ADVERTISEMENT

ADVERTISEMENT

ആലുവയിലും വിൻമാക്സി ഹോളിഡേയ്സ് ആൻഡ് ട്രാവൽസ്

ആലുവ: പ്രമുഖ ടൂർ ഓപ്പറേറ്റേഴ്സ് ആയ വിൻമാക്സി ഹോളിഡേയ്സ് ആൻഡ് ട്രാവൽസ് പ്രൈവറ്റ് ലിമിറ്റഡിന്‍റെ കേരളത്തിലെ ആദ്യ ബ്രാഞ്ച് ആലുവ ശ്രീകൃഷ്ണ ടെമ്പിൾ റോഡിൽ പാംലാൻഡ് ബിൽഡിംഗിൽ പ്രവർത്തനമാരംഭിച്ചു.

ഗോ ഗ്ളോബൽ സ്ഥാപകൻ അയ്യപ്പദാസ് കുന്നത്ത് ഉദ്ഘാടനം ചെയ്തു. എക്സ്കോഡ് ഫിക്സ് എംഡി കെ. നന്ദകുമാർ, എക്സ്കോഡ് ഫിക്സ് സിഇഒ ജി.കെ.ജി. ഗുരു, വിൻമാക്സി സിഇഒ ജെ. നന്ദകുമാർ, എംഡി എസ്. സുകന്യ എന്നിവർ പ്രസംഗിച്ചു.

ADVERTISEMENT

പോയാലി ടൂറിസം പദ്ധതി നടപ്പാക്കാൻ പ്രമേയം

മൂവാറ്റുപുഴ: പായിപ്ര പഞ്ചായത്തിലെ പോയാലി ടൂറിസം പദ്ധതി നടപ്പാക്കണമെന്ന് കോണ്‍ഗ്രസ് മണ്ഡലം ക്യാന്പിൽ പ്രമേയം. എറണാകുളം ജില്ലയിലെ വലിയ പഞ്ചായത്തുകളിൽ ഒന്നായ പായിപ്രയെ ടൂറിസം മേഖലയിൽ അടയാളപ്പെടുത്തുവാൻ പദ്ധതി അനിവാര്യമാണെന്ന് പ്രമേയം വ്യക്തമാക്കി. നല്ലൊരു പദ്ധതി തയാറാക്കി നടപ്പാക്കിയാൽ മൂന്നാറിലേക്ക് ആകർഷിക്കപ്പെടുന്ന സഞ്ചാരികൾക്ക് ഇടതാവളമായി പോയാലിമലയെ മാറ്റിയെടുക്കുവാൻ സാധിക്കും. പോയാലി മലയിലേക്ക് എത്താൻ കഴിയുന്ന രീതിയിൽ റോഡിന്‍റെ നിർമാണം, റോപ് വേ സ്ഥാപിക്കൽ, മലമുകളിലെ വ്യൂ പോയിന്‍റുകളിൽ കാഴ്ചകൾക്കുള്ള സൗകര്യങ്ങൾ ഒരുക്കൽ, വിശ്രമ കേന്ദ്രങ്ങൾ, ഉദ്യാനങ്ങൾ, കഫെറ്റീരിയ എന്നീ അടിസ്ഥാന സൗകര്യങ്ങൾ ഒരുക്കി പദ്ധതി യഥാർഥ്യമാക്കണമെന്ന് പ്രമേയം ആവശ്യപ്പെട്ടു. കോണ്‍ഗ്രസ് മണ്ഡലം സംഘടന ക്യാന്പ് മാത്യു കുഴൽനാടൻ എംഎൽഎ ഉദ്ഘാടനം ചെയ്തു.

ഓൾ കേരള അഭിഭാഷക ക്ലാർക്ക് അസോ. സംസ്ഥാന സമ്മേളനം

മൂവാറ്റുപുഴ: ഓൾ കേരള അഭിഭാഷക ക്ലാർക്ക് അസോസിയേഷൻ 26-ാമത് സംസ്ഥാന സമ്മേളനം എട്ടിനും ഒന്പതിനും എറണാകുളത്ത് നടക്കും. ഇതിന്‍റെ ഭാഗമായി മൂവാറ്റുപുഴ ക്ലാർക്ക് അസോസിയേഷന്‍റെ നേതൃത്വത്തിൽ കോടതി സമുച്ചയത്തിന് സമീപം അഭിഭാഷക ക്ലാർക്ക് അസോസിയേഷൻ മൂവാറ്റുപുഴ പ്രസിഡന്‍റ് റെജി പ്ലാച്ചേരി പതാക ഉയർത്തി. കോടതിക്കു സമീപം നടന്ന വിളംബര ജാഥ കെഎസിഎ സംസ്ഥാന കമ്മിറ്റിയംഗം ബിജു ഉദ്ഘാടനം ചെയ്തു. യോഗത്തിൽ പ്രസിഡന്‍റ് റെജി പ്ലാച്ചേരി അധ്യക്ഷത വഹിച്ചു. അഭിഭാഷക ക്ലാർക്കുമാരുടെ ക്ഷേമനിധി, മെഡിക്ലെയിം എന്നിവ വർധിപ്പിക്കണമെന്ന് യോഗം സർക്കാരിനോട് ആവശ്യപ്പെട്ടു.

കെഎം എൽപി സ്കൂൾ സന്പൂർണ ഡിജിറ്റൽ വിദ്യാലയ പ്രഖ്യാപനം

മൂവാറ്റുപുഴ: കെഎം എൽപി സ്കൂൾ സന്പൂർണ ഡിജിറ്റൽ വിദ്യാലയ പ്രഖ്യാപനം മന്ത്രി ബി. ശിവൻകുട്ടി ഓണ്‍ലൈനായി നിർവഹിച്ചു. മാത്യു കുഴൽനാടൻ എംഎൽഎ ഇന്‍ററാക്റ്റീവ് പാനൽ ബോർഡിന്‍റെ സ്വിച്ച് ഓണ്‍ നിർവഹിച്ചു. ജില്ലാ പഞ്ചായത്തംഗവും പ്രൈവറ്റ് സ്കൂൾ മാനേജേഴ്സ് അസോസിയേഷൻ ജില്ലാ പ്രസിഡന്‍റുമായ ശാരദ മോഹൻ മുഖ്യാതിഥിയായിരുന്നു. ഇലാഹിയ ട്രസ്റ്റ് ചെയർമാൻ കെ.എം. പരീത് മുഖ്യപ്രഭാഷണം നടത്തി.

അങ്കണവാടി അധ്യാപകർക്ക് "രേഖാചിത്രം’ സമ്മാനിച്ച് പൂർവ വിദ്യാർഥികൾ

കോലഞ്ചേരി: അക്ഷര വെളിച്ചം പകർന്നു നൽകിയ അങ്കണവാടിയിലെ അധ്യാപികമാർക്ക് കാരിക്കേച്ചർ ചിത്രം വരച്ച് വിമരമിക്കൽ സമ്മാനം നൽകി പൂർവ വിദ്യാർഥികൾ. സർവീസിൽനിന്ന് വിരമിച്ച കോട്ടൂർ അങ്കണവാടിയിലെ സി.കെ. മേരിക്കും കെ.എം. വത്സയ്ക്കുമാണ് പൂർവ വിദ്യാർഥികളായ ഗായത്രിയും ദേവികയും തങ്ങളുടെ ടീച്ചർമാരുടെ ചിത്രം വരച്ച് യാത്രയയപ്പ് സമ്മാനമായി നൽകിയത്. 41 വർഷമായി അങ്കണവാടി വർക്കറായി സേവനമനുഷ്ഠിച്ച മേരിയും ഹെൽപ്പർ ആയ വത്സയും ഇവിടെ പഠിച്ചു പോയ കുട്ടികൾക്കെല്ലാം ടീച്ചറമ്മമാരായിരുന്നു.

കാറുകൾ കൂട്ടിയിടിച്ച് നാലുപേർക്ക് പരിക്ക്

കൂത്താട്ടുകുളം: കൂത്താട്ടുകുളം-പാലാ റോഡിൽ മാരുതി ജംഗ്ഷനു സമീപം കാറുകൾ കൂട്ടിയിടിച്ച് നാലുപേർക്ക് പരിക്ക്. കാർ യാത്രക്കാരായ പണ്ടപ്പിള്ളി സാന്പ്രക്കൽ സി.ബി. ജോയി (52), മകൾ ആൻ ജോയി (19), കൊല്ലം ചെരുവിലെ തെങ്ങുംവിള ടോണി ഷിബു (14), ഷിബു മാത്യു (46) എന്നിവർക്കാണ് പരിക്കേറ്റത്. പാലാ ഭാഗത്തുനിന്നു വരുകയായിരുന്ന കാറിന്‍റെ നിയന്ത്രണം നഷ്ടപ്പെട്ട് റോഡിന്‍റെ മറുവശത്ത് നിർത്തിയിട്ടിരുന്ന മറ്റൊരു കാറിൽ ഇടിച്ചാണ് അപകടം. ഇടിയുടെ ആഘാതത്തിൽ ഇടിച്ച കാർ പിന്നോട്ട് ഉരുളുകയും റോഡിലൂടെ പോയ മറ്റൊരു കാറിൽ ഇടിക്കുകയുമായിരുന്നു. ഇന്നലെ വൈകുന്നേരം മൂന്നിനാണ് അപകടം. അപകടത്തിൽ പരിക്കേറ്റവരെ കൂത്താട്ടുകുളത്തെ സ്വകാര്യ ആശുപത്രിയിൽ പ്രവേശിപ്പിച്ചു. ആരുടെയും പരിക്ക് ഗുരുതരമല്ല. അപകടത്തെ തുടർന്ന് ഗതാഗതം ഭാഗികമായി തടസപ്പെട്ടു. പിന്നീട് പോലീസ് സ്ഥലത്തെത്തി അപകടത്തിൽപ്പെട്ട വാഹനങ്ങൾ റോഡിൽനിന്നു നീക്കം ചെയ്ത് ഗതാഗതം പുനസ്ഥാപിച്ചു. റോഡരികിൽ നിർത്തിയിട്ടിരുന്ന വാഹനം ഇടിച്ചു കയറി സമീപത്തെ വർക്ക് ഷോപ്പിന്‍റെ മുൻഭാഗത്തെ തൂണുകൾക്ക് ബലക്ഷയം സംഭവിച്ചിട്ടുണ്ട്. കാർ ഡ്രൈവർ ഉറങ്ങിപ്പോയതാണ് അപകടകാരണമെന്നാണ് പ്രാഥമിക നിഗമനം.

വേനൽ മഴയും കൊടുങ്കാറ്റും കോതമംഗലത്ത് 50 ലക്ഷത്തിന്‍റെ കൃഷിനാശമെന്ന് പ്രാഥമിക കണക്ക്

കോതമംഗലം: കോതമംഗലം ബ്ലോക്കിൽ കഴിഞ്ഞ ദിവസമുണ്ടായ വേനൽ മഴയിലും കൊടുങ്കാറ്റിലും 50 ലക്ഷം രൂപയുടെ കൃഷി നാശമുണ്ടായതായി പ്രാഥമിക കണക്ക്. വിവിധ പഞ്ചായത്തുകളിൽനിന്നും നഗരസഭയിൽനിന്നും ലഭിച്ച പ്രാഥമികമായ വിവരമനുസരിച്ച് 5000 കുലച്ച ഏത്തവാഴകളും കുലയ്‌ക്കാത്ത 2600 ഏത്തവാഴകളും ഏഴു ഹെക്ടർ സ്ഥലത്തെ കപ്പ കൃഷിയും 650 ടാപ്പ് ചെയ്യുന്ന റബർ മരങ്ങളും 237 തൈ റബറും, 100 ജാതി, 50 കൊക്കോ മരങ്ങൾ, 10 തെങ്ങ് എന്നിവയ്ക്ക് നഷ്ടമുണ്ടായതായി റിപ്പോർട്ട് ചെയ്തിരിക്കുന്നത്. പിണ്ടിമന, കോതമംഗലം നഗരസഭ, വാരപ്പെട്ടി, പല്ലാരിമംഗലം, പോത്താനിക്കാട്, കവളങ്ങാട് എന്നീ പഞ്ചായത്തുകളിലാണ് കൂടതലായി നാശനഷ്ടം റിപ്പോർട്ട് ചെയ്തിട്ടുള്ളത്. പ്രാഥമികമായി 50 ലക്ഷം രൂപയുടെ നാശനഷ്ടമാണ് കണക്കാക്കിയിരിക്കുന്നത്. 10 വീടുകള്‍ക്ക് ഭാഗികനാശം കോതമംഗലം: കഴിഞ്ഞ ദിവസം വൈകിട്ട് വേനല്‍മഴയ്‌ക്കൊപ്പമുണ്ടായ കൊടുങ്കാറ്റില്‍ താലൂക്കിലെ വിവിധ പഞ്ചായത്തുകളില്‍ 10 വീടുകള്‍ക്ക് ഭാഗികനാശം. വാരപ്പെട്ടി, പിണ്ടിമന, നെല്ലിക്കുഴി, പല്ലാരിമംഗലം പഞ്ചായത്തുകളിലായിട്ടാണ് വീടുകള്‍ക്ക് കേടുപാടുണ്ടായത്. വാരപ്പെട്ടി പഞ്ചായത്തിലെ ഇഞ്ചൂര്‍ പാറേക്കുടി സാറാമ്മ കുര്യന്‍, ഇടപ്പാട്ട് ശശി എന്നിവരുടെ വീടുകള്‍ക്ക് മുകളിൽ മരം വീണ് വലിയ നാശമാണുണ്ടായത്. സാറാമ്മയുടെ വീടിന് മുകളിലേക്ക് തേക്കും മാവും അടക്കമുള്ള മരങ്ങളാണ് കടപുഴകി വീണത്. വീട്ടുമുറ്റത്തുണ്ടായിരുന്ന രണ്ട് സ്‌കൂട്ടറുകള്‍ക്ക് മുകളിൽ മരം വീണ് നാശം സംഭവിച്ചിട്ടുണ്ട്.

ചാവറ ഇന്‍റർനാഷണൽ അക്കാദമിക്ക് മികച്ച വിജയം

വാഴക്കുളം: ഐസിഎസ്ഇ പത്താം ക്ലാസ് പരീക്ഷയിൽ വാഴക്കുളം ചാവറ ഇന്‍റർനാഷണൽ അക്കാദമിക്ക് മികച്ച വിജയം. പരീക്ഷയെഴുതിയ 31 കുട്ടികളും ഡിസ്റ്റിംഗ്‌ഷൻ കരസ്ഥമാക്കി. 21 കുട്ടികൾ 90 ശതമാനത്തിന് മുകളിൽ മാർക്ക് നേടി. കണക്ക്, കെമിസ്ട്രി, ബയോളജി, ഹിസ്റ്ററി, കമ്പ്യൂട്ടർ സയൻസ് എന്നീ വിഷയങ്ങളിൽ ഒൻപത് കുട്ടികൾ മുഴുവൻ മാർക്കും നേടി. അമൃത് എസ്. പിള്ള, ജോയൽ ജിമ്മിച്ചൻ എന്നീ വിദ്യാർഥികൾ 98 ശതമാനം മാർക്കോടെ ഒന്നാം സ്ഥാനത്തിന് അർഹത നേടി. ഉന്നത വിജയം നേടിയ വിദ്യാർഥികളെ സ്കൂൾ മാനേജർ ഫാ. തോമസ് മഞ്ഞക്കുന്നേൽ, പ്രിൻസിപ്പൽ ഫാ. ഡിനോ കള്ളികാട്ട്, വൈസ് പ്രിൻസിപ്പൽ ഫാ. ജിത്തു തൊട്ടിയിൽ തുടങ്ങിയവർ അഭിനന്ദിച്ചു.

നൂറമേനി കൊയ്ത് ക്രിസ്തുജ്യോതി ഇന്‍റർനാഷണൽ സ്കൂൾ

കോതമംഗലം: ഐസിഎസ്ഇ പത്താം ക്ലാസ് പരീക്ഷയിൽ ക്രിസ്തുജ്യോതി ഇന്‍റർനാഷണൽ സ്കൂളിന് നൂറു ശതമാനം വിജയം. 2014ൽ ആരംഭിച്ച സ്കൂളിലെ ആദ്യ ബാച്ച് കുട്ടികളാണ് ഉന്നത വിജയം നേടിയത്. പരീക്ഷയെഴുതിയ 20 പേരിൽ 16 പേർ ഡിസ്റ്റിംഗ്ഷനും നാല് പേർ ഫസ്റ്റ് ക്ലാസും നേടി. അധ്യാപകരുടെയും രക്ഷകർത്താക്കളുടെയും കുട്ടികളുടെയും കൂട്ടായ പരിശ്രമമാണ് മികച്ച വിജയത്തിന് കാരണമെന്ന് സ്കൂൾ പ്രിൻസിപ്പൽ സോജൻ മാത്യു പറഞ്ഞു. കോതമംഗലം രൂപതയുടെ നേതൃത്വത്തിലുള്ള സ്കൂളിൽ ഈ വർഷം മുതൽ ഹയർ സെക്കൻഡറിയും ആരംഭിക്കും. സ്കൂൾ മാനേജർ മോണ്‍. പയസ് മലേക്കണ്ടത്തിൽ, അഡ്മിനിസ്ട്രേറ്റർ ഫാ. മാത്യു എം. മുണ്ടക്കൽ, പിടിഎ ഭാരവാഹികളായ നോബിൾ ജോസഫ്, ശ്വേത ജോസ് എന്നിവർ മികച്ച വിജയം നേടിയ കുട്ടികളെ അഭിനന്ദിച്ചു.

മൂവാറ്റുപുഴ നഗര വികസനം : നിർമാണ പുരോഗതി പരിശോധിച്ച് റിപ്പോർട്ട് നൽകാൻ നിർദേശം

മൂവാറ്റുപുഴ: നഗര വികസന നിർമാണ പുരോഗതി സ്ഥലത്ത് പരിശോധന നടത്തി റിപ്പോർട്ട് നൽകാൻ മന്ത്രി പി.എ. മുഹമ്മദ് റിയാസ് ഉദ്യോഗസ്ഥർക്ക് നിർദേശം നൽകി. നഗര വികസനം കാലവർഷത്തിന് മുന്പ് പൂർത്തീകരിക്കാൻ മന്ത്രിയുടെ ഇടപെടലും മേൽനോട്ടവും ആവശ്യപ്പെട്ട് എൽഡിഎഫ് പ്രതിനിധി സംഘം മന്ത്രിയെ കണ്ട് നിവേദനം നൽകി. നഗര വികസനത്തിന്‍റെ ഇതുവരെയുള്ള പ്രവർത്തനങ്ങൾ സംബന്ധിച്ച് നിവേദന സംഘവുമായി മന്ത്രി ചർച്ച നടത്തി. കെആർഎഫ്ബിയുടെ ഉന്നത ഉദ്യോഗസ്ഥരുമായി മന്ത്രി ബന്ധപ്പെടുകയും നിർമാണ പ്രവർത്തനം വേഗത്തിലാക്കാൻ അടിയന്തര ഇടപെടൽ ഉണ്ടാകണമെന്ന് ഉദ്യോഗസ്ഥർക്ക് നിർദേശം നൽകുകയും നിർമാണം വേഗത്തിൽ പൂർത്തീകരിക്കാൻ എല്ലാ ഇടപെടലും ഉണ്ടാകുമെന്ന് മന്ത്രി ഉറപ്പ് നൽകുകയുമുണ്ടായി. എൽഡിഎഫ് മൂവാറ്റുപുഴ അസംബ്ലി മണ്ഡലം കണ്‍വീനർ എൻ. അരുണ്‍, സിപിഎം ഏരിയ സെക്രട്ടറി അനീഷ് എം. മാത്യു, കണ്‍സ്യൂമർഫെഡ് ചെയർമാൻ പി.എം. ഇസ്മായിൽ, സിപിഐ ജില്ലാ എക്സിക്യൂട്ടീവംഗം കെ.എ. നവാസ്, സിപിഎം ഏരിയ കമ്മിറ്റിയംഗങ്ങളായ സജി ജോർജ്, റിയാസ് ഖാൻ, ജനാധിപത്യ കേരള കോണ്‍ഗ്രസ് ജില്ലാ സെക്രട്ടറി ഇമ്മാനുവൽ പാലക്കുഴി തുടങ്ങിയവരാണ് എൽഡിഎഫ് പ്രതിനിധി സംഘത്തിൽ ഉണ്ടായിരുന്നത്.

ഐഎസ്‌സി, ഐസിഎസ്ഇ പരീക്ഷകളിൽ എംഎ ഇന്‍റർനാഷണൽ സ്കൂളിന് നൂറ് ശതമാനം വിജയം

കോതമംഗലം: ഐഎസ്‌സി (ക്ലാസ് - 12), ഐസിഎസ്ഇ (ക്ലാസ് - 10) പരീക്ഷകളിൽ എംഎ ഇന്‍റർനാഷണൽ സ്കൂളിന് നൂറ് ശതമാനം വിജയം. പന്ത്രണ്ടാം ക്ലാസിൽ സയൻസ് സ്ട്രീമിൽ 98.25 ശതമാനം മാർക്ക് നേടി നിയ കാർമൽ ജെയ്സണും കൊമേഴ്സ് സ്ട്രീമിൽ 94.25 ശതമാനം മാർക്ക് നേടി എലീസ ചാഴിക്കാട്ടും ഒന്നാമതെത്തി. പത്താം ക്ലാസിൽ 96.4 ശതമാനം മാർക്ക് നേടി ഫാത്തിമ പി. നിഷാദും 96.2 ശതമാനം മാർക്ക് നേടി നോവ തെക്കുംപുറവും ഒന്നും രണ്ടും സ്ഥാനങ്ങൾ കരസ്ഥമാക്കി. പന്ത്രണ്ടിൽ 29 കുട്ടികൾ പരീക്ഷ എഴുതിയതിൽ 27 പേർ ഡിസ്റ്റിംഗ്ഷനും രണ്ട് കുട്ടികൾ ഫസ്റ്റ് ക്ലാസും കരസ്ഥമാക്കി. പത്താം ക്ലാസിൽ 43 കുട്ടികൾ പരീക്ഷ എഴുതിയതിൽ 41 പേർ ഡിസ്റ്റിംഗ്ഷനും രണ്ട് കുട്ടികൾ ഫസ്റ്റ് ക്ലാസും നേടി. വിജയികളെ സ്കൂൾ മാനേജ്മെന്‍റും പ്രിൻസിപ്പലും അധ്യാപകരും അഭിനന്ദിച്ചു.

ലഹരിക്കെതിരെ നീന്തൽ പരിശീലനം ഇന്ന്

ഇലഞ്ഞി: ലഹരിക്കെതിരെ നീന്തൽ പരിശീലന പരിപാടി ഇന്ന് രാവിലെ ഏഴിന് സെന്‍റ് ഫിലോമിനാസ് പൂളിൽ ആരംഭിക്കും. ഒരു മാസം നീണ്ടുനിൽക്കുന്ന പരിപാടി 30നു സമാപിക്കും. ഇന്നു രാവിലെ കോട്ടയം ബസേലിയോസ് കോളജ് പ്രഫ. സെൽവി സേവ്യർ ഉദ്ഘാടനം ചെയ്യും. ഫാ. ജോണ്‍ എറണ്യാകുളത്തിൽ അധ്യക്ഷത വഹിക്കും. പരിശീലനത്തിന് കെ.കെ. ബിന്ദു, സോനാ സുധീഷ്, പി.കെ. വിഷ്ണു എന്നിവർ നേതൃത്വം നൽകും.

വിമലഗിരി ഇന്‍റർനാഷണൽ സ്കൂളിന് നൂറുമേനി വിജയം

മൂവാറ്റുപുഴ: വിമലഗിരി ഇന്‍റർനാഷനൽ സ്കൂളിന് നൂറുമേനി വിജയം. ഐസിഎസ്ഇ പത്താം ക്ലാസ് പരീക്ഷയിൽ വിമലഗിരി ഇന്‍റർനാഷനൽ സ്കൂൾ തുടർച്ചയായി നൂറുശതമാനം വിജയം കൈവരിച്ചു. 90 ശതമാനത്തിനു മുകളിൽ മാർക്കുനേടി 54 ശതമാനം കുട്ടികൾ മികച്ച വിജയം നേടി. ഉയർന്ന മാർക്ക് 97 ശതമാനം നഥാൻ ജെ. മേച്ചേരിൽ കരസ്ഥമാക്കി. പരീക്ഷ എഴുതിയ മുഴുവൻ കുട്ടികളും ഉയർന്ന ഡിസ്റ്റിംഗ്ഷനോടുകുടി വിജയിച്ചു. 12 കുട്ടികൾ വിവിധ വിഷയങ്ങളിൽ 100 ശതമാനം മാർക്കും കരസ്ഥമാക്കി.

ആരക്കുഴ സെന്‍റ് മേരീസ് മേജർ ആർക്കി എപ്പിസ്കോപ്പൽ പള്ളിയിൽ പുതുഞായർ തിരുനാളിന് തിരക്കേറുന്നു

ആരക്കുഴ: തീർഥാടന കേന്ദ്രമായ ആരക്കുഴ സെന്‍റ് മേരീസ് മേജർ ആർക്കി എപ്പിസ്കോപ്പൽ - മലേക്കുരിശ് പള്ളിയിൽ പുതുഞായർ തിരുനാളിനോടനുബന്ധിച്ച് തിരക്കേറുന്നു. ആയിരകണക്കിന് വിശ്വാസികളാണ് ദിവസവും പള്ളിയിൽ എത്തിക്കൊണ്ടിരിക്കുന്നത്. ഇന്ന് രാവിലെ 7.30ന് കുർബാന, സന്ദേശം: ഫാ. ജോർജ് നെടുങ്കല്ലേൽ, വൈകുന്നേരം നാലിന് അന്പു പ്രദക്ഷിണം, 5.30ന് ആഘോഷമായ കുർബാന, സന്ദേശം: ഫാ. ജോയ്സണ്‍ തെക്കേക്കുടിയിൽ, ജപമാല റാലി. രണ്ടിന് രാവിലെ 7.30ന് കുർബാന, 10ന് കുർബാന, സന്ദേശം: ഫാ. ജോണ്‍സണ്‍ ആനിക്കോട്ടിൽ, വൈകുന്നേരം നാലിന് അന്പു പ്രദക്ഷിണം, 5.30ന് ആഘോഷമായ കുർബാന, സന്ദേശം: ഫാ. ജോർജ് കുരിശുംമൂട്ടിൽ, ജപമാല റാലി. മൂന്നിന് രാവിലെ ഏഴിന് കുർബാന, സന്ദേശം: ഫാ. ജോർജ് പൊട്ടയ്ക്കൽ, 8.30ന് കുർബാന, സന്ദേശം: ഫാ. ജേക്കബ് തലാപ്പിള്ളിൽ, 10ന് ആഘോഷമായ കുർബാന, സന്ദേശം: ഫാ. മാത്യു അത്തിക്കൽ, വൈകുന്നേരം നാലിന് അന്പു പ്രദക്ഷിണം, 5.30ന് ആഘോഷമായ കുർബാന, സന്ദേശം: ഫാ. സനിത്ത് വിച്ചാട്ട്, ജപമാല റാലി. നാലിന് രാവിലെ അഞ്ചിന് കുർബാന, സന്ദേശം, 6.30ന് കുർബാന, സന്ദേശം: ഫാ. ജോസ് കിഴക്കേൽ, 7.45ന് കുർബാന, സന്ദേശം: ഫാ. ജോസഫ് പറക്കുന്നേൽ, ഒന്പതിന് കുർബാന, സന്ദേശം: ഫാ. ജോസ് കല്ലുപിലാങ്കൽ, 10.30ന് ആഘോഷമായ തിരുനാൾ കുർബാന, സന്ദേശം: മാർ ജോർജ് മഠത്തിക്കണ്ടത്തിൽ, ഉച്ചയ്ക്ക് 12.15ന് പ്രസുദേന്തി വാഴ്ച, 12.30ന് പ്രദക്ഷിണം, വൈകുന്നേരം അഞ്ചിന് ആഘോഷമായ കുർബാന, സന്ദേശം: ഫാ. ജോസഫ് മുളഞ്ഞനാനി, ഏഴിന് കുർബാന, സന്ദേശം: ഫാ. പോൾ കാരക്കൊന്പിൽ.

സ്മാർട്ട് അങ്കണവാടി തുറന്നു

നെടുമ്പാശേരി: നെടുമ്പാശേരി പഞ്ചായത്തിലെ വാർഡ് 15 ൽ 118ാംനമ്പർ അങ്കണവാടി "സ്മാർട്ട് അങ്കണവാടി "യായി പ്രഖ്യാപിച്ചു. ബ്ലോക്ക് പഞ്ചായത്ത് പദ്ധതിയിൽ ഉൾപ്പെടുത്തിയാണ് അങ്കണവാടി നവീകരിച്ചത്. നവീകരിച്ച അങ്കണവാടിയുടെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്‍റ് ടി.വി. പ്രദീഷ് നിർവഹിച്ചു. നെടുമ്പാശേരി പഞ്ചായത്ത് പ്രസിഡന്‍റ് ഏ.വി. സുനിൽ അധ്യക്ഷയായി. വൈസ് പ്രസിഡന്‍റ് ശോഭ ഭരതൻ,ബ്ലോക്ക് മെമ്പർ ദിലീപ് കപ്രശേരി, സ്ഥിരം സമിതി അധ്യക്ഷരായി ബിജി സുരേഷ്, ആന്‍റണി കയ്യാല, പഞ്ചായത്ത് അംഗയായ ബിന്ദു സാബു, സി.ഒ. മാർട്ടിൻ, അജിത അജയൻ, പി.ഡി. തോമസ്, ജോബി നെൽക്കര എന്നിവർ സംസാരിച്ചു.

സമ്മര്‍ കിഡ്‌സ് ക്യാമ്പിന് സമാപനം

കൊച്ചി: സ്‌കൂള്‍ കുട്ടികള്‍ക്കായി സ്മാര്‍ട്ട് ഇന്ത്യാ ഫൗണ്ടേഷന്‍റെ നേതൃത്വത്തില്‍ എംഎസ്ഡബ്ല്യു, ബിഎസ്ഡബ്ല്യു വിദ്യാര്‍ഥികള്‍ ചെല്ലാനം ഗ്രാമപഞ്ചായത്തിലെ കരി ഐലൻഡില്‍ സംഘടിപ്പിച്ച സമര്‍ കിഡ്‌സ് ക്യാമ്പ് സമാപിച്ചു. മൂന്ന് ദിവസം നീണ്ടു നിന്ന ക്യാമ്പിന്‍റെ ഉദ്ഘാടനം വാര്‍ഡംഗം മാര്‍ഗ്രറ്റ് നിര്‍വഹിച്ചു. ലൈഫ് സ്‌കില്‍ ട്രെയിനിംഗ് പ്രോഗ്രാം, ക്രാഫ്റ്റ് ആക്ടിവിറ്റീസ് എന്നിവയോടൊപ്പം കുട്ടികളിലെ കലാകായിക കഴിവുകള്‍ വകിസിപ്പിക്കുന്ന പരിപാടികളും ക്യാമ്പില്‍ ഉണ്ടായിരുന്നു. തൃക്കാക്കര കെഎംഎം ആര്‍ട്‌സ് ആന്‍ഡ് സയന്‍സ് കോളജ് സോഷ്യല്‍ വര്‍ക്ക് ഡിപ്പാര്‍ട്ട്‌മെന്‍റ് അസിസ്റ്റന്‍റ് പ്രഫസര്‍ അര്‍ജുന്‍ ഷാജി ലഹരി വിരുദ്ധബോധവത്കരണ ക്ലാസ് നയിച്ചു.

കാറുകൾ കൂട്ടിയിടിച്ച് നാലുപേർക്ക് പരിക്ക്

കൂത്താട്ടുകുളം: കൂത്താട്ടുകുളം-പാലാ റോഡിൽ മാരുതി ജംഗ്ഷനു സമീപം കാറുകൾ കൂട്ടിയിടിച്ച് നാലുപേർക്ക് പരിക്ക്. കാർ യാത്രക്കാരായ പണ്ടപ്പിള്ളി സാന്പ്രക്കൽ സി.ബി. ജോയി (52), മകൾ ആൻ ജോയി (19), കൊല്ലം ചെരുവിലെ തെങ്ങുംവിള ടോണി ഷിബു (14), ഷിബു മാത്യു (46) എന്നിവർക്കാണ് പരിക്കേറ്റത്. പാലാ ഭാഗത്തുനിന്നു വരുകയായിരുന്ന കാറിന്‍റെ നിയന്ത്രണം നഷ്ടപ്പെട്ട് റോഡിന്‍റെ മറുവശത്ത് നിർത്തിയിട്ടിരുന്ന മറ്റൊരു കാറിൽ ഇടിച്ചാണ് അപകടം. ഇന്നലെ വൈകുന്നേരം മൂന്നിനാണ് അപകടം. അപകടത്തിൽ പരിക്കേറ്റവരെ കൂത്താട്ടുകുളത്തെ സ്വകാര്യ ആശുപത്രിയിൽ പ്രവേശിപ്പിച്ചു. ആരുടെയും പരിക്ക് ഗുരുതരമല്ല.

"എന്‍റെ വൈപ്പിൻ ലഹരിമരുന്ന് വിമുക്തം' പദ്ധതിക്ക് തുടക്കമായി

വൈപ്പിൻ: എന്‍റെ വൈപ്പിന്‍ ലഹരി മരുന്ന് മുക്തം മെഗാ കാമ്പയിൻ കെ.എന്‍. ഉണ്ണികൃഷ്ണന്‍ എംഎല്‍എ ഉദ്ഘാടനം ചെയ്തു. ശ്രദ്ധ ക്ഷണിക്കല്‍, വീടുവീടാന്തരം കയറിയിറങ്ങിയുള്ള പ്രചാരണം, ഐക്യദാര്‍ഡ്യ ജ്വാല, സ്‌കൂളുകളില്‍ കുട്ടികളെയും മാതാപിതാക്കളെയും കേന്ദ്രീകരിച്ചുള്ള ബോധവത്കരണം, മയക്കുമരുന്ന് വിതരണവും ഉറവിടങ്ങളും സംബന്ധിച്ച വിവരങ്ങള്‍ ഉദ്യോഗസ്ഥര്‍ക്ക് കൈമാറലും നടപടിക്കുവേണ്ടിയുള്ള സമ്മര്‍ദ്ദവും, കൗണ്‍സിലിംഗ്, ചികിത്സ എന്നിങ്ങനെ ഏഴ് ഘട്ടങ്ങളായുള്ള പ്രവര്‍ത്തനങ്ങളാണ് പദ്ധതിയിൽ ലക്ഷ്യമിട്ടിട്ടുള്ളത്. പദ്ധതിയുടെ ലോഗോ വാവ പ്രസിഡന്‍റ് സിപ്പി പള്ളിപ്പുറം സോജന്‍ വാളൂരാന് കൈമാറി പ്രകാശനം ചെയ്തു. സംഘാടകസമിതി ചെയര്‍മാന്‍ അഡ്വ. വി.പി. സാബു അധ്യക്ഷനായി.

വേതുചിറ ശുചീകരണം ആരംഭിച്ചു

നെടുമ്പാശേരി: നെടുമ്പാശേരി പഞ്ചായത്തിലെ നാല്, അഞ്ച് വാർഡുകളിലായുള്ള വേതു ചിറയുടെ ശുചീകരണ പ്രവർത്തനങ്ങൾ ആരംഭിച്ചു. ചിറയിൽ അടിഞ്ഞുകൂടിയ മണ്ണ് നീക്കം ചെയ്ത ശേഷം പായൽനീക്കുന്നിതിനിടെ ഫ്ളോട്ടിംഗ് ജെസിബിക്ക് യന്ത്രത്തകരാർ നേരിട്ടിരുന്നു. രണ്ടാഴ്ചയായി നിലച്ച ശുചീകരണ പ്രവർത്തനങ്ങൾ പഞ്ചായത്ത് പ്രസിഡന്‍റ് എ.വി. സുനിൽ ഇടപെട്ടതിനെ തുടർന്നാണ് പുനരാംരംഭിച്ചത്. ചിറയിലെ പായൽനീക്കം ചെയ്ത ശേഷം ചിറയിൽ നിന്ന് കരയിലിട്ട മണ്ണ് വീണ്ടും ചിറയിലേയ്ക്ക് ഒലിച്ചിറങ്ങാത്ത വിധം നീക്കണമെന്ന് പ്രദേശം സന്ദർശിച്ച പഞ്ചായത്ത് പ്രസിഡന്‍റ് നിർദേശം നൽകി. വേതുചിറയുടെ വികസനത്തിനായി പഞ്ചായത്ത് ഭരണസമിതി പ്രാധാന്യം നൽകിയിട്ടുണ്ടെന്ന് പഞ്ചായത്ത് പ്രസിഡന്‍റ് ഏ.വി. സുനിൽ പറഞ്ഞു. ശുചീകരണത്തിനായി അഞ്ച് ലക്ഷം രൂപയും, ചിറ ഭിത്തി സംരക്ഷണത്തിനായി അഞ്ച് ലക്ഷം രൂപയും നീക്കിവച്ചതു കൂടാതെ ഈ വർഷത്തെ പദ്ധതിയിൽ ഉൾപ്പെടുത്തി ചിറയുടെ പടിഞ്ഞാറ് ഭാഗത്ത് മേയ്ക്കാട്- ചമ്പന്നൂർ കരകളെ തമ്മിൽ ബന്ധിപ്പിക്കുന്ന താന്തോണി പാലം നവീകരിച്ച് നിർമിക്കുന്നതിനായി 20 ലക്ഷം രൂപയും വകയിരുത്തിയിട്ടുണ്ട്. പഞ്ചായത്ത് പ്രസിഡന്‍റിനൊപ്പം വാർഡ് മെമ്പർമാരായായ വനജ സന്തോഷ്, അബിത മനോജ്, പി.ഡി. തോമസ് എന്നിവരും പ്രദേശം സന്ദർശിച്ചു.

വടക്കേക്കോട്ട സെന്‍റ് ജോസഫ്സ് പള്ളിയിൽ ഊട്ടുതിരുനാൾ ഇന്ന്

തൃപ്പൂണിത്തുറ: വടക്കേക്കോട്ട സെന്‍റ് ജോസഫ്സ് പള്ളിയിൽ ഊട്ടുതിരുനാൾ ഇന്ന്. രാവിലെ ആറിന് ദിവ്യബലിയെ തുടർന്ന് നേർച്ച സദ്യ ആശീർവാദം, 7.30 ന് ദിവ്യബലി, 10.45ന് ആഘോഷമായ തിരുനാൾ ദിവ്യബലിയ്ക്ക് വരാപ്പുഴ അതിരൂപത മെത്രാപ്പോലീത്ത ഡോ. ജോസഫ് കളത്തിപ്പറമ്പിൽ കാർമികത്വം വഹിക്കും. വൈകിട്ട് 3.30നും അഞ്ചിനും 6.30നും ദിവ്യബലി, നൊവേന, ആരാധന. രാത്രി എട്ടിന് ഇംഗ്ലീഷ് ദിവ്യബലി.

സൗഹൃദ ഫുട്ബോൾ മത്സരം സംഘടിപ്പിച്ചു

പറവൂർ: കേരള പോലീസ് അസോസിയേഷൻ എറണാകുളം റൂറൽ ജില്ലാ കൺവൻഷനോട് അനുബന്ധിച്ച് ലഹരി വിരുദ്ധ കാമ്പയിനിന്‍റെ ഭാഗമായി “ലഹരിയാവാം കളിക്കളങ്ങളോട് “ എന്ന മുദ്രാവാക്യമുയർത്തി സൗഹൃദ ഫുട്ബോൾ മത്സരം സംഘടിപ്പിച്ചു. പറവൂർ ബ്ലോക്ക് പഞ്ചായത്ത് വൈസ് പ്രസിഡന്‍റ് കെ.എസ്. സനീഷ് ഉദ്ഘാടനം ചെയ്തു. കെപിഎ ജില്ലാ പ്രസിഡന്‍റ് ഇ.ആർ. ആത്മൻ അധ്യക്ഷനായി.വോളിബോൾ ഇന്ത്യൻ ടീം ക്യാപ്റ്റൻ ജിനി ഷാജി മുഖ്യാതിഥിയായി. ജില്ലാ പോലീസ് ടീമും മോസ്കോ എഫ്സി പറവൂരും തമ്മിലായിരുന്നു മത്സരം. 1-0 സ്കോറിന് മോസ്കോ എഫ്സി പറവൂർ വിജയിച്ചു. പി.ജി. അനിൽകുമാർ, സാബു പോൾ, പി.എ. ഷിയാസ് , കെ.എൻ. ബിജി, സി.ജെ. സെബി, കെ.വി. പ്രമോദ്കുമാർ, എ.കെ. പ്രവീൺകുമാർ, വി.എ. അഭിലാഷ് എന്നിവർ സംസാരിച്ചു. മൂന്നിന് പറവൂർ എൻഎസ്എസ് ഓഡിറ്റോറിയത്തിലാണ് ജില്ലാ കൺവൻഷൻ.

പഹൽഗാമിൽ കൊല്ലപ്പെട്ടവർക്കായി വ്യാപാരികളുടെ ശ്രദ്ധാഞ്ജലി

അങ്കമാലി: കാശ്മീരിലെ പഹൽഗാമിൽ ഭീകരാക്രമണത്തിൽ കൊല്ലപ്പെട്ടവർക്ക് ആദരവ് അർപ്പിച്ചു കൊണ്ട് അങ്കമാലി മർച്ചന്‍റ്സ് അസോസിയേഷന്‍റെ ആഭിമുഖ്യത്തിൽ ശ്രദ്ധാഞ്ജലി അർപ്പിച്ചു. അസോസിയേഷൻ പ്രസിഡന്‍റ് ജോണി കുര്യാക്കോസ് അധ്യക്ഷത വഹിച്ചു. വ്യാപാരി വ്യവസായി ഏകോപനസമിതി ജില്ലാ സെക്രട്ടറി എൻ.വി. പോളച്ചൻ അനുശോചന പ്രമേയം അവതരിപ്പിച്ചു. വൈസ് പ്രസിഡന്‍റ് ബിനു തരിയൻ ഭീകര വിരുദ്ധപ്രതിജ്ഞ ചൊല്ലിക്കൊടുത്തു. അസോസിയേഷൻ ഭാരവാഹികളായ ഡെന്നി പോൾ , ബിജു കോറാട്ടുകുടി, പി.വി. ലോറൻസ് , യൂത്ത് വിംഗ് നിയോജക മണ്ഡലം പ്രസിഡന്‍റ് റോജിൻ ദേവസി, വനിത വിംഗ് നിയോജക മണ്ഡലം വൈസ് പ്രസിഡന്‍റ് നയോമി ബെന്നിഎന്നിവർ പ്രസംഗിച്ചു.

ക്ഷേമനിധി നടപ്പാക്കണം

ആലുവ: ടാക്സ് കൺസൾട്ടന്‍റുമാർക്ക് ക്ഷേമനിധി നടപ്പിലാക്കണമെന്ന് കേരള ടാക്സ് കൺസൾട്ടന്‍റ്സ് അസോസിയേഷൻ ആവശ്യപ്പെട്ടു. സർക്കാരിന് വേണ്ടി നികുതി ശേഖരണം നടത്തുന്നവരെ മൂന്നര പതിറ്റാണ്ടായി അവഗണിക്കുകയാണെന്ന് സംസ്ഥാന സെക്രട്ടറി പി.കെ. സന്തോഷ് കുമാർ കുറ്റപ്പെടുത്തി. പെരുമ്പാവൂരിൽ രൂപീകരിക്കപ്പെട്ട കേരള ടാക്സ് കൺസൾട്ടന്‍റ്സ് അസോസിയേഷന്‍റെ ജില്ലാതല കുടുംബ സംഗമം ഇന്ന് ആലുവ ടൗൺ ഹാളിൽ നടക്കുമെന്ന് ജില്ലാ സെക്രട്ടറി യു. രാജേഷ് കുമാർ, ട്രഷറർ ഇ.ബി. അഹമ്മദ് ലെനിൻ എന്നിവർ വാർത്താ സമ്മേളനത്തിൽ അറിയിച്ചു. വൈകിട്ട് അഞ്ചിന് പൊതുസമ്മേളനം, പ്രതിപക്ഷ നേതാവ് വി.ഡി. സതീശൻ കുടുംബ സംഗമം ഉദ്ഘാടനം ചെയ്യും. സുവനീർ പ്രകാശനം നടക്കും.

ഊട്ടുനേര്‍ച്ച തിരുനാളിന് കൊടിയേറി

കൊച്ചി: ടാറ്റാപുരം ടോംകൊ സെന്‍റ് ജോസഫ്‌സ് ചാപ്പലില്‍ വിശുദ്ധ യൗസേപ്പിതാവിന്‍റെ ഊട്ടുനേര്‍ച്ച തിരുനാളിന് വികാരി ഫാ.പോള്‍സണ്‍ കൊറ്റിയത്ത് കൊടിയേറ്റി. സമൂഹബലിയില്‍ ഫാ. മാത്യു സോജന്‍ മാളിയേക്കല്‍ മുഖ്യകാര്‍മികത്വം വഹിച്ചു. തിരുനാള്‍ സമാപന ദിനമായ ഇന്ന് വൈകിട്ട് അഞ്ചിന് റവ.ഡോ. ആന്‍റണി തോപ്പിലിന്‍റെ മുഖ്യ കാര്‍മികത്വത്തില്‍ സമൂഹബലി. ഫാ. വിമല്‍ ഫ്രാന്‍സിസ് പണ്ടാരപറമ്പില്‍ തിരുനാള്‍ സന്ദേശം നല്കും. ഫാ.ടോണി ജോസഫ് കര്‍വാലിയോ ഊട്ടുനേര്‍ച്ച ആശീര്‍വദിക്കും. തുടര്‍ന്ന് ഊട്ടു നേര്‍ച്ച വിതരണം.

അന്തർദേശീയ ശ്രീമദ് രാമായണ മഹാസത്രം നാലു മുതൽ

ആലുവ: പതിനഞ്ചാമത് അന്തർദേശീയ ശ്രീമദ് രാമായണ മഹാസത്രം ഈ വർഷം മുപ്പത്തടം കണ്ണോത്ത് ശ്രീകൃഷ്ണസ്വാമി ക്ഷേത്രത്തിൽ നാലു മുതൽ 11 വരെ നടക്കും. സൂര്യകാലടി മന സുര്യൻ ജയസൂര്യൻ ഭട്ടതിരിപ്പാടിന്‍റെ മുഖ്യ കാർമികത്വത്തിൽ സൂര്യകാലടി മഹാഗണപതി ഹോമം, ധ്വജാരോഹണം എന്നിവ നടക്കും. സത്ര സമാരംഭ സഭ അശ്വതി തിരുനാൾ ഗൗരി ലക്ഷ്മ‌ിഭായി തമ്പുരാട്ടി ഉദ്ഘാടനം ചെയ്യും. എഡിജിപി ശ്രീജിത്ത് മുഖ്യപ്രഭാഷണം നടത്തും. തുടർ ദിവസങ്ങളിലായി ഒരു ലക്ഷത്തോളം ഭക്തജനങ്ങളെയാണ് പ്രതീക്ഷിക്കുന്നതെന്ന് സംഘാടകർ അറിയിച്ചു. സെക്രട്ടറി പി.കെ. അനീഷ്, ജനറൽ കൺവീനർ കെ.പി. രാമകൃഷ്ണൻ നായർ, ട്രസ്റ്റ് പ്രസിഡന്‍റ് പി.കെ. സദാശിവൻ പിള്ള, ട്രഷറർ പി.ബി. ബൈജു എന്നിവർ വാർത്താ സമ്മേളനത്തിൽ പങ്കെടുത്തു.

മൂഴിക്കുളം കവലയിൽ കുട്ടികളുടെ നാടകാവതരണം

നെടുമ്പാശേരി: മൂഴിക്കുളം ശാല നാടകകളരിയിൽ നാടക പരിശീലനം നടത്തിയ കുട്ടികൾ മൂഴിക്കുളം കവലയിൽ നാടകം അവതരിപ്പിച്ചു. "പുഴയൊഴുകും വഴി " എന്ന പ്രകൃതി സൗഹൃദ നാടകമാണ് കുട്ടികൾ അവതരിപ്പിച്ചത്. ക്യാമ്പ് ഡയറക്ടർ ഡോ. എം. പ്രദീപൻ നാടകത്തിന്‍റെ സംവിധായകനും പരിശീലകനുമായിരുന്നു. നാടകത്തിന്‍റെ സന്ദേശമായി കാണികൾക്ക് വിത്തുകൾ, ചെടികൾ, കൈപ്പുസ്തകം, ഓല കൊണ്ട് നിർമിച്ച മീനുകൾ, കിളികൾ എന്നിവ വിതരണചെയ്തു. നാടക പ്രവർത്തകരായ എം.കെ.കെ. പോറ്റി, കെ.എസ്. പതമനാഭൻ, ടി ആർ പ്രേംകുമാർ, ഡോ. എം. പ്രദീപൻ എന്നിവർ സംസാരിച്ചു.

കൊച്ചിയുടെ പൈതൃക വിവരങ്ങള്‍ ഉള്‍പ്പെടുത്തിയ വെബ്‌സൈറ്റുമായി ജിസിഡിഎ

കൊച്ചി: ഫോര്‍ട്ട് കൊച്ചിയിലെയും മട്ടാഞ്ചേരിയിലെയും പൈതൃക ഇടങ്ങളുടെ ജിയോഗ്രാഫിക് ഇന്‍ഫര്‍മേഷന്‍ സിസ്റ്റം (ജിഐഎസ്) അധിഷ്ഠിത മാപ്പിംഗ് പദ്ധതിയുടെ വെബ്‌സൈറ്റ് ഉദ്ഘാടനവും പഠനരേഖ പ്രകാശനവും നാളെ വൈകിട്ട് ഏഴിന് ടിഡിഎം ഹാളില്‍ നടക്കുമെന്ന് സംഘാടകര്‍ വാര്‍ത്താ സമ്മേളനത്തില്‍ പറഞ്ഞു. ടൂറിസം മന്ത്രി പി.എ. മുഹമ്മദ് റിയാസ് ഉദ്ഘാടനം ചെയ്യും. വ്യവസായ മന്ത്രി പി. രാജീവ് മുഖ്യാതിഥിയായി പങ്കെടുക്കും. ജിസിഡിഎ ചെയര്‍മാന്‍ കെ. ചന്ദ്രന്‍പിള്ള അധ്യക്ഷത വഹിക്കും. മേയര്‍ എം. അനില്‍കുമാര്‍ മുഖ്യപ്രഭാഷണം നടത്തും. ഫോര്‍ട്ട് കൊച്ചിയിലെയും മട്ടാഞ്ചേരിയിലെയും 200 ഓളം വരുന്ന പൈതൃക ഇടങ്ങളുടെ ചരിത്രവും നിലവിലെ അവസ്ഥയും ഉള്‍പ്പെട്ടിട്ടുള്ള വിവരങ്ങള്‍ തയാക്കിയിരിക്കുന്നത്. എഴുത്തുകാരനും ചരിത്രഗവേഷകനുമായ ബോണി തോമസാണ്. വെബ് സൈറ്റില്‍ പ്രവേശിച്ചാല്‍ ഫോര്‍ട്ട് കൊച്ചി, മട്ടാഞ്ചേരി മേഖലയിലെ എല്ലാ പൈതൃക ഇടങ്ങളുടെയും പേരും സ്ഥാനവും സാറ്റലൈറ്റ് മാപ്പിലായി ഒരു വിന്‍ഡോയില്‍ കാണാനാകും. രണ്ട് ലക്ഷം രൂപ ചെലവഴിച്ച് രണ്ടു വര്‍ഷം കൊണ്ടാണ് പദ്ധതി പൂര്‍ത്തിയാക്കിയത്. ജിസിഡിഎ എക്‌സിക്യൂട്ടീവ് അംഗം എ.ബി. സാബു, എ.എസ്. അനില്‍കുമാര്‍, ഇന്ദു വിജയനാഥ്, ബോണി തോമസ്, ഒ. ശ്രീകാന്ത്, എസ്. സുഭാഷ്, മഞ്ജു ജവഹര്‍ എന്നിവര്‍ വാർത്താസമ്മേളനത്തില്‍ പങ്കെടുത്തു.

ഹിയറിംഗ് എയ്ഡ് വിതരണം നടത്തി

കൊച്ചി: എറണാകുളം പാര്‍ലമെന്‍റ് മണ്ഡലത്തില്‍ കേള്‍വി സംബന്ധമായ പ്രശ്‌നങ്ങളുള്ള 126 പേര്‍ക്ക് ഹൈബി ഈഡന്‍ എംപിയുടെ നേതൃത്വത്തില്‍ സൗജന്യ ഹിയറിംഗ് എയിഡ് വിതരണം നടത്തി. എറണാകുളം ടൗണ്‍ ഹാളില്‍ നടന്ന പരിപാടി നടന്‍ അജു വര്‍ഗീസ് ഉദ്ഘാടനം നിര്‍വഹിച്ചു. ഫെഡറല്‍ ബാങ്കിന്റെ സിഎസ്ആര്‍ പിന്തുണയോടെ സ്വരൂപ് ചാരിറ്റബിള്‍ ഫൗണ്ടഷനുമായി സഹകരിച്ചാണ് പദ്ധതി നടപ്പിലാക്കിയത്. മണ്ഡലത്തിലെ വിവിധ പ്രദേശങ്ങളില്‍ നിന്ന് നേരിട്ടും അല്ലാതെയും ലഭിച്ച അപേക്ഷകളില്‍ നിന്നാണ് ഗുണഭോക്താക്കളെ തെരഞ്ഞെടുത്തതെന്ന് ഹൈബി ഈഡന്‍ എംപി പറഞ്ഞു. ക്യാമ്പില്‍ പങ്കെടുത്ത മുഴുവന്‍ ആളുകളുടെയും കേള്‍വി ശക്തി പരിശോധിച്ച് അവരവരുടെ ചെവികള്‍ക്ക് അനുസൃതമായ മോള്‍ഡുകള്‍ നിര്‍മിച്ച് ഹിയറിംഗ് എയിഡുകള്‍ അപ്പോള്‍ തന്നെ സ്ഥാപിച്ച് നല്‍കുകയായിരുന്നു. കൗണ്‍സിലിംഗും സൗജന്യ ബാറ്ററിയും തുടര്‍ന്നും ലഭ്യമാക്കുമെന്ന് സ്വരൂപ് ചാരിറ്റബിള്‍ ഫൗണ്ടേഷന്‍ ഡയറക്ടര്‍ സുരേഷ് ജെ. പിള്ള പറഞ്ഞു. ഫെഡറല്‍ ബാങ്ക് കലൂര്‍ ബ്രാഞ്ച് മാനേജര്‍ ആന്‍സണ്‍ ആന്‍റണി, കോര്‍പറേഷന്‍ സ്ഥിരംസമിതി അധ്യക്ഷ മാലിനി കുറുപ്പ്, കൗണ്‍സിലര്‍ മനു ജേക്കബ് തുടങ്ങിയവര്‍ പങ്കെടുത്തു.

തിരുനാൾ

മരട് മൂത്തേടം പള്ളിയിൽ മരട്: മൂത്തേടം വിശുദ്ധ മേരി മഗ്ദലിൻ പള്ളിയിൽ തിരുനാൾ തുടങ്ങി. കണ്ണൂർ രൂപത സഹായ മെത്രാൻ ഡോ. ഡെന്നീസ് കുറുപ്പശേരി കൊടിയേറ്റി. മൂന്നിന് രാവിലെ ആറിന് ദിവ്യബലി, വൈകിട്ട് 5ന് തിരുസ്വരൂപം എഴുന്നള്ളിക്കൽ, ആഘോഷമായ ദിവ്യബലി, പ്രസംഗം, പ്രദക്ഷിണം, പ്രസുദേന്തിമാരുടെ നേതൃത്വത്തിൽ കലാവിരുന്ന്. പ്രധാന തിരുനാൾ ദിനമായ നാലിന് രാവിലെ ഏഴിന് ദിവ്യബലി, വൈകിട്ട് 5.30ന് ആഘോഷമായ തിരുനാൾ ദിവ്യബലി - വരാപ്പുഴ അതിരൂപത മെത്രാപ്പോലീത്ത ഡോ. ജോസഫ് കളത്തിപ്പറമ്പിൽ, പ്രസംഗം, പ്രദക്ഷിണം തുടർന്ന് ഫ്യൂഷൻ ശിങ്കാരിമേളം. സാന്‍ജോപുരം പള്ളിയിൽ വൈപ്പിൻ: നായരമ്പലം സാന്‍ജോപുരം സെന്‍റ് ജോസഫ്‌ പള്ളിയില്‍ വിശുദ്ധ യൗസേപ്പിതാവിന്‍റെ തിരുനാളിന് വികാരി ഫാ. ജെയിംസ്‌ പനവേലില്‍ കൊടിയേറ്റി. തുടര്‍ന്ന്‌ പുതിയ കപ്പേളയുടെ ശിലാസ്ഥാപനവും വികാരി നിര്‍വഹിച്ചു. ഇന്നാണ് പ്രധാന തിരുനാൾ. ആഘോഷമായ തിരുനാള്‍ കുര്‍ബാന, വചന സന്ദേശം. തുടർന്ന് പ്രദക്ഷിണം എന്നിവയുണ്ടാകും. പള്ളിത്താഴം സെന്‍റ് ജോസഫ്സ് പള്ളിയിൽ പറവൂർ: പറവൂർ പള്ളിത്താഴം സെന്‍റ് ജോസഫ്സ് കൊത്തൊലെങ്കോ പള്ളിയിലെ തിരുനാൾ മേയ് നാലു വരെ ആഘോഷിക്കും. ഇന്നലെ വൈകിട്ട് 05.30ന് വികാരി ഫാ. ജോൺപോൾ തിരുനാളിന് കൊടിയേറ്റി. പ്രധാന തിരുനാൾ ദിനമായ നാലിന് രാവിലെ 07.30 ന് വീടുകളിലേക്ക് അമ്പ് പ്രദക്ഷിണം. വൈകിട്ട് അഞ്ചിന് നടക്കുന്ന തിരുനാൾ സമാപന ദിവ്യബലിയിൽ കോട്ടപ്പുറം രൂപത ചാൻസലർ ഫാ. ഷാബു കുന്നത്തൂർ മുഖ്യകാർമികത്വം വഹിക്കും. തുടർന്ന് പ്രദക്ഷിണം, പടിഞ്ഞാറ് ഭാഗത്തേക്ക്. വൈകിട്ട് എട്ടിന് മാജിക്ക് ഷോയും ഉണ്ടായിരിക്കും. താന്നിപ്പുഴ സെന്‍റ് ജോസഫ്സ് പള്ളിയില്‍ പെരുമ്പാവൂര്‍: താന്നിപ്പുഴ സെന്‍റ് ജോസഫ്സ് പള്ളിയില്‍ തിരുനാളിന് നാളെ വൈകിട്ട് ആറിന് വികാരി ഫാ. ജോസ് തോട്ടക്കര കൊടിയേറ്റും. തുടര്‍ന്ന് ദിവ്യബലി, പ്രസംഗം, ലദീഞ്ഞ്. ശനിയാഴ്ച രാവിലെ 6.30-ന് ദിവ്യബലി, വൈകിട്ട് 4.30-ന് രൂപം എഴുന്നള്ളിച്ച് വയ്ക്കല്‍, നേര്‍ച്ച വെഞ്ചിരിപ്പ്, പാട്ടുകുര്‍ബാന, പ്രദക്ഷിണം, വെടിക്കെട്ട്. ഞായറാഴ്ച രാവിലെ 6.30ന് ദിവ്യബലി, 10ന് തിരുനാള്‍ പാട്ടു കുർബാന. പ്രദക്ഷിണം, വൈകിട്ട് ഏഴിന് മെഗാഷോ, തിങ്കളാഴ്ച മരിച്ചവരുടെ ഓര്‍മ്മദിനം രാവിലെ 6.30 ന് ദിവ്യബലി. പിരാരൂർ കപ്പേളയിൽ കാലടി: വിശുദ്ധ യൗസേപ്പിന്‍റെ നാമധേയത്തിലുള്ള പിരാരൂർ കപ്പേളയിൽ തിരുനാളിന് തുടക്കമായി. മറ്റുർ സെന്‍റ് ആന്‍റണീസ് പള്ളി വികാരി ഫാ. ജേക്കബ് മഞ്ഞളി തിരുനാൾ കൊടിയേറ്റി. തുടർന്ന് ദിവ്യബലിക്കും നൊവേനക്കും കാർമികത്വം വഹിച്ചു. തിരുനാൾ ദിനമായ നാളെ വൈകിട്ട് 5.30ന് തിരുനാൾ കുർബാനയും ഗ്രാമപ്രദക്ഷിണവും ഉണ്ടാകും.

കരുവേലിപ്പടി താലൂക്ക് ആശുപത്രിയിൽ നിർമാണം പൂർത്തിയായിട്ടും ഒപി ബ്ലോക്ക് തുറക്കുന്നില്ല

തോപ്പുംപടി: നിർമാണം പൂർത്തീകരിച്ച കരുവേലിപ്പടി മഹാരാജാസ് താലൂക്ക് ആശുപത്രിയിലെ നവീകരിച്ച ഒപി ബ്ളോക്ക് തുറന്ന് നൽകാതായതോടെ രോഗികൾ ദുരിതത്തിൽ. മാസങ്ങൾക്ക് മുമ്പാണ് നവീകരണത്തിനായി ഒപി ബ്ലോക്ക് അടച്ചതിനെ തുടർന്ന് ആശുപത്രിയിലെ മറ്റൊരിടത്താണ് ഒപി ബ്ലോക്ക് പ്രവർത്തിച്ചിരുന്നത്. ബസ് സ്റ്റോപ്പിന് സമീപത്തെ താത്കാലികമായി ഉണ്ടാക്കിയ ചെറിയ ഗേറ്റ് വഴിയാണ് നിലവിൽ രോഗികൾതാത്കാലിക ഒപി ബ്ലോക്കിലേക്ക് പ്രവേശിക്കുന്നത്. ഇവിടെ എത്തുന്ന രോഗികൾക്ക് വാഹനം പാർക്ക് ചെയ്യുവാൻ പോലും സാധിക്കാത്ത സ്ഥിതിയാണ്. നാളുകളായി നവീകരിച്ച ഒപി ബ്ലോക്ക് തുറന്നു നൽകണമെന്ന് ആവശ്യം ഉയർന്നിട്ടും അധികൃതർ തയാറാകുന്നില്ല. ഉദ്ഘാടകന്‍റെ തിയതി ലഭിക്കാത്തതാണ് ഉദ്ഘാടനം വൈകുന്നതിന് കാരണമെന്നാണ് പറയുന്നത്. അതേ സമയം നവീകരിച്ച ഒപി ബ്ലോക്കിന്‍റെ ഉദ്ഘാടനം വൈകുന്നത് ആശുപത്രി സൂപ്രണ്ടിന്‍റെ ഉത്തരവാദിത്വമില്ലായ്മയാണെന്ന് വാർഡ് കൗൺസിലർ ബാസ്റ്റിൻ ബാബു പറഞ്ഞു. സൂപ്രണ്ടിന്‍റെ പ്രവർത്തനം ആശുപത്രിയുടെ ആകെയുള്ള പ്രവർത്തനത്തെ പിന്നോട്ട് വലിക്കുന്ന സാഹചര്യമാണെന്നും നിലവിലെ എച്ച്എംസി കമ്മിറ്റി പോലും വിളിച്ചു ചേർക്കുവാൻ സൂപ്രണ്ട് തയാറാകുന്നില്ലെന്നും ആരോപണമുയർന്നിട്ടുണ്ട്. ഒപി ബ്ലോക്ക് രോഗികൾക്ക് അടിയന്തരമായി തുറന്നു നൽകുവാനുള്ള നടപടി സ്വീകരിക്കണമെന്ന് കൗൺസിലർ ആവശ്യപ്പെട്ടു.

മുനമ്പം ഭൂസമരം : സംസ്ഥാന സര്‍ക്കാര്‍ അടിയന്തരമായി ഇടപെടണമെന്ന് ഡോ. വാലുങ്കല്‍

വൈപ്പിൻ : 200 ദിവസമായി തുടര്‍ന്നുവരുന്ന മുനമ്പം ഭൂമരം അവസാനിപ്പിക്കാന്‍ സംസ്ഥാന സര്‍ക്കാര്‍ അടിയന്തരമായി ഇടപെടണമെന്ന് വരാപ്പുഴ അതിരൂപത സഹായമെത്രാന്‍ ഡോ.ആന്‍റണി വാലുങ്കല്‍ ആവശ്യപ്പെട്ടു. ലത്തീന്‍ കത്തോലിക്ക സമുദായ നേതാക്കളോടൊപ്പം സമരത്തിന്‍റെ ഇരുന്നൂറാം ദിനമായ ഇന്നലെ സമരപ്പന്തല്‍ സന്ദര്‍ശിച്ച് സംസാരിക്കുകയായിരുന്നു അദ്ദേഹം. വഖഫ് ട്രൈബ്യൂണലിന്‍റെ നടപടികളെ തടസപ്പെടുത്തുന്നവിധം വഖഫ് ബോര്‍ഡ് പ്രവര്‍ത്തിക്കുന്നത് നിയന്ത്രിക്കാന്‍ സംസ്ഥാന സര്‍ക്കാര്‍ തയാറാകണം. മുനമ്പം നിവാസികളുടെ റവന്യു അവകാശങ്ങള്‍ സംരക്ഷിക്കാമെന്ന് സര്‍ക്കാര്‍ നല്‍കിയിരുന്ന ഉറപ്പ് പാലിക്കണമെന്നും അദ്ദേഹം പറഞ്ഞു. വിഷയം പരിഹരിക്കുന്നതിന് സര്‍ക്കാര്‍ നിസംഗതയും അനാസ്ഥയും തുടരുകയാണെങ്കില്‍ സംസ്ഥാന വ്യാപകമായി പ്രത്യക്ഷ സമരങ്ങള്‍ സംഘടിപ്പിക്കുമെന്ന് ഡോ.ആന്‍റണി വാലുങ്കലിനോടൊപ്പം ഉണ്ടായിരുന്ന കെഎല്‍സിഎ സംസ്ഥാന നേതൃത്വം അറിയിച്ചു. കെആര്‍എല്‍സിസി വൈസ് പ്രസിഡന്‍റ് ജോസഫ് ജൂഡ്, ജനറല്‍ സെക്രട്ടറി റവ. ഡോ.ജിജു അറക്കത്തറ, കെഎല്‍സിഎ സംസ്ഥാന പ്രസിഡന്‍റ് അഡ്വ. ഷെറി ജെ. തോമസ്, ഫാ. യേശുദാസ് പഴമ്പിള്ളി, ബിജു ജോസി, ആക്ട്‌സ് സംസ്ഥാന ജനറല്‍ സെക്രട്ടറി ജോര്‍ജ് സെബാസ്റ്റ്യന്‍, ഫാ. ആന്‍റണി തറയില്‍, വിന്‍സ് പെരിഞ്ചേരി, അനില്‍ കുന്നത്തൂര്‍, ഇ.ഡി.ഫ്രാന്‍സിസ്, ജോര്‍ജ് നാനാട്ട്, ആഷ്‌ലിന്‍ പോള്‍, ജോസഫ് ബെന്നി കുറുപ്പശേരി, സെബാസ്റ്റ്യന്‍ റോക്കി, എസ്എന്‍ഡിപി മുനമ്പം ശാഖ പ്രസിഡന്‍റ് മുരുകന്‍ കാതികുളത്ത് തുടങ്ങിയവരും ഉണ്ടായിരുന്നു.

രാസലഹരി: കളമശേരിയിൽ മൂന്നുപേർ പിടിയിൽ

കളമശേരി: കളമശേരി ചങ്ങമ്പുഴ നഗറിൽ രാസലഹരിയുമായി മൂന്നു പേർ പിടിയിൽ. പെരുന്പാവൂർ സ്വദേശി മുഹമ്മദ്(31), പാലക്കാട് സ്വദേശി എ.കെ. അശോക് കുമാർ, ചങ്ങന്പുഴ സ്വദേശി കെ.എ. ആഷിഫ് എന്നിവരാണ് വില്പനയ്ക്കും ഉപയോഗത്തിനുമായി കൈയിൽ കരുതിയ 4.78 ഗ്രാം എംഡിഎംഎയുമായി പിടിയിലായത്. ഡാൻസാഫ് സംഘവും പോലീസും ചേർന്നാണ് ഇവരെ പിടികൂടിയത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

ബസ് ഡ്രൈവറെ ആക്രമിച്ച പ്രതി പിടിയില്‍

കൊച്ചി: ബസില്‍ കയറി ഡ്രൈവറെ ആക്രമിച്ച കേസിലെ പ്രതി പിടിയില്‍. എളങ്കുന്നപ്പുഴ സൗത്ത് പുതുവൈപ്പ് തെങ്ങില്‍ വീട്ടില്‍ കെ.എച്ച്.ഷിഹാബ് (35) ആണ് പാലാരിവട്ടം പോലീസിന്‍റെ പിടിയിലായത്. പെരുമ്പാവൂര്‍-എറണാകുളം റൂട്ടില്‍ സര്‍വീസ് നടത്തുന്ന നൈറ മോള്‍ എന്ന ബസിലെ ഡ്രൈവര്‍ എല്‍ദോ സാജുവിനെയാണ് വാഹനം ഓടിക്കുന്നതിനിടെ പ്രതി ദേഹോപദ്രവം ഏല്‍പ്പിച്ചത്. എംഎംഎസ് എന്ന സ്വകാര്യ ബസിലെ കണ്ടക്ടറായ പ്രതി പാലാരിവട്ടം ആലിന്‍ചുവട് വച്ചാണ് എല്‍ദോയെ ആക്രമിച്ചത്. കൂടാതെ ഡ്രൈവര്‍ സീറ്റിന് പിന്‍വശത്തെ ചില്ല് തല്ലിപ്പൊട്ടിക്കുകയും ചെയ്തു. പ്രതിക്കെതിരെ മനപൂര്‍വമല്ലാത്ത നരഹത്യാശ്രമത്തിന് കേസ് രജിസ്റ്റര്‍ ചെയ്തു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

വില്ലേജ് ഓഫീസർ നിയമനം : വിവാദ ഉത്തരവ് പിൻവലിച്ചു ജില്ലാ ഭരണകൂടം

കാക്കനാട്: റവന്യു ഉദ്യോഗസ്ഥരുടെ സ്ഥലംമാറ്റ ഉത്തരവിൽ സിപിഐ തൃക്കാക്കര മണ്ഡലം സെക്രട്ടറിയുടെ പേര് ഉൾപ്പെടുത്തിയതിനെ ചൊല്ലി പ്രതിപക്ഷ സർവീസ് സംഘടനകളടക്കം പ്രതിഷേധവുമായി രംഗത്ത് വന്നത് വിവാദത്തിലേക്ക്. ഒടുവിൽ വിവാദ ഉത്തരവ് പിൻവലിച്ച് പുതിയ ഉത്തരവ് ഇറക്കുകയായിരുന്നു. ഒരു മാസത്തിലേറെയായി ഒഴിഞ്ഞു കിടക്കുന്ന വില്ലേജ് ഓഫീസർ തസ്തികയിൽ ഉദ്യോഗസ്ഥരെ നിയമിക്കണമെന്നു ചൂണ്ടിക്കാട്ടി സിപിഎ മണ്ഡലം സെക്രട്ടറി കെ.കെ. സന്തോഷ് ബാബു കളക്ടർക്ക് നിവേദനം നൽകിയിരിരുന്നു. റവന്യൂവകുപ്പ് ഭരിക്കുന്ന രാഷ്ട്രീയ പാർട്ടി കളക്ടർക്ക് നിവേദനം നൽകിയതുകൊണ്ടാണ് കാക്കനാട് വില്ലേജ് ഓഫീസിൽ നിയമനം നടത്തുന്നതെന്ന സൂചനയോടെ റവന്യൂ അധികൃർ നിയമന ഉത്തരവ് നൽകുകയായിരുന്നു. കാക്കനാട് വില്ലേജ് ഓഫീസറുടെയും കെഎംആർഎൽ റവന്യൂ ഇൻസ്പെക്ടറുടേയും സ്ഥലംമാറ്റ ഉത്തരവിലാണ് സിപിഐ തൃക്കാക്കര മണ്ഡലം സെക്രട്ടറിയുടെ നിവേദനത്തെ തുടർന്നുള്ള സ്ഥലം മാറ്റമെന്ന് രേഖപ്പെടുത്തിയത്. സംഭവം വിവാദമായതോടെ പുതിയ നിയമന ഉത്തരവ് ഇറക്കി കളക്ടറേറ്റ് റവന്യൂ വിഭാഗം പ്രശ്നത്തിനു പരിഹാരമുണ്ടാക്കിയെങ്കിലും വകുപ്പ് ഭരിക്കുന്ന സിപിഐയും അവരുടെ സംഘടനയായ ജോയിന്‍റ് കൗൺസിലും ചേർന്ന് നടത്തുന്ന സ്ഥലംമാറ്റ അഴിമതിക്കുള്ള ഉദാഹരണമാണ് ഉത്തരവിലെ പരാമർശമെന്ന് ആരോപിച്ച് മറ്റു സർവീസ് സംഘടനകൾ രംഗത്തു വന്നതോടെയാണ് അധികാരികൾ ഉത്തരവ് പരിഷ്കരിച്ച് പുറത്തിറക്കിയത്. സ്ഥലം മാറ്റഉത്തരവിൽ പാർട്ടി നേതാക്കളുടെ പേര് ചേർക്കുന്നത് ചട്ടവിരുദ്ധമായതിനാലാണ് വിവാദ ഉത്തരവ് പിൻവലിച്ചത്.

ഏലൂർ അമൃത് പദ്ധതി: ടെൻഡറിന് അനുമതിയായി

ഏലൂർ: ഏലൂർ മുനിസിപ്പാലിറ്റിയിൽ അമൃത് 2.0 പദ്ധതിയിൽ ഉൾപ്പെടുത്തി ഓവർഹെഡ് സർവീസ് റിസർവോയർ പണിയുന്നതിനുള്ള ടെൻഡറിന് മന്ത്രിസഭായോഗം അനുമതി നൽകി. മഞ്ഞുമ്മൽ മേഖലയിലെ കുടിവെള്ളക്ഷാമത്തിന് പരിഹാരമാകുന്ന പദ്ധതിയാണിത്. മഞ്ഞുമ്മൽ പഴയ ആയുർവേദ കോളേജിന് സമീപം 15 ലക്ഷം ലിറ്റർ സംഭരണ ശേഷിയുള്ള ഓവർഹെഡ് റിസർവോയർ നിർമിക്കാനുള്ള ടെൻഡറിനാണ് അംഗീകാരം ലഭിച്ചിരിക്കുന്നത്. 6.23 കോടി രൂപയുടേതാണ് കരാർ. പെട്ടെന്നു തന്നെ പദ്ധതി പൂർത്തിയാക്കാനാണ് ശ്രമിക്കുന്നതെന്ന് മന്ത്രി പി. രാജീവ് പറഞ്ഞു.

മഹാരാജാസ് ഹോക്കി ഗ്രൗണ്ട് പത്ത് ദിവസത്തിനകം തയാറാകും

കൊച്ചി: എറണാകുളം മഹാരാജാസ് കോളജിലെ സിന്തറ്റിക് ഹോക്കി ടര്‍ഫ് നിര്‍മാണം പത്ത് ദിവസത്തിനുള്ളില്‍ പൂര്‍ത്തിയാകും. ശനിയാഴ്ച ഗ്രൗണ്ടില്‍ ജലപരിശോധന നടത്തും. പമ്പ് ഹൗസ് നിര്‍മാണമുള്‍പ്പെടെയുള്ള ജോലികളാണ് ഇനി അവശേഷിക്കുന്നത്. ടര്‍ഫ് നനച്ച ശേഷം മാത്രമാണ് ഹോക്കി മത്സരം നടത്താനാവുക. മത്സരത്തിന്‍റെ രണ്ട് ഇടവേളകളിലായി 58,000 ലിറ്റര്‍ വെള്ളമാണ് ഉപയോഗിക്കേണ്ടി വരിക. ടര്‍ഫ് തുടര്‍ച്ചയായി നനയ്ക്കുന്നതിന് ഒരു ലക്ഷം ലിറ്റര്‍ കപ്പാസിറ്റിയുള്ള ടാങ്കാണ് ഗ്രൗണ്ടില്‍ നിര്‍മിച്ചിരിക്കുന്നത്. ടാങ്കിന്‍റെ മുകള്‍ഭാഗത്തായിരിക്കും പമ്പ് ഹൗസ്. പരിക്കുകള്‍ ഒഴിവാക്കാനാണ് ഹോക്കി മത്സരത്തിന് മുമ്പ് ടര്‍ഫ് നനയ്ക്കുന്നത്. ഗ്രൗണ്ടില്‍ ലെറ്റുകള്‍ സ്ഥാപിക്കുന്ന ജോലികളും അവസാനഘട്ടത്തിലാണ്. ആകെ ആറ് ഫ്ലഡ്‌ലിറ്റുകളാണ് സ്ഥാപിക്കുക. ഫെന്‍സിംഗ് ഉള്‍പ്പെടെയുള്ള ജോലികളും രണ്ട് ദിവസത്തിനകം പൂര്‍ത്തിയാവും. സംസ്ഥാനത്തെ മൂന്നാമത്തെ സിന്തറ്റിക് ടര്‍ഫാണ് മഹാരാജാസിലേത്. തിരുവനന്തപുരം ജി.വി. രാജ സ്റ്റേഡിയം, കൊല്ലം ഹോക്കി സ്റ്റേഡിയം എന്നിവയാണ് മറ്റുള്ളവ. കൊച്ചിന്‍ സ്മാര്‍ട്ട് മിഷന്‍ ലിമിറ്റഡിന്‍റെ (സിഎസ്എംഎല്‍) 9.51 കോടി രൂപ വിനിയോഗിച്ചാണ് സിന്തറ്റിക് ഹോക്കി സ്റ്റേഡിയം നിര്‍മിക്കുന്നത്. സര്‍ക്കാര്‍ സ്ഥാപനമായ സ്‌പോര്‍ട്‌സ് കേരള ഫൗണ്ടേഷനാണ് പദ്ധതിയുടെ മാനേജ്‌മെന്‍റ് കണ്‍സള്‍ട്ടന്‍റ്. ഹൈദരാബാദ് ആസ്ഥാനമായ ഗ്രേറ്റ് സ്‌പോര്‍ട്‌സ് ടെക് ലിമിറ്റഡിനാണ് സ്റ്റേഡിയം നിര്‍മാണച്ചുമതല.

നഗരസഭയ്ക്കു വേണ്ടി നിര്‍മിക്കുന്ന മൂന്നാമത്തെ റോ-റോയുടെ സ്റ്റീല്‍ കട്ടിംഗ് ചടങ്ങ് നടന്നു

കൊച്ചി: കൊച്ചിയുടെ ജലഗതാഗതയാത്രാ ക്ലേശത്തിന് പരിഹാരമാകുന്ന, മൂന്നാമത്തെ റോ-റോയുടെ നിര്‍മാണത്തിന് മുന്നോടിയായുള്ള സ്റ്റീല്‍ കട്ടിംഗ് ചടങ്ങ് കൊച്ചി കപ്പല്‍ശാലയില്‍ നടന്നു. മേയര്‍ എം. അനില്‍കുമാര്‍ സ്റ്റീല്‍ കട്ടിംഗ് നിര്‍വഹിച്ചു. ഹൈബി ഈഡന്‍ എംപി, എംഎല്‍എമാരായ ടി.ജെ. വിനോദ്, കെ.ജെ. മാക്‌സി, ഡെപ്യൂട്ടി മേയര്‍ കെ.എ. അന്‍സിയ, പ്രതിപക്ഷ നേതാവ് ആന്റണി കൂരീത്തറ, എസ്.ശശികല, കെഎസ്‌ഐഎന്‍സി എംഡി ആര്‍. ഗിരിജ, സ്റ്റീല്‍ ഇന്‍ഡസ്ട്രിയല്‍ ലിമിറ്റഡ് ചെയര്‍മാന്‍ മുഹമ്മദ് ഇക്ബാല്‍, മാനേജിംഗ് ഡയറക്ടര് ടി.ജി. ഉല്ലാസ്, കൊച്ചി കപ്പല്‍ശാല ഉദ്യോഗസ്ഥര്‍ തുടങ്ങിയവര്‍ പങ്കെടുത്തു. നഗരസഭയ്ക്കു വേണ്ടി നിര്‍മിക്കുന്ന മൂന്നാമത്തെ റോ റോയാണിത്. കൊച്ചി സ്മാര്‍ട്ട് മിഷന്‍ ലിമിറ്റഡിന്റെ സാമ്പത്തിക സഹായത്തോടെ 14.9 കോടി മുടങ്ങി നിര്‍മിക്കുന്ന റോറോ വെസലിന് 28.43 മീറ്റര്‍ നീളവും 8.25 മീറ്റര്‍ വീതിയുമുണ്ട്. ആറ് നോട്ടിക്കല്‍ മൈല്‍ വേഗത ഉണ്ടാകും. നാല് ലോറികള്‍, 12 കാറുകള്‍, 50 യാത്രക്കാര്‍ എന്നിങ്ങനെ വഹിക്കാന്‍ ശേഷിയുള്ളതാണീ വെസല്‍. ഒരു വര്‍ഷത്തിനുള്ളില്‍ നിര്‍മാണം പൂര്‍ത്തീകരിക്കണമെന്നതാണ് ആവശ്യമെന്ന് മേയര്‍ പറഞ്ഞു.

വയോധികന്‍ കുഴഞ്ഞുവീണു മരിച്ചു

കൊച്ചി: എറണാകുളം നോര്‍ത്ത് റെയില്‍വേ സ്‌റ്റേഷന്‍ പരിസരത്ത് വഴിയോര വസ്ത്ര വില്പന നടത്തിയിരുന്ന വയോധികന്‍ കുഴഞ്ഞുവീണു മരിച്ചു. നാഗര്‍കോവില്‍ സ്വദേശി മസൂദ് (80) ആണ് മരിച്ചത്. ചൊവ്വാഴ്ച രാത്രിയായിരുന്നു സംഭവം. ഇദ്ദേഹത്തെ പ്രദേശത്തെ ഓട്ടോ ഡ്രൈവര്‍മാര്‍ എറണാകുളം ജനറല്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. 40 വര്‍ഷത്തിലേറെയായി മസൂദ് കൊച്ചിയിലെത്തിയിട്ട്. ബന്ധുക്കളുമായി ബന്ധമൊന്നുമില്ല. അതേസമയം നോര്‍ത്ത് പരിസരത്ത് ആക്രി സാധനങ്ങള്‍ പെറുക്കി വില്പന നടത്തുന്ന യുവാവ് രാത്രിയില്‍ മസൂദുമായി വഴക്കുണ്ടാക്കിയതായി പോലീസിന് വിവരം ലഭിച്ചിട്ടുണ്ട്. മദ്യപിക്കാന്‍ പണം ചോദിച്ചെത്തിയ ഇയാള്‍ മസൂദിനെ മര്‍ദിച്ചതായും പറയുന്നു. തുടര്‍ന്നാണ് ഇദ്ദേഹം കുഴഞ്ഞുവീണതെന്നാണ് പ്രദേശത്തെ കച്ചവടക്കാര്‍ പറയുന്നത്. എറണാകുളം നോര്‍ത്ത് പോലീസ് അസ്വാഭാവിക മരണത്തിന് കേസെടുത്തു.യുവാവ് പോലീസ് നിരീക്ഷണത്തിലാണ്. മസൂദിന്‍റെ മൃതദേഹം എറണാകുളം ജനറല്‍ ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്. ഇന്ന് പോസ്റ്റുമോര്‍ട്ടം നടത്തും. ഇതിനുശേഷമേ മരണകാരണം സംബന്ധിച്ച് കൂടുതല്‍ വിവരങ്ങള്‍ വ്യക്തമാകൂവെന്ന് എറണാകുളം നോര്‍ത്ത് പോലീസ് അറിയിച്ചു.

കോർപറേഷൻ അഴിമതിയുടെ കൂത്തരങ്ങെന്ന് പ്രതിപക്ഷം

കൊച്ചി: കൊച്ചി കോർപറേഷ നില്‍ സേവനങ്ങള്‍ ലഭ്യമാക്കണമെങ്കില്‍ പണം നല്‍കേണ്ടത് സര്‍വസാധാരണമായി മാറിയിരിക്കുന്നുവെന്ന് പ്രതിപക്ഷനേതാവ് അഡ്വ. ആന്‍റണി കുരീത്തറ. കൊച്ചി കോർപറേഷനിൽ അണ്‍ഓഥറൈസ്ഡ് ബില്‍ഡിംഗിന് നമ്പര്‍ ഇടാന്‍ 50 ലക്ഷം രൂപ ചെയര്‍മാന്‍മാര്‍ക്ക് കൈക്കൂലി നല്‍കണമെന്ന് ഭരണകക്ഷി കൗണ്‍സിലര്‍ കൗണ്‍സില്‍ യോഗത്തില്‍ പറയുകയും അതേ തുടര്‍ന്ന് വിജിലന്‍സിനെകൊണ്ട് ഇത് അന്വേഷിക്കും എന്ന് മേയര്‍ പറഞ്ഞിട്ടും യാതൊരു അന്വേഷണ നടപടിയും ഉണ്ടായില്ല. സഹികെട്ട പൊതുജനങ്ങള്‍ വിജിലന്‍സില്‍ പരാതി കൊടുക്കുന്നതുകൊണ്ട് മാത്രമാണ് അഴിമതിക്കാരായ ഉദ്യോഗസ്ഥര്‍ പിടിക്കപ്പെടുന്നത്. മേയര്‍ അഴിമതിക്കാരെ നിലയ്ക്കു നിര്‍ത്താന്‍ കഴിവില്ലാത്ത ഭരണകര്‍ത്താവായി മാറിയിരിക്കുന്നുവെന്നും ആന്‍റണി കുരീത്തറ, എം.ജി. അരിസ്‌റ്റോട്ടില്‍ എന്നിവര്‍ ആരോപിച്ചു.

വീടിനു ഭീഷണി‌യായ മരങ്ങള്‍ മുറിച്ചു മാറ്റണമെന്ന പരാതിയില്‍ പരിഹാരം വേണം: കമ്മീഷന്‍

കൊച്ചി : എണ്‍പതുകാരിയുടെ വീടിന് ഭീഷണിയായി നില്‍ക്കുന്ന മരങ്ങള്‍ മുറിച്ച് അപകടഭീഷണി ഒഴിവാക്കണമെന്ന ആവശ്യത്തില്‍ കേരള പഞ്ചായത്ത് രാജ് നിയമത്തിന്‍റെ അടിസ്ഥാനത്തില്‍ ആറാഴ്ചയ്ക്കുള്ളില്‍ പരിഹാരം കാണണമെന്ന് മനുഷ്യാവകാശ കമ്മീഷന്‍ ചെയര്‍പേഴ്‌സണ്‍ ജസ്റ്റീസ് അലക്‌സാണ്ടര്‍ തോമസ് ഉത്തരവിട്ടു. പരാതിക്കാരനും മരങ്ങളുടെ ഉടമയ്ക്കും നോട്ടീസ് നല്‍കി ഇരുവരെയും നേരില്‍ കേട്ട ശേഷം പഞ്ചായത്ത് രാജ് നിയമം സെക്ഷന്‍ 238 പ്രകാരം നടപടിയെടുക്കാനാണ് കമ്മീഷന്‍ നിര്‍ദേശം നല്‍കിയത്. പരിഹാര നടപടികള്‍ സ്വീകരിക്കുമ്പോള്‍ ഗ്രാമപഞ്ചായത്ത് സെക്രട്ടറി ആലുവ തഹസില്‍ദാറുടെ നിഗമനങ്ങളും നിര്‍ദേശങ്ങളും പരിഗണിക്കണമെന്നും കമ്മീഷന്‍ ആവശ്യപ്പെട്ടു. സ്വീകരിച്ച നടപടികള്‍ ചൂര്‍ണിക്കര ഗ്രാമപഞ്ചായത്ത് സെക്രട്ടറി രണ്ടു മാസത്തിനകം കമ്മീഷനെ രേഖാമൂലം അറിയിക്കണം. ആലുവ അമ്പാട്ടുകടവ് സ്വദേശി എം.ജി. രാധാകൃഷ്ണന്‍ സമര്‍പ്പിച്ച പരാതി തീര്‍പ്പാക്കികൊണ്ടാണ് ഉത്തരവ്. 2022 ജൂലൈ എട്ട് മുതല്‍ പരാതി നല്‍കിയിട്ടും പഞ്ചായത്ത് നടപടിയെടുക്കുന്നില്ലെന്നാണ് പരാതി. എറണാകുളം ജില്ലാ കളക്ടറും പഞ്ചായത്ത് സെക്രട്ടറിയോട് നടപടിയെടുക്കാന്‍ നിര്‍ദേശിച്ചിരുന്നു. എന്നാല്‍ നടപടിയുണ്ടായില്ല.

സംസ്ഥാനത്ത് സാമ്പത്തിക പ്രതിസന്ധിയില്ല: മന്ത്രി രാജീവ്

കൊച്ചി: സംസ്ഥാനത്തു സാമ്പത്തിക പ്രതിസന്ധിയില്ലെന്നും ജീവനക്കാരുടെ ശമ്പളമോ പെന്‍ഷനോ മുടങ്ങാതെ നല്കാന്‍ നാളിതുവരെ സര്‍ക്കാരിന് കഴിഞ്ഞിട്ടുണ്ടെന്നും വ്യവസായ മന്ത്രി പി. രാജീവ് പറഞ്ഞു. കേരള സ്‌റ്റേറ്റ് സര്‍വീസ് പെന്‍ഷനേഴ്‌സ് യൂണിയന്‍ സംസ്ഥാന സമ്മേളനത്തോട് അനുബന്ധിച്ചു സംഘടിപ്പിച്ച പൊതുസമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. നികുതി വിഹിതം സംസ്ഥാന സര്‍ക്കാരുമായി പങ്കുവെയ്‌ക്കേണ്ട ബാധ്യത ഉള്ളതിനാല്‍ നികുതി ഇളവ് പ്രഖ്യാപിച്ചുകൊണ്ട് കേന്ദ്രത്തിന് മാത്രം അവകാശപെട്ട സെസും സര്‍ചാര്‍ജും ഈടാക്കുന്ന നയമാണ് കേന്ദ്ര സര്‍ക്കാര്‍ പിന്തുടരുന്നത്. ഉത്പാദന മേഖലയില്‍ മുന്നേറ്റമുണ്ടാക്കി ആഭ്യന്തര വരുമാനം വര്‍ധിപ്പിക്കാനുള്ള നീക്കമാണ് സംസ്ഥാന സര്‍ക്കാര്‍ നടത്തുന്നത്. വിരമിച്ച ജീവനക്കാര്‍ സംരഭക മേഖലയിലേക്ക് കടന്നുവരുന്ന പ്രവണത സംസ്ഥാനത്തുണ്ട്. ഈ മാറ്റത്തെ സര്‍ക്കാര്‍ സ്വാഗതം ചെയ്യുന്നു. മാലിന്യമുക്ത കേരളമടക്കമുള്ള സര്‍ക്കാര്‍ പദ്ധതികളുടെ നടത്തിപ്പില്‍ വിരമിച്ച ജീവനക്കാര്‍ക്ക് മികച്ച പങ്കാളിത്തം വഹിക്കാന്‍ കഴിയുമെന്ന് മന്ത്രി പറഞ്ഞു. പ്രസിഡന്‍റ് എന്‍. സദാശിവന്‍ നായര്‍ അധ്യക്ഷത വഹിച്ചു. ജനറല്‍ സെക്രട്ടറി ആര്‍. രഘുനാഥന്‍ നായര്‍. എ.പി. ജോസ്, സി.കെ. ഗിരി തുടങ്ങിയവര്‍ പ്രസംഗിച്ചു. രാജേന്ദ്ര മൈതാനത്തുനിന്ന് മറൈന്‍ ഡ്രൈവിലേക്ക് നടന്ന പ്രകടനത്തിന് സംസ്ഥാന നേതാക്കള്‍ നേതൃത്വം നല്‍കി. സാംസ്‌കാരിക സമ്മേളനം സുനില്‍ പി. ഇളയിടം ഉദ്ഘാടനം ചെയ്തു. വനിതാ സമ്മേളനത്തിന്‍റെ ഉദ്ഘാടനം ഉമാതോമസ് എംഎല്‍എ നിര്‍വഹിച്ചു. മൂന്നു ദിവസം നീണ്ടു നിന്ന സംസ്ഥാന സമ്മേളനം ഇന്നലെ സമാപിച്ചു.

ട്വന്‍റി 20 ലഹരി വിരുദ്ധ സന്ദേശ യാത്ര ഇന്ന്

കൊച്ചി: ട്വന്‍റി 20 എറണാകുളം നിയോജക മണ്ഡലം കമ്മിറ്റിയുടെ നേതൃത്വത്തിൽ മെയ് ഒന്നിന് ലഹരിവിരുദ്ധ സന്ദേശ യാത്ര നടത്തും. ചേരാനല്ലൂരിലൂടെ രാവിലെ 8.30 ന് യാത്ര ആരംഭിക്കും. 20 കേന്ദ്രങ്ങളിൽ യാത്രയ്ക്ക് സ്വീകരണം നല്കും. വൈകിട്ട് അഞ്ചിന് വിഷ്ണുപുരം ജംഗ്ഷനിൽ സമാപിക്കും. സമാപന സമ്മേളനം പാർട്ടി സംസ്ഥാന വൈസ് പ്രസിഡന്‍റ് വി. ഗോപകുമാർ ഉദ്ഘാടനം ചെയ്യും. പാർട്ടി സംസ്ഥാന എക്സിക്യൂട്ടീവ് ബോർഡ് അംഗം അഡ്വ. ചാർളി പോൾ മുഖ്യ സന്ദേശം നൽകും. നിയോജക മണ്ഡലം പ്രസിഡന്‍റ് ജോസ് പ്ലാക്കൽ അധ്യക്ഷത വഹിക്കും.

കെട്ടിട പെര്‍മിറ്റിന് കൈക്കൂലി : കൊച്ചി കോര്‍പറേഷന്‍ ഉദ്യോഗസ്ഥ വിജിലന്‍സ് പിടിയില്‍

പ്രതി സ്വപ്ന വിലജന്‍സ് തയാറാക്കിയിട്ടുള്ള കൈക്കൂലിക്കാരുടെ പട്ടികയിൽ ഉൾപ്പെട്ടയാൾ കൊച്ചി: കെട്ടിട പെര്‍മിറ്റിന് 15,000 രൂപ കൈക്കൂലി വാങ്ങുന്നതിനിടെ കൊച്ചി കോര്‍പറേഷന്‍ ഉദ്യോഗസ്ഥ വിജിലന്‍സ് പിടിയിലായി. കോര്‍പറേഷന്‍ വൈറ്റില സോണല്‍ ഓഫീസിലെ ബില്‍ഡിംഗ് സെക്ഷന്‍ ഓവര്‍സിയറായ തൃശൂര്‍ മണ്ണുത്തി പൊള്ളന്നൂര്‍ സ്വദേശിനി സ്വപ്‌നയാണ് പിടിയിലായത്. എറണാകുളം സ്വദേശിയുടെ പരാതിയിലാണ് അറസ്റ്റ്. ഇദ്ദേഹം പുതുതായി പണികഴിപ്പിക്കുന്ന 5000 ചതുരശ്രയടി വിസ്തീര്‍ണമുള്ള അഞ്ചുനില കെട്ടിടത്തിന് പെര്‍മിറ്റ് ലഭിക്കുന്നതിനായി നഗരസഭയില്‍ ഓണ്‍ലൈനായി അപേക്ഷ സമര്‍പ്പിച്ചിരുന്നു. സ്ഥല പരിശോധന നടത്തിയ സ്വപ്‌ന, പെര്‍മിറ്റ് അനുവദിക്കുന്നതിന് ഓരോ കെട്ടിടത്തിനും 5000 രൂപ വച്ച് 25000 രൂപ കൈക്കൂലി ആവശ്യപ്പെട്ടു. ഇത്രയും പണമില്ലെന്ന് പറഞ്ഞപ്പോള്‍ അത് കുറച്ച് 15000 രൂപയാക്കി. തുടര്‍ന്ന് പരാതിക്കാരന്‍ ഇക്കാര്യം എറണാകുളം വിജിലന്‍സ് മധ്യമേഖലാ പോലീസ് സൂപ്രണ്ടിനെ അറിയിക്കുകയായിരുന്നു. ഇന്നലെ പണവുമായി വൈറ്റിലയില്‍ എത്താന്‍ സ്വപ്‌ന നിര്‍ദേശിച്ചിരുന്നു. ഇതനുസരിച്ച് വൈകിട്ട് പൊന്നുരുന്നി അമ്പലത്തിന് സമീപം സ്വന്തം കാറില്‍ വച്ച് പരാതിക്കാരനില്‍ നിന്നും 15000 രൂപ കൈക്കൂലി വാങ്ങവെ കെണിയൊരുക്കി കാത്തിരുന്ന വിജിലന്‍സ് സംഘം കൈയോടെ പിടികൂടുകയായിരുന്നു. രാസപരിശോധനയില്‍ പണം കൈപ്പറ്റിയത് തെളിഞ്ഞു. തുടര്‍ന്ന് അറസ്റ്റ് രേഖപ്പെടുത്തി. ഇന്ന് മൂവാറ്റുപുഴ വിജിലന്‍സ് കോടതിയില്‍ ഹാജരാക്കും. വിലജന്‍സ് തയാറാക്കിയിട്ടുള്ള കൈക്കൂലിക്കാരുടെ പട്ടികയിലുള്ളയാളായിരുന്നു സ്വപ്‌ന.

റോഡിൽ കുഴഞ്ഞു വീണു മരിച്ചു

നീറിക്കോട്: കൊടുവഴങ്ങ കോച്ചിരിക്ക ചേലാട്ട് സി.വി. തോമസ് (74) റോഡിൽ കുഴഞ്ഞു വീണു മരിച്ചു. ഇന്നലെ വൈകിട്ട് സൈക്കിളിൽ പോകവേ, കരിങ്ങാൻതുരുത്ത് വച്ച് കുഴഞ്ഞു വീഴുകയായിരുന്നു. ഉടനെ കളമശേരി മെഡിക്കൽ കോളജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. കെട്ടിട നിർമാണ തൊഴിലാളിയാണ്. സംസ്കാരം പിന്നീട്. ഭാര്യ: മേരി പാവന കോതാട്. മക്കൾ: റോഷൻ (ദുബായ്), ഷെറിൻ. മരുമക്കൾ: വിനിത, ഡൈജു.

ശിലാസ്ഥാപനം

മൂവാറ്റുപുഴ: കിഴക്കേക്കര ഈസ്റ്റ് ഗവ. ഹൈസ്കൂളിന് ഒരു കോടിയുടെ പുതിയ കെട്ടിടം. പുതുതായി നിർമിക്കുന്ന സ്കൂൾ കെട്ടിടത്തിന്‍റെ നിർമാണോദ്ഘാടനം മന്ത്രി സജി ചെറിയാൻ ഓണ്‍ലൈനായി നടത്തി. ശിലാസ്ഥാപനം മാത്യു കുഴൽനാടൻ എംഎൽഎ നിർവഹിച്ചു. കിഴക്കേക്കരയിൽ 75 വർഷമായി പ്രവർത്തിക്കുന്ന സ്കൂളിൽ ഇപ്പോൾ 450ലധികം കുട്ടികൾ പഠിക്കുന്നുണ്ട്. ഹൈസ്കൂൾ കെട്ടിടം കാലപ്പഴക്കത്തെ തുടർന്ന് ശോചനീയാവസ്ഥയിലായിരുന്നു. കൂടുതൽ സ്ഥല സൗകര്യങ്ങളോടെ ആധുനികരീതിയിൽ പുതിയ കെട്ടിടം നിർമിക്കുന്നതിന് ഒരു കോടിയാണ് അനുവദിച്ചിരിക്കുന്നത്. മൂവാറ്റുപുഴ പൊതുമരാമത്ത് വകുപ്പ് ബിൽഡിംഗ് സെക്ഷന്‍റെ മേൽനോട്ടത്തിലാണ് കെട്ടിടത്തിന്‍റെ നിർമാണം നടത്തുന്നത്. ഒന്പത് മാസംകൊണ്ട് പണി പൂർത്തീകരിക്കാനാണ് നിശ്ചയിച്ചിട്ടുള്ളത്. 2475 സ്ക്വയർ മീറ്റർ വിസ്തൃതിയിൽ നാല് ക്ലാസ് മുറികളോടെയും രണ്ടു മീറ്റർ വീതിയിലുള്ള വരാന്തകളോടയും സ്റ്റെയർ റൂമുകളോടെയുമാണ് കെട്ടിട നിർമാണം.

ഭീകരവാദത്തിനെതിരെ പ്രതിഷേധ ജ്വാല

മൂവാറ്റുപുഴ: സിപിഐ ഈസ്റ്റ് മാറാടി ബ്രാഞ്ച് കമ്മിറ്റിയുടെ നേതൃത്വത്തിൽ ഭീകരവാദത്തിനെതിരെ പ്രതിഷേധ ജ്വാലയും പഹൽഗാമിൽ ഭീകരാക്രമണത്തിൽ കൊല്ലപ്പെട്ടവർക്ക് ആദരാഞ്ജലിയും അർപ്പിച്ചു. പ്രതിഷേധ ജ്വാല ജോയിന്‍റ് കൗണ്‍സിൽ മുൻ സംസ്ഥാന ചെയർമാൻ ജി. മോട്ടിലാൽ ഉദ്ഘാടനം ചെയ്തു. സിപിഐ മണ്ഡലം സെക്രട്ടേറിയറ്റംഗം പോൾ പൂമറ്റം അധ്യക്ഷത വഹിച്ചു.

തിരുനാൾ

വാഴക്കുളം: കാവക്കാട് വലിയപാറ സെന്‍റ് ജോർജ് കുരിശുമുടി കപ്പേളയിൽ വിശുദ്ധ ഗീവർഗീസ് സഹദായുടെ തിരുനാൾ മൂന്നിനും നാലിനും നടക്കും. മൂന്നിന് വൈകുന്നേരം 4.15ന് കൊടിയേറ്റ്, 4.30 ന് തിരുനാൾ കുർബാന, പ്രസംഗം, 5.45ന് പ്രദക്ഷിണം. 6.30ന് സമാപന പ്രാർഥന. നാലിന് രാവിലെ ഏഴിന് പള്ളിയിൽ കുർബാന, 10 ന് തിരുനാൾ കുർബാന, പ്രസംഗം, 11.30ന് പ്രദക്ഷിണം, 12.15 ന് സമാപന പ്രാർഥന എന്നിവയാണ് തിരുനാൾ പരിപാടികളെന്ന് വികാരി ഫാ. ഇമ്മാനുവൽ മുണ്ടയ്ക്കൽ അറിയിച്ചു.

റോഡ് ഉദ്ഘാടനം ചെയ്തു

കോതമംഗലം: ബ്ലോക്ക് പഞ്ചായത്ത് 20 ലക്ഷം ചെലവഴിച്ചു നവീകരിച്ച നെല്ലിക്കുഴി പഞ്ചായത്തിലെ ചെളിക്കുഴി തണ്ട് റോഡ് ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ ഉദ്ഘാടനം ചെയ്തു. കോതമംഗലം ബ്ലോക്ക് പഞ്ചായത്തിന്‍റെ 2024-25 വർഷിക പദ്ധതിയിലുൾപ്പെടുത്തി നെല്ലിക്കുഴി പഞ്ചായത്തിനെയും കോതമംഗലം നഗരസഭയേയും ബന്ധിപ്പിക്കുന്ന സ്റ്റേറ്റ് ഹൈവേ-43ലേക്കുള്ള റോഡാണ് പൂർത്തീകരിച്ചിട്ടുള്ളത്. സ്ഥിരം സമിതി അധ്യക്ഷൻ ജെയിംസ് കോറന്പേൽ അധ്യക്ഷത വഹിച്ചു.

കെഎംസിഡബ്ല്യുഎഫ് വാർഷിക സമ്മേളനം

മൂവാറ്റുപുഴ: കെഎംസിഡബ്ല്യുഎഫ് സിഐടിയു (എംഎംടിയു) നഗരസഭ യൂണിറ്റ് വാർഷിക സമ്മേളനം ചേർന്നു. സിഐടിയു ഏരിയ സെക്രട്ടറി സി.കെ. സോമൻ ഉദ്ഘാടനം ചെയ്തു. കെ.ജി അനിൽകുമാർ അധ്യക്ഷത വഹിച്ചു. ജോലിയിൽ നിന്ന് വിരമിച്ച വി.കെ. അജിത് പ്രസാദിന് യാത്രയയപ്പ് നൽകി. ഭാരവാഹികളായി സി.കെ. സോമൻ (പ്രസിഡന്‍റ്), കെ.ജി. അനിൽകുമാർ (വർക്കിംഗ് പ്രസിഡന്‍റ്), കെ.എസ്. സിന്ധു (വൈസ് പ്രസിഡന്‍റ്), എ.സി. മിനി (സെക്രട്ടറി), കെ.എം. രതീഷ് (ജോയിന്‍റ് സെക്രട്ടറി), വി.ജി. സുഗതൻ (ട്രഷറർ) എന്നിവരെ തെരഞ്ഞെടുത്തു.

മുഖ്യമന്ത്രി രാജിവയ്ക്കണം: എംഎൽഎ

കോതമംഗലം: അഴിമതിയിൽ മുങ്ങികുളിച്ച് നിൽക്കുന്ന പിണറായി വിജയൻ രാജിവയ്‌ക്കണമെന്ന് മാത്യു കുഴൽനാടൻ എംഎൽഎ. യുഡിഎഫ് വാരപ്പെട്ടി മണ്ഡലം കമ്മിറ്റിയുടെ നേതൃത്വത്തിൽ മൂന്നു ദിവസമായി നടന്നുവന്ന വാഹന പ്രചാരണയാത്രയുടെയും രാപകൽ സമരത്തിന്‍റെയും സമാപന സമ്മേളനം ഉദ്ഘാടനം ചെയ്യുകയായിരുന്നു എംഎൽഎ. മൂന്നു മാസമായി സെക്രട്ടറിയേറ്റ് കവാടത്തിൽ ജീവിതനീതിക്ക് വേണ്ടി സമരം നടത്തുന്ന ആശാ പ്രവർത്തകർക്ക് ആശ്വാസമായി സംസ്ഥാനത്ത് ആദ്യമായി ബജറ്റിൽ 1500 രൂപ അധിക ഓണറോറിയും അനുവദിച്ച വാരപ്പെട്ടി പഞ്ചായത്ത് പ്രസിഡന്‍റ് പി.കെ. ചന്ദ്രശേഖരൻ നായരെയും പഞ്ചായത്ത് ഭരണസമിതിയെയും ചടങ്ങിൽ അനുമോദിച്ചു. യുഡിഎഫ് ചെയർമാൻ പി.കെ ചന്ദ്രശേഖരൻ നായർ അധ്യക്ഷത വഹിച്ചു.

സ്കൂളുകളിൽ സ്റ്റാർസ് ഇന്‍റഗ്രേറ്റഡ് ലാബ് പദ്ധതി തുടങ്ങി

കൂത്താട്ടുകുളം: പൊതുവിദ്യാഭ്യാസ വകുപ്പ് - സമഗ്ര ശിക്ഷാ കേരളം കുസാറ്റുമായി സഹകരിച്ച് സ്കൂളുകളിൽ സ്റ്റാർസ് ഇന്‍റഗ്രേറ്റഡ് ലാബ് പദ്ധതി തുടങ്ങി. കൂത്താട്ടുകുളം ഗവ. യുപിഎസ്, സൗത്ത് മാറാടി ഗവ. യുപിഎസ്, ഈസ്റ്റ് മാറാടി ഗവ. വിഎച്ച്എസ്എസ്എസ്, തിരുമാറാടി ഗവ. വിഎച്ച്എഎസ്എസ് എന്നീ സ്കൂളുകളിലാണ് ആദ്യഘട്ടത്തിൽ പദ്ധതി നടപ്പാക്കുക. യുപി വിഭാഗം ക്ലാസുകളിലെ വിവിധ പരീക്ഷണങ്ങൾക്ക് ആവശ്യമായ ഇലക്ട്രോണിക്സ്, കെമിക്കലുകൾ, ലാബ് ഉപകരണങ്ങൾ, ടൂൾസുകൾ എന്നിവ അടങ്ങുന്ന കിറ്റുകളും ഫർണിച്ചറും സ്കൂളുകൾക്ക് കൈമാറി. ഉപകരണ വിതരണം മാറാടി പഞ്ചായത്ത് പ്രസിഡന്‍റ് ഒ.പി. ബേബി ഉദ്ഘാടനം ചെയ്തു. കൂത്താട്ടുകുളം നഗരസഭ സ്ഥിരം സമിതി അധ്യക്ഷ മരിയ ഗോരേത്തി അധ്യക്ഷത വഹിച്ചു. ബിപിസി കെ.ബി. സിനി പദ്ധതി വിശദീകരിച്ചു.

കടമറ്റം പള്ളിയിൽ ഊട്ട് പെരുന്നാളിന് കൊടിയേറി

കോലഞ്ചേരി: കടമറ്റം സെന്‍റ് ജോർജ് ഓർത്തഡോക്സ് പള്ളിയിൽ മാർ ഗീവർഗീസ് സഹദായുടെ ഓർമപ്പെരുന്നാളായ മേടം 24 ഊട്ട് പെരുന്നാളിന് വികാരി ഫാ. സണ്ണി വർഗീസിന്‍റെയും സഹവികാരി ഫാ. എൽദോ മത്തായിയുടെയും സാന്നിധ്യത്തിൽ ഫാ. ഒ.വി. ഏലിയാസ് കൊടിയേറ്റി. മേയ്‌ ആറിനും ഏഴിനുമാണ് പ്രധാന പെരുന്നാൾ. പെരുന്നാൾ ചടങ്ങുകൾക്ക് തിരുവല്ല മാർ അന്തോണിയോസ് ദയറ മാനേജർ ഫാ. കുര്യാക്കോസ് വർഗീസ് പ്രധാന കർമികത്വം വഹിക്കും.

നവീകരിച്ച യാക്കോബായ വൈദിക സെമിനാരി ചാപ്പൽ കൂദാശ

മുളന്തുരുത്തി: യാക്കോബായ സഭയുടെ മുളന്തുരുത്തിക്കടുത്ത് വെട്ടിക്കലിൽ സ്ഥിതി ചെയ്യുന്ന മലങ്കര സുറിയാനി ഓർത്തഡോക്‌സ് തിയോളജിക്കൽ (എംഎസ്ഒടി) സെമിനാരിയുടെ നവീകരിച്ച സെന്‍റ് എഫ്രേം ചാപ്പലിന്‍റെ കൂദാശ ശ്രേഷ്ഠ കാതോലിക്ക ബസേലിയോസ് ജോസഫ് ബാവ നിർവഹിച്ചു. സഭയിലെ മെത്രാപ്പോലീത്താമാർ പങ്കെടുത്തു. 1993ൽ സ്ഥാപിച്ച ചാപ്പലിന്‍റെ ബാഹ്യരൂപം ത്രികോണാകൃതിയിൽ കൂടാര രൂപത്തിലാണ്. ഇപ്പോൾ പുതുതായി നിർമിച്ച അൾത്താരയും ഹൈക്കലായും മൂന്ന് പ്രധാന വാസ്‌തുശില്‌പരീതികൾ ചേർന്നതാണ്. സുറിയാനി, ബറോക്ക്, ബൈസാന്‍റിയൻ പാരമ്പര്യങ്ങളും വാസ്‌തുശില്പ‌ ചാരുതയും സമന്വയിപ്പിച്ചുകൊണ്ടാണ് നവീകരണവും നിർമാണവും നിർവഹിച്ചിരിക്കുന്നതെന്ന് സെമിനാരി മെത്രാപ്പോലീത്ത കുര്യാക്കോസ് മാർ തെയോഫിലോസ് പറഞ്ഞു. യാക്കോബായ സഭയുടെ ഇന്ത്യയിലെ ഏക സെമിനാരിയാണിത്.

ശ്രേഷ്ഠ ബാവയ്ക്ക് സ്വീകരണം

കോലഞ്ചേരി: മലങ്കര യാക്കോബായ സിറിയൻ സൺഡേ സ്കൂ‌ൾ അസോസിയേഷൻ (എംജെഎസ്എസ്എ) നവാഭിഷിക്തനായ ശ്രേഷ്ഠ കാതോലിക്ക ബസേലിയോസ് ജോസഫ് ബാവയ്ക്ക് സ്വീകരണവും അനുമോദന സമ്മേളനവും നൽകി. പുത്തൻകുരിശ് അസോസിയേഷൻ ആസ്ഥാനത്ത് നടന്ന സമ്മേളനം സുപ്രീം കോടതി റിട്ട. ജസ്റ്റീസ് കുര്യൻ ജോസഫ് ഉദ്ഘാടനം ചെയ്തു. പ്രസിഡന്‍റ് മാത്യൂസ് മാർ അന്തിമോസ് മെത്രാപ്പോലീത്ത അധ്യക്ഷത വഹിച്ചു. ശ്രേഷ്ഠ കാതോലിക്ക ബാവ അനുഗ്രഹ പ്രഭാഷണം നടത്തി. തുടർന്ന് മണർകാട് സെന്‍റ് മേരീസ് കത്തീഡ്രലിൽ നടത്തുന്ന ദേശീയ വിദ്യാർഥി ക്യാമ്പ് പ്രോഗ്രാമിന്‍റെ ലോഞ്ച് നിർവഹിച്ചു.

പള്ളി ഓഡിറ്റോറിയത്തിന്‍റെയും സ്റ്റോർ റൂമിന്‍റെയും താഴ് രാസലായനി ഒഴിച്ച് നശിപ്പിച്ച നിലയിൽ

മൂവാറ്റുപുഴ: മുളവൂർ സെന്‍റ് മേരീസ് യാക്കോബായ പള്ളി ഓഡിറ്റോറിയത്തിന്‍റെയും സ്റ്റോർ റൂമിന്‍റെയും താഴിൽ കെമിക്കൽ കലർന്ന ദ്രാവകം ഒഴിച്ച് നശിപ്പിച്ച നിലയിൽ. തിങ്കളാഴ്ച അർധരാത്രിയാണ് സംഭവം. ഇന്നലെ രാവിലെ പള്ളി ട്രസ്റ്റി അംഗങ്ങൾ സ്റ്റോർ റൂം തുറക്കാനെത്തിയപ്പോഴാണ് വിവരം അറിഞ്ഞത്. തുടർന്ന് നടത്തിയ പരിശോധനയിലാണ് ഓഡിറ്റോറിയത്തിന്‍റെ പൂട്ടും നശിപ്പിച്ച നിലയിൽ കണ്ടെത്തിയത്. താഴുകളെല്ലാം തകർത്ത ശേഷമാണ് ഓഡിറ്റോറിയത്തിലും സ്റ്റോർ റൂമിലും ഭാരവാഹികൾക്ക് കയറാനായത്. പള്ളി ഭാരവാഹികൾ മൂവാറ്റുപുഴ പോലീസിൽ പരാതി നൽകി.

കാട്ടാന ആക്രമണത്തിൽനിന്ന് ഭയന്നോടി : ഒന്നര മാസത്തിനിടെ കുഴഞ്ഞുവീണ് മരിച്ചത് രണ്ടുപേർ

കോതമംഗലം: കോതമംഗലം താലൂക്കിൽ ഒന്നരമാസത്തിനിടെ കാട്ടാന ആക്രമണത്തിൽനിന്ന് ഭയന്ന് ഓടവേ കുഴഞ്ഞു വീണ് മരിച്ചത് രണ്ടുപേർ. പിണവൂർകുടിയിൽ കൃഷിയിടത്തിലെത്തിയ കാട്ടാനയെ തുരത്താനുള്ള ശ്രമത്തിനിടെ ചക്കനാനിക്കിൽ സി.എം. പ്രകാശ് (61) ആണ് ഇന്നലെ പുലർച്ചെ ഒന്നരയോടെ കുഴഞ്ഞുവീണ് മരിച്ചത്. കോട്ടപ്പടി കൂവക്കണ്ടത്തും സമാന രീതിയിൽ ഒരു കർഷകന്‍റെ ജീവൻ നഷ്ടപ്പെട്ടിരുന്നു. പാന്പലായം കുഞ്ഞപ്പനാണ് മരിച്ചത്. കൃഷിയിടത്തിലിറങ്ങിയ ആനയുടെ ആക്രമണത്തിൽ നിന്നും രക്ഷപ്പെടാൻ ഓടുന്നതിനിടെ കുഞ്ഞപ്പൻ കുഴഞ്ഞുവീഴുകയായിരുന്നു. മലയോര ഗ്രാമങ്ങളിൽ കർഷകരെ ഇത്തരം ദുരന്തങ്ങളേിലേക്ക് തള്ളിവിട്ടിട്ട് ഉദ്യോഗസ്ഥരും സർക്കാരും നിസ്‌സംഗത പാലിക്കുകയാണ്. നിരന്തരം ആന ശല്യമുള്ള പ്രദേശമാണ് വനത്തിന് അടുത്തുള്ള പിണവൂർകുടി. കൃഷി നശിപ്പിക്കുന്നതും മറ്റ് നാശനഷ്ടങ്ങളുണ്ടാക്കുന്നതും പതിവാണ്. ഇവിടെ മനുഷ്യരെ വന്യമൃഗങ്ങൾ കൊലപ്പെടുത്തിയിട്ടുമുണ്ട്. രാത്രിയിൽ പടക്കം പൊട്ടിച്ചും ഒച്ചവച്ചുമാണ് നാട്ടുകാരും വനപാലകരും ആനകളെ ഓടിക്കുന്നത്. കൂട്ടുകാർക്കൊപ്പമുള്ള ഇന്നലത്തെ പ്രകാശിന്‍റെ ദൗത്യം മരണത്തിലാണ് കലാശിച്ചത്. പ്രകാശിന്‍റെ മരണം വന്യജീവി ആക്രമണത്തേതുടർന്നുള്ളതായി കണക്കാക്കണമെന്നും കുടുബത്തിന് സഹായം ലഭ്യമാക്കണമെന്നുമാണ് ജനങ്ങളുടെ ആവശ്യം.

എംഎൽഎ ഓഫീസിലേക്ക് പ്രതിഷേധ മാർച്ച് ഇന്ന്

കോതമംഗലം: നിയോജകമണ്ഡലത്തിൽ കഴിഞ്ഞ ഒന്പത് വർഷമായി പുതിയ വികസന പദ്ധതികൾ നടപ്പാക്കാൻ കഴിയാത്തതിലും യുഡിഎഫ് സർക്കാർ കൊണ്ടുവന്ന പദ്ധതികൾ ഇതുവരെ പൂർത്തീകരിക്കാൻ കഴിയാത്തതിലും പ്രതിഷേധിച്ച് ആന്‍റണി ജോണ്‍ എംഎൽഎയുടെ ഓഫീസിലേക്ക് ഇന്ന് പ്രതിഷേധ മാർച്ച് സംഘടിപ്പിക്കുമെന്ന് കോണ്‍ഗ്രസ് കോതമംഗലം ബ്ലോക്ക് പ്രസിഡന്‍റ് ഷമീർ പനക്കൽ, കവളങ്ങാട് ബ്ലോക്ക് പ്രസിഡന്‍റ് ബാബു ഏലിയാസ് എന്നിവർ അറിയിച്ചു. രാവിലെ 10ന് മുനിസിപ്പൽ ഓഫീസ് പരിസരത്തുനിന്നും ആരംഭിക്കുന്ന പ്രകടനം എംഎൽഎ ഓഫീസിനു മുന്നിൽ എത്തിച്ചേരുന്പോൾ നടക്കുന്ന യോഗം കെപിസിസി വക്താവ് സന്ദീപ് വാര്യർ ഉദ്ഘാടനം ചെയ്യും. കോതമംഗലത്തിന്‍റെ സ്വപ്ന പദ്ധതികളായിരുന്ന തങ്കളം - കാക്കനാട് പാത, ചേലാട് അന്താരാഷ്ട്ര സ്റ്റേഡിയം, ഭൂതത്താൻകെട്ട് ജലവൈദ്യുത പദ്ധതി, കോതമംഗലം റിംഗ് റോഡ് തുടങ്ങി യുഡിഎഫ് സർക്കാർ കൊണ്ടുവന്ന നിരവധി പദ്ധതികൾ നാളിതുവരെ പൂർത്തീകരിക്കാൻ കഴിയാത്തത് എംഎൽഎയുടെ അനാസ്ഥയും പിടിപ്പുകേടുമാണെന്ന് കോണ്‍ഗ്രസ് ബ്ലോക്ക് പ്രസിഡന്‍റുമാർ പറഞ്ഞു. ബ്ലാവന പാലം, ബംഗ്ലാകടവ് പാലം, ഇഞ്ചത്തൊട്ടി പാലം തുടങ്ങി മോഹനവാഗ്ദാനങ്ങൾ നൽകിയ എംഎൽഎ കോതമംഗലത്തെ ജനങ്ങളെ വഞ്ചിച്ചിരിക്കുകയാണ്. നിയോജകമണ്ഡലത്തിലെ അഞ്ചു പഞ്ചായത്തുകളിൽ രൂക്ഷമായ വന്യമൃഗ ശല്യത്തിന് പരിഹാരം കാണുന്നതിന് കഴിയാത്ത എംഎൽഎ പരാജയമാണെന്നും ബ്ലോക്ക് പ്രസിഡന്‍റുമാർ കുറ്റപ്പെടുത്തി.

മൂവാറ്റുപുഴ നഗര വികസനം : ഗതാഗത ക്രമീകരണം വലിയ വാഹനങ്ങൾക്ക് ദുരിതമാകുന്നു

മൂവാറ്റുപുഴ: നഗര വികസനത്തിന്‍റെ ഭാഗമായി മാറാടി - കായനാട് റൂട്ടിൽ ഏർപ്പെടുത്തിയ ഗതാഗത ക്രമീകരണം വലിയ വാഹനങ്ങൾക്ക് ദുരിതമാകുന്നു. കഴിഞ്ഞ 13 ദിവസത്തിനിടെ ആറ് തവണ ഈ റൂട്ടിൽ വലിയ വാഹനങ്ങൾ വൈദ്യുതി ലൈനിൽ തട്ടിയതിനെതുടർന്ന് ഗതാഗതം തടസപ്പെടുകയും മണിക്കൂറുകളോളം വൈദ്യുതി വിതരണം മുടങ്ങുകയും ചെയ്തു. കഴിഞ്ഞ ദിവസം കായനാട് വാഹനംതട്ടി വൈദ്യുതി ലൈൻ പൊട്ടിവീഴുകയും ഇതുവഴിയുള്ള ഗതാഗതം മണിക്കൂറോളം തടസപ്പെടുകയുമുണ്ടായി. ഊരമന ശിവലി ഭാഗത്തെ ലിഫ്റ്റ് ഇറിഗേഷൻ അക്വഡറ്റിന് സമീപം കണ്ടെയ്നർ പോലുള്ള ഉയരം കൂടിയ വാഹനങ്ങൾ ഇടയ്ക്കിടെ തട്ടുന്നതും പതിവാണ്. ഇവിടെയെത്തുന്ന വലിയ വാഹനങ്ങൾക്ക് മുന്നോട്ട് പോകാനാകാത്ത അവസ്ഥയിൽ ഏകദേശം 500 മീറ്ററോളം പിന്നോട്ട് പോകേണ്ടി വരുന്നതിനാൽ ഗതാഗതക്കുരുക്ക് വർധിക്കുകയാണ്. ഇതിനു പുറമെ റോഡിന്‍റെ വശങ്ങൾ ഇടിഞ്ഞതും അപകടഭീഷണി ഉയരുന്നുണ്ട്. കായനാട് കവല മുതൽ റോഡിൽ വലിയ കുഴികൾ രൂപപ്പെട്ടിട്ടുണ്ട്. ഇതുവരെ അറ്റകുറ്റപ്പണി പോലും നടത്താത്തത് യാത്രക്കാർക്ക് ദുരിതമാകുന്നു. മൂവാറ്റുപുഴ നഗരത്തിൽ നടക്കുന്ന റോഡ് നവീകരണ പ്രവർത്തനങ്ങളുടെ ഭാഗമായിട്ടാണ് മാറാടി - കായനാട് റൂട്ടിലൂടെ വാഹനങ്ങൾ തിരിച്ചു വിടുന്നത്. വലിയ വാഹനങ്ങൾ മറ്റ് വഴികളിലൂടെ തിരിച്ചുവിടണമെന്നും റോഡിലെ ഇടിഞ്ഞ ഭാഗങ്ങൾ അടിയന്തരമായി നന്നാക്കണമെന്നുമാണ് ജനങ്ങളുടെ ആവശ്യം.

കോതമംഗലം താലൂക്കിൽ കാറ്റിലും മഴയിലും വ്യാപകനാശം

കോതമംഗലം: താലൂക്കിലെ വിവിധ ഭാഗങ്ങളിൽ ഇന്നലെ വൈകുന്നേരമുണ്ടായ കാറ്റില്‍ വ്യാപകനാശം സംഭവിച്ചു. മലയിന്‍കീഴ് ജംഗ്ഷനില്‍ മരം റോഡിലേക്ക് ഒടിഞ്ഞുവീണു. തണല്‍മരമാണ് വീണത്. രാമല്ലൂര്‍-മുത്തംകുഴി റോഡിലും മരം വീണു. ഇതേത്തുടര്‍ന്ന് വാഹന ഗതാഗതം തടസപ്പെട്ടു. അഗ്നിരക്ഷാസേന എത്തിയാണ് മരം മുറിച്ചുനീക്കി ഗതാഗതം പുനസ്ഥാപിച്ചത്. പല്ലാരിമംഗലത്ത് ഗവണ്‍മെന്‍റ് വിഎച്ച്എസ്എസിന്‍റെ മേച്ചില്‍ ഷീറ്റ് കാറ്റില്‍ പറന്നുപോയി. പ്രൈമറി വിഭാഗത്തിന്‍റെ കെട്ടിടത്തിലാണ് നാശമുണ്ടായത്. അടിവാട് തെക്കേക്കവലയിലും മരം റോഡിലേക്ക് കടപുഴകി വീണു. പിണ്ടിമന, മുത്തംകഴി, അടിവാട്, മൈലൂർ ഭാഗങ്ങളിലും ശക്തമായ കാറ്റിൽ വീണ നിരവധി മരങ്ങൾ അഗ്നിരക്ഷാസേന എത്തി വെട്ടിമാറ്റി. വൈദ്യുതി വിതരണ ശൃംഖലയ്‌ക്കും നാശനഷ്ടമുണ്ടായിട്ടുണ്ട്. പോസ്റ്റും ലൈനും തകര്‍ന്ന് വൈദ്യുതി വിതരണം തടസപ്പെട്ടു. അതിശക്തമായ ഇടിമിന്നലും ഉണ്ടായിരുന്നു.

ഫ്രാന്‍സീസ് പാപ്പ അനുസ്മരണം

കൊച്ചി: കാലം ചെയ്ത ഫ്രാന്‍സീസ് മാര്‍പാപ്പയെ അനുസ്മരിച്ച് കാത്തലിക് നസ്രാണി അസോസിയേഷന്‍ എറണാകുളം സെന്‍റ് മേരീസ് കത്തീഡ്രല്‍ ബസിലിക്കയുടെ മുന്നിൽ ഉപവാസ പ്രാര്‍ഥന നടത്തി. ചെയര്‍മാന്‍ ഡോ. എം.പി ജോര്‍ജ്, ഭാരവാഹികളായ ഷിജു സെബാസ്റ്റ്യന്‍, ബൈജു ഫ്രാന്‍സീസ്, ഷൈബി പാപ്പച്ചന്‍ തുടങ്ങിയവർ നേതൃത്വം നല്‍കി.

കാട്ടാന ആക്രമണത്തിൽ ഭയന്നോടി : ഒന്നര മാസത്തിനിടെ മരിച്ചത് രണ്ടുപേർ

കോതമംഗലം: കോതമംഗലം താലൂക്കിൽ ഒന്നരമാസത്തിനിടെ കാട്ടാന ആക്രമണത്തിൽനിന്ന് ഭയന്ന് ഓടവേ കുഴഞ്ഞു വീണ് മരിച്ചത് രണ്ടുപേർ. പിണവൂർകുടിയിൽ കൃഷിയിടത്തിലെത്തിയ കാട്ടാനയെ തുരത്താനുള്ള ശ്രമത്തിനിടെ ചക്കനാനിക്കിൽ സി.എം. പ്രകാശ് (61) ആണ് ഇന്നലെ പുലർച്ചെ ഒന്നരയോടെ കുഴഞ്ഞുവീണ് മരിച്ചത്. കോട്ടപ്പടി കൂവക്കണ്ടത്തും സമാന രീതിയിൽ ഒരു കർഷകന്‍റെ ജീവൻ നഷ്ടപ്പെട്ടിരുന്നു. പാന്പലായം കുഞ്ഞപ്പനാണ് മരിച്ചത്. കൃഷിയിടത്തിലിറങ്ങിയ ആനയുടെ ആക്രമണത്തിൽ നിന്നും രക്ഷപ്പെടാൻ ഓടുന്നതിനിടെ കുഞ്ഞപ്പൻ കുഴഞ്ഞുവീഴുകയായിരുന്നു. മലയോര ഗ്രാമങ്ങളിൽ കർഷകരെ ഇത്തരം ദുരന്തങ്ങളേിലേക്ക് തള്ളിവിട്ടിട്ട് ഉദ്യോഗസ്ഥരും സർക്കാരും നിസ്‌സംഗത പാലിക്കുകയാണ്. നിരന്തരം ആന ശല്യമുള്ള പ്രദേശമാണ് വനത്തിന് അടുത്തുള്ള പിണവൂർകുടി. കൃഷി നശിപ്പിക്കുന്നതും മറ്റ് നാശനഷ്ടങ്ങളുണ്ടാക്കുന്നതും പതിവാണ്. ഇവിടെ മനുഷ്യരെ വന്യമൃഗങ്ങൾ കൊലപ്പെടുത്തിയിട്ടുമുണ്ട്. രാത്രിയിൽ പടക്കം പൊട്ടിച്ചും ഒച്ചവച്ചുമാണ് നാട്ടുകാരും വനപാലകരും ആനകളെ ഓടിക്കുന്നത്. കൂട്ടുകാർക്കൊപ്പമുള്ള ഇന്നലത്തെ പ്രകാശിന്‍റെ ദൗത്യം മരണത്തിലാണ് കലാശിച്ചത്. പ്രകാശിന്‍റെ മരണം വന്യജീവി ആക്രമണത്തേതുടർന്നുള്ളതായി കണക്കാക്കണമെന്നും കുടുബത്തിന് സഹായം ലഭ്യമാക്കണമെന്നുമാണ് ജനങ്ങളുടെ ആവശ്യം.

എംപിഎല്‍ സീസണ്‍ ആറ് ആരംഭിച്ചു

കിഴക്കമ്പലം: ഫുട്‌ബോള്‍ ക്ലബ് മോറയ്ക്കാലയുടെ പത്താം വാര്‍ഷികവും മോറയ്ക്കാല പ്രീമിയര്‍ ഫുട്‌ബോള്‍ ലീഗിന്‍റെ ആറാം സീസണും പി.വി. ശ്രീനിജന്‍ എംഎല്‍എ ഉദ്ഘാടനം ചെയ്തു. ക്ലബ് പ്രസിഡന്‍റ് പി.എം. നിതീഷ് അധ്യക്ഷനായി. നടൻ എല്‍ദോ മാത്യു മുഖ്യാതിഥിയായി. ലീഗ് ചെയര്‍മാന്‍ ലിജു സാജു, കണ്‍വീനര്‍ ബിനില്‍ സി. മാത്യു, അനീഷ് മാമ്പിള്ളി, എം.ജി. സുബിന്‍, പി.കെ. രജ്ഞിത്, പി.എ. അമല്‍, കോച്ച് ഗൗതം, ആനന്ദ് സി. രാജന്‍ പങ്കെടുത്തു. മേയ് 18നാണ് ഫൈനല്‍.

മേയ്ക്കാട്-മധുരപ്പുറം സെന്‍റ് ജോർജ് കപ്പേളയിൽ

നെടുമ്പാശേരി: മേയ്ക്കാട്-മധുരപ്പുറം സെന്‍റ് ജോർജ് കപ്പേളയിൽ തിരുനാൾ മേയ് 3,4 തീയതികളിൽ നടക്കും. മൂന്നിന് വൈകിട്ട് 5.30ന് വികാരി ഫാ. ജോൺസൺ കൂവേലി കൊടിയേറ്റും. ഇടവകാംഗം ഫാ.സജി കോട്ടക്കലിന്‍റെ കാർമികത്വത്തിൽ പ്രസുദേന്തി വാഴ്ച, നോവേന, ദിവ്യബലി എന്നിവ നടക്കും. മേയ് 4ന് വൈകിട്ട് 5.30ന് ആഘോഷമായ തിരുനാൾ കുർബാനയ്ക്ക് ഫാ. ബിനീഷ് അഗസ്റ്റിൻ പൂണോളി കാർമികനാകും. തുടർന്ന് പ്രദക്ഷിണം ഉണ്ടായിരിക്കും.

കര്‍ഷക കൂട്ടായ്മയുടെ ഉദ്ഘാടനം നാളെ

കൊച്ചി: ഏലൂര്‍ നഗരസഭാ പ്രദേശത്തെ കര്‍ഷകര്‍ നേരിടുന്ന വിവിധ വിഷയങ്ങള്‍ക്ക് പരിഹാരം കാണുന്നതിനും കൃഷിയുടെ വികസനത്തിനുമായി രൂപം കൊടുത്തിട്ടുള്ള ഫാര്‍മേഴ്‌സ് യൂണിറ്റി ഓഫ് ഏലൂര്‍ എന്ന കര്‍ഷക കൂട്ടായ്മയുടെ ഉദ്ഘാടനം നാളെ നടക്കും. വൈകിട്ട് നാലിന് മഞ്ഞുമ്മല്‍ എസ്എന്‍ ഹാളില്‍ മന്ത്രി പി. രാജീവ് ഉദ്ഘാടനം ചെയ്യും. കര്‍ഷക കൂട്ടായ്മ പ്രസിഡന്‍റ് പി.ജി. ലളിതാംബിക അധ്യക്ഷത വഹിക്കും. ആദ്യ ഘട്ടമെന്ന നിലയില്‍ 50 സെന്‍റ് സ്ഥലത്ത് വാഴക്കൃഷി നടത്തും. തരിശായി കിടക്കുന്ന ഭൂമി ഏറ്റെടുത്ത് കൃഷി നടത്താനും നെല്‍കൃഷിക്ക് മുന്‍തൂക്കം നല്‍കാനുമാണ് ലക്ഷ്യമിടുന്നതെന്നും ഭാരവാഹികള്‍ പത്രസമ്മേളനത്തില്‍ പറഞ്ഞു. പി.ജി. ലളിതാംബിക, കെ.സി. റാഫേല്‍, ബിജു പി. ബാലന്‍ എന്നിവര്‍ പത്രസമ്മേളനത്തില്‍ പങ്കെടുത്തു.

ലഹരിവിരുദ്ധ കൂട്ടയോട്ടം

പെരുമ്പാവൂര്‍: കുറുപ്പംപടി വേങ്ങൂര്‍ മാര്‍ കൗമാ ഹയര്‍ സെക്കന്‍ഡറി സ്‌കൂളും കുറുപ്പംപടി പോലീസും സംയുക്തമായി ലഹരിവിരുദ്ധ കൂട്ടയോട്ടം സംഘടിപ്പിച്ചു. സിഐ കേഴ്‌സണ്‍ മര്‍ക്കോസ് ഫ്ളാഗ് ഓഫ് ചെയ്തു. മാര്‍കൗമാ പള്ളി വികാരി ഫാ. ജോണ്‍ ജോസഫ് ഉദ്ഘാടനം ചെയ്തു. സ്‌കൂള്‍ മാനേജര്‍ ജോഷി കെ. വര്‍ഗീസ് അധ്യക്ഷത വഹിച്ചു. വേങ്ങൂര്‍ പള്ളിത്താഴത്തു നിന്നും ആരംഭിച്ച കൂട്ടയോട്ടം ചൂരത്തോട് കവല ചുറ്റി സ്‌കൂള്‍ അങ്കണത്തില്‍ സമാപിച്ചു. കുറുപ്പംപടി സ്റ്റേഷന്‍ സബ് ഇന്‍സ്പെക്ടര്‍മാര്‍, അസി. സബ് ഇന്‍സ്പെക്ടര്‍മാര്‍, മറ്റ് പോലീസ് ഉദ്യോഗസ്ഥർ, സ്‌കൂള്‍ സ്റ്റാഫ്, മാനേജ്‌മെന്‍റ്, പിടിഎ അംഗങ്ങള്‍, വാര്‍ഡംഗം ബിജു പീറ്റര്‍ തുടങ്ങിയവർ കൂട്ടയോട്ടത്തില്‍ പങ്കെടുത്തു.

സെന്‍റ് പാട്രിക് പള്ളിയിൽ

വൈറ്റില: സഹോദരൻ അയ്യപ്പൻ റോഡിന്‍റെ വികസനത്തിനായി വൈറ്റില കാച്ചപ്പിള്ളി റോഡിലേക്ക് മാറ്റി സ്ഥാപിച്ച വിശുദ്ധ പാട്രിക്കിന്‍റെ ദേവാലയത്തിൽ കൊന്പ്രേര്യ തിരുനാളിന് ഇന്ന് തുടക്കംകുറിക്കും. വൈകിട്ട് 5.45ന് വരാപ്പുഴ അതിരൂപത വികാരി ജനറൽ മോണ്‍. മാത്യു ഇലഞ്ഞിമറ്റം കൊടിയേറ്റും. തുടർന്ന് തിരുനാൾ ദിവ്യബലിക്ക് മുഖ്യകാർമികത്വവും വഹിക്കും. ഫാ. നിജിൻ ഹെറോൾഡ് വചനസന്ദേശം നൽകും. തിരുനാൾ ദിനമായ നാലിന് രാവിലെ 8.30ന് ദിവ്യബലിക്ക് വരാപ്പുഴ അതിരൂപത ചാൻസിലർ ഫാ. എബിജിൻ അറക്കൽ മുഖ്യകാർമികനാകും. ഫാ. ഡേവിഡ് റോഡ്രിഗസ് വചന സന്ദേശം നൽകും തുടർന്ന് തിരുനാൾ പ്രദക്ഷിണം എന്നിവ ഉണ്ടായിരിക്കുമെന്ന് വികാരി ഫാ. വർഗിസ് സോജൻ തോപ്പിൽ അറിയിച്ചു.

ചിപ്പ് ടെസ്റ്റിംഗിൽ പേറ്റന്‍റ്

മട്ടാഞ്ചേരി: സെമി കണ്ടക്ട്ർ രൂപകല്പനയിൽ ഏറ്റവും ചെലവ് കുറഞ്ഞതും കാര്യക്ഷമതയുള്ളതുമായ ഡിജിറ്റൽ സിസ്റ്റം വികസിപ്പിച്ചു. സീമെൻസിൽ നിന്നുള്ള മെന്‍റർമാരായ ഇരിത്ത് പോമെറാൻസ്, ജാനുസ് രാജസ്കി എന്നിവരുടെ നേതൃത്വത്തിൽ കൊച്ചി പള്ളുരുത്തി ചിറയ്ക്കപ്പറമ്പിൽ ജെറിൻ ജോയുടെ പ്രവർത്തനങ്ങൾക്കാണ് പേറ്റന്‍റ് ലഭിച്ചത്. പള്ളുരുത്തി സ്വദേശികളായ സി.പി. ജോസഫ്-ലീന ജോസഫ് ദന്പതികളുടെ മകളായ ജെറിൻ ജോ കാലിക്കറ്റ് എൻഐടിയിൽ നിന്നും ബോംബെ ഐഐടിയിൽ നിന്നും ബിരുദം നേടിയ ശേഷം പർഡ്യൂ സർവകലാശാലയിൽ നിന്നാണ് പിഎച്ച്ഡി കരസ്ഥമാക്കിയത്. ഡിജിറ്റൽ സർക്യൂട്ട് ടെസ്റ്റിംഗിൽ ശ്രദ്ധേയമായ മുന്നേറ്റം നടത്തിയിട്ടുള്ള ഇവർ ഘടനാപരമായി സമാനമായ സർക്യൂട്ടുകൾക്കായുള്ള വർധിച്ചുവരുന്ന ടെസ്റ്റ് പാറ്റേൺ ജനറേഷനിലെ ഗവേഷണത്തിലാണ് ശ്രദ്ധ കേന്ദ്രീകരിച്ചരിക്കുന്നത്.

തിരുനാൾ

കളമശേരി സെന്‍റ് ജോസഫ്സ് പളളിയിൽ കളമശേരി: കളമശേരി സോഷ്യൽ സെന്‍റ് ജോസഫ്സ് പള്ളിയിൽ വിശുദ്ധ യൗസേപ്പിതാവിന്‍റെ തിരുനാളിന് സിഎംഐ രാജഗിരി പ്രൊവിൻഷ്യൽ ഫാ. ബെന്നി നൽക്കര ഇന്നലെ കൊടിയേറ്റി. ഇടവക വികാരി ഫാ. തോമസ് പെരേപ്പാടൻ പ്രസുദേന്തി വാഴ്ച നടത്തി. തിരുനാൾ ദിനമായ നാളെ വൈകിട്ട് 5.30ന് ആഘോഷമായ വിശുദ്ധ കുർബാനയ്ക്ക് ഫാ. എബി ഇടശേരിയും നേതൃത്വം നൽകും. പ്രസംഗം-റവ. ഡോ. ജിമ്മി പൂച്ചക്കാട്ട്. തുടർന്നു നടക്കുന്ന പ്രദക്ഷിണത്തിന് അസിസ്റ്റന്‍റ് വികാരി ഫാ. റോജൻ വട്ടോലി നേതൃത്വം നൽകും.

ചെട്ടിക്കാട് തീർഥാടന കേന്ദ്രത്തിൽ തിരുശേഷിപ്പ് പ്രദക്ഷിണം നടത്തി

പറവൂർ: ചെട്ടിക്കാട് തീർഥാടന കേന്ദ്രത്തിൽ വിശുദ്ധ അന്തോണീസിന്‍റെ തിരുശേഷിപ്പ് പ്രദക്ഷിണം നടത്തി. മേയ് 13ന് നടക്കുന്ന ഊട്ടുതിരുനാളിന്‍റെ ഭാഗമായി നവനാൾ ചൊവ്വയുടെ സമാപനത്തോടനുബന്ധിച്ചായിരുന്നു തിരുശേഷിപ്പ് പ്രദക്ഷിണം. വിശുദ്ധ അന്തോണീസിന്‍റെ അഴുകാത്ത നാവ് തിരുശേഷിപ്പ് പേടകത്തിൽനിന്ന് പുറത്തെടുത്ത് വിശ്വാസികൾക്ക് പൊതുവണക്കത്തിനായി വച്ചു. അയൽ സംസ്ഥാനങ്ങളിൽ നിന്നടക്കം തീർഥാടകരുടെ വൻ തിരക്കായിരുന്നു. റെക്ടർ റവ. ഡോ. ബെന്നി വാഴക്കൂട്ടത്തിൽ, ഫാ. നെൽസൻ ജോബ്, ഫാ. അജയ് ആന്‍റണി പുത്തൻപറമ്പിൽ എന്നിവർ തിരുകർമങ്ങൾക്ക് നേതൃത്വം നൽകി.

എഡ്രാക്ക് വാർഷികാഘോഷവും നേത്രപരിശോധനാ ക്യാമ്പും

തൃപ്പൂണിത്തുറ: എഡ്രാക്കിന്‍റെ 15-ാം വാർഷികാഘോഷങ്ങളോടനുബന്ധിച്ച് മേയ് മൂന്നിന് രാവിലെ 10ന് ലായം കൂത്തമ്പലത്തിൽ ഐ ഫൗണ്ടേഷനും എഡ്രാക്ക് തൃപ്പൂണിത്തുറ മേഖലാ കമ്മറ്റിയും ചേർന്ന് സൗജന്യ നേത്ര പരിശോധനാ ക്യാമ്പ് സംഘടിപ്പിക്കും. വൈകിട്ട് 5ന് എഡ്രാക്ക് - ഐ ഫൗണ്ടേഷന്‍റെ പ്രിവിലേജ് കാർഡ് വിതരണോദ്ഘാടനം നടക്കും. പൊതുസമ്മേളനം ഹൈബി ഈഡൻ എംപി ഉദ്ഘാടനം ചെയ്യും. എഡ്രാക്കിന്‍റെ ലൈവ് ഗാനമേള ട്രൂപ്പായ സ്വരലയ തൃപ്പൂണിത്തുറയുടെ ഉദ്ഘാടനം സംഗീത സംവിധായകൻ പി.ഡി. സൈഗാളും പിന്നണി ഗായകൻ ഗണേശ് സുന്ദരവും ചേർന്ന് നിർവഹിക്കും. കെ. ബാബു എംഎൽഎ സുവനീർ പ്രകാശനം ചെയ്യും. വിവിധ മേഖലകളിൽ വിശിഷ്ട സേവനം നടത്തിവരുന്ന വ്യക്തികളെ നഗരസഭാ ചെയർപേഴ്സൺ രമാ സന്തോഷ് ആദരിക്കും. തുടർന്ന് ലൈവ് ഗാനമേളയും നൃത്തനൃത്ത്യങ്ങളും അരങ്ങേറുമെന്ന് എഡ്രാക്ക് ഭാരവാഹികളായ ആർ. നന്ദകുമാർ, പോളി വർഗീസ്, ജി. ചന്ദ്രമോഹൻ തുടങ്ങിയവർ അറിയിച്ചു.

ഡെപ്യൂട്ടി കളക്ടർ കെ.ടി. സന്ധ്യാദേവി ഇന്ന് വിരമിക്കും

പറവൂർ: ദേശീയപാത 66 ഭൂമി ഏറ്റെടുക്കൽ വിഭാഗം ഡെപ്യൂട്ടി കളക്ടർ കെ.ടി. സന്ധ്യാദേവി ഇന്ന് സർവീസിൽ നിന്ന് വിരമിക്കും. അങ്കമാലി- കുണ്ടന്നൂർ ദേശീയപാത 544(ഗ്രീൻഫീൽഡ്) സ്ഥലം ഏറ്റെടുക്കലിന്‍റെയും ചുമതലയും സന്ധ്യാദേവിക്കായിരുന്നു. 1989ൽ പറവൂർ ബ്ലോക്ക് ഓഫീസിൽ ജോലിക്ക് പ്രവേശിച്ച ശേഷം പിന്നീട് റവന്യു വിഭാഗത്തിലേക്ക് മാറി. വില്ലേജ് ഓഫീസർ, ഡെപ്യൂട്ടി തഹസിൽദാർ, തഹസിൽദാർ പദവികളിലും സേവനമനുഷ്ടിച്ചിട്ടുണ്ട്. 2018ലെ പ്രളയകാലത്ത് ആലുവ തഹസിൽദാറായിരിക്കെ ശ്രദ്ധേയമായ പ്രവർത്തനങ്ങൾ നടത്തി. ജില്ലാ ദുരന്തനിവാരണം, ഭൂപരിഷ്കരണ വിഭാഗങ്ങളിലും ഡെപ്യൂട്ടി കളക്ടറായി സേവനമനുഷ്ഠിച്ചിട്ടുണ്ട്. എറണാകുളം ജില്ലയിലെ ദേശീയപാതയുടെ ഭൂമി ഏറ്റെടുക്കൽ കോംപീറ്റന്‍റ് അഥോറിറ്റിയായും പ്രവർത്തിച്ചിട്ടുണ്ട്.

കുടിവെള്ള സമരം അടിച്ചമർത്താൻ നോക്കേണ്ടെന്ന് നാട്ടുകാർ

വൈപ്പിൻ: ജീവനക്കാരുടെ ധാർഷ്ട്യം കൊണ്ടോ കള്ളപ്പരാതികൾ നൽകിയതുകൊണ്ടോ കുടിവെള്ളത്തിനായുള്ള എടവനക്കാട്ടുകാരുടെ വീര്യം കെടുത്താനാകില്ലെന്ന് വാട്ടർ അഥോറിട്ടി അധികൃതർക്ക് നാട്ടുകാരുടെ മുന്നറിയിപ്പ്. കഴിഞ്ഞ ദിവസം കുടിവെള്ളമാവശ്യപ്പെട്ട് പറവൂർ വാട്ടർ അഥോറിട്ടി അസി. എക്സിക്യൂട്ടീവ് എൻജിനീയറുടെ ഓഫീസിൽ പഞ്ചായത്ത് പ്രസിഡന്‍റിന്‍റെയും വൈസ് പ്രസിഡന്‍റിന്‍റെയും ഏതാനും വാർഡംഗങ്ങളുടെയും ഒപ്പമെത്തിയവരെ എൻജിനീയർ മറ്റു ജീവനക്കാരെ ഉപയോഗിച്ച് തുരത്താൻ ശ്രമിച്ചെന്നും, കള്ള പരാതി നൽകി പോലീസ് കേസിൽ കുടുക്കിയെന്നു മാരോപിച്ചാണ് നാട്ടുകാർ ഇത്തരത്തിൽ പ്രതികരിച്ചത്. നിരന്തരമായി കുടിവെള്ളം മുടങ്ങുന്ന എടവനക്കാട് തീരദേശ മേഖലയായ ഒന്ന്, 13 വാർഡുനിവാസികൾക്ക് എൻജിനീയർ നൽകിയ വാഗ്ദാനങ്ങൾ പല കുറി പാഴായ സാഹചര്യത്തിലാണത്രേ ജനങ്ങളും ജനപ്രതിനിധികളും വാട്ടർ അഥോറിട്ടി ഓഫീസിലെത്തിയത്. ഈ സമയം ജനങ്ങളെ കണ്ട് ഭയന്ന എൻജിനീയർ ആദ്യം മുങ്ങിയതാണ് പ്രശ്നങ്ങൾ സങ്കീർണമാക്കിയതെന്നാണ് സമരക്കാർ പറയുന്നു. തുടർന്നാണ് ജീവനക്കാരെ ഉപയോഗിച്ച് സ്ത്രീകൾ അടക്കമുള്ള സമരക്കാരെ തുരത്താൻ നോക്കിയത്. അവസാനം ഗത്യന്തരമില്ലാതെ വന്നപ്പോൾ എൻജിനിയർക്ക് നേരെ വരേണ്ടി വന്നെന്നും സമരക്കാർ ചൂണ്ടിക്കാട്ടി. മൂന്നിന് മുമ്പ് കുടിവെള്ളമെത്തിക്കും രേഖാമൂലമുള്ള ഉറപ്പ് വൈപ്പിൻ: എടവനക്കാട് പഞ്ചായത്തിലെ കുടിവെള്ളമെത്താത്ത ഒന്ന്, 13, തീരദേശ വാർഡുകളിൽ അടുത്ത മാസം മൂന്നിന് മുമ്പായി കുടിവെള്ളമെത്തിക്കാനുള്ള നടപടികൾ സ്വീകരിക്കുമെന്ന് പഞ്ചായത്ത് പ്രസിഡന്‍റിനും നാട്ടുകാർക്കും പറവൂർ വാട്ടർ അഥോറിട്ടി അസി.എക്സിക്യൂട്ടീവ് എൻജിനീയർ രേഖാമൂലം ഉറപ്പ് നൽകി. കഴിഞ്ഞ ദിവസം പ്രസിഡന്‍റ് അസീന അബ്ദുൾ സലാമിന്‍റെ നേതൃത്വത്തിൽ വാർഡുമെമ്പർമാരും നാട്ടുകാരും പറവൂരിലെ വാട്ടർ അഥോറിട്ടി ഓഫീസ് ഉപരോധിച്ച് നടത്തിയ എട്ടു മണിക്കൂറോളം നീണ്ട സമരത്തിനൊടുവിലാണ് വാട്ടർ അഥോറിട്ടി അധികൃതർ ഇത്തരം ഉറപ്പ് നൽകിയത്.

കളക്ടർ ഇടപെട്ടു : കാക്കനാട് പുതിയ വില്ലേജ് ഓഫീസറെത്തി

കാക്കനാട്: ജില്ലാ കലക്ടർ എൻ.എസ്.കെ. ഉമേഷിന്‍റെ നിർദേശപ്രകാരം കാക്കനാട്ടെ വില്ലേജ് ഓഫീസിൽ പുത്രിയ ഓഫീസർ ചുമതലയേറ്റു. തൃക്കാക്കര നഗരസഭയുടെ പ്രധാന മേഖലകൾ ഉൾപ്പെടുന്ന വില്ലേജ് ഓഫീസിൽ ഫയലുകൾ തീർപ്പാക്കാൻ വില്ലേജ് ഓഫീസർ ഇല്ലാതായിട്ട് ഒന്നര മാസം കഴിഞ്ഞ സാഹചര്യത്തിലാണ് പുതിയനിയമനം. കളക്‌ടറേറ്റ് മെട്രോ വിഭാഗം തഹസിൽദാർ ഓഫീസ് യൂണിറ്റ് 2ൽ ജീവനക്കാരിയായ കെ.ബി. ബിന്ദു കാക്കനാട് വില്ലേജ് ഓഫീസറുടെ ചുമതല വഹിക്കും. വില്ലേജ് ഓഫീസർ ഇല്ലാതായതോടെ നൂറുകണക്കിന് ഓൺലൈൻ ഓഫ്‌ലൈൻ അപേക്ഷകൾ കെട്ടിക്കിടക്കുകയാണെന്ന് ചൂണ്ടിക്കാട്ടി സിപിഐ മണ്ഡലം സെക്രട്ടറി കെ.കെ. സന്തോഷ് ബാബുവും, ലോക്കൽ കമ്മിറ്റി സെക്രട്ടറി പ്രമേഷ് വി. ബാബുവും തിങ്കളാഴ്ച കളക്ടറെ നേരിൽകണ്ട് കാക്കനാട്ട് പുതിയ വില്ലേജ് ഓഫീസറെ അടിയന്തരമായി നിയമിക്കണമെന്ന് ആവശ്യപ്പെട്ടിരുന്നു. വാഴക്കാല വില്ലേജ് ഓഫീസറാണ് പകരം ചുമതല വഹിച്ചിരുന്നത്. വില്ലേജ് ഓഫീസറായി നിയമിതയായ ഉദ്യോഗസ്ഥ ലീവ് എടുത്ത് പോയതോടെയാണ് കാക്കനാട് വില്ലേജ് ഓഫീസിന്‍റെ പ്രവർത്തനം അവതാളത്തിലായത്.

സാന്ദ്രാ തോമസിന്‍റെ പരാതി: കുറ്റപത്രം സമര്‍പ്പിച്ച് പ്രത്യേക അന്വേഷണ സംഘം

കൊച്ചി: പ്രൊഡ്യൂസേഴ്‌സ് അസോസിയേഷന്‍ യോഗത്തില്‍ അധിക്ഷേപിച്ചെന്ന നിര്‍മാതാവും നടിയുമായ സാന്ദ്രാ തോമസിന്‍റെ പരാതിയില്‍ കുറ്റപത്രം സമര്‍പ്പിച്ച് പ്രത്യേക അന്വേഷണ സംഘം. നിര്‍മാതാവ് ആന്‍റോ ജോസഫാണ് ഒന്നാം പ്രതി. പ്രൊഡ്യൂസേഴ്‌സ് അസോസിയേഷന്‍ ജനറല്‍ സെക്രട്ടി ബി. രാകേഷ്, അനില്‍ തോമസ്, ഔസേപ്പച്ചന്‍ വാളക്കുഴി എന്നിവരാണ് പ്രതിപ്പട്ടികയിലുള്ളത്. സ്ത്രീത്വത്തെ അപമാനിക്കല്‍, ഭീഷണിപ്പെടുത്തല്‍, ലൈംഗികച്ചുവയോടെ സംസാരം അടക്കമുള്ള കുറ്റങ്ങള്‍ ചുമത്തിയാണ് കുറ്റപത്രം. സിനിമാ വിതരണവുമായി ബന്ധപ്പെട്ട് യോഗത്തിലേക്ക് വിളിച്ചുവരുത്തി അസോസിയേഷന്‍ ഭാരവാഹികള്‍ അപമാനിക്കുന്ന തരത്തില്‍ സംസാരിച്ചുവെന്നാണ് സാന്ദ്രാ തോമസ് പരാതി നല്‍കിയത്. ഇതേത്തുടര്‍ന്ന് ഭാരവാഹികള്‍ക്കെതിരെ പോലീസ് കേസെടുത്തിരുന്നു. ഇതിനു പിന്നാലെ അച്ചടക്ക ലംഘനത്തിന്‍റെ പേരില്‍ സാന്ദ്രാ തോമസിനെ പ്രൊഡ്യൂസേഴ്‌സ് അസോസിയേഷനില്‍ നിന്ന് പുറത്താക്കി. തുടര്‍ന്ന് തന്നെ പുറത്താക്കിയ നടപടി ചട്ടവിരുദ്ധമാണെന്ന് ചൂണ്ടിക്കാട്ടി സാന്ദ്ര തോമസ് എറണാകുളം സബ് കോടതിയെ സമീപിച്ചു. മതിയായ വിശദീകരണം നല്‍കാതെയാണ് പുറത്താക്കിയതെന്നും വിഷയത്തില്‍ കോടതി ഇടപെടണമെന്നും സാന്ദ്ര തോമസ് ഹര്‍ജിയില്‍ ആവശ്യപ്പെട്ടിരുന്നു. ഹേമ കമ്മിറ്റി റിപ്പോര്‍ട്ട് പുറത്തുവന്നതിന് പിന്നാലെ പ്രൊഡ്യൂസേഴ്‌സ് അസോസിയേഷനെതിരെ ഗുരുതര ആരോപണവുമായി സാന്ദ്ര രംഗത്തെത്തിയിരുന്നു. ഒന്നോ രണ്ടോ വ്യക്തികളുടെ തീരുമാനപ്രകാരം മാത്രമാണ് സംഘടന പ്രവര്‍ത്തിക്കുന്നതെന്നും മറ്റുള്ളവരെ ഒന്നും അറിയിക്കുന്നില്ലെന്നുമാണ് സാന്ദ്രാ തോമസ് ആരോപിച്ചത്. പ്രൊഡ്യൂസേഴ്‌സ് അസോസിയേഷന്‍റെ കെട്ടിടത്തില്‍ സിസിടിവിയുണ്ട്. അവിടെ മുറികളുണ്ട്. എന്തിനാണ് അവിടെ മുറികള്‍, അവിടെ എന്തൊക്കെയാണ് നടക്കുന്നതെന്ന് അന്വേഷിക്കണം. അസോസിയേഷനിലെ പല ഭാരവാഹികളുടെയും സാമ്പത്തിക സ്രോതസുകളെക്കുറിച്ച് അന്വേഷിക്കണമെന്നും സാന്ദ്രാ തോമസ് ആവശ്യപ്പെട്ടിരുന്നു.

വേലിയേറ്റത്തില്‍ മുങ്ങി കലൂര്‍ അംബേദ്കര്‍ നഗര്‍

കൊച്ചി: ശക്തമായ വേലിയേറ്റത്തില്‍ കലൂര്‍ അംബേദ്കര്‍ നഗറിലെ 150ഓളം കുടുംബങ്ങള്‍ ദുരിതത്തിലായി. കലൂര്‍ ജഡ്ജസ് അവന്യു റോഡുമായി ചേര്‍ന്നു കിടക്കുന്ന പേരണ്ടൂര്‍ കനാല്‍ നിറഞ്ഞു കവിഞ്ഞതാണ് സമീപപ്രദേശങ്ങളിൽ വെള്ളം കയറാന്‍ കാരണമായത്. കാനകളില്‍ നിറഞ്ഞുനില്‍ക്കുന്ന മലിനജലം വീടുകള്‍ക്കുള്ളിലേക്ക് കയറുന്നത് പകര്‍ച്ച വ്യാധികള്‍ക്കുവരെ വഴിയൊരുക്കുമെന്ന ആശങ്കയിലാണ് പ്രദേശ വാസികള്‍. കഴിഞ്ഞ മൂന്നു ദിവസമായി വേലിയേറ്റ വെള്ളപ്പൊക്കങ്ങളില്‍ ദുരിതമനുഭവിക്കുകയാണ് പ്രദേശവാസികള്‍. കഴിഞ്ഞ രണ്ടു മാസങ്ങളിലും ഇതുപോലെ ഒരാഴ്ചയിലധികം നീണ്ടു നില്‍ക്കുന്ന വേലിയേറ്റം ഉണ്ടായിരുന്നു. റസിഡന്‍റ്സ് അസോസിയേഷന്‍റെ നേതൃത്വത്തില്‍ അധികൃതര്‍ക്ക് പരാതികള്‍ നല്‍കിയെങ്കിലും യാതൊരു നടപടിയും ഉണ്ടാ യില്ലെന്ന് പ്രദേശവാസികള്‍ പറഞ്ഞു.

സാന്ദ്രാ തോമസിന്‍റെ പരാതി: കുറ്റപത്രം സമര്‍പ്പിച്ചു : നിര്‍മാതാവ് ആന്‍റോ ജോസഫ് ഒന്നാം പ്രതി

കൊച്ചി: പ്രൊഡ്യൂസേഴ്‌സ് അസോസിയേഷന്‍ യോഗത്തില്‍ അധിക്ഷേപിച്ചെന്ന നിര്‍മാതാവും നടിയുമായ സാന്ദ്രാ തോമസിന്‍റെ പരാതിയില്‍ പ്രത്യേക അന്വേഷണസംഘം കുറ്റപത്രം സമര്‍പ്പിച്ചു. നിര്‍മാതാവ് ആന്‍റോ ജോസഫാണ് ഒന്നാം പ്രതി. പ്രൊഡ്യൂസേഴ്‌സ് അസോസിയേഷന്‍ ജനറല്‍ സെക്രട്ടി ബി. രാകേഷ്, അനില്‍ തോമസ്, ഔസേപ്പച്ചന്‍ വാളക്കുഴി എന്നിവരാണു പ്രതിപ്പട്ടികയിലുള്ളത്. സ്ത്രീത്വത്തെ അപമാനിക്കല്‍, ഭീഷണിപ്പെടുത്തല്‍, ലൈംഗികച്ചുവയോടെ സംസാരം അടക്കമുള്ള കുറ്റങ്ങള്‍ ചുമത്തിയാണു കുറ്റപത്രം. സിനിമാവിതരണവുമായി ബന്ധപ്പെട്ട് യോഗത്തിലേക്കു വിളിച്ചുവരുത്തി അസോസിയേഷന്‍ ഭാരവാഹികള്‍ അപമാനിക്കുന്ന തരത്തില്‍ സംസാരിച്ചുവെന്നാണ് സാന്ദ്രാ തോമസ് പരാതി നല്‍കിയത്. ഇതേത്തുടര്‍ന്ന് ഭാരവാഹികള്‍ക്കെതിരേ പോലീസ് കേസെടുത്തിരുന്നു. ഇതിനു പിന്നാലെ അച്ചടക്കലംഘനത്തിന്‍റെ പേരില്‍ സാന്ദ്രാ തോമസിനെ പ്രൊഡ്യൂസേഴ്‌സ് അസോസിയേഷനില്‍നിന്നു പുറത്താക്കി. ഇതോടെ, തന്നെ പുറത്താക്കിയ നടപടി ചട്ടവിരുദ്ധമാണെന്നു ചൂണ്ടിക്കാട്ടി സാന്ദ്ര തോമസ് എറണാകുളം സബ് കോടതിയെ സമീപിച്ചു. മതിയായ വിശദീകരണം നല്‍കാതെയാണു പുറത്താക്കിയതെന്നും വിഷയത്തില്‍ കോടതി ഇടപെടണമെന്നും സാന്ദ്രാ തോമസ് ഹര്‍ജിയില്‍ ആവശ്യപ്പെട്ടിരുന്നു. ഹേമ കമ്മിറ്റി റിപ്പോര്‍ട്ട് പുറത്തുവന്നതിനു പിന്നാലെ പ്രൊഡ്യൂസേഴ്‌സ് അസോസിയേഷനെതിരേ ഗുരുതര ആരോപണവുമായി സാന്ദ്ര രംഗത്തെത്തിയിരുന്നു. ഒന്നോ രണ്ടോ വ്യക്തികളുടെ തീരുമാനപ്രകാരം മാത്രമാണു സംഘടന പ്രവര്‍ത്തിക്കുന്നതെന്നും മറ്റുള്ളവരെ ഒന്നും അറിയിക്കുന്നില്ലെന്നുമാണ് സാന്ദ്രാ തോമസ് ആരോപിച്ചത്. പ്രൊഡ്യൂസേഴ്‌സ് അസോസിയേഷന്‍റെ കെട്ടിടത്തില്‍ സിസിടിവിയുണ്ട്. അവിടെ മുറികളുണ്ട്. എന്തിനാണ് അവിടെ മുറികള്‍, അവിടെ എന്തൊക്കെയാണു നടക്കുന്നതെന്ന് അന്വേഷിക്കണം. അസോസിയേഷനിലെ പല ഭാരവാഹികളുടെയും സാമ്പത്തിക സ്രോതസുകളെക്കുറിച്ച് അന്വേഷിക്കണമെന്നും സാന്ദ്രാ തോമസ് ആവശ്യപ്പെട്ടിരുന്നു.

കാറിടിച്ചു പരിക്കേറ്റ റിട്ടയേർഡ് ഇഎസ്ഐ ജീവനക്കാരി മരിച്ചു

വൈപ്പിൻ: കാറിടിച്ചു പരിക്കേറ്റ് ചികിത്സയിലായിരുന്ന റിട്ടയേർഡ് ഇഎസ്ഐ ജീവനക്കാരി മരിച്ചു. നായരന്പലം പുത്തലത്ത് പരേതനായ രാമൻപിള്ളയുടെ മകൾ ഝാൻസി (64) ആണ് മരിച്ചത്. 23ന് നായരന്പലം കുടുങ്ങാശേരി ബസ് സ്റ്റോപ്പിൽ നിൽക്കവെ നിയന്ത്രണംവിട്ട കാർ ഝാൻസിയെ ഇടിക്കുകയായിരുന്നു. എറണാകുളത്തെ സ്വകാര്യ ആശുപത്രിയിൽ ചികിത്സയിലിരിക്കയാണ് മരിച്ചത്. സംസ്കാരം നടത്തി. അമ്മ: പരേതയായ രുഗ്മിണി. സഹോദരങ്ങൾ: ഗീത, ബാലാനന്ദൻ പിള്ള, രാധാകൃഷ്ണ പിള്ള, സൈന.

ദേശീയ വനിതാ കമ്മീഷന്‍ പൊതുതെളിവെടുപ്പ് : 31 പരാതികള്‍ക്ക് പരിഹാരം

കൊച്ചി: ദേശീയ വനിതാ കമ്മീഷന്‍ എറണാകുളത്ത് നടത്തിയ പൊതു തെളിവെടുപ്പില്‍ 31 പരാതികള്‍ക്ക് പരിഹാരം. രാഷ്ട്രീയ മഹിളാ ആയോഗ് സംരംഭത്തിന് കീഴില്‍ കമ്മീഷന് ലഭിച്ച എറണാകുളം, ആലപ്പുഴ, തൃശൂര്‍, കോട്ടയം ജില്ലകളില്‍ നിന്നുള്ള 36 പരാതികളാണ് ഹിയറിംഗില്‍ പരിഗണിച്ചത്. അഞ്ച് പരാതികൾ നടപടികള്‍ക്ക് വിട്ടു. കളക്ടറേറ്റ് കോണ്‍ഫറന്‍സ് ഹാളില്‍ നടന്ന ഹിയറിംഗില്‍ കമ്മീഷന്‍ ചെയര്‍പേഴ്‌സണ്‍ വിജയ രഹത്കര്‍ അധ്യക്ഷത വഹിച്ചു. അഡീഷണല്‍ ജില്ലാ മജിസ്‌ട്രേറ്റ് വിനോദ് രാജ്, കൊച്ചി സിറ്റി പോലീസ് കമ്മീഷണര്‍ പുട്ട വിമലാദിത്യ, കൊച്ചി പോലീസ് ഡെപ്യൂട്ടി കമ്മീഷണര്‍ (അഡ്മിനിസ്‌ട്രേഷന്‍ ആന്‍ഡ് ക്രൈംസ്) ബിജി ജോര്‍ജ് എന്നിവര്‍ സന്നിഹിതരായിരുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]