ADVERTISEMENT

ADVERTISEMENT

കഞ്ചാവ് പിടികൂടി

പാപ്പിനിശേരി: സ്കൂൾ, കോളജ് പരിസരങ്ങൾ കേന്ദ്രീകരിച്ച് പാപ്പിനിശേരി എക്സൈസ് സംഘം നടത്തിയ പരിശോധയിൽ കഞ്ചാവുമായി യുവാവ് അറസ്റ്റിൽ. പുതിയങ്ങാടി സ്വദേശി എം. ഷദാദിനെയാണ് (29) അറസ്റ്റ് ചെയ്തത്. ഇയാളിൽ നിന്ന് പൊതിഞ്ഞു വച്ച നിലയിൽ അഞ്ചു ഗ്രാം കഞ്ചാവ് പിടിച്ചെടുത്തു.

ADVERTISEMENT

ഓട്ടോ ടാക്സി പോത്തിനെ ഇടിച്ച് ഡ്രൈവറടക്കം രണ്ടുപേർക്കു പരിക്ക്

ഉളിയിൽ: റോഡിലുണ്ടായിരുന്ന പോത്തിനെ ഓട്ടോ ടാക്സി ഇടിച്ച് ഡ്രൈവറടക്കം രണ്ടുപേർക്കു പരിക്ക്. പരിക്കളം സ്വദേശി മനീഷ്, ജോസഫ് എന്നിവർക്കാണ് പരിക്കേറ്റത്. ഇവർ ഇരിട്ടിയിലെ സ്വകാര്യ ആശുപത്രിയിൽ ചികിത്സ തേടി. ഇന്നലെ പുലർച്ചെ ഉളിയിലായിരുന്നു സംഭവം. തലശേരിയിൽ നിന്നും പരിക്കളത്തേക്ക് പോകുകയായിരുന്ന ഓട്ടോ ടാക്സിയാണ് അപകടത്തിൽപ്പെട്ടത്. വാഹനത്തിന്‍റെ മുൻഭാഗവും തകർന്നു. കനത്ത മഴയിൽ സമീപത്തെ പറമ്പിൽ നിന്നുമാണ് പോത്ത് റോഡിലെത്തിയതെന്ന് പറയുന്നു.

വന്യമൃഗങ്ങളും വനപാലകരും ജനങ്ങളെ ഒരുപോലെ വേട്ടയാടുന്നു: കേരള കോൺ.-എം

ഇരിട്ടി: വന്യമൃഗങ്ങളും വനപാലകരും ഒരുപോലെ കർഷകരെ വേട്ടയാടുന്നത് അവസാനിപ്പിക്കണമെന്ന് കേരള കോൺഗ്രസ്-എം പേരാവൂർ നിയോജക കമ്മിറ്റി ആവശ്യപ്പെട്ടു. കട്ടവനെ കിട്ടിയില്ലെങ്കിൽ കിട്ടിയവനെ കള്ളനാക്കുന്ന നയമാണ് വനം വകുപ്പ് നടപ്പിലാക്കുന്നത്. ഇത് അവസാനിപ്പിച്ചില്ലെങ്കിൽ ശക്തമായ സമരങ്ങൾ ആരംഭിക്കുവാനും യോഗം തീരുമാനിച്ചു. ജില്ലാ പ്രസിഡന്‍റ് ജോയ് കൊന്നയ്ക്കൽ ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് വിപിൻ തോമസ് അധ്യക്ഷത വഹിച്ചു. സംസ്ഥാന ഹൈപ്പവർ കമ്മിറ്റി അംഗം മാത്യു കുന്നപ്പള്ളി, തോമസ് മാലത്ത്, സി.എം. ജോർജ്, മാത്യു പുളിക്കകുന്നേൽ, അൽഫോൻസ് കളപ്പുര, ജെയ്സൺ ജിരകശേരി, എ.കെ. രാജു, ബെന്നിച്ചൻ മഠത്തിനകം, ഡോ. ത്രേസ്യാമ്മ കൊങ്ങോല, കെ.കെ. വിനോദ്, ജോസ് മാപ്പിളപ്പറമ്പിൽ, വർഗീസ് ആനിത്തോട്ടം, ജോജി പുനമറ്റം, ഏബ്രഹാം വെട്ടിക്കൽ, ബാബു നടയത്ത്, ഏബ്രഹാം കല്ലൻമ്മാരി, ബ്രിട്ടോ ജോസ്, മാത്യു കൊച്ചുതറ, ഗർവാസിസ് കേളിമറ്റം, ജോർജ് വാളുവെട്ടിക്കൽ, സി.പി. ജോസ്, ജോസഫ് വള്ളിക്കാവുങ്കൽ, ജെസി മോൾ വാഴപ്പള്ളി, റെജി മേച്ചേരിക്കുന്നേൽ, കുഞ്ഞച്ചൻ വടശേരി എന്നിവർ പ്രസംഗിച്ചു.

സമൂഹ മാധ്യമങ്ങളിലൂടെ പ്രധാനമന്ത്രിയുടെ പേരിൽ പുതിയ തട്ടിപ്പ്

ഇരിട്ടി: സമൂഹ മാധ്യമങ്ങളിലൂടെ പ്രധാനമന്ത്രിയുടെ പേരിൽ പുതിയ തട്ടിപ്പുമായി സൈബർ തട്ടിപ്പുകാർ. പ്രധാനമന്ത്രിയുടെ ചിത്രവും ബിജെപിയുടെ തെരഞ്ഞെടുപ്പ് ചിഹ്നം താമരയിൽ ക്ലിക്ക് ചെയ്താൽ നിങ്ങളുടെ അകൗണ്ടിലേക്ക് 5000 രൂപ ലഭിക്കുമെന്നും കാണിച്ചാണ് തട്ടിപ്പുകാർ രംഗത്തു വന്നിരിക്കുന്നത്. താമരയിൽ വിരൽ അമർത്തിയാൽ ഉടൻ തന്നെ നിങ്ങൾ 5000 രൂപ വിജയിച്ചതായി മെസേജ് വരും. പിന്നീട് നിങ്ങളുടെ ഫോൺ നമ്പർ ആവശ്യപ്പെടും. ജനങ്ങളെ വിശ്വസത്തിൽ എടുക്കാൻ ആദ്യം നിങ്ങളുടെ ഫോൺ നമ്പറിലേക്ക് ഒരു വൺ ടൈം പാസ്‌വേഡ് വരും. പാസ്‌വേർഡ് അടിച്ച ഉടനെ അക്കൗണ്ടിൽ നിന്നും പണം നഷ്ടമാകും. ഇത്തരത്തിൽ നിരവധിപേരുടെ പണം നഷ്ടമായതായി സൈബർ പോലീസ് പറഞ്ഞു. കഴിഞ്ഞ ദിവസം മുതലാണ് സോഷ്യൽമീഡിയയിൽ പരസ്യം പ്രത്യക്ഷപ്പെട്ടത്. പിന്നീടത് സോഷ്യൽ മീഡിയ പ്ലാറ്റഫോമിൽ നിന്നും അപ്രത്യക്ഷമായി. ഇത്തരത്തിൽ മുൻ പ്രധാനമന്ത്രി വാജ്പേയിയുടെയും മുൻ പ്രസിഡന്‍റ് എ.പി.ജെ. അബ്ദുൾ കാലമിന്‍റെയും പേരിൽ സ്കോളർഷിപ്പികൾ നൽകുന്നു എന്നപേരിലും തട്ടിപ്പുകൾ നടക്കുന്നുണ്ട്.

ഭാരവാഹികൾ ചുമതലയേറ്റു

കേളകം: സാമൂഹിക ക്ഷേമ പ്രവർത്തനത്തിൽ ഊന്നിയ പുത്തൻ രാഷ്‌ട്രീയ പ്രവർത്തനത്തിന് മാതൃകയാണ് രാജീവ് ഫൗണ്ടേഷനെന്ന് കെപിസിസി അംഗം ലിസി ജോസഫ്. കേളകം കോൺഗ്രസ് ഭവനിൽ രാജീവ് ഫൗണ്ടേഷൻ മണ്ഡലം ഭാരവാഹികളുടെ സ്ഥാനാരോഹണ ചടങ്ങും ബ്ലീഡ് ഫോര്‍ ദി നേഷൻ രക്തദാന സന്നദ്ധ സേനാ രൂപീകരണവും ഉദ്ഘാടനം ചെയ്തു പ്രസംഗിക്കുകയായിരുന്നു അവർ. ഫൗണ്ടേഷൻ മണ്ഡലം ചെയർമാൻ പി.എ. സെബാസ്റ്റ്യൻ അധ്യക്ഷത വഹിച്ചു. സി.ജെ. മാത്യു, സന്തോഷ് ജോസഫ് മണ്ണാർകുളം, കെ.കെ. അംബുജാക്ഷൻ, വർഗീസ് ജോസഫ് നടപ്പുറം, അലക്സാണ്ടർ കുഴിമണ്ണിൽ, ജീമോൾ വെട്ടുവേലിൽ, വർഗീസ് കൂമ്പുക്കൽ, ജോർജ് ജോസഫ് കാക്കനാട്ട് എന്നിവർ പ്രസംഗിച്ചു.

മുടയരിഞ്ഞിയിൽ റോഡ് പുഴയിലേക്ക് ഇടിയുന്നു

ഇരിട്ടി: കാലവർഷം ശക്തമായതോടെ വള്ളിത്തോട് ചരൾ റോഡിന്‍റെ ഭാഗമായ മുടയരിഞ്ഞിയിൽ റോഡ് പുഴയിലേക്ക് ഇടിഞ്ഞ് റോഡ് അപകടത്തിലായിട്ടും അധികൃതരുടെ അവഗണന തുടരുന്നതായി പരാതി. കഴിഞ്ഞ മഴക്കാലത്തും ഇത സംഭവം നടന്നപ്പോൾ പഞ്ചായത്ത് പ്രസിഡന്‍റിന്‍റെ നേതൃത്വത്തിൽ പൊതുമരാമത്തിനെ അറിയിച്ചിരുന്നു. ബന്ധപ്പെട്ട ഉദ്യോഗസ്ഥർ സ്ഥലത്തെത്തി പരിശോധന നടത്തിയെങ്കിലും യാതൊരു നടപടിയും സ്വീകരിച്ചല്ല. ഈ മഴക്കാലത്തും റോഡ് ഇടിഞ്ഞു തുടങ്ങിയിരിക്കുകയാണ്. ഭാരം കയറ്റിയ വാഹനങ്ങൾ കടന്നുപോ കുന്ന വഴിയിൽ റോഡ് വീണ്ടും ഇടിയാനുള്ള സാധ്യതുണ്ടെന്നാണ് നാട്ടുകാർ പറയുന്നത്. റോഡിന് ശരിയായ രീതിയിൽ ഓവുചാൽ സംവിധാനം നിർമിക്കാത്തതാണ് നിലവിലെ സാഹചര്യത്തിന് കാരണം. നാട്ടുകാരുടെ ശ്രമദാനം റോഡ് ഇടിയുന്നതിൽ അധികൃതർ നടപടി സ്വീകരിക്കാത്തതിൽ പ്രതിഷേധിച്ച് ജനകീയ സമിതിയുടെ നേത്രത്തൽ ജെസിബി ഉപയോഗിച്ച് റോഡിന്‍റെ ഓവുചാലുകൾ വൃത്തിയാക്കി താത്കാലിക ഓവുചാലുകൾ നിർമിച്ച് മഴവെള്ളം ഒഴുക്കിവിടാനുള്ള നടപടികൾ സ്വീകരിച്ചു. അധികൃതർ അടിയന്തര നടപടി സ്വീകരിച്ചില്ലെങ്കിൽ ജനകീയ സമിതിയുടെ നേതൃത്വത്തിൽ സമര പരിപാടികൾ ആരംഭിക്കാനാണ് തീരുമാനം. പഞ്ചായത്ത് പ്രസിഡന്‍റ് കുര്യാച്ചൻ പൈമ്പള്ളിക്കുന്നേൽ, സ്റ്റാൻഡിംഗ് കമ്മി റ്റി ചെയർമാൻ ഐസക് ജോസഫ്, പഞ്ചായത്ത് അംഗങ്ങളായ ജോസ് എ വൺ, സജി മച്ചിത്താന്നി, സെലീന ബിനോയി തുടങ്ങിയവർ സ്ഥലം സന്ദർശിച്ചു. ശ്രമദാനത്തിന് ജനകീയ കമ്മിറ്റി അംഗങ്ങളായ മാത്യു പുലിക്കകുന്നേൽ, ജോസ് മാപ്പിളപ്പറമ്പിൽ, തോമസ് വട്ടമറ്റം, ഫിലിപ്പ് പുളിക്കക്കുന്നേൽ തുടങ്ങിയവർ പങ്കെടുത്തു.

സമൂഹ മാധ്യമങ്ങളിലൂടെ പ്രധാനമന്ത്രിയുടെ പേരിൽ പുതിയ തട്ടിപ്പ്

ഇരിട്ടി: സമൂഹ മാധ്യമങ്ങളിലൂടെ പ്രധാനമന്ത്രിയുടെ പേരിൽ പുതിയ തട്ടിപ്പുമായി സൈബർ തട്ടിപ്പുകാർ. പ്രധാനമന്ത്രിയുടെ ചിത്രവും ബിജെപിയുടെ തെരഞ്ഞെടുപ്പ് ചിഹ്നം താമരയിൽ ക്ലിക്ക് ചെയ്താൽ നിങ്ങളുടെ അകൗണ്ടിലേക്ക് 5000 രൂപ ലഭിക്കുമെന്നും കാണിച്ചാണ് തട്ടിപ്പുകാർ രംഗത്തു വന്നിരിക്കുന്നത്. താമരയിൽ വിരൽ അമർത്തിയാൽ ഉടൻ തന്നെ നിങ്ങൾ 5000 രൂപ വിജയിച്ചതായി മെസേജ് വരും. പിന്നീട് നിങ്ങളുടെ ഫോൺ നമ്പർ ആവശ്യപ്പെടും. ജനങ്ങളെ വിശ്വസത്തിൽ എടുക്കാൻ ആദ്യം നിങ്ങളുടെ ഫോൺ നമ്പറിലേക്ക് ഒരു വൺ ടൈം പാസ്‌വേഡ് വരും. പാസ്‌വേർഡ് അടിച്ച ഉടനെ അക്കൗണ്ടിൽ നിന്നും പണം നഷ്ടമാകും. ഇത്തരത്തിൽ നിരവധിപേരുടെ പണം നഷ്ടമായതായി സൈബർ പോലീസ് പറഞ്ഞു. കഴിഞ്ഞ ദിവസം മുതലാണ് സോഷ്യൽമീഡിയയിൽ പരസ്യം പ്രത്യക്ഷപ്പെട്ടത്. പിന്നീടത് സോഷ്യൽ മീഡിയ പ്ലാറ്റഫോമിൽ നിന്നും അപ്രത്യക്ഷമായി. ഇത്തരത്തിൽ മുൻ പ്രധാനമന്ത്രി വാജ്പേയിയുടെയും മുൻ പ്രസിഡന്‍റ് എ.പി.ജെ. അബ്ദുൾ കാലമിന്‍റെയും പേരിൽ സ്കോളർഷിപ്പികൾ നൽകുന്നു എന്നപേരിലും തട്ടിപ്പുകൾ നടക്കുന്നുണ്ട്.

റോഡ് പണി ഇഴഞ്ഞു നീങ്ങുന്നു: ദുരിതം മാറാതെ ഗ്രാമവാസികൾ

പെരുമ്പടവ്: ചപ്പാരപ്പടവ്-വിമലശേരി-എരുവാട്ടി-മേരിഗിരി-തേർത്തല്ലി റോഡ് ശാപമോക്ഷം കാത്ത് ഗ്രാമവാസികൾ. ഒരു പതിറ്റാണ്ടുകാലത്തെ മുറവിളിക്ക് ശേഷമാണ് റോഡ് മെക്കാഡം ടാറിംഗ് അനുവദിച്ചത്. എന്നാൽ, കോൺട്രാക്ടറുടെ അനാസ്ഥ കാരണം റോഡ് പണി ഇഴഞ്ഞു നീങ്ങുകയാണ്. പണിപൂർത്തീകരിക്കേണ്ട നാളുകൾ പിന്നിട്ടിട്ട് മാസങ്ങൾ കഴിഞ്ഞു. ഇപ്പോഴും ടാറിംഗ് പൂർത്തിയാക്കാൻ കഴിഞ്ഞിട്ടില്ല. നിലവിൽ യാത്രാ യോഗ്യമായ റോഡ് ഉണ്ടായിരുന്നെങ്കിലും അത് മെക്കാഡം ടാറിങ്ങിനായി കുത്തിപ്പൊളിച്ചതിനാൽ ഇപ്പോൾ യാത്ര ഏറെ ദുരിതത്തിലാണ്. വാഹനങ്ങൾ റോഡിൽ താഴ്ന്നു പോവുകയാണ്. കാൽനടയാത്രയ്ക്ക് പോലും കഴിയാത്ത വിധത്തിൽ റോഡ് തകർന്നിട്ടും കോൺട്രാക്ടർറും അധികൃതരും മൗനം നടിക്കുകയാണ്. അത്യാവശ്യത്തിന് ആസ്പത്രികളിൽ പോലും പോകാൻ സാധിക്കുന്നില്ല. നാളെ സ്കൂൾ തുറക്കുന്ന തോടുകൂടി സ്കൂൾ വിദ്യാർഥികൾ ഉൾപ്പെടെ ഏറെ ദുരിതം അനുഭവിക്കേണ്ടിവരും.

റോഡരികിലെ കുഴി ദുരിതവും നഷ്ടവും

പയ്യാവൂർ: ശ്രീകണ്ഠപുരം നഗരസഭ കഴിഞ്ഞ വർഷം നഗരസൗന്ദര്യവത്കരണത്തിനായി അഞ്ചു കോടി രൂപ ചെലവഴിച്ച് സംസ്ഥാന ഹൈവേ കടന്നുപോകുന്ന ടൗണിലെ റോഡിന്‍റെ ഇരുഭാഗങ്ങളും സ്ഥാപിച്ച ഇന്‍റർലോക്ക് ഇളക്കി മാറ്റിയത് അപകടത്തിന് വഴിവയ്ക്കുന്നു. കെഎസ്ഇബിയുടെ അണ്ടർലൈൻ കേബിൾ പണിയുടെ ഭാഗമായാണ് ഇത് പൊളിച്ചു മാറ്റിയത്. ഇതുവഴി ശ്രീകണ്ഠപുരം സബ് സ്റ്റേഷനിൽ നിന്ന് കോട്ടൂരേയ്ക്കുള്ള എർത്ത് കേബിൾ ഇടുകയാണി പ്പോൾ. അതി മനോഹരമായി സ്ഥാപിച്ച ഇന്‍റർ ലോക്കുകൾ ഇളക്കി മാറ്റി പത്തിലധികം സ്ഥലങ്ങളിൽ കുഴികളുണ്ടാക്കിയിരിക്കുകയാണ്. വികസനം നല്ലതാണെങ്കിലും അതിനുവണ്ടി ഇത്തരം നടപടികൾ പാടില്ലെന്നാണ് ജനങ്ങൾ പറയുന്നത്. പൊളിച്ചിട്ട ഭാഗം പൂർവ സ്ഥിതിയിലാക്കേണ്ടത് പൊതുമരാമത്ത് വകുപ്പിന്‍റെ ചുമതലയാണ്. ഇക്കാര്യത്തിൽ എത്രയും വേഗത്തിൽ പരിഹാരം ഉണ്ടാകണമെന്ന് ശ്രീകണ്ഠപുരം വൈസ്മെൻ ക്ലബ് ജനറൽ ബോഡി യോഗം അധികൃതരോട് ആവശ്യപ്പെട്ടു. പ്രസിഡന്‍റ് ജോൺസൺ തുടിയൻപ്ലാക്കൽ അധ്യക്ഷത വഹിച്ചു. മാത്യു വർഗീസ്, ജോർജ് പി.അഗസ്റ്റിൻ, റെജി കാര്യാങ്കൽ, വിപിൻ വിൻസെന്‍റ്, യു.കെ.ബാനു, എ.വി. മനീഷ് എന്നിവർ പ്രസംഗിച്ചു.

സ്കൂളുകളിൽ ആരോഗ്യ വകുപ്പിന്‍റെ പരിശോധന

ചെറുപുഴ: പുളിങ്ങോം കുടുംബാരോഗ്യ കേന്ദ്രത്തിന്‍റെ നേത്യത്വത്തിൽ ചെറുപുഴ പഞ്ചായത്തിലെ സ്കൂളുകളിൽ ആരോഗ്യ വകുപ്പ് ശുചിത്വ പരിശോധന നടത്തി. സ്കൂൾ തുറക്കുന്നതിനു മുന്നോടിയായി സ്കൂളുകൾ ആരോഗ്യ വകുപ്പ് നിഷ്കർഷിക്കുന്ന ശുചിത്വ നിർദേശങ്ങൾ പാലിക്കുന്നുണ്ടോ എന്നറിയാനാണ് ഹെൽത്ത് ഇൻസ്‌പെക്ടറുടെ നേതൃത്വത്തിൽ ആരോഗ്യ വകുപ്പ് സംഘം പരിശോധന നടത്തിയത്. സ്കൂളുകളിലെ ക്ലാസ് റൂം, പരിസരം, ടോയ്‌ലറ്റ്, അടുക്കള, സ്റ്റോർ റൂം എന്നിവ ശുചിയായി സൂക്ഷിക്കുന്നുണ്ടോ എന്നായിരുന്നു പരിശോധന. പാചക തൊഴിലാളികൾക്ക് ഹെൽത്ത് കാർഡ് ഉണ്ടോ എന്നും കുടിവെള്ള പരിശോധന നടത്തിയോ എന്നും വിലയിരുത്തി. പരിശോധനയ്ക്ക് പുളിങ്ങോം കുടുംബാരോഗ്യ കേന്ദ്രം ഹെൽത്ത് ഇൻസ്‌പെക്ടർ വി. മുഹമ്മദ്‌ ഷെരീഫ്, പബ്ലിക് ഹെൽത്ത് നഴ്സ് എം.എൽ. മനീഷ, ജൂണിയർ ഹെൽത്ത് ഇൻസ്‌പെക്ടർമാരായ എൽ.എസ്. അശ്വതി, എ.ജെ. ടിഞ്ചു എന്നിവർ നേതൃത്വം നൽകി.

വർഷം ഒന്നു കഴിഞ്ഞിട്ടും ഇടിഞ്ഞ മതിൽ റോഡിൽ തന്നെ

കാർത്തികപുരം: കഴിഞ്ഞ തവണത്തെ കനത്ത മഴയിൽ തകർന്ന കാർത്തികപുരം ഗവ. വൊക്കേഷണ ൽ ഹയർ സെക്കൻഡറി സ്‌കൂളിന്‍റെ മതിലിന്‍റെ ഭാഗങ്ങൾ വർഷം ഒന്നുകഴിഞ്ഞിട്ടും റോഡിൽ നിന്ന് നീക്കം ചെയ്യാത്തത് ജനങ്ങളെ ദുരിതത്തിലാക്കുന്നു. കഴിഞ്ഞ ജൂൺ മാസം തുടക്കത്തിലാണ് മുറ്റവും മതിലും ഇടിഞ്ഞ് റോഡിലേക്ക് പതിച്ചത്. ഇതേത്തുടർന്ന് കാർത്തിപുരം പാറോത്തുമല റൂട്ടിൽ ഗതാഗതം തടസപ്പെട്ടിരുന്നു. ആറുമീറ്റർ ഉയരമുള്ള സംരക്ഷണ ഭിത്തി 40 മീറ്ററോളം നീളത്തിലാണ് തകർന്നു വീണത്. ഇത് ഇപ്പോഴും റോഡിൽ കിടക്കുന്നതിനാൽ വാഹന-കാൽനട യാത്രികർക്ക് കടുത്ത ദുരിതമാണ്. സ്കൂൾ തുറക്കാറായിട്ടും ഈ ദുരവസ്ഥയ്ക്ക് പരിഹാര ഉണ്ടാക്കാത്തതിൽ രക്ഷിതാക്കൾക്കും പ്രതിഷേധമുണ്ട്. നാലുമീറ്റർ ടാറിംഗ് ചെയ്ത‌ റോഡിൽ ഏകദേശം ഒരു മീറ്ററിന് താഴെ മാത്രമാണ് വാഹനങ്ങൾ കടന്നു പോകുന്നതിന് അവശേഷിക്കുന്നത്. ഇരുചക്രവാഹനങ്ങളിൽ യാത്ര ചെയ്യുന്ന സ്ത്രീകളടക്കമുള്ളവർ പിറകിൽ ഇരിക്കുന്നവരെ ഇറക്കിയ ശേഷമാണ് ഇതിലൂടെ കടന്ന് പോകുന്നത്. സ്‌കൂൾ പിടിഎയുടെ ഇടപെടലിനെ തുടർന്ന് 90,00,000 രൂപ പൂനർനിർമാണത്തിനു അനുവദിച്ചെങ്കിലും, നാളിതുവരെയായി നിർമാണ പ്രവൃത്തികൾ തുടങ്ങിയിട്ടില്ല. സ്കൂ‌ൾ തുറക്കുന്ന കനത്ത മഴയുള്ള സമയത് ഭാഗികമായി നിൽക്കുന്ന സംരക്ഷണ ഭിത്തി വലിയ അപകടാവസ്ഥ ക്ഷണിച്ചു വരുത്തമോ എന്ന ആശങ്കയിലാണ് വിദ്യാർഥികളും രക്ഷിതാക്കളും.

ഡോ. ടി.കെ. സെബാസ്റ്റ്യൻ സർവീസിൽ നിന്ന് വിരമിച്ചു

കൂത്തുപറമ്പ്: നിർമലഗിരി ഓട്ടോണമസ് കോളജ് പ്രിൻസിപ്പൽ ഡോ. ടി.കെ. സെബാസ്റ്റ്യൻ ഇരുപത്തി ഒന്പത് വർഷത്തെ സേവന കാലാവധി പൂർത്തിയാക്കി സർവീസിൽ നിന്ന് വിരമിച്ചു. ഇക്കണോമിക്സ് വിഭാഗം അധ്യാപകനായും വകുപ്പധ്യക്ഷനായും പ്രവർത്തിച്ചിട്ടുണ്ട്. എൻസിസി ഓഫീസർ, ഐക്യുഎസി. കോ-ഓർഡിനേറ്റർ തുടങ്ങിയ വിവിധ ചുമതലകൾ വഹിച്ചിട്ടുണ്ട്. 2023 മുതൽ കോളജിന്‍റെ പ്രിൻസിപ്പലായി സേവനം അനുഷ്ഠിച്ചു വരുന്ന അദ്ദേഹത്തിന്‍റെ കാലഘട്ടത്തിലാണ് കോളേജ് യുജിസി യുടെ നാക് "എ പ്ലസ് പ്ലസ്' ഗ്രേഡും ഓട്ടോണമസ് പദവിയും കൈവരിച്ചത്.

ഇ.കെ. പദ്മനാഭൻ സർവീസിൽ നിന്ന് വിരമിച്ചു

കണ്ണൂർ: ഇൻഫർമേഷൻ-പബ്ലിക് റിലേഷൻസ് വകുപ്പ് കണ്ണൂർ മേഖലാ ഡപ്യൂട്ടി ഡയറക്ടർ ഇ.കെ. പദ്മനാഭൻ സർവീസിൽനിന്ന് വിരമിച്ചു. കണ്ണൂർ, കാസർകോട്, വയനാട് ജില്ലകളുടെ ചുമതല വഹിക്കുകയായിരുന്നു. കണ്ണൂർ ജില്ലാ ഇൻഫർമേഷൻ ഓഫീസറായിരിക്കേ ജില്ലയിലെ ലൈബ്രറികളെ കോർത്തിണക്കി ആവിഷ്‌കരിച്ച പിആർഡി സഹായ കേന്ദ്രം പദ്ധതി ഏറെ ശ്രദ്ധ പിടിച്ചുപറ്റി. 2012ൽ തിരുവനന്തപുരം ജില്ലയിൽ അസിസ്റ്റന്‍റ് ഇൻഫർമേഷൻ ഓഫീസറായി സർവീസിൽ പ്രവേശിച്ച അദ്ദേഹം കണ്ണൂർ ജില്ലയിൽ അസിസ്റ്റന്‍റ് ഇൻഫർമേഷൻ ഓഫീസറായും അസിസ്റ്റന്‍റ് എഡിറ്ററായും പ്രവർത്തിച്ചിട്ടുണ്ട്. കണ്ണൂർ ജില്ലയിലെ കരിയാട് സ്വദേശിയാണ്. ഭാര്യ: വിചിത്ര. മക്കൾ: അനഘനന്ദ, അഥീന. ഇ.കെ. പദ്മനാഭന് ജില്ലാ ഇൻഫർമേഷൻ ഓഫീസിൽ യാത്രയയപ്പ് നൽകി. കെ.വി. സുമേഷ് എംഎൽഎ ഉപഹാരം നൽകി. കണ്ണൂർ ജില്ലാ ഇൻഫർമേഷൻ ഓഫീസർ പി.പി. വിനീഷ്, കോഴിക്കോട് ജില്ലാ ഇൻഫർമേഷൻ ഓഫീസർ സി.പി. അബ്ദുൾകരീം, കണ്ണൂർ അസിസ്റ്റന്‍റ് എഡിറ്റർ സൗമ്യ മത്തായി, ആലപ്പുഴ എഐഒ പിഎസ് സജിമോൻ, കണ്ണൂർ എഐഒ സി.ജി. ആശ, കണ്ണൂർ പ്രസ് ക്ലബ് പ്രസിഡന്‍റ് സി. സുനിൽകുമാർ, സീനിയർ ജേണലിസ്റ്റ് ഫോറം ജില്ലാ പ്രസിഡന്‍റ് കെ. ബാലകൃഷ്ണൻ, സംസ്ഥാന സമിതി അംഗം പി. ഗോപി, സീനിയർ ജേണലിസ്റ്റ്‌സ് യൂണിയൻ കേരള ജില്ലാ പ്രസിഡന്‍റ് ടി.പി. വിജയൻ, സെക്രട്ടറി മട്ടന്നൂർ സുരേന്ദ്രൻ, കെ. ഗോപി, കെ. ജയപ്രകാശ്, പി. നിജ, വിഷ്ണുപ്രസാദ്, രാജേഷ് കരേള എന്നിവർ പ്രസംഗിച്ചു.

സജി ജേക്കബിന് യാത്രയയപ്പ് നല്‍കി

കോഴിക്കോട്: 32 വര്‍ഷത്തെ സേവനത്തിനുശേഷം ദീപിക കോഴിക്കോട് യൂണിറ്റില്‍ നിന്നു വിരമിക്കുന്ന എജിഎം (മാർക്കറ്റിംഗ്) സജി ജേക്കബിന് സഹപ്രവര്‍ത്തകര്‍ യാത്രയയപ്പ് നല്‍കി. സിഒഡി ഡയറക്ടര്‍ ഫാ. സായി പാറന്‍കുളങ്ങര അധ്യക്ഷത വഹിച്ചു. ചടങ്ങില്‍ ജീവന ഡയറക്ടര്‍ ഫാ. ആല്‍ഫ്രഡ് വടക്കേതുണ്ടില്‍, ചലച്ചിത്ര നിര്‍മാതാവ് സ്വര്‍ഗചിത്ര അപ്പച്ചന്‍, ദീപിക ജിഎം (മാര്‍ക്കറ്റിംഗ്) കെ.സി. തോമസ്, ദീപിക കോഴിക്കോട് റസിഡന്‍റ് മാനേജര്‍ ഫാ. ഷെറിന്‍ പുത്തന്‍പുരയ്ക്കല്‍, ഫാ. ബിനു കുളത്തിങ്കൽ, ഫാ. സുദീപ് കിഴക്കാരക്കാട്ടില്‍, കെത്രിഎ പ്രസിഡന്‍റ് ഡിനല്‍ ആനന്ദ്, ദീപിക മുന്‍ ഡിജിഎം ഡി.പി. ജോസ്, ഡിഎഫ്‌സി താമരശേരി രൂപതാ പ്രസിഡന്‍റ് ജോര്‍ജ് വട്ടുകളം, ദീപിക കോഴിക്കോട് യൂണിറ്റ് സര്‍ക്കുലേഷന്‍ മാനേജര്‍ പ്രിന്‍സി ജോസ്, ന്യൂസ് എഡിറ്റര്‍ ബിജോയി ജോസഫ്, ബ്യൂറോ ചീഫ് എം. ജയതിലകന്‍, ഫോട്ടോഗ്രാഫര്‍ രമേഷ് കോട്ടൂളി, തലശേരി ലേഖകന്‍ നവാസ് മേത്തര്‍, ദീപിക അസി. ഫിനാന്‍സ് മാനേജര്‍ റിനോജ് സെബാസ്റ്റ്യന്‍, ലിനറ്റ് ബ്ലെസണ്‍, മെയ്ത്ര ഹോസ്പിറ്റല്‍ മാര്‍ക്കറ്റിംഗ് മാനേജര്‍ പ്രവീണ്‍ നായര്‍ തുടങ്ങിയവര്‍ പ്രസംഗിച്ചു.

ലഹരിക്കെതിരേ വിദ്യാലയങ്ങളിൽ കർശന പരിശോധനയും നടപടിയും

കണ്ണൂർ: പുതിയ അധ്യയന വർഷം ആരംഭിക്കാനിരിക്കെ ജില്ലയിലെ വിദ്യാലയങ്ങളിലെ ലഹരികൾക്കും മയക്കുമരുന്നിനുമെതിരേ കർശന പരിശോധനയും നടപടിയും സ്വീകരിക്കാൻ ജില്ലാ വികസന സമിതി യോഗം തീരുമാനിച്ചു. ജില്ലയിൽ ഹോട്ട്‌സ്‌പോട്ടുകളായി കണ്ടെത്തിയ വിദ്യാലയങ്ങളിൽ പ്രത്യേക നിരീക്ഷണം നടത്തും. പുകയിലയും ലഹരി പദാർഥങ്ങളും വിൽക്കുന്ന കടകൾ കണ്ടെത്തിയാൽ തദ്ദേശ സ്ഥാപനങ്ങളും എക്‌സൈസ് വകുപ്പും പോലീസും സംയുക്ത പരിശോധന നടത്തി ലൈസൻസ് റദ്ദാക്കുന്നത് ഉൾപ്പെടെയുള്ള കർശന നിയമ നടപടികൾ സ്വീകരിക്കും. ലഹരിക്കെതിരായ നടപടികൾക്ക് വിദ്യാർഥികളിൽനിന്ന് വിവരം ശേഖരിക്കും. എല്ലാ വിദ്യാലയങ്ങളിലും സ്‌കൂൾ തുറന്ന് ഒരാഴ്ചയ്ക്കകം ജാഗ്രതാ സമിതികൾ ചേരാൻ യോഗം തീരുമാനിച്ചു. കെ.വി. സുമേഷ് എംഎൽഎയാണ് യോഗത്തിൽ വിഷയം ഉന്നയിച്ചത്. മന്ത്രി കടന്നപ്പള്ളി രാമചന്ദ്രന്‍റെ ആസ്തി വികസന ഫണ്ടിൽ ഉൾപ്പെടുത്തി കണ്ണൂർ കളക്ടറേറ്റ് വളപ്പിൽ 30 ലക്ഷം രൂപ ചെലവിൽ നിർമിക്കുന്ന സൗഹൃദ കേന്ദ്രത്തിന്‍റെ നിർമാണം 10ന് ആരംഭിക്കുമെന്ന് പൊതുമരാമത്ത് കെട്ടിടവിഭാഗം എക്‌സിക്യൂട്ടീവ് എൻജിയർ അറിയിച്ചു. ഉളിക്കൽ പോലീസ് സ്റ്റേഷൻ പരിധിയിൽ ഉളിക്കൽ മുതൽ കോളിത്തട്ട് വരെയുള്ള ഭാഗത്ത് കണിയാർ വയൽ ഉളിക്കൽ റോഡിൽ മഞ്ചക്കരി മണ്ണേരി ഭാഗത്ത് ജല ജീവൻ മിഷൻ പൈപ്പുകൾ സ്ഥാപിക്കുന്നതിനായി എടുത്ത കുഴികൾ അടച്ചുവെന്നും ഇത്തരം പ്രവൃത്തികൾ എല്ലാവിധ മുൻകരുതലും എടുത്തശേഷമാണ് ചെയ്യാറുള്ളതെന്നും ജലവിഭവ വകുപ്പ് എക്‌സിക്യൂട്ടീവ് എൻജിനിയർ അറിയിച്ചു. കൂത്തുപറമ്പ് നിയോജക മണ്ഡലത്തിലെ രണ്ട് നഗരസഭകളിലും അഞ്ച് പഞ്ചായത്തുകളിലും കുടിവെള്ളക്ഷാമം രൂക്ഷമായ പ്രദേശങ്ങളിൽ കുടിവെള്ളം എത്തിക്കുന്നതിനുള്ള നടപടികൾ സ്വീകരിച്ചതായി തദ്ദേശ വകുപ്പ് ജോയിന്‍റ് ഡയറക്ടറും പാനൂർ നഗരസഭാ സെക്രട്ടറിയും അറിയിച്ചു. തൃപ്പങ്ങോട്ടൂർ, പാട്യം പഞ്ചായത്തുകളിൽ അനുവദിച്ച അംബേദ്കർ സെറ്റിൽമെന്‍റ് പദ്ധതിയിൽ ഉൾപ്പെട്ട പാട്യം പഞ്ചായത്തിലെ കടവിൽ മുണ്ടയാട് നഗർ പ്രവൃത്തികൾക്ക് പഞ്ചായത്ത് ഡിപിആർ ലഭ്യമാക്കിയിട്ടുണ്ടന്ന് ഐടിഡിപിസി പ്രോജക്ട് ഓഫീസർ അറിയിച്ചു. എന്നാൽ, നരിക്കോട്ട് മല നഗർ പ്രവൃത്തിക്ക് 15 നു മുന്പ് ഡിപിആർ ലഭ്യമാക്കണമെന്ന് ജില്ലാ കളക്ടർ നിർദേശിച്ചു. നടാൽ പാലം നിർമാണവുമായി ബന്ധപ്പെട്ട പ്രവൃത്തികൾക്ക് പദ്ധതിപ്രദേശത്ത് ട്രൈബൽ സെറ്റിൽമെന്‍റ് ഇല്ലെന്നുള്ള സർട്ടിഫിക്കറ്റ് ലഭ്യമാക്കുന്നതിന് നടപടികളെടുക്കാൻ ഐടിഡിപി ക്ക് ജില്ലാ കളക്ടർ നിർദേശം നൽകി. കാലവർഷത്തിൽ ഉണ്ടാകുന്ന വിളനാശത്തിന് ധനസഹായം നൽകുന്നതിനുള്ള നടപടികൾ ത്വരിതപ്പെടുത്തണമെന്ന് കൃഷിവകുപ്പിന് കളക്ടർ നിർദേശം നൽകി. ദേശീയപാത വികസനത്തിന്‍റെ ഭാഗമായി ഉണ്ടായ കൃഷി നാശത്തിന് അടിയന്തര നടപടിയെടുക്കാൻ ദേശീയപാത പ്രോജക്റ്റ് ഓഫീസർക്ക് കളക്ടർ നിർദേശം നൽകി. ജില്ലാ കളക്ടർ അരുൺ കെ. വിജയൻ അധ്യക്ഷത വഹിച്ചു. എംഎൽഎമാരായ കെ.പി. മോഹനൻ, കെ.വി. സുമേഷ്, സബ് കളക്ടർ കാർത്തിക് പാണിഗ്രഹി, അസിസ്റ്റന്‍റ് കളക്ടർ എഹ്‌തെദ മുഫാസിർ എന്നിവർ പങ്കെടുത്തു.

വിളക്കന്നൂർ ഇനി ദിവ്യകാരുണ്യ ആരാധനയുടെ തീർഥാടന കേന്ദ്രം: ആർച്ച്ബിഷപ് ഡോ. ലെയോപോൾദോ ജിറേല്ലി

വിളക്കന്നൂർ: ദിവ്യകാരുണ്യ ആരാധനയുടെ ഇന്ത്യയിലെ തീർഥാടന കേന്ദ്രമായ വിളക്കന്നൂർ മാറിയെന്ന് ഇന്ത്യയിലെ വത്തിക്കാൻ സ്ഥാനപതി ആർച്ച്ബിഷപ് ഡോ. ലെയോപോൾദോ ജിറേല്ലി. വിളക്കന്നൂരിലെ ദിവ്യകാരുണ്യ അടയാളത്തിന് വത്തിക്കാന്‍റെ അംഗീകാരം ലഭിച്ചതിന്‍റെ ഔദ്യോഗിക പ്രഖ്യാപനം നടത്തിയ ശേഷം പ്രസംഗിക്കുകയായിരുന്നു ആർച്ച്ബിഷപ്. ഭാരത കത്തോലിക്ക സഭയുടെ വിശ്വാസത്തിന്‍റെ വളർച്ചയ്ക്ക് വിളക്കന്നൂരിലെ ദിവ്യകാരുണ്യ അടയാളം ഇടയാക്കും. യേശുക്രിസ്തുവിന്‍റെ തിരുവോസ്തിയിലെ സാന്നിധ്യമാണ് അടയാളമായി വന്നിരിക്കുന്നത്. ഇത്, വിശ്വാസം കൂടുതൽ ആഴത്തിലാക്കും. ക്രൈസ്തവ ജീവിതത്തിന്‍റെ അടിസ്ഥാനം ദിവ്യകാരുണ്യത്തിലുള്ള ഈശോയാണെന്നും ആർച്ച്ബിഷപ് പറഞ്ഞു.

വിശ്വാസത്തിന്‍റെ ആഴംകൂട്ടുന്ന അടയാളം: ആർച്ച്ബിഷപ് മാർ ജോസഫ് പാംപ്ലാനി

വിളക്കന്നൂർ: പരിശുദ്ധ കുർബാനയിൽ ഈശോയുടെ യഥാർഥ സ്ഥാനത്തെക്കുറിച്ചുള്ള നമ്മുടെ വിശ്വാസത്തിന് സ്വർഗം നല്കിയ ദൃശ്യമായ അടയാളമാണ് വിളക്കന്നൂരിലേതെന്ന് തലശേരി ആർച്ച്ബിഷപ് മാർ ജോസഫ് പാംപ്ലാനി. വിളക്കന്നൂരിലെ ദിവ്യകാരുണ്യ അടയാളത്തിന് വത്തിക്കാന്‍റെ അംഗീകാരം ലഭിച്ചതിന്‍റെ ഔദ്യോഗിക പ്രഖ്യാപനത്തിന്‍റെ ഭാഗമായി നടന്ന സമൂഹബലിമധ്യേ വചനസന്ദേശം നല്കുകയായിരുന്നു മാർ ജോസഫ് പാംപ്ലാനി. പരിശുദ്ധ കുർബാനയോടുള്ള ഭക്തിയിലാണ് കുടിയേറ്റജനത മലബാറിനെ കീഴടക്കിയത്. പരിശുദ്ധ കുർബാനയുമായിട്ടുള്ള വ്യക്തിബന്ധം കാത്തുസൂക്ഷിക്കണം. കുടിയേറ്റ ജനതയുടെ അഗാധമായ വിശ്വാസത്തിനും ദിവ്യകാരുണ്യത്തോടുള്ള സ്നേഹത്തിനും ലഭിച്ച സ്വർഗീയ പ്രതികരണമാണിത്. ഈ അടയാളം വെറും കാഴ്ചയല്ല. മറിച്ച് നമ്മുടെ വിശ്വാസത്തെ കൂടുതൽ ആഴപ്പെടുത്താനും വിശുദ്ധ കുർബാനയോടുള്ള ഭക്തി വർധിപ്പിക്കാനുമുള്ള ദൈവിക ക്ഷണം കൂടിയാണ്. നമ്മൾക്ക് ലഭിച്ചിരിക്കുന്ന അടയാളം നമ്മുടെ ഇടയിൽ വിശ്വാസത്തിന്‍റെ തീ ആളിക്കത്തിക്കാനും ദിവ്യകാരുണ്യത്തോടുള്ള സ്നേഹം വർധിപ്പിക്കാനും സഹായിക്കുമെന്നും മാർ ജോസഫ് പാംപ്ലാനി പറഞ്ഞു.

ദിവ്യകാരുണ്യമേ... വിളക്കന്നൂർ

ഷെൽമോൻ പൈനാടത്ത് വിളക്കന്നൂർ: വിളക്കന്നൂർ: ഇന്നലെ പുലർച്ചെ മുതൽ കനത്ത മഴയായിരുന്നു വിളക്കന്നൂരിലും പരിസരപ്രദേശങ്ങളിലും. എന്നാൽ, രാവിലെ പതിനൊന്നോടെ പെയ്തൊഴിഞ്ഞ മാനമായിരുന്നു കാണാൻ കഴിഞ്ഞത്. സ്ഥലപരിമിതിമൂലം വിളക്കന്നൂരിന്‍റെ പരിസര പ്രദേശങ്ങളായ വായാട്ടുപറന്പ്, ചെന്പന്തൊട്ടി, ചെന്പേരി, ആലക്കോട് ഫൊറോനകളിൽ നിന്നുള്ള ആളുകളോട് മാത്രമാണ് ദിവ്യകാരുണ്യ അടയാള പ്രഖ്യാപനത്തിന് വരാൻ പറഞ്ഞത്. എന്നാൽ, തലശേരി അതിരൂപതയുടെ കീഴിലുള്ള കണ്ണൂർ, കാസർഗോഡ് ജില്ലകളിലെ പള്ളികളിൽ നിന്ന് വിളക്കന്നൂർ ക്രിസ്തുരാജ പള്ളിയിൽ തിരുവോസ്തി പ്രതിഷ്ഠിക്കുന്നത് കാണുന്നതിനായി വിശ്വാസികൾ ഇന്നലെ രാവിലെ മുതൽ എത്തിത്തുടങ്ങിയിരുന്നു. ഉച്ചയ്ക്ക് ഒന്നോടെ വിളക്കന്നൂർ ടൗൺ വിശ്വാസസാഗരമായി. ഉച്ചയ്ക്ക് 1.45 ന് ഒടുവള്ളിയിൽ ഇന്ത്യയിലെ വത്തിക്കാൻ സ്ഥാനപതി ആർച്ച്ബിഷപ് ഡോ. ലെയോപോൾദോ ജിറേല്ലിയും തലശേരി ആർച്ച്ബിഷപ് മാർ ജോസഫ് പാംപ്ലാനിയും എത്തിച്ചേർന്നു. സ്വീകരിക്കാൻ നൂറുകണക്കിന് വാഹനങ്ങളിൽ വിശ്വാസികളും ഒടുവള്ളിയിൽ എത്തി. ഒടുവള്ളി മുതൽ അലങ്കരിച്ച വെള്ള കാറുകളുടെയും മറ്റ് കാറുകളുടെയും അകമ്പടിയോടെയും തുറന്ന വാഹനങ്ങളിൽ മാലാഖമാരുടെ വേഷം അണിഞ്ഞ കുട്ടികളും ഉൾപ്പെടെയാണ് തിരുവോസ്തിയെ ആനയിച്ച് വിളക്കന്നൂരിലേക്ക് എത്തിയത്. 2.30ന് വിളക്കന്നൂർ ടൗണിൽ കുരിശുപള്ളിക്ക് സമീപം വിശ്വാസികളുടെ നേതൃത്വത്തിൽ തിരുവോസ്തിയെ വരവേറ്റു. ആർച്ച്ബിഷപ് ഡോ. ലെയോപോൾദോ ജിറേല്ലിയിൽ നിന്ന് തിരുവോസ്തി തലശേരി ആർച്ച്ബിഷപ് മാർ ജോസഫ് പാംപ്ലാനി ഏറ്റുവാങ്ങി പ്രത്യേകം സജ്ജമായ വേദിയിലേക്ക്. അവിടെ, അരുളിക്കയിൽ തിരുവോസ്തി പ്രതിഷ്ഠിക്കുകയും ചെയ്തു. തുടർന്ന്, ദിവ്യകാരുണ്യം ദർശിക്കുവാൻ ആയിരക്കണക്കിനാളുകൾ ഒഴുകിയെത്തി. മാർ ജോസഫ് പാംപ്ലാനിയുടെ മുഖ്യകാർമികത്വത്തിൽ നടന്ന ദിവ്യബലിയോടെ ദിവ്യകാരുണ്യ അടയാള പ്രഖ്യാപന കർമങ്ങൾ പൂർത്തിയായി. വിളക്കന്നൂർ ക്രിസ്തുരാജ പള്ളി ഇനി ഭാരതത്തിലെ ദിവ്യകാരുണ്യ തീർഥാടന കേന്ദ്രമായി മാറിയെന്ന ആർച്ച്ബിഷപ് ഡോ. ലെയോപോൾദോ ജിറേല്ലിയുടെ വാക്കുകൾ കരഘോഷത്തോടെയാണ് വിശ്വാസികൾ വരവേറ്റത്. ആയിരക്കണക്കിന് വിശ്വാസികളെയും നൂറുകണക്കിന് വാഹനങ്ങളും നിയന്ത്രിക്കാൻ യാതൊരുവിധ തടസങ്ങളും ഉണ്ടായില്ല. വിളക്കന്നൂർ ഇടവക വികാരി ഫാ.തോമസ് കീഴാരത്തിലിന്‍റെ നേതൃത്വത്തിൽ നൂറുകണക്കിന് വോളന്‍റിയർമാരും പോലീസും ഗതാഗതം ക്രമീകരിക്കാൻ ഉണ്ടായിരുന്നു. ഇടവക കോ-ഓർഡിനേറ്റർ സണ്ണി പോത്തനാംതടത്തിൽ, ടോമി കണിവേലിൽ എന്നിവരുടെ നേതൃത്വത്തിൽ വിശ്വാസികൾക്ക് പള്ളിപരിസരത്തും പന്തലിലും ഇരിപ്പിട ക്രമീകരണങ്ങൾ ഒരുക്കിയിരുന്നു. ചടങ്ങുകൾ കാണുവാൻ സംഘാടകസമിതി ചെയർമാനും പബ്ലിസിറ്റി കമ്മിറ്റിയുടെ ചുമതലക്കാരനുമായ ഫാ.ജോസഫ് ഓരത്തേലിന്‍റെ നേതൃത്വത്തിൽ എൽഇഡി സ്ക്രീനുകൾ സജ്ജമാക്കിയിരുന്നു.

ഒഴുക്കിൽപ്പെട്ട് കാണാതായ വയോധികയുടെ മൃതദേഹം കണ്ടെത്തി

കൂത്തുപറമ്പ്: കഴിഞ്ഞ ദിവസം ഒഴുക്കിൽപ്പെട്ട് കാണാതായ വയോധികയുടെ മൃതദേഹം കണ്ടെത്തി.മുതിയങ്ങയിലെ വിനോദ് ഭവനിൽ നളിനിയുടെ (70) മൃതദേഹമാണ് ഇന്നലെ രാവിലെ വീടിനു സമീപം പുഴയിൽ കണ്ടെത്തിയത്. നളിനിയെ കാണാതായതിനെ തുടർന്ന് നാട്ടുകാരും അഗ്നിരക്ഷാ സേനയും വീടിനു സമീപത്തെ പുഴയിലും തോട്ടിലും തെരച്ചിൽ നടത്തി വരികയായിരുന്നു. വ്യാഴാഴ്ച രാവിലെ 8.30 യോടെയാണ് വീട്ടിൽ നിന്നും നളിനിയെ കാണാതായത്. ഇവർ വീടിനു സമീപത്തെ തോട്ടിൽ വീണിട്ടുണ്ടാകുമെന്ന സംശയത്തിൽ വീടിനു സമീപത്തെ തോട്ടിലും പുഴയിലും വിവിധ ഭാഗങ്ങളിലെ അഗ്നിരക്ഷാസേനയും നാട്ടുകാരും പഞ്ചായത്ത് അധികൃതരും ചേർന്ന് കഴിഞ്ഞ ദിവസങ്ങളിലായി തെരച്ചിൽ നടത്തിയെങ്കിലും നളിനിയെ കണ്ടെത്താൻ സാധിച്ചിരുന്നില്ല. വിവരമറിഞ്ഞ് പാട്യം പഞ്ചായത്ത് പ്രസിഡന്‍റ് എൻ.വി. ഷിനിജ, വൈസ് പ്രസിഡന്‍റ് കെ.പി. പ്രദീപ് കുമാർ, പഞ്ചായത്ത് അധികൃതർ എന്നിവർ സ്ഥലത്തെത്തിയിരുന്നു.

നവീകരിച്ച കെഎസ്‌സിഎഫ് ഓഫീസ് ഉദ്ഘാടനം ചെയ്തു

ചെമ്പേരി: ടൗണിലെ വയോജന മന്ദിരത്തിൽ പ്രവർത്തിക്കുന്ന കേരള സീനിയർ സിറ്റിസൺ ഫോറം (കെഎസ്‌സിഎഫ്) ചെമ്പേരി യൂണിറ്റിന്‍റെ നവീകരണം പൂർത്തിയാക്കിയ ഓഫീസ് ഏരുവേശി പഞ്ചായത്ത് പ്രസിഡന്‍റ് മിനി ഷൈബി ഉദ്ഘാടനം ചെയ്തു. വൈസ് പ്രസിഡന്‍റ് മധു തൊട്ടിയിൽ അധ്യക്ഷത വഹിച്ചു. കെഎസ് സിഎഫ് ചെമ്പേരി യൂണിറ്റ് വൈസ് പ്രസിഡന്‍റ് ഇമ്മാനുവൽ ജോർജ് ആമുഖ പ്രഭാഷണവും ചെമ്പേരി ലൂർദ് മാതാ ബസിലിക്ക അസിസ്റ്റന്‍റ് റെക്ടർ ഫാ. ജോസഫ് തുരുത്തേൽ അനുഗ്രഹ പ്രഭാഷണവും നടത്തി. പഞ്ചായത്ത് സ്ഥിരം സമിതി അധ്യക്ഷരായ മോഹനൻ മൂത്തേടൻ, ഷൈല ജോയി, കെഎസ് സിഎഫ് കണ്ണൂർ ജില്ലാ പ്രസിഡന്‍റ് ഏബ്രഹാം തോണക്കര, ഇരിക്കൂർ ബ്ലോക്ക് കമ്മിറ്റി പ്രസിഡന്‍റ് ജോണി മുണ്ടയ്ക്കൽ, ഏരുവേശി പഞ്ചായത്ത് കമ്മിറ്റി പ്രസിഡന്‍റ് പി.കെ. കുര്യാക്കോസ്, ചെമ്പേരി യൂണിറ്റ് പ്രസിഡന്‍റ് ജോർജ് പഴയതോട്ടം, കേരള വ്യാപാരി വ്യവസായി ഏകോപന സമിതി ചെമ്പേരി യൂണിറ്റ് പ്രസിഡന്‍റ് സാബു മണിമല, സെക്രട്ടറി ജോസഫ് പനയ്ക്കൽ എന്നിവർ പ്രസംഗിച്ചു.

നിലമ്പൂർ ഉപതെരഞ്ഞെടുപ്പിൽ യുഡിഎഫ് വൻവിജയം നേടും: സണ്ണി ജോസഫ്

ശ്രീകണ്ഠപുരം: നിലമ്പൂർ ഉപതെരഞ്ഞെടുപ്പിൽ യുഡിഎഫ് വൻവിജയം നേടുമെന്ന് കെപിസിസി പ്രസിഡന്‍റ് സണ്ണി ജോസഫ് എംഎൽഎ. നെടിയേങ്ങ കവലയിൽ പുതുതായി നിർമിച്ച ഉമ്മൻ ചാണ്ടി ഭവൻ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കേരളത്തിൽ യുഡിഎഫ് ഒറ്റക്കെട്ടാണെന്നും നിയമസഭാ തെരഞ്ഞെടുപ്പിലും കേരളത്തിൽ യുഡിഎഫ് അധികാരത്തിൽ വരുമെന്നും അദ്ദേഹം പറഞ്ഞു. നെടിയേങ്ങ മണ്ഡലം കോൺഗ്രസ് പ്രസിഡന്‍റ് ജിയോ ജേക്കബ് അധ്യക്ഷത വഹിച്ചു. എൻ.സി. വർഗീസ് സ്മാരക ഹാളിന്‍റെ ഉദ്ഘാടനം കെപിസിസി വർക്കിംഗ് പ്രസിഡന്‍റ് ഷാഫി പറമ്പിൽ നിർവഹിച്ചു. കോൺഫറൻസ് ഹാൾ സജീവ് ജോസഫ് എംഎൽഎ ഉദ്ഘാടനം ചെയ്തു. പൊതുസമ്മേളനം മുൻ മന്ത്രി കെ.സി. ജോസഫ് ഉദ്ഘാടനം ചെയ്തു. ഡിസിസി പ്രസിഡന്‍റ് മാർട്ടിൻ ജോർജ് മുഖ്യാതിഥിയായി. കെപിസിസി അംഗം മുഹമ്മദ് ബ്ലാത്തൂർ, യൂത്ത് കോൺഗ്രസ് ജില്ലാ പ്രസിഡന്‍റ് വിജിൽ മോഹൻ, ശ്രീകണ്ഠപുരം ബ്ലോക്ക് കോൺഗ്രസ് പ്രസിഡന്‍റ് ഇ.വി. രാമകൃഷ്ണൻ, എം.ഒ. മാധവൻ, കെ.വി. ഫിലോമിന, കെ.പി. ഗംഗാധരൻ, ജോസഫീന വർഗീസ്, കെ.സി. ജോസഫ് കൊന്നയ്ക്കൽ, കെ.ജി. ജയരാജ്, കെ.വി. കുഞ്ഞിരാമൻ, കെട്ടിട നിർമാണ കമ്മിറ്റി ഭാരവാഹികളായ ടി.എൻ. പ്രമോദ്, കെ.പി. ലിജേഷ് എന്നിവർ പ്രസംഗിച്ചു.

ജില്ലയിലാകെ മണ്ണിടിച്ചിൽ, വെള്ളക്കെട്ട്

തളിപ്പറമ്പ് പുളിമ്പറമ്പ് പട്ടുവം റോഡിൽ മണ്ണിടിച്ചിൽ: ഗതാഗതം നിരോധിച്ചു തളിപ്പറമ്പ്: തളിപ്പറമ്പ്-പുളിമ്പറമ്പ്-പട്ടുവം റോഡിൽ ദേശീയപാത ബൈപ്പാസ് റോഡ് നിർമാണം നടക്കുന്ന ഭാഗത്ത് മണ്ണിടിച്ചിൽ രൂക്ഷമായതിനെ തുടർന്ന് ഗതാഗതം നിരോധിച്ചു. താത്കാലിക പാതയുടെ ഒരു വശത്താണ് മണ്ണിടിച്ചൽ രൂക്ഷമായത്. ഈ മേഖലയിൽ അപകടാവസ്ഥ നിലനിൽക്കുന്നത് ദീപിക കഴിഞ്ഞ ദിവസം റിപ്പോർട്ട് ചെയ്തിരുന്നു. ഗതാഗതം വഴിതിരിച്ചു വിടാതെ ദേശീയപാത ബൈപ്പാസ് നിർമാണത്തിനായി ചിറവക്ക് പുളിമ്പറമ്പ് റോഡിൽ മഞ്ചക്കുഴി ഭാഗത്ത് സ്വകാര്യ വ്യക്തികളുടെ സ്ഥലത്ത് കൂടിയാണ് താത്കാലിക പാത നിർമിച്ചത്. കുപ്പത്തുനിന്ന് ആരംഭിക്കുന്ന ബൈപാസ് പുളിമ്പറമ്പിൽ വലിയ കുന്നിനെ രണ്ടായി മുറിച്ചാണ് കടന്നു പോകുന്നത്. താത്കാലികമായി ഒരുക്കിയ റോഡിന്‍റെ ഇരുഭാഗത്തും 20 മീറ്ററിലേറെ ആഴത്തിലാണ് കുഴിച്ചു മാറ്റിയത്. ബൈപ്പാസ് പ്രവൃത്തിക്കായി ഗതാഗതം ഏഴാംമൈൽ, കൂവോട്, കയ്യം, മാന്ധംകുണ്ട് എന്നിവിടങ്ങളിലൂടെ തിരിച്ച് വിടാനുള്ള നിർദേശത്തിനെതിരെ ബസ് തൊഴിലാളികൾ രംഗത്ത് വന്നതോടെയാണ് താതാകാലിക പാത നിർമിച്ച് ഇതിലൂടെ വാഹനങ്ങളെ കടത്തി വിട്ട് പഴയ റോഡിൽ പാലം പണി ആരംഭിച്ചത്. മഴയിൽ പ്രവൃത്തി നടക്കുന്നതിന് സമീപത്ത് മണ്ണിടിഞ്ഞു തുടങ്ങിയത് ആശങ്കയ്ക്ക് ഇടയാക്കിയിരുന്നു. കഴിഞ്ഞ ദിവസം പെയ്ത കനത്ത മഴയിൽ ഒരുവശം വലിയ രീതിയിൽ ഇടിയുകയും ചെയ്തു. ഇതേ തുടർന്ന ഗതാഗത നിയന്ത്രണം ഏർപ്പെടുത്തിയിരുന്നു. ഇരുചക്ര വാഹനങ്ങൾ, കാറുകൾ, ഓട്ടോറിക്ഷകൾ ഉൾപ്പെടെയുള്ള ചെറു വാഹനങ്ങൾ നിയന്ത്രണ വിധേയമായി നിലവിലുള്ള പാതവഴിയും തളിപ്പറമ്പിൽ നിന്നും പട്ടുവം ഭാഗത്തേക്കും തിരിച്ചുമുള്ള ബസുകൾ ഉൾപ്പെടെയുള്ള ഹെവി വാഹനങ്ങൾ ഏഴാംമൈലിൽ എത്തി കൂവോട്-കയ്യം വഴിയും മുറിയാത്തോടിൽ നിന്നും ചാലത്തൂർ-മംഗലശേരി-കുപ്പം വഴിയും കടന്നു പോകുന്ന രീതിയിലുമാണ് ക്രമീകരിച്ചിരുന്നത്. ഇന്നലെ ഉച്ചയ്ക്ക് ശേഷമുണ്ടായ കനത്ത മഴയിൽ വീണ്ടും മണ്ണിടിച്ചിൽ ഉണ്ടായതോടെയാണ് ഇതുവഴിയുള്ള ഗതാഗതം പൂർണമായും നിരോധിച്ചത്. പട്ടുവം ഭാഗത്തേക്ക് പോകേണ്ട വാഹനങ്ങൾ ഏഴാംമൈൽ കൂവോട് കുപ്പം മംഗലശേരി വഴി പോകണമെന്ന് ആർഡിഒ ടി.വി രഞ്ജിത്ത് അറിയിച്ചു. മലയോരത്ത് നാശനഷ്‌ടങ്ങൾ തുടരുന്നു ചെറുപുഴ: കനത്ത മഴയിലും കാറ്റിലും മലയോരത്ത് നാശനഷ്‌ടം തുടരുന്നു. തിരുമേനി വില്ലേജിലെ കോറാളി മലയിൽ റിട്ട. എസ്ഐ പഴയങ്ങാടി സ്വദേശി സ്കറിയയുടെ തേക്കിൻ തോട്ടത്തിൽ വൻതോതിൽ മണ്ണിടിഞ്ഞു. ഇവിടുത്തെ ഏക താമസക്കാരനായ നട്ടിയിൽ പ്രസാദും ഭാര്യയും നോക്കിനിൽക്കെ ഇന്നലെ രാവിലെ 8.30 ഓടെയാണ് മണ്ണിടിഞ്ഞത്. തേക്കുമരങ്ങളും മണ്ണും ഉൾപ്പെടെ റോഡിലേക്കു പതിച്ചതോടെ ഗതാഗതം തടസപ്പെട്ടു. പ്രസാദും കുടുംബവും ഒറ്റപ്പെട്ട നിലയിലാണ്. റോഡിൽ കൂടിയും മണ്ണും വെള്ളവും ഒഴുകി. ഇതോടെ മതുവംപാടി പ്രദേശത്തെ താമസക്കാർ ഭീഷണിയിലായി. ഇന്നലെ രാവിലെ മുതൽ പെയ്ത മഴയിൽ കാര്യങ്കോട് പുഴയും തോടുകളും കരകവിഞ്ഞു. കാര്യങ്കോട് പുഴ കരകവിഞ്ഞതോടെ പുഴ തീരത്തെ കൃഷിയിടങ്ങളിൽ വെള്ളം കയറി. തിരുമേനി തോട് കരകവിഞ്ഞതോടെ മുളപ്ര പാലത്തിൽ വെള്ളം കയറി. മടന്പം പുഴയിൽ റഗുലേറ്ററിന്‍റെ ഷട്ടർ ഉയർത്തി മടമ്പം: നിർത്താതെ പെയ്യുന്ന മഴയിൽ മലയോരത്തെ പുഴകളും തോടുകളിലും ജല നിരപ്പ് ഉയരുന്നു. മടന്പം പുഴയിൽ ജലനിരപ്പ് ഉയർന്നതിനെ തുടർന്ന് മടന്പം റഗുലേറ്ററിന്‍റെ ഷട്ടറുകൾ ഉയർത്തി. കാഞ്ഞിലേരി, ബാലങ്കരി, വയക്കര, മൈക്കിൾഗിരി ഭാഗത്തും താഴ്ന്ന ഭാഗങ്ങളിൽ വെള്ളക്കെട്ട് രൂപപ്പെട്ടു. ചെങ്ങളായി വയലിലും കോട്ടൂർ വയലിലും വെള്ളം ഉയർന്നു. പലയിടത്തും നേരിയ തോതിൽ മണ്ണിടിച്ചിലുമുണ്ടായി. ശ്രീകണ്ഠപുരം, ഓടത്തുപാലം, വെമ്പുവ, പൈസക്കരി ഭാഗത്തെ പുഴകളിൽ കുത്തൊഴുക്ക് ശക്തമാണ്. വണ്ണായികടവ്, കണ്ടകശേരി പാലത്തിനോട് ചേർന്നാണ് ജലനിരപ്പ് ഉള്ളത്. ഇരിക്കൂർ പുഴയിലും ഒഴുക്ക് ശക്തിപ്പെട്ടു. മടമ്പം, കൈതപ്രം, പൊടിക്കളം, അലക്സ് നഗർ, സാൻജോസ് നഗർ എന്നിവിടങ്ങളിൽ വീശിയടിച്ച കാറ്റിൽ വ്യാപകമായി കൃഷി നശിച്ചു. മരകൊമ്പുകൾ പൊട്ടിവീണ് ശ്രീകണ്ഠപുരം നഗരസഭ, ഏരുവേശി, ഇരിക്കൂർ, ചെങ്ങളായി, പയ്യാവൂർ എന്നിവിടങ്ങളിൽ വീടുകൾ ഭാഗികമായി തകർന്നു. കരിങ്കൽ കെട്ട് തകർന്നു വീണു രയറോം: ശക്തമായ മഴയിൽ വീടിനു പിന്നിലെ കരിങ്കൽകെട്ട് തകർന്നു വീണ് വീട് അപകട ഭീഷണിയിൽ. രയറോം പള്ളിപ്പടിയിലെ പുലിക്കോടൻ സജിയുടെ വീടാണ് അപകടാവസ്ഥയിലായത്. വീടിനോട് ചേർന്നുള്ള ഷെഡും തകർന്നു. കൃഷിനാശമുണ്ടായ പ്രദേശങ്ങൾ കൃഷി വകുപ്പ് ഉദ്യോഗസ്ഥർ സന്ദർശിച്ചു പെരിങ്ങോം: പെരിങ്ങോം-വയക്കര പഞ്ചായത്തിന്‍റെ വിവിധ ഭാഗങ്ങളിൽ തുടർച്ചയായി ഉണ്ടായ ചുഴലിക്കാറ്റിലും ശക്തമായ മഴയിലും വ്യാപക കൃഷി നാശം. നാശനഷ്‌‌ടമുണ്ടായ പ്രദേശങ്ങൾ ജില്ലാ കൃഷി ഡപ്യൂട്ടി ഡയറക്‌ടർ വിഷ്ണു എസ്. നായർ, പെരിങ്ങോം കൃഷിഭവൻ കൃഷി ഓഫീസർ ടി.വി. തുഷാര തുടങ്ങിയവർ സന്ദർശിച്ചു. തെങ്ങ്, കവുങ്ങ്, റബർ, കശുമാവ് മുതലായ കാർഷിക വിളകൾ ശക്തമായ ചുഴലിക്കാറ്റിൽ വിവിധയിടങ്ങളിൽ പൂർണമായും നശിച്ചു. കടുക്കാരം ഏണ്ടി പ്രദേശത്തെ കർഷകരായ എ.പി.വി. തങ്കമണി, രവീന്ദ്രൻ, വിജയൻ, അബ്‌ദുൾ ഖാദർ, എ.ടി.വി. മോഹനൻ, ഭാർഗവി, മറിയം തുടങ്ങിയവരുടെ റബർ കൃഷിക്കാണ് കൂടുതൽ നാശനഷ്‌ടം സംഭവിച്ചത്. കടുക്കാരം, ഏണ്ടി ഭാഗത്തു മാത്രമായി 15 ലക്ഷം രൂപയുടെ നാശനഷ്‌ടം ഉണ്ടായിട്ടുണ്ടെന്നാണു വിലയിരുത്തൽ.

ആർഡിഒ ടി.വി. രഞ്ജിത്ത് ഇന്ന് വിരമിക്കും

തളിപ്പറമ്പ്: തളിപ്പറമ്പ് റവന്യൂ ഡിവിഷണൽ ഓഫീസർ ടി .വി രഞ്ജിത്ത് ഇന്ന് സർവീസിൽ നിന്നും വിരമിക്കും.1990 ൽ എറണാകുളം ജില്ലയിൽ എൽഡി ക്ലർക്കായി ജോലിയിൽ പ്രവേശിച്ച രഞ്ജിത്ത് കോഴിക്കോട്, ഇടുക്കി. കണ്ണൂർ, ജില്ലകളിൽ സേവനമനുഷ്ഠിച്ചിട്ടുണ്ട്. തലശേരിയിലും വടകരയിലും തഹസിൽദാരായും ഇടുക്കി, കോഴിക്കോട്, കണ്ണൂർ എന്നിവിടങ്ങളിൽ ഡപ്യൂട്ടി കളക്ടറായും പ്രവർത്തിച്ചിട്ടുണ്ട്. കണ്ണൂരിൽ ഡപ്യൂട്ടി കളക്ടറായിരിക്കെ കിൻഫ്രാ പാർക്ക് പോലുള്ള പദ്ധതികൾക്ക് യുദ്ധകാലാടിസ്ഥാനത്തിൽ ഭൂമി ഏറ്റെടുക്കൽ നടപടികൾക്ക് നേതൃത്വം നൽകിയിട്ടുണ്ട്. 2024 ഓഗസ്റ്റിലാണ് തളിപ്പറന്പിൽ ആർഡിഒ ആയി ചുമതലയേറ്റത്. ആർഡിഒ ആയിരിക്കെ അനധികൃത ചെങ്കൽ, കരിങ്കൽ ക്വാറികൾക്കെതിരെ കർശന നടപടികൾ സ്വീകരിച്ചതിനൊപ്പം ഭക്ഷ്യ സുരക്ഷ നിയമ പ്രകാരം 50 തിലധികം കേസുകളും വയോജനങ്ങളുടെ ക്ഷേമത്തിനായുള്ള നിയമ പ്രകാരം 100 ലധികം കേസുകളുംസബ് ഡിവിഷണൽ മജിസ്ട്രേറ്റ് എന്ന നിലയിൽ 838 എംസി കേസുകളും തീർപ്പാക്കിയിട്ടുണ്ട്.

ഇംഗ്ലീഷ് പഠനം രസകരമാക്കിയ രാമചന്ദ്രൻ മാഷ് ഇന്ന് വിരമിക്കും

ചെമ്പേരി: ഇംഗ്ലീഷ് അധ്യാപന രംഗത്ത് നൂതന പരീക്ഷണങ്ങൾ നടത്തി ഭാഷാപഠനം രസകരവും ജനകീയവുമാക്കിയ അധ്യാപകൻ ടി.എം. രാമചന്ദ്രൻ മൂന്നു പതിറ്റാണ്ടിലേറെക്കാലത്തെ സേവനത്തിന് ശേഷം ഇന്ന് വിരമിക്കും. ദീർഘകാലം ഹൈസ്കൂൾ ഇംഗ്ലീഷ് അധ്യാപകനായിരുന്ന രാമചന്ദ്രൻ പൂപ്പറമ്പിലെ ഏരുവേശി ഗവ. യുപി സ്കൂൾ മുഖ്യാധ്യാപകനായാണ് വിരമിക്കുന്നത്. കല്യാശേരി ഗവ. ഹൈസ്കൂൾ അധ്യാപകനായിരിക്കെ പത്താം തരം വിദ്യാർഥികൾക്കായി "മാജിക് കാർഡ്സ്' എന്ന പേരിൽ തയാറാക്കിയ നൂറ് കാർഡുകൾ ഉൾപ്പെടുന്ന പ്രത്യേക പഠന സാമഗ്രി ഏറെ ശ്രദ്ധിക്കപ്പെട്ടിരുന്നു. "ഇംഗ്ലീഷ് കാസിൽ', "ആൽഫബെറ്റ്', "ബലൂൺസ്' എന്നീ പേരുകളിൽ തയാറാക്കിയ പഠനപദ്ധതികളും ശില്പശാലയും ശ്രദ്ധേയമായിരുന്നു. "മാജിക് ഗ്രാമർ കാർഡ്സ്' എന്ന പേരിൽ എഴുതിയ വ്യാകരണ പുസ്തകം അവതരണ ശൈലി കൊണ്ട് ഏവർക്കും പ്രിയപ്പെട്ടതായി. ഫേസ്ബുക്കിൽ അവതരിപ്പിച്ച "സിക്സ്റ്റി സെക്കന്‍റ്സ്' എന്ന ഇംഗ്ലീഷ് പഠന വീഡിയോയ്ക്ക് ഇന്നു വൻ ജനപ്രീതിയാണ്. കണ്ണൂർ ജില്ലാതല ഇംഗ്ലീഷ് അധ്യാപക പരിശീലകനായും ജില്ലാ പഞ്ചായത്തിന്‍റെ മുകുളം പഠന സഹായി തയാറാക്കുന്ന സംഘത്തിലും പ്രവർത്തിച്ചു. 33 വർഷം അധ്യാപകനായി ജോലി ചെയ്ത രാമചന്ദ്രൻ മലപ്പട്ടം ചൂളിയാട് സ്വദേശിയാണ്.

നിയന്ത്രണം വിട്ട കാർ വൈദ്യുതി തൂൺ ഇടിച്ചു തകർത്തു

ചെറുപുഴ: നിയന്ത്രണം വിട്ട കാർ വൈദ്യുതി തൂൺ ഇടിച്ചു തകർത്തു. ഇന്നലെ ഉച്ചകഴിഞ്ഞ് മൂന്നോടെ ചെറുപുഴ-തിരുമേനി റോഡിൽ കോക്കടവിലാണ് അപകടം നടന്നത്. ചെറുപുഴ ഭാഗത്തു നിന്നും വന്ന കാർ നിയന്ത്രണം വിട്ട് റോഡരികിലെ വൈദ്യുതി തൂണ് ഇടിച്ചു തകർത്ത് സമീപത്തെ മതിലിലിടിക്കുകയായിരുന്നു. അപകടത്തിൽ ആർക്കും പരിക്കില്ല.

കനത്ത മഴയും കാറ്റും ; നാടും നഗരവും വെള്ളത്തിൽ

കണ്ണൂർ: കനത്തമഴയിൽ ജില്ലയുടെ പലഭാഗങ്ങളും വെള്ളത്തിനടിയിലായി. പുഴകളെല്ലാം കരകവിഞ്ഞ് ഒഴുകിയതോടെ പല സ്ഥലങ്ങളിലും പുഴയോരത്ത് താമസിക്കുന്നവരെ മാറ്റി താമസിപ്പിച്ചു. നിരവധി സ്ഥലങ്ങളിൽ മരം പൊട്ടിവീണ് വീടുകൾക്കും കൃഷിക്കും നാശം സംഭവിച്ചു. നാലുവയൽ, കുറുവ, നീർച്ചാൽ, അഞ്ചുകണ്ടി, കക്കാട്, ചാലാട്, പള്ളിയാംമൂല, ചാല എന്നീ പ്രദേശങ്ങളും വെള്ളത്തിനടിയിലായി. കണ്ണൂർ താലൂക്ക് പരിധിയിലെ വിവിധ പ്രദേശങ്ങളിലെ വീടുകളിൽ വെള്ളം കയറി കുടുംബങ്ങളെ ബന്ധു വീടുകളിലേക്ക് മാറ്റി പാർപ്പിച്ചു. കണ്ണൂർ യൂണിവേഴ്സിറ്റിയിലേക്ക് പോകുന്ന പ്രധാന റോഡായ താവക്കര എടാട്ട് പള്ളി റോഡിലെ 10 കുടുംബങ്ങളെ റവന്യൂ അധികാരികളുടെ നിർദേശപ്രകാരം അഗ്നിരക്ഷാസേന ബന്ധുവീടുകളിലേക്ക് സുരക്ഷിതമായി മാറ്റി. റസ്‌ക്യൂ ബോട്ടിലാണ് ഇവരെ താവക്കരയിൽ നിന്നും ഒഴിപ്പിച്ചത്. പുഴാതി കക്കാട് ചെക്കിച്ചിറ ഭാഗത്ത് വെള്ളപ്പൊക്ക ഭീഷണിയിലായ രണ്ട് കുടുംബങ്ങളെ റവന്യൂ അധികൃതരുടെ സാന്നിധ്യത്തിൽ അഗ്നിരക്ഷാസേന സുരക്ഷിതമായി ഒഴിപ്പിച്ചു. ഇവരും ബന്ധുവീടുക്കളിലേക്ക് മാറി. കക്കാട് പുഴ കരകവിഞ്ഞൊഴുകി പള്ളിപ്രം റോഡിൽ ഗതാഗതം സ്തംഭിച്ചു. കണ്ണൂർ പാസ്‌പോർട്ട് ഓഫീസിനു സമീപം പടന്ന തോടിന് സമീപമുള്ള 40 ഓളം വീടുകളിൽ വെള്ളം കയറിയതിനെ തുടർന്ന് മാറ്റിപ്പാർപ്പിച്ചു. നഗരത്തിൽ പഴയ ബസ് സ്റ്റാൻഡ്, മുനീശ്വരൻ കോവിൽ, റെയിൽവേ സ്റ്റേഷന് സമീപം തുടങ്ങിയ സ്ഥലങ്ങളും വെള്ളത്തിനടിയിലായി. വളപട്ടണത്ത് മണ്ണ് ഇടിഞ്ഞ് വീണ് പി. രതീഷിന്‍റെ വീട് മതിലിടിഞ്ഞ് ഭാഗികമായി തകർന്നു. ഗതാഗത പരിഷ്കരണത്തെ തുടർന്ന് പുതിയതെരുവിൽ സ്ഥാപിച്ച താത്കാലിക ബസ് കാത്തിരിപ്പ് കേന്ദ്രം മഴയിൽ തകർന്നു വീണു. രാത്രിയിലാണ് ബസ് കാത്തിരിപ്പ് കേന്ദ്രം തകർന്നത്. താവക്കരയിൽ വെള്ളം കയറി വീടുകളിൽ കുടുങ്ങിയ തമിഴ്നാട് സ്വദേശികളായ ഭിന്നശേഷിക്കാരായ നാഗമ്മാൾ, എട്ടുവയസുകാരി മീനു, സന്ധ്യ, ചിന്നത്തെ എന്നിവരെ സ്വദേശത്തേക്ക് പോകാനായി ദുരന്തനിവാരണ സേനയുടെ നേതൃത്വത്തിൽ റെയിൽവേ സ്റ്റേഷനിൽ എത്തിച്ചു. നഗരത്തിലെ ഹോട്ടൽ ജീവനക്കാരായ അഭിലാഷ്, രവീന്ദ്രൻ, പ്രദീപ്, സുലബ്, അഭിലാഷ് എന്നിവരെ ഫയർഫോഴ്സിന്‍റെ ഡിങ്കി ബോട്ടിലാണ് പുറത്തെത്തിച്ചത്. വെള്ളം കയറിയ വീടുകളിൽ ഉള്ളവരെ ബന്ധുവീടുകളിലേക്കും മറ്റ് സുരക്ഷിത കേന്ദ്രങ്ങലിലേക്കും മാറ്റിപ്പാർപ്പിച്ചു. എംടിഎം സ്കൂളിൽ കോർപറേഷൻ ക്യാന്പ് തുറന്നിട്ടുണ്ടെങ്കിലും ആരും ക്യാന്പിലേക്ക് മാറിയിട്ടില്ല. മേയർ മുസ്‌ലിഹ് മഠത്തിൽ, മുൻ മേയർ ടി.ഒ. മോഹനൻ, വാർഡ് കൗൺസിലർ സുരേഷ് ബാബു എളയാവൂർ, കോർപറേഷൻ ജീവനക്കാർ എന്നിവർ സ്ഥലത്തെത്തി. വീടുകളിലടക്കം വെള്ളം കയറിയിട്ടും പലരും മാറാൻ തയാറാകുന്നില്ലെന്നും 50 ഓളം കുടുംബങ്ങളാണ് പ്രദേശത്ത് താമസിക്കുന്നതെന്നും കൂടുതലും ഇതര സംസ്ഥാന തൊഴിലാളികളാണെന്നും മേയർ പറഞ്ഞു. യൂണിവേഴ്സിറ്റിയിലെ തോട് വൃത്തിയാക്കാത്തതാണ് വെള്ളക്കെട്ടിന് കാരണമെന്ന് വാർഡ് കൗൺസിലർ സുരേഷ് ബാബു എളയാവൂർ ആരോപിച്ചു. വെള്ളക്കെട്ടിനെ തുടർന്ന് കോർപറേഷൻ പത്താം വാർഡിൽ പുഴാതി സോണിൽപെട്ട ചെക്കിച്ചിറയിലെ വീട്ടിൽ കുടുങ്ങിയ എട്ടുമാസം ഗർഭിണിയെയും ദുരന്ത നിവാരണ സേനയുടെ നേതൃത്വത്തിൽ മാറ്റിപ്പാർപ്പിച്ചു. പള്ളിക്കുന്ന് പാലത്തിന് സമീപം അഞ്ചോളം കുടുംബങ്ങളിൽ വെള്ളം കയറി. തായത്തെരു ഭാഗത്ത് പത്തു കുടുംബങ്ങളെയാണ് മാറ്റി താമസിപ്പിച്ചത്. മുഴപ്പിലങ്ങാട് മലയ്ക്ക് താഴെ പ്രദേശത്ത് പത്തിൽ അധികം വീടുകളിൽ വെള്ളം കയറി. മൂന്ന് വീട്ടുകാരെ മാറ്റി താമസിപ്പിച്ചു. പാപ്പിനിശേരി റെയിൽവേ സ്റ്റേഷൻ റോഡിലെ അണ്ടർ ബ്രിഡ്ജ് കനത്ത മഴയെ തുടർന്ന് വെള്ളം കെട്ടിക്കിടക്കുന്ന അവസ്ഥയിലാണ്. കടമ്പൂർ വില്ലേജിൽ കേസ് റോഡിനു സമീപം ആറ് വീടുകളിൽ വെള്ളം കയറി. അടിയന്തര സാഹചര്യം അല്ലാത്തതിനാൽ കുടുംബങ്ങൾ വീടുകളിൽ തന്നെ തുടരുകയാണ്. ചെറുകുന്ന് വില്ലേജിൽ മൂന്നാം വാർഡിൽ ബാലകൃഷ്ണൻ എന്നവരുടെ കുടുംബം താമസിക്കുന്ന വീടിന്‍റെ ചുമർ ഇടിഞ്ഞ് നാശനഷ്ടം സംഭവിച്ചതിനാൽ ബന്ധു വീട്ടിലേക്ക് താമസം മാറി. കനത്തമഴയെ തുടർന്ന് തലശേരി താലൂക്കിൽ ദുരിതാശ്വാസ ക്യാമ്പ് തുറന്നു. തലശേരി വില്ലേജിൽ ഒന്നാം വാർഡ് പ്രദേശത്തുള്ള കയ്യാലി റെയിൽവേ ഗേറ്റിന് സമീപമുള്ള മൂന്നു വീടുകളിൽ വെള്ളം കയറിയതിനെ തുടർന്ന് ഒരു വീട്ടിലെ രണ്ട് കുട്ടികളടക്കം അഞ്ചു പേരെ ഗവ. ബ്രണ്ണൻ കോളജ് ഓഫ് ടീച്ചർ എഡ്യുക്കേഷനിൽ ആരംഭിച്ച ക്യാമ്പിലേക്ക് മാറ്റി. രണ്ടു വീട്ടുകാർ ബന്ധുവീടുകളിലേക്ക് താമസം മാറി. കണ്ണപുരം വില്ലേജ് ചൈനാക്ലേ റെയിൽവേ ഗേറ്റ് മുതൽ റെയിൽവേ സ്റ്റേഷൻ ഭാഗത്തേക്ക് റെയിൽ പാളത്തിന് കിഴക്ക് ഭാഗത്ത് വെള്ളം കയറി. ഏഴോളം വീട്ടുകളുടെ മുറ്റത്ത് വെള്ളം കെട്ടി നിൽക്കുന്നുണ്ട്. റെയിൽവേ ലൈനിനോട് ചേർന്നുള്ള ഓവുചാലിലൂടെ ശരിയായി വെള്ളം ഒഴുകി പോകാത്തതാണ് കാരണമെന്ന് സ്ഥലപരിശോധനയിൽ വില്ലേജ് ഓഫീസർ വിലയിരുത്തി. കാലവർഷം ശക്തി പ്രാപിച്ചതോടെ മാടായി, പുതിയങ്ങാടി, നീരൊഴുക്കുംചാലിൽ പ്രദേശങ്ങളിൽ വെള്ളക്കെട്ട് ഭീഷണിയിൽ. നിരവധി വീടുകളിലും കടകളിലും വെള്ളം കയറി വീട്ടുകാർ ദുരിതത്തിലായി. കെ. ഡോമിനി, അഹമ്മദ് കുട്ടി, ശേഖരൻ, ബാലാമണി, സി.എച്ച്. നബീസ, കാർത്യായനി, വി. രവി, വസന്ത, ലൂക്കോസ്, മേരി, ജോൺസൺ, അന്ന, ത്രേസ്യ, ബീവി, ഭാരതി, പ്രഭാകരൻ തുടങ്ങിയവരുടെ വീട്ടുകളിലും വെള്ളം കയറി. സമീപത്തെ സെബാസ്റ്റ്യന്‍റെ സ്റ്റേഷനറിക്കടയിലും ഹോട്ടലിലും വെള്ളം കയറി സാധനങ്ങൾ ഉൾപ്പെടെ നശിച്ചിരിക്കുകയാണ്. ഇവിടങ്ങളിലെ കിണറുകളിലെ വെള്ളവും ഉപയോഗശൂന്യമായ നിലയിലാണ്. പുതിയങ്ങാടി മൊട്ടാന്പ്രത്തെ ക്രെസന്‍റ് ആശുപത്രിയിലും വെള്ളം കയറി. ഇരിട്ടി: മഴയ്ക്കൊപ്പം ശക്തമായ കാറ്റും വീശുന്നതോടെ വ്യാപക നാശനഷ്ടമാണ് മലയോരത്ത് റിപ്പോർട്ട് ചെയ്യുന്നത്. അയ്യൻകുന്ന് പഞ്ചായത്തിലെ വാണിയപ്പാറ-കളിത്തട്ടുംപാറ റോഡിൽ കലുങ്കിന്‍റെ കെട്ട് ഇടിഞ്ഞ് റോഡ് അപകടത്തിലായി. പ്രദേശത്തെ ജനങ്ങൾക്ക് ടൗണുമായി ബന്ധപ്പെടാനുള്ള ഏക റോഡാണ് അപകടാവസ്ഥയിലായത്. പായം പഞ്ചായത്തിൽ കനത്ത മഴയിൽ വീടിനോട് ചേർന്ന് മതിൽ ഇടിഞ്ഞ് വീടിന് കേടുപാടുകൾ സംഭവിച്ചു. പായം കാടമുണ്ടയിലെ തോട്ടിൻക്കര രാജീവന്‍റെ വീടിന്‍റെ പിൻഭാഗത്തെ മതിലാണ് ഇടിഞ്ഞുവീണത്. താഴേക്ക് പതിച്ച മതിൽ കെട്ടിന്‍റെ ചെങ്കല്ലും മണ്ണും ഉൾപ്പെടെ വീടിന്‍റെ ചുമരിൽ തട്ടിയാണ് നിന്നത്. കനത്ത മഴകൂടി പെയ്തതോടെ ചെളിയും മണ്ണും ഉൾപ്പെടെ വീടിനുള്ളിലേക്ക് കയറി. കിണറ്റിലും ചെളി വെള്ളം നിറഞ്ഞു. ഉളിക്കൽ പഞ്ചായത്തിലെ പേരട്ട-മട്ടിണി റോഡിൽ അറയ്ക്കൽ ജോൺസന്‍റെ വീടിന് പിൻവശത്തെ വലിയ മൺതിട്ട ഇടിഞ്ഞുവീണു. മണ്ണിനൊപ്പം അടർന്നുവീണ വലിയ കല്ല് വീടിന്‍റെ വെളിയിലേക്ക് പതിച്ചത് കൊണ്ട് വലിയ ദുരന്തം ഒഴിവായി. അപകടാവസ്ഥ നിലനിൽക്കുന്ന സ്ഥലങ്ങളിൽ നിന്ന് ജനങ്ങളോട് മാറിതാമസിക്കാൻ അധികൃതർ നിർദേശം നൽകി. കാരയിൽ വൻ കൃഷിനാശം മട്ടന്നൂർ: കണ്ണൂർ വിമാനത്താവളത്തിൽ നിന്ന് ഉൾപ്പെടെ മഴ വെള്ളം കൃഷിയിടത്തിലേക്ക് ഒഴുകി വൻ നാശം. കാരയിലെ ഏക്കറുകളോളം സ്ഥലത്തെ കൃഷിയാണു വെള്ളത്തിലായത്. കാര തോട് നിറഞ്ഞു കവിഞ്ഞൊഴുകിയതാണു കാരയിലെ ഏക്കറു കണക്കിന് കൃഷിയിടം വെള്ളത്തിലായത്. 15 ഓളം കർഷകരുടെ കൃഷിയിലാണു വെള്ളം കയറിയത്. പത്തായിരത്തോളം കുലച്ച നേന്ത്രവാഴകളാണു വെള്ളത്തിലായതെന്നു കർഷകർ പറഞ്ഞു. നേന്ത്രവാഴകൾക്ക് പുറമെ കപ്പ, പച്ചക്കറി കൃഷികളും നശിച്ചു. കാര തോടിന്‍റെ നിർമാണം വർഷങ്ങൾക്കു മുമ്പ് ആരംഭിച്ചിരുന്നുവെങ്കിലും പ്രവൃത്തി കല്ലേരിക്കരയിൽ പാതിവഴിയിൽ കിടക്കുകയാണ്. കൃഷി നാശമുണ്ടായ പ്രദേശം നഗരസഭാ ചെയർമാൻ എൻ. ഷാജിത്ത് സന്ദർശിച്ചു. ചെങ്കൽപ്പണയിൽ നിന്ന് വെള്ളം കുത്തിയൊഴുകി കുമ്മാനത്ത് കടകളിലും വീടുകളിലും വെള്ളം കയറി. വ്യാഴാഴ്ച രാത്രി 10.30 ഓടെയായിരുന്നു സംഭവം. വെള്ളിയാംപറമ്പിലെ ചെങ്കൽപ്പണയിൽ കെട്ടിക്കിടന്ന വെള്ളമാണ് കുന്നിൻതാഴേക്ക് ഒഴുകിയെത്തിയത്. കുമ്മാനത്ത് കീഴല്ലൂർ ബാങ്കിന് സമീപമുള്ള വീടുകളിലാണു വെള്ളം കയറിയത്. നാട്ടുകാർ വിവരമറിയിച്ചതിനെ തുടർന്ന് അഗ്നിരക്ഷാസേനയും പോലീസും സ്ഥലത്തെത്തി. വൻതോതിൽ വെള്ളം കുത്തിയൊഴുകിയതിനെ തുടർന്ന് വെള്ളിയാംപറമ്പ് വളറണ്ടക്കാവിന്‍റെ മതിൽ തകർന്നു. കുന്നിടിഞ്ഞ് രണ്ടുവീടുകള്‍ തകര്‍ന്നു; മൂന്ന് വീടുകള്‍ ഭീഷണിയില്‍ പയ്യന്നൂര്‍: തോരാമഴയില്‍ രാമന്തളിയിലെ രണ്ടു വീടുകള്‍ കുന്നിടിഞ്ഞുവീണ് തകര്‍ന്നു. മൂന്നുവീടുകള്‍ മണ്ണിടിച്ചില്‍ ഭീഷണിയില്‍. പഞ്ചായത്ത്, റവന്യൂ അധികൃതര്‍ സ്ഥലത്തെത്തി രണ്ടുവീട്ടുകാരെ മാറ്റിപ്പാര്‍പ്പിച്ചു. ഇന്നലെ ഉച്ചക്ക് ഒന്നരയോടെയാണ് രാമന്തളി കരമുട്ടത്തെ ബി.എസ്. ഇബ്രാഹിം-റുമൈസ ദന്പതികളുടെ മൂന്നുമാസം മുമ്പ് ഗൃഹപ്രവേശനം നടത്തിയ വീടിനു പിന്നിലെ കുന്നിടിഞ്ഞത്. ശബ്ദം കേട്ട് വീട്ടുകാര്‍ പുറത്തേക്ക് ഓടി രക്ഷപ്പെട്ടതിനാലാണ് ആളപായമൊഴിവായത്. അന്പതടിയോളം ഉയരത്തിലുള്ള കുന്നിടിഞ്ഞു താഴേക്ക് പതിച്ച കല്ലും മണ്ണും വീണ് വീടിന്‍റെ പിന്‍ഭാഗം മൂടിയ നിലയിലാണ്. ഇടിച്ചിലിന്‍റെ ശക്തിയില്‍ വീടിന്‍റെ വര്‍ക്ക് ഏരിയ തകര്‍ത്ത് അടുക്കള വാതിലിലൂടെ വീടിന്‍റെ അകത്തേക്കാണു കല്ലും മണ്ണും കടന്നെത്തിയത്. അടുത്ത കിടപ്പുമുറിയുടെ ഭിത്തി തകര്‍ത്തെത്തിയ മണ്ണ് മുറിയില്‍ നിറഞ്ഞതിനാല്‍ വാതില്‍ തുറക്കാനുമാകാത്ത അവസ്ഥയാണ്. വിവരമറിഞ്ഞെത്തിയ രാമന്തളി പഞ്ചായത്ത് പ്രസിഡന്‍റ് വി. ഷൈമയും ജനപ്രതിനിധികളും റവന്യൂ ഉദ്യോഗസ്ഥരും ചേര്‍ന്ന് വീട്ടുകാരെ മാറ്റിപ്പാര്‍പ്പിച്ചിരിക്കുകയാണ്. ഇവിടെ വീണ്ടും കുന്നിടിച്ചില്‍ ഭീഷണിയുണ്ടാകാനുള്ള സാധ്യതയുമുണ്ട്. ഓലക്കാല്‍ കടവിനു സമീപത്തെ ഒ.കെ. ജമീലയുടെ വീടിന്‍റെ പിന്നിലെ കുന്നിടിഞ്ഞ് കൂറ്റന്‍ കല്ലുകളും മണ്ണും വീട്ടിലേക്കെത്തി. തുടര്‍ന്ന് കുന്നിടിഞ്ഞ് വീണുകൊണ്ടിരിക്കുന്നതും വീടിന് ഭീഷണിയായി മാറി. ഇതോടെ ഇവരെയും മാറ്റിത്താമസിപ്പിച്ചു. തൊട്ടടുത്തുള്ള മുത്തലിബ്, അബ്ദുള്‍ ഹക്ക്, ആസിഫ് എന്നിവരുടെ വീടുകളും മണ്ണിടിച്ചില്‍ ഭീഷണിയിലാണ്. പയ്യന്നൂര്‍ നഗരസഭയുടെ വിവിധ പ്രദേശങ്ങളും കനത്ത മഴയില്‍ വെള്ളത്തിനടിയിലായി. നഗരസഭയിലെ അന്പതിലധികം വീടുകളില്‍ വെള്ളം കയറി. ഇവരില്‍ പലരും ബന്ധുവീടുകളിലേക്ക് താമസം മാറിയിട്ടുണ്ട്. അടിയന്തര സാഹചര്യം നേരിടേണ്ട ഘട്ടങ്ങളില്‍ മതിയായ ക്രമീകരണങ്ങള്‍ ഏര്‍പ്പെടുത്തുമെന്ന് ഇവിടം സന്ദര്‍ശിച്ച ചെയര്‍പേഴ്‌സണ്‍ കെ.വി. ലളിത അറിയിച്ചു.

കനത്ത മഴയിൽ പയ്യാന്പലത്ത് സംസ്കാരം തടസപ്പെട്ടു

കണ്ണൂർ: കനത്ത മഴയെ തുടർന്ന് പയ്യാന്പലം ശ്മശാനത്തിൽ ശവസംസ്കാര ക്രിയകൾ തടസപ്പെട്ടു. മഴക്കാലത്ത് സുഗമമായ രീതിയിൽ ശവസംസ്കാരം നടത്താനുള്ള സംവിധാനങ്ങളില്ലാത്തതാണ് കാരണം. ഇന്നലെ മൃതദേഹങ്ങളുമായെത്തിയവർ മണിക്കൂറുകളോളം കാത്തിരുന്ന ശേഷമാണ് സംസ്കാര ചടങ്ങുകൾ പൂർത്തിയാക്കിയത്. മൂന്നു മൃതദേഹങ്ങൾ സംസ്കാര ക്രിയകൾ നടത്തുന്നതിനായി മണിക്കൂറുകളോളം ആംബുലൻസിൽ നിന്നിറക്കാതെ വയ്ക്കുകയായിരുന്നു. നിലവിൽ 30 ചിതകൾ ഇവിടെ ഉണ്ടെങ്കിലും മഴക്കാലത്ത് സംസ്കാരം നടത്താനായി എടുത്തുമാറ്റാവുന്ന ആറ് മേൽക്കൂരകൾ മാത്രമാണുള്ളത്. ഇവയിൽ തന്നെ പലതിന്‍റെ മുകളിലെ ഷീറ്റുകൾ തകർന്ന നിലയിലുമാണ്. കൂടാതെ വിറക് നനയാതെ സൂക്ഷിക്കാൻ ആവശ്യമായ സൗകര്യമില്ലാത്തതും സംസ്കാരക്രിയകളെ പ്രതികൂലമായി ബാധിക്കുന്നുണ്ട്.

ജലവിഭവ അസിസ്റ്റന്‍റ് എൻജിനിയറുടെ ഓഫീസ് യൂത്ത് ലീഗ് ഉപരോധിച്ചു

മട്ടന്നൂർ: പഴശി കനാൽ റോഡും സംരക്ഷണ ഭിത്തിയും തകർന്നതിൽ പ്രതിഷേധിച്ച് മുസ്‌ലിം യൂത്ത് ലീഗ് മട്ടന്നൂർ മണ്ഡലം കമ്മിറ്റിയുടെ നേതൃത്വത്തിൽ കൂടാളിയിലെ ജല വിഭവ വകുപ്പ് അസിസ്റ്റന്‍റ് എൻജിനീയറുടെ കാര്യാലയം ഉപരോധിച്ചു. സംഭവത്തിൽ നേതാക്കളെയും പ്രവർത്തകരെയും മട്ടന്നൂർ പോലീസ് അറസ്റ്റ് ചെയ്തു നീക്കി. കഴിഞ്ഞ ദിവസമാണ് മട്ടന്നൂർ-തലശേരി റോഡിൽ കുഞ്ഞിപ്പള്ളി-കാര കനാൽ റോഡിൽ പുനർനിർമിച്ച സംരക്ഷണ ഭിത്തിയും കോൺക്രീറ്റ് റോഡും തകർന്നത്. അഴിമതിയിലൂടെ റോഡു പണി നടത്തി ജനങ്ങളെ ദുരിതത്തിലേക്കു തള്ളിയ അധികൃതർക്കെതിരെ ശക്തമായ നടപടി സ്വീകരിക്കുകയും എത്രയും പെട്ടെന്ന് റോഡ് ഗതാഗത യോഗ്യമാക്കുകയും ചെയ്യണമെന്ന് ആവശ്യപ്പെട്ടായിരുന്നു ഉപരോധസമരം സംഘടിപ്പിച്ചത്. യൂത്ത് ലീഗ് നിയോജക മണ്ഡലം ജനറൽ സെക്രട്ടറി ഷബീർ എടയന്നൂർ സമരം ഉദ്ഘാടനം ചെയ്തു. തുടർന്നും ഓഫീസ് ഉപരോധിച്ചതോടെ പോലീസും പ്രവർത്തകരും തമ്മിൽ ഉന്തും തള്ളുമായി. ഇതോടെ നേതാക്കളെയും പ്രവർത്തകരെയും മട്ടന്നൂർ പോലീസ് അറസ്റ്റ് ചെയ്തു നീക്കുകയായിരുന്നു. താഹ കൂടാളി അധ്യക്ഷത വഹിച്ചു. ഹാരിസ് ശിവപുരം പ്രസംഗിച്ചു. തകർച്ചയ്ക്കു കാരണക്കാരായവർക്കെതിരെ ശക്തമായ നിയമനടപടി സ്വീകരിക്കുന്നതുവരെ പ്രക്ഷോഭവുമായി യൂത്ത് ലീഗ് മുന്നോട്ടുപോകുമെന്ന് നേതാക്കൾ അറിയിച്ചു.

പഴശി കനാലിന്‍റെ സംരക്ഷണ ഭിത്തിയിലും കോൺക്രീറ്റ് റോഡിലും വീണ്ടും തകർച്ച

മട്ടന്നൂർ: ഒരു കോടിയോളം രൂപ ചെലവിട്ടു നിർമിച്ച പഴശി കനാലിന്‍റെ സംരക്ഷണ ഭിത്തിയിലും കോൺക്രീറ്റ് റോഡിലും വീണ്ടും തകർച്ചയുണ്ടായി. കഴിഞ്ഞ ദിവസം തകർന്ന കോൺക്രീറ്റ് റോഡാണ് നെടുകെ പിളർന്നത്. തലശേരി റോഡിൽ നിന്ന് വിമാനത്താവള ഭാഗത്തേക്കു പോകുന്ന കാര കനാൽ റോഡിന്‍റെ അരിക് ഇടിഞ്ഞതിനെ തുടർന്നാണു നവീകരണം നടത്തിയത്. 92 ലക്ഷം രൂപയാണു പ്രവൃത്തിക്കായി അനുവദിച്ചിരുന്നത്. സംരക്ഷണ ഭിത്തിയിൽ വിള്ളൽ വിഴുകയും കോൺക്രീറ്റ് റോഡ് പൂർണമായും തകരുകയും ചെയ്യുകയായിരുന്നു. ഇന്നലെ വീണ്ടും തകർച്ചയുണ്ടാകുകയായിരുന്നു. ഒരുമാസം മുമ്പാണ് പദ്ധതിയുടെ പ്രവൃത്തി പൂർത്തീകരിച്ചത്. സ്ഥലം നഗരസഭാ ചെയർമാൻ എൻ. ഷാജിത്ത് സന്ദർശിച്ചു. ജലസേചന വകുപ്പിന്‍റെ നേതൃത്വത്തിൽ നിർമിച്ച പഴശി ഇറിഗേഷൻ കനാലിന്‍റെ ഭിത്തി തകരാനിടയായ സാഹചര്യം അടിയന്തരമായി പരിശോധിച്ച് കുറ്റക്കാർക്കെതിരെ നടപടി സ്വീകരിക്കണമെന്ന് അദ്ദേഹം പറഞ്ഞു.

കെഎസ്ആർടിസി ബസ് നിയന്ത്രണം വിട്ട് തോട്ടിലേക്ക് ചെരിഞ്ഞു

തലശേരി: ദേശീയ പാതയിൽ പുന്നോൽ കുറിച്ചിയിൽ കെഎസ്ആർടിസി സ്വിഫ്റ്റ് ബസ് നിയന്ത്രണം വിട്ട് തെന്നിമാറി റോഡിരികിലെ തോട്ടിലേക്ക് ചെരിഞ്ഞു. വെള്ളിയാഴ്ച പുലർച്ചെയായിരുന്നു അപകടം. യാത്രക്കാർ പരിക്കേൽക്കാതെ രക്ഷപ്പെട്ടു. തിരുവനന്തപുരത്ത് നിന്ന് തലശേരി ഭാഗത്തേക്ക് വരികയായിരുന്ന ബസ് എതിർദിശയിൽ നിന്ന് വരികയായിരുന്ന കാറിനെ വെട്ടിക്കാൻ ശ്രമിക്കുന്നതിനിടെ നിയന്ത്രണം നഷ്ടപ്പെടുകയായിരുന്നു. യാത്രക്കാരെ മറ്റൊരു വാഹനത്തിൽ തലശേരിയിൽ എത്തിച്ചു. ഉച്ചയോടെ ക്രെയിൻ ഉപയോഗിച്ചാണ് അപകടസ്ഥലത്ത് നിന്ന് ബസ് നീക്കിയത്.

ഉന്നതവിജയികൾക്ക് ചെറുപുഴയിൽ ദീപികയുടെ ആദരം

ചെറുപുഴ: പത്താംക്ലാസ്, പ്ലസ് ടു പരീക്ഷകളിൽ മികച്ച വിജയം നേടിയ ചെറുപുഴ മേഖലയിലെ വിദ്യാർഥികൾക്ക് മലയാളത്തിലെ പ്രഥമ ദിനപത്രമായ ദീപികയുടെ ആദരവ്. വിദേശ വിദ്യാഭ്യാസ രംഗത്തെ പ്രമുഖരായ സാന്‍റാ മോണിക്ക സ്റ്റഡി എബ്രോഡ്, ബംഗളൂരു സെന്‍റ് ബെനഡിക്ട്സ് ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് എന്നിവരുമായി സഹകരിച്ച് ചെറുപുഴ സെന്‍റ് മേരീസ് ഫൊറോന പാരിഷ് ഹാളിൽ "ആദരം -2025' എന്ന പേരിൽ സംഘടിപ്പിച്ച പരിപാടി ആർച്ച്ബിഷപ് എമരിറ്റസ് മാർ ജോർജ് വലിയമറ്റം ഉദ്ഘാടനം ചെയ്തു. ഉന്നത വിജയം നേടി ലോകത്തിനും രാജ്യത്തിനും വിലപ്പെട്ട സംഭാവനകൾ നൽകേണ്ടവരാണ് ഓരോ വിദ്യാർഥികളുമെന്നും ഇപ്പോഴത്തെ വിജയം അതിന്‍റെ തുടക്കമാണെന്നും ആർച്ച്ബിഷപ് പറഞ്ഞു. ചെറുപുഴ സെന്‍റ് മേരീസ് ഫൊറോന വികാരി ഫാ. ഫിലിപ്പ് ഇരുപ്പക്കാട്ട് അധ്യക്ഷത വഹിച്ചു. ദീപിക കണ്ണൂർ റസിഡന്‍റ് മാനേജർ ഫാ. ജോബിൻ വലിയപറമ്പിൽ, ചെറുപുഴ പഞ്ചായത്ത് വൈസ് പ്രസിഡന്‍റ് റെജി പുളിക്കൽ, ദീപിക കണ്ണൂർ സീനിയർ സർക്കുലേഷൻ മാനേജർ ജോർജ് തയ്യിൽ, സാന്‍റാ മോണിക്ക സ്റ്റഡി എബ്രോഡ് കാഞ്ഞങ്ങാട് ബ്രാഞ്ച് മാനേജർ ക്രിസ്റ്റോ ജേക്കബ്, ചെമ്പേരി വിമൽ ജ്യോതി എൻജിനിയറിംഗ് കോളജ് പിആർഒ സെബാസ്റ്റ്യൻ പുത്തൻപുര, പ്ലസ് ടു സയൻസ് പരീക്ഷയിൽ 1200ൽ 1200 മാർക്ക് വാങ്ങിയ കോഴിച്ചാൽ ഗവ. ഹയർ സെക്കൻഡറി സ്കൂളിലെ പോൾസൻ ജെ. പോൾ, ചെറുപുഴ സെന്‍റ് മേരീസ് ഫൊറോന പള്ളി അസിസ്റ്റന്‍റ് വികാരി ഫാ. ബോഡ്‌വിൻ അട്ടാറിയ്ക്കൽ, പി.എം. ബാബു എന്നിവർ പ്രസംഗിച്ചു. മികച്ച വിജയം കരസ്ഥമാക്കിയ സെന്‍റ് സാവിയോ ഇംഗ്ലീഷ് മീഡിയം സ്കൂൾ വള്ളിക്കടവ്, സെന്‍റ് എലിസബത്ത് ഇംഗ്ലീഷ് മീഡിയം സ്കൂൾ വെള്ളരിക്കുണ്ട്, സെന്‍റ് ജൂഡ് എച്ച്എസ് വെള്ളരിക്കുണ്ട്, ഓക്സിലിയം സ്കൂൾ വരക്കാട്, സെന്‍റ് മേരീസ് ഇംഗ്ലീഷ് മീഡിയം സ്കൂൾ ചിറ്റാരിക്കാൽ, സെന്‍റ് തോമസ് ഹയർ സെക്കന്‍ഡറി സ്കൂൾ തോമാപുരം, സെന്‍റ് ജോസഫ് സ്കൂൾ ചെറുപുഴ, സെന്‍റ് മേരീസ് ഹൈസ്കൂൾ ചെറുപുഴ, ഗവ. ഹയർ സെക്കൻഡറി സ്കൂൾ കോഴിച്ചാൽ എന്നീ സ്കൂളുകളെയും ആദരിച്ചു.

കാണാതായ യുവാവിന്‍റെ മൃതദേഹം കിണറ്റിൽ

പയ്യന്നൂർ: നാലുദിവസം മുമ്പ് കാണാതായ യുവാവിന്‍റെ മൃതദേഹം ഉപയോഗശൂന്യമായ കിണറ്റിൽ കണ്ടെത്തി. രാമന്തളി എട്ടിക്കുളം പള്ളിക്കോളനിയിലെ എം.കെ. ഫസലു റഹ്‌മാനെ (35) ആണ് ഇന്നലെ രാവിലെ 10.30 ഓടെ കിണറ്റിൽ മരിച്ചനിലയിൽ കണ്ടെത്തിയത്. പള്ളിക്കോളനിയുടെ താഴെയുള്ള ആൾമറയില്ലാത്ത ഉപയോഗശൂന്യമായ കിണറ്റിലാണ് ഇയാളുടെ മൃതദേഹം കണ്ടെത്തിയത്. പരിസരത്തെ ദുർഗന്ധത്തിന്‍റെ ഉറവിടം തേടിയെത്തിയവരാണ് കിണറിൽ മൃതദേഹം കണ്ടെത്തിയത്. ഇയാൾ ചെറിയ മാനസികാസ്വാസ്ഥ്യം പ്രകടിപ്പിച്ചിരുന്നതായി പരിസരവാസികൾ പറയുന്നു. മൃതദേഹത്തിന് മൂന്നു ദിവസത്തോളം പഴക്കമുണ്ടെന്ന് പോലീസ് പറഞ്ഞു. പയ്യന്നൂർ പോലീസ് ഇൻക്വസ്റ്റ് നടത്തിയ മൃതദേഹം കണ്ണൂർ പരിയാരം ഗവ. മെഡിക്കൽ കോളജിലെ പോസ്റ്റുമോർട്ടത്തിനുശേഷം സംസ്കരിച്ചു. എട്ടിക്കുളം പള്ളിക്കോളനിയിലെ അബ്‌ദുറഹിമാൻ-പരേതയായ സുബൈദ ദന്പതികളുടെ മകനാണ് അവിവാഹിതനായ ഫസലുറഹ്‌മാൻ. സഹോദരങ്ങൾ: റാഷിദ്, റഷീദ.

റോഡുപണി വേഗത്തിലാക്കണം: ബിജെപി

പയ്യാവൂർ: കിഫ്ബി പദ്ധതി മുഖേന നവീകരണം നടത്തി വരുന്ന ശ്രീകണ്ഠപുരം-ചെമ്പന്തൊട്ടി-നടുവിൽ റോഡിൽ താത്കാലിക പാലം മഴയിൽ ഒലിച്ചു പോയതിനെ തുടർന്നുണ്ടായ യാത്രാ ദുരിതം പരിഹരിക്കാൻ ബന്ധപ്പെട്ട അധികാരികൾ അടിയന്തര നടപടികൾ സ്വീകരിക്കണമെന്ന് ബിജെപി ഇരിക്കൂർ നിയോജക മണ്ഡലം കമ്മിറ്റി. എഫ്എംബി പ്രകാരം താലൂക്ക് സർവെയർ അളന്ന് തിട്ടപ്പെടുത്തിയ കൊട്ടൂർവയലിൽ റോഡ് പണിക്ക് തടസമായ കെട്ടിടത്തിന്‍റെ ഭാഗം കരാറുകാരനോ ഉടമസ്ഥനോ പൊളിച്ചു നീക്കാതെ ഓവുചാലിന്‍റെ പണി പൂർത്തിയാക്കാനാകില്ല. ഇക്കാരണത്താൽ ഈ ഭാഗത്തെ പ്രവൃത്തി മന്ദഗതിയായി. ചെമ്പന്തൊട്ടിയിലെ ഒരു സ്വകാര്യ വ്യക്തിയുടെ ഉടമസ്ഥതയിലുള്ള കെട്ടിടം കരാറുകാരൻ പൊളിക്കട്ടെ എന്ന് ഉടമയും ഉടമ പൊളിക്കട്ടെ എന്ന് കരാറുകാരനും തമ്മിൽ തർക്കത്തിലാണ്. ഇത്തരം സാഹചര്യങ്ങളിൽ ഉത്തരവാദപ്പെട്ട അധികാരികൾ എത്രയും വേഗം നടപടികൾ സ്വീകരിക്കണമെന്ന് ബിജെപി ഇരിക്കൂർ നിയോജക മണ്ഡലം പ്രസിഡന്‍റ് സഞ്ജു കൃഷ്ണകുമാർ ആവശ്യപ്പെട്ടു.

യാത്രയയപ്പ് നൽകി

ചെറുപുഴ: ചെറുപുഴ പോലീസ് സ്റ്റേഷനിൽ നിന്നു വിരമിക്കുന്ന എസ്ഐയും പയ്യന്നൂർ കാനായി സ്വദേശിയുമായ എം. നാരായണൻ നമ്പൂതിരിക്ക് യാത്രയയ്പ്പ് നല്കി. ചെറുപുഴ വ്യാപാര ഭവൻ ഓഡിറ്റോറിയത്തിൽ നടന്ന ചടങ്ങ് പയ്യന്നൂർ സബ് ഡിവിഷൻ ഡപ്യൂട്ടി സൂപ്രണ്ട് ഓഫ് പോലീസ് കെ. വിനോദ്കുമാർ ഉദ്ഘാടനം ചെയ്ത് ഉപഹാരം സമ്മാനിച്ചു. ചെറുപുഴ പോലീസ് സ്‌റ്റേഷൻ സബ് ഇൻസ്പെക്ടർ രൂപാ മധുസൂദനൻ അധ്യക്ഷത വഹിച്ചു. എസ്ഐ സി.പി. ഗംഗാധരൻ, കെ.വി. ജയേഷ്, പെരിങ്ങോം എസ്ഐ കെ. ഖദീജ, എസ്ഐ എം. പ്രമോദ്കുമാർ, എഎസ്ഐ പി. തങ്കമണി, സറ്റേഷൻ റൈറ്റർ കെ.സി. രതീഷ് എന്നിവർ പ്രസംഗിച്ചു. എം. നാരായണൻ നമ്പൂതിരി മറുപടി പ്രസംഗം നടത്തി. ചെറുപുഴ കൃഷിഭവൻ ഉദ്യോഗസ്ഥരും എസ്ഐ നാരായണൻ നമ്പൂതിരിയ്ക്ക് ഉപഹാരം നൽകി. കൃഷി ഓഫീസർ പി.അഞ്ജു, അസിസ്റ്റന്‍റ് കൃഷി ഓഫീസർ പി. ഗീത, കൃഷി അസിസ്റ്റന്‍റ് സുരേഷ് കുറ്റൂർ എന്നിവർ നേതൃത്വം നൽകി. ചടങ്ങിൽ പ്ലസ് ടു, എസ്എസ്എൽസി പരീക്ഷയിൽ മികച്ച വിജയം നേടിയ ഐശ്വര്യ ബാബു, ദേവാംഗന വിനോദ് എന്നിവരേയും യുഎസ്എസ് നേടിയ ആരുഷി വിനോദിനേയും അനുമോദിച്ചു.

ജലജീവൻമിഷൻ പ്രവൃത്തി യാത്രികർക്ക് ദുരിതമായി

പയ്യാവൂർ: മലയോര പാതയിൽ പയ്യാവൂർ പൊന്നുംപറമ്പിൽ ജലജീവൻമിഷന് വേണ്ടി കുഴിച്ച കുഴി യാത്രക്കാർക്കും വ്യാപാരികൾക്കും തീരാ ദുരിതമായി. കുഴിയെടുത്തവർ അശാസ്ത്രീയ രീതിയിൽ മണ്ണിട്ട് മൂടിയത് കാരണം നൂറ്റമ്പത് മീറ്ററോളം റോഡ് തകർന്നു ഗർത്തം രൂപപ്പെട്ടു. ഇതോടെ പയ്യാവൂർ, ആലക്കോട്, ചെറുപുഴ, ഭാഗത്തേക്ക് വരുന്ന വാഹനങ്ങൾ അപകടത്തിൽപ്പെടു ന്നതും പതിവായി. കഴിഞ്ഞ ദിവസം രാത്രി കുഴിയിൽ വീണ കാർ നാട്ടുകാരാണ് പുറത്തെത്തിച്ചത്. പൊന്നുംപറമ്പ് വളവു മുതൽ പെട്രോൾപമ്പ് വരെയാണ് പലയിടത്തായി ഗർത്തം രൂപപ്പെട്ടത്. ഗർത്തം രൂപപ്പെട്ട ഭാഗത്ത് വാഴകൾ നട്ടുള്ള പ്രതിഷേധവും കാണാം. വ്യാപാരികൾ പഴയ പൈപ്പുകളും മറ്റും സ്ഥാപിച്ച് മുന്നറിയിപ്പും നൽകിയിട്ടുണ്ട്. റോഡിന്‍റെ അരികി ലെ ഗർത്തം കാണാതെ കാറുകളടക്കം അപകടത്തിൽപ്പെടുകയാണ്. പൊന്നുംപറമ്പ് ജംഗ്ഷനിലെ വ്യാപാരികൾ പ്രതിഷേധവുമായി രംഗത്തിറങ്ങിയതോടെ ജൽജീവൻ മിഷൻ അധികൃതർ സ്ഥാപന ങ്ങൾക്ക് മുന്നിൽ മെറ്റൽ ഇറക്കിയാണ് താത്കാലിക പരിഹാരം ഉണ്ടാക്കിയത്.

പൂർവ വിദ്യാർഥി-അധ്യാപക സൗഹൃദ സംഗമം നടത്തി

കുടിയാന്മല: കുടിയാന്മല മേരി ക്വീൻസ് ഹൈസ്കൂളിലെ 1986-87 ബാച്ച് പത്താം ക്ലാസ് സഹപാഠികളുടെയും അധ്യാപകരുടേയും സൗഹൃദ സംഗമം സ്കൂൾ ഓഡിറ്റോറിയത്തിൽ നടന്നു. സുവർണ ജൂബിലി ആഘോഷ നിറവിലെത്തിയ കുടിയാന്മല മേരി ക്വീൻസ് ഹൈസ്കൂളിന്‍റെ ഒമ്പതാമത്തെ പത്താം ക്ലാസ് ബാച്ചാണ് "ബഡീസ് -87.' അന്ന് കേരളത്തിൽ നടത്തിയ വിദ്യാഭ്യാസ പരിഷ്കരണത്തിന്‍റെ ഫലമായി ചരിത്രത്തിൽ "പാള' പുസ്തകം എന്നറിയപ്പെട്ട വലിയ പുസ്തകങ്ങളും "എല്ലില്ലാത്ത' എസ്എസ്എൽസിയുടെ ആദ്യത്തെയും അവസാനത്തെയും "എസ്എസ്‌സി' സർട്ടിഫിക്കറ്റ് ബുക്കും 1200ൽ മാർക്കുകളും ലഭിച്ച ഏക ബാച്ചാണ് 1987ലെ പത്താം ക്ലാസുകാരുടേത്. "അടി പാപ്പി കൂട്ടമണി' എന്ന പേരിൽ സംഘടിപ്പിച്ച സൗഹൃദ സംഗമത്തിൽ അന്നത്തെ സഹപാഠികളും അധ്യാപകരും അടക്കം 110 പേർ പങ്കെടുത്തു. മൺമറഞ്ഞുപോയ അധ്യാപകർക്കും സഹപാഠികൾക്കും സ്മരണാഞ്ജലികളർപ്പിച്ച പുഷ്പാർച്ചനയോടെയാണു സമ്മേളനം ആരംഭിച്ചത്. സ്കൂൾ മാനേജരും ഇടവക വികാരിയുമായ ഫാ. പോൾ വള്ളോപ്പിള്ളി സംഗമം ഉദ്ഘാടനം ചെയ്തു. 38 വർഷങ്ങൾക്കു മുമ്പത്തെ സ്കൂൾ ലീഡറും ബഡീസ് 87ന്‍റെ ഇപ്പോഴത്തെ ഗ്രൂപ്പ് ലീഡറുമായ ബിജു ഫ്രാൻസിസ് അധ്യക്ഷത വഹിച്ചു. സഹപാഠി പ്രതിനിധി എൻ.പി. റോയി ആമുഖ പ്രഭാഷണം നടത്തി. അധ്യാപകർക്ക് സ്നേഹാദരവ് നൽകുന്ന ഗുരുവന്ദനവും നടന്നു. സ്കൂൾ മുഖ്യാധ്യാപകൻ സുനിൽ ജോസഫ്, ഫാത്തിമ യുപി സ്കൂൾ മുൻ മുഖ്യാധ്യാപകൻ സി.ഒ. ജേക്കബ്, 1986-87 വർഷത്തിൽ ക്ലാസ് അധ്യാപകരായിരുന്ന മാത്യു തെള്ളിയിൽ, എൽസി പോൾ, സി.എസ്. തോമസ്, വിദ്യാർഥി പ്രതിനിധികളായ ടി.സി. ജോൺസൺ, കെ.ജെ. ബെസി, റെജി തോമസ് എന്നിവർ പ്രസംഗിച്ചു. സഹപാഠികൾ അവതരിപ്പിച്ച വിവിധ കലാപരിപാടികളും സ്നേഹ വിരുന്നുമുണ്ടായിരുന്നു. സ്കൂളിന്‍റെ സുവർണ ജൂബിലി സ്മാരകമായി സ്കൂളിന് പുതിയ കമാനവും ഗേറ്റും നിർമിച്ചു നൽകുമെന്ന് ബഡീസ് 87 ന്‍റെ ഗ്രൂപ്പ് ലീഡർ ബിജു ഫ്രാൻസിസ് അറിയിച്ചു.

മണ്ണിടിച്ചിൽ കുപ്പത്ത് വൈദ്യുത തൂണുകൾ നിലം പതിച്ചു

തളിപ്പറമ്പ്: കുപ്പത്ത് വൈദ്യുത തൂണുകൾ നിലം പതിച്ചു. കനത്ത മഴയെ തുടർന്ന് ദേശീയ പാത പ്രവൃത്തി നടക്കുന്ന കുപ്പം കപ്പണത്തട്ടിൽ സിമന്‍റ് പ്ലാസ്റ്റർ ചെയ്ത ഭാഗത്തെ കഴിഞ്ഞ ദിവസം മണ്ണിടിച്ചിൽ ഉണ്ടായ സ്ഥലത്തെ തൂണാണ് താഴേക്ക് പതിച്ചത്. സമീപത്ത് തന്നെയുള്ള ഫർണിച്ചർ സ്ഥാപനത്തിലേക്കുള്ള ത്രീ ഫെയ്സ് ലൈൻ കടന്നു പോകുന്ന തൂണാണ് തകർന്നത്. കുപ്പം കപ്പണത്തട്ടിൽ മണ്ണിടിച്ചിൽ തുടങ്ങിയപ്പോൾ തന്നെ അപകട സാധ്യത മുൻനിർത്തി ഇതുവഴിയുള്ള വൈദ്യുത വിതരണം ഒഴിവാക്കുകയും ഫർണിച്ചർ സ്ഥാപനത്തിലേക്ക് കേബിൾ വഴി കണക്‌ഷൻ നൽകുകയും ചെയ്തിരുന്നതിനാൽ വലിയ അപകടം ഒഴിവായി. അതേ സമയം മണ്ണിടിച്ചിൽ, വെള്ളം കുത്തിയൊലിക്കൽ എന്നിവ തടയാനുള്ള പ്രവൃത്തി പുരോഗമിക്കുകയാണ്. കുപ്പം കപ്പണത്തട്ട് ദേശീയപാത വഴിയുള്ള ഗതാഗതം പുനസ്ഥാപിക്കുന്ന കാര്യം ഇന്ന് പരിശോധിക്കും.

കാറ്റിലും മഴയിലും വീടുകൾ തകർന്നു

ചെറുപുഴ: കാറ്റിലും മഴയിലും വീട് തകർന്നു. തിരുമേനി ചാത്തമംഗലത്തെ വെളിയാനിപറമ്പിൽ വർഗീസിന്‍റെ വീടാണ് തകർന്നു വീണത്. ഇന്നലെ രാവിലെ 10 ഓടെയാണ് ഓടിട്ട വീട് പൂർണമായും തകർന്നത്. അപകട സമയത്ത് വീട്ടിൽ ആരും ഉണ്ടായിരുന്നില്ല. ചെറുപുഴ പഞ്ചായത്തിലെ മരുതംപാടി മലയിലെ ജയിംസ് മേക്കലാത്ത്, ബെന്നി മേക്കലാത്ത്, ഷിജി ജോർജ്, ടോജി ജോർജ് എന്നീ സഹോദരൻമാരുടെ കൃഷിയിടങ്ങളിലും നാശനഷ്ടമുണ്ടായി. കശുമാവ്, കവുങ്ങ്, വാഴ, റബർ, കൊക്കോ മുതലായ നൂറ് കണക്കിന് വൃക്ഷങ്ങളാണ് നിലം പൊത്തിയത്. പെരുമ്പടവ്: ബുധനാഴ്ച രാത്രി ഉണ്ടായ ശക്തമായ മഴയിൽ വീട് പൂർണമായും തകർന്നു. ഏര്യം ഞണ്ടമ്പലത്തെ കല്ലേൻ കുഞ്ഞിരാമന്‍റെ വീടാണ് മേൽക്കൂരയും ചുമരും ഉൾപ്പെടെ തകർന്നത്. കുടുംബാംഗങ്ങൾ വീട്ടിൽ കിടന്നുറങ്ങുമ്പോഴാണ് വലിയ ശബ്ദത്തോടെ വീട് തകർന്നത്. 70 വയസ് പ്രായമായ കുഞ്ഞിരാമനും ഭാര്യ സരോജിനിയും നാലു മക്കളും വീട്ടിൽ ഉണ്ടായിരുന്നു. പട്ടികജാതി കുടുംബമായ ഇവരുടെ വീട് എത്രയും വേഗം പുനർനിർമിക്കാനുള്ള നടപടി ഉണ്ടാകണമെന്ന് വീട് സന്ദർശിച്ച പഞ്ചായത്ത് അംഗം ജംഷീർ ആലക്കാട് അധികൃതരോട് ആവശ്യപ്പെട്ടു. വീട്ടുകാരെ മാറ്റി പാർപ്പിച്ചു.

തകർന്ന അപ്രോച്ച് റോഡുകൾ സന്ദർശിച്ച് ജനപ്രതിനിധികൾ

ചെമ്പന്തൊട്ടി: കനത്ത മഴയെ തുടർന്ന് പൂർണമായും തകർന്ന കൊക്കായി, ചെമ്പന്തൊട്ടി പാലങ്ങളുടെ അപ്രോച്ച് റോഡുകൾ സജീവ് ജോസഫ് എംഎൽഎയുടെ നേതൃത്വത്തിൽ ജനപ്രതിനിധിസംഘം സന്ദർശിച്ചു. മഴയുടെ തീവ്രത കാരണം റോഡിന്‍റെ വലിയ ഭാഗങ്ങൾ ഒഴുകിപ്പോയിരുന്നു. പ്രശ്നം ഗുരുതരമായ സാഹചര്യത്തിൽ ബന്ധപ്പെട്ട വകുപ്പുകളുടെ ശ്രദ്ധയിൽ ഉടൻ കാര്യങ്ങൾ പെടുത്തി റോഡിന്‍റെ പുനർനിർമാണം ആരംഭിക്കാൻ നടപടികൾ കൈക്കൊള്ളുമെന്ന് എംഎൽഎ അറിയിച്ചു. നഗരസഭാധ്യക്ഷ കെ.വി. ഫിലോമിന, വൈസ് ചെയർമാൻ കെ. ശിവദാസൻ, ഫാ. ആന്‍റണി മഞ്ഞളാംകുന്നേൽ, കെ.സി. ജോസഫ്. കെ.ജെ. ചാക്കോ, വർഗീസ് വയലാമണ്ണിൽ, ബിനു ഇലവുങ്കൽ, ജോർജ് ആലപ്പാട്, ബെന്നറ്റ്, തോമസ് കുര്യൻ, കിഫ്ബി എക്സിക്യൂട്ടിവ് എൻജിനിയർ സജിത്ത്, പ്രോജക്ട് എൻജിനിയർ ആതിര, കോൺട്രാക്ടർ പ്രതിനിധി മർസുഖ് തുടങ്ങിയവരും ജനപ്രതികൾക്കൊപ്പം ഉണ്ടായിരുന്നു.

കാറ്റിലും മഴയിലും നൂറോളം കുലച്ച നേന്ത്രവാഴകൾ നിലംപൊത്തി

ഇരിട്ടി: ചുഴലിക്കാറ്റും മഴയും തന്‍റെ അധ്വാനം ഫലം മുഴുവൻ നശിപ്പിച്ചതോടെ ഇത്തവണയും നഷ്ടം താങ്ങാനാവാതെ വാഴ കർഷകൻ ജോണി യോയാക്ക്. അദ്ദേഹത്തിന്‍റെ കുലച്ച 100 ഓളം നേന്ത്രവാഴകളാണ് നിലംപൊത്തിയത്. കഴിഞ്ഞ വർഷം 2000 ത്തോളം വാഴകൾ നശിച്ച് സർക്കാരിൽ നിന്നുള്ള നഷ്ടപരിഹാവും പ്രതീക്ഷിച്ചിരിക്കുന്നതിനിടയിലാണ് വീണ്ടും നാശം ഉണ്ടായിരിക്കുന്നത്. ഇരിട്ടി എടക്കാനും റോഡിൽ സ്വകാര്യ വ്യക്തിയുടെ പാട്ടത്തിനെടുത്ത സ്ഥലത്ത് നടത്തിയ കൃഷിയിടത്തിലാണ് കാറ്റ് നാശം വിതച്ചത്. കഴിഞ്ഞ വർഷത്തെ അനുഭവത്തിൽ ഇക്കുറി നേരത്തെ തന്നെ കാറ്റിനെ പ്രതിരോധിക്കാനുള്ള സംവിധാനം ഒരുക്കിയിരുന്നു. ഇതിനെയെല്ലാം തകർത്തുകൊണ്ടാണ് ഒരു പ്രദേശമാകെ കാറ്റ് ആഞ്ഞ് വീശിയത്. വാഴകൾ നിലം പൊത്തുന്നത് കണ്ടതോടെ സ്വയം രക്ഷതേടി കൃഷിയിടത്തിൽ നിന്നും ഓടി രക്ഷപ്പെടുക‌യായിരുന്നുവെന്ന് ജോണി പറഞ്ഞു.1500 ഓളം വാഴകളാണ് നട്ടത്. 15 മുതൽ 25 കിലോവരെ തൂക്കം വരുന്ന വാഴക്കൂലകളാണ് നഷ്ടപ്പെട്ടവയിൽ ഭൂരിഭാഗവും. പെരുംപറമ്പിൽ മറ്റൊരു സ്ഥലത്ത് പാട്ടത്തിനെടുത്ത് നട്ട വാഴകൃഷിയിൽ 250 ഓളം വാഴകൾ നേരത്തെ കാട്ടു പന്നി നശിപ്പിച്ചിരുന്നു. കിട്ടാനുള്ളത് 2022 മുതലുള്ള നഷ്ടപരിഹാരം 2022 മുതൽ പ്രകൃതി ക്ഷോഭത്തിൽ ഉണ്ടായ കൃഷി നാശത്തിനുള്ള നഷ്ടപരിഹാരം ജോണിക്ക് ലഭിക്കാനുണ്ട്. നഷ്ടം ഉണ്ടാകുമ്പോൾ കൃഷി വകുപ്പ് സംഘം സ്ഥലത്തെത്തി നഷ്ടപ്പെട്ട വിളകളുടെ കണക്കെടുത്ത് പോകും. പിന്നീട് പലതവണ കൃഷി ഓഫീസുകളിൽ കയറി ഇറങ്ങിയാലും നഷ്ടപരിഹാരം ലഭിക്കില്ല. ഫണ്ട് കിട്ടുന്ന മുറയ്ക്ക് നിങ്ങൾക്കുള്ള നഷ്ടപരിഹാരം അക്കൗണ്ടിൽ ലഭ്യമാക്കുമെന്ന കത്താണ് ജോണിക്ക് ലഭിക്കുന്നത്. കഴിഞ്ഞ വർഷം മാത്രം അഞ്ചുലക്ഷത്തിൽ കൂടുതൽ നഷ്ടം ഉണ്ടായിട്ടുണ്ട്. ഇൻഷ്വർ ചെയ്ത വാഴകൾക്കുള്ള നഷ്ടപരിഹാരം ഒരു വർഷത്തിനുള്ളിൽ ലഭിക്കുന്നുണ്ടെന്നും ജോണി പറഞ്ഞു. നൂറുരൂപയാണ് കുലച്ച വാഴയ്ക്ക് പ്രകൃതി ദുരിതാശ്വസ നിധിയിൽ നിന്നുള്ള നഷ്ടപരിഹാരം. തെങ്ങിന് കുലച്ചതിന് 700 ഉം കുലയ്ക്കാത്തതിന് 350 രൂപയാണ് നല്കുക. ഇതാണ് വർഷങ്ങളായി കുടിശികയാക്കുന്നത്.

ഉരുപ്പുംകുറ്റി, കരിക്കോട്ടക്കരി കുരിശുമല പ്രദേശങ്ങളിൽ കാട്ടാന ശല്യം രൂക്ഷം

ഇരിട്ടി: ഉരുപ്പുംകുറ്റിയിലും കരിക്കോട്ടക്കരി കുരിശുമല പ്രാദേശങ്ങളിൽ കാട്ടാന കൂട്ടമിറങ്ങി വ്യാപകമായി കൃഷി നശിപ്പിക്കുന്നു. രണ്ടാഴ്ചയിലധികമായി പദേശത്ത് ആനക്കൂട്ടം വ്യാപക കൃഷി നാശമാണ് വരുത്തുന്നത്. കൃഷിയെ ആശ്രയിച്ച് ഉപജീവനം നടത്തുന്നവരാണ് ഇതോടെ ഏറെ പ്രതിസന്ധിയിലായിരിക്കുന്നത്. ആറളം ഫാമിൽ നിന്നും തുരുത്തുന്ന ആനകളാണ് പ്രദേശത്തെത്തി കൃഷിനാശം വരുത്തുന്നതെന്ന് നാട്ടുകാർ ആരോപിച്ചു. വനം വകുപ്പിനെ വിവരം അറിയിക്കുന്പോൾ അധികൃതർ എത്തി പരിശോധന നടത്തി അപേക്ഷ സമർപ്പിക്കാൻ ആവശ്യപ്പെടുകയല്ലാതെ മറ്റൊന്നും ലഭിക്കാറില്ലെന്നും, കഴിഞ്ഞ വർഷം ഒരുലക്ഷം രൂപയുടെ നഷ്ടം സംഭവിച്ചപ്പോൾ 8000 രൂപയാണ് ആകെ നഷ്ടപരിഹാരം നല്കിയതെന്നും പ്രദേശവാസികൾ കുറ്റപ്പെടുത്തി. കഴിഞ്ഞ ദിവസം ഉരുപ്പുംകുറ്റിയിലെ കുന്നിനി സണ്ണിയുടെ മൂന്നു വർഷം പ്രായമായ 200 ഓളം കവുങ്ങിൻ തൈകളാണ് ആന നശിപ്പിച്ചത്. റബർ, തെങ്ങ്, കശുമാവ് തുടങ്ങി പ്രദേശത്തെ നിരവധി പേരുടെ കാർഷിക വിളകളും ആനക്കൂട്ടം നശിപ്പിച്ചു. കൂമൻന്തോട് കുരിശുമലയിലും കാട്ടനകൂട്ടം ഏക്കറു കണക്കിന് കൃഷിയാണ് നശിപ്പിച്ചത്. കുന്നേത്തടത്തിൽ റോബിന്‍റെ രണ്ട് ഏക്കർ കൃഷിയിടത്തിലെ കൃഷി ഏകദേശം പൂർണമായും കാട്ടാന കൂട്ടം നശിപ്പിച്ചു. റബർ, വാഴ, കശുമാവ് , തെങ്ങ്, കവുങ്ങ് തുടങ്ങി സർവ വിളകളും കാട്ടാനകൾ നശിപ്പിച്ചു. ബെന്നി ഈഴംകുന്നേൽ, അബിൻ ബെന്നി, ജിൻസി മാത്യു, റോബിൻ ചെറിയാൻ, അപ്പച്ചൻ പുത്തൻവീട്ടിൽ, ലൗലി പുത്തൻപറമ്പിൽ, അപ്പച്ചൻ പുത്തൻപറമ്പിൽ എന്നിവരുടെ കൃഷിയിടത്തിലും കൃഷി നശിപ്പിച്ചു. രണ്ടാഴ്ചമുന്പ് പ്രദേശത്തെ ഒരു വീട്ടിലെ വളർത്തുനായയെ പുലി പിടിച്ചിരുന്നുവെന്നാണ് നാട്ടുകാർ പറയുന്നത്. പകൽ സമയത്തപോലും കർഷകന് വന്യമൃഗങ്ങളെ ഭയന്ന് പുറത്തിറങ്ങാൻ പറ്റാത്ത സ്ഥിതിയാണ്.വന്യമൃഗ ശല്യത്തിൽ നിന്നും കർഷകരെ രക്ഷിക്കാൻ നടപടിയെടുക്കണമെന്നാണ് നാട്ടുകാരുടെ ആവശ്യം.

സണ്ണി ജോസഫിന് മലയോര മണ്ണിന്‍റെ ഉജ്ജ്വല വരവേൽപ്പ്

ഉളിക്കൽ: മഴ മാറി നിന്ന ഉളിക്കലിൽ കർഷക പുത്രനായ കെപിസിസി പ്രസിഡന്‍റ് സണ്ണി ജോസഫിനും കെപിസിസി വർക്കിംഗ് പ്രസിഡന്‍റ് ഷാഫി പറമ്പിൽ എംപിക്കും മലയോര മക്കളുടെ ഊഷ്മള സ്വീകരണം. മഴയെ വകവയ്ക്കതെ യുവാക്കളടക്കം നുറു കണക്കിനാളുകൾ കക്ഷി രാഷ്‌ട്രീയം മറന്ന് സ്വീകരണ പരിപാടിയിലെത്തി. മുൻ മന്ത്രി കെ.സി. ജോസഫ് സമ്മേളനം ഉദ്ഘാടനം ചെയ്തു. ഒടുവിൽ ഒഴിച്ചിട്ട കല്ല് സംഘടനയുടെ മൂലകല്ലായി മാറിയെന്ന ബൈബിളിലെ വാക്യത്തെ ഉദ്ധരിച്ചുകൊണ്ടാണ് സണ്ണി ജോസഫ് കെപിസിസി പ്രസിഡന്‍റ് ആയതിനെക്കുറിച്ച് കെ.സി. ജോസഫ് പറഞ്ഞത്. കോൺഗ്രസ് നേതൃത്വത്തിൽ സൗമ്യതയുടെ മുഖമാണ് സണ്ണി ജോസഫ്. അദ്ദേഹത്തിന്‍റെ നേതൃത്വത്തിൽ കോൺഗ്രസ് കേരളത്തിൽ അധികാരത്തിൽ തിരിച്ചെത്തുമെന്നും കെ.സി. ജോസഫ് പറഞ്ഞു. ഉളിക്കൽ പഞ്ചായത്ത് ഓഫീസ് പരിസരത്തു നിന്നും തുറന്ന വാഹനത്തിൽ വാദ്യമേളങ്ങളുടെ അകമ്പടിയോടെ റോഡ് ഷോ ആയാണ് നേതാക്കളെ സമ്മേളന നഗരിയിലേക്ക് ആനയിച്ചത്. മലയോരത്തിന്‍റെ വിവിധ ഭാഗങ്ങളിൽ നിന്നും എത്തിയ സ്ത്രീകളും പ്രായമായവരും കുട്ടികളും ഉൾപ്പെടെയുള്ളവർ അണി നിരന്ന റാലി നഗരവിഥികളിലൂടെ ആവേശം വിതറി ഉളിക്കൽ ബസ് സ്റ്റാൻഡിന് സമീപം പ്രത്യകം തയാറാക്കിയ വേദിയിൽ സമാപിച്ചു. സജീവ് ജോസഫ് എംഎൽഎ, നേതാക്കളായ മാർട്ടിൻ ജോർജ്, അബ്‌ദുൾകരീം ചേലേരി,പി.ടി. മാത്യു, കെ.എ. ഫിലിപ്പ്, റോജസ് സെബാസ്റ്റ്യൻ, ഫാ. ജോസഫ് കാവനാടി, ടി.എ. ജസ്‌റ്റിൻ, ബെന്നി തോമസ്, ബേബി തോലാനി, ജോസഫ് ആഞ്ഞിലിത്തോപ്പിൽ, ടോമി മൂക്കനോലി, ഡോ. എം.പി. ചന്ദ്രാഗദൻ, ടി.എൻ.എ. ഖാദർ, എസ്എൻഡിപി യൂണിയൻ ഇരിട്ടി താലൂക്ക് സെക്രട്ടറി പി.എൻ. ബാബു, കെ.വി. ഫിലോമിന, വി.പി. അബ്ദുൾ റഷീദ്, മുഹമ്മദ് ബ്ലാത്തൂർ, കെ.പി. ഗംഗാധരൻ, പി.കെ. ജനാർദനൻ, ബേബി ഓടംപള്ളി, എ. അഹമ്മദ് കുട്ടി ഹാജി, തോമസ് അപ്രേം, വി.വി. രാമകൃഷ്ണൻ, പി.എ. നസീർ, ചാക്കോ പാലക്കലോടി തുടങ്ങിയവർ പ്രസംഗിച്ചു. പാർട്ടി നേതൃത്വം മലയോര ജനതയ്ക്ക് നല്കിയ അംഗീകാരമെന്ന് സണ്ണി ജോസഫ് ഒരു സാധാരണ പാർട്ടി പ്രവർത്തകനായി തുടങ്ങി കേരളത്തിലെ കോൺഗ്രസ് പാർട്ടിയെ നയിക്കാൻ എന്നെ പ്രപ്തനാക്കിയത് മലയോര ജനതയുടെ സ്‌നേഹമാണെന്ന് കെപിസിസി പ്രസിഡന്‍റ് സണ്ണി ജോസഫ്. ഉളിക്കലിലെ അമ്മമാരും നാട്ടുകാരും നല്കിയ സ്‌നേഹവും പണവും കൊണ്ടാണ് എൽഎൽബി പഠനം പൂർത്തിയാക്കാൻ കഴിഞ്ഞത്. എന്നെ തിരുത്തിയതും തെറ്റുകൾ ചൂണ്ടികാണിച്ചതും എന്‍റെ ഉളിക്കലുകാർ തന്നെയാണ്. ഒരു കർഷക പുത്രൻ എന്നതിൽ ഉപരി മണ്ണിൽ പണിയെടുത്തും പട്ടിണി അനുഭവിച്ചും നടത്തിയ രാഷ്ട്രീയ പ്രവർത്തനത്തിന്‍റെ അംഗീകാരം കൂടിയാ ണിത്. കോളജിലെ സുഹൃത്തിന്‍റെ പക്കൽ നിന്നും കടം വാങ്ങിയ ഖദർ ഷർട്ടിൽ തുടങ്ങിയ രാഷ്ട്രീയ ജീവിതത്തിലെ എല്ലാ വിജയവും മലയോര ജനതയ്ക്കുള്ളതാണെന്നും സണ്ണി ജോഫഫ് പറഞ്ഞു.

കാണാതായ വയോധികയ്ക്കായി തെരച്ചിൽ നടത്തി അഗ്നിരക്ഷാസേന

കൂത്തുപറമ്പ്: കാണാതായ വയോധികയ്ക്കായി വീടിനു സമീപത്തെ തോട്ടിൽ തെരച്ചിൽ നടത്തി അഗ്നിരക്ഷാസേനയും നാട്ടുകാരും. പാട്യം മുതിയങ്ങയിലെ വിനോദ്‌ഭവനിൽ നളിനിയെയാണ് (78) ഇന്നലെ രാവിലെ മുതൽ കാണാതായത്. വീടിനു സമീപത്തെ തോട്ടിൽ വീണതാകാമെന്ന ബന്ധുക്കളുടെ സംശയത്തിൽ തോട്ടിൽ അഗ്നിരക്ഷാസേനയും സ്കൂബ ടീമും നാട്ടുകാരും ജനപ്രതിധികളും ഉദ്യോഗസ്ഥരും ചേർന്ന് തെരച്ചിൽ നടത്തിയെത്തിയെങ്കിലും കണ്ടെത്താനായില്ല. വീടിനു സമീപത്തെ തോടിന്‍റെ പാലം കടന്ന് തൊട്ടടുത്ത ബന്ധുവീട്ടിലേക്ക് ഇവർ പോകാറുണ്ടായിരുന്നുവത്രെ. ഇങ്ങിനെ പോകുന്നതിനിടെ അബദ്ധത്തിൽ വീണിട്ടുണ്ടാകുമെന്ന സംശയത്തെ തുടർന്നാണ് അഗ്നിരക്ഷാസേനയുടെ സഹായത്തോടെ തെരച്ചിൽ നടത്തിയത്. ഇന്നും വയോധികയ്ക്കായുള്ള തെരച്ചിൽ തുടരും. കണ്ണൂർ, തലശേരി, കൂത്തുപറമ്പ്, മട്ടന്നൂർ, പാനൂർ, പേരാവൂർ എന്നിവിടങ്ങളിലെ അഗ്നിരക്ഷാസേനയും സ്കൂബ ടീമുമാണ് തെരച്ചിൽ നടത്തിയത്. കെ.പി. മോഹനൻ എംഎൽഎയും സ്ഥലത്തെത്തിയിരുന്നു. ശക്തമായ മഴ തുടരുന്ന സാഹചര്യത്തിൽ തോട്ടിൽ അടിയൊഴുക്കു കൂടിയതിനാൽ വൈകുന്നരത്തോടെ തെരച്ചിൽ നിർത്തിവയ്ക്കുകയായിരുന്നു. ഇന്നു രാവിലെ തെരച്ചിൽ തുടരും. അവിവാഹിതയായ നളിനി വർഷങ്ങളായി മുതിയങ്ങയിലെ സഹോദരന്‍റെ വീട്ടിലായിരുന്നു താമസിച്ചു വന്നത്.

പഴശി കനാലിന്‍റെ സംരക്ഷണ ഭിത്തിയും കോൺക്രീറ്റ് റോഡും തകർന്നു

മട്ടന്നൂർ: 92 ലക്ഷം രൂപ ചിലവിൽ നിർമിച്ച പഴശി കനാലിന്‍റെ സംരക്ഷണ ഭിത്തിയും കോൺക്രീറ്റ് റോഡും തകർന്നു. മട്ടന്നൂർ കുഞ്ഞിപ്പള്ളി കനാൽ-കാര കനാൽ റോഡാണ് തകർന്നത്. തലശേരി റോഡിൽ നിന്ന് വിമാനത്താവള ഭാഗത്തേക്ക് പോകുന്ന റോഡിന്‍റെ അരിക് ഇടിഞ്ഞതിനെ തുടർന്നാണ് നവീകരണം നടത്തിയത്. 2022 ജൂലൈയിൽ കനാലിന്‍റെ എതിർവശത്തുള്ള ഓവുചാലിലൂടെ വെള്ളം കനാൽ ഭാഗത്തേക്ക് കുത്തിയൊഴുകിയതാണ് കനാൽഭിത്തിക്ക് ഭീഷണിയായത്. ഇതേ തുടർന്നാണ് കാര-തെളുപ്പ് ഭാഗങ്ങളിലേക്ക് പോകുന്ന റോഡ് തലശേരി റോഡിന് സമീപത്തായി ഇടിഞ്ഞ് താഴ്ന്നത്. സ്‌കൂൾ ബസുകൾ ഉൾപ്പടെ നിരവധി വാഹനങ്ങൾ പോകുന്ന റോഡ് അപകടഭീഷണിയിലായതിനെ തുടർന്നു കനാലിനോട് ചേർന്ന് 60 മീറ്റർ നീളത്തിലുള്ള സുരക്ഷാഭിത്തിയും ചേർന്നു കോൺക്രീറ്റ് റോഡും നിർമിച്ചത്. 92 ലക്ഷം രൂപയാണ് പ്രവൃത്തിക്കായി അനുവദിച്ചിരുന്നത്. സരക്ഷണ ഭിത്തിയിൽ നെടുകെ വിള്ളൽ വിഴുകയും കോൺക്രീറ്റ് റോഡ് പൂർണമായും തകരുകയും ചെയ്തു. ഒരു മാസം മുമ്പാണ് പദ്ധതിയുടെ പ്രവൃത്തി പൂർത്തികരിച്ചത്. നിർമാണത്തിലെ അപാകതയാണ് സംരക്ഷണ ഭിത്തിയും റോഡും തകർന്നതെന്നും വൻ അഴിമതിയാണ് ഇതിൽ നടന്നതെന്നും കോൺഗ്രസ് നേതാവ് കെ.വി. ജയചന്ദ്രൻ പറഞ്ഞു. യുഡിഎഫ് നേതാക്കളായ കെ.വി. ജയചന്ദ്രൻ, എ.കെ. രാജേഷ്, റഫീഖ് ബാവോട്ടുപാറ എന്നിവർ സന്ദർശിച്ചു.

എളയാവൂർ, വലിയന്നൂർ പ്രദേശങ്ങളിൽ ചുഴലിക്കാറ്റ്; ഇരുപത് വീടുകൾ തകർന്നു; ഒരാൾക്ക് പരിക്ക്

കണ്ണൂർ: വാരം, വലിയന്നൂർ, എളയാവൂർ പ്രദേശങ്ങളിൽ ഇന്നലെ വീശിയടിച്ച ശക്തമായ ചുഴലിക്കാറ്റിൽ വ്യാപകനാശനഷ്ടം. ഇരുപതോളം വീടുകൾക്കും സ്ഥാപനങ്ങൾക്കും നാശനഷ്ടം സംഭവിച്ചു. ഒരാൾക്ക് പരിക്കേറ്റു. ഇന്നലെ രാവിലെ ഏഴോടെയാണ് ചുഴലിക്കാറ്റ് ആഞ്ഞടിച്ചത്. വലിയന്നൂർ റോഡരികിലെ മുണ്ടേരി ചാപ്പയിലെ ഉത്തമന്‍റെ ലോട്ടറി സ്റ്റാൾ ചുഴലിക്കാറ്റിൽ പാറിപ്പോയി. സ്റ്റാളിലുണ്ടായിരുന്ന ഉത്തമന് തെറിച്ചുവീണ് മുഖത്തും കൈകാലുകൾക്കും പരിക്കേറ്റു. നിരവധി കച്ചവടസ്ഥാപനങ്ങളുടെ മേൽക്കൂരകളും ഷീറ്റുകളും പാറിപ്പോയി. റോഡിൽ നിർത്തിയിട്ട കാർ മീറ്ററുകൾക്കപ്പുറത്തേക്കാണ് എടുത്തുകൊണ്ടുപോയത്. മുഴങ്ങുന്ന ശബ്ദത്തോടെ എത്തിയ ചുഴലിക്കാറ്റിൽ മിനുട്ടുകൾക്കമാണ് കനത്ത നാശനഷ്ടം ഉണ്ടായത്. വസുമതിയുടെ വസുമതി ഫ്ലോർ മില്ലിന് മുകളിൽ മരം വീണു നാശനഷ്ടമുണ്ടായി. മുൻവശത്തെ ഷീറ്റുകൾ ദൂരെ നിലംപതിച്ചു.തൊട്ടടുത്ത പറമ്പിലെ പ്രഭാകരന്‍റെ വീടിന് മുകളിലും മരം വീണു നാശനഷ്ടമുണ്ടായി. എളയാവൂർ ധർമോദയം എൽപി സ്കൂളിന് മുകളിൽ മരം വീണ് ഓടുകൾ തകർന്നു. രണ്ട് ലക്ഷം രൂപ ചെലവഴിച്ചാണ് സ്കൂളിന്‍റെ മേൽക്കൂര ഉൾപ്പെടെ കഴിഞ്ഞ ദിവസം പുതുക്കിപ്പണിതതെന്ന് അധ്യാപിക പറഞ്ഞു. സ്കൂൾ റോഡിൽ മരം കടപുഴകി വീണ് മണിക്കൂറുകളോളം ഗതാഗതം തടസപ്പെട്ടു. ആയങ്കി റോഡിലെ സരോജിനിയുടെ പറമ്പിലെ മരം കടപുഴകി തൊട്ടടുത്ത ഇഖ്ബാലിന്‍റെ മെഹറാസ് എന്ന വീടിനു മുൻവശമാണ് വീണത്. വൈദ്യുതി തൂൺ ഉൾപ്പെടെ തകർന്ന് വീണ് റോഡ് ഗതാഗതം പൂർണമായും തടസപ്പെട്ടു. തൊട്ടടുത്ത സതീശന്‍റെ വീട്ടിലെ മരം വീണ് വൈദ്യുതി തൂണുകളും സുരേന്ദ്രന്‍റെ വീടിന്‍റെ ഓടുകളും തകർന്നു.ആയങ്കി കനാലിന് സമീപത്തെ കെ.എം. ബാലകൃഷ്ണന്‍റെ വീടിന് മുകളിൽ കൂറ്റൻ മരം കടപുഴകി വീണ് വീടിന്‍റെ മേൽക്കൂര തകർന്നു. കുന്നത്ത് അലി, വാരം തക്കാളി പീടികക്ക് സമീപത്തെ പി.പി. രാമകൃഷ്ണൻ, സിദ്ധിഖ് പള്ളിക്ക് സമീപത്തെ പി.പി. സുരേശൻ, പി.പി. രവീന്ദ്രൻ എന്നിവരുടെ വീടുകൾക്ക് മുകളിലും മരം വീണ് നാശനഷ്ടമുണ്ടായി. ആയങ്കി റോഡിൽ താഹിറ, ഗഫൂർ എന്നിവരുടെ വീടിന്‍റെ മേൽക്കൂരകൾ കാറ്റിൽ നിലം പതിച്ചു. വാരം കടാങ്കോട് റോഡിൽ പി.പി.സുരേശന്‍റെ വീടിന് മുകളിൽ കൂറ്റൻ മാവ് കടപുഴകി വീണു. ശാസ്താംകോട്ട ലക്ഷം വീട് കോളനിയിലെ അമ്മാളുവിന്‍റെ വീട് തകർന്നു. വീട്ടിലുള്ളവരെ മാറ്റി പാർപ്പിച്ചതിനാൽ അപകടം ഒഴിവായി.മേഖലയിലെ വൈദ്യുതി ലൈനുകളും പോസ്റ്റുകളും കേബിളും ഉൾപ്പെടെ തകർന്ന് വൻ നാശനഷ്ടമാണുണ്ടായത്. അഗ്നിശമനസേന, യൂത്ത് ബ്രിഗേഡ്, നാട്ടുകാർ എന്നിവർ ചേർന്ന് മരങ്ങളടക്കം മുറിച്ചുമാറ്റി. മന്ത്രി കടന്നപ്പള്ളി രാമചന്ദ്രൻ, കൗൺസിലർമാരായ കെ. പി. അബ്ദുൾ റസാഖ്, പി.പി. വത്സലൻ, ശ്രീജ ആരംഭൻ, റവന്യൂ- വില്ലേജ് ഉദ്യോഗസ്ഥർ തുടങ്ങിയവർ സ്ഥലം സന്ദർശിച്ചു.

ഇഎസ്ഐ ആശുപത്രിയിൽ ആംബുലൻസും ഡ്രൈവർമാരും ഉണ്ടെങ്കിലും ശനി ഉച്ചകഴിഞ്ഞ് മുതൽ തിങ്കൾ വരെ സേവനം ലഭ്യമല്ല !

കണ്ണൂർ: തോട്ടട ഇഎസ്ഐ ആശുപത്രിയിൽ ആംബുലൻസും രണ്ട് ഡ്രൈവർമാരുമുണ്ടെങ്കിലും ശനിയാഴ്ച ഉച്ചകഴിഞ്ഞ് തിങ്കളാഴ്ച രാവിലെ എട്ടുവരെ സേവനം ലഭിക്കില്ലെന്ന് ഔദ്യോഗിക അറിയിപ്പ് ! ആശുപത്രി സേവനങ്ങൾ വിവരിച്ച് സൂപ്രണ്ട് ഒപ്പിട്ട് പുറത്തിറക്കിയ നോട്ടീസിലാണ് ഇക്കാര്യം പറയുന്നത്. ആശുപത്രിയിൽ ആബുലൻസ് സേവനം 24 മണിക്കൂറും ലഭ്യമാണെന്ന് വ്യക്തമാക്കുന്ന അറിയിപ്പിൽ തന്നെയാണ് ശനിയാഴ്ച ഉച്ച കഴിഞ്ഞ് മൂന്ന് മുതൽ തിങ്കളാഴ്ച രാവിലെ എട്ടുവരെ ആംബുലൻസ് സേവനം ലഭിക്കില്ലെന്ന വിചിത്രമായ ‌അറിയിപ്പുമുള്ളത്. ഇതോടെ ശനിയാഴ്ച ഉച്ചകഴിഞ്ഞ് മൂന്നു മുതൽ തിങ്കൾ രാവിലെ എട്ടുവരെ ആംബുലൻസ് സേവനം ലഭിക്കേണ്ടവർ മറ്റു വഴികൾ തേടണമെന്നാണ് നോട്ടീസിലൂടെ പറയാതെ പറയുന്നത്. രണ്ട് ഡ്രൈവർമാർക്കും ഒരേ ദിവസം വീക്ക്‌ലി ഓഫ് അനുവദിക്കുന്നതാണ് ആംബുലൻസ് സേവനം തടസപ്പെടാൻ കാരണമെന്ന് ആശുപത്രിയെ ആശ്രയിക്കുന്നവർ പറയുന്നു. കണ്ണൂർ ജില്ലയിലെയും കോഴിക്കോട് വടകര ഉൾപ്പടെയുള്ള മേഖലകളിലെ ഇഎസ്ഐ ആനുകൂല്യമുള്ളവരും ബന്ധുക്കളും ഏറ്റവും കൂടുതൽ ആശ്രയിക്കുന്ന ആശുപത്രിയാണ് തോട്ടടയിലേത്. തൊഴിൽവകുപ്പിന്‍റെ കീഴിലാണ് ആശുപത്രിയെങ്കിലും ആരോഗ്യമേഖലയിലെ നിയമങ്ങൾക്കനുസൃതമായിട്ടു കൂടിയാണ് പ്രവർത്തനം. ആശുപത്രികളിൽ ആംബുലൻസ് ഡ്രൈവർമാരുടെ സേവനം ഏതു സമയവും ഉറപ്പാക്കണമെന്നാണ് ചട്ടം. ഇതു സംബന്ധിച്ച് സംസ്ഥാന തൊഴിൽ മന്ത്രി, കേന്ദ്ര തൊഴിൽ മന്ത്രി, മനുഷ്യാവകാശ കമ്മീഷൻ, ഇഎസ്ഐ ഉന്നതോദ്യോഗസ്ഥർ എന്നിവർക്ക് പരാതി നൽകാനുള്ള ഒരുക്കത്തിലാണ് ട്രേഡ് യൂണിയൻ സംഘടനകൾ.

പ്രതിഭകൾക്ക് ചെന്പേരിയിൽ ദീപികയുടെ വിജയാദരം

ചെമ്പേരി: എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ ചെമ്പേരി, ആലക്കോട് മേഖലകളിലെ വിദ്യാർഥികൾക്കും അവരെ മികച്ച വിജയത്തിലേക്ക് നയിച്ച വിദ്യാലയങ്ങൾക്കും മലയാളത്തിന്‍റെ പ്രഥമ ദിനപത്രമായ ദീപിക, വിദേശ വിദ്യാഭ്യസരംഗത്തെ പ്രമുഖരായ സാന്‍റാ മോണിക്ക സ്റ്റഡി എബ്രോഡിന്‍റെ സഹകരണത്തോടെ ആദരിച്ചു. ചെമ്പേരി വിമൽ ജ്യോതി എൻജിനിയറിംഗ് കോളജിലെ മോൺ. ജേക്കബ് വാരികാട്ട് മെമ്മോറിയൽ ഹാളിൽ നടന്ന ‘ആദരം-2025' സജീവ് ജോസഫ് എംഎൽഎ ഉദ്ഘാടനം ചെയ്തു. വിദ്യാർഥികളുടെ ആത്മാർഥമായ പ്രയത്നങ്ങൾക്കൊപ്പം അധ്യാപകരുടെയും രക്ഷിതാക്കളുടെയും കഠിനാധ്വാനം കൂടിയാണ് ഇത്രയും മികച്ച വിജയത്തിന് പിന്നിലെന്ന് സജീവ് ജോസഫ് പറഞ്ഞു. വിദ്യാർഥികൾ ഉപരിപഠനത്തിലൂടെ നേടുന്ന അറിവുകൾ നമ്മുടെ നാട്ടിലും പ്രയോജനപ്പെടുത്താൻ ശ്രമിക്കണമെന്നും അദ്ദേഹം ഓർമപ്പെടുത്തി. തലശേരി അതിരൂപത ആർച്ച്ബിഷപ് മാർ ജോസഫ് പാംപ്ലാനി അധ്യക്ഷത വഹിച്ചു. ബുദ്ധിയുടെ അനന്ത സാധ്യതകളെ വിരിയിച്ചെടുക്കുന്ന വിദ്യാഭ്യാസത്തിലൂടെ ഓരോരുത്തരുടേയും വ്യത്യസ്തങ്ങളായ കഴിവുകളെ കണ്ടെത്താനുള്ള പരിശ്രമങ്ങൾ എല്ലാവരിലും ഉണ്ടായിരിക്കണമെന്ന് ആർച്ച് ബിഷപ് പറഞ്ഞു. ദീപിക കണ്ണൂർ യൂണിറ്റ് റസിഡന്‍റ് മാനേജർ ഫാ. ജോബിൻ വലിയപറന്പിൽ, മാർക്കറ്റിംഗ് കോ-ഓർഡിനേറ്റർ ഫാ. സെബാസ്റ്റ്യൻ വെമ്മേനിക്കട്ടയിൽ, ബംഗളൂരു സെന്‍റ് ബെനഡിക്ട്സ് ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് ഡയറക്ടർ ഫാ. ജെറോം നടുവത്താനിയിൽ ഒഎസ്ബി, ചെമ്പേരി വിമൽജ്യോതി എൻജിനിയറിംഗ് കോളജ് പിആർഒ സെബാസ്റ്റ്യൻ പുത്തൻപുര, സാന്‍റാ മോണിക്ക സ്റ്റഡി എബ്രോഡ്‌ റീജണൽ മാനേജർ ലിഷ ബിനു, സെറ്റ അക്കാദമി മാനേജർ സിന്ധു ദിവാകർ, ദീപിക മാർക്കറ്റിംഗ് അസിസ്റ്റന്‍റ് ജനറൽ മാനേജർ ജോസ് ലൂക്കോസ്, സീനിയർ സർക്കുലേഷൻ മാനേജർ ജോർജ് തയ്യിൽ എന്നിവർ പ്രസംഗിച്ചു. മുന്നൂറ്റമ്പതിലേറെ വിദ്യാർഥികളെയും മികച്ച വിജയം നേടിയ പതിനെട്ട് സ്കൂളുകളെയും ആദരിച്ചു. പയ്യാവൂർ സെന്‍റ് ആൻസ് ഇംഗ്ലീഷ് മീഡിയം സ്കൂൾ, ചന്ദനക്കാംപാറ ചെറുപുഷ്പ ഹൈസ്കൂൾ, പൈസക്കരി ദേവമാതാ ഹൈസ്കൂൾ, പയ്യാവൂർ സേക്രഡ് ഹാർട്ട് ഹൈസ്കൂൾ, ശ്രീകണ്ഠപുരം ലിറ്റിൽ ഫ്ലവർ സ്കൂൾ, മണിക്കടവ് സെന്‍റ് തോമസ് ഹൈസ്കൂൾ, കുടിയാന്മല മേരി ക്യൂൻസ് ഹൈസ്കൂൾ, പുലിക്കുരുമ്പ സെന്‍റ് ജോസഫ്സ് ഹൈസ്കൂൾ, കുടിയാന്മല ഹോളിക്രോസ് പബ്ലിക് സ്കൂൾ, പൂപ്പറമ്പ് ഫുസ്കോ സീനിയർ സെക്കൻഡറി സ്കൂൾ, ചെമ്പന്തൊട്ടി സെന്‍റ് ജോർജ് ഹൈസ്കൂൾ, ചെമ്പേരി സെന്‍റ് തോമസ് പബ്ലിക് സ്കൂൾ, പൊടിക്കളം മേരി ഗിരി ഇംഗ്ലീഷ് മീഡിയം സ്കൂൾ, നെല്ലിക്കുറ്റി സെന്‍റ് അഗസ്റ്റിൻസ് ഹൈസ്കൂൾ, ചെമ്പേരി നിർമല ഹൈസ്കൂൾ, നടുവിൽ സെന്‍റ് മേരീസ് ഇംഗ്ലീഷ് മീഡിയം സ്കൂൾ, നടുവിൽ ബിടിഎം ഇംഗ്ലീഷ് മീഡിയം സ്കൂൾ, വായാട്ടുപറമ്പ് സെന്‍റ് ജോസഫ്സ് ഹൈസ്കൂൾ എന്നിവയാണ് ചെമ്പേരി ആദരവ് ഏറ്റുവാങ്ങിയ സ്കൂളുകൾ. വിദ്യാർഥികൾക്കൊപ്പം രക്ഷിതാക്കളും അധ്യാപകരും ചടങ്ങിൽ പങ്കെടുത്തു. ഇന്ന് ചെറുപുഴയിൽ കണ്ണൂർ: സ്റ്റേറ്റ്, സിബിഎസ്ഇ, ഐസിഎസ്ഇ സിലബസുകളില്‍ പത്ത്, പന്ത്രണ്ട് ക്ലാസുകളില്‍ മികച്ച നേട്ടം കരസ്ഥമാക്കിയ കുട്ടികൾക്കുള്ള ആദരവ് മലയാളത്തിലെ പ്രഥമ ദിനപത്രമായ ദീപികയുടെയും വിദേശ വിദ്യാഭ്യാസ രംഗത്തെ അതികായരായ സാന്‍റാമോണിക്ക സ്റ്റഡി എബ്രോഡിന്‍റെയും സംയുക്താഭിമുഖ്യത്തില്‍ ഇന്ന് ചെറുപുഴയിൽ നടക്കും. രാവിലെ 9.30ന് ചെറുപുഴ സെന്‍റ് മേരീസ് പാരിഷ് ഹാളിൽ ആർച്ച്ബിഷപ് എമരിറ്റസ് മാർ ജോർജ് വലിയമറ്റം ഉദ്ഘാടനം ചെയ്യും. ചെറുപുഴ ഫൊറോന വികാരി ഫാ. ഫിലിപ്പ് ഇരുപ്പക്കാട്ട് അധ്യക്ഷത വഹിക്കും.

കൊമേഴ്സ് പ്രഫഷണൽ കോച്ചിംഗ് സ്കോളർഷിപ്പ്

കണ്ണൂർ: ജെസിഐ സോൺ-19 വിദ്യാർഥികൾക്കായി 50 ലക്ഷം രൂപയുടെ കൊമേഴ്സ് പ്രഫഷണൽ കോച്ചിംഗ് സ്കോളർഷിപ്പ് എക്സാം സംഘടിപ്പിക്കുന്നു. കണ്ണൂർ, കാസർഗോഡ്, വയനാട് ജില്ലകളിലെയും മാഹിയിലെയും പ്ലസ്ടു, ഡിഗ്രി പഠനം ഈ വർഷം പൂർത്തിയാക്കിയ വിദ്യാർഥികൾക്കാണ് പദ്ധതി. പദ്ധതിയുടെ ഭാഗമായി ലഭ്യമാകുന്ന കോഴ്സുകൾ: സിഎ (CA), സിഎംഎ (CMA - IND/US), എസിസിഎ (ACCA), സിഎസ് (CS). എക്സാം മാർക്ക് അടിസ്ഥാനത്തിൽ ഈ കോഴ്‌സുകളിൽ ട്യൂഷൻ ഫീസ് 100 ശതമാനംവരെ സ്കോളർഷിപ്പ് നേടാം. പരീക്ഷയെഴുതുന്ന മുഴുവൻ വിദ്യാർഥികൾക്കും ഏത് കോഴ്സിലായാലും 15 ശതമാനം ട്യൂഷൻ ഫീസ് ഇളവ് ലഭിക്കും. പ്രധാന പരീക്ഷാ കേന്ദ്രങ്ങൾ: സോൺ-19 ൽ 10 പരീക്ഷാ സെന്‍ററുകൾ ഒരുക്കിയിട്ടുണ്ട്. ഇരിട്ടി, മട്ടന്നൂർ, തലശേരി, കണ്ണൂർ, പയ്യന്നൂർ, കാഞ്ഞങ്ങാട്, കാസർഗോഡ്, മാനന്തവാടി, കൽപ്പറ്റ, ചെറുപുഴ. പരീക്ഷയിൽ ആദ്യ മൂന്നുസ്ഥാനം നേടുന്നവർക്കും സെന്‍ററുകളിൽ ഒന്നാമത് എത്തുന്നുവർക്കും കാഷ് അവാർഡ് നല്കും. ജൂൺ അഞ്ചിന് രാവിലെ പത്തിനാണ് കണ്ണൂരിലെ പരീക്ഷ. രജിസ്ട്രേഷൻ: ഗൂഗിൾ ഫോം ലിങ്ക് മുഖേന https://forms.gle/deWKw3dB7YMU93oy6, ഫോൺ: 7558999500, 9605777500. അവസാന തീയതി ജൂൺ 03.

ലൈഫ് വീടുകൾക്കുള്ള തുക വർധിപ്പിക്കണം: കത്തോലിക്ക കോൺഗ്രസ്

കണ്ണൂർ: ഭവന നിർമാണ സാമഗ്രികളുടെ വില അനുദിനം വർധിക്കുകയും നിർമാണ ജോലികൾക്ക് കൂലി കൂട്ടുകയും ചെയ്ത സാഹചര്യത്തിൽ ലൈഫ് വീടുകളുടെ നിർമാണം പൂർത്തിയാക്കാൻ സാധിക്കാത്ത അവസ്ഥയായതിനാൽ ലൈഫ് വീടുകൾക്ക് സർക്കാർ നിശ്ചയിച്ചിട്ടുള്ള നാല് ലക്ഷം രൂപയുടെ ധനസഹായം 8 ലക്ഷം രൂപയാക്കണമെന്ന് കത്തോലിക്ക കോൺഗ്രസ് തലശേരി അതിരൂപത കമ്മിറ്റി ആവശ്യപ്പെട്ടു. ലൈഫ് വീടുകളുടെ നിർമാണ ആവശ്യങ്ങൾക്ക് പുഴകളിൽ നിന്ന് മണൽവാരുന്ന രീതി പുനഃസ്ഥാപിക്കണമെന്നും യോഗം ആവശ്യപ്പെട്ടു. ഗ്ലോബൽ ഡയറക്ടർ റവ.ഡോ.ഫിലിപ്പ് കവിയിൽ ഉദ്ഘാടനം ചെയ്തു. അതിരൂപത പ്രസിഡന്‍റ് ഫിലിപ്പ് വെളിയത്ത് അധ്യക്ഷത വഹിച്ചു. ഗ്ലോബൽ ട്രഷറർ ടോണി ജോസഫ് പുഞ്ചക്കുന്നേൽ, ജനറൽ സെക്രട്ടറി ജിമ്മി ആയിത്തമറ്റം, ട്രഷറർ ബെന്നി പുതിയാംപുറം, ഷീജ കാറുകളും, സുരേഷ് ജോർജ്, വൈസ് പ്രസിഡന്‍റുമാരായ ബെന്നിച്ചൻ മഠത്തിനകം, ഐ.സി.മേരി, ടോമി കണയങ്കൽ, ഷിനോ പാറയ്ക്കൽ, സെക്രട്ടറിമാരായ ജെയിംസ് ഇമ്മാനുവൽ, ഡേവിസ് ആലങ്ങാടൻ, സൈജോ ജോസഫ്, ഷാജു ഇടശേരി എന്നിവർ പ്രസംഗിച്ചു.

വിദ്യാർഥികളുടെ ഭൗതികശാസ്ത്ര കോൺഫറൻസ് ഇന്ന് നിർമലഗിരിയിൽ

കൂത്തുപറമ്പ്: വളർന്നുവരുന്ന വിദ്യാർഥി ഗവേഷകർക്ക് വേണ്ടി ഫൈകോൺ-2025 എന്ന പേരിൽ സംഘടിപ്പിക്കുന്ന ഫിസിക്സ് കോൺഫറൻസ് ഇന്ന് നിർമലഗിരി കോളജിൽ നടക്കും. ബിരുദാനന്തര ബിരുദ വിദ്യാർഥികൾക്ക് വേണ്ടി മാത്രം സംഘടിപ്പിക്കുന്ന കോൺഫറൻസ് വിദ്യാർഥികൾക്ക് തങ്ങളുടെ ഗവേഷണ പ്രബന്ധങ്ങൾ അവതരിപ്പിക്കുവാനുള്ള വേദിയാണ്. ഗവേഷകർക്ക്‌ വേണ്ടി കോൺഫറൻസുകൾ നിരവധി നടക്കാറുണ്ടെങ്കിലും വിദ്യാർഥികൾക്ക് വേണ്ടി മാത്രമായി ആദ്യമായാണ് ഇത്തരമൊരു കോൺഫറൻസ് കേരളത്തിൽ സംഘടിപ്പിക്കപ്പെടുന്നതെന്ന് സംഘാടകസമിതി അറിയിച്ചു. കണ്ണൂർ സർവകലാശാലയുടെയും സർവകലാശാലയിലെ വിവിധ അഫിലിയേറ്റഡ് കോളജുകളിലെ ഫിസിക്സ്‌ വിഭാഗങ്ങളുടെയും സംയുക്ത ആഭിമുഖ്യത്തിലാണ് കോൺഫറൻസ് സംഘടിപ്പിക്കുന്നത്. ഫിസിക്സ് വിദ്യാർഥികൾക്കായി ഗവേഷണ പ്രബന്ധ അവതരണങ്ങൾ, പോസ്റ്റർ സെഷനുകൾ, ഇന്‍ററാക്ടീവ് വർക്ക്ഷോപ്പുകൾ എന്നിവ ഇതിൽ ഉൾപ്പെടും.പ്രമുഖ ശാസ്ത്ര പ്രഭാഷകനും തിരുവനന്തപുരം എംജി കോളജ് ഭൗതിക ശാസ്ത്രവിഭാഗം അസിസ്റ്റന്‍റ് പ്രഫസറുമായ ഡോ. വൈശാഖൻ തമ്പി മുഖ്യപ്രഭാഷണം നടത്തും. കോളജ് മാനേജർ മോൺ. ആന്‍റണി മുതുകുന്നേൽ, ബർസാർ റവ.ഡോ. തോമസ് കൊച്ചുകരോട്ട്, കോളജ് പ്രിൻസിപ്പൽ ഡോ.ടി.കെ. സെബാസ്റ്റ്യൻ, ഗവ.ബ്രണ്ണൻ കോളജ് ഫിസിക്സ്‌ വിഭാഗം മേധാവി ഡോ.ലിഷ ദാമോദരൻ, ഡോ. ജോഷി ജോസഫ്, കോൺഫറൻസ് കൺവീനർ ഡോ.ദീപു തോമസ് എന്നിവർ പ്രസംഗിക്കും.

മാവുങ്കാല്‍ മേല്‍പ്പാലത്തിലെ കോണ്‍ക്രീറ്റ് തകര്‍ന്ന നിലയില്‍

കാഞ്ഞങ്ങാട്: ദേശീയപാതയിൽ ഗതാഗതത്തിന് തുറന്നുകൊടുത്ത മാവുങ്കാല്‍ മേല്‍പ്പാലത്തിലെ കോണ്‍ക്രീറ്റ് തകര്‍ന്ന നിലയില്‍. പാലത്തിന്‍റെ മധ്യഭാഗത്തായി കോണ്‍ക്രീറ്റ് അടര്‍ന്ന് കമ്പികള്‍ പൂര്‍ണമായും പുറത്തേക്ക് കാണുന്നുണ്ട്. ഇന്നലെ രാവിലെയാണ് സംഭവം യാത്രക്കാരുടെ ശ്രദ്ധയില്‍പ്പെടുന്നത്. എന്നാല്‍ ഇതില്‍ ആശങ്കപ്പെടാനില്ലെന്നും പാലത്തിന്‍റെ രണ്ടു ഭാഗങ്ങളെ യോജിപ്പിക്കുന്നിടത്തെ താത്കാലിക കോണ്‍ക്രീറ്റ് ആണ് അടര്‍ന്നതെന്നും ഇതിനുമേല്‍ വീണ്ടും കോണ്‍ക്രീറ്റ് ചെയ്യാനുള്ളതാണെന്നും ദേശീയപാത അധികൃതര്‍ അറിയിച്ചു.

മാക്കൂട്ടം ചുരം പാതയിൽ വലിയ ചരക്ക് വാഹനങ്ങൾക്ക് നിരോധനം‌

ഇരിട്ടി: കനത്ത മഴയിൽ മാക്കൂട്ടം ചുരത്തിൽ മണ്ണിടിച്ചിൽ ഭീഷണി നിലനിൽക്കുന്ന സാഹചര്യത്തിൽ വലിയ ചരക്ക് വാഹനങ്ങളുടെ ചുരം പാതവഴിയുള്ള ഗതാഗതം ജൂൺ ആറുമുതൽ ജൂലൈ അഞ്ചുവരെ കുടക് ജില്ലാ ഭരണകൂടം നിരോധിച്ചു. കണ്ടെയ്നറുകൾ, ബുള്ളറ്റ് ടാങ്കറുകൾ, മരം, മണൽ എന്നിവ കൊണ്ടുപോകുന്ന ടോറസ് ലോറികൾ, മൾട്ടി ആക്സിൽ ടിപ്പറുകൾ തുടങ്ങിയ ചരക്ക് വാഹനങ്ങൾക്കാണ് നിരോധനം. ബസ്, പച്ചക്കറികൾ അടക്കം കൊണ്ടുപോകുന്ന സാധാരണ ചരക്ക് വാഹനങ്ങൾ, ലോറികൾ എന്നിവയ്ക്ക് നിയന്ത്രണം ബാധകമല്ല. കേരളത്തിൽ നിന്ന് കർണാടകയിലേക്ക് പ്രവേശിക്കുന്ന വലിയ ചരക്ക് വാഹനങ്ങൾക്കും ഉത്തരവ് ബാധകമാണ്. ഉത്തരവ് നടപ്പാക്കുന്ന ആദ്യദിവസം എത്തുന്ന വാഹനങ്ങൾക്ക് ചെക്ക് പോസ്റ്റിൽ മുന്നറിയിപ്പ് നൽകിയശേഷം തിരിച്ചയയ്ക്കുമെന്നും തുടർന്നുള്ള ദിവസങ്ങളിൽ നടപടി സ്വീകരിക്കുമെന്നും അധികൃതർ അറിയിച്ചു. നിയമം ലംഘിക്കുന്ന വാഹന ഉടമകൾക്കെതിരെ ദുരന്തനിവാരണ നിയമപ്രകാരം കേസെടുക്കുമെന്ന് കളക്ടർ വെങ്കിട്ട രാജു പറഞ്ഞു. 16 കിലോമീറ്റർ വനത്തിലൂടെ മാത്രം കടന്നുവരുന്ന മാക്കൂട്ടം ചുരം പാതയിൽ മഴക്കാലത്ത് അപകട സാധ്യത കൂടുതലാണ്. മണ്ണിടിച്ചിലും മരം കടപുഴകി വീഴുന്നതും പതിവാണ്. കഴിഞ്ഞ ദിവസം മെതിയടി പാറയ്ക്ക് സമീപം മരം കടപുഴകി വീണ് മണിക്കൂറുകളോളം ഗതാഗതം തടസപ്പെട്ടു. രാത്രിയിലടക്കം യാത്രക്കാർ വനത്തിൽ കുടുങ്ങിപ്പോകാറുണ്ട്. ചുരം പാതയിൽ മൊബൈൽ നെ‌റ്റ്‌വർക്ക് സംവിധാനം ലഭ്യമല്ലാത്തതിനാൽ അപകടം സംഭവിച്ചാൽ തന്നെ പുറത്തറിയാൻ മണിക്കൂറുകൾ കഴിയും. കുടക് ജില്ലയിൽ ഒരാഴ്ചയായി കനത്ത മഴയാണ്. കാവേരി നദി കരകവിഞ്ഞൊഴുകിയതിനെത്തുടർന്ന് നദിയുടെ സമീപപ്രദേശത്തുള്ള പല ഭാഗങ്ങളിലും വെള്ളം കയറിയിട്ടുണ്ട്.

ചരിത്രത്തിലെ അത്യപൂർവം

ദിവ്യകാരുണ്യ അദ്ഭുത സംഭവത്തിനുശേഷം ആറര വർഷം കഴിഞ്ഞ് 2019 മേയ് മാസത്തിലാണ് ഞാൻ വിളക്കന്നൂർ ഇടവക വികാരിയയായി വന്നത്. ഈ കാലത്തിനിടയിൽ തിരുമുഖം തെളിഞ്ഞ തിരുവോസ്തി അഞ്ചുവർഷം കൂടുതൽ നിരീക്ഷണത്തിനും പഠനത്തിനുമായി തലശേരി അരമനയിൽ ആയിരുന്നു. 2018 സെപ്റ്റംബർ 21ന് അന്നത്തെ ഇടവക വികാരിയായിരുന്ന ഫാ. ജേക്കബ് കുറ്റിക്കാട്ടുകുന്നേൽ അച്ചന്‍റെ നേതൃത്വത്തിൽ വിളക്കന്നൂർ ഇടവകയിലേക്ക് തിരുവോസ്തി തിരികെ കൊണ്ടുവരികയും പൊതുവണക്കത്തിനായി പ്രത്യേകമായി ഒരുക്കിയ പീഠത്തിൽ സ്ഥാപിക്കുകയും ചെയ്തു. ചരിത്രത്തിൽ അത്യപൂർവമായ ഈ തിരുവോസ്തിയിലെ തിരുമുഖം ദർശിക്കുവാനും പ്രാർഥിക്കുവാനുമായി ആ നാളുകളിൽ ധാരാളം തീർഥാടകര്‍ ഒറ്റയ്ക്കും സംഘമായും വിളക്കന്നൂരിൽ എത്താറുണ്ടായിരുന്നു. വിളക്കന്നൂരിൽ സന്ദർശകരായും തീർഥാടകരായും വരുന്നവരോട് 2013 നവംബർ 15 ലെ ദിവ്യകാരുണ്യ അദ്ഭുത പ്രതിഭാസത്തെക്കുറിച്ച് എനിക്ക് വിവരിക്കേണ്ടി വന്നിട്ടുണ്ട്.

ലോകത്തിന്‍റെ ശ്രദ്ധ വിളക്കന്നൂരിലേക്ക്

വിളക്കന്നൂർ ക്രിസ്തുരാജ പള്ളിയിൽ അർപ്പിച്ച വിശുദ്ധ കുർബാനയുടെ സമയത്ത് തിരുവോസ്തിയിൽ ഈശോയുടെ തിരുമുഖം തെളിഞ്ഞുവന്നത് തിരുസഭ അംഗീകരിച്ചതോടെ ലോകത്തിന്‍റെ മുഴുവൻ ശ്രദ്ധ വിളക്കന്നൂർ പള്ളിയിലേക്ക് തിരിയുകയാണ്. ലോകചരിത്രത്തിൽ ദൈവം ഇടപെട്ട ധാരാളം അവസരങ്ങളും സംഭവങ്ങളും ഉണ്ട്. ഇവയെല്ലാം ദൈവത്തിന്‍റെ രക്ഷാകരപ്രവൃത്തിയുടെ ഭാഗവുമാണ്. കത്തോലിക്കാ സഭയുടെ അടിസ്ഥാന പ്രബോധനങ്ങളിൽ ഒന്നാണ് വിശുദ്ധ കുർബാനയിൽ ഈശോയുടെ സാന്നിധ്യമുണ്ട് എന്ന സത്യം. വേഗം കേടാകും എന്നതിനാൽ സാധാരണഗതിയിൽ തിരുവോസ്തി മൂന്ന് ആഴ്ചയിൽ അധികം സൂക്ഷിച്ചു വയ്ക്കാറില്ല. എന്നാൽ, ഈശോയുടെ തിരുമുഖം ബാഹ്യമായി കാണപ്പെട്ട തിരുവോസ്തിക്ക് യാതൊരു രൂപമാറ്റവും ഇന്നുവരെ സംഭവിച്ചിട്ടില്ല എന്നത് ഒരു യാഥാർഥ്യമാണ്. വിളക്കന്നൂർ ക്രിസ്തുരാജ പള്ളിയിലുണ്ടായ ഈ അദ്ഭുത സംഭവം അനേകർക്ക് വിശുദ്ധ കുർബാനയിലുള്ള വിശ്വാസം വർധിക്കുന്നതിനും ദിവ്യകാരുണ്യ ഭക്തിയിൽ വളരുന്നതിനും സഹായിക്കും എന്ന് പ്രത്യാശിക്കാം.

വിളക്കന്നൂരിലെ ദിവ്യകാരുണ്യ അദ്‌ഭുതം: ഔദ്യോഗിക പ്രഖ്യാപനം നാളെ

കണ്ണൂർ: വിളക്കന്നൂരിലെ ദിവ്യകാരുണ്യ അദ്ഭുതത്തിന് വത്തിക്കാന്‍റെ അംഗീകാരം ലഭിച്ചതിന്‍റെ ഔദ്യോഗിക പ്രഖ്യാപനം നാളെ ഉച്ചകഴിഞ്ഞ് 2.30ന് വിളക്കന്നൂർ ക്രിസ്തുരാജ പള്ളിയിൽ നടക്കുമെന്ന് തലശേരി അതിരൂപത പ്രോട്ടോ സിഞ്ചെലൂസ് മോൺ. ആന്‍റണി മുതുകുന്നേൽ പത്രസമ്മേളനത്തിൽ അറിയിച്ചു. ആഘോഷമായ സമൂഹബലി മധ്യേ ഇന്ത്യയിലെ വത്തിക്കാൻ സ്ഥാനപതി ആർച്ച്ബിഷപ് ഡോ. ലെയോപോൾദോ ജിറെല്ലിയാണ് വിശ്വാസതിരുസംഘത്തിന്‍റെ ഡിക്രി വായിച്ച് ഔദ്യോഗികമായ പ്രഖ്യാപനം നടത്തുന്നത്. തലശേരി ആർച്ച്ബിഷപ് മാർ ജോസഫ് പാംപ്ലാനി, കണ്ണൂർ ബിഷപ് ഡോ. അലക്സ് വടക്കുംതല, കണ്ണൂർ രൂപത സഹായമെത്രാൻ ഡോ. ഡെന്നിസ് കുറുപ്പശേരി, മാനന്തവാടി രൂപത സഹായമെത്രാൻ മാർ അലക്സ് താരാമംഗലം, ആർച്ച്ബിഷപ് എമരിറ്റസുരായ മാർ ജോർജ് ഞറളക്കാട്ട്, മാർ ജോർജ് വലിയമറ്റം എന്നിവരുടെ സാന്നിധ്യത്തിലാണ് പ്രഖ്യാപനം. പ്രഖ്യാപനത്തിന് മുന്നോടിയായി ഉച്ചകഴിഞ്ഞ് 1.45ന് ഒടുവള്ളിത്തട്ടിൽ തിരുവോസ്തിക്ക് സ്വീകരണം നൽകി വാഹനങ്ങളുടെ അകന്പടിയോടെ വിളക്കന്നൂരിലേക്ക് നീങ്ങും. വിളക്കന്നൂർ ടൗണിൽ സ്വീകരണം നൽകിയ ശേഷം പ്രത്യേകം ഒരുക്കിയിരിക്കുന്ന പന്തലിലേക്ക് ആഘോഷപൂർവമായ പ്രദക്ഷിണമായി തിരുവോസ്തി സംവഹിക്കും. തലശേരി ആർച്ച്ബിഷപ് മാർ ജോസഫ് പാംപ്ലാനി സ്വാഗതം പറയും. തുടർന്ന് ഇന്ത്യയിലെ വത്തിക്കാൻ സ്ഥാനപതി ആർച്ച്ബിഷപ് ഡോ. ലെയോപോൾദോ ജിറെല്ലി ഔദ്യോഗിക പ്രഖ്യാപനം നടത്തുകയും തിരുവോസ്തി പ്രത്യേകം തയാറാക്കിയ പീഠത്തിൽ പ്രതിഷ്ഠിക്കുകയും ചെയ്യും. മലയാളത്തിലുള്ള ഡിക്രി തലശേരി അതിരൂപത ചാൻസലർ റവ. ഡോ. ബിജു മുട്ടത്തുകുന്നേൽ വായിക്കും. തുടർന്ന് നടക്കുന്ന ദിവ്യകാരുണ്യ ആരാധനയ്ക്ക് ഫാ. മാത്യു വേങ്ങക്കുന്നേൽ നേതൃത്വം നൽകും. ‌3.15ന് ആഘോഷമായ സമൂഹബലി ആരംഭിക്കും. തലശേരി അതിരൂപതയിലെ മുഴുവൻ വൈദികരും സഹകാർമികരാകും. പതിനായിരത്തോളം വിശ്വാസികൾ ചടങ്ങിൽ പങ്കെടുക്കും. തിരുവോസ്തിയിലെ ഛായാചിത്രം ദർശിക്കുവാൻ എല്ലാവർക്കും അവസരം ഒരുക്കിയതായി മോൺ. ആന്‍റണി മുതുകുന്നേൽ പത്രസമ്മേളനത്തിൽ പറഞ്ഞു. പത്രസമ്മേളനത്തിൽ തലശേരി അതിരൂപത ചാൻസലർ റവ. ഡോ. ബിജു മുട്ടത്തുകുന്നേൽ, പാസ്റ്ററൽ കോ-ഓർഡിനേറ്റർ റവ. ഡോ. ഫിലിപ്പ് കവിയിൽ, മീഡിയ കോ-ഓർഡിനേറ്ററും കരയത്തുംചാൽ പള്ളി വികാരിയുമായ ഫാ. ജോസഫ് ഓരത്തേൽ, വിളക്കന്നൂർ ഇടവക കോ-ഓർഡിനേറ്റർ സണ്ണി പോത്തനാംതടത്തിൽ എന്നിവർ പങ്കെടുത്തു.

പരീക്ഷയിൽ തോറ്റ വിദ്യാർഥിനിയെ തൂങ്ങിമരിച്ച നിലയിൽ കണ്ടെത്തി

ഇരിട്ടി: കുടക് ജില്ലയിലെ പൊന്നംപേട്ട് താലൂക്കിലെ ഹള്ളിഗട്ട് സിഇടി കോളജ് ഹോസ്റ്റലിൽ ഒന്നാം വർഷ എഐഎംഎൽ വിദ്യാർഥിനിയെ തൂങ്ങിമരിച്ച നിലയിൽ കണ്ടെത്തി. റായ്ച്ചൂർ സ്വദേശി മഹന്തപ്പയുടെ ഏക ‌മകൾ ജസ്വിനി (19) യാണ് മരിച്ചത്. പരീക്ഷയിൽ തോറ്റതിലുള്ള മനോവിഷമമാണ് കാരണമെന്ന് പോലീസിന് ലഭിച്ച ആത്മഹത്യാ കുറിപ്പിൽ പറയുന്നു. മൂന്ന് ദിവസം മുമ്പ് സുഹൃത്തുക്കളോടൊപ്പം ജന്മദിനം ആഘോഷിച്ച വിദ്യാർഥിനി കഴിഞ്ഞ ദിവസം ക്ലാസിൽ എത്തി സുഹൃത്തുക്കൾക്ക് മധുരം വിതരണം ചെയ്തിരുന്നു. വൈകുന്നേരം നാലിന് തിരിച്ച് ഹോസ്റ്റലിൽ എത്തിയെന്നാണ് ലഭിക്കുന്ന വിവരം. 4.30 ഓടെ സഹപാഠി എത്തിയപ്പോൾ മുറിയുടെ വാതിൽ ഉള്ളിൽനിന്ന് പൂട്ടിയ നിലയിലായിരുന്നു. കതകിൽ തട്ടിവിളിച്ചിട്ടും തുറക്കാഞ്ഞതിനെ തുടർന്ന് ഹോസ്റ്റൽ വാർഡനെ വിവരം അറിയിക്കുകയായിരുന്നു. വാതിൽ പൊളിച്ച് മുറിയിൽ പ്രവേശിച്ചപ്പോഴാണ് തൂങ്ങി മരിച്ച നിലയിൽ കാണുന്നത്. പരീക്ഷയിൽ ആറ് വിഷയങ്ങളിൽ പരാജയപ്പെട്ടതിനാൽ മരിക്കുന്നുവെന്നാണ് ആത്മഹത്യ കുറിപ്പിലുള്ളത്.

പാണപ്പുഴയിൽ മഹാശിലായുഗത്തിന്‍റെ തെളിവുകളായ മുനിയറകൾ കണ്ടെത്തി

പരിയാരം: പാണപ്പുഴയിൽ മഹാശിലായുഗ സംസ്കൃതിയുടെ ചരിത്രാവശേഷിപ്പുകളായ മുനിയറകൾ കണ്ടെത്തി. പാണപ്പുഴ ഏഴുംവയലിലാണ് മുനിയറകൾ, ചെങ്കല്ലറകൾ, കൽവൃത്തങ്ങൾ, അത്യപൂർവമായ കന്മഴു, ചതുരക്കിണർ എന്നിവ കണ്ടെത്തിയത്. ഇതോടെ കണ്ണൂർ, കാസർഗോഡ് ജില്ലകളിൽ നേരത്തെ കണ്ടെത്തിയ മഹാശിലായുഗ സംസ്കൃതി പാണപ്പുഴയിലുമുണ്ടായിരുന്നുവെന്നതിന്‍റെ തെളിവാണിതെന്നാണ് പ്രാഥമിക കണ്ടെത്തൽ. ആറു മുനിയറകളാണ് കണ്ടെത്തിയത്. ഇവ മറ്റിടങ്ങളിൽ കാണാത്ത വിധം ആർച്ച് രൂപത്തിൽ മനോഹരമായ കൊത്തുപണികളോട് കൂടിയതാണ്. കേരള ചരിത്ര ഗവേഷണ കൗൺസിലിന്‍റെ നേതൃത്വത്തിൽ തഞ്ചാവൂർ തമിഴ് യൂണിവേ്ഴ്സിറ്റി അസോസിയേറ്റ് പ്രഫസറും കെസിഎച്ച്ആർ എക്സിക്യുട്ടീവ് അംഗവുവുമായ ഡോ. പി. സെൽവകുമാർ, റിസർച്ച് ഓഫീസർ ദിനീഷ് കൃഷ്ണൻ, പ്രോജക്ട് അസിസ്റ്റന്‍റ് മുബീർ ഷാ എന്നിവരടങ്ങിയ പുരാവസ്തുഗവേഷക സംഘം നടത്തിയ പര്യവേഷണത്തിലാണ് മഹാശിലായുഗ അവശേഷിപ്പുകൾ കണ്ടെത്തിയത്. കേരളത്തിലെ മഹാശിലാസ്മാരകങ്ങളിൽനിന്ന് അപൂർവമായി മാത്രം ലഭിച്ചിട്ടുള്ള പരുക്കൻകൻ മഴു നവീന ശിലായുഗ കാലത്തിന് മുന്നേയുള്ളതാകാമെന്ന് പ്രഫ. സെൽവകുമാർ പറഞ്ഞു. കൽവൃത്തത്തോടുകൂടിയ ചെങ്കല്ലറകൾക്കകത്ത് ഒന്നിൽ കൂടുതൽ അറകളും മൺപാത്രങ്ങളുൾപ്പെടെയുള്ള ഉപകരണങ്ങളും ഇരുമ്പായുധങ്ങളുൾപ്പെടെയുള്ള മഹാശില കാലഘട്ടത്തിലെ നിർമിതികളുണ്ടാകാമെന്നും പര്യവേഷണം കെസിഎച്ച്ആർ ഡയറക്ടർ ഡോ. ദിനേശൻ വടക്കിനിയിൽ പറഞ്ഞു. പാണപ്പുഴ പ്രദേശത്ത് നേരത്തെ ചില ചെങ്കല്ലറകളും പ്രാചീന പ്രകൃതിദത്ത മനുഷ്യാധിവാസ ഗുഹകളും കണ്ടെത്തിയിരുന്നുവെങ്കിലും ആദ്യമായാണ് പുരാവസ്തു വിഭാഗം പരിശോധന നടത്തിയത്.

ദമ്പതികളെ വീടിനുള്ളിൽ മരിച്ചനിലയിൽ കണ്ടെത്തി

മട്ടന്നൂർ: കൊടോളിപ്രത്ത് ദമ്പതികളെ വീട്ടിനുള്ളിൽ മരിച്ച നിലയിൽ കണ്ടെത്തി. കൊടോളിപ്രത്തെ ഗോകുലത്തിൽ കെ.വി. ബാബു (58), കെ.വി. സജിത (54) എന്നിവരെയാണ് തൂങ്ങിമരിച്ച നിലയിൽ കണ്ടെത്തിയത്. സാമ്പത്തിക പ്രശ്നമാണ് ആത്മഹത്യയ്ക്ക് കാരണമെന്നാണു സൂചന. ഇന്നലെ ഉച്ചയ്ക്ക് 12 ഓടെയാണ് ഇരുവരെയും വീടിനുള്ളിൽ തൂങ്ങിമരിച്ച നിലയിൽ കണ്ടെത്തിയത്. ബാബുവിനെ കിടപ്പുമുറിയിലും സജിതയെ ഹാളിലെ ഫാനിലുമാണു തൂങ്ങിയ നിലയിൽ കാണപ്പെട്ടത്. സജിത ആത്മഹത്യ ചെയ്യാൻ ഫാനിൽ തുണി കെട്ടാൻ കയറിയ കസേരയോ മറ്റൊന്നും കാണാൻ കഴിഞ്ഞില്ല. ഇതേത്തുടർന്നു കണ്ണൂരിൽനിന്ന് ഫോറൻസിക് വിഭാഗം വീട്ടിലെത്തി പരിശോധന നടത്തി. സംഭവം നടക്കുമ്പോൾ ബാബുവും സജിതയും മാത്രമാണ് വീട്ടിലുണ്ടായിരുന്നത്. മകൾ ഭർത്താവിന്‍റെ വീട്ടിലും മകൻ ഭാര്യവീട്ടിലും പോയിരുന്നു. ഇന്നലെ ഉച്ചയായിട്ടും വീട് തുറക്കാത്തതിനാൽ സമീപത്ത് താമസിക്കുന്നവർ മകനെ വിവരമറിച്ച് മകൻ വീട്ടിലെത്തി മറ്റൊരു താക്കോൽ ഉപയോഗിച്ച് വാതിൽ തുറന്നു നോക്കിയപ്പോഴാണ് ഇരുവരെയും തൂങ്ങിയ നിലയിൽ കണ്ടെത്തിയത്. വിവരം അറിയിച്ചതിനെ തുടർന്നു മട്ടന്നൂർ എസ്ഐ സി.പി. ലിനേഷിന്‍റെ നേതൃത്വത്തിൽ പോലീസ് എത്തി പരിശോധന നടത്തി. വിദേശത്തായിരുന്ന ബാബു അഞ്ചുവർഷം മുമ്പാണു നാട്ടിലെത്തിയത്. നേരത്തെ ബാർബർ ജോലി ചെയ്തിരുന്നുവെങ്കിലും ഇപ്പോൾ ജോലി കുറവായതിനാൽ പോകാറില്ലെന്നു പറയുന്നു. ബാങ്കിൽ നിന്ന് വായ്പയെടുത്തതിനാൽ പലിശയടക്കം 25 ലക്ഷത്തോളം രൂപയടയ്ക്കാനുണ്ടെന്നും ഇതിന്‍റെ പ്രയാസമുള്ളതായും പറയുന്നു. സാമ്പത്തിക പ്രതിസന്ധിയാണ് ദമ്പതികളെ കടുംകൈയ്ക്ക് പ്രേരിപ്പിച്ചതെന്നാണു വിവരം. കടം വീട്ടാനായി ഇവരുടെ വീടും സ്ഥലവും വില്പനയ്ക്ക് വച്ചിരിക്കുകയായിരുന്നു. മട്ടന്നൂർ പോലീസ് ഇൻക്വസ്റ്റ് നടത്തിയ മൃതദേഹങ്ങൾ പോസ്റ്റ്‌മോർട്ടത്തിനായി കണ്ണൂർ പരിയാരം ഗവ. മെഡിക്കൽ കോളജിലേക്കു മാറ്റി. ഇന്ന് ഉച്ചയോടെ വീട്ടിലെത്തിച്ച് സംസ്‌കരിക്കും. മക്കൾ: സുബിജിത്ത്, ജിബിഷ. മരുമക്കൾ: സുധേഷ്, ശ്രീഷ. നാരായണൻ-കല്യാണി ദന്പതികളുടെ മകളാണ് സജിത. ആനന്ദകൃഷ്ണൻ, ജയരാജൻ, ശ്രീലത, പരേതനായ സത്യൻ എന്നിവർ സഹോദരങ്ങളാണ്. ഉണ്ണിക്കൃഷ്ണൻ-മാധവി ദന്പതികളുടെ മകനാണ് ബാബു. സഹോദരി: മായ.

പ്രധാനമന്ത്രിക്ക് രാജ്യസുരക്ഷയെക്കാൾ പ്രധാനം തെരഞ്ഞെടുപ്പ്: എം.എ. ബേബി

കണ്ണൂർ: രാജ്യ സുരക്ഷയേക്കാൾ പ്രധാനമന്ത്രി നരേന്ദ്ര മോദിക്ക് പ്രധാനം തെരഞ്ഞെടുപ്പെന്ന് സിപിഎം അഖിലേന്ത്യ ജനറൽ സെക്രട്ടറി എം.എ. ബേബി. പഹൽഗാമിൽ 26 പേർ തീവ്രവാദി ആക്രമണ ത്തിൽ കൊല്ലപ്പെട്ടതിനെ തുടർന്ന് വിളിച്ചുചേർത്ത രണ്ട് സർവകക്ഷി യോഗങ്ങളിലും രാജ്യത്തുണ്ടായിട്ടും പ്രധാനമന്ത്രി പങ്കെടുത്തില്ല. ആദ്യത്തെ സർവകക്ഷി യോഗം നടക്കുന്ന സമയം ബിഹാറിൽ തെരഞ്ഞെടുപ്പ് തന്ത്രം മെനയുന്ന തിരക്കിലായിരുന്ന പ്രധാനമന്ത്രിയെന്നും അദ്ദേഹം ആരോപിച്ചു. ഗാന്ധിജിയിലേക്ക് മടങ്ങൂ; രാജ്യത്തെ രക്ഷിക്കൂ എന്ന പ്രമേയവുമായി കോൺഗ്രസ്-എസ് പുനഃസ്ഥാപന വാർഷികാഘോഷം കണ്ണൂർ ചേംബർ ഹാളിൽ ഉദ്ഘാടനം ചെയ്തു പ്രസംഗിക്കുകയായിരുന്നു എം.എ. ബേബി. യൂണിയൻ ടെറിട്ടറിയിൽപ്പെട്ട കാഷ്മീരിൽ സകല സുരക്ഷ സംവിധാനങ്ങളും ലംഘിച്ച് അതിർത്തി യിൽനിന്ന് 100 കിലോമീറ്റർ അകലെയുള്ള പഹൽഗാമിൽ തീവ്രവാദികൾ എത്തിയത് ഗുരുതര സുര ക്ഷാ വീഴ്ചയാണ്. പോലീസ്, അർധ സൈനിക വിഭാഗം, പട്ടാളം, അതിർത്തി രക്ഷാസേന ഇവരുയൊക്കെ കണ്ണുവെട്ടിച്ച് പഹൽഗാമിൽ എത്തി 26 പേരെ മതം ചോദിച്ച് കൊലപ്പെടുത്തി സുരക്ഷിത മായി രക്ഷപെട്ടതും, അവരെ ഇതുവരെ പിടികൂടാൻ കഴിയാത്തതും കേന്ദ്ര സർക്കാരിന്‍റെ ഗുരുതര വീഴ്ചയാണ് വ്യക്തമാകുന്നത്. പഹൽഗാം സംഭവത്തിൽ എല്ലാ പ്രതിപക്ഷ കക്ഷികളും പാർലമെന്‍റ് സമ്മേളനം വിളിക്കണമെന്ന് ആവശ്യപ്പെട്ടിട്ടും അത് ചെവിക്കൊള്ളാൻ പ്രധാനമന്ത്രി തയാറായില്ല. നീതി ആയോഗ് യോഗം വിളിച്ചാൽ പോലും പ്രതിപക്ഷം ഭരിക്കുന്ന സംസ്ഥാനങ്ങളോട് അവഗണനയാണ്. ഒരു പുതിയ കേരളത്തിന്‍റെ സൃഷ്ടിക്കായി പരിശ്രമിക്കുന്ന പിണറായി സർക്കാരിന് വിണ്ടും തുടർച്ചയുണ്ടാകുമെന്ന് എം.എ. ബേബി പറഞ്ഞു. കോൺഗ്രസ്-എസ് സംസ്ഥാന പ്രസിഡന്‍റ് മന്ത്രി കടന്നപ്പള്ളി രാമചന്ദ്രൻ അധ്യക്ഷത വഹിച്ചു. കോൺഗ്രസ്-എസ് ദേശീയ ജനറൽ സെക്രട്ടറി ഉമേഷ് ചന്ദ്ര ശർമ മുഖ്യപ്രഭാഷണം നടത്തി. സിപിഎം ജില്ലാ സെക്രട്ടറി കെ.കെ. രാഗേഷ്, കെ.കെ. ജയപ്രകാശ്, ഉഴമലക്കൽ വേണുഗോപാൽ, സി.ആർ. വത്സൻ, ടി.പി.ആർ വേശാല, ടി.വി. വർഗീസ്, മാത്യു കോലഞ്ചേരി, ബാബു ഗോപിനാഥ്, കെ.എം. വിജയൻ എന്നിവർ പ്രസംഗിച്ചു. ഗാന്ധി പ്രതിമയിൽ പുഷ്പാർച്ചന നടത്തിയായിരുന്നു പരിപാടികൾ ആരംഭിച്ചത്. കോൺഗ്രസ്-എസ് സംസ്ഥാന കമ്മിറ്റി അംഗമായിരുന്ന ഇ. ജനാർദനന്‍റെ സ്മരണയ്ക്കായി ഏർപ്പെടുത്തിയ ഇ.ജെ. സ്മാരക അവാർഡും വിതരണം ചെയ്തു.

"കാത്തിരിപ്പ് കഴിഞ്ഞു, നടന്നത് അസാധാരണ സംഭവം'

വിളക്കന്നൂരിലെ ദിവ്യകാരുണ്യ അദ്‌ഭുതത്തിന് വത്തിക്കാന്‍റെ അംഗീകാരം കിട്ടുന്നതുമായി ബന്ധപ്പെട്ട് തലശേരി ആർച്ച്ബിഷപ് മാർ ജോസഫ് പാംപ്ലാനി വത്തിക്കാനുമായി നടത്തിയ കത്തിടപാടുകൾക്കും പഠനങ്ങൾക്കും 2023 മുതൽ തലശേരി അതിരൂപത ചാൻസലർ ഫാ.ബിജു മുട്ടത്തുകുന്നേലും സാക്ഷിയാണ്. വിളക്കന്നൂർ ദിവ്യകാരുണ്യ അദ്ഭുതത്തെക്കുറിച്ചുള്ള കാര്യങ്ങൾ അദ്ദേഹം പങ്കുവച്ചപ്പോൾ: " പരിശോധനയ്ക്കായി പലപ്പോഴും തിരുവോസ്തിയുമായി തലശേരിയിൽനിന്നും ബംഗളൂർ ക്രൈസ്റ്റ് യൂണിവേഴ്സിറ്റിയിലേക്ക് പോകേണ്ടി വന്നു. ഇതിന്‍റെ രഹസ്യസ്വഭാവം കാത്തുസൂക്ഷിക്കാൻ റോമിൽ നിന്നും നിർദേശം ഉണ്ടായിരുന്നു. സഭയിൽ ഇത്തരം അസാധാരണസംഭവം നടന്നു കഴിഞ്ഞാൽ കാത്തിരിപ്പിന്‍റെ ഒരു സമയം ഉണ്ട്. ഇത്തരം സംഭവങ്ങളുണ്ടാകുന്പോൾ ആൾക്കാർ ഒരുമിച്ചുകൂടുന്നത് പതിവാണ്. എന്നാൽ, ഇതിൽ എന്തെങ്കിലും കൃത്രിമത്വം ഉണ്ടോ എന്ന കാര്യം പരിശോധിക്കേണ്ടതുണ്ട്. അത് സഭ ശരിയായ രീതിയിൽ സമയമെടുത്ത് പഠിച്ചു. വത്തിക്കാനിലെ തിരുസംഘത്തിന്‍റെ നിർദേശമനുസരിച്ച് ഓരോ കാര്യങ്ങളും രഹസ്യാത്മകതയോടെ ചെയ്തു. ഇതൊരു അസാധാരണമായ സംഭവം ആണെന്ന് പ്രഖ്യാപിക്കുന്നതിൽ തടസമില്ലെന്ന് വത്തിക്കാൻ തിരുസംഘം ഒടുവിൽ അറിയിക്കുകയായിരുന്നു. ദൈവം ഒരു അടയാളം തരുന്നു. ആ അടയാളം ജനങ്ങളുടെ വിശ്വാസം വർധിപ്പിക്കുന്നതിന് കാരണമാകുന്നുണ്ടോ എന്ന് സഭ പരിശോധിക്കേണ്ടതുണ്ട്. അതുകൊണ്ടാണ് വർഷങ്ങൾ നീണ്ട പഠനം എടുത്തത്. തിരുവോസ്തിയിൽ യേശുവിന്‍റെ രൂപം തെളിഞ്ഞ സംഭവത്തിൽ ശാസ്ത്രീയ രീതിയിലുള്ള പഠനം നടത്തുന്നതിന് ഇന്ത്യയിൽ സൗകര്യം ഉണ്ടോയെന്ന് റോമിൽനിന്ന് ചോദിച്ചപ്പോൾ ബംഗളൂരുവിൽ അതിനുള്ള സൗകര്യം ഉണ്ടെന്ന് അറിയിച്ചു. ബംഗളൂരുവിലെ ക്രൈസ്റ്റ് യൂണിവേഴ്സിറ്റിയുടെ ലാബിൽ ആധുനികമായ ഉപകരണങ്ങളുടെ സഹായത്തോടെയാണ് പഠനം നടത്തിയത്. തിരുവോസ്തിയിൽ തെളിഞ്ഞിരിക്കുന്ന ഛായാചിത്രത്തിൽ തിരുവോസ്തിയിലെ പദാർഥത്തിന്‍റെ അംശം തന്നെയാണോ അതോ പുറമേ നിന്നുള്ള പദാർഥത്തിന്‍റെ അംശം ആണോയെന്നായിരുന്നു പരിശോധിച്ചിരുന്നത്. കൂടാതെ ആരെങ്കിലും രൂപം വരച്ചു ചേർത്തതാണോയെന്ന പരിശോധനയും നടത്തിയിരുന്നു. ഈ പഠനത്തിൽ കണ്ടെത്തിയത് തിരുവോസ്തിയുടെ അതേ പദാർഥങ്ങൾ തന്നെയായിരുന്നു യേശുവിന്‍റെ ഛായാചിത്രത്തിലുള്ളതെന്നാണ്. ശാസ്ത്രജ്ഞൻമാരുടെ മൂന്നംഗസംഘമായിരുന്നു ഇതിനെക്കുറിച്ച് പഠനം നടത്തിയത്. ഇവരുടെ പഠനം വിലയിരുത്താൻ ഒപ്പം ദൈവശാസ്ത്രജ്ഞന്മാരും ഉണ്ടായിരുന്നു. തുടർന്ന് പഠന റിപ്പോർട്ട് വത്തിക്കാന് സമർപ്പിച്ചു. നീണ്ട കാത്തിരിപ്പിന് ശേഷമാണ് വത്തിക്കാനിൽനിന്ന് അറിയിപ്പ് വരുന്നത്. ഇതൊരു അസാധാരണമായ സംഭവം ആണെന്ന് പ്രഖ്യാപിക്കുന്നതിൽ തടസമില്ലെന്ന് വത്തിക്കാൻ തിരുസംഘം അറിയിക്കുകയായിരുന്നു. ഇതിന്‍റെ ഡിക്രി തയാറാക്കി അതിനെ, മലയാളത്തിൽ പരിഭാഷപ്പെടുത്തി റോമിന് സമർപ്പിക്കാൻ അറിയിച്ചു. അങ്ങനെ, റോമിലേക്ക് അയച്ചു. സീറോ മലബാർ സഭയുടെ മേജർ ആർച്ച്ബിഷപ്പിനും സിബിസിഐയും പ്രസിഡന്‍റിനും നല്കാൻ പറഞ്ഞു. എല്ലാം നടപടിക്രമങ്ങളും പാലിച്ചശേഷം ദൈവജനത്തെ അറിയിക്കാൻ റോമിൽനിന്നും നിർദേശിക്കുകയായിരുന്നു. മേയ് ഒൻപതിനാണ് വിളക്കന്നൂർ ക്രിസ്തുരാജ പള്ളിയിൽ വച്ച് തലശേരി ആർച്ച്ബിഷപ് മാർ ജോസഫ് പാംപ്ലാനി പ്രഖ്യാപിച്ചത്. ഔദ്യോഗിക പ്രഖ്യാപനം 31 നടക്കും.

നാവിക അക്കാഡമിയില്‍ പാസിംഗ് ഔട്ട് പരേഡ് 31ന്

ഏഴിമല: ഏഴിമല ഇന്ത്യന്‍ നാവിക അക്കാദമിയില്‍ ഈ വര്‍ഷത്തെ സ്പ്രിംഗ് ടേം പാസിംഗ് ഔട്ട് പരേഡ് 31ന് നടക്കും. ബംഗ്ലാദേശ്, സീസെഷല്‍സ്, ശ്രീലങ്ക, ടാന്‍സാനിയ എന്നിവിടങ്ങളിലെ പരിശീലനാര്‍ഥികള്‍ ഉള്‍പ്പെടെ 185 പേര്‍ പരേഡില്‍ പങ്കെടുക്കും. മാസങ്ങളോളം നീണ്ട കഠിന പരിശീലനത്തിനുശേഷം ഇന്ത്യന്‍ നാവികസേനയിലേക്കും സൗഹൃദ രാജ്യങ്ങളിലെ നാവികസേനകളിലേക്കുമുള്ള കമ്മീഷന്‍ഡ് ഓഫീസര്‍മാരായി മാറുന്നതിന്‍റെ ചവിട്ടുപടിയാണു നാവിക സേനയിലെ പ്രധാന ചടങ്ങുകളിലൊന്നായ പാസിംഗ് ഔട്ട് പരേഡ്. ക്ഷണിക്കപ്പെട്ട അതിഥികള്‍, മുതിര്‍ന്ന നാവിക ഉദ്യോഗസ്ഥര്‍, കാഡറ്റുകളുടെ രക്ഷിതാക്കൾ, പരിശീലകര്‍, ശിക്ഷകര്‍ തുടങ്ങിയവര്‍ പരേഡിന് സാക്ഷികളാകും. ചടങ്ങില്‍ പങ്കെടുക്കാനാകാത്തവര്‍ക്ക് ഇന്ത്യന്‍ നാവികസേനയുടെ ഔദ്യോഗിക ഫേസ്ബുക്ക്, യുട്യൂബ്, ട്വിറ്റര്‍ വഴിയും പരിപാടികള്‍ വീക്ഷിക്കാനാവുമെന്ന് നാവിക അക്കാദമി അധികൃതര്‍ പത്രക്കുറിപ്പിൽ അറിയിച്ചു.

മട്ടന്നൂർ-മാനന്തവാടി എയർപോർട്ട് കണക്ടിവിറ്റി റോഡ്: ഭൂമി ഏറ്റെടുക്കൽ നടപടികളാരംഭിക്കാൻ ഉത്തരവ്

കേളകം: നിർദിഷ്ട മട്ടന്നൂർ-മാനന്തവാടി എയർപോർട്ട് കണക്ടിവിറ്റി റോഡിന്‍റെ സാമൂഹിക ആഘാത പഠന റിപ്പോർട്ട് അംഗീകരിച്ച സർക്കാർ ഭൂമി എറ്റെടുക്കൽ നടപടികളുമായി ബന്ധപ്പെട്ട കാര്യങ്ങളാരംഭിക്കുന്നതിന് ഉത്തവ് പുറപ്പെടുവിച്ചു. വിദഗ്‌ധ സമിതിയുടെ ശിപാർശ, സാമുഹ്യാഘാത പഠന റിപ്പോർട്ട്, കണ്ണൂർ ജില്ലാ കളക്ടറുടെ റിപ്പോർട്ട് എന്നിവയുടെ അടിസ്ഥാനത്തിലാണ് നടപടി. മാനന്തവാടി-കൊട്ടിയൂർ-പേരാവൂർ-മട്ടന്നൂർ എയർപോർട്ട് റോഡ് നവീകരണത്തിനു വേണ്ടി 84.906 ഹെക്ടർ ഭൂമിയാണ് കണ്ടെത്തിയത്. ഇതിൽ നെൽവയൽ ഉൾപ്പെട്ടിട്ടുണ്ടെങ്കിൽ ആയത് 2008-ലെ കേരള നെൽവയൽ തണ്ണീർത്തട സംരക്ഷണ ആക്ടിലെയും ബന്ധപ്പെട്ട ചട്ടങ്ങളിലെയും നടപടിക്രമങ്ങൾ പാലിച്ച് മാത്രമേ പരിവർത്തനം ചെയ്യാവൂ എന്ന വ്യവസ്ഥക്കു വിധേയമായേ നടപടികളുമായി മുന്നോട്ട് പോകാവൂ എന്ന് ഉത്തരവിൽ പറയുന്നു. 2013-ലെ ആർഎഫ്സിറ്റിഎൽഎആർആർ നിയമത്തിലെ സെക്ഷൻ-അഞ്ച് പ്രകാരം ബാധിക്കപ്പെടുന്ന കുടുംബങ്ങളുടെ പരാതികൾ കേൾക്കുന്നതിന് പബ്ലിക് ഹിയറിംഗ് ഉൾപ്പെടെ നടത്തിയിരുന്നു.

എംഡിഎംഎ: യുവാവ് പിടിയിൽ

ഇരിട്ടി: കൂട്ടുപുഴ പോലീസ് എയ്ഡ് പോസ്റ്റിൽ ഇരിട്ടി എസ്ഐ റെജി സ്കറിയയും ജില്ലാ പോലീസ് മേധാവിയുടെ ലഹരിവിരുദ്ധ സ്‌ക്വാഡും സംയുക്തമായി നടത്തിയ വാഹനപരിശോധനയിൽ എംഡിഎംഎയുമായി യുവാവിനെ അറസ്റ്റ് ചെയ്തു. കതിരൂർ ആറാം മൈലിലെ കെ. മുഹമ്മദ് ഷാനിലാണ് (29) അറസ്റ്റിലായത്. പ്രതിയുടെ കയ്യിൽ നിന്നും 10.238 ഗ്രാം എംഡിഎംഎ പോലീസ് കണ്ടെടുത്തു.

കണ്ണൂരും കാസർഗോട്ടും വിദ്യാഭ്യാസ സ്ഥാപനങ്ങള്‍ക്ക് അവധി

അതിതീവ്ര മഴ തുടരുന്ന സാഹചര്യത്തിൽ ഇന്നും നാളെയും റെഡ് അലര്‍ട്ട് പ്രഖ്യാപിച്ചതിനാൽ കണ്ണൂർ, കാസർഗോഡ് ജില്ലകളിലെ വിദ്യാഭ്യാസ സ്ഥാപനങ്ങള്‍, അങ്കണവാടികള്‍, മദ്രസകള്‍, ട്യൂഷന്‍ സെന്‍ററുകള്‍, സ്‌പെഷല്‍ ക്ലാസുകള്‍ എന്നിവയ്ക്ക് ഇന്ന് ജില്ലാ കളക്ടര്‍മാർ അവധി പ്രഖ്യാപിച്ചു. മുന്‍കൂട്ടി പ്രഖ്യാപിച്ച പരീക്ഷകളില്‍ മാറ്റമില്ല. റെഡ് അലര്‍ട്ട് പ്രഖ്യാപിച്ച സാഹചര്യത്തില്‍ കാസർഗോഡ് ജില്ലയിൽ ക്വാറികള്‍ ഇന്നും നാളെയും പ്രവര്‍ത്തിക്കാന്‍ പാടില്ല. റാണിപുരം ഉള്‍പ്പെടെയുള്ള വിനോദസഞ്ചാര കേന്ദ്രങ്ങള്‍ അടച്ചിടും. ബീച്ചുകളിലേക്കും വിനോദസഞ്ചാരികള്‍ക്ക് പ്രവേശനം അനുവദിക്കുന്നതല്ല. മലയോരങ്ങളിലേക്കുള്ള രാത്രികാല യാത്രകള്‍ ഒഴിവാക്കേണ്ടതാണെന്നും ജില്ലാ കളക്ടർ അറിയിച്ചു.

പായത്ത് ഡെങ്കി പ്രതിരോധ പ്രവർത്തനങ്ങൾ ആരംഭിച്ചു

ഇരിട്ടി: പായം പഞ്ചായത്തിൽ ഡെങ്കിപ്പനി റിപ്പോർട്ട് ചെയ്ത പതിനാലാം വാർഡിൽ വള്ളിത്തോട് കുടുംബാരോഗ്യ കേന്ദ്രത്തിന്‍റെ നേതൃത്വത്തിൽ കൊതുക് നശീകരണം ഉൾപ്പെടെ ഡെങ്കി പ്രതിരോധ പ്രവർത്തനങ്ങൾ ആരംഭിച്ചു. ആരോഗ്യപ്രവർത്തകർ, വിദ്യാർഥികൾ, ആശാവർക്കർമാർ, കുടുംബശ്രീ അംഗങ്ങൾ എന്നിവരടങ്ങിയ സംഘമാണ് പ്രതിരോധ പ്രവർത്തനങ്ങൾ നടത്തുന്നത്. കൊതുക വളരുന്ന സാഹചര്യം ഉണ്ടോ എന്ന് പരിശോധിക്കുകയും ബോധവത്കരണ നൽകുകയും ലഘുലേഖകൾ വിതരണം ചെയ്യുകയും ചെയ്തു. ജൂണിയർ ഹെൽത്ത് ഇൻസ്പെക്ടർ കെ. സിജു, മഞ്ജു , ആശാവർക്കർമാർ, കുടുംബശ്രീ പ്രവർത്തകർ എന്നിവർ നേതൃത്വം നൽകി. വീട്ടിലും പരിസരത്തും കൊതുക് വളരുന്ന സാഹചര്യമില്ലെന്ന് ഓരോ വീട്ടുകാരും ഉറപ്പ് വരുത്തണമെന്നും അല്ലാത്തവർക്കെതിരെ കേരള പൊതുജനാരോഗ്യ നിയമം പ്രകാരം നടപടി സ്വീകരിക്കുമെന്നും ഹെൽത്ത്‌ ഇൻസ്‌പെക്ടർ ബിനോജ് കുറ്റ്യാനി അറിയിച്ചു.

പ്രതിഭകൾക്ക് ഇരിട്ടിയിൽ ദീപികയുടെ വിജയാദരം

ഇരിട്ടി: എസ്എസ്എൽസി, പ്ലസ് ടു പരീക്ഷകളിൽ മികച്ച വിജയം നേടിയ ഇരിട്ടി മേഖലയിലെ വിദ്യാർഥികളെയും വിദ്യാർഥികളെ ഉന്നത വിജയത്തിന് പ്രാപ്തമാക്കിയ വിദ്യാലയങ്ങളേയും മലയാളത്തിലെ പ്രഥമ ദിനപത്രമായ ദീപിക, വിദേശ വിദ്യാഭ്യാസ രംഗത്തെ അതികായരായ സാന്‍റാ മോണിക്ക സ്റ്റഡി എബ്രോഡുമായി സഹകരിച്ച് ആദരിച്ചു. ഇരിട്ടി സെന്‍റ് ജോസഫ് പാരിഷ് ഹാളിൽ നടന്ന ആദരം-2025 പരിപാടി കെപിസിസി പ്രസിഡന്‍റ് സണ്ണി ജോസഫ് എംഎൽഎ ഉദ്ഘാടനം ചെയ്തു. വിദ്യാഭ്യാസത്തിലൂടെ മാത്രമേ വിജയം കൈവരിക്കാനാകൂ എന്നും വിദ്യാഭ്യാസത്തിന്‍റെ രണ്ട് പ്രാരംഭ കടന്പകളാണ് എസ്എസ്എൽസിയും പ്ലസ് ടുവുമെന്ന് സണ്ണി ജോസഫ് എംഎൽഎ പറഞ്ഞു. വിജയികൾക്ക് മാത്രമല്ല വിജയത്തിലേക്ക് വിദ്യാർഥികളെ ഒരുക്കിയ അധ്യാപകർക്കും രക്ഷിതാക്കൾക്കും ലഭിക്കുന്ന അംഗീകാരം കൂടിയാണ് ദീപികയുടെ ആദരവ്.‌- സണ്ണി ജോസഫ് പറഞ്ഞു. മികച്ച നേട്ടം കരസ്ഥമാക്കിയ സിഎംഐ ക്രൈസ്റ്റ് സ്കൂൾ ഇരിട്ടി, നവജ്യോതി സീനിയർ സെക്കൻഡറി സ്കൂൾ എടത്തൊട്ടി , ഫ്ലോറിറ്റ് ഇംഗ്ലീഷ് മീഡിയം സ്കൂൾ ഉളിക്കൽ, സെന്‍റ് അൽഫോൻസാ ഇംഗ്ലീഷ് മീഡിയം സ്കൂൾ കീഴ്പ്പള്ളി, ബെൻഹിൽ ഇംഗ്ലീഷ് മീഡിയം സ്കൂൾ കുന്നോത്ത് , സെന്‍റ് . തോമസ് ഹയർ സെക്കൻഡറി സ്കൂൾ കിളിയന്തറ, സെന്‍റ് ജോസഫ് ഹയർ സെക്കൻഡറി സ്കൂൾ കുന്നോത്ത്, സെന്‍റ് ജോസഫ് ഇംഗ്ലീഷ് മീഡിയം സ്കൂൾ പേരട്ട , സെന്‍റ് മേരീസ് ഹയർ സെക്കൻഡറി സ്കൂൾ എടൂർ, സേക്രട്ട് ഹാർട്സ് ഹയർ സെക്കൻഡറി സ്കൂൾ അങ്ങാടിക്കടവ് , സെന്‍റ് ജോൺസ് ബാപ്റ്റിസ്റ്റ് ഇംഗ്ലീഷ് മീഡിയം സ്കൂൾ കടത്തുംകടവ്, സെന്‍റ് തോമസ് ഹൈസ്കൂൾ കരിക്കോട്ടക്കരി , സെന്‍റ് സെബാസ്റ്റ്യൻസ് ഹയർ സെക്കൻഡറി സ്കൂൾ വെളിമാനം, മേരിലാൻഡ് സ്കൂൾ മടമ്പം , ലിറ്റിൽ ഫ്ലവർ ഇംഗ്ലീഷ് മീഡിയം കേളകം എന്നീ വിദ്യാലയങ്ങളെയും നൂറുശതമാനം വിജയം നേടിയ സ്കൂൾ പ്രിൻസിപ്പൽമാരെയും കെപിസിസി പ്രസിഡന്‍റായി തെരഞ്ഞെടുക്കപ്പെട്ട സണ്ണി ജോസഫ് എംഎൽഎയെയും ചടങ്ങിൽ ആദരിച്ചു. 500ലധികം വിദ്യാർഥികളും രക്ഷിതാക്കളും അധ്യാപകരും പങ്കെടുത്തു.

ദേശീയപാതയിലെ മണ്ണിടിച്ചിൽ: പ്രതിഷേധ കൂട്ടായ്മ നടത്തി

തളിപ്പറമ്പ്: ദേശീയപാത നിർമാണത്തിലെ അപാകതകൾ പരിഹരിക്കണമെന്നും മണ്ണിടിച്ചിലും വെള്ളംകയറിയും നാശനഷ്ടം സംഭവിച്ച വീടുകൾക്ക് നഷ്ടപരിഹാരം ഉറപ്പാക്കണമെന്നും യുഡിഎഫ് തളിപ്പറന്പ് നിയോജക മണ്ഡലം കമ്മിറ്റി ആവശ്യപ്പെട്ടു. ഇക്കാര്യങ്ങൾ ഉന്നയിച്ച് കുപ്പത്ത് സംഘടിപ്പിച്ച പ്രതിഷേധ കൂട്ടായ്മ ഡിസിസി പ്രസിഡന്‍റ് മാർട്ടിൻ ജോർജ് ഉദ്ഘാടനം ചെയ്തു. ദേശീയപാത നിർമാണ പ്രവൃത്തി ആരംഭിക്കുന്പോൾ തന്നെ പ്രദേശവാസികൾ നിർമാണം അശാസ്ത്രീയമാണെന്ന് ചൂണ്ടിക്കാട്ടിയത് ശരിവെക്കുന്ന സംഭവങ്ങളാണ് കുപ്പം മേഖലയിൽ ഉണ്ടായിരിക്കുന്നതെന്ന് മാർട്ടിൻ ജോർജ് പറഞ്ഞു. യുഡിഎഫ് തളിപ്പറമ്പ് നിയോജക മണ്ഡലം ചെയർമാൻ പി. മുഹമ്മദ് ഇക്ബാൽ അധ്യക്ഷത വഹിച്ചു. യുഡിഎഫ് ജില്ലാ ചെയർമാൻ പി.ടി. മാത്യു, മുസ്‌ലിം ലീഗ് ജില്ലാ പ്രസിഡന്‍റ അബ്ദുൽ കരീം ചേലേരി, ടി. ജനാർദനൻ, മുഹമ്മദ് ബ്ലാത്തൂർ, വി.പി അബ്ദുൽ റഷീദ്, പി.കെ സുബൈർ, ഇബ്രാഹിം കുട്ടി തിരുവട്ടൂർ, സി.പി.വി അബ്ദുല്ല, ഒ.പി ഇബ്രാഹിംകുട്ടി, പി.വി അബ്ദുൽ ഷുക്കൂർ എന്നിവർ പ്രസംഗിച്ചു.

മട്ടന്നൂരിൽ കാറ്റിൽ വ്യാപക നാശനഷ്‌ടം

മട്ടന്നൂർ: ശക്തമായ കാറ്റിൽ മട്ടന്നൂരിൽ വ്യാപക നാശനഷ്‌ടം. ഇന്നലെ ഉച്ചയോടെയുണ്ടായ കാറ്റിലാണ് നാശനഷ്‌‌ടമുണ്ടായത്. മട്ടന്നൂർ ശങ്കരവിദ്യാപീഠം സ്‌കൂളിനു സമീപം മൈത്രി നഗറിലെ എ. റീനയുടെ വീടിനു മുകളിലെ ഷീറ്റ് കാറ്റിൽ പറന്നുപോയി. മുന്നിലെ റോഡിലേക്കാണു ഷീറ്റ് വീണത്. വാഹനങ്ങളും ആളുകളുമില്ലാത്തതിനാൽ വലിയ അപകടമാണ് ഒഴിവായത്. മട്ടന്നൂർ മധുസൂദനൻ തങ്ങൾ സ്മാരക ഗവ. യുപി സ്‌കൂളിന്‍റെ ഭക്ഷണശാലയുടെ മേൽക്കൂര കാറ്റിൽ നിലംപതിച്ചു. കാറ്റിൽ മേൽക്കുരയുടെ ഷീറ്റ് പാറിപ്പോകുകയായിരുന്നു. വൈദ്യുത ലൈനിൽ മരങ്ങൾ പൊട്ടിവീണ് പലയിടത്തും വൈദ്യുത ബന്ധം തടസപ്പെട്ടു. നാഗവളവ്, വെമ്പടി, മരുതായി, നെല്ലൂന്നി, ഇല്ലംഭാഗം, കല്ലൂർ തുടങ്ങിയ സ്ഥലങ്ങളിലാണു മരംപൊട്ടി വീണത്. പലയിടത്തും വൻതോതിൽ കൃഷിനാശവുമുണ്ടായി.

ഇരിട്ടിയിൽ സ്കൂൾ വാഹനങ്ങളുടെ പരിശോധന തുടങ്ങി

ഇരിട്ടി: സ്കൂൾ വാഹനങ്ങളുടെ സുരക്ഷ ഉറപ്പാക്കുന്നതിനായി മോട്ടോർ വാഹനവകുപ്പ് സ്കൂൾ വാഹനങ്ങളുടെ പരിശോധന ആരംഭിച്ചു. നരയംന്പാറ സ്കൂൾ ഗ്രൗണ്ടിൽ ഓപ്പറേഷൻ സുരക്ഷിത 2025 വിദ്യാരംഭം എന്ന പേരിൽ ഇരിട്ടി സബ് ആർടിഒ ഓഫീസ് പരിധിക്കു കീഴിൽ വരുന്ന സ്കൂളുകളുടെ പരിശോധനയാണ് ആരംഭിച്ചത്. മോട്ടോർ വെഹിക്കിൾ ഇൻസ്പെക്ടർ കെ. രാജീവൻ, അസിസ്റ്റന്‍റ് മോട്ടോർ വെഹിക്കിൾ ഇൻസ്പെക്ടർമാരായ വി.ആർ.ഷനിൽകുമാർ, ഡി.കെ. ഷീജി, ടി.എ. സുമേഷ് എന്നിവരുടെ നേതൃത്വത്തിലായിരുന്നു പരിശോധന. ഡ്രൈവർമാർക്കും വാഹനത്തിലെ സഹായികൾക്കും ബോധവത്കരണ ക്ലാസും നൽകുന്നുണ്ട്. 31 വരെ പരിശോധന തുടരും. തിരക്ക് കുറക്കാൻ ഒരോ ദിവസവും നിശ്ചിത എണ്ണം വാഹനങ്ങളാണ് പരിശോധിക്കുന്നത്. ഇന്നലെ രജിസ്ട്രേഷൻ നന്പർ ഒന്നു മുതൽ 5000 വരെയുള്ള വാഹനങ്ങൾ പരിശോധിച്ചു. 31ന് 5001 മുതല്‍ 9999 വരെയുള്ള വാഹനങ്ങള്‍പരിശോധിക്കും. പരിശോധനക്ക് നടത്തി സ്റ്റിക്കര്‍ പതിക്കാത്ത വാഹനങ്ങള്‍ ജൂണ്‍ രണ്ടു മുതല്‍ നിരത്തില്‍ ഇറങ്ങാന്‍ അനുവദിക്കില്ലെന്ന് മോട്ടോർ വകുപ്പ് ഉദ്യോഗസ്ഥർ അറിയിച്ചു. അധ്യയനവർഷം ആരംഭിച്ച ശേഷവും നിരത്തുകളിൽ ശക്തമായ വാഹന പരിശോധന തുടരുമെന്ന് ഇരിട്ടി മോട്ടോർ വെഹിക്കിൾ ഇൻസ്പെക്ടർ കെ. രാജീവൻ പറഞ്ഞു.

ആവശ്യത്തിന് ഡോക്ടർമാരില്ലാതെ പേരാവൂർ താലൂക്ക് ആശുപത്രി

പേരാവൂർ: പേരാവൂർ താലൂക്ക് ആശുപത്രിയിൽ ആവശ്യത്തിന് ഡോക്ടർമാരില്ലാത്ത് ആശുപത്രിയുടെ പ്രവർത്തനത്തിന്‍റെ താളം തെറ്റിക്കുന്നു. ഡോക്ടർമാരുടെ കുറവ് കാരണം രാത്രികാല അത്യാഹിത വിഭാഗത്തിന്‍റെ പ്രവർത്തനം നിർത്തി വച്ചത് ജനങ്ങളെ ദുരിതത്തിലാക്കുന്നുണ്ട്. സൂപ്രണ്ട് ഉൾപ്പെടെ 14 ഡോക്ടർമാരുടെ തസ്തിക നിലവിലുള്ള ആശുപത്രിയിൽ മൂന്ന് ഡോക്ടർമാരുടെ തസ്തികകൾ ഒഴിഞ്ഞു കിടക്കുകയാണ്. ഒരു ഡോക്ടർ ദീർഘകാല അവധിയിൽ ആയതിനാലും ഒരു ഡോക്ടർ ട്രൈബൽ മൊബൈൽ യൂണിറ്റിലേക്ക് നിയമിക്കപ്പെട്ടതിനാലും സ്ഥാപനത്തിലെ ഏക ഗൈനക്കോളജി വിഭാഗം ഡോക്ടർ 24 മണിക്കൂറും ജോലി ചെയ്യേണ്ട അവസ്ഥ നേരിടുന്നുണ്ട്. ഒരു ദിവസം താലൂക്ക് ആശുപത്രിയിൽ അത്യാഹിത വിഭാഗം കൈകാര്യം ചെയ്യുന്നതിലേക്കായി കുറഞ്ഞത് അഞ്ച് ഡോക്ടർമാർ ആവശ്യമാണെന്നിരിക്കെ രണ്ടു പേരുടെ സേവനമേ ലഭിക്കുന്നുള്ളൂ. കൂടാതെ മഴക്കാല രോഗങ്ങൾ മലയോര മേഖലകളിൽ വ്യാപിക്കുമ്പോൾ ജനറൽ മെഡിസിൻ, പീഡിയാട്രിക്സ്, പനി ക്ലിനിക് ഉൾപ്പെടെ പ്രവർത്തിക്കാതിരിക്കുന്നത് സ്ഥിതിഗതികൾ കൂടുതൽ ഗുരുതരമായേക്കാനും സാധ്യതയുണ്ട്. ഡോക്ടർമാരുടെ കുറവ് ‌പരിഹരിക്കണം: കെജിഎംഒഎ കണ്ണൂർ: ജനങ്ങളുടെ ആരോഗ്യസുരക്ഷ ഉറപ്പാക്കാൻ പേരാവൂർ താലൂക്ക് ആശുപത്രിയിലെ ഡോക്ടർമാരുടെ കുറവ് എത്രയും പെട്ടെന്ന് പരിഹരിക്കണമെന്ന് കേരള ഗവ. മെഡിക്കൽ ഓഫീസേഴ്സ് അസോസിയേഷൻ ജില്ലാ കമ്മിറ്റി ആവശ്യപ്പട്ടു. ഡോക്ടർമാരുടെ കുറവ് കാരണം രാത്രികാല അത്യാഹിത വിഭാഗത്തിന്‍റെ സേവനം നിർത്തിവേക്കേണ്ടി വന്നു എന്നത് ഗുരുതരമായ അവസ്ഥയാണ്. ഡോക്ടർമാരുടെ നിയമന കാര്യത്തിൽ ജില്ലാ മെഡിക്കൽ ഓഫീസിന്‍റെ ഭാഗത്ത് നിന്നും നടപടികൾ ഉണ്ടായില്ലെങ്കിൽ കെജിഎംഒഎ ശക്തമായ പ്രക്ഷോഭത്തിനിറങ്ങുമെന്നും ജില്ലാ കമ്മിറ്റി മുന്നറിയിപ്പ് നൽകി.

ജോയിന്‍റ് ആർടി ഓഫീസ് ധർണ നടത്തി

ഇരിട്ടി: ബാക്കി നിൽക്കുന്ന ഡ്രൈവിംഗ് ടെസ്റ്റ് ഫ്ലോട്ടുകൾ അടിയന്തരമായി പൂർത്തിയാക്കുക, ഡ്രൈവിംഗ് സ്കൂൾകാരെ ഇല്ലായ്മ ചെയ്യുന്ന തൊഴിലാളി ദ്രോഹ നടപടിയിൽ നിന്ന് ഗതാഗത മന്ത്രി പിൻമാറുക, ഡ്രൈവിംഗ് സ്കൂളുകളെ സംരക്ഷിക്കുക, കെഎസ്ആർടിസി ഡ്രൈവിംഗ് സ്കൂളിലെ പഠിതാക്കളെ ഡ്രൈവിംഗ് ടെസ്റ്റ് മോട്ടോർവാഹന വകുപ്പ് നിശ്ചയിച്ചിട്ടുള്ള ടെസ്റ്റ് ഗ്രൗണ്ടിൽ വച്ച് നടത്തുക, ഡ്രൈവിംഗ് സ്കൂളുകാരെ അപകീർത്തിപ്പെടുത്തുന്ന തരത്തിലുള്ള പ്രസ്താവനകൾ വകുപ്പ് മന്ത്രി അവസാനിപ്പിക്കുക തുടങ്ങിയ ആവശ്യങ്ങൾ ഉന്നയിച്ച് ഡ്രൈവിംഗ് സ്കൂൾ ഉടമകളും ജീവനക്കാരും ഇരിട്ടി ജോയിന്‍റ് ആർടി ഓഫീസിലേക്ക് മാർച്ചും ധർണയും നടത്തി. ഓൾ കേരള ഡ്രൈവിംഗ് സ്കൂൾ വർക്കേഴ്സ് യൂണിയൻ സിഐടിയു ഇരിട്ടി മേഖലാ കമ്മിറ്റിയുടെ നേതൃത്വത്തിലായിരുന്നു മാർച്ചും ധർണയും. സിഐടിയു ഇരിട്ടി ഏരിയ വൈസ് പ്രസിഡന്‍റ് എം. വിനോദ് കുമാർ ഉദ്ഘാടനം ചെയ്തു. ടി.എൻ. ജയേഷ് അധ്യക്ഷത വഹിച്ചു. പി. ചന്ദ്രൻ, മുജീബ് അരമന, സജീർ, സയ്യിദ്ലൽവി, സക്കീർ, നിസാർ എന്നിവർ പ്രസംഗിച്ചു .

ഓപ്പറേഷന്‍ ക്ലീൻ സ്ലേറ്റ്: സംസ്ഥാന അതിർത്തിയിൽ പരിശോധന നടത്തി

ഇരിട്ടി: ലഹരിക്കെതിരെ നടത്തുന്ന കർശന നടപടികളുടെ ഭാഗമായുള്ള ഓപ്പറേഷൻ ക്ലീൻ സ്ലേറ്റ് പദ്ധതിയുടെ ഭാഗമായി കേരള-കർണാടക അതിർത്തിയായ കുട്ടുപുഴയിൽ പോലീസ്, എക്സൈസ്, ഡോഗ് സ്ക്വാഡ് എന്നിവയുടെ സംയുക്ത പരിശോധന നടത്തി. ലഹരി വസ്തുക്കൾ കണ്ടെത്തുന്നതിൽ പ്രത്യേക പരിശീലനം നേടിയ കണ്ണൂർ ജില്ലാ നർക്കോട്ടിക് വിഭാഗം ഡോഗ് ഹീറോയുടെ സഹായത്തോടെയാണ് പരിശോധന നടത്തിയത് . ലഹരിവസ്തുക്കൾ കണ്ടെത്താൻ പ്രത്യേക പരിശീലനം ലഭിച്ച നായയാണ് ഹീറോ. ബസ് ,കാർ , രാവിലെ പത്തു മുതൽ ഉച്ച കഴിഞ്ഞ് രണ്ടു വരെ വാഹനങ്ങൾ പരിശോധിച്ചു.കൂട്ടുപുഴ എക്സൈസ് ചെക്പോസ്റ്റ് , ഇരിട്ടി റേഞ്ച് എക്സൈസ് , ഡോഗ് സ്‌ക്വാഡ്, ഡാൻസഫ് ഇരിട്ടി, തളിപ്പറമ്പ്, ഇരിട്ടി സ്ട്രൈക്കിംഗ് ടീം, ഇരിട്ടി , പേരാവൂർ , മാലൂർ, കേളകം, ആറളം, മുഴക്കുന്ന് പോലീസ് , ഹൈവേ പോലീസ് എന്നിവരും പങ്കെടുത്തു. ഇത് രണ്ടാം തവണയാണ് നർക്കോട്ടിക്ക് ഡോഗിന്‍റെ സഹായത്തോടെ കൂട്ടുപുഴയിൽ പരിശോധന നടത്തുന്നത്.

കർഷകർക്ക് മുൻനിര പരിശീലനം

പയ്യാവൂർ: ഇരിക്കൂർ ബ്ലോക്ക് തലത്തിൽ കർഷകർക്കായി സംഘടിപ്പിച്ച മുൻനിര പരിശീലനം പയ്യാവൂർ ഗ്രാമപഞ്ചായത്ത് കൃഷിഭവൻ ഹാളിൽ നടന്നു. പഞ്ചായത്ത് വൈസ് പ്രസിഡന്‍റ് പ്രീത സുരേഷ് പരിശീലന പരിപാടി ഉദ്ഘാടനം ചെയ്തു. സിഡിഎസ് അംഗം ഷീബ വിജയൻ അധ്യക്ഷത വഹിച്ചു. കൃഷി ഓഫീസർ എ.വി. രാധാകൃഷ്ണൻ ആമുഖ പ്രഭാഷണം നടത്തി പദ്ധതി വിശദീകരിച്ചു. സിഡിഎസ് അക്കൗണ്ടന്‍റ് ഗീത മധു, ബിന്ദു ജയകുമാർ എന്നിവർ പ്രസംഗിച്ചു. പന്നിയൂരിലെ കണ്ണൂർ ജില്ലാ കാർഷിക വിജ്ഞാന കേന്ദ്രം (കെവികെ) നേതൃത്വം നൽകിയ പരിശീലനത്തിൽ ഇരിക്കൂർ ബ്ലോക്ക് കൃഷി അസിസ്റ്റന്‍റ് ഡയറക്‌ടർ കാര്യാലയത്തിന്‍റെ പരിധിയിലുള്ള കർഷകരാണു പങ്കെടുത്തത്. കശുമാങ്ങ ഉപയോഗിച്ച് മൂല്യവർധിത ഉത്പന്നങ്ങളായ കാഷ്യു ജാം, കാഷ്യു സിറപ്പ്, കാഷ്യു കാൻഡി എന്നിവ ഉണ്ടാക്കുന്ന വിധം കർഷകരെ പരിശീലിപ്പിച്ചു. കെവികെ പന്നിയൂർ ഫാം സൂപ്രണ്ട് ഷഹനാസ്, പുഷ്പ എന്നിവർ ക്ലാസ് നയിച്ചു.

മഴയിൽ മലയോരത്ത് കാർഷിക മേഖലയിൽ വൻ നാശനഷ്ടം

ശ്രീകണ്ഠപുരം: തീവ്ര മഴയിലും കാറ്റിലും മലയോരത്തെ കാർഷിക മേഖലയിൽ വൻ നാശനഷ്ടം. വാഴകൃഷി പൂർണമായും നശിച്ച അവസ്ഥയാണ്. റബർ, തെങ്ങ്, കശുമാവ് തുടങ്ങിയ വയും കാറ്റിൽ കടപുഴകി വീണു. നിരവധി കർഷകരാണ് ഓരോ ദിവസവും നഷ്ടപരിഹാരത്തിനായി കൃഷി ഓഫീസിൽ കയറിയിറങ്ങുന്നത്. കഴിഞ്ഞ വർഷം ഉണ്ടായ നഷ്ടത്തിന്‍റെ തുക പോലും കർഷകർക്ക് ഇനിയും ലഭ്യമായിട്ടില്ല. ഇരിക്കൂർ നിയോജകമണ്ഡലത്തിലെ നടുവിൽ, ആലക്കോട്, ചെമ്പന്തൊട്ടി മേഖലയിലാണ് ഏറ്റവും കൂടുതൽ നാശനഷ്ടം ഉണ്ടായത്. നടുവിൽ പഞ്ചായത്തിലെ വിളക്കന്നൂർ 16,18 വാർഡുകളിൽ മാത്രം കഴിഞ്ഞ ദിവസങ്ങളിൽ 10 വീടുകൾ കാറ്റിലും മഴയിലും തകർന്നതായി പഞ്ചായത്ത് പ്രസിഡന്‍റ് ബേബി ഓടംപള്ളി പറഞ്ഞു. ചെന്പന്തൊട്ടി മേഖലയിൽ കൊക്കായി, ചെമ്പന്തൊട്ടി പാലങ്ങളുടെ അപ്രോച്ച് റോഡ് പൂർണമായും ഒഴുകിപ്പോയി. യാത്രാ ക്ലേശത്തിനു ഇനിയും പരിഹാരമായില്ല. കൃഷി നാശം സംഭവിച്ചവർക്ക് അടിയന്തര നഷ്ടപരിഹാരം വിതരണം ചെയ്യണമെന്നാണ് നാട്ടുകാരുടെ ആവിശ്യം.

ദുരന്ത നിവാരണ സേന യോഗം ചേർന്നു

ശ്രീകണ്ഠപുരം: ശ്രീകണ്ഠപുരം നഗരസഭയിൽ ഏത് അടിയന്തര സാഹചര്യവും നേരിടുന്നതിനുള്ള തയാറെടുപ്പിനായി ദുരന്തനിവാരണ സേനയുടെ അടിയന്തരയോഗം ചേർന്നു. മുനിസിപ്പൽ ചെയർപേഴ്സൺ കെ.വി.ഫിലോമിന അധ്യക്ഷത വഹിച്ചു. വൈസ് ചെയർമാൻ കെ. ശിവദാസൻ, സ്റ്റാൻഡിംഗ് കമ്മിറ്റി ചെയർമാൻ പി.പി. ചന്ദ്രാംഗദൻ, ചെയർപേഴ്സൺമാരായ ജോസഫിന, വി. പി. നസീമ, കൗൺസിലർ കെ. വി. ഗീത, ക്ലീൻസിറ്റി മാനേജർ പി. മോഹനൻ എന്നിവർ പ്രസംഗിച്ചു. റവന്യു, അഗ്നിരക്ഷാസേനാ വിഭാഗം ഉദ്യോഗസ്ഥർ എന്നിവർ ക്ലാസുകൾ നയിച്ചു.

സണ്ണി ജോസഫിന് സ്വീകരണം

പയ്യാവൂർ: കെപിസിസി പ്രസിഡന്‍റായി ചുമതലയേറ്റ സണ്ണി ജോസഫ് എംഎൽഎക്ക് സ്വീകരണവും നവീകരിച്ച കോൺഗ്രസ് പയ്യാവൂർ മണ്ഡലം കമ്മിറ്റി ഓഫീസായ ഇന്ദിരാഭവൻ ഉദ്ഘാടനവും ജൂൺ ഒന്നിനു വൈകുന്നേരം 4.30 ന് പയ്യാവൂർ ഇന്ദിരാഭവനിൽ നടക്കും. സണ്ണി ജോസഫ് എംഎൽഎ ഉദ്ഘാടനം നിർവഹിക്കും. കോൺഗ്രസ് പയ്യാവൂർ മണ്ഡലം പ്രസിഡന്‍റ് ഇ.കെ. കുര്യൻ അധ്യക്ഷത വഹിക്കും. കെ. സുധാകരൻ എംപി ഫോട്ടോ അനാഛാദനം ചെയ്യും. സജീവ് ജോസഫ് എംഎൽഎ മികച്ച പ്രതിഭകളെയും കെപിസിസി ജനറൽ സെക്രട്ടറി സോണി സെബാസ്റ്റ്യൻ മുതിർന്ന നേതാക്കളെയും ആദരിക്കും. കെപിസിസി ജനറൽ സെക്രട്ടറി പി.എം. നിയാസ് മുഖ്യാതിഥിയായിരിക്കും.

യുവാവ് വാഹനമിടിച്ച് മരിച്ച സംഭവം: നിർത്താതെ പോയ ടാങ്കർ കസ്റ്റഡിയിൽ

കണ്ണൂർ: വളപട്ടണം പാലത്തിനടുത്ത് യുവാവ് വാഹനമിടിച്ച് മരിക്കാനിടയായ സംഭവത്തിൽ നിർത്താതെ പോയ വാഹനം പോലീസ് കസ്റ്റഡിയിലെടുത്തു. അപകടം വരുത്തിയതിന് ശേഷം നിർത്താതെ പോയ കെഎൽ 58 സി 9086 നമ്പർ മാലിന്യം കയറ്റിയ മിനി ടാങ്കർ കണ്ണൂർ വാരത്ത് ഒളിപ്പിച്ച നിലയിൽ പോലീസ് കണ്ടെടുക്കുകയായിരുന്നു. പാപ്പിനിശേരി ഈന്തോട് ഐശ്വര്യ നിവാസിലെ അഷിൻ (22) ആണ് അപകടത്തിൽ മരിച്ചത്. കണ്ണൂരിൽ നിന്ന് ജോലി കഴിഞ്ഞ് സകൂട്ടറിൽ വീട്ടിലേക്ക് മടങ്ങവെയായിരുന്നു അപകടം. അർധരാത്രിയോടെ വളപട്ടണം പഴയങ്ങാടി റോഡിനടുത്തായി അഷിൻ സഞ്ചരിച്ച വാഹനത്തെ പിറകിൽ നിന്നെത്തിയ മാലിന്യ ടാങ്കർ ഇടിച്ചുതെറിപ്പിച്ച ശേഷം നിർത്താതെ പോവുകയായിരുന്നു. റോഡിൽ ചോർവാർന്ന നിലയിൽ കണ്ട യുവാവിനെ അതുവഴി കാറിലെത്തിയവർ ചേർന്ന് ആശുപത്രിയിൽ എത്തിച്ചെങ്കിലും മരിക്കുകയായിരുന്നു.

വാർഷിക പൊതുയോഗം നടത്തി

തിരുമേനി: കേരള വ്യാപാരി വ്യവസായി ഏകോപന സമിതി തിരുമേനി യൂണിറ്റ് വാർഷിക പൊതുയോഗം ജില്ലാ സെക്രട്ടറി ജെ. സെബാസ്റ്റ്യൻ ഉദ്ഘാടനം ചെയ്തു. വ്യാപാര ഭവനിൽ നടന്ന യോഗത്തിൽ യൂണിറ്റ് പ്രസിഡന്‍റ് വിൽസൻ ഇടക്കര അധ്യക്ഷത വഹിച്ചു. ജനറൽ സെക്രട്ടറി ടോമി മൂന്നാനാൽ, ട്രഷറർ ടി.എസ്. അജയകുമാർ, മേഖലാ പ്രസിഡന്‍റ് റോയി ജോസ്, ജോൺസൻ സി. പടിഞ്ഞാത്ത്, സുജിത്ത് നമ്പ്യാർ, വി.ജി. രവീന്ദ്രൻ എന്നിവർ പ്രസംഗിച്ചു. ചടങ്ങിൽ എസ്എസ്എൽസി, പ്ലസ് ടു പരീക്ഷകളിൽ മികച്ച വിജയം നേടിയ വിദ്യാർഥികളെ അനുമോദിച്ചു.

ദമ്പതികളെ വീടിനുള്ളിൽ മരിച്ച നിലയിൽ കണ്ടെത്തി

മട്ടന്നൂർ: കൊടോളിപ്രത്ത് ദമ്പതികളെ വീട്ടിനുള്ളിൽ മരിച്ച നിലയിൽ കണ്ടെത്തി. കൊടോളിപ്രത്തെ ഗോകുലത്തിൽ കെ.വി. ബാബു (58), കെ.വി. സജിത (54) എന്നിവരെയാണ് തൂങ്ങിമരിച്ച നിലയിൽ കണ്ടെത്തിയത്. സാമ്പത്തിക പ്രശ്നമാണ് ആത്മഹത്യയ്ക്ക് കാരണമെന്നാണു സൂചന. ഇന്നലെ ഉച്ചയ്ക്ക് 12 ഓടെയാണ് ഇരുവരെയും വീടിനുള്ളിൽ തൂങ്ങിമരിച്ച നിലയിൽ കണ്ടെത്തിയത്. ബാബുവിനെ കിടപ്പുമുറിയിലും സജിതയെ ഹാളിലെ ഫാനിലുമാണു തൂങ്ങിയ നിലയിൽ കാണപ്പെട്ടത്. സജിത ആത്മഹത്യ ചെയ്യാൻ ഫാനിൽ തുണി കെട്ടാൻ കയറിയ കസേരയോ മറ്റൊന്നും കാണാൻ കഴിഞ്ഞില്ല. ഇതേത്തുടർന്നു കണ്ണൂരിൽനിന്ന് ഫോറൻസിക് വിഭാഗം വീട്ടിലെത്തി പരിശോധന നടത്തി. സംഭവം നടക്കുമ്പോൾ ബാബുവും സജിതയും മാത്രമാണ് വീട്ടിലുണ്ടായിരുന്നത്. മകൾ ഭർത്താവിന്‍റെ വീട്ടിലും മകൻ ഭാര്യവീട്ടിലും പോയിരുന്നു. ഇന്നുച്ചയായിട്ടും വീട് തുറക്കാത്തതിനാൽ സമീപത്ത് താമസിക്കുന്നവർ മകനെ വിവരമറിച്ച് മകൻ വീട്ടിലെത്തി മറ്റൊരു താക്കോൽ ഉപയോഗിച്ച് വാതിൽ തുറന്നു നോക്കിയപ്പോഴാണ് ഇരുവരെയും തൂങ്ങിയ നിലയിൽ കണ്ടെത്തിയത്. വിവരം അറിയിച്ചതിനെ തുടർന്നു മട്ടന്നൂർ എസ്ഐ സി.പി. ലിനേഷിന്‍റെ നേതൃത്വത്തിൽ പോലീസ് എത്തി പരിശോധന നടത്തി. വിദേശത്തായിരുന്ന ബാബു അഞ്ചുവർഷം മുമ്പാണു നാട്ടിലെത്തിയത്. നേരത്തെ ബാർബർ ജോലി ചെയ്തിരുന്നുവെങ്കിലും ഇപ്പോൾ ജോലി കുറവായതിനാൽ പോകാറില്ലെന്നു പറയുന്നു. ബാങ്കിൽ നിന്ന് വായ്പയെടുത്തതിനാൽ പലിശയടക്കം 25 ലക്ഷത്തോളം രൂപയടയ്ക്കാനുണ്ടെന്നും ഇതിന്‍റെ പ്രയാസമുള്ളതായും പറയുന്നു. മട്ടന്നൂർ പോലീസ് ഇൻക്വസ്റ്റ് നടത്തിയ മൃതദേഹങ്ങൾ പോസ്റ്റ്‌മോർട്ടത്തിനായി കണ്ണൂർ പരിയാരം ഗവ. മെഡിക്കൽ കോളജിലേക്കു മാറ്റി. ഇന്ന് ഉച്ചയോടെ വീട്ടിലെത്തിച്ച് സംസ്‌കരിക്കും. മക്കൾ: സുബിജിത്ത്, ജിബിഷ. മരുമക്കൾ: സുധേഷ്, ശ്രീഷ. നാരായണൻ-കല്യാണി ദന്പതികളുടെ മകളാണ് സജിത. ആനന്ദകൃഷ്ണൻ, ജയരാജൻ, ശ്രീലത, പരേതനായ സത്യൻ എന്നിവർ സഹോദരങ്ങളാണ്. ഉണ്ണിക്കൃഷ്ണൻ-മാധവി ദന്പതികളുടെ മകനാണ് ബാബു. സഹോദരി: മായ.

ലീഗല്‍ മെട്രോളജി വകുപ്പിന്‍റെ ഉത്തരമേഖലയിലെ ആദ്യ ലബോറട്ടറി യൂണിറ്റ് ബട്ടത്തൂരില്‍

പൊയിനാച്ചി: ഉപഭോക്തൃ സംരക്ഷണം, അളവുതൂക്ക കൃത്യത, പായ്ക്ക് ചെയ്ത ഉത്പന്നങ്ങളിലെ കൃത്യത എന്നിവ ഉറപ്പ് വരുത്തുന്നതിനായി ലീഗല്‍ മെട്രോളജി വകുപ്പ് ബട്ടത്തൂരില്‍ നിര്‍മിച്ച സെക്കന്‍ഡറി സ്റ്റാന്‍ഡേര്‍ഡ് ലബോറട്ടറി യൂണിറ്റ് ലീഗല്‍ മെട്രോളജി മന്ത്രി ജി.ആര്‍. അനില്‍ നാടിന് സമര്‍പ്പിച്ചു. ഉത്തരമേഖലയിലെ ആദ്യത്തേതും സംസ്ഥാനത്തെ നാലാമത്തേതുമായ ലബോറട്ടറി യൂണിറ്റ് യാഥാര്‍ഥ്യമാകുന്നതോടെ സമീപ ജില്ലകളിലെ ലീഗല്‍ മെട്രോളജി ഓഫീസുകളില്‍ ഉപയോഗിക്കുന്ന വര്‍ക്കിംഗ് സ്റ്റാന്‍ഡേര്‍ഡ് ഉപകരണങ്ങളുടെ കാലികമായ പുനഃപരിശോധനയില്‍ കൃത്യത വരുത്താന്‍ സാധിക്കും. 1.5 കോടി രൂപ ചെലവഴിച്ച് 7000 സ്‌ക്വയര്‍ ഫീറ്റ് വിസ്തൃതിയില്‍ ഒരുക്കിയ ആധുനിക സൗകര്യത്തൂടെയുള്ള മൂന്നുനില കെട്ടിടമാണ് മന്ത്രി നാടിന് സമര്‍പ്പിച്ചത്. ഇന്ത്യയുടെ അളവ് തൂക്ക സംവിധാനത്തിന്‍റെ ആധാരമായ ഡല്‍ഹിയിലെ നാഷണല്‍ ഫിസിക്കല്‍ ലബോറട്ടറിയില്‍ സൂക്ഷിച്ചിട്ടുള്ള സ്റ്റാന്‍ഡേര്‍ഡുകള്‍ അടിസ്ഥാനമാക്കിയാണ് രാജ്യത്തുടനീളമുള്ള റഫറന്‍സ് സ്റ്റാന്‍ഡേര്‍ഡ് ലബോറട്ടറികള്‍ (ആര്‍ആര്‍എസ്എല്‍) പ്രവര്‍ത്തിക്കുന്നത്. ഇവയുടെ കീഴിലുള്ള സെക്കന്‍ഡറി സ്റ്റാന്‍ഡേര്‍ഡ് ലബോറട്ടറികളിലാണ് ലീഗല്‍ മെട്രോളജി വര്‍ക്കിംഗ് സ്റ്റാന്‍ഡേഡുകള്‍ പരിശോധിച്ചു കൃത്യത ഉറപ്പുവരുത്തുന്നത്. ജനങ്ങള്‍ക്ക് കൂടുതല്‍ ഗുണംചെയ്യുന്ന രീതിയില്‍ കൃത്യതയും വിശ്വാസ്യതയും ഉറപ്പാക്കാനുള്ള ശ്രമങ്ങളുടെ ഭാഗമായാണ് ജില്ലയില്‍ സെക്കന്‍ഡറി ലബോറട്ടറി യൂണിറ്റ് സ്ഥാപിച്ചത്.ഇതോടൊപ്പം വിഭാവനം ചെയ്ത ടാങ്കര്‍ ലോറി കാലിബ്രേഷന്‍ യൂണിറ്റ് അടുത്ത ഘട്ടത്തില്‍ ഉദ്ഘാടനം ചെയ്യും.

മന്ത്രിയുടെ നിര്‍ദേശം അവഗണിച്ച് മേഘ കണ്‍സ്ട്രക്‌‌ഷന്‍സ്

കാസര്‍ഗോഡ്: ദേശീപാത നിര്‍മാണവുമായി ബന്ധപെട്ട് അപകട ഭീഷണി നിലനില്‍ക്കുന്ന ഇടങ്ങളില്‍ സുരക്ഷ ഉറപ്പാക്കുന്നതിനായി നിര്‍മാണ കമ്പനി സ്വീകരിച്ച നടപടികള്‍ സംബന്ധിച്ച് റിപ്പോര്‍ട്ട് നല്‍കണമെന്ന മന്ത്രിയുടെ നിര്‍ദേശം അവഗണിച്ച് മേഘ കണ്‍ട്രക്‌ഷന്‍ കമ്പനി. ഇന്നലെ രാവിലെ 10നംകം രണ്ടും മൂന്നും റീച്ചുകളുടെ റിപ്പോര്‍ട്ട് കളക്ടര്‍ക്ക് നല്‍കണമെന്നായിരുന്നു ജില്ലയുടെ ചുമതലയുള്ള മന്ത്രി എ.കെ. ശശീന്ദ്രന്‍റെ നിര്‍ദേശം. എന്നാല്‍, ഏറ്റവും കൂടുതല്‍ അപകട സാധ്യതയുള്ള മൂന്നാം റീച്ചിന്‍റെ റിപ്പോര്‍ട്ട് നല്‍കാന്‍ നിര്‍മാണ കരാര്‍ കമ്പനിയായ മേഘ എന്‍ജിനിയറിംഗ് ആന്‍ഡ് ഇന്‍ഫ്രാസ്ട്രക്‌ചേഴ്‌സ് ലിമിറ്റഡ് തയാറായില്ല. പക്ഷേ, രണ്ടാം റീച്ചിന്‍റെ റിപ്പോര്‍ട്ട് നല്‍കിയിരുന്നു. തിങ്കളാഴ്ച ചേര്‍ന്ന യോഗത്തിലാണ് രണ്ടും മൂന്നും റീച്ചുകളുടെ നിര്‍മാണ ചുമതല വഹിക്കുന്ന കമ്പനി ചൊവ്വാഴ്ച രാവിലെ 10നകം നിര്‍മാണ മേഖലയില്‍ സുരക്ഷ ഉറപ്പാക്കുന്നതിനും വെള്ളക്കെട്ടും മണ്ണിടിച്ചിലും തടയുന്നതിനുള്ള അടിയന്തരമായി ചെയ്യുന്ന നടപടികളുടെ സമഗ്രമായ റിപ്പോര്‍ട്ട് ജില്ലാ കളക്ടര്‍ക്ക് സമര്‍പ്പിക്കണമെന്ന് മന്ത്രി നിര്‍ദേശം നല്‍കിയത്. ലഭിച്ച രണ്ടാം റീച്ചിന്‍റെ റിപ്പോര്‍ട്ട് കളക്ടര്‍ മന്ത്രിക്ക് കൈമാറി. റിപ്പോര്‍ട്ട് വിലയിരുത്തി മന്ത്രി മുഖ്യമന്ത്രിയെ അറിയിക്കും. കേന്ദ്ര ഉപരിതല ഗതാഗത വകുപ്പിനും വിവരങ്ങള്‍ കൈമാറുമെന്നാണ് മന്ത്രി അറിയിച്ചത്. നിര്‍മാണ കരാര്‍ കമ്പനി ഉദാസീനത തുടര്‍ന്നാല്‍ കരിമ്പട്ടികയില്‍ പെടുത്തുന്നത് ഉള്‍പ്പെടെയുള്ള കര്‍ശന നടപടി സ്വീകരിക്കേണ്ടി വരുമെന്നും മന്ത്രി മുന്നറിയിപ്പ് നല്‍കിയിരുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]