മാര്‍ ജോസഫ് പവ്വത്തില്‍ മെമ്മോറിയല്‍ ട്രോഫി കുര്യനാട് സെന്‍റ് ആന്‍സ് എച്ച്എസ്എസിന്
1599425
Monday, October 13, 2025 7:21 AM IST
കുറുമ്പനാടം: സെന്‍റ് പീറ്റേഴ്‌സ് ഹയര്‍ സെക്കന്‍ഡറി സ്‌കൂളിന്‍റെ രജത ജൂബിലി സ്മാരകമായി നടത്തിയ മൂന്നാമത് അഖില കേരള ഇന്‍റര്‍ ഹയര്‍ സെക്കന്‍ഡറി സ്കൂള് പ്രസംഗ മത്സരത്തില്‍ കുര്യനാട് സെന്‍റ് ആന്‍സ് എച്ച്എസ്എസിലെ ആഷര്‍ ജോസഫ് ഒന്നാം സ്ഥാനം നേടി. ആഷറിന് മാര്‍ ജോസഫ് പവ്വത്തില്‍ മെമ്മോറിയല്‍ ട്രോഫിയും 5,000 രൂപ കാഷ് അവാര്‍ഡും സമ്മാനിച്ചു.
രണ്ടാം സ്ഥാനത്തിന് അര്‍ഹയായ അതിരമ്പുഴ സെന്‍റ് അലോഷ്യസ് എച്ച്എസ്എസിലെ ഏബല്‍ ബിനോയ്ക്ക് ഫാ. ജോര്‍ജ് മുക്കാട്ടുകുന്നേല്‍ മെമ്മോറിയല്‍ ട്രോഫിയും 4,000 രൂപ കാഷ് അവാർഡും നൽകി. മൂന്നാം സ്ഥാനത്തിനുള്ള കെ. ജോര്‍ജ് കിഴക്കേക്കുറ്റ് മെമ്മോറിയല്‍ ട്രോഫിയും 3,000 രൂപ കാഷ് അവാര്‍ഡും നേടിയത് കുറുമ്പനാടം സെന്‍റ് പീറ്റേഴ്‌സ് ഹയര്‍ സെക്കന്‍ഡറി സ്‌കൂളിലെ നോയല്‍ മാത്യുവാണ്.
നാലാം സ്ഥാനത്തിനുള്ള ജോസ് ഫിലിപ്പ് മേടയില്‍ മെമ്മോറിയല്‍ ട്രോഫിയും 2,000 രൂപയുടെ കാഷ് അവാര്‍ഡും മലകുന്നം എച്ച്എസ്എസിലെ അമൃത സന്തോഷ് കരസ്ഥമാക്കി. കുറുമ്പനാടം സെന്‍റ് പീറ്റേഴ്‌സ് എച്ച്എസ്എസിലെ അന്‍സു മരിയ സെബാസ്റ്റ്യന്‍ അഞ്ചാം സ്ഥാനത്തിനുള്ള സാബു ടി.കെ മെമ്മോറിയല്‍ ട്രോഫിയും 1,000 രൂപ കാഷ് പ്രൈസും നേടി.
സമാപന സമ്മേളനത്തില്‍ വിജയികള്‍ക്കുള്ള സമ്മാനം മാടപ്പള്ളി പഞ്ചായത്ത് വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ ബാബു പാറയില്‍ വിതരണം ചെയ്തു. സ്കൂള് അസിസ്റ്റന്‍റ് മാനേജര്‍ ഫാ. സെബാസ്റ്റ്യന്‍ കളത്തിപ്പറമ്പില്‍ അധ്യക്ഷത വഹിച്ചു.
സ്കൂള് പ്രിന്‍സിപ്പല്‍ ജയിംസ് കെ. മാളിയേക്കല്‍, പിടിഎ വൈസ് പ്രസിഡന്‍റ് ജോളി ജോസഫ്, വാര്ഡ് മെംബര്‍ രമ്യ റോയ്, വിധികര്‍ത്താക്കളായ ഡോ. സണ്ണി സെബാസ്റ്റ്യന്‍, ഡോ. തെരേസ തോമസ്, ഡോ. നെവില്‍ തോമസ്, കണ്‍വീനര്‍ ജോണിയ ഗ്രേയ്‌സ് ജോസഫ്, എം.എസ്. അജേഷ്, ടെസിമോള്‍ ജോസഫ്, ഫിലിപ്‌സണ്‍ ജെ. മേടയില്‍ എന്നിവര്‍ പ്രസംഗിച്ചു.