ADVERTISEMENT

ADVERTISEMENT

അഡ്വ.സാം കെ.ഡാനിയേലും എം.എസ്. താരയും സിപിഐ ജില്ല അസിസ്റ്റന്‍റ് സെക്രട്ടറിമാർ

കൊല്ലം: സിപിഐ ജില്ല കൗൺസിൽ അസിസ്റ്റന്‍റ് സെക്രട്ടറിമാരായി അഡ്വ.സാം.കെ.ഡാനിയേലിനെയും അഡ്വ. എം.എസ്.താരയെയും തെരഞ്ഞെടുത്തു. എം.എൻ.സ്മാരകത്തിൽ ചേർന്ന ജില്ലാ കൗൺസിൽ യോഗത്തിലാണ് തെരഞ്ഞെടുത്തത്. 19 അംഗം ജില്ലാ എക്സിക്യൂട്ടീവിനെയും തെരഞ്ഞെടുത്തു.

പി.എസ്. സുപാൽ എംഎൽഎ, അഡ്വ. സാം കെ.ഡാനിയേൽ, എം.എസ്.താര, ജി.ലാലു, എം.സലീം, എ.മന്മഥൻ നായർ, ആർ.എസ് .അനിൽ, ജി .ബാബു, ജി.ആർ. രാജീവൻ, ഐ. ഷിഹാബ്, എസ്.ബുഹാരി, കെ.സി. ജോസ്, ജി.എസ്. ജയലാൽ എംഎൽഎ,

സി.അജയ പ്രസാദ്, ഹണി ബെഞ്ചമിൻ, ജെ.ജഗദമ്മ ടീച്ചർ, കെ.ആർ. മോഹനൻ പിള്ള, എ.എസ്. ഷാജി,എസ്.അഷറഫ് എന്നിവരാണ് എക്സിക്യൂട്ടീവ് അംഗങ്ങൾ. ജില്ലാ കൗൺസിൽ യോഗത്തിൽ ആർ.എസ്. അനിൽ അധ്യക്ഷത വഹിച്ചു.

ADVERTISEMENT

പ്രതിഷേധസംഗമം നടത്തി

കുണ്ടറ : താമരശേരി താലൂക്ക് ആശുപത്രിയിൽ ഡോക്ടർക്കു നേരെ ഉണ്ടായ വധശ്രമത്തിനെതിരെ കുണ്ടറ താലൂക്ക് ആശുപത്രിയിൽ പ്രതിഷേധ സംഗമം നടത്തി. ആശുപത്രി സൂപ്രണ്ട് ഡോ. ബാബുലാൽ, കെജിഎംഒ എ കുണ്ടറ താലൂക്ക് കൺവീനർ ഡോ. ശബരി നാഥ്, സ്റ്റാഫ് കൗൺസിൽ സെക്രട്ടറി വിഷ്ണു എന്നിവർ പ്രസംഗിച്ചു. ആശുപത്രിയിൽ സിസിടിവി സംവിധാനം നടപ്പിലാക്കുക, ഓരോ ഷിഫ്റ്റിലും രണ്ട് ഡോക്ടർമാരുടെ സേവനം ഉറപ്പുവരുത്തുക, ആശുപത്രി പരിസരം സേഫ്സോണായി പ്രഖ്യാപിക്കുക തുടങ്ങിയ ആവശ്യങ്ങളും പ്രതിഷേധക്കാർ ഉന്നയിച്ചു.

പോലീസ് ഉദ്യോഗസ്ഥനെ മർദിച്ച കേസ്: പ്രതികൾ അറസ്റ്റിൽ

കൊല്ലം: പൊതുസ്ഥലത്ത് കൂട്ടംകൂടി മദ്യപിക്കുന്ന വിവരം പോലീസ് സ്റ്റേഷനിൽ അറിയിച്ചെന്ന വിരോധം നിമിത്തം പോലീസ് ഉദ്യോഗസ്ഥനെ സംഘം ചേർന്ന് മർദിച്ച് പരിക്കേൽപ്പിച്ച കേസിലെ പ്രതികൾ അഞ്ചാലുംമൂട് പോലീസിന്‍റെപിടിയിലായി. തൃക്കടവൂർ പനമൂട് കരിക്കവയൽ വീട്ടിൽ ദീപു എന്ന ഹരിസുധൻ(45), തൃക്കടവൂർ മുരുന്തൽ സജന മൻസിലിൽ നസീർ(42), തൃക്കടവൂർ കുപ്പണ തങ്കത്തെക്കതിൽ സലീം(52), തൃക്കടവൂർ നീരാവിൽ മണ്ണൂർ വടക്കതിൽ സുജിത്ത് എന്ന പ്രമോദ്(33), തൃക്കടവൂർ നീരാവിൽ സിയാദ്(42) എന്നിവരാണ് അഞ്ചാലുംമൂട് പോലീസിന്‍റെ പിടിയിലായത്. പ്രതികൾ പതിവായി അഞ്ചാലുംമൂട് ആണിക്കുളത്ത് ചിറ ഗ്രൗണ്ടിൽ വന്നിരുന്ന് മദ്യപിക്കുന്ന വിവരം പോലീസ് സ്റ്റേഷനിൽ അറിയിച്ചതിലുള്ള വിരോധമാണ് പോലീസുകാരനെ ആക്രമിക്കാൻ കാരണമായത്. പ്രതികൾ സംഘം ചേർന്ന് മാരകായുധങ്ങളുമായി പോലീസ് ഉദ്യോഗസ്ഥരെ ആക്രമിച്ചതായാണ് കേസ്. അഞ്ചാലുംമൂട് പോലീസ് ഇൻസ്‌പെക്ടർ ഇ.ബാബുവിന്‍റെ നേതൃത്വത്തിൽ എസ് ഐമാരായ ഗിരീഷ്, സഞ്ജയൻ, സി പി ഒമാരായ ശിവകുമാർ, വിഗ്്നേശ് എന്നിവരുൾപ്പെട്ട സംഘമാണ് പ്രതികളെ അറസ്റ്റ് ചെയ്യുന്നത്.

പള്‍സ് പോളിയോ തുള്ളിമരുന്ന് വിതരണം

കൊല്ലം: ജില്ലയുടെ വിവിധഭാഗങ്ങളില്‍ ഒരുക്കിയ ബൂത്തുകള്‍വഴി നാളെ അഞ്ചു വയസുവരെ പ്രായമുള്ള എല്ലാകുട്ടികള്‍ക്കും പള്‍സ് പോളിയോ തുള്ളിമരുന്നു വിതരണം ചെയ്യും. ജില്ലാതല ഉദ്ഘാടനം സര്‍ക്കാര്‍ വിക്ടോറിയ ആശുപത്രിയില്‍ നാളെ രാവിലെ എട്ടിന് എം.മുകേഷ് എംഎല്‍എ നിര്‍വഹിക്കും. 1,38,755 കുട്ടികള്‍ക്കാണ് മരുന്ന് നല്‍കുക. 1790 ബൂത്തുകളും 37 ട്രാന്‍സിറ്റ് ബൂത്തുകളും 19 മൊബൈല്‍ ബൂത്തുകളും ഒരുക്കിയിട്ടുണ്ട്. അതിഥിതൊഴിലാളികളുടെകുട്ടികള്‍ക്കും പോളിയോ വാക്‌സിന്‍ എടുക്കാം. ആരോഗ്യകേന്ദ്രങ്ങള്‍, സ്‌കൂളുകള്‍, അങ്കണവാടികള്‍, റെയില്‍വേ സ്റ്റേഷനുകള്‍, ബസ് സ്റ്റാന്‍ഡുകള്‍ എന്നിവിടങ്ങളില്‍ പ്രത്യേകസജ്ജീകരണം ഏര്‍പ്പെടുത്തും. തുടര്‍ന്നുള്ള ദിവസങ്ങളിലും തുള്ളിമരുന്ന് എടുക്കുന്നതിനുള്ള സൗകര്യം ഏര്‍പ്പെടുത്തുമെന്നു ജില്ലാ മെഡിക്കല്‍ ഓഫീസര്‍ (ആരോഗ്യം) അറിയിച്ചു.

തദ്ദേശ സ്വയംഭരണ സ്ഥാപനങ്ങളുടെ നിര്‍വഹണ പുരോഗതി : ജില്ല ഒന്നാം സ്ഥാനത്ത്

കൊല്ലം: സംസ്ഥാനത്തെ തദ്ദേശഭരണ സ്ഥാപനങ്ങളുടെ വാര്‍ഷിക പദ്ധതിയുടെ നിര്‍വഹണ പുരോഗതിയില്‍ ജില്ല ഒന്നാം സ്ഥാനത്ത്. 142.80 കോടി രൂപയുടെ പ്രവൃത്തികളാണ് ഇതുവരെ നടപ്പാക്കിയത്. ജില്ലാ പഞ്ചായത്ത് കോണ്‍ഫറന്‍സ് ഹാളില്‍ ചേര്‍ന്ന ജില്ലാ ആസൂത്രണസമിതി യോഗത്തിലാണ് തദ്ദേശഭരണ സ്ഥാപനങ്ങളുടെ വാര്‍ഷികപദ്ധതികളുടെപുരോഗതിയും പദ്ധതിവിഹിതവും സംബന്ധിച്ചു ചര്‍ച്ച ചെയ്തത്. നിര്‍വഹണ പുരോഗതിയില്‍ കൊല്ലം കോര്‍പറേഷന്‍ സംസ്ഥാനതലത്തില്‍ ഒന്നാം സ്ഥാനത്തും ജില്ലാ പഞ്ചായത്ത് മൂന്നാം സ്ഥാനത്തും അഞ്ചല്‍ പഞ്ചായത്ത് രണ്ടാം സ്ഥാനത്തുമാണ്. പദ്ധതിനിര്‍വഹണത്തില്‍ ജില്ലാ അടിസ്ഥാനത്തില്‍ പഞ്ചായത്തുകള്‍, ബ്ലോക്ക് പഞ്ചായത്തുകള്‍ മുന്‍സിപ്പാലിറ്റികള്‍ എന്നിവയുടെ നിര്‍വഹണ പുരോഗതിയും വിലയിരുത്തി. പഞ്ചായത്ത് തലത്തില്‍ അഞ്ചല്‍ (നിര്‍വഹണ പുരോഗതി-34.21ശതമാനം), ഓച്ചിറ (29.51ശതമാനം) പഞ്ചായത്തുകള്‍ ഒന്നും രണ്ടും സ്ഥാനത്താണ്. ബ്ലോക്ക് പഞ്ചായത്ത് തലത്തില്‍ ഇത്തിക്കര (27.39ശതമാനം), ഓച്ചിറ (26.60ശതമാനം) ബ്ലോക്കുകള്‍ ഒന്നും രണ്ടും സ്ഥാനത്താണ്. പുനലൂര്‍ മുൻസിപ്പാലിറ്റി (19.55ശതമാനം), പരവൂര്‍ മുനിസിപ്പാലിറ്റി (16.86ശതമാനം) എന്നിവരാണ് മുന്‍സിപ്പാലിറ്റി തലത്തില്‍ ഒന്നും രണ്ടും സ്ഥാനത്തുള്ളത്. ജില്ലയിലെ 61 തദ്ദേശഭരണസ്ഥാപനങ്ങളുടെ വാര്‍ഷികപദ്ധതിഭേദഗതിക്കും അംഗീകാരംനല്‍കി. തദ്ദേശഭരണസ്ഥാപനങ്ങളുടെ ആരോഗ്യഗ്രാന്‍ഡ് പ്രോജക്‌ടുകള്‍ക്കും കരുനാഗപ്പള്ളി, പരവൂര്‍, കൊട്ടാരക്കര മുന്‍സിപ്പാലിറ്റികളുടെ ഖരമാലിന്യ പരിപാലനപദ്ധതിയുടെ ഭാഗമായിട്ടുള്ള ബിസിനസ് ഡെവലപ്മെന്‍റ് പ്ലാനുകള്‍ക്കും അംഗീകാരം നല്‍കി. ജില്ലാ പഞ്ചായത്ത് പ്രസിഡന്‍റ് ഡോ. പി.കെ.ഗോപന്‍ അധ്യക്ഷനായി. ജില്ലാ കളക്ടര്‍ എന്‍.ദേവിദാസ്, ജില്ലാ പ്ലാനിംഗ് ഓഫീസര്‍ എം.ആര്‍. ജയഗീത, സര്‍ക്കാര്‍ പ്രതിനിധി എം. വിശ്വനാഥന്‍, ജില്ലാ ആസൂത്രണസമിതി അംഗങ്ങള്‍, തദ്ദേശഭരണ സ്ഥാപന അധ്യക്ഷര്‍/സെക്രട്ടറിമാര്‍, ജില്ലാതല ഉദ്യോഗസ്ഥര്‍ എന്നിവര്‍ പങ്കെടുത്തു.

ജോണിന് തുണയായി ദീപിക വാർത്ത

കുണ്ടറ: ദീപിക വാർത്ത ഫലം കണ്ടു.ജോണിന്‍റെ മോഹങ്ങൾക്കു തിരിതെളിഞ്ഞു. ഇരുളടഞ്ഞ ലോകത്തു ജനിച്ചു വീണ ജോണിനെ കുറിച്ചു ദീപിക വാർത്ത ചെയ്തിരുന്നു. ഈ വാർത്ത ശ്രദ്ധയിൽപ്പെട്ട ചിത്ര സൗഹൃദ കൂട്ടായ്മ ജോണിന് ലാപ്ടോപ് വാങ്ങി നൽകി. നെടുമ്പായിക്കുളം, മുക്കൂട്, ചിത്ര ജംഗ്ഷൻ എന്നിവിടങ്ങളിലെ സ്വദേശത്തും വിദേശത്തുമുള്ള യുവാക്കളുടെ കൂട്ടായ്മയാണ് ചിത്ര സൗഹൃദ കൂട്ടായ്മ. ജോണിന്‍റെ ഷോർട്ട് ഫിലിമും മറ്റും എഡിറ്റ് ചെയ്യുന്നതിനായി മുന്തിയ ഇനം ലാപ്ടോപ്പാണ് നൽകിയത്. ഇതുകൂടാതെ സോഫ്റ്റ് വെയർവാങ്ങാനുള്ള തുകയും സമ്മാനിച്ചു.

അഭിഭാഷകനെ മർദിച്ച സംഭവം : സിഐ ഉൾപ്പെടെയുള്ളവർക്കെതിരേ ജാമ്യമില്ലാ വകുപ്പ്

കൊല്ലം : അഭിഭാഷകന് പോലീസ് സ്റ്റേഷനിൽ ക്രൂരപീഡന മേൽക്കേണ്ടി വന്ന സംഭവത്തിൽ പോലീസ് സർക്കിൾ ഇൻസ്പെക്ടറും ഉദ്യോഗസ്ഥരുമടക്കം ഒൻപത് പ്രതികൾക്കെതിരെ ജാമ്യമില്ലാ വകുപ്പ് പ്രകാരം കേസെടുത്ത് കോടതി. കൊല്ലം ജുഡിഷൽ ഒന്നാം ക്ലാസ് മജിസ്ട്രേറ്റ് കോടതിയുടെതാണ് നടപടി. കരുനാഗപ്പള്ളി പോലീസ് സ്റ്റേഷൻ സർക്കിൾ ഇൻസ്പെക്ടർ ആയിരുന്ന ജി. ഗോപകുമാർ, പോലീസ് ഉദ്യോഗസ്ഥരായ അലോഷ്യസ് അലക്സാണ്ടർ, ഫിലിപ്പോസ്, അനൂപ്, ശ്രീകുമാർ, പ്രമോദ് എന്നിവരെയും മുഹമ്മദ് അഫ്സൽ, റാഷിദ്, നിസാർ തുടങ്ങി ഒൻപത് പേരെ പ്രതികളാക്കി ജാമ്യമില്ലാ വകുപ്പുകൾ പ്രകാരം കേസെടുത്തതോടെ പ്രതികൾക്ക് സമൻസ് അയക്കാൻ കോടതി ഉത്തരവിടുകയായിരുന്നു. അഭിഭാഷകനായ അഡ്വ. പനമ്പിൽ എസ്.ജയകുമാറിന്‍റെ വാഹനത്തിൽ മറ്റൊരു വാഹനം കൊണ്ട് വന്ന് ബോധപൂർവം ഇടിക്കുകയും തുടർന്ന് ജയകുമാറിനെ കരുനാഗപ്പള്ളി പോലീസ് സ്റ്റേഷനിൽ കൊണ്ടുപോയി അതിക്രൂരമായും പൈശാചികമായും ശരീരമാസകലം മർദിക്കുകയും ചെയ്ത വിവാദ സംഭവത്തിലാണ് കോടതിയുടെ നടപടി. സംഭവത്തിൽ ജയകുമാറിന്‍റെ തലയോട്ടിക്ക് പൊട്ടൽ സംഭവിച്ചിരുന്നു. അഭിഭാഷകർ സംഘടിച്ച് തുടർച്ചയായി കോടതി ബഹിഷ്കരിക്കാനിടയാക്കിയ സംഭവമാണിത്. ഇതിനിടെ അഡ്വ. ജയകുമാർ 25 ലക്ഷം രൂപ നഷ്‌ട പരിഹാരം ആവശ്യപ്പെട്ട് നൽകിയ കേസിൽ അലോഷ്യസ് അലക്സാണ്ടറിന്‍റെ വസ്തുവകകൾ കരുനാഗപ്പള്ളി സബ് കോടതി ജപ്തി ചെയ്ത് ഉത്തരവായിരുന്നു. വാദി ജയകുകാറിന് വേണ്ടി അഭിഭാഷകരായ എം.ഐ. അലക്സാണ്ടർ പണിക്കർ, പെരുമൺ എസ്.രാജു എന്നിവരാണ് കോടതിയിൽ ഹാജരായത്.

വോട്ട് കൊള്ള: മഹിളാ കോൺഗ്രസ് പ്രതിഷേധിച്ചു

കൊല്ലം: യഥാർഥവോട്ടർമാർക്ക് തങ്ങളുടെ അവകാശങ്ങളാണ് നിഷേധിക്കപ്പെടുന്നതെന്നും ഇതാണ് വോട്ട് കൊള്ളയെന്നും കൃഷ്ണ വേണി ശർമ. വോട്ട് കൊള്ളക്കെതിരെ ദേശീയ തലത്തിൽ മഹിള കോൺഗ്രസ് നടത്തുന്ന വോട്ട് ച്ചോരി സിഗ്്നേച്ചർ കാമ്പയിന്‍റെ ഭാഗമായി ജില്ലാ കോൺഗ്രസ് കമ്മറ്റി സംഘടിപ്പിച്ച ഒപ്പുശേഖരണ പരിപാടി വി.പാർക്കിൽ ഉദ്ഘാടനം ചെയ്യുകയായിരുന്നു. ഡിസിസി ജനറൽ സെക്രട്ടറിയും ഐഎൻടിയുസി ദേശീയ സെക്രട്ടറിയുമായ കൃഷ്ണ വേണി ശർമ. ജില്ലാ പ്രസിഡന്‍റ് അഡ്വ. ഫേബ സുദർശൻ അധ്യക്ഷത വഹിച്ചു. ചലച്ചിത്ര സംവിധായകനും എഴുത്തുകാരനുമായ അഡ്വ. സി. ആർ. അജയകുമാർ മുഖ്യപ്രഭാഷണം നടത്തി. മഹിളാ കോൺഗ്രസ്‌ ജില്ലാ വൈസ് പ്രസിഡന്‍റ് ജലജ മുണ്ടക്കൽ, സുബി നുജും, കെ.രാഗിണി, പ്രിയങ്ക, ഹരിത എന്നിവർ പ്രസംഗിച്ചു.

കാഷ്യൂ കോർപറേഷന്‍റെ ഉത്പന്നങ്ങൾ 30 ശതമാനം വരെ ഡിസ്കൗണ്ടിൽ

കൊല്ലം: കാഷ്യൂ കോൺക്ലേവും ദീപാവലിയും പ്രമാണിച്ച് കാഷ്യൂ കോർപറേഷന്‍റെ കശുവണ്ടി പരിപ്പിനും മൂല്യവർധിത ഉത്പന്നങ്ങൾക്കും ആഭ്യന്തര വിപണിയിൽ ഓണം മുതൽ നൽകി വരുന്ന 30ശതമാനം വരെയുള്ള ഡിസ്കൗണ്ട് 31വരെ തുടരും. സിഡിസി കാഷ്യൂസിന് പൊതുജനങ്ങളിൽ നിന്ന് ലഭിക്കുന്ന വലിയ സ്വീകാര്യത പരിഗണിച്ചാണ് ഒക്‌ടോബർ 31വരെ 30 ശതമാനം ഡിസ്കൗണ്ട് നൽകാൻ കാഷ്യൂ കോർപറേഷൻ തീരുമാനിച്ചതെന്ന് ചെയർമാൻ എസ്.ജയമോഹനും മാനേജിംഗ് ഡയറക്ടർ സുനിൽ ജോണും പറഞ്ഞു. കാഷ്യൂ കോർപറേഷന്‍റെ ഔട്ട് ലെറ്റുകൾ, ഫ്രാഞ്ചൈസികൾ, സഞ്ചരിക്കുന്ന വിപണന വാഹനം എന്നിവയിലൂടെ കശുവണ്ടിപ്പരിപ്പും മൂല്യവർധിത ഉത്പന്നങ്ങളും പൊതുജനങ്ങൾക്ക് ലഭ്യ മാകും.

കേരളത്തിൽ സ്വർണത്തകിടുകൾ ചെമ്പാകുന്ന കാഴ്ച: ഡോ.ജിന്‍റോ ജോൺ

ചവറ : പിണറായി സർക്കാരിന്‍റെ കാലത്തു സ്വർണത്തകിടുകൾ ചെമ്പ് തകിടുകളാകുന്ന അത്ഭുത കാഴ്ചയാണ് ശബരിമലയിലൂടെ കേരള ജനത കാണുന്നതെന്ന് കെപിസിസി വക്താവ് ഡോ. ജിന്‍റോ ജോൺ. ചവറ ബ്ലോക്ക് കോൺഗ്രസ് കമ്മിറ്റി കൊറ്റംകുളങ്ങര ജംഗ്ഷനിൽ സംഘടിപ്പിച്ച വിശ്വാസ സംഗമം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് മേച്ചേഴുത്തു ഗിരീഷ് കുമാർ ചടങ്ങിൽ അധ്യക്ഷനായി. കോലത്ത് വേണുഗോപാൽ, സന്തോഷ് തുപ്പാശേരി, അഡ്വ. സേതുനാഥൻ പിള്ള, ചക്കിനാൽ സനൽകുമാർ, യൂസഫ് കുഞ്ഞ്, ആർ. അരുൺ രാജ്, ചവറ ഗോപകുമാർ, ജെ.ആർ .സുരേഷ് കുമാർ, ബാബു ജി. പട്ടത്താനം, പി.ആർ.ജയപ്രകാശ്, കിഷോർ അമ്പിലാക്കര, സെബാസ്റ്റ്യൻ അംബ്രോസ് തുടങ്ങിയവർ പ്രസംഗിച്ചു.

ഇത്തിക്കരയിലെ സഞ്ചാര സ്വാതന്ത്ര്യ സത്യഗ്രഹ പന്തലിൽ എംഎൽഎ എത്തി

കൊട്ടിയം:ഇത്തിക്കര ജനകീയ പ്രതിഷേധ സമിതിയുടെ നേതൃത്വത്തിൽ നടുക്കുന്ന സഞ്ചാര സ്വാതന്ത്ര്യറിലേ സത്യഗ്ര പന്തലിൽ ജി.എസ്. ജയലാൽ എംഎൽഎ സന്ദർശിക്കുകയും പൂർണ പിന്തുണ അറിയിക്കുകയും ചെയ്തു. റിലേ സത്യഗ്രഹ സമരത്തിന്‍റെ ഒൻപതാം ദിവസം ഐഎൻടിയുസി മണ്ഡലം പ്രസിഡന്‍റ് സുഗതൻ പറമ്പിൽ സത്യഗ്രഹം അനുഷ്‌ടിച്ചു. ആദിച്ചനല്ലൂർ പഞ്ചായത്ത്‌ അംഗവും സമര സമിതി കൺവീനറുമായ ജി.രാജുവിന്‍റെ അധ്യക്ഷതയിൽ ചേർന്ന യോഗത്തിൽ ഡിസിസി സെക്രട്ടറി ശ്രീലാൽ ഉദ്ഘാടനം ചെയ്തു. ഐഎൻടിയുസി റീജണൽ പ്രസിഡന്‍റ്‌ ഹാഷിം, ആർഎസ്പി ചാത്തന്നൂർ മണ്ഡലം പ്രസിഡന്‍റ്‌ ഷാലു വി. ദാസ്, മുൻ ബ്ലോക്ക് പഞ്ചായത്ത് മെമ്പർ മൈലക്കാട് സുനിൽ, ആദിച്ചനല്ലൂർ റസിഡന്‍റ് അസോസിയേഷൻ സെക്രട്ടറി വിദ്യാസാഗർ, യുഡിഎഫ് മണ്ഡലം ചെയർമാൻ സജി സാമൂവൽ എന്നിവർ ഐക്യദാർഢ്യം പ്രഖ്യാപിച്ചു പ്രസംഗിച്ചു.

വനം വന്യജീവി വാരാഘോഷം; പഠനയാത്ര നടത്തി

കുളത്തൂപ്പുഴ : വനം വന്യജീവി വാരാഘോഷ ഭാഗമായി വിദ്യാർഥികൾക്കായി വനം വകുപ്പ് പഠനയാത്ര സംഘടിപ്പിച്ചു. തെന്മല റെയ്ഞ്ച് കല്ലുവരമ്പ് സെക്ഷൻ വനപാലകരുടെ നേതൃത്വത്തിൽ വില്ലുമല ട്രൈബൽ എൽപി സ്കൂളിലെ വിദ്യാർഥികൾക്കായി കുളത്തൂപ്പുഴ വനം മ്യൂസിയവും വനപ്രദേശങ്ങളിലുമായാണ് പഠനയാത്ര സംഘടിപ്പിച്ചത്. സെക്‌ഷൻ ഫോറസ്റ്റർ ആർ.ഡി. അരുൺകുമാറിന്‍റെ നേതൃത്വത്തിൽ ബീറ്റ് ഫോറസ്റ്റർമാരായ അഹല്യാരാജ്, ആര്യ പ്രസാദ്, ശ്യാം എന്നിവരും അധ്യാപകരും ഒപ്പമുണ്ടായിരുന്നു. കളങ്കുന്ന് ഫോറസ്റ്റ് സെക്ഷൻ വനപാലകരുടെ നേതൃത്വത്തിൽ സംഘടിപ്പിച്ച വനം വന്യജീവി വാരാഘോഷ സമാപന സമ്മേളനം ചന്ദനക്കാവ് ബിഎംജി ഹൈസ്കൂൾ ഓഡിറ്റോറിയത്തിൽ അഞ്ചൽ ഫോറസ്റ്റ് റെയ്ഞ്ച് ഓഫീസർ ആർ. ദിവ്യ ഉദ്ഘാടനം ചെയ്തു. പിടിഎ പ്രസിഡന്‍റ് പി.ആർ. സന്തോഷ് കുമാർ അധ്യക്ഷത വഹിച്ചു. സ്കൂൾ ലോക്കൽ മാനേജർ ഫാ.മാത്യു ചരിവുകാലായിൽ, പ്രഥമാധ്യാപകൻ കെ. ഷാജുമോൻ, ഫോറസ്റ്റ് ഓഫീസർ ടി.ആർ. ഷിബു, പിടിഎ അംഗം ഷൈജു, ഷാഹുൽ ഹമീദ്, ജെ. ജോസ്മോൻ, സുനിൽ കെ. തോമസ്, ബീറ്റ് ഫോറസ്റ്റ് ഓഫീസർ എം.എസ്.രമ്യ, ഫോറസ്റ്റ് ജീവനക്കാരനായ രാജേഷ് കുട്ടൻ, ജയശ്രീ, അധ്യാപകരായ റോജി വർഗീസ്, ടി.എസ്. അപർണ എന്നിവർ പ്രസംഗിച്ചു.

തിരുമുക്ക് അടിപ്പാത സമരം: കർഷക പ്രതിനിധി സത്യഗ്രഹം അനുഷ്‌ടിച്ചു

ചാത്തന്നൂർ: തിരുമുക്കിൽവലിയ വാഹനങ്ങൾക്ക് കടന്നുപോകുവാൻ കഴിയുന്ന തരത്തിൽ അടിപ്പാത ശാസ്ത്രീയമായി പുതുക്കിപ്പണിയണമെന്ന് ആവശ്യപ്പെട്ട് തിരുമുക്ക് അടിപ്പാത സമരസമിതിയുടെ നേതൃത്വത്തിൽ നടത്തിവരുന്ന റിലേസത്യഗ്രഹ സമരത്തിന്‍റെ 23-ാം ദിവസം അഖിലേന്ത്യാ കിസാൻ സഭ ചാത്തന്നൂർ മേഖലാ കമ്മിറ്റിയുടെ നേതൃത്വത്തിലാണ് റിലേസത്യഗ്രഹം നടന്നത്. അഖിലേന്ത്യാ കിസാൻ സഭ ചാത്തന്നൂർ മേഖലാ പ്രസിഡന്‍റ് വിനോദ് സത്യഗ്രഹം അനുഷ്‌ടിച്ചു. സിപിഐ ചാത്തന്നൂർ മണ്ഡലം സെക്രട്ടറി അഡ്വ.ആർ.ദിലീപ് കുമാർ റിലേ സത്യഗ്രഹം ഉദ്ഘാടനം ചെയ്തു. കിസാൻസഭ ജില്ലാ കൗൺസിൽ അംഗം അഡ്വ.എച്ച്.ഹരീഷ് അധ്യക്ഷത വഹിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് നിർമ്മലാവർഗീസ് ,ചാത്തന്നൂർ ഗ്രാമപഞ്ചായത്ത് പ്രസിഡന്‍റ് എസ്.കെ.ചന്ദ്രകുമാർ,എൻ.സദാനന്ദൻ പിള്ള, വി.സണ്ണി, എൻ.രവീന്ദ്രൻ, രാമചന്ദ്രൻ പിള്ള , അഡ്വ.കെ.എസ്.ഷൈൻ,ചാത്തന്നൂർ വികസന സമിതി ചെയർമാൻ ജി.രാജശേഖരൻ,പരവൂർ പ്രൊട്ടക്ഷൻ ഫോറം കൺവീനർ പി.കെ.സുഭാഷ്, രാധാകൃഷ്ണൻ തുടങ്ങിയവർ പ്രസംഗിച്ചു. സമരസമിതി ജനറൽ കൺവീനർ കെ.കെ.നിസാർ സ്വാഗതവും ഷിബിനാഥ് നന്ദിയും പറഞ്ഞു. വർക്കല ശിവഗിരി മഠം ഗുരുധർമ്മ പ്രചരണ സഭ ജോയിന്‍റ് രജിസ്ട്രാർ പുത്തൂർ ശോഭനൻ സമരവേദി സന്ദർശിച്ച് അനുഭാവം രേഖപ്പെടുത്തി.സമരവേദിയിൽ ഇന്നലെ വൈകുന്നേരം ചാത്തന്നൂർ നാദം ഓർക്കസ്ട്ര പ്രവർത്തകർ അനുഭാവ ധർണനടത്തി. ഗാനസന്ധ്യയും അവതരിപ്പിച്ചു. സത്യഗ്രഹ സമരത്തിന്‍റെ ഇരുപത്തിനാലാം ദിവസമായ ഇന്ന് പരവൂർ തെക്കുംഭാഗം കാരുണ്യം പാറപ്പുറം ചാരിറ്റബിൾ സൊസൈറ്റി വൈസ് പ്രസിഡന്‍റ് മുരളീധരൻ പിള്ളസത്യഗ്രഹമനുഷ്ടിക്കും. കാരുണ്യം ചാരിറ്റബിൾ സൊസൈറ്റി പ്രസിഡന്‍റ് ഹക്കിം രാവിലെ സത്യഗ്രഹം ഉദ്ഘാടനം ചെയ്യും. പരവൂർ തെക്കുംഭാഗം കാരുണ്യം പാറപ്പുറം ചാരിറ്റബിൾ സൊസൈറ്റിയുടെ നേതൃത്വത്തിലാണ് റിലേസത്യഗ്രഹം നടക്കുന്നത്. ജനങ്ങളെ കബളിപ്പിക്കുന്നു കൊല്ലം: തിരുമുക്ക് അടിപ്പാത വിഷയത്തിൽ പിണറായി സർക്കാരും കേന്ദ്ര സർക്കാരും ജനങ്ങളെ കബളിപ്പിക്കുകയാണെന്ന് ഡിസിസി ജനറൽ സെക്രട്ടറി എൻ. ഉണ്ണികൃഷ്ണൻ. ദേശീയപാത 66 ന്‍റെ പണികൾ പൂർത്തീകരിക്കുന്നത് സംബന്ധിച്ച് ഡൽഹിയിൽ മുഖ്യമന്ത്രിയും കേന്ദ്രപൊതുമരാമത്ത് മന്ത്രിയുമായി നടത്തിയ ചർച്ചയിൽ തിരുമുക്ക് അടിപ്പാത സംബന്ധിച്ചുള്ള വിഷയം സംസ്ഥാന സർക്കാർ ഉന്നയിച്ചില്ല. ഇക്കാര്യത്തിൽ ബിജെപിയും സിപിഎമ്മും കാട്ടുന്ന ഇരട്ടത്താപ്പ് ചാത്തന്നൂർ പരവൂർ നിവാസികളെയും ഈ പാത ഉപയോഗിക്കുന്ന ലക്ഷക്കണക്കിന് ആളുകളെയും കബളിപ്പിക്കുന്നതാണെന്ന് ഉണ്ണികൃഷ്ണൻ പറഞ്ഞു.

ഓർമ തിരുനാൾ ആചരിച്ചു

കുളത്തൂപ്പുഴ: ബിഎംജി ഹൈസ്കൂളിൽ ആർച്ച്ബിഷപ് ബനഡിക്‌ട് മാർ ഗ്രിഗോറിയോസിന്‍റെ ഓർമ തിരുന്നാൾ കെസിഎസ്എല്ലിന്‍റെ നേതൃത്വത്തിൽ ആചരിച്ചു. കാലത്തിന് മുമ്പേ സഞ്ചരിച്ച യോഗിവര്യനായിരുന്നു ഗ്രിഗോറിയോസ് മെത്രാപ്പോലിത്തായെന്നു മലങ്കര കത്തോലിക്കാ സഭാ മേജർ ആർച്ച് ബിഷപ് കർദിനാൾ മാര്‍ ബസേലിയോസ് ക്ലീമിസ് കാതോലിക്കാബാവ ഓൺലൈൻ സന്ദേശത്തിലൂടെ അറിയിച്ചു. ഹെഡ്മാസ്റ്റർ കെ.ഷാജുമോൻ, കെസിഎസ്എൽ യൂണിറ്റ് ഡയറക്ടർ ഫാ.വിൽസൺ ചരുവിള, ആനിമേറ്റർ സിസ്റ്റർ ഐശ്വര്യ എസ്ഐസി, സ്റ്റാഫ് സെക്രട്ടറി ജെ.ജോസ്മോൻ തുടങ്ങിയവർ പ്രസംഗിച്ചു. അധ്യാപകരായ സുനിൽ.കെ.തോമസ്, സജയകുമാർ, എബിൻ ലൂക്കോസ് എന്നിവർ നേതൃത്വം നൽകി.

രണ്ടു കിലോ കഞ്ചാവുമായി ഒരാൾ പിടിയിൽ

കൊല്ലം: കൊല്ലത്ത് രണ്ടു കിലോഗ്രാം കഞ്ചാവുമായി ഒരാൾ പിടിയിൽ. കിളികൊല്ലൂർ ചാമ്പക്കുളം സ്വദേശി വിഷ്ണു എന്നു വിളിക്കുന്ന സാദിക്കാണ് എക്സൈസിന്‍റെ പിടിയിലായത്. കല്ലുംതാഴം ചാമ്പക്കുളം അപ്പൂപ്പൻകാവ് ക്ഷേത്രത്തിനു സമീപം റെയിൽവേ പുറമ്പോക്കിൽ കഴിഞ്ഞദിവസം രാത്രി നടത്തിയ റെയ്ഡിലാണ് ഇയാൾ പിടിയിലാകുന്നത്. അറസ്റ്റിലായ സാദിക്കിനെതിരെ എൻഡിപിഎസ് കേസെടുത്തു. തമിഴ്നാട്ടിൽ നിന്നും വൻതോതിൽ കഞ്ചാവ് കടത്തിവന്നു കൊല്ലം നഗരത്തിലും സമീപപ്രദേശങ്ങളിലും വിൽപന നടത്തി വരികയായിരുന്നു. കഞ്ചാവ് എത്തിക്കുന്നതിന് സാദിക്ക് ഉപയോഗിച്ച ഥാർ ജീപ്പും കസ്റ്റഡിയിലെടുത്തു. ഇയാളെക്കുറിച്ചു നിരവധി പരാതികൾ ലഭിച്ചതിന്‍റെ അടിസ്ഥാനത്തിലാണ് പ്രദേശത്ത് പരിശോധന നടത്തിയത്. നിരവധി എൻഡിപിഎസ് കേസുകളിൽ പ്രതിയാണ് പിടിയിലായ സാദിക്ക്. കൊല്ലം എക്സൈസ് റേഞ്ച് ഓഫീസിലെ എക്സൈസ് ഇൻസ്പെക്ടർ പി. ശങ്കറിന്‍റെ നേതൃത്വത്തിൽ നടത്തിയ പരിശോധനയിൽ അസിസ്റ്റന്‍റ് എക്സൈസ് ഇൻസ്പെക്ടർ (ഗ്രേഡ്) ആർ.ജി. വിനോദ്, പ്രിവന്‍റീവ് ഓഫീസർ (ഗ്രേഡ്) ടി.ആർ. ജ്യോതി, ബി.ഷെഫീഖ്, സിവിൽ എക്സൈസ് ഓഫീസർമാരായ ആസിഫ് ഗോകുൽ, ഉണ്ണികൃഷ്ണൻ, വനിത സിവിൽ എക്സൈസ് ഓഫീസർ ബീന, ഡ്രൈവർ അനിൽകുമാർ എന്നിവർ പങ്കെടുത്തു.

ബനഡിക്‌ട് മാര്‍ ഗ്രിഗോറിയോസ് അനുസ്മരണം നാളെ

അഞ്ചല്‍ : ആര്‍ച്ച് ബിഷപ് ബനഡിക്‌ട് മാര്‍ ഗ്രിഗോറിയോസിന്‍റെ ചരമ വാര്‍ഷികത്തോടനുബന്ധിച്ച് എംസിഎ അഞ്ചല്‍ വൈദിക ജില്ലയുടെ നേതൃത്വത്തിലുള്ള അനുസ്മരണയോഗം നാളെ ഉച്ചയ്ക്ക് 2.30 ന് അഞ്ചല്‍ സെന്‍റ് ജോണ്‍സ് സ്‌കൂള്‍ ഓഡിറ്റോറിയത്തില്‍ നടക്കും. ചടങ്ങില്‍ പത്തനംതിട്ട ബിഷപ് ഡോ. സാമുവേല്‍ മാര്‍ ഐറേനിയോസ് അനുസ്മരണ പ്രഭാഷണം നടത്തും. എംസിഎ സഭാതല സമിതി പ്രസിഡന്‍റ് എസ്.ആര്‍.ബൈജു മുഖ്യാതിഥിയായിരിക്കും. എംസിഎ അഞ്ചല്‍ വൈദിക ജില്ലാ പ്രസിഡന്‍റ് രാജന്‍ ഏഴംകുളം അധ്യക്ഷത വഹിക്കും. എംസിഎ മേജര്‍ അതിഭദ്രാസന സമിതി പ്രസിഡന്‍റ് റെജിമോന്‍ വർഗീസ്, അഞ്ചല്‍ വൈദിക ജില്ലാ വികാരി ഫാ. ബോവസ് മാത്യു, എംസിഎ സഭാതല മാനേജിംഗ് കമ്മിറ്റി അംഗം ഡോ.കെ.വി. തോമസ് കുട്ടി, വൈദിക ജില്ലാ ഉപദേഷ്ടാവ് ഫാ. ജോഷ്വാ കൊച്ചുവിളയില്‍, എംസിഎ വൈദിക ജില്ലാ സെക്രട്ടറി എന്‍.വി. വിന്‍സെന്‍റ് തുടങ്ങിയവർ പ്രസംഗിക്കും.

തിരുവനന്തപുരം - തെങ്കാശി പാതയിൽ മരം കടപുഴകി വീണ് വാഹന ഗതാഗതം തടസപ്പെട്ടു

കുളത്തൂപ്പുഴ : കഴിഞ്ഞരാത്രിയിലെ ശക്തമായ മഴയിലും കാറ്റിലും അന്തർസംസ്ഥാന പാതയിൽ വൻമരം കടപുഴകി വീണതിനെതുടർന്ന് തിരുവനന്തപുരം - തെങ്കാശി പാതയിൽ വാഹന ഗതാഗതം തടസപ്പെട്ടു. കുളത്തൂപ്പുഴ പോലീസ് സ്റ്റേഷനുസമീപം വനംമ്യൂസിയം വളപ്പിൽ നിന്നിരുന്ന മരമാണ് 11 കെവി ലൈൻ തകർത്ത് പാതക്കുകുറുകെ നിലംപൊത്തിയത്. ഇതോടെ പ്രദേശത്തെ വൈദ്യുതി ബന്ധം പൂർണമായി തകരാറിലായി. സംഭവസമയം റോഡിൽ വാഹനങ്ങളില്ലാതിരുന്നതിനാൽ ദുരന്തം ഒഴിവായി. മരം വീണതോടെ അയൽസംസ്ഥാനത്തുനിന്നും ചരക്കുകളുമായെത്തിയ നിരവധി വാഹനങ്ങൾ പാതയിൽ കുടുങ്ങി. നാട്ടുകാർ അഗ്നിരക്ഷാ സംഘത്തെ വിവരം അറിയിച്ചതിനെ തുടർന്ന് പുനലൂരിൽനിന്നും എത്തിയ ഫയർഫോഴ്സ് സംഘം മരംമുറിച്ചു നീക്കിയ ശേഷമാണ് ഗതാഗതം പുനഃസ്ഥാപിച്ചത്.

പുലി ഭീതി ഒഴിയാതെ വനാതിർത്തി ഗ്രാമങ്ങൾ

പത്തനാപുരം: ഭീതി ഒഴിയാതെ ഒരു നാട്; ഇവിടെ പകൽ പോലും വന്യമൃഗങ്ങൾ കൂട്ടമായി സഞ്ചരിക്കുന്നു. കുട്ടികളെ സ്കൂളിൽ അയക്കാൻ ഭയക്കുകയാണ് മാതാ പിതാക്കൾ. പിറവന്തൂർ പഞ്ചായത്തിലെ വനാതിർത്തി ഗ്രാമങ്ങളിൽ ഉള്ളവർ തൊഴിലിടങ്ങളിലേക്ക് പോകാൻ കഴിയാതെ വിറങ്ങലിച്ചു കഴിയുകയാണ് . കറവൂർ, കടശേരി, പെരുന്തോയിൽ, ചണ്ണക്കമൺ, ചെമ്പനരുവി, പത്തനാപുരം പഞ്ചായത്തിന്‍റെ ഭാഗമായ നെടുംപറമ്പ്, നടുമുരുപ്പ്, കുമ്പിക്കൽ തുടങ്ങിയ ഭാഗങ്ങളിലും പുലിയുടെ സാന്നിധ്യം കണ്ടെത്തിയിട്ടുണ്ട്. മുൻപ് കാട്ടാനയുടെയും കാട്ടുപന്നിയുടെയും മലയണ്ണാന്‍റെയും ശല്യം മാത്രമായിരുന്നുവെങ്കിൽ ഇപ്പോൾ പുലി ഉൾപ്പെടെയുള്ള വന്യമൃഗങ്ങൾ പകൽപോലും ഇവിടെ സ്വൈര്യ വിഹാരം നടത്തുകയാണ്. കൃഷിനാശം പതിവു പല്ലവി ആയിട്ട് നാളുകൾ ഏറെയായി. ഭൂരിഭാഗം ആളുകളും ഉപജീവനമാർഗം ആയിരുന്ന കൃഷി പോലും ഉപേക്ഷിച്ചിരിക്കുന്നു. മറ്റേതെങ്കിലും തൊഴിൽ ചെയ്ത് ജീവിക്കാം എന്ന് കരുതുന്നവർക്കാവട്ടെ പുലി ഉൾപ്പടെയുള്ള വന്യമൃഗ ഭീഷണി. കഴിഞ്ഞ ഒരാഴ്ചയ്ക്കിടെ മേഖലയിൽ മൂന്നു വളര്‍ത്തു നായ്ക്കളെയാണ് പുലി കടിച്ചു കൊന്നത്. ഒരാഴ്ചയായി പുലിയെ പ്രദേശത്തിന്‍റെ വിവിധ ഭാഗങ്ങളിൽ നാട്ടുകാരിൽ പലരും കാണുകയും ചെയ്തു. പരാതി ഉയരുമ്പോഴൊക്കെ വനപാലകർ സ്ഥലം സന്ദർശിക്കുമെങ്കിലും കാര്യമായ നടപടികൾ ഒന്നും ഉണ്ടായിട്ടില്ല. വന്യമൃഗങ്ങൾ ജനവാസ മേഖലയിലേക്ക് കടക്കാതിരിക്കാൻ കിടങ്ങുകളോ സോളാർ ഫെൻസിങ്ങോ സ്ഥാപിക്കണമെന്ന് പ്രദേശവാസികളുടെ ആവശ്യത്തിന് വർഷങ്ങളുടെ പഴക്കമുണ്ട്. എന്നാൽ ഇക്കാര്യത്തിലും നടപടികൾ ഒന്നും ഉണ്ടായിട്ടില്ല. വളർത്തു നായയും പശുവുംആടുമൊക്കെ പുലിയുടെ ഭക്ഷണമാകുന്നത് പതിവ് സംഭവമാണ്. ഇതിനിടെയാണ് ഇന്നലെ ചാങ്ങപ്പാറയിൽ വീടിന്‍റെ കിണറ്റിനുള്ളിൽ പുലിയെ അകപ്പെട്ട നിലയിൽ കണ്ടെത്തുന്നത്. കൂട്ടമായും ഒറ്റപ്പെട്ടും നിരവധി ആളുകൾ പുലിയെ കാണുകയും അപകടത്തിൽ നിന്ന് തലനാരിഴക്ക് രക്ഷപ്പെടുകയുമായിരുന്നു. വന്യമൃഗ ശല്യത്തിൽ നിന്നും ശാശ്വത പരിഹാരം കാണുന്നതിന് വനംവകുപ്പിന്‍റെയും പഞ്ചായത്ത് അധികൃതർ ഉൾപ്പെടെയുള്ളവരുടെ കൃത്യമായ ഇടപെടീൽ ഉണ്ടാകണമെന്നാണ് നാട്ടുകാരുടെ ആവശ്യം.

വീട്ടമ്മ ട്രെയിൻ തട്ടി മരിച്ചു

എഴുകോൺ : നെടുമ്പായിക്കുളത്ത് വീട്ടമ്മ ട്രെയിൻ തട്ടി മരണപ്പെട്ടു. കരീപ്ര ഏറ്റുവായ്ക്കോട് ശ്രീലകം വീട്ടിൽ അംബിക (57 ) യാണ് മരിച്ചത്. വ്യാഴാഴ്ച വീട്ടിൽ നിന്നും നെടുമൺകാവ് അക്ഷയ കേന്ദ്രത്തിൽ പോയ അംബികയെ രാത്രി വൈകിയും കാണാത്തതിനാൽ എഴുകോൺ പോലീസിൽ വീട്ടുകാർ പരാതി നൽകിയിരുന്നു. തുടർന്ന് ഇന്നലെ രാത്രി നെടുമ്പായിക്കുളം റെയിൽവേ ഓവർ ബ്രിഡ്ജിന് താഴെ ട്രെയിൻ തട്ടി മരിച്ച നിലയിൽ കണ്ടെത്തുകയായിരുന്നു.പോലീസ് തുടർ നടപടികൾ സ്വീകരിച്ചു. ഭർത്താവ്: ശിവാനന്ദൻ പിള്ള. മക്കൾ: കാവ്യ, കീർത്തന.

സൈനികന്‍റെ മരണം: അന്വേഷണസംഘം വിവരങ്ങൾ ശേഖരിച്ചു

കുണ്ടറ : മുളവനയിൽ മരണമടഞ്ഞ സൈനികൻ തോംസൺ തങ്കച്ചന്‍റെ വീട്ടിൽ അന്വേഷണസംഘം എത്തി വിവരങ്ങൾ ശേഖരിച്ചു. തോംസന്‍റെ അമ്മ ഡെയ്സി മരണത്തിൽ ദുരൂഹത ഉന്നയിച്ചു ഫയൽ ചെയ്ത കേസിൽ കോടതി ഉത്തരവിനെ തുടർന്ന് ഡിജിപിക്ക് നൽകിയ പരാതിയുടെ അടിസ്ഥാനത്തിൽ ഡിഐജി അജിത ബീഗത്തിന്‍റെ നിർദേശപ്രകാരമാണ് അന്വേഷണസംഘം എത്തിയത്. സൈനികന്‍റെ മാതാവിൽ നിന്ന് വിവരങ്ങൾ ശേഖരിച്ചു. അന്വേഷണ സംഘത്തിന്‍റെ റിപ്പോർട്ടിന്‍റെ അടിസ്ഥാനത്തിൽ തുടരന്വേഷണം നടക്കുമെന്ന് ഉദ്യോഗസ്ഥർ അറിയിച്ചു. അന്വേഷണ സംഘത്തിൽ എസ് ഐ മാരായ ഷാലു, നിത്യ സിപിഒ മനോജ്‌ എന്നിവരാണ് ഉണ്ടായിരുന്നത്. വിശദമായ വിവരശേഖരണത്തിന് ശേഷംകാര്യങ്ങൾ മാതാവിനെ ബോധ്യപ്പെടുത്തി. റിപ്പോർട്ടിന്‍റെ പകർപ്പും നൽകിയ ശേഷമാണ് സംഘം മടങ്ങിയത്.

ലഹരിക്കടത്ത് കേസിലെ പ്രതിയെ കരുതൽ തടങ്കലിലാക്കി

കൊല്ലം: ലഹരി കടത്തിൽ പ്രതിയായ യുവാവിനെ കരുതൽ തടങ്കലിലാക്കി. തഴുത്തല ഉമയനല്ലൂർ പറക്കുളം എംഇഎസ് സ്കൂളിനുസമീപം റെജിനിവാസിൽ ഷിജു അസീർ ( 35) ആണ് അറസ്റ്റിലായത്. സാധാരണ രീതിയിൽ ഒരു വർഷമാണ് തടങ്കൽ കാലയളവ്. 2025 മാർച്ച് 11ന് ഇരവിപുരം പോലിസ് സ്റ്റേഷൻ പരിധിയിൽ അഞ്ചുലക്ഷംരൂപ വിലവരുന്ന 90 ഗ്രാം എംഡിഎംഎയുമായി ഇയാളെ ഇരവിപുരം സബ് ഇൻസ്പെക്ടർ ജയേഷിന്‍റെ നേതൃത്വത്തിലുള്ള സംഘം അറസ്റ്റ് ചെയ്തിരുന്നു. ഡൽഹിയിൽ നിന്നും വാങ്ങി വിമാനത്തിൽ തിരുവനന്തപുരത്ത് എത്തിച്ച് കൊല്ലത്ത് വിൽപനയ്ക്കായി കൊണ്ടുപോകുന്പോഴാണ് മാടൻനട ജംഗ്ഷനുസമീപത്തുനിന്നും ഇയാൾ പോലിസ് പിടിയിലായത് .

സ്കൂട്ടറിൽ മദ്യവില്പന: യുവാവ് അറസ്റ്റിൽ

ചവറ : ചെറുശേരിഭാഗം, ശങ്കരമംഗലം ഭാഗങ്ങളിൽ സ്കൂട്ടറിൽ മദ്യം വില്പന നടത്തി വന്നയാൾ എക്സൈസിന്‍റെ പിടിയിലായി. ചവറ ചെറുശേരി ഭാഗം പേരപ്പാടിൽ വീട്ടിൽ ബേബി കുമാർ ( 38 ) ആണ് പിടിയിലായത്.ഇയാൾ മദ്യ വില്പനയ്ക്ക് ഉപയോഗിച്ചുവന്ന സ്കൂട്ടറിൽ സൂക്ഷിച്ചിരുന്നത് കൂടാതെ വീട്ടിൽ സൂക്ഷിച്ചിരുന്ന 22 മദ്യ കുപ്പിയും കണ്ടെടുത്തു. കരുനാഗപ്പള്ളി എക്സൈസ് റേഞ്ച് ഓഫീസിലെ അസി.എക്സൈസ് ഇൻസ്പെക്ടർ ഗ്രേഡ് കെ വി. എബിമോന്‍റെ നേതൃത്വത്തിൽ നടന്ന റെയ്ഡിൽ വാഹനസഹിതം പിടിയിലായ ബേബികുമാറിനെ കോടതി റിമാൻഡ് ചെയ്തു. പരിശോധനയിൽ സിവിൽ എക്സൈസ് ഓഫീസർമാരായ കിഷോർ ഗോഡ്വിൻ, വനിത സിവിലിസ് ഓഫീസർ മോളി, അസിസ്റ്റന്‍റ് എക്സൈസ് ഇൻസ്പെക്ടർ അബ്ദുൽ മനാഫ് എന്നിവർ പങ്കെടുത്തു.

വിഷപ്പാമ്പുകളെ ‘സര്‍പ്പ' നേരിടും

കൊല്ലം : വനം വകുപ്പിന്‍റെ ‘സര്‍പ്പ' പദ്ധതി ജില്ലയില്‍ ഒരുക്കുന്നത് ജങ്ങൾക്ക് സുരക്ഷയുടെ സമാശ്വാസം. പാമ്പുകടിയേറ്റുള്ള മരണങ്ങള്‍ കുറയ്ക്കാനും ജനവാസ മേഖലകള്‍ക്ക് ഭീഷണിയായ വിഷപ്പാമ്പുകളെ സുരക്ഷിതസ്ഥാനങ്ങളിലേക്ക് മാറ്റാനും വനംവകുപ്പ് ആരംഭിച്ച പദ്ധതിയുടെ ഭാഗമായി അഞ്ചു വര്‍ഷത്തിനിടെ ജില്ലയില്‍ 2850 വിഷപ്പാമ്പുകളെയാണ് പിടികൂടി സുരക്ഷിതസ്ഥാനങ്ങളിലേക്ക് മാറ്റിയത്. വോളണ്ടിയര്‍മാരുടെ സേവനം ലഭ്യമാക്കുന്നത് ‘സര്‍പ്പ' മൊബൈല്‍ ആപ്ലിക്കേഷനിലൂടെയാണ്. പ്ലേ സ്റ്റോറില്‍ നിന്ന് ഡൗണ്‍ലോഡ് ചെയ്യാം. സര്‍ട്ടിഫിക്കേഷന്‍ലഭിച്ച റെസ്‌ക്യൂവര്‍മാരുടെ വിവരങ്ങളും റെസ്‌ക്യൂ പ്രവര്‍ത്തനങ്ങളുടെയും ഏകോപനം ആപ്പിലൂടെയാണ് നടത്തുന്നത്. പാമ്പുകള്‍മൂലം ഭീഷണിയുണ്ടാകുന്ന സാഹചര്യങ്ങളില്‍ ജനങ്ങളുടെ ജീവന് സുരക്ഷയൊരുക്കുക, ജനവാസ മേഖലകളിലെ ആവാസവ്യവസ്ഥയില്‍ ജീവിക്കുന്ന ഉരഗവര്‍ഗങ്ങള്‍ക്ക് സംരക്ഷണം നല്‍കുക തുടങ്ങിയവയാണ് ലക്ഷ്യങ്ങള്‍. സര്‍പ്പ ജില്ലാ കോര്‍ഡിനേറ്ററായി സാമൂഹിക വനവത്ക്കരണ വിഭാഗം റെയ്ഞ്ച് ഫോറസ്റ്റ് ഓഫീസറെ ചുമതലപ്പെടുത്തിയിട്ടുണ്ട്. ജില്ലാ കോര്‍ഡിനേറ്ററെ സഹായിക്കുന്നതിനായി സന്നദ്ധപ്രവര്‍ത്തകരില്‍നിന്ന് തെരഞ്ഞെടുക്കപ്പെട്ട ജില്ലാ ഫെസിലിറ്റേറ്റര്‍മാരുമുണ്ട്. ഫോണിലൂടെയും ആപ് വഴിയും വിവരം ലഭിക്കുന്ന എല്ലാ റെസ്‌ക്യൂ കോളുകളിലും സമയബന്ധിതമായി ഇടപെട്ട് പരിഹാരം കാണുന്നു. അസിസ്റ്റന്‍റ് ഫോറസ്റ്റ് കണ്‍സര്‍വേറ്ററാണ് സര്‍പ്പയുടെ സംസ്ഥാന നോഡല്‍ ഓഫീസര്‍. ജില്ലയിലെ സര്‍പ്പ സേവനത്തിനായി ബന്ധപ്പെടേണ്ട നമ്പറുകള്‍: ജില്ലാ കോര്‍ഡിനേറ്റര്‍: 8547603705, ജില്ലാ ഫെസിലിറ്റേറ്റര്‍: 9947467006, 94950 86150, ഡിവിഷണല്‍ ഫോറസ്റ്റ് എമര്‍ജന്‍സി ഓപ്പറേഷന്‍ സെന്‍ററുകള്‍: അച്ചന്‍കോവില്‍ ഡിവിഷന്‍-9188407512, പുനലൂര്‍ ഡിവിഷന്‍-9188407514, തെന്മല ഡിവിഷന്‍: 9188407516. പാമ്പുകടിയേറ്റാല്‍ പ്രഥമശുശ്രൂഷ കൊല്ലം: കടിയേറ്റയാള്‍ക്ക് ഭയമോ, മാനസികപിരിമുറുക്കമോ ഉണ്ടാകാന്‍ ഇടയാകരുത്. സൗകര്യപ്രദമായരീതിയില്‍ ഇരിക്കാന്‍/കിടക്കാന്‍ അനുവദിക്കണം. പേശീചലനംനിയന്ത്രിക്കുന്നതിനായി കടിയേറ്റഭാഗത്ത് പ്രഷര്‍ബാന്‍ഡ് ചുറ്റാം. കടിയേറ്റഭാഗത്ത് മുറിവുണ്ടാകുകയോ തിരുമ്മുകയോ രാസവസ്തുക്കളോ പച്ചമരുന്നുകളോ സോപ്പ് ഡെറ്റോള്‍ ഉപയോഗിച്ച് കഴുകുകയോ ചെയ്യരുത്. ഇത് വിഷബാധ വേഗത്തില്‍ പടരുന്നതിനും രക്തസ്രാവത്തിനും കാരണമായേക്കാം.

ഉപേക്ഷിച്ച നിലയില്‍ കണ്ടെത്തിയ സ്കൂട്ടർ പോലീസെത്തിയിട്ടും മാറ്റിയില്ല

കുളത്തൂപ്പുഴ: മാസങ്ങളേറെ കഴിഞ്ഞിട്ടും ഉപേക്ഷിച്ച നിലയില്‍ റോഡുവക്കില്‍ കണ്ടെത്തിയ സ്കൂട്ടറിന്‍റെ ഉടമയെ ഇനിയും കണ്ടെത്താനായില്ല. തിരുവനന്തപുരം - ചെങ്കോട്ട അന്തര്‍സംസ്ഥാന പാതയില്‍ കുളത്തൂപ്പുഴ കൂവക്കാട് കവലക്ക് സമീപം റിഹാബിലിറ്റേഷന്‍ പ്ലാന്‍റേഷന്‍ ലിമിറ്റഡ് (ആര്‍ പി എല്‍) പ്രധാന കവാടത്തിനു മുന്നിലെ പാതയോരത്താണ് മാസങ്ങള്‍ക്ക് മുമ്പ് ഇരുചക്ര വാഹനം ഉപക്ഷിച്ച നിലയില്‍ കണ്ടെത്തിയത്. ദിവസങ്ങളായി പാതയോരത്ത് വാഹനം കണ്ടതോടെ നാട്ടുകാരറിയിച്ചതിനെ തുടര്‍ന്ന് കുളത്തൂപ്പുഴ പോലീസെത്തി പരിശോധിച്ച് ഗുജറാത്തിനു സമീപം ഡാമന്‍ഡിയുവില്‍ 2018ല്‍ രജിസ്റ്റര്‍ ചെയ്ത ഹോണ്ട ആക്ടീവ വാഹനമാണെന്ന് സ്ഥിരീകരിച്ചിരുന്നു. എന്നാൽ ഉടമയെ കണ്ടെത്താനുള്ള ശ്രമം വിജയിച്ചില്ല. സംഭവമറിഞ്ഞ് സ്ഥലത്തെത്തി വാഹനം പരിശോധിച്ച പോലീസ് ഉദ്യോഗസ്ഥര്‍ വാഹനം സ്റ്റേഷനിലേക്ക് മാറ്റാതെ പാതയോരത്ത് തന്നെ ഉപേക്ഷിച്ച് പോവുകയായിരുന്നു.

കോൺഗ്രസ് പ്രതിഷേധ കൂട്ടായ്മ സംഘടിപ്പിച്ചു

പുനലൂർ: നഗരസഭയിലെ ഭരണസമിതിയുടെ പിടിപ്പുകേടുകാരണം കേരളമൊട്ടാകെ നാണക്കേടായി തീർന്നിരിക്കുകയാണെന്നും നിയോഗിച്ച രാഷ്ട്രീയ നേതൃത്വത്തിന് പോലും അവരെ തിരുത്താൻ ആകാത്തത് അത്ഭുതകരമാണെന്നും കെപിസിസി ജനറൽ സെക്രട്ടറി എം.എം.നസീർ. കോൺഗ്രസ് പുനലൂരിൽ സംഘടിപ്പിച്ച പ്രതിഷേധ കൂട്ടായ്മ ഉദ്ഘാടനം ചെയ്യുകയായിരുന്നു അദ്ദേഹം. യുഡിഎഫ് പാർലമെന്‍ററി പാർട്ടി ലീഡർ ജി.ജയപ്രകാശ് അധ്യക്ഷനായി. കോൺഗ്രസ് ബ്ലോക്ക് പ്രസിഡന്‍റ് സി.വിജയകുമാർ, ഡിസിസി ജനറൽ സെക്രട്ടറിമാരായ സഞ്ജു ബുഖാരി, എസ്.ഇ.സഞ്ജയ്ഖാൻ, നേതാക്കളായ സാബു അലക്സ്, എസ്.നാസർ, കെ. എൻ. ബിപിൻ കുമാർ, ഷെമി എസ് അസീസ്, ഓമനക്കുട്ടൻ ഉണ്ണിത്താൻ, ശിവരാജൻ അടൂർ എന്‍. ജയപ്രസാദ് , ഒമേഗ രാജൻ. എം.പി .റഷീദ് കുട്ടി തുടങ്ങിയവർ പ്രസംഗിച്ചു.

ശാസ്താംകോട്ടയുടെ ചരിത്ര ഏടുകളില്‍ ബ്രൂക്കിനും സ്ഥാനം: മാര്‍ ക്ലീമിസ് ബാവ

ശാസ്താംകോട്ട : ശാസ്താംകോട്ടയുടെ ചരിത്ര ഏടുകളില്‍ ബ്രൂക്കിനും സ്ഥാനം രേഖപ്പെടുത്തിരിക്കുന്നുവെന്നു മലങ്കര കത്തോലിക്കാ സഭാ മേജർ ആർച്ച് ബിഷപ് കർദിനാൾ മാര്‍ ബസേലിയോസ് ക്ലീമിസ് കാതോലിക്കാബാവ. രാജഗിരി ബ്രൂക്ക് ഇന്‍റര്‍നാഷണല്‍ സ്‌കൂളിന്‍റെ വാര്‍ഷികവും ബ്രൂക്കിന്‍റെ സ്ഥാപക ഡയറക്ടര്‍ റവ.ഡോ. ജി.ഏബ്രഹാം തലോത്തിലിന്‍റെ നാമഹേതുക തിരുനാള്‍ ആഘോഷവും ഉദ്ഘാടനം ചെയ്തു പ്രസംഗിക്കുകയായിരുന്നു കതോലിക്കബാവ. പത്തനംതിട്ട ബിഷപ് ഡോ. സാമുവല്‍ മാര്‍ ഐറേനിയോസ് അധ്യക്ഷത വഹിച്ചു. മാര്‍ത്താണ്ഡം ബിഷപ് ഡോ. വിന്‍സെന്‍റ് മാര്‍ പൗലോസ് അനുഗ്രഹ പ്രഭാഷണം നടത്തി. മാവേലിക്കര വികാരി ജനറാൾ മോൺ. ജോബ് കല്ലുവിളയില്‍, ശാസ്താംകോട്ട പഞ്ചായത്ത് പ്രസിഡന്‍റ് ആര്‍.ഗീത, പിടിഎ പ്രസിഡന്‍റ് ആര്‍.ഗിരികുമാര്‍ തുടങ്ങിയവർ പ്രസംഗിച്ചു. സമൂഹത്തിൽ നാനാതുറകളിലുള്ളവരുടെ സ്നേ ഹവും സഹകരണവുമാണ് ബ്രൂക്കിന്‍റെ ഈ വളർച്ചയ്ക്ക് കാരണമെന്ന് മറുപടി പ്രസംഗത്തിൽ ഫാ.ഏബ്രഹാം തലോത്തില്‍ പറഞ്ഞു. കായംകുളം ചേതന സോഷ്യല്‍ സര്‍വീസ് സൊസൈറ്റി സിഇഒ ഫാ. തോമസ് ചെറുപുഷ്പം സ്വാഗതം പറഞ്ഞു. പ്രിന്‍സിപ്പല്‍ ബോണിഫെസിയ വിന്‍സെന്‍റ്, അഡ്മിനിസ്‌ട്രേറ്റര്‍ കൊച്ചുമോള്‍ കെ. സാമുവല്‍, സെക്രട്ടറി ജോജി ടി. കോശി തുടങ്ങിയവർ നേതൃത്വം നല്‍കി.

അരിപ്പ ഭൂസമരം അവസാനിക്കുന്നു

അഞ്ചല്‍ : നീണ്ട 14 വര്‍ഷത്തിനിപ്പുറം കൊല്ലം അരിപ്പയില്‍ വിവിധ സംഘടനകളുടെ നേതൃത്വത്തില്‍ നടത്തിവന്ന ഭൂസമരം അവസാനിക്കുന്നു. സര്‍ക്കാര്‍ മുന്നോട്ടുവച്ച ഒത്തുതീര്‍പ്പ് വ്യവസ്ഥകള്‍ സമരം ചെയ്തുവന്ന സംഘടനകള്‍ അംഗീകരിച്ചതോടെയാണ് ഒന്നര ദശാബ്ദത്തിലേക്ക് നീണ്ട ഭൂസമരം അവസാനിക്കുന്നതെന്ന് റവന്യൂ മന്ത്രി കെ. രാജന്‍ വാർത്താസമ്മേളനത്തിൽ അറിയിച്ചു. പട്ടികവർഗ വിഭാഗത്തിൽപ്പെടുന്ന 35 കുടുംബങ്ങൾക്ക് ഒരു ഏക്കർ ഭൂമിയുടെ അവകാശം നിലനിർത്തിക്കൊണ്ടു തന്നെ അരിപ്പ സമരഭൂമിയിൽ 20 സെന്‍റ് പുരയിടവും 10 സെന്‍റ് നിലവും നൽകും. സമരത്തി ലുള്ള 209 പട്ടിക ജാതി കുടുംബങ്ങൾക്ക് 12 സെന്‍റ്് വീതവും ജനറൽ വിഭാഗ ത്തിൽപ്പെട്ട 78 കുടുംബങ്ങൾക്ക് 10 സെന്‍റ് വീതവും ഭൂമി പതിച്ചു നൽകി പട്ടയം അനുവദിക്കാനും സർക്കാർ തീരുമാനിച്ചു. ഈ വ്യവസ്ഥകളാണ് ഭൂസമരം നടത്തുന്ന ആറ് സംഘടനകളും ചർച്ചയിൽ അംഗീകരിച്ചതെന്നും മന്ത്രി അറിയിച്ചു. സർക്കാർ വ്യവസ്ഥകൾ സമരക്കാർ അംഗീകരിച്ച സാഹചര്യത്തിൽ ഇവരെ ഭൂമിയുടെ അവകാശികളാക്കി മാറ്റുന്ന നടപടികളിലേക്ക് ഉടൻ കടക്കും. നിലവിൽ ഭൂമി കൈയേറി കുടിൽ കെട്ടിയാണ് സമരം നടത്തുന്നത്. അതിനാൽ അളന്ന് സെറ്റിൽ ചെയ്യേണ്ടി വരും. ഇതിനായി പുനലൂർ ആർഡിഒയെ സെറ്റിൽമെന്‍റ് ഓഫീസറായി നിയോഗിച്ചതായി മന്ത്രി അറിയിച്ചു. സർവേ നടപടിക്രമങ്ങൾ തിങ്കളാഴ്ച ആരംഭിച്ച് 10 ദിവസത്തിനകം പൂർത്തിയാക്കുന്നതിനാണ് ബന്ധപ്പെട്ട ഉദ്യോഗസ്ഥർക്ക് നിർദേശം നൽകിയിരിക്കുന്നതെന്നും റവന്യു മന്ത്രി പറഞ്ഞു. 2026 ജനുവരിയിൽ പട്ടയം നല്‍കി ഭൂമി ലഭ്യമാക്കുകയാണ് സർക്കാർ ലക്ഷ്യമിടുന്നത്. പുനലൂർ താലൂക്കിലെ തിങ്കൾകരിക്കം വില്ലേജിലെ സർവെ നമ്പർ 745 /1ൽപ്പെട്ട 94 ഏക്കർ സർക്കാർ പുറമ്പോക്ക് ഭൂമി കുത്തകപാട്ട വ്യവസ്ഥ ലംഘിച്ച് തങ്ങൾ കുഞ്ഞ് മുസ്‌ലിയാർ കൈവശം വച്ചിരുന്നു. 1997 ഓഗസ്റ്റ് നാലിന് അന്നത്തെ എംഎല്‍എയായിരുന്ന പി.എസ്. സുപാൽ ഇടപെട്ട് അന്നത്തെ റവന്യൂ വകുപ്പ് മന്ത്രി കെ. ഇ .ഇസ്മയിലിന്‍റെ നേതൃത്വത്തിൽ റവന്യൂ വകുപ്പ് അധികൃതർ ഈ ഭൂമി തിരിച്ചു പിടിച്ചു. സർക്കാർ ഉത്തരവനുസരിച്ച് ഇതിൽ നിന്ന് 13.55 ഏക്കർ കുളത്തൂപ്പുഴ മോഡൽ റസിഡൻഷ്യൽ സ്കൂളിനും 21.53 ഏക്കർ ചെങ്ങറ ഭൂസമരക്കാർക്കും കൈമാറി. ശേഷിക്കുന്ന ഭൂമിയിൽ 2012 ഡിസംബർ 31 ന് മുതൽ ഭൂരഹിതരായ ദളിത്, ആദിവാസി വിഭാഗങ്ങൾ പ്രക്ഷോഭം ആരംഭിച്ചത്. ജീവിക്കാനും കൃഷി ചെയ്യാനുമായി ഭൂമി ആവശ്യപ്പെട്ടാണ് 14 വർഷമായി സമരം തുടർന്നത്. അന്നു മുതൽ സമരം ഒത്തുതീർപ്പാക്കുവാൻ സർക്കാർ ഇടപെടലുകൾ നടന്നിരുന്നു. ആധുനിക സംവിധാനങ്ങളോടെ അളന്നതനുസരിച്ച് അരിപ്പയിൽ 48.8304 ഏക്കർ ഭൂമി ശേഷിക്കുന്നുണ്ട്. ഇവിടെ തന്നെ പുരയിടവും കൃഷിഭൂമിയും വേണമെന്ന സമരക്കാരുടെ ആവശ്യത്തോടാണ് ഈ സർക്കാർ അനുഭാവ പൂർവമായ നിലപാട് സ്വീകരിച്ചിരിക്കുന്നു എന്നത് ശ്രദ്ധേയമാണ്. റോഡും കളിസ്ഥലവും ഉൾപ്പെടെ പൊതു ആവശ്യം ഒഴിച്ച് 39.9 ഏക്കർ ഭൂമിയാണ് അരിപ്പ ഭൂസമരക്കാർക്ക് അനുവദിക്കുന്നത്. ഭൂമിയിൽ നിന്നും ചതുപ്പുനിലം (വയല്‍),കളിസ്ഥലം, തോട്, റോഡ് നിർമാണത്തിന് എന്നിങ്ങനെ എട്ട് ഏക്കർ 93 സെന്‍റ് ആവശ്യങ്ങൾക്കായി വിനിയോഗിക്കേണ്ടതായി വന്നതിന് ശേഷമുള്ള 39.99 ഏക്കർ ഭൂമി അരിപ്പ സമര ഭൂമിയിലെ കൈവശക്കാർക്ക് പതിച്ചു നല്‍കും. പി.എസ്. സുപാല്‍ എംഎല്‍എയുടെ നിരന്തര ഇടപെടലിനെ തുടര്‍ന്നാണ് ഇപ്പോള്‍ സമരം ഒത്തുതീര്‍പ്പില്‍ എത്തിയത്. ജില്ലാ കളക്ടര്‍ അവതരിപ്പിച്ച പ്രൊപ്പോസല്‍ അംഗീകരിക്കുകയും തുടര്‍ നടപടികള്‍ക്ക് സെറ്റില്‍മെന്‍റ് ഓഫീസറായി പുനലൂര്‍ ആര്‍‌ഡി‌ഒയെ ചുമതലപ്പെടുത്തുകയും ചെയ്തിട്ടുണ്ട്. വാർത്താ സമ്മേളനത്തില്‍ മന്ത്രിയെ കൂടാതെ പി.എസ്. സുപാൽ എംഎൽഎയും ലാൻഡ് റവന്യൂ കമ്മിഷണർ ജീവൻ ബാബുവും പങ്കെടുത്തു.

ഹരിതഭംഗിയിൽ കൊട്ടിയം ആനിമേഷൻ സെന്‍ററിന്‍റെ കൃഷിത്തോ‌ട്ടം

ജോൺസൺ വേങ്ങത്തടം കൊട്ടിയം: ഹരിതഭംഗിയിൽ നിറഞ്ഞു കൊട്ടിയം ക്രിസ്തുജ്യോതിസ് ആനിമേഷൻ സെന്‍ററിലെ കൃഷിത്തോട്ടം. പത്ത് ഏക്കർ ഭൂമിയിൽ നാല് ഏക്കർ ഭൂമിയിൽ റബർമരങ്ങളാണ്. ബാക്കിയുള്ള കൃഷിയിടത്തിൽ വാഴയും മരച്ചീനിയും പച്ചക്കറികളും പഴവർഗങ്ങളും നിറഞ്ഞുനിൽക്കുന്നു. കൊട്ടിയം ഹോളിക്രോസ് കോൺവന്‍റിൽനിന്നും എത്തിയ സിസ്റ്റർ പെട്രീനയാണ് കൃഷിയുടെ മേൽനോട്ടം. സിസ്റ്ററിനെ സഹായിക്കാൻ സിസ്റ്റർ പ്രീതിയുമുണ്ട്. കൃഷിയിടത്തിൽ സഹായഹസ്തവുമായി ഡയറക്ടർ ഫാ. ഷാജൻ വർഗീസുമുണ്ട്. വിഷമില്ലാത്ത പച്ചക്കറിയും പഴവർഗങ്ങളും ഭക്ഷിക്കുക എന്ന ലക്ഷ്യത്തിൽ ഊന്നിയാണ് കൃഷിയെ പ്രോത്സാഹിപ്പിക്കുന്നത്. വിവിധയിനം വാഴകൾകൊണ്ടു സന്പന്നമാണ് ഈ കൃഷിയിടം. ഏത്തവാഴയാണ് കൃഷിയിലെ താരം. വെള്ളം, വളം തുടങ്ങി കൃത്യമായ പരിപാലനം ഈ കൃഷിക്ക് ആവശ്യമാണ്. പാളയംകോടൻ, ഞാലിപ്പൂവൻ, പൂവൻ തുടങ്ങിയവയുണ്ട്. നമുക്കാവശ്യമുള്ള പച്ചക്കറികളും പഴങ്ങളും ഔഷധസസ്യങ്ങളും ഈ വളപ്പിൽതന്നെ നട്ടുവളര്‍ത്തുന്നു. പച്ചക്കറികള്‍, ഫലവൃക്ഷങ്ങള്‍, പഴങ്ങള്‍, സുഗന്ധവ്യഞ്ജനങ്ങള്‍, കിഴങ്ങുവര്‍ഗവിളകള്‍, ഔഷധസസ്യങ്ങള്‍ , ഉയരം കുറഞ്ഞ തെങ്ങുകള്‍ ഇവയെല്ലാം ഈ ഭൂമിയിൽ വളരുന്നു. 1000ലധികം ചുവട് മരച്ചീനി വളർന്നുനിൽക്കുന്നു. പച്ചക്കറികളിൽ പയറും വെണ്ടയും ചേന്പും ചേനയും പപ്പായയും വഴുതനയും കുർക്കയും തഴച്ചുവളർന്നു നിൽക്കുന്നു. പച്ചമുളകും കാന്താരിമുളകും ആവശ്യത്തിനു പുരയിടത്തിൽ തന്നെയുണ്ട്. പാവൽ, പടവലം, കുമ്പളം, മത്തൻ തുടങ്ങിയവയാണു കൃഷി ചെയ്യുന്നുണ്ട്. ഡ്രിപ്പ് ഇറിഗേഷ‌ൻ, പ്ലാസ്റ്റിക് മൾച്ചിംഗ്, സ്ഥിരം പന്തൽ എന്നിവയെല്ലാം ഇവിടത്തെ കൃഷിക്കായി അവലംബിക്കുന്നുണ്ട്. ആവശ്യത്തിനു വെള്ളമുള്ളതുകൊണ്ട് കൃഷി നന്നായി നടക്കുന്നു. രാവിലെ മുതൽ പണിക്കാരോടൊപ്പം കൃഷിയിടത്തിൽ സിസ്റ്ററുണ്ട്. പച്ചക്കറികളും മറ്റു കാർഷികോത്പന്നങ്ങളും ആനിമേഷൻ സെന്‍ററിലേക്കുതന്നെയാണ് എടുക്കുന്നത്. വിവിധയിനം പ്ലാവുകൾ,കടച്ചക്ക, മാവുകൾ, ചാന്പ തുടങ്ങിയവയും ഈ കൃഷിയിടത്തിൽ ആവശ്യത്തിനുണ്ട്. ഇതുകൂടാതെ വിവിധയിനം പഴവർഗങ്ങളും നട്ടുവളർത്തുന്നു. റംബൂട്ടാൻ കൂടുതൽ വ്യവസായി അടിസ്ഥാനത്തിൽ വളർത്താനുള്ള പദ്ധതി തയാറാക്കിയതായി ഡയറക്ടർ ഫാ. ഷാജൻ വർഗീസ് പറഞ്ഞു.

ഗാന്ധിജയന്തി വാരാഘോഷം സമാപിച്ചു

കൊല്ലം: ഗാന്ധിജിയെകുറിച്ച് അറിയേണ്ടതെല്ലാം ചോദിച്ച് ക്വിസ്മാസ്റ്ററുടെ റോളില്‍ ജില്ലാ കളക്ടർ എന്‍. ദേവിദാസ്. അറിയുന്നതെല്ലാം പങ്കിട്ട് കടുത്ത മത്സരം കാഴ്ചവച്ച സിവില്‍ സ്റ്റേഷനിലെ ജീവനക്കാരും കൊല്ലം ബാറിലെ അഭിഭാഷകരും. ജില്ലാ ഭരണകൂടം, ജില്ലാ ഇന്‍ഫര്‍മേഷന്‍ ഓഫീസ്, കൊല്ലം ബാര്‍ അസോസിയേഷന്‍, കേരള യൂത്ത് പ്രമോഷന്‍ കൗണ്‍സില്‍ എന്നിവയുടെ ആഭിമുഖ്യത്തില്‍ സംഘടിപ്പിച്ച ഗാന്ധിജയന്തി വാരാഘോഷ ഭാഗമായാണ് ബാര്‍ അസോസിയേഷന്‍ ഹാളില്‍ മത്സരം അരങ്ങേറിയത്. സമാപന സമ്മേളനം ജില്ലാ കളക്ടർ എന്‍. ദേവിദാസ് ഉദ്ഘാടനം ചെയ്തു. ബാര്‍ അസോസിയേഷന്‍ പ്രസിഡന്‍റ് പി.ബി. ശിവന്‍ അധ്യക്ഷനായി.

സായാഹ്ന ധർണ നടത്തി

കുണ്ടറ : കേരളത്തിൽ ആരോഗ്യരംഗത്ത് സർക്കാർ തികഞ്ഞ പരാജയമാണെന്ന് കേരള കോൺഗ്രസ് സംസ്ഥാന സെക്രട്ടറി കുളത്തൂർ രവി. കുണ്ടറയിൽ കേരള കോൺഗ്രസിന്‍റെ ആഭിമുഖ്യത്തിൽ നടന്ന ആരോഗ്യരംഗത്തെ തകർച്ചയ്ക്കെതിരെയുള്ള സായാഹ്ന ധർണ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കേരള കോൺഗ്രസ് ജില്ലാ വൈസ് പ്രസിഡന്‍റ് വെങ്കിട്ട രമണൻ പോറ്റിയുടെ അധ്യക്ഷതയിൽ ചേർന്ന യോഗത്തിൽ ചിറ്റുമല ബ്ലോക്ക് പഞ്ചായത്ത് അംഗം അഡ്വ. അരുൺ അലക്സ്, കേരള കോൺഗ്രസ് സംസ്ഥാന ജനറൽ സെക്രട്ടറി വി .വിശ്വജിത്, ജെ .സിൽവസ്റ്റർ, അനിൽ പനിക്കവിള, വി.പി. സാബു, ലിജു വിജയൻ, രാജേഷ് മുകുന്ദാശ്രമം, ജിഷ്ണു ഗോകുലം, ശിവൻകുട്ടി പിള്ള, സാൻഡോ കാഞ്ഞിരകോട്, അനസ് കരിക്കോട് തുടങ്ങിയവർ പ്രസംഗിച്ചു.

സ്കൂള്‍ കെട്ടിട നിര്‍മാണത്തിന് 99.99 ലക്ഷം രൂപയുടെ ഭരണാനുമതി

കുണ്ടറ: കുണ്ടറ നിയോജകമണ്ഡലത്തിലെ സ്കൂളുകളുടെ അടിസ്ഥാന സൗകര്യ വികസനം മെച്ചപ്പെടുത്തുന്നതിന്‍റെ ഭാഗമായി കൊറ്റങ്കര പഞ്ചായത്തില്‍ ഉള്‍പ്പെട്ടിട്ടുളള ഗോപികാ സദനം ഗവ. എല്‍പി സ്കൂളിന് കെട്ടിടം നിര്‍മിക്കുന്നതിനായി, പൊതുവിദ്യാഭ്യാസ വകുപ്പിന്‍റെ 2025-26 പ്ലാന്‍ ഫണ്ടില്‍ നിന്നും തുക അനുവദിപ്പിച്ചാണ് 99.99 ലക്ഷം രൂപയുടെ ഭരണാനുമതി നേടിയെടുത്തതെന്ന് പി.സി. വിഷ്ണുനാഥ് എംഎല്‍എ അറിയിച്ചു. 80 വര്‍ഷം പഴക്കമുള്ള സ്കൂളിന് ആരംഭകാലത്തുളള കെട്ടിടങ്ങളാണ് നിലവിലുളളത്. ആധുനിക സൗകര്യങ്ങളോടു കൂടിയ പുതിയ കെട്ടിടത്തിന്‍റെ ആവശ്യകത മനസിലാക്കിയാണ് പ്രൊപ്പോസല്‍ സമര്‍പ്പിച്ചതെന്നും എംഎല്‍എ അറിയിച്ചു. കുണ്ടറ നിയോജകമണ്ഡലത്തിലെ കുണ്ടറ, പെരിനാട്, ഇളംമ്പള്ളൂര്‍, നെടുമ്പന, തൃക്കോവില്‍വട്ടം, കൊറ്റങ്കര എന്നീ പഞ്ചായത്തുകളിലെ എട്ട് സ്കൂളുകളുടെ അടിസ്ഥാന സൗകര്യ വികസനത്തിനായി കെട്ടിടങ്ങള്‍ നിര്‍മിക്കുന്നതിന് വിവിധ ഫണ്ടുകളില്‍ നിന്നും എട്ടുകോടി രൂപ ചെലവഴിച്ച് ഭരണാനുമതി നേടിയെടുത്തതായും എംഎല്‍എ അറിയിച്ചു.

ഇനി ‘കൂൾ’ അങ്കണവാടി

കൊട്ടിയം: ആദിച്ചനല്ലൂർ പഞ്ചായത്തിലെ രണ്ടാം നമ്പർ അങ്കണവാടി ഇനി സാധാരണ അങ്കണവാടിയല്ല. എസിയുടെ സുഖശീതളിമയിലായിരിക്കും കുഞ്ഞു ബാല്യങ്ങളുടെ പഠനവും കുസൃതിത്തരങ്ങളും.കുടിക്കാൻ തണുത്ത വെള്ളത്തിന് ഫ്രിഡ്ജ്. ഈ അങ്കണവാടിയുടെ ലെവൽ വേറെ തന്നെ. മറ്റ് അങ്കണവാടികൾക്ക് അസൂയ ജനിപ്പിക്കുവാനുതകുന്ന തരത്തിൽ ഇത് മേലേയ്ക്ക്. അങ്കണവാടിയിലെ ആധുനിക സൗകര്യങ്ങളുടെ ഉദ്ഘാടനം ജില്ലാ പഞ്ചായത്ത് വൈസ് പ്രസിഡന്‍റ് ശ്രീജ ഹരീഷ് നിർവഹിച്ചു. ക്ലാസ് മുറികൾ ആധുനികവത്കരിക്കുന്നതോടൊപ്പം കുഞ്ഞുമനസുകളുടെ വീടും കളിയിടവുമായ അങ്കണവാടികൾ ശീതീകരിക്കുകയും ഫ്രിഡ്ജ് ഉൾപ്പെടെയുള്ള സൗകര്യങ്ങൾ ഏർപ്പെടുത്തുകയും ചെയ്തത് പ്രശംസനീയമാണെന്നും അവർ പറഞ്ഞു. പഞ്ചായത്തംഗത്തിന്‍റെയും അങ്കണവാടി ലെവൽ മോണിറ്ററിംഗ് ആൻഡ് സപ്പോർട്ടിംഗ് കമ്മിറ്റി ( എഎൽഎംഎസ്‌സി ) യുടെയും ശ്രമഫലമായി സ്വരൂപ്പിച്ച തുക ഉപയോഗിച്ച് വാങ്ങിയതാണ് എസിയും ഫ്രിഡ്ജും. പഞ്ചായത്ത്‌ അംഗം പ്ലാക്കാട് ടിങ്കു അധ്യക്ഷത വഹിച്ചു. ഇത്തിക്കര ബ്ലോക്ക്‌ പഞ്ചായത്ത്‌ മെമ്പറന്മാരായ ബിന്ദു ഷിബു, ശ്രീലാൽ ചിറയത്ത്, സിഡിപിഒ കവിത, ജാഗ്രത സമതി കൺവീനർ കെ. രമേശൻ, മുൻ പഞ്ചായത്തംഗം റോയ്സൺ, സിഡിഎസ് മെമ്പർ ആർ. കലജാദേവി, ഐസിഡിഎസ് സൂപ്പർവൈസർമാരായ നജീമ, ഷീബ, അങ്കണവാടി വർക്കർ സരിത, ഹെൽപർ സന്ധ്യ എന്നിവർ പ്രസംഗിച്ചു.

പോലീസ് വാഹനം അപകടത്തിൽപ്പെട്ടു; ആറുപേർക്ക് പരിക്ക്

കൊട്ടാരക്കര: ലോറിയിലും കാറിലും തട്ടി നിയന്ത്രണംവിട്ട പോലീസ് വാഹനം എതിരെ വന്ന കാറിലേക്ക് ഇടിച്ചു കയറി. അപകടത്തിൽ രണ്ടു പോലീസ് ഉദ്യോഗസ്ഥർ ഉൾപ്പെടെ ആറു പേർക്ക് പരിക്ക്. കാറിലുണ്ടായിരുന്ന കോട്ടയം കല്ലറ സ്വദേശികളായ മനോജ്(55), ഭാര്യ വിജയലക്ഷ്മി(44), മകൻ കാർത്തിക്(21), മകൾ കീർത്തിക(15) എന്നിവർക്കും പോലീസ് വാഹനത്തിലുണ്ടായിരുന്ന എസ്‌ഐ മനോജ്, ഡ്രൈവർ ഗോവിന്ദ് എന്നിവർക്കുമാണ് പരിക്കേറ്റത്. കാറിലുണ്ടായിരുന്നവരെ കൊട്ടാരക്കര സ്വകാര്യ ആശുപത്രിയിലും പോലീസ് ഉദ്യോഗസ്ഥരെ താലൂക്ക് ആശുപത്രിയിലും പ്രവേശിപ്പിച്ചു. പോലീസുകാരുടെ പരിക്ക് ഗുരുതരമല്ല. വാളകം പൊലിക്കോട് ആനാട് ഭാഗത്ത് ഇന്നലെ വൈകുന്നേരം 4.30നായിരുന്നു അപകടം. എതിരെ വന്ന ലോറിയിലും ലോറിക്കു പിന്നിൽ കെപിസിസി ജനറൽ സെക്രട്ടറി എം. ലിജുവും യൂത്ത് കോൺഗ്രസ് സംസ്ഥാന വൈസ് പ്രസിഡന്‍റ് അബിൻ വർക്കിയും സഞ്ചരിച്ചിരുന്ന കാറിലും തട്ടിയ ശേഷമാണ് പോലീസ് വാഹനം അടുത്ത കാറിലേക്കു ഇടിച്ചു കയറിയത്. ഇരുവാഹനങ്ങളടെയും മുൻ ഭാഗം പൂർണമായി തകർന്നു. ആയൂർ ഭാഗത്തേക്കു പോവുകയായിരുന്നു പോലീസ് വാഹനം. എം.ലിജുവിനും അബിൻവർക്കിക്കും പരിക്കില്ല.

തദ്ദേശ തെരഞ്ഞെടുപ്പില്‍ യുഡിഎഫിനും ബിജെപിക്കും കനത്ത തോല്‍വിയുണ്ടാകും: ഡോ.സ്റ്റീഫന്‍ ജോർജ്

കൊട്ടാരക്കര : പ്രാദേശിക വികസനവും അടിസ്ഥാന സൗകര്യ വിപുലീകരണവും മുഖമുദ്രയാക്കിയ എല്‍ഡിഎഫ്‌ ഭരണത്തിന്‍റെ സ്വീകാര്യത ത്രിതല പഞ്ചായത്ത്‌ തെരഞ്ഞെടുപ്പില്‍ യുഡിഎഫിനും ബിജെപി മുന്നണിക്കും കനത്ത തോല്‍വിയുണ്ടാക്കുമെന്ന്‌ കേരള കോണ്‍ഗ്രസ്‌ എം സംസ്ഥാന ജനറല്‍ സെക്രട്ടറി ഡോ. സ്റ്റീഫന്‍ ജോർജ്. കേരള കോണ്‍ഗ്രസ്‌ എം ജില്ലാ പ്രവർത്തക സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ജില്ലാ പ്രസിഡന്‍റ് വഴുതാനത്ത്‌ ബാലചന്ദ്രൻ അധ്യക്ഷത വഹിച്ചു. ഉന്നതാധികാര സമിതിയംഗം ബെന്നി കക്കാട്‌, സജി ജോണ്‍ കുറ്റിയില്‍, ഉഷാലയം ശിവരാജന്‍, രഞ്ജിത്‌ തോമസ്‌, എ. ഇക്ബാല്‍ കുട്ടി, ചവറ ഷാ, ആദിക്കാട മനോജ്‌, ജി.മുരുകദാസര്‍ നായര്‍, ജോസ്‌ മത്തായി, ജോണ്‍ പി. കരിക്കം, മാത്യു സാം, മാത്യു പണിക്കര്‍, ശാന്താലയം സുരേഷ്‌, ഇഞ്ചക്കാട്‌ രാജന്‍, ജോസഫ്‌ മാത്യു, മുഹമ്മദ്‌ കാസിം, സി.ശിവാനന്ദന്‍, ജോസ്‌ ഏറത്ത്‌, ബേബി തോമസ്‌ തുടങ്ങിയവര്‍ പ്രസംഗിച്ചു.

തിരുമുക്കിലെ അടിപ്പാത സമരം: പങ്കാളിയായി കുടുംബശ്രീ കൂട്ടായ്മ

ചാത്തന്നൂർ: തിരുമുക്ക് അടിപ്പാത സമരത്തിൽ വനിതാസംഘടനകൾക്കും യുവജന സംഘടനകൾക്കുമൊപ്പം കുടുംബശ്രീ കൂട്ടായ്മയും റിലേ സത്യഗ്രഹ സമരത്തിൽ പങ്കാളികളായി. ചാത്തന്നൂർ തിരുമുക്കിൽ വലിയ വാഹനങ്ങൾക്ക് കടന്നുപോകുവാൻ കഴിയുന്ന തരത്തിൽ അടിപ്പാത ശാസ്ത്രീയമായി പുതുക്കിപ്പണിയണമെന്ന് ആവശ്യപ്പെട്ട് തിരുമുക്ക് അടിപ്പാത സമരസമിതി നേതൃത്വത്തിൽ നടത്തിവരുന്ന റിലേസത്യഗ്രഹ സമരത്തിന്‍റെ 22-ാം ദിവസം കുടുംബശ്രീ കൂട്ടായ്മയുടെ നേതൃത്വത്തിലാണ് റിലേ സത്യഗ്രഹം നടന്നത്. കുടുംബശ്രീ സിഡിഎസ് ചെയർപേഴ്സൺ ബി.ലൈല സത്യഗ്രഹം അനുഷ്ടിച്ചു. ചാത്തന്നൂർ പഞ്ചായത്ത് പ്രസിഡന്‍റ് എസ്.കെ.ചന്ദ്രകുമാർ റിലേ സത്യഗ്രഹം ഉദ്ഘാടനം ചെയ്തു. ചാത്തന്നൂർ പഞ്ചായത്ത് ക്ഷേമകാര്യ സ്റ്റാൻഡിംഗ്‌ കമ്മിറ്റി ചെയർപേഴ്സൺ കെ. ഇന്ദിര അധ്യക്ഷത വഹിച്ചു. പരവൂർ പ്രൊട്ടക്ഷൻ ഫോറം കൺവീനർ അഡ്വ.വി.എച്ച്. സത്ജിത്, ജനാധിപത്യ മഹിളാ അസോസിയേഷൻ ചാത്തന്നൂർ ഏരിയാ സെക്രട്ടറി അജിതകുമാരി, പഞ്ചായത്ത് അംഗം ഷീബ മധു, ഗായത്രി വിനാഥ്, കവിത, ചാത്തന്നൂർ വികസന സമിതി ചെയർമാൻ ജി.രാജശേഖരൻ, കൺവീനർ ജി.പി.രാജേഷ്, സമരസമിതി ജനറൽ കൺവീനർ കെ.കെ.നിസാർ, സമരസമിതി കൺവീനർ സന്തോഷ് പാറയിൽക്കാവ്, അനിൽ കുമാർ തുടങ്ങിയവർ പ്രസംഗിച്ചു. സത്യഗ്രഹ സമര ഭാഗമായി 23-ാം ദിവസമായ ഇന്ന് അഖിലേന്ത്യാ കിസാൻ സഭ ചാത്തന്നൂർ മേഖലാ പ്രസിഡന്‍റ് വിനോദ് സത്യഗ്രഹം അനുഷ്ടിക്കും. സിപിഐ ചാത്തന്നൂർ മണ്ഡലം സെക്രട്ടറി അഡ്വ.ആർ.ദിലീപ് കുമാർ രാവിലെ സത്യഗ്രഹം ഉദ്ഘാടനം ചെയ്യും. അഖിലേന്ത്യാ കിസാൻ സഭ ചാത്തന്നൂർ മേഖലാ കമ്മിറ്റിയുടെ നേതൃത്വത്തിലാണ് റിലേ സത്യഗ്രഹം നടക്കുക.

സഞ്ചാര സ്വാതന്ത്ര്യ സമരം: ജനകീയ പ്രതിഷേധം ശക്തം

കൊട്ടിയം: ഇത്തിക്കരയിൽ ജനങ്ങളുടെ യാത്രാസ്വാതന്ത്ര്യം നിഷേധിച്ചു കൊണ്ട് നടക്കുന്ന അശാസ്ത്രീയമായ നാഷണൽ ഹൈവേ നിർമാണ പ്രവർത്തനങ്ങൾക്ക് എതിരെ ജനകീയ പ്രതിഷേധ സമിതി നടത്തുന്ന സമരം ഓരോ ദിവസം കഴിയുന്തോറും ശക്തമാകുന്നു. ഇത്തിക്കരയിൽഅടിപ്പാത നിർമിക്കണമെന്ന് ആവശ്യപ്പെട്ടുകൊണ്ട് നടക്കുന്ന റിലേ സത്യഗ്രഹ സമരത്തിന്‍റെ എട്ടാം ദിവസം ഷിജില സഫീർ സത്യഗ്രഹം അനുഷ്ടിച്ചു. കൺവീനർ ജി. രാജുവിന്‍റെ അധ്യക്ഷതയിൽ ചേർന്ന യോഗത്തിൽ ചാത്തന്നൂർ ഗവ. വിഎച്ച് എസ്എസ് ചെയർപേഴ്സൺ അലീഡ ഉദ്ഘാടനം നിർവഹിച്ചു. ചാത്തന്നൂർ ബ്ലോക്ക് കോൺഗ്രസ് വൈസ് പ്രസിഡന്‍റ് ജോൺ ഏബ്രഹാം മുഖ്യപ്രഭാഷണം നടത്തി. ഐഎൻടിയുസി ചാത്തന്നൂർ മണ്ഡലം സെക്രട്ടറി സുഗതൻ പറമ്പിൽ, ആദിച്ചനല്ലൂർ മുൻ പഞ്ചായത്ത്‌ പ്രസിഡന്‍റ് അജയകുമാർ, ആദിച്ചനല്ലൂർ പഞ്ചായത്ത്‌ വൈസ് പ്രസിഡന്‍റ് അനിൽകുമാർ, ബ്ലോക്ക്‌ പഞ്ചായത്തംഗം ബിന്ദു ഷിബു, ഡിസിസി ജനറൽ സെക്രട്ടറി സുഭാഷ്പുളിക്കൽ, സിപിഎം ഏരിയ കമ്മിറ്റി അംഗം എം. സുഭാഷ്, കൊട്ടിയം വി എച്ച് പി സെക്രട്ടറി രാജേഷ് കൊട്ടിയം, ചാത്തന്നൂർ മണ്ഡലം കോൺഗ്രസ്‌ കമ്മിറ്റി ജോയിൻ്റ് സെക്രട്ടറി വിജയകുമാർ, ആർ എസ് പി ചാത്തന്നൂർ മണ്ഡലം പ്രസിഡന്‍റ് ഷാലുവിദാസ്, മൈലക്കാട് സുനിൽ, മുൻ ചാത്തന്നൂർ പഞ്ചായത്ത്‌ പ്രസിഡന്‍റ്എ. സുരേഷ്, മുൻ ആദിച്ചനല്ലൂർ ഫാർമേഴ്‌സ് ബാങ്ക് പ്രസിഡന്‍റ് ശശിധരൻ പിള്ള എന്നിവർ പ്രസംഗിച്ചു. വൈകുന്നേരം നടന്ന സമാപന ചടങ്ങിൽ സിപിഎം ജില്ല കമ്മിറ്റി അംഗം എൻ. സന്തോഷ്‌ നാരങ്ങാനീര് നൽകി സത്യഗ്രഹം അവസാനിപ്പിച്ചു. സാമൂഹ്യ, സാംസ്‌കാരിക, രാഷ്ട്രീയ രംഗത്തെ പ്രമുഖർ സമരത്തിന് ഐക്യദാർഢ്യം പ്രഖ്യാപിച്ചു പ്രസംഗിച്ചു. സത്യഗ്രഹ സമരത്തിന്‍റെ ഒൻപതാം ദിവസമായ നാളെ ഐഎൻടിയുസി ചാത്തന്നൂർ മണ്ഡലം സെക്രട്ടറി സുഗതൻ പറമ്പിൽ സത്യഗ്രഹം അനുഷ്്‌ടിക്കും. ഡിസിസി സെക്രട്ടറി ശ്രീലാൽ സത്യഗ്രഹം ഉദ്ഘാടനം ചെയ്യും. എക്സിക്യൂട്ടീവ് അംഗങ്ങളായ ഫൈസൽ, അനസ്, ദീപക്, ശ്യാം, സിജു മനോഹരൻ, അശോക് കുമാർ മൂഴിയിൽ, രാജേഷ്,രവീന്ദ്രൻ പിള്ള, രാധാകൃഷ്ണൻ,വിജയ, അംബിക, താര, വനജ, ബീന, സരള എന്നിവർ ചടങ്ങിന് നേതൃത്വം നൽകി.

സീബ്രാ ലൈനുകൾ കാണാനില്ല : നഗരത്തിൽ അപകടങ്ങൾ തുടർക്കഥകളാവുന്നു

കൊല്ലം: ജില്ലാ ആസ്ഥാനത്ത് റോഡിലെ സീബ്രാ ലൈനുകൾ മിക്കയിടത്തും കാണാനില്ല. നിത്യവും ഒട്ടനവധി അപകടങ്ങളാണ് ഇത് വരുത്തിവയ്ക്കുന്നത്. ജില്ലാ കളക്ടറേറ്റിന് സമീപം പഴയ കനറാ ബാങ്കിന്‍റെ ഭാഗത്ത് സീബ്രാ ലൈനുകൾ പോയിട്ട് റോഡുകൾ പോലും പലയിടത്തും കാണാനില്ല. കാവനാട് റൂട്ടിലും കുണ്ടറ റോഡിലും സ്ഥിതി വിഭിന്നമല്ല. ഹൈവേയുടെ പണി നടക്കുന്നതിനാൽ കൊട്ടിയം റൂട്ടിലും ഇതേ അവസ്ഥ തന്നെ. ചിന്നക്കടയിൽ തിരക്കേറിയ ഇടങ്ങളിൽ സീബ്രാ ലൈനുകൾ മാഞ്ഞു പോയി. മാസങ്ങൾ കഴിഞ്ഞിട്ടും ഇക്കാര്യത്തിൽ ട്രാഫിക് പോലീസും പൊതുമരാമത്ത് വകുപ്പും ഇതൊന്നും കണ്ടില്ലെന്നു നടിക്കുകയാണ്. ചീറിപ്പാഞ്ഞു വരുന്ന വാഹനങ്ങൾക്കിടയിലൂടെയാണ് ജീവൻ പണയം വച്ച് കാൽനടയാത്രക്കാർ റോഡിന്‍റെ കുറുകെ കടക്കുന്നത്. കാൽനടയാത്രക്കാർ നേരിടുന്ന അപകടഭീഷണി മരാമത്ത് വകുപ്പ് അവഗണിക്കുക്കുകയാണ്. കടപ്പാക്കട ഭാഗത്തും കൊട്ടിയം റൂട്ടിലും അഞ്ചാലും മൂട് റൂട്ടിലും ബീച്ച് റോഡിനും കച്ചേരിമുക്കിലും ഇത് തന്നെയാണ് സ്ഥിതി. കെഎസ്ആർടിസി ബസ് സ്റ്റാൻഡിന്‍റെ ഭാഗത്ത് സീബ്രാ ലൈനുകൾ മാഞ്ഞു പോയിരിക്കുന്നു. സീബ്രാ ലൈനുകൾ മാഞ്ഞു പോയത് കാരണമാണ് അപകടങ്ങൾ ഉണ്ടാവുന്നത്. പ്രധാന നഗരങ്ങളിൽ പോലും ഇക്കാര്യത്തിൽ അധികൃതർ ശ്രദ്ധിക്കുന്നില്ല എന്ന് പറയുമ്പോൾ മറ്റിടങ്ങളിലെ സ്ഥിതി പറയാതിരിക്കുകയാണ് ഭേദം. കെഎസ്ആർടിസി ജംഗ്ഷനിലെ പ്രൈവറ്റ് ബസ് സ്റ്റോപ്പിൽ വാഹനങ്ങൾക്ക് പിന്നിൽ വാഹനം ഇടിച്ചുണ്ടാവുന്ന അപകടങ്ങൾ നിരവധിയാണ്. മിക്ക ദിവസങ്ങളിലും ആശു പത്രി ഭാഗത്ത് ട്രാഫിക് പോലീസ് ഉണ്ടാകാറില്ല. കുണ്ടറ, മയ്യനാട്, കൊട്ടിയം, പോളയത്തോട്, റൂട്ടുകളിലേക്കുള്ള വാഹനങ്ങൾ ചിന്നക്കട വഴിയാണ് പോകുന്നത്. രാവിലെയും വൈ ുന്നേരത്തും ചിന്നക്കട തിരക്കിലാവുമ്പോഴാണ് കാൽനടയാത്രക്കാർ ഏറെ ബുദ്ധിമുട്ടു അനുഭവിക്കുന്നത്. രാവിലെ മുതൽ വിവിധ റൂട്ടുകളിൽ ഓടുന്ന 120 ഓളം സ്വകാര്യബസുകളും കെഎസ്ആർടിസി ബസുകളും ഈ റൂട്ടുകളിൽ തന്നെയാണ് ഓടുന്നത്. ചിന്നക്കട വഴിയാണ് അവ കടന്നു പോകുന്നത്. പ്രായമായവരും കുട്ടികളുമാണ് ഇത് മൂലം ദുരിതത്തിലാകുന്നത്. ഗുണനിലവാരം കുറഞ്ഞ പെയിന്‍റ് കൊണ്ട് ലൈനുകൾ വരയ്ക്കുന്നതിനാലാണ് വേഗത്തിൽ മാഞ്ഞുപോകുന്നതെന്ന് നേരത്തെ ആരോപണം ഉയർന്നിരുന്നു. കാൽനടക്കാരെ അപകടങ്ങളിൽനിന്ന് സംരക്ഷിക്കുക, വാഹനങ്ങൾ കാൽനടയ്‌ക്കുള്ള മുൻഗണന നൽകാൻ നിർബന്ധിക്കുക, ട്രാഫിക് നിയന്ത്രണം സുഗമമാക്കുക എന്നിവയാണ് സീബ്രാ ലൈനുകൾ കൊണ്ട് ലക്ഷ്യമിടുന്നത്. സീബ്രാ ലൈൻ (സീബ്രാ ക്രോസിംഗ്) കാൽനടയാത്രക്കാർക്ക് റോഡ് മുറിച്ചുകടക്കാനുള്ള സുരക്ഷിത ഇടമാണ്. ഇത് റോഡിൽ വെളുത്ത-കറുത്ത സമാന്തര വരകളായി വരച്ചിടുകയാണ് പതിവ്. സീബ്രാ ലൈൻ കണ്ടാൽ വാഹനങ്ങൾ നിർത്തി കാൽനടക്കാരായ യാത്രക്കാരെ കടക്കാൻ ഇടവരുത്തണം. റോഡിലെ സീബ്രാ ലൈൻ കാണുപ്പോൾ എത്രമാത്രം സുരക്ഷിതമാണെന്ന തോന്നലുകളൊന്നും കൊല്ലം നഗരത്തിലെ യാത്രക്കാർക്ക് ഇപ്പോൾ ഇല്ല. നഗരം കാൽനടയാത്രക്കാരെ സംബന്ധിച്ചിടത്തോളം സുരക്ഷിതമല്ലെന്ന് തന്നെ പറയേണ്ടിയിരിക്കുന്നു. അതേസമയം സീബ്രാലൈനുകളുടെ വിസിബിലിറ്റിയും വ്യക്തത ഉള്ളതായിരിക്കണമെന്നുണ്ട്. വെളുത്ത - കറുത്ത കൺട്രാസ്റ്റ് നിറങ്ങളിലാണ് ഇത് രേഖപ്പെടുത്തേണ്ടത്. റോഡിന്‍റെ രണ്ടുവശങ്ങളിൽ നിന്ന് ജനങ്ങൾക്ക് ഇത് വ്യക്തമാവണം. ആവശ്യാനുസരണം ലൈറ്റുകൾ ഉപയോഗിച്ച് സീബ്രാ ലൈൻ വ്യക്തമാക്കപ്പെടുമ്പോൾ യാത്രക്കാർക്ക് കൂടുതൽ സുരക്ഷിതത്വം ഉറപ്പാക്കുക കൂടിയാണ്.

ഭരണ ഘടനയെ അറിയാം സെമിനാര്‍ നടത്തി

ചവറ : കൊറ്റന്‍കുളങ്ങര വൊക്കേഷണല്‍ ഹയര്‍സെക്കന്‍ഡറി സ്‌കൂളിലെ എന്‍എസ്എസ് ഗാന്ധിജയന്തി തുടര്‍പ്രവര്‍ത്തനങ്ങളുടെ ഭാഗമായി ജീവിതോത്സവം നടത്തി. പ്രിന്‍സിപ്പൽ എസ്. മായദേവി ഉദ്ഘാടനം ചെയ്തു. ഉണ്ണിക്കൃഷ്ണന്‍ അധ്യക്ഷനായി. ഹയര്‍ സെക്കന്‍ഡറി അധ്യാപകന്‍ ഡോ. അരവിന്ദന്‍ നാലു കണ്ടത്തില്‍ സെമിനാറില്‍ ക്ലാസെടുത്തു. എച്ച്എസ്, വൊക്കേഷണല്‍ ഹയര്‍സെക്കന്‍ഡറി പ്രഥമാധ്യാപികരായ പി. സുലത, റജിമോള്‍, എന്‍എസ്എസ് പ്രോഗ്രാം ഓഫീസര്‍ രാഖി, വിദ്യാര്‍ഥി പ്രതിനിധികളായ അന്ന, അനന്ദു എന്നിവര്‍ പ്രസംഗിച്ചു . പരിപാടിയുടെ ഭാഗമായി ഭരണഘടനയെ അറിയാം എന്ന വിഷയത്തില്‍ നടത്തിയ സെമിനാറില്‍ കുട്ടികള്‍ വിവിധ പ്രവര്‍ത്തനങ്ങളിലൂടെ ഭരണഘടനയുടെ ആശയങ്ങള്‍ അവതരിപ്പിച്ചു. ഭരണ ഘടനയുടെ ആമുഖം തിരുവാതിരയായി അവതരിപ്പിക്കുകയും ഉണ്ടായി.

വഴിയോരക്കച്ചവടം നിയന്ത്രിക്കുക; പഞ്ചായത്തിന് മുന്നിൽ ധർണ നടത്തി

ചാത്തന്നൂർ: വഴിയോര കച്ചവടം നിയന്ത്രണ വിധേയമാക്കണമെന്ന് ആവശ്യപ്പെട്ട് വ്യാപാരി - വ്യവസായി സമിതി ചാത്തന്നൂർ ഗ്രാമപഞ്ചായത്ത് ഓഫീസിന് മുന്നിൽ ധർണ നടത്തി. പഞ്ചായത്തു ലൈസൻസ് എടുത്തു കച്ചവടം നടത്തുന്ന സ്ഥാപനങ്ങൾക്കു മുൻപിൽ വാഹനങ്ങൾ നിർത്തി സാധങ്ങൾ വാങ്ങുന്ന ഉപഭോക്താക്കളുടെ വാഹനങ്ങളുടെ ഫോട്ടോ എടുത്തു കൊണ്ടുപോയി ഫൈൻ ചുമത്തുന്നതു ഒഴിവാക്കണമെന്നും വ്യാപാരി വ്യവസായി സമിതി ചാത്തന്നൂർ ഏരിയാകമ്മിറ്റി ആവശ്യപ്പെട്ടു. എൻ എച്ച് 66 നിർമാണം മൂലം മൂന്നു വർഷങ്ങളായി സുഗമമായ സഞ്ചാരപാതയില്ലാതെ വ്യാപാരികൾ കച്ചവടമാന്ദ്യം നേരിടുന്നവരാണ്. ഈ അവസരം മുതലെടുത്ത് വഴിവാണിഭക്കച്ചവട ലോബികൾ ഓരോ വഴികളിലും ഏജൻറുമാരെ നിയോഗിച്ചു വാഹനങ്ങളിലും തെരുവിലും കച്ചവടം നടത്തി നാട്ടിലെ ഉൽപ്പാദകരുടെ ഉൽപ്പന്നങ്ങൾക്ക് മാർക്കറ്റ് ഇല്ലാതാക്കുകയാണെന്നും പഞ്ചായത്തു പരിധിയിലുള്ള എല്ലാ വഴിവാണിഭക്കാരെയും ഒരു കേന്ദ്രത്തിൽ എത്തിച്ചു നിയമ വിധേയമായി കച്ചവടം ചെയ്യാൻ വേണ്ട നടപടി ഗ്രാമ പഞ്ചായത്തു ഭരണ സമിതി ഉണ്ടാക്കണമെന്നും ആവശ്യപ്പെട്ടായിരുന്നു സമരം. വ്യാപാരി വ്യവസായ സമിതി സംസ്ഥാന സമിതി അംഗം കെ.കെ.നിസാർ ഉദ്ഘാടനം ചെയ്തു. സമിതി ഏരിയ പ്രസിഡന്‍റ് ജയചൻ അധ്യക്ഷത വഹിച്ചു. ജില്ലാ എക്സിക്യൂട്ടീവ് കമ്മറ്റി അംഗം ജി. പി.രാജേഷ്, ശീമാട്ടി യൂണിറ്റ് സെക്രട്ടറി അജിത്ത്, അനസ്, ബിനു എന്നിവർ പ്രസംഗിച്ചു.

കലുങ്ക് അപകടാവസ്ഥയിൽ

കൊട്ടാരക്കര : നെടുവത്തൂർ ഗ്രാമപഞ്ചായത്തിലെ വെണ്ടാർ - അരീക്കൽ കലുങ്ക് തകർച്ചയിൽ. അടിസ്ഥാനം ഇളകിയതിനാൽ ഏത് നിമിഷവും കലുങ്ക് തകർന്ന് നിലംപൊത്താവുന്ന അവസ്ഥയിലാണ്. വെണ്ടാർ കോമളം ജംഗ്ഷനിൽ അരീക്കൽ ഭാഗം റോഡിൽ ശ്രീ വിദ്യാധിരാജ എൽ പി സ്കൂളിനടുത്താണ് തീർത്തും അപകടാവസ്ഥയിലുള്ള കലുങ്ക് സ്ഥിതി ചെയ്യുന്നത്. തോടിന് കുറുകെ ഉള്ള കലുങ്കിന് ചെറുപാലമെന്ന നിലയിൽ പണിതിരുന്ന കലുങ്കിന്‍റെ സംരക്ഷണ ഭിത്തി തകർന്ന നിലയിലാണ്. കുറ്റിക്കാട് വളർന്ന് മൂടിയതിനാൽ കലുങ്കിന്‍റെ ഇളകിയ ഭാഗം പുറത്ത് കാണാനാവില്ല. ഭാരം കയറ്റിയ ലോറികളും സ്കൂൾബസുകളും ഇത് വഴി നിരന്തരം കടന്ന് പോകുന്നുണ്ട്. അതുകൊണ്ട് തന്നെ കലുങ്ക് പൊളിഞ്ഞ് വലിയ അപകടത്തിനും സാധ്യത വർധിച്ചിട്ടുണ്ട്. കലുങ്കിന് അര നൂറ്റാണ്ടോളം പഴക്കം ഉണ്ടെന്നാണ് നാട്ടുകാർ പറയുന്നത്. അടുത്തകാലത്താണ് അടിസ്ഥാന കല്ലുകൾ ഇളകിത്തുടങ്ങിയത്. എൽ പി സ്കൂളിനോട് ചേർന്ന് ഇത്തരത്തിൽ വലിയ അപകടം പതിയിരിക്കുമ്പോഴും അധികൃതർ മൗനം പാലിക്കുന്നതിൽ നാട്ടുകാർക്കിടയിൽ പ്രതിക്ഷേധത്തിന് കാരണമായിട്ടുണ്ട്.

കാഷ്യു കോൺക്ലേവ് സിപിഎമ്മിന്‍റെ രാഷ്‌ട്രീയ തട്ടിപ്പ്: പി. രാജേന്ദ്രപ്രസാദ്

കൊല്ലം: കാഷ്യു കോൺക്ലേവ് സിപിഎമ്മി െ ന്‍റ രാഷ്‌ട്രീയ തട്ടിപ്പി െ ന്‍റ ഒടുവിലത്തെ ഉദാഹരണമാണെന്ന് ഡിസിസി പ്രസിഡന്‍റ് പി. രാജേന്ദ്രപ്രസാദ് ആരോപിച്ചു. അധികാരത്തിലേറി ഒമ്പതര കൊല്ലമായിട്ടും കൊല്ലത്തെ അടഞ്ഞുകിടക്കുന്ന സ്വകാര്യ ഫാക്ടറികളിൽ ഒന്നുപോലും തുറന്നു പ്രവർത്തിപ്പിക്കാൻ കഴിയാത്തവർ കാഷ്യു ബോർഡ് വഴി ഗുണനിലവാരമില്ലാത്ത തോട്ടണ്ടി ഇടപാടുകളിലൂടെ കോടിക്കണക്കിന് രൂപയുടെ അഴിമതിയാണ് നടത്തിയിട്ടുള്ളത്. കശുവണ്ടി വികസന കോർപ്പറേഷനും കാപ്പക്സിനും വേണ്ടി ചരിത്രത്തിൽ ആദ്യമായാണ് ഒറ്റയടിക്ക് 15,000 മെട്രിക് ടൺ തോട്ടണ്ടി വാങ്ങിക്കൂട്ടിയത്. ഘാനയിൽ നിന്നും ഐവറി കോസ്റ്റിൽ നിന്നും ഇറക്കുമതി ചെയ്ത തോട്ടണ്ടി ഗുണനിലവാരം ഇല്ലാത്തതും പഴകിയതും കേടുപിടിച്ചതും ആണെന്നിരിക്കെ വിജിലൻസ് അന്വേഷണം ആവശ്യപ്പെട്ടിട്ടും പരാതിയിൻമേൽ അന്വേഷണ ഉദ്യോഗസ്ഥർ അടയിരിക്കുകയാണെന്ന് പി. രാജേന്ദ്രപ്രസാദ് കുറ്റപ്പെടുത്തി. കുറഞ്ഞ വിലയ്ക്ക് ഗുണനിലവാരമുള്ള തോട്ടണ്ടി എടുത്ത് പൊതുമേഖലയ്ക്കും സ്വകാര്യമേഖലയ്ക്കും നൽകുമെന്ന മോഹന സുന്ദര വാഗ്ദാനം നൽകിയാണ് കഴിഞ്ഞ സർക്കാരി െ ന്‍റ കാലത്ത് മേഴ്സിക്കുട്ടിയമ്മയുടെ നേതൃത്വത്തിൽ കാഷ്യു ബോർഡ് രൂപീകരിച്ചതെന്നും ആ ബോർഡ് ഏറ്റവും വലിയ വെള്ളാനയാണെന്നും ബോർഡ് പിരിച്ചുവിടണമെന്നും പി. രാജേന്ദ്രപ്രസാദ് ആവശ്യപ്പെട്ടു. കാഷ്യു കോൺക്ലേവ് എന്ന രാഷ്ട്രീയ തട്ടിപ്പിൽ കോൺഗ്രസും യുഡിഎഫും സഹകരിക്കില്ലെന്നും പി. രാജേന്ദ്രപ്രസാദ് അറിയിച്ചു.

പരവൂർ ഫയർ സ്റ്റേഷന് സ്വന്തമായി കെട്ടിടം നിർമിക്കും

പരവൂർ : പരവൂർ ഫയർ സ്റ്റേഷന് സ്വന്തമായി കെട്ടിടം നിർമിക്കാൻ 5.07 കോടി രൂപയുടെ ഭരണാനുമതി ലഭിച്ചതായി ജി.എസ്.ജയലാൽ എംഎൽഎ അറിയിച്ചു. ഫയർ സ്റ്റേഷന് സ്വന്തമായി സ്ഥലം വാങ്ങിയിട്ടുണ്ട്. ഇവിടെ ഒരു കെട്ടിടം നിർമിക്കുന്നതിന് പൊതുമരാമത്ത് വകുപ്പ് ആദ്യം തയാറാക്കിയ പ്ലാൻ പരിമിതികൾ നിറഞ്ഞതായിരുന്നു. പിന്നീട് കൂടുതൽ സൗകര്യങ്ങൾ ഉൾപ്പെടുത്തി പ്ലാൻ പുതുക്കി അതിനനുസരിച്ച് വർധിച്ച എസ്റ്റിമേറ്റ് തുക പ്രകാരം ഫയൽ സർക്കാരിൽ സമർപ്പിക്കുകയും ഉണ്ടായി. പുതിയ എസ്റ്റിമേറ്റ് പ്രകാരമുള്ള 5.07 കോടിരൂപയുടെ ഭരണാനുമതിയാണ് ഇപ്പോൾ കിട്ടിയിട്ടുള്ളത്. ഇതോടെ പരവൂർ ഫയർ സ്റ്റേഷന് സ്വന്തമായി കെട്ടിടം നിർമിക്കുക എന്ന ഏറെ നാളായുള്ള നാടി െ ന്‍റ ആവശ്യം യാഥാർഥ്യമാവുകയാണ്. തുടർ നടപടികൾ അടിയന്തിരമായി സ്വീകരിച്ച് ഫയർ സ്റ്റേഷൻ കെട്ടിട നിർമാണം ഉടൻ ആരംഭിക്കുമെന്ന് എംഎൽഎ പറഞ്ഞു.

സൈനികനെ മർദിച്ച് ഒളിവിൽ പോയ പ്രതി അറസ്റ്റിൽ

കൊട്ടിയം: മുൻ വിരോധത്തിൽ സൈനികനെ മർദിച്ച് പരിക്കേൽപ്പിച്ച് ഒളിവിൽ പോയ പ്രതി കൊട്ടിയം പോലീസിന്‍റെ പിടിയിലായി. നിരവധി കേസുകളിൽ പ്രതിയായ ബീഡി കിച്ചു എന്ന് അറിയപ്പെടുന്ന ഉമയനല്ലൂർ പേരയം വിനീത് ഭവനിൽ വിനീത്(28) ആണ് കൊട്ടിയം പോലീസി െ ന്‍റ പിടിയിലായത്. തഴുത്തല പേരയം പ്രീതാ ഭവനിൽ രാഹുൽ (22) എന്ന സൈനികനെയാണ് ഇയാൾ മർദിച്ച് ഗുരുതരമായിപരിക്കേൽപ്പിച്ചത്. കൊട്ടിയം പോലീസ് സ്റ്റേഷനിൽ 2021 മുതൽ രജിസ്റ്റർ ചെയ്ത അഞ്ചോളം ക്രിമിനൽ കേസുകളിൽ ഇയാൾ പ്രതിയാണ്. കൊട്ടിയം പോലീസ് സ്റ്റേഷൻ ഇൻസ്പെക്ടർ പ്രദീപിന്‍റെ നേതൃത്വത്തിൽ എസ്ഐ നിഥിൻ നളൻ, സിപിഒ മാരായ പ്രവീൺചന്ദ്,നൗഷാദ്, ശംഭു, എന്നിവരടങ്ങിയ പോലീസ് സംഘമാണ് ഇയാളെ പിടികൂടിയത്.

ഡാഫിനി ടീച്ചർക്ക് അംഗീകാരങ്ങളുടെ പൂക്കാലം

ജോൺസൺ വേങ്ങത്തടം കൊല്ലം : കലാകാരിയാണ്. അധ്യാപനത്തിൽ കുട്ടികളുടെ പ്രിയപ്പെട്ട അധ്യാപികയാണ്. കുട്ടികളെയും സ്കൂളിനെയും ഒരു കാൻവാസിൽ പകർത്തി ചിത്രത്തിനു പൂർണത നൽകുകയാണ് ഈ അധ്യാപികയുടെ കടമ. അതുകൊണ്ടുതന്നെ നിലാവുപോലെ പ്രഭ ചൊരിഞ്ഞ കർമവഴികളിൽ അംഗീകാരമായി അവാർഡുകൾ ഡാഫിനി ടീച്ചറിനെ തേടിയെത്തുന്നു. 16 വർഷത്തെ അധ്യാപന കാലഘട്ടത്തിൽ സ്കൂളിനും വിദ്യാർഥികൾക്കും നേടി കൊടുത്ത അംഗീകാരങ്ങൾ കൂടി പരിഗണിച്ചാണ് പട്ടത്താനം ഗവ. എസ്എൻഡിപി യുപി സ്കൂൾ അധ്യാപിക ഡാഫിനി ജയിംസിന് അവാർഡുകൾ വന്നുചേരുന്നത്. കഠിനാധ്വാനത്തിന് ഉദാഹരണമാണ് ഈ ജീവിതം. പാഠ്യ-പാഠ്യേതര രംഗങ്ങളിലെ പ്രവര്‍ത്തനത്തിലൂടെ സ്കൂളിനും വിദ്യാഭ്യാസമേഖലയ്ക്കും കുട്ടികളുടെ മാനസികവും ബൗദ്ധികവുമായ പുരോഗതിയും ഈ അധ്യാപിക ശ്രദ്ധിക്കുന്നുവെന്നതിന്‍റെ തെളിവാണ് അംഗീകാരം. പ്രശസ്ത കവയിത്രി സുഗതകുമാരി ടീച്ചറുടെ സ്മരണാർത്ഥം സുഗത വനം ചാരിറ്റബിൾ ട്രസ്റ്റ് ഏർപ്പെടുത്തിയ ഗുരുജ്യോതി സംസ്ഥാന അധ്യാപക പുരസ്കാരവും ഡോ. എ.പി.ജെ. അബ്ദുൾ കലാം ബെസ്റ്റ് ടീച്ചർ അവാർഡും ഡാഫിനി ജയിംസിനാണ് ലഭിച്ചത്. പാലക്കാട് ജില്ലയിലെ വണ്ണാമട എന്ന ഗ്രാമീണമേഖലയിൽ ആണ് ടീച്ചർ അധ്യാപന ജീവിതം തുടങ്ങിയത്. അത് ആറുവർഷക്കാലം തുടർന്നു. കൊല്ലം ജില്ലയിൽ ഒന്പതുവർഷത്തോളമായി സേവനം ചെയ്തുവരുന്നു. ചിത്രകാരി കൂടിയായ ടീച്ചർ കേരളത്തിനകത്ത് ഇരുപത്തഞ്ചോളം സ്കൂളുകളെ വർണങ്ങൾകൊണ്ട് അണിയിച്ചൊരുക്കി. സ്വന്തം സ്കൂളുകളിലെല്ലാം പഠന പ്രവർത്തനങ്ങൾ ഉൾപ്പെടുന്ന ചിത്രങ്ങൾ വരച്ചു മനോഹരമാക്കി. അടച്ചുപൂട്ടൽ അവസ്ഥയിലായിരുന്ന വടക്കേവിള പഞ്ചായത്ത് എൽപി സ്കൂളിനെ ഉയർത്തിക്കൊണ്ടുവരുന്നതിൽ കഠിനാധ്വാനം ചെയ്തു. വേറിട്ട ജൈവവൈവിധ്യ ഉദ്യാനം,ഏറുമാടം, പാവ നാടകങ്ങൾ, കേരളത്തിലെ അനുഷ്ഠാനകലകൾ, 80 ഏക്കറിൽ ഉൾപ്പെടെയുള്ള വിവിധ കൃഷികൾ, കുട്ടികൾക്കും പ്രദേശ നിവാസികൾക്കും കൈത്തൊഴിൽ ക്ലാസുകൾ,തീരദേശ ലൈബ്രറി പ്രവർത്തനങ്ങൾ, തെരുവുനാടകങ്ങൾ, എൻഎസ്എസ് ക്യാമ്പുകൾ, പ്ലാസ്റ്റിക് പുനരുപയോഗ നിർമ്മാണ പ്രവർത്തനങ്ങൾ, സ്കൗട്ട് തുടങ്ങി നൂറിൽപരം വ്യത്യസ്തമാർന്ന പ്രവർത്തനങ്ങൾ നടപ്പിലാക്കിയതും അവാർഡിന്‍റെ പരിഗണനയിലെത്തി. 2024 -25 ഇന്നവേറ്റീവ് പ്രവർത്തനം എന്ന നിലയിൽ പ്രത്യേക പരിഗണന ആവശ്യമായ കുട്ടികൾക്കായി കലാ കൈത്തൊഴിൽ പഠനപ്രവർത്തന ക്ലാസുകൾ തുടങ്ങിവച്ചു. സ്റ്റേറ്റ് തലത്തിൽ അധ്യാപകർക്കായുള്ള പഠനോപകരണ ശില്പശാല ക്യാമ്പുകൾ, ഗണിതശാസ്ത്ര പ്രവർത്തി പരിചയ മേളകളിൽ നേടിയെടുത്തിട്ടുള്ള ഓവറോൾ ട്രോഫികൾ ഇവയൊക്കെ ടീച്ചറുടെ നേട്ടങ്ങളാണ്. 2022 -23ലെ കേരള സ്റ്റേറ്റ് പിടിഎ അവാർഡ്, നേഷൻബിൽഡർ അവാർഡുകൾ, ചിത്രകല അവാർഡുകൾ, മലയാള മനോരമ നല്ല പാഠം അവാർഡ്, ഹ്യൂമൻ റൈറ്റ്സിന്‍റെ ബെസ്റ്റ് ടീച്ചർ അവാർഡ് തുടങ്ങി 25 ഓളം പുരസ്കാരങ്ങളും ആദരവുകളും ടീച്ചർക്കു ലഭിച്ചിട്ടുണ്ട് 2024ലെ ദേശീയ അധ്യാപക അവാർഡിനു കേരളത്തിൽ നിന്നും തെരഞ്ഞെടുക്കപ്പെട്ട അവാർഡിനർഹരായ ആറു പേരിൽ ഒരാളായിരുന്നു ടീച്ചർ. 2024 25 ഗുരുശ്രേഷ്ഠപുരസ്കാരവും ലഭ്യമായി. ടിടിസി, ബിഎഡ് ,ബിരുദാനന്ത‌‌ര ബിരുദം, എച്ച് എം ടെസ്റ്റും ഒക്കെ പാസായ ടീച്ചർക്ക് ഏതെങ്കിലും ഒരു കേരളീയ കലയിൽ പി എച്ച് ഡി ചെയ്യണമെന്നാണ് ആഗ്രഹം. കൊല്ലം തങ്കശേരിയിൽ ജയന്തി വിലയിൽ പരേതരായ ജയിംസിന്‍റെയും രമണിയുടെയും ഏക മകളാണ്. ഏക മകൻ ആദി ഏഴാം ക്ലാസിൽ പഠിക്കുന്നു.

തിരുമുക്ക് അടിപ്പാത സമരം : പങ്കാളികളായി യുവജന സംഘടനകളും

ചാത്തന്നൂർ: ദേശീയ പാതയിൽ ചാത്തന്നൂർ തിരുമുക്കിൽ ശാസ്ത്രീയമായ രീതിയിൽ അടിപ്പാത നിർമിക്കണമെന്ന് ആവശ്യപ്പെട്ട് തിരുമുക്ക് അടിപ്പാത സമരസമിതി നടത്തുന്ന റിലേ സത്യഗ്രഹത്തിൽ യുവജന സംഘടനകളും പങ്കാളികളായി.വലിയ വാഹനങ്ങൾക്ക് കടന്നുപോകുവാൻ കഴിയുന്ന തരത്തിൽ അടിപ്പാത ശാസ്ത്രീയമായി പുതുക്കിപ്പണിയണമെന്ന് ആവശ്യപ്പെട്ടാണ് തിരുമുക്ക് അടിപ്പാത സമരസമിതി റിലേ സത്യഗ്രഹം നടത്തുന്നത്. സമരത്തിെ ന്‍റ ഇരുപത്തൊന്നാം ദിവസം ഡിവൈഎഫ്ഐമേഖലാ കമ്മിറ്റിയുടെ നേതൃത്വത്തിലാണ് റിലേ സത്യഗ്രഹം നടന്നത്. ഡിവൈഎഫ്ഐ ചാത്തന്നൂർ മേഖലാ സെക്രട്ടറി അഭിലാഷ് എം.സജി സത്യഗ്രഹം അനുഷ്ടിച്ചു.ഡിവൈഎഫ്ഐ ചാത്തന്നൂർ ബ്ലോക്ക് സെക്രട്ടറി എസ്.ശരത് കുമാർ റിലേ സത്യഗ്രഹം ഉദ്ഘാടനം ചെയ്തു. തിരുമുക്കിലെ അടിപ്പാത നിർമാണത്തിൽ വന്നിട്ടുള്ള തെറ്റ് തിരുത്തി വലിയ വാഹനങ്ങൾക്ക് കടന്നു പോകാൻ കഴിയുന്ന തരത്തിൽ അടിപ്പാത ശാസ്ത്രീയമായി പുനർനിർമിക്കാൻ ദേശീയപാത അഥോറിറ്റി തയ്യാറാകണമെന്ന് എസ്.ശരത് കുമാർ ആവശ്യപ്പെട്ടു. ഡിവൈഎഫ്ഐ ചാത്തന്നൂർ മേഖലാ എക്സിക്യൂട്ടീവ് കമ്മിറ്റിയംഗം അനീസ് അധ്യക്ഷത വഹിച്ചു. ചാത്തന്നൂർ വികസന സമിതി ചെയർമാൻ ജി.രാജശേഖരൻ, പരവൂർ പ്രൊട്ടക്ഷൻ ഫോറം കൺവീനർ അഡ്വ.വി.എച്ച്.സത്ജിത്,സി പിഎം ലോക്കൽ സെക്രട്ടറി ടി. ദിജു, ജനാധിപത്യ മഹിളാ അസോസിയേഷൻ ചാത്തന്നൂർ ഏരിയാ സെക്രട്ടറി അജിതകുമാരി ,സിപിഎം ചാത്തന്നൂർ ലോക്കൽ കമ്മിറ്റിയംഗം ജി.എസ്.സുരേഷ് , എസ്എഫ്ഐ ഏരിയാ വൈസ് പ്രസിഡന്‍റ് ശിവ, സന്തോഷ് പാറയിൽക്കാവ് തുടങ്ങിയവർ പ്രസംഗിച്ചു. സമരസമിതി ജനറൽ കൺവീനർ കെ.കെ.നിസാർ സ്വാഗതവും പി. ദിനകരൻ നന്ദിയും പറഞ്ഞു. സത്യഗ്രഹ സമരത്തി െന്‍റ ഇരുപത്തിരണ്ടാം ദിവസമായ ഇന്ന് സിഡിഎസ് ചെയർപേഴ്സൺ ബി. ലൈല സത്യഗ്രഹമനുഷ്ടിക്കും. രാവിലെ ചാത്തന്നൂർ പഞ്ചായത്ത് പ്രസിഡന്‍റ് എസ്.കെ.ചന്ദ്രകുമാർ സത്യഗ്രഹം ഉദ്ഘാടനം ചെയ്യും.

പെൺകുട്ടികൾക്ക് പീഡനം: രണ്ട് യുവാക്കൾ അറസ്റ്റിൽ

കൊല്ലം: പ്രായപൂർത്തിയാകാത്ത പെൺകുട്ടികളെ പ്രലോഭിപ്പിച്ചു കൂട്ടി കൊണ്ടു പോയി ലൈംഗിക ചൂഷണം നടത്തിയ കേസിൽ രണ്ടു പേരെ കിളികൊല്ലൂർ പോലീസ് അറസ്റ്റ് ചെയ്തു. കൊല്ലം വെസ്റ്റ് പള്ളിത്തോട്ടം ഗലീലിയോ നഗർ ഫിജോയ് (22), പള്ളിത്തോട്ടം സെഞ്ച്വറി നഗറിൽ ജിത്തു ( 23 )എന്നിവരാണ് കിളികൊല്ലൂർ പോലീസിന്‍റെ പിടിയിലായത്. കഴിഞ്ഞദിവസം രാവിലെയായിരുന്നു സംഭവം. കൊല്ലം നഗരത്തിലെ വിദ്യാഭ്യാസ സ്ഥാപനത്തിൽ പഠിക്കുന്നതിനായി പോയ പ്രായപൂർത്തിയാകാത്ത കുട്ടികളെ കൊല്ലം ശങ്കേഴ്സ് ജംഗ്ഷനിൽ വച്ചു രണ്ടാം പ്രതി ജിത്തു സ്കൂട്ടറിൽ കയറ്റി ഒന്നാം പ്രതിയുടെ സമീപം എത്തിച്ച് പ്രതികളുടെ വീടിനു സമീപമുള്ള പാർക്കിലെ ഒഴിഞ്ഞ സ്ഥലത്ത് വച്ച് ലൈംഗികമായി ചൂഷണം ചെയ്യുകയായിരുന്നു. കുട്ടികൾ വിദ്യാഭ്യാസ സ്ഥാപനത്തിൽ എത്തിയില്ലായെന്നു മനസിലാക്കിയ മാതാപിതാക്കൾ നൽകിയ പരാതിയുടെ അടിസ്ഥാനത്തിൽ കിളികൊല്ലൂർ പോലീസ് കേസ് രജിസ്റ്റർ ചെയ്തിരുന്നു. തുടർന്ന് പോലീസ് നടത്തിയ അന്വേഷണത്തിന് ഒടുവിൽ രാത്രി പത്തോടെ കുട്ടികളെ കണ്ടെത്തുകയായിരുന്നു. കുട്ടികളുടെ മൊഴി വിശദമായി രേഖപ്പെടുത്തിയപ്പോഴാണ് സംഭവങ്ങളെ കുറിച്ചുള്ള വിശദവിവരം മനസിലായത്. കഴിഞ്ഞ ദിവസം രാത്രി രണ്ട് പ്രതികളേയും പള്ളിത്തോട്ടത്ത് വച്ച് കിളികൊല്ലൂർ പോലീസ് അറസ്റ്റ് ചെയ്യുകയായിരുന്നു. അറസ്റ്റ് ചെയ്ത പ്രതികളെ കോടതിയിൽ ഹാജരാക്കി റിമാൻഡ് ചെയ്തു.

റോഡ് സുരക്ഷ: വിദ്യാർഥികൾ കളക്ടർക്കു നിവേദനം നൽകി

കുളത്തൂപ്പുഴ: ചന്ദനക്കാവ് പ്രദേശത്തുള്ള ഗുഡ് ഷെപ്പേഡ് പബ്ലിക് സ്കൂൾ, ബി എംജി ഹൈസ്കൂൾ, എ പി എൻ എം സി എം എസ് സ്കൂൾ, ബദനി എൽ പി സ്കൂൾ, സ്റ്റെല്ലാമേരി സ്കൂളുകൾ തുടങ്ങിയ സ്കൂളുകൾക്കുമുന്നിലൂടെ കടന്നു പോകുന്ന മലയോര ഹൈവേയിൽ റോഡ് സുരക്ഷ ഉറപ്പാക്കണമെന്നാവശ്യപ്പെട്ട് ഗുഡ് ഷെപ്പേഡ് പബ്ലിക് സ്കൂളിലെ വിദ്യാർഥികൾ കുട്ടികളുടെ പ്രധാനമന്ത്രി ബഹിയ ഫാത്തിമയുടെ നേതൃത്വത്തിൽ കൊല്ലം ജില്ലാ കളക്ടർ ദേവിദാസിനു നിവേദനം നൽകി. ചന്ദനക്കാവ് ജംഗ്ഷനിൽ ട്രാഫിക് സിഗ്നൽ സ്ലോ സുരക്ഷാ സംവിധാനങ്ങളോ ഇല്ലാത്തതിനാൽ പലപ്പോഴും അപകടങ്ങൾ നടക്കുന്നത് തുടർക്കഥയായിരിക്കുകയാണ്. നിവേദനം സ്വീകരിച്ച കളക്ടർ ഉടൻ തന്നെ എൻഫോഴ്‌സ്‌മെന്‍റ് വിഭാഗത്തിനും ആർടിഒക്കും ആവശ്യമായ സുരക്ഷാ നടപടികൾ സ്വീകരിക്കാൻ ഉടൻ നിർദേശം നൽകി. ശിശുക്ഷേമ സമിതി കൊല്ലം ജില്ലാ ജനറൽ സെക്രട്ടറി അഡ്വ. ഡി. ഷൈൻ ദേവിനും നിവേദനം കൈമാറി.

സ്കൂൾ ശാസ്ത്രമേളയ്ക്ക് അഞ്ചലിൽ തുടക്കമായി

അഞ്ചൽ : അഞ്ചൽ വിദ്യാഭ്യാസ ഉപജില്ലാ സ്കൂൾ ശാസ്ത്രമേളയ്ക്ക് തുടക്കമായി. ഏരൂർ സർക്കാർ ഹയർ സെക്കൻഡറി സ്കൂളിലാണ് മേള. ഗ്രാമപഞ്ചായത്ത് പ്രസിഡന്‍റ് ജി. അജിത്ത് മേള ഉദ്ഘാടനം ചെയ്തു. ഉപജില്ലയുടെ കീഴിലുള്ള നൂറോളം സ്കൂളുകളിൽ നിന്നുമായി മൂവായിരത്തോളം കുട്ടികളാണ് മേളയിൽ പങ്കെടുക്കുന്നത്. ഇന്നു വൈകീട്ട് നടക്കുന്ന സമാപന സമ്മേളനം എൻ.കെ. പ്രേമചന്ദ്രൻ എംപി ഉദ്ഘാടനം ചെയ്യും. ബ്ലോക്ക് പഞ്ചായത്ത് പ്രസിഡന്‍റ് ഓമനാ മുരളി അധ്യക്ഷത വഹിക്കും. കശുവണ്ടി വികസന കോർപ്പറേഷൻ ചെയർമാൻ എസ്. ജയമോഹൻ, ജില്ലാ പഞ്ചായത്ത് അംഗം സി. അംബികാകുമാരി, ഗ്രാമപഞ്ചായത്ത് സ്ഥിരം സമിതി അധ്യക്ഷൻ ഷൈൻ ബാബു അടക്കമുള്ളവർ പ്രസംഗിക്കും.

ദേവസ്വം അസിസ്റ്റന്‍റ് കമ്മീഷണർ ഓഫിസ് ഉപരോധിച്ചു

കൊട്ടാരക്കര: ദേവസ്വം ബോർഡ് ക്ഷേത്രങ്ങളിലെ സ്വർണക്കൊള്ള അവസാനിപ്പിക്കണമെന്ന് ആവശ്യപ്പെട്ടുകൊണ്ടും ദേവസ്വം പ്രസിഡന്‍റും ദേവസ്വം മന്ത്രിയും രാജിവെക്കണമെന്ന് ആവശ്യപ്പെട്ടുകൊണ്ടും യുവമോർച്ച കൊല്ലം ഈസ്റ്റ് ജില്ലാ കമ്മിറ്റിയുടെ നേതൃത്വത്തിൽ കൊട്ടാരക്കര ദേവസ്വം അസിസ്റ്റന്‍റ് കമ്മീഷണർ ഓഫീസ് ഉപരോധിച്ചു. യുവമോർച്ച കൊല്ലം ജില്ലാ ജനറൽ സെക്രട്ടറി മഹേഷ് മണികണ്ഠൻ അധ്യക്ഷത വഹിച്ചു. യുവമോർച്ച കൊല്ലം ജില്ലാ പ്രസിഡന്‍റ് അഖിൽ ശാസ്താംകോട്ട ഉദ്ഘാടനം ചെയ്തു.

സ്കൂൾ ബസ് അപകട‌ത്തിൽപ്പെട്ടു

അഞ്ചല്‍ : അഞ്ചല്‍ ചൂരക്കുളത്ത് പ്രവർത്തിക്കുന്ന ആനന്ദഭവൻ സെൻട്രൽ സ്കൂളിന്‍റെ ബസ് മറിഞ്ഞു. രാവിലെ കുട്ടികളുമായി സ്കൂളിലേക്കു വരവേ അസുരമംഗലത്തിനു സമീപമുള്ള ഇടറോഡിലാണ് ബസ് മറിഞ്ഞത്. ഇരുപത്തിയേഴോളം കുട്ടികളാണ് അപകട സമയം ബസിലുണ്ടായിരുന്നത്. ഓടിക്കൂടിയ നാട്ടുകാര്‍ ബസിനുള്ളില്‍ നിന്നും കുട്ടികളെ പുറത്തെടുത്ത് അഞ്ചലിലെ സ്വകാര്യ ആശുപത്രിയില്‍ എത്തിച്ചു. ആരുടേയും പരിക്ക് ഗുരുതരമല്ല. വീതി കുറഞ്ഞ റോഡിന്‍റെ വശത്തായി ഇട്ടിരുന്ന വലിയ മരക്കുറ്റിയില്‍ കയറിയതാണ് അപകടത്തിനിടയാക്കിയത്. ഏറെനാളുകളായി റോഡിന്‍റെ ഇരുവശങ്ങളിലുമായി റബർ മരങ്ങൾ മുറിച്ചതിന്‍റെ വലിയ കുറ്റികൾ ഇട്ടിരിക്കുകയാണ്. ഇതു നീക്കം ചെയ്യാൻ പലതവണ പറഞ്ഞുവെങ്കിലും നടപടി ഉണ്ടായിരുന്നില്ല. പഞ്ചായത്ത് അധികൃതരെയും വിവരം ധരിപ്പിച്ചിരുന്നു. അഞ്ചല്‍ പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു. മോട്ടോര്‍ വാഹന വകുപ്പ് അധികൃതരും സ്ഥലത്തെത്തി പരിശോധന നടത്തിയിട്ടുണ്ട്. ബസിന് ഏതെങ്കിലും തരത്തില്‍ തകരാര്‍ ഉണ്ടോ എന്നതടക്കം അധികൃതര്‍ പരിശോധിക്കുന്നുണ്ട്.

ക്ഷേത്രത്തിലെ മോഷണം: പ്രതി അറസ്റ്റിൽ

കൊല്ലം: ഇരവിപുരം പോലീസ് സ്റ്റേഷൻ പരിധിയിൽ ജോളി ജംഗ്ഷനിലുള്ള തുണ്ടിൽ ശിവഭുവനേശ്വരി ക്ഷേത്രത്തിൽ മോഷണം നടത്തിയ കേസിൽ ഒരാളെ പോലീസ് അറസ്റ്റ് ചെയ്തു. വാളത്തുംഗൽ ശരവണ നഗർ 108-ൽ പുത്തൻ വയൽ വീട്ടിൽ കണ്ണൻ എന്നു വിളക്കുന്ന മഹേഷ് ( 27) ആണ് അറസ്റ്റിലായത്. കഴിഞ്ഞദിവസം പുലർച്ചെ 1.30 നായിരുന്നു സംഭവം. ക്ഷേത്ര കോമ്പൗണ്ടിൽ സ്ഥിതിചെയ്യുന്ന ശ്രീകോവിലിന്‍റെ മുൻവശത്തായുള്ള സ്റ്റീൽ നിർമിതമായ കാണിക്ക വഞ്ചി മോഷ്ടിച്ചുകൊണ്ടു പോകുകയായിരുന്നു. വഞ്ചിയിലുണ്ടായിരുന്ന ഉദ്ദേശം 10000 രൂപ മോഷണം പോയതായി ക്ഷേത്ര ഭാരവാഹികൾ കണ്ടെത്തി. തുടർന്ന് അവർ ഇരവിപുരം പോലീസിൽ പരാതി നൽകുകയായിരുന്നു. കേസ് രജിസ്റ്റർ ചെയ്ത ഇരവിപുരം പോലീസ് അന്വേഷണത്തിനൊടുവിൽ പ്രതിയെ അറസ്റ്റ് ചെയ്യുകയായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ്് ചെയ്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]