ADVERTISEMENT

ADVERTISEMENT

കളംപാട്ട് ശില്പശാല ശ്രദ്ധേയമായി

തിരുവില്വാമല: അനുഷ്ഠാനകലകളെ കുട്ടികൾക്ക് പരിചയപ്പെടുത്തുന്നതിന്‍റെ ഭാഗമായി ഗ്രാമീണ വായനശാല ബാലവേദിയുടെ നേതൃത്വത്തിൽ സംഘടിപ്പിച്ച കളംപാട്ട് ശില്പശാല കുട്ടികൾക്ക് പുതിയ അനുഭവമായി.

കേരള ഫോക്‌ലോർ അക്കാദമി പുരസ്കാര ജേതാവും കളംപാട്ട് കലാകാരനുമായ കടന്നമണ്ണ ശ്രീനിവാസനാണ് ശില്പശാല നയിച്ചത്. അനുഷ്ഠാനകലകൾ ജനകീയമാകേണ്ടതിന്‍റെ ആവശ്യകതയെക്കുറിച്ചും എങ്ങനെ ജനകീയമാക്കാം എന്നതിനെക്കുറിച്ചും അദ്ദേഹം വിശദീകരിച്ചു. 256-ാം കളംപാട്ട് ശില്പശാല പൂർത്തിയാക്കിയ ശ്രീനിവാസനെ ഗ്രാമപഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ സ്മിത സുകുമാരൻ ഉപഹാരംനല്കി ആദരിച്ചു.

വായനശാല സെക്രട്ടറി ബാബു പരശുറാം, കെ. ജയപ്രകാശ്കുമാർ, എൻ രാംകുമാർ, സുരേഷ് ബാബു, ബാലവേദി വൈസ് പ്രസിഡന്‍റ് ബി. അഭിനവ്, കെ.എസ്. ജാനകി എന്നിവർ സംസാരിച്ചു. തുടർന്ന് വായനശാല ലൈഫ് മെമ്പർമാർക്കുള്ള ഐഡന്‍റിറ്റി കാർഡ് തലപ്പിള്ളി താലൂക്ക് ലൈബ്രറി കൗൺസിൽ എക്സിക്യൂട്ടീവ് അംഗം ഗിരീഷ് രാധാകൃഷ്ണൻ വിതരണംചെയ്തു.

ADVERTISEMENT

നൂറുകണക്കിനു വീടുകൾ, റോഡുകള്‌ വെള്ളത്തിൽ

കടൽക്ഷോഭം രൂക്ഷം ചാവക്കാട്: കാറ്റും മഴയും ശക്തമായതിന് പിന്നാലെ കടൽക്ഷോഭവും രൂക്ഷമായി. കടപ്പുറം പഞ്ചായത്തിന്‍റെ തീരമേഖലയായ തൊട്ടാപ്പ് മുതൽ അഴിമുഖംവരെയുള്ള പ്രദേശങ്ങളിലാണ് ചെറിയൊരു ഇടവേളയ്ക്കുശേഷം വീണ്ടും കടലാക്രമണം രൂക്ഷമായത്. കടൽ ആഞ്ഞടിക്കുകയാണ്. ഭിത്തി തകർന്ന സ്ഥലത്തും ഭിത്തിയുള്ള സ്ഥലത്തും കടൽ കരയ്ക്ക് കയറുന്നു. തീരവാസികൾ നിസഹയരാണ്. മഴ അൽപം മാറിനിൽക്കുന്നുണ്ടെങ്കിലും ഇടവിട്ട് കറ്റോടുകൂടിയ മഴ പെയ്യുന്നതിനാൽ വെള്ളക്കെട്ടിന് കാര്യമായ കുറവ് വന്നിട്ടില്ല. പുന്ന പേരകം, വഞ്ചിക്കടവ്, തെക്കഞ്ചേരി തുടങ്ങി പ്രദേശങ്ങൾ വെള്ളക്കെട്ടിൽതന്നെ. ഇവിടെനിന്ന് പല വീട്ടുകാരും ബന്ധുവീടുകളിലേക്കും കടപ്പുറത്തെ ഷെൽട്ടറിലേക്കുംമാറി. ദേശീയപാത 66 നിർമാണത്തിന്‍റെ ഭാഗമായി വില്യം സിൽപാലം പണിയുന്നതിനായി കനോലി കനാൽ ഭാഗികമായി നികത്തിയിടത്തുനിന്ന് മൂന്ന് മീറ്റർ വീതിയിൽ മണൽ നീക്കിയതിനെ തുടർന്ന് ചെറിയതോതിൽ വെള്ളം ഒഴിയുന്നുണ്ട്. പുന്നപ്രദേശം ഒറ്റപ്പെട്ട നിലയിലാണ്. ഇവിടത്തുകാർക്ക് പുറത്തുപോകാനുളള മുക്കുട്ട, കോഴിക്കുളങ്ങര, കോഴിത്തറ, പുതിയറ എന്നീ നാലു റോഡുകളും വെള്ളക്കെട്ടിൽ മുങ്ങി. ദ്വീപിൽ അകപ്പെട്ട അവസ്ഥയിലാണ് പുന്നകാർ. കനോലി കനാലിനോടുചേർന്ന് കിടക്കുന്ന പ്രദേശത്തെ വെള്ളം കനാലിലേക്കാണ് ഒഴുകിയിരുന്നത്. കനാൽ കരകവിഞ്ഞതിനാൽ ഒഴുക്ക് നിലച്ചതാണ് പുന്ന, പേരകം സ്വദേശികളെ ദുരിതത്തിലാക്കിയത്. ദേശീയപാത നിർമാണത്തിന്‍റെ ഭാഗമായി പുന്നയൂർക്കുളം മന്ദലാംകുന്നിൽ വെള്ളക്കെട്ടിൽ കുടുങ്ങിയ 15 വീട്ടുകാരുടെ പ്രശ്നം പരിഹരിക്കാൻ ഇന്ന് 3.30ന് ചാവക്കാട് റസ്റ്റ് ഹൗസിൽ ചർച്ചയുണ്ട്. എന്നാൽ മലപ്പുറം ജില്ലയിലെ വെളിയങ്കോട് ലോക്ക് കം ബ്രിഡ്ജിന്‍റെ നിർമാണത്തിനായി കനോലി കനാലിൽ തടയണ കെട്ടിയതിനെ തുടർന്ന് തൃശൂർ, മലപ്പുറം ജില്ലകളിലായി നൂറുകണക്കിന് വീടുകൾ വെള്ളത്തിലാണ്. കനാലിന്‍റെ ഇരുകരയിലായി കിലോമീറ്ററുകൾ ദൂരത്തിൽ വെള്ളക്കെട്ടാണ്. ജില്ലയിലെ പുന്നയൂർ, എടക്കര, പുന്നയൂർക്കുളം, മല്ലാട്, പനന്തറ, അണ്ടത്തോട് തുടങ്ങിയ പ്രദേശങ്ങൾ വെള്ളത്തിലായി ഒട്ടേറെ വീട്ടുകാർ താമസംമാറി. കനാലിലെ തടയണ പൊളിക്കണമെന്നാണ് നാട്ടുകാരുടെ ആവശ്യം. എന്നാൽ നിർമാണം തടസപ്പെടുമെന്നും വേഗത്തിൽ പണി പൂർത്തികരിക്കാമെന്ന നിലപാടിലാണ് കരാറുകാരൻ പറയുന്നത്. മഴ തുടർന്നാൽ കനാൽ തീരത്തെ സ്ഥിതി വഷളാകുമെന്ന് തീരവാസികൾ ചൂണ്ടിക്കാട്ടുന്നു. റോഡിൽ വെള്ളംകയറി ചേർപ്പ്: കനത്ത മഴയെ തുടർന്ന് പള്ളിപ്പുറം ആലപ്പാട് റോഡിൽ വെള്ളംകയറി. ഇരുഭാഗങ്ങളിലെ കോൾപടവുകളിൽനിന്ന് വെള്ളം റോഡിലേക്ക് കവിഞ്ഞതിനെ തുടർന്നാണ് വെള്ളക്കെട്ട് രൂപപ്പെട്ടിരിക്കുന്നത്. പാലക്കലിൽ നിന്ന് അമ്മാടം, പള്ളിപ്പുറം, പുള്ള്, മനക്കൊടി, തൃപ്രയാർ ഭാഗങ്ങളിലേക്ക് പോകുന്ന വഴികൂടിയാണിത്. മഴ തുടർന്നാൽ വാഹനഗതാഗതവും തടസപ്പെടുന്ന അവസ്ഥയിലാണ്. സ്കൂളിനു മുകളിലേക്ക് മരക്കൊമ്പ് പൊട്ടിവീണു എരുമപ്പെട്ടി: വെള്ളറക്കാട് വിവേകസാഗരം യുപി സ്കൂളിലെ ക്ലാസ് മുറിയുടെ മുകളിലേക്ക് മരക്കൊമ്പ് പൊട്ടിവീണ് ഓടുകൾ തകർന്നു. ഇന്നലെ പുലർച്ചെയുണ്ടായ ശക്തമായ കാറ്റിലും മഴയിലുമാണ് തേക്ക് മരത്തിന്‍റെ കൊമ്പ് പൊട്ടിവീണത്. ഒന്ന്, രണ്ട് ക്ലാസുകളുടെ മുകളിലേക്കാണ് മരക്കൊമ്പ് വീണത്. പുലർച്ചെയായതിനാൽ വൻ അപകടം ഒഴിവായി. മേൽക്കൂരയിലെ ഓടുകൾ തകർന്നു. തൊട്ടടുത്തപറമ്പിൽ നിന്നിരുന്ന ഉണങ്ങിയ മരവും സ്കൂളിലേക്ക് വീണു. മരംവീണ് വീടുതകർന്നു പുന്നംപറമ്പ്: കഴിഞ്ഞദിവസമുണ്ടായ ശക്തമായ കാറ്റിലും മഴയിലും മരം വീണു വീടുതകർന്നു. തെക്കുംകര വിരുപ്പാക്ക നമ്പ്രത്ത്‌ വ‌‌ീട്ടിൽ തങ്കമ്മയുടെ വീടിനു മുകളിലേക്കാണ് വലിയപുളിമരം കാറ്റിൽവീണത്. അർധരാത്രിയിലായിരുന്നു സംഭവം. വീട്ടിൽ ഉറങ്ങുകയായിരുന്നവർ തലനാരിഴയ്ക്കാണ് രക്ഷപ്പെട്ടത്. തങ്കമ്മയും മരുമകൾ പ്രീതയും രണ്ടു മക്കളുമാണ് വീട്ടിൽ ഉണ്ടായിരുന്നത്. ഓട് തലയിൽവീണ് രണ്ടുപേർക്ക് ചെറിയ പരിക്കേറ്റു. വീടിന്‍റെ മേൽക്കൂര പൂർണമായി തകർന്നു. മകൻ വിനോദ് ജോലിസ്ഥലത്തായിരുന്നു. മഴയില്‌ വീട് തകർന്നു പാവറട്ടി: ശക്തമായ കാറ്റിലും മഴയിലും പാവറട്ടിയിൽ വീടുതകർന്നു. പാവറട്ടി പഞ്ചായത്തിലെ വെൻമേനാട് ആശുപത്രിപടിക്കുസമീപം താമസിക്കുന്ന കെ. ദേവദാസിന്‍റെ വീടാണ് മഴയിൽ തകർന്നത്. വീടിന്‍റെ മണ്ണുകൊണ്ട് നിർമിച്ച ചുമര് മഴയിൽ തകർന്നുവീണു. ഓടിട്ട വീടിന്‍റെ മേൽക്കൂരയിലെ കഴുക്കോലുകളും ദ്രവിച്ച അവസ്ഥയിലാണ്. വീടിനുള്ളിൽ സൂക്ഷിച്ചിരുന്ന പാത്രങ്ങൾ, വിവിധ രേഖകൾ, സൈക്കിൾ എന്നിവ നശിച്ചു. വീടിനുചുറ്റും വെള്ളക്കെട്ട് രൂപപ്പെട്ട നിലയിലാണ്. വീട്ടിൽനിന്നു താമസംമാറേണ്ട അവസ്ഥയിലാണ് കുടുംബം. പുന്നയൂര്‍ക്കുളം: ശക്തമായ മഴയില്‍ വീട് തകര്‍ന്നുവീണു. തൃപ്പറ്റ് ജയാനന്ദന്‍റെ വീടാണ് കാറ്റിൽ തകര്‍ന്നുവീണത്. കഴിഞ്ഞദിവസം രാത്രിയിലാണ് സംഭവം. തൊഴിലാളിയായ ജയാനന്ദൻ ഒറ്റയ്ക്കാണ് താമസം. ആളപായമില്ല. കുന്നംകുളം: ഇന്നലെ രാത്രിയിൽ പെ യ്ത കനത്തമഴയിൽ ചൊവ്വന്നൂരിൽ ഇരുനില വീട് തകർന്നുവീണു. കുന്നംകുളം ചൊവ്വന്നൂർ അയ്യപ്പത്ത് റോഡിൽ കോലാടിപറമ്പിൽ ബിജേഷും കുടുംബവും താമസിച്ചിരുന്ന വീടാണ് തകർന്നത്. ഇന്നലെ പുലർച്ചെ നാലോടെ വീടിന്‍റെ ചുവരുകൾ പൊട്ടുന്ന ശബ്ദംകേട്ട് ബിജീഷും ഭാര്യയും രണ്ടു കുട്ടികൾ അടങ്ങുന്ന കുടുംബം പുറത്തേക്ക് ഓടിയതിനാൽ വൻ ദുരന്തം ഒഴിവായി. അൽപനിമിഷത്തിനുള്ളിൽ വീട് പൂർണമായും നിലംപൊത്തുകയായിരുന്നു. കുടുംബ ക്ഷേത്രത്തിൽ പോകുന്നതിനായി ബിജേഷ് നേരത്തെ എഴുന്നേറ്റു. ഈ നേരത്താണ് ചുമർ പൊട്ടുന്നത് ശ്രദ്ധയിൽപ്പെട്ടത്. ഇതോടെയാണ് ഭാര്യയും കുട്ടികളുമായി പുറത്തേക്ക് ഓടിയത്. മഴയിൽ വീടിന്‍റെ ചുവരുകൾക്കിടയിലേക്ക് വെള്ളം ഇറങ്ങിയതാണ് ഇടിയാൻ കാരണമായതെന്ന് കരുതുന്നു. വീട്ടുസാധനങ്ങൾ എല്ലാം നശിച്ചു. മേഖലയിൽ ഇന്നലെ വൈകിട്ട് മുതൽ കനത്ത മഴയാണ് ഉണ്ടായിരുന്നത്. റോഡിലെ വെള്ളക്കെട്ട് ഒഴിവാക്കാൻ നാട്ടുകാർ അന്തിക്കാട്: കനത്തമഴയെ തുടർന്ന് ദിവസങ്ങളായി നിലനിൽക്കുന്ന അന്തിക്കാട് വാമനമൂർത്തി ക്ഷേത്രം റോഡിലെ വെള്ളക്കെട്ട് ഒഴിവാക്കാൻ നാട്ടുകാർ രംഗത്തിറങ്ങി. ഇതുവഴിയുള്ള യാത്ര അപകടം നിറഞ്ഞതായതോടെയാണ് കൈക്കോട്ടും പിക്കാസുമായി നാട്ടുകാർ രംഗത്തിറങ്ങിയത്. റോഡ് അരികിലെ പാഴ് പുല്ലുകളും മറ്റും വെട്ടി വൃത്തിയാക്കിയ നാട്ടുകാർ കൈക്കോട്ട് ഉപയോഗിച്ച് റോഡരികിൽ ചെറിയ കാനയുണ്ടാക്കി വെള്ളം ഒഴുക്കിവിടാനുള്ള ശ്രമങ്ങളാണ് നടത്തിയത്. കിഴക്കുഭാഗത്തുനിന്നു ചെറിയ കാനകോരി പടിഞ്ഞാറുഭാഗത്തെ പ്രധാന റോഡരികിലെ കാനയിലേക്കാണ് ഇവർ വെള്ളം ഒഴുക്കിവിട്ടത്. കളത്തൻപറമ്പിൽ ജയൻ, ടി.ജെ. ബെന്നി, സി.ജെ. ബിജു, എം.വി. സുദർശൻ എന്നിവരാണ് തിങ്കളാഴ്ച രാവിലെ മുതൽ മണിക്കൂറുകളോളം നീണ്ടുനിന്ന സന്നദ്ധ പ്രവർത്തനങ്ങൾ ചെയ്തത്. തണ്ണീർത്തടം കരകവിഞ്ഞൊഴുകി അന്തിക്കാട്: കനത്തമഴയിൽ കെ.കെ. മേനോൻ ഷെഡിന് വടക്കുഭാഗത്തെ തണ്ണീർത്തടം കരകവിഞ്ഞൊഴുകിയതോടെ അന്തിക്കാട് റോഡ് വെള്ളത്തിലായി. നിരവധി ഇരുചക്രവാഹനങ്ങളിലെ എൻജിനുകളിൽ വെള്ളംകയറി യാത്രക്കാർ വലഞ്ഞു. അന്തിക്കാട് സെന്‍റർ, വാമനമൂർത്തി ക്ഷേത്രപരിസരം, കെ.കെ. മേനോൻ ഷെഡിന്‍റെ പടിഞ്ഞാറുഭാഗം തുടങ്ങി നിരവധി പ്രദേശങ്ങളിലെ വെള്ളം ഒഴുകിപ്പോയിരുന്ന പുറമ്പോക്ക് തോട്ടിലെ ഒഴുക്കുനിലച്ചതാണ് വെള്ളം കയറാൻ പ്രധാനകാരണം. പുറമ്പോക്ക് തോട്ടിലൂടെ എത്തുന്ന മഴവെള്ളം 150 മീറ്ററോളം കഴിഞ്ഞാൽ പിന്നീട് സ്വകാര്യ വ്യക്തികളുടെ വീട്ടുപറമ്പുകളിലൂടെയും കര പാടങ്ങളിലുടെയും ഒഴുകി മാത്തുതോട് വഴി കനോലി കനാലിലേക്കാണ് ഒഴുകിപ്പോയിരുന്നത്. സ്വകാര്യ വ്യക്തികൾ തോടുകൾ മതിൽകെട്ടിയും വീട് നിർമിച്ചും അടച്ചതോടെയാണ് വെള്ളം ഒഴുകിപോകാൻ കഴിയാതെ വെള്ളക്കെട്ട് രൂപപെട്ടതെന്ന് നാട്ടുകാർ പറയുന്നു. സ്വകാര്യവ്യക്തികൾ സ്ഥാപിച്ച ഓവുകൾ പഞ്ചായത്ത് ഇടപെട്ട് എടുത്തുമാറ്റി പകരം കാന നിർമിച്ച് വെള്ളമൊഴുക്കിക്കളയലാണ് ശാശ്വത പരിഹാരമെന്ന് നാട്ടുകാർ പറയുന്നു. കെ.കെ. മേനോൻ - പേരാൻ മാർക്കറ്റ് ന്യൂ ലിങ്ക് റോഡിൽ വെള്ളമൊഴുകിയെത്തുന്ന തോടിനെ ബന്ധിപ്പിക്കുന്ന രീതിയിൽ കലുങ്ക് സ്ഥാപിക്കണമെന്ന ആവശ്യവും ശക്തമാണ്. മിന്നൽചുഴലി - എളവള്ളിയിലും പാവറട്ടിയിലും വ്യാപകനാശം പാവറട്ടി: കനത്ത മഴയ്ക്കൊപ്പം മിന്നൽ ചുഴലിയും. എളവള്ളി, പാവറട്ടി പഞ്ചായത്തുകളിൽ വ്യാപക നാശനഷ്ടം. പ്രദേശത്തെ വിടുകളിലെ മരങ്ങൾ കടപുഴകിവീണും വീടുകളുടെ ഓടും ഷീറ്റുകളും പറന്നുപോയും ഇലക്ട്രിക് പോസ്റ്റുകൾ തകർന്നും നാശനഷ്ടങ്ങൾ ഉണ്ടായി. കാക്കശ്ശേരി ഹനുമാൻകാവ് ക്ഷേത്രത്തിനുസമീപം നിർത്താട്ടിൽ മനോജ്കുമാറിന്‍റെ വീട്ടിൽ നിർത്തിയിട്ടിരുന്ന കാറിനു മുകളിൽ മാവ് മുറിഞ്ഞുവീണു. ചുഴലി ബിജുവിന്‍റെ വീടിനു മുകളിലേക്ക് ശക്തമായ കാറ്റിൽ തെങ്ങുവീണു. വീടിന് കേടുപാടുകൾ സംഭവിച്ചു. ആതിര ചാരിറ്റബിൾ സൊസൈറ്റിയുടെ മുകളിലേക്ക് മാവ് കടമുറിഞ്ഞുവീണു. പാവറട്ടി പഞ്ചായത്തിൽ കുറ്റിക്കാട്ട് അന്തോണിയുടെ വീടിനുമുകളിൽ പ്ലാവ് വീണു. നീലങ്കാവിൽ എൻ.ജെ. ലിയോയുടെ വീട്ടിൽ രണ്ട് മാവ് കടമുറിഞ്ഞുവീണു. പുത്തൂർ ഡേവിസിന്‍റെ വീട്ടിലെ ഷീറ്റ് കാറ്റിൽ പറന്നുപോയി. പാമ്പിങ്ങൽ മുരളിയുടെ വീട്ടിലെ അയിനിമരവും ഊരുപറമ്പിൽ രാമകൃഷ്ണന്‍റെ വീട്ടിലെ മാവും കാറ്റിൽ വീണു. മുരളി പെരുനെല്ലി എംഎൽഎ സിപിഎം ജില്ലാ സെക്രട്ടറിയേറ്റംഗം ടി.വി. ഹരിദാസൻ, മണലൂർ ഏരിയ കമ്മിറ്റി അംഗം പി.ജി. സുബിദാസ്, ചിറ്റാട്ടുകര ലോക്കൽ സെക്രട്ടറി ബി.ആർ. സന്തോഷ്, മുല്ലശ്ശേരി ബ്ലോക്ക് പഞ്ചായത്ത് പ്രസിഡന്‍റ് ലതി വേണുഗോപാൽ, ബ്ലോക്ക് പഞ്ചായത്ത് അംഗം ചെറുപുഷ്പം ജോണി, എളവള്ളി വില്ലേജ് ഓഫീസർ ജോയ്സി എന്നിവർ നാശനഷ്ടങ്ങളുണ്ടായ പ്രദേശങ്ങൾ സന്ദർശിച്ചു. പറപ്പൂക്കരയില്‍ വീട്ടുകാരെ ദുരിതാശ്വാസ ക്യാമ്പിലേക്ക് മാറ്റി പറപ്പൂക്കര: ശക്തമായ മഴയില്‍ പറപ്പൂക്കര പഞ്ചായത്തിലെ തൊട്ടിപ്പാള്‍ മാടപ്പുറം, ജൂബിലിനഗര്‍ എന്നിവിടങ്ങളിലെ വീടുകളില്‍ വെള്ളംകയറി. തൊട്ടിപ്പാള്‍ കെഎസ്‌യുപി സ്‌കൂളില്‍ ആരംഭിച്ച ദുരിതാശ്വാസ ക്യാമ്പിലേക്ക് വീട്ടുകാരെ മാറ്റി. ആറ് പുരുഷന്‍മാരും ആറ് സ്ത്രീകളും ഒരു കുട്ടിയും ഉള്‍പ്പടെ 13 പേരാണ് ക്യാമ്പിലുള്ളത്. പഞ്ചായത്ത് പ്രസിഡന്‍റ് ഇ.കെ. അനൂപ്, വില്ലേജ് അധികൃതര്‍ എന്നിവരുടെ നേതൃത്വത്തിലാണ് വീട്ടുകാരെ ദുരിതാശ്വാസ ക്യാമ്പിലേക്ക് മാറ്റിയത്.

ഈ വഴി "പെരുവഴി'

തൃശൂർ: മഴയുടെ ശക്തി കുറഞ്ഞെങ്കിലും റോഡിലെ തിരക്കിന്‍റെയും വെള്ളക്കെട്ടിന്‍റെയും തോത് കുറയാത്തതു ജനങ്ങൾക്കു സമ്മാനിച്ചതു ദുരിതയാത്ര. പൂങ്കുന്നത്തു റോഡിന്‍റെ നിർമാണവുമായി ബന്ധപ്പെട്ട് വാഹനങ്ങൾ വഴിതിരിച്ചുവിട്ടത്തോടെ അയ്യന്തോൾ കുടുംബകോടതിക്കുസമീപം വൻഗതാഗത ക്കുരുക്കാണ്. നാളേറെയായി ഈ പ്രശ്നം തുടരുന്നുണ്ടെങ്കിലും മഴ ശക്തമായതോടെ യാത്രാക്ലേശവും കുത്തനേ കൂടി. ഇതിനിടെ സമയക്രമം പാലിക്കാൻ സ്വകാര്യ ബസുകൾ നിരതെറ്റിച്ചുവരുന്നതും വൻ ഗതാഗതതടസമാണ് സൃഷ്ടിക്കുന്നത്. വെള്ളം വെള്ളം സർവത്ര... മഴയൊന്നു പെയ്യുന്പോഴേക്കും നിറയുന്ന തോടുകളും പിറകെ പുഴയാകുന്ന റോഡുകളും തൃശൂരിൽ പതിവുകാഴ്ചയാണ്. ഇത്തവണയും ആ കാഴ്ചകൾക്ക് ഒരു കുറവുമില്ല. മഴക്കാലമുന്നൊരുക്കങ്ങളുടെ ഭാഗമായി തോടുനവീകരണം പൂർത്തീകരിച്ചെങ്കിലും അയ്യന്തോൾ പഞ്ചിക്കൽ തോട് നിറഞ്ഞ് റോഡിലേക്കു വെള്ളം കയറിയത് യാത്രക്കാരെ വലച്ചു. റോഡിലെ കുഴികൾ അറിയാതെ വാഹനങ്ങൾ വെള്ളത്തിൽ കുടുങ്ങിയതും ജനങ്ങളെ ബുദ്ധിമുട്ടിലാക്കി. അയ്യന്തോൾ പ്രിയദർശിനിനഗറിലും റോഡിൽ വെള്ളം കയറി. പൂങ്കുന്നം എംഎൽഎ റോഡിൽ തോടുനിറഞ്ഞ് റോഡിലേക്കു വെള്ളം ശക്തമായി ഒഴുകിയെത്തിയത് വാഹനങ്ങളെയും കാൽനടയാത്രികരെയും ഒരുപോലെ നട്ടംതിരിച്ചു. തോടിനോടുചേർന്നുള്ള കടയിലേക്കും വെള്ളംകയറി. പാന്പൂർ ചെന്പിശേരി പാലത്തിനുതാഴെയും തോട് കരകവിഞ്ഞ് വീടുകൾക്കുചുറ്റും വെള്ളക്കെട്ടും ഉണ്ടായി. പലരും വെള്ളം കയറുമെന്ന ഭീതിയിൽ സാധനസമഗ്രികളെല്ലാം ഭദ്രമായി ബന്ധുവീടുകളിലേക്കും വീടുകളിലെ ഉയർന്ന ഭാഗങ്ങളിലേക്കും മാറ്റിവച്ചിരിക്കുകയാണ്.

വെള്ളക്കെട്ട് ഒഴിയുന്നില്ല, ക്യാമ്പിലേക്ക് കൂടുതൽപേർ

കയ്പമംഗലം: എടത്തിരുത്തിയിലും കയ്പമംഗലത്തും വെള്ളക്കെട്ട് ഒഴിയുന്നില്ല; ജനങ്ങളുടെ ദുരിതം രൂക്ഷമാകുന്നു. കൂരിക്കുഴിയിലെയും ചാമക്കാലയിലെയും ദുരിതാശ്വാസ ക്യാമ്പിൽ എത്തുന്ന ആളുകളുടെ എണ്ണവും വർധിച്ചു. കൂരിക്കുഴിയിൽ എട്ടു കുടുംബാംഗങ്ങളിൽ‌നിന്നായി 18 പേരും ചാമക്കാല ക്യാമ്പിൽ 18 കുടുംബങ്ങളിൽ‌നിന്നായി 38 ആളുകളുമാണ് ഇപ്പോഴും ക്യാമ്പിൽ കഴിയുന്നത്. കയ്പമംഗലം ഒൻപതാം വാർഡിന്‍റെ പലപ്രദേശങ്ങളിലും വെള്ളം കയറിയിട്ടുണ്ട്. രണ്ട്, മൂന്ന്, അഞ്ച്, ആറ് വാർഡുകളിലും വെള്ളക്കെട്ട് രൂക്ഷമാണ്. അതേ‌സമയം പെരിഞ്ഞനം പഞ്ചായത്തിലെ ഗവ. യുപി സ്കൂളിൽ പ്രവർത്തിച്ചിരുന്ന ക്യാമ്പ് ഇന്നലെ അവസാനിപ്പിച്ചിട്ടുണ്ട്.

കനത്ത മഴ, വാഴത്തോട്ടങ്ങളില്‍ വെള്ളംകയറി

കോടാലി: ദിവസങ്ങളായി തുടരുന്ന മഴ മറ്റത്തൂരിലെ വാഴക്കര്‍ഷകരെ ദുരിതത്തിലാക്കുന്നു. പാടങ്ങളോടു‌ചേര്‍ന്നുള്ള താഴ്ന്ന‌പ്രദേശങ്ങളിലെ വാഴത്തോട്ടങ്ങളില്‍ വെള്ളം കയറിയതാണു കര്‍ഷകരെ പ്രതിസന്ധിയിലാക്കുന്നത്. ഓണവിപണി ലക്ഷ്യംവെച്ച് കൃഷിചെയ്തിട്ടുള്ള നൂറുകണക്കിനു നേന്ത്രവാഴകളാണ് വെള്ളത്തില്‍ മുങ്ങിനില്‍ക്കുന്നത്. ഒരു മാസം മുമ്പ് കൃഷിയിറക്കിയ വാഴകളും വെള്ളത്തിലാണ്. വാഴകളുടെ ചുവട്ടില്‍ നാലുദിവസത്തിലേറെ വെള്ളം കെട്ടിനിന്നാല്‍ വാഴകള്‍ക്ക് പഴുപ്പുബാധിച്ച് ഒടിഞ്ഞുവീഴുമെന്ന് കര്‍ഷകര്‍ പറയുന്നു. മറ്റത്തൂരിലെ ചേലക്കാട്ടുകര, മാങ്കുറ്റിപ്പാടം, കൊടുങ്ങ, കോപ്ലിപ്പാടം, മന്ദരപ്പിള്ളി, നൂലുവള്ളി എന്നിവിടങ്ങളിലെല്ലാം വാഴത്തോട്ടങ്ങള്‍ വെള്ളത്തില്‍ മുങ്ങിനില്‍ക്കുകയാണ്. വിളവെടുപ്പിനു പാകമായ തോ ട്ടങ്ങളില്‍ വെള്ളക്കെട്ടുള്ളതിനാല്‍ വാഴക്കുലകള്‍ വെട്ടിയെടുക്കാന്‍ കഴിയാത്ത സാഹചര്യവുമുണ്ട്. ഇനിയും രണ്ടു ദിവസത്തിലേറെ കനത്തമഴ തുടര്‍ന്നാല്‍ വലിയ നഷ്ടം നേരിടേണ്ടിവരുമെന്ന് വാഴകര്‍ഷകര്‍ പറയുന്നു.

മോഡൽ ഹയർസെക്കൻഡറി സ്കൂൾ സ്റ്റേഡിയത്തിന് ചാത്തുണ്ണിയുടെ പേരിടും

ചാലക്കുടി: ഗവ. മോഡൽ ഹയർസെക്കൻഡറി സ്കൂളിൽ അഞ്ചുകോടി രൂപ ചെലവിൽ നിർമിക്കുന്ന സ്റ്റേഡിയത്തിനു ദേശീയ ഫുട്ബോൾ ടീം മുൻ കോച്ചും താരവുമായിരുന്ന അന്തരിച്ച ടി.കെ. ചാത്തുണ്ണിയുടെ നാമകരണം നടത്താൻ നഗരസഭ തീരുമാനം. വുഡ് ഫ്ലോറിംഗ് ഉൾപ്പെടെയുള്ള നിർമാണപ്രവൃത്തികൾ പൂർത്തിയായ നഗരസഭയിലെ എം.എൽ. ജേക്കബ് സ്മാരക ഇൻഡോർ സ്റ്റേഡിയം 20നു പ്രവർത്തനമാരംഭിക്കും. ഒരു കോടിയിലേറെ രൂപ ചെലവിലാണ് മേപ്പിൾ മരത്തടിയിൽ ഫ്ലോറിംഗും വൈദ്യുതി പെയിന്‍റിംഗ് പ്രവൃത്തികളും പൂർത്തിയാക്കിയത്. ഇൻഡോർ സ്റ്റേഡിയത്തിൽ ബാസ്കറ്റ്ബോൾ, വോളിബോൾ, ഷട്ടിൽ ബാഡ്മിന്‍റണ്‍ പരിശീലനത്തിനും വ്യായാമത്തിനും ഉപയോഗിക്കാനും തീരുമാനിച്ചു. ഇൻഡോർ സ്റ്റേഡിയത്തിന്‍റെ പ്രവർത്തനോദ്ഘാടനവും ഗവ. മോഡൽ ഹയർ സെക്കൻഡറി സ്കൂൾ സ്റ്റേഡിയത്തിന്‍റെ നിർമാണോദ്ഘാടനവും മന്ത്രി നിർവഹിക്കുമെന്നു ചെയർമാൻ കൗണ്‍സിലിനെ അറിയിച്ചു. പവലിയനും സിന്തറ്റിക് ട്രാക്കും ടോയ്‌്‌ലറ്റ് ബ്ലോക്കും ഉൾപ്പെടെയുള്ള ടർഫ് മൈതാനമാണു കായികവകുപ്പ് നിർമിക്കുന്നത്. സ്റ്റേഡിയത്തോടു ചേർന്നുള്ള മൈതാനവും ടൗണ്‍ ഹാൾ മൈതാനവും പാർക്കിംഗിനുനൽകി ഫീസ് ഈടാക്കും. കലാഭവൻ മണി പാർക്കിൽ കാന്‍റീൻ ആരംഭിക്കും. നഗരസഭ താലൂക്ക് ആശുപത്രി വഴി നടപ്പാക്കുന്ന സാന്ത്വനം പാലിയേറ്റീവ് പരിചരണപദ്ധതിക്ക് പുതിയ വാഹനം വാങ്ങിനൽകുമെന്ന വൈസ് ചെയർപേഴ്സൻ സി. ശ്രീദേവിയുടെ ഓഫർ കൗണ്‍സിൽ അംഗീകരിച്ചു. ശുചീകരണപ്രവർത്തനങ്ങൾക്ക് വാർഡ്തല സമിതിക്ക് 10000 രൂപ വീതം നൽകിയിട്ടുണ്ടെന്ന് ചെയർപേഴ്സണ്‍ അറിയിച്ചു. 28ന് എസ്എസ്എൽസി, പ്ലസ് ടു വിജയികളെ ടൗണ്‍ഹാളിൽ അനുമോ ദിക്കും. നഗരസഭയിലെ അസി. എൻജിനീയറുടെ പ്രവർത്തനത്തിൽ കൗണ്‍സിൽ അസംതൃപ്തി രേഖപ്പെടുത്തി. ചെയർമാൻ ഷിബു വാലപ്പൻ അധ്യക്ഷത വഹിച്ചു.

ചാലക്കുടി സർവീസ് സഹകരണ ബാങ്ക് ടൗൺ ബ്രാഞ്ച് ഓഫീസ് ഉദ്ഘാടനം നാളെ

ചാലക്കുടി: ചാലക്കുടി സർവീസ് സഹകരണ ബാങ്കിന്‍റെ കെട്ടിട സമുച്ചയത്തിന്‍റെയും ടൗൺ ബ്രാഞ്ച് ഓഫീസിന്‍റെയും ഉദ്ഘാടനം നാളെ രാവിലെ 10 ന് പ്രതിപക്ഷനേതാവ് വി.ഡി. സതീശൻ നിർവഹിക്കും. സനീഷ്‌കുമാർ ജോസഫ് എംഎൽഎ അധ്യക്ഷത വഹിക്കും. ബെന്നി ബെഹനാൻ എംപി മുഖ്യാതിഥിയായിരി ക്കും. സ്ട്രോംഗ് റൂം ഉദ്ഘാടനം നഗരസഭ ചെയർമാൻ ഷിബു വാലപ്പൻ നിർവഹിക്കും. ആദ്യനിക്ഷേപം സ്വീകരിക്കൽ തൃശൂർ ജോയിന്‍റ്് രജിസ്ട്രാർ ജൂബി ടി. കുര്യാക്കോസ് നിർവഹിക്കും. 1961 ൽ ആണ് ചാലക്കുടി സർവീസ് സഹകരണ ബാങ്ക് പ്രവർത്തനം ആരംഭിച്ചത്. ബാങ്കിന് ചാലക്കുടി ടൗണിൽ പഴയ ഹെഡ് ഓഫീസ് പ്രവർത്തിച്ചിരുന്ന സ്ഥലത്ത് ഒന്നരക്കോടി രൂപ ചെലവിൽ മൂന്നു നിലകളിലായാണ് പുതിയ ഓഫീസ്‌ കെട്ടിടം നിർമിച്ചിട്ടുള്ളത്. പ്രസിഡന്‍റ് വി.എൽ. ജോൺസൺ, സെക്രട്ടറി കെ.ജെ. മിനി, ഭരണസമിതി അംഗങ്ങളായ ഒ.എസ്. ചന്ദ്രൻ, ആന്‍റോ മേലേപ്പുറം, ജോയ് മാളിയേക്കൽ, ബി.എ. അബ്ദുൾ മജീദ്, റീന ഡേവിസ്, റിൻ്റോസ് കണ്ണമ്പുഴ, ജോസ് പുല്ലൻ, ഷനിൽ കുത്തോട്ടുങ്ങക്കാരൻ, ദിലീപ് പേരാമ്പ്രത്ത്, സിനി സന്തോഷ്, ഇന്ദിര ബാബു എന്നിവർ പത്രസമ്മേളനത്തിൽ പങ്കെടുത്തു.

താത്കാലിക ബണ്ട് പൊളിക്കില്ല; പഞ്ചായത്ത് പ്രസിഡന്‍റിനെ തടഞ്ഞു

ഇരിങ്ങാലക്കുട: പടിയൂര്‍ പഞ്ചായത്തിലെ രണ്ടുവാര്‍ഡുകളിലെ നൂറോളം വീടുകള്‍ വെള്ളക്കെട്ടിലായ വിഷയത്തിനു പരിഹാരമായി വാര്‍ഡ് നിവാസികളും ജനപ്രതിനിധികളും ആവശ്യപ്പെട്ടതുപ്രകാരം പുളിക്കലച്ചിറ പാലംനിര്‍മാണത്തിനായി നിര്‍മിച്ച താത്കാലിക ബണ്ട് പൊളിക്കില്ല. താത്കാലിക ബണ്ട് നിലനിർത്തിക്കൊണ്ടുതന്നെ വെള്ളക്കെട്ടിന് പരിഹാരം കാണാന്‍ ആവശ്യമായ നിര്‍മാണ പ്രവര്‍ത്തനങ്ങള്‍ നാളെ മുതല്‍ തന്നെ ആരംഭിക്കാനാണ് തീരുമാനമെന്ന് പിഡബ്ല്യുഡി ബ്രിഡ്ജസ് വിഭാഗം അധികൃതര്‍ അറിയിച്ചു. താത്കാലിക ബണ്ട് പൊളിക്കുന്നത് അടുത്ത മാസം ആരംഭിക്കുന്ന നാലമ്പലദര്‍ശനത്തിന് പ്രതിസന്ധി സൃഷ്ടിക്കുമെന്നും ബണ്ട് നിലനിറുത്തിക്കൊണ്ടുതന്നെ വിഷയത്തിന് പരിഹാരം കാണാനും സുഗമമായി വെള്ളം ഒഴുകിപ്പോകാനുള്ള നടപടികള്‍ സ്വീകരിക്കാനുമാണ് തീരുമാനിച്ചിരിക്കുന്നതെന്ന് ബ്രിഡ്ജസ് വിഭാഗം അറിയിച്ചു. ബണ്ട് പൊളിക്കണമെന്ന ആവശ്യത്തില്‍ ഉറപ്പ് ലഭിക്കാതെ വന്നതോടെ വൈകീട്ട് നാലിന് പഞ്ചായത്ത് ഓഫീസിന് മുന്നില്‍ ഭരണസമിതിയിലെ ബിജെപി അംഗങ്ങളുടെ നേതൃത്വത്തില്‍ പഞ്ചായത്ത് ഓഫീസില്‍നിന്നും മടങ്ങി ഔദ്യോഗിക വാഹനത്തില്‍ കയറാന്‍ ഒരുങ്ങിയ പഞ്ചായത്ത് പ്രസിഡന്‍റിനെ തടഞ്ഞു. നടപടി സ്വീകരിക്കേണ്ടി‌വരുമെന്ന് പോലീസ് വിശദീകരിച്ചപ്പോള്‍ പ്രതിഷേധവുമായി വാര്‍ഡ് നിവാസികള്‍ റോഡില്‍ കുത്തിയിരുന്നു. തുടര്‍ന്ന് പോലീസ് ഇവരെ ബലപ്രയോഗത്തിലൂടെ മാറ്റുകയായിരുന്നു. രാവിലെ വില്ലേജ് അധികൃതര്‍ നല്‍കിയ റിപ്പോര്‍ട്ട് അനുസരിച്ച് ബണ്ട് പൊളിക്കുകയോ അല്ലെങ്കില്‍ കൂടുതല്‍ വ്യാസമുള്ള പൈ പ്പുകള്‍ സ്ഥാപിച്ച് വെള്ളക്കെട്ട് ഒഴിവാക്കുകയോ ചെയ്യാ നാണ് ജില്ലാ ഭരണകൂടം നിര്‍ദേശിച്ചത്. അതേ‌സമയം പഞ്ചായത്തിലെ പത്തനങ്ങാടി, കോതേറ്റിപ്പാടം പ്രദേശങ്ങളിലെ വെള്ളക്കെട്ട് തുടരുകയാണ്. എതാനും പേര്‍ ക്യാമ്പിലേക്കും മറ്റുള്ളവര്‍ ബന്ധുവീടുകളിലേക്കുമാണു മാറിയിരിക്കുന്നത്. വിടപറഞ്ഞ മുന്‍ പഞ്ചായത്ത് പ്രസിഡന്‍റ് കെ.സി. ബിജുവിന്‍റെ വീട് അടക്കം വെള്ളക്കെട്ടിലാണ്. 2018 ലെ പ്രളയത്തിനുശേഷം ഇതാദ്യമായാണ് ഇത്രയും വെള്ളം കയറുന്നതെന്നും കഴിഞ്ഞ രണ്ടു ദിവസങ്ങളില്‍ മഴ കുറഞ്ഞെങ്കിലും വെള്ളക്കെട്ടിന് മാറ്റമുണ്ടായിട്ടില്ലെന്നും പ്രദേശത്തു നിന്നുള്ള വീട്ടുകാര്‍ പറഞ്ഞു.

മാധ്യമങ്ങള്‍ പ്രത്യാശപകരുന്ന വാര്‍ത്തകള്‍ക്കു മുന്‍തൂക്കം നല്‍കണം: മാര്‍ പോളി കണ്ണൂക്കാടന്‍

ഇരിങ്ങാലക്കുട: വായനക്കാരുടെയും പ്രേക്ഷകരുടെയും ശ്രദ്ധനേടാനുള്ള മത്സരത്തില്‍ നിഷേധാത്മകവാര്‍ത്തകള്‍ പെരുകിവരികയാണെന്നും യഥാര്‍ഥ മാധ്യമ‌പ്രവര്‍ത്തനം നന്മയുടെയും സ്‌നേഹത്തിന്‍റെയും പ്രത്യാശയുടെയും വാര്‍ത്തകള്‍ക്കാണ് പ്രാധാന്യം നല്‍കേണ്ടതെന്നും മാര്‍ പോളി കണ്ണൂക്കാടന്‍. കഴിഞ്ഞ 15 വര്‍ഷമായി ഇരിങ്ങാലക്കുട രൂപത പ്രതിവര്‍ഷം നടത്തിവരുന്ന പ്രാദേശിക മാധ്യമപ്രവര്‍ത്തകരുടെ കൂട്ടായ്മയെ അഭിസംബോധന ചെയ്യുകയായിരുന്നു ബിഷപ്. യുദ്ധവും സംഘര്‍ഷങ്ങളും മദ്യവും ലഹരിയും മറ്റു സാമൂഹികതിന്മകളും സമൂഹത്തെ അതീവ ആശങ്കയിലാക്കുന്ന ഇന്നത്തെ സാഹചര്യത്തില്‍ നല്ല വാര്‍ത്തകളാണ് ജനം ആഗ്രഹിക്കുന്നതെന്ന് മാധ്യമങ്ങള്‍ തിരിച്ചറിയണം. സാധ്യമായ തോതില്‍ തങ്ങള്‍ക്കു ചുറ്റിലുമുള്ള നന്മയുടെയും സാഹോദര്യത്തിന്‍റെയും സഹകരണത്തിന്‍റെയും മാതൃകകളെ പ്രാദേശിക മാധ്യമപ്രവര്‍ത്തകര്‍ക്കു ചൂണ്ടിക്കാട്ടാന്‍ കഴിയും. നിഷേധ വാര്‍ത്തകള്‍ക്കല്ല, പോസിറ്റീവ് - സര്‍ഗാത്മക - വാര്‍ത്തകള്‍ക്കാണു പ്രാധാന്യം നൽ കേ ണ്ടതെ ന്നും ബിഷപ്ഓര്‍മിപ്പിച്ചു. വികാരി ജനറാൾമാരായ മോണ്‍. ജോസ് മാളിയേക്കല്‍, മോണ്‍. വില്‍സണ്‍ ഈരത്തറ, മോണ്‍. ജോളി വടക്കന്‍, കേരളസഭ മാനേജിംഗ് ഡയറക്ടർ ഫാ. ജെയ്സണ്‍ വടക്കുംഞ്ചേരി, ഫാ. സിന്‍റോ മാടവന, ഫാ. അനൂപ് കോലങ്കണ്ണി, ഫാ. ടിന്‍റോ കൊടിയന്‍, സെബി മാളിയേക്കൽ, ജോസ് തളിയത്ത് എന്നിവര്‍ പ്രസംഗിച്ചു.

വിശുദ്ധ അന്തോണീസിന്‍റെ മരണത്തിരുനാൾ ആഘോഷിച്ചു

ചെട്ടിക്കാട്: വിശുദ്ധ അന്തോണീസിന്‍റെ തീർഥാടന ദേവാലയത്തി ൽ അത്ഭുത‌പ്രവർത്തകനായ വിശുദ്ധന്‍റെ മരണത്തിരുനാൾ ഭക്തിസാന്ദ്രമായി. രാവിലെ 6.15 മുതൽ വൈകിട്ട് 6.30വരെ ദിവ്യബലി നൊവേന, ആരാധന എന്നിവ നടന്നു. തിരുനാൾ ദിവ്യബലിക്ക് ഫാ. പ്രിൻസ് പഴമ്പിള്ളി ഒഎസ്ജെ മുഖ്യകാർമികനായി. വിശുദ്ധ അന്തോണീസിന്‍റെ തിരുശേഷിപ്പുകളായ അഴുകാത്ത നാവ്, കൈയുടെ അസ്ഥി, സാഭാവസ്ത്രത്തിന്‍റെ ഒരു ഭാഗം എന്നിവ സുക്ഷിച്ചിരിക്കുന്ന ഇന്ത്യയിലെ ഏക തീർത്ഥാടന കേന്ദ്രമായതിനാൽ വിശുദ്ധന്‍റെ മരണത്തിരുനാളിൽ പങ്കെടുക്കുന്നതിനും തിരുശേഷിപ്പുകൾ വണ ങ്ങുന്നതിനും അയൽസംസ്ഥാനങ്ങളിൽനിന്നുൾപ്പടെയുള്ള തീർഥാടകരുടെ വൻ തിരക്കാണ് അനുഭവപ്പെട്ടത്. റെക്ടർ റവ. ഡോ. ബെന്നി വാഴക്കൂട്ടത്തിൽ, ഫാ. അജയ് ആന്‍റണി പുത്തൻപറമ്പിൽഎന്നിവർ ആഘോഷങ്ങൾക്കു നേതൃത്വം നൽകി.

പെരുമാറ്റച്ചട്ടം ലംഘിച്ചെന്ന്; മുഖ്യമന്ത്രിക്കെതിരേ കോണ്‍ഗ്രസ് പരാതി നൽകി

തൃശൂർ: മുഖ്യമന്ത്രി പെരുമാറ്റച്ചട്ടം ലംഘിച്ചെന്നു പരാതിനൽകി കോണ്‍ഗ്രസ് നേതാവും കോർപറേഷൻ കൗണ്‍സിലറുമായ ജോണ്‍ ഡാനിയൽ. നിലന്പൂർ നിയോജകമണ്ഡലത്തിലെ ഉപതെരഞ്ഞെടുപ്പ് നടക്കാനിരിക്കെ, കേരള പോലീസിൽ കൂടുതൽ വനിതകൾക്കു ജോലിനൽകുമെന്നു മുഖ്യമന്ത്രി പിണറായി വിജയൻ നടത്തിയ പ്രഖ്യാപനം മാതൃകാ തെരഞ്ഞെടുപ്പുപെരുമാറ്റച്ചട്ടങ്ങളുടെ ലംഘനമാണെന്നാരോപിച്ചാണ് കെപിസിസി സെക്രട്ടറികൂടിയായ ജോണ്‍ ഡാനിയൽ കേന്ദ്ര തെരഞ്ഞെടുപ്പു കമ്മീഷനു പരാതി നൽകിയത്. തെരഞ്ഞെടുപ്പുവേളകളിൽ അധികാരസ്ഥാനത്തിരിക്കുന്നവർ വോട്ടർമാരെ സ്വാധീനിക്കാൻ സാധ്യതയുള്ള ആനുകൂല്യപ്രഖ്യാപനങ്ങളോ സൗജന്യങ്ങളോ സഹായപദ്ധതികളോ പ്രഖ്യാപിക്കുന്നതു ചട്ടലംഘനമാണെന്നു പരാതിയിൽ ചൂണ്ടിക്കാട്ടി. പെരുമാറ്റച്ചട്ടലംഘനത്തിനു മുഖ്യമന്ത്രിക്കെതിരേ അടിയന്തര നടപടി സ്വീകരിക്കണമെന്നും ഇ-മെയിലിൽ അയച്ച പരാതിയിൽ ആവശ്യപ്പെട്ടു. തിങ്കളാഴ്ച തൃശൂർ രാമവർമപുരം പോലീസ് അക്കാദമിയിൽ പരിശീലനം പൂർത്തിയാക്കിയ വനിതാ സിവിൽ പോലീസ് ഓഫീസർമാരുടെ പാസിംഗ്ഔട്ട് പരേഡിൽ സല്യൂട്ട് സ്വീകരിച്ചു നടത്തിയ പ്രസംഗം ചൂണ്ടിക്കാട്ടിയാണു പരാതി.

എക്‌സൈസ് സ്റ്റാഫ് അസോ. ജില്ലാ സമ്മേളനം

തൃശൂർ: കേരള സ്റ്റേറ്റ് എക്‌സൈസ് സ്റ്റാഫ് അസോസിയേഷന്‍ ജില്ലാ സമ്മേളനം മുരളി പെരുനെല്ലി എംഎൽഎ ഉദ്ഘാടനം ചെയ്തു. ജില്ലാ പ്രസിഡന്‍റ് ഒ.ജെ. രാജീവ് അധ്യക്ഷത വഹിച്ചു. ജില്ലാ സെക്രട്ടറി എൻ.എൻ. ജയേഷ്, തൃശൂര്‍ ഡെപ്യൂട്ടി എക്‌സൈസ് കമ്മീഷണര്‍ വി. സുഭാഷ്, സംഘടന സംസ്ഥാന പ്രസിഡന്‍റ് ടി. സജുകുമാര്‍, സംസ്ഥാന ജനറല്‍ സെക്രട്ടറി കെ. സന്തോഷ്‌കുമാര്‍, ടി.ബി. ഉഷ തുടങ്ങിയവർ പ്രസംഗിച്ചു. ഒ.ജെ. രാജീവിനെ പ്രസിഡന്‍റായും എന്‍.എന്‍. ജയേഷിനെ സെക്രട്ടറിയായും എ. മണികണ്ഠനെ ട്രഷററായും സി. അജയ്കുമാര്‍, എം.ബി. വത്സരാജ്, പി.വി. ബെന്നി എന്നിവരെ സംസ്ഥാന കമ്മിറ്റി അംഗങ്ങളായും തെരഞ്ഞെടുത്തു.

കരുവന്നൂർ: മരിച്ച പൗലോസിന്‍റെ വീട് സുരേഷ് ഗോപി സന്ദര്‍ശിച്ചു

ഇരിങ്ങാലക്കുട: വിദഗ്ധചികിത്സയ്ക്കു കരുവന്നൂര്‍ സഹകരണബാങ്കില്‍നിന്നു നിക്ഷേപത്തുക ലഭിക്കാതെ മരിച്ച പൊറത്തിശേരി കോട്ടയ്ക്കകത്തുകാരന്‍ പൗലോസിന്‍റെ വീട് കേന്ദ്രമന്ത്രി സുരേഷ് ഗോപി സന്ദര്‍ശിച്ചു. പൗലോസിന്‍റെ ഭാര്യയോടും സഹോദരങ്ങളോടും വിവരങ്ങള്‍ ചോദിച്ചറിഞ്ഞ്, ആശ്വസിപ്പിച്ച് മന്ത്രി മടങ്ങി. ജില്ലാ പ്രസിഡന്‍റ് എ.ആര്‍. ശ്രീകുമാര്‍, ജനറല്‍ സെക്രട്ടറിമാരായ കൃപേഷ് ചെമ്മണ്ട, കെ.പി. ഉണ്ണികൃഷ്ണന്‍, കെ.പി. ജോര്‍ജ്, മണ്ഡലം പ്രസിഡന്‍റ് ആര്‍ച്ച അനീഷ്, മണ്ഡലം ജനറല്‍ സെക്രട്ടറിമാരായ ഷൈജു കുറ്റിക്കാട്ട്, വി.സി. രമേഷ്, സന്തോഷ് ചെറാക്കുളം, പി.എസ്. അനില്‍കുമാര്‍, എ. നാഗേഷ്, ശ്യാംജി മാടത്തിങ്കല്‍, രിമ പ്രകാശ്, അജീഷ് പൈക്കാട്ട്, രമേഷ് അയ്യര്‍, ടി.കെ. ഷാജു, സൂരജ് കടുങ്ങാടന്‍, സൂരജ് നമ്പ്യാങ്കാവ്, അഖിലാഷ് വിശ്വനാഥന്‍ എന്നിവരും ഉണ്ടായിരുന്നു.

തൊമ്മാന പാടത്തേക്കു ട്രാവലര്‍ മറിഞ്ഞ് മൂന്നുപേര്‍ക്കു പരിക്കേറ്റു

ഇരിങ്ങാലക്കുട: നിയന്ത്രണംവിട്ട ടെന്പോ ട്രാവലര്‍ പുല്ലൂർ തൊമ്മാനപാടത്തേക്ക് മറിഞ്ഞ് യാത്രക്കാരായ മൂന്നുപേര്‍ക്ക് പരിക്കേറ്റു. ഇന്നലെ രാവിലെ 7.45 ഓടെയായിരുന്നു അപകടം. ആരുടെയും പരിക്കുകള്‍ ഗുരുതരമല്ല. വലപ്പാട് കേന്ദ്രീകരിച്ച് പ്രവര്‍ത്തിക്കുന്ന മണപ്പുറം ഫിനാന്‍സ് സ്ഥാപനത്തിലേക്ക് ആമ്പല്ലൂര്‍, കൊടകര സ്വദേശികളായ യാത്രക്കാരുമായി പോവുകയായിരുന്ന വണ്ടിയാണ് അപകടത്തില്‍ പെട്ടത്. എതിരെനിന്ന് അമിത വേഗതയില്‍ വന്നിരുന്ന ലോറിക്ക് സൈഡ് കൊടുക്കുന്നതിനിടയില്‍ നിയന്ത്രണം വിട്ട് കൈവരിയില്‍ ഇടിച്ച് വണ്ടി മറിയുകയായിരുന്നുവെന്ന് ജീവനക്കാര്‍ പറഞ്ഞു. ലോറി നിറുത്താതെ ഓടിച്ചുപോയി. പതിനെട്ടു പേരാണ് വണ്ടിയില്‍ ഉണ്ടായിരുന്നത്. ഉടനെ സ്ഥലത്ത് എത്തിയ ക്രെയിന്‍ ഉപയോഗിച്ച് ഒന്പതോടെ വണ്ടി പാടത്തുനിന്ന് എടുത്തുമാറ്റുകയായിരുന്നു.

മഴ; ജില്ലയിൽ 26 വീടുകൾ തകർന്നു

തൃശൂർ: ജില്ലയിൽ ശക്തമായി തുടരുന്ന മഴയിൽ 23 വീടുകൾ ഭാഗികമായും മൂന്നു വീടുകൾ പൂർണമായും തകർന്നു. തലപ്പിള്ളി താലൂക്കിൽ നാലും മുകുന്ദപുരത്ത് രണ്ടും കുന്നംകുളത്ത് എട്ടും തൃശൂരിൽ നാലും കൊടുങ്ങല്ലൂരിൽ രണ്ടും ചാവക്കാട് മൂന്നും വീടുകളാണ് ഭാഗികമായി തകർന്നത്. തൃശൂർ താലൂക്കിൽ രണ്ടും തലപ്പിള്ളിയിൽ ഒരു വീടും പൂർണമായി തകർന്നിട്ടുണ്ട്. ചാലക്കുടി താലൂക്കിൽ ഒരു കിണർ ഇടിഞ്ഞുതാണു. ജില്ലയിലെ എല്ലാ താലൂക്ക് കേന്ദ്രപരിധിയിലും ശക്തമായ മഴ ലഭിച്ചു. നിലവിലുള്ള 16 ദുരിതാശ്വാസക്യാന്പുകളിൽ 116 കുടുംബങ്ങളാണുള്ളത്. 337 പേരാണ് ക്യാന്പുകളിൽ ആകെയുള്ളത്. ഇതിൽ 110 പുരുഷൻമാരും 146 സ്ത്രീകളുമുണ്ട്. 81 കുട്ടികളും.

പുത്തൻപള്ളിക്കു സമീപം കെട്ടിടം തകർന്നുവീണു

തൃശൂർ: പുത്തൻപള്ളിക്കു മുന്പിലുള്ള പഴയ കെട്ടിടം തകർന്നു. ദിവസങ്ങൾക്കുമുന്പ് പെരിഞ്ചേരി ടോണിയുടെ ഉടമസ്ഥതയിലുള്ള കെട്ടിടത്തിന്‍റെ ഉൾഭാഗം ഭാഗികമായി തകർന്നിരുന്നു. ആവശ്യത്തിനു മുൻകരുതലെടുക്കാതെ ഇതരസംസ്ഥാന തൊഴിലാളികളെ ഉപയോഗിച്ചു പൊളിച്ചുമാറ്റാൻ ആരംഭിച്ചതു സമീപത്തുള്ളവരെയും ആശങ്കയിലാഴ്ത്തി. കെട്ടിടം പൊളിഞ്ഞുവീണത് അറിയിച്ചതിനെത്തുടർന്നു സ്ഥലത്തെത്തിയ കൗണ്‍സിലർ ജോണ്‍ ഡാനിയലാണ് കോർപറേഷൻ സെക്രട്ടറിയെ വിവരമറിയിച്ചത്. ഇതിനുപിന്നാലെയാണ് രണ്ട് തൊഴിലാളികളെ അയച്ച് പൊളിക്കൽ ആരംഭിച്ചത്. വേണ്ടത്ര മുൻകരുതൽ എടുത്തുമാത്രമേ കെട്ടിടം പൊളിക്കാവൂ എന്നു സ്ഥലത്തെത്തിയ കോർപറേഷൻ അസിസ്റ്റന്‍റ് എൻജിനീയർ നിർദേശം നൽകി. നിരവധി വാഹനങ്ങളും കാൽനടയാത്രക്കാരും കെട്ടിടത്തിനുമുന്നിലൂടെ കടന്നുപോകുന്പോഴാണ് പൊളിക്കൽ തുടങ്ങിയത്. പൊളിക്കുന്നവരുടെയും ജീവൻ അപകടത്തിലാക്കുംവിധമാണ് പൊളിക്കൽ നടന്നതെന്നു ജോണ്‍ ഡാനിയൽ പറഞ്ഞു. കോർപറേഷന്‍റെ പട്ടികയിലുള്ള അപകടാവസ്ഥയിലുള്ള കെട്ടിടമാണ് തകർന്നതെന്നും അപകടങ്ങൾ ആവർത്തിക്കുന്പോഴും അധികൃതർ ഇടപെടാത്തതിൽ ജനങ്ങൾക്ക് ആശങ്കയുണ്ടെന്നും അദ്ദേഹം കൂട്ടിച്ചേർത്തു.

പ്രതിഷേധം അതിരുവിട്ട് "അടി’യന്തര കൗണ്‍സിൽ

തൃശൂർ: അജൻഡകൾ ചർച്ചചെയ്യാതെ മേയറുടെ അപ്രതീക്ഷിത ഇറങ്ങിപ്പോക്ക്. കോണ്‍ഗ്രസ് നടത്തിയ പ്രതിഷേധം അതിരുവിട്ടു. മേയറെ തടഞ്ഞ് കൗണ്‍സിലർമാർ. സംരക്ഷണം ഒരുക്കിയ പോലീസും കൗണ്‍സിലർമാരും തമ്മിൽ ഉന്തുംതള്ളും. സംഘർഷഭൂമിയായി കോർപറേഷൻ. മേയറുടെ ചേംബറിനു മുൻപിൽ കിടന്നു പ്രതിഷേധിച്ച് ബിജെപി കൗണ്‍സിലർമാർ. ഇന്നലെ ചേർന്ന അടിയന്തര കൗണ്‍സിൽ യോഗത്തിലാണ് നാടകീയരംഗങ്ങൾ അരങ്ങേറിയത്. അയ്യന്തോൾ ഷോപ്പിംഗ് കോംപ്ലക്സ് കെട്ടിടം പൊളിക്കുന്നതിനു മുന്നോടിയായി വാടകക്കാരെ മാറ്റുന്നതുമായി ബന്ധപ്പെട്ടുണ്ടായ ആദ്യചർച്ചകൾ പൂർത്തിയാകുംമുൻപേയാണ് മേയർ അപ്രതീക്ഷിതമായി ഇറങ്ങിപ്പോയത്. തുടർന്നു നടുത്തളത്തിൽ ഇറങ്ങി കോണ്‍ഗ്രസ് പ്രതിഷേധം ആരംഭിക്കുകയായിരുന്നു. വസ്തുനികുതിപിരിവിൽ തൃശൂർ കോർപറേഷന് അപാകത പറ്റിയെന്ന കോടതിവിധി ചർച്ചചെയ്യാതിരിക്കാനാണ് അജൻഡ എത്തുന്നതിനുമുന്നേ മേയർ കൗണ്‍സിൽ യോഗം പിരിച്ചുവിട്ടതെന്ന് ആരോപിച്ച് കോണ്‍ഗ്രസും ബിജെപി കൗണ്‍സിലർമാരും മേയറെ പിന്തുടർന്നു ചേംബറിനകത്തും പുറത്തും പ്രതിഷേധം തുടർന്നു. മേയറെ വളഞ്ഞു മുദ്രാവാക്യംവിളിയുമായി കോണ്‍ഗ്രസ് കൗണ്‍സിലർമാർ കുത്തിയിരുന്നു പ്രതിഷേധം നടത്തിയപ്പോൾ ചേംബറിനുപുറത്ത് നിലത്തുകിടന്നായിരുന്നു ബിജെപി പ്രതിഷേധം. കൗണ്‍സിലർമാരുടെ സമരത്തെ ആദ്യം ചിരിച്ചുതള്ളിയ മേയർക്ക് പിന്നീട് പുറത്തിറങ്ങാൻ കഴിയാതായതോടെ സംരക്ഷണത്തിനായി പോലീസ് സംഘവും സ്ഥലത്തു തന്പടിച്ചു. ഇതിനിടെ സമരം പൊളിക്കാൻ ചേംബറിനകത്തു ഭരണമുന്നണി കൗണ്‍സിലർമാർ പാട്ടുപാടിയും ചിരിച്ചും പ്രതിരോധം തീർത്തു. ഒരുമണിക്കൂറോളം നീണ്ട സമരത്തിനൊടുവിൽ പത്രസമ്മേളനത്തിനായി മേയർ പുറത്തിറങ്ങാൻ ശ്രമിക്കവേ കോണ്‍ഗ്രസ് കൗണ്‍സിലമാർ കൈകോർത്തും വട്ടമിട്ടും മേയറെ തടഞ്ഞതോടെ പ്രതിഷേധം അതിരുവിടുകയായിരുന്നു. പോലീസ് വലയം ഭേദിച്ച് മേയറെ തടയാൻ കൗണ്‍സിലർമാർ ശ്രമിച്ചതോടെ പോലീസും കൗണ്‍സിലർമാരും തമ്മിൽ കൈയാങ്കളിയിൽ എത്തി. ഇതിനിടെ മേയർ കൗണ്‍സിൽ ഹാളിലേക്ക് എത്തിയിരുന്നു. തുടർന്ന് മേയറുടെ രാജി ആവശ്യപ്പെട്ടും പോലീസിനു ഗോ ബാക്ക് വിളിച്ചും കൗണ്‍സിലർമാർ കോർപറേഷൻ ഓഫീസ് സമരഭൂമിയാക്കി. അജൻഡ ചർച്ചചെയ്താൽ ഇടതുഭരണസമിതിക്കുണ്ടായ വീഴ്ച പുറത്തുവരുമെന്നു മനസിലായ മേയർ കൗണ്‍സിൽ പിരിച്ചുവിടുകയായിരുന്നുവെന്നും മേയർ വച്ച അജൻഡ അവർക്കുതന്നെ തിരിച്ചടി യായെന്ന തിരിച്ചറിവിലാണ് മേയർ ഏകപക്ഷീയമായി കൗണ്‍സിൽ പിരിച്ചുവിട്ടു തടിതപ്പിയതെന്നും ജനങ്ങളിൽനിന്നും നികുതിയുടെ പേരിൽ വൻകൊള്ളയാണ് ഇടതുഭരണസമിതി നടത്തിയതെന്നും കോണ്‍ഗ്രസ്ആരോപിച്ചു. നികുതിയിലെ കടുംവെട്ട് ഹൈക്കോടതി തടഞ്ഞു: രാജൻ ജെ. പല്ലൻ കോർപറേഷനിലെ രണ്ടുലക്ഷത്തോളം വരുന്ന നികുതിദായകരിൽനിന്ന് ഈടാക്കിയ നികുതിപിരിവ് നിയമവിരുദ്ധമാണെന്നും കേസ് കൊടുത്ത 198 ആളുകളുടെയും 2016 മുതലുള്ള അധികനികുതി ഒഴിവാക്കിക്കൊണ്ടാണ് ഹൈക്കോടതി ഉത്തരവിട്ടതെന്നും പ്രതിപക്ഷ നേതാവ് രാജൻ ജെ. പല്ലൻ പറഞ്ഞു. കേസിൽ കൗണ്‍സിൽ അപ്പീൽ പോകാൻ തീരുമാനിക്കുന്നതിനുമുന്പ്, എൽഡിഎഫ് ഭരണസമിതി ജനങ്ങളുടെ പക്കൽനിന്നും അധികനികുതിയും പലിശയും പിരിക്കണമെന്ന് ആവശ്യപ്പെട്ടുകൊണ്ട് കൗണ്‍സിൽ അറിയാതെ അപ്പീൽ പോകുന്നത് അംഗീകരിക്കില്ല. ജനങ്ങൾക്ക് അനുകൂലമായ ഹൈക്കോടതി വിധിക്കെതിരേ അപ്പീൽ പോകരുത്. നികുതിദായകരിൽനിന്നും അധികം വാങ്ങിയ തുക തിരിച്ചുനൽകണമെന്നും കോടതിവിധിയിലൂടെ കോർപറേഷനുണ്ടാകുന്ന കോടിക്കണക്കിനു രൂപയുടെ നഷ്ടം ബന്ധപ്പെട്ട ഉദ്യോഗസ്ഥരിൽനിന്ന് ഈടാക്കണമെന്നും പ്രതിപക്ഷ നേതാവ് ആവശ്യപ്പെട്ടു. പ്രതിഷേധം അന്വേഷണം തടസപ്പെടുത്താൻ: മേയർ നികുതിപിരിവുമായി ബന്ധപ്പെട്ട്, മുൻമേയർമാരായ ഐ.പി. പോൾ, രാജൻ ജെ. പല്ലൻ എന്നിവരുടെ കാലത്ത് ടാക്സേഷൻ നടപടി പൂർത്തീകരിക്കാത്തതും കൗണ്‍സിൽ തീരുമാനപ്രകാരം അന്തിമവിജ്ഞാപനം പത്രപ്പരസ്യം ചെയ്തിട്ടില്ലാത്തതുമാണെന്നു മേയർ എം.കെ. വർഗീസ്. ഇതിന്‍റെ ഭാഗമായി 198 പേരിൽനിന്നു നികുതി പിരിക്കാൻ പാടില്ല എന്ന് ഹൈക്കോടതി ഉത്തരവായിട്ടുണ്ട്. ഈ ഉത്തരവുപ്രകാരം കോടികളുടെ നഷ്ടം കോർപറേഷനു വരുമെന്നാണ് കണക്കാക്കുന്നത്. ഇതിന്‍റെ യഥാർഥ ഉത്തരവാദികളെ കണ്ടുപിടിക്കണമെന്നു മേയർ എന്ന നിലയിൽ താൻ പ്രത്യേക കുറിപ്പ് തയാറാക്കിനൽകിയിരുന്നു. ഇതിനെതുടർന്ന് അന്വേഷണം തടസപ്പെടുത്തുക എന്നതാണ് കൗൺസിൽ അലങ്കോലപ്പെടുത്തലിന്‍റെ അജൻഡയെന്നും മേയർ പത്രസമ്മേളനത്തിൽ ആരോപിച്ചു. നിയമപരമായ നടപടികൾപ്രകാരം കുറ്റവാളികളെ കണ്ടുപിടിച്ച് കോർപറേഷനു വരുന്ന നഷ്ടം ഉത്തരവാദികളിൽ നിന്നുതന്നെ ഈടാക്കുന്നതാണ്. ഇതു ജനങ്ങൾ തിരിച്ചറിയാതിരിക്കാനാണ് കൗണ്‍സിലിൽ കോണ്‍ഗ്രസ് കപടനാടകം നടത്തിയതെന്നും അദ്ദേഹം പറഞ്ഞു.

ഗ്യാസ് സിലിണ്ടര്‍ ചോര്‍ന്ന് പൊള്ളലേറ്റ വയോധികന്‍ മരിച്ചു

പുതുക്കാട്: കണ്ണംമ്പത്തൂരില്‍ വീട്ടിലെ ഗ്യാസ് സിലിണ്ടറിലെ ചോര്‍ച്ച പരിശോധിക്കുന്നതിനിടെയുണ്ടായ തീപിടിത്തത്തില്‍ പൊള്ളലേറ്റ് ചികിത്സയിലായിരുന്ന വട്ടണാത്ര സ്വദേശി മരിച്ചു. കൈനാത്തൂടന്‍ വീട്ടില്‍ അശോകൻ (62) ആണ് മരിച്ചത്. ഗ്യാസ് സിലിണ്ടര്‍ സര്‍വീസ് ചെയ്യാനെത്തിയ അശോകന്‍ അടുക്കളയില്‍ സിലിണ്ടര്‍ പരിശോധിക്കുന്നതിനിടെയായിരുന്നു അപകടം. മേയ് 30ന് കണ്ണമ്പത്തൂര്‍ പൊന്നാമ്പിടി ബിന്ദുവിന്‍റെ വീട്ടിലായിരുന്നു സംഭവം. അപകടത്തില്‍ ഗുരുതരമായി പൊള്ളലേറ്റ ബിന്ദു ചികിത്സയിലാണ്. എറണാകുളത്തെ സ്വകാര്യ ആശുപത്രിയില്‍ ചികിത്സയിലിരിക്കെയാണ് മരിച്ചത്.

വനത്തിനുള്ളില്‍ അഴുകിയനിലയില്‍ മൃതദേഹം കണ്ടെത്തി

കോടാലി: താളൂപ്പാടം മുപ്ലിവനത്തില്‍ പുരുഷന്‍റെ മൃതദേഹം അഴുകിയനിലയില്‍ കണ്ടെത്തി. മുരിക്കുങ്ങല്‍ മുപ്ലി റോഡിലെ ഫോറസ്റ്റ് സ്‌റ്റേഷന് ഒരു കിലോമീറ്ററോളം അകലെ വനത്തിനുള്ളിലെ നീര്‍ച്ചോലയിലാണ് മൃതദേഹം കണ്ടെത്തിയത്. മുപ്ലിയിലുള്ള പിതൃഭവന്‍ ഓള്‍ഡ് ഏജ് ഹോമില്‍നിന്ന് ഒരുമാസംമുമ്പ് കാണാതായ വയോധികന്‍റേതാണ് മൃതദേഹമെന്നു സംശയിക്കുന്നു. ഇയാളുടേതെന്നു കരുതുന്ന ഷര്‍ട്ടും ബെല്‍റ്റും മുതദേഹത്തിനരികില്‍നിന്നു കണ്ടെടുത്തിട്ടുണ്ട്. വനവിഭവങ്ങള്‍ ശേഖരിക്കുന്നതിനിടെ ആദിവാസികളാണ് മൃതദേഹം കണ്ട് വിവരം വനപാലകരെ അറിയിച്ചത്. ഇന്‍സ്‌പെക്ടര്‍ കെ. കൃഷ്ണന്‍റെ നേതൃത്വത്തില്‍ വെള്ളിക്കുളങ്ങര പോലീസും വനപാലകരും ഫോറന്‍സിക്, ഫിംഗര്‍പ്രിന്‍റ് വിദഗ്ധരും സ്ഥലത്തെത്തി മേല്‍നടപടി സ്വീകരിച്ചശേഷം മൃതദേഹം പോസ്റ്റുമോര്‍ട്ടത്തിനായി തൃശൂര്‍ മെഡിക്കല്‍ കോളജ് ആശുപത്രിയിലേക്കു കൊണ്ടുപോയി.

കക്ക വാരുന്നതിനിടെ പുഴയിൽ മുങ്ങിമരിച്ചു

കൊടുങ്ങല്ലൂർ: പുഴയിൽ കക്ക വാരാൻ ഇറങ്ങിയ തൊഴിലാളി മുങ്ങിമരിച്ചു. ആനാപ്പുഴ പാലിയംതുരുത്ത് കോഴിപ്പറമ്പിൽ ഗോപാലൻ മകൻ ബോസ്(65)ആണ് മരിച്ചത്. തിങ്കളാഴ്ച വൈകീട്ട് ആനാപ്പുഴ കനാൽ ഓഫീസിനു മുമ്പിലുള്ള പുഴയിലാണ് കക്കവാരാൻ ഇറങ്ങിയത്. കനത്ത മഴയെത്തുടർന്ന് പുഴയിൽ വെള്ളവും ഒഴുക്കും കൂടുതലായിരുന്നു. ഇതിനിടയിൽ ഒഴുക്കിൽപ്പെട്ട് കാണാതാവുകയായിരുന്നു. കൊടുങ്ങല്ലൂർ ഫയർഫോഴ്സും നാട്ടുകാരും ചേർന്ന് തെരച്ചിൽ നടത്തിയെങ്കിലും കണ്ടുകിട്ടിയില്ല. ഇന്നലെ ഉച്ചയോടെയാണ് മൃതദേഹം കണ്ടെത്തിയത്. പോലീസ് നടപടികൾക്കുശേഷം താലൂക്ക് ആശുപത്രിയിൽ പോസ്റ്റ്മോർട്ടം നടത്തി. സംസ്കാരം നടത്തി. ഭാര്യ: സജിത. മക്കൾ: ബിനോയ്, ബിനിൽ

അനുമോദനവും ആദരിക്കലും

എരുമപ്പെട്ടി: കോൺഗ്രസ് എരുമപ്പെട്ടി മണ്ഡലം ഒന്നാംവാർഡ് മഹാത്മാഗാന്ധി കൂട്ടായ്മയുടെ നേതൃത്വത്തിൽ വിവിധ മേഖലകളിൽ കഴിവ് തെളിയിച്ചവരെ ആദരിച്ചു. എസ്എസ്എൽസി, പ്ലസ് ടു വിജിയികളെ അനുമോദിച്ചു. ഡിസിസി സെക്രട്ടറി ഷാഹിദ റഹ്മാൻ ഉദ്ഘാടനംചെയ്തു. ബ്ലോക്ക് സെക്രട്ടറി കെ. ഗോവിന്ദൻകുട്ടി അധ്യക്ഷനായി. ദീപിക പ്രാദേശികലേഖിക എരുമപ്പെട്ടി പ്രസ്ക്ലബ് സെക്രട്ടറിയുമായ കെ.ആർ. രാധിക ഉൾപ്പടെയുള്ളവരെയാണ് ചടങ്ങിൽ ആദരിച്ചത്. യുഡിഎഫ് നിയോജകമണ്ഡലം കൺവീനർ അമ്പലപ്പാട്ട് മണികണ്ഠൻ മുഖ്യാതിഥിയായി. കോൺഗ്രസ് മണ്ഡലം പ്രസിഡന്‍റ് എം.എം. നിഷാദ്, ബ്ലോക്ക് വൈസ് പ്രസിഡന്‍റ് എൻ.കെ. കബീർ, മുൻ പഞ്ചായത്ത് പ്രസിഡന്‍റ് മീന ശലമോൻ, മഹിളാ കോൺഗ്രസ് നേതാക്കളായ സെഫീന അസീസ്, വിനോദിനി, പാലയ്ക്കൽ പഞ്ചായത്ത് മെമ്പർ റീന വർഗീസ്, കോൺഗ്രസ് വാർഡ് പ്രസിഡന്‍റ് പി.എസ്. ബാലകൃഷ്ണൻ എന്നിവർ സംസാരിച്ചു. നൂറ് വിദ്യാർഥികൾക്ക് നോട്ടുപുസ്തകങ്ങൾ വിതരണംചെയ്തു.

ബേക്കറിയില്‍നിന്ന് വാങ്ങിയ പരിപ്പുവടയില്‍ തേരട്ട

പുതുക്കാട്: സെന്‍ററിലെ ബേക്കറിയില്‍നിന്ന് വാങ്ങിയ പരിപ്പുവടയില്‍ തേരട്ട. ആരോഗ്യവകുപ്പും പഞ്ചായത്ത് അധികൃതരുംചേര്‍ന്ന് ബേക്കറി അടപ്പിച്ചു. പുതുക്കാട് സിഗ്നല്‍ ജംഗ്ഷനുസമീപം പ്രവര്‍ത്തിക്കുന്ന ഈറ്റ്‌സ് ആന്‌ഡ് ട്രീറ്റ്‌സ് എന്ന ബേക്കറിയില്‍നിന്ന് വാങ്ങിയ പരിപ്പുവടയിലാണ് ചത്തനിലയില്‍ തേരട്ടയെ കണ്ടെത്തിയത്. പുതുക്കാട് കേരള ബാങ്കിലെ ജീവനക്കാര്‍ തിങ്കളാഴ്ച രാവിലെ വാങ്ങിയ പരിപ്പുവടയില്‍നിന്നാണ് തേരട്ടയെ കിട്ടിയത്. ഉടന്‍തന്നെ ബാങ്ക് ജീവനക്കാര്‍ ആരോഗ്യവിഭാഗത്തെ വിവരമറിയിക്കുകയായിരുന്നു. പുതുക്കാട് ഹെല്‍ത്ത് ഇന്‍സ്‌പെക്ടര്‍ ആര്‍. രാജേഷിന്‍റെ നേതൃത്വത്തില്‌ ഉദ്യോഗസ്ഥര്‍ സ്ഥലത്തെത്തി പരിശോധനനടത്തിയശേഷം ബേക്കറി അടച്ചുപൂട്ടാന്‍ നിര്‍ദേശിക്കുകയായിരുന്നു. പഞ്ചായത്തിന്‍റെ ലൈസന്‍സ് ഇല്ലാതെയാണ് സ്ഥാപനം പ്രവര്‍ത്തിക്കുന്നതെന്ന് ഉദ്യോഗസ്ഥര്‍ പറഞ്ഞു. നാലുപേര്‍ ജോലിചെയ്യുന്ന സ്ഥാപനത്തില്‍ ഒരാള്‍ക്കുമാത്രമാണ് ഹെൽത്ത് കാര്‍ഡ് ഉള്ളതെന്നും രാത്രിയും പകലും പ്രവര്‍ത്തിക്കുന്ന കടയില്‍ വൃത്തിഹീനമായ രീതിയിലാണ് ഭക്ഷണം പാകംചെയ്യുന്നതെന്നും അധികൃതര്‍ പറഞ്ഞു. ജൂണിയര്‍ ഹെല്‍ത്ത് ഇന്‍സ്പെക്ടര്‍മാരായ അബ്ദുല്‍ റസാഖ്, നിമ്മി, പഞ്ചായത്തുതല ഹെല്‍ത്ത് ഇന്‍സ്പെക്ടര്‍ കെ.ജി. ഗീതു പ്രിയ എന്നിവരും പരിശോധനയില്‍ പങ്കെടുത്തു.

കാട്ടാന ആക്രമണം

പാലപ്പിള്ളി: നടാംപാടത്ത് വീടിനനേരെ കാട്ടാന ആക്രമണം. നടാംപാടം ചെമ്പലംങ്ങാട് പാലാപറമ്പില്‍ ആസിയയുടെ വീടിനുനേരെയാണ് കാട്ടാന ആക്രമണം. വീടിനുമുകളിലേക്ക് കവുങ്ങ് കുത്തിമറിച്ചിട്ട ആന പറമ്പിലെ കാര്‍ഷിക വിളകളും നശിപ്പിച്ചു. ഞായറാഴ്ച രാത്രിയിലാണ് സംഭവം. ആന വീട്ടുമുറ്റത്ത് എത്തിയതറിഞ്ഞ വീട്ടുകാര്‍ മണിക്കൂറുകളോളം ഭീതിപരത്തി. പിന്നീട് വനപാലകര്‍ എത്തിയാണ് ആനയെ കാടുകയറ്റിയത്. വനാതിര്‍ത്തിയിലെ സൗരോര്‍ജവേലി തകര്‍ത്താണ് കാട്ടാനകള്‍ ജനവാസ മേഖലയില്‍ എത്തുന്നത്. പ്രദേശത്തെ കാട്ടാനശല്യം ഒഴിവാക്കാന്‍ അധികൃതര്‍ ഇടപെടണമെന്നാണ് നാട്ടുകാരുടെ ആവശ്യം.

ദേശീയപാതയിലെ ഗതാഗതക്കുരുക്ക്

പട്ടിക്കാട്: ദേശീയപാതയിൽ മണിക്കൂറുകളോളംനീളുന്ന രൂക്ഷമായ ഗതാഗതക്കുരുക്ക് പതിവായതിനെതുടർന്ന് മന്ത്രി കെ. രാജന്‍റെ നേതൃത്വത്തിലുള്ള ഉന്നതതലസംഘം മുടിക്കോടിലും കല്ലിടുക്കിലും സന്ദർശനംനടത്തി സാഹചര്യങ്ങൾ വിലയിരുത്തി. അടിപ്പാതകളുടെ നിർമാണത്തിനായി ഗതാഗതം വഴിതിരിച്ചുവിട്ട സർവീസ് റോഡുകൾ പൂർണമായും തകർന്നതിനെതുടർന്നാണ് ആറുവരിപ്പാതയിൽ മണിക്കൂറോളംനീളുന്ന ഗതാഗതക്കുരുക്കുകൾ നിത്യസംഭവമായത്. ദേശീയപാതയിലൂടെയുള്ള ഗതാഗതവും ചരക്കുനീക്കവും സ്തംഭിക്കുന്ന സ്ഥിതിയിലേക്കു കാര്യങ്ങളെത്തി. മഴ കനത്തതോടെ അടിപ്പാതയുടെ നിർമാണപ്രവർത്തനങ്ങളും സ്തംഭിച്ചു. സർവീസ് റോഡിൽ അറ്റകുറ്റപ്പണികൾ നടത്തുന്നതുപോലും അസാധ്യമായി. അടിപ്പാതകളുടെ പണികൾ തുടങ്ങുന്നതിനുമുമ്പായി സർവീസ് റോഡുകൾ ബലപ്പെടുത്തി ഗതാഗതയോഗ്യമാക്കാതിരുന്നതാണ് ദേശീയപാതയിലെ സ്ഥിതി ഇത്രയും രൂക്ഷമാക്കിയത്. അതുകൊണ്ട് ഗതാഗതക്കുരുക്ക് ഒഴിവാക്കാൻവേണ്ട നടപടികൾ എത്രയുംവേഗം സ്വീകരിക്കണമെന്ന് മന്ത്രി അധികൃതർക്കു നിർദേശം നൽകി. ജില്ലാ കളക്ടർ അർജുൻ പാണ്ഡ്യൻ, സിറ്റി പോലീസ് കമ്മീഷണർ ആർ. ഇളങ്കോ, തഹസിൽദാർ ടി. ജയശ്രീ, മോട്ടോർ വാഹനവകുപ്പ് ഉദ്യോഗസ്ഥർ, പീച്ചി സ്റ്റേഷൻ ഹൗസ് ഓഫീസർ കെ. സതീഷ്‌കുമാർ, ദേശീയപാത അധികൃതർ തുടങ്ങിയവർ ഒപ്പമുണ്ടായിരുന്നു.

മഴ, കാറ്റ് തുടരുന്നു... വെള്ളക്കെട്ട്, മരംവീഴ്ച പരക്കുന്നു

മഴ കുറഞ്ഞു: കടൽക്ഷോഭം കൂടി ചാവക്കാട്: മഴ കുറഞ്ഞുവെങ്കിലും വെള്ളം ഇറങ്ങിയില്ല. കടലാക്രമണം രൂക്ഷമായി. കടപ്പുറം പഞ്ചായത്തിന്‍റെ തീരമേഖലയായ വെളിച്ചെണ്ണപ്പടി, മാളു കുട്ടിവളവ്, മുനയ്ക്കക്കടവ്, അഴിമുഖം തുടങ്ങിയ തീരങ്ങളിൽ കടല്‌ക്ഷോഭം രൂക്ഷമാണ്. ഇവിടെ 20 വീടുകളിലേക്ക് തിരമാലകയറി. അഞ്ചുവീട്ടുകാർ ബന്ധുവീടുകളിലേക്ക് താമസംമാറി. അഞ്ചങ്ങാടിവളവിൽ കടൽ റോഡുവരെയെത്തി. വളരെ ഉയരത്തിലാണ് തിരമാല കരയിൽ പതിക്കുന്നത്. രാവിലെ 11 മണിയോടെ ആരംഭിച്ച കടലേറ്റം ഉച്ചകഴിഞ്ഞ് മൂന്നുകഴിഞ്ഞപ്പോൾ അൽപം ശാന്തമായെങ്കിലും ക്ഷോഭത്തിലാണ്. കടൽ കരയ്ക്കു കയറിയപ്പോൾ റോഡിന്‍റെ കിഴക്കുഭാഗത്തെ വീട്ടുകാരുടെ ദുരിതംവർധിച്ചു. മഴ പെയ്ത് കെട്ടിനിൽക്കുന്ന വെള്ളത്തിലേക്ക് കടൽവെള്ളംകൂടി എത്തി. പുന്ന, തെക്കഞ്ചേരി, വഞ്ചിക്കടവ് തുടങ്ങി കനോലി കനാലിന്‍റെ തീരങ്ങളിലുളള പ്രദേശങ്ങളിലെ വെള്ളം ഒഴുകിപോകാത്തതിനെത്തുടർന്ന് ഇവിടങ്ങളിലെ നൂറോളം വീടുകൾ ഇപ്പോഴും വെള്ളത്തിലാണ്. തെക്കഞ്ചേരിയിലെ പത്ത് വീട്ടുകാർ ബന്ധുവീടുകളിലേക്കുമാറി. വഞ്ചിക്കടവിലെ മൂന്നുവീടുകളിൽനിന്ന് 19 പേരെ അഞ്ചങ്ങാടിയിലെ സർക്കാർ ഷെൽട്ടറിലേക്ക് നഗരസഭ മാറ്റി. ദേശീയപാത 66ന്‍റെ നിർമാണത്തിന്‍റെ ഭാഗമായി വില്യംസിൽ പാലം പണിയുന്നതിനായി കനോലി കനാൽ ഭാഗികമായി നികത്തിയതാണ് വെളളക്കെട്ടിന് കാരണമെന്ന് ബന്ധുവീട്ടിലേക്ക് താമസംമാറിയ തെക്കഞ്ചേരിയിലെ കമാലുദ്ദീൻ പറയുന്നു. ‌അറബിക്കടലിലെ ജലനിരപ്പ് വളരെ ഉയർന്നതിനെ തുടർന്ന് പുഴ വഴി എത്തുന്ന വെള്ളത്തെ കടൽ ഉൾക്കൊളളാത്തതും വെള്ളക്കെട്ടിനും കടൽക്ഷോഭത്തിനും കാരണമാകുന്നുണ്ടെന്ന് പൗരസമതി പ്രസിഡന്‍റ് ഷറഫുദ്ദീൻ മുനയ്ക്കക്കടവ് അഭിപ്രായപ്പെട്ടു. മരവും തെങ്ങും വീണ് ട്രാൻസ്‌ഫോമർ നിലംപതിച്ചു പുന്നയൂർക്കുളം: ശക്തമായ കാറ്റിലും മഴയിലും തേക്കുമരവും തെങ്ങും ഒന്നിച്ച് വീണ് ട്രാൻസ്ഫോമർ നിലംപതിച്ചു. പരൂർ ക്ഷേത്രത്തിന്‍റെ തെക്കുഭാഗം റോഡരികിൽ സ്ഥാപിച്ചിരുന്ന ട്രാൻസ്ഫോമറാണ് തകർന്നത്. വൈദ്യുതി കാലുകളും കമ്പികളും പൊട്ടിവീണെങ്കിലും പുലർച്ചെ ആൾസഞ്ചാരം കുറഞ്ഞ സമയമായതിനാൽ അപകടം ഒഴിവായി. വൈദ്യുതി നിലയ്ക്കുകയുംചെയ്തു. സ്വകാര്യ വ്യക്തിയുടെ പറമ്പിലെ വലിയ തേക്കുമരം കടപുഴകി തൊട്ടടുത്തുള്ള തെങ്ങിലേക്ക് പതിക്കുകയും തെങ്ങു പൊട്ടി രണ്ടും കൂടി ട്രാൻസ്ഫോര്‌മർ സ്ഥാപിച്ചിരുന്ന പോസ്റ്റിൽ വീണാണ് അപകടം. ട്രാൻസ്‌ഫോര്‌മര്‌ ചെരിഞ്ഞു കമ്പികൾ പൊട്ടിച്ചിതറി.മരങ്ങൾ റോഡിലേക്ക് വീണതിനാൽ കാൽനടയാത്രയും വാഹന ഗതാഗതവും തടസപ്പെട്ടു. മരങ്ങൾ വെട്ടിമാറ്റി ഗതാഗതം പുനഃരാരംഭിച്ചെങ്കിലും രാത്രി വൈകിയും വൈദ്യുതിവിതരണം പുനഃസ്ഥാപിച്ചില്ല. മഴ മാറിനിന്നതിനാൽ രാത്രിയും അറ്റകുറ്റപ്പണികൾ നടത്തി. പുന്നയൂർക്കുളം മന്ദലംകുന്നിൽ 15 വീടുകൾ വെള്ളക്കെട്ടിലാണ്. ദേശീയപാതയുടെ നിർമാണമാണ് ഇതിനുകാരണം. പരിഹാരം കാണാൻ നാളെ ഉച്ചകഴിഞ്ഞു 3.30ന് ചാവക്കാട് ടിബിയിൽ കളക്ടറുടെ സാന്നിധ്യത്തിൽ ചർച്ച നടത്തുമെന്ന് എൻ.കെ. അക്ബർ എംഎൽഎ അറിയിച്ചു. കാറ്റിലും മഴയിലും ഭീമൻമരം വീണു വടക്കാഞ്ചേരി: കഴിഞ്ഞദിവസം രാത്രിയിലുണ്ടായ ശക്തമായ കാറ്റിലും മഴയിലും ഭീമൻ മരം കടപുഴകിവീണ് ഗതാഗതം സ്തംഭിച്ചു. കുമ്പളങ്ങാട് - പാർളിക്കാട് വ്യാസ കോളജ് റോഡിലാണ് മരംവീണത്. മരം റോഡിനുകുറുകെ വീണതിനാൽ ഏറെനേരം ഗതാഗതവും തടസപ്പെട്ടു. വിവരമറിയിച്ചതിനെ തുടർന്ന് വടക്കാഞ്ചേരിയിൽ നിന്നെത്തിയ ഫയർഫോഴ്സും നാട്ടുകാരുംചേർന്ന് ഏറെനേരം പാടുപെട്ടാണ് മരം മുറിച്ചുമാറ്റിയത്. പ്രദേശത്തെ വെെദ്യുതി ബന്ധവും താറുമാറായി. വൈദ്യുതലൈനിലേക്ക് മരംവീണു; ആമ്പല്ലൂര്‍ ടൗണില്‍ വൈദ്യുതി നിലച്ചത് 20 മണിക്കൂര്‍ ആമ്പല്ലൂര്‍: ശക്തമായ മഴയിലും കാറ്റിലും വൈദ്യുതലൈനിലേക്ക് മരംവീണു. ആമ്പല്ലൂര്‍ ടൗണില്‍ വൈദ്യുതിയില്ലാതെ 20 മണിക്കൂര്‍ പിന്നിട്ടു. മണലിക്ക് സമീപം ഞായറാഴ്ച വൈകിട്ടാണ് മരംവീണത്. ഇതോടെ സമീപപ്രദേശങ്ങളില്‍ വൈദ്യുതതടസം നേരിട്ടു. നിരവധി വ്യാപാരസ്ഥാപനങ്ങളുടെ പ്രവര്‍ത്തനം തന്നെ നിലച്ച മട്ടിലാണ്. ചില സ്ഥാപനങ്ങള്‍ ജനറേറ്റര്‍ ഉപയോഗിച്ച് പ്രവര്‍ത്തിക്കുന്നുണ്ട്. ഇന്നലെ രാവിലെ പുതുക്കാട് കെഎസ്ഇബി അധികൃതരെത്തി ഏറെ പണിപ്പെട്ടാണ് മരം മുറിച്ചുനീക്കിയത്. കെഎസ്ഇബി ഉദ്യോഗസ്ഥരുടെ നേതൃത്വത്തില്‍ വൈദ്യുതി പുനഃസ്ഥാപിക്കുന്ന ജോലികളും പുരോഗമിക്കുന്നുണ്ട്.

സഹൃദയ കോളജില്‍ "ദീക്ഷാരംഭ് 2025'

കൊടകര: സഹൃദയ കോളജ് ഓഫ് അഡ്വാന്‍സ്ഡ് സ്റ്റഡീസിലെ ഒന്നാംവര്‍ഷ ബിരുദവിദ്യാര്‍ഥികള്‍ക്കായി ദീക്ഷാരംഭ് - 2025 സംഘടിപ്പിച്ചു. സഹൃദയ ഗ്രൂപ്പ് ഓഫ് ഇന്‍സ്റ്റിറ്റ്യൂഷന്‍സ് മാനേജരും ഇരിങ്ങാലക്കുട രൂപത വികാരി ജനറാളുമായ മോണ്‍. വില്‍സണ്‍ ഈരത്തറ ഉദ്ഘാടനം ചെയ്തു. എക്‌സിക്യൂട്ടീവ് ഡയറക്ടര്‍ റവ.ഡോ. ഡേവിസ് ചെങ്ങിനിയാടന്‍ അധ്യക്ഷത വഹിച്ചു. കേരളത്തിലെ വിദ്യാര്‍ഥികളുടെ സമ്പൂര്‍ണസുരക്ഷിതത്വം ഉറപ്പാക്കുന്നതിനായി കേരളസര്‍ക്കാര്‍ രൂപവത്കരിച്ച കോളജ് പ്രൊട്ടക്‌ഷന്‍ ഫോറം പ്രതിനിധി കൊടകര പോലീസ് സ്റ്റേഷനിലെ എഎസ്‌ഐ ആഷ്‌ലി ജോണ്‍ റാഗിംഗ് വിരുദ്ധ, ലഹരിവിരുദ്ധ കാമ്പസുകളുണ്ടാക്കുന്നതിന് വിദ്യാര്‍ഥികളും രക്ഷിതാക്കളും ശ്രദ്ധിക്കേണ്ടതെന്തെല്ലാം എന്ന വിഷയത്തിലും മോട്ടിവേഷണല്‍ സ്പീക്കര്‍ പ്രവീണ്‍ ചിറയത്ത് നെക്സ്റ്റ് ജനറേഷന്‍ പ്രൊഫഷണല്‍സ് എന്ന വിഷയത്തിലും ക്ലാസെടുത്തു. കോളജ് മാനുവലിന്‍റെ പ്രകാശനം മോണ്‍. വില്‍സന്‍ ഈരത്തറ നിര്‍വഹിച്ചു. പ്രിന്‍സിപ്പല്‍ ഡോ. കെ.എല്‍.ജോയ്, ഫിനാന്‍സ് ഓഫീസര്‍ ഫാ. സിബിന്‍ വാഴപ്പിളളി, വൈസ് പ്രിന്‍സിപ്പല്‍ ഡോ. കെ. കരുണ, ഡീന്‍ ഓഫ് ഇന്‍റര്‍നാഷണല്‍ അഫയേഴ്‌സ് പ്രഫ. വി.ജെ. തോമസ്, ഡീന്‍ ഓഫ് അക്കാഡമിക്‌സ് ഡോ. എം.ബി. ഷീബ, ഡീന്‍ ഓഫ് സ്റ്റുഡന്‍റ് അഫയേഴ്‌സ് പ്രഫ. ഡോ. ജെ. സനില്‍രാജ് എന്നിവര്‍ സന്നിഹിതരായിരുന്നു. തുടര്‍ന്ന് വിദ്യാര്‍ഥികളുടെ കലാപരിപാടികളും അരങ്ങേറി.

16 വയസുള്ള കുട്ടിക്ക് പുകയില ഉത്പന്നം നൽകി അറസ്റ്റിലായി

ചാലക്കുടി: 18 വയസിനുതാഴെയുള്ളവർക്ക് പുകയില ഉത്പന്നങ്ങൾ വിൽപ്പന നടത്തരുതെന്നുള്ള നിയമം ലംഘിച്ച് പുകയില ഉല്പന്നം വില്പന നടത്തിയ ആൾ അറസ്റ്റിലായി. പരിയാരം പോസ്റ്റ് ഓഫീസ് ജംഗ്ഷനു സമീപമുള്ള പലചരക്കുകടയിൽനിന്ന് 16 വയസുള്ള കുട്ടിക്ക് പുകയില ഉത്പന്നങ്ങൾ വില്പന നടത്തിയ തൂമ്പാക്കോട് മംഗലത്തുകണ്ടൻ വീട്ടിൽ ആന്‍റു (54) വിനെയാണ് ചാലക്കുടി പോലീസ് എസ്ഐ ഋഷിപ്രസാദും സംഘവും അറസ്റ്റ് ചെയ്തത്. ഇയാൾക്കെതിരെ ജുവനൈൽ ജസ്റ്റീസ് ആക്ട് പ്രകാരം കേസ് രജിസ്റ്റർ ചെയ്തു. സബ് ഇൻസ്പെക്ടർമാരായ ജോഫി ജോസ്, സിപിഒമാരായ ബിനു, വിനോദ്, അരുൺകുമാർ എന്നിവരും ചേർന്നാണ് പ്രതിയെ അറസ്റ്റ് ചെയ്തത്.

ബസുകളുടെ സമയക്രമം, തര്‍ക്കം പരിഹരിച്ചു

ഇരിങ്ങാലക്കുട: കാട്ടൂര്‍ വഴി തൃപ്രയാറിലേക്ക് സര്‍വീസ് നടത്തുന്ന ബസുകളുടെ സമയത്തെച്ചൊല്ലിയുണ്ടായ തര്‍ക്കത്തിന് പരിഹാരമായി. ആര്‍ടിഒ ജയേഷ്‌കുമാറിന്‍റെ നേതൃത്വത്തില്‍ ബസുടമകളുമായി നടത്തിയ ചര്‍ച്ചയില്‍ കാട്ടൂര്‍ മുതല്‍ താണിശേരി വരെ ബസുകള്‍ക്ക് സഞ്ചരിക്കാന്‍ 11 മിനിറ്റായി യോഗത്തില്‍ നിശ്ചയിച്ചു. ഈ റൂട്ടിലോടുന്ന എല്ലാ ബസുകള്‍ക്കും സഞ്ചാരസമയം മൂന്നു മിനിറ്റ് കുറയ്ക്കുകയും ചെയ്തു. ബസുകള്‍ പുതിയ സമയക്രമത്തില്‍ സര്‍വീസ് ആരംഭിച്ചു. ഇരിങ്ങാലക്കുട- കാട്ടൂര്‍- തൃപ്രയാര്‍ റൂട്ടില്‍ 18 ബസുകളാണ് സര്‍വീസ് നടത്തുന്നത്. ഏറെ നാളായി ഈ റൂട്ടില്‍ സമയത്തെച്ചൊല്ലി ബസ്സുടമകളും ജീവനക്കാരും നിരന്തരം തര്‍ക്കം ഉണ്ടായിരുന്നു. തുടര്‍ന്ന് ഗതാഗതവകുപ്പ് മന്ത്രി അടക്കമുള്ളവര്‍ പ്രശ്‌നത്തില്‍ ഇടപെട്ട് സമയക്രമം പാലിക്കാന്‍ കര്‍ശന നടപടി സ്വീകരിക്കാന്‍ ഉദ്യോഗസ്ഥര്‍ക്ക് നിര്‍ദേശം നല്‍കുകയായിരുന്നു. തുടര്‍ന്ന് ഈ റൂട്ടില്‍ ഉദ്യോഗസ്ഥര്‍ സഞ്ചരിച്ചശേഷം പ്രശ്‌നപരിഹാരത്തിനായി ബസുകളുടെ പുതിയ സമയക്രമം നിശ്ചയിച്ച് ഉടമകള്‍ക്ക് നല്‍കിയെങ്കിലും ചില ബസുടമകളും ജീവനക്കാരും അത് പാലിക്കാന്‍ തയ്യാറായിരുന്നില്ല. തുടര്‍ന്നാണ് ആര്‍ടിഒ ബസുടമകളുടെ പ്രത്യേക യോഗം വിളിച്ച് പരിഹാരമുണ്ടാക്കിയത്. യോഗത്തില്‍ എന്‍ഫോഴ്സ്മെന്‍റ് ഇന്‍സ്‌പെക്ടര്‍ പി.വി. ബിജു, ബസുടമകളെ പ്രതിനിധീകരിച്ച് വിവിധ സംഘടനാ നേതാക്കളായ അബ്ദുല്‍ കരീം, കെ.കെ. സേതുമാധവന്‍, നൗഫല്‍, സി.സി. ആന്‍റോ, നന്ദകുമാര്‍, കെ.എന്‍. സന്ദീപ്, സജീവന്‍ മേനോന്‍, സി.പി. രാജു എന്നിവരും പങ്കെടുത്തു.

പുളിക്കലച്ചിറ ബണ്ട് പൊളിക്കണമെന്ന് ആവശ്യപ്പെട്ട് പ്രദേശവാസികള്‍ പ്രതിഷേധിച്ചു

ഇരിങ്ങാലക്കുട: പടിയൂര്‍ പുളിക്കലച്ചിറ താത്കാലിക ബണ്ട് പൊളിക്കണമെന്നാവശ്യപ്പെട്ട് പ്രദേശവാസികള്‍ പഞ്ചായത്താഫീസില്‍ കുത്തിയിരിപ്പ് നടത്തി പ്രതിഷേധിച്ചു. കൈകുഞ്ഞുങ്ങളുമായാണ് പ്രദേശവാസികള്‍ പഞ്ചായത്താഫീസിലെത്തിയത്. താത്കാലിക ബണ്ട് പൊളിച്ച് നീക്കണമെന്ന് ആവശ്യപ്പെട്ട് രാവിലെ പത്ത് മണിക്ക് തന്നെ ജനപ്രതിനിധികളുടെ നേതൃത്വത്തില്‍ വെള്ളക്കെട്ടിന്റെ ദുരിതം നേരിടുന്നവരും ക്യാമ്പില്‍ കഴിയുന്നവരും പഞ്ചായത്ത് ഓഫീസില്‍ എത്തുകയായിരുന്നു. താത്കാലിക ബണ്ട് അടിയന്തരമായി പൊളിച്ച് നീക്കണമെന്ന് ഇവര്‍ ആവശ്യപ്പെട്ടു. പുളിക്കലച്ചിറയിലെ പാലം നിര്‍മ്മാണം അനിശ്ചിതമായി നീണ്ട് പോയതിലും നിര്‍മ്മാണത്തില്‍ അപാകത കണ്ടെത്തിയതിലും ഉദ്യോഗസ്ഥരുടെയും കരാറുകാരുടെയും വീഴ്ച ഉണ്ടെന്നും ഇവര്‍ ആരോപിച്ചു. വെള്ളക്കെട്ടിന് പരിഹാരം കാണാനാണ് തീരുമാനമെന്ന് പഞ്ചായത്തില്‍ എത്തിയ മുകുന്ദപുരം തഹസില്‍ദാര്‍ വിശദീകരിച്ചുവെങ്കിലും ഇവര്‍ തൃപ്തരായില്ല. വൈകീട്ട് അഞ്ച് മണിക്ക് കളക്ടറേറ്റില്‍ ഉന്നതതല യോഗം വിളിച്ചിട്ടുണ്ടെന്ന് റവന്യൂ അധികൃതര്‍ വിശദീകരിച്ചുവെങ്കിലും യോഗത്തില്‍ പങ്കെടുക്കില്ലെന്നും ജില്ലാ ഭരണാധികാരികള്‍ സ്ഥലം സന്ദര്‍ശിക്കണമെന്നും ഇവര്‍ ആവശ്യപ്പെട്ടു. വൈകീട്ട് ജില്ലാ സബ് കളക്ടറും തഹസില്‍ദാറും പഞ്ചായത്ത് അധികൃതരും ചേര്‍ന്ന ഗൂഗില്‍ മീറ്റിലാണ് ഇത് സംബന്ധിച്ച തീരുമാനം ഉണ്ടായത്. പഞ്ചായത്ത് പ്രസിഡന്റ് ലിജി രതീഷ്, ഭരണ സമിതി അംഗങ്ങള്‍, വില്ലേജ് ഓഫീസര്‍, ബ്രിഡ്ജസ് വിഭാഗം ഉദ്യോഗസ്ഥര്‍ എന്നിവര്‍ ചര്‍ച്ചകളില്‍ പങ്കെടുത്തു. പടിയൂര്‍ പഞ്ചായത്തിലെ 5, 6 വാര്‍ഡുകളിലെ വെള്ളക്കെട്ടിന് പരിഹാരം കാണാറായി പുളിക്കലച്ചിറയിലെ താത്കാലിക ബണ്ട് പൊളിക്കുന്ന വിഷയത്തില്‍ ജില്ലാ ഭരണകൂടം ഇന്ന് തീരുമാനമെടുക്കും. ഇത് സംബന്ധിച്ച് മുകുന്ദപുരം തഹസില്‍ദാര്‍, പൊതുമരാമത്ത് ബ്രിഡ്ജസ് വിഭാഗം എക്‌സിക്യുട്ടീവ് എന്‍ജിനീയര്‍, വില്ലേജ് ഓഫീസര്‍ എന്നിവര്‍ നല്‍കുന്ന റിപ്പോര്‍ട്ടിന്‍റെ അടിസ്ഥാനത്തിലായിരിക്കും തീരുമാനം. ചൊവ്വാഴ്ച ഒന്‍പത് മണിക്കുള്ളില്‍ റിപ്പോര്‍ട്ട് നല്‍കാനാണ് ജില്ലാ ഭരണകൂടം ആവശ്യപ്പെട്ടിരിക്കുന്നത്. വൈകീട്ട് ആറരയോടെയാണ് ഇക്കാര്യത്തില്‍ ധാരണയായത്. അനിഷ്ട സംഭവങ്ങള്‍ ഒഴിവാക്കാന്‍ രാവിലെ മുതല്‍ തന്നെ കാട്ടൂര്‍ പോീസും സ്ഥലത്ത് ഉണ്ടായിരുന്നു.

മഴ = വെള്ളക്കെട്ട്

തീരദേശത്ത് നിരവധി വീടുകൾ വെള്ളത്തിൽ കയ്പമംഗലം: തുടർച്ചയായി പെയ്ത കനത്ത മഴയിൽ തീരദേശത്ത് നിരവധി വീടുകൾ വെള്ളത്തിലായി. എടത്തിരുത്തി, കയ്പമംഗലം, പെരിഞ്ഞനം എന്നീ പഞ്ചായത്തുകളിലാണ് വെള്ളക്കെട്ട് രൂക്ഷമായത്. ഈ മൂന്ന് പഞ്ചായത്തുകളിൽ ദുരിതാശ്വാസ ക്യാമ്പ് തുറന്നു. പ്രധാന തോടുകൾ കരകവിഞ്ഞൊഴുകിയതോടെയാണ് തീരദേശ പഞ്ചായത്തുകളിൽ വെള്ളക്കെട്ട് രൂക്ഷമായത്. എടത്തിരുത്തി പതിനഞ്ചാം വാർഡ് ചെന്ത്രാപ്പിന്നി ബൈപ്പാസിന് സമീപവും, പപ്പടം നഗറിലും നിരവധി വീടുകളിൽ വെള്ളം കയറി. പലരും ബന്ധുവീടുകളിലേക്കും മറ്റും താമസം മാറിയിരിക്കുകയാണ്. റോഡുകളിലും വെള്ളക്കെട്ട് മൂലം സഞ്ചരിക്കാൻ പറ്റാത്ത സ്ഥിതിയാണുള്ളത്. ചെന്ത്രാപ്പിനി എസ്എൻ വിദ്യാഭവൻ പ്രദേശത്തും വെള്ളക്കെട്ട് രൂക്ഷമാണ്. എടത്തിരുത്തി പൈനൂർ, പല്ല, അയ്യൻപ്പടി നഗർ, കോഴിത്തുമ്പ് തുടങ്ങിയ സ്ഥലങ്ങളിലും വെള്ളക്കെട്ടുണ്ട്. കയ്പമംഗലം പഞ്ചായത്ത് രണ്ടാം വാർഡ് കൂരിക്കുഴി സലഫി വടക്ക് ഭാഗത്താണ് വെള്ളക്കെട്ട് കൂടുതലായിട്ടുള്ളത്. ഈ ഭാഗത്ത് നിരവധി കുടുംബങ്ങൾ വെള്ളക്കെട്ടിലാണ്. ചില വീടുകളിൽ വെള്ളം കയറി. കാളമുറി കിഴക്ക് വിളക്കുപറമ്പ്, തൈവെപ്പ്, പള്ളിത്താനം, ഗ്രാമലക്ഷ്മി, വഴിയമ്പലം ബൈപ്പാസ് പ്രദേശത്തും വെള്ളക്കെട്ട് മൂലം ദുരിതത്തിലാണ് നാട്ടുകാർ. കനത്ത മഴയിൽ വീടുകളിൽ വെള്ളം കയറിയതിനെ തുടർന്ന് പെരിഞ്ഞനം പഞ്ചായത്തിൽ ദുരിതാശ്വാസ ക്യാമ്പ് തുറന്നു. രണ്ട് കുടുംബങ്ങളിൽ നിന്നായി ആറ് പേരാണ് പെരിഞ്ഞനം ഗവ. യുപി സ്കൂളിലുള്ള ക്യാമ്പിലുള്ളത്. കൂരിക്കുഴി ബാബുൽ ഉലും മദ്രസയിലാരംഭിച്ചിട്ടുള്ള ക്യാമ്പിൽ കയ്പമംഗലം പഞ്ചായത്തിലെ രണ്ട്, മൂന്ന് വാർഡുകളിലെ എഴു കുടുംബങ്ങളിൽ നിന്നായി 13 പേരും, ചാമക്കാല സ്കൂളിലെ സർക്കാർ ആശ്വാസ കേന്ദ്രത്തിൽ എടത്തിരുത്തി പഞ്ചായത്തിലെ ആറാം വാർഡ് കോഴിതുമ്പിലെ 10 കുടുംബങ്ങളിൽ നിന്നായി 18 പേരുമുണ്ട്. പഞ്ചായത്ത് - വില്ലേജ് അധികൃതർ ക്യാമ്പുകൾ സന്ദർശിച്ചു. ഇ.ടി. ടൈസൺ എംഎൽഎ ഉൾപ്പെടെയുള്ള ജനപ്രതിനിധികൾ ക്യാമ്പുകൾ സന്ദർശിച്ചു. മാപ്രാണം വാതില്‍മാടം പ്രദേശത്ത് വെള്ളക്കെട്ട് മാപ്രാണം: ഇരിങ്ങാലക്കുട നഗരസഭ 38-ാം വാര്‍ഡിലെ വാതില്‍മാടം പ്രദേശത്ത് വെള്ളക്കെട്ട്. 32 കുടുംബങ്ങളാണ് ഇവിടെ താമസിക്കുന്നത്. മഴയില്‍ പ്രദേശത്തുണ്ടാകുന്ന വെള്ളം കാനയിലൂടെ വിട്ട് റോഡിന് കുറുകേ പൈപ്പിട്ടാണ് പുറത്തേക്ക് ഒഴുക്കിക്കളയുന്നത്. എന്നാല്‍ പൈപ്പില്‍ മാലിന്യം അടിഞ്ഞതുമൂലം വെള്ളം പുറത്തേയ്ക്ക് ഒഴുകാതെ വന്നതാണ് വീടുകളില്‍ വെള്ളം കയറാന്‍ കാരണമായത്. പ്രശ്‌നത്തിന് കാരണം നഗരസഭയുടെ അനാസ്ഥയെന്നാരോപിച്ച് സിപിഎം പ്രതിഷേധിച്ചു. മഴ തുടരുന്ന സാഹചര്യത്തില്‍ വെള്ളം ഒഴുക്കിവിടാന്‍ റോഡ് ജെസിബി ഉപയോഗിച്ച് പൊളിക്കണമെന്ന് ആവശ്യമുയര്‍ന്നു. വീടുകളുടെ പടിവരെ വെള്ളം കയറിയിട്ടും പ്രശ്‌നപരിഹാരത്തിന് യാതൊരു നടപടികളും അധികാരികളുടെ ഭാഗത്തുനിന്നും ഉണ്ടായിട്ടില്ലെന്ന് സിപിഎം കൗണ്‍സിലര്‍മാര്‍ ആരോപിച്ചു. നിരവധി തവണ മുനിസിപ്പാലിറ്റിയില്‍ ഈ വിഷയം ശ്രദ്ധയില്‍പ്പെടുത്തി പരാതി നല്‍കി. എന്നാല്‍ കാര്യങ്ങള്‍ വ്യക്തമായി മനസിലാക്കാതെ റോഡ് പൊളിക്കുന്നതു ശരിയായ നടപടിയല്ലെന്നു നഗരസഭ വ്യക്തമാക്കി. പരാതിയെതുടര്‍ന്ന് നഗരസഭ എന്‍ജിനീയറിംഗ് വിഭാഗം ഉദ്യോഗസ്ഥര്‍ സ്ഥലത്തെത്തി പരിശോധിച്ചു. സമരം നടത്താന്‍ എത്തിയ പ്രവര്‍ത്തകരോട് പ്രദേശവാസികളായ ചിലര്‍ വിഷയത്തില്‍ രാഷ്ട്രിയം ആവശ്യമില്ലെന്നും വെള്ളം ഒഴിഞ്ഞുപോയാല്‍ മതിയെന്നും പറഞ്ഞ് എതിര്‍ക്കുകയായിരുന്നു. എന്നാല്‍, ഉത്തരവാദിത്വത്തില്‍നിന്ന് ഒളിച്ചോടുന്ന നഗരസഭ ഭരണത്തോടുള്ള പ്രതിഷേധമാണ് ഈ സമരമെന്ന് സിപിഎം വ്യക്തമാക്കി. സിപിഎം സ്വന്തം നിലയില്‍ പണം കണ്ടെത്തി മോട്ടോറും മറ്റും വാടകയ്‌ക്കെടുത്ത് വെള്ളം ഒഴുക്കിക്കളയാന്‍ ആരംഭിച്ചു. സമരം ലോക്കല്‍ സെക്രട്ടറി ആര്‍.എല്‍. ജീവന്‍ലാല്‍ ഉദ്ഘാടനം ചെയ്തു. വാര്‍ഡ് കൗണ്‍സിലര്‍ ലേഖാ ഷാജന്‍ അധ്യക്ഷയായി. കൗണ്‍സിലര്‍മാരായ സി.സി. ഷിബിന്‍, സി.എം. സാനി, എം.എസ്. സഞ്ജയ്, സിപിഎം നേതാക്കളായ പി.എ. അനീഷ്, കെ.കെ. ദാസന്‍, കെ.ജെ. ജോണ്‍സണ്‍ തുടങ്ങിയവര്‍ നേതൃത്വം നല്‍കി. പടിയൂരില്‍ നൂറോളം കുടുംബങ്ങള്‍ ആശങ്കയില്‍ പായമ്മല്‍: പുളിക്കലച്ചിറ പാടത്ത് വെള്ളമുയര്‍ന്നതിനെ തുടര്‍ന്ന് പടിയൂര്‍ പഞ്ചായത്തിലെ അഞ്ച്, ആറ് വാര്‍ഡുകളിലേയ്ക്ക് വെള്ളം കയറി. അഞ്ചാം വാര്‍ഡിലെ രണ്ടു കുടുംബങ്ങളെ എടതിരിഞ്ഞി എച്ച്ഡിപി സമാജം സ്‌കൂളില്‍ ദുരിതാശ്വാസ ക്യാമ്പ് ആരംഭിച്ച് അതിലേക്കു മാറ്റി. മൂന്നു കുടുംബങ്ങള്‍ ബന്ധുവീടുകളിലേക്ക് മാറി. പ്രദേശത്തെ മുഴുവന്‍ വീടുകളും വെള്ളക്കെട്ടു ഭീഷണിയിലാണ്. സംഭവം ഏറെ പ്രതിഷേധത്തിനിടയാക്കിയിരുന്നു. പ്രദേശത്തെ വെള്ളക്കെട്ട് ഒഴിവാക്കാനും നീരൊഴുക്ക് വേഗത്തിലാക്കാനുമായി കഴിഞ്ഞമാസം ആദ്യം റോഡിന്‍റെ കിഴക്കുഭാഗത്തായി നാലിടത്തായി പൊതുമരാമത്തുവകുപ്പ് റോഡ് പൊളിച്ച് വെള്ളം തുറന്നുവിട്ടു. പാടശേഖരത്തോടുചേര്‍ന്നുള്ള പടിയൂര്‍- പൂമംഗലം പഞ്ചായത്തുകളിലെ താഴ്ന്ന സ്ഥലങ്ങളില്‍ വെള്ളം കയറാതിരിക്കാന്‍ മുന്‍കരുതലായിട്ടാണ് വെള്ളം തുറന്നുവിട്ടത്. എന്നാല്‍, നിര്‍ത്താതെ പെയ്ത മഴ കണക്കുകൂട്ടലുകള്‍ മുഴുവന്‍ തെറ്റിച്ചു. വലിയ തോതിലാണ് പല പ്രദേശത്തും വെള്ളമുയര്‍ന്നത്. പുളിക്കലച്ചിറ പാടത്തോടുചേര്‍ന്നുള്ള അഞ്ച്, ഏഴ് വാര്‍ഡുകളിലെ വീടുകളില്‍ വെള്ളക്കെട്ടുഭീഷണി തുടരുകയാണ്. മഴ തുടരുകയാണെങ്കില്‍ കൂടുതല്‍ കുടുംബങ്ങളെ ദുരിതാശ്വാസ ക്യാമ്പിലേക്ക് മാറ്റേണ്ടിവരുമെന്നാണ് കരുതുന്നത്.

സോഡാക്കുപ്പിയുടെ അടപ്പുകളില്‍ തെളിഞ്ഞ വിശുദ്ധ അന്തോണീസ്

ഇരിങ്ങാലക്കുട: പാദുവനഗര്‍ സെന്‍റ് ആന്‍റണീസ് ഇടവകയില്‍ വിശുദ്ധ അന്തോണീസിന്‍റെ തിരുനാളാചരണത്തോടനുബന്ധിച്ച് 8000 സോ ഡാക്കുപ്പി അടപ്പുകള്‍ അടിച്ചുപരത്തി വിശുദ്ധന്‍റെ മനോ ഹരമായ ചിത്രം നിര്‍മിച്ചു. കെസിവൈഎം അംഗങ്ങളാണ് ചിത്രം നിര്‍മിച്ചത്. കെസിവൈഎം പ്രസിഡന്‍റ് ആല്‍ബിന്‍ ഷാജു, കോഓര്‍ഡിനേറ്റര്‍ സാന്ദ്ര ഷാജി എന്നിവരുടെ നേതൃത്വത്തില്‍ മൂന്നാഴ്ചയോളം നീണ്ട പരിശ്രമംകൊണ്ടാണ് യുവജനങ്ങള്‍ വ്യത്യസ്തമായ ഈ കലാവിഷ്‌കാരം സാധ്യമാക്കിയത്.

ചാലക്കുടിയിൽ വൻ തീപിടിത്തം; അഞ്ചുകോടിയുടെ നഷ്ടം

ചാലക്കുടി: നോർത്ത് ജംഗ്ഷനിലുള്ള പെയിന്‍റ് ഗോഡൗണിൽ വൻഅഗ്നിബാധ. ഊക്കൻസ് ഷോപ്പിംഗ് കോംപ്ലക്സിലെ പെയിന്‍റ് ഗോഡൗണിലുണ്ടായ തീപിടിത്തത്തിൽ അഞ്ചുകോടി രൂപയുടെ നഷ്ടം കണക്കാക്കുന്നു. ഷോർട്ട് സർക്യൂട്ട് മൂലം തീ പടർന്നുവെന്നാണ് പ്രാഥമികനിഗമനം. ഇന്നലെ രാവിലെ 8.30നാണ് കെട്ടിടത്തിൽനിന്നു തീയും പുകയും ഉയരുന്നതുകണ്ടത്. സമീപത്തുണ്ടായിരുന്ന നാട്ടുകാരും ചുമട്ടുതൊഴിലാളികളും ഓടിയെത്തി അഗ്നിരക്ഷാസേനയെയും പോലീസിനെയും വിവരം അറിയിച്ചു. ഉടനേ ചാലക്കുടി ഫയർ സ്റ്റേഷൻ ചാർജ് ഓഫീസർ പി.ഒ. വർഗീസിന്‍റെ നേതൃത്വത്തിൽ രണ്ടു യൂണിറ്റുകൾ എത്തി തീയണയ്ക്കാനുള്ള ശ്രമം തുടങ്ങി. സംഭവത്തിന്‍റെ ഗൗരവം മനസിലാക്കി അടുത്തുള്ള നിലയങ്ങളിലും വിവരം അറിയിച്ചു. പെയിന്‍റും തിന്നറും ആയതിനാൽ ഫോം ഉപയോഗിച്ചാണ് തീ നിയന്ത്രണവിധേയമാക്കിയത്. എട്ടു ഫയർ സ്റ്റേഷനുകളിൽനിന്നായി 10 യൂണിറ്റുകൾ പ്രവർത്തിച്ചാണ് തീയണച്ചത്. സ്റ്റേഷൻ ഓഫീസർ സി.സി. വിജയൻ, കെ.എസ്. ഡിബിൻ എന്നിവരടക്കം ഫയർഫോഴ്സിലെ 58 ജീവനക്കാരും 12 സിവിൽ ഡിഫൻസ് അംഗങ്ങളും തീയണയ്ക്കാനെത്തി. പുതുക്കാട്, മാള, ഇരിങ്ങാലക്കുട, തൃശൂർ, അങ്കമാലി, പെരുമ്പാവൂർ, പറവൂർ എന്നീ അഗ്നിരക്ഷാനിലയങ്ങളിൽനിന്നാണ് യൂണിറ്റുകൾ എത്തിയത്. തൃശൂർ ഫയർ സ്റ്റേഷൻ ഓഫീസർ ബി. വൈശാഖിന്‍റെ നേതൃത്വത്തിലായിരുന്നു ഏകോപനം. മൂന്നുമണിക്കൂർ നേരത്തെ ശ്രമഫലമായി പതിനൊന്നരയോടെയാണ് തീ പൂർണമായും അണച്ചത്. ഗോഡൗണിൽ സൂക്ഷിച്ചിരുന്ന പെയിന്‍റ് ടിന്നുകളും സമീപത്തെ ഗോഡൗണിലുണ്ടായിരുന്ന ഗ്യാസ് സിലിണ്ടറുകളും നാട്ടുകാരുടെ നേതൃത്വത്തിൽ മാറ്റിയതു കൂടുതൽ അപകടം ഒഴിവാക്കി. മറ്റു നിലയങ്ങളിൽനിന്നെത്തിയ ഫയർ എൻജിനുകൾ ദേശീയപാതയിലെ ഗതാഗതക്കുരുക്കിൽപ്പെട്ടതു ദുരിതമായി.

ശവപ്പെട്ടിയുമായി ബിജെപി പ്രതിഷേധസമരം നടത്തി

കരുവന്നൂർ: നിക്ഷേപത്തുക ലഭിക്കാത്തതിനെതുടർന്നുള്ള പൗലോസിന്‍റെ മരണത്തിൽ പ്രതിഷേധിച്ചു കരുവന്നൂര്‍ സഹകരണ ബാങ്കിനുമുമ്പില്‍ ശവപ്പെട്ടിയുമായി ബിജെപിയുടെ പ്രതിഷേധസമരം. ധര്‍ണ ബിജെപി തൃശൂര്‍ സൗത്ത് ജനറല്‍ സെക്രട്ടറി കെ.പി. ഉണ്ണികൃഷ്ണന്‍ ഉദ്ഘാടനം ചെയ്തു. ജില്ലാ ജനറല്‍ സെക്രട്ടറി കൃപേഷ് ചെമ്മണ്ട ആമുഖഭാഷണം നടത്തി. ബിജെപി മണ്ഡലം പ്രസിഡന്‍റ് ആര്‍ച്ച അനീഷ് അധ്യക്ഷത വഹിച്ചു. ജനറല്‍ സെക്രട്ടറിമാരായ ഷൈജു കുറ്റിക്കാട്ട്, സി.സി. രമേഷ്, ബിജെപി സംസ്ഥാന കമ്മിറ്റി അംഗം സന്തോഷ് ചെറാക്കുളം, ജില്ലാ സെക്രട്ടറിമാരായ ശ്യാംജി മാടത്തിങ്കല്‍, രിമ പ്രകാശ്, അജീഷ് പൈക്കാട്ട്, മണ്ഡലം സെക്രട്ടറി ടി.കെ. ഷാജു, ട്രഷറര്‍ ജോജന്‍ കൊല്ലാട്ടില്‍, വൈസ് പ്രസിഡന്‍റ് രമേഷ് അയ്യര്‍, പൊറത്തിശേരി ഏരിയ പ്രസിഡന്‍റ് സൂരജ് കടുങ്ങാടന്‍, ഇരിങ്ങാലക്കുട ടൗണ്‍ ഏരിയ പ്രസിഡന്‍റ് ലിഷോണ്‍ കാട്ട്‌ളാസ്, കൗണ്‍സിലര്‍മാരായ അജയന്‍, സിന്ധു സതീഷ്, ലാമ്പി റാഫേല്‍ എന്നിവര്‍ പങ്കെടുത്തു.

ചികിത്സയ്ക്കു പണംകിട്ടാതെ നിക്ഷേപകന്‍ മരിച്ചു; വൻ പ്രതിഷേധം

ഇരിങ്ങാലക്കുട: ചികിത്സയിലിരിക്കെ മരിച്ച ഗൃഹ നാഥന്‍റെ ചികിത്സയ് ക്കായി ബാങ്കിലെ നിക്ഷേപത്തുക ലഭിച്ചില്ലെ ന്നു ബന്ധുക്കള്‍ ആരോപിച്ചു. സംഭവത്തിൽ വൻപ്രതിഷേധമുയർന്നു. കരുവന്നൂര്‍ സഹകരണ ബാങ്കിലെ നിക്ഷേപകനായ പൊറത്തിശേരി കോട്ടയ്ക്കകത്തുകാരന്‍ പൗലോസ് (68) ആണ് ചികിത്സയിലിരിക്കെ മരിച്ചത്. സൈക്കിളിനുകുറുകെ തെരുവുനായ ചാടിയതിനെത്തുടര്‍ന്ന് വീണുപരിക്കേറ്റു ചികിത്സയിലായിരുന്നു പൗലോസ്. 2024 ഓഗസ്റ്റ് 23-ന് ആയിരുന്നു അപകടം. ഓര്‍മ നഷ്ടപ്പെട്ട പൗലോസ് ഒരുമാസം ആശുപത്രിയില്‍ കഴിഞ്ഞു. ആശുപത്രിച്ചെലവ് 10 ലക്ഷം രൂപയായി. തൃശൂരിലെ സ്വകാര്യ ആശുപത്രിയില്‍ ചികിത്സ നടത്തിയെങ്കിലും സാമ്പത്തികപ്രശ്നംമൂലം പിന്നീടു വീട്ടിലായിരുന്നു ചികിത്സ. വീട്ടിലെത്തിയശേഷവും വൻതുക ചികിത്സയ്ക്കു ചെലവായി. പത്തുവർഷംമുന്പ് പൗലോസ് നാലുലക്ഷം രൂപ കരുവന്നൂർ ബാങ്കിന്‍റെ പൊറത്തിശേരി ശാഖയിൽ നിക്ഷേപിച്ചിരുന്നു. 50,000 രൂപയുടെ സ്ഥിരനിക്ഷേപമുണ്ടായിരുന്നു. നിക്ഷേപിച്ച മുഴുവന്‍തുകയും അപകടംപറ്റിയ സമയത്തു മടക്കിനല്‍കണമെന്ന് ബാങ്ക് അധികൃതരോട് ആവശ്യപ്പെട്ടെങ്കിലും 50,000 രൂപ മാത്രമാണ് നല്‍കിയതെന്നും മുഴുവന്‍ തുകയും അന്നു ലഭിച്ചിരുന്നെങ്കില്‍ കൃത്യമായ ചികിത്സ നല്‍കാന്‍ കഴിയുമായിരുന്നെന്നും പൗലോസിന്‍റെ ഭാര്യ വെറോനിക്ക പറഞ്ഞു. ഓരോ മാസവും പണം ലഭിക്കാന്‍ ചികിത്സയുടെ ബില്ലുകള്‍ ചേര്‍ത്ത് അപേക്ഷ നല്‍കിയിരുന്നുവെങ്കിലും 20,000 രൂപ വീതമാണ് ലഭിച്ചിരുന്നത്. കഴിഞ്ഞ മൂന്നുമാസമായി അതു 10,000 രൂപയായി കുറഞ്ഞതായും ബന്ധുക്കള്‍ പറഞ്ഞു. ബാങ്ക് ക്രൂരത തുടരുന്നു: തോമസ് ഉണ്ണിയാടൻ ഇരിങ്ങാലക്കുട: കരുവന്നൂർ ബാങ്കിന്‍റെ ക്രൂരതയിൽ ജീവിതം പൊലിയുന്നവരുടെ എണ്ണം വർധിച്ചുവരുന്നതിൽ നാടാകെ വിറങ്ങലിച്ചുനിൽക്കുന്നതായി കേരള കോണ്‍ഗ്രസ് ഡെപ്യൂട്ടി ചെയർമാൻ തോമസ് ഉണ്ണിയാടൻ പറഞ്ഞു. ബാങ്കിൽ നിക്ഷേപിച്ച തുക തിരികെ കിട്ടാത്തതുമൂലം ചികിത്സയ്ക്കായി പണം തികയാതെ മരണത്തിനു കീഴടങ്ങേണ്ടിവന്ന പൊറത്തിശേരി കോട്ടയ്ക്കകത്തുകാരൻ പൗലോസിന്‍റെ മരണം സഹിക്കാവുന്നതല്ല. ഇത്തരത്തിൽ മരണപ്പെട്ടവരുടെ എണ്ണം പലതാണ്. ഗുരുതരരോഗം ബാധിച്ച് ചികിത്സയിലുള്ളവർക്കെങ്കിലും നിക്ഷേപിച്ച പണം തിരികെനല്കാൻ ബാങ്ക് അധികൃതർ തയാറാകണമെന്നും ബാങ്കിന്‍റെയും സർക്കാരിന്‍റെയും അനാസ്ഥയ്ക്കെതിരേ കേരള കോണ്‍ഗ്രസ് തുടർസമരപരിപാടികൾ നടത്തുമെന്നും ഉണ്ണിയാടൻ പറഞ്ഞു.

കാന്പസ് ഹോസ്റ്റലുകളിൽ മികച്ച സൗകര്യങ്ങളൊരുക്കും: മുഖ്യമന്ത്രി

മണ്ണുത്തി: കാന്പസുകളിൽ താമസിച്ചുപഠിക്കുന്ന പ്രവണതയ്ക്കൊപ്പം ചേർന്നുകൊണ്ട് ഉന്നതവിദ്യാഭ്യാസസ്ഥാപനങ്ങളിലെ ഹോസ്റ്റലുകളിൽ മികച്ച സൗകര്യങ്ങൾ ഒരുക്കാൻ നടപടികൾ സ്വീകരിക്കുമെന്നു മുഖ്യമന്ത്രി പിണറായി വിജയൻ. സംസ്ഥാന പ്ലാൻ, ആർഐഡിഎഫ് പദ്ധതികളിൽ ഉൾപ്പെടുത്തി കേരള വെറ്ററിനറി ആൻഡ് അനിമൽ സയൻസസ് സർവകലാശാലയുടെ മണ്ണുത്തി കാന്പസിൽ പണികഴിപ്പിച്ച ലേഡീസ് ഹോസ്റ്റൽ, റഫറൽ അനലറ്റിക്കൽ ഡയഗഗ്നോസ്റ്റിക് ലബോറട്ടറി, വികെഐഡിഎഫ്ടി ഓഡിറ്റോറിയം എന്നിവയുടെ ഉദ്ഘാടനം നിർവഹിച്ചു സംസാരിക്കുകയായിരുന്നു മുഖ്യമന്ത്രി. അടിസ്ഥാനവികസനരംഗത്തു മാത്രമല്ല അക്കാദമികരംഗത്തും മികച്ച സൗകര്യങ്ങളും കോഴ്സുകളും ഏർപ്പെടുത്തി കേരള വെറ്ററിനറി ആൻഡ് അനിമൽ സയൻസസ് സർവകലാശാലയെ ആഗോളനിലവാരത്തിലേക്ക് ഉയർത്താനാണ് സർക്കാർ ശ്രമിക്കുന്നതെന്നു മുഖ്യമന്ത്രി പറഞ്ഞു. ആരോഗ്യരംഗത്തു മികവുറ്റ നേട്ടങ്ങൾ കൈവരിക്കാനായെങ്കിലു ചില വൈഷമ്യങ്ങൾ ഇപ്പോഴുമുണ്ട്. സാംക്രമികരോഗങ്ങളുടെ ആധിക്യം അതിൽ പ്രധാനമാണ്. ജന്തുജന്യരോഗങ്ങൾ മറികടക്കുന്നതിന് 32 കോടി ചെലവഴിച്ച് വണ്‍ ഹെൽത്ത് പോളിസി നടപ്പാക്കിയിട്ടുണ്ടെന്നും മുഖ്യമന്ത്രി പറഞ്ഞു. മന്ത്രി ജെ. ചിഞ്ചുറാണി അധ്യക്ഷത വഹിച്ചു. മന്ത്രി കെ. രാജൻ മുഖ്യപ്രഭാഷണം നടത്തി. മേയർ എം.കെ. വർഗീസ്, വൈസ് ചാൻസലർ ഡോ. കെ.എസ്. അനിൽ എന്നിവർ പ്രസംഗിച്ചു.

ബസിൽനിന്നു തെറിച്ചുവീണ് പരിക്കേറ്റ യുവാവ് മരിച്ചു

പഴയന്നൂർ: ബസിൽനിന്നു തെറിച്ചുവീണു ഗുരുതരപരിക്കേറ്റ ഓട്ടിസംബാധിതനായ യുവാവ് മരിച്ചു. ചേലക്കര എളനാട് തേക്കിൻകാട് വീട്ടിൽ രാജന്‍റെ മകൻ അനൂജ് (27) ആണ് മരിച്ചത്. കഴിഞ്ഞ വെള്ളിയാഴ്ച രാവിലെ എട്ടുമണിയോടെ പഴയന്നൂർ - എളനാട് - തൃശൂർ റൂട്ടിൽ ഓടുന്ന ഉണ്ണികൃഷ്ണ ബസിൽനിന്നു വീണാണ് അനൂജിനു തലയ്ക്കു ഗുരുതരപരിക്കേറ്റത്. ഉടൻതന്നെ ചേലക്കര താലൂക്ക് ആശുപത്രിയിലും തുടർന്നു തൃശൂർ മെഡിക്കൽ കോളജ് ആശുപത്രിയിലും പ്രവേശിപ്പിച്ചെങ്കിലും ഇന്നലെ രാവിലെ പത്തോടെ മരിച്ചു.

റസ്റ്റ് ഹൗസിൽനിന്നു വീണ് മരിച്ചു

കുന്നംകുളം: കക്കാട് പിഡബ്ല്യുഡി റസ്റ്റ് ഹൗസിന്‍റെ ഒന്നാം നിലയിൽ നിന്ന് കാൽവഴുതി താഴേക്ക് വീണ് പൊന്നാനി സ്വദേശിയായ വയോധികന് ദാരുണാന്ത്യം. പൊന്നാനി തൃക്കാവ് പാണ്ടംപറമ്പത്തുമന വീട്ടിൽ നാരായണൻ ഭട്ടതിരിപ്പാടിന്‍റെ മകൻ ശങ്കരനാണ്(70) മരിച്ചത്. ഇന്നലെ രാത്രി എട്ടോടെയായിരുന്നു സംഭവം. ഉടനെ കുന്നംകുളത്തെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.

തലകറക്കം അനുഭവപ്പെട്ട കരാട്ടെ ഇൻസ്ട്രക്ടർ മരിച്ചു

വാടാനപ്പള്ളി: പരിശീലനത്തിനിടെ തലകറക്കം അനുഭവപ്പെട്ട കരാട്ടെ ഇൻസ്ട്രക്ടർ മരിച്ചു. വാടാനപ്പള്ളി ഗോൾഡൻ വളവിൽ കണ്ടൻ ചക്കി വീട്ടിൽ വിജയന്‍റെ മകൻ ജിതേഷ് (ജിതു - 43) ആണ് മരിച്ചത്. ഞായറാഴ്ച പരിശീലനത്തിനിടെ തലകറക്കം അനുഭവപ്പെട്ട ജിതേഷിനെ തൃശൂരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഗോജു റിയു കരാട്ടെ ഇൻസ്ട്രക്ടറാണ്. സംസ്കാരം ഇന്ന് രാവിലെ 11ന് വീട്ടുവളപ്പിൽ. ഭാര്യ: ഹരിത. അമ്മ: ഊർമിള. മക്കൾ: അമൃതാഞ്‌ജലി, റിയോജിത്ത്.

ശ്രീനാരായണപുരം കല്ലുംപുറത്ത് കുടിവെള്ളക്ഷാമം സമ്പൂർണമായി പരിഹരിക്കപ്പെടുന്നു

ശ്രീനാരായണപുരം: ദേശീയ പാത 66 നിർമാണം ഉൾപ്പെടെയുള്ള വിവിധ പ്രശ്നങ്ങളാൽ കല്ലുംപുറം ഗ്രാമവാസികൾക്ക് വാട്ടർ അതോറിറ്റിയുടെ ശുദ്ധജലം കൃത്യമായി വിതരണം ചെയ്തിട്ട് വർഷങ്ങളായി. ഈ സാഹചര്യത്തിൽ ജലനിധിയെന്ന പേരിൽ നാട്ടുകാരുടെ കൂട്ടായ്മയിൽ ശുദ്ധജല വിതരണത്തിനായി ഒരു പദ്ധതി ആരംഭിക്കുകയായിരുന്നു. ഈ പദ്ധതി വിജയകരമായി തുടർന്ന് രണ്ടാംഘട്ടവും ആരംഭിച്ചു. 46 കുടുംബങ്ങളാണ് പദ്ധതിയുടെ ഗുണഭോക്താക്കൾ. 1850 മീറ്റർ നീളമുള്ള പൈപ്പ് ലൈനാണ് കുടിവെള്ള വിതരണത്തിനായി ഉപയോഗിച്ചിട്ടുള്ളത്. ദേശീയ പാത 66 നോടു ചേർന്ന് മൂന്ന് ബോർവൽ താഴ്ത്തി വെള്ളമെടുടുത്ത് പ്രത്യേകം മോട്ടോർ സ്ഥാപിച്ച് പ്രത്യേകം തയ്യാറാക്കിയ 23 അടി ഉയരത്തിൽ സ്ഥാപിച്ച 5000 ലിറ്റർ കൊള്ളുന്ന ടാങ്കിൽ വെള്ളം ശേഖരിച്ച് അവിടെ രണ്ടാമത് മറ്റൊരു മോട്ടോർ സ്ഥാപിച്ചാണ് വെള്ള വിതരണം നടത്തുന്നത്. 24 മണിക്കൂറും റിമോട്ട് കൺട്രോളിൽ പ്രവർത്തിക്കുന്ന മോട്ടോറും ഇതോടൊപ്പം ബന്ധിപ്പിച്ചിട്ടുണ്ട്. ആകെ ചിലവ് 5,75,000 രൂപ വരുന്ന പദ്ധതിക്ക് ഇതുവരെ 2,65,000 ഉപഭോക്തൃ വിഹിതവും ശേഷം വിവിധ സ്ഥാപനങ്ങൾ വ്യക്തികൾ എന്നിവയുടെ സഹായവും ലഭിച്ചിട്ടുണ്ട്. ബാക്കി വരുന്ന സംഖ്യ ക്ക് സി പി ട്രസ്റ്റിന്റ സഹായം ലഭിച്ചിട്ടുണ്ട്. ജലനിധി- ഒന്ന് പദ്ധതി രണ്ട് മാസങ്ങൾക്ക് മുമ്പ് പ്രവർത്തനം ആരംഭിച്ചിരുന്നു. ശ്രീനാരായണപുരം ഗ്രാമപഞ്ചായത്ത് ഒൻപതാം വാർഡ് കേന്ദ്രീകരിച്ചാണ് രണ്ടു പദ്ധതികളും പ്രവർത്തിക്കുന്നത്. ആല- കല്ലുംപുറത്ത് ചേർന്ന ചടങ്ങിൽ സിപി ട്രസ്റ്റ് ചെയർമാൻ സി.പി.സാലിഹ് പദ്ധതിയുടെ ഉദ്ഘാടനം നിർവഹിച്ചു. പദ്ധതി കൺവീനർ ബിന്ദു സുദർശനൻ അധ്യക്ഷയായി. ട്രഷറർ എം.എസ്. രാധാകൃഷ്ണൻ, സൈനുദ്ദീൻ കാട്ടകത്ത്, അഡ്വ. എ.ഡി സുദർശനൻ, അസീസ് കാട്ടകത്ത്, പ്രഫ. സിറാജുദ്ദീൻ, ദിനിൽ മാധവ്, കെ.കെ. ഘോഷ് എന്നിവർ പ്രസംഗിച്ചു. പദ്ധതിയുടെ നിർവ്വഹണ പ്രവർത്തനങ്ങളിൽ മാതൃകാപരമായി സഹകരിച്ച ടി.എസ്. ഹരീഷ് , സി.കെ.വിമൽ , സി.കെ.കുട്ടൻ, കെ.എൻ.മധു ,ശോഭന രവീന്ദ്രൻ, എം.എസ്.സുഭാഷിണി, ലളിത ബാലൻ, സി. കെ. ശകുന്തള എന്നിവരെ ആദരിച്ചു.

മഴ കനത്തു, ദുരിതവും

മുസാഫരിക്കുന്നില്‍ മണ്ണിടിഞ്ഞു കരൂപ്പടന്ന: മഴ കനത്തതോടെ വെള്ളാങ്കല്ലൂര്‍ പഞ്ചായത്തിലെ പാരിജാതപുരം ക്ഷേത്രത്തിനു പുറകിലെ മുസാഫരിക്കുന്നില്‍ മണ്ണിടിച്ചില്‍. മുത്തോളാന്‍ വീട്ടില്‍ ശശി ഭാര്യ അംബികയുടെ വീടിന്‍റെ മുന്‍ഭാഗത്തുള്ള റോഡിനോട് ചേര്‍ന്ന് കരിങ്കല്ല് കൊണ്ട് നിര്‍മിച്ചിട്ടുള്ള സംരക്ഷണഭിത്തിയാണ് ഭാഗികമായി തകര്‍ന്നത്. സംരക്ഷണ ഭിത്തിയുടെ മറ്റു ഭാഗങ്ങളും വിണ്ട് നില്‍ക്കുകയാണ്. ഏതു സമയവും ഇടിഞ്ഞു വീഴാവുന്ന അവസ്ഥയിലാണ്. കാലവര്‍ഷം കണക്കിലെടുത്ത് മണ്ണിടിച്ചിലിന് സാധ്യതയുണ്ടെന്ന് കണ്ടെത്തിയ പ്രദേശങ്ങളിലൊന്നായ മുസാഫരിക്കുന്ന് അതിജാഗ്രത പുലര്‍ത്തേണ്ട പ്രദേശങ്ങളുടെ പട്ടികയില്‍ ജില്ലാ ഭരണകൂടം ഉള്‍പ്പെടുത്തിയിട്ടുള്ള സ്ഥലമാണ്. ആഴ്ചകള്‍ക്കു മുമ്പ് ഈ പ്രദേശത്തെ 23 കുടുംബങ്ങളോട് മാറി താമസിക്കുവാന്‍ വില്ലേജ് ഓഫീസര്‍ നോട്ടീസ് നല്‍കിയിരുന്നു. മരങ്ങള്‍ മുറിച്ചുനീക്കി കരുവന്നൂര്‍: പുത്തന്‍തോട് കെഎല്‍ഡിസി കനാലിനു സമീപത്തെ മരങ്ങള്‍ മുറിച്ചുനീക്കി. പുത്തന്‍തോട് പാലത്തിനു സമീപം ബണ്ട് റോഡ് കെട്ടി സംരക്ഷിക്കുന്നതിനോടു ചേര്‍ന്നുള്ള മരങ്ങള്‍ കനത്തമഴയില്‍ കനാലിലേക്ക് മറിഞ്ഞുവീണ് നീരൊഴുക്ക് തടസപ്പെട്ടത് പ്രതിഷേധമുയര്‍ത്തിയിരുന്നു. ഈ മരങ്ങളടക്കം കനാലിനോടുചേര്‍ന്ന് ബണ്ടില്‍നില്‍ക്കുന്ന അപകടാവസ്ഥയിലുള്ള മരങ്ങള്‍ മുറിച്ചുനീക്കുകയായിരുന്നു. നഗരസഭ മൂന്ന്, നാല്, നല്പത് എന്നീ വാര്‍ഡുകളിലൂടെ കടന്നുപോകുന്ന കനാലിന്‍റെ ഇരുവശത്തും അപകടകരമായ രീതിയില്‍ നില്‍ക്കുന്ന മരങ്ങളുടെ ചില്ലകളാണ് കെഎല്‍ഡിസി അധികൃതര്‍ മുറിച്ചുനീക്കുന്നതെന്ന് വാര്‍ഡ് കൗണ്‍സിലര്‍ അല്‍ഫോന്‍സാ തോമസ് പറഞ്ഞു. ആൽമരം കടപുഴകി മുരിങ്ങൂർ: അതിശക്തമായ കാറ്റിലും മഴയിലും നാഷണൽ ഹൈവേയിൽനിന്നു കാടുകുറ്റി പഞ്ചായത്തിലേക്കുള്ള പ്രവേശന കവാടത്തിൽ മുരിങ്ങൂർ ഡിവൈൻനഗർ ജംഗ്ഷനിൽ നിന്ന കൂറ്റൻ ആൽമരം കടപുഴകി. ഇന്നലെ വൈകീട്ട് 6.15നാണ് സംഭവം. 11 കെവി അടക്കമുള്ള എച്ച്ടി,എൽടി വൈദ്യുതി ലൈനുകൾ ഉഗ്രശബ്ദത്തോടെ പൊട്ടിവീണു. കമ്പികൾ കൂട്ടിമുട്ടി തീപ്പൊരിയും ഉയർന്നിരുന്നു. സമീപത്തെ ഓട്ടോസ്റ്റാൻഡിലേക്ക് മറയാതെ മറുഭാഗത്തേക്ക് മറഞ്ഞതിനാലും വാഹനങ്ങളും ആളുകളും ആ സമയത്ത് അതിലൂടെ കടന്നുപോകാതിരുന്നതിനാലും വൻ അപകടമാണ് ഒഴിവായത്. മരത്തിന് താഴെ നിർത്തിയിട്ടിരുന്ന ഒരു ഇരുചക്രവാഹനത്തിന് കേടുപാട് സംഭവിച്ചു. കെ.എസ്.ഇ.ബി. ജീവനക്കാർ സ്ഥലത്തെത്തി ലൈൻ ഓഫ് ചെയ്തു. ചാലക്കുടിയിൽ നിന്നെത്തിയ ഫയർഫോഴ്സ് സംഘം മരം വെട്ടിമാറ്റി. മണിക്കൂറുകളോളം കാടുകുറ്റി ഭാഗത്തേയ്ക്കുള്ള ഗതാഗതം സ്തംഭിച്ചു. ആൽത്തറയ്ക്ക് വിള്ളൽ സംഭവിച്ചിട്ടുണ്ടെന്നും ആൽമരം അപകടത്തിലാണെന്നും കാണിച്ച് കളക്ടർക്കും എൻഎച്ച്എഐ പ്രൊജക്ട് ഡയറക്ടർക്കും ഗുരുവായൂർ ഇൻഫ്രാസ്ട്രക്ച്ചർ കമ്പനിക്കും നാളുകൾക്ക് മുമ്പ് ഇ-മെയിൽ സന്ദേശം അയച്ചിരുന്നതായി മേലൂർ പഞ്ചായത്ത് പ്രസിഡന്‍റ് എം.എസ്.സുനിത പറഞ്ഞു. വിഷയം എൻഎച്ച്എഐ പ്രൊജക്ട് മാനേജരുടെയും ഡിവൈഎസ്പി, സിഐ എന്നിവരുടെ ശ്രദ്ധയിൽപ്പെടുത്തിയിരുന്നതായും പ്രസിഡന്‍റ്് പറഞ്ഞു. കാലവർഷം ശക്തമായതോടെ അപകടാവസ്ഥയിൽ നിൽക്കുന്ന മരങ്ങൾ മുറിച്ചു മാറ്റുന്നതിൽ വൻ വീഴ്ചയാണ് അധികൃതരുടെ ഭാഗത്ത് നിന്നു ഉണ്ടാകുന്നതെന്ന വ്യാപക പരാതിയാണ് നിലനിൽക്കുകയാണ്. ഡിവൈൻ നഗർ അടിപ്പാതയിലും ഉപറോഡുകളിലും ചെറിയ മഴയ്ക്ക് പോലും രൂക്ഷമായ വെള്ളക്കെട്ട് രൂപപ്പെടുന്നുവെന്ന പരാതികൾക്ക് പിന്നാലെ ആൽമരം കടപുഴകിയതും ജനങ്ങളെ ആശങ്കയിലാഴ്ത്തുകയാണ്. തീരദേശത്ത് വെള്ളക്കെട്ട് കയ്പ്പമംഗലം: കനത്ത മഴയെതുടര്‍ന്ന് കയ്പ്പമംഗലം മേഖലയില്‍ വെള്ളക്കെട്ട് രൂക്ഷമായി. പന്ത്രണ്ടാം വാര്‍ഡിലെ ഗാര്‍ഡിയന്‍ ആശുപത്രി പരിസരം, മനയ്ക്കപ്പാടം സേവന അങ്കണവാടി പരിസരം, പള്ളിത്താനം തുടങ്ങിയ സ്ഥലങ്ങളിലാണ് വെള്ളക്കെട്ട് രൂക്ഷമായത്. ഇനിയും മഴ തുടര്‍ന്നാല്‍ വീടുകള്‍ക്കുള്ളിലേയ്ക്ക് വെള്ളം കയറുമെന്ന അവസ്ഥയാണ്. രണ്ടാം വാര്‍ഡിലെ കൂരിക്കുഴി സലഫി നഗര്‍, ആറാം വാര്‍ഡിലെ കാളമുറി കിഴക്കുഭാഗം, അഞ്ചാം വാര്‍ഡിലെ പള്ളിനട ഭാഗം എന്നിവടങ്ങളിലാണ് ദുരിതം ഏറിയത്. പലയിടത്തും വീട്ടുകാര്‍ ബന്ധുവീടുകളിലേയ്ക്ക് മാറിത്തുടങ്ങിയിട്ടുണ്ട്. രണ്ട് ദിവസമായി തുടരുന്ന തോരാമഴയാണ് മേഖലയില്‍ വെള്ളക്കെട്ട് രൂക്ഷമാക്കിയത്. എടത്തിരുത്തി പഞ്ചായത്തിന്‍റെ പല മേഖലകളിലും വെള്ളക്കെട്ട് രൂക്ഷമായിക്കൊണ്ടിരിക്കുകയാണ്. വൈദ്യുതി വിതരണം തടസപ്പെടുന്നത് പതിവാകുന്നു വെള്ളിക്കുളങ്ങര: 11 കെവി ലൈനിലേയ്ക്ക് മരം വീണതിനെ തുടര്‍ന്ന് മലയോരത്തെ ചൊക്കന, നായാട്ടുകുണ്ട് ഗ്രാമങ്ങളിലും കാരിക്കടവ് ആദിവാസി നഗറിലുമുള്ള കുടുംബങ്ങള്‍ കഴിഞ്ഞ രാത്രി ഇരുട്ടിലായി. വെള്ളികുളങ്ങര -ചൊക്കന റോഡിലെ പത്തരക്കുണ്ടിലാണ് ശനിയാഴ്ച രാത്രിയില്‍ വന്‍മരം റോഡിലേക്കും ഇലക്ട്രിക് ലൈനിലേക്കും വീണത്. ഇതേതുടര്‍ന്ന് 11 കെവി ലൈനിലെ കമ്പികള്‍ പൊട്ടിവീണു. ഇതേ തുടര്‍ന്ന് തടസപ്പെട്ട് വൈദ്യുതി വിതരണം ഇന്നലെ ഉച്ചയോടെയാണ് പുനഃസ്ഥാപിച്ചത്. പത്തരക്കുണ്ട് മുതല്‍ നായാട്ടുകുണ്ട് പ്ലാവിന്‍ കയറ്റം വരെ റോഡിനിരുവശത്തുമായി നിരവധി മരങ്ങളാണ് അപകടകരമായ നിലയില്‍ ഏതുസമയവും 11 കെവിലൈനിലേക്ക് വീഴാറായി നില്‍ക്കുന്നത്. അപകടാവസ്ഥ പരിഹരിക്കണമെന്നാവശ്യപ്പെട്ട് കളക്ടറടക്കമുള്ളവര്‍ക്ക് പരാതി നല്‍കിയിട്ടും നടപടി ഉണ്ടായിട്ടില്ലെന്ന് നാട്ടുകാര്‍ പറയുന്നു. കാട്ടാനശല്യമുള്ള ചൊക്കന, കാരിക്കടവ് പ്രദേശങ്ങളിലേക്കുള്ള വൈദ്യുതി ലൈന്‍ കേബിള്‍ ലൈനാക്കി മാറ്റണമെന്ന ആവശ്യവും പരിഗണിക്കപ്പെടാതെ കിടക്കുകയാണ്. വെള്ളിക്കുളങ്ങര-ചൊക്കന 11 കെവി ലൈനില്‍ തടസമുണ്ടായാല്‍ മുപ്ലിയില്‍ നിന്ന് ചൊക്കനയിലേക്ക് വൈദ്യുതിയെത്തിക്കാന്‍ സംവിധാനം നിലവിലുണ്ടെങ്കിലും ഇതും ഫലപ്രദമായി നടപ്പാക്കപ്പെടുന്നില്ലെന്നാണ് നാട്ടുകാരുടെ പരാതി. കയ്പമംഗലത്ത് സൈറൻ മുഴങ്ങി കാളമുറി: കയ്പമംഗലത്ത് അതി തീവ്ര മഴ മുന്നറിയിപ്പ്. ഇന്നലെ വൈകീട്ട് 4.30ന്്‌ ഇതു സംബന്ധിച്ച് അപകട മുന്നറിയിപ്പ് നൽകി. കാലാവസ്ഥാ, ദേശീയ പ്രധാനമായ മറ്റ് അടിയന്തര സന്ദർഭങ്ങളിലും ജനങ്ങൾ ജാഗരൂകമായിരിക്കുന്നതിനും ഏത് സാഹചര്യത്തെയും അതിജീവിക്കാനുള്ള തയാറെടുപ്പുകൾ ഉടനടി സ്വീകരിക്കാൻ പൊതുജനം തയാറായിരിക്കണമെന്ന ഉദ്ദേശ്യത്താലാണ് സൈറൻ മുഴക്കുന്നത്. ദേശീയ ദുരന്ത നിവാരണ കേന്ദ്രത്തിന്‍റെ നിർദേശാനുസരണം സംസ്ഥാനത്തെ എല്ലാ നിയോജക മണ്ഡലങ്ങളിലും പ്രത്യേകം തയാറാക്കിയ കേന്ദ്രങ്ങളിലാണ് ഇങ്ങനെ സൈറൻ മുഴക്കിയത്. കയ്പമംഗലം നിയോജക മണ്ഡലത്തിലെ കയ്പമംഗലം ഗവ. ഫിഷറീസ് ഹയർ സെക്കൻഡറി സ്കൂളിലാണ് സൈറൻ പ്രവർത്തിപ്പിച്ചത്. പെരിഞ്ഞനത്ത് ദുരിതാശ്വാസക്യാമ്പ് തുറന്നു പെരിഞ്ഞനം: കനത്തമഴയിൽ വീടുകളിൽ വെള്ളം കയറിയതിനെ തുടർന്ന് പെരിഞ്ഞനം പഞ്ചായത്തിൽ ദുരിതാശ്വാസ ക്യാമ്പ് ആരംഭിച്ചു. പെരിഞ്ഞനം ഗവ. യുപി സ്കൂളിലാണ് ക്യാമ്പ് തുറന്നത്. പത്താം വാർഡ് കുടിലിങ്ങൽ കോളനിയിൽ നിന്നുമുള്ള മൂന്ന് കുടുംബങ്ങളാണ് ക്യാമ്പിൽ ഉള്ളത്. പതിനാലാം വാർഡിലും കനത്ത വെള്ളക്കെട്ട് തുടരുന്നതിനാൽ ഇവിടെ നിന്നും കുടുംബങ്ങളെ ക്യാമ്പിലേക്ക് മാറ്റാൻ സാധ്യതയുണ്ട്. പഞ്ചായത്ത് - വില്ലേജ് അധികൃതർ ആവശ്യമായ സംവിധാനങ്ങൾ ക്യാമ്പിൽ ഒരുക്കിയിട്ടുണ്ട്.

കേബിളിൽ കുരുങ്ങി ഓട്ടോറിക്ഷ മറിഞ്ഞു

കാടുകുറ്റി: കൊരട്ടി - കാടുകുറ്റി പാതയിൽ തറവാട്കവലയിൽ കെ - ഫോണിന്‍റെ കേബിളിൽ കുരുങ്ങി ഓട്ടോറിക്ഷ മറിഞ്ഞു. ഡ്രൈവർ നിസാര പരിക്കുകളോടെ രക്ഷപ്പെട്ടു. ഇന്നലെ രാവിലെ 11.30 മണിയോടെയായിരുന്നു സംഭവം. യാത്രക്കാരെ നിർദ്ദിഷ്ട ഇടത്ത് എത്തിച്ച് മടങ്ങവെയാണ് വാഹനം കേബിളിൽ കുടുങ്ങിയത്. ഓടിക്കൂടിയ നാട്ടുകാർ ഓട്ടോറിക്ഷ ഉയർത്തി ഡ്രൈവറെ പുറത്തേയ്ക്കെടുത്തു. ഇന്നലെ പുലർച്ചെ ഈ വഴികടന്നുപോയ ടോറസ് ലോറി വൈദ്യുതി പോസ്റ്റിലിടിച്ച് പോസ്റ്റ് ചെരിഞ്ഞതായും പറയുന്നു. തുടർന്നാണ് കേബിൾ താഴേക്ക് തൂങ്ങിക്കിടന്നത്. ദേശീയപാതയിൽ നിന്നും ഗതാഗതക്കുരുക്കൊഴിവാക്കാൻ ഈ റോഡിനെ ആശ്രയിക്കുന്ന വലിയ വാഹനങ്ങൾ തട്ടി കേബിളുകൾ പൊട്ടിവീഴുന്നത് നിത്യസംഭവമായി മാറിയിരിക്കുകയാണ്. റോഡുകളുടെ തകർച്ച പരിഹരിക്കണമെന്നും അമിതഭാരവുമായി വരുന്ന ഇത്തരം ഭാരവാഹനങ്ങൾക്ക് നിയന്ത്രണം വേണമെന്നാവശ്യപ്പെട്ട് കാടുകുറ്റി പഞ്ചായത്ത് കാര്യാലയത്തിനു മുന്നിൽ ജനകീയ സമിതിയുടെ നേതൃത്വത്തിൽ കഴിഞ്ഞ ദിവസം വൻ പ്രതിഷേധവും സംഘടിപ്പിച്ചിരുന്നു.

ചെട്ടിക്കാട് വിശുദ്ധ അന്തോണീസിന്‍റെ മരണത്തിരുന്നാൾ നാളെ

ചെട്ടിക്കാട്: വിശുദ്ധ അന്തോണീസിന്‍റെ തീർത്ഥാടന ദേവാലയത്തിൽ അത്ഭുത പ്രവർത്തകനായ വിശുദ്ധന്‍റെ മരണത്തിരുനാൾ നാളെ നടക്കും. രാവിലെ 6.15 മുതൽ വൈകിട്ട് 6.30 വരെ ദിവ്യബലി നൊവേന, ആരാധന എന്നിവ നടക്കും. രാവിലെ ഒൻപതു മുതൽ ഊട്ടുനേർച്ച വിതരണം ചെയ്യും. രാവിലെ 10.30ന് നടക്കുന്ന തിരുനാൾ ദിവ്യബലിയ്ക്ക് ഫാ. പ്രിൻസ് പഴമ്പിള്ളി ഒഎസ്ജെ മുഖ്യകാർമികനാകും. തുടർന്ന് നൊവേന, ആരാധന വിശുദ്ധ അന്തോണീസിന്‍റെ തിരുശേഷിപ്പുകളായ അഴുകാത്ത നാവ്, കൈയ്യുടെ അസ്ഥി, സാഭാവസ്ത്രത്തിന്‍റെ ഒരു ഭാഗം എന്നിവ സൂക്ഷിച്ചിരിക്കുന്ന ഇന്ത്യയിലെ ഏക തീർത്ഥാടന കേന്ദ്രമായതിനാൽ വിശുദ്ധന്‍റെ മരണത്തിരുനാളിൽ പങ്കെടുക്കുന്നതിനായി അയൽ സംസ്ഥാനങ്ങളിൽ നിന്നുൾപ്പെടെ തീർത്ഥാടകർ ദേവാലയത്തിലേക്ക് എത്തിചേരുമെന്നതിനാൽ വിശ്വസികൾക്ക് തിരുശേഷിപ്പുകൾ വണങ്ങുന്നതിനും പൊൻനാവ് എടുത്തുവയ്ക്കൽ നേർച്ചയ്ക്കും അടിമ സമർപ്പണത്തിനും വിപുലമായ ക്രമീകരണങ്ങൾ ഒരുക്കിയിട്ടുള്ളതായി റെക്ടർ റവ.ഡോ. ബെന്നി വാഴക്കൂട്ടത്തിൽ, ഫാ. അജയ് ആന്‍റണി പുത്തൻപറമ്പിൽ എന്നിവർ അറിയിച്ചു.

യാത്രക്കാരന് രക്ഷകരായി കെഎസ്ആർടിസി ജീവനക്കാർ

ചാലക്കുടി: കെഎസ്ആർടിസി ബസിൽ യാത്രക്കാരന് രക്ഷകരായി ജീവനക്കാർ. "മലക്കപ്പാറ - ചാലക്കുടി റൂട്ടിൽ ഓടുന്ന കെഎസ്ആർടിസി ബസിലെ ജീവനക്കാരാണ് അസുഖം ബാധിച്ച യാത്രക്കാരനെ ബസിൽ ആശുപത്രിയിലെത്തിച്ചത്. കൊന്നക്കുഴിക്ക് സമീപം ചാട്ടുകല്ല് സ്റ്റോപ്പിൽ നിന്നാണ് 73കാരനായ കൊന്നക്കുഴി കള്ളിയത്ത് പറമ്പിൽ ജോണിയും ഭാര്യയും ബസിൽ കയറിയത്. ഏതാനും സമയം കഴിഞ്ഞപ്പോൾ ജോണിക്ക് അവശത അനുഭവപ്പെട്ടു തുടങ്ങി. അധികം വൈകാതെ ജോണി കുഴഞ്ഞുവീണു. സംഭവം ശ്രദ്ധയിൽപ്പെട്ട കണ്ടക്ടർ ഷാജൻ ഉടൻ തന്നെ ജോണിയ്ക്കു പ്രഥമശുശ്രൂഷ നൽകി. പിന്നാലെ പ്രദേശത്തെ പ്രാഥമിക ആരോഗ്യ കേന്ദ്രത്തിലെ ജോലികഴിഞ്ഞ് മടങ്ങിപ്പോകുന്ന ബസിലെ യാത്രക്കാരായ രണ്ട് നഴ്സുമാരും സഹായത്തിനെത്തി. ഇതിനിടയിൽ ആംബുലൻസിനെ ബന്ധപ്പെടാൻ ശ്രമിച്ചെങ്കിലും ലഭിക്കാതെ വന്നതോടെ ബസ് ഡ്രൈവർ അതിവേഗത്തിൽ ചാലക്കുടി സെന്‍റ്് ജെയിംസ് ആശുപത്രിയിലേക്ക് എത്തിച്ചു. പല സ്റ്റോപ്പുകളിലും ഇറങ്ങേണ്ട യാത്രക്കാർ ബസിൽ ഉണ്ടായിരുന്നെങ്കിലും അവരാരും സ്റ്റോപ്പുകളിൽ ഇറങ്ങാതെ രോഗിയെ ആശുപത്രിയിൽ എത്തിക്കാൻ സഹകരിച്ചതും ജോണിയുടെ ജീവൻ രക്ഷിക്കാൻ തുണയായി. ചാലക്കുടി ഡിപ്പോയിലെ കണ്ടക്ടർ ഷൊർണൂർ കവളപ്പാറ സ്വദേശി ഷാജിന്‍റേയും ആമ്പല്ലൂർ സ്വദേശി ഡ്രൈവർ ഷിമിലിന്‍റേയും നേതൃത്വത്തിൽ ആയിരുന്നു രക്ഷാപ്രവർത്തനം. രോഗിയെ സുരക്ഷിതമായി ആശുപത്രിയിൽ എത്തിച്ചശേഷം ബസ് ഡിപ്പോയിലേക്ക് മടങ്ങി. യാത്രക്കാർ ചാലക്കുടിയിൽ നിന്നും അടുത്ത ബസിൽ വീടുകളിലേക്കുപോയി. ജീവനക്കാരുടെയും യാത്രക്കാരുടെയും സമയോചിത ഇടപെടൽ മൂലം വയോധികന്‍റെ ജീവൻ രക്ഷിക്കാൻ കഴിഞ്ഞു.

ദേവാലയങ്ങളില്‌ തിരുനാളാഘോഷം

പെരുവല്ലൂർ സെന്‍റ് ആന്‍റണീസ് ദേവാലയം ഇടവക മധ്യസ്ഥനായ വിശുദ്ധ അന്തോണീസിന്‍റെയും വിശുദ്ധ മറിയം ത്രേസ്യയുടേയും സംയുക്ത ഊട്ടുതിരുനാളിന് കൊടികയറി. ഇന്നലെ രാവിലെ നടന്ന ആഘോഷമായ ദിവ്യബലിക്കുശേഷം പാവറട്ടി തീർഥകേന്ദ്രം വികാരി ഫാ. ആന്‍റണി ചെമ്പകശേരി കൊടിയേറ്റ് നിർവഹിച്ചു. ഇടവക വികാരി ഫാ. ഫ്രാങ്ക്ളിൻ കണ്ണനായ്ക്കൽ സഹകാർമികനായി. തിരുനാളിന്‍റെ ഭാഗമായി ഇന്നുമുതൽ ശനി വരെ വൈകീട്ട് ആറിന് വിശുദ്ധ കുർബാന, നൊവേന, ലദിഞ്ഞ് എന്നിവ ഉണ്ടായിരിക്കും. ഊട്ടുതിരുനാൾ ദിവസമായ ഞായറാഴ്ച രാവിലെ 10ന് ആഘോഷമായ തിരുനാൾ ദിവ്യബലിക്ക് ഫാ. ജോയ് പുത്തൂർ മുഖ്യകാർമികനാകും. ഫാ. സിജോൺ കുഴിക്കാട്ടുമ്യാലിൽ തിരുനാൾ സന്ദേശംനൽകും. തുടർന്ന് പ്രസുദേന്തി വാഴ്ച, പ്രദക്ഷിണം, ഊട്ടുനേർച്ച ആശിർവാദം, വിതരണം എന്നിവ നടക്കും. ഒല്ലൂർ സെന്‍റ് ആന്‍റണീസ് ഫൊറാോന പള്ളി ഇടവക മധ്യസ്ഥനായ വിശുദ്ധ അന്തോണീസിന്‍റെ തിരുനാൾ ആഘോഷിച്ചു. ആഘോഷമായ ദിവ്യബലിക്ക് ഫാ. ആന്‍റണി നമ്പളത്ത് മുഖ്യകാർമികത്വംവഹിച്ചു. ഫാ. ആന്‍റണി തട്ടാശേരി സന്ദേശംനൽകി. തുടർന്ന് പ്രദക്ഷിണവും നേർച്ചപ്പായസവിതരണവും ഉണ്ടായിരുന്നു. റവ.ഡോ. പോൾ പൂവത്തിങ്കൽ നയിച്ച സംഗീതനിശയും അർണോസ് പാതിരിയെക്കുറിച്ച് റവ.ഡോ. ജോർജ് തേനംകുടം അനുസ്മരണ പ്രഭാഷണവും നടത്തി. വികാരി ഫാ. വർഗീസ് കുത്തൂർ, അസി.വികാരിമാരായ ഫാ. അഡ്വിൻ ഐനിക്കൽ, ഫാ. തേജസ് കുന്നംപിള്ളിൽ, കൈക്കാരന്മാരായ സെബി വല്ലച്ചിറക്കാരൻ, പോൾ കുണ്ടുകുളം, ആന്‍റണി ചുങ്കത്ത്, റാഫി ചെമ്മണം എന്നിവർ നേതൃത്വംനൽകി. കിള്ളിമംഗലം സെന്‍റ് ആന്‍റണീസ് പള്ളി ഊട്ടുതിരുനാൾ ആഘോഷിച്ചു. നൂറുകണക്കിന് വിശ്വാസികൾ ചടങ്ങിൽ പങ്കെടുത്തു. തൃശൂർ അതിരൂപത വികാരി ജനറാൾ മോൺ.ഫാ. ജെയിസൺ കൂനംപ്ലാക്കൽ മുഖ്യകാർമികത്വം വഹിച്ചു. ഫാ. ജോർജ് നിരപ്പുക്കാല, ഫാ. ഷിന്‍റോ മാറോക്കി സഹകർമികരായി. സോബിൻ ചാണിത്തറ, വിനിഷ് കളപ്പുര തട്ടേൽ, സുനിൽ മറ്റപ്പിള്ളി, ജോസ് കൈതകുളങ്ങര, സിബി ജോർജ്, സജി ജോസഫ്, അനൂപ് മാത്യു എന്നിവർ നേതൃത്വംനൽകി.‌ ആറ്റുപുറം സെന്‍റ് ആന്‍റണീസ് പള്ളി വിശുദ്ധ അന്തോണിസിന്‍റെ ഊട്ടുതിരുനാൾ ആഘോഷിച്ചു. തിരുനാൾ കുർബാനയ്ക്ക് അത്താണി ടിംഹാൻസ് ഡയറക്ടർ ഫാ. ജോബി കടപ്പൂരാൻ മുഖ്യകാർമി കനായി. ജൂബിലി മിഷൻ ഹോസ്പിറ്റൽ അസി.ഡയറക്ടർ ഫാ. തോമസ് പൂപ്പാടി സന്ദേശംനൽകി. പ്രദക്ഷിണത്തിനു വികാരി ഫാ. ഡെന്നീസ് മാറോക്കി കാർമികനായി. ജനറൽ കൺവീനർ സി.വി. ജോസഫ്, ട്രസ്റ്റിമാരായ കെ.ടി. സൈമൺ, ഇ.ജെ. ബെന്നി, പി.ജെ. ഡേവിഡ് തുടങ്ങിയവർ നേതൃത്വംനൽകി.

സ്വകാര്യ കെട്ടിടത്തിന്‍റെ വരാന്തയിൽ രക്തം: പോലീസ് അന്വേഷണം ആരംഭിച്ചു

അരിമ്പൂർ: കുന്നത്തങ്ങാടിയിൽ സ്വകാര്യ കെട്ടിടത്തിന്‍റെ നടവഴിയിൽ പലയിടത്തായി രക്തംകണ്ടെത്തിയത് ആശങ്കയ്ക്കിടയാക്കി. കെട്ടിടത്തിന്‍റെ 15 മീറ്ററിലധികം നീളമുള്ള വരാന്തയിലും ഗോവണിയിലുമാണ് ശനിയാഴ്ച രാവിലെ രക്തംകണ്ടത്. ഹൈടെക് മെഡിക്കൽലാബ്, കെഎസ്എഫ്ഇ കുന്നത്തങ്ങാടി ശാഖ ഓഫീസ്, തൃശൂർ താലൂക്ക് ചെത്തുതൊഴിലാളി സംഘത്തിന്‍റെ നീതി മെഡിക്കൽ സ്റ്റോർ, കമ്പ്യൂട്ടർ സെന്‍റർ തുടങ്ങിയ സ്ഥാപനങ്ങളാണ് കെട്ടിടത്തിൽ പ്രവർത്തിക്കുന്നത്. സംഭവമറിഞ്ഞ് അന്തിക്കാട് പോലീസ് പരിശോധനനടത്തി. സ്ഥാപനങ്ങളിലെ സിസിടിവി ദൃശ്യങ്ങളും പോലീസ് പരിശോധിക്കുന്നുണ്ട്. ചോരയിൽ ചവിട്ടി തെരുവുനായകൾ ഓടിയതും പോലീസിനെ കുഴയ്ക്കുന്നു. കെട്ടിടത്തിന് സമീപത്തെ പൈപ്പിൻ ചുവട്ടിലും രക്തം കണ്ടെത്തിയതോടെയാണ് നാട്ടുകാർക്ക് സംശയമേറിയത്. സിസിടിവി ദൃശ്യങ്ങൾ പരിശോധിച്ച് കൂടുതൽ വിവരങ്ങൾ ശേഖരിക്കാനാണ് പോലീസിന്‍റെ ശ്രമം.

വാടാനപ്പിള്ളിയിൽ റോഡരികിൽ സ്കൂട്ടർ കത്തിനശിച്ചു

വാടനപ്പിള്ളി: തൃശൂർ റോഡിലെ ബസ്‌ സ്റ്റോപ്പിനു എതിർവശത്തെ കെട്ടിടത്തിനു സമീപം പാർക്ക് ചെയ്തിരുന്ന സ്കൂട്ടർ കത്തിനശിച്ചു. സമീപത്ത് നിർത്തിയിട്ടിരുന്ന മറ്റൊരു സ്കൂട്ടറിനും ഭാഗികമായി തീപിടിച്ചു. ഇന്നലെ ഉച്ചയ്ക്ക് ഒരുമണിയോടെയാണ് സംഭവം. നാട്ടുകാർ വിവരമറിയിച്ചതിനെ തുടർന്ന് വാടാനപ്പിള്ളി പോലീസും നാട്ടികയിൽനിന്നു ഫയർഫോഴ്സും എത്തി. ഇതിനിടെ അതുവഴിവന്ന നാട്ടുകാർതന്നെ ബക്കറ്റിൽ വെള്ളമെത്തിച്ച് തീ കെടുത്തി. സ്കൂട്ടർ പൂർണമായി കത്തിയമർന്നു. വാഹന ഉടമയെക്കുറിച്ച് വിവരം ലഭ്യമായിട്ടില്ല, തീപ്പിടുത്തത്തിന്‍റെ കാരണവും വ്യക്തമല്ല. സുവർണ ജൂബിലി പ്രമാണിച്ച് വാടാനപ്പിള്ളിയിലെ വ്യാപാരസ്ഥാപനങ്ങൾ മുടക്കമായതിനാൽ സംഭവം നടക്കുമ്പോൾ ആരും ഉണ്ടായിരുന്നില്ല. അതുവഴി വന്നവരാണ് പോലീസിൽ വിവരം അറിയിച്ചത്.

കനത്ത മഴ, കാറ്റ്: നാ‍‍ശനഷ്ടങ്ങള്‌

വാളിപ്പാടത്ത് വ്യാപക നാശനഷ്ടം വരാക്കര: ശക്തമായ കാറ്റിലും മഴയിലും വരാക്കര വാളിപ്പാടത്ത് വ്യാപക നാശനഷ്ടം. അഞ്ച് വൈദ്യുതി പോസ്റ്റുകളും തെങ്ങും മരങ്ങളും മറിഞ്ഞുവീണു. നിർത്തിയിട്ട കാറിന് മുകളിൽ മരംവീണ് കേടുപാടുകൾ സംഭവിച്ചു.ഞായറാഴ്ച വൈകിട്ട് പത്തുമിനിറ്റോളം ആഞ്ഞുവീശിയ കാറ്റിലാണ് നാശനഷ്ടം. ആർക്കും പരിക്കില്ല. വൈദ്യുതി പോസ്റ്റുകൾ ഒടിഞ്ഞുവീണതോടെ മേഖലയിൽ വൈദ്യുതിബന്ധം നിലച്ചു. അളഗപ്പനഗർ പഞ്ചായത്തംഗം പ്രിൻസ് അരിപാലത്തുകാരന്‍റെ നേതൃത്വത്തിൽ നാട്ടുകാർചേർന്ന് റോഡിലേക്കുവീണ മരങ്ങൾ നീക്കി. കെഎസ്ഇബി അധികൃതരും സ്ഥലത്തെത്തി. വീടിന്‍റെ മേൽക്കൂര ഇടിഞ്ഞുവീണു കൈപ്പറമ്പ്: കനത്ത മഴയിലും കാറ്റിലും വീടിന്‍റെ മേൽക്കൂര ഇടിഞ്ഞുവീണു. കൈപ്പറമ്പ് പഞ്ചായത്ത് മൂന്നാംവാർഡിൽ ആറമ്പിള്ളി റോഡിൽ മനക്കാലത്ത് ശ്രീനിവാസന്‍റെ ഓടിട്ടവീടാണ് തകർന്നത്. ഇന്നലെ ഉച്ചയ്ക്ക് 12 മണിയോടെയായിരുന്നു മഴയിൽ വീടിന്‍റെ മേൽക്കൂര പൂർണമായും തകർന്നു വീണത്. അപകടസമയത്ത് വീട്ടിൽ ആളുണ്ടായിരുന്നില്ല. അതിനാൽ വലിയ അപകടം ഒഴിവായി. പഞ്ചായത്ത് അധികൃതർ സ്ഥലം സന്ദർശിച്ചു. ക്ഷേത്രത്തിലെ കൂറ്റൻ ആൽമരം കടപുഴകിവീണു പറപ്പൂർ: ഊരകം പതിയാർകുളങ്ങര ക്ഷേത്രത്തിലെ കൂറ്റൻ ആൽമരം കനത്ത കാറ്റിലും മഴയിലും കടപുഴകിവീണു. ഞായറാഴ്ച വൈകീട്ട് ആറരയ്ക്കുണ്ടായ ശക്തമായ കാറ്റിലും മഴയിലുമാണ് ആൽമരം കടപുഴകിവീണത്. ശക്തമായ മഴയുള്ളതിനാൽ ക്ഷേത്രത്തിൽ ഭക്തജനങ്ങൾ കുറവായിരുന്നു. അതുകൊണ്ട് ആർക്കും അപകടങ്ങൾ സംഭവിച്ചില്ല. ദ ുരിതാശ്വാസ ക്യാമ്പ് തുടങ്ങി ചേർപ്പ്: മഴയെ തുടർന്ന് ചേർപ്പ് പഞ്ചായത്തിലെ തെക്കുംപാടം, മുത്തുള്ളിയാൽ തോപ്പ്, ഊരകം തുടങ്ങിയ താഴ്ന്നപ്രദേശങ്ങളിലെ വെള്ളക്കെട്ടിലായ കുടുംബങ്ങൾ പടിഞ്ഞാട്ടുമുറി ജി.ജെ.ബി. സ്കൂളിലെ ദുരിതാശ്വാസ ക്യാമ്പിലെത്തി. ഏഴോളം കുടുംബങ്ങളിലെ ഇരുപത്തിനാലോളംപേരാണ് ഇന്നലെ ക്യാമ്പിലെത്തിയത്. പഞ്ചായത്ത് പ്രസിഡന്‍റ് സുജീഷ കള്ളിയത്ത്, വൈസ് പ്രസിഡന്‍റ് വി.എൻ. സുരേഷ്, അംഗങ്ങളായ സുനിത ജിനു, നെസീജ മുത്തലി എന്നിവർ ക്യാമ്പ് സന്ദർശിച്ചു.

കൂട്ടായ്മകൾ ദൈവികരഹസ്യത്തിന്‍റെ ഭൂമിയിലെ പ്രതീകങ്ങൾ: മാർ താഴത്ത്

തൃശൂർ: അതിരൂപതയിലെ എല്ലാ ഇടവകകളിലും കുടുംബകൂട്ടായ്മ പതാകദിനം ആചരിച്ചു. ചേറൂർ സെന്‍റ് ഫ്രാൻസീസ് സേവ്യർ ദേവാലയത്തിൽ പതാകയുയർത്തി ആര്‌ച്ച്ബിഷപ് മാർ ആൻഡ്രൂസ് താഴത്ത് അതിരൂപതാതല ഉദ്ഘാടനം നിർവഹിച്ചു. പിതാവും പുത്രനും പരിശുദ്ധാത്മാവും തമ്മിലുള്ള സ്നേഹക്കൂട്ടായ്മയാണ് ദൈവമെന്നും അതുകൊണ്ട് ദൈവത്തെ മാറ്റിനിർത്തിയുള്ള കൂട്ടായ്മകൾക്ക് സഭാ ജീവിതത്തിൽ പ്രസക്തിയില്ലെെന്നും ആര്‌ച്ച്ബിഷപ് പറഞ്ഞു. അതിരൂപത ഡയറക്ടർ ഫാ ഫ്രാൻസിസ് ട്വിങ്കിൾ, ലൂർദ് ഫൊറോന ആനിമേറ്ററും ചേറൂർവികാരിയുമായ ഫാ ജോൺസൺ അന്തിക്കാട്ട്, അതിരൂപത കുടുംബകൂട്ടായ്മ കേന്ദ്രസമിതി ജന.കൺവീനർ ഷിന്‍റോ മാത്യു, ജന.സെക്രട്ടറി പ്രഫ. ജോർജ് അലക്സ് എന്നിവർ സംസാരിച്ചു.

ഡിസിസി സെക്രട്ടറിക്ക് കാരണംകാണിക്കൽ നോട്ടീസ്

വടക്കാഞ്ചേരി: ഡിസിസി സെക്രട്ടറി ഉൾപ്പടെ നാലുപേർക്ക് ഡിസിസി പ്രസിഡന്‍റ് അഡ്വ. ജോസഫ് ടാജറ്റ് കാരണംകാണിക്കൽ നോട്ടീസ് നൽകി. കഴിഞ്ഞമാസംനടന്ന തലപ്പിളളി സർക്കിൾ സഹകരണ യൂണിയൻ തെരഞ്ഞെടുപ്പിൽ പാർട്ടിവിരുദ്ധ പ്രവർത്തനം നടത്തിയതിനാണ് നോട്ടീസ് നൽകിയത്. തെരഞ്ഞെടുപ്പുമായി ബന്ധപ്പെട്ട് അവസാനനിമിഷത്തിൽ യുഡിഎഫ് സ്ഥാനാർഥിയെ പിൻവലിപ്പിച്ച് സിപിഎം സ്ഥാനാർഥിയെ വിജയിപ്പിച്ച സംഭവത്തിലാണ് നോട്ടീസ്. ഡിസിസി ജനറൽസെക്രട്ടറി പി.ജെ. രാജു, കുന്നംകുളം നിയോജകമണ്ഡലം യുഡിഎഫ് കൺവീനർ അമ്പലപ്പാട്ട് മണികണ്ഠൻ, വടക്കാഞ്ചേരി ബ്ലോക്ക് കോൺഗ്രസ് സെക്രട്ടറിയും അമ്പലപ്പാട് സർവീസ് സഹകരണബാങ്ക് വൈസ് പ്രസിഡന്‍റുമായ കെ. ചന്ദ്രശേഖരൻ, മുൻ ബ്ലോക്ക് കോൺഗ്രസ് വൈസ് പ്രസിഡന്‍റ് ജോസഫ് തൈക്കാടൻ എന്നിവർക്കാണ് നോട്ടീസ് നൽകിയത്. സംഭവത്തിൽ കെപിസിസി സെക്രട്ടറി എ. പ്രസാദ്, ഡിസിസി വൈസ് പ്രസിഡന്‍റ് അഡ്വ. നിജി ജെസ്റ്റിൻ എന്നിവരുടെ അന്വേഷണ റിപ്പോർട്ടിന്‍റെ അടിസ്ഥാനത്തിലാണ് നോട്ടീസ്. മൂന്നുദിവസത്തിനകം മറുപടി നൽകണമെന്നും കത്തിൽ പറയുന്നുണ്ട്. കഴിഞ്ഞ 40 വർഷം യുഡിഎഫ് ഭരിച്ചിരുന്ന തലപ്പിള്ളി സഹകരണ യൂണിയൻ ഭരണമാണ് എൽഡിഎഫിന് ലഭിച്ചത്.

കനത്ത മഴ: കനാലുംകടലും കരകയറി; നൂറുകണക്കിനു വീടുകൾ വെള്ളക്കെട്ടിൽ

ചാവക്കാട്: മഴ ശക്തമായതോടെ ചാവക്കാട് മേഖലയിലെ താഴ്ന്നപ്രദേശങ്ങള്‍ വെള്ളക്കെട്ടിലായി. നൂറുകണക്കിനു വീടുകളാണ് രൂക്ഷമായ വെള്ളക്കെട്ടില്‍ അകപ്പെട്ടിട്ടുള്ളത്. കനോലി കനാലും മത്തിക്കായലും കരകവിഞ്ഞു. കടൽക്ഷോഭം അതിരൂക്ഷമല്ലെങ്കിലും മുനക്കക്കടവ്, വെളിച്ചെണ്ണ പടി, തൊട്ടാപ്പ് തുടങ്ങിയ സ്ഥലങ്ങളിൽ കടലാക്രമണം ഉണ്ടായി. മണൽ ഭിത്തി ഉയർത്തിയത് ചെറിയൊരു ആശ്വാസമാണ്. കനാലുകൾ കരകവിഞ്ഞ തിനാല്‍ വൻ വെള്ളക്കെട്ടാണ് അനുഭവപ്പെടുന്നത്. തെക്കഞ്ചേരി, വഞ്ചിക്കടവ്, പാലയൂര്‍, ഇരട്ടപ്പുഴ, ബ്ലാങ്ങാട് , മാട്, പുന്ന, തിരുവത്ര, പൂതിരുത്തി തുടങ്ങി പ്രദേശങ്ങൾ വലിയ വെള്ളക്കെട്ടിലാണ്. ചേറ്റുവ പുഴയിലും അറബിക്കടലിലും ജലനിരപ്പ് ഉയര്‍ന്നിരിക്കുകയാണ്. ശക്തമായ കാറ്റും നാശനഷ്ടങ്ങള്‍ വരുത്തുന്നുണ്ട്. താഴ്ന്നപ്രദേശങ്ങളിൽ വീടുകൾക്കുപുറമെ കടകള്‍ക്ക് അകത്തേക്കും വെള്ളംകയറി നാശങ്ങള്‍ സംഭവിച്ചിട്ടുണ്ട്. വെള്ളക്കെട്ടുമൂലം റോഡുകള്‍ തകര്‍ന്നതും യാത്രക്കാരെ ദുരിതത്തിലാക്കി. ദേശീയപാത ചേറ്റുവ റോ ഡ് തെക്കേ ബൈപ്പാസ് മുതല്‍ വില്യംസ്‌വരെ തകര്‍ന്ന നിലയിലാണ് വാഹനങ്ങള്‍ പലതും തീരദേശം വഴിപോകുന്നത്. ദേശീയപാത 66 സര്‍വീസ് റോഡ് പലസ്ഥലങ്ങളിലും തകര്‍ന്നനിലയിലാണ്. സര്‍വീസ് റോഡരികിലെ കാനയിലേക്കു വെള്ളം ഒഴുകിപ്പോകാതെ കെട്ടിനില്‍ക്കുകയാണ്. വെള്ളക്കെട്ടുമൂലം തകര്‍ന്ന റോഡിലെ കുഴികള്‍ കാണാതെ ഇരുചക്ര യാത്രക്കാര്‍ അടക്കമുള്ളവര്‍ അപകടത്തില്‍‌പ്പെടുകയാണ്. കാഞ്ഞാണി: കനത്ത മഴയെ തുടർന്ന് മണലൂർ പഞ്ചായത്തിൽ വ്യാപക വെള്ളക്കെട്ട്. അഞ്ചാം വാർഡിലെ വിശുദ്ധി അങ്കണവാടിയുൾപ്പടെ പരിസരത്തെ വീടുകളിൽ വെള്ളം കയറി. വാക്കാട്ട് മാധവി, ചിത്തംതോപ്പിൽ ജോൺ മോഹൻ, പനക്കപറമ്പിൽ ഉണ്ണി,കോറോട്ട് സുകുമാരൻ, രാധാകൃഷ്ണൻ കോറോട്ട്, വാക്കാട്ട് ഗോപി, തേർമഠം റൈജു, കളരിക്കൽ സുരേഷ് ബാബു, കുന്പളത്തറ ഭാനു, പച്ചാം‌പിള്ളി മനോജ്, വാക്കാട്ട് വിജയൻ എന്നിങ്ങിനെ 11 വീടുകളാണു വെള്ളക്കെട്ടിലായത്. ഈ പ്രദേശത്തുകൂടി കടന്നുപോകുന്ന ഇറിഗേഷൻ കനാൽ കരകവിഞ്ഞ് ഒഴുകുന്നതുകൊണ്ടാണ് വെള്ളക്കെട്ട് രൂക്ഷമായത്. പ്രദേശത്തുകൂടെ കടന്നുപോകുന്ന ഇറിഗേഷൻ കനാൽ ഇടിഞ്ഞാണ് ഒഴുക്കു നിലച്ചത്. ഇതിനുപുറമെ ഫലവൃക്ഷക്കൊമ്പുകളും മറ്റും വന്നടിഞ്ഞ് കനാലിന്‍റെ ആഴം കുറയുകയും ചെയ്തു. കാഞ്ഞാണി - ഗുരുവായൂർ റോഡിലൂടെ കടന്നുപോകുന്ന ഇറിഗേഷൽ കനാൽ ഒരു കിലോമീറ്റർ ദൂരത്തിൽ ശ്മശാനം‌വരെ അടിയന്തരമായി ശുചീകരിച്ച് ഒഴുക്ക് സ്ഥാപിക്കണമെന്ന് മണലൂർ പഞ്ചായത്ത് ആസൂത്രണ സമിതിയംഗം ജനാർദനൻ മണ്ണുമ്മൽ ആവശ്യപ്പെട്ടു.

മോഹന്‍റേത് കലാത്മകതയും ജനപ്രിയതയും സമന്വയിച്ച ചലച്ചിത്രങ്ങൾ: മന്ത്രി ബിന്ദു

പ്രതിഭാശാലിയായ മോഹനെ കേരളം വിസ്മരിച്ചെന്ന് കമൽ ഇരിങ്ങാലക്കുട: ചലച്ചിത്ര സംവിധായകൻ മോഹന്‍റെ അനുസ്മരണാർഥം ഇരിങ്ങാലക്കുട പൗരാവലിയും മോഹൻ ഫൗണ്ടേഷനും സംയുക്തമായി സംഘടിപ്പിച്ച ദൃശ്യമോഹനം 2015നു സമാപനം. രണ്ടു ദിവസങ്ങളിലായി സംഘടിപ്പിച്ച പരിപാടിയുടെ ഉദ്ഘാടനം ഉന്നത വിദ്യാഭ്യാസവകുപ്പ് മന്ത്രി ഡോ. ആർ. ബിന്ദു നിർവഹിച്ചു. ചടങ്ങിൽ യുവ സംവിധായകനുള്ള പ്രഥമ മോഹൻ പുരസ് കാരം ലിജോ ജോസ് പെല്ലിശേരിക്ക് മന്ത്രി ഡോ. ആർ. ബിന്ദുവും അനുപമ മോഹനും ചേർന്നു സമർപ്പിച്ചു. കലാത്മകതയും ജനപ്രിയതയും സമന്വയിപ്പിച്ച സിനിമകളായിരുന്നു മോഹന്‍റേതെന്ന് ഉദ്ഘാ ടനപ്രസംഗത്തിൽ മന്ത്രി ബിന്ദു പറഞ്ഞു. പത്മരാജനും കെ.ജി. ജോർജും ഭരതനും ആഘോഷിക്കപ്പെടുന്പോൾ അവരോടൊപ്പം സഞ്ചരിച്ച അവരോളം പ്രതിഭാശാലിയായ മോഹനെ കേരളം വിസ്മരിക്കുകയാണെന്ന് സംവിധായകൻ കമൽ അനുസ്മരണപ്രഭാഷണത്തിൽ പറഞ്ഞു. ഒരു വിട്ടുവീഴ്ചക്കും തയ്യാറാകാതെ ഒരുതരത്തിലുള്ള വെള്ളം ചേർക്കലും നടത്താതെ തന്‍റെ സിനിമകൾ ചെയ്തുപോന്ന സംവിധായകനായിരുന്നു മോഹൻ എന്നു സംവിധായകൻ സിബി മലയിൽ അഭിപ്രായപ്പെട്ടു. മലയാള ചലച്ചിത്രമേഖലയ്ക്കു പാഠപുസ്തകങ്ങൾ ആക്കാവുന്ന ഒരുപിടി ചിത്രങ്ങൾ സമ്മാനിച്ച സംവിധായകനാണു മോഹനെന്നു ചലച്ചിത്ര അക്കാദമി ചെയർമാൻ പ്രേംകുമാർ പറഞ്ഞു. യോഗത്തിൽ മുൻസിപ്പൽ ചെയർപേഴ്സണ്‍ മേരിക്കുട്ടി ജോയ് അധ്യക്ഷത വഹിച്ചു. കലാമണ്ഡലം ക്ഷേമാവതി, അനുപമ മോഹൻ, പ്രദീപ് മേനോൻ, മുൻ എംഎൽഎ കെ.യു. അരുണൻ, ജില്ലാ പഞ്ചായത്ത് വൈസ് പ്രസിഡന്‍റ് ലത ചന്ദ്രൻ, സംവിധായകരായ ലിജോ ജോസ് പെല്ലിശേരി, കെ.ബി. വേണു, പി.ജി. പ്രേംലാൽ, തിരക്കഥാകൃത്ത് അനന്തപത്മനാഭൻ, സിജി പ്രദീപ്, വെള്ളാങ്കല്ലൂർ ബ്ലോക്ക് പഞ്ചായത്ത് പ്രസിഡന്‍റ് സുധ ദിലീപ്, മുരിയാട് ഗ്രാമപഞ്ചായത്ത് പ്രസിഡന്‍റ് ജോസ് ചിറ്റിലപ്പിള്ളി, മുൻ നഗരസഭ ചെയർപേഴ്സണ്‍ സോണിയ ഗിരി, അഡ്വ. മണികണ്ഠൻ എന്നിവർ പ്രസംഗിച്ചു.

സെൽഫിയെടുക്കുന്നതിനിടയിൽ ഐഫോൺ കനാലിൽ വീണു; മുങ്ങിയെടുത്ത് അഗ്നിരക്ഷാസേന

അരിമ്പൂർ: സെൽഫിയെടുക്കുന്നതിനിടയിൽ അബദ്ധത്തിൽ ഇറിഗേഷൻ കനാലിൽ വീണ ഒന്നേകാൽലക്ഷം രൂപ വിലവരുന്ന പുതിയ മൊബൈൽ ഫോൺ അഗ്നിരക്ഷാ സേനാംഗങ്ങൾ മുങ്ങിയെടുത്തു നൽകി. മനക്കൊടി പുള്ള് ടൂറിസം പ്രദേശത്ത് എത്തി സെൽഫിയെടുക്കുന്നതിനിടയിൽ ചേർപ്പ് സ്വദേശി ഇ.പി. കൃഷ്ണയുടെ മൊബൈൽ ഫോണാണ് വെള്ളത്തിൽ വീണത്. ശനിയാഴ്ചയാണ് കൃഷ്ണ ഫോൺ വാങ്ങിയത്. ഇന്നലെ സെൽഫി എടുക്കുന്നതിനിടയിൽ കനാലിൽ വീഴുകയായിരുന്നു. ഫയർഫോഴ്സ് തൃശൂർ ഡിവിഷനിൽ നിന്ന് എത്തിയ സംഘം ഓക്സിജൻ സിലിണ്ടർ ഉൾപ്പെടെയുള്ള സംവിധാനങ്ങൾ ഉപയോഗിച്ച് രണ്ടു മണിക്കൂർ പ്രയത്നിച്ചാണ് ഫോൺ കണ്ടെടുത്തത്.

പ്രോലൈഫ് കാരുണ്യപ്രവർത്തകസംഗമം നടത്തി

തൃശൂർ: അതിരൂപത ജോണ്‍പോൾ പ്രോലൈഫ് സമിതിയുടെ നേ തൃത്വത്തിൽ ജീവകാരുണ്യ പ്രവർത്തനങ്ങൾ നടത്തുന്ന സ്ഥാ പന അധികാരികളുടെയും പ്രവർത്തകരുടെയും സംഗമം അതിരൂപത ഫാമിലി അപ്പസ്തൊലേറ്റ് സെന്‍ററിൽ നടത്തി. ജെജെ ആക്റ്റിലെ പല നിബന്ധനകളും നിസ്വാർഥമായി സേവനം അനുഷ്ഠിക്കുന്നപല ജീവകാരുണ്യസ്ഥാപനങ്ങൾക്കും ബു ദ്ധിമുട്ടുണ്ടാക്കുന്നവയാണെന്നും സർക്കാർ ഇക്കാര്യത്തിൽ ശ്രദ്ധ‌ ചെലുത്തണമെന്നും പരിപാടി ഉദ്ഘാടനം ചെയ്തു നടത്തിയ പ്രസംഗത്തിൽ മാർ ടോണി നീലങ്കാവിൽ അഭിപ്രായപ്പെട്ടു. പ്രോലൈഫ് സമിതി പ്രസിഡന്‍റ് ജെയിംസ് ആഴ്ചങ്ങാടൻ അധ്യക്ഷത വഹിച്ചു. കേരള സംസ്ഥാന ഓർഫനേജ് കണ്‍ട്രോൾ ബോർഡ് മെന്പറും കെ‌സിബിസി കെയർ ഹോം ആൻഡ് സ്പെഷൽ സ്കൂൾസ് ഡയറക്ടറുമായ ഫാ. ലിജൊ ചിറ്റിലപ്പിള്ളി അനുഭവങ്ങൾ പങ്കുവച്ചു. തുടർന്ന് വിവിധ സ്ഥാപനങ്ങളിൽ നിന്നും പങ്കെടുത്ത പ്രതിനിധികൾഅവരവരുടെസ്ഥാപനങ്ങളെക്കുറിച്ചും ശുശ്രൂഷകളെക്കുറിച്ചും വിശദീകരിച്ചു. ഡയറക്ടർ ഫാ. ഫ്രാൻസിസ് ട്വിങ്കിൾ വാഴപ്പിള്ളി സ്വാഗതവും സമിതി വൈസ് പ്രസിഡന്‍റ് രാജൻആന്‍റണി നന്ദിയും പറഞ്ഞു. പ്രിൻസ് കരേക്കാട്ടിൽ, എം. എ. വർഗീസ്, ഷീബാ ബാബു, ശോഭ ജോണ്‍സണ്‍, സ ണ്ണി തുടങ്ങിയവർ നേതൃത്വം നൽകി.

ഗുണ്ടകൾക്കെതിരായ നടപടി: കുതിച്ച് റൂറൽ പോലീസ്

തൃശൂർ: മയക്കുമരുന്നുവേട്ടയിലും ഗുണ്ടകൾക്കെതിരായ നടപടിയിലും അടിയന്തരഘടത്തിലെ പോലീസ് സേവനത്തിലും തൃശൂർ റൂറൽ പോലീസിന്‍റെ കുതിപ്പ്. ഓപ്പറേഷൻ ഗ്രേ ഹണ്ടിന്‍റെ ഭാഗമായി 15 ദിവസത്തിനിടെ 283 പിടികിട്ടാപ്പുള്ളികളെ അറസ്റ്റ് ചെയ്തു. മയക്കുമരുന്നു നിരോധനനിയമപ്രകാരം നാലുപേരെ കരുതൽ തടങ്കലിലുമാക്കി. ആകെ 9663 പേരെ പരിശോധിച്ചു. 921 പേരെ അറസ്റ്റ് ചെയ്തു. 162.09 കിലോ കഞ്ചാവ്, 210.07 ഗ്രാം എംഡിഎംഎ, 30 ഗ്രാം കഞ്ചാവുമിഠായി, 3.42 ഗ്രാം ഹെറോയിൻ, 17.93 ഗ്രാം ഹാഷിഷ് ഓയിൽ, ഒരു എൽഎസ്ഡി എന്നിവയാണു പിടികൂടിയത്. ഗുണ്ടകൾക്കെതിരായ ഓപ്പറേഷൻ കാപ്പ പ്രകാരം ആറുമാസത്തിനിടെ 97 പേർക്കെതിരേ നടപടിയെടുത്തു. 40 പേരെ ജയിലിലാക്കി. 57 പേരെ നാടുകടത്തി. അടിയന്തരഘട്ടത്തിലെ സേവനങ്ങൾക്കായി ഏർപ്പെടുത്തിയ 112 ഹെൽപ് ലൈൻ നന്പരിൽ ബന്ധപ്പെട്ടവർക്ക് ഉടനടി സേവനമെത്തിക്കാൻ റൂറൽ പോലീസിനു കഴിഞ്ഞു. ഒൗട്ട്ഗോയിംഗ് സർവീസുകൾ ഇല്ലാത്ത മൊബൈൽ നന്പരിൽനിന്നുപോലും സേവനങ്ങൾക്കായി വിളിക്കാൻ കഴിയും. പോലീസിന്‍റെ ഒൗദ്യോഗിക ആപ്ലിക്കേഷനായ പോൽ ആപ്പിലുള്ള എസ്ഒഎസ് ബട്ടണ്‍വഴിയും ഈ സേവനം ലഭ്യമാകും. റൂറൽ പോലീസ് പരിധിയിൽ വിവിധ കേസുകളിൽ ഹാജരാകാതെ മുങ്ങിനടക്കുന്ന 283 പ്രതികളെയും പിടികൂടി. 20 പിടികിട്ടാപ്പുള്ളികളെയും ജാമ്യമില്ലാ വാറന്‍റുള്ള ഏഴു പ്രതികളെയും മറ്റു കേസുകളിൽ മുങ്ങിനടന്ന 256 പ്രതികളും ഉൾപ്പെടെയാണിത്. കയ്പമംഗലം സ്റ്റേഷൻ പരിധിയിൽ 38 പേരെ പിടികൂടി. ഇരിങ്ങാലക്കുട- 43, കാട്ടൂർ- 11, ആളൂർ-10, അന്തിക്കാട്- 5, അതിരപ്പിള്ളി-11, ചാലക്കുടി- 16, കൊടകര- ആറ്, ചർപ്പ് 26, വരന്തരപ്പിള്ളി- ഏഴ്, വെള്ളിക്കുളങ്ങര- നാല്, കൊരട്ടി- 18, മാള- 22, വാടാനപ്പിള്ളി- ആറ്, വലപ്പാട്- 10, പുതുക്കാട്- 15, കൊടുങ്ങല്ലൂർ- 21, മതിലകം- 14 എന്നിങ്ങനെയാണു മറ്റു സ്റ്റേഷൻ പരിധികളിലെ അറസ്റ്റ്. വിവിധ ഡിവൈഎസ്പിമാരുടെയും ഇൻസ്പെക്ടർമാരുടെയും നേതൃത്വത്തിലാണു നടപടികൾ ഏകോപിപ്പിച്ചത്. സംസ്ഥാനത്ത് ഏറ്റവുംകൂടുതൽ പാസ്പോർട്ട് വെരിഫിക്കേഷൻ പൂർത്തിയാക്കുന്ന പോലീസ് ജില്ലയും തൃശൂർ റൂറലാണ്.

കൊടകര സഹൃദയ എൻജിനീയറിംഗ് കോളജിൽ ബിരുദദാനം നടത്തി

കൊടകര: സഹൃദയ എൻജിനീയറിംഗ് കോളജിൽ ഈ വർഷത്തെ ബിരുദദാനച്ചടങ്ങ് കേരള വെറ്ററിനറി ആൻഡ് അനിമൽ സയൻസസ് സർവകലാശാല വൈസ് ചാൻസലർ ഡോ. കെ.എസ്. അനിൽ ഉദ് ഘാടനം ചെയ്തു. ഇരിങ്ങാലക്കുട രൂപത ബിഷപ് മാർ പോളി കണ്ണൂക്കാടൻ അധ്യക്ഷത വഹിച്ചു. കോളജ് മാനേജർ മോണ്‍. വിൽസണ്‍ ഈരത്തറ, എക്സിക്യൂട്ടീവ് ഡയറക്ടർ റവ.ഡോ. ആന്‍റോ ചുങ്കത്ത്, ഡയറക്ടർ ഡോ. ലിയോ ണ്‍ ഇട്ടിയച്ചൻ, ജോയിന്‍റ് ഡയറക്ടർ ഡോ. സുധ ജോർജ് വളവി, പ്രിൻസിപ്പൽ ഡോ. എസ്. രാംകുമാർ, വൈസ് പ്രിൻസിപ്പൽ ഡോ. ഫിന്‍റോ റാഫേൽ എന്നിർ പ്രസംഗിച്ചു. വകുപ്പുതലവന്മാർ എന്നിവർ നേതൃത്വം നൽകി. ബിടെക്, എംടെക്, പിഎച്ച്ഡി എന്നിവ പൂർത്തിയാക്കിയ 353 വിദ്യാർഥികൾക്കാണ് ബിരുദദാനം നടത്തിയത്. ഇതിൽ 345 പേർ ബിടെക്, ഏഴുപേർ എംടെക്, ഒരു വിദ്യാർഥി പിഎച്ച്ഡിയാണ് കരസ്ഥമാക്കി യിരിക്കുന്നത്. വിദ്യാർഥികളെ പ്രതിനിധീകരിച്ച് ആകർഷ ഡേവിസ് അനുഭവങ്ങൾ പങ്കുവച്ചു.

കുഴിക്കാട്ടുശേരിയിൽ വിശുദ്ധ മറിയംത്രേസ്യയുടെ തിരുനാൾ എട്ടാമിടം ഭക്തിസാന്ദ്രം

കുഴിക്കാട്ടുശേരി: വിശുദ്ധ മറിയം ത്രേസ്യ - ധന്യൻ ഫാ. ജോസഫ് വിതയത്തിൽ തീർഥാടന കേന്ദ്രത്തിൽ വിശുദ്ധ മറിയം ത്രേസ്യയുടെ തിരുനാളിന്‍റെ എട്ടാമിടം ആഘോഷിച്ചു. കുടുംബങ്ങളുടെ മധ്യസ്ഥയായ വിശുദ്ധയുടെ തിരുനാൾ എട്ടാമിടത്തിൽ നടന്ന ആഘോഷമായ ദിവ്യബലിക്ക് ചാലക്കുടി സെന്‍റ് ജെയിംസ് ആശുപത്രി ഫിനാൻസ് ഓഫീസർ ഫാ. ജോ സഫ് ഗോപുരം കാർമികനായി. തുടർന്ന് പ്രദക്ഷിണം, തിരുശേഷിപ്പ് വണക്കം, നേർച്ചയൂട്ട് എന്നിവ നടന്നു. നാടിന്‍റെ നാനാഭാഗത്തുനിന്നായി ആയിരങ്ങൾ തീർഥാടന കേന്ദ്രത്തിലെത്തി തിരുക്കർമങ്ങളിലും നേർച്ചയൂട്ടിലും പങ്കെടുത്തു. ‌ തിരുനാൾ ആഘോഷ പരിപാടികൾക്ക് ഇരിങ്ങാലക്കുട രൂപത വികാരി ജനറാളും ആഘോഷകമ്മിറ്റി ചെയർമാനുമായ മോൺ. ജോളി വടക്കൻ, തീർഥാടന കേന്ദ്രം റെക്ടർ ഫാ. ജോൺ കവലക്കാട്ട്, ഹോളി ഫാമിലി സന്യാസിനി സമൂഹത്തിന്‍റെ സുപ്പീരിയർ ജനറൽ മദർ ആനി കുര്യാക്കോസ് സിഎച്ച് എഫ്, പ്രമോട്ടർ ഫാ. സെ ബാസ്റ്റ്യൻ അരിക്കാട്ട്, അഡ്മിനിസ് ട്രേറ്ററും ജനറൽ കൺവീനറുമായ സിസ്റ്റർ എൽസി സേവ്യർ സി എച്ച്എഫ്, വൈസ് പോസ്റ്റുലേറ്റർ സിസ്റ്റർ വിനയ സിഎച്ച്എഫ്, ജനറൽ കൺവീനർ സണ്ണി പഴയാറ്റിൽ എന്നിവരുടെ നേതൃത്വത്തിലുള്ള വിവിധ കമ്മിറ്റി കൺവീനർമാർ, കമ്മിറ്റി അംഗങ്ങൾ തുടങ്ങിയവർ നേതൃത്വം നൽകി.

ഇരിങ്ങാലക്കുട ക്രൈസ്റ്റ് കോളജിലെ ഭൂഗര്‍ഭ വകുപ്പ് ജിയോളജി പ്രവൃത്തിപരിചയമേള സംഘടിപ്പിച്ചു

ഇരിങ്ങാലക്കുട: ക്രൈസ്റ്റ് കോളജിലെ ഭൂഗര്‍ഭ വകുപ്പിലെ അധ്യാപകരും വിദ്യാര്‍ഥികളും പരിയാരം സെന്‍റ്് ജോര്‍ജ് ഹയര്‍ സെക്കന്‍ഡറി സ്‌കൂളില്‍ ജിയോളജി പ്രവൃത്തിപരിചയമേള സംഘടിപ്പിച്ചു. ഭാരതീയ ഭൗശാസ്ത്ര മന്ത്രാലയത്തിന്‍റെ നേതൃത്വത്തിലാണു പരിപാടി സംഘടിപ്പിച്ചത്. സ്‌കൂള്‍ പ്രധാനാധ്യാപകന്‍ സന്തോഷ് ദേവസി അധ്യക്ഷത വഹിച്ചു. ഡോ. ആന്‍റോ ഫ്രാന്‍സിസ് (അസി. പ്രഫസര്‍, ജിയോളജി സെല്‍ഫ് ഫിനാന്‍സിംഗ് തലവന്‍), ഡോ. ലിന്‍റോ ആലപ്പാട്ട് (അസി. പ്രഫസര്‍, ജിയോളജി വകുപ്പ്, ഡീന്‍, റിസര്‍ച്ച്, ടീച്ചിംഗ് ലേണിംഗ് സെന്‍റര്‍), കോ-ഓര്‍ഡിനേറ്റര്‍ ഡോ. ആന്‍സോ (അസി. പ്രഫസര്‍, ജിയോളജി വിഭാഗം) എന്നിവര്‍ പ്രസംഗിച്ചു. വിവിധതരത്തിലുള്ള ധാതുക്കള്‍, പാറകള്‍, ജലസ്രോതസുകള്‍, ഫോസിലുകള്‍ തുടങ്ങിയവയുടെ ആകര്‍ഷകമായ ശേഖരങ്ങള്‍ പ്രദര്‍ശിപ്പിച്ചിരുന്നു. പൗഡര്‍, വാച്ച്, കണ്മഷി, അലങ്കാരവസ്തുക്കള്‍ തുടങ്ങി നിത്യജീവിതത്തില്‍ ഒഴിച്ചുകൂടാനാകാത്ത ഒരുപാടുവസ്തുക്കള്‍ നിര്‍മിക്കാന്‍ ഉപയോഗിക്കുന്ന ധാതുക്കള്‍, വെള്ളത്തില്‍ പൊങ്ങിക്കി ടക്കുന്ന പാറ, വജ്രം കാണപ്പെടുന്ന പാറ, ഇതുകൂടാതെ പാറയിലെ ധാതുക്കള്‍ കാണാന്‍ മൈക്രോസ്‌കോപ്പ് പ്രദര്‍ശനം എന്നിവയെല്ലാം പ്രവൃത്തി പരിചയമേളയെ വേറിട്ട അനുഭവമാക്കി. ദശലക്ഷക്കണക്കിനുവര്‍ഷം മുന്‍പ് കടലില്‍ ജീവിച്ചിരുന്ന ജീവികളുടെ ഫോസിലുകള്‍, മരം കല്ലായി രൂപാന്തരപ്പെട്ട പേട്രിഫൈഡ് വുഡ് എന്നിവയ്‌ക്കൊപ്പം നഗ്‌ന‌നേത്രങ്ങള്‍ക്ക് കാണാന്‍ കഴിയാത്ത സൂക്ഷ്മ ഫോസിലുകള്‍ മൈക്രോസ്‌കോപ്പിലൂടെ കാണാന്‍ അവസരം ലഭിച്ചതു വിദ്യര്‍ഥികളിലും അധ്യാപകരിലും അദ്ഭുതം ഉളവാക്കി.

മുടിക്കോട് വൻ ഗതാഗതക്കുരുക്ക്; സർവീസ് റോഡ് ചെളിക്കുളം

പട്ടിക്കാട്: ദേശീയപാതയിൽ മുടിക്കോട് സെന്‍ററിൽ ഗതാഗതക്കുരുക്ക് തുടരുന്നു. ഇന്നലെ വൈകീട്ട് പാലക്കാട് ഭാഗത്തേക്കുള്ള പാതയിൽ മുടിക്കോട് മുതൽ ആറാംകല്ല് മേൽപ്പാലം വരെയാണ് വാഹനങ്ങൾ കുരുങ്ങിക്കിടന്നത്. പാലക്കാട് ഭാഗത്തേക്കുള്ള വാഹനങ്ങളെ ആറാംകല്ല് മുതൽ സർവീസ് റോഡിലൂടെ കടത്തിവിടാൻ തുടങ്ങിയതാണ് ഗതാഗതക്കുരുക്ക് രൂക്ഷമാകാൻ കാരണം. തൃശൂർ ഭാഗത്തേക്കുള്ള പാതയും പൂർണമായും തകർന്ന നിലയിലാണ്. മഴ ആരംഭിച്ചതോടെ സർവീസ് റോഡ് ചെളിക്കുളമായി മാറി. റോഡിന്‍റെ തകർച്ചയും ഗതാഗതനിയന്ത്രണത്തിലെ അപാകതയും യാത്രക്കാരെ ഏറെ ബുദ്ധിമുട്ടിക്കുന്നുണ്ട്. വേണ്ട നടപടികൾ സ്വീകരിക്കാൻ അധികൃതർ ശ്രമിക്കുന്നുമില്ല.

വിരുപ്പാക്ക സ്പിന്നിംഗ് മിൽ: ചെയർമാനും എംഡിയും ചാർജെടുത്തു

പുന്നംപറമ്പ്: ചെയർമാനും എം ഡിയും മില്ലിലെത്തി ചാർജെടുത്തു. വിരുപ്പാക്ക തൃശൂർ കോ- ഓപ്പറേറ്റീവ് സ്പിന്നിംഗ് മില്ലിൽ ചാർജെടുത്ത ചെയർമാൻ ഡോ. കെ.എസ്. കൃപകുമാറും എംഡി എബി തോമസും സന്ദർശനവും നടത്തി. അടച്ചുപൂട്ടിയ മിൽ എപ്പോൾ പ്രവർത്തന സജ്ജമാകുമെന്നതിൽ അനിശ്ചിതത്വം തുടരുകയാണ്. 1985ൽ പ്രവർത്തനം ആരംഭിച്ച മില്ല് ഒട്ടേറെ പ്രതിസന്ധികളിൽ നട്ടംതിരിഞ്ഞ് 2023 ഫെബ്രുവരി ആറിന് താഴിട്ട് പൂട്ടി. മില്ലിന്‍റെ പ്രവർത്തനം ഊർജ്വസലമാക്കാൻ സംസ്ഥാന വ്യവസായ വാണിജ്യവകുപ്പ് അഡീഷണൽ ഡയറക്ടറും ടെക്സ്റ്റൈൽസ് - കൈത്തറി വകുപ്പ് ഡയറക്ടറും പരിസരവാസിയുമായ ഡോ. കെ.എസ് . കൃപകുമാറിനെ സർക്കാർ മില്ലിന്‍റെ സാരഥിയാക്കി. സങ്കീർണമായ പ്രശ്നങ്ങളെ ക്കുറിച്ച് തൊഴിലാളി നേതാക്കളുമായും മില്ലിന്‍റെ പ്രൗഢി തിരിച്ചെടുക്കാൻ ഉതകുന്ന സംവിധാനങ്ങളുണ്ടാക്കാൻ പൂർണ സഹകരണവും ഉണ്ടാകുമെന്ന് ചെയർമാൻ മില്ല് സന്ദർശന വേളയിൽ പറഞ്ഞു. കഴിഞ്ഞ ഏപ്രിൽ 25ന് എംഡിയായിരുന്ന ശ്രീകുമാറിനെ മാറ്റി എബി തോമസിനെ എംഡി സ്ഥാനത്തേക്ക് സർക്കാർ നിയമിച്ചിരുന്നു. ശുഭ പ്രതീക്ഷയിൽ മുന്നോട്ട് ചലിക്കണമെങ്കിൽ ഒട്ടേറെ കടമ്പകൾ താണ്ടണം. വൻ തുക കുടിശികയുള്ളതിനാൽ വിച്ഛേദിച്ച വൈദ്യുതി ബന്ധം പുനഃസ്ഥാപിക്കണം. വിരമിച്ച ജീവനക്കാർക്ക് ആനുകൂല്യം നൽകണം. രണ്ടരവർഷമായി തൊഴിലാളികളുടെ ജീവിതവും നരകതുല്യമാണ്. പഴയ മെഷീനുകളെല്ലാം തുരുമ്പെടുത്തു. പുതിയത് ഇറക്കിയിട്ടുണ്ടെങ്കിലും അതെല്ലാം കാലതാമസമില്ലാതെ പ്രവർത്തിപ്പിക്കണം. മേഞ്ഞ ഷീറ്റുകളെല്ലാം വാനരപടയുടെ വിളയാട്ടത്തിൽ തകർന്നു തരിപ്പണമായി. സ്റ്റോക്കുണ്ടായിരുന്ന പഞ്ഞിക്കെട്ടുകളെല്ലാം നിരീക്ഷണവും, പരിപാലനവുമില്ലാത്ത സാഹചര്യത്തിൽ മുള്ളൻപന്നികൾ നശിപ്പിച്ചു. ടൈംകീപ്പർ പി. മൊയ്തു, സഹകരണ ബാങ്ക് പ്രസിഡന്‍റ് എൻ. കെ. പ്രമോദ് കുമാർ, വിവിധ രാഷ്ട്രീയ തൊഴിലാളി യൂണിയൻ ഭാരവാഹികൾ സന്ദർശനവേളയിൽ ചെയർമാനും എംഡിക്കു മൊപ്പമുണ്ടായിരുന്നു.

മാലിന്യം തള്ളാനെത്തിയ വാഹനം നാട്ടുകാർ തടഞ്ഞു

വടക്കാഞ്ചേരി: ജനവാസ മേഖലയിൽ മാലിന്യം തള്ളാനെത്തിയ വാഹനം നാട്ടുകാർ തടഞ്ഞു. വടക്കാഞ്ചേരി മേലേമ്പാട്ട് ആലിൻചുവട് പരിസരത്താണ് വർക്ക്ഷോപ്പ് മാലിന്യം പിക്കപ്പ് വാനിൽ കൊണ്ടുവന്ന്‌ തള്ളിയത്. സംഭവത്തിൽ 25,000 രൂപ പിഴ ഈടാക്കാനും മാലിന്യം പ്രദേശത്തുനിന്നും നീക്കം ചെയ്യാനും നഗരസഭ ആരോഗ്യ വിഭാഗം നോട്ടീസ് നൽകിയെങ്കിലുംഇന്നലെയും മാലിന്യം നീക്കം ചെയ്യാതെ മണ്ണിട്ടു നികത്താനുള്ള ശ്രമം നാട്ടുകാർ തടയുകയും ചെയ്തു. ക്രഷിയിടത്തോടുചേർന്നുള്ള നീർചാലിലാണ് മാലിന്യംതള്ളിയത്.വിവരമറിയിച്ചതിനെ തുടർന്ന് വടക്കാഞ്ചേരി പോലീസ് സ്ഥലത്തെത്തി മേൽ നടപടികൾ സ്വീകരിച്ചു. മാലിന്യം കൊണ്ടുവന്ന വാഹനംഅന്യസംസ്ഥാനരജിസ്ട്രേഷനിലുള്ളതാണന്നും പൂർണ്ണമായ രേഖകളൊന്നും ഇല്ലെന്നുംപോലീസ് പറഞ്ഞു.

ചിരകാലസ്വപ്നം പൂവണിയുന്നു ; കൊണ്ടാഴി - കുത്താന്പുള്ളി പാലം നിർമാണം അവസാനഘട്ടത്തിൽ

ചേലക്കര: കൊണ്ടാഴി ഗ്രാമപഞ്ചായത്ത് നിവാസികളുടെ ചിരകാലസ്വപ്നമായ കൊണ്ടാഴി-കുത്താന്പുള്ളി പാലത്തിന്‍റെ നിർമാണം അവസാനഘട്ടത്തിൽ. കേരളത്തിന്‍റെ നെയ്ത്തുഗ്രാമമായ കുത്താന്പുള്ളിയെ വള്ളുവനാടുമായും മലബാർ മേഖലയുമായും ബന്ധിപ്പിക്കുന്ന പാലമാണിത്. കൊണ്ടാഴി പഞ്ചായത്തിലെ കൊണ്ടാഴി വില്ലേജിനെയും തിരുവില്വാമല പഞ്ചായത്തിലെ കണിയാർകോട് വില്ലേജിനെയും ബന്ധിപ്പിച്ച് ഗായത്രിപ്പുഴയ്ക്കു കുറുകെയാണു പാലം നിർമിച്ചത്. കിഫ്ബി പദ്ധതിയിൽ ഉൾപ്പെടുത്തി സ്ഥലമേറ്റെടുക്കൽ ഉൾപ്പെടെ 33.14 കോടി രൂപയാണ് പാലം നിർമാണത്തിന് അനുവദിച്ചത്. പുഴയ്ക്കു കുറുകെയുള്ള പ്രധാന പാലം, കുത്താന്പുള്ളി ഭാഗത്തെ അനുബന്ധ റോഡിൽ വരുന്ന വയഡക്ട് പാലം, ജലസേചന കനാലിനു കുറുകെയുള്ള ചെറിയ പാലം എന്നിവയും പാലത്തിന്‍റെ അപ്രോച്ച് റോഡുമാണു പദ്ധതിയിലുള്ളത്. വയഡക്ട് പാലത്തിന്‍റെയും മൈനർ കനാൽ പാലത്തിന്‍റെയും നിർമാണം ആദ്യഘട്ടത്തിൽതന്നെ പൂർത്തിയായിരുന്നു. പുഴയ്ക്കു കുറുകെയുള്ള പ്രധാന പാലത്തിന് 11 മീറ്റർ വീതിയും 155.74 മീറ്റർ നീളവുമുണ്ട്. 12 മീറ്ററാണ് അപ്രോച്ച് റോഡിന്‍റെ വീതി. യു.ആർ. പ്രദീപ് എംഎൽഎ ആയിരിക്കെ 2017-18 കാലഘട്ടത്തിലാണ് കിഫ്ബിയിൽനിന്ന് 19 കോടി രൂപ അനുവദിക്കുകയും ടെൻഡർ നടപടികളാരംഭിക്കുകയും ചെയ്തത്. പിന്നീട് കെ. രാധാകൃഷ്ണൻ മന്ത്രിയായിരിക്കെ നടപടികൾ വേഗത്തിലാക്കി. 1.606 ഹെക്ടർ ഭൂമിയാണു പാലത്തിനായി ഏറ്റെടുത്തത്. നഷ്ടപരിഹാരത്തുക 6.27 കോടി രൂപ പാലം നിർമാണത്തിനുമുന്പ് കൈമാറി ചരിത്രം സൃഷ്ടിക്കുകയും ചെയ്തു. നിലവിൽ ഇരുഭാഗത്തെയും അപ്രോച്ച് റോഡിൽ ആദ്യഘട്ട ഡിബിഎം ടാറിംഗ് നടത്തി. പ്രധാന പാലത്തിന്‍റെ അവസാന സ്ലാബ് വാർക്കലും കഴിഞ്ഞദിവസം പൂർത്തിയായി. ഇപ്പോൾ പാലത്തിന്‍റെ ഹാൻഡ് റെയിലുകളുടെ നിർമാണം നടന്നുവരികയാണെന്നും നിലവിൽ ടാർ ചെയ്ത ഭാഗത്ത് എസി ടാറിംഗ് താമസിയാതെ നടത്തുമെന്നും കെആർഎഫ്ബിഐ അസി. എക്സിക്യൂട്ടീവ് എൻജിനീയർ ഇ.ഐ. സജിത് പറഞ്ഞു.

ഓടിക്കൊണ്ടിരുന്ന സ്കൂട്ടറിനു തീപിടിച്ചു; യാത്രക്കാരൻ രക്ഷപ്പെട്ടു

ചെറുതുരുത്തി: ഓടിക്കൊണ്ടിരുന്ന സ്കൂട്ടറിനു തീപിടിച്ച് പൂർണമായും കത്തി നശിച്ചു. യാത്ര ചെയ്തിരുന്ന പാഞ്ഞാൾ സ്വദേശി സുബ്രഹ്മണ്യൻ (50) പരിക്കേൽക്കാതെ രക്ഷപെട്ടു. ഇന്നലെ രാവിലെ ആറരയ്ക്ക് ഷൊർണൂർ കുളപ്പുള്ളി മെറ്റൽ ഭാഗത്ത് ഭാര്യയെ കൊണ്ടാക്കി തിരിച്ചുവരുന്നതിനിടെയാണ് ചെറുതുരുത്തി സെന്‍ററിൽ സുബ്ര ഹ്മണ്യൻ സഞ്ചരിച്ചിരുന്ന സ്കൂട്ടറിൽ നിന്ന് പുക ഉയരുകയും കത്തുകയും ചെയ്തത്. ഉടനെ വാഹനം നിർത്തി സുബ്രഹ്മണ്യൻ ചാടിയിറങ്ങിയതിനെ തുടർന്ന് പരിക്കേൽകാതെ രക്ഷപ്പെട്ടു. നാട്ടുകാർ നോക്കിനിൽക്കെയാണ് ബൈക്ക് പൂർണമായി കത്തിനശിച്ചത്. ചെറുതുരുത്തി പോലീസ് സംഭവസ്ഥലത്തെത്തി. ഷൊർണൂർ അഗ്നിരക്ഷാസേന സ്ഥലത്തെത്തി തീയണച്ചു. പെട്രോൾ ടാങ്ക് പൊട്ടിത്തെറിക്കുമോ എന്ന ഭയം കൊണ്ടാണ് രക്ഷാപ്രവർത്തനത്തിന് ശ്രമിക്കാതിരുന്നതെന്ന് നാട്ടുകാർ പറയുന്നു.

സഭയെ സർക്കാരുകൾ അവഗണിക്കുന്നു: അതിരൂപത പാസ്റ്ററൽ കൗണ്‍സിൽ

തൃശൂർ: കത്തോലിക്കാസമുദായം കാലങ്ങളായി അനുഭവിക്കുന്ന നിരവധിപ്രശ്നങ്ങളിൽ കേന്ദ്ര-സംസ്ഥാന സർക്കാരുകൾ തുടരുന്ന അവഗണനയിലും നിസംഗതയിലും തൃശൂർ അതിരൂപത പാസ്റ്ററൽ കൗണ്‍സിൽ പ്രതിഷേധിച്ചു. ജെ.ബി. കോശി കമ്മീഷൻ, വിദ്യാഭ്യാസ അവകാശങ്ങളിലുള്ള കടന്നുകയറ്റം, വന്യജീവി ആക്രമണം, കടലോരമേഖലകളിലെ പ്രതിസന്ധികൾ, മുനന്പം വിഷയം, മതപരിവർത്തന നിരോധനനിയമത്തിന്‍റെ മറവിലുള്ള ആക്രമണങ്ങൾ, ക്രൈസ്തവസംഭാവനകളുടെ തമസ്കരണം എന്നിവയിലുള്ള സഭയുടെ പരാതികളും ഉത്കണ്ഠകളും ബധിരകർണങ്ങളിലാണു പതിക്കുന്നതെന്നു യോഗം വിലയിരുത്തി. ഇക്കാര്യത്തിൽ സമുദായാംഗങ്ങളിലുള്ള കടുത്ത അസംതൃപ്തിയും വേദനയും അധികാരികളെ അറിയിക്കാനും ശക്തമായ പ്രചാരണ - പ്രതികരണ പരിപാടികൾക്കു രൂപംനൽകാനും യോഗം തീരുമാനിച്ചു. അതിരൂപത പാസ്റ്ററൽ കൗണ്‍സിൽ യോഗം ആർച്ച്ബിഷപ് മാർ ആൻഡ്രൂസ് താഴത്ത് ഉദ്ഘാടനം ചെയ്തു. സഹായമെത്രാൻ മാർ ടോണി നീലങ്കാവിൽ അധ്യക്ഷനായി. "പ്രത്യാശയുടെ തീർഥാടകർ' എന്ന വിഷയത്തിൽ ഫാ. ദിൽജോ ഒലക്കേങ്കിൽ, "സമുദായ ശാക്തീകരണം' എന്ന വിഷയത്തിൽ പ്രഫ. കെ.എം. ഫ്രാൻസിസ് എന്നിവർ ക്ലാസ് നയിച്ചു. ജോയിന്‍റ് സെക്രട്ടറി എൽസി വിൻസന്‍റ് പ്രവർത്തന റിപ്പോർട്ടും എ.ഡി. ഷാജു ഫൊറോനകളിലെ ചർച്ചാറിപ്പോർട്ടും അവതരിപ്പിച്ചു. വികാരി ജനറാൾമാരായ മോണ്‍. ജോസ് കോനിക്കര, മോണ്‍. ജെയ്സണ്‍ കൂനംപ്ലാക്കൽ, ചാൻസലർ ഫാ. ഡൊമിനിക്ക് തലക്കോടൻ, പാസ്റ്ററൽ കൗണ്‍സിൽ സെക്രട്ടറി ജോഷി വടക്കൻ എന്നിവർ പ്രസംഗിച്ചു. അഡ്വ. അജി വർഗീസ് പ്രമേയം അവതരിപ്പിച്ചു.

വാട്ടർ എഫിഷ്യന്‍റ് തൃശൂർ സമർപ്പണം നാളെ മുഖ്യമന്ത്രി നിർവഹിക്കും

തൃശൂർ: സംസ്ഥാനത്ത് ആദ്യമായി ശുദ്ധജലം കാര്യക്ഷമതയോടെ ഗുണഭോക്താക്കളിലേക്ക് എത്തിക്കാനുള്ള വാട്ടർ എഫിഷ്യന്‍റ് തൃശൂരിന്‍റെ (വെറ്റ്) സമർപ്പണം നാളെ രാവിലെ 11.30നു കോർപറേഷൻ അങ്കണത്തിൽ മുഖ്യമന്ത്രി പിണറായി വിജയൻ നിർവഹിക്കുമെന്ന് മേയർ എം.കെ. വർഗീസ് പത്രസമ്മേളനത്തിൽ പറഞ്ഞു. പീച്ചി ഡാമില്‍നിന്നുള്ള ട്രീറ്റ് ചെയ്ത വെള്ളം തേക്കിന്‍കാട് മൈതാനിയിലെ ഓവര്‍ഹെഡ് ടാങ്കിലെത്തിച്ച് വിതരണം ചെയ്യുന്നത് ഓണ്‍ലൈനിലാക്കി എവിടെനിന്നുവേണമെങ്കിലും കാണാവുന്നതും യഥാസമയം പരിശോധിച്ച് പോരായ്മകള്‍ കണ്ടെത്തി പരിഹരിക്കാനാകുന്നതുമാണ് വെറ്റ് പദ്ധതി. ജലത്തിന്‍റെ വരവിൽ അളവുകുറയുന്നതും ലൈനില്‍ ലീക്ക് ഉണ്ടാകുന്നതും അനധികൃതമായി ജലമെടുക്കുന്നതും ഈ സംവിധാനംവഴി ഉടനടി പരിഹരിക്കാനാകും. സംസ്ഥാനത്ത് ആദ്യമായാണ് ഇത്തരമൊരു വാട്ടര്‍ എഫിഷ്യന്‍റ് പദ്ധതി വിഭാവനംചെയ്തു നടപ്പാക്കുന്നത്. 5.59 കോടി രൂപ അമൃത് പദ്ധതിയില്‍ ഉള്‍പ്പെടുത്തി പൂര്‍ത്തീകരിച്ച പ്രവൃത്തി യുഎല്‍സിസിയാണു കോര്‍പറേഷനുവേണ്ടി നിർവഹിച്ചിട്ടുള്ളത്. ഉദ്ഘാടനച്ചടങ്ങിൽ മന്ത്രിമാരായ അഡ്വ.കെ. രാജന്‍, എം.ബി. രാജേഷ്, കേന്ദ്രസഹമന്ത്രി സുരേഷ് ഗോപി, ജില്ലാ കളക്ടര്‍ അര്‍ജുന്‍ പാണ്ഡ്യന്‍ തുടങ്ങിയവരും പങ്കെടുക്കും. 4,000 സ്മാര്‍ട്ട് മീറ്ററുകള്‍, ലോറാവാൻ സംവിധാനം, ജലത്തിന്‍റെ ഗുണനിലവാരം ഓണ്‍ലൈനായി പരിശോധിക്കുന്നതിനുള്ള സംവിധാനം തുടങ്ങിയവ ഒരുക്കാൻ അമൃത് 2.0 പദ്ധതിയില്‍ ഉള്‍പ്പെടുത്തി വെറ്റ് 2.0 എന്ന പ്രവൃത്തികൂടി കോര്‍പറേഷന്‍ വിഭാവനം ചെയ്തിട്ടുണ്ടെന്നും മേയർ എം.കെ. വർഗീസ് പറഞ്ഞു.

ഓപ്പറേഷൻ ഗ്രേ ഹണ്ട്: അറസ്റ്റിലായത് 218 പ്രതികൾ

തൃശൂർ: തൃശൂർ റൂറൽ പോലീസ് നടപ്പാക്കിയ ഓപ്പറേഷൻ ഗ്രേ ഹണ്ടിൽ ഈ മാസം ഒന്നു മുതൽ 12 വരെ 218 പേരെ അറസ്റ്റ് ചെയ്തു. ജില്ലയിലെ വിവിധ കേസുകളിൽ കോടതിയിൽ ഹാജരാകാതെ മുങ്ങി നടക്കുന്ന ജാമ്യമില്ലാ വകുപ്പ് പ്രകാരമുള്ള വാറണ്ട് പുറപ്പെടുവിച്ച പ്രതികളെയും, ദീർഘകാലം കോടതിയിൽ ഹാജരാകാതെ മുങ്ങി നടക്കുന്ന പിടികിട്ടാപ്പുള്ളി വാറണ്ടുള്ള പ്രതികളെയും പിടികൂടുന്നതിനായി തൃശൂർ റൂറൽ എസ് പി ബി.കൃഷ്ണകുമാറിന്‍റെ നിർദേശപ്രകാരം തൃശൂർ റൂറൽ പോലീസ് ആണ് സ്പെഷ്യൽ ഡ്രൈവായി ഓപ്പറേഷൻ ഗ്രേ ഹണ്ട് നടത്തിയത്. കോടതി പിടികിട്ടാപ്പുള്ളികളായി പ്രഖ്യാപിച്ച ജാമ്യമില്ലാ വാറണ്ടുള്ള 16 പ്രതികളെയും, കോടതിയുടെ ശിക്ഷാവിധി അനുസരിക്കാതെ മുങ്ങിനടന്നിരുന്ന ജാമ്യമില്ലാ വാറണ്ടുള്ള അഞ്ചു പ്രതികളെയും, ജാമ്യമില്ലാ വാറണ്ടിൽ ഹാജരാകാതെ മുങ്ങിനടന്നിരുന്ന മറ്റ് 197 പ്രതികളെയുമാണ് അറസ്റ്റ് ചെയ്തത്. ഇവരെ വിവിധ കോടതികളിൽ ഹാജരാക്കിയത്. കൈപ്പമംഗലത്തുനിന്ന് 32 പേരെയും ഇരിങ്ങാലക്കുടയിൽനിന്ന് 17 പേരെയും കാട്ടൂരിൽനിന്ന് 11 പ്രതികളെയും പിടികൂടി. ആളൂർ-4, അന്തിക്കാട്-5, അതിരപ്പള്ളി- 7, ചാലക്കുടി- 16, കൊടകര- 6, ചേർപ്പ്- 20, വെള്ളിക്കുളങ്ങര- 4, കൊരട്ടി- 13, മാള- 22, വാടാനപ്പിള്ളി- 6, വലപ്പാട്- 10, പുതുക്കാട്- 12, കൊടുങ്ങല്ലൂർ- 19, മതിലകം- 14 എന്നിങ്ങനെയാണ് ബാക്കി അറസ്റ്റ്. ചാലക്കുടി ഡിവൈഎസ്പി പി.സി. ബിജുകുമാർ, കൊടുങ്ങല്ലൂർ ഡിവൈഎസ്പി വി.കെ. രാജു, ഇരിങ്ങാലക്കുട ഡിവൈഎസ്പി കെ.ജി. സുരേഷ് എന്നിവരുടെ നേതൃത്വത്തിൽ അതാത് സ്റ്റേഷനുകളിലെ ഇൻസ്പെക്ടർമാരാണ് പ്രതികളെ പിടികൂടിയത്.

ലോക് അദാലത്തിൽ ആറായിരത്തോളം കേസുകൾ തീർപ്പാക്കി

തൃശൂർ: ജില്ലാ നിയമസേവന അഥോറിറ്റി ലോക് അദാലത്തിൽ ആറായിരത്തോളം കേസുകൾ തീർപ്പാക്കി. ജില്ലയിലെ മജിസ്‌ട്രേറ്റ് കോടതികളിൽ കെട്ടിക്കിടന്ന പിഴയൊടുക്കി തീർക്കാവുന്ന കേസുകൾ, എംഎസിടി കേസുകൾ, ബാങ്ക്, സിവിൽ കേസുകൾ, മറ്റു വിവിധ കേസുകൾ എന്നിവയിലൂടെ 22 കോടിയോളം രൂപയുടെ വ്യവഹാരങ്ങളാണു തീർപ്പാക്കിയത്. പ്രിൻസിപ്പൽ ജില്ലാ ജഡ്ജി പി.പി. സൈതലവി, ജില്ലാ നിയമസേവന അഥോറിറ്റി സെക്രട്ടറി, സബ് ജഡ്ജി സരിത രവീന്ദ്രൻ എന്നിവർ അദാലത്തിനു നേതൃത്വംനൽകി. എംഎസിടി ജഡ്ജി സി.ആർ. രവിചന്ദർ, സെക്കൻഡ് അഡീഷണൽ ജില്ലാ ജഡ്ജി കെ.എം. രതീഷ് കുമാർ, റിട്ടയേർഡ് ജില്ലാ ജഡ്ജി പി.എസ്. അനന്തകൃഷ്ണൻ, റിട്ട. ജില്ലാ ജഡ്ജി കെ. രവീന്ദ്രബാബു, സെക്കൻഡ് അഡീഷണൽ സബ് ജഡ്ജി കെ.എം. ശ്രീദേവി, പ്രിൻസിപ്പൽ മുൻസിഫ് ആൻമേരി കുരിയാക്കോസ് മണലേൽ എന്നിവർ പരാതികളിൽ തീർപ്പുകല്പിച്ചു.

പവനൻ അവാർഡ് വൈശാഖന്

തൃശൂർ: കേരള യുക്തിവാദി സംഘത്തിന്‍റെ പവനൻ സെക്യുലർ അവാർഡിന് കഥാകൃത്ത് വെെശാഖനെ തെരഞ്ഞെടുത്തു. 10,000 രൂപയും പ്രശ്സതിപത്രവും ഫലകവും അടങ്ങുന്നതാണ് അവാർഡ്. കൂരിപ്പുഴ ശ്രീകുമാർ, അഡ്വ. കെ.എൻ. അനിൽ കുമാർ, ഗംഗൻ അഴീക്കോട്, അഡ്വ. രാജഗോപാൽ വാകത്താനം, ടി.കെ. ശക്തിധരൻ എന്നിവരടങ്ങുന്ന കമ്മിറ്റിയാണ് അവാർഡ് ജേതാവിനെ തെരഞ്ഞെടുത്തത്. 22 ന് രാവിലെ 10 ന് സാഹിത്യ അക്കാദമിയിൽ നടക്കുന്ന പവനപർവം അനുസ്മരണത്തിൽ ഹൈക്കോടതി ജഡ്ജ് വി.ജി. അരുണ്‍ ഉദ്ഘാടനവും അവാർഡ് ദാനവും നിർവഹിക്കും. മുൻമന്ത്രി കെ.പി. രാജേന്ദ്രൻ പ്രശ്സതിപത്രം സമർപ്പിക്കും. പത്രസമ്മേളനത്തിൽ ടി.കെ. ശക്തിധരൻ, കെ.എസ്. സത്താർ, കെ.എസ്. സുധാകരൻ എന്നിവർ പങ്കെടുത്തു.

മെഡിക്കൽ കോളജിനോടുള്ള അവഗണന തുടർക്കഥയാകുന്നുവെന്ന് കോൺഗ്രസ്

മുളങ്കുന്നത്തുകാവ്: തൃശൂർ ഗവൺമെന്‍റ് മെഡിക്കൽ കോളജിനോടുള്ള സർക്കാരിന്‍റെ സമീപനത്തിന്‍റെ ഏറ്റവുമൊടുവിലത്തെ ഉദാഹരണമാണു ഹൃദയരോഗികളുടെ ദുരവസ്ഥയെന്നു കെപിസിസി സെക്രട്ടറിയും ആശുപത്രി വികസന സമിതി അംഗവുമായ രാജേന്ദ്രൻ അരങ്ങത്ത്. കാർഡിയോളജി, ന്യൂറോളജി, ഗ്യാസ്ട്രോളജി, യൂറോളജി, റേഡിയോളജി വിഭാഗങ്ങളിലടക്കം ഡോക്ടർമാരുടെയും മറ്റു ജീവനക്കാരുടെയും കുറവുനികത്താൻ സർക്കാർ തയാറായിട്ടില്ല. ഹൃദയ ശസ്ത്രക്രിയ വിഭാഗത്തിൽ പരിചയമുള്ള ടെക്നീഷ്യന്മാരില്ലാത്തതിനാൽ പാവപ്പെട്ട രോഗികളുടെ ശസ്ത്രക്രിയ മുടങ്ങുന്ന അവസ്ഥയാണ്. ഒഴിവുകൾ നികത്താൻ സർക്കാർ തയാറാകണമെന്നും രാജേന്ദ്രൻ അരങ്ങത്ത് ആവശ്യപ്പെട്ടു. വിഷയത്തിൽ അടിയന്തര ഇടപെടൽ ആവശ്യപ്പെട്ട് മുഖ്യമന്ത്രിക്കും സംസ്ഥാന മനുഷ്യാവകാശ കമ്മീഷനും കത്തയച്ചു.

രക്തദാനക്യാമ്പ് നടത്തി

ചാലക്കുടി: മർച്ചന്‍റ്സ് യൂത്ത് വിംഗിന്‍റെ നേതൃത്വത്തിൽ സെന്‍റ് ജെയിംസ് ഹോസിപിറ്റലുമായി സഹകരിച്ച് രക്തദാനക്യാമ്പ് നടത്തി. യൂത്ത്‌വിംഗ് പ്രസിഡന്‍റ് ലിന്‍റോ തോമസിന്‍റെ അധ്യക്ഷതയിൽ ചേർന്ന യോഗം സെന്‍റ് ജെയിംസ് ഹോസ്പിറ്റൽ ഡയറക്ടർ റവ.ഡോ. ആന്‍റു ആലപ്പാടൻ ഉദ്ഘാടനം ചെയ്തു. കേരള വ്യാപാരി വ്യവസായി ഏകോപനസമിതി ജില്ലാ ജനറൽ സെക്രട്ടറി എൻ.ആർ. വിനോദ്കുമാർ മുഖ്യപ്രഭാഷണം നടത്തി. മർച്ചന്‍റ്സ് അസോസിയേഷൻ പ്രസിഡന്‍റ് ജോയ് മൂത്തേടൻ ആമുഖപ്രഭാഷണം നടത്തി. അസോസിയേഷൻ ജനറൽ സെക്രട്ടറി ബിനു മഞ്ഞളി, ട്രഷറര്‍ ഷൈജു പുത്തൻപുരക്കൽ, ടി.ബി. ബിനു, ചന്ദ്രൻ കൊളത്താപ്പിള്ളി, എം.ഡി. ഡേവിസ്, എൻ.എ. ഗോവിന്ദൻകുട്ടി, ഡേവിസ് വെളിയത്ത്, റെയ്സൺ ആലുക്ക, ബിജു മാളക്കാരൻ, ആന്‍റോ മേനാച്ചേരി, ആന്‍റോ എരിഞ്ഞേരി, ഇ.ടി. ബഷീർ, വനിതാവിംഗ് ജില്ലാ ട്രഷറര്‍ ഷൈന ജോർജ്, വനിതാ‌വിംഗ് പ്രസിഡന്‍റ് സിന്ധു ബാബു, സെക്രട്ടറി നീബ രാജേഷ്, ട്രഷറര്‍ സിനി സന്തോഷ് എന്നിവർ പ്രസംഗിച്ചു.

കുഴിക്കാട്ടുശേരിയിൽ എട്ടാമിടം തിരുനാൾ ഇന്ന്

കുഴിക്കാട്ടുശേരി: വിശുദ്ധ മറിയം ത്രേസ്യ - ധന്യൻ ഫാ. ജോസഫ് വിതയത്തിൽ തീർത്ഥാടന കേന്ദ്രത്തിൽ വിശുദ്ധ മറിയം ത്രേസ്യയുടെ തിരുനാളിന്‍റെ എട്ടാമിടം ഇന്നു നടക്കും. കുടുംബങ്ങളുടെ മധ്യസ്ഥയായ വിശുദ്ധയുടെ തിരുനാളിന്‍റെ എട്ടാമിടദിനത്തിൽ രാവിലെ 10. 30 ന് ആഘോഷമായ ദിവ്യബലി, പ്രദക്ഷിണം, തിരുശേഷിപ്പ് വണക്കം എന്നീ തിരുക്കർമങ്ങൾക്ക് ഫാ. ജോസഫ് ഗോപുരം മുഖ്യകാർമികനാകും. തിരുനാളിനുള്ള ഒരുക്കങ്ങൾ പൂർത്തിയായി. ഇരിങ്ങാലക്കുട രൂപത വികാരി ജനറാൾ മോൺ. ജോളി വടക്കൻ ചെയർമാനായി കമ്മിറ്റികൾ പ്രവർത്തിക്കുന്നുണ്ട്. തീർഥാടന‌കേന്ദ്രം റെക്ടർ ഫാ. ജോൺ കവലക്കാട്ട്, പ്രമോട്ടർ ഫാ. സെബാസ്റ്റ്യൻ അരിക്കാട്ട്, ഹോളി ഫാമിലി സന്യാസിനി സമൂഹത്തിന്‍റെ സുപ്പീരിയർ ജനറൽ മദർ ആനി കുര്യാക്കോസ് സിഎച്ച് എഫ്, അഡ്മിനിസ്ട്രേറ്ററും ജനറൽ കൺവീനറുമായ സിസ്റ്റർ എൽസി സേവ്യർ സിഎച്ച്എഫ്, വൈസ് പോസ്റ്റുലേറ്റർ സിസ്റ്റർ വിനയ സിഎച്ച്എഫ്, ജനറൽ കൺവീനർ സണ്ണി പഴയാറ്റിൽ എന്നിവരുടെ നേതൃത്വത്തിൽ വിവിധ കമ്മിറ്റികൾ പ്രവർത്തിച്ചുവരുന്നു.

പൂര്‍വവിദ്യാര്‍ഥി സ്നേഹസംഗമം നടത്തി

ഇരിങ്ങാലക്കുട: ഗവ. മോഡല്‍ ബോയ്സ് ഹൈസ്‌കൂളില്‍ 1984-85 കാലയളവില്‍ പഠിച്ചിരുന്ന പൂര്‍വവിദ്യാര്‍ഥികളുടെ സ്നേഹസംഗമം മുന്‍ കേരള പോലീസ് ഫുട്ബോള്‍ ടീം ക്യാപ്റ്റനും പോ ലീസ് കമാന്‍ഡന്‍റുമായ സി.പി. അശോകന്‍ കേക്ക് മുറിച്ച് ഉദ് ഘാടനം ചെയ്തു. വിജയ് പാറയില്‍ അധ്യക്ഷത വഹിച്ചു. വിദ്യാധരന്‍, ടെല്‍സണ്‍ കോട്ടോളി, യൂസഫ്, രാധാകൃഷ്ണന്‍, ദിനേഷ്കുമാര്‍, ഡോ. സാജു മാമ്പിള്ളി, രവി ബോംബെ എന്നിവര്‍ പ്രസംഗിച്ചു. സമ്മേളനത്തില്‍ കേരള പോലീസില്‍നിന്നു വിരമിക്കുന്ന സന്തോഷ് ട്രോഫി താരം കൂടിയായ സി.പി. അശോകനെ ആദരിച്ചു.

സന്നദ്ധരക്തദാന ക്യാമ്പ്

കൊടകര: സഹൃദയ കോളജ് ഓഫ് അഡ്വാന്‍സ്ഡ് സ്റ്റഡീസിലെ എന്‍എസ്എസ് യൂണിറ്റിന്‍റെ നേതൃത്വത്തില്‍ ലോകരക്തദാന ദിനാചരണത്തിന്‍റെ ഭാഗമായി സന്നദ്ധ രക്തദാന ക്യാമ്പ് സംഘടിപ്പിച്ചു. തൃശൂര്‍ ഐഎംഎ ബ്ലഡ് ബാങ്കിന്‍റെ സഹകരണത്തോടെ നടന്ന രക്തദാന ക്യാമ്പ് കോളജ് എക്‌സിക്യൂട്ടീവ് ഡയറക്ടര്‍ റവ. ഡോ. ഡേവിസ് ചെങ്ങിനിയാടന്‍ ഉദ്ഘാടനം ചെയ്തു. പ്രിന്‍സിപ്പല്‍ ഡോ. കെ.എല്‍. ജോയ്, ഐഎംഎ ബ്ലഡ് ബാങ്ക് ടെക്‌നിക്കല്‍ സൂപ്പര്‍വൈസര്‍ ടി.എസ്.സുരേഷ് ബാബു, ഐഎംഎ ബ്ലഡ് ബാങ്ക് മെഡിക്കല്‍ ഓഫീസര്‍ ഡോ. പ്രദീപ്കുമാര്‍, സ്റ്റുഡന്‍റ് കോ-ഓഡിനേറ്റര്‍ അര്‍ജുന്‍‌കൃഷ് ണ എന്നിവര്‍ സംസാരിച്ചു. എന്‍എസ്എസ് യൂണിറ്റിനെ സന്നദ്ധ രക്തദാന രംഗത്തെ മികച്ച പ്രവര്‍ത്തനത്തിനുള്ള അവാര്‍ഡ് നല്‍കി തൃശൂര്‍ വൈഎംസിഎ ആദരിച്ചു.

പഠനോപകരണവിതരണം നടത്തി

കൊരട്ടി: കോൺഗ്രസ്‌ കൊരട്ടി മണ്ഡലം കമ്മിറ്റിയുടെ നേതൃത്വത്തിൽ അർഹരായ വിദ്യാർഥികൾക്ക് പഠനോപകരണങ്ങൾ വിതരണം ചെയ്തു. പഞ്ചായത്തിലെ 19 വാർഡുകളെ 6 മേഖലകളായി തിരിച്ച് 250 കുട്ടികൾക്കു പഠനോപകരണങ്ങൾ വിതരണം ചെയ്യുന്ന പദ്ധതി സനീഷ്കുമാർ ജോസഫ് എംഎൽഎ ഉദ്ഘാടനം ചെയ്തു. മണ്ഡലം പ്രസിഡന്‍റ് അഡ്വ. ആൽബിൻ പൗലോസ് അധ്യക്ഷത വഹിച്ചു. ഗ്രാമ പഞ്ചായത്ത് അംഗങ്ങളായ വർഗീസ് പയ്യപ്പിള്ളി, ഗ്രേസി സ്കറിയ, പോൾസി ജിയോ, മണ്ഡലം ഭാരവാഹികളായ ജോഷി വല്ലൂരാൻ, സച്ചിൻ രാജ്, വി.കെ. കൃഷ്ണൻ, ബിജോയ്‌ പാപ്പച്ചൻ, ജോമി തോമസ്, ബൈജു മുള്ളൻകുഴി എന്നിവർ പ്രസംഗിച്ചു. കൊടകര: മർച്ചന്‍റ്സ് അസോസിയേഷന്‍റെ നേതൃത്വത്തിൽ കൊടകര ജനമൈത്രി പോലീസ് സ്റ്റേഷന്‍റെ പരിധിയിൽപെട്ട സാന്പത്തികമായി പിന്നോക്കമുള്ള വിദ്യാർഥികൾക്ക് സ്കൂൾ ബാഗുകൾ, കുട, നോട്ട്ബുക്കുകൾ വിതരണം ചെയ്തു. എസ്എച്ച്ഒ സി.ഐ. ദാസ് ഏറ്റുവാങ്ങി. കൊടകര മർച്ചന്‍റ്സ് അസോസിയേഷൻ പ്രസിഡന്‍റ് ഷാജി ജോസഫ്, ജനറൽ സെക്രട്ടറി ബാബു ജോർജ്, യൂത്തുവിംഗ് പ്രസിഡന്‍റ് സിന്‍റോ പുതുമ എന്നിവർ പ്രസംഗിച്ചു. കൊടകര പോലീസ് അംഗങ്ങളായ ഷീബ, സിപിഒ സജു, ബേബി, അജി എന്നിവർ പങ്കെടുത്തു. ചാലക്കുടി: ദളിത് കോൺഗ്രസ്‌ ബ്ലോക്ക്‌ കമ്മിറ്റിയുടെ നേതൃത്വത്തിൽ എസ്‌സി - എസ്‌ടി കുട്ടികൾക്കുള്ള പഠനോപകരണ വിതരണവും ലഹരി വിരുദ്ധ ക്ലാസും നടത്തി. സനീഷ്കുമാർ ജോസഫ് എംഎൽഎ ഉദ്ഘാടനം ചെയ്തു. ദളിത് കോൺഗ്രസ് ബ്ലോക്ക് പ്രസിഡന്‍റ് ശശി വട്ടേക്കാട് അധ്യക്ഷത വഹിച്ചു. എക്സൈസ് അസി. ഇൻസ്പെക്ടർ കെ. കെ. രാജു ലഹരിവിരുദ്ധ ക്ലാസ് നയിച്ചു. ബ്ലോക്ക് പഞ്ചായത്ത് പ്രസിഡന്‍റ് വേണു കണ്ടരുമഠത്തിൽ, ദളിത് കോൺഗ്രസ് ജില്ലാ പ്രസിഡന്‍റ് സന്തോഷ് ഐത്താടൻ, കോൺഗ്രസ് സംസ്ഥാന ജനറൽ സെക്രട്ടറി എം.കെ. രാജേഷ്‌ കുമാർ, ഡിസിസി ജനറൽ സെക്രട്ടറി കെ. ജെയിംസ് പോൾ, സേവാദൾ സംസ്ഥാന ജനറൽ സെക്രട്ടറി ബാബു ജോസഫ് പുത്തനങ്ങാടി, സുലോചന രാജൻ, ദളിത് കോൺഗ്രസ് ജില്ലാ സെക്രട്ടറിമാരായ കെ.കെ. രവി, രാജ്കുമാർ സിത്താര, ദളിത് കോൺഗ്രസ് മണ്ഡലം പ്രസിഡന്‍റ് കുമാരൻ വെട്ടിയാട്ടിൽ, പ്രിയ മംഗലശേരി എന്നിവർ പ്രസംഗിച്ചു. മേലൂർ: സർവീസ് സഹകരണ ബാങ്കിന്‍റെ ആഭിമുഖ്യത്തിൽ എസ്എസ്എൽസി, പ്ലസ് ടു പരീക്ഷകളിൽ മുഴുവൻ വിഷയങ്ങൾക്കും എ പ്ലസ് നേടിയ ബാങ്ക് സഹകാരികളുടെ മക്കളെ വിദ്യാഭ്യാസ പുരസ്കാരങ്ങൾ നൽകി ആദരിച്ചു. ചടങ്ങിനോടനുബന്ധിച്ച് പഠനോപകരണങ്ങളുടെ വിതരണവും നടന്നു. ജില്ല പഞ്ചായത്ത് പ്രസിഡന്‍റ് വി.എസ്. പ്രിൻസ് ഉദ് ഘാടനം ചെയ്തു. ബാങ്ക് പ്രസിഡ‌ന്‍റ്് ഇ.കെ. കൃഷ്ണൻ അധ്യക്ഷനായി. ഭരണസമിതി അംഗങ്ങളായ മധു തൂപ്രത്ത്, എൻ.ജി. സന്തോഷ്കുമാർ, പൗലോസ് തെക്കൻ, ജോമോൻ നെറ്റിക്കാടൻ, ഫ്രാൻസിസ് മേനാച്ചേരി, സന്ധ്യ ബാബു, സിന്ധു രാധാകൃഷ്ണൻ, സിസിലി തോമസ്, ബാങ്ക് സെക്രട്ടറി എം. സിന്ധു എന്നിവർ പ്രസംഗിച്ചു.

കൊരട്ടി, മുരിങ്ങൂർ ദേശീയപാത: ഗ്രാമീണറോഡുകൾ തകരുന്നു; കാടുകുറ്റിയിൽ പ്രതിഷേധ ധർണ

കാടുകുറ്റി: ദേശീയപാതയിലെ ഗതാഗതക്കുരുക്ക് ഒഴിവാക്കാൻ വാഹനങ്ങൾ വഴിതിരിച്ചുവിടുന്നതുമൂലം കാടുകുറ്റി പഞ്ചായത്തിലെ ഗ്രാമീണ - പൊതുമരാമത്ത് റോഡുകൾ തകരുന്നുവെന്നും ഭാരവണ്ടികളും എയർബസുകളും ഇതിലുടെ കടത്തിവിടുന്നതിന് നിയന്ത്രണം ഏർപ്പെടുത്തണമെന്നും ആവശ്യപ്പെട്ട് ജനകീയ സമിതിയുടെ ആഭിമുഖ്യത്തിൽ പഞ്ചായത്ത് കാര്യാലയത്തിനു മുന്നിൽ പ്രതിഷേധ ധർണ. വാട്ടർ അഥോറിറ്റി കുഴിച്ച കുഴികളിൽ രാത്രികാലങ്ങളിൽ വലിയ വാഹനങ്ങളുടെ ടയറുകൾ താഴുന്നതായും ഇന്‍റർനെറ്റ്, കേബിൾ ടി.വി, സർവീസ് വയറുകൾ എന്നിവ വാഹനങ്ങളിൽ കുടുങ്ങി പൊട്ടിവീഴുന്നതായും സമരക്കാർ ചൂണ്ടിക്കാട്ടി. ഇതുസംബന്ധിച്ച് പ്രദേശവാസികൾ ഒപ്പിട്ട പരാതി ഗ്രാമപഞ്ചായത്ത് പ്രസിഡന്‍റിനും സെക്രട്ടറിക്കും കൈമാറി. ജയൻ ജോസഫ് പട്ടത്ത് ധർണ ഉദ്ഘാടനം ചെയ്തു. മുൻ ഗ്രാമപഞ്ചായത്ത് പ്രസിഡന്‍റ് തോമസ് ഐ. കണ്ണത്ത് മുഖ്യപ്രഭാഷണം നടത്തി. സിയോൺ ധ്യാനകേന്ദ്രം ഡയറക്ടർ ഫാ. ജിജോ, പയസ് പാറയിൽ, ഷിബു വട്ടോലി, എം.ആർ.ഡേവീസ്, ബിനോജ് കെ.ജോസ്, ലോനച്ചൻ അമ്പൂക്കൻ, ജോർജ് പാറയിൽ, മാൽക്കം എന്നിവർ പ്രസംഗിച്ചു.

അശാസ്ത്രീയ നിർമാണത്തിനെതിരെ കൊരട്ടിയിൽ ജനകീയകൂട്ടായ്മ

കൊരട്ടി: ദേശീയപാത ചിറങ്ങര, കൊരട്ടി, മുരിങ്ങൂർ എന്നിവിടങ്ങളിലെ അടിപ്പാത - മേൽപ്പാല നിർമാണത്തിലെ അശാസ്ത്രീയതക്കെതിരെയും മെല്ലെപ്പോക്കിനെതിരെയും എൽഡിഎഫ് കൊരട്ടി പഞ്ചായത്ത് കമ്മിറ്റിയുടെ നേതൃത്വത്തിൽ പ്രതിഷേധ കൂട്ടായ്മ സംഘടിപ്പിച്ചു. വിഷയത്തോട് സ്ഥലം എംപിയും എം എൽഎയും ഗുരുതരമായ കൃത്യവിലോപവും അനാസ്ഥയും പുലർത്തുന്നതായി യോഗത്തിൽ ആരോപണമുയർന്നു. പ്രതിഷേധ ജനകീയ കൂട്ടായ്മ സിപി എം ചാലക്കുടി ഏരിയ സെക്രട്ടറി കെ.എസ്. അശോകൻ ഉദ്ഘാടനം ചെയ്തു. സിപിഐ മണ്ഡലം കമ്മിറ്റി അംഗം ടി.വി. രാമകൃഷ്ണൻ അധ്യക്ഷത വഹിച്ചു. ഗ്രാമപഞ്ചായത്ത് പ്രസിഡന്‍റ്് പി.സി. ബിജു, എൽഡിഎഫ് നേതാക്കളായ ഡെന്നീസ് കെ. ആന്‍റണി, കെ.പി. തോമസ്, കെ.എ. ജോജി, ജോർജ് വി. ഐനിക്കൽ, ഡേവിസ് മാമ്പ്ര, എ.എ. ബിജു, കെ.കെ. രാജൻ, അഡ്വ. കെ.ആർ. സുമേഷ് എന്നിവർ പ്രസംഗിച്ചു.

മതിലകം ഗ്രാമപഞ്ചായത്ത് വിദ്യാഭ്യാസ അവാർഡ് വിതരണം

പള്ളിവളവ്: മതിലകം ഗ്രാമപഞ്ചായത്തിന്‍റെ ആഭിമുഖ്യത്തിൽ വിദ്യാഭ്യാഅവാർഡ് വിതരണം സംഘടിപ്പിച്ചു. എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയവർക്കാണ് വിദ്യാഭ്യാസ അവാർഡ് നൽകി അനുമോദിച്ചത്. ഇ.ടി. ടൈസൺ എംഎൽഎ ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്‍റ്് സീനത്ത് ബഷീർ അധ്യക്ഷത വഹിച്ചു. എംഇഎസ് അസ്മാബി കോളജ് പൊളിറ്റിക്കൽ സയൻസ് വിഭാഗം മേധാവി ഡോ. സനന്ദ് സദാനന്ദൻ മുഖ്യപ്രഭാഷണം നടത്തി. ജില്ലാ പഞ്ചായത്തംഗം സുഗത ശശിധരൻ, ബ്ലോക്ക് പഞ്ചായത്ത് വൈസ് പ്രസിഡന്‍റ് ഹഫ്സ ഒഫൂർ, പഞ്ചായത്ത് വൈസ് പ്രസിഡന്‍റ്് ടി.എസ്. രാജു, പഞ്ചായത്ത്‌ ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ സുമതി സുന്ദരൻ, വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ പ്രിയ ഹരിലാൽ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ എം.കെ. പ്രേമാനന്ദൻ, പഞ്ചായത്ത്‌ സെക്രട്ടറി കെ.എസ്. രാമദാസ്, പഞ്ചായത്തംഗങ്ങൾ തുടങ്ങിയവർ പങ്കെടുത്തു. വിരമിച്ച അധ്യാപകരായ ടി.എസ്. സജീവൻ, വി.കെ. മുജീബ് റഹ്മാൻ എന്നിവരെ എംഎൽഎ ആദരിച്ചു.

എലിഞ്ഞിപ്ര കുടുംബാരോഗ്യകേന്ദ്രത്തിൽ ഭീഷണിയായി വൻമരങ്ങൾ

എലിഞ്ഞിപ്ര: കുടുംബാരോഗ്യകേന്ദ്രത്തിനു മുന്നിൽ വൻമരങ്ങൾ അപകടഭീഷണി ഉയർത്തു ന്നു. സാധാരണക്കാരായ രോഗികൾ ചികിത്സക്കായി ആശ്രയിക്കുന്ന ആതുരാലയത്തിൽ ദിനംപ്രതി നൂറുകണക്കിന് രോഗികളാണു ചികിത്സയ്ക്കുവേണ്ടി എത്തുന്നത്. മരങ്ങളുടെ വിഷയം ആശുപത്രി വികസനസമിതിയിൽ പലവട്ടം ഉന്നയിക്കപ്പെട്ടിട്ടുള്ളതാണ്. എന്നാൽ മരങ്ങൾ മുറിക്കുന്നതിലെ നിയമപ്രശ്നങ്ങളുടെ പേരിൽ അധികൃതർ ഇക്കാര്യത്തിൽ അലംഭാവം പുലർത്തുകയാണെന്നും അടിയന്തരമായി മരച്ചില്ലകൾ മുറിച്ചുമാറ്റിയില്ലെങ്കിൽ അപകടം എപ്പോൾ വേണമെങ്കിലും സംഭവിക്കാമെന്നും ബ്ലോക്ക് പഞ്ചായത്ത് പ്രസിഡന്‍റ് വേണു കണ്ടരുമഠത്തിൽ ചൂണ്ടിക്കാട്ടി.

സെന്‍റ്് ജോസഫ് കോളജില്‍ നേത്രദാന ബോധവത്കരണ കര്‍മപരിപാടിക്കു തുടക്കം

ഇരിങ്ങാലക്കുട: ലയണ്‍സ് ക്ലബ് ഓഫ് സെന്‍റ് ജോസഫ് കോളജ് ഇരിങ്ങാലക്കുടയുടെ നേതൃത്വത്തില്‍ സെന്‍റ്് ജോസഫ് കോളജ് എന്‍എസ്എസ് യൂണിറ്റിന്‍റെ സഹകരണത്തോടെ നേത്രദാന ബോധവത്കരണ കര്‍മപരിപാടിക്കു തുടക്കംകുറിച്ചു. നേത്രദാന ബോധവത്കരണ കര്‍മസേന അംഗത്വ ഫോം വിദ്യാര്‍ഥികള്‍ സോണ്‍ ചെയര്‍മാന്‍ അഡ്വ. ജോണ്‍ നിധിന്‍ തോമസിനു കൈമാറി. നൂറ് വിദ്യാര്‍ഥികള്‍ ഉള്‍പ്പെടുന്ന കര്‍മസേന രൂപീകരിച്ചു. അഡ്വ. ജോണ്‍ നിധിന്‍ തോമസ് നേത്രദാന ബോധവത്കരണ പരിപാടി ഉദ്ഘാടനം ചെയ്തു. എന്‍എസ്എസ് പ്രോഗ്രാം ഓഫീസര്‍ വീണ സാനി അധ്യക്ഷത വഹിച്ചു. ഹെല്‍ന വര്‍ഗീസ് സ്വാഗതവും മാളവിക നന്ദിയും പറഞ്ഞു. ലയണ്‍സ് ക്ലബ് കോ-ഓര്‍ഡിനേറ്റര്‍ മഞ്ജു പ്രതിജ്ഞവാചകം ചൊല്ലിക്കൊടുത്തു. എന്‍എസ്എസ് പ്രോഗ്രാം ഓഫീസര്‍ ഉര്‍സുല, ഹൃദ്യ എന്നിവര്‍ പ്രസംഗിച്ചു.

ദേശീയപാത 66 അപകടപാത; എടക്കഴിയൂരിൽ കെണി

ചാവക്കാട്: നിർമാണത്തിനിടയിൽ വിള്ളൽവീണ ദേശീയപാത 66ലെ കുഴികൾ വാഹനങ്ങൾക്കും കാൽനടക്കാർക്കും ഭീഷണിയായി. എടക്കഴിയൂര്‍ സലഫി മസ്ജിദിനു വടക്ക് സര്‍വീസ് റേഡിനോട് ചേര്‍ന്ന് രൂപപ്പെട്ട വലിയ കുഴി അപകടം ക്ഷണിച്ചു വരുത്തുന്ന കെണിയായി. കാന നിര്‍മാണം വന്നെത്തിനില്‍ക്കുന്ന സ്ഥലത്താണ് കുഴി. സമീപത്തെ ട്രാസ് ഫോര്‍മറും കുഴിയിലെ വെള്ളകെട്ടില്‍ അകപെട്ടിരിക്കുകയാണ്. അപകട സൂചനയായി ദേശീയപാത അധികൃതര്‍ ഒരു പിവിസി പൈപ്പ് കുത്തിവെച്ചതല്ലാതെ മറ്റു സുരക്ഷാ വലയങ്ങളൊന്നുമില്ല. ആയിരക്കണക്കിനു ചെറുതും വലുതുമായ വാഹനങ്ങളാണ് ഇതിലെ കടന്നുപോകുന്നത്. സീതിസാഹിബ് ഹയര്‍ സെക്കൻഡറി സ്‌കൂളിലെ നൂറുകണക്കിനു വിദ്യാര്‍ഥികളും, മറ്റു ജനങ്ങളും ഇതുവഴിയാണ് പോകുന്നത്. മഴശക്തമായാല്‍ കുഴിയും, റോഡും, വെള്ളകെട്ടാല്‍ തിരിച്ചറിയാന്‍ കഴിയാത്ത അവസ്ഥയാണ്. കാന നിര്‍മാണത്തിന്‍റെ കൂര്‍ത്ത കമ്പികളും ഉയര്‍ന്നു നില്‍ക്കുന്നതു ഭീഷണിയാണ് .

ദേശീയപാതയിലെ കുഴി; വീണ്ടും ലോറി മറിഞ്ഞു

പുന്നയൂർക്കുളം: അകലാട് മൂന്നയിനിയിൽ ദേശീയപാതയിലെ കുഴിയിൽ ചാടി മരം കയറ്റി വന്ന ലോറി ചെരിഞ്ഞു. മൂന്നയിനി റഹ്മത്ത് ഹാളിന് സമീപമാണ് സംഭവം. ദേശീയപാത 66ലെ സർവീസ് റോഡുകളുടെ വശങ്ങളിലെ കുഴിയടയ്ക്കാത്തതാണ് അപകടത്തിന് കാരണം. കുഴിയടയ്ക്കണമെന്ന് നിരവധിതവണ നാട്ടുകാർ ആവശ്യപ്പെട്ടതിനെ തുടർന്ന് കഴിഞ്ഞദിവസം കുഴികളിൽ കമ്പനി ഇട്ട മണൽ കനത്ത മഴയിൽ ഒലിച്ചുപോയി വെള്ളം നിറഞ്ഞ് റോഡും കുഴികളും തിരിച്ചറിയാൻ കഴിയാൻ കഴിയാത്ത വിധമായി. കുഴിയറിയാതെ വാഹനങ്ങൾ കുഴിയിൽ ചാടി ഭാരം കയറ്റിയ വാഹനങ്ങൾ അപകടത്തിൽപ്പെടുന്നത് നിത്യസംഭവമായി. ഒടുവിൽ നടന്ന അപകടം ഡ്രൈവറുടെയും നാട്ടുകാരുടേയും സമയോചിതമായ ഇടപെടലിനെതുടർന്ന് വാഹനം മറിയാതെ വൻ അപകടത്തിൽ നിന്നും രക്ഷപ്പെട്ടു. തുടർന്ന് മൂന്ന് ജെസിബി ഉപയോഗിച്ച് കുഴിയിൽ നിന്നും കയറ്റി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]