ADVERTISEMENT

ADVERTISEMENT

കൂരോപ്പട സാന്താ മരിയ ജേതാക്കള്‍

കൂരോപ്പട: കൂരോപ്പട സാന്താ മരിയ പബ്ലിക് സ്‌കൂളില്‍ നടന്ന 13-ാമത് സാന്താ മരിയന്‍ വോളിബോള്‍ ടൂര്‍ണമെന്‍റില്‍ പെണ്‍കുട്ടികളുടെ വിഭാഗത്തില്‍ കൂരോപ്പട സാന്താ മരിയ പബ്ലിക് സ്‌കൂള്‍ ഒന്നാം സ്ഥാനം കരസ്ഥമാക്കി.

ഫസ്റ്റ് റണ്ണര്‍ അപ്പ് ആനക്കല്ല് സെന്‍റ് ആന്‍റണീസ് പബ്ലിക് സ്‌കൂള്‍ കരസ്ഥമാക്കി. പെണ്‍കുട്ടികളുടെ വിഭാഗത്തിലെ ബെസ്റ്റ് പ്രോമിസിംഗ് പ്ലെയറായി സാന്താ മരിയ പബ്ലിക് സ്‌കൂളിലെ എഞ്ചലിയ മറിയം വര്‍ഗീസും ബെസ്റ്റ് പ്ലെയറായി സെന്‍റ് ആന്‍റണീസ് പബ്ലിക് സ്‌കൂളിലെ അന്നാ ജോസഫും തെരഞ്ഞെടുക്കപ്പെട്ടു.

വിജയികള്‍ക്ക് സ്‌കൂള്‍ പ്രിന്‍സിപ്പല്‍ ഫാ. റോയി മാളേയ്ക്കല്‍ സിഎംഐ ട്രോഫികളും ക്യാഷ് അവാര്‍ഡുകളും നല്കി.

ADVERTISEMENT

വെരൂര്‍ ഇന്‍ഡസ്ട്രിയല്‍ എസ്റ്റേറ്റില്‍ അടിസ്ഥാന സൗകര്യങ്ങള്‍ മെച്ചപ്പെടുത്തണം

ചങ്ങനാശേരി: ചങ്ങനാശേരിയിലെ ഇന്‍ഡസ്ട്രിയല്‍ പാര്‍ക്കായ വെരൂര്‍ ഇന്‍ഡസ്ട്രിയല്‍ എസ്റ്റേറ്റില്‍ അടിസ്ഥാന സൗകര്യങ്ങള്‍ മെച്ചപ്പെടുത്തി കൂടുതല്‍ വ്യവസായ സംരംഭങ്ങള്‍ ആരംഭിക്കാന്‍ സാഹചര്യമൊരുക്കണമെന്ന ആവശ്യം ഉയരുന്നു. ആധുധിക കാലഘട്ടത്തിന്‍റെ സാധ്യതകള്‍ക്കനുസൃതമായി ഐടി വ്യവസായത്തിനുവേണ്ട അടിസ്ഥാന സൗകര്യങ്ങള്‍ ഒരുക്കിയാല്‍ അഭ്യസ്തരായ തൊഴില്‍ അന്വേഷകര്‍ക്ക് കൂടുതല്‍ അവസരം സൃഷ്ടിക്കാന്‍ കഴിയും. ഇവിടെ പ്രവര്‍ത്തിക്കുന്ന കോമണ്‍ ഫെസിലിറ്റി സെന്‍ററിലെ ഇന്‍റര്‍നെറ്റ് കണക്ടിവിറ്റി മെച്ചപ്പെടുത്താനും ചെറുകിട വ്യവസായ യൂണിറ്റുകളിലേക്കുള്ള റോഡ് ഗതാഗതം മെച്ചപ്പെടുത്താനും അധികൃതര്‍ തയാറാകണമെന്നും ആര്‍ജെഡി ചങ്ങനാശേരി നിയോജകമണ്ഡലം നേതൃസമ്മേളനം ആവശ്യപ്പെട്ടു. ആര്‍ജെഡി ജില്ലാ പ്രസിഡന്‍റ് സണ്ണി തോമസ് സമ്മേളനം ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് ബെന്നി സി. ചീരഞ്ചിറ അധ്യക്ഷത വഹിച്ചു. ജില്ലാ സെക്രട്ടറി ജോണ്‍ മാത്യു, ഓമന വിദ്യാധരന്‍, സുരേഷ് പുഞ്ചക്കോട്ടില്‍, ജോസഫ് കടപ്പള്ളി, ഇ.ഡി. ജോര്‍ജ്, ലാല്‍ പ്ലാംതോപ്പില്‍, ജോര്‍ജുകുട്ടി കുന്നേല്‍ എന്നിവര്‍ പ്രസംഗിച്ചു.

യുവാവിന്‍റെ അപകടമരണം: എഫ്‌ഐആറിനെതിരേ പരാതി

തൃക്കൊടിത്താനം: തൃക്കൊടിത്താനം കൊക്കോട്ടുചിറയ്ക്കു സമീപം മാടത്തരുവിയില്‍ വാഹനാപകടത്തില്‍ വായ്പൂര് സ്വദേശി വേങ്ങമടത്തില്‍ ആദിത്യന്‍ സുരേഷിന്‍റെ (19) മരണവുമായി ബന്ധപ്പെട്ട് പോലീസ് തയാറാക്കിയ എഫ്‌ഐആര്‍ വസ്തുതാവിരുദ്ധമെന്ന് കാട്ടി അമ്മ അമ്പിളി കോട്ടയം ജില്ലാ പോലീസ് മേധാവിക്കു പരാതി നല്‍കി. എതിര്‍ദിശയില്‍നിന്നു വന്ന കാര്‍ അമിതവേഗത്തില്‍ മറ്റൊരു ടുവീലറിനെ ഓവര്‍ടേക്ക് ചെയ്ത് ആദ്യത്യന്‍റെ വാഹനത്തില്‍ ഇടിച്ചു. ഇടിയുടെ ആഘാതത്തില്‍ യുവാവ് വാഹനത്തില്‍ നിന്നും തെറിച്ച് അടുത്തുള്ള മതിലില്‍ പോയി തലയടിച്ചു വീണു വഴിയില്‍ കിടക്കുകയായിരുന്നു. അപകടം നടന്നയുടനെ പോലീസ് അവിടെയെത്തിയെങ്കിലും ആശുപത്രിയിലെത്തിക്കുന്നതിന് കാലതാമസം വരുത്തിയെന്നും അപകടത്തിനിടയാക്കിയ വാഹനം ഓടിച്ച സ്ത്രീയെ കേസില്‍നിന്ന് ഒഴിവാക്കുന്നതിനു ശ്രമം നടത്തിയെന്നും പരാതിയില്‍ പറയുന്നു. ഏറെസമയത്തിനുശേഷം ഒരു പെട്ടിവണ്ടിയിലാണ് ആദിത്യനെ ചങ്ങനാശേരി ജനറല്‍ ആശുപത്രിയില്‍ എത്തിച്ചത്. തലയ്ക്കു ഗുരുതര പരിക്കായതിനാല്‍ അവിടെനിന്ന് മെഡിക്കല്‍ കോളജിലേക്കു മാറ്റിയെങ്കിലും യാത്രാമധ്യേ യുവാവ് മരിച്ചു. ആദിത്യന്‍ ഓടിച്ചിരുന്ന ബൈക്കിന്‍റെ പിന്നിലിരുന്ന സുഹൃത്ത് സമീര്‍ അപകടത്തില്‍പ്പെട്ട് ആശുപത്രിയില്‍ ചികിത്സയിലായിരുന്നു. സമീറിന്‍റെ മൊഴിയെടുക്കാതെയാണ് പോലീസ് എഫ്ഐആര്‍ തായാറാക്കിയതെന്നു കാണിച്ചാണ് ബന്ധുക്കള്‍ പോലീസ് മേധാവിക്കു പരാതി നല്‍കിയിരിക്കുന്നത്.

അധികമായി ഈടാക്കിയ ബില്‍ തുക തിരിച്ചുനല്‍കണമെന്ന് ഉപഭോക്തൃ തര്‍ക്കപരിഹാര കമ്മീഷന്‍

ചങ്ങനാശേരി: ക്രെഡിറ്റ് പരിധി കടക്കില്ലെന്ന വാഗ്ദാനത്തില്‍ വിശ്വസിച്ച് റിലയന്‍സ് ജിയോ പ്രീപെയ്ഡ് സിം എടുത്ത ഉപഭോക്താവിന് അധികമായി ഈടാക്കിയ ബില്‍ തുക തിരിച്ചുനല്‍കണമെന്ന് ഉത്തരവിട്ട് കോട്ടയം ഉപഭോക്തൃ തര്‍ക്കപരിഹാര കമ്മീഷന്‍. ചങ്ങനാശേരി ചെറുവള്ളി പുതിയേടത്തുവീട്ടില്‍ പി.ജി. രതീഷ് നല്‍കിയ പരാതിയിലാണ് നടപടി. റിലയന്‍സ് ജിയോയുടെ ചങ്ങനാശേരി ശാഖയില്‍നിന്ന് പരാതിക്കാരന്‍ ക്രെഡിറ്റ് പ്ലാനില്‍ പ്രീപെയ്ഡ് സിം വാങ്ങുകയും ഇന്‍റര്‍നാഷണല്‍ റോമിംഗ് പ്ലാനില്‍ 1,102 രൂപയ്ക്ക് മൊബൈല്‍ റീചാര്‍ജ് ചെയ്യുകയും ചെയ്തു. തുടര്‍ന്ന് 2024 ഓഗസ്റ്റ് 11ന് മാലദ്വീപില്‍ യാത്ര പോയ പരാതിക്കാരന്‍ ലോക്കല്‍ സിം വാങ്ങി ഉപയോഗിച്ച സമയത്ത് ഓഗസ്റ്റ് 21ന് 27,215 രൂപയുടെ ബില്‍ ലഭിച്ചു. പരാതിയോടൊപ്പം സമര്‍പ്പിച്ച രേഖ പരിശോധിച്ച കമ്മീഷന്‍ പരാതിക്കാരന്‍ എടുത്തിരിക്കുന്ന 999 രൂപയുടെ ഡബ്ല്യുഎംഎന്‍പി 999 പ്രൈം പ്ലാന്‍ പ്രകാരം 200 ജിബിയുടെ ഹൈ സ്പീഡ് ഡാറ്റയും അധിക ഉപയോഗമായി ഓരോ ജിബിക്കും ലിമിറ്റ് ചേഞ്ച് 10 രൂപയാണെന്നും കണ്ടെത്തി. 2024 ജൂലൈ 22 മുതല്‍ ഓഗസ്റ്റ് 10 വരെ 36 ജിബി മാത്രമാണ് പരാതിക്കാരന്‍ ഉപയോഗിച്ചിരിക്കുന്നതെന്നും അത് 200 ജിബിയുടെ ഹൈ സ്പീഡ് ഡാറ്റയില്‍ ഉള്‍പ്പെടുത്തുന്നതാണെന്നും കമ്മീഷന്‍ കണ്ടെത്തി. ക്രെഡിറ്റ് പരിധി കഴിയുമ്പോള്‍ എസ്എംഎസ് ഇമെയിലായി സന്ദേശം നല്‍കുമെന്ന വാദം തെളിയിക്കാന്‍ എതിര്‍ കക്ഷികള്‍ക്ക് സാധിക്കാത്തതിനാല്‍ 2024 ഒക്‌ടോബര്‍ 30 മുതല്‍ 9 ശതമാനം പലിശനിരക്കില്‍ 21,435 രൂപയും നഷ്ടപരിഹാരമായി 10,000 രൂപയും കോടതിച്ചെലവായി 5000 രൂപയും നല്‍കണമെന്ന് അഡ്വ.വി.എസ്. മനുലാല്‍ പ്രസിഡന്‍റും അഡ്വ. ആര്‍. ബിന്ദു, കെ.എം. ആന്‍റോ എന്നിവര്‍ അംഗങ്ങളുമായുള്ള കമ്മീഷന്‍ ഉത്തരവിട്ടു.

അഞ്ജു ബോബി ജോര്‍ജ് റോഡ് ഒരു കോടി മുടക്കി നവീകരിക്കുന്നു

ചങ്ങനാശേരി: മാടപ്പള്ളി പഞ്ചായത്തിനെയും വാഴപ്പള്ളി പഞ്ചായത്തിനെയും തമ്മില്‍ ബന്ധിപ്പിക്കുന്ന അന്തര്‍ദേശീയ ലോംഗ്ജംപ് താരം അഞ്ജു ബോബി ജോര്‍ജ് റോഡിന്‍റെ നിര്‍മാണോദ്ഘാടനം ജോബ് മൈക്കിള്‍ എംഎല്‍എ നിര്‍വഹിച്ചു. ഒരു കോടി രൂപ മുടക്കി മികച്ച രീതിയിലാണ് റോഡ് നിര്‍മാണം ക്രമീകരിച്ചിരിക്കുന്നത്. റോഡിലെ കാലപ്പഴക്കമുള്ള കലുങ്ക് പൊളിച്ച് പുനര്‍നിര്‍മിക്കാനും തുക വകയിരുത്തിയിട്ടുണ്ട്. കായികതാരം അഞ്ജു ബോബി ജോര്‍ജിന്‍റെ കുടുംബവീടിനു സമീപത്തുകൂടി കടന്നുപോകുന്ന ഈ പഞ്ചായത്ത് റോഡ് ദീര്‍ഘനാളുകളായി തകര്‍ന്നു കിടക്കുകയായിരുന്നു. റോഡിന്‍റെ നവീകരണം വേഗത്തിലാക്കും ചങ്ങനാശേരിയുടെ അഭിമാന കായികതാരം അഞ്ജു ബോബി ജോര്‍ജ് റോഡിന്‍റെ ശോചനീയാവസ്ഥ പരിഗണിച്ചാണ് എംഎല്‍എ ഫണ്ടില്‍നിന്നും പണം അനുവദിച്ചത്. എത്രയും വേഗം റോഡ് നിര്‍മാണം പൂര്‍ത്തിയാക്കി റോഡ് ഗതാഗത യോഗ്യമാക്കാനുള്ള നടപടികള്‍ ചെയ്യും. ജോബ് മൈക്കിള്‍ എംഎല്‍എ

സിഎംസി മഹാജൂബിലി വിദ്യാഭ്യാസ കണ്‍വന്‍ഷന്‍

ചങ്ങനാശേരി: സിഎംസി ഹോളി ക്വീന്‍സ് പ്രൊവിന്‍സിന്‍റെ മഹാജൂബിലി വിദ്യാഭ്യാസ കണ്‍വന്‍ഷന്‍ അസംപ്ഷന്‍ കോളജ് ഓഡിറ്റോറിയത്തില്‍ നടത്തി. പ്രൊവിന്‍ഷ്യല്‍ സുപ്പീരിയർ സിസ്റ്റര്‍ സോഫി റോസ് സിഎംസി അധ്യക്ഷത വഹിച്ചു. ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്തു. അതിരൂപതാ കോര്‍പറേറ്റ് മാനേജര്‍ ഫാ. ജോബി മൂലയില്‍, ഫാ. മനോജ് കറുകയില്‍, സിസ്റ്റര്‍ ആനി തോമസ് സിഎംസി, സിസ്റ്റര്‍ ബ്ലെസി ആന്‍സ് സിഎംസി എന്നിവര്‍ പ്രസംഗിച്ചു. അസംപ്ഷന്‍ കോളജ് പ്രിന്‍സിപ്പല്‍ ഡോ.റാണി മരിയ ക്ലാസ് നയിച്ചു. വിവിധ മേഖലകളില്‍ മികവ് പ്രകടിപ്പിച്ചവരെ ഉപഹാരം നല്‍കി ആദരിച്ചു.

ദേശീയ ക്യുഐ കോണ്‍ഫറന്‍സ് ഇന്ന് ചെത്തിപ്പുഴ ആശുപത്രിയില്‍

ചങ്ങനാശേരി: ചെത്തിപ്പുഴ സെന്‍റ് തോമസ് ആശുപത്രിയിലെ ക്വാളിറ്റി ആന്‍ഡ് ഇന്‍ഫക്‌ഷന്‍ കണ്‍ട്രോള്‍ ഡിപ്പാര്‍ട്ട്‌മെന്‍റുകളുടെ നേതൃത്വത്തില്‍ മൂന്നാമത് ദേശീയ കോണ്‍ഫറന്‍സ് സെന്‍റ് തോമസ് ആശുപത്രി ഓഡിറ്റോറിയത്തില്‍ ഇന്നു രാവിലെ ഒമ്പതിന് നടക്കും. ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും. ക്വാളിറ്റി, ഇന്‍ഫക‌്ഷന്‍ കണ്‍ട്രോള്‍ മേഖലയുമായി ബന്ധപ്പെട്ട ഹോസ്പിറ്റല്‍ അഡ്മിനിസ്‌ട്രേറ്ററുമാര്‍, ഡോക്ടർമാര്‍, നഴ്‌സുമാര്‍, പിജി വിദ്യാര്‍ഥികള്‍ എന്നിവര്‍ പങ്കെടുക്കും. സെന്‍റ് തോമസ് നഴ്‌സിംഗ് കോളജ് പ്രിന്‍സിപ്പൽ ഡോ. ഷൈല ഐപ്പ് വര്‍ഗീസ്, ആലപ്പുഴ ജില്ലാ ക്വാളിറ്റി അഷ്വറന്‍സ് കമ്മിറ്റി അംഗം ഡോ. ജോസഫ് ജോസഫ്, ആലുവ രാജഗിരി ഹോസ്പിറ്റലിലെ ഡോ. സോണിയ ജോയി, തിരുവനന്തപുരം മെഡിഫോര്‍ട്ട് ഹോസ്പിറ്റല്‍ ചീഫ് ഓപ്പറേറ്റിംഗ് ഓഫീസര്‍ ഡോ. രശ്മി നായര്‍, ബംഗളൂരു‍ സെന്‍റ് ജോണ്‍സ് മെഡിക്കല്‍ കോളേജിലെ ജനറല്‍ മാനേജര്‍ ബീനാമ്മ കുര്യന്‍, എറണാകുളം ലിസി ഹോസ്പിറ്റലിലെ ഡോ. രോഹിത എസ്. ചന്ദ്ര എന്നിവര്‍ ക്ലാസുകള്‍ നയിക്കും. സെന്‍റ് തോമസ് ഹോസ്പിറ്റല്‍ എക്‌സിക്യൂട്ടീവ് ഡയറക്ടര്‍ ഫാ. ജയിംസ് പി. കുന്നത്ത് അധ്യക്ഷത വഹിക്കും. അസോസിയേറ്റ് ഡയറക്ടറുമാരായ ഫാ. ജോഷി മുപ്പതില്‍ച്ചിറ, ഫാ. ജേക്കബ് അത്തിക്കളം, ഫാ. ജോസ് പുത്തന്‍ചിറ, മെഡിക്കല്‍ അഡ്മിനിസ്‌ട്രേറ്റര്‍ ഡോ.എന്‍. രാധാകൃഷ്ണന്‍, മെഡിക്കല്‍ സൂപ്രണ്ട് ഡോ. തോമസ് സഖറിയ, ചീഫ് ഓപ്പറേറ്റിംഗ് ഓഫീസര്‍ ഡോ. നവീന്‍ എസ്. നായര്‍, ബിജി മാത്യു, നീനു വര്‍ഗീസ് എന്നിവര്‍ പ്രസംഗിക്കും. രാവിലെ 8.30 ന് രജിസ്‌ട്രേഷന്‍ ആരംഭിക്കും. രജിസ്‌ട്രേഷന് 6282102385, 7736679819.

എസ്ബി കോളജില്‍ കാര്‍ഷിക സംരംഭകത്വ പരിശീലന പരിപാടി ഇന്ന്

ചങ്ങനാശേരി: കാര്‍ഷികമേഖലയെ അടിസ്ഥാനമാക്കിയുള്ള സംരംഭകത്വ പരിശീലന പരിപാടി ഇന്നു രാവിലെ പത്തിന് എസ്ബി കോളജില്‍ നടക്കും. കുട്ടനാട് പഠനഗവേഷണ കേന്ദ്രത്തിന്‍റെ നേതൃത്വത്തിലാണ് ശില്പശാല സംഘടിപ്പിക്കുന്നത്. ഒരു ലക്ഷം കോടി രൂപയുടെ കാര്‍ഷിക അടിസ്ഥാന വികസനകാര്യ നിധിയില്‍ എങ്ങനെ പങ്കാളികളാകാം എന്നതാണ് പരിശീലന പദ്ധതി. ഫലത്തില്‍ നാലു ശതമാനം മാത്രമാണ് പലിശ. വായ്പയുടെ 40 മുതല്‍ 80 ശതമാനം വരെ സബ്‌സിഡി ലഭിക്കും. ഒരു വര്‍ഷത്തെ മോറട്ടോറിയം ലഭിക്കും. കൃഷിവിജ്ഞാന കേന്ദ്രം, നബാര്‍ഡ്, ലീഡ് ബാങ്ക്, കാര്‍ഷിക ഡയറക്ടറേറ്റ് എന്നിവിടങ്ങളില്‍നിന്നുള്ള വിദഗ്ധരുടെ ക്ലാസുകള്‍ ലഭിക്കും. പദ്ധതി തെരഞ്ഞെടുക്കല്‍, പ്രോജക്ട് റിപ്പോര്‍ട്ടുകള്‍ തയാറാക്കല്‍, വായ്പാ സമ്പാദനം, കയറ്റുമതി ഉള്‍പ്പെടെയുള്ള വിപണനസാധ്യതകള്‍ തുടങ്ങിയവയില്‍ മാര്‍ഗനിര്‍ദേശങ്ങളും തുടര്‍സേവനങ്ങളും ലഭ്യമാക്കും. വ്യക്തിഗത വായ്പകള്‍ ഒരു യൂണിറ്റിന് രണ്ടു കോടി രൂപ വരെയാണ്. കൂട്ടു സംരംഭങ്ങള്‍ക്ക് പരിധിയില്ല. കാര്‍ഷിക വരുമാനത്തിലെ അപര്യാപ്ത, കണ്‍സ്ട്രക്‌ഷന്‍, വ്യാപാര വ്യവസായ മേഖലകള്‍ എന്നിവ നേരിടുന്ന മാന്ദ്യം പരിഹരിക്കുന്നതിന് കാര്‍ഷിക അടിസ്ഥാന സൗകര്യവികസന നിധി ഉപയോഗപ്പെടുത്താം. ഫാര്‍മര്‍ പ്രൊഡ്യൂസേഴ്‌സ് ഓർഗനൈസേഷന്‍സ് രൂപീകരിക്കുന്നതും പ്രവര്‍ത്തിപ്പിക്കേണ്ടതും എങ്ങനെയെന്നതു സംബന്ധിച്ച് വിജയകരമായി പ്രവര്‍ത്തിക്കുന്ന എഫ്പിഒകളുടെ സംഘാടകര്‍ വിശദീകരിക്കും. ഇന്നു രാവിലെ ഒമ്പതു മുതല്‍ 10 വരെ സ്‌പോട്ട് രജിസ്‌ട്രേഷന്‍ ഉണ്ടായിരിക്കും. ഫോണ്‍: 8547829482.

അവകാശസംരക്ഷണ യാത്രയ്ക്ക് ചങ്ങനാശേരിയില്‍ സ്വീകരണം ഇന്ന്

ചങ്ങനാശേരി: കത്തോലിക്ക കോണ്‍ഗ്രസ് ഗ്ലോബല്‍ സമിതിയുടെ നേതൃത്വത്തില്‍ "സമുദായ ശക്തീകരണം രാഷ്‌ട്രപുരോഗതിക്ക്, നീതി ഔദാര്യമല്ല അവകാശമാണ്’ എന്നീ മുദ്രാവാക്യങ്ങള്‍ ഉയര്‍ത്തി ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പില്‍ നയിക്കുന്ന അവകാശ സംരക്ഷണ യാത്രയ്ക്ക് ഇന്ന് ചങ്ങനാശേരിയില്‍ വരവേല്പ് നല്‍കും. വൈകുന്നേരം 4.30ന് പെരുന്ന റെഡ്‌സ്‌ക്വയര്‍ ജംഗ്ഷനില്‍നിന്ന് വാദ്യമേളങ്ങളുടെ അകമ്പടിയോടുകൂടി യാത്രയെ സ്വീകരിച്ച് പെരുന്ന ബസ് സ്റ്റാന്‍ഡ് മൈതാനത്ത് ക്രമീകരിച്ചിരിക്കുന്ന സമ്മേളന നഗറിലേക്ക് ആനയിക്കും. തുടര്‍ന്നു നടക്കുന്ന സമാപന സമ്മേളനം ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും. അതിരൂപത പ്രസിഡന്‍റ് ബിജു സെബാസ്റ്റ്യന്‍ അധ്യക്ഷത വഹിക്കും. ജാഥാ ക്യാപ്റ്റന്‍ പ്രഫ. രാജീവ് കൊച്ചുപറമ്പില്‍ വിഷയാവതരണ പ്രസംഗം നടത്തും. അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട് മുഖ്യസന്ദേശം നല്കും. അതിരൂപതാ ഡയറക്ടര്‍ ഫാ. സാവിയോ മാനാട്ട്, കത്തോലിക്കാ കോണ്‍ഗ്രസ് ഗ്ലോബല്‍ ഡയറക്ടര്‍ ഫാ. ഫിലിപ്പ് കവിയില്‍ തുടങ്ങിയവര്‍ പ്രസംഗിക്കും. വിവിധ ഫൊറോനകളില്‍നിന്നുള്ള ആയിരക്കണക്കിനു സംഘടനാംഗങ്ങള്‍ സമ്മേളനത്തില്‍ അണിനിരക്കും.

സംവരണ സീറ്റുകൾ : ചങ്ങനാശേരി നഗരസഭയില്‍ പ്രമുഖര്‍ക്ക് തട്ടകങ്ങള്‍ നഷ്ടമായി

ചങ്ങനാശേരി: വനിതാ, പട്ടികജാതി സംവരണ സീറ്റുകള്‍ പ്രഖ്യാപിച്ചതോടെ ചങ്ങനാശേരി നഗരസഭയിലും സമീപ പഞ്ചായത്തുകളിലും പ്രമുഖ നേതാക്കള്‍ക്ക് നിലവിലുള്ള തട്ടകങ്ങള്‍ നഷ്ടമാകും. പൂവക്കാട്ടുചിറ (മൂന്ന്), പാറേല്‍ പള്ളി (ഒമ്പത്), ബോട്ടു ജെട്ടി (31) എന്നീ വാര്‍ഡുകളാണ് പട്ടികജാതി സംവരണ വാര്‍ഡുകളായത്. ഇതില്‍ ഒമ്പതും 31ഉം പട്ടികജാതി സ്ത്രീ സംവരണവും മൂന്ന് പട്ടികജാതി സംവരണവുമാണ്. ഇതുകൂടാതെ ഒന്ന്, രണ്ട്, ആറ്, ഏഴ്, 10, 12, 15, 17, 18, 19, 24, 29, 32, 33, 34, 36, 37 വാര്‍ഡുകളിലാണ് വനിതകള്‍ക്ക് കുറി വീണത്. യുഡിഎഫ് നേതാക്കളായ ജോമി ജോസഫ്, സന്തോഷ് ആന്‍റണി, ബെന്നി ജോസഫ്, എല്‍ഡിഎഫ് നേതാക്കളായ മാത്യൂസ് ജോര്‍ജ്, കെ.ആര്‍. പ്രകാശ്, പി.എ. നസീര്‍, ശിവകുമാര്‍ തുടങ്ങിയവര്‍ക്കാണ് സ്വന്തം വാര്‍ഡുകള്‍ നഷ്ടമായത്. ഇതോടെ ഇവര്‍ സമീപ വാര്‍ഡുകളിള്‍ മത്സരത്തിനുള്ള ശ്രമത്തിലാണ്. അമ്പതുശതമാനം സംവരണവാര്‍ഡുകളായി മാറിയ സാഹചര്യത്തില്‍ പുരുഷ സ്ഥാനാര്‍ഥികള്‍ക്ക് അവസരം കുറയുമെന്നിരിക്കെ ജനറല്‍ വാര്‍ഡുകളില്‍ വനിതകള്‍ മത്സരിക്കേണ്ടതില്ലെന്ന തീരുമാനത്തിലേക്ക് ഇരുമുന്നണികളുടെയും സംസ്ഥാന നേതൃത്വങ്ങള്‍ എത്തിച്ചേരാനിടയുണ്ട്. അതേസമയം, യുഡിഎഫില്‍ ഘടക കക്ഷികള്‍ക്കിടയില്‍ സീറ്റുനിര്‍ണയം സംബന്ധിച്ച് തര്‍ക്കങ്ങള്‍ ഉടലെടുത്തിട്ടുണ്ട്. മുസ്‌ലിംലീഗ് വിജയ സാധ്യതയുള്ള രണ്ട് സീറ്റുകൾ ആവശ്യപ്പെട്ടിട്ടുണ്ട്. നിലവില്‍ ലീഗിന്‍റെ സിറ്റിംഗ് വാര്‍ഡായ 28, കോണ്‍ഗ്രസിന്‍റെ സിറ്റിംഗ് വാര്‍ഡും മുമ്പ് മുസ്‌ലിംലീഗ് മത്സരിച്ചു ജയിച്ച പെരുന്ന എല്‍പിഎസ് (14), 17 വാര്‍ഡുകളിലുമാണ് ലീഗ് അവകാശവാദമുന്നയിച്ചിരിക്കുന്നത്. ലീഗിന്‍റെ പ്രമുഖ നേതാക്കളെ മത്സരരംഗത്തിറക്കാനാണ് തീരുമാനം.

ഞങ്ങൾ എങ്ങനെ ഉറങ്ങും? കൂറ്റൻ വനംകുളവിക്കൂടിനടിയിൽ ഭീതിയോടെ ഒരു നാട്

ബെന്നി ചിറയിൽ ചങ്ങനാശേരി: ഒരു നാടിന്‍റെ ഉറക്കം കെടുത്തി കൂറ്റൻ വനംകുള വിക്കൂട്. കാട്ടുകുളവിയെന്നും ആനക്കുളവിയെന്നുമൊക്കെ അറിയപ്പെടുന്ന അതീവ അപകടകാരിയായ കടന്നലിന്‍റെ കൂടാണ് ഒരു നാടിനെ ഭീതിയിലാഴ്ത്തിയിരിക്കുന്നത്. മാടപ്പള്ളി മോസ്കോ-വെങ്കോട്ട റോഡിൽ ഏലംകുന്ന് കുരിശടിക്കു സമീപത്തെ വല്യാനാൽ തങ്കച്ചന്‍റെ വീടിന്‍റെ പുരയിടത്തിലാണ് നാടിനെ വിറപ്പിക്കുന്ന കുളവിക്കൂട് മരക്കൊന്പിൽ തൂങ്ങിക്കിടക്കുന്നത്. ഒരു മഹാഗണി മരത്തിലാണ് ഈ കൂട് തൂങ്ങിക്കിടക്കുന്നത്. കാഴ്ചയിൽ ഭംഗിയുണ്ടെങ്കിലും പ്രാണഭീതിയിലാണ് നാട്ടുകാർ. ആയിരക്കണക്കിനു കുളവികളാണ് ഒാരോ നിമിഷവും ഈ കൂട്ടിലേക്കു കയറുകയും ഇറങ്ങുകയും ചെയ്യുന്നത്. കാഴ്ചയിൽത്തന്നെ ഭീതി ജനിപ്പിക്കുന്ന ദൃശ്യം. ലക്ഷക്കണക്കിനു കുളവികൾ ഈ കൂട്ടിലുണ്ടെന്നാണ് നാട്ടുകാർ പറയുന്നത്. സമീപത്തെല്ലാം വീടുകളുള്ള മേഖലയാണ്. കുട്ടികളും വയോധികരുമൊക്കെ ഏറെയുള്ള പ്രദേശത്ത് ഈ കുളവിക്കൂട് ഇപ്പോൾ നാട്ടുകാരുടെ ഉറക്കം കെടുത്തിയിരിക്കുകയാണ്. ഒാരോ ദിവസവും ഇതിന്‍റെ വലിപ്പം കൂടി വരുന്നതായിട്ടാണ് നാട്ടുകാർ പറയുന്നത്. കഴിഞ്ഞദിവസമാണ് കുളവിക്കൂട് വീട്ടുകാരുടെ ശ്രദ്ധയിൽപ്പെട്ടത്. പഞ്ചായത്ത് അധികൃതർക്കു വിവരം നൽകിയെങ്കിലും മരം മുറിച്ചുനീക്കാനാണ് നിർദേശിച്ചതെന്നു പറയുന്നു. എന്നാൽ, കൂറ്റൻ കുളവിക്കൂട് ഉള്ള മരം എങ്ങനെ മുറിക്കുമെന്നും ആരു മുറിക്കുമെന്നും നാട്ടുകാർ ചോദിക്കുന്നു. കാക്കയോ മറ്റു പക്ഷികളോ കൂടിനെ ആക്രമിച്ചാൽ ഇവ ഇളകുമെന്നും നാട്ടുകാരെ ആക്രമിക്കുമെന്നുമുള്ള ഭീതിയിലാണ് ഈ പ്രദേശത്തുള്ളവർ. കൂട്ടത്തോടെ ആക്രമിച്ചാൽ ജീവൻ പോലുമെടുക്കാൻ ശേഷിയുള്ള അപകടകാരികളാണ് കുളവികൾ. വളർത്തു മൃഗങ്ങളെയും ഇവ ആക്രമിക്കും. പോലീസോ ഫയർഫോഴ്സോ ഇടപെട്ട് ഈ ഇവയെ നീക്കം ചെയ്യണമെന്നാണ് നാട്ടുകാരുടെ ആവശ്യം.

പെൻഷനേഴ്സ് ഓർഗനൈസേഷൻ ധർണ

വൈക്കം: പെൻഷൻ പരിഷ്കരണം നടപ്പാക്കുക, ഓണം ഉത്സവബത്ത പുനഃസ്ഥാപിക്കുക, പെൻഷൻ സർക്കാർ ഏറ്റെടുക്കുക തുടങ്ങിയ ആവശ്യങ്ങൾ ഉന്നയിച്ച് സെക്രട്ടേറിയറ്റ് നടയിലും യൂണിറ്റ് ഓഫീസുകളിലും നടത്തിയ സമരത്തിൽ സർക്കാർ അനുകൂല നിലപാട് സ്വീകരിക്കാത്തതിൽ പ്രതിഷേധിച്ച് പെൻഷനേഴ്സ് ഓർഗനൈസേഷന്‍റെ നേതൃത്വത്തിൽ ഡിപ്പോ ഓഫീസിനു മുന്നിൽ ധർണ നടത്തി. വൈക്കം കെഎസ്ആർടിസി ഡിപ്പോയ്ക്ക് മുന്നിൽ യൂണിറ്റ് പ്രസിഡന്‍റ് കെ.എം. മുരളീധരന്‍റെ അധ്യക്ഷതയിൽ നടന്ന ധർണാസമരം സിഐടിയു ഏരിയാ പ്രസിഡന്‍റ് പി.വി. പുഷ്കരൻ ഉദ്ഘാടനം ചെയ്തു. ഓർഗനൈസേഷൻ നേതാക്കളായ എൻ.കെ. സോമൻ, എ.വി. ജോസഫ്, ടി.കെ. പൊന്നപ്പൻ, പി.വി. പത്മനാഭൻ, ജി. ഗോപകുമാർ തുടങ്ങിയവർ പ്രസംഗിച്ചു. സെക്രട്ടേറിയറ്റ് നടയിൽ ആരംഭിക്കുന്ന അനിശ്ചിതകാല സമരം സമരസഹായ സമിതി ചെയർമാൻ പന്ന്യൻ രവീന്ദ്രൻ ഉദ്ഘാടനം ചെയ്യും.

കൂണ്‍ കൃഷി സംസ്ഥാനമൊട്ടാകെ വ്യാപിപ്പിക്കും: മന്ത്രി പി. പ്രസാദ്

കടുത്തുരുത്തി: കൂണ്‍ കൃഷി സംസ്ഥാനമൊട്ടാകെ വ്യാപിപ്പിക്കുന്നതിന്‍റെ ഭാഗമായി സംസ്ഥാന കൃഷി വകുപ്പ് ഡിഎംആറുമായി ഉടന്‍ ധാരണാപത്രം ഒപ്പ് വയ്ക്കുമെന്ന് മന്ത്രി പി. പ്രസാദ്. സമഗ്ര കൂണ്‍ഗ്രാമം വികസനപദ്ധതി പൂര്‍ത്തീകരണം സംസ്ഥാനത്തെ പ്രഥമ പ്രഖ്യാപനവും ഭാരതീയ പ്രകൃതി കൃഷി പദ്ധതി കിസാന്‍ മേളയും കടുത്തുരുത്തിയില്‍ ഉദ്ഘാടനം ചെയ്യുകയായിരുന്നു മന്ത്രി. കടുത്തുരുത്തി മിനി സിവില്‍ സ്റ്റേഷന്‍ അങ്കണത്തില്‍ നടന്ന യോഗത്തില്‍ മോന്‍സ് ജോസഫ് എംഎല്‍എ അധ്യക്ഷത വഹിച്ചു. പരിപാടിയോടനുബന്ധിച്ചു കര്‍ഷകരുടെ ഉത്പന്നങ്ങളും മൂല്യവര്‍ധിത ഉത്പന്നങ്ങളും പ്രോത്സാഹിപ്പിക്കുന്നതിന്‍റെ ഭാഗമായി കാര്‍ഷിക പ്രദര്‍ശന മേളയും ഉണ്ടായിരുന്നു. 2024-25 വര്‍ഷത്തെ സംസ്ഥാനത്തെ മികച്ച കൂണ്‍ കര്‍ഷകനായി തെരഞ്ഞെടുക്കപ്പെട്ട രാഹുല്‍ ഗോവിന്ദ് നയിച്ച "ശാസ്ത്രീയ കൂണ്‍ കൃഷിയും സംരംഭകത്വവും' എന്ന വിഷയത്തില്‍ സെമിനാറും നടന്നു. കിസാന്‍ മേളയുടെ ഉദ്ഘാടനം കെ. ഫ്രാന്‍സിസ് ജോര്‍ജ് എംപി നിര്‍വഹിച്ചു. മിഷന്‍ ഡയറക്ടര്‍ സജി ജോണ്‍, കടുത്തുരുത്തി ബ്ലോക്ക് പഞ്ചായത്ത് പ്രസിഡന്‍റ് ജോണ്‍സണ്‍ കൊട്ടുകാപ്പള്ളി, കൃഷി അസിസ്റ്റന്‍റ് ഡയറക്ടര്‍ ടി.ആര്‍. സ്വപ്ന, ജില്ലാ പഞ്ചായത്ത് വൈസ് പ്രസിഡന്‍റ് ജോസ് പുത്തന്‍കാലാ, പ്രിന്‍സിപ്പല്‍ കൃഷി ഓഫീസര്‍ സി. ജോ ജോസ്, വിവിധ പഞ്ചായത്ത് പ്രസിഡന്‍റുമാര്‍, ജനപ്രതിനിധികള്‍, ഉദ്യോഗസ്ഥര്‍, കൃഷിക്കാര്‍ തുടങ്ങിയവര്‍ പങ്കെടുത്തു. സംഘമൈത്രിക്ക് 18 ലക്ഷം അനുവദിച്ചു: മന്ത്രി കടുത്തുരുത്തി: കുറുപ്പന്തറയിലെ സംഘമൈത്രിക്ക് അടിസ്ഥാന സൗകര്യ വികസനം നടപ്പിലാക്കുന്നതിനായി 18 ലക്ഷം രൂപ അനുവദിച്ചതായി മന്ത്രി പി. പ്രസാദ്. മോന്‍സ് ജോസഫ് എംഎല്‍എയുടെ അഭ്യര്‍ഥനയെത്തുടര്‍ന്നാണ് ഇക്കാര്യത്തില്‍ അനുകൂല തീരുമാനമുണ്ടായതെന്നും മന്ത്രി അറിയിച്ചു. സമഗ്ര കൂണ്‍ ഗ്രാമം വികസന പദ്ധതി പൂര്‍ത്തീകരണം സംസ്ഥാനത്തെ പ്രഥമ പ്രഖ്യാപനവും ഭാരതീയ പ്രകൃതി കൃഷി പദ്ധതി കിസാന്‍ മേളയും കടുത്തുരുത്തിയില്‍ ഉദ്ഘാടനം ചെയ്യുന്നതിനിടെയാണ് മന്ത്രി ഇക്കാര്യങ്ങള്‍ അറിയിച്ചത്.

പാടശേഖരങ്ങളുടെ ഭൗതിക സാഹചര്യം മെച്ചപ്പെടുത്താൻ 4.5 കോടി: മന്ത്രി റോഷി

വൈക്കം: വൈക്കം നിയോജക മണ്ഡലത്തിലെ വിവിധ പാടശേഖരങ്ങളുടെ ഭൗതിക സാഹചര്യം മെച്ചപ്പെടുത്തുന്നതിനായി 4.5കോടി രൂപ അനുവദിച്ചതായി ജലവിഭവ മന്ത്രി റോഷി അഗസ്റ്റിൻ. കേരള കോൺഗ്രസ്‌-എം വൈക്കം നിയോജകമണ്ഡലം കമ്മിറ്റിയുടെ നിവേദനത്തിന്‍റെ അടിസ്ഥാനത്തിൽ നിയോജകമണ്ഡലത്തിലെ വൈക്കം നഗരസഭയിലേയും അഞ്ച് പഞ്ചായത്തുകളിലും ഉൾപ്പെട്ട വിവിധ പാടശേഖരങ്ങൾക്ക് കുട്ടനാട് പാക്കേജിൽപ്പെടുത്തിയാണ് അപ്പർ കുട്ടനാടൻ മേഖലയായ വൈക്കത്തിന് 4.5 കോടി രൂപ അനുവദിച്ചതെന്ന് മന്ത്രി അറിയിച്ചു. കാർഷിക മേഖലയിലെ ഉത്പാദന വർധനവിനായി അടിസ്ഥാന സൗകര്യങ്ങൾ ഒരുക്കുന്നതിനാണ് തുക അനുവദിച്ചിരിക്കുന്നത്. നിയോജകമണ്ഡലം പ്രസിഡന്‍റ് ലൂക്ക് മാത്യുവിന്‍റെ നേതൃത്വത്തിൽ ഏബ്രഹാം പഴയകടവൻ, ജോയി ചെറുപുഷ്പം, വക്കച്ചൻ മണ്ണത്താലി, പി. വി. കുര്യൻ പ്ലാക്കോട്ടയിൽ, സന്തോഷ് കല്ലറ, റെജി ആറാക്കൻ, എം.സി. ഏബ്രഹാം, ബാബു ജോസഫ്, മണ്ഡലം പ്രസിഡന്‍റുമാരായ ആന്‍റണി കളമ്പുകാടൻ, ടെൽസൺ തോമസ്, സജുമോൻ ജോസഫ്, അനീഷ് തേവരപടിക്കൽ എന്നിവരാണ് മന്ത്രിക്ക് നിവേദനം നൽകിയത്. കല്ലറ പഞ്ചായത്തിലെ മുണ്ടാർ പാടശേഖരത്തിന് 30 ലക്ഷം, കളത്തോട്- പടിനിരപ്പള്ളി പാടശേഖരം 50 ലക്ഷം, വൈക്കം നഗരസഭ എട്ടാം വാർഡിലെ നാറാണത്ത് പാടശേഖരത്തിന് 50 ലക്ഷം, തലയോലപ്പറമ്പ് പഞ്ചായത്തിലെ ആലങ്കരി പാടശേഖരത്തിന് 75 ലക്ഷം, വെച്ചൂർ പഞ്ചായത്തിലെ പൂവത്തിക്കരി പാടശേഖരത്തിന് 75 ലക്ഷം, പന്നയ്ക്കാതടം പാടശേഖരത്തിന് 25 ലക്ഷം, ഉദയനാപുരം പഞ്ചായത്തിലെ ചാലകം പാടശേഖരത്തിന് 50 ലക്ഷം, ടിവിപുരം പഞ്ചായത്തിലെ പാലോന്ന് പാടശേഖരത്തിന് 50 ലക്ഷമടക്കം 4.5 കോടി രൂപയാണ് അനുവദിച്ചിരിക്കുന്നത്. കുട്ടനാട് പാക്കേജിൽ ഒരു നിയോജകമണ്ഡലത്തിൽ കാർഷികമേഖലയുടെ ഉണർവിനായി ഇത്രയും തുക ഒരുമിച്ച് അനുവദിക്കുന്നത് ആദ്യമാണ്. നിയോജകമണ്ഡലം കമ്മിറ്റി ആവശ്യപ്പെട്ട മുഴുവൻ പാടശേഖരങ്ങൾക്കും തുക അനുവദിച്ച മന്ത്രിയെ പാർട്ടി നിയോജകമണ്ഡലം കമ്മിറ്റി അഭിനന്ദിച്ചു.

കാറ്റില്‍ നെല്ല് നിലംപൊത്തി; വിരിപ്പിലും കണ്ണീര്‍ക്കൊയ്ത്ത്

കോട്ടയം: വിരിപ്പുവിളവിലും നെല്‍കര്‍ഷകര്‍ക്ക് കണ്ണീര്‍ക്കൊയ്ത്ത്. കനത്ത തുലാമഴയ്‌ക്കൊപ്പം ആഞ്ഞുവീശിയ കാറ്റില്‍ കല്ലറ, തലയാഴം, വെച്ചൂര്‍, പൂവത്തുംകര പ്രദേശങ്ങളിലെ പാടങ്ങളില്‍ നെല്ല് നിലംപൊത്തി. കൊയ്യാന്‍ ഒരു മാസം ബാക്കിനില്‍ക്കെയാണ് കര്‍ഷകര്‍ക്ക് വന്‍ നഷ്ടം സംഭവിച്ചിരിക്കുന്നത്. പൂര്‍ണമായി വിളവെത്താത്ത നെല്ല് കൊയ്‌തെടുത്താലും പ്രയോജനമില്ല. നിലംപൊത്തിയ നെല്ല് പാടത്ത് ഉപേക്ഷിക്കാനേ കര്‍ഷകര്‍ക്ക് കഴിയൂ. ചിലയിടങ്ങളില്‍ ഈ നെല്ല് കിളിര്‍ത്തു തുടങ്ങിയിട്ടുണ്ട്. പ്രദേശത്തെ നൂറ് ഏക്കറിലേറെ പാടങ്ങളില്‍ കൃഷിനാശമുണ്ട്. കഴിഞ്ഞ പുഞ്ചക്കൊയ്ത്തിന് മില്ലുകാര്‍ക്ക് 30 കിലോവരെ താര കൊടുക്കേണ്ടിവന്ന കര്‍ഷകര്‍ക്ക് വിരിപ്പുകൊയ്ത്തും ഭീമമായ നഷ്ടത്തില്‍ കലാശിച്ചു. അപ്പര്‍ കുട്ടനാട്ടില്‍ നവംബര്‍ പകുതിയോടെ കൊയ്ത്ത് തുടങ്ങാന്‍ പാകത്തില്‍ നെല്ല് വിളവായി വരുമ്പോഴാണ് മഴക്കെടുതി. തുലാമഴ ശക്തിപ്പെടുംതോറും കര്‍ഷകര്‍ക്ക് ആധിയും ആശങ്കയും വര്‍ധിക്കുകയാണ്. കഴിഞ്ഞ പുഞ്ചനെല്ല് വിറ്റ് ആറു മാസം പിന്നിടുമ്പോഴും സപ്ലൈകോയില്‍നിന്ന് പണം ലഭിക്കാത്ത കര്‍ഷകര്‍ ഏറെപ്പേരാണ്.

ഇടവട്ടത്ത് കിണർ ഇടിഞ്ഞുതാഴ്ന്നു

മറവൻതുരുത്ത്: മറവൻതുരുത്ത് ഇടവട്ടത്ത് കിണർ ഇടിഞ്ഞുതാണു. ഇടവട്ടം ചിറേക്കടവിൽ തൈപ്പടവിൽ ടി.എസ്. മധുവിന്‍റെ കിണറാണ് ഇടിഞ്ഞുതാഴ്ന്നത്. രണ്ടടി ഉയരമുള്ള ആൾമറയും ഒരടി വീതമുള്ള 12 റിംഗുകളും പൂർണമായി താഴ്ന്നുപോയ സ്ഥിതിയിലാണ്. കൂലിപ്പണിക്കാരനായ മധു ഇന്നലെ രാവിലെ എഴുന്നേറ്റു പുറത്തിറങ്ങിയപ്പോഴാണ് കിണർ താഴ്ന്നത് ശ്രദ്ധയിൽപ്പെട്ടത്. തിങ്കളാഴ്ച രാത്രി ശക്‌തമായ മഴയുണ്ടായിരുന്നതിനാൽ പുറത്തുനിന്നു ശബ്ദമൊന്നും കേട്ടിരുന്നില്ലെന്നും മധു പറഞ്ഞു. കനത്ത മഴയെത്തുടർന്ന് വെള്ളം കെട്ടിനിന്ന് മണ്ണിന് ഇളക്കം തട്ടിയാണ് കിണർ താണുപോയതെന്നാണ് കരുതുന്നത്.

തുലാവർഷം കനത്തു : 1,200 ഏക്കർ നെൽക്കൃഷി ഭീഷണിയിൽ

തലയോലപ്പറമ്പ്: തുലാവർഷം ശക്തമായതിനെത്തുടർന്ന് തലയോലപ്പറമ്പ് കൃഷിഭവൻ പരിധിയിൽ വരുന്ന 1200 ഏക്കർ നെൽക്കൃഷി വെള്ളപ്പൊക്ക ഭീഷണിയിൽ. പുഞ്ചക്കൃഷിയുടെ ഭാഗമായി വിതച്ച പാടശേഖരങ്ങളും വിതയ്ക്ക് നിലമൊരുക്കിയ പാടശേഖരങ്ങളും തുലാവർഷക്കെടുതിയുടെ പിടിയിലമരുകയാണ്. മഴയെത്തുടർന്ന് മൂവാറ്റുപുഴയാറിലെ ജലനിരപ്പ് ഉയർന്നതോടെ പുത്തൻതോട് -കരിയാർ തോട് കരകവിഞ്ഞൊഴുകി പാടശേഖരങ്ങളിൽ വെള്ളംകയറി. കൃഷിനാശമൊഴിവാക്കാൻ അടിയം - താഴപ്പള്ളി ഷട്ടർ ഉടൻ അടയ്ക്കണമെന്ന് കർഷകർ ആവശ്യപ്പെട്ടു. പായലും പുല്ലും വളർന്ന് നീരൊഴുക്ക് നിലച്ചു കരിയാറുമായി ബന്ധപ്പെട്ട് ഒഴുകിയിരുന്ന പുത്തൻതോട്ടിൽ പായലും പുല്ലും പിടിച്ച് നീരൊഴുക്ക് തടസപ്പെട്ടതിനാൽ പെയ്ത്തുവെള്ളം ഒഴുകിപ്പോകാതെ പാടശേഖരങ്ങളിലേക്ക് ഇരച്ചുകയറി. മോട്ടോർ തറകളും വെള്ളംകയറി മുങ്ങിയതോടെ മോട്ടോർ പ്രവർത്തിപ്പിക്കാനും കഴിയുന്നില്ല . മഴയും ഇടിമിന്നലും കാരണം വൈദ്യുതിയും തടസപ്പെടുന്നത് കർഷകരെ ആശങ്കയിലാക്കുകയാണ് . കൃഷി വകുപ്പും പഞ്ചായത്ത് അധികൃതരും അടിയം-താഴപ്പള്ളി ഷട്ടർ അടയ്ക്കുന്നതിന് നടപടി സ്വീകരിക്കണമെന്നു കോലത്താർ പാടശേഖരസമിതി ഭാരവാഹികളായ സാബു ജോർജ് മംഗലത്ത്, വി.കെ. ശശിധരൻ വാളവേലി, സി.ഡി. ദിനേശ് തയ്യിൽ തുടങ്ങിയവർ ആവശ്യപ്പെട്ടു.

വയോജനങ്ങൾക്കൊപ്പം ഷെഫ്സ് ഡേ

കുമരകം: ഇന്‍റർനാഷണൽ ഷെഫ്സ് ഡേ ഓർഫനേജിലെ അന്തേവാസികൾക്കൊപ്പം ആഘോഷിച്ചു. ദി സുരി കുമരകം കേരള റിസോർട്ട് ആൻഡ് സ്‌പായിലെ ജീവനക്കാരും ഷെഫുമാരുമാണ് ഇന്‍റർനാഷണൽ ഷെഫ്സ് ഡേ-2025 വേറിട്ട മാതൃകയായി ആഘോഷിച്ചത്. ഫുഡ് എക്സ്പ്ലോർസ് എന്ന തീമിനെ ആസ്പദമാക്കിയായിരുന്നു പരിപാടി. ഷെഫ്മാർ കുമരകം സംരക്ഷ ഓർഫനേജ് സന്ദർശിക്കുകയും അന്തേവാസികളോടൊപ്പം ദിവസം മുഴുവൻ ചെലവഴിക്കുകയും ചെയ്തു. ഷെഫുമാർ ഓർഫനേജിന്‍റെ ചുറ്റുമതിൽ പെയിന്‍റ് ചെയ്തു മനോഹരമാക്കി. ഇത് ഷെഫുമാരുടെ കലാത്മക മികവും ടീം സ്പിരിറ്റും തെളിയിച്ചു. കലയും കരുണയും ചേർന്ന ദിനത്തിൽ ഷെഫുമാർ അവതരിപ്പിച്ച നൃത്ത-സംഗീത പരിപാടികൾ അന്തേവാസികളുടെ ഹൃദയങ്ങളിൽ സന്തോഷത്തിന്‍റെ വെളിച്ചം പകർന്നു. ഷെഫുമാർ തയാറാക്കിയ രുചികരമായ വിഭവങ്ങൾ വിളമ്പിയതോടെ ആഘോഷം പൂർണതയിലെത്തി. പാചകത്തിന്‍റെ രുചിയും ഹൃദയത്തിന്‍റെ താപവും ഒരുമിച്ച് നിറഞ്ഞതായിരുന്നു വൃദ്ധസദനത്തിലെ ദിനാഘോഷം. ജനറൽ മാനേജർ ശരത് വത്സരാജ്. എച്ച്ആർ ഹെഡ് വി.ആർ. ഹരികൃഷ്ണൻ, എക്സിക്യൂട്ടീവ് ഷെഫ് ബോബൻ തോമസ് എന്നിവരുടെ നേതൃത്വത്തിലായിരുന്നു ഷെഫേഴ്സ് ദിനാഘോഷം.

പാമ്പാടിക്കാര്‍ക്ക് ഇനി ജിം സൗകര്യങ്ങള്‍ സൗജന്യം

പാമ്പാടി: പാമ്പാടി ബ്ലോക്ക് പഞ്ചായത്ത് വികസന പദ്ധതിയില്‍ ഉള്‍പ്പെടുത്തി സൗത്ത് പാമ്പാടി സഹൃദയ ഗ്രന്ഥശാലയ്ക്ക് അനുവദിച്ച ഓപ്പണ്‍ ജിം കുട്ടികളും വനിതകളും അടങ്ങുന്ന കായികപ്രേമികളുടെ സാനിധ്യത്തില്‍ എംജി സര്‍വകലാശാല സിന്‍ഡിക്കേറ്റംഗം റെജി സക്കറിയ നാടിനു സമര്‍പ്പിച്ചു. ഗ്രന്ഥശാല പ്രസിഡന്‍റും ബ്ലോക്ക് പഞ്ചായത്തംഗവുമായ സി.എം. മാത്യു അധ്യക്ഷത വഹിച്ചു. കാപ്‌കോസ് ചെയര്‍മാന്‍ കെ.എം. രാധാകൃഷ്ണന്‍, പാമ്പാടി സര്‍വീസ് സഹകരണ ബാങ്ക് പ്രസിഡന്‍റ് വി.എം. പ്രദീപ്, പഞ്ചായത്ത് പ്രസിഡന്‍റ് ഡാലി റോയ്, ബ്ലോക്ക് പഞ്ചായത്തംഗങ്ങളായ മറിയാമ്മ ഏബ്രഹാം, ടി.എം. ജോര്‍ജ്, സെന്‍റ് തോമസ് ഹൈസ്‌കൂള്‍ മാനേജര്‍ മാത്യു സി. വര്‍ഗീസ്, ജോജോ സാമുവല്‍, സാജന്‍ സാമുവല്‍, എ.ആര്‍. ഉണ്ണികൃഷ്ണന്‍, സാബു പാത്തിങ്കല്‍, സന്ധ്യാ രാജേഷ്, കെ.കെ. തങ്കപ്പന്‍, സുനിത ദീപു, പി.എം. വര്‍ഗീസ്, ഏലിയാസ് കെ. ഏബ്രഹാം, ജേക്കബ് എം. ഏബ്രഹാം, കെ.പി. ബെന്നിമോന്‍, ഗീതാ അജയ്, ലൈലാ രാജു എന്നിവര്‍ പ്രസംഗിച്ചു.

എല്‍ഡിഎഫ് വിടാന്‍ ആഗ്രഹിക്കുന്നെങ്കിൽ അവർ പറയട്ടെ: മോൻസ്

കോട്ടയം: എല്‍ഡിഎഫ് മുന്നണി വിടാന്‍ കേരള കോണ്‍ഗ്രസ് -എം ആഗ്രഹിക്കുന്നുണ്ടെങ്കില്‍ അവര്‍തന്നെ പറയട്ടെന്നു കേരള കോണ്‍ഗ്രസ് എക്‌സിക്യൂട്ടീവ് ചെയര്‍മാന്‍ മോന്‍സ് ജോസഫ് എംഎല്‍എ. ഇക്കാര്യം കേരള കോണ്‍ഗ്രസ്-എം പറഞ്ഞാല്‍ യുഡിഎഫ് ചര്‍ച്ച ചെയ്യും. കേരള കോണ്‍ഗ്രസ് ഇക്കാര്യത്തില്‍ ഗുണത്തിനോ ദോഷത്തിനോ ഇല്ലെന്നും മോന്‍സ് പറഞ്ഞു. ഇക്കാര്യത്തില്‍ യുഡിഎഫ് കണ്‍വീനര്‍ അടൂര്‍ പ്രകാശ് വ്യക്തിപരമായ അഭിപ്രായം പറഞ്ഞതാണ്. കേരള കോണ്‍ഗ്രസുകളുടെ യോജിപ്പിനെക്കുറിച്ചു യുഡിഎഫ് ഒരുഘട്ടത്തിലും ചര്‍ച്ച ചെയ്തിട്ടില്ല. ഭിന്നശേഷി അധ്യാപക നിയമന വിഷയം സര്‍ക്കാരിനു പരിഹരിക്കാന്‍ കഴിഞ്ഞിട്ടില്ല. ഇക്കാര്യത്തില്‍ സുപ്രീംകോടതിയെ ബോധ്യപ്പെടുത്തി സര്‍ക്കാര്‍ പരിഹാരത്തിനു ശ്രമിക്കുമെന്നാണു വിദ്യാഭ്യാസ മന്ത്രി പറഞ്ഞത്. കാര്‍ഷിക മേഖലയെ രക്ഷപ്പെടുത്താന്‍ കേന്ദ്രവും സംസ്ഥാനവും സഹായം ചെയ്യുന്നില്ല. നെല്ല് സംഭരിക്കുന്ന പണം സമയത്ത് കൊടുക്കാന്‍ കഴിയുന്നില്ല. വനം-വന്യജീവി പ്രശ്‌നത്തില്‍ കേന്ദ്രവും സംസ്ഥാനവും പരസ്പരം കുറ്റപ്പെടുത്തുകയാണ്. കടുത്തുരുത്തി മണ്ഡലത്തിലെ വികസന പ്രവർത്തനങ്ങളുടെ ധവളപത്രം പുറത്തിറക്കി വിമര്‍ശകരെ സംവാദത്തിനു ക്ഷണിക്കുകയാണെന്നും മോന്‍സ് പറഞ്ഞു.

അയർക്കുന്നം മോഷണം: പ്രതിയെക്കുറിച്ച് സൂചന ലഭിച്ചതായി പോലീസ്

അയർക്കുന്നം: വീടിനുള്ളിലെ അലമാര തകർത്ത് 12പവൻ സ്വർണവും 28,000 രൂപയും കവർന്ന സംഭവത്തിൽ പ്രതിയെക്കുറിച്ച് സൂചന ലഭിച്ചതായി അയർക്കുന്നം പോലീസ്. വിവിധ ഭാഗങ്ങളിലെ സിസിടിവികൾ കേന്ദ്രീകരിച്ചു നടത്തിയ അന്വേഷണത്തിൽ ഒരാളാണ് കവർച്ച നടത്തിയതെന്ന സൂചന ലഭിച്ചതായി എസ്എച്ച്ഒ അനൂപ് ജോസ് പറഞ്ഞു. ഞായറാഴ്ചയായിരുന്നു സംഭവം. അയർക്കുന്നം കല്ലിട്ടനട ഭാഗത്ത് പോളയ്ക്കൽ ബെന്നി ചാക്കോയുടെ വീട്ടിലായിരുന്നു മോഷണം. പാലായിലെ സ്വകാര്യ ആശുപത്രിയിൽ ജോലിചെയ്യുന്ന ബെന്നിയുടെ മകൾ അനീറ്റ വീട്ടിലെത്തിയപ്പോഴാണ് വീടിന്‍റെ പിൻവാതിൽ തകർത്ത് മോഷണം നടന്നതായി അറിഞ്ഞത്. തുടർന്ന് അയർക്കുന്നം പോലീസിൽ പരാതി നൽകിയിരുന്നു.

എക്‌സലന്‍ഷിയ-2025

കോട്ടയം: കാണക്കാരി സിഎസ്‌ഐ കോളജ് ഫോര്‍ ലീഗല്‍ സ്റ്റഡീസിന്‍റെ ബിരുദദാനവും കോഴ്സ് കംപ്ലീഷന്‍ ചടങ്ങും “എക്‌സലന്‍ഷിയ-2025’’ കോട്ടയം സിഎസ്‌ഐ റിട്രീറ്റ് സെന്‍ററില്‍ സംഘടിപ്പിച്ചു. എംജി സര്‍വകലാശാലാ രജിസ്ട്രാര്‍ ഡോ. ബിസ്മി ഗോപാലകൃഷ്ണന്‍ ഉദ്ഘാടനം ചെയ്തു. കോഴ്‌സ് പഠനം പൂര്‍ത്തിയാക്കിയവര്‍ക്കുള്ള സര്‍ട്ടിഫിക്കറ്റുകള്‍ സിക്കിം ഹൈക്കോടതി മുന്‍ ചീഫ് ജസ്റ്റീസ് പയസ് സി. കുര്യാക്കോസ് വിതരണം ചെയ്തു. സിഎസ്‌ഐ മധ്യ കേരള മഹാ ഇടവക ബിഷപ് ഡോ. മലയില്‍ സാബു കോശി ചെറിയാന്‍ അധ്യക്ഷത വഹിച്ചു. പ്രിന്‍സിപ്പല്‍ ഡോ. ജോര്‍ജ് ജോസഫ്, ബര്‍സാര്‍ കോശി ഏബ്രഹാം, മഹായിടവക രജിസ്ട്രാര്‍ അഡ്വ. ഷീബ തരകന്‍, വൈസ് പ്രിന്‍സിപ്പല്‍ ഡോ. ജയ്‌സി കരിങ്ങാട്ടില്‍, എ. ഐശ്വര്യ, മരിയ ജോബി എന്നിവര്‍ പ്രസംഗിച്ചു. പഠനം പൂര്‍ത്തിയാക്കിയ 114 വിദ്യാര്‍ഥികള്‍ക്ക് സര്‍ട്ടിഫിക്കറ്റുകള്‍ വിതരണം ചെയ്തു.

ഓർമ ഉണർത്തൽ സംഗമം

കുമരകം: കുമരകം വടക്കുംഭാഗം സര്‍വീസ് സഹകരണ ബാങ്ക് 1070ന്‍റെ ശതാബ്ദി ആഘോഷങ്ങളുടെ ഭാഗമായി ബാങ്കില്‍ സേവനം ചെയ്ത മുന്‍കാല പ്രസിഡന്‍റുമാര്‍, ഭരണസമിതിയംഗങ്ങള്‍, ജീവനക്കാര്‍, സഹകരണ വകുപ്പ് ഉദ്യോഗസ്ഥര്‍ എന്നിവരുടെയും നിലവിലുള്ള സഹകരണ വകുപ്പ് ഉദ്യോഗസ്ഥര്‍, ഭരണസമിതിയംഗങ്ങള്‍, ജീവനക്കാര്‍ എന്നിവരുടെയും ഓര്‍മ ഉണര്‍ത്തല്‍ സംഗമം നടത്തി. ബാങ്ക് പ്രസിഡന്‍റ് കെ.ജെ. കുഞ്ഞുമോന്‍ കരീത്ര അധ്യക്ഷത വഹിച്ചു. സംസ്ഥാന സഹകരണ ഇലക്‌ഷന്‍ കമ്മീഷന്‍ അംഗം ബിനോയ് എം. കുമാര്‍ ഉദ്ഘാടനം ചെയ്തു. സഹകരണ വകുപ്പ് ജോയിന്‍റ് ഡയറക്ടര്‍ ജയമ്മ പോള്‍, ഡെപ്യൂട്ടി രജിസ്ട്രാര്‍ കെ.സി. വിജയകുമാര്‍, മുന്‍ സെക്രട്ടറി ടി.ജെ. മാത്യു, ജനറല്‍ കണ്‍വീനര്‍ ഫിലിപ്പ് സ്‌കറിയ പെരുമ്പളത്തുശേരില്‍, സെക്രട്ടറി കെ.പി. മിനിമോള്‍ എന്നിവര്‍ പ്രസംഗിച്ചു.

നിർത്തിയിട്ട ലോറിയിൽ ഇടിച്ച് നിയന്ത്രണംവിട്ട കാർ ബൈക്കിലിടിച്ചു; മൂന്നു പേർക്ക് പരിക്ക്

ഏറ്റുമാനൂർ: നിർത്തിയിട്ടിരുന്ന ലോറിയിൽ ഇടിച്ചു നിയന്ത്രണംവിട്ട കാർ ബൈക്കിലിടിച്ച് മൂന്നുപേർക്ക് പരിക്ക്. ഇന്നലെ രാവിലെ ഒമ്പതിനു പട്ടിത്താനം-മണർകാട് ബൈപാസ് റോഡിൽ വടക്കേനട ഭാഗത്ത് ഉണ്ടായ അപകടത്തിൽ ബൈക്ക് യാത്രക്കാരൻ പട്ടിത്താനം സ്വദേശി അനന്തു (26)വിനും കാർ യാത്രക്കാരായ തോട്ടയ്ക്കാട് സ്വദേശി സന്തോഷ് (49), ഭാര്യ പ്രതിഭ (45) എന്നിവർക്കുമാണ് പരിക്കേറ്റത്. പട്ടിത്താനം ഭാഗത്തേക്ക് പോയ കാർ ബൈപാസ് റോഡരികിൽ പാർക്ക് ചെയ്തിരുന്ന നാഷണൽ പെർമിറ്റ് ലോറിയിൽ ഇടിച്ച് നിയന്ത്രണം നഷ്ടപ്പെട്ട് പാറകണ്ടം ഭാഗത്തേക്ക് വരികയായിരുന്ന ബൈക്കിൽ ഇടിക്കുകയായിരുന്നു. ഇടിയുടെ ആഘാതത്തിൽ അനന്തു റോഡിൽ തെറിച്ചു വീണു. സ്വകാര്യ സ്ഥാപനത്തിൽ അക്കൗണ്ടന്‍റായ അനന്തു ജോലിസ്ഥലത്തേക്കു പോകുകയായിരുന്നു. മൂന്നു പേരെയും മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ഏറ്റുമാനൂർ പോലീസ് മേൽനടപടികൾ സ്വീകരിച്ചു. ഏറ്റുമാനൂർ ബൈപാസ് റോഡിൽ അപകടത്തിൽപ്പെട്ട കാറും ബൈക്കും.

കത്തോലിക്കാ കോൺഗ്രസ് അവകാശ സംരക്ഷണയാത്ര ഇന്ന് ഏറ്റുമാനൂരിൽ

ഏറ്റുമാനൂർ: കത്തോലിക്കാ കോൺഗ്രസ് ഗ്ലോബൽ സമിതിയുടെ നേതൃത്വത്തിൽ സമുദായ ശക്തീകരണം രാഷ്‌ട്ര പുരോഗതിക്ക്, നീതി ഔദാര്യമല്ല അവകാശമാണ് എന്നീ മുദ്രാവാക്യങ്ങൾ ഉയർത്തി. 13ന് കാസർഗോഡുനിന്നു കത്തോലിക്കാ കോൺഗ്രസ് ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറമ്പിലിന്‍റെ നേതൃത്വത്തിൽ ആരംഭിച്ച അവകാശ സംരക്ഷണ യാത്രയ്ക്ക് ഇന്ന് ഏറ്റുമാനൂരിൽ സ്വീകരണം നൽകും. ചങ്ങനാശേരി അതിരൂപതയിലെ ആദ്യ സ്വീകരണ കേന്ദ്രമാണ് ഏറ്റുമാനൂർ. പാലായിൽനിന്ന് രാവിലെ 8.45ന് ഏറ്റുമാനൂരിൽ എത്തിച്ചേരുന്ന അവകാശ സംരക്ഷണ യാത്രയെ പാലാ റോഡിൽനിന്ന് സ്വീകരിച്ച് കുരിശുപള്ളി ജംഗ്ഷനിലെ സമ്മേളന വേദിയിലേക്ക് ആനയിക്കും. തുടർന്നു നടക്കുന്ന സ്വീകരണ സമ്മേളനം ചങ്ങനാശേരി അതിരൂപത പ്രോട്ടോ സിഞ്ചെല്ലൂസ് മോൺ. ആന്‍റണി ഏത്തയ്ക്കാട്ട് ഉദ്ഘാടനം ചെയ്യും. കത്തോലിക്കാ കോൺഗ്രസ് അതിരൂപത പ്രസിഡന്‍റ് ബിജു സെബാസ്റ്റ്യൻ പടിഞ്ഞാറേവീട്ടിൽ അധ്യക്ഷത വഹിക്കും. അതിരമ്പുഴ ഫൊറോനാ വികാരി ഫാ. മാത്യു പടിഞ്ഞാറേക്കുറ്റ് മുഖ്യസന്ദേശവും അതിരൂപതാ ഡയറക്ടർ റവ.ഡോ. സാവിയോ മാനാട്ട് ആമുഖ സന്ദേശവും നൽകും. അതിരൂപതാ ജനറൽ സെക്രട്ടറി ബിനു ഡൊമിനിക് നടുവിലേഴം, ഫൊറോന ഡയറക്ടർ ഫാ. ജോസഫ് ആലുങ്കൽ, ഏറ്റുമാനൂർ ക്രിസ്തുരാജ പള്ളി വികാരി ഫാ. തോമസ് കുത്തുകല്ലുങ്കൽ, സഹവികാരി ഫാ. ജേക്കബ് ചക്കാത്ര, അതിരൂപതാ ട്രഷറർ ജോസ് ജോൺ വെങ്ങാന്തറ, ഭാരവാഹികളായ സെബാസ്റ്റ്യൻ പുല്ലാട്ടുകാല, ജോയി പാറപ്പുറം, ബിജു തുളിശേരിൽ, ജോബി ചൂരക്കുളം എന്നിവർ പ്രസംഗിക്കും. ജാഥാ ക്യാപ്റ്റൻ പ്രഫ. രാജീവ് കൊച്ചുപറമ്പിൽ മറുപടിപ്രസംഗം നടത്തും. ജാഥ സ്ഥിരാംഗങ്ങളായ ഫാ. ഫിലിപ്പ് കവിയിൽ, ഡോ. ജോസ്കുട്ടി ജെ. ഒഴുകയിൽ, ടോണി പുഞ്ചക്കുന്നേൽ, രാജേഷ് ജോൺ, ട്രീസാ ലിസ് സെബാസ്റ്റ്യൻ, ബെന്നി ആന്‍റണി, ജോർജ് കോയിക്കൽ, മനു ജെ. വരാപ്പള്ളി എന്നിവർ വിഷയമവതരിപ്പിച്ച് പ്രസംഗിക്കും .

മെഡിക്കൽ കോളജ് ഓട്ടോ സ്റ്റാൻഡിനു സമീപം മരങ്ങൾ ഉണക്കാൻ മരുന്നൊഴിച്ചെന്നു പരാതി

ഗാന്ധിനഗർ: മെഡിക്കൽ കോളജ് ഓട്ടോ സ്റ്റാൻഡിന് സമീപം നിന്ന മരങ്ങളിൽ സാമൂഹ്യവിരുദ്ധർ മരുന്നൊഴിച്ച് ഉണക്കാൻ ശ്രമിച്ചതായി പരാതി. ഓട്ടോ സ്റ്റാൻഡിന് സമീപംനിന്ന ആര്യവേപ്പ്, പ്ലാവ്, മാവ് തുടങ്ങിയ മരങ്ങളിൽ വാക്കത്തിയോ മറ്റായുധങ്ങൾകൊണ്ടോ വെട്ടി മുറിവുണ്ടാക്കി അതിലേക്കു മരം ഉണക്കുന്നതിനുള്ള മരുന്ന് ഒഴിച്ചതായാണ് പരാതി ഉയർന്നിരിക്കുന്നത്. സംഭവത്തെ തുടർന്ന് മരങ്ങൾ കരിഞ്ഞു തുടങ്ങി. പ്രദേശത്ത് തണൽ വിരിച്ച് നിന്ന മരങ്ങളാണ് സാമൂഹ്യവിരുദ്ധരുടെ പ്രവൃത്തി മൂലം കരിഞ്ഞു തുടങ്ങിയത്. സംഭവത്തിൽ പ്രതിഷേധം ശക്തമാണ്. പഞ്ചായത്ത് അധികാരികൾ സ്ഥലത്തെത്തി മരം പരിശോധിച്ച് നടപടി സ്വീകരിക്കണമെന്ന ആവശ്യമുന്നയിച്ചിട്ടുണ്ട്. മാസങ്ങൾക്കു മുമ്പ് കുറുപ്പന്തറയിലും റോഡ് അരികിൽ നിന്ന മരം ഉണക്കുന്നതിന് സാമൂഹ്യവിരുദ്ധർ മരുന്നു പ്രയോഗം നടത്തിയിരുന്നു. അന്ന് പരിസ്ഥിതി പ്രവർത്തകരും സാമൂഹ്യ പ്രവർത്തകരും സംയുക്തമായി വലിയ പ്രതിഷേധം സംഘടിപ്പിച്ചിരുന്നു.

പ്ലാറ്റിനം ജൂബിലി ആഘോഷം നാളെ; രാഷ്‌ട്രപതി ദ്രൗപദി മുര്‍മു മുഖ്യാതിഥി

കോട്ടയം: അനേകരുടെ കഠിനാധ്വാനത്തിലും കാത്തിരിപ്പിനുമൊടുവിലാണ് സെന്‍റ് തോമസ് കോളജ് പാലായ്ക്ക് സ്വന്തമായത്. 1950 ഓഗസ്റ്റ് ഏഴിന് കോട്ടയം രൂപതാധ്യക്ഷനും മലബാര്‍ ബിഷപ്‌സ് കോണ്‍ഫറന്‍സ് സെക്രട്ടറിയുമായിരുന്ന മാര്‍ തോമസ് തറയില്‍ കോളജിന്‍റെ ഉദ്ഘാടനം നിര്‍വഹിച്ചു. ചങ്ങനാശേരി എസ്ബി, ആലുവ യുസി കോളജുകള്‍ മാത്രമായിരുന്നു അക്കാലത്തെ ഉന്നത കലാലയങ്ങള്‍. ഈ സാഹചര്യത്തിലാണ് പാലാ സെന്‍റ് തോമസ് ഹൈസ്‌കൂളിനെ ഒരു സെക്കൻഡ് ഗ്രേഡ് കോളജായി ഉയര്‍ത്തണമെന്ന ആശയം ഉദിക്കുന്നത്. 1937 ല്‍ ആരംഭിച്ച ഉദ്യമം ലക്ഷ്യത്തിലെത്തിയത് ഭാരതം സ്വതന്ത്രമായതിനു ശേഷമാണ്. 1949 ഡിസംബര്‍ ആറിന് കോളജിന് താത്കാലിക അനുമതി ലഭിക്കുകയും 1950 ഏപ്രില്‍ 16ന് മദ്രാസ് ആര്‍ച്ച് ബിഷപ്പ് റവ.ഡോ. മത്യാസ് ശിലാസ്ഥാപനം നിര്‍വഹിക്കുകയും ചെയ്തു. തുടര്‍ന്ന് ഇന്‍റര്‍മീഡിയറ്റ് ആരംഭിക്കാന്‍ അനുവാദം ലഭിച്ചു. പാലാ സെന്‍റ് തോമസ് ഹൈസ്‌കൂളിലെ ഒരു മുറിയായിരുന്നു കോളജ് ഓഫീസായി പ്രവര്‍ത്തിച്ചിരുന്നത്. ജവഹര്‍ലാല്‍ നെഹ്‌റുവിന്‍റെ സാമ്പത്തികോപദേഷ്ടാവായിരുന്ന ഡോ. പി.ജെ. തോമസായിരുന്നു പ്രഥമ പ്രിന്‍സിപ്പല്‍. പ്രഫ. വി.ജെ. ജോസഫ് വൈസ്പ്രിന്‍സിപ്പലും. മുന്നൂറിലധികം വിദ്യാര്‍ഥികളും 14 അധ്യാപകരും ഏതാനും അനധ്യാപകരുമാണ് ആദ്യ ബാച്ചിലുണ്ടായിരുന്നത്. അതേദിവസം തന്നെയാണ് പാലാ രൂപത സ്ഥാപിക്കപ്പെട്ടതും കോളജ് നിര്‍മാണ കമ്മിറ്റിക്ക് നേതൃത്വം നല്കിയിരുന്ന വയലില്‍ കളപ്പുര മാണിയച്ചന്‍ (മാര്‍ സെബാസ്റ്റ്യന്‍ വയലില്‍) പ്രഥമ മെത്രാനായി പ്രഖ്യാപിക്കപ്പെട്ടതും. 1952-53 അധ്യയനവര്‍ഷം ഇക്കണോമിക്‌സ്, മാത്തമാറ്റിക്‌സ് ഡിഗ്രി ക്ലാസുകള്‍ ആരംഭിച്ചപ്പോള്‍ 60 വിദ്യാര്‍ഥികളാണ് ഉണ്ടായിരുന്നത്. ഇന്‍റര്‍ മീഡിയറ്റില്‍ 612 വിദ്യാര്‍ഥികളും. 1952 മുതല്‍ 1968 വരെ പ്രിന്‍സിപ്പലായിരുന്ന മോണ്‍. ജോസഫ് കുരീത്തടം കോളജിനെ ഉയര്‍ച്ചയിലേക്ക് നയിച്ചു. വിവിധ ബ്ലോക്കുകളും ഓഡിറ്റോറിയവും ക്രിസ്തുരാജ് ഹോസ്റ്റലും ഫാത്തിമ ഹോസ്റ്റലും കാന്‍റീനും സ്റ്റാഫ് ക്വാര്‍ട്ടേഴ്‌സും നീന്തല്‍ക്കുളവും നിര്‍മിക്കപ്പെട്ടത് കുരീത്തടത്തിലച്ചന്‍റെ കാലത്താണ്. 10 ബിരുദ കോഴ്‌സുകളും ഒന്‍പത് ബിരുദാനന്തര ബിരുദ കോഴ്‌സുകളും അക്കാലത്ത് ആരംഭിച്ചു. 1971-72 ല്‍ 2502 വിദ്യാര്‍ഥികളും 139 അധ്യാപകരുമായി. 1976 ഫെബ്രുവരി 12ന് രജത ജൂബിലി ഉദ്ഘാടനം നിര്‍വഹിച്ചത് പ്രധാനമന്ത്രി ഇന്ദിര ഗാന്ധിയായിരുന്നു. 1999-2000 ല്‍ സുവര്‍ണ ജൂബിലി മേഘാലയ ഗവര്‍ണര്‍ എം.എം. ജേക്കബ് ഉദ്ഘാടനം ചെയ്തു. ഡോ. പി.ജെ തോമസ്, ഫാ. ജോസഫ് കുരീത്തടം, ഡോ. എന്‍.എം. തോമസ്, പ്രഫ. പി.എം. ചാക്കോ, ഫാ. ജോസഫ് വെള്ളാങ്കല്‍, ഫാ. ഈനാസ് ഒറ്റത്തെങ്ങുങ്കല്‍, ഫാ. ഫിലിപ്പ് ഞരളക്കാട്ട്, റവ.ഡോ. കുര്യന്‍ മറ്റം, റവ.ഡോ. മാത്യു മലേപ്പറമ്പില്‍, റവ.ഡോ. മാത്യു ജോണ്‍ കോക്കാട്ട്, ഡോ. കെ.കെ. ജോസ്, ഫാ. ജോസഫ് ഞാറക്കാട്ടില്‍, ഡോ. സണ്ണി ജോസഫ്, ഡോ. ജോയി ജോര്‍ജ്, ഡോ. ജയിംസ് ജോണ്‍ എന്നിവര്‍ക്കുശേഷം ഡോ. സിബി ജയിംസ് ഇപ്പോള്‍ പ്രിന്‍സിപ്പലായി സേവനമനുഷ്ഠിക്കുന്നു. പാലാ ബിഷപ് മാര്‍ ജോസഫ് കല്ലറങ്ങാട്ടാണ് രക്ഷാധികാരി. 15 യുജി, 16 പിജി പ്രോഗ്രാമുകളിലും 11 ഗവേഷണവിഭാഗങ്ങളിലുമായി ഇപ്പോള്‍ 2000ല്‍പ്പരം വിദ്യാര്‍ഥികളുണ്ട്. റവ.ഡോ. സാല്‍വിന്‍ കെ. തോമസ് വൈസ്പ്രിന്‍സിപ്പലായും ഫാ. മാത്യു ആലപ്പാട്ടുമേടയില്‍ ബര്‍സാറായും സേവനമനുഷ്ഠിക്കുന്നു. നിലവില്‍ പെണ്‍കുട്ടികള്‍ക്കും എല്ലാ കോഴ്‌സുകളിലും പ്രവേശനമുണ്ട്. നാക് സമിതിയുടെ എ പ്ലസ് പ്ലസ് അംഗീകാരവും ഓട്ടോണമസ് പദവിയും കരസ്ഥമാക്കിയതിന്‍റെ അഭിമാനത്തോടെയാണു കോളജില്‍ പ്ലാറ്റിനം ജൂബിലി ആഘോഷം.

ഒരിക്കലും മറക്കാത്ത സെന്‍റ് തോമസ് കാലം

1961 ജൂണിലാണ് ഞാന്‍ പാലാ സെന്‍റ് തോമസ് കോളജില്‍ പ്രീ യൂണിവേഴ്‌സിറ്റിക്ക് എത്തുന്നത്. വിശാലമായ പച്ച പുതച്ച കാമ്പസ്. ഗാംഭീര്യത്തോടെ മൂന്നുനില മെയിന്‍ ബില്‍ഡിംഗ്. ലാബുകള്‍, സ്വിമ്മിംഗ് പൂള്‍, അഞ്ചര ഏക്കര്‍ മൈതാനം. ഫുട്‌ബോള്‍, ഹോക്കി, ഷട്ടില്‍ കോര്‍ട്ടുകള്‍. മുന്നിലൂടെ കോട്ടയം-പൂഞ്ഞാര്‍ മെയിന്‍ റോഡ്. പിന്നില്‍ മീനച്ചിലാര്‍. മെയിന്‍ ബില്‍ഡിംഗിന്‍റെ ഇടതുവശത്തെ ലൈബ്രറി ബ്ലോക്കിലായിരുന്നു പ്രീ യൂണിവേഴ്‌സിറ്റി ക്ലാസ്. അതില്‍ ജി-ബാച്ചിലായിരുന്നു ഞാനും ജ്യേഷ്ഠന്‍ സക്കറിയാസും. അന്നു കോളജിലെത്തിയ കേരള സര്‍വകലാശാല വൈസ്ചാന്‍സലര്‍ ഡോ. കെ.സി.കെ.ഇ. രാജ, പ്രിന്‍സിപ്പല്‍ ഫാ. ജോസഫ് കുരീത്തടത്തിനൊപ്പം ഞങ്ങളുടെ ക്ലാസില്‍ വന്നു. അച്ചന്‍ എന്നെ വിശിഷ്ടാതിഥിക്കു പരിചയപ്പെടുത്തി. വൈസ് ചാന്‍സലര്‍ എന്നോടു രണ്ട് ചോദ്യങ്ങള്‍ ചോദിച്ചു. ഒന്ന് "കോടി' എന്നര്‍ഥം വരുന്ന ഇംഗ്ലീഷ് വാക്ക്. എനിക്ക് "ലാക്’ കഴിഞ്ഞ് ‘മില്യന്‍’ വരെ മാത്രമേ പറയാന്‍ കഴിഞ്ഞുള്ളൂ. "ക്രോര്‍’ എന്ന വാക്ക് "കോ’ എന്നു മുഴക്കത്തില്‍ അദ്ദേഹം തിരുത്തി ആവര്‍ത്തിക്കാന്‍ ആവശ്യപ്പെട്ടു. ഒന്നും മനസിലാകാതെ ഞാന്‍ ‘കോ’ എന്നു പ്രതിവചിച്ചു, വിസിക്കു തൃപ്തിയായി. മീനച്ചിലാറിന് കുറുകെ മുത്തോലി പാലം അക്കാലത്ത് പൂര്‍ത്തിയായിട്ടില്ല. അതിനാല്‍ കൊഴുവനാലില്‍ നിന്ന് ലൈന്‍ബസില്‍ മുത്തോലി കടവില്‍ ഇറങ്ങി വള്ളം കടന്ന് ഒരു കിലോമീറ്റര്‍ കാട്ടുവഴിയിലൂടെ കോളജിലേക്കു നടക്കും. ഒരു മാസത്തെ ക്ലേശ യാത്രയ്ക്കുശേഷം കോളജിനടുത്ത് വീട് വാടകയ്‌ക്കെടുത്തു പ്രീയൂണിവേഴ്‌സിറ്റി പൂര്‍ത്തിയാക്കി. വെള്ളപ്പൊക്കവും ആഘോഷം ഫീസ് കൊടുത്തായിരുന്നു പഠനം. യഥാസമയം ഫീസടച്ചില്ലെങ്കില്‍ മാസാന്ത്യം ഫൈന്‍ കൂട്ടി കൊടുക്കണം. അര രൂപ, മുക്കാല്‍ രൂപ, ഒരു രൂപ, ഒന്നര രൂപ പരമാവധി രണ്ട് രൂപ ആയിരുന്നു ഫൈന്‍. പ്രിന്‍സിപ്പല്‍, വൈസ്പ്രിന്‍സിപ്പല്‍, ബര്‍സാര്‍ ഇവരില്‍ ഒരാള്‍ക്കേ ഫൈന്‍ കുറയ്ക്കാനാവൂ. മൂന്നു പേരെയും ദൈന്യഭാവം കാണിച്ച് ഫൈന്‍ കുറയ്ക്കാനുള്ള ചിറ്റ് വാങ്ങും. അങ്ങനെ ഏറ്റം കുറഞ്ഞ ചിറ്റ് എടുത്ത് ഫീസിന്‍റെ കൂടെ കൊടുക്കും. മാര്‍ സെബാസ്റ്റ്യന്‍ വയലില്‍ പാലാ രൂപതാധ്യക്ഷനാകുംമുമ്പ് പാലാ സെന്‍റ് തോമസ് ഹൈസ്‌കൂള്‍ ഹെഡ്മാസ്റ്ററായിരിക്കെ രൂപീകരിച്ച കമ്മിറ്റിയുടെ നേതൃത്വത്തില്‍ 1950ലാണ് സെന്‍റ് തോമസ് കോളജ് സ്ഥാപിതമായത്. 1961ല്‍ പ്രധാന കെട്ടിടം കൂടാതെ മൂന്നുനില ലൈബ്രറി ബില്‍ഡിംഗ് 1962ല്‍ കേരള ഗവര്‍ണറായിരുന്ന വി.വി. ഗിരി ഉദ്ഘാടനം ചെയ്തു. ആ വര്‍ഷം കോളജ് ദിനാഘോഷത്തിനു മുഖ്യാതിഥി കേന്ദ്രമന്ത്രി പനമ്പള്ളി ഗോവിന്ദമേനോനായിരുന്നു. പണി തീരാറായ ഓഡിറ്റോറിയത്തിനു മുന്നില്‍ ഓടിട്ട നീളന്‍ കെട്ടിടത്തിലായിരുന്നു കാന്‍റീനും ബുക്ക് സ്റ്റാളും. താമസത്തിനു ക്രിസ്തുരാജ് ഹോസ്റ്റല്‍. മീനച്ചിലാര്‍ വര്‍ഷത്തില്‍ രണ്ടു മൂന്നു തവണ സമ്മാനിച്ചിരുന്ന വെള്ളപ്പൊക്കം ഞങ്ങളേറെ ആസ്വദിച്ചിരുന്നു. പ്രതിഭകളുടെ കാലം അറുപതുകളുടെ മധ്യത്തോടെ രാജ്യത്തെ മുന്‍നിര വോളിബോള്‍ ടീം എന്ന ഖ്യാതി സെന്‍റ് തോമസ് കോളജ് നേടി. 1966-68 കാലത്ത് ദേശീയ വോളിയിലെ ഒന്നാംസ്ഥാനം കുത്തകയാക്കിയിരുന്ന ഉത്തര്‍പ്രദേശ് പോലീസ് ടീമിനെ ഓള്‍ ഇന്ത്യാ മണര്‍കാട്ട് ടൂര്‍ണമെന്‍റില്‍ തകര്‍ത്ത് പാലാ സെന്‍റ് തോമസ് കോളജ് ട്രോഫിയില്‍ മുത്തമിട്ടത് മാധ്യമങ്ങള്‍ക്ക് ചാകരയായി. ജിമ്മി ജോര്‍ജ്, ജ്യേഷ്ഠന്‍ ജോസ് ജോര്‍ജ്, എസ്. ഗോപിനാഥ്, പി.ജെ. ജോസ്, എം.എ. ജോസഫ്, ജോര്‍ജ് മാത്യു തുടങ്ങിയവര്‍ അങ്ങനെ ദേശീയ-അന്തര്‍ദേശീയ താരങ്ങളായി. 1961-62 ലാണ് ഇംഗ്ലീഷ് സാഹിത്യത്തില്‍ ബിഎ ആരംഭിച്ചത്. 1962-63 രണ്ടാം ബാച്ചില്‍ എനിക്ക് പ്രവേശനം ലഭിച്ചു. 1965-ല്‍ എംഎ ആരംഭിച്ചപ്പോള്‍ കോഴ്‌സ് കോ-ഓര്‍ഡിനേറ്ററായി ഫാ. കുരീത്തടം കൊണ്ടുവന്നത് പ്രസിദ്ധ ഇംഗ്ലീഷ് പ്രഫസര്‍ ഡോ. എ. ശിവരാമ സുബ്രഹ്മണ്യ അയ്യരെയാണ്. ലണ്ടന്‍ യൂണിവേഴ്‌സിറ്റിയില്‍നിന്ന് ഇംഗ്ലീഷ് സാഹിത്യത്തില്‍ പിഎച്ച്ഡി നേടിയ ആദ്യ ഇന്ത്യക്കാരന്‍. ഞങ്ങളെ മോട്ടിവേറ്റ് ചെയ്യാന്‍ തന്‍റെ പൂര്‍വവിദ്യാര്‍ഥികളുടെ ലിസ്റ്റ് പലപ്പോഴും ഡോ. അയ്യര്‍ പറയുമായിരുന്നു. എന്നും ലിസ്റ്റ് ആരംഭിക്കുന്നത് "വണ്‍-കെ.ആര്‍. നാരായണന്‍’-ല്‍. പില്‍ക്കാലത്ത് ഇന്ത്യന്‍ പ്രസിഡന്‍റായ കെ.ആര്‍. നാരായണന്‍ അന്ന് ബര്‍മീസ് എംബസിയില്‍ ഫസ്റ്റ് സെക്രട്ടറി മാത്രമാണ്. ലിസ്റ്റില്‍ കേണല്‍ ഗോദവര്‍മരാജ, വൈസ് ചാന്‍സലര്‍ ഹബീബ് മുഹമ്മദ്, ഡോ. അയ്യപ്പപണിക്കര്‍, ഡോ. നരേന്ദ്രപ്രസാദ്, കെ.എം. ചാണ്ടി തുടങ്ങിയ സ്റ്റാര്‍സ്. ഞങ്ങളുടെ വകുപ്പ് അധ്യക്ഷനായിരുന്ന പ്രഫ. കെ.എം. ചാണ്ടി പില്‍ക്കാലത്ത് പോണ്ടിച്ചേരി, ഗുജറാത്ത്, മധ്യപ്രദേശ് സംസ്ഥാനങ്ങളില്‍ ഗവര്‍ണറായി. താരപ്രഭയിൽ‌ കോളജുകള്‍ അക്കാലത്ത് കലാലയങ്ങള്‍ത്തന്നെ ആയിരുന്നു. നാടകം, കഥാപ്രസംഗം, മിമിക്രി, മോണോ ആക്ട്, പ്രഭാഷണം തുടങ്ങിയവയ്ക്കായിരുന്നു മേല്‍സ്ഥാനം. ഏകാങ്ക നാടകങ്ങളും കുറവല്ലായിരുന്നു. കോളജ് യൂണിയന്‍, കാത്തലിക് സ്റ്റുഡന്‍റ്സ് യൂണിയന്‍, എന്‍സിസി, ഇംഗ്ലീഷ്-മലയാളം അസോസിയേഷനുകള്‍ തുടങ്ങിയവയുടെ ആഭിമുഖ്യത്തിലായിരുന്നു കലാപരിപാടികള്‍. 1967 ജനുവരി 17 മുതല്‍ 24 വരെ കോളജില്‍ നടത്തിയ "ഫെസ്റ്റിവല്‍ ഓഫ് ആര്‍ട്‌സ്' സംഭവമായിരുന്നു. അതിലെ അതിഥികളെക്കൂടി പറയാം. മുഹമ്മദ് റാഫി, പി.ബി. ശ്രീനിവാസ്, കെ.ജെ. യേശുദാസ്, എസ്. ജാനകി, സത്യന്‍, പ്രേം നസീര്‍, ഹിന്ദി ഹാസ്യതാരം ജോണി വിസ്‌കി തുടങ്ങിയവര്‍. കൂടാതെ മദ്രാസ് സിസ്റ്റേഴ്‌സിന്‍റെ ഡാന്‍സും കലാനിലയത്തിന്‍റെ നാലു ദിവസത്തെ നാടകവും. സെന്‍റ് തോമസിന്‍റെ ഖ്യാതിയായി അറിയപ്പെട്ടിരുന്നത് കാമ്പസിലെ മികച്ച അച്ചടക്കമായിരുന്നു. ഫാ. ജോസഫ് കുരീത്തടമായിരുന്നു ഈ സല്‍പേരിന്‍റെ മുഖ്യശില്പി. ഞാന്‍ പ്രീയൂണിവേഴ്‌സിറ്റിക്കു പഠിക്കുമ്പോള്‍ ഹിന്ദി, പൊളിറ്റിക്‌സ്, സ്റ്റാറ്റിസ്റ്റിക്‌സ്, ബോട്ടണി എന്നിവയായിരുന്നു പിജി കോഴ്‌സുകള്‍. 1964-ല്‍ കെമിസ്ട്രി, 1965-ല്‍ ഇംഗ്ലീഷ്, ഫിസിക്‌സ്, 66ല്‍ കണക്ക്, ഇക്കണോമിക്‌സ് പിജി കോഴ്‌സുകള്‍ ആരംഭിച്ചു. അക്കാലത്ത് ഏറ്റവുമധികം പിജി കോഴ്‌സുകളുണ്ടായിരുന്നത് കൊല്ലം എസ്എന്‍ കോളജിലായിരുന്നു. രണ്ടാം സ്ഥാനം പാലാ സെന്‍റ് തോമസിനും. ഡോ. സെബാസ്റ്റ്യന്‍ നരിവേലി

ഹെലികോപ്റ്ററുകളും ഡ്രോണുകളും പറത്തുന്നത് നിരോധിച്ചു

കോട്ടയം: രാഷ്‌ട്രപതി ദ്രൗപദി മുര്‍മുവിന്‍റെ സന്ദര്‍ശനത്തോടനുബന്ധിച്ച വ്യോമസുരക്ഷാ ക്രമീകരണങ്ങളുടെ ഭാഗമായി ജില്ലയിലെ വിവിധ കേന്ദ്രങ്ങളില്‍ നാളെ ഉച്ചയ്ക്കു 12 മുതല്‍ 24നു ഉച്ചയ്ക്ക് 12 വരെ ഹെലികോപ്റ്ററുകളും ഡ്രോണുകളും മൈക്രോലൈറ്റ് എയര്‍ക്രാഫ്റ്റുകളും യുഎവികളും പറത്തുന്നതിന് നിരോധം ഏര്‍പ്പെടുത്തി ജില്ലാ കളക്ടര്‍ ഉത്തരവായി. കോട്ടയം പോലീസ് പരേഡ് ഗ്രൗണ്ട്, പാലാ സെന്‍റ് തോമസ് കോളജ്, പാലാ മുനിസിപ്പല്‍ സ്റ്റേഡിയം, കോട്ടയം സിഎംഎസ് കോളജ് ഗ്രൗണ്ട്, കോട്ടയം നെഹ്‌റു സ്റ്റേഡിയം, കുമരകം താജ് ഹോട്ടല്‍ എന്നിവയുടെയും ജില്ലയിലെ മറ്റ് ഹെലിപ്പാഡുകളുടെയും സമീപ സ്ഥലങ്ങളുടെയും വ്യോമ മേഖലയിലാണ് നിരോധനം. വ്യോമസേനയ്ക്കും എസ്പിജിക്കും സംസ്ഥാന പോലീസിനും രാഷ്‌ട്രപതിയുടെ സന്ദര്‍ശനവുമായി ബന്ധപ്പെട്ട് ഔദ്യോഗികമായി നിയോഗിക്കപ്പെട്ടിട്ടുള്ള മറ്റ് ഏജന്‍സികള്‍ക്കും നിരോധനം ബാധകമല്ല. ഹെലികോപ്റ്ററുകളോ നിരോധന പരിധിയില്‍ വരുന്ന മറ്റ് ഉപകരണങ്ങളോ അടിയന്തര സാഹചര്യത്തില്‍ പറത്തേണ്ടതുണ്ടെങ്കില്‍ ജില്ലാ കളക്ടറുടെ മുന്‍കൂര്‍ അനുമതി വാങ്ങണം. ഉത്തരവ് ലംഘിക്കുന്നവര്‍ക്കെതിരേ നിയമ നടപടി സ്വീകരിക്കും.

ജെ.ബി. കോശി കമ്മീഷൻ റിപ്പോർട്ട് പുറത്തുവിടണം: മാർ പുളിക്കൽ

കാഞ്ഞിരപ്പള്ളി: ജെ.ബി. കോശി കമ്മീഷൻ റിപ്പോർട്ട് പുറത്തുവിടണമെന്നു കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ. കത്തോലിക്ക കോൺഗ്രസ് ഗ്ലോബൽ സമിതിയുടെ ആഭിമുഖ്യത്തിൽ നടത്തുന്ന അവകാശ സംരക്ഷണയാത്രയ്ക്കു കാഞ്ഞിരപ്പള്ളിയിൽ നൽകിയ സ്വീകരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. കേരള സമൂഹത്തിന്‍റെ വളർച്ചയ്ക്കും പുരോഗതിക്കും വേണ്ടി നിലപാട് സ്വീകരിച്ച്, വിദ്യാഭ്യാസ സാമൂഹിക സാംസ്കാരിക ജീവകാരുണ്യ മേഖലകളിൽ വലിയ സംഭാവനങ്ങൾ നൽകിയ ഈ സമുദായത്തിന്‍റെ പിന്നാക്കാവസ്ഥയെക്കുറിച്ചു കൃത്യമായി പഠിച്ചു പുറത്തുകൊണ്ടുവരേണ്ട റിപ്പോർട്ട് പൂഴ്ത്തിവച്ചിരിക്കുകയാണ്. എയ്ഡഡ് സ്കൂളുകളിലെ അധ്യാപകരുടെ കാര്യത്തിൽ എൻഎസ്എസിനു ലഭിച്ച അനുകൂലവിധി എല്ലാവർക്കും ബാധകമാണെന്നു പകൽപോലെ വ്യക്തമായിട്ടും തമസ്കരിക്കുന്നതു ശരിയല്ല. കുട്ടികളുടെ വിദ്യാഭ്യാസ അവകാശംകൂടിയാണ് നിഷേധിക്കപ്പെടുന്നത്. എന്തുകൊണ്ടാണ് സർക്കാർ പക്ഷപാതിത്വപരമായ നിലപാടുകൾ സ്വീകരിക്കുന്നതെന്ന ചോദ്യം പ്രസക്തം. ഇടപെടുന്നുവെന്നു വരുത്തിവച്ചിട്ട് കാര്യമില്ല. വിവേചനപരമായ നിലപാടാണ് ഇക്കാര്യത്തിൽ സർക്കാർ സ്വീകരിക്കുന്നത്. വന്യജീവിശല്യം പെരുകിയതിനാൽ അടിയന്തരമായി 1972ലെ വനം വന്യജീവി നിയമത്തിൽ മാറ്റം വരുത്താൻ കേന്ദ്ര- സംസ്ഥാന സർക്കാരുകൾ ഒരുമിച്ച് ഇടപ്പെടണം. റബറിന് കൃത്യമായ വില സ്ഥിരതയുണ്ടാകണമെന്നും 250 രൂപ തറവിലയായി മാറ്റണമെന്നും മാർ ജോസ് പുളിക്കൽ കൂട്ടിച്ചേർത്തു. നമ്മൾ കടുത്ത പ്രതിഷേധം ഉയർത്തിയപ്പോൾ അധ്യാപക നിയമനമായി ബന്ധപ്പെട്ട പ്രശ്നം തീർക്കാൻ മുഖ്യമന്ത്രി ഇടപെടൽ നടത്തിയത് അവകാശ സംരക്ഷണയാത്രയുടെ വിജയത്തിന്‍റെ ഒന്നാം ഘട്ടമാണെന്നു ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറന്പിൽ മറുപടി പ്രസംഗത്തിൽ പറഞ്ഞു. വിദ്യാഭ്യാസമന്ത്രിയുടെ പല പ്രസ്താവനകളും പ്രതിഷേധാർഹമാണെന്നും അദ്ദേഹം കൂട്ടിച്ചേർത്തു. കത്തോലിക്ക കോൺഗ്രസ് രൂപത പ്രസിഡന്‍റ് കെ.കെ. ബേബി കണ്ടത്തിൽ അധ്യക്ഷത വഹിച്ചു. രൂപത വികാരി ജനറാൾ റവ.ഡോ. സെബാസ്റ്റ്യൻ കൊല്ലംകുന്നേൽ ആമുഖ സന്ദേശവും ഗ്ലോബൽ ഡയറക്ടർ ഫാ. ഫിലിപ്പ് കവിയിൽ മുഖ്യപ്രഭാഷണവും നടത്തി. രൂപത ഡയറക്ടർ ഫാ. ജസ്റ്റിൻ മതിയത്ത്, ഗ്ലോബൽ ജനറൽ സെക്രട്ടറി ഡോ. ജോസുകുട്ടി ജെ. ഒഴുകയിൽ, ഗ്ലോബൽ വൈസ് പ്രസിഡന്‍റ് ജോമി കൊച്ചുപറമ്പിൽ, ഗ്ലോബൽ സമിതി അംഗം ടെസി ബിജു പാഴിയാങ്കൽ, രൂപത ജനറൽ സെക്രട്ടറി ജോസഫ് പണ്ടാരക്കളം, ജോർജ് കോയിക്കൽ തുടങ്ങിയവർ പ്രസംഗിച്ചു. ഭാരവാഹികളായ ഫിലിപ്പ് നിക്കോളാസ് പള്ളിവാതുക്കൽ, ജോജോ തെക്കുംചേരിക്കുന്നേൽ, ബിജു ശൗര്യാംകുഴി, സണ്ണിക്കുട്ടി അഴകമ്പ്രയിൽ, സിനി ജിബു നീറനാക്കുന്നേൽ, ജിജി പുത്തേട്ട്, ജോബി തെക്കുംചേരിക്കുന്നേൽ, ജോബിൻ വടക്കേനാത്ത്, അനിത ജസ്റ്റിൻ തുടങ്ങിയവർ പരിപാടികൾക്ക് നേതൃത്വം നൽകി. കാഞ്ഞിരപ്പള്ളി പേട്ടക്കവലയിൽനിന്ന് ആരംഭിച്ച അവകാശ സംരക്ഷണ റാലിയിൽ നിരവധിപേർ പങ്കെടുത്തു.

രാഷ്‌ട്രപതി: സ്‌കൂൾ സമയത്തില്‍ ക്രമീകരണം

കോട്ടയം: രാഷ്‌ട്രപതി ദ്രൗപദി മുര്‍മുവിന്‍റെ സന്ദര്‍ശനവുമായി ബന്ധപ്പെട്ട് നാളെയും വെള്ളിയാഴ്ചയും ജില്ലയുടെ വിവിധ ഭാഗങ്ങളില്‍ വിപുലമായ സുരക്ഷാ, ഗതാഗത ക്രമീകരണങ്ങള്‍ ഏര്‍പ്പെടുത്തുന്നതിനാല്‍ സ്‌കൂളുകളുടെ പ്രവര്‍ത്തനസമയത്തില്‍ ക്രമീകരണം വരുത്തുമെന്ന് ജില്ലാ വിദ്യാഭ്യാസ ഉപഡയറക്ടര്‍ അറിയിച്ചു. നാളെ ജില്ലയിലെ സര്‍ക്കാര്‍, എയ്ഡഡ്, അണ്‍ എയ്ഡഡ്, സിബിഎസ്ഇ, ഐസിഎസ്ഇ, കേന്ദ്രീയ വിദ്യാലയങ്ങള്‍ ഉള്‍പ്പെടെ എല്ലാ സ്‌കൂളുകളും ഉച്ചകഴിഞ്ഞ് മൂന്നിനു മുന്‍പായി പ്രവര്‍ത്തനം അവസാനിപ്പിക്കണം. വെള്ളിയാഴ്ച കോട്ടയം താലൂക്കിലെ സര്‍ക്കാര്‍, എയ്ഡഡ്, അണ്‍ എയ്ഡഡ്, സിബിഎസ്ഇ, ഐസിഎസ്ഇ, കേന്ദ്രീയ വിദ്യാലയങ്ങള്‍ ഉള്‍പ്പെടെ എല്ലാ സ്‌കൂളുകളും രാവിലെ 8.30ന് മുമ്പായി പ്രവര്‍ത്തനം ആരംഭിക്കുകയും വേണം. ഇതുസംബന്ധിച്ച് രക്ഷിതാക്കള്‍ക്ക് സ്‌കൂള്‍ അധികൃതര്‍ കൃത്യമായ അറിയിപ്പ് നല്‍കണം.

കേരള കോണ്‍ഗ്രസ് ബഹുജനസംഗമം 25ന്

കോട്ടയം: എല്‍ഡിഎഫ് സര്‍ക്കാരിന്‍റെ വാഗ്ദാന ലംഘനങ്ങള്‍ക്കും ജനദ്രോഹ നടപടികള്‍ക്കുമെതിരേ കേരള കോണ്‍ഗ്രസ് സംസ്ഥാന കമ്മിറ്റിയുടെ ആഭിമുഖ്യത്തില്‍ 25ന് ഉച്ചകഴിഞ്ഞു മൂന്നിനു കോട്ടയം തിരുനക്കര ബസ് സ്റ്റാന്‍ഡ് മൈതാനത്ത് ബഹുജനസംഗമം സംഘടിപ്പിക്കും. പാര്‍ട്ടി ചെയര്‍മാന്‍ പി.ജെ. ജോസഫ് എംഎല്‍എ ഉദ്ഘാടനം ചെയ്യും. വര്‍ക്കിംഗ് ചെയര്‍മാന്‍ പി.സി. തോമസ് അധ്യക്ഷത വഹിക്കും. എക്‌സിക്യൂട്ടീവ് ചെയര്‍മാന്‍ മോന്‍സ് ജോസഫ് എംഎല്‍എ മുഖ്യപ്രഭാഷണം നടത്തും. സെക്രട്ടറി ജനറല്‍ ജോയി ഏബ്രഹാം, ഡെപ്യൂട്ടി ചെയര്‍മാന്മാരായ ടി.യു. കുരുവിള, ഫ്രാന്‍സിസ് ജോര്‍ജ് എംപി, തോമസ് ഉണ്ണിയാടന്‍, സംസ്ഥാന കോ ഓര്‍ഡിനേറ്റര്‍ അപു ജോണ്‍ ജോസഫ് തുടങ്ങിയവര്‍ പ്രസംഗിക്കും. പാര്‍ട്ടിയുടെ സംസ്ഥാന, ജില്ലാ, നിയോജക മണ്ഡലം, മണ്ഡലം, വാര്‍ഡ് ഭാരവാഹികളും പോഷക സംഘടനാ ഭാരവാഹികളും പാര്‍ട്ടി സംസ്ഥാന കമ്മിറ്റി അംഗങ്ങളും സംഗമത്തില്‍ പങ്കെടുക്കും. ഭിന്നശേഷി അധ്യാപക നിയമനം, കാര്‍ഷിക മേഖലയുടെ തകര്‍ച്ച, ക്ഷേമനിധി ആനുകൂല്യങ്ങള്‍ വര്‍ധിപ്പിക്കുക, വന്യജീവി ആക്രമണത്തില്‍നിന്നു സാധാരണക്കാരെ രക്ഷിക്കുക തുടങ്ങിയ ആവശ്യങ്ങള്‍ ഉന്നയിച്ചാണ് ബഹുജനസംഗമം സംഘടിപ്പിക്കുന്നത്. പത്രസമ്മേളനത്തില്‍ മോന്‍സ് ജോസഫ് എംഎല്‍എ, ജോയി ഏബ്രഹാം, ജെയ്‌സണ്‍ ജോസഫ്, ബിനു ചെങ്ങളം, സന്തോഷ് കാവുകാട്ട് എന്നിവര്‍ പങ്കെടുത്തു.

പൂഞ്ഞാറില്‍ ആടിനെ അജ്ഞാത ജീവി കടിച്ചുകൊന്നു

പൂഞ്ഞാര്‍: വളതൂക്കില്‍ ആടിനെ അജ്ഞാതജീവി കടിച്ചു കൊന്ന നിലയില്‍ കണ്ടെത്തി. പൂഞ്ഞാര്‍ പഞ്ചായത്ത് വളതൂക്ക് കൃഷിഭവന് സമീപം കീരംചിറയില്‍ ജോസിന്‍റെ ഉടമസ്ഥതയിലുള്ള ഒരു വയസ് പ്രായമുള്ള ആടിനെയാണ് കൊലപ്പെടുത്തിയത്. ഇന്നലെ ഉച്ചകഴിഞ്ഞ് മൂന്നോടെയാണ് സംഭവം. സമീപത്തെ പുരയിടത്തില്‍ തീറ്റാനായി വിട്ടിരുന്ന ആടിനെ അഴിക്കാന്‍ ചെന്നപ്പോഴാണ് കൊന്നുതിന്ന നിലയില്‍ കണ്ടെത്തിയത്. ആടിന്‍റെ ശരീരം പകുതിയോളം കടിച്ചു തിന്ന നിലയിലായിരുന്നു. 15 കിലോയോളം തൂക്കമുള്ള പെണ്ണാടായിരുന്നു. ഏതു മൃഗമാണ് ആക്രമിച്ചതെന്ന് സംശയം ഉയര്‍ന്നതോടെ വനം വകുപ്പ് അധികൃതരെ വിവരം അറിയിച്ചു. തുടര്‍ന്ന് രാത്രി ഒമ്പതോടെ ഫോറസ്റ്റ് അധികൃതര്‍ സ്ഥലത്തെത്തി പരിശോധന നടത്തി. ചെന്നായ ആകാനാണ് സാധ്യതയെന്ന് വനം വകുപ്പ് ഉദ്യോഗസ്ഥര്‍ പറഞ്ഞു.

അവകാശസംരക്ഷണ യാത്രയ്ക്ക് രാമപുരത്ത് ആവേശോജ്വല സ്വീകരണം

രാമപുരം: നീതി ഔദാര്യമല്ല അവകാശമാണ് എന്ന മുദ്രാവാക്യമുയര്‍ത്തി കത്തോലിക്ക കോണ്‍ഗ്രസ് ഗ്ലോബല്‍ സമിതി പ്രസിഡന്‍റ് പ്രഫ. രാജീവ് കൊച്ചുപറമ്പില്‍ നയിക്കുന്ന അവകാശസംരക്ഷണ യാത്രയ്ക്ക് രാമപുരത്ത് ഫൊറോന വികാരി ഫാ. ബെര്‍ക്കുമാന്‍സ് കുന്നുംപുറത്തിന്‍റെ നേതൃത്വത്തില്‍ ഉജ്വല സ്വീകരണം നല്‍കി. സ്വീകരണ സമ്മേളനം രാമപുരം പള്ളി വികാരി ഫാ. ബെര്‍ക്കുമാന്‍സ് കുന്നുംപുറം ഉദ്ഘാടനം ചെയ്തു. ജാഥാ ക്യാപ്റ്റന്‍ പ്രഫ. രാജീവ് കൊച്ചുപറമ്പില്‍, പ്രഫ. ജോസുകുട്ടി ഒഴുകയില്‍, ജോര്‍ജ് കോയിക്കല്‍, രൂപത പ്രസിഡന്‍റ് ഇമ്മാനുവല്‍ നിധീരി, സെക്രട്ടറി ജോസ് വട്ടുകുളം, മാര്‍ ആഗസ്തീനോസ് കോളജ് പ്രിന്‍സിപ്പൽ ഡോ. റെജി വര്‍ഗീസ് മേക്കാടന്‍ തുടങ്ങിയവര്‍ പ്രസംഗിച്ചു. ‌കത്തോലിക്ക കോണ്‍ഗ്രസ് ഭാരവാഹികളായ അജോ തൂണുങ്കല്‍, സൈജു കോലത്ത്, ജോബിന്‍ പുതിയിടത്തുചാലില്‍, സജി മിറ്റത്താനി, സണ്ണി കുരിശുംമൂട്ടില്‍, ബിനു മാണിമംഗലത്ത്, ജയ്‌സണ്‍ അറക്കപ്പറമ്പില്‍, വിവിധ സംഘടനാ ഭാരവാഹികള്‍ തുടങ്ങിയവര്‍ നേതൃത്വം നല്‍കി.

മറ്റത്തില്‍ കുടിവെള്ള പദ്ധതി നവീകരണ പ്രവർത്തനോദ്ഘാടനം

ഇടനാട്: മറ്റത്തില്‍ കുടിവെള്ള പദ്ധതിയുടെ നവീകരണ പ്രവർത്തനങ്ങളുടെയും പുതിയ പമ്പ്സെറ്റിന്‍റെയും ഉദ്ഘാടനം ഫ്രാന്‍സിസ് ജോര്‍ജ് എംപി നിര്‍വഹിച്ചു. കുടിവെള്ള പദ്ധതി പ്രസിഡന്‍റ് ജോബിഷ് തേനാടികുളം അധ്യക്ഷത വഹിച്ചു. ഷീലാ ബാബു, ഗിരിജാ ജയന്‍, എന്‍. സുരേഷ്, ജോര്‍ജ് പുളിങ്കാട്, എം.ടി. സജി, കുഞ്ഞുമോന്‍ മാടപ്പാട്ട്, സജി കരിപ്പുകാട്ടില്‍, മേരി സണ്ണി കണ്ടകത്ത്, ബിജു പുലിയുറുമ്പില്‍, സോജാ രാജു, ഫ്രാന്‍സിസ് തോമസ് തേനാടികുളത്തില്‍, ഷാജി നെല്ലിക്കല്‍, അജി വട്ടക്കുന്നേല്‍, സിബി ചെല്ലപ്പന്‍ എന്നിവര്‍ പ്രസംഗിച്ചു. ടാങ്കിനും കുളത്തിനും സൗജന്യമായി സ്ഥലം നൽകിയ മേരി മാത്യു മൂലക്കുന്നേലിനെയും അലക്‌സ് പുലിയുറുമ്പിലിനെയും എംപി ആദരിച്ചു.

മാവടി പള്ളിയിൽ ‘സൗഹൃദം-2025’

മാവടി: മാവടി പള്ളിയുടെ സുവര്‍ണജൂബിലിയോടനുബന്ധിച്ച് ഇടവകയില്‍ സേവനമനുഷ്ഠിച്ച വികാരിമാര്‍, മദര്‍ സൂപ്പീരിയര്‍മാര്‍, കൈക്കാരന്മാര്‍, അക്കൗണ്ടന്‍റുമാര്‍, ദേവാലയശുശ്രൂഷികള്‍ തുടങ്ങിയവര്‍ക്ക് മാവടി ഇടവകയുടെ സ്‌നേഹാദരവ് സമ്മാനിച്ചു. ബിഷപ് മാര്‍ ജേക്കബ് മുരിക്കന്‍ ഉദ്ഘാടനം ചെയ്തു. തുടര്‍ന്ന് സമൂഹബലി അര്‍പ്പിക്കുകയും ചെയ്തു. വികാരി ഫാ. ജോര്‍ജ് അമ്പഴത്തിനാല്‍, ജൂബിലി കമ്മിറ്റി കണ്‍വീനര്‍ സന്തോഷ് ടോം അമ്പഴത്തിനാക്കുന്നേല്‍, ജൂബിലി കമ്മിറ്റി അംഗങ്ങള്‍, കൈക്കാരന്മാര്‍, സണ്‍ഡേ സ്‌കൂള്‍ അധ്യാപകര്‍, ഭക്തസംഘടനാ അംഗങ്ങള്‍ തുടങ്ങിയവര്‍ നേതൃത്വം നല്‍കി.

മെഡിസിറ്റിയില്‍ അന്താരാഷ്‌ട്ര ഇന്‍ഫെക്‌ഷന്‍ പ്രിവന്‍ഷന്‍ വീക്ക് ആചരണം

പാലാ: മാര്‍ സ്ലീവാ മെഡിസിറ്റിയില്‍ അന്താരാഷ്‌ട്ര ഇന്‍ഫെക്‌ഷന്‍ പ്രിവന്‍ഷന്‍ വീക്ക് ആചരണം തുടങ്ങി. ആശുപത്രി മാനേജിംഗ് ഡയറക്ടര്‍ മോണ്‍. ജോസഫ് കണിയോടിക്കല്‍ ഉദ്ഘാടനം ചെയ്തു. മാര്‍ സ്ലീവാ മെഡിസിറ്റി ഏറ്റവും പ്രാധാന്യത്തോടെയാണ് അണുബാധ പ്രതിരോധം നടപ്പാക്കുന്നതെന്ന് അദ്ദേഹം പറഞ്ഞു. ചീഫ് ഓഫ് മെഡിക്കല്‍ സര്‍വീസസ് ഡോ. പൗളിന്‍ ബാബു, ആശുപത്രി മെഡിക്കല്‍ സൂപ്രണ്ട് ഡോ. പി.എന്‍. നിതീഷ്, ഇന്‍ഫെക്‌ഷന്‍ കണ്‍ട്രോള്‍ ഓഫീസര്‍ ഡോ. ജീന ജോര്‍ജ്, സൂപ്പര്‍വൈസര്‍ ബ്ലൂമെല്‍ ബെര്‍ക്കുമാന്‍സ് എന്നിവര്‍ പ്രസംഗിച്ചു. ബോധവത്കരണമായി ബന്ധപ്പെട്ട് മാര്‍ സ്ലീവാ കോളജ് ഓഫ് നഴ്‌സിംഗ് വിദ്യാര്‍ഥിനികളുടെ ഫ്‌ളാഷ് മോബ്, ക്വിസ് മത്സരം എന്നിവയും സംഘടിപ്പിച്ചു. ഒരാഴ്ച നീണ്ടുനില്‍ക്കുന്ന ബോധവത്കരണ പരിപാടികളാണ് ക്രമീകരിച്ചിട്ടുള്ളത്.

തിടനാട് ഫാമിലി ഹെൽത്ത് സെന്‍റർ ഉദ്ഘാടനം നാളെ

തിടനാട്: ഫാമിലി ഹെല്‍ത്ത് സെന്‍ററിന്‍റെ പുതിയ കെട്ടിടത്തിന്‍റെ ഉദ്ഘാടനം നാളെ രാവിലെ 11.30ന് മന്ത്രി വീണാ ജോര്‍ജ് നിര്‍വഹിക്കും. സെബാസ്റ്റ്യന്‍ കുളത്തുങ്കല്‍ എംഎല്‍എ അധ്യക്ഷത വഹിക്കും. ആന്‍റോ ആന്‍റണി എംപി, ജോസ് കെ. മാണി എംപി എന്നിവര്‍ പ്രസംഗിക്കും. തിടനാട് സെന്‍റ് ജോസഫ് പള്ളിക്ക് സമീപത്തെ പടിഞ്ഞാറെകുരിശ് ലിങ്ക് റോഡിലാണ് പുതിയ കെട്ടിടം പൂര്‍ത്തീകരിച്ചിട്ടുള്ളത്.

ഐഎംഎ വാർഷികയോഗം

പാലാ: ഐഎംഎ പാലാ ബ്രാഞ്ച് 46-ാമത് വാര്‍ഷിക പൊതുയോഗം ചേർന്നു. പുതിയ ഭാരവാഹികളായി ഡോ. സോം വര്‍ഗീസ് തോമസ് (പ്രസിഡന്‍റ്), ഡോ. സാം മാത്യു (സെക്രട്ടറി), ഡോ. മാത്യു ജോര്‍ജ് (ട്രഷറര്‍) എന്നിവരെ തെരഞ്ഞെടുത്തു. പുതിയ ഭാരവാഹികളുടെ സ്ഥാനാരോഹണച്ചടങ്ങിന് ഐഎംഎ സംസ്ഥാന പ്രസിഡന്‍റ് കെ.എ. ശ്രീനിവാസന്‍ നേതൃത്വം നല്‍കി. ദേശീയ വൈസ് പ്രസിഡന്‍റ് ഡോ. അലക്സ് ഫ്രാങ്ക്ളിന്‍, പത്മശ്രീ ഡോ. എ. മാര്‍ത്തണ്ഡപിള്ള, ഡോ. ശ്രീജിത്ത് എന്‍. കുമാര്‍, ഡോ. എം.എന്‍. മേനോന്‍, ഡോ. കുര്യന്‍ ജോസഫ്, ഡോ. സോം വര്‍ഗീസ് തോമസ്, ഡോ. എന്‍.കെ. സുദര്‍ശന്‍, ഡോ. അലക്സ് ഇട്ടിച്ചെറിയാന്‍, ഡോ. സുനില്‍ അപ്പു തുടങ്ങിയവര്‍ പ്രസംഗിച്ചു. വനിതാ വിഭാഗം നേതാക്കളായി ഡോ. അനൂപ ബെന്നി, ഡോ. സിജിയ പോള്‍ എന്നിവരെയും തെരഞ്ഞെടുത്തു.

അഖിലകേരള വാക്കത്തണ്‍ മത്സരം

പിഴക്: വൈസ് മെന്‍ ക്ലബ്ബിന്‍റെ ആഭിമുഖ്യത്തില്‍ രണ്ടാമത് അഖിലകേരള വാക്കത്തണ്‍ മത്സരം നവംബര്‍ എട്ടിന് രാവിലെ 8.30നു നടത്തും. മത്സരം പിഴകില്‍നിന്ന് ആരംഭിച്ച് രാമപുരം ടൗണ്‍ ചുറ്റിത്തിരിച്ച് പിഴകില്‍ അവസാനിക്കും. 50 വയസു വരെ ഒരു കാറ്റഗറി, 50 വയസിനു മുകളില്‍ മറ്റൊരു കാറ്റഗറിയുമായാണ് മത്സരം ക്രമീകരിച്ചിരിക്കുന്നത്. കൂടാതെ രണ്ടു കിലോമീറ്റര്‍ ദൂരത്തിലുള്ള മിനി വാക്കത്തണും നടത്തും. ആദ്യത്തെ രണ്ടു കാറ്റഗറി മത്സര വിജയികള്‍ക്ക് യഥാക്രമം 5001, 3001 രൂപയും ട്രോഫിയും നല്‍കും. 200 രൂപയാണ് രജിസ്‌ട്രേഷന്‍ ഫീസ്. മാണി സി. കാപ്പന്‍ എംഎല്‍എ മത്സരം ഫ്‌ളാഗ് ഓഫ് ചെയ്യും. ക്ലബ് പ്രസിഡന്‍റ് പോള്‍സ് ജോബി സെബാസ്റ്റ്യന്‍, സെക്രട്ടറി ജില്‍സണ്‍ ജോസ്, ട്രഷറര്‍ സണ്ണി ഏബ്രഹാം, കെ.എം. ചെറിയാന്‍, റോക്കി തോമസ് എന്നിവര്‍ പ്രസംഗിക്കും.

പൂഞ്ഞാറിൽ ഹരിതകർമസേനയ്ക്ക് വാഹനം അനുവദിച്ചു

ഈരാറ്റുപേട്ട: ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി പൂഞ്ഞാര്‍ പഞ്ചായത്ത് ഹരിതകര്‍മസേനയ്ക്ക് പുതിയ വാഹനം അനുവദിച്ചതായി ജില്ലാ പഞ്ചായത്തംഗം ഷോണ്‍ ജോര്‍ജ് അറിയിച്ചു. 7.50 ലക്ഷം രൂപയാണ് പദ്ധതിക്കായി നീക്കിവച്ചിരിക്കുന്നത്. മറ്റക്കാട് മുതല്‍ മാളിക വരെ വിസ്തൃതിയുള്ള പഞ്ചായത്തില്‍ ഹരിതകര്‍മസേനയ്ക്ക് വാഹനം അത്യാവശ്യമായി വന്നതിനാലാണ് തുക അനുവദിച്ചത്. നടപടികള്‍ പൂര്‍ത്തീകരിച്ച് ഉടന്‍ വാഹനം കൈമാറുമെന്ന് ഷോണ്‍ ജോര്‍ജ് പറഞ്ഞു.

കൊഴുവനാൽ ഉപജില്ലാ കലോത്സവം ഇന്നുമുതൽ

കാഞ്ഞിരമറ്റം: കൊഴുവനാൽ ഉപജില്ലാ കലോത്സവം കാഞ്ഞിരമറ്റം ലിറ്റിൽ ഫ്ലവർ ഹൈസ്കൂളിൽ ഇന്നുമുതൽ 24 വരെ നടക്കും. പാമ്പാടി ബ്ലോക്ക്‌ പഞ്ചായത്ത് പ്രസിഡന്‍റ് ബെറ്റി റോയി മണിയങ്ങാട്ട് ഉദ്ഘാടനം ചെയ്യും. സ്കൂൾ മാനേജർ ഫാ. ജോസഫ് മണ്ണനാൽ അധ്യക്ഷത വഹിക്കും. 24നു സമാപനസമ്മേളനം ചാണ്ടി ഉമ്മൻ എംഎൽഎ ഉദ്ഘാടനം ചെയ്യും. ആയിരത്തിലധികം കുരുന്നുപ്രതിഭകൾ കലോത്സവത്തിൽ പങ്കെടുക്കും.

ജെ.ബി. കോശി കമ്മീഷൻ റിപ്പോർട്ട് പുറത്തുവിടണം: മാർ പുളിക്കൽ

അവകാശസംരക്ഷണ യാത്രയ്ക്കു കാഞ്ഞിരപ്പള്ളിയിൽ വൻ വരവേൽപ് കാഞ്ഞിരപ്പള്ളി: ജെ.ബി. കോശി കമ്മീഷൻ റിപ്പോർട്ട് പുറത്തുവിടണമെന്നു കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ. കത്തോലിക്ക കോൺഗ്രസ് ഗ്ലോബൽ സമിതിയുടെ ആഭിമുഖ്യത്തിൽ നടത്തുന്ന അവകാശ സംരക്ഷണയാത്രയ്ക്കു കാഞ്ഞിരപ്പള്ളിയിൽ നൽകിയ സ്വീകരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. കേരള സമൂഹത്തിന്‍റെ വളർച്ചയ്ക്കും പുരോഗതിക്കും വേണ്ടി നിലപാട് സ്വീകരിച്ച്, വിദ്യാഭ്യാസ സാമൂഹിക സാംസ്കാരിക ജീവകാരുണ്യ മേഖലകളിൽ വലിയ സംഭാവനങ്ങൾ നൽകിയ ഈ സമുദായത്തിന്‍റെ പിന്നാക്കാവസ്ഥയെക്കുറിച്ചു കൃത്യമായി പഠിച്ചു പുറത്തുകൊണ്ടുവരേണ്ട റിപ്പോർട്ട് പൂഴ്ത്തിവച്ചിരിക്കുകയാണ്. എയ്ഡഡ് സ്കൂളുകളിലെ അധ്യാപകരുടെ കാര്യത്തിൽ എൻഎസ്എസിനു ലഭിച്ച അനുകൂലവിധി എല്ലാവർക്കും ബാധകമാണെന്നു പകൽപോലെ വ്യക്തമായിട്ടും തമസ്കരിക്കുന്നതു ശരിയല്ല. കുട്ടികളുടെ വിദ്യാഭ്യാസ അവകാശംകൂടിയാണ് നിഷേധിക്കപ്പെടുന്നത്. എന്തുകൊണ്ടാണ് സർക്കാർ പക്ഷപാതിത്വപരമായ നിലപാടുകൾ സ്വീകരിക്കുന്നതെന്ന ചോദ്യം പ്രസക്തം. ഇടപെടുന്നുവെന്നു വരുത്തിവച്ചിട്ട് കാര്യമില്ല. വിവേചനപരമായ നിലപാടാണ് ഇക്കാര്യത്തിൽ സർക്കാർ സ്വീകരിക്കുന്നത്. വന്യജീവിശല്യം പെരുകിയതിനാൽ അടിയന്തരമായി 1972ലെ വനം വന്യജീവി നിയമത്തിൽ മാറ്റം വരുത്താൻ കേന്ദ്ര- സംസ്ഥാന സർക്കാരുകൾ ഒരുമിച്ച് ഇടപ്പെടണം. റബറിന് കൃത്യമായ വില സ്ഥിരതയുണ്ടാകണമെന്നും 250 രൂപ തറവിലയായി മാറ്റണമെന്നും മാർ ജോസ് പുളിക്കൽ കൂട്ടിച്ചേർത്തു. നമ്മൾ കടുത്ത പ്രതിഷേധം ഉയർത്തിയപ്പോൾ അധ്യാപക നിയമനമായി ബന്ധപ്പെട്ട പ്രശ്നം തീർക്കാൻ മുഖ്യമന്ത്രി ഇടപെടൽ നടത്തിയത് അവകാശ സംരക്ഷണയാത്രയുടെ വിജയത്തിന്‍റെ ഒന്നാം ഘട്ടമാണെന്നു ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറന്പിൽ മറുപടി പ്രസംഗത്തിൽ പറഞ്ഞു. വിദ്യാഭ്യാസമന്ത്രിയുടെ പല പ്രസ്താവനകളും പ്രതിഷേധാർഹമാണെന്നും അദ്ദേഹം കൂട്ടിച്ചേർത്തു. കത്തോലിക്ക കോൺഗ്രസ് രൂപത പ്രസിഡന്‍റ് കെ.കെ. ബേബി കണ്ടത്തിൽ അധ്യക്ഷത വഹിച്ചു. രൂപത വികാരി ജനറാൾ റവ.ഡോ. സെബാസ്റ്റ്യൻ കൊല്ലംകുന്നേൽ ആമുഖ സന്ദേശവും ഗ്ലോബൽ ഡയറക്ടർ ഫാ. ഫിലിപ്പ് കവിയിൽ മുഖ്യപ്രഭാഷണവും നടത്തി. രൂപത ഡയറക്ടർ ഫാ. ജസ്റ്റിൻ മതിയത്ത്, ഗ്ലോബൽ ജനറൽ സെക്രട്ടറി ഡോ. ജോസുകുട്ടി ജെ. ഒഴുകയിൽ, ഗ്ലോബൽ വൈസ് പ്രസിഡന്‍റ് ജോമി കൊച്ചുപറമ്പിൽ, ഗ്ലോബൽ സമിതി അംഗം ടെസി ബിജു പാഴിയാങ്കൽ, രൂപത ജനറൽ സെക്രട്ടറി ജോസഫ് പണ്ടാരക്കളം, ജോർജ് കോയിക്കൽ തുടങ്ങിയവർ പ്രസംഗിച്ചു. ഭാരവാഹികളായ ഫിലിപ്പ് നിക്കോളാസ് പള്ളിവാതുക്കൽ, ജോജോ തെക്കുംചേരിക്കുന്നേൽ, ബിജു ശൗര്യാംകുഴി, സണ്ണിക്കുട്ടി അഴകമ്പ്രയിൽ, സിനി ജിബു നീറനാക്കുന്നേൽ, ജിജി പുത്തേട്ട്, ജോബി തെക്കുംചേരിക്കുന്നേൽ, ജോബിൻ വടക്കേനാത്ത്, അനിത ജസ്റ്റിൻ തുടങ്ങിയവർ പരിപാടികൾക്ക് നേതൃത്വം നൽകി. കാഞ്ഞിരപ്പള്ളി പേട്ടക്കവലയിൽനിന്ന് ആരംഭിച്ച അവകാശ സംരക്ഷണ റാലിയിൽ നിരവധിപേർ പങ്കെടുത്തു.

അവകാശസംരക്ഷണ യാത്രയ്ക്ക്‌ മുണ്ടക്കയത്ത് ഉജ്വല സ്വീകരണം

മുണ്ടക്കയം: നീതി ഔദാര്യമല്ല അവകാശമാണെന്ന മുദ്രാവാക്യമുയർത്തി കത്തോലിക്ക കോൺഗ്രസ് നടത്തുന്ന അവകാശസംരക്ഷണ യാത്രയ്ക്ക്‌ മുണ്ടക്കയത്ത് സ്വീകരണം നൽകി. മുണ്ടക്കയം ബസ് സ്റ്റാൻഡിൽ നടന്ന സ്വീകരണ സമ്മേളനം മുണ്ടക്കയം ഫൊറോന ഡയറക്ടർ റവ.ഡോ. ജയിംസ് മുത്തനാട്ട് ഉദ്ഘാടനം ചെയ്തു. ജാഥാ ക്യാപ്റ്റൻ പ്രഫ. രാജീവ് കൊച്ചുപറമ്പിലിനെ ഷാൾ അണിയിച്ച് പ്രവർത്തകർ സ്വീകരിച്ചു. ഗ്ലോബൽ ഡയറക്ടർ ഫാ. ഫിലിപ്പ് കവിയിൽ, രൂപത ഡയറക്ടർ ഫാ. ജസ്റ്റിൻ മതിയത്ത്, കാഞ്ഞിരപ്പള്ളി രൂപത പ്രസിഡന്‍റ് ബേബി കണ്ടത്തിൽ, മുണ്ടക്കയം ഫൊറോന യൂണിറ്റ് പ്രസിഡന്‍റ് സണ്ണി ആന്‍റണി തുരുത്തിപ്പള്ളി, ജോസ് ജേക്കബ് കല്ലൂർ, ജോബി കൊച്ചുപറമ്പിൽ, റോണി പുഞ്ചക്കുന്ന്, മനു വരാപ്പള്ളി, ഫാ. ഡോൺ മറ്റക്കരതുണ്ടിയിൽ തുടങ്ങിയവർ പ്രസംഗിച്ചു. ഭരണഘടന ഉറപ്പുതരുന്ന മതേതരത്വം സംരക്ഷിക്കപ്പെടണം, ജെ.ബി. കോശി കമ്മീഷൻ റിപ്പോർട്ട് നടപ്പാക്കണം, ഭൂനിയമങ്ങൾ കാലോചിതമായി പരിഷ്കരിക്കണം, കാർഷികോത്പന്നങ്ങളുടെ വിലത്തകർച്ച, വന്യമൃഗങ്ങളുടെ ആക്രമണങ്ങൾ എന്നിവയിൽനിന്ന് കർഷകർക്ക് മോചനം ലഭിക്കണം, വിദ്യാഭ്യാസ മേഖലയിലെ ക്രൈസ്തവ അവഗണനകൾ പൂർണമായും പരിഹരിക്കണം എന്നീ ആവശ്യങ്ങൾ ഉന്നയിച്ചുകൊണ്ടാണ് അവകാശ സംരക്ഷണയാത്ര നടത്തുന്നത്. 13ന് കാസർഗോട്ട് ആരംഭിച്ച യാത്ര 24ന് തിരുവനന്തപുരത്ത് സമാപിക്കും. കത്തോലിക്ക കോൺഗ്രസിന്‍റെ സമരങ്ങൾ പൊതുനന്മയ്ക്ക്: രാജീവ് കൊച്ചുപറന്പിൽ കാഞ്ഞിരപ്പള്ളി: ക്രൈസ്തവ സമുദായത്തിന്‍റെ താത്പര്യം സംരക്ഷിക്കാൻ വേണ്ടി മാത്രമല്ല പൊതുസമൂഹത്തിന്‍റെ നന്മയ്ക്കു കൂടിയാണ് കത്തോലിക്ക കോൺഗ്രസിന്‍റെ സമരങ്ങളെന്ന് ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറന്പിൽ. അവകാശസംരക്ഷണ യാത്രയ്ക്കു നൽകിയ സ്വീകരണത്തിൽ മറുപടിപ്രസംഗം നടത്തുകയായിരുന്നു അദ്ദേഹം. വിദ്യാഭ്യാസ മേഖലയിലെ അവഗണനയിൽ നമ്മൾ ശക്തമായി പ്രതിഷേധിച്ചപ്പോൾ ആ വിഷയത്തിൽ അധ്യാപക നിയമനമായി ബന്ധപ്പെട്ട പ്രശ്നം പരിഹരിക്കാൻ മുഖ്യമന്ത്രി തയാറായത് അവകാശസംരക്ഷണ യാത്രയുടെ വിജയത്തിന്‍റെ ഒന്നാം ഘട്ടമാണ്. പള്ളിയോടൊപ്പം പള്ളിക്കൂടം ആരംഭിച്ച് ഈ നാട്ടിലെ സാധാരണക്കാരായ ജനങ്ങളെ സമൂഹത്തിന്‍റെ മുഖ്യധാരയിലേക്ക് ഉയർത്തിക്കൊണ്ടുവന്ന നവോത്ഥാന ചരിത്രമാണ് സഭയ്ക്കും സമുദായത്തിനുള്ളത്. ഇത്തരത്തിൽ പൊതുസമൂഹത്തിൽ നിലകൊള്ളുന്പോഴും ക്രൈസ്തവസഭയ്ക്ക് ലഭിക്കേണ്ട അവകാശങ്ങൾ നൽകുന്നതിൽ സർക്കാരും രാഷ്‌ട്രീയ പാർട്ടികളും കുറ്റകരമായ അനാസ്ഥ കാണിക്കുകയാണ്. കത്തോലിക്ക കോൺഗ്രസ് രാഷ്‌ട്രീയ സംഘടനയല്ല. കക്ഷിരാഷ്‌ട്രീയവുമില്ല. പക്ഷേ, രാഷ്‌ട്രീയ നിലപാടുണ്ട്. ഈ സമുദായത്തിന്‍റെയും നാട്ടിലെ കർഷകരുടെയും വേദനിക്കുന്ന ജനങ്ങളുടെയും പ്രശ്നങ്ങളാണ് കത്തോലിക്ക കോൺഗ്രസിന്‍റെ രാഷ്‌ട്രീയം. ആത്മാർഥമായി ആരാണോ ഈസമുദായത്തിന്‍റെ പ്രശ്നങ്ങൾ പരിഹരിക്കാൻ കടന്നുവരുന്നത് അവരെ പിന്തുണയ്ക്കാനും മടിയില്ല. ഞങ്ങളെ അവഗണിക്കുന്നവരെ ഞങ്ങളും അവഗണിക്കുമെന്നും ‌അദ്ദേഹം കൂട്ടിച്ചേർത്തു.

മുണ്ടക്കയത്ത് പോരാട്ടം കണ്ടറിയാം

മുണ്ടക്കയം പഞ്ചായത്ത് കോട്ടയം ജില്ലയുടെ കിഴക്കേ അറ്റത്തുള്ള ഇടുക്കി ജില്ലയോടു ചേർന്നു കിടക്കുന്ന പഞ്ചായത്താണ് മുണ്ടക്കയം. വന്യമൃഗ ശല്യം, കാർഷിക മേഖലയിലെ പ്രതിസന്ധി, അടിസ്ഥാന സൗകര്യങ്ങളുടെ വികസനം തുടങ്ങി നിരവധി പ്രശ്നങ്ങളാണ് ജനങ്ങൾ നേരിടുന്നത്. 21 വാർഡുള്ള മുണ്ടക്കയം പഞ്ചായത്ത് എൽഡിഎഫ് ആണ് ഭരിക്കുന്നത്. കഴിഞ്ഞ അഞ്ചു വർഷത്തെ വികസന നേട്ടങ്ങളും കോട്ടങ്ങളും ഭരണപക്ഷവും പ്രതിപക്ഷവും പങ്കുവയ്ക്കുന്നു. നേട്ടങ്ങൾ രേഖ ദാസ്(പഞ്ചായത്ത്‌ പ്രസിഡന്‍റ്)

• 21 വാർഡുകളിലും ഫണ്ട് തുല്യമായി വീതിച്ചു. • ജനകീയ ഹോട്ടൽ, ടേക്ക് എ ബ്രേക്ക് എന്നിവ തുടങ്ങി. • 8.66 കോടി മുടക്കി ഗ്രാമീണ റോഡുകളെല്ലാംതന്നെ പുനരുദ്ധരിച്ചു. • പ്രളയത്തിൽ വീടും സ്ഥലവും നഷ്ടപ്പെട്ടവർക്ക് പത്തുലക്ഷം രൂപ വീതം നഷ്ടപരിഹാരം. •വണ്ടൻപതാലിൽ പുതിയ സബ് സെന്‍റർ. •പഞ്ചായത്തിനു കീഴിലുള്ള മൂന്നു സ്കൂളുകളിലും അടിസ്ഥാന സൗകര്യങ്ങൾ. • 40 അങ്കണവാടികളിൽ 34 എണ്ണം സ്മാർട്ട് അങ്കണവാടികളാക്കി. ആറെണ്ണത്തിനു സ്ഥലം വാങ്ങി. • ലൈഫ് മിഷൻ, പിഎംഎവൈ പദ്ധതി വഴി 290 കുടുംബങ്ങൾക്കു വീടും സ്ഥലവും. •കാർഷിക മേഖലയിൽ കർഷകർക്ക് ഉപകാരപ്രദമാകുന്ന നിരവധി നൂതന പദ്ധതികൾ. • 43 ഹരിത കർമസേനാംഗങ്ങൾ സജീവം. ഇവർക്കു വാഹന സൗകര്യം. രണ്ട് എംസിഎഫും 42 മിനി എംസിഎഫും ക്രമീകരിച്ചു. • ബസ് സ്റ്റാൻഡിൽ സ്വീവേജ് ട്രീറ്റ്മെന്‍റ് പ്ലാന്‍റ്. • മണിമലയാറ്റിലേക്ക് ഒഴുകുന്ന മലിനജലം ശുചീകരിക്കാൻ ഗ്രോവാട്ടർ ട്രീറ്റ്മെന്‍റ് പ്ലാന്‍റ് നിർമിക്കാൻ 1.40 കോടി വകയിരുത്തി. കോട്ടങ്ങൾ

ബെന്നി ചേറ്റുകുഴി(പ്രതിപക്ഷ പാർലമെന്‍ററി നേതാവ്) • കഴിഞ്ഞ അഞ്ചു വർഷക്കാലം പദ്ധതി നിർവഹണത്തിൽ 70 ശതമാനത്തിൽ താഴെ ചെലവഴിച്ച് കോട്ടയം ജില്ലയിലെ ഏറ്റവും മോശം പഞ്ചായത്തായി. • എൽഡിഎഫിന്‍റെ തെരഞ്ഞെടുപ്പ് വാഗ്‌ദാനമായ ടൗണിലെ മാലിന്യപ്രശ്‌നം പരിഹരിക്കുമെന്നുള്ളത് നടപ്പായിട്ടില്ല. • ബൈപാസിനോടനുബന്ധിച്ച് പാർക്ക് നിർമിക്കുമെന്നു പറഞ്ഞതു പാഴ്‌വാക്കായി. ബൈപാസ് മാലിന്യക്കൂമ്പാരം. • ചെക്ക്‌ഡാമിൽ ടൂറിസം പദ്ധതി പറഞ്ഞത് നടപ്പായില്ല. • തിലകൻ സ്‌മാരക കേന്ദ്രം പാതിവഴിയിൽ ഉപേക്ഷിച്ചു. • ബസ് സ്റ്റാൻഡിൽ ഷോപ്പിംഗ്‌ കോംപ്ലക്‌സ്‌ പണി പൂർത്തിയാക്കിയില്ല. • ശുചിത്വ മിഷനിൽനിന്നു ഫണ്ട് ലഭിക്കുന്ന മാലിന്യ നിർമാർജന പദ്ധതികൾ ഒന്നുമില്ല. • എംസിഎഫ് ഇതുവരെ നിർമിച്ചിട്ടില്ല. • മണിമലയാറ്റിൽനിന്നു വാരിയ മണൽ നിക്ഷേപിച്ച് ഏക പഞ്ചായത്ത് സ്റ്റേഡിയം ഉപയോഗശൂന്യമാക്കി. കായികപ്രേമികൾക്ക് തിരിച്ചടി. • കേസുകളെല്ലാം സ്വകാര്യ വ്യക്തികളെ സഹായിക്കാൻ തോറ്റു കൊടുത്തു. • മുണ്ടക്കയം പഞ്ചായത്ത് ഏറ്റവും കുറച്ചു പദ്ധതി തുക ചെലവഴിച്ചത് സമിതിയുടെ കാലഘട്ടത്തിൽ. കക്ഷിനില എൽഡിഎഫ് -12, യുഡിഎഫ് - 8, ബിജെപി -1.

കാളകെട്ടി കുടുംബാരോഗ്യകേന്ദ്രം ഉദ്ഘാടനം നാളെ

കാഞ്ഞിരപ്പള്ളി: പഞ്ചായത്തിലെ പ്രാഥമികാരോഗ്യ കേന്ദ്രമായ കാളകെട്ടി കുടുംബാരോഗ്യ കേന്ദ്രത്തിന്‍റെ ഉദ്ഘാടനം നാളെ രാവിലെ 10.30ന് ആരോഗ്യമന്ത്രി വീണാ ജോർജ് നിർവഹിക്കും. ചീഫ് വിപ്പ് ഡോ. എൻ. ജയരാജ് അധ്യക്ഷത വഹിക്കും. ആന്‍റോ ആന്‍റണി എംപി മുഖ്യാതിഥിയായിരിക്കും. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗർ മുഖ്യപ്രഭാഷണം നടത്തും. ആരോഗ്യ കേരളം ജില്ലാ പ്രോഗ്രാം മാനേജർ ഡോ. വ്യാസ് സുകുമാരൻ വിഷയാവതരണവും ജില്ലാ മെഡിക്കൽ ഓഫീസർ ഡോ. എൻ. പ്രിയ റിപ്പോർട്ട് അവതരണവും നടത്തും. ജില്ലാ പഞ്ചായത്തംഗം ജെസി ഷാജൻ, ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ്, ബ്ലോക്ക് വൈസ് പ്രസിഡന്‍റ് ജോളി മടുക്കക്കുഴി, പഞ്ചായത്ത് പ്രസിഡന്‍റ് കെ.ആർ. തങ്കപ്പൻ, വൈസ് പ്രസിഡന്‍റ് സുമി ഇസ്മായിൽ, കാളകെട്ടി മെഡിക്കൽ ഓഫീസർ ഡോ. വിദ്യാ മോഹൻ, ബ്ലോക്ക്, ഗ്രാമ പഞ്ചായത്തംഗങ്ങൾ, രാഷ്‌ട്രീയപാർട്ടി പ്രതിനിധികൾ തുടങ്ങിയവർ പ്രസംഗിക്കും. ആർദ്രം മിഷന്‍റെ ഭാഗമായി സംസ്ഥാന സർക്കാരും നാഷണൽ ഹെൽത്ത് മിഷനും 1.50 കോടിയും പഞ്ചായത്തിന്‍റെ വികസന ഫണ്ടിൽനിന്നു 15 ലക്ഷം രൂപയും അനുവദിച്ചാണ് പുതിയ ആശുപത്രി മന്ദിരത്തിന്‍റെ നിർമാണ പ്രവർത്തനങ്ങൾ പൂർത്തീകരിച്ചത്.

ബൈക്കും ലോറിയും കൂട്ടിയിടിച്ച് യുവാവ് മരിച്ചു

കട്ടപ്പന: കുട്ടിക്കാനത്തിനു സമീപം മുറിഞ്ഞപുഴയ്ക്കും വളഞ്ഞങ്ങാനത്തിനുമിടയിൽ ബുള്ളറ്റും ലോറിയും കൂട്ടിയിടിച്ച് യുവാവ് മരിച്ചു. ബുള്ളറ്റ് യാത്രികൻ കട്ടപ്പന വാഴവര രാമപുരത്ത് അതുൽ സണ്ണി (23) ആണ് മരിച്ചത്. ചൊവ്വാഴ്ച ഉച്ചകഴിഞ്ഞ് രണ്ടിനാണ് അപകടം. മുണ്ടക്കയം ഭാഗത്തുനിന്നു വന്ന ലോറിയും കട്ടപ്പനയിൽനിന്നു വന്ന ബൈക്കുമാണ് അപകടത്തിൽപ്പെട്ടത്. റോഡിൽനിന്ന് തെന്നിമാറിയ ബുള്ളറ്റ് ലോറിയിൽ ഇടിക്കുകയായിരുന്നെന്നു പറയുന്നു. ഗുരുതരമായി പരിക്കേറ്റ യുവാവിനെ മറ്റ് വാഹനങ്ങളിലെ യാത്രികരും പ്രദേശവാസികളും ചേർന്ന് പിന്നാലെ വന്ന കെഎസ്ആർടിസി ബസിൽ കയറ്റി മുണ്ടക്കയത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. അതുൽ തിരുവനന്തപുരത്തേക്കു പോകുകയായിരുന്നു. പോസ്റ്റ്മോർട്ടത്തിനുശേഷം സംസ്കാരം പിന്നീട്. തിരുവനന്തപുരം ഐഎസ്ആർഒയിലെ ട്രെയിനിയാണ് അതുൽ. പിതാവ്: സണ്ണി. അമ്മ: മിനി. സഹോദരങ്ങൾ: സ്റ്റെമിൻ, ആൽബി.

ആനക്കല്ല് സെന്‍റ് ആന്‍റണീസ് സ്കൂൾ റൂബി ജൂബിലി ആഘോഷം; കുടുംബസംഗമം

കാഞ്ഞിരപ്പള്ളി: റൂബി ജൂബിലി ആഘോഷങ്ങളുടെ ഭാഗമായി ആനക്കല്ല്‌ സെന്‍റ് ആന്‍റണീസ്‌ പബ്ലിക്‌ സ്‌കൂളില്‍ കുടുംബസംഗമം നടത്തി. കാഞ്ഞിരപ്പള്ളി രൂപത മുന്‍ ബിഷപ് മാര്‍ മാത്യു അറയ്‌ക്കല്‍ കുടുംബസംഗമം ഉദ്‌ഘാടനം ചെയ്‌തു. മാനേജര്‍ ഫാ. ജോസഫ്‌ പൊങ്ങന്താനം അധ്യക്ഷത വഹിച്ചു. സെബാസ്റ്റ്യന്‍ കുളത്തുങ്കല്‍ എംഎല്‍എ, വികാരി ജനറാള്‍ ഫാ. ബോബി അലക്‌സ്‌ മണ്ണംപ്ലാക്കല്‍, പ്രിന്‍സിപ്പല്‍ ഫാ. ആന്‍റണി തോക്കനാട്ട്‌, ബനഡിക്‌ടന്‍ ആശ്രമ മഠാധിപതി ഫാ. ക്ലെമന്‍റ് എട്ടാനിയില്‍, മുന്‍ മാനേജര്‍ ഫാ. ഡാര്‍വിന്‍ വാലുമണ്ണേല്‍, മുന്‍ പ്രിന്‍സിപ്പല്‍ ഫാ. ജോഷി വാണിയപ്പുരയ്‌ക്കല്‍, ബ്രില്യന്‍റ് സ്റ്റഡി സെന്‍റര്‍ ഡയറക്‌ടര്‍ സ്റ്റീഫന്‍ ജോസഫ്‌, അധ്യാപക പ്രതിനിധി ജോസി ജോസഫ്‌, മുന്‍ അധ്യാപിക ആഗ്‌നസ്‌ ജോസഫ്‌ എന്നിവര്‍ പ്രസംഗിച്ചു. യോഗത്തില്‍ സ്‌കൂളിന്‍റെ പുതിയ വെബ്‌സൈറ്റിന്‍റെ ലോഞ്ചിംഗും റൂബി ജൂബിലി സ്‌മാരക സ്റ്റാമ്പിന്‍റെ പ്രകാശനവും നടത്തി. റവ.ഡോ. ആന്‍റണി നിരപ്പേല്‍ എഡ്യൂക്കേഷണല്‍ ഐക്കണ്‍ ഓഫ്‌ ദി ഇയര്‍ പുരസ്‌കാരത്തിന്‌ അര്‍ഹനായ പ്രിന്‍സിപ്പല്‍ ഫാ. ആന്‍റണി തോക്കനാട്ടിനെ അഭിനന്ദിച്ചു. അധ്യാപക-അനധ്യാപക കുടുംബാംഗങ്ങള്‍, പിടിഎ പ്രതിനിധികള്‍, എസ്‌എംസി പ്രതിനിധികള്‍, പാരിഷ്‌ കൗണ്‍സില്‍ അംഗങ്ങള്‍, മുന്‍ മാനേജര്‍മാര്‍, പ്രിന്‍സിപ്പല്‍മാര്‍, റിട്ടയേര്‍ഡ്‌ അധ്യാപക-അനധ്യാപകര്‍ തുടങ്ങിയവർ കുടുംബസംഗമത്തില്‍ പങ്കെടുത്തു. സമ്മേളനത്തില്‍ കുട്ടികളുടെ വിവിധ കലാപരിപാടികളും നടത്തി.

കാഞ്ഞിരപ്പള്ളി രൂപത കലോത്സവം

കാഞ്ഞിരപ്പള്ളി: രൂപത വിശ്വാസജീവിത പരിശീലന വിഭാഗം നേതൃത്വം നല്‍കിയ രൂപത കലോത്സവം-2025 കുട്ടിക്കാനം മരിയന്‍ കോളജിൽ നടത്തി. മരിയന്‍ ഇന്‍റര്‍നാഷണല്‍ ഇന്‍സ്റ്റിറ്റ്യൂട്ട് ഓഫ് മാനേജ്‌മെന്‍റ് ഡയറക്ടര്‍ ഫാ. ജോസ് ചിറ്റടിയില്‍ ഉദ്ഘാടനം ചെയ്തു. സമാപനസമ്മേളനത്തില്‍ കാഞ്ഞിരപ്പള്ളി രൂപത വികാരി ജനറാള്‍ ഫാ. ബോബി അലക്‌സ് മണ്ണംപ്ലാക്കല്‍ സന്ദേശം നല്‍കുകയും വിജയികള്‍ക്ക് സമ്മാനദാനം നിർവഹിക്കുകയും ചെയ്തു. വിശ്വാസജീവിത പരിശീലന വിഭാഗം ഡയറക്ടര്‍ ഫാ. തോമസ് വാളന്മനാലിന്‍റെ നേതൃത്വത്തില്‍ വൈദികരും സന്യസ്തരും ചേര്‍ന്ന് നടത്തിയ കലോത്സവത്തില്‍ അറുനൂറോളം കുട്ടികള്‍ പങ്കെടുത്തു.

ബ്ലോക്ക് പഞ്ചായത്ത് ബാങ്കേഴ്സ് മീറ്റ് നാളെ

കാഞ്ഞിരപ്പള്ളി: ബ്ലോക്ക് പഞ്ചായത്തിനു കീഴില്‍ സംരംഭം തുടങ്ങാന്‍ ആഗ്രഹിക്കുന്നവര്‍ക്കായി താലൂക്കിലെ വിവിധ ബാങ്കുകളുടെ സംഗമം - ബാങ്കേഴ്സ് മീറ്റ് നാളെ രാവിലെ പത്തിന് ബ്ലോക്ക് പഞ്ചായത്ത് ഹാളിൽ നടക്കും. പ്രോജക്‌ടും എസ്റ്റിമേറ്റുമായി എത്തുന്ന സംരംഭകര്‍ക്ക് വ്യവസായ വകുപ്പിന്‍റെയും കാഞ്ഞിരപ്പള്ളി ബ്ലോക്ക് പഞ്ചായത്തിന്‍റെയും സഹായത്തോടെ വിവിധ ബാങ്കുകളില്‍നിന്ന് ലോണും സര്‍ക്കാരിന്‍റെ മറ്റ് ആനുകൂല്യങ്ങളും അപ്പോൾതന്നെ നല്‍കും. ബാങ്കേഴ്സ് മീറ്റ് ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് ഉദ്ഘാടനം ചെയ്യും. വൈസ് പ്രസിഡന്‍റ് ജോളി മടുക്കക്കുഴി അധ്യക്ഷത വഹിക്കും. ജില്ലാ വ്യവസായവകുപ്പ് മേധാവി വി.ആര്‍. രാകേഷ്, ലീഡ് ബാങ്ക് ജില്ലാ മാനേജര്‍ രാജു ഫിലിപ്പ്, പഞ്ചായത്ത് പ്രസിഡന്‍റ് കെ.ആര്‍. തങ്കപ്പന്‍, ജില്ലാ പഞ്ചായത്തംഗം ജെസി ഷാജന്‍, ബിഡിഒ എസ്. സജീഷ്, താലൂക്ക് വ്യവസായവകുപ്പ് തലവന്‍ കെ.കെ. ഫൈസല്‍, ലോറന്‍സ് മാത്യു, യദു കെ. മണി, പി.കെ. പോള്‍, അമല്‍ തോമസ്, പി. ചന്ദ്രന്‍ തുടങ്ങിയവര്‍ പ്രസംഗിക്കും.

ഗതാഗതക്കുരുക്കായി തണൽമരങ്ങൾ

കുമരകം: വാഹനഗതാഗതം പുനരാരംഭിച്ച കോണത്താറ്റു പാലത്തിലൂടെ കടന്നുവരുന്ന വാഹന ഡ്രൈവർമാരുടെ കാഴ്ചമറയ്ക്കുന്ന തണൽ മരങ്ങൾ വാഹനക്കുരുക്കിനു കാരണമാകുന്നതായി പരാതി. കുമരകം ഭാഗത്തുനിന്ന് കോണത്താറ്റു പാലത്തിലെത്തുന്ന വാഹനങ്ങളുടെ ഡ്രൈവർമാർക്ക് കോട്ടയം ഭാഗത്തുനിന്നു വരുന്ന വാഹനങ്ങളെ കാണാൻ കഴിയാത്തതിനു കാരണം റോഡിന്‍റെ ഇരുവശങ്ങളിലായി വളർന്നുനില്ക്കുന്ന രണ്ടു തണൽമരങ്ങളാണ്. ഒരു മരത്തിന്‍റെ ശിഖരങ്ങൾക്കിടയിലൂടെ വൈദ്യുതിലൈനുകളും കടന്നുപോകുന്നു. ഇത് അപകടങ്ങൾക്കും വൈദ്യുതിമുടങ്ങുന്നതിനും കാരണമാകും. ഡ്രൈവർമാർക്ക് ബുദ്ധിമുട്ടുണ്ടാക്കുന്ന മരത്തിന്‍റെ ശിഖരങ്ങൾ രാഷ്‌ട്രപതി എത്തുന്നതിനു മുമ്പുതന്നെ മുറിച്ചു മാറ്റി ഗതാഗതം സുഗമമാക്കണമെന്നാണ് ഡ്രൈവർമാരുടെയും നാട്ടുകാരുടെയും ആവശ്യം.

മെഡി. കോളജ് ട്രോമ കെയർ യൂണിറ്റിലെ രോഗികളുടെ കൂട്ടിരിപ്പുകാർ ദുരിതത്തിൽ

ഗാന്ധിനഗര്‍: മെഡിക്കല്‍ കോളജ് ആശുപത്രി ട്രോമ കെയര്‍ യൂണിറ്റില്‍ ചികിത്സയില്‍ കഴിയുന്ന രോഗികളുടെ കൂട്ടിരിപ്പുകാര്‍ ദുരിതത്തില്‍. തലയ്ക്ക് ഗുരുതര പരിക്കേറ്റവരും ന്യൂറോ സര്‍ജറി വിഭാഗത്തിന് കീഴില്‍ തലയില്‍ ശസ്ത്രക്രിയ നടത്തിയവരുമാണ് ട്രോമ കെയര്‍ യൂണിറ്റില്‍ ചികിത്സയിലുള്ളത്. എന്നാല്‍, ഇവരുടെ കൂട്ടിരിപ്പുകാര്‍ അടിസ്ഥാന സൗകര്യങ്ങളുടെ അഭാവം നേരിടുകയാണ്. മഴക്കാലമായതിനാല്‍ കൂട്ടിരിപ്പുകാര്‍ ഇരിക്കുന്ന ഭാഗത്തുകൂടെയാണ് വെള്ളം കുത്തിയൊലിക്കുന്നത്. ഇതില്‍ ചവിട്ടിവേണം കൂട്ടിരിപ്പുകാര്‍ ഈ വിഭാഗത്തില്‍ പ്രവേശിക്കാന്‍. വലിയ ശുചിത്വം പാലിക്കേണ്ട വിഭാഗമാണ് ട്രോമ കെയര്‍. വെള്ളം കെട്ടിക്കിടന്ന് ചെളി നിറഞ്ഞ നിലയിലാണ് ഇപ്പോള്‍ ഇവിടം. ഇതു കൊതുക് ശല്യവും വര്‍ധിപ്പിച്ചിരിക്കുകയാണ്. ഇവിടേക്കുള്ള വെള്ളമൊഴുക്കിന്‍റെ ഗതി മാറ്റി വിടേണ്ടത് അടിയന്തര ആവശ്യമാണ്. രോഗികളുടെ കൂട്ടിരിപ്പുകാര്‍ക്ക് രാത്രികാലങ്ങളില്‍ കിടക്കുന്നതിനുള്ള സൗകര്യവും പരിമിതമാണ്. സ്ത്രീകള്‍ക്ക് കിടക്കുന്നതിന് ചെറിയ സൗകര്യം ഒരുക്കിയിട്ടുണ്ടെങ്കിലും ഇതു പരിമിതമാണ്. പുരുഷന്മാർക്ക് കിടക്കുന്നതിന് വലിയ ദുരിതമാണ് നേരിടുന്നത്.

കോണത്താറ്റ് പാലം അടുത്തമാസം ‌ ഗതാഗതയോഗ്യമാക്കും: മന്ത്രി വാസവന്‍

കുമരകം: കോട്ടയം-കുമരകം റോഡിലെ കോണത്താറ്റ് പാലം പൂര്‍ണമായും അടുത്തമാസം ഗതാഗത യോഗ്യമാക്കുമെന്ന് മന്ത്രി വി.എന്‍ വാസവന്‍. കുമരകം പഞ്ചായത്തിലെ വികസനസദസ് ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. കോണത്താറ്റ് പാലത്തിന്‍റെ നിര്‍മാണം സമയബന്ധിതമായി പൂര്‍ത്തിയാക്കിയെങ്കിലും ഉറപ്പില്ലാത്ത മണ്ണായതിനാലാണ് സമാന്തര പാത നിര്‍മാണം വൈകിയതെന്ന് മന്ത്രി പറഞ്ഞു. കുമരകം പഞ്ചായത്തിനു സമീപമുള്ള ഗവൺമെന്‍റ് എൽപി സ്കൂൾ ഗ്രൗണ്ടിൽ നടന്ന സെമിനാറിൽ പഞ്ചായത്ത് പ്രസിഡന്‍റ് ധന്യ സാബു അധ്യക്ഷത വഹിച്ചു. പഞ്ചായത്തിന്‍റെ വികസന രേഖ മന്ത്രി പ്രകാശനം ചെയ്തു. സംസ്ഥാന സർക്കാരിന്‍റെ വികസന നേട്ടങ്ങൾ റിസോഴ്സ് പേഴ്സൺ ബിലാൽ കെ. റാമും പഞ്ചായത്തിന്‍റെ വികസന നേട്ടങ്ങൾ സെക്രട്ടറി എസ്. ബിനുവും അവതരിപ്പിച്ചു. ജില്ലാ പഞ്ചായത്തഗം കെ.വി. ബിന്ദു, പഞ്ചായത്ത് വൈസ് പ്രസിഡന്‍റ് ആർഷ ബൈജു, ബ്ലോക്ക് പഞ്ചായത്ത് അംഗങ്ങളായ കവിത ലാലു, മേഘലാ ജോസഫ്, പഞ്ചായത്ത് അംഗങ്ങളായ സ്മിത സുനിൽ, മായാ സുരേഷ്, പി.ഐ. ഏബ്രഹാം, ശ്രീജ സുരേഷ്, വി.കെ. ജോഷി, രശ്മികല, പി.എസ്. അനീഷ്, വി.സി. അഭിലാഷ്, പി.കെ. മനോഹരൻ, അസിസ്റ്റന്‍റ് സെക്രട്ടറി കെ.ഡി. മുത്തുമണി എന്നിവർ പങ്കെടുത്തു.

പ്രാര്‍ഥനാസമാജം സില്‍വര്‍ജൂബിലി സമാപനം ഇന്ന്

കോട്ടയം: യാക്കോബായ സഭ ഭദ്രാസന പ്രാര്‍ഥനാസമാജം സില്‍വര്‍ ജൂബിലി സമാപന സമ്മേളനവും കൃപാധാര ധ്യാന സംഗമവും കോട്ടയം സെന്‍റ് ജോസഫ്‌സ് കത്തീഡ്രലില്‍ ഇന്നു രാവിലെ എട്ടു മുതല്‍ ഉച്ചകഴിഞ്ഞ് ഒന്നുവരെ നടക്കും. ഫാ. സേവേറിയോസ് തോമസ് നിരണം വിശുദ്ധ കുര്‍ബാനയര്‍പ്പിക്കും. കുര്യാക്കോസ് മാര്‍ ക്ലീമീസ് മെത്രാപ്പോലീത്ത വചനസന്ദേശം നല്‍കും. സമാപന സമ്മേളനം യാക്കോബായ സഭ എപ്പിസ്‌കോപ്പല്‍ സുന്നഹദോസ് സെക്രട്ടറി തോമസ് മാര്‍ തീമോത്തിയോസ് ഉദ്ഘാടനം ചെയ്യും. 50-ാം വര്‍ഷ പൗരോഹിത്യ ജൂബിലി ആചരിക്കുന്ന തോമസ് മാര്‍ തീമോത്തിയോസിനെ പ്രാര്‍ഥനാസമാജം ആദരിക്കും. ഭദ്രാസന സെക്രട്ടറി ഫാ. ഷൈജു ജോസ് ചെന്നിക്കര സമാപനസന്ദേശം നല്‍കും.

ഒന്ന്, രണ്ട് ബസ് സ്റ്റാന്‍ഡുകളുടെ പരിപാലനം സ്വകാര്യ വ്യക്തിക്കു നല്‍കി നഗരസഭ

ചങ്ങനാശേരി: സ്വകാര്യ വ്യക്തിയുടെ പങ്കാളിത്തത്തോടെ ഒന്നാംനമ്പര്‍ പഴയ ബസ് സ്റ്റാന്‍ഡ്, പെരുന്ന ബസ് സ്റ്റാന്‍ഡുകളുടെ മുഖം മിനുക്കുന്നു. ഇരു ബസ്‌സ്റ്റാന്‍ഡുകളിലും ഇരിപ്പിടങ്ങള്‍ സജ്ജമാക്കും. അലങ്കാരദീപങ്ങള്‍ തെളിക്കും. ചെടിച്ചട്ടികളില്‍ പൂച്ചെടികള്‍ വച്ചുപിടിപ്പിക്കും. ടെര്‍മിനലും മുറികളും പെയിന്‍റുചെയ്ത് മനോഹരമാക്കും. വൈദ്യുതി ചാര്‍ജ് അടയ്ക്കുന്നതും സ്വകാര്യ വ്യക്തിയായിരിക്കും. പെരുന്ന ബസ് സ്റ്റാന്‍ഡിലെ ടേക്ക് എ ബ്രേക്ക് നടത്തിപ്പ് 7500 രൂപ മാസവാടകക്ക് ഇതേവ്യക്തിക്കു നല്‍കിയിട്ടുണ്ട്. ഇതില്‍ കാപ്പിക്കട തുറക്കും. ഇരു സ്റ്റാന്‍ഡുകളിലും കാമറ സ്ഥാപിച്ച് സുരക്ഷ ഉറപ്പാക്കും. ഡിജിറ്റല്‍ ബോര്‍ഡ് സ്ഥാപിച്ച് പരസ്യങ്ങള്‍ പ്രദര്‍ശിപ്പിക്കും. ജൈവ, അജൈവ മാലിന്യങ്ങള്‍ തരംതിരിച്ച് ശേഖരിക്കാന്‍ ബിന്നുകളും ബോട്ടില്‍ബൂത്തും സ്ഥാപിക്കും. നഗരസഭ നിര്‍ദേശിക്കുന്ന അറിയിപ്പുകളും നിര്‍ദേശങ്ങളും പ്രദര്‍ശിപ്പിക്കും. ദിവസവും ശുചീകരണം നടത്തും. രണ്ട് ലക്ഷം രൂപ സെക്യൂരിറ്റി ഡിപ്പോസിറ്റ് നല്‍കി സ്റ്റാന്‍ഡിന്‍റെ വിവിധ ഭാഗങ്ങളിലും ടെര്‍മിനലിലും നഗരസഭ അനുവദിക്കുന്ന അളവില്‍ പരസ്യബോര്‍ഡ് സ്ഥാപിച്ചാണ് സ്വകാര്യവ്യക്തി ബസ് സ്റ്റാന്‍ഡുകളുടെ പരിപാലനം ഏറ്റെടുത്തിരിക്കുന്നത്. യാത്രക്കാരുടെ സൗകര്യങ്ങള്‍ മെച്ചമാക്കാന്‍ ഉപകരിക്കും കഴിഞ്ഞ ബജറ്റിലെ നിര്‍ദേശപ്രകാരമാണ് പഴയ ബസ് സ്റ്റാന്‍ഡിന്‍റെയും പെരുന്ന ബസ് സ്റ്റാന്‍ഡിന്‍റെയും സൗന്ദര്യവത്കരണവും പരിപാലനവും സ്വകാര്യവ്യക്തിയെ ഏല്‍പ്പിച്ചത്. ഇതു യാത്രക്കാര്‍ക്ക് ഏറെ ഉപകരിക്കും. - മാത്യൂസ് ജോര്‍ജ്വൈസ് ചെയര്‍മാന്‍, ചങ്ങനാശേരി നഗരസഭ

ഗര്‍ഭച്ഛിദ്രം നിരുത്സാഹപ്പെടുത്തണം: മാര്‍ തോമസ് തറയില്‍

ചങ്ങനാശേരി: ഗര്‍ഭസ്ഥ ശിശുവിന്‍റെ ജീവിക്കാനുള്ള അവകാശത്തെ ധ്വംസിക്കുന്ന ഗര്‍ഭച്ഛിദ്രം നിരുത്സാഹപ്പെടുത്തണമെന്ന് ആര്‍ച്ച്ബിഷപ് മാര്‍ തോമസ് തറയില്‍. ജീവന്‍ ജ്യോതിസ് പ്രോലൈഫ് സെല്ലിന്‍റെ രജതജൂബിലി ദീപം തെളിച്ചു പ്രസംഗിക്കുകയായിരുന്നു ആര്‍ച്ച്ബിഷപ്. കുടുംബങ്ങളില്‍ മക്കളുടെ എണ്ണം കുറയുന്നത് സാമൂഹ്യവിപത്തായി നാം കാണേണ്ടിയിരിക്കുന്നു. കൂടുതല്‍ മക്കള്‍ ജനിക്കുവാന്‍ ദമ്പതികളെ പ്രോത്സാഹിപ്പിക്കേണ്ടത് ഈ കാലഘട്ടത്തിന്‍റെ ആവശ്യമാണെന്നും ആര്‍ച്ച്ബിഷപ് കൂട്ടിച്ചേര്‍ത്തു. അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട് ആമുഖസന്ദേശം നല്‍കി. ഫാമിലി അപ്പൊസ്തലേറ്റ് ഡയറക്ടര്‍ ഫാ. സെബാസ്റ്റ്യന്‍ ചാമക്കാല, യുഗേഷ് പുളിക്കന്‍, ഏബ്രഹാം പുത്തന്‍കളം എന്നിവര്‍ ക്ലാസുകള്‍ നയിച്ചു. സമാപന സമ്മേളനത്തില്‍ ഫാമിലി അപ്പൊസ്തലേറ്റ് ഡയറക്ടര്‍ ഫാ. സെബാസ്റ്റ്യന്‍ ചാമക്കാല, ഡയറക്ടര്‍ ഫാ. ജോസഫ് പാറയ്ക്കല്‍, അനിമേറ്റര്‍ സിസ്റ്റർ ജിന്‍സ് മേരി, അസിസ്റ്റന്‍റ് ഡയറക്ടര്‍ ഫാ. ജോണിക്കുട്ടി തറക്കുന്നേല്‍, ഏബ്രഹാം പുത്തന്‍കളം, പ്രോലൈഫ് സെക്രട്ടറി റെജി ആഴാഞ്ചിറ, പിതൃവേദി പ്രസിഡന്‍റ് റോയ് കപ്പാങ്കല്‍, മാതൃവേദി പ്രസിഡന്‍റ് റോസമ്മ സോണി എന്നിവര്‍ പ്രസംഗിച്ചു. പരിശീലനത്തില്‍ റെജി ആഴാഞ്ചിറ, ബൈജു ആലഞ്ചേരി, ടോമിച്ചന്‍ കാവാലം, ലൂസിയമ്മ ചെന്നാട്ടുശേരി, ബെറ്റി, പ്രിന്‍സ് ചക്കാല എന്നിവര്‍ നേതൃത്വം വഹിച്ചു.

സഭയുടെ പാരമ്പര്യം പുതുതലമുറയിലേക്കു പകരണം: മാര്‍ തോമസ് തറയില്‍

ചങ്ങനാശേരി: സീറോമലബാര്‍ സഭാംഗങ്ങള്‍ സ്വത്തബോധമുള്ളവരും പൂര്‍വികര്‍ പകര്‍ന്നുതന്ന വിശ്വാസതീക്ഷ്ണതയിലും പാരമ്പര്യങ്ങളും അഭിമാനം കൊള്ളുന്നവരുമാകണമെന്ന് ആര്‍ച്ച്ബിഷപ് മാര്‍ തോമസ് തറയില്‍. സീറോമലബാര്‍ സമുദായിക ശക്തീകരണ വര്‍ഷത്തിന്‍റെ ഭാഗമായി ചങ്ങനാശേരി അതിരൂപത എസ്ബി ഹയര്‍ സെക്കന്‍ഡറി സ്‌കൂള്‍ ഓഡിറ്റോറിയത്തില്‍ ടീച്ചിംഗ് ടീം അംഗങ്ങള്‍ക്കായി സംഘടിപ്പിച്ച പരിശീലന പരിപാടിയില്‍ മുഖ്യസന്ദേശം നല്‍കുകയായിരുന്നു ആര്‍ച്ച്ബിഷപ്. പുതുതലമുറയ്ക്ക് സഭയുടെയും സമുദായത്തിന്‍റെയും ചരിത്രവും പാരന്പര്യങ്ങളും പകര്‍ന്നുനല്‍കണമെന്നും മാര്‍ തോമസ് തറയില്‍ കൂട്ടിച്ചേര്‍ത്തു. അതിരൂപതാ വികാരി ജനറാള്‍ മോണ്‍. ആന്‍റണി എത്തയ്ക്കാട്ട് ഉദ്ഘാടനം നിര്‍വഹിച്ചു. സീറോമലബാര്‍ പബ്ലിക് അഫയേഴ്‌സ് കമ്മീഷന്‍ സെക്രട്ടറി ഫാ. ജയിംസ് കൊക്കാവയലില്‍, താമരശേരി രൂപതാ എയ്ഡര്‍ എഡ്യുകെയര്‍ ഡയറക്ടര്‍ ഫാ. മെല്‍ബിന്‍ വെള്ളയ്ക്കാക്കുടി, കാര്‍പ് പ്രമോട്ടര്‍ ബേബി വട്ടക്കര, റിട്ടയേർഡ് ഡെപ്യൂട്ടി തഹസില്‍ദാര്‍ ആന്‍റണി ആറില്‍ച്ചിറ എന്നിവര്‍ ക്ലാസുകള്‍ നയിച്ചു. സമുദായ ശക്തീകരണ അതിരൂപത കമ്മിറ്റി ഡയറക്ടര്‍ ഫാ. സാവിയോ മാനാട്ട്, കരിയര്‍ കോ-ഓര്‍ഡിനേറ്റര്‍ ഫാ. മാത്യു നടയ്ക്കല്‍, കണ്‍വീനര്‍ ബിജു സെബാസ്റ്റ്യന്‍ എന്നിവര്‍ പ്രസംഗിച്ചു.

വിശ്വാസീസമൂഹങ്ങളുടെ ഐക്യം മതേരത്വത്തെ ശക്തിപ്പെടുത്തും: ബിഷപ് ഡോ. മഠത്തിപ്പറമ്പില്‍

ചങ്ങനാശേരി: ഓരോ വിശ്വാസീ സമൂഹത്തിന്‍റെയും ഐക്യവും മൂല്യാധിഷ്ഠിത വളര്‍ച്ചയും ഒരു മതേതരസമൂഹത്തില്‍ രാജ്യത്തിന്‍റെ കെട്ടുറപ്പിനെ ശക്തിപ്പെടുത്തുമെന്ന് വിജയപുരം രൂപതാ സഹായ മെത്രാന്‍ ഡോ. ജസ്റ്റിന്‍ മഠത്തിപ്പറമ്പില്‍. രൂപതയുടെ ശതാബ്ദിക്കു മുന്നോടിയായി നടക്കുന്ന സിനഡാത്മക കോണ്‍ക്ലേവിന്‍റെ തിരുവല്ലാ മേഖലാതല കോണ്‍ക്ലേവ് ചങ്ങനാശേരി മേരി മൗണ്ട് റോമന്‍ കത്തോലിക്കാ പള്ളിയില്‍ ഉദ്ഘാടനം ചെയ്യുകയായിരുന്നു ബിഷപ്. രൂപതാ സിനഡല്‍ കമ്മീഷന്‍ സെക്രട്ടറി ഫാ. അജി ചെറുകാക്രാംചേരില്‍ അധ്യക്ഷനായിരുന്നു. രൂപതാ ശുശ്രൂഷാ സമിതി കോ-ഓര്‍ഡിനേറ്റര്‍ ഫാ. വര്‍ഗീസ് കൊട്ടയ്ക്കാട്ട്, ഫെറോനാ വികാരി ഫാ. സ്റ്റീഫന്‍ പുത്തന്‍പറമ്പില്‍, മേഖലാ സെക്രട്ടറി ഫാ. മാത്യു ഒഴത്തില്‍, ഫാ. തിയോഫിന്‍ തുരുത്തിക്കോണം, ഫാ. ഔസേഫ് പുത്തന്‍പറമ്പില്‍, ഫാ. ജോര്‍ജ് ലോബോ, ഫാ. സാബിന്‍ ചേപ്പില, മദര്‍ ദീപ്തി, സിസ്റ്റര്‍ മേബിള്‍, ഫ്രാന്‍സിസ് ബി. സാവിയോ, ജസ്റ്റിന്‍ ബ്രൂസ് തുടങ്ങിയവര്‍ പ്രസംഗിച്ചു. വിവിധ ശുശ്രൂഷാ സമിതികള്‍ ചര്‍ച്ച ചെയ്ത് അംഗീകരിച്ച റിപ്പോര്‍ട്ട് രൂപതാധ്യക്ഷനു കൈമാറുമെന്ന് മേഖലാ സെക്രട്ടറി ഫാ. മാത്യു ഒഴത്തില്‍ പറഞ്ഞു.

ദൈവദാസന്‍ മാര്‍ കാവുകാട്ടിന്‍റെ സുഗന്ധവ്യഞ്ജനങ്ങളാല്‍ നിര്‍മിച്ച ചിത്രം കബറിടത്തില്‍ സമര്‍പ്പിച്ച് കുടുംബക്കൂട്ടായ്മ

ചങ്ങനാശേരി: ദൈവദാസന്‍ മാര്‍ കാവുകാട്ടിന്‍റെ ചിത്രം സുഗന്ധവ്യഞ്ജനങ്ങളാല്‍ നിര്‍മിച്ച് കബറിടത്തില്‍ സമര്‍പ്പിച്ച് കുടുംബക്കൂട്ടായ്മ യൂണിറ്റ്. കുറവിലങ്ങാട് മേജര്‍ ആര്‍ക്കി എപ്പിസ്‌കോപ്പല്‍ മര്‍ത്ത്മറിയം അര്‍ക്കദിയാക്കോന്‍ തീര്‍ഥാടന ഇടവകയിലെ 27-ാം വാര്‍ഡിലെ ഒന്നാം കുടുംബക്കൂട്ടായ്മ യൂണിറ്റാണ് പുണ്യവഴി തേടി പുതിയ മാതൃക സ്വീകരിച്ചത്. കുടുംബക്കൂട്ടായ്മ യൂണിറ്റ് ദൈവദാസന്‍ മാര്‍ മാത്യു കാവുകാട്ടിന്‍റെ പേരിലുള്ളതാണ്. മാര്‍ മാത്യു കാവുകാട്ടിന്‍റെ ചരമവാര്‍ഷികത്തോടനുബന്ധിച്ച് അദ്ദേഹത്തിന്‍റെ കബറിടം സ്ഥിതി ചെയ്യുന്ന ചങ്ങനാശേരി മെത്രാപ്പോലീത്തന്‍ പള്ളിയോട് ചേര്‍ന്നുള്ള കബറിട പള്ളിയില്‍ കൂട്ടായ്മ അംഗങ്ങള്‍ എത്തിയാണ് സുഗന്ധവ്യഞ്ജനങ്ങളാല്‍ നിര്‍മിച്ച ചിത്രം സമര്‍പ്പിച്ചത്. മാര്‍ മാത്യു കാവുകാട്ട് വൈദികനായിരിക്കേ വിശുദ്ധ കുര്‍ബാനയര്‍പ്പിച്ചിരുന്ന പള്ളിയില്‍ അസിസ്റ്റന്‍റ് വികാരി ഫാ. തോമസ് താന്നിമലയുടെ കാര്‍മികത്വത്തില്‍ വിശുദ്ധ കുര്‍ബാനയര്‍പ്പണം നടത്തി. തുടര്‍ന്ന് മാര്‍ മാത്യു കാവുകാട്ട് മ്യൂസിയത്തിലേക്ക് ചിത്രം കൈമാറി. കുറവിലങ്ങാട് ഇടവക പള്ളിയില്‍നിന്ന് ആരംഭിച്ച തീര്‍ഥാടനം ആര്‍ച്ച്പ്രീസ്റ്റ് റവ.ഡോ. തോമസ് മേനാച്ചേരി ഫ്ളാഗ് ഓഫ് ചെയ്തു. അസിസ്റ്റന്‍റ് വികാരിമാരായ ഫാ. പോള്‍ കുന്നുംപുറത്ത്, ഫാ. തോമസ് താന്നിമലയില്‍, ഫാ. ജോസഫ് ചൂരയ്ക്കല്‍ എന്നിവരുടെ കാര്‍മികത്വത്തില്‍ പ്രത്യേക പ്രാര്‍ഥനകളോടെയാണ് ചങ്ങനാശേരി കത്തീഡ്രലിലേക്കുള്ള തീര്‍ഥാടനമാരംഭിച്ചത്. പള്ളിയോഗം സെക്രട്ടറി ബെന്നി കോച്ചേരി, കുടുംബക്കൂട്ടായ്മ ജനറല്‍ ലീഡര്‍ ബോബിച്ചന്‍ നിധീരി, സോണ്‍ ലീഡര്‍ സണ്ണി വെട്ടിക്കാട്ട്, യൂണിറ്റ് പ്രസിഡന്‍റ് പോള്‍സണ്‍ ചേലക്കാപ്പിള്ളില്‍, സെക്രട്ടറി സുമി റോയി ഓലിക്കാട്ടില്‍ തുടങ്ങിയവര്‍ പ്രസംഗിച്ചു. മാര്‍ മാത്യു കാവുകാട്ട് നാമകരണനടപടികളുടെ വൈസ് പോസ്റ്റുലേറ്റര്‍ ഫാ. ജോണ്‍ പ്ലാത്താനം ചിത്രം ഏറ്റുവാങ്ങി. സുഗന്ധവ്യഞ്ജനങ്ങള്‍കൊണ്ട് മാര്‍ കാവുകാട്ടിന്‍റെ ചിത്രം ചുക്ക്, മഞ്ഞള്‍, ഏലക്ക, ഗ്രാമ്പൂ, കുരുമുളക്, കറുവ എന്നിങ്ങനെ പത്തിനം സുഗന്ധവ്യഞ്ജനങ്ങള്‍ ഉപയോഗിച്ചാണ് ചിത്രം ഒരുക്കിയത്. ഒരു മാസത്തോളം നീണ്ട പരിശ്രമങ്ങളിലാണ് ചിത്രം ഒരുക്കിയതെന്ന് യൂണിറ്റ് ഭാരവാഹികളായ പോള്‍സണ്‍ ചേലയ്ക്കാപ്പള്ളിയും സുമി റോയിയും പറഞ്ഞു. ചിത്രകലയില്‍ ശ്രദ്ധേയനായ സണ്ണി ഇടത്തിനാലാണ് ചിത്രം ക്രമീകരിക്കാന്‍ മാര്‍ഗനിര്‍ദേശങ്ങള്‍ നല്‍കിയത്.

കത്തോലിക്ക കോണ്‍ഗ്രസ് അവകാശസംരക്ഷണ യാത്രയ്ക്ക് ചങ്ങനാശേരിയിൽ സ്വീകരണം നാളെ

ചങ്ങനാശേരി: കത്തോലിക്ക കോണ്‍ഗ്രസ് ഗ്ലോബല്‍ സമിതിയുടെ നേതൃത്വത്തില്‍ "സമുദായ ശക്തീകരണം രാഷ്‌ട്രപുരോഗതിക്ക്, നീതി ഔദാര്യമല്ല അവകാശമാണ്’ എന്നീ മുദ്രാവാക്യങ്ങള്‍ ഉയര്‍ത്തി ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പില്‍ നയിക്കുന്ന അവകാശ സംരക്ഷണ യാത്രയ്ക്ക് നാളെ ചങ്ങനാശേരിയില്‍ വരവേല്പ് നല്‍കും. വൈകുന്നേരം 4.30ന് പെരുന്നയില്‍നിന്ന് വാദ്യമേളങ്ങളുടെ അകമ്പടിയോടുകൂടി സ്വീകരിച്ച് സമ്മേളന വേദിയായ പെരുന്ന ബസ്‌സ്റ്റാന്‍ഡ് മൈതാനത്ത് ക്രമീകരിച്ചിരിക്കുന്ന സമ്മേളന നഗറിലേക്ക് ആനയിക്കും. തുടര്‍ന്നു നടക്കുന്ന സമ്മേളനം ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും. അതിരുപത പ്രസിഡന്‍റ് ബിജു സെബാസ്റ്റ്യന്‍ അധ്യക്ഷത വഹിക്കും. ജാഥാ ക്യാപ്റ്റന്‍ പ്രഫ. രാജീവ് കൊച്ചുപറമ്പില്‍ വിഷയാവതരണ പ്രസംഗം നടത്തും. അതിരൂപതാ വികാരി ജനറാള്‍ മോണ്‍. ആന്‍റണി എത്തയ്ക്കാട്ട് മുഖ്യസന്ദേശം നല്കും. അതിരൂപത ഡയറക്ടര്‍ ഫാ. സാവിയോ മാനാട്ട്, കത്തോലിക്കാ കോണ്‍ഗ്രസ് ഗ്ലോബല്‍ ഡയറക്ടര്‍ ഫാ. ഫിലിപ്പ് കവിയില്‍ തുടങ്ങിയവര്‍ പ്രസംഗിക്കും. സ്വീകരണത്തിന് വിപുലമായ കമ്മിറ്റി സ്വീകരണത്തിന്‍റെ വിജയത്തിനായി ഫൊറോന വികാരിമാരായ ഫാ. ജോസഫ് വാണിയപ്പുരയ്ക്കല്‍, ഫാ. സെബാസ്റ്റ്യന്‍ പുന്നശേരി, ഫാ. ജേക്കബ് ചീരംവേലില്‍, ഫാ. ജോബി കറുകപ്പറമ്പില്‍, ഫാ. വര്‍ഗീസ് കൈതപ്പറമ്പില്‍, അതിരൂപതാ ഭാരവാഹികളായ ബിനു ഡൊമിനിക്, ജോസ് വെങ്ങാന്തറ, രാജേഷ് ജോണ്‍, ടോമിച്ചന്‍ അയ്യരുകുളങ്ങര, സൈബി അക്കര, കെ.എസ്. ആന്‍റണി, ജേക്കബ് നിക്കോളാസ്, ജോര്‍ജുകുട്ടി മുക്കത്ത്, ഷിജി ജോണ്‍സണ്‍, റോസിലിന്‍ കുരുവിള, സേവ്യര്‍ കൊണ്ടോടി, പി.സി. കുഞ്ഞപ്പന്‍, സിസി അമ്പാട്ട്, ബാബു വള്ളപ്പുര, ലിസി ജോസ്, ടോം കയ്യാലകം, പി.ജെ. സെബാസ്റ്റ്യന്‍, കുഞ്ഞുമോന്‍ തൂമ്പുങ്കല്‍, ലാലി ഇളപ്പുങ്കല്‍, കെ.ഡി. ചാക്കോ, ഇ.ജെ. തോമസ്, ഔസേപ്പച്ചന്‍ ചെറുകാട് തുടങ്ങിയവരുടെ നേതൃത്വത്തില്‍ വിവിധ കമ്മിറ്റികള്‍ പ്രവര്‍ത്തിച്ചുവരുന്നു. വിവിധ ഫൊറോനകളില്‍നിന്നു വാഹനങ്ങളിലെത്തുന്നവര്‍ക്ക് പെരുന്ന ബസ് സ്റ്റാന്‍ഡില്‍ ആളെ ഇറക്കി വാഹനങ്ങള്‍ കത്തീഡ്രല്‍ പള്ളി മൈതാനിയില്‍ പാര്‍ക്കു ചെയ്യാവുന്നതാണ്.

ജൂബിലി ലോഗോസ് ക്വിസ് -2025: ചങ്ങനാശേരി അതിരൂപത വിജയികളെ പ്രഖ്യാപിച്ചു

ചങ്ങനാശേരി: ജൂബിലി ലോഗോസ് ക്വിസ് - 2025ന്‍റെ അതിരൂപതാതല വിജയികളെ പ്രഖ്യാപിച്ചു. വിവിധ കാറ്റഗറികളിലെ വിജയികൾ. കാറ്റഗറി-എ  ഒന്നാംസ്ഥാനം: ജോസഫ് ജോൺ മേനാച്ചേരി, ലൂർദ് ഫൊറോന പള്ളി തിരുവനന്തപുരം, തിരുവനന്തപുരം ഫൊറോന. രണ്ടാംസ്ഥാനം: സേറ ആൻ ജൂവൽ സെന്‍റ് മേരിസ് പാറേൽ, ചങ്ങനാശേരി ഫൊറോന. മൂന്നാംസ്ഥാനം: തെരേസ ടോജോ ഉറുമ്പക്കൽ ക്രിസ്തുരാജ് പള്ളി, ഏറ്റുമാനൂർ, അതിരമ്പുഴ ഫൊറോന. കാറ്റഗറി-ബി  ഒന്നാംസ്ഥാനം: ജാൻവി ആൻ ജോസി മറ്റപ്പറമ്പിൽ, എസ്എച്ച് പള്ളി, ചെത്തിപ്പുഴ, ചങ്ങനാശേരി ഫൊറോന. രണ്ടാംസ്ഥാനം: ഏയ്ഞ്ചൽ മേരി തോമസ് ഷാരോൺ കുറ്റിക്കാട്ട് സെന്‍റ് മേരീസ് ആർക്കിഎപ്പിസ്കോപ്പൽ പള്ളി കുടമാളൂർ, കുടമാളൂർ ഫൊറോന. മൂന്നാംസ്ഥാനം: അലോണ നോജി കാട്ടാമ്പള്ളി സെന്‍റ് ജോൺ ദ ബാപ്റ്റിസ്റ്റ് പള്ളി നെടുംകുന്നം, നെടുംകുന്നം ഫൊറോന. സി-കാറ്റഗറി  ഒന്നാംസ്ഥാനം: ജോയൽ ജോമോൻ പതിനഞ്ചിൽ സെന്‍റ് തോമസ് കപ്പൂച്ചിൻ ആശ്രമം സൺഡേ സ്കൂൾ, കാവാലം സെന്‍റ് തെരേസാസ് ഇടവക, പുളിങ്കുന്ന് ഫൊറോന. രണ്ടാംസ്ഥാനം: വിൻസി റോസ് ക്രിസ്തുരാജ് പള്ളി രാജഗിരി, അമ്പൂരി ഫൊറോന. മൂന്നാംസ്ഥാനം: ജിഷ ജോർജ് കുരീക്കാട്ട്, സെന്‍റ് ജോസഫ് പള്ളി, ചമ്പക്കര, നെടുംകുന്നം ഫൊറോന. ഡി-കാറ്റഗറി  ഒന്നാംസ്ഥാനം: മജേഷ് ജോസഫ് തൈക്കാട് സെന്‍റ് ജോസഫ് ചർച്ച് വായ്പൂര്, നെടുംകുന്നം ഫൊറോന. രണ്ടാംസ്ഥാനം: സിസ്റ്റർ സിസി മരിയ പറപ്പള്ളി എസ്എബിഎസ്, ലൂർദ് മാതാ ചർച്ച് മാമ്മൂട്, കുറുമ്പനാടം ഫൊറോന. മൂന്നാംസ്ഥാനം: നിധി ആന്‍റൺ കൈലാത്ത്, സെന്‍റ് മേരീസ് കത്തീഡ്രൽ, ചങ്ങനാശേരി ഫൊറോന. ഇ-കാറ്റഗറി  ഒന്നാംസ്ഥാനം: തോമസുകുട്ടി ജോസ് വള്ളവന്ത്ര സെന്‍റ് ഗ്രിഗോറിയസ് ചർച്ച്, പുന്നപ്ര, ആലപ്പുഴ ഫൊറോന. രണ്ടാംസ്ഥാനം: ഫാ. മാർട്ടിൻ തൈപ്പറമ്പിൽ സെന്‍റ് തോമസ് ചെത്തിപ്പുഴ, ചങ്ങനാശേരി ഫൊറോന. മൂന്നാംസ്ഥാനം: അമ്മിണി ഇമ്മാനുവൽ കാരിക്കാട്ട്, ക്രിസ്തുരാജ് പള്ളി കുറ്റിക്കോണം, കൊല്ലം-ആയൂർ ഫൊറോന. എഫ്-കാറ്റഗറി  ഒന്നാംസ്ഥാനം: വത്സമ്മ സ്കറിയ അമ്പലത്തട്ടിൽ, സെന്‍റ് ജോർജ് പള്ളി തോട്ടയ്ക്കാട്, കുറുമ്പനാടം ഫൊറോന. രണ്ടാംസ്ഥാനം: സിസ്റ്റർ ആശാ എസ്ഡിഎസ് സെന്‍റ് ജോസഫ് പള്ളി പടഹാരം, ചമ്പക്കുളം ഫൊറോന. മൂന്നാംസ്ഥാനം: ലിസി തോമസ് കുരിശുംമൂട്ടിൽ സെന്‍റ് അൽഫോൻസ പള്ളി പൊങ്ങംമൂട്. മത്സരത്തിന്‍റെ മുഴുവൻ ഫലങ്ങളും ചങ്ങനാശേരി അതിരൂപത, ഇടവകതല മത്സര റിസൾട്ട് ഉൾപ്പെടെ www.logosquiz.org എന്ന സൈറ്റിൽ ലഭ്യമാണെന്ന് സംഘാടകർ അറിയിച്ചു. ചങ്ങനാശേരി അതിരൂപത കേന്ദ്രത്തിൽ നടന്ന വാർത്താ സമ്മേളനത്തിൽ വികാരി ജനറാൾ മോൺ. ആന്‍റണി എത്തയ്ക്കാട്ട്, ബൈബിൾ അപ്പൊസ്തലേറ്റ് അതിരൂപത ഡയറക്ടർ ഫാ. ജോർജ് മാന്തുരുത്തിൽ, പ്രഫ. ജോസഫ് ടിറ്റോ നേര്യംപറമ്പിൽ, സിസ്റ്റർ ചെറുപുഷ്പം എസ്എബിഎസ്, മറിയം ജോർജ് പൊട്ടംകളം, റ്റോമിച്ചൻ കൈതക്കളം, ജിക്കു ജോസഫ് ഉണ്ടിപ്പറമ്പിൽ, ജോഷി കൊല്ലാപുരം തുടങ്ങിയവർ പങ്കെടുത്തു. സെമിഫൈനൽ മത്സരം നവംബർ 9ന്  വിജയികൾക്കുള്ള സെമിഫൈനൽ മത്സരം നവംബർ 9ന് കൊല്ലം ജ്യോതി നികേതൻ വിമൻസ് കോളജിൽ ഉച്ചകഴിഞ്ഞ് 2 മുതൽ 3 വരെ നടക്കും. വിശദവിവരങ്ങൾക്ക് ഫോൺ: +91 96050 , +91 99613 69380.

സ്ത്രീകളെ ശക്തീകരിക്കാൻ കുടുംബശ്രീക്ക് കഴിഞ്ഞു: മന്ത്രി

തലയാഴം: സാമൂഹ്യ, സാംസ്കാരിക വളർച്ചയ്ക്കൊപ്പം സ്ത്രീകളെ സാമ്പത്തികമായും ശക്തീകരിക്കാൻ കുടുംബശ്രീക്ക് കഴിഞ്ഞതായി മന്ത്രി വി.എൻ. വാസവൻ. തലയാഴം പഞ്ചായത്ത് കുടുംബശീ സിഡിഎസ് വാർഷികം ഉല്ലല ജൂബിലി മെമ്മോറിയൽ ഹാളിൽ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ബ്രാൻഡഡ് പ്രോഡക്ടുകൾ നാണിച്ചുപോകുന്ന തരത്തിലുള്ള നല്ല ഉത്പന്നങ്ങൾ ഉത്പാദിപ്പിച്ച് വിപണിയിലെത്തിക്കാൻ കുടുംബശ്രീക്ക് കഴിയുന്നത് ഏറെ അഭിമാനകരമാണെന്നും മന്ത്രി കൂട്ടിച്ചേർത്തു. സി.കെ. ആശ എംഎൽഎ അധ്യക്ഷത വഹിച്ചു. തലയാഴം പഞ്ചായത്ത് പ്രസിഡന്‍റ് രമേഷ് പി. ദാസ് മുഖ്യ പ്രഭാഷണം നടത്തി. മന്ത്രി വി.എൻ. വാസവൻ, സി.കെ. ആശ എംഎൽഎ, പഞ്ചായത്ത് പ്രസിഡന്‍റ് രമേഷ് പി. ദാസ്, ഡോ. സലില മുല്ലൻ തുടങ്ങിയവരെ ഉപഹാരം നൽകി ആദരിച്ചു. ജില്ലാ പഞ്ചായത്തംഗം ഹൈമി ബോബി, ബ്ലോക്ക് പഞ്ചായത്ത് പ്രസിഡന്‍റ് എസ്. ബിജു, ബ്ലോക്ക് പഞ്ചായത്ത് മുൻ പ്രസിഡന്‍റ് കെ.ക. രഞ്ജിത്ത്, പഞ്ചായത്ത് വൈസ് പ്രസിഡന്‍റ് ജെൽസി സോണി, പ്രതിപക്ഷ നേതാവ് എസ്. ദേവരാജൻ, പഞ്ചായത്ത് അംഗങ്ങളായ സുജാത മധു, കൊച്ചുറാണി ബേബി, ബി.എൽ. സെബാസ്റ്റ്യൻ, കെ. ബിനിമോൻ, പ്രീജു കെ. ശശി, റോസി ബാബു, എം.എസ്. ധന്യ, ഷീജ ബൈജു, പഞ്ചായത്ത് സെക്രട്ടറി വി.എൻ. റെജിമോൻ, സിഡിഎസ് ചെയർപേഴ്സൺ പി.ആർ. രജനി, മെമ്പർ സെക്രട്ടറി ജി. മഞ്ജു, സിഡിഎസ് മെമ്പർ മരിയ ജൂഡിത്ത് തുടങ്ങിയവർ പ്രസംഗിച്ചു.

കോരിക്കൽ പാലം വീതികൂട്ടി പുനർനിർമിക്കണം

തലയോലപ്പറമ്പ്: തലയോലപ്പറമ്പ് - കോരിക്കൽ- പഴമ്പെട്ടി റോഡിലെ കോരിക്കൽ പാലം വീതികൂട്ടി പുനർനിർമിക്കണമെന്ന ആവശ്യം ശക്തമായി. പാലത്തിന്‍റെ ഒരു ഭാഗത്തെ കൈവരി തകർന്നത് അപകടഭീതി പരത്തുകയാണ്. ഏതാനും വർഷം മുമ്പാണ് പാലത്തിന്‍റെ കൈവരി തകർന്നത്. കുറുന്തറപുഴയ്ക്കു കുറുകെയുള്ള പാലത്തിന് അന്പതു വർഷത്തിലധികം പഴക്കമുണ്ട്. വാഹനത്തിരക്കേറിയ വീതികുറഞ്ഞ റോഡിലെ കൈവരിയില്ലാത്ത പാലത്തിലൂടെ കടന്നുപോകുന്ന വാഹനങ്ങൾ രാത്രികാലങ്ങളിൽ ആഴമേറിയ തോട്ടിലേക്കു പതിക്കാനുള്ള സാധ്യത ഏറെയാണെന്ന് നാട്ടുകാർ പറയുന്നു. 2018ലെ പ്രളയത്തിലാണ് പാലത്തിന്‍റെ കൈവരികൾ തകർന്നത്. തലയോലപ്പറമ്പിൽനിന്ന് എഴുമാ‌ന്തുരുത്ത്, വൈക്കം എന്നിവടങ്ങളിലേക്കുള്ള എളുപ്പമാർഗമായതിനാൽ പാലത്തിന്‍റെ കൈവരികളും പുനർനിർമിക്കണമെന്ന ആവശ്യം പ്രദേശവാസികൾ ഏറെക്കാലമായി ഉയർത്തുന്നു. വിദ്യാർഥികളും വയോജനങ്ങളും പാലത്തിന്‍റെ വശംചേർന്നു നടന്നുപോകുന്നത് ഭയത്തോടെയാണ്. അപകടത്തിനു കാക്കാതെ കൈവരികൾ നന്നാക്കണം അരനൂറ്റാണ്ടിലധികം പഴക്കമുള്ള പാലത്തിന് ബലക്ഷയം സംഭവിച്ചിട്ടുണ്ടോയെന്നകാര്യം പരിശോധിക്കണം. ജനങ്ങൾ നിരന്തരം ഇക്കാര്യം പഞ്ചായത്തിനെ ബോധ്യപ്പെടുത്തിയിട്ടുള്ളതാണ്. -സുരേഷ് പെരുമ്പാട്ടത്തിൽ,കോരിക്കൽ പാലം പുനർനിർമിക്കണം റോഡ് ബിഎം ആൻഡ് ബിസി നിലവാരത്തിൽ നിർമിച്ചത് ഗുണകരമായെങ്കിലും കാലപ്പഴക്കത്താൽ ജീർണാവസ്ഥയിലായ കോരിക്കൽ പാലം പുനർനിർമിക്കാൻ നടപടിയുണ്ടായില്ല. കൃഷിയുമായി ബന്ധപ്പെട്ട് പാടശേഖരങ്ങളിലേക്കു വരുന്ന വാഹനങ്ങളും സ്‌കൂൾ ബസുകളും സ്വകാര്യബസും കെഎസ്ആർടിസിയുടെ ഗ്രാമവണ്ടിയുമടക്കം നൂറുകണക്കിനു വാഹനങ്ങളാണ് ദിനംപ്രതി പാലത്തിലൂടെ പോകുന്നത്. അറ്റകുറ്റപ്പണി നടത്താതെ കാലപ്പഴക്കമേറിയ പാലം വീതികൂട്ടി പുനർനിർമിക്കാൻ സർക്കാർ നടപടി സ്വീകരിക്കണം. - ശശിധരൻ വാളവേലിപൊതുപ്രവർത്തകൻ, തലയോലപ്പറമ്പ് വീണ്ടും ടെൻഡർ ചെയ്യും ‌പൊതുമരാമത്തു വകുപ്പ് ബ്രിഡ്ജസ് വിഭാഗത്തിന്‍റെ കീഴിൽ വിവിധ പാലങ്ങൾക്കായി പത്തു ലക്ഷം രൂപ അനുവദിച്ചതിൽ കോരിക്കൽ പാലത്തിന്‍റെ കൈവരി നിർമാണവും ഉൾപ്പെടുത്തിയിട്ടുണ്ട്. രണ്ടു തവണ ടെൻഡർ ചെയ്തെങ്കിലും കരാറുകാർ പ്രവൃത്തി ഏറ്റെടുത്തില്ല. വീണ്ടും ടെൻഡർ നടത്താൻ തീരുമാനിച്ചിട്ടുണ്ട്. - എസ്.എ. കിരൺലാൽ, അസി. എൻജിന‌ിയർ, പൊതുമരാമത്ത് വകുപ്പ് ബ്രിഡ്‌ജസ് വിഭാഗം

അഞ്ചുലക്ഷം പാർപ്പിടമൊരുക്കിയ നേട്ടം കേരളത്തി‌നു മാത്രം: മന്ത്രി വാസവൻ

ഉദയനാപുരം: നിർധന കുടുംബങ്ങൾക്ക് 5,22,000 വീടുകൾ ലൈഫ് പദ്ധതിയിൽ പൂർത്തിയാക്കിയ നേട്ടം കേരളത്തിനു മാത്രം സ്വന്തമെന്ന് മന്ത്രി വി.എൻ. വാസവൻ. ഉദയനാപുരം പഞ്ചായത്തിലെ വികസനസദസും ലൈഫ് ഭവന പദ്ധതിയിലൂടെ നിർമാണം പൂർത്തീകരിച്ച വീടുകളുടെ താക്കോൽ വിതരണോദ്ഘാടനവും നിർവഹിച്ചു പ്രസംഗിക്കുകയായിരുന്നു മന്ത്രി. വൈക്കം മുഹമ്മദ് ബഷീർ സ്മാരക ഹാളിൽ നടന്ന യോഗത്തിൽ സി.കെ. ആശ എംഎൽഎ അധ്യക്ഷത വഹിച്ചു. സംസ്ഥാന സർക്കാരിന്‍റെ വികസനനേട്ടങ്ങൾ വികസനസദസ് റിസോഴ്സ് പേഴ്സൺ സുമേഷ് സുകുമാരൻ അവതരിപ്പിച്ചു. ബ്ലോക്ക് പഞ്ചായത്ത് പ്രസിഡന്‍റ് എസ്. ബിജു, പഞ്ചായത്ത് പ്രസിഡന്‍റ് പി.കെ. ആനന്ദവല്ലി, വൈസ് പ്രസിഡന്‍റ് സി.പി. അനൂപ്, ജില്ലാ പഞ്ചായത്തംഗം പി.എസ്. പുഷ്പമണി, ബ്ലോക്ക് പഞ്ചായത്തംഗം ഒ.എം. ഉദയപ്പൻ എന്നിവർ പങ്കെടുത്തു.

കടുത്തുരുത്തിയില്‍ സമഗ്ര കൂണ്‍ഗ്രാമ പ്രഖ്യാപനവും കിസാന്‍മേളയും ഇന്ന്

കടുത്തുരുത്തി: സമഗ്ര കൂണ്‍ഗ്രാമ വികസനപദ്ധതി പൂര്‍ത്തീകരണവും സംസ്ഥാനത്തെ പ്രഥമ പ്രഖ്യാപനവും ഭാരതീയ പ്രകൃതി കൃഷിപദ്ധതി കിസാന്‍മേളയും ഇന്നു കടുത്തുരുത്തിയില്‍ മന്ത്രി പി. പ്രസാദ് നിര്‍വഹിക്കും. കടുത്തുരുത്തി മിനി സിവില്‍ സ്റ്റേഷന്‍ അങ്കണത്തില്‍ 3.30ന് നടക്കുന്ന യോഗത്തില്‍ മോന്‍സ് ജോസഫ് എംഎല്‍എ അധ്യക്ഷത വഹിക്കും. പരിപാടിയോടനുബന്ധിച്ചു കര്‍ഷകരുടെ ഉത്പന്നങ്ങളും മൂല്യവര്‍ധിത ഉത്പന്നങ്ങളും പ്രോത്സാഹിപ്പിക്കുന്നതിന്‍റെ ഭാഗമായി പത്തു മുതല്‍ ഏഴു വരെ കാര്‍ഷിക പ്രദര്‍ശന മേളയും ഉണ്ടായിരിക്കും. 2024-25 വര്‍ഷത്തെ സംസ്ഥാനത്തെ മികച്ച കൂണ്‍കര്‍ഷകനായി തെരഞ്ഞെടുക്കപ്പെട്ട രാഹുല്‍ ഗോവിന്ദ് നയിക്കുന്ന ശാസ്ത്രീയ കൂണ്‍കൃഷിയും സംരംഭകത്വവും എന്ന വിഷയത്തില്‍ 11 മുതല്‍ സെമിനാറും നടക്കും. നിരവധി കര്‍ഷകരെ കൂണ്‍ കൃഷിയിലേക്ക് ആകര്‍ഷിക്കാനും മൂല്യാധിഷ്ഠിത ഉത്പന്നങ്ങളിലൂടെ വരുമാനമാര്‍ഗം കണ്ടെത്തുന്നതിനും പദ്ധതി സഹായിച്ചു. കിസാന്‍ മേളയുടെ ഉദ്ഘാടനം കെ.ഫ്രാന്‍സിസ് ജോര്‍ജ് എംപിയും ആദ്യവില്‍പന സി.കെ. ആശ എംഎല്‍എയും നിര്‍വഹിക്കും. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ മുഖ്യപ്രഭാഷണം നടത്തും. മിഷന്‍ ഡയറക്ടര്‍ സജി ജോണ്‍ റിപ്പോര്‍ട്ട് അവതരിപ്പിക്കും.

അയർക്കുന്നത്തെ മോഷണം: അന്വേഷണം ഊർജിതം

അയര്‍ക്കുന്നം: വീടിനുള്ളിലെ അലമാര തകര്‍ത്ത് 12 പവന്‍ സ്വര്‍ണവും 28,000 രൂപയും മോഷ്ടിച്ച സംഭവത്തില്‍ പോലീസ് അന്വേഷണം ഊര്‍ജിതമാക്കി. വിവിധ ഭാഗങ്ങളിലെ സിസിടിവികള്‍ കേന്ദ്രീകരിച്ചാണ് അന്വേഷണം പുരോഗമിക്കുന്നത്. കഴിഞ്ഞ ഞായറാഴ്ചയായിരുന്നു സംഭവം. അയര്‍ക്കുന്നം കൊങ്ങാണ്ടൂര്‍ കല്ലിട്ടനട ഭാഗത്തു താമസിക്കുന്ന പോളയ്ക്കല്‍ ബെന്നി ചാക്കോയുടെ വീട്ടിലായിരുന്നു മോഷണം. പാലായിലെ സ്വകാര്യ ആശുപത്രിയില്‍ ജോലിചെയ്യുന്ന മകള്‍ അനീറ്റ വീട്ടിലെത്തിയപ്പോഴാണ് മോഷണ വിവരമറിഞ്ഞത്. തുടര്‍ന്ന് അയര്‍ക്കുന്നം പോലീസില്‍ പരാതി നല്‍കി. എസ്എച്ച്ഒ അനൂപ് ജോസിന്‍റെ നേതൃത്വത്തിലുള്ള പോലീസ് സംഘമാണ് അന്വേഷണം നടത്തുന്നത്.

സ്മാർട്ട്‌ ഫർണിച്ചറുകളുടെ വിതരണം

ഉല്ലല: പള്ളിയാട് ശ്രീനാരായണ യുപി സ്കൂളിൽ വൈക്കം ബ്ലോക്ക് പഞ്ചായത്തംഗം കെ.കെ. രഞ്ജിത്തിന്‍റെ വികസനഫണ്ട് വിനിയോഗിച്ച് സ്മാർട്ട് ക്ലാസ്റൂമുകളിലേക്കു വാങ്ങിയ സ്മാർട്ട്‌ ഫർണിച്ചറുകളുടെ വിതരണോദ്‌ഘാടനം നടത്തി. സ്കൂൾ മാനേജർ ടി.പി. സുഖലാലിന്‍റെ അധ്യക്ഷതയിൽ നടന്ന യോഗത്തിൽ പുതിയ ഫർണിച്ചറുകൾ കുട്ടികൾക്കു കൈമാറി കെ.കെ. രഞ്ജിത്ത് ഉദ്ഘാടനം നിർവഹിച്ചു. അഞ്ചു ലക്ഷം രൂപയുടെ ഫർണിച്ചറാണ് നൽകിയത്. ഹെഡ്മാസ്റ്റർ പി. പ്രദീപ്, പഞ്ചായത്തംഗങ്ങളായ ടി. മധു, കെ. ബിനിമോൻ, എസ്. ദേവരാജൻ, പിടിഎ വൈസ് പ്രസിഡന്‍റ് എം.എം. സാജൻ, എസ്എൻഡിപി ശാഖായോഗം സെക്രട്ടറി എ.ജി.ബിജു, വൈസ് പ്രസിഡന്‍റ് എൻ.എസ്. നിജു, എംപി‌ടിഎ പ്രസിഡന്‍റ് ഷീജാ വിക്രമൻ, സ്റ്റാഫ്‌ സെക്രട്ടറി ടി.ടി. ബൈജു എന്നിവർ പ്രസംഗിച്ചു.

ജില്ലാ സമ്മേളനം

കോട്ടയം: അസോസിയേഷന്‍ ഓഫ് ഓട്ടോമൊബൈല്‍ വര്‍ക്ക്‌ഷോപ്പ് കേരളയുടെ 36-ാമത് ജില്ലാ സമ്മേളനം മന്ത്രി വി.എന്‍. വാസവന്‍ ഉദ്ഘാടനം ചെയ്തു. ജില്ലാ പ്രസിഡന്‍റ് എ.ആര്‍. രാജന്‍ അധ്യക്ഷത വഹിച്ചു. സംഘടനയില്‍ ഒരംഗം മരണപ്പെട്ടാല്‍ 10 ദിവസത്തിനുള്ളില്‍ 10 ലക്ഷം രൂപ നല്കുന്ന പദ്ധതി നിലവില്‍ പ്രാബല്യത്തിലായി. സംഘടനയുടെ സ്ഥാപന നേതാക്കളായ ടോമി തോമസ്, എ.ആര്‍. രാജന്‍, ടി.കെ. പൊന്നപ്പന്‍, എ.പി. ജയരാജന്‍ എന്നിവരെ ആദരിച്ചു. ജില്ലാ സെക്രട്ടറി കെ.പി.എന്‍. സുരേഷ് ബാബു, സംസ്ഥാന പ്രസിഡന്‍റ് കെ.ജി. ഗോപകുമാര്‍, സംസ്ഥാന ജനറല്‍ സെക്രട്ടറി നസീര്‍ കള്ളിക്കാട്, ട്രെയിനിംഗ് ബോര്‍ഡ് ചെയര്‍മാന്‍ മുഹമ്മദ് ഷാ, ജില്ലാ ട്രഷാര്‍ പി.ജി. ഗിരീഷ്, ജില്ലാ വൈസ് പ്രസിഡന്‍റ് ഷിഫാസ് എം. ഇസ്മയില്‍, ജില്ലാ ജോയിന്‍റ് സെക്രട്ടറി കെ.എന്‍. സതീശന്‍ തുടങ്ങിയവര്‍ പ്രസംഗിച്ചു.

അംഗത്വ വിതരണോദ്ഘാടനം

തലയോലപ്പറമ്പ്: കെപിഎംഎസിന്‍റെ 2025-2026 സംഘടനാവർഷത്തെ അംഗത്വ വിതരണത്തിന്‍റെ ജില്ലാതല ഉദ്ഘാടനം നടത്തി. തലയോലപ്പറമ്പ് യൂണിയനിലെ മറവൻതുരുത്തിൽ ഐഎച്ച്ഡിപി ഹാളിൽ നടന്ന യോഗത്തിൽ അംഗത്വ വിതരണോദ്ഘാടനം കെപിഎംഎസ് സംസ്ഥാന ട്രഷറർ അഡ്വ.എ. സനീഷ്കുമാർ നിർവഹിച്ചു. യൂണിയൻ പ്രസിഡന്‍റ് എസ്. പുഷ്പകുമാർ അധ്യക്ഷത വഹിച്ചു. കെ.കെ. കൃഷ്ണകുമാർ, മോഹനൻ പേരേത്തറ, ഒ.ടി. പുഷ്കരൻ, മിനി സിബി, ഇ.ആർ.സിന്ധുമോൻ, ആശ ഫെനിൽ, സി.വി. മധു, കെ.കെ.രാജൻ, കെ.കെ. അനിൽകുമാർ, ബി. ശ്രീകല, എം.കെ. സുധീഷ്, കെ. തിലകൻ തുടങ്ങിയവർ പ്രസംഗിച്ചു.

ചാച്ചാജി ഗോള്‍ഡ് മെഡല്‍ പെയിന്‍റിംഗ് മത്സരം

കോട്ടയം: പ്രീ-പ്രൈമറി കുട്ടികള്‍ മുതല്‍ പ്ലസ്ടു വരെയുള്ള കുട്ടികള്‍ വരകളും വര്‍ണങ്ങളുമായി ദീപാവലി ദിനത്തില്‍ ഒരുമിച്ചു കൂടി. ജവഹര്‍ ബാല്‍ മഞ്ച് ജില്ലാ കമ്മിറ്റി സംഘടിപ്പിച്ച ചാച്ചാജി ഗോള്‍ഡ് മെഡല്‍ പെയിന്‍റിംഗ് മത്സരത്തില്‍ നിരവധി കുട്ടികള്‍ പങ്കെടുത്തു. എംഡി സെമിനാരി സ്‌കൂളില്‍ ജില്ലാ ചെയര്‍മാന്‍ രഞ്ജു തോമസിന്‍റെ അധ്യക്ഷതയില്‍ തിരുവഞ്ചൂര്‍ രാധാകൃഷ്ണന്‍ എംഎല്‍എ ഉദ്ഘാടനം ചെയ്തു. കെപിസിസി ജനറല്‍ സെക്രട്ടറി ജോഷി ഫിലിപ്പ്, സംസ്ഥാന കോ-ഓര്‍ഡിനേറ്റര്‍ സാബുമാത്യു, പ്രോഗ്രാം കോ-ഓര്‍ഡിനേറ്ററും നഗരസഭ കൗണ്‍സിലറുമായ ജയമോള്‍ ജോസഫ്, ജില്ലാ കോ-ഓര്‍ഡിനേറ്റര്‍മാരായ എസ്. വിനോദ്കുമാര്‍, വിനീത ഹരിലാല്‍, എ.ആര്‍. രാജേഷ് കുമാര്‍, ബിജി സണ്ണി, എം.എം. ഷീബാമോള്‍, ഡാനി ജോസ്, ഡെന്നി തോമസ്, ജില്ലാ പ്രസിഡന്‍റ് കെസിയ മജു, വിഷ്ണു പ്രസാദ്, പ്രിന്‍സ് പാമ്പാടി, ജോളിയമ്മ ജോസഫ്, എ.വി. അജയ്, ബിഫാസ് വടക്കേല്‍, വിനീഷ് വിജയന്‍, ക്രിസ്റ്റീന്‍ സ്‌കറിയ പ്രസംഗിച്ചു.

മീനടം പഞ്ചായത്ത് പ്രവാസി ഗ്രാമസഭ

മീനടം: മീനടം പഞ്ചായത്തിലെ 10-ാം വാര്‍ഡില്‍ പ്രവാസി ഗ്രാമസഭ ചാണ്ടി ഉമ്മന്‍ എംഎല്‍എ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് മോനിച്ചന്‍ കിഴക്കേടം അധ്യക്ഷത വഹിച്ചു. വാര്‍ഡു മെംബര്‍ റെജി ചാക്കോയാണ് വ്യത്യസ്തമായ രീതിയില്‍ ഗ്രാമസഭ സംഘടിപ്പിച്ചത്. ഗവണ്‍മെന്‍റ് ്ഡെപ്യൂട്ടി സെക്രട്ടറി പദവിയില്‍നിന്നു വിരമിച്ച ഗ്രാമസഭാംഗം ജോസഫ് സ്‌കറിയ, വിവിധ പരീക്ഷകളില്‍ ഉന്നത വിജയം നേടിയ ജി. ഗംഗ, ഗായത്രി സന്തോഷ്, അലീന അന്ന അശോക്, അന്ന സൂസന്‍ സജി, അനീറ്റ അന്ന ചെറിയാന്‍ എന്നിവരെ മെമന്‍റോ നല്‍കി ആദരിച്ചു. ഗ്രാമസഭയില്‍ 220 പേരും ഓണ്‍ലൈനായി നിരവധി പ്രവാസികളും പങ്കെടുത്തു. നേരില്‍ പങ്കെടുക്കാനെത്തിയവര്‍ക്ക് ഉച്ചഭക്ഷണവും നല്‍കിയ ഗ്രാമസഭ നാടിനു പുത്തനനുഭവമായി. പാമ്പാടി ബ്ലോക്ക് പഞ്ചായത്തംഗം സിന്ധു വിശ്വന്‍, പഞ്ചായത്തംഗങ്ങളായ റെജി ചാക്കോ, ലീന്‍ മാത്യു, രമണി ശശിധരന്‍, ലാലി വര്‍ഗീസ്, സൂസന്‍ ചാണ്ടി, ഗിരീന്ദ്രന്‍, ബെന്നി അടിച്ചിറ, ടോം സെബാസ്റ്റ്യന്‍, റെജി സ്‌കറിയ തുടങ്ങിയവര്‍ പ്രസംഗിച്ചു.

ശങ്കേഴ്‌സ് മത്സര അവാര്‍ഡ് വിതരണം

കോട്ടയം: 28-ാമത് ദര്‍ശന ശങ്കേഴ്‌സ് അഖില കേരള കാര്‍ട്ടൂണ്‍ പെയിന്‍റിംഗ് മത്സരങ്ങളുടെ അവാര്‍ഡുകള്‍ തിരുവഞ്ചൂര്‍ രാധാകൃഷ്ണന്‍ എംഎല്‍എ വിതരണം ചെയ്തു. പി.ആര്‍. ശ്രീഹരി (കണ്ണൂര്‍) ശങ്കേഴ്‌സ് അവാര്‍ഡ് ഏറ്റുവാങ്ങി. എട്ടു വിഭാഗങ്ങളിലായി നടന്ന മത്സരത്തില്‍ 150 കുട്ടികള്‍ സമ്മാനങ്ങള്‍ സ്വന്തമാക്കി. ദര്‍ശന സാംസ്‌കാരിക കേന്ദ്രം ഡയറക്ടര്‍ ഫാ. എമില്‍ പുള്ളിക്കാട്ടില്‍ സിഎംഐ അധ്യക്ഷത വഹിച്ച ചടങ്ങില്‍ തേക്കിന്‍കാട് ജോസഫ്, രാജു നായര്‍, പഴയിടം മുരളി, പി.കെ. ആനന്ദക്കുട്ടന്‍, ആര്‍ട്ടിസ്റ്റ് അശോകന്‍, ടി.എസ്. ശങ്കര്‍ തുടങ്ങിയവര്‍ പ്രസംഗിച്ചു. രണ്ടായിരത്തില്‍പ്പരം കുട്ടികള്‍ മത്സരത്തില്‍ പങ്കെടുത്തു

ധന്യന്‍ മാര്‍ മാത്യു മാക്കീലിന്‍റെ കബറിടത്തിലേക്ക് തീര്‍ഥാടന പദയാത്ര നടത്തി

കോട്ടയം: കോട്ടയം അതിരൂപത ചെറുപുഷ്പ മിഷന്‍ലീഗിന്‍റെ ആഭിമുഖ്യത്തില്‍ അതിരൂപതയിലെ വിവിധ മേഖലകളില്‍നിന്നായി ധന്യന്‍ മാര്‍ മാത്യു മാക്കീല്‍ തീര്‍ഥാടന പദയാത്ര നടത്തി. മള്ളൂശേരി സെന്‍റ് തോമസ് ക്‌നാനായ പള്ളിയില്‍നിന്നാരംഭിച്ച യാത്ര കോട്ടയം അതിരൂപത വികാരി ജനറാള്‍ ഫാ. തോമസ് ആനിമൂട്ടില്‍ സന്ദേശം നല്‍കി ഫ്ലാഗ് ഓഫ് ചെയ്തു. മള്ളൂശേരി പള്ളി വികാരി ഫാ. ബിജി പല്ലോന്നില്‍ ആമുഖസന്ദേശം നല്‍കി. കബറിടം സ്ഥിതിചെയ്യുന്ന ഇടയ്ക്കാട്ട് സെന്‍റ് ജോര്‍ജ് പള്ളിയിലെത്തിയ തീര്‍ഥാടകരെ ഫൊറോന വികാരി ഫാ. സൈമണ്‍ പുല്ലാട്ടിന്‍റെ നേതൃത്വത്തില്‍ സ്വീകരിച്ചു. ഇടയ്ക്കാട്ട് സെന്‍റ് ജോര്‍ജ് പള്ളിയിലെ ആശീര്‍വാദ പ്രാര്‍ഥനയ്ക്ക് കോട്ടയം അതിരൂപത സഹായ മെത്രാന്‍ മാര്‍ ജോസഫ് പണ്ടാരശേരില്‍ കാര്‍മികത്വം വഹിച്ചു. തുടര്‍ന്നു പിതൃസമ്മാനം നറുക്കെടുപ്പ് സമ്മാന പദ്ധതിയുടെ ഉദ്ഘാടനം രാഷ്‌ട്രദീപിക ലിമിറ്റഡ് മാനേജിംഗ് ഡയറക്ടര്‍ ഫാ. മൈക്കിള്‍ വെട്ടിക്കാട്ട് നിര്‍വഹിച്ചു. ചെറുപുഷ്പ മിഷന്‍ ലീഗ് അതിരൂപത ഡയറക്‌ടര്‍ ഫാ. ജെഫിന്‍ ഒഴുങ്ങാലില്‍ നന്ദിയര്‍പ്പിച്ചു. വിവിധ ദേവാലയങ്ങളില്‍നിന്നായി ആയിരത്തില്‍പ്പരം ചെറുപുഷ്പ മിഷന്‍ ലീഗ് അംഗങ്ങള്‍ പങ്കെടുത്തു.

അധ്യാപക ഡോക്ടർമാരുടെ ഒപി ബഹിഷ്കരണം ; ഒപികളിലെത്തിയ രോഗികളുടെ എണ്ണത്തിൽ കുറവ്

ഗാന്ധിനഗർ: കോട്ടയം മെഡിക്കൽ കോളജിൽ അധ്യാപക ഡോക്ടർമാർ ഇന്നലെ ഒപി ബഹിഷകരിച്ചു. സർക്കാർ മെഡിക്കൽ കോളജുകളിലെ അടിസ്ഥാന സൗകര്യങ്ങളുടെയും അധ്യാപക തസ്തികകളുടെയും അപര്യാപ്തതകൾ പരിഹരിക്കുക, ശമ്പള പരിഷ്കരണത്തിലെ അപാകതകൾ പരിഹരിക്കുക തുടങ്ങിയ വിവിധ ആവശ്യങ്ങൾ ഉന്നയിച്ചാണ് ഒപി ബഹിഷ്കരണം. കെജിഎംസിടിഎയുടെ നേതൃത്വത്തിലാണ് ബഹിഷ്കരണം നടത്തിയത്. ദീപാവലിയും അധ്യാപക ഡോക്ടർമാരുടെ ഒപി ബഹിഷ്കരണത്തെ തുടർന്നും ഇന്നലെ കോട്ടയം മെഡിക്കൽ കോളജ് ഒപിയിലെത്തിയ രോഗികളുടെ എണ്ണം വളരെ കുറവായിരുന്നു. ഉച്ചയ്ക്ക് 12 ആയപ്പോഴേക്കും ഒപി ടിക്കറ്റ് എടുക്കുന്ന കൗണ്ടർ ആളൊഴിഞ്ഞ നിലയിലായിരുന്നു. സാധാരണ ഗതിയിൽ ഈ സമയത്തൊക്കെ ഒപി കൗണ്ടറിൽ വൻ തിരക്കായിരിക്കും. റുമറ്റോളജി വിഭാഗം ഒപി ഇന്നലെ പ്രവർത്തിച്ചില്ല. എന്നാൽ റുമറ്റോളജി ഒപി ഉണ്ടെന്ന് കരുതി നിരവധി രോഗികളെത്തിയിരുന്നു. ഇവർ പിന്നീട് തിരിച്ചു പോകുകയായിരുന്നു. നേത്രവിഭാഗം, ജനറൽ മെഡിസിൻ തുടങ്ങിയ വിഭാഗങ്ങളിൽ രോഗികളുടെ തിരക്കില്ലായിരുന്നു. അധ്യാപക ഡോക്ടർമാർ മാത്രമാണ് ബഹിഷ്ക്കരണം നടത്തിയത്. എന്നാൽ ജൂണിയർ ഡോക്ടർമാരുടെ നേതൃത്വത്തിൽ ഒപി യുടെ പ്രവർത്തനം നടന്നു. അതേസമയം വാർഡുകളിൽ അധ്യാപക ഡോക്ടർമാരുടെ സേവനം ലഭിച്ചു. മെഡിക്കൽ കോളജുകളിൽ വിദ്യാർഥി അധ്യാപക അനുപാതവും രോഗി ബാഹുല്യത്തിന് ആനുപാതികമായ ഡോക്ടർമാരുടെ എണ്ണവും തമ്മിൽ വളരെ അന്തരം ഉണ്ടെന്ന് കെജിഎംസിടിഎ ചൂണ്ടിക്കാട്ടുന്നു.

തേനീച്ചയുടെ കുത്തേറ്റു വിനോദസഞ്ചാരികൾക്ക് പരിക്ക്

ചെറുതോണി: പാണ്ടിപ്പാറ ടൂറിസ്റ്റ് പാറയിൽ വിനോദസഞ്ചാരികൾ ഉൾപ്പെടെ 13 പേർക്ക് തേനീച്ചയുടെ കുത്തേറ്റു. ഇന്നലെ ഉച്ചയോടെയാണ് സംഭവം. പാണ്ടിപ്പാറ ടൂറിസ്റ്റ് പാറയിലെത്തിയ എറണാകുളം സ്വദേശികൾക്കാണ് ആദ്യം കുത്തേറ്റത്. പാറയിൽ ഭക്ഷണം കഴിച്ചുകൊണ്ടിരുന്ന സഞ്ചാരികൾ തേനീച്ചയുടെ കുത്തേറ്റ് ഓടുന്നതുകണ്ട് രക്ഷിക്കാനെത്തിയ നാട്ടുകാരെയും ഈച്ചകൾ ഓടിച്ചിട്ട് കുത്തി. സമീപ പ്രദേശത്ത വീടുകളിലുണ്ടായിരുന്നവർക്കും തേനീച്ചയുടെ ആക്രമണമുണ്ടായി. എറണാകുളം സ്വദേശികളായ ഹംബൽ (20), സ്റ്റെഫി ജോസ് (28), ബിൽദാർ (20 ), നബീൽ (20), അഖിൽ (20), മുബാരീസ് (21) എന്നിവർക്കും സമീപവാസികളായ ഓടമ്പള്ളിൽ സൗമ്യ (43), സാബു ഇഞ്ചയിൽ (48), സാബുവിന്‍റെ ഭാര്യ ലിറ്റിൽ (45), ഇവരുടെ മക്കളായ അമല (11 ), ആഗ്‌നസ് (7) എന്നിവർക്കും രക്ഷിക്കാനെത്തിയ ചാക്കോ (56), പ്രതീഷ് ചാമക്കാല എന്നിവർക്കുമാണ് തേനീച്ച യുടെ കുത്തേറ്റത്. ഇവരെ ആംബുലൻസിൽ ഇടുക്കി മെഡിക്കൽ കോളജ് ആശുപത്രിയിൽ എത്തിച്ച് ചികിത്സ നൽകി. ഇവരിൽ ആഗ്‌നസ്, അമല എന്നിവരൊഴികെ മറ്റുള്ളവരെ പ്രാഥമിക ചികിത്സ നൽകി വിട്ടയച്ചു. വനംവകുപ്പ് ഉദ്യോഗസ്ഥർ സ്ഥലത്തെത്തി പരിശോധന നടത്തി. പരുന്ത് കൂടിളക്കിയതിനെത്തുടർന്നാവണം ഈച്ചകൾ ഇളകിയതെന്നു വനംവകുപ്പ് ഉദ്യോഗസ്ഥർ പറഞ്ഞു.

മണ്ഡലകാലത്തിന് ഒരു മാസം ബാക്കി; ഒരുക്കങ്ങള്‍ മന്ദഗതിയില്‍

കോട്ടയം: ശബരിമല മണ്ഡലകാലത്തിന് 28 ദിവസം മാത്രം ബാക്കി നിർക്കെ രണ്ടു കോടിയോളം തീര്‍ഥാടകരെത്തുന്ന എരുമേലിയിലും പമ്പയിലും അടിസ്ഥാന സൗകര്യങ്ങളോ സംവിധാനങ്ങളോ ഏര്‍പ്പെടുത്താന്‍ ഇനിയുമായിട്ടില്ല. എരുമേലിയിലേക്കുള്ള പല ഗ്രാമീണ റോഡുകളുടെയും സ്ഥിതി ദയനീയമാണ്. വിവിധ ജില്ലകളില്‍നിന്ന് അന്‍പത് സ്‌പെഷല്‍ ബസുകളും 200 അധികം ജീവനക്കാരും എത്തുന്ന എരുമേലി കെഎസ്ആര്‍ടിസി ഡിപ്പോയുടെ നില ദയനീയമാണ്. ചെളിക്കുളമായി മാറുന്ന ഡിപ്പോയില്‍ ടോയ്‌ലറ്റ് സൗകര്യം പരിമിതമാണ്. അന്‍പതുവര്‍ഷം പഴക്കമുള്ള എരുമേലി പ്രൈവറ്റ് ബസ് സ്റ്റാന്‍ഡിന് നേരിയ നവീകരണംപോലും നടത്താനായിട്ടില്ല. 27 വര്‍ഷം മുന്‍പ് അനുമതിയായ ശബരി റെയില്‍വേ പദ്ധതി ഇപ്പോഴും രേഖകളില്‍ മാത്രം. 2029ല്‍ നിര്‍മാണം പൂര്‍ത്തിയാക്കുമെന്ന് സര്‍ക്കാര്‍ അവകാശപ്പെടുന്ന എരുമേലി ശബരി എയര്‍പോര്‍ട്ട് പദ്ധതിയും നിയമക്കുരുക്കില്‍തന്നെ. വന്യമൃഗശല്യം അതിരൂക്ഷമാകുന്ന സാഹചര്യത്തില്‍ കാനനപാത സുരക്ഷിതമാക്കാനോ ഇടത്താവളങ്ങളില്‍ വൈദ്യുതി എത്തിക്കാനോ നടപടിയായിട്ടില്ല. തുലാമഴ ഡിസംബര്‍ വരെ നീളുന്ന സാഹചര്യമുണ്ടായാല്‍ തീര്‍ഥാടനപാതയില്‍ മിന്നല്‍പ്രളയം നേരിടാനുള്ള സൗകര്യങ്ങളുമില്ല. മുന്‍വര്‍ഷങ്ങളില്‍ നവംബറിന് മുന്‍പ് കാനനപാതയിലെ അടിക്കാടുകള്‍ വെട്ടിത്തെളിക്കുമായിരുന്നു. എരുമേലിയില്‍ തീര്‍ഥാടകര്‍ക്ക് പേട്ട തുള്ളലിനായി പില്‍ഗ്രിം പാത്ത് നിര്‍മിക്കാനുള്ള പദ്ധതിക്ക് മൂന്നു പതിറ്റാണ്ട് പഴക്കമുണ്ട്. എരുമേലിയില്‍ സ്ഥിരമായി ഫയര്‍ സ്റ്റേഷന്‍ നിര്‍മിക്കണമെന്ന ആവശ്യവും നടപ്പായില്ല. നിലവില്‍ കാഞ്ഞിരപ്പള്ളി ഫയര്‍ സ്റ്റേഷനില്‍നിന്ന് ഒരു യൂണിറ്റ് താത്കാലികമായി സീസണില്‍ എരുമേലിയില്‍ ക്യാമ്പ് ചെയ്യുകയാണ് പതിവ്. പ്ലാച്ചേരി പാലം, കരിങ്കല്ലുമൂഴി കലുങ്ക് എന്നിവയുടെ കൈവരികള്‍ തകര്‍ന്നു കിടക്കുന്നു. അപകട മേഖലയായ കരിങ്കല്ലുമൂഴി വളവില്‍ രൂപപ്പെട്ട കുഴി കിടങ്ങുപോലെയായിരിക്കുന്നു. പ്ലാച്ചേരി-എരുമേലി, കണമല- പമ്പ വനയോര പാതയുടെ ഇരുവശവും കാട് കയറിയ നിലയിലാണ്. പമ്പയില്‍ തിരക്കുകൂടുമ്പോള്‍ എരുമേലിയില്‍ തീര്‍ഥാടകവാഹനങ്ങള്‍ എരുമേലിയില്‍ തടയുക പതിവാണ്. നൂറുകണക്കിന് വാഹനങ്ങള്‍ കുരുക്കില്‍ പെടുന്നത് ഒഴിവാക്കാന്‍ കൂടുതല്‍ പാര്‍ക്കിംഗ് മൈതാനങ്ങള്‍ നിര്‍മിക്കാനും സാധിച്ചിട്ടില്ല. ഇലക്‌ട്രിക് ചാര്‍ജിംഗ് സൗകര്യമില്ല കോട്ടയം: ഒട്ടേറെ ഇലക്‌ട്രിക് വാഹനങ്ങളാണ് സംസ്ഥാനത്തിന് അകത്തുനിന്നും പുറത്തുനിന്നും എരുമേലിയിലും പമ്പയിലും മണ്ഡലകാലത്ത് എത്തുന്നത്. ഇത്തരം വാഹനങ്ങള്‍ ചാര്‍ജ് ചെയ്യുന്നതിനുള്ള സൗകര്യം പാലാ, മുണ്ടക്കയം, പൊന്‍കുന്നം, മുക്കൂട്ടുതറ, പ്ലാച്ചേരി എന്നിവിടങ്ങളില്‍ ഏര്‍പ്പെടുത്തണമെന്നത് ഏറെക്കാലമായുള്ള ആവശ്യമാണ്. കഴിഞ്ഞ വര്‍ഷം തീര്‍ഥാടക വാഹനങ്ങള്‍ ചാര്‍ജ് തീര്‍ന്ന് വഴിയില്‍ കിടന്ന സംഭവങ്ങള്‍ പലതുണ്ടായി.

ഗതാഗത നിയന്ത്രണം

കോട്ടയം: രാഷ്‌ട്രപതിയുടെ സന്ദര്‍ശനവുമായി ബന്ധപ്പെട്ട് 23ന് ഉച്ചകഴിഞ്ഞ് ഒന്നു മുതല്‍ ഏഴു വരെയും, 24നു രാവിലെ ആറു മുതല്‍ മുതല്‍ 11 വരെയും കോട്ടയം ടൗണില്‍ ഗതാഗത നിയന്ത്രണം ഏര്‍പ്പെടുത്തി. 8മൂവാറ്റുപുഴ, കടുത്തുരുത്തി ഭാഗങ്ങളില്‍നിന്നു ചങ്ങനാശേരി ഭാഗത്തേക്ക് പോകേണ്ട വാഹനങ്ങള്‍ പട്ടിത്താനം ജംഗ്ഷനില്‍നിന്നു തിരിഞ്ഞ് ഏറ്റുമാനൂര്‍-മണര്‍കാട് ബൈപാസ്, പുതുപ്പള്ളി വഴി പോകണം. 8ചങ്ങനാശേരി ഭാഗത്തുനിന്ന് ഏറ്റുമാനൂര്‍ ഭാഗത്തേക്ക് പോകേണ്ട വാഹനങ്ങള്‍ ചങ്ങനാശേരി ടൗണില്‍നിന്നു കുരിശുംമൂട്, തെങ്ങണ, ഞാലിയാകുഴി, പുതുപ്പള്ളി, മണര്‍കാട്-ഏറ്റുമാനൂര്‍ ബൈപാസ് വഴി പോകണം. 8മെഡിക്കല്‍ കോളജ് ഭാഗത്തുനിന്നു കോട്ടയം ടൗണിലേക്ക് പോകേണ്ട പ്രൈവറ്റ് ബസുകള്‍ വട്ടമൂട് പാലം കയറി തിരുവഞ്ചൂര്‍ വഴി പോകണം. തിരുവഞ്ചൂര്‍ മുതല്‍ വട്ടമൂട് വരെയുള്ള ഭാഗം വണ്‍വേ ആയിരിക്കും. 8ചിങ്ങവനം ഭാഗത്തുനിന്നു കോട്ടയം ടൗണിലേക്ക് പോകേണ്ട വാഹനങ്ങള്‍ മാവിളങ്ങ് ജംഗ്ഷനില്‍നിന്നു തിരിഞ്ഞ് പാക്കില്‍, പൂവന്തുരുത്ത്, കടുവാക്കുളം, നാല്‍ക്കവല വഴി പുതുപ്പള്ളിയെത്തി പോകണം. 8ചങ്ങനാശേരി ഭാഗത്തുനിന്നു കോട്ടയത്തേക്ക് വരുന്ന കെഎസ്ആര്‍ടിസി ബസുകള്‍ പുളിമൂട് ജംഗ്ഷനില്‍നിന്നും തിരിഞ്ഞ് കെഎസ്ആര്‍ടിസി സ്റ്റാൻഡിലേക്ക് പോകണം. 8പൊന്‍കുന്നം, കാഞ്ഞിരപ്പള്ളി, മുണ്ടക്കയം ഭാഗങ്ങളിലേക്ക് പോകേണ്ട കെഎസ്ആര്‍ടിസി ബസുകള്‍ ഐഡ ജംഗ്ഷന്‍, പുളിമൂട് ജംഗ്ഷന്‍ വഴി ശീമാട്ടി റൗണ്ട് ചുറ്റി സെന്‍ട്രല്‍ ജംഗ്ഷനിലെത്തി അവിടെനിന്നു കെകെ റോഡ് കളക്ടറേറ്റ് ജംഗ്ഷന്‍, കഞ്ഞിക്കുഴി, മണര്‍കാട് വഴി പോകണം. 8എറണാകുളം, തൃശൂര്‍ ഭാഗങ്ങളിലേക്ക് പോകേണ്ട കെഎസ്ആര്‍ടിസി ബസുകള്‍ ഐഡ ജംഗ്ഷന്‍, പുളിമൂട് ജംഗ്ഷന്‍ വഴി ശീമാട്ടി റൗണ്ട് ചുറ്റി സെന്‍ട്രല്‍ ജംഗ്ഷനിലെത്തി അവിടെനിന്നു കെകെ റോഡ് കളക്റ്ററേറ്റ് ജംഗ്ഷന്‍, കഞ്ഞിക്കുഴി, മണര്‍കാട്, ഏറ്റുമാനൂര്‍ വഴി പോകണം. 8ആലപ്പുഴ, ചേര്‍ത്തല ഭാഗങ്ങളില്‍നിന്നു കോട്ടയം ടൗണിലേക്ക് പോകേണ്ട വാഹനങ്ങള്‍ ബണ്ട് റോഡില്‍നിന്നും തിരിഞ്ഞ് ഇടയാഴം, കല്ലറ, നീണ്ടൂര്‍ വഴി പോകണം. 8ചേര്‍ത്തല ഭാഗത്തുനിന്നു കുമരകത്തേക്ക് വരുന്ന ബസുകള്‍ മണിയാപറമ്പ് റോഡ് ജംഗ്ഷനില്‍ സര്‍വീസ് നിര്‍ത്തി തിരികെ പോകണം. 8വൈക്കം-കുമരകം വഴി കോട്ടയം ഭാഗത്തേക്ക് പോകേണ്ട വാഹനങ്ങള്‍ ഇടയാഴം ജംഗ്ഷനില്‍നിന്നു തിരിഞ്ഞ് കല്ലറ, നീണ്ടൂര്‍ വഴി പോകണം. 8കല്ലറ, നീണ്ടൂർ ഭാഗങ്ങളില്‍നിന്നു പനമ്പാലം വഴി കോട്ടയം ടൗണിലേക്ക് പോകേണ്ട വാഹനങ്ങള്‍ കുടമാളൂര്‍ കുരിശുപള്ളി ജംഗ്ഷനില്‍നിന്നു തിരിഞ്ഞ് പുളിഞ്ചുവട്, കുമാരനല്ലൂര്‍ മേല്‍പ്പാലം വഴി പോകണം. 8ചിങ്ങവനം ഭാഗത്തുനിന്നു കോട്ടയം ടൗണിലേക്ക് വരുന്ന പ്രൈവറ്റ് ബസുകള്‍ കോടിമത സ്റ്റാന്‍ഡില്‍ സര്‍വീസ് അവസാനിപ്പിച്ചു തിരികെ പോകണം. 8ദിവാന്‍ കവലയില്‍നിന്നു കഞ്ഞിക്കുഴി ഭാഗത്തേക്ക് വാഹനങ്ങള്‍ പോകാന്‍ പാടില്ല. 8മെഡിക്കല്‍ കോളജ് ഭാഗത്തുനിന്ന് എറണാകുളം, മൂവാറ്റുപുഴ ഭാഗങ്ങളിലേക്ക് പോകേണ്ട വാഹനങ്ങള്‍ മെഡിക്കല്‍ കോളജ് കുരിശുപള്ളി ജംഗ്ഷനില്‍നിന്ന് അമ്മഞ്ചേരി, യൂണിവേഴ്‌സിറ്റി, അതിരമ്പുഴ വഴി അതിരമ്പുഴ ഉപ്പുപുര ജംഗ്ഷനിലെത്തി ഇടത്തേക്ക് തിരിഞ്ഞ് കോട്ടമുറി, ആനമല വഴി കാണക്കാരി അമ്പലം ജംഗ്ഷനിലെത്തി പോകണം. 823ന് ഉച്ചയ്ക്ക് 12 മുതല്‍ രാത്രി ഏഴു വരെയും 24നു പുലര്‍ച്ചെ 12.30 മുതല്‍ ഉച്ചയ്ക്കു 12 വരെയും റോഡ് അരികുകളിലും ജംഗ്ഷനുകളിലും പാര്‍ക്കിംഗും തട്ടുകട ഉള്‍പ്പെടെയുള്ള വഴിയോര വാണിഭങ്ങളും ഓട്ടോ, ടാക്‌സി സ്റ്റാന്‍ഡുകളും കര്‍ശനമായി നിരോധിച്ചു. പാലാ-കോട്ടയം റൂട്ടിലെ ക്രമീകരണം 23നു പാലാ ഭാഗത്തുനിന്നു കോട്ടയം ഭാഗത്തേക്ക് വരുന്ന വാഹനങ്ങള്‍ പാലാ ജനറല്‍ ആശുപത്രി ജംഗ്ഷനില്‍നിന്നു പൊന്‍കുന്നം പാലം കയറി പൊന്‍കുന്നം റോഡില്‍ പൈക ജംഗ്ഷനില്‍നിന്നു വലത്തോട്ട് തിരിഞ്ഞ് കൊഴുവനാല്‍-മറ്റക്കര അയര്‍ക്കുന്നത്തെത്തി കോട്ടയം ഭാഗത്തേക്കും പോകണം. തൊടുപുഴ ഭാഗത്തുനിന്നു കോട്ടയം ഭാഗത്തേക്ക് വരുന്ന വാഹനങ്ങള്‍ പാലാ-തൊടുപുഴ റോഡില്‍ കുറിഞ്ഞിയില്‍നിന്നോ കൊല്ലപ്പള്ളിയില്‍ നിന്നോ വലത്തോട്ട് തിരിഞ്ഞ് രാമപുരം വഴി എംസി റോഡിലെത്തി കോട്ടയം ഭാഗത്തേക്ക് പോകണം. പാലാ ഭാഗത്തുനിന്ന് ഏറ്റുമാനൂര്‍, കോട്ടയം മെഡിക്കല്‍ കോളജ്, എറണാകുളം ഭാഗത്തേക്ക് പോകുന്ന വാഹനങ്ങള്‍ പാലാ-സിവില്‍സ്റ്റേഷന്‍-ആവി ജംഗ്ഷന്‍ തിരിഞ്ഞ് മരങ്ങാട്ടുപിള്ളി-കോഴ, കുറവിലങ്ങാട് വഴി എംസി റോഡിലെത്തി പോകണം. ഈരാറ്റുപേട്ട ഭാഗത്തുനിന്നു കോട്ടയം, പൊന്‍കുന്നം ഭാഗത്തേക്ക് വരുന്ന വാഹനങ്ങള്‍ തിടനാട് കാഞ്ഞിരപ്പള്ളി വഴി കെകെ റോഡിലെത്തിയോ ഭരണങ്ങാനം പള്ളി ഭാഗത്തുനിന്ന് ഇടത്തോട്ട് തിരിഞ്ഞ് ഇടമറ്റം, പൈക-വഴി പൊന്‍കുന്നം ഭാഗത്തേക്കും പൈക ജംഗ്ഷനില്‍നിന്നു തിരിഞ്ഞ് കൊഴുവനാല്‍ മറ്റക്കര-അയര്‍ക്കുന്നത്തെത്തി കോട്ടയം ഭാഗത്തേക്കും പോകണം. ആംബുലന്‍സുകള്‍ വഴിതിരിച്ചുവിടും 23ന് ഉച്ചകഴിഞ്ഞ് ഒന്നു മുതല്‍ രാത്രി ഏഴു വരെ വിവിധ ഭാഗങ്ങളില്‍നിന്നു കോട്ടയം നഗരത്തിലെത്തുന്ന ആംബുലന്‍സ്, മറ്റ് ഹോസ്പിറ്റല്‍ എമര്‍ജന്‍സി വാഹനങ്ങള്‍ എന്നി വയ്ക്കും നിയന്ത്രണം ഏര്‍പ്പെടുത്തി. എംസി റോഡിലൂടെ തിരുവല്ല ഭാഗത്തുനിന്നു വരുന്ന ആംബുലന്‍സുകളും മറ്റ് ആശുപത്രി സംബന്ധമായ എമര്‍ജന്‍സി വാഹനങ്ങളും ചങ്ങനാശേരി ബൈപാസ് റോഡില്‍ പ്രവേശിച്ചു തെങ്ങണ, പുതുപ്പള്ളി, മണര്‍കാട്, പൂവത്തുംമൂട്, സംക്രാന്തി വഴി എംസിഎച്ചില്‍ എത്തണം. ആലപ്പുഴ ചേര്‍ത്തല ഭാഗത്തുനിന്നു വരുന്ന ആംബുലന്‍സുകളും എമര്‍ജന്‍സി വാഹനങ്ങളും ഇടയാഴം ജംഗ്ഷനില്‍നിന്ന് ഇടത്തേക്ക് തിരിഞ്ഞ് കല്ലറ വഴി എംസിഎച്ചില്‍ എത്തണം. കെകെ റോഡില്‍നിന്നു വരുന്ന ആംബുലന്‍സുകളും എമര്‍ജന്‍സി വാഹനങ്ങളും മണര്‍കാട് എത്തി പൂവത്തുംമൂട് പാലം വഴി എംസിഎച്ചില്‍ എത്തണം. പാലാ, കുറവിലങ്ങാട്, എറണാകുളം ഭാഗങ്ങളില്‍നിന്നും വരുന്ന ആംബുലന്‍സുകളും മറ്റ് എമര്‍ജന്‍സി വാഹനങ്ങളും ഏറ്റുമാനൂര്‍ സെന്‍ട്രല്‍ ജംഗ്ഷനില്‍ എത്തി അതിരമ്പുഴ യൂണിവേഴ്‌സിറ്റി വഴി എംസിഎച്ചില്‍ എത്തണം.

രാഷ്‌ട്രപതിയെ വരവേല്‍ക്കാന്‍ വിപുലമായ ഒരുക്കങ്ങള്‍

കോട്ടയം: രാഷ്‌ട്രപതി ദ്രൗപദി മുര്‍മുവിനെ വരവേല്‍ക്കാന്‍ പാലായും കോട്ടയവും കുമരകവും അണിഞ്ഞൊരുങ്ങുന്നു. മൂന്നിടങ്ങളിലും റോഡിലെ കുഴിയടയ്ക്കല്‍, പുല്ലുവെട്ട്, വൈദ്യുതി അറ്റകുറ്റപ്പണികള്‍ എന്നിവ നടക്കുന്നു. കോട്ടയം നഗരത്തിന്‍റെ അഞ്ചു കിലോമീറ്റര്‍ പരിധിയില്‍ റോഡുകളുടെ നിര്‍മാണം നടക്കുന്നതിനാല്‍ ഗതാഗതതടസം രൂക്ഷമായി. ശിവഗിരിയില്‍നിന്ന് 23ന് ഉച്ചകഴിഞ്ഞ് 3.45ന് രാഷ്‌ട്രപതി ഹെലികോപ്ടറില്‍ പാലായിലെത്തും. സെന്‍റ് തോമസ് കോളജിലെ ബിഷപ് വയലില്‍ ഹാളിലാണു പ്ലാറ്റിനം ജൂബിലി സമാപന സമ്മേളനം. ജില്ലാ പോലീസ് ചീഫ് എ. ഷാഹുല്‍ ഹമീദ് കോളജിലെ ക്രമീകരണങ്ങള്‍ വിലയിരുത്തി. പ്രിന്‍സിപ്പല്‍ ഡോ. സിബി ജയിംസ്, വൈസ്പ്രിന്‍സിപ്പല്‍ റവ. ഡോ. സാല്‍വിന്‍ കാപ്പിലിപ്പറമ്പില്‍ എന്നിവരുമായി അദ്ദേഹം ചര്‍ച്ച നടത്തി. പാലായില്‍നിന്ന് 5.30ന് ഹെലികോപ്റ്ററില്‍ കോട്ടയം പോലീസ് പരേഡ് മൈതാനത്ത് ഇറങ്ങി റോഡ് മാര്‍ഗമാണ് രാഷ്‌ട്രപതി കുമരകം ടാജ് ഹോട്ടലിലെത്തി അന്നു രാത്രി അവിടെ തങ്ങുന്നത്. കോണത്താറ്റ് പാലത്തിനുസമീപം നിലവിലുള്ള താത്കാലിക റോഡില്‍ തറ ഓടുകള്‍ പാകുന്നതിനുള്ള ജോലിയാണ് റോഡിന്‍റെ കാര്യത്തില്‍ ചെയ്യുന്നത്. ഇന്നലെ റോഡ് പണി തുടങ്ങി. കോണത്താറ്റ് പാലത്തിലൂടെ രാഷ്‌ട്രപതിയുടെ കാര്‍ പോകുന്നതിനു സുരക്ഷാ പ്രശ്‌നം ഉണ്ടെങ്കില്‍ ഉപയോഗിക്കുന്നതിനാണു താത്കാലിക റോഡ് നന്നാക്കുന്നത്. കുമരകം റോഡിലെ പാലങ്ങളുടെ കൈവരികള്‍ വെള്ളപൂശി മനോഹരമാക്കും. റോഡിലേക്ക് ചാഞ്ഞുനില്‍ക്കുന്ന മരങ്ങളുടെ ശിഖരങ്ങള്‍ വെട്ടിമാറ്റി. കുമരകം റൂട്ടില്‍ ഇല്ലിക്കല്‍പാലം മുതല്‍ കവണാറ്റിന്‍കര വരെയുള്ള റോഡ് കുഴികള്‍ അടച്ചുവരികയാണ്. 24ന് രാവിലെ 10നു കുമരകത്തുനിന്നും‌ റോഡുമാര്‍ഗം കോട്ടയത്തെത്തി ഹെലികോപ്റ്ററില്‍ കൊച്ചിയിലേക്കും തുടര്‍ന്ന് ഡല്‍ഹിയിലേക്കും മടങ്ങും. അവിസ്മരണീയ മുഹൂർത്തം കാത്ത് പാലാ സെന്‍റ് തോമസ് കോളജ് പാലാ: പാലാ സെന്‍റ് തോമസ് ഓട്ടോണമസ് കോളജ് രാഷ്‌ട്രപതി ദ്രൗപദി മുര്‍മുവിനെ വരവേല്ക്കാന്‍ ഒരുങ്ങുന്നു. പ്ലാറ്റിനം ജൂബിലി സമാപന സമ്മേളനത്തില്‍ പങ്കെടുക്കാന്‍ വ്യാഴാഴ്ച വൈകുന്നേരം 4.15ന് രാഷ്‌ട്രപതി എത്തും. ജൂബിലി സ്മാരക ബ്ലോക്കിന്‍റെ ശിലാഫലകം അനാച്ഛാദനം ചെയ്യും. ജവഹര്‍ലാല്‍ നെഹ്റു, ഇന്ദിരാഗാന്ധി, ഡോ. എ.പി.ജെ. അബ്ദുള്‍ കലാം, വി.വി. ഗിരി തുടങ്ങിയവരുടെ സന്ദര്‍ശനത്തിന്‍റെ ഓര്‍മകളുള്ള കോളജിന് രാഷ്‌ട്രപതി ദ്രൗപദി മുര്‍മുവിന്‍റെ സന്ദര്‍ശനത്തിലൂടെ അവിസ്മരണീയമായ മറ്റൊരു സ്മരണകൂടി സ്വന്തമാകുകയാണ്. പൂര്‍വവിദ്യാര്‍ഥിയും സുപ്രീം കോടതി ചീഫ് ജസ്റ്റീസുമായിരുന്ന കെ.ജി. ബാലകൃഷ്ണന്‍, എസ്.കെ. പാട്ടീല്‍ എംപി, മുന്‍ മുഖ്യമന്ത്രി എ.ജെ. ജോണ്‍, ശ്രീചിത്തിര തിരുനാള്‍, കര്‍ദിനാള്‍ ടിസറങ്, ഗായകന്‍ മുഹമ്മദ് റാഫി, കെ.ജെ. യേശുദാസ്, എസ്. ജാനകി, ഹേമലത, പി.ബി. ശ്രീനിവാസന്‍, താരങ്ങളായ സത്യന്‍, പ്രേം നസീര്‍, ഇറോം ശര്‍മ്മിള, സ്‌കോട്ടിഷ് ചരിത്രകാരന്‍ വില്യം ഡാല്‍റിംപിള്‍ തുടങ്ങിയവരും കോളജ് സന്ദര്‍ശിച്ചവരില്‍പ്പെടുന്നു. മന്ത്രിപദവിയിലെത്തിയവരില്‍ ജോര്‍ജ് കുര്യന്‍, റോഷി അഗസ്റ്റിന്‍ എന്നിവരുണ്ട്. മുന്‍ മന്ത്രി എന്‍.എം. ജോസഫ് ഇവിടെ അധ്യാപകനായിരുന്നു. എംജി യൂണിവേഴ്സിറ്റി മുന്‍ വൈസ് ചാന്‍സര്‍ ഡോ. എ.ടി. ദേവസ്യ, ഡോ. സിറിയക് തോമസ്, ഡോ. ബാബു സെബാസ്റ്റ്യന്‍ എന്നിവര്‍ സെന്‍റ് തോമസിലെ അധ്യാപകരായിരുന്നു. 16 യുജി, പിജി കോഴ്‌സുകളും 11 ഗവേഷണവിഭാഗങ്ങളും കോളജിനുണ്ട്. ബിഎസ്‌സി സൈക്കോളജി, എംഎസ്‌ സി ഫുഡ് സയന്‍സ് ആന്‍ഡ് ടെക്നോളജി കോഴ്സുകള്‍ ഇക്കൊല്ലം തുടങ്ങി. മൈക്രോബയോളജി, ബയോ സ്റ്റാറ്റിറ്റിക്സ്, ബയോ ടെക്നോളജി തുടങ്ങിയ പ്രഫഷണല്‍ കോഴ്സുകളുമുണ്ട്. നാക് ഗ്രേഡിംഗില്‍ എ പ്ലസ് പ്ലസ് അംഗീകാരം കരസ്ഥമാക്കുകയും ഓട്ടോണമസ് പദവി നേടുകയും ചെയ്ത കോളജിന് അഭിമാനം പകരുന്നതാണ് രാഷ്‌ട്രപതിയുടെ വരവ്. ഡേറ്റാ സയന്‍സ് ഉള്‍പ്പെടെ കോഴ്സുകള്‍ തുടങ്ങുകയും ഡീംഡ് യൂണിവേഴ്സിറ്റിയായി ഉയര്‍ത്തുകയുമാണ് ലക്ഷ്യമെന്ന് പ്രന്‍സിപ്പല്‍ ഡോ. സിബി ജെയിംസ് പറഞ്ഞു.

രാമപുരം-നീറന്താനം-മാറിക റോഡില്‍ അപകടം പതിവാകുന്നു; തിട്ട ഇടിയുന്നു

രാമപുരം: മരണക്കെണിയായി രാമപുരം - നീറന്താനം - മാറിക റോഡ്. പല ഭാഗങ്ങളിലും റോഡ് ഇടിഞ്ഞ് താണുകൊണ്ടിരിക്കുന്നു. കഴിഞ്ഞ ദിവസം നീറന്താനത്തിന് സമീപം കയം ഭാഗത്ത് കല്ലുമായി പോയ ഭാരവണ്ടി റോഡിന്‍റെ സൈഡ് ഇടിഞ്ഞ് ഒരുവശത്തേക്ക് താന്നുപോയി. ഭാഗ്യംകൊണ്ടാണ് താഴെയുള്ള കൊക്കയിലേക്ക് പതിക്കാതെ വാഹനം രക്ഷപ്പെട്ടത്. ജെസിബി ഉപയോഗിച്ചാണ് പിന്നീട് ഈ ലോറി ഉയര്‍ത്തിയത്. ഈ അപകടത്തില്‍ റോഡ് ഇടിഞ്ഞ് തകര്‍ന്ന് കിടക്കുകയാണ്. നാട്ടുകാരുടെ നേതൃത്വത്തില്‍ ഇടിഞ്ഞ ഭാഗത്ത് ടാര്‍ വീപ്പകള്‍ വെച്ചിരിക്കുകയാണ്. ഈ ഭാഗത്ത് വലിയൊരു വളവാണുള്ളത്. അമിത വേഗത്തിലേത്തുന്ന വാഹനങ്ങള്‍ അപകടത്തില്‍പ്പെടാതെ കഷ്ടിച്ചാണ് രക്ഷപ്പെടുന്നത്. മൂവാറ്റുപുഴയില്‍ നിന്നു പാലായിലേയ്ക്ക് എളുപ്പം എത്തുവാന്‍ ഗൂഗിള്‍ മാപ്പില്‍ കാണിക്കുന്ന റോഡായതിനാല്‍ ശബരിമല തീര്‍ഥാടകരടക്കം നിരവധി ദീര്‍ഘദൂര വാഹനങ്ങളും ഭാര വണ്ടികളും സ്‌കൂള്‍ കുട്ടികളുമായി പോകുന്ന ബസുകളും സര്‍വീസ് ബസുകളും ഇടതടവില്ലാതെ ഈ റോഡിലൂടെ പോകുന്നുണ്ട്. ഈ അപകടം നടന്നതിന്‍റെ തൊട്ട് മുന്പിലായി വല്യവീട്ടില്‍ വാതിലിന് സമീപം റോഡിന്‍റെ ഒരു സൈഡ് താഴ്ന്ന് പൊയ്ക്കൊണ്ടിരിക്കുകയാണ്. വലിയ വാഹനങ്ങള്‍ ഒരു വശത്തേക്ക് ചെരിഞ്ഞ് അപകടത്തില്‍പ്പെടാതെ കഷ്ടിച്ചാണ് രക്ഷപ്പെടുന്നത്. മഴ കനക്കുന്നതോടുകൂടി ഈ ഭാഗം ഇടിയുവാന്‍ സാധ്യതയുണ്ട്. ഈ റോഡിന്‍റെ അപാകതകള്‍ എത്രയും പെട്ടന്ന് പരിഹരിക്കണമെന്ന നാട്ടുകാരുടെ ആവശ്യം ശക്തമാവുകയാണ്.

നാമഹേതുകന്‍റെ ചിത്രം സുഗന്ധവ്യഞ്ജനങ്ങളാൽ നിർമിച്ച് സമർപ്പിച്ച് കുറവിലങ്ങാട് കുടുംബകൂട്ടായ്മ യൂണിറ്റ്

കുറവിലങ്ങാട്: നാമഹേതുകന്‍റെ ചിത്രം സുഗന്ധവ്യഞ്ജനങ്ങളാൽ നിർമിച്ച് സമർപ്പിച്ച് കുടുംബകൂട്ടായ്മ യൂണിറ്റ്. മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ഇടവകയിലെ 27-ാം വാർഡിലെ ഒന്നാം കുടുംബകൂട്ടായ്മ യൂണിറ്റാണ് പുണ്യവഴികൾ തേടി പുതിയ മാതൃക സ്വീകരിച്ചത്. ദൈവദാസൻ മാർ മാത്യു കാവുകാട്ടാണ് യുണിറ്റിന്‍റെ നാമഹേതുകൻ. ആർച്ച്ബിഷപ് മാർ മാത്യു കാവുകാട്ടിന്‍റെ അനുസ്മരണ വാർഷികത്തോടനുബന്ധിച്ചാണ് ആർച്ച്ബിഷപ്പിന്‍റെ കബറിടം സ്ഥിതി ചെയ്യുന്ന ചങ്ങനാശേരി മെത്രാപ്പോലീത്തൻ പള്ളിയോട് ചേർന്നുള്ള കബറിട പള്ളിയിൽ കൂട്ടായ്മ അംഗങ്ങൾ എത്തിയത്. തുടർന്ന് ആർച്ച്ബിഷപ് മാർ മാത്യു കാവുകാട്ട് വൈദികനായിരിക്കെ വിശുദ്ധ കുർബാനയർപ്പിച്ചിരുന്ന പള്ളിയിൽ അസിസ്റ്റന്‍റ് വികാരി ഫാ. തോമസ് താന്നിമലയുടെ കാർമികത്വത്തിൽ വിശുദ്ധ കുർബാനയർപ്പണം നടത്തി. മാർ മാത്യു കാവുകാട്ട് മ്യൂസിയത്തിലേക്ക് ചിത്രം കൈമാറി. കുറവിലങ്ങാട് ഇടവക പള്ളിയിൽ നിന്ന് ആരംഭിച്ച തീർഥാടനം ആർച്ച്പ്രീസ്റ്റ് റവ.ഡോ.തോമസ് മേനാച്ചേരി ഫ്‌ളാഗ് ഓഫ് ചെയ്തു. അസിസ്റ്റന്‍റ് വികാരിമാരായ ഫാ. പോൾ കുന്നുംപുറത്ത്, ഫാ. തോമസ് താന്നിമലയിൽ, ഫാ. ജോസഫ് ചൂരയ്ക്കൽ എന്നിവരുടെ കാർമികത്വത്തിൽ പ്രത്യേക പ്രാർഥനകളോടെയാണ് ചങ്ങനാശേരി കത്തീഡ്രലിലേക്കുള്ള തീർഥാടനം ആരംഭിച്ചത്. പള്ളിയോഗം സെക്രട്ടറി ബെന്നി കോച്ചേരി, കുടുംബകൂട്ടായ്മ ജനറൽ ലീഡർ ബോബിച്ചൻ നിധീരി, സോൺ ലീഡർ സണ്ണി വെട്ടിക്കാട്ട്,യൂണിറ്റ് പ്രസിഡന്‍റ് പോൾസൺ ചേലക്കാപ്പിള്ളിൽ, സെക്രട്ടറി സുമി റോയി ഓലിക്കാട്ടിൽ തുടങ്ങിയവർ പ്രസംഗിച്ചു. ഒരുമാസത്തോളം നീണ്ട പരിശ്രമങ്ങളിലാണ് ചിത്രം ഒരുക്കിയതെന്ന് യൂണിറ്റ് ഭാരവാഹികളായ പോൾസൺ ചേലയ്ക്കാപ്പള്ളിയും സുമി റോയിയും പറഞ്ഞു. ചിത്രകലയിൽ ശ്രദ്ധേയനായ സണ്ണി ഇടത്തിനാലാണ് ചിത്രം ക്രമീകരിക്കാൻ മാർഗനിർദേശങ്ങൾ നൽകിയത്.

ഉപജില്ലാ ശാസ്ത്ര, പ്രവൃത്തി പരിചയമേള കീരീടം കൈവിടാതെ നസ്രത്ത്ഹിൽ ഡിപോൾ

കുറവിലങ്ങാട്: ഉപജില്ലാ ശാസ്‌ത്രോത്സവത്തിൽ ഓവറോൾ കിരീടം നസ്രത്ത്ഹിൽ ഡി പോൾ ഹയർസെക്കൻഡറി സ്‌കൂളിന്. തുടർച്ചയായ ആറാം തവണയാണ് ഡിപോളിന്‍റെ തേരോട്ടം. 989 പോയിന്‍റ് നേടിയാണ് ഡിപോളിലെ പ്രതിഭകൾ ഒന്നാംസ്ഥാനം കൈപ്പിടിയിലൊതുക്കിയത്. ശാസ്ത്ര, ഗണിതശാസ്ത്ര, പ്രവൃത്തിപരിചയ, ഐടി മേളകളിളെല്ലാം ഓവറോൾ കിരീടം നസ്രത്ത്ഹിൽ ഡി പോളിനാണ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]