കൂമ്പൻപാറ സ്വദേശി കരുതൽ തടങ്കലിൽ

അടിമാലി: അടിമാലി കൂമ്പന്‍പാറ സ്വദേശിയെ കരുതല്‍ തടങ്കലിലാക്കി.സ്ഥിരമായി ലഹരിക്കേസ് പ്രതിയായ കൂമ്പന്‍പാറ സ്വദേശി മനു മണി (32) യെയാണ് പോലീസ് കസ്റ്റഡിയിലെടുത്ത് തടങ്കലില്‍ ആക്കിയത്. ഇയാള്‍ക്കെതിരേ നിരവധി മയക്കുമരുന്ന് കേസുകള്‍ നിലവിലുണ്ട്.

പോലീസ് മേധാവി സാബു മാത്യുവിന്‍റെ നിർദേശാനുസരണം ഡാന്‍സഫ് ടീമും ഇടുക്കി ഡിവൈഎസ്പി രാജന്‍ കെ. അരമനയുടെ പ്രത്യേക അന്വേഷണ സംഘവും അടിമാലി എസ്എച്ച്ഒ ലൈജുമോന്‍, എസ്ഐ ജിബിന്‍ എന്നിവരുടെ നേതൃത്വത്തിലുള്ള സംഘവുമാണ് പ്രതിയെ കസ്റ്റഡിയിലെടുത്തത്.

ADVERTISEMENT

പുഴയിൽ കാണാതായ ആളുടെ മൃതദേഹം കണ്ടെത്തി

കരിമണ്ണൂർ: ചൂണ്ടയിട്ട് മീൻ പിടിക്കുന്നതിനിടെ തൊമ്മൻകുത്ത് കണ്ണാടിപ്പുഴയിൽ കാണാതായ ആളുടെ മൃതദേഹം കണ്ടെത്തി. തൊമ്മൻകുത്ത് വാഴക്കുടിയിൽ റോയി (55)യുടെ മൃതദേഹമാണ് ഇന്നലെ രാവിലെ കണ്ടെത്തിയത്. വ്യാഴാഴ്ച ഉച്ചയ്ക്കായിരുന്നു സംഭവം. പുഴയിൽ പതിവായി മീൻ പിടിക്കാൻ പോകുന്നയാളായിരുന്നു റോയി. തൊമ്മൻകുത്ത് ജുമാ മസ്ജിദിന് സമീപം വട്ടക്കയം ഭാഗത്ത് പുഴയിൽ റോയി ചൂണ്ടയിടുന്നത് പ്രദേശവാസികൾ കണ്ടിരുന്നു. പിന്നീടാണ് കാണാതായത്. സമീപത്തെ പാറയിൽനിന്നു റോയിയുടെ ഫോണും വസ്ത്രവും ചെരിപ്പും കണ്ടെത്തിയിരുന്നു. കരിമണ്ണൂർ പോലീസും തൊടുപുഴ അഗ്നിരക്ഷാസേനയും സ്ഥലത്തെത്തി മണിക്കൂറുകൾ പരിശോധന നടത്തിയെങ്കിലും ഫലമുണ്ടായില്ല. ഇന്നലെ രാവിലെ പഞ്ചായത്തംഗം ബിബിൻ അഗസ്റ്റിന്‍റെ നേതൃത്വത്തിൽ നടത്തിയ തെരച്ചിലിൽ മൃതദേഹം കണ്ടെത്തുകയായിരുന്നു. മൃതദേഹം തൊടുപുഴ ജില്ലാ ആശുപത്രിയിൽ പോസ്റ്റ്മോർട്ടത്തിനു ശേഷം സംസ്കാരം നടത്തി. തൊമ്മൻകുത്തിൽ സഹോദരിക്കൊപ്പമായിരുന്നു താമസം.

പെട്രോൾ പന്പിനു സമീപം കാർ കത്തിനശിച്ചു

വണ്ണപ്പുറം: പെട്രോൾ പന്പിന് മുന്നിൽ തീപിടിച്ച കാർ പൂർണമായും കത്തിനശിച്ചു. ഇന്ധനം നിറയ്ക്കാനായി പന്പിലേക്ക് കയറുന്നതിനിടെയാണ് സംഭവം. തലനാരിഴയ്ക്കാണ് വൻ ദുരന്തം ഒഴിവായത്. ഇന്നലെ ഉച്ചയ്ക്ക് 12.15ഓടെ വണ്ണപ്പുറം ഹൈറേഞ്ച് കവലയിലെ പെട്രോൾ പന്പിന് മുന്പിലായിരുന്നു അപകടം. വെണ്‍മറ്റം സ്വദേശി മണിമലകുന്നേൽ ജിതിനും സുഹൃത്തുമാണ് കാറിലുണ്ടായിരുന്നത്. തീ കണ്ടതോടെ കാർ നിർത്തി ഇവർ ഇറങ്ങിയോടിയതിനാലാണ് രക്ഷപ്പെട്ടത്. വാഹനത്തിൽ വേഗം തീ ആളിപ്പടർന്നു.

സഭയുടെ ശക്തിയാകേണ്ടത് കുടുംബങ്ങൾ: മോണ്‍ നെടുങ്ങാട്ട്

മാറിക: വെല്ലുവിളികൾ നേരിടുന്ന സഭയുടെ ശക്തിയായി നിലകൊള്ളേണ്ടത് ധാർമികതയിലും വിശ്വാസത്തിലും അടിയുറച്ച കുടുംബങ്ങളാണെന്ന് കോതമംഗലം രൂപത വികാരി ജനറാൾ മോണ്‍ വിൻസന്‍റ് നെടുങ്ങാട്ട്. ദീപിക ഫ്രണ്ട്സ് ക്ലബ്, ഫാമിലി അപ്പൊസ്തലേറ്റ് എന്നിവയുടെ മാറിക ഫൊറോനതല കണ്‍വൻഷൻ ഉദ്ഘാടനം ചെയ്യുകയായിരുന്നു അദ്ദേഹം. ക്രൈസ്തവസഭയ്ക്കും ധാർമികതയ്ക്കും ഉറച്ച പിന്തുണ നൽകുന്ന ഏക മാധ്യമം ദീപികയാണെന്നും അദ്ദേഹം പറഞ്ഞു. ഫൊറോന ഡയറക്ടർ ഫാ. മാത്യു കോണിക്കൽ അധ്യക്ഷത വഹിച്ചു. ഡയറക്ടർ ഫാ.ആന്‍റണി പുത്തൻകുളം, ദീപിക ജനറൽ മാനേജർ (സർക്കുലേഷൻ) ഫാ. ജിനോ പുന്നമറ്റത്തിൽ, ഡിഎഫ്സി സംസ്ഥാന ഉപദേശക സമിതി ചെയർമാൻ ജോയി നടുക്കുടി, സംസ്ഥാന പ്രസിഡന്‍റ് ലോറൻസ് ഏബ്രഹാം, രൂപത പ്രസിഡന്‍റ് ഡിഗോൾ കെ. ജോർജ്, ഫൊറോന പ്രസിഡന്‍റുമാരായ ജോസഫ് മൂലശേരി, ജോണ്‍സൻ പൊന്നാട്ട്, രൂപത ജോയിന്‍റ് സെക്രട്ടറി തോമസ് കുണിഞ്ഞി, പി.വി. ജോസ് എന്നിവർ പ്രസംഗിച്ചു. സിബി പൊതൂർ, പൗളി താന്നിക്കൽ, സിൻസി തട്ടാറ, ജോണ്‍ വാഴയിൽ, സെലിൻ നടുവക്കുന്നേൽ, ജോർജ് നെടുമരുതുംചാലിൽ, പോൾ ലൂയിസ്, പ്രഫ. ജോർജ് ആറ്റുപുറം എന്നിവർ നേതൃത്വം നൽകി.

ലോറി സ്കൂട്ടറിലിടിച്ച് ഗൃഹനാഥൻ മരിച്ചു

തൊടുപുഴ: ലോറി സ്കൂട്ടറിലിടിച്ച് ഗൃഹനാഥന് ദാരുണാന്ത്യം. കദളിക്കാട് പെരളിമറ്റം വട്ടപ്പറന്പിൽ വി.കെ. ഹരിദാസാണ് (58) മരിച്ചത്. ഇന്നലെ വൈകുന്നേരം 6.30ന് വെങ്ങല്ലൂർ സിഗ്നൽ ജംഗ്ഷനിലായിരുന്നു അപകടം. ഹരിദാസ് തൊടുപുഴയിൽനിന്ന് കദളിക്കാടിനു പോവുകയായിരുന്നു. ഇതിനിടെ വെങ്ങല്ലൂർ സിഗ്നൽ ജംഗ്ഷനിലെത്തിയപ്പോൾ പിന്നാലെയെത്തിയ ലോറി കോലാനി ഭാഗത്തേക്ക് തിരിയുന്നതിനിടെ സ്കൂട്ടറിൽ തട്ടി. ഇടിയുടെ ആഘാതത്തിൽ റോഡിൽ വീണ ഹരിദാസിന്‍റെ ദേഹത്ത് കൂടി ലോറിയുടെ ചക്രങ്ങൾ കയറിയിറങ്ങി. ഹരിദാസിനെ ഉടൻ തന്നെ സമീപത്തെ സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ഭാര്യ: അജിത. മകൾ: അരുണിമ. തൊടുപുഴ പോലീസ് മേൽനടപടികൾ സ്വീകരിച്ചു. തൊടുപുഴയിലെ സ്വകാര്യആശുപത്രിയിൽ സൂക്ഷിച്ചിരിക്കുന്ന മൃതദേഹം ഇന്ന് പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടുനൽകും. 2009 ഓഗസ്റ്റിൽ വീടിന് മുന്നിലെ തറയിൽ കിടന്നുറങ്ങുകയായിരുന്ന ഹരിദാസിന്‍റെ മക്കളായ അരുണ്‍ദാസും കൃഷ്ണദാസും ഇടിമിന്നലേറ്റ് മരിച്ചിരുന്നു.

മാതൃവേദി "നല്ലനിലം’ മേഖലാതല മത്സരം

കാഞ്ഞിരപ്പള്ളി: ഈശോയുടെ മനുഷ്യാവതാരത്തിന്‍റെ ജൂബിലി വർഷത്തോടും മാതൃവേദിയുടെ മുപ്പതാം വാർഷികത്തോടുമനുബന്ധിച്ചും രൂപതയുടെ സുവർണ ജൂബിലിക്കൊരുക്കമായും വചനം വായിക്കുക, പഠിക്കുക എന്ന ലക്ഷ്യത്തോടെ മാതൃവേദിയുടെ നേതൃത്വത്തിൽ നടത്തപ്പെടുന്ന നല്ലനിലം വചനപഠന മത്സരത്തിന്‍റെ മേഖലാതല മത്സരം ഇന്ന് നടക്കും. ഹൈറേഞ്ച്, ലോറേഞ്ച്, തെക്കൻ മേഖലകളിലായി ആണ് മത്സരം നടത്തുക. അണക്കര, മുണ്ടിയെരുമ, കട്ടപ്പന, ഉപ്പുതറ, കുമളി എന്നീ ഫൊറോനകൾ ഹൈറേഞ്ച് മേഖലയിലും പെരുവന്താനം, മുണ്ടക്കയം, വെളിച്ചിയാനി, കാഞ്ഞിരപ്പള്ളി, പൊൻകുന്നം എന്നീ ഫൊറോനകൾ ലോറേഞ്ച് മേഖലയിലും, റാന്നി, പത്തനംതിട്ട, എരുമേലി എന്നീ ഫൊറോനകൾ തെക്കൻ മേഖലയിലും ഉൾപ്പെടുന്നു. ഹൈറേഞ്ച് മേഖലാ മത്സരം കട്ടപ്പന സെന്‍റ് ജോർജ് ഫൊറോനാ പള്ളിയിലും ലോ റേഞ്ച്, തെക്കൻ മേഖല മത്സരങ്ങൾ പൊടിമറ്റം നിർമല റിന്യൂവൽ സെന്‍ററിലും നടത്തും. ഓരോ ഫൊറോനയിൽനിന്നും ആദ്യ മൂന്ന് സ്ഥാനം ലഭിച്ചവരാണ് മേഖലാതല മത്സരത്തിൽ പങ്കെടുക്കുന്നതെന്ന് രൂപത ഡയറക്‌ടർ ഫാ. മാത്യു ഓലിക്കൽ അറിയിച്ചു. മാത്യവേദി രൂപത, ഫൊറോന ഭാരവാഹികൾ മത്സരത്തിന് നേതൃത്വം നൽകും.

എക്സൈസ് പിടികൂടിയത് 1291 ലഹരിക്കേസുകൾ

തൊടുപുഴ: ഓണനാളുകളിൽ ലഹരി ഉപയോഗത്തിനും കടത്തലിനും തടയിട്ട് എക്സൈസ് വകുപ്പ്. ഓണം സ്പെഷൽ ഡ്രൈവിനോടനുബന്ധിച്ച് ജില്ലയിലുടനീളം വ്യാപക പരിശോധനകൾ നടത്തിയിരുന്നു. ഇതിന്‍റെ ഭാഗമായി ജില്ലയിലാകെ 1291 കേസുകൾ രജിസ്റ്റർ ചെയ്തു. 141 അബ്കാരി കേസുകളും 148 മയക്കുമരുന്നു കേസുകളും 1002 നിരോധിത പുകയില വിൽപ്പന കേസുകളും ഉൾപ്പെടെയാണിത്. അബ്കാരി കേസുകളിൽ 135 പേരെ അറസ്റ്റ് ചെയ്തു. മൂന്ന് വാഹനങ്ങൾ പിടിച്ചെടുത്തു. മയക്കുമരുന്ന് കേസുകളിൽ 151 പേരുടെ അറസ്റ്റ് രേഖപ്പെടുത്തി. മൂന്ന് വാഹനങ്ങൾ പിടിച്ചെടുത്തു. നിരോധിത പുകയില ഉത്പന്ന വിപണനകേസുകളിൽ 1002 പേർ ഉൾപ്പെട്ടു. പിഴയിനത്തിൽ 2,00,400 രൂപ ഈടാക്കി. ചാരായം-38.4 ലിറ്റർ, ഇന്ത്യൻ നിർമിത വിദേശ മദ്യം - 408.65 ലിറ്റർ, ബിയർ- 19.5 ലിറ്റർ, 595 ലിറ്റർ വാഷ്, 17.22 കിലോ പുകയില ഉത്പന്നങ്ങൾ, 9.60 കിലോ കഞ്ചാവ് എന്നിവ പിടിച്ചെടുത്തു. ഒരു കഞ്ചാവ് ചെടി കണ്ടെത്തി നശിപ്പിച്ചു. അഞ്ച് കഞ്ചാവ് ബീഡിയും പിടിച്ചെടുത്തു. 1.165 ഗ്രാം എംഡിഎംഎ, 0.926 മെത്താഫിറ്റമിൻ ഗുളികകളും പിടികൂടിയിട്ടുണ്ട്. അതിർത്തി മേഖലകളിൽ കർശനപരിശോധന നടത്തിയിരുന്നു. രണ്ട് സ്ട്രൈക്കിംഗ് ഫോഴ്സിനെ ഉപയോഗിച്ച് ദിവസേന രാത്രികാലങ്ങളിൽ പട്രോളിംഗും വാഹനപരിശോധനയുമുണ്ട്. ഒരു ഹൈവേ പട്രോളിംഗുമുണ്ട്. കന്പംമെട്ട്, ബോഡിമെട്ട്, കുമളി, ചിന്നാർ എന്നിവിടങ്ങളിലെ ചെക്ക്പോസ്റ്റുകൾ കേന്ദ്രീകരിച്ചുള്ള പരിശോധന ശക്തമാണ്. പോലീസ്, വനം, റവന്യു, എംവിഡി എന്നിവയുമായി ചേർന്നുള്ള പരിശോധനകളും നടക്കുന്നുണ്ട്. ലഹരിക്കെതിരേ ബോധവത്കരണവും ജില്ലയിൽ സജീവമാണ്. സ്കൂളുകൾ, കോളജുകൾ കേന്ദ്രീകരിച്ച് വിവിധ പരിപാടികളും എക്സൈസ് സംഘടിപ്പിക്കുന്നുണ്ട്.

മൂലമറ്റം-കോട്ടമല റോഡ് നിർമാണ ഉദ്ഘാടനം ഇന്ന്

തൊടുപുഴ: മൂലമറ്റം-കോട്ടമല റോഡിന്‍റെയും പഞ്ചായത്തിലെ 76 ലക്ഷം രൂപ ചെലവഴിച്ചുള്ള വിവിധ നിർമാണ പദ്ധതികളുടെയും ഉദ്ഘാടനം ഇന്ന് വൈകുന്നേരം നാലിന് മൂലമറ്റം ടൗണിൽ നടക്കുമെന്ന് സംഘാടക സമിതി പത്രസമ്മേളനത്തിൽ അറിയിച്ചു. 6.80 കോടി ചെലവഴിച്ച് അശോക കവല മുതൽ മൂലമറ്റം വരെയുള്ള ഭാഗത്തെ റോഡ് ബിഎംബിസി നിലവാരത്തിൽ നിർമിക്കും. തുടർന്ന് കോട്ടമല റോഡിന്‍റെ കവുന്ത ഭാഗത്തെ 1.8 കിലോമീറ്റർ ഭാഗം പുനർനിർമിച്ച് റോഡ് തുറന്നുകൊടുക്കുന്നതിനാണ് പദ്ധതി വിഭാവനം ചെയ്യുന്നത്. ഇതോടെ കൊച്ചി-തേക്കടി റൂട്ടിൽ 40 കിലോമീറ്ററിന്‍റെ ലാഭം ഉണ്ടാകും. കാർഷിക, ടൂറിസം മേഖലകളിൽ കുതിച്ചുചാട്ടമുണ്ടാക്കാനും ഇതിലൂടെ കഴിയും. ഇതിനു പുറമേ പഞ്ചായത്തിൽ 16 വികസന പദ്ധതികളുടെ ഉദ്ഘാടനവും നടത്തും. മന്ത്രി വി.എ. മുഹമ്മദ് റിയാസ് ഓണ്‍ലൈനിൽ ഉദ്ഘാടനം നിർവഹിക്കും. മന്ത്രി റോഷി അഗസ്റ്റിൻ അധ്യക്ഷത വഹിക്കും. ഡീൻ കുര്യാക്കോസ് എംപി മുഖ്യപ്രഭാഷണം നടത്തും. ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ, ബ്ലോക്ക് പ്രസിഡന്‍റ് ഡോളി സുനിൽ, ജില്ലാ പഞ്ചായത്തംഗം പ്രഫ. എം.ജെ. ജേക്കബ്, പഞ്ചായത്ത് പ്രസിഡന്‍റ് കെ.എസ്. വിനോദ്, വൈസ് പ്രസിഡന്‍റ് സുബി ജോമോൻ, ജില്ലാ ആസൂത്രണ സമിതി ഉപാധ്യക്ഷൻ സി.വി. വർഗീസ്, കേരള കോണ്‍ഗ്രസ് -എം ജില്ലാ പ്രസിഡന്‍റ് ജോസ് പാലത്തിനാൽ, സിപിഐ ജില്ലാ സെക്രട്ടറി കെ. സലീംകുമാർ, കെപിസിസി നിർവാഹക സമിതിയംഗം ജോയി തോമസ്, ജോയിന്‍റ് ഡയറക്ടർ ട്രീസ ജോസ് എന്നിവർ പ്രസംഗിക്കും. സ്ഥിരം സമിതി അധ്യക്ഷൻ കെ.എൽ. ജോസഫ് പദ്ധതി വിശദീകരിക്കും. പത്രസമ്മേളനത്തിൽ സംഘാടക സമിതി ചെയർമാൻ കെ.എസ്. വിനോദ്, ജനറൽ കണ്‍വീനർ കെ.എൽ. ജോസഫ്, ടോമി കുന്നേൽ, ടി.കെ. ശിവൻ നായർ, സി.വി. വിബിൻ, സിബി മാളിയേക്കൽ, ടോമി നാട്ടുനിലം എന്നിവർ പങ്കെടുത്തു.

ഹൃദയത്തിന് കരുതലായി സെന്‍റ് മേരീസ് ആശുപത്രി

തൊടുപുഴ: ഇടുക്കി ജില്ലയിൽ ഏറ്റവും കൂടുതൽ ആൻജിയോപ്ലാസ്റ്റികൾ നടക്കുന്ന സൂപ്പർ സ്പെഷാലിറ്റി ആശുപത്രിയെന്ന നേട്ടം കൈവരിച്ച് തൊടുപുഴ സെന്‍റ് മേരീസ് ആശുപത്രി. കോഴിക്കോട് കഴിഞ്ഞമാസം നടന്ന ഇന്‍റർവെൻഷണൽ കാർഡിയോളജി കൗണ്‍സിൽ ഓഫ് കേരളയുടെ സമ്മേളനത്തിലാണ് ഈ പ്രഖ്യാപനം ഉണ്ടായത്. കഴിഞ്ഞ ഏഴു പതിറ്റാണ്ടിലേറെയായി ആതുരസേവന രംഗത്ത് മുൻനിരയിലുള്ള ആശുപത്രിയിലെ ഹൃദ്രോഗ വിഭാഗത്തിന് നേതൃത്വം നൽകുന്നത് സംസ്ഥാനത്തെ സീനിയർ കാർഡിയോളജിസ്റ്റായ ഡോ. മാത്യു ഏബ്രഹാം, സീനിയർ ഇന്‍റർവെൻഷണൽ കാർഡിയോളജിസ്റ്റുമാരായ ഡോ. മുസ്ന ജമാൽ, ഡോ. ബിജോയി വി. ഏലിയാസ്, ക്ലിനിക്കൽ കാർഡിയോളജിസ്റ്റ് ഡോ. നിതിൻ പരീത് എന്നിവരാണ്. ഹൃദ്രോഗ നിർണയത്തിനായി എക്കോ കാർഡിയോഗ്രാഫി, സ്ട്രെസ് എക്കോകാർഡിയോഗ്രാഫി, കോണ്‍ട്രാസ്റ്റ് എക്കോകാർഡിയോഗ്രാഫി, ട്രെഡ്മിൽ ടെസ്റ്റ്, ഹോൾട്ടർ, ഇഎൽആർ, എബിപിഎം എന്നിവ സെന്‍റ് മേരീസ് ആശുപത്രിയിൽ ലഭ്യമാണ്. അത്യാധുനിക കാത്ത‌‌‌‌‌‌‌‌്‌ലാബും കൊറോണറി കെയർ യൂണിറ്റും 24 മണിക്കൂറും പ്രവർത്തന സജ്ജമാണ്. പ്രൈമറി ആൻജിയോപ്ലാസ്റ്റി, കോംപ്ലക്സ് കൊറോണറി ആൻജിയോപ്ലാസ്റ്റി, സിടിഒ, ബൈപ്യൂരിഫിക്കേഷൻ ആൻജിയോപ്ലാസ്റ്റി, ഒസിടി ഇമേജിംഗ്, ഐഎബിപി എന്നീ അതിനൂതനമായ ചികിത്സാസംവിധാനങ്ങളും ടെന്പററി ആന്‍ഡ് പെർമനന്‍റ് പേസ്മേക്കർ ഇൻസ്റ്റലേഷൻ സൗകര്യങ്ങളും ഇവിടെ ലഭ്യമാണ്. സൂപ്പർ സ്പെഷാലിറ്റി ചികിത്സ സാധാരണക്കാരിലേക്ക് എത്തിക്കുന്നതിനായി 1963-ൽ ഡോ. ഏബ്രഹാം തേക്കുംകാട്ടിൽ സ്ഥാപിച്ച സെന്‍റ് മേരീസ് ആശുപത്രി ഇന്ന് ഇടുക്കിയിലെയും സമീപ ജില്ലകളിലെയും ജനങ്ങൾക്ക് ആശ്രയകേന്ദ്രമാണ്.

വിത്തു ലഭിച്ചില്ല: കാന്തല്ലൂരിൽ കുങ്കുമസുഗന്ധം മാഞ്ഞു

തൊടുപുഴ: രാജ്യത്ത് കാഷ്മീരിനു പുറമേ കുങ്കുമപ്പൂവ് കൃഷിചെയ്യുന്ന സ്ഥലമെന്ന ഖ്യാതി കാന്തല്ലൂരിനു ലഭിച്ചെങ്കിലും അധികൃതരുടെ നിസഹകരണം മൂലം കൃഷിയും ഉത്പാദനവും നിലച്ചു. കാന്തല്ലൂരിൽ പരീക്ഷണാടിസ്ഥാനത്തിലാണ് കുങ്കുമപ്പൂവ് കൃഷി ആരംഭിച്ചതെങ്കിലും മെച്ചപ്പെട്ട വിളവ് ലഭിച്ചതോടെ കൂടുതൽ മേഖലകളിലേക്കു കൃഷി വ്യാപിപ്പിക്കാൻ ലക്ഷ്യമിട്ടിരുന്നു. എന്നാൽ, തുടർ കൃഷിയ്ക്കായി കുങ്കമപ്പൂവിന്‍റെ വിത്ത് ലഭിക്കാതെ വന്നതോടെയാണ് രണ്ടു വർഷം മാത്രം വിളവു നൽകിയ ഈ കൃഷി കൂന്പടച്ചത്. പെരുമല പെരുമ കാന്തല്ലൂരിലെ പെരുമലയിലാണ് 2022, 2023 വർഷം കുങ്കുമപ്പൂവ് കൃഷി ചെയ്തത്. മറയൂരിലെ നാച്ചിവയൽ, ഗുഹനാഥപുരം, വട്ടവട, പഴത്തോട്ടം, വാഗമണ്‍, സേനാപതി എന്നിവിടങ്ങളിലും കുങ്കുമപ്പൂക്കൃഷി നടത്തിയെങ്കിലും വിജയിച്ചത് തണുപ്പുകൂടിയ പെരുമലയിൽ മാത്രമാണ്. മറയൂർ മലനിരയിലെ ഏറ്റവും തണുപ്പുള്ള ഇടമാണ് കാന്തല്ലൂരിലെ പെരുമല. കാഷ്മീരിനു സമാനമായ കാലാവസ്ഥയായതിനാൽ ഇവിടെ കുങ്കുമപ്പൂവ് കൃഷിക്കു സാധ്യത കണ്ടെത്തിയത് ശാന്തൻപാറയിലെ ഇന്ത്യൻ കൗണ്‍സിൽ ഫോർ അഗ്രികൾച്ചറൽ റിസർച്ച് കൃഷി വിജ്ഞാന കേന്ദ്രമാണ്. ഇവരുടെ നേതൃത്വത്തിൽ കൃഷിയിട പരീക്ഷണ പദ്ധതിയുടെ ഭാഗമായാണു ആദ്യമായി കുങ്കുമപ്പൂവ് കൃഷി ചെയ്തത്. ഗുണം മെച്ചം പക്ഷേ, കാന്തല്ലൂരിലെ വെജിറ്റബിൾ ആൻഡ് ഫ്രൂട്സ് പ്രമോഷൻ കൗണ്‍സിൽ ഫീൽഡ് ഓഫീസറായ രാമമൂർത്തി ഭഗവതിയുടെ കൃഷിയിടത്തിലാണ് കൃഷിയാരംഭിച്ചത്. ശ്രീനഗറിലെ പാന്പൂരിൽനിന്നാണ് വിത്ത് എത്തിച്ചു നൽകിയത്. 25 സെന്‍റ് സ്ഥലത്ത് കൃഷി ചെയ്തതിലൂടെ 300 ഗ്രാമോളം വിളവു ലഭിച്ചു. 30-50 ദിവസം കൊണ്ടാണ് വിളവെടുപ്പു നടത്തിയത്. ഗ്രാമിന് 600 മുതൽ 700 വരെ വില നൽകി ഇവിടെത്തന്നെ കുങ്കുമപ്പൂവ് വിൽക്കാൻ സാധിച്ചു. വിപണിയിൽ ഈ ഗ്രേഡിലുള്ള കുങ്കുമപ്പൂവിന് ഗ്രാമിന് 900 രൂപ വരെ വില ലഭിക്കും. കാന്തല്ലൂരിലെ തണുത്ത കാലാവസ്ഥ കുങ്കുമകൃഷിക്ക് അനുയോജ്യമാണെന്നു കണ്ടെത്തിയതോടെ കൃഷി വ്യാപകമാക്കാനുള്ള ലക്ഷ്യത്തിലായിരുന്നു രാമമൂർത്തി. കാഷ്മീരിൽ ഉത്പാദിപ്പിക്കുന്നതിനേക്കാൾ ഗുണവും മണവും വലുപ്പവുമുള്ള കുങ്കുമപ്പൂവാണ് ഇവിടെ ഉത്പാദിപ്പിച്ചത്. രണ്ടു വർഷത്തിനിടെ രാമമൂർത്തിക്കു മികച്ച വിളവു ലഭിക്കുകയും ചെയ്തു. ഇതോടെയാണ് കൂടുതൽ വിത്തു വരുത്തി കൃഷി ചെയ്യാനുള്ള പദ്ധതിയിട്ടത്. ആദ്യഘട്ടത്തിൽ ഓണ്‍ലൈൻ വഴി കാഷ്മീരിൽനിന്നു വിത്ത് എത്തിച്ചെങ്കിലും പിന്നീട് ലഭിച്ചില്ല. വിത്ത് ലഭിക്കാനുള്ള സാധ്യത തേടി രാമമൂർത്തി കൃഷി വിജ്ഞാൻ കേന്ദ്രത്തെയും കൃഷി വകുപ്പിനെയും സമീപിച്ചെങ്കിലും അവരും കൈ മലർത്തി. കാഷ്മീർ വിലക്കി കേരളത്തിലേക്കു കൃഷി വാപിക്കുന്നതിലുള്ള അപകടം മണത്ത കാഷ്മീർ കൃഷിവകുപ്പ് വിത്ത് നൽകുന്നതിനു തടയിട്ടതും പ്രതിസന്ധിയായി. കേരളത്തിൽ ഗുണമേന്മ കൂടിയ കുങ്കുമപ്പൂവ് ഉത്പാദിപ്പിച്ചാൽ തങ്ങളുടെ മേൽക്കോയ്മ നഷ്ടപ്പെടുമെന്നു ഭയന്ന കാഷ്മീർ അധികൃതർ വിത്ത് സംസ്ഥാനത്തിനു പുറത്തു നൽകേണ്ടെന്നു തീരുമാനിക്കുകയായിരുന്നു. ഇക്കാര്യത്തിൽ എന്തെങ്കിലും ഇടപെടൽ നടത്താൻ കഴിയുമോയെന്ന കാര്യത്തിൽ പോലും അധികൃതർ ശ്രമം നടത്തിയില്ല. കാന്തല്ലൂരിൽതന്നെ വിത്ത് ഉത്പാദിപ്പിക്കാനുള്ള ശ്രമം നടത്തിയെങ്കിലും കൃഷിയിടങ്ങളിൽ വെള്ളം കെട്ടി നിൽക്കുന്നത് തടസമായി. ഇതോടെയാണ് കുങ്കുമപ്പൂവ് കൃഷി ഉപേക്ഷിക്കേണ്ട സ്ഥിതിയിലെത്തിയത്. വ്യത്യസ്തമായ കൃഷിയിലൂടെ വരുമാന നേട്ടമുണ്ടാക്കാൻ കഴിയുമായിരുന്ന ഒരു പദ്ധതിക്കാണ് ഇതോടെ തിരശീല വീണത്. കാന്തല്ലൂരിൽ പഴം, പച്ചക്കറി കൃഷി വിളയുന്ന പെരുമല വിനോദ സഞ്ചാരികളുടെ ഇഷ്ടയിടം കൂടിയാണ്.

വിതരണോദ്ഘാടനം

ഇളംദേശം: ബ്ലോക്ക് പഞ്ചായത്ത് കോന്പൗണ്ടിൽ തയാറാക്കിയ നഴ്സറിയിൽ ഉത്പാദിപ്പിച്ച ആയിരത്തോളം തെങ്ങിൻ തൈകളുടേയും 15000 ത്തോളം കമുകിൻ തൈകളുടെയും വിതരണോദ്ഘാടനം നടത്തി. ബ്ലോക്ക് പഞ്ചായത്ത് പ്രസിഡന്‍റ് ടോമി തോമസ് കാവാലം ഉദ്ഘാടനം ചെയ്തു. സ്ഥിരംസമിതി അധ്യക്ഷൻമാരായ നൈസി ഡെനിൽ, ആൻസി സോജൻ, ബ്ലോക്ക് പഞ്ചായത്തംഗങ്ങളായ കെ.എസ്. ജോണ്‍, ഷൈനി സന്തോഷ്, ടെസിമോൾ മാത്യു, ഡാനിമോൾ വർഗീസ്, ബിഡിഒ എ.ജെ. അജയ്, ജോയിന്‍റ് ബിഡിഒ ഡി. ജ്യോതി എന്നിവർ പ്രസംഗിച്ചു.

കായികനിധി പദ്ധതി: ആദ്യ ധനസഹായംകൈമാറി

ഇടുക്കി: ജില്ലാ സ്പോർട്സ് കൗണ്‍സിലിന്‍റെ കായികനിധി പദ്ധതിയിൽ ലഭിച്ച ആദ്യ ധനസഹായം ജില്ലാ സ്പോർട്സ് കൗണ്‍സിൽ ചെയർമാനായ കളക്ടർ ഡോ. ദിനേശൻ ചെറുവാട്ടിന് കൈമാറി. ഒളിന്പ്യൻമാരും സഹോദരങ്ങളുമായ കെ.എം. ബിനു, കെ.എം. ബീനാമോൾ എന്നിവരാണ് ജില്ലാ സ്പോർട്സ് കൗണ്‍സിലിന്‍റെ കായികനിധിയിലേക്ക് ധനസഹായം നൽകിയത്. 60,000 രൂപയാണ് ഇവർ നൽകുന്നത്. അതിന്‍റെ ആദ്യഗഡുവായ 20,000 രൂപയുടെ ചെക്കാണ് കെ.എം.ബിനു കളക്ടർക്ക് കൈമാറിയത്. ജില്ലാ സ്പോർട്സ് കൗണ്‍സിൽ പ്രസിഡന്‍റ് റോമിയോ സെബാസ്റ്റ്യൻ, ഇടുക്കി ബ്ലോക്ക് പഞ്ചായത്തംഗം ഡിറ്റാജ് ജോസഫ്, കൗണ്‍സിൽ അംഗങ്ങളായ അനസ് ഇബ്രാഹിം, ടി.എം. ജോണ്‍, സ്പോർട്സ് കൗണ്‍സിൽ സെക്രട്ടറി പി.എ. ഷാജിമോൻ എന്നിവർ പങ്കെടുത്തു. സംസ്ഥാനത്ത് ഇടുക്കി ജില്ലാ സ്പോർട്സ് കൗണ്‍സിലാണ് ആദ്യമായി കായികനിധി രൂപീകരിച്ചത്. കായികരംഗത്തെ അടിസ്ഥാനസൗകര്യവികസനം, അവശ കായികതാരങ്ങൾക്കുള്ള സാന്പത്തികസഹായം, ചികിത്സാ ധനസഹായം, സാന്പത്തികമായി പിന്നാക്കം നിൽക്കുന്ന കായികതാരങ്ങളെ ദേശീയഅന്തർദേശീയ മത്സരങ്ങളിൽ പങ്കെടുപ്പിക്കുന്നതിനുളള ധനസഹായം, കായികരംഗവുമായി ബന്ധപ്പെട്ട് മറ്റ് അത്യാവശ്യകാര്യങ്ങൾക്ക് തുക വിനിയോഗിക്കൽ എന്നീ ലക്ഷ്യത്തോടെയാണ് കായികനിധി രൂപികരിച്ചിരിക്കുന്നത്.

വഴിയാത്രക്കാരൻ ക്രെയിനിടിച്ച് മരിച്ചു

തൊടുപുഴ: നടന്നുപോകുന്നതിനിടെ വഴിയാത്രക്കാരൻ ക്രെയിൻ ഇടിച്ചു മരിച്ചു. തൊടുപുഴ വെങ്ങല്ലൂർ ഗുരുനഗർ വടക്കേടത്ത് ഉണ്ണികൃഷ്ണൻ (53) ആണ് മരിച്ചത്. വെങ്ങല്ലൂർ - മങ്ങാട്ടുകവല ബൈപാസ് റോഡിലൂടെ നടന്നുപോകുകയായിരുന്ന ഉണ്ണികൃഷ്ണനെ പിന്നിലൂടെയെത്തിയ ക്രെയിൻ ഇടിക്കുകയായിരുന്നു. ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം നടത്തി. ഭാര്യ: മഞ്ജു വേങ്ങത്താനം കുടുംബാംഗം. മകൻ: നന്ദു.

പാന്പുകടിയേറ്റ് വീട്ടമ്മ മരിച്ചു

മൂലമറ്റം: പാന്പുകടിയേറ്റ് വീട്ടമ്മ മരിച്ചു. ഇടാട് പുതിയകുന്നേൽ ജോസഫിന്‍റെ ഭാര്യ ബെറ്റി (49) യാണ് മരിച്ചത്. ബുധനാഴ്ച പുരയിടത്തിൽ വിറക് ശേഖരിക്കാനായി പോയപ്പോഴാണ് പാന്പുകടിയേറ്റത്. തൊടുപുഴയിലെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം ഇന്നലെ തൊടുപുഴ ജില്ലാ ആശുപത്രിയിൽ പോസ്റ്റ്മോർട്ടത്തിനു ശേഷം ബന്ധുക്കൾക്ക് വിട്ടു നൽകി. സംസ്കാരം നടത്തി. മകൻ: ജോയൽ.

അലങ്കാരമായി അധികതസ്തിക: സായാഹ്ന ഒപിക്ക് നടപടിയില്ല

തൊടുപുഴ: ആവശ്യത്തിന് ഡോക്ടർമാരും ജീവനക്കാരും ഉണ്ടായിട്ടും ജില്ലയിലെ കുടുംബാരോഗ്യകേന്ദ്രങ്ങളിൽ സായാഹ്ന ഒപി തുടങ്ങാനായില്ല. മൂന്നു ഡോക്ടർമാരും രണ്ടു വീതം നഴ്സുമാരും ഫാർമസിസ്റ്റും ഉള്ള ആശുപത്രികളിൽ വൈകുന്നേരം ആറുവരെ സായാഹ്ന ഒപി തുടങ്ങുമെന്നായിരുന്നു സർക്കാർ പ്രഖ്യാപനം. പിഎച്ച്സികൾ കുടുംബാരോഗ്യ കേന്ദ്രങ്ങളായും ബ്ലോക്ക് പിഎച്ച്സികൾ ബ്ലോക്ക് കുടുംബാരോഗ്യ കേന്ദ്രങ്ങളായും ഉയർത്തുന്പോൾ സായാഹ്ന ഒപി ആരംഭിക്കാനായിരുന്നു തീരുമാനം. ഇതിന്‍റ അടിസ്ഥാനത്തിൽ ജീവനക്കാർ കുറവുള്ള സ്ഥാപനങ്ങളിൽ കൂടുതൽ തസ്തിക അനുവദിക്കുകയും സ്ഥാപനങ്ങളെല്ലാം കുടുംബാരോഗ്യകേന്ദ്രങ്ങളായും ബ്ലോക്ക് കുടുംബാരോഗ്യകേന്ദ്രങ്ങളായും ഉയർത്തുകയും ചെയ്തു. കുടുംബാരോഗ്യ കേന്ദ്രങ്ങളായി ഉയർത്തിയതിനെത്തുടർന്ന് കിടത്തിച്ചികിത്സ ഉണ്ടായിരുന്ന പലസ്ഥാപനങ്ങളിലും ഇത് പൂർണമായും നിർത്തലാക്കി. മികച്ച നിലയിൽ കിടത്തിച്ചികിത്സ ലഭിച്ചിരുന്ന മുട്ടം, കഞ്ഞിക്കുഴി, ഉപ്പുതറ, അറക്കുളം എന്നിവിടങ്ങളിൽ ഇത് പൂർണമായും നിലച്ചു. നിലവിൽ കുമളി, ചിത്തിരപുരം, വണ്ടൻമേട്, വണ്ടിപ്പെരിയാർ എന്നിവിടങ്ങളിലെ ആശുപത്രികളിലാണ് കിടത്തിച്ചികിത്സയുള്ളത്. എന്നാൽ കൂടുതൽ ഡോക്ടർമാരും ജീവനക്കാരും ഉണ്ടായിട്ടും സായാഹ്ന ഒപി പ്രഖ്യാപിച്ച ആശുപത്രികളിൽ വൈകുന്നേരം ആറു വരെ സായാഹ്ന ഒപി തുടങ്ങാൻ കഴിഞ്ഞില്ല. ഒപി തുടങ്ങാനായി ആവശ്യത്തിന് ജീവനക്കാരെ നിയമിക്കുകയും ബ്ലോക്ക്, ഗ്രാമ പഞ്ചായത്തുകൾക്ക് ആവശ്യമെങ്കിൽ കൂടുതൽ ജീവനക്കാരെ നിയമിക്കാൻ അനുമതി നൽകുകയും ചെയ്തിരുന്നു. ഇത്തരത്തിൽ പഞ്ചായത്തുകൾ വഴിയും എൻഎച്ച്എം വഴിയും ജീവനക്കാരെ നിയമിച്ചിട്ടും ഭൂരിപക്ഷം സ്ഥാപനങ്ങളിലും ആറുവരെ ഡോക്ടറുടെ സേവനം ലഭിക്കുന്നില്ലെന്നാണ് പരാതി. മുടങ്ങിപ്പോയ കിടത്തിച്ചികിത്സ പുനരാരംഭിക്കാനും നടപടിയില്ല. സായാഹ്ന ഒപി ഏറ്റവും കൂടുതൽ പ്രയോജനം ചെയ്യുന്നത് സാധാരണക്കാരായ തൊഴിലാളികൾക്കാണ്. തൊഴിൽസമയം കഴിഞ്ഞ് എത്തുന്നവർക്ക് വൈകിയാണെങ്കിലും ഡോക്ടറെ കാണാൻ അവസരം ലഭിക്കുമെന്നതാണ് ഗുണം.

വനവിഭവങ്ങൾ ശേഖരിക്കാൻ പോയ ആദിവാസി സ്ത്രീ കാട്ടിൽ പ്രസവിച്ചു

വണ്ടിപ്പെരിയാർ: വനവിഭവങ്ങൾ ശേഖരിക്കുവാൻ കാട്ടിൽപോയ ആദിവാസി സ്ത്രീ പ്രസവിച്ചു. വള്ളക്കടവ് റേഞ്ചിന്‍റെ കീഴിൽ കാട്ടിൽ താമസിക്കുന്ന മലമ്പണ്ടാര വിഭാഗത്തിൽപ്പെട്ട ബിന്ദു (24) ആണ് പെൺകുഞ്ഞിന് ജൻമം നൽകിയത്. കൂടെയുണ്ടായിരുന്ന ഭർത്താവ് സുരേഷ്, ആരോഗ്യ വകുപ്പ് അധികൃതരെ വിവരമറിയിച്ചതനുസരിച്ച് കുമളിയിലെ പ്രാഥമികാരോഗ്യ കേന്ദ്രത്തിലെ ഡോക്ടർ ഉൾപ്പെടെയുള്ള ആരോഗ്യപ്രവർത്തകർ ആംബുലൻസുമായി വള്ളക്കടവിലെ കാട്ടിലെത്തി കുട്ടിയെയും മാതാവിനെയും ആശുപത്രിയിൽ എത്തിക്കുന്നതിനായി ശ്രമിച്ചങ്കിലും ബിന്ദു അവരോടൊപ്പം പോകാൻ തയാറായില്ല. ഇതിനെത്തുടർന്ന് ആരോഗ്യ വകുപ്പ് അധികൃതർ കുട്ടിയെ ആംബുലൻസിൽ വണ്ടിപ്പെരിയാർ പ്രാഥമികാരോഗ്യ കേന്ദ്രത്തിലെത്തിക്കുകയായിരുന്നു. തുടർന്ന് കുട്ടിക്കു വേണ്ട ചികിത്സ ഇവർ ഉറപ്പാക്കി. കുഞ്ഞിന് രണ്ടര കിലോഗ്രാം തൂക്കമുണ്ട്. കുമളി പ്രാഥമികാരോഗ്യ കേന്ദ്രത്തിലെ ഡോ. ഷബാന ബീഗം, കുമളി ഹെൽത്ത് ഇൻസ്പെക്ടർ ബി. മാടസ്വാമി, ആരോഗ്യ വകുപ്പ് ജീവനക്കാരായ ആര്യാമോഹൻ, ആംബുലൻസ് ഡ്രൈവർ നൈസാമുദ്ദീൻ, വനം വകുപ്പ് ജീവനക്കാരിയായ സുബിഷ, അങ്കണവാടി വർക്കർ ശ്രീദേവി എന്നിവർ ചേർന്നാണ് കുട്ടിയെ ആശുപത്രിയിൽ എത്തിച്ചത്.

ഇന്‍റർകൊളീജിയറ്റ് ഫുട്ബോൾ ടൂർണമെന്‍റ്

തൊടുപുഴ: ഫ്യൂജി ഗംഗയുടെയും തൊടുപുഴ സോക്കർ സ്കൂളിന്‍റെയും ആഭിമുഖ്യത്തിൽ ഒന്നാമത് ജെയിംസ് വി. ജോർജ് മെമ്മോറിയൽ ഇന്‍റർകൊളീജിയറ്റ് ഫുട്ബോൾ ടൂർണമെന്‍റ് തൊടുപുഴ സോക്കർ സ്കൂൾ ഗ്രൗണ്ടിൽ ആരംഭിച്ചു. കേരള ഫുട്ബോൾ അസോസിയേഷൻ പ്രസിഡന്‍റ് നവാസ് മീരാൻ ഉദ്ഘാടനം ചെയ്തു. മുൻ ഇന്ത്യൻ ഫുട്ബോൾ താരം എൻ.പി. പ്രദീപ് കിക്കോഫ് നിർവഹിച്ചു. കേരള ഫുട്ബോൾ അസോ. ഓണററി പ്രസിഡന്‍റ് ടോം ജോസ് കുന്നേൽ, കേരള ഒളിന്പിക് അസോ. വൈസ് പ്രസിഡന്‍റ് ശരത് യു. നായർ, പി.എ. സലിംകുട്ടി, സി.കെ. സുനിൽരാജ്, ജോസ് പുളിക്കൻ, എം.എച്ച്. സജീവ്, സി.ബി. ഹരികൃഷ്ണൻ തുടങ്ങിയവർ പ്രസംഗിച്ചു. തേവര എസ്എച്ച് കോളജ്, കോതമംഗലം എംഎ കോളജ്, എസ്ബി കോളജ് ചങ്ങനാശേരി, നിർമല കോളജ് മുവാറ്റുപുഴ എന്നീ ടീമുകൾ സെമിഫൈനൽ യോഗ്യത നേടി.

സെന്‍റ് ഫിലോമിനാസ് എച്ച്എസ്എസ് രജതജൂബിലി സമാപനം ഇന്ന്

ഉപ്പുതറ: ഹൈറേഞ്ചിലെ ആദ്യകാല കുടിയേറ്റ മേഖലയായ ഉപ്പുതറയിൽ വിദ്യാഭ്യാസ രംഗത്ത് നാഴികക്കല്ലായി മാറിയ സെന്‍റ് ഫിലോമിനാസ് ഹയർ സെക്കൻഡറി സ്കൂളിൽ എച്ച്എസ്എസ് വിഭാഗം ആരംഭിച്ചതിന്‍റെ രജത ജൂബിലിയോടനുബന്ധിച്ച് സംഘടിപ്പിക്കുന്ന ആഘോഷങ്ങൾ ഇന്ന് സമാപിക്കും. ജൂബിലി സമാപന സമ്മേളനവും പൂർവ വിദ്യാർഥി സംഗമവും കാഞ്ഞിരപ്പള്ളി ബിഷപ് മാർ ജോസ് പുളിക്കൽ ഉദ്ഘാടനം ചെയ്യും. ജില്ലാ കളക്ടർ ഡോ. ദിനേശൻ ചെറുവാട്ട് മുഖ്യാതിഥിയായിരിക്കും. സ്കൂൾ മാനേജർ ഫാ. ഡൊമിനിക് കാഞ്ഞിരത്തിനാൽ അധ്യക്ഷത വഹിക്കും. രൂപത കോർപറേറ്റ് മാനേജർ ഫാ. ഡൊമിനിക് അയലൂപ്പറന്പിൽ മുഖ്യപ്രഭാഷണം നടത്തും. പഞ്ചായത്ത് പ്രസിഡന്‍റ് ജയിംസ് കെ. ജേക്കബ്, സ്ഥാപക മാനേജർ ഫാ. മാത്യു പനച്ചിക്കൽ, ഫാ. ആന്‍റണി കൊച്ചാങ്കൽ, ജില്ലാ പഞ്ചായത്തംഗം ആശ ആന്‍റണി, പഞ്ചായത്തംഗങ്ങളായ സാബു വേങ്ങവേലിൽ, ഫ്രാൻസിസ് അറയ്ക്കപ്പറന്പിൽ, പിടിഎ പ്രസിഡന്‍റ് ടോമി മുഖാലയിൽ എന്നിവർ പ്രസംഗിക്കും. യോഗത്തിൽ മുൻ മാനേജർമാരെയും അധ്യാപകരെയും ആദരിക്കുമെന്ന് പ്രിൻസിപ്പൽ ജീമോൻ ജേക്കബ്, ജനറൽ കണ്‍വീനർ സജിൻ സ്കറിയ എന്നിവർ അറിയിച്ചു.

ഓണവിപണി; നേട്ടം കൊയ്ത് കൃഷിവകുപ്പും കുടുംബശ്രീയും

തൊടുപുഴ: ഓണക്കാലത്ത് പഴം, പച്ചക്കറി വിപണിയിൽ നേട്ടം കൊയ്ത് കൃഷിവകുപ്പും കുടുംബശ്രീയും. കൃഷിവകുപ്പ് ജില്ലയിൽ നടത്തിയ വിപണികളിലൂടെ 35.79 ലക്ഷം രൂപയുടെ വിറ്റുവരവാണ് നേടിയത്. കഴിഞ്ഞ ഒന്നുമുതൽ ഉത്രാടനാളായ നാലുവരെ ജില്ലാതലത്തിൽ ഉൾപ്പെടെ 84 വിപണികളാണ് കൃഷിവകുപ്പ് തുറന്നത്. 83.85 മെട്രിക് ടണ്‍ പഴം, പച്ചക്കറികളാണ് വിറ്റഴിച്ചത്. കർഷകരിൽനിന്ന് ഉത്പ്പന്നങ്ങൾ മാർക്കറ്റ് വിലയെക്കാൽ 10 ശതമാനം അധികം നൽകി സംഭരിച്ച് മാർക്കറ്റ് വിലയെക്കാൾ 30 ശതമാനം കുറച്ച് പൊതുജനങ്ങൾക്ക് നൽകുകയായിരുന്നു ലക്ഷ്യം. ഇതനുസരിച്ച് 32.289 മെട്രിക് ടണ്‍ പച്ചക്കറികൾ 17.09 ലക്ഷം രൂപയ്ക്കും 22.92 മെട്രിക് ടണ്‍ പഴ വർഗങ്ങൾ 11.98 ലക്ഷം രൂപയ്ക്കും കർഷകരിൽനിന്ന് സംഭരിച്ചു. ഇതിനു പുറമേ 19.03 ലക്ഷം രൂപയ്ക്ക് 62.135 മെട്രിക് ടണ്‍ പച്ചക്കറിയും 1.73 ലക്ഷം രൂപയ്ക്ക് 4.102 മെട്രിക് ടണ്‍ പഴ വർഗങ്ങളും ഹോർട്ടികോർപ്പിൽനിന്നും സംഭരിച്ചു. സപ്ലൈകോ 1.24 കോടി മഞ്ഞൾപൊടി, ചേന അട, കൂവപ്പൊടി, ചിപ്സ്, എള്ളെണ്ണ, ഏലയ്ക്ക, റാഗിപ്പൊടി, അച്ചാറുകൾ, രക്തശാലി അരി, പാഷൻഫ്രൂട്ട് ജ്യൂസ്, കാന്താരി ഹണി തുടങ്ങിയ കേരളഗ്രോ ബ്രാൻഡഡ് ഉത്പന്നങ്ങളും വിപണികളിലെത്തിച്ചിരുന്നു. ജില്ലയിലെ 84 വിപണികളിൽ 52 എണ്ണം കൃഷിവകുപ്പ് നേരിട്ടും 25 എണ്ണം ഹോർട്ടികോർപ്പും ഏഴെണ്ണം വിഎഫ്പിസികെയുമാണ് നടത്തിയത്. സപ്ലൈക്കോയും ഓണക്കാലത്ത് നേട്ടം കൈവരിച്ചു. സപ്ലൈക്കോയ്ക്ക് 1.24 കോടിയാണ് ഓണക്കാലത്തെ ജില്ലയിലെ വിറ്റുവരവ്. കണ്‍സ്യൂമർഫെഡും ഓണച്ചന്തകൾ നടത്തിയിരുന്നു. കുടുംബശ്രീക്ക് 60 ലക്ഷം ചെറുതോണിയിലെ ജില്ലാ ഫെയറും 108 സിഡിഎസ് ചന്തകളുമടക്കം 109 ഓണച്ചന്തകളാണ് കുടുംബശ്രീ ജില്ലയിൽ തുറന്നത്. 60.88 ലക്ഷമാണ് വിറ്റുവരവായി നേടിയത്.1807 ചെറുകിട സംരംഭക യൂണിറ്റുകളും (എംഇ) 1885 ജെഎൽജികളും ഭാഗമായി. ചെറുകിട സംരംഭക യൂണിറ്റുകൾ 26,63,275 ലക്ഷവും ജഐൽജികൾ 34,25,553 രൂപയും വിറ്റുവരവ് നേടിയെന്ന് മാർക്കറ്റിംഗ് വിഭാഗം അധികൃതർ പറഞ്ഞു. ജില്ലാ ഫെയറിൽ മാത്രം 5.10 ലക്ഷമാണ് വിറ്റുവരവ്. 47 ജഐൽജികൾക്ക് 1.80 ലക്ഷം രൂപയും എംഇകൾക്ക് 3.30 ലക്ഷവും വിറ്റുവരവുണ്ട്.

ഓണോത്സവ് സമാപിച്ചു

തൊടുപുഴ: മർച്ചന്‍റ്സ് അസോസിയേഷൻ, തൊടുപുഴ നഗരസഭ, ഡിടിപിസി എന്നിവയുടെ ആഭിമുഖ്യത്തിൽ സംഘടിപ്പിച്ച ഓണോത്സവ്- 2025 സമാപിച്ചു. സമാപന സമ്മേളനം പി.ജെ. ജോസഫ് എംഎൽഎ ഉദ്ഘാടനം ചെയ്തു. മുനിസിപ്പൽ ചെയർമാൻ കെ. ദീപക് അധ്യക്ഷത വഹിച്ചു. കെവിവിഇഎസ് ജില്ല പ്രസിഡന്‍റ് സണ്ണി പൈന്പിള്ളിൽ മുഖ്യപ്രഭാഷണം നടത്തി. വൈസ് ചെയർപേഴ്സണ്‍ ജെസി ആന്‍റണി സന്ദേശം നൽകി. മർച്ചന്‍റ്സ് അസോസിയേഷൻ പ്രസിഡന്‍റ് രാജു തരണിയിൽ, ജനറൽ കണ്‍വീനർ ആർ. രമേശ്, അനിൽ പീടികപ്പറന്പിൽ, ജോസ് തോമസ് കളരിക്കൽ, ഷെരീഫ് സർഗം, കെ.പി. ശിവദാസ്, ഷിയാസ് എംപീസ്, ജഗൻ ജോർജ്, ലിജോണ്‍സ് ഹിന്ദുസ്ഥാൻ, ബസ് ഓപ്പറേറ്റേഴ്സ് അസോസിയേഷൻ സംസ്ഥാന പ്രസിഡന്‍റ് കെ.കെ. തോമസ്, അഡ്വ. ജോയി തോമസ്, ടി.എൻ. പ്രസന്നകുമാർ, സാലി എസ്. മുഹമ്മദ്, നാസർ സൈര, എൻ.പി. ചാക്കോ, എം.എൻ. ബാബു, ആന്‍റണി കണ്ടിരിക്കൽ എന്നിവർ പ്രസംഗിച്ചു. ശതാഭിഷിക്തനായ പി.ജെ. ജോസഫ് എംഎൽഎയെ ചടങ്ങിൽ ആദരിച്ചു.

റോഡു വികസനത്തിനു ഭൂമി ഏറ്റെടുത്തു നൽകണം: സർവകക്ഷി യോഗം

ഉപ്പുതറ: മലയോരഹൈവേ നിർമാണത്തിന് ഭൂമി ഏറ്റെടുത്തു നൽകണമെന്ന ഹൈക്കോടതി ഉത്തരവ് ഉടൻ നടപ്പാക്കണമെന്ന് ചപ്പാത്തിൽ ചേർന്ന സർവകക്ഷിയോഗം ആവശ്യപ്പെട്ടു. ചപ്പാത്ത് പെട്രോൾ പമ്പിന് മുന്നിലുള്ള മൂന്ന് സെന്‍റ് സ്ഥലമാണ് ഏറ്റെടുത്ത് റോഡ് നിർമാണത്തിന് നൽകാൻ തഹസീൽദാർ, പഞ്ചായത്ത് സെക്രട്ടറി എന്നിവർക്ക് കോടതി ഉത്തരവ് നൽകിയത്. എന്നാൽ, കോടതി ഉത്തരവ് നടപ്പാക്കുന്നതിൽ ഉദ്യോഗസ്ഥർ വീഴ്ച വരുത്തി. നടപടിക്ക് കാലതാമസം വരുത്തി. കളക്ടർക്ക് പരാതി നൽകാൻ പമ്പ് ഉടമയ്ക്ക് അവസരമൊരുക്കി. അതിനിടെ പമ്പിന് മുൻവശം വീതികുറച്ച് മലയോര വിഭാഗം ടാറിംഗ് നടത്തി. റോഡിന് മതിയായവീതിയില്ലാത്തതിനാൽ ഇവിടെ അപകടം പതിവായിരിക്കുകയാണ്. കോടതി ഉത്തരവ് നടപ്പാക്കാൻ തയാറാകാത്ത ഉടുമ്പുഞ്ചോല തഹസിൽദാർ, പഞ്ചായത്ത് സെക്രട്ടറി എന്നിവർക്കെതിരേ നടപടി വേണമെന്നും യോഗം ആവശ്യപ്പെട്ടു. പമ്പിന് മുന്നിലെ സർക്കാർ ഭൂമി ഏറ്റെടുത്ത് വീതികൂട്ടി റോഡ് നിർമിക്കാൻ ജില്ലാഭരണകൂടം ഉടൻ നടപടി സ്വീകരിക്കണമെന്നും അല്ലാത്ത പക്ഷം ശനിയാഴ്ച പ്രക്ഷോഭം തുടങ്ങാനും യോഗം തീരുമാനിച്ചു. പ്രസിഡന്‍റ് ജയ്മോൾ ജോൺസൻ, പഞ്ചായത്ത് അംഗങ്ങളായ ബി. ബിനു, എം. കുഞ്ഞുമോൻ, വിവിധ കക്ഷിനേതാക്കളായ പി. ഗോപി, അഡ്വ. ജയിംസ് കാപ്പൻ, ഷാജി മാത്യു, വി.വി. പ്രമോദ് കുമാർ, ഷാജി. പി. ജോസഫ്, സി.ജെ. സ്റ്റീഫൻ തുടങ്ങിയവർ പ്രസംഗിച്ചു.

സുഹൃത്തിന്‍റെ മൃതദേഹം കണ്ട ആൾ കുഴഞ്ഞുവീണ് മരിച്ചു

അടിമാലി: ഉറ്റ സുഹൃത്ത് മരിച്ചുകിടക്കുന്നത് കണ്ടയാൾ കുഴഞ്ഞു വീണ് മരിച്ചു. കഴിഞ്ഞ 31ന് കാണാതായ പണിക്കൻകുടി സ്വദേശി പൊട്ടനാനിക്കൽ തങ്കനെ (62) യാണ് തൂങ്ങി മരിച്ച നിലയിൽ കണ്ടെത്തിയത്. ഇത് കണ്ടെത്തിയ ഇടുക്കിപണിക്കൻകുടി വെട്ടിക്കാട്ട് ജോർജ് (60) ആണ് കുഴഞ്ഞുവീണ് മരിച്ചത്. കഴിഞ്ഞ ദിവസങ്ങളിലെല്ലാം നാട്ടുകാരുടെയും പോലീസിന്‍റെയും നേതൃത്വത്തിൽ അന്വേഷണം നടത്തിയെങ്കിലും കണ്ടെത്താനായില്ല. ഇന്നലെ രാവിലെ 8.30ഓടെയാണ് സമീപത്തെ മറ്റൊരാളുടെ പറമ്പിൽ കാപ്പി മരത്തിലാണ് മൃതദേഹം കണ്ടെത്തിയത്. മൃതദേഹം കണ്ട ജോർജ് കുഴഞ്ഞ് വീണു. ഉടൻ തന്നെ അടിമാലി താലൂക്കാശുപത്രിയിലെത്തിച്ചെങ്കിലും ജോർജിന്‍റെ ജീവൻ രക്ഷിക്കാനായില്ല. ജോർജും തങ്കനും അടുത്ത സുഹൃത്തുക്കളായിരുന്നു. ഇടുക്കി മെഡിക്കൽ കോളജിൽ പോസ്റ്റ്മോർട്ടത്തിനു ശേഷം വീട്ടുവളപ്പിൽ തങ്കന്‍റെ സംസ്കാരം നടത്തി . ഭാര്യ: ബിന്ദു മക്കൾ: ആതിര, ആശ്വതി. മരുമക്കൾ: ശാന്തനു. ജോർജിന്‍റെ മൃതദേഹം പണിക്കൻ കുടി സെന്‍റ് ജോൺസ് മരിയ വിയാനി പള്ളി സെമിത്തേരിയിൽ ഇന്നു രാവിലെ ഒൻപതിനു സംസ്കരിക്കും.പണിക്കൻകുടി പുളിക്കപ്പറമ്പിൽ മോളിയാണ് ജോർജിന്‍റെ ഭാര്യ മക്കൾ: ബിജോ, ജോമോൾ. മരുമക്കൾ: പ്രശോഭ്.

ഭൂപതിവ്: അപാകതയ്ക്കെതിരേ സമരപ്രഖ്യാപന കൺവൻഷൻ

രാജാക്കാട്: ഭൂനിയമങ്ങളിലെ ജനവിരുദ്ധ ചട്ടഭേദഗതികൾ പുനഃപരിശോധിക്കണമെന്നാവശ്യപ്പെട്ട് കേരള വ്യാപാരി വ്യവസായി ഏകോപന സമിതി സംസ്ഥാന കമ്മിറ്റിയുടെ നേതൃത്വത്തിൽ സെക്രട്ടേറിയറ്റിന് മുൻപിൽ നടത്തുന്ന അർധദിന സത്യഗ്രഹ സമരത്തിന് ഐക്യദാർഢ്യം പ്രഖ്യാപിച്ച് കേരള വ്യാപാരി വ്യവസായി ഏകോപന സമിതി രാജാക്കാട് യൂണിറ്റിന്‍റെ നേതൃത്വത്തിൽ ഇന്നലെ രാജാക്കാട് വ്യാപാരഭവൻ ഓഡിറ്റോറിയത്തിൽ സമര പ്രഖ്യാപന കൺവൻഷൻ നടത്തി. ജില്ലാ വൈസ് പ്രസിഡന്‍റ്് വി.എസ്. ബിജു അധ്യക്ഷത വഹിച്ചു. ജില്ലാ വർക്കിംഗ് പ്രസിഡന്‍റ്് കെ.ആർ. വിനോദ് ഉദ്ഘാടനം നിർവഹിച്ചു‌. വൈസ് പ്രസിഡന്‍റ്് പി.എം. ബേബി വിഷയാവതരണം നടത്തി. ഡയസ് പുല്ലൻ, ജില്ലാ ഓർഗനൈസർ സിബി കൊച്ചുവള്ളാട്ട്, സംസ്ഥാന കമ്മിറ്റിയംഗം പി.വി. ബേബി, ബ്ലോക്ക് പ്രസിഡന്‍റ് പി.ജെ. ജോൺസൺ, യൂണിറ്റ് ജനറൽ സെക്രട്ടറി സജിമോൻ കോട്ടയ്ക്കൽ, ട്രഷറർ വി.സി. ജോൺസൺ തുടങ്ങിയവർ പ്രസംഗിച്ചു.18ന് സെക്രട്ടേറിയറ്റിന് മുമ്പിൽ നടക്കുന്ന സമരത്തിൽ 100 പ്രവർത്തകരെ പങ്കെടുപ്പിക്കാൻ തീരുമാനിച്ചു.

ചൂണ്ടയിടാൻ പോയ ആളെ പുഴയിൽ കാണാതായി

കരിമണ്ണൂർ: ചൂണ്ടയിടാൻ പോയ ആളെ തൊമ്മൻകുത്ത് പുഴയിൽ കാണാതായി. തൊമ്മൻകുത്ത് വാഴക്കുടിയിൽ റോയിയെ(55) യാണ് കാണാതായത്. ഇന്നലെ ഉച്ചയ്ക്കാണ് സംഭവം. തൊമ്മൻകുത്ത് ജുമാ മസ്ജിദിന് സമീപം വട്ടക്കയം ഭാഗത്ത് പുഴയിൽ റോയി ചൂണ്ടയിടുന്നത് പ്രദേശവാസികൾ കണ്ടിരുന്നു. 12.45 ഓടെ തൊഴിലുറപ്പ് ജോലിയിൽ ഏർപ്പെട്ടിരുന്ന സ്ത്രീകളും സമീപവാസികളും വലിയ ശബ്ദം കേട്ട് ഓടിയെത്തിയപ്പോൾ ഇയാളെ കാണാനായില്ല. സമീപത്തെ പാറയിൽനിന്നും റോയിയുടെ ഫോണും വസ്ത്രവും ചെരിപ്പും കണ്ടെത്തുകയും ചെയ്തു. നാട്ടുകാർ അറിയിച്ചതനുസരിച്ച് കരിമണ്ണൂർ പോലീസും തൊടുപുഴയിൽനിന്ന് അഗ്നിരക്ഷാ സേനയും സ്കൂബാ ടീമും തെരച്ചിൽ നടത്തിയെങ്കിലും ഫലമുണ്ടായില്ല. തൊമ്മൻകുത്തിലെ വനംവകുപ്പ് ഉദ്യോഗസ്ഥരും സ്ഥലത്തെത്തിയിരുന്നു. ഇരുട്ടു മൂലം ഇന്നലെ വൈകുന്നേരത്തോടെ നിർത്തി വച്ച തെരച്ചിൽ ഇന്നുരാവിലെ പുനരാരംഭിക്കുമെന്ന് ഫയർഫോഴ്സ് അധികൃതർ പറഞ്ഞു.

ആർമി റിക്രൂട്ട്മെന്‍റ് റാലി: രണ്ടാംദിനം 600 ഉദ്യോഗാർഥികൾ

ഇടുക്കി: നെടുങ്കണ്ടം സിന്തറ്റിക് സ്റ്റഡിയത്തിൽ നടന്നുവരുന്ന ആർമി റിക്രൂട്ട്മെന്‍റ് റാലിയുടെ രണ്ടാം ദിവസം 600 ഉദ്യോഗാർഥികൾ പങ്കെടുത്തു. തിരുവനന്തപുരം, പത്തനംതിട്ട ജില്ലകളിൽനിന്ന് ജനറൽ ഡ്യൂട്ടി വിഭാഗം ഉദ്യോഗാർഥികളാണ് രണ്ടാം ദിന കായികക്ഷമതാ പരീക്ഷയ്ക്ക് എത്തിയത്. ഇന്ന് കൊല്ലം ജില്ലയിൽനിന്ന് ജനറൽ ഡ്യൂട്ടി വിഭാഗത്തിൽ 829 പേരും നാളെ ഏഴ് ജില്ലകളിൽനിന്നായി ടെക്നിക്കൽ സ്റ്റാഫ് വിഭാഗത്തിൽ 843 പേരും റാലിയിൽ പങ്കെടുക്കും. 14ന് 13ാം തീയതിയിലെ ഫിസിക്കൽ ടെസ്റ്റിൽ പങ്കെടുത്ത് വിജയിച്ചവർക്ക് മെഡിക്കൽ ടെസ്റ്റ് നടത്തും. 15ന് ജനറൽ ഡ്യൂട്ടിക്കുള്ള ഉദ്യോഗാർഥികളിൽനിന്നു പാരാറെജിമെന്‍റിലേക്ക് പോകാൻ താത്പര്യമുള്ളവർക്ക് അഞ്ച് കിലോമീറ്റർ റണ്‍റേസ് നടത്തും.

ഭിന്നശേഷി സംവരണം: വൻ പ്രതിഷേധ സംഗമം നാളെ മുരിക്കാശേരിയിൽ

ചെറുതോണി: ഭിന്നശേഷി സംവരണ വിഷയത്തിൽ ക്രൈസ്തവ മാനേജ്മെന്‍റുകളോടുള്ള വിവേചനത്തിനെതിരേ നാളെ മുരിക്കാശേരി വൻ പ്രക്ഷോഭത്തിനു സാക്ഷ്യം വഹിക്കും. ഉച്ചകഴിഞ്ഞ് രണ്ടിനാണ് അധ്യാപകരുടെ പ്രതിഷേധ സംഗമം. ഇടുക്കി രൂപത കാത്തലിക് ടീച്ചേഴ്സ് ഗിൽഡ് നേതൃത്വം നൽകും. കേരളത്തിലെ പൊതുവിദ്യാഭ്യാസ മേഖലയിൽ ഗുണമേന്മയും അച്ചടക്കവും പഠന മികവും ഉറപ്പുവരുത്തുന്നതിൽ മുന്നിൽനിൽക്കുന്ന എയ്ഡഡ് മേഖലയോടു സർക്കാർ കാണിക്കുന്ന വിവേചനത്തിനെതിരേയാണ് പ്രതിഷേധം. ഈ മേഖലയെ സംരക്ഷിക്കുന്നതിനു പകരം ശ്വാസം മുട്ടിക്കാനാണ് സർക്കാരുകൾ ശ്രമിക്കുന്നതെന്ന് അധ്യാപകർ ചൂണ്ടിക്കാട്ടുന്നു. ക്രൈസ്തവരോടു വിവേചനം ഭിന്നശേഷി സംവരണത്തിന്‍റെ പേരിൽ 2016 മുതൽ നിയമന അംഗീകാരമില്ലാതെ ആയിരക്കണക്കിന് അധ്യാപകരാണ് ജോലി ചെയ്യേണ്ടി വരുന്നത്. ഭിന്നശേഷി സംവരണം നടപ്പിലാക്കാൻ എയ്ഡഡ് സ്കൂൾ മാനേജ്മെന്‍റ് തയാറാണെന്നു നേരത്തെതന്നെ സർക്കാരിനെ അറിയിച്ചിരുന്നു. എന്നാൽ, ഈ വിഭാഗത്തിൽ യോഗ്യതയുള്ള അധ്യാപകരെ കിട്ടുന്നില്ല. ഭിന്നശേഷി നിയമനങ്ങൾ മുഴുവൻ നടപ്പിലായ ശേഷമേ നിലവിൽ ജോലിയിലുള്ള അധ്യാപകരുടെ നിയമനങ്ങൾ അംഗീകരിക്കൂ എന്ന നിലപാടിലാണ് സർക്കാർ. ഇതിനെതിരേ എൻഎസ്എസ് മാനേജ്മെന്‍റ് സുപ്രീംകോടതിയെ സമീപിച്ചു. 2025 മാർച്ച് നാലിനു സുപ്രീംകോടതി വിധി പ്രസ്താവിച്ചു. ഭിന്നശേഷി വിഭാഗത്തിൽപ്പെട്ട അധ്യാപക തസ്തികകൾ മാറ്റിവച്ചതിനു ശേഷം മറ്റ് തസ്തികകളിൽ നിയമന അംഗീകാരം നൽകണമെന്ന വാദമാണ് കോടതി അംഗീകരിച്ചത്. സമാനമായ സാഹചര്യങ്ങളിൽ മറ്റു മാനേജ്മെന്‍റുകളിലെ അധ്യാപകർക്കും നിയമന അംഗീകാരം നൽകാൻ സുപ്രീംകോടതി നിർദേശിച്ചിരുന്നു. എന്നാൽ, 2025 മാർച്ച് 17ന് സംസ്ഥാന സർക്കാർ നിയമന അംഗീകാരം എൻഎസ്എസ് മാനേജ്മെന്‍റുകളിലെ അധ്യാപകർക്കു മാത്രമായി ചുരുക്കി. കോടതി ഉത്തരവും പാലിച്ചില്ല തുടർന്ന് കെസിബിസിയുടെ മാനേജ്മെന്‍റ് കൺസോർഷ്യം ഹൈക്കോടതിയെ സമീപിച്ച് 2025 ഏപ്രിൽ ഏഴിന് സമാനമായ വിധി നേടി. എൻഎസ്എസിനു ലഭിച്ച കോടതിവിധിക്കു സമാനമായി ഹൈക്കോടതി മറ്റു മാനേജ്മെന്‍റുകൾക്ക് അനുകൂലമായി വിധി പ്രസ്താവിച്ചിട്ടും കത്തോലിക്കാ സഭയുടെ മാനേജ്മെന്‍റിനു കീഴിലുള്ള അധ്യാപക നിയമനങ്ങൾ നിരസിച്ചുകൊണ്ട് 2025 ജൂലൈ 31ന് സംസ്ഥാന സർക്കാർ ഉത്തരവ് ഇറക്കിയത് കടുത്ത വിവേചനമാണ്. ഇതിൽ പ്രതിഷേധിച്ചാണ് കാത്തലിക് ടീച്ചേഴ്സ് ഗിൽഡിന്‍റെ നേതൃത്വത്തിൽ നാളെ മുരിക്കാശേരിയിൽ പ്രതിഷേധ സംഗമം നടത്തുന്നത്. ആയിരത്തോളം അധ്യാപക, അനധ്യാപകർ പ്രതിഷേധ സംഗമത്തിൽ പങ്കെടുക്കും. ഉച്ചകഴിഞ്ഞ് രണ്ടിനു മുരിക്കാശ്ശേരി പാവനാത്മ കോളജിൽനിന്ന് ആരംഭിക്കുന്ന പ്രതിഷേധ റാലി ഇടുക്കി രൂപത മുഖ്യവികാരി ജനറാൾ മോൺ. ജോസ് കരിവേലിക്കൽ ഉദ്ഘാടനം ചെയ്യും. രൂപത എകെസിസി പ്രസിഡന്‍റ് ജോർജ് കോയിക്കൽ മുഖ്യ പ്രഭാഷണം നടത്തും. ഇടുക്കി രൂപത വിദ്യാഭ്യാസ സെക്രട്ടറി റവ.ഡോക്ടർ ജോർജ് തകടിയേൽ, മുരിക്കാശേരി സെന്‍റ് മേരീസ് ഹയർ സെക്കൻഡറി സ്കൂൾ പ്രിൻസിപ്പൽ സിബിച്ചൻ തോമസ്, ഹെഡ്മിസ്ട്രസ് ജിജിമോൾ മാത്യു, ടീച്ചേഴ്സ് ഗിൽഡ് രൂപത പ്രസിഡന്‍റ് നോബിൾ മാത്യു, സെക്രട്ടറി ബോബി തോമസ്, ട്രഷറർ എബി കൂട്ടുങ്കൽ എന്നിവർ പ്രസംഗിക്കും.

തൽ സൈനിക് ക്യാന്പിൽ അഭിമാനമായി കേഡറ്റുകൾ

തൊടുപുഴ: എൻസിസിയുടെ നേതൃത്വത്തിൽ ഡൽഹിയിൽ സംഘടിപ്പിച്ച തൽ സൈനിക് ക്യാന്പിൽ സ്വർണമെഡൽ ഉൾപ്പെടെ മികച്ച നേട്ടം കൈവരിച്ച് തൊടുപുഴ ന്യൂമാൻ കോളജിലെ എൻസിസി കേഡറ്റുകൾ അഭിമാനമായി. ബിരുദ വിദ്യാർഥികളായ കിരണ്‍ ജേക്കബ് ജോയ്സ്, അലൻ രാജൻ, അരവിന്ദ് രാജേഷ് എന്നിവരാണ് എൻസിസിയുടെ പരമോന്നത ക്യാന്പായ തൽ സൈനിക് ക്യാന്പ് വിജയകരമായി പൂർത്തീകരിച്ചത് . നൂറു ദിവസത്തെ കഠിനമായ സെലക്‌ഷൻ പ്രക്രിയയ്ക്ക് ശേഷമാണ് കേഡറ്റുകൾ ഡൽഹിയിലെ തൽ സൈനിക് ക്യാന്പിലേക്ക് യോഗ്യത നേടിയത്. ഒബ്സ്റ്റക്കിൾ ട്രെയിനിംഗ്, ഫയറിംഗ്, ജെഡിഎഫ്എസ്, ഹെൽത്ത് ആൻഡ് ഹൈജിൻ, മാപ് റീഡിംഗ് എന്നീ മിലിറ്ററി മത്സരയിനങ്ങളാണ് വിവിധ സംസ്ഥാനങ്ങളിൽനിന്നെത്തുന്ന കേഡറ്റുകൾക്കായി ഒരുക്കിയത്. ഒബ്സ്റ്റക്കിൾ ട്രെയിനിംഗ് വിഭാഗത്തിൽ കിരണ്‍ ജേക്കബും ഫയറിംഗിൽ അലൻ രാജനും ഹെൽത്ത് ആൻഡ് ഹൈജിൻ വിഭാഗത്തിൽ അരവിന്ദ് രാജേഷും സംസ്ഥാനത്തെ പ്രതിനിധീകരിച്ചു. ടിഎസ്‌സി ദേശീയതല ടീം ഷൂട്ടിംഗ് ചാന്പ്യൻഷിപ്പിൽ അലൻ സ്വർണ മെഡൽ ജേതാവായി. മികച്ച നേട്ടം കരസ്ഥമാക്കിയ കേഡറ്റുകളെ 18 കേരള ബറ്റാലിയൻ കമാൻഡിംഗ് ഓഫീസർ ലെഫ്. കേണൽ അനിരുദ്ധ് സിംഗ്, കോളജ് മാനേജർ മോണ്‍. പയസ് മലേക്കണ്ടത്തിൽ, പ്രിൻസിപ്പൽ ഡോ.ജെന്നി കെ. അലക്സ്, ലഫ്. ക്യാപ്റ്റൻ പ്രജീഷ് സി. മാത്യു, വൈസ് പ്രിൻസിപ്പൽമാരായ ഡോ. സാജു ഏബ്രഹാം, പ്രഫ. ബിജു പീറ്റർ, ബർസാർ ഫാ. ബെൻസണ്‍ എൻ. ആന്‍റണി എന്നിവർ അഭിനന്ദിച്ചു.

ഇരച്ചിൽപാറ വെള്ളച്ചാട്ടം ചോദിക്കുന്നു ; എന്നെ കൊല്ലാതിരിക്കാൻ പറ്റുമോ... ഇല്ലല്ലേ?

മറയൂർ: വെള്ളച്ചാട്ടങ്ങളെയും മറ്റും ആളുകൾക്ക് കൂടുതൽ ആസ്വദിക്കാൻ കഴിയുന്ന രീതിയിൽ മാറ്റിയെടുക്കാൻ ശ്രമിക്കുന്ന കാലത്ത് ഇവിടെയൊരു ബ്ലോക്ക് പഞ്ചായത്ത് അടക്കം വെള്ളച്ചാട്ടത്തിന്‍റെ ഉള്ള ശോഭ കൂടി കെടുത്തുന്ന രീതിയിൽ തലതിരിഞ്ഞ പരിഷ്കാരം നടത്തുന്നതായി ആക്ഷേപം. മറയൂരിലെ ഇരച്ചിൽപാറ വെള്ളച്ചാട്ടത്തിനാണ് ഈ ദുർഗതി. മറയൂർ- കാന്തല്ലൂർ മേഖലയിലെ പ്രധാന വിനോദസഞ്ചാര കേന്ദ്രമാണ് ഇരച്ചിൽപാറ വെള്ളച്ചാട്ടം. ഈ വെള്ളച്ചാട്ടത്തിന്‍റെ പ്രകൃതിഭംഗി അനധികൃത നിർമാണങ്ങളും ബ്ലോക്ക് പഞ്ചായത്തിന്‍റെ അശാസ്ത്രീയ നടപടികളും നശിപ്പിക്കുന്നതായിട്ടാണ് ആക്ഷേപം. കോവിൽക്കടവിനു സമീപം സ്ഥിതിചെയ്യുന്ന നയനമനോഹരമായ വെള്ളച്ചാട്ടത്തിനു സമീപം നിരവധി അനധികൃത പെട്ടിക്കടകൾ പ്രവർത്തിക്കുന്നതും ദേവികുളം ബ്ലോക്ക് പഞ്ചായത്ത് നിർമിച്ച ശൗചാലയവും വെള്ളച്ചാട്ടത്തിന്‍റെ ദൃശ്യഭംഗി മറയ്ക്കുന്നതായാണ് നാട്ടുകാരുടെ ആക്ഷേപം. വിനയായി കൈയറ്റവും വെള്ളച്ചാട്ടത്തിനു മുന്നിലൂടെ നിരവധി ഗ്രാമങ്ങളിലേക്കു പോകുന്ന വീതി കുറഞ്ഞ പാതയുടെ ഇരുവശങ്ങളിലാണ് അനധികൃതമായി പെട്ടിക്കടകൾ നിർമിച്ചിരിക്കുന്നത്. ആറ്റുപുറന്പോക്ക് ഭൂമി കൈയേറിയാണ് ഈ വ്യാപാര സ്ഥാപനങ്ങൾ പ്രവർത്തിക്കുന്നത്. വെള്ളച്ചാട്ടത്തിന്‍റെ മനോഹാരിത കെടുത്തുന്ന വിധത്തിൽ പഞ്ചായത്തുതന്നെ നിർമിച്ച രണ്ടു മുറികളുള്ള ശൗചാലയവും പ്രശ്നം സൃഷ്ടിക്കുന്നുണ്ട്. പഞ്ചായത്ത് നിർമിച്ച കെട്ടിടം പൊളിച്ചുമാറ്റിയും അനധികൃത പെട്ടിക്കടകൾ നിയന്ത്രിക്കാൻ നടപടി സ്വീകരിക്കണമെന്നുമാണ് പ്രധാന ആവശ്യം.

ആർമി റിക്രൂട്ട്മെന്‍റ് റാലിക്ക് തുടക്കം

ഇടുക്കി: ആർമി റിക്രൂട്ട്മെന്‍റ് റാലിക്ക് നെടുങ്കണ്ടം പഞ്ചായത്ത് സിന്തറ്റിക് സ്റ്റേഡിയത്തിൽ തുടക്കമായി. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം എന്നീ ഏഴ് ജില്ലകളിലെ ഉദ്യോഗാർഥികൾക്കായാണ് റിക്രൂട്ട്മെന്‍റ് റാലി നടത്തുന്നത്. ഇന്നലെ നടന്ന കായികക്ഷമതാ പരീക്ഷയിൽ ഇടുക്കി, എറണാകുളം, ആലപ്പുഴ, കോട്ടയം ജില്ലകളിൽ നിന്ന് ജനറൽ ഡ്യൂട്ടി വിഭാഗത്തിലെ ഉദ്യോഗാർഥികളാണ് പങ്കെടുത്തത്. 1600 മീറ്റർ റണ്‍ റേസ്, സിഗ് സാഗ് ബാലൻസ്, പുൾ അപ്സ്, 9 ഫീറ്റ് ഡിച്ച് തുടങ്ങി നാലിനം കായിക ക്ഷമതാ പരീക്ഷയും ശാരീരിക അളവ് പരിശോധനയും നടത്തി. ഇവയ്ക്ക് പുറമേ സർട്ടിഫിക്കറ്റ്, മെഡിക്കൽ പരിശോധനയും റാലിയുടെ ഭാഗമായി നടന്നു. 120 ആർമി ഉദ്യോഗസ്ഥരുടെ നേതൃത്വത്തിലാണ് റാലി നടത്തുന്നത്. ഇന്ന് തിരുവനന്തപുരം, പത്തനംതിട്ട ജില്ലകളിൽ നിന്നായി ജനറൽ ഡ്യൂട്ടി വിഭാഗത്തിൽ 788 പേരും നാളെ കൊല്ലം ജില്ലയിൽനിന്ന് ജനറൽ ഡ്യൂട്ടി വിഭാഗത്തിൽ 829 പേരും, 13 ന് ഏഴ് ജില്ലകളിൽനിന്നായി ടെക്നിക്കൽ സ്റ്റാഫ് വിഭാഗത്തിൽ 843 പേരും റിക്രൂട്ട്മെന്‍റ് റാലിയിൽ പങ്കെടുക്കും. 14ന് 13-ാം തീയതിയിലെ ഫിസിക്കൽ ടെസ്റ്റിൽ പങ്കെടുത്ത് വിജയിച്ചവർക്ക് മെഡിക്കൽ ടെസ്റ്റ് നടത്തും. 15ന് ജനറൽ ഉദ്യോഗാർഥികളിൽനിന്നു പാരാ റെജിമെന്‍റിലേക്ക് പോകാൻ താത്പര്യമുള്ളവർക്ക് അഞ്ച് കിലോമീറ്റർ റണ്‍റേസ് നടത്തും. 16ന് റാലി സമാപിക്കും. ഇന്ന് റാലിയിൽ പങ്കെടുക്കുന്ന ഉദ്യോഗാർഥികൾ പുലർച്ചെ നാലിന് പഞ്ചായത്ത് ടൗണ്‍ ഹാളിൽ എത്തണം. പ്രവേശന കാർഡ് സ്കാൻ ചെയ്തതിന് ശേഷം 100 പേരുടെ ബാച്ചുകളായി നെടുങ്കണ്ടം സിന്തറ്റിക് ഗ്രൗണ്ടിൽ പ്രവേശിപ്പിക്കും. അഞ്ചിന് കായികക്ഷമതാ പരിശോധന ആരംഭിക്കും.

പോലീസ് സേന ക്രിമിനലുകളുടെ താവളമായി: ഇ.എം. ആഗസ്തി

കട്ടപ്പന: ക്രിമിനലായ പിണറായി വിജയൻ നാട് ഭരിക്കുന്നതുകൊണ്ടാണ് കേരളത്തിലെ പോലീസ് സേന ക്രിമിനലുകളുടെ തവളമായി മാറിയതെന്ന് എഐസിസി അംഗം അഡ്വ. ഇ.എം. ആഗസ്തി ആരോപിച്ചു. യൂത്ത് കോണ്‍ഗ്രസ് നേതാവായ വി.എസ്. സുജിത്തിനെ മർദിച്ച പോലീസുകാരെ ജോലിയിൽനിന്ന് പിരിച്ചുവിടണമെന്നാവശ്യപ്പെട്ട് കോണ്‍ഗ്രസിന്‍റെ നേതൃത്വത്തിൽ കട്ടപ്പന പോലീസ് സ്റ്റേഷന് മുൻപിൽ നടത്തിയ ജനകീയ പ്രതിഷേധ സദസ് ഉദ്ഘാടനം ചെയ്യുകയായിരുന്നു അദ്ദേഹം. കോണ്‍ഗ്രസ് കട്ടപ്പന മണ്ഡലം പ്രസിഡന്‍റ് സിജു ചക്കുംമൂട്ടിൽ അധ്യക്ഷത വഹിച്ചു. ഡിസിസി വൈസ് പ്രസിഡന്‍റ് ജോർജ് ജോസഫ് പടവൻ, ജനറൽ സെക്രട്ടറി അഡ്വ. കെ.ജെ. ബെന്നി, ബ്ലോക്ക് കമ്മിറ്റി പ്രസിഡന്‍റ് തോമസ് മൈക്കിൾ, മനോജ് മുരളി, അനീഷ് മണ്ണൂർ, ജോയി ആനിത്തോട്ടം, ജോയി പോരുന്നോലി തുടങ്ങിയവർ പങ്കെടുത്തു.

കസ്റ്റഡി മർദനത്തെ ന്യായീകരിച്ച് എസ്ഐയുടെ എഫ്ബി പോസ്റ്റ്

തൊടുപുഴ: കസ്റ്റഡി മർദനത്തെ ന്യായീകരിച്ച് എസ്ഐയുടെ എഫ്ബി പോസ്റ്റ്. ആവനാഴി സിനിമയിൽ മമ്മൂട്ടി മോഷ്ടാവിനെ പിടികൂടി ചോദ്യം ചെയ്യുന്നതിന്‍റെയും കുറ്റം സമ്മതിക്കാതെ വരുന്പോൾ മർദിച്ച് കുറ്റംസമ്മതിപ്പിക്കുകയും ചെയ്യുന്ന രംഗങ്ങൾ പങ്കുവച്ചാണ് പോസ്റ്റ്. മറയൂർ എസ്ഐ മാഹിൻ സലീമിന്‍റേതാണ് വിവാദ പോസ്റ്റ്. നേരത്തേ കോതമംഗലത്ത് വിദ്യാർഥിയെ മർദിച്ചതിന് സസ്പെൻഷൻ നേരിട്ട ആളാണ് ഇദ്ദേഹം. വിദ്യാർഥിയെ സ്റ്റേഷനുള്ളിലേക്ക് വലിച്ചുകയറ്റുകയും കരണത്തടിക്കുകയും ചെയ്യുന്ന ദൃശ്യങ്ങൾ പുറത്തുവന്നതിനെത്തുടർന്നാണ് ഇദ്ദേഹത്തെ അന്ന് സസ്പെൻഡ് ചെയ്തത്.

പ്രിൻസ് ലൂക്കോസിന് നാടിന്‍റെ അന്ത്യാഞ്ജലി

ഏറ്റുമാനൂർ: അകാലത്തിൽ വിടപറഞ്ഞ കേരള കോൺഗ്രസ് ഉന്നതാധികാര സമിതി അംഗം പ്രിൻസ് ലൂക്കോസിനെ നാടൊന്നുചേർന്ന് യാത്രയാക്കി. സംസ്കാരം വൻ ജനാവലിയുടെ സാന്നിധ്യത്തിൽ പാറമ്പുഴ ബെത്‌ലഹേം പള്ളിയിൽ നടത്തി. ഭവനത്തിലെ ശുശ്രൂഷകളിൽ ചങ്ങനാശേരി ആർച്ച്ബിഷപ് മാർ തോമസ് തറയിൽ മുഖ്യ കാർമികത്വം വഹിച്ചു. റവ.ഡോ. മാണി പുതിയിടം സന്ദേശം നൽകി. പള്ളിയിലെ ശുശ്രൂഷകളിൽ അതിരൂപതാ പ്രോട്ടോസിഞ്ചെല്ലൂസ് മോൺ. ആന്‍റണി എത്തക്കാട്ട് കാർമികത്വം വഹിച്ചു. പാറമ്പുഴ ബെത്‌ലഹേം പള്ളിവികാരി ഫാ. മാത്യു ചൂരവടി, അതിരമ്പുഴ ഫൊറോനാ വികാരി ഫാ. മാത്യു പടിഞ്ഞാറേക്കുറ്റ്, റവ.ഡോ. ജോസഫ് മുണ്ടകത്തിൽ, ഫാ. സെബാസ്റ്റ്യൻ പൂവത്തുങ്കൽ, മാണി കല്ലാപ്പുറം കോറെപ്പിസ്കോപ്പ എന്നിവരടക്കം ഒട്ടേറെ വൈദികർ സന്നിഹിതരായിരുന്നു. ചൊവ്വാഴ്ച രാത്രി ഒമ്പതിന് മൃതദേഹം പാറന്പുഴ ഒറ്റത്തൈയിൽ വീട്ടിൽ എത്തിച്ചതുമുതൽ നൂറുകണക്കിനു പേരാണ് അന്തിമോപചാരം അർപ്പിക്കാൻ എത്തിയത്. ആർച്ച്ബിഷപ് മാർ ജോസഫ് പെരുന്തോട്ടം ഭവനത്തിലെത്തി പ്രാർഥന നടത്തി. കേരള കോൺഗ്രസ് ചെയർമാൻ പി.ജെ. ജോസഫിന്‍റെ നേതൃത്വത്തിൽ നേതാക്കൾ ചേർന്ന് മൃതദേഹത്തിൽ പാർട്ടി പതാക പുതപ്പിച്ചു. മന്ത്രിമാരായ വി.എൻ. വാസവൻ, റോഷി അഗസ്റ്റിൻ, ചീഫ് വിപ്പ് ഡോ. എൻ. ജയരാജ്, എംപിമാരായ കൊടിക്കുന്നിൽ സുരേഷ്, ഫ്രാൻസിസ് ജോർജ്, ആന്‍റോ ആന്‍റണി, എംഎൽഎമാരായ മോൻസ് ജോസഫ്, തിരുവഞ്ചൂർ രാധാകൃഷ്ണൻ, അനൂപ് ജേക്കബ്, ജോബ് മൈക്കിൾ, സെബാസ്റ്റ്യൻ കുളത്തിങ്കൽ, ചാണ്ടി ഉമ്മൻ, രാഷ്‌ട്രദീപിക ലിമിറ്റഡ് മാനേജിംഗ് ഡയറക്ടർ ഫാ. മൈക്കിൾ വെട്ടിക്കാട്ട്, മാന്നാനം കെഇ സ്കൂൾ പ്രിൻസിപ്പൽ റവ.ഡോ. ജയിംസ് മുല്ലശേരി സിഎംഐ, തോമസ് ചാഴികാടൻ, തോമസ് ഉണ്ണിയാടൻ, ജോയി ഏബ്രഹാം, ജോയി നടുക്കര, ഡോ. കെ.സി. ജോസഫ്, ഡിസിസി പ്രസിഡന്‍റ് നാട്ടകം സുരേഷ്, സിപിഎം ജില്ലാ സെക്രട്ടറി ടി.ആർ. രഘുനാഥ്, കേരള കോൺഗ്രസ് ജില്ലാ പ്രസിഡന്‍റ് ജയ്സൺ ജോസഫ്, കെ. അനിൽകുമാർ, ലതിക സുഭാഷ്, ജോഷി ഫിലിപ്, ലിജിൻ ലാൽ, എൻ. ഹരി, ഫിൽസൺ മാത്യൂസ്, അപു ജോൺ ജോസഫ്, പ്രഫ. ലോപ്പസ് മാത്യു, ഡോ. സിറിയക് തോമസ് തുടങ്ങി ജനപ്രതിനിധികളും രാഷ്‌ട്രീയ നേതാക്കളും സാമൂഹ്യ - സാംസ്കാരിക നായകരും അന്തിമോപചാരമർപ്പിക്കാൻ എത്തിയിരുന്നു. എ.കെ. ആന്‍റണി ഫോണിൽ വിളിച്ച് പ്രിൻസ് ലൂക്കോസിന്‍റെ ഭാര്യയെയും അമ്മയെയും ആശ്വസിപ്പിച്ചു. പള്ളി അങ്കണത്തിൽ നടത്തിയ അനുശോചന സമ്മേളനത്തിൽ കോട്ടയം നഗരസഭാ ചെയർപേഴ്സൺ ബിൻസി സെബാസ്റ്റ്യൻ അധ്യക്ഷത വഹിച്ചു. സാബു മാത്യു അനുശോചന പ്രമേയം അവതരിപ്പിച്ചു. മന്ത്രി റോഷി അഗസ്റ്റിൻ, ഫ്രാൻസിസ് ജോർജ് എംപി, തിരുവഞ്ചൂർ രാധാകൃഷ്ണൻ എംഎൽഎ, മോൻസ് ജോസഫ് എംഎൽഎ, ഫാ. ജയിംസ് മുല്ലശേരി, കെ. അനിൽകുമാർ, എൻ. ഹരി, തോമസ് ചാഴികാടൻ, സലിം പി. മാത്യു, ജയിംസ് കുര്യൻ, ടോമി വേദഗിരി, അസീസ് ബഡായി, അഡ്വ. ജയ്സൺ ജോസഫ്, ബിനു ചെങ്ങളം, ലിസി കുര്യൻ തുടങ്ങിയവർ പ്രസംഗിച്ചു.

യുഡിഎഫ് വ്യാജപ്രചാരണം നടത്തുന്നു: കേരള കോണ്‍ഗ്രസ്-എം

കട്ടപ്പന: ഭൂനിയമ ഭേദഗതി നിലവില്‍ വരുന്നതോടെ ജില്ലയിലെ ഭൂപ്രശ്‌നങ്ങള്‍ പരിഹരിക്കപ്പെടുമെന്ന യാഥാര്‍ഥ്യം ജനങ്ങളില്‍ എത്താതെയിരിക്കാന്‍ കോണ്‍ഗ്രസും യുഡിഎഫും വ്യാജപ്രചാരണം നടത്തുകയാണെന്ന് കേരള കോണ്‍ഗ്രസ്-എം ജില്ലാ കമ്മിറ്റി. പുതിയ ചട്ടം സാധാരണക്കാര്‍ക്ക് ബാധ്യതയാകുമെന്നും വീടുകള്‍ ക്രമവത്കരിക്കപ്പെടുമ്പോള്‍ അപേക്ഷാ ഫീസും മുദ്രപ്പത്ര വിലയും അടയ്ക്കേണ്ടിവരുമെന്നും ജില്ലക്കാരെ രണ്ടാംകിട പൗരന്‍മാരാക്കുമെന്നുമാണ് വ്യാജപ്രചാരണം. നില്‍വിലുള്ള വീടുകള്‍ ക്രമവത്്കരിക്കേണ്ടതില്ലെന്ന് ചട്ടത്തില്‍ വ്യക്തമാക്കിയിട്ടുണ്ട്. വീടുകളോടുചേര്‍ന്നുള്ള ഹോം സ്റ്റേ, ചെറുകിട വാണിജ്യ സംരംഭങ്ങള്‍ എന്നിവ മാത്രമേ 50 രൂപ അപേക്ഷ ഫീസ് അടച്ച് ക്രമവത്്കരിക്കേണ്ടതുള്ളൂ. നിയമസഭ സബ്ജക്ട് കമ്മിറ്റിയുടെ പരിഗണയിലിരിക്കുന്ന ചട്ടരൂപീകരണ നടപടിക്രമങ്ങളില്‍ തിരുത്തലുകള്‍ക്ക് അവസരമുണ്ടായിരിക്കേയാണ് ജനത്തെ തെറ്റിദ്ധരിപ്പിക്കുന്നത്. എല്‍ഡിഎഫ് സര്‍ക്കാരിനെയും മന്ത്രി റോഷി അഗസ്റ്റിനെയും അപകീര്‍ത്തിപ്പെടുത്താനുള്ള നീക്കത്തെ പ്രതിരോധിക്കുമെന്നും നേതാക്കള്‍ പറഞ്ഞു. നിര്‍മാണ നിരോധനമുണ്ടെങ്കില്‍ സംസ്ഥാനത്ത് മുഴുവന്‍ ബാധകമാക്കണമെന്ന് ആവശ്യപ്പെട്ട് കോടതിയില്‍ ഹാജരായത് മാത്യു കുഴല്‍നാടനാണ്. ഭൂപ്രശ്‌നങ്ങള്‍ സങ്കീര്‍ണമാക്കിയ കരിനിയമങ്ങളെല്ലാം കോണ്‍ഗ്രസ് സര്‍ക്കാരുകളുടെ സംഭാവനയാണെന്നു ജില്ലാ പ്രസിഡന്‍റ്് ജോസ് പാലത്തിനാല്‍, ജില്ലാ പഞ്ചായത്ത് പ്രസിഡന്‍റ് രാരിച്ചന്‍ നീറാണാക്കുന്നേല്‍, അഡ്വ. മനോജ് എം. തോമസ്, റെജി കുന്നംകോട്ട്, ജിന്‍സണ്‍ വര്‍ക്കി, ഷാജി കൂത്തോടിയില്‍, ബിജു വാഴപ്പനാടി എന്നിവര്‍ പറഞ്ഞു.

കേരള പോലീസ് രക്തദാഹികളായി മാറി: സി.പി. മാത്യു

തൊടുപുഴ: മനുഷ്യത്വം നഷ്ടപ്പെട്ട കാക്കിക്കുള്ളിലെ കാപാലികർ മൃഗങ്ങളെപ്പോലും ലജ്ജിപ്പിക്കുന്ന ക്രൂരകൃത്യങ്ങളാണ് ലോക്കപ്പിനുള്ളിലും പുറത്തും നടത്തുന്നതെന്നു ഡിസിസി ജില്ലാ പ്രസിഡന്‍റ് സി.പി. മാത്യു പറഞ്ഞു. കോണ്‍ഗ്രസിന്‍റെ നേതൃത്വത്തിൽ തൊടുപുഴ ഡിവൈഎസ്പി ഓഫീസിലേക്ക് നടത്തിയ മാർച്ച് ഉദ്ഘാടനം ചെയ്യുകയായിരുന്നു അദ്ദേഹം. യൂത്ത് കോണ്‍ഗ്രസ് ജില്ലാ കമ്മിറ്റി തൊടുപുഴയിൽ കഴിഞ്ഞ ദിവസം നടത്തിയ പ്രതിഷേധ മാർച്ചിനോട് കാണിച്ച പോലീസ് സമീപനം മനഃസാക്ഷിയുള്ള ആർക്കും അംഗീകരിക്കാവുന്നതല്ല. ഇത്തരം പോലീസ് ഉദ്യോഗസ്ഥരുടെ വീടുകളിലേക്കും സമരം വ്യാപിപ്പിക്കുമെന്നും അദ്ദേഹം പറഞ്ഞു. മുനിസിപ്പൽ മണ്ഡലം കോണ്‍ഗ്രസ് കമ്മിറ്റി പ്രസിഡന്‍റ്എം.എച്ച്. സജീവ് അധ്യക്ഷത വഹിച്ചു. വെസ്റ്റ് മണ്ഡലം പ്രസിഡന്‍റ് രാജേഷ് ബാബു, നേതാക്കളായ ചാർലി ആന്‍റണി, ജോസ് അഗസ്റ്റിൻ, ലീലമ്മ ജോസ്, ഷിബിലി സാഹിബ്, ജാഫർ ഖാൻ മുഹമ്മദ്, ടോമി പാലയ്ക്കൽ, എ.കെ. സുഭാഷ്കുമാർ, ബി. സജ്ജയകുമാർ, ജോമോൻ ആലക്കോട് എന്നിവർ പ്രസംഗിച്ചു.

"ഭൂഭേദഗതി: വികസനം സ്തംഭിക്കും'

തൊടുപുഴ: ഭൂഭേദഗതിയുടെ ഭാഗമായി കൊണ്ടുവന്ന ചട്ടങ്ങൾ വികസനം സ്തംഭിപ്പിക്കുമെന്നും അപേക്ഷ നൽകാനും ഫീസടയ്ക്കാനും കർഷകർ ഓഫീസുകൾ കയറിയിറങ്ങി ബുദ്ധിമുട്ടേണ്ടി വരുമെന്നും ആം ആദ്മി നേതാക്കൾ പത്രസമ്മേളനത്തിൽ ആരോപിച്ചു. കഴിഞ്ഞ 65 വർഷമായി നടന്ന എല്ലാ വാണിജ്യ നിർമിതികളും നിയമവിരുദ്ധമായി പ്രഖ്യാപിച്ച് ക്രമവത്കരണത്തിന് ഫീസ് ഈടാക്കാനാണ് നീക്കം. വീടുകൾ നിയമവിരുദ്ധമല്ലെങ്കിലും അവരും അപേക്ഷ നൽകണം. അതിന് ഭൂമിയുടെ പഴയ രേഖകൾ കണ്ടെത്തേണ്ടിവരും. ഈ സാഹചര്യത്തിൽ പാർട്ടിയുടെ കിസാൻ വിംഗിന്‍റെ നേതൃത്വത്തിൽ പ്രതിഷേധ പരിപാടികൾ ആരംഭിക്കും. ഇതിന്‍റെ ഭാഗമായി 13നു കട്ടപ്പന ടൗണിൽ ഏകദിന ജനജാഗരണ ഉപവാസം നടത്തും. സംസ്ഥാന പ്രസിഡന്‍റ് വിനോദ് മാത്യു വിത്സണ്‍ ഉദ്ഘാടനം ചെയ്യും. റസാഖ് ചൂരവേലി, ഫാം സെക്രട്ടറി സിജുമോൻ ഫ്രാൻസിസ്, ഹൈവേ സംരക്ഷണസമിതി ചെയർമാൻ പി.എം. ബേബി എന്നിവർ വിഷയാവതരണം നടത്തും. പത്രസമ്മേളനത്തിൽ കിസാൻ വിംഗ് സംസ്ഥാന കോ-ഓർഡിനേറ്റർ മാത്യു ജോസ്, പാർട്ടി ജില്ലാ പ്രസിഡന്‍റ് അഡ്വ. ബേസിൽ ജോണ്‍, സംസ്ഥാന വൈസ് പ്രസിഡന്‍റ് ജേക്കബ് എട്ടുതൊട്ടിയിൽ, നിയോജക മണ്ഡലം പ്രസിഡന്‍റ് ലിസി ബാബു, മുനിസിപ്പൽ മണ്ഡലം പ്രസിഡന്‍റ് പുന്നൂസ് ജേക്കബ് എന്നിവർ പങ്കെടുത്തു.

പാതിവില തട്ടിപ്പ്: അന്വേഷണം പാതിയിൽ തീർത്തു ; കുറ്റപത്രം തുലാസിൽ

തൊടുപുഴ: പാതിവില തട്ടിപ്പ് കേസിൽ അന്വേഷണം അട്ടിമറിക്കാൻ ശ്രമം നടക്കുന്നതായി ആക്ഷേപം. കേസന്വേഷിച്ചിരുന്ന പ്രത്യേക സംഘത്തെ സർക്കാർ കഴിഞ്ഞ ദിവസം പിരിച്ചുവിട്ടിരുന്നു. സംസ്ഥാനത്തെ വിവിധ സ്റ്റേഷനുകളിലായി നൂറുകണക്കിനു കേസുകളാണ് രജിസ്റ്റർ ചെയ്തത്. എന്നാൽ, ഇതിലൊന്നും കുറ്റപത്രം സമർപ്പിക്കുകയോ ശരിയായ രീതിയിൽ അന്വേഷണം നടത്തുകയോ ചെയ്തിട്ടില്ല. ഇതിനിടെയാണ് അന്വേഷണ സംഘത്തെ പിരിച്ചുവിട്ടത്. അതതു ജില്ലാ ക്രൈംബ്രാഞ്ച് യൂണിറ്റുകൾ അന്വേഷിച്ചാൽ മതിയെന്ന നിലപാടാണ് നിലവിൽ സർക്കാർ സ്വീകരിച്ചിരിക്കുന്നത്. വാഗ്ദാനം പാഴായി തിരുവനന്തപുരം സായിഗ്രാം എക്സിക്യൂട്ടീവ് ഡയറക്ടർ ആനന്ദകുമാർ ചെയർമാനായുള്ള നാഷണൽ എൻജിഒ കോണ്‍ഫെഡറേഷനിലൂടെയാണ് സിഎസ്ആർ ഫണ്ട് ലഭ്യമാകുന്നതെന്നായിരുന്നു അവകാശവാദം. ഏതാനും പേർക്ക് സ്കൂട്ടറുകളും ലാപ്ടോപ്പുകളുമടക്കം കിട്ടിയതോടെ ആളുകൾ കൂട്ടത്തോടെ ഇതിലേക്ക് ആകൃഷ്ടരായി. എന്നാൽ, പണമടച്ചവർക്കു യഥാസമയം ഉത്പന്നങ്ങൾ നൽകിയില്ല. ആദ്യഘട്ടത്തിൽ ലഭിച്ച പരാതികൾ ഒത്തുതീർപ്പാക്കാനും ശ്രമം നടത്തി. പറഞ്ഞ സമയം കഴിഞ്ഞിട്ടും ഉത്പന്നങ്ങൾ കിട്ടാതെ വന്നതോടെ ചതിയിൽപ്പെട്ടതായി ആളുകൾ തിരിച്ചറിഞ്ഞു പരാതിയുമായി രംഗത്തുവരികയായിരുന്നു. പ്രതികൾ രക്ഷപ്പെടും കേസ് രജിസ്റ്റർ ചെയ്തു മാസങ്ങൾ പിന്നിട്ടിട്ടും കൃത്യമായ അന്വേഷണം നടത്തുകയോ കുറ്റപത്രം സമർപ്പിക്കുകയോ ചെയ്തിട്ടില്ല. തൊടുപുഴ, കാഞ്ഞാർ ഉൾപ്പെടെ ജില്ലയിലെ വിവിധ സ്റ്റേഷനുകളിൽ നിരവധി കേസുകളാണ് രജിസ്റ്റർ ചെയ്തിട്ടുള്ളത്. ഇതിൽ ഒരു കേസിൽ പോലും കുറ്റപത്രം സമർപ്പിച്ചിട്ടില്ല. ഇതു പ്രതികൾക്കു രക്ഷപ്പെടാനുള്ള സാധ്യതയിലേക്കാണ് വിരൽ ചൂണ്ടുന്നത്. 64 സീഡ് സൊസൈറ്റികളിലും 2000ൽപരം എൻജിഒകളിലുമായി രണ്ടു ലക്ഷത്തോളം പേർ നൽകിയ പണം എറണാകുളം ഇയാറ്റുമുക്കിലെ എച്ച്ഡിഎഫ്സി ബാങ്ക് ശാഖയിലേക്ക് എത്തി. 357 കോടിയോളം രൂപയാണ് ഇങ്ങനെ വന്നത്. ഈ തുക എന്തു ചെയ്തെന്നും ആരുടെ അക്കൗണ്ടിലേക്കു മാറ്റിയെന്നും കണ്ടെത്താൻ അന്വേഷണ സംഘം ശ്രമിച്ചില്ലെന്നും ആക്ഷേപമുണ്ട്. ഫലപ്രദമായ അന്വേഷണം ഉണ്ടായില്ലെങ്കിൽ ആക്‌ഷൻ കൗണ്‍സിലിന്‍റെ നേതൃത്വത്തിൽ തദ്ദേശ, നിയമസഭ തെരഞ്ഞെടുപ്പുകളിൽ പ്രതിഷേധം ഉയർത്താനുള്ള നീക്കത്തിലാണ് തട്ടിപ്പിനിരയായവർ. പാതിവിലയിലെ മുഴുവൻതട്ടിപ്പ് ഇങ്ങനെ കേസിലെ മുഖ്യപ്രതി അനന്ദു കൃഷ്ണൻ പ്രോജക്ട് കോ-ഓർഡിനേറ്ററായി രൂപീകരിച്ച സർദാർ പട്ടേൽ ഇൻസ്റ്റിറ്റ്യൂട്ട് ഓഫ് അഡ്വാൻസ്ഡ് റിസർച്ച് ആൻഡ് ഡവലപ്മെന്‍റ് സ്റ്റഡീസിന്‍റെ പേരിൽ വുമണ്‍ ഓഫ് വീൽസ് പദ്ധതി പ്രകാരം പാതിവിലയ്ക്കു സ്കൂട്ടർ, തയ്യൽ മെഷീൻ, ലാപ്ടോപ്പ്, മൊബൈൽ ഫോണ്‍, വാഷിംഗ് മെഷീൻ, മറ്റ് ഗൃഹോപകരണങ്ങൾ തുടങ്ങിയവ ലഭിക്കുമെന്നും ഇതിന്‍റെ 50 ശതമാനം തുക വിവിധ കന്പനികളുടെ സിഎസ്ആർ ഫണ്ടായി ലഭിക്കുമെന്നും പ്രചാരണം നടത്തിയാണ് സാധാരണക്കാരും നിർധനരുമായ ആയിരക്കണക്കിനു സ്ത്രീകളുടെ പണം തട്ടിയെടുക്കാൻ കളമൊരുക്കിയത്. ജനങ്ങളുടെ വിശ്വാസം ആർജിക്കാൻ ആദ്യ ഘട്ടത്തിൽ ഏതാനും പേർക്ക് സ്കൂട്ടറുകളും ലാപ്ടോപ്പുകളുമടക്കം വിതരണം ചെയ്തു.

മഹാറാണി വെഡ്ഡിംഗ് കളക്‌ഷൻ 50 ലക്ഷം ഒാണസമ്മാനം

തൊടുപുഴ: മഹാറാണി വെഡ്ഡിംഗ് കളക്‌ഷൻസ് ഇത്തവണ ജീവനക്കാർക്ക് ഓണ സമ്മാനമായി നൽകിയത് 50 ലക്ഷം രൂപ. വസ്ത്രവ്യാപാര മേഖലയിൽ ആദ്യമായാണ് ഒരു ടെക്സ്റ്റൈൽ ബ്രാൻഡ് മാത്രം സീസണിൽ മാത്രം ഇത്രയുംവലിയ തുക ഓണ സമ്മാനമായി നൽകുന്നത് ജീവനക്കാർക്ക് നൽകുന്നതെന്ന് അറ്റ്‌ലസ് മഹാറാണി ഗ്രൂപ്പ് ചെയർമാൻ ആന്‍റ് മാനേജിംഗ് ഡയറക്ടർ വി.എ. റിയാസ് പറഞ്ഞു. ഇതിനു പുറമേ ഓരോ സെക്‌ഷനുകളിലും വ്യക്തിഗതനേട്ടം കൈവരിച്ച ജീവനക്കാർക്ക ്സ്കൂട്ടറുകൾ, വാഷിംഗ് മെഷീനുകൾ എന്നിവയും സമ്മാനമായി നൽകി. തുടർന്നും ജീവനക്കാർക്കും സാമൂഹ്യ മേഖലയിലും പ്രയോജനകരമായ കാര്യങ്ങൾ നടപ്പാക്കുമെന്ന് ചെയർമാൻ അറിയിച്ചു.

മറയൂർ ശർക്കരയ്ക്ക് 120 രൂപ

മറയൂർ: നിലനില്പിനായി വെല്ലുവിളികൾ ഏറെ നേരിടുന്ന ഭൗമസൂചിക പദവിയുള്ള മറയൂർ ശർക്കരയ്ക്ക് ഈ ഓണസീസണിൽ നല്ല ഡിമാൻഡും വിലയും ലഭിച്ചു. ഒരു കിലോ മറയൂർ ശർക്കര 120 രൂപ വിലയ്ക്കാണ് ഇപ്പോൾ ഉപഭോക്താവിന് ലഭിക്കുന്നത്. തമിഴ്നാട്ടിൽനിന്നു മറയൂർ ശർക്കരയുടെ വ്യാജൻ കേരള വിപണികളിൽ വ്യാപകമായി എത്തുന്നുണ്ടെങ്കിലും യഥാർഥ മറയൂർ ശർക്കര കണ്ടെത്തി വാങ്ങാൻ ഉപഭോക്താക്കൾ ശ്രമം ആരംഭിച്ചതാണ് വില വർധനവിന് കാരണം. മറയൂർ സഹകരണ ബാങ്ക് പോലെയുള്ള സ്ഥാപനങ്ങൾ മറയൂർ ശർക്കര വിപണിയിൽ എത്തിക്കുന്നതുമൂലം വില ഇത്തവണ 20 രൂപ വർധിച്ച് 120 രൂപയിലെത്തി. 2500 ഹെക്ടർ സ്ഥലത്ത് കരിന്പു കൃഷിയുണ്ടായിരുന്ന മറയൂർ, കാന്തല്ലൂർ മേഖലയിൽ ഇന്ന് 500 ഏക്കറിൽ താഴെ മാത്രമാണ് കരിന്പ് കൃഷിയുള്ളത്. ഉത്പാദനച്ചെലവ് പോലും ലഭിക്കാത്തതിനാലും നല്ല വിപണി കണ്ടെത്തുവാൻ കഴിയാത്തതും തമിഴ്നാട്ടിൽനിന്നു വിലകുറഞ്ഞ, ഗുണമേന്മയില്ലാത്ത ശർക്കരയുടെ ഗണ്യമായ വരവും കരിന്പ് കൃഷിയിൽനിന്നു കർഷകർ പിൻവാങ്ങുന്നതിന് കാരണമായി. കരിന്പിൻ പാടങ്ങൾ നികത്തി പ്ലോട്ടുകളാക്കിയതും മറ്റൊരു കാരണമാണ്. ഈ പ്രതികൂല സാഹചര്യമൊക്കെ തരണം ചെയ്താണ് കുറച്ചു കർഷകർ കരിന്പു കൃഷി തുടരുന്നത്. ഉത്പാദനം കുറഞ്ഞതിനാൽ മറയൂർ ശർക്കരയുടെ ഡിമാൻഡ് വർധിച്ചിട്ടുണ്ട്. ഭൗമസൂചിക പദവി ഉണ്ടെങ്കിലും കരിന്പ് കർഷകരെ സഹായിക്കുന്നതിനോ മറയൂർ ശർക്കരയ്ക്ക് നല്ല വിപണി കണ്ടെത്തുന്നതിനോ സർക്കാർ ഏജൻസികൾക്ക് കഴിയുന്നില്ല. മുൻപ് കരിന്പു കർഷകർക്ക് കൃഷിക്ക് സബ്സിഡി ആനുകൂല്യങ്ങൾ കൃഷിവകുപ്പ് നല്കിയിരുന്നു. ഇന്ന് അതൊന്നുമില്ല. പേരുകൊണ്ടും ഗുണമേന്മകൊണ്ടും മറ്റേത് ശർക്കരയേക്കാളും മുന്നിൽ നില്ക്കുന്ന മറയൂർ ശർക്കര നിലനില്ക്കണമെങ്കിൽ കർഷകർക്ക് സഹായം ലഭിക്കുവാനുള്ള നടപടികൾ സർക്കാർ സ്ഥാപനങ്ങൾ സ്വീകരിക്കണം.

ചികിത്സയിലിരുന്ന ചുമട്ടുതൊഴിലാളി മരിച്ചു

കട്ടപ്പന: കട്ടപ്പനയിലെ സര്‍ക്കാര്‍ വെയര്‍ഹൗസില്‍ ജോലിക്കിടെ കാല്‍വഴുതിവീണ് പരിക്കേറ്റ് ചികിത്സയിലായിരുന്ന ചുമട്ടുതൊഴിലാളി മരിച്ചു. സിഐടിയു അംഗം അന്യാര്‍തൊളു ബിടിആര്‍ നഗര്‍ താന്നിക്കല്‍ ടി.എസ്. സതീഷ് (39) ആണ് മരിച്ചത്. കഴിഞ്ഞ മൂന്നിനാണ് അപകടം. വീഴ്ചയിൽ സതീഷിന് ഗുരുതരമായി പരിക്കേറ്റിരുന്നു. തലയോട്ടിക്കും വാരിയെല്ലുകള്‍ക്കും പൊട്ടലുണ്ടായി. കട്ടപ്പനയിലെ സ്വകാര്യ ആശുപത്രിയില്‍ ചികിത്സയിലിക്കെ ഇന്നലെ മരിച്ചു. സംസ്‌കാരം ബുധന്‍ പകല്‍ മൂന്നിന് വീട്ടുവളപ്പില്‍. ഭാര്യ: ദീപ. മക്കള്‍: അനശ്വര, ആവണി.

ഓപ്പറേഷന്‍ ഷൈലോക്ക്: ഒരാള്‍ പിടിയില്‍

നെടുങ്കണ്ടം: വട്ടിപ്പലിശക്കാരെ പൂട്ടാനായി പോലീസിന്‍റെ നേതൃത്വത്തില്‍ സംസ്ഥാനവ്യാപകമായി നടക്കുന്ന ഓപ്പറേഷന്‍ ഷൈലോക്കില്‍ നെടുങ്കണ്ടത്തും അറസ്റ്റ്. നെടുങ്കണ്ടം ചക്കക്കാനം സ്വദേശി കൊന്നക്കാപറമ്പില്‍ സുധീന്ദ്രനാണ് പിടിയിലായത്. ഇയാളുടെ പക്കല്‍നിന്നു 9,86,800 രൂപ, മൂന്ന് ചെക്കുകള്‍, ഒപ്പിട്ടു വാങ്ങിയ മുദ്രപത്രങ്ങള്‍, പണം നല്‍കിയതിന് ഈടായി വാങ്ങിയ ഒറിജിനല്‍ ആധാരങ്ങള്‍, വാഹനങ്ങളുടെ ആര്‍സി ബുക്ക് എന്നിവ കണ്ടെടുത്തു. ആവശ്യക്കാര്‍ക്ക് കൂടിയ പലിശനിരക്കിലാണ് ഇയാള്‍ പണം കടംനല്‍കിയിരുന്നത്. ഈടായി ചെക്കുകളും ആധാരങ്ങളും ഉള്‍പ്പടെയുള്ളവ വാങ്ങിവയ്ക്കുകയാണ് പതിവ്. കൃത്യസമയത്ത് പണം തിരികെ നല്‍കാത്തവരെ ഭീഷണിപ്പെടുത്തുകയും ചെയ്തിരുന്നു.

ആസിഡ് ആക്രമണത്തില്‍ മരിച്ച നിജിതയുടെ മക്കള്‍ക്ക് അടിമാലിയില്‍ സ്‌നേഹവീട്

അടിമാലി: 2022ല്‍ കണ്ണൂരില്‍ ഭര്‍ത്താവിന്‍റെ ആസിഡാക്രമണത്തില്‍ മരിച്ച നിജിതയുടെ മക്കള്‍ക്ക് അടിമാലിയില്‍ സ്‌നേഹവീടൊരുങ്ങി. ഇന്നു മുതല്‍ ഇവര്‍ക്ക് അടിമാലി ആയിരമേക്കറില്‍ സുമനസുകള്‍ നിർമിച്ചു നല്‍കിയ സ്‌നേഹ ഭവനത്തില്‍ അന്തിയുറങ്ങാം. ആസിഡാക്രമണത്തില്‍ പരിക്കേറ്റ നിജിതയുടെ മകളെ ജീവിതത്തിലേക്ക് തിരികെയെത്തിച്ചത് അടിമാലി ഇരുന്നൂറേക്കറിലുള്ള പൊള്ളല്‍ ചികിത്സാലയമായ സ്‌നേഹസാന്ത്വനത്തിലെ ചികിത്സയായിരുന്നു. വൈദ്യരത്‌നം ജോര്‍ജ് ഫിലിപ്പ് വൈദ്യരായിരുന്നു പാരമ്പര്യ ചികിത്സയിലൂടെ ബാലികയ്ക്ക് തുണയായത്. ചികിത്സയിലൂടെ ജീവിതത്തിലേക്ക് തിരികെയെത്തിയെങ്കിലും ബാലികയ്ക്കും സഹോദരനും ഇരുവര്‍ക്കും തണലായി നിന്ന വല്യമ്മയ്ക്കും കയറി കിടക്കാന്‍ സ്വന്തമായി ഭവനമുണ്ടായിരുന്നില്ല.തുടര്‍ന്ന് ജോര്‍ജ് ഫിലിപ്പ് വൈദ്യര്‍ തന്നെ ഇവര്‍ക്ക് വീട് നിര്‍മാണത്തിനായി അഞ്ചു സെന്‍റ് സ്ഥലം സൗജന്യമായി നല്‍കി. ആയിരമേക്കറിലെ ഈ സ്ഥലത്താണ് സ്‌നേഹഭവനം ഒരുങ്ങിയിട്ടുള്ളത്. കെപിസിസി പ്രസിഡന്‍റ് അഡ്വ. സണ്ണി ജോസഫ് എംഎല്‍എ സ്‌നേഹവീടിന്‍റെ താക്കോല്‍ദാനം നിര്‍വഹിച്ചു. താക്കോല്‍ദാന ചടങ്ങില്‍ മാര്‍ ജോണ്‍ നെല്ലിക്കുന്നേല്‍ അനുഗ്രഹ പ്രഭാഷണം നടത്തി. നിജിതയുടെ മകള്‍ കൂമ്പന്‍പാറ ഫാത്തിമമാത ഗേള്‍സ് ഹയര്‍ സെക്കൻഡറി സ്‌കൂളിലാണ് പഠിക്കുന്നത്. സഹോദരന്‍ വയനാട്ടിലും. ജോര്‍ജ് ഫിലിപ്പ് വൈദ്യര്‍ക്കൊപ്പം കൂമ്പന്‍പാറ ഫാത്തിമ മാത ഗേള്‍സ് ഹയര്‍ സെക്കൻഡറി സ്‌കൂളിന്‍റെകൂടി നേതൃത്വത്തിലാണ് സുമനസുകളുടെ സഹായത്താല്‍ വീടിന്‍റെ പൂര്‍ത്തീകരണം സാധ്യമാക്കിയത്. മുന്‍ ഇടുക്കി ജില്ലാ കളക്ടര്‍ ഷീബാ ജോര്‍ജാണ് വീടിന് തറക്കല്ലിട്ടത്. ഫാത്തിമ മാത ഗേള്‍സ് ഹയര്‍ സെക്കൻഡറി സ്‌കൂളിന്‍റെയും പിടിഎയുടെയും സഹകരണത്തോടെയാണ് വീട്ടിലേക്ക് വേണ്ടുന്ന ഫര്‍ണിച്ചറുകൾ നല്‍കിയത്. ചടങ്ങില്‍ സ്‌കൂള്‍ മാനേജര്‍ സിസ്റ്റർ ഡോ. പ്രദീപ സിഎംസി അധ്യക്ഷത വഹിച്ചു. ഡി സിസി പ്രസിഡന്‍റ് സി.പി. മാത്യു, മുന്‍ എംഎല്‍എ. കെ. മണി, ഫാ. തോമസ് തൂമ്പുങ്കല്‍, സിസ്റ്റര്‍ ക്രിസ്റ്റീന, ജോര്‍ജ് ഫിലിപ്പ് വൈദ്യര്‍, ഫാ. എല്‍ദോസ് കുറ്റപ്പാല കോര്‍ എപ്പിസ്‌ക്കോപ്പ തുടങ്ങിയവർ സന്നിഹിതരായിരുന്നു.

കക്കുഴിയച്ചന്‍റെ സ്മരണ മായാതെ കുടിയേറ്റജനത

തൊടുപുഴ: കുടിയേറ്റ ജനതയുടെ നൊന്പരങ്ങളും നെടുവീർപ്പുകളും ഏറ്റെടുത്ത് ആത്മീയ, സാമൂഹ്യ, ജീവകാരുണ്യ പ്രവർത്തനങ്ങൾക്ക് നേതൃത്വം നൽകിയ ഫാ. ജോസഫ് കക്കുഴി നിത്യതയിലേക്ക് യാത്രയായിട്ട് 25 വർഷം തികയുന്നു. രണ്ടാം ലോകമഹായുദ്ധത്തിനുശേഷം ഉണ്ടായ സാന്പത്തിക പരാധീനതകളാണ് ഹൈറേഞ്ചിലേക്ക് കുടിയേറ്റം വ്യാപകമാക്കിയത്. അക്കാലത്ത് നെടുങ്കണ്ടത്ത് വൈദ്യുതിയോ യാത്രാസൗകര്യങ്ങളോ ചികിത്സാസഹായമോ ലഭ്യമായിരുന്നില്ല. ഏക ആശ്രയം സെന്‍റ് സെബാസ്റ്റ്യൻ മിഷൻ മാത്രമായിരുന്നു. 1959ൽ നെടുങ്കണ്ടം മിഷൻ കേന്ദ്രത്തിന്‍റെ വികാരിയായി നിയമിതനായ കക്കുഴി അച്ചന്‍റെ നിസ്വാർഥമായ സേവനമാണ് ഇവിടത്തുകാർക്ക് സാന്ത്വനം പകർന്നത്. നെടുങ്കണ്ടം പള്ളിയുടെ വികാരിയായി 14 വർഷം പ്രവർത്തിച്ച ഇദ്ദേഹം പള്ളി, സ്കൂൾ, മഠം, ആശുപത്രി, ബാങ്ക് തുടങ്ങിയ സ്ഥാപനങ്ങൾ ആരംഭിക്കുന്നതിന് മുൻകൈയെടുത്തു. സർക്കാർ സ്ഥാപനങ്ങളിൽ ഏറിയ പങ്കും ഇദ്ദേഹത്തിന്‍റെ ശ്രമഫലമായാണ് ഇവിടെ സ്ഥാപിതമായത്. സമീപ കുടിയേറ്റ ഗ്രാമങ്ങളായ തൂക്കുപാലം, വെള്ളയാംകുടി എഴുകുംവയൽ, ശാന്തിഗ്രാം, പച്ചടി, ചെമ്മണ്ണാർ, തങ്കമണി, നെല്ലിപ്പാറ, കോന്പയാർ എന്നീ സ്ഥലങ്ങളിൽ ഒന്പത് പള്ളികൾ സ്ഥാപിച്ചു. ഇതി നു പുറമേ 1973ൽ വാഴത്തോപ്പ് ഫെറോന പള്ളി വികാരിയായിരുന്നപ്പോൾ മണിയാറൻകുടി, ഭൂമിയാംകുളം, മുളകുവള്ളി, കരിന്പൻ, പൈനാവ് കോളനി എന്നിവിടങ്ങളിൽ അഞ്ച് പള്ളികൾകൂടി സ്ഥാപിച്ചു. അച്ചൻ സ്ഥാപിച്ച കരുണ ആശുപത്രി നെടുങ്കണ്ടത്തെയും സമീപപ്രദേശത്തെയും ആളുകൾക്ക് ആതുരശുശ്രൂഷാ രംഗത്ത് ഏറെ പ്രയോജനകരമായി. നീണ്ട 17 വർഷത്തെ ഹൈറേഞ്ചിലെ സേവനകാലത്ത് സാമൂഹിക, സാംസ്കാരിക, കാർഷികമേഖലകളിലും അച്ചന്‍റെ കൈയൊപ്പ് പതിഞ്ഞിട്ടുണ്ട്. പിന്നീട് നെടിയശാല, നെല്ലിമറ്റം, മൈലക്കൊന്പ്, കലൂർ, പെരിങ്ങഴ, പോത്താനിക്കാട്, കദളിക്കാട് എന്നീ ഇടവകകളിലും സേവനമനുഷ്ഠിച്ചു. കദളിക്കാട് പള്ളി വികാരിയായി സേവനമനുഷ്ഠിക്കുന്നതിനിടെ 2000 സെപ്റ്റംബർ 11നായിരുന്നു കക്കുഴി അച്ചന്‍റെ വിയോഗം.

15 മേഖലകളിൽ ഉടൻ സോളാർ വേലി: മന്ത്രി

ഇടുക്കി: ഇടുക്കി പാക്കേജുമായി ബന്ധപ്പെട്ട് ഏറ്റെടുത്ത ജോലികൾ സമയബന്ധിതമായി തീർക്കണമെന്ന് മന്ത്രി റോഷി അഗസ്റ്റിൻ. കളക്ടറേറ്റിൽ ചേർന്ന ഇടുക്കി പാക്കേജ് അവലോകന യോഗത്തിൽ പ്രസംഗിക്കുകയായിരുന്നു അദ്ദേഹം. ഇടമലക്കുടിയിൽ പദ്ധതികൾക്കു ടെൻഡർ ഏറ്റെടുക്കാൻ കാലതാമസം നേരിടുന്ന സാഹചര്യത്തിൽ പദ്ധതി പൂർത്തീകരണം വേഗത്തിലാക്കാൻ സർക്കാർ തലത്തിൽ ഇടപെടലുണ്ടാകും. സമഗ്ര ടൂറിസം പ്ലാൻ പ്ലാന്‍റേഷൻ, പിന്നാക്ക മേഖലകളിൽ പത്തു മോഡൽ അങ്കണവാടികൾ നിർമിക്കും. ഇതിൽ അഞ്ചെണ്ണം ഇടമലക്കുടിയിലാണ്. ഇടുക്കി ടൂറിസത്തെ ബ്രാൻഡ് ചെയ്യാനും പ്രചാരണം നടത്താനും സമഗ്രമായ ടൂറിസം മാസ്റ്റർ പ്ലാൻ തയാറാക്കും. ഇടുക്കി ഡാം റിസർവോയറിൽ ടൂറിസ്റ്റുകൾക്കു ബോട്ടിംഗ് ഏർപ്പെടുത്താനുള്ള നടപടി സ്വീകരിക്കും. വന്യജീവി ആക്രമണം രൂക്ഷമായ 15 മേഖലകളിൽ സോളാർ വേലികൾ സ്ഥാപിക്കും. ഇതിൽ കാലതാമസം നേരിടുന്ന ഏഴ് പ്രവൃത്തികളുടെ റീ ടെൻഡർ രണ്ടു ദിവസത്തിനകം നടക്കും. ദേവികുളത്തു വന്യമൃഗശല്യമുള്ള പ്രദേശങ്ങളിൽ സോളാർ സ്ട്രീറ്റ് ലൈറ്റുകൾ ഈ മാസംതന്നെ സ്ഥാപിച്ചു തുടങ്ങും. കട്ടപ്പന ഗവ. കോളജിൽ ആധുനിക സജ്ജീകരണങ്ങളോടെയുള്ള ലബോറട്ടറികളുടെ നിർമാണം രണ്ടു മാസത്തിനകം പൂർത്തിയാകും. പുരോഗതി വിലയിരുത്തി 2022 മുതൽ 25 വരെയുള്ള പദ്ധതികളാണ് യോഗത്തിൽ അവലോകനം ചെയ്തത്. വിവിധ പദ്ധതികളുടെ നിലവിലെ പുരോഗതിയെക്കുറിച്ചുള്ള റിപ്പോർട്ട് ജില്ലാ കളക്ടർ ഡോ. ദിനേശൻ ചെറുവാട്ട് അവതരിപ്പിച്ചു. വണ്ടിപ്പെരിയാർ കനാൽ പുനരുജ്ജീവനം, സോളാർ ഫെൻസിംഗ്, പൈനാവ് വർക്കിംഗ് വിമണ്‍സ് ഹോസ്റ്റൽ, പാലങ്ങൾ, ഉടുന്പൻചോല ആയുർവേദ മെഡിക്കൽ കോളജ്, നെടുങ്കണ്ടം പോളിടെക്നിക് കോളജ് തുടങ്ങി വിവിധ പദ്ധതികളുടെ നിർമാണ പുരോഗതിയും വിലയിരുത്തി. എംഎൽഎമാരായ എം.എം. മണി, എ. രാജ, ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ, സബ് കളക്ടർ അനൂപ് ഗാർഗ്, ജില്ലാ പ്ലാനിംഗ് ഓഫീസർ ദീപ ചന്ദ്രൻ തുടങ്ങിയവർ പ്രസംഗിച്ചു.

അഗ്നിവീര്‍ റിക്രൂട്ട്‌മെന്‍റ്് റാലി ഇന്നുമുതല്‍ നെടുങ്കണ്ടത്ത്; ഒരുക്കങ്ങള്‍ പൂര്‍ത്തിയായി

നെടുങ്കണ്ടം: ഏഴു ദിവസങ്ങളിലായി നെടുങ്കണ്ടത്ത് നടക്കുന്ന അഗ്‌നിവീര്‍ റിക്രൂട്ട്‌മെന്‍റിനുള്ള ഒരുക്കങ്ങള്‍ പൂര്‍ത്തിയായി. ഇന്ന് മുതല്‍ 16 വരെ നെടുങ്കണ്ടം പഞ്ചായത്ത് സ്റ്റേഡിയത്തില്‍ നടക്കുന്ന റിക്രൂട്ട്‌മെന്‍റിന്‍റെ അവസാനഘട്ട വിലയിരുത്തല്‍ നടത്തുന്നതിനായി ഇടുക്കി എഡിഎം ഷൈജു ജേക്കബിന്‍റെ നേതൃത്വത്തിലുള്ള ഉദ്യോഗസ്ഥ സംഘം സന്ദര്‍ശനം നടത്തി. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം എന്നീ ഏഴു ജില്ലകളില്‍നിന്നുള്ള 3102 ഉദ്യോഗാര്‍ഥികളാണ് ആര്‍മി റിക്രൂട്ട്‌മെന്‍റ് റാലിയില്‍ പങ്കെടുക്കുന്നത്. പുലര്‍ച്ചെ നാലിന് നടപടിക്രമങ്ങള്‍ ആരംഭിക്കും. 120 ആര്‍മി ഉദ്യോഗസ്ഥര്‍ക്കാണ് നടത്തിപ്പ് ചുമതല. നെടുങ്കണ്ടം വൊക്കേഷണല്‍ ഹയര്‍ സെക്കന്‍ഡറി സ്‌കൂളിലാണ് കരസേന ഉദ്യോഗസ്ഥര്‍ക്കുള്ള താമസ സൗകര്യം ഒരുക്കിയിരിക്കുന്നത്. നെടുങ്കണ്ടം മേഖലയിലെ വിവിധ ലോഡ്ജുകള്‍, ഹോട്ടലുകള്‍, ഹോം സ്‌റ്റേകള്‍, റിസോര്‍ട്ടുകള്‍ എന്നിവിടങ്ങളില്‍ ഉദ്യോഗാര്‍ഥികള്‍ക്ക് വാടക ഇളവോടുകൂടി താമസിക്കാനുള്ള സൗകര്യം ഒരുക്കിയിട്ടുണ്ട്. വിവിധ ജില്ലകളില്‍നിന്നെത്തുന്ന ഉദ്യോഗാര്‍ഥികള്‍ക്കായി കോട്ടയം റെയില്‍വേ സ്റ്റേഷനില്‍നിന്ന് ഉള്‍പ്പെടെ കെഎസ്ആര്‍ടിസി അധിക സര്‍വീസുകള്‍ നടത്തും. ആവശ്യമെങ്കില്‍ കട്ടപ്പന - നെടുങ്കണ്ടം - രാമക്കല്‍മേട് സര്‍വീസുകളും ഏര്‍പ്പെടുത്തും. പഞ്ചായത്ത്, പൊതുമരാമത്ത്, ആരോഗ്യം, പോലീസ് തുടങ്ങി വിവിധ വകുപ്പുകളുടെ സഹകരണത്തോടെയാണ് റിക്രൂട്ട്‌മെന്‍റ് നടത്തുന്നത്. കുടുംബശ്രീയുടെ സഹകരണത്തോടെ നടത്തുന്ന ഭക്ഷണശാലകളില്‍നിന്നു മിതമായ നിരക്കില്‍ ഉദ്യോഗാര്‍ഥികള്‍ക്ക് ഭക്ഷണം ലഭ്യമാകും. കൂടാതെ നെടുങ്കണ്ടത്തെ വ്യാപാര സ്ഥാപനങ്ങളില്‍നിന്നു മിതമായ നിരക്കില്‍ ഭക്ഷണവും താമസ സൗകര്യവും നല്‍കും. പോലീസിനാണ് നഗരത്തിലെ ഗതാഗത നിയന്ത്രണത്തിന്‍റെ ചുമതല. സ്റ്റേഡിയത്തിനുള്ളിലെ നിയന്ത്രണങ്ങള്‍ക്ക് ഇരുപതോളം പോലീസ് ഉദ്യോഗസ്ഥരെയും നിയോഗിച്ചിട്ടുണ്ട്.

ടൂറിസം വാരാഘോഷം സമാപിച്ചു

ഇടുക്കി: ടൂറിസം വകുപ്പ്, ജില്ലാ ഭരണകുടം, ഡിടിപിസി, വാഴത്തോപ്പ് പഞ്ചായത്ത് എന്നിവയുടെ നേതൃത്വത്തിൽ സംഘടിപ്പിച്ച ഓണവില്ല് -2025 ഓണം ടൂറിസം വാരാഘോഷം സമാപിച്ചു. സമാപന സമ്മേളനം മന്ത്രി റോഷി അഗസ്റ്റിൻ ഉദ്ഘാടനം ചെയ്തു. വാഴത്തോപ്പ് പഞ്ചായത്ത് പ്രസിഡന്‍റ് ജോർജ് പോൾ അധ്യക്ഷത വഹിച്ചു. ജില്ലാ കളക്ടർ ഡോ. ദിനേശൻ ചെറുവാട്ട്, ജില്ലാ ആസൂത്രണ സമിതി ഉപാധ്യക്ഷൻ സി.വി. വർഗീസ്, ജില്ലാ പഞ്ചായത്തംഗം കെ.ജി. സത്യൻ, പഞ്ചായത്ത് വൈസ് പ്രസിഡന്‍റ് മിനി ജേക്കബ്, ത്രിതല പഞ്ചായത്തംഗങ്ങളായ ഡിറ്റാജ് ജോസഫ്, നിമ്മി ജയൻ, പ്രഭ തങ്കച്ചൻ, രാജു ജോസഫ്, ടി.ഇ. നൗഷാദ്, ഡിടിപിസി സെക്രട്ടറി ജിതേഷ് ജോസ് എന്നിവർ പ്രസംഗിച്ചു.

അനധികൃത വോട്ട് ചേർക്കൽ: സിപിഎം സമരത്തിലേക്ക്

തൊടുപുഴ: വണ്ണപ്പുറം പഞ്ചായത്തിൽ അനധികൃതമായി വോട്ട് ചേർത്തതിനെതിരേ സിപിഎമ്മിന്‍റെ നേതൃത്വത്തിൽ നാളെ രാവിലെ 10ന് പഞ്ചായത്ത് ഓഫീസിലേക്ക് മാർച്ചും ധർണയും നടത്തുമെന്ന് നേതാക്കൾ പത്രസമ്മേളനത്തിൽ അറിയിച്ചു. പഞ്ചായത്തിൽ അന്തിമമായി പുറത്തിറക്കിയ വോട്ടർ പട്ടികയിൽ യുഡിഎഫ് വ്യാപകമായി കള്ളവോട്ട് ചേർത്തെന്നാരോപിച്ചാണ് മാർച്ച് നടത്തുന്നത്. പാർട്ടി ജില്ലാ സെക്രട്ടേറിയറ്റംഗം മുഹമ്മദ് ഫൈസൽ ഉദ്ഘാടനം ചെയ്യും. ഏരിയാ സെക്രട്ടറി പി.പി. സുമേഷ്, കെ.ജി. വിനോദ്, ഷിജോ സെബാസ്റ്റ്യൻ, ജഗദമ്മ വിജയൻ, ജോഷി തോമസ്, വി.ജെ. ജോമോൻ, അന്പിളി രവികല എന്നിവർ പ്രസംഗിക്കും. വാർഡിനും പഞ്ചായത്തിനും പുറത്ത് താമസിക്കുന്നവരെ ലിസ്റ്റിൽ ഉൾപ്പെടുത്തിയതിനെതിരേ നിയമാനുസൃതമായി ആക്ഷേപം ഉന്നയിച്ചിട്ടും നടപടി സ്വീകരിച്ചില്ലെന്ന് നേതാക്കൾ കുറ്റപ്പെടുത്തി. ഇതു സംബന്ധിച്ച് സംസ്ഥാന തെരഞ്ഞെടുപ്പ് കമ്മീഷണർ, ജില്ലാ വരണാധികാരി, പഞ്ചായത്ത് ഡെപ്യൂട്ടി ഡയറക്ടർ, പഞ്ചായത്ത് സെക്രട്ടറി എന്നിവർക്ക് പരാതി നൽകിയിട്ടുണ്ട്. പത്രസമ്മേളനത്തിൽ പി.പി. സുമേഷ്, കെ.ജി. വിനോദ്, ഷിജോ സെബാസ്റ്റ്യൻ, ജഗദമ്മ വിജയൻ, ജോഷി തോമസ്, വി.ജെ. ജോമോൻ, അന്പിളി രവികല എന്നിവർ പങ്കെടുത്തു.

നിറക്കാഴ്ചകളുമായി ഓണോത്സവ് ഘോഷയാത്ര

തൊടുപുഴ: ഓണോത്സവ് -2025 ന്‍റെ ഭാഗമായി തൊടുപുഴയിൽ നടന്ന വർണശബളമായ സാംസ്കാരിക ഘോഷയാത്ര കാണികൾക്ക് ദൃശ്യവിരുന്നായി. മർച്ചന്‍റ്സ് അസോസിയേഷനും നഗരസഭയും ഡിടിപിസിയും ചേർന്നാണ് ഓണോത്സവ് സംഘടിപ്പിച്ചത്. ഏറ്റവും മുന്നിലായി മാവേലി മന്നൻ ജനങ്ങളെ അഭിവാദ്യം ചെയ്തു നീങ്ങി. നിശ്ചല ദൃശ്യങ്ങൾ, കഥകളി, മയിലാട്ടം, തെയ്യം, കൊട്ടക്കാവടി, പൂക്കാവടി, കരകാട്ടം, അർജുന നൃത്തം, പുലികളി, വാദ്യമേളങ്ങൾ എന്നിവ ഘോഷയാത്രയ്ക്ക് നിറപ്പൊലിമ പകർന്നു. ഫയർ ആന്‍ഡ് റെസ്ക്യു, അൽ അസ്ഹർ കോളജ്, ജയ്ഹിന്ദ് ലൈബ്രറി, ബേബി മെമ്മോറിയൽ ആശുപത്രി, കുടുംബശ്രീ, പെരുക്കോണി റെസിഡന്‍റ്സ് അസോസിയേഷൻ, വിദ്യാർഥികൾ എന്നിങ്ങനെ വിവിധ തുറകളിലുള്ളവർ ഘോഷയാത്രയിൽ അണിനിരന്നു. ഇവർക്കു പുറമേ നഗരസഭാ ചെയർമാൻ കെ. ദീപക്, വൈസ് ചെയർപേഴ്സണ്‍ പ്രഫ. ജെസി ആന്‍റണി, കൗണ്‍സിലർമാർ, മർച്ചന്‍റ്സ് അസോസിയേഷൻ പ്രസിഡന്‍റ് രാജു തരണിയിൽ, സെക്രട്ടറി സി.കെ. നവാസ്, യൂത്ത് വിംഗ് പ്രസിഡന്‍റ് പ്രശാന്ത് കുട്ടപ്പാസ്, കാഡ്സ് ചെയർമാൻ ആന്‍റണി കണ്ടിരിക്കൽ തുടങ്ങിയവർ ഘോഷയാത്രയ്ക്ക് നേതൃത്വം നൽകി. തൊടുപുഴ മുനിസിപ്പൽ ബസ് സ്റ്റാൻഡ് ജംഗ്ഷനിൽനിന്നാരംഭിച്ച ഘോഷയാത്ര മങ്ങാട്ടുകവലയിൽ സമാപിച്ചു. തുടർന്ന് ഒൗസേപ്പ് ജോണ്‍ പുളിമൂട്ടിൽ മെമ്മോറിയൽ ട്രോഫിക്കുവേണ്ടിയുള്ള അഖിലകേരള വടംവലി മത്സരവും അരങ്ങേറി. ഓണാഘോഷത്തിന്‍റെ ജില്ലാതല സമാപന സമ്മേളനം ഇന്ന് വൈകുന്നേരം അഞ്ചിന് മങ്ങാട്ടുകവല ബസ് സ്റ്റാൻഡിൽ നടക്കും. മന്ത്രി റോഷി അഗസ്റ്റിൻ ഉദ്ഘാടനം ചെയ്യും. മുനിസിപ്പൽ ചെയർമാൻ കെ. ദീപക് അധ്യക്ഷത വഹിക്കും. പി.ജെ. ജോസഫ് മുഖ്യപ്രഭാഷണം നടത്തും. എംഎൽഎമാരായ എ. രാജ, എം.എം. മണി, ജില്ലാ കളക്ടർ ദിനേശൻ ചെറുവാട്ട്, ഡിടിപിസി സെക്രട്ടറി ജിതേഷ് ജോസ്, കെവിവിഇസ് ജില്ലാ പ്രസിഡന്‍റ് സണ്ണി പൈന്പിള്ളിൽ, മർച്ചന്‍റ്സ് അസോസിയേഷൻ പ്രസിഡന്‍റ് രാജു തരണിയിൽ എന്നിവർ പ്രസംഗിക്കും. തുടർന്ന് ഗാനമേള നടക്കും.

വ്യാപാരി സമരപ്രഖ്യാപന കൺവൻഷൻ ഇന്ന്

രാജാക്കാട്: ഭൂനിയമങ്ങളിൽ സർക്കാർ ഉണ്ടാക്കിയ ജനവിരുദ്ധ ചട്ട ഭേദഗതി പുനഃപരിശോധന ആവശ്യപ്പെട്ട് കേരള വ്യാപാരി വ്യവസായി ഏകോപന സമിതി സംസ്ഥാന കമ്മിറ്റിയുടെ നേതൃത്വത്തിൽ 15ന് സെക്രട്ടേറിയറ്റിന് മുൻപിൽ നടത്തുന്ന അർധദിന സത്യഗ്രഹ സമരത്തിന് ഐക്യദാർഢ്യം പ്രഖ്യാപിച്ച് കേരള വ്യാപാരി വ്യവസായി ഏകോപന സമിതി രാജാക്കാട് യൂണിറ്റിന്‍റെ നേതൃത്വത്തിൽ ഇന്നു രാവിലെ 10.30ന് രാജാക്കാട് വ്യാപാരഭവൻ ഓഡിറ്റോറിയത്തിൽ സമര പ്രഖ്യാപന കൺവൻഷൻ നടത്തും. ജില്ലാ വൈസ് പ്രസിഡന്‍റ്് വി.എസ്. ബിജു അധ്യക്ഷത വഹിക്കും. ജില്ലാ പ്രസിഡന്‍റ്് സണ്ണി പൈമ്പിള്ളിൽ ഉദ്ഘാടനം ചെയ്യും. വർക്കിംഗ് പ്രസിഡന്‍റ്് കെ.ആർ. വിനോദ്, വൈസ് പ്രസിഡന്‍റ്് പി.എം. ബേബി, ഡയസ് പുല്ലൻ, ജില്ലാ ഓർഗനൈസർ സിബി കൊച്ചുവള്ളാട്ട്, യൂണിറ്റ് സെക്രട്ടറി സജിമോൻ കോട്ടയ്ക്കൽ, ട്രഷറർ വി.സി. ജോൺസൺ, വൈസ് പ്രസിഡന്‍റ്് ബെന്നി ജോസഫ്, രാജാക്കാട് മതസൗഹാർദ കൂട്ടായ്മ ചെയർമാൻ എം.ബി. ശ്രീകുമാർ, കൺവീനർ ഫാ. മാത്യു കരോട്ടുകൊച്ചറയ്ക്കൽ എന്നിവർ നേതൃത്വം നൽകുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു.

കുഴഞ്ഞുവീണ് മരിച്ചു

മറയൂർ: കാന്തല്ലൂർ സന്ദർശിക്കാനെത്തിയ തമിഴ്നാട് പുതുക്കോട്ടൈ സ്വദേശി കുഴഞ്ഞുവീണു മരിച്ചു. പുതുക്കോട്ടൈ അരന്തങ്കി രാമകൃഷ്ണൻ കോട്ടൈ വീട്ടിൽ ഗണേശന്‍റെയും പാർവതിയുടെയും മകൻ വിശ്വനാഥൻ (50) ആണ് കാന്തല്ലൂരിലെ ഒരു റിസോർട്ടിൽ കുഴഞ്ഞുവീണത്. ഉടൻ മറയൂരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. വിശ്വനാഥൻ അവിവാഹിതനാണ്. രാമകൃഷ്ണൻ, പ്രഭു, ഗായത്രി, ചാമുണ്ടേശ്വരി, രാജരാജേശ്വരി, ശാന്തി എന്നിവർ സഹോദരങ്ങളാണ്. മറയൂർ പോലീസ് മേൽനടപടികൾ സ്വീകരിച്ചു. മൃതദേഹം ഇടുക്കി മെഡിക്കൽ കോളജിൽ പോസ്റ്റ്മോർട്ടം പൂർത്തിയാക്കിയ ശേഷം പുതുക്കോട്ടയിലേക്ക് കൊണ്ടുപോയി.

പ്രവർത്തകർക്കെതിരേ ജാമ്യമില്ലാ കേസ്

തൊടുപുഴ: യൂത്ത് കോണ്‍ഗ്രസിന്‍റെ നേതൃത്വത്തിൽ തൊടുപുഴ ഡിവൈഎസ്പി ഓഫീസിലേക്ക് നടത്തിയ മാർച്ചിനിടെയുണ്ടായ സംഘർഷത്തിൽ യൂത്ത് കോണ്‍ഗ്രസ് ജില്ലാ നേതാക്കൾക്കും പ്രവർത്തകർക്കുമെതിരെ ജാമ്യമില്ലാ വകുപ്പ് പ്രകാരം കേസെടുത്തു. ജില്ലാ വൈസ് പ്രസിഡന്‍റ് ടോണി തോമസ്, ബിലാൽ സമദ്, ഷാനു ഷാഹുൽ, അഖിൽ വണ്ടിപ്പെരിയാർ, ബാദുഷ പൂപ്പാറ എന്നിവർക്കും കണ്ടാലറിയാവുന്ന മറ്റ് ഇരുപതോളം പ്രവർത്തകർക്കെതിരെയുമാണ് പോലീസ് കേസെടുത്തത്.

തൊടുപുഴയിൽ തെരുവുയുദ്ധം

തൊടുപുഴ: യൂത്ത് കോണ്‍ഗ്രസ് പ്രവർത്തകരെ പോലീസ് അതിക്രൂരമായി മർദിച്ച സംഭവത്തിൽ പ്രതിഷേധിച്ച് തൊടുപുഴ ഡിവൈഎസ്പി ഓഫീസിലേക്കു യൂത്ത് കോണ്‍ഗ്രസ് ജില്ലാ കമ്മിറ്റിയുടെ നേതൃത്വത്തിൽ നടത്തിയ മാർച്ച് സംഘർഷത്തിൽ കലാശിച്ചു. മാർച്ച് പോലീസ് സ്റ്റേഷനു മുന്നിൽ ബാരിക്കേഡ് ഉപയോഗിച്ചു തടഞ്ഞു. ഇതേത്തുടർന്ന് പോലീസും പ്രവർത്തകരും തമ്മിൽ ഉന്തും തള്ളും ആരംഭിച്ചു. ഒടുവിൽ പോലീസ് ലാത്തി വീശി. ലാത്തിയടിയേറ്റ് യൂത്ത് കോണ്‍ഗ്രസ് വണ്ടിപ്പെരിയാർ മണ്ഡലം പ്രസിഡന്‍റ് അഖിൽ, പ്രവർത്തകരായ മനോജ് രാജൻ, ബാദുഷ പൂപ്പാറ, മഹേഷ് മോഹനൻ എന്നിവർക്കു പരിക്കേറ്റു. ഇവരെ പോലീസ് വാഹനത്തിൽ ആശുപത്രിയിലെത്തിച്ചു. വളഞ്ഞിട്ടു തല്ല് ഇന്നലെ ഉച്ചയ്ക്ക് 12.45 ഓടെയാണ് രാജീവ് ഭവനിൽനിന്ന് മാർച്ച് ആരംഭിച്ചത്. ബാരിക്കേഡ് മറി കടക്കാൻ ശ്രമിക്കുന്നതിനിടെ പോലീസുകാരുടെ കൈയിൽനിന്നു ഷീൽഡ് തട്ടിത്തെറിപ്പിക്കാൻ ശ്രമിച്ചതാണ് സംഘർഷത്തിനിടയാക്കിയത്. ഇതോടെ പോലീസ് പ്രവർത്തകർക്കു നേരേ ലാത്തി വീശുകയായിരുന്നു. പ്രവർത്തകർക്കു പരിക്കേറ്റതോടെ അവർ പോലീസിനു നേരേ തിരിഞ്ഞു. ഇതോടെ യൂത്ത് കോണ്‍ഗ്രസ് പ്രവർത്തകരായ അഖിലിനെയും മനോജിനെയും പോലീസ് വളഞ്ഞിട്ട് തല്ലി. തുടർന്ന് നേതാക്കൾ ഇടപ്പെട്ട് പ്രവർത്തകരെ അനുനയിപ്പിച്ചു നീക്കാൻ ശ്രമിച്ചു. ബാരിക്കേഡുകൾക്കു മുന്പിൽ പ്രതിഷേധം തുടരുന്നതിനിടെ വീണ്ടും പ്രവർത്തകരും പോലീസും തമ്മിൽ വാക്കേറ്റമുണ്ടാകുകയും പോലീസ് ലാത്തി വിശുകയും ചെയ്തു. ഇതിനിടെ, ചില പ്രവർത്തകർ പോലീസിനെ കന്പുകൾ ഉപയോഗിച്ചു നേരിടാനും ശ്രമിച്ചു. തുടർന്ന് ഡിവൈഎസ്പി പി.കെ. സാബു ഇടപെട്ടു രംഗം ശാന്തമാക്കി. തിരിച്ചടിക്കുമെന്ന് നേതാക്കൾ പ്രതിഷേധ യോഗം യൂത്ത് കോണ്‍ഗ്രസ് അഖിലേന്ത്യ സെക്രട്ടറി ജിൻഷാദ് ജിന്നാസ് ഉദ്ഘാടനം ചെയ്തു. കാക്കിയുടെ ബലത്തിൽ യൂത്ത് കോണ്‍ഗ്രസ് പ്രവർത്തകരെ കൈകാര്യം ചെയ്യാമെന്നു വിചാരിച്ചാൽ ശക്തമായ തിരിച്ചടിയ്ക്കുമെന്നു ജിൻഷാദ് പറഞ്ഞു. ജില്ലാ പ്രസിഡന്‍റ് ഫ്രാൻസിസ് അറയ്ക്കപ്പറന്പിൽ അധ്യക്ഷത വഹിച്ചു. ടോണി തോമസ്, അരുണ്‍ പൂച്ചക്കുഴി, മാത്യു കെ.ജോണ്‍, സോയിമോൻ ഫ്രാൻസിസ്, ജോബി സി.ജോയി, ബിലാൽ സമദ്, ജാഫർ ഖാൻ മുഹമ്മദ് എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]