിത ശിങ്കാരിമേളം സംഘമാണ് മാവേലിക്കസ് 2025ന്‍റെ മാനാഞ്ചിറയിലെ വേദിയെ താളം മുഴക്കി ചുവടു വച്ച് കയ്യിലെടുത്തത്. 2011ല്‍ കുരുവട്ടൂര്‍ പഞ്ചായത്തില്‍ സ്ത്രീഘടക പദ്ധതിയുടെ ഭാഗമായി പഞ്ചായത്തിന്‍റെ ധനസഹായത്തോടെ തുടങ്ങിയ തൊഴില്‍ സംരംഭമായ സ്വരലയം വനിതാ ശിങ്കാരിമേളം നിലവില്‍ വിവിധ സംസ്ഥാനങ്ങളില്‍ 1700ല്‍ അധികം വേദികളില്‍ പരിപാടികള്‍ അവതരിപ്പിച്ചിട്ടുണ്ട്. കുടുംബശ്രീ സംസ്ഥഥാന കലോത്സവത്തില്‍ ശിങ്കാരിമേളം മത്സരത്തില്‍ തുടര്‍ച്ചയായി ആറ് തവണ ഒന്നാം സ്ഥാനം ലഭിച്ചതും ഇവര്‍ക്കാണ്. ബീച്ചിലെ മാവേലിക്കസ് 2025ന്‍റെന്റെ വേദിയില്‍ വാര്‍സി സഹോദരരായ നസീര്‍ അഹമ്മദ് ഖാന്‍ വാര്‍സിയും നസ്സീര്‍ അഹമ്മദ് ഖാന്‍ വാര്‍സിയും സംഗീതമഴ പൊഴിച്ചത് സംഗീതാസ്വാദകര്‍ക്ക് കുളിര്‍മഴയായി. ഹൈദരാബാദില്‍ നിന്നുള്ള ഒന്‍പത് പേരടങ്ങുന്ന സംഘമാണ് ഖവാലിയുമായി കോഴിക്കോടിന്‍റെ ഓണം ആഘോഷമാക്കാന്‍ എത്തിയത്. മുത്തച്ഛനില്‍ നിന്നും പിതാവില്‍ നിന്നും ലഭിച്ച സംഗീത പരിശീലനമാണ് വാര്‍സി സഹോദരന്മാരെ ഖവാലി മാന്ത്രികരാക്കി മാറ്റിയത്. പരമ്പരാഗത സുഫിയാന ഖവാലി ഗസല്‍, തുമ്രി, ഭജന്‍, ക്ലാസിക്കല്‍ ബന്ദിഷ് എന്നിവയിലും തങ്ങളുടേതായ മുദ്ര പതിപ്പിച്ചവരാണ് ഈ സഹോദരങ്ങള്‍.

റെയിൽവേ സ്റ്റേഷൻ മേൽക്കൂരയിലെ ഷീറ്റുകൾ പൊട്ടിയ നിലയില്‍

കോഴിക്കോട്: മേൽക്കൂരയിലെ ഷീറ്റുകൾ പൊട്ടിയ കടലുണ്ടി റെയിൽവേ സ്റ്റേഷൻ രണ്ടാം പ്ലാറ്റ്ഫോമിൽ യാത്രക്കാർക്ക് ദുരിതം. മഴ പെയ്താൽ വെള്ളം മേൽക്കൂര ചോർന്നൊലിക്കും.490 മീറ്റർ നീളത്തിലുള്ള രണ്ടാം പ്ലാറ്റ്ഫോമിൽ ആകെ കുറഞ്ഞ ഇടത്തു മാത്രമാണ് മേൽക്കൂരയുള്ളത്. കാറ്റും മഴയും വന്നാൽ ഷീറ്റുകൾ പൊട്ടിയ ഭാഗത്തു കൂടി വെള്ളം പ്ലാറ്റ്ഫോമിലേക്ക് വ്യാപിക്കും. ഇരിപ്പിടങ്ങളിൽ വരെ വെള്ളം എത്തുന്ന സ്ഥിതിയാണ്. ഷൊർണൂർ ഭാഗത്തേക്കുള്ള യാത്രക്കാർ രണ്ടാം പ്ലാറ്റ്ഫോമിലാണ് കാത്തിരിപ്പ്. കാലപ്പഴക്കത്താലാണു പ്ലാറ്റ്ഫോം മേൽക്കൂരയുടെ ഷീറ്റുകൾ പൊട്ടിയത്. ഈയിടെ കോടികൾ ചെലവിട്ട് സ്റ്റേഷനിലെ ഇരു പ്ലാറ്റ്ഫോമുകളും ഉയർത്തി ചുറ്റുമതിൽ കെട്ടി സുരക്ഷിതമാക്കിയിരുന്നു. എന്നാൽ പഴകി ദ്രവിച്ച പഴയ മേൽക്കൂര മാറ്റി സ്ഥാപിക്കാൻ നടപടിയുണ്ടായില്ല.ഇത് പരിഹരിക്കാന്‍ നടപടിയുണ്ടാകണമെന്നാണ് യാത്രക്കാരുടെ ആവശ്യം.

കോടതിയിൽ ഓണാഘോഷം സംഘടിപ്പിച്ചു

പേരാമ്പ്ര: കോടതിയിൽ നടന്ന ഓണാഘോഷം ടി.പി. രാമകൃഷ്ണൻ എംഎൽഎ ഉദ്ഘാടനം ചെയ്തു. പേരാമ്പ്ര കോടതിക്ക് വേണ്ടി പുതിയ കെട്ടിട സമൂച്ചയം നിർമിക്കാൻ ഗവൺ‌മെന്‍റ് തലത്തിൽ വേണ്ട കാര്യങ്ങൾ ഉടനെ ചെയ്യുമെന്ന് അദ്ദേഹം ഉറപ്പ് നൽകി. ബാർ അസോസിയേഷൻ പ്രസിഡന്‍റ് അഡ്വ. എം. രാജേഷ് കുമാർ, പേരാമ്പ്ര മജിസ്‌ട്രേറ്റ് വിനി മുട്ടിക്കൽ ജോസ്, ബാർ അസോസിയേഷൻ സെക്രട്ടറി അനിൽകുമാർ തുടങ്ങിയവർ പ്രസംഗിച്ചു.

സാക്ഷരതാ ക്ലാസ് ഉദ്ഘാടനം

കോഴിക്കോട്: സംസ്ഥാന സാക്ഷരതാ മിഷന്‍ നടത്തുന്ന കേന്ദ്രാവിഷ്‌കൃത പദ്ധതിയായ "ഉല്ലാസ്' ന്യൂ ഇന്ത്യാ ലിറ്ററസി പ്രോഗ്രാമിന്‍റെ ഭാഗമായി തിരുവമ്പാടി പഞ്ചായത്തിലെ കൊടക്കാട്ടുപാറ മേലെ പൊന്നാങ്കയം ആദിവാസി ഉന്നതിയില്‍ സാക്ഷരതാ ക്ലാസിന്‍റെ ഉദ്ഘാടനം പഞ്ചായത്ത് പ്രസിഡന്‍റ് ബിന്ദു ജോണ്‍സന്‍ നിര്‍വഹിച്ചു. വാര്‍ഡ് മെമ്പര്‍ കെ.ഡി. ആന്‍റണി അധ്യക്ഷത വഹിച്ചു. സാക്ഷരതാ മിഷന്‍ ജില്ലാ കോഓഡിനേറ്റര്‍ പി.വി. ശാസ്തപ്രസാദ്, സാക്ഷരതാ പ്രേരക് കെ. സജന, റിസോഴ്സ്‌പേഴ്സണ്‍ സോന ഡോണി, എസ്ടി പ്രമോട്ടര്‍ സി. ശ്യാം കിഷോര്‍, അങ്കണവാടി വര്‍ക്കര്‍ ടി. എം. മിനിമോള്‍ തുടങ്ങിയവര്‍ പ്രസംഗിച്ചു. ജില്ലാ സാക്ഷരതാ മിഷന്‍ നടത്തുന്ന ദേശീയ സാക്ഷരതാ വാരാചരണത്തിന്‍റെ ഭാഗമായാണ് ക്ലാസ് ആരംഭിച്ചത്. അല്‍ഫോന്‍സാ കോളജ് എന്‍എസ്എസ് വളണ്ടിയര്‍മാരുടെ സഹകരണത്തോടെയാണ് പഞ്ചായത്തില്‍ ഉല്ലാസ് പദ്ധതി വിവരശേഖരണം നടത്തിയത്.

ഗവർണറെ കേന്ദ്രം തിരിച്ച് വിളിക്കണം: കേരള കോൺഗ്രസ് - എം

തിരുവമ്പാടി: വൈസ് ചാൻസലർമാരെ തെരഞ്ഞെടുക്കുന്ന പ്രക്രിയയിൽ നിന്ന് മുഖ്യമന്ത്രിയെ ഒഴിവാക്കണമെന്ന് ആവശ്യപ്പെട്ട് സുപ്രീം കോടതിയെ സമീപിച്ച കേരള ഗവർണർ രാജേന്ദ്ര അർലേക്കറെ കേന്ദ്രം തിരിച്ച് വിളിക്കണമെന്ന് കേരള കോൺഗ്രസ്-എം തിരുവമ്പാടി മണ്ഡലം നേതൃത്വ സമ്മേളനം ആവശ്യപ്പെട്ടു. ജില്ലാ പ്രസിഡന്‍റ് ടി.എം. ജോസഫ് ഉദ്ഘാടനം ചെയ്തു. മണ്ഡലം വൈസ് പ്രസിഡന്‍റ് റോബിൻസ് തടത്തിൽ അധ്യക്ഷത വഹിച്ചു. കർഷക യൂണിയൻ -എം ജില്ലാ പ്രസിഡന്‍റ് ജോസഫ് പൈമ്പിള്ളി, വിൽസൺ താഴത്ത് പറമ്പിൽ, ഫൈസൽ ചാലിൽ, ദിനിഷ് കൊച്ചുപറമ്പിൽ, സണ്ണി പുതുപ്പറമ്പിൽ, സുബിൻ തയ്യിൽ, ബിജു പുളിയാശേരി എന്നിവർ പ്രസംഗിച്ചു.

പോലീസ് സ്റ്റേഷനിൽ ഓണാഘോഷം

കൊയിലാണ്ടി: കൊയിലാണ്ടി പോലീസ് സ്റ്റേഷൻ ഈ വർഷത്തെ ഓണാഘോഷം സ്റ്റേഷൻ കോമ്പൗണ്ടിൽ നടത്തി. ഓണപ്പട, കാക്കിപ്പട എന്ന പേരിലാണ് ഓണാഘോഷം സംഘടിപ്പിച്ചത്. സിഐ ശ്രീലാൽശേഖരന്‍റെ നേതൃത്വത്തിലാണ് ഓണാഘോഷം നടന്നത്. ചടങ്ങിൽ കേരള പോലീസ് അസോസിയേഷൻ സംസ്ഥാന പ്രസിഡന്‍റ് ജി.പി അഭിജിത്തിനെ ആദരിച്ചു സ്റ്റേഷനിൽ നിന്ന് ട്രാൻസ്ഫറായി പോകുന്ന എസ്ഐ മനോജ്, വിനോദ്, ശ്രീജിത്ത് എന്നിവർക്ക് യാത്രയയപ്പ് നൽകി. തുടർന്ന് ഓണസദ്യയും വിവിധയിനം കലാപരിപാടികളും അരങ്ങേറി.

ഓണക്കിറ്റുകൾ വിതരണം ചെയ്തു

കൂരാച്ചുണ്ട്: കേരളാ കോൺഗ്രസ് -എം കല്ലാനോട് മണ്ഡലം കമ്മറ്റിയുടെ നേതൃത്വത്തിൽ നിർധന കുടുംബങ്ങൾക്ക് ഓണക്കിറ്റുകൾ വിതരണം ചെയ്തു. സംസ്ഥാന ജനറൽ സെക്രട്ടറി ഡോ. സ്റ്റീഫൻ ജോർജ് വിതരണോദ്ഘാടനം നിർവഹിച്ചു. മണ്ഡലം പ്രസിഡന്‍റ് ടോം തടത്തിൽ അധ്യക്ഷത വഹിച്ചു. ജില്ലാ പ്രസിഡന്‍റ് ടി.എം. ജോസഫ് മുഖ്യ പ്രഭാഷണം നടത്തി. സംസ്ഥാന സ്റ്റിയറിംഗ് കമ്മിറ്റി മെമ്പർ ബേബി കാപ്പുകാട്ടിൽ, ജില്ലാ സെക്രട്ടറിമാരായ ജോസഫ് വെട്ടുകല്ലേൽ, ബോബി ഓസ്റ്റിൻ, വിനോദ് കിഴക്കയിൽ, വനിതാ കോൺഗ്രസ് -എം വൈസ് പ്രസിഡന്‍റ് ലൂസി തടത്തിൽ, വനിതാ കോൺഗ്രസ്-എം ജില്ലാ സെക്രട്ടറി സിനി സിജോ, ദളിത് കോൺഗ്രസ് ജില്ലാ പ്രസിഡന്‍റ് രാഘവൻ, നിയോജക മണ്ഡലം പ്രസിഡന്‍റ് ബേബി പൂവത്തിങ്കൽ, കൂരാച്ചുണ്ട് മണ്ഡലം പ്രസിഡന്‍റ് വിൽസൻ പാത്തിച്ചാലിൽ തുടങ്ങിയവർ പ്രസംഗിച്ചു. മാത്യു അകമ്പടിയിൽ, സംസ്ഥാന ഐടി കോഡിനേറ്റർ സനീഷ് കായണ്ണ, തോമസ് വെട്ടിക്കുഴി, പ്രിൻസ് കളമ്പൻകുഴി, വിപിൻ എട്ടിയിൽ, പോൾസൻ കുറിയേടത്ത്, മാത്യു കൊടകശേരി തുടങ്ങിയവർ നേതൃത്വം നൽകി.

തിരുവമ്പാടിയെ ഇളക്കിമറിച്ച് സാംസ്കാരിക ഘോഷയാത്ര

തിരുവമ്പാടി: കേരള വ്യാപാരി വ്യവസായി ഏകോപനസമിതി തിരുവമ്പാടി യൂണിറ്റിന്‍റെ ആഭിമുഖ്യത്തിൽ "തിരുവോണം ഫെസ്റ്റ് 2025' എന്ന പേരിൽ സാംസ്‌കാരിക ഘോഷയാത്രയും ഓണാഘോഷവും സംഘടിപ്പിച്ചു. തിരുവമ്പാടി അനുരാഗ ഓഡിറ്റോറിയത്തിൽ നിന്ന് ആരംഭിച്ച ഘോഷയാത്ര ബസ് സ്റ്റാൻഡിൽ സമാപിച്ചു. മറ്റ് സാംസ്കാരിക ഘോഷയാത്രകളോട് കിടപടിക്കുന്ന രീതിയിലാണ് തിരുവമ്പാടിയിലെ വ്യാപാരികൾ ഘോഷയാത്ര അണിയിച്ചൊരുക്കിയത്. സാംസ്കാരിക ഘോഷയാത്രയ്ക്ക് വ്യാപാരി വ്യവസായി ഏകോപന സമിതി തിരുവമ്പാടി യൂണിറ്റ് പ്രസിഡന്‍റ് ജീജി കെ. തോമസ്, ജനറൽ സെക്രട്ടറി ഏബ്രഹാം ജോൺ, സിംഗാർ ഗഫൂർ, മുനീർ, ജോജു സൈമൺ, ഷംസുദ്ധീൻ, അനസ് ഷൈൻ, അനൂപ് സാഗർ, നിധിൻ ജോയ്, സുജൻ കുമാർ, ഇ.ജെ. പീറ്റർ, ഗീരീഷ്, ഒ.ടി. ഡൊമിനിക് എന്നിവർ നേതൃത്വം നൽകി.

കുടുംബശ്രീ ഓണം വിപണന മേള ആരംഭിച്ചു

കൂടരഞ്ഞി: പഞ്ചായത്ത് കുടുംബശ്രീ സിഡിഎസിന്‍റെ നേതൃത്വത്തിൽ ആരംഭിച്ച ഓണം വിപണന മേളയുടെ ഉദ്ഘാടനം പഞ്ചായത്ത് പ്രസിഡന്‍റ് ആദർശ് ജോസഫ് നിർവഹിച്ചു. ചടങ്ങിൽ സിഡിഎസ് ചെയർപേഴ്സൺ ഇൻചാർജ് സോളി ജെയ്സൺ അധ്യക്ഷത വഹിച്ചു. വൈസ് പ്രസിഡന്‍റ് മേരി തങ്കച്ചൻ, സ്ഥിരം സമിതി അധ്യക്ഷരായ റോസിലി ജോസ്, ജെറീന റോയി, വി.എസ്. രവീന്ദ്രൻ, മെമ്പർമാരായ ബോബി ഷിബു, സീന ബിജു, ബിന്ദു ജയൻ, ബാബു മൂട്ടോളി, ജോണി വാളിപ്ലാക്കൽ, ജോസ് തോമസ് മാവറ, സിഡിഎസ് അംഗങ്ങളായ സിന്ധു ബിനോയി, ഗ്രേസി ചടങ്ങിൽ പങ്കെടുത്തു.

വോട്ടർ പട്ടികയിൽ അട്ടിമറി : പുറമേരി പഞ്ചായത്ത് ഓഫീസിൽ യുഡിഎഫ് പ്രതിഷേധം

നാദാപുരം: പുറമേരി പഞ്ചായത്തിൽ വോട്ടർ പട്ടിക അട്ടിമറിച്ചെന്ന് ആരോപിച്ച് യുഡിഎഫ് പ്രതിഷേധം. പഞ്ചായത്ത് സെക്രട്ടറിയുടെ നേതൃത്വത്തിൽ മൂന്നാം വാർഡിലും ഒന്പതാം വാർഡിലും നിന്നുള്ള നിരവധി യുഡിഎഫ് പിന്തുണയുള്ള വോട്ടർമാരെ സിപിഎം ഒത്താശയോടെ മറ്റ് വാർഡുകളിലേക്ക് മാറ്റിയെന്ന് ആരോപിച്ചാണ് യുഡിഎഫ് പ്രവർത്തകർ പ്രതിഷേധം സംഘടിപ്പിച്ചത്. കുറ്റക്കാർക്കെതിരേ കർശന നടപടി സ്വീകരിക്കണമെന്നും യുഡിഎഫ് ആവശ്യപ്പെട്ടു. ജില്ലാ മുസ്ലിം ലീഗ് വൈസ് പ്രസിഡന്‍റ് കെ.ടി. അബ്ദുറഹിമാൻ ഉദ്ഘാടനം ചെയ്തു. യുഡിഎഫ് ചെയർമാൻ കെ. മുഹമ്മദ് സാലി അധ്യക്ഷത വഹിച്ചു. വി.പി. കുഞ്ഞമ്മദ് മാസ്റ്റർ, ടി. കുഞ്ഞിക്കണ്ണൻ, പി. അജിത്, കെ. സജീവൻ, കപ്ലിക്കണ്ടി മജീദ്, കെ. സൂപ്പി, മുഹമ്മദ് പുറമേരി, പനയുള്ള കണ്ടി മജീദ്, ചിറയിൽ മൂസഹാജി, ഷംസു മടത്തിൽ, കെ.എം. സമീർ, അജയൻ പുതിയോട്ടിൽ, എൻ.കെ. അലിമത്ത്, ബീന കല്ലിൽ, സമീറ കൂട്ടായി, റീത്ത കണ്ടോത്ത് തുടങ്ങിയവർ നേതൃത്വം നൽകി.

ഗതാഗതക്കുരുക്ക് പരിഹരിക്കാന്‍ നടപടി വേണം: റസിഡന്‍റ്സ് അപ്പെക്‌സ് കൗണ്‍സില്‍

കോഴിക്കോട് : നഗരത്തിലെ രൂക്ഷമായ ഗതാഗതക്കുരുക്ക് പരിഹരിക്കാനും സ്വകാര്യ ബസുകളുടെ മത്സര ഓട്ടം തടയാനും സത്വര നടപടികള്‍ സ്വീകരിക്കണമെന്ന് റസിഡന്‍റ്സ് അപ്പെക്‌സ് കൗണ്‍സില്‍ ജില്ലാ കമ്മിറ്റി യോഗം ആവശ്യപ്പെട്ടു. വര്‍ധിച്ചു വരുന്ന തെരുവ് നായ ശല്യത്തിനെതിരെ ഫലപ്രദമായ നടപടി എടുക്കണമെന്ന് ആവശ്യപ്പെട്ട് 16 ന് സിവില്‍ സ്റ്റേഷന് മുന്നില്‍ ശ്രദ്ധ ക്ഷണിക്കല്‍ പരിപാടി നടത്താന്‍ തീരുമാനിച്ചു. ഗാന്ധി ജയന്തിയോടനുബന്ധിച്ചു ഹൈസ്‌കൂള്‍, യു പി സ്‌കൂള്‍ വിദ്യാര്‍ത്ഥികള്‍ക്ക് മഹാത്മാ ഗാന്ധി ക്വിസ് മത്സരം നടത്തും. ജില്ലാ പ്രസിഡണ്ട് എം.കെ ബീരാന്‍ അധ്യക്ഷത വഹിച്ചു. ജില്ലാ ജനറല്‍ സെക്രട്ടറി സി.രാധാകൃഷ്ണന്‍, ഹരിത കേരള മിഷന്‍ റിസോഴ്സ് പേഴ്‌സണ്‍ രാജേഷ്, ടി.എം ബാലകൃഷ്ണന്‍, കെ.സി രവീന്ദ്രനാഥ്, എം.പി രാമകൃഷ്ണന്‍, സണ്ണി മാത്യു കൂഴാംപാല, അഡ്വ. എ.കെ ജയകുമാര്‍, കെ.വി ഷാബു, വി.സത്യനാഥന്‍, ശ്രീജ സുരേഷ്, പി.പി നാസര്‍, സുഷാന്ത് പൊറ്റക്കാട്ട്, ആര്‍.എം സക്കറിയ, സണ്ണി പുളിക്കല്‍ തുടങ്ങിയവര്‍ പ്രസംഗിച്ചു.

കാട്ടുപന്നികൾ കപ്പകൃഷി നശിപ്പിച്ചു

കൂരാച്ചുണ്ട്: കാട്ടുപന്നികൾ വ്യാപകമായി കപ്പകൃഷി നശിപ്പിച്ചു. പഞ്ചായത്ത് മൂന്നാം വാർഡ് പൂവ്വത്തുംചോലയിലെ കർഷകൻ നടുക്കണ്ടിപറമ്പിൽ ദാമോദരൻ നട്ടു പരിപാലിച്ചുവന്ന 250 ചുവട് കപ്പയാണ് കാട്ടുപന്നികൾ നശിപ്പിച്ചത്. വൻ തുക മുടക്കി കൃഷിചെയ്തു വന്നതാണിത്. ഈ മേഖലയിൽ കാട്ടുപന്നികളുടെ ശല്യം രൂക്ഷമായതിനാൽ കൃഷികൾ ഒന്നുംതന്നെ ചെയ്യാൻ കഴിയാത്ത അവസ്ഥയിലാണ്. കാലങ്ങളായി കാട്ടുപന്നി ശല്യം രൂക്ഷമായിട്ടും ഇവയെ ഉന്മൂലനം ചെയ്യാൻ വനംവകുപ്പ് ശാശ്വതമായ നടപടികൾ സ്വീകരിക്കുന്നില്ലെന്നാണ് കർഷകർ ആരോപിക്കുന്നത്. നഷ്ടപരിഹാര തുക നൽകാൻ വനം വകുപ്പ് തയാറാകണമെന്നും കർഷകർ ആവശ്യപ്പെടുന്നു.

ചാപ്പൻതോട്ടത്തിൽ കാട്ടുപന്നിശല്യം രൂക്ഷം

ചാപ്പൻതോട്ടം: കാവിലുംപാറ പഞ്ചായത്തിലെ ചാപ്പൻതോട്ടത്തിൽ കാട്ടുപന്നി ശല്യം രൂക്ഷം. ഇല്ലിക്കൽ ആന്‍റണി, ബോബി ജോസഫ് ചെറ്റകാരിക്കൽ, ഷിബോ പെന്നാറ്റിൽ എന്നിവരുടെ പറന്പിലെ കൃഷിയാണ് കഴിഞ്ഞ ദിവസം കാട്ടുപന്നികൾ നശിപ്പിച്ചത്. കപ്പ, ചേന, ചേമ്പ്, വാഴ എന്നീ കൃഷികളാണ് നശിപ്പിച്ചത്. കൂടാതെ റബർ മരങ്ങളുടെ തൊലി പൊളിച്ചു തിന്നുകയും ചെയ്യുന്നുണ്ട്. ഭീതി മൂലം റബർ ടാപ്പിംഗ് പോലും നടത്താൻ പറ്റാത്ത സാഹചര്യമാണുള്ളത്. പ്രദേശത്ത് മലയണ്ണാനും കുരങ്ങും നാളികേരവും കൊക്കേയും അടക്കയും നശിപ്പിക്കുന്നുണ്ട്. ഒരു തരത്തിലുള്ള കൃഷിയും ചെയ്യാൻ കഴിയാത്ത സ്ഥിതിയാണെന്നും പ്രശ്നപരിഹാരത്തിന് അധികൃതർ അടിയന്തര നടപടി സ്വീകരിക്കണമെന്നും കർഷകർ പറഞ്ഞു.

ജില്ലയില്‍ ആകെ 26,54,972 വോട്ടര്‍മാര്‍

ഏറ്റവും കൂടുതല്‍ പ്രവാസി വോട്ടര്‍മാരുള്ളത് കോഴിക്കോട്ട് കോഴിക്കോട്: സപ്തംബര്‍ രണ്ടിന് പ്രസിദ്ധീകരിച്ച തദ്ദേശ സ്ഥാപനങ്ങളുടെ അന്തിമ വോട്ടര്‍ പട്ടികയില്‍ കോഴിക്കോട് ജില്ലയിലുള്ളത് ആകെ 26,54,972 വോട്ടര്‍മാര്‍. 12,53,480 പുരുഷന്‍മാരും 14,01,460 സ്ത്രീകളും 32 ട്രാന്‍സ്ജെന്‍ഡേഴ്‌സും അടങ്ങിയതാണ് ജില്ലയിലെ വോട്ടര്‍ പട്ടിക. ഇതിനു പുറമെ, പ്രവാസി വോട്ടര്‍പട്ടികയില്‍ ജില്ലയില്‍ ആകെ 902 പേരുണ്ട്.സംസ്ഥാനത്ത് ഏറ്റവും കൂടുതല്‍ പ്രവാസി വോട്ടര്‍മാരുള്ളത് കോഴിക്കോട് ജില്ലയിലാണ്. കരട് വോട്ടര്‍പട്ടിക സംബന്ധിച്ച് ഓഗസ്റ്റ് 12 വരെ ലഭിച്ച അപേക്ഷകളും ആക്ഷേപങ്ങളും പരിശോധിച്ചും ഹിയറിംഗ് നടത്തിയുമാണ് ഇലക്ടറല്‍ രജിസ്ട്രേഷന്‍ ഓഫീസര്‍മാര്‍ (ഇആര്‍ഒ) അന്തിമ വോട്ടര്‍പട്ടിക തയാറാക്കിയത്. സംക്ഷിപ്ത പുതുക്കലിനായി ജൂലൈ 23ന് പ്രസിദ്ധീകരിച്ച കരട് വോട്ടര്‍പട്ടികയില്‍ ജില്ലയില്‍ ആകെ 24,80,032 വോട്ടര്‍മാരാണുണ്ടായിരുന്നത്. ഇതില്‍ 3,31,035 വോട്ടര്‍മാരെ പുതുതായി ചേര്‍ത്തപ്പോള്‍ 1,56,095 പേരെ ഒഴിവാക്കി. തദ്ദേശസ്ഥാപനങ്ങളിലെ വാര്‍ഡ് പുനര്‍വിഭജനത്തിന് ശേഷം പുതിയ വാര്‍ഡുകളിലെ പോളിംഗ് സ്റ്റേഷന്‍ അടിസ്ഥാനത്തിലാണ് പുതുക്കിയ അന്തിമ വോട്ടര്‍പട്ടിക തയാറാക്കിയത്. വോട്ടര്‍പട്ടിക കമ്മീഷന്‍റെ sec.kerala.gov.in വെബ്സൈറ്റിലും അതാത് തദ്ദേശസ്ഥാപനങ്ങളിലും താലൂക്ക്, വില്ലേജ് ഓഫീസുകളിലും പരിശോധനയ്ക്ക് ലഭ്യമാണ്. ഒളവണ്ണ സംസ്ഥാനത്ത് ഏറ്റവും കൂടുതല്‍ വോട്ടര്‍മാരുള്ള പഞ്ചായത്ത് കോഴിക്കോട്: സംസ്ഥാനത്തെ പഞ്ചായത്തുകളില്‍ ഏറ്റവും കൂടുതല്‍ വോട്ടര്‍മാരുള്ളത് ഒളവണ്ണയില്‍. 26,545 പുരുഷന്‍മാരും 28,555 സ്ത്രീകളും ഒരു ട്രാന്‍സ്‌ജെന്‍ഡറും ഉള്‍പ്പെടെ 55,101 വോട്ടര്‍മാരാണ് ഒളവണ്ണ ഗ്രാമപഞ്ചായത്തിലുള്ളത്. ജില്ലയിലെ 70 പഞ്ചായത്തുകളില്‍ ഏറ്റവും കുറവ് വോട്ടര്‍മാരുള്ളത് കായണ്ണ പഞ്ചായത്തിലാണ്. 5,693 പുരുഷന്‍മാരും 6,025 സ്ത്രീകളും ഉള്‍പ്പെടെ 11,718 വോട്ടര്‍മാരാണ് ഇവിടെയുള്ളത്. കോഴിക്കോട് കോര്‍പറേഷനില്‍ ആകെ 4,69,771 വോട്ടര്‍മാരുണ്ട്. 2,21,533 പുരുഷന്‍മാരും 2,48,231 സ്ത്രീകളും ഏഴ് ട്രാന്‍സ്‌ജെന്‍ഡേഴ്‌സും ഉള്‍പ്പെടെയാണിത്. പ്രവാസി വോട്ടര്‍പട്ടികയില്‍ കോര്‍പറേഷനില്‍ 11 പേരാണുള്ളത്. ജില്ലയിലെ ഏഴ് മുനിസിപ്പാലിറ്റികളില്‍ ഏറ്റവും കൂടുതല്‍ വോട്ടര്‍മാര്‍ വടകരയിലാണ്. 29,041 പുരുഷന്‍മാരും 32,558 സ്ത്രീകളും ഒരു ട്രാന്‍സ്‌ജെന്‍ഡറും ഉള്‍പ്പെടെ 61,600 വോട്ടര്‍മാരാണ് ഇവിടെയുള്ളത്. 28,486 പുരുഷന്‍മാരും 32,865 സ്ത്രീകളും ഉള്‍പ്പെടെ 61,351 വോട്ടര്‍മാരുമായി കൊയിലാണ്ടി മുനിസിപ്പാലിറ്റിയാണ് രണ്ടാം സ്ഥാനത്ത്. ജില്ലയില്‍ ഏറ്റവും കുറവ് വോട്ടര്‍മാര്‍ രാമനാട്ടുകര മുനിസിപ്പാലിറ്റിയിലാണ്. 14,525 പുരുഷന്‍മാരും 15,888 സ്ത്രീകളും ഉള്‍പ്പെടെ 30,413 വോട്ടര്‍മാരാണ് ഇവിടെയുള്ളത്. ജില്ലയില്‍ ഏറ്റവും കൂടുതല്‍ പ്രവാസി വോട്ടര്‍മാരുള്ളത് ആയഞ്ചേരി പഞ്ചായത്തിലാണ്- 174 പേര്‍. 146 പേരുമായി പുറമേരി പഞ്ചായത്താണ് രണ്ടാമത്. മൂന്നാം സ്ഥാനത്തുള്ള മണിയൂര്‍ പഞ്ചായത്തില്‍ 75 പ്രവാസി വോട്ടര്‍മാരാണുള്ളത്.

കക്കയം ഡാം റോഡിൽ കടുവ; ഭീതിയിലായി യാത്രക്കാർ

കൂരാച്ചുണ്ട്: കക്കയം ഡാം സൈറ്റ് റോഡിൽ കടുവയെ കണ്ടു. ഇന്നലെ വൈകുന്നേരം ഡാം സൈറ്റ് റോഡിലെ വനം വകുപ്പിന്‍റെ ടിക്കറ്റ് കൗണ്ടറിന് സമീപമുള്ള സിസിലി മുക്ക് എന്നറിയപ്പെടുന്ന ഭാഗത്ത് ഇതുവഴി വാഹനത്തിൽ യാത്ര ചെയ്യുന്നതിനിടെ വനം വകുപ്പ് ജീവനക്കാർ തന്നെയാണ് കടുവയെ കണ്ടത്. റോഡിലൂടെ കടുവ ഓടിപ്പോകുന്നതാണ് കണ്ടത്. തുടർന്ന് ഇവർ പിന്തുടരുകയും പിന്നീട് വനത്തിനുള്ളിലേക്ക് കയറിപ്പോയതായും പറയുന്നു. ഡാം സൈറ്റ് റോഡ് മേഖലയിൽ മാസങ്ങൾക്ക് മുമ്പും കണ്ടിരുന്നു. ഇപ്പോൾ രണ്ടാം തവണയാണ് കടുവയെ കാണുന്നത്. വിനോദസഞ്ചാര കേന്ദ്രങ്ങൾ പ്രവർത്തിക്കുന്ന കക്കയം ഡാം സൈറ്റ് മേഖലയിലേക്ക് ഇതുവഴി അനുദിനം നൂറുകണക്കിന് വിനോദസഞ്ചാരികൾ യാത്ര ചെയ്യുന്നുണ്ട്. കൂടാതെ ഇവിടെ നിന്നും ജനവാസ മേഖലയിലേക്ക് അധികം ദൂരമില്ലെന്നുള്ളതും നിരവധിയാളുകളെ ആശങ്കയിലാഴ്ത്തുന്നുണ്ട്. ഓണം അവധിക്കാലമായതോടെ ജില്ലയുടെ വിവിധ പ്രദേശങ്ങളിൽ നിന്നും നിരവധി കുടുംബങ്ങൾ വിനോദസഞ്ചാര കേന്ദ്രങ്ങളിൽ സന്ദർശനം നടത്തുന്നുണ്ട്. എന്നാൽ ഡാം റോഡ് വനമേഖലയിൽ കടുവയുടെ സാന്നിധ്യം നേരത്തെയുണ്ടെന്നും ആശങ്കപ്പെടേണ്ടതില്ലെന്നും ഡെപ്യൂട്ടി റേഞ്ച് ഓഫീസർ സി. വിജിത്ത് പറഞ്ഞു.

നളന്ദ ലിറ്ററേച്ചര്‍ ഫെസ്റ്റിവല്‍ സംഘടിപ്പിക്കുന്നു

കോഴിക്കോട്: പ്രാചീന ഭാരതത്തിലുണ്ടായിരുന്ന നളന്ദ വിശ്വവിദ്യാലയത്തിന്‍റെ ഓര്‍മ നിലനിര്‍ത്തുന്നതിനു ഡിസംബറില്‍ ബിഹാറിലെ രാജ്ഗീറില്‍ നളന്ദ ലിറ്ററേച്ചര്‍ ഫെസ്റ്റിവല്‍ സംഘടിപ്പിക്കുന്നു. ഡിസംബര്‍ 21 മുതല്‍ 25 വരെ നടക്കുന്ന ഫെസ്റ്റിവലില്‍ ഇന്ത്യയ്ക്കകത്തും പുറത്തുമുള്ള എഴുത്തുകാര്‍ പങ്കെടുക്കുമെന്ന് ആര്‍ക്കിയോളജിസ്റ്റ് കെ.കെ.മുഹമ്മദ്, ഫെസ്റ്റില്‍ ഡയറക്ടര്‍ ഗംഗാകുമാര്‍ എന്നിവര്‍ അറിയിച്ചു. ഫെസ്റ്റിവലിന്‍റെ ഭാഗമായി കോഴിക്കോട്ട് ചര്‍ച്ചാപരിപാടി സംഘടിപ്പിച്ചു. കോഴിക്കോട് ജില്ലാ കളക്ടര്‍ സ്‌നേഹില്‍ കുമാര്‍ സിംഗ് മുഖ്യാതിഥിയായിരുന്നു.മുംബൈ, കൊല്‍ക്കത്ത, ഡല്‍ഹി, ഗോഹതി എന്നിവിടങ്ങളിലും ചര്‍ച്ചാ സമ്മേളനങ്ങള്‍ നടക്കും. കേന്ദ്ര സര്‍ക്കാരും ബിഹാര്‍ സര്‍ക്കാറും സംയുക്തമായാണ് ഫെസ്റ്റിവല്‍ സംഘടിപ്പിക്കുന്നത്. സാഹിത്യം, ചരിത്രം എന്നിവയ്ക്കു പുറമേ സംഗീത പരിപാടികളും ഫെസ്റ്റിവലില്‍ ഉണ്ടാവും. ഫെസ്റ്റില്‍ ചെയര്‍മാന്‍ പി.ആലിയ, ഡോ. ബാലകൃഷ്ണന്‍, ഡോ. അന്‍വര്‍ സാദത്ത് എന്നിവര്‍ പ്രസംഗിച്ചു.

മാവേലിക്കസ് 2025 : പ്രേക്ഷകരുടെ മനംനിറച്ച് തങ്കനാട്ടവും എസ്‌കേപ്പും

കോഴിക്കോട്: സംസ്ഥാന സര്‍ക്കാരിന്‍റെ ഓണാഘോഷമായ മാവേലിക്കസ്-2025ല്‍ പ്രേക്ഷകര്‍ക്ക് മറക്കാനാവാത്ത അനുഭവങ്ങള്‍ സമ്മാനിച്ച് തങ്കനാട്ടം, എസ്‌കേപ്പ് നാടകങ്ങള്‍. കോഴിക്കോട് ടൗണ്‍ഹാളിലെ വേദിയില്‍ നിറഞ്ഞ സദസിനു മുന്നിലാണ് നാടകങ്ങള്‍ അരങ്ങേറിയത്. പാര്‍ശ്വവത്കരിക്കപ്പെടുന്നവരുടെ ചെറുത്തുനില്‍പ്പുകള്‍ തുറന്നു കാണിക്കുന്നതാണ് തങ്കനാട്ടം. ക്ഷേത്ര മുറ്റങ്ങളില്‍ ദൈവവേഷം കെട്ടിയാടി ജീവിക്കുന്ന തങ്കന്‍ എന്ന ആട്ടക്കാരന്‍റെ മനോവ്യഥകള്‍ സമൂഹത്തോട് സംവദിക്കുന്ന നാടകത്തിന്‍റെ രചനയും സംവിധാനവും നിര്‍വഹിച്ചത് ഗിരീഷ് കളത്തിലാണ്. നന്മ പെരുമണ്ണയാണ് നാടകം അരങ്ങിലെത്തിച്ചത്. കീഴാളരുടെ വിമര്‍ശന ശബ്ദങ്ങള്‍ ഉയര്‍ന്നുവന്നതു മുതല്‍ ആവിഷ്‌കാരങ്ങളും ആട്ടക്കാരും വേട്ടകള്‍ക്കിരയാകുന്നതിന്‍റെ ചരിത്രം കൂടിയാണ് തങ്കനാട്ടം പറഞ്ഞുവയ്ക്കുന്നത്. പ്രദീപ് ഗോപാല്‍, മധു പന്തീരങ്കാവ്, ഗിരീഷ് ഇല്ലത്ത്താഴം, ഉഷ ചന്ദ്രബാബു, അപര്‍ണ വിനോദ്, സുഭാഷ്, രാജന്‍ മുണ്ടുപാലം, അജയന്‍, സത്യന്‍ മേഖ, പി.പി. രാമകൃഷ്ണന്‍, എം.കെ. പ്രവീണ്‍, കെ.പി. രതീഷ് ബാബു, സുധിഷ് കരുവാല്‍, വി.കെ. രമേശ്, പര്‍വീസ് അലി കെഎംസി തുടങ്ങിയവരാണ് അരങ്ങില്‍ എത്തിയത്. വിനോദ് നിസരി, കെഎംസി പെരുമണ്ണ, അരുണ്‍, സത്യന്‍മേഖ, സുനീഷ് പെരുവയല്‍, സുധാകരന്‍, അജയന്‍, രമേഷ് വെണ്‍മയത്ത് തുടങ്ങിയവര്‍ പിന്നണിയില്‍ അണിനിരന്നു. നിലവിലെ സാമൂഹിക വ്യവസ്ഥിതിയെ കൃത്യമായി അടയാളപ്പെടുത്തുന്ന നാടകമാണ് എസ്‌കേപ്പ്. കേരളത്തിന്‍റെ പല ഭാഗങ്ങളിലായുള്ള മുപ്പതോളം യുവതീയുവാക്കളെ അണിനിരത്തിയാണ് കതിര്‍ തിയറ്റര്‍ കളക്ടീവ് ‘എസ്‌കേപ്പ്' എന്ന നാടകമൊരുക്കിയത്. ഭൂരിഭാഗം പേരും കോളജ് വിദ്യാര്‍ഥികളാണ്. യുവ ജനങ്ങളുടെ മറ്റു രാജ്യങ്ങളിലേക്കുള്ള കുടിയേറ്റവും അവര്‍ പൊതുഇടങ്ങളില്‍നിന്ന് മാറിനില്‍ക്കേണ്ടിവരുന്ന സാഹചര്യങ്ങളുമാണ് നാടകത്തിലുള്ളത്. നാടുവിട്ട് പോവാന്‍ ആഗ്രഹിക്കുന്നവര്‍ക്ക് ഭാവിയില്‍ രാജ്യത്ത് സംഭവിച്ചേക്കാവുന്ന ഭീകരാവസ്ഥകള്‍കൂടി ഇത് വരച്ചുകാട്ടുന്നു. യുവ നാടക പ്രവര്‍ത്തകനായ ഛന്ദസാണ് രചനയും ഡിസൈനും സംവിധാനവും നിര്‍വഹിച്ചത്. ജി എസ് അനന്തകൃഷ്ണനാണ് ആര്‍ട്ട്. പ്രകാശ വിതാനം സനോജ് മാമോയുടേതാണ്. എം എം അലോക് പ്രോപ്പര്‍ട്ടിയും കൃഷ്ണദേവ് സംഗീതവും നിര്‍വഹിച്ചിരിക്കുന്നു.

സ്പെഷൽ വിലക്കുറവുമായി മൈജി ഉത്രാടപ്പാച്ചിൽ സെയിൽ

കോഴിക്കോട്: ഉത്രാടം നാളിൽ ഹോം അപ്ലയൻസസുകളിലും ഡിജിറ്റൽ ഗാഡ്ജറ്റുകളിലും 75 ശതമാനംവരെ വിലക്കുറവും സ്പെഷൽ ഓഫറുകളുമായി മൈജിയുടെ 24 മണിക്കൂർ ഉത്രാടപ്പാച്ചിൽ സ്പെഷൽ സെയിൽ തുടങ്ങി. എല്ലാ മൈജി, മൈജി ഫ്യൂച്ചർ ഷോറൂമുകളിലും ഇന്ന് ഉത്രാടപ്പാച്ചിൽ സെയിൽ നടക്കുന്നുണ്ട്. മൈജി ഓണം മാസ് ഓണം സീസൺ മൂന്നിലെ ഏറ്റവും പ്രധാന ദിനമാണ് ഉത്രാടം നാൾ. ഓണത്തിന്‍റെ ആവേശം ഏറ്റവും കൂടി നിൽക്കുന്ന ഉത്രാട ദിനത്തിൽ മറ്റെവിടുത്തേക്കാളും എല്ലാ ഉത്പന്നങ്ങളിലും ഏറ്റവും കൂടുതൽ ഡിസ്‌കൗണ്ടുകൾ, ഏറ്റവും കൂടുതൽ സ്‌പെഷ്യൽ സമ്മാനങ്ങൾ, കൂടുതൽ ഫിനാൻസ് ഓഫറുകൾ, പഴയ ഉത്പന്നങ്ങൾക്ക് ഏറ്റവും കൂടുതൽ എക്‌സ്‌ചേഞ്ച് ബോണസ്, ബ്രാൻഡുകൾ നൽകുന്ന സമ്മാനങ്ങൾ എന്നിവ ലഭിക്കും. ലോകോത്തര ബ്രാൻഡുകളുടെ മൊബൈൽ ഫോണുകൾ, ടാബ്‌ലറ്റുകൾ, ലാപ്ടോപ്പുകൾ, സ്മാർട്ട് വാച്ചുകൾ, ആക്സസറികൾ, മീഡിയ ഗാഡ്ജറ്റുകൾ, ടീവികൾ, എയർ കണ്ടീഷണറുകൾ തുടങ്ങിയവയിൽ ഏറ്റവും കുറഞ്ഞ വിലകളും ഓഫറുകളുമാണ് ഉത്രാടപ്പാച്ചിലിലൂടെ മൈജി പ്രഖ്യാപിച്ചിട്ടുള്ളത്. ആകെ 25 കോടി രൂപ വിലമതിക്കുന്ന സമ്മാനങ്ങളും ഡിസ്‌കൗണ്ടുകളുമാണ് മൈജി ഓണം സീസൺ മൂന്നിലൂടെ നൽകുന്നത്. ലക്കി ഡ്രോയിലൂടെ 25 കാർ, 30 സ്‌കൂട്ടർ, ഒരു ലക്ഷം രൂപ വീതം 30 പേർക്ക് കാഷ് പ്രൈസ്, 60 പേർക്ക് (30 ദമ്പതികൾക്ക് ) ഇന്‍റർനാഷണൽ ട്രിപ്പ്, ഒരു പവന്‍റെ 30 ഗോൾഡ് കോയിനുകൾ, ദിവസേന നറുക്കെടുപ്പില്ലാതെ സ്‌ക്രാച്ച് ആൻഡ് വിൻ കാർഡുകളിലൂടെ ഉത്പന്നവിലയുടെ നാല് മുതൽ നൂറ് ശതമാനം വരെ ഡിസ്‌കൗണ്ട് അല്ലെങ്കിൽ റെഫ്രിജറേറ്റർ, വാഷിംഗ് മെഷീൻ, പാർട്ടി സ്പീക്കർ, സ്മാർട്ട്‌ഫോൺ തുടങ്ങിയ സുനിശ്ചിത സമ്മാനങ്ങൾ എന്നിവയാണ് ഒരുക്കിയിരിക്കുന്നത്. 45 ദിവസങ്ങൾക്കുള്ളിൽ ബമ്പർ സമ്മാനങ്ങൾ വിതരണം ചെയ്യും.

ഒറ്റ നമ്പര്‍ ലോട്ടറി ചൂതാട്ടം: പ്രതി പിടിയില്‍

കോഴിക്കോട്: പന്നിയങ്കര പോലീസ് സ്റ്റേഷന്‍ പരിധിയിലെ ചക്കുംകടവ് കോയാസ് ഹോട്ടലിന്‍റെ മുന്‍വശം വച്ച് വ്യാജ ഒറ്റ നമ്പര്‍ ലോട്ടറി കച്ചവടം നടത്തുകയായിരുന്നയാളെ അറസ്റ്റ് ചെയ്തു. കല്ലായി കപ്പക്കല്‍ മണ്ണടത്ത് പറമ്പ് വീട്ടില്‍ മുസ്തഫ (54) യാണ് പന്നിയങ്കര പോലീസ് അറസ്റ്റ് ചെയ്തത്. ഹോട്ടലിന്‍റെ മുന്‍വശം വെച്ച് വ്യാജ ഒറ്റ നമ്പര്‍ ലോട്ടറി കച്ചവടം നടക്കുന്നുണ്ടെന്ന് രഹസ്യവിവരത്തിന്‍റെ അടിസ്ഥാനത്തില്‍ പന്നിയങ്കര പോലീസ് സ്റ്റേഷന്‍ ഇന്‍സ്‌പെക്ടര്‍ സതീഷ് കുമാറിന്‍റെ നേതൃത്വത്തില്‍ പന്നിയങ്കര പോലീസ് സംഘം സ്ഥലത്തെത്തുകയായിരുന്നു. പോലീസിനെ കണ്ട് ഓടിപ്പോകാന്‍ ശ്രമിച്ച ലോട്ടറി കച്ചവടക്കാരനെ തടഞ്ഞുനിര്‍ത്തി പരിശോധന നടത്തി. പ്രതിയുടെ കൈയില്‍ നിന്നു ഒറ്റ നമ്പര്‍ ലോട്ടറി കച്ചവടം നടത്താന്‍ ഉപയോഗിച്ച മൊബെല്‍ ഫോണും ലോട്ടറി നമ്പറുകള്‍ എഴുതിയ കടലാസ് തുണ്ടുകളും ഒറ്റഅക്ക നമ്പര്‍ ലോട്ടറി വിറ്റ വകയില്‍ കിട്ടിയ 5450 രൂപയും പോലീസ് കണ്ടെടുത്തു.കൂടുതല്‍ തുകയുടെ ഇടപാട് ഓണ്‍ലൈന്‍ വഴിയാണ് നടക്കുന്നതെന്നു പോലീസ് പറഞ്ഞു. ഒറ്റ നമ്പര്‍ ലോട്ടറിക്ക് 10 രൂപയാണ് വാങ്ങിയ്ക്കാറുള്ളത്. കേരള ലോട്ടറിയുടെ ഒന്നാം സമ്മാനത്തിന്‍റെ അവസാനത്തെ മൂന്നു നമ്പര്‍ എഴുതുന്ന വ്യക്തിക്ക് 5000 രൂപയും, രണ്ടാം സമ്മാനത്തിന്‍റെ അവസാനത്തെ മൂന്നക്കത്തിന് 1000 രൂപയും, മൂന്നാം സമ്മാനത്തിന്‍റെ അവസാന മൂന്ന് അക്കത്തിന് 500 രൂപയും ആണ് നല്‍കുക.

ബഥാനിയ ധ്യാനകേന്ദ്രത്തിലെ അഖണ്ഡ ജപമാല സമര്‍പ്പണം അന്‍പതാം ദിനത്തിലേക്ക്

പുല്ലൂരാംപാറ: പുല്ലൂരാംപാറ ബഥാനിയ ധ്യാനകേന്ദ്രത്തില്‍ 101 ദിനരാത്രങ്ങള്‍ ഇടമുറിയാതെ നടക്കുന്ന ദിവ്യകാരുണ്യ ആരാധനയും അഖണ്ഡ ജപമാല സമര്‍പ്പണവും അന്‍പതാം ദിവസത്തിലേക്ക് പ്രവേശിച്ചു. അഖണ്ഡ ജപമാല സമര്‍പ്പണത്തിന്‍റെ രജത ജൂബിലി വര്‍ഷത്തിലൂടെ കടന്നുപോകുമ്പോള്‍ ലോകസമാധാനവും കുടുംബ വിശുദ്ധീകരണവുമാണ് പ്രധാന നിയോഗം. താമരശ്ശേരി രൂപതാധ്യക്ഷന്‍ മാര്‍ റെമീജിയോസ് ഇഞ്ചനാനിയില്‍ ജൂലൈ 17നാണ് അഖണ്ഡ ജപമാല സമര്‍പ്പണം ഉദ്ഘാടനം ചെയ്തത്. ഒക്ടോബര്‍ 25ന് സമാപിക്കും. അഖണ്ഡ ജപമാല ദിവസങ്ങളില്‍ കുമ്പസാരത്തിനും സ്പിരിച്വല്‍ ഷെയറിംഗിനുമുള്ള സൗകര്യം ഏര്‍പ്പെടുത്തിയിട്ടുണ്ട്. 24 മണിക്കൂറും ആരാധനയുണ്ട്. ഞായര്‍ ഒഴികെ എല്ലാ ദിവസവും രാവിലെ ആറിനും ഉച്ചയ്ക്ക് 12നും വൈകുന്നേരം ഏഴിനും ദിവ്യബലി അര്‍പ്പണം ഉണ്ടാകും. പകല്‍ മൂന്നിനും പുലര്‍ച്ചെ മൂന്നിനും കുരിശിന്‍റെ വഴിയും കരുണക്കൊന്തയുമുണ്ട്. ഉച്ചയ്ക്കും രാത്രിയും നേര്‍ച്ച ഭക്ഷണവുമുണ്ട്. അഖണ്ഡ ജപമാല സമര്‍പ്പണത്തിന്‍റെ നൂറാം ദിവസമായ ഒക്ടോബര്‍ 24ന് വൈകുന്നേരം ആറിന് മെഴുകുതിരിയേന്തി ജപമാല റാലിയും രാത്രി ഏഴിന് ആഘോഷപൂര്‍വ്വമായ വിശുദ്ധ കുര്‍ബാനയും നടക്കും. താമരശേരി രൂപത വികാരി ജനറാള്‍ മോണ്‍. ഏബ്രഹാം വയലില്‍ മുഖ്യകാര്‍മികത്വം വഹിക്കും. സമാപന ശുശ്രൂഷകള്‍ പുലര്‍ച്ചെ മൂന്നിന് കരുണക്കൊന്തയോടെ ആരംഭിക്കും. തുടര്‍ന്ന് കുരിശിന്‍റെ വഴി. രാവിലെ ആറിന് വിശുദ്ധ കുര്‍ബ്ബാന, 10.30ന് സമാപന ജപമാല, 11ന് നടക്കുന്ന ആഘോഷമായ വിശുദ്ധ കുര്‍ബ്ബാനയ്ക്ക് ബിഷപ് മാര്‍ റെമിജിയോസ് ഇഞ്ചനാനിയില്‍ മുഖ്യകാര്‍മികത്വം വഹിക്കും. ഉച്ചയ്ക്ക് 12.30ന് ദിവ്യകാരുണ്യ ആരാധന, ദിവ്യകാരുണ്യ പ്രദക്ഷിണം, സമാപന ആശീര്‍വാദം. തുടര്‍ന്ന് നേര്‍ച്ച ഭക്ഷണം. ശുശ്രൂഷകള്‍ക്ക് ബഥാനിയ ഡയറക്ടര്‍ ഫാ. റോണി പോള്‍ കാവില്‍, അസി. ഡയറക്ടര്‍ ഫാ. ആല്‍ബിന്‍ വിലങ്ങുപാറ, ഫാ. ജോസഫ് പൂവന്നിക്കുന്നേല്‍ എന്നിവര്‍ നേതൃത്വം നല്‍കും.

മധുരത്തെരുവില്‍ ഉത്സവമായി പായസമേളകള്‍

കോഴിക്കോട്: ഓണത്തിരക്കിനിടയില്‍ മധുരം വിളമ്പി മിഠായിെത്തരുവ്. മധുരമൂറുന്ന മിഠായിത്തെരുവില്‍ അധിമധുരവുമായി പായസമേളകളും ഒരുങ്ങിക്കഴിഞ്ഞു. മിഠായിത്തെരുവിലും പരിസരപ്രദേശങ്ങളിലുമായി പായസമേളകളുടെ പൊടിപൂരമാണ്. വീട്ടമ്മമാരുടെ കൂട്ടായ്മയായ കുടുംബിനി വനിതാ സൊസൈറ്റിയുടെയും കെടിഡിസിയുടേയും ഖാദിയുടെയും മൃഗനയനിയുടെയും വീട്ടമ്മമാരുടെയും നേതൃത്വത്തിലാണ് മിഠായിത്തെരുവില്‍ പായസരുചികളൊരുക്കിയിട്ടുള്ളത്. തൊട്ടടുത്ത് മുതലക്കുളത്ത് കുടുബശ്രീ ഓണച്ചന്തകളിലും പായസമൊരുക്കിയിട്ടുണ്ട്. വഴിയോരങ്ങളിലും പായസമേളക്കാരുടെ നീണ്ട നിരയാണ്. പുത്തന്‍ രുചിയുടെ സ്പെഷല്‍ പായസങ്ങളും ഇത്തവണയുണ്ട്. ഓണത്തിന് പാഴ്‌സല്‍ മുന്‍കൂട്ടി ബുക്ക് ചെയ്യാനും സൗകര്യമുണ്ട്.നിരവധി പേരാണ് പായസ മധുരം ആസ്വദിക്കാന്‍ എത്തുന്നത്. അതിരാവിലെ തുടങ്ങുന്ന പായസ വില്‍പ്പന പല കൗണ്ടറുകളിലും ഉച്ചയോടെ തീരുന്ന സ്ഥിതിയാണ്. പാല്‍പായസം, അട പ്രഥമന്‍, മുളയരി പായസം, പരിപ്പ് പ്രഥമന്‍ എന്നിവയ്‌ക്കൊപ്പം സ്പെഷല്‍ ഇനങ്ങളായി അമ്പലപ്പുഴ സ്‌പെഷല്‍, പഴം, പൈനാപ്പിള്‍, കാരറ്റ്, ഇളനീര്‍, മിക്‌സഡ് പായസം,ഗോതമ്പു പായസങ്ങളെല്ലാം മേളയില്‍ സ്ഥാനം പിടിച്ചിട്ടുണ്ട്. ഒരു കപ്പിന് 40 രൂപയാണ് നിരക്ക്. ഇതിനു പുറമേ അര ലിറ്റര്‍ മുതല്‍ തുടങ്ങുന്ന പാര്‍സല്‍ കൗണ്ടറും ഒരുക്കിയിട്ടുണ്ട്. ഒന്നിച്ച് വാങ്ങുകയാണെങ്കില്‍ ഒരു ലിറ്ററിന് 390 രൂപയും അര ലിറ്ററിന് 200 രൂപയുമാണ്. പാലട പായസവും പരിപ്പ് പായസവുമാണ് കൂടുതല്‍ ചെലവാകുന്നത്.

വാർഷിക പൊതുയോഗവും ആദരിക്കലും നടത്തി

കൂരാച്ചുണ്ട്: കൂരാച്ചുണ്ട് ക്ഷീരോത്പാദക സഹകരണ സംഘം വാർഷിക പൊതുയോഗവും ക്ഷീര കർഷകരെ ആദരിക്കലും ഓണക്കിറ്റ് വിതരണവും പഞ്ചായത്ത് ഹാളിൽ നടന്നു. പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർമാൻ സണ്ണി പുതിയകുന്നേൽ ഉദ്ഘാടനം ചെയ്തു. ക്ഷീര കർഷകൾക്കുള്ള ഓണക്കിറ്റുകളുടെ വിതരണം പഞ്ചായത്ത് വൈസ് പ്രസിഡന്‍റ് വിൻസി തോമസ് ഉദ്ഘാടനം ചെയ്തു. ക്ഷീരസംഘം പ്രസിഡന്‍റ് ജോർജ് പൊട്ടുകുളത്തിൽ അധ്യക്ഷത വഹിച്ചു. പഞ്ചായത്ത് അംഗങ്ങളായ സിമിലി ബിജു, ഡാർളി ഏബ്രഹാം, അരുൺ ജോസ്, ആൻസമ്മ ജോസഫ്, മിൽമ സീനിയർ സൂപ്പർവൈസർ കെ.പി. ജസ്ന, സജി ചെറിയാൻ ചേലാപറമ്പത്ത്, ഹമീദ് റാവുത്തർ നടൂപറമ്പിൽ, ക്ഷീര സംഘം സെക്രട്ടറി ബസ്‌ലിൻ മഠത്തിനാൽ, ദീപു കിഴക്കനകത്ത്, പി.ടി. രാജി പള്ളത്തുകാട്ടിൽ എന്നിവർ പ്രസംഗിച്ചു.

വേനപ്പാറ സ്കൂളിൽ പച്ചക്കറി വിളവെടുപ്പ് നടത്തി

താമരശേരി: "ഓണത്തിന് ഒരു മുറം പച്ചക്കറി' പദ്ധതി പ്രകാരം വേനപ്പാറ ലിറ്റിൽ ഫ്ലവർ യുപി സ്കൂൾ അങ്കണത്തിലെ ഗ്രീൻ ഹൗസിൽ പച്ചക്കറി വിളവെടുപ്പ് നടത്തി. സ്കൂൾ കാർഷിക ക്ലബിന്‍റെ നേതൃത്വത്തിൽ കൃഷിഭവന്‍റെ സഹകരണത്തോടെയാണ് പച്ചക്കറി കൃഷി ആരംഭിച്ചത്. വെണ്ട, പച്ചമുളക്, തക്കാളി, വഴുതന, പയർ, പടവലം എന്നിവ കൃഷി ചെയ്തിട്ടുണ്ട്. ആദ്യവിളവെടുപ്പിന്‍റെ ഉദ്ഘാടനം കൃഷി ഓഫീസർ ടിൻസി ടോം നിർവഹിച്ചു. പ്രധാനാധ്യാപകൻ ജെയിംസ് ജോഷി, കൃഷി അസിസ്റ്റന്‍റ് എം. റീപ, അധ്യാപകരായ ബിജു മാത്യു, സുനീഷ് ജോസഫ്, വിമൽ വിനോയി, ശിൽപാ ചാക്കോ, പാർവതി, ഗിരിജ തുടങ്ങിയവർ പ്രസംഗിച്ചു.

ഓണക്കിറ്റ്, ഓണക്കോടി വിതരണം ചെയ്തു

തിരുവമ്പാടി: സിഗ്നേച്ചർ സ്പോർട്സ് ക്ലബ് കൂടരഞ്ഞിയുടെ നേതൃത്വത്തിൽ കിടപ്പ് രോഗികൾക്ക് ഓണക്കിറ്റ് വിതരണം ചെയ്തു. കൂടരഞ്ഞി പഞ്ചായത്തിന്‍റെയും കുടുംബാരോഗ്യ കേന്ദ്രത്തിന്‍റെയും സഹകരണത്തോടെയാണ് ഓണക്കിറ്റ് വിതരണം ചെയ്തത്. കൂടരഞ്ഞി പഞ്ചായത്ത് പ്രസിഡന്‍റ് ആദർശ് ജോസഫ് ഉദ്ഘാടനം നിർവഹിച്ചു. സിഗ്നേച്ചർ സ്പോർട്സ് ക്ലബ് പ്രസിഡന്‍റ് സിജോ മച്ചുകുഴിയിൽ അധ്യക്ഷത വഹിച്ചു. ആരോഗ്യ വികസനകാര്യ സ്റ്റാൻഡിംഗ് കമ്മിറ്റി ചെയർമാൻ വി.എസ്. രവീന്ദ്രൻ, മെഡിക്കൽ ഓഫീസർ ഡോ. പി.കെ. ദിവ്യ, ഹെൽത്ത് ഇൻസ്പെക്ടർ രാജീവൻ, മെൽബിൻ കളത്തിപറമ്പിൽ, ജോബിൻ തെങ്ങുംപള്ളിയിൽ, ദിലീപ് മാത്യൂസ്, ബോണി പടിഞ്ഞാറേൽ, സിബി അറക്കൽ എന്നിവർ പ്രസംഗിച്ചു. പെരുവണ്ണാമൂഴി: ചക്കിട്ടപാറ ശാന്തി പെയിൻ ആൻഡ് പാലിയേറ്റീവ് കെയറിന്‍റെ ആഭിമുഖ്യത്തിൽ രോഗികൾക്ക്‌ ഓണ സമ്മാനങ്ങളും കിറ്റും വിതരണം ചെയ്തു. മുതുകാട് സബ് സെന്‍ററിൽ നടന്ന പരിപാടി പന്നിക്കോട്ടൂർ പ്രൈമറി ഹെൽത്ത് സെന്‍റർ മെഡിക്കൽ ഓഫീസർ ഡോ. സി.കെ. വിനോദ് ഉദ്ഘാടനം ചെയ്തു. പാലിയേറ്റീവ് കെയർ പ്രസിഡന്‍റ് ബോബി ഓസ്റ്റിൻ അധ്യക്ഷത വഹിച്ചു. നോബി കുമ്പുക്കൽ, കെ.ഒ. സെബാസ്റ്റ്യൻ, ജോസ് വിലങ്ങുപാറ, ശ്രീധരൻ പെരുവണ്ണാമൂഴി, തോമസ് ചെരിയംപുറത്ത്, ഷൈനി ഫ്രാൻസിസ്, കെ.എസ്. ധന്യ എന്നിവർ പങ്കെടുത്തു. കൂരാച്ചുണ്ട്: കത്തോലിക്കാ കോൺഗ്രസ് കല്ലാനോട് യൂണിറ്റിന്‍റെ നേതൃത്വത്തിൽ ഓണാഘോഷത്തിന്‍റെ ഭാഗമായി നിർധന കുടുംബങ്ങൾക്ക് ഭക്ഷ്യധാന്യങ്ങൾ അടങ്ങിയ ഓണക്കിറ്റുകൾ വിതരണം ചെയ്തു. ‌ യൂണിറ്റ് ഡയറക്ടർ ഫാ. ജിനോ ചുണ്ടയിൽ യൂണിറ്റ് പ്രസിഡന്‍റ് ജോർജ് ദാസ് കാനാട്ടിന് കൈമാറി ഉദ്ഘാടനം നിർവഹിച്ചു. കമ്മിറ്റി അംഗങ്ങളായ ജോൺസൺ മാളിയേക്കൽ, വിനോദ് നരിക്കുഴി, നിമ്മി പൊതിയിട്ടേൽ, ലൗലി തടത്തിൽ എന്നിവർ നേതൃത്വം നൽകി. കൂരാച്ചുണ്ട്‌: കോൺഗ്രസ് കൂരാച്ചുണ്ട് പഞ്ചായത്ത് കല്ലാനോട് എട്ടാം വാർഡ് കമ്മിറ്റിയുടെ നേതൃത്വത്തിൽ നിർധനരായവരും കിടപ്പു രോഗികളുമുള്ള കുടുംബങ്ങൾക്ക് ഭവനങ്ങൾ സന്ദർശിച്ച് ഓണക്കിറ്റുകൾ വിതരണം ചെയ്തു. തോമസ് കുമ്പുക്കൽ, ജോൺസൺ എട്ടിയിൽ, വാർഡ് മെമ്പർ അരുൺ ജോസ്, ജോസ് വട്ടുകുളം, ഷാജൻ കടുകൻമാക്കൽ, കുര്യൻ ചെമ്പനാനി,ജോയി എളംപ്ലാശേരി, സദീശൻ പുതുക്കുടിമീത്തൽ, സന്ദീപ് കളപ്പുരയ്ക്കൽ, സണ്ണി മാളിയേക്കൽ എന്നിവർ നേതൃത്വം നൽകി. കോടഞ്ചേരി: പഞ്ചായത്തിലെ ആശമാർക്ക് ഓണക്കോടി സമ്മാനിച്ച് പ്രിയങ്ക ഗാന്ധി എംപി. കോടഞ്ചേരി പഞ്ചായത്ത് തല ഉദ്ഘാടനം പ്രസിഡന്‍റ് അലക്സ് തോമസ് ചെമ്പകശേരി നിർവഹിച്ചു. ആശമാരുടെ സേവനങ്ങളെ പ്രകീർത്തിച്ചു കൊണ്ടുള്ള കത്തും ആശമാർക്ക് കൈമാറി. ആശമാരുടെ സേവനത്തിന് മാന്യമായ വേതനം നൽകുകയെന്നത് നാടിന്‍റെ കടമയാണെന്നും അതിനു വേണ്ടിയുള്ള പോരാട്ടത്തിൽ താൻ കൂടെയുണ്ടെന്നും സന്ദേശത്തിൽ പ്രിയങ്ക ഗാന്ധി എംപി ഉറപ്പ് നൽകി. ചടങ്ങിൽ പഞ്ചായത്ത് വൈസ് പ്രസിഡന്‍റ് ജമീല അസീസ് അധ്യക്ഷത വഹിച്ചു.ബ്ലോക്ക് കോൺഗ്രസ് പ്രസിഡന്‍റ് ജോബി ഇലന്തൂർ മുഖ്യപ്രഭാഷണം നടത്തി. മണ്ഡലം കോൺഗ്രസ് പ്രസിഡന്‍റ് വിൻസന്‍റ് വടക്കേമുറിയിൽ, യുഡിഎഫ് ചെയർമാൻ കെ.എം. പൗലോസ്, കേരള കോൺഗ്രസ് സംസ്ഥാന നിർവാഹ സമിതി അംഗം സി.ജെ. ടെന്നിസൺ, ഫ്രാൻസിസ് ചാലിൽ, ടോമി ഇല്ലിമൂട്ടിൽ, ബിജു ഒത്തിക്കൽ, റെജി തമ്പി തുടങ്ങിയവർ പ്രസംഗിച്ചു.

സർഗശേഷി പ്രദർശന വിപണന മേള സമാപിച്ചു

കോഴിക്കോട്: വിവിധ ജില്ലകളിൽ നിന്നുള്ള ഭിന്നശേഷിക്കാരെ പങ്കെടുപ്പിച്ചു നടത്തിയ ‘സർഗശേഷി പ്രദർശന വിപണന മേള’ സമാപിച്ചു. സമാപന ദിനത്തിൽ മന്ത്രി എ.കെ. ശശീന്ദ്രൻ, കോഴിക്കോട് ആർച്ച് ബിഷപ് ഡോ. വർഗീസ് ചക്കാലയ്ക്കൽ എന്നിവർ സിഎസ്ഐ ഹാളിൽ സന്ദർശനം നടത്തി. പ്രദർശന മേളയിൽ പങ്കെടുത്തവർക്ക് എല്ലാ വിജയവും ആർച്ച് ബിഷപ് നേർന്നു. ഭിന്നശേഷിയുള്ളവർ നിർമിച്ച ഉത്പന്നങ്ങൾ പ്രദർശിപ്പിച്ച 20 സ്റ്റാളുകളും മന്ത്രി സന്ദർശിച്ചു. മേളയുടെ സമാപന ചടങ്ങ് കോഴിക്കോട് ആരോഗ്യകാര്യ സ്റ്റാന്‍ഡിംഗ് കമ്മിറ്റി ചെയർപേഴ്സൺ ഡോ. എസ്. ജയശ്രീ ഉദ്ഘാടനം ചെയ്തു. പ്രശസ്ത സ്പോർട്സ് ജേർണലിസ്റ്റ് കമാൽ വരദൂർ അധ്യക്ഷത വഹിച്ചു. കോഴിക്കോട് മലബാർ മൾട്ടി സ്പെഷാലിറ്റി ഹോസ്പിറ്റൽ സിഇഒ കോളിൻ ജോസഫ്, കൺസൾട്ടിംഗ് സൈക്കോളജിസ്റ്റ് റീജ, യുഎൽ കെയർ നായനാർ സദനം അഡ്വൈസറി കൗൺസിൽ മെമ്പർ സി.വി. സന്തോഷ് എന്നിവർ പങ്കെടുത്തു. മേളയിൽ പങ്കെടുത്തവരെ ചടങ്ങിൽ സർട്ടിഫിക്കറ്റ് നൽകി ആദരിച്ചു.

വിൽപ്പനയ്ക്കായി വീട്ടിൽ സൂക്ഷിച്ച ചന്ദനം പിടികൂടി

താമരശേരി: വിൽപ്പനയ്ക്കായി വീട്ടിൽ സൂക്ഷിച്ച ചന്ദനവുമായി പ്രതിയെ പിടികൂടി.കണ്ണാടിപ്പൊയിൽ സ്വദേശി ടി.കെ. താരിഖാണ് വനം വിജിലൻസിന്‍റെ പിടിയിലായത്. കോഴിക്കോട് ഫ്ലയിംഗ് സ്ക്വാഡ് റേഞ്ച് ഫോറസ്റ്റ് ഓഫീസർ എ.പി. ശ്രീജിത്തിന്‍റെ നേതൃത്വത്തിൽ കോഴിക്കോട് വനം വിജിലൻസ് വിഭാഗം നടത്തിയ പരിശോധനയിലാണ് ചന്ദനം പിടിച്ചെടുത്തത്. എകദേശം 25000 രൂപ വില വരുന്ന 6.800 കിലോ ചന്ദന കഷണങ്ങളും ചീളുകളും പിടിച്ചെടുത്തു. അനധികൃതമായി ചന്ദന മരങ്ങൾ മുറിച്ച കുറ്റത്തിന് പ്രതിയുടെ പേരിൽ കേസുണ്ട്. ഫ്ലയിംഗ് സ്ക്വാഡിലെ സെക്‌ഷൻ ഫോറസ്റ്റ് ഓഫീസർ എ. ആസിഫ്, ബീറ്റ് ഫോറസ്റ്റ് ഓഫീസർമാരായ സി. മുഹമ്മദ് അസ്ലം, എം. ദേവാനന്ദൻ, കെ.വി. ശ്രീനാഥ്, എൻ. ലുബൈബ, സീനിയർ ഫോറസ്റ്റ് ഡ്രൈവർ പി. ജിതേഷ്, ഫോറസ്റ്റ് ഡ്രൈവർ ടി.കെ. ജിജീഷ് എന്നിവരാണ് പരിശോധന നടത്തിയത്.

വിസ്മയം തീർത്ത് ബേപ്പൂർ ബീച്ചിൽ പുഷ്പമേള

കോഴിക്കോട്: കൺനിറയെ പൂക്കാഴ്ചകളുമായി ജനപ്രിയമാവുകയാണ് ബേപ്പൂരിലെ പുഷ്പമേള. ഏഴ് വരെ നടക്കുന്ന ഓണാഘോഷം "മാവേലിക്കസ് 2025'ന്‍റെ ഭാഗമായാണ് വർണപ്പൊലിമയുമായി 20,000 ചതുരശ്രയടി പവിലിയനിൽ ബേപ്പൂർ മറീന ബീച്ചിൽ പുഷ്പോദ്യാനം ഒരുക്കിയത്. വിവിധ നിറത്തിലുള്ള ജമന്തി, ചെണ്ടുമല്ലി, ഡാലിയ, റോസ്, വാടാമല്ലി, കോസ്മോസ്, ഡെലീഷ്യ, സാൽവിയ, മാരിഗോൾഡ്, പെറ്റൂണിയ, ഡെൻഫീനിയ, പാൻസി, ഫ്ലോക്സ്, ഡയാന്തസ് തുടങ്ങി ഒട്ടേറെ പൂക്കാഴ്ചകളാണ് സഞ്ചാരികളെ കാത്തിരിക്കുന്നത്. സെൽഫിയെടുക്കാനായി സെൽഫികോർണറും ഒരുക്കിയിട്ടുണ്ട്. പൂക്കൾകൊണ്ട് ഒരുക്കിയ വിവിധ രൂപങ്ങളും മറ്റും മേളയിലെ മുഖ്യ ആകർഷണമാണ്. ഉദ്യാനങ്ങളിലേക്ക് ആവശ്യമായ ചെടികളും വളവും മറ്റു വസ്തുക്കളും വാങ്ങാനുള്ള അവസരവും ഷോയുടെ ഭാഗമായുണ്ട്. രാവിലെ 11 മുതൽ രാത്രി എട്ട് വരെയാണ് പ്രവേശനം. മുതിർന്നവർക്ക് 30 രൂപയും കുട്ടികൾക്ക് 10 രൂപയുമാണ് പ്രവേശന ഫീസ്. ഫ്ളവർഷോ ഏഴിന് സമാപിക്കും.

സ്വകാര്യ സ്ഥാപനത്തിലെ മാലിന്യം ഓടയിലേക്ക്: നടപടിയില്ലെങ്കില്‍ നഗരസഭാ സെക്രട്ടറിക്കെതിരേ നടപടിയെന്ന്

കോഴിക്കോട്: പൊറ്റമ്മലില്‍ പ്രവര്‍ത്തിക്കുന്ന സ്ലാഷ് എന്ന സ്ഥാപനത്തിലെ മാലിന്യങ്ങള്‍ പൊതുഓടയില്‍ ഒഴുക്കി വിടുന്നതിനെതിരേ ഒരു മാസത്തിനുള്ളില്‍ സ്ഥിരമായ പരിഹാരം കണ്ടില്ലെങ്കില്‍ അത് മനുഷ്യാവകാശ ലംഘനമായി കണ്ട് കോര്‍പറേഷന്‍ സെക്രട്ടറിക്കെതിരേ നിയമാനുസൃത നടപടി സ്വീകരിക്കുമെന്ന് മനുഷ്യാവകാശ കമ്മീഷന്‍ ജുഡീഷല്‍ അംഗം കെ. ബൈജുനാഥ് ഉത്തരവിട്ടു. സ്വീകരിച്ച നടപടികള്‍ നിശ്ചിത സമയപരിധിക്കുള്ളില്‍ രേഖാമൂലം സമര്‍പ്പിക്കണമെന്നും കമ്മീഷന്‍ നിര്‍ദേശിച്ചു. കമ്മീഷന്‍ ശക്തമായ താക്കീത് നല്‍കിയിട്ടും മാസങ്ങളോളം മെല്ലെപ്പോക്ക് നയമാണ് കോര്‍പറേഷന്‍ സ്വീകരിച്ചതെന്ന് ഉത്തരവില്‍ പറയുന്നു. ഇത് അപലപനീയവും നിയമവാഴ്ചയോടുള്ള വെല്ലുവിളിയുമാണ്. തിരക്കേറിയ സ്ഥലത്ത് സ്ഥിരമായി മാലിന്യനിക്ഷേപവും ദുര്‍ഗന്ധവും ഉണ്ടായതായി പരാതി വന്നിട്ടും ഫലപ്രദമായ നടപടി സ്വീകരിക്കാത്ത കോര്‍പറേഷന്‍ ആരോഗ്യവിഭാഗത്തിന്‍റെ നടപടി നിരുത്തരവാദപരവും ലജ്ജാകരവുമാണ്. വൃത്തിയുള്ള സാഹചര്യത്തില്‍ ജീവിക്കാനുള്ള പൗരന്‍റെ മനുഷ്യാവകാശമാണ് നഗ്‌നമായി ലംഘിക്കപ്പെടുന്നത്. മാലിന്യമുക്ത കേരളം, അഴക് എന്നീ പേരുകള്‍ കൊണ്ടുമാത്രം പരിസരശുചിത്വം ഉറപ്പാക്കാന്‍ കഴിയില്ലെന്ന് നഗരസഭ മനസിലാക്കണം. മാലിന്യനിര്‍മാര്‍ജനം അക്ഷരാര്‍ഥത്തില്‍ നടപ്പിലാക്കേണ്ടതാണ്. അത് തദ്ദേശസ്ഥാപനങ്ങളുടെ അനിവാര്യമായ ചുമതലയാണെന്നും ഉത്തരവില്‍ പറയുന്നു. കോര്‍പറേഷന്‍ നടപടിയെടുത്തിട്ടും നിയമലംഘനങ്ങള്‍ തുടരുന്നുണ്ടെന്ന് പറഞ്ഞാല്‍ ഉദ്യോഗസ്ഥര്‍ മനുഷ്യാവകാശ ലംഘനത്തിന് കൂട്ടുനില്‍ക്കുന്നുവെന്ന നിഗമനത്തിലെത്തേണ്ടി വരുമെന്നും കെ. ബൈജുനാഥ് ഉത്തരവില്‍ പറഞ്ഞു. സ്വകാര്യസ്ഥാപനത്തിന് നോട്ടീസ് നല്‍കിയിട്ടുണ്ടെന്ന് ക്ലീന്‍ സിറ്റി മാനേജര്‍ കമ്മീഷനെ അറിയിച്ചു. തുടര്‍ന്ന് ഹെല്‍ത്ത് ഇന്‍സ്‌പെക്ടര്‍ ഹാജരായി. സ്ഥാപനത്തിലെ സെപ്റ്റിക് മലിനജലം ഉള്‍പ്പെടെ പൊതു ഓടയിലേക്ക് ഒഴുക്കിവിടുന്നതായി ബോധ്യപ്പെട്ടതായി നഗരസഭ കമ്മീഷനെ അറിയിച്ചു, സ്ഥാപനത്തിന് 25,000 രൂപ പിഴയിട്ടതായും ഓടയിലേക്ക് സ്ഥാപിച്ച പിവിസി പൈപ്പ് അടച്ച് താത്കാലികമായി പ്രശ്‌നം പരിഹരിച്ചിട്ടുണ്ടെന്നും റിപ്പോര്‍ട്ടില്‍ പറയുന്നു. സ്വകാര്യ സ്ഥാപനത്തിന്‍റെ പരിസര മലിനീകരണത്തിനെതിരേ നെല്ലിക്കോട് സ്വദേശി എം. ദിനേഷ് സമര്‍പ്പിച്ച പരാതിയിലാണ് നടപടി.

എലത്തൂര്‍ മണ്ഡലം അദാലത്ത് : അക്ഷയ കേന്ദ്രങ്ങളിലും തദ്ദേശ സ്ഥാപനങ്ങളിലും പരാതികള്‍ സ്വീകരിക്കും

20 വരെ പരാതികള്‍ നല്‍കാം കോഴിക്കോട്: മന്ത്രി എ.കെ. ശശീന്ദ്രന്‍റെ നേതൃത്വത്തില്‍ എലത്തൂര്‍ നിയോജക മണ്ഡലത്തില്‍ ഒക്ടോബര്‍ നാലിന് നടത്തുന്ന പരാതി പരിഹാര അദാലത്തിലേക്കുള്ള അപേക്ഷകള്‍ 20 വരെ നൽകാം. ഇതുമായി ബന്ധപ്പെട്ട് മന്ത്രിയുടെ അധ്യക്ഷതയില്‍ കളക്ടറേറ്റിൽ ചേര്‍ന്ന യോഗത്തിലാണ് തീരുമാനം. ജനങ്ങളുടെ പരാതികളില്‍ ഏതെങ്കിലും കാരണത്താല്‍ തീരുമാനം വൈകുന്നത് ഒഴിവാക്കുകയെന്ന ലക്ഷ്യത്തോടെയാണ് അദാലത്ത് സംഘടിപ്പിക്കുന്നതെന്ന് മന്ത്രി പറഞ്ഞു. അദാലത്തില്‍ പരിഗണിക്കുന്നതിനുള്ള പരാതികള്‍ ഇ- ഡിസ്ട്രിക്ട് പോര്‍ട്ടല്‍ വഴി (edistrict.kerala.gov.in) സ്വന്തം നിലയ്ക്കും അക്ഷയ കേന്ദ്രങ്ങള്‍ വഴിയും തദ്ദേശ സ്ഥാപനങ്ങള്‍ വഴിയും നേരിട്ടും സമര്‍പ്പിക്കാം. സ്വന്തം നിലയ്ക്ക് പരാതി സമര്‍പ്പിക്കുന്നവര്‍ ഇ-ഡിസ്ട്രിക്ട് പോര്‍ട്ടലില്‍ ലോഗിന്‍ ചെയ്ത്, വണ്‍ടൈം രജിസ്‌ട്രേഷന്‍ മെനുവിലെ ആപ്ലിക്കന്‍റ് രജിസ്‌ട്രേഷന്‍ പൂര്‍ത്തിയാക്കി എലത്തൂര്‍ മണ്ഡലം അദാലത്ത് ലിങ്ക് വഴിയാണ് അപേക്ഷിക്കേണ്ടത്. നേരിട്ടുള്ള അപേക്ഷകള്‍ സ്വീകരിക്കുന്നതിനായി മണ്ഡലത്തിന്‍റെ പരിധിയില്‍ വരുന്ന ചേളന്നൂര്‍, കക്കോടി, കാക്കൂര്‍, കുരുവട്ടൂര്‍, നന്മണ്ട, തലക്കുളത്തൂര്‍ പഞ്ചായത്തുകളിലും കോര്‍പറേഷന്‍റെ എലത്തൂരിലെ മേഖലാ ഓഫീസിലും പ്രത്യേക ഹെല്‍പ്പ് ഡെസ്‌ക്കുകള്‍ ഒരുക്കിയിട്ടുണ്ട്. മറ്റ് വകുപ്പുകളുമായി ബന്ധപ്പെട്ട പരാതികളും ഹെല്‍പ്പ് ഡെസ്‌ക്കുകളില്‍ സ്വീകരിക്കും. ഇവിടെ ലഭിക്കുന്ന പരാതികളും അനുബന്ധ രേഖകളും സിറ്റിസണ്‍ പോര്‍ട്ടല്‍ വഴി അപ്‌ലോഡ് ചെയ്ത് കളക്ടറേറ്റിലെ സെന്‍ട്രല്‍ ഹെല്‍പ്പ് ഡെസ്‌ക്കിലേക്ക് നല്‍കും. ഇവിടെ നിന്നാണ് പരാതികള്‍ ബന്ധപ്പെട്ട വകുപ്പുകള്‍ക്കും ഓഫീസുകള്‍ക്കും തുടര്‍ നടപടികള്‍ക്കായി കൈമാറുക. ഭൂമി സംബന്ധമായ വിഷയങ്ങള്‍, സര്‍ട്ടിഫിക്കറ്റുകള്‍, ലൈസന്‍സുകള്‍ നല്‍കുന്നതിലെ കാലതാമസം, കെട്ടിട നിര്‍മാണ ചട്ടങ്ങളുമായി ബന്ധപ്പെട്ടവ, വയോജന സംരക്ഷണം, പട്ടികജാതി-പട്ടികവര്‍ഗ വിഭാഗങ്ങള്‍ക്കുള്ള വിവിധ ആനുകൂല്യങ്ങള്‍, ശാരീരിക/ ബുദ്ധി/ മാനസിക വെല്ലുവിളി നേരിടുന്നവരുടെ പുനരധിവാസം, ധനസഹായം, പെന്‍ഷന്‍, പരിസ്ഥിതി മലിനീകരണം/ മാലിന്യ സംസ്‌കരണം, കുടിവെള്ളം, ഭക്ഷ്യ സുരക്ഷ, ജലസ്രോതസുകളുടെ സംരക്ഷണം, റേഷന്‍ കാര്‍ഡ്, കാര്‍ഷിക മേഖലയുമായി ബന്ധപ്പെട്ട വിഷയങ്ങള്‍, വ്യവസായ സംരംഭങ്ങള്‍ക്കുള്ള അനുമതികള്‍, ആരോഗ്യമേഖലയിലെ സ്ഥാപനങ്ങളുമായി ബന്ധപ്പെട്ട വിഷയങ്ങള്‍, വന്യജീവി ആക്രമണങ്ങളുമായി ബന്ധപ്പെട്ട വിഷയങ്ങള്‍, വിവിധ സ്‌കോളര്‍ഷിപ്പുകള്‍ സംബന്ധിച്ചുള്ള പരാതികള്‍, തണ്ണീര്‍ത്തട സംരക്ഷണം, അപകടകരങ്ങളായ മരങ്ങള്‍ മുറിച്ചുമാറ്റല്‍ തുടങ്ങിയ വിഷയങ്ങളാണ് അദാലത്തുകളില്‍ പരിഗണിക്കുക. ലൈഫ് ഭവനപദ്ധതി, ഭൂമി തരം മാറ്റല്‍, മുഖ്യമന്ത്രിയുടെ ദുരിതാശ്വാസ നിധി എന്നിവയുമായി ബന്ധപ്പെട്ട പുതിയ പരാതികള്‍ അദാലത്തില്‍ പരിഗണിക്കില്ല. ഒരു അപേക്ഷയില്‍ ഒന്നില്‍ കൂടുതല്‍ പരാതികള്‍ ഉള്‍പ്പെടുത്തരുത്. ജില്ലാ കലക്ടറുടെ ചേംബറില്‍ ചേര്‍ന്ന യോഗത്തില്‍ ജില്ലാ കളക്ടര്‍ സ്‌നേഹില്‍ കുമാര്‍ സിംഗ്, ചേളന്നൂര്‍ ബ്ലോക്ക് പഞ്ചായത്ത് പ്രസിഡന്‍റ് കെ.പി. സുനില്‍കുമാര്‍, ഗ്രാമപഞ്ചായത്ത് പ്രസിഡന്‍റുമാരായ സി.എം. ഷാജി (കാക്കൂര്‍), പി.പി. നൗഷീര്‍ (ചേളന്നൂര്‍), കെ.ടി. പ്രമീള (തലക്കുളത്തൂര്‍), എ. സരിത (കുരുവട്ടൂര്‍), കൃഷ്ണവേണി മാണിക്കോത്ത് (നന്മണ്ട), കോര്‍പറേഷന്‍ കൗണ്‍സിലര്‍മാരായ വി.പി. മനോജ്, എസ്.എം. തുഷാര, എഡിഎം പി. സുരേഷ്, എല്‍എസ്ജിഡി ജോയിന്‍റ് ഡയരക്ടര്‍ പി.ടി. പ്രസാദ്, വാട്ടര്‍ അഥോറിറ്റി എക്‌സിക്യൂട്ടീവ് എൻജിനിയര്‍മാരായ പി.കെ. സുരേഷ്, ജി.എല്‍. വിഷ്ണു, വിവിധ വകുപ്പ് മേധാവികള്‍, തദ്ദേശസ്ഥാപന സെക്രട്ടറിമാര്‍ തുടങ്ങിയവര്‍ പങ്കെടുത്തു.

വിവരാവകാശ സൗഹൃദ കളക്ടറേറ്റ് : ഓഫീസുകളില്‍ വിവരാവകാശ കമ്മീഷണര്‍ പരിശോധന നടത്തി

കോഴിക്കോട്: കളക്ടറേറ്റിലെ മുഴുവന്‍ ഓഫീസുകളും വിവരാവകാശ സൗഹൃദമാക്കുന്ന പദ്ധതിയുടെ പുരോഗതി വിലയിരുത്തുന്നതിന്‍റെ ഭാഗമായി സംസ്ഥാന വിവരാവകാശ കമ്മീഷണര്‍ അഡ്വ. ടി.കെ. രാമകൃഷ്ണന്‍ വിവിധ ഓഫീസുകളില്‍ പരിശോധന നടത്തി. കളക്ടറേറ്റിലെ റവന്യൂ, ഡിഎംഒ, ആര്‍ടിഒ, എല്‍എസ്ജിഡി, പട്ടികജാതി വികസന ഓഫീസുകളിലാണ് പരിശോധനകള്‍ നടത്തിയത്. ഓഫീസുകളിലെ വിവരാവകാശ ഓഫീസര്‍മാരുടെ പേരുവിവരങ്ങള്‍ ഉള്‍ക്കൊള്ളുന്ന ബോര്‍ഡുകള്‍ സ്ഥാപിക്കുന്നതുള്‍പ്പെടെ, വിവരാവകാശ നിയമപ്രകാരം ഓഫീസുകള്‍ സ്വമേധയാ വെളിപ്പെടുത്തേണ്ട വിവരങ്ങള്‍ പൊതുജനങ്ങള്‍ക്ക് ലഭ്യമാക്കാന്‍ നടപടികള്‍ സ്വീകരിച്ചിട്ടുണ്ടോ എന്ന കാര്യമാണ് നേരിട്ട് പരിശോധിച്ചത്. ഇക്കാര്യങ്ങളില്‍ മികച്ച പുരോഗതി ഓഫീസുകള്‍ കൈവരിച്ചതായി തുടര്‍ന്ന് നടന്ന അവലോകന യോഗത്തില്‍ വിവരാവകാശ കമീഷണര്‍ പറഞ്ഞു. ഓഫീസ് ജീവനക്കാരുടെ വിവരങ്ങള്‍, ഫോണ്‍ നമ്പറുകള്‍, ഓഫീസ് നല്‍കുന്ന സേവനങ്ങള്‍ ഉള്‍പ്പെടെയുള്ള കാര്യങ്ങള്‍ വെബ്‌സൈറ്റുകളില്‍ പ്രസിദ്ധീകരിക്കണം. ഇവ പൊതുജനങ്ങള്‍ക്ക് എളുപ്പത്തില്‍ ലഭ്യമാവുന്ന രീതിയില്‍ ഡിജിറ്റല്‍ രൂപത്തിലാക്കി സൂക്ഷിക്കണമെന്നും അദ്ദേഹം പറഞ്ഞു. വിവരാവകാശ നിയമം പൂര്‍ണമായി നടപ്പാക്കിയ ദിനമായ ഒക്ടോബര്‍ 12ന് കോഴിക്കോട് കളക്ടറേറ്റിനെ വിവരാവകാശ സൗഹൃദമായി പ്രഖ്യാപിക്കുന്നതാണ് പദ്ധതി. ഇതിന്‍റെ ഭാഗമായി വരുംദിനങ്ങളില്‍ കൂടുതല്‍ ഓഫീസുകളില്‍ പരിശോധന നടത്തി പദ്ധതി പ്രവര്‍ത്തനങ്ങള്‍ വേഗത്തിലാക്കും. കളക്ടറേറ്റിലെ ഓഫീസുകള്‍ ഇക്കാര്യത്തില്‍ കൈവരിച്ച പുരോഗതി വിലയിരുത്തുന്നതിനായി എല്ലാ ഓഫീസുകളില്‍നിന്നും ഇതുമായി ബന്ധപ്പെട്ട വിവരങ്ങള്‍ ലഭ്യമാക്കുന്നതിന് നടപടി സ്വീകരിക്കാന്‍ ജില്ലാ കളക്ടര്‍ സ്‌നേഹില്‍ കുമാര്‍ സിംഗ് നിര്‍ദേശം നല്‍കി. വിവരാവകാശ നിയമത്തിലെ 4 (1) ബി വകുപ്പ് പ്രകാരം വിവരാവകാശ അധികാരികള്‍ സ്വമേധയാ സ്വീകരിക്കേണ്ട 17 ഇന നടപടികളിലെ പുരോഗതി വിലയിരുത്തുന്നതിന് ഓഫീസുകള്‍ക്ക് ചെക്ക് ലിസ്റ്റ് നല്‍കും. കളക്ടറുടെ ചേംബറില്‍ ചേര്‍ന്ന യോഗത്തില്‍ സബ് കളക്ടര്‍ ആര്‍. ഗൗതം രാജ്, എഡിഎം പി. സുരേഷ്, എല്‍എസ്ജിഡി ജോയിന്‍റ് ഡയറക്ടര്‍ പി.ടി. പ്രസാദ്, ജില്ലാ ഇന്‍ഫമേഷന്‍ ഓഫീസര്‍ സി.പി. അബ്ദുല്‍ കരീം തുടങ്ങിയവര്‍ പങ്കെടുത്തു.

സ്റ്റാർകെയറിൽ ബൈപോർട്ടൽ എൻഡോസ്കോപിക് നട്ടെല്ല് ശസ്ത്രക്രിയ വിജയകരം

കോഴിക്കോട്: ആരോഗ്യമേഖലയ്ക്ക് അഭിമാനകരമായ നേട്ടം സമ്മാനിച്ച് അതീവ സങ്കീർണമായ എൻഡോസ്കോപിക് സെർവിക്കൽ സ്‌പൈൻ ശസ്ത്രക്രിയ വിജയകരമായി പൂർത്തിയാക്കി കോഴിക്കോട് സ്റ്റാർകെയർ ഹോസ്പിറ്റൽ. പ്രമുഖ സ്പൈൻ സർജൻ ഡോ. ഫസൽ റഹ്മാനാണ് ശസ്ത്രക്രിയയ്ക്ക് നേതൃത്വം നൽകിയത്. 34 വയസുള്ള ഒരു യുവാവിനാണ് ശസ്ത്രക്രിയ നടത്തിയത്. വലതു കൈയിൽ കഠിനമായ വേദന, ബലക്കുറവ് എന്നിവയായിരുന്നു രോഗി അനുഭവച്ചിരുന്ന ബുദ്ധിമുട്ടുകൾ. ബൈപോർട്ടൽ എൻഡോസ്കോപ്പിക് സാങ്കേതികവിദ്യ ഉപയോഗിച്ചുള്ള ഈ ശസ്ത്രക്രിയ വളരെ അപൂർവവും ഉയർന്ന വൈദഗ്ധ്യം ആവശ്യമുള്ളതുമാണ്. 90 മിനിറ്റുകൊണ്ട് രണ്ട് ചെറിയ ദ്വാരങ്ങളിലൂടെയാണ് ഈ ശസ്ത്രക്രിയ പൂർത്തിയാക്കിയത്. ശസ്ത്രക്രിയയ്ക്ക് ശേഷം 12 മണിക്കൂറിനുള്ളിൽ രോഗിയ്ക്ക് നടക്കാൻ സാധിച്ചതായി ഡോക്ടർ ഫസൽ റഹ്മാൻ പറഞ്ഞു. സാധാരണ ശസ്ത്രക്രിയകളെ അപേക്ഷിച്ച് ഈ ചികിത്സാരീതിക്ക് നിരവധി ഗുണങ്ങളുണ്ട്. രക്തസ്രാവം കുറവാണെന്നതും അണുബാധയ്ക്കുള്ള സാധ്യതയില്ലെന്നതും ഇതിന്‍റെ പ്രത്യേകതകളാണ്. കൂടാതെ, വേദന കുറവായതുകൊണ്ട് രോഗിക്ക് വേഗത്തിൽ ആശുപത്രി വിടാനും സാധാരണ ജീവിതത്തിലേക്ക് മടങ്ങാനും സാധിക്കും.

സ്‌നേഹതീരം ഗ്രാന്‍ഡ്മാ ഹോമിന് തറക്കല്ലിട്ടു

കോഴിക്കോട്: ജീവിതത്തില്‍ ഒറ്റപ്പെടലിന്‍റെ നൊമ്പരവുമായി കഴിയുന്ന അമ്മമാര്‍ക്ക് വേണ്ടി ഫാറൂഖ് കോളജ് പരുത്തിപ്പാറ സ്‌നേഹതീരം ഭവനത്തില്‍ മലബാര്‍ ചാരിറ്റബിള്‍ ട്രസ്റ്റിന്‍റെ സഹകരണത്തോടെ നിര്‍മിക്കുന്ന ഗ്രാന്‍ഡ്മാ ഹോമിന്‍റെ ശിലാസ്ഥാപനം മലബാര്‍ ഗ്രൂപ്പ് ചെയര്‍മാന്‍ എം.പി. അഹമ്മദ് നിര്‍വഹിച്ചു. ഹൈദരാബാദിലെ കോയ ആൻഡ് കമ്പനി മാനേജിംഗ് ഡയറക്ടര്‍ ടി.കെ. സലീം ചടങ്ങില്‍ മുഖ്യാതിഥിയായിരുന്നു. എല്ലാ മതവിഭാഗത്തില്‍പ്പെട്ട അമ്മമാര്‍ക്കും പ്രാര്‍ഥനയ്ക്കുള്ള സൗകര്യങ്ങള്‍ അടക്കം ഗ്രാന്‍ഡ്മാ ഹോമില്‍ ഒരുക്കുന്നുണ്ട്. രാമനാട്ടുകര നഗരസഭാധ്യക്ഷ വി.എം. പുഷ്പ, ഫറോക്ക് നഗരസഭാധ്യക്ഷന്‍ എന്‍.സി. അബ്ദുൾ റസാഖ്, ഉപാധ്യക്ഷന്‍ പി.കെ. അബ്ദുൾ ലത്തീഫ്, വികെസി ഗ്രൂപ്പ് ചെയര്‍മാന്‍ വികെസി മമ്മദ് കോയ, രാമകൃഷ്ണ ശാരദാമിഷന്‍ സെക്രട്ടറി പ്രവാജിക രാധാപ്രാണ മാതാജി, സ്‌നേഹതീരം ട്രസ്റ്റ് അംഗങ്ങളായ എം.സി. അക്ബര്‍, കെ.ടി. കബീര്‍, സിദ്ദീഖ് കോടമ്പുഴ തുടങ്ങിയവര്‍ പ്രസംഗിച്ചു. അഗതികളായ അമ്മമാരെ സംരക്ഷിക്കുകയും പുനരധിവസിപ്പിക്കുകയും ചെയ്യുന്നതിനായി മലബാര്‍ ഗ്രൂപ്പിന്‍റെ ഗ്രാന്‍ഡ്മാ ഹോമുകള്‍ ഇപ്പോള്‍ ബംഗളൂരുവിലും ഹൈദരാബാദിലും പ്രവര്‍ത്തിക്കുന്നുണ്ട്. കൂടുതല്‍ സംസ്ഥാനങ്ങളില്‍ ഗ്രാന്‍ഡ്മാ ഹോമുകള്‍ ആരംഭിക്കും. കേരളത്തില്‍ വയനാട്, തൃശൂര്‍, നെടുമ്പാശേരി, കൊടുവള്ളി എന്നിവിടങ്ങളില്‍ ഗ്രാന്‍ഡ്മാ ഹോമുകളുടെ നിര്‍മാണം പുരോഗമിച്ചുകൊണ്ടിരിക്കുകയാണ്.

ഓണം സമ്മാനിക്കുന്നത് പറുദീസ അനുഭവം: ആര്‍ച്ച് ബിഷപ് ഡോ. ചക്കാലയ്ക്കല്‍

കോഴിക്കോട്: ഓണം സമ്മാനിക്കുന്നത് പറുദീസ അനുഭവമാണെന്ന് കോഴിക്കോട് ആര്‍ച്ച്ബിഷപ് ഡോ. വര്‍ഗീസ് ചക്കാലയ്ക്കല്‍. ദീപിക കോഴിക്കോട് യൂണിറ്റിന്‍റെ ഓണാഘോഷം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സമത്വ സുന്ദരമായ, കള്ളവും ചതിയുമില്ലാത്ത, എല്ലാവരെയും ഒരു പോലെ കാണുന്ന സമഭാവനയാണ് പറുദീസ നമുക്ക് നല്‍കുന്ന പ്രത്യാശ. ആ അര്‍ഥത്തില്‍ ഓണം സമ്മാനിക്കുന്നത് നന്മയുടെയും സന്തോഷത്തിന്‍റെയും സ്‌നേഹത്തിന്‍റെയും പറുദീസയാണ്. ജാതി, മത, വര്‍ഗ ഭേദമില്ലാതെ എല്ലാവരും തമ്മില്‍ കൂട്ടുകൂടുന്ന അവസരം കൂടിയാണ് ഓണം. ആ അര്‍ഥത്തില്‍ എന്നും ഓണമായിരുന്നുവെങ്കില്‍ എന്ന് ആശിക്കുന്നതായും ആര്‍ച്ച് ബിഷപ് പറഞ്ഞു. അശോകപുരം ഇന്‍ഫന്‍റ് ജീസസ് പള്ളി വികാരി ഫാ. ബിനു കുളത്തിങ്കല്‍ അധ്യക്ഷത വഹിച്ചു. കോഴിക്കോട് ജീവന ഡയറക്ടര്‍ ഫാ. ആല്‍ഫ്രഡ് വി.സി, ദീപിക റെസിഡന്‍റ് മാനേജര്‍ ഫാ. ഷെറിന്‍ പുത്തന്‍പുരയ്ക്കല്‍, ആര്‍ച്ച് ബിഷപ്‌സ് സെക്രട്ടറി ഫാ. റെനി ഇമ്മാനുവേല്‍, ദീപിക എജിഎം പ്രിന്‍സി ജോസ്, പരസ്യവിഭാഗം മാനേജര്‍ ബ്രിജോ ആന്‍റണി, കോഴിക്കോട് ബ്യൂറോ ചീഫ് എം. ജയതിലകന്‍ തുടങ്ങിയവര്‍ പ്രസംഗിച്ചു. ഓണം മത്സരങ്ങൾക്ക് ഡിസിഎല്‍ ഡയറക്ടര്‍ ഫാ. സായി പാറന്‍കുളങ്ങര നേതൃത്വം നല്‍കി. രമേഷ് കോട്ടൂളി, ജീന , ഷനോജ് എന്നിവര്‍ ഗാനങ്ങള്‍ ആലപിച്ചു.

ഭൂപ്രകൃതിക്കനുസരിച്ച് വിളകള്‍ കൃഷി ചെയ്യണം: മന്ത്രി ശശീന്ദ്രന്‍

കോഴിക്കോട്: വിവിധ പ്രദേശങ്ങളിലെ ഭൂപ്രകൃതി മനസിലാക്കി വിളകള്‍ കൃഷി ചെയ്യുമ്പോള്‍ മാത്രമേ കാര്‍ഷിക മേഖല വികസിക്കൂവെന്ന് മന്ത്രി എ.കെ. ശശീന്ദ്രന്‍. ലോക നാളികേര ദിനത്തിന്‍റെ ഭാഗമായി കോഴിക്കോട് പാളയം ചിന്താവളപ്പ് ശിക്ഷക് സദനില്‍ നടന്ന "കുറ്റ്യാടി കേര സമൃദ്ധി മിഷന്‍റെ'യും സെമിനാറിന്‍റെയും ഉദ്ഘാടനം നിര്‍വഹിക്കുകയായിരുന്നു മന്ത്രി. ഭൂവിനിയോഗവും ശാസ്ത്രീയ ജലസേചനവും കൂടിച്ചേരുമ്പോള്‍ മാത്രമേ മികച്ച നിലയിലുള്ള വിളവ് ലഭിക്കൂ. കാര്‍ഷിക സമൃദ്ധിയുടെയും വിളസമൃദ്ധിയുടെയും ഒരു കാലഘട്ടം ഉണ്ടാക്കിയെടുക്കുന്നതിനായാണ് സര്‍ക്കാര്‍ പുതിയ പദ്ധതികള്‍ മുന്നോട്ടുവയ്ക്കുന്നത്. കേരളം എന്ന സങ്കല്‍പ്പം നിലനില്‍ക്കണമെങ്കില്‍ നാളികേരവുമായി ബന്ധപ്പെട്ട വികാസ പ്രക്രിയയില്‍ സംഭാവന നല്‍കണമെന്നും മന്ത്രി ആവശ്യപ്പെട്ടു. കുറ്റ്യാടി തെങ്ങിന്‍റെ സാധ്യതകള്‍ പ്രയോജനപ്പെടുത്തി കോഴിക്കോട് ജില്ലയിലെ കുന്നുമ്മല്‍ ബ്ലോക്കില്‍ സമഗ്ര തെങ്ങു വികസന പരിപാടിക്ക് രൂപം നല്‍കി. പ്രാദേശിക ഭരണകൂടം, ദേശീയ, സംസ്ഥാന സര്‍ക്കാര്‍ വകുപ്പുകള്‍, കര്‍ഷകര്‍, വനിതാ കൂട്ടായ്മകള്‍ എന്നിവരുടെ പിന്തുണയോടെയാണ് പദ്ധതി നടപ്പാക്കുന്നത്. മിഷന്‍റെ പ്രധാന ലക്ഷ്യങ്ങളില്‍ ഒന്നായ "കാര്‍ഷിക ടൂറിസത്തിന്‍റെ വികസനം: കുറ്റ്യാടി കോക്കനട്ട് ടു ദി വേള്‍ഡ്' എന്ന പദ്ധതിയും സെമിനാറില്‍ ചര്‍ച്ച ചെയ്തു. ചടങ്ങില്‍ കെ.പി. കുഞ്ഞമ്മദ് കുട്ടി എംഎല്‍എ അധ്യക്ഷത വഹിച്ചു. കുന്നുമ്മല്‍ ബ്ലോക്ക് പഞ്ചായത്ത് പ്രസിഡന്‍റ് കെ.പി. ചന്ദ്രി, കോഴിക്കോട് മുനിസിപ്പല്‍ കോര്‍പറേഷന്‍ വാര്‍ഡ് കൗണ്‍സിലര്‍ പി.കെ. നാസര്‍, ഭൂവിനിയോഗ കമ്മീഷണര്‍ യാസ്മിന്‍ എല്‍. റഷീദ്, ഭൂവിനിയോഗ വകുപ്പ് ജോയിന്‍റ് ഡയറക്ടര്‍ ടീന ഭാസ്‌കരന്‍ തുടങ്ങിയവര്‍ പങ്കെടുത്തു.

വയനാടന്‍ റോബസ്റ്റ കാപ്പിയുടെ ആഗോള ബ്രാന്‍ഡിംഗ് : ക്ലൈമറ്റ് സ്മാര്‍ട്ട് കോഫി പ്രോജക്ടിന് മൂന്നുകോടി രൂപയുടെ ഭരണാനുമതി

ബിനു ജോര്‍ജ് കോഴിക്കോട്: വയനാടന്‍ കാപ്പിയുടെ ആഗോളതല ബ്രാന്‍ഡിംഗ് അടക്കമുള്ള സമഗ്ര കര്‍ഷക പ്രോത്സാഹന പദ്ധതികള്‍ നടപ്പാക്കാന്‍ കാര്‍ബണ്‍ ന്യൂട്രല്‍ കോഫി പാര്‍ക്ക് പ്രോജക്ടിന്‍റെ ഭാഗമായി തയാറാക്കിയ ക്ലൈമറ്റ് സ്മാര്‍ട്ട് കോഫി പ്രോജക്ടിന് സംസ്ഥാന സര്‍ക്കാര്‍ മൂന്നു കോടി രൂപയുടെ ഭരണാനുമതി നല്‍കി. 2025-2026 സാമ്പത്തിക വര്‍ഷത്തെ സംസ്ഥാന ബജറ്റില്‍ ഉള്‍പ്പെടുത്തിയിട്ടുള്ള പദ്ധതി വ്യവസായ വകുപ്പിന് കീഴിലുള്ള കേരള കോഫി ലിമിറ്റഡാണ് നടപ്പാക്കുക. പദ്ധതി നടത്തിപ്പിനായി സര്‍ക്കാര്‍ തലത്തില്‍ രൂപവത്കരിച്ച സ്‌പെഷല്‍ പര്‍പ്പസ് വെഹിക്കിളാണ് കേരള കോഫി ലിമിറ്റഡ്. കാലാവസ്ഥാ വ്യതിയാനത്തെ പ്രതിരോധിക്കുന്ന കൃഷിരീതികള്‍ പ്രോത്സാഹിപ്പിക്കുക, കര്‍ഷകരുടെ വരുമാനം വർധിപ്പിക്കുക, വയനാടന്‍ കാപ്പിക്ക് അന്താരാഷ്ട്രതലത്തില്‍ പ്രീമിയം ബ്രാന്‍ഡിംഗ് നല്‍കുക എന്നിവയാണ് പദ്ധതിയുടെ പ്രധാന ലക്ഷ്യങ്ങള്‍. പദ്ധതിയുടെ പ്രാഥമിക ഗുണഭോക്താക്കള്‍ വയനാട് ജില്ലയിലെ കാപ്പി കര്‍ഷകരാണ്. സാങ്കേതികവിദ്യ, വിഭവങ്ങള്‍, മെച്ചപ്പെട്ട വിപണികള്‍ എന്നിവയിലേക്ക് നേരിട്ടുള്ള പ്രവേശനം ലഭിക്കുന്നതിലൂടെ കര്‍ഷകര്‍ക്ക് അവരുടെ ഉത്പാദനക്ഷമതയും വരുമാനവും വര്‍ധിക്കും. കര്‍ഷക കൂട്ടായ്മകള്‍, വ്യാപാരികള്‍, സംരംഭകര്‍ എന്നിവര്‍ പദ്ധതിയുടെ പരോക്ഷ ഗുണഭോക്താക്കളാണ്. ഈ പദ്ധതി വയനാടന്‍ കാപ്പിക്ക് മാത്രമല്ല, കേരളത്തിന്‍റെ കാര്‍ഷിക മേഖലയ്ക്ക് മുഴുവന്‍ ഒരു വഴികാട്ടിയായിട്ടാണ് സര്‍ക്കാര്‍ കരുതുന്നത്. കാലാവസ്ഥാവ്യതിയാനത്തെ പ്രതിരോധിക്കാനുള്ള ആഗോള ശ്രമങ്ങള്‍ക്കിടയില്‍ കാര്‍ബണ്‍ ന്യൂട്രല്‍ കാപ്പി ഉത്പാദന മാതൃക വികസിപ്പിക്കാനുള്ള ശ്രമം ഒരു പുതിയ മാതൃക സൃഷ്ടിക്കും. ഇത് "വയനാട് റോബസ്റ്റ' എന്ന ബ്രാന്‍ഡിന് ആഗോളതലത്തില്‍ "കാര്‍ബണ്‍ ന്യൂട്രല്‍', "ഫെയര്‍ ട്രേഡ്' പോലുള്ള പദവികള്‍ നേടാന്‍ സഹായിക്കുമെന്നാണ് പ്രതീക്ഷ. കര്‍ഷക കൂട്ടായ്മകള്‍ക്ക് കൂടുതല്‍ സഹകരണത്തിലൂടെയും കൂട്ടായ വിലപേശല്‍ ശേഷിയിലൂടെയും നേട്ടമുണ്ടാക്കാന്‍ കഴിയും. ഉയര്‍ന്ന നിലവാരമുള്ള, സര്‍ട്ടിഫൈഡ് ഉത്പന്നങ്ങള്‍ ലഭ്യമാകുന്നതിലൂടെ വ്യാപാരികള്‍ക്കും സംരംഭകര്‍ക്കും അവരുടെ ബിസിനസ് സാധ്യതകള്‍ വിപുലീകരിക്കാനും വിപണി വ്യാപനം വര്‍ധിപ്പിക്കാനും സാധിക്കും. കര്‍ഷകര്‍ മുതല്‍ സംരംഭകര്‍ വരെയുള്ളവരാണ് പദ്ധതിയുടെ ഗുണഭോക്താക്കള്‍. ക്ലൈമറ്റ് സ്മാര്‍ട്ട് കോഫി പ്രോജക്ട് കേവലം ഒരു കാര്‍ഷിക സഹായ പദ്ധതിക്കപ്പുറം വയനാട്ടിലെ കാപ്പി വ്യവസായത്തെ ആഗോള നിലവാരത്തിലേക്ക് ഉയര്‍ത്താനുള്ള സമഗ്ര നയരേഖയാണ്. പരിസ്ഥിതിയെ സംരക്ഷിച്ചുകൊണ്ടുള്ള കാര്‍ഷിക ഉത്പന്നങ്ങള്‍ക്കായുള്ള ഉപഭോക്താക്കളുടെ വര്‍ധിച്ചുവരുന്ന ആവശ്യം തിരിച്ചറിഞ്ഞാണ് പദ്ധതി തയാറാക്കിയത്. ഇത് വയനാടന്‍ കാപ്പിയെ സുസ്ഥിര കാപ്പി കൃഷിയുടെ മാതൃകയായി ഉയര്‍ത്തിക്കാട്ടുകയും പ്രാദേശിക കര്‍ഷകര്‍ക്കും പരിസ്ഥിതിക്കും ഗുണനിലവാരമുള്ള കാപ്പി തേടുന്ന ഉപഭോക്താക്കള്‍ക്കും ഒരുപോലെ പ്രയോജനകരമാവുകയും ചെയ്യും. പദ്ധതി വിഭാവനം ചെയ്തിരിക്കുന്നത് കേന്ദ്രീകൃത "ഹബ് ആന്‍ഡ് സ്‌പോക്ക്' ശൃംഖലയെ അടിസ്ഥാനമാക്കിയാണ്. "കാര്‍ബണ്‍ സ്മാര്‍ട്ട് വില്ലേജ് കോഫി പാര്‍ക്ക്' എന്ന് വിശേഷിപ്പിക്കപ്പെടുന്ന ഈ കേന്ദ്രം, പരിശീലനം, സാങ്കേതിക സഹായം, ഗുണമേന്മ പരിശോധന, മാര്‍ക്കറ്റിംഗ് തുടങ്ങിയ എല്ലാ പിന്തുണകളും ഒരു കുടക്കീഴില്‍ ലഭ്യമാക്കും. ഈ ഹബ്ബില്‍ നിന്നും വിഭവങ്ങളും അറിവും പ്രാദേശിക കര്‍ഷകരിലേക്ക് എത്തിക്കും. കേവലം ഉത്പാദനം വര്‍ധിപ്പിക്കുക എന്നതിലുപരി, ഉത്പന്നത്തിന്‍റെ മുഴുവന്‍ മൂല്യശൃംഖലയിലും സുസ്ഥിരത ഉറപ്പാക്കുക എന്നതാണ് ഇതിലൂടെ ലക്ഷ്യമിടുന്നത്. കാലാവസ്ഥാ വ്യതിയാനത്തെ പ്രതിരോധ പദ്ധതികള്‍ക്ക് 30 ലക്ഷം, യന്ത്രവല്‍ക്കരണം 20 ലക്ഷം, ജലസേചനം 20 ലക്ഷം, സംഭരണം 25 ലക്ഷം, അന്താരാഷ്ട്ര സമ്മേളനങ്ങളില്‍ പങ്കെടുക്കുന്നതിനും ഉത്പന്ന വികസനത്തിനും 15 ലക്ഷം, വിപണനം പ്രോത്സാഹിപ്പിക്കുന്നതിന് 15 ലക്ഷം എന്നിങ്ങനെയാണ് തുക വിനിയോഗിക്കുക.

യുവതി മരിച്ച നിലയിൽ

തിരുവമ്പാടി: യുവതിയെ വീടിന് സമീപം മരിച്ച നിലയിൽ കണ്ടെത്തി. പുല്ലുരാംപാറ പള്ളിപ്പടി പനച്ചിക്കൽ പാലത്തിനു സമീപം താമസിക്കുന്ന ഡ്രൈവർ ധനീഷിന്‍റെ ഭാര്യ പ്രിയയെ (28) ആണ് മരിച്ച നിലയിൽ കണ്ടെത്തിയത്. അസ്വാഭാവിക മരണത്തിന് തിരുവമ്പാടി പോലീസ് കേസ് എടുത്തു. മക്കൾ: ധ്യാൻ, ദിയ. സംസ്കാരം നടത്തി.

ഓണസമൃദ്ധി വിപണി ജില്ലാതല ഉദ്ഘാടനം

കോഴിക്കോട്: കൃഷി വകുപ്പിന്‍റെ നേതൃത്വത്തില്‍ നടത്തുന്ന "ഓണസമൃദ്ധി 2025' പഴം-പച്ചക്കറി വിപണിയുടെ ജില്ലാതല ഉദ്ഘാടനം എടച്ചേരി ഗ്രാമപഞ്ചായത്തില്‍ കര്‍ഷകരില്‍നിന്ന് പച്ചക്കറികള്‍ ഏറ്റുവാങ്ങി ഇ.കെ. വിജയന്‍ എംഎല്‍എ നിര്‍വഹിച്ചു. എടച്ചേരി കൃഷിഭവന്‍റെ നേതൃത്വത്തില്‍ ഗ്രാമപഞ്ചായത്ത് കമ്യൂണിറ്റി ഹാളില്‍ നടന്ന ചടങ്ങില്‍ ഗ്രാമപഞ്ചായത്ത് പ്രസിഡന്‍റ് എന്‍. പത്മിനി അധ്യക്ഷത വഹിച്ചു. ജില്ലാ കൃഷി ഓഫീസര്‍ ടി.പി. അബ്ദുൾ മജീദ് പദ്ധതി വിശദീകരിച്ചു. ആദ്യവില്‍പ്പന തൂണേരി ബ്ലോക്ക് പഞ്ചായത്ത് വൈസ് പ്രസിഡന്‍റ് കെ.എം. അരവിന്ദാക്ഷന്‍ നിര്‍വഹിച്ചു. വൈസ് പ്രസിഡന്‍റ് എം. രാജന്‍, കൃഷി അസിസ്റ്റന്‍റ് ഡയറക്ടര്‍ പി. വിദ്യ, രാജന്‍ കൊല്ലൊത്ത്, എൻ. നിഷ, ഷീമ വള്ളില്‍, ടി.വി. ഗോപാലന്‍, സി. സുരേന്ദ്രന്‍, ഗംഗാധരന്‍ പാച്ചാക്കര, എം.എം. അശോകന്‍, കൃഷി ഓഫീസര്‍ ജിന്‍സി തുടങ്ങിയവര്‍ സംസാരിച്ചു. നാടന്‍ പച്ചക്കറികളും കേരളഗ്രോ ബ്രാന്‍ഡഡ് ഉത്പന്നങ്ങളും നാളികേര വികസന കോര്‍പറേഷന്‍റെ വെളിച്ചെണ്ണയും എഫ്പിഒകളുടെ മറ്റുല്‍പ്പന്നങ്ങളും ഓണവിപണിയില്‍ ലഭ്യമാകും. കര്‍ഷകരില്‍നിന്ന് പച്ചക്കറികളും വാഴക്കുലയും വിപണി വിലയേക്കാള്‍ അധികനിരക്കില്‍ സംഭരിച്ച് കുറഞ്ഞ നിരക്കിലാണ് പച്ചക്കറിച്ചന്തയില്‍ ലഭ്യമാക്കുന്നത്.

പദ്ധതികളുടെ പേരില്‍ സര്‍ക്കാര്‍ വഞ്ചന കാട്ടുന്നു: ഡിസിസി പ്രസിഡന്‍റ്

കോഴിക്കോട്: ജനങ്ങളുടെ ജീവനും സുരക്ഷയും ഉറപ്പാക്കേണ്ട സര്‍ക്കാര്‍ പദ്ധതികളുടെയും പ്രഖ്യാപനങ്ങളുടെയും പേരില്‍ വഞ്ചന നടത്തുകയാണെന്ന് ഡിസിസി പ്രസിഡന്‍റ് അഡ്വ. കെ.പ്രവീണ്‍കുമാര്‍. കര്‍ഷക കോണ്‍ഗ്രസ് കോഴിക്കോട് ജില്ലാ നേതൃയോഗം ഉദ്ഘാടനം ചെയ്യുകയായിരുന്നു അദ്ദേഹം. കേരളത്തിലെ ഗ്രാമപ്രദേശങ്ങള്‍ വന്യജീവികളുടെ ആക്രമണത്തില്‍ കരഞ്ഞുകൊണ്ടിരിക്കുകയാണെന്ന് അദ്ദേഹം പറഞ്ഞു. കഴിഞ്ഞ ഒമ്പതു വര്‍ഷത്തിനിടെ മാത്രം 400-ഓളം പഞ്ചായത്തുകളില്‍ നടന്ന ആക്രമണങ്ങളില്‍ 884 പേര്‍ക്ക് ജീവന്‍ നഷ്ടപ്പെട്ടു. ആയിരങ്ങള്‍ പരിക്കേറ്റ് ജീവിതം തകര്‍ന്ന് കിടപ്പിലായി. എന്നാല്‍, സര്‍ക്കാരിന്‍റെ ഇടപെടല്‍ വട്ടപൂജ്യമാണെന്നും ജനങ്ങളുടെ ജീവന്‍കൊണ്ടാണ് സര്‍ക്കാര്‍ രാഷ്ട്രീയം കളിക്കുന്നതെന്നും അദ്ദേഹം പറഞ്ഞു. വന്യജീവി ആക്രമണം തടയാന്‍ 12 ഭൂഭാഗങ്ങളായി തിരിച്ചുള്ള പദ്ധതി വരുന്നു എന്നത് ജനങ്ങളെ പറ്റിക്കുകയാണ്. നടപ്പാകാത്ത പദ്ധതികളുടെ പേരില്‍, പ്രതിഷേധങ്ങളെ അടിച്ചമര്‍ത്താന്‍ സര്‍ക്കാരിന്‍റെ രാഷ്ട്രീയ കളി തുടര്‍ന്നുകൊണ്ടിരിക്കുന്നു.ആന, പുലി, കാട്ടുപോത്ത് തുടങ്ങി വന്യജീവികള്‍ ജനവാസ മേഖലകളിലേക്ക് ഇറങ്ങിക്കൊണ്ടിരിക്കുമ്പോള്‍ അവയെ നിയന്ത്രിക്കുന്നതിനുള്ള യാതൊരു നടപടിയും ഇല്ല. വനപാലകര്‍ക്കു ലഭിക്കുന്ന നിയമ സംരക്ഷണം പൊതുജനങ്ങള്‍ക്കും ലഭിക്കണമെന്ന ആവശ്യം സര്‍ക്കാര്‍ അവഗണിക്കുകയാണ്. ജനവാസ മേഖലകളില്‍ ഇറങ്ങുന്ന വന്യമൃഗങ്ങളെ കൊല്ലാന്‍ സ്വതന്ത്ര നിയമനിര്‍മാണം നടത്തണം. ജെല്ലിക്കെട്ട് വിഷയത്തില്‍ കര്‍ണാടക, തമിഴ്‌നാട്, മഹാരാഷ്ട്ര സര്‍ക്കാരുകള്‍ സംസ്ഥാന താത്പര്യം സംരക്ഷിക്കാനായി കേന്ദ്രനിയമം നിലനില്‍ക്കെ തന്നെ സംസ്ഥാന തലത്തില്‍ സ്വതന്ത്ര നിയമനിര്‍മാണം നടത്തിയ കാര്യം അദ്ദേഹം ചൂണ്ടിക്കാട്ടി. ജില്ലാ പ്രസിഡന്‍റ് അഡ്വ. ബിജു കണ്ണന്തറ അധ്യക്ഷത വഹിച്ചു. പി.എം അബ്ദുറഹിമാന്‍, രവീഷ് വളയം, ജോസ് കരിവേലി,സി.എം സദാശിവന്‍, പാപ്പച്ചന്‍ കൂനന്തടം, പി.എ ചാക്കോ പിള്ളച്ചിറ, പി.എം. രാധാകൃഷ്ണന്‍, സുശാന്ത് വളയം, കെ.വി. പ്രസാദ്, ടി.എന്‍ അബ്ദുള്‍ നാസര്‍, സുനില്‍ പ്രകാശ്, സോജന്‍ ആലക്കല്‍, ശരീഫ് വെളിമണ്ണ, സുജിത്ത് കറ്റോട്, റഫീഖ് പുതിയപാലം, സത്യേന്ദ്രന്‍, അസ്ലം കടമേരി, കമറുദ്ദീന്‍ അടിവാരം എന്നിവര്‍ സംസാരിച്ചു.

"കാരണവര്‍ക്കൂട്ടം' വയോജന സംഗമം സംഘടിപ്പിച്ചു

കൊയിലാണ്ടി: കൊയിലാണ്ടി നഗരസഭയില്‍ സംഘടിപ്പിച്ച "കാരണവര്‍ക്കൂട്ടം' വയോജനസംഗമം ചെയര്‍പേഴ്സണ്‍ സുധ കിഴക്കേപ്പാട്ട് ഉദ്ഘാടനം ചെയ്തു. ഇഎംഎസ് ടൗണ്‍ഹാളില്‍ നടന്ന പരിപാടിയില്‍ വൈസ് ചെയര്‍പേഴ്സണ്‍ അഡ്വ. കെ. സത്യന്‍ അധ്യക്ഷത വഹിച്ചു. സ്ഥിരംസമിതി അധ്യക്ഷരായ അജിത്, ഇന്ദിര, കൗണ്‍സിലര്‍ രമേശന്‍, വത്സരാജ്, ഐസിഡിഎസ് സൂപ്പര്‍വൈസര്‍മാരായ മോനിഷ, കെ.കെ. അനുഷ, സിഡിഎസ് ചെയര്‍പേഴ്സണ്‍ ഇന്ദുലേഖ എന്നിവര്‍ സംസാരിച്ചു. ഐസിഡിഎസ് സൂപ്പര്‍വൈസര്‍ ടി.കെ. റുഫീല പദ്ധതി വിശദീകരിച്ചു. വാര്‍ഷിക പദ്ധതിയില്‍നിന്ന് 75,000 രൂപ വകയിരുത്തിയ പദ്ധതികൊണ്ട് വയോജനങ്ങളുടെ ശാരീരിക, മാനസിക ഉല്ലാസമാണ് ലക്ഷ്യമിടുന്നത്.കുഞ്ചന്‍ നമ്പ്യാര്‍ അവാര്‍ഡ്, കേരള കലാമണ്ഡലം അവാര്‍ഡ്, വയോജന അവാര്‍ഡ് എന്നിവ ലഭിച്ച മുചുകുന്ന് പത്മനാഭന്‍ ഓട്ടന്‍തുള്ളല്‍ അവതരിപ്പിച്ചു.

വ്യാപാരിയുടെ കുടുംബത്തിന് 10 ലക്ഷം രൂപ സഹായധനം നല്‍കി ഏകോപനസമിതി

വിലങ്ങാട്: മരണപ്പെട്ട വിലങ്ങാട്ടെ വ്യാപാരി ചൂരപ്പൊയ്കയില്‍ ജെയിംസ്‌കുട്ടിയുടെ കുടുംബത്തിന് വ്യാപാരി വ്യവസായി ഏകോപന സമിതി കോഴിക്കോട് ജില്ലാ കമ്മിറ്റി ആശ്വാസ് പദ്ധതിയിലൂടെ 10 ലക്ഷം രൂപ നല്‍കി. ഏകോപന സമിതിയുടെ ഇത്തരം പ്രവവൃത്തികള്‍ മാതൃകപരമാണെന്ന് പരിപാടി ഉദ്ഘാടനം ചെയ്ത ടി. സിദ്ദിഖ് എംഎല്‍എ പറഞ്ഞു. ഏരത് ഇക്ബാല്‍ അധ്യക്ഷത വഹിച്ചു. ജില്ലാ പ്രസിഡന്‍റ് ബാപ്പുഹാജി, കെ.വി.എം. കബീര്‍, വിലങ്ങാട് സെന്‍റ് ജോര്‍ജ് ഫൊറോന ചര്‍ച്ച് വികാരി ഫാ. വില്‍സണ്‍ മുട്ടത്തുകുന്നേല്‍, മഞ്ഞക്കുന്ന് സെന്‍റ് അല്‍ഫോന്‍സ ചര്‍ച്ച് വികാരി ഫാ. ബോബി പൂവത്തിങ്കല്‍, വാണിമേല്‍ പഞ്ചായത്ത് വൈസ് പ്രസിഡന്‍റ് സെല്‍മ രാജു, ജെന്‍സി കൊടിമരത്തുംമൂട്ടില്‍, അല്‍ഫോന്‍സ റോബിന്‍, അബ്ബാസ് കണേക്കല്‍, ഏബ്രഹാം തടത്തില്‍, കുഞ്ഞമ്മദ് വാണിമേല്‍, ജലീല്‍ കവൂര്‍, വിനോയ് തോമസ്, റെനി തോമസ്, ഷെബി സെബാസ്റ്റ്യന്‍, സിബി വട്ടക്കൂന്നേല്‍, സോയൂസ് ജോസഫ്, ഡെന്നിസ് പന്തിരുവേലില്‍ തുടങ്ങിയവര്‍ സംസാരിച്ചു. നവീകരിച്ച പുതിയ ഓഫീസിന്‍റെ ഉദ്ഘാടനം ബാപ്പുഹാജി നിര്‍വഹിച്ചു.

ഓണാഘോഷം സംഘടിപ്പിച്ചു

താമരശേരി: ചമല്‍ അംബേദ്കര്‍ സാംസ്‌കാരിക നിലയം-വായനശാല ഓണാഘോഷ പരിപാടികള്‍ നടത്തി. കലാ,കായിക മത്സരങ്ങളുടെ ഉദ്ഘാടനം മഴവില്‍ മനോരമ താരങ്ങളായ അനന്തുവും അഭിമന്യുവും ചേര്‍ന്ന് നിര്‍വഹിച്ചു. അംബേദ്കര്‍ സാംസ്‌കാരിക നിലയം പ്രസിഡന്‍റ് കെ.വി. സെബാസ്റ്റ്യന്‍ അധ്യക്ഷത വഹിച്ചു. കെ.പി.രാജന്‍, പി.എം. രതിഷ്, അശോകന്‍ കാരപറ്റ, ഗോകുല്‍ ചമല്‍, വിവേക് കൃഷ്ണന്‍, ഷീലത, എന്‍.കെ.ബിനു തുടങ്ങിയവര്‍ നേതൃത്വം നല്‍കി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]