വേറിട്ട പുസ്തകപരിചയ മത്സരവുമായി പിആര്‍ഡി
1568429
Wednesday, June 18, 2025 11:30 PM IST
കോട്ടയം: വായന പക്ഷാചരണത്തോടനുബന്ധിച്ച് പുസ്തക പരേഡ് - പ്രിയ പുസ്തകം, എന്‍റെ വാക്കില്‍ പരിപാടിയുമായി വിവര - പൊതുജനസമ്പര്‍ക്ക വകുപ്പ്. ജില്ലാ ഇന്‍ഫര്‍മേഷന്‍ ഓഫീസിന്‍റെ ഔദ്യോഗിക ഫേസ്ബുക്ക് പേജി വഴി സംഘടിപ്പിക്കുന്ന പുസ്തക പരേഡ് മത്സരത്തില്‍ ഹൈസ്‌കൂള്‍, ഹയര്‍ സെക്കന്‍ഡറി വിദ്യാര്‍ഥികള്‍ക്കും കോളജ് വിദ്യാര്‍ഥികള്‍ക്കും പങ്കെടുക്കാം.
പ്രിയപ്പെട്ട പുസ്തകത്തെ അവതരിപ്പിക്കുക മാത്രമാണ് ചെയ്യേണ്ടത്. എന്തുകൊണ്ടാണ് ഈ പുസ്തകത്തെ ഇഷ്ടപ്പെടുന്നത്, പുസ്തകത്തെപ്പറ്റി പറയുന്നത് എന്നു വ്യക്തമാക്കുന്ന 100 വാക്കില്‍ കവിയാത്ത കുറിപ്പും പുസ്തകത്തിനൊപ്പം നില്‍ക്കുന്ന മത്സരാര്‍ഥിയുടെ വ്യക്തമായ ചിത്രവും 9847998894 എന്ന വാട്സ് ആപ്പ് നമ്പറില്‍ അയച്ചുനല്‍കണം.
പുസ്തകത്തിന്‍റെ പേര്, രചയിതാവിന്‍റെ പേര്, ഏതു വിഭാഗത്തില്‍ വരുന്ന പുസ്തകമാണ് (കഥ, നോവല്‍, ജീവചരിത്രം, പഠനം... എന്നിങ്ങനെ) എന്നീ വിവരങ്ങളും മത്സരാര്‍ഥിയുടെ പേര്, വയസ്, വിലാസം, സ്‌കൂള്‍, ക്ലാസ്, ബന്ധപ്പെടാനുള്ള ഫോണ്‍നമ്പര്‍ എന്നിവയും കുറിപ്പിനൊപ്പം നല്‍കണം.
ഇന്നുമുതല്‍ ജൂലൈ ഒന്നുവരെ ഈ മത്സരത്തില്‍ പങ്കെടുക്കാം. എന്‍ട്രികളില്‍ പ്രസിദ്ധീകരണയോഗ്യമായവ ജില്ലാ ഇന്‍ഫര്‍മേഷന്‍ ഓഫീസിന്‍റെ ഫേസ്ബുക്ക് പേജില്‍ പുസ്തകവുമായുള്ള മത്സരാര്‍ഥിയുടെ ചിത്രം സഹിതം പോസ്റ്റ് ചെയ്യും. സ്‌കൂള്‍ വിഭാഗത്തിലും (ഹൈസ്‌കൂള്‍, ഹയര്‍ സെക്കന്‍ഡറി)കോളജ് വിഭാഗത്തിലും ഏറ്റവും മികച്ച മൂന്നു കുറിപ്പുകള്‍ക്ക് ആകര്‍ഷകമായ സമ്മാനങ്ങളും നല്‍കും.
മേല്‍പ്പറഞ്ഞ രീതിയില്‍ പൊതുജനങ്ങള്‍ക്കും പുസ്തകപരേഡില്‍ പങ്കാളികളാകാം. ഈ വിഭാഗത്തില്‍ മത്സരമില്ല. പുസ്തകത്തെക്കുറിച്ചുള്ള കുറിപ്പും പുസ്തകവുമായുള്ള ചിത്രവും പേര്, വയസ്, വിലാസം, തൊഴില്‍/പ്രവൃത്തി മേഖല, ഫോണ്‍നമ്പര്‍ (വാട്‌സ്ആപ്പ്) എന്നിവ സഹിതം ജില്ലാ ഇന്‍ഫര്‍മേഷന്‍ ഓഫീസിന്‍റെ ഫേസ്ബുക്ക് മെസഞ്ചറിലൂടെ നല്‍കുക. ജൂലൈ ഏഴുവരെ എന്‍ട്രികള്‍ സ്വീകരിക്കും.
ഏതു വിഭാഗത്തില്‍പ്പെട്ടവര്‍ക്കും ഏതു പ്രായക്കാര്‍ക്കും പങ്കെടുക്കാം. ജില്ലാ ഇന്‍ഫര്‍മേഷന്‍ ഓഫീസിന്‍റെ ഫേസ്ബുക്ക് പേജ് ഫോളോ ചെയ്യുക. ലിങ്ക്: https://www.facebook.com/diokottayam, 0481 2562558.