ADVERTISEMENT

ADVERTISEMENT

സെന്‍റ് ജോസഫ്‌സ് എന്‍ജി. കോളജിൽ വിജയദിനാഘോഷം

പാലാ: സെന്‍റ് ജോസഫ്‌സ് എന്‍ജിനിയറിംഗ് കോളജിലെ വിജയദിനാഘോഷം മുന്‍ ഡിജിപി ഋഷിരാജ് സിംഗ് ഉദ്ഘാടനം ചെയ്തു. കോളജ് രക്ഷാധികാരി മാര്‍ ജോസഫ് കല്ലറങ്ങാട്ട് സന്നിഹിതനായിരുന്നു.

അക്കാദമിക മികവ് പുലര്‍ത്തിയവരെയും മികച്ച നേട്ടങ്ങള്‍ കൈവരിച്ച വിദ്യാര്‍ഥികളെയും ഈ വര്‍ഷം ഡോക്‌ടറേറ്റ് നേടിയ കോളജിലെ അധ്യാപകരെയും ആദരിച്ചു. കോളജ് ചെയര്‍മാന്‍ മോണ്‍. ജോസഫ് തടത്തില്‍, കോളജ് ഡയറക്ടര്‍ റവ.ഡോ. ജയിംസ് ജോണ്‍ മംഗലത്ത്, പ്രിന്‍സിപ്പല്‍ ഡോ. വി.പി. ദേവസ്യ എന്നിവര്‍ പ്രസംഗിച്ചു.

ADVERTISEMENT

റബർ ബോർഡ് ജിയോ മാപ്പിംഗ് തുടങ്ങി

കാഞ്ഞിരപ്പള്ളി: ഇയുഡിആർ ചട്ടങ്ങൾ പാലിച്ച് ഇന്ത്യയിൽ നിന്ന് യൂറോപ്യൻ യൂണിയനിലേക്കുള്ള റബറിന്‍റെയും റബറുൽപന്നങ്ങളുടെയും കയറ്റുമതി ഉറപ്പാക്കുന്നതിനായി റബർബോർഡിന്‍റെ ആഭിമുഖ്യത്തിൽ റബർതോട്ടങ്ങളിൽ ജിയോ മാപ്പിംഗ് ആരംഭിച്ചു. ജിയോ മാപ്പിംഗിനായി ഹൈദരാബാദ് കേന്ദ്രമായി പ്രവർത്തിക്കുന്ന ട്രയമ്പു ടെക് സൊല്യൂഷൻസ് പ്രൈവറ്റ് ലിമിറ്റഡ് എന്ന സ്ഥാപനത്തെയാണ് റബർബോർഡ് നിയോഗിച്ചിട്ടുള്ളത്. ഭൂമിയുടെ ഉടമസ്ഥാവകാശം, വിസ്തൃതി, റബർതോട്ടങ്ങളുടെ അതിരുകൾ തുടങ്ങിയ വിശദാംശങ്ങൾ ശേഖരിച്ചുകൊണ്ടാണ് മാപ്പിംഗ് നടത്തുന്നത്. ഇതുമായി ബന്ധപ്പെട്ട് ശേഖരിക്കുന്ന വിവരങ്ങൾ റബർബോർഡിന്‍റെ കേന്ദ്രീകൃത ഡാറ്റാ ബേസിൽ സൂക്ഷിക്കുന്നതും വിവരങ്ങളുടെ രഹസ്യാത്മകത ഉറപ്പാക്കുകയും ചെയ്യുന്നതാണ്. ഇയുഡിആറുമായി ബന്ധപ്പെട്ട വിവരങ്ങൾ പങ്കുവയ്ക്കാനായി തോട്ടമുടമകൾക്കും റബർഡീലർമാർക്കും സംസ്കർത്താക്കൾക്കും വ്യവസായികൾക്കുമായി അവബോധനപരിപാടികൾ റബർബോർഡ് സംഘടിപ്പിച്ചുവരുന്നു. റബർബോർഡിന്‍റെ ഈ ഉദ്യമത്തോട് കർഷകർ സഹകരിക്കണമെന്ന് അസിസ്റ്റന്‍റ ഡയറക്ടർ അറിയിച്ചു.

ഓടകൾ അടഞ്ഞു; ബസ് സ്റ്റാൻഡ് ജംഗ്ഷനിലെ വെള്ളക്കെട്ട് പരിഹരിക്കാൻ നടപടിയില്ല

കാഞ്ഞിരപ്പള്ളി: ദേശീയപാതയിൽ ബസ് സ്റ്റാൻഡ് ജംഗ്ഷനിലെ വെള്ളക്കെട്ട് പരിഹരിക്കാൻ നടപടികളില്ല. എല്ലാ വർഷവും ഈ ഭാഗത്ത് വെള്ളക്കെട്ട് പതിവാണ്. ഇതുമൂലം ഏറെ ദുരിതമനുഭവിക്കുന്നത് ഓട്ടോറിക്ഷ ഡ്രൈവർമാരും കാൽനടയാത്രക്കാരും സമീപത്തെ വ്യാപാരികളുമാണ്. ഓടകൾ ഇല്ലാത്തതും ഉള്ള ഓടകൾ മണ്ണും മാലിന്യവും നിറഞ്ഞു മൂടിയതുമാണ് വെള്ളക്കെട്ട് രൂപപ്പെടാൻ കാരണം. വർഷങ്ങളായി സ്ഥിരമായി ഇതാണ് അവസ്ഥയെങ്കിലും ഇതു പരിഹരിക്കുന്നതിനുള്ള നടപടികൾ അധികൃതരുടെ ഭാഗത്തുനിന്നുണ്ടാകുന്നില്ലെന്നു കാൽനടയാത്രക്കാർ പരാതിപ്പെടുന്നു. വെള്ളം കെട്ടിക്കിടക്കുന്നതിനാല്‍ വാഹനങ്ങള്‍ കടന്നുപോകുമ്പോള്‍ ആളുകളുടെ ദേഹത്തേക്കു ചെളിവെള്ളം തെറിക്കുന്ന സ്ഥിതിയാണ്. ബസ് സ്റ്റാന്‍ഡ് പ്രവേശന കവാടത്തിനു മുന്പിലൂടെയുള്ള റോഡിലൂടെ പുത്തനങ്ങാടി ഭാഗത്തുനിന്ന് ഒഴുകിയെത്തുന്ന വെള്ളം ഓടയിലേക്ക് ഒഴുകുന്നതിനുള്ള ഭാഗം അടഞ്ഞുകിടക്കുകയാണ്. അതിനാൽ വെള്ളം നേരെ ദേശീയപാതയിലേക്കാണ് എത്തുന്നത്. ബസ് സ്റ്റാന്‍ഡിനു മുന്‍വശം താഴ്ന്ന ഭാഗമാണ്. ഇവിടെനിന്ന് ഇരു വശത്തേക്കുമുള്ള ഓടയിലേക്കു വെള്ളം ഒഴുകുന്നതിനും സംവിധാനമില്ല. ഓട്ടോറിക്ഷാ സ്റ്റാന്‍ഡിലടക്കം വെള്ളം കെട്ടിനില്‍ക്കുന്ന സ്ഥിതിയിലാണ്. മഴ പെയ്ത് തീര്‍ന്ന് ഏറെ നേരം കഴിഞ്ഞാൽ മാത്രമേ ഇവിടുത്തെ വെള്ളക്കെട്ട് ഒഴിവാകുകയുള്ളു. മഴവെള്ളത്തിനൊപ്പമെത്തുന്ന കറുത്ത നിറത്തിലുള്ള മാലിന്യം കലർന്ന വെള്ളത്തിൽ നിൽക്കേണ്ട ഗതികേടിലാണ് ഓട്ടോറിക്ഷ ഡ്രൈവർമാർ. ഈ മാലിന്യ വെള്ളത്തിനു കടുത്ത ദുർഗന്ധമാണ് അനുഭവപ്പെടുന്നത്. മൂക്ക് പൊത്തി ഇരിക്കേണ്ട ഗതികേടാണെന്ന് സമീപത്തെ വ്യാപാരികളും പറയുന്നു. കാഞ്ഞിരപ്പള്ളി ടൗണിലെ ഓടകൾ വൃത്തിയാക്കിയിട്ട് വർഷങ്ങളായി. ഓടകളിലെ മണ്ണും മാലിന്യങ്ങളും നീക്കി വെള്ളം ഒഴുകിപ്പോകാനുള്ള സംവിധാനങ്ങള്‍ ഏര്‍പ്പെടുത്തണമെന്ന് ആവശ്യം ശക്തമായി.

ബിരുദദാന ചടങ്ങ്: രാജു നാരായണസ്വാമി ഉദ്ഘാടനം ചെയ്യും

അരുവിത്തുറ: സെന്‍റ് ജോർജ് കോളജിലെ ബിരുദദാന ചടങ്ങ് വ്യാഴാഴ്ച ഐഎഎസ് മുൻ ഉദ്യോഗസ്ഥൻ ഡോ. രാജു നാരായണ സ്വാമി ഉദ്ഘാടനം ചെയ്യും. 400 ഓളം വിദ്യാർഥികളാണ് ബിരുദം പൂർത്തിയാക്കി സർട്ടിഫിക്കറ്റുകൾ ഏറ്റുവാങ്ങുന്നത്. കോളജ് മാനേജർ വെരി റവ. ഫാ. സെബാസ്റ്റ്യൻ വെട്ടുകല്ലേൽ അധ്യക്ഷത വഹിക്കുന്ന ചടങ്ങിൽ പാലാ രൂപത പ്രോട്ടോസിഞ്ചല്യൂസ് മോൺ. റവ. ഡോ. ജോസഫ് തടത്തിൽ അനുഗ്രഹ പ്രഭാഷണം നടത്തും. കോളജ് ബർസാർ റവ ഫാ.ബിജു കുന്നയ്ക്കാട്ട്, വൈസ് പ്രിൻസിപ്പൾ ഡോ. ജിലു ആനി ജോൺ, ഐക്യുഎസി കോഓർഡിനേറ്റർ ഡോ. സുമേഷ് ജോർജ് തുടങ്ങിയവർ ചടങ്ങിൽ സംസാരിക്കും. നാക്ക് റീ അക്രഡിറ്റേഷനിൽ എ പ്ലസ് പ്ലസ് ആക്രഡിറ്റേഷൻ ലഭിച്ച അരുവിത്തുറ സെന്‍റ് ജോർജ് കോളജ് ജില്ലയിൽ കൂടുതൽ ബിരുദധാരികളെ സമൂഹത്തിന് സമ്മാനിക്കുന്ന വിദ്യാഭ്യാസ സ്ഥാപനമാണ്. ചടങ്ങിൽ പിജി വിദ്യാർഥികൾക്കുള്ള ബിരുദ സർട്ടിഫിക്കറ്റുകളും വിതരണം ചെയ്യും. ഈ വർഷം യൂണിവേഴ്സിറ്റി റാങ്കുകൾ കരസ്ഥമാക്കിയ വിദ്യാർഥികളേയും കാന്പസ് പ്ലെയ്സ്മെന്‍റ് വഴി ജോലി കരസ്ഥമാക്കിയ വിദ്യാർഥികളേയും ചടങ്ങിൽ ആദരിക്കും.

അപുഷ്പി സസ്യങ്ങളിൽ ഗണ്യമായ കുറവെന്ന് പഠനം

അരുവിത്തുറ: കാലവർഷം നേരത്തെ എത്തിയതും ഇടയ്ക്ക് ഉണ്ടായ ഇടവേളയും മൂലം അപുഷ്പി സസ്യങ്ങളിൽ കുറവുണ്ടായതായി അരുവിത്തുറ സെന്‍റ് ജോർജ് കോളജ് ബോട്ടണി വിഭാഗം പഠന റിപ്പോർട്ട്. കാലാവസ്ഥാ വ്യതിയാനം മൂലം കാലം തെറ്റിയെത്തിയ മഴ ഉണ്ടാക്കിയ മാറ്റങ്ങളാണ് ഈ വർഷം അപുഷ്‌പി സസ്യങ്ങളുടെ കുറവിന് കാരണമായത്. ഇത്തരം സസ്യങ്ങളുടെ കുറവ് മണ്ണിന്‍റെ സൂക്ഷ്മ ഘടനയിൽ മാറ്റങ്ങൾക്ക് കാരണമായേക്കാം. ഇത് മണ്ണിന്‍റെ ഫലഭൂയിഷ്ടിയെ ബാധിക്കുകയും മിത്ര കീടങ്ങൾ കുറയാൻ കാരണമാകുമെന്നും റബർ ഉൾപ്പെടെയുള്ള കാർഷിക വിളകളെ ഇത് പ്രതികൂലമായി ബാധിച്ചേക്കുമെന്നും പഠനം പറയുന്നു. പരിസ്ഥിതി ദിനത്തോടനുബന്ധിച്ച് കോളജിലെ ബോട്ടണി വിഭാഗം നടത്തിയ സർവ്വേ പഠനത്തിന് ബോട്ടണി വിഭാഗം മേധാവി ജോബി ജോസഫ് നേതൃത്വം നൽകി. അധ്യാപകരായ ഡോ. അബിൻ സെബാസ്റ്റ്യൻ, കാതറിൻ ജോസ് എനിവരുടെ കീഴിൽ വിദ്യാർഥികൾ രണ്ട് ടീമുകളായി തിരിഞ്ഞാണ് കാമ്പസിലും സമീപ പ്രദേശങ്ങളിലുമായി പഠനം നടത്തിയത്.

രണ്ടു മിനിറ്റ് കാറ്റ്: അതിരന്പുഴയിൽ നാശനഷ്ടമേറെ

അതിരമ്പുഴ: രണ്ടു മിനിറ്റുമാത്രം ദീർഘിച്ച ശക്തമായ കാറ്റിൽ അതിരമ്പുഴ പഞ്ചായത്തിലെ മൂന്നു വാർഡുകളിൽ വൻ നാശം. മരങ്ങൾ കടപുഴകി; വീടുകൾക്കും സ്ഥാപനങ്ങൾക്കും വലിയ നാശനഷ്ടമുണ്ടായി. വ്യാപകമായി കൃഷിനാശവുമുണ്ടായി. ഞായറാഴ്ച വൈകുന്നേരം 5.36നാണ് കാറ്റ് ആഞ്ഞുവീശിയത്. ചന്തക്കുളം മുതൽ കൈപ്പുഴ കവലവരെയുള്ള പ്രദേശങ്ങളിൽ കാറ്റ് നാശം വിതച്ചു. 22-ാം വാർഡിൽ അതിരമ്പുഴ പഞ്ചായത്തുവക മത്സ്യമാർക്കറ്റ് കെട്ടിടത്തിന്‍റെ മേൽക്കൂര അതേപടി നിലംപൊത്തി. മാർക്കറ്റിലെ ഹോൾസെയിൽ മത്സ്യവ്യാപാരി ജോയ്സ് മൂലേക്കരിയുടെ ഓഫീസ് കെട്ടിടത്തിന്‍റെ മേൽക്കൂരയിലെ ഷീറ്റുകൾ പറന്നുപോയി. വലിയ മതിൽ ഇടിഞ്ഞു വീണു. ചെമ്മാച്ചേരിൽ ജിമ്മി, കുട്ടപ്പായി കിടങ്ങയിൽ, പ്രസന്നൻ കുന്നത്തുപറമ്പിൽ, പെണ്ണമ്മ തുരുത്തേൽ എന്നിവരുടെ വീടുകൾക്കു മുകളിൽ മരം വീണു. ഷിബു പൊത്തനാംതടത്തിന്‍റെയും പഞ്ചായത്ത് മെംബർ ജോസ് അഞ്ജലിയുടെയും മതിലുകൾ ഇടിഞ്ഞു. ജോസ് അഞ്ജലിയുടെ പുരയിടത്തിലെ തേക്ക്, ആഞ്ഞിലി മരങ്ങൾ കടപുഴകി വീണു. പി ആൻഡ് എം സെറാമിക്സ് ഓഫീസ് കെട്ടിടത്തിന്‍റെ ഷീറ്റുകളും ഗേറ്റും തകർന്നു.

20-ാം വാർഡ് കുറ്റിയേൽ കവല ഭാഗത്ത് പാലയ്ക്കാത്തൊട്ടി ശ്രീനാഥിന്‍റെ വീടിനു മുന്നിലും പിന്നിലും നിന്നിരുന്ന മരങ്ങൾ വീടിനു മുകളിലേക്കു വീണു. വീടിന്‍റെ മേൽക്കൂര പൂർണമായി തകർന്നു. പാലയ്ക്കാത്തൊട്ടി ശാന്തമ്മയുടെ വീടിന്‍റെ മേൽക്കൂരയ്ക്കും മരം വീണ് നാശനഷ്ടമുണ്ടായി. ചിന്നമ്മ കൊല്ലംപറമ്പിലിന്‍റെ വീടിന്‍റെ മുകളിലെ ട്രസ് വർക്ക് മരം വീണു തകർന്നു. 21-ാം വാർഡിൽ കുറ്റിയേൽ പ്രസാദിന്‍റെ വീടിനു മുകളിലേക്ക് ആഞ്ഞിലിമരം വീണ് മേൽക്കൂര പൂർണമായി തകർന്നു. കുന്നത്ത് പ്രസാദിന്‍റെ വീടിനു മുകളിലേക്കും തേക്കുമരം കടപുഴകി വീണു. കുറ്റിയേൽ സുഭാഷ്, കുറ്റിയേൽ സുമോൻ, കുറ്റിയേൽ സജി, കിടങ്ങയിൽ സിബി എന്നിവരുടെ വീടുകൾക്കും മരംവീണ് നാശനഷ്ടമുണ്ടായി. എസ്എൻഡിപി ഹാളിനു മുകളിലേക്ക് വലിയ ആഞ്ഞിലിമരം വീണു. ഇവിടെ മതിലും ഇടിഞ്ഞു തകർന്നു. ട്രാൻസ്ഫോർമറിനു മുകളിലേക്ക് മരംവീണ് വൈദ്യുതി പോസ്റ്റുകൾ ഒടിഞ്ഞു. 11 കെവി ലൈൻ ഉൾപ്പെടെയുള്ള വൈദ്യുതിലൈനുകൾ മരംവീണ് വ്യാപകമായി തകർന്നു. റോഡിലെ തടസങ്ങൾ നീക്കം ചെയ്യൽ ഇന്നലെ ഉച്ചയോടെയാണ് പൂർത്തിയായത്. അതുവരെ അതിരമ്പുഴ - കൈപ്പുഴ റോഡിൽ ഗതാഗതം തടസപ്പെട്ടു. വൈകുന്നേരത്തോടെയാണ് പുതിയ പോസ്റ്റുകൾ സ്ഥാപിച്ച് വൈദ്യുതി ലൈനുകൾ പൂർവസ്ഥിതിയിലാക്കിയത്. തഹസിൽദാർ, വില്ലേജ് ഓഫീസർ എന്നിവരുടെ നേതൃത്വത്തിൽ റവന്യു അധികൃതർ വീടുകളും സ്ഥാപനങ്ങളും സന്ദർശിച്ച് റിപ്പോർട്ട് തയ്യാറാക്കി സമർപ്പിച്ചു. ബ്ലോക്ക് പഞ്ചായത്ത് മെംബർ ജയിംസ് കുര്യൻ, വാർഡ് മെംബർമാരായ ജോസ് അഞ്ജലി, കെ.എ. അശ്വതിമോൾ, ഐസി സാജൻ എന്നിവരും സിപിഐ ജില്ലാ സെക്രട്ടറി വി.ബി. ബിനു, മണ്ഡലം സെക്രട്ടറി കെ.ഐ. കുഞ്ഞച്ചൻ എന്നിവരും നാശനഷ്ടമുണ്ടായ സ്ഥലങ്ങളിലെത്തി. കൈപ്പുഴയിൽ വീടുകൾക്ക് മുകളിൽ മരംവീണു കൈപ്പുഴ: ശക്തമായ കാറ്റിലും മഴയിലും കൈപ്പുഴയില്‍ മരം കടപുഴകി വീടുകള്‍ക്കു നാശം. മഴയ്‌ക്കൊപ്പം ചുഴലിക്കാറ്റിന് സമാനമായ കാറ്റാണ് ഉണ്ടായതെന്നു നാട്ടുകാര്‍ പറയുന്നു. കൈപ്പുഴ തേനാകര കാവില്‍ റോഡിന് സമീപത്ത് താമസിക്കുന്ന മഠംപറമ്പില്‍ മായാ രാജുവിന്‍റെ വീടിനു മുകളിലേക്ക് മൂന്നു മരങ്ങളാണു വീണത്. വീടിന്‍റെ ഭിത്തിക്കും മുകള്‍ഭാഗത്തിനും കേടുപാടു സംഭവിച്ചു. വീടിനുള്ളില്‍ ആളുകളുണ്ടായിരുന്നെങ്കിലും അപകടം ഉണ്ടാകാതെ രക്ഷപ്പെട്ടു. സമീപത്തെ വലിയപറമ്പില്‍ ബിബിയുടെ വീടിനു മുകളിൽ കൂറ്റന്‍ തേക്കുമരം വീണു. തൊട്ടടുത്ത കാവില്‍ ഡൊമിനിക്കിന്‍റെ റബര്‍ത്തോട്ടത്തിലെ ഭൂരിഭാഗം റബര്‍മരങ്ങളും വട്ടം ഒടിഞ്ഞു. ബാക്കിയുള്ള റബര്‍ മരങ്ങള്‍ ചാഞ്ഞു നില്‍ക്കുകയാണ്. ഇതു നിലംപൊത്തിയാല്‍ സമീപവാസിയായ ബേബിയുടെ വീട് തകരും. മുണ്ടയ്ക്കല്‍ ലൂക്കോസിന്‍റെ വീടിനു മുകളിൽ തൊട്ടടുത്ത പുരയിടത്തില്‍നിന്ന തേക്കു മരം വീണു. ഇടമറ്റത്തില്‍ ജോസഫിന്‍റെ പുരയിടത്തിലെ മരങ്ങളും കടപുഴകി. കുടിലില്‍ കവല, പുളിങ്കാല ഭാഗങ്ങളിൽ മരം കടപുഴകി ഗതാഗതം തടസപ്പെട്ടു. ഇവിടെ വൈദ്യുതി പോസ്റ്റും ഒടിഞ്ഞു. തേനാകര കാവില്‍ റോഡിലും മൂന്നുപറ റോഡിലും വൈദ്യുതി പോസ്റ്റുകൾ ഒടിഞ്ഞുവീണു. കാറ്റിലും മഴയിലും ലക്ഷക്കണക്കിന് രൂപയുടെ നാശനഷ്ടങ്ങള്‍ സംഭവിച്ചിട്ടുണ്ട്. കാറ്റ് നാശം വിതച്ച പ്രദേശങ്ങള്‍ മന്ത്രി വാസവന്‍ സന്ദര്‍ശിച്ചു അതിരമ്പുഴ: ശക്തമായ കാറ്റില്‍ നാശനഷ്ടങ്ങളുണ്ടായ പ്രദേശങ്ങള്‍ മന്ത്രി വി.എന്‍. വാസവന്‍ സന്ദര്‍ശിച്ചു. അതിരമ്പുഴ, നീണ്ടൂര്‍ പഞ്ചായത്തുകളിലെ ദുരന്തബാധിത പ്രദേശങ്ങളിലാണ് മന്ത്രി എത്തിയത്. അതിരമ്പുഴ വില്ലേജിലെ ശ്രീകണ്ഠമംഗലം, കുറ്റിയേല്‍ ഭാഗങ്ങളിലായി 16 വീടുകളും കൈപ്പുഴ വില്ലേജിലെ കൈപ്പുഴ ഭാഗത്ത് 10 വീടുകളും മരംവീണു തകര്‍ന്നു. വര്‍ഷങ്ങള്‍ പഴക്കമുള്ള കരിന്തകര വീണ് വീട് പാടേ തകര്‍ന്ന ശ്രീകണ്ഠമംഗലം പാലയ്ക്കത്തൊടിയില്‍ സലില ശിവരാമന്‍റെ വീട്ടിലാണ് മന്ത്രി ആദ്യമെത്തിയത്. കുടുംബാംഗങ്ങളെ ആശ്വസിപ്പിച്ച മന്ത്രി പ്രകൃതി ദുരന്തത്തില്‍പ്പെടുത്തി ആവശ്യമായ എല്ലാ സഹായങ്ങളും ചെയ്തു നല്‍കാമെന്ന് ഉറപ്പുനല്‍കി. സാധ്യമായ എല്ലാ സഹായങ്ങളും അടിയന്തരമായി ലഭ്യമാക്കാനാവശ്യമായ നടപടികളെടുക്കുമെന്ന് മന്ത്രി ദുരന്തബാധിതര്‍ക്ക് ഉറപ്പുനല്‍കി. വൈദ്യുതി ബന്ധം കഴിയുന്നത്ര വേഗത്തില്‍ പുനഃസ്ഥാപിക്കാനും മന്ത്രി നിര്‍ദേശം നല്‍കി. തകര്‍ന്ന വീടുകളുടെ കണക്കെടുത്തു റിപ്പോര്‍ട്ട് ഉടന്‍തന്നെ തഹസില്‍ദാര്‍ക്കു നല്‍കാന്‍ പഞ്ചായത്ത് അസിസ്റ്റന്‍റ് എന്‍ജിനിയര്‍മാരോട് മന്ത്രി നിര്‍ദേശിച്ചു. നീണ്ടൂര്‍ പഞ്ചായത്ത് പ്രസിഡന്‍റ് വി.കെ. പ്രദീപ്, പഞ്ചായത്തംഗം പി.ഡി. ബാബു, കോട്ടയം തഹസില്‍ദാര്‍ എസ്.എന്‍. അനില്‍കുമാര്‍, ഡെപ്യൂട്ടി തഹസില്‍ദാര്‍ എന്‍. രാജേഷ്, അതിരമ്പുഴ വില്ലേജ് ഓഫീസര്‍ പി.വി. ലാല്‍ ദാസ്, കൈപ്പുഴ വില്ലേജ് ഓഫീസര്‍ കെ.പി. സ്മിത തുടങ്ങിയവരും മന്ത്രിയോടൊപ്പമുണ്ടായിരുന്നു.

നഗരത്തിലെ ഗതാഗതക്കുരുക്ക്: പോലീസ് ഏർപ്പെടുത്തിയ പരിഷ്‌കാരം ആരംഭിച്ചു

കോട്ടയം: നഗരത്തിലെ ഗതാഗതക്കുരുക്കഴിക്കാന്‍ പോലീസ് ഏര്‍പ്പെടുത്തിയ പരിഷ്‌കാരം ആരംഭിച്ചു. എന്നാല്‍, ഇന്നലെ വിദ്യാഭ്യാസ സ്ഥാപനങ്ങള്‍ക്ക് അവധിയായതിനാല്‍ തിരക്കു കുറവായിരുന്നു. അതിനാൽ, പരീക്ഷണം എത്രത്തോളം വിജയമാണെന്നറിയാന്‍ സാധിച്ചില്ല. രണ്ടോ മൂന്നോ ദിവസം കൊണ്ടേ വിജയ സാധ്യതയറിയാന്‍ സാധിക്കുകയുള്ളൂവെന്ന് പോലീസ് പറഞ്ഞു. ചാലുകുന്ന് ഭാഗത്തുനിന്നു വരുന്ന ബസുകള്‍ ശാസ്ത്രി റോഡ് വഴി നാഗമ്പടം ബസ് സ്റ്റാന്‍ഡിലേക്ക് പോകുന്ന തരത്തിലാണ് പരിഷ്‌കാരം. ബേക്കര്‍ ജംഗ്ഷനുസമീപം ആളെയിറക്കി എംസി റോഡ് വഴി സീസേഴ്‌സ് ജംഗ്ഷനിലൂടെയാണ് ബസുകള്‍ നാഗമ്പടം സ്റ്റാന്‍ഡില്‍ എത്തിയിരുന്നത്. പുതിയ പരിഷ്‌കാരപ്രകാരം കുമരകം, ചുങ്കം, ചാലുകുന്ന് ഭാഗങ്ങളിൽനിന്നു വരുന്ന ബസുകള്‍ ഇന്നലെ രാവിലെ മുതല്‍ ബേക്കര്‍ ജംഗ്ഷനിലെത്തി ശാസ്ത്രി റോഡില്‍ പ്രവേശിച്ച് അവിടെയുള്ള ബസ്‌സ്‌റ്റോപ്പിലാണ് ആളുകളെ ഇറക്കിയത്. തുടർന്ന് ബസുകള്‍ കുര്യന്‍ ഉതുപ്പ് റോഡുവഴി നാഗമ്പടം സ്റ്റാന്‍ഡിലെത്തി. കോട്ടയം വെസ്റ്റ് പോലീസ് എസ്എച്ച്ഒ, കോട്ടയം ട്രാഫിക് യൂണിറ്റ് ഹൗസ് ഓഫീസര്‍, പ്രൈവറ്റ് ബസ് ഓപ്പറേറ്റേഴ്‌സ് അസോസിയേഷന്‍ എന്നിവർ നടത്തിയ ചര്‍ച്ചയുടെ അടിസ്ഥാനത്തിലാണ് പുതിയ പരിഷ്കാരം. അഴിയാനുണ്ട് ഇനിയും കുരുക്കുകള്‍; പരിഷ്‌കാരങ്ങള്‍ വേണം സ്‌കൂള്‍കൂടി തുറന്നതോടെ നഗരത്തില്‍ പലയിടത്തും ഗതാഗതക്കുരുക്ക് രൂക്ഷമാണ്. ബേക്കര്‍ ജംഗ്ഷനിലാണ് ഗതാഗതക്കുരുക്ക് പാരമ്യത്തിലെത്തിയിരിക്കുന്നത്. നഗരത്തിലെ തിരക്കു നോക്കി ക്രമീകരണങ്ങള്‍ വരുത്തിയാല്‍ കുരുക്കിന് ഒരു പരിധിവരെ പരിഹാരമാകും. • ബേക്കര്‍ ജംഗ്ഷനു സമീപം എംസി റോഡില്‍ ശക്തി ഹോട്ടലിനു സമീപം ഡിവൈഡറുകള്‍ സ്ഥാപിച്ചിരിക്കുന്ന ഇറക്കത്തില്‍ യു ടേണ്‍ എടുക്കുന്നത് തടയുക. • ശക്തി ഹോട്ടലിനു സമീപമുള്ള റോഡില്‍കൂടി വാഹനങ്ങള്‍ കുമരകം റോഡിലേക്കു പ്രവേശിക്കുന്നത് തടയുക. • ബേക്കര്‍ ജംഗ്ഷനിലെ ട്രാഫിക് ഐലന്‍ഡില്‍ വലിയ വാഹനങ്ങള്‍ റോഡ് നിറഞ്ഞ് നിര്‍ത്തുന്നത് തടയുക. • ബേക്കര്‍ ജംഗ്ഷനിലെ ബസ്‌സ്റ്റോപ്പുകളില്‍ നിശ്ചിത സമയം കഴിഞ്ഞുള്ള ബസുകളുടെ പാര്‍ക്കിംഗ് തടയുക • പുതിയ പരിഷ്‌കാരത്തിനൊപ്പം ബേക്കര്‍ ജംഗ്ഷനില്‍ ശക്തി ഹോട്ടലിനു സമീപമുള്ള ബസ്‌ സ്റ്റോപ്പ് എംസി റോഡില്‍കൂടി ഏറ്റുമാനൂര്‍ ഭാഗത്തേക്ക് പോകുന്ന ബസുകള്‍ക്കായി ക്രമീകരിക്കുക. • ബസ്‌സ്റ്റോപ്പുകള്‍ക്ക് സമീപം നിര്‍ത്തിയിട്ട് ഓട്ടോറിക്ഷകള്‍ ഓട്ടം പിടിക്കുന്നത് തടയുക. • നാഗമ്പടത്തുനിന്നു പുറപ്പെടുന്ന ബസുകളുടെ ടൗണില്‍കൂടിയുള്ള നിരക്കല്‍ അവസാനിപ്പിക്കുക.

വികസനം കാത്ത് നാലുകോടി, പായിപ്പാട് ജംഗ്ഷനുകള്‍

ചങ്ങനാശേരി: വികസനം കാത്തുകഴിയുന്ന നാലുകോടി ജംഗ്ഷനില്‍ കനത്ത വെള്ളക്കെട്ട്. പായിപ്പാട് റോഡില്‍നിന്നും റോഡിന്‍റെ വശത്തുകൂടി ഒഴുകുന്ന വെള്ളം ജംഗ്ഷനിലെത്തുമ്പോള്‍ റോഡിന്‍റെ മധ്യത്തിലൂടെ കവിഞ്ഞ് വശത്തുള്ള ഞാലിക്കടവ് റോഡിലേക്ക് ഒഴുകുകയാണ്. വെള്ളം ഒഴുകുന്നതിന് ഡ്രെയിനേജ് സൗകര്യങ്ങളൊന്നും നാലുകോടി ജംഗ്ഷനിലില്ല. വേഗത്തിലെത്തുന്ന വാഹനങ്ങള്‍ വെള്ളക്കെട്ടിലേക്ക് പതിക്കുമ്പോള്‍ സമീപത്തെ വ്യാപാര സ്ഥാപനങ്ങളിലേക്കും പാര്‍ക്ക് ചെയ്തിരിക്കുന്ന ഓട്ടോകളിലേക്കും കാല്‍നടയാത്രക്കാരുടെ വസ്ത്രങ്ങളിലേക്കും മലിനജലം തെറിക്കുന്നത് പതിവാണ്. റോഡിലേക്ക് വന്‍തോതില്‍ വെള്ളം ഒഴുകിയെത്തി ജംഗ്ഷനില്‍ വെള്ളക്കെട്ടുണ്ടാകുന്നതായി പരാതി ഉയര്‍ന്നിട്ടും പഞ്ചായത്ത് അധികൃതരോ പൊതുമരാമത്ത് ഉദ്യോഗസ്ഥരോ വേണ്ട നടപടികള്‍ സ്വീകരിച്ചിട്ടില്ല. റോഡുകളുടെ നിര്‍മാണം നിലച്ചു; ജംഗ്ഷനുകളുടെ വികസനം മരവിച്ചു ചങ്ങനാശേരി-കവിയൂര്‍ റോഡിന്‍റെ നവീകരണത്തിന്‍റെ ഭാഗമായി നാലുകോടി, പായിപ്പാട് കവലകളുടെ വികസനം ലക്ഷ്യം വച്ചിരുന്നെങ്കിലും റോഡ് നിര്‍മാണം നിര്‍ദേശിക്കപ്പെട്ടിരുന്ന അവസ്ഥയില്‍ പൂര്‍ത്തിയാകാതിരുന്നതോടെ ജംഗ്ഷനുകളുടെ വികസനവും നിലയ്ക്കുകയായിരുന്നു. എന്‍എച്ച്-183 (എംസി റോഡ്)ല്‍ തിരുവല്ലയ്ക്കു സമീപം ആരംഭിക്കുന്ന പെരുന്തുരുത്തി-ഏറ്റുമാനൂര്‍ ബൈപാസ് കടന്നുപോകുന്ന പ്രധാന ജംഗ്ഷനുകളില്‍ ഒന്നാണ് ഗതാഗതക്കുരുക്കില്‍ നട്ടംതിരിയുന്ന നാലുകോടി ജംഗ്ഷന്‍. നൂറുകണക്കിനു വാഹനങ്ങള്‍ അനുദിനം കടന്നുപോകുന്ന ഈ ജംഗ്ഷന്‍റെ നവീകരണത്തിനായി ഇവിടുത്തെ ഒരു തണല്‍മരം നാലുവര്‍ഷം മുമ്പ് മുറിച്ചുമാറ്റിയിരുന്നു. ചങ്ങനാശേരി-കവിയൂര്‍, തിരുവല്ല-മല്ലപ്പള്ളി റോഡുകള്‍ കടന്നുപോകുന്ന ഏറെ തിരക്കുള്ള പായിപ്പാട് കവലയുടെ അവസ്ഥയും പരിതാപകരമാണ്. ഈ കവലയിലെ റോഡും പൊട്ടിപ്പൊളിഞ്ഞ നിലയിലാണ്. കവിയൂര്‍ റോഡിന്‍റെയും തിരുവല്ല-മല്ലപ്പള്ളി-നൂറോമ്മാവ് റോഡിന്‍റെയും വികസനത്തിന്‍റെ ഭാഗമായി പായിപ്പാട് കവല വികസിപ്പിക്കാനായിരുന്നു പദ്ധതി. എന്നാല്‍, രണ്ടു പദ്ധതികളും നിശ്ചലമായതോടെയാണ് പായിപ്പാട് കവലയുടെ വികസം മുരടിച്ചത്. ഇതരസംസ്ഥാന തൊഴിലാഴികള്‍ തിങ്ങിപ്പാര്‍ക്കുന്ന നാടെന്ന പേരുള്ള സ്ഥലംകൂടിയാണ് പായിപ്പാട്. ഈ രണ്ട് ജംഗ്ഷനുകളുടെയും വികസനത്തിന് സത്വര നടപടികളുണ്ടാകണമെന്ന ആവശ്യം ശക്തമാകുകയാണ്.

കുട്ടനാടിനുവേണ്ടി ശബ്ദമുയര്‍ത്താന്‍ റേഡിയോ മീഡിയ വില്ലേജ്

ചങ്ങനാശേരി: കുട്ടനാടിന്‍റെ വിവിധങ്ങളായ പ്രശ്‌നങ്ങള്‍ ജന മനഃസാക്ഷിയില്‍ എത്തിക്കുകയെന്ന ലക്ഷ്യത്തോടെ റേഡിയോ മീഡിയ വില്ലേജും ചമ്പക്കുളം ഫെറോനാ യുവദീപ്തി എസ്എംവൈഎമ്മും സംയുക്തമായി സംഘടിപ്പിക്കുന്ന "സേവ് കുട്ടനാട് ഓപ്പണ്‍ റേഡിയോ കാമ്പയിന്' മങ്കൊമ്പില്‍ തുടക്കമായി. അതിരൂപതാ വികാരി ജനറാള്‍ മോണ്‍. ആന്‍റണി എത്തയ്ക്കാട്ട് ഉദ്ഘാടനം ചെയ്തു. കുട്ടനാടിന് ലഭിച്ചിരിക്കുന്ന അനുഗ്രഹങ്ങളെ കാലാനുസൃതമായി പ്രയോജനപ്പെടുത്താന്‍ ഭരണകൂടം തയാറാകാത്തതാണ് ഇവിടത്തെ നിരവധിയായ പ്രശ്‌നങ്ങള്‍ക്ക് കാരണമെന്നും ഈ പ്രദേശത്തിന്‍റെ അന്തസും മഹിമയും ഉയര്‍ത്താന്‍ ഈ കാമ്പയിൻ വഴിതെളിക്കുമെന്നും അദ്ദേഹം പറഞ്ഞു. രാജ്യാന്തര കായല്‍കൃഷി ഗവേഷണകേന്ദ്രം ഡയറക്ടറും കൃഷി ശാസ്ത്രജ്ഞനുമായ കെ.ജി. പത്മകുമാര്‍, റിട്ട. ഡെപ്യൂട്ടി തഹസില്‍ദാര്‍ ആന്‍റണി ആറില്‍ച്ചിറ, ടൂറിസ്റ്റ് അഡ്വൈസര്‍ ജൂബി കാട്ടാമ്പള്ളി, ഇറിഗേഷന്‍ വിഭാഗം റിട്ട. അസിസ്റ്റന്‍റ് എന്‍ജിനിയര്‍ ജോസഫ് മാത്യു, കേരള ഗവ. കോണ്‍ട്രാക്ടേഴ്‌സ് അസോസിയേഷന്‍ സംസ്ഥാന പ്രസിഡന്‍റ് വര്‍ഗീസ് കണ്ണമ്പള്ളി, ആലപ്പുഴ ജില്ലാ മുന്‍ മെഡിക്കല്‍ ഓഫീസര്‍ മുരളീധരന്‍പിള്ള എന്നിവര്‍ ചര്‍ച്ചകളില്‍ പങ്കെടുത്തു. മീഡിയ വില്ലേജ് എക്‌സിക്യൂട്ടീവ് ഡയറക്ടര്‍ ഫാ. ജോഫി പുതുപ്പറമ്പ്, എസ്‌ജെസിസി പ്രിന്‍സിപ്പല്‍ ഫാ. മാത്യു മുര്യങ്കരി, ബര്‍സാര്‍ ഫാ. ലിപിന്‍ തുണ്ടുകളം, കെ.സി. ജോജോ, കെ. വിപിന്‍ രാജ്, ജയിംസ് കല്ലുപാത്ര, ജസ്റ്റിന്‍ ജോസ് എന്നിവര്‍ പ്രസംഗിച്ചു. കാമ്പയിന്‍റെ ഭാഗമായി കുട്ടനാടിന്‍റെ വിവിധ പ്രദേശങ്ങളില്‍ ഓപ്പണ്‍ റേഡിയോ പരിപാടി സംഘടിപ്പിക്കുമെന്ന് ഡയറക്ടര്‍ ഫാ. ജോഫി പുതുപ്പറമ്പ് പറഞ്ഞു.

കെസിഎസ്എല്‍ പ്രവര്‍ത്തനവര്‍ഷം ഉദ്ഘാടനം

ചങ്ങനാശേരി: കെസിഎസ്എല്‍ അതിരൂപതാതല പ്രവര്‍ത്തനവര്‍ഷാരംഭവും അനിമേറ്റേഴ്സ് സംഗമവും അവാര്‍ഡ് വിതരണവും എസ്ബി സ്‌കൂള്‍ ഓഡിറ്റോറിയത്തില്‍ നടത്തി. ആര്‍ച്ച്ബിഷപ് മാര്‍ ജോസഫ് പെരുന്തോട്ടം ഉദ്ഘാടനം ചെയ്തു. 2024-25 വര്‍ഷത്തെ മാര്‍ഗരേഖ പ്രകാശനം ചെയ്തു. മികച്ച കെസിഎസ്എല്‍ യൂണിറ്റുകള്‍ക്ക് അതിരൂപത കോര്‍പറേറ്റ് മാനേജര്‍ റവ.ഡോ. ആന്‍റണി മൂലയില്‍ അവാര്‍ഡുകള്‍ വിതരണം ചെയ്തു. എല്‍പി വിഭാഗത്തില്‍ ചങ്ങനാശേരി സെന്‍റ് ആന്‍സ്, യുപി വിഭാഗത്തില്‍ സെന്‍റ് ജോസഫ്, ഹൈസ്‌കൂള്‍ വിഭാഗത്തില്‍ കുറുമ്പനാടം സെന്‍റ് പീറ്റേഴ്‌സ്, ഹയര്‍ സെക്കന്‍ഡറി വിഭാഗത്തില്‍ എസ്ബി സ്‌കൂളുകള്‍ അവാര്‍ഡുകള്‍ നേടി. ഇന്നവേറ്റീവ് പ്രോഗ്രാമില്‍ യുപി വിഭാഗത്തില്‍ ആര്യങ്കാവ് സെന്‍റ് മേരീസും ഹൈസ്‌കൂള്‍ വിഭാഗത്തില്‍ പായിപ്പാട് സെന്‍റ് ജോസഫും അവാര്‍ഡുകള്‍ കരസ്ഥമാക്കി. അതിരൂപതാ ചെയര്‍പേഴ്‌സണ്‍ തെരേസ ബിജു സെബാസ്റ്റ്യന്‍ അധ്യക്ഷത വഹിച്ചു. സ്‌കൂള്‍ മാനേജര്‍ റവ.ഡോ. ടോണി ചെത്തിപ്പുഴ, ഹെഡ്മാസ്റ്റര്‍ വിനോദ് ബാബു, ഡയറക്ടര്‍ ഫാ. ജോജോ പള്ളിച്ചിറ, പ്രസിഡന്‍റ് റിന്‍സ് വര്‍ഗീസ്, സംസ്ഥാന ചെയര്‍പേഴ്‌സണ്‍ നേഹ മരിയ ജോസഫ്, ടിന്‍റു ആന്‍ ജയിംസ്, നോയല്‍ മാത്യു, സജിന്‍ എന്‍., സിസ്റ്റര്‍ അലീന മ്ലാവില്‍, സിസ്റ്റര്‍ സീനി, മനോജ് ചാക്കോ, ടോം ചാക്കോ, ജിജോമോന്‍ തോമസ് എന്നിവര്‍ പ്രസംഗിച്ചു.

വൈക്കത്തെ റോഡുകളിലെ വളവുകളിൽ അപകടങ്ങൾ തുടർക്കഥ

വൈക്കം: വൈക്കം-തലയോലപ്പറമ്പ്, വൈക്കം-വെച്ചൂർ, ഇടയാഴം-കല്ലറ റോഡുകളിലെ വളവുകളില്‍ അപകടം തുടര്‍ക്കഥയാകുന്നു. അപകടങ്ങളിൽ ജീവൻ പൊലിഞ്ഞിട്ടും പ്രധാന നിരത്തിലെ അപകടക്കെണിയാകുന്ന വളവുകൾ നിവര്‍ത്തുന്നതിന് നടപടിയില്ല. വാഹനഗതാഗതത്തിനും കാൽനടക്കാർക്കും ഒരുപോലെ വളവുകൾ ഭീഷണിയാകുന്നു. തലയോലപ്പറമ്പിലെ വടയാര്‍, പൊതി മേൽപ്പാലം, പൊട്ടന്‍ചിറ, ഉദയനാപുരത്തെ വല്ലകം, പുളിഞ്ചുവട്, ചാലപ്പറമ്പ്, തോട്ടകം, ഉദയനാപുരം, കൂട്ടുമ്മേല്‍, വൈക്കം-വെച്ചൂർ റോഡിലെ തോട്ടകം ഷാപ്പിനു സമീപത്തും തോട്ടകം ഗവൺമെന്‍റ് എൽപി സ്കൂളിനുംവളഞ്ഞമ്പലത്തിനു സമീപവും ഇടയാഴം - കല്ലറ റോഡിലെ വല്യാറ വളവുകളിലുമാണ് അപകടങ്ങൾ പതിവാകുന്നത്. തോട്ടകം ഇലഞ്ഞിച്ചുവട് ഭാഗത്തെ കൊടുംവളവ് നിരവധി അപകടങ്ങള്‍ക്കാണ് കാരണമാകുന്നത്. ഏതാനും വർഷങ്ങൾക്കുള്ളിൽ നിരവധി പേരാണ് ഇവിടെ അപകടത്തിൽ മരിച്ചത്. ഏഴു വർഷം മുമ്പാണ് ഇവിടെ ദമ്പതികൾ ദാരുണമായി അപകടത്തില്‍ മരിച്ചത്. മറുവശത്തുനിന്നു വരുന്ന വാഹനങ്ങൾ കാണാനാവാതെ വരുന്നതാണ്അപകടങ്ങള്‍ക്ക് ഇടയാക്കുന്നത്. വല്ലകം സബ്‌സ്റ്റേഷനു മുന്നിലെ വളവും ഗതാഗതത്തിന് വലിയ ഭീഷണിയാണ് ഉയര്‍ത്തുന്നത്. തലയോലപ്പറമ്പ് റോഡ് ആധുനികവത്കരിച്ചതിനെത്തുടര്‍ന്ന് ചാലപ്പറമ്പ് വളവിൽ റോഡരികിലെ മതില്‍ പത്തുതവണ വാഹനമിടിച്ചു തകര്‍ന്നിരുന്നു. ഇതിനുശേഷം അപകടങ്ങള്‍ കുറയ്ക്കാന്‍ ഇവിടെ സിഗ്നല്‍ ലൈറ്റ് സ്ഥാപിച്ചെങ്കിലും ഒരുതരത്തിലുമുള്ള പ്രയോജനവും ഉണ്ടാകുന്നില്ലെന്ന് നാട്ടുകാർ കുറ്റപ്പെടുത്തുന്നു. കൊടുംവളവില്‍ അമിതവേഗതയില്‍ പാഞ്ഞെത്തുന്ന വാഹനങ്ങള്‍ക്ക് ഈ മുന്നറിയിപ്പുകൾ ശ്രദ്ധിക്കാനുമാകുന്നില്ല. വൈക്കം-വെച്ചൂര്‍ റോഡിൽ വലിയാനപ്പുഴ പാലം മുതല്‍ വെച്ചൂര്‍വരെയുള്ള വീതി കുറഞ്ഞ റോഡിലെ വളവുകളിൽ നിരന്തരം അപകടങ്ങളുണ്ടാകുന്നു. വൈക്കം-വെച്ചൂര്‍ റോഡ് അന്താരാഷ്‌ട്ര നിലവാരത്തില്‍ വീതികൂട്ടി പുനര്‍നിര്‍മിക്കുമെന്ന പ്രഖ്യാപനം വന്നിട്ട് നാളേറെയായെങ്കിലും നടപടികള്‍ ഇഴഞ്ഞുനീങ്ങുകയാണ്. റോഡ് വീതികൂട്ടി വളവുകള്‍ നിവർത്തി ഗതാഗതം സുരക്ഷിതമാക്കണമെന്നു നാട്ടുകാർ ആവശ്യപ്പെട്ടു.

കാറ്റിൽ വീടിന്‍റെ ഷീറ്റ്മേൽക്കൂര 30 മീറ്റർ അകലേക്ക് പറന്നുപോയി

വൈക്കം: ശക്തമായ കാറ്റിൽ വീടിനു മുകളിൽ ട്രസ് വർക്ക് ചെയ്തിരുന്ന ഷീറ്റും മേൽക്കൂരയും പറന്നുപോയി. മുപ്പത് മീറ്ററകലെ സമീപവാസികളുടെ വളപ്പിലെ മരങ്ങളിൽ തങ്ങിനിന്നതിനാൽ താഴെ വീഴാതെ ആളപായം ഒഴിവായി. ഇന്നലെ രാവിലെപത്തിന് വൈക്കം നഗരസഭ ഒന്നാം വാർഡിൽ ഉദയനാപുരം ക്ഷേത്രത്തിന് സമീപമായിരുന്നു സംഭവം. ബ്ലൂനെയിലിൽ അല്ലിയുടെ വീടിന്‍റെ മുകളിൽ സ്ഥാപിച്ചിരുന്ന ഷീറ്റിട്ട 450 സ്ക്വയർ ഫീറ്റോളം വരുന്ന മേൽക്കൂരയാണ് 30 മീറ്റർ ദൂരത്തിൽ പറന്നുപോയത്.സമീപവാസികളായ ഹരിചന്ദനത്തിൽ ഹരിദാസ്, പ്ലാത്തോട്ടത്തിൽ ശശി എന്നിവരുടെ പുരയിടത്തിലെ തെങ്ങിലും മാവിലുമായി തങ്ങിനിന്നതിനാൽ താഴെക്ക് പതിയാതെ വലിയ അപകടം ഒഴിവാകുകയായിരുന്നു. വൈക്കം ഫയർ സ്റ്റേഷൻ അസിസ്റ്റന്‍റ് സ്റ്റേഷൻ ഓഫീസർ അഖിൽ രാജ്, സീനിയർ ഫയർ ആൻഡ് റെസ്ക്യു ഓഫീസർ സാജു, വി.ആർ. ബിജു, ഗോകുൽ ജി., കെ. ശ്രീജിത്ത്, കൃഷ്ണകുമാർ, വിജിലേഷ് എന്നിവരുടെ നേതൃത്വത്തിൽ അഗ്നിരക്ഷാസേന എത്തി തെങ്ങിന് മുകളിൽ വടം കെട്ടി കപ്പിയും കയറും ഉപയോഗിച്ച് മണിക്കൂറുകൾകൊണ്ടാണ് മേൽക്കൂര സുരക്ഷിതമായി താഴെയിറക്കിയത്. അഗ്നിരക്ഷാസേനയെ സഹായിക്കാനായി വാർഡ് കൗൺസിലർ എൻ. അയ്യപ്പന്‍റെ നേതൃത്വത്തിൽ നാട്ടുകാരുമെത്തിയിരുന്നു. മേൽക്കൂര പറന്നുപോയതോടെ പെയ്ത്തുവെള്ളം അല്ലിയുടെ വീടിനുള്ളിൽ നിറഞ്ഞു. പിന്നീട് പടുത വലിച്ചുകെട്ടിയാണ് വീടിനുള്ളിൽ വെള്ളം വീഴാതെ സംരക്ഷിച്ചത്. മുറിയിലുണ്ടായിരുന്ന കട്ടിൽ, ബെഡ് എന്നിവയ്ക്കും നാശം സംഭവിച്ചു.

കന്തീശങ്ങളുടെ തിരുനാളും ഇരട്ടകളുടെ മഹാസംഗമവും

കടുത്തുരുത്തി: തീര്‍ഥാടന കേന്ദ്രമായ കോതനല്ലൂര്‍ ഫൊറോനാ പള്ളിയില്‍ കന്തീശങ്ങളുടെ തിരുനാളും ഇരട്ടകളുടെ മഹാസംഗമവും 18, 19 തീയതികളില്‍ നടക്കും. ഇരട്ടകളുടെ സംഗമവും സമര്‍പ്പണ ശുശ്രൂഷയും 19 ന് നടക്കുമെന്ന് പള്ളിയധികൃതര്‍ പത്രസമ്മേളനത്തില്‍ അറിയിച്ചു. ഇന്നു രാവിലെ 6.30നും വൈകുന്നേരം അഞ്ചിനും വിശുദ്ധ കുര്‍ബാന. നാളെ രാവിലെ 6.15ന് കന്തീശങ്ങളുടെ തിരുസ്വരൂപങ്ങള്‍ മോണ്ടളത്തില്‍ പ്രതിഷ്ഠിക്കും. തുടര്‍ന്ന് 6.30നും പത്തിനും പാട്ടുകുര്‍ബാന. വൈകുന്നേരം അഞ്ചിന് പാട്ടുകുര്‍ബാന, സന്ദേശം, നൊവേന-ഫാ. ബിജു ഇളമ്പാശേരില്‍ സിഎംഎഫ്, 6.30ന് പ്രദക്ഷിണം. പ്രധാന തിരുനാള്‍ ദിനമായ 19ന് രാവിലെ 5.45ന് വിശുദ്ധ കുര്‍ബാന, ഏഴിന് പാട്ടുകുര്‍ബാന, നൊവേന. 8.30 ന് ഇരട്ടകളുടെ രജിസ്‌ട്രേഷന്‍ ആരംഭിക്കും. 9.30ന് സമൂഹബലി. ഇരട്ടവൈദികരായ ഫാ. റോയി കണ്ണഞ്ചിറ സിഎംഐ, ഫാ. റോബി കണ്ണഞ്ചിറ സിഎംഐ, ഫാ. റോജി മനയ്ക്കപ്പറമ്പില്‍ സിഎംഐ, ഫാ. റെജി മനയ്ക്കപ്പറമ്പില്‍ സിഎംഐ, ഫാ. ആന്‍റോ പേഴുംകാട്ടില്‍, ഫാ. അജോ പേഴുംകാട്ടില്‍, ഫാ.ജസ്റ്റിന്‍ തയ്യില്‍ ഒഎസ്ബി, ഫാ. ജിസ്റ്റോ തയ്യില്‍ ഒഎസ്ബി, ഫാ. ഡെയ്‌ന വടക്കേമുറിയില്‍ എന്നിവര്‍ കാര്‍മികത്വം വഹിക്കും. 11.15 ന് തിരുനാള്‍ പ്രദക്ഷിണം ആരംഭിക്കും. 12.15 ന് ഇരട്ടകളുടെ സമര്‍പ്പണ ശുശൂഷ - ബിഷപ് മാര്‍ ജോസഫ് കല്ലറങ്ങാട്ട് നിര്‍വഹിക്കും. തുടര്‍ന്ന് സ്‌നേഹവിരുന്ന്, വൈകുന്നേരം അഞ്ചിന് പാട്ടുകുര്‍ബാന, തുടര്‍ന്ന് കന്തീശങ്ങളുടെ തിരുസ്വരൂപങ്ങള്‍ പുനഃപ്രതിഷ്ഠിക്കും. തിരുനാള്‍ തിരുക്കര്‍മങ്ങളെക്കുറിച്ചു വിശദീകരിക്കുന്നതിനായി നടന്ന വാര്‍ത്താസമ്മേളനത്തില്‍ വികാരി ഫാ. സെബാസ്റ്റ്യന്‍ പടിയ്ക്കക്കുഴുപ്പില്‍, കൈക്കാരന്മാരായ ബേബി എടാട്ടേല്‍, പൊന്നി പുളിങ്ങാപ്പള്ളില്‍, ജോസഫ് പാളിയില്‍, ജോര്‍ജ് പട്ടമന എന്നിവര്‍ പങ്കെടുത്തു.

പ്രവർത്തനം നിലച്ച ശുചിമുറിസമുച്ചയം നശിക്കുന്നു

വൈക്കം: വൈക്കം ദളവാക്കുളം ബസ് ടെർമിനലിന്‍റെ സമീപത്തെ പ്രവർത്തനം നിലച്ച കംഫർട്ട് സ്റ്റേഷൻ കെട്ടിടം നാശത്തിന്‍റെ വക്കിൽ. ദളവാക്കുളം ബസ് ടെർമിനലിനു കിഴക്കുഭാഗത്ത് കോട്ടയം ജില്ലാ ടൂറിസം പ്രമോഷൻ കൗൺസിലിന്‍റെ ആഭിമുഖ്യത്തിൽ ലക്ഷങ്ങൾ ചെലവഴിച്ചു നിർമിച്ച കംഫർട്ട് സ്റ്റേഷൻ കെട്ടിടമാണ് ഏതാനും വർഷങ്ങളായി പ്രവർത്തനം നിലച്ചതോടെ കിടന്ന് നശിക്കുന്നത്. മഹാദേവ ക്ഷേത്രത്തിലെത്തുന്നവർക്കും നഗരത്തിലെത്തുന്നവർക്കും പ്രാഥമികാവശ്യം നിർവഹിക്കാൻ കംഫർട്ട് സ്റ്റേഷൻ വേണമെന്ന നിരന്തരാവശ്യത്തെത്തുടർന്നാണ് വിനോദസഞ്ചാര വകുപ്പിന്‍റെ ധനസഹായത്തോടെ ശുചിമുറി സമുച്ചയം നിർമിച്ചത്. ദളവാക്കുളം ബസ് ടെർമിനലിനുള്ളിൽ ടേക്ക് എ ബ്രേക്ക് പദ്ധതിയിൽ ഉൾപ്പെടുത്തി പുതിയ കംഫർട്ട് സ്റ്റേഷൻ പണിത് പ്രവർത്തനം ആരംഭിച്ചു. ദളവാക്കുളം ബസ് ടെർമിനലിനു കിഴക്കുഭാഗത്ത് നഗരസഭയുടെ സ്ഥലത്ത് ജില്ലാ ടൂറിസം പ്രമോഷൻ കൗൺസിൽ ലക്ഷങ്ങൾ വിനിയോഗിച്ചു പണിത കംഫർട്ട് സ്റ്റേഷന്‍റെ പ്രവർത്തനം പുനരാരംഭിക്കുന്നതിന് അധികൃതർ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

റോഡില്‍ കളിവള്ളമിറക്കി പ്രതിഷേധിച്ചു

പെരുവ: വര്‍ഷങ്ങളായി സഞ്ചാരയോഗ്യമല്ലാത്ത രീതിയില്‍ താറുമാറായിക്കിടക്കുന്ന വെള്ളൂര്‍ റെയില്‍വേ സ്റ്റേഷന്‍ ചെക്ക്പോസ്റ്റ് റോഡ് ഗതാഗതയോഗ്യമാക്കണമെന്നാവശ്യപ്പെട്ട് റോഡില്‍ കളിവള്ളമിറക്കി പ്രതിഷേധിച്ചു. അപകടകരമായ കുഴികളും വെള്ളക്കെട്ടുംമൂലം നൂറുകണക്കിനാളുകള്‍ യാത്ര ചെയ്യുന്ന റോഡ് ദുരിതമായി മാറിയിരിക്കുകയാണ്. റോഡ് അടിയന്തരമായി സഞ്ചാരയോഗ്യമാക്കണമെന്ന ആവശ്യവുമായി വെള്ളൂര്‍ ഹോളി ഫാമിലി പള്ളി കെസിസി യൂണിറ്റിന്‍റെ നേതൃത്വത്തിലാണ് വ്യത്യസ്തമായ സമരം സംഘടിപ്പിച്ചത്. പള്ളിയിലെ മറ്റു സംഘടനകളുടെയും അംഗങ്ങള്‍ സമരത്തില്‍ പങ്കെടുത്തു. റോഡില്‍ കളിവള്ളങ്ങള്‍ ഇറക്കിയും ചെടികള്‍ നട്ടുമാണ് പ്രതിഷേധമറിയിച്ചത്. കെസിസി യൂണിറ്റ് പ്രസിഡന്‍റ് സാലസ് കുറ്റിയാംകോണത്തും ഭാരവാഹികളും സമരപരിപാടിക്കു നേതൃത്വം നല്‍കി. ഫാ. സ്റ്റീഫന്‍ കുളക്കാട്ടുകുടി പ്രതിഷേധ പരിപാടി ഉദ്ഘാടനം ചെയ്തു. എംപി ഫണ്ടില്‍നിന്ന് റോഡ് നിര്‍മാണത്തിനാവശ്യമായ തുക നേരത്തേ അനുവദിച്ചിട്ടുള്ളതും റെയില്‍വേ കരാറുകാരനെ പണികള്‍ ഏല്‍പ്പിച്ചിട്ടുള്ളതുമാണ്. ഏറെക്കാലമായിട്ടും റോഡിന്‍റെ പണികള്‍ നടക്കുന്നില്ല. മഴക്കാലമായതോടെ റോഡിലെ‍ വെള്ളക്കെട്ട് കാല്‍നട യാത്രപോലും പറ്റാത്ത വിധത്തിലാക്കിയിരിക്കു കയാണ്. ഇരുചക്ര വാഹനയാത്രികർ വെള്ളക്കെട്ടില്‍ വീണ് പരിക്കേല്‍ക്കുന്നതും പതിവായി. റോഡ് നന്നാക്കാന്‍ റെയില്‍വേയുടെയും പഞ്ചായത്തിന്‍റെയും മറ്റ് അധികാരികളുടെയും ഭാഗത്തുനിന്നും അടിയന്തര നടപടിയുണ്ടാകണമെന്ന് പ്രതിഷേധക്കാര്‍ ആവശ്യപ്പെട്ടു.

പൂവന്തുരുത്ത് ലക്ഷംവീട് കുടിവെള്ള പദ്ധതി ഉദ്ഘാടനം ചെയ്തു

പൂവന്തുരുത്ത്: രൂക്ഷമായ കുടിവെള്ളക്ഷാമം അനുഭവിച്ചിരുന്ന പൂവന്തുരുത്ത് ലക്ഷം വീട് ഭാഗത്തെ ജനങ്ങള്‍ക്ക് ആശ്വാസമായി പൂവന്തുരുത്ത് ലക്ഷംവീട് കുടിവെള്ള പദ്ധതി. പള്ളം ബ്ലോക്ക് പഞ്ചായത്ത് 2022-23 വാര്‍ഷിക പദ്ധതിയില്‍ ഉള്‍പ്പെടുത്തി കുഴിമറ്റം ഡിവിഷനില്‍ പനച്ചിക്കാട് പഞ്ചായത്ത് 21-ാം വാര്‍ഡിലാണ് കുടിവെള്ള പദ്ധതി ആരംഭിച്ചത്. പദ്ധതിയിലൂടെ 20 കുടുംബങ്ങള്‍ക്കും കോളനിയില്‍ പ്രവര്‍ത്തിക്കുന്ന അങ്കണവാടിക്കുമാണ് കുടിവെള്ളം ലഭ്യമാകുന്നത്. ഡിവിഷന്‍ ഫണ്ടില്‍നിന്ന് 7,75,000 രൂപ കോട്ടയം ഭൂജലവകുപ്പില്‍ നിക്ഷേപിച്ചാണ് പദ്ധതി നടപ്പാക്കിയത്. പള്ളം ബ്ലോക്ക് പഞ്ചായത്ത് പ്രസിഡന്‍റ് പ്രഫ. ടോമിച്ചന്‍ ജോസഫ് പൂവന്തുരുത്ത് ലക്ഷംവീട് മൈതാനിയില്‍ പദ്ധതി ഉദ്ഘാടനം ചെയ്തു. ഡിവിഷന്‍ മെംബറും ബ്ലോക്ക് പഞ്ചായത്ത് വൈസ് പ്രസിഡന്‍റുമായ രജനി അനില്‍ അധ്യക്ഷത വഹിച്ചു. ക്ഷേമകാര്യ സ്ഥിരം സമിതി അധ്യക്ഷന്‍ സിബി ജോണ്‍ കൈതയില്‍, പഞ്ചായത്തംഗങ്ങളായ വാസന്തി സലിം, മഞ്ജു രാജേഷ്, രാഷ്‌ട്രീയപ്പാര്‍ട്ടി പ്രതിനിധികളായ ഷാജി ഉതുപ്പാന്‍, പി.കെ. കൃഷ്ണന്‍, ജെയ് പി. പോള്‍, പദ്ധതി സമിതി സെക്രട്ടറി ബിജു ജോണ്‍ എന്നിവര്‍ പങ്കെടുത്തു.

അപകടാവസ്ഥയിലുള്ള മരങ്ങള്‍ കണ്ടെത്തി വെട്ടിമാറ്റണം: തിരുവഞ്ചൂർ

കോട്ടയം: പൊതുസ്ഥലങ്ങളില്‍ മനുഷ്യരുടെ ജീവനും സ്വത്തിനും ഭീഷണി ഉയര്‍ത്തുന്ന മരങ്ങള്‍ കണ്ടെത്തി വെട്ടിമാറ്റാന്‍ നടപടിയെടുക്കാത്തതിനാല്‍ ജനങ്ങള്‍ ഭയാശങ്കയിലാണ് കഴിയുന്നതെന്ന് തിരുവഞ്ചൂര്‍ രാധാകൃഷ്ണന്‍ എംഎല്‍എ. മരണത്തില്‍നിന്ന് ജനങ്ങളെ രക്ഷിക്കുന്നതിനു പകരം മരണത്തിന്‍റെ വ്യാപാരികളായി സര്‍ക്കാര്‍ മാറിയിരിക്കുകയാണ്. കാലവര്‍ഷത്തിനു മുന്നോടിയായി ചെയ്യേണ്ട നടപടികളില്‍ വലിയ വീഴ്ചയാണ് ഇത്തവണ ഉണ്ടായിട്ടുള്ളത്. മണ്‍സൂണിന് മുന്‍പ് നടത്തേണ്ടിയിരുന്ന മഴക്കാല പൂര്‍വകാല ശുചീകരണം ഇത്തവണ ഫലപ്രദമായി നടന്നിട്ടില്ലെന്നും തിരുവഞ്ചൂര്‍ ചൂണ്ടിക്കാട്ടി. പൊതുസ്ഥലങ്ങളിലെ വേരുറപ്പില്ലാത്ത വലിയ മരങ്ങള്‍ വെട്ടിമാറ്റുക മാത്രമാണു പോംവഴി. സോഷ്യല്‍ ഫോറസ്ട്രി വകുപ്പ് ഇത്തരം മരങ്ങളുടെ കണക്കെടുപ്പ് നടത്തണം. കഴിഞ്ഞദിവസമുണ്ടായ കാറ്റിലും മഴയിലും മരങ്ങള്‍ റോഡിലേക്ക് മറിഞ്ഞുവീണു വലിയ നാശനഷ്ടമാണ് ഉണ്ടായത്. പൊതുസ്ഥലങ്ങളിലെ അപകടാവസ്ഥയിലുള്ള മരങ്ങള്‍ കണ്ടെത്താനോ നടപടിയെടുക്കാനോ ഫലപ്രദമായ ഇടപെടല്‍ ഉണ്ടായിട്ടില്ല. മഴയും കാറ്റും കനത്തതോടെ എല്ലായിടത്തും ജനങ്ങള്‍ ഭയപ്പാടിലാണ് കഴിയുന്നത്. ദുരന്തനിവാരണ സമിതി ഇത്തരം സാഹചര്യങ്ങളില്‍ അടിയന്തര നടപടികള്‍ക്ക് തയാറാകണം. ജില്ലാ വികസനസമിതി ഇക്കാര്യങ്ങളില്‍ നടപടി എടുക്കണമെന്ന് ആവശ്യപ്പെട്ടിരുന്നതാണ്. ജനങ്ങളുടെ ജീവനും സ്വത്തിനും സംരക്ഷണം നല്‍കേണ്ട ഉത്തരവാദിത്വം സര്‍ക്കാര്‍ നിറവേറ്റണമെന്ന് തിരുവഞ്ചൂര്‍ പത്രസമ്മേളനത്തില്‍ ആവശ്യപ്പെട്ടു. ഇത്തരം സാഹചര്യങ്ങളില്‍ നാശനഷ്ടം ഉണ്ടാകുന്ന കുടുംബങ്ങള്‍ക്ക് അടിയന്തരമായി മതിയായ നഷ്ടപരിഹാരം നല്‍കണം. പ്രളയരഹിത കോട്ടയം എന്ന് പരസ്യമായി അവകാശവാദം ഉന്നയിച്ചവര്‍ അത് നടപ്പാക്കിക്കാണിക്കുകയാണ് വേണ്ടത്. മലയോരമേഖലയില്‍ ഉയരുന്ന ഏറ്റവും വലിയ ആവശ്യം വന്യജീവികളില്‍നിന്നും മനുഷ്യജീവന് സംരക്ഷണം നല്‍കണമെന്നതാണ്. എന്നാല്‍ ഇവിടെയും മനുഷ്യരെ വിധിക്ക് വിട്ടുകൊടുത്ത് മരണത്തിന്‍റെ വ്യാപാരികളായി സര്‍ക്കാര്‍ മാറിയെന്ന് തിരുവഞ്ചൂര്‍ ചൂണ്ടിക്കാട്ടി. യുഡിഎഫ് ജില്ലാ കണ്‍വീനര്‍ ഫില്‍സണ്‍ മാത്യൂസ്, എം.പി. സന്തോഷ്‌കുമാര്‍, ജയചന്ദ്രന്‍ ചിറോത്ത് എന്നിവരും പത്രസമ്മേളനത്തില്‍ പങ്കെടുത്തു.

സെൻട്രൽ ജംഗ്ഷനിൽ ഭാരവാഹനം കുടുങ്ങി

ചങ്ങനാശേരി: ഭാരവാഹനം നഗരമധ്യത്തിൽ കുടുങ്ങി. തിരുവനന്തപുരം ഭാഗത്തേക്ക് പോയ സ്വകാര്യ കമ്പനിയുടെ കൂറ്റൻ ലോറിയാണ് സെൻട്രൽ ജംഗ്ഷനിൽ കുടുങ്ങിയത്. സ്റ്റേഷനിൽനിന്ന് കൂടുതൽ പോലീസ് എത്തിയാണ് ഗതാഗത തടസം പരിഹരിച്ചത്. കമ്പനിയിൽനിന്ന് ആളുകളെത്തി തകരാർ പരിഹരിച്ചാണ് ലോറി കൊണ്ടുപോയത്. ഭാരവാഹനങ്ങളെ ചങ്ങനാശേരി ബൈപാസിലൂടെ പോലീസ് തിരിച്ചു വിടാത്തത് നഗരത്തിൽ ഗതാഗതക്കുരുക്കിന് ഇടയാക്കുന്നുണ്ട്.

വീട് നിര്‍മിച്ചു നല്‍കി കേരള കോണ്‍ഗ്രസിന്‍റെ വ്യത്യസ്ത സമരം

ചങ്ങനാശേരി: കുറിച്ചി പഞ്ചായത്ത് എണ്ണയ്ക്കാച്ചിറയിലെ വീടുകളുടെ അറ്റകുറ്റപ്പണി നടത്താന്‍ ഫണ്ട് അനുവദിക്കാത്തതിലും പട്ടയം നല്‍കാത്തതിലും പ്രതിഷേധിച്ച് വീട് ഇടിഞ്ഞുവീഴാറായ ഒരു കുടുംബത്തിനു വീട് നിര്‍മിച്ചു നല്‍കി കേരള കോണ്‍ഗ്രസിന്‍റെ വ്യത്യസ്ത സമര പരിപാടി. ഇതിനായി കേരള കോണ്‍ഗ്രസ് സംസ്ഥാന സ്റ്റിയറിംഗ് കമ്മിറ്റി അംഗം ഡോ. ജോബിന്‍ എസ്. കൊട്ടാരം കണ്‍വീനറായി ഭവന നിര്‍മാണ കമ്മിറ്റി രൂപീകരിച്ചു. കെ.എഫ്. വര്‍ഗീസ് സമ്മേളനം ഉദ്ഘാടനം ചെയ്തു. സി.ഡി. വത്സപ്പന്‍, വി.ജെ. ലാലി, ജിക്കു കുര്യാക്കോസ്, റോയി ചാണ്ടി, ജോസഫ് ആന്‍റണി, സണ്ണി മക്കൊള്ളില്‍, ഷാജി പാറത്താഴെ, ബിജോയ് എണ്ണക്കാച്ചിറ, തങ്കച്ചന്‍ കല്ലുതറ എന്നിവര്‍ പ്രസംഗിച്ചു.

യുജി, പിജി വിദ്യാര്‍ഥിനികള്‍ക്ക് അസംപ്ഷനില്‍ ബിരുദദാനം

ചങ്ങനാശേരി: അസംപ്ഷന്‍ ഓട്ടോണമസ് കോളജില്‍ വിവിധ യുജി, പിജി കോഴ്‌സുകള്‍ പാസായ വിദ്യാര്‍ഥിനികള്‍ക്ക് ബിരുദദാനം നടത്തി. ഹയര്‍ എഡ്യൂക്കേഷന്‍ പ്രിന്‍സിപ്പല്‍ സെക്രട്ടറി ഡോ. ശര്‍മിള മേരി ജോസഫ് ഉദ്ഘാടനം നിര്‍വഹിച്ചു. ജീവിതവിജയം നേടാന്‍ കഠിന പരിശ്രമങ്ങള്‍ക്കൊപ്പം മൂല്യാധിഷ്ഠിത വിദ്യാഭ്യാസവും അനിവാര്യമാണെന്ന് ഡോ. ശര്‍മിള പറഞ്ഞു. കോളജ് ഇന്‍ഡോര്‍ സ്റ്റേഡിയത്തില്‍ നടന്ന സമ്മേളനത്തില്‍ കോളജ് മാനേജര്‍ മോണ്‍. ആന്‍റണി എത്തയ്ക്കാട്ട് അധ്യക്ഷത വഹിച്ചു. വിദ്യാഭ്യാസത്തിലൂടെ വെല്ലുവിളികളെ അതിജീവിക്കാനും പ്രതിസന്ധികളെ തരണം ചെയ്യാനുമുള്ള കഴിവ് നേടണമെന്ന് വികാരി ജനറാള്‍ പറഞ്ഞു. പൂര്‍വവിദ്യാര്‍ഥിനിയും 2024 ലെ സിവില്‍ സര്‍വീസ് 569-ാം റാങ്ക് ജേതാവുമായ വി. ഹേമയെ സമ്മേളനത്തില്‍ ആദരിച്ചു. ജോബ് മൈക്കിള്‍ എംഎല്‍എ മുഖ്യാതിഥിയായിരുന്നു. കോളജ് പ്രന്‍സിപ്പല്‍ ഡോ. റാണി മരിയ തോമസ്, വൈസ് പ്രിന്‍സിപ്പല്‍ ഡോ. ജിസി മാത്യു, വിദ്യാര്‍ഥി പ്രതിനിധി ഷൈന്‍ മരിയ ഷാജി എന്നിവര്‍ പ്രസംഗിച്ചു.

മെഡിക്കല്‍ ക്യാമ്പ് ന‌ടത്തി

കുറിച്ചി: പഞ്ചായത്തും കുറിച്ചി ഗവണ്‍മെന്‍റ് ആയുഷ് ആയുര്‍വേദ ആശുപത്രിയും കല്ലട ഐ കെയര്‍ ഹോസ്പിറ്റലും ചങ്ങനാശേരി ശങ്കേഴ്സ് ലബോറട്ടറിയും ചേര്‍ന്ന് പഞ്ചായത്തിലെ 12-ാം വാര്‍ഡില്‍ സൗജന്യ മെഡിക്കല്‍ ക്യാമ്പ് സംഘടിപ്പിച്ചു. പഞ്ചായത്ത് പ്രസിഡന്‍റ് സുജാത സുശീലന്‍ ഉദ്ഘാടനം ചെയ്തു. ആരോഗ്യ വിദ്യാഭ്യാസ സ്ഥിരം സമിതി അധ്യക്ഷ കൊച്ചുറാണി ജോസഫ് അധ്യക്ഷയായി. പഞ്ചായത്തംഗം ബിജു എസ്. മേനോന്‍, ഇത്തിത്താനം ഹയര്‍ സെക്കന്‍ഡറി സ്‌കൂള്‍ പ്രിന്‍സിപ്പല്‍ വി.ജെ. വിജയകുമാര്‍, കല്ലട ഐ കെയര്‍ ഹോസ്പിറ്റല്‍ സിഇഒ കെ.കെ. അലക്സാണ്ടര്‍, ആശാ വര്‍ക്കര്‍ കുഞ്ഞുമോള്‍ ജോസഫ് എന്നിവര്‍ പങ്കെടുത്തു.

മാത്യൂസ് ജോര്‍ജ് വാഴപ്പള്ളി സഹകരണ ബാങ്ക് പ്രസിഡന്‍റ്

ചങ്ങനാശേരി: ജില്ലയിലെ ഏക സൂപ്പര്‍ സ്‌പെഷല്‍ ഗ്രേഡ് ബാങ്കായ വാഴപ്പള്ളി സര്‍വീസ് സഹകരണ ബാങ്ക് പ്രസിഡന്‍റായി ചങ്ങനാശേരി മുനിസിപ്പല്‍ വൈസ് ചെയര്‍മാന്‍കൂടിയായ മാത്യൂസ് ജോര്‍ജ് തെരഞ്ഞെടുക്കപ്പെട്ടു. കഴിഞ്ഞ കാല്‍ നൂറ്റാണ്ട് കാലമായി പാറേല്‍ പള്ളി വാര്‍ഡിനെ നഗരസഭയില്‍ പ്രതിനിധീകരിക്കുന്ന ഇദ്ദേഹം ജനാധിപത്യ കേരള കോണ്‍ഗ്രസ് കോട്ടയം ജില്ലാ പ്രസിഡന്‍റാണ്. ചങ്ങനാശേരി അര്‍ബന്‍ കോ ഓപ്പറേറ്റീവ് ബാങ്ക് മുന്‍ പ്രസിഡന്‍റായിരുന്നു.

പിതൃദിനത്തില്‍ പ്രഫ. തോമസ് കണയംപ്ലാവന് ആദരവ്

തൃക്കൊടിത്താനം: മാതൃ-പിതൃവേദി തൃക്കൊടിത്താനം ഫൊറോനാ സമിതിയുടെ നേതൃത്വത്തില്‍ ലോക പിതൃദിനം ആഘോഷിച്ചു. എഴുത്തുകാരനും ഗാനരചയിതാവും മുന്‍ എസ്ബി കോളജ് അധ്യാപകനുമായ പ്രഫ. തോമസ് കണയംപ്ലാവനെ ഡയറക്ടര്‍ ഫാ. ചെറിയാന്‍ കക്കുഴി പൊന്നാടയണിയിച്ചു. പിതൃവേദി ഫൊറോന പ്രസിഡന്‍റ് സിബി മുക്കാടന്‍ അധ്യക്ഷത വഹിച്ചു. സിസ്റ്റര്‍ ലിന്‍സിയ സിഎംസി, മാതൃവേദി പ്രസിഡന്‍റ് ജോളി തോമസ്, രാജു ആന്‍റണി, ജോഷി കൊല്ലാപുരം, മോളി ലൂയിസ്, ജോസഫ് തോമസ്, ലാലി ഇളപ്പുങ്കല്‍, റിറ്റി മനോഷ്, ബിന്നി ജോജി എന്നിവര്‍ പ്രസംഗിച്ചു.

മെറിറ്റ് അവാര്‍ഡ് വിതരണം

ചങ്ങനാശേരി: മോര്‍ക്കുളങ്ങര പബ്ലിക് സ്‌കൂളില്‍ പിടിഎ ജനറല്‍ബോഡി മീറ്റിംഗും മെറിറ്റ് അവാര്‍ഡ് ദാനവും നടത്തി. പ്രൊവിന്‍ഷ്യല്‍ കൗണ്‍സിലര്‍ സിസ്റ്റര്‍ ദീപ തോട്ടുകടവില്‍ എസ്എബിഎസ് ഉദ്ഘാടനം നിര്‍വഹിച്ചു. ക്ലിനിക്കല്‍ സൈക്കോളജിസ്റ്റ് ഡോ. ശ്രീജിത്ത് നായര്‍ ക്ലാസ് നയിച്ചു. പിടിഎ പ്രസിഡന്‍റ് സാജന്‍ ജോയി അധ്യക്ഷത വഹിച്ചു. പ്രിന്‍സിപ്പൽ സിസ്റ്റര്‍ ടിന്‍സി വാഴക്കാട് മുഖ്യപ്രഭാഷണം നടത്തി. റോബിന്‍ ജോര്‍ജ്, സോളി മാത്യു, ഐറിന്‍ മരിയ ജോസ്, ആര്‍. രാജേന്ദ്രന്‍, അഞ്ജു മാത്യു തുടങ്ങിയവര്‍ പ്രസംഗിച്ചു.

ഇത്തിത്താനം ആശാഭവന്‍ സ്‌പെഷല്‍ സ്‌കൂളില്‍ പ്രവേശനോത്സവം

ഇത്തിത്താനം: ചങ്ങനാശേരി അതിരൂപതയുടെ നേതൃത്വത്തിലു ള്ള ഇത്തിത്താനം ആശാഭവന്‍ സ്‌പെഷല്‍ സ്‌കൂളില്‍ 2025-26 വര്‍ഷത്തെ പ്രവേശനോത്സവം വികാരി ജനറാള്‍ മോണ്‍. മാത്യു ചങ്ങങ്കരി ഉദ്ഘാടനം ചെയ്തു. ഭിന്നശേഷിക്കാരായ കുട്ടികള്‍ക്ക് സഹതാപമല്ല, സമൂഹത്തിന്‍റെ അംഗീകാരമാണ് ആവശ്യമെന്നും അവരോട് കാരുണ്യപൂര്‍വമായ സമീപനമാണ് ഉണ്ടാകേണ്ടതെന്നും അദ്ദേഹം പറഞ്ഞു. ഡയറക്ടര്‍ ഫാ. സോണി മുണ്ടുനടയ്ക്കല്‍ അധ്യക്ഷത വഹിച്ചു. അതിരൂപത പ്രൊക്യുറേറ്റര്‍ ഫാ. ജയിംസ് മാളേക്കല്‍ മുഖ്യപ്രഭാഷണം നടത്തി. പിഎഐഡി സംസ്ഥാന പ്രസിഡന്‍റ് ജോര്‍ജ് മാത്യു, സിസ്റ്റര്‍ ജൂലിയറ്റ്, ജോസി, പിടിഎ പ്രസിഡന്‍റ് ജിജി കാലായില്‍, സെക്രട്ടറി ലൗലി ജോസഫ്, ട്രഷറര്‍ സീമ, ലിസി, ശാന്തി എന്നിവര്‍ പ്രസംഗിച്ചു.

നീറ്റ് പരീക്ഷ സംസ്ഥാനത്ത് അഞ്ചാം റാങ്ക് നേടി ചെൽസി എസ്. തെരേസ

മുണ്ടക്കയം: നീറ്റ് പരീക്ഷയിൽ സംസ്ഥാനത്ത് അഞ്ചാം റാങ്കും അഖിലേന്ത്യാതലത്തിൽ 290ാം റാങ്കും നേടി മലയോര നാടിന് അഭിമാനമായി മാറിയിരിക്കുകയാണ് പാലൂർക്കാവ് സ്വദേശിനിയായ വിദ്യാർഥിനി. പാലൂർക്കാവ് വടക്കേനിരപ്പേൽ സണ്ണി - ബീന ദമ്പതികളുടെ മകളായ ചെൽസി എസ്. തെരേസയാണ് മിന്നുന്ന വിജയം കരസ്ഥമാക്കിയത്. കർഷക കുടുംബത്തിൽ ജനിച്ച ചെൽസി ഒന്നു മുതൽ ഏഴു വരെ മുണ്ടക്കയം സെന്‍റ് ജോസഫ് സെൻട്രൽ സ്കൂളിലും പിന്നീട് പ്ലസ് ടു വരെ പെരുവന്താനം സെന്‍റ് ജോസഫ് ഹയർ സെക്കൻഡറി സ്കൂളിലുമാണ് പഠിച്ചത്. എസ്എസ്എൽസി, പ്ലസ്ടു പരീക്ഷകളിൽ എല്ലാ വിഷയങ്ങൾക്കും എ പ്ലസ് കരസ്ഥമാക്കിയാണ് ഈ മിടുക്കി നീറ്റ് പരീക്ഷയിലും മിന്നുന്ന വിജയം നേടിയത്. പാലാ ബ്രില്യന്‍റിലാണ് നീറ്റ് പരിശീലനം നേടിയത്. ചെൽസിയുടെ പിതാവ് കർഷകനാണ്. മാതാവ് പെരുവന്താനം സെന്‍റ് ജോസഫ് സ്കൂളിലെ അധ്യാപികയാണ്. ഏഴിലും ഒമ്പതിലും പഠിക്കുന്ന രണ്ട് സഹോദരിമാരെ കൂടാതെ പ്ലസ് ടു പരീക്ഷയിൽ എല്ലാ വിഷയങ്ങൾക്കും ഫുൾ എ പ്ലസ് കരസ്ഥമാക്കി തുടർ പഠനത്തിനായി ശ്രമിക്കുന്ന മറ്റൊരു സഹോദരിയുമാണ് ചെൽസിക്കുള്ളത്. വീട്ടുകാരുടെയും അധ്യാപകരുടെയും അകമഴിഞ്ഞ പിന്തുണയാണ് വിജയത്തിനു പിന്നിലെന്ന് ചെൽസി പറഞ്ഞു. എയിംസിൽ തുടർപഠനം നടത്തുവാനുള്ള ശ്രമത്തിലാണ് ചെൽസി.

കായല്‍യാത്രയില്‍ സര്‍ക്കാര്‍ ബോട്ടുകള്‍ കോരിയെടുത്തത് ലക്ഷങ്ങള്‍

കോട്ടയം: കായല്‍ യാത്രയില്‍ സര്‍ക്കാര്‍ ബോട്ടുകള്‍ കോരിയെടുത്തത് ലക്ഷങ്ങള്‍. യാത്രാപ്രേമികള്‍ ഏറെ ഇഷ്ടപ്പെടുന്ന കോട്ടയം-ആലപ്പുഴ കായല്‍ യാത്രയിലാണ് സര്‍ക്കാര്‍ ബോട്ടുകള്‍ ലാഭം കൊയ്തത്. അവധിക്കാലമായ ഏപ്രില്‍, മേയ് മാസത്തില്‍ ടിക്കറ്റിനത്തില്‍ അഞ്ചര ലക്ഷം രൂപയുടെ വരുമാനമാണ് കോട്ടയം കോടിമത സ്റ്റേഷനില്‍നിന്നും ജലഗതാഗത വകുപ്പിന് ലഭിച്ചത്. ഏപ്രിലില്‍ രണ്ടര ലക്ഷവും മേയില്‍ മൂന്നു ലക്ഷവും ലഭിച്ചു. കഴിഞ്ഞ വര്‍ഷത്തേക്കാള്‍ മികച്ച വര്‍ധനയാണിത്. പ്രകൃതിഭംഗി ആസ്വദിച്ച് വേഗത്തില്‍ കോട്ടയത്തുനിന്നും ആലപ്പുഴയില്‍ എത്താന്‍ ചെലവുകുറഞ്ഞൊരു യാത്രയാണിത്. 29 രൂപയാണ് ടിക്കറ്റ് നിരക്ക്. മുന്‍ വര്‍ഷങ്ങളില്‍ നിന്നും വ്യത്യസ്തമായി ഇത്തവണ കായല്‍യാത്ര ആസ്വദിക്കാന്‍ എത്തിയവരുടെ എണ്ണത്തിലും വലിയ വര്‍ധനയുണ്ടായി. വിദേശികളെ അപേക്ഷിച്ച് സ്വദേശികളാണ് ഇത്തവണ കൂടുതലും എത്തിയത്. വടക്കന്‍ ജില്ലകളില്‍ നിന്നുള്ളവരാണ് കൂടുതല്‍. രണ്ടുമാസത്തില്‍ 40,000 യാത്രക്കാരെത്തിയതാണ് ജലഗതാഗത വകുപ്പിന്‍റെ കണക്ക്. കോടിമതയില്‍നിന്ന് രണ്ടും ആലപ്പുഴയില്‍നിന്ന് ഒരു ബോട്ടുമാണ് സര്‍വീസ് നടത്തുന്നത്. രണ്ടു മണിക്കൂര്‍ നീളുന്ന യാത്ര പുതിയൊരു അനുഭവമാണ് സഞ്ചാരികള്‍ക്ക് സമ്മാനിക്കുന്നത്. കോടിമതയില്‍നിന്ന് പുറപ്പെട്ട് കൊടൂരാറ്റിലൂടെ കാഞ്ഞിരം, വെട്ടിക്കാട്,- പുത്തന്‍തോട്, പള്ളിക്കായല്‍,- ആര്‍ ബ്ലോക്ക്,- പുന്നമട- വഴി ആലപ്പുഴ ബോട്ട് ജെട്ടിയിലെത്തും. കോട്ടയത്തുനിന്ന് രാവിലെ 6.45, 11.30, ഒന്ന്, ഉച്ചകഴിഞ്ഞ് 3.30, വൈകുന്നേരം 5.15 എന്നീ സമയത്താണ് സര്‍വീസ്. ആലപ്പുഴയില്‍നിന്ന് രാവിലെ 7.15, 9.35, 11.30, ഉച്ചകഴിഞ്ഞ് 2.30, വൈകുന്നേരം 5.15 എന്നീ സമയങ്ങളിലാണ് മടക്ക ബോട്ട്. കായല്‍ യാത്രയിലൂടെ ലക്ഷങ്ങള്‍ വരുമാനം നേടിയെങ്കിലും സര്‍വീസിനായി ഇപ്പോഴും പഴയ ബോട്ടുകളാണ് ഉപയോഗിക്കുന്നത്. സോളാര്‍ സംവിധാനത്തില്‍ പ്രവര്‍ത്തിക്കുന്ന പുതിയ ബോട്ടുകള്‍ യാത്രയ്ക്കായി ഉപയോഗിക്കണമെന്ന ആവശ്യവും ശക്തമായി.

പ്രളയദുരിതം പേറി വീണ്ടും ദുരിതാശ്വാസ ക്യാമ്പുകളിലേക്ക്

കോട്ടയം: മഴക്കാലം കോട്ടയം നഗരപ്രാന്തത്തിലും കുട്ടനാട്ടിലും താമസിക്കുന്ന ഒട്ടേറെപ്പേര്‍ക്ക് ദുരിതകാലമാണ്. ഒരു മാസത്തിനുള്ളില്‍ ഇത് രണ്ടാം തവണയാണ് ദുരിതം നിറഞ്ഞ ക്യാമ്പുകളിലേക്ക് പോകാന്‍ ഇവര്‍ നിര്‍ബന്ധിതരാകുന്നത്. കൂലിവേലക്കാരും ചെറുകിടക്കാരുമാണ് വെള്ളക്കെടുതിയുടെ ഇരകളായി ദുരിതാശ്വാസ ക്യാമ്പുകളില്‍ എത്തുന്നത്. വീട്ടിലുള്ള വിലപിടിച്ച സാധനകളും പാത്രങ്ങളും വെള്ളം കയറാത്തയിടങ്ങളില്‍ സൂക്ഷിച്ചശേഷമാണ് വരവ്. ഇലക്‌ട്രോണിക് സാധനങ്ങള്‍ നനയാതെ സംരക്ഷിക്കുക ഏറെ ക്ലേശകരമാണ്. വളര്‍ത്തുമൃഗങ്ങളെ പരിപാലിക്കുന്നവര്‍ക്കാണ് ഏറ്റവും ദുരിതം. തൊഴുത്തുകളില്‍ വെള്ളം കയറുന്നവര്‍ കാലികളെ ഉയര്‍ന്ന പ്രദേശങ്ങളില്‍ ടാര്‍പോളിന്‍ കെട്ടി പാര്‍പ്പിക്കുകയാണ്. വെള്ളക്കെട്ട് രൂപംകൊണ്ടതോടെ ആടിനും പശുവിനും തീറ്റ ശേഖരിക്കുക ഏറെ ദുഷ്‌കരമായിരിക്കുന്നു. നായ, പൂച്ച, കോഴി എന്നിവയെ പരിപാലിക്കുന്നതും ഏറെ ദുരിതപൂര്‍ണം. ക്യാമ്പുകളില്‍ കഴിയുന്നതേറെയും കൂലിപ്പണിക്കാരായതിനാല്‍ പല കുടുംബങ്ങളും സാമ്പത്തിക ക്ലേശത്തിലാണ്. ക്യാമ്പുകളില്‍ പൊതുവായി തയാറാക്കുന്ന ഭക്ഷണമാണ് ഇവര്‍ക്ക് ഏക ആശ്രയം. കൊച്ചുകുട്ടികളും കിടപ്പുരോഗികളുമാണ് ക്യാമ്പുകളില്‍ ഏറ്റവും ദുരിതപ്പെടുന്നത്. ക്യാമ്പുകളില്‍നിന്ന് സ്‌കൂളുകളില്‍ പോകുന്ന കുട്ടികളുമുണ്ട്.

കര്‍ഷക രജിസ്‌ട്രേഷൻ: വെബ്സൈറ്റ് ഓപ്പണായി; സ്വന്തമായോ അക്ഷയ വഴിയോ ചെയ്യാം

കോട്ടയം: കര്‍ഷക രജിസ്‌ട്രേഷനായി ദിവസങ്ങള്‍ കൃഷി ഭവനുകളില്‍ കാത്തുനിന്നിട്ടും കഴിയാത്തവര്‍ക്ക് ആശ്വാസമായി. ഇനിമുതല്‍ കര്‍ഷക രജിസ്ട്രേഷന്‍ ഫാര്‍മര്‍ ലോഗിന്‍ വഴി സ്വന്തമായോ അക്ഷയ സെന്‍ററുകള്‍, കോമണ്‍ സര്‍വീസ് സെന്‍ററുകള്‍ എന്നിവ വഴിയോ ചെയ്യുന്നതിന് വെബ്സൈറ്റ് ഓപ്പണായി. ഇതുവരെ കര്‍ഷക രജിസ്‌ട്രേഷന്‍ ചെയ്യാന്‍ സാധിച്ചിരുന്നതു കൃഷിഭവനുകള്‍വഴി മാത്രമായിരുന്നു. അതിനാൽ രജിസ്‌ട്രേഷന്‍ നടത്തുന്നതിനു കൃഷിഭവനുകളില്‍ നീണ്ട ക്യൂവായിരുന്നു. ഇതോടെ കൃഷിഭവനുകളിലെ ദൈനംദിന ജോലികള്‍ നടക്കുന്നില്ലെന്ന് പരാതിയും വ്യാപകമായിരുന്നു. ദീര്‍ഘനേരം ക്യൂവില്‍ നിന്നശേഷം രജിസ്‌ട്രേഷന്‍ നടത്താന്‍ സാധിക്കാതെ പലര്‍ക്കും മടങ്ങേണ്ട അവസ്ഥയുമായിരുന്നു. ഒടിപി ലഭിക്കാന്‍ ബുദ്ധിമുട്ടുന്നതിനാല്‍ ഏറെനേരം കൃഷിഭവനുകളില്‍ കാത്തുനില്ക്കുന്നതും പതിവു കാഴ്ചയായിരുന്നു. സ്വന്തമായി രജിസ്റ്റര്‍ ചെയ്യാമെന്നതോടെ കൃഷിക്കാര്‍ക്ക് ഏറെ സൗകര്യമായി. കര്‍ഷകര്‍ക്ക് കേന്ദ്ര-സംസ്ഥാന സര്‍ക്കാരുകളുടെ സേവനങ്ങള്‍ ലഭ്യമാക്കാന്‍ രജിസ്ട്രേഷന്‍ നടത്തണം. കര്‍ഷകരുടെ വിവരങ്ങളും കൃഷിയുമായി ബന്ധപ്പെട്ട സേവനങ്ങളും ഏകീകരിക്കാനാണ് അഗ്രി സ്റ്റാക്ക് ഡിജിറ്റല്‍ പ്ലാറ്റ്‌ഫോം തയാറാക്കിയിരിക്കുന്നത്. പിഎം കിസാന്‍ സമ്മാന്‍നിധി പദ്ധതിപ്രകാരം അനുവദിക്കുന്ന തുകയുള്‍പ്പെടെയുള്ള ആനുകൂല്യങ്ങള്‍ ലഭ്യമാകണമെങ്കിലും രജിസ്ട്രേഷന്‍ വേണം. ഇതില്‍ത്തന്നെ പിഎം കിസാന്‍ പദ്ധതിയിലുള്‍പ്പെട്ടവര്‍ ആദ്യം രജിസ്ട്രേഷന്‍ പൂര്‍ത്തിയാക്കണമെന്ന നിര്‍ദേശമാണുള്ളത്. പ്രധാന്‍മന്ത്രി ഫസല്‍ ബീമാ യോജന, അഗ്രിക്കള്‍ച്ചര്‍ ഇന്‍ഷ്വറന്‍സ്, പ്രധാനമന്ത്രി കൃഷി സിഞ്ചായി യോജന തുടങ്ങി കൃഷിസംബന്ധമായ കേന്ദ്ര-സംസ്ഥാന സര്‍ക്കാര്‍ ആനുകൂല്യങ്ങള്‍ക്കും സേവനങ്ങള്‍ക്കുമെല്ലാം കര്‍ഷക രജിസ്ട്രേഷന്‍ ആവശ്യമാണ്. രജിസ്‌ട്രേഷന്‍ നടത്താനുള്ള അവസാന തീയതി ജൂലൈ 31 ആണ്. കര്‍ഷക രജിസ്‌ട്രേഷന്‍ എന്തിന്? കേന്ദ്ര സര്‍ക്കാരിന്‍റെ ഡിജിറ്റല്‍ അഗ്രികള്‍ച്ചര്‍ മിഷനു കീഴില്‍ നടപ്പിലാക്കുന്ന പദ്ധതിയാണ് അഗ്രിസ്റ്റാക് കര്‍ഷക രജിസ്‌ട്രേഷന്‍. കൃഷിക്കാര്‍ ഇത്തരത്തില്‍ രജിസ്റ്റര്‍ ചെയ്യുമ്പോള്‍ ആധാര്‍ കാര്‍ഡിനു സമാനമായ രീതിയില്‍ 21 അംഗ കര്‍ഷക ഐഡി ലഭിക്കും. ഈ ഐഡി കാര്‍ഡ് വഴി ഡിജിറ്റല്‍ സേവനങ്ങള്‍ കര്‍ഷകരിലേക്ക് എത്തിക്കാനാണു പദ്ധതിയിലൂടെ ലക്ഷ്യമിടുന്നത്. രജിസ്‌ട്രേഷന്‍ നടത്താന്‍... രജിസ്ട്രേഷനായി www.agritack.gov.in kerala എന്ന പോര്‍ട്ടല്‍ തുറക്കുക. പോര്‍ട്ടലില്‍ കര്‍ഷകന്‍ എന്ന ലിങ്കില്‍ പുതിയ അക്കൗണ്ട് തുറക്കണം. ഇതിനായി ആധാര്‍നമ്പരും ആധാറില്‍ ലിങ്ക് ചെയ്തിരിക്കുന്ന ഫോണ്‍നമ്പരും നല്‍കണം. ഈ സമയം നമ്മുടെ ആധാര്‍ ലിങ്ക് ചെയ്തിരിക്കുന്ന ഫോണിലേക്ക് ഒടിപി ലഭിക്കും. ഈ ഒടിപി നല്‍കി സബ്മിറ്റ് ചെയ്യണം. തുടര്‍ന്നു താഴെയായി ഫോണ്‍നമ്പര്‍ കൊടുക്കാനുള്ള സ്ഥലത്ത് ഫോണ്‍ നമ്പര്‍ ടൈപ്പ് ചെയ്ത് നല്കണം. അപ്പോഴും ഫോണിലേക്ക് ഒടിപി വരും. ഇതും നല്‍കണം. പിന്നീട് താഴെയായി പാസ് വേര്‍ഡ് സെറ്റ് ചെയ്യാനുള്ള ഓപ്ഷന്‍ വരും. അവിടെ പാസ്‌വേർഡ് സെറ്റ് ചെയ്യണം. തുടര്‍ന്ന് വീണ്ടും ലോഗിന്‍ പേജിലേക്ക് പോയി ഫാര്‍മര്‍ ഓപ്ഷന്‍ സെലക്ട് ചെയ്യണം. യൂസര്‍ ഐഡിയായി ഫോണ്‍ നമ്പര്‍ നല്കണം. പാസ്‌വേര്‍ഡ് നേരത്തേ സെറ്റ് ചെയ്യണം. തുടര്‍ന്ന് ക്യാപ്ച്ച കൊടുത്ത് ലോഗിന്‍ ചെയ്യാം. തുടര്‍ന്ന് താഴെ Register as farmer എന്നതില്‍ ക്ലിക്ക് ചെയ്യണം. അപ്പോള്‍ കാണിക്കുന്ന Mobile Number Change Confirmation എന്നതില്‍ No എന്ന് കൊടുക്കുക. തൊട്ട് താഴെ Land ownership details ല്‍ owner എന്ന് സെലക്ട് ചെയ്യണം. തുടര്‍ന്ന് വരുന്ന Occupation details ല്‍ Agriculture Land owing farmer എന്നത് രണ്ടും സെലക്ട് ചെയ്യണം. പിന്നീട് താഴെ Land details ല്‍ Fetch Land details ക്ലിക്ക് ചെയ്യണം. District, Sub district, Village എന്നിവ സെലക്ട് ചെയ്തു നല്‍കിയശേഷം കരം കെട്ടിയ രസീതില്‍ കാണിച്ചിരിക്കുന്ന ബ്ലോക്ക് നമ്പരും സര്‍വേ നമ്പറും നല്‍കി (സബ് സര്‍വേ നമ്പര്‍ കൊടുക്കണ്ട) സബ്മിറ്റ് ചെയ്യണം. ഈ സമയം കാണിക്കുന്ന Select owner identifier number എന്നതില്‍ കരം ഒടുക്കിയ രസീതില്‍ കാണിച്ചിരിക്കുന്ന ഭൂഉടമയുടെ പേരും വിവരങ്ങളും കാണിക്കും. അത് കൃത്യമാണോയെന്ന് പരിശോധിച്ചു സബ്മിറ്റ് ചെയ്യണം. തുടര്‍ന്ന് verifie all lands കൊടുക്കുക. ശേഷം Approving എന്നിടത്ത് Agriculture Revanue എന്നിടത്ത് Revanue എന്ന് സെലക്ട് ചെയ്യണം. ഇവിടെ ഒരു കാരണവശാലും Agriculture സെലക്ട് ചെയ്യരുത്. തുടര്‍ന്ന് proceed to e- Sign നല്കണം. അപ്പോള്‍ കാണുന്ന വിന്‍ഡോയില്‍ ചെക്ക്‌ബോക്‌സ് ടിക്ക് ചെയ്ത് താഴെ ആധാര്‍ നമ്പര്‍ കൊടുത്ത് Send otp കൊടുക്കുക. ഫോണിലേക്ക് വരുന്ന otp നല്‍കി സബ്മിറ്റ് കൊടുത്ത് രജിസ്‌ട്രേഷന്‍ പൂര്‍ത്തിയാകും.

ത്രിതല പഞ്ചായത്ത് തെരഞ്ഞെടുപ്പിന് ഇനി അഞ്ചു മാസം

കോട്ടയം: ത്രിതല പഞ്ചായത്ത് തെരഞ്ഞെടുപ്പിന് ഇനി അവേശഷിക്കുന്നത് അഞ്ചു മാസം. നവംബര്‍ 15നും ഡിസംബര്‍ 15നും ഇടയില്‍ തെരഞ്ഞെടുപ്പ് നടക്കുമെന്നാണ് സൂചന. പഞ്ചായത്തുകളിലെയും നഗരസഭകളിലെയും വാര്‍ഡ് വിഭജനം പൂര്‍ത്തിയായി. ഈ മാസാവസാനത്തോടെ ബ്ലോക്ക്, ജില്ലാ പഞ്ചായത്തുകളുടെ വിഭജനവും പൂര്‍ത്തിയാകും. തുടര്‍ന്ന് അന്തിമ വോട്ടര്‍പട്ടിക പ്രസിദ്ധീകരിക്കും. പുതിയ ഭരണസമിതി അധികാരമേല്‍ക്കുന്നതുവരെ നിലവിലെ ഭരണസമിതിക്ക് കാലാവധിയുണ്ടെങ്കിലും പഞ്ചായത്തുകളില്‍ അവസാനത്തെ ഗ്രാമസഭയും ഗുണഭോക്തൃലിസ്റ്റ് രൂപീകരണവും നടന്നുവരികയാണ്. തെരഞ്ഞെടുപ്പ് വിജ്ഞാപനം വരുന്നതുവരെ പ്രോജക്ടുകളും കരാറുകളും മറ്റും സമര്‍പ്പിക്കാമെങ്കിലും ത്രിതല പഞ്ചായത്ത് നഗരസഭകളില്‍ ഭരണത്തിന്‍റെ അവസാനവട്ടം തകൃതിയായി നടക്കുകയാണ്. ത്രിതല പഞ്ചായത്ത് തെരഞ്ഞെടുപ്പിനുള്ള മുന്നൊരുക്കങ്ങള്‍ മുന്നണികളും പാര്‍ട്ടികളും ആരംഭിച്ചു. എല്‍ഡിഎഫും യുഡിഎഫും ബിജെപിയും വിപുലമായ ഒരുക്കങ്ങളാണ് ബൂത്ത്തലം മുതല്‍ ആരംഭിച്ചിരിക്കുന്നത്. പഞ്ചായത്തുകളില്‍ ഭരണപക്ഷം വികസന നേട്ടങ്ങളുമായി ജനങ്ങള്‍ക്കിടയിലേക്ക് ഇറങ്ങിയപ്പോള്‍ നാട്ടിലെ ചെറിയ പ്രശ്‌നങ്ങളില്‍ വരെ ഇടപെട്ടാണു പ്രതിപക്ഷവും വിവിധ പാര്‍ട്ടികളും സമരങ്ങളും ജനകീയ ഇടപെടലും നടത്തുന്നത്. സ്ഥാനാര്‍ഥിത്വം പ്രതീക്ഷിച്ചിരിക്കുന്ന മൂന്നു മുന്നണികളിലെയും പ്രാദേശിക നേതാക്കളും സജീവമായി പൊതുരംഗത്തുണ്ട്. പഞ്ചായത്തുകളിലും നഗരസഭകളിലും വാര്‍ഡുകള്‍ കൂടി ജില്ലാ പഞ്ചായത്തില്‍ ഒരു ഡിവിഷന്‍ കൂടും കോട്ടയം: പുതുക്കിയ വാര്‍ഡുവിഭജനപ്രകാരം പഞ്ചായത്തുകളില്‍ വാര്‍ഡുകള്‍ കൂടി. നഗരസഭകളിലും വാര്‍ഡുകളുടെ എണ്ണം കൂടിയിട്ടുണ്ട്. എന്നാല്‍ പുതിയ പഞ്ചായത്തുകളോ ബ്ലോക്കുകളോ ഇല്ല. നഗരസഭകളും ഇല്ല. കാഞ്ഞിരപ്പള്ളി നഗരസഭയാകുമെന്ന് പ്രതീക്ഷിച്ചിരുന്നെങ്കിലും വിഭജനത്തില്‍ ഉണ്ടായിട്ടില്ല. ജില്ലാ പഞ്ചായത്തില്‍ പുനര്‍ വിഭജനപ്രകാരം ഒരു ഡിവിഷന്‍ വര്‍ധിക്കും. നിലവില്‍ ജനസംഖ്യ കൂടുതലുള്ള പൂഞ്ഞാര്‍, മുണ്ടക്കയം, എരുമേലി, കാഞ്ഞിരപ്പള്ളി ഡിവിഷനുകളുടെ മധ്യത്തില്‍ ഒരു ഡിവിഷന്‍ അധികമായി വരുമെന്നാണു കരുതുന്നത്. പാറത്തോട്, ആനക്കല്ല് എന്നീ പേരുകളിലൊന്നായിരിക്കും പുതിയ ഡിവിഷന്‍. ഇതല്ലെങ്കില്‍ വൈക്കം മുതല്‍ കാഞ്ഞിരപ്പള്ളി വരെ ബ്ലോക്ക് പഞ്ചായത്ത് ഡിവിഷനുകള്‍ പുനര്‍നിര്‍ണയിച്ച് പുതിയ ഡിവിഷന്‍ രൂപീകരിക്കും. ആദ്യ വിഭജനത്തിനാണ് സാധ്യതയേറെ. നിലവിലെ ബലാബലം കോട്ടയം: ജില്ലാ പഞ്ചായത്തിലും ബ്ലോക്ക് പഞ്ചായത്തില്‍ 11ല്‍ 10 ഇടത്തും 71 പഞ്ചായത്തുകളില്‍ 50 ഇടത്തും ഇടതു മുന്നണിയാണ് അധികാരത്തില്‍. നഗരഭരണത്തില്‍ യുഡിഎഫിനായിരുന്നു മുന്‍ തൂക്കം. പാലാ, ചങ്ങനാശേരി നഗരസഭകളൊഴികെ നാലു നഗരസഭകളും യുഡിഎഫാണ് ഭരിക്കുന്നത്. ചങ്ങനാശേരി നഗരസഭാ ഭരണം ഒരു വര്‍ഷം മുമ്പാണ് എല്‍ഡിഎഫ് നേടിയത്. പള്ളിക്കത്തോട്, മുത്തോലി പഞ്ചായത്തുകള്‍ ബിജെപിയാണ് ഭരിക്കുന്നത്. ബിജെപി കഴിഞ്ഞ തവണ കൂടുതല്‍ വാര്‍ഡുകള്‍ നേടിയിരുന്നു. ജനറല്‍ വാര്‍ഡുകള്‍ വനിതയാകും ജില്ലാ പഞ്ചായത്ത് പ്രസിഡന്‍റ് സ്ഥാനം ജനറലോ, സംവരണമോ ആകും കോട്ടയം: നിലവിലെ ജനറല്‍ വാര്‍ഡുകള്‍ വനിതാ വാര്‍ഡുകളായും വനിതാ വാര്‍ഡുകള്‍ ജനറൽ വാര്‍ഡുകളായും മാറും. ഇതോടെ നിലവിലെ മെംബര്‍മാരില്‍ വീണ്ടും മത്സരിക്കുന്നവര്‍ പുതിയ വാര്‍ഡുകള്‍ നോട്ടമിട്ട് പ്രവര്‍ത്തനങ്ങള്‍ തുടങ്ങി. ജില്ലാ പഞ്ചായത്ത് പ്രസിഡന്‍റ് സ്ഥാനം ഇത്തവണ ജനറലായിരിക്കും. ആറാമത്തെ ഭരണസമിതിയാണ് ജില്ലാ പഞ്ചായത്തില്‍ ഇനി എത്തുന്നത്. അതിനാല്‍ ഇത്തവണ ജനറല്‍ 80 ശതമാനവും സംവരണം 20 ശതമാനവും സാധ്യതയുണ്ട്. നഗരസഭകളില്‍ പാലാ നഗരസഭാ ചെയര്‍മാന്‍ സ്ഥാനം വനിതാ സംവരണമാകുമ്പോള്‍ മറ്റ് അഞ്ച് നഗരസഭകളിലും ജനറലായിരിക്കും ചെയര്‍മാന്‍ സ്ഥാനം. ഇതില്‍ ഏതെങ്കിലും ഒരു നഗരസഭയില്‍ ചെയര്‍മാന്‍ സ്ഥാനം സംവരണം ആകാനും സാധ്യതയുണ്ട്. ബ്ലോക്ക് പഞ്ചായത്തിലും നിലവിലെ ജനറല്‍ വനിതയായും വനിതാസംവരണം ജനറലായും മാറും. ഇവിടെയും ഒരു ബ്ലോക്ക് പ്രസിഡന്‍റ് സ്ഥാനം സംവരണം ആകും. തെരഞ്ഞെടുപ്പു വിജ്ഞാപനം വരുന്നതിനു മുമ്പ് നറുക്കെടുപ്പിലൂടെയാണ് ഇത് തീരുമാനിക്കുന്നത്. ജില്ലാ പഞ്ചായത്ത് ആകെ ഡിവിഷന്‍-22 എല്‍ഡിഎഫ്-14 യുഡിഎഫ്-ഏഴ് ബിജെപി-ഒന്ന് എല്‍ഡിഎഫ് (സിപിഎം-ആറ്, കേരള കോണ്‍-എം-അഞ്ച്, സിപിഐ-മൂന്ന്) യുഡിഎഫ് (കോണ്‍ഗ്രസ്-അഞ്ച്, കേരള കോണ്‍ഗ്രസ്-രണ്ട്) ബ്ലോക്ക് ആകെ-11 എല്‍ഡിഎഫ്-10 യുഡിഎഫ്-ഒന്ന് മുനിസിപ്പാലിറ്റി ആകെ-ആറ് എല്‍ഡിഎഫ്-രണ്ട് യുഡിഎഫ്-നാല് പഞ്ചായത്ത് ആകെ-71 എല്‍ഡിഎഫ്-50 യുഡിഎഫ്-19 ബിജെപി-രണ്ട്

കൗതുകമുണര്‍ത്തി കുട്ടി ബാന്‍ഡ് തെരേസിയന്‍ ബീറ്റ്‌സ്

ഭരണങ്ങാനം: കൊച്ചുകുട്ടികള്‍ ബാന്‍ഡ് യൂണിഫോമില്‍ അണിനിരന്നപ്പോള്‍ കണ്ടുനിന്നവര്‍ക്ക് കൗതുകം. ഡ്രം, ബ്യൂഗിള്‍ എന്നിവയൊക്കെ വളരെ മനോഹരമായി അടുക്കുംചിട്ടയുമോടെ ഹൃദ്യമായി അവതരിപ്പിച്ച കൊച്ചുകുട്ടികള്‍ ഏവരുടെയും കൈയടി നേടി. ഭരണങ്ങാനം സെന്‍റ് ലിറ്റില്‍ ത്രേസ്യാസ് എല്‍പി സ്‌കൂളില്‍ പുതുതായി ആരംഭിച്ച സ്‌കൂള്‍ ബാന്‍ഡ് തെരേസിയന്‍ ബീറ്റ്‌സാണ് ഹൃദ്യമായത്. ഏഴ് ആണ്‍കുട്ടികളും ഇരുപത് പെണ്‍കുട്ടികളും ബാന്‍ഡിലെ അംഗങ്ങളാണ്. ബാന്‍ഡ് മാസ്റ്റര്‍ ഹെലോയിസ് കെ. കുര്യാക്കോസിന്‍റെ നേതൃത്വത്തിലായിരുന്നു പരിശീലനം നേടിയത്. പ്രവേശനോത്സവത്തോടനുബന്ധിച്ച് നടത്തപ്പെട്ട തെരേസിയന്‍ ബീറ്റ്‌സ് പ്രദര്‍ശനം സ്‌കൂള്‍ മാനേജര്‍ ഫാ. സക്കറിയാസ് ആട്ടപ്പാട്ട് ഉദ്ഘാടനം ചെയ്തു.

പാലാ ടൗണ്‍ ബസ് സ്റ്റാന്‍ഡ് നവീകരണം ആരംഭിച്ചു

പാലാ: ടൗണ്‍ ബസ് സ്റ്റാന്‍ഡിന്‍റെ പുനരുദ്ധാരണ പ്രവൃത്തികള്‍ ആരംഭിച്ചു. ടാറിംഗ് തകർന്ന് കുഴിയായ ഭാഗങ്ങളില്‍ പേവിംഗ് ടൈല്‍ വിരിക്കുന്ന ജോലികളാണ് ഇപ്പോള്‍ നടത്തുന്നത്. സ്റ്റാന്‍ഡിൽ പൊന്‍കുന്നം ഭാഗത്തേക്കുള്ള ബസുകള്‍ നിര്‍ത്തുന്ന ഭാഗം പൂർണമായും തകര്‍ന്ന അവസ്ഥയിലായിരുന്നു. വലിയ കുഴികള്‍ ഇവിടെ രൂപപ്പെട്ടിരുന്നു. കനത്ത മഴയില്‍ കുഴികളില്‍ ചെളിവെള്ളം നിറയുന്നത് യാത്രക്കാര്‍ക്ക് ബുദ്ധിമുട്ട് സൃഷ്ടിച്ചിരുന്നു. ബസുകള്‍ കടന്നുപോകുമ്പോള്‍ കുഴികളില്‍നിന്ന് മിറ്റലുകള്‍ തെറിച്ച് യാത്രക്കാര്‍ക്ക് പരിക്കേറ്റ സംഭവവും ഉണ്ടായിട്ടുണ്ട്. ബസുകള്‍ സ്റ്റാന്‍ഡില്‍നിന്ന് പുറത്തേക്കിറങ്ങുന്ന ഭാഗത്തും പേവിംഗ് ടൈലുകള്‍ വിരിക്കുന്നുണ്ട്. യാത്രക്കാരുടെ നിരന്തര പരാതിയെത്തുടര്‍ന്ന് നഗരസഭാ ചെയര്‍മാന്‍ തോമസ് പീറ്ററും വൈസ്‌ ചെയര്‍പേഴ്‌സണ്‍ ബിജി ജോജോയും മുന്‍കൈയെടുത്തതോടെയാണ് ബസ് സ്റ്റാന്‍ഡ് നവീകരണം ആരംഭിച്ചത്. അഞ്ചര ലക്ഷത്തോളം രൂപയാണ് അനുവദിച്ചിരിക്കുന്നത്. മുനിസിപ്പല്‍ എൻജിനിയര്‍ക്കാണ് നിര്‍മാണച്ചുമതല.

ഇളപ്പുങ്കൽ-കാരക്കാട് നടപ്പാലം നിർമാണം ഇഴയുന്നു

ഈരാറ്റുപേട്ട: പ്രളയത്തിൽ തകർന്ന ഇളപ്പുങ്കൽ-കാരക്കാട് നടപ്പാലത്തിന്‍റെ നിർമാണം ഇഴയുന്നു. 2021ലെ പ്രളയത്തിലാണ് പാലം ഒലിച്ചുപോയത്. എംഎൽഎ ഫണ്ടിൽനിന്ന് 21 ലക്ഷം രൂപ അനുവദിച്ചിട്ടു രണ്ടു വർഷം കഴിഞ്ഞിട്ടും പാലംപണി എങ്ങുമെത്തിയില്ല. ഈ അധ്യയന വർഷമെങ്കിലും പാലം വരുമെന്ന് കരുതിയെങ്കിലും ജനങ്ങൾ വിഡ്ഢികളായി. മുപ്പതു വർഷം മുൻപ് ജില്ലാ പഞ്ചായത്ത് ഫണ്ട് ഉപയോഗിച്ചാണ് ഇവിടെ നടപ്പാലം നിർമിച്ചത്. ഇവിടം തലപ്പലം പഞ്ചായത്തിന്‍റെ ആസ്തിയിൽ ഉൾപ്പെട്ടതായിരുന്നു. പാലത്തിന്‍റെ മറുവശം ഈരാറ്റുപേട്ട നഗരസഭയിലും സ്വകാര്യ വ്യക്തിയുടെ ഭൂമിയിലുമായിരുന്നു അവസാനിച്ചിരുന്നത്. ഇതോടെ നിയമപ്രശ്നങ്ങൾ തുടങ്ങി പാലംപണി വൈകുകയായിരുന്നു. പഴയ പാലത്തിന്‍റെ തൂണുകളിൽ ആവശ്യമായ ബലപ്പെടുത്തൽ വരുത്തി ഇരുമ്പ് ഗർഡറുകൾ ഉപയോഗിച്ചാണ് നടപ്പാലം പണിയുന്നത്. ഇവ നിർമിച്ച് കൊണ്ടുവന്ന് തുണുകളിൽ ഘടിപ്പിക്കുകയാണ് ചെയ്യുന്നത്. ഉടൻ തന്നെ പാലം നിർമാണം പൂർത്തീകരിക്കുമെന്ന് സെബാസ്റ്റ്യൻ കുളത്തുങ്കൽ എംഎൽഎ പറഞ്ഞു.

ലഹരിവ്യാപനം തടയുന്നതിൽ തദ്ദേശ സ്ഥാപനങ്ങള്‍ക്ക് നിര്‍ണായക പങ്ക്: ജോസ് കെ. മാണി എംപി

പൂവരണി: ജനങ്ങളുടെ ആരോഗ്യ സംരക്ഷണത്തിനും ലഹരിവസ്തുക്കളുടെ വ്യാപനം തടയുന്നതിനും തദ്ദേശ സ്വയംഭരണ സ്ഥാപനങ്ങള്‍ക്ക് നിര്‍ണായക പങ്കാണു വഹിക്കാനുള്ളതെന്ന് ജോസ് കെ. മാണി എംപി. ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ അനുവദിച്ച ഫണ്ട് ഉപയോഗിച്ച് പൂവരണി പള്ളിക്ക് സമീപം റോഡ് സൈഡില്‍ നിര്‍മിച്ച ഓപ്പണ്‍ ജിം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മദ്യ-മയക്കുമരുന്ന് ലഹരിയില്‍നിന്നു യുവജനങ്ങളെ അകറ്റുന്നതിന് ഇതുപോലുള്ള ആരോഗ്യ സംരക്ഷണകേന്ദ്രങ്ങള്‍ ഉപകരിക്കുമെന്നും അദ്ദേഹം പറഞ്ഞു. ‌പഞ്ചായത്ത് പ്രസിഡന്‍റ് സോജന്‍ തൊടുക അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍, ബ്ലോക്ക് പഞ്ചായത്ത് പ്രസിഡന്‍റ് ജെസി ജോര്‍ജ്, ലിന്‍സി മാര്‍ട്ടിന്‍, സാജോ പൂവത്താനി, ജോയി കുഴിപ്പാല, ബിജു തുണ്ടിയില്‍, ബിജു കുമ്പളന്താനം, ബിന്ദു ശശികുമാര്‍, ബിനോയി നരിതൂക്കില്‍, ജോസ് പാറേക്കാട്ട്, കെ.പി. ജോസഫ്, മാത്യു നരിതൂക്കില്‍, അനില്‍ മത്തായി, ശ്രീലത ഹരിദാസ്, ജിനു വാട്ടപ്പള്ളി, അജേഷ് പൊയ്യീപ്ലാക്കല്‍, ജോര്‍ജുകുട്ടി മാളിയേക്കല്‍, ടോമി പുല്ലാട്ട്, സിബി ഈറ്റത്തോട്ട്, പി.ടി. ജോസഫ് പന്തലാനി, തോമസ് നീലിയറ തുടങ്ങിയവര്‍ പ്രസംഗിച്ചു.

രാമപുരം കോളജില്‍ ബികോമിനൊപ്പം എസിസിഎയും

രാമപുരം: മാര്‍ ആഗസ്തീനോസ് കോളജും ബംഗളൂരു ആസ്ഥാനമായി പ്രവര്‍ത്തിക്കുന്ന ഐഎസ്ഡിസിയും ചേര്‍ന്ന് എസിസിഎ കോഴ്‌സ് ആരംഭിക്കുന്നതിനുള്ള ധാരണാപത്രം ഒപ്പുവച്ചു. ഇന്‍റഗ്രേറ്റഡ് ബികോം പ്രോഗ്രാമിൽ‍ എസിസിഎയും പഠിക്കാം. കോളജ് മാനേജര്‍ ഫാ. ബെര്‍ക്കുമാന്‍സ് കുന്നുംപുറം, പ്രിന്‍സിപ്പല്‍ ഡോ. റെജി വര്‍ഗീസ് മേക്കാടന്‍ എന്നിവര്‍ക്ക് ഐഎസ്ഡിസി റീജണല്‍ മാനേജര്‍ അര്‍ജുന്‍ രാജ് കോഴ്‌സ് സംബന്ധിച്ച ധാരണാപത്രം കൈമാറി. വൈസ് പ്രിന്‍സിപ്പല്‍മാരായ ഫാ. ജോസഫ് ആലഞ്ചേരില്‍, സിജി ജേക്കബ്, അഡ്മിനിസ്ട്രേറ്റീവ് ഓഫീസര്‍മാരായ രാജീവ് ജോസഫ്, പ്രകാശ് ജോസഫ്, ഡിപ്പാര്‍ട്ട്മെന്‍റ് മേധാവി ജോസ് ജോസഫ്, അധ്യാപകര്‍ തുടങ്ങിയവര്‍ പങ്കെടുത്തു.

ആരും അറിയാതെ കിടന്നിരുന്ന വെള്ളച്ചാട്ടം സോഷ്യല്‍ മീഡിയയിലൂടെ തരംഗമായി

പാലാ: നഗരത്തിന്‍റെ തിരക്കുകള്‍ക്കിടയില്‍നിന്നു മാറി ഗ്രാമത്തില്‍ ഒരു വെള്ളച്ചാട്ടം. മഴക്കാലമായതോടെ വെള്ളച്ചാട്ടത്തിനു ദൃശ്യഭംഗിയും സൗന്ദര്യവും കൂടിയിരിക്കുകയാണ്. പതിവു വെള്ളച്ചാട്ടങ്ങളും കാഴ്ചകളും കണ്ടുമടുത്ത ആളുകള്‍ മണ്‍സൂണ്‍ ഡെസ്റ്റിനേഷനായി പാലാ ടൗണിനു സമീപമുള്ള കവീക്കുന്ന് മീനാറ വെള്ളച്ചാട്ടത്തെ തെരഞ്ഞെടുത്തിരിക്കുകയാണ്. ഇതുവരെ ആരും അറിയാതെ കിടന്നിരുന്ന ഈ വെള്ളച്ചാട്ടം സമീപകാലത്താണ് സോഷ്യല്‍ മീഡിയയില്‍ തരംഗമായത്. മഴക്കാലമായതോടെ വെള്ളച്ചാട്ടവും ഇതിനു മുകളിലുള്ള ചെക്ക്ഡാമും സന്ദര്‍ശിക്കാന്‍ ദൂരസ്ഥലങ്ങളില്‍നിന്നുപോലും സന്ദര്‍ശകരെത്തുന്നുണ്ട്. ചൂണ്ടച്ചേരിയില്‍നിന്ന് ആരംഭിച്ച് രണ്ട് കിലോമീറ്റര്‍ അകലെ മീനച്ചിലാറ്റില്‍ പതിക്കുന്നതാണ് ഇവിടത്തെ നീരൊഴുക്ക്. മീനച്ചിലാറിന്‍റെ കൈവഴിയായും അറിയപ്പെടുന്നു. സന്ദര്‍ശകര്‍ക്ക് മനസില്‍ ഓര്‍ത്തിരിക്കാന്‍ പറ്റിയ ഒരിടമാണ് മീനാറ വെള്ളച്ചാട്ടം. എല്ലാ ടെന്‍ഷനുകളും മറന്ന് ഇത്തിരിനേരം ആസ്വദിക്കാനും സംസാരിച്ചിരിക്കാനും പറ്റിയ ഒരിടമാണിത്. കണ്ണിനും മനസിനും ഒരുപോലെ കുളിര്‍മ നല്‍കുന്നതാണ് ഈ വെള്ളച്ചാട്ടം. കാടിനു സമാനമായ പ്രകൃതി. ചെറിയ കല്ലിടുക്കുകളില്‍കൂടി നിറഞ്ഞുപതഞ്ഞ് ഒഴുകുകയാണ് വെള്ളം. വെള്ളത്തിലിറങ്ങിയാല്‍ അപകടസാധ്യതയുള്ളതിനാല്‍ ആരും ഇറങ്ങാതെ വെള്ളച്ചാട്ടം ആസ്വദിച്ചാല്‍ മതിയെന്നാണ് നാട്ടുകാര്‍ പറയുന്നത്. വെള്ളച്ചാട്ടം കാണാനെത്തുന്നവര്‍ പ്ലാസ്റ്റിക് കുപ്പി ഉള്‍പ്പെടെയുള്ള പാഴ്‌വസ്തുക്കള്‍ ഇവിടെ നിക്ഷേപിച്ചിട്ട് പോകരുതെന്നും നാട്ടുകാര്‍ അഭ്യര്‍ഥിക്കുന്നു. നാട്ടുകാര്‍ തന്നെയാണ് സന്ദര്‍ശകര്‍ക്ക് നിര്‍ദേശവും നല്‍കുന്നത്. നഗരസഭ ഇടപെട്ട് സുരക്ഷാക്രമീകരണങ്ങള്‍ നടത്തി വിനോദസഞ്ചാരകേന്ദ്രമാക്കി മാറ്റാനുള്ള നടപടികള്‍ സ്വീകരിക്കണമെന്നും സമീപവാസികള്‍ ആവശ്യപ്പെടുന്നു. പാലാ മുനിസിപ്പാലിറ്റിയിലെ എട്ടാം വാര്‍ഡിലാണ് ഈ വെള്ളച്ചാട്ടം സ്ഥിതി ചെയ്യുന്നത്. അപ്പുറം ഭരണങ്ങാനം പഞ്ചായത്താണ്. പാലാ-തൊടുപുഴ റോഡിൽ പാലാ കാര്‍മല്‍ ആശുപത്രിക്ക് സമീപമുള്ള റോഡില്‍ കൂടിയും പാലാ-ഈരാറ്റുപേട്ട റോഡില്‍ കൊച്ചിടപ്പാടിയില്‍നിന്നു കവീക്കുന്നിലേക്ക് പോകുന്ന റൂട്ടിലും സഞ്ചരിച്ചാല്‍ വെള്ളച്ചാട്ടത്തിലേക്ക് എത്താം. സമീപത്തായി തീര്‍ഥാടനകേന്ദ്രമായ പാമ്പൂരാംപാറ കുരിശുമലയും സ്ഥിതി ചെയ്യുന്നുണ്ട്.

കോഴിക്കൂട്ടിൽ കയറിയ പെരുമ്പാമ്പിനെ പിടികൂടി

മുക്കൂട്ടുതറ: കോഴിക്കൂട്ടിൽ കയറിയ ഭീമൻ പെരുമ്പാമ്പിനെ പിടികൂടി. മുക്കൂട്ടുതറ കൊല്ലമുള കാവുങ്കൽ ഉബൈദിന്‍റെ കോഴിക്കൂട്ടിൽ കയറിയ പെരുമ്പാമ്പിനെയാണ് വനംവകുപ്പിന്‍റെ ആർആർടി ടീം പിടിച്ചത്. ഇന്നലെ രാവിലെ 11ഓടെ 12 അടി നീളമുള്ള പെരുമ്പാമ്പാണ് കോഴിക്കൂട്ടിൽ കയറിയത്. കോഴികളുടെ അസാധാരണമായ ശബ്ദം കേട്ട് വീട്ടുകാർ ശ്രദ്ധിച്ചപ്പോഴാണ് പെരുമ്പാമ്പിനെ കണ്ടത്. തുടർന്ന് വനംവകുപ്പിൽ വിവരം അറിയിച്ചതിനെത്തുടർന്ന് ആർആർടി ടീം സ്ഥലത്തെത്തി പെരുന്പാന്പിനെ പിടികൂടി.

നിയന്ത്രണംവിട്ട മിനിലോറി നടപ്പാതയിലേക്ക് ഇടിച്ചുകയറി

പൊൻകുന്നം: പുനലൂർ-പൊൻകുന്നം സംസ്ഥാനപാതയിൽ ചിറക്കടവ് എസ്ആർവി സ്‌കൂളിന് സമീപം നിയന്ത്രണംവിട്ട മിനിലോറി നടപ്പാതയിലേക്ക് ഇടിച്ചുകയറി. ഇന്നലെ രാവിലെ 8.30ഓടെയായിരുന്നു അപകടം. ഡ്രൈവർ മൂവാറ്റുപുഴ മടവൂർ സ്വദേശി പുളിച്ചാലിൽ പരീത് തലനാരിഴയ്ക്ക് രക്ഷപ്പെട്ടു. ക്യാബിനിലേക്ക് തുളഞ്ഞുകയറിയ കമ്പി ഇദ്ദേഹത്തിന്‍റെ വസ്ത്രത്തിലും സീറ്റിലുമായിട്ടാണ് കൊണ്ടു കയറിയതെന്ന് ദൃക്‌സാക്ഷികൾ പറഞ്ഞു. ലോഡ് കയറ്റി വന്ന ലോറി പത്തനംതിട്ടയ്ക്കു പോകുകയായിരുന്നു. ഇതിനോട് ചേർന്നുള്ള വളവിൽ നിരന്തരം അപകടങ്ങളുണ്ടാകുന്നതായി പ്രദേശവാസികൾ പറഞ്ഞു. അടുത്തിടെ മറ്റൊരു വാഹനവും ഫുട്പാത്തിലെ കൈവരിയിൽ ഇടിച്ച് അപകടമുണ്ടായിരുന്നു.

പ്രേഷിതപ്രവര്‍ത്തനത്തിന് ഊര്‍ജം തീക്ഷ്ണമായ പ്രാര്‍ഥന: മാര്‍ പെരുന്തോട്ടം

ചങ്ങനാശേരി: തീക്ഷ്ണമായ പ്രാര്‍ഥനയിലൂടെയാണ് പ്രേഷിതപ്രവര്‍ത്തനത്തിനുള്ള ഊര്‍ജം ആര്‍ജിക്കുന്നതെന്ന് ആര്‍ച്ച്ബിഷപ് മാര്‍ ജോസഫ് പെരുന്തോട്ടം. അതിരൂപത ചെറുപുഷ്പ മിഷന്‍ലീഗ് 2025-26 പ്രവര്‍ത്തനവര്‍ഷം എസ്ബി കോളജ് കാവുകാട്ട് ഹാളില്‍ ഉദ്ഘാടനം ചെയ്തു പ്രസംഗിക്കുകയായിരുന്നു ആര്‍ച്ച്ബിഷപ്. അതിരൂപത പ്രസിഡന്‍റ് ഫെബിന്‍ അഗസ്റ്റിന്‍ മാത്യു അധ്യക്ഷത വഹിച്ചു. അതിരൂപതാ വികാരി ജനറാള്‍ മോണ്‍. സ്‌കറിയ കന്യാകോണില്‍ മാര്‍ഗരേഖയും പഠനഗ്രന്ഥ പ്രകാശനവും നടത്തി. ചെറുപുഷ്പ മിഷന്‍ ലീഗ് അതിരൂപതാ ഡയറക്ടര്‍ റവ.ഡോ. വര്‍ഗീസ് പുത്തന്‍പുരയ്ക്കല്‍, അസിസ്റ്റന്‍റ് ഡയറക്ടര്‍ ഫാ. സെബാസ്റ്റ്യന്‍ മാമ്പ്ര, ഓര്‍ഗനൈസിംഗ് പ്രസിഡന്‍റ് ടിന്‍റോ സെബാസ്റ്റ്യന്‍, ജോയിന്‍റ് ഡയറക്ടര്‍ സിസ്റ്റര്‍ ജെസ്‌ലിന്‍ ജെഎസ്, ജനറല്‍ സെക്രട്ടറി എബിന്‍ ജോസഫ്, ഓഫീസ് സെക്രട്ടറി സിസ്റ്റര്‍ മേരി റോസ്, ജോണ്‍സണ്‍ കാഞ്ഞിരക്കാട്, ലൂ ക്ക് അലക്‌സ്, ആനിമേറ്റര്‍ ബോബി തോമസ്, റോഹന്‍ ബെന്നി, ജോയല്‍ ജോണ്‍, സാലിച്ചന്‍ തുമ്പേക്കളം എന്നിവര്‍ പ്രസംഗിച്ചു. കഴിഞ്ഞ പ്രവര്‍ത്തനവര്‍ഷ കാലയളവില്‍ നടത്തപ്പെട്ട വിവിധ മത്സരങ്ങളില്‍ മികച്ച പ്രകടനം കാഴ്ചവച്ച കുഞ്ഞുമിഷനറിമാരെ സമ്മാനങ്ങള്‍ നല്കി ആദരിച്ചു. കുഞ്ഞേട്ടന്‍ പുരസ്‌കാര ജേതാവ് ജോണ്‍സണ്‍ കാഞ്ഞിരങ്ങാട്ടിനെ ആദരിച്ചു. തുടര്‍ന്ന് നടന്ന സെമിനാർ‍ റവ.ഡോ. മാണി പുതിയിടം നയിച്ചു.

എ പ്ലസ് ജേതാക്കൾക്ക് അനുമോദനം

കപ്പാട്: കത്തോലിക്ക കോൺഗ്രസ് കപ്പാട് യൂണിറ്റിന്‍റെ ആഭിമുഖ്യത്തിൽ എസ്എസ്എൽസി, പ്ലസ് ടു പരീക്ഷകളിൽ ഫുൾ എ പ്ലസ് നേടിയ കുട്ടികളെ അനുമോദിച്ചു. കപ്പാട് മാർ സ്ലീവാ പള്ളി വികാരി ഫാ. ആന്‍റണി മണിയങ്ങാട്ട് യോഗം ഉദ്ഘാടനം ചെയ്തു. യൂണിറ്റ് പ്രസിഡന്‍റ് ജോൺസൺ പന്തപ്ലാക്കൽ അധ്യക്ഷത വഹിച്ചു. രൂപത ഡയറക്ടറായി ചുമതലയേറ്റ ഫാ. ജസ്റ്റിൻ മതിയത്തിന് യോഗത്തിൽ സ്വീകരണം നൽകി. പരീക്ഷയിൽ ഉന്നത വിജയം നേടിയ ഡാനി ടോമി കടപ്ലാക്കൽ, സിന്‍റാ റോസ് ജോജോ തെക്കുംചേരിക്കുന്നേൽ എന്നിവരെ ഫാ. ആന്‍റണി മണിയങ്ങാട്ട്, ഫാ. ജസ്റ്റിൻ മതിയത്ത് എന്നിവർ ചേർന്ന് മെമന്‍റോ നൽകി ആദരിച്ചു. കത്തോലിക്ക കോൺഗ്രസ് ഗ്ലോബൽ വൈസ് പ്രസിഡന്‍റ് ജോമി കൊച്ചുപറമ്പിൽ, അസി. വികാരി ഫാ. മാത്യു നിരപ്പേൽ, രൂപത ജനറൽ സെക്രട്ടറി ജോസഫ് പണ്ടാരക്കളം, ട്രഷറർ ജോജോ തെക്കുംചേരികുന്നേൽ, യൂണിറ്റ് സെക്രട്ടറി സാബു മാത്യു മുടപ്പാലയിൽ, സജി ഡൊമിനിക് പ്ലാത്തോട്ടം,സാബു വട്ടോത്ത്, ഷാജി പുതിയാപറമ്പിൽ, സ്വപ്‌നിൽ കല്ലൂകുളങ്ങര എന്നിവർ പ്രസംഗിച്ചു. മുണ്ടക്കയം: കോൺഗ്രസ്‌ കരിനിലം വാർഡ് കമ്മിറ്റിയുടെ നേതൃത്വത്തിൽ എസ്എസ്എൽസി, പ്ലസ് ടു പരീക്ഷയിൽ ഉന്നത വിജയം നേടിയ കുട്ടികളെ ആദരിച്ചു. എരുമേലി സെന്‍റ് തോമസ് ഹയർ സെക്കൻഡറി സ്കൂൾ പ്രിൻസിപ്പൽ റോയ് സ്‌കറിയ കുമ്പളത്താനം യോഗം ഉദ്ഘാടനം ചെയ്തു. വാർഡ് പ്രസിഡന്‍റ് എൻ. ബാലൻ ആലുംമുട്ടിൽകിഴക്കേതിൽ അധ്യക്ഷത വഹിച്ചു. കോൺഗ്രസ് ബ്ലോക്ക്‌ പ്രസിഡന്‍റ് ബിനു മറ്റക്കര, മണ്ഡലം പ്രസിഡന്‍റ് കെ.എസ്. രാജു, ഡിസിസി ജനറൽ സെക്രട്ടറി പ്രകാശ് പുളിക്കൽ, റോയി കപ്പലുമാക്കൽ, വാർഡ് മെംബർമാരായ ബെന്നി ചേറ്റുകുഴി, ജാൻസി തൊട്ടിപ്പാട്, ബി. ജയചന്ദ്രൻ, വാർഡ് സെക്രട്ടറി ബാബു നെല്ലിക്കുന്നോരത്ത്‌, സിബിച്ചൻ കാരക്കാട്ട്, റെമിൻ രാജൻ തുടങ്ങിയവർ പ്രസംഗിച്ചു.

കാൽനടയാത്രക്കാർക്ക് ഭീഷണിയായി മരത്തടികൾ

വാഴൂർ: ദേശീയപാത 183ൽ ഇളംപള്ളി കവലയിൽ കൂട്ടിയിട്ടിരിക്കുന്ന മരത്തടികൾ കാൽനടയാത്രക്കാർ ദുരിതമാകുന്നു. ഇളംപള്ളി കവലയിലെ ബസ് കാത്തിരിപ്പുകേന്ദ്രത്തിന് സമീപം ഒരു മാസം മുമ്പ് പുറമ്പോക്കിലെ പ്ലാവ് റോഡിലേക്കു വീണപ്പോൾ അഗ്നിരക്ഷാസേന മുറിച്ചുമാറ്റിയ മരങ്ങളുടെ അവശിഷ്ടങ്ങളും ചില്ലകളുൾപ്പെടെയുള്ള ഭാഗങ്ങളാണ് കൂട്ടിയിട്ടിരിക്കുന്നത്. ഇത് ഇപ്പോൾ വാഹനങ്ങൾക്കും കാൽനടയാത്രക്കാർക്കും അപകട ഭീഷണിയായിരിക്കുകയാണ്. തടികൾ കിടക്കുന്നതിനാൽ റോഡിലൂടെ നടക്കേണ്ട സ്ഥിതിയിലാണ് കാൽനടയാത്രക്കാർ. ഇളംപള്ളി കവലയിലെ വളവ് തിരിഞ്ഞ് വേഗത്തിലെത്തുന്ന വാഹനങ്ങൾ കാൽനടയാത്രക്കാരെ ഇടിച്ച് അപകടം ഉണ്ടാകാനുള്ള സാധ്യതയും ഏറെയാണ്. കാൽനടയാത്രക്കാർക്ക് ഭീഷണിയായി മാറിയിരിക്കുന്ന മരത്തടികൾ എത്രയും വേഗം നീക്കം ചെയ്യണമെന്ന ആവശ്യം ശക്തമായിരിക്കുകയാണ്.

സാപ്സ് എക്സലൻസിയ അവാർഡ് ഡേ

കാഞ്ഞിരപ്പള്ളി: സിബിഎസ്ഇ പത്ത്, പന്ത്രണ്ട് ക്ലാസുകളിൽ ഉന്നത വിജയം കരസ്ഥമാക്കിയ വിദ്യാർഥികളെ അനുമോദിക്കുന്നതിനായി ആനക്കല്ല് സെന്‍റ് ആന്‍റണീസ് പബ്ലിക് സ്കൂളിൽ സാപ്സ് എക്സലൻസിയ അവാർഡ് ഡേ നാളെ രാവിലെ 10.30ന് സ്കൂൾ ഓഡിറ്റോറിയത്തിൽ നടക്കും. കർദിനാൾ മാർ ജോർജ് ആലഞ്ചേരി സമ്മേളനം ഉദ്ഘാടനം ചെയ്യും. സ്കൂൾ മാനേജർ ഫാ. ജോസഫ് പൊങ്ങന്താനം അധ്യക്ഷത വഹിക്കും. പ്രിൻസിപ്പൽ ഫാ. ആന്‍റണി തോക്കനാട്ട്, പിടിഎ വൈസ് പ്രസിഡന്‍റ് ശോഭ വർക്കി, അലുമ്നി അസോസിയേഷൻ പ്രസിഡന്‍റ് ഡോ. ജൂബിലന്‍റ് കിഴക്കേതോട്ടം, ബ്രില്യന്‍റ് സ്റ്റഡി സെന്‍റർ ഡയറക്ടർ സ്റ്റീഫൻ ജോസഫ്, സ്റ്റാഫ് സെക്രട്ടറി തനുജ മാത്യു, വിദ്യാർഥി പ്രതിനിധികളായ നകുൽ സി. അനിൽ, അസ്റ ഫാത്തിമ, നയന കൃഷ്ണകുമാർ, കെവിൻ ഷിജോ എന്നിവർ പ്രസംഗിക്കും. സമ്മേളനത്തിൽ ഉന്നത വിജയം നേടിയ വിദ്യാർഥികൾക്ക് കാഷ് അവാർഡും മെമന്‍റോയും നൽകും.

ചോര്‍ന്നൊലിക്കുന്ന പമ്പ് ഹൗസ് ടാർപോളിൻകൊണ്ടു മൂടി

വാഴൂര്‍: ചോര്‍ന്നൊലിക്കുന്ന ഇളംപള്ളി കവലയിലെ പമ്പ് ഹൗസ് മഴക്കാലമായതോടെ വെള്ളം അകത്തു വീഴാതിരിക്കുവാന്‍ ടാര്‍പോളിന്‍ കൊണ്ട് മൂടിയ നിലയില്‍. കെട്ടിടം തകര്‍ന്നു വീഴുമെന്ന പേടിയില്‍ പമ്പ് ഓപ്പറേറ്റര്‍ മോട്ടോര്‍ ഓണാക്കിയതിനുശേഷം കെട്ടിടത്തിനു പുറത്തിറങ്ങി നില്‍ക്കുകയാണിപ്പോൾ. ജലവിതരണ വകുപ്പിന്‍റെ നെടുംകുന്നം സെക്‌ഷന് കീഴിലാണ് പതിനേഴാംമൈല്‍ ഇളംപള്ളി തോടിന് സമീപത്തെ പമ്പ് ഹൗസ്. ഇവിടെനിന്നാണ് വാഴൂര്‍ പഞ്ചായത്തിലെ വിവിധ ഭാഗങ്ങളിലേക്ക് കുടിവെള്ളം വിതരണം ചെയ്യുന്നത്. അകത്ത് ജീവനക്കാരുള്ള സമയത്ത് കെട്ടിടം നിലംപൊത്തിയാല്‍ വലിയ അപകടമുറപ്പാണ്. പമ്പ് ഹൗസിന്‍റെ ശോച്യാവസ്ഥ പരിഹരിക്കാന്‍ അധികൃതര്‍ നടപടികള്‍ സ്വീകരിക്കുന്നില്ലെന്നാണ് ഉയരുന്ന പ്രധാന ആക്ഷേപം. എത്രയും വേഗം പമ്പ് ഹൗസിന് പുതിയ കെട്ടിടം നിര്‍മിക്കണമെന്നാണ് നാട്ടുകാരുടെ ആവശ്യം.

പാറത്തോട്-പിണ്ണാക്കനാട് റോഡില്‍ ഗർത്തം

കാഞ്ഞിരപ്പള്ളി: പാറത്തോട്-പിണ്ണാക്കനാട് റോഡില്‍ വലിയ ഗർത്തം രൂപപ്പെട്ടു. പാറത്തോട് മലനാടിനു സമീപം തോടിന് കുറുകെയുള്ള പാലത്തോട് ചേര്‍ന്നാണ് കുഴി രൂപപ്പെട്ടത്. ഇന്നലെ പുലര്‍ച്ചെയാണ് റോഡില്‍ കുഴി രൂപപ്പെട്ട നിലയില്‍ കണ്ടെത്തിയത്. കുഴിയുടെ അടിഭാഗത്തെ മണ്ണ് പൂര്‍ണമായും നീങ്ങിയ നിലയിലായിരുന്നു. ഇരു വശങ്ങളിലേക്കും എട്ടടിയോളം ദൂരത്തില്‍ കമ്പ് ഇറങ്ങിപ്പോകുന്ന ഗര്‍ത്തമാണ് രൂപപ്പെട്ടത്. മഴ തുടരുന്നതോടെ ഭാരവാഹനങ്ങളും ബസ് സര്‍വീസുമുള്ള ഈ റോഡില്‍ അപകടസാഹചര്യം കണക്കിലെടുത്ത് പൊതുമരാമത്ത് റോഡ് വിഭാഗം അധികൃതരെത്തി താത്കാലികമായി റോഡിലൂടെ ഗതാഗതം നിരോധിച്ചിരുന്നു. പിന്നീട് അറ്റകുറ്റപ്പണികള്‍ നടത്തി ഇന്നലെ വൈകുന്നേരത്തോടെയാണു ഗതാഗതം പുനഃസ്ഥാപിച്ചത്. കുഴി രൂപപ്പെട്ട ഭാഗത്തെ ടാറിംഗും മണ്ണും നീക്കിയ ശേഷം മെറ്റലും മക്കുമിട്ട് നിരത്തിയാണ് കുഴിയടച്ചത്.

മോദിയുടെ ഖജാന്‍ജിയായി അദാനിയെ മാറ്റിയെടുത്തു: ആര്‍. രാജേന്ദ്രന്‍

ചങ്ങനാശേരി: മണ്‍മറഞ്ഞ ഇന്ത്യന്‍ നേതാക്കളെ സംഘപരിവാറിന്‍റെ പട്ടികയില്‍പ്പെടുത്താന്‍ കേന്ദ്ര ഭരണാധികാരികള്‍ ശ്രമിക്കുന്നതായും പ്രധാനമന്ത്രി മോദിയുടെ ഖജാന്‍ജിയായി അദാനിയെ മാറ്റിയെടുത്തിരിക്കുന്നതായും സിപിഐ സംസ്ഥാന എക്‌സിക്യുട്ടീവ് അംഗം ആര്‍. രാജേന്ദ്രന്‍. സിപിഐ ചങ്ങനാശേരി മണ്ഡലം സമ്മേളനത്തിന്‍റെ സമാപനത്തില്‍ പ്രസംഗിക്കുകയായിരുന്നു അദ്ദേഹം. മധ്യേഷ്യയിലുണ്ടായിരിക്കുന്ന യുദ്ധാന്തരീക്ഷം ഇന്ത്യക്ക് ആശങ്കാജനകമാണെന്ന് അദ്ദേഹം കൂട്ടിച്ചേര്‍ത്തു. ജില്ലാ സെക്രട്ടറി അഡ്വ. വി.ബി. ബിനു അധ്യക്ഷത വഹിച്ചു. ജില്ലാ എക്‌സിക്യൂട്ടീവ് അംഗങ്ങളായ ടി.എന്‍. രമേശന്‍, അഡ്വ. മാധവന്‍പിള്ള, ജോണ്‍ വി. ജോസഫ്, ഷേര്‍ലി ഹരികൃഷ്ണന്‍, എം.ആര്‍. രഘുദാസ്, കെ.ടി. തോമസ്, പി.എസ്. രാജേഷ്, കെ. രഞ്ജിത്, എം.കെ. രാജേന്ദ്രന്‍ എന്നിവര്‍ പ്രസംഗിച്ചു. മണ്ഡലം സെക്രട്ടറിയായി അഡ്വ.ജി. രാധാകൃഷ്ണനെ തെരഞ്ഞെടുത്തു.

തിരക്കേറിയ റോഡില്‍ മെറ്റില്‍ക്കൂനകളും വീപ്പകളും : പെരുമ്പനച്ചിയിലെ ഓട നിര്‍മാണം സുരക്ഷാ മാനദണ്ഡങ്ങള്‍ പാലിക്കാതെയെന്ന്

ചങ്ങനാശേരി: പെരുമ്പനച്ചിയില്‍ സുരക്ഷാ മാനദണ്ഡങ്ങള്‍ പാലിക്കാതെയുള്ള ഓട നിര്‍മാണം വാഹനങ്ങള്‍ക്കും കാല്‍നടയാത്രക്കാര്‍ക്കും അപകടഭീഷണിയാകുന്നതായി പരാതി. വാഴൂര്‍ റോഡിലെ പെരുമ്പനച്ചി മുതല്‍ പൂവത്തുംമൂട് വരെയുള്ള ഭാഗത്താണ് ഓടനിര്‍മാണം നടക്കുന്നത്. ഓട നിര്‍മാണത്തിനായുള്ള മെറ്റില്‍ക്കൂനകള്‍ തിരക്കേറിയ റോഡിന്‍റെ വശത്ത് അലക്ഷ്യമായി നിക്ഷേപിച്ചിരിക്കുന്നതാണ് അപകട കാരണമാകുന്നത്. രാത്രി വാഹനങ്ങള്‍ ഇതിലേക്ക് ഇടിച്ചു കയറി അപകടത്തില്‍പ്പെടാനും സാധ്യതയുണ്ട്. കഴിഞ്ഞദിവസം കനത്ത മഴയത്ത് ബൈക്കില്‍ ഇതു വഴിയെത്തിയ ദമ്പതികള്‍ റോഡരികില്‍ വച്ചിരുന്ന വീപ്പയില്‍ തട്ടി മറിഞ്ഞു വീണു. ഓടിക്കൂടിയ നാട്ടുകാരാണ് ഇവരെ രക്ഷിച്ചത്. വഴിവിളക്കുകളില്ലാത്തതിനാൽ രാത്രികാലങ്ങളില്‍ സ്ഥല പരിചയമില്ലാത്തവര്‍ വന്നാല്‍ ഓടയിലേക്ക് വീഴും. യാത്രക്കാരുടെ ശ്രദ്ധയ്ക്കായി റിഫ്‌ളക്ടര്‍ ടേപ്പുകളോ, റിബണോ, ബോര്‍ഡുകളോ ഒന്നും സ്ഥാപിച്ചിട്ടില്ല.

വെരൂര്‍ ഇന്‍ഡസ്ട്രിയല്‍ നഗറില്‍ റോഡിന്‍റെ വശങ്ങള്‍ ചെളിക്കുളം

ചങ്ങനാശേരി: ചങ്ങനാശേരി-വാഴൂര്‍ റോഡില്‍ വെരൂര്‍ ഇന്‍ഡസ്ട്രിയല്‍ നഗറില്‍ റോഡിന്‍റെ വശങ്ങളില്‍ വെള്ളക്കെട്ടും ചെളിയും നിറഞ്ഞു വാഹന സഞ്ചാരവും കാല്‍നട യാത്രയും ദുരിതമായി. എസ്‌റ്റേറ്റ് പടി ബസ്‌സ്റ്റോപ്പ് മുതല്‍ മൂന്നാംമൈല്‍ ബസ്‌സ്റ്റോപ്പ് വരെയുള്ള ഭാഗത്താണ് റോഡിന്‍റെ വശങ്ങള്‍ ചെളിക്കുളമായിരിക്കുന്നത്. വെരൂര്‍ പള്ളിയുടെ കുരിശടിക്കു മുമ്പില്‍ പൈപ്പ് അറ്റകുറ്റപ്പണിക്കായി ഫുട്പാത്തിലെ ടൈലുകള്‍ ഇളക്കിയ ഭാഗം പൂര്‍വസ്ഥിതിയില്‍ ആക്കിയിട്ടില്ല. ഇവിടത്തെ പെട്രോള്‍ പമ്പിന് എതിര്‍വശത്ത് റോഡരികില്‍ മുപ്പതുമീറ്ററോളം ദൂരത്തില്‍ വെള്ളംകെട്ടി നിൽക്കുന്നത് കാല്‍നടയാത്രക്കാര്‍ക്ക് ദുരിതമാകുന്നുണ്ട്. വേഗത്തിലെത്തുന്ന വാഹനങ്ങള്‍ യാത്രക്കാരുടെ ദേഹത്തേക്ക് ചെളിവെള്ളം തെറിപ്പിക്കുന്നതു പതിവാണ്. റോഡിന്‍റെ വശങ്ങളിലെ അനധികൃത വഴിവാണിഭങ്ങൾ വാഹനങ്ങള്‍ക്കും കാല്‍നടയാത്രക്കാര്‍ക്കും ബുദ്ധിമുട്ടാകുന്നുണ്ട്. റോഡരികിലെ ചിലമരങ്ങളും ചിലതിന്‍റെ കൂറ്റന്‍ ശാഖകളും അപകടഭീഷണി സൃഷ്ടിക്കുന്നതായും പരാതിയുണ്ട്.

കനത്ത മഴയില്‍ മണ്‍തിട്ട ഇടിഞ്ഞു, വീടിനു നാശം; ദുരന്തം ഒഴിവായി

മാമ്മൂട്: കനത്ത മഴയില്‍ മണ്‍തിട്ട ഇടിഞ്ഞുവീണു. വീടിനു നാശനഷ്ടം നേരിട്ടു. വന്‍ദുരന്തം ഒഴിവായി. കാല്‍നൂറ്റാണ്ട് മുമ്പ് മണ്ണു നീക്കം ചെയ്ത ഭാഗത്ത് അവശേഷിച്ച മണ്‍തിട്ടയാണ് ഇടിഞ്ഞു വീണത്. ഇന്നലെ പുലര്‍ച്ചെയാണ് സംഭവം. മാടപ്പള്ളി പഞ്ചായത്ത് എട്ടാംവാര്‍ഡില്‍ മാമ്മൂട് കാരയ്ക്കാട്ടുപടി-കുറ്റിക്കാട്ടുപടി റോഡിലാണ് സംഭവം. മണ്ണും കൂറ്റന്‍കല്ലുമാണ് ഇടിഞ്ഞുവീണത്. ചിറപ്പുരയിടത്തില്‍ ജോര്‍ജിന്‍റെ വീടിന്‍റെ വശത്തുള്ള ബാത്ത്‌റൂമും പൈപ്പ് ഫിറ്റിംഗുകളുമാണ് തകര്‍ന്നത്. അതേസമയം, അവശേഷിക്കുന്ന മൺതിട്ടയും അപകട ഭീഷണിയിലാണ്. ചുറ്റുപാടും താമസിക്കുന്നവരോട് മാറിത്താമസിക്കണമെന്ന് അധികൃതർ നിർദേശിച്ചിട്ടുണ്ട്. പഞ്ചായത്ത് പ്രസിഡന്‍റ് മണിയമ്മ രാജപ്പൻ, വാർഡ് മെംബർ ജി. അശോക് എന്നിവർ സ്ഥലം സന്ദർശിച്ചു.

കര്‍ഷകരുടെ പ്രശ്‌നങ്ങളില്‍ സര്‍ക്കാര്‍ ഇടപെടണം: കത്തോലിക്കാ കോണ്‍ഗ്രസ്

ചങ്ങനാശേരി: പ്രതികൂലമായ കാലാവസ്ഥയും വെള്ളപ്പൊക്കവും മൂലം കഷ്ടപ്പെടുന്ന കര്‍ഷകര്‍ക്ക് അവരുടെ നെല്ലിന്‍റെ വില നല്‍കാത്തത് പ്രതിഷേധാര്‍ഹമാണെന്നും അടിസ്ഥാന മേഖലയില്‍ തൊഴില്‍ ചെയ്യുന്ന കര്‍ഷകരെ അവരുടെ ന്യായമായ അവകാശങ്ങള്‍ക്കായിപ്പോലും സമരം ചെയ്യേണ്ട അവസ്ഥയിലേക്ക് സര്‍ക്കാര്‍ വലിച്ചിഴയ്ക്കരുതെന്നും അതിരൂപത കത്തോലിക്ക കോണ്‍ഗ്രസ്. ഈ വിഷയത്തില്‍ സര്‍ക്കാര്‍ നിസംഗത തുടര്‍ന്നാല്‍ സമരമാര്‍ഗങ്ങളിലേക്ക് പ്രവേശിക്കുവാന്‍ നിര്‍ബന്ധിതരാകുമെന്നും കത്തോലിക്ക കോണ്‍ഗ്രസ് മുന്നറിയിപ്പു നല്‍കി. അതിരൂപത പ്രസിഡന്‍റ് ബിജു സെബാസ്റ്റ്യന്‍റെ അധ്യക്ഷതയില്‍ ചേര്‍ന്ന നേതൃസമ്മേളനം അതിരൂപതാ ഡയറക്ടര്‍ ഫാ. സെബാസ്റ്റ്യന്‍ ചാമക്കാല ഉദ്ഘാടനം ചെയ്തു. അതിരൂപതാ ജനറല്‍ സെക്രട്ടറി ബിനു ഡൊമിനിക്, ട്രഷറര്‍ ജോസ് വെങ്ങാന്തറ, സി.ടി. തോമസ്, ജോര്‍ജുകുട്ടി മുക്കത്ത്, റോസിലിന്‍ കെ. കുരുവിള, ജിനോ ജോസഫ്, സെബാസ്റ്റ്യന്‍ വര്‍ഗീസ്, കുഞ്ഞ് കളപ്പുര, പി.സി. കുഞ്ഞപ്പന്‍ കെ.എസ്. ആന്‍റണി എന്നിവര്‍ പ്രസംഗിച്ചു.

കാറ്റിലും മഴയിലും വൻ നാശം

കുമരകം: ശക്തമായ കാറ്റിലും മഴയിലും ഇന്നലെ രാത്രി കുമരകത്ത് വ്യാപകമായ നാശനഷ്ടങ്ങൾ ഉണ്ടായി. മരങ്ങൾ കടപുഴകി വീണ് ഗതാഗതം സ്തംഭിച്ചു. കുമരകം-അട്ടിപ്പീടിക റോഡിൽ ബിവറേജസ് കോർപറേഷന്‍റെ സമീപത്തായാണ് ആദ്യം മരം വീണത്. കോട്ടയത്തുനിന്നു വരുന്ന ചെറിയ വാഹനങ്ങൾ കോണത്താറ്റു പാലം നിർമാണം നടക്കുന്നതിനാൽ വൺവേ സംവിധാനം വഴി അട്ടിപീടിക റോഡിലെത്തിയാണ് കുമരകത്തെ പ്രധാന റോഡിലേക്ക് വീണ്ടും പ്രവേശിക്കുന്നത്. അതിനാലാണ് അട്ടിപ്പീടിക റോഡിൽ വീണ മരം വലിയ ഗതാഗതക്കുരുക്കിനിടയാക്കിയത്. കൈപ്പുഴ: ഇന്നലെ വൈകുന്നേരമുണ്ടായ ശക്തമായ കാറ്റിലും മഴയിലും കൈപ്പുഴയിൽ വ്യാപക നാശം. കൈപ്പുഴ കുരിശുപള്ളിക്ക് സമീപം കണ്ടത്തിൽ വീട്ടിലെ തേക്കുമരം കടപുഴകി വീണ് കല്ലറ-കൈതക്കനാൽ റോഡിൽ ഗതാഗതം തടസപ്പെട്ടു. കോട്ടയത്തുനിന്നു ഫയർഫോഴ്സെത്തി മരം വെട്ടിമാറ്റി ഗതാഗതം പുനഃസ്ഥാപിച്ചു. കൈപ്പുഴ പുളിങ്കാല ഭാഗത്തും കുടിലിൽ കവല ഭാഗത്തും വീടുകളുടെ മുകളിലേക്കു മരം വീണു.പ്രദേശത്ത് വ്യാപക നാശമാണ് ഇന്നലെ സംഭവിച്ചത്.

പിക്കപ്പ് വാൻ നിയന്ത്രണംവിട്ട് മരത്തിലിടിച്ചു

വെച്ചൂർ: വൈക്കം- വെച്ചൂർ റോഡിലെ അച്ചിനകത്ത് നിയന്ത്രണംവിട്ട പിക്കപ്പ് വാൻ മരത്തിമിടിച്ചു.അപകടത്തിൽ ആർക്കും പരിക്കില്ല. അപകടം നടന്ന ഭാഗത്ത് ആഴമുള്ള തോടും വെള്ളം നിറഞ്ഞ പാടവുമാണ്. മരത്തിൽ തട്ടിനിന്നില്ലായിരുന്നെങ്കിൽ വാഹനം വെള്ളത്തിലേക്കു മറിയുമായിരുന്നു.നാലു മാസം മുമ്പ് ഇവിടെ വാഹനം ഇടിച്ച് കലിങ്കിന്‍റെ സംരക്ഷണഭിത്തി തകർന്ന ഭാഗത്തുതന്നെയാണ് ഇന്നലെ പുലർച്ചെയും അപകടമുണ്ടായത്. യാത്രാബസോ മറ്റു വാഹനങ്ങളോ അപകടത്തിൽപ്പെടാൻ സാധ്യതയുള്ളതിനാൽ സംരക്ഷണഭിത്തി നിർമിക്കാൻ അധികൃതർ ഉടൻ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

സംവിധായകൻ തരുൺ മൂർത്തിക്ക് ജന്മനാട്ടിൽ ആദരം

വൈക്കം: ചലച്ചിത്ര സംവിധായകൻ തരുൺ മൂർത്തിക്ക് ജന്മനാട്ടിൽ പുരോഗമന കലാസാഹിത്യ സംഘവും വൈക്കം പി. കൃഷ്ണപിള്ള സ്മാരക ഗ്രന്ഥശാലയും ചേർന്ന് ആദരമൊരുക്കി. വൈക്കത്തെ കലാപാരമ്പര്യമുള്ള ഒരു കുടുംബത്തിൽനിന്നു വരുന്ന തരുൺ മൂർത്തി ഇതോടകം ശ്രദ്ധേയമായ ഓപ്പറേഷൻ ജാവ, സൗദി വെള്ളയ്ക്ക, തുടരും എന്നീ സിനിമകൾ സംവിധാനം ചെയ്‌തിട്ടുണ്ട്. സൗദി വെള്ളയ്ക്ക നിരവധി ദേശീയ-അന്തർദേശീയ ബഹുമതികൾ നേടി. തുടരും ബോക്‌സ് ഓഫീസിൽ റിക്കാർഡുകൾ തകർത്തുകൊണ്ട് തിയറ്ററുകളിൽ പ്രദർശിപ്പിക്കുന്നു. വൈക്കം സത്യഗ്രഹ സ്മാരക മന്ദിരത്തിൽ നടന്ന സമ്മേളനത്തിൽ സാഹിത്യപ്രവർത്തക സഹകരണസംഘം പ്രസിഡന്‍റ് അഡ്വ.പി.കെ. ഹരികുമാർ തരുൺ മൂർത്തിയെ ആദരിച്ചു. പുകസ ഏരിയാ പ്രസിഡന്‍റ് കെ.സി. കുമാരൻ അധ്യക്ഷത വഹിച്ചു. ഡോ. അജു കെ. നാരായണൻ മുഖ്യപ്രഭാഷണം നടത്തി. ഗാനരചയിതാവ് അജീഷ് ദാസൻ, സംസ്ഥാന നാടക അവാർഡ് ജേതാവ് പ്രദീപ് മാളവിക, തബലവാദക രത്ന ശ്രീരാമചന്ദ്രൻ, ഡി. മനോജ്, പ്രഫ. പാർവതി ചന്ദ്രൻ, അഡ്വ. അംബരീഷ് ജി. വാസു തുടങ്ങിയവർ പ്രസംഗിച്ചു. തുടർന്ന് തരുൺ മൂർത്തിയുടെ പിതാവും നാടക പ്രവർത്തകനുമായ വൈക്കം ഡി. മധുമൂർത്തി സംവിധാനം നിർവഹിച്ച വിഘടിക്കാതെ, വിച്ഛേദിക്കാതെ, വിഹായസിലേക്ക് എന്ന നാടകം അവതരിപ്പിച്ചു. വൈക്കം: ചലച്ചിത്ര സംവിധായകൻ തരുൺ മൂർത്തിയെ വൈക്കം ടൗൺ മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ ആദരിച്ചു. പ്രസിഡന്‍റ് സോണി സണ്ണി തരുൺ മൂർത്തിയെ പൊന്നാടയണിയിക്കുകയും മെമന്‍റോ നൽകി ആദരിക്കുകയും ചെയ്തു. ബ്ലോക്ക് കോൺഗ്രസ് പ്രസിഡന്‍റ് പി.ഡി. ഉണ്ണി, ഡിസിസി ഭാരവാഹികളായ അബ്ദുൾ സലാം റാവുത്തർ, എ. സനീഷ് കുമാർ , ജയ് ജോൺ, വി. സമ്പത്ത് കുമാർ, കെ.പി. ശിവജി തുടങ്ങിയവർ പ്രസംഗിച്ചു.

എന്‍റെ ഉയർച്ചയ്ക്കു പിന്നിൽ അച്ഛൻ: തരുൺ മൂർത്തി

വൈക്കം: ചിത്രരചനയിൽ കലാപ്രവർത്തനം ഒതുങ്ങിപ്പോകുമായിരുന്ന തന്നെ ഗൗരവമായ വായനയിലേക്കും എഴുത്തിലേക്കും കഥകളി അഭ്യസനത്തിലേക്കും കൈപിടിച്ചു നടത്തിയത് അച്ഛൻ മധുമൂർത്തിയാണെന്ന് ചലച്ചിത്ര സംവിധായകൻ തരുൺ മൂർത്തി. അച്ഛൻ നിർബന്ധിച്ച് കഥകളി അഭ്യസിപ്പിച്ചത് തന്‍റെ സിനിമാജീവിതത്തിൽ ഏറെ ഗുണം ചെയ്തു. കുടുംബത്തിൽ അച്ഛനും സഹോദരൻമാരുമൊക്കെ കലാകാരൻമാരാണ്. വല്യച്ഛനും കെപിസിസി നിർവാഹക സമിതിയംഗവുമായ മോഹൻ ഡി. ബാബുവും തന്‍റെ കലാപ്രവർത്തനത്തിന് വലിയ പ്രോത്സാഹനം നൽകി. അഭിഭാഷകനായി ശ്രദ്ധേയനാകുമെന്ന് കുടുംബം കരുതിയ വല്യച്ഛൻ പൊതു പ്രവർത്തനത്തിലാണ് മുഴുകിയത്. ജോലിക്കൊപ്പം നാടകത്തെയും കൂടെക്കൂട്ടിയ അച്ഛന് അഭിനയത്തോടും വലിയ അഭിനിവേശമുണ്ടായിരുന്നു. അഭിനയിക്കാൻ ചെന്ന‍യിടങ്ങളിൽ തിക്താനുഭവമുണ്ടായ അച്ഛനെ തന്‍റെ മൂന്നു സിനിമകളിലും അഭിനയിപ്പിച്ചു. ഇപ്പോൾ വിജയകരമായി ഓടുന്ന തുടരും എന്ന മോഹൻലാൽ ചിത്രത്തിൽ പ്രശസ്തരായ മറ്റാരെയെങ്കിലും അഭിനയിപ്പിക്കാൻ അച്ഛൻ നിർബന്ധിച്ചെങ്കിലും ആ വേഷം അച്ഛനിലൂടെ പൂർണതയിലെത്തിക്കണമെന്ന തന്‍റെ മോഹസാക്ഷാത്കാരത്തിന് മോഹൻലാലും നിർമാതാവ് രഞ്ജിത്തും ഉറച്ച പിന്തുണ നൽകി. കോന്പിനേഷൻ സീനിൽ അച്ഛനിൽനിന്ന് ഏറ്റവും മികച്ച പ്രകടനം ലഭിക്കാൻ ലാലേട്ടൻ ഏറെ സഹായിച്ചെന്നും അദ്ദേഹം പറഞ്ഞു. ഫഹദ് ഫാസിൽ നായകനാകുന്ന അടുത്ത സിനിമ നവംബറിൽ തുടങ്ങും. തന്നെ കലാകാരനാക്കിയ അച്ഛനായി അതിലും ഒരു വേഷമൊരുക്കാൻ തരുണും മകന്‍റെ ഫഹദ് ചിത്രത്തിൽ അഭിനയിക്കാൻ ആകാംക്ഷയോടെ മധുമൂർത്തിയും കാത്തിരിക്കുകയാണ്.

കടുത്തുരുത്തിയിൽ ആഫ്രിക്കന്‍ ഒച്ച് ശല്യം

കടുത്തുരുത്തി: മഴ ശക്തമായതിന് പിന്നാലെ കടുത്തുരുത്തിയില്‍ ആഫ്രിക്കന്‍ ഒച്ചിന്‍റെ ശല്യം രൂക്ഷം. അലരി, മങ്ങാട് മേഖലകളിലാണ് ഇവ വ്യാപകമായിരിക്കുന്നത്. ഒച്ചിന്‍റെ മുട്ടകള്‍ വ്യാപകമായി വിരിഞ്ഞ് ഒച്ചുകള്‍ പെരുകുകയാണ്. കോട്ടയം മുന്‍സിപ്പാലിറ്റി ജീവനക്കാരനായ അലരി പുഴക്കരോട്ട് ടോജി ഫിലിപ്പിന്‍റെ വീട്ടിലും പരിസരത്തുമെല്ലാം ആഫ്രിക്കന്‍ ഒച്ചുകളെക്കൊണ്ടു നിറഞ്ഞിരിക്കുകയാണ്. ആഴ്ചകളായി ദിവസവും രാവിലെ പുരയിടത്തില്‍നിന്ന് ഒച്ചുകളെ കണ്ടെത്തി ഉപ്പിട്ട് നശിപ്പിക്കുകയാണ് ടോജി. സമീപത്തെ വീടുകളിലും ഒച്ചുകളെ കണ്ടെത്തിയിട്ടുണ്ട്. ചെടികളും വീട്ടിലെ ഫലവൃഷങ്ങളും പച്ചക്കറികളും ഉൾപ്പെടെ പൂര്‍ണമായും തിന്നു നശിപ്പിക്കുകയാണ് കൂട്ടത്തോടെയെത്തുന്ന ഒച്ചുകളെന്ന് ‌ടോജി പറയുന്നു. പഞ്ചായത്തിന്‍റെ വിവിധ പ്രദേശങ്ങളിലും ആഫ്രിക്കന്‍ ഒച്ചുകള്‍ വ്യാപിച്ചിരിക്കുകയാണെന്ന് നിരീക്ഷണത്തിലാണ് പ്രദേശവാസികള്‍. എന്നാല്‍, ഇക്കാര്യം കൃഷി വകുപ്പോ പഞ്ചായത്തോ ആരോഗ്യ വകുപ്പോ അറിഞ്ഞിട്ടില്ല. ഒച്ചിനെ കൂട്ടത്തോടെ നിര്‍മാര്‍ജനം ചെയ്യുന്നതിനുള്ള നടപടികള്‍ സ്വീകരിക്കണമെന്നാണ് നാട്ടുകാരുടെ ആവശ്യം.

കാരിക്കോട് കെപിപിഎല്‍ വളപ്പിലെ മണ്ണിടിഞ്ഞു റോഡിലേക്ക് വീണു

കടുത്തുരുത്തി: തലയോലപ്പറമ്പ് - വെള്ളൂര്‍ - മൂര്‍ക്കാട്ടിപ്പടി റോഡില്‍ കാരിക്കോട് മുടക്കാരി ദേവീക്ഷേത്രത്തിനു സമീപം കെപിപിഎല്‍ വക സ്ഥലത്തെ മണ്ണിടിഞ്ഞു റോഡിലേക്കു വീണു. കനത്ത മഴയെത്തുടര്‍ന്ന് കെപിപിഎല്‍ വക സ്ഥലത്തെ ഏകദേശം പത്ത് അടി ഉയരമുള്ള മണ്‍തിട്ട ഇടിഞ്ഞ് റോഡിലേക്ക് വീഴുകയായിരുന്നു. റോഡിന്‍റെ മധ്യഭാഗം വരെ മണ്ണും വലിയ മണ്‍കട്ടകളും നിറഞ്ഞിരിക്കുകയാണ്. വാഹനയാത്രക്കാര്‍ക്ക് മുന്നറിയിപ്പായി ഇവിടെ അപകട സൂചനാ ബോര്‍ഡ് സ്ഥാപിച്ചിട്ടുണ്ട്. ഇപ്പോഴും വലിയ മണ്‍കട്ടകള്‍ റോഡിലേക്ക് അടര്‍ന്നുവീഴാവുന്ന നിലയിലാണുള്ളത്. മുകളില്‍ നിരവധി മരങ്ങള്‍ നില്‍ക്കുന്നതും സ്ഥിതി കൂടുതല്‍ വഷളാക്കുന്നു. മഴ കനത്താല്‍ വീണ്ടും മണ്ണിടിച്ചില്‍ ഉണ്ടാകാന്‍ സാധ്യതയുണ്ട്. സ്‌കൂള്‍ വാഹനങ്ങള്‍ ഉള്‍പ്പെടെ നിരവധി വാഹനങ്ങള്‍ ഇതുവഴി കടന്നുപോകുന്നതിനാല്‍ മണ്ണിടിയുന്നത് വലിയ അപകടഭീഷണിയാണ് ഉയര്‍ത്തുന്നത്. മണ്ണ് നീക്കം ചെയ്യുകയും കൂടുതല്‍ മണ്ണിടിച്ചില്‍ ഉണ്ടാകാതിരിക്കാന്‍ ആവശ്യമായ നടപടികള്‍ സ്വീകരിക്കുകയും ചെയ്യണമെന്നാണ് യാത്രക്കാരുടെയും നാട്ടുകാരുടെയും ആവശ്യം. photo കാരിക്കോട് മുടക്കാരി ദേവീക്ഷേത്രത്തിനു സമീപം കെപിപിഎല്‍ വക സ്ഥലത്തെ മണ്ണിടിഞ്ഞു റോഡിലേക്കു വീണ നിലയില്‍.

അസംപ്ഷന്‍ കോളജില്‍ ബിരുദദാന ചടങ്ങ് ഇന്ന്

ചങ്ങനാശേരി: അസംപ്ഷന്‍ ഓട്ടോണമസ് കോളജില്‍ വിവിധ യുജി, പിജി കോഴ്‌സുകള്‍ പാസായ വിദ്യാര്‍ഥിനികള്‍ക്ക് ബിരുദദാന ചടങ്ങ് ഇന്നു രാവിലെ പത്തിനു നടക്കും. കോളജ് ഇന്‍ഡോര്‍ സ്റ്റേഡിയത്തില്‍ നടക്കുന്ന സമ്മേളനത്തില്‍ കോളജ് മാനേജര്‍ മോണ്‍. ആന്‍റണി എത്തയ്ക്കാട്ട് അധ്യക്ഷത വഹിക്കും. ഹയര്‍ എഡ്യൂക്കേഷന്‍ പ്രിന്‍സിപ്പല്‍ സെക്രട്ടറി ഡോ. ശര്‍മിള മേരി ജോസഫ് ഉദ്ഘാടനം ചെയ്യും. പൂര്‍വ വിദ്യാര്‍ഥിനിയും 2024ലെ സിവില്‍ സര്‍വീസ് 569-ാം റാങ്ക് ജേതാവുമായ വി. ഹേമയെ സമ്മേളനത്തില്‍ ആദരിക്കും. ജോബ് മൈക്കിള്‍ എംഎല്‍എ മുഖ്യാതിഥി ആയിരിക്കും. പ്രിന്‍സിപ്പല്‍ ഡോ. റാണി മരിയ തോമസ്, വൈസ് പ്രിന്‍സിപ്പല്‍ ഡോ. ജിസി മാത്യു, വിദ്യാര്‍ഥി പ്രതിനിധി ഷൈന്‍ മരിയ ഷാജി എന്നിവര്‍ പ്രസംഗിക്കും.

എസ്.പി. പിള്ള സ്മാരക ലൈബ്രറിയിൽ സ്മൃതിദിനാചരണം

ഏറ്റുമാനൂർ: വടക്കേനട എസ്.പി. പിള്ള സ്മാരക വനിതാ ലൈബ്രറിയുടെ ആഭിമുഖ്യത്തിൽ എസ്.പി. പിള്ള സ്മൃതിദിനം ആചരിച്ചു. പ്രസിഡന്‍റ് സരസമ്മ ആർ. പണിക്കർ അധ്യക്ഷത വഹിച്ച അനുസ്മരണ സമ്മേളനം കോട്ടയം താലൂക്ക് ലൈബ്രറി കൗൺസിൽ സെക്രട്ടറി ഷൈജു തെക്കുംചേരി ഉദ്ഘാടനം ചെയ്തു. ഏറ്റുമാനൂർ എസ്എംഎസ്എം പബ്ലിക് ലൈബ്രറി പ്രസിഡന്‍റ് ജി. പ്രകാശ് അനുസ്മരണ പ്രഭാഷണം നടത്തി. അഡ്വ. പി. രാജീവ്‌ ചിറയിൽ, പി.ആർ. രാജേന്ദ്രകുമാർ, നഗരസഭാ കൗൺസിലർ സുരേഷ് ആർ. നായർ, ശ്രീമൂലം നേച്ചർ ക്ലബ്ബ് കമ്മിറ്റി അംഗം ജയിംസ് പുളിക്കൻ, ലൈബ്രറി സെക്രട്ടറി മായ സുജി, വൈസ് പ്രസിഡന്‍റ് വി. ജ്യോതി എന്നിവർ പ്രസംഗിച്ചു. എസ്.പി. പിള്ളയുടെ ചിത്രത്തിനു മുമ്പിൽ ഭദ്രദീപം തെളിച്ച് പുഷ്പാർച്ചന നടത്തി.

കോണത്താറ്റ് പാലം നിർമാണം അടിയന്തരമായി പൂർത്തിയാക്കണം

നീണ്ടൂർ: അപകടാവസ്ഥയിലായ നീണ്ടൂർ പ്രാലേൽ പാലത്തിന്‍റെ നിർമാണം നടക്കേണ്ട സാഹചര്യത്തിൽ കുമരകം കോണത്താറ്റ് പാലം നിർമാണം പൂർത്തിയാക്കാൻ അടിയന്തര നടപടി സ്വീകരിക്കണമെന്ന് കേരള കോൺഗ്രസ്-എം നീണ്ടൂർ മണ്ഡലം കമ്മിറ്റി ആവശ്യപ്പെട്ടു. നീണ്ടൂർ പ്രാലേൽ പാലം അപകടാവസ്ഥയിലാണ്. ഇക്കാര്യം സർക്കാരിന്‍റെ ശ്രദ്ധയിൽപ്പെടുത്തുകയും കഴിഞ്ഞ ബഡ്ജറ്റിൽ പാലം പുനർനിർമിക്കുന്നതിനും സ്ഥലം ഏറ്റെടുക്കുന്നതിനും ആവശ്യമായ ഫണ്ട് വകയിരുത്തുകയും ചെയ്തിട്ടുണ്ട്. കുമരകം കോണത്താറ്റ് പാലം പൂർത്തിയാക്കാതെ നീണ്ടൂർ പ്രാലേൽ പാലം പൊളിച്ചാൽ പടിഞ്ഞാറൻ മേഖലയിലെ ഗതാഗതസംവിധാനം താളം തെറ്റും. ഇപ്പോൾത്തന്നെ ധാരാളം വാഹനങ്ങളാണ് അപകടാവസ്ഥയിലുള്ള പ്രാലേൽ പാലത്തിലൂടെ കടന്നുപോകുന്നത്. അതിനാൽ കുമരകം കോണത്താറ്റ് പാലത്തിന്‍റെ നിർമാണം അതിവേഗം പൂർത്തീകരിച്ച് അപകടാവസ്ഥയിലുള്ള പ്രാലേൽ പാലത്തിന്‍റെ നിർമാണം അടിയന്തരമായി തുടങ്ങണമെന്ന് കേരള കോൺഗ്രസ് -എം നീണ്ടൂർ മണ്ഡലം കമ്മിറ്റി ആവശ്യപ്പെട്ടു. മണ്ഡലം പ്രസിഡന്‍റ് വി.സി. മത്തായി അധ്യക്ഷത വഹിച്ചു. സംസ്ഥാന കമ്മിറ്റി അംഗം തോമസ് കോട്ടൂർ ഉദ്ഘാടനം ചെയ്തു. പഞ്ചായത്ത് മെംബർമാരായ പുഷ്പമ്മ തോമസ്, ആലീസ് ജോസഫ്, സഹകരണ ബാങ്ക് ബോർഡ് മെംബർ വിനോദ് ചാമക്കാല, ജോസി സി. ജോസഫ്, ജയ്സൺ എബ്രാഹം, ജോസ്മോൻ ജോസ്, മനോജ് സുകുമാരൻ, ഗോപി മങ്ങാട്ടുകുഴി, പ്രസാദ് പറയൻകുന്ന്, ജയിംസ് മാക്കിൽ, നിഖിൽ ഫിലിപ്, സിജു പാലക്കാട്ട്, റെജി കുടിലിൽ, സിബി വയലുങ്കൽ, ജോസ്മോൻ തറയ്ക്കൽ, ലിൻസൺ പ്രാലേൽ തുടങ്ങിയവർ പ്രസംഗിച്ചു.

മുതിര്‍ന്ന പൗരന്മാരോടുള്ള അതിക്രമം: ബോധവത്കരണ ദിനാചരണം സംഘടിപ്പിച്ചു

കോട്ടയം: ജില്ലാ സാമൂഹ്യനീതി വകുപ്പിന്‍റെ നേതൃത്വത്തില്‍ മുതിര്‍ന്ന പൗരന്മാരോടുള്ള അതിക്രമങ്ങള്‍ക്കെതിരേയുള്ള ബോധവത്കരണ ദിനാചരണം സംഘടിപ്പിച്ചു. ജില്ലാതല ഉദ്ഘാടനം സിഎംഎസ് കോളജില്‍ ജില്ലാ പഞ്ചായത്തംഗം പി.എം. മാത്യു നിര്‍വഹിച്ചു. സംസ്ഥാന വയോജന കമ്മീഷന്‍ രൂപീകരണം ഉള്‍പ്പെടെ വിവിധ ചുവടുകളാണ് സര്‍ക്കാര്‍ മുന്നോട്ടുവയ്ക്കുന്നത്. യുവജനങ്ങളുടെ കരുതലോടെയുള്ള ഇടപെടലും വയോജന സംരക്ഷണത്തില്‍ അനിവാര്യമാണെന്ന് പി.എം. മാത്യു പറഞ്ഞു. സംസ്ഥാന വയോജന കൗണ്‍സില്‍ അംഗം തോമസ് പോത്തന്‍ അധ്യക്ഷത വഹിച്ചു. കോട്ടയം നഗരസഭാധ്യക്ഷ ബിന്‍സി സെബാസ്റ്റ്യന്‍ വയോജന സംരക്ഷണ പ്രതിജ്ഞ ചൊല്ലിക്കൊടുത്തു. വി.പി. സുനില്‍കുമാര്‍ ബോധവത്കരണ ക്ലാസ് നയിച്ചു. ജില്ലാ സാമൂഹ്യനീതി ഓഫീസര്‍ പി. പ്രദീപ്, ജില്ലാ സാമൂഹ്യനീതി ഓഫീസ് സീനിയര്‍ സൂപ്രണ്ട് എം.വി. സഞ്ജയന്‍, എസ്‌സിഎഫ്ഡബ്ല്യുഎ ജില്ലാ പ്രസിഡന്‍റ് ടി.വി. മോഹന്‍കുമാര്‍ എന്നിവര്‍ പങ്കെടുത്തു. നഗരത്തിലെ പ്രധാന ഇടങ്ങളില്‍ നടത്തിയ വാഹന പ്രചാരണ ജാഥയോടൊപ്പം സിഎംഎസ് കോളജ് വിദ്യാര്‍ഥികള്‍ അവതരിപ്പിച്ച ഫ്‌ളാഷ് മോബും ശ്രദ്ധേയമായിരുന്നു.

സ്കൂളിന്‍റെ ചുറ്റുമതിൽ ഇടിഞ്ഞുവീണു

അതിരമ്പുഴ: തുടർച്ചയായി പെയ്ത മഴയിൽ സ്കൂളിന്‍റെ ചുറ്റുമതിൽ ഇടിഞ്ഞുവീണു. അതിരമ്പുഴ സെന്‍റ് മേരീസ് എൽപി സ്കൂളിന്‍റെ ചുറ്റുമതിലാണ് ഇന്നലെ ഉച്ചകഴിഞ്ഞ് ഇടിഞ്ഞുവീണത്. ഏറ്റുമാനൂർ - അതിരമ്പുഴ റോഡിലേക്കാണ് മതിൽ വീണതെങ്കിലും മറ്റ് അനിഷ്ട സംഭവങ്ങൾ ഒന്നുമുണ്ടായില്ല.

കത്തോലിക്ക കോൺഗ്രസ് അതിരമ്പുഴ ഫൊറോന സമ്മേളനം

അതിരമ്പുഴ: കത്തോലിക്ക കോൺഗ്രസ് അതിരമ്പുഴ ഫൊറോന സമ്മേളനം നടത്തി. പ്രസിഡന്‍റ് ജോയി പാറപ്പുറത്ത് അധ്യക്ഷത വഹിച്ച സമ്മേളനം അതിരമ്പുഴ ഫൊറോന വികാരി റവ.ഡോ. ജോസഫ് മുണ്ടകത്തിൽ ഉദ്ഘാടനം ചെയ്തു. ക്രൈസ്തവരുടെ പിന്നാക്കാവസ്ഥയെപ്പറ്റി പഠിക്കാൻ നിയോഗിച്ച ജസ്റ്റീസ് ബെഞ്ചമിൻ കോശി കമ്മീഷൻ റിപ്പോർട്ട് എത്രയും വേഗം പ്രസിദ്ധീകരിക്കുകയും റിപ്പോർട്ടിൽ പറഞ്ഞിരിക്കുന്ന കാര്യങ്ങൾ നടപ്പിലാക്കുകയും ചെയ്യണമെന്ന് യോഗം സർക്കാരിനോട് ആവശ്യപ്പെട്ടു. ഫാ. ജോസഫ് ആലുങ്കൽ ആമുഖ സന്ദേശം നൽകി. ഫാ. ടോണി മണക്കുന്നേൽ, സെബാസ്റ്റ്യൻ പുല്ലാട്ടുകാല, അഡ്വ. പി.പി. ജോസഫ്, ബിജോ തുളിശേരിൽ, റോബിൻ ജോസഫ് ആലഞ്ചേരി മാനാട്ട്, സൂസൻ വർഗീസ് മാത്തശേരി, ജോയി കാരിക്കൊമ്പിൽ എന്നിവർ പ്രസംഗിച്ചു. അതിരമ്പുഴ പള്ളിയിൽനിന്നു കൊടിനാട്ടുംകുന്ന് പള്ളിയിലേക്കു സ്ഥലം മാറിപ്പോകുന്ന റവ.ഡോ. ജോസഫ് മുണ്ടകത്തിലിന് സമ്മേളനത്തിൽ യാത്രയയപ്പ് നൽകി.

പിതൃദിനാചരണം

മുടിയൂർക്കര: തിരുക്കുടുംബ പളളിയിൽ പിതൃദിനത്തോടനുബന്ധിച്ച് പതാക ഉയർത്തുകയും പിതാക്കന്മാരെ ആദരിക്കുകയും ചെയ്തു. വികാരി റവ.ഡോ. ഫിലിപ്പ് നെൽപ്പുരപ്പറമ്പിൽ പിതൃദിന സന്ദേശം നൽകി. പിതൃവേദി കുടമാളൂർ ഫൊറോന ഡയറക്ടർ ഫാ. മാത്യു പുത്തൻപുരയ്ക്കൽ അധ്യക്ഷത വഹിച്ചു. മാതൃവേദി അതിരൂപതാ പ്രസിഡന്‍റ് ഡോ. റോസമ്മ സോണി മുഖ്യപ്രഭാഷണം നടത്തി. യൂണിറ്റ് പ്രസിഡന്‍റ് ജോസ് പാറയ്ക്കൽ, ബിനു മുക്കുങ്കൽ, ബിനോയ് മടുക്കുനിൽക്കുംകാലാ, സണ്ണി ചെട്ടിശേരി, ഷാജി സി. മുകളേൽ, ജോർജുകുട്ടി മടുക്കുനിൽക്കുംകാലാ, ടോം തോമസ് കണ്ണാതറ, ബേബിച്ചൻ തടത്തേൽ, ടി.വി. സോണി, ജോസ് ജേക്കബ് കുന്നത്തേട്ട്, ബേബിച്ചൻ മുകളേൽ, റെജി പോങ്ങാനാംതടം, ഷാജി പുതിയാപറമ്പിൽ, ബെന്നി പടിഞ്ഞാറെപറമ്പിൽ, കൊച്ചുമോൾ ബേബി, അനു ലൂക്കോസ് കാരക്കട, ലാലി വെള്ളാകോട്ടിൽ എന്നിവർ പ്രസംഗിച്ചു.

കാറ്റിലും മഴയിലും വൻ നാശം

കുമരകം: ശക്തമായ കാറ്റിലും മഴയിലും ഇന്നലെ രാത്രി കുമരകത്ത് വ്യാപകമായ നാശനഷ്ടങ്ങൾ ഉണ്ടായി. മരങ്ങൾ കടപുഴകി വീണ് ഗതാഗതം സ്തംഭിച്ചു. കുമരകം-അട്ടിപ്പീടിക റോഡിൽ ബിവറേജസ് കോർപറേഷന്‍റെ സമീപത്തായാണ് ആദ്യം മരം വീണത്. കോട്ടയത്തുനിന്നു വരുന്ന ചെറിയ വാഹനങ്ങൾ കോണത്താറ്റു പാലം നിർമാണം നടക്കുന്നതിനാൽ വൺവേ സംവിധാനം വഴി അട്ടിപീടിക റോഡിലെത്തിയാണ് കുമരകത്തെ പ്രധാന റോഡിലേക്ക് വീണ്ടും പ്രവേശിക്കുന്നത്. അതിനാലാണ് അട്ടിപ്പീടിക റോഡിൽ വീണ മരം വലിയ ഗതാഗതക്കുരുക്കിനിടയാക്കിയത്. കുമരകത്തിന്‍റെ വിവിധ പ്രദേശങ്ങളിലെ ചെറു റോഡുകളിലെല്ലാം മരം വീണ് ഗതാഗതം താറുമാറായി. മഴക്കെടുതി മൂലം വിവിധ സ്ഥലങ്ങളിൽ ഫയർഫോഴ്സ് ഉദ്യോഗസ്ഥർ തിരക്കിലായതിനാൽ കുമരകം എസ്എച്ച്ഒയുടെ അഭ്യർഥനപ്രകാരം ബാക്ക് വാട്ടർ റിപ്പിൾസ് റിസോർട്ടിലെ ജീവനക്കാരാണ് അട്ടിപ്പീടിക റോഡിലെ മരം മുറിച്ചുമാറ്റിയത്. മരം വീണു തകർന്ന വൈദ്യുതി പോസ്റ്റുകളും ലൈനും പുനഃസ്ഥാപിക്കാൻ രാത്രി വൈകിയും ജോലികൾ തുടർന്നു. കുമരകം പെട്രോൾ പമ്പിന്‍റെ സമീപത്തും പോളക്കുളം ബാറിനും കൈപ്പുഴമുട്ട് പാലത്തിനുമിടയിലും മരങ്ങൾ വീണു. കുമരകം അഞ്ചാം വാർഡിൽ കണ്ണാടിച്ചാൽ പാടത്തിന്‍റെ തുരുത്തിൽ താമസിക്കുന്ന കുന്നക്കാട് കുര്യാക്കോസിന്‍റെ (കുഞ്ഞ്) വീടിന്‍റെ മേൽക്കൂര പൂർണമായും തകർന്നു. കുമരകം ആറാം വാർഡിൽ ഇടവട്ടം തെക്കേത്തറ വീട്ടിൽ ജോസഫിന്‍റെ ( ബാബു) വീട് ഭാഗികമായി തകർന്നു. മണിക്കൂറിൽ 52 കിലോമീറ്റർ വേഗത്തിൽ ആഞ്ഞടിച്ച കാറ്റ് കുമരകത്തിന്‍റെ പല ഭാഗങ്ങളിലും നാശം വിതച്ചതായി പറയുന്നു. അതിരന്പുഴയിൽ അതിരമ്പുഴ: കാറ്റിൽമരങ്ങൾ കടപുഴകി. വീടുകൾക്ക് നാശനഷ്ടം. വൈദ്യുതി ലൈനുകൾ തകർന്ന് വൈദ്യുതി വിതരണം തടസപ്പെട്ടു. അതിരമ്പുഴയിൽ ഇന്നലെ വൈകുന്നേരം ആഞ്ഞടിച്ച കാറ്റിൽ വൻ നാശനഷ്ടം. മരങ്ങൾ കടപുഴകി ഒട്ടേറെ വീടുകൾക്ക് നാശനഷ്ടമുണ്ടായി. അതിരമ്പുഴ - കുറ്റിയേൽ കവല - കൈപ്പുഴ റോഡിൽ മരങ്ങൾ വീണ് വൈദ്യുതി പോസ്റ്റുകൾ ഒടിഞ്ഞു. ഗതാഗതം തടസപ്പെട്ടു. വൈദ്യുതി വിതരണം നിലച്ചു. അതിരമ്പുഴ ടൗണിൽ ഫ്ലക്സ് ബോർഡുകൾ കാറ്റിൽ പറന്നു പോയി. ടൗൺ വാർഡിലും ശ്രീകണ്ഠമംഗലം ഭാഗത്തുമായി ഒട്ടേറെ വീടുകൾക്ക് മരങ്ങൾ വീണ് നാശനഷ്ടമുണ്ടായി. കൈപ്പുഴയിലും വ്യാപകനാശം കൈപ്പുഴ: ഇന്നലെ വൈകുന്നേരമുണ്ടായ ശക്തമായ കാറ്റിലും മഴയിലും കൈപ്പുഴയിൽ വ്യാപക നാശം. കൈപ്പുഴ കുരിശുപള്ളിക്ക് സമീപം കണ്ടത്തിൽ വീട്ടിലെ തേക്കുമരം കടപുഴകി വീണ് കല്ലറ-കൈതക്കനാൽ റോഡിൽ ഗതാഗതം തടസപ്പെട്ടു. കോട്ടയത്തുനിന്നു ഫയർഫോഴ്സെത്തി മരം വെട്ടിമാറ്റി ഗതാഗതം പുനഃസ്ഥാപിച്ചു. കൈപ്പുഴ പുളിങ്കാല ഭാഗത്തും കുടിലിൽ കവല ഭാഗത്തും വീടുകളുടെ മുകളിലേക്കു മരം വീണു നാശങ്ങൾ സംഭവിച്ചു. പ്രദേശത്ത് വ്യാപക നാശമാണ് ഇന്നലെ സംഭവിച്ചത്.

കുരുക്കഴിക്കാന്‍ ഇന്നുമുതല്‍ കോട്ടയത്ത് ഗതാഗതപരിഷ്‌കാരം

കോട്ടയം: നഗരത്തിലെ ഗതാഗതക്കുരുക്കഴിക്കാന്‍ ട്രാഫിക് പരിഷ്‌കാരം. ഇന്നുമുതലാണ് നഗരത്തില്‍ പോലീസ് ട്രാഫിക് പരിഷ്‌കാരം ഏര്‍പ്പെടുത്തുന്നത്. ചാലുകുന്നു ഭാഗത്തുനിന്നു വരുന്ന ബസുകള്‍ ഇനി ശാസ്ത്രി റോഡു വഴിയാകും നാഗമ്പടം ബസ്‌ സ്റ്റാന്‍ഡിലേക്ക് പോകുക. നിലവില്‍ ബേക്കര്‍ ജംഗ്ഷനു സമീപം ആളെയിറക്കി എംസി റോഡു വഴി സീസേഴ്‌സ് ജംഗ്ഷനിലെത്തിയാണ് ബസുകള്‍ നാഗമ്പടം സ്റ്റാന്‍ഡിലേക്ക് പോയിരുന്നത്. കുമരകം, ചുങ്കം, ചാലുകുന്ന് ഭാഗത്തുനിന്നുവരുന്ന ബസുകള്‍ ബേക്കര്‍ ജംഗ്ഷനിലെത്തി നേരേ ശാസ്ത്രി റോഡില്‍ പ്രവേശിക്കും. തുടർന്ന് ശാസ്ത്രി റോഡിലെ ബസ്‌ സ്റ്റോപ്പില്‍ ആളുകളെയിറക്കും. അവിടെനിന്നു ബസുകള്‍ കുര്യന്‍ ഉതുപ്പ് റോഡ് വഴി നാഗമ്പടം ബസ്‌സ്റ്റാന്‍ഡിലെത്തും. പരീക്ഷണാടിസ്ഥാനത്തില്‍ നടപ്പാക്കുന്ന ഈ പരിഷ്‌കാരംഎത്രമാത്രം വിജയിക്കുമെന്ന് പോലീസുകാര്‍ക്കും പറയാനാകുന്നില്ല. കോട്ടയം വെസ്റ്റ് പോലീസ് എസ്എച്ച്ഒയുടെ അധ്യക്ഷതയില്‍ കോട്ടയം ട്രാഫിക് യൂണിറ്റ് ഹൗസ് ഓഫീസര്‍, പ്രൈവറ്റ് ബസ് ഓപ്പറേറ്റേഴ്‌സ് അസോസിയേഷന്‍ എന്നിവരുമായി നടത്തിയ ചര്‍ച്ചയിലാണ് പുതിയ തീരുമാനം. സ്‌കൂള്‍ കൂടി തുറന്നതോടെ നഗരത്തില്‍ പലയിടത്തും ഗതാഗതക്കുരുക്ക് രൂക്ഷമാണ്. ചന്തക്കവലയില്‍ സിഗ്നല്‍ സംവിധാനമില്ലാത്തതിനാല്‍ ചന്തയ്ക്കുള്ളില്‍നിന്നു വാഹങ്ങള്‍ തോന്നുന്നതുപോലെ കയറുന്നതും ഇറങ്ങുന്നതും അപകടത്തിനിടയാക്കുന്നു. അതേപോലെ കുമരകം റോഡിലൂടെ വരുന്ന വാഹനങ്ങള്‍ എംസി റോഡിൽ ശക്തി ഹോട്ടലിനുസമീപത്ത് ഡിവൈഡറുകള്‍ തീരുന്നിടത്ത് ഇറക്കത്തില്‍ വച്ചു യു ടേണ്‍ എടുക്കുന്നതും ഗതാഗതക്കുരുക്കിനു കാരണമാകുന്നുണ്ട്. എംസി റോഡില്‍നിന്നു യാതൊരു നിയന്ത്രണവുമില്ലാതെ ശക്തി ഹോട്ടലിനു സമീപമുള്ള റോഡില്‍ കൂടി വാഹനങ്ങള്‍ കുമരകം റോഡിലേക്കും പ്രവേശിക്കുന്നുണ്ട്. ഇതും അപകടങ്ങള്‍ക്ക് കാരണമാകുന്നുണ്ട്. ബേക്കര്‍ ജംഗ്ഷനിലെ ട്രാഫിക് ഐലന്‍ഡിലാണ് എപ്പോഴും ഗതാഗതകുരുക്ക് അനുഭവപ്പെടുന്നത്. ഇവിടെ വലിയ വാഹനങ്ങള്‍ റോഡ് നിറഞ്ഞ് നിര്‍ത്തുന്നതും കുരുക്കിനു കാരണമാകുന്നുണ്ട്. നഗരത്തില്‍ പലയിടത്തും ട്രാഫിക് പോലീസിന്‍റെ സേവനം കാര്യക്ഷമല്ലെന്നും പരാതിയുണ്ട്. സീബ്രാലൈനുകള്‍ പലയിടത്തും മാഞ്ഞുകിടക്കുകയാണ്. ആളുകള്‍ തോന്നുംപടിയാണ് റോഡ് മുറിച്ചുകടക്കുന്നത്. നഗരത്തിലെ ട്രാഫിക് സംവിധാനങ്ങൾ അടിയന്തരമായി പരിഷ്കരിക്കണമെന്ന ആവശ്യം ശക്തമായിട്ടുണ്ട്.

അപകടഭീഷണിയിലായ എരുത്തുപുഴ പാലം വീതികൂട്ടി നവീകരിക്കണം

കൂരോപ്പട: ഒറവയ്ക്കൽ-കൂരാലി റോഡിലെ കൂരോപ്പട എരുത്തുപുഴയിൽ പന്നഗം തോടിനു കുറുകെയുള്ള എരുത്തുപുഴ പാലം യാത്രക്കാർക്ക് ഭീഷണിയാകുന്നു. കാലപ്പഴക്കം മൂലമുള്ള കേടുപാടുകൾ സംഭവിച്ചിട്ടുള്ള ഈ പാലത്തിന് കഷ്ടിച്ച് ഒരു ബസിന് കടന്നുപോകാവുന്നത്ര വീതി മാത്രമാണുള്ളത്. തിരക്കേറിയ രാവിലെയും വൈകുന്നേരവും പാലത്തിന്‍റെ ഇരുഭാഗത്തും രൂപപ്പെടുന്ന വാഹനങ്ങളുടെ നിര ഗതാഗതക്കുരുക്കിനും കാരണമാകുന്നുണ്ട്. വാഹനബാഹുല്യം മൂലം പാലത്തിലൂടെ കാൽനടയാത്രയും ദുഷ്‌കരമാണ്. നടപ്പാതയില്ലാത്തതിനാൽ കാൽനട യാത്രികർക്ക് മറ്റു മാർഗങ്ങളുമില്ല. പലപ്രാവശ്യം റോഡ് നവീകരിച്ചപ്പോഴും പാലം പഴയപടി തുടരുകയായിരുന്നു. 65 വർഷത്തെ പഴക്കമുള്ള ഈ പാലത്തിലൂടെ ദിവസേന 100 കണക്കിന് വാഹനങ്ങളാണ് കടന്നുപോകുന്നത്. ഇരുവശവും ഇറക്കമുള്ള വീതിയുള്ള റോഡ് ആ‍യതിനാൽ പലപ്പോഴും വാഹനങ്ങൾ അതിവേഗത്തിലാണ് പാലത്തിലേക്ക് പ്രവേശിക്കുക. പാലത്തിൽ ക‍യറുന്പോഴാണ് വീതിക്കുറവ് ശ്രദ്ധയിൽപ്പെടുക. കോൺക്രീറ്റിൽ നിർമിച്ച പാലത്തിന്‍റെ ഇരുവശത്തുമുള്ള കൈവരികൾ ഇപ്പോൾ വാഹനങ്ങൾ ഇടിച്ചു തകർന്നനിലയിലാണ്. 30 അടിയോളം ഉയരത്തിലുള്ള പാലത്തിൽനിന്ന് താഴേക്ക് പോയാൽ കുത്തൊഴുക്കുള്ള പന്നഗം തോട്ടിലേക്കാണ് വീഴുന്നത്. ഒരു മാസത്തിനിടെ രണ്ട് അപകടങ്ങൾ പാലത്തിൽ ഉണ്ടായി. എന്നാൽ അപകട മരണമുണ്ടായാലേ അധികൃതർ നടപടിയെടുക്കൂ എന്നുവരുന്നത് അനാസ്ഥയാണ്. കഴിഞ്ഞമാസം പൊതുമരാമത്ത് വകുപ്പിന്‍റെ കീഴിൽ നവീകരണം പൂർത്തിയാക്കിയ വിവിധ റോഡുകളുടെ ഉദ്ഘാടനം സർക്കാർ ഒരുമിച്ച് നടത്തിയതിൽ ഉൾപ്പെട്ട റോഡിലാണ് ഈ പാലമുള്ളത്. തകർന്ന കൈവരികളുടെ അറ്റകുറ്റപ്പണി അടിയന്തരമായി പൂർത്തിയാക്കുന്നതിനൊപ്പം അപകടമൊഴിവാക്കാൻ പാലം വീതികൂട്ടി പുനർനിർമിക്കണമെന്നാണ് നാട്ടുകാരുടെ ആവശ്യം.

റോഡുകളില്‍ അപകടകരമായ രീതിയില്‍ മരങ്ങള്‍

കോട്ടയം: മഴ ശക്തമായതോടെ ജില്ലയില്‍ മരങ്ങള്‍ ഒടിഞ്ഞുവീണുള്ള അപകടങ്ങള്‍ വര്‍ധിക്കുകയാണ്. ഇന്നലെ എരുമേലിയില്‍ ചെറുവള്ളി എസ്റ്റേറ്റില്‍ മരം വീണു തോട്ടം തൊഴിലാളി മരിച്ചതാണ് ദാരുണമായ സംഭവം. കോട്ടയത്തുനിന്ന് മെഡിക്കല്‍ കോളജിലേക്കുള്ള ബൈപാസ് റോഡില്‍ കൂറ്റന്‍ വാകമരം രാവിലെ വീണ് ഒരു പകല്‍ മുഴുവനാണ് ഗതാഗതം തടസപ്പെട്ടത്. ഓട്ടോറിക്ഷയുടെ മുകളിലേക്കാണ് മരം വീണത്. യാത്രക്കാര്‍ അത്ഭുതകരമായിട്ടാണ് രക്ഷപ്പെട്ടത്. വമ്പന്‍ മരത്തിന്‍റെ തടിയും ശിഖരങ്ങളും വെട്ടിമാറ്റാനായത് വൈകുന്നേരമാണ്. വൈക്കത്തിനു സമീപം വെള്ളൂരില്‍ തേക്കുമരം കോഴി ഫാമിനു മുകളില്‍ വീണ് 200 കോഴികള്‍ ചത്തതാണ് മറ്റൊരു സംഭവം. പാതയോരങ്ങളിലും പ്രധാനപ്പെട്ട കവലകളിലും മറ്റും നില്‍ക്കുന്ന കൂറ്റന്‍ മരങ്ങള്‍ യാത്രക്കാര്‍ക്ക് വലിയ അപകട ഭീഷണിയാണുയര്‍ത്തുന്നത്. കാലപ്പഴക്കത്താലും ശിഖരങ്ങളുടെ ഭാരത്താലുമാണ് മരങ്ങള്‍ ഒടിഞ്ഞുവീഴുന്നത്. കൂടാതെ വഴിയോരങ്ങളിലും മറ്റും നില്‍ക്കുന്ന മരങ്ങളുടെ വേരുകള്‍ കാര്യമായി മണ്ണിലേക്ക് ആഴ്ന്നിറങ്ങുന്നുമില്ല. കൂടാതെ ഒരു കാലം കഴിയുമ്പോള്‍ വാകമരത്തിന്‍റെ വേരുകള്‍ ചീയാന്‍ തുടങ്ങും. കേബിളുകള്‍ക്കും മറ്റുമായി മരത്തിന്‍റെ ചുവടുമാന്തി കുഴിയെടുക്കുന്നതും അപകടത്തിനു കാരണമാകുന്നു. മഴ മരം, ഉറക്കംതൂങ്ങിമരം എന്നു വിളിക്കുന്ന വാകമരം എന്നിവ ജില്ലയുടെ പ്രധാനപ്പെട്ട റോഡുകളിലെല്ലാം ധാരാളമായിട്ടുണ്ട്. പലതും അപകടാവസ്ഥയിലാണ്. സ്‌കൂളുകളുടെയും മറ്റും മുറ്റത്തുനിന്നിരുന്ന അപകട മരങ്ങള്‍ സ്കൂള്‍ തുറക്കലിനു മുമ്പായി വിദ്യാഭ്യാസ വകുപ്പ് അധികൃതര്‍ വെട്ടിമാറ്റിയിരുന്നു. റോഡുകളില്‍ നില്‍ക്കുന്ന അപകടകരമായ മരങ്ങള്‍ വെട്ടിമാറ്റേണ്ട ചുമതല പൊതുമരാമത്ത്, തദ്ദേശ സ്വയംഭരണ വകുപ്പുകള്‍ക്കാണ്. കഴിഞ്ഞ ഒരു മാസത്തിനിടയില്‍ ജില്ലയില്‍ അപകടകരമായ 400 മരങ്ങള്‍ വെട്ടിമാറ്റണമെന്നാണ് ജില്ലാ ട്രീ കമ്മിറ്റിക്കു മുമ്പാകെ അപേക്ഷ വന്നത്. അപേക്ഷകള്‍ വിശദമായി പരിശോധിച്ച് 400 മരങ്ങളും വെട്ടിമാറ്റാന്‍ ട്രീ കമ്മിറ്റി അനുമതി നല്‍കിയിരുന്നു. എന്നാല്‍ വെട്ടിമാറ്റേണ്ട വകുപ്പുകള്‍ ഇക്കാര്യത്തില്‍ നിസംഗത തുടരുകയാണ്. ചുങ്കം ബൈപാസിലെ മരം അപകടകരമായ രീതിയലാണെന്ന് ദീപിക പലതവണ ചിത്രം സഹിതം റിപ്പോര്‍ട്ട് ചെയ്തിരുന്നു. നാട്ടുകാരും വ്യാപാരികളും ബന്ധപ്പെട്ട അധികാരികള്‍ക്ക് പരാതിയും നല്‍കിയിരുന്നു. എന്നാല്‍, ഇതു വെട്ടിമാറ്റാന്‍ അധികൃതര്‍ തയാറായില്ല.

ചുങ്കം പാലത്തിനു സമീപം വൻമരം റോഡിലേക്ക് വീണു

കോട്ടയം: ശക്തമായ കാറ്റിലും മഴയത്തും ചുങ്കത്ത് പാലത്തിനു സമീപം കൂറ്റന്‍ വാകമരം റോഡിലേക്ക് കടപുഴകി വീണു. കോട്ടയം ചുങ്കം മെഡിക്കല്‍ കോളജ് ബൈപാസില്‍ ചുങ്കം പാലത്തിനു സമീപം ഇന്നലെ രാവിലെ 6.45 ഓടെയായിരുന്നു സംഭവം. മരത്തിന്‍റെ ശിഖരങ്ങള്‍ പതിച്ച് സമീപത്തെ ചുങ്കം കോയിക്കല്‍ ജോണിന്‍റെ വീട് ഭാഗികമായി തകർന്നു. രാവിലെ വീടിനു സമീപത്തെ കടയിലേക്ക് പോയി തിരികെ വീട്ടിലേക്ക് വരുമ്പോഴായിരുന്നു സംഭവമെന്ന് ജോണ്‍ പറയുന്നു. ശബ്ദം കേട്ട് മുകളിലേക്ക് നോക്കുമ്പോള്‍ വീടിനോട് ചേര്‍ന്നുനിന്ന വാകമരം ഒടിഞ്ഞ് വീഴുന്നതാണ് കണ്ടത്. ചില്ലകളില്‍ ചിലത് ദേഹത്തേക്കും വീണു. ഈ സമയം വീടിനുള്ളിൽ ഭാര്യ ലില്ലി മാത്രമാണുണ്ടായിരുന്നത്. പിന്നീട് അഗ്‌നിരക്ഷാസേന എത്തി മരച്ചില്ലകള്‍ മുറിച്ച് മാറ്റിയാണ് ഇവരെ പുറത്തിറക്കിയത്. ഇവര്‍ക്ക് മറ്റു പരിക്കുകളില്ല. വൈദ്യുതി കമ്പിയിലേക്ക് ചില്ലവീണ് ലൈനുകള്‍ കൂട്ടിമുട്ടി തീ കത്തി വൈദ്യുതി ബന്ധം വിച്ഛേദിക്കപ്പെട്ടു. മരം വീണതിനെത്തുടര്‍ന്ന് മണിക്കൂറുകളോളം ഗതാഗതക്കുരുക്കുണ്ടായി. റോഡരികില്‍നിന്നിരുന്ന മരം റോഡിനു കുറുകെയാണ് വീണത്. മരം വീഴുന്നതിന് അല്പം മുന്പ് പാലം കടന്ന ഓട്ടോറിക്ഷ സെക്കന്‍ഡുകളുടെ വ്യത്യാസത്തിലാണ് അപകടത്തില്‍നിന്ന് രക്ഷപ്പെട്ടതെന്ന് നാട്ടുകാര്‍ പറഞ്ഞു. ഞായറാഴ്ച ആയതിനാലും പുലർച്ചെ റോഡിൽ തിരക്കില്ലാതിരുന്നതിനാലും വലിയ ദുരന്തം ഒഴിവായി. മെഡിക്കല്‍ കോളജിലേക്കുള്ള ആംബുലന്‍സുകളടക്കം പോകുന്ന റൂട്ടാണിത്. വൈകുന്നേരത്തോടെയാണ് ഗതാഗതം പുനഃസ്ഥാപിച്ചത്. പ്രദേശത്തെ വൈദ്യുതി വിതരണവും വൈകിട്ടോടെ പുനഃസ്ഥാപിച്ചു. കോട്ടയം അഗ്‌നിരക്ഷാസേനയുടെ യും ഗാന്ധിനഗര്‍, കോട്ടയം വെസ്റ്റ് പോലീസ് സ്റ്റേഷനിലെ ഉദ്യോഗസ്ഥരുടെയും നേതൃത്വത്തില്‍ തൊഴിലാളികളെ ഉപയോഗിച്ച് ഒരു പകൽ മുഴുവന്‍ സമയമെടുത്താണ് മരം മുറിച്ചു നീക്കിയത്. ജെസിബി, ക്രെയിന്‍ എന്നിവയുടെ സഹായത്തോടെയാണ് കൂറ്റന്‍ മരത്തടികളും ശിഖരങ്ങളും പൂര്‍ണമായും വെട്ടിമാറ്റിയത്.

സ്കൂട്ടറിലേക്ക് മരം വീണ് തോട്ടം തൊഴിലാളി മരിച്ചു

എരുമേലി: സ്കൂട്ടറിൽ വരുമ്പോൾ റബർ മരം ഒടിഞ്ഞുവീണ് വൈദ്യുതി ലൈനിൽ തട്ടിയ ശേഷം സ്കൂട്ടറിലേക്കു വീണ് തോട്ടം തൊഴിലാളി മരിച്ചു. ചെറുവള്ളി എസ്റ്റേറ്റ് അഞ്ചാം ഡിവിഷനിൽ താമസിക്കുന്ന മുനിയ സ്വാമി (56) ആണ് മരിച്ചത്. ഇന്നലെ ഉച്ചകഴിഞ്ഞ് രണ്ടോടെയാണ് അപകടം. എസ്റ്റേറ്റ് തൊഴിലാളിയായ മുനിയ സ്വാമി വീട്ടിൽനിന്ന് എരുമേലിയിലേക്ക് സ്കൂട്ടറോടിച്ച് വരുമ്പോൾ എസ്റ്റേറ്റിലെ പഴയ ഫാക്ടറി ഭാഗത്തുവച്ച് റബർ മരം ഒടിഞ്ഞ് സ്കൂട്ടറിന് മുകളിൽ വീഴുകയായിരുന്നു. വൈദ്യുതി ലൈനിൽ തട്ടിയ ശേഷം മരം സ്കൂട്ടറിലേക്ക് വീണതിനൊപ്പം വൈദ്യുതി പ്രവാഹം ഉണ്ടായി. എരുമേലിയിലെ സർക്കാർ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. പോസ്റ്റ്മോർട്ടത്തിന് ശേഷം ഇന്ന് വൈകുന്നേരം നാലിന് എസ്റ്റേറ്റ് ശ്മശാനത്തിൽ മൃതദേഹം സംസ്‌കരിക്കും. വേലുതായി ആണ് ഭാര്യ. മക്കൾ: വിഷ്ണു, വിജയ്.

അപകടകരമായ മരങ്ങള്‍: പരാതി നൽകാം

കോട്ടയം: പൊതുസ്ഥലങ്ങളില്‍ അപകടകരമായ രീതിയില്‍ മരങ്ങള്‍ നില്‍പ്പുണ്ടെങ്കില്‍ തദ്ദേശസ്വയം ഭരണ സ്ഥാപനത്തിന്‍റെ പരിധയിലാണെങ്കിലും പൊതുമരാമത്ത് വകുപ്പിന്‍റെ പരിധിയിലാണെങ്കിലും ബന്ധപ്പെട്ട വകുപ്പില്‍ പരാതി നല്‍കാം. പരാതി അതതു വകുപ്പുകള്‍ ജില്ലാ ട്രീ കമ്മിറ്റിക്ക് നല്‍കും. ട്രീ കമ്മിറ്റി 15 ദിവസത്തിനകം ബന്ധപ്പെട്ട സ്ഥലത്ത് നേരിട്ട് സന്ദര്‍ശനം നടത്തി റിപ്പോര്‍ട്ട് സമര്‍പ്പിക്കും. ഇതനുസരിച്ചാണ് മരങ്ങള്‍ വെട്ടുന്നത്. നേരത്തേ വനം വകുപ്പിനായിരുന്നു ട്രീ കമ്മിറ്റിയുടെ ചുമതല. ഇപ്പോള്‍ ജില്ലാ പഞ്ചായത്ത് സെക്രട്ടറിമാരാണ് ട്രീ കമ്മിറ്റിയുടെ ചുമതല നിര്‍വഹിക്കുന്നത്. വ്യക്തമായ കാരണത്തിന്‍റെ അടിസ്ഥാനത്തില്‍ ഒരു കാരണവശാലും വെട്ടാന്‍ പാടില്ലെന്ന് ട്രീ കമ്മിറ്റി സത്യവാംഗ്മൂലം നല്‍കിയാല്‍ മാത്രമേ മരം വെട്ടാതിരിക്കുകയുള്ളൂ. നിലവില്‍ ട്രീ കമ്മറ്റിക്കു മുമ്പാകെ ഇതുവരെ വന്ന മുഴുവന്‍ പരാതികളിലും മരങ്ങള്‍ വെട്ടിമാറ്റാന്‍ അനുമതി നല്‍കിയിട്ടുണ്ട്. വീടുകൾക്ക് ഭീഷണിയായി മരങ്ങൾ നിൽപുണ്ടെങ്കിൽ പഞ്ചായത്തിലും നഗരസഭയിലും പരാതിപ്പെട്ടാൽ അധികൃതർ നടപടിയെടുക്കും. അപകടകരമായ രീതിയിലുള്ള മരങ്ങൾ സ്വന്തം ചെലവിൽ വെട്ടിമാറ്റണമന്നും അല്ലാത്ത പക്ഷം നഷ്ടപരിഹരം ഉൾപ്പെടെ അതതു വ്യക്തികളിൽ നിന്ന് ഈടാക്കുമെന്ന് പഞ്ചായത്തും നഗരസഭയും ഉത്തരവിറക്കിയിട്ടുണ്ട്.

കോഴിഫാമിനു മുകളിൽ മരംവീണ് 200 കോഴിക്കുഞ്ഞുങ്ങൾ ചത്തു

വെള്ളൂർ: ശക്തമായ കാറ്റിൽ തേക്ക് മരം കോഴിഫാമിന് മുകളിലേക്ക് വീണ് 200 കോഴിക്കുഞ്ഞുങ്ങൾ ചത്തു. മേവെള്ളൂർ പമ്പ് ഹൗസിനു സമീപം തേയത്ത് ടി.വി. മധുവിന്‍റെ ഉടമസ്ഥതയിലുള്ള കോഴി ഫാമിനു മുകളിലേക്ക് പുരയിടത്തിൽനിന്ന കൂറ്റൻ തേക്ക് മരം ഇന്നലെ പുലർച്ചെ കടപുഴകി വീണാണ് കോഴിക്കുഞ്ഞുങ്ങൾ കൂട്ടത്തോടെ ചത്തത്. മരം വീണ് കോഴിഫാമിന്‍റെ ഒരു വശം പൂർണമായും തകർന്നു. രണ്ടു ലക്ഷത്തിലധികം രൂപയുടെ നാശനഷ്ടമുണ്ടായതായി ഉടമ പറഞ്ഞു.

കാറ്റിനെ നേരിടാനുള്ള പൊതുജാഗ്രതാ നിര്‍ദേശങ്ങള്‍

കാറ്റും മഴയും ഉണ്ടാകുമ്പോള്‍ ഒരു കാരണവശാലും മരങ്ങളുടെ ചുവട്ടില്‍ നില്‍ക്കാന്‍ പാടുള്ളതല്ല. മരച്ചുവട്ടില്‍ വാഹനങ്ങളും പാര്‍ക്ക് ചെയ്യരുത്. വീട്ടുവളപ്പിലെ മരങ്ങളുടെ അപകടകരമായ രീതിയിലുള്ള ചില്ലകള്‍ വെട്ടിയൊതുക്കണം. അപകടാവസ്ഥയിലുള്ള മരങ്ങള്‍ പൊതുവിടങ്ങളില്‍ ശ്രദ്ധയില്‍ പെട്ടാല്‍ ബന്ധപ്പെട്ട തദ്ദേശ സ്ഥാപനങ്ങളെ അറിയിക്കുക. ഉറപ്പില്ലാത്ത പരസ്യബോര്‍ഡുകള്‍, ഇലക്‌ട്രിക് പോസ്റ്റുകള്‍, കൊടിമരങ്ങള്‍ തുടങ്ങിയവയും കാറ്റില്‍ വീഴാന്‍ സാധ്യതയുള്ളതിനാല്‍ കാറ്റും മഴയും ഇല്ലാത്ത സമയത്ത് അവ ശരിയായ രീതിയില്‍ ബലപ്പെടുത്തുകയോ അഴിച്ചു വയ്ക്കുകയോ ചെയ്യുക. കാറ്റും മഴയും ഉള്ളപ്പോള്‍ ഇതിന്‍റെ ചുവട്ടിലും സമീപത്തും നില്‍ക്കുകയോ വാഹനങ്ങള്‍ പാര്‍ക്ക് ചെയ്യുകയോ അരുത്. ചുമരിലോ മറ്റോ ചാരിവച്ചിട്ടുള്ള കോണി പോലെയുള്ള, കാറ്റില്‍ വീണുപോകാന്‍ സാധ്യതയുള്ള ഉപകരണങ്ങളും മറ്റ് വസ്തുക്കളും കയറുപയോഗിച്ച് കെട്ടിവയ്ക്കുക. കാറ്റ് വീശിത്തുടങ്ങുമ്പോള്‍തന്നെ വീടുകളിലെ ജനലുകളും വാതിലുകളും അടച്ചിടേണ്ടതാണ്. ജനലുകളുടെയും വാതിലുകളുടെയും സമീപത്ത് നില്‍ക്കാതിരിക്കുക. വീടിന്‍റെ ടെറസിലും നില്‍ക്കുന്നത് ഒഴിവാക്കുക. ഓല മേഞ്ഞതോ, ഷീറ്റ് പാകിയതോ, അടച്ചുറപ്പില്ലാത്തതോ ആയ വീടുകളില്‍ താമസിക്കുന്നവര്‍ മുന്നറിയിപ്പ് വരുന്ന ഘട്ടങ്ങളില്‍ അധികൃതര്‍ ആവശ്യപ്പെടുന്ന മുറയ്ക്ക് സുരക്ഷിതമായ കെട്ടിടങ്ങളിലേക്ക് മാറിത്താമസിക്കേണ്ടതാണ്. നിര്‍മാണ ജോലികളില്‍ ഏര്‍പ്പെടുന്നവര്‍ കാറ്റും മഴയും ശക്തമാകുമ്പോള്‍ ജോലി നിര്‍ത്തിവച്ച് സുരക്ഷിതമായ ഇടത്തേക്ക് മാറി നില്‍ക്കണം.

ജില്ലയില്‍ മഴ ശക്തം

കോട്ടയം: ജില്ലയില്‍ വീണ്ടും മഴ ശക്തിപ്രാപിച്ചു. കോട്ടയം, ചങ്ങനാശേരി, വൈക്കം താലൂക്കുകളില്‍ ശക്തമായ മഴയും കാറ്റുമുണ്ടായി. ശക്തമായ കാറ്റില്‍ മരങ്ങള്‍ ഒടിഞ്ഞ് നിരവധി അപടങ്ങളുമുണ്ടായി. മീനച്ചില്‍, മണിമല, മൂവാറ്റുപുഴയാറുകളില്‍ ജലനിരപ്പ് ഉയര്‍ന്നു. ചങ്ങനാശേരി താലൂക്കില്‍ ഒരു ദുരിതാശ്വാസ ക്യാമ്പ് പ്രവര്‍ത്തിക്കുന്നുണ്ട്. ഇവിടെ രണ്ടു കുടുംബങ്ങള്‍ കഴിയുന്നു. മാടപ്പള്ളി വില്ലേജില്‍ ജോര്‍ജ് തോമസ് എന്ന ആളിന്റെ വീടിനു മുകളില്‍ മണ്ണ് ഇടിഞ്ഞുവീണു, അതിരമ്പുഴ ജംഗ്ഷനിലുള്ള സെന്‍റ് മേരീസ് എല്‍പി സ്‌കൂളിന്‍റെ മതില്‍ തകര്‍ന്നുവീണു. മലയോര മേഖലയില്‍ രാത്രി യാത്ര നിരോധിച്ചിട്ടുണ്ട്. ജില്ലയില്‍ ഖനനവും നിരോധിച്ചു. രാത്രിയിലും ശക്തമായ മഴ തുടരുകയാണ്.

വൈദ്യുതി കമ്പികള്‍ പൊട്ടിവീണാല്‍...

കോട്ടയം: കാറ്റും മഴയും ശക്തമാകുമ്പോള്‍ വൈദ്യുതി കമ്പികളും പോസ്റ്റുകളും പൊട്ടിവീഴാനുള്ള സാധ്യത കൂടുതലാണ്. ഇത്തരത്തില്‍ ഏതെങ്കിലും അപകടം ശ്രദ്ധയില്‍ പെട്ടാല്‍ ഉടനെ തന്നെ കെഎസ്ഇബിയുടെ 1912 എന്ന കണ്‍ട്രോള്‍ റൂമിലോ 1077 എന്ന നമ്പറില്‍ ജില്ലാ ദുരന്ത നിവാരണ അഥോറിറ്റിയുടെ കണ്‍ട്രോള്‍ റൂമിലോ വിവരം അറിയിക്കുക. കെഎസ്ഇിബി ജീവനക്കാരുമായി പൊതുജനങ്ങള്‍ ക്ഷമയോടെ സഹകരിക്കുക. പൊതുജനങ്ങള്‍ നേരിട്ടിറങ്ങി ഇത്തരം അറ്റകുറ്റപ്പണികൾ ചെയ്യാതിരിക്കുക. പത്രം-പാല്‍ വിതരണക്കാര്‍ പോലെയുള്ള അതിരാവിലെ ജോലിക്ക് ഇറങ്ങുന്നവര്‍ പ്രത്യേക ജാഗ്രത പാലിക്കണം. വഴികളിലെ വെള്ളക്കെട്ടുകളിലും മറ്റും വൈദ്യുതി ലൈന്‍ പൊട്ടിവീണിട്ടില്ലെന്ന് ഉറപ്പാക്കാന്‍ ശ്രമിക്കണം. കൃഷിയിടങ്ങളില്‍കൂടി കടന്നുപോകുന്ന വൈദ്യുത ലൈനുകളും സുരക്ഷിതമാണെന്ന് പാടത്ത് ഇറങ്ങുന്നതിന് മുന്‍പ് ഉറപ്പ് വരുത്തുക.

സാനിട്ടേഷന്‍ ബ്ലോക്ക് ഉദ്ഘാടനം ചെയ്തു

പാദുവ: ജില്ലാ പഞ്ചായത്തിന്‍റെ പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ ജോസ് മോന്‍ മുണ്ടയ്ക്കല്‍ അനുവദിച്ച അഞ്ചു ലക്ഷം രൂപ ഉപയോഗിച്ച് അകലക്കുന്നം പഞ്ചായത്തിലെ പാദുവ സെന്‍റ് ആന്‍റണീസ് എല്‍പി സ്‌കൂളില്‍ സാനിട്ടേഷന്‍ ബ്ലോക്കിന്‍റെ നിര്‍മാണം പൂര്‍ത്തീകരിച്ചു. ജോസ്മോന്‍ മുണ്ടയ്ക്കല്‍ സാനിട്ടേഷൻ ബ്ലോക്കിന്‍റെ ഉദ്ഘാടനം നിര്‍വഹിച്ചു. യോഗത്തില്‍ സ്‌കൂള്‍ മാനേജര്‍ ഫാ. തോമസ് ഓലായത്തില്‍ അധ്യക്ഷത വഹിച്ചു. പഞ്ചായത്ത് മെംബര്‍ മാത്തുക്കുട്ടി കൈമരപ്ലാക്കല്‍, ഹെഡ്മിസ്ട്രസ് സിസ്റ്റര്‍ പൗളിന്‍, മാത്യു ജോസഫ് കരിപ്പാമറ്റം, തങ്കച്ചന്‍ കടുപ്പില്‍ എന്നിവര്‍ പ്രസംഗിച്ചു.

ജില്ലാതല ലോക രക്തദായക ദിനാചരണവും മെഗാ രക്തദാന ക്യാമ്പും ഇന്നു പാലായില്‍

പാലാ: ജില്ലാ ആരോഗ്യ വകുപ്പിന്‍റെയും ആരോഗ്യ കേരളത്തിന്‍റെയും പാലാ ബ്ലഡ് ഫോറത്തിന്‍റെയും പാലാ സെന്‍റ് തോമസ് കോളജ് എന്‍എസ്എസ് യൂണിറ്റിന്‍റെയും നേതൃത്വത്തില്‍ ജില്ലാതല ലോക രക്തദായക ദിനാചരണവും മെഗാ രക്തദാന ക്യാമ്പും ഇന്നു പാലായില്‍ നടക്കും. പാലാ സെന്‍റ് തോമസ് കോളജ് ഓഡിറ്റോറിയത്തില്‍ രാവിലെ 9.30ന് ആരംഭിക്കുന്ന രക്തദാന ക്യാമ്പ് പാലാ ബ്ലഡ് ഫോറം ജനറല്‍ കണ്‍വീനര്‍ ഷിബു തെക്കേമറ്റം ഉദ്ഘാടനം ചെയ്യും. 11.45ന് ജില്ലാ മെഡിക്കല്‍ ഓഫീസര്‍ ഡോ. എന്‍. പ്രിയയുടെ അധ്യക്ഷതയില്‍ ചേരുന്ന സമ്മേളനത്തില്‍ ജോസ് കെ. മാണി എംപി ദിനാചരണം ഉദ്ഘാടനം ചെയ്യും. കോളജ് പ്രിന്‍സിപ്പല്‍ ഡോ. സിബി ജയിംസ്, മുനിസിപ്പല്‍ കൗണ്‍സിലര്‍ ജിമ്മി ജോസഫ്, ആരോഗ്യകേരളം ജില്ലാ പ്രോഗ്രാം മാനേജര്‍ ഡോ. വ്യാസ് സുകുമാരന്‍, ജനറല്‍ ആശുപത്രി സൂപ്രണ്ട് ഡോ. ടി.പി അഭിലാഷ്, എന്‍എസ്എസ് പ്രോഗ്രാം ഓഫീസര്‍മാരായ ഡോ. പ്രിന്‍സി ഫിലിപ്പ്, ഡോ. ആന്‍റോ മാത്യു, ആരോഗ്യകേരളം പ്രോഗ്രാം കോ-ഓര്‍ഡിനേറ്റര്‍ സി. ആര്‍. വിനീഷ്, ഡെപ്യൂട്ടി മാസ് ഇന്‍ ചാര്‍ജ് ജി. ജയരാജ്, സിബി മാത്യു പ്ലാത്തോട്ടം എന്നിവര്‍ പ്രസംഗിക്കും. പാലാ മരിയന്‍ മെഡിക്കല്‍ സെന്‍റര്‍ ബ്ലഡ് ബാങ്ക് ക്യാമ്പ് നയിക്കും.

വിദ്യാർഥികളിലൂടെ 2047ൽ വികസിത ഭാരതമെന്ന ലക്ഷ്യം നേടണം: ഗവർണർ സി.പി. രാധാകൃഷ്ണൻ

മാന്നാനം: വിദ്യാർഥികളിലൂടെ 2047ൽ വികസിത ഭാരതം എന്ന ലക്ഷ്യം സ്വായത്തമാക്കണമെന്ന് മഹാരാഷ്‌ട്ര ഗവർണർ ഡോ.സി.പി. രാധാകൃഷ്ണൻ. സിറ്റിസൺസ് ഫോറത്തിന്‍റെ നേതൃത്വത്തിൽ മാന്നാനം കുര്യാക്കോസ് ഏലിയാസ് ഇംഗ്ലീഷ് മീഡിയം സ്കൂളിൽ നടത്തിയ ‘വികസിത് ഭാരത് -2047’ സംവാദം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഇന്നത്തെ കുട്ടികൾ നാളത്തെ പൗരന്മാരാണെന്ന തിരിച്ചറിവോടെ കുഞ്ഞുങ്ങളെ രാജ്യത്തിന്‍റെ വികസനത്തിനും പുരോഗതിക്കും ഉതകുംവിധം ഉത്തമപൗരന്മാരായി വളർത്തിയെടുക്കണം. അധ്യാപകരിലൂടെ കുഞ്ഞുങ്ങൾ സ്വരാജ്യത്തിന്‍റെ മൂല്യങ്ങളും ലക്ഷ്യങ്ങളും തിരിച്ചറിയണമെന്ന് ഗവർണർ പറഞ്ഞു. എംജി യൂണിവേഴ്സിറ്റി മുൻ വൈസ് ചാൻസലർ ഡോ. സിറിയക് തോമസ് മോഡറേറ്ററായി. കോട്ടയം അതിരൂപത വികാരി ജനറാൾ മോൺ. മൈക്കിൾ വെട്ടിക്കാട്ട്, സിറ്റിസൺസ് ഫോറം ഓർഗനൈസിംഗ് സെക്രട്ടറിയും ദർശന കൾച്ചറൽ സെന്‍റർ ഡയറക്ടറുമായ ഫാ. എമിൽ പുള്ളിക്കാട്ടിൽ, സിറ്റിസൺസ് ഫോറം സെക്രട്ടറി ജനറലും കെഇ സ്കൂൾ പ്രിൻസിപ്പലുമായ റവ.ഡോ. ജയിംസ് മുല്ലശേരി സിഎംഐ, സിറ്റിസൺസ് ഫോറം പ്രോഗ്രാം കോ-ഓർഡിനേറ്റർ മാത്യു കൊല്ലമലക്കരോട്ട് തുടങ്ങിയവർ പങ്കെടുത്തു.

എരുമേലി തെക്ക് വില്ലേജിന്‍റെ സ്മാർട്ട്‌ ഓഫീസ് ഇനി തുറക്കാം

എരുമേലി: നിർമാണം പൂർത്തിയായി ഉദ്ഘാടനമായപ്പോൾ ഹൈക്കോടതിയിൽ കേസിൽ കുരുങ്ങി ഒന്നര വർഷമായി അടഞ്ഞുകിടന്ന എരുമേലി തെക്ക് വില്ലേജിന്‍റെ സ്മാർട്ട്‌ ഓഫീസ് ഇനി തുറക്കാം. സ്ഥലം ദേവസ്വം വക ആണെന്നായിരുന്നു എറണാകുളം സ്വദേശി അഭിഭാഷകൻ കോടതിയിൽ ഹർജിയിൽ ഉന്നയിച്ചിരുന്നത്. എന്നാൽ, ഇതിനു വ്യക്തമായ തെളിവുകൾ നൽകാൻ കഴിയാതെ വന്നതോടെ കേസ് കഴിഞ്ഞദിവസം കോടതി തീർപ്പാക്കുകയായിരുന്നു. റവന്യുഭൂമി ആണെന്ന സർക്കാർ വാദം പരിശോധിച്ച് ഉറപ്പുവരുത്താൻ കോടതി നിർദേശം നൽകിയാണ് കേസ് തീർപ്പാക്കിയത്. കോട്ടയം ജില്ലാ കളക്ടർക്കാണ് നിർദേശം നൽകിയിരിക്കുന്നത്. പൊതുമരാമത്ത് വകുപ്പിന്‍റെ അധീനതയിലുള്ള സ്ഥലത്തിൽനിന്നു പത്ത് സെന്‍റ് ഭൂമി റവന്യുവകുപ്പിന് വിട്ടുനൽകിയാണ് സ്മാർട്ട് വില്ലേജ് ഓഫീസ് നിർമിച്ചത്. മുൻ കളക്ടർ ഡോ. പി.കെ. ജയശ്രീ ആണ് സ്ഥലം ഏറ്റെടുത്തു കൈമാറിയത്. അന്ന് പരിശോധിച്ച രേഖകൾ തന്നെയാണ് നിലവിലുള്ളത്. ഇത് വീണ്ടും പരിശോധിച്ച് വ്യക്തത വരുത്താനാണ് കോടതി നിർദേശിച്ചിരിക്കുന്നതെന്നും സ്ഥലം റവന്യുഭൂമി ആണെന്ന് നേരത്തേ ബോധ്യപ്പെട്ടിട്ടുള്ളതുകൊണ്ട് ഒരു മാസത്തിനകം നടപടികൾ പൂർത്തിയാക്കി കെട്ടിടം തുറന്ന് ഉദ്ഘാടനം ചെയ്യാൻ കഴിയുമെന്ന് സെബാസ്റ്റ്യൻ കുളത്തുങ്കൽ എംഎൽഎ പറഞ്ഞു. എരുമേലിയിൽ പൊതുമരാമത്ത് റെസ്റ്റ് ഹൗസിന്‍റെ സ്ഥലത്തിനോട് ചേർന്നാണ് വില്ലേജ് ഓഫീസ് നിർമിച്ചിട്ടുള്ളത്. ഇതിനായി സ്ഥലം ഏറ്റെടുത്ത് ജില്ലാ കളക്ടർ ഉത്തരവിട്ടപ്പോൾ ആക്ഷേപങ്ങൾക്ക് സമയം അനുവദിച്ചിരുന്നെങ്കിലും ആക്ഷേപങ്ങൾ ലഭിച്ചില്ല. തുടർന്ന് നിർമാണം പൂർത്തിയായി ഉദ്ഘാടന നോട്ടീസ് ആയപ്പോളാണ് ഹൈക്കോടതിയിൽ കേസെത്തുകയും ഉദ്ഘാടനം നടത്തി കെട്ടിടം പ്രവർത്തനം ആരംഭിക്കുന്നതിന് കോടതിയിൽനിന്ന് വിലക്കുണ്ടായതും. റെസ്റ്റ് ഹൗസ് ഉൾപ്പെടെ തൊട്ടുചേർന്ന് സ്വകാര്യ ആശുപത്രി അടക്കം ഒട്ടേറെ വീടുകളും സ്ഥലങ്ങളുമുണ്ട്. ഇങ്ങനെയിരിക്കേ വില്ലേജ് ഓഫീസിന് ലഭിച്ച സ്ഥലം മാത്രം ദേവസ്വം വക ആണെന്ന ഹർജി നാട്ടുകാർക്കും അവിശ്വസനീയമായിരുന്നു. ദേവസ്വം ബോർഡ് ആകട്ടെ ഭൂമി തങ്ങളുടേതല്ലെന്ന് നേരത്തേ അറിയിച്ചിരുന്നു. വസ്തുതകൾ ഇതായിരിക്കെ നാട്ടുകാരൻ അല്ലാത്ത എറണാകുളം സ്വദേശിയായ ആൾ കേസ് നൽകിയത് ഏറെ ദുരൂഹത സൃഷ്ടിച്ചു. ഒടുവിൽ ഇപ്പോൾ ഓഫീസ് തുറക്കാൻ അനുകൂലമായ വിധി ഉണ്ടായതോടെ ആശ്വാസത്തിലാണ് റവന്യുവകുപ്പ്. കേസിൽ തിരിച്ചടി നേരിട്ടിരുന്നുവെങ്കിൽ കെട്ടിട നിർമാണത്തിന് ചെലവിട്ട 44 ലക്ഷം രൂപ നഷ്ടവും ബാധ്യതയുമായി മാറുമായിരുന്നു. കെട്ടിടം അടഞ്ഞുകിടന്നതുമൂലം കാട് വളർന്ന നിലയിൽ ഇഴജന്തുക്കളും തെരുവുനായ്ക്കളും താവളമാക്കിയിരിക്കുകയാണ്. 44 ലക്ഷം ചെലവിട്ട് 1250 ചതുരശ്ര അടിയിലാണ് കെട്ടിടം നിർമിച്ചത്. 2022 ഏപ്രിൽ 30നാണ് പുതിയ സ്മാർട്ട്‌ വില്ലേജ് ഓഫീസിന് ശിലയിട്ടത്. 2023 ഒക്ടോബറിൽ നിർമാണം പൂർത്തിയായി. നിലവിൽ പതിറ്റാണ്ടുകളായി എരുമേലി പ്രൈവറ്റ് ബസ് സ്റ്റാൻഡിൽ ഷോപ്പിംഗ് കോംപ്ലക്സിന്‍റെ രണ്ടാം നിലയിലെ ഒരു മുറിയിലാണ് വില്ലേജ് ഓഫീസ് പ്രവർത്തിച്ചു കൊണ്ടിരിക്കുന്നത്. ഇവിടെ അസൗകര്യങ്ങൾ ഏറെയാണ്. കോട്ടയം ജില്ലയിൽ വിസ്തൃതി കൂടിയ വലിയ വില്ലേജാണ് എരുമേലി. ജില്ലയിൽ ഏറ്റവും കൂടുതൽ റവന്യു റിക്കവറിയും വനഭൂമിയും ഈ വില്ലേജിലാണ്. കെട്ടിടം പ്രവർത്തനമാകുന്നതോടെ നിർദിഷ്ട എരുമേലി വിമാനത്താവള പദ്ധതി, ശബരി റെയിൽവേ പദ്ധതി എന്നിവയുടെ സ്ഥലം ഏറ്റെടുക്കുന്നതിനുള്ള ജോലികൾക്ക് ഓഫീസ് ഉപകരിക്കും.

ഡോ. ആന്‍റണി കല്ലമ്പള്ളിക്ക് ലൈഫ് ടൈം അച്ചീവ്മെന്‍റ് അവാർഡ്

പെരുവന്താനം: സെന്‍റ് ആന്‍റണീസ് കോളജ് പ്രിൻസിപ്പൽ ഡോ. ആന്‍റണി കല്ലമ്പള്ളിക്ക് ലൈഫ് ടൈം അച്ചീവ്മെന്‍റ് അവാർഡ് ഫോർ എഡ്യുക്കേഷണൽ എക്സലൻസ് സമ്മാനിച്ചു. കോട്ടയം മാമ്മൻ മാപ്പിള ഹാളിൽ നടന്ന സമ്മേളനത്തിൻ ഗോവ ഗവർണർ പി.എസ്. ശ്രീധരൻപിള്ള അവാർഡ് നൽകി. എഴുത്തുകാരനും മോട്ടിവേഷണൻ സ്പീക്കറും എംജി യൂണിവേഴ്സിറ്റിയുടെയും ഭാരതിയാർ യൂണിവേഴ്സിറ്റിയുടെയും റിസർച്ച് ഗൈഡും കോളമിസ്റ്റും ട്രെയിനറും പതിനാല് പുസ്തകങ്ങളുടെ രചയിതാവുമായ ഡോ. ആന്‍റണി കല്ലമ്പള്ളി നിരവധി സാമൂഹിക, സാംസ്കാരിക, സഹകരണ മേഖലയിലും അതുല്യ സംഭാവനകൾ നൽകി പ്രവർത്തിച്ചുവരുന്നു. ഈ വർഷം കേരള സർക്കാരിന്‍റെ ലഹരിവിരുദ്ധ പ്രവൃത്തനങ്ങൾക്ക് പിന്തുണ നൽകി നൂറിലേറെ സ്കൂളുകൾ സന്ദർശിച്ച് അവബോധ ക്ലാസുകൾ സംഘടിപ്പിച്ചു. 81 സൺഡേ സ്കൂളുകൾ സന്ദർശിച്ച് ലഹരിവിരുദ്ധ പ്രവർത്തനങ്ങൾക്ക് നേതൃത്വം നൽകി. കൂടാതെ 101 സ്കൂളുകൾ സന്ദർശിച്ച് പരീക്ഷാഭയം മാറ്റുന്നതിന് ഉൾപ്പെടെ നൽകിയ സമഗ്ര സംഭാവനകൾ പരിഗണിച്ചാണ് അവാർഡ് സമ്മാനിച്ചത്. പെരുവന്താനം സെന്‍റ് ആന്‍റണീസ് കോളജ് വിദ്യാഥികൾക്ക് 2021 മുതൽ തുടർച്ചയായി റാങ്ക് നേട്ടങ്ങൾ കൈവരിക്കുന്നതിനു പുലർത്തുന്ന വ്യത്യസ്തങ്ങളായ സമീപനങ്ങൾ ഏറെ ശ്രദ്ധേയമാണ്.

വാർഷിക പൊതുയോഗവും എസ്എസ്എൽസി അവാർഡ് ദാനവും

കാഞ്ഞിരപ്പള്ളി: കേരള വ്യാപാരി വ്യവസായി ഏകോപനസമിതി കാഞ്ഞിരപ്പള്ളി യൂണിറ്റ് 34-ാമത് വാർഷിക പൊതുയോഗവും എസ്എസ്എൽസി അവാർഡ് ദാനവും നടത്തി. വ്യാപാരി വ്യവസായി ഏകോപനസമിതി സംസ്ഥാന വൈസ് പ്രസിഡന്‍റും കോട്ടയം ജില്ലാ പ്രസിഡന്‍റുമായ എം.കെ. തോമസ്കുട്ടി സമ്മേളനം ഉദ്ഘാടനം ചെയ്തു. യൂണിറ്റ് പ്രസിഡന്‍റ് ബെന്നിച്ചൻ കുട്ടൻചിറയിൽ അധ്യക്ഷത വഹിച്ചു. ജനറൽ സെക്രട്ടറി ബിജു പത്യാല റിപ്പോർട്ടും ട്രഷറർ വി.എം. അബ്ദുസലാം കണക്കും അവതരിപ്പിച്ചു. ജില്ലാ ജനറൽ സെക്രട്ടറി എ.കെ.എൻ. പണിക്കർ, രക്ഷാധികാരി മാത്യു ചാക്കോ വെട്ടിയാങ്കൽ, വൈസ് പ്രസിഡന്‍റുമാരായ മനോജ് അമ്പാട്ട്, ജോജി ഗ്ലോബൽ, നജീബ് ഇസ്മായിൽ, സെക്രട്ടറിമാരായ സുരേഷ് കുമാർ, ഉണ്ണി ചെറിയാൻ ചീരൻവേലിൽ, അബ്ദുൾ ജബ്ബാർ, മുഹമ്മദ് ശരീഫ്, വനിതാ വിംഗ് പ്രസിഡന്‍റ് ലിസിയമ്മ ചാക്കോ, യൂത്ത് വിംഗ് പ്രസിഡന്‍റ് റിജോ ജോസ് ചീരാംകുഴിയിൽ എന്നിവർ പ്രസംഗിച്ചു.

മരംവീണ് മരണം: ഷോക്കേറ്റെന്നു സംശയം

എരുമേലി: ചെറുവള്ളി എസ്റ്റേറ്റിൽ തോട്ടം തൊഴിലാളിയുടെ ദാരുണ മരണത്തിൽ ദുഃഖാർത്തരായി നാട്ടുകാർ. അഞ്ചാം ഡിവിഷനിലെ ലയത്തിൽ താമസിക്കുന്ന എസ്റ്റേറ്റ് തൊഴിലാളി മുനിയ സ്വാമി (56) ആണ് ഇന്നലെ ഉച്ചയ്ക്ക് എസ്റ്റേറ്റിൽവച്ച് അപകടത്തിൽ മരിച്ചത്. മുനിയ സ്വാമി ഓടിച്ചുവന്ന സ്കൂട്ടറിലേക്ക് റബർ മരം ഒടിഞ്ഞുവീണാണ് അപകടം. വൈദ്യുതിലൈനുകൾ തകർത്താണ് മരം സ്കൂട്ടറിന് മുകളിലേക്ക് വീണത്. തത്സമയം വൈദ്യുതി പ്രവഹിച്ചിരുന്നോ എന്നു സംശയമുണ്ടെന്നും അപകടസ്ഥലത്തുതന്നെ മരണം സംഭവിച്ച നിലയിലായിരുന്നുവെന്നും നാട്ടുകാർ പറഞ്ഞു. എരുമേലി സർക്കാർ ആശുപത്രിയിൽ എത്തിച്ചതോടെ മരണം സ്ഥിരീകരിക്കുകയായിരുന്നു. ഗുരുതരമായ പരിക്കുകൾ ശരീരത്തിൽ ഇല്ലായിരുന്നു. പെട്ടെന്നുണ്ടായ വൈദ്യുതാഘാതമാകാം മരണകാരണമെന്ന് സംശയമുണ്ട്. പോസ്റ്റ്മോർട്ടത്തിനു ശേഷമേ മരണകാരണം വ്യക്തമാകുമെന്ന് എരുമേലി പോലീസ് പറഞ്ഞു. തമിഴ്‌നാട്ടിൽനിന്ന് എരുമേലി ചെറുവള്ളി എസ്റ്റേറ്റിൽ പതിറ്റാണ്ടുകൾക്ക് മുമ്പ് തൊഴിലാളികളായി താമസമാക്കിയ കുടുംബമാണ് മുനിയ സ്വാമിയുടേത്. മൃതദേഹം ഇന്നു വൈകുന്നേരം നാലിന് എസ്റ്റേറ്റിലെ പൊതുശ്മശാനത്തിൽ സംസ്‌കരിക്കും.

കെ. നാരായണക്കുറുപ്പ് ലളിതജീവിതത്താൽ മഹത്തായ സന്ദേശം പകർന്ന വ്യക്തി: മന്ത്രി റോഷി അഗസ്റ്റിൻ

കാഞ്ഞിരപ്പള്ളി: ലളിത ജീവിതംകൊണ്ടു മഹത്തായ സന്ദേശം പകർന്ന വ്യക്തിയായിരുന്നു മന്ത്രിയും ഡെപ്യൂട്ടി സ്പീക്കറുമായിരുന്ന പ്രഫ. കെ. നാരായണക്കുറുപ്പെന്ന് ജലവിഭവമന്ത്രി റോഷി അഗസ്റ്റിൻ. കുന്നുംഭാഗം സെന്‍റ് ജോസഫ്സ് പബ്ലിക് സ്കൂളിൽ നടത്തിയ പ്രഫ. കെ. നാരായണക്കുറുപ്പ് അനുസ്മരണവും എംഎൽഎ എക്സലൻസ് അവാർഡ് ദാനവും ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. നിയോജകമണ്ഡലത്തിലെ സാമൂഹിക, സാംസ്കാരിക മേഖലകളിൽ മികച്ച സേവനങ്ങൾ ചെയ്യുന്നവരെ മന്ത്രി ആദരിച്ചു. എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർഥികൾക്ക് അവാർഡ് സമർപ്പിച്ചു. ലഹരിക്ക് ഒരു ചെക്ക് എന്ന പേരിൽ എല്ലാ സ്കൂളുകളിലും ചെസ് പരിശീലന പരിപാടികൾ ആരംഭിക്കുമെന്ന് ചടങ്ങിൽ അധ്യക്ഷത വഹിച്ച ചീഫ് വിപ്പ് ഡോ. എൻ. ജയരാജ് പറഞ്ഞു. വിവിധ മേഖലകളിൽ മികവു തെളിയിച്ച മേരിക്വീൻസ് ആശുപത്രി അഡ്മിനിസ്ട്രേറ്റർ ഫാ. മാർട്ടിൻ മണ്ണനാൽ സിഎംഐ, മെന്‍റലിസ്റ്റ് ഡോ. സജീവ് പള്ളത്ത്, സ്വരുമ ചാരിറ്റബിൾ സൊസൈറ്റി ഭാരവാഹികൾ, ഈരാറ്റുപേട്ട നന്മക്കൂട്ടം ടീം, അധ്യാപിക ജെ. ഷേർലി, ക്രൈംബ്രാഞ്ച് ഉദ്യോഗസ്ഥൻ എം. പ്രദീപ്, കാർ വെള്ളത്തിൽ വീണുണ്ടായ അപകടത്തിൽ രക്ഷാപ്രവർത്തനം നടത്തിയ ആസം സ്വദേശി ദീപക്, സിബിഎസ്ഇ പ്ലസ് ടു പരീക്ഷയിൽ 500ൽ 499 മാർക്ക് നേടിയ ട്രീസ ആന്‍റണി എന്നിവരെ അനുമോദിച്ചു. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗർ, ജില്ലാ പഞ്ചായത്തംഗം ടി.എൻ. ഗിരീഷ് കുമാർ, ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി, ചിറക്കടവ് പഞ്ചായത്ത് പ്രസിഡന്‍റ് സി.ആർ. ശ്രീകുമാർ, സെന്‍റ് ജോസഫ് പബ്ലിക് സ്കൂൾ പ്രിൻസിപ്പൽ സിസ്റ്റർ ലിറ്റിൽ റോസ് എസ്എബിഎസ്, പഞ്ചായത്ത് വൈസ് പ്രസിഡന്‍റ് സതി സുരേന്ദ്രൻ, ഷാജി പാമ്പൂരി, ആന്‍റണി മാർട്ടിൻ, സുമേഷ് ആൻഡ്രൂസ്, ജോളി മടുക്കക്കുഴി, മുണ്ടക്കയം സോമൻ, ഷാജി നല്ലേപറമ്പിൽ, കെ.എ. ഏബ്രഹാം, സതി സുരേന്ദ്രൻ, അമ്പിളി ശിവദാസ്, ഷാക്കി സജീവ് എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]