കെസിവൈഎം കേരള നവീകരണ യാത്രയ്ക്ക് സ്വീകരണം നൽകി

സുൽത്താൻ ബത്തേരി: ’യുവത്വത്തിന്‍റെ കണ്ണുകളിലൂടെ കേരള സമൂഹത്തിന്‍റെ വികസനം’ എന്ന മുദ്രാവാക്യവുമായി കെസിവൈഎം സംസ്ഥാന പ്രസിഡന്‍റ് എബിൻ കണിവയലിൽ നയിക്കുന്ന കേരള നവീകരണ യാത്രയ്ക്ക് മാനന്തവാടി, ബത്തേരി രൂപതകളുടെ നേതൃത്വത്തിൽ സ്വതന്ത്ര മൈതാനിയിൽ സ്വീകരണം നൽകി.

മുനിസിപ്പൽ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ ടോം ജോസ് ഉദ്ഘാടനം ചെയ്തു. കെസിവൈഎം മാനന്തവാടി രൂപത പ്രസിഡന്‍റ് ബിബിൻ പിലാപ്പള്ളിയിൽ അധ്യക്ഷത വഹിച്ചു.

ജാഥാ ക്യാപ്റ്റൻ എബി കണിവയലിൽ മുഖ്യപ്രഭാഷണം നടത്തി. എംസിവൈഎം ബത്തേരി രൂപത പ്രസിഡന്‍റ് എബി ഏബ്രഹാം, കെസിവൈഎം സംസ്ഥാന ഡയറക്ടർ ഫാ.ഡിറ്റോ കൂള, സംസ്ഥാന കമ്മിറ്റി അംഗങ്ങളായ ജോബിൻ ജോസ്,

ജിബി ഏലിയാസ്, വിപിൻ ജോസഫ്, ജീന ജോർജ്, മാനന്തവാടി രൂപത ഡയറക്ടർ ഫാ.സാന്‍റോ അന്പലത്തറ, വിമൽ കൊച്ചുപുരയ്ക്കൽ, അനിസ്റ്റാ പി. മാർക്കോസ് എന്നിവർ പ്രസംഗിച്ചു.

ADVERTISEMENT

ചുരം ബദൽപാതകൾ യാഥാർഥ്യമാക്കണം; കോണ്‍ഗ്രസ് പ്രതിഷേധസദസ് നടത്തി

കൽപ്പറ്റ: വികസനത്തിന്‍റെ കാര്യത്തിൽ വയനാടിനോട് പിണറായി സർക്കാർ കാണിക്കുന്നത് നിഷേധാത്മക നടപടികളാണെന്ന് സജീവ് ജോസഫ് എംഎൽഎ. വയനാട് ചുരം റോഡിൽ സുരക്ഷിത യാത്രയ്ക്ക് സൗകര്യമൊരുക്കുക, ചിപ്പിലിത്തോട് - മരുതിലാവ് - തളിപ്പുഴ ചുരം ബൈപാസ് ഉടൻ ടെൻഡർ ചെയ്യുക, പടിഞ്ഞാറത്തറ - പൂഴിത്തോട് റോഡ് യാഥാർഥ്യമാക്കുക തുടങ്ങിയ ആവശ്യങ്ങൾ ഉന്നയിച്ച് വയനാട് ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തിൽ ലക്കിടിയിൽ ചുരം കവാടത്തിന് സമീപം നടത്തിയ പ്രതിഷേധസദസ് ഉദ്ഘാടനം ചെയ്യുകയായിരുന്നു അദ്ദേഹം. വയനാട്ടിലെ ജനങ്ങളുടെ ജീവിതത്തെ ഗുരുതരമായി ബാധിക്കുന്ന വിഷയമാണ് ചുരത്തിലെ യാത്രാ പ്രശ്നം. ദുരന്തങ്ങൾക്കും ദുരിതങ്ങൾക്കും നടുവിൽ കഴിയേണ്ട അവസ്ഥയിലാണ് ജില്ലയിലെ ജനങ്ങൾ. സഞ്ചാരസ്വാതന്ത്ര്യമോ മതിയായ ചികിത്സാസൗകര്യമോ ഇവിടയില്ല. എല്ലാത്തരത്തിലും കൂട്ടിലടയ്ക്കപ്പെട്ട സാഹചര്യമാണ്. ഇക്കഴിഞ്ഞ 26ന് ചുരത്തിൽ മണ്ണിടിച്ചിലുണ്ടായപ്പോൾ വഴി തന്നെ അടഞ്ഞ അവസ്ഥയുണ്ടായെന്നും അദ്ദേഹം ചൂണ്ടിക്കാട്ടി. വയനാടിന്‍റെ വിവിധ വിഷയങ്ങളോടുള്ള ഇടതുസർക്കാരിന്‍റെ അനങ്ങാപ്പാറനയം തിരുത്തണം. മുന്പത്തേക്കാൾ ഗുരുതരമാണ് ചുരത്തിലെ ഇന്നത്തെ സാഹചര്യം. എന്നാൽ ന്യായങ്ങൾ പറഞ്ഞും നിസാര കാരണങ്ങൾ കണ്ടെത്തിയും റോഡ് വികസനം തടയുന്ന സമീപനമാണ് ഈ സർക്കാർ സ്വീകരിച്ചത്. മതിയായ ചികിത്സാസൗകര്യമില്ലാത്ത ജില്ലയിൽ നിന്നും അത്യാസന്ന നിലയിലുള്ള രോഗികളെയും കൊണ്ട് പോകുന്പോൾ എത്രയോ പേരാണ് മരിച്ചിട്ടുള്ളത്. എന്നാൽ സർക്കാർ നിസംഗതയിൽ തന്നെയാണ്. വയനാട്ടിലെ ജനങ്ങളോട് കാണിക്കുന്ന പ്രതികാര നടപടിയുടെ ഭാഗമാണിതെന്നും അദ്ദേഹം പറഞ്ഞു. ജില്ലയിലെ ജനങ്ങളും രാഷ്ട്രീയപാർട്ടികളും നടത്തുന്ന സമരം വികസനത്തിന് വേണ്ടിയോ പുതിയ പദ്ധതികൾക്കോ അല്ലെന്നതാണ് യാഥാർഥ്യം. മറിച്ച് വർഷങ്ങളായി അനുഭവിച്ചുവരുന്ന പദ്ധതികളെ ഇല്ലാതാക്കുന്നതിന് എതിരെയാണ്. വയനാട് മെഡിക്കൽ കോളജ്, എയർ സ്ട്രിപ്പ്, നഞ്ചൻഗോഡ് നിലന്പൂർ റെയിൽപാത, റോഡ് വികസനം ഉൾപ്പെടെ എല്ലാ സാധ്യതകളും അവസരങ്ങളും ഈ സർക്കാർ പിടിപ്പുകേട് കൊണ്ട് ഇല്ലാതാക്കി. തെരഞ്ഞെടുപ്പ് ഘട്ടത്തിൽ ഒരിക്കൽ നിർമാണോദ്ഘാടനം നടത്തിയ തുരങ്കപാത വീണ്ടും പ്രവൃത്തി ഉദ്ഘാടനം ചെയ്യുകയാണെന്നും അദ്ദേഹം പരിഹസിച്ചു. തുരങ്കപാതയ്ക്ക് എതിരല്ല, എന്നാൽ അത് പ്രാവർത്തികമാകുന്നത് വരെ ഇപ്പോഴത്തെ ഗതാഗതപ്രശ്നം വയനാട്ടുകാർ അനുഭവിക്കണമെന്ന് പറയുന്നത് ശരിയല്ല. യുഡിഎഫ് അധികാരത്തിലെത്തിയാൽ ബദൽപാതകൾ യാഥാർഥ്യമാക്കുമെന്നും അദ്ദേഹം കൂട്ടിച്ചേർത്തു. ഡിസിസി പ്രസിഡന്‍റ് എൻ.ഡി. അപ്പച്ചൻ അധ്യക്ഷത വഹിച്ചു. പി.കെ. ജയലക്ഷ്മി, കെ.എൽ. പൗലോസ്, പി.പി. ആലി, ടി.ജെ. ഐസക്, എൻ.കെ. വർഗീസ്, എം.എ. ജോസഫ്, ഒ.വി. അപ്പച്ചൻ, എം.ജി. ബിജു, ബിനു തോമസ്, എൻ.സി. കൃഷ്ണകുമാർ, നജീബ് കരണി, ഒ.ആർ. രഘു, രാജേഷ്കുമാർ, ഇ.എ. ശങ്കരൻ, പോൾസണ്‍ കൂവക്കൽ, ബി. സുരേഷ് ബാബു, മാണി ഫ്രാൻസിസ്, കമ്മന മോഹനൻ, ചിന്നമ്മ ജോസ്, ചന്ദ്രികാ കൃഷ്ണൻ, വർഗീസ് തുടങ്ങിയവർ സംബന്ധിച്ചു.

കാട്ടാന ആക്രമണം; ബൈക്ക് യാത്രികർ പരിക്കുകളോടെ അദ്ഭുതകരമായി രക്ഷപ്പെട്ടു

പുൽപ്പള്ളി: ബൈക്ക് യാത്രികർ കാട്ടാനയുടെ ആക്രമണത്തിൻ നിന്ന് അദ്ഭുതകരമായി പരിക്കുകളോടെ രക്ഷപ്പെട്ടു. വാഴപ്പിള്ളി ജോർജ് (54), ജോസ് (52) എന്നിവർക്കാണ് പരിക്കേറ്റത്. ഇന്നലെ രാവിലെയായിരുന്നു സംഭവം. മുള്ളൻകൊല്ലിയിൽനിന്ന് കാട്ടിക്കുളത്തേക്ക് ബന്ധുവിന്‍റെ മരണാനന്തര ചടങ്ങിന് പങ്കെടുക്കാൻ ബൈക്കിൽ പോകുന്നതിനിടെ ചേകാടി ഭാഗത്തായിരുന്നു കാട്ടാനയുടെ ആക്രമണം. കാട്ടിൽ മറഞ്ഞുനിന്ന കാട്ടാന ബൈക്കിനുനേരേ കുതിച്ചെത്തുകയായിരുന്നു. നിയന്ത്രണംവിട്ട ബൈക്ക് മറിഞ്ഞാണ് ഇവർക്ക് പരിക്കേറ്റത്. ജോസിന് കണ്ണിന്‍റെ ഭാഗത്ത് 14 സ്റ്റിച്ചുണ്ട്. ഇവരെ പുൽപ്പളളിയിലെ സ്വകാര്യ ആശുപത്രിയിൽ പ്രവേശിപ്പിച്ചു.

അജൈവ മാലിന്യങ്ങളാൽ പൂക്കളം തീർത്ത് ശുചിത്വമിഷൻ

കൽപ്പറ്റ: അജൈവ മാലിന്യങ്ങളാൽ പൂക്കളം തീർത്ത് ശുചിത്വമിഷൻ. മാലിന്യ സംസ്കരണ പ്രവർത്തനങ്ങൾ ഊർജ്ജിതമാക്കി അജൈവ മാലിന്യങ്ങൾ തരംതിരിക്കുന്നതിന്‍റെ പ്രാധാന്യം ജനങ്ങളിലേക്കെത്തിക്കാൻ അജൈവ മാലിന്യങ്ങൾ ഉപയോഗിച്ച് ഓണപൂക്കളം തീർക്കുകയാണ് ശുചിത്വമിഷൻ. ശുചിത്വമിഷൻ അജൈവ മാലിന്യങ്ങളാൽ തയാറാക്കിയ ഓണപൂക്കളം സംസ്ഥാനത്തിന് തന്നെ മാതൃകയായി മാറുമെന്ന് ജില്ലാ കളക്ടർ ഡി.ആർ. മേഘശ്രീ പറഞ്ഞു. ജില്ലയിൽ ഹരിതചട്ടം പാലിച്ചാണ് ഓണാഘോഷ പരിപാടികൾ സംഘടിപ്പിക്കുന്നതെന്നും ശുചിത്വമിഷന്‍റെ പ്രവർത്തനങ്ങൾ മാതൃകാപരമാണെന്നും കളക്ടർ പറഞ്ഞു. തെർമോകോൾ, കാർബോർഡ്, പ്ലാസ്റ്റിക് കുപ്പിയുടെ അടപ്പ്, തുണി, പ്ലാസ്റ്റിക് കയർ, പെപ്പ്, പേനയുടെ അടപ്പ്, ടയർ ട്യൂബ്, മിൽമ കവർ, സ്ട്രോ തുടങ്ങി വിവിധങ്ങളായ പാഴ് വസ്തുക്കൾ ഉപയോഗിച്ചാണ് ഹരിതകർമ സേന കണ്‍സോർഷ്യം പ്രസിഡന്‍റുമാർ, സെക്രട്ടറിമാർ, ഹെൽത്ത് ഇൻസ്പെക്ടർമാർ ചേർന്ന് വ്യത്യസ്തമായ പൂക്കളം ഒരുക്കിയത്. കൽപ്പറ്റ എസ്കെഎംജെ സ്കൂളിലെ ജൂബിലി ഹാളിൽ ജില്ലാ ശുചിത്വമിഷൻ സംഘടിപ്പിച്ച ഓണാഘോഷ പരിപാടിയിൽ ശുചിത്വമിഷൻ കോഓർഡിനേറ്റർ എസ്. ഹർഷൻ, പ്രോഗ്രാം ഓഫീസർ കെ. അനൂപ്, അസിസ്റ്റന്‍റ് കോ ഓർഡിനേറ്റർ കെ.ബി. നിധി കൃഷ്ണ, അക്കൗണ്ട്സ് അസിസ്റ്റന്‍റ് കോഓർഡിനേറ്റർ പി.എസ്. സഞ്ജയ്, ടെക്നിക്കൽ കണ്‍സൾട്ടന്‍റ് എസ്. ശ്രീനിഷ്, ഡാറ്റ എൻട്രി ഓപ്പറേറ്റർ പ്രക്ഷോഭ് ജയകുമാർ, കുടുംബശ്രീ ജില്ലാ മിഷൻ അസിസ്റ്റന്‍റ് കോഓർഡിനേറ്റർമാരായ വി.കെ. റെജീന, കെ.എം. സലീന, പഞ്ചായത്ത് സെക്രട്ടറിമാർ, പ്രസിഡന്‍റുമാർ, വിവിധ വകുപ്പ് ഉദ്യോഗസ്ഥർ എന്നിവർ പങ്കെടുത്തു.

ദേശീയ കായികദിനം ആഘോഷിച്ചു

വെള്ളമുണ്ട: പബ്ലിക് ലൈബ്രറിയിൽ കായികവേദി, മേരാ യുവ ഭാരത് വയനാട്, ജിഎംഎച്ച്എസ്എസ് നാഷണൽ സർവീസ് സ്കീം യൂണിറ്റ് എന്നിവ സംയുക്തമായി ദേശീയ കായികദിനം ആഘോഷിച്ചു. പഞ്ചായത്ത് പ്രസിഡന്‍റ് സുധി രാധാകൃഷ്ണൻ ഉദ്ഘാടനം ചെയ്തു. ഹോക്കി കോച്ച് സി. സതീശനെയും സിഎഫ്സി ജനറൽ സെക്രട്ടറി മുജീബ് റഹ്മാനെയും അവർ പൊന്നാട അണിയിച്ച് ആദരിച്ചു. എം. സുധാകരൻ അധ്യക്ഷത വഹിച്ചു. എ. രാജഗോപാൽ, എൻഎസ്എസ് പ്രോഗ്രാം ഓഫീസർ ആർ. രേഖ, കെ. എ. അഭിജിത്ത്, എം. മുരളീധരൻ, സക്കീന കുടുവ, പി. തങ്കമണി എന്നിവർ പ്രസംഗിച്ചു. എം. മണികണ്ഠൻ, എം. മോഹനകൃഷ്ണൻ എന്നിവർ സംസാരിച്ചു. കൽപ്പറ്റ: ജില്ലാ സ്പോർട്സ് കൗണ്‍സിലിന്‍റെ നേതൃത്വത്തിൽ ജില്ലയുടെ വിവിധ ഭാഗങ്ങളിൽ ദേശീയ കായികദിനാഘോഷവും ധ്യാൻചന്ദ് അനുസ്മരണവും നടത്തി. പുൽപ്പള്ളി ആർച്ചറി അക്കാദമിയിൽ ദിനാഘോഷത്തിന്‍റെ ഭാഗമായി നടത്തിയ അന്പെയ്ത്ത് മത്സരം സ്പോർട്സ് കൗണ്‍സിൽ ജില്ലാ പ്രസിഡന്‍റ് എം. മധു ഉദ്ഘാടനം ചെയ്തു. പി.കെ. അയൂബ്, കെ.എ. ജിജി, അക്ഷയ ദാസ് എന്നിവർ പ്രസംഗിച്ചു. പനമരം ഗവ. ഹയർ സെക്കൻഡറി സ്കൂളിൽ സ്പോർട്സ് കൗണ്‍സിൽ ജില്ലാ വൈസ് പ്രസിഡന്‍റ് സലിം കടവൻ ദിനാഘോഷം ഉദ്ഘാടനം ചെയ്തു. കെ.എ. ജിജി കായികദിന പ്രതിജ്ഞ ചൊല്ലിക്കൊടുത്തു. കായികാധ്യാപകൻ മുഹമ്മദ് നവാസ് പ്രസംഗിച്ചു.

പിഎൽഎസ്എ കുടുംബ സംഗമവും ഓണാഘോഷവും നടത്തി

കൽപ്പറ്റ: പ്രൈവറ്റ് ലാൻഡ് സർവേയേഴ്സ് അസോസിയേഷൻ(പിഎൽഎസ്എ)ജില്ലാ കമ്മിറ്റി കെഎം ഹോളിഡെയ്സിൽ കുടുംബ സംഗമവും ഓണാഘോഷവും നടത്തി. എഡിഎം കെ. ദേവകി ഉദ്ഘാടനം ചെയ്തു. പിഎൽഎസ്എ ജില്ലാ പ്രസിഡന്‍റ് പി. പ്രസന്നകുമാർ അധ്യക്ഷത വഹിച്ചു. കെജിഎൽഎസ്എ സംസ്ഥാന പ്രസിഡന്‍റ് ഫാസിൽ കാസിം മുഖ്യപ്രഭാഷണം നടത്തി. സർവേ രംഗത്ത് 50 വർഷം പൂർത്തിയാക്കിയ നാലുപേരെ ഡിവൈഎസ്പി പി.എൽ. ഷൈജു ആദരിച്ചു. ജോണ്‍ അംഗത്വ വിതരണം നടത്തി. എ.കെ. രാജേഷ്, സന്തോഷ് നന്പ്യാർ എന്നിവർ പ്രസംഗിച്ചു. പിഎൽഎസ്എ ജില്ലാ സെക്രട്ടറി കെ.പി. ശിവദാസ് ട്രഷറർ ഗോവിന്ദൻ പ്രസംഗിച്ചു.

കിടപ്പുരോഗികൾക്ക് ഓണക്കിറ്റ് നൽകി

ചെന്നലോട്: തരിയോട് സെക്കൻഡറി പാലിയേറ്റീവ് വോളണ്ടിയർ ഗ്രൂപ്പ് പ്രവർത്തനപരിധിയിലെ കിടപ്പുരോഗികൾക്ക് ഓണക്കിറ്റ് നൽകി. തരിയോട് സാമൂഹികാരോഗ്യ കേന്ദ്രം മെഡിക്കൽ ഓഫീസർ ഡോ.ഷൈനി മാത്യുവിന് കിറ്റ് കൈമാറി പഞ്ചായത്ത് പ്രസിഡന്‍റ് ഷമീം പാറക്കണ്ടി വിതരണം ഉദ്ഘാടനം ചെയ്തു. കമ്മ്യൂണിറ്റി നഴ്സുമാരായ കെ.കെ. രാജാമണി, ബീന അജു, ഫിസിയോതെറാപ്പിസ്റ്റ് റിയ ഐസണ്‍, വോളണ്ടിയർമാരായ അനിൽകുമാർ, ശാന്തി അനിൽ, കെ.ജെ. സെബാസ്റ്റ്യൻ തുടങ്ങിയവർ പങ്കെടുത്തു.

എസ്‌വൈഎസ് സാന്ത്വനം: പരിശീലനം സമാപിച്ചു

പടിഞ്ഞാറത്തറ: എസ്‌വൈഎസ് സാന്ത്വനം എമർജർസി ടീം മൂന്നാംഘട്ടം പരിശീലനം പന്തിപ്പൊയിലിൽ സമാപിച്ചു. പ്രകൃതി ദുരന്തങ്ങൾ ഉൾപ്പെടെ അകസ്മിക സാഹചര്യങ്ങളിൽ സേവനം ചെയ്യുന്നതിന് പ്രത്യേക പരിശീലനം ലഭിച്ച സംഘമാണ് സാന്ത്വനം എമർജൻസി ടീം. പ്രയോഗിക പരിശീലനമാണ് മൂന്നാംഘട്ടത്തിൽ നടന്നത്. സംസ്ഥാനത്തിന്‍റെ വിവിധ ഭാഗങ്ങളിൽനിന്നു തെരഞ്ഞെടുത്ത 130 പേർ പങ്കെടുത്തു. സമാപനസമ്മേളനം ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി ഉദ്ഘാടനം ചെയ്തു. ടീം അംഗങ്ങൾക്കുള്ള മെമന്‍റോ വിതരണം അദ്ദേഹം നിർവഹിച്ചു.

എട്ട് നോന്പ് പെരുന്നാൾ

സുൽത്താൻ ബത്തേരി: താളൂർ സെന്‍റ് മേരീസ് യാക്കോബായ സുറിയാനി പള്ളിയിൽ എട്ട് നോന്പ് പെരുന്നാൾ ഏഴ്, എട്ട് തീയതികളിൽ നടക്കും. ഏഴിന് രാവിലെ വിശുദ്ധ കുർബാന തുടർന്ന് കൊടി ഉയർത്തൽ. വൈകുന്നേരം ഏഴിന് സന്ധ്യാ പ്രാർഥന. എട്ടിന് രാവിലെ ഏഴിന് പ്രഭാത പ്രാർഥന, എട്ടിന് വിശുദ്ധ കുർബാന, പ്രസംഗം- ഫാ. സോജൻ വാണാക്കുടി. പ്രദക്ഷിണം താളൂർ ടൗണ്‍ കുരിശിങ്കലേക്ക്. ആശിർവാദം, നേർച്ച ഭക്ഷണം. വികാരി റവ.ഡോ. മത്തായി അതിരംപുഴയിൽ, ട്രസ്റ്റി ബെസി വാരിശേരിൽ, സെക്രട്ടറി തോമസ് വൻമേലിൽ, ജോയിന്‍റ് സെക്രട്ടറി കുര്യാക്കോസ് കാരക്കാട്ട് എന്നിവർ നേതൃത്വം നൽകും.

ബദൽ പാതകൾ യാഥാർഥ്യമാക്കണം: ബദൽ റോഡ് വികസന സമിതി

കൽപ്പറ്റ: വയനാടിന്‍റെ സമഗ്ര രക്ഷയ്ക്ക് കേന്ദ്ര-സംസ്ഥാന ഗവണ്‍മെന്‍റുകൾ ഉടനടി എത്തണമെന്ന് പടിഞ്ഞാറത്തറ പൂഴിത്തോട് ബദൽ പാത, മൈസൂർ പുറക്കാട്ടിരി ഗ്രീൻഫീൽഡ് ഹൈവേ വികസന സമിതി നേതാക്കൾ വാർത്താസമ്മേളനത്തിൽ ആവശ്യപ്പെട്ടു. ജില്ല രൂപീകൃതമായിട്ട് 45 വർഷങ്ങൾ കഴിഞ്ഞിട്ടും നൂറ്റാണ്ടുകൾ മുൻപ് പണിത താമരശേരി ചുരം പാത മാത്രമാണ് ഏക ആശ്രയം. മെഡിക്കൽ കോളജ് പൂർണതോതിൽ പ്രവർത്തനം ആരംഭിക്കാത്ത സാഹചര്യത്തിൽ മികച്ച ചികിത്സയ്ക്കുവേണ്ടി കോഴിക്കോട്ടേക്ക് പോകേണ്ട സ്ഥിതിയാണ്. വളരെ വീതികുറഞ്ഞ കുറ്റ്യാടി ചുരത്തിലൂടെ വാഹനങ്ങൾ തിരിച്ചുവിടുന്നത് ആ പ്രദേശത്തും മണിക്കൂറുകളോളം നീണ്ടുനിൽക്കുന്ന ഗതാഗതക്കുരുക്കിനും കാരണമാകുന്നുണ്ട്. റെയിൽവേ സർവീസും വിമാന സർവീസും വയനാട്ടിൽ ഇല്ലാത്തതുകൊണ്ട് എല്ലാകാര്യത്തിനും കോഴിക്കോടിനെ ആശ്രയിക്കേണ്ട സാഹചര്യമാണുള്ളത്. 70 ശതമാനം പണി പൂർത്തീകരിച്ച വനം പരിസ്ഥിതി മന്ത്രാലയത്തിന്‍റെ വനത്തിലൂടെ റോഡ് വെട്ടുന്നതിനുള്ള അനുമതി നിഷേധിക്കപ്പെട്ട പൂഴിത്തോട് പടിഞ്ഞാറത്തറ ബദൽ പാതയുടെ നിർമാണത്തിന് ആവശ്യമായ അനുവാദം കേന്ദ്ര വനം പരിസ്ഥിതി മന്ത്രാലയത്തിൽനിന്ന് നേടിയെടുക്കുക മാത്രമാണ് ഏക പോംവഴി. നിലവിൽ സർവേക്ക് രണ്ട് കോടി രൂപ അനുവദിച്ച പടിഞ്ഞാറത്തറ - പൂഴിത്തോട് ബദൽ റോഡിനെ തത്ത്വത്തിൽ അംഗീകരിച്ച സംസ്ഥാന ഇടതുപക്ഷ ഗവണ്‍മെന്‍റ് പടിഞ്ഞാറത്തറ - പൂഴിത്തോട് ബദൽ പാത യാഥാർഥ്യമാക്കിത്തന്നേ തീരുവെന്ന് അവർ ആവശ്യപ്പെട്ടു. തുരങ്ക പാതയുടെ നിർമാണ പ്രവർത്തനങ്ങൾ ആരംഭിച്ചുവെങ്കിലും പൂർത്തിയാക്കുവാൻ നാലുവർഷം എടുക്കുന്നതുകൊണ്ട് ഇപ്പോഴത്തെ സംസ്ഥാന ഗവണ്‍മെന്‍റ് അവരുടെ കാലാവധി പൂർത്തിയാകുന്നതിന് മുൻപ് ഈ ബദൽ പാതയുടെ നിർമാണവും പൂർത്തീകരിക്കണമെന്ന് അവർ ആവശ്യപ്പെട്ടു. ആറുമാസംകൊണ്ട് പൂർത്തീകരിക്കാൻ കഴിയുന്ന, ചുരമില്ലാത്ത, വൻ വളവുകൾ ഇല്ലാത്ത, വലിയ പാലങ്ങൾ ആവശ്യമില്ലാത്ത, കുത്തനെയുള്ള കയറ്റങ്ങൾ ഇല്ലാത്ത, വളരെ എളുപ്പത്തിൽ കുറഞ്ഞ ആഘാതത്തിലും ചെലവിലും ചുരുങ്ങിയ സമയം കൊണ്ട് പൂർത്തിയാക്കാൻ കഴിയുന്ന ഈ ബദൽ പാതയുടെ നിർമാണം ഉടൻ ആരംഭിക്കണം. മേപ്പാടി തുരങ്ക പാതയ്ക്ക് കേന്ദ്ര വനം പരിസ്ഥിതി മന്ത്രാലയം അനുമതി നൽകിയ സാഹചര്യത്തിൽ പടിഞ്ഞാറത്തറ ബദൽ റോഡിനും അനുമതി നൽകാൻ പുതിയ സാഹചര്യത്തിൽ കേന്ദ്ര വനം പരിസ്ഥിതി മന്ത്രാലയം തയാറാകും. ഉടനടി അപേക്ഷയും ഡിപിആർ അടക്കമുള്ള മുഴുവൻ രേഖകളും സർവേ റിപ്പോർട്ടും കേന്ദ്ര ഗവണ്‍മെന്‍റിന് സമർപ്പിച്ച് അംഗീകാരം നേടുവാൻ എൽഡിഎഫ് ഗവണ്‍മെന്‍റ് തയാറാകണം. കൂടാതെ പടിഞ്ഞാറത്തറ-പൂഴിത്തോട് ബദൽ പാതയിലേക്ക് മലയോര ഹൈവേ വഴി താമരശേരി ഭാഗത്തു നിന്ന് ഈ പാതയിലേക്ക് പ്രവേശിക്കുവാൻ കഴിയുമെന്നുള്ളത് വലിയ നേട്ടമാണ്. ഇതോടൊപ്പം കോഴിക്കോടിനെ എളുപ്പത്തിൽ മൈസൂരുവുമായി ബന്ധിപ്പിക്കാവുന്ന പുറക്കാട്ടിരി കുറ്റ്യാടി-മാനന്തവാടി - മൈസൂരു ഗ്രീൻഫീൽഡ് ഹൈവേയും യാഥാർഥ്യമാക്കണം. 2022ൽ 7134 കോടി രൂപ വകയിരുത്തിയതായി രാഹുൽ ഗാന്ധി എംപിയെ ഉപരിതല ഗതാഗത മന്ത്രി നിതിൻ ഗഡ്കരി രേഖാമൂലം അറിയിച്ചതാണ്. പുതിയ അലൈൻമെന്‍റ് സമർപ്പിക്കുവാൻ ദേശീയപാത അതോറിറ്റിക്ക് നിർദേശം നൽകി. ബംഗളൂരു - മലപ്പുറം സാന്പത്തിക ഇടനാഴിയുടെ ഭാഗമായി ഭാരത് മാല പദ്ധതിയിൽ ഉൾപ്പെടുത്തിയാണ് റോഡ് വിഭാവനം ചെയ്തിരിക്കുന്നത്. പുറക്കാട്ടിരി മൈസൂർ പാത ഇപ്പോഴും കേന്ദ്ര ഗവണ്‍മെന്‍റിന്‍റെ സജീവ പരിഗണനയിൽ ഉണ്ടെന്നത് പ്രതീക്ഷയ്ക്ക് വക നൽകുന്നതായി ഭാരവാഹികൾ പറഞ്ഞു. മൈസൂർ - പുറക്കാട്ടിരി - കുറ്റ്യാടി - ഗ്രീൻഫീൽഡ് ഹൈവേ യാഥാർഥ്യം ആക്കേണ്ടത് ഇന്നത്തെ പ്രത്യേക സാഹചര്യത്തിൽ വയനാടിന്‍റെ നിലനിൽപ്പിനു ആവശ്യമാണ്. ഈ വിഷയത്തിൽ കേന്ദ്ര-സംസ്ഥാന ഗവണ്‍മെന്‍റുകൾക്കും ജനപ്രതിനിധികൾക്കും കേന്ദ്ര ഉപരിതല ഗതാഗത മന്ത്രി നിതിൻ ഗഡ്ക്കരിക്കും മുഖ്യമന്ത്രി പിണറായി വിജയൻ, മന്ത്രിമാർ അടക്കമുള്ള രാഷ്ട്രീയ കക്ഷി നേതാക്കൾ തുടങ്ങിയവർക്ക് നിവേദനം സമർപ്പിച്ചിട്ട് മാസങ്ങൾ കഴിഞ്ഞു. ഈ രണ്ടു പാതകളും യാഥാർഥ്യമായാൽ വയനാട് ഒറ്റപ്പെടുന്ന ദയനീയമായ സാഹചര്യം ഒഴിവാക്കാൻ കഴിയും. ഒപ്പം മലബാറിന്‍റെ സമഗ്ര വികസന മുന്നേറ്റത്തിനും ചരക്കു ലോറി ഗതാഗത രംഗത്തും വയനാടിന്‍റെ ടൂറിസം രംഗത്തും കുതിച്ചു ചാട്ടം ഉണ്ടാക്കാൻ കഴിയും. ഇതിനായി മുഖ്യമന്ത്രി പിണറായി വിജയൻ വയനാട് സന്ദർശിക്കണമെന്നും വയനാട്, കോഴിക്കോട് മേഖലകളിലെ ബന്ധപ്പെട്ട ജനപ്രതിനിധികളുടെ യോഗം വിളിച്ചു കൂട്ടണമെന്നും വികസന സമിതി ചെയർമാൻ കെ.എ. ആന്‍റണി ആവശ്യപ്പെട്ടു. വാർത്താസമ്മേളനത്തിൽ എടവക പഞ്ചായത്ത് പ്രസിഡന്‍റ് ബ്രാൻ അഹമ്മദ് കുട്ടി, ബാബു ഫിലിപ്പ്, വി.എ. അഗസ്റ്റിൻ, കെ.എം. ജോസഫ് തുടങ്ങിയവർ പങ്കെടുത്തു.

നെറ്റ് പരിശീലനത്തിന് അപേക്ഷിക്കാം

കൽപ്പറ്റ: സർക്കാർ/എയ്ഡഡ് കോളജുകളിൽ രണ്ടാംവർഷ പിജി കോഴ്സുകളിൽ പഠിക്കുന്നവരും നിലവിൽ പഠനം പൂർത്തിയായവരുമായ മുസ്‌ലിം, ക്രൈസ്തവ, സിഖ്, ബുദ്ധ, പാഴ്സി, ജൈന വിഭാഗങ്ങളിലെ വിദ്യാർഥികൾക്ക് യുജിസി/സിഎസ്ഐആർ നെറ്റ് പരീക്ഷാ പരിശീലനത്തിന് സംസ്ഥാന ന്യൂനപക്ഷ ക്ഷേമ വകുപ്പ് അപേക്ഷ ക്ഷണിച്ചു. ന്യൂനപക്ഷ ക്ഷേമവകുപ്പ് ഡയറക്ടറേറ്റ് എംപാനൽ ചെയ്ത 24 സ്ഥാപനങ്ങൾ മുഖാന്തിരമാണ് പരിശീലനം. കേരളത്തിൽ പഠിക്കുന്ന സ്ഥിര താമസക്കാരായ മുസ്‌ലിം, ക്രൈസ്തവ, സിഖ്, ബുദ്ധ, പാഴ്സി, ജൈന മതവിഭാഗത്തിൽപ്പെട്ടവരും ബിരുദാനന്തര ബിരുദ ഒന്നാം വർഷ പരീക്ഷയിൽ 55 ശതമാനം മാർക്ക് നേടി രണ്ടാം വർഷ പഠനം നടത്തുന്നവരെയും ബിരുദാനന്തര ബിരുദം 55 ശതമാനം മാർക്കോടെ പൂർത്തിയാക്കിയ വിദ്യാർഥികൾക്കുമാണ് പരിശീലത്തിന് അർഹത. ന്യൂനപക്ഷ മത വിഭാഗത്തിൽപ്പെട്ട ബിപിഎൽ വിഭാഗത്തിലെ വിദ്യാർഥികളെ പ്രത്യേകം പരിഗണിച്ചും കുടുംബ വാർഷിക വരുമാനത്തിന്‍റെയും മാർക്കിന്‍റെയും അടിസ്ഥാനത്തിലുമാണ് വിദ്യാർഥികളെ തെരഞ്ഞെടുക്കുന്നത്. ബിപിഎൽ അപേക്ഷകരുടെ അഭാവത്തിൽ എപിഎൽ വിഭാഗത്തിലെ എട്ട് ലക്ഷം രൂപ വരെ വാർഷിക വരുമാനമുളളവരെയും പരിഗണിക്കും. www.minortiywelfare.kerala.gov.in വെബ് സൈറ്റിലും തെരഞ്ഞെടുത്ത കോച്ചിംഗ് സ്ഥാപനങ്ങളുടെ വിവരങ്ങളും അപേക്ഷ ഫോമും ലഭ്യമാണ്. പരിശീലനം നേടാൻ താത്പര്യമുള്ള വിദ്യാർഥികൾ അപേക്ഷ ഫോം പൂരിപ്പിച്ച് നേരിട്ടോ തപാൽ മുഖാന്തിരമോ പരിശീലനം നേടാൻ ആഗ്രഹിക്കുന്ന സ്ഥാപനത്തിലെ കോഴ്സ് കോഓർഡിനേറ്റർക്ക് 10നകം സമർപ്പിക്കണം. ജില്ലയിൽ മുട്ടിൽ ഡബ്ല്യുഎംഒ ആർട്സ് ആൻഡ് സയൻസ് കോളജ് ആണ് പരിശീലന കേന്ദ്രം. ജനറൽ പേപ്പർ 1, പേപ്പർ 2 കോമേഴ്സ് എന്നീ വിഷയങ്ങൾക്കാണ് ക്ലാസുകൾ നൽകുന്നത്. കൂടുതൽ വിവരങ്ങൾക്കും അപേക്ഷ ഫോമിനുമായി പി. കബീർ, കോഴ്സ് കോഓർഡിനേറ്റർ 9947729192 എന്ന നന്പറിൽ ബന്ധപ്പെടണം.

മരണാനന്തര നിധി കൈമാറി

കേണിച്ചിറ: കേരള വ്യാപാരി വ്യവസായി ഏകോപന സമിതി കേണിച്ചിറ യൂണിറ്റിൽ നിര്യാതനായ ടി.കെ. ശിവദാസന്‍റെ കുടുംബത്തിനുള്ള ജില്ലാ വ്യാപാരി കുടുംബ സുരക്ഷാനിധിയിൽ നിന്നുള്ള അഞ്ച് ലക്ഷം രൂപയുടെ ചെക്ക് കേരള വ്യാപാരി വ്യവസായി ഏകോപന സമിതി ജില്ലാ പ്രസിഡന്‍റ് ജോജിൻ ടി. ജോയ് കൈമാറി. യോഗത്തിൽ യൂണിറ്റ് പ്രസിഡന്‍റ് എം.ആർ. സുരേഷ്ബാബു അധ്യക്ഷത വഹിച്ചു. ബിൽജോ പി. ജോസ്, എം.കെ. ശശിധരൻ, കെ.സി. ഷാജി, രാജമ്മ സുരേന്ദ്രൻ, പി.എ. എൽദോ, ടി.കെ. മനോഹരൻ, പി.എം. സുധാകരൻ എന്നിവർ പ്രസംഗിച്ചു.

എട്ട് നോന്പാചരണത്തിന് തുടക്കമായി

പുൽപ്പള്ളി: മുള്ളൻകൊല്ലി സെന്‍റ് മേരീസ് ഫൊറോന ദേവാലയത്തിൽ എട്ട് നോന്പാചരണത്തിന് തുടക്കം കുറിച്ച് ഫാ. ജോർജ് ആലൂക്ക കൊടിയേറ്റി. തുടർന്ന് ജപമാല, വിശുദ്ധ കുർബാന, സന്ദേശം, നൊവേന എന്നിവയുണ്ടായിരുന്നു. ഇന്ന് മുതൽ ഏഴുവരെ എല്ലാ ദിവസവും വൈകുന്നേരം 4.30ന് ജപമാല, വിശുദ്ധ കുർബാന, നൊവേന, സന്ദേശത്തിനും ഫാ. റോയ് വട്ടക്കാട്ട്, ഫാ. ജോജോ ഔസേപ്പറന്പിൽ, ഫാ. തോംസണ്‍ കീരിപ്പേൽ, ഫാ. ജോളി കളപ്പുര, ഫാ. ജോഷി പുൽപ്പയിൽ, ഫാ. ഷാജി ചിറപ്പുറത്ത് എന്നിവർ കാർമികത്വം വഹിക്കും. പ്രധാന തിരുനാൾ ദിനമായ എട്ടിന് വൈകുന്നേരം 4.30ന് ജപമാല, അഞ്ചിന് ആഘോഷമായ തിരുനാൾ കുർബാനയ്ക്കും സന്ദേശം, നൊവേനയ്ക്കും മാനന്തവാടി രൂപതാ സഹായമെത്രാൻ മാർ അലക്സ് താരാമംഗലം മുഖ്യകാർമികത്വം വഹിക്കും.

തുരങ്കപാത: സംസ്ഥാന സർക്കാരിന്‍റെ ഇച്ഛാശക്തിയുടെ പ്രതീകമെന്ന്

കൽപ്പറ്റ: ആനക്കാംപൊയിൽ - മേപ്പാടി തുരങ്കപാത വയനാടിന്‍റെ സമഗ്രമായ മുന്നേറ്റത്തിന് കരുത്തു പകരുന്നതാണെന്നും പദ്ധതി തടസങ്ങൾ നീക്കി എളുപ്പമാക്കിയതും നിർമാണോദ്ഘാടനം നടത്താൻ സാധിച്ചതും സംസ്ഥാന സർക്കാരിന്‍റെ ഇച്ഛാശക്തിയുടെ പ്രതീകമാണെന്നും ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ ജുനൈദ് കൈപ്പാണി പറഞ്ഞു. വയനാട് അഭിമുഖീകരിക്കുന്ന യാത്രാ പ്രശ്നം പരിഹരിക്കുന്നതിന് പ്രധാനപ്പെട്ട ആശ്വാസമായി മാറും. വ്യാപാര വ്യവസായിക രംഗത്തെ വളർച്ചയ്ക്ക് വഴിയൊരുക്കും. വയനാടിന്‍റെ ടൂറിസം മേഖലയ്ക്ക് കൂടുതൽ സാധ്യതകളാവും. വയനാടിന്‍റെ ദീർഘ കാലത്തെ ആവശ്യം സാക്ഷാത്കരിക്കുന്ന സർക്കാരിന് ജില്ലയുടെ നന്ദിയും സന്തോഷവും രേഖപ്പെടുത്തുന്നുവെന്നും ജുനൈദ് കൈപ്പാണി പറഞ്ഞു.

സർക്കാർ ജോലി വാഗ്ദാനം ചെയ്ത് പണം തട്ടിയ സംഘം അറസ്റ്റിൽ

ഊട്ടി: ഊട്ടിയിലെ കളക്ടറേറ്റിൽ ജോലി വാങ്ങിത്തരാമെന്ന് പറഞ്ഞ് വിശ്വസിപ്പിച്ച് പലരിൽ നിന്നായി 22 ലക്ഷം രൂപ തട്ടിയെടുത്തതായി പരാതി. ഇതുമായി ബന്ധപ്പെട്ട് ഉൗട്ടി സ്വദേശി കൃഷ്ണൻ (34), കാന്തൽ സ്വദേശി രാജൻ (47), ഫിങ്കർപോസ്റ്റ് സ്വദേശി വിനോദ് (45) എന്നിവരെയാണ് വിജിലൻസ് വിഭാഗം സിഐ കമലേഷ് അറസ്റ്റ് ചെയ്തത്. ഊട്ടി വണ്ടിശോല സ്വദേശി ഗീതാഞ്ജലി, തലകുന്ദ സ്വദേശികളായ കാർത്തിക, സരോജിനി, ജയലക്ഷ്മി, രാംകി എന്നിവരിൽ നിന്നാണ് പണം തട്ടിയത്. ജോലി വാഗ്ദാനം നൽകി പണം തട്ടിയെടുത്തതായി വിജിലൻസ് വിഭാഗം ഡിവൈഎസ്പി ശക്തിവേലുവിന് തട്ടിപ്പിനിരയായവർ നൽകിയ പരാതിയെത്തുടർന്ന് നടത്തിയ അന്വേഷണത്തിനിടെയാണ് ഇവരെ അറസ്റ്റു ചെയ്തത്.

വയനാട് ഒറ്റപ്പെടുന്നത് ഒഴിവാക്കണം: സ്വതന്ത്ര കർഷക സംഘം

കൽപ്പറ്റ: താമരശേരി ചുരത്തിൽ മണിക്കൂറുകൾ നീളുന്ന ഗതാഗത തടസം ഉണ്ടാകുന്പോഴെല്ലാം വയനാട് ഒറ്റപ്പെടുന്നത് ഒഴിവാക്കാൻ സർക്കാർ സത്വര നടപടി സ്വീകരിക്കണമെന്ന് സ്വതന്ത്ര കർഷക സംഘം ജില്ലാ കമ്മിറ്റി സർക്കാരിനോട് ആവശ്യപ്പെട്ടു. ബദൽ റോഡുകൾ യാഥാർഥ്യമാക്കുന്നത് വയനാട്ടിൽ കോഴിക്കോട് ഭാഗത്തേക്കും തിരിച്ചുമുള്ള യാത്ര സുഗമമാക്കാൻ ഉതകുമെന്ന് യോഗം അഭിപ്രായപ്പെട്ടു. കർഷകരോടുള്ള കേന്ദ്ര, സംസ്ഥാന സർക്കാരുകളുടെ അവഗണനയ്ക്കെതിരേ ഈ മാസം സംസ്ഥാന കമ്മിറ്റിയുടെ നേതൃത്വത്തിൽ നടത്തുന്ന സെക്രട്ടേറിയറ്റ് മാർച്ചിൽ ജില്ലയിൽനിന്നു 100 പേരെ പങ്കെടുപ്പിക്കാൻ തീരുമാനിച്ചു. സംസ്ഥാന സെക്രട്ടറി പി.കെ. അബ്ദുൾ അസീസ് ഉദ്ഘാടനം ചെയ്തു. ജില്ലാ പ്രസിഡന്‍റ് വി. അസൈനാർ ഹാജി അധ്യക്ഷത വഹിച്ചു. കല്ലിടുന്പൻ ഹംസ ഹാജി, പൊരളോത്ത് അമ്മദ് ഹാജി, എം. അന്ത്രു ഹാജി, മായൻ മുതിര, തന്നാണി അബൂബക്കർ ഹാജി, ഖാലിദ് വേങ്ങൂർ, പി.കെ. മൊയ്തീൻകുട്ടി, ആർ.പി. അസ്ലം തങ്ങൾ, സൗജത്ത് ഉസ്മാൻ, കെ. കുഞ്ഞായിഷ, അലവി വടക്കേതിൽ, എൻ.എ. ബഷീർ എന്നിവർ പ്രസംഗിച്ചു.

കാടോരം വിശ്രമ കേന്ദ്രം വീണ്ടും തുറക്കാൻ വനം വകുപ്പിൽ സമ്മർദ്ദമേറുന്നു

സുൽത്താൻ ബത്തേരി: സഞ്ചാരികൾക്ക് ഏറെ ഉപകാരപ്രദമായിരുന്ന കാടോരം വിശ്രമ കേന്ദ്രം വീണ്ടും തുറന്ന് പ്രവർത്തിക്കാൻ വനം വകുപ്പിൽ സമ്മർദ്ദമേറുന്നു. കഴിഞ്ഞ വർഷമാണ് വനപാതയോരത്തെ വിശ്രമകേന്ദ്രമായ കാടോരം സാങ്കേതികത്വത്തിന്‍റെ പേര് പറഞ്ഞ് അടച്ചുപൂട്ടിയത്. എന്നാൽ മാസങ്ങൾക്ക് മുന്പ് തുറന്ന് പ്രവർത്തിക്കാൻ നീക്കം നടന്നെങ്കിലും തുറക്കാനായില്ല. സഞ്ചാരികൾക്ക് വിശ്രമിക്കുന്നതിനും ഭക്ഷണം കഴിക്കുന്നതിനും ശൗചാലയം ഉപയോഗിക്കുന്നതിനും മറ്റുമായാണ് മുത്തങ്ങക്കടുത്ത കല്ലൂർ അറുപത്തിയേഴിൽ വനം വകുപ്പ് പദ്ധതി ആരംഭിച്ചത്. ആളൊന്നിന് 10 രൂപയാണ് വിശ്രമകേന്ദ്രത്തിലെ നിരക്ക്. കുടുംബമായും കൂട്ടമായും എത്തുന്നവർക്ക് ഏറെ പ്രയോജനപ്പെട്ടിരുന്നു കാടോരം. മാസങ്ങളായി പൂട്ടിക്കിടന്നതിനാൽ പ്രകൃതിയോട് ഇണങ്ങുന്ന രീതിയിൽ കെട്ടിയുണ്ടാക്കിയ കുടിലുകൾ ഉൾപ്പടെയുള്ളവ നാശത്തെ നേരിട്ടുകൊണ്ടിരിക്കുകയാണ്. ഗുണ്ടൽപേട്ടിലെ മഥൂർ കഴിഞ്ഞാൽ കേരളത്തിലേക്ക് വരുന്പോൾ വിശ്രമിക്കുന്നതിനോ ശൗചാലയ സൗകര്യമോ വഴിയരികിൽ സൗകര്യമില്ല. ആകെയുണ്ടായിരുന്നത് കാടോരം വിശ്രമ കേന്ദ്രം മാത്രമായിരുന്നു. ഇത് അടച്ച് പൂട്ടിയതോടെ സഞ്ചാരികൾ ദുരിതത്തിലായി. ഈ സാഹചര്യത്തിലാണ് വിശ്രമ കേന്ദ്രത്തിന്‍റെ ആവശ്യകത വീണ്ടും ഉയർന്നത്. മുത്തങ്ങയിൽ കഴിഞ്ഞ ദിവസം മാധ്യമ പ്രവർത്തകർക്കായി നടത്തിയ ശിൽപ്പശാലയിലും ആവശ്യ ഉയർന്നിരുന്നു. ഈ ആവശ്യം വനപാലകർ അംഗീകരിച്ചതോടെയാണ് കാടോരം കേന്ദ്രം തുറന്ന് പ്രവർത്തിക്കാനുള്ള നീക്കം നടക്കുന്നത്.

എൽസ്റ്റണ്‍ എസ്റ്റേറ്റിലെ തൊഴിലാളി പ്രശ്നത്തിന് പരിഹാരമാകുന്നു; 24 കോടി അനുവദിച്ചു

കൽപ്പറ്റ: പുഞ്ചരിമട്ടം ഉരുൾ ദുരന്തബാധിതരുടെ പുനരധിവാസത്തിന് സർക്കാർ ഏറ്റെടുത്ത എൽസ്റ്റൺ എസ്റ്റേറ്റിലെ തൊഴിലാളി പ്രശ്നത്തിന് പരിഹാരമാകുന്നു. തൊഴിലാളികൾക്ക് വേതനക്കുടിശികയും ആനുകുല്യങ്ങളും വിതരണം ചെയ്യുന്നതിന് എസ്റ്റേറ്റ് ഉടമയ്ക്ക് 24 കോടി രൂപ ഹൈക്കോടതി അനുവദിച്ചതായി ലേബർ ഓഫീസിൽ ഉദ്യോഗസ്ഥരെയും തൊഴിലാളി പ്രതിനിധികളെയും പങ്കെടുപ്പിച്ച് നടത്തിയ യോഗത്തിൽ ഡെപ്യൂട്ടി ലേബർ കമ്മീഷണർ കെ.എം. സുനിൽകുമാർ അ റിയിച്ചു. സംയുക്ത ട്രേഡ് യൂണിയൻ സമിതിയുടെ നേതൃത്വത്തിൽ തൊഴിലാളികൾ കളക്ടറേറ്റ് പടിക്കൽ നാളെ അനിശ്ചിതകാല സമരം തുടങ്ങാനിരിക്കേയായിരുന്നു യോഗം. എസ്റ്റേറ്റ് ഉടമയുടെ ഹർജിയിൽ ഹൈക്കോടതി ഉത്തരവായതനുസരിച്ച് സർക്കാർ ഹൈക്കോടതിയിൽ കെട്ടിവച്ച തുകയിൽനിന്നാണ് 24 കോടി രൂപ അനുവദിച്ചതെന്നു ഡെപ്യൂട്ടി ലേബർ കമ്മീഷണർ പറഞ്ഞു. തൊഴിലാളികളുടെ വേതനക്കുടിശികയും ആനുകൂല്യങ്ങളും അഞ്ച് ദിവസത്തിനകം വിതരണം ചെയ്യണമെന്നു ഹൈക്കോടതി നിർദേശമുണ്ട്. തുക വിതരണം ചെയ്യുന്നതിൽ എസ്റ്റേറ്റ് ഉടമ കാലതാമസം വരുത്തിയാൽ റവന്യു റിക്കവറി മുഖേന തൊഴിലാളികൾക്ക് തുക നൽകാൻ സാധിക്കും. ഹൈക്കോടതി നിർദേശിച്ച സമയപരിധിയിൽ തൊഴിലാളികൾക്ക് തുക നൽകാത്ത സാഹചര്യമുണ്ടായാൽ സർക്കാരിലേക്ക് റിപ്പോർട്ട് ചെയ്ത് റവന്യു റിക്കവറി നടപടി സ്വീകരിച്ച് തൊഴിൽ ഉടമയുടെ ബാങ്ക് അക്കൗണ്ട് അറ്റാച്ച് ചെയ്യാൻ ജില്ലാ കളക്ടർ സ്വീകരിച്ചിട്ടുണ്ട്. വെരിഫിക്കേഷൻ പൂർത്തിയാക്കുന്ന മുറയ്ക്ക് പിഎഫ് ആനുകൂല്യം 20 ദിവസത്തിനകം തൊഴിലാളികളുടെ അക്കൗണ്ടിൽ ലഭ്യമാകുമെന്നും ഡെപ്യൂട്ടി ലേബർ കമ്മീഷണർ പറഞ്ഞു. ജില്ലാ ലേബർ ഓഫീസർ സി. വിനോദ് കുമാർ, ചൂരൽമല-മുണ്ടക്കൈ സ്പെഷൽ ഓഫീസർ സി.വി. മൻമോഹൻ, പ്ലാന്‍റേഷൻ ഇൻസ്പെക്ടർ ആർ. പ്രിയ, വിവിധ തൊഴിലാളി സംഘടനാ പ്രതിനിധികളായ പി. ഗഗാറിൻ(സിഐടിയു) പി.പി. ആലി (ഐഎൻടിയുസി), എൻ.ഒ. ദേവസി(എച്ച്എംഎസ്), എൻ. വേണുഗോപാൽ( കെഡിഎൽപിസി), യു. കരുണൻ(എസ്റ്റേറ്റ് ലേബർ യൂണിയൻ), ബി. സുരേഷ്ബാബു(മലബാർ എസ്റ്റേറ്റ് വർക്കേഴ്സ് യൂണിയൻ), കെ.ടി. ബാലകൃഷ്ണൻ(വയനാട് എസ്റ്റേറ്റ് ലേബർ യൂണിയൻ)എന്നിവർ യോഗത്തിൽ പങ്കെടുത്തു.

ദ്വാരകയിൽ ബസ് ബേ ഒരുങ്ങുന്നു

മാനന്തവാടി: എടവക പഞ്ചായത്തിലെ ദ്വാരകയിൽ ബസ് ബേ ഒരുങ്ങുന്നു. കോഴിക്കോട് റോഡിൽ മാനന്തവാടി രൂപത ലഭ്യമാക്കിയ 20 സെന്‍റിലാണ് ബസ് ബേ സജ്ജമാകുന്നത്. ലക്ഷക്കണക്കിനു രൂപ വിലമതിക്കുന്ന സ്ഥലമാണ് രൂപത പദ്ധതിക്കു വിട്ടുകൊടുത്തത്. പഞ്ചായത്തിന്‍റെ തനതുഫണ്ടിൽനിന്നു 50 ലക്ഷം രൂപ ചെലവഴിച്ചാണ് പ്രവൃത്തി നടത്തിയത്. ഗതാഗത ഉപദേശക സമിതിയുടെ അനുമതി ലഭിച്ചാലുടൻ ബസ് ബേ പൊതുജനങ്ങൾക്കു തുറന്നുകൊടുക്കും. കാത്തിരിപ്പ് കേന്ദ്രം, ഇരിപ്പിടങ്ങൾ, ശുചിമുറി, കോഫി ഷോപ്പ് എന്നിവ ബസ് ബേയിൽ സജ്ജീകരിക്കും. വിദ്യാർഥികളുടെ ഉപയോഗത്തിന് ഊരാളുങ്കൽ ലേബർ കോണ്‍ട്രാക്ട് സൊസൈറ്റിയുടെ സഹായത്തോടെ ബസ് ബേയിലേക്ക് നടപ്പാത നിർമിക്കും. നിരവധി വിദ്യാഭ്യാസ സ്ഥാപനങ്ങൾ പ്രവർത്തിക്കുന്ന സ്ഥലമാണ് ദ്വാരക. പ്രതിദിനം അയ്യായിരത്തോളം വിദ്യാർഥികളാണ് ദ്വാരകയിൽ വന്നുപോകുന്നത്. ബസ് ബേ നിർമാണത്തിന് പ്രാരംഭ പ്രവർത്തനങ്ങൾ പഞ്ചായത്ത് 2015ൽ ആരംഭിച്ചതാണ്. എന്നാൽ പ്രളയവും കോവിഡും പദ്ധതിയുടെ താളം തെറ്റിച്ചു. ദ്വാരകയിലെ ബസ് കാത്തിരിപ്പുകേന്ദ്രം മലയോര ഹൈവേ പദ്ധതിയുടെ ഭാഗമായി പൊളിച്ച് മാറ്റിയിരുന്നു. ഇത് വിദ്യാർഥികൾ അടക്കം യാത്രക്കാർക്ക് ദുരിതമായ സാഹചര്യത്തിലാണ് ബസ് ബേ യാഥാർഥ്യമാക്കുന്നതിനു നീക്കം വേഗത്തിലാക്കിയത്.

തൊഴിലുറപ്പ് പദ്ധതി നിർവഹണത്തിലെ തട്ടിപ്പ്: അന്വേഷണം അട്ടിമറിക്കാൻ നീക്കമെന്ന് യുഡിഎഫ്

മക്കിയാട്: തൊണ്ടർനാട് പഞ്ചായത്തിൽ തൊഴിലുറപ്പ് പദ്ധതി നിർവഹണത്തിൽ നടന്ന തട്ടിപ്പുമായി ബന്ധപ്പെട്ട കേസ് അന്വേഷണം അന്വേഷണം അട്ടിമറിക്കാൻ സിപിഎം നീക്കം നടത്തുന്നതായി യുഡിഎഫ് പഞ്ചായത്ത് കമ്മിറ്റി ആരോപിച്ചു. ബ്ലോക്ക് പഞ്ചായത്ത് എൻആർഇജി പ്രോഗ്രാം ഓഫീസറുടെ പരിശോധനയിലാണ് തട്ടിപ്പ് കണ്ടെത്തിയത്. ഇതേത്തുടർന്നു രജിസ്റ്റർ ചെയ്ത കേസിൽ അന്വേഷണം ഇഴയുന്നതിനു പിന്നിൽ സിപിഎം ഇടപെടലാണ്. സംസ്ഥാനത്ത് തൊഴിലുറപ്പ് പദ്ധതിയുമായി ബന്ധപ്പെട്ട് ഇതിനകം പുറത്തുവന്നതിൽ ഏറ്റവും വലിയ തട്ടിപ്പാണ് തൊണ്ടർനാട് പഞ്ചായത്തിൽ നടന്നത്. ഇതുമായി ബന്ധപ്പെട്ട് ജില്ലാ കളക്ടർ ഉത്തരവായ വകുപ്പുതല അന്വേഷണം പൂർത്തിയായില്ല. ക്രൈംബ്രാഞ്ച് ഡിവൈഎസ്പിയുടെ മേൽനോട്ടത്തിലുള്ള അന്വേഷണവും മന്ദഗതിയിലാണ്. കേസിൽ അറസ്റ്റിലായ അക്കൗണ്ടന്‍റ് നിധിനെ കസ്റ്റഡിയിൽ വാങ്ങി ചോദ്യംചെയ്യാൻ പോലീസ് തയാറാകുന്നില്ല. കേസിൽ ഉൾപ്പെട്ട അക്രഡിറ്റഡ് എൻജിനിയർ ജോജോ ജോണിക്ക് വിദേശത്തേക്ക് കടക്കാൻ ചിലർ സൗകര്യം ഒരുക്കി. തൊഴിലുറപ്പ് പദ്ധതി ഗുണഭോക്തൃ ലിസ്റ്റ് പരിശോധിച്ച് ഫീൽഡുതല അന്വേഷണം നടത്തുന്പോൾ ഞെട്ടിക്കുന്ന വിവരങ്ങളാണ് പുറത്തുവരുന്നത്. വർഷങ്ങൾ പഴക്കമുള്ള കിണറുകൾക്കുപോലും ബില്ലുണ്ടാക്കി പണം തട്ടിയതായി സൂചനയുണ്ട്. അഴിമതിയിൽ പങ്കാളികളായ മുഴുവൻ ആളുകളെയും നിയമനത്തിനു മുന്പിൽ നിർത്തണമെന്ന് യോഗം ആവശ്യപ്പെട്ടു. 12, 13 തീയതികളിൽ പഞ്ചായത്തിൽ കുറ്റവിചാരണ ജാഥയും പിന്നീട് ശക്തമായ സമരവും സംഘടിപ്പിക്കാൻ തീരുമാനിച്ചു. ചെയർമാൻ എസ്.എം. പ്രമോദ് അധ്യക്ഷത വഹിച്ചു. ടി. മൊയ്തു, പി.എം. ടോമി, പടയൻ അബ്ദുള്ള, കെ.ടി. കുഞ്ഞിക്കൃഷ്ണൻ, എം.ടി. ജോസഫ്, ആറങ്ങാടൻ ആലിക്കുട്ടി, പി.എ. മൊയ്തൂട്ടി, എം.കെ. അബൂബക്കർ, ടി.കെ. മമ്മൂട്ടി, കെ.വി. ബാബു, വി.സി. ഹമീദ് എന്നിവർ പ്രസംഗിച്ചു. കണ്‍വീനർ അബ്ദുള്ള കേളോത്ത് സ്വാഗതവും സലിം അസ്ഹരി നന്ദിയും പറഞ്ഞു.

തുരങ്കപാത: പശ്ചിമഘട്ട സംരക്ഷണ സമിതി ധർണ നടത്തി

കൽപ്പറ്റ: ആനക്കാംപൊയിൽ-കള്ളാടി തുരങ്കപാത പദ്ധതി സർക്കാർ ഉപേക്ഷിക്കണമെന്ന് ആവശ്യപ്പെട്ട് പശ്ചിമഘട്ട സംരക്ഷണ സമിതിയുടെ നേതൃത്വത്തിൽ ഹെഡ്പോസ്റ്റ് ഓഫീസ് പരിസരത്ത് ധർണ നടത്തി. ചെയർമാൻ വർഗീസ് വട്ടേക്കാട്ടിൽ ഉദ്ഘാടനം ചെയ്തു. ശാസ്ത്രീയ പഠനങ്ങൾ നടത്താതെയാണ് തുരങ്കപാത പദ്ധതിയുമായി സർക്കാർ മുന്നോട്ടുപോകുന്നതെന്നു അദ്ദേഹം ആരോപിച്ചു. പരിസ്ഥിതി ലോല പ്രദേശത്തെ തുരങ്കപാത നിർമാണം ഭാവിയിൽ വിനാശത്തിനു കാരണമാകുമെന്ന് അഭിപ്രായപ്പെട്ടു. താമരശേരി ചുരം റോഡ് അടിയന്തരമായി നവീകരിക്കണമെന്ന് ആവശ്യപ്പെട്ടു. പി.ജി. മോഹൻദാസ് അധ്യക്ഷത വഹിച്ചു. റിട്ട.അധ്യാപകനും എഴുത്തുകാരനുമായ കെ.കെ. സുരേന്ദ്രൻ, പ്രജൂഷ്, സലിംകുമാർ, ഉണ്ണിക്കൃഷ്ണൻ ചീരാൽ, സുനിൽ ജോസഫ്, അരൂഷ് കാരായി എന്നിവർ പ്രസംഗിച്ചു. ബഷീർ ആനന്ദ് ജോണ്‍ സ്വാഗതവും കൃഷ്ണൻകുട്ടി നന്ദിയും പറഞ്ഞു.

ഗവ.മെഡിക്കൽ കോളജ്: സ്ഥിര നിർമാണം മടക്കിമലയിൽ നടത്തുന്നതിന് ആക്‌ഷൻ കമ്മിറ്റി സമ്മർദം ശക്തമാക്കുന്നു

കൽപ്പറ്റ: വയനാട് ഗവ.മെഡിക്കൽ കോളജിനുള്ള സ്ഥിര നിർമാണം മടക്കിമലയിൽ നടത്തുന്നതിന് ആക്‌ഷൻ കമ്മിറ്റി സമ്മർദം ശക്തമാക്കുന്നു. ഇതിന്‍റെ ഭാഗമായി 17ന് കളക്ടറേറ്റ് പടിക്കൽ ധർണ നടത്താൻ കഴിഞ്ഞ ദിവസം എംജിടി ഹാളിൽ വിവിധ സംഘടനാപ്രതിനിധികളെ പങ്കെടുപ്പിച്ച് കമ്മിറ്റി സംഘടിപ്പിച്ച യോഗം തീരുമാനിച്ചു. മെഡിക്കൽ കോളജ് മടക്കിമലയിൽ ചന്ദ്രപ്രഭ ചാരിറ്റബിൾ ട്രസ്റ്റ് സൗജന്യമായി വിട്ടുകൊടുത്ത സ്ഥലത്ത് സ്ഥാപിക്കുന്നതിന് പ്രാരംഭ പ്രവർത്തനങ്ങൾ നടത്തിയിരുന്നു. ഇതിനുശേഷം പാരിസ്ഥിതിക പ്രശ്നങ്ങൾ പറഞ്ഞ് പേരിയ വില്ലേജിൽ ഗ്ലെൻ ലെവൻ എസ്റ്റേറ്റിൽനിന്നു ഏറ്റെടുത്ത ഭൂമിയിലേക്ക് കോളജ് മാറ്റാൻ തീരുമാനിച്ചിതിനു പിന്നിൽ രാഷ്‌ട്രീയ-ഉദ്യോഗസ്ഥ ഗൂഢാലോചനയുണ്ടന്ന് യോഗം ആരോപിച്ചു. പേരിയയിലെ ഭൂമി മെഡിക്കൽ കോളജ് നിർമാണത്തിന് യോജിച്ചതല്ലെന്നു അഭിപ്രായപ്പെട്ടു. വയനാട് ചേബർ ഓഫ് കൊമേഴ്സ് പ്രസിഡന്‍റ് ജോണി പാറ്റാനി ഉദ്ഘാടനം ചെയ്തു. ആക്ഷൻ കമ്മിറ്റി ചെയർമാൻ ഡോ.എം. ബാലകൃഷ്ണൻ അധ്യക്ഷത വഹിച്ചു. അഡ്വ.വി.പി. എൽദോ മുഖ്യപ്രഭാഷണം നടത്തി. കെ.വി. ഗോകുൽദാസ്, വിജയൻ മടക്കിമല, സുജാത കോട്ടവയൽ, വർഗീസ് വട്ടേക്കാട്, സാം പി. മാത്യു, ജോണ്‍ തയ്യിൽ, ജോസഫ് വള്ളിനാൽ, സി.എച്ച്. സജിത്കുമാർ, വസന്ത പനമരം, ചന്ദ്രൻ വൈക്കത്ത് എന്നിവർ പ്രസംഗിച്ചു.

കടമാൻതോട് പദ്ധതി: ജില്ലാ കളക്ടർ യോഗം വിളിക്കണമെന്ന് കെ.എൽ. പൗലോസ്

കൽപ്പറ്റ: പുൽപ്പള്ളി കടമാൻതോട് ജലസേചന പദ്ധതിയുമായി ബന്ധപ്പെട്ട് ജനങ്ങൾക്കുള്ള ആശങ്ക പരിഹരിക്കാൻ ജില്ലാ കളക്ടറുടെ നേതൃത്വത്തിൽ പ്രദേശവാസികളുടെ യോഗം വിളിക്കണമെന്ന് ജില്ലാ വികസന സമിതി യോഗത്തിൽ പ്രിയങ്ക ഗാന്ധി എംപിയുടെ പ്രതിനിധി കെ.എൽ. പൗലോസ് ആവശ്യപ്പെട്ടു. പദ്ധതിയുമായി ബന്ധപ്പെട്ട പല കാര്യങ്ങളിലും വ്യക്തമായ വിവരം ജനങ്ങൾക്ക് ലഭിക്കാത്ത സാഹചര്യത്തിലാണ് അദ്ദേഹം ഈ ആവശ്യം ഉന്നയിച്ചത്. താമരശേരി ചുരം റോഡിന്‍റെ സംരക്ഷണത്തിനും ചിപ്പിലിത്തോട്-മരുതിലാവ്-തളിപ്പുഴ ബൈപാസ് നിർമാണത്തിനും സർക്കാരിൽ സമ്മർദം ചെലുത്തണമെന്നും പൗലോസ് ആവശ്യപ്പെട്ടു. പട്ടികവർഗത്തിലെ ഭൂരഹിത കുടുംബങ്ങൾക്ക് ഭവന നിർമാണത്തിന് കണ്ടെത്തുന്ന ഭൂമിയിൽ അടിസ്ഥാന സൗകര്യങ്ങൾ ഉറപ്പാക്കണമെന്ന് യോഗത്തിൽ പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു നിർദേശിച്ചു. അതിഥി തൊഴിലാളികളുടെ സുരക്ഷിതത്വം ഉറപ്പാക്കുന്നതിന്‍റെ ഭാഗമായി ജില്ലയിലെ മുഴുവൻ എസ്റ്റേറ്റ് പാടികളിലും പരിശോധന നടത്തിയതായി തൊഴിൽ വകുപ്പ് അധികൃതർ യോഗത്തിൽ അറിയിച്ചു. ജില്ലയിൽ 14,500 അതിഥി തൊഴിലാളികൾ തൊഴിൽ വകുപ്പിൽ രജിസ്റ്റർ ചെയ്തിട്ടുണ്ട്. ബാണാസുര അണയുടെ പരിസരത്തുകൂടിയുള്ള കുതിരപ്പാണ്ടി റോഡിന് പകരം അനുവദിച്ച പാത സഞ്ചാരയോഗ്യമാക്കുന്നതിന് സംയുക്ത പരിശോധന നടത്തി നടപടി സ്വീകരിക്കാൻ യോഗം ബന്ധപ്പെട്ടവർക്ക് നിർദേശം നൽകി. കൈനാട്ടി മുതൽ മുത്തങ്ങ വരെ ദശീയ പാതയോരത്ത് കാടുവെട്ടൽ പൂർത്തിയായതായി നാഷണൽ ഹൈവേ അസിസ്റ്റന്‍റ് എൻജിനിയർ അറിയിച്ചു. ജില്ലയുടെ വിവിധ ഭാഗങ്ങളിൽ തദ്ദേശസ്ഥാപനങ്ങളുടെ അനുമതിയോടെ നിർമിച്ച 11 ജലസംഭരണികളുടെ സുരക്ഷ ഉറപ്പാക്കാൻ നടപടികൾ സ്വീകരിച്ചതായി ബന്ധപ്പെട്ടവർ യോഗത്തിൽ വ്യക്തമാക്കി. പട്ടികവർഗ വിദ്യാർഥികളുടെ കൊഴിഞ്ഞുപോക്ക് തടയാൻ ആക്‌ഷൻ പ്ലാൻ തയാറാക്കിയതായി വിദ്യാഭ്യാസ ഡെപ്യൂട്ടി ഡയറക്ടർ അറിയിച്ചു. കോട്ടത്തറ, മേപ്പാടി, നെൻമേനി, നൂൽപ്പുഴ, പൂതാടി, പുൽപ്പള്ളി, തൊണ്ടർനാട്, വൈത്തിരി പഞ്ചായത്തുകളിൽ ഉന്നതികൾ കേന്ദ്രീകരിച്ച് രക്ഷിതാക്കൾക്കും കുട്ടികൾക്കും ബോധവത്കരണം സംഘടിപ്പിച്ചതായി അദ്ദേഹം പറഞ്ഞു. ഉൾപ്രദേശങ്ങളിലേക്കുള്ള ലാസ്റ്റ് ട്രിപ്പ് മുടക്കുന്ന എട്ട് സ്വകാര്യ ബസുകൾക്കെതിരേ നടപടി സ്വീകരിച്ചതായി റീജണൽ ട്രാൻസ്പോർട്ട് ഓഫീസർ അറിയിച്ചു. കൽപ്പറ്റ ബൈപാസ് ജംഗ്ഷനിലെ കുഴികൾ അടയ്ക്കാൻ അടിയന്തര നടപടി സ്വീകരിക്കാൻ എൻഎച്ച്എവൈ അസിസ്റ്റന്‍റ് എൻജിനിയർക്ക് യോഗം നിർദേശം നൽകി. ജില്ലാ കളക്ടർ ഡി.ആർ. മേഘശ്രീ അധ്യക്ഷത വഹിച്ചു. ടി. സിദ്ദിഖ് എംഎൽഎ, എഡിഎം കെ. ദേവകി, സബ് കളക്ടർ അതുൽ സാഗർ, പ്ലാനിംഗ് ഓഫീസർ ഇൻചാർജ് കെ.എസ്. ശ്രീജിത്ത്, ജില്ലാതല ഉദ്യോഗസ്ഥർ എന്നിവർ പങ്കെടുത്തു.

തേയിലത്തോട്ടത്തിൽ തങ്ങുന്ന കരിന്പുലിയും കുട്ടികളും ഭീതി പരത്തുന്നു

ഗൂഡല്ലൂർ: തേയിലത്തോട്ടത്തിൽ തങ്ങുന്ന കരിന്പുലിയും മൂന്നു കുട്ടികളും സമീപവാസികളിൽ ഭീതി പരത്തുന്നു. കോത്തഗിരി ഓറശോലയിയിലാണ് കരിന്പുലിയും കുട്ടികളും തേയിലത്തോട്ടത്തിൽ തങ്ങുന്നത്. കഴിഞ്ഞ ദിവസമാണ് തോട്ടത്തിൽ പുലിയും കുഞ്ഞുങ്ങളും പ്രദേശവാസികളുടെ ശ്രദ്ധയിൽപ്പെട്ടത്. ജോലിക്ക് പോകാൻ കഴിയാത്ത സ്ഥിതിയിലാണ് തൊഴിലാളികൾ. പുലിയെയും കുഞ്ഞുങ്ങളെയും പിടികൂടി ഉൾക്കാട്ടിൽ വിടണമെന്ന് അവർ ആവശ്യപ്പെട്ടു.

വിദ്യാർഥിനിയുടെ മാല കവർന്നു

സുൽത്താൻ ബത്തേരി: വഴിയരികിലൂടെ നടന്നുപോവുകയായിരുന്ന പെണ്‍കുട്ടിയുടെ മാല മങ്കി ക്യാപ് ധരിച്ച് മുഖംമറച്ചയാൾ കവർന്നു. കഴിഞ്ഞദിവസം രാത്രി ഒന്പതോടെ കുപ്പാടി സ്കൂളിന് സമീപമാണ് സംഭവം. കന്പളക്കാട് സ്വദേശിനി ആദർശയുടെ അര പവൻ വരുന്ന മാലയാണ് നഷ്ടമായത്. ഭക്ഷ്യോത്പന്ന നിർമാണ പരിശീലന ക്യാന്പിനെത്തിയ പെണ്‍കുട്ടി താമസസ്ഥലത്തേക്ക് പോകുകയായിരുന്നു. ഒപ്പമുണ്ടായിരുന്ന രണ്ടു പെണ്‍കുട്ടികളെ തള്ളിയിട്ടശേഷമാണ് മാല പൊട്ടിച്ച് ഓടിയത്. ആദർശയുടെ പരാതിയിൽ പോലീസ് കേസെടുത്ത് അന്വേഷണം തുടങ്ങി.

കർഷകമിത്രം പ്രവർത്തനം മാതൃക: ബിഷപ് ഡോ.ജോസഫ് മാർ തോമസ്

സുൽത്താൻ ബത്തേരി: ജൈവകൃഷി നടത്തിയും ജൈവ ഉത്പന്നങ്ങളുടെ ഔട്ട് ലെറ്റ് തുടങ്ങിയും മാതൃകാപരമായ പ്രവർത്തനമാണ് കർഷകമിത്രം ഫാർമേഴ്സ് പ്രൊഡ്യൂസർ കന്പനി നടത്തുന്നതെന്ന് ബത്തേരി രൂപത അധ്യക്ഷൻ ഡോ.ജോസഫ് മാർ തോമസ്. ഈസ്റ്റ് ചീരാലിൽ കർഷകമിത്രം പ്രൊഡക്ഷൻ സെന്‍റർ ഉദ്ഘാടനം ചെയ്യുകയായിരുന്നു പിതാവ്. കൂടുതൽ ഔട്ട് ലെറ്റുകൾ ആരംഭിക്കുന്നതിന് കർഷകമിത്രം രക്ഷാധികാരി എന്ന നിലയിൽ പൂർണ പിന്തുണ ഉണ്ടാകുമെന്നു ബിഷപ് പറഞ്ഞു. കർഷകമിത്രം ഉപ രക്ഷാധികാരി കാദർ പട്ടാന്പി അധ്യക്ഷത വഹിച്ചു. നവീകരിച്ച ഫ്ളോർ മില്ല് പൗൾട്രി ബോർഡ് ചെയർമാൻ പി.കെ. മൂർത്തി ഉദ്ഘാടനം ചെയ്തു. തെരഞ്ഞെടുത്ത കർഷകമിത്രം അംഗങ്ങളെ ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ ആദരിച്ചു. കർഷകമിത്രം അംഗങ്ങൾക്കുള്ള കിറ്റ് വിതരണം ജില്ലാ പ്രിൻസിപ്പൽ കൃഷി ഓഫീസർ രാജീ വർഗീസ് നിർവഹിച്ചു. സ്നാക്സ്, അച്ചാർ യൂണിറ്റ് ഉദ്ഘാടനം പഞ്ചായത്ത് അംഗങ്ങളായ കെ.വി. കൃഷ്ണൻകുട്ടി, അഫ്സൽ, വിനോദിനി എന്നിവർ സംയുക്തമായി നിർവഹിച്ചു. കർഷകമിത്രം ചെയർമാൻ പി.എം. ജോയി, നെൻമേനി പഞ്ചായത്ത് പ്രസിഡന്‍റ് ബിന്ദു അനന്തൻ, പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ വി.ടി. ബേബി, കർഷകമിത്രം ഡയറക്ടർമാരായ ഡോ.പി. ലക്ഷ്മണൻ, കെ.പി. യൂസഫ് ഹാജി, വിഷ്ണു വേണുഗോപാൽ എന്നിവർ പ്രസംഗിച്ചു.

മണ്ണെണ്ണ കൃത്യമായി വിതരണം ചെയ്യുന്നില്ലെന്ന്

ഗൂഡല്ലൂർ: നീലഗിരിയിലെ ചില റേഷൻകടകളിൽ മണ്ണെണ്ണ കൃത്യമായി വിതരണം ചെയ്യുന്നില്ലെന്ന് പരാതി. ഓരോ കടയിലും തോന്നിയതുപോലെയാണ് മണ്ണെണ്ണ വിതരണമെന്ന് കാർഡ് ഉടമകൾ പറയുന്നു. ഇതേക്കുറിച്ച് ചോദിക്കുന്പോൾ അധികൃതർ വ്യക്തമായ മറുപടി നൽകുന്നില്ല. വൈദ്യുതി, പാചക വാതക കണക്ഷൻ ഇല്ലാത്ത റേഷൻ കാർഡ് ഉടമകൾക്ക് മാസം അഞ്ച് ലിറ്റർ മണ്ണെണ്ണ വീതമാണ് നൽകേണ്ടത്. എന്നാൽ റേഷൻകട നടത്തിപ്പുകാരിൽ പലരും ഇത്രയും അളവിൽ മണ്ണെണ്ണ നൽകുന്നില്ല. സിവിൽ സപ്ലൈസ് അധികൃതർ റേഷൻകടകളിൽ പരിശോധന നടത്തുന്നില്ല. ഉപഭോക്താക്കൾക്ക് എല്ലാ റേഷൻ സാധനങ്ങളും കൃത്യമായി വിതരണം ചെയ്യുന്നുവെന്ന് സർക്കാർ ഉറപ്പുവരുത്തണമെന്നാണ് ജനങ്ങളുടെ ആവശ്യം.

ചുരം ബദൽ റോഡ്: നടപടികൾ ത്വരിതപ്പെടുത്തണമെന്ന്

കൽപ്പറ്റ: താമരശേരി ചുരത്തിലെ മണ്ണിടിച്ചിലും തുടർന്നുണ്ടായ യാത്രാക്ലേശവും ബദൽ സംവിധാനത്തിന്‍റെ അനിവാര്യതയാണ് വെളിവാക്കുന്നതെന്നു എസ്ഡിപിഐ ജില്ലാ കമ്മിറ്റി അഭിപ്രായപ്പെട്ടു. ചുരം ബദൽ റോഡ് പദ്ധതി പ്രഥമ പരിഗണന നൽകി പൂർത്തിയാക്കണമെന്നു ആവശ്യപ്പെട്ടു. ചുരത്തിലെ യാത്രാതടസം തുടർക്കഥയാണ്. ദേശീയപാതയിലെ രാത്രിയാത്രാനിരോധനവും ചുരത്തിലെ തടസങ്ങളും തുടർന്ന് കുറ്റ്യാടി ചുരത്തിൽ അനുഭവപ്പെടുന്ന വാഹനത്തിരക്കും ജില്ല ഒറ്റപ്പെടുന്ന സാഹചര്യമാണ് സൃഷ്ടിക്കുന്നത്. മാനന്തവാടി ഗവ.മെഡിക്കൽ കോളജിൽനിന്നു റഫർ ചെയ്യുന്ന രോഗികൾ വിദഗ്ധ ചികിത്സയ്ക്കു കോഴിക്കോട് മെഡിക്കൽ കോളജിനെയാണ് ആശ്രയിക്കുന്നത്. അടിയന്തര ചികിത്സ ലഭിക്കേണ്ട രോഗികൾ മരണത്തിന് കീഴടങ്ങേണ്ട സാഹചര്യമാണുള്ളത്. ചുരത്തിലെ യാത്രാതടസംമൂലം വിദേശയാത്ര മുടങ്ങിയവർ ജില്ലയിലുണ്ട്. ചരക്കുവാഹനങ്ങൾ മണിക്കൂറുകൾ ചുരത്തിലും സമീപത്തും കുടുങ്ങുന്നതു പ്രശ്നങ്ങൾ സൃഷ്ടിക്കുന്നുണ്ട്. ജില്ലാ രൂപീകരണം മുതൽ തുടരുന്ന യാത്രാക്ലേശത്തിന് ഭരണ-പ്രതിപക്ഷ കക്ഷികൾ തുല്യ ഉത്തരവാദികളാണ്. പ്രതിപക്ഷത്തിരിക്കുന്പോൾ പ്രതിഷേധവും ഭരണത്തിലിരിക്കുന്പോൾ മൗനവുമെന്ന കാപട്യം രാഷ്ട്രീയ പാർട്ടികൾ അവസാനിപ്പിക്കണമെന്നും യോഗം ആവശ്യപ്പെട്ടു. പ്രസിഡന്‍റ് എ. യൂസുഫ് അധ്യക്ഷത വഹിച്ചു. എൻ. ഹംസ, കെ.ജെ. തോമസ്, സൽമ അഷ്റഫ്, ബബിത ശ്രീനു എന്നിവർ പ്രസംഗിച്ചു. ജില്ലാ ജനറൽ സെക്രട്ടറി പി.ടി. സിദ്ദിഖ് സ്വാഗതവും ട്രഷറർ കെ.പി സുബൈർ നന്ദിയും പറഞ്ഞു.

വയറിംഗ് നടത്തുന്നത് ലൈസൻസ് ഉള്ളവരെന്നു ഉറപ്പുവരുത്തണം: ഇഡബ്ല്യു ആൻഡ് എസ്എ ജില്ലാ സമ്മേളനം

കൽപ്പറ്റ: വീടുകളിലും കെട്ടിടങ്ങളിലും മറ്റും വയറിംഗ് ജോലി ചെയ്യുന്നത് ലൈസൻസും പെർമിറ്റും ഉള്ളവരാണെന്ന് അധികൃതർ ഉറപ്പുവരുത്തണമെന്ന് ഇലക്ട്രിക്കൽ വയർമെൻ ആൻഡ് സൂപ്പർവൈസേഴ്സ് അസോസിയേഷൻ ഓഫ് കേരള(ഇഡബ്ല്യു ആൻഡ് എസ്എ-സിഐടിയു)ജില്ലാ സമ്മേളനം ആവശ്യപ്പെട്ടു. മീനങ്ങാടി പഞ്ചായത്ത് കമ്മ്യൂണിറ്റി ഹാളിൽ സിഐടിയു ജില്ലാ വൈസ് പ്രസിഡന്‍റ് കെ. റഫീഖ് ഉദ്ഘാടനം ചെയ്തു. അസോസിയേഷൻ ജില്ലാ പ്രസിഡന്‍റ് എം. മധു അധ്യക്ഷത വഹിച്ചു. സിഐടിയു ജില്ലാ ജനറൽ സെക്രട്ടറി വി.വി. ബേബി, വി.എം. സാബു, അസോസിയേഷൻ സംസ്ഥാന ട്രഷറർ സി. സുധീരൻ, ജില്ലാ ജനറൽ സെക്രട്ടറി കെ.വി. ബാലകൃഷ്ണൻ, കെ.പി. അബൂബക്കർ, കുഞ്ഞുമോൾ, കെ.പി. ദിലീപ്, വി.എം. സാബു, കെ. സക്കീർ എന്നിവർ പ്രസംഗിച്ചു. ഭാരവാഹികളായി ടി.കെ. പുഷ്പൻ(പ്രസിഡന്‍റ്), കെ.വി. ദേവദാസ്(സെക്രട്ടറി), മാത്യു(ട്രഷറർ)എന്നിവരെ തെരഞ്ഞെടുത്തു.

മുച്ചിറി, മുറിയണ്ണാക്ക്: മേപ്പാടിയിൽ മെഡിക്കൽ ക്യാന്പ് നാളെ

കൽപ്പറ്റ: സാമൂഹിക സേവന സംഘടന "തണൽ’, ജ്യോതി പെയിൻ ആൻഡ് പാലിയേറ്റീവ് കെയർ, കോഴിക്കോട് സ്റ്റാർ കെയർ ഹോസ്പിറ്റൽ എന്നിവ സംയുക്തമായി നാളെ രാവിലെ 10 മുതൽ ഉച്ചകഴിഞ്ഞ് മൂന്നു വരെ മേപ്പാടി ജ്യോതി പെയിൻ ആൻഡ് പാലിയേറ്റീവ് കെയർ സെന്‍ററിൽ സൗജന്യ മുച്ചിറി, മുറിയണ്ണാക്ക് ചികിത്സ-സർജറി ക്യാന്പ് നടത്തും. പങ്കെടുക്കുന്നവർക്ക് വൈദ്യസഹായവും തുടർപിന്തുണയും "തണൽ’ മുഖേന ലഭ്യമാക്കുമെന്ന് ജ്യോതി പെയിൻ ആൻഡ് പാലിയേറ്റീവ് കെയർ സൊസൈറ്റി അഡ്മിനിസ്ട്രേറ്റർ സി.എച്ച്. സുബൈർ, സ്റ്റാർ കെയർ ഹോസ്പിറ്റർ സ്മൈൽ ട്രെയിൻ പ്രോജക്ട് മാനേജർ പി. മോഹനൻ, മേപ്പാടി ചൈൽഡ് ഡവലപ്മെന്‍റ് സെന്‍റർ ഇൻ ചാർജ് എം.പി. കാവ്യ എന്നിവർ വാർത്താസമ്മേളത്തിൽ അറിയിച്ചു. മുച്ചിറി, മുറിച്ചുണ്ട് വൈകല്യത്തിൽ 95 ശതമാനവും ശരിയായ ചികിത്സയിലൂടെ പരിഹരിക്കാവുന്നതാണ്. കുഞ്ഞ് ജനിച്ച് ആദ്യ ആഴ്ച മുതൽ 18 വയസു വരെ ഘട്ടങ്ങളായി ചികിത്സ നൽകണം. മുച്ചിറി നിവാരണത്തിന് ആദ്യ ശസ്ത്രക്രിയ മൂന്നാം മാസത്തിലാണ് ചെയ്യേണ്ടത്. മുറിയണ്ണാക്കിനു ശസ്ത്രക്രിയ കുട്ടി സംസാരിക്കാൻ തുടങ്ങുന്നതിനു മുന്പ് നടത്തണം. സംസാരവൈകല്യം പരിഹരിക്കുന്നതിന് സ്പീച്ച് തെറാപ്പിയും ചിലപ്പോൾ സ്പീച്ച് സർജറിയും ആവശ്യമാണ്. താടിയെല്ലിന്‍റെ വളർച്ചക്കുറവ് പരിഹരിക്കൽ, പല്ലുകളുടെ നിരയൊപ്പിക്കൽ, മോണയിലുണ്ടാകുന്ന പിളർപ്പിന് എസ്എബിജെ ശസ്ത്രക്രിയ, പല്ലിൽ കന്പിയിടൽ, താടിയെല്ലിന്‍റെ വൈകല്യം മാറ്റൽ തുടങ്ങിയവയ്ക്കുള്ള ചെലവുകളാണ് തണലിന്‍റെ സഹകരണത്തോടെ സ്മൈൽ ട്രെയിൻ അംഗീകാരമുള്ള സ്റ്റാർ കെയർ സൗജ്യമായി ലഭ്യമാക്കുന്നത്. മുച്ചിറി, മുറിയണ്ണാക്ക് വൈകല്യങ്ങളോടെ ജനിക്കുന്ന കുഞ്ഞുങ്ങൾക്കായി ആഗോളതലത്തിൽ പ്രവർത്തിക്കുന്ന സംഘടനയാണ് സ്മൈൽ ട്രെയിൻ.

നഗരവനം ഒരു വർഷത്തിനിടെ സന്ദർശിച്ചത് 80,000 പേർ

മാനന്തവാടി: നോർത്ത് വയനാട് വനം ഡിവിഷൻ വളപ്പിലെ നഗരവനം ഒരു വർഷത്തിനിടെ സന്ദർശിച്ചത് 80,000 ഓളം പേർ. 2024 എപ്രിലിലാണ് നഗരവനം സന്ദർശകർക്കു തുറന്നുകൊടുത്തത്. അക്വേറിയം, നക്ഷത്ര വനം, ആന്തൂറിയം കോർണർ, ബട്ടർഫ്ളൈ ഗാർഡൻ, ഫേണ്‍സ്, കനോപി വാക്ക്, ഏറുമാടം, ഓക്സിജൻ പാർലർ, വെള്ളച്ചാട്ടം, ഊഞ്ഞാൽ, ഫോട്ടോ പോയിന്‍റ്, കഫ്റ്റീരീയ, ഇരിപ്പിടങ്ങൾ തുടങ്ങിയ സൗകര്യങ്ങളോടെ പരിസ്ഥിതി സൗഹൃദമായാണ് നഗരവനം ഒരുക്കിയത്. വിവിധയിനം ഔഷധ സസ്യങ്ങൾ, ചെറു ജീവജാലങ്ങൾ എന്നിവയെക്കുറിച്ചുള്ള വിവരണം, പ്രകൃതി സംരക്ഷണത്തിന്‍റെ ആവശ്യകത ബോധ്യപ്പെടുത്തുന്ന ഗ്രാഫുകൾ, കടുവ ഉൾപ്പെടെ വന്യമൃഗങ്ങളുടെ ശിൽപ്പങ്ങൾ, കുട്ടികൾക്കുള്ള കളി ഉപകരണങ്ങൾ എന്നിവ നഗരവനത്തിൽ സജ്ജീകരിച്ചിട്ടുണ്ട്. ഒരു വർഷത്തിനിടെ ടിക്കറ്റ്, പാർക്കിംഗ് ഫീസ്, കഫ്റ്റിരീയ ഇനങ്ങളിൽ 35,21,909 രൂപയാണ് നഗരവനത്തിൽ വരുമാനം. ഉയർന്ന അന്തരീക്ഷ താപനിലയും വായു, ശബ്ദ മലിനീകരണവും കുറയ്ക്കുക, ചെറുജീവജാലങ്ങൾക്കു വാസസ്ഥലം ഒരുക്കുക, ഭുഗർഭ ജലസംഭരണം വർധിപ്പിക്കുക തുടങ്ങിയ ലക്ഷ്യങ്ങളോടെയാണ് നഗരവനം സജ്ജമാക്കിയതെന്നു ഫോറസ്റ്റ് റേഞ്ച് ഓഫീസർ രഞ്ജിത്ത്കുമാർ പറഞ്ഞു. രാവിലെ 9.30 മുതൽ വൈകുന്നേരം 5.30 വരെയാണ് നഗരവനത്തിൽ സന്ദർശകർക്ക് പ്രവേശനം. മുതിർന്നവർക്ക് 40 ഉം കുട്ടികൾക്ക് 20 ഉം വിദേശികൾക്ക് 50 ഉം രൂപയാണ് പ്രവേശന ടിക്കറ്റ് നിരക്ക്.

ബത്തേരി പാൽവിതരണ സഹകരണ സംഘം ക്ഷീര കർഷകർക്ക് അധികവില നൽകും

സുൽത്താൻ ബത്തേരി: സുൽത്താൻ ബത്തേരി പാൽ വിതരണ സഹകരണ സംഘം ക്ഷീര കർഷകർക്ക് അധിക വിലയായി 90 ലക്ഷം രൂപ നൽകുമെന്ന് സംഘം ഭാരവാഹികൾ വാർത്താസമ്മേളനത്തിൽ അറിയിച്ചു. ഏപ്രിൽ ഒന്ന് മുതൽ ഓഗസ്റ്റ് 31 വരെ പാൽ അളന്ന എല്ലാ ക്ഷീരകർഷകർക്കും ലിറ്റർ ഒന്നിന് രണ്ട് രൂപ പ്രകാരമാണ് അധികവില നൽകുക. രണ്ടിന് രാവിലെ 10ന് അധികവില ക്ഷീര കർഷകർക്ക് നൽകും. 2024-2025 വർഷത്തിൽ 4.9 കോടി രൂപ ക്ഷീര കർഷകർക്ക് അധികവില, സബ്സിഡികൾ മുതലായ ഇനത്തിൽ സംഘം നൽകുകയും ചെയ്തു. ഇവയ്ക്ക് പുറമേ കാലിത്തീറ്റ സബ്സിഡി, ചികിൽസ ആനുകൂല്യങ്ങൾ, ഇൻഷ്വറൻസ് പരിരക്ഷ, തൊഴുത്ത് നിർമാണം, പച്ചപ്പുല്ലിന്‍റെ ലഭ്യത, മൃഗപരിപാലനം തുടങ്ങിയവക്കുള്ള ആനുകൂല്യങ്ങളും നൽകി. പാൽവില ലിറ്ററിന് ഏഴ് രൂപകൂടി വർധിപ്പിക്കുക, ത്രിതല പഞ്ചായത്തും ക്ഷീര മേഖലയും നൽകുന്ന സബ്സിഡികൾ ക്ഷീര കർഷകരുടെ അക്കൗണ്ടിലേക്ക് നൽകുക, പുറമെ നിന്നെത്തുന്ന പാലിന്‍റെ ഗുണനിലവാരം ഉറപ്പ് വരുത്താൻ പരിശോധന കർശനമാക്കുക, രാത്രികാലങ്ങളിലും വെറ്ററിനറി ഡോക്ടറുടെ സേവനം ഉറപ്പ് വരുത്തുക തുടങ്ങിയ ആവശ്യങ്ങളും സംഘം ഭാരവാഹികൾ ഉന്നയിച്ചു. വാർത്താസമ്മേളനത്തിൽ സംഘം പ്രസിഡന്‍റ് കെ.കെ. പൗലോസ്, വൈസ് പ്രസിഡന്‍റ് സിന്ധുഹരിദാസ്, സെക്രട്ടറി പി.പി. വിജയൻ, സയറക്ടർമാരായ കെ.സി. ഗോപിദാസ്, എബി ജോസ്, എം. ഭാസ്ക്കരൻ, കെ.എ. മത്തായി, അനീഷ് ബാബു, കെ.ബി. സോൾന, സി.വി. സുജാത എന്നിവർ പങ്കെടുത്തു.

കഞ്ചാവുകേസ്: ഒളിവിലായിരുന്ന പ്രതികൾ പിടിയിൽ

മാനന്തവാടി: വ്യത്യസ്ത കഞ്ചാവുകേസുകളിൽ ഒളിവിലായിരുന്ന പ്രതികൾ പിടിയിൽ. 2023ൽ 29.2 കിലോഗ്രാം കഞ്ചാവ് കടത്തിയ കേസിലെ പ്രതി കോഴിക്കോട് കണ്ണിപ്ര മേലേ ഈച്ചംപാട്ടിൽ രാജീവ്(43), 100 ഗ്രാം കഞ്ചാവ് കൈവശംവച്ച കേസിലെ പ്രതി മധുര സ്വദേശി ആർ. പ്രകാശ് (28) എന്നിവരെയാണ് എക്സൈസ് റേഞ്ച് ഇൻസ്പെക്ടർ എസ്.ബി. അർജുൻ വൈശാഖും സംഘവും അറസ്റ്റുചെയ്തത്. കഴിഞ്ഞ ദിവസം കോഴിക്കോട് ജില്ലയിൽനിന്നാണ് ഇവരെ കസ്റ്റഡിയിലെടുത്തത്.

ഓണക്കാലത്ത് പുഞ്ചിരി പൊഴിച്ച് ചെറുകാട്ടൂർ കൃഷിക്കൂട്ടം

പനമരം: ഓണക്കാലം മുന്നിൽക്കണ്ട് നടത്തിയ പൂക്കൃഷി വിജയമായതിന്‍റെ ആഹ്ളാദത്തിൽ ചെറുകാട്ടൂർ കൃഷിക്കൂട്ടം. വനിതകൾ അംഗങ്ങളായ കൃഷിക്കൂട്ടം ചെറുകാട്ടൂർ എസ്റ്റേറ്റുമുക്കിൽ മൂന്ന് ഏക്കറിൽ പരീക്ഷണാടിസ്ഥാനത്തിൽ നടത്തിയ കൃഷിയാണ് വിജയമായത്. ശക്തമായ മഴ വെല്ലുവിളിയായെങ്കിലും നട്ട് രണ്ടുമാസംകൊണ്ട് പൂക്കൾ വിളവെടുപ്പിന് പാകമായി. ബീന സണ്ണി മൂലക്കര, റെജീന ജോസഫ് മാങ്ങാപറന്പിൽ, രാജി ജോണ്‍സൻ പാറപ്പുറം, അന്നക്കുട്ടി മൂലക്കര, ചിന്നമ്മ മാങ്ങാപറന്പിൽ എന്നിവരുടെ നേതൃത്വത്തിലാണ് കൃഷിക്കൂട്ടം പ്രവർത്തനം. കൃഷിയിടത്തിൽ മഞ്ഞ, ഓറഞ്ച് നിറങ്ങളിൽ വിളഞ്ഞ പൂക്കൾ വിളവെടുത്ത് തൃശൂർ, കോഴിക്കോട് ജില്ലകളിലേക്ക് കയറ്റുന്ന തിരക്കിലാണ് കൃഷിക്കൂട്ടം അംഗങ്ങൾ. ബ്ലോക്കിൽ സെപ്റ്റംബർ രണ്ടിന് തുടങ്ങുന്ന ഓണച്ചന്തയിലും കൃഷിക്കൂട്ടത്തിന്‍റെ പൂക്കൾ വില്പനയ്ക്കെത്തും. ചെണ്ടുമല്ലി കിലോഗ്രാമിന് 200 രൂപ വരെ വില ലഭിക്കുമെന്നാണ് കൃഷിക്കൂട്ടം അംഗങ്ങളുടെ പ്രതീക്ഷ. വരുംവർഷങ്ങളിൽ വൻതോതിൽ കൃഷി ഇറക്കാനാണ് തീരുമാനം.

തുരങ്കപാത: ഒരുവശത്ത് ആവേശം, മറുവശത്ത് പ്രതിഷേധം

കൽപ്പറ്റ: കള്ളാടി-ആനക്കാംപൊയിൽ നാലുവരി തുരങ്കപാതയുടെ പ്രവൃത്തി ഉദ്ഘാടനം ഇന്നു വൈകുന്നേരം ആനക്കാംപൊയിലിൽ മുഖ്യമന്ത്രി പിണറായി വിജയൻ നിർവഹിക്കാനിരിക്കേ ജനങ്ങൾക്കിടയിൽ ആവേശവും പ്രതിഷേധവും. വയനാടിനെ കോഴിക്കോടുമായി ബന്ധിപ്പിക്കുന്ന താമരശേരി ചുരത്തിൽ മണ്ണിടിച്ചിൽ ഉൾപ്പെടെ കാരണങ്ങളാൽ മണിക്കൂറുകൾ നീളുന്ന ഗതാഗത തടസം ആവർത്തിക്കുന്ന സാഹചര്യത്തിൽ തുരങ്കപാത പദ്ധതിയെ കരഘോഷത്തോടെ സ്വീകരിക്കുകയാണ് ജില്ലയിലെ ജനങ്ങളിൽ ഒരു വിഭാഗം. എന്നാൽ ഭാവിയിൽ വലിയ വിനാശത്തിന് കാരണമായേക്കാവുന്ന പദ്ധതി ഉപേക്ഷിക്കണമെന്ന നിലപാടിലാണ് പരിസ്ഥിതി രംഗത്ത് പ്രവർത്തിക്കുന്നവരടക്കം മറ്റൊരു വിഭാഗം. തുരങ്കപാത പദ്ധതിക്ക് തടയിടാൻ വയനാട് പ്രകൃതി സംരക്ഷണ സമിതി നിയമവഴിയിലൂടെയും നീങ്ങുകയാണ്. തുരങ്കപാത നിർമാണത്തിന് സ്റ്റേറ്റ് എൻവയണ്‍മെന്‍റ് ഇംപാക്ട് അസസ്മെന്‍റ് ഏജൻസി റിപ്പോർട്ടിന്‍റെ അടിസ്ഥാനത്തിൽ നൽകിയ പരിസ്ഥിതി അനുമതി റദ്ദാക്കുന്നതിന് പ്രകൃതി സംരക്ഷണ സമിതി സമർപ്പിച്ച ഹർജിയിൽ ഹൈക്കോടതി സെപ്റ്റംബർ ഒന്പതിന് വാദം കേൾക്കും. തുരങ്കപാതയുമായി ബന്ധപ്പെട്ട തീരുമാനങ്ങൾ ഹർജിയിലെ തീർപ്പിനു വിധേയമായിരിക്കുമെന്ന് ഹൈക്കോടതി വ്യക്തമാക്കിയിരുന്നു. ഈ സന്ദർഭത്തിലാണ് ഇന്ന് തുരങ്കപാതയുടെ പ്രവൃത്തി ഉദ്ഘാടനം. തുരങ്കപാത പദ്ധതിക്കെതിരേ പശ്ചിമഘട്ട സംരക്ഷണ സമിതി, സിപിഐ(എംഎൽ)റെഡ് സ്റ്റാർ, എംഎൽപിഐ റെഡ് ഫ്ളാഗ്, സിപിഐ(എംഎൽ), എഇപിഎസ്, തുരങ്കപാത വിരുദ്ധ സമിതി എന്നിവയും രംഗത്തുണ്ട്. തുരങ്കപാത പദ്ധതി ഉപേക്ഷിക്കണമെന്ന ആവശ്യവുമായി കൽപ്പറ്റ ഹെഡ് പോസ്റ്റ് ഓഫീസ് പരിസരത്ത് ഇന്നു രാവിലെ 10 മുതൽ വൈകുന്നേരം വരെ പശ്ചിമഘട്ട സംരക്ഷണ സമിതി ധർണ തീരുമാനിച്ചിട്ടുണ്ട്. വനം-പരിസ്ഥിതി മന്ത്രാലയത്തെ തെറ്റിധരിപ്പിച്ചും വസ്തുതകൾ മറച്ചുവച്ചും നേടിയതാണ് തുരങ്കപാതയുടെ പരിസ്ഥിതി അനുമതിയെന്ന നിലപാടിലാണ് വയനാട് പ്രകൃതി സംരക്ഷണ സമിതി. തെറ്റായ വിവരങ്ങൾ നൽകിയാണ് കേന്ദ്ര ന്ത്രാലയത്തിൽനിന്നും തുരങ്കപാത പദ്ധതിയുടെ സ്റ്റേജ് വണ്‍ ക്ലിയറൻസ് നേടിയതെന്ന് സമിതി ഭാരവാഹികൾ പറയുന്നു. പ്രകൃതിദുരന്തങ്ങൾ സംഭവിച്ചതും സാധ്യത നിലനിൽക്കുന്നതുമായ പ്രദേശങ്ങളിലൂടെയാണ് തുരങ്കപാത നിർമിക്കേണ്ടത്. തുരങ്കപാത പദ്ധതിക്ക് ഉപയോഗപ്പെടുത്തുന്ന ഭൂപ്രദേശത്ത് 1960 മുതൽ നിരവധി തവണ ഉരുൾപൊട്ടിയിട്ടുണ്ട്. 1984ലും 2019ലും 2020ലും മുണ്ടക്കൈയിൽ ഉരുൾപൊട്ടി. ഉരുൾ പൊട്ടൽ ഉണ്ടായ കവളപ്പാറയും പാതാറും തുരങ്കപാത പദ്ധതി പ്രദേശത്തിന്‍റെ പടിഞ്ഞാറ് ഭാഗത്താണ്. നിർദിഷ്ട പാതയിൽനിന്ന് ഏകദേശം 0.85 കിലോമീറ്റർ അകലെയാണ് 2019 ഓഗസ്റ്റ് എട്ടിന് ഉരുൾപൊട്ടിയ പുത്തുമല. 2024 ജൂലൈ 30ന് ഉരുൾ പൊട്ടിയ പുഞ്ചിരിമട്ടം തുരങ്കപാത പദ്ധതി പ്രദേശവുമായി ബന്ധപ്പെട്ടു കിടക്കുന്നതാണ്. പദ്ധതി പ്രദേശത്തിന്‍റെ ദുർബലതയിലേക്ക് വിരൽചൂണ്ടുന്നതാണ് ഈ വസ്തുതകൾ. തുരങ്ക പാത കടന്നുപോകേണ്ട പർവതപ്രദേശങ്ങൾ വംശനാശ ഭീഷണി നേരിടുന്നതടക്കം ജൈവജാലങ്ങളുടെ ആവാസ വ്യവസ്ഥയാണെന്നും സമിതി ഭാരവാഹികൾ പറഞ്ഞു.

വയനാട് സ്വദേശിനി ഇസ്രയേലിൽ മരിച്ചു

മാനന്തവാടി: വയനാട് സ്വദേശിനി ഇസ്രയേലിൽ മരിച്ചു. പനങ്കണ്ടി ജ്യോതിഭവൻ പരേതനായ സുധാകരൻ-യശോദ ദന്പതികളുടെ മകൾ റാണി ചിത്രയാണ്(33) മരിച്ചത്. വിളന്പുകണ്ടംപുഴയ്ക്കൽ രാഹുലിന്‍റെ ഭാര്യയാണ്. ആറുമാസമായി ഇസ്രയേലിൽ ജോലി ചെയ്യുകയായിരുന്നു. പക്ഷാഘാതത്തെത്തുടർന്നു ചികിത്സയിലിരിക്കേവെള്ളിയാഴ്ച വൈകുന്നേരമാണ് മരിച്ചത്. സംസ്കാരം പിന്നീട്. മക്കൾ: ആരവ്, അദിക്.

ഓണക്കാല അധികവില വിതരണം

പുൽപ്പള്ളി: 2024 ഏപ്രിൽ ഒന്നുമുതൽ 2025 മാർച്ച് 31 വരെ സംഭരിച്ച പാൽ ലിറ്ററിന് ഒരു രൂപ ഓണക്കാല അധികവില നൽകാൻ കബനിഗിരി ക്ഷീസംഘം ഭരണസമിതി യോഗം തീരുമാനിച്ചു. 2024 ജൂലൈയിൽ മിൽമ ലിറ്ററിന് രണ്ട് രൂപ പ്രകാരം അനുവദിച്ച അധികവില ഇതോടൊപ്പം വിതരണം ചെയ്യും. ആകെ 15 ലക്ഷത്തോളം രൂപയാണ് അധികവിലയായി നൽകുന്നത്. തുക ഓഗസ്റ്റ് 21 മുതൽ 31 വരെയുള്ള പാൽ വിലയ്ക്കൊപ്പം രണ്ടിന് കർഷകരുടെ അക്കൗണ്ടിൽ ലഭ്യമാക്കും. പ്രസിഡന്‍റ് സുനിൽ ജോസ് അധ്യക്ഷത വഹിച്ചു. ഭരണസമിതി അംഗങ്ങളായ ഫ്രെൻസി, റെന്നി ജോർജ്, മായ ഷിജു, സുധിഷ്ണ, ജെസി, തങ്കച്ചൻ, ഗംഗാധരൻ, ശിവരാജ്, സെക്രട്ടറി പി.ജെ. സജി എന്നിവർ പ്രസംഗിച്ചു.

കാട്ടാന പൂജാരിയുടെ വീട് തകർത്തു

ഗൂഡല്ലൂർ: ഓവാലി പഞ്ചായത്തിലെ ചന്ദനമല ക്ഷേത്ര പൂജാരിയുടെ വീട് കാട്ടാന തകർത്തു. കഴിഞ്ഞ ദിവസം രാത്രിയിലാണ് സംഭവം. ക്ഷേത്രത്തിന് സമീപത്തെ വീടാണ് തകർത്തത്. ആർക്കും പരിക്കില്ല. വീട് പൂർണമായും തകർത്തു. വീട്ടിനകത്ത് കടന്ന് വീട്ട് സാധനങ്ങൾ നശിപ്പിച്ചിട്ടുണ്ട്. ശബ്ദം കേട്ട് ഉണർന്ന പൂജാരി ആനയെ തുരത്തുകയായിരുന്നു. ഇതുസംബന്ധിച്ച് വനംവകുപ്പിന് പരാതി നൽകി.

എസ്പിസി ഓണം ക്യാന്പ്

വെള്ളമുണ്ട: ഗവ.മോഡൽ ഹയർ സെക്കൻഡറി സ്കൂളിൽ എസ്പിസി ഓണം ക്യാന്പ് ആരംഭിച്ചു. ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ ഉദ്ഘാടനം ചെയ്തു. പിടിഎ പ്രസിഡന്‍റ് സലിം കേളോത്ത് അധ്യക്ഷത വഹിച്ചു. ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി, എംപിടിഎ പ്രസിഡന്‍റ് ഇ.കെ. സൽമത്ത്, ബ്ലോക്ക് പഞ്ചായത്ത് അംഗം പി.കെ. അമീൻ, കെ. അബ്ദുൾസലാം, വി.കെ. പ്രസാദ്, ഹെഡ്മിസ്ട്രസ് ഫാത്തിമത്ത് ഷംല, ബി.ആർ. വിജിഷ എന്നിവർ പ്രസംഗിച്ചു.

ജില്ലാ പോലീസ് രക്തദാന ക്യാന്പ് സംഘടിപ്പിച്ചു

മാനന്തവാടി: സർദാർ വല്ലഭായ് പട്ടേലിന്‍റെ 150-ാം ജൻമവാർഷികത്തോടനുബന്ധിച്ച് ജില്ലാ പോലീസിന്‍റെ ആഭിമുഖ്യത്തിൽ മാനന്തവാടി മെഡിക്കൽ കോളജിൽ രക്തദാന ക്യാന്പ് സംഘടിപ്പിച്ചു. ഇന്നലെ രാവിലെ 9.30ന് ഡിസിആർബി ഡിവൈഎസ്പി കെ.ജെ. ജോണ്‍സണ്‍ ഉദ്ഘാടനം ചെയ്തു. മാനന്തവാടി ഡിവൈഎസ്പി വി.കെ. വിശ്വംഭരൻ, മാനന്തവാടി സ്റ്റേഷൻ ഇൻസ്പെക്ടർ എസ്എച്ച്ഒ പി. റഫീഖ്, ജില്ലാ ജനമൈത്രി അസിസ്റ്റന്‍റ് നോഡൽ ഓഫീസർ കെ.എം. ശശിധരൻ, എസ്പിസി ജില്ലാ അസിസ്റ്റന്‍റ് നോഡൽ ഓഫീസർ കെ. മോഹൻദാസ് മറ്റു പോലീസ് ഉദ്യോഗസ്ഥർ, മെഡിക്കൽ കോളജ് ആർഎംഒ ഡോ.ജി.ആർ. ഫെസിൻ, ഡോ. ബിനിജ മെറിൻ ജോയ്, സിസ്റ്റർ സെലിൻ തുടങ്ങിയവർ പങ്കെടുത്തു. രക്തദാന ക്യാന്പിൽ 30 ഓളം പേർ പങ്കാളികളായി.

മീനങ്ങാടി സെന്‍റ് മേരീസ് സൂനോറോ പള്ളിയിൽ എട്ടു നോന്പ് ആചരണം

കൽപ്പറ്റ: മീനങ്ങാടി സെന്‍റ് മേരീസ് സൂനോറോ പള്ളിയിൽ വിശുദ്ധ ദൈവമാതാവിന്‍റെ ജനനപ്പെരുന്നാളും എട്ട് നോന്പ് ആചരണവും സുവിശേഷധാരയും സംഗീതവിരുന്നും ഒന്നു മുതൽ എട്ടുവരെ നടത്തും. വികാരി ഫാ. എൽദോസ് കാട്ടുകുടി, ട്രസ്റ്റി ജോർജ് പൊയ്കയിൽ, സെക്രട്ടറി സണ്ണി കാലാപ്പിള്ളിയിൽ, പബ്ലിസിറ്റി കമ്മിറ്റി കണ്‍വീനർ ജിനീഷ് എലവത്തിൽ, റെജി വാധ്യാപ്പിള്ളിൽ എന്നിവർ വാർത്താസമ്മേളനത്തിൽ അറിയിച്ചതാണ് വിവരം. നാളെ രാവിലെ വിശുദ്ധ കുർബാനയ്ക്കുശേഷമാണ് കൊടിയേറ്റ്. വിവിധ ദിവസങ്ങളിൽ മലബാർ ഭദ്രാസനാധിപൻ ഡോ. ഗീവർഗീസ് മോർ സ്തേഫാനോസ്, കോർ എപ്പിസ്കോപ്പമാർ, വൈദികർ എന്നിവർ ശുശ്രൂഷകൾക്ക് നേതൃത്വം നൽകും. ഒന്നു മുതൽ ആറു വരെ രാവിലെ 8.30ന് വിശുദ്ധ മൂന്നിൻമേൽ കുർബനയും 10ന് പാച്ചോർ നേർച്ചയും 10.30ന് ഗാനശുശ്രൂഷയും 11ന് വചന ശുശ്രൂഷയും ഉണ്ടാകും. ഏഴിന് രാവിലെ എട്ടിന് വിശുദ്ധ മൂന്നിൻമേൽ കുർബാന. തുടർന്ന് പാച്ചോർ നേർച്ച, പ്രദക്ഷിണം, ഗാനശുശ്രൂഷ, വചനശുശ്രൂഷ. എട്ടിന് രാവിലെ 8.30ന് വിശുദ്ധ മൂന്നിൻമേൽ കുർബാന. 10ന് വിശുദ്ധ ദൈവമാതാവിന്‍റെ സൂനോറാ പേടകത്തിൽനിന്നു പുറത്തെടുക്കൽ. 11ന് പൊതുസമ്മേളനം ഐ.സി. ബാലകൃഷ്ണൻ എംഎൽഎ ഉദ്ഘാടനം ചെയ്യും. ചാരിറ്റി വിതരണം അദ്ദേഹം നിർവഹിക്കും. പാഠ്യ, പാഠ്യേതര രംഗങ്ങളിൽ മികവ് പുലർത്തുന്നവരെ ബത്തേരി ബ്ലോക്ക് പഞ്ചായത്ത് പ്രസിഡന്‍റ് സി. അസൈനാരും ഇടവകയിൽ എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയവരെയും സ്കോളർഷിപ്പ് ജേതാക്കളെയും മീനങ്ങാടി പഞ്ചായത്ത് പ്രസിഡന്‍റ് കെ.ഇ. വിനയനും ആദരിക്കും. ഇന്നു രാവിലെ എട്ടിന് ദേവാലയത്തിൽ രോഗികളുടെയും പ്രായമായവരുടെയും സ്നേഹസംഗമവും 9.30ന് ജില്ലാതല ചെസ് ടൂർണമെന്‍റും നടത്തും. ഒന്ന്, നാല്, അഞ്ച് തീയതികളിൽ ഉച്ചകഴിഞ്ഞ് രണ്ട് മുതൽ നാല് വരെ കൗണ്‍സലിംഗ് സൗകര്യം ഉണ്ടാകും. ആറിന് ഉച്ചകഴിഞ്ഞ് രണ്ട് മുതൽ നാല് വരെ ഉണർവ് എന്ന പേരിൽ വിദ്യാർഥി സംഗമവും ലഹരിവിരുദ്ധ ബോധവത്കരണവും നടത്തും.

പൊതുകിണർ ഇടിഞ്ഞുതാഴ്ന്നു

സുൽത്താൻ ബത്തേരി: മഴയ്ക്കിടെ പൊതുകിണർ ഇടിഞ്ഞുതാഴ്ന്നു. നൂൽപ്പുഴ പള്ളിവയൽ നാരകകൊല്ലി കാട്ടുനായ്ക്ക ഉന്നതിക്കടുത്തുള്ള പൊതുകിണറാണ് വ്യാഴാഴ്ച രാത്രി പത്തോടെ ഇടിഞ്ഞുതാഴ്ന്നത്. കിണറിന്‍റെ രണ്ട് റിംഗ് വലിയ ശബ്ദത്തോടെ താഴ്ന്നു. കിണറിനുചുറ്റം അപകടരമാംവിധം ഗർത്തം രൂപപ്പെട്ടു. പ്രദേശത്തെ പത്തോളം കുടുംബങ്ങൾ കുടിവെള്ളമെടുത്തിരുന്നത് ഈ കിണറിൽനിന്നാണ്.

താമരശേരി ചുരത്തിലെ ഗതാഗതക്കുരുക്ക്

പടിഞ്ഞാറത്തറ-പൂഴിത്തോട് റോഡ് അടിയന്തര പ്രാധാന്യത്തോടെ നിർമിക്കണം: വ്യാപാരി വ്യവസായി യൂത്ത് വിംഗ് കൽപ്പറ്റ: വയനാടിനെ കോഴിക്കോട് ജില്ലയുമായി ബന്ധിപ്പിക്കുന്ന പ്രധാന പാതയാണ് താമരശേരി ചുരം. ഇടയ്ക്കിടക്ക് മണ്ണിടിച്ചിൽ പോലുള്ള സംഭവങ്ങൾ ഉണ്ടാകുന്പോൾ ഈ പാത പൂർണമായും സ്തംഭിക്കുകയാണ് അതുകാരണം. വയനാട്ടിലെ നിരവധി വ്യാപാര മേഖലകളെയും ടൂറിസ്റ്റ് കേന്ദ്രങ്ങളെയും സാരമായി ബാധിക്കുന്നതാണ്. ഇതിന് പരിഹാരം എന്ന നിലയ്ക്ക് ഒരു ബദൽ പാത ഉടൻ യാഥാർഥ്യമാക്കുന്ന രീതിയിലേക്ക് സർക്കാർ ഇടപെടലുകൾ നടത്തണമെന്ന് കന്പളക്കാട് വ്യാപാരി വ്യവസായി യൂത്ത് വിംഗ് യൂണിറ്റിന്‍റെ യോഗത്തിൽ ആവശ്യപ്പെട്ടു. ജില്ലയിലേക്ക് പുതിയതായി തെരഞ്ഞെടുക്കപ്പെട്ട ഭാരവാഹികൾക്ക് സ്വീകരണം നൽകുന്ന സ്വീകരണ യോഗവും നടത്തി. ബദൽ പാതകൾ വേഗത്തിൽ യാഥാർഥ്യമാക്കണം: ഇ.ജെ. ബാബു കൽപ്പറ്റ: കോഴിക്കോടിനെ വയനാടുമായി ബന്ധപ്പിക്കുന്ന ചുരം ബദൽ പാതകൾ വേഗത്തിൽ യാഥാർഥ്യമാക്കണമെന്ന് സിപിഐ ജില്ലാ സെക്രട്ടറി ഇ.ജെ. ബാബു ആവശ്യപ്പെട്ടു. താമരശേരി ചുരത്തിലെ മണ്ണിടിച്ചിൽ വയനാട് ഭാഗികമായി ഒറ്റപ്പെടുന്നതിന് കാരണമായി. അനാവശ്യ പരിസ്ഥിതി വാദം ഉന്നയിച്ച് ജില്ലയുടെ വികസന സാധ്യതകൾ കൊട്ടിയടയ്ക്കരുത്. നാടിന്‍റെ പുരോഗതിക്ക് ചുരം ബദൽ പാതകൾ ഉണ്ടാകണം. ആനക്കാംപൊയിൽ-കള്ളാടി തുരങ്കപാത നിർമാണവുമായി സർക്കരാർ മുന്നോട്ടുപോകുന്നതിനെ ജനം പ്രതീക്ഷയോടെയാണ് കാണുന്നത്. പടിഞ്ഞാറത്തറ-പൂഴിത്തോട് ബദൽ പാതയുടെ ഇൻവെസ്റ്റിഗേഷൻ സർക്കാർ തുക അനുവദിച്ച് മാസങ്ങൾ കഴിഞ്ഞിട്ടും പൂർത്തിയാകാത്തത് നിരാശാജനകമാണ്. തളിപ്പുഴ-ചിപ്പിലിത്തോട്, കൊട്ടിയൂർ 44 ബദൽ പാത സാധ്യത ഗൗരവമായി പരിഗണിക്കണം. ജില്ലയുടെ വികസനത്തിന് വിലങ്ങുതടിയാകുന്ന കേന്ദ്ര വന നിയമങ്ങളിൽ മാറ്റം വേണമെന്നും ബാബു ആവശ്യപ്പെട്ടു. ചുരത്തിലെ യാത്രാ പ്രശ്നത്തിന് ശാശ്വത പരിഹാരം വേണം: പി.സി. തോമസ് കൽപ്പറ്റ: വയനാട്ടിലേക്കും കർണാടക, തമിഴ്നാട് എന്നിവിടങ്ങളിലേക്കുമുള്ള പ്രധാന യാത്രാ മാർഗമായ താമരശേരി ചുരത്തിൽ ഇടയ്ക്കിടെ ഉണ്ടാകുന്ന യാത്രക്കുരുക്കിന് ശാശ്വത പരിഹാരം ഉണ്ടാക്കണമെന്ന് കേരള കോൺഗ്രസ് വർക്കിംഗ് ചെയർമാനും മുൻ കേന്ദ്ര മന്ത്രിയുമായ പി.സി. തോമസ് ആവശ്യപ്പെട്ടു. മഴക്കാലത്ത് മണ്ണിടിച്ചിൽ മൂലവും മറ്റു സമയങ്ങളിൽ വാഹനക്കുരുക്ക് മൂലവും ഉണ്ടാകുന്ന യാത്രാ തടസത്തിന് പരിഹാരമായി ഭാവിയിൽ ഉണ്ടാകുമെന്നു പറയുന്ന തുരങ്കപ്പാതയുടെ നിർമാണ പൂർത്തീകരണത്തിനായി കാത്തിരിക്കുന്നതിൽ അർഥമില്ല. അതിന് എത്ര നാൾ വേണ്ടി വരുമെന്നുമറിയില്ല. അടിവാരത്തു നിന്നും പടിഞ്ഞാറത്തറ വഴിയുള്ള ബദൽപാത പൂർത്തീകരിച്ച് ഗതാഗതയോഗ്യമാക്കുകയും ചുരത്തിൽ സ്ഥിരമായ ഗതാഗത നിയന്ത്രണം ഏർപ്പെടുത്തുകയുമാണ് അടിയന്തരമായി ചെയ്യേണ്ടത്. ടൂറിസ്റ്റുകൾ അധികരിക്കുന്ന ആഴ്ചാവസാന ദിവസങ്ങളിൽ, തമിഴ്നാട്ടിലെ ഊട്ടി മോഡൽ പോലെ വാഹന നിയന്ത്രണം നടപ്പാക്കുകയും ചെയ്യാവുന്നതാണ്. കേരളമുൾപ്പടെ മൂന്നു സംസ്ഥാനങ്ങളെ ബാധിക്കുന്ന ദേശീയപാത 766 ലെ ഈ പ്രശ്നത്തിൽ കേന്ദ്ര സർക്കാർ അടിയന്തരമായി ഇടപെട്ട് ശാശ്വത പരിഹാരം ഉണ്ടാക്കണം. ഇപ്പോഴുണ്ടായ ദുരന്തം ചൂണ്ടിക്കാണിച്ച് പ്രധാന മന്ത്രിക്കും കേന്ദ്ര റോഡ് ഗതാഗത മന്ത്രി നിതിൻ ഗഡ്കരിക്കും നിവേദനങ്ങൾ അയച്ചുകൊണ്ട് തോമസ് ആവശ്യപ്പെട്ടു. ചുരം ബൈപാസ് യാഥാർഥ്യമാക്കണം: പി.പി. ഷൈജൽ കൽപ്പറ്റ: താമരശേരി ചുരത്തിൽ ഗതാഗതതടസം അടിക്കടി ഉണ്ടാകുന്ന സാഹചര്യത്തിൽ ചിപ്പിലിത്തോട്-മരുതിലാവ്-തളിപ്പുഴ ബൈപാസ് അടിയന്തരമായി യാഥാർഥ്യമാക്കണമെന്ന് രാഷ്ട്രീയ യുവജനതാദൾ ജില്ലാ പ്രസിഡന്‍റ് പി.പി. ഷൈജൽ ആവശ്യപ്പെട്ടു. ചിപ്പിലിത്തോടിൽനിന്നു മരുതിലാവ് വഴി തളിപ്പുഴയിലേക്ക് 14 കിലോമീറ്റർ മാത്രമാണ് ദൂരം. റോഡിൽ കുറച്ചുദൂരം വനത്തിലൂടെയാണ് നിർമിക്കേണ്ടത്. ഇതിനു പ്രത്യേക അനുമതി വാങ്ങണം. മഴക്കാലത്ത് ചെറുതും വലുതുമായ മണ്ണിടിച്ചിൽ ചുരത്തിൽ പതിവാണ്. ഈ സാഹചര്യത്തിൽ ബൈപാസിനു ഏറെ പ്രാധാന്യമുണ്ടെന്നും ഷൈജൽ പറഞ്ഞു.

എട്ടുനോന്പ് ആചരണം

പുൽപ്പള്ളി: പാടിച്ചിറ സെന്‍റ് സെബാസ്റ്റ്യൻസ് പള്ളിയിൽ എട്ടുനോന്പ് ആചരണവും പരിശുദ്ധ വേളാങ്കണ്ണിമാതാവിന്‍റെ തിരുനാൾ ആഘോഷവും നാളെ മുതൽ സെപ്റ്റംബർ എട്ട് വരെ നടത്തും. നാളെ വൈകുന്നേരം 4.45ന് വികാരി ഫാ. സജി ഇളയിടത്ത് കൊടിയേറ്റും. അഞ്ചിന് വിശുദ്ധ കുർബാന. നീലഗിരി ഡവലപ്മെന്‍റ് സൊസൈറ്റി ഡയറക്ടർ ഫാ. ബിനോയി കാശാംകുറ്റിയിൽ സന്ദേശം നൽകും. വൈകിട്ട് പാടിച്ചിറ കപ്പേളയിൽ നൊവേനയിൽ മുൻ വികാരി ഫാ.ജോർജ് മന്പള്ളിൽ കാർമികത്വം വഹിക്കും. സെപ്റ്റംബർ ഒന്നുമുതൽ ഏഴ് വരെ വൈകുന്നേരം 4.30ന് ആരാധന, ജപമാല. അഞ്ചിന് വിശുദ്ധ കുർബാന, നൊവേന. എട്ടിനു രാവിലെ 10ന് തിരുനാൾ കുർബാന. മാനന്തവാടി രൂപത സഹായമെത്രാൻ മാർ അലക്സ് താരാമംഗലം സന്ദേശം നൽകും. ഉച്ചയ്ക്ക് സ്നേഹവിരുന്നോടെ തിരുനാൾ സമാപിക്കും.

ചുരത്തിലെ മണ്ണിടിച്ചിൽ ടൂറിസം മേഖലയെ ബാധിച്ചു

സുൽത്താൻ ബത്തേരി: കഴിഞ്ഞദിവസം താമരശേരി ചുരത്തിൽ ഉണ്ടായ മണ്ണിടിച്ചിൽ ജില്ലയിൽ ടൂറിസം മേഖലയിൽ കനത്ത നഷ്ടത്തിനു കാരണമായി. നിരവധി സഞ്ചാരികൾ ഓണക്കാലത്തേക്ക് ജില്ലയിലെ ടൂറിസം സംരംഭങ്ങളിൽ നടത്തിയ ബുക്കിംഗ് റദ്ദാക്കി. ചൊവ്വാഴ്ച വൈകീട്ടാണ് ചുരത്തിൽ വ്യൂപോയിന്‍റിന് സമീപം മണ്ണിടിഞ്ഞത്. ഇതേത്തുടർന്നു ആളുകൾ ജില്ലയ്ക്കു പുറത്തേക്കുള്ള യാത്ര ഒഴിവാക്കിയത് ടാക്സി സേവനത്തെയും ബാധിച്ചു. ചുരത്തിൽ വാഹന ഗതാഗതം സാധാരണ നിലയിലാകുന്ന മുറയ്ക്ക് ജില്ലയിൽ ഓണാവധി ആഘാഷത്തിന് സഞ്ചാരികൾ എത്തുമെന്ന പ്രതീക്ഷയിലാണ് ടൂറിസം സംരംഭകരും മറ്റും.

ചുരം ബൈപാസ് റീ ടെൻഡർ ചെയ്യണം: ടി. സിദ്ദിഖ് എംഎൽഎ

വൈത്തിരി: ചുരംറോഡുകളുടെ ഗതാഗതകുരുക്കിന് പരിഹാരം കാണുന്നതിനായി ബൈപാസ്, ബദൽ റോഡുകൾ യാഥാർഥ്യമാക്കണം. അതിൽ ഏറ്റവും പ്രധാനപ്പെട്ടത് ചിപ്പിലിത്തോട്-മരുതിലാവ്-തളിപ്പുഴ ബൈപ്പാസാണ്. ഇത് ടെൻഡർ ക്ഷണിച്ചിരുന്നുവെങ്കിലും ആരും ഏറ്റെടുത്തിട്ടില്ല. ഇപ്പോഴത്തെ സാഹചര്യം പരിഗണിച്ചുകൊണ്ട് അടിയന്തരമായി റീ ടെൻഡർ ക്ഷണിക്കണമെന്നും അദ്ദേഹം ആവശ്യപ്പെട്ടു. രണ്ടാമത്തേത് പടിഞ്ഞാറത്തറ-പൂഴിത്തോട് റോഡാണ്. ഈ റോഡ് ഇനിയും പൂർത്തിയാകാത്തത് ഒരു ജനതയോടും പ്രദേശത്തോടും കാണിക്കുന്ന അവഗണനയുടെ പ്രതീകമാണെന്ന് അദ്ദേഹം പറഞ്ഞു. 1994 സെപ്റ്റംബർ 24ന് കെ. കരുണാകൻ പ്രവൃത്തി ഉദ്ഘാടനം ചെയ്ത ഈ പദ്ധതിക്ക് ആവശ്യമായ 52 ഏക്കർ വനഭൂമി വിട്ടുകിട്ടുന്നതിനായി 104 ഏക്കർ ഭൂമി വനംവകുപ്പിന് നൽകിയതാണ്. വനംവകുപ്പിന് വിട്ടുകൊടുത്ത സ്ഥലം വനമായി മാറി. എന്നാൽ റോഡിനായി വിട്ടുകിട്ടേണ്ട സ്ഥലം ലഭിച്ചില്ല. വനംമന്ത്രിയുടെ സാന്നിധ്യത്തിൽ ചേർന്ന യോഗത്തിൽ ഭൂമി വിട്ടുനൽകിയിട്ടില്ലെന്ന് വനംവകുപ്പ് കള്ളം പറയുന്നതാണ് കണ്ടത്. 23 കിലോമീറ്റർ ദൈർഘ്യമുള്ള ഈ റോഡിന്‍റെ 70 ശതമാനം പ്രവൃത്തിയും പൂർത്തീകരിച്ചതാണ്. വനത്തിനിടയിലൂടെയുള്ള ചെറിയ ഭാഗം മാത്രമാണ് ഇനി പൂർത്തിയാകാനുള്ളത്. നിയമസഭയിൽ ഏറ്റവും കൂടുതൽതവണ ആവശ്യപ്പെട്ട വിഷയം പടിഞ്ഞാറത്തറ-പൂഴിത്തോട് റോഡാണ്. ഇതിന്‍റെ ഇൻവെസ്റ്റിഗേഷനായി ഒന്നരക്കോടി രൂപ മാറ്റിവച്ചു. വയനാട് ഭാഗത്തെ ഇതിനകം പൂർത്തിയായി. എന്നാൽ കോഴിക്കോട് ഭാഗത്തേത് പൂർത്തിയായിട്ടില്ല. സെപ്റ്റംബർ 18 ആണ് അനുവദിച്ചിരിക്കുന്ന അവസാന തീയതി. പദ്ധതികൾക്ക് മുഴുവൻ തുരങ്കംവയ്ക്കുന്ന പണിയെടുക്കുന്നത് വനംവകുപ്പാണ്. 1994ൽ ഈ റോഡ് അട്ടിമറിക്കാനുള്ള അതേ റിപ്പോർട്ട് 2024ലും 2025ലും തയാറാക്കുകയാണ് വനംവകുപ്പ്. ഇത് അംഗീകരിക്കാൻ സാധിക്കില്ല. വയനാടിന്‍റെ ഗതാഗതപ്രശ്നത്തോട് നീതി പുലർത്താൻ വനംവകുപ്പും സർക്കാരുകളും തയാറാകണമെന്നും അദ്ദേഹം ആവശ്യപ്പെട്ടു.

പുരസ്കാര നിറവിൽ ജില്ലാ ഹോമിയോ ആശുപത്രി

കൽപ്പറ്റ: പ്രഥമ ആയുഷ് കായകൽപ്പ് അവാർഡ് വിഭാഗത്തിൽ ജില്ലാ ഹോമിയോ ആശുപത്രി 95.24 ശതമാനം മാർക്കോടെ സംസ്ഥാനതലത്തിൽ മൂന്നാംസ്ഥാനം നേടി. ഒന്നര ലക്ഷം രൂപയാണ് അവാർഡ് തുക. ശുചിത്വം, മാലിന്യ സംസ്കരണം, അണുബാധ നിയന്ത്രണം എന്നിവയിലെ മികച്ച പ്രവർത്തനമാണ് അവാർഡിന് അർഹമാക്കിയത്. തിരുവനന്തപുരത്ത് നടന്ന ചടങ്ങിൽ ആരോഗ്യമന്ത്രി വീണാ ജോർജിൽനിന്നു ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി, ഹോസ്പിറ്റൽ സൂപ്രണ്ട് ഡോ.പി. സുമേഷ്, ഡോ.പി. നാദിയ മോൾ, ഡോ.കെ.എൻ. അശ്വതി എന്നിവർചേർന്ന് പുരസ്കാരം ഏറ്റുവാങ്ങി.

കുടുംബാരോഗ്യ കേന്ദ്രത്തിലെ സൗകര്യങ്ങളിൽ സന്തുഷ്ടൻ: നീതി ആയോഗ് വൈസ് ചെയർമാൻ

കൽപ്പറ്റ: രാജ്യത്തിന് മാതൃകയാകുന്ന എൽസ്റ്റണ്‍ എസ്റ്റേറ്റിലെ പുനരധിവാസ പ്രവർത്തനങ്ങളും ദേശീയതലത്തിൽ പുരസ്കാരം ലഭിച്ച നൂൽപ്പുഴ കുടുംബാരോഗ്യ കേന്ദ്രത്തിലെ വികസന പ്രവൃത്തികളും നീതി ആയോഗ് വൈസ് ചെയർമാൻ സുമൻ കെ. ബറിയുടെ നേതൃത്വത്തിലുള്ള സംഘം നേരിൽകണ്ടു വിലയിരുത്തി. ആസ്പിരേഷണൽ ഡിസ്ട്രിക്ട്സ് ആൻഡ് ബ്ലോക്ക്സ് പദ്ധതിയുടെ ഭാഗമായാണ് നീതി ആയോഗ് സംഘം ഇന്നലെ ജില്ലയിൽ സന്ദർശനം നടത്തിയത്. രാവിലെ 8.30ന് നൂൽപ്പുഴ കുടുംബാരോഗ്യ കേന്ദ്രത്തിൽ എത്തിയ സുമൻ കെ. ബറി ആശുപത്രിയിലെ ഫിസിയോതെറാപ്പി യൂണിറ്റ്, ഡേ കെയർ, വിളർച്ചാ നിയന്ത്രണ പദ്ധതിയായ "അമ്മ താരാട്ട്’, ഗർഭിണികളായ ആദിവാസി സ്ത്രീകൾക്കുള്ള "പ്രതീക്ഷ’ പദ്ധതികൾ, റോബോട്ടിക് ഗെയ്റ്റ് ട്രെയ്നർ സംവിധാനം തുടങ്ങിയ സൗകര്യങ്ങൾ വിലയിരുത്തി. പഠന പ്രശ്നങ്ങളുള്ള വിദ്യാർഥികൾക്കായി ആശുപത്രിയിൽ ഏർപ്പെടുത്തിയ വെർച്വൽ റിയാലിറ്റി തെറാപ്പി സംവിധാനം പരിശോധിച്ചു. രോഗീ പരിചരണത്തിലെ അനന്യ സമീപനങ്ങൾ, അംഗീകാരങ്ങൾ എന്നിവ സംഘം മനസിലാക്കി. ആശുപത്രിയുടെ സന്ദർശക രജിസ്റ്ററിൽ "ആശുപത്രിയിൽ രോഗികൾക്ക് ലഭ്യമാക്കിയ സൗകര്യങ്ങളിൽ അതീവ സന്തുഷ്ടി രേഖപ്പെടുത്തുന്നു. ഇവിടം സന്ദർശിക്കുന്നതിൽ നിന്നും മഴ എന്നെ തടയാഞ്ഞതിൽ ഞാൻ ആഹ്ലാദവാനാണ്...' എന്ന് നീതി ആയോഗ് വൈസ് ചെയർമാൻ കുറിച്ചു. ദേശീയ ആരോഗ്യ ദൗത്യം ജില്ലാ പ്രോഗ്രാം മാനേജർ ഡോ. സമീഹ സൈതലവി, ഡെപ്യൂട്ടി ഡിഎംഒ ഡോ.പി. ബിനീഷ്, കുടുംബാരോഗ്യ കേന്ദ്രം അസി. സർജൻ ഡോ.വി.പി. ദാഹർ മുഹമ്മദ്, ഡോ. ജെറിൻ എന്നിവർ ആശുപത്രി കാര്യങ്ങൾ വിശദീകരിച്ചു. തുടർന്ന് എൽസ്റ്റണ്‍ എസ്റ്റേറ്റിൽ എത്തിയ വൈസ് ചെയർമാനെ ജില്ലാ കളക്ടർ ഡി.ആർ. മേഘശ്രീ, പുനരധിവാസ പദ്ധതിയുടെ ചീഫ് ഓപ്പറേറ്റിംഗ് ഓഫീസർ ജെ. അരുണ്‍ എന്നിവരുടെ നേതൃത്വത്തിൽ സ്വീകരിച്ചു. മാതൃക വീട് സന്ദർശിച്ച അദ്ദേഹം പുഞ്ചിരിമട്ടം ദുരന്തത്തെക്കുറിച്ചും സംസ്ഥാന സർക്കാർ നടത്തുന്ന വിവിധങ്ങളായ പുനരധിവാസ പ്രവൃത്തികളെക്കുറിച്ചും വിശദമായി ചോദിച്ചു മനസിലാക്കി. ടൗണ്‍ഷിപ്പിലെ വീടുകൾ പരിപാലിക്കുന്നതും വെള്ളം, വൈദ്യുതി തുടങ്ങിയവ വിതരണം ചെയ്യാനുള്ള പദ്ധതിയെക്കുറിച്ച് അധികൃതർ നീതി ആയോഗ് വൈസ് ചെയർമാനെ ധരിപ്പിച്ചു. ടൗണ്‍ഷിപ്പ് പദ്ധതിയുടെ മാപ്പും വീടിന്‍റെ പ്ലാനും കാണിച്ചുകൊടുത്തു. ആസ്പിരേഷനൽ ജില്ല എന്ന നിലയ്ക്ക് വയനാട് നേരിടുന്ന പ്രധാന പ്രതിസന്ധികൾ, പരിഹാരം എന്നിവയെക്കുറിച്ചും സുമൻ ബറി ജില്ലാ കളക്ടറോട് ചോദിച്ചു. ഗോത്രജന വിഭാഗങ്ങൾക്കിടയിലെ പോഷകാഹാര കുറവ്, അരിവാൾ രോഗം എന്നിവയെക്കുറിച്ച് വിശദീകരിച്ച കളക്ടർ പാകം ചെയ്ത ഭക്ഷണം കഴിക്കാൻ നടത്തുന്ന ബോധവത്കരണത്തെക്കുറിച്ചും ആസ്പിരേഷണൽ ജില്ലയുടെ പല മാനദണ്ഡങ്ങളിലും വയനാട് മികച്ച പ്രകടനം നടത്തിയതും ചൂണ്ടിക്കാട്ടി. വൈസ് ചെയർമാനൊപ്പം നീതി ആയോഗ് ഡയറക്ടർ ഷോയബ് അഹമദ് കമാൽ, എ. മുത്തുകുമാർ എന്നിവരുമുണ്ടായിരുന്നു. സുമൻ ബറിയുടെ ഭാര്യ മൈത്രേയി ബറി അനുഗമിച്ചു. സബ് കളക്ടർ അതുൽ സാഗർ, അസിസ്റ്റന്‍റ് കളക്ടർ പി.പി. അർച്ചന, ജില്ലാതല ഉദ്യോഗസ്ഥർ എന്നിവരും സ്ഥലത്തുണ്ടായിരുന്നു.

കോണ്‍ഗ്രസ് ജില്ലാതല ഗൃഹസന്ദർശന പരിപാടികൾക്ക് തുടക്കമായി

കാക്കവയൽ: തദ്ദേശസ്വയം ഭരണ സ്ഥാപനങ്ങളിലേക്കുള്ള തെരഞ്ഞെടുപ്പിന് മുന്നോടിയായി നടക്കുന്ന കോണ്‍ഗ്രസ് ഗൃഹസന്ദർശന പരിപാടികൾക്ക് ജില്ലയിൽ തുടക്കമായി. ജില്ലാതല ഉദ്ഘാടനം മുട്ടിൽ പഞ്ചായത്ത് 12-ാം വാർഡ് വാഴവറ്റയിൽ ഷാജു നീറാന്പുഴയുടെ ഭവനത്തിൽ കൂപ്പണും ബ്രോഷറും നൽകി ഡിസിസി പ്രസിഡന്‍റ് എൻ.ഡി. അപ്പച്ചൻ ഉദ്ഘാടനം ചെയ്തു. 31നകം ജില്ലയിലെ വാർഡുകളിലെ ഓരോ വീടുകളും മുഴുവൻ കയറി കോണ്‍ഗ്രസ് പ്രവർത്തകർ ഗൃഹസന്ദർശനം നടത്തും. കേന്ദ്ര സംസ്ഥാന സർക്കാരുകൾക്ക് നേതൃത്വം നൽകുന്ന ബിജെപിയും സിപിഎമ്മും വർഗീയതയും രാഷ്ട്രീയ ഫാസിസവും കേരളത്തിലും നടപ്പാക്കി മുന്നോട്ട് പോകുകയാണെന്ന് അദ്ദേഹം പറഞ്ഞു. ഇതിനെ ശക്തമായി നേരിടുന്നതിനും ഭരണഘടനയും ജനാധിപത്യവും മതേതരത്വവും സംരക്ഷിക്കുന്നതിനും കോണ്‍ഗ്രസ് പോരാട്ടം തുടരും. കള്ളവോട്ടിലൂടെ അധികാരത്തിൽ വന്ന കേന്ദ്ര ഗവണ്‍മെന്‍റ് യഥാർഥ വോട്ടർമാരുടെ പേരുകൾ വെട്ടിമാറ്റുകയും ചെയ്യുകയാണ്. ലോക്സഭ പ്രതിപക്ഷ നേതാവ് രാഹുൽ ഗാന്ധിയുടെ നേതൃത്വത്തിൽ വോട്ടു വെട്ടിമാറ്റിയ ആളുകളെ ഉൾപ്പെടുത്തണമെന്ന് ആവശ്യപ്പെട്ട് നടത്തുന്ന പ്രക്ഷോഭത്തിൽ ലക്ഷക്കണക്കിന് ആളുകളാണ് പങ്കെടുത്തതെന്നും അദ്ദേഹം ചൂണ്ടിക്കാട്ടി. കേരളത്തിലെ പാവപ്പെട്ട ജനങ്ങൾക്ക് ഓണം ആഘോഷിക്കുന്നതിന് യുഡിഎഫിന്‍റെ കാലത്ത് നിയന്ത്രിത വിലയ്ക്ക് പൊതുവിതരണ സംവിധാനങ്ങളിലൂടെ ജനങ്ങൾക്ക് അവശ്യ സാധനങ്ങൾ വിലകുറച്ച് നൽകിയിരുന്നു. ഇപ്പോൾ വിലക്കയറ്റംമൂലം ജനങ്ങൾ പൊറുതി മുട്ടിയിട്ടും വിപണിയേക്കാൾ വിലയിലാണ് ഭൂരിഭാഗം സാധനങ്ങളും സർക്കാർ സംവിധാനത്തിലൂടെ വിൽപ്പന നടത്തുന്നതെന്നും അദ്ദേഹം കൂട്ടിച്ചേർത്തു. മുട്ടിൽ മണ്ഡലം കോണ്‍ഗ്രസ് പ്രസിഡന്‍റ് ജോയി തൊട്ടിത്തറ അധ്യക്ഷത വഹിച്ചു. ക്ഷീര കർഷക കോണ്‍ഗ്രസ് പ്രസിഡന്‍റ് എം.ഒ. ദേവസ്യ, വാർഡ് പ്രസിസന്‍റ് ബിജു പബിക്കൽ, ജോണ്‍ നടക്കൽ, റെജി പാറപ്പുറത്ത്, ത്യേസ്യാമ്മ സാനി, സെലിൻ, എൽ.ഡി. ഐസക്ക്, മേരി, ടോമി, സാജൻ, ബാബു, പി. ജോണ്‍സണ്‍, ഷാജി, പ്രിജു, ജിഥിൻ, വർഗീസ്, എം. ജോളി, പത്മനാഭൻ, അബിലാഷ്, ജോസ്, ചന്ദ്രൻ, സുനിൽ, ചന്തു, ബൂത്ത് പ്രസിഡന്‍റ് സി.ടി. ജോയി എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]