ADVERTISEMENT

ADVERTISEMENT

നുച്യാട് ഗവ. യുപി സ്കൂളിൽ ഐ ലാബ് ഉദ്ഘാടനം ചെയ്തു

പയ്യാവൂർ: കൊച്ചി ശാസ്ത്ര സാങ്കേതിക സർവകലാശാലയുടെ സഹകരണത്തോടെ സമഗ്രശിക്ഷാ കേരളം പദ്ധതിയിൽ ഉൾപ്പെടുത്തി‌ നുച്യാട് ഗവ. യുപി സ്കൂളിൽ തയാറാക്കിയ ഐ ലാബും ക്രിയേറ്റീവ് കോർണറും ഉളിക്കൽ പഞ്ചായത്ത് പ്രസിഡന്‍റ് പി.സി. ഷാജി ഉദ്ഘാടനം ചെയ്തു. വൈസ് പ്രസിഡന്‍റ് സമീറ പള്ളിപ്പാത്ത് അധ്യക്ഷത വഹിച്ചു.

മുഖ്യാധ്യാപിക ബി. റഹ്മത്തുന്നീസ, ഇരിക്കൂർ ബിപിസി എം.കെ. ഉണ്ണിക്കൃഷ്ണൻ, എസ്എംസി ചെയർമാൻ അസീസ് നന്ദാനിശേരി, മദർ പിടിഎ പ്രസിഡന്‍റ് എം.പി. ആബിദ, സ്കൂൾ സീനിയർ അസിസ്റ്റന്‍റ് ടി.എം. ബീന, വി.പി. ആബിദ, സിആർസി കോ- ഓർഡിനേറ്റർ ടി.പി. അനുഷിമ എന്നിവർ പ്രസംഗിച്ചു. എൽഎസ്എസ്, യുഎസ്എസ് വിജയികളെയും പ്ലസ് ടു പരീക്ഷയിൽ മുഴുവൻ വിഷയങ്ങളിലും എ പ്ലസ് കരസ്ഥമാക്കിയ വിദ്യാർഥികളെയും അനുമോദിച്ചു. ക്രിയേറ്റീവ് കോർണർ ഏകദിന ശില്പശാലയ്ക്ക് പി. ഷിബിന, ഇ.എ.അഞ്ജലി എന്നിവർ നേതൃത്വം നൽകി.

ADVERTISEMENT

ഇരിക്കൂറിൽ പുതിയ പാലം അനുവദിക്കണമെന്ന് പഞ്ചായത്ത്

ഇരിക്കൂർ: കാലപ്പഴക്കം കൊണ്ട് തകർന്നു കൊണ്ടിരിക്കുന്ന പാലത്തിന് പകരം ഇരിക്കൂറിൽ പുതിയ പാലം അനുവദിക്കണമെന്ന് പഞ്ചായത്ത്. ഇരിക്കൂർ-കൂടാളി പഞ്ചായത്തുകളെ ബന്ധിപ്പിക്കുന്ന പാലത്തിന്‍റെ ഉപരിതലം പലസ്ഥലങ്ങളിലും തകർന്ന നിലയിലാണ്. സ്പാനുകൾക്കിടയിലെ ടാറിംഗ് തകർന്ന് വലിയ വിള്ളൽ രൂപപ്പെട്ടിട്ടുണ്ട്. കൈവരികൾ ഉൾപ്പെടെ പല ഭാഗങ്ങളിലെയും കോൺക്രീറ്റുകൾ തകർന്ന് കമ്പികൾ പുറത്തായി. ഭാരമുള്ള വാഹനങ്ങൾ കടന്നുപോകുമ്പോൾ പാലത്തിന് വിറയൽ അനുഭവപ്പെടുന്നുണ്ട്. കണ്ണൂർ, മട്ടന്നൂർ, തലശേരി, ചാലോട്, ഇരിട്ടി, ശ്രീകണ്ഠപുരം ഭാഗങ്ങളിലേക്കുള്ള ബസുകളും വാഹനങ്ങളും ദിവസവും ഇതുവഴി പോകുന്നുണ്ട്. പയ്യാവൂർ, ഏരുവേശി, ശ്രീകണ്ഠപുരം, ചെങ്ങളായി ഉൾപ്പെടെ മലയോര മേഖലയിലുള്ളവർ കണ്ണൂർ രാജ്യാന്തര വിമാനത്താവളത്തിലേക്കു പോകാനും ഇരിക്കൂർ പാലത്തെയാണ് ആശ്രയിക്കുന്നത്. കഴിഞ്ഞ ബജറ്റിലും ടോക്കൺ മാത്രമാണ് അനുവദിച്ചത്. അപകടാവസ്ഥയിലുള്ള പാലത്തോടുള്ള സർക്കാർ അവഗണന മാറുമോയെന്നാണ് പഞ്ചായത്ത് ചോദിക്കുന്നത്. കൂടാളി പഞ്ചായത്തിന്‍റെ അതിർത്തിയിലാണ് പാലം സ്ഥിതിചെയ്യുന്നത്. മലയോര മേഖലയുടെ പ്രധാന പ്രവേശന കവാടമായ ഇരിക്കൂർ പാലം ബജറ്റിൽ ഉൾപ്പെടുത്താൻ എംഎൽഎമാർ നിർദേശം നൽകിയിരുന്നെങ്കിലും പരിഗണിച്ചില്ല. നേരത്തെ കിഫ്ബി പദ്ധതിയിൽ ഉൾപ്പെടുത്താൻ ആവശ്യപ്പെട്ടിരുന്നെങ്കിലും പുതിയ പദ്ധതി എടുക്കുന്നില്ലെന്ന് പറഞ്ഞ് ഒഴിവാക്കി. കേന്ദ്ര സർക്കാരിന്‍റെ സഹായത്തോടെയുള്ള സേതുബന്ധൻ പദ്ധതിയിലോ മറ്റേതെങ്കിലും പദ്ധതിയിലോ ഉൾപ്പെടുത്തി പുതിയ പാലം നിർമിക്കാൻ അടിയന്തര നടപടി സ്വീകരിക്കണമെന്നാണ് പഞ്ചായത്തും ആവശ്യപ്പെടുന്നത്.

ചെങ്ങളായി-ചുഴലി റോഡിലെ ഗർത്തം: അടിയന്തര നടപടി സ്വീകരിക്കണം

ചെങ്ങളായി: ചെങ്ങളായി-ചുഴലി റോഡിൽ രൂപപ്പെട്ട വലിയ ഗർത്തം സംബന്ധിച്ച് വിശദമായ പഠനം നടത്തി അടിയന്തര പരിഹാര മാർഗങ്ങൾ സ്വീകരിക്കണമെന്ന് സജീവ് ജോസഫ് എംഎൽഎ ആവശ്യ പ്പെട്ടു. റോഡിലെ ഗർത്തം സോയിൽ പൈപ്പിംഗ് എന്ന ജിയോളജിക്കൽ പ്രതിഭാസം മൂലമാണെന്നാണ് പ്രാഥമിക നിഗമനം. ചീഫ് എൻജിനിയർ കെ.ജി. സന്ദീപും സംഘവും സ്ഥലം സന്ദർശിച്ചിരുന്നു. ഏകദേശം നാലു മീറ്ററോളം ആഴമുള്ള ഗർത്തമാണ് ഇവിടെയുണ്ടായിരിക്കുന്നത്. അപകടഭീഷണിയേറിയ ഈ അവസ്ഥയിൽ, ദുരന്ത നിവാരണ ഫണ്ടിന്‍റെ സഹായം ഉപയോഗിച്ച് അടിയന്തരമായി ഗർത്തം നികത്തി വാഹന ഗതാഗതം സാധാരണ നിലയിലേക്ക് കൊണ്ടുവരാൻ നടപടികൾ ആരംഭിക്കണമെന്ന് എംഎൽഎ ആവശ്യപ്പെട്ടു. ടി.സി. പ്രിയ, ജോഷി കണ്ടത്തിൽ, പി. ബാലകൃഷ്ണൻ, പി. രാജ്കുമാർ, ആന്‍റണി കണ്ണാടിപ്പാറ, എസ്. പി. മുഹമ്മദ്‌ എന്നിവർ എംഎൽഎയുടെ ഒപ്പമുണ്ടായിരുന്നു.

കത്തോലിക്ക കോൺഗ്രസ് പരിസ്ഥിതി ദിനാചരണം

മണിക്കടവ്: കത്തോലിക്ക കോൺഗ്രസിന്‍റെ ആഭിമുഖ്യത്തൽ ലോക പരിസ്ഥിതി ദിനാചരണം നടത്തി. തലശേരി അതിരൂപതാതല ഉദ്ഘാടനം മണിക്കടവ് സെന്‍റ് തോമസ് ഫൊറോന പള്ളി വളപ്പിൽ വൃക്ഷത്തൈ നട്ട് അതിരൂപത വികാരി ജനറാൾ മോൺ. സെബാസ്റ്റ്യൻ പാലാക്കുഴി നിർവഹിച്ചു. ഫാ. പോൾ പടിഞ്ഞാറെമുറിയിൽ അധ്യക്ഷത വഹിച്ചു. കത്തോലിക്ക കോൺഗ്രസ് മണിക്കടവ് ഫൊറോന പ്രസിഡന്‍റ് ബിജു ഒറ്റപ്ലാക്കൽ, സെക്രട്ടറി ജോർജ് തെക്കേമുറിയിൽ എന്നിവർ പ്രസംഗിച്ചു. കത്തോലിക്ക കോൺഗ്രസ് ഗ്ലോബൽ ട്രഷറർ ടോണി പുഞ്ചക്കുന്നേൽ തളിപ്പറമ്പിലും അതിരൂപത പ്രസിഡന്‍റ് ഫിലിപ്പ് വെളിയത്ത് ചെറുപുഴയിലും അതിരൂപത സെക്രട്ടറി ജിമ്മി ആയിത്തമറ്റം ചെമ്പേരിയിലും അതിരൂപത ട്രഷറർ സുരേഷ് ജോർജ് ശ്രീകണ്ഠപുരത്തും ഷിനോ പാറയ്ക്കൽ ചെമ്പന്തൊട്ടിയിലും ടോമി കണയങ്കൽ ആലക്കോടും ബെന്നിച്ചൻ മഠത്തിനകം എടൂരിലും ഐ.സി. മേരി കണ്ണൂരിലും ഉദ്ഘാടനം നിർവഹിച്ചു. ലോക പരിസ്ഥിതി ദിനാചരണത്തിൽ തലശേരി അതിരൂപതയിലെ മുഴുവൻ യൂണിറ്റുകളിലും വൃക്ഷത്തൈകൾ നട്ടു.

സ്‌കൂൾ മുറ്റത്തൊരു കൃഷിത്തോട്ടം പദ്ധതിക്ക് തുടക്കമായി

കണ്ണൂർ: സ്‌കൂൾ മുറ്റത്തൊരു കൃഷിത്തോട്ടം പദ്ധതിയുടെ ഭാഗമായി ജില്ലയിൽ ഈ വർഷം ആരംഭിക്കുന്ന 100 സ്‌കൂളിലെ കൃഷിത്തോട്ടത്തിന് തുടക്കമായി. കണ്ണൂർ നഗരത്തിലെ സെന്‍റ് ‌പീറ്റേഴ്സ് എൽപി സ്കൂൾ ബർണശേരി, ഗവ. ടൗൺ ഹയർ സെക്കൻഡറി സ്കൂൾ കണ്ണൂർ, സെന്‍റ് തെരേസാസ് ആംഗ്ലോ ഇന്ത്യൻ സ്കൂൾ, തളാപ്പ് മിക്സഡ് യുപി സ്കൂൾ എന്നീ സ്കൂളുകളിലാണ് ആദ്യദിവസം കൃഷിയിടം തയാറാക്കിയത്. കുട്ടികൾക്കായുള്ള വിവിധ പദ്ധതി നടപ്പാക്കിവരുന്ന എൻജിഒ സംഘടനയായ മാനുഷയാണ് കുട്ടികളിലെ മാനസിക ആരോഗ്യം എന്ന ആശയം മുൻനിർത്തി പദ്ധതിയുടെ ഭാഗമാകുന്നത്‌. കുട്ടികൾക്കുള്ള സെമിനാറുകളും ക്ലാസുകളും ഈ വർഷം സ്‌കൂളിൽ നടപ്പിലാക്കും. ഈവർഷം 100 സ്‌കൂളുകളിലാണ് പദ്ധതി നടപ്പിലാക്കുന്നത്. ഒരു വർഷം മുഴുവൻ കുട്ടികളുടെ കൃഷിത്തോട്ടത്തിൽ പച്ചക്കറിത്തൈകൾ മാറി മാറി നടുന്നതാണ് പദ്ധതി. ലഹരിയിൽ നിന്ന് ശ്രദ്ധ തിരിക്കാൻ സ്‌കൂളിലെ കുട്ടിക്കർഷക ഗ്രൂപ്പിന് കഴിയുമെന്ന് മാനുഷ സംഘാടകർ പറഞ്ഞു. ജൈവ കൃഷി പ്രോത്സാഹിപ്പിക്കുന്ന ചെറി ഗാർഡൻ എക്സോട്ടിക് ഫ്രൂട്ട് ഗാർഡനുമായി സഹകരിച്ചാണ് കുട്ടിക്കൃഷി പദ്ധതിക്ക് തുടക്കമാകുന്നത്.

ക്ഷേത്രഭൂമി കൈയേറ്റമൊഴിപ്പിക്കല്‍: ബോര്‍ഡ് സ്ഥാപിച്ചു

പയ്യന്നൂര്‍: ക്ഷേത്ര ഭൂമിയിലെ കൈയേറ്റമൊഴിപ്പിക്കണമെന്ന ഹൈക്കോടതി ഉത്തരവ് നടപ്പാക്കുന്നതിന്‍റെ ഭാഗമായി കൈയേറ്റത്തിന് തടയിടാന്‍ ബോര്‍ഡ് സ്ഥാപിച്ച് ദേവസ്വം ബോര്‍ഡ്. മുമ്പ് സ്ഥലമളന്ന് മാര്‍ക്ക് ചെയ്തിരുന്നുവെങ്കിലും നാലുവര്‍ഷങ്ങള്‍ക്ക് ശേഷമാണ് ദേവസ്വം ബോര്‍ഡിന്‍റെ നടപടി. സുബ്രഹ്മണ്യ സ്വാമി ക്ഷേത്രത്തിന് തെക്ക് ഭാഗത്തെ ഫൈന്‍ ആര്‍ട്‌സ് സൊസൈറ്റിയുടെ പിറകിലായാണ് ബോര്‍ഡ് സ്ഥാപിച്ചത്. ദേവസ്വം ഭൂമിയില്‍ അനധികൃതമായി പ്രവേശിക്കുന്നതും കൈകാര്യം ചെയ്യുന്നതും നിരോധിച്ചുകൊണ്ടുള്ള എക്‌സിക്യൂട്ടീവ് ഓഫീസറുടെ അറിയിപ്പായാണ് ബോര്‍ഡ് സ്ഥാപിച്ചിട്ടുള്ളത്. പരിസ്ഥിതിയുടെ പേരില്‍ ഇവിടെ നട്ട ചെടികള്‍ ദേവസ്വം എക്‌സിക്യൂട്ടീവ് ഓഫീസറുടെ നേതൃത്വത്തില്‍ നീക്കം ചെയ്ത സംഭവവുമുണ്ടായി. ക്ഷേത്ര ഭൂമിയിലെ കൈയേറ്റമൊഴിപ്പിക്കണമെന്ന ഹൈക്കോടതി ഉത്തരവിനെ തുടര്‍ന്ന് 2021 ജൂണില്‍ കൈയേറ്റ സ്ഥലം കണ്ടെത്താനായി അളന്ന് മാര്‍ക്ക് ചെയ്തിരുന്നു.

ആറളം ഫാമിലെ ആന വിളയാട്ടം സർക്കാർ അനാസ്ഥക്കെതിരേ പ്രക്ഷോഭം തുടങ്ങുന്നു

ഇരിട്ടി: ആറളം ഫാമിലെ ആന വിളയാട്ടത്തിലെ സർക്കാർ അനാസ്ഥയ്ക്കെതിരേ പ്രക്ഷോഭം തുടങ്ങുന്നു. ആദിവാസി ദമ്പതികൾ ആനയുടെ ആക്രമണത്തിൽ കൊല്ലപ്പെട്ടതിനെ തുടർന്ന് ആദിവാസി സംഘടനകളുടെ നേതൃത്വത്തിൽ നാത്തിയ രാപ്പകൽ സമരം പരിഹരിക്കുന്നതിന്‍റെ ഭാഗമായി നല്കിയ ഉറപ്പുകൾ പാലിക്കാത്തതിൽ പ്രതിഷേധിച്ചാണ് ആദിവാസികൾ പ്രക്ഷോഭം തുടങ്ങുന്നത്. ആനമതിൽ നിർമാണം മൂന്നു മാസത്തിനകം പൂർത്തിയാക്കുമെന്നു പറഞ്ഞ ഉറപ്പു പാലിച്ചിട്ടില്ല. മതിൽ നിർമാണ കരാറുകാരൻ പണി ഉപേക്ഷിച്ചു പോകുന്ന സാഹചര്യമുണ്ടായതിന് പിന്നിൽ സർക്കാരിന്‍റെ കൊടുകാര്യസ്ഥതയാണെന്ന് ആദിവാസി ദലിത് മുന്നേറ്റ സമിതി പ്രസിഡന്‍റ് ശ്രീരാമൻ കൊയ്യോൻ പറഞ്ഞു. തൂക്കുവേലി നിർമാണ പ്രവർത്തനം വേണ്ട രീതിയിൽ നടപ്പാക്കാതിരിക്കുകയും, കാടുവെട്ടിത്തെളിക്കുന്നതും, ഫാമിൽ തമ്പടിച്ച ആനകളെ തുരത്തി വനത്തിലെത്തിക്കുന്നത് കാര്യക്ഷമമല്ലാത്തതും ജില്ലാ ഭരണകൂടത്തിന്‍റെ പരാജയമാണെന്നും അദ്ദേഹം ആരോപിച്ചു. കാലവർഷമാരംഭിച്ചതോടെ ആനകൾ കൂട്ടമായി ആദിവാസി പുനരധിവാസ മേഖലയിൽ തമ്പടിച്ച് കുടിലുകൾക്ക് നാശം വരുത്തുകയും ജീവഭയം കൊണ്ട് ഓടി മറയുന്ന ഗർഭിണികളും കുട്ടികളുമുൾപ്പെടെ പരിക്കേൽക്കുന്ന സ്ഥിതിയാണുള്ളതെന്നും അദ്ദേഹം പറഞ്ഞു.

കോഴി കയറ്റി വരികയായിരുന്ന ലോറി നിയന്ത്രണം വിട്ടുമറിഞ്ഞു

പുന്നാട്: മട്ടന്നൂർ-ഇരിട്ടി റൂട്ടിൽ പുന്നാട് കോഴി കയറ്റി വരികയായിരുന്ന ലോറി നിയന്ത്രണം വിട്ട് മറിഞ്ഞ് ഡ്രൈവർക്ക് പരിക്കേറ്റു. കൂട്ടുപുഴ സ്വദേശി സജേഷിനാണ് പരിക്കേറ്റത്. വാഹനത്തിൽ കുടുങ്ങിക്കിടന്ന ഡ്രൈവറെ ഫയർഫോഴ്സ് എത്തിയാണ് രക്ഷപ്പെടുത്തിയത്. നിസാര പരിക്കേറ്റ സജേഷ് ആശുപത്രിയിൽ ചികിത്സ തേടി. പുന്നാട് കുന്നിറക്കത്തിൽ ഇന്നലെ പുലർച്ചെ 5.30 ഓടെയായിരുന്നു അപകടം. മൈസൂരുവിൽ നിന്നും വലിയന്നൂരിലേക്ക് വരികയായിരുന്ന ലോറിയാണ് നിയന്ത്രണംവിട്ട് തൊട്ടടുത്തുള്ള പറമ്പിലേക്ക് മറിഞ്ഞത്. വാഹനത്തിൽ കുടുങ്ങിയ ഡ്രൈവറെ ഇരിട്ടിയിൽ നിന്നെത്തിയ അഗ്നിരക്ഷാസേനയാണ് രക്ഷിച്ചത്.

ലോറിയിടിച്ച് സ്കൂട്ടർ യാത്രികനായ വിദ്യാർഥിക്ക് ഗുരുതരം

മട്ടന്നൂർ: മട്ടന്നൂർ-ഇരിട്ടി റൂട്ടിൽ ചാവശേരി ഇരുപത്തിയൊന്നാം മൈലിൽ ലോറിയും സ്കൂട്ടറും കൂട്ടിയിടിച്ച് സ്കൂട്ടർ യാത്രികനായ വിദ്യാർഥിക്ക് ഗുരുതരമായി പരിക്കേറ്റു. ഉളിയിൽ ദാറുൽ ഹുദായ കോളേജ് വിദ്യാർഥിയും കിളിയന്തറ സ്വദേശിയുമായ മുഹമ്മദ് അഫ്സലിനാണ് പരിക്കേറ്റത്. റോഡിലേക്ക് തെറിച്ചു വീണ അഫ്സലിന് തലയ്ക്കാണ് പരിക്ക്. അഫ്സലിനെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇന്നലെ ഉച്ചയോടെയായിരുന്നു അപകടം. ഉളിയിൽ നിന്നും മട്ടന്നൂർ ഭാഗത്തേക്ക്‌ പോകുകയായിരുന്ന അഫ്സൽ സഞ്ചരിച്ച സ്കൂട്ടറും മട്ടന്നൂരിൽ നിന്ന് ഇരിട്ടി ഭാഗത്തേക്ക് പോകുകയായിരുന്ന ഭാരത് ബെൻസ് ലോറിയുമാണ് അപകടത്തിൽപ്പെട്ടത്. ഇടിയുടെ ആഘാതത്തിൽ സ്കൂട്ടർ പൂർണമായും തകർന്നു.

വായന ശോഷിക്കുകയല്ല, ശക്തിപ്പെടുകയാണ്: എം. മുകുന്ദൻ

കണ്ണൂർ: വായന ശോഷിക്കുന്നില്ലെന്നും ശക്തിപ്പെട്ടു വരികയാണെന്ന് എഴുത്തുകാരൻ എം. മുകുന്ദൻ. കണ്ണൂർ ജില്ലാ ലൈബ്രറി കൗൺസിൽ വികസന സമിതി സംഘടിപ്പിക്കുന്ന 19-ാമത് പുസ്തകോത്സവം കളക്ടറേറ്റ് മൈതാനിയിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഇത്രയധികം ഗ്രന്ഥശാല പ്രവർത്തകർ, ബുക്ക് സ്റ്റാളുകൾ, പുസ്തകങ്ങൾ ഇവയൊക്കെ സൂചിപ്പിക്കുന്നത് നമ്മുടെ വായന ശക്തിപ്പെട്ടുവരുന്നു എന്നതാണ്. അതുകൊണ്ട് നമ്മുടെ സമൂഹവും ശക്തിപ്പെടും. വായനയെ കുറിച്ച് നാം ആവലാതിപ്പെടേണ്ടതില്ല. വായനയെ ഗൗരവത്തോടെ കാണുന്ന ഒരു വിഭാഗം ഇപ്പോഴുമുണ്ട്. യുവാക്കളും വിദ്യാർഥികളും വായനയിലേക്ക് തിരിച്ചുവരുന്നുണ്ട്. ഐടി മേഖലയിലുള്ളവരടക്കം പുതിയ ഒരു വായനാ സമൂഹം വളർന്നു വന്നിട്ടുണ്ട്. അമേരിക്കയിൽ നടത്തിയ പഠനം പറയുന്നത് ആളുകൾ സാമൂഹിക മാധ്യമങ്ങൾ ഉപേക്ഷിച്ച് പുസ്തകങ്ങളിലേക്ക് തിരിച്ചുവരികയാണെന്നാണ്. കേരളത്തിൽ ഒരു പഠനം നടത്തിയാലും ഈ ഫലം തന്നെയായിരിക്കുമെന്നും എം. മുകുന്ദൻ പറഞ്ഞു. ജില്ലാ ലൈബ്രറി കൗൺസിൽ പ്രസിഡന്‍റ് മുകുന്ദൻ മഠത്തിൽ അധ്യക്ഷനായി. ആദ്യ വില്പന കണ്ണൂർ മേയർ മുസ്‌ലിഹ് മഠത്തിൽ നിന്നും തായംപൊയിൽ സഫ്ദർ ഹാശ്മി ഗ്രസ്ഥാലയം പ്രവർത്തകർ ഏറ്റുവാങ്ങി. ജില്ലാ ലൈബ്രറി കൗൺസിലിന്‍റെ മുഖപത്രമായ "അക്ഷരം' ത്രൈമാസിക കെ.പി. മോഹനൻ എംഎൽഎ ഗ്രന്ഥശാല പ്രവർത്തകൻ ഇ.പി.ആർ. വേശാലക്ക് നൽകി പ്രകാശനം ചെയ്തു. പിഎംഎസ്ഡി കൺവീനർ ടി.കെ. ഗോവിന്ദൻ, സി.എൻ. ചന്ദ്രൻ, കോർപറേഷൻ കൗൺസിലർ പി.കെ. അൻവർ, ജില്ലാ ഇൻഫർമേഷൻ ഓഫീസർ പി.പി. വിനീഷ്, പ്രസ് ക്ലബ് പ്രസിഡന്‍റ് സി. സുനിൽകുമാർ, അരക്കൻ പുരുഷോത്തമൻ, വി.സി. അരവിന്ദാക്ഷൻ, വൈക്കത്ത് നാരായണൻ, വി. സുജാത, കെ. രാജൻ, ടി. പ്രകാശൻ, പി.കെ. വിജയൻ എന്നിവർ പ്രസംഗിച്ചു. നാളെ രാവിലെ 10 മുതൽ വിവിധ പുസ്തകങ്ങളുടെ പ്രകാശനം നടക്കും. ഉച്ചകഴിഞ്ഞ് മൂന്നിന് "സർഗാത്മക സ്വാതന്ത്ര്യം' എന്ന വിഷയത്തിൽ നടക്കുന്ന സെമിനാർ കെ.ഇ.എൻ. കുഞ്ഞഹമ്മദ് ഉദ്ഘാടനം ചെയ്യും. എം.കെ. മനോഹരൻ അധ്യക്ഷത വഹിക്കും. പ്രഫ. ബി. മുഹമ്മദ് അഹമ്മദ്, താഹ മാടായി, ഡോ. പ്രിയ വർഗീസ് എന്നിവർ സംസാരിക്കും. ആർട്ടിസ്റ്റ് മദനൻ ഒരുക്കുന്ന "എം.ടി. സ്മരണയിൽ വരയും വർത്തമാനവും' നടക്കും.

പി. ബാലകൃഷ്ണൻ നായർ, കെ.വി. വേണുഗോപാൽ, എം.പി. വിനോദ് ക്രൈംബ്രാഞ്ച് എസ്പിമാർ

കണ്ണൂർ: കാസർഗോഡ് അഡീഷണൽ പോലീസ് മേധാവിയായ പി. ബാലകൃഷ്ണൻ നായരെയും കണ്ണൂർ അഡീഷണൽ പോലീസ് മേധാവികളായ കെ.വി. വേണുഗോപാലിനെയും എം.പി. വിനോദിനെയും ക്രൈംബ്രാഞ്ച് എസ്പിമാരായി നിയമിച്ചു. വേണുഗോപാലിനെ കോഴിക്കോട്-വയനാട് ജില്ലകൾ ഉൾപ്പെടുന്ന ക്രൈംബ്രാഞ്ച് യൂണിറ്റിന്‍റെ മേധാവിയായും വിനോദിനെ കണ്ണൂർ-കാസർഗോഡ് ജില്ലാ ക്രൈംബ്രാഞ്ച് യൂണിറ്റ് മേധാവിയായും വിനോദിനെ കണ്ണൂർ-കാസർഗോഡ് സാന്പത്തിക കുറ്റാന്വേഷണ വിഭാഗം മേധാവിയായുമായാണ് നിയമിച്ചത്. മൂന്നുപേരും കാസർഗോഡ് ജില്ലക്കാരാണ്. ബാലകൃഷ്ണൻ നായർ പാലക്കുന്ന് സ്വദേശിയും വേണുഗോപാൽ ചീമേനി സ്വദേശിയും വിനോദ് ബളാൽ സ്വദേശിയുമാണ്.കേസുകളിൽ മികവാർന്ന പ്രകടനം കാഴ്ചവച്ച പോലീസ് ഉദ്യോഗസ്ഥരാണ് മൂവരും. ഇത് ആദ്യമായാണ് ഒരേസമയം ഒരേ ജില്ലക്കാരായ മൂന്നുപേർ എസ്പിമാരാകുന്നത്.

റവ. ഡോ. സാമുവൽ പുതുപ്പാടി മാത്തിൽ ഗുരുദേവ് കോളജ് പ്രിൻസിപ്പൽ

ചെറുപുഴ: ബത്തേരി മലങ്കര കത്തോലിക്ക രൂപതയുടെ കീഴിൽ പ്രവർത്തിക്കുന്ന പയ്യന്നൂർ മാത്തിൽ ഗുരുദേവ് രവീന്ദ്രനാഥ ടാഗോർ ആർട്സ് ആൻഡ് സയൻസ് കോളജിന്‍റെ പുതിയ പ്രിൻസിപ്പലായി റവ. ഡോ. സാമുവേൽ പുതുപ്പാടി നിയമിതനായി. വയനാട് സ്വദേശിയായ ഇദ്ദേഹം കഴിഞ്ഞ നാലുവർഷം കോളജിന്‍റെ സിഇഒ ആൻഡ് ഡയറക്ടർ ആയും വൈസ് പ്രിൻസിപ്പലായും സേവനമനുഷ്ഠിക്കുകയായിരുന്നു. കർണാടക സൗത്ത് കാനറ ഡിസ്ട്രിക്ട് കുന്തൂർ മാർ ഇവാനിയോസ് ബിഎഡ് കോളജിലും മാർ ബസേലിയോസ് കോളജ് ഓഫ് എഡ്യുക്കേഷനിലും അസിസ്റ്റന്‍റ് പ്രഫസറായും ബസേലിയോസ് ടീച്ചർ ട്രെയിനിംഗ് ഇൻസ്റ്റിറ്റ്യൂട്ടിൽ പ്രിൻസിപ്പലായും സേവനമനുഷ്ഠിച്ചിട്ടുണ്ട്. ഗുരുദേവ് കോളജിന്‍റെ പ്രിൻസിപ്പൽആയിരുന്ന ഡോ. പി.സി. ശ്രീനിവാസ് വിരമിച്ച ഒഴിവിലേക്കാണ് റവ. ഡോ. സാമുവലിന്‍റെ നിയമനം

ആട് വെള്ളം കുടിച്ചതിനെ ചൊല്ലി തർക്കം, സംഘർഷം: രണ്ടുപേർക്കെതിരേ കേസ്

തളിപ്പറമ്പ്: അയല്‍ക്കാരിയുടെ ബക്കറ്റില്‍ നിന്ന് ആട് വെള്ളം കുടിച്ചതിനെ ചൊല്ലിയുണ്ടായ തർക്കത്തെ തുടർന്ന് വീട് ആക്രമിക്കുകയും ഗൃഹനാഥനെ കത്തിവീശി പരിക്കേൽപ്പിക്കുകയും ചെയ്ത സംഭവത്തിൽ രണ്ട് പേർക്കെതിരെ തളിപ്പറന്പ് പോലീസ് കേസെടുത്തു. ചപ്പാരപ്പടവ് പെരുമളാബാദിലെ തെക്കന്‍ ആയിഷ, മകന്‍ റിനാസ് എന്നിവരുടെ പേരിലാണ് കേസെടുത്തത്. കഴിഞ്ഞ മൂന്നിന് വൈകുന്നേരം ആറിനായിരുന്നു സംഭവം. പയ്യന്നൂര്‍ കൊക്കാനിശേരി സ്വദേശിയും ഇപ്പോള്‍ പെരുമളാബാദ് ഉപ്പുവളപ്പില്‍ താമസക്കാരനുമായ ചേക്കിന്‍റകത്ത് സി.എച്ച്. ഇഷാക്കിന്‍റെ (59) പരാതിയിലാണ് കേസെടുത്തത്. ഇഷാക്കിന്‍റെ വീട്ടില്‍ വളര്‍ത്തുന്ന ആട് ആയിഷ കൊണ്ടു പോകുകയായിരുന്ന ബക്കറ്റിലെ വെള്ളത്തിൽ നിന്നും വെള്ളം കുടിച്ചതിന്‍റെ പേരിലാണ് വഴക്ക് ആരംഭിച്ചത്. വഴക്കിനിടയില്‍ വീടിന്‍റെ ജനല്‍ചില്ല് കല്ലെറിഞ്ഞ് തകര്‍ത്ത് 2000 രൂപയുടെ നഷ്ടം വരുത്തുകയും കത്തിവീശി മുഖത്തും ചെവിയിലും പരിക്കേല്‍പ്പിക്കുകയും ചെയ്തുവെന്നാണ് പരാതി. ഇഷാക്ക് തളിപ്പറമ്പിലെ സ്വകാര്യ ആശുപത്രിയില്‍ ചികിത്സയിലാണ്.

ഇറ്റാലിയൻ പാർലമെന്‍റിൽ ദേശീയഗാനം ആലപിച്ച് എടൂർ സ്വദേശിനി

ഇരിട്ടി: ഇറ്റലിയുടെ റിപ്പബ്ലിക് ദിനത്തിൽ ഇറ്റാലിയൻ പാർലമെന്‍റിൽ ഇറ്റാലിയൻ ദേശീയഗാനമാലപിച്ച സംഘത്തിൽ എടൂർ സ്വദേശിനിയായ വിദ്യാർഥിനിയും. ദീർഘകാലമായി ഇറ്റലിയിലെ താമസക്കാരനും ലോക കേരള സഭാംഗവുമായ എബിൻ ഏബ്രഹാം പാരിക്കാപള്ളി-ജാൻസി ദന്പതികളുടെ മകളായ എലൈന എബിൻ പാരിക്കാപ്പള്ളിയാണ് നാൽപതംഗ സംഘത്തോടൊപ്പം ദേശീയഗാനം ആലപിച്ചത്. ജൂൺ രണ്ടിന് നടന്ന ഇറ്റലിയുടെ റിപ്പബ്ലിക് ദിനവും ദേശീയദിനവുമായ ഫെസ്റ്റ് ഡെല്ല റിപ്പബ്ലിക് ആഘോഷത്തിൽ പാർലമെന്‍റായ ഇറ്റാലിയാനോവിൽ ‌ആയിരുന്നു പരിപാടി. ദേശീയഗാനാലാപനത്തിന് പുറമെ എലൈന എബിൻ പാരിക്കാപ്പള്ളി ഉൾപ്പെടുന്ന സംഘം മറ്റൊരു ഗാനവും ആലപിച്ചു. ഇറ്റലിയിലെ വിവിധ സ്കൂളുകളിലെ കൊയറുകളിൽ നിന്നാണ് 40 പേരെ ദേശീയതലത്തിലേക്ക് ഗാനാലാപനത്തിനായി തെരഞ്ഞെടുത്തത്. ഈ വർഷം റിപ്പബ്ലിക് ദിനത്തിൽ പരിപാടി അവതരിപ്പിക്കാൻ അവസരം ലഭിച്ച 40 അംഗ വിദ്യാർഥി സംഘത്തിലെ ഏക മലയാളിയാണ് എലൈന. എലൈന റോമിലെ പ്ലിനിയോ സിനിയൊരെ സ്കൂളിലെ പ്ലസ് വൺ വിദ്യാർഥിനിയാണ്. കരോളിന,ഫാബിയോ എന്നിവരാണ് സഹോദരങ്ങളാണ്.

വ്യാപാര കരാറിലൂടെ കർഷകരെ അമേരിക്കയ്ക്ക് അടിയറവയ്ക്കരുത്: സംയുക്ത കിസാൻ മോർച്ച

കണ്ണൂർ: രണ്ടാം തവണയും അധികാരത്തിൽ വന്ന അമേരിക്കൻ പ്രസിഡന്‍റ് ഡൊണാൾഡ് ട്രംപിന്‍റെ തെറ്റായ വ്യാപാര തീരുമാനങ്ങൾ കാരണം അമേരിക്കയിൽ കെട്ടിക്കിടക്കുന്ന പാലുത്പന്നങ്ങളും സോയാബീൻ എണ്ണ, കോഴയിറച്ചി ഉത്പന്നങ്ങളഉം ഇന്ത്യയിലേക്ക് കയറ്റി അയക്കാനുള്ള നീക്കത്തിന്‍റെ ഭാഗമായി ഇന്ത്യൻ സർക്കാറിൽ കടുത്ത സമ്മർദം ചെലുത്താനള്ള നീക്കം പ്രതിരോധിക്കണമെന്ന് രാഷ്‌ട്രീയ കിസാൻ മഹാസംഘ് ഉൾപ്പടെയുള്ള സംയുക്ത കിസാൻ മോർച്ച ആവശ്യപ്പെട്ടു. അമേരിക്കയിൽ കെട്ടിക്കിടക്കുന്ന പാൽ, ഇറച്ചി ഉത്പന്ന ഇറക്കുമതി രാജ്യത്തെ കർഷകരെ കടുത്ത പ്രതിസന്ധിയിലേക്ക് തള്ളിവിടുമെന്നും രാഷ്‌ട്രീയ കിസാൻ മഹാസംഘ് സംസ്ഥാന ചെയർമാൻ അഡ്വ. ബിനോയ് തോമസ് പറഞ്ഞു. കഴിഞ്ഞ അഞ്ചു വർഷമായി കർഷക പ്രതിരോധത്തെ തുടർന്ന് നിർത്തി വച്ചിരിക്കുന്ന ഇന്ത്യ-അമേരിക്ക സ്വതന്ത്ര വ്യാപാരക്കരാർ ചർച്ചകൾ അതീവ രഹസ്യമായി ആരംഭിച്ച് പ്രാരംഭകരാർ ഈ മാസം 24ന് ഒപ്പിടാൻ ധാരണയിലെത്തുകയും ചെയ്തിരിക്കുകയാണ്. കരാർ നടപ്പിലായാൽ ഇന്ത്യയിലെ 15 കോടി ക്ഷീര, കോഴി കർഷകരെയും റബർ കർഷകർ ഉൾപ്പടെയുള്ള കോടിക്കണക്കിന് മറ്റ് കർഷകരുടെയും തകർച്ചയ്ക്ക് കാരണമാകും. കരാറിനെതിരെ ദേശീയ തലത്തിൽ നടത്തുന്ന പ്രക്ഷോഭങ്ങളുടെ ഭാഗമായി ദക്ഷിണേന്ത്യയിലെ പ്രക്ഷോഭ പരിപാടികളെക്കുറിച്ചാലോചിക്കുന്നതിന് ഡൽഹി കർഷക സമര ഐക്യദാർഢ്യ സമിതി നേതാക്കളുടെയും സമര പ്രഖ്യാപന കൺവൻഷൻ നാളെ കണ്ണൂരിൽ നടക്കും. ഉച്ച കഴിഞ്ഞ് രണ്ടിന് കണ്ണൂർ മഹാത്മാ മന്ദിരത്തിലാണ് സമരപ്രഖ്യാപന കൺവൻഷനെന്ന് സംയുക്ത കിസാൻ മോർച്ചാ നേതാക്കളായ അഡ്വ. കെ.വി. ബിജു, അഡ്വ. ബിനോയ് തോമസ്, ഡോ. ജോസുകുട്ടി ഒഴുകയിൽ, ഐക്യ ദാർഢ്യ സമിതി നേതാക്കളായ എൻ. സുബ്രമണ്യൻ, ഡോ. ഡി. സുരേന്ദ്രനാഥ്, അഡ്വ. വിനോദ് എം. പയ്യട എന്നിവർ അറിയിച്ചു. കരാർ സംസ്ഥാനത്തെ കൃഷിയെയും സാമ്പത്തിക മേഖലയെയും കാര്യമായി ബാധിക്കും എന്നതിനാൽ സംസ്ഥാന സർക്കാർ ഈ വിഷയത്തിൽ അടിയന്തിരമായി ഇടപെട്ട് കരാറിൽ നിന്ന് പിൻമാറാൻ കേന്ദ്രത്തിൽ സമ്മർദം ചെലുത്തണമെന്നും സംയുക്ത കിസാൻ മോർച്ച ആവശ്യപ്പെട്ടു. ഇക്കാര്യം ആവശ്യപ്പെട്ട് മുഖ്യമന്ത്രിക്കും കൃഷി മന്ത്രിക്കും സംയുക്ത കിസാൻ മോർച്ചയുടെയും കർഷക സമര ഐക്യദാർഢ്യ സമിതികളുടേയും നേതാക്കൾ നിവേദനം നൽകി.

ആർഎസ്എസോ ഭരണഘടനയോ വലുത് ?

കണ്ണൂര്‍: ഇന്ത്യ രാജ്യത്ത് ആര്‍എസ്എസ് ആണോ ഭരണഘടനയാണോ വലുതെന്ന കാര്യം കേരള ഗവർണർ രാജേന്ദ്ര ആർലേക്കർ വ്യക്തമാക്കണമെന്ന് സിപിഐ സംസ്ഥാന സെക്രട്ടറി ബിനോയ് വിശ്വം ആവശ്യപ്പെട്ടു. കണ്ണൂരിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം. പരിസ്ഥിതിദിനാചാരണ പരിപാടിയിൽ ആർഎസ്എസ് കൊടിപിടിച്ചുള്ള ഭാരതാംബയുടെ ചിത്രം മാറ്റില്ലെന്ന ഗവർണറുടെ കടുംപിടിത്തം അങ്ങേയറ്റം ഭരണഘടനാവിരുദ്ധമാണ്. അത് ഭരണഘടനയോടു കാണിക്കുന്ന അവഹേളനംകൂടിയാണ്. രാജ്ഭവനെ സംഘപരിവാറിന്‍റെ ക്യാമ്പ് ഓഫീസാക്കിയും ഗവർണർപദവിയെ രാഷ്‌ട്രീയ വടംവലിക്കുള്ള ഉപാധിയാക്കിയും മാറ്റരുത്. ഭാരതാംബ എന്ന സങ്കല്പം ഇന്ത്യക്കാര്‍ക്കെല്ലാം ആവേശം നല്‍കുന്ന പ്രതീകമാണ്. പക്ഷേ ആ പ്രതീകത്തിന് ആര്‍എസ്എസ് കല്‍പ്പിക്കുന്ന മുഖച്ഛായ വേണമെന്നും ആര്‍എസ്എസ് ശാഖയില്‍ ഉയര്‍ത്തുന്ന കൊടിപിടിക്കണമെന്നും സിംഹാസനം ഒരു സിംഹമാകണമെന്നും ചിത്രത്തിന്‍റെ പശ്ചാത്തലം ഇന്ത്യക്കറിയാത്ത ഭൂപടമാകണമെന്നുമുള്ള പിടിവാശി രാജ്യം അംഗീകരിക്കില്ല. ഇന്ത്യയുടെ ഭൂപടമെന്താണെന്ന് ഇന്ത്യയുടെ ഭരണഘടനയിൽ വ്യക്തമായി പറയുന്നുണ്ട്. ആർഎസ്എസിന്‍റെ സങ്കൽപ ഭാരതമാതാവിനു മുന്നിൽ പുഷ്പാർച്ച ചെയ്യാൻ നിർബന്ധിതനാവുന്ന സാഹചര്യത്തിലാണ് മന്ത്രി പ്രസാദ് ചടങ്ങ് ബഹിഷ്കരിച്ചത്. ആര്‍എസ്എസിന് ഇഷ്ടമില്ലാത്തതും ഇന്ത്യക്കാര്‍ക്ക് ഏറെ പ്രിയപ്പെട്ട വ്യക്തിത്വവുമായ ജവഹര്‍ ലാല്‍ നെഹ്റു, ആരാണ് ഭാരതമാതാവെന്നു വ്യക്തമായി പറഞ്ഞിട്ടുണ്ട്. ഭാരത് മാതാ കീ ജയ് എന്ന് പറയുമ്പോള്‍ ഭാരതത്തിലെ എല്ലാ ചരാചരങ്ങള്‍ക്കുമാണു ജയ് വിളിക്കുന്നത് എന്നാണ് നെഹ്റു വിശദീകരിച്ചത്. ആ ഉദാത്തഗംഭീരമായ നിര്‍വചനം കമ്യൂണിസ്റ്റ് പാര്‍ട്ടി എന്നും ഓര്‍ക്കുന്നുണ്ട്. നെഹ്റു ഭാരതമാതാവിന് നൽകിയ നിർവചനം വായിക്കാൻ ഗവർണറോട് സിപിഐ അഭ്യർഥിക്കുന്നുവെന്നും ബിനോയ് വിശ്വം പറഞ്ഞു.

പഴയങ്ങാടിയിൽ മയക്കുമരുന്നു വേട്ട: കാറുമായി നാലംഗ സംഘം പിടിയിൽ

പഴയങ്ങാടി: വാഹന പരിശോധനയ്ക്കിടെ അതിമാരക മയക്കുമരുന്നുമായി കാറിലെത്തിയ നാലംഗ സംഘം പിടിയിൽ. പഴയങ്ങാടി ബി.വി.റോഡ് സ്വദേശികളായ പി.എം. സവാദ് (24), യു.കെ.പി. സാബിർ (25), കെ.കെ. മുഹമ്മദ് നാസിക് അലി (24), ഇ.കെ. ഷമീൻ (25) എന്നിവരെ പഴയങ്ങാടി അടിപ്പാലത്തി നടുത്തുനിന്ന് എസ്ഐ കെ. സുഹൈലും സംഘവും പിടികൂടിയത്. 10 ഗ്രാം ഹൈബ്രിഡ് കഞ്ചാവ്, 0.570 ഗ്രാം കെറ്റാമിൻ, 25 മാക്സ് ഗാലിൻ ഗുളികകളുമാണ് ഇവരിൽ നിന്നും പിടികൂടിയത്. സംഘം മയക്കുമരുന്ന് കടത്താൻ ഉപയോഗിച്ച കാറും പോലീസ് പിടിച്ചെടുത്തു. പോലീസിനു ലഭിച്ച രഹസ്യവിവരത്തെ തുടർന്ന് പഴയങ്ങാടി എസ്ഐയും കണ്ണൂർ റൂറൽ എസ്പി യുടെ ലഹരി വിരുദ്ധ സ്ക്വാഡും ചേർന്ന് വെള്ളിയാഴ്ച രാവിലെ നടത്തിയ വാഹന പരിശോധനക്കി ടെയാണ് നാലംഗസംഘം പിടിയിലാകുന്നത്. ബംഗ്ലൂരുവിൽ നിന്ന് വ്യാപാര അടിസ്ഥാനത്തിൽ കടത്തുകയായിരുന്ന അതിമാരക ലഹരി ഉത്പന്നങ്ങളാണ് പോലീസ് പിടികൂടിയത്. പിടികൂടിയ സംഘത്തിൽ എഎസ്ഐ സി.പി. ഷാജൻ, സീനിയർ സിപിഒ ടി.വി. ചന്ദ്രകുമാർ, പി.പി. ഷിജു, പി.ജയേഷ്, മിഥുൻ എന്നിനിവരും ഉണ്ടായിരുന്നു. പ്രതികളെ പയ്യന്നുർ കോടതിയിൽ ഹാജരാക്കി.

ബാരാപോളിൽ വൈദ്യുതി ഉത്പാദനം പുനരാരംഭിച്ചു

ഇരിട്ടി: മഴ നേരത്തേ ലഭിച്ചതോടെ ബാരോപോൾ ചെറുകിട ജലവൈദ്യുതി പദ്ധതിയിൽ വൈദ്യുതി ഉത്പാദനം പുനഃരാരംഭിച്ചു. മഴക്കാലത്ത് മാത്രം വൈദ്യുതി ഉത്പാദനം നടത്തുന്ന ഇവിടുത്തെ കനാൽ ചോർച്ച ഉൾപ്പടെയുള്ള ഭീഷണി നേരിടുന്ന കുടുംബങ്ങൾക്ക് പുനരധിവാസം ഉറപ്പാക്കിയാണ് ഉത്പാദനം പുനരാരംഭിച്ചത്. കഴിഞ്ഞ വർഷം ജൂൺ 24 നായിരുന്നു ബാരാപോളിൽ വൈദ്യുതി ഉത്പാദനമാരംഭിച്ചത്. ഇത്തവണ തുടക്കത്തിൽ തന്നെ ശക്തമായ മഴ ലഭിച്ചതിനാൽ പുഴയിലെ നീരൊഴുക്ക് വർധിച്ചപ്പോൾ തന്നെ ഉത്പാദനം ആരംഭിക്കുകയായിരുന്നു. അഞ്ചു മെഗാവാട്ടിന്‍റെ മൂന്നു ജനറേറ്ററുകളാണ് ഇവിടുള്ളത്. അഞ്ച് മെഗാവാട്ടിന്‍റെ രണ്ട് ജനറേറ്ററുകളും 24 മണിക്കൂറും പ്രവർത്തിപ്പിക്കാനുള്ള വെള്ളമാണ് നിലവിൽ ലഭ്യമായിട്ടുള്ളത്. മഴ ഇനിയും ശക്തിപ്പെടുന്നതോടെ മറ്റഅ മൂന്നു ജനറേറ്ററുകളും പ്രവർത്തിപ്പിക്കും. കർണാടകയിലെ കുടക് മലനിരകളിൽ നിന്നാണ് ബാരാപോൾ പുഴ ആരംഭിക്കുന്നത്. കർണാടക വനമേഖലയിലും മഴ ശക്തമായതാണ് ഇത്തവണ വൈദ്യുതി ഉത്പാദനം നേരത്തെ ആരംഭിക്കാൻ സഹായിച്ചത്. പ്രതിവർഷം 36 ദശലക്ഷം യൂണിറ്റ് വൈദ്യുതിയാണ് ബാരാപോളിൽ നിന്നും ലക്ഷ്യമിടുന്നത്. കഴിഞ്ഞ വർഷം 43.98 യൂണിറ്റായിരുന്നു ഉത്പാദനം. 2021 ൽ ഏറ്റവും കൂടിയ മഴ ലഭിച്ചതിനാൽ 49.83 ദശ ലക്ഷം യൂണിറ്റ് വൈദ്യുതി ഉത്പാദിപ്പിച്ചതാണ് റിക്കാർഡ് . ഒൻപത് വർഷം മുന്പ് പ്രവർത്തനം തുടങ്ങിയെങ്കിലും 2017 ൽ മാത്രമാണ് പ്രതിവർഷ ഉത്പാദന ലക്ഷ്യത്തിലേക്ക് ഉയർത്താൻ സാധിച്ചിരുന്നുള്ളൂ. 2017 ൽ 40 ദശ ലക്ഷം യൂണിറ്റ് ഉത്പാദിപ്പിക്കാനായതോടെ പദ്ധതി കെഎസ്ഇബിക്ക് വൻ പ്രതീക്ഷയാണ് നൽകിയത്. തുടർന്നുള്ള രണ്ടു വർഷങ്ങളിൽ ഉണ്ടായ ഉരുൾപൊട്ടലും വെള്ളപ്പൊക്കവും വൻ നാശനഷ്ടം ഉണ്ടാക്കിയതിനാൽ ഈ വർഷങ്ങളിൽ ഉത്പാദനം നടത്താനായിരുന്നില്ല. 2020 ൽ 28.96 ദശലക്ഷം യൂണിറ്റ് മാത്രമായിരുന്നു ഉത്പാദനം. ഇക്കുറി 50 ദശ ലക്ഷം യൂണിറ്റ് ഉത്പാദനം എന്ന ലക്ഷ്യം കൈവരിക്കാൻ സാധിക്കുമെന്നാണു അധികൃതർ പ്രതീക്ഷിക്കുന്നത്.

ബസിന്‍റെ എയർ ലീക്ക് പരിശോധിക്കുന്നതിനിടെ മെക്കാനിക്കിന് ദാരുണാന്ത്യം

കൂത്തുപറമ്പ്: ടൂറിസ്റ്റ് ബസിന്‍റെ എയർ ലീക്ക് പരിശോധിക്കുന്നതിനിടെ എയർ സസ്പെൻഷൻ താഴ്ന്ന് ഉള്ളിൽ കുടുങ്ങിയ മെക്കാനിക്കിന് ദാരുണാന്ത്യം. പാട്യം പാലാ ബസാറിലെ കൃഷ്ണ ഹൗസിൽ സി.വി. സുകുമാരൻ (64) ആണ് മരിച്ചത്. ഇന്നലെ രാവിലെ 10.30 ഓടെയായിരുന്നു സംഭവം. നാട്ടുകാർ ചേർന്ന് സാഹസികമായി ഉള്ളിൽ കുടുങ്ങിയ സുകുമാരനെ പുറത്തെടുത്ത് കൂത്തുപറമ്പ് താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പരേതരായ സി.വി. കൃഷ്ണൻ-മാതു ദന്പതികളുടെ മകനാണ് സുകുമാരൻ. ഭാര്യ: രഞ്ജിനി. മക്കൾ: സരിൻ (അബുദാബി), സച്ചിൻ (സൗദി), സയന. മരുമക്കൾ: ജൂഹി, അയന, ഹെലൻ. സഹോദരങ്ങൾ: രോഹിണി, വിമല, പുരുഷോത്തമൻ (സി.വി. ഹോട്ടൽ, പാല ബസാർ), ശശി (വ്യാപാരി, പാത്തിപ്പാലം), ഗിരിജ, പരേതയായ പ്രേമ. സംസ്കാരം ഇന്ന് നടക്കും.

പ്രവേശനോത്സവം നടത്തി

കൂത്തുപറമ്പ്: അറിവിന്‍റെ അക്ഷരലോകത്തേക്ക് ചുവട് വച്ച് കുരുന്നുകൾ. നിർമലഗിരി റാണിജെയ് ഹയർ സെക്കൻഡറി സ്കൂൾ കിന്‍റർ ഗാർട്ടൻ പ്രവേശനോത്സവമാണ് കുട്ടിക്കുരുന്നുകളുടെ നൃത്തവും പാട്ടുമൊക്കെയായി ശ്രദ്ധേയമായത്. പ്രവേശനോത്സവം ഡോ. ആർ. രാഹുൽ ഉദ്ഘാടനം ചെയ്തു. സ്കൂൾ ലോക്കൽ മാനേജർ സിസ്റ്റർ ലിസ്മറിയ പാറക്കൽ അധ്യക്ഷത വഹിച്ചു. സ്കൂൾ പ്രിൻസിപ്പൽ ഡോ.സിസ്റ്റർ മേഴ്സി കുന്നത്തുപുരയിടം, പിടിഎ പ്രസിഡന്‍റ് അഷ്റഫ് ഹാജി, അധ്യാപിക എം.പി.വിജിന എന്നിവർ പ്രസംഗിച്ചു.

ചെങ്ങളായിലെ ഗർത്തം സോയിൽ പൈപ്പിംഗ് വഴിയാകാം: ശാസ്ത്ര സാഹിത്യ പരിഷത്ത്

ശ്രീകണ്ഠപുരം: ചെങ്ങളായി - ചുഴലി റോഡിൽ രൂപപ്പെട്ട അഗാധമായ ഗർത്തം സോയിൽ പൈപ്പിംഗ് വഴിയാകാമെന്ന് ശാസ്ത്ര സാഹിത്യ പരിഷത്ത് പഠനസംഘം അഭിപ്രായപ്പെട്ടു. നല്ല മഴ ലഭിക്കുന്ന ചെങ്കൽ പീഠഭൂമി മേഖലകളിൽ കിനിഞ്ഞിറങ്ങുന്ന വെള്ളത്തിന്‍റെ അളവ് കൂടുതലാകും. മേൽമണ്ണിന്‍റെയും അടിയിലുള്ള കരിങ്കല്ലിന്‍റെയും (മാതൃശിലയുടെയും) ഇടയിൽ ഉള്ള കനം കുറഞ്ഞ കളിമണ്ണ് ഭൂഗർഭ നീരോഴുക്കിൽ ഒലിച്ചു പോയി മണ്ണി നടിയിൽ ഗർത്തങ്ങൾ രൂപപ്പെടുന്നതാണ് സോയിൽ പൈപ്പിംഗ്. ഇങ്ങനെ സംഭവിച്ചാൽ റോഡിന്‍റെ മറ്റു ഭാഗങ്ങളും അപകടത്തിൽ ആകും. സംസ്ഥാന ദുരന്ത നിവാരണ അഥോറിറ്റിയുടെ സോയിൽ പൈപ്പിംഗ് സാധ്യതയുള്ള പ്രദേശങ്ങൾ മാപ്പ് ചെയ്യപ്പെട്ടവയിൽ ഉൾപ്പെടുന്ന ഭൂമിശാസ്ത്ര മേഖലയാണ് ഇത് എന്നത് പ്രശ്നത്തിന്‍റെ ഗൗരവം വർധിപ്പിക്കുന്നു. സമീപ പ്രദേശത്തെ ചെറു തോടുകളിലെ നീരോഴുക്കും കിണറുകളുടെയും മറ്റു ജലസ്രോതസുകളുടെയും സവിശേഷതകൾ കൂടി പ്രാദേശിക ഭൂവിനിയോഗം മുൻനിർത്തി പഠനവിധേയമാക്കേണ്ടതാണ്. റോഡിൽ പലഭാഗത്തായി ഇനിയും കാണുന്ന ചെറിയ വിള്ളലുകൾ വിശദമായി പരിശോധിച്ച് റോഡ് പുനർനിർമാണം നടത്തേണ്ടതാണ്. കണ്ണൂർ സർവകലാശാല ഭൂമിശാസ്ത്ര വിഭാഗം അസോസിയേറ്റ് പ്രഫസർ ഡോ. ടി.കെ . പ്രസാദ്, ജില്ലാ സെക്രട്ടറി ബിജു നിടുവാലൂർ, കെ.കെ . രവി, വി.പി . വത്സരാജൻ, പി. ഹരീഷ്, കെ.വി . മുരളീധരൻ, നസീർ ചൂളിയാട്, ആർ.കെ. മാധവൻ എന്നിവർ പഠന സംഘത്തോടൊപ്പം ഉണ്ടായിരുന്നു.

ഇന്‍ഫാം പരിസ്ഥിതി ദിനാചരണവും മെംബര്‍ഷിപ്പ് വിതരണവും ‌നടത്തി

ചെന്പന്തൊട്ടി: ഇന്‍ഫാം തലശേരി കാര്‍ഷിക ജില്ലയുടെ നേതൃത്വത്തില്‍ ചെമ്പന്തൊട്ടി പാരിഷ് ഓഡിറ്റോറിയത്തില്‍ നടന്ന പരിസ്ഥിതി ദിനാചരണം ശ്രീകണ്ഠപുരം മുനിസിപ്പൽ ചെയര്‍പേഴ്സണ്‍ ഡോ. കെ.വി. ഫിലോമിന ഉദ്ഘാടനം ചെയ്തു. ഇന്‍ഫാം നടത്തുന്ന ലക്ഷം തൈ വിതരണത്തിന്‍റെ ജില്ലാതല ഉദ്ഘാടനവും ആയിരം കുറ്റികുരുമുളക് തൈകളും ചടങ്ങില്‍ വിതരണം ചെയ്തു. ചെമ്പന്തൊട്ടി ഫൊറോന വികാരി ഫാ. ആന്‍റണി മഞ്ഞളാംകുന്നേല്‍ തൈ വിതരണോദ്ഘാടനം നടത്തി. തലശേരി അതിരൂപത പ്രോട്ടോ സിഞ്ചല്ലൂസ് മോണ്‍. ആന്‍റണി മുതുകുന്നേല്‍ അധ്യക്ഷത വഹിച്ചു. ഇന്‍ഫാമിന്‍റെ മെംബര്‍ഷിപ്പ് വിതരണോദ്ഘാടനം ഇന്‍ഫാം ദേശീയ ജനറല്‍ സെക്രട്ടറി ഫാ. ജോസഫ് കാവനാടി നിര്‍വഹിച്ചു. 700 പുതിയ അംഗങ്ങള്‍ ഇന്‍ഫാമില്‍ അംഗത്വം സ്വീകരിച്ചു. ഇന്‍ഫാം അതിരൂപത ഡയറക്‌ടര്‍ ഫാ. ബിബിന്‍ വരമ്പകത്ത്, മുന്‍ ഡയറക്‌‌‌‌ടർമാരായ ഡോ. ലൂക്കോസ് മാടശേരി, ഫാ. തോമസ് ചെരുവില്‍, അസിസ്റ്റന്‍റ് ഡയറക്‌ടർ ഫാ. ആല്‍ബിന്‍ തെങ്ങുംപള്ളില്‍, ഇന്‍ഫാം തലശേരി കാര്‍ഷിക ജില്ലാ പ്രസിഡന്‍റ് സ്കറിയ നെല്ലംകുഴി, ഇന്‍ഫാം തലശേരി കാര്‍ഷിക ജില്ലാ സെക്രട്ടറി സണ്ണി തുണ്ടത്തില്‍, ടിഎസ്എസ്എസ് അതിരൂപതാ പ്രസിഡന്‍റ് ജോഷി കുന്നത്ത് എന്നിവര്‍ പ്രസംഗിച്ചു.

ജോസ്ഗിരി സെന്‍റ് ജോസഫ്സ് യുപി സ്കൂൾ സുവർണ ജൂബിലി ആഘോഷങ്ങൾക്ക് തുടക്കമായി

ചെറുപുഴ: ജോസ്ഗിരി സെന്‍റ് ജോസഫ്സ് യുപി സ്കൂൾ സുവർണ ജൂബിലി ആഘോഷങ്ങൾക്ക് തുടക്കമായി. 1976 ജൂൺ ഏഴിന് ആരംഭിച്ചതാണ് സെന്‍റ് ജോസഫ്സ് യുപി സ്കൂൾ. ഒരു വർഷം നീണ്ടു നില്ക്കുന്ന സുവർണ ജൂബിലി ആഘോഷങ്ങൾക്ക് ജോസ്ഗിരി, രാജഗിരി പ്രദേശങ്ങളിൽ നടന്ന വിളംബര ജാഥയോടെ തുടക്കമായി. സുവർണ ജൂബിലി ആഘോഷങ്ങളുടെ ഉദ്ഘാടനം സ്കൂൾ ഓഡിറ്റോറിയത്തിൽ ചെറുപുഴ പഞ്ചായത്ത് പ്രസിഡന്‍റ് കെ.എഫ്. അലക്സാണ്ടർ നിർവഹിച്ചു. ജോസ്ഗിരി സെന്‍റ് ജോസഫ്സ് ചർച്ച് വികാരിയും സ്കൂൾ മാനേജരുമായ ഫാ. ജസ്റ്റിൻ മേപ്രത്ത് അധ്യക്ഷത വഹിച്ചു. സ്കൂളിൽ പ്രഥമ അധ്യാപകനായിരുന്ന മാത്യു കാട്ടുനിലം, പ്രഥമ പിടിഎ പ്രസിഡന്‍റ് സിറിയക് താണപറമ്പിൽ, പൂർവ വിദ്യാർഥിയും കണ്ണൂർ സോഷ്യൽ ഫോറസ്റ്റ് ഡിവിഷൻ ഡെപ്യൂട്ടി കൺസർവേറ്ററുമായ ജോസ് മാത്യു എന്നിവരെ പൊന്നാട അണിയിച്ച് ആദരിച്ചു. തുടർന്ന് ജോസ് മാത്യു പരിസ്ഥിതി ദിന സന്ദേശം നൽകി. 2024 - 25 വർഷത്തെ എൽഎസ്എസ് നേടിയ എവ് ലിൻ മഹേഷി്ന് സ്കൂൾ മാനേജർ ഫാ. ജസ്റ്റിൻ മേപ്രത് ഉപഹാരം നൽകി അനുമോദിച്ചു. ജാൻസി മാത്യു, തോമസ് തള്ളയിൽ, റെക്സി ബിജോയ്, ജിബി സെബാസ്റ്റ്യൻ, ജോസ് പുറംചിറ എന്നിവർ പ്രസംഗിച്ചു. കുട്ടികളുടെ വിവിധ കലാപരിപാടികളുടെ വിവിധ കലാപരിപാടികളും നടന്നു.

പ്ലസ് വൺ ആദ്യ അലോട്ട്മെന്‍റ്: സീറ്റ് ഉറപ്പിച്ചത് 20695 പേർ

കണ്ണൂര്‍: പ്ലസ് വൺ പ്രവേശനത്തിനായുള്ള ആദ്യ അലോട്ട്മെന്‍റ് ലിസ്റ്റ് പ്രസിദ്ധീകരിച്ചപ്പോൾ ജില്ലയിൽ സീറ്റ് ഉറപ്പിച്ചത് 20695 പേർ. 37988 പേരാണ് ഏകജാലകം വഴി പ്ലസ് വൺ പ്രവേശനത്തിനായി അപേക്ഷ സമർപ്പിച്ചിരുന്നത്. ജനറൽ ക്വാട്ടയിൽ 13635 പേർ സീറ്റുറപ്പിച്ചു. സ്പോർട്സ് ക്വട്ടയിൽ 684 സീറ്റുകളാണ് ആകെയുള്ളത്. ഇതിൽ457 പേർ സീറ്റുറപ്പിച്ചു. 542 അപേക്ഷകരാണുണ്ടായിരുന്നത്. എസ്‌സി, എസ്ടി വിഭാഗത്തിൽ 6656 സീറ്റുകളാണുള്ളത്. ഇതിൽ 1474 പേർ സീറ്റുറപ്പിച്ചു. 5182 സീറ്റുകൾ ബാക്കിയുണ്ട്. ഭിന്നശേഷി വിഭാഗത്തിൽ 601 സീറ്റുകളിൽ 298 പേർക്ക് പ്ലസ് വൺ പ്രവേശനം ലഭിച്ചു. ബധിര വിഭാഗത്തിൽ ആകെയുള്ള 98 സീറ്റുകളിൽ 14 പേർ പ്രവേശനം നേടി. കമ്യൂണിറ്റിക്വാട്ടയിൽ 4765 പേർ പ്രവേശനം നേടി. 10 നാണ് രണ്ടാം അലോട്ട്മെന്‍റ് പ്രസിദ്ധീകരിക്കുന്നത്. മുൻ വർഷങ്ങളെ അപേക്ഷിച്ച് പ്ലസ് വണ്ണിന് ആർക്കും സീറ്റ് ലഭിക്കാതെ വരില്ലെന്ന് അധികൃതർ പറഞ്ഞു. ജില്ലയില്‍ ഇത്തവണ എസ്എസ്എൽസി പരീക്ഷ എഴുതിയ 35377 പേരിൽ 35331 കുട്ടികൾ വിജയിച്ചു.5997 വിദ്യാര്‍ഥികള്‍ മുഴുവന്‍ വിഷയങ്ങളിലും എപ്ലസ് നേടി. 99.87 ആണ് വിജയശതമാനം.

മഞ്ചപ്പാലത്ത് മേയറുടെയും ഡെപ്യൂട്ടി മേയറുടെയും വാഹനം തടഞ്ഞ് വീട്ടമ്മമാരുടെ പ്രതിഷേധം

കണ്ണൂര്‍: മഞ്ചപ്പാലത്തെ മലിനജല ശുദ്ധീകരണ പ്ലാന്‍റിന്‍റെ നിര്‍മാണ പ്രവര്‍ത്തനങ്ങളില്‍ വീഴ്ചപറ്റിയെന്നാരോപിച്ച് പ്രദേശവാസികളായ വീട്ടമ്മമാരുടെ പ്രതിഷേധം. മേയര്‍ മുസ്‌ലിഹ് മഠത്തില്‍, ഡെപ്യൂട്ടി മേയര്‍ പി. ഇന്ദിര, സ്റ്റാന്‍ഡിംഗ് കമ്മിറ്റി അധ്യക്ഷന്‍ സുരേഷ് ബാബു എളയാവൂര്‍ എന്നിവരെ തടഞ്ഞുവച്ചാണ് പ്രതിഷേധിച്ചത്. പരിസ്ഥിതി ദിനത്തിന്‍റെ ഭാഗമായി മരം നടാനാണ് മേയറും ഡെപ്യൂട്ടി മേയറും മഞ്ചപ്പാലം മലിനജല ശുദ്ധീകരണ പ്ലാന്‍റിലെത്തിയത്. പരിപാടി കഴിഞ്ഞ് തിരിച്ചുപോകുമ്പോഴാണ് പ്രദേശവാസികളായ സത്രീകള്‍ ഇവിടേക്ക് എത്തി മേയര്‍ സഞ്ചരിച്ച വാഹനം തടഞ്ഞുനിര്‍ത്തി പ്രതിഷേധിച്ചത്. പ്രദേശവാസികളായ സബീന, കോകില, ഗിരിജ, ഷഹര്‍ബാന്‍, ഭാര്‍ഗവി, റാണി എന്നിവരുടെ നേതൃത്വത്തിലായിരുന്നു പ്രതിഷേധം. പ്രതിഷേധത്തിനിടെ മുന്നോട്ടെടുത്ത ഡെപ്യൂട്ടിമേയറുടെ കാർ കയറി വീട്ടമ്മയ്ക്ക് പരിക്കേറ്റു. പി.പി. സബീനയുടെ കാലിനാണ് പരിക്കേറ്റത്.സബീന ജില്ലാ ആശുപത്രിയിൽ ചികിത്സ തേടി. മലിനജല ശുദ്ധീകരണ പ്ലാന്‍റില്‍ നിന്ന് അഴുക്കുവെള്ളം പടന്നത്തോട്ടിലേക്ക് ഒഴുക്കി വിടുന്നതിനാല്‍ ഈ പ്രദേശത്ത് ദുര്‍ഗന്ധം കാരണം നില്‍ക്കാന്‍ സാധിക്കുന്നില്ലെന്ന് പ്രതിഷേധക്കാര്‍ പറഞ്ഞു. ഇവിടെയുള്ള കിണറുകളിലെ വെള്ളം മലിനമായി കറുത്ത നിറമായെന്നും ശുചിമുറിയില്‍ പോകാന്‍പോലും ഉപയോഗിക്കാന്‍ സാധിക്കാത്ത അവസ്ഥയിലാണെന്നും വീട്ടമ്മമാർ പറഞ്ഞു. മഴക്കാലത്ത് പടന്നത്തോട് നിറഞ്ഞ് അഴുക്കുവെള്ളം സമീപത്തെ വീടുകളിലേക്ക് കയറിയിരുന്നു. നിര്‍ത്താതെ പെയ്ത മഴയില്‍ ഈ പ്രദേശത്ത് മൂന്ന് ദിവസത്തോളമാണ് വെള്ളം കെട്ടി നിന്നത്. ചിലര്‍ വീടൊഴിഞ്ഞ് ബന്ധുവീടുകളിലേക്ക് താമസം മാറുകയും ചെയ്തു. പടന്നപ്പാലത്തെ മലിനജല തോടുമായി ബന്ധപ്പെട്ട് വര്‍ഷങ്ങളായി ജനങ്ങള്‍ ദുരിതം അനുഭവിക്കുകയാണ്. ഈ പ്രശ്‌നം പരിഹരിക്കാനാണ് മഞ്ചപ്പാലത്ത് മലിനജല ശുദ്ധീകരണ പ്ലാന്‍റ് നിര്‍മിച്ചത്. എന്നാല്‍, വെള്ളം ശുദ്ധീകരിക്കാതെ പൈപ്പിലൂടെ രാത്രി തോടിലേക്ക് ഒഴുക്കിവിട്ട് പ്രദേശവാസികള്‍ക്ക് കുടിവെള്ളം പോലും മുട്ടുന്ന സാഹചര്യമുണ്ടാക്കുകയാണ് കോര്‍പറേഷന്‍ ചെയ്യുന്നതെന്ന് പ്രതിഷേധക്കാർ ആരോപിച്ചു. രേഖാമൂലം കാരണം എഴുതി തരണമെന്ന ആവശ്യം അംഗീകരിച്ചതോടെയാണ് പ്രതിഷേധം അവസാനിപ്പിച്ചത്.

പോക്സോ കേസിൽ രണ്ടുപേർ അറസ്റ്റിൽ

കണ്ണൂർ: പോക്സോ കേസിൽ രണ്ട് യുവാക്കളെ പോലീസ് അറസ്റ്റ് ചെയ്തു.പടിയൂർ പൂവ്വം സ്വദേശി കെ.പി. ഷമ്മാസ്, പടയങ്ങോട് സ്വദേശി കെ.പി. നിഫാദ് എന്നിവരെയാണ് സിറ്റി ഇൻസ്പെക്ടർ കെ. സനിൽകുമാറിന്‍റെ നേതൃത്വത്തിൽ അറസ്റ്റ് ചെയ്തത്. പ്രണയം നടിച്ച് സ്വന്തമാക്കിയ ഫോട്ടോ ഇൻസ്റ്റഗ്രാമിൽ പോസ്റ്റ് ചെയ്യുമെന്ന് പെൺകുട്ടിയെ ഭീഷണിപ്പെടുത്തിയ കേസിലാണ് അറസ്റ്റ്. കണ്ണൂർ സിറ്റി പോലീസ് സ്റ്റേഷൻ പരിധിയിലുള്ള പെൺകുട്ടിയുടെ പരാതിയിലാണ് കേസ്. ആത്മഹത്യ ഭീഷണി മുഴക്കിയാണ് പെൺകുട്ടിയിൽ നിന്ന് പ്രതികൾ ഫോട്ടോ വാങ്ങിയത്. പിന്നീട് പെൺകുട്ടിയെ പല സ്ഥലങ്ങളിലേക്ക് വരാനായി ക്ഷണിച്ചു. എന്നാൽ ഇത് പെൺകുട്ടി നിരസിച്ചതോടെയാണ് പ്രതികൾ ഭീഷണി തുടങ്ങിയത്. തുടർന്ന് പെൺകുട്ടി പോലീസിൽ പരാതി നല്കുകയായിരുന്നു.

ആദിവാസിപെണ്‍കുട്ടിയുടെ കൊലപാതകം ; മൃതദേഹം കൊണ്ടുപോയ ജീപ്പ് കസ്റ്റഡിയിലെടുത്തു

കാഞ്ഞങ്ങാട്: അമ്പലത്തറ പോലീസ് സ്റ്റേഷൻ പരിധിയിൽ പതിനേഴുകാരിയായ ആദിവാസി പെണ്‍കുട്ടിയെ കൊലപ്പെടുത്തി പുഴയില്‍ തള്ളിയെന്ന കേസില്‍ നിര്‍ണായക തെളിവുമായി ക്രൈംബ്രാഞ്ച്. ഡിവൈഎസ്പി മധുസൂദനന്‍ നായരുടെ നേതൃത്വത്തില്‍ ഇന്നലെ ബന്തടുക്കയില്‍ നടത്തിയ അന്വേഷണത്തില്‍ കാഞ്ഞങ്ങാട്ട് നിന്നു പാണത്തൂരിലേക്ക് മൃതദേഹം കയറ്റിക്കൊണ്ടു പോകാന്‍ ഉപയോഗിച്ച ജീപ്പ് കണ്ടെത്തി. കൊലപാതകം നടന്ന സമയത്ത് പ്രസ്തുത ജീപ്പ് അറസ്റ്റിലായ പാണത്തൂര്‍ ബാപ്പുങ്കയം സ്വദശി ബിജു പൗലോസിന്‍റെ ഉടമസ്ഥതയിലായിരുന്നു. പിന്നീട് ജീപ്പ് ബന്തടുക്ക സ്വദേശിയുടെ കൈയില്‍ എത്തുകയായിരുന്നു. ഇക്കഴിഞ്ഞ മേയ് 16നാണ് രേഷ്മ കൊലക്കേസില്‍ ബിജു പൗലോസിനെ അറസ്റ്റു ചെയ്തത്. കാഞ്ഞങ്ങാട്ടെ ക്വാര്‍ട്ടേഴ്സില്‍നിന്നു രേഷ്മയുടെ മൃതദേഹം ജീപ്പില്‍ കയറ്റിക്കൊണ്ടു പോയി പാണത്തൂര്‍ പുഴയില്‍ കല്ലില്‍ കെട്ടിത്താഴ്ത്തിയെന്നാണ് ബിജു മൊഴി നല്‍കിയിരുന്നത്. മൃതദേഹം കണ്ടെത്താന്‍ ഫയര്‍ഫോഴ്‌സിന്‍റെ സഹായത്തോടെ പുഴയില്‍ തെരച്ചില്‍ നടത്തിയെങ്കിലും ഫലം ഉണ്ടായിരുന്നില്ല. 2011 ജനുവരി 19ന് ആണ് മകളെ കാണുന്നില്ലെന്നു കാണിച്ച് പെണ്‍കുട്ടിയുടെ പിതാവ് അമ്പലത്തറ പോലീസില്‍ പരാതി നല്‍കിയത്.ക്രൈംബ്രാഞ്ച് എസ്പി പ്രജീഷ് തോട്ടത്തിലിന്‍റെ നേതൃത്വത്തില്‍ നടത്തിയ അന്വേഷണത്തിലാണ് രേഷ്മ കൊല്ലപ്പെട്ടതായി കണ്ടെത്തിയതും തുടര്‍ന്ന് ബിജുവിനെ അറസ്റ്റു ചെയ്തതും. പ്രജീഷ് മേയ് 31ന് സര്‍വീസില്‍നിന്നു പിരിഞ്ഞതോടെ എസ്പി കെ.കെ. മൊയ്തീന്‍കുട്ടിയുടെ നേതൃത്വത്തിലാണ് കേസ് അന്വേഷിക്കുന്നത്. റിമാന്‍ഡില്‍ കഴിയുന്ന ബിജു പൗലോസിനെ നുണ പരിശോധന നടത്താന്‍ അനുമതി തേടിക്കൊണ്ട് ക്രൈംബ്രാഞ്ച് ജില്ലാ കോടതിയില്‍ നല്‍കിയ അപേക്ഷ കോടതി തള്ളി. പരിശോധനയ്ക്ക് ബിജു സമ്മതമല്ലെന്നു അറിയിച്ചതിനെ തുടര്‍ന്നാണിത്.

ആയിപ്പുഴ പീഡനക്കേസ്; രണ്ടാം പ്രതിക്ക് 15 വര്‍ഷം കഠിനതടവും ഒന്നരലക്ഷം പിഴയും

തളിപ്പറമ്പ്: വിവാദമായ ആയിപ്പുഴ പീഡനക്കേസിലെ രണ്ടാംപ്രതിക്ക് 15 വര്‍ഷം തടവും ഒന്നരലക്ഷം രൂപ പിഴയും ശിക്ഷ വിധിച്ചു. പടിയൂര്‍ പടയങ്ങോട്ടെ സക്കരിയ്യയെയാണ്(46) തളിപ്പറമ്പ് അതിവേഗ പോക്‌സോ കോടതി ജഡ്ജി ആര്‍. രാജേഷ് ശിക്ഷിച്ചത്. തട്ടിക്കൊണ്ടുപോയതിന് അഞ്ച് വര്‍ഷവും ബലാത്സംഗം ചെയ്തതിന് പത്ത് വര്‍ഷവുമാണ് ശിക്ഷ. 2008 ലായിരുന്നു കേസിനാസ്പദമായ സംഭവം നടന്നത്.12 പ്രതികളുണ്ടായിരുന്ന കേസില്‍ 11 പ്രതികളെ തലശേരി കോടതി ശിക്ഷിച്ചിരുന്നു. ഇതിൽ പത്ത് പേർ ശിക്ഷാകാലാവധി പൂര്‍ത്തിയാക്കി പുറത്തിറങ്ങി. ഒന്നാം പ്രതിയായ പെൺകുട്ടിയുടെ പിതാവ് ജീവപര്യന്തം ശിക്ഷയിൽ കഴിയവെ 2020 ഫെബ്രുവരി ഏഴിന് കണ്ണൂർ സെൻട്രൽ ജയിലിൽ തൂങ്ങിമരിച്ചു. 2008 ഏപ്രിലിൽ പറശിനിക്കടവിലുള്ള തായ് റിസോർട്ടിൽ വച്ചാണ് രണ്ടാം പ്രതിയായ സക്കരിയ്യ പിതാവിന്‍റെ സഹായത്തോടെ പെൺകുട്ടിയെ പീഡിപ്പിച്ചത്. പത്താം ക്ലാസിൽ പഠിക്കുമ്പോഴാണ് പെൺകുട്ടി പീഡനവിവരം മാതാവിനോടു പറഞ്ഞത്. തുടർന്ന് മാതാവ് പോലീസിൽ പരാതി നൽകുകയായിരുന്നു. പ്രായപൂർത്തിയാകാത്ത മകളെ പിതാവ് തന്നെ പന്ത്രണ്ടാം വയസുമുതൽ ലൈംഗിമായി പീഡിപ്പിക്കുകയും മറ്റുള്ള പ്രതികൾക്ക് കാഴ്ചവയ്ക്കുകയും ചെയ്തു എന്നാണ് കേസ്. സംഭവം നടന്ന് ഒരാഴ്ചക്കകം പ്രതി സക്കരിയ്യ വിദേശത്തേക്ക് കടക്കുകയായിരുന്നു. 2024 സെപ്റ്റംബറില്‍ തിരിച്ചെത്തിയപ്പോള്‍ വിമാനത്താവളത്തില്‍ നിന്നാണ് ഇയാള്‍ പിടിയിലായത്. തുടര്‍ന്ന് റിമാന്‍ഡിലായ പ്രതി ഹൈക്കോടതിയില്‍ നല്‍കിയ ജാമ്യഹരജിയില്‍ വിധി പറഞ്ഞുകൊണ്ട് മൂന്ന് മാസത്തിനകം കേസ് വിചാരണ നടത്തി തീര്‍പ്പുകല്‍പ്പിക്കാന്‍ നിര്‍ദ്ദേശം നല്‍കിയിരുന്നു. അത് പ്രകാരം ഇക്കഴിഞ്ഞ ഏപ്രിലില്‍ തളിപ്പറമ്പ് അതിവേഗ പോക്‌സോ കോടതി മുമ്പാകെ എത്തിയ കേസില്‍ ജൂണ്‍ 10 നകം വിധി പ്രസ്താവിക്കേണ്ടതുണ്ടായിരുന്നു.അന്നത്തെ മട്ടന്നൂര്‍ സിഐ വി.എന്‍ വിശ്വനാഥന്‍, എസ്ഐ പി.കെ മണി എന്നിവരാണ് കേസന്വേഷിച്ചത്. പ്രോസിക്യൂഷന് വേണ്ടി സ്‌പെഷല്‍ പബ്ലിക് പ്രോസിക്യൂട്ടര്‍ അഡ്വ. ഷെറിമോള്‍ ജോസ് ഹാജരായി.

ആക്രമണശ്രമത്തിനിടെ ഓടിരക്ഷപ്പെടാന്‍ ശ്രമിച്ച യുവാവിന് മൂന്നാംനിലയില്‍ നിന്നുവീണ് ഗുരുതരപരിക്ക്

ബദിയഡുക്ക: മണ്ണിറക്കുന്നതിനെ ചൊല്ലിയുണ്ടായ വാക്കുതര്‍ക്കത്തിനും ആക്രമണശ്രമത്തിനുമിടയില്‍ ഓടി രക്ഷപ്പെടാന്‍ ശ്രമിച്ച യുവാവ് കെട്ടിടത്തിന്‍റെ മൂന്നാം നിലയില്‍നിന്നു വീണു ഗുരുതരമായി പരിക്കേറ്റു. നെക്രാജെ ഉദംപാറ പിലിക്കൂടലിലെ പി.കെ.അഷ്‌റിനാണ് (44) പരിക്കേറ്റത്. ഇയാള്‍ നല്‍കിയ പരാതിയില്‍ വിദ്യാഗിരിയിലെ ഹര്‍ഷിദ്, കുബംഡാജെയിലെ ഫാറൂഖ്, താഴെനെക്രയിലെ സയ്യിദ് എന്നിവര്‍ക്കെതിരെ ബദിയഡുക്ക പോലീസ് നരഹത്യാശ്രമത്തിനു കേസെടുത്തു. ബുധനാഴ്ച പുലര്‍ച്ചെ നാലിന് ബദിയഡുക്ക മീത്തല്‍ ബസാറിലാണ് സംഭവം. മണ്ണിറക്കുന്നതിനെ ചൊല്ലി അഷ്‌റഫും മറ്റു മൂന്നുപേരും വാക്കുതര്‍ക്കം ഉണ്ടാവുകയും ഒന്നാം പ്രതിയായ ഹര്‍ഷാദ് കൊല്ലുമെന്ന് ഭീഷണിപ്പെടുത്തിയതായും പറയുന്നു. ഇയാൾ ആക്രമിക്കാൻ ശ്രമിച്ചപ്പോള്‍ പ്രാണരക്ഷാര്‍ഥം പണി നടക്കുന്ന മൂന്നു നില കെട്ടിടത്തിലേക്ക് ഓടി കയറിയപ്പോള്‍ താഴേക്ക് വീണു അഷ്‌റഫിനു പരിക്കേറ്റുവെന്നാണ് പോലീസ് പറയുന്നത്.

ആർച്ച്ബിഷപ് ഡോ. വർഗീസ് ചക്കാലക്കലിന് നാളെ തലശേരിയിൽ സ്വീകരണം

തലശേരി: കോഴിക്കോട് അതിരൂപതയുടെ പ്രഥമ ആർച്ച്ബിഷപ്പായി സ്ഥാനാരോഹണം ചെയ്ത ഡോ. വർഗീസ് ചക്കാലക്കലിന് നാളെ തലശേരിയിൽ സ്വീകരണം നല്കുമെന്ന് തലശേരി ഹോളി റോസറി ചർച്ച വികാരി ഫാ. തോംസൺ കൊറ്റിയത്ത്, സംഘാടക സമിതി ജനറൽ കൺവീനർ ഫാ. ബെന്നി മണപ്പാട്ട്, പി.ജെ. ഹാരി, ഷിബു ഫർണാണ്ടസ്, ശ്രീജൻ ഫ്രാൻസിസ്, എന്നിവർ പത്ര സമ്മേളനത്തിൽ അറിയിച്ചു. കണ്ണൂർ രൂപതയുടെ ആഭിമുഖ്യത്തിൽ നൽകുന്ന സ്വീകരണ പരിപാടി കണ്ണൂർ ബിഷപ് ഡോ. അല ക്സ് വടക്കും തല ഉത്ഘാടനം ചെയ്യും. തലശേരി ആർച്ച്ബിഷപ് ഡോ. മാർ ജോസഫ് പാംപ്ലാനി ഉപഹാര സമർപ്പണം നടത്തും. ശനിയാഴ്ച ഉച്ചയ്ക്ക് 2.30 ന് മാഹി പാലത്തിന് സമീപത്തുനിന്നും ആർച്ച്ബിഷപ്പിനെ വാഹനങ്ങളുടെ അകമ്പടിയോടെ ചാലിൽ പള്ളിയിലേക്ക് ആനയിക്കും. പള്ളിപ്പരിസരത്തു നിന്നും മുത്തുക്കുടകളും വാദ്യമേളങ്ങളും അണിചേരുന്ന ഘോഷയാത്ര പള്ളിയങ്കണത്തിലേക്ക് പ്രവേശിക്കും. തുടർന്ന് നവീകരിച്ച സിൽവർ ജൂബിലി ഹാളിന്‍റെ ഉദഘാടനവും ദിവ്യബലി സമർപ്പണവും നടക്കും. കണ്ണൂർ രൂപത സഹായ മെത്രാൻ ഡോ. ഡെന്നീസ് കുറുപ്പശേരി അധ്യക്ഷത വഹിക്കും. ഫാ. ബെന്നി മണപ്പാട്ട്, ഫാ. ജേക്കബ് ജോസ്, സിസ്റ്റർ വിനയ പുരയിടത്തിൽ യുഎംഐ, ഷിബു ഫെർണാണ്ടസ്, റോജസ് ഫെർണാണ്ടസ് എന്നിവർ പ്രസംഗിക്കും. ആർച്ച്ബിഷപ് ഡോ. വർഗീസ് ചക്കാലക്കൽ മറുപടി പ്രസംഗം നടത്തും.

വിളക്കന്നൂർ ദിവ്യകാരുണ്യ തീർഥാടന പള്ളിയിൽ പന്തക്കുസ്താ തിരുനാളിന് ഇന്ന് തുടക്കമാകും

വിളക്കന്നൂർ: വിളക്കന്നൂർ ദിവ്യകാരുണ്യ അടയാള തീർഥാടന പള്ളിയിൽ പന്തക്കുസ്താ തിരുനാൾ ആഘോഷങ്ങൾക്ക് ഇന്നു തുടക്കമാകും. രാവിലെ 5ന് ആരാധന, 6.30തിനും ഉച്ചയ്ക്ക് 12 നും വിശുദ്ധ കുർബാന. തുടർന്ന് കരുണയുടെ ജപമാല, തിരുമുഖ നൊവേന, വചന വിരുന്ന്, ഉച്ചകഴിഞ്ഞ് മൂന്നു മുതൽ 40 മണി ആരാധന. നാലിന് വിശുദ്ധ കുർബാന, തിരുമുഖ നൊവേന, വചനവിരുന്ന്. വൈകുന്നേരം 7ന് വിശുദ്ധ കുർബാന, തിരുമുഖ നൊവേന, വചന വിരുന്നിന് എന്നിവയ്ക്ക് ഫാ. സെബാസ്റ്റ്യൻ മുട്ടത്തുപാറ കാർമികത്വം വഹിക്കും. നാളെ പുലർച്ചെ നാലിനും 6.30നും ഉച്ചയ്ക്ക് 12 നും വൈകുന്നേരം മൂന്നിനും ആറിനും രാത്രി എട്ടിനും വിശുദ്ധ കുർബാന. ആരാധനയ്ക്ക് ഫാ. ഓസ്റ്റിൻ ചക്കാംകുന്നേൽ കാർമികത്വം വഹിക്കും. രാത്രി പത്തിന് വചനശുശ്രൂഷയ്ക്ക് മദർ ഹോം ഡയറക്ടർ ഫാ. ബെന്നി പുത്തൻനടയിൽ കാർമികത്വം വഹിക്കും. പന്തക്കുസ്താ തിരുനാൾ ദിനമായ ഞായറാഴ്ച പുലർച്ചെ 3.30 നും 5.30നും 7.30 നും 9.30നും ഉച്ചയ്ക്ക് ഒന്നിനും ഉച്ചയ്ക്കു ശേഷം 3.30നും 5.30നും വൈകുന്നേരം ഏഴിനും വിശുദ്ധ കുർബാന ഉണ്ടായിരിക്കും. പന്തക്കുസ്താതിരുനാളിനോടനുബന്ധിച്ച് തിരുക്കർമങ്ങളിൽ പങ്കെടുക്കുന്നവർക്ക് തൈലാഭിഷേക പ്രാർഥനയ്ക്കുള്ള അവസരവും ഉണ്ടായിരിക്കും.

സഹകരണ ബാങ്കുകൾ മദ്യ ഉത്പാദന കേന്ദ്രങ്ങളാക്കരുത്: കെസിബിസി മദ്യ, ലഹരി വിരുദ്ധസമിതി

തലശേരി: സഹകരണ ബാങ്കുകൾ മദ്യത്തിന്‍റെ ഉത്പാദനവും വിപണനവും നടത്തുന്നതിൽ നിന്ന് പിന്മാറണമെന്ന് കെസിബിസി മദ്യ, ലഹരി വിരുദ്ധ സമിതിയുടെയും മുക്തിശ്രീയുടെയും സംയുക്ത തലശേരി അതിരൂപതാ കമ്മിറ്റി സഹകരണ ബാങ്ക് ഭരണസമിതികളോട് ആവശ്യപ്പെട്ടു. സഹകരണ ബാങ്കുകൾ പ്രവർത്തിക്കേണ്ടത് പ്രദേശത്തെ ജനങ്ങളെ സാമ്പത്തിക വിഷമതകളിൽ സഹായിക്കാനാണ്. മദ്യ നിർമാണത്തിന് അനുമതി നൽകുന്ന സർക്കാർ നയം അപലനീയമാണെന്നും യോഗം അഭിപ്രായപ്പെട്ടു. സാധാരണ ജനങ്ങളെ സേവിക്കുന്നതിനു പകരം നാട്ടിൽ അസമാധാനം സൃഷ്ടിക്കാൻ മാത്രമേ ഇത്തരത്തിലുള്ള സഹകരണ പ്രസ്ഥാനങ്ങൾക്കു കഴിയൂ. മദ്യ ഉത്പാദനത്തെ കുടിൽ വ്യവസായമാക്കാൻ നേതൃത്വം നല്കുന്ന ജനപ്രതിനിധികളെ നാം തിരിച്ചറിയണമെന്നും യോഗം പറഞ്ഞു. മദ്യ വിപണനത്തിന് മുന്നിട്ടിറങ്ങുന്ന സഹകരണ സ്ഥാപനങ്ങളെ ബഹിഷ്കരിക്കാനും അതിനു നേതൃത്വം കൊടുക്കുന്നവരെ തള്ളി പറയാനും യോഗം ആഹ്വാനം ചെയ്തു. സംഘടനയുടെ പുതിയ അതിരൂപത ഡയറക്ടറായി ചുമതലയേറ്റ ഫാ. ജെയ്സൺ കോലക്കുന്നേലിന് യോഗത്തിൽ സ്വീകരണം നൽകി. ഉളിക്കൽ ബഥേൽ ഓഡിറ്റോറിയത്തിൽ ചേർന്ന യോഗം ഉളിക്കൽ ഉണ്ണിമിശിഹ പള്ളി വികാരി ഫാ.മനോജ് കിടാരത്തിൽ ഉദ്ഘാടനം ചെയ്തു. അതിരൂപത പ്രസിഡന്‍റ് ടോമി വെട്ടിക്കാട്ട് അധ്യക്ഷത വഹിച്ചു. അന്താരാഷ്‌ട്ര ലഹരി വിരുദ്ധ ദിനത്തോടനുബന്ധിച്ച് ഉളിക്കൽ ടൗണിൽ റാലിയും പൊതുസമ്മേളനവും നടത്താൻ തീരുമാനിച്ചു. മുക്തിശ്രീ അതിരൂപത പ്രസിഡന്‍റ് ഷിനോ പാറയ്ക്കൽ, ടി.ഡി.ദേവസ്യ, സിസ്റ്റർ ജോസ്മരിയ സിഎംസി, പൈലി വലിയകണ്ടം, വിൻസെന്‍റ് മുണ്ടാട്ടുചുണ്ടയിൽ, സോയി ജോസഫ്, ജോസ് ചാലിശേരി, സെബാസ്റ്റ്യൻ ചെരുംപുഴ, സോളി രാമച്ചനാട്ട്, ഷെൽസി കാവനാടി എന്നിവർ പ്രസംഗിച്ചു. മോളി കൈനിയിൽ, തങ്കമ്മ പാലമറ്റം, പുഷ്പ വെള്ളാപ്പാടം, മേരിക്കുട്ടി പാലയ്ക്കലോടി, ജോളി നടുത്തൊട്ടിയിൽ, സിനി കൊച്ചുപുറത്താനത്ത്, ജിൻസി കുഴിമുള്ളിൽ എന്നിവർ നേതൃത്വം നൽകി.

കണ്ടലുകളെ സംരക്ഷിച്ച് പൊക്കുടന്‍റെ വഴിയെ മകനും

പഴയങ്ങാടി: കണ്ടൽക്കാടുകളെ മാറോടണച്ച് മരണംവരെ അവയുടെ പ്രചാരണത്തിനും കണ്ടൽച്ചെടികൾക്കും കാവലാളായിരുന്ന പൊക്കുടന്‍റെ വഴിയെ മകൻ രഘുനാഥും. കണ്ടൽക്കാടുകൾക്കായി ജീവിതം ഉഴിഞ്ഞുവച്ച പൊക്കുടൻ ഓർമയായിട്ട് 17 വർഷം കഴിയുന്പോഴും കണ്ടലുകൾക്ക് പുതുജീവൻ നൽകി പ്രവർത്തനം നടത്തുകയാണ് മകൻ. വീട്ടുമുറ്റത്ത് വിശാലമായ ഒരു കണ്ടൽ നഴ്സറി ഒരുക്കിയിട്ടുണ്ട്. കുറ്റിക്കണ്ടൽ, ഭ്രാന്തൻ കണ്ടൽ, ഉപ്പൂറ്റി കണ്ടൽ, ചക്കര കണ്ടൽ തുടങ്ങി 20 ഓളം കണ്ടൽക്കാടുകളുടെ അപൂർവ ശേഖരങ്ങളും നഴ്സറിയിൽ ഒരുക്കിയിട്ടുണ്ട്. കേരളത്തിന്‍റെ പല ഭാഗങ്ങളിൽ നിന്നുള്ളവർ കണ്ടലുകൾ വാങ്ങുവാൻ രഘുവിന്‍റെ പക്കൽ എത്താറുണ്ട്. വിദ്യാർഥികൾക്കായി കണ്ടലുമായി ബന്ധപ്പെട്ട പഠന ക്ലാസുകളും ക്യാന്പുകളും നടത്തുന്നുണ്ട്. ജില്ലയിലെ തന്നെ പ്രധാന കണ്ടൽ നഴ്സറി ഒരുക്കാനുള്ള തീവ്രശ്രമത്തിലാണ് രഘുനാഥ്.സർക്കാരിന്‍റെ ഭാഗത്ത് നിന്നുള്ള സഹായവും പ്രതീക്ഷിക്കുന്നുണ്ട്. കണ്ടലുകളുടെ പരിചരണത്തിന് സഹായിയായി ഭാര്യ റീനയും കൂടെയുണ്ട്.

ആറളത്ത് കാട്ടാന രണ്ടു കുടിലുകൾ തകർത്തു; ഗർഭിണിയുൾപ്പെടെ മൂന്നു സ്ത്രീകൾക്ക് പരിക്ക്

ഇരിട്ടി: ആറളം ഫാം പുനരധിവാസ മേഖലയിൽ കാട്ടാന‍യിറങ്ങി രണ്ടു കുടിലുകൾ തകർത്തു. ഓടി രക്ഷപ്പെടുന്നതിനിടെ ഗർഭിണിയടക്കം രണ്ടു സ്ത്രീകൾക്ക് പരിക്ക്. ഗർഭിണിയായ അശ്വനി (26), ലീന(40), ജിഷ്ണു (30) എന്നിവരാണ് കാട്ടാനയ്ക്കു മുന്നിൽ നിന്ന് അദ്ഭുതകരമായി രക്ഷപ്പെട്ടത്. പുനരധിവാസ മേഖലയിലെ ബ്ലോക്ക് ഒന്പതിൽ പൂക്കുണ്ട് മേഖലയിൽ ഇന്നു പുലർച്ചെ അഞ്ചോടെയായിരുന്നു കാട്ടാനയുടെ ആക്രമണം. പൂക്കുണ്ടിലെ ലീന, തങ്കമ്മ എന്നിവർ താമസിക്കുന്ന കുടിലുകളാണ് ആന തകർത്തത്. ലീനയുടെ സഹോദരന്‍റെ ഭാര്യയാണ് അശ്വിനി. തങ്കമ്മയുടെ മകനാണ് ജിഷ്ണു. പഴയ തകർന്ന ആനമതിലിനോട് ചേർന്ന് ഭാഗത്തുള്ള വന്യജീവി സങ്കേതത്തിൽനിന്നും ഇറങ്ങിയ ആനയാണ് ആക്രമണം അഴിച്ചുവിട്ടത്. പിഞ്ചുകുട്ടികൾ അടക്കം 25 പേരാണ് കുടിലുകളിൽ ഉണ്ടായിരുന്നത്. വലിയൊരു ദുരന്തമാണ് ഒഴിവായത്. പുറത്തിറങ്ങിയ രണ്ട് ആനകളിൽ ഒരാനയാണ് കുടിലിനു നേരേ ആക്രമണം നടത്തിയത്. ആന കുടിലിനു നേരേ തിരിഞ്ഞതോടെ ലീനയും അശ്വനിയും ഓടി രക്ഷപ്പെടുന്നതിനിടയിലാണ് രണ്ടുപേർക്കും പരിക്കേറ്റത്. അശ്വനിയുടെ ചെവിക്ക് സമീപത്തായാണ് പരിക്ക്. പരിക്കേറ്റ മൂന്നുപേരേ യും പേരാവൂർ താലൂക്ക് ആശുപത്രിയിൽ പ്രവേശിപ്പിച്ചു. ഗർഭിണിയായ അശ്വനിയെ കൂടുതൽ ചികിത്സയ്ക്കായി കണ്ണൂർ ജില്ലാ ആശുപത്രിയിലേക്ക് മാറ്റി. മൂന്നുമാസത്തിനുള്ളിൽ പുനരധിവാസ മേഖലയിൽ കാട്ടാന തകർക്കുന്ന പതിനാലാമത്തെ വീടാണിത്. കഴിഞ്ഞ ദിവസമാണ് അയ്യൻകുന്ന് പഞ്ചായത്തിലെ കച്ചേരിക്കടവിൽ ഗൃഹനാഥയെ കാട്ടാന ആക്രമിച്ച് പരിക്കേല്പിച്ചത്. വാരിയെല്ലുകൾക്ക് പൊട്ടൽ സംഭവിച്ച ഇവരെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചിരിക്കുകയാണ്. വനപാലകർ മോശമായി പെരുമാറിയെന്ന് ആക്ഷേപം കാട്ടാനയുടെ ആക്രമണം നടന്ന സ്ഥലത്തെത്തിയ വനപാലക സംഘത്തിലെ ഉദ്യോഗസ്ഥർ തങ്ങളോട് മോശമായി പെരുമാറിയതായി ലീന പറയുന്നു. സംഭവത്തിൽ പ്രതിഷേധിച്ച് ആക്രമണത്തിൽപെട്ടവർ വനപാലകരുടെ വാഹനത്തിൽ ആശുപത്രിയിലേക്ക് പോകാൻ തയാറായില്ല. വേറെ വാഹനത്തിനായി ശ്രമിച്ചെങ്കിലും ലഭിക്കാതെ വന്നതോടെ നാട്ടുകാർ ചേർന്ന് അനുനയിപ്പിച്ച് വനം വകുപ്പ് വാഹനത്തിൽ കയറ്റി പേരാവൂർ താലൂക്ക് ആശുപത്രിയിലേക്ക് അയയ്ക്കുകയായിരുന്നു. ഇന്നലെ ആറളം ഫാം സ്കൂൾ പരിസരത്ത് പത്തിലധികം വരുന്ന കാട്ടാനക്കൂട്ടം തമ്പടിച്ച് ഭീഷണി സൃഷ്ടിച്ചിരുന്നു. എന്നാൽ, ആനക്കൂട്ടത്തെ തുരത്താൻ വനംവകുപ്പ് തയാറായില്ല.

യുവാവ് പുഴയിൽ മുങ്ങിമരിച്ചു

തലശേരി: കടവത്തൂർ കല്ലാച്ചേരിക്കടവിനു സമീപം യുവാവ് പുഴയിൽ മുങ്ങി മരിച്ചു. കടവത്തൂർ തെക്കയിൽ മുഹമ്മദാണ് (21) മരണമടഞ്ഞത്. ഇന്നലെ വൈകുന്നേരം അഞ്ചോടെയായിരുന്നു സംഭവം. സുഹൃത്തുക്കളോടൊപ്പം കുളിക്കാനിറങ്ങിയ മുഹമ്മദ് ഒഴുക്കിൽപ്പെടുകയായിരുന്നു. സുഹൃത്തുക്കളും നാട്ടുകാരും ചേർന്ന് രക്ഷപ്പെടുത്തി ഇന്ദിരാഗാന്ധി സഹകരണ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം ജനറൽ ആശുപത്രി മോർച്ചറിയിലേക്കു മാറ്റി. സലിം-ഹഫ്സ ദന്പതികളുടെ മകനാണ്. രണ്ട് സഹോദരിമാരുണ്ട്.

പരിസ്ഥിതി ദിനത്തിലും പരിസ്ഥിതിക്കു വേണ്ടിയുള്ള പോരാട്ടത്തിന് ലക്ഷ്മണൻ കോടതിയിലെത്തും

കരുവഞ്ചാൽ: ലോക പരിസ്ഥിതി ദിനമായ ഇന്നും പരിസ്ഥിതി പ്രവർത്തകനായ ലക്ഷ്മണൻ പരിസ്ഥിതിക്കായുള്ള പോരാട്ടത്തിനായി കോടതിയിലെത്തും. വക്കീലിനെ വയ്ക്കാതെ തന്‍റെ കേസ് ലക്ഷ്മണൻ സ്വയമാണ് വാദിക്കുന്നത്. കരുവഞ്ചാൽ പുഴയിലെ കാലായിമുക്കിലുള്ള നടുവിൽ പഞ്ചായത്തിന്‍റെ അധീനതയിലുള്ള പുഴയുടെ പുറന്പോക്കിൽനിന്നു മരങ്ങൾ അനധികൃതമായി മുറിച്ചു നീക്കിയതിനെതിരെ നൽകിയ കേസുമായി ബന്ധപ്പെട്ടാണ് ലക്ഷ്ണന്‍റെ ഇന്നത്തെ കോടതിയാത്ര. ‌ ഇവിടെനിന്ന് നേരത്തെ പത്തിലേറെ വൻമരങ്ങളുടെ ശാഖകൾ ചിലർ മുറിച്ചുകടത്തിയിരുന്നു. ഇതു ശ്രദ്ധയിൽപ്പെട്ട പൗരാവകാശ പ്രവർത്തകർ ആലക്കോട് പോലീസിനും നടുവിൽ പഞ്ചായത്തധികൃതർക്കും പരാതി നൽകുകയും ശിഖരങ്ങൾ മുറിക്കുന്നത് തടയുകയും ചെയ്തിരുന്നു. എന്നാൽ ഇതിനു ശേഷവും മരം മുറിച്ചവർക്കെതിരെ പോലീസും പഞ്ചായത്തും നടപടികൾ സ്വീകരിച്ചില്ല. ഇതിനെതിരെ തദ്ദേശ സ്വയംഭരണ സ്ഥാപനങ്ങൾക്കു വേണ്ടിയുള്ള ഓംബുഡ്സ്മാൻ ജസ്റ്റീസ് പി.എസ്. ഗോപിനാഥൻ മുന്പാകെ കേസ് ഫയൽ ചെയ്യുകയായിരുന്നു. കേസ് പരിഗണിച്ച ഓംബുഡ്സ്മാൻ പരാതിയിലെ ആരോപണങ്ങൾ സംബന്ധിച്ച് 645 / 2023 നന്പർ പ്രകാരം എഫ്ഐആർ ഫയൽ ചെയ്തിരുന്നു. തുടർന്ന് അന്വേഷണം നടത്തി ഇന്ത്യൻ ശിക്ഷാ നിയമം 427, 447 വകുപ്പു ചേർത്ത് കേസ് തളിപ്പറന്പ് ഒന്നാം ക്ലാസ് ജുഡിഷ്യൽ മജിസ്ട്രേറ്റ് കോടതിക്ക് കൈമാറി. പലപ്പോഴായി മാറ്റിവച്ച കേസ് ഇന്നു പരിഗണിക്കുന്നുണ്ട്. ഇതിനാണ് ലക്ഷ്മണൻ കോടതിയിലെത്തുന്നത്. ഇത്തരം കേസുകൾ പലപ്പോഴായി മാറ്റിവയ്ക്കുന്നതിനാലാണ് പലരും പരിസ്ഥിതി പ്രവർത്തനങ്ങളിൽനിന്നും മാറി നിൽക്കാൻ ഇടയാക്കുന്നതെന്നും നിരവധിതവണ കോടതിയിൽ കയറി ഇറങ്ങേണ്ടി വരുന്നത് വലിയ സാമ്പത്തിക ബാധ്യതയായിട്ടുണ്ടെന്നും ലക്ഷ്മണൻ പറഞ്ഞു.

കോൺഗ്രസിന്‍റെ ഗാന്ധിയാത്ര നാളെ; മലപ്പട്ടത്ത് ഗാന്ധി പ്രതിമ സ്ഥാപിക്കും

കണ്ണൂർ: രാഷ്‌ട്രപിതാവ് മഹാത്മാഗാന്ധിയുടെയും പ്രഥമ പ്രധാനമന്ത്രി ജവഹർലാൽ നെഹ്റുവിന്‍റെയും സ്മരണകളെ തമസ്കരിക്കുന്ന രീതിയിൽ ചരിത്രം മാറ്റിയെഴുതുന്ന കേന്ദ്ര -സംസ്ഥാന ഭരണകൂടങ്ങളെ തുറന്നുകാട്ടി ജില്ലാ കോൺഗ്രസ് കമ്മിറ്റി സംഘടിപ്പിക്കുന്ന ഗാന്ധിയാത്ര നാളെ മലപ്പട്ടത്ത് നടക്കുമെന്ന് ഡിസിസി പ്രസിഡന്‍റ് മാർട്ടിൻ ജോർജ് പത്രസമ്മേളനത്തിൽ പറഞ്ഞു. മലപ്പട്ടം സ്ക്വയറിൽ ഗാന്ധി പ്രതിമയും സ്ഥാപിക്കും. ഗാന്ധിജിയെയും നെഹ്റുവിനെയും ഇകഴ്ത്തി ഇന്ത്യുടെ മഹത്തായ പൈതൃകത്തെ തകർക്കുന്ന രീതിയിൽ അഭിനവ ഗോഡ്‌സേമാർ വിളയാടുന്ന വർത്തമാന സാഹചര്യത്തിൽ അതിനെതിരായ പ്രതിരോധം തീർക്കുകയെന്ന ലക്ഷ്യത്തോടെയാണ് ഗാന്ധിയാത്ര സംഘടിപ്പിക്കുന്നതെന്ന് ഡിസിസി പ്രസിഡന്‍റ് മാർട്ടിൻ ജോർജ് പറഞ്ഞു. നാളെ ഉച്ചകഴിഞ്ഞ് മൂന്നിന് മലപ്പട്ടം ഗവ. സ്കൂൾ പരിസരത്തു നിന്നും ആരംഭിക്കുന്ന യാത്ര മലപ്പട്ടം സ്ക്വയറിൽ സമാപിക്കും. കെപിസിസി പ്രസിഡന്‍റ് സണ്ണി ജോസഫ്, വർക്കിംഗ് പ്രസിഡന്‍റുമാരായ പി.സി. വിഷ്ണുനാഥ് എംഎൽഎ, ഷാഫി പറമ്പിൽ എംപി, യൂത്ത് കോൺഗ്രസ് സംസ്ഥാന പ്രസിഡന്‍റ് രാഹുൽ മാങ്കൂട്ടത്തിൽ എംഎൽഎ തുടങ്ങി പ്രമുഖ നേതാക്കൾ സംബന്ധിക്കും.

ഒറ്റ നന്പർ ചൂതാട്ടം: ഒരാൾ അറസ്റ്റിൽ

എടക്കാട്: എടക്കാട് പോലീസ് സ്റ്റേഷന്‍ പരിധിയിലെ എരഞ്ഞിക്കൽ ക്ഷേത്രത്തിന് സമീപം ഇലക്ടോണിക്സ് സംവിധാനങ്ങളുപയോഗിച്ച് ഒറ്റ നന്പർ ചൂതാട്ടം നടത്തിയ ആൾ അറസ്റ്റിൽ. ഷിജിലിനെയാണ് എടക്കാട് പോലീസ് അറസ്റ്റ് ചെയ്തത്. സിഐ എം.വി. ബിജുവിന് ലഭിച്ച രഹസ്യ വിവരത്തെ തുടർന്ന് പ്രിൻസിപ്പൽ എസ്ഐ എൻ. ദിജേഷിന്‍റെ നേതൃത്വത്തിലുള്ള പോലീസ് സംഘം നടത്തിയ മിന്നൽ പരിശോധയിലാണ് പ്രതിയെ അറസ്റ്റ് ചെയ്തത്. പ്രതിയിൽ നിന്ന് മൊബൈൽ ഫോൺ, ഇലക്ടോണിക്സ് ഉപകരണങ്ങൾ എന്നിവയും പിടിച്ചെടുത്തു.എസ്ഐ വി.പി. ഷജീർ, പോലീസുകാരായ നിബിൻ പിണറായി, റിജിൻ കടന്പൂർ എന്നിവരും അന്വേഷണ സംഘത്തിലുണ്ടായിരുന്നു.

ശുഹൈബ് വധക്കേസിൽ ഹൈക്കോടതി;വിചാരണയ്ക്ക് സ്‌പെഷല്‍ പ്രോസിക്യൂട്ടറിൽ ആറാഴ്ചയ്ക്കകം തീരുമാനമെടുക്കണം

കൊച്ചി: ശുഹൈബ് വധക്കേസിന്‍റെ വിചാരണയ്ക്ക് സ്‌പെഷല്‍ പബ്ലിക് പ്രോസിക്യൂട്ടറെ നിയമിക്കണമെന്ന ആവശ്യത്തില്‍ സര്‍ക്കാര്‍ ആറാഴ്ചയ്ക്കകം തീരുമാനമെടുക്കണമെന്ന് ഹൈക്കോടതി. തലശേരി അഡീഷണല്‍ സെഷന്‍സ് കോടതിയില്‍ നടക്കാനിരിക്കുന്ന വിചാരണനടപടികള്‍ സുതാര്യമാകാന്‍ സ്‌പെഷല്‍ പബ്ലിക് പ്രോസിക്യൂട്ടറെ നിയമിക്കണമെന്നാവശ്യപ്പെട്ട് ശുഹൈബിന്‍റെ മാതാപിതാക്കളായ സി.പി. മുഹമ്മദ്, എസ്.പി. റസിയ, ആക്രമണത്തില്‍ പരിക്കേറ്റു ചികിത്സയിലിരുന്നവരും കേസിലെ സാക്ഷികളുമായ കെ. റിയാസ്, ഇ. നൗഷാദ് എന്നിവര്‍ നല്‍കിയ ഹര്‍ജിയിലാണ് ജസ്റ്റീസ് പി.വി. കുഞ്ഞിക്കൃഷ്ണന്‍റെ ഉത്തരവ്. തീരുമാനമാകുംവരെ വിചാരണനടപടികള്‍ നീട്ടിവയ്ക്കാനും കോടതി ഉത്തരവിട്ടു. സിപിഎം നേതൃത്വത്തിന്‍റെ അറിവോടെ ക്വട്ടേഷന്‍ സംഘം നടത്തിയ ഹീനമായ രാഷ്‌ട്രീയ കൊലപാതകമാണ് ശുഹൈബിന്‍റേതെന്നു ഹര്‍ജിയില്‍ ചൂണ്ടിക്കാട്ടിയിരുന്നു. ഭരണത്തിലുള്ളത് സിപിഎം ആയതിനാല്‍ സര്‍ക്കാര്‍ നിയമിച്ച പ്രോസിക്യൂട്ടര്‍ക്ക് സ്വതന്ത്രമായ നിലപാടെടുത്ത് കേസ് നടത്താന്‍ സാധ്യമാകില്ലെന്നും നീതി ലഭ്യമാകില്ലെന്നും ഹര്‍ജിയില്‍ പറയുന്നു. ഈ സാഹചര്യത്തില്‍ സ്‌പെഷല്‍ പ്രോസിക്യൂട്ടറെ നിയമിക്കണമെന്നാവശ്യപ്പെട്ടു ഹര്‍ജിക്കാര്‍ സര്‍ക്കാരിന് കഴിഞ്ഞ മാര്‍ച്ചില്‍ നിവേദനം നല്‍കിയെങ്കിലും തീരുമാനമെടുക്കുന്നില്ലെന്നും കോടതി ഉത്തരവുണ്ടാകണമെന്നുമായിരുന്നു ആവശ്യം. തുടര്‍ന്നാണ് നിവേദനത്തില്‍ നടപടിയെടുക്കാന്‍ ആഭ്യന്തര അഡീഷണല്‍ ചീഫ് സെക്രട്ടറിക്ക് കോടതി നിര്‍ദേശം നല്‍കിയത്.

കൃത്രിമ രേഖകള്‍ ചമച്ച് ലോണ്‍ അനുവദിച്ച് നല്‍കിയ നാല് ഉദ്യോഗസ്ഥര്‍ക്കെതിരേ കേസ്

കണ്ണൂര്‍: ഭവന നിര്‍മാണ ബോര്‍ഡിന്‍റെ പേരില്‍ വ്യാജരേഖകളും സാക്ഷ്യപത്രങ്ങളും ചമച്ച് ലോണ്‍ അനുവദിച്ച് കൊടുത്ത് ലക്ഷങ്ങള്‍ സാമ്പത്തിക നഷ്ടം വരുത്തിയെന്ന പരാതിയില്‍ ഉദ്യോഗസ്ഥരായ നാലുപേര്‍ക്കെതിരേ കണ്ണൂര്‍ ടൗണ്‍ പോലീസ് കേസെടുത്തു. കേരള സ്റ്റേറ്റ് ഹൗസിംഗ് ബോര്‍ഡ് കണ്ണൂര്‍ ഡിവിഷന്‍ എന്‍ജിനിയര്‍ കെ.പി. വിജയന്‍റെ പരാതിയിലാണ് ഓഫീസില്‍ ജോലി ചെയ്ത ഡെപ്യൂട്ടി സെക്രട്ടറി മമ്പറം കായലോട് സ്വദേശി കെ. അലി, ഫസ്റ്റ് ഗ്രേഡ് ഡ്രാഫ്റ്റ്‌മേന്‍ വടകര പഴങ്കാവ് താഴെ കക്കാട്ടുപറമ്പ് സ്വദേശി എം. രാജന്‍, മരണപ്പെട്ട എക്‌സിക്യൂട്ടിവ് എന്‍ജിനിയര്‍ കൊല്ലം മായിലക്കാട് സ്വദേശി ലോഹിത ദാസ്, അസി. എന്‍ജിനിയര്‍ പാറപ്പുറം വയലിലെ പുരുഷോത്തമന്‍ കൊയിലേരികയന്‍ എന്നിവര്‍ക്കെതിരെ കേസെടുത്തത്. 2018-19ന് മുമ്പ് വായ്പ എടുത്ത് എട്ട് വായ്പക്കാര്‍ക്ക് ലോണ്‍ അനുവദിച്ചുകൊടുക്കുന്നതിന് ബോര്‍ഡിന്‍റെ കണ്ണൂര്‍ ഓഫീസിലെ ഉത്തരവാദപ്പെട്ടവരായ ഉദ്യോഗസ്ഥര്‍ ലോണ്‍ അപേക്ഷകര്‍ക്ക് കൃത്രിമ സ്റ്റേജ് സര്‍ട്ടിഫിക്കറ്റ് ഉണ്ടാക്കി നല്‍കി വായ്പ അനുവദിച്ച് കൊടുത്ത് കൃത്രിമ സാക്ഷ്യപത്രങ്ങള്‍ ചമച്ച് ഹാജരാക്കിയും ബോര്‍ഡിന് സാമ്പത്തിക നഷ്ടം വരുത്തിയെന്ന പരാതിയിലാണ് കേസെടുത്തത്.

സ്ലാബ് മാറ്റിയിട്ട ഓവുചാലില്‍ വീണ് കാൽനട യാത്രികന്‍റെ കാലൊടിഞ്ഞു

പയ്യന്നൂര്‍: ദേശീയപാതയുടെ സർവീസ് റോഡിൽ സ്ലാബ് മാറ്റിയിട്ട ശേഷം മുന്നറിയിപ്പ് ബോർഡ് സ്ഥാപിക്കാത്തിടത്തെ ഓവുചാലിൽ വീണ് കാൽനടയാത്രികന്‍റെ കാലൊടിഞ്ഞു. വെള്ളൂര്‍ ബ്രദേഴ്‌സ് റോഡിലെ സാംസ്‌കാരിക നിലയത്തിന് സമീപം താമസിക്കുന്ന കെ. വത്സരാജിനാണ് (61) പരിക്കേറ്റത്. കാലിന്‍റെ എല്ലുപൊട്ടിയ വത്സരാജ് പയ്യന്നൂര്‍ സഹകരണ ആശുപത്രിയില്‍ ചികിത്സയിലാണ്. തിങ്കളാഴ്ച രാത്രി ഏഴരയോടെ‍ ജനത സൊസൈറ്റിക്ക് സമീപമാണ് അപകടം. വാഹനങ്ങള്‍ വന്നപ്പോള്‍ റോഡരികിലേക്ക് മാറിനില്‍ക്കാന്‍ ശ്രമിക്കുന്നതിനിടെ സ്ലാബ് മാറ്റിവച്ച വിടവിലൂടെ ഓവുചാലിലേക്ക് വീഴുകയായിരുന്നു.

ഭീഷണിയായി ജൽജീവൻ കുഴികൾ

തൊണ്ടിയിൽ: ജൽജീവൻ മിഷൻ പൈപ്പിടുന്നതിനെടുത്ത കുഴികൾ അപകട ഭീഷണി ഉയർത്തുന്നു. തൊണ്ടിയിൽ സെന്‍റ് ജൂഡ് റോഡിലാണ് വാഹനങ്ങൾ കുഴിയിൽ വീഴുന്നത് പതിവായിരിക്കുന്നത്. വീതി കുറവായ റോഡിൽ ടാറിംഗ് ഉൾപ്പെടെ കുത്തിപ്പൊളിച്ചാണ് പൈപ്പിട്ടത്. അതിനുശേഷം മണ്ണ് ശരിയായി ഉറപ്പിച്ചിരുന്നുമില്ല. കാലവർഷം തുടങ്ങിയതോടെ മണ്ണ് കുത്തിയൊലിച്ച് റോഡരുകിൽ വലിയ ഗർത്തങ്ങൾ രൂപപ്പെട്ടിരിക്കുകയാണ്. ചിലയിടങ്ങളിലാകട്ടെ തുരങ്കം പോലെയാണ് മണ്ണ് ഒലിച്ചുപോയിരിക്കുന്നത്. അടിഭാഗത്ത് ചതിക്കുഴികൾ ഉണ്ടെന്നറിയാതെ വാഹനങ്ങൾ സൈഡ് കൊടുക്കുന്പോഴാണ് അപകടത്തിൽപ്പെടുന്നത്. മഴവെള്ളം ഒലിച്ചുപോകാൻ മറ്റു മാർഗമില്ലാത്തതും റോഡിന്‍റെ അപകടാവസ്ഥ വർധിപ്പിക്കുന്നു. മഴ തുടങ്ങും മുന്പ് തന്നെ റോഡിലെ അപകടാവസ്ഥ അറിയിച്ചെങ്കിലും അധികൃതർ തിരിഞ്ഞുനോക്കിയില്ലെന്ന് നാട്ടുകാർ ആരോപിക്കുന്നു.

ട്രോളിംഗ് നിരോധനം ഒമ്പതിന് അർധരാത്രി മുതൽ; നിരീക്ഷണം ശക്തമാക്കും

കണ്ണൂർ: ഒമ്പതിന് അർധരാത്രി മുതൽ ജൂലൈ 31 അർധരാത്രി വരെയുള്ള ട്രോളിംഗ് നിരോധന കാലയളവിൽ കേരളാ തീരത്ത് മത്സ്യബന്ധന ബോട്ടുകൾ കടലിൽ പോകുവാനോ മത്സ്യബന്ധനം നടത്താനോ പാടുള്ളതല്ലെന്ന് ഫിഷറീസ് വകുപ്പ് അറിയിച്ചു. ട്രോളിംഗ് നിരോധന കാലയളവിൽ കടലോരമേഖലകളിൽ പോലീസ് നിരീക്ഷണവും കടൽ നിരീക്ഷണവും ശക്തമാക്കുന്നതിന് എഡിഎം ഇൻ ചാർജ് കെ.വി. ശ്രുതിയുടെ അധ്യക്ഷതയിൽ ചേർന്ന ട്രോളിംഗ് നിരോധന മുന്നൊരുക്ക യോഗം തീരുമാനിച്ചു. സുരക്ഷമാനദണ്ഡങ്ങൾ കർശനമാക്കിയതിനാൽ പരമ്പരാഗത യാനങ്ങളിൽ ആധാർ, രജിസ്‌ട്രേഷൻ സർട്ടിഫിക്കറ്റ്, ലൈസൻസ് എന്നിവയുള്ള തൊഴിലാളികളെ മാത്രം മത്സ്യബന്ധനത്തിന് ഉപയോഗിക്കാവൂ എന്ന് ഉടമകൾക്ക് നിർദേശം നൽകി. ആയിക്കര മത്സ്യബന്ധന തുറമുഖത്ത് രാത്രി എട്ടിനുശേഷം മത്സ്യത്തൊഴിലാളികളുടേതല്ലാത്ത വാഹനങ്ങൾ കടത്തിവിടുന്നത് നിരോധിക്കാനും പോലീസ് എയ്ഡ് പോസ്റ്റ് പ്രവർത്തനം തുടങ്ങാനും തീരുമാനമായി. ട്രോളിംഗ് നിരോധന കാലയളവിൽ രക്ഷപ്രവർത്തനത്തിനും കടൽ പട്രോളിംഗിനും രണ്ട് ട്രോൾ ബോട്ടുകൾ സജ്ജമാക്കിയിട്ടുണ്ട്. ഇതിനായി മറൈൻ എൻഫോഴ്‌സ്മെന്‍റ്, പോലീസ്, സീ റെസ്‌ക്യൂ ഗാർഡുകൾ എന്നിവരുടെ സേവനം ലഭിക്കും. കൂടാതെ കോസ്റ്റ് ഗാർഡ്, നേവി എന്നിവയുടെ സഹായവും രക്ഷാപ്രവർത്തനത്തിന് ഉപയോഗപ്പെടുത്തും.ആയിക്കര മാപ്പിളബേ മത്സ്യബന്ധന തുറമുഖത്ത് രക്ഷാപ്രവർത്തനത്തിന് ഫൈബർ യാനം, ജീവൻ രക്ഷാഉപകരണങ്ങൾ, ജിപിഎസ്, വയർലെസ് എന്നിവ ഉൾപ്പെടുന്ന മറൈൻ റെസ്‌ക്യൂ യൂണിറ്റ് സജ്ജമാക്കിയിട്ടുണ്ട്. ബേപ്പൂർ കേന്ദ്രീകരിച്ചുള്ള മറൈൻ ആംബുലൻസ് സേവനം അടിയന്തിര ഘട്ടത്തിൽ പ്രയോജനപ്പെടുത്താം. ട്രോളിംഗ് നിരോധനവുമായി ബന്ധപ്പെട്ട് 24 മണിക്കൂർ പ്രവർത്തിക്കുന്ന ഫിഷറീസ് കൺട്രോൾ റൂം കണ്ണൂർ ഫിഷറീസ് അസിസ്റ്റന്‍റ് ഡയറക്ടറുടെ കാര്യാലയത്തിൽ പ്രവർത്തനം ആരംഭിച്ചു. ഫോൺ: 0497 2732487.

കരാറുകാരനെ നീക്കി; പുതിയ ടെൻഡർ വിളിച്ചു

ഉളിക്കൽ: നുച്യാട് -മണിക്കടവ് - കാഞ്ഞിരകൊല്ലി റോഡിന്‍റെ നിർമാണവുമായി ബന്ധപ്പെട്ട് നിലവിലുള്ള കരാറുകാരനെ നീക്കി ടെൻഡർ ക്ഷണിച്ചതായി സജീവ് ജോസഫ് എംഎൽഎ അറിയിച്ചു. ടെൻഡർ സമർപ്പിക്കാനുള്ള അവസാന തീയതി ഏഴിനാണ്. റോഡിന്‍റെ കരാർ കാലാവധിയും കഴിഞ്ഞ് കരാറുകാരന് പല തവണ കാലാവധി ദീർഘിപ്പിച്ചു നൽകിയിരുന്നു. എന്നിട്ടും പ്രവൃത്തി പൂർത്തീകരിക്കുവാൻ കരാറുകാരന് കഴിയാതെ വന്ന സഹചര്യത്തിലാണ് കരാറുകാരനെ ഒഴിവാക്കി പുതിയ ടെൻഡർ വിളിക്കുന്നത്. റോഡിന്‍റെ നിർമാണം വൈകുന്നത് സംബന്ധിച്ച് എം എൽഎ നിയമസഭയിൽ അവതരിപ്പിച്ച സബ്മിഷന് കരാറുകാരനെതിരെ ശക്തമായ നടപടി സ്വീകരിക്കുമെന്ന് പൊതുമരാത്ത് വകുപ്പ് മന്ത്രി ഉറപ്പ് നൽകിയിരുന്നു. തുടർന്ന് ടെൻഡർ നടപടികൾ വേഗത്തിലാക്കാൻ പൊതുമരാമത്ത് വകുപ്പ് ചീഫ് എൻജിനിയറോട് എംഎൽഎ ആവശ്യപ്പെട്ടിരുന്നു.

സ്വകാര്യ ആശുപത്രികളും ലാബുകളും കോവിഡ് പരിശോധനാഫലം റിപ്പോര്‍ട്ട്‌ ചെയ്യണം: ഡിഎംഒ

കണ്ണൂർ: കോവിഡ് പരിശോധന നടത്തി പോരുന്ന ജില്ലയിലെ സ്വകാര്യ ആശുപത്രികളും ലാബുകളും റാപിഡ് ആന്‍റിജൻ, ആർടിപിസിആർ, ട്രൂ നാറ്റ് പരിശോധന ഫലം ഔദ്യോഗിക പോര്‍ട്ടലായ https://labsys.health.kerala.gov.in ല്‍ അപ് ലോഡ് ചെയ്യേണ്ടതാണെന്ന് ജില്ലാ മെഡിക്കൽ ഓഫീസർ അറിയിച്ചു. നെഗറ്റീവ് ടെസ്റ്റ്‌ ഫലം ഉള്‍പ്പെടെ ഈ ഔദ്യോഗിക പോര്‍ട്ടലില്‍ അപ് ലോഡ് ചെയ്യണം. പോര്‍ട്ടലിന്‍റെ യൂസർ ഐഡി, പാസ് വേഡ്‌ എന്നിവ ലഭ്യമല്ലാത്തവര്‍ 9846056161, 0497-2709494 എന്നീ നമ്പറിലോ [email protected] എന്ന ഇ മെയിൽ ഐഡി യിലോ വിവരം അറിയിക്കേണ്ടതാണ് .ഈ നിര്‍ദേശം പാലിക്കാത്തവർക്ക് എതിരെ കര്‍ശന നടപടി സ്വീകരിക്കുമെന്ന് ഡിഎംഒ ഡോ. പീയുഷ് എം. നമ്പൂതിരിപ്പാട് അറിയിച്ചു.

കേളകത്ത്് ഡെങ്കിപ്പനി വ്യാപനം രൂക്ഷം

കേളകം: കേളകം പഞ്ചായത്തില്‍ ഡെങ്കിപ്പനി വ്യാപനം അതിരൂക്ഷം. കഴിഞ്ഞ മാസം 91 പേരാണ് ഡെങ്കിപ്പനി ബാധിച്ച് ചികിത്സ തേടിയെന്നാണ് ആരോഗ്യവകുപ്പിന്‍റെ കണക്ക്. ഇതിന്‍റെ ഇരട്ടിയോളം ആളുകളാണ് സ്വകാര്യ ആശുപത്രികളില്‍ ചികിത്സ തേടിയത്. ഈ മാസം ഇതുവരെ 11 പേര്‍ക്ക് ഡെങ്കിപ്പനി സ്ഥിരീകരിച്ചു. ഏഴുപേരാണ് ആശുപത്രികളില്‍ ചികിത്സയില്‍ ഉളളത്. മാര്‍ച്ച് മുതല്‍ മേയ് വരെ 129 പേര്‍ക്കാണ് കേളകം പഞ്ചായത്തിന്‍റെ വിവിധയിടങ്ങളില്‍ ഡെങ്കിപ്പനി ബാധിച്ചത്. വെണ്ടേക്കുംചാല്‍, ഇല്ലിമുക്ക്, പാറത്തോട്, കുണ്ടേരി തുടങ്ങിയ പ്രദേശത്താണ് കൂടുതല്‍ പേർക്ക് രോഗം പിടിക്കപ്പെട്ടത്. വരും ദിവസങ്ങളില്‍ ഇനിയും കേസുകളുടെ എണ്ണം വർധിക്കുമെന്ന ആശങ്കയും ഉയരുന്നുണ്ട്.

സെൻട്രൽ ജയിലിൽ പരിസ്ഥിതി ദിനാചരണം സംഘടിപ്പിച്ചു

കണ്ണൂർ: കയ്റോസും കണ്ണൂർ പിലാത്തറ സെന്‍റ് ജോസഫ് കോളജും സംയുക്തമായി ലോക പരിസ്ഥിതി ദിനത്തോടനുബന്ധിച്ച് കണ്ണൂർ സെൻട്രൽ ജയിലിൽ പരിസ്ഥിതി ദിനാചരണം സംഘടിപ്പിച്ചു. എസ്ഐസിഎ ട്രെയിനിംഗ് ഹാളിൽ പിലാത്തറ സെന്‍റ് ജോസഫ് കോളജ് മാനേജർ ഫാ. രാജൻ ഫാസ്റ്റോ ഉദ്ഘാടനം ചെയ്തു. വാർത്തമാന കാലഘട്ടത്തിൽ പരിസ്ഥിതി വന്യജീവി സംരക്ഷണത്തിന്‍റെ പ്രാധാന്യം എന്ന വിഷയത്തിൽ പരിസ്ഥിതി ഗവേഷകൻ വിജയൻ നീലകണ്ഠൻ പ്രസംഗിച്ചു. സെൻട്രൽ ജയിൽ സൂപ്രണ്ട് വേണു അധ്യക്ഷത വഹിച്ചു. കയ്റോസ് ഡയറക്ടർ ജോർജ് മാത്യു ചെമ്പകശേരി, ജയിൽ വെൽഫയർ ഓഫീസർ ഹനീഫ്, കെ.വി. ചന്ദ്രൻ എന്നിവർ പ്രസംഗിച്ചു. പരിസ്ഥിതിയുമായി ബന്ധപ്പെട്ട് ഫ്ലാഷ് മോബ് അവതരിപ്പിച്ചു.

വഴിയോര കച്ചവടക്കാരന്‍റെ സാധനങ്ങൾ മോഷണം പോയി

ഇരിട്ടി: വഴിയോര കച്ചവടക്കാരന്‍റെ സാധങ്ങൾ മോഷണം പോയി. ഇരിട്ടി ബസ് സ്റ്റാൻഡ് ബൈപാസ് റോഡരികിൽ വർഷങ്ങളായി കച്ചവടം നടത്തുന്ന കല്ലുമുട്ടിയിലെ കല്ലേരിക്കരമ്മൽ ബാബുവിന്‍റെ 26 കുടകളാണ് മോഷണം പോയത്. ഇതിന് ഏതാനും ദിവസം മുന്പ് മൂന്ന് വാക്കത്തികളും മോഷണം പോയിരുന്നു. ബാബുവിന്‍റെ പരാതിയിൽ സിസിടിവി ദൃശ്യങ്ങൾ അടക്കം പരിശോധിച്ച് കള്ളനെ കണ്ടെത്താനുള്ള ശ്രമത്തിലാണ് പോലീസ്.

ഇരിട്ടിയിൽ അനധികൃത പാർക്കിംഗിനെതിരേ നടപടി തുടങ്ങി

ഇരിട്ടി: ഇരിട്ടി പുതിയ ബസ് സ്റ്റാൻഡിലേക്കുള്ള വൺവേ റോഡിന്‍റെ ഇരുവശവും ഉള്ള അനധികൃത പാർക്കിംഗിനെതിരേ മോട്ടർ വാഹന വകുപ്പും നടപടി ശക്തമാക്കി. ഇന്നലെ ഓട്ടോറിക്ഷ, കാർ ഉൾപെടെ 51 വാഹനങ്ങൾക്കാണ് പിഴ ചുമത്തിയത്. ഇരിട്ടി സബ് ആർടിഒ ഓഫീസിലെ അസിസ്റ്റന്‍റ് മോട്ടർ വെഹിക്കിൾ ഇൻസ്പെക്‌ടർമാരായ വി.ആർ. ഷനിൽകുമാർ, ഡി.കെ. ഷീജി, ടി.എ. സുമേഷ്, എന്നിവരുടെ നേതൃത്വത്തിലായിരുന്നു പരിശോധന. പുതിയ ബസ് സ്‌റ്റാൻഡിലേക്കു ബസുകൾ കടന്നു പോകുന്ന വൺവേ റോഡ് പാർക്കിംഗ് നിരോധിച്ച മേഖലയാണ്. കർശന നടപടികളുടെ ഭാഗമായി അനധികൃത പാർക്കിംഗ് നടത്തുന്ന വാഹനങ്ങൾ ക്രെയിൻ ഉപയോഗിച്ച് മോട്ടർ വാഹന വകുപ്പ് യാർഡിലേക്കു മാറ്റുന്നതിനുള്ള നടപടികളും വരും ദിവസങ്ങളിൽ ഉണ്ടാകും.

വിജയോത്സവം സംഘടിപ്പിച്ചു

ഇരിട്ടി: ഹയർസെക്കൻഡറി തലത്തിൽ തലശേരി കോർപറേറ്റ് സ്കൂളിൽ ഒന്നാം സ്ഥാനം കരസ്ഥമാക്കിയ കുന്നോത്ത് ഹയർ സെക്കൻഡറി സ്കൂളിൽ വിജയോത്സവം നടത്തി. പായം പഞ്ചായത്ത് പ്രസിഡന്‍റ് പി.രജനി ഉദ്ഘാടനം ചെയ്തു. വിജയികൾക്ക് മൊമെന്‍റോയും ക്യാഷ് അവാർഡും വിതരണം ചെയ്തു. സ്കൂൾ മാനേജർ ഫാ. സെബാസ്റ്റ്യൻ മൂക്കിലിക്കാട്ട് അധ്യക്ഷത വഹിച്ചു. മുൻ കോർപറേറ്റ് മാനേജർ ഫാ.മാത്യു ശാസ്താംപാടവിൽ മുഖ്യാതിഥിയായിരുന്നു. സ്കൂൾ പ്രിൻസിപ്പൽ പി.കെ. ബാബു പഞ്ചായത്ത് അംഗങ്ങളായ മുജീബ് കുഞ്ഞിക്കണ്ടി, ഷൈജൻ ജേക്കബ് ,പിടിഎ പ്രസിഡന്‍റ് ജോബി ജോസഫ്, മുൻ പ്രിൻസിപ്പൽ തോമസ് തോമസ്, സ്കൂൾ ചെയർമാൻ എം. സകൽ , ജോളി, അനുഗ്രഹ, മേരി സന്തോഷ്, ബിന്ദു തോമസ് എന്നിവർ പ്രസംഗിച്ചു. ഹയർസെക്കൻഡറിൽ 98.32 ശതമാനം വിജയമാണ് സ്കൂൾ കരസ്ഥമാക്കിയത്. 119 വിദ്യാർഥികൾ പരീക്ഷ എഴുതിയതിൽ 117 പേരും വിജയിച്ചു. സ്‌കൂൾ സയൻസിൽ നാലാം വർഷവും 100% കരസ്ഥമാക്കി. 17കുട്ടികൾക്ക് ഫുൾ എ പ്ലസും രണ്ടു കുട്ടികൾക്ക് അഞ്ച് എ പ്ലസും ലഭിച്ചു.

ജനപ്രതിനിധികളെ കൈയേറ്റം ചെയ്തതിൽ എൽഡിഎഫ് പ്രതിഷേധം

കാർത്തികപുരം: ഉദയഗിരി മണ്ഡലം കോൺഗ്രസ് കമ്മിറ്റി പഞ്ചായത്ത് ഓഫീസിലേക്ക് നടത്തിയ മാർച്ചിൽ പഞ്ചായത്ത് പ്രസിഡന്‍റിനെയും മറ്റ് അംഗങ്ങളെയും കൈയേറ്റം ചെയ്തതായി ആരോപണം. സംഭവത്തിൽ പ്രതിഷേധിച്ച് എൽഡിഎഫ് ഉദയഗിരി പഞ്ചായത്ത് കമ്മിറ്റി കാർത്തികപുരം ടൗണിൽ പ്രകടനവും പൊതു യോഗവും നടത്തി. പഞ്ചായത്ത് ഓഫീസിന് മുന്നിൽ നിന്ന് പ്രസിഡന്‍റ് കെ.എസ്. ചന്ദ്രശേഖരൻ, വൈസ് പ്രസിഡന്‍റ് ബിന്ദു ഷാജു, മെംബർമാരായ ഷീജ വിനോദ്, കെ.പി. സിനി, എം.എൻ. ബിന്ദു, കെ.ടി. സുരേഷ് കുമാർ, വി.സി. പ്രകാശ് എന്നിവരെ കോൺഗ്രസ് നേതാക്കളായ ബെന്നി പീടിയേക്കൽ, ബിജു പുളിയംതൊട്ടി . സാബു വെള്ളമറ്റം, ബെന്നി കണ്ണോളിൽ, ടോമി വെട്ടുകാട്ടിൽ,അജിത് വരിക്ക മാക്കൽ തുടങ്ങിയവർ തടഞ്ഞ് കൈയേറ്റം ചെയ്തുവെന്നാണ് എൽഡിഎഫ് ആരോപണം. ഉച്ചകഴിഞ്ഞ് രണ്ടിന് പഞ്ചായത്ത് ഭരണസമിതിയോഗം നടക്കുന്നതിനാൽ മന:പൂർവം സംഘർഷം സൃഷ്ടിക്കാൻ കോൺഗ്രസ് ശ്രമം നടത്തിയതായും എൽഡിഎഫ് ആരോപിച്ചു. എൽഡിഎഫ് പ്രതിഷേധ യോഗം സിപിഎം ഏരിയ സെക്രട്ടറി സാജൻ ജോസഫ് ഉദ്ഘാടനം ചെയ്തു. കെ.ആർ. രതീഷ് അധ്യക്ഷത വഹിച്ചു. കെ.എസ്. ചന്ദ്രശേഖരൻ, ബിന്ദു ഷാജു, വി.ബി. രാജേഷ് കെ.ടി. സുരേഷ് കുമാർ, ഇ.വി. ജോയി എന്നിവർ പ്രസംഗിച്ചു.

ഉദയഗിരി പഞ്ചായത്ത് ഓഫീസിലേക്ക് കോൺഗ്രസ് മാർച്ച് നടത്തി

കാർത്തികപുരം: ഉദയഗിരി പഞ്ചായത്ത് ഭരണ സമിതിയുടെ ജനവിരുദ്ധ നയങ്ങൾക്കെതിരേയും വികസനകാര്യത്തിൽ പ്രതിപക്ഷ അംഗങ്ങളോടുള്ള അവഗണ അവസാനിപ്പിക്കണമെന്നാവശ്യപ്പെട്ടും ഉദയഗിരി മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പഞ്ചായത്ത് ഓഫീസ് മാർച്ചും ധർണയും നടത്തി. ജില്ലാ പഞ്ചായത്തംഗം തോമസ് വെക്കത്താനം ധർണ ഉദ്ഘാടനം ചെയ്തു. വന്യമൃഗശല്യം രൂക്ഷമായ മാമ്പോയിൽ, ശാന്തിപുരം, ജയഗിരി, താളിപ്പാറ, താബോർ, മണിയംകൊല്ലി പ്രദേശങ്ങളിൽ സജീവ് ജോസഫ് എംഎൽഎ അനുവദിച്ച മിനിമാസ്റ്റ് ലൈറ്റുകൾക്ക് അനുമതി നിഷേധിക്കുകയായിരുന്നു വെന്നും, യുഡിഎഫ് മെംബർമാരുടെ വാർഡുകളിൽ വികസന ഫണ്ട് വെട്ടിക്കുറയ്ക്കുന്നതായും നേതാക്കൾ ആരോപിച്ചു. കോൺഗ്രസ് മണ്ഡലം പ്രസിഡന്‍റ് ജോയിച്ചൻ പള്ളിയാലിൽ അധ്യക്ഷത വഹിച്ചു. നേതാക്കളായ ബിജു പുളിയൻതൊട്ടി, ജോസ് പറയൻകുഴി, ബെന്നി പീടിയേക്കൽ, ടോമി കണയങ്കൻ, ജോസഫ് മങ്ങാട്ട്, മിനി മുകുന്ദൻ കരിയിൽ, സരിത ജോസ് തുടങ്ങിയവർ പ്രസംഗിച്ചു.

സ്വകാര്യ ആശുപത്രികളും ലാബുകളുംകോവിഡ് പരിശോധനാ ഫലം റിപ്പോര്‍ട്ട്‌ ചെയ്യണം: ഡിഎംഒ

കണ്ണൂർ: കോവിഡ് പരിശോധന നടത്തി പോരുന്ന ജില്ലയിലെ സ്വകാര്യ ആശുപത്രികളും ലാബുകളും റാപിഡ് ആന്‍റിജൻ, ആർടിപിസിആർ, ട്രൂ നാറ്റ് പരിശോധന ഫലം ഔദ്യോഗിക പോര്‍ട്ടലായ https://labsys.health.kerala.gov.in ല്‍ അപ് ലോഡ് ചെയ്യേണ്ടതാണെന്ന് ജില്ലാ മെഡിക്കൽ ഓഫീസർ അറിയിച്ചു. നെഗറ്റീവ് ടെസ്റ്റ്‌ ഫലം ഉള്‍പ്പെടെ ഈ ഔദ്യോഗിക പോര്‍ട്ടലില്‍ അപ് ലോഡ് ചെയ്യണം. പോര്‍ട്ടലിന്‍റെ യൂസർ ഐഡി, പാസ് വേഡ്‌ എന്നിവ ലഭ്യമല്ലാത്തവര്‍ 9846056161, 0497-2709494 എന്നീ നമ്പറിലോ [email protected] എന്ന ഇ മെയിൽ ഐഡി യിലോ വിവരം അറിയിക്കേണ്ടതാണ് .ഈ നിര്‍ദേശം പാലിക്കാത്തവർക്ക് എതിരെ കര്‍ശന നടപടി സ്വീകരിക്കുമെന്ന് ഡിഎംഒ ഡോ. പീയുഷ് എം. നമ്പൂതിരിപ്പാട് അറിയിച്ചു.

മഴയിൽ തകർന്ന റോഡ് ശ്രമദാനത്തിലൂടെ നന്നാക്കി

പൈസക്കരി: കനത്ത മഴയിലും വെള്ളപ്പൊക്കത്തിലും വണ്ണായിക്കടവ് പാലത്തിനു മുകളിലൂടെ വെള്ളം കയറി ഒഴുകിയപ്പോൾ പാലത്തിന്‍റെ ഇരുഭാഗത്തേയും റോഡിൽ അടിഞ്ഞുകൂടിയ മരക്കമ്പുകളും മാലിന്യങ്ങളും ഭാഗികമായി തകർന്ന റോഡും വണ്ണായിക്കടവ് സോൺ കത്തോലിക്കാ കോൺഗ്രസ് വാട്സ് ആപ് കൂട്ടായ്മയുടെ നേതൃത്വത്തിൽ നന്നാക്കി. സോൺ കോ -ഓർഡിനേറ്റർ ടി.ടി. സെബാസ്റ്റ്യൻ, സാബു വള്ളോപ്പള്ളിൽ, ബെന്നി പൂവന്നിക്കുന്നേൽ, ഡെന്നീസ് ഓലിയ്ക്കൽ, ജോസ് ശൗര്യാംതൊട്ടി, ബേബി പുളിയ്ക്കൽ, റോബിൻ മുട്ടത്തുകാട്ടിൽ, വിൽസൺ ചാക്കോ എന്നിവർ നേതൃത്വം നല്കി. കാലപ്പഴക്കത്താൽ അപകടാവസ്ഥയിലുമായ ഈ പാലത്തിനു പകരം പുതിയ പാലം നിർമിക്കാൻ കേന്ദ്ര, സംസ്ഥാന സർക്കാരുകളിൽ സമ്മർദം ചെലുത്തുന്നതിനായി എംപി, എംഎൽഎ, ഗതാഗത മന്ത്രി എന്നിവർക്ക് നിവേദനം നൽകാനും കൂട്ടായ്മ തീരുമാനിച്ചു.

തദ്ദേശ സ്വയംഭരണ സ്ഥാപനങ്ങളുടെ വാർഷിക പദ്ധതികൾക്ക് അംഗീകാരം

കണ്ണൂർ: ജില്ലയിലെ തദ്ദേശ സ്വയംഭരണ സ്ഥാപനങ്ങളുടെ 2025-26 വാർഷിക പദ്ധതികൾക്ക് ജില്ലാ ആസൂത്രണ സമിതിയുടെ അംഗീകാരം. പാനൂർ ഒഴികെയുള്ള തദ്ദേശ സ്ഥാപനങ്ങളുടെ സ്പിൽഓവർ കൂട്ടിച്ചേർത്ത 2025-26 വാർഷിക പദ്ധതി ഭേദഗതിക്കാണ് അംഗീകാരമായത്. തദ്ദേശഭരണ സ്ഥാപനങ്ങൾ കഴിയുന്നത്ര പദ്ധതികൾ തുടങ്ങിവെക്കണമെന്നും പദ്ധതി നിർവഹണത്തിൽ കൃത്യമായ ഇടപെടൽ നടത്തണമെന്നും ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരി പറഞ്ഞു.ഡയാലിസിസ് രോഗികൾക്ക് ധനസഹായം നൽകുന്ന പ്രോജക്ടിന്‍റെ നിർവഹണം മെഡിക്കൽ ഓഫീസർമാർ തന്നെ തുടരുമെന്ന തീരുമാനത്തിന് യോഗം അംഗീകാരം നൽകി. എന്നാൽ, ഗുണഭോക്താക്കളുടെ തെരഞ്ഞെടുപ്പ്, അവരുടെ അപേക്ഷയുടെ സൂക്ഷ്മ പരിശോധന തുടങ്ങിയ പ്രക്രിയ സുഗമമാക്കാനും പ്രായോഗിക വൈഷമ്യങ്ങൾ പരിഹരിക്കാനുമായി മാർഗനിർദേശങ്ങൾ പുതുക്കി നൽകും. ബണ്ട് സംരക്ഷണം, കടൽ,പുഴ തീരത്തെ വീട് സംരക്ഷണം, ദുരിതാശ്വാസ ക്യാമ്പുകളുടെ മെച്ചപ്പെടുത്തൽ, ദുരന്ത അവശിഷ്ടങ്ങൾ നീക്കം ചെയ്യൽ, രക്ഷാപ്രവർത്തന ഉപകരണങ്ങൾ ശേഖരിക്കൽ തുടങ്ങിയവയ്ക്ക് ജില്ലാ ദുരന്തനിവാരണ അതോറിറ്റി മുഖേന തുക ലഭ്യമാകുമെന്ന് യോഗത്തിൽ അറിയിച്ചു. അതത് ത്രിതല പഞ്ചായത്തുകൾ ദുരന്തനിവാരണ വർക്കിംഗ് ഗ്രൂപ്പിന്‍റെ തീരുമാനത്തോടെ തഹസിൽദാർമാർക്കാണ് പദ്ധതി തയാറാക്കി സമർപ്പിക്കേണ്ടത്. എത്ര തുക അനുവദിക്കണമെന്ന തീരുമാനം ജില്ലാ ദുരന്തനിവാരണ അതോറിറ്റി കൈക്കൊള്ളും. ഈ പദ്ധതികൾക്ക് ഡിപിസി അനുമതി ആവശ്യമില്ലെന്നും ജില്ലാ ദുരന്തനിവാരണ അഥോറിറ്റിയാണ് വിനിയോഗ അനുമതി നൽകുന്നതെന്നും ജില്ലാ കളക്ടർ അരുൺ കെ. വിജയൻ പറഞ്ഞു. കാലാവസ്ഥാ വ്യതിയാനത്തെ പ്രതിരോധിക്കുന്നതിന്‍റെ ഭാഗമായി നെറ്റ് സീറോ കാർബൺ എമിഷൻ ലക്ഷ്യമിട്ടുള്ള ഹരിത കേരളം മിഷന്‍റെ വൃക്ഷവത്കരണ പരിപാടി ഇന്ന് ആരംഭിക്കും. സെപ്തംബർ 30 വരെയുള്ള കാലയളവിൽ ജില്ലയിൽ ആറ് ലക്ഷം വൃക്ഷത്തൈകൾ നടും. ഡി പി സി അംഗങ്ങളായ ബിനോയ് കുര്യൻ, വി.ഗീത, കെ. താഹിറ, ലിസി ജോസഫ്, വി.വിജയൻ, ശ്രീന പ്രമോദ്, ടി.ഒ. മോഹനൻ, ഗ്രാമപഞ്ചായത്ത് പ്രസിഡന്‍റ് അസോസിയേഷൻ പ്രതിനിധികളായ എം. ശ്രീധരൻ, പി.സി. ഗംഗാധരൻ, കെ.വി. ഗോവിന്ദൻ, ജില്ലാ പ്ലാനിംഗ് ഓഫീസർ നെനോജ് മേപ്പടിയത്ത് എന്നിവർ പങ്കെടുത്തു.

ജൽജീവൻ പദ്ധതിയിലെ മെല്ലെപ്പോക്ക്; ഉദ്യോഗസ്ഥരെ തടഞ്ഞുവച്ചു

ഉളിക്കൽ: ജൽജീവൻ പദ്ധതി ഉദ്യോഗസ്ഥരേയും കരാറുകാരുടെ പ്രതിനിധികളേയും ഉളിക്കൽ പഞ്ചായത്ത് ഓഫീസിൽ ഭരണസമിതി അംഗങ്ങൾ തടഞ്ഞുവച്ചു. ഉളിക്കൽ പഞ്ചായത്തിലെ വിവിധ ഗ്രാമീണ റോഡുകളും പൊതുമരാമത്ത് റോഡുകളും ജൽജീവൻ മിഷൻ പൈപ്പുകൾ സ്ഥാപിക്കുന്നതിന്‍റെ ഭാഗമായി വെട്ടിപ്പൊളിച്ചത് നേരെയാക്കാത്തതിൽ പ്രതിഷേധിച്ചായിരുന്നു തടഞ്ഞുവ യ്ക്കൽ. റോഡുകൾ ഗതാഗത യോഗ്യമല്ലാത്ത ഗുരുതര സാഹചര്യം ചർച്ച ചെയ്യുന്നതിനായി ഉളിക്കൽ പഞ്ചാ യത്ത് ഓഫീസിൽ ചേർന്ന കേരള വാട്ടർ അഥോറിറ്റി അസിസ്റ്റന്‍റ് എക്സിക്യൂട്ടീവ് എൻജിനിയർ, മറ്റ് ഉദ്യോഗസ്ഥർ, കരാറുകാരുടെ പ്രതിനിധികൾ എന്നിവരും പഞ്ചായത്ത് ഭരണസമിതി അംഗങ്ങളും പങ്കെടുത്ത യോഗത്തിലായിരുന്നു പ്രതിഷേധം. പ്രശ്‌നപരിഹാരത്തിന് ഉറപ്പ് ലഭിച്ചാൽ മാത്രമേ പ്രതിനിധികളെ പോകാൻ അനുവദിക്കുകയുള്ളുവെന്ന നിലപാടിലായിരുന്നു പഞ്ചായത്ത് ഭരണസമിതി അംഗങ്ങൾ. ഒന്നര വർഷമായി വെട്ടിപ്പിളിച്ച റോഡുകൾ കാലവർഷം കനത്തതോടെ ഗതാഗതയോഗ്യമല്ലാതായത് അംഗങ്ങൾ ചൂണ്ടിക്കാണിച്ചു. അടിയന്തരമായി ഗതാഗതയോഗ്യമാക്കേണ്ട റോഡുകളുടെ ലിസ്റ്റ് പഞ്ചായത്ത് അംഗങ്ങൾ അസിസ്റ്റന്‍റ് എക്സിക്യൂട്ടീവ് എൻജിനിയർക്ക് കൈമാറി. എന്നാൽ പ്രവർത്തികൾ എന്ന് പൂർത്തീകരിക്കാൻ സാധിക്കുമെന്ന് അസി. എക്സിക്യൂട്ടീവ് എൻജിനിയർക്കോ കരാറുകാരുടെ പ്രതിനിധികൾക്കോ ഉറപ്പ് നൽകാൻ കഴിഞ്ഞില്ല. ജൂൺ മുപ്പതിനകം ഗുരുതരമായി തകർന്ന റോഡുകൾ അടിയന്തരമായി പുനർ നിർമിച്ചു നൽകാൻ നടപടി ഉണ്ടാകണമെന്ന് ഉളിക്കൽ പഞ്ചായത്ത് പ്രസിഡന്‍റ് പി.സി. ഷാജി ആവശ്യപ്പെട്ടു. മണിക്കൂറുകൾ നീണ്ട തർക്കങ്ങൾക്കും ചർച്ചകൾക്കും ഒടുവിൽ ഉദ്യോഗസ്ഥരും കരാറുകാരുടെ പ്രതിനിധികളും പ്രസിഡന്‍റിന്‍റെ നിർദേശം അംഗീകരിച്ചു. ഉറപ്പു ലഭിച്ചതിന് ശേഷമാണ് ജനപ്രതിനിധികൾ ഇവരെ ഹാളിന് പുറത്ത് പോകാൻ അനുവദിച്ചത്. 30 നുള്ളിൽ റിപ്പയർ പ്രവർത്തികൾ പൂർത്തീകരിച്ചില്ലെങ്കിൽ പഞ്ചായത്തിനുള്ളിലെ ജല ജീവൻ മിഷന്‍റെ ഒരു പ്രവർത്തികൾ തടയുമെന്നും, വകുപ്പ് മന്ത്രിക്ക് പരാതി നൽകുമെന്നും പ്രസിഡന്‍റ് പി.സി. ഷാജി പറഞ്ഞു .

കരിയർ ഗൈഡൻസ് സെമിനാർ നടത്തി

കാർത്തികപുരം: ഉദയഗിരി പഞ്ചായത്തിന്‍റെ നേതൃത്വത്തിൽ എസ്എസ്എൽസി, പ്ലസ്‌ടു-ഡിഗ്രി കഴിഞ്ഞ വിദ്യാർഥികൾക്കായി കരിയർ ഗൈഡൻസ് സെമിനാർ നടത്തി. പഞ്ചായത്ത് കമ്യുണിറ്റി ഹാളിൽ പഞ്ചായത്ത് പ്രസിഡന്‍റ് കെ.എസ്.ചന്ദ്രശേഖരൻ ഉദ്ഘാടനം ചെയ്തു. ആരോഗ്യ-വിദ്യാഭ്യാസ സ്ഥിരസമിതി ചെയർമാൻ കെ.ടി.സുരേഷ്കുമാർ അധ്യക്ഷത വഹിച്ചു.നല്ലതൊഴിൽ ലഭിക്കാൻ ഏത് കോഴ്സ് പഠിക്കണം, എങ്ങനെ പഠിക്കണം, എവിടെ പഠിക്കണം എന്നത് സംബന്ധിച്ച് കോർപറേറ്റ് ട്രെയിനർ കെ.ജയപാലനും സർക്കാരിന്‍റെ വിവിധ ആനുകൂല്യങ്ങൾ സംബന്ധിച്ച് എൻടിഎസ് പ്രിൻസിപ്പൽ കെ.എസ്.അനിൽകുമാറും ക്ലാസെടുത്തു. ബിന്ദു ഷാജു, എം.എൻ.ബിന്ദു, കെ.പി.സിനി എന്നിവർ പ്രസംഗിച്ചു.

നവീകരിച്ച പാചകപ്പുര ഉദ്ഘാടനം ചെയ്തു

ചെറുപുഴ: ചെറുപുഴ ജെഎംയുപി സ്കൂളിൽ നാല് ലക്ഷത്തോളം രൂപ ചെലവഴിച്ച് നവീകരിച്ച പാചകപ്പുരയുടെ ഉദ്ഘാടനം ടി.ഐ. മധുസൂദനൻ എംഎൽഎ നിർവഹിച്ചു. പാചകം വേഗത്തിലും ഇന്ധനച്ചെലവ് കുറച്ചും കൂടുതൽ വൃത്തിയായും ചെയ്യുന്നതിനു വേണ്ടി സ്റ്റീമർ ഉൾപ്പെടെയുള്ള സംവിധാനങ്ങളാണ് ഒരുക്കിയിട്ടുള്ളത്. ചെറുപുഴ പഞ്ചായത്ത് പ്രസിഡന്‍റ് കെ.എഫ്. അലക്സാണ്ടർ അധ്യക്ഷത വഹിച്ചു. ആരോഗ്യ വിദ്യാഭ്യാസ സ്ഥിരം സമിതി ചെയർമാൻ എം. ബാലകൃഷ്ണൻ, സ്കൂൾ മാനേജർ കെ.കെ. വേണുഗോപാൽ, മുഖ്യാധ്യാപകൻ പി.എൻ. ഉണ്ണികൃഷ്ണൻ, പിടിഎ പ്രസിഡന്‍റ് ടി.വി. രമേശ് ബാബു, റോബിൻ വർഗീസ് എന്നിവർ പ്രസംഗിച്ചു.

ബീഫിന്‍റെ അന്യായ വിലവർധന പിൻവലിക്കണം: യൂത്ത് കോൺഗ്രസ്

പയ്യാവൂർ: മലയോര മേഖലയിൽ ബീഫിന് അന്യായമായി വർധിപ്പിച്ച വില ഉടൻ പിൻവലിക്കണമെന്നും അല്ലാത്തപക്ഷം പ്രത്യക്ഷ സമരപരിപാടികൾ ആരംഭിക്കുമെന്നും യൂത്ത് കോൺഗ്രസ് ഇരിക്കൂർ നിയോജക മണ്ഡലം കമ്മിറ്റി. മേഖലയിൽ ബീഫിന്‍റെ ഉപയോഗം താരതമ്യേന കൂടുതലായുള്ളതിനാൽ തന്നെ വില്പനക്കാർ അതൊരു ചൂഷണമാർഗമായി കാണാൻ തുടങ്ങിയിട്ടുണ്ട്. മുമ്പ് കിലോഗ്രാമിന് 300 രൂപയായിരുന്നതിൽ നിന്ന് കഴിഞ്ഞ രണ്ടുവർഷങ്ങൾക്കിടയിൽ 330, 350, 380, 400 എന്നിങ്ങനെ യാതൊരു മാനദണ്ഡവുമില്ലാതെയാണ് വില വർധിപ്പിച്ചത്. ഈ മാസം ഒന്നു മുതൽ മുന്നറിയിപ്പോ ന്യായമായ കാരണമോ ഇല്ലാതെ 460 രൂപയാണ് ഇടാക്കുന്നത്. ബീഫിന്‍റെ വില അകാരണമായി വർധിപ്പിച്ചത് കാറ്ററിംഗ്, ഹോട്ടൽ മേഖലകളെ ഏറെ പ്രതികൂലമായി ബാധിക്കുന്ന സാഹചര്യമാണ് നിലവിലുള്ളത്. അതിനാൽ ഇപ്പോൾ വർധിപ്പിച്ച തുക പൂർണമായും പിൻവലിക്കണമെന്നാണ് ഭക്ഷ്യ വ്യാപാരികളും പൊതുജനങ്ങളും ആവശ്യപ്പെടുന്നത്.

വൃക്ഷത്തൈകൾ വിതരണം ചെയ്തു

പെരുമ്പടവ്: എരമം-കുറ്റൂർ പഞ്ചായത്ത് മഹാത്മാഗാഡി ദേശീയ ഗ്രാമീണ തൊഴിലുറപ്പ് പദ്ധതിയുടെ ഭാഗമായി സ്കൂളുകൾ, അങ്കണവാടികൾ, വായനശാല, സന്നദ്ധ സംഘടനകൾ എന്നിവയ്ക്ക് വൃക്ഷത്തൈകൾ വിതരണം ചെയ്തു. പയ്യന്നൂർ ബ്ലാേക്ക് പഞ്ചായത് പ്രസിഡന്‍റ് പി.വി. വത്സല ടിടിഐ മാതമംഗലം പ്രിൻസിപ്പാലിന് നൽകി ഉദ്ഘാടനം ചെയ്തു. കശുമാവ്, സീതാ പഴം,പുളി,നെല്ലി,പപ്പായ, മാവ്,പിലാവ്, കറ്റാർവാഴ, പതിമുഖം തുടങ്ങി 7,000ത്തോളം വൃക്ഷത്തൈകളാണ് വിതരണം ചെയ്തത്. എരമം-കുറ്റൂർ പഞ്ചായത്ത് പ്രസിഡന്‍റ് ടി.ആർ. രാമചന്ദ്രൻ അധ്യക്ഷത വഹിച്ചു. പഞ്ചായത്ത് അംഗം പി.വി. വിജയൻ, ടി.കെ. രാജൻ,എം. കെ. കരുണാകരൻ, കെ. സരിത, കെ.പി. രമേശൻ, അനിൽ പാടാച്ചേരി, അമൽ സജി എന്നിവർ പ്രസംഗിച്ചു.

റോഡിന്‍റെ ഇരുവശങ്ങളിലുമുള്ള കാടുവെട്ടി തെളിച്ചു

ആലക്കോട്: കിംഗ്സ് കരുവാൻചാൽ അയൽക്കൂട്ടത്തിന്‍റെ നേതൃത്വത്തിൽ മഴക്കാല പൂർവ ശുചീകരണത്തിന്‍റെ ഭാഗമായി കരുവഞ്ചാൽ, കോട്ടക്കടവ് റോഡിന്‍റെ ഇരുവശങ്ങളിലുമുള്ള കാടു വെട്ടി തെളിക്കുകയും കാലായിമുക്കിലുള്ള ചെക് ഡാമിൽ അടിഞ്ഞ മാലിന്യം നീക്കം ചെയ്യുകയും ചെയ്തു. സന്തോഷ്‌ തട്ടുങ്കൽ, തങ്കച്ചൻ നടുത്തൊട്ടി, ജോൺസൻ കുടിപാറ, ബിനു പുളിമൂട്ടിൽ എന്നിവർ നേതൃത്വം നൽകി.

കുളത്തില്‍ മുങ്ങി ചികിത്സയിലായിരുന്ന നഴ്സിംഗ് വിദ്യാര്‍ഥി മരിച്ചു

പരിയാരം: കുളത്തില്‍ കുളിക്കുന്നതിനിടെ മുങ്ങിത്താഴ്ന്നതിനെ തുടർന്ന് ചികിത്സയിലായിരുന്നു നഴ്സിംഗ് വിദ്യാര്‍ഥി മരിച്ചു. തൃശൂര്‍ പൊയ്യ മല പള്ളിപ്പുറം സ്വദേശിയും കണ്ണൂർ ഗവ. മെഡിക്കൽ കോളജ് രണ്ടാം വർഷ ബിഎസ്‌സി വിദ്യാർഥിയുമായ ഒ.എസ്.അഭിമന്യുവാണ് (20) മരിച്ചത്. പരിയാരത്തെ കണ്ണൂർ ഗവ. മെഡിക്കൽ കോളജിലെ തീവ്രപരിചരണ വിഭാഗത്തിൽ ചികിത്സയിൽ കഴിയവേ ഇന്നലെ രാവിലെയാണ് മരിച്ചത്. പൊയ്യമല ഓലിപ്പറമ്പില്‍ സുഭാഷ്-മിനി ദമ്പതികളുടെ ഏക മകനാണ്. ഇക്കഴിഞ്ഞ 31ന് മെഡിക്കൽ കോളജിന് സമീപത്തെ ഏന്പേറ്റ് ജവാൻ കോളനിയിലെ പഞ്ചായത്ത് കുളത്തിൽ സുഹൃത്തുക്കൾക്കൊപ്പം കുളിക്കുന്നതിനിടെയായിരുന്നു അപകടം. പോസ്റ്റുമോർട്ടത്തിന് ശേഷം മൃതദേഹം നാട്ടിലേക്ക് കൊണ്ടു പോയി.

കടലിൽ കാണാതായ രണ്ടാമന്‍റെ മൃതദേഹം കണ്ടെത്തി

കണ്ണൂർ: കഴിഞ്ഞ തിങ്കളാഴ്ച അഴീക്കോട് മീൻകുന്ന് കള്ളക്കടപ്പുറത്ത് കുളിക്കുന്നതിനിടെ തിരയിൽ പ്പെട്ട് കാണാതായ രണ്ടാമത്തെ യുവാവും മരിച്ചു. വാരം വലിയന്നൂർ സ്വദേശി വി. പ്രനീഷിന്‍റെ (27) മൃതദേഹമാണ് ഇന്നലെ രാവിലെ പയ്യാന്പലത്ത് കരയ്ക്കടിഞ്ഞ നിലയിൽ കണ്ടെത്തിയത്. വാരം വലിയന്നൂർ വെള്ളോറ വീട്ടിൽ പവിത്രൻ-സുമ ദന്പതികളുടെ മകനാണ്. ദുബായിലുള്ള പ്രസൂൺ സഹോദരനാണ്. പ്രനീഷിനൊപ്പം കടലിൽ കുളിക്കുന്നതിനിടെ തിരയിൽപെട്ട് കാണതായ സുഹൃത്തും പട്ടാന്നൂർ കൊടോളിപ്രം സ്വദേശിയും ഹൈദരാബാദിൽ അധ്യാപകനുമായ പി.കെ.ഗണേശൻ നമ്പ്യാരുടെ(28) മൃതദേഹം ചൊവ്വാഴ്ച നീർക്കടവ് ഭാഗത്തെ കടലിൽ കണ്ടെത്തിയിരുന്നു. സ്കൂൾ വിദ്യാഭ്യാസ കാലം മുതലേ സുഹൃത്തുക്കളാണ് ഇരുവരും. ഹൈദരബാദിൽനിന്നും നാട്ടിലെത്തിയ ഗണേശൻ നന്പ്യാരും പ്രസൂണും കഴിഞ്ഞ തിങ്കളാഴ്ച വൈകുന്നേരം കടലിൽ കുളിക്കുന്നതിനിടെയാണ് തിരയിൽപ്പെട്ടത്. കൊടോളിപ്രം ആനന്ദാലയത്തിൽ പി.വി. ആനന്ദൻ-പി.കെ.നിഷ ദന്പതികളുടെ മകനാണ് മരിച്ച ഗണേശന്‍ നന്പ്യാർ. ഗണേശൻ നന്പ്യാരുടെ സംസ്കാരം ഇന്നുച്ചകഴിഞ്ഞ് രണ്ടിന് തറവാട് ശ്മശാനത്തിൽ നടക്കും.

ചുഴലി-ചെങ്ങളായി റോഡിൽ പനംങ്കുന്ന് കയറ്റത്തിൽ ഗർത്തം: ഗതാഗതത്തിന് നിയന്ത്രണം

ശ്രീകണ്ഠപുരം: ചുഴലി-ചെങ്ങളായി റോഡിൽ നിടുവാലൂർ ജംഗ്ഷന് സമീപം പനംങ്കുന്ന് കയറ്റത്തിൽ ഗർത്തം രൂപപ്പെട്ടു. ഇതേ തുടർന്ന് ഇതുവഴിയുള്ള ഗതാഗതം ഭാഗികമായി നിരോധിച്ചു. ഇന്നലെ വൈകുന്നേരം അഞ്ചോടെ വൈദ്യുതി വകുപ്പ് ജീവനക്കാരാണ് ജോലിക്കിടെ വിള്ളൽ കണ്ടത്. പരിശോധിച്ചപ്പോഴാണ് ടാറിംഗ് പാളി തകർന്നതിനെ തുടർന്ന് കുഴി കാണാനിടയായത്. വാർഡ് മെംബർ കെ.വി. ഗീത അറിയിച്ചതിനെ തുടർന്ന് ചെങ്ങളായി പഞ്ചായത്ത് പ്രസിഡന്‍റ് വി.പി.മോഹനനും മറ്റ് പഞ്ചായത്ത് അംഗങ്ങളും സ്ഥലത്തെത്തി. ശ്രീകണ്ഠപുരം പോലീസ് സ്ഥലത്തെ ത്തിയ ശേഷം ബന്ധപ്പെട്ടവരുമായി സംസാരിച്ചതിനെ തുടർന്നാണ് ഇതുവഴിയുള്ള ഗതാഗതം ഭാഗികമായി നിരോധിച്ചത്. ഗർത്തം പഞ്ചായത്ത് ഉദ്യോഗസ്ഥരെത്തി ഇന്ന് പരിശോധിക്കും. ഗുഹ ആണെന്ന സംശയം ബലപ്പെട്ടതിനെ തുടർന്ന് പുരാവസ്തു വകുപ്പും എത്തിയേക്കും. ഇതുവഴി വാഹനഗതാഗതം സാധ്യമല്ലെന്നും യാത്രക്കാർ മറ്റു റോഡുകൾ ഉപയോഗിക്കണമെന്നും സോഷ്യൽ മീഡിയ വഴിയും മറ്റും പഞ്ചായത്ത് മുന്നറിയിപ്പ് നൽകിയിട്ടുണ്ട്. ചുഴലിയിൽ നിന്നും കാവുമ്പായി, കരിവെളളൂർ, നിടുവാലൂർ, ചെങ്ങളായിയിലേക്കടക്കം സ്കൂൾ ബസുകൾ ഉൾപ്പെടെ നിരവധി വാഹനങ്ങൾ ഉപയോഗിക്കുന്ന ജില്ലാപഞ്ചായത്ത് റോഡാണിത്. ജംഗ്ഷനുകളിൽ മുന്നറിയിപ്പ് സൂചന നല്കിയിട്ടുണ്ട്.

പ്രതീക്ഷ നല്കി മോറാനി പാലം

ആലക്കോട്: വർഷങ്ങളുടെ കാത്തിരിപ്പിനൊടുവിൽ കൊട്ടാരംകടവ് പുഴയ്ക്ക് കുറുകെയുള്ള മോറാനി പാലം നിർമാണത്തിന്‍റെ എസ്റ്റിമേറ്റ് അംഗീകരിച്ചു. 77.50 ലക്ഷം രൂപയുടെ എസ്റ്റിമേറ്റാണ് തയാറാക്കിയത്. ഇതിൽ 40 ലക്ഷം ആലക്കോട് പഞ്ചായത്തും 37.50 ലക്ഷം രൂപ കണ്ണൂർ ജില്ലാ പഞ്ചായത്തും ചെലവഴിക്കും. ഇരു പഞ്ചായത്തുകളും സംയുക്തമായി നടപ്പാക്കുന്ന പദ്ധതിയുടെ എസ്റ്റിമേറ്റിനു അന്തിമ രൂപം നല്കുന്നതിന്‍റെ ഭാഗമായി സ്ഥലത്തെ ജനപ്രതിനിധികൾ, എൻജിനിയർമാർ, വിവിധ രാഷ്‌ട്രീയ നേതാക്കന്മാർ തുടങ്ങിയവർ പ്രദേശം സന്ദർശിച്ചു. ജില്ലാ പഞ്ചായത്തംഗം തോമസ് വക്കത്താനം, ഗ്രാമപഞ്ചായത്ത് അംഗങ്ങളായ കെ.പി. സാബു, സാലി, മാത്യു പുതിയടത്ത്, ജോൺസൺ താരാ മംഗലത്ത്, രാഷ്‌ട്രീയ നേതാക്കന്മാരായ ബാബു പള്ളിപ്പുറം, ജോൺസൺ ചിറവയൽ, മാത്യു ചിറവയൽ, ബിനോയി കിഴക്കത്താഴെ, ലാലിച്ചൻ കിഴക്കത്താഴെ തുടങ്ങിയവർ സംഘത്തിൽ ഉണ്ടായിരുന്നു. പാലത്തിന്‍റെ എസ്റ്റിമേറ്റ് അംഗീകരിക്കപ്പെട്ട സാഹചര്യത്തിൽ അധികം താമസിയാതെ പ്രവൃത്തി ആരംഭിക്കാനാകുമെന്ന് ജില്ലാ പഞ്ചായത്തംഗം തോമസ് വക്കത്താനം അറിയിച്ചു. നേരത്തെ മോറാനി പാലത്തിന്‍റെ ആവശ്യകതയെക്കുറിച്ച് കുറിച്ച് ദീപിക റിപ്പോർട്ട് ചെയ്തിരുന്നു.

കർഷകർക്ക് നഷ്ടപരിഹാരം ലഭ്യമാക്കണം: ജനാധിപത്യ കേരള കോൺഗ്രസ്

കണ്ണൂർ: കാലവർഷക്കെടുതിയിൽ ദുരിതമനുഭവിക്കുന്ന മലയോര കർഷകർക്ക് നഷ്ടപരിഹാരം ഉടൻ അനുവദിക്കണമെന്ന് ജനാധിപത്യ കേരള കോൺഗ്രസ് കണ്ണൂർ ജില്ലാ കമ്മിറ്റി ആവശ്യപ്പെട്ടു. കഴിഞ്ഞ ദിവസങ്ങളിൽ കാറ്റിലും മഴയിലും വീടുകൾക്കും കർഷകരുടെ വിളകൾക്കും കനത്ത നാശം നേരിട്ടിട്ടുണ്ട്. യോഗം സംസ്ഥാന ഡപ്യൂട്ടി ചെയർമാൻ എ.ജെ. ജോസഫ് ഉദ്ഘാടനം ചെയ്തു. ജില്ലാ പ്രസിഡന്‍റ് ജോജി ആനിത്തോട്ടം അധ്യക്ഷത വഹിച്ചു. ടോമിച്ചൻ നടുത്തൊട്ടിയിൽ, ജോസഫ് പരത്തനാൽ, ബാബു അണിയറ, ജോസ് മാത്യു, ബിജു പുളിക്കൽ, ജോസ് തെക്കേടത്ത്, സണ്ണി പരവരാകത്ത്, ജോർജ് കാരക്കാട്ട്, ജസ്റ്റിൻ വടക്കൻ എന്നിവർ പ്രസംഗിച്ചു.

യാത്രികരെ ദുരിതത്തിലാക്കി പയ്യന്നൂർ-കണ്ണൂർ റൂട്ടിൽ ബസ് ജീവനക്കാരുടെ മിന്നൽ പണിമുടക്ക്

തളിപ്പറമ്പ്: പയ്യന്നൂർ -കണ്ണൂർ റൂട്ടിലെ മിന്നൽ ബസ് സമരം യാത്രക്കാരെയും വിദ്യാർഥികളെയും ദുരിതത്തിലാക്കി. മണ്ണിടിച്ചിലിനെ തുടർന്ന് പ്രവൃത്തികൾക്കായി കുപ്പം റോഡിൽ ഗതാഗതം നിരോധിച്ചത് വൻ ദുരിതമാണെന്ന് ആരോപിച്ച് ഇന്നലെ രാവിലെ മുതലാണ് ബസ് ജീവനക്കാർ മിന്നൽ പണിമുടക്ക് തുടങ്ങിയത്. എന്നാൽ, മുന്നറിയിപ്പില്ലാതെ നടത്തിയ മിന്നൽ ബസ് സമരം വിദ്യാർഥികളടക്കമുള്ള യാത്രികരെ ഏറെ വലച്ചു. ഇതോടെ പലരും കെഎസ്ആർടിസിയെയും, ബസ് സമരത്തിൽ പങ്കെടുക്കാത്ത ചുരുക്കം ചില ബസുകളെയും ആശ്രയിക്കുകയായിരുന്നു. ഇന്നു തന്നെ കുപ്പം വഴിയുള്ള ഗതാഗതം പുനസ്ഥാപിക്കുമെന്ന അധികൃതരുടെ ഉറപ്പിൽ ബസ് ജീവനക്കാർ വൈകുന്നേരത്തോടെ സർവീസ് പുനരാരംഭിച്ചു. കുപ്പം ഗതാഗത തടസത്തെ തുടർന്ന് പയ്യന്നൂർ-കണ്ണൂർ റൂട്ടിൽ ബസുകൾ നിലവിൽ പരിയാരം-നെരുവമ്പ്രം-ഏഴോം വഴിയാണ് സർവീസ് നടത്തിയിരുന്നത്. ഇത് ഇന്ധനനഷ്ടവും അതു പോലെ തന്നെ സമയനഷ്ടം കാരണം കൃത്യസമയത്ത് ഓടാനും വിവിധ സ്ഥലങ്ങളിൽ എത്തിച്ചേരാനും കഴിയാത്ത സാഹചര്യമായി. ഭക്ഷണ സമയമോ, വിശ്രമമോ പോലും കിട്ടാത്ത സ്ഥിതിയാണെന്നാണ് ബസ് ജീവനക്കാർ പറയുന്നത്. ഇക്കാരണത്താലാണ് യാതൊരു സംഘടനയുടെയും ആഹ്വാനവും പിന്തുണയുമില്ലാതെ വാട്സ് ആപ് ആഹ്വാന പ്രകാരം ബസ് ജീവനക്കാർ മിന്നൽ ബസ് സമരം നടത്തിയത്.

കൃഷി സങ്കൽപ്പ് അഭിയാൻ കാമ്പയി‍ൻ സംഘടിപ്പിച്ചു

പെരുമ്പടവ്: കൃഷി വിജ്ഞാന കേന്ദ്രം, ആത്മ കണ്ണൂർ, കൃഷി ഭവൻ എരമം-കുറ്റൂർ എന്നിവയുടെ നേതൃത്ത്വത്തിൽ കുറ്റൂർ സാംസ്കാരിക നിലയത്തിൽ കൃഷി സങ്കൽപ്പ് അഭിയാൻ കാമ്പയി‍ൻ സംഘടിപ്പിച്ചു. പഞ്ചായത്ത് പ്രസിഡന്‍റ് ടി.ആർ. രാമചന്ദ്രൻ ഉദ്ഘാടനം ചെയ്തു. പഞ്ചായത്ത് വൈസ് പ്രസിഡന്‍റ് ഷൈനി ബിജേഷ് അധ്യക്ഷത വഹിച്ചു. കേന്ദ്രാവിഷ്കൃത-സംസ്ഥാന കർഷക പദ്ധതികളെ പറ്റിയുള്ള വിശദീകരണം, വരുമാന വർധനവിന് ഉതകുന്ന പദ്ധതികൾ, സാമൂഹ്യ സുരക്ഷ ഭൗതീക സാഹചര്യം ഒരുക്കൽ തുടങ്ങിയ വിഷയങ്ങളെപ്പറ്റി ജി.കെ. ശിവരാമൻ (സൈന്‍റിസ്റ്റ് സിഐഎഫ്ടി എറണാകുളം), കെ.പി. മഞ്ജു (കെവികെ കണ്ണൂർ അസിസ്റ്റന്‍റ് പ്രഫസർ) തുടങ്ങിയവർ ക്ലാസെടുത്തു. കൃഷി ഓഫീസർ ടി. കൃഷ്ണ പ്രസാദ്, കൃഷി അസിസ്റ്റന്‍റ് ടി. തമ്പാൻ എന്നിവർ പ്രസംഗിച്ചു.

മുച്ചക്ര വാഹനം വിതരണം ചെയ്തു

ശ്രീകണ്ഠപുരം: നഗരസഭയുടെ 2024-25 വാർഷിക പദ്ധതിയിൽ ഉൾപ്പെടുത്തി ഭിന്നശേഷിക്കാർക്ക് നൽകുന്ന മുച്ചക്ര വാഹനത്തിന്‍റെ വിതരണോദ്ഘാടനം നടന്നു. നഗരസഭാധ്യക്ഷ കെ.വി. ഫിലോമിന നിർവഹിച്ചു. ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ പി.പി. ചന്ദ്രാംഗദൻ അധ്യക്ഷത വഹിച്ചു. ഏഴുലക്ഷം രൂപയാണു പദ്ധതി വിഹിതം. ആറു ഗുണഭോക്താക്കളെയാണു തെരഞ്ഞെടുത്തത്. വൈസ് ചെയർമാൻ കെ. ശിവദാസൻ, നഗരസഭ സ്ഥിരം സമിതി അധ്യക്ഷന്മാരായ കെ.സി. ജോസഫ് കൊന്നയ്ക്കൽ, ജോസഫിന, വി.പി. നസീമ, കൗൺസിലർമാരായ ബാബുമാണി പെരുകിലാ മലയിൽ, നിഷിദറഹ്‌മാൻ, ഷംന ജയരാജ്, കെ.സി. അജിത, സിഡബ്ള്യുഎഫ്എം വി. സ്നേഹ, ഐസിഡിഎസ് സൂപ്പർവൈസർ പുഷ്പജ തുടങ്ങിയവർ പങ്കെടുത്തു.

വീട്ടിൽനിന്ന് നാടൻ തോക്ക് പിടികൂടി; ഒരാൾ അറസ്റ്റിൽ

പരിയാരം: കടന്നപ്പള്ളിയില്‍ വീട്ടിൽനിന്ന് നാടന്‍തോക്ക് പിടികൂടി. തിങ്കളാഴ്ച രാത്രി 11.30 ന് കടന്നപ്പള്ളി കള്ളക്കാംതോടിലെ സന്തോഷിന്‍റെ വീട്ടിൽ റെയ്ഡ് നടത്തിയാണ് പരിയാരം എസ്ഐ സി. സനീതും സംഘവും ലൈസന്‍സില്ലാത്ത സിംഗിള്‍ ബാരല്‍ തോക്ക് പിടിച്ചെടുത്തത്. നാട്ടുകാരുടെ സാന്നിധ്യത്തിൽ വീട് തുറന്ന് പോലീസ് അകത്തുകയറി പരിശോധിച്ചാണു തോക്ക് കണ്ടെടുത്തത്. നായാട്ടിന് ഉപയോഗിക്കുന്നതാണെന്ന് സംശയിക്കുന്നതായി പോലീസ് പറഞ്ഞു. പ്രതി സന്തോഷ് പോലീസിനെ കണ്ട് ഓടിരക്ഷപ്പെട്ടുവെങ്കിലും പിന്നീട് കടന്നപ്പള്ളിയിൽ നിന്ന് പോലീസ് പിടികൂടി. രഹസ്യവിവരം ലഭിച്ചതിന്‍റെ അടിസ്ഥാനത്തിലാണ് പോലീസ് വീട് റെയ്ഡ് നടത്തിയത്. എസ്ഐക്ക് പുറമെ ഗ്രേഡ് എസ്ഐ ഷാജിമോന്‍, ഗ്രേഡ് എഎസ്ഐ ചന്ദ്രന്‍, സിപിഒ മഹിത, പോലീസ് ഡ്രൈവര്‍ സിപിഒ രാജേഷ് എന്നിവരും സംഘത്തിലുണ്ടായിരുന്നു.

മാഹിയിൽ തകർന്ന റോഡിൽ മഴയത്ത് അറ്റകുറ്റപ്പണി: ഗതാഗതക്കുരുക്കിലായി ആംബുലൻസും

മാഹി: കോപ്പാലത്ത് പെട്രോൾ പമ്പുകൾക്ക്‌ മുൻവശം തകർന്ന റോഡിൽ അറ്റകുറ്റപ്പണി നടത്തിയത് ശക്തമായ മഴയിൽ. മുന്നറിയിപ്പില്ലാതെ നടത്തിയ റോഡ് പണിയെ തുടർന്ന് പ്രദേശത്ത് ഗതാഗത തടസവും ഉണ്ടായി. രോഗികളുമായെത്തിയ ആംബുലൻസുകളടക്കം വഴിയിൽ കുടുങ്ങി. ഒരു വശത്ത് കുഴിയടുക്കുന്നതിനാൽ ഇടുങ്ങിയ റോഡിൽ വാഹനങ്ങൾ അങ്ങോട്ടുമിങ്ങോട്ടും കടന്നു പോകാൻ കഴിയാതെ ദീർഘനേരം കുരുക്കിൽപ്പെട്ടു. ഒപ്പം മഴയും പെയ്തതോടെ പന്തക്കൽ പോലീസ് ഏറെ പ്രയാസപ്പെട്ടാണ് വാഹനങ്ങൾ കടത്തി വിട്ട് കുരുക്കഴിച്ചത്. ഈ സ്ഥലത്ത് മഴ പെയ്താൽ കുണ്ടും കുഴിയും രൂപപ്പെടുന്നത് നിത്യസംഭവമാണ്. മഴ തുടങ്ങുന്നതിന് മുന്നേ നാട്ടുകാർ അധികൃതരോട് കുഴിയടക്കാൻ ആവശ്യപ്പെട്ടിരുന്നു. എന്നാൽ, നടന്നില്ല. അന്പതിലധികം ബസുകൾ ദിനം പ്രതി കടന്നുപോകുന്ന തലശേരി-പാനൂർ റൂട്ടിലാണ് ഈ ദുരിതം.

ജില്ലാ ലൈബ്രറി കൗൺസിൽ പുസ്തകോത്സവം ആറു മുതൽ

കണ്ണൂർ: ജില്ലാ ലൈബ്രറി കൗൺസിൽ വികസന സമിതി സംഘടിപ്പിക്കുന്ന 19-ാമത് പുസ്തകോത്സവം ആറു മുതൽ ഒന്പത് വരെ കണ്ണൂർ കളക്‌ട്രേറ്റ് മൈതാനിയിൽ നടക്കും. ആറിന് ഉച്ചകഴിഞ്ഞ് മൂന്നിന് എഴുത്തുകാരൻ എം. മുകുന്ദൻ ഉദ്ഘാടനം ചെയ്യും. വി. ശിവദാൻ എംപി അധ്യക്ഷത വഹിക്കും. ആദ്യവില്പന മേയർ മുസ്‌ലിഹ് മഠത്തിൽ നിർവഹിക്കും. പുസ്തകോത്സവത്തിൽ കേരളത്തിലെ വലുതും ചെറുതുമായ 173 പ്രസാധകരുടെ 146 സ്റ്റാളുകളുണ്ടാകും. ഉദ്ഘാടന പരിപാടിക്ക് ശേഷം റീഡിംഗ് തീയറ്റർ അരങ്ങേറും. ഏഴ്, എട്ട് ദിവസങ്ങളിൽ രാവിലെ മുതൽ ഉച്ചവരെ എഴുത്തുകാർക്ക് വേദിയിൽ വച്ച് തങ്ങളുടെ പുസ്തകങ്ങൾ പ്രകാശനം ചെയ്യാനുള്ള സൗകര്യം ഒരുക്കിയിട്ടുണ്ട്. ഏഴിന് ഉച്ചകഴിഞ്ഞ് മൂന്നിന് സർഗാത്മക സ്വാതന്ത്ര്യം എന്ന വിഷയത്തിൽ സെമിനാർ നടക്കും. കെ.ഇ.എൻ. കുഞ്ഞഹമ്മദ് ഉദ്ഘാടനം ചെയ്യും. എട്ടിന് ഉച്ചകഴിഞ്ഞ് മൂന്നിന് നടക്കുന്ന ലൈബ്രേറിയൻസ് സംഗമം മുൻ മന്ത്രി പി.കെ. ശ്രീമതി ഉദ്ഘാടനം ചെയ്യും. ഒന്പതിന് രാവിലെ 10ന് നടക്കുന്ന സമാപന സമ്മേളനം മന്ത്രി കടന്നപ്പള്ളി രാമചന്ദ്രൻ ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരി അധ്യക്ഷത വഹിക്കും. എല്ലാ ദിവസവും രാവിലെ ഒന്പത് മുതൽ രാത്രി ഏഴുവരെയാണ് പുസ്തകോത്സവത്തിലെ സ്റ്റാളുകൾ പ്രവർത്തിക്കുക. പത്രസമ്മേളനത്തിൽ ലൈബ്രറി കൗൺസിൽ ജില്ലാ സെക്രട്ടറി പി.കെ. വിജയൻ, പ്രസിഡന്‍റ് മുകുന്ദൻ മഠത്തിൽ, ജോയിന്‍റ് സെക്രട്ടറി വി.കെ.പ്രകാശിനി, എക്സിക്യുട്ടീവ് അംഗം പി. ജനാർദനൻ, മീഡിയാ കമ്മിറ്റി കൺവീനർ കെ.ടി. ശശി എന്നിവർ പങ്കെടുത്തു.

യാത്രികരെ ദുരിതത്തിലാക്കി പയ്യന്നൂർ- കണ്ണൂർ റൂട്ടിൽ ബസ് ജീവനക്കാരുടെ മിന്നൽ പണിമുടക്ക്

തളിപ്പറമ്പ്: പയ്യന്നൂർ -കണ്ണൂർ റൂട്ടിലെ മിന്നൽ ബസ് സമരം യാത്രക്കാരെയും വിദ്യാർഥികളെയും ദുരിതത്തിലാക്കി. മണ്ണിടിച്ചിലിനെ തുടർന്ന് പ്രവൃത്തികൾക്കായി കുപ്പം റോഡിൽ ഗതാഗതം നിരോധിച്ചത് വൻ ദുരിതമാണെന്ന് ആരോപിച്ച് ഇന്നലെ രാവിലെ മുതലാണ് ബസ് ജീവനക്കാർ മിന്നൽ പണിമുടക്ക് തുടങ്ങിയത്. എന്നാൽ, മുന്നറിയിപ്പില്ലാതെ നടത്തിയ മിന്നൽ ബസ് സമരം വിദ്യാർഥികളടക്കമുള്ള യാത്രികരെ ഏറെ വലച്ചു. ഇതോടെ പലരും കെഎസ്ആർടിസിയെയും, ബസ് സമരത്തിൽ പങ്കെടുക്കാത്ത ചുരുക്കം ചില ബസുകളെയും ആശ്രയിക്കുകയായിരുന്നു. ഇന്നു തന്നെ കുപ്പം വഴിയുള്ള ഗതാഗതം പുനസ്ഥാപിക്കുമെന്ന അധികൃതരുടെ ഉറപ്പിൽ ബസ് ജീവനക്കാർ വൈകുന്നേരത്തോടെ സർവീസ് പുനരാരംഭിച്ചു. കുപ്പം ഗതാഗത തടസത്തെ തുടർന്ന് പയ്യന്നൂർ-കണ്ണൂർ റൂട്ടിൽ ബസുകൾ നിലവിൽ പരിയാരം-നെരുവമ്പ്രം-ഏഴോം വഴിയാണ് സർവീസ് നടത്തിയിരുന്നത്. ഇത് ഇന്ധനനഷ്ടവും അതു പോലെ തന്നെ സമയനഷ്ടം കാരണം കൃത്യസമയത്ത് ഓടാനും വിവിധ സ്ഥലങ്ങളിൽ എത്തിച്ചേരാനും കഴിയാത്ത സാഹചര്യമായി. ഭക്ഷണ സമയമോ, വിശ്രമമോ പോലും കിട്ടാത്ത സ്ഥിതിയാണെന്നാണ് ബസ് ജീവനക്കാർ പറയുന്നത്. ഇക്കാരണത്താലാണ് യാതൊരു സംഘടനയുടെയും ആഹ്വാനവും പിന്തുണയുമില്ലാതെ വാട്സ് ആപ് ആഹ്വാന പ്രകാരം ബസ് ജീവനക്കാർ മിന്നൽ ബസ് സമരം നടത്തിയത്.

മഴക്കാല രോഗങ്ങൾക്കെതിരേ പ്രതിരോധം തുടങ്ങി

ഇരിട്ടി: ഡെങ്കിപ്പനി, മഞ്ഞപ്പിത്തം തുടങ്ങിയ രോഗങ്ങളെ പ്രതിരോധിക്കാൻ വള്ളിത്തോട് കുടുംബാ രോഗ്യ കേന്ദ്രത്തിന്‍റെ നേതൃത്വത്തിൽ വിവിധ വാർഡുകൾ കേന്ദ്രീകരിച്ച് പ്രതിരോധ പ്രവർത്തനങ്ങൾ തുടങ്ങി. പെരുമ്പറമ്പ്, തന്തോട്, പുതുശേരി, കല്ലുമുട്ടി, മാടത്തിൽ, കുന്നോത്ത്, വിളമന, വള്ളിത്തോട്, പായം പ്രദേശങ്ങളിൽ ആരോഗ്യ വകുപ്പ് ഉദ്യോഗസ്ഥർ, ആശമാർ തുടങ്ങിയവരുടെ നേതൃത്വത്തിൽ ബഹുജന പങ്കാളിത്തത്തോടെയാണ് പ്രവർത്തനങ്ങൾ നടത്തിയത്. സ്കൂളുകൾ തുറന്ന സാഹചര്യത്തിൽ സ്കൂളുകളിലും ശുചിത്വപരിശോധനയും, കുടിവെള്ള പരിശോധയും നടത്തി. ഹെൽത്ത് ഇൻസ്‌പെക്ടർ ബിനോജ് സി. കുറ്റ്യാനി, സിജു കേളോത്ത്, അബ്ദുള്ള, ജിതിൻ, സന്ദീപ് എന്നിവർ നേതൃത്വം നല്കി. പനി ഉണ്ടെങ്കിൽ ഉടൻ ഡോക്ടറെ കാണാനും ആവശ്യമായ പരിശോധനകൾ നടത്തി യഥാസമയം ചികിത്സ സ്വീകരിക്കാനും മെഡിക്കൽ ഓഫീസർ ഡോ. നിറ്റു തോമസ് അറിയിച്ചു.

കൊട്ടിയൂർ തീർഥാടനം: ആരോഗ്യവകുപ്പ് മുന്നൊരുക്ക യോഗം ചേർന്നു

കണ്ണൂർ: കൊട്ടിയൂർ വൈശാഖ മഹോത്സവത്തിന് മുന്നോടിയായി തീർഥാടകരുടെയടക്കമുള്ള പൊതു ജനാരോഗ്യ സുരക്ഷ ഉറപ്പു വരുത്തുന്നതിനായുള്ള നടപടികൾ ആരോഗ്യ വകുപ്പ് ഊർജിതമാക്കി. ജില്ലാ മെഡിക്കൽ ഓഫീസിൽ ഡോ. പിയൂഷ് എം. നമ്പൂതിരിപ്പാടിന്‍റെ അധ്യക്ഷതയിൽ പ്രോഗ്രാം ഓഫീസർമാരുടെയും ഹെൽത്ത് ഇൻസ്പെക്ടർമാരുടേയും യോഗം ചേർന്നു. ഉത്സവ സ്ഥലത്തു സ്വീകരിക്കേണ്ട ആരോഗ്യ സുരക്ഷാ നടപടികൾ ചർച്ച ചെയ്തു. ഹെൽത്ത് ഇൻസ്പെക്ടർമാർക്കുള്ള പരിശീലനവും നടന്നു. നോഡൽ ഓഫീസർ ഡോ. കെ.സി. സച്ചിന്‍റെ നേതൃത്വത്തിലുള്ള സംഘം കൊട്ടിയൂർ ക്ഷേത്രം സന്ദർശിച്ചു. ദേവസ്വം എക്‌സിക്യൂട്ടീവ് ഓഫീസർ ഗോകുലുമായി ചർച്ച നടത്തിയ സംഘം ഡിഎംഒയ്ക്ക് റിപ്പോർട്ട് സമർപ്പിക്കും. സംഘത്തിൽ ടെക്‌നിക്കൽ അസിസ്റ്റന്‍റ് എം.ബി. മുരളി, ജില്ലാ എപ്പിഡെമോളജിസ്റ്റ് അഭിഷേക് എന്നിവരും ഉണ്ടായിരുന്നു. ഉത്സവ പ്രദേശത്ത് കൊതുക് ജന്യ രോഗങ്ങൾ നിയന്ത്രിക്കുന്നതിനായി ജില്ലാ വെക്‌ടർ ബോൺ ഡീസീസ് കൺട്രോൾ യൂണിറ്റിന്‍റെയും കൊട്ടിയൂർ പിഎച്ച്സിയുടെയും നേതൃത്വത്തിൽ ഫോഗിംഗ് നടത്തി. ഉത്സവ സ്ഥലത്ത് ആംബുലൻസ്, ലാബ് സൗകര്യങ്ങളോടെയുള്ള മെഡിക്കൽ സൗകര്യം ഒരുക്കും. യോഗത്തിൽ നോഡൽ ഓഫീസർ ഡോ. കെ.സി. സച്ചിൻ, ഡോ. ജി. അശ്വിൻ, ഡോ. അനീറ്റ കെ. ജോസി, ജില്ലാ വിബിഡി കൺട്രോൾ ഓഫീസർ ഡോ. കെ.കെ. ഷിനി, ജില്ലാ ഡപ്യൂട്ടി മാസ് മീഡിയ ഓഫീസർമാരായ എസ്.എസ്. ആർദ്ര, ടി. സുധീഷ്, ടെക്‌നിക്കൽ അസിസ്റ്റന്‍റ് ഇൻ ചാർജ് എം.ബി. മുരളി, സി.പി. സലിം, ജില്ലാ നഴ്‌സിംഗ് ഓഫീസർ ഇൻ ചാർജ് വി.വി. മാലതി, എംസിഎച്ച് ഓഫീസർ ഇൻ ചാർജ് ടി.ജി. പ്രീത, അഡ്മിനിട്രേറ്റീവ് അസിസ്റ്റന്‍റ് ശ്യാം സുന്ദരം ഉത്സവവുമായി ബന്ധപ്പെട്ട ചുമതലയുള്ള ഹെൽത്ത് ഇൻസ്പെക്ടർമാർ എന്നിവർ പങ്കെടുത്തു.

കരിക്കോട്ടക്കരി-പതിനെട്ട് ഏക്കർ റോഡിലെ അപകടക്കുഴികളിൽ പൊറുതിമുട്ടി ജനം

ഇരിട്ടി: കരിക്കോട്ടക്കരി ടൗണിൽ നിന്നും രാജീവ് ദശലക്ഷം കോളനി വഴി പതിനെട്ട് ഏക്കറിലേക്കുള്ള റോഡിലെ അപകടക്കുഴികൾ യാത്രക്കാർക്ക് ഭീഷണിയാകുന്നു. ജൽജീവൻ മിഷന്‍റെ പൈപ്പിടാനായി റോഡിന്‍റെ ഒരു വശത്ത് തീർത്ത കുഴികളാണ് കാലവർഷത്തിൽ മണ്ണൊഴുകിപോയി വാഹങ്ങളെയും കാൽനട യാത്രക്കാരെയും ഒരുപോലെ ബുദ്ധിമുട്ടിലാക്കുന്നത്. വാഹങ്ങൾ സൈഡ് കൊടുക്കുമ്പോൾ ടാറിൽ നിന്നും വെളിയിൽ ഇറക്കുന്ന വാഹനങ്ങൾ കുഴിയിൽ വീണ് അപകടം പതിവാകുകയാണ്. കഴിഞ്ഞ ദിവസം ഗ്യാസ് കയറ്റിവന്ന വാഹനം കുഴിയിൽ താഴ്ന്ന് പോയിരുന്നു. നിരവധി ഇരുചക്രവാഹനങ്ങളും അപകടത്തിൽപ്പെടുന്നുണ്ട്. കുഴിയിൽ വീണ് കാൽനടയാത്രക്കാർക്കും പരിക്ക് പറ്റിയിട്ടുണ്ട്. സ്കൂൾ തുറന്നതോടെ ഇതുവഴി സ്കൂളിലേക്ക് നടന്നെത്തുന്ന കുട്ടികൾ കുഴികളിൽ വീണ് അപകടത്തിൽപെ‌ടാനും സാധ്യതയേറെയാണ്. വാട്ടർ അതോറിറ്റി അധികൃതർ അടിയന്തരമായി വിഷയത്തിൽ ഇടപെട്ട് റോഡിലെ അപകടാവസ്ഥ ഒഴിവാക്കണമെന്നാണ് പ്രദേശവാസികളുടെ ആവശ്യം. റോഡിൽ നിന്നും മണ്ണും ചെളിവെള്ളവും താഴ്ന്ന പ്രദേശത്തെ വീടുകളിലേക്ക് ഒഴുകി എത്തുന്നതായും പരാതി ഉണ്ട്.

ഡയപ്പർ കാമ്പയിന് തുടക്കമായി

കണ്ണൂർ: സമഗ്ര ശിക്ഷാ കേരളം കണ്ണൂർ, ജൂണിയർ ചേംബർ ഇന്‍റർനാഷണൽ എന്നിവയുടെ സംയുക്താഭിമുഖ്യത്തിൽ നടത്തുന്ന ഡയപ്പർ കാമ്പയിനിന്‍റെ ജില്ലാതല ഉദ്ഘാടനം അസിസ്റ്റന്‍റ് കളക്ടർ എഹ്‌തെദ മുഫസിർ നിർവഹിച്ചു. ഗൃഹാധിഷ്ഠിത വിദ്യാഭ്യാസം നടത്തുന്ന ജില്ലയിലെ കുട്ടികൾക്ക് ആവശ്യമായ ഡയപ്പർ ശേഖരിക്കുന്നതിന്‍റെ ഭാഗമായാണ് കാമ്പയിൻ സംഘടിപ്പിക്കുന്നത്. കിടപ്പിലായ കുട്ടികൾക്ക് വീടുകളിലെത്തി വിദ്യാഭ്യാസം നൽകുക എന്നത് അവരുടെ ജീവിതത്തെ തൊട്ടറിയുന്നതിന് തുല്യമാണെന്ന് എഹ്‌തെദ മുഫസിർ പറഞ്ഞു. ആരുമറിയാതെ പോകുന്ന ആവശ്യങ്ങൾ കണ്ടറിഞ്ഞ് അതിനുവേണ്ടി പ്രവർത്തിക്കുന്നവരെ അവർ അഭിനന്ദിച്ചു. കിടപ്പു രോഗികളും ഭിന്നശേഷിക്കാരുമായ നിരവധി വിദ്യാർഥികളാണ് ഡയപ്പർ ഇല്ലാതെ ബുദ്ധിമുട്ടുകൾ അനുഭവിക്കുന്നത്. ദിവസേന ഉപയോഗിക്കുന്ന എട്ട് ഡയപ്പറുകൾക്ക് 4000 രൂപവരെ ചെലവുണ്ട്. സാമ്പത്തികമായി പിന്നാക്കം നിൽക്കുന്ന രക്ഷിതാക്കൾക്ക് ഇത്തരം ചെലവുകൾ ബുദ്ധിമുട്ടേറിയതാണ്. ഇത്തരമൊരു സാഹചര്യത്തിലാണ് ഹാൻഡ് ഓഫ് ഹോപ്പ് എന്ന പേരിൽ എസ്എസ്കെയുടെയും ജെസിഐയുടെയും നേതൃത്വത്തിൽ ഡയപ്പർ ശേഖരണം നടത്തുന്നതെന്ന് എസ്എസ്‌കെ ജില്ലാ പ്രോഗ്രാം ഓഫീസർ ഇ.സി. വിനോദ് പറഞ്ഞു. എസ്എസ്‌കെ ജില്ലാ പ്രോജക്ട് കോ-ഓർഡിനേറ്റർ പി.കെ. സബിത്ത്, വിദ്യാകിരണം കോ-ഓർഡിനേറ്റർ കെ.സി. സുധീർ, സ്‌പെഷൽ എഡ്യുക്കേറ്റർ എൻ.എസ്. ധന്യ, ജെസിഐ ജോയിന്‍റ് ഡയറക്ടർ ഡോ. മേഘ പോത്തൻ, ജില്ലാ ഇൻഫർമേഷൻ ഓഫീസർ പി.പി. വിനീഷ്, ജെസിഐ പ്രതിനിധികളായ സംഗീത അഭയ്, സവിത ഭാസ്‌കർ, മാജിത, സുറുമി, രശ്മി, റിനിഷ, മേഘ എന്നിവർ പ്രസംഗിച്ചു.

ആറളം ഫാം സ്കൂളിന് സമീപം കാട്ടാനക്കൂട്ടം

ഇരിട്ടി: ആറളം ഫാം സ്‌കൂളിന് സമീപത്തെ പൊന്തക്കാടുകളിൽ കാട്ടാനകളെത്തിയത് ഭീതിയും ആശങ്കയും പരത്തി. തിങ്കളാഴ്ച വൈകുന്നേരമാണ് 12 അംഗ സംഘത്തെ കാട്ടാനക്കൂട്ടത്തെ കണ്ടത്. ഇന്നലെ രാവിലെ നാല് ആനകൾ കൂടി സംഘത്തോടൊപ്പം ചേർന്നു. കാട്ടാനക്കൂട്ടം സ്കൂളിനടുത്ത് തന്പടിച്ചതോടെ വനപാലകർ എത്തി സുരക്ഷാ സംവിധാനം ഒരുക്കുകയായിരുന്നു. തുടർന്ന് വിവിധ സംഘങ്ങളായി വനപാലകർ പടക്കം പൊട്ടിച്ചും ശബ്ദമുണ്ടാക്കിയും ആനകളെ ഇവിടെ നിന്നും നീക്കുകയായിരുന്നു. മേഖലയിലെ താമസക്കാർക്ക് മുന്നറിയിപ്പു നൽകാതെ ആനക്കൂട്ടത്തെ വനത്തിലേക്ക് തുരത്താൻ ശ്രമിച്ചാലുള്ള അപകട സാധ്യത കണക്കിലെടുത്ത് തുരത്തൽ ശ്രമം ഉപേക്ഷിക്കുകയായിരുന്നു. ആനക്കൂട്ടത്തെ നിലവിൽ ഫാമിന്‍റെ അധീനതയിലുള്ള കൃഷിയിടങ്ങളോട് ചേർന്നുള്ള കാട്ടിലേക്കാണ് മാറ്റിയത്. ആറളം ഫാമിംഗ് കോർപറേഷന്‍റെ അധീനതയിലുള്ള സ്ഥലത്തോട് ചേർന്നുള്ള സ്കൂളിന് ചുറ്റുമതിൽ ഉണ്ടെങ്കിലും കാട്ടാനക്കൂട്ടം വലിയ ഭീതിയാണ് സൃഷ്ടിച്ചത്. പുനർകൃഷിയുടെ ഭാഗമായി ഫാം സ്‌കൂളിന് സമീപത്തെ റബറും കശുമാവും ഉൾപ്പെടുന്ന തോട്ടം മുറിച്ചുമാറ്റിസ്ഥലം കാട് മൂടിയ നിലയിലാണ്. ഇവിടെയാണ് കാട്ടാനക്കൂട്ടം തന്പടിച്ചത്. തിങ്കളാഴ്ച്ച പുരധിവാസ മേഖലയിലെ ഒന്പതാം ബ്ലോക്കിൽ വളയം ചാലിലെ രാജൻ-ബിന്ദു ദമ്പതികളുടെ വീടിന്‍റെ അടുക്കള ഷെഡ് കാട്ടാന തകർത്തിരുന്നു. ആനയുടെ പിടിയിൽ നിന്നും രാജനും മകനും തലനാരിഴയക്കായിരുന്നു രക്ഷപ്പെട്ടത്. രാജന്‍റെ വീട് ഇരിട്ടി ബ്ലോക്ക് പഞ്ചായത്ത് പ്രസിഡന്‍റ് കെ. വേലായുധൻ, ബ്ലോക്ക് പഞ്ചായത്ത് അംഗം കെ. ശോഭ എന്നിവർ സന്ദർശിച്ചു. കാട്ടിലേക്ക് തുരത്തിയ ആനകൾ ഫാമിൽ തിരിച്ചെത്തുന്നു പലപ്പോഴായി ആറളം ഫാം മേഖലയിൽ നിന്ന് കാട്ടിലേക്ക് തുരത്തിയ ആനകൾ തിരിച്ചു വരുന്നതാണ് ആറളം ഫാം മേഖലയിലുള്ളവർ നേരിടുന്ന പ്രധാന പ്രശ്നം. നിലവിൽ ഫാം മേഖലയിൽ 50 ലധികം കാട്ടാനകളുണ്ടെന്നാണ് താമസക്കാരും ഫാം തൊഴിലാളികളും പറയുന്നത്. വിവിധ ഘട്ടങ്ങളിലായി നേരത്തെ 50ൽ അധികം ആനകളെ കാട്ടിലേക്ക് തുരത്തിയെന്നാണ് വനംവകുപ്പിന്‍റെ റിപ്പോർട്ടിലുള്ളത്. ആനമതിൽ നിർമാണം പാതിവഴിയിൽ നിലച്ചതും വനാതിർത്തിയിലെ സൗരോജ തൂക്കുവേലി തകർന്നതുമെല്ലാമാണ് തുരത്തിയ ആനകൾ തിരിച്ചെത്താൻ കാരണം. സ്‌കൂൾ തുറന്ന സാഹചര്യവും കാലസ്ഥയിൽ ഉണ്ടായ മാറ്റവും കാരണം എല്ലാവിധ സുരക്ഷാ സംവിധാനവും ഒരുക്കിയാൽ മാത്രമെ നിലവിൽ ഫാമിലുള്ള കാട്ടാനകളെ വനത്തിലേക്ക തുരത്തനാകു. ജനവാസ മേഖലയിലും ഫാമിന്‍റെ കൃഷിയിടത്തിലുമായി ആനയ്ക്ക് ചക്ക ഉൾപ്പെടെ ഭക്ഷണ സാധങ്ങൾ ലഭിക്കുന്നതുമാണഅ ആനകൾ ഇവിടെ തന്നെ തന്പടിക്കാൻ കാരണം. കാട്ടാനകൾ കൃഷി നശിപ്പിച്ചത് മൂലം മാത്രമായി 91 കോടിയുടെ നഷ്ടപരിഹാരത്തുക ഫാമിന് ലഭിക്കാനുണ്ട്.

പരിസ്ഥിതി സംരക്ഷണത്തോടൊപ്പം സാധാരണക്കാരുടെ ക്ഷേമവും ഉറപ്പാക്കണം: മാധവ് ഗാഡ്ഗിൽ

കണ്ണൂർ: പരിസ്ഥിതി സംരക്ഷണത്തോടൊപ്പം സാധാരണക്കാരായ മനുഷ്യരുടെ ക്ഷേമവും ഉറപ്പു വരുത്തണമെന്ന് പ്രശസ്ത പരിസ്ഥിതി ശാസ്ത്രഞ്ജൻ ഡോ. മാധവ് ഗാഡ്ഗിൽ. കണ്ണൂർ യൂണിവേഴ്സിറ്റി പരിസ്ഥിതി പഠനവകുപ്പിന്‍റെ ആഭിമുഖ്യത്തിൽ സംഘടിപ്പിക്കുന്ന ത്രിദിന പരിസ്ഥിതിശാസ്ത്ര ദേശീയ സെമിനാർ ഓൺലൈനായി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പ്രകൃതിയിലേക്കുള്ള മനുഷ്യന്‍റെ ഭീകരമായ കടന്നു കയറ്റം നി‍യന്ത്രിക്കപ്പെടണം. അല്ലാത്ത പക്ഷംപ്രത്യാഘാതം അതീവ ഭീകരമായിരിക്കും. പരിസ്ഥിതിയെ സംരക്ഷിച്ചില്ലെങ്കിൽ ഒരു ജീവജാലങ്ങൾക്കും നിലനിൽക്കാനാകില്ലെന്നും അദ്ദേഹം പറഞ്ഞു. സിൻഡിക്കേറ്റംഗം കെ.പി. അനീഷ് അധ്യക്ഷത വഹിച്ചു. പരിസ്ഥിതി പഠന വകുപ്പ് മേധാവി കെ. മനോജ്, ഡോ. ഖലീൽ ചൊവ്വ, ഡോ. കുര്യൻ പുന്ന്യൻ, പ്രഫ. സലോം, ഡോ. പ്രദീപൻ പെരിയാട്ട് എന്നിവർ വിഷയാവതരണം നടത്തി. വിവിധ സെഷനുകളിൽ ഇന്ത്യയിലെ പ്രമുഖ പരിസ്ഥിതി ശാസ്ത്രജ്ഞർ ഉൾപ്പടെയുള്ളവർ വിഷയാവതരണം നടത്തും. ക്ഷണിക്കപ്പെട്ട ഗവഷേകർ അവരുടെ കണ്ടെത്തലുകൾ അവതരിപ്പിക്കുകയും ചെയ്യും. സെമിനാർ നാളെ സമാപിക്കും.

ഒഡീഷയിൽ വൈദികർക്കു നേരെയുള്ള അക്രമം; കെഎൽസിഎ പ്രതിഷേധിച്ചു

കണ്ണൂർ: വൈദികർക്കു നേരെ ഒഡീഷയിൽ നടന്ന ആക്രമണത്തിൽ കെഎൽസിഎ കണ്ണൂർ രൂപത സമിതി പ്രതിഷേധിച്ചു. ഭരണഘടന ഉറപ്പുനൽകുന്ന മതസ്വാതന്ത്ര്യത്തിന്‍റെ മേലുള്ള കടന്നുകയറ്റമാണ് ഇന്ത്യയിൽ ഉടനീളം നടത്തുന്നത്. മതേതര മൂല്യങ്ങളെ ഉയർത്തിപ്പിടിക്കുന്ന ഭാരതത്തിൽ ഇത് ഒറ്റപ്പെട്ട സംഭവമല്ല. കുറെ നാളുകളായി ഇത്തരക്കാർക്ക് മൗനാനുവാദം നല്കുകയാണ് കേന്ദ്രസർക്കാർ ചെയ്യുന്നത്. മാസങ്ങൾക്ക് മുമ്പാണ് സമാനമായ സംഭവം മധ്യപ്രദേ ശിലും അരങ്ങേറിത്. ക്രൈസ്തവ മൂല്യങ്ങൾ എന്താണെന്ന് അറിയാത്തവരാണ് ഇത്തരത്തിലുള്ള കാടത്തരങ്ങൾ കാട്ടിക്കൂട്ടുന്നതെന്ന് കെഎൽസിഎ കണ്ണൂർ രൂപത സമിതി ചൂണ്ടിക്കാട്ടി. സ്നേഹം, ക്ഷമ, സമാധാനം എന്നീ മൂല്യങ്ങൾ ക്രൈസ്തവ സഭ ഉയർത്തിപ്പിടിക്കുന്നുവെന്ന് കരുതി വിശ്വാസം വ്രണപ്പെടുത്താൻ നോക്കിയാൽ കൈയും കെട്ടി നോക്കിയിരിക്കില്ലെന്നു കെഎൽസിഎ മുന്നറിയിപ്പു നല്കി. കെഎൽസിഎ സംസ്ഥാന ട്രഷറർ രതീഷ് ആന്‍റണി യോഗം ഉദ്ഘാടനം ചെയ്തു. കണ്ണൂർ രൂപത പ്രസിഡന്‍റ് ഗോഡ്സൺ ഡിക്രൂസ് അധ്യക്ഷത വഹിച്ചു. ഫാ. മാർട്ടിൻ രായപ്പൻ, ആന്‍റണി നൊറോണ, ജോൺ ബാബു കോളയാട്, ശ്രീജൻ ഫ്രാൻസിസ്, കെ.എച്ച്. ജോൺ, ക്രിസ്റ്റഫർ കല്ലറക്കൽ, ഫ്രാൻസിസ് ജെ. അലക്സ്, റിക്സൺ ജോസഫ്, ലെസ്ലി ഫെർണാണ്ടസ്, എലിസബത്ത് കുന്നോത്ത്, പ്രീത, റീജ സ്റ്റീഫൻ, ആന്‍റോ തലശേരി, ബർണാർഡ് താവം എന്നിവർ പ്രസംഗിച്ചു.

വാടക ക്വാർട്ടേഴ്സിൽ മയക്കുമരുന്നും ആയുധങ്ങളും; വീട്ടമ്മ അറസ്റ്റിൽ

കണ്ണൂർ: കാപ്പാ കേസ് പ്രതിയെ പിടികൂടാനെത്തിയ പോലീസ് സംഘം വാടക ക്വാർട്ടേഴ്സിൽ നിന്ന് എംഡിഎംഎയും വടിവാളും നഞ്ചക്കുമായി യുവതിയെ അറസ്റ്റ് ചെയ്തു. തയ്യിൽ സ്വദേശിനിയും ചാലാ‌ട് മണലിൽ താമസക്കാരിയുമായ സി.സീനത്തിനെയാണ്(48) ടൗൺ സിഐ ശ്രീജിത്ത് കൊടേരിയുടെ നേതൃത്വത്തിൽ എസ്ഐ ദീപ്തിയും സംഘവും അറസ്റ്റ് ചെയ്തത്. കണ്ണൂർ മണലിലുള്ള ഷഹദ് എന്നയാൾ താമസിക്കുന്ന വാടക കെട്ടിടത്തിൽ കാപ്പാ കേസിൽ പിടികിട്ടാപ്പുള്ളിയായ പട്ടറത്ത് റഹീമും കൂ‌ട്ടാളികളും താമസിക്കുന്നുണ്ടെന്ന രഹസ്യവിവരത്തിന്‍റെ അടിസ്ഥാനത്തിലായിരുന്നു പോലീസ് പരിശോധന. പോലീസിനെ കണ്ടപ്പോൾ ഷഹദിന്‍റെ ഉമ്മ സീനത്ത് പരുങ്ങുന്നത് കണ്ടതിനെ തുടർന്ന് ചോദ്യം ചെയ്യുകയും പരിശോധന നടത്തിയപ്പോൾ കൈയിൽ ഒളിപ്പിച്ച് പിടിച്ച 1.40 ഗ്രാം എംഡിഎംഎ പിടിച്ചെടുക്കുകയുമായിരുന്നു. തുടർന്ന് നടത്തിയ പരിശോധനയിലാണ് ഒരു മുറിയിലെ കട്ടിലിന്‍റെ അടിയിൽ നിന്ന് വടിവാളും നഞ്ചക്കും കണ്ടെടുത്തത്. ക്വാർട്ടേഴ്സിൽ പരിശോധന നടത്തി പോലീസ് ഇറങ്ങവെ സ്കൂട്ടറിൽ വന്ന സീനത്തിന്‍റെ മകളുടെ ഭർത്താവിൽ നിന്ന് കഞ്ചാവ് 3.45 ഗ്രാം കണ്ടെടുത്തു. ഭാര്യയെ അവിടെ ഇറക്കവെ പോലീസിനെ കണ്ടതോടെ രക്ഷപ്പെടാൻ ശ്രമിച്ച തയ്യിൽ സ്വദേശിയായ ഷാഹിദ് അഫ്നാസിനെയാണ്(25) പോലീസ് പിടികൂടിയത്. പ്രതികൾക്ക് നഗരത്തിലെ മയക്ക്മരുന്ന് ശ്യംഖലയുമായി ബന്ധമുള്ളതായി സംശയിക്കുന്നതായി പോലീസ് പറഞ്ഞു. എസ്ഐ അനുരൂപ്, ഉദ്യോഗസ്ഥരായ അഫ്സീർ, അഖിൽ വിനീത്, മിനി, സൗമ്യ, ഡാൻസാഫ് ടീമംഗങ്ങളായ സുജിത്ത്, പ്രവീഷ് , സിസിൽ , മഹേഷ് തുടങ്ങിയവർ പ്രതികളെ പിടികൂടിയ സംഘത്തിലുണ്ടായിരുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]