ADVERTISEMENT

ADVERTISEMENT

സ്ലൂയിസുകൾ തുറക്കാത്തതുമൂലം വെള്ളക്കെട്ട്: കോൺഗ്രസ് മാർച്ച് നടത്തി

ചാഴൂർ: പഞ്ചായത്തിലെ പാടശേഖരങ്ങളിലെ സ്ലൂയിസുകൾ തുറക്കാതെ മനുഷ്യനിർമിത ദുരന്തം ജനങ്ങൾക്ക് സമ്മാനിച്ച ഉദ്യോഗസ്ഥരുടെയും ജനപ്രതിനിധികളുടേയും നടപടിക്കെതിരെ കോൺഗ്രസ് ചാഴൂർ മണ്ഡലം കമ്മിറ്റി ചാഴൂർ കൃഷിഭവൻ മാർച്ച് നടത്തി.

ഡിസിസി വൈസ് പ്രസിഡന്‍റ് സി.ഒ.ജേക്കബ് ഉദ്ഘാടനം ചെയ്തു. സുനിൽ ലാലൂർ മുഖ്യ പ്രഭാഷണം നടത്തി. മണ്ഡലം പ്രസിഡന്‍റ് ഷൈജു സായിറാം അധ്യക്ഷത വഹിച്ചു. ബ്ലോക്ക് കോൺഗ്രസ് അംഗങ്ങളായ സി.എം. പരമശിവൻ, അശോക് കോമത്ത് കാട്ടിൽ, ജോഷി ആലപ്പാട്ട്, കെ.കെ. രാജേഷ്, പി.കെ. ഇബ്രാഹിം, സലാം കക്കേരി. ഷീമ ആന്‍റണി എന്നിവർ പ്രസംഗിച്ചു.

ADVERTISEMENT

ദുരിതാശ്വാസ ക്യാമ്പുകൾ എംഎൽഎ സന്ദർശിച്ചു

ചേർപ്പ്: കനത്ത മഴയിൽ വെള്ളം ഉയർന്നതിനെ തുടർന്ന് ചേർപ്പ് വെസ്റ്റ് ഗവ. ജൂണിയർ ബേസിക് സ്കൂൾ, ചേർപ്പ് ഗവ. ഹയർ സെക്കൻഡറി സ്കൂളുകളിലെ ദുരിതാശ്വാസ ക്യാന്പുകൾ സി.സി. മുകുന്ദൻ എംഎൽഎയും ജനപ്രതിനിധികളും ഉദ്യോഗസ്ഥരും സന്ദർശിച്ചു. ജില്ലാ കളക്ടറുമായി ബന്ധപ്പെട്ട് ദുരിതാശ്വാസ ക്യാമ്പുകളിലേക്ക് സർക്കാരിന്‍റെ സഹായങ്ങൾ ലഭ്യമാക്കിയതായും ക്യാമ്പിന്‍റെ നടത്തിപ്പ് വില്ലേജ് ഓഫീസറും ഗ്രാമപഞ്ചായത്ത് പ്രസിഡന്‍റ്് അടക്കമുള്ള ജനപ്രതിനിധികളും ഉത്തരവാദിത്വത്തോടെ നിർവഹിക്കുന്നതായും ക്യാന്പ് സന്ദർശിച്ച എംഎൽഎ പറഞ്ഞു. ബ്ലോക്ക് പഞ്ചായത്ത് പ്രസിഡന്‍റ്് എ.കെ. രാധാകൃഷ്ണൻ, ഗ്രാമപഞ്ചായത്ത് പ്രസിഡന്‍റ്് സുജിഷ കളിയത്ത്, വില്ലേജ് ഓഫീസർ ശ്രീവിദ്യ രാമചന്ദ്രൻ, ഗ്രാമപഞ്ചായത്ത്‌ സെക്രട്ടറി മുംതാസ് അക്ബറലി, ഗ്രാമപഞ്ചായത്ത് അംഗങ്ങളായ ധന്യ സുനിൽ, നസീജ മുത്തലീഫ്, വിദ്യ രമേഷ് തുടങ്ങിയവർ സന്നിഹിതരായിരുന്നു.

തൃപ്രയാർ ശ്രീരാമ ഗവ. പോളിടെക്നിക് വജ്രജൂബിലി കെട്ടിടസമുച്ചയം ഉദ്ഘാടനം ഇന്ന്

തൃപ്രയാർ: 10 കോടി രൂപ ചെലവഴിച്ച് നിർമിച്ച ശ്രീരാമ ഗവ. പോളിടെക്നിക് വജ്രജൂബിലി കെട്ടിടസമുച്ചയം ഇന്ന് ഉദ്ഘാടനം ചെയ്യുമെന്ന് സ്കൂൾ അധികൃതർ പത്രസമ്മേളനത്തിൽ അറിയിച്ചു. കെട്ടിടത്തിൽ വിദ്യാർഥികൾക്കുള്ള ലാബുകൾ, പൊതുജനങ്ങൾക്കും ഉപയോഗിക്കാവുന്ന 100 കമ്പ്യൂട്ടറുകളുള്ള കോമൺകമ്യൂണിറ്റി സെന്‍ററും ഉണ്ട്. ഓൺലൈൻ എക്സാമിനേഷൻ സെന്‍ററും പ്രവർത്തിക്കും. കൂടാതെ അത്യാധുനിക സംവിധാനത്തോടെയുള്ള മെറ്റീരിയൽ ടെസ്റ്റിംഗ് സൗകര്യവും ഒരു ക്കും. ഇന്ന് ഉച്ചയ്ക്ക് 12 ന് മന്ത്രി ആർ. ബിന്ദു ഉദ്ഘാടനം നിർവഹിക്കും. സി.സി. മുകുന്ദൻ എംഎൽഎ അധ്യക്ഷത വഹിക്കും. പത്രസമ്മേളനത്തിൽ പ്രിൻസിപ്പൽ ടി.എസ്. ബാബുരാജ്, വിവിധ വകുപ്പുമേധാവികളായ സി.എ. അരുൺ, ഇ.പി. അജയ്കുമാർ, പി.ജി. ജിന്‍റോ ഫ്രാൻസിസ് എന്നിവർ പങ്കെടുത്തു.

പുതുക്കാട് തട്ടുകടകളില്‍ ആരോഗ്യവകുപ്പിന്‍റെ മിന്നല്‍പരിശോധന; രണ്ടു കടകള്‍ അടപ്പിച്ചു

പുതുക്കാട്: സെന്‍ററിലെ തട്ടുകടകളില്‍ ആരോഗ്യവകുപ്പിന്‍റെ മിന്നല്‍പരിശോധന. വൃത്തിഹീനമായ സാഹചര്യത്തില്‍ ഭക്ഷണം പാകംചെയ്തതും പഴകിയ ഭക്ഷണം കണ്ടെത്തിയതുമായ രണ്ടു കടകള്‍ അടയ്ക്കാന്‍ നിര്‍ദേശം നല്‍കി. രണ്ടു ദിവസത്തിനുള്ളില്‍ മറ്റുള്ള തട്ടുകള്‍ വൃത്തിയാക്കിയശേഷം ആരോഗ്യവകുപ്പിനെ അറിയിക്കാനും ഉദ്യോഗസ്ഥര്‍ നിര്‍ദേശിച്ചു. പുതുക്കാട് സെന്‍ററിലെ കടകളില്‍നിന്ന് വാങ്ങിയ ഭക്ഷണത്തില്‍നിന്ന് കഴിഞ്ഞ ദിവസങ്ങളില്‍ പുഴുവിനെയും തേരട്ടയെയും കണ്ടെത്തിയതിനു പിന്നാലെയാണ് ആരോഗ്യവകുപ്പിന്‍റെ പരിശോധന. വഴിയാത്രക്കാരാണ് കൂടുതലായി പരാതിയുമായെത്തുന്നത്. ദേശീയപാതയോരത്തെ കടകളില്‍നിന്ന് ഭക്ഷണം കഴിച്ച് മടങ്ങുന്ന ദൂരസ്ഥലങ്ങളിലുള്ളവര്‍ക്ക് അസ്വസ്ഥത അനുഭവപ്പെട്ടതായും പരാതി ഉയര്‍ന്നിരുന്നു. രണ്ടാഴ്ചയിലൊരിക്കല്‍ രാത്രി പരിശോധന കര്‍ശനമാക്കുമെന്നും ഉദ്യോഗസ്ഥര്‍ അറിയിച്ചു. പുതുക്കാട് ഹെല്‍ത്ത് ഇന്‍സ്‌പെക്ടര്‍ ആര്‍. രാജേഷ്, പഞ്ചായത്തുതല ഹെല്‍ത്ത് ഇന്‍സ്‌പെക്ടര്‍ കെ.ജി. ഗീതുപ്രിയ, ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരായ അബ്ദുള്‍ റസാഖ്, നിമ്മി എന്നിവരുടെ നേതൃത്വത്തിലാണു പരിശോധന നടത്തിയത്.

കമാൻഡ് മുഖം താത്കാലിക ബണ്ട് തകർന്നു; നാലു പഞ്ചായത്തുകൾ വെള്ളക്കെട്ടുഭീഷണിയിൽ

ചേർപ്പ്: കരുവന്നൂർ വൈക്കോച്ചിറ കമാൻഡ് മുഖത്തെ താത്കാലിക ബണ്ട് തകർന്നു. പുഴ കവിഞ്ഞ് വെള്ളം ജനവാസകേന്ദ്രങ്ങളിലേക്ക് ഒഴുകുന്നതിനാൽ നാലു പഞ്ചായത്തുകളിലെ താഴ്ന്ന പ്രദേശങ്ങൾ വെള്ളക്കെട്ട് ഭീഷണിയിലായി. ചേർപ്പ്, ചാഴൂർ, പാറളം, അരിമ്പൂർ പഞ്ചായത്തുകളാണ് വെള്ളക്കെട്ട് ഭീഷണി നേരിടുന്നത്. കഴിഞ്ഞ വർഷം രണ്ടായിരത്തോളം വീടുകളിലും കൃഷിസ്ഥലത്തും വെള്ളക്കെട്ട് സൃഷ്ടിച്ച അതേ‌സാഹചര്യമാണ് നിലവിൽ. കരുവന്നൂർ പുഴയിലെ വെള്ളം നിയന്ത്രിക്കാൻ കഴിഞ്ഞ ഒാഗസ്റ്റിൽ പത്തുലക്ഷം രൂപ ചെലവാക്കി കമാൻഡ് മുഖത്ത് പണിത താത്കാലിക തടയണയാണു തകർന്നത്. ഈ ബണ്ട് നിർമാണം അശാസ്ത്രീയമാണെന്ന് ആരോപണം ഉയർന്നിരുന്നു. കഴിഞ്ഞ വർഷം കമാൻഡ് മുഖം തകർന്നതിനെത്തുടർന്ന് പുഴയിൽനിന്നും വൻതോതിൽ വെള്ളം ഒഴുകി നാലു പഞ്ചായത്തുകളിലായി രണ്ടായിരത്തോളം വീടുകളിൽ വെള്ളം കയറിയിരുന്നു. വൻതോതിൽ കൃഷിനാശവും രണ്ടായിരത്തിലധികം ആളുകൾ ദുരിതാശ്വാസ ക്യാമ്പുകളിൽ അഭയം തേടേണ്ട സാഹചര്യവും ഉണ്ടായിരുന്നു. തദ്ദേശ സ്ഥാപനങ്ങൾ നൽകിയ പത്തുലക്ഷം രൂപ ഉപയോഗിച്ചാണ് തടയണ നിർമിച്ചത്. തടയണയുടെ പണി കഴിയുംമുമ്പേ കനാലിൽനിന്നും പുഴയിലേക്ക് വെള്ളം തിരിച്ചൊഴുകിയതിനാൽ തടയണകൊണ്ട് ഗുണം ഉണ്ടാ യില്ല. എങ്കിലും മഴ ശക്തിപ്രാപിച്ച് പുഴയിൽനിന്നും വെള്ളം കവിഞ്ഞൊഴുകിയുള്ള പ്രശ്നങ്ങൾ ഉണ്ടാകില്ലെന്നായിരുന്നു നാട്ടുകാരുടെ പ്രതീക്ഷ. എന്നാൽ ആ പ്രതീക്ഷയും അസ്ഥാനത്തായി. ഫലത്തിൽ അശാസ്ത്രീയമായ പണികൾമൂലം പത്തുലക്ഷം രൂപ പാഴാവുകയാണുണ്ടായതെന്നു നാട്ടുകാർ ആരോപിച്ചു.

വടക്കാഞ്ചേരി നഗരസഭ ഇനി സമ്പൂർണതിമിരവിമുക്തം

വടക്കാഞ്ചേരി: നഗരസഭയും ലയൺസ് ക്ലബ്ബും തൃശൂർ ആര്യ ഐ കെയർ കണ്ണാശുപത്രിയും സംയുക്തമായി നടത്തിയ "കാഴ്‌ച 2024-25" സമ്പൂർണ തിമിരവിമുക്ത നഗരസഭ പദ്ധതിയുടെ പ്രഖ്യാപനം 28 ന് രാവിലെ 10 ന് പാലസ് റോഡിലെ ലയൺസ് ഹാളിൽ നടത്തുമെന്ന് ഭാരവാഹികൾ പത്രസമ്മേളനത്തിൽ പറഞ്ഞു. വടക്കാഞ്ചേരി നഗരസഭയുടെ 41 ഡിവിഷനിലുള്ളവർക്കായി ലയൺസ് ക്ലബ് ഹാളിലും വിവിധ‌സ്ഥലങ്ങളിലുമായി നടത്തിയ സൗജന്യ നേത്ര‌പരിശോധനയും നേത്ര സംരക്ഷണ ബോധവത്കരണ ക്ലാസും പൂർത്തിയാ യി. പദ്ധതിയുടെ ഭാഗമായി തിമിരശ സ്ത്രക്രിയയും സൗജന്യ മരുന്നുവിതരണവും നടന്നു. സാമ്പത്തികമായി പിന്നാക്കംനിൽക്കുന്ന ജനങ്ങൾക്ക് ഏറെ ആശ്വാസമാകുന്നതിനു പദ്ധതിക്കുകഴിഞ്ഞു. തിമിരവിമുക്ത വടക്കാഞ്ചേരി നഗരസഭ എന്ന ലക്ഷത്തിലേക്ക് പദ്ധതിയെ എത്തിക്കുന്നതിനും സാധിച്ചു. വർഷത്തിൽ 365 ദിവസവും സൗജന്യ ഡയബറ്റിക് രക്തപരിശോധന, തിമിര നിർണയ കണ്ണ് പരിശോധന, ബിആർസിയുടെ കീഴിലുള്ള 700ലധികം വിദ്യാർഥികൾക്കു സൗജന്യ കണ്ണടവിതരണം എന്നിവ നടത്തിയതായും ഭാരവാഹികൾ പറഞ്ഞു. പത്രസമ്മേളനത്തിൽ നഗരസഭ ചെയർമാൻ പി.എൻ. സുരേന്ദ്രൻ, ലയൺസ് ക്ലബ് പ്രസിഡന്‍റ് എ. പി. ജോൺസൻ, സെക്രട്ടറി വിൽസൻ കുന്നുംപ്പിള്ളി, ആര്യ കണ്ണാശുപത്രി പിആർഒ സുനീഷ് ചന്ദ്രൻ, സി.എ. ശങ്കരൻകു ട്ടി എന്നിവർ പങ്കെടുത്തു.

ട്രോളിംഗ് നിരോധനം ലംഘിച്ചു; തമിഴ്നാട് വള്ളം പിടിച്ചു

ചാവക്കാട്: ട്രോളിംഗ് നിരോധനം ലംഘിച്ച് മത്സ്യബന്ധനം നടത്താൻ ശ്രമിച്ച വള്ളം പിടികൂടി. മത്സ്യബന്ധനത്തിനായി തമിഴ്നാട്ടിൽനിന്നു കളർകോഡ് മാറ്റി ബ്ലാങ്ങാട് ബീച്ചിലെത്തി മത്സ്യബന്ധനത്തിനായി ഒരുങ്ങുന്നതിനിടയിലാണ് മറൈൻ എൻഫോഴ്സ്മെന്‍റ് ചീഫ് ഗാർഡിന്‍റെ നേതൃത്വത്തിലുള്ള പ്രത്യേകസംഘം വള്ളവും എൻജിനും വലകളും പിടിച്ചെടുത്തത്. കളർ കോഡും ജീവൻരക്ഷ ഉപകരണങ്ങളും ഇല്ലാതെയാണ് മത്സ്യബന്ധനത്തിന് എത്തിയത്. നിയമം ലംഘിച്ച കുളച്ചൽ സ്വദേശി ഡേവിഡ് അശ്വിന്‍റെ ഉടമസ്ഥതയിലുള്ള "പുനിത പ്രകാശിയമ്മാൾ' എന്ന ആഴക്കടൽ മത്സ്യബന്ധന യാനമാണ് ചീഫ് ഗാർഡ് വി.ജി. അജിത്ത്കുമാർ, അഴീക്കോട് ഫിഷറീസ് സ്റ്റേഷൻ അസി. ഡയറക്ടർ ഡോ. സി. സീമയുടെയും നേതൃത്വത്തിൽ നടത്തിയ പ്രത്യേക കോമ്പിംഗ് ഓപ്പറേഷന്‍റെ ഭാഗമായി പിടിച്ചെടുത്തത്. 20,000 രൂപ പിഴ ചുമത്തി. മറൈൻ എൻഫോഴ്സ്മെന്‍റ് ആൻഡ് വിജിലൻസ് വിംഗ് ഓഫീസർമാരായ ഇ.ആർ. ഷിനിൽകുമാർ, വി.എൻ.പ്രശാന്ത്കുമാർ, പി.എം. ഷൈബു, കോസ്റ്റൽ എസ്ഐമാരായ ലോഫിരാജ്, ജോബി വർഗീസ് തുടങ്ങിയവർ പരിശോധനസംഘത്തിൽ ഉണ്ടായിരുന്നു.

വിജയോത്സവം സംഘടിപ്പിച്ചു

"സൗഹാർദം 2025' ചാലക്കുടി: നഗരസഭ 15-ാംവാർഡ് വികസന സമിതിയുടെയും കുടുംബശ്രീയുടെയും റസിഡൻഷ്യൽ അസോസിയേഷൻ കോഡിനേഷൻ കമ്മിറ്റിയുടെയും നേതൃത്വത്തിൽ മെറിറ്റ് ഡേ സൗഹാർദം 2025 നടത്തി. സനീഷ് കുമാർ ജോസഫ് എംഎൽഎ ഉദ്ഘാടനം നിർവഹിച്ചു. വാർഡ് കൗൺസിലർ അഡ്വ. ബിജു എസ്. ചിറയത്ത് അധ്യക്ഷത വഹിച്ചു. എസ്എസ്എൽസി പ്ലസ്ടു പരീക്ഷകളിൽ ഉന്നത വിജയം കരസ്ഥമാക്കിയ വിദ്യാർഥികളെ ആദരിച്ചു. ലണ്ടൻ കാർഡിഫ് സർവകലാശാലയിൽ നിന്ന് ബിസിനസ് ഇന്‍റലിജിൻസിൽ പിഎച്ച്ഡി കരസ്ഥമാക്കിയ ഹിമ ജോർജിനെയും, സുഗമ ഹിന്ദി പരീക്ഷയിൽ എവൺ കരസ്ഥമാക്കിയ ഈസ് ബൽ റോസ് ബെന്നിയെയും ആദരിച്ചു. പ്രമുഖ സാഹിത്യകാരി പ്രൊഫ ലിറ്റി ചാക്കോ മോട്ടിവേഷണൽ ക്ലാസ് നയിച്ചു. മേരി നളൻ, പി.വി. വേണു, എം.കെ ജോസ്, മുരളീധരൻ പൈങ്കിൽ, ഷീബ ഷൈജു, റിജുല ഉണ്ണികൃഷ്ണൻ എന്നിവർ പ്രസംഗിച്ചു. മൂര്‍ക്കനാട് സെന്‍റ് ആന്‍റണീസ് മൂര്‍ക്കനാട്: സെന്‍റ്് ആന്‍റണീസ് ഹയര്‍ സെക്കന്‍ഡറി സ്‌കൂളില്‍ വിജയോത്സവം സംഘടിപ്പിച്ചു. രൂപത കോര്‍പ്പറേറ്റ് മാനേജര്‍ ഫാ. സീജോ ഇരുമ്പന്‍ ഉദ്ഘാടനം നിര്‍വഹിച്ചു. സ്‌കൂള്‍ മാനേജര്‍ ഫാ. സിന്‍റോ മാടവന ചടങ്ങില്‍ അധ്യക്ഷത വഹിച്ചു. കെഎല്‍എഫ് ഗ്രൂപ്പ് ഡയറക്ടര്‍ ജോണ്‍ ഫ്രാന്‍സിസ് മുഖ്യാതിഥിയായിരുന്നു. പ്രിന്‍സിപ്പല്‍ കെ.എ. വര്‍ഗീസ്, വാര്‍ഡ് കൗണ്‍സിലര്‍ നസീമ കുഞ്ഞുമോന്‍, പിടിഎ പ്രസിഡന്‍റ്് രാജു ആന്‍റണി, ട്രസ്റ്റി പോള്‍ തേരുപറമ്പില്‍, സ്‌കൂള്‍ ഹെഡ്മിസ്ട്രസ് പ്രീത ഫിലിപ്പ്, എല്‍പി ഹെഡ്മിസ്ട്രസ് കെ.എ. റീന, സ്റ്റാഫ് സെക്രട്ടറി ആശാ ജി. കിഴക്കേടത്ത്, ഫസ്റ്റ് അസിസ്റ്റന്‍റ് ടി.ജെ. ജാന്‍സി, സ്‌കൂള്‍ വൈസ് ചെയര്‍പേഴ്സണ്‍ കുമാരി ലിനറ്റ് ലിജോമോന്‍ എന്നിവര്‍ സംസാരിച്ചു. ഇരിങ്ങാലക്കുട എൽഎഫ് കോണ്‍വന്‍റ്് ഇരിങ്ങാലക്കുട: ലിറ്റില്‍ ഫ്ളവര്‍ കോണ്‍വന്‍റ് ഹൈസ്‌കൂളില്‍ വിജയോത്സവം തൃശൂര്‍ റൂറല്‍ സ് പെഷല്‍ ബ്രാഞ്ച് ഡിവൈഎസ് പി ബിജോയ് ഉദ്ഘാടനം ചെയ്തു. ഉദയ എഡ്യുക്കേഷണല്‍ കൗണ്‍സിലര്‍ സിസ്റ്റര്‍ മരിയറ്റ് സിഎംസി അധ്യക്ഷത വഹിച്ചു. പിടിഎ പ്രസിഡന്‍റ് സിവിന്‍ കെ. വര്‍ഗീസ്, ലോക്കല്‍ മാനേജര്‍ സിസ്റ്റര്‍ ഹാന്‍സി സിഎംസി, അധ്യാപക പ്രതിനിധി ജൂലി ജെയിംസ്, വിദ്യാര്‍ഥി പ്രതിനിധി ആയിഷ നവാര്‍, പ്രധാന അധ്യാപിക സിസ്റ്റര്‍ സുധീപ സിഎംസി, കണ്‍വീനര്‍ ജെയ്ഫിന്‍ ഫ്രാന്‍സിസ് എന്നിവര്‍ പ്രസംഗിച്ചു. കാട്ടുങ്ങച്ചിറ ലിസ്യു കോണ്‍വന്‍റ്് ഇരിങ്ങാലക്കുട: കാട്ടുങ്ങച്ചിറ ലിസ്യു കോണ്‍വന്‍റ് ഇംഗ്ലീഷ് മീഡിയം ഹൈസ്‌കൂളില്‍ വിജയോത്സവ് 2കെ25 പ്രൊവിന്‍ഷ്യല്‍ കൗണ്‍സിലര്‍ സിസ്റ്റര്‍ മേരിറ്റ് ഉദ്ഘാടനം ചെയ്തു. ലിസ്യു കോണ്‍വന്‍റ്് മദര്‍ സുപ്പീരിയര്‍ സിസ്റ്റര്‍ ടെസ്‌ലിന്‍ അധ്യക്ഷത വഹിച്ചു. മുഴുവന്‍ വിഷയങ്ങള്‍ക്കും എ പ്ലസ് കരസ്ഥമാക്കിയ വിദ്യാര്‍ഥികള്‍ക്കുള്ള ട്രോഫി സിസ്റ്റര്‍ മേരിറ്റ് വിതരണം ചെയ്തു. മറ്റു വിദ്യാര്‍ഥികളെ മെഡലുകള്‍ നല്‍കി ഹെഡ്മിസ്ട്ര്സ് സിസ്റ്റര്‍ ജീന ആദരിച്ചു. പിടിഎ പ്രസിഡന്‍റ്് വി.വി. ജെയ്സണ്‍, അധ്യാപികമാരായ രാജശ്രീ, ബിന്ദു എന്നിവര്‍ പ്രസംഗിച്ചു. കുറ്റിക്കാട് സെന്‍റ്് സെബാസ്റ്റ്യൻസ് കുറ്റിക്കാട്: സെന്‍റ് സെബാസ്റ്റ്യൻസ് ഹയർ സെക്കൻഡറി സ്കൂളിന്‍റെ വിജയോത്സവം ഇരിങ്ങാലക്കുട രൂപത ബിഷപ് മാർ പോളി കണ്ണൂക്കാടൻ ഉദ്ഘാടനം ചെയ്തു. മാനേജർ ഫാ. ലിജു പോൾ പറമ്പേത്ത് അധ്യക്ഷത വഹിച്ചു. ഗവ. എയ്ഡഡ് ഹയർസെക്കൻഡറി സ്കൂളുകളിൽ, സംസ്ഥാനത്ത് ഒന്നാം സമ്മാനം നേടിയ സെന്‍റ് സെബാസ്റ്റ്യൻസ് ഹയർ സെക്കൻഡറി സ്കൂളിനുള്ള മെമെന്‍റോ ബിഷപ് സമ്മാനിച്ചു, സനീഷ്കുമാർ ജോസഫ് എംഎൽഎ മുഖ്യാതിഥിയായിരുന്നു. ഇരിങ്ങാലക്കുട കോർപ്പറേറ്റ് മാനേജർ ഫാ. സീജോ ഇരുമ്പൻ പരിയാരം ഗ്രാമപഞ്ചായത്ത് പ്രസിഡന്‍റ് മായ ശിവദാസൻ, വൈസ് പ്രസിഡന്‍റ് ഡെസ്റ്റിൻ താക്കോൽക്കാരൻ,ജില്ലാ പഞ്ചായത്ത് മെമ്പർ ജെനീഷ് പി ജോസ്, പിടിഎ പ്രസിഡന്‍റ് ജോൺ പാറയ്ക്കൽ ഹൈസ്കൂൾ എച്ച് എം എം.ടി. ജെയ്സൻ എൽപിഎച്ച്എം ജെസി ജോസ്, ജോസി ജോർജ്, പി.വി. ഷിബു, വി.എസ്. സച്ചു പ്രിൻസിപ്പൽ പി.കെ. ആന്‍റു, സിന്ധു എബ്രഹാം എന്നിവർ പ്രസംഗിച്ചു.

നേട്ടവുമായി ക്രൈസ്റ്റ് കോളജ് അധ്യാപിക

ഇരിങ്ങാലക്കുട: ക്രൈസ്റ്റ് കോളജ് ഫിസിക്സ് വിഭാഗം അധ്യാപികയും ഗവേഷണവിദ്യാര്‍ഥിയുമായ സ്റ്റിജി ജോസിനു ചെന്നൈ കാഞ്ചീപുരം, ഐഐഐടിഡിമില്‍ വെച്ച് നടന്ന നാലാമത് ഐഇഇഇ വയര്‍ലെസ്, ആന്‍റിന ആന്‍ഡ് മൈക്രോവേവ് കോണ്‍ഫറന്‍സില്‍ ബെസ്റ്റ് പ്രസന്‍റേഷന്‍ അവാര്‍ഡ് ലഭിച്ചു. നാല് ദിവസങ്ങളിലായി നടന്ന പരിപാടിയില്‍ വയര്‍ലെസ് മൈക്രോവേവ് കമ്യൂണിക്കേഷന്‍ രംഗത്തെ ഭാവി സാധ്യതകളെ പറ്റി അവതരിപ്പിച്ചതിനാണ് അംഗീകാരം ലഭിച്ചത്. 5ജി നെറ്റ്‌വര്‍ക്കില്‍ നിന്നും മാറി 6ജി, 7ജി നെറ്റ്‌വര്‍ക്ക് തുടങ്ങി ഉയര്‍ന്ന ഫ്രീക്വന്‍സിയിലെ കമ്യൂണിക്കേഷന്‍ സാധ്യതകള്‍ ആണ് സ്റ്റിജി അവതരിപ്പിച്ചത്. ഐഇഇഇ എ.പി.എസ് പ്രസിഡന്‍റും ഓസ്ട്രേലിയ യൂണിവേഴ്സിറ്റി ഓഫ് ക്വീന്‍സ്‌ലാന്‍ഡ് പ്രഫസറും ആയ ക്രിസ്റ്റഫര്‍ ഫ്യൂമൈ ക്യാഷ് അവാര്‍ഡും പ്രശസ്തിപത്രവും സമ്മാനിച്ചു. വാംസ് 2025 എന്ന പേരില്‍ നടത്തുന്ന ഈ സിമ്പോസിയത്തില്‍ വളര്‍ന്ന് വരുന്ന ഗവേഷണ വിദ്യാര്‍ഥികളെ പ്രോത്സാഹിപ്പിക്കുന്നതിന്‍റെ ഭാഗമായി സ്റ്റിജിക്ക് ലഭിച്ച ഈ അംഗീകാരത്തിന്‍റെ നിറവില്‍ ആണ് ക്രൈസ്റ്റ് കോളജ്. കോളജിലെ ഫിസിക്സ് വിഭാഗം അധ്യാപകന്‍ ആയ ഡോ. അജിത്തിന്‍റെ കീഴിലാണ് സ്റ്റിജി ഗവേഷണം നടത്തുന്നത്. കോളജ് പ്രിന്‍സിപ്പല്‍ ഡോ. ഫാ.ജോളി ആന്‍ഡ്രൂസ് അഭിനന്ദനങ്ങള്‍ അര്‍പ്പിച്ച് സംസാരിച്ചു.

കനാലില്‍ കുളിക്കാനിറങ്ങിയ യുവാവിനെ ഒഴുക്കില്‍പ്പെട്ട് കാണാതായി

ഇരിങ്ങാലക്കുട: കനാലില്‍ കുളിക്കാനിറങ്ങിയ യുവാവിനെ ഒഴുക്കില്‍പ്പെട്ട് കാണാതായി. ചളിങ്ങാട് തോട്ടുപറമ്പത്ത് പരേതനായ കരീം മകന്‍ ഷാനവാസി(23)നെയാണ് കാണാതായത്. പടിയൂര്‍ പഞ്ചായത്തിലെ കെഎല്‍ഡിസി കനാലില്‍ കോതറ പാലത്തിനുസമീപം ഇന്നലെ വൈകീട്ട് നാല് മണിയോടെയാണ് സംഭവം. സുഹൃത്തായ കൂരിക്കുഴി സ്വദേശി മജീദിനൊപ്പം കുളിക്കുന്നതിനിടയില്‍ കാല്‍വഴുതി ഒഴുക്കില്‍പെടുകയായിരുന്നു. സംഭവമറിഞ്ഞ് നാട്ടുകാരും ഇരിങ്ങാലക്കുടയില്‍നിന്നു ഫയര്‍ഫോഴ്‌സ് സംഘവും സ്ഥലത്തെത്തി തെരച്ചില്‍ നടത്തിയെങ്കിലും യുവാവിനെ കണ്ടെത്താനായില്ല. തൃശൂരില്‍ നിന്നും സ്‌കൂബ ടീമും കനാലില്‍ തെരച്ചില്‍ നടത്തി. ഇരിങ്ങാലക്കുട ഫയര്‍ സ്റ്റേഷന്‍ ഓഫീസര്‍ കെ.എസ്. ഡിബിന്‍റെ നേതൃത്വത്തിലുള്ള സംഘവും വൈശാഖിന്‍റെ നേതൃത്വത്തിലുള്ള സ്‌കൂബ ടീമും തെരച്ചിലിന് നേതൃത്വം നല്‍കി. കനത്ത മഴയും വെള്ളത്തിന്‍റെ ശക്തമായ അടിയൊഴുക്കും മൂലം തെരച്ചിലിനെ ഏറെ ബാധിച്ചു. രാത്രി എട്ടുമണിയോടെ തെരച്ചില്‍ നിര്‍ത്തിയെങ്കിലും ഇന്നു രാവിലെ ഒമ്പതോടെ വീണ്ടും പുനരാരംഭിക്കും.

പുളിക്കലച്ചിറ ബണ്ട് പൊളിക്കില്ല; വെള്ളം ഒഴുക്കിവിടും

ഇരിങ്ങാലക്കുട: പടിയൂര്‍ പഞ്ചായത്തിലെ രണ്ട് വാര്‍ഡുകളിലെ ജനങ്ങളെ ദുരിതത്തിലാക്കിയ വെള്ളക്കെട്ടിനു പരിഹാരം കാണാനുള്ള അടിയന്തരനടപടികള്‍ തുടങ്ങി. പടിയൂര്‍- പൂമംഗലം പഞ്ചായത്തുകളെ ബന്ധിപ്പിക്കുന്ന പുളിക്കലച്ചിറ പാലംനിര്‍മാണത്തോടനുബന്ധിച്ച് നിര്‍മിച്ചിട്ടുള്ള താത്കാലിക ബണ്ട്റോഡ് നിലനിർത്തി ക്കൊണ്ടുതന്നെ പുളിക്കലച്ചിറ പാടത്തെ അധികജലം ഒഴുക്കിവിടാനുള്ള നിര്‍മാണ പ്രവൃത്തികളാണ് ജില്ലാ ഭരണകൂടത്തിന്‍റെ നിര്‍ദേശമനുസരിച്ച് ആരംഭിച്ചിരിക്കുന്നത്. തോടിന്‍റെ ഇരുവശത്തുമായി ചാലുകള്‍ കീറുന്ന പ്രവൃത്തി പൂര്‍ത്തിയായിക്കഴിഞ്ഞു. ജലത്തിന്‍റെ ഒഴുക്ക് കുറയുന്നതോടെ പൈപ്പുകള്‍ സ്ഥാപിക്കുന്ന പ്രവൃത്തി ഇന്ന് ആരംഭിക്കും. അധികജലം ഒഴുക്കി വിടാനുള്ള നിര്‍മാണ പ്രവര്‍ത്തനങ്ങളോടൊപ്പംതന്നെ അടുത്തമാസം ആരംഭിക്കുന്ന നാലമ്പലദര്‍ശനം സുഗമമാക്കാന്‍ വേണ്ടി താത്കാലിക ബണ്ട് റോഡ് ശക്തിപ്പെടുത്തുന്ന പ്രവൃത്തികളും അടിയന്തരമായി പൂര്‍ത്തീകരിക്കും. ചാലക്കുടി സ്വദേശിയായ ജിന്‍സനാണ് ഇപ്പോള്‍ നടക്കുന്ന നിര്‍മാണ പ്രവര്‍ത്തനങ്ങളുടെ കരാര്‍ എറ്റെടുത്തിരിക്കുന്നത്.

കനോലി കനാൽ കവിഞ്ഞു; തീരദേശം വെള്ളക്കെട്ടിൽ

കയ്പമംഗലം: കനോലി കനാൽ കവിഞ്ഞതോടെ കയ്പമംഗലം, എടത്തിരുത്തി പഞ്ചായത്തുകളിൽ നിരവധി വീടുകൾ വെള്ളക്കെട്ടിലായി. നീരൊഴുക്കു വർധിച്ചതോടെ പുഴകവിഞ്ഞ് വെള്ളം ഒഴുകിയെത്തിയത് ജനങ്ങളെ ദുരിതത്തിലാക്കി. എടത്തിരുത്തി ആറാം വാർഡ് കോഴിത്തുമ്പ്, കയ്പമംഗലം എട്ട്, ഒമ്പത് വാർഡുകളിലെ ചളിങ്ങാട്, കാക്കാത്തിരുത്തി താഴ്‌വാരം എന്നിവിടങ്ങളിലാണ് വെള്ളക്കെട്ട് രൂക്ഷമായിട്ടുള്ളത്. ഈ ഭാഗങ്ങളിലായി ഇരുന്നൂറോളം വീടുകൾ വെള്ളക്കെട്ടിലായി. വീട്ടുകാരിൽ പലരും ബന്ധുവീടുകളിലേക്കും മറ്റും മാറിയിരിക്കുകയാണ്. 14 കുടുംബങ്ങളെ പഞ്ചായത്ത് ദുരിതാശ്വാസക്യാമ്പിലേക്കും മാറ്റിയിട്ടുണ്ട്. ഇവർക്കുവേണ്ട എല്ലാ സൗകര്യവും സഹായവും ചെയ്തിട്ടുണ്ടെന്ന് കയ്പമംഗലം പഞ്ചായത്ത് പ്രസിഡന്‍റ് ശോഭന രവി പറഞ്ഞു. ഇ.ടി. ടൈസൺ എംഎൽഎ, പഞ്ചായത്ത് പ്രസിഡന്‍റ് ശോഭന രവി, പഞ്ചായത്തംഗങ്ങളായ എം.എസ്. സുജിത്ത്, വി.ബി. ഷെഫീഖ് എന്നിവർ വെള്ളക്കെട്ട് പ്രദേശങ്ങൾ സന്ദർശിച്ചു.

തൃശൂരിലെ വനഭൂമിപട്ടയ അപേക്ഷകള്‍ 25നകം സമര്‍പ്പിക്കാൻ നിർദേശം

തൃശൂർ: ജില്ലയിലെ വനഭൂമിപട്ടയത്തിനായി കേന്ദ്രാനുമതിക്കുള്ള അപേക്ഷകള്‍ 25 നകം പരിവേഷ് പോര്‍ട്ടലില്‍ ഉള്‍പ്പെടുത്തി കേന്ദ്ര സര്‍ക്കാരിലേക്ക് അയയ്ക്കാന്‍ മന്ത്രി കെ. രാജന്‍ നിര്‍ദേശം നല്‍കി. സംയുക്തപരിശോധന പൂര്‍ത്തീകരിച്ചിട്ടുള്ള അപേക്ഷകളില്‍ ഓരോ സ്ഥലവും പ്രത്യേകം സര്‍വേ നടത്തി ടോപോ ഷീറ്റിലേക്കു മാറ്റിയാണു പരിവേഷ് പോര്‍ട്ടലിലൂടെ അയയ്ക്കുന്നത്. വിവിധ താലൂക്കുകളിലായി 4,111 അപേക്ഷകളാണ് തയാറാക്കിയിട്ടുള്ളത്. റവന്യൂ മന്ത്രിയുടെ പ്രത്യേക നിര്‍ദേശപ്രകാരം എട്ടു സര്‍വേ ടീമുകള്‍ രൂപീകരിച്ച് പ്രത്യേക വാഹനങ്ങള്‍ ഉള്‍പ്പെടെയുള്ള സൗകര്യങ്ങള്‍ നല്‍കിയാണ് 892.5301 ഹെക്ടര്‍ ഭൂമി അളന്ന് പ്രത്യേകം സ്കെച്ചുകള്‍ തയാറാക്കിയത്. പ്രത്യേക ഓഫീസും അനുവദിച്ചിരുന്നു. തൃശൂര്‍ -1590, തലപ്പിള്ളി -1,643, ചാലക്കുടി -1,430, കുന്നംകുളം -19, മുകുന്ദപുരം -57 എന്നിങ്ങനെയാണ് ഇപ്പോള്‍ അയയ്ക്കുന്ന അപേക്ഷകള്‍. 230 പട്ടയങ്ങള്‍ എൽഎ നമ്പർ ഒന്ന് ഓഫീസില്‍ വിതരണത്തിനു തയാറായിട്ടുണ്ട്. 359 പട്ടയഫയലുകളിലുള്ള നടപടികള്‍ അന്തിമഘട്ടത്തിലാണെന്നു മന്ത്രി പറഞ്ഞു. വിവരശേഖരണത്തില്‍ ജില്ലയില്‍ ലഭിച്ച 8,355 അപേക്ഷകളില്‍ സംയുക്തപരിശോധന വേഗത്തിൽ പൂർത്തിയാക്കി നടപടികള്‍ ആരംഭിക്കാനും മന്ത്രി നിര്‍ദേശം നല്‍കി. യോഗത്തില്‍ ലാൻഡ് റവന്യൂ ജോയിന്‍റ് കമ്മീഷണര്‍ എ. ഗീത, ജില്ലാ കളക്ടര്‍ അര്‍ജുന്‍ പാണ്ഡ‍്യന്‍, റവന്യൂ അഡീഷണല്‍ സെക്രട്ടറി അനു എസ്. നായര്‍, എല്‍.ആര്‍. ഡെപ്യൂട്ടി കളക്ടര്‍ ജ്യോതി, ഡെപ്യൂട്ടി കളക്ടര്‍ രാജേഷ്, തഹസില്‍ദാര്‍മാര്‍ തുടങ്ങിയവര്‍ പങ്കെടുത്തു.

കള്ളക്കേസെടുക്കുന്ന വനംവകുപ്പ് ഉദ്യോഗസ്ഥർക്കെതിരേ നടപടി എടുക്കണം: കേരള കോൺഗ്രസ് -എം

തൃശൂർ: വനം - വന്യജീവിനിയമങ്ങളിലെ കർശനവ്യവസ്ഥകൾ ഉൾപ്പെടുത്തി കള്ളക്കേസെടുത്ത് ജനങ്ങളെ ദ്രോഹിക്കുന്ന വനംവകുപ്പ് ഉദ്യോഗസ്ഥർക്കെതിരേ കർശനനിയമനടപടികൾ സ്വീകരിക്കണമെന്നു കേരള കോണ്‍ഗ്രസ്‌ -എം ജില്ലാ നേതൃയോഗം ആവശ്യപ്പെട്ടു. വ്യക്തമായ തെളിവുകളും ലബോറട്ടറി പരിശോധനാഫലങ്ങളുമില്ലാതെ വനം വകുപ്പ് ഉദ്യോഗസ്ഥർ കേസെടുത്ത് ജനങ്ങളെ ജയിലിലടയ്ക്കുന്നത് അംഗീകരിക്കാനാവില്ലെന്നും വ്യക്തമാക്കി. സംസ്ഥാന ജനറൽ സെക്രട്ടറി അഡ്വ. ജോസ് ജോസഫ് ഉദ്ഘാടനം ചെയ്തു. ജില്ലാ പ്രസിഡന്‍റ് ഉണ്ണികൃഷ്ണൻ ഈച്ചരത്ത് അധ്യക്ഷത വഹിച്ചു. സംസ്ഥാന ഉന്നതാധികാരസമിതി അംഗം സെബാസ്റ്റ്യൻ ചൂണ്ടൽ, സംസ്ഥാന സ്റ്റിയറിംഗ് കമ്മിറ്റി അംഗങ്ങളായ ബേബി മാത്യു കാവുങ്കൽ, ഡെന്നീസ് ആന്‍റണി, സെക്രട്ടേറിയറ്റ് അംഗം അഡ്വ. പി.ഐ. മാത്യു, ജില്ലാ സെക്രട്ടറിമാരായ ബേബി നെല്ലിക്കുഴി, ജിമ്മി വർഗീസ്, ബിജു ആന്‍റണി, നിയോജകമണ്ഡലം പ്രസിഡന്‍റുമാരായ വി.എം. മാണി, ജോസ് മുതുകാട്ടിൽ, സി.ടി. ബാബു, ബിനിൽ പ്രതാപൻ, ബെന്നി ചെറുവത്തൂർ, ജില്ലാ ഐടി കോ- ഓർഡിനേറ്റർ സാംസണ്‍ ചിരിയങ്കണ്ടത്ത് തുടങ്ങിയവർ പ്രസംഗിച്ചു.

ചങ്ങമ്പുഴ അനുസ്മരണവും സാഹിത്യസംഗമവും

തൃശൂർ: കവി ചങ്ങമ്പുഴയുടെ 77-ാം ചരമവാർഷികദിനത്തിൽ നടത്തിയ അനുസ്മരണവും സാഹിത്യസംഗമവും കവി ആലങ്കോട് ലീലാകൃഷ്ണൻ ഉദ്ഘാടനം ചെയതു. സദ്ഭാവന ബുക്സ് എഡിറ്റർ സുനിൽ മടപ്പള്ളി അധ്യക്ഷത വഹിച്ചു. ഡോ. എസ്.കെ. വസന്തൻ മുഖ്യപ്രഭാഷണവും മഹാത്മാഗാന്ധി യൂണിവേഴ്സിറ്റി സ്കൂൾ ഓഫ് ലെറ്റേഴ്സ് ഡയറക്ടർ ഡോ. ഹരികുമാർ ചങ്ങമ്പുഴ അനുസ്മരണവും നിർവഹിച്ചു. ചങ്ങമ്പുഴ അനുസ്മരണസമിതി,സദ്ഭാവന ബുക്സ്, പഞ്ചാക്ഷരം ബുക്സ് എന്നിവയുടെ ആഭിമുഖ്യത്തിലായിരുന്നു പരിപാടി. ഡോ. പി.വി. കൃഷ്ണൻനായരും എം.എസ്. ബാലകൃഷ്ണനും ചങ്ങമ്പുഴയുടെ കവിതകളെക്കുറിച്ച് പ്രഭാഷണം നടത്തി. പഞ്ചാക്ഷരം ബുക്സ് എഡിറ്റർ ഇ.ആർ. ഉണ്ണി, ഗിന്നസ് സത്താർ ആദൂർ, രമ്യ ബാലകൃഷ്ണൻ, ചങ്ങമ്പുഴ സാഹിതി പുരസ്കാരജേതാവ് കാവല്ലൂർ മുരളീധരൻ എന്നിവർ പ്രസംഗിച്ചു. ചടങ്ങിൽ ചങ്ങമ്പുഴ സ്മാരക പുരസ്കാരങ്ങൾ ആലങ്കോട് ലീലാകൃഷ്ണൻ സമ്മാനിച്ചു. ചങ്ങമ്പുഴക്കവിതകളുടെ ആലാപനവും ഗീത മേലേഴത്ത് അവതരിപ്പിച്ച ചങ്ങമ്പുഴക്കവിത വാഴക്കുലയുടെ നൃത്താവിഷ്കാരവുമുണ്ടായി.

പോലീസ് ചോദിക്കും, ഉത്തരം പറഞ്ഞോണം

തൃശൂർ: പോലീസ് ചോദിക്കും, ഉത്തരം പറഞ്ഞോണം. ലഹരിവിരുദ്ധദിനത്തോടനുബന്ധിച്ച് ഈ മാസം 21നു തൃശൂർ സിറ്റി പോലീസാണ് വിദ്യാർഥികൾക്കും അവരുടെ രക്ഷിതാക്കൾക്കുമായി ക്വിസ് മത്സരം സംഘടിപ്പിക്കുന്നത്. മക്കളും രക്ഷിതാക്കളും ഒരുമിച്ച് അണിനിരക്കുന്ന ക്വിസ് മത്സരം എന്ന പ്രത്യേകതയാണ് ഇതിനുള്ളത്. ലഹരിയുടെ ഉന്മൂലനം നമുക്കു വീട്ടിൽനിന്നും തുടങ്ങാം എന്ന ഓർമപ്പെടുത്തലോടെയായിരിക്കും ക്വിസ് മത്സരം തുടങ്ങുക. ജില്ലയിലെ ഹൈസ്കൂൾ, ഹയർസെക്കൻഡറി, കോളജ് വിദ്യാർഥികൾക്കും അവരുടെ രക്ഷിതാക്കൾക്കും ക്വിസ് മത്സരത്തിൽ പങ്കെടുക്കാം. ആനുകാലികപൊതുവിജ്ഞാനവുമായി ബന്ധപ്പെട്ട ചോദ്യങ്ങൾ ഉൾപ്പെടുത്തിക്കൊണ്ടുള്ളതാണ് മത്സരം. 21നു രാവിലെ പത്തിനു ശക്തൻനഗറിലെ തൃശൂർ സിറ്റി പോലീസ് മേധാവിയുടെ ഓഫീസിനു സമീപമുള്ള ട്രെയിനിംഗ് സെന്‍ററിലാണ് മത്സരം. രജിസ്റ്റർ ചെയ്യുന്ന ആദ്യ മുപ്പതു പേർക്കാണ് അവസരം. ഫോൺ: 9497975510.

ജൂബിലിയിൽ ഔഷധ കഞ്ഞിക്കൂട്ട് ഉദ്ഘാടനം

തൃശൂർ: ജൂബിലി ആയുർവേദ മിഷൻ ആശുപത്രി പുറത്തിറക്കുന്ന ഔഷധക്കഞ്ഞിക്കൂട്ടിന്‍റെ ഉദ്ഘാടനം രാമവർമപുരം ജൂബിലി ആയുർവേദ കാന്പസിൽ അതിരൂപത മെത്രാപ്പോലീത്ത മാർ ആൻഡ്രൂസ് താഴത്ത് നിർവഹിച്ചു. ഫാ. ഫ്രാൻസിസ് പള്ളിക്കുന്നത്ത്, ജൂബിലി മിഷൻ ആശുപത്രി ഡയറക്ടർ ഫാ. റെന്നി മുണ്ടൻകുരിയൻ, ചീഫ് എക്സിക്യൂട്ടീവ് ഓഫീസർ ഡോ. ബെന്നി ജോസഫ് നീലങ്കാവിൽ, റിസർച്ച് ഡയറക്ടർ ഡോ. ഡി.എം. വാസുദേവൻ, ഫാ. സനോജ് അറങ്ങാശേരി, ആയുർവേദ ചീഫ് കണ്‍സൾട്ടന്‍റ് സിസ്റ്റർ ഡോ. ഡൊണാറ്റ, ഡോ. ഹാർവിൻ ജോർജ്, സ്റ്റാഫ് അംഗങ്ങൾ എന്നിവർ പങ്കെടുത്തു. ജൂബിലി ആയുർവേദ ഫാർമസിയിൽ കഞ്ഞിക്കിറ്റ് ലഭിക്കും.

എലിപ്പനിമരണങ്ങൾ കൂടുന്നു; ജാഗ്രത

തൃശൂർ: എലിപ്പനിമരണങ്ങൾ കൂടുന്നു. ജാഗ്രത വേണമെന്നും സ്വയംചികിത്സ പാടില്ലെന്നും ആരോഗ്യവകുപ്പിന്‍റെ മുന്നറിയിപ്പ്. ഒന്നരമാസം പിന്നിടുന്പോഴേക്കും ജില്ലയിൽ 21 പേർക്കാണ് എലിപ്പനി ബാധിച്ചത്. 26 പേർ രോഗലക്ഷണങ്ങളോടെ ചികിത്സതേടിയപ്പോൾ നാലു മരണങ്ങളും റിപ്പോർട്ട് ചെയ്തിട്ടുണ്ട്. ഈ വർഷം ഇതുവരെ എട്ടു മരണങ്ങൾ റിപ്പോർട്ട് ചെയ്തപ്പോൾ മേയ് മാസംമാത്രം മൂന്നുമരണമാണ് റിപ്പോർട്ട് ചെയ്തിട്ടുള്ളത്. മേയിൽ 16 പേർക്കും ഈ മാസം അഞ്ചുപേർക്കും എലിപ്പനി സ്ഥിരീകരിച്ചപ്പോൾ കഴിഞ്ഞമാസം 14 പേരും ഈ മാസം 12 പേരും രോഗലക്ഷണങ്ങളോടെ ചികിത്സ തേടി. മുൻവർഷങ്ങളെ അപേക്ഷിച്ച് എലിപ്പനിയുടെ എണ്ണത്തിൽ കാര്യമായ വർധന രേഖപ്പെടുത്തിയിട്ടില്ലെങ്കിലും മരണങ്ങൾ വർധിക്കുന്നതായാണ് റിപ്പോർട്ട്. ജില്ലയുടെ എല്ലാ ഭാഗങ്ങളിലും എലിപ്പനി റിപ്പോർട്ട് ചെയ്യുന്നുണ്ട്. എലിപ്പനി വരുംവഴി എലി, പട്ടി, പൂച്ച, കന്നുകാലികൾ തുടങ്ങിയവയുടെ മൂത്രവും വിസർജ്യങ്ങളുംവഴി പകരുന്ന രോഗമാണ് എലിപ്പനി. ഇവയുടെ മൂത്രവും വിസർജ്യവുംവഴി മണ്ണിലും വെള്ളത്തിലും എത്തുന്ന രോഗാണുക്കൾ മുറിവുകൾവഴി ശരീരത്തിൽ എത്തിയാണ് രോഗം ഉണ്ടാകുന്നത്. ലക്ഷണങ്ങൾ * ക്ഷീണത്തോടെയുള്ള പനി, തലവേദന, പേശിവേദന. * കണ്ണിൽ ചുവപ്പ്. * മൂത്രക്കുറവ്. * മഞ്ഞപ്പിത്തലക്ഷണങ്ങളും കണ്ടേക്കാം. മുൻകരുതൽ വേണം * കാർഷികപ്രവൃത്തികളിലോ ശുചീകരണപ്രവർത്തനങ്ങളിലോ ഏർപ്പെടുന്നവർ കട്ടിയുള്ള ഗംബൂട്ടുകൾ, കൈയുറകൾ എന്നിവ ധരിക്കുക. * കൈകാലുകളിലും മറ്റു ശരീരഭാഗങ്ങളിലും മുറിവുള്ളവർ മുറിവ് ഉണങ്ങുന്നതുവരെ ഇത്തരം പ്രവർത്തനങ്ങളിൽ ഏർപ്പെടരുത്. * ഡോക്സിസൈക്ലിൻ ഗുളികകൾ ആരോഗ്യപ്രവർത്തകരുടെ നിർദേശാനുസരണം കഴിക്കുക. * കെട്ടിക്കിടക്കുന്ന വെള്ളത്തിൽ ഇറങ്ങുന്നത് കഴിവതും ഒഴിവാക്കുക. * സംഭരണടാങ്കുകളിലെ ജലത്തിൽ എലിക്കാഷ്ഠം, മൂത്രം എന്നിവ വീഴുന്നില്ല എന്ന് ഉറപ്പുവരുത്തുക. മഞ്ഞപ്പിത്തമാണെന്നു കരുതരുത്: ഡിഎംഒ എലിപ്പനിക്കു മഞ്ഞപ്പിത്തരോഗലക്ഷണങ്ങൾ കൂടി കാണിക്കുമെന്നുള്ളതിനാൽ മഞ്ഞപ്പിത്തം ആണെന്നു തെറ്റിദ്ധരിക്കരുതെന്നും നാടൻചികിത്സകളും മറ്റും ചെയ്യുന്നത് അപകടകരമാണെന്നും ഡിഎംഒ ടി.പി. ശ്രീദേവി പറഞ്ഞു. രോഗലക്ഷണങ്ങൾ കണ്ടാൽ ഉടൻ വൈദ്യസഹായം തേടുക. സ്വയം ചികിത്സ ചെയ്യരുത് . പനിയോ മറ്റു രോഗലക്ഷണങ്ങളുമായോ ചികിത്സതേടുന്പോൾ മലിനജലവുമായി സന്പർക്കമുണ്ടായിട്ടുണ്ടെങ്കിൽ അത് ആരോഗ്യപ്രവർത്തകരെ പ്രത്യേകം അറിയിക്കുക.

വാതില്‍മാടം; സംരക്ഷണഭിത്തി നിര്‍മിക്കാന്‍ 50 ലക്ഷം അനുവദിച്ച് സുരേഷ് ഗോപി

ഇരിങ്ങാലക്കുട: വാതില്‍മാടം സങ്കേതത്തിലെ വീടുകള്‍ക്കു ഭീഷണിയായ കുന്നില്‍നിന്നുള്ള മണ്ണിടിച്ചില്‍ ഒഴിവാക്കാന്‍ സംരക്ഷണഭിത്തി നിര്‍മിക്കാന്‍ 50 ലക്ഷം രൂപ അനുവദിച്ച് കേന്ദ്രമന്ത്രി സുരേഷ് ഗോപി. മണ്ണിടിച്ചില്‍ നേരിടുന്ന വാതില്‍മാടം സങ്കേതം സന്ദര്‍ശിക്കവേ അപകടഭീഷണി ഉയര്‍ത്തുന്ന കുന്ന് കണ്ടാണ് സുരേഷ് ഗോപി അതിനാവശ്യമായ തുക അനുവദിക്കാമെന്ന് ഉറപ്പുനല്‍കിയത്. അടുത്ത ദിവസംതന്നെ ജില്ലാ കളക്ടറും പ്ലാനിംഗ് ഓഫീസറുമായി ബന്ധപ്പെട്ട് തുക അനുവദിക്കാനുള്ള നടപടി കൈക്കൊള്ളാന്‍ ഒപ്പമുണ്ടായിരുന്ന പേഴ്സണല്‍ സ്റ്റാഫുകള്‍ക്കു മന്ത്രി നിര്‍ദേശം നല്‍കി. നേരത്തേ കുന്നിടിച്ചില്‍ ഒഴിവാക്കാന്‍ എംഎല്‍എയായിരുന്ന പ്രഫ.കെ.യു. അരുണന്‍ 68 ലക്ഷം അനുവദിച്ചിരുന്നെങ്കിലും നടപടിയൊന്നുമായില്ലെന്നു സമീപവാസികള്‍ ശ്രദ്ധയില്‍പ്പെടുത്തിയപ്പോഴാണ് സുരേഷ് ഗോപി ആവശ്യമായ തുക അനുവദിക്കാന്‍ നിര്‍ദേശം നല്‍കിയത്. എന്നാല്‍, എംപി ഫണ്ടില്‍നിന്ന് 50 ലക്ഷംമാത്രമേ അടിയന്തരമായി അനുവദിക്കാന്‍ കഴിയുകയുള്ളൂവെന്ന് ഉദ്യോഗസ്ഥര്‍ പറഞ്ഞപ്പോള്‍ ബാക്കി തുക നോക്കാമെന്നും സുരേഷ് ഗോപി പറഞ്ഞു. ഇതിലെന്തെങ്കിലും തടസങ്ങളുണ്ടെങ്കില്‍ പരിഹരിക്കാനും പദ്ധതി യാഥാര്‍ഥ്യമാക്കാനും ഒപ്പമുണ്ടായിരുന്ന നേതാക്കളോടു മന്ത്രി ആവശ്യപ്പെട്ടു. പ്രദേശത്തെ വീട്ടുകാരെ സംരക്ഷിക്കാന്‍ നഗരസഭയും എംഎല്‍എയും ഇടപെടണമെന്നും അതിന് എല്ലാ സഹായങ്ങളും ചെയ്യാന്‍ താന്‍ സന്നദ്ധനാണെന്നും സുരേഷ് ഗോപി പറഞ്ഞു.

നാട്ടികയിൽ കടലേറ്റം രൂക്ഷം ; വിനോദസഞ്ചാരകേന്ദ്രത്തിന്‍റെ 30 കുടിലുകൾ കടലെടുത്തു

തൃപ്രയാർ: കനത്ത മഴയും കാറ്റും നാട്ടികയിൽ കടലേറ്റം രൂക്ഷമാക്കി. വിനോദസഞ്ചാരികൾക്കായി നിർമിച്ച കുടിലുകൾ കടലെടുത്തു. നാട്ടിക ബീച്ച് റിസോർട്ടിനു സമീപമാണ് കടലേറ്റം രൂക്ഷമായിട്ടുള്ളത്. ഇവിടെ വിനോദ സഞ്ചാരികൾക്കായി നിർമിച്ച മുപ്പതോളം കുടിലുകളും സമീപപ്രദേശങ്ങളിലെ തെങ്ങുകളും കടലെടുത്തു. കുഴിപ്പൻതിരമാലകളാണു നാശത്തിനു കാരണമായതെന്ന് സമീപവാസികൾ പറയുന്നു. കുറച്ചുകാലങ്ങൾക്കുമുമ്പ് ഈ പ്രദേശത്ത് കുഴിപ്പൻതിരമാലകൾ കാരണം 20 മീറ്ററോളം കടലെടുത്തുപോയിരുന്നു. ഇതിനോടൊപ്പം നിരവധി കാറ്റാടിമരങ്ങളും തെങ്ങുകളും കടപുഴകി നശിച്ചിരുന്നു. മഴക്കെടുതി: ജില്ലയിൽ ദുരിതാശ്വാസ ക്യാമ്പുകൾ 22 ആയി തൃശൂർ: ജില്ലയിൽ മഴയുടെ ശക്തി ചെറുതായി കുറഞ്ഞെങ്കിലും ഇടവിട്ടു ശക്തമായ മഴ പലയിടത്തും പെയ്തു. ദുരിതാശ്വാസ ക്യാമ്പുകളുടെ എണ്ണം കൂടി. നിലവിൽ 22 ദുരിതാശ്വാസക്യാമ്പുകൾ പ്രവർത്തിക്കുന്നുണ്ട്. 197 കുടുംബങ്ങളാണ് ക്യാമ്പുകളിലുള്ളത്. ആകെ 550 പേരിൽ 175 പുരുഷൻമാരും 247 സ്ത്രീകളും 128 കുട്ടികളുമുണ്ട്.

വാഹനാപകടത്തില്‍ പരിക്കേറ്റയാൾ മരിച്ചു

കയ്പമംഗലം: വാഹനാപകടത്തില്‍ പരിക്കേറ്റ് ചികിത്സയിലിരുന്നയാള്‍ മരിച്ചു. മതിലകം ഒന്നാംകല്ല് വടക്ക് കൈതക്കാട്ട് ഷോബി(53) ആണ് മരിച്ചത്. ഞായറാഴ്ച രാത്രി ഒമ്പതരയോടെ പടിഞ്ഞാറെ ടിപ്പുസുല്‍ത്താന്‍ റോഡില്‍ പടിഞ്ഞാറെ വെമ്പല്ലൂര്‍ അസ്മാബി കോളജിനടുത്ത് ബൈക്കുകള്‍ കൂട്ടിയിടിച്ചാണ് അപകടം. ഗുരുതരമായി പരിക്കേറ്റതിനെ തുടര്‍ന്ന് കൊടുങ്ങല്ലൂരിലെ സ്വകാര്യ ആശുപത്രിയില്‍ ചികിത്സയിലിരിക്കെ ഇന്നലെ പുലര്‍ച്ചെയാണ് മരിച്ചത്. അസ്മാബി കോളേജിനടുത്ത് പച്ചക്കറി കടയിലെ തൊഴിലാളിയായിരുന്നു. അപകടത്തില്‍ പരിക്കേറ്റ മറ്റ് മൂന്നു പേരും ചികിത്സയിലാണ്. സംസ്കാരം നടത്തി. ഭാര്യ: സീന. മക്കൾ: ആദിൽ മാധവ്, അഞ്ജന (സെന്‍റ് ജോസഫ് ഹയർ സെക്കൻഡറി സ്കൂൾ പ്ലസ് വൺ വിദ്യാർഥിനി).

യുവാവ് വീടിനുള്ളിൽ മരിച്ചനിലയിൽ

കയ്പമംഗലം: പെരിഞ്ഞനത്ത് യുവാവിനെ വീടിനുള്ളിൽ മരിച്ചനിലയിൽ കണ്ടെത്തി. ചക്കരപ്പാടം പടിഞ്ഞാറ് ഏറാട്ട് വീട്ടിൽ വാസുവിന്‍റെ മകൻ വിനീഷ്(41) ആണ് മരിച്ചത്. കുറച്ചുദിവസമായി വീട്ടിൽ തനിച്ചായിരുന്ന വിനീഷിനെ പുറത്തുകാണാതായതിനെ തുടർന്ന് ബന്ധുക്കളെത്തി വാതിൽ തുറന്നുനോക്കിയപ്പോൾ അടുക്കളഭാഗത്ത് മരിച്ചനിലയിൽ കണ്ടത്. വിനീഷും അമ്മയുമാണ് വീട്ടിൽ താമസിച്ചിരുന്നത്. അമ്മ വീട്ടിലുണ്ടായിരുന്നില്ല. കയ്പമംഗലം പോലീസ് സ്ഥലത്തെത്തി മേൽനടപടികൾ സ്വീകരിച്ചു.

മൃതദേഹം തിരിച്ചറിഞ്ഞു

വെള്ളിക്കുളങ്ങര: മുപ്ലിവനത്തില്‍ കണ്ടെത്തിയ മൃതദേഹം വൃദ്ധമന്ദിരത്തില്‍ നിന്ന് കാണാതായ വര്‍ഗീസ്(63) എന്നയാളുടേതാണെന്ന് തിരിച്ചറിഞ്ഞതായി പോലീസ് അറിയിച്ചു. മുപ്ലിയിലുള്ള പിതൃഭവന്‍ വൃദ്ധമന്ദിരത്തിലെ അന്തേവാസിയായ വർഗീസിനെ ഒരു മാസം മുമ്പാണ് കാണാതായത്. മരണകാരണം പരിശോധനകള്‍ക്കുശേഷം മാത്രമേ വ്യക്തമാകൂ. തൃശൂര്‍ മെഡിക്കല്‍ കോളജില്‍ പോസ്റ്റുമോര്‍ട്ടത്തിനു ശേഷം മൃതദേഹം ബന്ധുക്കള്‍ക്ക് വിട്ടുനല്‍കി.

യുവതി തീകൊളുത്തി മരിച്ചനിലയിൽ

ചാലക്കുടി: പരിയാരത്ത് യുവതിയെ തീകൊളുത്തി മരിച്ചനിലയിൽ കണ്ടെത്തി. പരിയാരം സെന്‍റ് ജോർജ് പള്ളിക്കു സമീപം കരേടത്ത് വീട്ടിൽ ഷാജു ഭാര്യ സിമി(45)യാണ് മരിച്ചത്. ഇന്നലെ വൈകീട്ട് 5.45 നായിരുന്നു സംഭവം. വീട്ടിലെ മുകളിലെ കിടപ്പുമുറിയിൽ മണ്ണെണ്ണയൊഴിച്ച് തീ കൊളുത്തുകയായിരുന്നുവെന്ന് പറയുന്നു. സിമി നാലുമാസം മുമ്പ് ഇസ്രയേലിൽ ഹോം നഴ്‌സ് ആയി ജോലിക്ക് പോയിരുന്നു. ജോലി ശരിയാവാത്തതിനെ തുടർന്ന് ഒരാഴ്ച്ച മുമ്പ് വീട്ടിൽ തിരിച്ചെത്തിയതാണ്. വിവരമറിഞ്ഞ് ഫയർഫോഴ്സും പോലീസും സ്ഥലത്തെത്തി.

വീട്ടമ്മ ട്രെയിൻതട്ടി മരിച്ചു

മുരിങ്ങൂർ: റെയിൽവേ ട്രാക്ക് മുറിച്ചു കടക്കവെ വീട്ടമ്മ ട്രെയിൻതട്ടി മരിച്ചു. പറമ്പിക്കാടൻ സുകുമാരൻ ഭാര്യ മണി(63) ആണ് മരിച്ചത്. ഇന്നലെ രാവിലെ പത്തോടെയായിരുന്നു സംഭവം. ഉടൻ ചാലക്കുടിയിലെ സ്വകാര്യ ആശുപത്രിയിൽ എത്തിച്ചെങ്കിലും മരണം സംഭവിച്ചു. ഇരുട്രാക്കുകളിൽ നിന്നും ട്രെയിൻ വരുന്നത് കണ്ട് പെട്ടെന്ന് ഒഴിഞ്ഞു മാറുന്നതിനിടെയായിരുന്നു അപകടം. സംസ്കാരം നടത്തി. മക്കൾ: മിഥുൻരാജ്, സുമ. മരുമകൻ: സുധീർ.

നൂറുകണക്കിനു വീടുകൾ, റോഡുകള്‌ വെള്ളത്തിൽ

കടൽക്ഷോഭം രൂക്ഷം ചാവക്കാട്: കാറ്റും മഴയും ശക്തമായതിന് പിന്നാലെ കടൽക്ഷോഭവും രൂക്ഷമായി. കടപ്പുറം പഞ്ചായത്തിന്‍റെ തീരമേഖലയായ തൊട്ടാപ്പ് മുതൽ അഴിമുഖംവരെയുള്ള പ്രദേശങ്ങളിലാണ് ചെറിയൊരു ഇടവേളയ്ക്കുശേഷം വീണ്ടും കടലാക്രമണം രൂക്ഷമായത്. കടൽ ആഞ്ഞടിക്കുകയാണ്. ഭിത്തി തകർന്ന സ്ഥലത്തും ഭിത്തിയുള്ള സ്ഥലത്തും കടൽ കരയ്ക്ക് കയറുന്നു. തീരവാസികൾ നിസഹയരാണ്. മഴ അൽപം മാറിനിൽക്കുന്നുണ്ടെങ്കിലും ഇടവിട്ട് കറ്റോടുകൂടിയ മഴ പെയ്യുന്നതിനാൽ വെള്ളക്കെട്ടിന് കാര്യമായ കുറവ് വന്നിട്ടില്ല. പുന്ന പേരകം, വഞ്ചിക്കടവ്, തെക്കഞ്ചേരി തുടങ്ങി പ്രദേശങ്ങൾ വെള്ളക്കെട്ടിൽതന്നെ. ഇവിടെനിന്ന് പല വീട്ടുകാരും ബന്ധുവീടുകളിലേക്കും കടപ്പുറത്തെ ഷെൽട്ടറിലേക്കുംമാറി. ദേശീയപാത 66 നിർമാണത്തിന്‍റെ ഭാഗമായി വില്യം സിൽപാലം പണിയുന്നതിനായി കനോലി കനാൽ ഭാഗികമായി നികത്തിയിടത്തുനിന്ന് മൂന്ന് മീറ്റർ വീതിയിൽ മണൽ നീക്കിയതിനെ തുടർന്ന് ചെറിയതോതിൽ വെള്ളം ഒഴിയുന്നുണ്ട്. പുന്നപ്രദേശം ഒറ്റപ്പെട്ട നിലയിലാണ്. ഇവിടത്തുകാർക്ക് പുറത്തുപോകാനുളള മുക്കുട്ട, കോഴിക്കുളങ്ങര, കോഴിത്തറ, പുതിയറ എന്നീ നാലു റോഡുകളും വെള്ളക്കെട്ടിൽ മുങ്ങി. ദ്വീപിൽ അകപ്പെട്ട അവസ്ഥയിലാണ് പുന്നകാർ. കനോലി കനാലിനോടുചേർന്ന് കിടക്കുന്ന പ്രദേശത്തെ വെള്ളം കനാലിലേക്കാണ് ഒഴുകിയിരുന്നത്. കനാൽ കരകവിഞ്ഞതിനാൽ ഒഴുക്ക് നിലച്ചതാണ് പുന്ന, പേരകം സ്വദേശികളെ ദുരിതത്തിലാക്കിയത്. ദേശീയപാത നിർമാണത്തിന്‍റെ ഭാഗമായി പുന്നയൂർക്കുളം മന്ദലാംകുന്നിൽ വെള്ളക്കെട്ടിൽ കുടുങ്ങിയ 15 വീട്ടുകാരുടെ പ്രശ്നം പരിഹരിക്കാൻ ഇന്ന് 3.30ന് ചാവക്കാട് റസ്റ്റ് ഹൗസിൽ ചർച്ചയുണ്ട്. എന്നാൽ മലപ്പുറം ജില്ലയിലെ വെളിയങ്കോട് ലോക്ക് കം ബ്രിഡ്ജിന്‍റെ നിർമാണത്തിനായി കനോലി കനാലിൽ തടയണ കെട്ടിയതിനെ തുടർന്ന് തൃശൂർ, മലപ്പുറം ജില്ലകളിലായി നൂറുകണക്കിന് വീടുകൾ വെള്ളത്തിലാണ്. കനാലിന്‍റെ ഇരുകരയിലായി കിലോമീറ്ററുകൾ ദൂരത്തിൽ വെള്ളക്കെട്ടാണ്. ജില്ലയിലെ പുന്നയൂർ, എടക്കര, പുന്നയൂർക്കുളം, മല്ലാട്, പനന്തറ, അണ്ടത്തോട് തുടങ്ങിയ പ്രദേശങ്ങൾ വെള്ളത്തിലായി ഒട്ടേറെ വീട്ടുകാർ താമസംമാറി. കനാലിലെ തടയണ പൊളിക്കണമെന്നാണ് നാട്ടുകാരുടെ ആവശ്യം. എന്നാൽ നിർമാണം തടസപ്പെടുമെന്നും വേഗത്തിൽ പണി പൂർത്തികരിക്കാമെന്ന നിലപാടിലാണ് കരാറുകാരൻ പറയുന്നത്. മഴ തുടർന്നാൽ കനാൽ തീരത്തെ സ്ഥിതി വഷളാകുമെന്ന് തീരവാസികൾ ചൂണ്ടിക്കാട്ടുന്നു. റോഡിൽ വെള്ളംകയറി ചേർപ്പ്: കനത്ത മഴയെ തുടർന്ന് പള്ളിപ്പുറം ആലപ്പാട് റോഡിൽ വെള്ളംകയറി. ഇരുഭാഗങ്ങളിലെ കോൾപടവുകളിൽനിന്ന് വെള്ളം റോഡിലേക്ക് കവിഞ്ഞതിനെ തുടർന്നാണ് വെള്ളക്കെട്ട് രൂപപ്പെട്ടിരിക്കുന്നത്. പാലക്കലിൽ നിന്ന് അമ്മാടം, പള്ളിപ്പുറം, പുള്ള്, മനക്കൊടി, തൃപ്രയാർ ഭാഗങ്ങളിലേക്ക് പോകുന്ന വഴികൂടിയാണിത്. മഴ തുടർന്നാൽ വാഹനഗതാഗതവും തടസപ്പെടുന്ന അവസ്ഥയിലാണ്. സ്കൂളിനു മുകളിലേക്ക് മരക്കൊമ്പ് പൊട്ടിവീണു എരുമപ്പെട്ടി: വെള്ളറക്കാട് വിവേകസാഗരം യുപി സ്കൂളിലെ ക്ലാസ് മുറിയുടെ മുകളിലേക്ക് മരക്കൊമ്പ് പൊട്ടിവീണ് ഓടുകൾ തകർന്നു. ഇന്നലെ പുലർച്ചെയുണ്ടായ ശക്തമായ കാറ്റിലും മഴയിലുമാണ് തേക്ക് മരത്തിന്‍റെ കൊമ്പ് പൊട്ടിവീണത്. ഒന്ന്, രണ്ട് ക്ലാസുകളുടെ മുകളിലേക്കാണ് മരക്കൊമ്പ് വീണത്. പുലർച്ചെയായതിനാൽ വൻ അപകടം ഒഴിവായി. മേൽക്കൂരയിലെ ഓടുകൾ തകർന്നു. തൊട്ടടുത്തപറമ്പിൽ നിന്നിരുന്ന ഉണങ്ങിയ മരവും സ്കൂളിലേക്ക് വീണു. മരംവീണ് വീടുതകർന്നു പുന്നംപറമ്പ്: കഴിഞ്ഞദിവസമുണ്ടായ ശക്തമായ കാറ്റിലും മഴയിലും മരം വീണു വീടുതകർന്നു. തെക്കുംകര വിരുപ്പാക്ക നമ്പ്രത്ത്‌ വ‌‌ീട്ടിൽ തങ്കമ്മയുടെ വീടിനു മുകളിലേക്കാണ് വലിയപുളിമരം കാറ്റിൽവീണത്. അർധരാത്രിയിലായിരുന്നു സംഭവം. വീട്ടിൽ ഉറങ്ങുകയായിരുന്നവർ തലനാരിഴയ്ക്കാണ് രക്ഷപ്പെട്ടത്. തങ്കമ്മയും മരുമകൾ പ്രീതയും രണ്ടു മക്കളുമാണ് വീട്ടിൽ ഉണ്ടായിരുന്നത്. ഓട് തലയിൽവീണ് രണ്ടുപേർക്ക് ചെറിയ പരിക്കേറ്റു. വീടിന്‍റെ മേൽക്കൂര പൂർണമായി തകർന്നു. മകൻ വിനോദ് ജോലിസ്ഥലത്തായിരുന്നു. മഴയില്‌ വീട് തകർന്നു പാവറട്ടി: ശക്തമായ കാറ്റിലും മഴയിലും പാവറട്ടിയിൽ വീടുതകർന്നു. പാവറട്ടി പഞ്ചായത്തിലെ വെൻമേനാട് ആശുപത്രിപടിക്കുസമീപം താമസിക്കുന്ന കെ. ദേവദാസിന്‍റെ വീടാണ് മഴയിൽ തകർന്നത്. വീടിന്‍റെ മണ്ണുകൊണ്ട് നിർമിച്ച ചുമര് മഴയിൽ തകർന്നുവീണു. ഓടിട്ട വീടിന്‍റെ മേൽക്കൂരയിലെ കഴുക്കോലുകളും ദ്രവിച്ച അവസ്ഥയിലാണ്. വീടിനുള്ളിൽ സൂക്ഷിച്ചിരുന്ന പാത്രങ്ങൾ, വിവിധ രേഖകൾ, സൈക്കിൾ എന്നിവ നശിച്ചു. വീടിനുചുറ്റും വെള്ളക്കെട്ട് രൂപപ്പെട്ട നിലയിലാണ്. വീട്ടിൽനിന്നു താമസംമാറേണ്ട അവസ്ഥയിലാണ് കുടുംബം. പുന്നയൂര്‍ക്കുളം: ശക്തമായ മഴയില്‍ വീട് തകര്‍ന്നുവീണു. തൃപ്പറ്റ് ജയാനന്ദന്‍റെ വീടാണ് കാറ്റിൽ തകര്‍ന്നുവീണത്. കഴിഞ്ഞദിവസം രാത്രിയിലാണ് സംഭവം. തൊഴിലാളിയായ ജയാനന്ദൻ ഒറ്റയ്ക്കാണ് താമസം. ആളപായമില്ല. കുന്നംകുളം: ഇന്നലെ രാത്രിയിൽ പെ യ്ത കനത്തമഴയിൽ ചൊവ്വന്നൂരിൽ ഇരുനില വീട് തകർന്നുവീണു. കുന്നംകുളം ചൊവ്വന്നൂർ അയ്യപ്പത്ത് റോഡിൽ കോലാടിപറമ്പിൽ ബിജേഷും കുടുംബവും താമസിച്ചിരുന്ന വീടാണ് തകർന്നത്. ഇന്നലെ പുലർച്ചെ നാലോടെ വീടിന്‍റെ ചുവരുകൾ പൊട്ടുന്ന ശബ്ദംകേട്ട് ബിജീഷും ഭാര്യയും രണ്ടു കുട്ടികൾ അടങ്ങുന്ന കുടുംബം പുറത്തേക്ക് ഓടിയതിനാൽ വൻ ദുരന്തം ഒഴിവായി. അൽപനിമിഷത്തിനുള്ളിൽ വീട് പൂർണമായും നിലംപൊത്തുകയായിരുന്നു. കുടുംബ ക്ഷേത്രത്തിൽ പോകുന്നതിനായി ബിജേഷ് നേരത്തെ എഴുന്നേറ്റു. ഈ നേരത്താണ് ചുമർ പൊട്ടുന്നത് ശ്രദ്ധയിൽപ്പെട്ടത്. ഇതോടെയാണ് ഭാര്യയും കുട്ടികളുമായി പുറത്തേക്ക് ഓടിയത്. മഴയിൽ വീടിന്‍റെ ചുവരുകൾക്കിടയിലേക്ക് വെള്ളം ഇറങ്ങിയതാണ് ഇടിയാൻ കാരണമായതെന്ന് കരുതുന്നു. വീട്ടുസാധനങ്ങൾ എല്ലാം നശിച്ചു. മേഖലയിൽ ഇന്നലെ വൈകിട്ട് മുതൽ കനത്ത മഴയാണ് ഉണ്ടായിരുന്നത്. റോഡിലെ വെള്ളക്കെട്ട് ഒഴിവാക്കാൻ നാട്ടുകാർ അന്തിക്കാട്: കനത്തമഴയെ തുടർന്ന് ദിവസങ്ങളായി നിലനിൽക്കുന്ന അന്തിക്കാട് വാമനമൂർത്തി ക്ഷേത്രം റോഡിലെ വെള്ളക്കെട്ട് ഒഴിവാക്കാൻ നാട്ടുകാർ രംഗത്തിറങ്ങി. ഇതുവഴിയുള്ള യാത്ര അപകടം നിറഞ്ഞതായതോടെയാണ് കൈക്കോട്ടും പിക്കാസുമായി നാട്ടുകാർ രംഗത്തിറങ്ങിയത്. റോഡ് അരികിലെ പാഴ് പുല്ലുകളും മറ്റും വെട്ടി വൃത്തിയാക്കിയ നാട്ടുകാർ കൈക്കോട്ട് ഉപയോഗിച്ച് റോഡരികിൽ ചെറിയ കാനയുണ്ടാക്കി വെള്ളം ഒഴുക്കിവിടാനുള്ള ശ്രമങ്ങളാണ് നടത്തിയത്. കിഴക്കുഭാഗത്തുനിന്നു ചെറിയ കാനകോരി പടിഞ്ഞാറുഭാഗത്തെ പ്രധാന റോഡരികിലെ കാനയിലേക്കാണ് ഇവർ വെള്ളം ഒഴുക്കിവിട്ടത്. കളത്തൻപറമ്പിൽ ജയൻ, ടി.ജെ. ബെന്നി, സി.ജെ. ബിജു, എം.വി. സുദർശൻ എന്നിവരാണ് തിങ്കളാഴ്ച രാവിലെ മുതൽ മണിക്കൂറുകളോളം നീണ്ടുനിന്ന സന്നദ്ധ പ്രവർത്തനങ്ങൾ ചെയ്തത്. തണ്ണീർത്തടം കരകവിഞ്ഞൊഴുകി അന്തിക്കാട്: കനത്തമഴയിൽ കെ.കെ. മേനോൻ ഷെഡിന് വടക്കുഭാഗത്തെ തണ്ണീർത്തടം കരകവിഞ്ഞൊഴുകിയതോടെ അന്തിക്കാട് റോഡ് വെള്ളത്തിലായി. നിരവധി ഇരുചക്രവാഹനങ്ങളിലെ എൻജിനുകളിൽ വെള്ളംകയറി യാത്രക്കാർ വലഞ്ഞു. അന്തിക്കാട് സെന്‍റർ, വാമനമൂർത്തി ക്ഷേത്രപരിസരം, കെ.കെ. മേനോൻ ഷെഡിന്‍റെ പടിഞ്ഞാറുഭാഗം തുടങ്ങി നിരവധി പ്രദേശങ്ങളിലെ വെള്ളം ഒഴുകിപ്പോയിരുന്ന പുറമ്പോക്ക് തോട്ടിലെ ഒഴുക്കുനിലച്ചതാണ് വെള്ളം കയറാൻ പ്രധാനകാരണം. പുറമ്പോക്ക് തോട്ടിലൂടെ എത്തുന്ന മഴവെള്ളം 150 മീറ്ററോളം കഴിഞ്ഞാൽ പിന്നീട് സ്വകാര്യ വ്യക്തികളുടെ വീട്ടുപറമ്പുകളിലൂടെയും കര പാടങ്ങളിലുടെയും ഒഴുകി മാത്തുതോട് വഴി കനോലി കനാലിലേക്കാണ് ഒഴുകിപ്പോയിരുന്നത്. സ്വകാര്യ വ്യക്തികൾ തോടുകൾ മതിൽകെട്ടിയും വീട് നിർമിച്ചും അടച്ചതോടെയാണ് വെള്ളം ഒഴുകിപോകാൻ കഴിയാതെ വെള്ളക്കെട്ട് രൂപപെട്ടതെന്ന് നാട്ടുകാർ പറയുന്നു. സ്വകാര്യവ്യക്തികൾ സ്ഥാപിച്ച ഓവുകൾ പഞ്ചായത്ത് ഇടപെട്ട് എടുത്തുമാറ്റി പകരം കാന നിർമിച്ച് വെള്ളമൊഴുക്കിക്കളയലാണ് ശാശ്വത പരിഹാരമെന്ന് നാട്ടുകാർ പറയുന്നു. കെ.കെ. മേനോൻ - പേരാൻ മാർക്കറ്റ് ന്യൂ ലിങ്ക് റോഡിൽ വെള്ളമൊഴുകിയെത്തുന്ന തോടിനെ ബന്ധിപ്പിക്കുന്ന രീതിയിൽ കലുങ്ക് സ്ഥാപിക്കണമെന്ന ആവശ്യവും ശക്തമാണ്. മിന്നൽചുഴലി - എളവള്ളിയിലും പാവറട്ടിയിലും വ്യാപകനാശം പാവറട്ടി: കനത്ത മഴയ്ക്കൊപ്പം മിന്നൽ ചുഴലിയും. എളവള്ളി, പാവറട്ടി പഞ്ചായത്തുകളിൽ വ്യാപക നാശനഷ്ടം. പ്രദേശത്തെ വിടുകളിലെ മരങ്ങൾ കടപുഴകിവീണും വീടുകളുടെ ഓടും ഷീറ്റുകളും പറന്നുപോയും ഇലക്ട്രിക് പോസ്റ്റുകൾ തകർന്നും നാശനഷ്ടങ്ങൾ ഉണ്ടായി. കാക്കശ്ശേരി ഹനുമാൻകാവ് ക്ഷേത്രത്തിനുസമീപം നിർത്താട്ടിൽ മനോജ്കുമാറിന്‍റെ വീട്ടിൽ നിർത്തിയിട്ടിരുന്ന കാറിനു മുകളിൽ മാവ് മുറിഞ്ഞുവീണു. ചുഴലി ബിജുവിന്‍റെ വീടിനു മുകളിലേക്ക് ശക്തമായ കാറ്റിൽ തെങ്ങുവീണു. വീടിന് കേടുപാടുകൾ സംഭവിച്ചു. ആതിര ചാരിറ്റബിൾ സൊസൈറ്റിയുടെ മുകളിലേക്ക് മാവ് കടമുറിഞ്ഞുവീണു. പാവറട്ടി പഞ്ചായത്തിൽ കുറ്റിക്കാട്ട് അന്തോണിയുടെ വീടിനുമുകളിൽ പ്ലാവ് വീണു. നീലങ്കാവിൽ എൻ.ജെ. ലിയോയുടെ വീട്ടിൽ രണ്ട് മാവ് കടമുറിഞ്ഞുവീണു. പുത്തൂർ ഡേവിസിന്‍റെ വീട്ടിലെ ഷീറ്റ് കാറ്റിൽ പറന്നുപോയി. പാമ്പിങ്ങൽ മുരളിയുടെ വീട്ടിലെ അയിനിമരവും ഊരുപറമ്പിൽ രാമകൃഷ്ണന്‍റെ വീട്ടിലെ മാവും കാറ്റിൽ വീണു. മുരളി പെരുനെല്ലി എംഎൽഎ സിപിഎം ജില്ലാ സെക്രട്ടറിയേറ്റംഗം ടി.വി. ഹരിദാസൻ, മണലൂർ ഏരിയ കമ്മിറ്റി അംഗം പി.ജി. സുബിദാസ്, ചിറ്റാട്ടുകര ലോക്കൽ സെക്രട്ടറി ബി.ആർ. സന്തോഷ്, മുല്ലശ്ശേരി ബ്ലോക്ക് പഞ്ചായത്ത് പ്രസിഡന്‍റ് ലതി വേണുഗോപാൽ, ബ്ലോക്ക് പഞ്ചായത്ത് അംഗം ചെറുപുഷ്പം ജോണി, എളവള്ളി വില്ലേജ് ഓഫീസർ ജോയ്സി എന്നിവർ നാശനഷ്ടങ്ങളുണ്ടായ പ്രദേശങ്ങൾ സന്ദർശിച്ചു. പറപ്പൂക്കരയില്‍ വീട്ടുകാരെ ദുരിതാശ്വാസ ക്യാമ്പിലേക്ക് മാറ്റി പറപ്പൂക്കര: ശക്തമായ മഴയില്‍ പറപ്പൂക്കര പഞ്ചായത്തിലെ തൊട്ടിപ്പാള്‍ മാടപ്പുറം, ജൂബിലിനഗര്‍ എന്നിവിടങ്ങളിലെ വീടുകളില്‍ വെള്ളംകയറി. തൊട്ടിപ്പാള്‍ കെഎസ്‌യുപി സ്‌കൂളില്‍ ആരംഭിച്ച ദുരിതാശ്വാസ ക്യാമ്പിലേക്ക് വീട്ടുകാരെ മാറ്റി. ആറ് പുരുഷന്‍മാരും ആറ് സ്ത്രീകളും ഒരു കുട്ടിയും ഉള്‍പ്പടെ 13 പേരാണ് ക്യാമ്പിലുള്ളത്. പഞ്ചായത്ത് പ്രസിഡന്‍റ് ഇ.കെ. അനൂപ്, വില്ലേജ് അധികൃതര്‍ എന്നിവരുടെ നേതൃത്വത്തിലാണ് വീട്ടുകാരെ ദുരിതാശ്വാസ ക്യാമ്പിലേക്ക് മാറ്റിയത്.

ഈ വഴി "പെരുവഴി'

തൃശൂർ: മഴയുടെ ശക്തി കുറഞ്ഞെങ്കിലും റോഡിലെ തിരക്കിന്‍റെയും വെള്ളക്കെട്ടിന്‍റെയും തോത് കുറയാത്തതു ജനങ്ങൾക്കു സമ്മാനിച്ചതു ദുരിതയാത്ര. പൂങ്കുന്നത്തു റോഡിന്‍റെ നിർമാണവുമായി ബന്ധപ്പെട്ട് വാഹനങ്ങൾ വഴിതിരിച്ചുവിട്ടത്തോടെ അയ്യന്തോൾ കുടുംബകോടതിക്കുസമീപം വൻഗതാഗത ക്കുരുക്കാണ്. നാളേറെയായി ഈ പ്രശ്നം തുടരുന്നുണ്ടെങ്കിലും മഴ ശക്തമായതോടെ യാത്രാക്ലേശവും കുത്തനേ കൂടി. ഇതിനിടെ സമയക്രമം പാലിക്കാൻ സ്വകാര്യ ബസുകൾ നിരതെറ്റിച്ചുവരുന്നതും വൻ ഗതാഗതതടസമാണ് സൃഷ്ടിക്കുന്നത്. വെള്ളം വെള്ളം സർവത്ര... മഴയൊന്നു പെയ്യുന്പോഴേക്കും നിറയുന്ന തോടുകളും പിറകെ പുഴയാകുന്ന റോഡുകളും തൃശൂരിൽ പതിവുകാഴ്ചയാണ്. ഇത്തവണയും ആ കാഴ്ചകൾക്ക് ഒരു കുറവുമില്ല. മഴക്കാലമുന്നൊരുക്കങ്ങളുടെ ഭാഗമായി തോടുനവീകരണം പൂർത്തീകരിച്ചെങ്കിലും അയ്യന്തോൾ പഞ്ചിക്കൽ തോട് നിറഞ്ഞ് റോഡിലേക്കു വെള്ളം കയറിയത് യാത്രക്കാരെ വലച്ചു. റോഡിലെ കുഴികൾ അറിയാതെ വാഹനങ്ങൾ വെള്ളത്തിൽ കുടുങ്ങിയതും ജനങ്ങളെ ബുദ്ധിമുട്ടിലാക്കി. അയ്യന്തോൾ പ്രിയദർശിനിനഗറിലും റോഡിൽ വെള്ളം കയറി. പൂങ്കുന്നം എംഎൽഎ റോഡിൽ തോടുനിറഞ്ഞ് റോഡിലേക്കു വെള്ളം ശക്തമായി ഒഴുകിയെത്തിയത് വാഹനങ്ങളെയും കാൽനടയാത്രികരെയും ഒരുപോലെ നട്ടംതിരിച്ചു. തോടിനോടുചേർന്നുള്ള കടയിലേക്കും വെള്ളംകയറി. പാന്പൂർ ചെന്പിശേരി പാലത്തിനുതാഴെയും തോട് കരകവിഞ്ഞ് വീടുകൾക്കുചുറ്റും വെള്ളക്കെട്ടും ഉണ്ടായി. പലരും വെള്ളം കയറുമെന്ന ഭീതിയിൽ സാധനസമഗ്രികളെല്ലാം ഭദ്രമായി ബന്ധുവീടുകളിലേക്കും വീടുകളിലെ ഉയർന്ന ഭാഗങ്ങളിലേക്കും മാറ്റിവച്ചിരിക്കുകയാണ്.

വെള്ളക്കെട്ട് ഒഴിയുന്നില്ല, ക്യാമ്പിലേക്ക് കൂടുതൽപേർ

കയ്പമംഗലം: എടത്തിരുത്തിയിലും കയ്പമംഗലത്തും വെള്ളക്കെട്ട് ഒഴിയുന്നില്ല; ജനങ്ങളുടെ ദുരിതം രൂക്ഷമാകുന്നു. കൂരിക്കുഴിയിലെയും ചാമക്കാലയിലെയും ദുരിതാശ്വാസ ക്യാമ്പിൽ എത്തുന്ന ആളുകളുടെ എണ്ണവും വർധിച്ചു. കൂരിക്കുഴിയിൽ എട്ടു കുടുംബാംഗങ്ങളിൽ‌നിന്നായി 18 പേരും ചാമക്കാല ക്യാമ്പിൽ 18 കുടുംബങ്ങളിൽ‌നിന്നായി 38 ആളുകളുമാണ് ഇപ്പോഴും ക്യാമ്പിൽ കഴിയുന്നത്. കയ്പമംഗലം ഒൻപതാം വാർഡിന്‍റെ പലപ്രദേശങ്ങളിലും വെള്ളം കയറിയിട്ടുണ്ട്. രണ്ട്, മൂന്ന്, അഞ്ച്, ആറ് വാർഡുകളിലും വെള്ളക്കെട്ട് രൂക്ഷമാണ്. അതേ‌സമയം പെരിഞ്ഞനം പഞ്ചായത്തിലെ ഗവ. യുപി സ്കൂളിൽ പ്രവർത്തിച്ചിരുന്ന ക്യാമ്പ് ഇന്നലെ അവസാനിപ്പിച്ചിട്ടുണ്ട്.

കനത്ത മഴ, വാഴത്തോട്ടങ്ങളില്‍ വെള്ളംകയറി

കോടാലി: ദിവസങ്ങളായി തുടരുന്ന മഴ മറ്റത്തൂരിലെ വാഴക്കര്‍ഷകരെ ദുരിതത്തിലാക്കുന്നു. പാടങ്ങളോടു‌ചേര്‍ന്നുള്ള താഴ്ന്ന‌പ്രദേശങ്ങളിലെ വാഴത്തോട്ടങ്ങളില്‍ വെള്ളം കയറിയതാണു കര്‍ഷകരെ പ്രതിസന്ധിയിലാക്കുന്നത്. ഓണവിപണി ലക്ഷ്യംവെച്ച് കൃഷിചെയ്തിട്ടുള്ള നൂറുകണക്കിനു നേന്ത്രവാഴകളാണ് വെള്ളത്തില്‍ മുങ്ങിനില്‍ക്കുന്നത്. ഒരു മാസം മുമ്പ് കൃഷിയിറക്കിയ വാഴകളും വെള്ളത്തിലാണ്. വാഴകളുടെ ചുവട്ടില്‍ നാലുദിവസത്തിലേറെ വെള്ളം കെട്ടിനിന്നാല്‍ വാഴകള്‍ക്ക് പഴുപ്പുബാധിച്ച് ഒടിഞ്ഞുവീഴുമെന്ന് കര്‍ഷകര്‍ പറയുന്നു. മറ്റത്തൂരിലെ ചേലക്കാട്ടുകര, മാങ്കുറ്റിപ്പാടം, കൊടുങ്ങ, കോപ്ലിപ്പാടം, മന്ദരപ്പിള്ളി, നൂലുവള്ളി എന്നിവിടങ്ങളിലെല്ലാം വാഴത്തോട്ടങ്ങള്‍ വെള്ളത്തില്‍ മുങ്ങിനില്‍ക്കുകയാണ്. വിളവെടുപ്പിനു പാകമായ തോ ട്ടങ്ങളില്‍ വെള്ളക്കെട്ടുള്ളതിനാല്‍ വാഴക്കുലകള്‍ വെട്ടിയെടുക്കാന്‍ കഴിയാത്ത സാഹചര്യവുമുണ്ട്. ഇനിയും രണ്ടു ദിവസത്തിലേറെ കനത്തമഴ തുടര്‍ന്നാല്‍ വലിയ നഷ്ടം നേരിടേണ്ടിവരുമെന്ന് വാഴകര്‍ഷകര്‍ പറയുന്നു.

മോഡൽ ഹയർസെക്കൻഡറി സ്കൂൾ സ്റ്റേഡിയത്തിന് ചാത്തുണ്ണിയുടെ പേരിടും

ചാലക്കുടി: ഗവ. മോഡൽ ഹയർസെക്കൻഡറി സ്കൂളിൽ അഞ്ചുകോടി രൂപ ചെലവിൽ നിർമിക്കുന്ന സ്റ്റേഡിയത്തിനു ദേശീയ ഫുട്ബോൾ ടീം മുൻ കോച്ചും താരവുമായിരുന്ന അന്തരിച്ച ടി.കെ. ചാത്തുണ്ണിയുടെ നാമകരണം നടത്താൻ നഗരസഭ തീരുമാനം. വുഡ് ഫ്ലോറിംഗ് ഉൾപ്പെടെയുള്ള നിർമാണപ്രവൃത്തികൾ പൂർത്തിയായ നഗരസഭയിലെ എം.എൽ. ജേക്കബ് സ്മാരക ഇൻഡോർ സ്റ്റേഡിയം 20നു പ്രവർത്തനമാരംഭിക്കും. ഒരു കോടിയിലേറെ രൂപ ചെലവിലാണ് മേപ്പിൾ മരത്തടിയിൽ ഫ്ലോറിംഗും വൈദ്യുതി പെയിന്‍റിംഗ് പ്രവൃത്തികളും പൂർത്തിയാക്കിയത്. ഇൻഡോർ സ്റ്റേഡിയത്തിൽ ബാസ്കറ്റ്ബോൾ, വോളിബോൾ, ഷട്ടിൽ ബാഡ്മിന്‍റണ്‍ പരിശീലനത്തിനും വ്യായാമത്തിനും ഉപയോഗിക്കാനും തീരുമാനിച്ചു. ഇൻഡോർ സ്റ്റേഡിയത്തിന്‍റെ പ്രവർത്തനോദ്ഘാടനവും ഗവ. മോഡൽ ഹയർ സെക്കൻഡറി സ്കൂൾ സ്റ്റേഡിയത്തിന്‍റെ നിർമാണോദ്ഘാടനവും മന്ത്രി നിർവഹിക്കുമെന്നു ചെയർമാൻ കൗണ്‍സിലിനെ അറിയിച്ചു. പവലിയനും സിന്തറ്റിക് ട്രാക്കും ടോയ്‌്‌ലറ്റ് ബ്ലോക്കും ഉൾപ്പെടെയുള്ള ടർഫ് മൈതാനമാണു കായികവകുപ്പ് നിർമിക്കുന്നത്. സ്റ്റേഡിയത്തോടു ചേർന്നുള്ള മൈതാനവും ടൗണ്‍ ഹാൾ മൈതാനവും പാർക്കിംഗിനുനൽകി ഫീസ് ഈടാക്കും. കലാഭവൻ മണി പാർക്കിൽ കാന്‍റീൻ ആരംഭിക്കും. നഗരസഭ താലൂക്ക് ആശുപത്രി വഴി നടപ്പാക്കുന്ന സാന്ത്വനം പാലിയേറ്റീവ് പരിചരണപദ്ധതിക്ക് പുതിയ വാഹനം വാങ്ങിനൽകുമെന്ന വൈസ് ചെയർപേഴ്സൻ സി. ശ്രീദേവിയുടെ ഓഫർ കൗണ്‍സിൽ അംഗീകരിച്ചു. ശുചീകരണപ്രവർത്തനങ്ങൾക്ക് വാർഡ്തല സമിതിക്ക് 10000 രൂപ വീതം നൽകിയിട്ടുണ്ടെന്ന് ചെയർപേഴ്സണ്‍ അറിയിച്ചു. 28ന് എസ്എസ്എൽസി, പ്ലസ് ടു വിജയികളെ ടൗണ്‍ഹാളിൽ അനുമോ ദിക്കും. നഗരസഭയിലെ അസി. എൻജിനീയറുടെ പ്രവർത്തനത്തിൽ കൗണ്‍സിൽ അസംതൃപ്തി രേഖപ്പെടുത്തി. ചെയർമാൻ ഷിബു വാലപ്പൻ അധ്യക്ഷത വഹിച്ചു.

ചാലക്കുടി സർവീസ് സഹകരണ ബാങ്ക് ടൗൺ ബ്രാഞ്ച് ഓഫീസ് ഉദ്ഘാടനം നാളെ

ചാലക്കുടി: ചാലക്കുടി സർവീസ് സഹകരണ ബാങ്കിന്‍റെ കെട്ടിട സമുച്ചയത്തിന്‍റെയും ടൗൺ ബ്രാഞ്ച് ഓഫീസിന്‍റെയും ഉദ്ഘാടനം നാളെ രാവിലെ 10 ന് പ്രതിപക്ഷനേതാവ് വി.ഡി. സതീശൻ നിർവഹിക്കും. സനീഷ്‌കുമാർ ജോസഫ് എംഎൽഎ അധ്യക്ഷത വഹിക്കും. ബെന്നി ബെഹനാൻ എംപി മുഖ്യാതിഥിയായിരി ക്കും. സ്ട്രോംഗ് റൂം ഉദ്ഘാടനം നഗരസഭ ചെയർമാൻ ഷിബു വാലപ്പൻ നിർവഹിക്കും. ആദ്യനിക്ഷേപം സ്വീകരിക്കൽ തൃശൂർ ജോയിന്‍റ്് രജിസ്ട്രാർ ജൂബി ടി. കുര്യാക്കോസ് നിർവഹിക്കും. 1961 ൽ ആണ് ചാലക്കുടി സർവീസ് സഹകരണ ബാങ്ക് പ്രവർത്തനം ആരംഭിച്ചത്. ബാങ്കിന് ചാലക്കുടി ടൗണിൽ പഴയ ഹെഡ് ഓഫീസ് പ്രവർത്തിച്ചിരുന്ന സ്ഥലത്ത് ഒന്നരക്കോടി രൂപ ചെലവിൽ മൂന്നു നിലകളിലായാണ് പുതിയ ഓഫീസ്‌ കെട്ടിടം നിർമിച്ചിട്ടുള്ളത്. പ്രസിഡന്‍റ് വി.എൽ. ജോൺസൺ, സെക്രട്ടറി കെ.ജെ. മിനി, ഭരണസമിതി അംഗങ്ങളായ ഒ.എസ്. ചന്ദ്രൻ, ആന്‍റോ മേലേപ്പുറം, ജോയ് മാളിയേക്കൽ, ബി.എ. അബ്ദുൾ മജീദ്, റീന ഡേവിസ്, റിൻ്റോസ് കണ്ണമ്പുഴ, ജോസ് പുല്ലൻ, ഷനിൽ കുത്തോട്ടുങ്ങക്കാരൻ, ദിലീപ് പേരാമ്പ്രത്ത്, സിനി സന്തോഷ്, ഇന്ദിര ബാബു എന്നിവർ പത്രസമ്മേളനത്തിൽ പങ്കെടുത്തു.

താത്കാലിക ബണ്ട് പൊളിക്കില്ല; പഞ്ചായത്ത് പ്രസിഡന്‍റിനെ തടഞ്ഞു

ഇരിങ്ങാലക്കുട: പടിയൂര്‍ പഞ്ചായത്തിലെ രണ്ടുവാര്‍ഡുകളിലെ നൂറോളം വീടുകള്‍ വെള്ളക്കെട്ടിലായ വിഷയത്തിനു പരിഹാരമായി വാര്‍ഡ് നിവാസികളും ജനപ്രതിനിധികളും ആവശ്യപ്പെട്ടതുപ്രകാരം പുളിക്കലച്ചിറ പാലംനിര്‍മാണത്തിനായി നിര്‍മിച്ച താത്കാലിക ബണ്ട് പൊളിക്കില്ല. താത്കാലിക ബണ്ട് നിലനിർത്തിക്കൊണ്ടുതന്നെ വെള്ളക്കെട്ടിന് പരിഹാരം കാണാന്‍ ആവശ്യമായ നിര്‍മാണ പ്രവര്‍ത്തനങ്ങള്‍ നാളെ മുതല്‍ തന്നെ ആരംഭിക്കാനാണ് തീരുമാനമെന്ന് പിഡബ്ല്യുഡി ബ്രിഡ്ജസ് വിഭാഗം അധികൃതര്‍ അറിയിച്ചു. താത്കാലിക ബണ്ട് പൊളിക്കുന്നത് അടുത്ത മാസം ആരംഭിക്കുന്ന നാലമ്പലദര്‍ശനത്തിന് പ്രതിസന്ധി സൃഷ്ടിക്കുമെന്നും ബണ്ട് നിലനിറുത്തിക്കൊണ്ടുതന്നെ വിഷയത്തിന് പരിഹാരം കാണാനും സുഗമമായി വെള്ളം ഒഴുകിപ്പോകാനുള്ള നടപടികള്‍ സ്വീകരിക്കാനുമാണ് തീരുമാനിച്ചിരിക്കുന്നതെന്ന് ബ്രിഡ്ജസ് വിഭാഗം അറിയിച്ചു. ബണ്ട് പൊളിക്കണമെന്ന ആവശ്യത്തില്‍ ഉറപ്പ് ലഭിക്കാതെ വന്നതോടെ വൈകീട്ട് നാലിന് പഞ്ചായത്ത് ഓഫീസിന് മുന്നില്‍ ഭരണസമിതിയിലെ ബിജെപി അംഗങ്ങളുടെ നേതൃത്വത്തില്‍ പഞ്ചായത്ത് ഓഫീസില്‍നിന്നും മടങ്ങി ഔദ്യോഗിക വാഹനത്തില്‍ കയറാന്‍ ഒരുങ്ങിയ പഞ്ചായത്ത് പ്രസിഡന്‍റിനെ തടഞ്ഞു. നടപടി സ്വീകരിക്കേണ്ടി‌വരുമെന്ന് പോലീസ് വിശദീകരിച്ചപ്പോള്‍ പ്രതിഷേധവുമായി വാര്‍ഡ് നിവാസികള്‍ റോഡില്‍ കുത്തിയിരുന്നു. തുടര്‍ന്ന് പോലീസ് ഇവരെ ബലപ്രയോഗത്തിലൂടെ മാറ്റുകയായിരുന്നു. രാവിലെ വില്ലേജ് അധികൃതര്‍ നല്‍കിയ റിപ്പോര്‍ട്ട് അനുസരിച്ച് ബണ്ട് പൊളിക്കുകയോ അല്ലെങ്കില്‍ കൂടുതല്‍ വ്യാസമുള്ള പൈ പ്പുകള്‍ സ്ഥാപിച്ച് വെള്ളക്കെട്ട് ഒഴിവാക്കുകയോ ചെയ്യാ നാണ് ജില്ലാ ഭരണകൂടം നിര്‍ദേശിച്ചത്. അതേ‌സമയം പഞ്ചായത്തിലെ പത്തനങ്ങാടി, കോതേറ്റിപ്പാടം പ്രദേശങ്ങളിലെ വെള്ളക്കെട്ട് തുടരുകയാണ്. എതാനും പേര്‍ ക്യാമ്പിലേക്കും മറ്റുള്ളവര്‍ ബന്ധുവീടുകളിലേക്കുമാണു മാറിയിരിക്കുന്നത്. വിടപറഞ്ഞ മുന്‍ പഞ്ചായത്ത് പ്രസിഡന്‍റ് കെ.സി. ബിജുവിന്‍റെ വീട് അടക്കം വെള്ളക്കെട്ടിലാണ്. 2018 ലെ പ്രളയത്തിനുശേഷം ഇതാദ്യമായാണ് ഇത്രയും വെള്ളം കയറുന്നതെന്നും കഴിഞ്ഞ രണ്ടു ദിവസങ്ങളില്‍ മഴ കുറഞ്ഞെങ്കിലും വെള്ളക്കെട്ടിന് മാറ്റമുണ്ടായിട്ടില്ലെന്നും പ്രദേശത്തു നിന്നുള്ള വീട്ടുകാര്‍ പറഞ്ഞു.

മാധ്യമങ്ങള്‍ പ്രത്യാശപകരുന്ന വാര്‍ത്തകള്‍ക്കു മുന്‍തൂക്കം നല്‍കണം: മാര്‍ പോളി കണ്ണൂക്കാടന്‍

ഇരിങ്ങാലക്കുട: വായനക്കാരുടെയും പ്രേക്ഷകരുടെയും ശ്രദ്ധനേടാനുള്ള മത്സരത്തില്‍ നിഷേധാത്മകവാര്‍ത്തകള്‍ പെരുകിവരികയാണെന്നും യഥാര്‍ഥ മാധ്യമ‌പ്രവര്‍ത്തനം നന്മയുടെയും സ്‌നേഹത്തിന്‍റെയും പ്രത്യാശയുടെയും വാര്‍ത്തകള്‍ക്കാണ് പ്രാധാന്യം നല്‍കേണ്ടതെന്നും മാര്‍ പോളി കണ്ണൂക്കാടന്‍. കഴിഞ്ഞ 15 വര്‍ഷമായി ഇരിങ്ങാലക്കുട രൂപത പ്രതിവര്‍ഷം നടത്തിവരുന്ന പ്രാദേശിക മാധ്യമപ്രവര്‍ത്തകരുടെ കൂട്ടായ്മയെ അഭിസംബോധന ചെയ്യുകയായിരുന്നു ബിഷപ്. യുദ്ധവും സംഘര്‍ഷങ്ങളും മദ്യവും ലഹരിയും മറ്റു സാമൂഹികതിന്മകളും സമൂഹത്തെ അതീവ ആശങ്കയിലാക്കുന്ന ഇന്നത്തെ സാഹചര്യത്തില്‍ നല്ല വാര്‍ത്തകളാണ് ജനം ആഗ്രഹിക്കുന്നതെന്ന് മാധ്യമങ്ങള്‍ തിരിച്ചറിയണം. സാധ്യമായ തോതില്‍ തങ്ങള്‍ക്കു ചുറ്റിലുമുള്ള നന്മയുടെയും സാഹോദര്യത്തിന്‍റെയും സഹകരണത്തിന്‍റെയും മാതൃകകളെ പ്രാദേശിക മാധ്യമപ്രവര്‍ത്തകര്‍ക്കു ചൂണ്ടിക്കാട്ടാന്‍ കഴിയും. നിഷേധ വാര്‍ത്തകള്‍ക്കല്ല, പോസിറ്റീവ് - സര്‍ഗാത്മക - വാര്‍ത്തകള്‍ക്കാണു പ്രാധാന്യം നൽ കേ ണ്ടതെ ന്നും ബിഷപ്ഓര്‍മിപ്പിച്ചു. വികാരി ജനറാൾമാരായ മോണ്‍. ജോസ് മാളിയേക്കല്‍, മോണ്‍. വില്‍സണ്‍ ഈരത്തറ, മോണ്‍. ജോളി വടക്കന്‍, കേരളസഭ മാനേജിംഗ് ഡയറക്ടർ ഫാ. ജെയ്സണ്‍ വടക്കുംഞ്ചേരി, ഫാ. സിന്‍റോ മാടവന, ഫാ. അനൂപ് കോലങ്കണ്ണി, ഫാ. ടിന്‍റോ കൊടിയന്‍, സെബി മാളിയേക്കൽ, ജോസ് തളിയത്ത് എന്നിവര്‍ പ്രസംഗിച്ചു.

വിശുദ്ധ അന്തോണീസിന്‍റെ മരണത്തിരുനാൾ ആഘോഷിച്ചു

ചെട്ടിക്കാട്: വിശുദ്ധ അന്തോണീസിന്‍റെ തീർഥാടന ദേവാലയത്തി ൽ അത്ഭുത‌പ്രവർത്തകനായ വിശുദ്ധന്‍റെ മരണത്തിരുനാൾ ഭക്തിസാന്ദ്രമായി. രാവിലെ 6.15 മുതൽ വൈകിട്ട് 6.30വരെ ദിവ്യബലി നൊവേന, ആരാധന എന്നിവ നടന്നു. തിരുനാൾ ദിവ്യബലിക്ക് ഫാ. പ്രിൻസ് പഴമ്പിള്ളി ഒഎസ്ജെ മുഖ്യകാർമികനായി. വിശുദ്ധ അന്തോണീസിന്‍റെ തിരുശേഷിപ്പുകളായ അഴുകാത്ത നാവ്, കൈയുടെ അസ്ഥി, സാഭാവസ്ത്രത്തിന്‍റെ ഒരു ഭാഗം എന്നിവ സുക്ഷിച്ചിരിക്കുന്ന ഇന്ത്യയിലെ ഏക തീർത്ഥാടന കേന്ദ്രമായതിനാൽ വിശുദ്ധന്‍റെ മരണത്തിരുനാളിൽ പങ്കെടുക്കുന്നതിനും തിരുശേഷിപ്പുകൾ വണ ങ്ങുന്നതിനും അയൽസംസ്ഥാനങ്ങളിൽനിന്നുൾപ്പടെയുള്ള തീർഥാടകരുടെ വൻ തിരക്കാണ് അനുഭവപ്പെട്ടത്. റെക്ടർ റവ. ഡോ. ബെന്നി വാഴക്കൂട്ടത്തിൽ, ഫാ. അജയ് ആന്‍റണി പുത്തൻപറമ്പിൽഎന്നിവർ ആഘോഷങ്ങൾക്കു നേതൃത്വം നൽകി.

പെരുമാറ്റച്ചട്ടം ലംഘിച്ചെന്ന്; മുഖ്യമന്ത്രിക്കെതിരേ കോണ്‍ഗ്രസ് പരാതി നൽകി

തൃശൂർ: മുഖ്യമന്ത്രി പെരുമാറ്റച്ചട്ടം ലംഘിച്ചെന്നു പരാതിനൽകി കോണ്‍ഗ്രസ് നേതാവും കോർപറേഷൻ കൗണ്‍സിലറുമായ ജോണ്‍ ഡാനിയൽ. നിലന്പൂർ നിയോജകമണ്ഡലത്തിലെ ഉപതെരഞ്ഞെടുപ്പ് നടക്കാനിരിക്കെ, കേരള പോലീസിൽ കൂടുതൽ വനിതകൾക്കു ജോലിനൽകുമെന്നു മുഖ്യമന്ത്രി പിണറായി വിജയൻ നടത്തിയ പ്രഖ്യാപനം മാതൃകാ തെരഞ്ഞെടുപ്പുപെരുമാറ്റച്ചട്ടങ്ങളുടെ ലംഘനമാണെന്നാരോപിച്ചാണ് കെപിസിസി സെക്രട്ടറികൂടിയായ ജോണ്‍ ഡാനിയൽ കേന്ദ്ര തെരഞ്ഞെടുപ്പു കമ്മീഷനു പരാതി നൽകിയത്. തെരഞ്ഞെടുപ്പുവേളകളിൽ അധികാരസ്ഥാനത്തിരിക്കുന്നവർ വോട്ടർമാരെ സ്വാധീനിക്കാൻ സാധ്യതയുള്ള ആനുകൂല്യപ്രഖ്യാപനങ്ങളോ സൗജന്യങ്ങളോ സഹായപദ്ധതികളോ പ്രഖ്യാപിക്കുന്നതു ചട്ടലംഘനമാണെന്നു പരാതിയിൽ ചൂണ്ടിക്കാട്ടി. പെരുമാറ്റച്ചട്ടലംഘനത്തിനു മുഖ്യമന്ത്രിക്കെതിരേ അടിയന്തര നടപടി സ്വീകരിക്കണമെന്നും ഇ-മെയിലിൽ അയച്ച പരാതിയിൽ ആവശ്യപ്പെട്ടു. തിങ്കളാഴ്ച തൃശൂർ രാമവർമപുരം പോലീസ് അക്കാദമിയിൽ പരിശീലനം പൂർത്തിയാക്കിയ വനിതാ സിവിൽ പോലീസ് ഓഫീസർമാരുടെ പാസിംഗ്ഔട്ട് പരേഡിൽ സല്യൂട്ട് സ്വീകരിച്ചു നടത്തിയ പ്രസംഗം ചൂണ്ടിക്കാട്ടിയാണു പരാതി.

എക്‌സൈസ് സ്റ്റാഫ് അസോ. ജില്ലാ സമ്മേളനം

തൃശൂർ: കേരള സ്റ്റേറ്റ് എക്‌സൈസ് സ്റ്റാഫ് അസോസിയേഷന്‍ ജില്ലാ സമ്മേളനം മുരളി പെരുനെല്ലി എംഎൽഎ ഉദ്ഘാടനം ചെയ്തു. ജില്ലാ പ്രസിഡന്‍റ് ഒ.ജെ. രാജീവ് അധ്യക്ഷത വഹിച്ചു. ജില്ലാ സെക്രട്ടറി എൻ.എൻ. ജയേഷ്, തൃശൂര്‍ ഡെപ്യൂട്ടി എക്‌സൈസ് കമ്മീഷണര്‍ വി. സുഭാഷ്, സംഘടന സംസ്ഥാന പ്രസിഡന്‍റ് ടി. സജുകുമാര്‍, സംസ്ഥാന ജനറല്‍ സെക്രട്ടറി കെ. സന്തോഷ്‌കുമാര്‍, ടി.ബി. ഉഷ തുടങ്ങിയവർ പ്രസംഗിച്ചു. ഒ.ജെ. രാജീവിനെ പ്രസിഡന്‍റായും എന്‍.എന്‍. ജയേഷിനെ സെക്രട്ടറിയായും എ. മണികണ്ഠനെ ട്രഷററായും സി. അജയ്കുമാര്‍, എം.ബി. വത്സരാജ്, പി.വി. ബെന്നി എന്നിവരെ സംസ്ഥാന കമ്മിറ്റി അംഗങ്ങളായും തെരഞ്ഞെടുത്തു.

കരുവന്നൂർ: മരിച്ച പൗലോസിന്‍റെ വീട് സുരേഷ് ഗോപി സന്ദര്‍ശിച്ചു

ഇരിങ്ങാലക്കുട: വിദഗ്ധചികിത്സയ്ക്കു കരുവന്നൂര്‍ സഹകരണബാങ്കില്‍നിന്നു നിക്ഷേപത്തുക ലഭിക്കാതെ മരിച്ച പൊറത്തിശേരി കോട്ടയ്ക്കകത്തുകാരന്‍ പൗലോസിന്‍റെ വീട് കേന്ദ്രമന്ത്രി സുരേഷ് ഗോപി സന്ദര്‍ശിച്ചു. പൗലോസിന്‍റെ ഭാര്യയോടും സഹോദരങ്ങളോടും വിവരങ്ങള്‍ ചോദിച്ചറിഞ്ഞ്, ആശ്വസിപ്പിച്ച് മന്ത്രി മടങ്ങി. ജില്ലാ പ്രസിഡന്‍റ് എ.ആര്‍. ശ്രീകുമാര്‍, ജനറല്‍ സെക്രട്ടറിമാരായ കൃപേഷ് ചെമ്മണ്ട, കെ.പി. ഉണ്ണികൃഷ്ണന്‍, കെ.പി. ജോര്‍ജ്, മണ്ഡലം പ്രസിഡന്‍റ് ആര്‍ച്ച അനീഷ്, മണ്ഡലം ജനറല്‍ സെക്രട്ടറിമാരായ ഷൈജു കുറ്റിക്കാട്ട്, വി.സി. രമേഷ്, സന്തോഷ് ചെറാക്കുളം, പി.എസ്. അനില്‍കുമാര്‍, എ. നാഗേഷ്, ശ്യാംജി മാടത്തിങ്കല്‍, രിമ പ്രകാശ്, അജീഷ് പൈക്കാട്ട്, രമേഷ് അയ്യര്‍, ടി.കെ. ഷാജു, സൂരജ് കടുങ്ങാടന്‍, സൂരജ് നമ്പ്യാങ്കാവ്, അഖിലാഷ് വിശ്വനാഥന്‍ എന്നിവരും ഉണ്ടായിരുന്നു.

തൊമ്മാന പാടത്തേക്കു ട്രാവലര്‍ മറിഞ്ഞ് മൂന്നുപേര്‍ക്കു പരിക്കേറ്റു

ഇരിങ്ങാലക്കുട: നിയന്ത്രണംവിട്ട ടെന്പോ ട്രാവലര്‍ പുല്ലൂർ തൊമ്മാനപാടത്തേക്ക് മറിഞ്ഞ് യാത്രക്കാരായ മൂന്നുപേര്‍ക്ക് പരിക്കേറ്റു. ഇന്നലെ രാവിലെ 7.45 ഓടെയായിരുന്നു അപകടം. ആരുടെയും പരിക്കുകള്‍ ഗുരുതരമല്ല. വലപ്പാട് കേന്ദ്രീകരിച്ച് പ്രവര്‍ത്തിക്കുന്ന മണപ്പുറം ഫിനാന്‍സ് സ്ഥാപനത്തിലേക്ക് ആമ്പല്ലൂര്‍, കൊടകര സ്വദേശികളായ യാത്രക്കാരുമായി പോവുകയായിരുന്ന വണ്ടിയാണ് അപകടത്തില്‍ പെട്ടത്. എതിരെനിന്ന് അമിത വേഗതയില്‍ വന്നിരുന്ന ലോറിക്ക് സൈഡ് കൊടുക്കുന്നതിനിടയില്‍ നിയന്ത്രണം വിട്ട് കൈവരിയില്‍ ഇടിച്ച് വണ്ടി മറിയുകയായിരുന്നുവെന്ന് ജീവനക്കാര്‍ പറഞ്ഞു. ലോറി നിറുത്താതെ ഓടിച്ചുപോയി. പതിനെട്ടു പേരാണ് വണ്ടിയില്‍ ഉണ്ടായിരുന്നത്. ഉടനെ സ്ഥലത്ത് എത്തിയ ക്രെയിന്‍ ഉപയോഗിച്ച് ഒന്പതോടെ വണ്ടി പാടത്തുനിന്ന് എടുത്തുമാറ്റുകയായിരുന്നു.

മഴ; ജില്ലയിൽ 26 വീടുകൾ തകർന്നു

തൃശൂർ: ജില്ലയിൽ ശക്തമായി തുടരുന്ന മഴയിൽ 23 വീടുകൾ ഭാഗികമായും മൂന്നു വീടുകൾ പൂർണമായും തകർന്നു. തലപ്പിള്ളി താലൂക്കിൽ നാലും മുകുന്ദപുരത്ത് രണ്ടും കുന്നംകുളത്ത് എട്ടും തൃശൂരിൽ നാലും കൊടുങ്ങല്ലൂരിൽ രണ്ടും ചാവക്കാട് മൂന്നും വീടുകളാണ് ഭാഗികമായി തകർന്നത്. തൃശൂർ താലൂക്കിൽ രണ്ടും തലപ്പിള്ളിയിൽ ഒരു വീടും പൂർണമായി തകർന്നിട്ടുണ്ട്. ചാലക്കുടി താലൂക്കിൽ ഒരു കിണർ ഇടിഞ്ഞുതാണു. ജില്ലയിലെ എല്ലാ താലൂക്ക് കേന്ദ്രപരിധിയിലും ശക്തമായ മഴ ലഭിച്ചു. നിലവിലുള്ള 16 ദുരിതാശ്വാസക്യാന്പുകളിൽ 116 കുടുംബങ്ങളാണുള്ളത്. 337 പേരാണ് ക്യാന്പുകളിൽ ആകെയുള്ളത്. ഇതിൽ 110 പുരുഷൻമാരും 146 സ്ത്രീകളുമുണ്ട്. 81 കുട്ടികളും.

പുത്തൻപള്ളിക്കു സമീപം കെട്ടിടം തകർന്നുവീണു

തൃശൂർ: പുത്തൻപള്ളിക്കു മുന്പിലുള്ള പഴയ കെട്ടിടം തകർന്നു. ദിവസങ്ങൾക്കുമുന്പ് പെരിഞ്ചേരി ടോണിയുടെ ഉടമസ്ഥതയിലുള്ള കെട്ടിടത്തിന്‍റെ ഉൾഭാഗം ഭാഗികമായി തകർന്നിരുന്നു. ആവശ്യത്തിനു മുൻകരുതലെടുക്കാതെ ഇതരസംസ്ഥാന തൊഴിലാളികളെ ഉപയോഗിച്ചു പൊളിച്ചുമാറ്റാൻ ആരംഭിച്ചതു സമീപത്തുള്ളവരെയും ആശങ്കയിലാഴ്ത്തി. കെട്ടിടം പൊളിഞ്ഞുവീണത് അറിയിച്ചതിനെത്തുടർന്നു സ്ഥലത്തെത്തിയ കൗണ്‍സിലർ ജോണ്‍ ഡാനിയലാണ് കോർപറേഷൻ സെക്രട്ടറിയെ വിവരമറിയിച്ചത്. ഇതിനുപിന്നാലെയാണ് രണ്ട് തൊഴിലാളികളെ അയച്ച് പൊളിക്കൽ ആരംഭിച്ചത്. വേണ്ടത്ര മുൻകരുതൽ എടുത്തുമാത്രമേ കെട്ടിടം പൊളിക്കാവൂ എന്നു സ്ഥലത്തെത്തിയ കോർപറേഷൻ അസിസ്റ്റന്‍റ് എൻജിനീയർ നിർദേശം നൽകി. നിരവധി വാഹനങ്ങളും കാൽനടയാത്രക്കാരും കെട്ടിടത്തിനുമുന്നിലൂടെ കടന്നുപോകുന്പോഴാണ് പൊളിക്കൽ തുടങ്ങിയത്. പൊളിക്കുന്നവരുടെയും ജീവൻ അപകടത്തിലാക്കുംവിധമാണ് പൊളിക്കൽ നടന്നതെന്നു ജോണ്‍ ഡാനിയൽ പറഞ്ഞു. കോർപറേഷന്‍റെ പട്ടികയിലുള്ള അപകടാവസ്ഥയിലുള്ള കെട്ടിടമാണ് തകർന്നതെന്നും അപകടങ്ങൾ ആവർത്തിക്കുന്പോഴും അധികൃതർ ഇടപെടാത്തതിൽ ജനങ്ങൾക്ക് ആശങ്കയുണ്ടെന്നും അദ്ദേഹം കൂട്ടിച്ചേർത്തു.

പ്രതിഷേധം അതിരുവിട്ട് "അടി’യന്തര കൗണ്‍സിൽ

തൃശൂർ: അജൻഡകൾ ചർച്ചചെയ്യാതെ മേയറുടെ അപ്രതീക്ഷിത ഇറങ്ങിപ്പോക്ക്. കോണ്‍ഗ്രസ് നടത്തിയ പ്രതിഷേധം അതിരുവിട്ടു. മേയറെ തടഞ്ഞ് കൗണ്‍സിലർമാർ. സംരക്ഷണം ഒരുക്കിയ പോലീസും കൗണ്‍സിലർമാരും തമ്മിൽ ഉന്തുംതള്ളും. സംഘർഷഭൂമിയായി കോർപറേഷൻ. മേയറുടെ ചേംബറിനു മുൻപിൽ കിടന്നു പ്രതിഷേധിച്ച് ബിജെപി കൗണ്‍സിലർമാർ. ഇന്നലെ ചേർന്ന അടിയന്തര കൗണ്‍സിൽ യോഗത്തിലാണ് നാടകീയരംഗങ്ങൾ അരങ്ങേറിയത്. അയ്യന്തോൾ ഷോപ്പിംഗ് കോംപ്ലക്സ് കെട്ടിടം പൊളിക്കുന്നതിനു മുന്നോടിയായി വാടകക്കാരെ മാറ്റുന്നതുമായി ബന്ധപ്പെട്ടുണ്ടായ ആദ്യചർച്ചകൾ പൂർത്തിയാകുംമുൻപേയാണ് മേയർ അപ്രതീക്ഷിതമായി ഇറങ്ങിപ്പോയത്. തുടർന്നു നടുത്തളത്തിൽ ഇറങ്ങി കോണ്‍ഗ്രസ് പ്രതിഷേധം ആരംഭിക്കുകയായിരുന്നു. വസ്തുനികുതിപിരിവിൽ തൃശൂർ കോർപറേഷന് അപാകത പറ്റിയെന്ന കോടതിവിധി ചർച്ചചെയ്യാതിരിക്കാനാണ് അജൻഡ എത്തുന്നതിനുമുന്നേ മേയർ കൗണ്‍സിൽ യോഗം പിരിച്ചുവിട്ടതെന്ന് ആരോപിച്ച് കോണ്‍ഗ്രസും ബിജെപി കൗണ്‍സിലർമാരും മേയറെ പിന്തുടർന്നു ചേംബറിനകത്തും പുറത്തും പ്രതിഷേധം തുടർന്നു. മേയറെ വളഞ്ഞു മുദ്രാവാക്യംവിളിയുമായി കോണ്‍ഗ്രസ് കൗണ്‍സിലർമാർ കുത്തിയിരുന്നു പ്രതിഷേധം നടത്തിയപ്പോൾ ചേംബറിനുപുറത്ത് നിലത്തുകിടന്നായിരുന്നു ബിജെപി പ്രതിഷേധം. കൗണ്‍സിലർമാരുടെ സമരത്തെ ആദ്യം ചിരിച്ചുതള്ളിയ മേയർക്ക് പിന്നീട് പുറത്തിറങ്ങാൻ കഴിയാതായതോടെ സംരക്ഷണത്തിനായി പോലീസ് സംഘവും സ്ഥലത്തു തന്പടിച്ചു. ഇതിനിടെ സമരം പൊളിക്കാൻ ചേംബറിനകത്തു ഭരണമുന്നണി കൗണ്‍സിലർമാർ പാട്ടുപാടിയും ചിരിച്ചും പ്രതിരോധം തീർത്തു. ഒരുമണിക്കൂറോളം നീണ്ട സമരത്തിനൊടുവിൽ പത്രസമ്മേളനത്തിനായി മേയർ പുറത്തിറങ്ങാൻ ശ്രമിക്കവേ കോണ്‍ഗ്രസ് കൗണ്‍സിലമാർ കൈകോർത്തും വട്ടമിട്ടും മേയറെ തടഞ്ഞതോടെ പ്രതിഷേധം അതിരുവിടുകയായിരുന്നു. പോലീസ് വലയം ഭേദിച്ച് മേയറെ തടയാൻ കൗണ്‍സിലർമാർ ശ്രമിച്ചതോടെ പോലീസും കൗണ്‍സിലർമാരും തമ്മിൽ കൈയാങ്കളിയിൽ എത്തി. ഇതിനിടെ മേയർ കൗണ്‍സിൽ ഹാളിലേക്ക് എത്തിയിരുന്നു. തുടർന്ന് മേയറുടെ രാജി ആവശ്യപ്പെട്ടും പോലീസിനു ഗോ ബാക്ക് വിളിച്ചും കൗണ്‍സിലർമാർ കോർപറേഷൻ ഓഫീസ് സമരഭൂമിയാക്കി. അജൻഡ ചർച്ചചെയ്താൽ ഇടതുഭരണസമിതിക്കുണ്ടായ വീഴ്ച പുറത്തുവരുമെന്നു മനസിലായ മേയർ കൗണ്‍സിൽ പിരിച്ചുവിടുകയായിരുന്നുവെന്നും മേയർ വച്ച അജൻഡ അവർക്കുതന്നെ തിരിച്ചടി യായെന്ന തിരിച്ചറിവിലാണ് മേയർ ഏകപക്ഷീയമായി കൗണ്‍സിൽ പിരിച്ചുവിട്ടു തടിതപ്പിയതെന്നും ജനങ്ങളിൽനിന്നും നികുതിയുടെ പേരിൽ വൻകൊള്ളയാണ് ഇടതുഭരണസമിതി നടത്തിയതെന്നും കോണ്‍ഗ്രസ്ആരോപിച്ചു. നികുതിയിലെ കടുംവെട്ട് ഹൈക്കോടതി തടഞ്ഞു: രാജൻ ജെ. പല്ലൻ കോർപറേഷനിലെ രണ്ടുലക്ഷത്തോളം വരുന്ന നികുതിദായകരിൽനിന്ന് ഈടാക്കിയ നികുതിപിരിവ് നിയമവിരുദ്ധമാണെന്നും കേസ് കൊടുത്ത 198 ആളുകളുടെയും 2016 മുതലുള്ള അധികനികുതി ഒഴിവാക്കിക്കൊണ്ടാണ് ഹൈക്കോടതി ഉത്തരവിട്ടതെന്നും പ്രതിപക്ഷ നേതാവ് രാജൻ ജെ. പല്ലൻ പറഞ്ഞു. കേസിൽ കൗണ്‍സിൽ അപ്പീൽ പോകാൻ തീരുമാനിക്കുന്നതിനുമുന്പ്, എൽഡിഎഫ് ഭരണസമിതി ജനങ്ങളുടെ പക്കൽനിന്നും അധികനികുതിയും പലിശയും പിരിക്കണമെന്ന് ആവശ്യപ്പെട്ടുകൊണ്ട് കൗണ്‍സിൽ അറിയാതെ അപ്പീൽ പോകുന്നത് അംഗീകരിക്കില്ല. ജനങ്ങൾക്ക് അനുകൂലമായ ഹൈക്കോടതി വിധിക്കെതിരേ അപ്പീൽ പോകരുത്. നികുതിദായകരിൽനിന്നും അധികം വാങ്ങിയ തുക തിരിച്ചുനൽകണമെന്നും കോടതിവിധിയിലൂടെ കോർപറേഷനുണ്ടാകുന്ന കോടിക്കണക്കിനു രൂപയുടെ നഷ്ടം ബന്ധപ്പെട്ട ഉദ്യോഗസ്ഥരിൽനിന്ന് ഈടാക്കണമെന്നും പ്രതിപക്ഷ നേതാവ് ആവശ്യപ്പെട്ടു. പ്രതിഷേധം അന്വേഷണം തടസപ്പെടുത്താൻ: മേയർ നികുതിപിരിവുമായി ബന്ധപ്പെട്ട്, മുൻമേയർമാരായ ഐ.പി. പോൾ, രാജൻ ജെ. പല്ലൻ എന്നിവരുടെ കാലത്ത് ടാക്സേഷൻ നടപടി പൂർത്തീകരിക്കാത്തതും കൗണ്‍സിൽ തീരുമാനപ്രകാരം അന്തിമവിജ്ഞാപനം പത്രപ്പരസ്യം ചെയ്തിട്ടില്ലാത്തതുമാണെന്നു മേയർ എം.കെ. വർഗീസ്. ഇതിന്‍റെ ഭാഗമായി 198 പേരിൽനിന്നു നികുതി പിരിക്കാൻ പാടില്ല എന്ന് ഹൈക്കോടതി ഉത്തരവായിട്ടുണ്ട്. ഈ ഉത്തരവുപ്രകാരം കോടികളുടെ നഷ്ടം കോർപറേഷനു വരുമെന്നാണ് കണക്കാക്കുന്നത്. ഇതിന്‍റെ യഥാർഥ ഉത്തരവാദികളെ കണ്ടുപിടിക്കണമെന്നു മേയർ എന്ന നിലയിൽ താൻ പ്രത്യേക കുറിപ്പ് തയാറാക്കിനൽകിയിരുന്നു. ഇതിനെതുടർന്ന് അന്വേഷണം തടസപ്പെടുത്തുക എന്നതാണ് കൗൺസിൽ അലങ്കോലപ്പെടുത്തലിന്‍റെ അജൻഡയെന്നും മേയർ പത്രസമ്മേളനത്തിൽ ആരോപിച്ചു. നിയമപരമായ നടപടികൾപ്രകാരം കുറ്റവാളികളെ കണ്ടുപിടിച്ച് കോർപറേഷനു വരുന്ന നഷ്ടം ഉത്തരവാദികളിൽ നിന്നുതന്നെ ഈടാക്കുന്നതാണ്. ഇതു ജനങ്ങൾ തിരിച്ചറിയാതിരിക്കാനാണ് കൗണ്‍സിലിൽ കോണ്‍ഗ്രസ് കപടനാടകം നടത്തിയതെന്നും അദ്ദേഹം പറഞ്ഞു.

ഗ്യാസ് സിലിണ്ടര്‍ ചോര്‍ന്ന് പൊള്ളലേറ്റ വയോധികന്‍ മരിച്ചു

പുതുക്കാട്: കണ്ണംമ്പത്തൂരില്‍ വീട്ടിലെ ഗ്യാസ് സിലിണ്ടറിലെ ചോര്‍ച്ച പരിശോധിക്കുന്നതിനിടെയുണ്ടായ തീപിടിത്തത്തില്‍ പൊള്ളലേറ്റ് ചികിത്സയിലായിരുന്ന വട്ടണാത്ര സ്വദേശി മരിച്ചു. കൈനാത്തൂടന്‍ വീട്ടില്‍ അശോകൻ (62) ആണ് മരിച്ചത്. ഗ്യാസ് സിലിണ്ടര്‍ സര്‍വീസ് ചെയ്യാനെത്തിയ അശോകന്‍ അടുക്കളയില്‍ സിലിണ്ടര്‍ പരിശോധിക്കുന്നതിനിടെയായിരുന്നു അപകടം. മേയ് 30ന് കണ്ണമ്പത്തൂര്‍ പൊന്നാമ്പിടി ബിന്ദുവിന്‍റെ വീട്ടിലായിരുന്നു സംഭവം. അപകടത്തില്‍ ഗുരുതരമായി പൊള്ളലേറ്റ ബിന്ദു ചികിത്സയിലാണ്. എറണാകുളത്തെ സ്വകാര്യ ആശുപത്രിയില്‍ ചികിത്സയിലിരിക്കെയാണ് മരിച്ചത്.

വനത്തിനുള്ളില്‍ അഴുകിയനിലയില്‍ മൃതദേഹം കണ്ടെത്തി

കോടാലി: താളൂപ്പാടം മുപ്ലിവനത്തില്‍ പുരുഷന്‍റെ മൃതദേഹം അഴുകിയനിലയില്‍ കണ്ടെത്തി. മുരിക്കുങ്ങല്‍ മുപ്ലി റോഡിലെ ഫോറസ്റ്റ് സ്‌റ്റേഷന് ഒരു കിലോമീറ്ററോളം അകലെ വനത്തിനുള്ളിലെ നീര്‍ച്ചോലയിലാണ് മൃതദേഹം കണ്ടെത്തിയത്. മുപ്ലിയിലുള്ള പിതൃഭവന്‍ ഓള്‍ഡ് ഏജ് ഹോമില്‍നിന്ന് ഒരുമാസംമുമ്പ് കാണാതായ വയോധികന്‍റേതാണ് മൃതദേഹമെന്നു സംശയിക്കുന്നു. ഇയാളുടേതെന്നു കരുതുന്ന ഷര്‍ട്ടും ബെല്‍റ്റും മുതദേഹത്തിനരികില്‍നിന്നു കണ്ടെടുത്തിട്ടുണ്ട്. വനവിഭവങ്ങള്‍ ശേഖരിക്കുന്നതിനിടെ ആദിവാസികളാണ് മൃതദേഹം കണ്ട് വിവരം വനപാലകരെ അറിയിച്ചത്. ഇന്‍സ്‌പെക്ടര്‍ കെ. കൃഷ്ണന്‍റെ നേതൃത്വത്തില്‍ വെള്ളിക്കുളങ്ങര പോലീസും വനപാലകരും ഫോറന്‍സിക്, ഫിംഗര്‍പ്രിന്‍റ് വിദഗ്ധരും സ്ഥലത്തെത്തി മേല്‍നടപടി സ്വീകരിച്ചശേഷം മൃതദേഹം പോസ്റ്റുമോര്‍ട്ടത്തിനായി തൃശൂര്‍ മെഡിക്കല്‍ കോളജ് ആശുപത്രിയിലേക്കു കൊണ്ടുപോയി.

കക്ക വാരുന്നതിനിടെ പുഴയിൽ മുങ്ങിമരിച്ചു

കൊടുങ്ങല്ലൂർ: പുഴയിൽ കക്ക വാരാൻ ഇറങ്ങിയ തൊഴിലാളി മുങ്ങിമരിച്ചു. ആനാപ്പുഴ പാലിയംതുരുത്ത് കോഴിപ്പറമ്പിൽ ഗോപാലൻ മകൻ ബോസ്(65)ആണ് മരിച്ചത്. തിങ്കളാഴ്ച വൈകീട്ട് ആനാപ്പുഴ കനാൽ ഓഫീസിനു മുമ്പിലുള്ള പുഴയിലാണ് കക്കവാരാൻ ഇറങ്ങിയത്. കനത്ത മഴയെത്തുടർന്ന് പുഴയിൽ വെള്ളവും ഒഴുക്കും കൂടുതലായിരുന്നു. ഇതിനിടയിൽ ഒഴുക്കിൽപ്പെട്ട് കാണാതാവുകയായിരുന്നു. കൊടുങ്ങല്ലൂർ ഫയർഫോഴ്സും നാട്ടുകാരും ചേർന്ന് തെരച്ചിൽ നടത്തിയെങ്കിലും കണ്ടുകിട്ടിയില്ല. ഇന്നലെ ഉച്ചയോടെയാണ് മൃതദേഹം കണ്ടെത്തിയത്. പോലീസ് നടപടികൾക്കുശേഷം താലൂക്ക് ആശുപത്രിയിൽ പോസ്റ്റ്മോർട്ടം നടത്തി. സംസ്കാരം നടത്തി. ഭാര്യ: സജിത. മക്കൾ: ബിനോയ്, ബിനിൽ

അനുമോദനവും ആദരിക്കലും

എരുമപ്പെട്ടി: കോൺഗ്രസ് എരുമപ്പെട്ടി മണ്ഡലം ഒന്നാംവാർഡ് മഹാത്മാഗാന്ധി കൂട്ടായ്മയുടെ നേതൃത്വത്തിൽ വിവിധ മേഖലകളിൽ കഴിവ് തെളിയിച്ചവരെ ആദരിച്ചു. എസ്എസ്എൽസി, പ്ലസ് ടു വിജിയികളെ അനുമോദിച്ചു. ഡിസിസി സെക്രട്ടറി ഷാഹിദ റഹ്മാൻ ഉദ്ഘാടനംചെയ്തു. ബ്ലോക്ക് സെക്രട്ടറി കെ. ഗോവിന്ദൻകുട്ടി അധ്യക്ഷനായി. ദീപിക പ്രാദേശികലേഖിക എരുമപ്പെട്ടി പ്രസ്ക്ലബ് സെക്രട്ടറിയുമായ കെ.ആർ. രാധിക ഉൾപ്പടെയുള്ളവരെയാണ് ചടങ്ങിൽ ആദരിച്ചത്. യുഡിഎഫ് നിയോജകമണ്ഡലം കൺവീനർ അമ്പലപ്പാട്ട് മണികണ്ഠൻ മുഖ്യാതിഥിയായി. കോൺഗ്രസ് മണ്ഡലം പ്രസിഡന്‍റ് എം.എം. നിഷാദ്, ബ്ലോക്ക് വൈസ് പ്രസിഡന്‍റ് എൻ.കെ. കബീർ, മുൻ പഞ്ചായത്ത് പ്രസിഡന്‍റ് മീന ശലമോൻ, മഹിളാ കോൺഗ്രസ് നേതാക്കളായ സെഫീന അസീസ്, വിനോദിനി, പാലയ്ക്കൽ പഞ്ചായത്ത് മെമ്പർ റീന വർഗീസ്, കോൺഗ്രസ് വാർഡ് പ്രസിഡന്‍റ് പി.എസ്. ബാലകൃഷ്ണൻ എന്നിവർ സംസാരിച്ചു. നൂറ് വിദ്യാർഥികൾക്ക് നോട്ടുപുസ്തകങ്ങൾ വിതരണംചെയ്തു.

ബേക്കറിയില്‍നിന്ന് വാങ്ങിയ പരിപ്പുവടയില്‍ തേരട്ട

പുതുക്കാട്: സെന്‍ററിലെ ബേക്കറിയില്‍നിന്ന് വാങ്ങിയ പരിപ്പുവടയില്‍ തേരട്ട. ആരോഗ്യവകുപ്പും പഞ്ചായത്ത് അധികൃതരുംചേര്‍ന്ന് ബേക്കറി അടപ്പിച്ചു. പുതുക്കാട് സിഗ്നല്‍ ജംഗ്ഷനുസമീപം പ്രവര്‍ത്തിക്കുന്ന ഈറ്റ്‌സ് ആന്‌ഡ് ട്രീറ്റ്‌സ് എന്ന ബേക്കറിയില്‍നിന്ന് വാങ്ങിയ പരിപ്പുവടയിലാണ് ചത്തനിലയില്‍ തേരട്ടയെ കണ്ടെത്തിയത്. പുതുക്കാട് കേരള ബാങ്കിലെ ജീവനക്കാര്‍ തിങ്കളാഴ്ച രാവിലെ വാങ്ങിയ പരിപ്പുവടയില്‍നിന്നാണ് തേരട്ടയെ കിട്ടിയത്. ഉടന്‍തന്നെ ബാങ്ക് ജീവനക്കാര്‍ ആരോഗ്യവിഭാഗത്തെ വിവരമറിയിക്കുകയായിരുന്നു. പുതുക്കാട് ഹെല്‍ത്ത് ഇന്‍സ്‌പെക്ടര്‍ ആര്‍. രാജേഷിന്‍റെ നേതൃത്വത്തില്‌ ഉദ്യോഗസ്ഥര്‍ സ്ഥലത്തെത്തി പരിശോധനനടത്തിയശേഷം ബേക്കറി അടച്ചുപൂട്ടാന്‍ നിര്‍ദേശിക്കുകയായിരുന്നു. പഞ്ചായത്തിന്‍റെ ലൈസന്‍സ് ഇല്ലാതെയാണ് സ്ഥാപനം പ്രവര്‍ത്തിക്കുന്നതെന്ന് ഉദ്യോഗസ്ഥര്‍ പറഞ്ഞു. നാലുപേര്‍ ജോലിചെയ്യുന്ന സ്ഥാപനത്തില്‍ ഒരാള്‍ക്കുമാത്രമാണ് ഹെൽത്ത് കാര്‍ഡ് ഉള്ളതെന്നും രാത്രിയും പകലും പ്രവര്‍ത്തിക്കുന്ന കടയില്‍ വൃത്തിഹീനമായ രീതിയിലാണ് ഭക്ഷണം പാകംചെയ്യുന്നതെന്നും അധികൃതര്‍ പറഞ്ഞു. ജൂണിയര്‍ ഹെല്‍ത്ത് ഇന്‍സ്പെക്ടര്‍മാരായ അബ്ദുല്‍ റസാഖ്, നിമ്മി, പഞ്ചായത്തുതല ഹെല്‍ത്ത് ഇന്‍സ്പെക്ടര്‍ കെ.ജി. ഗീതു പ്രിയ എന്നിവരും പരിശോധനയില്‍ പങ്കെടുത്തു.

കാട്ടാന ആക്രമണം

പാലപ്പിള്ളി: നടാംപാടത്ത് വീടിനനേരെ കാട്ടാന ആക്രമണം. നടാംപാടം ചെമ്പലംങ്ങാട് പാലാപറമ്പില്‍ ആസിയയുടെ വീടിനുനേരെയാണ് കാട്ടാന ആക്രമണം. വീടിനുമുകളിലേക്ക് കവുങ്ങ് കുത്തിമറിച്ചിട്ട ആന പറമ്പിലെ കാര്‍ഷിക വിളകളും നശിപ്പിച്ചു. ഞായറാഴ്ച രാത്രിയിലാണ് സംഭവം. ആന വീട്ടുമുറ്റത്ത് എത്തിയതറിഞ്ഞ വീട്ടുകാര്‍ മണിക്കൂറുകളോളം ഭീതിപരത്തി. പിന്നീട് വനപാലകര്‍ എത്തിയാണ് ആനയെ കാടുകയറ്റിയത്. വനാതിര്‍ത്തിയിലെ സൗരോര്‍ജവേലി തകര്‍ത്താണ് കാട്ടാനകള്‍ ജനവാസ മേഖലയില്‍ എത്തുന്നത്. പ്രദേശത്തെ കാട്ടാനശല്യം ഒഴിവാക്കാന്‍ അധികൃതര്‍ ഇടപെടണമെന്നാണ് നാട്ടുകാരുടെ ആവശ്യം.

ദേശീയപാതയിലെ ഗതാഗതക്കുരുക്ക്

പട്ടിക്കാട്: ദേശീയപാതയിൽ മണിക്കൂറുകളോളംനീളുന്ന രൂക്ഷമായ ഗതാഗതക്കുരുക്ക് പതിവായതിനെതുടർന്ന് മന്ത്രി കെ. രാജന്‍റെ നേതൃത്വത്തിലുള്ള ഉന്നതതലസംഘം മുടിക്കോടിലും കല്ലിടുക്കിലും സന്ദർശനംനടത്തി സാഹചര്യങ്ങൾ വിലയിരുത്തി. അടിപ്പാതകളുടെ നിർമാണത്തിനായി ഗതാഗതം വഴിതിരിച്ചുവിട്ട സർവീസ് റോഡുകൾ പൂർണമായും തകർന്നതിനെതുടർന്നാണ് ആറുവരിപ്പാതയിൽ മണിക്കൂറോളംനീളുന്ന ഗതാഗതക്കുരുക്കുകൾ നിത്യസംഭവമായത്. ദേശീയപാതയിലൂടെയുള്ള ഗതാഗതവും ചരക്കുനീക്കവും സ്തംഭിക്കുന്ന സ്ഥിതിയിലേക്കു കാര്യങ്ങളെത്തി. മഴ കനത്തതോടെ അടിപ്പാതയുടെ നിർമാണപ്രവർത്തനങ്ങളും സ്തംഭിച്ചു. സർവീസ് റോഡിൽ അറ്റകുറ്റപ്പണികൾ നടത്തുന്നതുപോലും അസാധ്യമായി. അടിപ്പാതകളുടെ പണികൾ തുടങ്ങുന്നതിനുമുമ്പായി സർവീസ് റോഡുകൾ ബലപ്പെടുത്തി ഗതാഗതയോഗ്യമാക്കാതിരുന്നതാണ് ദേശീയപാതയിലെ സ്ഥിതി ഇത്രയും രൂക്ഷമാക്കിയത്. അതുകൊണ്ട് ഗതാഗതക്കുരുക്ക് ഒഴിവാക്കാൻവേണ്ട നടപടികൾ എത്രയുംവേഗം സ്വീകരിക്കണമെന്ന് മന്ത്രി അധികൃതർക്കു നിർദേശം നൽകി. ജില്ലാ കളക്ടർ അർജുൻ പാണ്ഡ്യൻ, സിറ്റി പോലീസ് കമ്മീഷണർ ആർ. ഇളങ്കോ, തഹസിൽദാർ ടി. ജയശ്രീ, മോട്ടോർ വാഹനവകുപ്പ് ഉദ്യോഗസ്ഥർ, പീച്ചി സ്റ്റേഷൻ ഹൗസ് ഓഫീസർ കെ. സതീഷ്‌കുമാർ, ദേശീയപാത അധികൃതർ തുടങ്ങിയവർ ഒപ്പമുണ്ടായിരുന്നു.

മഴ, കാറ്റ് തുടരുന്നു... വെള്ളക്കെട്ട്, മരംവീഴ്ച പരക്കുന്നു

മഴ കുറഞ്ഞു: കടൽക്ഷോഭം കൂടി ചാവക്കാട്: മഴ കുറഞ്ഞുവെങ്കിലും വെള്ളം ഇറങ്ങിയില്ല. കടലാക്രമണം രൂക്ഷമായി. കടപ്പുറം പഞ്ചായത്തിന്‍റെ തീരമേഖലയായ വെളിച്ചെണ്ണപ്പടി, മാളു കുട്ടിവളവ്, മുനയ്ക്കക്കടവ്, അഴിമുഖം തുടങ്ങിയ തീരങ്ങളിൽ കടല്‌ക്ഷോഭം രൂക്ഷമാണ്. ഇവിടെ 20 വീടുകളിലേക്ക് തിരമാലകയറി. അഞ്ചുവീട്ടുകാർ ബന്ധുവീടുകളിലേക്ക് താമസംമാറി. അഞ്ചങ്ങാടിവളവിൽ കടൽ റോഡുവരെയെത്തി. വളരെ ഉയരത്തിലാണ് തിരമാല കരയിൽ പതിക്കുന്നത്. രാവിലെ 11 മണിയോടെ ആരംഭിച്ച കടലേറ്റം ഉച്ചകഴിഞ്ഞ് മൂന്നുകഴിഞ്ഞപ്പോൾ അൽപം ശാന്തമായെങ്കിലും ക്ഷോഭത്തിലാണ്. കടൽ കരയ്ക്കു കയറിയപ്പോൾ റോഡിന്‍റെ കിഴക്കുഭാഗത്തെ വീട്ടുകാരുടെ ദുരിതംവർധിച്ചു. മഴ പെയ്ത് കെട്ടിനിൽക്കുന്ന വെള്ളത്തിലേക്ക് കടൽവെള്ളംകൂടി എത്തി. പുന്ന, തെക്കഞ്ചേരി, വഞ്ചിക്കടവ് തുടങ്ങി കനോലി കനാലിന്‍റെ തീരങ്ങളിലുളള പ്രദേശങ്ങളിലെ വെള്ളം ഒഴുകിപോകാത്തതിനെത്തുടർന്ന് ഇവിടങ്ങളിലെ നൂറോളം വീടുകൾ ഇപ്പോഴും വെള്ളത്തിലാണ്. തെക്കഞ്ചേരിയിലെ പത്ത് വീട്ടുകാർ ബന്ധുവീടുകളിലേക്കുമാറി. വഞ്ചിക്കടവിലെ മൂന്നുവീടുകളിൽനിന്ന് 19 പേരെ അഞ്ചങ്ങാടിയിലെ സർക്കാർ ഷെൽട്ടറിലേക്ക് നഗരസഭ മാറ്റി. ദേശീയപാത 66ന്‍റെ നിർമാണത്തിന്‍റെ ഭാഗമായി വില്യംസിൽ പാലം പണിയുന്നതിനായി കനോലി കനാൽ ഭാഗികമായി നികത്തിയതാണ് വെളളക്കെട്ടിന് കാരണമെന്ന് ബന്ധുവീട്ടിലേക്ക് താമസംമാറിയ തെക്കഞ്ചേരിയിലെ കമാലുദ്ദീൻ പറയുന്നു. ‌അറബിക്കടലിലെ ജലനിരപ്പ് വളരെ ഉയർന്നതിനെ തുടർന്ന് പുഴ വഴി എത്തുന്ന വെള്ളത്തെ കടൽ ഉൾക്കൊളളാത്തതും വെള്ളക്കെട്ടിനും കടൽക്ഷോഭത്തിനും കാരണമാകുന്നുണ്ടെന്ന് പൗരസമതി പ്രസിഡന്‍റ് ഷറഫുദ്ദീൻ മുനയ്ക്കക്കടവ് അഭിപ്രായപ്പെട്ടു. മരവും തെങ്ങും വീണ് ട്രാൻസ്‌ഫോമർ നിലംപതിച്ചു പുന്നയൂർക്കുളം: ശക്തമായ കാറ്റിലും മഴയിലും തേക്കുമരവും തെങ്ങും ഒന്നിച്ച് വീണ് ട്രാൻസ്ഫോമർ നിലംപതിച്ചു. പരൂർ ക്ഷേത്രത്തിന്‍റെ തെക്കുഭാഗം റോഡരികിൽ സ്ഥാപിച്ചിരുന്ന ട്രാൻസ്ഫോമറാണ് തകർന്നത്. വൈദ്യുതി കാലുകളും കമ്പികളും പൊട്ടിവീണെങ്കിലും പുലർച്ചെ ആൾസഞ്ചാരം കുറഞ്ഞ സമയമായതിനാൽ അപകടം ഒഴിവായി. വൈദ്യുതി നിലയ്ക്കുകയുംചെയ്തു. സ്വകാര്യ വ്യക്തിയുടെ പറമ്പിലെ വലിയ തേക്കുമരം കടപുഴകി തൊട്ടടുത്തുള്ള തെങ്ങിലേക്ക് പതിക്കുകയും തെങ്ങു പൊട്ടി രണ്ടും കൂടി ട്രാൻസ്ഫോര്‌മർ സ്ഥാപിച്ചിരുന്ന പോസ്റ്റിൽ വീണാണ് അപകടം. ട്രാൻസ്‌ഫോര്‌മര്‌ ചെരിഞ്ഞു കമ്പികൾ പൊട്ടിച്ചിതറി.മരങ്ങൾ റോഡിലേക്ക് വീണതിനാൽ കാൽനടയാത്രയും വാഹന ഗതാഗതവും തടസപ്പെട്ടു. മരങ്ങൾ വെട്ടിമാറ്റി ഗതാഗതം പുനഃരാരംഭിച്ചെങ്കിലും രാത്രി വൈകിയും വൈദ്യുതിവിതരണം പുനഃസ്ഥാപിച്ചില്ല. മഴ മാറിനിന്നതിനാൽ രാത്രിയും അറ്റകുറ്റപ്പണികൾ നടത്തി. പുന്നയൂർക്കുളം മന്ദലംകുന്നിൽ 15 വീടുകൾ വെള്ളക്കെട്ടിലാണ്. ദേശീയപാതയുടെ നിർമാണമാണ് ഇതിനുകാരണം. പരിഹാരം കാണാൻ നാളെ ഉച്ചകഴിഞ്ഞു 3.30ന് ചാവക്കാട് ടിബിയിൽ കളക്ടറുടെ സാന്നിധ്യത്തിൽ ചർച്ച നടത്തുമെന്ന് എൻ.കെ. അക്ബർ എംഎൽഎ അറിയിച്ചു. കാറ്റിലും മഴയിലും ഭീമൻമരം വീണു വടക്കാഞ്ചേരി: കഴിഞ്ഞദിവസം രാത്രിയിലുണ്ടായ ശക്തമായ കാറ്റിലും മഴയിലും ഭീമൻ മരം കടപുഴകിവീണ് ഗതാഗതം സ്തംഭിച്ചു. കുമ്പളങ്ങാട് - പാർളിക്കാട് വ്യാസ കോളജ് റോഡിലാണ് മരംവീണത്. മരം റോഡിനുകുറുകെ വീണതിനാൽ ഏറെനേരം ഗതാഗതവും തടസപ്പെട്ടു. വിവരമറിയിച്ചതിനെ തുടർന്ന് വടക്കാഞ്ചേരിയിൽ നിന്നെത്തിയ ഫയർഫോഴ്സും നാട്ടുകാരുംചേർന്ന് ഏറെനേരം പാടുപെട്ടാണ് മരം മുറിച്ചുമാറ്റിയത്. പ്രദേശത്തെ വെെദ്യുതി ബന്ധവും താറുമാറായി. വൈദ്യുതലൈനിലേക്ക് മരംവീണു; ആമ്പല്ലൂര്‍ ടൗണില്‍ വൈദ്യുതി നിലച്ചത് 20 മണിക്കൂര്‍ ആമ്പല്ലൂര്‍: ശക്തമായ മഴയിലും കാറ്റിലും വൈദ്യുതലൈനിലേക്ക് മരംവീണു. ആമ്പല്ലൂര്‍ ടൗണില്‍ വൈദ്യുതിയില്ലാതെ 20 മണിക്കൂര്‍ പിന്നിട്ടു. മണലിക്ക് സമീപം ഞായറാഴ്ച വൈകിട്ടാണ് മരംവീണത്. ഇതോടെ സമീപപ്രദേശങ്ങളില്‍ വൈദ്യുതതടസം നേരിട്ടു. നിരവധി വ്യാപാരസ്ഥാപനങ്ങളുടെ പ്രവര്‍ത്തനം തന്നെ നിലച്ച മട്ടിലാണ്. ചില സ്ഥാപനങ്ങള്‍ ജനറേറ്റര്‍ ഉപയോഗിച്ച് പ്രവര്‍ത്തിക്കുന്നുണ്ട്. ഇന്നലെ രാവിലെ പുതുക്കാട് കെഎസ്ഇബി അധികൃതരെത്തി ഏറെ പണിപ്പെട്ടാണ് മരം മുറിച്ചുനീക്കിയത്. കെഎസ്ഇബി ഉദ്യോഗസ്ഥരുടെ നേതൃത്വത്തില്‍ വൈദ്യുതി പുനഃസ്ഥാപിക്കുന്ന ജോലികളും പുരോഗമിക്കുന്നുണ്ട്.

സഹൃദയ കോളജില്‍ "ദീക്ഷാരംഭ് 2025'

കൊടകര: സഹൃദയ കോളജ് ഓഫ് അഡ്വാന്‍സ്ഡ് സ്റ്റഡീസിലെ ഒന്നാംവര്‍ഷ ബിരുദവിദ്യാര്‍ഥികള്‍ക്കായി ദീക്ഷാരംഭ് - 2025 സംഘടിപ്പിച്ചു. സഹൃദയ ഗ്രൂപ്പ് ഓഫ് ഇന്‍സ്റ്റിറ്റ്യൂഷന്‍സ് മാനേജരും ഇരിങ്ങാലക്കുട രൂപത വികാരി ജനറാളുമായ മോണ്‍. വില്‍സണ്‍ ഈരത്തറ ഉദ്ഘാടനം ചെയ്തു. എക്‌സിക്യൂട്ടീവ് ഡയറക്ടര്‍ റവ.ഡോ. ഡേവിസ് ചെങ്ങിനിയാടന്‍ അധ്യക്ഷത വഹിച്ചു. കേരളത്തിലെ വിദ്യാര്‍ഥികളുടെ സമ്പൂര്‍ണസുരക്ഷിതത്വം ഉറപ്പാക്കുന്നതിനായി കേരളസര്‍ക്കാര്‍ രൂപവത്കരിച്ച കോളജ് പ്രൊട്ടക്‌ഷന്‍ ഫോറം പ്രതിനിധി കൊടകര പോലീസ് സ്റ്റേഷനിലെ എഎസ്‌ഐ ആഷ്‌ലി ജോണ്‍ റാഗിംഗ് വിരുദ്ധ, ലഹരിവിരുദ്ധ കാമ്പസുകളുണ്ടാക്കുന്നതിന് വിദ്യാര്‍ഥികളും രക്ഷിതാക്കളും ശ്രദ്ധിക്കേണ്ടതെന്തെല്ലാം എന്ന വിഷയത്തിലും മോട്ടിവേഷണല്‍ സ്പീക്കര്‍ പ്രവീണ്‍ ചിറയത്ത് നെക്സ്റ്റ് ജനറേഷന്‍ പ്രൊഫഷണല്‍സ് എന്ന വിഷയത്തിലും ക്ലാസെടുത്തു. കോളജ് മാനുവലിന്‍റെ പ്രകാശനം മോണ്‍. വില്‍സന്‍ ഈരത്തറ നിര്‍വഹിച്ചു. പ്രിന്‍സിപ്പല്‍ ഡോ. കെ.എല്‍.ജോയ്, ഫിനാന്‍സ് ഓഫീസര്‍ ഫാ. സിബിന്‍ വാഴപ്പിളളി, വൈസ് പ്രിന്‍സിപ്പല്‍ ഡോ. കെ. കരുണ, ഡീന്‍ ഓഫ് ഇന്‍റര്‍നാഷണല്‍ അഫയേഴ്‌സ് പ്രഫ. വി.ജെ. തോമസ്, ഡീന്‍ ഓഫ് അക്കാഡമിക്‌സ് ഡോ. എം.ബി. ഷീബ, ഡീന്‍ ഓഫ് സ്റ്റുഡന്‍റ് അഫയേഴ്‌സ് പ്രഫ. ഡോ. ജെ. സനില്‍രാജ് എന്നിവര്‍ സന്നിഹിതരായിരുന്നു. തുടര്‍ന്ന് വിദ്യാര്‍ഥികളുടെ കലാപരിപാടികളും അരങ്ങേറി.

16 വയസുള്ള കുട്ടിക്ക് പുകയില ഉത്പന്നം നൽകി അറസ്റ്റിലായി

ചാലക്കുടി: 18 വയസിനുതാഴെയുള്ളവർക്ക് പുകയില ഉത്പന്നങ്ങൾ വിൽപ്പന നടത്തരുതെന്നുള്ള നിയമം ലംഘിച്ച് പുകയില ഉല്പന്നം വില്പന നടത്തിയ ആൾ അറസ്റ്റിലായി. പരിയാരം പോസ്റ്റ് ഓഫീസ് ജംഗ്ഷനു സമീപമുള്ള പലചരക്കുകടയിൽനിന്ന് 16 വയസുള്ള കുട്ടിക്ക് പുകയില ഉത്പന്നങ്ങൾ വില്പന നടത്തിയ തൂമ്പാക്കോട് മംഗലത്തുകണ്ടൻ വീട്ടിൽ ആന്‍റു (54) വിനെയാണ് ചാലക്കുടി പോലീസ് എസ്ഐ ഋഷിപ്രസാദും സംഘവും അറസ്റ്റ് ചെയ്തത്. ഇയാൾക്കെതിരെ ജുവനൈൽ ജസ്റ്റീസ് ആക്ട് പ്രകാരം കേസ് രജിസ്റ്റർ ചെയ്തു. സബ് ഇൻസ്പെക്ടർമാരായ ജോഫി ജോസ്, സിപിഒമാരായ ബിനു, വിനോദ്, അരുൺകുമാർ എന്നിവരും ചേർന്നാണ് പ്രതിയെ അറസ്റ്റ് ചെയ്തത്.

ബസുകളുടെ സമയക്രമം, തര്‍ക്കം പരിഹരിച്ചു

ഇരിങ്ങാലക്കുട: കാട്ടൂര്‍ വഴി തൃപ്രയാറിലേക്ക് സര്‍വീസ് നടത്തുന്ന ബസുകളുടെ സമയത്തെച്ചൊല്ലിയുണ്ടായ തര്‍ക്കത്തിന് പരിഹാരമായി. ആര്‍ടിഒ ജയേഷ്‌കുമാറിന്‍റെ നേതൃത്വത്തില്‍ ബസുടമകളുമായി നടത്തിയ ചര്‍ച്ചയില്‍ കാട്ടൂര്‍ മുതല്‍ താണിശേരി വരെ ബസുകള്‍ക്ക് സഞ്ചരിക്കാന്‍ 11 മിനിറ്റായി യോഗത്തില്‍ നിശ്ചയിച്ചു. ഈ റൂട്ടിലോടുന്ന എല്ലാ ബസുകള്‍ക്കും സഞ്ചാരസമയം മൂന്നു മിനിറ്റ് കുറയ്ക്കുകയും ചെയ്തു. ബസുകള്‍ പുതിയ സമയക്രമത്തില്‍ സര്‍വീസ് ആരംഭിച്ചു. ഇരിങ്ങാലക്കുട- കാട്ടൂര്‍- തൃപ്രയാര്‍ റൂട്ടില്‍ 18 ബസുകളാണ് സര്‍വീസ് നടത്തുന്നത്. ഏറെ നാളായി ഈ റൂട്ടില്‍ സമയത്തെച്ചൊല്ലി ബസ്സുടമകളും ജീവനക്കാരും നിരന്തരം തര്‍ക്കം ഉണ്ടായിരുന്നു. തുടര്‍ന്ന് ഗതാഗതവകുപ്പ് മന്ത്രി അടക്കമുള്ളവര്‍ പ്രശ്‌നത്തില്‍ ഇടപെട്ട് സമയക്രമം പാലിക്കാന്‍ കര്‍ശന നടപടി സ്വീകരിക്കാന്‍ ഉദ്യോഗസ്ഥര്‍ക്ക് നിര്‍ദേശം നല്‍കുകയായിരുന്നു. തുടര്‍ന്ന് ഈ റൂട്ടില്‍ ഉദ്യോഗസ്ഥര്‍ സഞ്ചരിച്ചശേഷം പ്രശ്‌നപരിഹാരത്തിനായി ബസുകളുടെ പുതിയ സമയക്രമം നിശ്ചയിച്ച് ഉടമകള്‍ക്ക് നല്‍കിയെങ്കിലും ചില ബസുടമകളും ജീവനക്കാരും അത് പാലിക്കാന്‍ തയ്യാറായിരുന്നില്ല. തുടര്‍ന്നാണ് ആര്‍ടിഒ ബസുടമകളുടെ പ്രത്യേക യോഗം വിളിച്ച് പരിഹാരമുണ്ടാക്കിയത്. യോഗത്തില്‍ എന്‍ഫോഴ്സ്മെന്‍റ് ഇന്‍സ്‌പെക്ടര്‍ പി.വി. ബിജു, ബസുടമകളെ പ്രതിനിധീകരിച്ച് വിവിധ സംഘടനാ നേതാക്കളായ അബ്ദുല്‍ കരീം, കെ.കെ. സേതുമാധവന്‍, നൗഫല്‍, സി.സി. ആന്‍റോ, നന്ദകുമാര്‍, കെ.എന്‍. സന്ദീപ്, സജീവന്‍ മേനോന്‍, സി.പി. രാജു എന്നിവരും പങ്കെടുത്തു.

പുളിക്കലച്ചിറ ബണ്ട് പൊളിക്കണമെന്ന് ആവശ്യപ്പെട്ട് പ്രദേശവാസികള്‍ പ്രതിഷേധിച്ചു

ഇരിങ്ങാലക്കുട: പടിയൂര്‍ പുളിക്കലച്ചിറ താത്കാലിക ബണ്ട് പൊളിക്കണമെന്നാവശ്യപ്പെട്ട് പ്രദേശവാസികള്‍ പഞ്ചായത്താഫീസില്‍ കുത്തിയിരിപ്പ് നടത്തി പ്രതിഷേധിച്ചു. കൈകുഞ്ഞുങ്ങളുമായാണ് പ്രദേശവാസികള്‍ പഞ്ചായത്താഫീസിലെത്തിയത്. താത്കാലിക ബണ്ട് പൊളിച്ച് നീക്കണമെന്ന് ആവശ്യപ്പെട്ട് രാവിലെ പത്ത് മണിക്ക് തന്നെ ജനപ്രതിനിധികളുടെ നേതൃത്വത്തില്‍ വെള്ളക്കെട്ടിന്റെ ദുരിതം നേരിടുന്നവരും ക്യാമ്പില്‍ കഴിയുന്നവരും പഞ്ചായത്ത് ഓഫീസില്‍ എത്തുകയായിരുന്നു. താത്കാലിക ബണ്ട് അടിയന്തരമായി പൊളിച്ച് നീക്കണമെന്ന് ഇവര്‍ ആവശ്യപ്പെട്ടു. പുളിക്കലച്ചിറയിലെ പാലം നിര്‍മ്മാണം അനിശ്ചിതമായി നീണ്ട് പോയതിലും നിര്‍മ്മാണത്തില്‍ അപാകത കണ്ടെത്തിയതിലും ഉദ്യോഗസ്ഥരുടെയും കരാറുകാരുടെയും വീഴ്ച ഉണ്ടെന്നും ഇവര്‍ ആരോപിച്ചു. വെള്ളക്കെട്ടിന് പരിഹാരം കാണാനാണ് തീരുമാനമെന്ന് പഞ്ചായത്തില്‍ എത്തിയ മുകുന്ദപുരം തഹസില്‍ദാര്‍ വിശദീകരിച്ചുവെങ്കിലും ഇവര്‍ തൃപ്തരായില്ല. വൈകീട്ട് അഞ്ച് മണിക്ക് കളക്ടറേറ്റില്‍ ഉന്നതതല യോഗം വിളിച്ചിട്ടുണ്ടെന്ന് റവന്യൂ അധികൃതര്‍ വിശദീകരിച്ചുവെങ്കിലും യോഗത്തില്‍ പങ്കെടുക്കില്ലെന്നും ജില്ലാ ഭരണാധികാരികള്‍ സ്ഥലം സന്ദര്‍ശിക്കണമെന്നും ഇവര്‍ ആവശ്യപ്പെട്ടു. വൈകീട്ട് ജില്ലാ സബ് കളക്ടറും തഹസില്‍ദാറും പഞ്ചായത്ത് അധികൃതരും ചേര്‍ന്ന ഗൂഗില്‍ മീറ്റിലാണ് ഇത് സംബന്ധിച്ച തീരുമാനം ഉണ്ടായത്. പഞ്ചായത്ത് പ്രസിഡന്റ് ലിജി രതീഷ്, ഭരണ സമിതി അംഗങ്ങള്‍, വില്ലേജ് ഓഫീസര്‍, ബ്രിഡ്ജസ് വിഭാഗം ഉദ്യോഗസ്ഥര്‍ എന്നിവര്‍ ചര്‍ച്ചകളില്‍ പങ്കെടുത്തു. പടിയൂര്‍ പഞ്ചായത്തിലെ 5, 6 വാര്‍ഡുകളിലെ വെള്ളക്കെട്ടിന് പരിഹാരം കാണാറായി പുളിക്കലച്ചിറയിലെ താത്കാലിക ബണ്ട് പൊളിക്കുന്ന വിഷയത്തില്‍ ജില്ലാ ഭരണകൂടം ഇന്ന് തീരുമാനമെടുക്കും. ഇത് സംബന്ധിച്ച് മുകുന്ദപുരം തഹസില്‍ദാര്‍, പൊതുമരാമത്ത് ബ്രിഡ്ജസ് വിഭാഗം എക്‌സിക്യുട്ടീവ് എന്‍ജിനീയര്‍, വില്ലേജ് ഓഫീസര്‍ എന്നിവര്‍ നല്‍കുന്ന റിപ്പോര്‍ട്ടിന്‍റെ അടിസ്ഥാനത്തിലായിരിക്കും തീരുമാനം. ചൊവ്വാഴ്ച ഒന്‍പത് മണിക്കുള്ളില്‍ റിപ്പോര്‍ട്ട് നല്‍കാനാണ് ജില്ലാ ഭരണകൂടം ആവശ്യപ്പെട്ടിരിക്കുന്നത്. വൈകീട്ട് ആറരയോടെയാണ് ഇക്കാര്യത്തില്‍ ധാരണയായത്. അനിഷ്ട സംഭവങ്ങള്‍ ഒഴിവാക്കാന്‍ രാവിലെ മുതല്‍ തന്നെ കാട്ടൂര്‍ പോീസും സ്ഥലത്ത് ഉണ്ടായിരുന്നു.

മഴ = വെള്ളക്കെട്ട്

തീരദേശത്ത് നിരവധി വീടുകൾ വെള്ളത്തിൽ കയ്പമംഗലം: തുടർച്ചയായി പെയ്ത കനത്ത മഴയിൽ തീരദേശത്ത് നിരവധി വീടുകൾ വെള്ളത്തിലായി. എടത്തിരുത്തി, കയ്പമംഗലം, പെരിഞ്ഞനം എന്നീ പഞ്ചായത്തുകളിലാണ് വെള്ളക്കെട്ട് രൂക്ഷമായത്. ഈ മൂന്ന് പഞ്ചായത്തുകളിൽ ദുരിതാശ്വാസ ക്യാമ്പ് തുറന്നു. പ്രധാന തോടുകൾ കരകവിഞ്ഞൊഴുകിയതോടെയാണ് തീരദേശ പഞ്ചായത്തുകളിൽ വെള്ളക്കെട്ട് രൂക്ഷമായത്. എടത്തിരുത്തി പതിനഞ്ചാം വാർഡ് ചെന്ത്രാപ്പിന്നി ബൈപ്പാസിന് സമീപവും, പപ്പടം നഗറിലും നിരവധി വീടുകളിൽ വെള്ളം കയറി. പലരും ബന്ധുവീടുകളിലേക്കും മറ്റും താമസം മാറിയിരിക്കുകയാണ്. റോഡുകളിലും വെള്ളക്കെട്ട് മൂലം സഞ്ചരിക്കാൻ പറ്റാത്ത സ്ഥിതിയാണുള്ളത്. ചെന്ത്രാപ്പിനി എസ്എൻ വിദ്യാഭവൻ പ്രദേശത്തും വെള്ളക്കെട്ട് രൂക്ഷമാണ്. എടത്തിരുത്തി പൈനൂർ, പല്ല, അയ്യൻപ്പടി നഗർ, കോഴിത്തുമ്പ് തുടങ്ങിയ സ്ഥലങ്ങളിലും വെള്ളക്കെട്ടുണ്ട്. കയ്പമംഗലം പഞ്ചായത്ത് രണ്ടാം വാർഡ് കൂരിക്കുഴി സലഫി വടക്ക് ഭാഗത്താണ് വെള്ളക്കെട്ട് കൂടുതലായിട്ടുള്ളത്. ഈ ഭാഗത്ത് നിരവധി കുടുംബങ്ങൾ വെള്ളക്കെട്ടിലാണ്. ചില വീടുകളിൽ വെള്ളം കയറി. കാളമുറി കിഴക്ക് വിളക്കുപറമ്പ്, തൈവെപ്പ്, പള്ളിത്താനം, ഗ്രാമലക്ഷ്മി, വഴിയമ്പലം ബൈപ്പാസ് പ്രദേശത്തും വെള്ളക്കെട്ട് മൂലം ദുരിതത്തിലാണ് നാട്ടുകാർ. കനത്ത മഴയിൽ വീടുകളിൽ വെള്ളം കയറിയതിനെ തുടർന്ന് പെരിഞ്ഞനം പഞ്ചായത്തിൽ ദുരിതാശ്വാസ ക്യാമ്പ് തുറന്നു. രണ്ട് കുടുംബങ്ങളിൽ നിന്നായി ആറ് പേരാണ് പെരിഞ്ഞനം ഗവ. യുപി സ്കൂളിലുള്ള ക്യാമ്പിലുള്ളത്. കൂരിക്കുഴി ബാബുൽ ഉലും മദ്രസയിലാരംഭിച്ചിട്ടുള്ള ക്യാമ്പിൽ കയ്പമംഗലം പഞ്ചായത്തിലെ രണ്ട്, മൂന്ന് വാർഡുകളിലെ എഴു കുടുംബങ്ങളിൽ നിന്നായി 13 പേരും, ചാമക്കാല സ്കൂളിലെ സർക്കാർ ആശ്വാസ കേന്ദ്രത്തിൽ എടത്തിരുത്തി പഞ്ചായത്തിലെ ആറാം വാർഡ് കോഴിതുമ്പിലെ 10 കുടുംബങ്ങളിൽ നിന്നായി 18 പേരുമുണ്ട്. പഞ്ചായത്ത് - വില്ലേജ് അധികൃതർ ക്യാമ്പുകൾ സന്ദർശിച്ചു. ഇ.ടി. ടൈസൺ എംഎൽഎ ഉൾപ്പെടെയുള്ള ജനപ്രതിനിധികൾ ക്യാമ്പുകൾ സന്ദർശിച്ചു. മാപ്രാണം വാതില്‍മാടം പ്രദേശത്ത് വെള്ളക്കെട്ട് മാപ്രാണം: ഇരിങ്ങാലക്കുട നഗരസഭ 38-ാം വാര്‍ഡിലെ വാതില്‍മാടം പ്രദേശത്ത് വെള്ളക്കെട്ട്. 32 കുടുംബങ്ങളാണ് ഇവിടെ താമസിക്കുന്നത്. മഴയില്‍ പ്രദേശത്തുണ്ടാകുന്ന വെള്ളം കാനയിലൂടെ വിട്ട് റോഡിന് കുറുകേ പൈപ്പിട്ടാണ് പുറത്തേക്ക് ഒഴുക്കിക്കളയുന്നത്. എന്നാല്‍ പൈപ്പില്‍ മാലിന്യം അടിഞ്ഞതുമൂലം വെള്ളം പുറത്തേയ്ക്ക് ഒഴുകാതെ വന്നതാണ് വീടുകളില്‍ വെള്ളം കയറാന്‍ കാരണമായത്. പ്രശ്‌നത്തിന് കാരണം നഗരസഭയുടെ അനാസ്ഥയെന്നാരോപിച്ച് സിപിഎം പ്രതിഷേധിച്ചു. മഴ തുടരുന്ന സാഹചര്യത്തില്‍ വെള്ളം ഒഴുക്കിവിടാന്‍ റോഡ് ജെസിബി ഉപയോഗിച്ച് പൊളിക്കണമെന്ന് ആവശ്യമുയര്‍ന്നു. വീടുകളുടെ പടിവരെ വെള്ളം കയറിയിട്ടും പ്രശ്‌നപരിഹാരത്തിന് യാതൊരു നടപടികളും അധികാരികളുടെ ഭാഗത്തുനിന്നും ഉണ്ടായിട്ടില്ലെന്ന് സിപിഎം കൗണ്‍സിലര്‍മാര്‍ ആരോപിച്ചു. നിരവധി തവണ മുനിസിപ്പാലിറ്റിയില്‍ ഈ വിഷയം ശ്രദ്ധയില്‍പ്പെടുത്തി പരാതി നല്‍കി. എന്നാല്‍ കാര്യങ്ങള്‍ വ്യക്തമായി മനസിലാക്കാതെ റോഡ് പൊളിക്കുന്നതു ശരിയായ നടപടിയല്ലെന്നു നഗരസഭ വ്യക്തമാക്കി. പരാതിയെതുടര്‍ന്ന് നഗരസഭ എന്‍ജിനീയറിംഗ് വിഭാഗം ഉദ്യോഗസ്ഥര്‍ സ്ഥലത്തെത്തി പരിശോധിച്ചു. സമരം നടത്താന്‍ എത്തിയ പ്രവര്‍ത്തകരോട് പ്രദേശവാസികളായ ചിലര്‍ വിഷയത്തില്‍ രാഷ്ട്രിയം ആവശ്യമില്ലെന്നും വെള്ളം ഒഴിഞ്ഞുപോയാല്‍ മതിയെന്നും പറഞ്ഞ് എതിര്‍ക്കുകയായിരുന്നു. എന്നാല്‍, ഉത്തരവാദിത്വത്തില്‍നിന്ന് ഒളിച്ചോടുന്ന നഗരസഭ ഭരണത്തോടുള്ള പ്രതിഷേധമാണ് ഈ സമരമെന്ന് സിപിഎം വ്യക്തമാക്കി. സിപിഎം സ്വന്തം നിലയില്‍ പണം കണ്ടെത്തി മോട്ടോറും മറ്റും വാടകയ്‌ക്കെടുത്ത് വെള്ളം ഒഴുക്കിക്കളയാന്‍ ആരംഭിച്ചു. സമരം ലോക്കല്‍ സെക്രട്ടറി ആര്‍.എല്‍. ജീവന്‍ലാല്‍ ഉദ്ഘാടനം ചെയ്തു. വാര്‍ഡ് കൗണ്‍സിലര്‍ ലേഖാ ഷാജന്‍ അധ്യക്ഷയായി. കൗണ്‍സിലര്‍മാരായ സി.സി. ഷിബിന്‍, സി.എം. സാനി, എം.എസ്. സഞ്ജയ്, സിപിഎം നേതാക്കളായ പി.എ. അനീഷ്, കെ.കെ. ദാസന്‍, കെ.ജെ. ജോണ്‍സണ്‍ തുടങ്ങിയവര്‍ നേതൃത്വം നല്‍കി. പടിയൂരില്‍ നൂറോളം കുടുംബങ്ങള്‍ ആശങ്കയില്‍ പായമ്മല്‍: പുളിക്കലച്ചിറ പാടത്ത് വെള്ളമുയര്‍ന്നതിനെ തുടര്‍ന്ന് പടിയൂര്‍ പഞ്ചായത്തിലെ അഞ്ച്, ആറ് വാര്‍ഡുകളിലേയ്ക്ക് വെള്ളം കയറി. അഞ്ചാം വാര്‍ഡിലെ രണ്ടു കുടുംബങ്ങളെ എടതിരിഞ്ഞി എച്ച്ഡിപി സമാജം സ്‌കൂളില്‍ ദുരിതാശ്വാസ ക്യാമ്പ് ആരംഭിച്ച് അതിലേക്കു മാറ്റി. മൂന്നു കുടുംബങ്ങള്‍ ബന്ധുവീടുകളിലേക്ക് മാറി. പ്രദേശത്തെ മുഴുവന്‍ വീടുകളും വെള്ളക്കെട്ടു ഭീഷണിയിലാണ്. സംഭവം ഏറെ പ്രതിഷേധത്തിനിടയാക്കിയിരുന്നു. പ്രദേശത്തെ വെള്ളക്കെട്ട് ഒഴിവാക്കാനും നീരൊഴുക്ക് വേഗത്തിലാക്കാനുമായി കഴിഞ്ഞമാസം ആദ്യം റോഡിന്‍റെ കിഴക്കുഭാഗത്തായി നാലിടത്തായി പൊതുമരാമത്തുവകുപ്പ് റോഡ് പൊളിച്ച് വെള്ളം തുറന്നുവിട്ടു. പാടശേഖരത്തോടുചേര്‍ന്നുള്ള പടിയൂര്‍- പൂമംഗലം പഞ്ചായത്തുകളിലെ താഴ്ന്ന സ്ഥലങ്ങളില്‍ വെള്ളം കയറാതിരിക്കാന്‍ മുന്‍കരുതലായിട്ടാണ് വെള്ളം തുറന്നുവിട്ടത്. എന്നാല്‍, നിര്‍ത്താതെ പെയ്ത മഴ കണക്കുകൂട്ടലുകള്‍ മുഴുവന്‍ തെറ്റിച്ചു. വലിയ തോതിലാണ് പല പ്രദേശത്തും വെള്ളമുയര്‍ന്നത്. പുളിക്കലച്ചിറ പാടത്തോടുചേര്‍ന്നുള്ള അഞ്ച്, ഏഴ് വാര്‍ഡുകളിലെ വീടുകളില്‍ വെള്ളക്കെട്ടുഭീഷണി തുടരുകയാണ്. മഴ തുടരുകയാണെങ്കില്‍ കൂടുതല്‍ കുടുംബങ്ങളെ ദുരിതാശ്വാസ ക്യാമ്പിലേക്ക് മാറ്റേണ്ടിവരുമെന്നാണ് കരുതുന്നത്.

സോഡാക്കുപ്പിയുടെ അടപ്പുകളില്‍ തെളിഞ്ഞ വിശുദ്ധ അന്തോണീസ്

ഇരിങ്ങാലക്കുട: പാദുവനഗര്‍ സെന്‍റ് ആന്‍റണീസ് ഇടവകയില്‍ വിശുദ്ധ അന്തോണീസിന്‍റെ തിരുനാളാചരണത്തോടനുബന്ധിച്ച് 8000 സോ ഡാക്കുപ്പി അടപ്പുകള്‍ അടിച്ചുപരത്തി വിശുദ്ധന്‍റെ മനോ ഹരമായ ചിത്രം നിര്‍മിച്ചു. കെസിവൈഎം അംഗങ്ങളാണ് ചിത്രം നിര്‍മിച്ചത്. കെസിവൈഎം പ്രസിഡന്‍റ് ആല്‍ബിന്‍ ഷാജു, കോഓര്‍ഡിനേറ്റര്‍ സാന്ദ്ര ഷാജി എന്നിവരുടെ നേതൃത്വത്തില്‍ മൂന്നാഴ്ചയോളം നീണ്ട പരിശ്രമംകൊണ്ടാണ് യുവജനങ്ങള്‍ വ്യത്യസ്തമായ ഈ കലാവിഷ്‌കാരം സാധ്യമാക്കിയത്.

ചാലക്കുടിയിൽ വൻ തീപിടിത്തം; അഞ്ചുകോടിയുടെ നഷ്ടം

ചാലക്കുടി: നോർത്ത് ജംഗ്ഷനിലുള്ള പെയിന്‍റ് ഗോഡൗണിൽ വൻഅഗ്നിബാധ. ഊക്കൻസ് ഷോപ്പിംഗ് കോംപ്ലക്സിലെ പെയിന്‍റ് ഗോഡൗണിലുണ്ടായ തീപിടിത്തത്തിൽ അഞ്ചുകോടി രൂപയുടെ നഷ്ടം കണക്കാക്കുന്നു. ഷോർട്ട് സർക്യൂട്ട് മൂലം തീ പടർന്നുവെന്നാണ് പ്രാഥമികനിഗമനം. ഇന്നലെ രാവിലെ 8.30നാണ് കെട്ടിടത്തിൽനിന്നു തീയും പുകയും ഉയരുന്നതുകണ്ടത്. സമീപത്തുണ്ടായിരുന്ന നാട്ടുകാരും ചുമട്ടുതൊഴിലാളികളും ഓടിയെത്തി അഗ്നിരക്ഷാസേനയെയും പോലീസിനെയും വിവരം അറിയിച്ചു. ഉടനേ ചാലക്കുടി ഫയർ സ്റ്റേഷൻ ചാർജ് ഓഫീസർ പി.ഒ. വർഗീസിന്‍റെ നേതൃത്വത്തിൽ രണ്ടു യൂണിറ്റുകൾ എത്തി തീയണയ്ക്കാനുള്ള ശ്രമം തുടങ്ങി. സംഭവത്തിന്‍റെ ഗൗരവം മനസിലാക്കി അടുത്തുള്ള നിലയങ്ങളിലും വിവരം അറിയിച്ചു. പെയിന്‍റും തിന്നറും ആയതിനാൽ ഫോം ഉപയോഗിച്ചാണ് തീ നിയന്ത്രണവിധേയമാക്കിയത്. എട്ടു ഫയർ സ്റ്റേഷനുകളിൽനിന്നായി 10 യൂണിറ്റുകൾ പ്രവർത്തിച്ചാണ് തീയണച്ചത്. സ്റ്റേഷൻ ഓഫീസർ സി.സി. വിജയൻ, കെ.എസ്. ഡിബിൻ എന്നിവരടക്കം ഫയർഫോഴ്സിലെ 58 ജീവനക്കാരും 12 സിവിൽ ഡിഫൻസ് അംഗങ്ങളും തീയണയ്ക്കാനെത്തി. പുതുക്കാട്, മാള, ഇരിങ്ങാലക്കുട, തൃശൂർ, അങ്കമാലി, പെരുമ്പാവൂർ, പറവൂർ എന്നീ അഗ്നിരക്ഷാനിലയങ്ങളിൽനിന്നാണ് യൂണിറ്റുകൾ എത്തിയത്. തൃശൂർ ഫയർ സ്റ്റേഷൻ ഓഫീസർ ബി. വൈശാഖിന്‍റെ നേതൃത്വത്തിലായിരുന്നു ഏകോപനം. മൂന്നുമണിക്കൂർ നേരത്തെ ശ്രമഫലമായി പതിനൊന്നരയോടെയാണ് തീ പൂർണമായും അണച്ചത്. ഗോഡൗണിൽ സൂക്ഷിച്ചിരുന്ന പെയിന്‍റ് ടിന്നുകളും സമീപത്തെ ഗോഡൗണിലുണ്ടായിരുന്ന ഗ്യാസ് സിലിണ്ടറുകളും നാട്ടുകാരുടെ നേതൃത്വത്തിൽ മാറ്റിയതു കൂടുതൽ അപകടം ഒഴിവാക്കി. മറ്റു നിലയങ്ങളിൽനിന്നെത്തിയ ഫയർ എൻജിനുകൾ ദേശീയപാതയിലെ ഗതാഗതക്കുരുക്കിൽപ്പെട്ടതു ദുരിതമായി.

ശവപ്പെട്ടിയുമായി ബിജെപി പ്രതിഷേധസമരം നടത്തി

കരുവന്നൂർ: നിക്ഷേപത്തുക ലഭിക്കാത്തതിനെതുടർന്നുള്ള പൗലോസിന്‍റെ മരണത്തിൽ പ്രതിഷേധിച്ചു കരുവന്നൂര്‍ സഹകരണ ബാങ്കിനുമുമ്പില്‍ ശവപ്പെട്ടിയുമായി ബിജെപിയുടെ പ്രതിഷേധസമരം. ധര്‍ണ ബിജെപി തൃശൂര്‍ സൗത്ത് ജനറല്‍ സെക്രട്ടറി കെ.പി. ഉണ്ണികൃഷ്ണന്‍ ഉദ്ഘാടനം ചെയ്തു. ജില്ലാ ജനറല്‍ സെക്രട്ടറി കൃപേഷ് ചെമ്മണ്ട ആമുഖഭാഷണം നടത്തി. ബിജെപി മണ്ഡലം പ്രസിഡന്‍റ് ആര്‍ച്ച അനീഷ് അധ്യക്ഷത വഹിച്ചു. ജനറല്‍ സെക്രട്ടറിമാരായ ഷൈജു കുറ്റിക്കാട്ട്, സി.സി. രമേഷ്, ബിജെപി സംസ്ഥാന കമ്മിറ്റി അംഗം സന്തോഷ് ചെറാക്കുളം, ജില്ലാ സെക്രട്ടറിമാരായ ശ്യാംജി മാടത്തിങ്കല്‍, രിമ പ്രകാശ്, അജീഷ് പൈക്കാട്ട്, മണ്ഡലം സെക്രട്ടറി ടി.കെ. ഷാജു, ട്രഷറര്‍ ജോജന്‍ കൊല്ലാട്ടില്‍, വൈസ് പ്രസിഡന്‍റ് രമേഷ് അയ്യര്‍, പൊറത്തിശേരി ഏരിയ പ്രസിഡന്‍റ് സൂരജ് കടുങ്ങാടന്‍, ഇരിങ്ങാലക്കുട ടൗണ്‍ ഏരിയ പ്രസിഡന്‍റ് ലിഷോണ്‍ കാട്ട്‌ളാസ്, കൗണ്‍സിലര്‍മാരായ അജയന്‍, സിന്ധു സതീഷ്, ലാമ്പി റാഫേല്‍ എന്നിവര്‍ പങ്കെടുത്തു.

ചികിത്സയ്ക്കു പണംകിട്ടാതെ നിക്ഷേപകന്‍ മരിച്ചു; വൻ പ്രതിഷേധം

ഇരിങ്ങാലക്കുട: ചികിത്സയിലിരിക്കെ മരിച്ച ഗൃഹ നാഥന്‍റെ ചികിത്സയ് ക്കായി ബാങ്കിലെ നിക്ഷേപത്തുക ലഭിച്ചില്ലെ ന്നു ബന്ധുക്കള്‍ ആരോപിച്ചു. സംഭവത്തിൽ വൻപ്രതിഷേധമുയർന്നു. കരുവന്നൂര്‍ സഹകരണ ബാങ്കിലെ നിക്ഷേപകനായ പൊറത്തിശേരി കോട്ടയ്ക്കകത്തുകാരന്‍ പൗലോസ് (68) ആണ് ചികിത്സയിലിരിക്കെ മരിച്ചത്. സൈക്കിളിനുകുറുകെ തെരുവുനായ ചാടിയതിനെത്തുടര്‍ന്ന് വീണുപരിക്കേറ്റു ചികിത്സയിലായിരുന്നു പൗലോസ്. 2024 ഓഗസ്റ്റ് 23-ന് ആയിരുന്നു അപകടം. ഓര്‍മ നഷ്ടപ്പെട്ട പൗലോസ് ഒരുമാസം ആശുപത്രിയില്‍ കഴിഞ്ഞു. ആശുപത്രിച്ചെലവ് 10 ലക്ഷം രൂപയായി. തൃശൂരിലെ സ്വകാര്യ ആശുപത്രിയില്‍ ചികിത്സ നടത്തിയെങ്കിലും സാമ്പത്തികപ്രശ്നംമൂലം പിന്നീടു വീട്ടിലായിരുന്നു ചികിത്സ. വീട്ടിലെത്തിയശേഷവും വൻതുക ചികിത്സയ്ക്കു ചെലവായി. പത്തുവർഷംമുന്പ് പൗലോസ് നാലുലക്ഷം രൂപ കരുവന്നൂർ ബാങ്കിന്‍റെ പൊറത്തിശേരി ശാഖയിൽ നിക്ഷേപിച്ചിരുന്നു. 50,000 രൂപയുടെ സ്ഥിരനിക്ഷേപമുണ്ടായിരുന്നു. നിക്ഷേപിച്ച മുഴുവന്‍തുകയും അപകടംപറ്റിയ സമയത്തു മടക്കിനല്‍കണമെന്ന് ബാങ്ക് അധികൃതരോട് ആവശ്യപ്പെട്ടെങ്കിലും 50,000 രൂപ മാത്രമാണ് നല്‍കിയതെന്നും മുഴുവന്‍ തുകയും അന്നു ലഭിച്ചിരുന്നെങ്കില്‍ കൃത്യമായ ചികിത്സ നല്‍കാന്‍ കഴിയുമായിരുന്നെന്നും പൗലോസിന്‍റെ ഭാര്യ വെറോനിക്ക പറഞ്ഞു. ഓരോ മാസവും പണം ലഭിക്കാന്‍ ചികിത്സയുടെ ബില്ലുകള്‍ ചേര്‍ത്ത് അപേക്ഷ നല്‍കിയിരുന്നുവെങ്കിലും 20,000 രൂപ വീതമാണ് ലഭിച്ചിരുന്നത്. കഴിഞ്ഞ മൂന്നുമാസമായി അതു 10,000 രൂപയായി കുറഞ്ഞതായും ബന്ധുക്കള്‍ പറഞ്ഞു. ബാങ്ക് ക്രൂരത തുടരുന്നു: തോമസ് ഉണ്ണിയാടൻ ഇരിങ്ങാലക്കുട: കരുവന്നൂർ ബാങ്കിന്‍റെ ക്രൂരതയിൽ ജീവിതം പൊലിയുന്നവരുടെ എണ്ണം വർധിച്ചുവരുന്നതിൽ നാടാകെ വിറങ്ങലിച്ചുനിൽക്കുന്നതായി കേരള കോണ്‍ഗ്രസ് ഡെപ്യൂട്ടി ചെയർമാൻ തോമസ് ഉണ്ണിയാടൻ പറഞ്ഞു. ബാങ്കിൽ നിക്ഷേപിച്ച തുക തിരികെ കിട്ടാത്തതുമൂലം ചികിത്സയ്ക്കായി പണം തികയാതെ മരണത്തിനു കീഴടങ്ങേണ്ടിവന്ന പൊറത്തിശേരി കോട്ടയ്ക്കകത്തുകാരൻ പൗലോസിന്‍റെ മരണം സഹിക്കാവുന്നതല്ല. ഇത്തരത്തിൽ മരണപ്പെട്ടവരുടെ എണ്ണം പലതാണ്. ഗുരുതരരോഗം ബാധിച്ച് ചികിത്സയിലുള്ളവർക്കെങ്കിലും നിക്ഷേപിച്ച പണം തിരികെനല്കാൻ ബാങ്ക് അധികൃതർ തയാറാകണമെന്നും ബാങ്കിന്‍റെയും സർക്കാരിന്‍റെയും അനാസ്ഥയ്ക്കെതിരേ കേരള കോണ്‍ഗ്രസ് തുടർസമരപരിപാടികൾ നടത്തുമെന്നും ഉണ്ണിയാടൻ പറഞ്ഞു.

കാന്പസ് ഹോസ്റ്റലുകളിൽ മികച്ച സൗകര്യങ്ങളൊരുക്കും: മുഖ്യമന്ത്രി

മണ്ണുത്തി: കാന്പസുകളിൽ താമസിച്ചുപഠിക്കുന്ന പ്രവണതയ്ക്കൊപ്പം ചേർന്നുകൊണ്ട് ഉന്നതവിദ്യാഭ്യാസസ്ഥാപനങ്ങളിലെ ഹോസ്റ്റലുകളിൽ മികച്ച സൗകര്യങ്ങൾ ഒരുക്കാൻ നടപടികൾ സ്വീകരിക്കുമെന്നു മുഖ്യമന്ത്രി പിണറായി വിജയൻ. സംസ്ഥാന പ്ലാൻ, ആർഐഡിഎഫ് പദ്ധതികളിൽ ഉൾപ്പെടുത്തി കേരള വെറ്ററിനറി ആൻഡ് അനിമൽ സയൻസസ് സർവകലാശാലയുടെ മണ്ണുത്തി കാന്പസിൽ പണികഴിപ്പിച്ച ലേഡീസ് ഹോസ്റ്റൽ, റഫറൽ അനലറ്റിക്കൽ ഡയഗഗ്നോസ്റ്റിക് ലബോറട്ടറി, വികെഐഡിഎഫ്ടി ഓഡിറ്റോറിയം എന്നിവയുടെ ഉദ്ഘാടനം നിർവഹിച്ചു സംസാരിക്കുകയായിരുന്നു മുഖ്യമന്ത്രി. അടിസ്ഥാനവികസനരംഗത്തു മാത്രമല്ല അക്കാദമികരംഗത്തും മികച്ച സൗകര്യങ്ങളും കോഴ്സുകളും ഏർപ്പെടുത്തി കേരള വെറ്ററിനറി ആൻഡ് അനിമൽ സയൻസസ് സർവകലാശാലയെ ആഗോളനിലവാരത്തിലേക്ക് ഉയർത്താനാണ് സർക്കാർ ശ്രമിക്കുന്നതെന്നു മുഖ്യമന്ത്രി പറഞ്ഞു. ആരോഗ്യരംഗത്തു മികവുറ്റ നേട്ടങ്ങൾ കൈവരിക്കാനായെങ്കിലു ചില വൈഷമ്യങ്ങൾ ഇപ്പോഴുമുണ്ട്. സാംക്രമികരോഗങ്ങളുടെ ആധിക്യം അതിൽ പ്രധാനമാണ്. ജന്തുജന്യരോഗങ്ങൾ മറികടക്കുന്നതിന് 32 കോടി ചെലവഴിച്ച് വണ്‍ ഹെൽത്ത് പോളിസി നടപ്പാക്കിയിട്ടുണ്ടെന്നും മുഖ്യമന്ത്രി പറഞ്ഞു. മന്ത്രി ജെ. ചിഞ്ചുറാണി അധ്യക്ഷത വഹിച്ചു. മന്ത്രി കെ. രാജൻ മുഖ്യപ്രഭാഷണം നടത്തി. മേയർ എം.കെ. വർഗീസ്, വൈസ് ചാൻസലർ ഡോ. കെ.എസ്. അനിൽ എന്നിവർ പ്രസംഗിച്ചു.

ബസിൽനിന്നു തെറിച്ചുവീണ് പരിക്കേറ്റ യുവാവ് മരിച്ചു

പഴയന്നൂർ: ബസിൽനിന്നു തെറിച്ചുവീണു ഗുരുതരപരിക്കേറ്റ ഓട്ടിസംബാധിതനായ യുവാവ് മരിച്ചു. ചേലക്കര എളനാട് തേക്കിൻകാട് വീട്ടിൽ രാജന്‍റെ മകൻ അനൂജ് (27) ആണ് മരിച്ചത്. കഴിഞ്ഞ വെള്ളിയാഴ്ച രാവിലെ എട്ടുമണിയോടെ പഴയന്നൂർ - എളനാട് - തൃശൂർ റൂട്ടിൽ ഓടുന്ന ഉണ്ണികൃഷ്ണ ബസിൽനിന്നു വീണാണ് അനൂജിനു തലയ്ക്കു ഗുരുതരപരിക്കേറ്റത്. ഉടൻതന്നെ ചേലക്കര താലൂക്ക് ആശുപത്രിയിലും തുടർന്നു തൃശൂർ മെഡിക്കൽ കോളജ് ആശുപത്രിയിലും പ്രവേശിപ്പിച്ചെങ്കിലും ഇന്നലെ രാവിലെ പത്തോടെ മരിച്ചു.

റസ്റ്റ് ഹൗസിൽനിന്നു വീണ് മരിച്ചു

കുന്നംകുളം: കക്കാട് പിഡബ്ല്യുഡി റസ്റ്റ് ഹൗസിന്‍റെ ഒന്നാം നിലയിൽ നിന്ന് കാൽവഴുതി താഴേക്ക് വീണ് പൊന്നാനി സ്വദേശിയായ വയോധികന് ദാരുണാന്ത്യം. പൊന്നാനി തൃക്കാവ് പാണ്ടംപറമ്പത്തുമന വീട്ടിൽ നാരായണൻ ഭട്ടതിരിപ്പാടിന്‍റെ മകൻ ശങ്കരനാണ്(70) മരിച്ചത്. ഇന്നലെ രാത്രി എട്ടോടെയായിരുന്നു സംഭവം. ഉടനെ കുന്നംകുളത്തെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.

തലകറക്കം അനുഭവപ്പെട്ട കരാട്ടെ ഇൻസ്ട്രക്ടർ മരിച്ചു

വാടാനപ്പള്ളി: പരിശീലനത്തിനിടെ തലകറക്കം അനുഭവപ്പെട്ട കരാട്ടെ ഇൻസ്ട്രക്ടർ മരിച്ചു. വാടാനപ്പള്ളി ഗോൾഡൻ വളവിൽ കണ്ടൻ ചക്കി വീട്ടിൽ വിജയന്‍റെ മകൻ ജിതേഷ് (ജിതു - 43) ആണ് മരിച്ചത്. ഞായറാഴ്ച പരിശീലനത്തിനിടെ തലകറക്കം അനുഭവപ്പെട്ട ജിതേഷിനെ തൃശൂരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഗോജു റിയു കരാട്ടെ ഇൻസ്ട്രക്ടറാണ്. സംസ്കാരം ഇന്ന് രാവിലെ 11ന് വീട്ടുവളപ്പിൽ. ഭാര്യ: ഹരിത. അമ്മ: ഊർമിള. മക്കൾ: അമൃതാഞ്‌ജലി, റിയോജിത്ത്.

ശ്രീനാരായണപുരം കല്ലുംപുറത്ത് കുടിവെള്ളക്ഷാമം സമ്പൂർണമായി പരിഹരിക്കപ്പെടുന്നു

ശ്രീനാരായണപുരം: ദേശീയ പാത 66 നിർമാണം ഉൾപ്പെടെയുള്ള വിവിധ പ്രശ്നങ്ങളാൽ കല്ലുംപുറം ഗ്രാമവാസികൾക്ക് വാട്ടർ അതോറിറ്റിയുടെ ശുദ്ധജലം കൃത്യമായി വിതരണം ചെയ്തിട്ട് വർഷങ്ങളായി. ഈ സാഹചര്യത്തിൽ ജലനിധിയെന്ന പേരിൽ നാട്ടുകാരുടെ കൂട്ടായ്മയിൽ ശുദ്ധജല വിതരണത്തിനായി ഒരു പദ്ധതി ആരംഭിക്കുകയായിരുന്നു. ഈ പദ്ധതി വിജയകരമായി തുടർന്ന് രണ്ടാംഘട്ടവും ആരംഭിച്ചു. 46 കുടുംബങ്ങളാണ് പദ്ധതിയുടെ ഗുണഭോക്താക്കൾ. 1850 മീറ്റർ നീളമുള്ള പൈപ്പ് ലൈനാണ് കുടിവെള്ള വിതരണത്തിനായി ഉപയോഗിച്ചിട്ടുള്ളത്. ദേശീയ പാത 66 നോടു ചേർന്ന് മൂന്ന് ബോർവൽ താഴ്ത്തി വെള്ളമെടുടുത്ത് പ്രത്യേകം മോട്ടോർ സ്ഥാപിച്ച് പ്രത്യേകം തയ്യാറാക്കിയ 23 അടി ഉയരത്തിൽ സ്ഥാപിച്ച 5000 ലിറ്റർ കൊള്ളുന്ന ടാങ്കിൽ വെള്ളം ശേഖരിച്ച് അവിടെ രണ്ടാമത് മറ്റൊരു മോട്ടോർ സ്ഥാപിച്ചാണ് വെള്ള വിതരണം നടത്തുന്നത്. 24 മണിക്കൂറും റിമോട്ട് കൺട്രോളിൽ പ്രവർത്തിക്കുന്ന മോട്ടോറും ഇതോടൊപ്പം ബന്ധിപ്പിച്ചിട്ടുണ്ട്. ആകെ ചിലവ് 5,75,000 രൂപ വരുന്ന പദ്ധതിക്ക് ഇതുവരെ 2,65,000 ഉപഭോക്തൃ വിഹിതവും ശേഷം വിവിധ സ്ഥാപനങ്ങൾ വ്യക്തികൾ എന്നിവയുടെ സഹായവും ലഭിച്ചിട്ടുണ്ട്. ബാക്കി വരുന്ന സംഖ്യ ക്ക് സി പി ട്രസ്റ്റിന്റ സഹായം ലഭിച്ചിട്ടുണ്ട്. ജലനിധി- ഒന്ന് പദ്ധതി രണ്ട് മാസങ്ങൾക്ക് മുമ്പ് പ്രവർത്തനം ആരംഭിച്ചിരുന്നു. ശ്രീനാരായണപുരം ഗ്രാമപഞ്ചായത്ത് ഒൻപതാം വാർഡ് കേന്ദ്രീകരിച്ചാണ് രണ്ടു പദ്ധതികളും പ്രവർത്തിക്കുന്നത്. ആല- കല്ലുംപുറത്ത് ചേർന്ന ചടങ്ങിൽ സിപി ട്രസ്റ്റ് ചെയർമാൻ സി.പി.സാലിഹ് പദ്ധതിയുടെ ഉദ്ഘാടനം നിർവഹിച്ചു. പദ്ധതി കൺവീനർ ബിന്ദു സുദർശനൻ അധ്യക്ഷയായി. ട്രഷറർ എം.എസ്. രാധാകൃഷ്ണൻ, സൈനുദ്ദീൻ കാട്ടകത്ത്, അഡ്വ. എ.ഡി സുദർശനൻ, അസീസ് കാട്ടകത്ത്, പ്രഫ. സിറാജുദ്ദീൻ, ദിനിൽ മാധവ്, കെ.കെ. ഘോഷ് എന്നിവർ പ്രസംഗിച്ചു. പദ്ധതിയുടെ നിർവ്വഹണ പ്രവർത്തനങ്ങളിൽ മാതൃകാപരമായി സഹകരിച്ച ടി.എസ്. ഹരീഷ് , സി.കെ.വിമൽ , സി.കെ.കുട്ടൻ, കെ.എൻ.മധു ,ശോഭന രവീന്ദ്രൻ, എം.എസ്.സുഭാഷിണി, ലളിത ബാലൻ, സി. കെ. ശകുന്തള എന്നിവരെ ആദരിച്ചു.

മഴ കനത്തു, ദുരിതവും

മുസാഫരിക്കുന്നില്‍ മണ്ണിടിഞ്ഞു കരൂപ്പടന്ന: മഴ കനത്തതോടെ വെള്ളാങ്കല്ലൂര്‍ പഞ്ചായത്തിലെ പാരിജാതപുരം ക്ഷേത്രത്തിനു പുറകിലെ മുസാഫരിക്കുന്നില്‍ മണ്ണിടിച്ചില്‍. മുത്തോളാന്‍ വീട്ടില്‍ ശശി ഭാര്യ അംബികയുടെ വീടിന്‍റെ മുന്‍ഭാഗത്തുള്ള റോഡിനോട് ചേര്‍ന്ന് കരിങ്കല്ല് കൊണ്ട് നിര്‍മിച്ചിട്ടുള്ള സംരക്ഷണഭിത്തിയാണ് ഭാഗികമായി തകര്‍ന്നത്. സംരക്ഷണ ഭിത്തിയുടെ മറ്റു ഭാഗങ്ങളും വിണ്ട് നില്‍ക്കുകയാണ്. ഏതു സമയവും ഇടിഞ്ഞു വീഴാവുന്ന അവസ്ഥയിലാണ്. കാലവര്‍ഷം കണക്കിലെടുത്ത് മണ്ണിടിച്ചിലിന് സാധ്യതയുണ്ടെന്ന് കണ്ടെത്തിയ പ്രദേശങ്ങളിലൊന്നായ മുസാഫരിക്കുന്ന് അതിജാഗ്രത പുലര്‍ത്തേണ്ട പ്രദേശങ്ങളുടെ പട്ടികയില്‍ ജില്ലാ ഭരണകൂടം ഉള്‍പ്പെടുത്തിയിട്ടുള്ള സ്ഥലമാണ്. ആഴ്ചകള്‍ക്കു മുമ്പ് ഈ പ്രദേശത്തെ 23 കുടുംബങ്ങളോട് മാറി താമസിക്കുവാന്‍ വില്ലേജ് ഓഫീസര്‍ നോട്ടീസ് നല്‍കിയിരുന്നു. മരങ്ങള്‍ മുറിച്ചുനീക്കി കരുവന്നൂര്‍: പുത്തന്‍തോട് കെഎല്‍ഡിസി കനാലിനു സമീപത്തെ മരങ്ങള്‍ മുറിച്ചുനീക്കി. പുത്തന്‍തോട് പാലത്തിനു സമീപം ബണ്ട് റോഡ് കെട്ടി സംരക്ഷിക്കുന്നതിനോടു ചേര്‍ന്നുള്ള മരങ്ങള്‍ കനത്തമഴയില്‍ കനാലിലേക്ക് മറിഞ്ഞുവീണ് നീരൊഴുക്ക് തടസപ്പെട്ടത് പ്രതിഷേധമുയര്‍ത്തിയിരുന്നു. ഈ മരങ്ങളടക്കം കനാലിനോടുചേര്‍ന്ന് ബണ്ടില്‍നില്‍ക്കുന്ന അപകടാവസ്ഥയിലുള്ള മരങ്ങള്‍ മുറിച്ചുനീക്കുകയായിരുന്നു. നഗരസഭ മൂന്ന്, നാല്, നല്പത് എന്നീ വാര്‍ഡുകളിലൂടെ കടന്നുപോകുന്ന കനാലിന്‍റെ ഇരുവശത്തും അപകടകരമായ രീതിയില്‍ നില്‍ക്കുന്ന മരങ്ങളുടെ ചില്ലകളാണ് കെഎല്‍ഡിസി അധികൃതര്‍ മുറിച്ചുനീക്കുന്നതെന്ന് വാര്‍ഡ് കൗണ്‍സിലര്‍ അല്‍ഫോന്‍സാ തോമസ് പറഞ്ഞു. ആൽമരം കടപുഴകി മുരിങ്ങൂർ: അതിശക്തമായ കാറ്റിലും മഴയിലും നാഷണൽ ഹൈവേയിൽനിന്നു കാടുകുറ്റി പഞ്ചായത്തിലേക്കുള്ള പ്രവേശന കവാടത്തിൽ മുരിങ്ങൂർ ഡിവൈൻനഗർ ജംഗ്ഷനിൽ നിന്ന കൂറ്റൻ ആൽമരം കടപുഴകി. ഇന്നലെ വൈകീട്ട് 6.15നാണ് സംഭവം. 11 കെവി അടക്കമുള്ള എച്ച്ടി,എൽടി വൈദ്യുതി ലൈനുകൾ ഉഗ്രശബ്ദത്തോടെ പൊട്ടിവീണു. കമ്പികൾ കൂട്ടിമുട്ടി തീപ്പൊരിയും ഉയർന്നിരുന്നു. സമീപത്തെ ഓട്ടോസ്റ്റാൻഡിലേക്ക് മറയാതെ മറുഭാഗത്തേക്ക് മറഞ്ഞതിനാലും വാഹനങ്ങളും ആളുകളും ആ സമയത്ത് അതിലൂടെ കടന്നുപോകാതിരുന്നതിനാലും വൻ അപകടമാണ് ഒഴിവായത്. മരത്തിന് താഴെ നിർത്തിയിട്ടിരുന്ന ഒരു ഇരുചക്രവാഹനത്തിന് കേടുപാട് സംഭവിച്ചു. കെ.എസ്.ഇ.ബി. ജീവനക്കാർ സ്ഥലത്തെത്തി ലൈൻ ഓഫ് ചെയ്തു. ചാലക്കുടിയിൽ നിന്നെത്തിയ ഫയർഫോഴ്സ് സംഘം മരം വെട്ടിമാറ്റി. മണിക്കൂറുകളോളം കാടുകുറ്റി ഭാഗത്തേയ്ക്കുള്ള ഗതാഗതം സ്തംഭിച്ചു. ആൽത്തറയ്ക്ക് വിള്ളൽ സംഭവിച്ചിട്ടുണ്ടെന്നും ആൽമരം അപകടത്തിലാണെന്നും കാണിച്ച് കളക്ടർക്കും എൻഎച്ച്എഐ പ്രൊജക്ട് ഡയറക്ടർക്കും ഗുരുവായൂർ ഇൻഫ്രാസ്ട്രക്ച്ചർ കമ്പനിക്കും നാളുകൾക്ക് മുമ്പ് ഇ-മെയിൽ സന്ദേശം അയച്ചിരുന്നതായി മേലൂർ പഞ്ചായത്ത് പ്രസിഡന്‍റ് എം.എസ്.സുനിത പറഞ്ഞു. വിഷയം എൻഎച്ച്എഐ പ്രൊജക്ട് മാനേജരുടെയും ഡിവൈഎസ്പി, സിഐ എന്നിവരുടെ ശ്രദ്ധയിൽപ്പെടുത്തിയിരുന്നതായും പ്രസിഡന്‍റ്് പറഞ്ഞു. കാലവർഷം ശക്തമായതോടെ അപകടാവസ്ഥയിൽ നിൽക്കുന്ന മരങ്ങൾ മുറിച്ചു മാറ്റുന്നതിൽ വൻ വീഴ്ചയാണ് അധികൃതരുടെ ഭാഗത്ത് നിന്നു ഉണ്ടാകുന്നതെന്ന വ്യാപക പരാതിയാണ് നിലനിൽക്കുകയാണ്. ഡിവൈൻ നഗർ അടിപ്പാതയിലും ഉപറോഡുകളിലും ചെറിയ മഴയ്ക്ക് പോലും രൂക്ഷമായ വെള്ളക്കെട്ട് രൂപപ്പെടുന്നുവെന്ന പരാതികൾക്ക് പിന്നാലെ ആൽമരം കടപുഴകിയതും ജനങ്ങളെ ആശങ്കയിലാഴ്ത്തുകയാണ്. തീരദേശത്ത് വെള്ളക്കെട്ട് കയ്പ്പമംഗലം: കനത്ത മഴയെതുടര്‍ന്ന് കയ്പ്പമംഗലം മേഖലയില്‍ വെള്ളക്കെട്ട് രൂക്ഷമായി. പന്ത്രണ്ടാം വാര്‍ഡിലെ ഗാര്‍ഡിയന്‍ ആശുപത്രി പരിസരം, മനയ്ക്കപ്പാടം സേവന അങ്കണവാടി പരിസരം, പള്ളിത്താനം തുടങ്ങിയ സ്ഥലങ്ങളിലാണ് വെള്ളക്കെട്ട് രൂക്ഷമായത്. ഇനിയും മഴ തുടര്‍ന്നാല്‍ വീടുകള്‍ക്കുള്ളിലേയ്ക്ക് വെള്ളം കയറുമെന്ന അവസ്ഥയാണ്. രണ്ടാം വാര്‍ഡിലെ കൂരിക്കുഴി സലഫി നഗര്‍, ആറാം വാര്‍ഡിലെ കാളമുറി കിഴക്കുഭാഗം, അഞ്ചാം വാര്‍ഡിലെ പള്ളിനട ഭാഗം എന്നിവടങ്ങളിലാണ് ദുരിതം ഏറിയത്. പലയിടത്തും വീട്ടുകാര്‍ ബന്ധുവീടുകളിലേയ്ക്ക് മാറിത്തുടങ്ങിയിട്ടുണ്ട്. രണ്ട് ദിവസമായി തുടരുന്ന തോരാമഴയാണ് മേഖലയില്‍ വെള്ളക്കെട്ട് രൂക്ഷമാക്കിയത്. എടത്തിരുത്തി പഞ്ചായത്തിന്‍റെ പല മേഖലകളിലും വെള്ളക്കെട്ട് രൂക്ഷമായിക്കൊണ്ടിരിക്കുകയാണ്. വൈദ്യുതി വിതരണം തടസപ്പെടുന്നത് പതിവാകുന്നു വെള്ളിക്കുളങ്ങര: 11 കെവി ലൈനിലേയ്ക്ക് മരം വീണതിനെ തുടര്‍ന്ന് മലയോരത്തെ ചൊക്കന, നായാട്ടുകുണ്ട് ഗ്രാമങ്ങളിലും കാരിക്കടവ് ആദിവാസി നഗറിലുമുള്ള കുടുംബങ്ങള്‍ കഴിഞ്ഞ രാത്രി ഇരുട്ടിലായി. വെള്ളികുളങ്ങര -ചൊക്കന റോഡിലെ പത്തരക്കുണ്ടിലാണ് ശനിയാഴ്ച രാത്രിയില്‍ വന്‍മരം റോഡിലേക്കും ഇലക്ട്രിക് ലൈനിലേക്കും വീണത്. ഇതേതുടര്‍ന്ന് 11 കെവി ലൈനിലെ കമ്പികള്‍ പൊട്ടിവീണു. ഇതേ തുടര്‍ന്ന് തടസപ്പെട്ട് വൈദ്യുതി വിതരണം ഇന്നലെ ഉച്ചയോടെയാണ് പുനഃസ്ഥാപിച്ചത്. പത്തരക്കുണ്ട് മുതല്‍ നായാട്ടുകുണ്ട് പ്ലാവിന്‍ കയറ്റം വരെ റോഡിനിരുവശത്തുമായി നിരവധി മരങ്ങളാണ് അപകടകരമായ നിലയില്‍ ഏതുസമയവും 11 കെവിലൈനിലേക്ക് വീഴാറായി നില്‍ക്കുന്നത്. അപകടാവസ്ഥ പരിഹരിക്കണമെന്നാവശ്യപ്പെട്ട് കളക്ടറടക്കമുള്ളവര്‍ക്ക് പരാതി നല്‍കിയിട്ടും നടപടി ഉണ്ടായിട്ടില്ലെന്ന് നാട്ടുകാര്‍ പറയുന്നു. കാട്ടാനശല്യമുള്ള ചൊക്കന, കാരിക്കടവ് പ്രദേശങ്ങളിലേക്കുള്ള വൈദ്യുതി ലൈന്‍ കേബിള്‍ ലൈനാക്കി മാറ്റണമെന്ന ആവശ്യവും പരിഗണിക്കപ്പെടാതെ കിടക്കുകയാണ്. വെള്ളിക്കുളങ്ങര-ചൊക്കന 11 കെവി ലൈനില്‍ തടസമുണ്ടായാല്‍ മുപ്ലിയില്‍ നിന്ന് ചൊക്കനയിലേക്ക് വൈദ്യുതിയെത്തിക്കാന്‍ സംവിധാനം നിലവിലുണ്ടെങ്കിലും ഇതും ഫലപ്രദമായി നടപ്പാക്കപ്പെടുന്നില്ലെന്നാണ് നാട്ടുകാരുടെ പരാതി. കയ്പമംഗലത്ത് സൈറൻ മുഴങ്ങി കാളമുറി: കയ്പമംഗലത്ത് അതി തീവ്ര മഴ മുന്നറിയിപ്പ്. ഇന്നലെ വൈകീട്ട് 4.30ന്്‌ ഇതു സംബന്ധിച്ച് അപകട മുന്നറിയിപ്പ് നൽകി. കാലാവസ്ഥാ, ദേശീയ പ്രധാനമായ മറ്റ് അടിയന്തര സന്ദർഭങ്ങളിലും ജനങ്ങൾ ജാഗരൂകമായിരിക്കുന്നതിനും ഏത് സാഹചര്യത്തെയും അതിജീവിക്കാനുള്ള തയാറെടുപ്പുകൾ ഉടനടി സ്വീകരിക്കാൻ പൊതുജനം തയാറായിരിക്കണമെന്ന ഉദ്ദേശ്യത്താലാണ് സൈറൻ മുഴക്കുന്നത്. ദേശീയ ദുരന്ത നിവാരണ കേന്ദ്രത്തിന്‍റെ നിർദേശാനുസരണം സംസ്ഥാനത്തെ എല്ലാ നിയോജക മണ്ഡലങ്ങളിലും പ്രത്യേകം തയാറാക്കിയ കേന്ദ്രങ്ങളിലാണ് ഇങ്ങനെ സൈറൻ മുഴക്കിയത്. കയ്പമംഗലം നിയോജക മണ്ഡലത്തിലെ കയ്പമംഗലം ഗവ. ഫിഷറീസ് ഹയർ സെക്കൻഡറി സ്കൂളിലാണ് സൈറൻ പ്രവർത്തിപ്പിച്ചത്. പെരിഞ്ഞനത്ത് ദുരിതാശ്വാസക്യാമ്പ് തുറന്നു പെരിഞ്ഞനം: കനത്തമഴയിൽ വീടുകളിൽ വെള്ളം കയറിയതിനെ തുടർന്ന് പെരിഞ്ഞനം പഞ്ചായത്തിൽ ദുരിതാശ്വാസ ക്യാമ്പ് ആരംഭിച്ചു. പെരിഞ്ഞനം ഗവ. യുപി സ്കൂളിലാണ് ക്യാമ്പ് തുറന്നത്. പത്താം വാർഡ് കുടിലിങ്ങൽ കോളനിയിൽ നിന്നുമുള്ള മൂന്ന് കുടുംബങ്ങളാണ് ക്യാമ്പിൽ ഉള്ളത്. പതിനാലാം വാർഡിലും കനത്ത വെള്ളക്കെട്ട് തുടരുന്നതിനാൽ ഇവിടെ നിന്നും കുടുംബങ്ങളെ ക്യാമ്പിലേക്ക് മാറ്റാൻ സാധ്യതയുണ്ട്. പഞ്ചായത്ത് - വില്ലേജ് അധികൃതർ ആവശ്യമായ സംവിധാനങ്ങൾ ക്യാമ്പിൽ ഒരുക്കിയിട്ടുണ്ട്.

കേബിളിൽ കുരുങ്ങി ഓട്ടോറിക്ഷ മറിഞ്ഞു

കാടുകുറ്റി: കൊരട്ടി - കാടുകുറ്റി പാതയിൽ തറവാട്കവലയിൽ കെ - ഫോണിന്‍റെ കേബിളിൽ കുരുങ്ങി ഓട്ടോറിക്ഷ മറിഞ്ഞു. ഡ്രൈവർ നിസാര പരിക്കുകളോടെ രക്ഷപ്പെട്ടു. ഇന്നലെ രാവിലെ 11.30 മണിയോടെയായിരുന്നു സംഭവം. യാത്രക്കാരെ നിർദ്ദിഷ്ട ഇടത്ത് എത്തിച്ച് മടങ്ങവെയാണ് വാഹനം കേബിളിൽ കുടുങ്ങിയത്. ഓടിക്കൂടിയ നാട്ടുകാർ ഓട്ടോറിക്ഷ ഉയർത്തി ഡ്രൈവറെ പുറത്തേയ്ക്കെടുത്തു. ഇന്നലെ പുലർച്ചെ ഈ വഴികടന്നുപോയ ടോറസ് ലോറി വൈദ്യുതി പോസ്റ്റിലിടിച്ച് പോസ്റ്റ് ചെരിഞ്ഞതായും പറയുന്നു. തുടർന്നാണ് കേബിൾ താഴേക്ക് തൂങ്ങിക്കിടന്നത്. ദേശീയപാതയിൽ നിന്നും ഗതാഗതക്കുരുക്കൊഴിവാക്കാൻ ഈ റോഡിനെ ആശ്രയിക്കുന്ന വലിയ വാഹനങ്ങൾ തട്ടി കേബിളുകൾ പൊട്ടിവീഴുന്നത് നിത്യസംഭവമായി മാറിയിരിക്കുകയാണ്. റോഡുകളുടെ തകർച്ച പരിഹരിക്കണമെന്നും അമിതഭാരവുമായി വരുന്ന ഇത്തരം ഭാരവാഹനങ്ങൾക്ക് നിയന്ത്രണം വേണമെന്നാവശ്യപ്പെട്ട് കാടുകുറ്റി പഞ്ചായത്ത് കാര്യാലയത്തിനു മുന്നിൽ ജനകീയ സമിതിയുടെ നേതൃത്വത്തിൽ കഴിഞ്ഞ ദിവസം വൻ പ്രതിഷേധവും സംഘടിപ്പിച്ചിരുന്നു.

ചെട്ടിക്കാട് വിശുദ്ധ അന്തോണീസിന്‍റെ മരണത്തിരുന്നാൾ നാളെ

ചെട്ടിക്കാട്: വിശുദ്ധ അന്തോണീസിന്‍റെ തീർത്ഥാടന ദേവാലയത്തിൽ അത്ഭുത പ്രവർത്തകനായ വിശുദ്ധന്‍റെ മരണത്തിരുനാൾ നാളെ നടക്കും. രാവിലെ 6.15 മുതൽ വൈകിട്ട് 6.30 വരെ ദിവ്യബലി നൊവേന, ആരാധന എന്നിവ നടക്കും. രാവിലെ ഒൻപതു മുതൽ ഊട്ടുനേർച്ച വിതരണം ചെയ്യും. രാവിലെ 10.30ന് നടക്കുന്ന തിരുനാൾ ദിവ്യബലിയ്ക്ക് ഫാ. പ്രിൻസ് പഴമ്പിള്ളി ഒഎസ്ജെ മുഖ്യകാർമികനാകും. തുടർന്ന് നൊവേന, ആരാധന വിശുദ്ധ അന്തോണീസിന്‍റെ തിരുശേഷിപ്പുകളായ അഴുകാത്ത നാവ്, കൈയ്യുടെ അസ്ഥി, സാഭാവസ്ത്രത്തിന്‍റെ ഒരു ഭാഗം എന്നിവ സൂക്ഷിച്ചിരിക്കുന്ന ഇന്ത്യയിലെ ഏക തീർത്ഥാടന കേന്ദ്രമായതിനാൽ വിശുദ്ധന്‍റെ മരണത്തിരുനാളിൽ പങ്കെടുക്കുന്നതിനായി അയൽ സംസ്ഥാനങ്ങളിൽ നിന്നുൾപ്പെടെ തീർത്ഥാടകർ ദേവാലയത്തിലേക്ക് എത്തിചേരുമെന്നതിനാൽ വിശ്വസികൾക്ക് തിരുശേഷിപ്പുകൾ വണങ്ങുന്നതിനും പൊൻനാവ് എടുത്തുവയ്ക്കൽ നേർച്ചയ്ക്കും അടിമ സമർപ്പണത്തിനും വിപുലമായ ക്രമീകരണങ്ങൾ ഒരുക്കിയിട്ടുള്ളതായി റെക്ടർ റവ.ഡോ. ബെന്നി വാഴക്കൂട്ടത്തിൽ, ഫാ. അജയ് ആന്‍റണി പുത്തൻപറമ്പിൽ എന്നിവർ അറിയിച്ചു.

യാത്രക്കാരന് രക്ഷകരായി കെഎസ്ആർടിസി ജീവനക്കാർ

ചാലക്കുടി: കെഎസ്ആർടിസി ബസിൽ യാത്രക്കാരന് രക്ഷകരായി ജീവനക്കാർ. "മലക്കപ്പാറ - ചാലക്കുടി റൂട്ടിൽ ഓടുന്ന കെഎസ്ആർടിസി ബസിലെ ജീവനക്കാരാണ് അസുഖം ബാധിച്ച യാത്രക്കാരനെ ബസിൽ ആശുപത്രിയിലെത്തിച്ചത്. കൊന്നക്കുഴിക്ക് സമീപം ചാട്ടുകല്ല് സ്റ്റോപ്പിൽ നിന്നാണ് 73കാരനായ കൊന്നക്കുഴി കള്ളിയത്ത് പറമ്പിൽ ജോണിയും ഭാര്യയും ബസിൽ കയറിയത്. ഏതാനും സമയം കഴിഞ്ഞപ്പോൾ ജോണിക്ക് അവശത അനുഭവപ്പെട്ടു തുടങ്ങി. അധികം വൈകാതെ ജോണി കുഴഞ്ഞുവീണു. സംഭവം ശ്രദ്ധയിൽപ്പെട്ട കണ്ടക്ടർ ഷാജൻ ഉടൻ തന്നെ ജോണിയ്ക്കു പ്രഥമശുശ്രൂഷ നൽകി. പിന്നാലെ പ്രദേശത്തെ പ്രാഥമിക ആരോഗ്യ കേന്ദ്രത്തിലെ ജോലികഴിഞ്ഞ് മടങ്ങിപ്പോകുന്ന ബസിലെ യാത്രക്കാരായ രണ്ട് നഴ്സുമാരും സഹായത്തിനെത്തി. ഇതിനിടയിൽ ആംബുലൻസിനെ ബന്ധപ്പെടാൻ ശ്രമിച്ചെങ്കിലും ലഭിക്കാതെ വന്നതോടെ ബസ് ഡ്രൈവർ അതിവേഗത്തിൽ ചാലക്കുടി സെന്‍റ്് ജെയിംസ് ആശുപത്രിയിലേക്ക് എത്തിച്ചു. പല സ്റ്റോപ്പുകളിലും ഇറങ്ങേണ്ട യാത്രക്കാർ ബസിൽ ഉണ്ടായിരുന്നെങ്കിലും അവരാരും സ്റ്റോപ്പുകളിൽ ഇറങ്ങാതെ രോഗിയെ ആശുപത്രിയിൽ എത്തിക്കാൻ സഹകരിച്ചതും ജോണിയുടെ ജീവൻ രക്ഷിക്കാൻ തുണയായി. ചാലക്കുടി ഡിപ്പോയിലെ കണ്ടക്ടർ ഷൊർണൂർ കവളപ്പാറ സ്വദേശി ഷാജിന്‍റേയും ആമ്പല്ലൂർ സ്വദേശി ഡ്രൈവർ ഷിമിലിന്‍റേയും നേതൃത്വത്തിൽ ആയിരുന്നു രക്ഷാപ്രവർത്തനം. രോഗിയെ സുരക്ഷിതമായി ആശുപത്രിയിൽ എത്തിച്ചശേഷം ബസ് ഡിപ്പോയിലേക്ക് മടങ്ങി. യാത്രക്കാർ ചാലക്കുടിയിൽ നിന്നും അടുത്ത ബസിൽ വീടുകളിലേക്കുപോയി. ജീവനക്കാരുടെയും യാത്രക്കാരുടെയും സമയോചിത ഇടപെടൽ മൂലം വയോധികന്‍റെ ജീവൻ രക്ഷിക്കാൻ കഴിഞ്ഞു.

കളംപാട്ട് ശില്പശാല ശ്രദ്ധേയമായി

തിരുവില്വാമല: അനുഷ്ഠാനകലകളെ കുട്ടികൾക്ക് പരിചയപ്പെടുത്തുന്നതിന്‍റെ ഭാഗമായി ഗ്രാമീണ വായനശാല ബാലവേദിയുടെ നേതൃത്വത്തിൽ സംഘടിപ്പിച്ച കളംപാട്ട് ശില്പശാല കുട്ടികൾക്ക് പുതിയ അനുഭവമായി. കേരള ഫോക്‌ലോർ അക്കാദമി പുരസ്കാര ജേതാവും കളംപാട്ട് കലാകാരനുമായ കടന്നമണ്ണ ശ്രീനിവാസനാണ് ശില്പശാല നയിച്ചത്. അനുഷ്ഠാനകലകൾ ജനകീയമാകേണ്ടതിന്‍റെ ആവശ്യകതയെക്കുറിച്ചും എങ്ങനെ ജനകീയമാക്കാം എന്നതിനെക്കുറിച്ചും അദ്ദേഹം വിശദീകരിച്ചു. 256-ാം കളംപാട്ട് ശില്പശാല പൂർത്തിയാക്കിയ ശ്രീനിവാസനെ ഗ്രാമപഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ സ്മിത സുകുമാരൻ ഉപഹാരംനല്കി ആദരിച്ചു. വായനശാല സെക്രട്ടറി ബാബു പരശുറാം, കെ. ജയപ്രകാശ്കുമാർ, എൻ രാംകുമാർ, സുരേഷ് ബാബു, ബാലവേദി വൈസ് പ്രസിഡന്‍റ് ബി. അഭിനവ്, കെ.എസ്. ജാനകി എന്നിവർ സംസാരിച്ചു. തുടർന്ന് വായനശാല ലൈഫ് മെമ്പർമാർക്കുള്ള ഐഡന്‍റിറ്റി കാർഡ് തലപ്പിള്ളി താലൂക്ക് ലൈബ്രറി കൗൺസിൽ എക്സിക്യൂട്ടീവ് അംഗം ഗിരീഷ് രാധാകൃഷ്ണൻ വിതരണംചെയ്തു.

ദേവാലയങ്ങളില്‌ തിരുനാളാഘോഷം

പെരുവല്ലൂർ സെന്‍റ് ആന്‍റണീസ് ദേവാലയം ഇടവക മധ്യസ്ഥനായ വിശുദ്ധ അന്തോണീസിന്‍റെയും വിശുദ്ധ മറിയം ത്രേസ്യയുടേയും സംയുക്ത ഊട്ടുതിരുനാളിന് കൊടികയറി. ഇന്നലെ രാവിലെ നടന്ന ആഘോഷമായ ദിവ്യബലിക്കുശേഷം പാവറട്ടി തീർഥകേന്ദ്രം വികാരി ഫാ. ആന്‍റണി ചെമ്പകശേരി കൊടിയേറ്റ് നിർവഹിച്ചു. ഇടവക വികാരി ഫാ. ഫ്രാങ്ക്ളിൻ കണ്ണനായ്ക്കൽ സഹകാർമികനായി. തിരുനാളിന്‍റെ ഭാഗമായി ഇന്നുമുതൽ ശനി വരെ വൈകീട്ട് ആറിന് വിശുദ്ധ കുർബാന, നൊവേന, ലദിഞ്ഞ് എന്നിവ ഉണ്ടായിരിക്കും. ഊട്ടുതിരുനാൾ ദിവസമായ ഞായറാഴ്ച രാവിലെ 10ന് ആഘോഷമായ തിരുനാൾ ദിവ്യബലിക്ക് ഫാ. ജോയ് പുത്തൂർ മുഖ്യകാർമികനാകും. ഫാ. സിജോൺ കുഴിക്കാട്ടുമ്യാലിൽ തിരുനാൾ സന്ദേശംനൽകും. തുടർന്ന് പ്രസുദേന്തി വാഴ്ച, പ്രദക്ഷിണം, ഊട്ടുനേർച്ച ആശിർവാദം, വിതരണം എന്നിവ നടക്കും. ഒല്ലൂർ സെന്‍റ് ആന്‍റണീസ് ഫൊറാോന പള്ളി ഇടവക മധ്യസ്ഥനായ വിശുദ്ധ അന്തോണീസിന്‍റെ തിരുനാൾ ആഘോഷിച്ചു. ആഘോഷമായ ദിവ്യബലിക്ക് ഫാ. ആന്‍റണി നമ്പളത്ത് മുഖ്യകാർമികത്വംവഹിച്ചു. ഫാ. ആന്‍റണി തട്ടാശേരി സന്ദേശംനൽകി. തുടർന്ന് പ്രദക്ഷിണവും നേർച്ചപ്പായസവിതരണവും ഉണ്ടായിരുന്നു. റവ.ഡോ. പോൾ പൂവത്തിങ്കൽ നയിച്ച സംഗീതനിശയും അർണോസ് പാതിരിയെക്കുറിച്ച് റവ.ഡോ. ജോർജ് തേനംകുടം അനുസ്മരണ പ്രഭാഷണവും നടത്തി. വികാരി ഫാ. വർഗീസ് കുത്തൂർ, അസി.വികാരിമാരായ ഫാ. അഡ്വിൻ ഐനിക്കൽ, ഫാ. തേജസ് കുന്നംപിള്ളിൽ, കൈക്കാരന്മാരായ സെബി വല്ലച്ചിറക്കാരൻ, പോൾ കുണ്ടുകുളം, ആന്‍റണി ചുങ്കത്ത്, റാഫി ചെമ്മണം എന്നിവർ നേതൃത്വംനൽകി. കിള്ളിമംഗലം സെന്‍റ് ആന്‍റണീസ് പള്ളി ഊട്ടുതിരുനാൾ ആഘോഷിച്ചു. നൂറുകണക്കിന് വിശ്വാസികൾ ചടങ്ങിൽ പങ്കെടുത്തു. തൃശൂർ അതിരൂപത വികാരി ജനറാൾ മോൺ.ഫാ. ജെയിസൺ കൂനംപ്ലാക്കൽ മുഖ്യകാർമികത്വം വഹിച്ചു. ഫാ. ജോർജ് നിരപ്പുക്കാല, ഫാ. ഷിന്‍റോ മാറോക്കി സഹകർമികരായി. സോബിൻ ചാണിത്തറ, വിനിഷ് കളപ്പുര തട്ടേൽ, സുനിൽ മറ്റപ്പിള്ളി, ജോസ് കൈതകുളങ്ങര, സിബി ജോർജ്, സജി ജോസഫ്, അനൂപ് മാത്യു എന്നിവർ നേതൃത്വംനൽകി.‌ ആറ്റുപുറം സെന്‍റ് ആന്‍റണീസ് പള്ളി വിശുദ്ധ അന്തോണിസിന്‍റെ ഊട്ടുതിരുനാൾ ആഘോഷിച്ചു. തിരുനാൾ കുർബാനയ്ക്ക് അത്താണി ടിംഹാൻസ് ഡയറക്ടർ ഫാ. ജോബി കടപ്പൂരാൻ മുഖ്യകാർമി കനായി. ജൂബിലി മിഷൻ ഹോസ്പിറ്റൽ അസി.ഡയറക്ടർ ഫാ. തോമസ് പൂപ്പാടി സന്ദേശംനൽകി. പ്രദക്ഷിണത്തിനു വികാരി ഫാ. ഡെന്നീസ് മാറോക്കി കാർമികനായി. ജനറൽ കൺവീനർ സി.വി. ജോസഫ്, ട്രസ്റ്റിമാരായ കെ.ടി. സൈമൺ, ഇ.ജെ. ബെന്നി, പി.ജെ. ഡേവിഡ് തുടങ്ങിയവർ നേതൃത്വംനൽകി.

സ്വകാര്യ കെട്ടിടത്തിന്‍റെ വരാന്തയിൽ രക്തം: പോലീസ് അന്വേഷണം ആരംഭിച്ചു

അരിമ്പൂർ: കുന്നത്തങ്ങാടിയിൽ സ്വകാര്യ കെട്ടിടത്തിന്‍റെ നടവഴിയിൽ പലയിടത്തായി രക്തംകണ്ടെത്തിയത് ആശങ്കയ്ക്കിടയാക്കി. കെട്ടിടത്തിന്‍റെ 15 മീറ്ററിലധികം നീളമുള്ള വരാന്തയിലും ഗോവണിയിലുമാണ് ശനിയാഴ്ച രാവിലെ രക്തംകണ്ടത്. ഹൈടെക് മെഡിക്കൽലാബ്, കെഎസ്എഫ്ഇ കുന്നത്തങ്ങാടി ശാഖ ഓഫീസ്, തൃശൂർ താലൂക്ക് ചെത്തുതൊഴിലാളി സംഘത്തിന്‍റെ നീതി മെഡിക്കൽ സ്റ്റോർ, കമ്പ്യൂട്ടർ സെന്‍റർ തുടങ്ങിയ സ്ഥാപനങ്ങളാണ് കെട്ടിടത്തിൽ പ്രവർത്തിക്കുന്നത്. സംഭവമറിഞ്ഞ് അന്തിക്കാട് പോലീസ് പരിശോധനനടത്തി. സ്ഥാപനങ്ങളിലെ സിസിടിവി ദൃശ്യങ്ങളും പോലീസ് പരിശോധിക്കുന്നുണ്ട്. ചോരയിൽ ചവിട്ടി തെരുവുനായകൾ ഓടിയതും പോലീസിനെ കുഴയ്ക്കുന്നു. കെട്ടിടത്തിന് സമീപത്തെ പൈപ്പിൻ ചുവട്ടിലും രക്തം കണ്ടെത്തിയതോടെയാണ് നാട്ടുകാർക്ക് സംശയമേറിയത്. സിസിടിവി ദൃശ്യങ്ങൾ പരിശോധിച്ച് കൂടുതൽ വിവരങ്ങൾ ശേഖരിക്കാനാണ് പോലീസിന്‍റെ ശ്രമം.

വാടാനപ്പിള്ളിയിൽ റോഡരികിൽ സ്കൂട്ടർ കത്തിനശിച്ചു

വാടനപ്പിള്ളി: തൃശൂർ റോഡിലെ ബസ്‌ സ്റ്റോപ്പിനു എതിർവശത്തെ കെട്ടിടത്തിനു സമീപം പാർക്ക് ചെയ്തിരുന്ന സ്കൂട്ടർ കത്തിനശിച്ചു. സമീപത്ത് നിർത്തിയിട്ടിരുന്ന മറ്റൊരു സ്കൂട്ടറിനും ഭാഗികമായി തീപിടിച്ചു. ഇന്നലെ ഉച്ചയ്ക്ക് ഒരുമണിയോടെയാണ് സംഭവം. നാട്ടുകാർ വിവരമറിയിച്ചതിനെ തുടർന്ന് വാടാനപ്പിള്ളി പോലീസും നാട്ടികയിൽനിന്നു ഫയർഫോഴ്സും എത്തി. ഇതിനിടെ അതുവഴിവന്ന നാട്ടുകാർതന്നെ ബക്കറ്റിൽ വെള്ളമെത്തിച്ച് തീ കെടുത്തി. സ്കൂട്ടർ പൂർണമായി കത്തിയമർന്നു. വാഹന ഉടമയെക്കുറിച്ച് വിവരം ലഭ്യമായിട്ടില്ല, തീപ്പിടുത്തത്തിന്‍റെ കാരണവും വ്യക്തമല്ല. സുവർണ ജൂബിലി പ്രമാണിച്ച് വാടാനപ്പിള്ളിയിലെ വ്യാപാരസ്ഥാപനങ്ങൾ മുടക്കമായതിനാൽ സംഭവം നടക്കുമ്പോൾ ആരും ഉണ്ടായിരുന്നില്ല. അതുവഴി വന്നവരാണ് പോലീസിൽ വിവരം അറിയിച്ചത്.

കനത്ത മഴ, കാറ്റ്: നാ‍‍ശനഷ്ടങ്ങള്‌

വാളിപ്പാടത്ത് വ്യാപക നാശനഷ്ടം വരാക്കര: ശക്തമായ കാറ്റിലും മഴയിലും വരാക്കര വാളിപ്പാടത്ത് വ്യാപക നാശനഷ്ടം. അഞ്ച് വൈദ്യുതി പോസ്റ്റുകളും തെങ്ങും മരങ്ങളും മറിഞ്ഞുവീണു. നിർത്തിയിട്ട കാറിന് മുകളിൽ മരംവീണ് കേടുപാടുകൾ സംഭവിച്ചു.ഞായറാഴ്ച വൈകിട്ട് പത്തുമിനിറ്റോളം ആഞ്ഞുവീശിയ കാറ്റിലാണ് നാശനഷ്ടം. ആർക്കും പരിക്കില്ല. വൈദ്യുതി പോസ്റ്റുകൾ ഒടിഞ്ഞുവീണതോടെ മേഖലയിൽ വൈദ്യുതിബന്ധം നിലച്ചു. അളഗപ്പനഗർ പഞ്ചായത്തംഗം പ്രിൻസ് അരിപാലത്തുകാരന്‍റെ നേതൃത്വത്തിൽ നാട്ടുകാർചേർന്ന് റോഡിലേക്കുവീണ മരങ്ങൾ നീക്കി. കെഎസ്ഇബി അധികൃതരും സ്ഥലത്തെത്തി. വീടിന്‍റെ മേൽക്കൂര ഇടിഞ്ഞുവീണു കൈപ്പറമ്പ്: കനത്ത മഴയിലും കാറ്റിലും വീടിന്‍റെ മേൽക്കൂര ഇടിഞ്ഞുവീണു. കൈപ്പറമ്പ് പഞ്ചായത്ത് മൂന്നാംവാർഡിൽ ആറമ്പിള്ളി റോഡിൽ മനക്കാലത്ത് ശ്രീനിവാസന്‍റെ ഓടിട്ടവീടാണ് തകർന്നത്. ഇന്നലെ ഉച്ചയ്ക്ക് 12 മണിയോടെയായിരുന്നു മഴയിൽ വീടിന്‍റെ മേൽക്കൂര പൂർണമായും തകർന്നു വീണത്. അപകടസമയത്ത് വീട്ടിൽ ആളുണ്ടായിരുന്നില്ല. അതിനാൽ വലിയ അപകടം ഒഴിവായി. പഞ്ചായത്ത് അധികൃതർ സ്ഥലം സന്ദർശിച്ചു. ക്ഷേത്രത്തിലെ കൂറ്റൻ ആൽമരം കടപുഴകിവീണു പറപ്പൂർ: ഊരകം പതിയാർകുളങ്ങര ക്ഷേത്രത്തിലെ കൂറ്റൻ ആൽമരം കനത്ത കാറ്റിലും മഴയിലും കടപുഴകിവീണു. ഞായറാഴ്ച വൈകീട്ട് ആറരയ്ക്കുണ്ടായ ശക്തമായ കാറ്റിലും മഴയിലുമാണ് ആൽമരം കടപുഴകിവീണത്. ശക്തമായ മഴയുള്ളതിനാൽ ക്ഷേത്രത്തിൽ ഭക്തജനങ്ങൾ കുറവായിരുന്നു. അതുകൊണ്ട് ആർക്കും അപകടങ്ങൾ സംഭവിച്ചില്ല. ദ ുരിതാശ്വാസ ക്യാമ്പ് തുടങ്ങി ചേർപ്പ്: മഴയെ തുടർന്ന് ചേർപ്പ് പഞ്ചായത്തിലെ തെക്കുംപാടം, മുത്തുള്ളിയാൽ തോപ്പ്, ഊരകം തുടങ്ങിയ താഴ്ന്നപ്രദേശങ്ങളിലെ വെള്ളക്കെട്ടിലായ കുടുംബങ്ങൾ പടിഞ്ഞാട്ടുമുറി ജി.ജെ.ബി. സ്കൂളിലെ ദുരിതാശ്വാസ ക്യാമ്പിലെത്തി. ഏഴോളം കുടുംബങ്ങളിലെ ഇരുപത്തിനാലോളംപേരാണ് ഇന്നലെ ക്യാമ്പിലെത്തിയത്. പഞ്ചായത്ത് പ്രസിഡന്‍റ് സുജീഷ കള്ളിയത്ത്, വൈസ് പ്രസിഡന്‍റ് വി.എൻ. സുരേഷ്, അംഗങ്ങളായ സുനിത ജിനു, നെസീജ മുത്തലി എന്നിവർ ക്യാമ്പ് സന്ദർശിച്ചു.

കൂട്ടായ്മകൾ ദൈവികരഹസ്യത്തിന്‍റെ ഭൂമിയിലെ പ്രതീകങ്ങൾ: മാർ താഴത്ത്

തൃശൂർ: അതിരൂപതയിലെ എല്ലാ ഇടവകകളിലും കുടുംബകൂട്ടായ്മ പതാകദിനം ആചരിച്ചു. ചേറൂർ സെന്‍റ് ഫ്രാൻസീസ് സേവ്യർ ദേവാലയത്തിൽ പതാകയുയർത്തി ആര്‌ച്ച്ബിഷപ് മാർ ആൻഡ്രൂസ് താഴത്ത് അതിരൂപതാതല ഉദ്ഘാടനം നിർവഹിച്ചു. പിതാവും പുത്രനും പരിശുദ്ധാത്മാവും തമ്മിലുള്ള സ്നേഹക്കൂട്ടായ്മയാണ് ദൈവമെന്നും അതുകൊണ്ട് ദൈവത്തെ മാറ്റിനിർത്തിയുള്ള കൂട്ടായ്മകൾക്ക് സഭാ ജീവിതത്തിൽ പ്രസക്തിയില്ലെെന്നും ആര്‌ച്ച്ബിഷപ് പറഞ്ഞു. അതിരൂപത ഡയറക്ടർ ഫാ ഫ്രാൻസിസ് ട്വിങ്കിൾ, ലൂർദ് ഫൊറോന ആനിമേറ്ററും ചേറൂർവികാരിയുമായ ഫാ ജോൺസൺ അന്തിക്കാട്ട്, അതിരൂപത കുടുംബകൂട്ടായ്മ കേന്ദ്രസമിതി ജന.കൺവീനർ ഷിന്‍റോ മാത്യു, ജന.സെക്രട്ടറി പ്രഫ. ജോർജ് അലക്സ് എന്നിവർ സംസാരിച്ചു.

ഡിസിസി സെക്രട്ടറിക്ക് കാരണംകാണിക്കൽ നോട്ടീസ്

വടക്കാഞ്ചേരി: ഡിസിസി സെക്രട്ടറി ഉൾപ്പടെ നാലുപേർക്ക് ഡിസിസി പ്രസിഡന്‍റ് അഡ്വ. ജോസഫ് ടാജറ്റ് കാരണംകാണിക്കൽ നോട്ടീസ് നൽകി. കഴിഞ്ഞമാസംനടന്ന തലപ്പിളളി സർക്കിൾ സഹകരണ യൂണിയൻ തെരഞ്ഞെടുപ്പിൽ പാർട്ടിവിരുദ്ധ പ്രവർത്തനം നടത്തിയതിനാണ് നോട്ടീസ് നൽകിയത്. തെരഞ്ഞെടുപ്പുമായി ബന്ധപ്പെട്ട് അവസാനനിമിഷത്തിൽ യുഡിഎഫ് സ്ഥാനാർഥിയെ പിൻവലിപ്പിച്ച് സിപിഎം സ്ഥാനാർഥിയെ വിജയിപ്പിച്ച സംഭവത്തിലാണ് നോട്ടീസ്. ഡിസിസി ജനറൽസെക്രട്ടറി പി.ജെ. രാജു, കുന്നംകുളം നിയോജകമണ്ഡലം യുഡിഎഫ് കൺവീനർ അമ്പലപ്പാട്ട് മണികണ്ഠൻ, വടക്കാഞ്ചേരി ബ്ലോക്ക് കോൺഗ്രസ് സെക്രട്ടറിയും അമ്പലപ്പാട് സർവീസ് സഹകരണബാങ്ക് വൈസ് പ്രസിഡന്‍റുമായ കെ. ചന്ദ്രശേഖരൻ, മുൻ ബ്ലോക്ക് കോൺഗ്രസ് വൈസ് പ്രസിഡന്‍റ് ജോസഫ് തൈക്കാടൻ എന്നിവർക്കാണ് നോട്ടീസ് നൽകിയത്. സംഭവത്തിൽ കെപിസിസി സെക്രട്ടറി എ. പ്രസാദ്, ഡിസിസി വൈസ് പ്രസിഡന്‍റ് അഡ്വ. നിജി ജെസ്റ്റിൻ എന്നിവരുടെ അന്വേഷണ റിപ്പോർട്ടിന്‍റെ അടിസ്ഥാനത്തിലാണ് നോട്ടീസ്. മൂന്നുദിവസത്തിനകം മറുപടി നൽകണമെന്നും കത്തിൽ പറയുന്നുണ്ട്. കഴിഞ്ഞ 40 വർഷം യുഡിഎഫ് ഭരിച്ചിരുന്ന തലപ്പിള്ളി സഹകരണ യൂണിയൻ ഭരണമാണ് എൽഡിഎഫിന് ലഭിച്ചത്.

കനത്ത മഴ: കനാലുംകടലും കരകയറി; നൂറുകണക്കിനു വീടുകൾ വെള്ളക്കെട്ടിൽ

ചാവക്കാട്: മഴ ശക്തമായതോടെ ചാവക്കാട് മേഖലയിലെ താഴ്ന്നപ്രദേശങ്ങള്‍ വെള്ളക്കെട്ടിലായി. നൂറുകണക്കിനു വീടുകളാണ് രൂക്ഷമായ വെള്ളക്കെട്ടില്‍ അകപ്പെട്ടിട്ടുള്ളത്. കനോലി കനാലും മത്തിക്കായലും കരകവിഞ്ഞു. കടൽക്ഷോഭം അതിരൂക്ഷമല്ലെങ്കിലും മുനക്കക്കടവ്, വെളിച്ചെണ്ണ പടി, തൊട്ടാപ്പ് തുടങ്ങിയ സ്ഥലങ്ങളിൽ കടലാക്രമണം ഉണ്ടായി. മണൽ ഭിത്തി ഉയർത്തിയത് ചെറിയൊരു ആശ്വാസമാണ്. കനാലുകൾ കരകവിഞ്ഞ തിനാല്‍ വൻ വെള്ളക്കെട്ടാണ് അനുഭവപ്പെടുന്നത്. തെക്കഞ്ചേരി, വഞ്ചിക്കടവ്, പാലയൂര്‍, ഇരട്ടപ്പുഴ, ബ്ലാങ്ങാട് , മാട്, പുന്ന, തിരുവത്ര, പൂതിരുത്തി തുടങ്ങി പ്രദേശങ്ങൾ വലിയ വെള്ളക്കെട്ടിലാണ്. ചേറ്റുവ പുഴയിലും അറബിക്കടലിലും ജലനിരപ്പ് ഉയര്‍ന്നിരിക്കുകയാണ്. ശക്തമായ കാറ്റും നാശനഷ്ടങ്ങള്‍ വരുത്തുന്നുണ്ട്. താഴ്ന്നപ്രദേശങ്ങളിൽ വീടുകൾക്കുപുറമെ കടകള്‍ക്ക് അകത്തേക്കും വെള്ളംകയറി നാശങ്ങള്‍ സംഭവിച്ചിട്ടുണ്ട്. വെള്ളക്കെട്ടുമൂലം റോഡുകള്‍ തകര്‍ന്നതും യാത്രക്കാരെ ദുരിതത്തിലാക്കി. ദേശീയപാത ചേറ്റുവ റോ ഡ് തെക്കേ ബൈപ്പാസ് മുതല്‍ വില്യംസ്‌വരെ തകര്‍ന്ന നിലയിലാണ് വാഹനങ്ങള്‍ പലതും തീരദേശം വഴിപോകുന്നത്. ദേശീയപാത 66 സര്‍വീസ് റോഡ് പലസ്ഥലങ്ങളിലും തകര്‍ന്നനിലയിലാണ്. സര്‍വീസ് റോഡരികിലെ കാനയിലേക്കു വെള്ളം ഒഴുകിപ്പോകാതെ കെട്ടിനില്‍ക്കുകയാണ്. വെള്ളക്കെട്ടുമൂലം തകര്‍ന്ന റോഡിലെ കുഴികള്‍ കാണാതെ ഇരുചക്ര യാത്രക്കാര്‍ അടക്കമുള്ളവര്‍ അപകടത്തില്‍‌പ്പെടുകയാണ്. കാഞ്ഞാണി: കനത്ത മഴയെ തുടർന്ന് മണലൂർ പഞ്ചായത്തിൽ വ്യാപക വെള്ളക്കെട്ട്. അഞ്ചാം വാർഡിലെ വിശുദ്ധി അങ്കണവാടിയുൾപ്പടെ പരിസരത്തെ വീടുകളിൽ വെള്ളം കയറി. വാക്കാട്ട് മാധവി, ചിത്തംതോപ്പിൽ ജോൺ മോഹൻ, പനക്കപറമ്പിൽ ഉണ്ണി,കോറോട്ട് സുകുമാരൻ, രാധാകൃഷ്ണൻ കോറോട്ട്, വാക്കാട്ട് ഗോപി, തേർമഠം റൈജു, കളരിക്കൽ സുരേഷ് ബാബു, കുന്പളത്തറ ഭാനു, പച്ചാം‌പിള്ളി മനോജ്, വാക്കാട്ട് വിജയൻ എന്നിങ്ങിനെ 11 വീടുകളാണു വെള്ളക്കെട്ടിലായത്. ഈ പ്രദേശത്തുകൂടി കടന്നുപോകുന്ന ഇറിഗേഷൻ കനാൽ കരകവിഞ്ഞ് ഒഴുകുന്നതുകൊണ്ടാണ് വെള്ളക്കെട്ട് രൂക്ഷമായത്. പ്രദേശത്തുകൂടെ കടന്നുപോകുന്ന ഇറിഗേഷൻ കനാൽ ഇടിഞ്ഞാണ് ഒഴുക്കു നിലച്ചത്. ഇതിനുപുറമെ ഫലവൃക്ഷക്കൊമ്പുകളും മറ്റും വന്നടിഞ്ഞ് കനാലിന്‍റെ ആഴം കുറയുകയും ചെയ്തു. കാഞ്ഞാണി - ഗുരുവായൂർ റോഡിലൂടെ കടന്നുപോകുന്ന ഇറിഗേഷൽ കനാൽ ഒരു കിലോമീറ്റർ ദൂരത്തിൽ ശ്മശാനം‌വരെ അടിയന്തരമായി ശുചീകരിച്ച് ഒഴുക്ക് സ്ഥാപിക്കണമെന്ന് മണലൂർ പഞ്ചായത്ത് ആസൂത്രണ സമിതിയംഗം ജനാർദനൻ മണ്ണുമ്മൽ ആവശ്യപ്പെട്ടു.

മോഹന്‍റേത് കലാത്മകതയും ജനപ്രിയതയും സമന്വയിച്ച ചലച്ചിത്രങ്ങൾ: മന്ത്രി ബിന്ദു

പ്രതിഭാശാലിയായ മോഹനെ കേരളം വിസ്മരിച്ചെന്ന് കമൽ ഇരിങ്ങാലക്കുട: ചലച്ചിത്ര സംവിധായകൻ മോഹന്‍റെ അനുസ്മരണാർഥം ഇരിങ്ങാലക്കുട പൗരാവലിയും മോഹൻ ഫൗണ്ടേഷനും സംയുക്തമായി സംഘടിപ്പിച്ച ദൃശ്യമോഹനം 2015നു സമാപനം. രണ്ടു ദിവസങ്ങളിലായി സംഘടിപ്പിച്ച പരിപാടിയുടെ ഉദ്ഘാടനം ഉന്നത വിദ്യാഭ്യാസവകുപ്പ് മന്ത്രി ഡോ. ആർ. ബിന്ദു നിർവഹിച്ചു. ചടങ്ങിൽ യുവ സംവിധായകനുള്ള പ്രഥമ മോഹൻ പുരസ് കാരം ലിജോ ജോസ് പെല്ലിശേരിക്ക് മന്ത്രി ഡോ. ആർ. ബിന്ദുവും അനുപമ മോഹനും ചേർന്നു സമർപ്പിച്ചു. കലാത്മകതയും ജനപ്രിയതയും സമന്വയിപ്പിച്ച സിനിമകളായിരുന്നു മോഹന്‍റേതെന്ന് ഉദ്ഘാ ടനപ്രസംഗത്തിൽ മന്ത്രി ബിന്ദു പറഞ്ഞു. പത്മരാജനും കെ.ജി. ജോർജും ഭരതനും ആഘോഷിക്കപ്പെടുന്പോൾ അവരോടൊപ്പം സഞ്ചരിച്ച അവരോളം പ്രതിഭാശാലിയായ മോഹനെ കേരളം വിസ്മരിക്കുകയാണെന്ന് സംവിധായകൻ കമൽ അനുസ്മരണപ്രഭാഷണത്തിൽ പറഞ്ഞു. ഒരു വിട്ടുവീഴ്ചക്കും തയ്യാറാകാതെ ഒരുതരത്തിലുള്ള വെള്ളം ചേർക്കലും നടത്താതെ തന്‍റെ സിനിമകൾ ചെയ്തുപോന്ന സംവിധായകനായിരുന്നു മോഹൻ എന്നു സംവിധായകൻ സിബി മലയിൽ അഭിപ്രായപ്പെട്ടു. മലയാള ചലച്ചിത്രമേഖലയ്ക്കു പാഠപുസ്തകങ്ങൾ ആക്കാവുന്ന ഒരുപിടി ചിത്രങ്ങൾ സമ്മാനിച്ച സംവിധായകനാണു മോഹനെന്നു ചലച്ചിത്ര അക്കാദമി ചെയർമാൻ പ്രേംകുമാർ പറഞ്ഞു. യോഗത്തിൽ മുൻസിപ്പൽ ചെയർപേഴ്സണ്‍ മേരിക്കുട്ടി ജോയ് അധ്യക്ഷത വഹിച്ചു. കലാമണ്ഡലം ക്ഷേമാവതി, അനുപമ മോഹൻ, പ്രദീപ് മേനോൻ, മുൻ എംഎൽഎ കെ.യു. അരുണൻ, ജില്ലാ പഞ്ചായത്ത് വൈസ് പ്രസിഡന്‍റ് ലത ചന്ദ്രൻ, സംവിധായകരായ ലിജോ ജോസ് പെല്ലിശേരി, കെ.ബി. വേണു, പി.ജി. പ്രേംലാൽ, തിരക്കഥാകൃത്ത് അനന്തപത്മനാഭൻ, സിജി പ്രദീപ്, വെള്ളാങ്കല്ലൂർ ബ്ലോക്ക് പഞ്ചായത്ത് പ്രസിഡന്‍റ് സുധ ദിലീപ്, മുരിയാട് ഗ്രാമപഞ്ചായത്ത് പ്രസിഡന്‍റ് ജോസ് ചിറ്റിലപ്പിള്ളി, മുൻ നഗരസഭ ചെയർപേഴ്സണ്‍ സോണിയ ഗിരി, അഡ്വ. മണികണ്ഠൻ എന്നിവർ പ്രസംഗിച്ചു.

സെൽഫിയെടുക്കുന്നതിനിടയിൽ ഐഫോൺ കനാലിൽ വീണു; മുങ്ങിയെടുത്ത് അഗ്നിരക്ഷാസേന

അരിമ്പൂർ: സെൽഫിയെടുക്കുന്നതിനിടയിൽ അബദ്ധത്തിൽ ഇറിഗേഷൻ കനാലിൽ വീണ ഒന്നേകാൽലക്ഷം രൂപ വിലവരുന്ന പുതിയ മൊബൈൽ ഫോൺ അഗ്നിരക്ഷാ സേനാംഗങ്ങൾ മുങ്ങിയെടുത്തു നൽകി. മനക്കൊടി പുള്ള് ടൂറിസം പ്രദേശത്ത് എത്തി സെൽഫിയെടുക്കുന്നതിനിടയിൽ ചേർപ്പ് സ്വദേശി ഇ.പി. കൃഷ്ണയുടെ മൊബൈൽ ഫോണാണ് വെള്ളത്തിൽ വീണത്. ശനിയാഴ്ചയാണ് കൃഷ്ണ ഫോൺ വാങ്ങിയത്. ഇന്നലെ സെൽഫി എടുക്കുന്നതിനിടയിൽ കനാലിൽ വീഴുകയായിരുന്നു. ഫയർഫോഴ്സ് തൃശൂർ ഡിവിഷനിൽ നിന്ന് എത്തിയ സംഘം ഓക്സിജൻ സിലിണ്ടർ ഉൾപ്പെടെയുള്ള സംവിധാനങ്ങൾ ഉപയോഗിച്ച് രണ്ടു മണിക്കൂർ പ്രയത്നിച്ചാണ് ഫോൺ കണ്ടെടുത്തത്.

പ്രോലൈഫ് കാരുണ്യപ്രവർത്തകസംഗമം നടത്തി

തൃശൂർ: അതിരൂപത ജോണ്‍പോൾ പ്രോലൈഫ് സമിതിയുടെ നേ തൃത്വത്തിൽ ജീവകാരുണ്യ പ്രവർത്തനങ്ങൾ നടത്തുന്ന സ്ഥാ പന അധികാരികളുടെയും പ്രവർത്തകരുടെയും സംഗമം അതിരൂപത ഫാമിലി അപ്പസ്തൊലേറ്റ് സെന്‍ററിൽ നടത്തി. ജെജെ ആക്റ്റിലെ പല നിബന്ധനകളും നിസ്വാർഥമായി സേവനം അനുഷ്ഠിക്കുന്നപല ജീവകാരുണ്യസ്ഥാപനങ്ങൾക്കും ബു ദ്ധിമുട്ടുണ്ടാക്കുന്നവയാണെന്നും സർക്കാർ ഇക്കാര്യത്തിൽ ശ്രദ്ധ‌ ചെലുത്തണമെന്നും പരിപാടി ഉദ്ഘാടനം ചെയ്തു നടത്തിയ പ്രസംഗത്തിൽ മാർ ടോണി നീലങ്കാവിൽ അഭിപ്രായപ്പെട്ടു. പ്രോലൈഫ് സമിതി പ്രസിഡന്‍റ് ജെയിംസ് ആഴ്ചങ്ങാടൻ അധ്യക്ഷത വഹിച്ചു. കേരള സംസ്ഥാന ഓർഫനേജ് കണ്‍ട്രോൾ ബോർഡ് മെന്പറും കെ‌സിബിസി കെയർ ഹോം ആൻഡ് സ്പെഷൽ സ്കൂൾസ് ഡയറക്ടറുമായ ഫാ. ലിജൊ ചിറ്റിലപ്പിള്ളി അനുഭവങ്ങൾ പങ്കുവച്ചു. തുടർന്ന് വിവിധ സ്ഥാപനങ്ങളിൽ നിന്നും പങ്കെടുത്ത പ്രതിനിധികൾഅവരവരുടെസ്ഥാപനങ്ങളെക്കുറിച്ചും ശുശ്രൂഷകളെക്കുറിച്ചും വിശദീകരിച്ചു. ഡയറക്ടർ ഫാ. ഫ്രാൻസിസ് ട്വിങ്കിൾ വാഴപ്പിള്ളി സ്വാഗതവും സമിതി വൈസ് പ്രസിഡന്‍റ് രാജൻആന്‍റണി നന്ദിയും പറഞ്ഞു. പ്രിൻസ് കരേക്കാട്ടിൽ, എം. എ. വർഗീസ്, ഷീബാ ബാബു, ശോഭ ജോണ്‍സണ്‍, സ ണ്ണി തുടങ്ങിയവർ നേതൃത്വം നൽകി.

ഗുണ്ടകൾക്കെതിരായ നടപടി: കുതിച്ച് റൂറൽ പോലീസ്

തൃശൂർ: മയക്കുമരുന്നുവേട്ടയിലും ഗുണ്ടകൾക്കെതിരായ നടപടിയിലും അടിയന്തരഘടത്തിലെ പോലീസ് സേവനത്തിലും തൃശൂർ റൂറൽ പോലീസിന്‍റെ കുതിപ്പ്. ഓപ്പറേഷൻ ഗ്രേ ഹണ്ടിന്‍റെ ഭാഗമായി 15 ദിവസത്തിനിടെ 283 പിടികിട്ടാപ്പുള്ളികളെ അറസ്റ്റ് ചെയ്തു. മയക്കുമരുന്നു നിരോധനനിയമപ്രകാരം നാലുപേരെ കരുതൽ തടങ്കലിലുമാക്കി. ആകെ 9663 പേരെ പരിശോധിച്ചു. 921 പേരെ അറസ്റ്റ് ചെയ്തു. 162.09 കിലോ കഞ്ചാവ്, 210.07 ഗ്രാം എംഡിഎംഎ, 30 ഗ്രാം കഞ്ചാവുമിഠായി, 3.42 ഗ്രാം ഹെറോയിൻ, 17.93 ഗ്രാം ഹാഷിഷ് ഓയിൽ, ഒരു എൽഎസ്ഡി എന്നിവയാണു പിടികൂടിയത്. ഗുണ്ടകൾക്കെതിരായ ഓപ്പറേഷൻ കാപ്പ പ്രകാരം ആറുമാസത്തിനിടെ 97 പേർക്കെതിരേ നടപടിയെടുത്തു. 40 പേരെ ജയിലിലാക്കി. 57 പേരെ നാടുകടത്തി. അടിയന്തരഘട്ടത്തിലെ സേവനങ്ങൾക്കായി ഏർപ്പെടുത്തിയ 112 ഹെൽപ് ലൈൻ നന്പരിൽ ബന്ധപ്പെട്ടവർക്ക് ഉടനടി സേവനമെത്തിക്കാൻ റൂറൽ പോലീസിനു കഴിഞ്ഞു. ഒൗട്ട്ഗോയിംഗ് സർവീസുകൾ ഇല്ലാത്ത മൊബൈൽ നന്പരിൽനിന്നുപോലും സേവനങ്ങൾക്കായി വിളിക്കാൻ കഴിയും. പോലീസിന്‍റെ ഒൗദ്യോഗിക ആപ്ലിക്കേഷനായ പോൽ ആപ്പിലുള്ള എസ്ഒഎസ് ബട്ടണ്‍വഴിയും ഈ സേവനം ലഭ്യമാകും. റൂറൽ പോലീസ് പരിധിയിൽ വിവിധ കേസുകളിൽ ഹാജരാകാതെ മുങ്ങിനടക്കുന്ന 283 പ്രതികളെയും പിടികൂടി. 20 പിടികിട്ടാപ്പുള്ളികളെയും ജാമ്യമില്ലാ വാറന്‍റുള്ള ഏഴു പ്രതികളെയും മറ്റു കേസുകളിൽ മുങ്ങിനടന്ന 256 പ്രതികളും ഉൾപ്പെടെയാണിത്. കയ്പമംഗലം സ്റ്റേഷൻ പരിധിയിൽ 38 പേരെ പിടികൂടി. ഇരിങ്ങാലക്കുട- 43, കാട്ടൂർ- 11, ആളൂർ-10, അന്തിക്കാട്- 5, അതിരപ്പിള്ളി-11, ചാലക്കുടി- 16, കൊടകര- ആറ്, ചർപ്പ് 26, വരന്തരപ്പിള്ളി- ഏഴ്, വെള്ളിക്കുളങ്ങര- നാല്, കൊരട്ടി- 18, മാള- 22, വാടാനപ്പിള്ളി- ആറ്, വലപ്പാട്- 10, പുതുക്കാട്- 15, കൊടുങ്ങല്ലൂർ- 21, മതിലകം- 14 എന്നിങ്ങനെയാണു മറ്റു സ്റ്റേഷൻ പരിധികളിലെ അറസ്റ്റ്. വിവിധ ഡിവൈഎസ്പിമാരുടെയും ഇൻസ്പെക്ടർമാരുടെയും നേതൃത്വത്തിലാണു നടപടികൾ ഏകോപിപ്പിച്ചത്. സംസ്ഥാനത്ത് ഏറ്റവുംകൂടുതൽ പാസ്പോർട്ട് വെരിഫിക്കേഷൻ പൂർത്തിയാക്കുന്ന പോലീസ് ജില്ലയും തൃശൂർ റൂറലാണ്.

കൊടകര സഹൃദയ എൻജിനീയറിംഗ് കോളജിൽ ബിരുദദാനം നടത്തി

കൊടകര: സഹൃദയ എൻജിനീയറിംഗ് കോളജിൽ ഈ വർഷത്തെ ബിരുദദാനച്ചടങ്ങ് കേരള വെറ്ററിനറി ആൻഡ് അനിമൽ സയൻസസ് സർവകലാശാല വൈസ് ചാൻസലർ ഡോ. കെ.എസ്. അനിൽ ഉദ് ഘാടനം ചെയ്തു. ഇരിങ്ങാലക്കുട രൂപത ബിഷപ് മാർ പോളി കണ്ണൂക്കാടൻ അധ്യക്ഷത വഹിച്ചു. കോളജ് മാനേജർ മോണ്‍. വിൽസണ്‍ ഈരത്തറ, എക്സിക്യൂട്ടീവ് ഡയറക്ടർ റവ.ഡോ. ആന്‍റോ ചുങ്കത്ത്, ഡയറക്ടർ ഡോ. ലിയോ ണ്‍ ഇട്ടിയച്ചൻ, ജോയിന്‍റ് ഡയറക്ടർ ഡോ. സുധ ജോർജ് വളവി, പ്രിൻസിപ്പൽ ഡോ. എസ്. രാംകുമാർ, വൈസ് പ്രിൻസിപ്പൽ ഡോ. ഫിന്‍റോ റാഫേൽ എന്നിർ പ്രസംഗിച്ചു. വകുപ്പുതലവന്മാർ എന്നിവർ നേതൃത്വം നൽകി. ബിടെക്, എംടെക്, പിഎച്ച്ഡി എന്നിവ പൂർത്തിയാക്കിയ 353 വിദ്യാർഥികൾക്കാണ് ബിരുദദാനം നടത്തിയത്. ഇതിൽ 345 പേർ ബിടെക്, ഏഴുപേർ എംടെക്, ഒരു വിദ്യാർഥി പിഎച്ച്ഡിയാണ് കരസ്ഥമാക്കി യിരിക്കുന്നത്. വിദ്യാർഥികളെ പ്രതിനിധീകരിച്ച് ആകർഷ ഡേവിസ് അനുഭവങ്ങൾ പങ്കുവച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]