ADVERTISEMENT

ADVERTISEMENT

സെന്‍റ് ജെയിംസ് മെഡിക്കല്‍ അക്കാഡമിയിൽ ബിരുദദാന ചടങ്ങ്

ചാലക്കുടി: സെന്‍റ് ജെയിംസ് കോളജ് ഓഫ് ഫാർമസ്യൂട്ടിക്കൽ സയൻസസിന്‍റെയും സെന്‍റ് ജെയിംസ് കോളജ് ഓഫ് നഴ്സിംഗിന്‍റെയും സംയുക്താഭിമുഖ്യത്തിൽ സെന്‍റ് ജെയിംസ് മെഡിക്കൽ അക്കാഡമിയിൽ ബിരുദദാനച്ചടങ്ങ് സംഘടിപ്പിച്ചു.

ഇരിങ്ങാലക്കുട ബിഷപ് മാർ പോളി കണ്ണൂക്കാടൻ ഉദ്ഘാടനം ചെയ്തു. രൂപത വികാരി ജനറാൾ മോണ്‍. ജോസ് മാളിയേക്കൽ അധ്യക്ഷത വഹിച്ചു. ഡോ. പി.ജെ. മേഴ്സി, ഡോ. ആർ.എസ്. രാജശ്രീ എന്നിവർ മുഖ്യാതിഥികളായിരുന്നു.

സെന്‍റ് ജെയിംസ് കോളജ് ഓഫ് നഴ്സിംഗ് പ്രിൻസിപ്പൽ ഡോ. സിസ്റ്റർ ജിജിമോൾ മാത്യു, സെന്‍റ് ജെയിംസ് കോളജ് ഓഫ് ഫാർമസ്യൂട്ടിക്കൽ സയൻസസ് പ്രിൻസിപ്പൽ ഡോ. കെ. കൃഷ്ണകുമാർ എന്നിവർ വിദ്യാർഥികൾക്കു പ്രതിജ്ഞ ചൊല്ലിക്കൊടുത്തു. സെന്‍റ് ജെയിംസ് മെഡിക്കൽ അക്കാഡമി ഡയറക്ടർ റവ. ഡോ. ആന്‍റു ആലപ്പാടൻ, സെന്‍റ് ജെയിംസ് മെഡിക്കൽ അക്കാദമി അസോ. ഡയറക്ടർ ഫാ. സോജോ കണ്ണന്പുഴ എന്നിവർ അവാർഡുകൾ വിതരണംചെയ്തു. വൈസ് പ്രിൻസിപ്പൽ ഡോ. ക്രിസ്റ്റി ആന്‍റണി നന്ദി പറഞ്ഞു.

ADVERTISEMENT

മസ്തിഷ്കത്തിൽ നീർക്കെട്ട്: ആരവിനു വേണം സുമനസുകളുടെ സഹായം

ഇരിങ്ങാലക്കുട: മസ്തിഷ്കത്തിൽ നീർക്കെട്ടുമൂലം ഗുരുതരാവസ്ഥയിൽ ചികിത്സയിൽ കഴിയുന്ന ഇരിങ്ങാലക്കുട സ്വദേശിയായ പത്തുവയസുകാരൻ സുമനസുകളുടെസഹായംതേടുന്നു. മാപ്രാണം മാടായിക്കോണം സ്വദേശി ജോബീഷിന്‍റെ മകനായ ആരവാണ് ചികിത്സാസഹായം തേടുന്നത്. ആരവ് ദിവസങ്ങളായി എറണാകുളത്തെ സ്വകാര്യ ആശുപത്രിയിൽ വെന്‍റിലേറ്ററിൽ ചികിത്സയിലാണ്. ചികിത്സയ്ക്കായി ഇതിനകം 10 ലക്ഷത്തിലധികം രൂപ കുടുംബം ചിലവഴിച്ചു. ഇനിയും ലക്ഷങ്ങൾ വേണ്ടിവരുമെന്നാണ് ആശുപത്രി അധികൃതർ കുടുംബത്തെ അറിയിച്ചിരിക്കുന്നത്. ആരവിന്‍റെ നിർധനകുടുംബത്തിന് ഈ തുക താങ്ങാവുന്നതിലും അപ്പുറമാണ്. ആരവിന് സാധാരണജീവിതത്തിലേക്കു തിരികെയെത്താൻ സുമനസുകളുടെ സഹായം അനിവാര്യമാണ്. സഹായം അയക്കക്കേണ്ട വിലാസം: സൗത്ത് ഇന്ത്യൻ ബാങ്ക്, പാലാരിവട്ടം, എക്കൗണ്ട്: 022805 3000015492. ഐഎഫ്എസ് സി നന്പർ: SIBL0000228. ഗൂഗിൾപേ: 9895341461

ദുരിതപ്പെയ്ത്ത്

നാടെങ്ങും മഴ കനത്തതോടെ ജനം ദുരിതത്തിലായി. പലയിടത്തും താഴ്ന്ന പ്രദേശങ്ങൾ വെള്ളത്തിനടിയിലായി. ചില വീടുകളും റോഡുകളും വെള്ളത്തിലായി. ഡാമുകൾ ഇതിനകം നിറഞ്ഞുതുടങ്ങിയതോടെ ജനം ആശങ്കയിലാണ്. കൊരട്ടി: പുഴയുടെ സാമീപ്യമില്ലാത്ത പഞ്ചായത്ത് ആണെങ്കിലും കൊരട്ടിയുടെ താഴ്ന്ന പ്രദേശങ്ങൾ വെള്ളക്കെട്ടിലാണ്. പാടശേഖരങ്ങളിലെല്ലാം വെള്ളംനിറഞ്ഞു. ആറാംതുരുത്ത് - കുലയിടം റോഡിലും ക്രിമറ്റോറിയം റോഡിലും ഇരുചക്രവാഹനങ്ങൾ കടന്നുപോകാൻ കഴിയാത്തവിധം വെള്ളം കയറി. അടിപ്പാതനിർമാണം നടക്കുന്ന ചിറങ്ങര, മുരിങ്ങൂർ, കൊരട്ടി ഭാഗങ്ങളിൽ ബദൽ റോഡുകളിൽ കുഴികൾ നിറഞ്ഞതിനാൽ യാത്ര ദുരിതപൂർണമാണ്. ഇതോടെ മഴക്കൊപ്പം ഗതാഗതക്കുരുക്കിലുംപെട്ട് വലയുകയാണ് ജനം. കാടുകുറ്റി: ചാലക്കുടി പുഴയോടുചേർന്നു കിടക്കുന്ന കാടുകുറ്റി പഞ്ചായത്തിന്‍റെ വിവിധ ഭാഗങ്ങൾ വെള്ളക്കെട്ടിലാണ്. ചാത്തൻചാൽ പാടശേഖരവും കാതിക്കുടം വളവനങ്ങാടി റോഡും വെള്ളത്തിലാണ്. കുലയിടം - വെസ്റ്റ് കൊരട്ടി റോഡിലും വെള്ളം കയറി. പലയിടങ്ങളിലും കൃഷിനാശം സംഭവിച്ചിട്ടുണ്ട്. വാളൂർ, കുലയിടം ഭാഗങ്ങളിലെ പാടങ്ങളിലും വെള്ളം കയറി. ചെറുവാളൂർ കരിപ്പാശേരി അശോകൻ, സുബ്രൻ എന്നിവരുടെ വീടുകളിൽ വെള്ളംകയറി. അന്നനാട് ചാത്തുംമൂല, വൈന്തല കുന്നിപ്പറന്പ് റോഡിലും വെള്ളം കയറിയിട്ടുണ്ട്. സന്പാളൂർ ഞർളക്കടവ് പാലത്തിനുസമീപം പുഴയോരം ഇടിഞ്ഞ് ജാതിമരം അടക്കം പുഴയിലേക്കു കടപുഴകി. അന്നമനട: ചാലക്കുടിപ്പുഴയുടെ ഭാഗമായ അന്നമനട സൗഹൃദതീരം വെള്ളത്തിലാണ്. കൂടാതെ വളൂർ - വെസ്റ്റ് കൊരട്ടി റോഡിലെ നടവരന്പ് ഭാഗവും വെള്ളത്തിലായി. ഇവിടെ ഗതാഗതം നിരോധിച്ചിട്ടുണ്ട്. പ്രദേശത്തെ മൂന്നു വീടുകളിൽ വെള്ളംകയറി. നിലവിൽ ദുരിതാശ്വാസ ക്യാന്പുകളൊന്നും തുറന്നിട്ടില്ല. രാത്രിയോടെ പുഴയിലെ ജലനിരപ്പ് ഗണ്യമായി കുറഞ്ഞിട്ടുണ്ട്. മേലൂർ: ശാന്തിപുരം ഡിവൈൻ ഉന്നതിയിലെ വീട്ടുപറന്പുകളിലും എരുമപ്പാടം ഉന്നതിയിലും താമസിക്കുന്ന ഒട്ടേറെ സാധാരണക്കാരുടെ വീടുകളും വെള്ളത്തിലാണ്. എരുമപ്പാടം ഉന്നതിയിൽനിന്നു മാത്രം 43 കുടുംബങ്ങളെ ഡിവൈൻ ധ്യാനകേന്ദ്രം മലയാളം സെക്ഷനിലേക്കു മാറ്റിപാർപ്പിച്ചു. കുന്നപ്പിള്ളിയിലെ രണ്ടു വീടുകളും വെള്ളക്കെട്ടുഭീഷണി നേരിടുന്നുണ്ട്. ചാലക്കുടിപ്പുഴയിൽ ജലനിരപ്പ് ഉയരുന്നു ചാലക്കുടി: കനത്ത മഴയെത്തുടർന്ന് ചാലക്കുടി പുഴയിലെ ജലനിരപ്പ് ഉയർന്നതോടെ താഴ്ന്നപ്രദേശങ്ങളിൽ വെള്ളം കയറിത്തുടങ്ങി. ചാലക്കുടി പുഴ നിറഞ്ഞൊഴുകുകയാണ്. കമ്മളം റോഡ്, തുരുത്തിപറന്പ് കാരൂർ വെള്ളാഞ്ചിറ റോഡ്, ചാലക്കുടി കുട്ടാടൻ പാടം, ഡിവൈൻ നഗറിലെ വീടുകളിലേക്കും വെള്ളംകയറി. ഇവിടെ താമസിക്കുന്നവരെ ഡിവൈൻ ധ്യാനകേന്ദ്രത്തിലേക്കു മാറ്റി. ചാലക്കുടിപ്പുഴയിൽ ഇന്നലെ വൈകിട്ട് ജലനിരപ്പ് 6.26 മീറ്ററായി ഉയർന്നു. 8.10 മീറ്ററാണ് അപകടനിരപ്പ്. പെരിങ്ങൽകുത്ത് ഡാമിന്‍റെ ജലനിരപ്പ് ഇപ്പോൾ 420.50 മീറ്ററാണ്. 424 മീറ്ററാണ് പരിധി. മഴക്കാലം ആരംഭിച്ചതോടെ ഡാമിന്‍റെ ഷട്ടർ അല്പം തുറന്നുവച്ചിരിക്കയാണ്. ചാലക്കുടി പാലത്തിനു സമീപം ലൈവ് ക്ലബ്ബിന്‍റെ പുഴയോരം ഇടിഞ്ഞുവീണു. ചാലക്കുടി സതേണ്‍ കോളജിനുസമീപമുള്ള റെയിൽവെ അടിപ്പാതയിൽ വെള്ളം ഉയർന്നു. പടിഞ്ഞാറെ ചാലക്കുടി ഭാഗത്തേക്കുള്ള ഗതാഗതം സ്തംഭിച്ചു.

ലഹരിക്കെതിരേ അണിനിരന്ന് കോട്ടപ്പുറം രൂപത

കൊടുങ്ങല്ലൂർ: കെസിബിസിയുടെ നേതൃത്വത്തിൽ കോട്ടപ്പുറം രൂപതയ്ക്കു കീഴിലെ എല്ലാ വിദ്യാലയങ്ങളിലും മതബോധനക്ലാസുകളിലും നടത്തുന്ന രാസലഹരിവിരുദ്ധ പ്രവർത്തനങ്ങളുടെ രൂപതാതല ഉദ്ഘാടനം ബിഷപ് ഡോ. അംബ്രോസ് പുത്തൻവീട്ടിൽ നിർവഹിച്ചു. മാള പള്ളിപ്പുറം സെന്‍റ് ആന്‍റണീസ് സ്കൂളിൽ നടന്ന ചടങ്ങിനു കോട്ടപ്പുറം രൂപത ലഹരിവിരുദ്ധസമിതി ഡയറക്ടർ റവ. ഫാ. ബിജു തേങ്ങാപ്പുരയ്ക്കൽ അധ്യക്ഷത വഹിച്ചു. പൊയ്യ ഗ്രാമപഞ്ചായത്ത് പ്രസിഡന്‍റ് ഡെയ്സി തോമസ്, കോട്ടപ്പുറം എഡ്യുക്കേഷണൽ ഏജൻസി ജനറൽ മാനേജർ റവ. ഫാ. സിബിൻ കല്ലറക്കൽ, സ്കൂൾ മാനേജർ റവ. ഫാ. പോൾ തോമസ് കളത്തിൽ, ഒഎസ്എ പ്രസിഡന്‍റ് ബൈജു പാറേക്കാടൻ, പിടിഎ പ്രതിനിധി പ്രസിജ ഷൈജു എന്നിവർ ആശംസകളർപ്പിച്ചു. സ്കൗട്ട് ട്രൂപ്പ് അംഗങ്ങൾ ലഹരിക്കെതിരേ ഫ്ളാഷ് മോബ് അവതരിപ്പിച്ചു. ലഹരിവിരുദ്ധപ്രതിജ്ഞ ചൊല്ലി. കെസിബിസി ലഹരിവിരുദ്ധസമിതി മധ്യമേഖല സെക്രട്ടറി സിജോ ഇഞ്ചോടിക്കാരൻ രക്ഷിതാക്കൾക്കായി ലഹരിവിരുദ്ധ സെമിനാർ നടത്തി. ലഹരിവിരുദ്ധസമിതി പ്രസിഡന്‍റ് സേവ്യർ പടിയിൽ നന്ദി പറഞ്ഞു. രൂപതയിലെ എല്ലാ സ്കൂളിലും ലഹരിവിരുദ്ധപ്രതിജ്ഞ ചൊല്ലി രാസലഹരിക്കെതിരേ പ്രവർത്തിക്കാൻ കുട്ടികൾ സന്നദ്ധരാണ് എന്നു പ്രഖ്യാപിച്ചു. വരുംദിനങ്ങളിൽ രൂപതയിലെ എല്ലാ സ്കൂളിലും ലഹരിവിരുദ്ധ ക്ലാസുകൾ സംഘടിപ്പിക്കും.

അടിയന്തരനടപടി വേണമെന്ന് പിടിഎ; ഇല്ലെങ്കിൽ സമരം

കയ്പമംഗലം: എടത്തിരുത്തി പഞ്ചായത്തിലെ കാലവർഷക്കെടുതിയിൽ ദുരിതമനുഭവിക്കുന്നവർക്കായി ചാമക്കാല ഗവ. മാപ്പിള ഹയർ സെക്കൻഡറി സ്കൂളിൽ ഒരാഴ്ചയായി തുടരുന്ന ദുരിതാശ്വാസക്യാന്പ് മൂലം അധ്യയനം മുടങ്ങുന്നതിനെതിരേ സ്കൂൾ പിടിഎ കമ്മിറ്റി രംഗത്ത്. ഇതു സംബന്ധിച്ച് പിടിഎയുടെ നേതൃത്വത്തിൽ പൂർവവിദ്യാർഥികൾ, അധ്യാപകർ, രാഷ്ട്രീയകക്ഷിനേതാക്കൾ, നാട്ടുകാർ എന്നിവരുടെ അടിയന്തരയോഗം വിളിച്ചുചേർത്തു. പഞ്ചായത്തിന്‍റെ വിവിധ പ്രദേശങ്ങളിൽ കൂടുതൽ സൗകര്യങ്ങളുള്ള വിദ്യാഭ്യാസസ്ഥാപനങ്ങളും പഞ്ചായത്ത് കമ്യൂണിറ്റി ഹാളും ഉണ്ടെന്നിരിക്കെ സ്ഥലപരിമിതിമൂലം പ്രയാസമനുഭവിക്കുന്ന ചാമക്കാല സ്കൂളിനെ ക്യാന്പിനായി തെരഞ്ഞെടുത്തതു നീതീകരിക്കാനാവില്ലെന്നു യോഗം വിലയിരുത്തി. 115ലധികം പേരാണു നിലവിൽ ക്യാന്പിൽ കഴിയുന്നത്. സ്കൂൾ തുറന്ന് ഒരു മാസം തികയുംമുന്പേ അധ്യയനം മുടങ്ങിയതുമൂലം വിദ്യാർഥികളും അധ്യാപകരും രക്ഷിതാക്കളും ആശങ്കയിലാണ്. വൻതോതിൽ മാലിന്യനിക്ഷേപമുണ്ടായിട്ടുണ്ട്. ഇതു നീക്കം ചെയ്യാൻ അധികൃതർ നടപടിയെടുത്തിട്ടില്ല. സ്കൂൾ അധികൃതരും വാർഡ് മെന്പറും ഇക്കാര്യങ്ങൾ പഞ്ചായത്തധികൃതരെ നിരവധിതവണ ബോധിപ്പിച്ചിട്ടും നടപടിയുണ്ടായില്ലെന്ന് യോഗം ആരോപിച്ചു. വിഷയത്തിൽ അടിയന്തര നടപടിയില്ലെങ്കിൽ പ്രത്യക്ഷ സമരപരിപാടികളുമായി മുന്നോട്ടുനീങ്ങുമെന്ന് യോഗം മുന്നറിയിപ്പ് നൽകി. ജില്ലാ പഞ്ചായത്ത്, ഗ്രാമപഞ്ചായത്ത്, ബന്ധപ്പെട്ട മറ്റു സർക്കാർ വകുപ്പുകൾ എന്നിവർക്ക് നിവേദനം നൽകാനും തീരുമാനമായി. പിടിഎ പ്രസിഡന്‍റ് സി.ബി. അബ്ദുസമദ് അധ്യക്ഷത വഹിച്ചു. പ്രിൻസിപ്പൽ രഞ്ജി ടി. പരമേശ്വരൻ, പ്രധാനധ്യാപകൻ എം.രാജേഷ്, വാർഡ് മെന്പർ കെ.എസ്. അനിൽകുമാർ, വിദ്യാലയ സംരക്ഷണസമിതി പ്രസിഡന്‍റ് പി.കെ. ഹംസ, ഒസാക്സ് പ്രസിഡന്‍റ്എം.സി.എം.താജുദ്ധീൻ, വികസനസമിതി കണ്‍വീനർ പ്രഫുല്ലചന്ദ്രൻ, എംപിടിഎ ഭാരവാഹികൾ, വിവിധ രാഷ്ട്രീയകക്ഷിനേതാക്കൾ തുടങ്ങിയവർ പ്രസംഗിച്ചു.

ആതിരയ്ക്കും ആകാശിനും സ്വപ്നസാക്ഷാത്കാരം

ഇരിങ്ങാലക്കുട: രോഗബാധിതരായി അച്ഛനമ്മമാർ മരണപ്പെട്ട പടിയൂർ പഞ്ചായത്തിലെ എടതിരിഞ്ഞി പയറ്റില്ലംപറന്പ് വീട്ടിൽ ആതിരയ്ക്കും ആകാശിനും ഇതു സ്വപ്നസാക്ഷാത്കാരം. കാർഷികവികസന കർഷകക്ഷേമവകുപ്പിന്‍റെ വൈഗ ടിക്കറ്റ് വില്പനയിലൂടെ സമാഹരിച്ച തുക ഉപയോഗിച്ച് ഇവർക്കായി നിർമിച്ച വീടിന്‍റെ താക്കോൽദാനം ഉന്നത വിദ്യാഭ്യാസ സാമൂഹികനീതിമന്ത്രി ഡോ. ആർ. ബിന്ദു നിർവഹിച്ചു. 2019-20 വർഷത്തിൽ സംസ്ഥാന കൃഷിവകുപ്പ് തൃശൂരിൽ വൈഗ എന്ന പേരിൽ അന്താരാഷ്ട്ര ശില്പശാലയും കാർഷികോത്പന്നവിപണനവും നടത്തിയിരുന്നു. ഈ പരിപാടിയുടെ ഭാഗമായി ടിക്കറ്റ് വില്പനയിലൂടെ സമാഹരിച്ച തുക ഉപയോഗിച്ച് ജില്ലയിലെ ഭവനരഹിതരായ നാലുപേർക്ക് ഒരു വീടിന് 5.70 ലക്ഷം രൂപ കണക്കാക്കി അനുവദിച്ചിരുന്നു. ആതിരയുടെയും ആകാശിന്‍റെയും മാതാപിതാക്കളായ ബാലൻ 2015-ലും ജയന്തി 2019-ലുമാണു രോഗബാധിതരായി മരണപ്പെട്ടത്. സ്വന്തമായി ഭൂമിയോ വീടോ ഇല്ലാതിരുന്ന ആതിരയും ആകാശും ബന്ധുമിത്രാദികളുടെ സഹായത്തോടെ വിവിധ സ്ഥലങ്ങളിൽ വാടകയ്ക്കു താമസിച്ചുവരികയായിരുന്നു. കാറളം പഞ്ചായത്തിലെ എട്ടാം വാർഡിൽ ഇവർക്കായി നിർമിച്ച വീടിന്‍റെ താക്കോൽദാനമാണ് മുൻകൃഷിമന്ത്രി വി.എസ്. സുനിൽകുമാറിന്‍റെ സാന്നിധ്യത്തിൽ മന്ത്രി ഡോ. ആർ. ബിന്ദു നിർവഹിച്ചത്. കിഴുത്താണി ഗ്രാമീണ വായനശാലയിൽ നടന്ന ചടങ്ങിൽ കാറളം പഞ്ചായത്ത് പ്രസിഡന്‍റ് ബിന്ദു പ്രദീപ് അധ്യക്ഷത വഹിച്ചു. ഇരിങ്ങാലക്കുട ബ്ലോക്ക് പഞ്ചായത്ത് പ്രസിഡന്‍റ് ലളിത ബാലൻ, ജില്ലാ പഞ്ചായത്തംഗം ഷീല അജയഘോഷ്, ഇരിങ്ങാലക്കുട ബ്ലോക്ക് പഞ്ചായത്ത് വൈസ് പ്രസിഡന്‍റ് കെ.എസ്. രമേഷ്, വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ അന്പിളി റെനിൽ തുടങ്ങിയവർ പങ്കെടുത്തു.

അപകടക്കെണിയുണ്ട്, സൂക്ഷിക്കുക

ഇരിങ്ങാലക്കുട: പണിയുന്നതു റോഡാണെങ്കിലും പണികിട്ടുന്നതു ജനങ്ങൾക്കാണ്. ഇതാണ് ഇരിങ്ങാലക്കുട - തൃശൂർ സംസ്ഥാനപാതയിലെ ജനങ്ങളുടെ അവസ്ഥ. റോഡുപണി ഇഴഞ്ഞുനീങ്ങുന്നത് നാട്ടുകാരെയും യാത്രക്കാരെയും കുറച്ചൊന്നുമല്ല ബുദ്ധിമുട്ടിക്കുന്നത്. ഇടയ്ക്കിടെ പെയ്യുന്ന മഴയും ജനങ്ങളുടെ യാത്ര ദുസഹമാക്കുന്നു. കനത്ത മഴയെത്തുടർന്ന് റോഡുനിർമാണം പാതിവഴിയിലായതോടെ പലയിടത്തും അപകടക്കെണിയൊരുങ്ങി. റോഡരികിലെ കാനകളുടെ നിർമാണവും പാതിവഴിയിലാണ്. കാനകൾക്കായി റോഡരികിൽ വന്പൻ കുഴികൾ തീർത്തതല്ലാതെ അവയ്ക്ക് ബാരിക്കേഡുകളോ ആവശ്യത്തിന് മുന്നറിയിപ്പ് ബോഡുകളോ സ്ഥാപിച്ചിട്ടില്ല. കന്പികൾ പുറത്തേക്കു തള്ളിനിൽക്കുന്നതും അപകടകരമാണ്. രാത്രിസമയത്ത് പലയിടത്തും വെളിച്ചക്കുറവുമുണ്ട്. ആഴത്തിൽ നിർമിച്ച കാനകളിൽ വെള്ളം കെട്ടിനിൽക്കുകയാണ്. ഇരിങ്ങാലക്കുട കാട്ടുങ്ങചിറയിൽ പെട്രോൾപന്പിനു മുന്നിലെ കാനനിർമാണം പാതിവഴിയിൽ നിർത്തിവച്ചതുമൂലം വിദ്യാർഥികളടക്കം അപകടഭീഷണിയിലാണ്. ക്രൈസ്റ്റ് വിദ്യാനികേതൻ, ക്രൈസ്റ്റ് കോളജ്, എസ്എൻ സ്കൂൾ എന്നിവടങ്ങളിലേക്കുള്ള വിദ്യാർഥികൾ ഇതുവഴിയാണു പോകുന്നത്. നടപ്പാതയുടെ നിർമാണം പൂർത്തിയാകാത്തതിനാൽ വാഹനങ്ങൾ വരുന്പോൾ റോഡിൽ നിന്നു മാറിനിൽക്കാനും കഴിയാത്ത സ്ഥിതിയാണ്. തൃശൂർ- കൊടുങ്ങല്ലൂർ സംസ്ഥാനപാതയിൽ നിർമാണ നിർവഹണ ഏജൻസിയായ കേരള സ്റ്റേറ്റ് ട്രാൻസ്പോർട്ട് പ്രോജക്ട് (കഐസ്ടിപി) ജോലികൾ വെള്ളത്തിലായ അവസ്ഥയാണ്. മഴ പെയ്തതോടെ റോഡുവികസനം പ്രതിസന്ധിയിലായി. പലയിടത്തും പണി നിർത്തി നിർമാണസാമഗ്രികൾ തിരികെകൊണ്ടുപോയി. മഴ മാറുന്ന സാഹചര്യത്തിൽ പണികൾ പുനരാരംഭിക്കുമെന്നാണ് കഐസ്ടിപി അധികൃതർ പറയുന്നത്. ഇരിങ്ങാലക്കുട പുത്തൻതോട് ജംഗ്ഷൻ മുതൽ വലിയപാലം വരെ ഒറ്റവരി നിർമാണമാണു നടന്നിരിക്കുന്നത്. റോഡിന്‍റെ ഇരുവശത്തും സമപ്രതലമല്ലാത്തതിനാലും അവശിഷ്ടങ്ങൾ ഉള്ളതിനാലും വാഹനങ്ങളും കാൽനടയാത്രക്കാരും ബുദ്ധിമുട്ടിലാണ്. ഗതാഗതം വണ്‍വേ ആയതിനാൽ കിലോമീറ്ററുകൾ ചുറ്റിയാണ് എതിർദിശയിലേക്കുള്ള യാത്ര.

ദേവാലയങ്ങളിൽ തിരുനാൾ

മറ്റം പള്ളി മറ്റം: സെന്‍റ് തോമസ് ഫൊറോന പള്ളിയിൽ ഇടവകമധ്യസ്ഥനായ വിശുദ്ധ തോമാശ്ലീഹായുടെയും ഈശോയുടെ തിരുഹൃദയത്തിന്‍റെയും സംയുക്ത തിരുനാളിന് കൊടികയറി. ഫൊറോന വികാരി ഫാ. ഫ്രാൻസീസ് ആളൂർ കൊടിയേറ്റം നിർവഹിച്ചു. അസിസ്റ്റന്‍റ്് വികാരി ഫാ. ഫ്രാങ്കോ ചെറുതാണിക്കൽ സഹകാർമികനായി. കൈക്കാരന്മാർ, തോമസ് നാമധാരികൾ എന്നിവർ പരിപാടികൾക്കു നേതൃത്വം നൽകി. ജൂലൈ രണ്ട്, മൂന്ന് തീയതികളിലാണ് തിരുനാളാഘോഷം. രണ്ടിന് വൈകീട്ട് ആറിന് ആഘോഷമായ വിശുദ്ധ കുർബാന, വേസ്പര, രൂപം എഴുന്നള്ളിച്ചുവയ്ക്കൽ എന്നിവ നടക്കും. തിരുക്കർമങ്ങൾക്ക് ചൂണ്ടൽ പള്ളി വികാരി ഫാ. ഡേവിസ് പുലിക്കോട്ടിൽ മുഖ്യകാർമികനാകും. തുടർന്ന് ബാൻഡ് വാദ്യം, ഫാൻസി വെടിക്കെട്ട് എന്നിവ ഉണ്ടാവും. ‌ തിരുനാൾദിനമായ മൂന്നിനു രാവിലെ ആറിനും 7.30നും വിശുദ്ധ കുർബാന, പത്തിന് ആഘോഷമായ തിരുനാൾപാട്ടുകുർബാന, സന്ദേശം എന്നീ തിരുക്കർമങ്ങൾക്കു തൃശൂർ അതിരൂപത സഹായമെത്രാൻ മാർ ടോണി നീലങ്കാവിൽ മുഖ്യകാർമികനാകും. തുടർന്ന് പ്രദക്ഷിണവും നേർച്ചപ്പായസവിതരണവും നടക്കും. രാത്രി ഏഴുമുതൽ ഏയ്ഞ്ചൽ വോയ്സ് മൂവാറ്റുപുഴ അവതരിപ്പിക്കുന്ന ബാൻഡ്‌വാദ്യം സ്റ്റേജ് ഷോ ഉണ്ടായിരിക്കും. കാഞ്ഞാണി പള്ളി കാഞ്ഞാണി: സെന്‍റ് തോമസ് പള്ളിയിലെ ദുക്റാന തിരുനാൾ ആഘോഷത്തിന് കൊടിയേറി. വികാരി ഫാ. ദാവീദ് വിതയത്തിൽ കൊടിയേറ്റം നിർവഹിച്ചു. ജുലൈ രണ്ട്, മൂന്ന് തീയതികളിലാണ് തിരുനാൾ. രണ്ടിന് വൈകിട്ട് ഏഴിന് പാന്തോട് സെന്‍ററിൽ നിന്നും ബാൻഡ് വാദ്യം, തേര് എന്നിവയുടെ അകമ്പടിയോടെ എഴുന്നള്ളിപ്പ്, ഒമ്പതിന് കപ്പേളയിൽ യൂണിറ്റുകളുടെ എഴുന്നള്ളിപ്പ് എത്തിച്ചേരും. 9.30 നു പള്ളിയിൽ യൂണിറ്റുകളുടെ എഴുന്നള്ളിപ്പുകൾ സംഗമിക്കും. 11 ന് വർണമഴ. തിരുനാൾ ദിനമായ മൂന്നിന് രാവിലെ 6.30 നു കുർബാന, ലദീഞ്ഞ്, നൊവേന, കാഴ്‌ചസമർപ്പണം , പത്തിന് ആഘോഷമായ പാട്ടുകുർബാന, ലദീഞ്ഞ്, നൊവേന, പ്രദക്ഷിണം, വിശ്വാസിസംഗമം, മാർഗംകളി എന്നിവ നടക്കും. ജനറൽ കൺവീനർ അഡ്വ. സന്തോഷ് മണ്ടുംപാല, ട്രസ്റ്റിമാരായ കെ.ജെ. ബേബി, എ.പി. റോബി, നവീൻ തോമസ് എന്നിവർ കൊടിയേറ്റ ചടങ്ങുകൾക്കു നേതൃത്വം നൽകി.

എൽത്തുരുത്ത് പള്ളിയിലെ വിവിധ പദ്ധതികൾ ഉദ്ഘാടനം ചെയ്തു

എൽത്തുരുത്ത്: സെന്‍റ് മേരീസ് പള്ളിയിലെ കുടുംബകൂട്ടായ്മകളുടെയും ദർശനസമൂഹത്തിന്‍റെയും പുനർരൂപീകരണവും ഐക്യഹസ്തം സ്നേഹപദ്ധതി, ആത്മീയ ഉണർവിനായുളള സ്നേഹപൂർവം ഈശോയ്ക്ക് പദ്ധതികളുടെ ഉദ്ഘാടനവും തൃശൂർ അതിരൂപതാധ്യക്ഷൻ മാർ ആൻഡ്രൂസ് താഴത്ത് നിർവഹിച്ചു. ഇടവകയ്ക്കു ലഭിക്കുന്ന വരുമാനത്തിൽനിന്ന് മാസംതോറും പത്തുശതമാനം കുഞ്ഞുങ്ങളുടെ ഭാവി സുരക്ഷിതമാക്കാനും വിശ്വാസജീവിതത്തിൽ വളർന്നു വരാൻ പ്രാപ്തരാക്കാനും ഉപയോഗിക്കുന്ന പദ്ധതിയാണ് ഐക്യഹസ്തം. ഇടവകജനമൊന്നാകെ ഐക്യത്തോടെ കൈകോർത്താണ് പദ്ധതിക്കു തുടക്കം കുറിച്ചിരിക്കുന്നത്. മാർ ആൻഡ്രൂസ് താഴത്തിന്‍റെ മുഖ്യകാർമികത്വത്തിൽ വിശുദ്ധകുർബാന അർപ്പിച്ചു. കുടുംബ കൂട്ടായ്മ അതിരൂപത ഡയറക്ടർ ഫാ. ട്വിങ്കിൾ വാഴപ്പിള്ളി, ദർശനസഭ അതിരൂപത ഡയറക്ടർ ഫാ. പോൾസണ്‍ പാലത്തിങ്കൽ, ഇടവകവികാരി ഫാ. ജോയ് കൂത്തൂർ, അസിസ്റ്റന്‍റ് വികാരി ഫാ. സെബി വെളിയൻ, ഫാ. ഹാഡ്‌ലി നീലങ്കാവിൽ എന്നിവർ സഹകാർമികരായി.

വെള്ളക്കെട്ട്: ബണ്ടുകൾ പൊളിച്ചു

കാഞ്ഞാണി: അന്തിക്കാട് ബ്ലോക്ക് പരിധിയിലെ പഞ്ചായത്തുകളിലെ വെള്ളക്കെട്ടൊഴിവാക്കാനുള്ള നടപടിയുടെ ഭാഗമായി കാഞ്ഞാംകോളിലേയും മണലൂർതാഴം പടവിലേയും ബണ്ടുകൾ പൊളിച്ചു. ജെസിബി ഉപയോഗിച്ച് ജനപ്രതിനിധികളുടേയും വകുപ്പുദ്യോഗസ്ഥരുടേയും വിവിധ പാടശേഖര ഭാരവാഹികളുടേയും പൊതുജനങ്ങളുടേയും സാന്നിദ്ധ്യത്തിലാണ് ബണ്ടുകൾ പൊളിച്ചത്. ചൊവ്വാഴ്ച്ച കളക്ടറേറ്റിൽ സബ് കളക്ടറുടെ നേതൃത്വത്തിൽ എംഎൽഎമാരായ മുരളി പെരുനെല്ലി, സി.സി. മുകുന്ദൻ എന്നിവരുൾപ്പടെയുള്ളവരുടെ സംയുക്ത യോഗത്തിലെ തീരുമാനപ്രകാരമാണ് ബണ്ടുകൾ പൊളിച്ചത്. ഇന്നലെ രാവിലെ മണലൂർ പഞ്ചായത്ത് ഹാളിൽ കൃഷിവകുപ്പ്, ഇറിഗേഷൻ , പടവുക കമ്മറ്റി ഭാരവാഹികൾ എന്നിവരുടെ യോഗം ചേർന്നിരുന്നു. തുടർന്ന് ഉച്ചയോടെ മണലൂർ താഴം കോൾപ്പടവിന്‍റെ ബണ്ടും തുടർന്ന് കാഞ്ഞാംകോൾ പടവിന്‍റെ ബണ്ടുമാണ് പൊളിച്ചത്. ഉദ്യോഗസ്ഥരും ജനപ്രതിനിധികളും നാട്ടുകാരും ഉൾപ്പെടെ വൻജനാവലി സ്ഥലത്ത് രാവിലെ മുതൽ തടിച്ചുകൂടിയിരുന്നു.

തോബിയാസ് തറയിൽ ചാരിറ്റി ആക്‌ഷൻ ഫോറം

കുറ്റൂർ: സ്വന്തം ജീവിതം അന്യർക്ക് ആശ്വാസവും പ്രകാശവുമാകാൻ എരിഞ്ഞുതീർന്ന മാതൃകയായിരുന്നു തോബിയാസ് തറയിലെന്നു കൊട്ടേക്കാട് ഫൊറോന വികാരി ഫാ. ഫ്രാങ്കോ കവലക്കാട്ട്. ബ്ലോക്ക് പഞ്ചായത്ത്, ഗ്രാമപഞ്ചായത്ത് അംഗവും സാമൂഹിക, രാഷ്ട്രീയ, ജീവകാരുണ്യ പ്രവർത്തകനുമായിരുന്ന കൊട്ടേക്കാട് യുവജനകലാസമിതി മുൻപ്രസിഡന്‍റ് തോബിയാസ് തറയിലിന്‍റെ സ്മരണാർഥം ആരംഭിച്ച തോബിയാസ് തറയിൽ സ്മാരക ചാരിറ്റി ആക്‌ഷൻ ഫോറം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ചടങ്ങിന്‍റെ ഭാഗമായി കുറ്റൂർ ഗവ. എൽപി സ്കൂളിലെ മുഴുവൻ വിദ്യാർഥികൾക്കും സൗജന്യകുടവിതരണ ഉദ്ഘാടനവും ഫാ. ഫ്രാങ്കോ കവലക്കാട്ട് നിർവഹിച്ചു. യുവജനകലാസമിതി പ്രസിഡന്‍റ് ഡേവിസ് കണ്ണനായ്ക്കൽ അധ്യക്ഷത വഹിച്ചു. കലാസമിതി വൈസ് പ്രസിഡന്‍റ് പോൾസണ്‍ ലൂയിസ് അനുസ്മരണപ്രഭാഷണം നടത്തി. കോലഴി പഞ്ചായത്ത് അംഗം പി.എ. ലോനപ്പൻ, തറയിൽ ട്രസ്റ്റ് ജനറൽ സെക്രട്ടറി അഡ്വ. പോൾ പി. തറയിൽ, ചാർട്ടേഡ് അക്കൗണ്ടന്‍റ് ജോണ്‍ ജോസഫ് തറയിൽ, സ്കൂൾ ഹെഡ്മിസ്ട്രസ് പി.കെ. ബിന്ദു , പിടിഎ പ്രസിഡന്‍റ് സി.എ. പോൾസണ്‍, എംപിടിഎ പ്രസിഡന്‍റ് മേരി ദീപ കെ. ഡേവിഡ്, കണ്‍വീനർ സി.എൽ. ഇഗ്നേഷ്യസ്, ജനറൽ സെക്രട്ടറി ജെൻസൻ വാഴപ്പിള്ളി എന്നിവർ പ്രസംഗിച്ചു.

കെസിബിസി മദ്യവിരുദ്ധസമിതി ലഹരിവിരുദ്ധദിനാചരണം

തൃശൂർ: കെസിബിസി മദ്യവിരുദ്ധസമിതി തൃശൂർ അതിരൂപതയുടെ നേതൃത്വത്തിൽ വരന്തരപ്പിള്ളി സെന്‍ററിൽ നടന്ന ലഹരിവിരുദ്ധദിനാചരണം ജില്ലാ പഞ്ചായത്ത് പ്രസിഡന്‍റ് വി.എസ്. പ്രിൻസ് ഉദ്ഘാടനം ചെയ്തു. മദ്യവിരുദ്ധസമിതി തൃശൂർ അതിരൂപത പ്രസിഡന്‍റ് വി.എം. അഗസ്റ്റിൻ അധ്യക്ഷത വഹിച്ചു. ഡയറക്ടർ റവ.ഡോ. ദേവസി പന്തല്ലൂക്കാരൻ മുഖ്യപ്രഭാഷണം നടത്തി. ഫൊറോന വികാരി ഫാ. പോൾ തേക്കാനത്ത് ആമുഖപ്രഭാഷണം നടത്തി. ഫൊറോന പ്രമോട്ടർ ഫാ. സോണി കിഴക്കൂടൻ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. വരന്തരപ്പിള്ളി പള്ളി വികാരി ഫാ. ജിയോ ആലനോലിക്കൽ സിഎംഐ, വരന്തരപ്പിള്ളി കേന്ദ്രസമിതി പ്രസിഡന്‍റ് ഡബ്ല്യു. ഡേവിസ്, മുൻ പാസ്റ്ററൽ കൗണ്‍സിൽ അംഗം ഇ.എ. ഓമന, റിട്ട. ഹെൽത്ത് ഓഫീസർ സി.പി. ഡേവിസ്, മദ്യവിരുദ്ധസമിതി അതിരൂപത സെക്രട്ടറി സിജോ ഇഞ്ചോടിക്കാരൻ, ട്രഷറർ കൊച്ചുവർക്കി തരകൻ, പ്രോഗ്രാം കണ്‍വീനർ ലിജി കുണ്ടുകുളം തുടങ്ങിയവർ പ്രസംഗിച്ചു. കല്ലൂർ സെന്‍റ് റാഫേൽ സ്കൂളിലെ വിദ്യാർഥികൾ ലഹരിക്കെതിരേ ഫ്ളാഷ് മോബ് അവതരിപ്പിച്ചു. ജേക്കബ് കരയാംപറന്പിൽ, സേവ്യർ മുക്കാട്ടുകര, കെ.കെ. ജോസ്, ബെന്നി പുളിക്കൻ തുടങ്ങിയവർ നേതൃത്വം നൽകി.

ഒല്ലൂരിലെ റോഡുകളുടെ നിര്‍മാണം വേഗത്തിൽ പൂര്‍ത്തിയാക്കും: മന്ത്രി

തൃശൂർ: ഒല്ലൂർ നിയോജകമണ്ഡലത്തിൽ അനുവദിച്ചിട്ടുള്ള പ്രധാനമന്ത്രി ഗ്രാമ സഡക് യോജന പ്രകാരം നിർമിക്കുന്ന റോഡുകളുടെ പണി വേഗത്തിൽ പൂർത്തീകരിക്കുന്നതിനു മന്ത്രി കെ. രാജന്‍റെ അധ്യക്ഷതയിൽ ചേർന്ന യോഗം തീരുമാനിച്ചു. ഇതിന്‍റെ ഭാഗമായി കല്ലിടുക്ക് പൂളച്ചോട് പീച്ചി ഡാം റോഡും മുരുക്കുംപാറ ചേരുംകുഴി ചവറാംപാടം റോഡും ജലജീവൻ മിഷന്‍റെ പണികൾ പൂർത്തിയാക്കി റീസ്റ്റോറേഷൻ പ്രവൃത്തികൾക്കുള്ള ടെൻഡർ നടപടികൾ പ്രസിദ്ധീകരിക്കും. മറ്റൊരു റോഡായ പാണഞ്ചേരി കോന്പാറ ചെന്പൂത്ര റോഡ് ഈ ആഴ്ചതന്നെ റീസ്റ്റോറേഷൻ പ്രവൃത്തികൾ പൂർത്തിയാക്കി പിഎംജിഎസ്‌വൈയ്ക്കു കൈമാറും. ഇതു പൂർത്തിയാകുന്ന മുറയ്ക്കു റോഡുനിർമാണത്തിന്‍റെ ബാക്കി പ്രവൃത്തികളും പൂർത്തീകരിക്കും. ചെന്നായ്പ്പാറ വെള്ളരിക്കത്താഴം റോഡിൽ സംയുക്തപരിശോധന നടത്തി ജലജീവൻ മിഷൻ, പിഎംജിഎസ്‌വൈ എക്സിക്യൂട്ടീവ് എൻജിനീയർമാർ കരാർ ഉണ്ടാക്കി നിർമാണപ്രവർത്തനങ്ങൾക്കു നിർദേശം നൽകും. ജലജീവൻ മിഷൻ റീസ്റ്റോറേഷൻ പൂർത്തിയാക്കി റോഡുമായി ബന്ധപ്പെട്ട് പുതിയ ഡിഎസ്ആർ അനുസരിച്ചുള്ള കരാർനടപടികളും പൂർത്തീകരിക്കും. കുറഞ്ഞ കാലത്തിനുള്ളിൽ നടപടി പൂർത്തീകരിക്കാൻ നിർദേശം നൽകിയ മന്ത്രി ഇതിനായി മൂന്നു റോഡുകളുടെയും പ്രവൃത്തികലണ്ടർ അടിയന്തരമായി സമർപ്പിക്കുവാനും നിർദേശിച്ചു. യോഗത്തിൽ കേരള വാട്ടർ അഥോറിറ്റി എംഡി ജീവൻ ബാബു, ജില്ലാ കളക്ടർ അർജുൻ പാണ്ഡ്യൻ, വിവിധ പഞ്ചായത്ത് പ്രസിഡന്‍റുമാരായ പി.പി. രവീന്ദ്രൻ, ശ്രീവിദ്യ രാജേഷ്, മിനി ഉണ്ണികൃഷ്ണൻ തുടങ്ങിയവർ പങ്കെടുത്തു.

സ്‌പെഷല്‍ സ്‌കൂള്‍ കുട്ടികള്‍ക്കായി സംസ്ഥാനതല സെവന്‍സ് ഫുട്‌ബോള്‍ ടൂര്‍ണമെന്‍റ് നാളെ

തൃശൂര്‍: അശ്വിനി ആശുപത്രിയുടെ ഓര്‍ത്തോ വിഭാഗമായ അശ്വിനി ബോണ്‍ ആൻഡ് ജോയിന്‍റ് ഫൗണ്ടേഷന്‍റെ ആഭിമുഖ്യത്തില്‍ ജില്ലയിലെ സ്‌പെഷല്‍ സ്‌കൂള്‍ കുട്ടികള്‍ക്കായി സംഘടിപ്പിക്കുന്ന സംസ്ഥാനതല സെവന്‍സ് ഫുട്‌ബോള്‍ ടൂര്‍ണമെന്‍റ് നാളെ കുട്ടനെല്ലൂര്‍ സ്‌പോര്‍ട്ടേക്കര്‍ ടര്‍ഫില്‍ നടക്കും. മത്സരത്തിൽ പത്തു ടീമുകള്‍ പങ്കെടുക്കും. 15 മിനിറ്റുവീതമാണു കളി. രാവിലെ ഒന്പതിനു മന്ത്രി ആര്‍. ബിന്ദു ഉദ്ഘാടനം ചെയ്യും. പദ്മശ്രീ ലഭിച്ച ഐ.എം. വിജയനെ ആദരിക്കും. ജോ പോള്‍ അഞ്ചേരി, ടി.ജി. പുരുഷോത്തമന്‍, വി.എ. നാരായണമേനോന്‍, ശ്രീജിത്ത് രവി എന്നിവര്‍ പങ്കെടുക്കും. വിജയികള്‍ക്ക് യഥാക്രമം 25,000, 15,000, 10,000 രൂപ വീതവും ട്രോഫിയും സമ്മാനിക്കും. പത്രസമ്മേളനത്തില്‍ അശ്വിനി എക്‌സിക്യൂട്ടീവ് ഡയറക്ടര്‍ ഐ.എന്‍. രാജേഷ്, ജനറല്‍ മാനേജര്‍ പി.കെ. രാജു, അശ്വിനി ബോണ്‍ ആൻഡ് ജോയിന്‍റ് ഫൗണ്ടേഷന്‍ തലവന് ഡോ. മഹേഷ് കൃഷ്ണന്‍, ഡോ. ഹാരിഷ് കൃഷ്ണന്‍, വി.പി. പ്രജേഷ് എന്നിവര്‍ പങ്കെടുത്തു.

വിദ്യാലയങ്ങളിലും തൊഴിലിടങ്ങളിലും ബോധവത്കരണം ഊർജിതമാക്കും

തൃശൂർ: വർധിച്ചുവരുന്ന അക്രമങ്ങളുടെയും പോക്സോ കേസുകളുടെയും സാഹചര്യത്തിൽ വിദ്യാലയങ്ങളിലും തൊഴിലിടങ്ങളിലും വിവിധ ബോധവത്കരണ ക്ലാസുകൾ ഊർജിതമാക്കുമെന്നു സംസ്ഥാന വനിതാ കമ്മീഷൻ ചെയർപേഴ്സണ്‍ അഡ്വ. പി. സതീദേവി. കേരള വനിതാ കമ്മീഷൻ സംഘടിപ്പിച്ച ജില്ലാതല അദാലത്തിൽ സംസാരിക്കുകയായിരുന്നു അവർ. തൊഴിലിടങ്ങളിലെ പരാതികൾ പരിശോധിക്കുന്പോൾ പലയിടത്തും ഇന്‍റേണൽ കമ്മിറ്റികൾ കാര്യക്ഷമമായി പ്രവർത്തിക്കുന്നതു കാണുന്നില്ല. അതിനാൽ തൊഴിലിടങ്ങളിലെ പീഡനവുമായി ബന്ധപ്പെട്ട് പോഷ് ആക്ടിനെ സംബന്ധിച്ച് പ്രത്യേകിച്ച് ഐടി മേഖലയിലെയും മാളുകളിലെയും വനിതകൾക്കു ബോധവത്കരണ ക്ലാസുകൾ നൽകുന്നതു തുടരുമെന്നും തോട്ടംതൊഴിലാളികൾ, തീരദേശത്തെയും ആദിവാസിമേഖലകളിലേയും സ്ത്രീകൾ തുടങ്ങി വിവിധ മേഖലകളിലെ വനിതകളെയും ഉൾപ്പെടുത്തി നിലവിൽ ക്യാന്പുകൾ കൂടുതൽ ഊർജിതമാക്കുമെന്നും അവർ പറഞ്ഞു. ടൗണ്‍ഹാളിൽ നടന്ന അദാലത്തിൽ 55 പരാതികളാണ് പരിഗണിച്ചത്. 14 പരാതികൾ പരിഹരിക്കുകയും രണ്ട് പരാതികളിൽ പോലീസ് റിപ്പോർട്ട് ആവശ്യപ്പെടുകയും ചെയ്തു. 39 പരാതികൾ അടുത്ത സിറ്റിംഗിലേക്കായി മാറ്റിവച്ചു. പാനലിൽ വനിതാ കമ്മീഷൻ അംഗം അഡ്വ. ഇന്ദിര രവീന്ദ്രൻ, അഡ്വക്കറ്റ് പാനൽ മെന്പർമാരായ ടി.എസ്. സജിത, അഡ്വ. ബിന്ദു രഘുനാഥ്, ഫാമിലി കൗണ്‍സലർ മാല രമണൻ തുടങ്ങിയവർ പങ്കെടുത്തു.

അന്തർദേശീയ ലഹരിവിരുദ്ധദിനം; ജില്ലാതല ഉദ്ഘാടനം നടത്തി

പറപ്പൂർ: അന്തർദേശീയ ലഹരിവിരുദ്ധദിനം 2025 ജില്ലാതല ഉദ്ഘാടനം പറപ്പൂർ കുന്നത്ത് ഓഡിറ്റോറിയത്തിൽ ജില്ലാ പഞ്ചായത്ത് പ്രസിഡന്‍റ് വി.എസ്. പ്രിൻസ് നിർവഹിച്ചു. പുഴയ്ക്കൽ ബ്ലോക്ക് പഞ്ചായത്ത് പ്രസിഡന്‍റ് ലീല രാമകൃഷ്ണൻ അധ്യക്ഷത വഹിച്ചു. തോളൂർ ഗ്രാമപഞ്ചായത്ത് പ്രസിഡന്‍റ് ശ്രീകല കുഞ്ഞുണ്ണി മുഖ്യാതിഥിയായി. ജില്ലാ മെഡിക്കൽ ഓഫീസർ (ആരോഗ്യം) ഡോ. ടി.പി ശ്രീദേവി ദിനാചരണസന്ദേശം നൽകി. ഡെപ്യൂട്ടി ഡിഎംഒ ആൻഡ് എൻടിഇപി നോഡൽ ഓഫീസർ എൻ.എ. ഷീജ വിഷയം അവതരിപ്പിച്ചു. പുകയിലരഹിത പഞ്ചായത്തിന്‍റെയും പുകയിലരഹിത വിദ്യാലയങ്ങളുടെയും ജില്ലാതല പ്രഖ്യാപനവും ആരോഗ്യം ആനന്ദം 2.0, പുരുഷന്മാർക്കുള്ള സൗജന്യ കാൻസർനിർണയ ക്യാന്പും ദിനാചരണത്തിന്‍റെ ഭാഗമായി നടന്നു. തോളൂർ ഗ്രാമപഞ്ചായത്തിനു ജില്ലയിലെ പ്രഥമ പുകയിലരഹിത പഞ്ചായത്തിനുള്ള സാക്ഷ്യപത്രവും പുകയിലരഹിത വിദ്യാലയമായി പ്രഖ്യാപിക്കപ്പെട്ട വിദ്യാഭ്യാസസ്ഥാപനങ്ങൾക്കുള്ള സാക്ഷ്യപത്രങ്ങളും ചടങ്ങിൽ വിതരണം ചെയ്തു. ജില്ലാ പഞ്ചായത്തംഗം ജിമ്മി ചൂണ്ടൽ, ബ്ലോക്ക് പഞ്ചായത്തംഗങ്ങളായ ആനി ജോസ്, പി.വി. ബിജു, വി.എസ്. ശിവരാമൻ, തോളൂർ ഗ്രാമപഞ്ചായത്ത് വൈസ് പ്രസിഡന്‍റ് ലില്ലി ജോസ്, വികസന സ്റ്റാൻഡിംഗ് കമ്മിറ്റി ചെയർപേഴ്സണ്‍ ഷീന വിൽസണ്‍, ഗ്രാമപഞ്ചായത്തംഗങ്ങളായ വി.കെ. രഘുനാഥൻ, വി.പി. അരവിന്ദാക്ഷൻ തുടങ്ങിയവർ സംസാരിച്ചു. ലഹരിക്കെതിരേ വിവിധ സ്കൂളുകളിലെ വിദ്യാർഥികളും ഗവ. നഴ്സിംഗ് കോളജ് വിദ്യാർഥികളും ഫ്ളാഷ് മോബ്, സ്കിറ്റുകൾ എന്നിവ അവതരിപ്പിച്ചു.

ജീവധനം പെൻഷനേഴ്സ് ആനയൂട്ട് നടത്തി

ഗുരുവായൂർ: ദേവസ്വം ആനകളുടെ താവളം ഗുരുവായൂരിൽ നിന്ന് പുന്നത്തൂർ കോട്ടയിലേക്ക് മാറ്റിയതിന്‍റെ സുവർണ ജൂബിലിയുടെ ഭാഗമായി ദേവസ്വം ജീവധന വിഭാഗം പെൻഷൻകാരുടെ നേതൃത്വത്തിൽ ആനയൂട്ട് നടത്തി. ആനത്താവളം പുന്നത്തൂരിലേക്ക് മാറ്റുന്ന സമയത്ത് ആനകളുടെ ചുമതലക്കാരനുമായിരുന്ന കെ.പി. കരുണാകരൻ ഉദ്ഘാടനം ചെയ്തു. പഴയ ആന പാപ്പാൻ മണ്ണാരത്ത് ശങ്കരനാരായണനെയും സർവീസിൽ നിന്ന് വിരമിക്കുന്ന പാപ്പാൻ നളരാജനെയും ആദരിച്ചു. കൺവീനർ സി.വി. വിജയൻ അദ്ധ്യക്ഷത വഹിച്ചു. ബി.ഹരികൃഷ്ണമേനോൻ, പി.വി.സോമസുന്ദരൻ, ശിവദാസ് മൂത്തേടത്ത് , എം.അരവിന്ദാക്ഷൻ, ആർ.രാജഗോപാലൻ, എം.പി. ശങ്കരനാരായണൻ, വി മുരളി, ആർ. പരമേശ്വരൻ, കെ.ആർ.സുനിൽകുമാർ എന്നിവർ പങ്കെടുത്തു.

മിന്നൽ ചുഴലി; മണലൂരിൽ വൻ നാശനഷ്ടം

കണ്ടശാംകടവ്: മണലൂർ പഞ്ചായത്തിലെ പാലാഴി, മാമ്പുള്ളി പ്രദേശങ്ങളിൽ ബുധനാഴ്ച രാത്രി ഉണ്ടായ മിന്നൽ ചുഴലിയിൽ വൻ നാശനഷ്ടം. നിരവധി വൈദ്യുതി പോസ്റ്റുകൾ, ഫലവൃക്ഷങ്ങൾ കടപുഴകി വീണ് വീടുകൾക്കും സ്ഥാപനത്തിനും കേടുപാടുകൾ സംഭവിച്ചു. പാലാഴി സ്വദേശി രാജൻ പുത്തൻ പുരയ്ക്കലിന്‍റെ വർക്ക്ഷോപ്പ് ഭാഗികമായി തകർന്നു. പറമ്പിലെ തെങ്ങും മാവും കാറ്റിൽ മുറിഞ്ഞ് വർക്ക്ഷോപ്പിന് മുകളിൽ വീഴുകയായിരുന്നു. പൊറ്റേക്കാട്ട് ജയസിംഗിന്‍റെ വീട്ടിലേക്കു കൂറ്റൻ മരം ഒടിഞ്ഞുവീണ് വാട്ടർ ടാങ്ക് തകർന്നു. വീടിനു ഭാഗികമായി കേടു പറ്റി. പണ്ടാരൻ ബാബുരാജ്, പുത്തൻപുരയ്ക്കൽ രാജൻ, പുല്ലാട്ട് സുരേഷ് , പൊറ്റേക്കാട്ട് ഗണേശൻ, കണിയാംപറമ്പിൽ മനോജ് എന്നിവരുടെ വസ്തുവഹകൾക്കും ഭാഗികമായി നാശനഷ്ടങ്ങൾ സംഭവിച്ചിട്ടുണ്ട്. മരം വീണ് മാമ്പുള്ളി ഇയ്യാനി ഷൈജുവിന്‍റെ വീടിന്‍റെ സൺഷേഡ് തകർന്നു.

യുവാവിന്‍റെ മരണം: റോഡ് ഉപരോധത്തിൽ സംഘർഷം; പ്രവർത്തകരെ അറസ്റ്റുചെയ്തു

തൃശൂർ: എംജി റോഡിലെ വാഹനാപകടത്തിൽ യുവാവ് മരിച്ചതിൽ പ്രതിഷേധിച്ച് യൂത്ത് കോണ്‍ഗ്രസ് നടത്തിയ റോഡ് ഉപരോധത്തിൽ സംഘർഷം. പ്രവർത്തകരെ പോലീസ് അറസ്റ്റുചെയ്തു നീക്കി. റോഡിന്‍റെ ശോച്യാവസ്ഥയും തുടരുന്ന അപകടങ്ങൾക്കുമെതിരേ യൂത്ത് കോണ്‍ഗ്രസ് തൃശൂർ നിയോജകമണ്ഡലം കമ്മിറ്റി നടത്തിയ ഉപരോധമാണ് സംഘർഷത്തിൽ കലാശിച്ചത്. നിയോജകമണ്ഡലം പ്രസിഡന്‍റ് കെ. സുമേഷ്, നേതാക്കളായ വിഷ്ണുചന്ദ്രൻ, സി.എസ്. സൂരജ്, ഡെൽജിൻ ഷാജു, നിഖിൽ വടക്കൻ, ശ്രീരാം ശ്രീധർ, പി.ജി. സൗരാഗ്, അമൽ ജെയിംസ്, ലിയാസ് ബാബു, ആന്‍റണി, എം.എച്ച്. ഷെമീർ, അരുണ്‍ തുടങ്ങിയവർ പങ്കെടുത്തു. മേയറെ അറസ്റ്റുചെയ്യണം: ബിജെപി തൃശൂർ: എംജി റോഡിലുണ്ടായ അപകടത്തിൽ യുവാവ് മരിച്ച സംഭവത്തിൽ മേയർ എം.കെ. വർഗീസിനെ കൊലക്കുറ്റം ചുമത്തി അറസ്റ്റുചെയ്യണമെന്ന് ബിജെപി. തൃശൂർ നഗരത്തിലെ റോഡുകളിലെല്ലാം ആളുകൾക്കു സഞ്ചരിക്കാൻ കഴിയാത്തവിധം കുഴികൾ നിറഞ്ഞിട്ടും കുഴികളടയ്ക്കാനോ റോഡ് റീടാർ ചെയ്യാനോപോലും സമയമില്ലാത്ത മേയർ ടൂർ പോകാനുള്ള തിരക്കിലാണെന്നും ബിജെപി കുറ്റപ്പെടുത്തി.

റോഡിലെ കുഴി; അപകടമരണം

പ്രതിഷേധം ആളിക്കത്തിക്കാൻ കോണ്‍ഗ്രസ് തൃശൂർ: എംജി റോഡിലെ അപകടമരണവുമായി ബന്ധപ്പെട്ട് ശക്തമായ പ്രതിഷേധം ആളിക്കത്തിക്കാനൊരുങ്ങി കോണ്‍ഗ്രസ്. ഇന്നലെ അപകടം നടന്നയുടൻ കോർപറേഷൻ പ്രതിപക്ഷനേതാവ് രാജൻ ജെ. പല്ലനും കൗണ്‍സിലർമാരായ ലാലി ജെയിംസും കെ. രാമനാഥനും ജോണ്‍ ഡാനി/ലുമടക്കമുള്ളവർ സംഭവസ്ഥലത്തെത്തി റോഡ് ഉപരോധം നടത്തിയിരുന്നു. എംജി റോഡിലെ അപകടമരണത്തിൽ കുറ്റക്കാർക്കെതിരേ ക്രിമിനൽ കേസെടുക്കുംവരെ കൗണ്‍സിലിനകത്തും പുറത്തും ശക്തമായ സമരങ്ങളുമായി മുന്നോട്ടുപോകാനാണ് തീരുമാനിച്ചിരിക്കുന്നതെന്ന് രാജൻ പല്ലൻ പറഞ്ഞു. മേയറുടെയും കോർപറേഷൻ സെക്രട്ടറിയുടെയും എൻജിനീയറുടെയും പേരിൽ കൊലക്കുറ്റത്തിനു കേസെടുക്കണമെന്നും പ്രതിപക്ഷനേതാവ് ആവശ്യപ്പെട്ടു. ഏകദേശം ഒരു വർഷംമുൻപ് കോർപറേഷൻ റോഡിലെ കുഴിയിൽ ചിയ്യാരം സ്വദേശിയായ വീട്ടമ്മ മരിച്ച സംഭവം ഉണ്ടായതും രാജൻ പല്ലൻ ചൂണ്ടിക്കാട്ടി. എംജി റോഡിലടക്കമുള്ള കുഴികൾ അടയ്ക്കുവാൻ കൗണ്‍സിൽ തീരുമാനം ഉണ്ടായിട്ടും ലക്ഷക്കണക്കിനു രൂപയുടെ പ്രവൃത്തികൾക്കു വർക്ക് ഓർഡർ നൽകിയിട്ടും ചെയ്യാത്തതുമൂലമാണ് ഒരു ചെറുപ്പക്കാരന്‍റെ ജീവൻ നഷ്ടപ്പെട്ടതെന്നു കോണ്‍ഗ്രസ് കുറ്റപ്പെടുത്തി. വിഷ്ണുദത്തിന്‍റെ കുടുംബത്തിന് ഒരു കോടി രൂപ കോർപറേഷൻ നഷ്ടപരിഹാരം നൽകണമെന്നും അമ്മ പദ്മിനിയെ വിദഗ്ധചികിത്സയ്ക്കായി മറ്റേതെങ്കിലും ആശുപത്രിയിലേക്കു മാറ്റി തുടർചികിത്സ കോർപറേഷൻ ഏറ്റെടുക്കണമെന്നും രാജൻ പല്ലൻ ആവശ്യപ്പെട്ടു. ഇന്നു കോണ്‍ഗ്രസ് മാർച്ച് തൃശൂർ: കോർപറേഷന്‍റെ അനാസ്ഥയുടെ രക്തസാക്ഷിയാണു സ്കൂട്ടറപകടത്തിൽ മരിച്ച യുവാവെന്നു കെപിസിസി സെക്രട്ടറിയും കൗണ്‍സിലറുമായ ജോണ്‍ ഡാനിയൽ. റോഡിലെ കുഴികളടയ്ക്കാൻ അടിയന്തരനടപടിയെടുക്കണമെന്നു കൗണ്‍സിലർമാർ മേയറോട് ആവശ്യപ്പെട്ടതാണ്. റോഡിലെ കുഴി ജീവനെടുത്തുപ്പോൾ പ്രതിഷേധിച്ചവർക്കെതിരേ കേസെടുത്ത പോലീസ്, മേയർക്കും കോർപറേഷൻ സെക്രട്ടറിക്കുമെതിരേ കൊലക്കുറ്റത്തിനു കേസെടുക്കണം. മരണത്തിന്‍റെ ഉത്തരവാദിത്വം ഏറ്റെടുത്തു മേയർ രാജിവയ്ക്കണം. അപകടത്തിൽ മരിച്ച വിഷ്ണുദത്തിന്‍റെ കുടുംബത്തിനു നഷ്ടപരിഹാരം നൽകാൻ കൗണ്‍സിൽ യോഗം തീരുമാനിക്കണം. മേയറുടെ രാജി ആവശ്യപ്പെട്ട് ഇന്നു കോർപറേഷൻ ഓഫീസിലേക്കു കോണ്‍ഗ്രസ് മാർച്ച് നടത്തുമെന്നും ജോണ്‍ ഡാനിയൽ പറഞ്ഞൂ. നാട്ടുകാർ മുന്നറിയിപ്പു നൽകി, കോർപറേഷൻ അവഗണിച്ചു സ്വന്തം ലേഖകൻ തൃശൂർ: എംജി റോഡിലെ കുഴിയിൽവീണു യുവാവ് മരിക്കാനിടയായ സംഭവം കോർപറേഷന്‍റെ അനാസ്ഥയെന്നു നാട്ടുകാരും. എംജി റോഡിലെ റെയിൽവേ മേൽപ്പാലം തീരുന്ന ഭാഗത്തുള്ള ഒരടിയോളം വലിപ്പമുള്ള കുഴി പടിഞ്ഞാറേകോട്ട ഭാഗത്തുനിന്നു വരുന്നവരുടെ കണ്ണിൽപെടില്ല. മുന്പിൽ വാഹനങ്ങളുണ്ടെങ്കിൽ കുഴിയിൽ വീഴാനുള്ള സാധ്യത കൂടുതലുമാണ്. മേൽപ്പാലത്തിന്‍റെ ഭാഗത്തു റോഡിനു വീതിയും കുറവാണ്. രണ്ടാഴ്ചയ്ക്കിടെ നിരവധി ബൈക്ക് യാത്രികർ കുഴിയിൽവീണെങ്കിലും അപകടമുണ്ടാകാതിരുന്നതു ഭാഗ്യംകൊണ്ടാണെന്നു നാട്ടുകാർ പറഞ്ഞു. മുന്പു കുഴിയിൽവീണവരും മാധ്യമങ്ങൾക്കുമുന്നിൽ പ്രതിഷേധം അറിയിച്ചു. എംജി റോഡ് ആരംഭിക്കുന്ന പടിഞ്ഞാറേകോട്ട ജംഗ്ഷൻമുതൽ റോഡിൽ നിരവധി അപകടക്കുഴികളുണ്ട്. സ്വരാജ് റൗണ്ടിലേക്ക് അടുക്കുന്നതോടെ റോഡ് തകർന്നു തരിപ്പണമാണ്. മന്നാടിയാർ, കോരപ്പത്ത് ലെയ്ൻ എന്നിവിടങ്ങളിലേക്കു തിരിയുന്ന ഭാഗങ്ങളിൽ ഒരുഭാഗം മുഴുവൻ തകർന്നു. എംജി റോഡിലെ ഗതാഗതക്കുരുക്കിന്‍റെ പ്രധാന കാരണങ്ങളിലൊന്നും കുഴികളാണ്. നേരം ഇരുട്ടിവെളുക്കുന്പോൾ പ്രത്യക്ഷപ്പെടുന്ന പുതിയ കുഴികൾ ഇരുചക്രവാഹനങ്ങളെയാണ് കൂടുതൽ അപകടത്തിലാക്കുന്നത്. സമയക്രമം പാലിക്കാൻ ബസുകളുടെ മരണപ്പാച്ചിൽകൂടിയാകുന്നതോടെ അപകടസാധ്യത പലമടങ്ങായി. പൂങ്കുന്നം റോഡ് നിർമാണത്തിന്‍റെ ഭാഗമായി ഭാരവാഹനങ്ങളടക്കം കടന്നുപോയതോടെ ഉദയനഗർ റോഡിന്‍റെ തുടക്കംമുതൽ ഒടുക്കംവരെ ഭീമൻകുഴികൾ നിറഞ്ഞു. അയ്യന്തോളിലേക്കുള്ള എളുപ്പവഴിയായ കാർത്യായനി അന്പലം റോഡ്, പഞ്ചിക്കൽ തോടിനോടു ചേർന്നുള്ള റോഡ് എന്നിവയും തകർന്നു. ചെന്പുക്കാവ്, രാമനിലയം റോഡുകളും വടക്കേച്ചിറയ്ക്കുസമീപം ഏതാനും മാസങ്ങൾക്കുമുന്പ് പാച്ച്‌വർക്ക് ചെയ്ത റോഡും തകർന്നു. ഇതു ദീപിക നേരത്തേ റിപ്പോർട്ട് ചെയ്തിരുന്നു.

വാഹനാപകടം: ചികിത്സയിലായിരുന്ന ചിറ്റിലപ്പിള്ളി സ്വദേശി മരിച്ചു

ചിറ്റിലപ്പിള്ളി: വാഹനാപകടത്തെ തുടർന്ന് ചികിത്സയിലായിരുന്ന ചിറ്റിലപ്പിള്ളി സ്വദേശി മരിച്ചു. ചിറ്റിലപ്പിള്ളി ഇളംതിരുത്തി രമേഷ്(65) ആണ് മരിച്ചത്. സംസ്കാരം നടത്തി. 2020ൽ അമലയിൽ വച്ച് ട്രാവലർ ഇടിച്ചായിരുന്നു അപകടം. ഭാര്യ: അംബിക. മക്കൾ: റികേഷ്, റിഷ്വാഗ്. മരുമകൾ: ദിയ.

വായനവാരത്തിൽ നീതുവിന്‍റെ ചോക്ലേറ്റ് കേക്ക് ഹിറ്റ്

തൃശൂർ: വായനവാരത്തിൽ പുസ്തകം വായിക്കുന്ന പെണ്‍കുട്ടിയെ ചോക്ലേറ്റ് കേക്കിൽ ആവിഷ്കരിച്ച് അയ്യന്തോൾ സ്വദേശിനി നീതു. ഒന്നരക്കിലോയുടെ ചോക്ലേറ്റ് കേക്കിലാണ് നീതു പെണ്‍കുട്ടിയുടെ രൂപം ഡിസൈൻ ചെയ്തത്. പുസ്തകങ്ങളെ ഒരുപാടു സ്നേഹിക്കുന്ന മകൾക്കു സമ്മാനിക്കാനായി നീതുവിന്‍റെ സുഹൃത്തുകൂടിയായ വീട്ടമ്മയാണ് വായനാവാരത്തിൽ ഇത്തരമൊരു കേക്ക് രൂപകല്പന ചെയ്തത്. വലിയൊരു പുസ്തകത്തിനുമുകളിൽ കമിഴ്ന്നുകിടന്നു പുസ്തകം വായിക്കുന്ന പെണ്‍കുട്ടിയെയാണ് നീതു തന്‍റെ കരവിരുതിൽ ആവിഷ്കരിച്ചത്. കേക്ക് നിർമാണത്തിൽ എന്നും പുതുമകൾ തേടുന്ന അയ്യന്തോൾ പിഎം ലെയ്നിലെ ശിവസർവം ശക്തി അപ്പാർട്ടുമെന്‍റ്സിൽ താമസിക്കുന്ന സാത്വികം കേക്ക്സിന്‍റെ ഉടമ കൂടിയായ നീതു, പുസ്തകത്തിന്‍റെയും പുസ്തകം വായിക്കുന്ന പെണ്‍കുട്ടിയുടെയും രൂപം ഇതാദ്യമായാണ് കേക്കിൽ ചെയ്തതെന്നു പറഞ്ഞു. താൻ ചെയ്ത കേക്കിന്‍റെ ചിത്രങ്ങളും വീഡിയോയും സോഷ്യൽ മീഡിയയിൽ നീതു പോസ്റ്റ് ചെയ്തതോടെ നിരവധിപേരാണ് ഇത്തരത്തിലുള്ള കേക്കുകൾ ചെയ്തുകൊടുക്കണമെന്ന ആവശ്യവുമായി നീതുവിനെ തേടിയെത്തുന്നത്.

മൃഗസംരക്ഷണത്തിനു പ്രത്യേക ശ്രദ്ധ അനിവാര്യം മഴക്കാലമല്ലേ, കരുതൽ വേണം

സ്വന്തം ലേഖകൻ തൃശൂർ: തകർത്തുപെയ്യുന്ന മഴയിൽ കൈയിൽ കട്ടൻചായയും മൂടിപ്പുതച്ചിരിക്കാൻ ഒരു പുതപ്പും ഉണ്ടെങ്കിൽ നമ്മുടെ കാര്യം ഒരു പരിധിവരെ സേഫ് ആണ്. എന്നാൽ ചാറ്റൽമഴയും തണുപ്പും ഈർപ്പവുമടക്കം മഴക്കാലമെന്നതു മിണ്ടാപ്രാണികൾക്കു ദുരിതകാലംകൂടിയാണ്. അന്തരീക്ഷതാപത്തിലെ വ്യതിയാനവും ഉയർന്ന ഈർപ്പവും അതുവഴി രോഗപ്രതിരോധശേഷിയിലുണ്ടാകുന്ന കുറവുമാണ് ഇവരുടെ വില്ലൻമാർ. രോഗസാധ്യത വർധിക്കുകയും തീറ്റയുടെയും കാലിത്തീറ്റയുടെയും ദൗർലഭ്യവും അടക്കം അവയെ വളർത്തുന്നവരും ബുദ്ധിമുട്ടിലാകുന്ന ഈ വേളയിൽ മിണ്ടാപ്രാണികളുടെ ആരോഗ്യവും ഉത്പാദനക്ഷമതയും ഉറപ്പാക്കാൻ ശരിയായ പരിപാലനം ആവശ്യമാണ്. കാത്തിരിക്കുന്ന രോഗങ്ങൾ * ഈർപ്പമുള്ള സാഹചര്യം ചെള്ള്, പുഴു തുടങ്ങിയ പരാദങ്ങളുടെ പ്രജനനത്തിനും വ്യാപനത്തിനും അനുകൂലമാണ്. ഇതു മൃഗങ്ങളിലും പക്ഷികളിലും വിളർച്ച, ദഹനക്കുറവ് തുടങ്ങിയ ആരോഗ്യപ്രശ്നങ്ങൾക്കു കാരണമാകും. *കന്നുകാലികൾ, എരുമകൾ തുടങ്ങിയവയ്ക്കു കുളന്പുരോഗത്തിനും സാധ്യതയേറെ. രോഗം ബാധിച്ച മൃഗങ്ങളുടെ വായിലും കാലുകളിലും മുറിവുകൾ ഉണ്ടാകുന്നു. * ഈർപ്പമുള്ള അവസ്ഥ മൃഗങ്ങളിൽ ശ്വസന അണുബാധയ്ക്കുള്ള സാധ്യത വർധിപ്പിക്കും. * ചെളിനിറഞ്ഞതും വെള്ളം കെട്ടിനിൽക്കുന്നതുമായ ചുറ്റുപാടുകൾ പാദം ചീയുന്നതിനും മറ്റു കുളന്പുസംബന്ധമായ പ്രശ്നങ്ങൾക്കും കാരണമാകും. ഇതു ചലനശേഷിയും ഉത്പാദനക്ഷമതയും കുറയ്ക്കുന്നു. മുൻകരുതലുകൾ 1. മൃഗങ്ങൾക്കു ശുദ്ധമായ കുടിവെള്ളം ലഭ്യമാണെന്ന് ഉറപ്പാക്കുക. 2. വരണ്ടതും വൃത്തിയുള്ളതുമായ ഷെൽട്ടറുകൾ ഒരുക്കുക 3. മഴക്കാലത്തു വ്യാപകമാകുന്ന രോഗങ്ങൾക്കെതിരേ മൃഗങ്ങൾക്കു വാക്സിനേഷൻ നൽകുക. 4. മൃഗങ്ങളുടെ പ്രതിരോധശേഷി വർധിപ്പിക്കുന്നതിനു സമീകൃതപോഷകാഹാരം ലഭിക്കുന്നുണ്ടെന്ന് ഉറപ്പാക്കുക.

കണ്ണന്‍റെ ആനകൾക്ക് സുഖചികിത്സ ജൂലൈ 1 മുതൽ

ഗുരുവായൂർ: ദേവസ്വത്തിലെ ആനകളുടെ സുഖചികിത്സ ജൂലൈ ഒന്നിനു തുടങ്ങും. രാവിലെ ഒന്പതിന് മന്ത്രി കെ. രാജൻ ഉദ്ഘാടനം ചെയ്യും. ദേവസ്വം ചെയർമാൻ ഡോ.വി.കെ. വിജയൻ അധ്യക്ഷനാകും. എൻ.കെ.അക്ബർ എംഎൽഎ, നഗരസഭ ചെയർമാൻ എം. കൃഷ്ണദാസ് എന്നിവർ പങ്കെടുക്കും. ആനകളുടെ ആരോഗ്യ സംരക്ഷണത്തിനും ശരീരപുഷ്ടിക്കുമായാണ് സുഖചികിത്സ നടത്തുന്നത്. ദിവസവും ആനകളെ കുളിപ്പിച്ച് തുടച്ചു നിരയായി നിർത്തി ശാസ്ത്രീയമായി തയാറാക്കിയ സമീകൃതാഹാരം നൽകും. ആനകളുടെ തൂക്കത്തിനനുസരിച്ചാണ് കൂട്ട് തയാറാക്കുക. ആയുർവേദ, അലോപ്പതി, ഹോമിയോ മരുന്നുകളും ഇക്കാലയളവിൽ നൽകും. 36 ആനകളിൽ മദപ്പാടിലുള്ളവയൊഴികെയുള്ളവയ്ക്കാണ് ചികിത്സ നൽകുക. മദപ്പാടിലുള്ള ആനകൾക്കു നീരിൽനിന്നഴിച്ചശേഷം ചികിത്സ നൽകും. ആന ചികിത്സാവിദഗ്ധരായ ഡോ.പി.ബി. ഗിരിദാസ്, ഡോ.എം.എൻ. ദേവൻ നമ്പൂതിരി, ഡോ.ടി.എസ്. രാജീവ്, ഡോ.കെ. വിവേക്, ഡോ. ചാരു ജിത് നാരായണൻ തുടങ്ങിയവരുടെ മേൽനോട്ടത്തിലാണ് ചികിത്സ നൽകുക. ജൂലൈ 30 ന് സമാപിക്കും.

ട്രോളിംഗ് നിരോധനം ലംഘിച്ച ഫൈബർവള്ളം പിടിച്ചെടുത്തു

അഴീക്കോട്: ട്രോളിംഗ് നിരോധനകാലത്തു നിയമവിരുദ്ധമായി മത്സ്യബന്ധനം നടത്തിയ ഫൈബർ മത്സ്യബന്ധനവള്ളം ഫിഷറീസ് മറൈൻ എൻഫോഴ്സ്മെന്‍റ് സംഘം പിടികൂടി. സ്വകാര്യവ്യക്തികളുടെ സ്ഥലത്തു പ്രവർത്തിക്കുന്ന സമാന്തരഹാർബറുകളിലാണ് അനധികൃതമായി മത്സ്യങ്ങൾ ഇറക്കുന്നത്. ചില വള്ളങ്ങൾ നിരോധിതവലകൾ സ്ഥാപിച്ച് കിളിമീൻ, അരണമീൻ ഉൾപ്പെടെ പ്രജനനത്തിനു പാകമായ അടിത്തട്ടുമത്സ്യങ്ങളെ പിടികൂടുന്നതായി ശ്രദ്ധയിൽപ്പെട്ടതിനെതുടർന്നാണ് നടപടി. തിരുവനന്തപുരം പൊഴിയൂർ സ്വദേശി ഡെവിൾസ് എന്നയാളുടെ ഉടമസ്ഥതയിലുള്ള ദീപം എന്ന മത്സ്യബന്ധനവള്ളമാണ് പിടിയിലായത്. തൃശൂർ എഫ്ഇഒ സി.കെ. മനോജിന്‍റെ റിപ്പോർട്ടിന്മേൽ തൃശൂർ ജില്ലാ ഫിഷറീസ് ഡെപ്യൂട്ടി ഡയറക്ടർ നിയമനടപടി സ്വീകരിച്ച് പിഴചുമത്തും. വള്ളത്തിലെ മത്സ്യം ലേലംചെയ്ത് 1,75,000 രൂപ ട്രഷറിയിൽ അടപ്പിച്ചു. ഫിഷറീസ് സ്റ്റേഷൻ അസിസ്റ്റന്‍റ് ഡയറക്ടർ ഡോ. സി. സീമ, മറൈൻ എൻഫോഴ്‌സ്‌മെന്‍റ് ആൻഡ് വിജിലൻസ് വിഭാഗം ഓഫീസർമാരായ വി.എൻ. പ്രശാന്തകുമാർ, വി.എം. ഷൈബു എന്നിവർ നേതൃത്വം നൽകി. നിഷാദ്, കൃഷ്ണപ്രസാദ്, ഷിഹാബ് എന്നിവരും ഡ്രൈവർ അഷറഫ് പേബസാറും സംഘത്തിൽ ഉണ്ടായിരുന്നു.

വെള്ളപ്പൊക്കബാധിതസ്ഥലങ്ങൾ സന്ദർശിച്ച് കേന്ദ്രമന്ത്രി നിയോഗിച്ച വിദഗ്ധസംഘം

തൃശൂർ: വർഷക്കാലത്തു നഗരത്തിലെ വെള്ളക്കെട്ടു ദുരന്തനിവാരണത്തിനുള്ള നിർദേശങ്ങൾ സമർപ്പിക്കാൻ കേന്ദ്ര സഹമന്ത്രി സുരേഷ് ഗോപി ചുമതലപ്പെടുത്തിയ ഡോ. കെ.ജി. പദ്മകുമാറിന്‍റെ നേതൃത്വത്തിലുള്ള വിദഗ്ധസംഘം വെള്ളപ്പൊക്കം അനുഭവപ്പെട്ട സ്ഥലങ്ങൾ സന്ദർശിച്ചു. താണിക്കുടം പുഴയും കുണ്ടുവാറ തോടും കോർപറേഷൻ കനാലും (ഗിരിജ തോട്) പഞ്ചിക്കൽ തോടും പുഴയ്ക്കൽ പ്രദേശവുമാണു സന്ദർശിച്ചത്. വിവിധയിടങ്ങളിലെ നീരൊഴുക്ക് അളക്കുകയും ജലത്തിന്‍റെ സാമ്പിളുകൾ ശേഖരിക്കുകയും ചെയ്തു. വിശദമായ അപഗ്രഥനത്തിനുശേഷം റിപ്പോർട്ട് തയാറാക്കി സമർപ്പിക്കുമെന്ന് പദ്മകുമാർ അറിയിച്ചു. കൗണ്‍സിലര്‍മാരായ പൂര്‍ണിമ സുരേഷ്, എന്‍.വി. രാധിക, ബിജെപി സംസ്ഥാന വൈസ് പ്രസിഡന്‍റ് അഡ്വ. ബി. ഗോപാലകൃഷ്ണൻ, കേന്ദ്രമന്ത്രിയുടെ പ്രതിനിധികളായ രാജേഷ് നായർ, നിമ വിനോദ്, ദിനേഷ്‌കുമാർ കരിപ്പേരിൽ, ശ്രീജി വി. മോഹൻ, വിവിധ റസിഡൻസ് അസോസിയേഷൻ ഭാരവാഹികൾ തുടങ്ങിയവർ കൂടെയുണ്ടായിരുന്നു.

മുരിയാട് ഒരുകോടിയുടെ നിർമാണ പ്രവർത്തനങ്ങൾക്കു തുടക്കം

ഇരിങ്ങാലക്കുട: അംബേദ്കർ ഗ്രാമവികസനപദ്ധതിയിൽ ഉൾപ്പെടുത്തി മുരിയാട് പഞ്ചായത്തിൽ കുന്നത്തറ നഗറിൽ നടപ്പിലാക്കുന്ന ഒരു കോടി രൂപയുടെ വികസനപ്രവർത്തനങ്ങളുടെ നിർമാണോദ്ഘാടനം ഉന്നത വിദ്യാഭ്യാസ മന്ത്രി ഡോ. ആർ. ബിന്ദു നിർവഹിച്ചു. കുന്നത്തറ നഗറിൽ നടപ്പാക്കുന്ന വികസന പ്രവർത്തനങ്ങളുടെ ശിലാഫലകം മന്ത്രി അനാച്ഛാദനം ചെയ്തു. പട്ടികജാതി വികസനവകുപ്പിന്‍റെ നേതൃത്വത്തിൽ പട്ടികജാതി നഗറുകളുടെ സമഗ്രവികസനത്തിനായി നടപ്പാക്കുന്ന പദ്ധതിയാണ് അംബേദ്കർ ഗ്രാമ വികസനപദ്ധതി. കുന്നത്തറ നഗറിൽ പശ്ചാത്തലവികസനം, ഭവനപുനരുദ്ധാരണം, റോഡുകൾ, കിണർ എന്നിവയുടെ നവീകരണം തുടങ്ങി വിവിധ വികസനപ്രവർത്തനങ്ങളാണു നടപ്പാക്കുന്നത്. പഞ്ചായത്ത് പ്രസിഡന്‍റ് ജോസ് ജെ. ചിറ്റിലപ്പള്ളി അധ്യക്ഷത വഹിച്ചു. കേരള സംസ്ഥാന നിർമിതികേന്ദ്രം റീജനൽ എൻജിനീയർ സതീദേവി, പഞ്ചായത്ത് വൈസ് പ്രസിഡന്‍റ് പ്രസിഡന്‍റ് രതി ഗോപി, ബ്ലോക്ക് പട്ടികജാതി വികസന ഓഫീസർ പി.എസ്. പ്രിയ, വാർഡ് മെന്പർ ജിനി സതീശൻ തുടങ്ങിയവർ പങ്കെടുത്തു.

ചൂലൂരിലെ കാർകവർച്ച: ദന്പതികളടക്കം അഞ്ചുപേർ അറസ്റ്റിൽ

കയ്പമംഗലം: എടത്തിരുത്തി ചൂലൂരിൽനിന്നു കാർ കവർച്ച ചെയ്ത കേസിൽ ദന്പതികളടക്കം അഞ്ചുപേർ അറസ്റ്റിൽ. മലപ്പുറം അന്തിയൂർക്കുന്ന് സ്വദേശി അന്പലക്കൽ മുബഷിർ(38), മലപ്പുറം പുളിക്കൽ സ്വദേശിനി കവുങ്ങപ്പാരന്പിൽ തഫ്സീന(33), കോഴിക്കോട് ബേപ്പൂർ നടുവട്ടം സ്വദേശികളായ സി.പി ഹൗസിൽ അസ്ലം (55), മാളിയേക്കൽ സലാം(38), വലിയത്തോടി മനു(37) എന്നിവരെയാണു കയ്പമംഗലം പോലീസ് അറസ്റ്റ് ചെയ്തത്. ചൊവ്വാഴ്ച പുലർച്ചെ മൂന്നരയോടെയാണു കേസിനാസ്പദമായ സംഭവം. എടത്തിരുത്തി ചൂലൂർ വലിയകത്ത് മുഹമ്മദ് ജാസിമിന്‍റെ വീട്ടുമുറ്റത്തു നിർത്തിയിട്ടിരുന്ന സ്വിഫ്റ്റ് ഡിസയർ കാറാണ് പ്രതികൾ കവർന്നത്. കാറിന്‍റെ അലാം ശബ്ദംകേട്ടു പുറത്തുവന്ന ജാസിം തടയാൻ ശ്രമിച്ചെങ്കിലും കാലിലൂടെ കാറിന്‍റെ ടയർ കയറ്റിയിറക്കിയ പ്രതികൾ ഭീഷണിപ്പെടുത്തി കാറുമായി കടന്നുകളഞ്ഞു. എന്നാൽ പ്രതികളെ കാർ സഹിതം തേഞ്ഞിപ്പലം പോലീസ് കസ്റ്റഡിയിൽ എടുക്കുകയായിരുന്നു. തുടർന്ന് കയ്പമംഗലം പോലീസ് സ്റ്റേഷനിൽ എത്തിച്ചാണ് അറസ്റ്റ് രേഖപ്പെടുത്തിയത്. മുബഷീർ, തഫ്സീന എന്നിവർ മലപ്പുറം അരീക്കോട്, പെരിന്തൽമണ്ണ പോലീസ് സ്റ്റേഷനിൽ 2024 ൽ 31 ഗ്രാം എംഡിഎംഎ പിടികൂടിയ കേസിൽ പ്രതികളാണ്. കയ്പമംഗലം പോലീസ് സ്റ്റേഷൻ ഇൻസ്പെക്ടർ ബിനു, സബ് ഇൻസ്പെക്ടർമാരായ അഭിലാഷ്, മുഹമ്മദ് സിയാദ്, ഹരിഹരൻ, സിപിഒമാരായ ജ്യോതിഷ്, വിനുകുമർ, പ്രിയ, നീതു എന്നിവരാണ് അന്വേഷണ സംഘത്തിലുണ്ടായിരുന്നത്.

വീട്ടിലെ ലൈബ്രറി സാഹിത്യ പുരസ്കാരം പ്രഖ്യാപിച്ചു

കാറളം: തന്‍റെ വീട്ടിലെ ലൈബ്രറിയുടെ പേരിലുള്ള സാഹിത്യപുരസ്കാരം പ്രഖ്യാപിച്ച് സാംസ്കാരിക പ്രവർത്തകൻ റഷീദ് കാറളം. നോവൽ സാഹിത്യപുരസ്കാരത്തിന് പ്രഫ. വി.കെ. ലക്ഷ്മണൻ നായരുടെ ലക്ഷംവീട്, മംഗള കരാട്ടുപറന്പിൽ എഴുതിയ ദയ സമന്വയത്തിന്‍റെ പ്രവാചകൻ എന്നീ നോവലുകളും ചെറുകഥാ പുരസ്കാരത്തിന് രാധാകൃഷ്ണൻ വെട്ടത്തിന്‍റെ അപരിചിതരുടെ കടൽ എന്ന കഥാസമാഹാരവും തെരഞ്ഞെടുക്കപ്പെട്ടു. 5,000 രൂപയും മെമന്‍റോയുമാണു പുരസ്കാരം. സ്പെഷൽ ജൂറി പുരസ്കാരത്തിന് ദയ, കെ. വേണുഗോപാൽ, മിനി രാജേഷ്, മോഹനൻ വെള്ളൂപറന്പിൽ, ദിലീപൻ പൊയ്യ, ശ്രീജ വേണുഗോപാൽ, സുജാത സോമൻ, ഇ.ഡി. അഗസ്റ്റിൻ, പ്രീതി രാകേഷ് എന്നിവരെ തെരഞ്ഞെടുത്തു. 29നു രാവിലെ 11-ന് റഷീദ് കാറളത്തിന്‍റെ വീട്ടിലെ ലൈബ്രറി അങ്കണത്തിൽ നടക്കുന്ന ചടങ്ങിൽ മന്ത്രി ഡോ. ആർ. ബിന്ദു പുരസ്കാരം സമ്മാനിക്കും. കാറളം പഞ്ചായത്ത് പ്രസിഡന്‍റ് ബിന്ദു പ്രദീപ് അധ്യക്ഷയാകും. അശോകൻ ചരുവിൽ മുഖ്യപ്രഭാഷണം നടത്തും.

ബൈക്ക് മോഷണം: പ്രതി അറസ്റ്റിൽ

ചാലക്കുടി: മേൽപാലത്തിനടിയിൽ നിർത്തിയിട്ട ബൈക്ക് മോഷണം നടത്തിയ കേസിൽ ഒളിവിലായിരുന്ന പ്രതി അറസ്റ്റിൽ. പൂന്പാറ്റ സന്തോഷ് എന്നറിയപ്പെടുന്ന നടത്തറ അയ്യംകുന്ന് സ്വദേശി കദളിക്കാട്ടിൽ സന്തോഷിനെ(32)യാണ് തൃശൂർ റൂറൽ ജില്ലാ പോലീസ് മേധാവി ബി. കൃഷ്ണകുമാറിന്‍റെ നേതൃത്വത്തിൽ പ്രത്യേക അന്വേഷണസംഘം പുത്തൂരിലെ ഒളിസങ്കേതത്തിൽനിന്നു പിടികൂടിയത്. ചാലക്കുടി, പുതുക്കാട്, തൃശൂർ മെഡിക്കൽ കോളജ്, വടക്കാഞ്ചേരി സ്റ്റേഷനുകളിലായി എട്ടു ക്രിമിനൽ കേസുകളിൽ പ്രതിയാണ്.

വീണുകിട്ടിയ സ്വർണമാല തിരിച്ചുനൽകി ഓട്ടോ ഡ്രൈവർ മാതൃകയായി

കൊടുങ്ങല്ലൂർ: ഓട്ടോയിൽ വീണുകിട്ടിയ രണ്ടര പവൻ തൂക്കമുള്ള സ്വർണമാല യാത്രക്കാരിക്ക് തിരിച്ചു നൽകി ഓട്ടോ ഡ്രൈവർ മാതൃകയായി. കൊടുങ്ങല്ലൂർ തെക്കേനടയിലെ പുളിഞ്ചോടാൻ സ്റ്റാൻഡിലെ ഓട്ടോ ഡ്രൈവർ ആനാപ്പുഴ കുരിയ പറബിൽ സുരേഷാണ് ലക്ഷങ്ങൾ വിലയുള്ള മാല തിരികെ നൽകിയത്. ഇന്നലെ രാത്രി കൊടുങ്ങല്ലൂർ ശ്രീകുരുംബ ഭഗവതിക്ഷേത്രത്തിൽ ദർശനത്തിനെത്തിയ പറവൂർ വെടിമറ സ്വദേശിയും റിട്ട. എഎസ്ഐയുമായ പാർവതിയുടെതായിരുന്നു മാല. മാല കിട്ടിയ വിവരം രാത്രി തന്നെ സുരേഷ് സഹപ്രവർത്തകരോട് പങ്കുവച്ചിരുന്നു. ക്ഷേത്ര ദർശനത്തിനായി ഓട്ടോയിൽ നിന്നും ഇറങ്ങു മ്പോൾ മാല അഴിച്ചു ബാഗിൽ ഇട്ടിരുന്നു എന്നാൽ മാല ഓട്ടോയിൽ വീണു പോകുകയായിരുന്നു. ഇതറിയാതെ ക്ഷേത്രദർശനം കഴിഞ്ഞ് തിരിച്ചുപോകാൻ ഒരുങ്ങുമ്പോൾ ബാഗിൽ മാല തെരഞ്ഞെങ്കിലും കണ്ടെത്തിയില്ല. ഇവർ മാലതിരക്കി ഒട്ടോ സ്റ്റാൻഡിൽ എത്തിയെങ്കിലും രാത്രി ഓട്ടോ സ്റ്റാൻഡ് ഒഴിഞ്ഞ നിലയിലായിരുന്നു. വീട്ടിലേക്ക് തിരിച്ചുപോയ പാർവതി ഇന്ന് രാവിലെ മാല തിരക്കി എത്തുകയായിരുന്നു. മറ്റു ഡ്രൈവർമാരുടെ സാന്നിധ്യത്തിൽ സുരേഷ് പാർവതിക്ക് സ്വർണമാല തിരിച്ചു നൽകി.

കരുവന്നൂർ ബാങ്ക് : കേരള കോണ്‍ഗ്രസ് തുടർസമരത്തിലേക്ക്: അഡ്വ. തോമസ് ഉണ്ണിയാടൻ

ഇരിങ്ങാലക്കുട: കരുവന്നൂർ ബാങ്ക് നിക്ഷേപകരോടു കാട്ടുന്ന ക്രൂരസമീപനം മാറ്റമില്ലാതെ തുടരുകയാണെന്നും ഇതിനെതിരേ കേരള കോണ്‍ഗ്രസ് രംഗത്തുണ്ടാകുമെന്നും സംസ്ഥാന ഡെപ്യൂട്ടി ചെയർമാൻ തോമസ് ഉണ്ണിയാടൻ. വായ്പാതട്ടിപ്പ് നടത്തിയവർ, അവർക്ക് കൂട്ടുനിന്നവർ, അവരെ സംരക്ഷിച്ചവർ, തട്ടിപ്പുതുകയുടെ ഓഹരി കൈപ്പറ്റിയവർ, ഇടനിലക്കാർ കുറ്റാരോപിതരായ ബാങ്ക് ഉദ്യോഗസ്ഥർ എല്ലാവരും ശിക്ഷിക്കപ്പെടണം. വർഷങ്ങളായി കാലാവധി പൂർത്തീകരിച്ചിട്ടും നിക്ഷേപത്തുക തിരികെ കിട്ടാതെ ആത്മഹത്യ ചെയ്യേണ്ടിവരികയും ചികിത്സ കിട്ടാതെ മരിക്കുകയും ചെയ്യുന്ന അവസ്ഥ ഇനി ഉണ്ടാവരുതെന്നും അദ്ദേഹം പറഞ്ഞു. കേരള കോണ്‍ഗ്രസ് ഇരിങ്ങാലക്കുട നിയോജകമണ്ഡലം കമ്മിറ്റിയുടെ ആഭിമുഖ്യത്തിൽ കരുവന്നൂർ ബാങ്കിനു മുന്പിൽ നടന്ന സംഗമം ഉദ്ഘാടനം ചെയ്തു പ്രസംഗിക്കുകയായിരുന്നു തോമസ് ഉണ്ണിയാടൻ. നിയോജകമണ്ഡലം പ്രസിഡന്‍റ് റോക്കി ആളൂക്കാരൻ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി മിനി മോഹൻദാസ്, ഭാരവാഹികളായ സേതുമാധവൻ പറയംവളപ്പിൽ, സിജോയ് തോമസ്, പി.ടി. ജോർജ്, സതീഷ് കാട്ടൂർ, എം.എസ്. ശ്രീധരൻ മുതിരപ്പറന്പിൽ, അഡ്വ. ഷൈനി ജോജോ തുടങ്ങിയവർ പ്രസംഗിച്ചു.

പുല്ലൂർ സേക്രഡ് ഹാർട്ട് മിഷൻ ഹോസ്പിറ്റലിൽ പുതിയ സിടി സ്കാൻ സെന്‍റർ തുറന്നു

ഇരിങ്ങാലക്കുട: പുല്ലൂർ സേക്രഡ് ഹാർട്ട് മിഷൻ ഹോസ്പിറ്റലിൽ അന്പത്തിയെട്ടാം ഹോസ്പിറ്റൽ ഡേ ആഘോഷവും പുതിയ സിടി സ്കാൻ സെന്‍ററിന്‍റെ ഉദ്ഘാടനവും രൂപത ബിഷപ് മാർ പോളി കണ്ണൂക്കാടൻ നിർവഹിച്ചു. അത്യാധുനിക സൗകര്യങ്ങൾ സംയോജിപ്പിപ്പിച്ചാണ് ഹോസ്പിറ്റൽ മാനേജ്മന്‍റ് ആശുപത്രിയെ കഴിഞ്ഞ 58 വർഷങ്ങളിൽ മുന്നോട്ടുകൊണ്ടുപോകുന്നതെന്ന് ബിഷപ് ഉദ്ഘാടനപ്രസംഗത്തിൽ പറഞ്ഞു. മരിറ്റൻ സിസ്റ്റേഴ്സ് സ്നേഹോദയ പ്രൊവിൻഷ്യൽ സുപ്പീരിയറും ഹോസ്പിറ്റൽ ഡയറക്ടറും മെഡിക്കൽ സൂപ്രണ്ടുമായ സിസ്റ്റർ ഡോ. റീറ്റ സിഎസ്എസ് അധ്യക്ഷത വഹിച്ചു. ഇരിങ്ങാലക്കുട ജോയിന്‍റ് റീജണൽ ട്രാൻസ്പോർട് ഓഫീസർ ബിജു ഐസക് മുഖ്യപ്രഭാഷണം നടത്തി. മുരിയാട് പഞ്ചായത്ത് പ്രസിഡന്‍റ് ജോസ് ചിറ്റിലപ്പിള്ളി, പുല്ലൂർ സെന്‍റ് സേവിയേഴ്സ് ഇടവക വികാരി ഫാ. ജോയ് വട്ടോളി സിഎംഐ, സീനിയർ ഡോക്ടർ എം.വി. വാറുണ്ണി, പഞ്ചായത്തംഗം മണി സജയൻ, എക്സൈസ് സർക്കിൾ ഇൻപെക്ടർ കെ. ശങ്കർ പ്രസംഗിച്ചു. ഹോസ്പിറ്റൽ അഡ്മിനിസ്ട്രേറ്റർ സിസ്റ്റർ ഫ്ലോറി സിഎസ്എസ് സ്വാഗതവും ഹോസ്പിറ്റൽ മാനേജർ-ഓപ്പറേഷൻസ് ആൻജോ ജോസ് ആമുഖപ്രസംഗവും മദർ സുപ്പീരിയർ സിസ്റ്റർ എൽസീന സിഎസ്എസ് നന്ദിയും പറഞ്ഞു. മാഗ്നസ് ഡയഗ്നോസ്റ്റിക്സുമായി സഹകരിച്ചാണ് ഇരുപത്തിനാലു മണിക്കൂറും പ്രവർത്തിക്കുന്ന സിടി സ്കാനിംഗ് സെന്‍റർ പ്രവർത്തനക്ഷമമാക്കിയത്.

വായനോത്സവം സംഘടിപ്പിച്ചു

എടത്തിരുത്തി: ഗ്രാമപഞ്ചായത്ത് പബ്ലിക് ലൈബ്രറിയുടെ ആഭിമുഖ്യത്തിൽ വായനോത്സവം സംഘടിപ്പിച്ചു. എടത്തിരുത്തി സെന്‍റ് ആൻസ് സ്കൂളിൽ യുപി, ഹൈസ്കൂൾ വിദ്യാർഥികൾക്കായി സംഘടിപ്പിച്ച വായനോത്സവം ഗ്രാമപഞ്ചായത്ത് പ്രസിഡന്‍റ് ടി.കെ. ചന്ദ്രബാബു ഉദ്ഘാടനം ചെയ്തു. ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ എം.എസ്. നിഖിൽ അധ്യക്ഷനായി. വികസനകാര്യ സ്റ്റാൻഡിംഗ് കമ്മിറ്റി ചെയർമാൻ പി.ആർ. നിഖിൽ, പഞ്ചായത്തംഗം പി.എ. ഷെമീർ, ലൈബ്രറി കമ്മിറ്റിയംഗം ജാൻസി ജേക്കബ്, താലൂക്ക് ലൈബ്രറി എക്സിക്യൂട്ടീവ് അംഗം കെ.എ. കൊച്ചുമോൻ, പഞ്ചായത്ത് സെക്രട്ടറി കെ.വി. സനീഷ്, സ്കൂൾ പ്രധാനധ്യാപിക ലിസ്ജോ, പഞ്ചായത്ത് സ്റ്റാഫ് അംഗങ്ങളായ വിദ്യ, റഹ്മത്ത്, പ്രസീദ, ഭാഗ്യലക്ഷ്മി, ലൈബ്രേറിയൻ എം.എസ്. സുബിൻ എന്നിവർ പ്രസംഗിച്ചു.

തരിശുരഹിത മേലൂരിനായി ഞങ്ങളും കൃഷിയിലേക്ക്

മേലൂർ: കൃഷിവകുപ്പ് വിഭാവനംചെയ്ത തരിശുരഹിതഗ്രാമം പദ്ധതിയുടെ ഭാഗമായി മേലൂരിൽ തൊഴിലുറപ്പ് തൊഴിലാളികളുടെ നേതൃത്വത്തിൽ പച്ചക്കറി, പൂച്ചെടി കൃഷികൾക്കു തുടക്കമായി. കുന്നപ്പിള്ളി വാർഡിൽ സംഘടിപ്പിച്ച തൈനടീൽ ഗ്രാമപഞ്ചായത്ത് പ്രസിഡന്‍റ് എം.എസ്. സുനിത ഉദ്ഘാടനം ചെയ്തു. മേലൂർ സർവീസ് സഹകരണ ബാങ്ക് പ്രസിഡന്‍റ് ഇ.കെ. കൃഷ്ണൻ അധ്യക്ഷത വഹിച്ചു. മൂന്നു ഏക്കർ തരിശൂഭൂമിയിലാണ് പയർ, വെണ്ട, വഴുതന, തക്കാളി, പച്ചമുളക് എന്നിവയ്ക്കുപുറമെ ഓണത്തെ വരവേൽക്കാൻ ചെണ്ടുമല്ലിപൂക്കൾക്കുമായി കൃഷിയിറക്കുന്നത്. ഗ്രാമപഞ്ചായത്തിന്‍റെയും മേലൂർ സഹകരണ ബാങ്കിന്‍റെയും കൃഷിഭവന്‍റെയും സഹകരണത്തോടെയാണു പദ്ധതി നടപ്പാക്കുന്നത്. ഗ്രാമപഞ്ചായത്ത് വൈസ് പ്രസിഡന്‍റ് പോളി പുളിക്കൻ, ബ്ലോക്ക് പഞ്ചായത്ത് അംഗം ഇന്ദിര പ്രകാശൻ, വാർഡ് മെന്പർ പി.ആർ. ബിബിൻരാജ്, ചാലക്കുടി ബ്ലോക്ക് കൃഷി അസിസ്റ്റന്‍റ് ഡയറക്ടർ ജെലിറ്റ എൽസ ജേക്കബ്, പഞ്ചായത്ത് സെക്രട്ടറി സി.എൻ. അനൂപ്, കൃഷി ഓഫീസർ രാഹുൽ കൃഷ്ണ, തൊഴിലുറപ്പ് അസിസ്റ്റന്‍റ് എൻജിനീയർ ധന്യ, ഷിജി വികാസ് എന്നിവർ പ്രസംഗിച്ചു.

പന്നിത്തടത്ത് വീണ്ടും വാഹനാപകടം; ലോറി മറിഞ്ഞ് ഒരാൾക്കു പരിക്ക്

എരുമപ്പെട്ടി: പന്നിത്തടം സെന്‍ററിൽ ലോറികൾ തമ്മിൽ കൂട്ടിയിടിച്ച് മറിഞ്ഞ് ഒരാൾക്ക് പരിക്ക്. ഇന്നലെ പുലർച്ചെ രണ്ടോടെയാണ് അപകടമുണ്ടായത്. തമിഴ്നാട്ടിൽ നിന്നും മത്സ്യം കയറ്റി വടക്കാഞ്ചേരി വഴി കുന്നംകുളം ഭാഗത്തേക്ക് വന്നിരുന്ന മിനി കണ്ടെയ്നർ ലോറിയും അക്കിക്കാവ് ഭാഗത്തുനിന്ന് വാഴക്കുലകൾ കയറ്റി വന്നിരുന്ന ടിപ്പർലോറിയുമാണ് സെന്‍ററിൽ കൂട്ടിയിടിച്ചത്. അപകടത്തിൽ കണ്ടെയ്നർ ലോറി നടുറോഡിൽ മറിഞ്ഞു. ഡ്രൈവർക്ക് പരിക്ക് പറ്റി. പോലീസ് സ്ഥലത്തെത്തി ക്രെയിൻ ഉപയോഗിച്ച് ലോറികൾ എടുത്ത് മാറ്റി. അക്കിക്കാവ് - കേച്ചേരി ബൈപ്പാസ് റോഡിന്‍റെ നിർമാണം പൂർത്തിയായതോടെയാണ് അപകടങ്ങൾ നിത്യസംഭവമായി മാറിയത്. അക്കിക്കാവ് - കേച്ചേരി ബൈപ്പാസ് റോഡും, കുന്നംകുളം - വടക്കാഞ്ചേരി റോഡും സംഗമിക്കുന്ന പന്നിത്തടം സെന്‍റർ വീതികൂട്ടി വികസിപ്പിച്ചിട്ടുണ്ട്. അമിത വേഗത്തിൽ അശ്രദ്ധയോടെ വാഹനങ്ങൾ സെന്‍ററിലേക്ക് പ്രവേശിക്കുന്നതാണ് അപകടത്തിന് കാരണമാകുന്നത്. കഴിഞ്ഞദിവസം രണ്ട് കാറുകളും ബൈക്കും തമ്മിൽ കൂട്ടിയിടിച്ചിരുന്നു. ഒരാഴ്ചയ്ക്കുള്ളിൽ ആറാമത്തെ അപകടമാണ് ഇവിടെ നടന്നിട്ടുള്ളത്. റോഡിൽ താൽക്കാലികമായി സ്പീഡ് ബ്രേക്കിംഗ് ബോർഡുകൾ വെച്ചിട്ടുണ്ട്. എന്നാൽ സിഗ്നൽ ലൈറ്റുകൾ സ്ഥാപിച്ചാൽ മാത്രമെ അപകടത്തിന് പരിഹാരമാവുകയുള്ളൂവെന്ന് നാട്ടുകാർ പറയുന്നു. പന്നിത്തടം സെന്‍ററിൽ സിഗ്നൽ ലൈറ്റ് സ്ഥാപിക്കാൻ നടപടി എരുമപ്പെട്ടി: തുടർച്ചയായി അപകടങ്ങൾ സംഭവിക്കുന്ന പന്നിത്തടം സെന്‍ററിൽ സോളാര്‍ പവേര്‍ഡ് ഓട്ടോമാറ്റിക് സിഗ്നൽ ലൈറ്റ് സംവിധാനം സ്ഥാപിക്കുന്നതിന് നടപടിയായി. എ.സി. മൊയ്തീൻ എംഎൽഎയുടെ ഇടപെടലിന്‍റെ ഭാഗമായി ജിഎസ്ടി ഉള്‍പ്പെടെ 19,39,854/- രൂപയ്ക്കാ ണ് സിഗ്നല്‍ സ്ഥാപിക്കുന്നതിന് കിഫ്ബി കെൽട്രോണിന് അനുമതി നല്‍കിയിട്ടുള്ളത്. കേച്ചേരി-അക്കിക്കാവ് ബൈപ്പാസ് റോഡും കുന്നംകുളം വടക്കാഞ്ചേരി സംസ്ഥാന ഹൈവേയും സംഗമിക്കുന്ന സെന്‍ററാണ് പന്നിത്തടം. ആധുനിക രീതിയിലുള്ള ബൈപ്പാസ് നിർമാണം പൂർത്തിയായി റോഡിന്‍റെ സൗകര്യം വർധിച്ചതിനാൽ ഇതിലൂടെയുള്ള വാഹനങ്ങളുടെ സഞ്ചാരവും വർധിച്ചിരിക്കുകയാണ്‌. സെന്‍ററിനെ കുറിച്ച് അറിയാതെയുള്ള അമിത വേഗം നിരന്തരം അപകടങ്ങൾക്ക് ഇടയാക്കുന്നുണ്ട്. ഇതിനെ തുടർന്നാണ് എംഎൽഎ ഇടപ്പെട്ട് സിഗ്നൽ സംവിധാനം ഒരുക്കുന്നത്. ഇതോടൊപ്പം അക്കിക്കാവ് ജംഗ്ഷനിലെ സിഗ്നല്‍ സംവിധാനവും മാറ്റി സ്ഥാപിക്കും.

ആൽപ്പാറയിൽ ശക്തമായ കാറ്റിൽ മരംവീണ് വൈദ്യുതിപോസ്റ്റ് ഒടിഞ്ഞു

ആൽപ്പാറ: റോസ് ഗാർഡനിൽ ശക്തമായ കാറ്റിൽ തേക്കുമരം കടപുഴകിവീണ് വൈദ്യുതി പോസ്റ്റ് ഒടിഞ്ഞു. ഇന്നലെ രാവിലെയാണ് ആൽപ്പാറ കമ്പനിപ്പടി ഭാഗങ്ങളിൽ ശക്തമായ കാറ്റ് വീശിയത്. വൈദ്യുതി പോസ്റ്റ് ഒടിഞ്ഞതോടെ പ്രദേശത്തെ 30 ഓളം വീടുകളിലേയ്ക്കുള്ള വൈദ്യുതി തടസപ്പെട്ടു. റോഡിനു കുറുകെയാണ് മരം വീണത്. സംഭവസമയം റോഡിൽ യാത്രക്കാർ ഇല്ലാതിരുന്നത് വലിയ അപകടമാണ് ഒഴിവാക്കിയത്.

ആമ്പല്ലൂർ സര്‍വീസ് റോഡിൽ‍ സ്ലാബുകളില്‍ കുടുങ്ങി അപകടങ്ങള്‍ പതിവാകുന്നു

ആമ്പല്ലൂര്‍: അടിപ്പാതനിര്‍മാണം നടക്കുന്ന ആമ്പല്ലൂരിലെ സര്‍വീസ് റോഡുകള്‍ അപകടക്കെണിയാകുന്നു. തൃശൂര്‍ ഭാഗത്തേക്ക് പോകുന്ന റോഡിലെ അശാസ്ത്രീയമായ നിര്‍മാണമാണ് അപകടങ്ങള്‍ക്കിടയാക്കുന്നത്. സര്‍വീസ് റോഡില്‍ നിര്‍മിച്ച ഡ്രൈനേജിന്‍റെ സ്ലാബുകളുടെ വശങ്ങളില്‍ വാഹനങ്ങള്‍ കുടുങ്ങുന്നതാണ് അപകടത്തിന് കാരണം. ഇരുചക്രവാഹന യാത്രക്കാരാണ് ഏറെയും അപകടത്തില്‍പ്പെടുന്നത്. ഉയര്‍ന്നുനില്‍ക്കുന്ന സ്ലാബിനോട് ചേര്‍ന്ന് റോഡ് മണ്ണിട്ടുനികത്താതായതോടെ ഇവിടെ ഇരുചക്ര വാഹനങ്ങള്‍ തെന്നിവീഴുന്നത് പതിവായിരിക്കുകയാണ്. കഴിഞ്ഞ ദിവസങ്ങളിലായി നിരവധി വാഹനങ്ങളാണ് ഇതില്‍ കുടുങ്ങിയത്. വീതി കുറഞ്ഞതും കുഴികള്‍ നിറഞ്ഞതുമായ സര്‍വീസ് റോഡിലൂടെ വാഹനങ്ങള്‍ ഇഴഞ്ഞു നീങ്ങുമ്പോള്‍ ഡ്രൈനേജിന്‍റെ മകളിലൂടെ ചെറുവാഹനങ്ങള്‍ കടന്നുപോകാറുണ്ട്. ഇത്തരത്തില്‍ പോകുന്ന ഇരുചക്രവാഹനങ്ങളാണ് കൂടുതലായി അപകടത്തില്‍പ്പെടുന്നത്. ഇവിടെ റോഡ്പണി പൂര്‍ത്തിയാക്കാത്തതുമൂലം സമീപത്തെ വ്യാപാര സ്ഥാപനങ്ങളിലേക്കും വാഹനങ്ങള്‍ക്ക് കടക്കാന്‍ ബുദ്ധിമുട്ടാണ് അനുഭവിക്കുന്നത്. നിരവധി തവണ പരാതി നല്‍കിയെങ്കിലും കരാര്‍ കമ്പനി യാതൊരു നടപടിയും എടുത്തില്ലെന്ന ആക്ഷേപമുണ്ട്. ഗതാഗതക്കുരുക്കൊഴിവാക്കാന്‍ സര്‍വീസ് റോഡിന്‍റെ വശങ്ങളിലുള്ള ഡ്രൈനേജിലൂടെയും വാഹനങ്ങള്‍ക്ക് കടന്നുപോകാന്‍ സൗകര്യമൊരുക്കിയിട്ടുണ്ടെങ്കിലും അപകടങ്ങള്‍ പതിയിരിക്കുന്നയിടങ്ങളില്‍ നിര്‍മാണം പൂര്‍ത്തിയാക്കണമെന്നാണ് യാത്രക്കാരുടെ ആവശ്യം.

പാലിയേക്കര ടോള്‍ സമാന്തരപാത മണലി - മടവാക്കര റോഡ് തുറന്നു

പാലിയേക്കര: ടോള്‍ സമാന്തര പാതയായ മണലി - മടവാക്കര റോഡ് നവീകരിച്ച് തുറന്നുനല്‍കി. മാസങ്ങളായി തകര്‍ന്ന് സഞ്ചാരയോഗ്യമല്ലാതായി കിടന്ന റോഡ് കെ.കെ. രാമചന്ദ്രന്‍ എംഎല്‍എയുടെ ആസ്തിവികസന ഫണ്ടില്‍ നിന്ന് 40 ലക്ഷം രൂപ ചിലവഴിച്ചാണ് നവീകരിച്ചത്. ചാലക്കുടി ഭാഗത്തുനിന്ന് വരുന്ന വാഹനങ്ങള്‍ക്കു തൃശൂര്‍, പാലക്കാട് ഭാഗത്തേക്ക് ടോള്‍ ഒഴിവാക്കി പോകാനുള്ള റോഡാണിത്. ഭാരവാഹനങ്ങള്‍ കൂടുതലായി കടന്നുപോയതോടെയാണ് റോഡ് തകർന്നത്. മുന്‍പ് പലതവണ റോഡ് നവീകരിച്ചിരുന്നുവെങ്കിലും ടോറസ് ഉള്‍പ്പടെയുള്ള വലിയ വാഹനങ്ങള്‍ പോയിത്തുടങ്ങിയതോടെ സഞ്ചാരയോഗ്യമല്ലാതാകുകയായിരുന്നു. നെന്മണിക്കര പഞ്ചായത്തിന്‍റെ പരിധിയിലുള്ള റോഡ് തകര്‍ന്നത് നവീകരിക്കാതെ വന്നതോടെ ഏറെ പരാതിക്കും പ്രതിഷേധത്തിനും ഇടയാക്കിയിരുന്നു. ഇതിനിടെയാണ് എംഎല്‍എ ഇടപെട്ട് റോഡ് നവീകരിച്ചത്. കെ.കെ. രാമചന്ദ്രന്‍ എംഎല്‍എ റോഡ് ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്‍റ് ് ടി.എസ്. ബൈജു അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ്് വി.എസ്. പ്രിന്‍സ്, ബ്ലോക്ക് പഞ്ചായത്ത് പ്രസിഡന്‍റ് കെ.എം.ചന്ദ്രന്‍ എന്നിവര്‍ വിശിഷ്ടാതിഥികളായി. ഗ്രാമപഞ്ചായത്ത് അംഗം കെ.വി. ഷാജു, ബ്ലോക്ക് പഞ്ചായത്ത് വൈസ് പ്രസിഡന്‍റ്് ഷീല മനോഹരന്‍ എന്നിവര്‍ സംസാരിച്ചു. മുഖ്യമന്ത്രിയുടെ തദ്ദേശ റോഡ് പുനരുദ്ധാരണ പദ്ധതി പ്രകാരം 35 ലക്ഷം രൂപയും, വശങ്ങള്‍ സംരക്ഷിക്കുന്നതിനും,ഐറിഷ് ഡ്രൈന്‍ ഉള്‍പ്പെടെയുള്ള പ്രവര്‍ത്തികള്‍ക്കും 8.3 ലക്ഷം രൂപ എംഎല്‍എയുടെ പ്രത്യേക വികസന ഫണ്ടില്‍ നിന്നും അനുവദിച്ചതായി എംഎല്‍എ അറിയിച്ചു.

വാഴാനി ഡാമിൽ മത്സ്യത്തൊഴിലാളികളുടെ വലകൾ മോഷണംപോയി

വടക്കാഞ്ചേരി: വാഴാനി ഡാമിൽ സാമൂഹ്യവിരുദ്ധരുടെ അഴിഞ്ഞാട്ടം. ഡാമിൽ മത്സ്യബന്ധനത്തിന് അധികാരമുള്ള ഹരിജൻ ഗിരിജൻ വെൽഫെയർ സഹകരണ സംഘം മെമ്പർമാരുടെ മത്സ്യബന്ധന വലകൾ ഒന്നാകെ അഴിച്ചുമാറ്റി.ഡാം ജലാശയത്തിന് സമീപം സൂക്ഷിച്ചിരുന്ന വലകളാണ് കഴിഞ്ഞരാത്രി മോഷണം പോയത്. ഇതോടെ മത്സ്യബന്ധനം നിലച്ചു. നിർധന കുടുംബാംഗങ്ങളാണ് സഹകരണ സംഘത്തിലുള്ളത്. ഇവരുടെ ഏക വരുമാനമാർഗവും ഇല്ലാതായി. നാടൻ മത്സ്യങ്ങളാണ് ഡാമിൽ നിക്ഷേപിച്ചിട്ടുള്ളത്. ഇതിന് വലിയ ഡിമാൻഡുണ്ട്. നിരവധി പേരാണ് സംഘത്തിൽ മത്സ്യത്തിനായെത്തുന്നത്. മികച്ച കച്ചവടം നടക്കുന്ന സമയത്താണ് ഇവർക്ക്തിരിച്ചടിയായത്. 30,000 രൂപയുടെ നഷ്ടം സംഭവിച്ചതായി പ്രസിഡന്‍റ് രാമൻകുട്ടി അറിയിച്ചു. വടക്കാഞ്ചേരി പൊലീസിൽ പരാതി നൽകി. അതിനിടെ മ്യൂസിക്കൽ ഫൗണ്ടൻ നിർമാണം നടക്കുന്ന സ്ഥലത്തുനിന്ന് ഇലക്ട്രിക് കട്ടറും മോഷണം പോയതായി തൊഴിലാളികൾ പറയുന്നു. രാത്രിയിൽ ഡാമിൽ വെളിച്ചവും, സുരക്ഷാജീവനക്കാരും ഇല്ലാത്തതും പ്രതിസന്ധിക്ക് കാരണമാകുന്നു.

സാമ്പത്തികപ്രതിസന്ധി വരുമെന്ന് യുഡിഎഫ്; ഇല്ലെന്ന് അധ്യക്ഷ

ചാവക്കാട്: നഗരസഭയുടെ ടൗണ്‍ഹാള്‍ നിര്‍മാണത്തിനായി വായ്പയെടുത്ത് നഗരസഭയെ സാമ്പത്തിക പ്രതിസന്ധിയിലാക്കരുതെന്ന് യുഡിഎഫ്. ടൗണ്‍ഹാള്‍ നിര്‍മാണത്തിനായി കെയുആര്‍ഡിഎഫ്‌സി-യില്‍നിന്ന് വായ്പ എടുക്കുന്നതു സംബന്ധിച്ച അജണ്ടയിലാണ് യുഡിഎഫ് അംഗങ്ങള്‍ ആശങ്ക അറിയിച്ചത്. വായ്പയെടുക്കുമ്പോള്‍ നഗരസഭയുടെ സ്ഥാപനങ്ങള്‍ ഈടായി നല്‍കരുത്, ടൗണ്‍ഹാളിന്‍റെ നിര്‍മാണം പൂര്‍ത്തിയായി സ്ഥാപനത്തില്‍നിന്ന് വരുമാനം കിട്ടിത്തുടങ്ങിയിട്ടു മാത്രമേ പലിശയോടുകൂടിയ വായ്പ തിരിച്ചടവ് ആരംഭിക്കാവൂ എന്നീ ഉപാധികളാണ് യുഡിഎഫ് അംഗങ്ങള്‍ മുന്നോട്ടുവച്ചത്. ഉപാധികള്‍ പാലിക്കപ്പെട്ടാല്‍ അജണ്ടയോടു യോജിക്കാമെന്നും അല്ലാത്തപക്ഷം വിയോജിപ്പ് രേഖപ്പെടുത്തുമെന്ന് കൗൺസിൽ യോഗത്തിൽ പ്രതിപക്ഷം പറഞ്ഞു. ടൗണ്‍ഹാള്‍ നിര്‍മാണത്തിന് 17 കോടി രൂപയാണ് ചെലവുവരുന്നത്. നവകേരളസദസില്‍ ഏഴ് കോടി രൂപ അനുവദിച്ചിട്ടുണ്ട്. എന്നാല്‍ ടൗണ്‍ഹാള്‍ പൂര്‍ണമായി എല്ലാ സംവിധാനങ്ങളോടുംകൂടി പൂര്‍ത്തീകരിക്കണമെങ്കില്‍ പത്ത് കോടികെയുആര്‍ഡിഎഫ്‌സി-യില്‍നിന്ന് വായ്പ എടുക്കണം. പ്ലാന്‍ ഫണ്ടില്‍നിന്നാണ് ഈ വായ്പയുടെ അടവ് പോകേണ്ടതെന്നും പ്ലാന്‍ ഫണ്ട് നാല് കോടി മാത്രമുള്ള നഗരസഭയ്ക്ക് ആറ് ശതമാനം പലിശ നിരക്കില്‍ വായ്പയെടുത്താല്‍ മറ്റു പ്രവര്‍ത്തനങ്ങള്‍ക്ക് ഫണ്ടില്ലാതെ വരുമെന്നും വലിയസാമ്പതികപ്രശ്‌നങ്ങള്‍ ഉണ്ടാവാന്‍ സാധ്യതയുണ്ടെന്നുമാണ് യുഡിഎഫ് ചൂണ്ടിക്കാട്ടി . ഉപാധികളോടെ മാത്രമേ വായ്പ എടുക്കാവു. എന്നാല്‍ അനാവശ്യമായ ആശങ്കയാണ് ഇക്കാര്യത്തില്ലെന്ന് ചെയര്‍പേഴ്‌സന്‍ ഷീജ പ്രശാന്ത് പറഞ്ഞു. വായ്പക്കായി നഗരസഭയുടെ ഫിനാന്‍ഷ്യല്‍ സ്‌റ്റേറ്റ്‌മെന്‍റ് മാത്രമാണ് കെയുആര്‍ഡിഎഫ്‌സി ആവശ്യപ്പെട്ടിട്ടുള്ളതെന്നും ഈടായി മറ്റൊന്നും നല്‍കുകയില്ലെന്നും ചെയര്‍പേഴ്‌സന്‍ പറഞ്ഞു.

അരണാട്ടുകര പള്ളിയിൽ ദുക്‌റാന തിരുനാൾ കൊടിയേറി

തൃശൂർ: അരണാട്ടുകര സെന്‍റ് തോമസ് പള്ളി ഇടവകമധ്യസ്ഥനായ വിശുദ്ധ തോമാശ്ലീഹായുടെ ഉൗട്ടുതിരുനാൾ കൊടികയറ്റം വികാരി ഫാ. ജോസ് ചാലയ്ക്കൽ നിർവഹിച്ചു. ഇന്നുമുതൽ എല്ലാദിവസവും വൈകിട്ട് ആറിന് ആഘോഷമായ പാട്ടുകുർബാന, ലദീഞ്ഞ്, നൊവേന. ജൂലൈ രണ്ടിന് ആഘോഷമായ പാട്ടുകുർബാനയ്ക്കും നൊവേനയ്ക്കും ശേഷം കൂടുതുറക്കൽ ചടങ്ങിന് ബസിലിക്ക ഫൊറോന പള്ളി വികാരി ഫാ. തോമസ് കാക്കശേരി മുഖ്യകാർമികനാകും. ജൂലൈ മൂന്ന് തിരുനാൾദിവസം രാവിലെ ആറിനും 7.30നും പാട്ടുകൂർബാനകൾ നടക്കും. 9.30ന് ആഘോഷമായ തിരുനാൾ പാട്ടു കുർബാനയ്ക്ക് ഫാ. ജോയ് പുത്തൂർ മുഖ്യകാർമികനാകും. മൈനർ സെമിനാരി റെക്ടർ ഫാ . പോൾ മാള്യമ്മാവ് സന്ദേശം നൽകും. വിശുദ്ധ കുർബാനയ്ക്കുശേഷം പ്രദക്ഷിണം, ഉൗട്ടുസദ്യ വെഞ്ചരിക്കൽ എന്നിവ നടക്കും.

എരുമപ്പെട്ടി ഫൊറോന പള്ളി ഊട്ടുതിരുനാൾ ഇന്നും നാളെയും

എരുമപ്പെട്ടി: എരുമപ്പെട്ടി തിരുഹൃദയ ഫൊറോന പള്ളിയിൽ ഈശോയുടെ തിരുഹൃദയ പ്രതിഷ്ഠ ഊട്ട് തിരുന്നാൾ വ്യാഴം, വെള്ളി ദിവസങ്ങളിൽ ആഘോഷിക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. ഇന്നു വൈകീട്ട് ആറിന് വിശുദ്ധ കുർബാന, രൂപംഎഴുന്നള്ളിപ്പ് എന്നിവ നടക്കും. അതിരൂപത വികാരി ജനറാൾ മോൺ. ജോസ് കോനിക്കര കാർമികത്വം വഹിക്കും. പെരുന്നാൾ ദിനമായ നാളെ രാവിലെ ആരംഭിക്കുന്ന നേർച്ച ഊട്ട് വൈകീട്ട് മൂന്ന് മണി വരെ നടക്കും. നേർച്ച ഊട്ടും പായസവും പാഴ്സലായി നൽകുന്നതിന് സൗകര്യമുണ്ടായിരിക്കും. രാവിലെ എട്ടിന് നടക്കുന്ന വിശുദ്ധ കുർബാനയ്ക്ക് ഫാ. ജീസ് അക്കരപറ്റ്യേക്കൽ കാർമികനാകും. പത്തിന് നടക്കുന്ന പരിശുദ്ധ റാസ കുർബാനയ്ക്ക് ഫാ. ജോൺ പുത്തൂർ കാർമികനാകും, ഫാ. പോൾ മുട്ടത്ത് തിരുന്നാൾ സന്ദേശം നൽകും. തുടന്ന് പ്രദക്ഷിണം നടക്കും. വൈകീട്ട് ആറിന് നടക്കുന്ന വിശുദ്ധ കുർബാനയ്ക്ക് ഫാ. ഷോജോ മഞ്ഞാടിക്കൽ കാർമികനാകും. എരുമപ്പെട്ടി പ്രസ് ക്ലബ്ബിൽ നടത്തിയ പത്രസമ്മേളനത്തിൽ ഫൊറോന വികാരി ഫാ. ജോഷി ആളൂർ, ജനറൽ കൺവീനർ കെ‌.സി. ഡേവീസ്, ജോയിന്‍റ്് കൺവീനർ എം.കെ ജോഷി, പബ്ലിസിറ്റി കൺവീനർ സിജു സൈമൺ, നടത്ത് കൈക്കാരൻ ജെയ്സൺ താണിക്കൽ, കൈക്കാരൻ എം.കെ. ജോൺസൻ എന്നിവർ പങ്കെടുത്തു.

തോട്ടിൽവീണ് കാണാതായ യുവാവിന്‍റെ മൃതദേഹം കണ്ടെത്തി

എളവള്ളി: കൊച്ചിൻ ഫ്രോണ്ടിയർ തോട്ടിൽ വീണ് കാണാതായ യുവാവിന്‍റെ മൃതദേഹം കണ്ടെത്തി. കടവല്ലൂർ റെയിൽവേ ഗേറ്റിനു സമീപം ഞാറേപറമ്പിൽ കൊണ്ടരാംവളപ്പിൽ കൊച്ചുണ്ണി മകൻ സത്യന്‍റെ(48) മൃതദേഹമാണ് കണ്ടെത്തിയത്. കാണാതായ സ്ഥലത്ത് നിന്ന് ഒന്നര കിലോമീറ്റർ മാറി കാക്കശേരി വിദ്യാ വിഹാർ സെൻട്രൽ സ്കൂളിനു പിറകുവശത്ത് തോട്ടിൽ കുറ്റിക്കാട്ടിൽ തടഞ്ഞു നിൽക്കുന്ന രീതിയിലാണ് മൃതദേഹം കണ്ടെത്തിയത്. കഴിഞ്ഞ തിങ്കളാഴ്ച രാവിലെ തോട്ടിൽ വീണ നാളികേരം എടുക്കുന്നതിനിടെയാണ് കാൽവഴുതി സത്യൻ വീണത്. നാട്ടുകാരും അഗ്നിശമന സേനാംഗങ്ങളും സ്ക്യൂബ ഡൈവേഴ്സും രണ്ടു ദിവസമായി തുടരുന്ന തെരച്ചിലിനൊടുവിലാണ് മൃതദേഹം കണ്ടെത്തിയത്. പാവറട്ടി പോലീസ് സ്ഥലത്തെത്തി മേൽനടപടികൾ സ്വീകരിച്ചു. അവിവാഹിതനാണ്. മാതാവ്: അമ്മിണി. പോസ്റ്റ് മോർട്ടത്തിനുശേഷം സംസ്കാരം ഇന്ന് രണ്ടിന് എളവള്ളി ക്രിമിറ്റോറിയത്തിൽ നടക്കും.

അജ്ഞാതൻ ട്രെയിൻതട്ടി മരിച്ചനിലയിൽ

വടക്കാഞ്ചേരി: അജ്ഞാതനെ ട്രെയിൻതട്ടി മരിച്ചനിലയിൽ കണ്ടെത്തി. അത്താണി റെയിൽവേ മേൽപ്പാലത്തിനു സമീപമായിരുന്നു സംഭവം. ഏകദേശം 60 വയസ് തോന്നിക്കുന്ന വയോധികൻ ക്രീം കളർ ഷർട്ടാണ് ധരിച്ചിരിക്കുന്നത്. കാവി നിറത്തിലുള്ള തോൾമുണ്ടും ലഭിച്ചിട്ടുണ്ട്. റെയിൽ ട്രാക്ക് പരിശോധിക്കുന്ന ജീവനകാരാണ് മൃതദേഹം കണ്ടത്. വടക്കാഞ്ചേരി പോലീസ് സ്ഥലത്തെത്തി മേൽനടപടികൾ സ്വീകരിച്ചു.

പ്രതിഭാദരം 2025 സംഘടിപ്പിച്ചു

എടത്തിരുത്തി: ചാമക്കാല ഗവ. മാപ്പിള ഹയർസെക്കന്‌റി സ്കൂളിലെ പൂർവ വിദ്യാർഥിസംഘടനയായ ഒസാക്സിന്‍റെ നേതൃത്വത്തിൽ പ്രതിഭാദരം 2025 സംഘടിപ്പിച്ചു. എസ്എസ്എൽസി, പ്ലസ് ടു പരീക്ഷകളിൽ ഉന്നതവിജയം നേടിയ വിദ്യാർഥികൾക്കും പതിനാലുവർഷങ്ങളായി എസ്എസ്എൽസി പരീക്ഷയിൽ നൂറുശതമാനം വിജയംനേടിയ സ്കൂളിനെയുമാണ് ഉപഹാരംനൽകി ആദരിച്ചത്. എടത്തിരുത്തി ഗ്രാമപഞ്ചായത്ത് പ്രസിഡന്‍റ് ടി.കെ. ചന്ദ്രബാബു ഉദ്ഘാടനംചെയ്തു. ഒസാക്സ് പ്രസിഡന്‍റ് എം.സി.എം. താജുദ്ദീൻ അധ്യക്ഷതവഹിച്ചു. സി.പി. ട്രസ്റ്റ് ചെയർമാൻ സി.പി. സാലിഹ് മുഖ്യാതിഥിയായി. മതിലകം ബ്ലോക്ക് പഞ്ചായത്തംഗം വി.എസ്. ജിനേഷ്, വാർഡ് മെമ്പർ കെ.എസ്. അനിൽകുമാർ, എഴുത്തുകാരൻ ആർ.എം. മുഹമ്മദ്‌ ഹുസൈർ, പ്രിൻസിപ്പല്‌ രഞ്ജി ടി.പരമേശ്വരൻ, പ്രധാനധ്യാപകൻ എം. രാജേഷ് തുടങ്ങിയവർ പ്രസംഗിച്ചു.

ബൈക്ക് റാലി സംഘടിപ്പിച്ചു

കൊടകര: അന്താരാഷ്ട്ര ലഹരിവിരുദ്ധ ദിനത്തിനു മുന്നോടിയായി കൊടകര സെന്‍റ് ജോസഫ് ഫൊറോന ദേവാലയത്തിലെ കെസിബിസി മദ്യ, ലഹരിവിരുദ്ധ സമിതിയും കെസിവൈഎം യൂണിറ്റും സംയുക്തമായി ബൈക്ക്‌റാലി സംഘടിപ്പിച്ചു. ഫൊറോന വികാരി ഫാ. ജെയ്‌സണ്‍ കരിപ്പായി ഉദ്ഘാടനംചെയ്തു. മദ്യ, ലഹരിവിരുദ്ധ സമിതി സംസ്ഥാന സെക്രട്ടറി അന്തോണിക്കുട്ടി ചെതലന്‍ സന്ദേശംനല്‍കി. അസിസ്റ്റന്‍റ് വികാരി ഫാ. ലിന്‍റോ കാരേക്കാടന്‍, കേരള കാത്തലിക് യൂത്ത് മൂവ്‌മെന്‍റ് കൊടകര ഇടവക പ്രസിഡന്‍റ് ആബേല്‍ ജേക്കബ്, ജോസ് കോച്ചേക്കാടന്‍, ബിനോയ് മംഗലന്‍, ഷേര്‍ളി ഷിജു, ലില്ലി ജോസഫ് തുടങ്ങിയവര്‍ സംസാരിച്ചു. കെസിവൈഎം പ്രവര്‍ത്തകര്‍ ലഹരിവിരുദ്ധ ഫ്ലാഷ് മോബ് അവതരിപ്പിച്ചു. സിജോ ചിറയത്ത് ലഹരിവിരുദ്ധ പ്രതിജ്ഞ ചൊല്ലിക്കൊടുത്തു.

യോഗ കാമ്പയിന്‍ തുടങ്ങി

കൊടകര: സഹൃദയ കോളജ് ഓഫ് അഡ്വാന്‍സ്ഡ് സ്റ്റഡീസിലെ ഇന്ത്യന്‍ നോളജ് സിസ്റ്റം സെന്‍റര്‍, എന്‍എസ്എസ്, ഐക്യുഎസി, ഡിപ്പാര്‍ട്ട്‌മെന്‍റ് ഓഫ് ഫിസിക്കല്‍ എഡ്യുക്കേഷന്‍ എന്നിവയുടെ സംയുക്താഭിമുഖ്യത്തില്‍ യോഗ കാമ്പയിന്‍ ആരംഭിച്ചു. കാലിക്കറ്റ് യൂണിവേഴ്‌സിറ്റി യോഗ ടീം കോച്ച് ബെന്നി കൊള്ളന്നൂര്‍ ഉദ്ഘാടനംചെയ്തു. ഇന്‍റര്‍ യൂണിവേഴ്‌സിറ്റി ചാമ്പ്യന്‍ ഹിബ മറിയം യോഗ അവതരിപ്പിച്ചു. പ്രിന്‍സിപ്പല്‍ ഡോ.കെ.എല്‍. ജോയ് അധ്യക്ഷതവഹിച്ചു. കോളജ് എക്‌സിക്യൂട്ടീവ് ഡയറക്ടര്‍ റവ.ഡോ. ഡേവിസ് ചെങ്ങിനിയാടന്‍, വൈസ് പ്രിന്‍സിപ്പല്‍ ഡോ.കെ. കരുണ എന്നിവര്‍ പ്രസംഗിച്ചു. എന്‍എസ്എസ് പ്രോഗ്രാം ഓഫിസര്‍ കെ. ജയകുമാര്‍, വോളന്‍റിയര്‍മാരായ വി.ആര്‍. പാര്‍വതി, മിലാന ജയ്‌സണ്‍, ഗോപിക മുരളീധരന്‍, ആതിര ഷൈജു എന്നിവര്‍ നേതൃത്വംനല്‍കി.

ലഹരി ഉപയോഗിക്കുന്നത് തടഞ്ഞതിന്്‌ ആക്രമണം: ഒളിവിലായിരുന്ന മുഖ്യപ്രതി അറസ്റ്റില്‍

ആളൂര്‍: ലഹരിവസ്തുക്കള്‍ ഉപയോഗിക്കുന്നത് തടഞ്ഞതിലുള്ള ആക്രമണത്തില്‍ ഒളിവിലായിരുന്ന മുഖ്യപ്രതി അറസ്റ്റില്‍. ആളൂര്‍ കാരൂര്‍ സ്വദേശി ഇല്ലത്തുപറമ്പില്‍ വീട്ടില്‍ ഷാഫി(23)യെയാണ് പോലീസ് അറസ്റ്റ് ചെയ്തത്. ഫെബ്രുവരി 18ന് വൈകീട്ട് ആറുമണിയോടെയാണ് സംഭവം. പുന്നേലിപ്പടിയിലുള്ള കാറ്ററിംഗ് യൂണിറ്റിലെ ജീവനക്കാരനായ കൈപ്പമംഗലം സ്വദേശി തലാശേരി വീട്ടില്‍ ജിബി(41)യെ പ്രതികള്‍ ലഹരി ഉപയോഗിക്കുന്നത് തടഞ്ഞതിലുള്ള വൈരാഗ്യത്താല്‍ ആക്രമിച്ച് ഗുരുതരമായി പരിക്കേല്‍പ്പിക്കുകയായിരുന്നു. ഈ കേസിലെ മറ്റ് പ്രതികളായ അമല്‍(20), മുഹമ്മദ് ഷഹിന്‍(18), രതുല്‍ രമേഷ്(19) എന്നിവരെ മുമ്പ് റിമാന്‌ഡ് ചെയ്തിരുന്നു. ഷാഫി ആളൂര്‍, നോര്‍ത്ത് പറവൂര്‍ പോലീസ് സ്റ്റേഷനുകളിലായി വധശ്രമം, അടിപിടി, മദ്യലഹരിയില്‍ മറ്റുള്ളവരുടെ ജീവന് അപകടംവരുത്തുന്ന തരത്തില്‍ വാഹനമോടിക്കല്‍ തുടങ്ങി നാല് ക്രിമിനല്‍കേസിലെ പ്രതിയാണ്. ആളൂര്‍ പോലീസ് സ്റ്റേഷന്‍ സബ് ഇന്‍സ്‌പെക്ടര്‍മാരായ അഫ്‌സല്‍, സുമേഷ്, സിപിഒമാരായ ആഷിക്, ഹരികൃഷ്ണന്‍, മന്നാസ് എന്നിവര്‍ചേര്‍ന്നാണ് പ്രതിയ അറസ്റ്റ് ചെയ്തത്.

ദേശീയപാത: പരാതിക്കെട്ടഴിച്ച് നാട്ടുകാർ, വാഗ്ദാനങ്ങളുമായി അധികൃതർ

കൊരട്ടി: ദേശീയപാത നിർമാണപരിശോധനയ്ക്കായി മുരിങ്ങൂർ ജംഗ്ഷനിലെത്തിയ കളക്ടർക്കും സംഘത്തിനും മുന്നിൽ സങ്കടങ്ങളും ആവലാതികളുമായി നിരവധി നാട്ടുകാരാണ് എത്തിയത്. ഗതാഗതക്കുരുക്കിലും വെള്ളക്കെട്ടിലും വലയുന്നതിന്‍റെ നേർക്കാഴ്ചയാണ് നാട്ടുകാർ പങ്കുവച്ചത്. കൃത്യമായ പഠനത്തിന്‍റെ പിൻബലത്തിലാണ് പ്രസിഡന്‍റ് എം.എസ്. സുനിതയുടെ നേതൃത്വത്തിൽ പഞ്ചായത്ത് അംഗങ്ങളും നാട്ടുകാരും കാര്യങ്ങൾ ബോധിപ്പിച്ചത്. തികച്ചും വ്യത്യസ്തമായിരുന്നു കൊരട്ടിയിലെത്തിയപ്പോൾ ജനങ്ങളുടെ പ്രതികരണം. മാസങ്ങളായി കൊരട്ടി ജംഗ്ഷൻ വെള്ളക്കെട്ടിന്‍റെ പിടിയിലാണെന്നും എൻഎച്ച്എഐയുടെയും കരാർ കമ്പനിയുടെയും നാടകം ഇനി അനുവദിക്കാനാകില്ലെന്നും അതിരൂക്ഷമായ വാക്കുകളിലാണ് ജനങ്ങൾ പ്രതികരിച്ചത്. പ്രോജക്ട് ഡയറക്ടർക്കു നാട്ടുകാരുടെ ശകാരവർഷം നേരിടേണ്ടിവന്നു എന്നതാണ് യാഥാർഥ്യം. കൊരട്ടി എംഎഎം ഹയർസെക്കൻഡറി വിദ്യാലയത്തിലെ പ്രിൻസിപ്പലും പ്രധാനാധ്യാപികയും കുട്ടികൾ നേരിടുന്ന ദുരിതങ്ങൾക്കു പരിഹാരംതേടി നിവേദനം നൽകി. വെള്ളക്കെട്ടിനു സത്വരപരിഹാരം ഉണ്ടാകുമെന്നു പ്രോജക്ട് ഡയറക്ടർ അൻസിൽ ഹസൻ ഉറപ്പുനൽകി. നാട്ടുകാരുടെ പ്രതിഷേധസ്വരങ്ങൾക്കു ചെവികൊടുക്കാതെ കേവലം മൂന്നു മിനിറ്റിനുള്ളിൽ കളക്ടർ അടുത്ത സ്ഥലമായ ചിറങ്ങരയിലേക്കു പോയി. ചിറങ്ങരയിലെ ജനങ്ങളുമായി ഏറെ സംവദിച്ച കളക്ടർ അവർ ഉന്നയിച്ച പരാതികൾക്കു സാധ്യമായ പരിഹാരം ഉണ്ടാക്കാമെന്നു മറുപടി നൽകി. കൽവർട്ട് വിഷയത്തിലും ഹൈവേയോടുചേർന്നു താമസിക്കുന്ന രണ്ടു കുടുംബങ്ങൾ മുന്നോട്ടുവച്ച സങ്കടങ്ങളോടും അനുഭാവപൂർവമായ പരിഹാരം കാണാമെന്ന ഉറപ്പിലായിരുന്നു കളക്ടർ മടങ്ങിയത്.

നഗരസഭാ യോഗത്തില്‍ വീണ്ടും വിമര്‍ശനം; റോഡുകളില്‌ അറ്റകുറ്റപ്പണി നടത്തും

ഇരിങ്ങാലക്കുട: ഇരിങ്ങാലക്കുടയിലെ കുഴികളെചൊല്ലി നഗരസഭാ യോഗത്തില്‍ വീണ്ടും വിമര്‍ശനം. നഗരസഭ പരിധിയില്‍ സണ്ണി സില്‍ക്ക്‌സ് റോഡിലുള്‍പ്പടെയുള്ള കുഴികളുടെ അറ്റകുറ്റപ്പണികളുമായി ബന്ധപ്പെട്ട അജന്‌ഡകള്‍ യോഗത്തില്‍ എത്തിയപ്പോഴായിരുന്നു പ്രതിപക്ഷത്തിന്‍റെ വിമര്‍ശനം. റോഡുകളിലെ മരണക്കുഴികള്‍ക്കെതിരേ വൈദികരും ബസുകാരുംവരെ രംഗത്തിറങ്ങിയിരിക്കുന്നത് നഗരസഭയില്‍ ആദ്യമായിട്ടാണെന്നും വിഷയത്തില്‍ റവന്യൂ, ജൂഡീഷ്യല്‍ അധികാരികള്‍ക്കുവരെ പരാതി ലഭിച്ചിരിക്കുകയാണെന്നും ബിജെപി അംഗം ടി.കെ. ഷാജു പറഞ്ഞു. തലയില്‍ മുണ്ടിട്ട് നടക്കേണ്ട സാഹചര്യമാണെന്നും ബൈപ്പാസ് റോഡിലെ കുഴികള്‍ അടയ്ക്കാനും നടപടികള്‍ സ്വീകരിക്കണമെന്ന് എല്‍ഡിഎഫ് പാര്‍ലമെന്‍ററി പാര്‍ട്ടി ലീഡര്‍ കെ.ആര്‍. വിജയ ആവശ്യപ്പെട്ടു. എല്ലാ വാര്‍ഡുകളിലെ റോഡുകളിലും കുഴികളുടെ പ്രശ്‌നമുണ്ടെന്നും പൊതുമരാമത്ത് സ്റ്റാന്‍ഡിംഗ് കമ്മിറ്റി ചെയര്‍മാന്‍റെ വാര്‍ഡുമായി ബന്ധപ്പെട്ട് മാത്രമാണ് അറ്റകുറ്റപ്പണികള്‍ നടക്കുന്നതെന്ന് ബിജെപി അംഗം സന്തോഷ് ബോബനും വിമര്‍ശിച്ചു. എല്ലാ വാര്‍ഡുകളിലെയും അപകടമായ കുഴികള്‍ പരിശോധിക്കാനും അടയ്ക്കാനും എന്‍ജിനീയറിംഗ് വിഭാഗത്തിന് ചെയര്‍പേഴ്‌സണ്‍ നിര്‍ദേശംനല്‍കി. കംഫേര്‍ട്ട് സ്റ്റേഷന്‍റെ മാത്രം സേവനം ലഭ്യമാക്കി നഗരസഭ നേരിട്ട് ഠാണാവിലെ പൂതംകുളത്ത് ടേക്ക് എ ബ്രേക്ക് പദ്ധതി പ്രവര്‍ത്തനം ആരംഭിച്ചതായുള്ള അജന്‌ഡയിലും വിമര്‍ശനങ്ങള്‍ ഉയര്‍ന്നു. വാടക കുറച്ച് ടേക്ക് എ ബ്രേക്ക് കുടുംബശ്രീയെ എല്‍പിക്കണമെന്നും സ്ഥലത്തെ ടോയ്‌ലറ്റ് സംവിധാനങ്ങള്‍ ശരിയല്ലെന്നും നിര്‍മാണ പ്രവര്‍ത്തനങ്ങളിലെ പാളിച്ചകള്‍ വ്യക്തമാണെന്നും പ്രതിപക്ഷ അംഗങ്ങള്‍ പറഞ്ഞു. പദ്ധതിയുടെ നടത്തിപ്പ് കുടുംബശ്രീ സിഡിഎസിനെയാണ് എല്പിച്ചതെന്നും എന്നാല്‍ എറ്റെടുക്കാന്‍വന്ന വ്യക്തിക്ക് അവിടെ ഹോട്ടല്‍ നടത്താനായിരുന്നു താല്‍പര്യമെന്നും സെക്രട്ടറി അറിയിച്ചു. കുടുംബശ്രീയുടെ അപേക്ഷകള്‍ വന്നാല്‍ പരിഗണിക്കാമെന്ന് ചെയര്‍പേഴ്‌സണ്‍ അറിയിച്ചു. യോഗത്തില്‍ ചെയര്‍പേഴ്‌സണ്‍ മേരിക്കുട്ടി ജോയ് അധ്യക്ഷതവഹിച്ചു.

ദീപിക നന്മനിറഞ്ഞ ലോകത്തേക്കു സ്വപ്‌നം കാണാൻ കുട്ടികൾക്കു വഴികാട്ടി: മാര്‍ പോളി കണ്ണൂക്കാടന്‍

ഇരിങ്ങാലക്കുട: നന്മനിറഞ്ഞ ലോകത്തേക്കു സ്വപ്‌നം കാണുവാൻ കുട്ടികൾക്കു വഴികാട്ടിയാണ് ദീപിക ദിനപത്രമെന്നു ഇരിങ്ങാലക്കുട രൂപത ബിഷപ് മാര്‍ പോളി കണ്ണൂക്കാടന്‍. ദീപിക നമ്മുടെ ഭാഷ പദ്ധതിയുടെ രൂപതാതല ഉദ്ഘാടനം നിര്‍വഹിച്ച് പ്രസംഗിക്കുകയായിരുന്നു ബിഷപ്. ഇരിങ്ങാലക്കുട സെന്‍റ് മേരീസ് ഹൈസ്‌കൂളില്‍ നടന്ന ചടങ്ങില്‍ വിദ്യാര്‍ഥിപ്രതിനിധി ക്രിസ്റ്റ ഡിയോണിനു പത്രത്തിന്‍റെ കോപ്പി കൈമാറിക്കൊണ്ടാണ് ബിഷപ് ഉദ്ഘാടനം നിര്‍വഹിച്ചത്. ശബ്ദമില്ലാത്തവരുടെ ശബ്ദമായി മാറി പാര്‍ശ്വവത്കരിക്കപ്പെട്ടവര്‍ക്കു പ്രത്യാശനല്‍കുന്ന പത്രമാണ് ദീപിക. സാമൂഹിക സാംസ്‌കാരിക രാഷ്ട്രീയതലങ്ങള്‍ നിഷ്പക്ഷമായി വിലയിരുത്തി വാര്‍ത്തകള്‍ വിശകലനംചെയ്യുന്ന പത്രമുത്തശിയുമാണ് ദീപിക. മൂല്യങ്ങളില്‍ അധിഷ്ഠിതമായ ഭാവിജീവിതം പ്രശോഭിതമാകുവാന്‍ വായനയിലൂടെ ലഭിക്കുന്ന അറിവുകള്‍ സഹായകരമാകണമെന്നും ബിഷപ് കൂട്ടിച്ചേര്‍ത്തു. കത്തീഡ്രല്‍ വികാരിയും സ്‌കൂള്‍മാനേജരുമായ റവ.ഡോ. ലാസര്‍ കുറ്റിക്കാടന്‍ അധ്യക്ഷത വഹിച്ചു. ദീപിക കോ ഓര്‍ഡിനേറ്റിംഗ് എഡിറ്റര്‌‍ ഫാ. റിന്‍റോ പയ്യപ്പിള്ളി ആമുഖപ്രസംഗം നടത്തി. പിടിഎ പ്രസിഡന്‍റ് അജോ ജോണ്‍, ദീപിക ഫ്രണ്ട്‌സ് ക്ലബ് രൂപത പ്രസിഡന്‍റ് ജോസഫ് വാസപുരത്തുകാരന്‍, കത്തീഡ്രല്‍ ട്രസ്റ്റി തിമോസ് പാറേക്കാടന്‍, പ്രധാനാധ്യാപിക റീജ ജോസ്, സ്റ്റാഫ് പ്രതിനിധി സ്മിത തോമസ് എന്നിവര്‍ പ്രസംഗിച്ചു.

കാരമുക്ക് പുതൃക്കോവ് ക്ഷേത്രത്തിൽ മോഷണം; അഞ്ചാംതവണ

കാഞ്ഞാണി: കാരമുക്ക് പുതൃക്കോവ് നരസിംഹമൂർത്തി ക്ഷേത്രത്തിൽ വീണ്ടും മോഷണം. അഞ്ചാം തവണയാണ് ഇവിടെ മോഷണം നടക്കുന്നത്. ക്ഷേത്രനടപ്പുരയിലും മുൻവശത്തെ റോഡിനോടു ചേർന്ന ഭണ്ഡാരങ്ങളിലുമാണു തിങ്കളാഴ്ച പുലർച്ചെ നാലോടെ മോഷണം നടന്നത്. സമീപത്തെ എവണ്‍ ബേക്കറിയിലും മോഷണശ്രമം നടന്നു. മോഷണത്തിനുപയോഗിച്ചിട്ടുള്ള ഇരുന്പുവടിയും മോഷ്ടാവിന്‍റെതെന്നു സംശയിക്കുന്ന തോർത്തുമുണ്ടും ബേക്കറിയുടെ സമീപത്തുനിന്നു കണ്ടെടുത്തു. ക്ഷേത്രത്തിൽ സ്ഥാപിച്ചിട്ടുള്ള സിസിടിവി കാമറയിൽ മോഷ്ടാവിന്‍റെ ചിത്രങ്ങൾ പതിഞ്ഞിട്ടുണ്ട്. അന്തിക്കാട് പോലീസിൽ സിസിടിവി ദൃശ്യങ്ങൾസഹിതം ക്ഷേത്രസംരക്ഷണസമിതി പരാതി നൽകി. നേരത്തെ നാലുതവണ ഇവിടെ മോഷണം നടന്നെങ്കിലും ആരെയും പിടികൂടാൻ കഴിഞ്ഞിട്ടില്ല. ആഴ്ചയിൽ ഭണ്ഡാരങ്ങൾ തുറന്ന് വരവ് എണ്ണിത്തിട്ടപ്പെടുത്തുന്നതിനാൽ ഒരാഴ്ചത്തെ പണം മാത്രമാണു നഷ്ടപ്പെട്ടിട്ടുള്ളത്. മോഷ്ടാവിനെ ഉടൻ പിടികൂടണമെന്നു ക്ഷേത്രസംരക്ഷണ സമിതി പ്രസിഡന്‍റ് ഷാജി കുറുപ്പത്ത്, സെക്രട്ടറി പി.ബി. വേണു, ട്രഷറർ കെ. സൂര്യനാരായണൻ, വൈസ് പ്രസിഡന്‍റ് സുഷമ സുനിൽ എന്നിവർ ആവശ്യപ്പെട്ടു.

ലോറി അപകടത്തിൽപെട്ടു; ടാങ്ക് വേർപെട്ട് ഡീസൽ ഒഴുകിയത് ആശങ്കയായി

ചേലക്കര: കൽത്തൊട്ടിയിൽ ടോറസ് ലോറിക്കു പിന്നിൽ മിനി ലോറിയിടിച്ചു. ടോറസ് ലോറിയുടെ ഡീസൽ ടാങ്ക് തകർന്നുവീഴുകയും ഡീസൽ റോഡിൽ പരക്കുകയും ചെയ്തത് ആശങ്ക പരത്തി. ഇന്നലെ രാവിലെയായിരുന്നു അപകടം. ഡീസൽ റോഡിൽ വ്യാപകമായി പരന്നതതിനെത്തുടർന്ന് ചേലക്കര പോലീസും നാട്ടുകാരും ചേർന്ന് വെള്ളം പന്പ് ചെയ്ത് അപകടസാധ്യത ഒഴിവാക്കി. അപകടത്തെത്തുടർന്ന് അൽപനേരം ഗതാഗതം തടസപ്പെട്ടു.

തിരുനാളിനു കൊടിയേറി

പുത്തൂർ: സെന്‍റ് തോമസ് ഫൊറാന ദേവാലയത്തിൽ ഇടവകമധ്യസ്ഥനായ വിശുദ്ധ തോമാശ്ലീഹായുടെ ദുക്റാന തിരുനാളിനു കൊടിയേറി. ഫൊറോന വികാരി ഫാ. ജോജു പനയ്ക്കൽ കൊടിയേറ്റി. 29ന് വിശുദ്ധ തോമാശ്ലീഹായുടെയും വിശുദ്ധ അന്തോണിസിന്‍റെയും സംയുക്ത ഉൗട്ടുതിരുനാൾ ആചരിക്കും. രാവിലെ 10നു നടക്കുന്ന ആഘോഷമായ തിരുനാൾ പാട്ടുകുർബാനയ്ക്ക് ഫാ. നിർമൽ അക്കര പട്ട്യേക്കൽ മുഖ്യകാർമികത്വം വഹിക്കും. ദുക്റാന തിരുനാളിനോടുനുബന്ധിച്ച് ജൂലൈ രണ്ടിന് വൈകിട്ട് കൂടുതുറക്കൽ ശുശ്രൂഷ. മുൻ വികാരി ഫാ. ഡോ. ജോണ്‍ മൂലൻ മുഖ്യകാർമികത്വം വഹിക്കും. തിരുനാൾദിനമായ ജൂലൈ മൂന്നിനു രാവിലെ ആറിന് വിശുദ്ധ കുർബാന. രാവിലെ 10നു നടക്കുന്ന ആഘോഷമായ തിരുനാൾ പാട്ടുകുർബാനയ്ക്ക് മുൻ വികാരി ഫാ. ജോർജ് തേർമഠം മുഖ്യകാർമികത്വം വഹിക്കും. ഫാ. ഫ്രാൻസിസ് പള്ളിക്കുന്നത്ത് സന്ദേശം നൽകും. തിരുനാൾ ആഘോഷങ്ങൾക്ക് അസിസ്റ്റന്‍റ് വികാരി ഫാ. റെജി തോമസ്, കണ്‍വീനർ ടോണി അന്തിക്കാടൻ, ജനറൽ കണ്‍വീനർ പ്രിൻസ് ഐനിക്കൽ, കൈകാര·ാരായ സണ്ണി മാളിയേക്കൽ, ഷോയി മാളിയേക്കൽ, സന്തോഷ് ആട്ടോക്കാരൻ, ഷാജി തട്ടിൽ എന്നിവർ നേതൃത്വം നൽകും.

കാഞ്ഞാണി, മണലൂർത്താഴം ബണ്ടുകൾ പൊളിക്കും

അന്തിക്കാട്: ബ്ലോക്ക് പഞ്ചായത്ത് പരിധിയിലുള്ള അന്തിക്കാട്, താന്ന്യം, ചാഴൂർ, മണലൂർ, അരിന്പൂർ പഞ്ചായത്തുകളിലെ വെള്ളക്കെട്ട് ഒഴിവാക്കാൻ അടിയന്തര നടപടിയെടുക്കാൻ ഇന്നലെ കളക്ടറേറ്റിൽ സബ് കളക്ടറുടെ നേതൃത്വത്തിൽ നടന്ന എംഎൽഎമാരുടെയും ബന്ധപ്പെട്ട ഉദ്യോഗസ്ഥരുടെയും പാടശേഖരപ്രതിനിധികളുടെയും സംയുക്ത യോഗത്തിൽ തീരുമാനമായി. കാഞ്ഞാണി കോൾ, മണലൂർത്താഴം കോൾ പാടശേഖരങ്ങളുടെ ബണ്ടുകൾ താൽകാലികമായി പൊളിക്കുന്നതുൾപ്പടെയുള്ള തീരുമാനങ്ങളാണ് ഉണ്ടായത്. ഇരു ബണ്ടുകളും പൊളിക്കുന്പോൾ പാടശേഖരങ്ങൾക്കുണ്ടാകുന്ന നഷ്ടം നികത്തുന്നതിനുള്ള മാർഗനിർദ്ദേങ്ങളും ഉത്തരവിലുണ്ടാകുമെന്ന് സബ് കളക്ടർ അഖിൽ വി. മേനോൻ യോഗത്തെ അറിയിച്ചു. ജലസേചന കനാലുകളിൽനിന്ന് ഒഴുക്കിനു തടസമാകുന്ന കരുവേലി ചണ്ടിയുൾപ്പടെയുള്ള എല്ലാ തടസവും ഒഴിവാക്കാൻ ജില്ല കളക്ടർ കർശന ഉത്തരവ് നൽകിയതായും അത് ഉടൻ നടപ്പിലാക്കുമെന്നും സബ് കളക്ടർ അറിയിച്ചു. പാടശേഖരങ്ങളുമായി ബന്ധപ്പെട്ട സ്ളൂയിസുകൾ സമയബന്ധിതമായി അടയ്ക്കുകയും തുറക്കുകയും വേണമെന്നും പ്രദേശത്തെ കൃഷി ഓഫീസർമാർ ഇത് ഉറപ്പുവരുത്തണമെന്നും ആവശ്യപ്പെട്ടു. ഇതിനാവശ്യമായ നിർദേശങ്ങൾ ബന്ധപ്പെട്ട ഉദ്യോഗസ്ഥർക്കു നൽകുമെന്ന് സബ് കളകടർ ഉറപ്പുനൽകി. കളക്ടറേറ്റിൽ നടന്ന യോഗത്തിൽ എംഎൽഎമാരായ മുരളി പെരുനെല്ലി, സി.സി. മുകുന്ദൻ, അന്തിക്കാട് ബ്ലോക്ക് പഞ്ചായത്ത് പ്രസിഡന്‍റ് കെ.കെ. ശശിധരൻ, അന്തിക്കാട്, താന്ന്യം, ചാഴൂർ, മണലൂർ, അരിന്പൂർ പഞ്ചായത്തുകളിലെ പ്രസിഡന്‍റുമാർ, വൈസ് പ്രസിഡന്‍റുമാർ, ജനപ്രതിനിധികൾ, കോൾ പാടശേഖരപ്രതിനിധികൾ, കൃഷി, വില്ലേജ് ഓഫീസർമാർ, ഇറിഗേഷൻ, കെ എൽഡിസി ഉദ്യോഗസ്ഥർ തുടങ്ങിയവർ പങ്കെടുത്തു.

പൊതുമരാമത്ത് റോഡിലെ അടച്ച കുഴികൾ ഒരാഴ്ചയ്ക്കുള്ളിൽ വീണ്ടും തകർന്നു

മുല്ലശേരി: സെന്‍ററിൽ പൊതുമരാമത്ത് റോഡിൽ നാട്ടുകാരുടെയും ജനപ്രതിനിധികളുടെയും പരാതിയെത്തുടർന്ന് അടച്ച കുഴികൾ ഒരാഴ്ചക്കുള്ളിൽ വീണ്ടും തകർന്നു. സെന്‍ററിൽ പാടൂർ റോഡിലേക്കു തിരിയുന്ന ഭാഗത്ത് കലുങ്കിന്‍റെ സ്ലാബ് തകർന്നതുമൂലമുണ്ടായ കുഴി കഴിഞ്ഞദിവസം മൂടിയിരുന്നു. നിരവധി അപകടങ്ങൾ ഉണ്ടായതിനെത്തുടർന്ന് നാട്ടുകാർ പഞ്ചായത്ത് അധികൃതർക്ക് പരാതി നൽകിയതിന്‍റെ അടിസ്ഥാനത്തിൽ കുഴി അടച്ചെങ്കിലും അടച്ചഭാഗത്തെ മെറ്റലും ടാറും വീണ്ടും ഇളകി കാനയിലേക്കു വീണതിനെത്തുടർന്നാണ് വീണ്ടും കുഴിരൂപപ്പെട്ടത്. പ്രധാന റോഡിലൂടെ നൂറുകണക്കിനു വാഹനങ്ങളാണു കടന്നുപോകുന്നത്. ഇരുചക്രവാഹനങ്ങൾ കുഴിയിൽചാടി അപകടത്തിൽപെടുക പതിവാണ്. വിദ്യാർഥികൾ അടക്കമുള്ള കാൽനടയാത്രക്കാർക്കും കുഴി ഭീഷണിയാണ്. പൊതുമരാമത്ത് വകുപ്പിന്‍റെ അനങ്ങാപ്പാറനയത്തിൽ നാട്ടുകാരും ജനപ്രതിനിധികളും കടുത്ത പ്രതിഷേധത്തിലാണ്. റോഡിലെ കുഴികൾ അടച്ച് പ്രശ്നത്തിനു ശാശ്വതപരിഹാരം കാണണമെന്നാണു നാട്ടുകാരുടെ ആവശ്യം.

പാഞ്ഞാളിൽ കണ്ട കാൽപ്പാട് പുലിയുടേതല്ല; കാട്ടുപൂച്ചയുടേത്

ചേലക്കര: പാഞ്ഞാളിൽ കണ്ടെത്തിയ കാൽപ്പാടുകൾ പുലിയുടേതല്ല, കാട്ടുപൂച്ചയുടേതാണെന്നു വനംവകുപ്പ് സ്ഥിരീകരിച്ചു. ഇതോടെ പ്രദേശത്തു നിലനിന്ന ആശങ്ക ഒഴിവായി. ചൊവ്വാഴ്ച രാവിലെയാണ് പാഞ്ഞാൾ ഗ്രാമപഞ്ചായത്ത് പരിധിയിൽ പുലിയുടെ കാൽപ്പാടുകളോടു സാമ്യമുള്ള അടയാളങ്ങൾ കണ്ടത്. ഇതോടെ ജനം ഭീതിയിലാവുകയും വിവരം വനംവകുപ്പിനെയും പോലീസിനെയും അറിയിക്കുകയും ചെയ്തു. പാഞ്ഞാൾ ഗ്രാമപഞ്ചായത്ത് വൈസ് പ്രസിഡന്‍റ് പി. കൃഷ്ണൻകുട്ടി അറിയിച്ചതിനെത്തുടർന്ന് അധികൃതർ ഉടൻ സ്ഥലത്തെത്തി പരിശോധന ആരംഭിച്ചു. വിശദമായ പരിശോധനകൾക്കുശേഷം കാൽപ്പാടുകൾ കാട്ടുപൂച്ചയുടേതാണെന്ന് വനംവകുപ്പ് അധികൃതർ സ്ഥിരീകരിക്കുകയായിരുന്നു. ഇതോടെയാണ് പ്രദേശവാസികൾക്ക് ആശ്വാസമായത്.

കർഷകർക്കു നൂതനസാങ്കേതികവിദ്യകൾ ലഭ്യമാക്കി കുടുംബശ്രീ കെ-ടാപ്പ് പദ്ധതി

തൃശൂർ: കാർഷികമേഖലയിൽ സുസ്ഥിരവികസനം ലക്ഷ്യമിട്ടു കുടുംബശ്രീ ടെക്നോളജി അഡ്വാൻസ്മെന്‍റ് പ്രോഗ്രാം (കെ-ടാപ്പ്) സാങ്കേതികവിദ്യകളും ആശയങ്ങളും കർഷകർക്കും സംരംഭകർക്കും ലഭ്യമാക്കുന്നു. ഇന്ത്യയിലെ പ്രമുഖ കാർഷിക-ഭക്ഷ്യ ഗവേഷണസ്ഥാപനങ്ങളുടെ 180 സാങ്കേതികവിദ്യകൾ പരിചയപ്പെടുത്തി ടൗണ്‍ഹാളിൽ സംഘടിപ്പിച്ച ടെക്നോളജി ഡിസെമിനേഷൻ ക്ലിനിക്കിൽ 350 കർഷകരും സംരംഭകരും പങ്കെടുത്തു. കുടുംബശ്രീ സ്റ്റേറ്റ് മിഷൻ പ്രോഗ്രാം മാനേജർ ഡോ. എസ്. ഷാനവാസ് സാങ്കേതികവിദ്യകൾ പരിചയപ്പെടുത്തി. ജില്ലാ മിഷൻ കോ-ഓർഡിനേറ്റർ ഡോ. യു. സലിൽ, കെ. രാധാകൃഷ്ണൻ, ജില്ലാ പ്രോഗ്രാം മാനേജർ കെ.എൻ. ദീപ എന്നിവർ പ്രസംഗിച്ചു. കേന്ദ്ര കിഴങ്ങുവിള ഗവേഷണകേന്ദ്രം, കേന്ദ്ര തോട്ടവിള ഗവേഷണകേന്ദ്രം, തഞ്ചാവൂർ നാഷണൽ ഇൻസ്റ്റിറ്റ്യൂട്ട് ഫോർ ഫുഡ് ടെക്നോളജി എൻട്രപ്രണർഷിപ്പ് ആൻഡ് മാനേജ്മെന്‍റ്, കേന്ദ്ര വാഴഗവേഷണകേന്ദ്രം, സെൻട്രൽ ഫുഡ് ടെക്നോളജി റിസർച്ച് ഇൻസ്റ്റിറ്റ്യൂട്ട്, നാഷണൽ ഇൻസ്റ്റിറ്റ്യൂട്ട് ഫോർ ഇന്‍റർഡിസിപ്ലിനറി സയൻസ് ആൻഡ് ടെക്നോളജി, കേരള കാർഷികസർവകലാശാല തുടങ്ങിയ സ്ഥാപനങ്ങൾ കുടുംബശ്രീ മിഷനുമായി ധാരണാപത്രത്തിൽ ഒപ്പുവച്ചു. പ്രമേഹസൗഹൃദ ഇൻസ്റ്റന്‍റ് കേക്ക് മിക്സ്, തേൻ അധിഷ്ഠിത ഉത്പന്നങ്ങൾ, ഹൈ പ്രോട്ടീൻ ലഘുഭക്ഷണങ്ങൾ, ഷുഗർഫ്രീ ഭക്ഷ്യ ഉത്പന്നങ്ങൾ, ലോ ഗ്ലൈസെമിക് ഇൻഡക്സ് ഉത്പന്നങ്ങൾ, നാച്ചുറൽ ഫുഡ് കളറുകൾ, മൾട്ടിഗ്രെയിൻ ബ്രെഡുകൾ, പലതരം ഫ്രൂട്ട് ജ്യൂസുകൾ, മുരിങ്ങ, നാളികേര, കിഴങ്ങുവിളകളുടെ മൂല്യവർധിത ഉത്പന്നങ്ങൾ, ചെറുധാന്യങ്ങൾ, അച്ചാറുകൾ, ഐസ്ക്രീമുകൾ, ഇൻസ്റ്റന്‍റ് ഫുഡ് മിക്സുകൾ തുടങ്ങി വൈവിധ്യമാർന്നവ പദ്ധതിയിലൂടെ തയാറാക്കാൻ കഴിയും.

വായനയും വിജ്ഞാനസമ്പാദനവും സംസ്കാരത്തിന്‍റെ അടിസ്ഥാനം: വൈശാഖൻ

തൃശൂർ: വായനയും വിജ്ഞാനസമ്പാദനവും സംസ്കാരത്തിന്‍റെ അടിസ്ഥാനമാണെന്നു സാഹിത്യകാരൻ വൈശാഖൻ പറഞ്ഞു. അമല മെഡിക്കല്‍ കോളജ്, നഴ്സിംഗ് കോളജ്, നഴ്സിംഗ് സ്കൂള്‍, പാരമെഡിക്കല്‍, ആയുര്‍വേദം പഠനവിഭാഗങ്ങളുടെ സംയുക്താഭിമുഖ്യത്തില്‍ നടത്തിയ വായനവാരാഘോഷം ഉദ്ഘാടനം ചെയ്യുകയായിരുന്നു അദ്ദേഹം. അമല ഡയറക്ടര്‍ ഫാ. ജൂലിയസ് അറയ്ക്കല്‍ സിഎംഐ അധ്യക്ഷത വഹിച്ചു. വായനയും മാനസിക ആരോഗ്യവും എന്ന വിഷയത്തിലുള്ള സെമിനാര്‍ അമല കമ്യൂണിറ്റി മെഡിസിന്‍ വിഭാഗം തലവന്‍ പ്രഫ.ഡോ. സി.ആര്‍. സാജു അവതരിപ്പിച്ചു. പി.എന്‍. പണിക്കര്‍ അനുസ്മരണം കൊടകര സഹൃദയ കോളജ് ലൈബ്രേറിയന്‍ ഡോ. ബി. ഷാജി നിർവഹിച്ചു. ഡെപ്യൂട്ടി ലൈബ്രേറിയന്‍ ജിക്കൊ ജെ. കോടങ്കണ്ടത്ത് വായനപ്രതിജ്ഞയ്ക്കു നേതൃത്വം നല്കി. അമല ഓങ്കോളജി വാർഡിലേക്കു പ്രജ്യോതിനികേതൻ കോളജ് സംഭാവനചെയ്ത പുസ്തകങ്ങൾ ഏറ്റുവാങ്ങി. ചീഫ് ലൈബ്രേറിയൻ പ്രഫ.ഡോ. എ.ടി. ഫ്രാന്‍സിസ്, ഡോ. ലോല ഭാസ്, സിസ്റ്റർ ലിത ലിസ്ബത്ത്, ഡോ. എം.സി. സാവിത്രി, സിസ്റ്റർ മിനി എസ്‌സിവി, ഡോ. ജയദീപ്, ലൈബ്രേറിയന്‍ വി.ജെ. ലിറ്റി, അയന ബേബി, മാക്ക് ലോഫ് മാത്യു മാർട്ടിൻ, ആൻ മരിയ ജോഷി, എസ്. ഹരിപ്രിയ, ഇ.എസ്. ശ്രീലേഖ എന്നിവര്‍ പ്രസംഗിച്ചു.

കണ്ണന്‍റെ കൊമ്പന്മാർ പുന്നത്തൂരിൽ എത്തിയിട്ട് അരനൂറ്റാണ്ട്

ഗുരുവായൂർ: കണ്ണന്‍റെ കൊമ്പന്മാർ പുന്നത്തൂർ ആനക്കോട്ടയിലെത്തിയിട്ട് നാളെ അരനൂറ്റാണ്ട് തികയും. 1975 ജൂൺ 26 നു ഗജരാജൻ കേശവന്‍റെ നേതൃത്വത്തിൽ ക്ഷേത്രനടയിൽനിന്ന് 25 ആനകളിൽ 19 ആനകൾ ഘോഷയാത്രയായി പുന്നത്തൂർ ആനക്കോട്ടയിൽ എത്തി ഗൃഹപ്രവേശം നടത്തുകയായിരുന്നു. പുന്നത്തൂർ കോവിലകത്തിന്‍റെ ആസ്ഥാനമായിരുന്ന പുന്നത്തൂർ കോട്ടയിലെ 9.75 ഏക്കർ സ്ഥലം 1.60 ലക്ഷം രൂപയ്ക്കു ഗുരുവായൂർ ദേവസ്വം വാങ്ങി. ഇപ്പോഴത്തെ ശ്രീവത്സം അതിഥിമന്ദിരം, പാഞ്ചജന്യം ടൂറിസ്റ്റ് ഹോം എന്നിവ സ്ഥിതിചെയ്യുന്ന സാമൂതിരിക്കോവിലകം പറമ്പിലായിരുന്നു അതുവരെ ആനകളുടെ ആസ്ഥാനം. ഗുരുവായൂർ ദേവസ്വത്തിന്‍റെ 36 ആനകളാണ് ഇപ്പോൾ ആനക്കോട്ടയിലുള്ളത്.

തെരുവുനായ്ശല്യം രൂക്ഷം: മേയർക്കു കത്തു നൽകി

തൃശൂർ: തെരുവുനായ്ശല്യം പരിഹരിക്കാൻ കോർപറേഷൻ അടിയന്തരനടപടിയെടുക്കണമെന്നു കൗണ്‍സിലർ ജോണ്‍ ഡാനിയൽ. ഷെൽട്ടർ ഒരുക്കി നായ്ക്കളെ പിടിച്ചുകെട്ടണം. അതാതു ഡിവിഷനിലെ വിഷയമെന്നുപറഞ്ഞു കൗണ്‍സിലർമാരുടെ തലിയിലിടാനാണു മേയർ ശ്രമിക്കുന്നത്. വിദ്യാർഥികളെ നായ്ക്കൾ ആക്രമിക്കാൻ വരുന്നെന്ന പരാതി രക്ഷിതാക്കൾ കൗണ്‍സിലർമാരെ അറിയിക്കുന്നുണ്ട്. പ്രായമായവർക്ക് ഓടിരക്ഷപ്പെടാൻപോലും കഴിയാത്ത സ്ഥിതിയാണ്. അനുയോജ്യമായ സ്ഥലംകണ്ടെത്തി ഷെൽട്ടർ സ്ഥാപിച്ചു നായ്ക്കളെ പിടിച്ചുകെട്ടാൻ കോർപറേഷൻ നടപടിയെടുക്കണം. സോൺ തിരിച്ചു സ്ഥലം കണ്ടെത്താം. ജനങ്ങളുടെ സഞ്ചാരസ്വാതന്ത്ര്യം തെരുവുനായ്ക്കളുടെ ശല്യംമൂലം നിഷേധിക്കപ്പെടുന്ന ഗുരുതരസാഹചര്യമാണുള്ളതെന്നും അടുത്ത കൗണ്‍സിൽ യോഗത്തിൽ വിഷയം സപ്ലിമെന്‍ററി അജൻഡയായി ഉൾപ്പെടുത്തി തീരുമാനമെടുക്കണമെന്നും ആവശ്യപ്പെട്ട് ജോണ്‍ ഡാനിയൽ മേയർ എം.കെ. വർഗീസിനു കത്തു നൽകി. പേപ്പട്ടികളെ കൊല്ലാൻ നിയമനിര്‍മാണം വേണമെന്ന് തൃശൂര്‍: പേവിഷബാധയുള്ള തെരുവുനായ്ക്കളെ കൊല്ലാന്‍ നിയമംകൊണ്ടുവരണമെന്നു ടോംയാസ് അഡ്വര്‍ടൈസിംഗ് ഉടമ തോമസ് പാവറട്ടി ആവശ്യപ്പെട്ടു. നായ്ക്കളുടെ കടിയേല്‍ക്കുന്നവരുടെ ചികിത്സയ്ക്കായി കോടിക്കണക്കിനു രൂപയുടെ മരുന്നുകളാണ് വേണ്ടിവരുന്നത്. സാധാരണ മനുഷ്യര്‍ക്കു തെരുവില്‍ കടിയേല്‍ക്കുമ്പോള്‍ മരുന്നുകമ്പനികളുടെ ലാഭം കൂടുകമാത്രമാണ് ചെയ്യുന്നതെന്ന് അദ്ദേഹം ആരോപിച്ചു.

അപകടമേൽക്കൂരയും ഷെഡും പൊളിച്ചുനീക്കി

തൃശൂർ: നഗരത്തിൽ അപകടഭീഷണി ഉയർത്തി നിലനിന്നിരുന്ന ഇരുമ്പുമേൽക്കൂരയും ഷെഡും പൊളിച്ചുനീക്കി. പുത്തൻപള്ളിക്കു മുൻപിൽ തിരക്കേറെയുള്ള റോഡിലേക്കു ചാഞ്ഞുനിന്നിരുന്ന തുരുന്പുപിടിച്ച ഇരുമ്പുമേൽക്കൂരയും ഷെഡുമാണ് പൊളിച്ചുനീക്കിയത്. അപകടഭീതി ഉയർത്തുന്ന ഇതിനെക്കുറിച്ച് ദീപിക വാർത്ത പ്രസിദ്ധീകരിച്ചിരുന്നു. തുടർന്നു വിഷയത്തിൽ നേരിട്ട് ഇടപെട്ട ഡിവിഷൻ കൗൺസിലർ സിന്ധു ആന്‍റോ ചാക്കോള ബന്ധപ്പെട്ട അധികാരികളെ ഇക്കാര്യം അറിയിക്കുകയും ഷെഡും മേൽക്കൂരയും പൊളിച്ചുനീക്കാൻ ഉടമയ്ക്കു നിർദേശം നൽകുകയുമായിരുന്നു. ഒരാഴ്ചയ്ക്കകം പൊളിച്ചുനീക്കാനായിരുന്നു നിർദേശമെങ്കിലും ശക്തമായ മഴയെതുടർന്ന് പൊളിച്ചുനീക്കൽ വൈകി. മഴ മാറിയതോടെയാണ് ഇവ പൊളിച്ചുനീക്കിയത്.

പൂങ്കുന്നം - പുഴയ്ക്കൽ വഴിയിലെ പ്രവേശനോത്സവം എന്ന്...?

തൃശൂർ: സ്കൂളുകളിലെല്ലാം പ്രവേശനോത്സവം കഴിഞ്ഞെങ്കിലും പൂങ്കുന്നം-പുഴയ്ക്കൽ വഴിയിലെ പ്രവേശനോത്സവം എന്നാണെന്ന് ആർക്കും പിടിയില്ല. റോഡുപണിയുടെ പേരിൽ മാസങ്ങളായി അടച്ചിട്ട ഈ വഴിയിൽ ഇപ്പോൾ പുഴയ്ക്കൽ ഭാഗത്തുനിന്നു തൃശൂരിലേക്കു വരുന്ന വാഹനങ്ങളെ കടത്തിവിടുന്നുണ്ടെങ്കിലും രണ്ടുഭാഗത്തേക്കും വാഹനഗതാഗതം തുറന്നുകൊടുത്താൽമാത്രമേ ഇപ്പോൾ അയ്യന്തോൾ-കുറിഞ്ഞ്യാക്കൽ മേഖലയിലും പുഴയ്ക്കലിലും അനുഭവപ്പെടുന്ന ഗതാഗതക്കുരുക്കിനു ശമനമുണ്ടാവുകയുള്ളു. മാസങ്ങളായി തൃശൂരിൽനിന്നു കോഴിക്കോട്, ഗുരുവായൂർ, കുന്നംകുളം വഴി മൈസൂർക്കും ബംഗളൂരുവിലേക്കുംവരെ പോകുന്ന സകല സ്വകാര്യ, കെഎസ്ആർടിസി ബസുകളും പൂങ്കുന്നംവഴി പോകാൻ സാധിക്കാത്തതിനാൽ അയ്യന്തോൾവഴിയാണ് പോകുന്നത്. ബസുകൾ പടിഞ്ഞാറേകോട്ട വഴി കളക്ടറേറ്റിനുമുന്നിലൂടെ അയ്യന്തോൾവഴി പുഴയ്ക്കലിലേക്കു പോകുന്പോൾ മറ്റു വാഹനങ്ങൾ അയ്യന്തോളിലേക്കു പോകുന്നത് ശങ്കരംകുളങ്ങര-ഉദയനഗർ വഴിയാണ്. ഭാരവാഹനങ്ങളും അസംഖ്യം ചെറുവാഹനങ്ങളും കടന്നുപോകുന്ന ഉദയനഗർ റോഡ് പൂർണമായും തകർന്നുതരിപ്പണമായി. സ്കൂളുകൾ, ഗവ.ലോ കോളജ്, കാർത്യായനി ക്ഷേത്രം എന്നിവിടങ്ങളിലേക്കുള്ള വാഹനങ്ങളും നഗരത്തിലെ പല സ്കൂളുകളിലേക്കുമുള്ള ബസുകളും സ്വകാര്യവാഹനങ്ങളുംകൂടി ഇതുവഴി പോകുന്നതിനാൽ മഴയ്ക്കു മുൻപ് അറ്റകുറ്റപ്പണി നടത്തിയ ഉദയനഗർ റോഡ് പൂർണമായും തകർന്നുകഴിഞ്ഞു. അമല ആശുപത്രിയിലേക്കും മറ്റും രോഗികളെയും കൊണ്ടുപോകുന്ന ആംബുലൻസുകളടക്കമുള്ളവയും തകർന്ന റോഡിന്‍റെ ദുരവസ്ഥയിൽ കുടുങ്ങാറുണ്ട്. ഉദയനഗർവഴിയുള്ള യാത്രയ്ക്കുപകരം മറ്റു വാഹനങ്ങളും പടിഞ്ഞാറേകോട്ട വഴി അയ്യന്തോളിലേക്കു തിരിയാൻ തുടങ്ങിയതോടെ കളക്ടറേറ്റ് മുതൽ പുഴയ്ക്കൽവരെയുള്ള റോഡിൽ വാഹനങ്ങളുടെ നീണ്ട ക്യൂ ദൃശ്യമാണ്.

കളക്ടറും എംപിയും എംഎൽഎയുമെത്തി; അത്രതന്നെ, സങ്കടങ്ങൾ ബാക്കി

കൊരട്ടി: ദേശീയപാത വികസനത്തിന്‍റെ ഭാഗമായി അടിപ്പാത/മേൽപ്പാല നിർമാണപ്രവൃത്തികൾ നടക്കുന്ന ചാലക്കുടി താലൂക്ക് പരിധിയിലെ കൊരട്ടി, ചിറങ്ങര, മുരിങ്ങൂർ, പേരാമ്പ്ര ഭാഗങ്ങളിൽ ബെന്നി ബഹനാൻ എംപിയുടെയും സനീഷ്കുമാർ ജോസഫ് എംഎൽഎയുടെയും ജില്ലാ കളക്ടർ അർജുൻ പാണ്ഡ്യന്‍റെയും നേതൃത്വത്തിൽ ഇന്നലെ നടന്ന സൈറ്റ് ഇൻസ്പെക്‌ഷനിൽ പരാതികളുടെ ഭാണ്ഡക്കെട്ടഴിച്ച് പ്രദേശവാസികൾ. നിർമാണപ്രവൃത്തികളിലെ അശാസ്ത്രീയതയും മേഖലകളിൽ മാസങ്ങളായി തുടരുന്ന ഗതാഗതക്കുരുക്കും പരിഹരിക്കാൻ കളക്ടറുടെ സാന്നിധ്യത്തിലും എസപി, ഡിവൈസിപി തലങ്ങളിലും നടന്ന ചർച്ചകളിൽ ഉരുത്തിരിഞ്ഞ നിർദേശങ്ങൾ നടപ്പാക്കിയിട്ടില്ലെന്നും എൻഎച്ച്എഐ പ്രോജക്ട് ഡയറക്ടറെ അടക്കം പങ്കെടുപ്പിച്ചുകൊണ്ടുള്ള ഈ സൈറ്റ് ഇൻസ്പെക്‌ഷൻ കേവലം പ്രഹസനം മാത്രമാണെന്നും നാട്ടുകാർ പറഞ്ഞു. ഇന്നലെ ഉച്ചകഴിഞ്ഞു 3.30 ഓടെ ചാലക്കുടി പിഡബ്ല്യുഡി റസ്റ്റ് ഹൗസിൽ ചേർന്ന യോഗത്തിൽ കൊരട്ടി, മേലൂർ, കാടുകുറ്റി, കൊടകര പഞ്ചായത്തുകളിലെ പ്രസിഡന്‍റുമാരായ പി.സി. ബിജു, എം.എസ്. സുനിത, പ്രിൻസി ഫ്രാൻസിസ്, അമ്പിളി സോമൻ എന്നിവർ അതിരൂക്ഷമായ വിമർശനങ്ങളാണ് ഉന്നയിച്ചത്‌. ഓരോ യോഗങ്ങളിലും തങ്ങൾ മുന്നോട്ടുവയ്ക്കുന്ന ഓരോ ആവശ്യങ്ങളും ഇപ്പ ശരിയാക്കിത്തരാമെന്ന വാഗ്ദാനവും നൽകി പോകുന്നതല്ലാതെ നടപ്പാക്കാറില്ലെന്നും കരാർ കമ്പനിയിൽ തങ്ങൾക്കു വിശ്വാസമില്ലെന്നും അവർ പറഞ്ഞു. ഉന്നതതലങ്ങളിലെടുക്കുന്ന യോഗതീരുമാനങ്ങളും നിർദേശങ്ങളും ആവർത്തിക്കുന്നതല്ലാതെ നടപടി ഉണ്ടാകാറില്ലെന്നും വിമർശിച്ചു. വിമർശനങ്ങൾ ക്ഷമയോടെ കേട്ടിരുന്ന ജില്ലാ കളക്ടർ തുടർന്ന് എൻഎച്ച്എഐക്കും കരാർ കമ്പനിക്കും കൃത്യമായ നിർദേശം നൽകി. പ്രധാന നിർദേശങ്ങൾ: 1. മെല്ലെപ്പോക്ക് ഒഴിവാക്കി നിർമാണം വേഗത്തിലാക്കണം. 2. സർവീസ് റോഡുകളിലെ കുണ്ടുംകുഴികളുമടച്ച് ടാറിംഗ് ജോലികൾ അടിയന്തരമായി പൂർത്തിയാക്കണം. 3. ഗതാഗതക്കുരുക്ക് ഒഴിവാക്കാൻ വാഹനങ്ങൾ വഴിതിരിച്ചുവിടുന്നതുമൂലം തകർന്ന ഗ്രാമീണ/പൊതുമരാമത്ത് റോഡുകൾ എൻഎച്ച്എഐയുടെ ചെലവിൽ നവീകരിക്കണം. (ഇതുസംബന്ധിച്ച് എന്തെങ്കിലും സാങ്കേതികതടസം ഉണ്ടെങ്കിൽ ഇടപെടാനുള്ള സന്നദ്ധതയും കളക്ടർ അറിയിച്ചു). 4. അപകടസ്ഥലങ്ങളിൽ ബാരിക്കേഡുകൾ നിർബന്ധമായും സ്ഥാപിക്കണം. 5. നിർമാണപ്രവൃത്തികൾ നടക്കുന്ന നിർദിഷ്ട ഇടങ്ങളിൽ ഹൈവേ അഥോറിറ്റിയുടെ സ്ഥിരമായ നിരീക്ഷണം ഉറപ്പാക്കണം. 6. വെള്ളക്കെട്ടുകൾ ഒഴിവാക്കുവാൻ ഡ്രെയ്നേജുകൾ കുറ്റമറ്റതാക്കണം. ഇവ പൂർണമായി പരിശോധിച്ച് പോരായ്മകൾ പരിഹരിക്കണം. 7. നിർമാണപ്രവൃത്തികൾക്കു കാലതാമസമോ തടസമോ ഇറിഗേഷൻ വകുപ്പിന്‍റെയോ വാട്ടർ അഥോറിറ്റിയുടെയോ ഭാഗത്തുനിന്നുണ്ടെങ്കിൽ യോഗംവിളിച്ച് പരിഹാരം കാണാമെന്നും കളക്ടർ പറഞ്ഞു. 8.എൻഎച്ച്എഐ ഉദ്യോഗസ്ഥരും പോലീസും അടക്കമുള്ള ഗ്രൂപ്പിൽ നിർമാണത്തിലെ അപാകതകളും നിർദേശങ്ങളും അറിയിക്കാൻ അതതു ഗ്രാമപഞ്ചായത്തിലെ പ്രസിഡന്‍റുമാരെയും ഉൾപ്പെടുത്താനും തീരുമാനിച്ചിട്ടുണ്ട്. പതിവുയോഗങ്ങളിലെ തീരുമാനങ്ങൾക്കപ്പുറം ഈ യോഗത്തിനു യാതൊരു പുതുമയും ഇല്ലെന്ന വിലയിരുത്തലിലാണ് യോഗത്തിൽ പങ്കെടുത്ത ജനപ്രതിനിധികളും മറ്റുള്ളവരും.

സൗദിയിൽ വാഹനാപകടം: നാട്ടിക സ്വദേശിനി മരിച്ചു

തൃപ്രയാർ: സൗദിയിൽ വാഹനാപകടത്തിൽ നാട്ടിക സ്വദേശിയായ വിദ്യാർഥി മരിച്ചു. നാട്ടിക വെള്ളാഞ്ചേരി ക്ഷേത്രത്തിനു വടക്ക് കല്ലിപ്പറമ്പിൽ സിദ്ധിഖ് ഹസൈനാരുടെ മകൾ ഫർഹാന ഷെറിൻ(18) ആണ് മരിച്ചത്. ചൊവ്വാഴ്ച പുലർച്ചെയാണ് അപകടം. അപകടത്തിൽ സിദ്ധിഖിന്‍റെ ഇരട്ടക്കുട്ടികളിൽ ഒരാളായ ഫർഹാന ഷെറിൻ സംഭവസ്ഥലത്ത് വച്ചുതന്നെ മരിച്ചു. സിദ്ധിഖും ഭാര്യയും മറ്റു രണ്ടു കുട്ടികളും പരിക്കുകളോടെ ആശുപത്രിയിൽ ചികിത്സയിലാണ്. ഇവരിൽ ഒരാളുടെ നില ഗുരുതരമാണെന്നാണ് ലഭിക്കുന്ന വിവരം. സന്ദർശക വിസയിലെത്തിയ കുടുംബത്തിന്‍റെ വിസ പുതുക്കുന്നതിനായി ബഹറിനിൽ പോയി തിരിച്ച് റിയാദിലേക്ക് വരുന്നതിനിടെയാണ് അപകടം. ദമാം-റിയാദ് ഹൈവേയിൽ ഖുറൈസിനു സമീപം ഹുറൈറയിൽ ഇവർ സഞ്ചരിച്ചിരുന്ന വാഹനം അപകടത്തിൽപ്പെടുകയായിരുന്നു. മൃതദേഹം അടുത്ത ദിവസങ്ങളിൽ നാട്ടിലെത്തിച്ച് കബറടക്കും. മാതാവ്: ഷമീറ. സഹോദരങ്ങൾ: റിസ്‌വാന നസ്‌റിൻ, റിഷാന പർവിൻ, ഫർസാന യാസ്മിൻ, മുഹമ്മദ്‌ അക്സം.

ഓട്ടോഡ്രൈവർ ക്ഷേത്രക്കുളത്തിൽ മുങ്ങിമരിച്ചു

വടക്കാഞ്ചേരി: ഓട്ടോറിക്ഷഡ്രൈവർ പട്ടിച്ചിറക്കാവ് ക്ഷേത്രക്കുളത്തിൽ മുങ്ങിമരിച്ചു. തെക്കുംകര തിരുവോണംസ്വദേശി കല്ലിപറമ്പിൽ വീട്ടിൽ വേലായുധൻ (മണിനായർ) മകൻ സുനിൽകുമാർ (46) ആണ് മരിച്ചത്. വടക്കാഞ്ചേരി നഗരസഭയിലെ പട്ടിച്ചിറക്കാവ് ക്ഷേത്രക്കുളത്തിൽ സുഹൃത്തുക്കളോടൊപ്പം നീന്തുന്നതിനിടെ മുങ്ങിത്താഴുകയായിരുന്നു. കൂട്ടുകാർ വിവരമറിയിച്ചതിനെ തുടർന്ന് വടക്കാഞ്ചേരി ഫയർ ഫോഴ്‌സും സ്കൂബടീമും നടത്തിയ തെരച്ചിലിൽ മൃതദേഹം കണ്ടെത്തുകയായിരുന്നു. വടക്കാഞ്ചേരി പോലീസ് മേൽനടപടികൾ സ്വീകരിച്ചു. സംസ്കാരം നടത്തി. അമ്മ: മണി. മകൻ: അഭിനവ്.

മെറിറ്റ് ഡേയും വിവിധ ക്ലബ്ബുകളുടെ ഉദ്ഘാടനവും

ഇരിങ്ങാലക്കുട: ഡോൺ ബോസ്കോ ഹയർ സെക്കൻഡറി സ്കൂളിൽ എസ്എസ്എൽസി, പ്ലസ്‌ടു ഫുൾ എപ്ലസ് കരസ്ഥമാക്കിയ വിദ്യാർഥികളെ ആദരിച്ചു. അതോടൊപ്പം സ്കൂളിലെ ഹൗസ് സിസ്റ്റത്തിന്‍റേയും വിവിധ ക്ലബുകളുടേയും ഉദ്ഘാടനം ഫാ. സന്തോഷ് മാത്യു നിർവഹിച്ചു. പ്രിൻസിപ്പൽ ഫാ. ഷിനോ കളപ്പുരയ്ക്കൽ സ്വാഗതം പറഞ്ഞു. സ്കൂൾ മാനേജർ ഫാ. ഇമ്മാനുവൽ വട്ടക്കുന്നേൽ, സെൻട്രൽ സ്കൂൾ പ്രിൻസിപ്പൽ ഫാ. ജിതിൻ മൈക്കിൾ, അഡ്‌മിനിസ്ട്രേറ്റർ ഫാ. ജീനോ കുഴിതൊട്ടിയിൽ, എൽപി ഹെഡ്മിസ്ട്രസ് സിസ്റ്റർ വി.പി. ഓമന, പിടിഎ പ്രസിഡന്‍റ് എം.ബി. സജിത്ത്, സ്റ്റാഫ് സെക്രട്ടറി സിൽജി ജോൺസൺ എന്നിവർ സന്നിഹിതരായിരുന്നു. വിദ്യാർഥി പ്രതിനിധികളായ അലൻ പോൾ, അലീന അമർ എന്നിവർ നന്ദി പറഞ്ഞു.

പെരുംതോടിന്‍റെ സംരക്ഷണഭിത്തി തകർന്നു

കൊറ്റംകുളം: പെരുംതോട് ഇറിഗേഷൻ ചീപ്പിന്‍റെ കരിങ്കൽ ഭിത്തി തകർന്നു. പെരിഞ്ഞനം കൊറ്റംകുളം പെരുംതോട് പാലത്തിനോട് ചേർന്ന് ഇക്കഴിഞ്ഞ മേയ്‌ മാസത്തിൽ ഹിറ്റാച്ചി ഉപയോഗിച്ച് കുളവാഴമാലിന്യം നീക്കം ചെയ്തപ്പോളായിരുന്നു പെരുംതോടിന്‍റെ സംരക്ഷണ ഭിത്തിയിൽ ആദ്യം വിള്ളൽ വീണത്. മഴ ശക്തിയായപ്പോൾ വിള്ളലുകൾക്കിടയിലൂടെ മഴവെള്ളം ഒലിച്ചിറങ്ങി ഭിത്തി പലയിടത്തും ഇടിഞ്ഞു താഴുകയായിരുന്നു. ഇപ്പോൾ ഇവിടെ റോഡ് തകർച്ചാഭീഷണി നേരിടുന്ന അവസ്ഥയാണ്. മഴ കനക്കുമെന്ന മുന്നറിയിപ്പ് പ്രദേശവാസികൾക്ക് ആശക ഉണ്ടാക്കുന്നു. കരിങ്കൽ ഭിത്തി തകർന്ന വിഷയത്തിൽ ബന്ധപ്പെട്ട അധികൃതർ ഇടപെട്ട് പ്രശ്നപരിഹാരം കാണണമെന്ന ആവശ്യം ഉയർന്നിട്ടുണ്ട്.

വിദ്യാഭ്യാസത്തിലൂടെ ജ്ഞാനമെന്ന ആറാമിന്ദ്രിയം തുറക്കണം: ജസ്റ്റീസ് കുര്യന്‍ ജോസഫ്

ഇരിങ്ങാലക്കുട: വിദ്യാഭ്യാസമെന്നത് വിവരങ്ങളുടെ ലഭ്യതയല്ല, ജ്ഞാനത്തിലുള്ള വളര്‍ച്ചയാണ് എന്ന് ജസ്റ്റീസ് കുര്യന്‍ ജോസഫ് അഭിപ്രായപ്പെട്ടു. ഇരിങ്ങാലക്കുട സെന്‍റ് ജോസഫ്സ് കോളജില്‍ നടന്ന സസ്‌നേഹം പരിപാടി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഉന്നതവിദ്യാഭ്യാസ രംഗത്ത് നമ്മുടെ അച്ചടക്കം നമ്മുടെ ഭാവിയെ നിര്‍ണയിക്കും. പുതിയ കാലത്തെ വിദ്യാര്‍ഥികള്‍ക്കൊപ്പം സഞ്ചരിച്ചുകൊണ്ട് മാതാപിതാക്കളും അധ്യാപകരും വഴികാട്ടികളാവണം. ഭരണഘടനയിലെ അവകാശങ്ങള്‍ മാത്രമല്ല കടമകളും യഥാവിധി നിര്‍വഹിക്കുന്ന തലമുറയാണ് പ്രതീക്ഷ തരുന്നതെന്ന് അദ്ദേഹം കൂട്ടിച്ചേര്‍ത്തു. ചടങ്ങില്‍ പ്രിന്‍സിപ്പല്‍ സിസ്റ്റര്‍ ഡോ. ബ്ലെസി അധ്യക്ഷത വഹിച്ചു. ഐക്യുഎസി കോ-ഓര്‍ഡിനേറ്റര്‍ ഡോ. ടി.വി. ബിനു, പിടിഎ വൈസ് പ്രസിഡന്‍റ്് പി.എന്‍. ഗോപകുമാര്‍, സന ബാബു തട്ടില്‍, ഷിജി തോമസ് എന്നിവര്‍ സംസാരിച്ചു. മാതാപിതാക്കള്‍ക്കായി സംഘടിപ്പിച്ച ഓറിയന്‍റേഷന്‍ ക്ലാസ് ഫാ. സിബു കള്ളാംപറമ്പില്‍ നയിച്ചു.

വൈദ്യുതി പോസ്റ്റിൽ തീപിടിത്തം പരിഭ്രാന്തി പരത്തി

കൊരട്ടി: കൊരട്ടി - കാടുകുറ്റി പൊതുമരാമത്ത് റോഡിൽ കാതിക്കുടം സൗത്ത് ഇന്ത്യൻ ബാങ്കിനു സമീപം വൈദ്യുതി പോസ്റ്റിലെ കമ്പികളിൽ തീപിടിച്ചത് പ്രദേശവാസികൾക്കിടയിലും വാഹന - കാൽനട യാത്രക്കാർക്കിടയിലും പരിഭ്രാന്തി പരത്തി. ഇന്നലെ ഉച്ചയ്ക്ക് 12.30 മണിയോടെയായിരുന്നു സംഭവം. 11 കെവി ലൈനും എൽടി ലൈനും കടന്നുപോകുന്ന പോസ്റ്റിൽ നിരവധി കേബിൾ ടിവി, ഇന്‍റർനെറ്റ് കണക്‌ഷനുകൾക്കായുള്ള ലൈനുകളും ബന്ധിപ്പിച്ചിട്ടുണ്ട്. സ്വകാര്യ കേബിൾ ശൃംഖലയുടെ ബോക്സിൽ നിന്നുള്ള ഷോർട്ട് സർക്യൂട്ട് ആയിരിക്കാം തീപിടുത്തത്തിന് കാരണമായതെന്നാണ് നിഗമനം. സംഭവസമയത്ത് അതിലൂടെ കടന്നുപോയ കെഎസ്ഇബി ജീവനക്കാരൻ ലൈൻ ഓഫ് ചെയ്യുന്നതിന് ഓഫീസിലേക്കും തത്സമയം സംഭവസ്ഥലത്തുണ്ടായിരുന്ന കൊരട്ടി പോലീസ് സ്റ്റേഷനിലെ ഉദ്യാേഗസ്ഥൻ ചാലക്കുടി ഫയർഫോഴ്സിനെയും വിവരമറിയിച്ചു. ഇതിനിടയിൽ തീ അണയ്ക്കാൻ പ്രദേശവാസികൾ ശ്രമിച്ചെങ്കിലും നടന്നില്ല. ഫയർഫാേഴ്സ് സ്ഥലത്തെത്തിയതിനു ശേഷമാണ് തീ നിയന്ത്രണ വിധേയമാക്കാനായത്. സംഭവമറിഞ്ഞ് കെഎസ്ഇബി ഉദ്യാേഗസ്ഥരും സ്ഥലത്തെത്തിയിരുന്നു.

യുവാവിനെ കുത്തിപ്പരിക്കേൽപ്പിച്ച കേസിലെ പ്രതി അറസ്റ്റിൽ

ചാലക്കുടി: സൗത്ത് മേല്പാലത്തിന്‍റെ അടിയിൽ എലിഞ്ഞിപ്ര മടത്തിപ്പറമ്പിൽ രാജനെ (32) കുത്തിപ്പരിക്കേൽപ്പിച്ച കേസിൽ പ്രതി അറസ്റ്റിൽ. ചേർത്തല മുരുകൻ (47) നെയാണ് അറസ്റ്റ് ചെയ്തത്. കഴിഞ്ഞദിവസം രാത്രി 9.30ന് പണം ചോദിച്ചതിനെ തുടർന്നുള്ള തർക്കത്തേയും സ്ഥിരമായി പണം ചോദിക്കുന്നതിലുള്ള വൈരാഗ്യത്തിൽ കത്തി കൊണ്ട് കുത്തി പ്പരിക്കേൽപ്പിക്കുകയായിരുന്നു. ഗുരുതരമായി പരിക്കേറ്റ രാജനെ തൃശൂർ മെഡിക്കൽ കോളജ് ആ ശൂപത്രിയിൽ പ്രവേശിപ്പിച്ചു. ചാലക്കുടി പോലീസ് വധശ്രമത്തിന് കേസ് എടുത്തു. സംഭവശേഷം സ്ഥലത്ത് നിന്ന് രക്ഷപ്പെട്ട പ്രതിയെ ചാലക്കുടി റെയിൽവേ സ്റ്റേഷനിൽ നിന്നുമാണ് പോലീസ് അറസ്റ്റ് ചെയ്തത്. പ്രതിയായ മുരുകൻ ചാലക്കുടി സൗത്ത് മേൽപാലത്തിന് താഴെ ചെരുപ്പും, ബാഗും തുന്നുന്ന ജോലി ചെയ്യുന്നയാളാണ്. പരിക്കേറ്റ രാജൻ പാലത്തിന് താഴെയാണ് കിടന്നുറങ്ങുന്നത്. അതിരപ്പിള്ളി പോലീസ് സ്റ്റേഷൻ ഇൻസ്പെക്ടർ വി. ബിജു ചാലക്കുടി പോലീസ് സ്റ്റേഷൻ എസ്ഐ മാരായ പി.വി. പാട്രിക്. ജോഫി ജോസ്, എഎസ്ഐ ബൈജു, സിപിഒമാരായ മാർട്ടിൻ പോൾ, അഗസ്റ്റിൻ, കെ.എ. അജിൻ എന്നിവരാണ് അന്വേഷണ സംഘത്തിൽ ഉണ്ടായിരുന്നത്.

കൂടല്‍മാണിക്യം ക്ഷേത്രത്തിലെ കഴകവിവാദം പ്രബുദ്ധകേരളത്തിന് അപമാനം: കെ.പി. രാജേന്ദ്രന്‍

ഇരിങ്ങാലക്കുട: കൂടല്‍മാണിക്യം ക്ഷേത്രത്തില്‍ ഈയിടെ ഉണ്ടായ കഴക വിവാദം പ്രബുദ്ധകേരളത്തിന് അപമാനമാണെന്ന് സിപിഐ ദേശീയ എക്‌സി. അംഗം കെ.പി. രാജേന്ദ്രന്‍ പ്രസ്താവിച്ചു. കുട്ടംകുളം സമരത്തിന്‍റെ 79-ാം വാര്‍ഷികാചരണത്തിന്‍റെ ഭാഗമായി സംഘടിപ്പിച്ച സമര സ്മരണ ഉദ്ഘാടനം ചെയ്യുകയായിരുന്നു അദ്ദേഹം. സമരഭൂമിയില്‍ സിപിഐ ജില്ലാ സെക്രട്ടറി കെ.കെ. വത്സരാജ് പതാക ഉയര്‍ത്തി. സംഘാടക സമിതി കണ്‍വീനര്‍ ടി.കെ. സുധിഷ് അധ്യക്ഷത വഹിച്ചു. കെ.ജി. ശിവാനന്ദന്‍, പി. മണി, അഡ്വ. പി.ജെ. ജോബി, ഷീനപറയങ്ങാട്ടില്‍, കെ.എസ്. ജയ, എന്‍.കെ. ഉദയപ്രകാശ്, ബിനോയ് ഷബീര്‍, അനിത രാധാകൃഷ്ണന്‍, മിഥുന്‍ പോട്ടക്കാരന്‍ തുടങ്ങിയവര്‍ സംസാരിച്ചു.

ബഡ്സ് സ്‌കൂള്‍ വിദ്യാര്‍ഥികള്‍ക്കായി പരിശീലനമൊരുക്കി ക്രൈസ്റ്റ് എന്‍ജിനീയറിംഗ് കോളജ്

ഇരിങ്ങാലക്കുട: ബഡ്സ് സ്‌കൂള്‍ വിദ്യാര്‍ഥികളെ സ്വയപര്യാപ്തതയിലേക്ക് നയിക്കാന്‍ ലക്ഷ്യമിട്ട് ഇരിങ്ങാലക്കുട ക്രൈസ്റ്റ് എന്‍ജിനീയറിംഗ് കോളജിന്‍റെ ആഭിമുഖ്യത്തില്‍ പരിശീലന പരിപാടി സംഘടിപ്പിച്ചു. ഇ- വേസ്റ്റില്‍ നിന്ന് ആഭരണങ്ങള്‍, കീ ചെയിനുകള്‍ മുതലായ കര കൗശല വസ്തുക്കള്‍ നിര്‍മിക്കുന്നതിനുള്ള പരിശീലനമാണ് എന്‍ജിനീയറിംഗ് കോളജ് വിദ്യാര്‍ഥികളും അധ്യാപകരും ചേര്‍ന്ന് ഒരുക്കിയത്. ചേര്‍പ്പ് ബ്ലോക്ക് പഞ്ചായത്തിന്‍റെ കീഴില്‍ പ്രവര്‍ത്തിക്കുന്ന വെങ്ങിണിശേരി സാന്ത്വനം ബഡ്സ് സ്‌കൂളിലെ വിദ്യാര്‍ഥികള്‍ക്കായി അഞ്ച് ദിവസങ്ങളിലായാണ് പരിശീലനം സംഘടിപ്പിച്ചത്. പരിശീലനത്തിന്‍റെ ഭാഗമായി വിദ്യാര്‍ഥികള്‍ നിര്‍മിച്ച ഉത്പന്നങ്ങളുടെ പ്രദര്‍ശനം ജില്ലാതല ബഡ്സ് പ്രവേശനോത്സവത്തോടനുബന്ധിച്ചു സംഘടിപ്പിച്ചു. പരിശീലന പരിപാടിക്ക് നേതൃത്വം നല്‍കിയതിന് ക്രൈസ്റ്റ് എന്‍ജിനീയറിംഗ് കോളജിനുള്ള സാക്ഷ്യ പത്രം മന്ത്രി ഡോ. ആര്‍. ബിന്ദുവില്‍ നിന്ന് കോളജ് എക്‌സിക്യൂട്ടീവ് ഡയറക്ടര്‍ ഫാ. ജോണ്‍ പാലിയേക്കര സിഎംഐ ഏറ്റുവാങ്ങി. ക്രൈസ്റ്റ് കോളജ് ഓഫ് എന്‍ജിനീയറിംഗ് ഔട്ട് റീച് ഡയറക്ടര്‍ ഡോ. സുധ ബാലഗോപാലന്‍റെ നേതൃത്വത്തില്‍ അധ്യാപകരായ ഡോ. വിഷ്ണു പി. മദന്‍മോഹന്‍, പി.എം. സ്വാതി, ഫെബിന്‍ രാജു തുടങ്ങിയവര്‍ പരിശീലനത്തിന് നേതൃത്വം നല്‍കി.

പുല്ലൂര്‍ സേക്രഡ് ഹാര്‍ട്ട് മിഷന്‍ ഹോസ്പിറ്റലില്‍ പുതിയ സിടി സ്‌കാന്‍ സെന്‍റർ ഉദ്ഘാടനം നാളെ

ഇരിങ്ങാലക്കുട: പുല്ലൂര്‍ സേക്രഡ് ഹാര്‍ട്ട് മിഷന്‍ ഹോസ്പിറ്റലില്‍ പുതിയതായി ആരംഭിക്കുന്ന സിടി സ്‌കാന്‍ സെന്‍ററിന്‍റെ ഉദ്ഘാടനവും അമ്പത്തിയെട്ടാം ഹോസ്പിറ്റല്‍ ഡേ ആഘോഷം ഉദ്ഘാടനവും നാളെ രാവിലെ 11ന് ഇരിങ്ങാലക്കുട രൂപത ബിഷപ് മാര്‍ പോളികണ്ണൂക്കാടന്‍ നിര്‍വഹിക്കും. സമരിറ്റന്‍ സിസ്റ്റേഴ്സ് സ്നേഹോദയ പ്രൊവിന്‍ഷ്യല്‍ സുപ്പീരിയറും ഹോസ്പിറ്റല്‍ ഡയറക്ടറും മെഡിക്കല്‍ സൂപ്രണ്ടുമായ സിസ്റ്റര്‍ ഡോ. ‍ റിറ്റ സി എസ്എസ് അധ്യക്ഷത വഹിക്കും. ഇരിങ്ങാലക്കുട ജോയിന്‍റ്് റീജണല്‍ ട്രാന്‍സ്പോര്‍ട്ട് ഓഫീസര്‍ ബിജു ഐസക് മുഖ്യ പ്രഭാഷണം നടത്തും. മുരിയാട് പഞ്ചായത്ത് പ്രസിഡന്‍റ് ജോസ് ചിറ്റിലപ്പിള്ളി, ഇരിങ്ങാലക്കുട രൂപത ഫിനാന്‍സ് ഓഫീസര്‍ ഫാ. ലിജോ കോങ്കോത്ത്, ഹോസ്പിറ്റലിലെ സീനിയര്‍ ഡോക്ടര്‍ എം.വി. വാറുണ്ണി, വാര്‍ഡ് മെമ്പര്‍ മാണി സജയന്‍ എന്നിവര്‍ ആശംസകള്‍ നേരും. മാഗ്നസ് ഡയഗ്നോസ്റ്റിക്സുമായി സഹകരിച്ചാണ് പുല്ലൂര്‍ മിഷന്‍ ആശുപത്രിയില്‍ ഏറ്റവും ആധുനിക സവിശേഷതകളോടുകൂടിയ ഇരുപത്തിനാലു മണിക്കൂറും പ്രവര്‍ത്തിക്കുന്ന സിടി സ്‌കാന്‍ സെന്‍ററും അള്‍ട്രാ സൗണ്ട് സ്‌കാനിംഗും അനുബന്ധസൗകര്യങ്ങളും ഒരുക്കിയിരിക്കുന്നത്. ഇതോടെ ആശുപത്രിയിലെ എമര്‍ജന്‍സി ഡിപ്പാര്‍ട്മെന്‍റിന്‍റെ സേവനങ്ങളും രോഗിവിശകലനവും പരിചരണവും കൂടുതല്‍ കാര്യക്ഷമമാക്കാന്‍ സാധിക്കുമെന്ന് ഹോസ്പിറ്റല്‍ അഡ്മിനിസ്ട്രേറ്റര്‍ സിസ്റ്റര്‍ ഫ്ലോറി സിഎസ്എസ്, നഴ്സിംഗ് സൂപ്രണ്ട് സിസ്റ്റര്‍ വിന്‍സി സിഎസ്എസ്, മാനേജര്‍ ഓപ്പറേഷന്‍സ് ആന്‍ജോ ജോസ് എന്നിവര്‍ പത്രസമ്മേളനത്തില്‍ അറിയിച്ചു.

യൂത്ത് കോൺഗ്രസിന്‍റെ റോഡ് ഉപരോധത്തില്‌ സംഘര്‌ഷം

ചേർപ്പ്: തൃശൂർ - കൊടുങ്ങല്ലൂർ - തൃപ്രയാർ റൂട്ടിലെ ബസുകളുടെ അമിത വേഗതയും ഗുണ്ടായിസവുംമൂലം ഉണ്ടാകുന്ന അപകടപരമ്പരയിൽ പ്രതിഷേധിച്ച് ഇന്നലെ രാവിലെ പെരുമ്പിള്ളിശേരി സെന്‍ററിൽ യൂത്ത് കോൺഗ്രസ് ചേർപ്പ് മണ്ഡലം കമ്മിറ്റി പ്രതിഷേധ മാർച്ച് നടത്തി. ചേർപ്പ് സിഐ സി. രമേഷിന്‍റെ നേതൃത്വത്തിലുള്ള പോലീസ് പ്രതിഷേധ മാർച്ച് തടയാൻ ശ്രമിച്ചത് കോൺഗ്രസ് പ്രവർത്തകരും പോലീസും തമ്മിൽ ബലപ്രയോഗത്തിനിടയാക്കി. പോലീസ് ഇവരെ അറസ്റ്റ് ചെയ്തു നീക്കി. ഗതാഗതതടസം സൃഷ്ടിച്ചതിന് പോലീസ് ഇവർക്കെതിരേ കേസെടുത്തു. ഉപരോധസമരം മുൻ ചേർപ്പ് ഗ്രാമപഞ്ചായത്ത് പ്രസിഡന്‍റ് സി.കെ. വിനോദ് ഉദ്ഘാടനംചെയ്തു. യൂത്ത് കോൺഗ്രസ് മണ്ഡലം പ്രസിഡന്‍റ് സുജിത്ത് തേറമ്പത്ത് അധ്യക്ഷനായി. ബ്ലോക്ക് കോൺഗ്രസ് പ്രസിഡന്‍റ് സിജോ ജോർജ്, വൈസ് പ്രസിഡന്‍റ് എം. സുജിത്ത്കുമാർ, മണ്ഡലം പ്രസിഡന്‍റ് കെ. രാമചന്ദ്രൻ, ജോർജ് ആന്‍റോ, ബാലു കനാൽ, മജീദ് മുത്തുള്ളിയാൽ സംസാരിച്ചു.

താക്കീതുമായി ഡിവൈഎഫ്ഐ പ്രവർത്തകർ

ചേർപ്പ്: തൃശൂർ - കൊടുങ്ങല്ലൂർ - തൃപ്രയാർ റൂട്ടുകളിൽ സ്വകാര്യ ബസുകളുടെ അമിതവേഗതമൂലം വർധിച്ചുവരുന്ന അപകടങ്ങളിൽ പ്രതിഷേധിച്ച് ഡിവൈഎഫ്ഐ ചേർപ്പ് മേഖല കമ്മിറ്റിയുടെ നേതൃത്വത്തിൽ പെരുമ്പിള്ളിശേരിയിൽ ബസ് തടഞ്ഞ് ജീവനക്കാർക്ക് ബോധവൽകരണ നിർദേശംനൽകി. സിപിഎം ചേർപ്പ് ലോക്കൽ സെക്രട്ടറി എ.വി. സഹദേവൻ ഉദ്ഘാടനംചെയ്തു. ബ്ലോക്ക് പഞ്ചായത്ത്‌ മെമ്പർ ജെറിൻ ജോസ്, ലോക്കൽ കമ്മിറ്റി അംഗം എം.എച്ച്. സജീർ, എ.ജെ. ജോഷോ, എം.ജെ. ജയിൻസൺ രാഹുൽ ജയപ്രകാശ്, പി.ഡി. ജിതിൻ, സി.ഡി. അജിൽ തുടങ്ങിയവർ നേതൃത്വംനൽകി. സംസ്ഥാനപാതയിൽ മാർഗതടസം സൃഷ്ടിച്ചതിന് പോലീസ് ഇവർക്കെതിരേ കേസെടുത്തു.

മദ്യപന്‌‌ സംസ്ഥാനപാതയിലെ ഗതാഗതം സ്തംഭിപ്പിച്ചു

വടക്കാഞ്ചേരി: മദ്യപിച്ചെത്തിയ യുവാവ് സംസ്ഥാനപാതയിൽ ഗതാഗതം സ്തംഭിപ്പിച്ചു. ഇന്നലെ ഉച്ചകഴിഞ്ഞ് 2.30ന് തൃശുർ - ഷൊർണൂർ സംസ്ഥാനപാതയിൽ ഓട്ടുപാറ സെന്‍ററിലായിരുന്നു യുവാവിന്‍റെ പരാക്രമം. ശരീരം മുഴുവൻ രക്തമൊലിക്കുന്ന നിലയിലായിരുന്നു. യുവാവ് സംസ്ഥാനപാതയിൽ വിലങ്ങനെ കിടന്നതോടെയാണ് വാഹനഗതാഗതം തടസപ്പെട്ടത്. പ്രദേശത്തെ ഓട്ടോറിക്ഷ ഡ്രൈവർമാരും നാട്ടുകാരുംചേർന്ന് റോഡിന്‍റെ ഓരത്തേക്കു മാറ്റി കിടത്തിയെങ്കിലും യുവാവ് വീണ്ടും റോഡിന്‍റെ നടുവിൽകിടന്നു. നാട്ടുകാർ വിവരമറിയിച്ചതിനെ തുടർന്ന് വടക്കാഞ്ചേരി പോലീസ് സ്ഥലത്തെത്തി യുവാവിനെ കീഴ്പെടുത്തി വടക്കാഞ്ചേരി ജില്ലാ ആശുപത്രിയിലെത്തിച്ചു. പിന്നീട് സ്റ്റേഷനിലേക്കു കൊണ്ടുപോയി.

സ്കൂളിലെ ഭക്ഷ്യവിഷബാധ; പിടിഎ പ്രസിഡന്‍റിനുനേരേ ആക്രമണം

എരുമപ്പെട്ടി: ഭക്ഷ്യവിഷബാധയുണ്ടായ എരുമപ്പെട്ടി ഗവ.എൽപി സ്കൂളിലെ പിടിഎ പ്രസിഡന്‍റ് പി.ടി. സുശാന്തിനുനേരെ ആക്രമണം. സ്കൂളിലെത്തിയ നെല്ലുവായ് മുണ്ടൻകോട് സ്വദേശി പ്രമോദാണ് ആക്രമണം നടത്തിയത്. ഇയാൾ മദ്യപിച്ചിരുന്നതായി സുശാന്തും പിടിഎ കമ്മറ്റി അംഗങ്ങളും പറഞ്ഞു. ഇന്നലെ രാവിലെ 10.30 ഓടെയായിരുന്നു സംഭവം. സ്കൂളിലെ കിണർവെള്ളത്തിൽ കോളിഫോം ബാക്ടീരിയയുടെ സാന്നിധ്യം കണ്ടെത്തിയതിനെ തുടർന്ന് കിണർ ശുചീകരണം നടത്താൻ സ്കൂളിൽ പിടിഎ അംഗങ്ങളോടൊപ്പം നിൽക്കുകയായിരുന്നു സുശാന്ത്. ഈ സമയം സ്കൂൾ കോമ്പൗണ്ടിലെത്തിയ പ്രമോദ് സുശാന്തിനെ അസഭ്യംപറയുകയും മർദിക്കുകയും സ്റ്റീൽ വള ഉപയോഗിച്ച് മുഖത്ത് ഇടിക്കുകയുംചെയ്തു. പ്രമോദിന്‍റെ കുട്ടി ഈ സ്കൂളിൽ പഠിക്കുന്നുണ്ട്. ഈ കുട്ടിയും ഭക്ഷ്യ വിഷബാധയേറ്റ് ചികിത്സയിൽ കഴിഞ്ഞിരുന്നു. ഭക്ഷ്യവിഷബാധയ്ക്കുകാരണം പിടിഎ പ്രസിഡന്‍റാണെന്ന് ആരോപിച്ചായിരുന്നു മർദനം. അതേസമയം സുശാന്തിന്‍റെ കുട്ടിയും ഭക്ഷ്യവിഷബാധയേറ്റ് ചികിത്സയിലായിരുന്നു. ഇതിനിടയിലും ശുചീകരണത്തിനും മറ്റു പ്രവർത്തനങ്ങൾക്കുമായി സുശാന്ത് മഴുവൻസമയവും സ്കൂളിലുണ്ടായിരുന്നു. പരിക്കുപറ്റിയ സുശാന്ത് എരുമപ്പെട്ടി സർക്കാർ ആശുപത്രിയിൽ ചികിത്സതേടി. എരുമപ്പെട്ടി പോലീസിൽ സുശാന്ത് പരാതിനൽകിയിട്ടുണ്ട്. സ്കൂൾ കോമ്പൗണ്ടിൽ കയറി പ്രസിഡന്‍റിനെ ആക്രമിച്ച സംഭവത്തിൽ പിടിഎ അംഗങ്ങൾ പ്രതിഷേധം അറിയിച്ചു. ശക്തമായ നിയമനടപടിയുണ്ടാകണമെന്ന് എസ്എംസി ചെയർമാൻ എ.യു. മനാഫ് ആവശ്യപ്പെട്ടു.

നടൻ മോഹൻലാൽ ക്ഷേത്രങ്ങളിൽ ദർശനം നടത്തി

ഗുരുവായൂര്‌: നടൻ മോഹൻലാൽ ഗുരുവായൂർ ക്ഷേത്രത്തില്‌ ദർശനംനടത്തി. ഇന്നലെ പുലർച്ചെ നിർമാല്യദർശനത്തിനായാണ് മോഹൻലാൽ എത്തിയത്. അദ്ദേഹത്തെ അഡ്മിനിസ്ട്രേറ്റർ ഒ.ബി. അരുൺകുമാർ, ക്ഷേത്രം ഡെപ്യൂട്ടി അഡ്മിനിസ്ട്രേറ്റർ പ്രമോദ് കളരിക്കൽ, അസിസ്റ്റന്‍റ് മാനേജർ ലെജുമോൾ എന്നിവർ സ്വീകരിച്ചു. തൃപ്രയാർ: ശ്രീരാമ ക്ഷേത്രത്തിൽ നടൻ മോഹൻലാൽ ദർശനം നടത്തി. ഇന്നലെ പുലർച്ചെ 4.30ന് രണ്ടുസുഹൃത്തുക്കൾക്കൊപ്പം ആയിരുന്നു ദർശനം. തിരുനടയിൽ അമ്പും വില്ലും സമർപ്പിച്ചു. മീനൂട്ട്, വെടി, അവിൽനിവേദ്യം എന്നീ വഴിപാടുകളും സമർപ്പിച്ചു. മേൽശാന്തിയിൽനിന്ന് തീർഥവും പ്രസാദവും വാങ്ങി ഉപദേവന്മാരെ തൊഴുത് അഞ്ചേകാലോടു കൂടി മടങ്ങി. മാനേജർ മനോജ്. കെ. നായർ, തൃപ്രയാർ തേവരുടെ ഫോട്ടോയും ചാർത്തിയ കളഭവും ക്ഷേത്രത്തിന്‍റെ ഐതിഹ്യം വിവരിക്കുന്ന പുസ്തകവും ഉപഹാരമായി നൽകി.

മനക്കൊടി - പുള്ള് റോഡ് വെള്ളംനിറഞ്ഞ് ഗതാഗതം നിർത്തുന്നത് ഒഴിവാക്കും: എംഎൽഎ

അരിമ്പൂർ: മഴയെത്തുടര്‌ന്നു മനക്കൊടി - പുള്ള് റോഡ് വെള്ളംനിറഞ്ഞു ഗതാഗതം നിർത്തിവയ്ക്കുന്ന സാഹചര്യം ഒഴിവാക്കാൻ നടപടി യുണ്ടാകുമെന്ന് മുരളി പെരുനെല്ലി എംഎൽഎ പറഞ്ഞു. എല്ലാവർഷക്കാലത്തും റോഡില്‌ വെള്ളംനിറഞ്ഞ് ഗതാഗതംനിർത്തിവയ്ക്കുന്ന സാഹചര്യമാണ് നിലവിലുള്ളത്. ഇതിന് പരിഹാരമെന്നോണം ഇറിഗേഷൻ കനാലിന്‍റെ റോഡിനോടുചേർന്ന് 850 മീറ്റർ നീളത്തിൽ കോൺക്രീറ്റ് വാൾ നിർമിക്കുന്നതിന് 62 ലക്ഷം രൂപയുടെ ഡിപിആർ തയാറാക്കിയിട്ടുള്ളതായും നിർമാണ പ്രവർത്തനങ്ങൾ വെള്ളമൊഴിയുന്നമുറയ്ക്ക് വേഗത്തിൽ നടത്തുമെന്നും അദ്ദേഹം പറഞ്ഞു. സ്ഥലം സന്ദർശിച്ചശേഷം സംസാരിക്കുകയായിരുന്നു എംഎൽഎ.തൃശൂർ - തൃപ്രയാർ - ചേർപ്പ് - അമ്മാടം ഭാഗത്തേക്കുള്ള എളുപ്പവഴിയിലും വെള്ളംനിറഞ്ഞതോടെ യാത്രക്കാർ ഏറെ ദുരിതത്തിലായി. വർഷക്കാലം കഴിഞ്ഞാലും ചെറിയ മഴ പെയ്താൽപോലും വാരിയംകോൾ പാടശേഖരത്തിലേക്ക് ഇറിഗേഷൻ കനാൽ കരകവിഞ്ഞൊഴുകി കൃഷി നശിക്കുന്നതും പതിവാണ്. വാർഡ് അംഗം കെ. രാഗേഷ്, ടി.വി. വിദ്യാധരൻ, അഭിലാഷ് ചേർക്കര, പടവ് ഭാരവാഹികൾ തുടങ്ങിയവരും എംഎൽഎയോടൊപ്പം ഉണ്ടായിരുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]