ADVERTISEMENT

ADVERTISEMENT

പെൻഷൻകാരുടെ ആനുകൂല്യങ്ങൾ അനുവദിക്കണം: കെഎസ്എസ്പിഎ

ആലത്തൂർ: പെൻഷൻകാരുടെ ആനുകൂല്യങ്ങൾ കവർന്നെടുക്കുന്ന സർക്കാർ നടപടിയിൽ കെഎസ്എസ്പിഎ കാവശേരി മണ്ഡലം കമ്മിറ്റി വാർഷിക പൊതുയോഗം പ്രതിഷേധിച്ചു.

സംസ്ഥാന കമ്മിറ്റി അംഗം എ. ഗോപിനാഥൻ യോഗം ഉദ്ഘാടനം ചെയ്തു. കെ.കെ. രാധാകൃഷ്ണൻ അധ്യക്ഷത വഹിച്ചു. പി. കേശവദാസ്, എ.എസ്. സാബു, പ്രസാദ് വർക്കി, ഇ.എസ്.എം. ഹനീഫ, കെ. ചാത്തൻ, എസ്. സുരേഷ്കുമാർ, എം. സഹദേവൻ, കെ.യു. ജയകുമാർ, കെ.കെ. ജയകൃഷ്ണൻ, ആർ. ഗണേശൻ എന്നിവർ പ്രസംഗിച്ചു. ഭാരവാഹികളായി ആർ. ഗണേശൻ- പ്രസിഡന്‍റ്, എസ്. സുരേഷ്കുമാർ-സെക്രട്ടറി, കെ.യു. ജയകുമാർ- ട്രഷറർ എന്നിവരെ തെരഞ്ഞെടുത്തു.

ADVERTISEMENT

ജില്ലാ ക്ഷീരകർഷകസംഗമത്തിന് തുടക്കം: പൊതുസമ്മേളനം ഇന്ന്

പാലക്കാട്: ക്ഷീരവികസനവകുപ്പിന്‍റെ വിജ്ഞാന വ്യാപന പ്രവർത്തനങ്ങളുടെ ഭാഗമായി ജില്ലാ ക്ഷീരകർഷകസംഗമത്തിന് തുടക്കമായി. ജില്ലയിലെ ക്ഷീരസഹകരണ സംഘങ്ങളുടെയും വകുപ്പിന്‍റെയും സംയുക്താഭിമുഖ്യത്തിൽ കൊല്ലങ്കോട് ബ്ലോക്ക് പഞ്ചായത്തിന്‍റെ സഹകരണത്തോടെയാണ് സംഗമം നടത്തുന്നത്. രണ്ടുദിവസമായി നടക്കുന്ന സംഗമം പെരുവെന്പ് ക്ഷീര വ്യവസായ സഹകരണ സംഘത്തിൽ കൊല്ലങ്കോട് ബ്ലോക്ക് പഞ്ചായത്ത് പ്രസിഡന്‍റ് ആർ. ചിന്നക്കുട്ടൻ പതാക ഉയർത്തി. പെരുവെന്പ് ഗ്രാമപഞ്ചായത്ത് ഗ്രൗണ്ടിൽ നടന്ന കന്നുകാലി പ്രദർശനത്തിന്‍റെ ഉദ്ഘാടനം പെരുവെന്പ് ഗ്രാമപഞ്ചായത്ത് പ്രസിഡന്‍റ് എസ്. ഹംസത്ത് ഉദ്ഘാടനം ചെയ്തു. ഡയറി എക്സ്പോയുടെ സന്ദർശന ഉദ്ഘാടനം ജില്ലാ കളക്ടർ എം. എസ്. മാധവിക്കുട്ടി നിർവഹിച്ചു. കൂടാതെ വിവിധ വിഷയങ്ങളിൽ സെമിനാറുകൾ നടത്തി. ആലത്തൂർ ഡയറി ഫാമിലെ നൂതന പ്രവണതകൾ ആയ ലൂസ് ഹൗസിംഗ് സിസ്റ്റം, തൊഴുത്തിൽ സ്ഥാപിക്കുന്ന ആധുനിക സംവിധാനങ്ങൾ, കറവ പശു പരിപാലനം തുടങ്ങി വിവിധ വിഷയങ്ങളിലാണ് സെമിനാറുകൾ നടത്തിയത്. തുടർന്ന് ‘നാട്ടിലെ ശാസ്ത്രം’ പരിപാടിയിൽ മഞ്ചക്കുന്ന് അന്നപൂർണി ഫാമിലെ ശങ്കരനാരായണൻ, ക്ഷീര വികസനം പ്രായോഗിക നിർദേശങ്ങൾ എന്ന വിഷയത്തിൽ പ്രത്യേക വിഷയാവതരണം നടത്തി.

അളുവശേരി-പോത്തുണ്ടി റോഡ് പൊളിച്ച് ആറുമാസമായിട്ടും ഗതാഗതയോഗ്യമാക്കിയില്ല

നെന്മാറ: അളുവശേരി - പോത്തുണ്ടി റോഡ് നവീകരണത്തിനായി പൊളിച്ചിട്ട് ആറുമാസം കഴിഞ്ഞു. പ്രധാനമന്ത്രി സഡക് യോജന പ്രകാരം നവീകരിച്ച് പുനർനിർമിക്കുന്നതിനായാണ് കഴിഞ്ഞ മാർച്ച് മാസത്തിൽ റോഡിന്‍റെ ഉപരിതലം പൊളിച്ചു ഇളക്കിമറിച്ചത്. നവീകരണ പ്രവൃത്തികൾ ഉടൻ നടക്കുമെന്ന് പ്രതീക്ഷയിലായിരുന്നു നാട്ടുകാർ. ആറുമാസവും വർഷകാലവും കഴിഞ്ഞിട്ടും പണിപൂർത്തിയാകാത്തതിനാൽ സ്കൂൾ ബസുകൾ ഉൾപ്പെടെയുള്ള വാഹനങ്ങൾക്ക് സഞ്ചരിക്കാൻ കഴിയാത്ത സ്ഥിതിയാണ്. ഇതുവഴി സർവീസ് നടത്തിയിരുന്ന ബസും റോഡ് തകരാറിലായതോടെ സർവീസ് നിർത്തിവെച്ചു. ആളുവശേരിയിൽ നിന്നും ചേരുംകാട്, കൊടുവാൾ പാറ, അയർപ്പള്ളം, അമ്പൂരിപ്പതി, തിരുത്തമ്പാടം വഴി പോത്തുണ്ടിയിൽ എത്തുന്ന പ്രധാനറോഡാണിത്. രണ്ടുവർഷം മുമ്പ് പോത്തുണ്ടി സമഗ്ര കുടിവെള്ള പദ്ധതിയുടെ പൈപ്പ് ലൈൻ സ്ഥാപിച്ചതോടെയാണ് റോഡ് തകർന്നത്. ഇതേതുടർന്നാണ് കേന്ദ്രസർക്കാരിന്‍റെ പ്രധാനമന്ത്രി സഡക്ക് യോജനയിൽ ഉൾപ്പെടുത്തി നവീകരണത്തിന് പദ്ധതിയിട്ടത്. ഇതോടെ ഈ മേഖലയിലുള്ളവർക്ക് നെന്മാറയിലേക്ക് പോത്തുണ്ടിയിലേക്കും യാത്രാസൗകര്യം ഇല്ലാതായി. പൊളിച്ചിട്ട റോഡ് ഉടൻ നന്നാക്കി ഗതാഗതയോഗ്യമാക്കണമെന്ന് പ്രദേശവാസികൾ ആവശ്യപ്പെടുന്നു.

വന്യജീവി ആക്രമണം : ജില്ലാതല കോ-ഓർഡിനേഷൻ കമ്മിറ്റി യോഗം ചേർന്നു

പാലക്കാട്: ജില്ലയിലെ വന്യജീവി ആക്രമണം ലഘൂകരിക്കുന്നതിനുള്ള 45 ദിവസത്തെ തീവ്രയജ്ഞ പരിപാടിയുമായി ബന്ധപ്പെട്ട നടപടികൾ ചർച്ച ചെയ്യാനായി ജില്ലാതല കോ-ഓർഡിനേഷൻ കമ്മിറ്റി യോഗം ചേർന്നു. യോഗത്തിൽ ജില്ലാ കളക്ടർ എം.എസ്. മാധവിക്കുട്ടി അധ്യക്ഷയായി. വന്യമൃഗ ആക്രമണ ഭീഷണിയുള്ള സ്ഥലങ്ങളിൽ ട്രൈബൽ പ്രമോട്ടർമാർ വഴി പൊതുജനങ്ങൾക്ക് മുന്നറിയിപ്പും ബോധവത്കരണവും നൽകാൻ യോഗത്തിൽ നിർദേശം നൽകി. വന്യജീവി ആക്രമണം ലഘൂകരിക്കുന്നതിനായി ബന്ധപ്പെട്ട ഒരോ വകുപ്പുകളും നോഡൽ ഓഫീസറെ നിയമിക്കണം. വന്യജീവി ആക്രമണമുള്ള സ്ഥലങ്ങൾ കണ്ടെത്തി റിപ്പോർട്ട് ചെയ്യാനായി ഫോറസ്റ്റ്, എൽഎസ്ജിഡി തുടങ്ങിയ വകുപ്പുകൾക്ക് നിർദേശം നൽകി. ആന്‍റിവെനം ഇല്ലാത്ത പിഎച്ച്സി കളെ കണ്ടെത്തി അവ ലഭ്യമാക്കാൻ ആരോഗ്യവകുപ്പിന് നിർദേശം നൽകി. വാച്ചർമാർ ഇല്ലാത്ത സ്ഥലങ്ങളിൽ അവരെ നിയമിക്കാനും വനംവകുപ്പിന് നിർദേശം നൽകി. ജില്ലാ കളക്ടറുടെ ചേംബറിൽ നടന്ന യോഗത്തിൽ വിവിധ വകുപ്പ് ഉദ്യോഗസ്ഥർ പങ്കെടുത്തു.

പിഎസ്എസ്പി കെയർ വൈബ്സ് സംഘടിപ്പിച്ചു

കൽക്കണ്ടി: പീപ്പിൾസ് സർവീസ് സൊസൈറ്റിയുടെ ജില്ലാ വിമൻസ് ഫെഡറേഷന്‍റെ നേതൃത്വത്തിൽ ഗാന്ധിജയന്തി വയോജന ദിനാചരണത്തിന്‍റെ ഭാഗമായി അട്ടപ്പാടി കൽക്കണ്ടിയിൽ പ്രവർത്തിക്കുന്ന അസീസി നിലയത്തിൽ കെയർ വൈബ്സ് സംഘടിപ്പിച്ചു. അനാഥരായ 36 ഓളം മാനസികരോഗികളായ സ്ത്രീകൾ താമസിക്കുന്ന ഭവനത്തിൽ നടത്തിയ പരിപാടി പിഎസ്എസ്പി അസി. ഡയറക്ടർ ഫാ. ജോണ്‍സണ്‍ വലിയപാടത്ത് ഉദ്ഘാടനം ചെയ്തു. ജില്ലാ വിമൻസ്ഫെഡ് പ്രസിഡന്‍റ് മഞ്ജു ബിനു അധ്യക്ഷത വഹിച്ച പരിപാടിയിൽ ഫാ. ജോസ് ചെനിയറ സന്ദേശം നല്കി. കലാപരിപാടികൾ, സമ്മാനദാനം, സനേഹവിരുന്ന്, സോപ്പ്, സോപ്പുല്പന്നങ്ങൾ വിതരണം, ധനസഹായം നൽകൽ എന്നിവയുടെ അകന്പടിയോടെയാണ് പ്രോഗ്രാം നടത്തിയത്. ജില്ലാ വിമണ്‍സ് ഫെഡറേഷൻ കോ-ഓർഡിനേറ്റർ കെ.എൽ. അരുണ്‍ സ്വാഗതവും സെക്രട്ടറി ശകുന്തള രമേഷ് നന്ദിയും പറഞ്ഞു. സൂരജ്, എസ്ബിഐ അഗളി ശാഖ മാനേജർ ജോയൽ, അസിസ്റ്റന്‍റ് മാനേജർ ഈശ്വരി രാജൻ, ബ്ലോക്ക് മെംബർ എന്നിവർ ആശംസകൾ അർപ്പിച്ചു. പിഎസ്എസ്പി ആനിമേറ്റർമാർ, ജില്ലാ വിമൻസ് ഫെഡ് ലീഡേഴ്സ് എന്നിവർ പരിപാടിക്ക് നേതൃത്വം നല്കി.

വിസ്മയക്കാഴ്ചകളുടെ വർണക്കൂടാരമൊരുക്കി മംഗലം ഗവ. എൽപി സ്കൂൾ

വടക്കഞ്ചേരി: പിഞ്ചുകുട്ടികളുടെ ഉല്ലാസഭൂമികയായി മാറുകയാണ് സർക്കാർ എൽപി സ്കൂളുകൾ. കുട്ടികളുടെ മാനസിക, ശാരീരിക, വൈജ്ഞാനിക, വൈകാരിക മേഖലകളുടെ വികാസത്തിനായുള്ള വർണക്കാഴ്ചകളാണ് ഇതിനായി ഒരുക്കുന്നത്. വർണ ക്കൂടാരം എന്ന് പേരിട്ടിട്ടുള്ള ഈ പദ്ധതിയുടെ പേരുപോലെതന്നെയാണ് ഇപ്പോൾ സർക്കാർ പ്രീ പ്രൈമറി സ്കൂളുകളുടെ ഭൗതിക സാഹചര്യങ്ങളും. കാട്ടരുവിയും തോടും വ്യു പോയിന്‍റും ആമ്പൽകുളവും കളി ഉപകരണങ്ങളും വിവിധ ഇടങ്ങളിലെ വൈജ്ഞാനിക മേഖലകളുമായി വിസ്മയപ്പെടുത്തുന്നതാണ് സ്കൂൾമുറ്റവും ക്ലാസ് മുറികളും. ഭാഷായിടം, ഗണിതയിടം, വരയിടം, കളിയിടം, ഇ - ഇടം, ശാസ്ത്രയിടം, നിർമാണയിടം, കരകൗശലയിടം, ഹരിതോദ്യാനം തുടങ്ങി 13 ഇടങ്ങളായാണ് വർണക്കൂടാരം സജ്ജമാക്കുന്നത്. സ്കൂളിലെ ഏതെങ്കിലും അധ്യാപകനെ ഇതിനായി കണ്ടെത്തി പരിശീലനം നൽകും. ഈ അധ്യാപകന്‍റെ നേതൃത്വത്തിൽ ഈ മേഖലയിൽ പ്രാവീണ്യമുള്ള തൊഴിലാളികളെ വച്ചാണ് പ്രവൃത്തികൾ നടത്തുന്നത്. മംഗലം ഗവ. എൽപി സ്കൂളിൽ പത്ത് ലക്ഷം രൂപ ചെലവഴിച്ചാണ് വർണക്കൂടാരം സജ്ജമായിട്ടുള്ളത്. പി.വി. ഷിബി ടീച്ചറുടെ നേതൃത്വത്തിലായിരുന്നു പ്രവർത്തനങ്ങൾ. പ്രധാനാധ്യാപിക ബി. മല്ലിക, മറ്റു അധ്യാപകരും അനധ്യാപകരുമായ ബാബു വർഗീസ്, കെ. ശ്രീദേവി, കോ-ഓർഡിനേറ്റർ ജീന കബീർ, റഹ്മത്ത്, നീതു, അബ്ദുൾ സലാം, ഫൗസിയ, സരിത, രാധ, ബിന്ദു രമേഷ്, പിടിഎ പ്രസിഡന്‍റ് കെ. ആർ. സുരേഷ്, എസ്എംസി കൺവീനർ കെ. ഗോവിന്ദൻ, സ്കൂൾ ലീഡർ എസ്. ശ്രീനാഥ് തുടങ്ങിയവരുടെ മേൽനോട്ടവും ഇടപെടലുകളുമുണ്ട് വർണക്കൂടാരത്തിനു പിന്നിൽ. വർണക്കൂടാരത്തിന്‍റെ ഉദ്ഘാടനം നാളെ രാവിലെ ഒമ്പതരക്ക് പി.പി. സുമോദ് എംഎൽഎ നിർവഹിക്കും. പഞ്ചായത്ത് പ്രസിഡന്‍റ് ലിസി സുരേഷ് അധ്യക്ഷത വഹിക്കും.

പ്രതിഷേധമാർച്ചിനിടെ ബസ് തട്ടി കോൺഗ്രസ് നേതാവിനു പരിക്ക്

വടക്കഞ്ചേരി: വണ്ടാഴിയിൽ പ്രതിഷേധ മാർച്ചിനിടെ സ്വകാര്യ ബസ് തട്ടി കോൺഗ്രസ് നേതാവിന് പരിക്കേറ്റു. പ്രകോപിതരായ പ്രവർത്തകർ ബസിന്‍റെ മുൻഭാഗത്തെ ചില്ല് തകർത്തു. സംഭവത്തിൽ ബസ് ഡ്രൈവർ ചിറ്റിലഞ്ചേരി സ്വദേശി വിജയനും (45) മർദനമേറ്റു. കോൺഗ്രസ് ബ്ലോക്ക് സെക്രട്ടറി പി.കെ. പ്രവീണി (34) ന്‍റെ കൈക്കാണ് ബസ് തട്ടി പരിക്കേറ്റത്. ഇരുവരെയും ആശുപത്രിയിൽ പ്രവേശിപ്പിച്ചു. ഇന്നലെ രാവിലെ പതിനൊന്നോടെ മുടപ്പല്ലൂർ ഗവ. ഹൈസ്കൂളിന്‍റെ മെയിൻ റോഡിലേക്കുള്ള ചെറിയ ഗേറ്റിനടുത്തുവച്ചായിരുന്നു സംഭവം. വടക്കഞ്ചേരി പോലീസ് എത്തി സ്ഥിതിഗതികൾ ശാന്തമാക്കി. ഗോവിന്ദാപുരത്തുനിന്നും തൃശൂരിലേക്ക് പോയിരുന്ന സ്വകാര്യബസാണ് പ്രകടനത്തിനിടെ കയറിവന്ന് അപകടമുണ്ടാക്കിയത്. വണ്ടാഴി പഞ്ചായത്തിലെ അഴിമതിക്കും വികസന മുരടിപ്പിനുമെതിരെയായിരുന്നു കോൺഗ്രസ് മണ്ഡലം കമ്മിറ്റിയുടെ നേതൃത്വത്തിൽ പഞ്ചായത്ത്‌ ഓഫീസിലേക്ക് മാർച്ച്‌ സംഘടിപ്പിച്ചത്. ഡിസിസി പ്രസിഡന്‍റ് എ. തങ്കപ്പൻ സമരം ഉദ്ഘാടനം ചെയ്തു. മണ്ഡലം പ്രസിഡന്‍റ് കെ.എം. ശശീന്ദ്രൻ അധ്യക്ഷത വഹിച്ചു. കെപിസിസി ജനറൽ സെക്രട്ടറി സി. ചന്ദ്രൻ മുഖ്യപ്രഭാഷണം നടത്തി. യൂത്ത് കോൺഗ്രസ്‌ മുൻ വൈസ് പ്രസിഡന്‍റ് പ്രദീപ്‌ നെന്മാറ, ബ്ലോക്ക്‌ വൈസ് പ്രസിഡന്‍റുുമാരായ സി. അരവിന്ദാക്ഷൻ മാസ്റ്റർ, എൻ. അശോകൻ മാസ്റ്റർ, ബ്ലോക്ക്‌ സെക്രട്ടറി ഡിനോയ് കോമ്പാറ, വി. മനോജ്‌, എസ്. ലാലു പ്രസംഗിച്ചു.

പാലക്കാട് ഉപജില്ലാ കായികമേളയ്ക്കു തുടക്കം

പാലക്കാട്: ഉപജില്ലാ കായികമേള മെഡിക്കൽ കോളജ് മൈതാനത്ത് ആരംഭിച്ചു. കായികമേള ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സണ്‍ എ. ഷാബിറ ഉദ്ഘാടനം ചെയ്തു. കേരള അത്‌ലറ്റിക് അസോസിയേഷൻ വൈസ് പ്രസിഡന്‍റ് ഹരിദാസ് വിശിഷ്ടാതിഥി ആയി. ഉപജില്ല എഇഒ രമേഷ് പാറപ്പുറത്ത്, വി. ഗംഗാധരൻ, ആർ. സത്യനാഥൻ, എ.എസ്. അബ്ദുൾസലാം, ലിന്‍റോ വേങ്ങശേരി, എസ്. ഫിറോസ്, എം.കെ. സൈഫുള്ള, ഹരീഷ്, സി. പ്രീത എന്നിവർ പ്രസംഗിച്ചു. 1800 വിദ്യാർഥികൾ മേളയിൽ മത്സരിക്കും.

ജില്ലയിൽ 1.93 ലക്ഷം കുട്ടികൾക്കു തുള്ളിമരുന്ന് നൽകും

പാലക്കാട്: പോളിയോ രോഗത്തെ ഇല്ലാതാക്കാനായി 12ന് രാജ്യത്തുടനീളം നടക്കുന്ന പൾസ് പോളിയോ ഇമ്യൂണൈസേഷൻ പരിപാടിക്ക് ജില്ലയിൽ ക്രമീകരണങ്ങൾ പൂർത്തിയായി. ജില്ലയിൽ അഞ്ചു വയസിൽ താഴെയുള്ള 1,92,960 കുട്ടികൾക്ക് പോളിയോ പ്രതിരോധ തുള്ളിമരുന്ന് നൽകും. 2157 ബൂത്തുകളിലാണ് സൗകര്യം ഒരുക്കിയിരിക്കുന്നത്. 1,92,597 കുട്ടികൾക്കും 363 അതിഥി തൊഴിലാളികളുടെ കുട്ടികൾക്കും തുള്ളിമരുന്ന് ഉറപ്പാക്കും.സബ് നാഷണൽ ഇമ്യൂണൈസേഷൻ ഡേ യുടെ ഭാഗമായി രാവിലെ എട്ട് മുതൽ വൈകുന്നേരം അഞ്ച് വരെയാണ് പോളിയോ പ്രതിരോധ തുള്ളിമരുന്ന് വിതരണം. ആരോഗ്യ കേന്ദ്രങ്ങൾ, അങ്കണവാടികൾ, സ്കൂളുകൾ, ബസ്‌സ്റ്റാന്‍ഡുകൾ, റെയിൽവേ സ്റ്റേഷനുകൾ തുടങ്ങി കുട്ടികൾ വരാൻ സാധ്യതയുള്ള എല്ലാ പൊതു ഇടങ്ങളിലും ബൂത്തുകൾ പ്രവർത്തിക്കും. കൂടാതെ, അതിഥി തൊഴിലാളികളുടെ കുട്ടികൾക്കായി മൊബൈൽ ബൂത്തുകൾ ഉൾപ്പെടെയുള്ള പ്രത്യേക സജ്ജീകരണങ്ങളും ഒരുക്കിയിട്ടുണ്ട്. പരിശീലനം ലഭിച്ച ആരോഗ്യ പ്രവർത്തകരും വോളന്‍റിയർമാരുമാണ് തുള്ളിമരുന്ന് വിതരണത്തിന് നേതൃത്വം നൽകുക. പൾസ് പോളിയോ ദിനത്തിൽ വാക്സിൻ ലഭിക്കാത്ത കുട്ടികളെ കണ്ടെത്താനും പ്രതിരോധം ഉറപ്പാക്കാനും പ്രത്യേക ക്രമീകരണങ്ങളുണ്ട്. ആദ്യദിനം മരുന്ന് ലഭിക്കാത്ത കുട്ടികൾക്കായി തുടർദിവസങ്ങളിൽ വോളന്‍റിയർമാർ, ആരോഗ്യ പ്രവർത്തകർ മുഖേന വീടുകളിൽ പോയി തുള്ളിമരുന്ന് നൽകാനുള്ള ക്രമീകരണങ്ങളും പൂർത്തിയാക്കിയിട്ടുണ്ട്. ജില്ലാതല ഉദ്ഘാടനം രാവിലെ എട്ടിന് കോങ്ങാട് സാമൂഹികാരോഗ്യ കേന്ദ്രത്തിൽ നടക്കും. കെ. ശാന്തകുമാരി എംഎൽഎ പരിപാടി ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ അധ്യക്ഷത വഹിക്കും. വാക്സിൻ വിതരണവുമായി ബന്ധപ്പെട്ട് നടന്ന പത്രസമ്മേളനത്തിൽ ജില്ലാ മെഡിക്കൽ ഓഫീസർ ഡോ.ടി.വി. റോഷ്, ജില്ലാ ആർസിഎച്ച് ഡോ.എ.കെ. അനിത, ജില്ലാ വിദ്യാഭ്യാസ മാധ്യമ ഓഫീസർ എസ്. സയന, ഡെപ്യൂട്ടി വിദ്യാഭ്യാസ മാധ്യമ ഓഫീസർ രജിത, ഡിപിഎച്ച്എൻ രമ എന്നിവർ പങ്കെടുത്തു.

സഞ്ചാരികളുടെ എണ്ണത്തിൽ വർധന: ടൂർ ഓപ്പറേറ്റർമാർക്കു ചാകര

വടക്കഞ്ചേരി: പ്രകൃതി മനോഹരമായ കാഷ്മീരിലേക്ക് പാലക്കാട്ടുനിന്നടക്കമുള്ള മലയാളി സംഘങ്ങളുടെ ഒഴുക്കാണിപ്പോൾ. അവധിദിവസങ്ങൾ അടുത്തടുത്തു വരുമ്പോഴൊക്കെ ദൂരയാത്രകളിലാണ് മലയാളികൾ. പൂജാ അവധി ദിവസങ്ങളിൽ നിരവധിയാളുകൾ കേരളത്തിൽ നിന്നും കാഷ്മീർ ട്രിപ്പ് നടത്തി. ഭീകരാക്രമണമുണ്ടായ പഹൽഗാം ഉൾപ്പെടുന്ന ടൂർ പാക്കേജാണ് സംഘങ്ങൾ ക്രമീകരിക്കുന്നത്. കാഷ്മീരിൽ ഗൈഡുകളായി മലയാളികളെത്തന്നെ കിട്ടുന്നതിനാൽ സ്ഥലങ്ങൾ കൂടുതലറിയാനും സഹായകമാണ്. ഭാഷാപ്രശ്നമില്ല. കേരളത്തിൽ ഇടയ്ക്കിടെ മഴ പ്രശ്നക്കാരനാകുന്നതും കേരളം വിട്ടുള്ള യാത്രകൾക്കു താത്പര്യം കൂടാൻ കാരണമായി. വടക്കഞ്ചേരി മേഖലയിൽനിന്നും കഴിഞ്ഞ ദിവസങ്ങളിൽ വിവിധ ഗ്രൂപ്പുകൾ കാഷ്മീരിലേക്കു വിനോദയാത്ര നടത്തി. എഴുപത്തിയേഴാം വയസിൽ കരാട്ടെയിൽ ബ്ലാക്ക് ബെൽറ്റ് നേടി യുവതലമുറക്കാരെ ഞെട്ടിച്ച മംഗലംഡാം പറശേരി സ്വദേശി കിഴക്കേക്കര ജോസ് ഉൾപ്പെടെ പ്രായമായവരുടെ കൂട്ടായ്മകളും ഇത്തവണത്തെ ഒഴിവുദിവസങ്ങൾ സന്ദർശന സ്ഥലമായി കാഷ്മീരാണ് തെരഞ്ഞെടുത്തത്. സീനിയർ അഡ്വഞ്ചേഴ്സ് എന്ന കൂട്ടായ്മയിലെ 28 പേരടങ്ങുന്ന സംഘമാണിത്. നടനായിരുന്ന ഇന്നസെന്‍റിന്‍റെ സഹോദരൻ ഉൾപ്പെടെ പല ജില്ലക്കാർ ഇതിലുണ്ട്. എപ്പോഴെങ്കിലും കണ്ടിരിക്കേണ്ട സ്ഥലമാണ് കാഷ്മീരെന്നാണ് ജോസ് പറയുന്നത്. ചെറുപ്പം മുതലേ മനസിലൊളിപ്പിച്ച മോഹം സഫലമായതിന്‍റെ സന്തോഷത്തിലാണ് ജോസേട്ടൻ. ഓട്ടത്തിന്‍റെ ദശാബ്ദി ആഘോഷത്തോടനുബന്ധിച്ചായിരുന്നു ജോസേട്ടന്‍റെയും സംഘത്തിന്‍റെയും കാഷ്മീർ ട്രക്കിംഗ്. കാഷ്മീരിലും ഓട്ടത്തിനു തടസംവരാത്ത വിധമായിരുന്നു ടൂർ പരിപാടി. പട്ടാളക്കാരുടെ നിരീക്ഷണ വലയത്തലും കാഷ്മീരിലും ഈ മുത്തച്ഛൻമാർ ഓട്ടം മുടക്കിയില്ല. പ്രകൃതി സൗന്ദര്യംതന്നെയാണ് പ്രധാന കാഴ്ച. വിഐപികളെപ്പോലെയാണ് കാഷ് മീരിലെ ജനങ്ങൾ വിനോദസഞ്ചാരികളെ കാണുന്നത്. ആപ്പിളിന്‍റെ വിളവെടുപ്പ് മാസങ്ങൾ കൂടിയാണിപ്പോൾ. കാഷ്മീരി ആപ്പിൾ എന്ന് ഫ്രൂട്സ് കടകളിൽ പറയുമ്പോൾ അത് വിളഞ്ഞുനിൽക്കുന്ന തോട്ടത്തിൽ കയറി ആപ്പിൾ പറിക്കാൻ കഴിഞ്ഞതൊക്കെ ഏറെ കൊതിപ്പിക്കുന്ന അനുഭവമാണെന്ന് സംഘാംഗങ്ങൾ പറഞ്ഞു. ഒരിക്കലും മറക്കാത്ത യാത്രാനുഭൂതി സമ്മാനിക്കുന്ന സ്ഥലമാണ് കാഷ്മീരെന്ന് ബംഗളൂരുവിലെ മത്തിക്കരയിൽനിന്നുള്ള മലയാളിയായ ചീരമ്പൻ ജോണും ഭാര്യ അന്നാസ് ജോണും പറയുന്നു. ഫാ. മാത്യു മേച്ചിറക്കലിന്‍റെ നേതൃത്വത്തിലായിരുന്നു 48 അംഗ സംഘത്തിന്‍റെ കാഷ്മീർ ട്രിപ്പ്.

പാലത്തുള്ളി പാലം റോഡരികിൽ തന്പടിച്ച് കാട്ടുപന്നിക്കൂട്ടം

തത്തമംഗലം: പാലത്തുള്ളി പുഴപ്പാലത്തിനിരുവശത്തും വളർന്നുപന്തലിച്ച പാഴ്ചെടികൾ പന്നിക്കൂട്ടങ്ങളുടെ താവളം. പകൽസമയത്തുപോലും പന്നികൾ പാലത്തിലൂടെ നടക്കുന്നത് കാൽനട, വാഹനയാത്രികർക്കു ദുരിതമായി. കഴിഞ്ഞദിവസം അത്തിക്കോട് ഭാഗത്തുനിന്നും പെരുവെമ്പിലേക്ക് ബൈക്കിൽവന്ന യാത്രികനെ പന്നി തുരത്തിയെങ്കിലും വാഹനം തിരിച്ചോടിച്ച് രക്ഷപ്പെടുകയായിരുന്നു. ഇതുവഴി കടന്നുപോകുന്ന വാഹന സഞ്ചാരികൾ പുഴയിലെ തടയണ വെള്ളച്ചാട്ടം കാണാൻ പാലത്തിൽ നിർത്താറുണ്ട്. സ്ഥലത്തു ഒളിഞ്ഞിരിക്കുന്ന പന്നികളെ തിരിച്ചറിയാൻ യാത്രക്കാർക്ക് അറിയാൻ കഴിയുകയില്ല. വിദ്യാർഥികൾ സമീപത്തെ സ്കൂളിലേക്കു നടന്നുപോകുന്നതും പാലത്തിലൂടെയാണ്. തൊഴിലുറപ്പ് തൊഴിലാളികളെ ഉപയോഗിച്ചെങ്കിലും പാഴ്ച്ചെടികൾ വെട്ടിമാറ്റണമെന്ന ആവശ്യം ശക്തമാണ്.

വ്യവസായ സ്മാർട്സിറ്റി: അടിസ്ഥാനസൗകര്യ വികസനം ഒറ്റഘട്ടമായി പൂർത്തിയാക്കും

പാലക്കാട്: കൊച്ചി-ബംഗളൂരു വ്യവസായ ഇടനാഴിയുടെ ഭാഗമായ പാലക്കാട് സ്മാർട്സിറ്റി പദ്ധതിയുടെ അടിസ്ഥാന സൗകര്യവികസനം ഒറ്റഘട്ടമായി നടപ്പാക്കുന്നതിനുള്ള പ്രാരംഭ നടപടികൾ കേരള ഇൻഡസ്ട്രിയൽ കോറിഡോർ വികസന കോർപറേഷൻ (കെഐസിഡിസി) ആരംഭിച്ചു. കരാർ നേടിയ ദിലീപ് ബിൽഡ്കോണ്‍ പിഎസ്പി സംയുക്ത സംരംഭത്തിന്‍റെയും കേന്ദ്ര സർക്കാരിനു കീഴിലുള്ള നാഷണൽ ഇൻഡസ്ട്രിയൽ കോറിഡോർ ഡെവലപ്മെന്‍റ് ആൻഡ് ഇംപ്ലിമെന്‍റേഷൻ ട്രസ്റ്റിന്‍റെയും പ്രതിനിധികളെ പങ്കെടുപ്പിച്ചുള്ള ആദ്യ യോഗം അടുത്തയാഴ്ച നടക്കും. ഈ മാസം അവസാനമോ അടുത്തമാസം ആദ്യമോ സ്മാർട്സിറ്റിയുടെ വികസനപ്രവർത്തനങ്ങൾ ആരംഭിക്കും വിധത്തിൽ ദ്രുതഗതിയിലാണ് നടപടികൾ പുരോഗമിക്കുന്നതെന്ന് വ്യവസായവകുപ്പ് പ്രിൻസിപ്പൽ സെക്രട്ടറി എ.പി.എം. മുഹമ്മദ് ഹനീഷ് പറഞ്ഞു. പദ്ധതിക്ക് ഘട്ടംഘട്ടമായാണ് കേന്ദ്രസർക്കാരിൽ നിന്ന് തുക അനുവദിക്കുക. കേന്ദ്രവിഹിതം കോർപറേഷന് കൈമാറാനുള്ള താത്പര്യം അറിയിക്കുന്ന മുറയ്ക്ക് സംസ്ഥാന സർക്കാരിനു വേണ്ടി കിൻഫ്ര ഏറ്റെടുത്ത ഭൂമിയുടെ നിശ്ചിത ശതമാനം കെഐസിഡിസിക്ക് കൈമാറുകയാണ് ചെയ്യുക. രണ്ടു ഗഡുക്കളായി കേന്ദ്രം 313.5 കോടി രൂപയും സംസ്ഥാനം 330 ഏക്കർ ഭൂമിയും ഇത്തരത്തിൽ കൈമാറിക്കഴിഞ്ഞു. മൂന്നാംഗഡു തുക വൈകാതെതന്നെ കേന്ദ്രം കൈമാറുമെന്നാണ് കരുതുന്നതെന്ന് കിൻഫ്ര മാനേജിംഗ് ഡയറക്ടർ സന്തോഷ് കോശി തോമസ് പറഞ്ഞു. രാജ്യത്ത് നടപ്പാക്കുന്ന 12 വ്യവസായ സ്മാർട് സിറ്റികളിൽ അടിസ്ഥാന സൗകര്യവികസനത്തിനുള്ള ടെൻഡർ നടപടികൾ പൂർത്തീകരിച്ച് കേരളം നടപടിക്രമങ്ങളിൽ ഏറെ മുന്നിലെത്തിക്കഴിഞ്ഞു. 42 മാസംകൊണ്ട് അടിസ്ഥാന സൗകര്യ വികസനം പൂർത്തിയാക്കി കന്പനികൾക്ക് ഭൂമി അനുവദിക്കുന്നതിനുള്ള നടപടികളിലേക്ക് കടക്കാനാണ് കെഐസിഡിസി ലക്ഷ്യമിടുന്നത്. കേന്ദ്രവിഹിതം ലഭ്യമാകുന്നതിനനുസരിച്ച് മാത്രമേ കേരളം ഭൂമി കൈമാറുകയുള്ളുവെങ്കിലും നിലവിൽ ഏറ്റെടുത്ത ഭൂമിയിൽ ഒറ്റ ഘട്ടമായിത്തന്നെ അടിസ്ഥാന സൗകര്യവികസനം നടപ്പാക്കാൻ ടെൻഡർ നൽകിയത് ഈ ഉദ്ദേശത്തിലാണ്. 1,450 ഏക്കർ ഭൂമി ഏറ്റെടുക്കുന്നതിനായി രണ്ടുവർഷം മുന്പുതന്നെ കിഫ്ബി വഴി സംസ്ഥാന സർക്കാർ 1,489 കോടി രൂപ ചെലവിട്ടിരുന്നു. അതുകൊണ്ടുതന്നെ പല ഗഡുക്കളായാണെങ്കിലും കേന്ദ്രവിഹിതം പെട്ടെന്ന് പൂർണമായും അനുവദിക്കുമെന്നാണ് സംസ്ഥാനം പ്രതീക്ഷിക്കുന്നത്. അതോടെ സംസ്ഥാനം ഏറ്റെടുത്ത ഭൂമിയും കോർപറേഷന് പൂർണമായും കൈമാറും. വ്യാവസായിക ഇടനാഴിയുമായി ബന്ധപ്പെട്ട് സംസ്ഥാനം കൈക്കൊണ്ട കാര്യങ്ങൾ 2024 ജൂണിൽ വ്യവസായ മന്ത്രി പി. രാജീവ് കേന്ദ്ര വ്യവസായ വാണിജ്യ മന്ത്രി പീയൂഷ് ഗോയലിനെ ബോധ്യപ്പെടുത്തിയതിനെതുടർന്നാണ് കേന്ദ്രസർക്കാർ നടപടികൾ വേഗത്തിലാക്കിയത്. ചെന്നൈ-ബാംഗ്ലൂർ വ്യാവസായിക ഇടനാഴി കൊച്ചിയിലേക്ക് നീട്ടി കൊച്ചി -ബംഗളൂരു വ്യാവസായിക ഇടനാഴി നിർമിക്കാൻ 2019 ആഗസ്റ്റിലാണ് തീരുമാനിച്ചത്. സംസ്ഥാന സർക്കാരിനും കേന്ദ്രസർക്കാരിനും തുല്യപങ്കാളിത്തമുള്ള പദ്ധതി പ്രാവർത്തികമാക്കുന്നതിനുള്ള നടപടിക്രമങ്ങൾ കേരളം 2020 സെപ്റ്റംബറിൽതന്നെ ആരംഭിച്ചിരുന്നു. കേരള സർക്കാരിനു കീഴിലുള്ള കിൻഫ്രയും കേന്ദ്ര സർക്കാരിനു കീഴിലുള്ള നാഷണൽ ഇൻഡസ്ട്രിയൽ കോറിഡോർ ഡെവലപ്മെന്‍റ് ആൻഡ് ഇംപ്ലിമെന്‍റേഷൻ ട്രസ്റ്റും (എൻഐസിഡിഐടി) ചേർന്ന് തുല്യ ഓഹരി പങ്കാളിത്തത്തോടെ രൂപംകൊടുത്ത പ്രത്യേകോദ്ദേശ് സ്ഥാപനമാണ് പാലക്കാട് സ്മാർട് സിറ്റിയുടെ വികസനപ്രവർത്തനങ്ങൾ ഏകോപിപ്പിക്കുന്ന കേരള ഇൻഡസ്ട്രിയൽ കോറിഡോർ ഡെവലപ്മെന്‍റ് കോർപറേഷൻ ലിമിറ്റഡ്. സ്മാർട് സിറ്റിയുടെ രൂപകൽപന മുതൽ നിർമാണവും മെയിന്‍റനൻസും ഉൾപ്പെടെയുള്ള സമഗ്ര വികസനമാണ് ഇപിസി (എൻജിനീയറിംഗ്, പ്രൊക്യുർമെന്‍റ് ആൻഡ് കണ്‍സ്ട്രക്ഷൻ) കരാർ നേടിയ കന്പനിയുടെ ചുമതലയിലുള്ളത്. പദ്ധതി പ്രദേശത്ത് ആവശ്യമായ റോഡുകൾ, ഡ്രെയ്നേജുകൾ, പാലങ്ങൾ, ജലവിതരണ ശൃംഖല, അഗ്നിശമന മാർഗങ്ങൾ, ജലപുനരുപയോഗ സംവിധാനങ്ങൾ, സീവറേജ് ലൈനുകൾ, ഉൗർജവിതരണ സംവിധാനങ്ങൾ, സീവേജ് ട്രീറ്റ്മെന്‍റ് പ്ലാന്‍റ്, വ്യാവസായിക മലിനജല ശേഖരണ സംവിധാനങ്ങൾ, മലിനജല സംസ്കരണ പ്ലാന്‍റ് തുടങ്ങിയവയെല്ലാം ഇതിൽ ഉൾപ്പെടും.

രാമശേരി ഗാന്ധി ആശ്രമത്തിലേക്കു ഗാന്ധിയൻ പുസ്തകങ്ങൾ നൽകി

രാമശ്ശേരി: ഗാന്ധിയൻ പഠനത്തിനു ആവശ്യമായ പുസ്തകങ്ങൾ പൂർണോദയ പുസ്തക കൂട്ടായ്മ പ്രതിനിധിയും ഗാന്ധിആശ്രമം സപ്പോർട്ട് ഗ്രൂപ്പ് അംഗവുമായ പി.ടി. രാമചന്ദ്രൻ ഗാന്ധിആശ്രമത്തിലേക്കു സംഭാവനയായി നൽകി. ഗാന്ധി ആശ്രമം ട്രസ്റ്റി പുതുശ്ശേരി ശ്രീനിവാസൻ അധ്യക്ഷനായ ചടങ്ങിൽ ഓയിസ്ക സംസ്ഥാന പ്രസിഡന്‍റ് ഡോ. ശുദ്ധോധനൻ പുസ്തകങ്ങൾ ഏറ്റുവാങ്ങി. ലയൺസ് ക്ലബ് പ്രസിഡന്‍റ് വി. അച്ചുതൻ, മുൻ നഗരസഭാ കൗൺസിലർ കെ. ബാബു, സർവോദയ കേന്ദ്രം ജോയിന്‍റ് ഡയറക്ടർ ഉണ്ണിക്കുട്ടൻ മടച്ചിപ്പാടം, ഗാന്ധി ആശ്രമം സപ്പോർട്ട് ഗ്രൂപ്പ് അംഗം എം.എം. കൃഷ്ണൻകുട്ടി, പ്രകൃതികൃഷി പദ്ധതി റിസോഴ്സ് പേഴ്സൺ കെ. യശോദദേവി, ആയുഷ് പദ്ധതി ഹീലർ രേഷ്മ, പ്രശാന്ത് തിരുവില്വാമല, ജെ. അപർണ പ്രസംഗിച്ചു.

ചിറ്റൂർ ഉപജില്ലാ ശാസ്ത്രമേളയ്ക്കു വണ്ടിത്താവളത്തു തുടക്കം

വണ്ടിത്താവളം: ചിറ്റൂർ ഉപജില്ലാ ശാസ്ത്രമേളയ്ക്ക് വണ്ടിത്താവളം കെകെഎം സ്കൂളിൽ തുടക്കമായി. ഉപജില്ലയിലെ എൺപതോളം സ്കൂളുകളിൽ നിന്നുള്ള ഏകദേശം മൂവായിരത്തോളം പ്രതിഭകൾ രണ്ടുദിവസത്തെ മേളയിൽ മാറ്റുരക്കും. ചിറ്റൂർ ബ്ലോക്ക് പഞ്ചായത്ത് പ്രസിഡന്‍റ് എ. സുജാത ഉദ്ഘാടനം ചെയ്തു. പട്ടഞ്ചേരി പഞ്ചായത്ത് പ്രസിഡന്‍റ് പി.എസ്. ശിവദാസ് അധ്യക്ഷത വഹിച്ചു. ചിറ്റൂർ എഇഒ എസ്. രാഖി, ജില്ലാ, ബ്ലോക്ക്, പഞ്ചായത്ത് ജനപ്രതിനിധികൾ പങ്കെടുത്തു.

ഇ- വേസ്റ്റ് ശേഖരണത്തിൽ പരിശീലനം നൽകി

പാലക്കാട്: തദ്ദേശ സ്വയംഭരണ വകുപ്പിന്‍റെയും ക്ലീൻ കേരള കന്പനിയുടേയും ആഭിമുഖ്യത്തിൽ മാലിന്യമുക്തം നവകേരളം ശുചിത്വ കാന്പയിനിന്‍റെ ഭാഗമായി ഇ- വേസ്റ്റ് ശേഖരണം നടത്തുന്നതിന് പരിശീലനം നൽകി. മലന്പുഴ, ചിറ്റൂർ ബ്ലോക്കുകളിലെ ഗ്രാമപഞ്ചായത്തുകളിൽ നിന്നുള്ള ഹരിതകർമസേന കണ്‍സോർഷ്യം പ്രതിനിധികൾ, വില്ലേജ് എക്സ്റ്റൻഷൻ ഓഫീസർമാർ, ഹെൽത്ത് ഇൻസ്പെക്ടർമാർ എന്നിവർക്കാണ് പരിശീലനം നൽകിയത്. മലന്പുഴ ഗ്രാമപഞ്ചായത്ത് സെക്രട്ടറി കെ. കാഞ്ചന അധ്യക്ഷയായ പരിപാടിയിൽ ജനറൽ എക്സ്റ്റൻഷൻ ഓഫീസർ കെ.എ. ഷോബിത, മലന്പുഴ, അകത്തേത്തറ, പുതുപ്പരിയാരം, മരുതറോഡ്, പുതുശ്ശേരി, കൊടുന്പ്, പൊൽപ്പുള്ളി, നല്ലേപ്പിള്ളി, എലപ്പുള്ളി, കൊഴിഞ്ഞാന്പാറ, വടകരപ്പതി, എരുത്തേന്പതി, പെരുമാട്ടി എന്നീ ഗ്രാമ പഞ്ചായത്ത് പ്രതിനിധികൾ തുടങ്ങിയവർ പങ്കെടുത്തു.

പാലിയേറ്റീവ് കെയർ വാഹനത്തിനു ടയറുകൾ നൽകി വാട്സാപ് ഗ്രൂപ്പ്

എടത്തനാട്ടുകര: എടത്തനാട്ടുകര പാലിയേറ്റീവ് കെയറിന്‍റെ ഹോംകെയർ യൂണിറ്റിന്‍റെ ബൊലേറോ വാഹനത്തിന് ടയറുകൾ നൽകി മുജീബ് അങ്ങാടി വാട്സാപ് കൂട്ടായ്മ. ചിരട്ടക്കുളത്ത് നടന്ന ചടങ്ങിൽ ടയറുകൾ കൈമാറി. കൂട്ടായ്മ ഭാരവാഹികളായ മുജീബ്, മുത്തു, ചാത്തൻ, യൂസഫ്, നാണിപ്പ പാലിയേറ്റീവ് കെയർ ക്ലിനിക് ഭാരവാഹികളായ റഹീസ് എടത്തനാട്ടുകര, മുത്തു കോയക്കുന്ന്, ടി.കെ. നജീബ്, മുസ്തഫ തോണിക്കടവൻ തുടങ്ങിയവർ പങ്കെടുത്തു.

പുതുനഗരത്ത് ആശാസമര ഐക്യദാർഢ്യ സംഗമം

പുതുനഗരം: വിവിധ ആവശ്യങ്ങൾ ഉന്നയിച്ച് ഉയർത്തി കഴിഞ്ഞ എട്ടുമാസമായി സെക്രട്ടേറിയറ്റിനു മുന്നിൽ ആശ ഹെൽത്ത് വർക്കേഴ്സ് അസോസിയേഷൻ ആഭിമുഖ്യത്തിൽ ആശാ പ്രവർത്തകർ നടത്തിവരുന്ന രാപകൽ സമരത്തിനു ഐക്യദാർഢ്യം പ്രഖ്യാപിച്ച് പുതുനഗരത്ത് പ്രതിഷേധ സംഗമം നടത്തി. കേരള ആശാ ഹെൽത്ത് വർക്കേഴ്സ് അസോസിയേഷനും സമരസഹായ സമിതിയും സംയുക്തമായാണ് പ്രതിഷേധ സംഗമം നടത്തിയത്. ജില്ലാ സെകട്ടറി എൻ. സുഗന്ധിയുടെ അധ്യക്ഷതയിൽ നടന്ന പ്രതിഷേധ സദസ് കെപിസിസി അംഗം സജേഷ് ചന്ദ്രൻ ഉദ്ഘാടനം ചെയ്തു. സംഘടനയുടെ സംസ്ഥാന പ്രസിഡന്‍റ് വി.കെ. സദാനന്ദൻ, കോൺഗ്രസ് പുതുനഗരം മണ്ഡലം പ്രസിഡന്‍റ് എം. യാക്കൂബ്, പുതുനഗരം ഗ്രാമപഞ്ചായത്ത് വൈസ് പ്രസിഡന്‍റ് യു. ശാന്തകുമാർ, കൊല്ലങ്കോട് ബ്ലോക്ക് കോൺഗ്രസ് വൈസ് പ്രസിഡന്‍റ് പി. ശെൽവരാജ് പ്രസംഗിച്ചു.

സുസ്ഥിര തൃത്താല പദ്ധതി: മലിനജല സംസ്കരണമാതൃക ശ്രദ്ധേയമാകുന്നു

തൃത്താല: മലിനജലത്തെ ശാസ്ത്രീയമായി സംസ്കരിക്കാൻ കമ്യൂണിറ്റി സോക്ക്പിറ്റ് സംവിധാനമൊരുക്കി സുസ്ഥിര തൃത്താല പദ്ധതി ശ്രദ്ധേയമാകുന്നു. തൃത്താല മണ്ഡലത്തിലെ പരുതൂർ ഒഴികെയുള്ള ഏഴ് ഗ്രാമപഞ്ചായത്തുകളിൽ ഓരോ പട്ടികജാതി നഗറുകളിലായാണ് കമ്യൂണിറ്റിതല സോക്ക് പറ്റുകൾ ഒരുക്കുന്നത്. 100 പട്ടികജാതി കുടുംബങ്ങൾക്ക് പ്രയോജനം കിട്ടുന്ന വിധത്തിലാണ് പദ്ധതി വിഭാവനം ചെയ്തത്. ജില്ലാ ശുചിത്വമിഷന്‍റെ മേൽനോട്ടത്തിൽ ഗ്രാമപഞ്ചായത്തുകളാണ് പദ്ധതി നടപ്പാക്കുന്നത്. സ്വച്ഛ് ഭാരത് മിഷന്‍റെയും ഗ്രാമപഞ്ചായത്തിന്‍റെയും ഫണ്ടുകൾ പ്രയോജനപ്പെടുത്തി 38 ലക്ഷം രൂപയാണ് പദ്ധതിക്ക് വേണ്ടി വിനിയോഗിക്കുന്നത്. വീടുകളിലെ കുളിമുറികൾ, വാഷ് ബേസിനുകൾ, വാഷിംഗ് മെഷീനുകൾ, അടുക്കളയിലെ സിങ്കുകൾ എന്നിവിടങ്ങളിൽ നിന്നുള്ള വെള്ളമാണ് സോക്ക് പിറ്റ് സംവിധാനത്തിലൂടെ സംസ്കരിക്കുന്നത്. നിലവിൽ ചാലിശ്ശേരി ഗ്രാമപഞ്ചായത്തിലെ തോപ്പിൽമറ്റം നഗർ, തൃത്താല ഗ്രാമപഞ്ചായത്തിലെ കുണ്ടയം ലക്ഷംവീട് നഗർ, തിരുമിറ്റക്കോട് ഗ്രാമപഞ്ചായത്തിലെ ലക്ഷംവീട് നഗർ എന്നിവിടങ്ങളിലെ പ്രവൃത്തികൾ പൂർത്തീകരിച്ചു. നാഗലശ്ശേരി ഗ്രാമപഞ്ചായത്തിലെ ലക്ഷംവീട് നഗർ പ്രവൃത്തിയുടെ പിറ്റ് നിർമാണവും പൂർത്തിയായി. സ്ഥലപരിമിതി നേരിടുന്ന ഇടങ്ങളിലെ മലിനജല സംസ്കരണത്തിന് പരിഹാരമായാണ് കമ്യൂണിറ്റി സോക്ക് പിറ്റ് സംവിധാനം നടപ്പാക്കിയതെന്ന് ശുചിത്വ മിഷൻ ജില്ലാ കോ-ഓർഡിനേറ്റർ ജി. വരുണ്‍ പറഞ്ഞു.

കേരള കോൺഗ്രസ്-എം ജന്മദിനാഘോഷം

പാലക്കാട്: കേരള കോൺഗ്രസ്- എം പാലക്കാട് നിയോജകമണ്ഡലം കമ്മിറ്റിയുടെ നേതൃത്വത്തിൽ പാർട്ടിയുടെ അറുപത്തിയൊന്നാമത് ജന്മദിനം ആഘോഷിച്ചു. മണ്ഡലം വൈസ് പ്രസിഡന്‍റ് സുന്ദരൻ കാക്കത്തറ അധ്യക്ഷനായി. മണ്ഡലം ജനറൽസെക്രട്ടറി പ്രജീഷ് പ്ലാക്കൽ സ്വാഗതം പറഞ്ഞു. ആഘോഷ പരിപാടിയിൽ പാർട്ടി ജില്ലാ ജനറൽ സെക്രട്ടറി കെ.എം. ഉണ്ണികൃഷ്ണൻ, കെടിയുസി- എം സംസ്ഥാന ജനറൽ സെക്രട്ടറി ആർ. സുരേഷ്, നിയോജകമണ്ഡലം പ്രസിഡന്‍റ് എൽ. കൃഷ്ണമോഹൻ, പാർട്ടി ഭാരവാഹികളായ രാജേന്ദ്രൻ കല്ലേപ്പുള്ളി, എം. അശോകൻ, വേണുഗോപാൽ, ബിജു പുഴക്കൽ എന്നിവർ പ്രസംഗിച്ചു.

എലപ്പുള്ളി ഗ്രാമപഞ്ചായത്തിൽ വയോജനങ്ങൾക്കു കട്ടിൽ വിതരണം

പാലക്കാട്: എലപ്പുള്ളി ഗ്രാമപഞ്ചായത്തിന്‍റെ 2025- 26 വാർഷിക പദ്ധതിയിൽ ഉൾപ്പെടുത്തി വയോജനങ്ങൾക്ക് കട്ടിൽ വിതരണം ചെയ്തു. ഗ്രാമപഞ്ചായത്ത് ഹാളിൽ നടന്ന പരിപാടി ഗ്രാമപഞ്ചായത്ത് പ്രസിഡന്‍റ് കെ. രേവതി ബാബു ഉദ്ഘാടനം ചെയ്തു. 10,06,890 രൂപ ചെലവിൽ 235 വയോജനങ്ങൾക്കാണ് കട്ടിലുകൾ വിതരണം ചെയ്തത്. പരിപാടിയിൽ ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ കെ. ശരവണകുമാർ, വൈസ് പ്രസിഡന്‍റ് എസ്. സുനിൽകുമാർ, വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ കെ.വി. പുണ്യകുമാരി വാർഡ് മെംബർമാരായ ഡി. രമേശൻ, വി. സന്തോഷ്, കെ. അപ്പുകുട്ടൻ, സുബ്രഹ്്മണ്യൻ, സി. മൂർത്തി, സി. അനിത, ഐസിഡിഎസ് സൂപ്പർവൈസർ ടി.എം. ലിമി ലാൽ എന്നിവർ പങ്കെടുത്തു.

വികസനസദസും വികസന പദ്ധതികളുടെ ഉദ്ഘാടനവും ഇന്ന്

പാലക്കാട്: മുനിസിപ്പാലിറ്റി വികസനസദസും വിവിധ വികസന പദ്ധതികളുടെ ഉദ്ഘാടനവും ഇന്ന് രാവിലെ 10 ന് നടക്കും. നഗരസഭ അങ്കണത്തിൽ നടക്കുന്ന പരിപാടി കേന്ദ്ര സഹമന്ത്രി സുരേഷ് ഗോപി ഉദ്ഘാടനം ചെയ്യും. മുനിസിപ്പൽ ചെയർപേഴ്സണ്‍ പ്രമീള ശശിധരൻ അധ്യക്ഷയാവും. വി.കെ ശ്രീകണ്ഠൻ എംപി വിശിഷ്ടാതിഥിയാവും. സംസ്ഥാന സർക്കാരിന്‍റെ ആഭിമുഖ്യത്തിൽ പ്രാദേശികതലത്തിൽ വികസന ആശയങ്ങൾ അവതരിപ്പിക്കുന്നതിനും പൊതുജനാഭിപ്രായം ഉൾക്കൊള്ളുന്നതിനുമായാണ് വികസനസദസ് നടത്തുന്നത്. പരിപാടിയിൽ മറ്റ് ജനപ്രതിനിധികൾ ഉൾപ്പെടെ വിവിധ മേഖലകളിലെ വിദഗ്ധരും സമൂഹത്തിലെ വിവിധ മേഖലകളിലുള്ളവരും പങ്കെടുക്കും.

ഡയബറ്റിക് റൈസ് എന്ന തെലങ്കാന സോന നെല്ലിനം നെന്മാറയിലും വൻവിജയം

നെന്മാറ: പ്രമേഹരോഗികൾക്ക് അനുയോജ്യമായതും കുറഞ്ഞ ഗ്ലൈസെമിക് ഇൻഡെക്സുമുള്ളതുമായ തെലങ്കാന സോന എന്ന ആർഎൻആർ -15048 എന്ന നെല്ലിനം വിജയകരമായി നെന്മാറ കൃഷിഭവൻ പരിധിയിലും വിളയിച്ചു. ജീരകശാല തുടങ്ങിയ നെല്ലിനങ്ങളെപോലെ സുഗന്ധമുള്ള നെല്ലിനമാണിത്. വെളുത്തനിറത്തിലുള്ള അരിയാണ്. നെന്മാറ കണ്ണോട് പാടശേഖരത്തിലെ കെ. ഭാസ്‌കരൻ പരീക്ഷണാടിസ്ഥാനത്തിൽ ഒന്നാം വിളയായി 50 സെന്‍റ് സ്ഥലത്താണ് കൃഷിയിറക്കിയത്. ഒരേക്കറിന് 15 കിലോ നെൽവിത്ത് മതിയെന്നാണ് വിത്തു വാങ്ങിയ കൃഷി വിജ്ഞാൻകേന്ദ്ര ബാംഗ്ലൂർ അധികൃതർ പറഞ്ഞതെന്ന് ഭാസ്കരൻ പറഞ്ഞു. തെലുങ്കാന ജയശങ്കർ സർവകലാശാല വികസിപ്പിച്ചെടുത്ത നെല്ലിനമാണ് തെലങ്കാന സോന. ഡയബെറ്റിക് റൈസ് എന്നറിയപ്പെടുന്ന ഈ ഇനം നെല്ല് ആന്ധ്രാപ്രദേശ്, കർണാടക, ഉത്തർപ്രദേശ് എന്നീ സംസ്ഥാനങ്ങളിൽ കൃഷിചെയ്യുന്ന ഇനമാണ് നമ്മുടെ കാലാവസ്ഥയിലും വിളയുമെന്ന് തെളിയിച്ചത്. ഡയബറ്റിക് ഇൻഡക്സ് കുറവായതിനാൽ പ്രമേഹരോഗികൾക്ക് ഭക്ഷണത്തിൽ ഉൾപ്പെടുത്താൻ പറ്റിയ ഇനമായതിനാൽ അരിക്ക് ആവശ്യക്കാരും ഏറെയാണ്. മറ്റ് ഇനം നെൽകൃഷിയോടൊപ്പം പ്രത്യേകമായി തയ്യാറാക്കി പറിച്ചു നട്ടു മറ്റു വിളകൾക്ക് നൽകുന്നതിനേക്കാൾ കുറവ് വളം മാത്രമാണ് നൽകിയത്. വിളവെടുക്കാൻ ആവശ്യമായ 130 ദിവസങ്ങൾക്കു മുൻപേ കൊയ്ത്തിനു പാകമായിരിക്കുകയാണ്. സമീപത്തെ നെൽപ്പാടങ്ങളിൽ മറ്റു നെല്ലിനങ്ങൾക്ക് ഓലകരിച്ചിൽ, മുഞ്ഞ, എന്നിവ ബാധിച്ചപ്പോൾ പ്രതികൂല കാലാവസ്ഥയിലും രോഗ കീട ബാധയൊന്നുമില്ലാതെ നല്ല കതിർ കാണപ്പെട്ടു. ഉമി കനം കുറഞ്ഞ വെളുത്ത നിറത്തിലുള്ള അരി ആയതിനാൽ സപ്ലൈകോ മുഖേന കേരളത്തിലെ മില്ലുകാർ ഈ ഇനം സംഭരിക്കാൻ വിമുഖത കാണിക്കുന്നുണ്ട്. മികച്ച വിളവും ഉയർന്ന വിപണിമൂല്യവുമുള്ള ഈ നെല്ല് വിളവെടുപ്പിനുശേഷം പ്രോസസ് ചെയ്ത് ആവശ്യക്കാർക്ക് അരിയാക്കി നൽകുമെന്ന് കർഷകനായ കെ. ഭാസ്‌കരൻ പറഞ്ഞു. നെന്മാറ കൃഷി ഓഫീസർ വി. അരുണിമ, അസിസ്റ്റന്‍റ് കൃഷി ഓഫീസർ സി. സന്തോഷ്, ഫീൽഡ് അസിസ്റ്റന്‍റ് ജെ. അജ്മൽ, പാടശേഖര സെക്രട്ടറിമാരായ കെ.എൻ. പൊന്നു, എൻ.ജി. ഭൂപതി എന്നിവരും കൃഷിഭവൻ അധികൃതർക്കൊപ്പം ഭാസ്കരന്‍റെ കൃഷിയിടം സന്ദർശിച്ച് ഉത്പാദനക്ഷമത വിലയിരുത്തി.

ജില്ലാ വിദ്യാഭ്യാസ ഓഫീസറെ ഉപരോധിച്ചു

പാലക്കാട്: ജില്ലാ സ്കൂൾ കായികമേള കമ്മീഷൻമേള ആക്കുന്ന ജില്ലാ വിദ്യാഭ്യാസ വകുപ്പിനെതിരെ പാലക്കാട് ബ്ലോക്ക് കോണ്‍ഗ്രസ് കമ്മിറ്റിയുടെ നേതൃത്വത്തിൽ ജില്ലാ വിദ്യാഭ്യാസ ഓഫീസറെ ഉപരോധിച്ചു. എട്ട് പേർക്ക് ഓടാൻ കഴിയുന്ന സിന്തറ്റിക്ക് ട്രാക്ക് പാലക്കാട് ഉള്ളപ്പോൾ ആറ് പേർക്ക് മാത്രം ഓടാൻ കഴിയുന്ന ചാത്തന്നൂർ എച്ച്എസിലെ ഗ്രൗണ്ടിൽ നടത്താനുള്ള നീക്കം ഒട്ടേറെ കായികതാരങ്ങളുടെ അവസരം നഷ്ടമാക്കും. കായിക ഉപകരണങ്ങൾ ഒന്നും ഇല്ലാത്ത ചാത്തന്നൂർ സ്കൂളിൽ കായിക ഉപകരണങ്ങൾ വാടകക്ക് എടുത്ത് കായികമേള നടത്തുന്നതിൽ വൻഅഴിമതി നടത്തുന്നതിന് വേണ്ടിയാണ് സംഘാടകർ പാലക്കാട് സിന്തറ്റിക്ക് ട്രാക്കിനെ തഴഞ്ഞത.് ഇതിനെതിരെ തുടർസമരങ്ങളുമായി മുന്നോട്ടുപോകുമെന്ന് ബ്ലോക്ക് കോണ്‍ഗ്രസ് പ്രസിഡന്‍റ് സി.വി. സതീഷ്, ഡയറക്ടർ ജനറൽ എഡ്യുക്കേഷൻ ഡിപ്പാർട്ട്മെന്‍റിൽ അറിയിച്ച് വേണ്ട നടപടികൾ കൈകൊള്ളാമെന്ന ഉറപ്പിൻമേൽ ആണ് ഉപരോധസമരം അവസാനിപ്പിച്ചത്. ഉപരോധസമരത്തിന് രമേശ് പുത്തൂർ, എസ്. സേവ്യർ, എസ്.എം. താഹ, അനിൽ ബാലൻ, ഹരിദാസ് മച്ചിങ്ങൽ, ബോബൻ മാട്ടുമന്ത, ഡി. ഷജിത് കുമാർ, വി. ആറുമുഖൻ, കെ.എൻ. സഹീർ, എസ്. ശെൽവൻ, നടരാജൻ കുന്നുംപുറം, അനന്തൻ വടക്കന്തറ എന്നിവർ പങ്കെടുത്തു.

സംസ്ഥാനപാതയിൽ അപകടഭീഷണിയായി ഉണങ്ങിനിന്നിരുന്ന പൂളമരം മുറിച്ചുനീക്കി

വടക്കഞ്ചേരി: മംഗലം - ഗോവിന്ദാപുരം സംസ്ഥാനപാതയിൽ വള്ളിയോട് തേവർകാട് കൺവൻഷൻ സെന്‍ററിനടുത്ത് ഉണങ്ങി ദ്രവിച്ച് നിന്നിരുന്ന വലിയ പൂളമരം ഇന്നലെ മുറിച്ചുനീക്കി. വലിയ ക്രെയിനിന്‍റെ സഹായത്തോടെ മണിക്കൂറുകൾ നീണ്ട പ്രവൃത്തികൾക്കു ശേഷമാണ് 200 ഇഞ്ച് വണ്ണമുള്ള മരം മുറിച്ച് മാറ്റാനായത്. കഴിഞ്ഞ ദിവസവും ഈ മരത്തിന്‍റെ കൊമ്പ് പൊട്ടിവീണ് കാറിന്‍റെ ചില്ലുകൾ തകർന്ന സംഭവമുണ്ടായിരുന്നു. ഭാഗ്യംകൊണ്ടാണ് യാത്രക്കാർ രക്ഷപ്പെട്ടത്. കുടുംബസമേതം യാത്രചെയ്തിരുന്ന സ്വിഫ്റ്റ് കാറാണ് അപകടത്തിൽപ്പെട്ടത്. കൊമ്പുകൾ പൊട്ടിവീണുള്ള അപകടങ്ങൾ ഇടക്കിടെ ആവർത്തിച്ചത് സമീപത്തെ വ്യാപാരികളിലും യാത്രക്കാരിലും വലിയ ഭയാശങ്കയുണ്ടാക്കി. മരത്തിന്‍റെ അപകടാവസ്ഥ സംബന്ധിച്ച് ദീപിക ഉൾപ്പെടെയുള്ള പത്രങ്ങളിലും പലതവണ വാർത്തകളും വന്നു. കോൺഗ്രസ്, ബിജെപി തുടങ്ങിയ രാഷ്ട്രീയ പാർട്ടികളും മരം മുറിച്ചു നീക്കണമെന്നാവശ്യപ്പെട്ട് സമരവുമായി രംഗത്തുവരികയുണ്ടായി. ഒടുവിലാണ് പൊതുമരാമത്ത് വകുപ്പ് കണ്ണുതുറന്നത്. വലിയ ദുരന്തം സംഭവിക്കും മുമ്പേ മരം മുറിച്ചുനീക്കിയ ആശ്വാസത്തിലാണ് എല്ലാവരും.

‘മുള നാളെയുടെ വിള' ശില്പശാല നടത്തി

മണ്ണാർക്കാട്: മുള വൻവരുമാനമാർഗമാണെന്നും അത് തിരിച്ചറിഞ്ഞ് മൂല്യവർധിത ഉത്പന്നങ്ങൾ വിപണിയിൽ ലഭ്യമാക്കേണ്ടതിന്‍റെ ആവശ്യകത വിശദീകരിച്ചും മുള സെമിനാർ നടത്തി. വന്യജീവി വാരാഘോഷത്തിന്‍റെ ഭാഗമായി എംഇഎസ് കല്ലടി കോളജിന്‍റെയും വിടിബി കോളജ് മണ്ണമ്പറ്റയുടേയും സഹകരണത്തോടെ സോഷ്യൽ ഫോറസ്ട്രി ഡിവിഷൻ ആണ് തൊടുകാപ്പ് ഇക്കോ ടൂറിസം സെന്‍ററിൽ മുള സെമിനാർ സംഘടിപ്പിച്ചത്. കേരള ഫോറസ്റ്റ് റിസർച്ച് ഇൻസ്റ്റിറ്റ്യൂട്ടിൽ നിന്നും വിരമിച്ച ഡോ.കെ.കെ. സീതാലക്ഷ്മി മുഖ്യാതിഥിയായിരുന്നു. റേഞ്ച് ഫോറസ്റ്റ് ഓഫീസർമാരായ വി. വിവേക്, കെ.പി. ജിനേഷ്, ഗ്രേഡ് ഡെപ്യൂട്ടി റേഞ്ച് ഓഫീസർ ബി.എസ്. ഭദ്രകുമാർ, അസിസ്റ്റന്‍റ് പ്രഫസർമാരായ കെ. മിനി, മുഹമ്മദ് ഷെരീഫ്, സെക്ഷൻ ഫോറസ്റ്റ് ഓഫീസർമാരായ വി. രാജേഷ്, ഫിറോസ് വട്ടത്തൊടി എന്നിവർ പ്രസംഗിച്ചു.

എച്ച്ടി ലൈനിൽ വള്ളിപ്പടർപ്പ് ചുറ്റിയതു നീക്കംചെയ്യണം

കൊഴിഞ്ഞാമ്പാറ: നല്ലേപ്പിള്ളി കുറ്റിപ്പള്ളം മെയിൻറോഡിന് സമീപമുള്ള എരിശേരി ട്രാൻസ്ഫോമറിന്‍റെ തൊട്ടടുത്ത എച്ച് ടി ലൈനിൽ കാട്ടുവള്ളികൾ ചുറ്റി പടർന്ന് അപകടാവസ്ഥ. മാട്ടുമന്ത- വണ്ണാമട റോഡ്സൈഡിൽ എരിശേരി തെക്കേദേശം പോസ്റ്റ് ഓഫീസിന് സമീപമുള്ള പോസ്റ്റിലാണ് വള്ളിപ്പടർപ്പ്. ഇതിനു സമീപത്തുകൂടി പോകുന്ന കാൽനട യാത്രികർക്കും നാൽക്കാലികൾക്കും വള്ളിപ്പടർപ്പ് അപകടഭീഷണിയാവുന്നുണ്ട്. ട്രാൻസ്ഫോമറുകളും തെരുവുവിളക്കുകളും കുടിവെള്ള പദ്ധതികളും ആയിരക്കണക്കിന് വൈദ്യുതി കണക്ഷൻ കൃഷിക്കുള്ള മോട്ടോർപമ്പ് സെറ്റുകളുമുള്ള പഞ്ചായത്ത് പ്രദേശമാണ് നല്ലേപ്പിള്ളി. കൊഴിഞ്ഞാമ്പാറ സെക്‌ഷൻ പ്രവർത്തനപരിധി വളരെ വലുതും ജീവനക്കാരുടെ എണ്ണത്തിലുള്ള കുറവും അപകടസാധ്യതകൾ ഇത്തരത്തിലുളള പ്രശ്നങ്ങൾ പരിഹരിക്കുന്നതിനും കാലതാമസം ഉണ്ടാകുന്നതായി നാട്ടുകാർ പരാതിപ്പെടുന്നുമുണ്ട്. നല്ലേപ്പിള്ളി കേന്ദ്രമാക്കി ഒരു പുതിയ സെക്‌ഷൻ ഓഫീസ് തുടങ്ങണമെന്ന ആവശ്യവും ഉണ്ടായിരിക്കുകയാണ്.

മണ്ണാർക്കാട്ട് ഡയപ്പർ മാലിന്യങ്ങൾ നേരിട്ടു വീട്ടിലെത്തി ശേഖരിക്കും

മണ്ണാർക്കാട്: ഡയപ്പര്‍ മാലിന്യം സംസ്‌കരിക്കാന്‍ ഇനി ബുദ്ധിമുട്ടേണ്ട. ഡയപ്പറും നാപ്കിനും ഉള്‍പ്പടെയുള്ള സാനിറ്ററി മാലിന്യം സംസ്‌കരിക്കാന്‍ നഗരസഭ വീട്ടിലെത്തി ശേഖരിക്കും. ഇതിനായി സുസ്ഥിര മാലിന്യനിര്‍മാര്‍ജന രംഗത്ത് പ്രവര്‍ത്തിക്കുന്ന ആക്രി ആപ്പുമായി നഗരസഭ കൈകോര്‍ത്തു. വാഹനത്തിന്‍റെ ഫ്ലാഗ് ഓഫ് നഗരസഭ ചെയർമാൻ സി. മുഹമ്മദ് ബഷീർ നിർവഹിച്ചു. വൈസ് ചെയർപേഴ്സൺ പ്രസീത അധ്യക്ഷത വഹിച്ചു. ഈ ആഴ്ച മുതല്‍ ഇത്തരം മാലിന്യങ്ങള്‍ ശേഖരിക്കാന്‍ ആക്രിയുടെ വാഹനം വീടുകളിലേക്കെത്തും. നഗരസഭാപരിധിയില്‍ 29 വാര്‍ഡുകളിലായി എണ്ണായിരത്തോളം വീടുകളുണ്ടെന്നാണ് കണക്ക്. മാലിന്യം നല്‍കുന്നതിന് ആക്രി ആപ്പില്‍ രജിസ്റ്റര്‍ ചെയ്യണം. ബയോമെഡിക്കല്‍ വിഭാഗത്തിലാണ് ബുക്ക് ചെയ്യേണ്ടത്. ബുക്കിംഗ് തീയതികളില്‍ മാലിന്യം ശേഖരിക്കുന്നതിന് ആളുകള്‍ വീടുകളിലെത്തുമെന്ന് നഗരസഭ ചെയർമാൻ പറഞ്ഞു. ഓരോതരം മാലിന്യവും നിക്ഷേപിക്കുന്നതിന് വ്യത്യസ്ത നിറത്തിലുള്ള സഞ്ചികള്‍ ആവശ്യക്കാര്‍ക്ക് നല്‍കും. മാലിന്യമെടുക്കുമ്പോള്‍ തൂക്കത്തിന് അനുസരിച്ച് പ്രത്യേക നിരക്കും നല്‍കണം. ഇങ്ങിനെ ശേഖരിക്കുന്ന മാലിന്യങ്ങള്‍ എറണാകുളം അമ്പലമുകളിലുള്ള കേരള എന്‍വിറോ ഇന്‍ഫ്രാസ്ട്രക്ചര്‍ ലിമിറ്റഡിൽ (കെഇഐഎല്‍) എത്തിച്ചാണ് സംസ്‌കരിക്കുക. നഗരസഭ സ്ഥിരം സമിതി അധ്യക്ഷരായ മാസിത സത്താർ, വത്സലകുമാരി, നഗരസഭ കൗൺസിലർമാർ, നഗരസഭാ സെക്രട്ടറി സതീഷ് കുമാർ, ക്ലീൻ സിറ്റി മാനേജർ ഇക്ബാൽ പങ്കെടുത്തു.

അയിലൂരിൽ കേരഗ്രാമം പദ്ധതി ഉദ്ഘാടനം നാളെ

നെന്മാറ: അയിലൂർ കൃഷിഭവൻ കേരഗ്രാമം പദ്ധതി ഉദ്ഘാടനം നാളെ. നാളികേരത്തിന്‍റെ ഉത്പാദനവും ഉത്പാദന ക്ഷമതയും വർധിപ്പിക്കുന്നതിനും വില തകർച്ചയും രോഗകീടാക്രമണം മൂലം പ്രതിസന്ധി നേരിടുന്ന കേരകർഷകർക്ക് കൈത്താങ്ങാവുക എന്ന ലക്ഷ്യത്തോടെ കേരള സർക്കാർ ആവിഷ്ക്കരിച്ച 3 വർഷം നീണ്ടുനിൽക്കുന്ന ബൃഹദ്പദ്ധതിയാണ് കേരഗ്രാമം പദ്ധതി. നാളികേര കർഷകരുടെ ജീവിത നിലവാരം ഉയർത്തുക, തെങ്ങിന്‍റെ ചങ്ങാതിക്കൂട്ടങ്ങളെ സൃഷ്‌ടിക്കുക, മൂല്യവർധിത യൂണിറ്റ് ഉണ്ടാക്കുക തുടങ്ങിയ ലക്ഷ്യങ്ങൾ കൈവരിക്കാൻ ലക്ഷ്യമിട്ടുള്ള പദ്ധതിയാണിത്. തെങ്ങുകൾ കൂടുതലുള്ള പഞ്ചായത്തുകളിലാണ് പദ്ധതി നടപ്പാക്കുന്നത്. കേരഗ്രാമം പദ്ധതിയുടെ ഉദ്ഘാടനം നാളെ ഉച്ചക്ക് 2.30 ന് അയലൂർ പഞ്ചായത്ത് ഹാളിൽ നടക്കും. കെ. ബാബു എംഎൽഎ ഉദ്ഘാടനം ചെയ്യുന്ന ചടങ്ങിൽ ഗ്രാമപഞ്ചായത്ത് പ്രസിഡന്‍റ് എസ്. വിഘ്നേഷ് അധ്യക്ഷത വഹിക്കും. പാലക്കാട് പ്രിൻസിപ്പൽ കൃഷി ഓഫീസർ എസ്.എൻ.ആർ. മുഖപ്രസാദ് പദ്ധതി വിശദീകരിക്കും. പഞ്ചായത്ത് അംഗങ്ങൾ, കർഷകർ എന്നിവർ പരിപാടിയിൽ പങ്കെടുക്കുമെന്ന് കേരസമിതി സെക്രട്ടറി കെ. സുന്ദരൻ, കൃഷി ഓഫീസർ എം. കെ. മാനസ എന്നിവർ അറിയിച്ചു.

ഒറ്റപ്പാലം താലൂക്ക് ആശുപത്രിയിൽ രക്തരഹിത അഡ്‌നോയ്‌ഡ് ശസ്ത്രക്രിയയ്ക്കു സൗകര്യം

ഒറ്റപ്പാലം: താലൂക്കാശുപത്രിയിൽ രക്തരഹിത അഡ്‌നോയ്‌ഡ് ശസ്ത്രക്രിയക്ക് സാഹചര്യമായി. കുട്ടികളുടെ അഡ്‌നോയ്‌ഡ് ഗ്രന്ഥിയും ടോൺസിലുമായി ബന്ധപ്പെട്ട ആരോഗ്യപ്രശ്നങ്ങൾക്കുള്ള ശസ്ത്രക്രിയ രക്തരഹിതമായി ചെയ്യാനാകുന്ന സൗകര്യമാണ് ഒരുങ്ങുന്നത്. ആശുപത്രിയിലെ ഇഎൻടി വിഭാഗത്തിൽ ഇതിന്‍റെ പരീക്ഷണപ്രവർത്തനം പൂർത്തിയായി. വായതുറന്ന് ഉറങ്ങുക, കൂർക്കംവലി, ചെവിവേദന, തുടർച്ചയായ കഫക്കെട്ട് തുടങ്ങിയവ ചിലപ്പോൾ അഡ്‌നോയിഡ് ഗ്രന്ധികളുടെ വീക്കംമൂലം ഉണ്ടാകാറുണ്ട്. മരുന്നുകൊണ്ട് മാറിയില്ലെങ്കിൽ ശസ്ത്രക്രിയ മാത്രമാണ് വഴി. രക്തരഹിതമായും വേദനയില്ലാതെയും നടത്തുന്ന ശസ്ത്രക്രിയ കഴിഞ്ഞാൽ അന്നുതന്നെ വീട്ടിലേക്ക് തിരിച്ചുപോകാം. ഒപ്പം ഇനി അസുഖംവരില്ലെന്ന് 90 ശതമാനത്തിലേറെ ഉറപ്പിക്കാനുമാകുമെന്ന് ഇഎൻടി വിഭാഗം വിദഗ്ധൻ ഡോ.പി. വിനോദ് പറഞ്ഞു. കോബ്ലേറ്റർ എന്ന യന്ത്രമുപയോഗിച്ചാണ് ശസ്ത്രക്രിയ ചെയ്യുന്നത്. ഇതിനായി എട്ടുലക്ഷം രൂപയാണ് ആരോഗ്യവകുപ്പ് ചെലവഴിക്കുന്നത്. ഈ യന്ത്രത്തിന്‍റെ പരീക്ഷണ പ്രവർത്തനവും വിജയകരമായി പൂർത്തിയായിട്ടുണ്ട്. ഒപ്പം ശസ്ത്രക്രിയ നടത്താൻ ഡോക്ടർമാർ വിദഗ്ധപരിശീലനവും നേടി. ജില്ലയിൽ ഏറ്റവുംകൂടുതൽ ഇഎൻടി ശസ്ത്രക്രിയകൾ നടക്കുന്ന സർക്കാർ ആശുപത്രിയാണ് ഒറ്റപ്പാലത്തേത്.

ജില്ലാ ക്ഷീരകർഷക സംഗമം ഇന്നും നാളെയും

പാലക്കാട്: ജില്ലാ ക്ഷീരകർഷക സംഗമം ഇന്നും നാളെയുമായി നടക്കും. തേങ്കുറിശി കെഎംആർ ഓഡിറ്റോറിയം, പെരുവെന്പ് പഞ്ചായത്ത് ഗ്രൗണ്ട് എന്നിവിടങ്ങളിലായി തയ്യാറാക്കിയ നാല് വേദികളിലായാണ് സംഗമം നടക്കുക. ക്ഷീരവികസന വകുപ്പിന്‍റെ വിജ്ഞാനവ്യാപന പ്രവർത്തനങ്ങളുടെ ഭാഗമായി ജില്ലയിലെ ക്ഷീരസംഘങ്ങളുടെയും വകുപ്പിന്‍റെയും സംയുക്താഭിമുഖ്യത്തിൽ പെരുവെന്പ് ക്ഷീരവ്യവസായ സഹകരണ സംഘമാണ് സംഗമത്തിന് ആതിഥേയത്വം വഹിക്കുന്നത്. കൊല്ലങ്കോട് ബ്ലോക്ക് പഞ്ചായത്തിന്‍റെ സഹകരണത്തോടെയാണ് സംഗമം നടക്കുന്നത്. കന്നുകാലി പ്രദർശനം, ഡയറി എക്സ്പോ, ക്ഷീര കർഷക സെമിനാർ, ക്ഷീരസംഘം ജീവനക്കാരുടെ ശില്പശാല, ഡയറി പ്രശ്നോത്തരി, കലാസന്ധ്യ, സാംസ്കാരിക ഘോഷയാത്ര, പൊതു സമ്മേളനം തുടങ്ങിയവ സംഗമത്തിന്‍റെ ഭാഗമായി രണ്ടു ദിവസങ്ങളിലായി നടക്കും. ഇന്ന് രാവിലെ 7.30 ന് പെരുവെന്പ് ക്ഷീരസംഘം പരിസരത്ത് നടക്കുന്ന പരിപാടിയിൽ കൊല്ലങ്കോട് ബ്ലോക്ക് പഞ്ചായത്ത് പ്രസിഡന്‍റ് ആർ. ചിന്നക്കുട്ടൻ പതാക ഉയർത്തുന്നതോടെ സംഗമത്തിന് തുടക്കമാവും. മുതലമട ഗ്രാമപഞ്ചായത്ത് പ്രസിഡന്‍റ് ജാസ്മിൻ ഷെയ്ക്ക് അധ്യക്ഷത വഹിക്കും. പെരുവെന്പ് പഞ്ചായത്ത് ഗ്രൗണ്ടിൽ നടക്കുന്ന കന്നുകാലി പ്രദർശനം രാവിലെ എട്ടു മണിക്ക് പെരുവെന്പ് ഗ്രാമപഞ്ചായത്ത് പ്രസിഡന്‍റ് എസ്. ഹംസത്ത് ഉദ്ഘാടനം ചെയ്യും. തേങ്കുറിശി കെഎംആർ ഓഡിറ്റോറിയത്തിന് മുൻവശത്തായി നടക്കുന്ന ഡയറി എക്സ്പോയുടെ ഉദ്ഘാടനം രാവിലെ ഒന്പതു മണിക്ക് കൊടുവായൂർ ഗ്രാമപഞ്ചായത്ത് പ്രസിഡന്‍റ് വി. പ്രേമ സുകുമാരൻ ഉദ്ഘാടനം ചെയ്യും. ‘കറവപശു പരിപാലനം മാറുന്ന കാലഘട്ടത്തിൽ’ എന്ന വിഷയത്തിൽ രാവിലെ ഒന്പതു മണിക്ക് കെഎംആർ ഓഡിറ്റോറിയത്തിൽ നടക്കുന്ന ക്ഷീര കർഷക സെമിനാർ കെ. രാധാകൃഷ്ണൻ എംപി ഉദ്ഘാടനം ചെയ്യും. ജില്ലാ കളക്ടർ എം.എസ്. മാധവിക്കുട്ടി മുഖ്യാതിഥിയാവും. ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ അധ്യക്ഷത വഹിക്കും. സെമിനാറിൽ മണ്ണുത്തി വെറ്ററിനറി ആൻഡ് അനിമൽ സയൻസ് സർവകലാശാല അസോ. പ്രഫസർ ഡോ. ജസ്റ്റിൻ ഡേവിഡ് വിഷയാവതരണം നടത്തും. ഉച്ചയ്ക്ക് രണ്ടു മണിക്ക് കെഎംആർ ഓഡിറ്റോറിയത്തിൽ നടക്കുന്ന ക്ഷീരസംഘം ജീവനക്കാരുടെ ശില്പശാല കൊല്ലങ്കോട് ഗ്രാമപഞ്ചായത്ത് പ്രസിഡന്‍റ് എ. സത്യപാൽ ഉദ്ഘാടനം ചെയ്യും. നാളെ രാവിലെ ഒന്പതിന് പനയത്താണി ജംഗ്ഷനിൽനിന്നും കെഎംആർ ഓഡിറ്റോറിയം വരെ സാംസ്കാരികഘോഷയാത്ര നടക്കും. കെ. ബാബു എംഎൽഎ ഫ്ലാഗ് ഓഫ് ചെയ്യും. രാവിലെ 10.30 ന് കെഎംആർ ഓഡിറ്റോറിയത്തിൽ നടക്കുന്ന പൊതുസമ്മേളനം ക്ഷീരവികസന, മൃഗസംരക്ഷണ വകുപ്പ് മന്ത്രി ജെ. ചിഞ്ചുറാണി ഉദ്ഘാടനം ചെയ്യും. കെ.ഡി. പ്രസേനൻ എംഎൽഎ. അധ്യക്ഷത വഹിക്കും. മന്ത്രിമാരായ കെ. കൃഷ്ണൻകുട്ടി, എം.ബി. രാജേഷ് എന്നിവർ മുഖ്യാതിഥികളാവും. ജില്ലയിലെ എംപിമാർ, എംഎൽഎമാർ, ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ തുടങ്ങിയവർ പങ്കെടുക്കും.

യുവക്ഷേത്ര കോളജിൽ ഏകദിന ശില്പശാല

മുണ്ടൂർ: യുവക്ഷേത്ര കോളജ് പിജി ഇംഗ്ലീഷ് ലാംഗ്വേജ് ആൻഡ് ലിറ്ററേച്ചർ വിഭാഗത്തിന്‍റെ നേതൃത്വത്തിൽ ഇന്ത്യൻ നോളജ് സിസ്റ്റം എന്ന വിഷയത്തിൽ നടത്തിയ ശില്പശാലയിൽ ലൈവ് ഓട്ടൻതുള്ളൽ സെഷൻ തുള്ളൽ കലാകാരി ശ്രീവിദ്യ ശങ്കരനാരായണൻ ഉദ്ഘാടനം ചെയ്തു. വൈസ് പ്രിൻസിപ്പൽ റവ.ഡോ. ജോസഫ് ഓലിക്കൽകൂനൽ ആശംസകൾ അർപ്പിച്ചു. ഇംഗ്ലീഷ് വിഭാഗം മേധാവി പമീല ജോൺസൺ സ്വാഗതവും അധ്യാപിക ഡോ. ആശ മേരി എബ്രഹാം നന്ദിയും പറഞ്ഞു.

കമ്മാന്തറ പാലത്തിലൂടെ അപകടയാത്ര

പെരുവെമ്പ്: കമ്മാന്തറ കനാൽപ്പാലത്തിന്‍റെ കൈവരി തകർന്നതു യാത്രാദുരിതംകൂട്ടി. പാലത്തിന്‍റെ തെക്കുഭാഗത്തെ കൈവരിയാണ് മുൻപ് വാഹനമിടിച്ച് നിലംപതിച്ചത്. വലിയ വാഹനം പാലത്തിലൂടെ സഞ്ചരിക്കുമ്പോൾ കാൽനടയാത്രപോലും അപകടഭീതിയിലാണ്. രാത്രിസമയത്ത് പാലത്തിലൂടെ വാഹനസഞ്ചാരം ഭീതിജനകമാണെന്നു സ്ഥിരംയാത്രികർ പറയുന്നു. സ്കൂൾ വിദ്യാർഥികളുമായി പത്തിലധികം വാഹനങ്ങൾ ദിനംപ്രതി കടന്നുപോകുന്ന പാലത്തിനാണ് ഈ ദുരവസ്ഥ.

കല്പാത്തി രഥോത്സവം: ഒരുക്കങ്ങൾ ദ്രുതഗതിയിൽ പൂർത്തിയാക്കാൻ ജില്ലാ കളക്ടറുടെ നിർദേശം

പാലക്കാട്: നവംബര്‍ ഏഴുമുതല്‍ 17 വരെ നടക്കുന്ന കല്പാത്തി രഥോത്സവത്തിന് മുന്നോടിയായി ജില്ലാ കളക്ടര്‍ എം.എസ്. മാധവിക്കുട്ടിയുടെ നേതൃത്വത്തില്‍ കഴിഞ്ഞ ദിവസം അവലോകന യോഗം ചേര്‍ന്നു. രഥോത്സവത്തിനായി എത്തുന്ന ജനങ്ങളുടെ തിരക്ക് കുറക്കുന്നതിനുള്ള മാര്‍ഗങ്ങള്‍ കണ്ടെത്താനും, പ്ലാന്‍ തയാറാക്കി സമര്‍പ്പിക്കാനും പോലീസ് അധികൃതരോടു ജില്ലാ കളക്ടര്‍ നിര്‍ദ്ദേശിച്ചു. കൃത്യമായ നിയമങ്ങളും ചട്ടങ്ങളും പാലിക്കുന്ന കച്ചവടക്കാര്‍ക്ക് മാത്രമേ രഥോത്സവത്തില്‍ വില്പന സ്റ്റാളുകള്‍ക്ക് അനുമതി നല്‍കാവൂ എന്നും സ്റ്റാളുകളില്‍ ഭക്ഷ്യസുരക്ഷാ വകുപ്പ് അധികൃതരുമായി ചേര്‍ന്ന് പരിശോധന സംഘടിപ്പിക്കാനും മുന്‍സിപ്പാലിറ്റി അധികൃതര്‍ക്ക് നിര്‍ദേശം നല്‍കി. ആവശ്യമെങ്കില്‍ നിലവിലുള്ള ബയോ ടോയ്‌ലറ്റുകളുടെ എണ്ണം വര്‍ധിപ്പിക്കാനും, ബയോ ടോയ്‌ലറ്റുകള്‍ സ്ഥാപിക്കാന്‍ തഹസില്‍ദാറുമായി ചേര്‍ന്ന് സ്ഥലം കണ്ടെത്തണമെന്നും പോലീസ് അധികൃതരോടാവശ്യപ്പെട്ടു. രഥപ്രയാണം നടക്കുന്ന നവംബര്‍ 14,15,16 തീയതികളില്‍ സമീപപ്രദേശങ്ങളിലെ ആരോഗ്യ സ്ഥാപനങ്ങള്‍ 24 മണിക്കൂര്‍ പ്രവര്‍ത്തിപ്പിക്കാനും, മൂന്നുദിവസങ്ങളിലും തടസങ്ങളില്ലാതെ ശുദ്ധജലം വിതരണം ചെയ്യാനും ബന്ധപ്പെട്ട അധികൃതര്‍ക്ക് ജില്ലാ കളക്ടര്‍ നിര്‍ദേശം നല്‍കി. ആനയെ എഴുന്നള്ളിക്കുന്നതുമായി ബന്ധപ്പെട്ട വിഷയം ചര്‍ച്ച ചെയ്യുന്നതിനായി അടുത്തയാഴ്ച വനം വകുപ്പ് അധികൃതര്‍ ഉള്‍പ്പെടെയുള്ളവരുമായി ചേര്‍ന്ന് ജില്ലാ മാനേജ്‌മെന്‍റ് കൗണ്‍സില്‍ യോഗം സംഘടിപ്പിക്കുമെന്നും കളക്ടര്‍ അറിയിച്ചു. കളക്ടറേറ്റ് കോണ്‍ഫറന്‍സ് ഹാളില്‍ നടന്ന പരിപാടിയില്‍ പാലക്കാട് മുനിസിപ്പാലിറ്റി കൗണ്‍സിലര്‍മാരായ കെ.വി. വിശ്വനാഥന്‍, എല്‍.വി. ഗോപാലകൃഷ്ണന്‍, അഡീഷണല്‍ ഡിസ്ട്രിക്ട് മജിസ്‌ട്രേറ്റ് കെ സുനില്‍ കുമാര്‍, തഹസില്‍ദാര്‍ മുഹമ്മദ് റാഫി, വിവിധ ക്ഷേത്ര കമ്മിറ്റി ഭാരവാഹികള്‍, വിവിധ വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

അട്ടപ്പാടിയിലെ അങ്കണവാടികളിൽ കെഫോൺ ഇന്‍റർനെറ്റ് സേവനം

അഗളി: അട്ടപ്പാടി ആദിവാസി ഊരുകളിലെ അങ്കണവാടികളില്‍ ഹൈസ്പീഡ് ഇന്‍റര്‍നെറ്റ് സേവനമെത്തിച്ച് കെഫോണ്‍. കുപ്പന്‍ കോളനി, പുതൂര്‍, ചീരക്കടവ് തുടങ്ങിയ പ്രദേശങ്ങളിലെ അന്പതോളം അങ്കണവാടികളിലാണ് കെഫോണ്‍ ഇന്‍റര്‍നെറ്റ് സേവനമെത്തിക്കുക. പദ്ധതിയുടെ ആദ്യഘട്ടമായി 31 അങ്കണവാടികളിൽ ഇന്‍റര്‍നെറ്റ് ലഭ്യമാക്കിക്കഴിഞ്ഞു. പുതൂര്‍ ഗ്രാമപഞ്ചായത്ത് ചൂട്ടറ അങ്കണവാടിയിലെ അധ്യാപികയ്ക്ക് കെഫോണിന്‍റെ പ്രാദേശിക പങ്കാളികളായ അട്ടപ്പാടി കേബിള്‍ വിഷന്‍ പ്രതിനിധികള്‍ വൈഫൈ മോഡം കൈമാറിക്കൊണ്ടായിരുന്നു പദ്ധതിയുടെ ഔപചാരിക തുടക്കം. ജില്ലാ ഭരണകൂടം, പഞ്ചായത്ത്, കേബിള്‍വിഷന്‍ പ്രതിനിധികള്‍ എന്നിവരുടെ കൂട്ടായ സഹകരണത്തിലൂടെയാണ് പദ്ധതി നടപ്പിലാക്കുന്നത്.

പട്ടഞ്ചേരി തെക്കേക്കാട്ടിൽ കളിസ്ഥലം നിർമാണത്തിനു തുടക്കം

വണ്ടിത്താവളം: പട്ടഞ്ചേരി ഗ്രാമ പഞ്ചായത്തിലെ തെക്കേക്കാട്ടിൽ കളിസ്ഥലം നിർമാണ ഉദ്ഘാടനം പഞ്ചായത്ത്‌ പ്രസിഡന്‍റ് പി.എസ്. ശിവദാസ് നിർവഹിച്ചു. ഇതിലേക്കായി ജില്ലാ പഞ്ചായത്തും ഗ്രാമ പഞ്ചായത്തും സംയുക്തമായി 16 ലക്ഷം രൂപ വകയിരുത്തിയിട്ടുണ്ട്. വൈസ് പ്രസിഡന്‍റ് അനില മുരളീധരൻ അധ്യക്ഷയായി. ജില്ലാപഞ്ചായത്ത് മെംബർ മാധുരി പത്മനാഭൻ, പഞ്ചായത്ത് വികസനകാര്യ ചെയർമാൻ ഭുവൻദാസ് ശൈലജ, ബ്ലോക്ക്‌ പഞ്ചായത്തംഗം മധു, ജനപ്രതിനിധികളായ ശോഭനദാസ്, സതീഷ് ചോഴിയക്കാടൻ, കെ. ചെമ്പകം, സുഷമ മോഹൻദാസ്, കെ. കണ്ടമുത്തൻ, സെക്രട്ടറി എം.എസ്. ബീന, അസിസ്റ്റന്‍റ് എൻജിനീയർ ഷമിത, അസിസ്റ്റന്‍റ് സെക്രട്ടറി ഹരിദാസ് എന്നിവർ പ്രസംഗിച്ചു.

കണ്ണിയമ്പുറം ബധിര- മൂക സ്കൂളിലെ വിദ്യാർഥികൾക്കു സർക്കാർ ഗ്രാന്‍റ് ലഭിച്ചില്ല

ഒറ്റപ്പാലം: കണ്ണിയമ്പുറം ബധിര- മൂക വൊക്കേഷണൽ ഹയർസെക്കൻഡറി സ്കൂളുകളിലെ വിദ്യാർഥികൾക്ക് സർക്കാർ ഗ്രാന്‍റ് ലഭിച്ചില്ലെന്നു പരാതി. രണ്ടുവർഷത്തെ ബോർഡിംഗ് ഗ്രാന്‍റാണ് ലഭിക്കാനുള്ളത്. മാസത്തിൽ 900 രൂപയാണ് ഒരു കുട്ടിക്ക്‌ ബോർഡിംഗ് ഗ്രാന്‍റ് അനുവദിക്കുക. ഇതിനൊപ്പം ഒരു വർഷത്തെ മെസ് ഫീസും ഇപ്പോഴും ലഭിച്ചിട്ടില്ല. മെസ് ഫീയായി 150 രൂപയാണ് അനുവദിക്കുന്നത്. തുക അനുവദിക്കണമെന്നാവശ്യപ്പെട്ട് പ്രിൻസിപ്പൽമാർ അപേക്ഷകൾ നൽകിയിട്ടുണ്ട്. എന്നാൽ, ഭരണാനുമതി ഇനിയുമായിട്ടില്ല. ഒറ്റപ്പാലം, തിരുവനന്തപുരം ജഗതി, തൃശൂർ, കുന്നംകുളം എന്നിവിടങ്ങളിലാണ് ഗവ. ബധിര വൊക്കേഷണൽ ഹയർസെക്കൻഡറി സ്കൂളുകളുള്ളത്. ഒരു വർഷത്തെ ഫണ്ടിന് നേരത്തെ ഭരണാനുമതി ലഭിച്ചിരുന്നു. ബാക്കിയുള്ള ഒരു വർഷത്തെ തുകയ്ക്ക് ഭരണാനുമതി നൽകി. രണ്ടുവർഷത്തെ തുക ഒരുമിച്ച് നൽകുമെന്നാണ് വിദ്യാഭ്യാസ വകുപ്പ് അധികൃതർ പറയുന്നത്. ഇനിയും വൈകിയാൽ മെസ് പ്രവർത്തനം പ്രതിസന്ധിയിലാകുമോയെന്ന ആശങ്കയും പ്രിൻസിപ്പൽമാർക്കുണ്ട്.

ഷൊർണൂർ ജംഗ്ഷൻ റെയിൽവേ സ്റ്റേഷനിൽ കാൽനടമേൽപ്പാലം തുറക്കണമെന്ന് ആവശ്യം

ഷൊർണൂർ: ജംഗ്ഷൻ റെയിൽവേ സ്റ്റേഷനിൽ കാൽനട മേൽപ്പാലം അടിയന്തിരമായി തുറന്നുകൊടുക്കണമെന്ന ആവശ്യം ശക്തം. പ്ലാറ്റ്ഫോമുകളുടെ രണ്ടറ്റങ്ങളിലേക്കും പോകേണ്ടവർ ഒരു നടപ്പാലം മാത്രം ഉപയോഗിച്ചാണിപ്പോൾ പോകുന്നത്. സ്റ്റേഷനിലെത്തിയാൽ നടപ്പാലം കയറി ട്രെയിനെത്തുന്ന പ്ലാറ്റ്ഫോമിന്‍റെ മുമ്പിലേക്കും പുറകിലേക്കും വലിയ ദൂരം പോകേണ്ടതാണ് യാത്രക്കാരെ വലയ്ക്കുന്നത്. റെയിൽവേ സ്റ്റേഷനിൽ മുമ്പുണ്ടായിരുന്ന നടപ്പാലമാണ് കാലപ്പഴക്കത്താലുള്ള പ്രശ്നങ്ങളാൽ അറ്റകുറ്റപ്പണി നടത്താതെ ഇട്ടിരിക്കുന്നത്. ഒരു വർഷത്തോളമായി ഇതു അടച്ചിട്ടിരിക്കുകയാണ്. ഏഴ് പ്ലാറ്റ്ഫോമുകളിലേക്കുമെത്താൻ പുതിയ പാലം നിർമിച്ചെങ്കിലും ടിക്കറ്റെടുക്കുന്നവർക്ക് ഈ ഭാഗത്തേക്ക് കുറേ നടന്നുവേണം കയറാൻ. അടച്ചിട്ട പാലം പ്രവേശനകവാടത്തിലേക്ക് നേരിട്ടെത്തുന്നതാണ്. ഭാരമേറിയ ബാഗുകളുമായെത്തുന്നവർക്കും പ്രായമായവർക്കും ഇപ്പോൾ പ്ലാറ്റ്ഫോമുകളിലേക്കെത്താൻ ഏറെ പാടുപെടണം. അമൃത് ഭാരത് പദ്ധതിയുടെ ഭാഗമായി 12 കോടിയോളം രൂപയുടെ പ്രവൃത്തികൾ നടത്തി നവീകരിച്ചെങ്കിലും യാത്രക്കാരുടെ അടിസ്ഥാനപ്രശ്നത്തിന് പരിഹാരമായിട്ടില്ല. യാത്രക്കാരെ പ്ലാറ്റ്ഫോമുകളിലേക്കെത്തിക്കാൻ ബാറ്ററി കാർ സംവിധാനമുണ്ടായിരുന്നെങ്കിലും ഇതു പാളത്തിലേക്ക് മറിഞ്ഞതോടെ സേവനവും നിലച്ചു. കരാറുകാരുടെ ഡ്രൈവർക്കെതിരേ നടപടിയുമെടുത്തിരിക്കുകയാണ്. സൗകര്യങ്ങളില്ലാത്തതിനാൽ യാത്രക്കാർ പലപ്പോഴും പോർട്ടർമാരുടെ സേവനമാണിപ്പോഴും ഉപയോഗിക്കുന്നത്.

സൗരോർജ തൂക്കുവേലി നിർമാണം പൂർത്തിയായി

നെന്മാറ: നെന്മാറ മലയോരമേഖലയിൽ കാട്ടാന പ്രതിരോധത്തിനായി സൗരോർജ തൂക്കുവേലി നിർമാണം പൂർത്തിയായി. നെന്മാറ വനംഡിവിഷനിൽ ആലത്തൂർ, നെല്ലിയാമ്പതി വനം റേഞ്ചുകളിൽപെട്ട മലയോരമേഖലകളിലാണ് സൗരോർജ തൂക്കുവേലി നിർമാണം പൂർത്തിയായത്. രാഷ്ട്രീയ കിസാൻ വികാസ് യോജന പദ്ധതി പ്രകാരം 60 ശതമാനം കേന്ദ്രവിഹിതവും 40 ശതമാനം സംസ്ഥാന സർക്കാരും വിഹിതമെടുത്താണ് പദ്ധതി നടപ്പിലാക്കിയത്. രണ്ടുകോടി 20 ലക്ഷം രൂപ ചെലവിൽ 27.5 കിലോമീറ്റർ ദൂരത്താണ് സൗരോർജ തൂക്കുവേലി സ്ഥാപിച്ചത്. ഇതുകൂടാതെ വനം വകുപ്പിന്‍റെ ഫണ്ടുപയോഗിച്ച് ഒന്പതു കിലോമീറ്ററോളം ദൂരം വിവിധ മേഖലകളിലായി നിർമിച്ചിട്ടുണ്ട്. വന്യമൃഗങ്ങൾ ജനവാസമേഖലയിൽ ഇറങ്ങി ജീവന് ഭീഷണി ഉയർത്തുകയും രൂക്ഷമായ കൃഷിനാശം വരുത്തിയതിനെതുടർന്നുള്ള പരാതികളെ തുടർന്നാണ് തൂക്കുവേലി നിർമാണം നടത്തിയത്. നെന്മാറ വനംഡിവിഷനു കീഴിൽ നെല്ലിയാമ്പതി, ആലത്തൂർ റേഞ്ചുകളിലാണ് സൗരോർജ തൂക്കുവേലി നിർമിച്ചത്. അയിലൂർ, വണ്ടാഴി, നെന്മാറ പഞ്ചായത്തുകളിലെ വനാതിർത്തികളിൽ പത്തുമീറ്റർ വീതിയിൽ അടിക്കാടുകൾ വെട്ടിമാറ്റിയായിരുന്നു നിർമാണം. പണി പൂർത്തിയാക്കിയ തൂക്കുവേലിക്ക് പരിപാലനത്തിന് സ്ഥിരം സംവിധാനം ഏർപ്പെടുത്തിയിട്ടില്ല. താത്കാലികമായി വനം വാച്ചർമാർ തന്നെയാണ് അടിക്കാടുകളും മറ്റും വെട്ടിനീക്കി പരിപാലിക്കുന്നത്. തൂക്കുവേലി നിർമാണം പൂർത്തിയായെങ്കിലും നിലവിലെ അഞ്ചടി പൊക്കമുള്ള സൗരോർജവേലി ബാറ്ററിയും യന്ത്രസാമഗ്രികളും കേടായതിനെ തുടർന്ന് പരിപാലനമില്ലാതെ പാഴ്ച്ചെടികളും വള്ളികളും കയറിത്തുടങ്ങിയെന്ന് പ്രദേശവാസികൾ പറഞ്ഞു.

വയോജനങ്ങൾക്കു താങ്ങായി വടക്കഞ്ചേരി മലബാർ ലയൺസ് ക്ലബ്

വടക്കഞ്ചേരി: കിടപ്പുരോഗികളായി കഴിയുന്ന വയോജനങ്ങൾക്ക് എയർബെഡുകൾ വീടുകളിൽ എത്തിച്ചനൽകി വടക്കഞ്ചേരി ലയൺസ് ക്ലബ്. വടക്കഞ്ചേരിയിലും സമീപ പ്രദേശങ്ങളായ വള്ളിയോട്, മുന്നാഴിപ്പറമ്പ്, കറ്റുകോട്, കണക്കൻതുരുത്തി ,അഞ്ഞുമൂർത്തി, കിഴക്കഞ്ചേരി പ്രദേശങ്ങളിലെ കിടപ്പുരോഗികൾക്കാണ് എയർ ബെഡുകൾ വിതരണം ചെയ്തത്. ക്ലബ് പ്രസിഡന്‍റ് കെ.പി. രാജേന്ദ്രൻ, സെക്രട്ടറി സജോ ജോർജ് തേവർകാട്, ട്രഷറർ സി.എൻ. ഷിനു, ഡിസ്ട്രിക്ട് കോ-ഓർഡിനേറ്റർ വിമൽ വേണു, മുരളി, ബേബി വർഗീസ്, ബാബു പീറ്റർ, ഇമ്മാനുവേൽ ജോസഫ്, കെ.ജെ. ചാക്കോ, സീൻ ജോസഫ് എന്നിവർ പ്രവർത്തനങ്ങൾക്കു നേതൃത്വം നൽകി. കാൻസർ രോഗികൾക്കുള്ള ധനസഹായം ബേബി വർഗീസ്, ജോസ് ജോർജ്, അജിത്ത് ജോർജ് എന്നിവരുടെ നേതൃത്വത്തിൽ നൽകി. അശരണരും അനാഥരുമായ 200 അമ്മമാരെ സംരക്ഷിക്കുന്ന മംഗലംപാലത്തെ ദൈവദാൻ സെന്‍ററിനു ഒരു ലക്ഷം രൂപ വിലമതിക്കുന്ന ചികിത്സാ സാധനങ്ങളും മരുന്നുകളും ക്ലബ് മെംബർ സജി ജോർജിന്‍റെ സഹകരണത്തോടെ ക്ലബ് നൽകിയിരുന്നു.

ഫാബ്രിക്കേഷൻ തൊഴിലാളി ഷോക്കേറ്റു മരിച്ചനിലയിൽ

പുതുനഗരം: അലുമിനിയം ഫാബ്രിക്കേഷൻ പണിക്കിടെ തൊഴിലാളിയെ ഷോക്കേറ്റു മരിച്ചനിലയിൽ കണ്ടെത്തി. പുതുനഗരം നെല്ലിമേട്ടിൽ മുഹമ്മദ് സലീമിന്‍റെ മകൻ തൗഫീഖാണ് (24) മരിച്ചത്. കൊടുവായൂർ നൊച്ചൂരിലെ സ്വകാര്യവ്യക്തിയുടെ വീട്ടിൽ മുകൾനിലയിൽ പണിചെയ്യുന്നതിനിടെയാണ് ഷോക്കേറ്റത്. ചൊവ്വാഴ്ച വൈകുന്നേരം 5.30 ഓടെ വീട്ടുടമസ്ഥനാണ് മൃതദേഹം കണ്ടത്. രാവിലെ പണിക്കെത്തിയ തൗഫീഖ് ഇരുന്പുദണ്ഡ് മുകളിലേക്കു കൊണ്ടുപോകുന്നതിനിടെ വൈദ്യുതിലൈനിൽ തട്ടി ഷോക്കേറ്റതാണെന്നു ബന്ധുക്കൾ പറഞ്ഞു. താഴത്തെ നിലയിൽ സ്ത്രീകൾ മാത്രമുണ്ടായിരുന്നതിനാൽ ആരും മുകളിലെ നിലയിലേക്കു പോയില്ല. പുറത്തുപോയ വീട്ടുടമസ്ഥൻ വൈകുന്നേരമെത്തി മുകളിലെ നിലയിലേക്കു പോയപ്പോഴാണ് പടിക്കെട്ടിൽ മരിച്ചുകിടക്കുന്നതു കണ്ടത്. ജില്ലാ ആശുപത്രിയിൽ എത്തിച്ചെങ്കിലും മരണം നടന്നു മണിക്കൂറുകൾ കഴിഞ്ഞതായി അറിയിച്ചു. മൊബൈൽ ടെക്നീഷ്യനായിരുന്ന തൗഫീഖ് വിദേശത്തുപോയി മാസങ്ങൾക്കുമുന്പാണ് നാട്ടിലെത്തിയത്. ഒരുമിച്ചു ജോലിചെയ്യുന്ന സുഹൃത്ത് പനിപിടിച്ച് വിശ്രമത്തിലായതിനാൽ ഒറ്റയ്ക്കാണ് പണിസ്ഥലത്ത് എത്തിയത്. പുതുനഗരം പോലീസ് ഇൻക്വസ്റ്റിനുശേഷം പോസ്റ്റ്മോർട്ടം നടത്തി മൃതദേഹം ബന്ധുക്കൾക്കു വിട്ടുനൽകി. അമ്മ: റെയ്ഹാന. സഹോദരൻ: ഫാസിൽ.

കാട്ടാനയാക്രമണത്തിൽ ബൈക്ക് യാത്രക്കാരൻ മരിച്ച സംഭവം: താവളത്ത് റോഡ് ഉപരോധിച്ച് നാട്ടുകാർ

അഗളി: ഇന്നലെ കാട്ടാന ആക്രമണത്തിൽ മഞ്ചിക്കണ്ടിയിൽ ശാന്തകുമാർ കൊല്ലപ്പെട്ടതിനെ തുടർന്ന് സർവകക്ഷി നേതൃത്വത്തിൽ താവളത്ത് നടന്ന സമരത്തിൽ വനംവകുപ്പിനെതിരെ അതിശക്ത പ്രതിഷേധമുയർന്നു. രണ്ടുദിവസം മുന്പ് മാൻ വാഹനത്തിന്‍റെ കുറുകെ ചാടി കൊല്ലപ്പെട്ട സുബ്രഹ്മണ്യന്‍റെ ഭാര്യ അടക്കമുള്ളവർ കട്ടിലുമായി സമരത്തിന് എത്തി. അഞ്ചുവർഷത്തിനിടയിൽ ഏതാണ്ട് മുപ്പതോളം ആളുകളാണ് അട്ടപ്പാടിയിൽ കാട്ടുമൃഗങ്ങളുടെ ആക്രമണത്തിൽ കൊല്ലപ്പെട്ടതെന്ന് സമരക്കാർ ചൂണ്ടിക്കാട്ടി. ഡിഎഫ്ഒ, ഭൂരേഖ തഹസിൽദാർ അട്ടപ്പാടി, അഗളി ഡിവൈഎസ്പി തുടങ്ങിയവർ സമരക്കാരുമായി ചർച്ചയ്ക്ക് എത്തി. വിവിധ കക്ഷിനേതാക്കളുമായി നടത്തിയ ചർച്ചയെ തുടർന്ന് പാലൂർ, തേക്ക് വട്ട ഭാഗങ്ങളിൽ കാട്ടാന ആക്രമണത്തിൽ ആളുകൾ നിരന്തരമായി കൊല്ലപ്പെടുന്ന സാഹചര്യത്തിൽ ആക്രമണകാരിയായ ആനയെ തിരിച്ചറിയുന്നതിന് നടപടി സ്വീകരിക്കുമെന്നും അതിനെ പിടിച്ചുകൊണ്ടു പോകുമെന്നും അധികൃതർ ഉറപ്പ് നൽകി. അട്ടപ്പാടിയുടെ വിവിധ മേഖലകളിൽ ജനവാസകേന്ദ്രങ്ങൾക്കിടയിൽ തുരുത്തുകളായി നിൽക്കുന്ന വനഭൂമിയിൽ നിലയുറപ്പിച്ചിട്ടുള്ള ആനകളെ അവിടെനിന്ന് നീക്കുന്നതിന് നടപടി സ്വീകരിക്കും. കഴിഞ്ഞ രണ്ട് ദിവസങ്ങളായി കൊല്ലപ്പെട്ട കുടുംബങ്ങളിലെ ഒരു അംഗത്തിന് ദിവസവേതന അടിസ്ഥാനത്തിൽ നിയമനം നൽകും. കാട്ടുമൃഗ അക്രമങ്ങൾ രൂക്ഷമായ പ്രദേശത്ത് ഇലക്ട്രിക് സോളാർ ഫെൻസിംഗ്, ട്രഞ്ച് എന്നിവ നിർമിച്ച് കാട്ടുമൃഗ ആക്രമങ്ങൾ തടയുന്നതിന് ശ്രമിക്കും. കഴിഞ്ഞ അഞ്ചുവർഷങ്ങളിലായി കാട്ടുമൃഗ ആക്രമണത്തിൽ കൊല്ലപ്പെട്ട കുടുംബങ്ങൾക്ക് ബാക്കി നൽകുവാനുള്ള തുക നൽകും. അവകാശ സർട്ടിഫിക്കറ്റ് കിട്ടാത്തവർക്ക് അതിനുള്ള സൗകര്യം തഹസിൽദാർ ഒരുക്കും. വളർത്തുമൃഗങ്ങൾ കൊല്ലപ്പെടുകയും കൃഷിനാശം സംഭവിക്കുകയും ചെയ്തവർക്ക് ലഭിക്കുവാനുള്ള നഷ്ടപരിഹാരം എത്രയും പെട്ടെന്ന് നൽകും. ആനയ്ക്ക് വനഭൂമിയിൽ തന്നെ കുടിവെള്ള സൗകര്യം ഒരുക്കും. സ്പെഷൽ ആർആർടി ടീമിന് സുസജ്ജമായ വാഹനവും യന്ത്രസൗകര്യങ്ങളും ഒരുക്കിക്കൊടുക്കും. ആർആർടി ടീമിന്‍റെ പട്രോളിംഗ് ശക്തിപ്പെടുത്തും തുടങ്ങിയ ഉറപ്പുകളാണ് അധികൃതർ നൽകിയത്. കൂടാതെ കാട്ടുമൃഗ ആക്രമണങ്ങളിൽ കൊല്ലപ്പെടുന്നവരുടെ നഷ്ടപരിഹാരത്തുക ഉയർത്തണമെന്നുള്ള ജനങ്ങളുടെ ആവശ്യം സർക്കാരിന്‍റെ ശ്രദ്ധയിൽ പെടുത്തും. കൃഷിനാശത്തിന്‍റെയും പരിധി ഉയർത്തുന്നതിനും സർക്കാരിന്‍റെ ശ്രദ്ധ കൊണ്ടുവരും. രാവിലെ ഒന്പതരയ്ക്ക് ആരംഭിച്ച സമരം ഉച്ചയ്ക്ക് ഒന്നരക്കാണ് അവസാനിപ്പിച്ചത്. ഷിബു സിറിയക്, പി.എം. ഹനീഫ, ധർമരാജ് താവളം, എം.ആർ. സത്യൻ, സെന്തിൽ കുമാർ. എ, ജോസ് പനക്കാമറ്റം, മണി കാവുണ്ടിക്കല്ല്, ബാബു ആനക്കല്ല്, സതീഷ് കുമാർ പാടവയൽ, മനോജ് ഭാസ്കരൻ തുടങ്ങിയവർ നേതൃത്വം നൽകി.

വന്യമൃഗ ആക്രമണങ്ങളിൽ കർഷകരുടെ മരണം: കിഫയുടെ പ്രതിഷേധകൂട്ടായ്മ

മംഗലംഡാം: കൊട്ടിഘോഷിച്ച് വന്യജീവി വാരാഘോഷങ്ങൾ നടന്നുക്കൊണ്ടിരിക്കെ തുടർച്ചയായ ദിവസങ്ങളിൽ വന്യജീവി ആക്രമണത്തിൽ മൂന്ന്പേർ കൊല്ലപ്പെട്ട സംഭവം സംസ്ഥാന സർക്കാരിന്‍റെ കർഷകരോടുള്ള കടുത്ത അനാസ്ഥയുടെ പ്രതിഫലനമാണെന്ന് കിഫ ആലത്തൂർ, നെന്മാറ നിയോജക മണ്ഡലം കമ്മിറ്റികൾ സംയുക്തമായി ഒലിപ്പാറ അടിപ്പെരണ്ടയിൽ സംഘടിപ്പിച്ച പ്രതിഷേധ കൂട്ടായ്മ ചൂണ്ടിക്കാട്ടി. പരാതിപ്പെട്ടിവച്ചും സെമിനാറുകൾ നടത്തിയും വനം വകുപ്പ് വൗച്ചറുകൾ എഴുതികൂട്ടുമ്പോൾ പാവപ്പെട്ട മലയോരകർഷകന്‍റെ ജീവൻ രക്ഷിക്കാൻ വനംവകുപ്പിന് സാധിക്കുന്നില്ല. അവാർഡ് നേടുന്ന നടൻമാരെ ആദരിക്കാൻ 2.84 കോടി രൂപ ഒരു ദിവസം ചെലവാക്കിയ സർക്കാർ നിയമസഭാ സബ് കമ്മിറ്റി വന്യജീവി ആക്രമണ നഷ്ടപരിഹാരത്തിന് 23 കോടി രൂപ ശുപാർശ ചെയ്തെങ്കിലും വെറും 1.26 കോടി രൂപ മാത്രമാണ് അനുവദിച്ചത്. ഈ പ്രഹസനങ്ങൾ അവസാനിപ്പിച്ച് മലയോരവാസികളുടെ ജീവൻ സംരക്ഷിക്കാൻ വേണ്ട നടപടികളെടുക്കണം. കൃഷിഭൂമിയിലിറങ്ങുന്ന വന്യമൃഗങ്ങളെ പ്രതിരോധിക്കാനുള്ള ശക്തമായ നടപടികൾ വനംവകുപ്പ് കൈക്കൊള്ളണം. ഇല്ലെങ്കിൽ സ്വയം പ്രതിരോധിക്കാനുള്ള അവകാശം കർഷകർക്ക് നൽകണമെന്നും യോഗം ആവശ്യപ്പെട്ടു. പ്രതിഷേധകൂട്ടായ്മയിൽ കിഫ ജില്ലാ സെക്രട്ടറി അബ്ബാസ് ഒറവഞ്ചിറ അധ്യക്ഷത വഹിച്ചു. ജില്ലാ കോ-ഓർഡിനേറ്റർ ഡോ. സിബി സക്കറിയാസ്, ജില്ലാ ട്രഷറർ രമേശ് ചേവക്കുളം, ജില്ലാ കമ്മിറ്റി അംഗങ്ങളായ ബെന്നി ജോർജ് കിഴക്കേപറമ്പിൽ, ഹുസൈൻകുട്ടി, എബ്രഹാം പുതുശേരി, സോമൻ കൊമ്പനാൽ പ്രസംഗിച്ചു. കാഞ്ഞിരപ്പുഴ: ചിന്നക്കനാലിലും അട്ടപ്പാടിയിലും കാട്ടാനയുടെ ആക്രമണത്തിൽ രണ്ടുപേർ കൊല്ലപ്പെട്ടതിൽ പ്രതിഷേധിച്ച് കേരള ഇൻഡിപെൻഡന്‍റ് ഫാർമേഴ്സ് അസോസിയേഷൻ കാഞ്ഞിരപ്പുഴ പഞ്ചായത്ത് കമ്മിറ്റിയുടെ നേതൃത്വത്തിൽ പ്രതിഷേധജാഥ നടത്തി. കാഞ്ഞിരപ്പുഴ പഞ്ചായത്ത് പരിസരത്ത് നിന്ന് കാഞ്ഞിരം അങ്ങാടിയിലേക്ക് നടത്തിയ പ്രതിഷേധപ്രകടനത്തിന് ജില്ലാ കോ- ഓർഡിനേറ്റർ ജോമി മാളിയേക്കൽ, വിൻസന്‍റ് ഇലവുങ്കൽ, ജിമ്മിച്ചൻ വട്ടവനാൽ, വികാസ് ജോസ,് രാധാകൃഷ്ണൻ, ചാമുണ്ണി എന്നിവർ നേതൃത്വം നൽകി. കിഫ ജില്ലാ പ്രസിഡന്‍റ് സണ്ണി കിഴക്കേക്കര ജാഥ ഉദ്ഘാടനം ചെയ്തു. കർഷകരും ഓട്ടോ-ടാക്സി തൊഴിലാളികൾ ഉൾപ്പടെ നൂറുകണക്കിന് ആളുകൾ പങ്കെടുത്തു.

മണ്ണാർക്കാട് ഉപജില്ലാ ശാസ്ത്രോത്സവം

കാരാകുർശി: മണ്ണാർക്കാട് ഉപജില്ല ശാസ്ത്രോത്സവത്തിനു തുടകമായി. ശാസ്ത്രോത്സവത്തിന്‍റെ ഉദ്ഘാടനം ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ നിർവഹിച്ചു. ഇന്നലെ കാരാകുർശി ജിവിഎച്ച്എസ്എസിൽ പ്രവൃത്തിപരിചയമേളയും എഎംയുപി സ്കൂളിൽ സാമൂഹ്യശാസ്ത്രമേളയും നടന്നു. ഇന്ന് ജിവിഎച്ച്എസ്എസിൽ ശാസ്ത്രമേളയും എഎംയുപി സ്കൂളിൽ ഗണിതമേളയും നടക്കും. രണ്ടു ദിവസങ്ങളിലായി നടക്കുന്ന ശാസ്ത്രമേളയിൽ എൽപി, യുപി, ഹൈസ്കൂൾ, ഹയർ സെക്കൻഡറി വിഭാഗത്തിൽ 4000 ലധികം പ്രതിഭകൾ മാറ്റുരക്കും. ഇന്ന് വൈകുന്നേരം മൂന്നിന് നടക്കുന്ന സമാപന സമ്മേളനം ശ്രീകൃഷ്ണപുരം ബ്ലോക്ക് പഞ്ചായത്ത് പ്രസിഡന്‍റ് സുനിത ജോസഫ് ഉദ്ഘാടനം ചെയ്യും.

വാർഡ് സംവരണം: നറുക്കെടുപ്പ് തിയതി വിജ്ഞാപനമായി

പാലക്കാട്: പൊതു തെരഞ്ഞെടുപ്പിനു മുന്നോടിയായി തദ്ദേശസ്വയംഭരണ സ്ഥാപനങ്ങളിലെ നിയോജകമണ്ഡലങ്ങളുടെയും വാർഡുകളുടെയും സംവരണക്രമം നറുക്കെടുപ്പിലൂടെ തീരുമാനിക്കുന്നതിന് ഉദ്യോഗസ്ഥരെ അധികാരപ്പെടുത്തിയും തിയതിയും സമയവും സ്ഥലവും നിശ്ചയിച്ചും സംസ്ഥാന തെരഞ്ഞെടുപ്പ് കമ്മീഷൻ വിജ്ഞാപനം പുറപ്പെടുവിച്ചു. 941 ഗ്രാമപഞ്ചായത്തുകളിലേയ്ക്ക് 13 മുതൽ 16 വരെയാണ് നറുക്കെടുപ്പ് തീയതി നിശ്ചയിച്ചിട്ടുള്ളത്. 14 ജില്ലാപഞ്ചായത്തുകളിലേയ്ക്കുള്ള നിയോജകമണ്ഡലങ്ങളുടെ സംവരണം നിശ്ചയിക്കുന്നതിനുള്ള നറുക്കെടുപ്പ് 21 ന് രാവിലെ 10 ന് അതാത് കളക്ടറേറ്റ് കോൺഫറൻസ് ഹാളിൽ നടക്കും. പാലക്കാട് ജില്ലയിലെ തൃത്താല, പട്ടാമ്പി, ഒറ്റപ്പാലം ബ്ലോക്ക് പരിധിയില്‍ വരുന്ന ഗ്രാമപഞ്ചായത്തുകളുടെ സംവരണ മണ്ഡലങ്ങള്‍ നിശ്ചയിക്കുന്ന നറുക്കെടുപ്പ് 13 രാവിലെ 10 മണിക്കും മണ്ണാർക്കാട്, പാലക്കാട്, ശ്രീകൃഷ്ണപുരം ബ്ലോക്ക് പരിധിയില്‍ വരുന്ന ഗ്രാമപഞ്ചായത്തുകളുടെ നറുക്കെടുപ്പ് 14 രാവിലെ 10 മണിക്കും കുഴൽമന്ദം, ചിറ്റൂർ, അട്ടപ്പാടി ബ്ലോക്ക് പരിധിയില്‍ വരുന്ന ഗ്രാമപഞ്ചായത്തുകളുടെ നറുക്കെടുപ്പ് 15 രാവിലെ 10 മണിക്കും കൊല്ലങ്കോട്, ആലത്തൂർ, നെന്മാറ, മലമ്പുഴ ബ്ലോക്ക് പരിധിയില്‍ വരുന്ന ഗ്രാമപഞ്ചായത്തുകളുടെ നറുക്കെടുപ്പ് 16 രാവിലെ 10 മണിക്കും കളക്ടറേറ്റ് കോണ്‍ഫ്രന്‍സ് ഹാളില്‍ നടക്കും. ജില്ലയിലെ നഗരസഭകളുടെ സംവരണ മണ്ഡലങ്ങള്‍ നിശ്ചയിക്കുന്നതിനുള്ള നറുക്കെടുപ്പും 16 രാവിലെ 10 മണിക്ക് കളക്ടറേറ്റ് കോണ്‍ഫ്രന്‍സ് ഹാളില്‍ നടക്കും. ജില്ലയിലെ ബ്ളോക്ക് പഞ്ചായത്തുകളിലെ നിയോജകമണ്ഡലങ്ങളുടെ സംവരണം നിശ്ചിയിക്കുന്നതിനുള്ള നറുക്കെടുപ്പ് 18 ന് രാവിലെ 10 മണിക്ക് കളക്ടറേറ്റ് കോണ്‍ഫ്രന്‍സ് ഹാളില്‍ നടക്കും.

സ്കൂളിൽ തേനീച്ചക്കൂടിളകിയത് പരിഭ്രാന്ത്രി പരത്തി

കൊല്ലങ്കോട്: നെന്മേനി ശ്രീ നാരായണ പബ്ളിക് സ്കൂൾ കോമ്പൗണ്ടിനകത്ത് കെട്ടിടത്തിൽ തേനീച്ചകൂടിളകിയത് പരിഭ്രാന്ത്രി പരത്തി. ഇന്നലെ രാവിലെ ഒന്പതിനാണ് സംഭവം. നേരത്തെ സ്കൂളിലെത്തിയ ജീവനക്കാർ തേനീച്ചകൾ കൂടിളകി പറക്കുന്നത് കണ്ട് ഉടൻ സ്കൂൾ അധികൃതർക്ക് വിവരം നൽകി. ഉടൻതന്നെ സ്കൂൾ പ്രവേശനകവാടത്തിലെ ഗേറ്റ് അടച്ച് വിദ്യാർഥികൾ അകത്തുകടക്കുന്നത് തടഞ്ഞു. ഉടൻതന്നെ സ്കൂൾ പ്രിൻസിപ്പൽ സ്കൂളിനു അവധി പ്രഖ്യാപിച്ചു. ഇതിനിടെ പല രക്ഷിതാക്കളും സ്്കൂളിൽ തേനീച്ചക്കൂടിളകിയ വിവരം അറിഞ്ഞ് ആശങ്കയോടെ കുട്ടികളെ അന്വേഷിച്ച് എത്തി. എന്നാൽ ആർക്കും തേനീച്ച ആക്രമണം ഉണ്ടായില്ലെന്നതിഞ്ഞ് നേരത്തെ സ്കൂളിലെത്തിയ വിദ്യാർഥികളുമായി വീട്ടിലേക്ക് മടങ്ങി. ഇത്തരത്തിൽ ഒരു തേനീച്ചകൂട് ഉണ്ടായിരുന്നത് ജീവനക്കാരുടെ ശ്രദ്ധയിൽപ്പെട്ടിരുന്നില്ല.

കുറുക്കൻകുണ്ട് നിവാസികൾക്ക് വൈദ്യുതിയും റോഡും മുഖ്യവിഷയം

പാലക്കാട്: വനംവകുപ്പിന്‍റെ പതിനഞ്ച് ദിവസം നീണ്ടുനിന്ന തീവ്രയജ്ഞ പരിപാടിയിൽ ജില്ലയിൽ ആയിരക്കണക്കിന് പരാതികൾ ലഭിച്ചു. ഏറിയ പങ്കും വന്യമൃഗ ആക്രമണവുമായി ബന്ധപ്പെട്ട പരാതികളാണ് ലഭിച്ചത്. എന്നാൽ അട്ടപ്പാടിയിലെ കുറുക്കൻകുണ്ട് പ്രദേശവാസികൾ കാലങ്ങളായി ഉന്നയിച്ചുവരുന്ന റോഡും വൈദ്യുതിയും സംബന്ധിച്ച പരാതികളാണ് ഉന്നയിച്ചത്. വനംവകുപ്പ് തങ്ങളുടെ ഇത്തരം അടിസ്ഥാന പ്രശ്നങ്ങൾ തടസപ്പെടുത്തുന്നതാണ് കർഷകർ മുഖ്യ പരാതിയായി ഉന്നയിച്ചത്. വൈദ്യുതിയും റോഡും ലഭിക്കുന്നതിന് വനം വകുപ്പ് ഉന്നയിക്കുന്നത് നിയമപരമല്ലാത്ത വാദങ്ങളാണ്. റോഡ് പഞ്ചായത്തിന്‍റെയാണ്. ഇന്ത്യക്ക് സ്വാതന്ത്ര്യം കിട്ടുന്നതിനും മുന്പേയുള്ള കൂപ്പു റോഡാണ് കുറുക്കൻകുണ്ടിലേത്. 1980 ൽ അഗളി പഞ്ചായത്ത് റോഡ് സോളിംഗും, മെറ്റലിംഗും നടത്തിയതാണ്. പക്ഷേ ബ്ലോക്കുതലത്തിൽ കൂടിയ ഫോറസ്റ്റിന്‍റെ മീറ്റിംഗിൽ കുറുക്കൻകുണ്ടുകാരുടെ ആവശ്യങ്ങൾ അടഞ്ഞ അധ്യായമാണെന്ന റേഞ്ച് ഓഫീസറുടെ നിലപാട് അംഗീകരിക്കാൻ കഴിയില്ലെന്ന് കർഷക സംഘടനകൾ അറിയിച്ചു. അരനൂറ്റാണ്ടായി താമസിച്ചു പോരുന്ന കർഷകരുടെ പ്രശ്നങ്ങളിൽ ജില്ലാ കളക്ടർ ഇടപെടണം എന്ന് പ്രദേശവാസികൾ ആവശ്യപ്പെട്ടു. ഇന്നാണ് പാലക്കാട് കളക്ടറേറ്റിൽ വനംവകുപ്പിന്‍റെ യോഗം.

ആരോഗ്യപ്രവര്‍ത്തകര്‍ക്കായി ഏകദിന പരിശീലനം

പാലക്കാട്: ബ്ലോക്ക് പഞ്ചായത്തിന്‍റെയും കോങ്ങാട് സാമൂഹികാരോഗ്യ കേന്ദ്രത്തിന്‍റെയും സംയുക്താഭിമുഖ്യത്തില്‍ ആരോഗ്യപ്രവര്‍ത്തകര്‍ക്കായി ഏകദിന പരിശീലന പരിപാടി സംഘടിപ്പിച്ചു. പാലക്കാട് ബ്ലോക്ക് മെഡിക്കല്‍ ഓഫീസര്‍ ഡോ.ആര്‍. മൈനാവതി ഉദ്ഘാടനം ചെയ്തു. അമീബിക്ക് മസ്തിഷ്‌ക ജ്വരം എന്ന വിഷയത്തിലായിരുന്നു പരിശീലനം. കോങ്ങാട് സാമൂഹികാരോഗ്യ കേന്ദ്രം കോണ്‍ഫറന്‍സ് ഹാളില്‍ നടന്ന പരിപാടിയില്‍ ഹെല്‍ത്ത് സൂപ്പര്‍വൈസര്‍ സിസിമോന്‍ അധ്യക്ഷത വഹിച്ചു. മരുതറോഡ് കുടുംബാരോഗ്യ കേന്ദ്രം മെഡിക്കല്‍ ഓഫീസര്‍ ഡോ. പ്രജിഷ ക്ലാസെടുത്തു.

ഗ്ലോബൽ ഫിൻകോർപിനു തുടക്കം

കല്ലടിക്കോട്: കരിമ്പ ഗവൺമെന്‍റ് ഹയർ സെക്കൻഡറി സ്കൂളിലെ പൂർവവിദ്യാർഥികളുടെ കൂട്ടായ്മയായ ഓർമവസന്തത്തിന്‍റെ നേതൃത്വത്തിൽ ആരംഭിച്ച ഗ്ലോബൽ ഫിൻകോർപ് കരിമ്പ ഗ്രാമപഞ്ചായത്ത് പ്രസിഡൻറ് പി.എസ്. രാമചന്ദ്രൻ ഉദ്ഘാടനം ചെയ്തു. മാനേജിംഗ് പാർട്ണർ ജയപ്രകാശ് കാളിയോട് അധ്യക്ഷത വഹിച്ചു. ലോക്കറിന്‍റെ ഉദ്ഘാടനം എൻഎസ്എസ് മണ്ണാർക്കാട് താലൂക്ക് യൂണിയൻ പ്രസിഡന്‍റ് ശശികുമാർ കല്ലടിക്കോട് നിർവഹിച്ചു. ആദ്യ വായ്പാവിതരണ ഉദ്ഘാടനം കല്ലടിക്കോട് സർവീസ് സഹകരണ ബാങ്ക് വൈസ് പ്രസിഡന്‍റ് ഡോ. മാത്യു കല്ലടിക്കോട് നിർവഹിച്ചു. കെ സുരേഷ് കുമാർ, മണികണ്ഠൻ, ദേവൻ മൈലോത്ത്, സി.എം. നൗഷാദ്, പി.കെ.എം. മുസ്തഫ, കെ. രാധാകൃഷ്ണൻ അജോ അഗസ്റ്റിൻ, മോഹന കൃഷ്ണൻ, രാജേഷ്, മോഹൻദാസ്, കെ.വേണു ഗോപാൽ, രാധാ ലക്ഷ്മണൻ എന്നിവർ പ്രസംഗിച്ചു.

പെരുങ്ങോട്ടുകുറുശി ഗ്രാമപഞ്ചായത്തില്‍ വികസനസദസ്

കുഴൽമന്ദം: പ്രാദേശികതലത്തില്‍ വികസന ആശയങ്ങള്‍ അവതരിപ്പിക്കാനും പൊതുജനാഭിപ്രായം ഉള്‍ക്കൊള്ളാനുമായി പെരുങ്ങോട്ടുകുറുശി ഗ്രാമപഞ്ചായത്തില്‍ വികസന സദസ് സംഘടിപ്പിച്ചു. തദ്ദേശ സ്വയംഭരണ വകുപ്പും ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പും സംയുക്തമായാണ് പരിപാടി സംഘടിപ്പിക്കുന്നത്. പെരുങ്ങോട്ടുകുറുശിയില്‍ സംഘടിപ്പിച്ച വികസന സദസ്സ് കെ.രാധാകൃഷ്ണന്‍ എംപി ഉദ്ഘാടനം ചെയ്തു. സംസ്ഥാന സര്‍ക്കാറിന്‍റെ ആഭിമുഖ്യത്തില്‍ നടക്കുന്ന വികസനസദസ് ഗ്രാമപഞ്ചായത്ത്, നഗരസഭ, കോര്‍പ്പറേഷന്‍ തലങ്ങളിലാണ് സംഘടിപ്പിക്കുന്നത്. മന്ത്രിമാര്‍, എംഎല്‍എമാര്‍, പഞ്ചായത്ത് പ്രസിഡന്‍റുമാര്‍, ജനപ്രതിനിധികള്‍ ഉള്‍പ്പെടെ വിവിധ മേഖലകളിലെ വിദഗ്ധരും പൊതുജനങ്ങളും 22 വരെ നടക്കുന്ന സദസുകളില്‍ പങ്കാളികളാകും. പെരുങ്ങോട്ടുകുറുശി ഗ്രാമപഞ്ചായത്ത് ഹാളില്‍ നടന്ന പരിപാടിയില്‍ പ്രസിഡന്‍റ് കെ.എം. കേരളകുമാരി അധ്യക്ഷയായി. എസ്‌സിഡിഒ റിസോഴ്സ് പേഴ്സണ്‍ സുന്ദരന്‍ വിഷയാവതരണം നടത്തി. പെരുങ്ങോട്ടുകുറുശി ഗ്രാമപഞ്ചായത്ത് വൈസ് പ്രസിഡന്‍റ് ഇ.പി. പൗലോസ്, മുന്‍ എംഎല്‍എയും വാര്‍ഡ് മെംബറുമായ എ.വി. ഗോപിനാഥന്‍, സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍മാര്‍, ഗ്രാമപഞ്ചായത്ത് അംഗങ്ങള്‍, ജനപ്രതിനിധികള്‍, മറ്റുദ്യോഗസ്ഥര്‍, ആശാ വര്‍ക്കര്‍മാര്‍, കുടുംബശ്രീ പ്രവര്‍ത്തകര്‍, ഹരിതകര്‍മസേന അംഗങ്ങള്‍ എന്നിവര്‍ പങ്കെടുത്തു.

ദേശീയ സ്കേറ്റിംഗ് ചാമ്പ്യൻഷിപ്പിൽ നിർമലമാതാ സ്കൂളിനു മിന്നുംനേട്ടം

മലന്പുഴ: മഹാരാഷ്ട്രയിലെ താനെ ഹിറാനന്ദാനി ഫൗണ്ടേഷൻ സ്കൂളിൽ നടന്ന ദേശീയ സ്കേറ്റിംഗ് ചാമ്പ്യൻഷിപ്പിൽ മിന്നുംനേട്ടവുമായി മലന്പുഴ നിർമലമാതാ സ്കൂൾ വിദ്യാർഥികൾ. അഞ്ചാംക്ലാസ് വിദ്യാർഥി എസ്. പൃഥ്വിയും നാലാംക്ലാസ് വിദ്യാർഥിനി വിപഞ്ചിക വിനോദുമാണ് ഈ കൊച്ചുമിടുക്കർ. 500, 1000 മീറ്റർ മത്സരങ്ങളിൽ രണ്ടുപേരും രണ്ടുസ്വർണമെഡൽ നേടിയാണ് വിജയക്കൊടി പാറിച്ചത്. സ്കൂൾ മാനേജ്മെന്‍റും അധ്യാപകരും ഇരുവരെയും ആദരിച്ചു.

നെഹ്റു കോളജ് ഓഫ് ഫാര്‍മസിയില്‍ അധ്യയന വർഷാരംഭ പരിപാടി

പാമ്പാടി: നെഹ്റു കോളജ് ഓഫ് ഫാര്‍മസിയില്‍ പുതിയ അധ്യയന വര്‍ഷത്തിനായുള്ള പ്രവേശന പരിപാടി നടന്നു. പുതുതായി ചേര്‍ന്ന വിദ്യാര്‍ഥികള്‍ക്ക് ഉന്നത വിദ്യാഭ്യാസരംഗത്തെ സാധ്യതകളും, ഫാര്‍മസി വിദ്യാഭ്യാസത്തിലെ സാധ്യതകളും പരിചയപ്പെടുത്തുകയായിരുന്നു ലക്ഷ്യം. കേരള ആരോഗ്യ ശാസ്ത്ര സര്‍വകലാശാല രജിസ്ട്രാര്‍ പ്രഫ.ഡോ. ഗോപകുമാര്‍ ഉദ്ഘാടനം ചെയ്തു. നെഹ്റു ഗ്രൂപ്പ് ചെയര്‍മാനും മാനേജിംഗ് ട്രസ്റ്റിയുമായ അഡ്വ.ഡോ.പി. കൃഷ്ണദാസ് അധ്യക്ഷനായിരുന്നു. എച്ച്.എന്‍. നാഗരാജ, ഡോ.ആര്‍.സി. കൃഷ്ണകുമാര്‍, ഡോ.ആര്‍. ഗൗരി തുടങ്ങിയവര്‍ പ്രസംഗിച്ചു. പ്രിന്‍സിപ്പൽ ഡോ.ഡി. വിജയ്കുമാര്‍ സ്വാഗതം പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]