ADVERTISEMENT

ADVERTISEMENT

‌മുലയൂട്ടല്‍ വാരാചരണം : ജില്ലാതല ഉദ്ഘാടനവും ബോധവത്കരണ സെമിനാറും നടത്തി

കോട്ടയം: മുലയൂട്ടല്‍ വാരാചരണത്തിന്‍റെ ജില്ലാതല ഉദ്ഘാടനം കോട്ടയം ആരോഗ്യകേരളം കോണ്‍ഫറന്‍സ് ഹാളില്‍ ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ നിര്‍വഹിച്ചു. ജില്ലാ മെഡിക്കല്‍ ഓഫീസര്‍ (ആരോഗ്യം) ഡോ. എന്‍. പ്രിയ അധ്യക്ഷത വഹിച്ചു.

ജില്ലാ ആര്‍സിഎച്ച് ഓഫീസര്‍ ഡോ. കെ.എന്‍. സുരേഷ്, ഐഎപി പ്രതിനിധി ഡോ. മുരാരി, കെഎഫ്ഒജി പ്രതിനിധി ഡോ. ജിന്‍സി, ജില്ലാ ഡെപ്യൂട്ടി എഡ്യുക്കേഷന്‍ മീഡിയ ഓഫീസര്‍ ആർ. ദീപ, കണ്‍സല്‍ട്ടന്‍റ് സി.ആര്‍. വിനീഷ് എന്നിവര്‍ പങ്കെടുത്തു.

ADVERTISEMENT

ചങ്ങനാശേരി ബൈപാസിലെ പാഴ്മരങ്ങള്‍ വെട്ടിമാറ്റണം

ചങ്ങനാശേരി: ചങ്ങനാശേരി ബൈപാസില്‍ റെയില്‍വേ സ്റ്റേഷന്‍ മുതല്‍ പാലാത്ര ജംഗ്ഷന്‍ വരെയുള്ള ഭാഗത്തെ പൊട്ടവാക പോലെയുള്ള പാഴ്മരങ്ങള്‍ വെട്ടിമാറ്റി യാത്രക്കാര്‍ക്കു സുരക്ഷയൊരുക്കണമെന്നു മുനിസിപ്പല്‍ കൗണ്‍സിലര്‍ എല്‍സമ്മ ജോബ്, വാര്‍ഡ് കണ്‍വീനര്‍ ചാള്‍സ് പാലാത്ര എന്നിവര്‍ കോട്ടയം ജില്ലാ കളക്ടര്‍ക്ക് നല്‍കിയ നിവേദനത്തില്‍ ആവശ്യപ്പെട്ടു. ഇത്തരം നിരവധി മരങ്ങള്‍ അപകടാവസ്ഥയില്‍ നില്‍ക്കുന്നുണ്ടെന്നും അടുത്തിടെ ചില മരങ്ങള്‍ നിലംപൊത്തിയതായും ഇവര്‍ ചൂണ്ടിക്കാട്ടി.

1200 ദിവസം പിന്നിട്ട് സില്‍വര്‍ലൈന്‍വിരുദ്ധ സത്യഗ്രഹസമരം

മാടപ്പള്ളി: കെ-റെയില്‍ സില്‍വര്‍ലൈന്‍ പദ്ധതി പിന്‍വലിച്ച് ഉത്തരവിറക്കണമെന്നാവശ്യപ്പെട്ട് മാടപ്പള്ളി സമരപ്പന്തലില്‍ നടന്നുവരുന്ന സത്യഗ്രഹ സമരം 1200 ദിവസം പിന്നിട്ടു. കേന്ദ്ര സര്‍ക്കാര്‍ നിര്‍ദിഷ്ട പദ്ധതിക്ക് അംഗീകാരം നല്‍കാത്ത സാഹചര്യത്തിലും കേരള ജനത തള്ളിക്കളഞ്ഞ പദ്ധതി കേരള സര്‍ക്കാരിനു നടപ്പാക്കാന്‍ സാധിക്കാത്തതിനാലും പദ്ധതി ഉപേക്ഷിക്കാന്‍ സര്‍ക്കാര്‍ തയാറാകണമെന്നും സര്‍വേ നമ്പര്‍ ഉള്‍പ്പെടുത്തി ഇറക്കിയ വിജ്ഞാപനം പിന്‍വലിക്കണമെന്നും സമരസമിതി ചെയര്‍മാന്‍ ബാബു കുട്ടന്‍ചിറ ആവശ്യപ്പെട്ടു.

മധ്യവേനല്‍ അവധി മാറ്റാനുള്ള ആലോചന ഉപേക്ഷിക്കണം: കത്തോലിക്ക കോണ്‍ഗ്രസ്

ചങ്ങനാശേരി: കുട്ടികള്‍ക്ക് ഏപ്രില്‍, മേയ് മാസങ്ങളിലുള്ള മധ്യവേനല്‍ അവധി ജൂണ്‍, ജൂലൈ മാസങ്ങളിലേക്ക് മാറ്റണമെന്നുള്ള നിർദേശം അപ്രായോഗീകമെന്ന് കത്തോലിക്ക കോണ്‍ഗ്രസ് അതിരൂപത സമിതി. സിബിഎസ്ഇ, ഐസിഎസ്ഇ തുടങ്ങിയ സിലബസില്‍ ബോര്‍ഡ് പരീക്ഷ എഴുതുന്ന കുട്ടികള്‍ക്ക് ഇതു വളരെയേറെ ബുദ്ധിമുട്ടുകള്‍ സൃഷ്ടിക്കും. കൂടാതെ വിവിധ എന്‍ട്രന്‍സ് പരീക്ഷകൾ എഴുതുന്ന കുട്ടികള്‍ക്ക് ഇതു പ്രയാസമുണ്ടാക്കും. കൃത്യമായ തയാറെടുപ്പുകൾക്ക് കഴിയാതെയും വരും. ഏപ്രില്‍, മേയ് മാസങ്ങളിലെ കൊടുംചൂടില്‍ ക്ലാസ് മുറിയിലിരുന്ന് പഠനം നടത്തുന്നത് കൊച്ചുകുട്ടികള്‍ക്ക് ക്ലേശകരമായിരിക്കും. ജലലഭ്യത കുറവുള്ള ഇക്കാലയളവില്‍ സ്‌കൂളുകള്‍ക്ക് ആവശ്യമായ ശുദ്ധജലം ലഭ്യമാകുമോ എന്നതു തീരുമാനമെടുക്കുമ്പോള്‍ മനസിലുണ്ടാകണമെന്ന് കത്തോലിക്ക കോണ്‍ഗ്രസ് ഓര്‍മിപ്പിച്ചു. അതിരൂപത പ്രസിഡന്‍റ് ബിജു സെബാസ്റ്റ്യന്‍ അധ്യക്ഷത വഹിച്ചു. ഡയറക്ടര്‍ ഫാ. സെബാസ്റ്റ്യന്‍ ചാമക്കാല ഉദ്ഘാടനം ചെയ്തു. ജനറല്‍ സെക്രട്ടറി ബിനു ഡൊമിനിക്, ജോസ് വെങ്ങാന്തറ, ജോര്‍ജുകുട്ടി മുക്കത്ത്, രാജേഷ് ജോണ്‍, സെബാസ്റ്റ്യന്‍ വര്‍ഗീസ്, കുഞ്ഞ് കളപ്പുര, ചാക്കപ്പന്‍ ആന്‍റണി, സേവ്യര്‍ കൊണ്ടോടി, ജോബി ചൂരക്കളം, ടോം കയ്യാലകം, ജോസി ഡൊമിനിക്, ഷാജി വര്‍ക്കി, ലിസി ജോസ്, ജെസി ആന്‍റണി എന്നിവര്‍ പ്രസംഗിച്ചു.

നിര്‍മാണോദ്ഘാടനം നടത്തിയിട്ട് ഒന്നരവര്‍ഷം : എങ്ങുമെത്താതെ നാലുകോടി റെയില്‍വേ മേല്‍പാലം

ചങ്ങനാശേരി: പെരുന്തുരുത്തി-ഏറ്റുമാനൂര്‍ ബൈപ്പാസില്‍ നാലുകോടി ലെവല്‍ ക്രോസിന് (ലെവല്‍ ക്രോസ് നമ്പര്‍ 7) പകരം മേല്‍പ്പാലത്തിന്‍റെ നിര്‍മാണോദ്ഘാടനം പ്രധാനമന്ത്രി നരേന്ദ്ര മോദി ഓണ്‍ലൈന്‍ വീഡിയോ കോണ്‍ഫറൻസിലൂടെ നിര്‍വഹിച്ചിട്ട് ഒന്നരവര്‍ഷം പിന്നിട്ടിട്ടും നടപടിയാകാതെ ഇഴയുന്നു. നരേന്ദ്ര മോദിയുടെ നേതൃത്വത്തില്‍ അടുത്ത സര്‍ക്കാര്‍ നിലവില്‍വന്ന് ഒരു വർഷം കഴിഞ്ഞിട്ടും മേല്‍പാലം നിര്‍മാണം സംബന്ധിച്ച് ഒരു നടപടിയും ഉണ്ടായില്ല. ഏറെ തിരക്കുള്ള ഈ ബൈപാസിലെ നാലുകോടി ലെവല്‍ക്രോസ് അടയ്ക്കുമ്പോള്‍ വാഹനതടസം യാത്രക്കാര്‍ക്കു ദുരിതമാകുകയാണ്. കഴിഞ്ഞ പാര്‍ലമെന്‍റ് തെരഞ്ഞെടുപ്പിനു തൊട്ടുമുമ്പ് 2024 ഫെബ്രുവരി 26നാണ് പ്രധാനമന്ത്രി മേല്‍പാലത്തിന്‍റെ നിര്‍മാണ പ്രവര്‍ത്തനങ്ങളുടെ ഉദ്ഘാടനം നിര്‍വഹിച്ചത്. 34.24 കോടി രൂപയാണു നാലുകോടി ലെവല്‍ ക്രോസിനു പകരം നിര്‍മിക്കുന്ന മേല്‍പാല നിര്‍മാണത്തിനു ചെലവ് പ്രതീക്ഷിക്കുന്നത്. ഈ തുക കേന്ദ്ര - സംസ്ഥാന സര്‍ക്കാരുകള്‍ പകുതി വീതം ഏറ്റെടുക്കാനായിരുന്നു പദ്ധതി. സംസ്ഥാന സര്‍ക്കാരിന്‍റെ നിര്‍മാണ ഏജന്‍സിയായ കേരള റോഡ് ബ്രിഡ്ജസ് ഡെവലപ്മെന്‍റ് കോര്‍പറേഷനു നിര്‍മാണ ചുമതല നല്‍കുകയും ചെയ്തു. പാലം നിര്‍മാണത്തിനായുള്ള സ്ഥലമെടുപ്പ് നടപടികളും എങ്ങുമെത്തിയിട്ടില്ല. കോട്ടയം, ഇടുക്കി ജില്ലകളില്‍നിന്നും വരുന്ന യാത്രക്കാര്‍ക്കും പുതുപ്പള്ളി, മണര്‍കാട് ദേവാലയങ്ങളിലേക്കു പോകുന്ന ആയിരക്കണക്കിന് തീര്‍ഥാടകര്‍ക്കും കോട്ടയം, ചങ്ങനാശേരി ടൗണുകളിലെ ഗതാഗതക്കുരുക്കില്‍പ്പെടാതെ എന്‍എച്ച്-183 (എംസി റോഡ്) പെരുന്തുരുത്തിയിലും ഏറ്റുമാനൂരിലും എത്തിച്ചേരാവുന്ന വേഗ ബൈപാസാണിത്. ലോക്സഭാ തെരഞ്ഞെടുപ്പു പ്രഖ്യാപിക്കുന്നതിനു മുന്പായി രാജ്യത്തൊട്ടാകെ 222 മേല്‍പ്പാലങ്ങളും അടിപ്പാതകളുടെയും നിര്‍മാണ പ്രവര്‍ത്തനങ്ങളാണ് പ്രധാനമന്ത്രി നരേന്ദ്ര മോദി വീഡിയോ കോണ്‍ഫറന്‍സിലൂടെ നിര്‍വഹിച്ചത്.

ചങ്ങനാശേരി ഡിപ്പോയുടെ വേളാങ്കണ്ണി സര്‍വീസില്‍ സ്ഥിരം ജീവനക്കാരെ നിയമിക്കണം

ചങ്ങനാശേരി: ചങ്ങനാശേരി കെഎസ്ആര്‍ടിസി ഡിപ്പോയില്‍നിന്നും സര്‍വീസ് നടത്തുന്ന വേളാങ്കണ്ണി ഇന്‍റര്‍‌സ്റ്റേറ്റ് സര്‍വീസില്‍ സ്ഥിരം ജീവനക്കാരെ നിയോഗിച്ചാല്‍ സര്‍വീസ് നിലനിര്‍ത്താനും വരുമാനം മെച്ചപ്പെടുത്താനും ആകുമെന്ന് വിലയിരുത്തല്‍. നിലവില്‍ ചങ്ങനാശേരിയില്‍നിന്നു സ്വിഫ്റ്റ് കോര്‍പറേഷന്‍ ഓപ്പറേറ്റ് ചെയ്യുന്ന വേളാങ്കണ്ണി ബസിന് 10 ഡ്രൈവര്‍ കം കണ്ടക്ടര്‍മാരെയാണ് പോസ്റ്റ് ചെയ്തിരിക്കുന്നത്. ഇവരില്‍ പലരും ജോലയ്ക്ക് കൃത്യമായി ഹാജരാകാത്തതു മൂലം കെഎസ്ആര്‍ടിസിയുടെ ഷെഡ്യുള്‍ ഓപ്പറേറ്റ് ചെയ്യേണ്ട മറ്റു ഡ്രൈവര്‍മാരെയോ അല്ലെങ്കില്‍ ഡിസിമാരായ ജീവനക്കാരെയോ ആണ് സര്‍വീസ് നടത്താന്‍ മിക്ക ദിവസങ്ങളിലും നിയോഗിക്കുന്നത്. ഇതുമൂലം ഡ്രൈവര്‍മാരില്ലാതെ ഡിപ്പോയിലെ മറ്റു പ്രധാനപ്പെട്ട പല ഷെഡ്യൂളുകളും സ്ഥിരമായി മുടങ്ങുന്നു. ഇത് ഡിപ്പോയുടെ വരുമാനത്തെ സാരമായി ബാധിക്കുന്നതോടൊപ്പം പ്രധാന സര്‍വീസ് നിലയ്ക്കാനും കാരണമാകുന്നു. ഇന്‍റര്‍സ്റ്റേറ്റ് സര്‍വീസിന് സ്ഥിരം ജീവനക്കാർ; നിബന്ധന അവഗണിക്കുന്നു സ്ഥിരം ജീവനക്കാരെ മാത്രമേ ഇന്‍റര്‍‌സ്റ്റേറ്റ് സര്‍വീസിന് നിയോഗിക്കാവൂവെന്ന ഉത്തരവ് നിലനില്‍ക്കെയാണ് ചങ്ങനാശേരി ഡിപ്പോയില്‍ ബദലി ഡ്രൈവര്‍മാരെയും ഡ്രൈവര്‍ കം കണ്ടക്ടര്‍മാരേയും സ്ഥിരമായി ഇന്‍റര്‍ സ്റ്റേറ്റ് ഡ്യൂട്ടിക്ക് നിയമിക്കുന്നത്. ഇപ്പോള്‍ സ്വിഫ്റ്റ് കോര്‍പറേഷന്‍ ഓപ്പറേറ്റ് ചെയ്യുന്ന വേളാങ്കണ്ണി സര്‍വീസ് കെഎസ്ആര്‍ടിസി തിരിച്ചെടുത്ത് പഴയ രീതിയില്‍ എക്സ്പ്രസ് ബസായിത്തന്നെ ഓപ്പറേറ്റ് ചെയ്താല്‍ സര്‍വീസിന്‍റെ സുഗമമായ നടത്തിപ്പിനു ചങ്ങനാശേരി ഡിപ്പോയില്‍നിന്നു രണ്ടു ഡ്രൈവര്‍മാരും പാലക്കാട് ഡിപ്പോയില്‍നിന്നും നാലു ഡ്രൈവര്‍മാരും മാത്രം മതിയാകുമെന്നു ചൂണ്ടിക്കാണിക്കപ്പെടുന്നു. പാലക്കാട് ഡിപ്പോയില്‍നിന്നു ഡ്രൈവര്‍ മാറിക്കയറുന്നത് അപകടം കുറയ്ക്കുന്നതോടൊപ്പം അധികമായി വരുന്ന ഡ്രൈവര്‍ കം കണ്ടക്ടര്‍, ഡ്രൈവര്‍ ജീവനക്കാരെ മറ്റു ഷെഡ്യുള്‍ ഡ്യൂട്ടികള്‍ക്ക് നിയോഗിച്ച് ജീവനക്കാരുടെ കുറവ് പരിഹരിക്കാനാകുമെന്നും ഇതിലൂടെ ഡിപ്പോയുടെയും കോര്‍പറേഷന്‍റെയും വരുമാനം വര്‍ധിപ്പിക്കാൻ സാധിക്കുമെന്നും ചൂണ്ടിക്കാണിക്കപ്പെടുന്നു. ഇക്കാര്യം പരീക്ഷണാര്‍ഥമെങ്കിലും പരിശോധിക്കപ്പെടണമെന്ന നിര്‍ദേശം തൊഴിലാളി യൂണിയനുകളുടേയും പാസഞ്ചേഴ്‌സ് അസോസിയേഷന്‍റെയും ഭാഗത്തുനിന്ന് ഉയര്‍ന്നിട്ടുണ്ട്. ചങ്ങനാശേരിയില്‍നിന്നും ഓപ്പറേറ്റ് ചെയ്യുന്ന തിരുനെല്‍വേലി സര്‍വീസിൽ കെഎസ്ആര്‍ടിസി ജീവനക്കാരാണ് ഡ്യൂട്ടി ചെയ്യുന്നത്. രാവിലെയും വൈകുന്നേരവുമായി സര്‍വീസ് നടത്തിയിരുന്ന രണ്ട് പളനി സര്‍വീസുകള്‍ ആറുമാസംമുമ്പ് നിര്‍ത്തലാക്കിയിരുന്നു.

ക്ഷീരസംഗമം

കടുത്തുരുത്തി: ക്ഷീരവികസന വകുപ്പിന്‍റെയും മാഞ്ഞൂര്‍ ക്ഷീരവികസന യൂണിറ്റിലെ ക്ഷീരസംഘങ്ങളുടെയും സംയുക്താഭിമുഖ്യത്തില്‍ ക്ഷീരസംഗമം നടത്തി. ഉഴവൂര്‍ ബ്ലോക്ക് പഞ്ചായത്തിന്‍റെയും കുറവിലങ്ങാട് ഗ്രാമപഞ്ചായത്തിന്‍റെയും മറ്റു സ്ഥാപനങ്ങളുടെയും സഹകരണത്തോടെ കളത്തൂര്‍ ഗവണ്‍മെന്‍റ് യുപി സ്‌കൂളില്‍ നടന്ന ക്ഷീരസംഗമം മോന്‍സ് ജോസഫ് എംഎല്‍എ ഉദ്ഘാടനം ചെയ്തു. ക്ഷീരവികസന വകുപ്പിന്‍റെ ആവശ്യാധിഷ്ഠിത ധനസഹായം പദ്ധതി പ്രകാരം നവീകരിച്ച പാല്‍ ഉത്പന്ന വിതരണ കേന്ദ്രത്തിന്‍റെ ഉദ്ഘാടനവും ക്ഷീരസംഗമത്തില്‍ നടന്നു. ഉഴവൂര്‍ ബ്ലോക്ക് പഞ്ചായത്ത് പ്രസിഡന്‍റ് രാജു ജോൺ അധ്യക്ഷത വഹിച്ചു. കന്നുകാലി പ്രദര്‍ശന മത്സരത്തിന്‍റെ ഉദ്ഘാടനം കുറവിലങ്ങാട് പഞ്ചായത്ത് പ്രസിഡന്‍റ് മിനി മത്തായിയും മുഖാമുഖം പരിപാടി ഉഴവൂര്‍ ബ്ലോക്ക് പഞ്ചായത്ത് പ്രസിഡന്‍റ് രാജു ജോണ്‍ ചിറ്റേത്തും ഉദ്ഘാടനം ചെയ്തു. ഉഴവൂര്‍ ബ്ലോക്ക് തലത്തില്‍ ക്ഷീരമേഖലയില്‍ ത്രിതല പഞ്ചായത്തുകള്‍ നടപ്പിലാക്കുന്ന ജനകീയാസൂത്രണ പദ്ധതികളുടെ ഉദ്ഘാടനം ജില്ലാപഞ്ചായത്ത് വൈസ് പ്രസിഡന്‍റ് ജോസ് പുത്തന്‍കാലാ നിര്‍വഹിച്ചു. മികച്ച ക്ഷീരകര്‍ഷകരെ കുറവിലങ്ങാട് പഞ്ചായത്ത് പ്രസിഡന്‍റ് മിനി മത്തായി, മാഞ്ഞൂര്‍ പഞ്ചായത്ത് പ്രസിഡന്‍റ് കോമളവല്ലി രവീന്ദ്രന്‍, കാണക്കാരി പഞ്ചായത്ത് പ്രസിഡന്‍റ് അംബിക സുകുമാരന്‍ എന്നിവര്‍ അവാര്‍ഡ് നല്‍കി ആദരിച്ചു. ത്രിതല പഞ്ചായത്ത്, മില്‍മ എന്നിവയുടെ പ്രതിനിധികള്‍, സാങ്കേതിക വിദഗ്ധര്‍, സഹകാരികള്‍, ക്ഷീരകര്‍ഷകര്‍, ക്ഷീരസംഘം ജീവനക്കാര്‍, സാങ്കേതികവിദഗ്ധര്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

നിയന്ത്രണംവിട്ട കാർ മരത്തിലിടിച്ചുണ്ടായ അപകടത്തിൽ മൂന്നുപേർക്ക് ഗുരുതര പരിക്ക്

തലയോലപ്പറമ്പ്: നിയന്ത്രണംവിട്ട കാർ റോഡരികിലെ മരത്തിലിടിച്ചുണ്ടായ അപകടത്തിൽ കാറിൽ സഞ്ചരിച്ചിരുന്ന മൂന്നു പേർക്ക് ഗുരുതര പരിക്ക്. തകർന്ന കാറിൽനിന്നു യാത്രക്കാരെ കാർ വെട്ടിപ്പൊളിച്ചാണ് പുറത്തെടുത്തത്. അരയൻകാവ് തുണ്ടുപറമ്പിൽ മാണി ജോസഫ് (27), തുണ്ടുപറമ്പിൽ ആമോസ് തങ്കച്ചൻ (27), അരയൻകാവ് എറണായിൽ അഭിജിത്ത് സുകുമാരൻ (27) എന്നിവരെ തലയോലപ്പറമ്പ് പൊതിയിലെ സ്വകാര്യ ആശുപത്രിയിൽ പ്രവേശിപ്പിച്ചശേഷം വിദഗ്ധ ചികിത്സയ്ക്കായി പിന്നീട് എറണാകുളം മെഡിക്കൽ ട്രസ്റ്റ് ആശുപത്രിയിലേക്ക് മാറ്റി. ശനിയാഴ്ച രാത്രി 12.30 ഓടെ കാഞ്ഞിരമറ്റം -തലപ്പാറ റോഡിൽ വടകര ജംഗ്ഷന് സമീപത്തെ വളവിലായിരുന്നു അപകടം. അരയൻകാവിൽനിന്നു തലയോലപ്പറമ്പ് ഭാഗത്തേക്ക് വരുന്നതിനിടെ കാർ നിയന്ത്രണംവിട്ട് റോഡരികിലെ മരത്തിലും സ്വകാര്യവ്യക്തിയുടെ മതിലിലും ഇടിച്ചുകയറുകയായിരുന്നു. ഇടിയുടെ ആഘാതത്തിൽ കാറിന്‍റെ എൻജിൻ ഉൾപ്പടെ വേർപെട്ടുപോയി. ഡോർ തുറക്കാൻ കഴിയാത്തവിധം തകർന്ന കാറിനുള്ളിൽ കുടുങ്ങിയവരെ ഫയർഫോഴ്സ് എത്തി കാർ വെട്ടിപ്പോളിച്ചാണ് പുറത്തെടുത്ത് ആശുപത്രിയിൽ എത്തിച്ചത്. ഇടിയുടെ ആഘാതത്തിൽ സ്വകാര്യവ്യക്തിയുടെ മതിൽ തകർന്നുവീണു. വടകര തടത്തിൽ ബിനുവിന്‍റെ വീട്ടുമുറ്റത്ത് കിടന്ന പുതിയ കാറിന്‍റെ ഒരു വശം പൂർണമായി തകർന്നു.

പഴയ ബോട്ടുജെട്ടിയുടെ മേൽക്കൂര പുനർനിർമിച്ചു

വൈക്കം: നൂറ്റാണ്ട് പിന്നിട്ട വൈക്കത്തെ പഴയ ബോട്ടുജെട്ടിക്കെട്ടിടം പുനരുദ്ധരിക്കുന്നതിന്‍റെ ഭാഗമായി മേൽക്കൂരയുടെ നിർമാണം പൂർത്തിയാക്കി. വൈക്കംസത്യഗ്രഹ സമര ചരിത്രത്തിന്‍റെ ഭാഗമായ ബോട്ടുജെട്ടിക്കെട്ടിടം തനിമ നിലനിർത്തി ചരിത്രസ്മാരകമായാണ് പുനർനിർമിക്കുന്നത്. ബോട്ടുജെട്ടിയുടെ നവീകരണത്തിനായി 25 ലക്ഷം രൂപയാണ് എസ്റ്റിമേറ്റ് തുക. ബോട്ടുജെട്ടിക്കെട്ടിടത്തിന്‍റെ പഴയ രൂപത്തിനു മാറ്റംവരുത്താതെയാണ് നിർമാണപ്രവൃത്തികൾ നടന്നുവരുന്നത്. വൈക്കം സത്യഗ്രഹത്തിൽ പങ്കെടുക്കാൻ മഹാത്മജിയടക്കമുള്ള നേതാക്കൾ ബോട്ടുമാർഗമെത്തി വൈക്കം ജെട്ടിയിലാണ് ഇറങ്ങിയത്. നിരവധി ധന്യമുഹൂർത്തങ്ങൾക്ക് സാക്ഷിയായ ബോട്ടുജെട്ടി ചരിത്രസ്മാരകമായി പുനർനിർമിക്കണമെന്ന് ജനങ്ങൾ ഏറെക്കാലമായി ആവശ്യപ്പെട്ടുവരികയായിരുന്നു.

ആരോഗ്യരംഗത്തെ ചൂഷണം കുറയുന്നത് സഹകരണ സ്ഥാപനങ്ങളുള്ളതിനാൽ: മന്ത്രി വാസവൻ

വൈക്കം: ആരോഗ്യ പരിപാലനരംഗത്തെ ചൂഷണത്തെ ഒരു പരിധിവരെ ചെറുക്കാൻ സഹകരണ മേഖലയിൽ പ്രവർത്തിക്കുന്ന സ്ഥാപനങ്ങൾമൂലം കഴിയുന്നുണ്ടെന്ന് സഹകരണ വകുപ്പ് മന്ത്രി വി.എൻ. വാസവൻ. വൈക്കം താലൂക്ക് അർബൻ വെൽഫെയർ കിസ്കോ ഡയഗ്‌നോസ്റ്റിക് സെന്‍ററിന്‍റെ അത്യാധുനിക സംവിധാനങ്ങളോടെ നവീകരിച്ച മെഡിക്കൽ ലാബ് ആൻഡ് ഇമേജിംഗ് സെന്‍റർ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സ്വകാര്യ സ്ഥാപനങ്ങളിൽ സ്കാനിംഗ്, എക്സ്-റേ, രക്തപരിശോധന തുടങ്ങിയവയ്ക്ക് ഈടാക്കുന്നതിനേക്കാൾ കുറഞ്ഞ തുകയ്ക്കാണ് സഹകരണ സ്ഥാപനങ്ങളിൽ രോഗനിർണയം നടത്തുന്നതെന്നും അദ്ദേഹം കൂട്ടിച്ചേർത്തു. നമ്മുടെ ആരോഗ്യത്തെ മുൻനിർത്തി സ്വകാര്യസ്ഥാപനങ്ങൾ വിലപേശാതിരിക്കാൻ സർക്കാർ,സഹകരണ സ്ഥാപനങ്ങളെ മെച്ചപ്പെടുത്തി പിൻബലമേകണമെന്ന് കൃഷിമന്ത്രി പി .പ്രസാദ് അഭിപ്രായപ്പെട്ടു. സംഘം പ്രസിഡന്‍റ് ആർ. ചന്ദ്രശേഖരൻ അധ്യക്ഷത വഹിച്ചു. കിഴതടിയൂർ സഹകരണ ബാങ്ക് പ്രസിഡന്‍റ് എം.എസ്. ശശിധരൻ നായർ റിപ്പോർട്ട് അവതരിപ്പിച്ചു. എംഎൽഎമാരായ സി.കെ. ആശ, മോൻസ് ജോസഫ്, സാഹിത്യസഹകരണ സംഘം പ്രസിഡന്‍റ് പി.കെ. ഹരികുമാർ, നഗരസഭാ ചെയർപേഴ്സൺ പ്രീതാ രാജേഷ്, നഗരസഭാ വൈസ് ചെയർമാൻ പി.ടി. സുഭാഷ്, വാർഡ് കൗൺസിലർ ലേഖ ശ്രീകുമാർ, ജോയിന്‍റ് രജിസ്ട്രാർ പി.പി. സലിം, സർക്കിൾ സഹകരണ യൂണിയൻ ചെയർമാൻ ടി.സി. വിനോദ്, അസിസ്റ്റന്‍റ് രജിസ്ട്രാർ ജനറൽ സി.ആർ. മിനി, അസിസ്റ്റന്‍റ് ഡയറക്ടർ ഓഡിറ്റ് സി.എസ്. പ്രിയ, വിവിധ രാഷ്‌‌ട്രീയ കക്ഷിനേതാക്കൾ തുടങ്ങിയവർ പ്രസംഗിച്ചു.

റോഡരികില്‍ അപകടക്കെണിയൊരുക്കി കെഎസ്ഇബി

പെരുവ: റോഡരികില്‍ അപകടക്കെണിയൊരുക്കി കെഎസ്ഇബി. പെരുവ കെഎസ്ഇബി സബ് സെന്‍ററിന്‍റെ കീഴിലുള്ള കുന്നപ്പള്ളിയില്‍ റോഡിലേക്ക് ചെരിഞ്ഞ് അപകടഭീഷിണി ഉയര്‍ത്തുന്നത് വൈദ്യുതി തൂണുകളാണെങ്കില്‍, കാരിക്കോട്ട് വൈദ്യുതി തൂണിലേക്ക് പടര്‍ന്നുകയറി നില്‍ക്കുന്ന വള്ളിപ്പടര്‍പ്പുകളാണ് നാട്ടുകാര്‍ക്ക് ഭീഷണിയാവുന്നത്. കുന്നപ്പള്ളി ആക്യമാലി ജംഗ്ഷനില്‍നിന്നു മടത്താട്ട് കോളനി റോഡിലുള്ള വൈദ്യുത തൂണുകളാണ് റോഡിലേക്ക് ചെരിഞ്ഞു മറിഞ്ഞുവീഴാറായ നിലയില്‍ സ്ഥിതി ചെയ്യുന്നത്. ഇതിലൂടെയുള്ള വൈദ്യുതി ലൈനുകള്‍ മാറ്റി പുതിയ തൂണുകളിലേക്ക് സ്ഥാപിച്ചെങ്കിലും ചെരിഞ്ഞുനില്‍ക്കുന്ന തൂണുകള്‍ മാറ്റാന്‍ അധികൃതര്‍ നടപടിയെടുത്തില്ല. നിരവധിത്തവണ അധികൃതരോട് ആവശ്യപ്പെട്ടെങ്കിലും നടപടിയായില്ലെന്ന് നാട്ടുകാര്‍ പറയുന്നു. ദിവസവും നൂറുകണക്കിന് വാഹനങ്ങളും കാല്‍നടയാത്രക്കാരും സഞ്ചരിക്കുന്ന വഴിയാണിത്. ചെരിഞ്ഞുനില്‍ക്കുന്ന നിരവധി തൂണുകള്‍ മാറ്റിസ്ഥാപിച്ച വൈദ്യുത ലൈനിന്‍റെ നടുക്കാണ് സ്ഥിതിചെയ്യുന്നത്. വൈദ്യുതി തൂണുകള്‍ മറിഞ്ഞുവീണാല്‍ വൈദ്യുത ലൈന്‍ ഉള്‍പ്പെടെ പൊട്ടിവീഴാനുള്ള സാധ്യതയുമുണ്ടെന്ന് നാട്ടുകാര്‍ മുന്നറിയിപ്പ് നല്‍കുന്നു. മൂര്‍ക്കാട്ടിപ്പടി-വെള്ളൂര്‍ റോഡില്‍ പൈന്താറ്റില്‍ ഭാഗത്തേക്ക് തിരിയുന്നിടത്താണ് വൈദ്യുത തൂണിലും ഇതു വലിച്ചുകെട്ടിയ സ്റ്റേ കമ്പികളിലൂടെയും വൈദ്യുതി ലൈനിലേക്ക് വള്ളിപ്പടര്‍പ്പുകള്‍ കയറിയിരിക്കുന്നത്.

കൈവരിയില്ലാത്ത കലുങ്ക് അപകടഭീഷണിയാകുന്നു

ഉദയനാപുരം: കൈവരിയില്ലാത്ത കലുങ്കുപാലം അപകടഭീഷണിയാകുന്നു. ഉദയനാപുരം ഓർശ്ലേം പള്ളിക്ക് സമീപത്തെ കലുങ്ക് പാലമാണ് കൈവരിയില്ലാത്തതിനാൽ അപകടക്കെണിയാകുന്നത്. നേരേകടവ്, കരിയിൽ, മാടവന, വല്യാറ ഭാഗങ്ങളിലുള്ളവർ ഓർശ്ലേം പള്ളി, ഇംഗ്ലീഷ് മീഡിയം സ്കൂൾ, ആയുർവേദ ആശുപത്രി, വൈക്കം താലൂക്ക് ആശുപത്രി, കോവിലകത്തുംകടവ് മത്സ്യമാർക്കറ്റ് എന്നിവിടങ്ങളിലേക്ക് പോകുന്നതിനുള്ള എളുപ്പമാർഗമാണിത്. വാഹനമിടിച്ച് കൈവരി തകർന്ന പാലത്തിലൂടെ സ്കൂൾ വാഹനങ്ങളടക്കം കടന്നുപോകുന്നുണ്ട്. ആഴമേറിയ തോടിനു കുറുകെയാണ് പാലം. രാത്രികാലങ്ങളിൽ വാഹന യാത്രികർ അപകടപ്പെടാൻ സാധ്യതയേറെയാണ്. പാലത്തിന്‍റെ കൈവരി പുനർനിർമിക്കാൻ അധികൃതർ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

ഇടവേളയ്ക്കുശേഷം അനധികൃത മണ്ണെടുപ്പ് വ്യാപകമാകുന്നു

കടുത്തുരുത്തി: ഇടവേളയ്ക്കുശേഷം അനധികൃത മണ്ണെടുപ്പ് വ്യാപകമാകുന്നു. കടുത്തുരുത്തി, ഞീഴൂര്‍, മുളക്കുളം, വെള്ളൂര്‍ പഞ്ചായത്തുകളിലാണ് അനധികൃത മണ്ണെടുപ്പ് ശക്തമായിരിക്കുന്നത്. കഴിഞ്ഞ 28 വരെ ഖനനപ്രവൃത്തികള്‍ ഒന്നും നടത്താന്‍ പാടില്ലെന്ന കളക്ടറുടെ ഉത്തരവ് ലംഘിച്ചും ഇവിടെ മണ്ണെടുപ്പ് നിര്‍ബാധം തുടരുകയായിരുന്നു. മഴ മാറി ഒരു ദിവസം വെയില്‍ തെളിഞ്ഞതോടെ മണ്ണ് മാഫിയ ഈ പ്രദേശങ്ങളില്‍ പിടിമുറുക്കിയിരിക്കുകയാണ്. മുളക്കുളം പഞ്ചായത്തിലെ ഞാറുകുന്ന് അങ്കണവാടിക്ക് സമീപവും, കുന്നപ്പള്ളി പെരുമാലില്‍ ക്രഷറിന് സമീപവും നിരോധന ഉത്തരവ് നിലനില്‍ക്കേ യാതൊരുവിധ അനുമതിയുമില്ലാതെ മണ്ണെടുപ്പ് തുടരുകയാണ്. വലുതും ചെറുതുമായ ടിപ്പര്‍ ലോറികള്‍ ഓടി ഇവിടത്തെ പ്രാദേശികവഴികള്‍ തകര്‍ന്നുതുടങ്ങി. വെളുപ്പിന് തുടങ്ങുന്ന മണ്ണെടുപ്പ് രാത്രിവരെ നീളും. വെള്ളൂര്‍, ഇറുമ്പയം, ജാതിക്കാമല, ഞീഴൂര്‍, പാറശേരി, കാട്ടാമ്പാക്ക് തുടങ്ങിയ പ്രദേശങ്ങളിലും അനധികൃത മണ്ണെടുപ്പ് വ്യാപകമാണ്. ഇതിനെല്ലാം റവന്യു, പോലീസ് അധികൃതര്‍ കൂട്ടുനില്‍ക്കുന്നതായി നാട്ടുകാര്‍ ആരോപിക്കുന്നു. പരാതി പറഞ്ഞാല്‍ പരിശോധിക്കാന്‍ ഉദ്യോഗസ്ഥര്‍ എത്തുമ്പോഴേക്കും സ്ഥലത്തുനിന്ന് ജെസിബിയും ടിപ്പറുകളും മാറ്റി ഉദ്യോഗസ്ഥരുടെ കണ്ണില്‍പ്പെടാതെ രക്ഷപ്പെടും. അനധികൃത മണ്ണെടുപ്പിന് കൂട്ടുനില്‍ക്കുന്ന പോലീസ്, റവന്യു ഉദ്യോഗസ്ഥര്‍ മണ്ണ് മാഫിയകളെ പരിശോധനയ്ക്ക് വരുന്ന വിവരം നേരത്തേ അറിയിക്കുകയാണന്നും നാട്ടുകാര്‍ ആരോപിക്കുന്നു.

മതേതരത്വത്തിനേറ്റ കളങ്കം: ജില്ലാ പൗരസമിതി

കോട്ടയം: ഛത്തീഗഡില്‍ കന്യാസ്ത്രീകളെ അന്യായമായി ജയിലിലടച്ചതു മതേതരത്വത്തിനേറ്റ കളങ്കമാണെന്ന് കോട്ടയം ജില്ലാ പൗരസമിതി. യോഗത്തില്‍ പ്രസിഡന്‍റ് ഡോ. എം.എം. മാത്യു അധ്യക്ഷത വഹിച്ചു. സെക്രട്ടറി സാല്‍വിന്‍ കൊടിയന്തറ, കോട്ടയം മോഹന്‍ദാസ്, ജോജി മൂലേക്കരി, ആനിക്കാട് ഗോപി എന്നിവര്‍ പ്രസംഗിച്ചു.

ടി.ഡി. ചാക്കോ അനുസ്മരണം

മുടിയൂര്‍ക്കര: മുടിയൂര്‍ക്കര ഗവണ്‍മെന്‍റ് എല്‍പി സ്‌കൂളിലെ പിടിഎ യോഗത്തോടനുബന്ധിച്ച് മാനവികം സോഷ്യല്‍ ഫൗണ്ടേഷന്‍റെ ആഭിമുഖ്യത്തില്‍ ടി.ഡി. ചാക്കോ അനുസ്മരണം നടത്തി. സമ്മേളനം തിരുവഞ്ചൂര്‍ രാധാകൃഷ്ണന്‍ എംഎല്‍എ ഉദ്ഘാടനം ചെയ്തു. മാനവികം വിദ്യാഭ്യാസ സ്‌കോളര്‍ഷിപ്പുകള്‍ വിതരണം ചെയ്തു. പിടിഎ പ്രസിഡന്‍റ് കെ.സി. സെബാസ്റ്റ്യന്‍ അധ്യക്ഷത വഹിച്ചു. പ്രഫ. ഷാജി ജോസഫ്, കെ.എസ്. മാത്യു, ഹെഡ്മിസ്ട്രസ് കെ. സിന്ധു, രഞ്ജിത എസ്. വാധ്യാര്‍, ഷാലിനി എന്നിവര്‍ പ്രസംഗിച്ചു.

കന്യാസ്ത്രീകള്‍ക്കെതിരായ വ്യാജക്കേസ്: എഫ്‌ഐആര്‍ റദ്ദാക്കണമെന്ന്

ചങ്ങനാശേരി: ഛത്തീസ്ഗഡിലെ ബിജെപി സര്‍ക്കാര്‍ വ്യാജ കേസ് ചുമത്തി മലയാളികളായ കന്യാസ്ത്രീകളെ ജയിലിലടച്ച സംഭവം മതേതര ഇന്ത്യക്ക് തീരാക്കളങ്കം വരുത്തിയെന്ന് ആര്‍ജെഡി ജില്ലാ നേതൃയോഗം അഭിപ്രായപ്പെട്ടു. കന്യാസ്ത്രീകള്‍ക്ക് ജാമ്യം ലഭിച്ചതുകൊണ്ടുമാത്രം പ്രശ്നം തീരില്ല. എഫ്‌ഐആര്‍ റദ്ദാക്കുന്നതുവരെ മതേതര വിശ്വാസികള്‍ അതീവ ജാഗ്രത പുലര്‍ത്തണം. എട്ടിന് ഉച്ചകഴിഞ്ഞ് മൂന്നിനു കോട്ടയം ഗാന്ധിസ്‌ക്വയറില്‍ ആര്‍ജെഡി ജില്ലാ കമ്മിറ്റിയുടെ നേതൃത്വത്തില്‍ ജനജാഗ്രതാ സദസ് സംഘടിപ്പിക്കാൻ യോഗം തീരുമാനിച്ചു. ആര്‍ജെഡി നിയോജകമണ്ഡലം പ്രസിഡന്‍റുമാരായി രാജീവ് അലക്സാണ്ടര്‍ (പൂഞ്ഞാര്‍), എ.വി. ജോര്‍ജുകുട്ടി (കടുത്തുരുത്തി) എന്നിവരെ യോഗം നിയമിച്ചു. ജില്ലാ പ്രസിഡന്‍റ് സണ്ണി തോമസിന്‍റെ അധ്യക്ഷതയില്‍ സംസ്ഥാന കമ്മിറ്റി അംഗങ്ങളായ അഡ്വ. ബെന്നി കുര്യന്‍, പീറ്റര്‍ പന്തലാനി, ടി.എസ്. റഷീദ്, ജോസ് മടുക്കക്കുഴി, ജോര്‍ജ് മാത്യു, ജോണ്‍ മാത്യു മൂലയില്‍, ഓമന വിദ്യാധരന്‍, കെ.ഇ. ഷെറീഫ് എന്നിവര്‍ പ്രസംഗിച്ചു.

അനധികൃത മദ്യക്കച്ചവടം: യുവാവ് പിടിയിൽ

ഗാന്ധിനഗർ: മെഡിക്കൽ കോളജിൽ രോഗീപരിചരണത്തിനു വരുന്നവർക്ക് വിളിപ്പുറത്ത് ബൈക്കിൽ മദ്യമെത്തിച്ച് നൽകുന്ന മൊബൈൽ മദ്യവില്പനക്കാരൻ പിടിയിൽ. മുടിയൂർക്കര സ്വദേശി രവിശങ്കറി (35 )നെയാണ് അസിസ്റ്റന്‍റ് എക്സൈസ് ഇൻസ്പെക്ടർ ആനന്ദരാജ് ബി.യുടെ നേതൃത്വത്തിൽ അറസ്റ്റ് ചെയ്തത്. ഓണം സ്പെഷൽ ഡ്രൈവിന്‍റെ മുന്നോടിയായാണ് എക്സൈസ് നടപടി. ഇയാൾക്കെതിരേ നിരവധി പരാതികൾ ഇതോടകം ഉയർന്നിരുന്നു. കഴിഞ്ഞ ഡ്രൈ ഡേ ദിനം രോഗികളുടെ കൂട്ടിരിപ്പുകാർക്ക് ഇരട്ടി വിലയ്ക്ക് മദ്യം കൊടുക്കാൻ ഇയാൾ കറങ്ങി നടക്കുന്നതിനിടെ എക്സൈസ് പിന്തുടരുകയായിരുന്നു. അമ്മഞ്ചേരി കുട്ടികളുടെ ആശുപത്രിക്കു സമീപമുള്ള ഇയാളുടെ വീട്ടിൽനിന്നും സ്കൂട്ടറിൽ മദ്യവുമായെത്തി ഒരാൾക്ക് മദ്യം കൈമാറുമ്പോഴാണ് ഇയാൾ പിടിയിലായത്. നാലു ലിറ്റർ മദ്യവും ഇയാൾ സഞ്ചരിച്ച സ്കൂട്ടറും കസ്റ്റഡിയിലെടുത്തു. മദ്യം വിറ്റ വകയിൽ കണ്ടെടുത്ത 1,200 രൂപയും കോടതിയിൽ ഹാജരാക്കി. പ്രതിയെ കോടതി പതിനാല് ദിവസത്തേക്ക് റിമാൻഡ് ചെയ്തു. റെയ്ഡിൽ കോട്ടയം എക്സൈസ് സർക്കിൾ ഓഫീസിലെ ഉദ്യോഗസ്ഥരായ അസിസ്റ്റന്‍റ് എക്സൈസ് ഇൻസ്പെക്ടർ ബി. സന്തോഷ് കുമാർ, അസിസ്റ്റന്‍റ് എക്സൈസ് ഇൻസ്പെക്ടർ സി. കണ്ണൻ, പ്രിവന്‍റീവ് ഓഫീസർ ഹരികൃഷ്ണൻ, സിവിൽ എക്സൈസ് ഓഫീസർ വി. വിനോദ് കുമാർ, വനിതാ സിവിൽ എക്സൈസ് ഓഫീസർ കെ.ജി. അമ്പിളി, സിവിൽ എക്സൈസ് ഓഫീസർ ഡ്രൈവർ സുരേഷ് ബാബു എന്നിവർ പങ്കെടുത്തു.

സംസ്‌കാര സാഹിതി: ഷിജു സ്‌കറിയ സംസ്ഥാന ജനറല്‍ സെക്രട്ടറി

കോട്ടയം: കെപിസിസി സാംസ്‌കാരിക വിഭാഗമായ സംസ്‌കാര സാഹിതിയുടെ സംസ്ഥാന ജനറല്‍ സെക്രട്ടറിയായും മീഡിയാസെല്‍ കണ്‍വീനറായും ഷിജു സ്‌കറിയയെ സംസ്ഥാന ചെയര്‍മാന്‍ സി.ആര്‍. മഹേഷ് എംഎല്‍എ നിയമിച്ചു. നേരത്തേ ജില്ലാ ചെയര്‍മാനായിരുന്നു. സീനിയര്‍ ജേര്‍ണലിസ്റ്റ് ഫെഡറേഷന്‍ ഓഫ് കേരളയുടെ പത്തനംതിട്ട ജില്ലാ വൈസ് പ്രസിഡന്‍റാണ്. കെയുഡബ്ല്യുജെ ബംഗളൂരു, ചെന്നൈ ഘടകങ്ങളുടെ ഭാരവാഹിയായും പ്രവര്‍ത്തിച്ചു.

വട്ടക്കാട് - ഇരവീശ്വരം പാടശേഖരം റോഡിലെ പുതിയ പാലം തുറന്നു

അയ്മനം: അയ്മനം പഞ്ചായത്ത്‌ അഞ്ചാം വാർഡിൽ വട്ടക്കാട് -ഇരവീശ്വരം പാടശേഖരം റോഡിൽ മോട്ടോർ തറയ്ക്ക് സമീപം തോടിനു കുറുകെ ഇരവീശ്വരം പാടശേഖരത്തേക്കുള്ള പുതിയ പാലം പണി പൂർത്തിയാക്കി ജനങ്ങൾക്കായി തുറന്നു കൊടുത്തു. പഞ്ചായത്ത്‌ പ്രസിഡന്‍റ് വിജി രാജേഷ് നാടമുറിച്ച് പാലം ഉദ്ഘാടനം ചെയ്തു. വാർഡ് മെംബർ ബിജു മാന്താറ്റിൽ അധ്യക്ഷത വഹിച്ചു. തടിയും പലകക്കഷണങ്ങളും ഉപയോഗിച്ച് താത്കാലികമായി നിർമിച്ച നിലവിലെ നടപ്പാലം അപകടാവസ്ഥയി ലായിരുന്നു. കാറുകളുൾപ്പെടെ ചെറിയ വാഹനങ്ങൾക്ക് കടന്നുപോകാവുന്ന വീതിയിൽ ഇരുകരകളിലെയും കൽക്കെട്ടുകൾ കോൺക്രീറ്റ് ഭിത്തികൊണ്ട് ബലപ്പെടുത്തി ഫാബ്രിക്കേറ്റ് ചെയ്ത ഇരുമ്പ് പാലമാണ് പഞ്ചായത്ത്‌ ഫണ്ടുപയോഗിച്ച് നിർമിച്ചത്. തോടിന്‍റെ മറുകരയിൽ വെള്ളപ്പൊക്ക ഭീഷണിയിൽ ഒറ്റപ്പെട്ട രീതിയിൽ താമസിച്ചു വന്നിരുന്ന കുടുംബങ്ങൾ ഇവിടെ പാലമില്ലാതിരുന്നതുകൊണ്ട് വലിയ ദുരിതമാണ് അനുഭവിച്ചിരുന്നത്. നീണ്ടകാലത്തെ കാത്തിരിപ്പിനൊടുവിൽ പാലം യാഥാർഥ്യമായത് ഇവിടെയുള്ള കുടുംബങ്ങൾക്ക് ആശ്വാസമായി. ബ്ലോക്ക്‌ പഞ്ചായത്ത്‌ ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ കെ.കെ. ഷാജിമോൻ, മെംബർ പി.വി. സുശീലൻ, അസിസ്റ്റന്‍റ് എൻജിനിയർ പ്രിയ മേരി ഫിലിപ്പ്, അരുൺ എന്നിവർ പ്രസംഗിച്ചു.

ഖാദി ഓണം മേളയ്ക്കു തുടക്കമായി

കോട്ടയം: കേരള ഖാദി ഗ്രാമവ്യവസായ ബോര്‍ഡും അംഗീകൃത ഖാദി സ്ഥാപനങ്ങളും സംയുക്തമായി നടത്തുന്ന ഖാദി ഓണം മേളയുടെ ജില്ലാതല ഉദ്ഘാടനം മന്ത്രി വി.എന്‍. വാസവന്‍ നിര്‍വഹിച്ചു. തിരുവഞ്ചൂര്‍ രാധാകൃഷ്ണന്‍ എംഎല്‍എ അധ്യക്ഷത വഹിച്ചു. ഗ്രാമ വ്യവസായ ഉത്പന്നങ്ങളുടെ ആദ്യവില്‍പ്പന ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗറും ഖാദി ഉത്പന്നങ്ങളുടെ ആദ്യവിൽപ്പന നഗരസഭാധ്യക്ഷ ബിന്‍സി സെബാസ്റ്റ്യനും നിര്‍വഹിച്ചു. ജില്ലാ കളക്ടര്‍ ജോണ്‍ വി. സാമുവല്‍, ഖാദി ഗ്രാമവ്യവസായ ബോര്‍ഡ് അംഗങ്ങളായ കെ.എസ്. രമേഷ് ബാബു, സാജന്‍ തൊടുക, പ്രോജക്ട് ഓഫീസര്‍ ജെസി ജോണ്‍,സംഘടനാ പ്രതിനിധികളായ സതീഷ് ജോര്‍ജ്, വിമല്‍കുമാര്‍ എന്നിവര്‍ പ്രസംഗിച്ചു. സെപ്റ്റംബര്‍ നാലുവരെയാണ് മേള നടക്കുന്നത്. ജില്ലയിലെ വിവിധ സ്ഥലങ്ങളില്‍ സംഘടിപ്പിച്ചിരിക്കുന്ന മേളകളില്‍ ജില്ലയിലെ തനതായ ഉത്‍പന്നങ്ങള്‍ക്ക് പുറമേ രാജ്യത്തിന്‍റെ വിവിധ ഭാഗങ്ങളില്‍ നിന്നുള്ള ഖാദി തുണിത്തരങ്ങളുമുണ്ട്. കോട്ടയം സിഎസ്ഐ കോംപ്ലക്‌സ്, ചങ്ങനാശേരി റവന്യു ടവര്‍, ഏറ്റുമാനൂര്‍ ഏദന്‍സ് ഷോപ്പിംഗ് കോംപ്ലക്‌സ്, വൈക്കം എസ്ബിഐ ബില്‍ഡിംഗ്, ഉദയനാപുരം വില്ലേജ് ഓഫീസിനു സമീപം, കുറവിലങ്ങാട് ഭാരത് മാതാ കോംപ്ലക്‌സ് എന്നിവിടങ്ങളിലെ ഖാദി ഗ്രാമ സൗഭാഗ്യകളിലാണ് ഓണം ഖാദി മേള നടക്കുന്നത്.

കളക്ടറേറ്റിലെ നവീകരിച്ച ശലഭോദ്യാനത്തിന്‍റെ ഉദ്ഘാടനം ഇന്ന്

കോട്ടയം: വിവിധ വര്‍ണങ്ങളില്‍ പാറിപ്പറക്കുന്ന പൂമ്പാറ്റകളെ അടുത്തു കാണാം. പ്രകൃതിയെ അടുത്തറിയാം. നഗരമധ്യത്തില്‍ കളക്‌ടറേറ്റ് വളപ്പിലെ നവീകരിച്ച ശലഭോദ്യാനത്തിന്‍റെ ഉദ്ഘാടനം ഇന്നു നടക്കും. കേരളത്തില്‍ നഗരമധ്യത്തില്‍ ആദ്യത്തേതും ഭരണസിരാകേന്ദ്രത്തില്‍ കോട്ടയത്ത് മാത്രമുള്ളതുമാണ് കളക്‌ടറേറ്റ് വളപ്പിലെ ശലഭോദ്യാനം. 2006-ല്‍ പരിസ്ഥിതി ഗവേഷണ സ്ഥാപനമായ ട്രോപ്പിക്കല്‍ ഇന്‍സ്റ്റിറ്റ്യൂട്ട് ഓഫ് ഇക്കോളജിക്കല്‍ സയന്‍സസ്, അന്നത്തെ കളക്‌ടര്‍ വേണുഗോപാലിന്‍റെ നിര്‍ദേശപ്രകാരമാണ് കളക്‌ടറേറ്റ് വളപ്പില്‍ ശലഭോദ്യാനം നിര്‍മിച്ചത്. വാഹനങ്ങളും ജനത്തിരക്കുമുള്ള ഒരിടത്ത്, ആതിഥേയ ചെടികളും തേന്‍ചെടികളും ഒരുക്കിയപ്പോള്‍ ശലഭങ്ങളെത്തുമോ എന്ന് ആശങ്കപ്പെട്ടിരുന്നുവെങ്കിലും ഏവരേയും അത്ഭുതപ്പെടുത്തി നാല്പതോളം ഇനം ശലഭങ്ങളെ ഇവിടെ കണ്ടുവരുന്നു. തുടക്കത്തില്‍ 18 ഇനം നാടന്‍ ചെടികളാണ് ഉണ്ടായിരുന്നതെങ്കില്‍ ഇപ്പോള്‍ മുപ്പതോളം ചെടികളുണ്ട്. ചിത്രശലഭങ്ങളെയും വിവിധയിനം സസ്യങ്ങളെയും പരിചയപ്പെടുത്തുന്ന ബോര്‍ഡുകളും ശലഭോദ്യാനത്തില്‍ സ്ഥാപിച്ചിട്ടുണ്ട്. സ്‌കൂള്‍, കോളജ് വിദ്യാര്‍ഥികളുടെ പഠനകേന്ദ്രം കൂടിയായ ശലഭോദ്യാനം സന്ദര്‍ശകര്‍ക്ക് കൗതുകക്കാഴ്ച മാത്രമല്ല, പ്രകൃതിയിലേക്കുള്ള അറിവിന്‍റെ ജാലകം കൂടിയാണു പകര്‍ന്നു തരുന്നതെന്ന് ശലഭോദ്യാനം നിര്‍മാണത്തിനു നേതൃത്വം നല്‍കിയ ടൈസ് ഡയറക്‌ടര്‍ ഡോ. പുന്നന്‍ കുര്യന്‍ വേങ്കടത്ത് പറഞ്ഞു. ദക്ഷിണേന്ത്യയില്‍ വിവിധ ഇടങ്ങളിലായി ഇരുപതിലധികം ചിത്രശലഭോദ്യാനങ്ങള്‍ ആവിഷ്‌കരിച്ചിട്ടുള്ള ടൈസ് ആദ്യമായി നിര്‍മിച്ച ശലഭോദ്യാനമാണിത്. നഗരത്തിലെ സ്‌കൂളുകളുടെ പങ്കാളിത്തത്തോടെ ടൈസ് തന്നെയാണ് നവീകരണം നടത്തിയതും തുടര്‍പരിപാലനം നടത്തുന്നതും. നവീകരിച്ച ശലഭോദ്യാനത്തിന്‍റെ ഉദ്ഘാടനം ഇന്നു രാവിലെ 10ന് നടക്കും.

കോട്ടയത്തുമുണ്ടൊരു ഗ്യാപ് റോഡ്

കൈത-റബര്‍ത്തോട്ടങ്ങൾക്കിടയിലൂടെ വളഞ്ഞുപുളഞ്ഞ് 35-ാമൈല്‍-ചോലത്തടം റോഡ് കോട്ടയം: അരിക്കൊമ്പനെ പിടികൂടി കാട്ടിലേക്ക് അയയ്ക്കാനായി ലോറിയില്‍ കൊണ്ടുപോയപ്പോൾ ഒരു റോഡും സമൂഹ മാധ്യമങ്ങളില്‍ ഏറെ വൈറലായിരുന്നു. കൊച്ചി- ധനുഷ്‌കോടി ദേശീയ പാതയുടെ ഭാഗമായ മൂന്നാര്‍ - ബോഡിമെട്ട് റോഡില്‍ മൂന്നാറില്‍ നിന്ന് 13 കിലോമീറ്റര്‍ അകലെ ദേവികുളത്തിനും പെരിയകനാലിനും ഇടയിലുള്ള പ്രദേശമായ മൂന്നാര്‍ ഗ്യാപ് റോഡാണ് വൈറലായ റോഡ്. അടുത്ത നാളില്‍ ഹൈറേഞ്ചിലെ ജീപ്പുകളെല്ലാം റോഡ് ഷോ നടത്തി റോഡിനെ വീണ്ടും വൈറലാക്കി. സംസ്ഥാന പൊതുമരാമത്ത് വകുപ്പിന്‍റെ നേട്ടങ്ങളുടെ റീല്‍സ് കാണിക്കുന്നതും ഈ റോഡാണ്. തേയിലത്തോട്ടങ്ങളും പാറക്കെട്ടുകളും വ്യൂ പോയിന്‍റുകളും നിറഞ്ഞ ഗ്യാപ് റോഡ് സഞ്ചാരികളുടെ ഇഷ്ട ലൊക്കേഷനാണ്. ഇതുപോലെ കാഴ്ചകള്‍ നല്‍കുന്ന ഒരു റോഡ് കോട്ടയം- ഇടുക്കി ജില്ലാ അതിര്‍ത്തിയിലുണ്ട്. തേയിലത്തോട്ടങ്ങള്‍ക്കു പകരമായി കൈതയും റബര്‍ തോട്ടങ്ങളും വളവും പുളവും നിറഞ്ഞവഴികളുമുള്ള ഒരു മിനി ഗ്യാപ് റോഡ്. ദേശീയ പാത 183ല്‍ ഇടുക്കി ജില്ലയിലെ 35-ാംമൈലില്‍ നിന്നും ബോയ്‌സ് എസ്റ്റേറ്റ്, കൊക്കയാര്‍ വഴി കോട്ടയം ജില്ലയിലെ കൂട്ടിക്കല്‍, കാവാലി വഴി ചോലത്തടത്തെത്തുന്നതാണ് റോഡ്. മലയോര ഹൈവേയുടെ ഭാഗമായ റോഡ് അടുത്ത നാളില്‍ ബിഎം ആന്‍ഡ് ബിസി നിലവാരത്തില്‍ ടാര്‍ ചെയ്തതോടെ സഞ്ചാരികളുടെ റൈഡിംഗ് റൂട്ടും ഇഷ്ട ലൊക്കേഷനുമായി മാറിക്കഴിഞ്ഞിരിക്കുകയാണ്. 14 കിലോമീറ്റര്‍ ദൂരമുള്ള റോഡില്‍ കെകെ റോഡിലെ 35-ാം മൈലില്‍നിന്നും പ്രവേശിക്കുമ്പോള്‍ തന്നെ കൈതത്തോട്ടങ്ങളാണ്. കൈതകള്‍ക്കിടയിലൂടെ വളഞ്ഞും പുളഞ്ഞും എത്തി പിന്നെ റബര്‍ എസ്റ്റേറ്റിലേക്കാണ് പ്രവേശിക്കുന്നത്. മേലോരം, പെരുവന്താനം, വെംബ്ലി, ഉറുമ്പിക്കര വെള്ളച്ചാട്ടങ്ങള്‍ കാണാന്‍ ഈ റോഡില്‍നിന്നാണ് വഴി തിരിഞ്ഞു പോകുന്നത്. കൂട്ടിക്കലിലെത്തി കോട്ടയം ജില്ലയില്‍ പ്രവേശിച്ചാല്‍ താളുങ്കല്‍ കാവാലി വഴി ചോലത്തടത്തേക്കുള്ള റോഡില്‍ കാവാലി വ്യൂ പോയിന്‍റ് മനോഹരമായ കാഴ്ചയാണ് സമ്മാനിക്കുന്നത്. ഹെയര്‍പിന്‍ വളവുകളും എസ് വളവുകളും നിറഞ്ഞ റോഡില്‍ ചെറുതും വലുതുമായ നിരവധി വെള്ളച്ചാട്ടങ്ങളുമുണ്ട്. ചോലത്തടത്തുനിന്നും പൂഞ്ഞാര്‍ റോഡില്‍ പാതാമ്പുഴ വരെ കുത്തനെയുള്ള ഇറക്കവും എസ് വളവുകളുമാണ്. അസല്‍ ഹൈറേഞ്ച് വൈബ് സമ്മാനിക്കുന്ന യാത്രയാണ്. ഇടുക്കി ജില്ലയിലെ കുട്ടിക്കാനം ഭാഗത്തുനിന്നും നെടുമ്പാശേരി വിമാനത്താവളത്തിലേക്കും ഈരാറ്റുപേട്ട, പാലാ, തൊടുപുഴ ഭാഗങ്ങളിലേക്കും പോകാനുള്ള എളുപ്പ വഴികൂടിയാണ്. മഴക്കാലമായതോടെ റോഡിലെ കാഴ്ചകള്‍ ആസ്വദിച്ചുള്ള റൈഡിംഗിനായി ധാരാളം പേര്‍ എത്തുന്നുണ്ട്.

സഞ്ചാരികളുടെ മനം നിറച്ച് മലരിക്കല്‍ ആമ്പല്‍പാടം

കോട്ടയം: മലരിക്കലിലെ ആമ്പല്‍പാടം കാണാനും ആസ്വദിക്കാനും ജനം ഒഴുകിയെത്തുന്നു. അവധിദിനമായ ഇന്നലെ അഭൂതപൂര്‍വമായ തിരക്കായിരുന്നു. രാവിലെ 10 കഴിഞ്ഞാല്‍ ആമ്പല്‍ പ്പൂക്കള്‍ വാടിപ്പോകുന്നതിനാല്‍ പുലര്‍ച്ചെ അഞ്ചരയോടെ ആളുകള്‍ എത്തിത്തുടങ്ങും. 1800 ഏക്കറുള്ള ജില്ലയിലെ ഏറ്റവും വലിയ പാടശേഖരമായ ജെ ബ്ലോക്ക് ഒന്‍പതിനായിരം പാടശേഖരത്തിന്‍റെ മലരിക്കല്‍ ഭാഗത്തും 850 ഏക്കറുള്ള തിരുവായിക്കരിയിലുമാണ് ആമ്പല്‍പാടങ്ങളുള്ളത്. ഇപ്പോള്‍ തിരുവായ്ക്കരി പാടശേഖരത്തിലാണ് ആമ്പലുകള്‍ നിറഞ്ഞിരിക്കുന്നത്. ജെ ബ്ലോക്ക് ഒന്‍പതിനായിരം പാടത്തിന്‍റെ ഇരുവശത്തും ഏകദേശം ഒന്നരകിലോമീറ്റര്‍ റോഡിന് ഇരുവശവുമാണ് ആദ്യം കാഴ്ചയില്‍പെടുന്ന പൂപ്പാടം. സൂര്യോദയത്തോടൊപ്പം ആമ്പല്‍പ്പൂക്കൾ കാണാനാണ് ഏറെ ഭംഗി. എല്ലാ വര്‍ഷവും കൊയ്ത്ത് കഴിഞ്ഞു പാടത്ത് വെള്ളം കയറ്റുമ്പോഴാണ് ആമ്പല്‍ കിളിര്‍ത്തുതുടങ്ങുന്നത്. വെള്ളം വറ്റിക്കുന്ന സമയത്ത് ചെളിയില്‍ വീണുകിടക്കുന്ന വിത്താണു പിന്നീട് കിളിര്‍ത്തുവരുന്നത്. വിതയ്ക്ക് പാടം വറ്റിക്കുന്നതുവരെ പാടത്ത് ആമ്പലുകള്‍ നിറഞ്ഞുനില്‍ക്കും. മുന്‍കാലങ്ങളില്‍ ഓഗസ്റ്റ് ആദ്യവാരം ആരംഭിച്ചിരുന്ന ആമ്പല്‍വസന്തം ഇക്കുറി നേരത്തെ എത്തുകയായിരുന്നു. വിവിധ ഡിപ്പോകളില്‍ നിന്നായി കെഎസ്ആര്‍ടിസിയുടെ ഇരുപതോളം ബജറ്റ് ടൂറിസം ഉല്ലാസയാത്രാ വണ്ടികളാണ് ഇന്നലെ മലരിക്കലിലെത്തിയത്. സഞ്ചാരികളെ കാത്ത് വള്ളങ്ങള്‍ കിളിരൂര്‍ പാലം ഇറങ്ങി മലരിക്കലിലോട്ട് കയറുന്ന ഭാഗം മുതല്‍ പാടശേഖരങ്ങളില്‍ കാത്തുകിടക്കുന്നത് നൂറിലേറെ വള്ളങ്ങളാണ്. ഒരേസമയം രണ്ട് മുതല്‍ ഏഴ് പേര്‍ക്കുവരെ യാത്രചെയ്യാവുന്ന വള്ളങ്ങളാണ് ഇവിടെയുള്ളത്. സഞ്ചാരികള്‍ക്ക് പാടത്തിന്‍റെ ഉള്‍ഭാഗത്തേക്ക് യാത്രചെയ്ത് ആമ്പല്‍വസന്തം അടുത്തുകാണാനുള്ള അവസരമാണുള്ളത്. വള്ളത്തില്‍ സഞ്ചരിച്ചാലേ ആമ്പല്‍ക്കാഴ്ചകള്‍ അടുത്ത് ആസ്വദിക്കാന്‍ സാധിക്കൂ. വള്ളത്തില്‍ കയറുന്നവര്‍ക്ക് ലൈഫ് ജാക്കറ്റുമുണ്ട്. എത്തിച്ചേരാന്‍ കോട്ടയത്തുനിന്ന് ഇല്ലിക്കല്‍ കാഞ്ഞിരംകവല വഴി മലരിക്കലില്‍ എത്താന്‍ ഒന്‍പതു കിലോമീറ്റര്‍. കുമരകത്തുനിന്ന് ഇല്ലിക്കല്‍ കാഞ്ഞിരംകവല വഴി മലരിക്കലില്‍ എത്താന്‍ 10 കിലോമീറ്റര്‍. വൈക്കത്തുനിന്ന് ഇല്ലിക്കല്‍ കാഞ്ഞിരംകവല വഴി മലരിക്കലില്‍ എത്താന്‍ 28 കിലോമീറ്റര്‍. പാലാ, ചങ്ങനാശേരി ഭാഗങ്ങളില്‍ നിന്നും വരുന്നവര്‍ കോട്ടയത്ത് എത്തി കാഞ്ഞിരംകവല വഴി മലരിക്കലില്‍ എത്തുന്നതാണ് സൗകര്യം. സഞ്ചാരികളുടെ ശ്രദ്ധയ്ക്ക് പുലര്‍ച്ചെ 5.30 മുതല്‍ ആമ്പല്‍പാടം കാണാന്‍ ആളുകള്‍ എത്തിത്തുടങ്ങും. രാവിലെ ഒമ്പതിനു മുന്‍പ് എത്തിയാലേ വര്‍ണവിസ്മയം പൂര്‍ണമായും ആസ്വദിക്കാന്‍ സാധിക്കൂ. വെയിലുറയ്ക്കുന്നതോടെ പൂക്കള്‍ വാടും. സ്വകാര്യ വാഹനങ്ങളില്‍ എത്തുന്നവര്‍ നിര്‍ദേശിക്കുന്ന സ്ഥലങ്ങളില്‍ മാത്രമേ പാര്‍ക്ക് ചെയ്യാവൂ. ഫീസ് 30 രൂപ. കാഞ്ഞിരം കവലയില്‍നിന്നു വീതി കുറഞ്ഞ റോഡായതിനാല്‍ വാഹനങ്ങള്‍ നിര്‍ത്തി ബ്ലോക്ക് ഉണ്ടാക്കരുത്. ആമ്പല്‍ പാടത്ത് ഇറങ്ങരുത്. വള്ളം തുഴയുന്നവരുടെ നിര്‍ദേശങ്ങള്‍ പാലിക്കുക.ആറു മുതല്‍ എട്ടു പേര്‍ വരെയുള്ള സംഘത്തിനു വള്ളത്തില്‍ സഞ്ചരിക്കുന്നതിനു 1000 രൂപയാണ് ചാര്‍ജ്. ആമ്പല്‍പൂക്കള്‍ ഒരു കെട്ടിനു 30 രൂപ.

കന്യാസ്ത്രീകൾക്കെതിരായ കേസ് റദ്ദാക്കണം: മന്ത്രി റോഷി അഗസ്റ്റിൻ

കാഞ്ഞിരപ്പള്ളി: അവനവന്‍റെ വിശ്വാസം കാപട്യമില്ലാതെ തുറന്നുപറയുകയും അത് ഒരു സംസ്കാരമായി കാണുകയും പ്രവൃത്തിയിലാക്കുകയും ചെയ്യുന്ന വ്യക്തിക്കേ യഥാർഥ മനുഷ്യനാകാൻ സാധിക്കൂവെന്ന് ജലവിഭവമന്ത്രി റോഷി അഗസ്റ്റിൻ. കാഞ്ഞിരപ്പള്ളി സെന്‍റ് ഡൊമിനിക്സ് കത്തീഡ്രൽ ഇടവകയുടെ ദ്വിശതാബ്ദി ആഘോഷങ്ങളുടെ ഭാഗമായി നടന്ന സാംസ്കാരിക സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഭരണഘടനാപരമായ അവകാശങ്ങൾ പലതും ലംഘിച്ചുകൊണ്ടാണ് പലരും അറസ്റ്റ് ചെയ്യപ്പെടുകയും വേട്ടയാടപ്പെടുകയും ജയിലിൽ അടയ്ക്കപ്പെടുകയും ചെയ്യുന്നത്. കന്യാസ്ത്രീകൾക്കെതിരായി എ‌ടുത്തിരിക്കുന്ന കേസ് ഛത്തീസ്ഗഡ് ഗവൺമെന്‍റും കേന്ദ്രഗവൺമെന്‍റും ഇടപെട്ട് റദ്ദാക്കണമെന്നും അദ്ദേഹം കൂട്ടിച്ചേർത്തു. കാഞ്ഞിരപ്പള്ളിയുടെയും ഈ ദേശത്തിന്‍റെയും വളർച്ചയ്ക്കും പുരോഗതിക്കും പിന്നിൽ ഇവിടെ വസിച്ചുവരുന്ന വിശ്വാസിസമൂഹത്തിന്‍റെ കരുതലും കാവലും കർമശേഷിയുമുണ്ടെന്ന് യോഗത്തിൽ അധ്യക്ഷതവഹിച്ച കാഞ്ഞിരപ്പള്ളി രൂപതാ ബിഷപ് മാർ ജോസ് പുളിക്കൽ പറഞ്ഞു. ക്രൈസ്തവസമൂഹം വര്‍ഗീയമായി ചിന്തിക്കുന്നവരല്ല, ഉന്നതമായ മൂല്യങ്ങളിൽ അടിയുറച്ച് ജീവിക്കുന്നവരാണ്. വർഗീയത ഒരു നിർഭാഗ്യകരമായ അവസ്ഥയാണ്. അതിന്‍റെ എപ്പിസോഡുകളാണ് ഇപ്പോൾ നടന്നുകൊണ്ടിരിക്കുന്നത്. സിസ്റ്റർമാർക്ക് ജാമ്യം കിട്ടിയതുകൊണ്ട് കാര്യമില്ല. അടിസ്ഥാനരഹിതമായി അവർക്കെതിരേ എടുത്തിരിക്കുന്ന കേസുകൾ റദ്ദു ചെയ്യപ്പെടണം. മതസാഹോദര്യത്തിന്‍റെ മുഖം നഷ്ടപ്പെടാതെ കാത്തുസൂക്ഷിക്കേണ്ടത് ധാർമികതയുള്ള സമൂഹത്തിന്‍റെ ഉത്തരവാദിത്വമാണ്. നാടിനെ വളർത്തുന്ന പുതിയ സംരംഭങ്ങൾ വളര്‍ത്തിയെടുക്കാന്‍ സാധിക്കണമെന്നും മാർ ജോസ് പുളിക്കൽ കൂട്ടിച്ചേർത്തു. ആന്‍റോ ആന്‍റണി എംപി, ചീഫ് വിപ്പ് ഡോ. എന്‍. ജയരാജ്, പഞ്ചായത്ത് പ്രസിഡന്‍റ് കെ.ആര്‍. തങ്കപ്പന്‍, എസ്എൻഡിപി ഹൈറേഞ്ച് യൂണിയന്‍ സെക്രട്ടറി പി. ജീരാജ്, നൈനാര്‍പള്ളി ചീഫ് ഇമാം ഡോ. അര്‍ഷാദ് മൗലവി, കത്തീഡ്രൽ വികാരി റവ.ഡോ. കുര്യൻ താമരശേരി എന്നിവർ പ്രസംഗിച്ചു. തുടർന്ന് കത്തീഡ്രല്‍ ടീം അവതരിപ്പിച്ച മഞ്ഞുപെയ്യുന്ന മരുഭൂമി എന്ന സാമൂഹിക സംഗീത നാടകവും അരങ്ങേറി. ശതാബ്ദി ആഘോഷങ്ങളുടെ ഭാഗമായി ഉച്ചകഴിഞ്ഞ് നടന്ന വിശുദ്ധ കുർബാനയ്ക്ക് മാർ ജോസ് പുളിക്കൽ കാർമികത്വം വഹിച്ചു. ഇടവകയിൽ സേവനമനുഷ്ഠിച്ച വൈദികർ സഹകാർമികരായിരുന്നു. വിശാല കത്തീഡ്രൽ ഇടവകയുടെ ഭാഗമായിരുന്ന അഞ്ച് ഇടവകകളുടെ സംഗമം ഇന്ന് നടക്കും. വൈകുന്നേരം അഞ്ചിന് നടക്കുന്ന വിശുദ്ധകുർബാനയ്ക്ക് റവ.ഡോ. മാത്യു പായിക്കാട്ട്, ഫാ. മാത്യു പുതുമന, ഫാ. മാർട്ടിൻ വെള്ളിയാംകുളം, ഫാ. ജോസഫ് പൊങ്ങന്താനം, ഫാ. ആന്‍റണി ചെന്നക്കാട്ടുകുന്നേൽ എന്നിവർ കാർമികത്വം വഹിക്കും. വൈകുന്നേരം ആറിന് നടക്കുന്ന പൊതുസമ്മേളനം വികാരി ജനറാൾ റവ.ഡോ. ജോസഫ് വെള്ളമറ്റം ഉദ്ഘാടനം ചെയ്യും. തുടർന്ന് കുന്നന്താനം പ്രോവിഡൻസ് ഹോമിലെ കുട്ടികളുടെ കലാപരിപാടികളും നടക്കും.

ജില്ലയില്‍ അതിതീവ്രമഴ

കോട്ടയം: ജില്ലയില്‍ അതിതീവ്രമഴ. ഇന്നലെ ഉച്ചമുതലാണ് പലയിടത്തും ഒറ്റപ്പെട്ട ശക്തമായ മഴ പെയ്തത്. ഉച്ചകഴിഞ്ഞ് ഒന്നു മുതല്‍ മീനച്ചില്‍ താലൂക്കിലെ വിവിധ ഭാഗങ്ങളിലും മലയോര മേഖലയിലും അതിതീവ്രമഴയാണ് ലഭിച്ചത്. മീനച്ചിലാറ്റിലും മണിമലയാറ്റിലും ജലനിരപ്പ് ഉയര്‍ന്നു. പൂഞ്ഞാര്‍ വെട്ടുകല്ലാംകുഴി, തീക്കോയി ആറ്, അടിവാരം, ളാലം തോട്, അന്ത്യാളം തോട്, ചിറ്റാര്‍ തോട് എന്നീ തോടുകളിലും ജലനിരപ്പ് ഉയര്‍ന്നു. രാത്രിയിലും മഴ തുടരുകയാണ്. ഇന്നും ഓറഞ്ച് അലര്‍ട്ട് പ്രഖ്യാപിച്ചിരിക്കുന്ന ജില്ലയില്‍ വിവിധ ഭാഗങ്ങളില്‍ ഒറ്റപ്പെട്ട കനത്ത മഴയ്ക്കു സാധ്യതയുണ്ട്.

മിനി മാരത്തൺ 15ന് രജിസ്ട്രേഷൻ പുരോഗമിക്കുന്നു

കോട്ടയം: ഹൊറൈസൺ മോട്ടോഴ്സും ദീപികയും സിഎംഎസ് കോളജും വിമുക്തി മിഷനും ചേർന്ന് ലഹരിക്കെതിരേ 15ന് കോട്ടയത്തു നടത്തുന്ന മിനി മാരത്തൺ മൂന്നാം സീസണിലേക്കുള്ള രജിസ്ട്രേഷൻ പുരോഗമിക്കുന്നു. തെള്ളകം കാരിത്താസ് മാതാ ആശുപത്രിക്ക് സമീപത്തുള്ള ഹൊറൈസൺ മോട്ടോഴ്സ് അങ്കണത്തിൽനിന്നു രാവിലെ 6.30ന് ആരംഭിക്കുന്ന മിനി മാരത്തൺ 10 കിലോമീറ്റർ പിന്നിട്ട് സിഎംഎസ് കോളജിലാണ് സമാപിക്കുന്നത്. മാരത്തണിനെത്തുന്ന താരങ്ങൾക്കുള്ള വൈദ്യ സഹായവും ആരോഗ്യ പരിശോധനയും കോട്ടയം കാരിത്താസ് ഹോസ്പിറ്റലിലെ മെഡിക്കൽ സംഘം ലഭ്യമാക്കും. പങ്കെടുക്കുന്നവർക്കുള്ള രജിസ്‌ട്രേഷൻ പുലർച്ചെ 5.30 മുതൽ ഹൊറൈസൺ മോട്ടോഴ്‌സിന്‍റെ തെള്ളകം കാരിത്താസ് ഹോസ്പിറ്റലിന് സമീപമുള്ള മഹീന്ദ്ര സർവീസ് സെന്‍ററിൽ ആരംഭിക്കും. ഒന്നാമതെത്തുന്ന വനിതാ , പുരുഷ വിഭാഗത്തിലുള്ള വിജയിക്ക് 25,000 രൂപ കാഷ് പ്രൈസ് നൽകും. രണ്ടും മൂന്നും സ്ഥാനം നേടുന്ന പുരുഷ, വനിതാ വിഭാഗത്തിലുള്ള അത്‌ലറ്റുകൾക്ക് യാഥാക്രമം 10,000 , 5000 രൂപ വീതം കാഷ് പ്രൈസ് ലഭിക്കും. 50 വയസിനു മുകളിലുള്ള വിഭാഗത്തിൽ പുരുഷ,വനിതാ വിജയികൾക്ക് 5000 രൂപ വീതമാണ് കാഷ് പ്രൈസ്. ഫിനിഷിംഗ് പോയിന്‍റിൽ ഓടി എത്തുന്ന എല്ലാവർക്കും മെഡലുകൾ നൽകും. മുൻ വർഷങ്ങളിലേതുപോലെ തന്നെ മത്സരാർഥികൾക്ക് ടീഷർട്ടും പ്രഭാത ഭക്ഷണവും ക്രമീകരിച്ചിട്ടുണ്ട്. രജിസ്റ്റർ ചെയ്യാൻ: https://cmscollege.ac.in/cms-horizon-marathon-2025 കൂടുതൽ വിവരങ്ങൾക്ക് 9847266166 എന്ന നമ്പറിൽ ബന്ധപ്പെടാം.

ഡിസിസി പ്രസിഡന്‍റുമാറ്റം: ചർച്ച വീണ്ടും സജീവം

കോട്ടയം: ഡിസിസി പ്രസിഡന്‍റുമാറ്റം വീണ്ടും സജീവമായി. ഡിസിസി പ്രസിഡന്‍റുമാരെ മാറ്റുന്നതിനായി എഐസിസി നല്‍കിയ പട്ടികയില്‍ കോട്ടയവുമുണ്ട്. കഴിഞ്ഞയാഴ്ച ഡല്‍ഹിയിലെത്തിയ കെപിസിസി പ്രസിഡന്‍റിനോടും ഭാരവാഹികളോടും മുന്‍ കെപിസിസി പ്രസിഡന്‍റുമാരുമായും ഡിസിസി പ്രസിഡന്‍റുമാരുമായും മുതിര്‍ന്ന നേതാക്കളുമായും ആലോചിച്ച് പുനഃസംഘടന നടത്താനാണ് ദേശീയ നേതൃത്വം പറഞ്ഞത്. ഇതനുസരിച്ച് കെപിസിസി ഭാരവാഹികള്‍ അനൗപചാരിക ചര്‍ച്ചകള്‍ ആരംഭിച്ചുകഴിഞ്ഞു. നിലവിലെ ഡിസിസി പ്രസിഡന്‍റ് നാട്ടകം സുരേഷിന് ഒരു ടേം കൂടി നല്‍കണമെന്ന ആവശ്യം ഉയര്‍ന്നിട്ടുണ്ടെങ്കിലും സാധ്യത കുറവാണ്. തിരുവഞ്ചൂര്‍ രാധാകൃഷ്ണന്‍ നേതൃത്വം നല്‍കുന്ന എ വിഭാഗത്തിന്‍റെ പ്രതിനിധിയായിട്ടാണ് സുരേഷ് ഇപ്പോള്‍ പ്രവര്‍ത്തിക്കുന്നത്. സുരേഷിനെ മാറ്റിയാല്‍ യുഡിഎഫ് ജില്ലാ കണ്‍വീനര്‍ ഫില്‍സണ്‍ മാത്യൂസിനെ പ്രസിഡന്‍റാക്കാനാണ് തിരുവഞ്ചൂര്‍ രാധാകൃഷ്ണന്‍ നേതൃത്വം നല്‍കുന്ന എ ഗ്രൂപ്പിന്‍റെ തീരുമാനം. ചര്‍ച്ചയില്‍ ഫില്‍സണ്‍ മാത്യൂസിന്‍റെ പേരിനാണ് മുന്‍തൂക്കം ലഭിച്ചിരിക്കുന്നത്. കഴിഞ്ഞ തവണയും ഫില്‍സണ്‍ മാത്യൂസിന്‍റെ പേര് അവസാനവട്ടം വരെ പരിഗണിച്ചിരുന്നു. ഏറ്റവും ഒടുവിലാണ് നാട്ടകം സുരേഷ് എത്തുന്നത്. ഇതിനിടയില്‍ സംസ്ഥാന തലത്തില്‍ ഉമ്മന്‍ ചാണ്ടി നേതൃത്വം നല്‍കിയിരുന്ന എ ഗ്രൂപ്പ് പുനരുജ്ജീവിച്ചിട്ടുണ്ട്. പി.സി. വിഷ്ണുനാഥും ചാണ്ടി ഉമ്മനുമാണ് ഇതിനു നേതൃത്വം നല്‍കുന്നത്. കെ.സി. ജോസഫ്, എം.എം. ഹസന്‍, ബെന്നി ബഹന്നാന്‍ എന്നിവരുടെ ആശീര്‍വാദത്തോടെയാണ് ഉമ്മന്‍ ചാണ്ടിയുടെ എ ഗ്രൂപ്പ് എന്ന പേരില്‍ പുതിയ നീക്കം. ഈ ഗ്രൂപ്പ് ചാണ്ടി ഉമ്മനെയാണ് കോട്ടയം ഡിസിസി പ്രസിഡന്‍റ് സ്ഥാനത്തേക്ക് നിര്‍ദേശിക്കുന്നത്. തിരുവഞ്ചൂര്‍ രാധാകൃഷ്ണന്‍ ഉള്‍പ്പെടെയുള്ളവര്‍ ഇതിനോട് യോജിക്കുന്നില്ല. സാമുദായിക പരിഗണനയും നോക്കേണ്ടതുണ്ട്. ക്രിസ്ത്യന്‍ സമുദായത്തിനു മുന്‍തൂക്കമുള്ള ജില്ലയില്‍ ആ സമുദായത്തില്‍നിന്ന് ഒരാള്‍ എന്ന നിര്‍ദേശമാണ് ഇപ്പോള്‍ ഉയര്‍ന്നിരിക്കുന്നത്. കോട്ടയം, ഇടുക്കി ജില്ലകളിലെ പ്രസിഡന്‍റുമാരെ ഇതനുസരിച്ചാകും തീരുമാനിക്കുക. അപ്രതീക്ഷിതമായി ഒരാൾ പ്രസിഡന്‍റു സ്ഥാനത്തേക്ക് എത്താനും സാധ്യതയില്ലായ്കയില്ല. കാലങ്ങളായി എ ഗ്രൂപ്പിന്‍റെ കൈയിലുള്ള സ്ഥാനം ഇത്തവണ വേണമെന്നാണ് ഐ ഗ്രൂപ്പിന്‍റെ ആവശ്യം. കെപിസിസി മുന്‍ വൈസ്പ്രസിഡന്‍റ് വക്താവും എംഎല്‍എയുമായ ജോസഫ് വാഴയ്ക്കന്‍, ഐഎന്‍ടിയുസി ജില്ലാ പ്രസിഡന്‍റ് ഫിലിപ്പ് ജോസഫ് എന്നിവരുടെ പേരുകളാണ് ഐ ഗ്രൂപ്പ് മുന്നോട്ടു വയ്ക്കുന്നത്. ജോസഫ് വാഴയ്ക്കന്‍ അടുത്ത നാളിലായി ജില്ലയില്‍ സജീവമാണ്. ഐഎന്‍ടിയുസി ജില്ലാ പ്രസിഡന്‍റ് എന്ന നിലയില്‍ ഫിലിപ്പ് ജോസഫ് ജില്ലയില്‍ സജീവമായി പ്രവര്‍ത്തിക്കുന്നയാളാണ്. മുമ്പും പലവട്ടം ഫിലിപ്പ് ജോസഫിന്‍റെ പേര് പ്രസിഡന്‍റ് സ്ഥാനത്തേക്ക് പരിഗണിച്ചിരുന്നതാണ്. അടുത്തയാഴ്ച പുതിയ ഡിസിസി പ്രസിഡന്‍റും ജില്ലാ ഭാരവാഹികളുമുണ്ടാകുമെന്നാണ് സൂചന.

വനംമന്ത്രി രാജിവയ്ക്കണമെന്ന്

മുണ്ടക്കയം ഈസ്റ്റ്‌: പെരുവന്താനം പഞ്ചായത്തിൽ നിത്യേന ഉണ്ടാകുന്ന വന്യജീവി ആക്രമണങ്ങളുടെ ഉത്തരവാദിത്വം ഏറ്റെടുത്ത് വനംമന്ത്രി രാജിവയ്ക്കണമെന്ന് ബിജെപി സംസ്ഥാന സെക്രട്ടറി പന്തളം പ്രതാപൻ. വന്യജീവി ആക്രമണത്തിൽ പ്രതിഷേധിച്ച് മുണ്ടക്കയം മുപ്പത്തഞ്ചാംമൈലിലെ ഫോറസ്റ്റ് സ്റ്റേഷനിലേക്ക് ബിജെപി പ്രവർത്തകർ നടത്തിയ പ്രതിഷേധ മാർച്ച് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. കഴിഞ്ഞ അഞ്ചു മാസത്തിനിടയിൽ മതമ്പയിൽ രണ്ട് തൊഴിലാളികളാണ് കാട്ടാനയുടെ ആക്രമണത്തിൽ കൊല്ലപ്പെട്ടത്. കഴിഞ്ഞ മാസം തൊട്ടടുത്ത പഞ്ചായത്തായ പീരുമേട്ടിലും ഒരു ആദിവാസി സ്ത്രീയെ കാട്ടാന ചവുട്ടി കൊലപ്പെടുത്തി. ഇത്തരം സംഭവങ്ങളുണ്ടായിട്ടും വകുപ്പ് മേലധികാരികൾ അനങ്ങാപ്പാറ നയമാണ് സ്വീകരിക്കുന്നത്. ജനങ്ങളുടെ സ്വത്തിനും ജീവനും സംരക്ഷണം നൽകണമെന്നും വനം മന്ത്രിയുടെ നിഷ്ക്രിയത്വം ജനജീവിതത്തിന് ഭീഷണിയാണെന്നും അദ്ദേഹം കുറ്റപ്പെടുത്തി. ധർണയിൽ ജില്ലാ പ്രസിഡന്‍റ് വി.സി. വർഗീസ് മുഖ്യപ്രഭാഷണം നടത്തി. മണ്ഡലം വൈസ് പ്രസിഡന്‍റ് ടി.ആർ. രാജേന്ദ്രൻ അധ്യക്ഷത വഹിച്ചു. ജില്ലാ ജനറൽ സെക്രട്ടറി സി. സന്തോഷ് കുമാർ, മണ്ഡലം പ്രസിഡന്‍റ് കെ.ഡി. അനീഷ്, ജില്ലാ സെക്രട്ടറി സന്തോഷ് കൃഷ്ണൻ എന്നിവർ പ്രസംഗിച്ചു.

റവ. ഡോ. നിരപ്പേൽ അവാർഡ് ഫോർ ഇൻസ്പിരേഷണല്‍ ടീച്ചർ പുരസ്കാരം ആർ. ജയശ്രീക്ക് സമ്മാനിച്ചു

പെരുവന്താനം: സെന്‍റ് ആന്‍റണീസ് കോളജിന്‍റെയും റവ.ഡോ. ആന്‍റണി നിരപ്പേൽ ഫൗണ്ടേഷന്‍റെയും സംയുക്താഭിമുഖ്യത്തില്‍ കേരളത്തിലെ ബെസ്റ്റ് ഹയർ സെക്കൻഡറി സ്കൂൾ പ്രിൻസിപ്പൽമാർക്കായി ഏർപ്പെടുത്തിയ റവ.ഡോ. നിരപ്പേൽ അവാർഡ് ഫോർ ഇൻസ്പിരേഷണല്‍ ടീച്ചർ പുരസ്കാരം പൂഞ്ഞാർ എസ്എംവി ഹയർ സെക്കൻഡറി സ്കൂൾ പ്രിൻസിപ്പൽ ആർ. ജയശ്രീക്ക് സമർപ്പിച്ചു. പെരുവന്താനം സെന്‍റ് ആന്‍റണീസ് കോളജ് ഓഡിറ്റോറിയത്തിൽ നടന്ന സമ്മേളനത്തിൽ മോൺ. ജോർജ് ആലുങ്കല്‍ 10,001 രൂപയും പ്രശസ്തി പത്രവും മെമന്‍റോയുമടങ്ങുന്ന പുരസ്കാരം ആർ. ജയശ്രീക്ക് നൽകി. പ്രിൻസിപ്പൽ ഡോ.ആന്‍റണി ജോസഫ് കല്ലമ്പള്ളി അധ്യക്ഷത വഹിച്ചു. കോളജ് ചെയര്‍മാന്‍ ബെന്നി തോമസ് മുഖ്യപ്രഭാഷണം നടത്തി. സെക്രട്ടറി ടിജോമോന്‍ ജേക്കബ്‌, വൈസ് പ്രിന്‍സിപ്പല്‍മാരായ സുപർണ രാജു, ബോബി കെ. മാത്യു, പി.ആർ. രതീഷ്, ഫാ. ജോസഫ്‌ വാഴപ്പനാടി, ജിനു തോമസ്‌ എന്നിവർ പ്രസംഗിച്ചു. തുടർന്ന് പൂഞ്ഞാർ എസ്എംവി സ്കൂളിൽ നിന്നെത്തിയ വിദ്യാർഥികൾ ആർട്ടിഫിഷൽ ഇന്‍റലിജന്‍സ്, റോബോട്ടിക്സ്‌, ഹോട്ടല്‍ മാനേജ്‌മെന്‍റ്, ഫാഷന്‍ ഡിസൈനിംഗ്, ഏവിയേഷന്‍ ഡിപ്പാര്‍ട്ട്മെന്‍റുകള്‍ നടത്തിയ പ്രദർശനങ്ങളില്‍ പങ്കെടുത്തു.

കാടുമൂടിയ റബർത്തോട്ടങ്ങൾ കീഴടക്കി കാട്ടാനക്കൂട്ടം

മുണ്ടക്കയം: കാട്ടാനയുടെ ആക്രമണത്തിൽ രണ്ടു ജീവനുകൾ നഷ്ടമായ പെരുവന്താനം പഞ്ചായത്തിലെ ടിആർ ആൻഡ് ടി എസ്റ്റേറ്റിലെ കാടുമൂടിയ റബർത്തോട്ടങ്ങൾ വന്യജീവകളുടെ വിഹാരകേന്ദ്രമായി മാറുന്നു. ടിആർ ആൻഡ് ടി എസ്റ്റേറ്റിൽ റബർമരങ്ങൾ വെട്ടിമാറ്റിയ നൂറുക്കണക്കിന് ഏക്കർ സ്ഥലമാണ് കാടുമൂടി വെറുതേ കിടക്കുന്നത്. ഈ പ്രദേശങ്ങളിൽ ശബരിമലവനത്തിൽനിന്നു വന്യജീവികൾ കൂട്ടമായെത്തി തമ്പടിക്കുകയാണ്. എസ്റ്റേറ്റിന്‍റെ പല ഭാഗങ്ങളിലും കഴിഞ്ഞ ഏതാനും വർഷങ്ങളായി പുലി, കടുവ, കാട്ടാന, കാട്ടുപോത്ത്, കാട്ടുപന്നി, കുരങ്ങൻ അടക്കമുള്ള വന്യജീവികൾ വിഹരിക്കുകയാണ്. കഴിഞ്ഞ വർഷം മന്ത്രി വി.എൻ. വാസവന്‍റെ നേതൃത്വത്തിൽ മുണ്ടക്കയത്ത് നടത്തിയ ചർച്ചയിൽ എസ്റ്റേറ്റിലെ കാടുമൂടിയ പ്രദേശങ്ങൾ വെട്ടിത്തെളിക്കണമെന്ന് എസ്റ്റേറ്റ് മാനേജ്മെന്‍റിന് നിർദേശം നൽകിയെങ്കിലും ഇതൊന്നും പാലിക്കപ്പെട്ടില്ല. പുതിയതായി റബർ വെട്ടിമാറ്റിയ ഭാഗത്ത് കൈത കൃഷി നടത്തുന്നുണ്ടെങ്കിലും വർഷങ്ങളായി ഉപയോഗിക്കാതെ കിടക്കുന്ന ഭൂമി കാടുമൂടിയ നിലയിലാണ്. ഇവിടെയാണ് വന്യമൃഗങ്ങൾ തമ്പടിക്കുന്നത്. കഴിഞ്ഞ ഫെബ്രുവരിയിൽ ചെന്നാപ്പാറയിൽ എസ്റ്റേറ്റിനോട് ചേർന്ന് താമസിച്ചിരുന്ന സോഫിയ എന്ന വീട്ടമ്മയെ കാട്ടാന ആക്രമിച്ച് കൊന്നിരുന്നു. കഴിഞ്ഞ ദിവസം മതമ്പ കൊണ്ടോടിയിൽ റബർ ടാപ്പിംഗ് തൊഴിലാളിയായ പുരുഷോത്തമനെ കാട്ടാന ആക്രമിച്ച് കൊലപ്പെടുത്തിയിരുന്നു. ആന പുരുഷോത്തമനെ ആക്രമിച്ച ശേഷം ടിആർ ആൻഡ് ടി എസ്റ്റേറ്റിലെ കാടുമൂടിയ മേഖലയിലേക്കാണ് ഓടിപ്പോയതെന്ന് മകൻ രാഹുൽ പറഞ്ഞിരുന്നു. എസ്റ്റേറ്റിലെ തൊഴിലാളികളെയും പ്രദേശത്തെ കുടുംബങ്ങളെയും ദുരിതത്തിലാക്കുന്ന വന്യമൃഗശല്യത്തിന് പ്രധാന കാരണമായ തോട്ടം മേഖലയിലെ കാടുകൾ വെട്ടിമാറ്റി പ്രശ്നത്തിന് പരിഹാരം കാണണമെന്ന് ആവശ്യം ശക്തമാവുകയാണ്.

രാജേന്ദ്ര മൈതാനത്ത് സ്റ്റേജ് ഉദ്ഘാടനവും ജലബജറ്റ് പ്രഖ്യാപനവും

പൊൻകുന്നം: രാജേന്ദ്ര മൈതാനത്ത് ചിറക്കടവ് പഞ്ചായത്ത് ആറുലക്ഷം രൂപ മുടക്കി നിർമിച്ച പുതിയ സ്റ്റേജിന്‍റെ ഉദ്ഘാടനവും ജലബജറ്റ് പ്രഖ്യാപനവും മന്ത്രി റോഷി അഗസ്റ്റിൻ നടത്തി. ചീഫ് വിപ്പ് ഡോ. എൻ. ജയരാജ് അധ്യക്ഷത വഹിച്ചു. പഞ്ചായത്ത് പ്രസിഡന്‍റ് സി.ആർ. ശ്രീകുമാർ, ജില്ലാ പഞ്ചായത്തംഗം ടി.എൻ. ഗിരീഷ്‌കുമാർ, സതി സുരേന്ദ്രൻ, മിനി സേതുനാഥ്, ബി. രവീന്ദ്രൻനായർ, ഷാജി പാമ്പൂരി, സുമേഷ് ആൻഡ്രൂസ്, ആന്‍റണി മാർട്ടിൻ, എൻ.ടി. ശോഭന, ഗിരീഷ് എസ്. നായർ, വി.ജി. ലാൽ, പി. പ്രജിത്, പി. സതീഷ്ചന്ദ്രൻനായർ, വൈശാഖ് എസ്. നായർ, വിവിധ രാഷ്‌ട്രീയകക്ഷി പ്രതിനിധികൾ തുടങ്ങിയവർ പങ്കെടുത്തു.

ജില്ലാ ക്ഷീരസംഗമം കാഞ്ഞിരപ്പള്ളിയിൽ

കാഞ്ഞിരപ്പള്ളി: കോട്ടയം ജില്ലാ ക്ഷീരസംഗമം 21, 22, 23 തീയതികളില്‍ തമ്പലക്കാട് സെന്‍റ് തോമസ് പള്ളി ഓഡിറ്റോറിയത്തില്‍ ന‌ട‌ക്കും. ക്ഷീരവികസന വകുപ്പ്, ജില്ലയിലെ ക്ഷീരസഹകരണ സംഘങ്ങള്‍, മില്‍മ, ത്രിതല പഞ്ചായത്തുകള്‍, കേരള ഫീഡ്സ്, മറ്റ് സഹകരണ സ്ഥാപനങ്ങള്‍ എന്നിവയുടെ സംയുക്താഭിമുഖ്യത്തില്‍ കാഞ്ഞിരപ്പള്ളി ബ്ലോക്ക് പഞ്ചായത്തിനു കീഴില്‍ വരുന്ന തമ്പലക്കാട് നോര്‍ത്ത് ക്ഷീരസംഘത്തിന്‍റെ ആതിധേയത്വത്തിലാണ് ക്ഷീരസംഗമം‍ സംഘടിപ്പിക്കുന്നത്. പരിപാടിയോടനുബന്ധിച്ചുള്ള സ്വാഗതസംഘ രൂപീകരണയോഗം ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴിയുടെ അധ്യക്ഷതയില്‍ ചീഫ് വിപ്പ് ഡോ. എന്‍. ജയരാജ് ഉദ്ഘാടനം ചെയ്തു. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ മുഖ്യപ്രഭാഷണം നടത്തി. ജില്ലയിലെ 72 പഞ്ചായത്തുകളിലായി 11 ബ്ലോക്ക് പഞ്ചായത്തുകള്‍ക്കു കീഴില്‍ വരുന്ന 272 ക്ഷീരസംഘങ്ങളിലെ ആയിരക്കണക്കിന് ക്ഷീരകര്‍ഷകര്‍ പങ്കെടുക്കുന്ന പരിപാടിയിൽ ക്ഷീരവികസന-മൃഗസംരക്ഷണ മന്ത്രി ചിഞ്ചു റാണി, സഹകരണമന്ത്രി വി.എന്‍. വാസവന്‍, ചീഫ് വിപ്പ് ഡോ. എന്‍. ജയരാജ്, എംഎല്‍എമാര്‍, എംപിമാര്‍, ത്രിതലപഞ്ചായത്ത് പ്രതിനിധികൾ, ക്ഷീരവികസന വകുപ്പ് മേധാവികള്‍, ക്ഷീരസംഘം ഭാരവാഹികള്‍ തുടങ്ങിയവര്‍ പങ്കെടുക്കും. കന്നുകാലി പ്രദര്‍ശനം, ക്ഷീരകര്‍ഷകര്‍ക്കുള്ള ശില്പശാലകള്‍, ക്ഷീരജാലകം, എക്സിബിഷന്‍, ഗവ്യജാലകം, ക്ഷീരപ്രഭ, കര്‍ഷക സെമിനാര്‍, നാട്ടറിവുകള്‍, ക്ഷീരകര്‍ഷകരുടെ കലാസന്ധ്യ, വിളംബരവാഹനറാലി, പൊതുസമ്മേളനം തുടങ്ങിയ വിവിധ പരിപാടികള്‍ നടക്കും. പരിപാടിയുടെ വിജയത്തിനായി ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ്, ജീല്ലാ പഞ്ചായത്ത് മെംബർ ജെസി ഷാജന്‍, ക്ഷീരവികസന വകുപ്പ് ജില്ലാ ഡയറക്ടര്‍ സി.ആര്‍. ശാരദ, അസിസ്റ്റന്‍റ് ഡയറക്ടര്‍ ബിജി വിശ്വനാഥ്, പഞ്ചായത്ത് പ്രസിഡന്‍റ് കെ.ആര്‍. തങ്കപ്പന്‍, ബ്ലോക്ക് പഞ്ചായത്ത് മെംബർമാരായ ടി.ജെ. മോഹനന്‍, ഷക്കീല നസീര്‍, ടി.എസ്. കൃഷ്ണകുമാര്‍, രത്നമ്മ രവീന്ദ്രന്‍, ഡാനി ജോസ്, അനുഷിജു, പഞ്ചായത്ത് വൈസ് പ്രസിഡന്‍റ് സുമി ഇസ്മയില്‍, മെംബര്‍മാരായ ബേബി വട്ടയ്ക്കാട്ട്, രാജു തേക്കുംതോട്ടം, അമ്പിളി ഉണ്ണിക്കൃഷ്ണന്‍, ബ്ലോക്ക് ക്ഷീരവികസന ഓഫീസര്‍ ടി.എസ്. ഷീഹാബുദ്ദീന്‍, തമ്പലക്കാട് നോര്‍ത്ത് സംഘം സെക്രട്ടറി സണ്ണി ജേക്കബ് തുടങ്ങിയവര്‍ നേത്യത്വം നല്‍കുന്ന വിവിധ കമ്മിറ്റികള്‍ രൂപീകരിച്ചു.

എരുമേലിയില്‍ മേൽപ്പാലം ഒഴിവാക്കി മാസ്റ്റർ പ്ലാൻ നടപ്പാക്കാമെന്ന് എംഎൽഎ

എരുമേലി: എതിർപ്പിനെത്തുടർന്ന് എരുമേലി ടൗണിൽ മസ്ജിദിനും ക്ഷേത്രത്തിനും ഇടയിലായുള്ള മേൽപ്പാലം നിർമാണം ഉപേക്ഷിക്കുകയാണെന്ന് സെബാസ്റ്റ്യൻ കുളത്തുങ്കൽ എംഎൽഎ. മേൽപ്പാലം ഒഴികെ എരുമേലി മാസ്റ്റർ പ്ലാനിലെ മറ്റ് പദ്ധതികൾ നടപ്പിലാക്കുമെന്ന് എംഎൽഎ അറിയിച്ചു. എരുമേലി പഞ്ചായത്ത്‌ ഹാളിൽ വിളിച്ചു ചേർത്ത സർവകക്ഷി യോഗത്തിൽ പ്രസംഗിക്കുകയായിരുന്നു അദ്ദേഹം. 2023ലെ സംസ്ഥാന ബജറ്റിലാണ് പത്തു കോടി അനുവദിച്ച് എരുമേലിക്ക് മാസ്റ്റർ പ്ലാൻ പ്രഖ്യാപിച്ചത്. ഇതു നടപ്പിലാക്കാനുള്ള ചുമതല ദേവസ്വം ബോർഡിനാണ് കൈമാറിയത്. എന്നാൽ കൺസൾട്ടിംഗ് ഏജൻസിയെ തെരഞ്ഞെടുക്കാൻ ബോർഡ് താത്പര്യപത്രം പുറപ്പെടുവിച്ചെങ്കിലും ഏജൻസിയെ ലഭിക്കാൻ കാലതാമസം നേരിട്ടു. തുടർന്ന് രണ്ടു വർഷം പിന്നിട്ട് കഴിഞ്ഞയിടെയാണ് ഏജൻസി എരുമേലിയിലെത്തി പദ്ധതികൾക്ക് പ്ലാനും രൂപരേഖയും തയാറാക്കിയത്. ഇതേത്തുടർന്ന് പ്ലാൻ പ്രകാശനം ചെയ്ത് പദ്ധതികളുടെ വിശദവിവരം പ്രഖ്യാപിച്ചിരുന്നെന്ന് എംഎൽഎ പറഞ്ഞു. തുടർന്നാണ് പ്ലാനിലെ മേൽപ്പാലം പദ്ധതിയോട് ഹൈന്ദവ സംഘടനകൾ വിയോജിപ്പ് അറിയിച്ചത്. മേൽപ്പാലം വന്നാൽ എരുമേലി പേട്ടക്കവലയിൽ ശബരിമല സീസണിൽ വാഹന ഗതാഗതം സ്തംഭിക്കാതെ അയ്യപ്പഭക്തർക്ക് ക്ഷേത്രത്തിലും മുസ്‌ലിം പള്ളിയിലും റോഡ് മുറിച്ച് പ്രവേശിക്കാനും ഇറങ്ങാനും സാധിക്കും. എന്നാൽ വിശുദ്ധപാതയായി പേട്ടതുള്ളൽ പാതയെ പ്രഖ്യാപിച്ച ഭാഗത്ത്‌ ഗതാഗതം ഒഴിവാക്കുകയാണ് വേണ്ടതെന്നാണ് ഹൈന്ദവ സംഘടനകളുടെ അഭിപ്രായമെന്ന് എംഎൽഎ പറഞ്ഞു. ഇത് മുൻനിർത്തി മേൽപ്പാലം നിർമാണം മാസ്റ്റർ പ്ലാനിൽനിന്ന് നീക്കം ചെയുകയാണെന്ന് യോഗത്തിൽ എംഎൽഎ അറിയിച്ചു.

നാലമ്പല വികസനം: കേന്ദ്രപദ്ധതിക്ക് ശ്രമിക്കുമെന്ന് ഫ്രാന്‍സിസ് ജോര്‍ജ് എംപി

രാമപുരം: രാമപുരത്തെ നാലമ്പലങ്ങളുടെ വികസനത്തിനുവേണ്ടി കേന്ദ്രസര്‍ക്കാരിന്‍റെ തീര്‍ഥാടന ടൂറിസം പദ്ധതിയില്‍നിന്നു ഫണ്ട് അനുവദിക്കുന്നതിന് അടിയന്തര ശ്രമങ്ങള്‍ നടത്തുമെന്ന് ഫ്രാന്‍സിസ് ജോര്‍ജ് എംപി പറഞ്ഞു. ഇന്നലെ പ്രവര്‍ത്തകരോടും ജനപ്രതിനിധികളോടുമൊപ്പം നാലമ്പലങ്ങളില്‍ സന്ദര്‍ശനം നടത്തുകയായിരുന്നു. അദ്ദേഹം. രാവിലെ രാമപുരം ശ്രീരാമസ്വാമി ക്ഷേത്രത്തില്‍ എത്തിയ ഫ്രാന്‍സിസ് ജോര്‍ജ് തുടര്‍ന്ന് മറ്റു മൂന്നു ക്ഷേത്രങ്ങളിലും സന്ദര്‍ശനം നടത്തിയാണ് മടങ്ങിയത്. ക്ഷേത്രങ്ങളിലെത്തിയ എംപിയെ ഭാരവാഹികളായ അഡ്വ. എ.ആര്‍. ബുദ്ധന്‍, പ്രാണ്‍ അമനകരമന, പ്രദീപ് നമ്പൂതിരി, ശ്രീകുമാര്‍ കൂടപ്പുലം, ഉണ്ണിക്കൃഷ്ണന്‍, സോമനാഥന്‍ നായര്‍ അക്ഷയ, പി.പി. നിര്‍മലന്‍, സലി പുലിക്കുന്നേല്‍, വിഷ്ണു കൊണ്ടമറുക് ഇല്ലം എന്നിവര്‍ ചേര്‍ന്ന് സ്വീകരിച്ചു. രാമപുരം പഞ്ചായത്ത് പ്രസിഡന്‍റ് ലിസമ്മ മത്തച്ചന്‍ പുതിയിടത്തുചാലില്‍, കെ.കെ. ശാന്താറാം, ജോഷി കുമ്പളത്ത്, തോമസ് ഉഴുന്നാലില്‍, ജോര്‍ജ് പുളിങ്കാട്, മത്തച്ചന്‍ പുതിയിടത്തുചാലില്‍, സി.ജി. വിജയകുമാര്‍ ചിറയ്ക്കല്‍, രാജപ്പന്‍ പുത്തന്‍മ്യാലില്‍, നോയല്‍ ലൂക്ക്, ജോമോന്‍ ശാസ്താംപടവില്‍, മത്തായിച്ചന്‍ വെണ്ണായപ്പിള്ളി, സലിലാല്‍ തോമസ് എന്നിവര്‍ എംപിയോടൊപ്പമുണ്ടായിരുന്നു.

പ്രഫ. എം.എം. ഏബ്രഹാം മാപ്പിളക്കുന്നേലിന് മികച്ച വിശ്വാസപരിശീലകനുള്ള അവാര്‍ഡ്

പാലാ: പാലാ രൂപതയിലെ മികച്ച സണ്‍ഡേ സ്‌കൂള്‍ അധ്യാപകന് കുറവിലങ്ങാട് ആസ്ഥാനമായി പ്രവര്‍ത്തിക്കുന്ന കൊടൈക്കനാല്‍ ബസ് അപകട അനുസ്മരണ സ്മാരക സമിതി ഏര്‍പ്പെടുത്തിയിരിക്കുന്ന പുരസ്‌കാരം പൂവരണി തിരുഹൃദയ സണ്‍ഡേ സ്‌കൂള്‍ അധ്യാപകന്‍ പ്രഫ. എം.എം. ഏബ്രഹാം മാപ്പിളക്കുന്നേലിന് സമ്മാനിച്ചു. അമ്പത് വര്‍ഷത്തിലധികമായി സണ്‍ഡേ സ്‌കൂള്‍ അധ്യാപകനായി സേവനമനുഷ്ഠിക്കുന്ന എം.എം. ഏബ്രഹാമിനെ വികാരി ഫാ. ജോസഫ് മഠത്തിക്കുന്നേല്‍ പൊന്നാടയണിയിച്ച് ആദരിച്ചു. മുന്‍ ദേശീയ വിവരാവകാശ കമ്മീഷണര്‍ ഡോ. കുര്യാസ് കുമ്പളക്കുഴി പ്രശസ്തിപത്രം നല്‍കി. സമിതി ഭാരവാഹികളായ വി.എം. ഇമ്മാനുവല്‍, ജോസ് കൊച്ചുപുരയ്ക്കല്‍ എന്നിവര്‍ ചേര്‍ന്ന് കാഷ് അവാര്‍ഡ് സമ്മാനിച്ചു. ഡയറക്ടര്‍ ഫാ. ആന്‍റണി വില്ലന്താനത്ത്, ഹെഡ്മാസ്റ്റര്‍ മനു കെ. ജോസ് കൂനാനിക്കല്‍, സിസ്റ്റര്‍ ടെസി, പ്രസിഡന്‍റ് ജിബിന്‍ മണിയഞ്ചിറ, സ്റ്റാഫ് സെക്രട്ടറി ജിയ ജിജി, പി.ടി. തോമസ് പാലൂക്കുന്നേല്‍, ഷെറിന്‍ സെബാസ്റ്റ്യന്‍, ആന്‍മരിയ സജി, ജിബിന്‍ കല്ലക്കുളത്ത്, ജിലു ജിജി എന്നിവര്‍ പ്രസംഗിച്ചു.

വനിതകള്‍ നേതൃത്വത്തിലേക്കു കടന്നുവരണം: കത്തോലിക്ക കോണ്‍ഗ്രസ്

പാലാ: വനിതകള്‍ സമൂഹത്തിന്‍റെയും രാഷ്‌ട്രത്തിന്‍റെയും മുന്‍നിരയിലേക്ക് കൂടുതലായി കടന്നുവരണമെന്നും അതിനായി കത്തോലിക്ക കോണ്‍ഗ്രസ് വനിതാ കൗണ്‍സില്‍ കൂടുതല്‍ ശ്രദ്ധിക്കണമെന്നും റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍. കത്തോലിക്ക കോണ്‍ഗ്രസ് പാലാ രൂപത വനിതാ കൗണ്‍സില്‍ നടത്തിയ നേതൃത്വ ശില്പശാല ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പാലാ രൂപതയിലെ യൂണിറ്റുകളില്‍നിന്നു തെരഞ്ഞെടുക്കപ്പെട്ടവര്‍ക്കായി, സ്ത്രീകളെ സമൂഹത്തിന്‍റെ നേതൃനിരയിലേക്ക് എത്തിക്കുന്നതിനായിട്ടായിരുന്നു ഒരു ദിവസത്തെ പരിശീലന പരിപാടി. ഭരണങ്ങാനം മാതൃഭവനില്‍ നടത്തിയ സമ്മേളനത്തില്‍ ഗ്ലോബല്‍ സെക്രട്ടറിയും വനിതാ കോ-ഓര്‍ഡിനേറ്ററുമായ ആന്‍സമ്മ സാബു അധ്യക്ഷത വഹിച്ചു. ഗ്ലോബല്‍ പ്രസിഡന്‍റ് രാജീവ് കൊച്ചുപറമ്പില്‍, രൂപത പ്രസിഡന്‍റ് ഇമ്മാനുവല്‍ നിധീരി, ഗ്ലോബല്‍ വനിതാ കോ-ഓര്‍ഡിനേറ്ററും കത്തോലിക്ക കോണ്‍ഗ്രസ് ചങ്ങനാശേരി വൈസ് പ്രസിഡന്‍റുമായ ഷിജി ജോണ്‍സണ്‍, ജോയിസ് മേരി, ജോസ് വട്ടുകുളം, റൈബി രാജേഷ്, ലിബി മണിമല, ബെല്ല സിബി, അന്നക്കുട്ടി, ലൈസമ്മ ജോര്‍ജ്, സുജ ജോസഫ്, മോളി തോമസ്, ഡാലിയ ഫ്രാന്‍സിസ്, ക്ലിന്‍റ് അരീപ്ലാക്കല്‍ എന്നിവര്‍ പ്രസംഗിച്ചു.

പാലാ സിവില്‍ സ്റ്റേഷന്‍ കോമ്പൗണ്ടിലെ തുറക്കാത്ത ശുചിമുറികള്‍: മനുഷ്യാവകാശ കമ്മീഷന്‍ ഇടപെടുന്നു

പാലാ: നഗരസഭയില്‍ സിവില്‍ സ്റ്റേഷന്‍ കോമ്പൗണ്ടില്‍ നിര്‍മിച്ച ശുചീകരണമുറികള്‍ അടഞ്ഞുകിടക്കുന്നതു സംബന്ധിച്ച പൗരസമിതിയുടെ പരാതിയില്‍ ആക്‌ഷന്‍ ടേക്കണ്‍ റിപ്പോര്‍ട്ട് ആവശ്യപ്പെട്ട് സംസ്ഥാന മനുഷ്യാവകാശ കമ്മീഷന്‍ ഉത്തരവ്. റവന്യു വകുപ്പിന്‍റെയും നഗരസഭയുടെയും അനാസ്ഥയാണ് ശുചിമുറിയുടെ അവസ്ഥയ്ക്ക് കാരണമെന്ന് പൗരസമിതിയുടെ പരാതിയില്‍ പറയുന്നു. അഞ്ചു ലക്ഷം രൂപ ചെലവാക്കി പാലാ നഗരസഭ നിര്‍മിച്ച സിവില്‍ സ്റ്റേഷന്‍ കോമ്പൗണ്ടിലെ ശുചിമുറികള്‍ കാടുകയറി നശിക്കുന്ന അവസ്ഥയിലാണ്. സിവില്‍ സ്റ്റേഷനിലെ ജീവനക്കാരുടെയും നാട്ടുകാരുടെയും നിരന്തരമായ ആവശ്യപ്രകാരം 2019ല്‍ അഞ്ചു ലക്ഷം രൂപ ശുചിത്വ മിഷന്‍ ഫണ്ടില്‍നിന്ന് അനുവദിച്ച് നിര്‍മിച്ചതാണ് അഞ്ചു മുറികളുള്ള കംഫര്‍ട്ട് സ്റ്റേഷന്‍. നഗരസഭ നിര്‍മിച്ചു നല്‍കിയ ശൗചാലയങ്ങളിലേക്ക് ആവശ്യമായ വെള്ളം നല്‍കാനോ വൈദ്യുതി നല്‍കാനോ വൃത്തിയായി സൂക്ഷിക്കുന്നതിന് ആളെ നിയമിക്കാനോ റവന്യു വകുപ്പ് തയാറായില്ല. അതേസമയം സിവില്‍ സ്റ്റേഷന്‍റെ കോമ്പൗണ്ടിലുള്ള ശൗചാലയത്തിലേക്ക് മുനിസിപ്പാലിറ്റിയുടെ പേരില്‍ വെള്ളം നല്‍കാന്‍ ജലവകുപ്പും തയാറായില്ല. ഇതിനിടെ സാമൂഹ്യവിരുദ്ധശല്യവും രൂക്ഷമായി. ശുചിമുറികളിലെ പോസിഡുകളും കതകുകളും തകര്‍ത്ത നിലയിലാണ്. ഇതിനെതിരേ പൗരസമിതി നിരന്തരം പരാതികള്‍ നല്‍കിയിട്ടും അധികൃതര്‍ ചെവിക്കൊണ്ടില്ല. തുടര്‍ന്നാണ് മനുഷ്യാവകാശ കമ്മീഷനെ സമീപിച്ചത്. ജനകീയാസൂത്രണ പദ്ധതിയില്‍പ്പെടുത്തി 2023-24 ല്‍ ശുചിമുറികളുടെ അറ്റപ്പണികള്‍ക്കായി നഗരസഭ ആറു ലക്ഷം രൂപ അനുവദിച്ചിരുന്നു. ഇതില്‍ 1.62 ലക്ഷം രൂപ സിവില്‍ സ്റ്റേഷന്‍ പരിസരത്തെ കംഫർട്ട് സ്റ്റേഷന് നീക്കിവച്ചിരുന്നു. സാങ്കേതികാനുമതിക്ക് കാത്തിരിക്കുകയാണെന്ന്‌ കമ്മീഷന് നഗരസഭ മറുപടിയും നല്‍കിയിരുന്നു. എന്നാല്‍ തുടര്‍ന്ന് പ്രവൃത്തികളൊന്നും നടക്കാത്തതിനാലാണ് പൗരസമിതി വീണ്ടും കമ്മീഷനെ സമീപിച്ചത്. നഗരസഭ സ്വീകരിച്ച നടപടികള്‍ വ്യക്തമാക്കി ഒരു മാസത്തിനകം കമ്മീഷന്‍ മുമ്പാകെ ആക്‌ഷന്‍ ടേക്കണ്‍ റിപ്പോര്‍ട്ട് ഫയല്‍ ചെയ്യണമെന്നാണ് മനുഷ്യാവകാശ കമ്മീഷന്‍ ഉത്തരവിട്ടിരിക്കുന്നത്.

കൊടുങ്കാറ്റിൽ പിടിച്ചുനിൽക്കാനാവാതെ തേക്കുമരങ്ങൾ

കോട്ടയം: ജില്ലയില്‍ കഴിഞ്ഞദിവസങ്ങളിൽ ആഞ്ഞുവീശിയ കൊടുങ്കാറ്റിൽ കടപുഴകിയതേറെയും തേക്കുമരങ്ങൾ. പ്ലാവ്, മാവ്, റബര്‍ എന്നിവയെ തെല്ലും തൊടാതെ നൂറു കണക്കിന് കൂറ്റന്‍ തേക്കുമരങ്ങളാണ് നിലംപൊത്തിയത്. ചിലയിടങ്ങളില്‍ തേക്ക് നടുവെ കീറി ഒടിയുകയും ചെയ്യുന്നു. നിലംപൊത്തിയ തേക്കുകള്‍ പിടിയാവിലയ്ക്ക് വില്‍ക്കാന്‍ കര്‍ഷകര്‍ നിര്‍ബന്ധിതരാകുന്നു. തേക്കുകള്‍ മാത്രം വീഴുകയോ ഒടിയുകയോ ചെയ്യുന്നതില്‍ പല കാരണങ്ങളാണ് പീച്ചി വനഗവേഷണകേന്ദ്രത്തിലെ വിദഗ്ധര്‍ ചൂണ്ടിക്കാട്ടുന്നത്. മൂന്നു മാസമായി പെയ്യുന്ന പെരുമഴയില്‍ മണ്ണ് നന്നായി കുതിര്‍ന്നതും തേക്കുമരങ്ങളില്‍ ഇലഭാരം കൂടിയതും പ്രധാന കാരണമായതായി ഗവേഷണകേന്ദ്രത്തിലെ ഡോ. പി. സുജനപാല്‍ പറഞ്ഞു. ചുഴലിക്കാറ്റില്‍ മരത്തിന്‍റെ ഭാരം താങ്ങാന്‍ മണ്ണിനാകുന്നില്ല. ജില്ലയിടുനീളം തേക്കുകള്‍ വേരോടെ പിഴുതു മറിയുകയായിരുന്നു. ഉറവച്ചാലുകളിലും തോട്, പുഴ എന്നിവയ്ക്കുസമീപവും നില്‍ക്കുന്നവയും അപകടഭീഷണിയിലാണ്. പഴയ കാലത്തുണ്ടായിരുന്ന കല്ലന്‍ തേക്കുകളെക്കാള്‍ പുഴുശല്യം പുതിയ ഇനങ്ങളില്‍ പതിവാണ്. പുഴു കുത്തിയ ഭാഗം ചീകി ബോര്‍ഡോ മിശ്രിതം തേയ്ക്കണം. വേഗം വളരുന്ന ഇനം തേക്കിന്‍ കമ്പുകളും തൈകളും നടുമ്പോള്‍ വേണ്ടത്ര വേരിന് ആഴമുണ്ടാവില്ല. ഇവയ്ക്ക് വേരുകെട്ടല്ലാതെ തായ്‌വേര് ഉണ്ടാകുകയില്ല. മൂന്നു വര്‍ഷം വരെ പുഴു തായ്ത്തടി കുത്തി മരം കേടുവന്നു ദുര്‍ബലമാകാന്‍ സാധ്യതയുണ്ട്. പുഴു കുത്തിയ തേക്ക് വട്ടം ഒടിയുക സ്വാഭാവികം. ചാണകത്തിനും ജൈവവളത്തിനും പകരം രാസവളപ്രയോഗം നടത്തി തോട്ടമായി തേക്ക് വളര്‍ത്തുന്നവരുണ്ട്. വീട്, തൊഴുത്ത് എന്നിവയോടു ചേര്‍ന്ന കുപ്പവളത്തില്‍ തേക്കുകള്‍ക്ക് അതിവേഗ വളര്‍ച്ചയുണ്ടാകും. മഴക്കാലത്തിനു മുന്‍പ് ശിഖരങ്ങള്‍ കോതി ഭാരം കുറച്ചാല്‍ കാറ്റിനെ പ്രതിരോധിക്കാം.

അഡാർട്ട് വാർഷികാഘോഷം

പാലാ: കേരളത്തിലെ ആദ്യ ലഹരി വിമോചന ചികിത്സാ കേന്ദ്രമായ പാലാ അഡാര്‍ട്ടിന്‍റെ 41-ാമത് വാര്‍ഷികാഘോഷവും ലഹരിവിമുക്ത ജീവിതം നയിക്കുന്നവരുടെ കൂട്ടായ്മയായ എഎ, ലഹരിവിമുക്ത ജീവിതം നയിക്കുന്നവരുടെ ഭാര്യമാരുടെ കൂട്ടായ്മയായ അല്‍ അനോണ്‍, അവരുടെ കുട്ടികളുടെ കൂട്ടായ്മയായ അല്‍ അറ്റിന്‍ എന്നിവയുടെ സംയുക്ത സംഗമവും അഡാര്‍ട്ടില്‍ നടന്നു. അഡാര്‍ട്ട് ചെയര്‍മാന്‍ മോണ്‍. ജോസഫ് കണിയോടിക്കല്‍ അധ്യക്ഷത വഹിച്ച സമ്മേളനം ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്തു. ഡയറക്ടര്‍ ഫാ. ജയിംസ് പൊരുന്നോലില്‍, എസ്എല്‍സിഎ ചങ്ങനാശേരി കോ-ഓർഡിനേറ്റര്‍ എം.ടി. മാത്യു, അഡാര്‍ട്ട് സീനിയര്‍ കൗണ്‍സിലര്‍ ജോയ് കെ. മാത്യു തുടങ്ങിയവര്‍ പ്രസംഗിച്ചു. ഉദ്ഘാടന പരിപാടിക്കുശേഷം അല്‍ അനോണ്‍ അംഗങ്ങള്‍ "ആത്മദര്‍പ്പണം' എന്ന നാടകം അവതരിപ്പിച്ചു. ലഹരിവിമുക്ത ജീവിതത്തില്‍ വാര്‍ഷികം ആഘോഷിക്കുന്നവര്‍ക്ക് ബിഷപ് മെഡലുകള്‍ വിതരണം ചെയ്തു.

രജതജൂബിലി ആഘോഷിച്ചു

വെച്ചൂർ: കുടവെച്ചുർ സെന്‍റ് മൈക്കിൾസ് സ്കൂൾ ഹയർ സെക്കൻഡറിയായി ഉയർത്തപ്പെട്ടതിന്‍റെ രജതജൂബിലി ആഘോഷങ്ങളുടെ സമാപന സമ്മേളനം നടത്തി. സെന്‍റ് അൽഫോൻസാ പാരിഷ് ഹാളിൽ നടന്ന സമ്മേളനം സി.കെ. ആശ എംഎൽഎ ഉദ്ഘാടനം ചെയ്തു. സ്കൂൾ അസിസ്റ്റന്‍റ് മാനേജർ ഫാ. ആന്‍റണി കളത്തിൽ അധ്യക്ഷത വഹിച്ചു. റവ. ഡോ. ബെർക്കുമാൻസ്, ഫാ. അജിത് ചിറ്റിലപ്പള്ളി, കളമശേരി പ്രൊവിൻഷ്യൽ മദർ ലീ റോസ് പ്ലാക്കൽ, സ്കൂൾ പ്രിൻസിപ്പൽ സിസ്റ്റർ ടെറസിൻ, വൈസ് പ്രിൻസിപ്പൽ ഷൈജ എം. ജോസഫ്, വെച്ചൂർ പഞ്ചായത്ത്‌ അംഗം പി.കെ. മണിലാൽ, സ്കൂൾ പിടിഎ പ്രസിഡന്‍റ് ബിജു മിത്രംപള്ളി, സജിമോൻ തുടങ്ങിയവർ പ്രസംഗിച്ചു.

വൈക്കം ഗവ. ഗേൾസ് ഹയർ സെക്കൻഡറി സ്കൂളിൽ ഇനി ആൺകുട്ടികൾക്കും പ്രവേശനം

വൈക്കം: കടുത്തുരുത്തി വിദ്യാഭ്യാസ ജില്ലയുടെ പരിധിയിൽപ്പെടുന്ന വൈക്കം ഗവൺമെന്‍റ് ഗേൾസ് ഹയർ സെക്കൻഡറി സ്കൂളിൽ 2025-2026 അധ്യയന വർഷം മുതൽ ആൺകുട്ടികൾക്കുകൂടി പ്രവേശനം അനുവദിച്ചു മിക്‌സഡ് സ്കൂളാക്കുന്നതിന് ഉത്തരവായി. നഗരസഭയും പിടിഎയും സ്കൂൾ അധികൃതരുടെയും ആവശ്യത്തെത്തുടർന്നാണ് വിദ്യാഭ്യാസ വകുപ്പ് സ്കൂളിൽ ആൺകുട്ടികൾക്കും പ്രവേശനം നൽകാൻ ഉത്തരവ് നൽകിയത്. 63 വർഷം മുൻപാണ് സ്കൂൾ ആരംഭിച്ചത്. അന്നുമുതൽ പെൺകുട്ടികൾക്കു മാത്രമായിരുന്നു പ്രവേശനം ലഭിച്ചിരുന്നത്. പുതിയ ഉത്തരവ് വന്നതോടെ 10-ാംക്ലാസ് വരെയുള്ള ആൺകുട്ടികൾക്കും ഇനിമുതൽ ഇവിടെ പഠിക്കാം. കെട്ടിടസൗകര്യങ്ങൾ, ക്ലാസ് മുറികൾ, ആൺകുട്ടികൾക്കും പെൺകുട്ടികൾക്കും പ്രത്യേകം ശുചിമുറി തുട ങ്ങിയ എല്ലാ അടിസ്ഥാന സൗകര്യങ്ങളും ഒരുക്കിയിട്ടുള്ളതായി പിടിഎയും സ്കൂൾ മാനേജ്മെന്‍റും അറിയിച്ചു. തെക്കേനട ഗവൺമെന്‍റ് ഹയർ സെക്കൻഡറി സ്കൂൾ നേരത്തേ ആൺകുട്ടികൾ മാത്രം പഠിക്കുന്ന സ്കൂളായിരുന്നെങ്കിലും നിലവിൽ പെൺകുട്ടികൾക്കും പ്രവേശനം അനുവദിച്ചിട്ടുണ്ട്.

മഴ മാറിയിട്ടും വെള്ളക്കെട്ട്; മുണ്ടാറില്‍ 30 കുടുംബങ്ങള്‍ ദുരിതത്തില്‍

പാടശേഖരങ്ങളില്‍ പമ്പിംഗ് നടത്താത്തത് വിനയായി കടുത്തുരുത്തി: മഴ മാറിയിട്ടും കല്ലുപുര- വാക്കേത്തറ റോഡിലെ കല്ലുപുരപ്പാലം- മുണ്ടാര്‍ 110 പാലം വരെയുള്ള ഭാഗത്തും സമീപത്തെ 30 വീടുകളിലും വെള്ളക്കെട്ട്. പല കുടുംബങ്ങളും വാടക വീടുകളിലേക്കു താമസം മാറ്റി. കല്ലറ പഞ്ചായത്തിലെ രണ്ടാം വാര്‍ഡില്‍പ്പെട്ട മുണ്ടാറിന്‍റെ നടുവിലൂടെ പോകുന്ന പൊതുമരാമത്ത് വകുപ്പിനു കീഴിലുള്ള റോഡിലാണ് വെള്ളക്കെട്ട്. ആറു കിലോമീറ്റര്‍ വരുന്ന റോഡിലെ ഒന്നര കിലോമീറ്റര്‍ ഭാഗമാണ് രണ്ടടിയോളം ഉയരത്തില്‍ വെള്ളം കയറി കിടക്കുന്നത്. 110 പാലം മുതല്‍ -നെറ്റിത്തറ റോഡിലും ഈ ഭാഗത്തുള്ള വീടുകളിലും വെള്ളമാണ്. പാടശേഖരത്തിനു സമീപമാണിത്. നെറ്റിത്തറ അങ്കണവാടിയും ജീവനക്കാർ വരുന്നുണ്ടെങ്കിലും ആഴ്ചകളായി പ്രവർത്തിക്കുന്നില്ല. ചെറുവാഹനങ്ങളൊന്നും പടിഞ്ഞാറന്‍ മുണ്ടാറിലേക്കു പോകുന്നില്ല. വിദ്യാർഥികളും കാല്‍നടയാത്രികരും വെള്ളത്തിലൂടെ നീന്തിയാണ് യാത്ര. കഴിഞ്ഞ രണ്ട് മാസമായി ഇതാണ് ഇതാണ് സ്ഥിതിയെന്നു നാട്ടുകാരനായ പ്രകാശന്‍ മരുത്താംതറയില്‍ പറയുന്നു. 13 പാടശേഖരങ്ങൾ കല്ലുപുര-വാക്കേത്തറ റോഡില്‍ കല്ലുപുര പാലം മുതല്‍ മുണ്ടാര്‍ 110 പാലം വരെ റോഡിന് ഇരുവശങ്ങളിലുമായി 13 പാടശേഖരങ്ങളാണുള്ളത്. പാടത്ത് വെള്ളം നിറയുന്നതോടെ മോട്ടോര്‍ പ്രവര്‍ത്തിപ്പിച്ചില്ലെങ്കില്‍ ഇവിടുത്തെ വീടുകളും റോഡുകളുമെല്ലാം വെള്ളത്തിലാകും. ഇതില്‍ 510 ഏക്ക വരുന്ന എട്ട് പാടശേഖരത്താണ് കൃഷിയുള്ളത്. ബാക്കി അഞ്ചിലും വര്‍ഷങ്ങളായി കൃഷിയില്ല. വിരിപ്പ് (വര്‍ഷ) കൃഷിയ്ക്കായി പാടശേഖരങ്ങളില്‍ മോട്ടോര്‍ പ്രവര്‍ത്തിപ്പിക്കാനായി പമ്പിംഗ് ലേലവും നടന്നു. മഴ മൂലം പമ്പിംഗ് വൈകി. എന്നാൽ, മഴ മാറിയിട്ടും പന്പിംഗ് നടത്താൻ കരാറുകാർ തയാറായിട്ടില്ല. പന്പിംഗ് നടത്തുന്നില്ല പാടശേഖരങ്ങളില്‍ യഥാസമയം പമ്പിംഗ് നടത്താത്തതാണ് വെള്ളക്കെട്ടിനു കാരണം. ജില്ലാ കളക്ടര്‍ക്കും പുഞ്ച സ്‌പെഷല്‍ ഓഫീസര്‍ക്കും പരാതി നല്‍കി. പക്ഷേ, ഇതുവരെ നടപടിയായിട്ടില്ല. അമ്മ വയ്യാതെ കിടപ്പിലായതിനാലാണ് ഞാനും കുടുംബവും ഇവിടെനിന്നു താമസം മാറാത്തത്. - പ്രകാശന്‍ മരുത്താംതറയില്‍ ആകെ പ്രതിസന്ധി മേയ് അവസാനം മുതല്‍ ഇവിടെ വെള്ളക്കെട്ടാണ്. മുമ്പ് പരമാവധി 10 ദിവസത്തില്‍ കൂടുതല്‍ വെള്ളക്കെട്ട് ഉണ്ടായിട്ടില്ല. ആകെ പ്രതിസന്ധിയിലാണ് ജനജീവിതം. പമ്പിംഗ് നടത്തിയാല്‍ വീടുകളില്‍നിന്നും റോഡുകളില്‍നിന്നും വെള്ളം ഇറങ്ങിയേനെ. - പി.എസ്. രാജേഷ് പുത്തന്‍പറമ്പില്‍ പരിഹാരമുണ്ട് മുണ്ടാര്‍ 110 പാടശേഖരത്തിന്‍റെ വടക്കേയറ്റം മുതല്‍ പോത്തന്‍മാലി പാടശേഖരത്തിന്‍റെ വടക്കേയറ്റം വരെയുള്ള പഞ്ചായത്ത് റോഡിലെ 500 മീറ്ററും 110 പാടശേഖരത്തിന്‍റെ വടക്കേ പുറംബണ്ട് 500 മീറ്റര്‍ ഭാഗവും രണ്ട് മീറ്റര്‍ മണ്ണിട്ട് ഉയര്‍ത്തിയാല്‍ പാടശേഖരത്തിലേക്കു പുറംതോട് കവിഞ്ഞ് വെള്ളം കയറുന്നത് അവസാനിക്കും. 13 പാടശേഖരങ്ങളുടെ തെക്കേയറ്റത്ത് അകത്താംതറ പാലം മുതല്‍ മുതിരക്കാല മോട്ടോര്‍തറ വരെ മുക്കാല്‍ കിലോമീറ്റര്‍ ദൂരവും മണ്ണിട്ട് ഉയര്‍ത്തണം. - പി. അജി

മുട്ടമ്പലം സ്മാര്‍ട്ട് വില്ലേജ് ഓഫീസ് ഉദ്ഘാടനം ചെയ്തു

കോട്ടയം: മുട്ടമ്പലം സ്മാര്‍ട്ട് വില്ലേജ് ഓഫീസ് ഉദ്ഘാടനം മന്ത്രി കെ. രാജന്‍ നിര്‍വഹിച്ചു. ജില്ലാ പഞ്ചായത്ത് ഹാളില്‍ നടന്ന ചടങ്ങില്‍ തിരുവഞ്ചൂര്‍ രാധാകൃഷ്ണന്‍ എംഎല്‍എ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, കളക്‌ടര്‍ ജോണ്‍ വി. സാമുവല്‍, സബ് കളക്‌ടര്‍ ഡി. രഞ്ജിത്ത്, കോട്ടയം നഗരസഭാധ്യക്ഷ ബിന്‍സി സെബാസ്റ്റ്യന്‍, എഡിഎം എസ്. ശ്രീജിത്ത്, നഗരസഭാംഗം ജൂലിയസ് ചാക്കോ, കോട്ടയം തഹസില്‍ദാര്‍ എസ്.എന്‍. അനില്‍കുമാര്‍ എന്നിവര്‍ പ്രസംഗിച്ചു.

‘ഹരിതം, ലഹരിരഹിതം’ സെമിനാര്‍

കോട്ടയം: എക്സൈസ് വകുപ്പിന്‍റെയും വിമുക്തി മിഷന്‍റെയും നേതൃത്വത്തില്‍ ലോക പ്രകൃതി സംരക്ഷണദിനത്തോടനുബന്ധിച്ചു സംഘടിപ്പിച്ച ‘ഹരിതം, ലഹരിരഹിതം’ ലഹരിവിരുദ്ധ സെമിനാര്‍ മന്ത്രി വി.എന്‍. വാസവന്‍ ഉദ്ഘാടനം ചെയ്തു. ഏറ്റുമാനൂര്‍ മംഗളം കോളജ് ഓഫ് എന്‍ജിനിയറിംഗില്‍ സംഘടിപ്പിച്ച ലഹരിവിരുദ്ധ സെമിനാറില്‍ ഏറ്റുമാനൂര്‍ നഗരസഭാധ്യക്ഷ ലൗലി ജോര്‍ജ് പടികര അധ്യക്ഷത വഹിച്ചു. ഡെപ്യൂട്ടി എക്സൈസ് കമ്മീഷണര്‍ കെ.ആര്‍. അജയ്, ജില്ലാ വിമുക്തി മാനേജര്‍ എം.കെ. പ്രസാദ്, മംഗളം ഗ്രൂപ്പ് ഓഫ് ഇന്‍സ്റ്റിറ്റ്യൂഷന്‍സ് ചെയര്‍മാന്‍ ഡോ. ബിജു വര്‍ഗീസ്, തങ്കച്ചന്‍ തോന്നിക്കല്‍, കെ.ജി. ശ്രീജ, കെ.എസ്. അനീഷ, ഡോ. ജി. ജയലക്ഷ്മി എന്നിവര്‍ പ്രസംഗിച്ചു.

‘കരുതല്‍’ ലഹരിവിരുദ്ധ കാമ്പയിന്‍: ജില്ലാതല പരിശീലനം

കോട്ടയം: ലഹരി ഉപയോഗം വ്യക്തിയുടെ ആരോഗ്യത്തിനും കുടുംബബന്ധങ്ങള്‍ക്കും സാമൂഹിക സുരക്ഷയ്ക്കും ഭീഷണിയാകുന്ന സാഹചര്യത്തില്‍, കുടുംബശ്രീ ജില്ലാ മിഷന്‍റെ നേതൃത്വത്തില്‍ കരുതല്‍ ലഹരിവിരുദ്ധ കാമ്പയിന്‍ ആരംഭിച്ചു. പോലീസ്, എക്സൈസ്, ആരോഗ്യ, വിദ്യാഭ്യാസ, സാമൂഹ്യനീതി, തദ്ദേശ സ്വയംഭരണ സ്ഥാപനങ്ങള്‍ എന്നിവയുടെ സംയുക്താഭിമുഖ്യത്തിലാണ് കാമ്പയിന്‍ നടപ്പാക്കുന്നത്. കാമ്പയിന്‍റെ ഭാഗമായി ജില്ലാതല പരിശീലനം ജില്ലാ പഞ്ചായത്ത് ഹാളില്‍ നടന്നു. കളക്‌ടര്‍ ജോണ്‍ വി. സാമുവല്‍ ഉദ്ഘാടനം ചെയ്തു. ജില്ലാ മിഷന്‍ കോ-ഓർഡിനേറ്റര്‍ അഭിലാഷ് കെ. ദിവാകര്‍ അധ്യക്ഷത വഹിച്ചു. ഡെപ്യൂട്ടി എക്സൈസ് കമ്മീഷണര്‍ കെ.ആര്‍. അജയ്, എക്‌സൈസ് വിമുക്തി മിഷന്‍ പ്രതിനിധികളായ ബെന്നി സെബാസ്റ്റ്യന്‍, കെ.എസ്. അനീഷ, സൈബര്‍ സെല്‍ എസ്ഐ ജയചന്ദ്രന്‍, സൈബര്‍ സെല്‍ ഓഫീസര്‍ ജോബിന്‍ ജയിംസ് എന്നിവര്‍ പ്രസംഗിച്ചു.

ഏറ്റുമാനൂരിലെ വികസനപദ്ധതികൾക്ക് കിഫ്ബിയുടെ അനുമതി

ഏറ്റുമാനൂര്‍: ഏറ്റുമാനൂർ അസംബ്ലി മണ്ഡലത്തിലെ വിവിധ പദ്ധതികള്‍ക്ക് മുഖ്യമന്ത്രിയുടെ അധ്യക്ഷതയില്‍ ചേര്‍ന്ന കിഫ്ബി ബോര്‍ഡ് യോഗം അനുമതി നല്‍കി. മഹാത്മാഗാന്ധി സര്‍വകലാശാലയിലെ 122.59 കോടി രൂപ അടക്കമുള്ള വികസന പദ്ധതികള്‍ക്കാണ് അനുമതി നല്‍കിയിരിക്കുന്നത്. ഏറ്റുമാനൂര്‍ റിംഗ് റോഡിന്‍റെ ആദ്യഘട്ടം ടാറിംഗ് ഉള്‍പ്പെടെയുള്ള നിര്‍മാണ പ്രവര്‍ത്തനങ്ങള്‍ പൂര്‍ത്തീകരിക്കും. കോട്ടയം-ഇല്ലിക്കല്‍-കുമരകം റോഡ് വീതികൂട്ടി ആധുനീകരിക്കും. മഹാത്മാഗാന്ധി സര്‍വകലാശാലയിലെ നാനോ ടെക്നോളജി ആന്‍ഡ് നാനോ സയന്‍സിന്‍റെ മികവിന്‍റെ കേന്ദ്രം സ്ഥാപിക്കുന്നതിനു 61.55 കോടി രൂപയും ആധുനിക ഗവേഷണ പരിശീലന കേന്ദ്രം സ്ഥാപിക്കുന്നതിന് 26.07 കോടി രൂപയും അന്തര്‍ദേശീയ നിലവാരത്തിലുള്ള ഹോസ്റ്റലിനായി 34.97 കോടി രൂപയുമാണ് അനുവദിച്ചിരിക്കുന്നത്. ഈ പദ്ധതികളെല്ലാം ഒരു വര്‍ഷത്തിനകം പൂര്‍ത്തീകരിക്കാനാണ് ലക്ഷ്യമിടുന്നത്.

ദ്വിദിന ശില്പശാലയും ഫോട്ടോ പ്രദര്‍ശനവും

കോട്ടയം: കേന്ദ്ര വാര്‍ത്താവിതരണ പ്രക്ഷേപണ മന്ത്രാലയത്തിനു കീഴിലുള്ള സെന്‍ട്രല്‍ ബ്യൂറോ ഓഫ് കമ്യൂണിക്കേഷന്‍റെ ആഭിമുഖ്യത്തില്‍ വിവിധ വകുപ്പുകളെ ഏകോപിപ്പിച്ചുള്ള ദ്വിദിന ശില്പശാലയും ഫോട്ടോ പ്രദര്‍ശനവും ഏറ്റുമാനൂര്‍ ക്രിസ്തുരാജ പള്ളി ഹാളില്‍ മന്ത്രി വി.എന്‍. വാസവന്‍ ഉദ്ഘാടനം ചെയ്തു. നഗരസഭാംഗം രശ്മി ശ്യാം അധ്യക്ഷത വഹിച്ചു. സെന്‍ട്രല്‍ ബ്യൂറോ ഓഫ് കമ്യൂണിക്കേഷന്‍ ഫീല്‍ഡ് എക്സിബിഷന്‍ ഓഫീസര്‍ ജൂണി ജേക്കബ്, നാഷണല്‍ ആയുഷ് മിഷന്‍ മെഡിക്കല്‍ ഓഫീസര്‍ ഡോ. അര്‍ച്ചന ചന്ദ്രന്‍, ഫീല്‍ഡ് പബ്ലിസിറ്റി അസിസ്റ്റന്‍റ് ടി. സരിന്‍ലാല്‍ എന്നിവര്‍ പ്രസംഗിച്ചു. പ്രവേശനം സൗജന്യമാണ്. ഏറ്റുമാനൂര്‍ നഗരസഭ, ഐസിഡിഎസ് ജില്ലാ പ്രോഗ്രാം സെല്‍, ജില്ലാ ഹോമിയോ ആശുപത്രി, തപാല്‍ വകുപ്പ്, വനിതാ പോലീസ് സെല്‍, ഫയര്‍ ആന്‍ഡ് റസ്‌ക്യു, എക്സൈസ് ഓഫീസ് എന്നിവയുടെ സഹകരണത്തോടെയാണു പരിപാടി സംഘടിപ്പിക്കുന്നത്.

പഞ്ചായത്ത് സെക്രട്ടറി, വില്ലേജ് ഓഫീസർ കസേരകൾ ഒഴിഞ്ഞുതന്നെ

കുമരകം: കുമരകം പഞ്ചായത്തിൽ സെക്രട്ടറിയും വില്ലേജ് ഓഫീസിൽ ഓഫീസറും ഇല്ലാതായതോടെ ആഴ്ചകളായി ജനങ്ങൾ വലയുന്നു. പ്രഫഷണൽ വിദ്യാഭ്യാസ പ്രവേശനത്തിന് വിവിധ സർട്ടിഫിക്കറ്റുകൾ ലഭിക്കാതെ വിദ്യാർഥികളും വൈദ്യുതി കണക്‌ഷനായി വേണ്ട സർട്ടിഫിക്കറ്റുകൾ ലഭിക്കാതെ കർഷകരും ആഴ്ചകളായി കാത്തിരിക്കുകയാണ്. വരുമാന സർട്ടിഫിക്കറ്റും ജാതി സർട്ടിഫിക്കറ്റും മറ്റും ലഭിക്കാൻ വരുന്ന കാലതാമസം വിദ്യാർഥികൾക്കും പൊതുജനങ്ങൾക്കും ഏറെ ബുദ്ധിമുട്ടായി മാറിയിരിക്കുകയാണ്. വർഷങ്ങളായി കുമരകത്ത് സേവനമനുഷ്ഠിച്ചിരുന്ന വില്ലേജ് ഓഫീസർ ഡെപ്യൂട്ടി തഹസിൽദാറായി പ്രമോഷൻ ലഭിച്ചു പോയതാണ് പ്രതിസന്ധിക്കു കാരണം. സമീപത്തെ വില്ലേജ് ഓഫീസർക്കു പകരം ചുമതല നൽകിയിട്ടുണ്ടെങ്കിലും ആഴ്ചയിൽ ഒന്നോ രണ്ടോ ദിവസങ്ങൾ മാത്രമാണ് എത്തുക.

ക്രൈസ്തവർ സഹനങ്ങളിൽ തളരുന്നവരല്ല: മാർ തോമസ് തറയിൽ

കുടമാളൂർ: ക്രൈസ്തവർ സഹനങ്ങളിൽ തളരുന്നവരല്ലെന്ന് ചങ്ങനാശേരി അതിരൂപതാ മെത്രാപ്പോലീത്ത മാർ തോമസ് തറയിൽ. ചങ്ങനാശേരി അതിരൂപത ചെറുപുഷ്പ മിഷൻലീഗിന്‍റെ നേതൃത്വത്തിൽ കുടമാളൂർ അൽഫോൻസാ ജന്മഗൃഹത്തിലേക്ക് നടത്തിയ തീർഥാടനത്തിൽ സന്ദേശം നൽകുകയായിരുന്നു അദ്ദേഹം. സഹനങ്ങളിൽ തളരാതെ ദൈവത്തിന്‍റെ മുഖം ദർശിച്ചവളാണ് വിശുദ്ധ അൽഫോൻസാമ്മ. തീവ്രമായ ദൈവസ്നേഹത്താൽ ജ്വലിച്ച അൽഫോൻസാമ്മ സഹനങ്ങളിൽ ദൈവത്തിന്‍റെ മുഖം ദർശിക്കുകയും ജീവിതത്തെ ദൈവത്തിനു സമർപ്പിക്കുകയും ചെയ്തു. അൽഫോൻസാമ്മയെപ്പോലെ അനുദിന ജീവിതത്തിൽ ഉണ്ടാകുന്ന പ്രതിസന്ധികളെയും സഹനങ്ങളെയും സന്തോഷത്തോടെ സ്വീകരിക്കാൻ ഓരോ ക്രിസ്ത്യാനിക്കും കഴിയണം. കർത്താവിന്‍റെ വേലയ്ക്കായി ഇറങ്ങുന്നവർക്ക് അനേകം പ്രശ്നങ്ങളെ നേരിടേണ്ടിവരും. അവിടെയൊക്കെ തളരാതെ ഈശോയ്ക്കു സാക്ഷ്യം വഹിക്കുന്നവരാണ് ക്രൈസ്തവർ. ക്രൈസ്തവ സാക്ഷ്യത്തിന്‍റെ നന്മയും മനോഹാരിതയുമായി ഇപ്പോൾ നടക്കുന്ന സംഭവങ്ങളെ കാണാം. ഈ സംഭവങ്ങളൊന്നും നമ്മെ ഭയപ്പെടുത്തുകയോ പിന്തിരിപ്പിക്കുകയോ ചെയ്യുന്നില്ല. യഥാർഥ ക്രിസ്തീയതയുടെ വെളിപ്പെടുത്തലാണ് ഇവിടെ നടക്കുന്നത്. നിരാലംബരും നിരാശ്രയരുമായവർ എവിടെയുണ്ടോ അവിടെയെല്ലാം ക്രൈസ്തവ മിഷനറിമാർ ഭയപ്പെടാതെയും പ്രതിഫലേച്ഛ കൂടാതെയും തങ്ങളുടെ ശുശ്രൂഷ നിർവഹിക്കും. ഇതിൽനിന്ന് ഒരു ശക്തിക്കും ക്രൈസ്തവരെ പിന്തിരിപ്പിക്കാനാവില്ല. അൽഫോൻസാമ്മയുടെ സഹനജീവിതം ക്രൈസ്തവ മിഷനറിമാർക്കു മാതൃകയും പ്രചോദനവുമാണ് - മാർ തോമസ് തറയിൽ പറഞ്ഞു.

അനുഗ്രഹസവിധേ...ഒഴുകിയെത്തി കുഞ്ഞുമിഷണറിമാർ

കുടമാളൂർ: വിശുദ്ധ അൽഫോൻസാമ്മയുടെ ജന്മംകൊണ്ട് അനുഗൃഹീതമായ പുണ്യഭൂമിയിലേക്ക് സുകൃതജപങ്ങൾ ഉരുവിട്ടും പ്രാർഥനാ ഗീതങ്ങൾ ആലപിച്ചും ആയിരങ്ങളെത്തി. എത്തിയവരിലേറെയും കുട്ടികൾ. കുടമാളൂർ അൽഫോൻസാ ജന്മഗൃഹത്തിലേക്ക് ചങ്ങനാശേരി അതിരൂപത ചെറുപുഷ്പ മിഷൻലീഗിന്‍റെ നേതൃത്വത്തിൽ നടത്തിയ 37-ാമത് അൽഫോൻസാ തീർഥാടനം ഭക്തിസാന്ദ്രമായി. അതിരൂപതയുടെ വിവിധ ഭാഗങ്ങളിൽനിന്ന് രാവിലെ മുതൽ വൈകുന്നേരം വരെ തീർഥാടകർ ഒഴുകിയെത്തി. പുലർച്ചെ 5.30ന് ചങ്ങനാശേരി പാറേൽ മരിയൻ തീർഥാടന കേന്ദ്രത്തിൽനിന്ന് വികാരി ഫാ. ജേക്കബ് വാരിക്കാട്ടിന്‍റെ പ്രാർഥനയോടെ തീർഥാടനമാരംഭിച്ചു. ചങ്ങനാശേരി, തുരുത്തി ഫാൊറാോനകളിൽനിന്നുള്ള തീർഥാടകർ 30 കിലോമീറ്ററാോളം കാൽനടയായി പിന്നിട്ട് ഉച്ചകഴിഞ്ഞ് രണ്ടിന് ജന്മഗൃഹത്തിൽ എത്തിച്ചേർന്നപ്പോൾ ചങ്ങനാശേരി ആർച്ച്ബിഷപ് മാർ താോമസ് തറയിൽ സന്ദേശം നൽകി. തുടർന്ന് കുടമാളൂർ മേജർ ആർക്കി എപ്പിസ്കോപ്പൽ തീർഥാടന ദേവാലയത്തിലെത്തി വിശുദ്ധ കുർബാനയർപ്പിച്ചു. ഫാ. ജാോസഫ് കുറശേരി കാർമികത്വം വഹിച്ചു. < b> കുടമാളൂർ മേഖല കുടമാളൂർ ഫാൊറാോനയിൽനിന്നുള്ള തീർഥാടകരാണ് ആദ്യം ജന്മഗൃഹത്തിൽ എത്തിയത്. ഫാൊറാേനയിലെ ഇടവകകളിൽനിന്നുമുള്ള തീർഥാടകർ പനമ്പാലം സെന്‍റ് മൈക്കിൾസ് ചാപ്പലിൽ സംഗമിച്ചു ജന്മഗൃഹത്തിൽ എത്തി. ആർച്ച്പ്രീസ്റ്റ് റവ.ഡോ. ജാോർജ് മംഗലത്തിന്‍റെ മുഖ്യകാർമികത്വത്തിൽ വിശുദ്ധ കുർബാനയർപ്പിച്ചു. ആർച്ച്ബിഷപ് മാർ ജാോസഫ് പെരുന്താേട്ടം സന്ദേശം നൽകി. അതിരന്പുഴ മേഖല പുലർച്ചെ 5.30ന് വെട്ടിമുകൾ, കാോട്ടയ്ക്കുപുറം, ചെറുവാണ്ടൂർ എന്നിവിടങ്ങളിൽനിന്നാരംഭിച്ച തീർഥാടനങ്ങൾ ആർപ്പൂക്കര അമ്പലക്കവലയിൽ സംഗമിച്ച് ജന്മഗൃഹത്തിൽ പ്രവേശിച്ചു. അതിരമ്പുഴ ഫാൊറോനാ വികാരി ഫാ. മാത്യു പടിഞ്ഞാറേക്കുറ്റിന്‍റെ മുഖ്യകാർമികത്വത്തിൽ വിശുദ്ധ കുർബാനയർപ്പിച്ചു. അൽഫോൻസാ തീർഥാടനത്തിന്‍റെ ആരംഭകാലത്ത് മിഷൻ ലീഗ് ഡയറക്ടറായിരുന്ന റവ.ഡോ. മാണി പുതിയിടം സന്ദേശം നൽകി. ആലപ്പുഴ മേഖല എടത്വ, ചമ്പക്കുളം, ആലപ്പുഴ, പുളിങ്കുന്ന് മേഖലകളിലെ തീർഥാടകർ മാന്നാനം ആശ്രമ ദേവാലയത്തിൽ സംഗമിച്ചു. ആശ്രമം പ്രിയോർ റവ.ഡോ. കുര്യൻ ചാലങ്ങാടിയുടെ കാർമികത്വത്തിൽ നടത്തിയ പ്രാർഥനാ ശുശ്രൂഷയ്ക്കുശേഷം കാൽന ടയായി ജന്മഗൃഹത്തിലെത്തി വിശുദ്ധ കുർബാനയർപ്പിച്ചു. എടത്വ മേഖലാ ഡയറക്ടർ ഫാ. ഏലിയാസ് കരിക്കണ്ടത്തിൽ മുഖ്യകാർമികത്വം വഹിച്ചു. അതിരൂപതാ സിഞ്ചെള്ളൂസ് മാോൺ. സ്കറിയ കന്യാക്കാേണിൽ സന്ദേശം നൽകി. കോട്ടയം മേഖല കാോട്ടയം, നെടുംകുന്നം, മണിമല, തൃക്കൊടിത്താനം, ചെങ്ങന്നൂർ മേഖലകളിലെ തീർഥാടകർ കാോട്ടയം സിഎംഎസ് ഹൈസ്കൂൾ ഗ്രൗണ്ടിൽ സംഗമിച്ച് കുടമാളൂർ പള്ളിയിലെത്തി മണിമല മേഖലാ ഡയറക്ടർ ഫാ. താോമസ് മണിയഞ്ചിറയുടെ മുഖ്യകാർമികത്വത്തിൽ വിശുദ്ധ കുർബാനയർപ്പിച്ചു. പ്രാോട്ടോ സിഞ്ചെള്ളൂസ് മാോൺ. ആന്‍റണി ഏത്തയ്ക്കാട്ട് സന്ദേശം നൽകി. തുടർന്ന് തീർഥാടകർ ജന്മഗൃഹത്തിലെത്തി. കുറുമ്പനാടം ഫൊറോന തീർഥാടനവും കോട്ടയം സിഎംഎസ് സ്കൂൾ ഗ്രൗണ്ടിൽനിന്നാരംഭിച്ച് കുടമാളൂർ പള്ളിയിലെത്തി മേഖലാ ഡയറക്ടർ ഫാ. സെബാസ്റ്റ്യൻ കളത്തിപ്പറമ്പിലിന്‍റെ മുഖ്യകാർമികത്വത്തിൽ വിശുദ്ധ കുർബാനയർപ്പിച്ചശേഷം ജന്മഗൃഹത്തിലെത്തി. തെക്കൻ മേഖല അമ്പൂരി, തിരുവനന്തപുരം, കാൊല്ലം-ആയൂർ മേഖലകളിൽനിന്നുള്ള തീർഥാടകരും വിവിധ സമയങ്ങളിൽ ജന്മഗൃഹത്തിലെത്തി. വൈകുന്നേരം അതിരൂപത ഡയറക്ടർ റവ.ഡോ. വർഗീസ് പുത്തൻപുരയ്ക്കൽ, അസിസ്റ്റന്‍റ് ഡയറക്‌ടർ ഫാ. സെബാസ്റ്റ്യൻ മാമ്പറ എന്നിവർ ചേർന്ന് അർപ്പിച്ച വിശുദ്ധ കുർബാനയാോടെ തീർഥാടന പരിപാടികൾ സമാപിച്ചു. അതിരൂപത ഭാരവാഹികളായ ഫാ. ജസ്റ്റിൻ വരവുകാലായിൽ, ടിന്‍റോ സെബാസ്റ്റ്യൻ, എബിൻ ജോസഫ്, സിസ്റ്റർ ജെസലിൻ തോമസ്, സിസ്റ്റർ മേരി റോസ്, ജോൺസൺ കാഞ്ഞിരക്കാട്ട്, സാലിച്ചൻ തുമ്പേക്കളം, ബോബി തോമസ്, ആകാശ് എ.ടി., മിനി തോമസ്, ജെറിൻ ജോസഫ്, നേഹാ ഷൈൻ, ദിവ്യ മരിയ ജയിംസ്, റോഹൻ ബെന്നി, ഷെബിൻ ആന്‍റണി, ലൂക്ക് അലക്സ്, ജോയൽ, അമൽ വർഗീസ്, സിജോ ആന്‍റണി തുടങ്ങിയവർ നേതൃത്വം നൽകി. രാജു കുടിലിൽ

പ്രഫ. സാബു തോമസ് വാസ് ഫെലോ

കോട്ടയം: എംജി സര്‍വകലാശാല മുന്‍ വൈസ് ചാന്‍സലറും സ്‌കൂള്‍ ഓഫ് എനര്‍ജി മെറ്റീരിയല്‍സ് ഡയറക്ടറുമായ ഡോ. സാബു തോമസിനെ വേള്‍ഡ് അക്കാദമി ഓഫ് ആര്‍ട്‌സ് ആന്‍ഡ് സയന്‍സിന്‍റെ (വാസ്) ഫെലോ ആയി തെരഞ്ഞെടുത്തു. ആഗോള തലത്തില്‍ ശാസ്ത്രം, സാമൂഹ്യശാസ്ത്രം, സാങ്കേതികവിദ്യ, കല തുടങ്ങിയ മേഖലകളുടെ വളര്‍ച്ചയ്ക്ക് ഉപകരിക്കുന്ന നിര്‍ണായക സംഭാവനകള്‍ നല്‍കിയവര്‍ക്കാണ് അക്കാദമി അംഗത്വം നല്‍കുന്നത്. ഗവേഷകനായ പ്രഫ. സാബു തോമസ് ട്രിവാന്‍ഡ്രം എന്‍ജിനിയറിംഗ് സയന്‍സ് ടെക്‌നോളജി റിസര്‍ച്ച് പാര്‍ക്കിന്‍റെ ചെയര്‍മാനും സര്‍വകലാശാലയിലെ ഇന്‍റര്‍നാഷണല്‍ ആന്‍ഡ് ഇന്‍റര്‍ യൂണിവേഴ്‌സിറ്റി സെന്‍റര്‍ ഫോര്‍ നാനോസയന്‍സ് ആന്‍ഡ് നാനോ ടെക്‌നോളജി ഡയറക്ടറുമാണ്. റിസര്‍ച്ച് ഡോട്‌കോമിന്‍റെ റാങ്കിംഗില്‍ രാജ്യത്തെ രണ്ടാമത്തെ മികച്ച മെറ്റീരിയല്‍ സയന്‍റിസ്റ്റായി തെരഞ്ഞെടുക്കപ്പെട്ടിരുന്നു.

ആരുടെ തലയിലും വീഴാം! അപകടാവസ്ഥയിലായിട്ടും വെയിറ്റിംഗ് ഷെഡ് പൊളിച്ചുനീക്കുന്നില്ല

കൊടുങ്ങൂർ: പതിനഞ്ചാം മൈലിൽ, ഗുരുമന്ദിരം സ്റ്റോപ്പിനും നെടുമാവിനും ഇടയിൽ കൊടുംവളവിൽ ഉപയോഗ യോഗ്യമല്ലാത്തതും വർഷങ്ങൾ പഴക്കമുള്ളതുമായ വെയിറ്റിംഗ് ഷെഡ് അപകടഭീഷണിയായി. രണ്ടു വീടുകളുടെ ഇടയിൽ അപകടാവസ്ഥയിൽ നിൽക്കുന്ന വെയിറ്റിംഗ് ഷെഡ് പൊളിച്ചുനീക്കണമെന്നാണ് ആവശ്യം. ഇതിനോടു ചേർന്നുള്ള വീട്ടിലേക്ക് ഇറങ്ങുന്ന ഇടുങ്ങിയ വഴിയിലാണ് അപകടക്കെണി. ഇതുമൂലം വീട്ടുകാർക്കു വീടിന്‍റെ വാതിൽ തുറക്കാൻ പോലും കഴിയാത്ത അവസ്ഥയാണ്. കൊച്ചുകുട്ടികൾ ഉള്ളതിനാൽ ജീവാപായം ഭയന്നാണ് ഇവർ കഴിയുന്നത്. തകർന്നുവീണാൽ വീടിനും സാരമായ കേടുപാടുകൾ സംഭവിക്കും. പത്തടിയോളം കുഴിയിൽനിന്നു കയ്യാല കെട്ടിപ്പൊക്കി റോഡ് നിരപ്പിലാണ് ഷെഡ്. ആകെ തകർന്നു കാലങ്ങളായി സംരക്ഷണം ഇല്ലാതെയും എലികളും മറ്റും തുരന്നും കയ്യാലക്കെട്ടുകൾ തകർന്നിരിക്കുകയാണ്. ഉൾവശം തറ വിണ്ടുകീറി ഷെഡ് മൊത്തത്തിൽ ഇടിഞ്ഞുതാണ് പിറകോട്ട് ചെരിഞ്ഞ നിലയിലാണ്. ശക്തമായ മഴയിൽ പൊട്ടിക്കീറിയ ആസ്ബസ്റ്റോസ് ഷീറ്റുകൾക്കിടയിൽകൂടി വെള്ളം വീണ് മണ്ണ് മാറിയതും ബലക്ഷയത്തിനു കാരണമായി. ഇപ്പോൾ ഏതു സമയവും തകർന്നു നിലംപൊത്താവുന്ന അവസ്ഥയിലാണ്. അടിയന്തരമായി വെയിറ്റിംഗ് ഷെഡ് പൊളിച്ചുനീക്കി അപകടം ഒഴിവാക്കണമെന്നാവശ്യപ്പെട്ടു വീട്ടുകാർ പഞ്ചായത്തിനും ജില്ലാ കളക്ടർക്കും പരാതി നൽകി.

കത്തീഡ്രൽ ഇടവക ദ്വിശതാബ്ദി: വിളംബരജാഥ നടത്തി

കാഞ്ഞിരപ്പള്ളി: സെന്‍റ് ഡൊമിനിക്സ് കത്തീഡ്രൽ ഇടവകയുടെ ദ്വിശതാബ്ദി ആഘോഷങ്ങള്‍ക്ക് തുടക്കം കുറിച്ച് അക്കരപ്പള്ളിയില്‍നിന്നു കത്തീഡ്രല്‍ പള്ളിയിലേക്ക് നടന്ന ജൂബിലി വിളംബര റാലി പ്രൗഢോജ്വലമായി. വിളംബര ജാഥയുടെ ഫ്ളാഗ് ഓഫ് വികാരിയും ആർച്ച്പ്രീസ്റ്റുമായ റവ.ഡോ. കുര്യൻ താമരശേി, ജനറൽ കൺവീനർ സെബാസ്റ്റ്യൻ എള്ളൂക്കുന്നേലിന് പതാക കൈമാറി നിർവഹിച്ചു. റാലിയില്‍ 200 വര്‍ഷത്തിന്‍റെ പ്രതീകമായി 200 പേര്‍ കൊടികളേന്തിയും കൂട്ടായ്മാ പ്രതിനിധികളും സംഘടനാ പ്രതിനിധികളും ഇടവകജനവും അണിനിരന്നു. ഫ്ളോട്ടുകളും മാലാഖമാരുടെ വേഷം ധരിച്ച കുട്ട‌ികളും റാലിയെ വർണാഭമാക്കി. കാഞ്ഞിരപ്പള്ളി ടൗണ്‍ ചുറ്റി റാലി കത്തീഡ്രല്‍ പള്ളിയില്‍ സമാപിച്ചു. തുടര്‍ന്ന് ജൂബിലി പതാക ഉയര്‍ത്തി. തിരിതെളിക്കല്‍, 200 പേർ അണിനിരന്ന ജൂബിലിഗാനം, വാദ്യമേളം എന്നിവയും നടന്നു.

ഇന്ന് ഉച്ചകഴിഞ്ഞു മൂന്നിന് നടക്കുന്ന വിശുദ്ധ കുർബാനയ്ക്ക് രൂപതാധ്യക്ഷൻ മാർ ജോസ് പുളിക്കൽ കാർമികത്വം വഹിക്കും. ഇടവകയിൽ സേവനം ചെയ്‌ത വൈദികർ സഹകാർമികരായിരിക്കും. വൈകുന്നേരം അഞ്ചിന് ന‌ടക്കുന്ന സാംസ്കാരിക സമ്മേളനം മാർ ജോസ് പുളിക്കലിന്‍റെ അധ്യക്ഷതയിൽ ജലവിഭവമന്ത്രി റോഷി അഗസ്റ്റിൻ ഉദ്ഘാടനം ചെയ്യും. ആന്‍റോ ആന്‍റണി എംപി, ചീഫ് വിപ്പ് ഡോ. എൻ. ജയരാജ്, കെ.ആർ. തങ്കപ്പൻ, ഡോ. അർഷാദ് മൗലവി, പി. ജീരാജ്, എം.എസ്. മോഹൻ എന്നിവർ പ്രസംഗിക്കും. തുടർന്ന് കത്തീഡ്രൽ ടീമിന്‍റെ നേതൃത്വത്തിൽ "മഞ്ഞു പെയ്യുന്ന മരുഭൂമി' എന്ന നാടകം നടക്കും. ‌ജൂബിലി ആഘോഷങ്ങൾ 10ന് സമാപിക്കും.

മൂല്യാധിഷ്ഠിത ഭാവിതലമുറയെ വാർത്തെടുക്കുന്നതാകണം വിദ്യാഭ്യാസ സ്ഥാപനങ്ങൾ: മാർ ജോസ് പുളിക്കൽ

കാഞ്ഞിരപ്പള്ളി: സമൂഹത്തിനും നാടിനും സംഭാവന നൽകുന്ന മനുഷ്യവ്യക്തികളായി നാടിന്‍റെ നന്മകളും ഭാവിയുടെ വാഗ്ദാനങ്ങളും കരുണയുടെ വക്താക്കളുമായി മാറാൻ തക്കവിധം നല്ലൊരു മൂല്യാധിഷ്ഠിത ഭാവിതലമുറയെ വാർത്തെടുക്കുന്നതാകണം നമ്മുടെ വിദ്യാഭ്യാസ സ്ഥാപനങ്ങളെന്ന് കാഞ്ഞിരപ്പള്ളി ബിഷപ് മാർ ജോസ് പുളിക്കൽ. കാഞ്ഞിരപ്പള്ളി രൂപത കോർപറേറ്റ് മാനേജ്മെന്‍റ് സ്കൂളുകളുടെ 2024-25 അധ്യയനവർഷത്തെ മെറിറ്റ് ദിനാചരണം കാഞ്ഞിരപ്പള്ളി സെന്‍റ് മേരീസ് ഗേൾസ് ഹൈസ്കൂളിൽ ഉദ്ഘാടനം ചെയ്തു പ്രസംഗിക്കുകയായിരുന്നു ബിഷപ്. രൂപത വികാരി ജനറാൾ ഫാ. ബോബി അലക്സ് മണ്ണംപ്ലാക്കൽ അധ്യക്ഷത വഹിച്ചു. സെന്‍റ് മേരീസ് ഗേൾസ് ഹൈസ്കൂൾ മാനേജർ സിസ്റ്റർ സലോമി സിഎംസി, രൂപത കോർപറേറ്റ് മാനേജർ ഫാ. ഡൊമിനിക് അയലൂപറന്പിൽ, സെന്‍റ് മേരീസ് ഗേൾസ് ഹൈസ്കൂൾ ഹെഡ്മിസ്ട്രസ് നിസാമോൾ ജോണ്‍, അക്കാദമിക് കൗണ്‍സിൽ സെക്രട്ടറി ഡോ. ഡോമിനിക് സാവിയോ എന്നിവർ പ്രസംഗിച്ചു. അധ്യയന വർഷം ദേശീയ, സംസ്ഥാന തലങ്ങളിൽ നേട്ടം കൈവരിച്ച അധ്യാപകർക്കും മികച്ച വിജയം നേടിയ വിദ്യാർഥികൾക്കും സമ്മാനങ്ങൾ വിതരണം ചെയ്തു.

മിനി റോബോട്ടിക് ലാബ്, വെർച്വൽ റിയാലിറ്റി സ്റ്റുഡിയോ ഉദ്ഘാടനം സെന്‍റ് ആന്‍റണീസ് കോളജില്‍

പെരുവന്താനം: സെന്‍റ് ആന്‍റണീസ് കോളജിൽ എഐസിടിയുടെയും സ്റ്റെം റോബോട്ടിക്സിന്‍റെയും സഹകരണത്തോടെ ആരംഭിക്കുന്ന മിനി റോബോട്ടിക്സ് ലാബിന്‍റെയും വെർച്വൽ റിയാലിറ്റി ലാബിന്‍റെയും ഉദ്ഘാടനം നാളെ നടക്കും. ഉച്ചകഴിഞ്ഞ് 1.30ന് നടക്കുന്ന സമ്മേളനത്തിൽ കോളജ് ചെയർമാൻ ബെന്നി തോമസ് അധ്യക്ഷത വഹിക്കും. നാനോ ടെക്നോളജി, റോബോട്ടിക്സ് മേഖലയിലെ ശാസ്ത്രജ്ഞൻ ഡോ. സാബു തോമസ് ഉദ്ഘാടനം നിര്‍വഹിക്കും. പ്രിൻസിപ്പൽ ഡോ. ആന്‍റണി ജോസഫ് കല്ലമ്പള്ളി, സെക്രട്ടറി റ്റിജോമോന്‍ ജേക്കബ്‌, വൈസ് പ്രിന്‍സിപ്പല്‍മാരായ സുപര്‍ണ രാജു, ബോബി കെ. മാത്യു, പി.ആർ. രതീഷ്‌, വകുപ്പ് മേധാവിമാരായ ജിന്‍റുമോള്‍ ജോണ്‍, റി‍ന്‍റാമോള്‍ മാത്യു തുടങ്ങിയവർ പ്രസംഗിക്കും. സ്റ്റെം റോബോട്ടിക്സുമായി ചേർന്ന് റോബോട്ടിക്സ് നിർമാണരംഗത്ത് വിദ്യാർഥികളെ പരിശീലിപ്പിക്കുന്നതിനും കാർഷിക മേഖല ഉൾപ്പെടെയുള്ള രംഗങ്ങളിൽ ചെലവുകുറഞ്ഞതും ഗുണമേന്മയുള്ളതുമായ ഉത്പാദനരീതികൾ അവലംബിക്കുന്നതിനും വേണ്ടിയുള്ള റോബോട്ടുകളുടെ നിർമാണം ലക്ഷ്യമിട്ടാണ് ലാബ് ആരംഭിക്കുന്നത്. മലയോരമേഖല ഉൾപ്പെടുന്ന കോട്ടയം, ഇടുക്കി,പത്തനംതിട്ട ജില്ലകളിലെ സ്കൂൾ വിദ്യാർഥികൾക്കും ഈ ലാബ് പ്രയോജനപ്പെടുത്താമെന്ന് ചെയർമാൻ ബെന്നി തോമസും, പ്രിന്‍സിപ്പല്‍ ഡോ. ആന്‍റണി ജോസഫ് കല്ലമ്പള്ളിയും അറിയിച്ചു. റോബോട്ടുകള്‍ നിര്‍മിക്കുന്നതിന് ആവശ്യമായ ത്രീഡി പ്രിന്‍ററുകളും കംപ്യൂട്ടറുകളും സജ്ജമാക്കിയിട്ടുണ്ട്. ഹയർ സെക്കൻഡറി സ്കൂൾ വിദ്യാർഥികൾക്കും ഇതര സ്കൂൾ വിദ്യാർഥികൾക്കുമായി ശനിയാഴ്ചകളില്‍ നടത്തുന്ന ഹ്രസ്വകാല റോബോട്ടിക്സ് കോഴ്സുകളും ആരംഭിക്കുന്നുണ്ട്. നാളെ മുതൽ 31 വരെ സ്കൂൾ വിദ്യാർഥികൾക്കായി പ്രദർശനവും ഉണ്ടായിരിക്കും. മാറുന്ന കാലഘട്ടത്തിലെ സാങ്കേതികവിദ്യ പൊതുജനങ്ങളെ പരിചയപ്പെടുത്തുക എന്നതും ലാബ്‌ ലക്ഷ്യമിടുന്നു. വന്യജീവികളെ ആർട്ടിഫിഷല്‍ ഇന്‍റലിജന്‍സിന്‍റെയും സൂപ്പര്‍ സോണിക് ലേസര്‍ സൗണ്ട് വേവുകളുടെയും സഹായത്തോടെ തുരത്താനുള്ള പ്രോട്ടോ ടൈപ്പ് ഉപകരണത്തിന്‍റെ നിർമാണം അവസാന ഘട്ടത്തിലാണെന്നും കോളജ് അധികൃതർ പറഞ്ഞു. പത്രസമ്മേളനത്തിൽ പ്രിൻസിപ്പൽ ഡോ. ആന്‍റണി ജോസഫ് കല്ലമ്പള്ളി, സെക്രട്ടറി റ്റിജോമോൻ ജേക്കബ്, വൈസ് പ്രിൻസിപ്പൽമാരായ സുപർണ രാജു, പി.ആർ. രതീഷ്, വകുപ്പ് മേധാവി ജിന്‍റുമോൾ ജോൺ, ജിനു തോമസ് എന്നിവർ പങ്കെടുത്തു.

സ്കൂളിൽ കുടുംബശ്രീ മാ കെയർ

മുണ്ടക്കയം: വിദ്യാർഥികൾക്കും അധ്യാപകർക്കും ലഘുഭക്ഷണം കഴിക്കാനും സ്റ്റേഷനറി സാധനങ്ങൾ വാങ്ങാനും ഇനി പുറത്തു പോകേണ്ട. ലഘുഭക്ഷണങ്ങൾ, പാനീയങ്ങൾ, സ്റ്റേഷനറി സാധനങ്ങൾ, സാനിറ്ററി നാപ്കിൻ എന്നിവ സ്കൂൾ വളപ്പിലെ കിയോസ്കിൽ ലഭിക്കുന്ന മാ കെയർ പദ്ധതി മുരിക്കുംവയൽ ഗവൺമെന്‍റ് വൊക്കേഷണൽ ഹയർ സെക്കൻഡറി സ്കൂളിൽ ആരംഭിച്ചു. വിദ്യാഭ്യാസവകുപ്പിന് കീഴിലുള്ള സ്കൂളുകളിൽ കുടുംബശ്രീയുടെ നേതൃത്വത്തിലാണ് പദ്ധതി നടപ്പാക്കുന്നത്. മിതമായ നിരക്കിലാണ് വില്പന. സ്കൂൾ സമയത്ത് വിദ്യാർഥികൾ പുറത്തു പോകുന്നത് ഒഴിവാക്കാനും പദ്ധതിയിലൂടെ സാധിക്കും. കുടുംബശ്രീ വനിതകൾക്ക് വരുമാനം ലക്ഷ്യമിട്ടാണ് പദ്ധതി നടപ്പാക്കുന്നത്. പദ്ധതിയുടെ ഉദ്ഘാടനം ജില്ലാ പഞ്ചായത്ത് മെംബർ പി.ആർ. അനുപമ നിർവഹിച്ചു. പിടിഎ പ്രസിഡന്‍റ് കെ.ടി. സനല്‍ അധ്യക്ഷ വഹിച്ചു. ഹയർ സെക്കൻഡറി സ്കൂൾ പ്രിൻസിപ്പൽ ഇൻ ചാർജ് എം.പി. രാജേഷ്, വൊക്കേഷണൽ ഹയർ സെക്കൻഡറി സ്കൂൾ പ്രിൻസിപ്പൽ പി.എസ്. സുരേഷ് ഗോപാൽ, സിഡിഎസ് ചെയർപേഴ്സൺ പി.ജി. വസന്തകുമാരി എന്നിവർ പ്രസംഗിച്ചു.

രാജേന്ദ്ര മൈതാനത്ത് സ്റ്റേജ് ഉദ്ഘാടനം

പൊൻകുന്നം: ചിറക്കടവ് പഞ്ചായത്ത് പൊൻകുന്നം രാജേന്ദ്ര മൈതാനത്ത് ആറുലക്ഷം രൂപ മുടക്കി നിർമിച്ച സ്റ്റേജ് ഇന്നു നാലിന് മന്ത്രി റോഷി അഗസ്റ്റിൻ ഉദ്ഘാടനം ചെയ്യും. ചീഫ് വിപ്പ് ഡോ. എൻ. ജയരാജ് അധ്യക്ഷത വഹിക്കും. പഞ്ചായത്ത് പ്രസിഡന്‍റ് സി.ആർ. ശ്രീകുമാർ മുഖ്യപ്രഭാഷണം നടത്തും. രാജേന്ദ്ര മൈതാനത്തെ ചരിത്രപ്രസിദ്ധമായ കിണറിന്‍റെ സംരക്ഷണം ഉറപ്പാക്കിയാണ് സ്റ്റേജിന്‍റെ നിർമാണം. പൊതുയോഗങ്ങളും മറ്റു പരിപാടികളും കുറഞ്ഞ ചെലവിൽ നടത്താൻ പുതിയ സംവിധാനത്തിലൂടെ സൗകര്യം ഒരുക്കും. യോഗത്തിൽ ചിറക്കടവ് പഞ്ചായത്തിന്‍റെ ജലബജറ്റ് മന്ത്രി പ്രകാശനം ചെയ്യും. ചിറക്കടവിന്‍റെ അഭിമാനമായി മാറിയ കുട്ടികൾ, റസലിംഗിൽ ദേശീയ ചാമ്പ്യൻഷിപ്പ് നേടിയ ആർച്ച അനീഷ്, അമേരിക്കയിൽ നടന്ന വേൾഡ് പോലീസ് കോമ്പറ്റീഷനിൽ ഗോൾഡ് മെഡൽ നേടിയ വിനീത് ശശീന്ദ്രൻ, ഹ്യൂമൻ റിസോഴ്സ് മാനേജ്മെന്‍റിൽ എംജി യൂണിവേഴ്സിറ്റി ഒന്നാം റാങ്ക് കരസ്ഥമാക്കിയ അനുഷ്ക ഷൈൻ എന്നിവർക്ക് ചിറക്കടവ് പഞ്ചായത്ത് നൽകുന്ന ആദരവ് മന്ത്രി സമർപ്പിക്കും.

കുറവിലങ്ങാട് ബൈബിൾ കൺവൻഷൻ പതിറ്റാണ്ടിന്‍റെ തിളക്കത്തിൽ

കുറവിലങ്ങാട്: ഓരോ വർഷവും ആയിരങ്ങൾ ഒഴുകിയെത്തുന്ന കുറവിലങ്ങാട് ബൈബിൾ കൺവൻഷൻ ഒരു പതിറ്റാണ്ടിന്‍റെ തിളക്കത്തിൽ. 28 മുതൽ സെപ്റ്റംബർ ഒന്നുവരെയാണ് ഈ വർഷത്തെ കൺവൻഷൻ. ഫാ. സേവ്യർഖാൻ വട്ടായിലിലാണ് നയിക്കുന്നത്. പാലാ രൂപത മുഖ്യവികാരി ജനറാൾ മോൺ. ജോസഫ് തടത്തിൽ കുറവിലങ്ങാട് ഇടവകയിൽ വികാരിയായിരിക്കെയാണ് കുറവിലങ്ങാട് ബൈബിൾ കൺവൻഷൻ ആരംഭിക്കുന്നത്. ഫാ. സേവ്യർഖാൻ വട്ടായിൽ, ഫാ. ഡാനിയേൽ പൂവണ്ണത്തിൽ, ഫാ. ഡൊമിനിക് വാളൻമനാൽ എന്നിവരടക്കമുള്ളവരാണ് കഴിഞ്ഞ വർഷങ്ങളിൽ കൺവൻഷനു നേതൃത്വം നൽകിയത്. കോവിഡുയർത്തിയ നിയന്ത്രണങ്ങളുടെ വർഷങ്ങളിലും ആർച്ച്പ്രീസ്റ്റായിരുന്ന റവ.ഡോ. അഗസ്റ്റിൻ കൂട്ടിയാനിയുടെ നേതൃത്വത്തിൽ മുടക്കം കൂടാതെ കൺവൻഷൻ നടത്തിയിരുന്നു. പത്താമത് കൺവൻഷന്‍റെ ഉദ്ഘാടനം കൺവൻഷനു തുടക്കമിട്ട മോൺ. ജോസഫ് തടത്തിൽ നിർവഹിക്കും. എല്ലാ ദിവസങ്ങളിലും വൈകുന്നേരം 4.30ന് വിശുദ്ധ കുർബാന, തുടർന്ന് വചനവിരുന്ന്. ഒൻപതിന് സമാപിക്കും.

കടവുപുഴ പാലത്തിന് കേന്ദ്രഫണ്ട് കിട്ടും

പാലാ: 2021ലെ അതിതീവ്ര മഴയെത്തുടർന്ന് തകർന്നുവീണ മൂന്നിലവ് പഞ്ചായത്തിലെ കടവുപുഴ പാലവും റോഡും നിർമിക്കാൻ ഫണ്ട് അനുവദിക്കുമെന്ന് കേന്ദ്ര ഗോത്രകാര്യമന്ത്രി ജൂവൽ ഓറം ഉറപ്പു നൽകിയതായി ഫ്രാൻസിസ് ജോർജ് എംപി, മാണി സി. കാപ്പൻ എംഎൽഎ എന്നിവർ അറിയിച്ചു. കോട്ടയം ലോക്സഭാ മണ്ഡലത്തിലെ ഏക പട്ടികവർഗ പഞ്ചായത്തായ മൂന്നിലവിലെ കടവുപുഴ പാലവും അപ്രോച്ച് റോഡും അടിയന്തരമായി പുനർനിർമിക്കുന്നതു സംബന്ധിച്ച് കേന്ദ്രമന്ത്രിയുമായി നടത്തിയ ചർച്ചയിൽ അറിയിച്ചതാണ് ഇക്കാര്യം. യാത്ര ദുഷ്കരം പാലം തകർന്നതോടെ മലഞ്ചെരിവുകൾ നിറഞ്ഞ പഞ്ചായത്തിലെ ഭൂരിപക്ഷം ജനങ്ങളുടെയും സഞ്ചാരം ദുഷ്കരമായിരിക്കുകയാണ്. ആശുപത്രികൾ, സ്കൂൾ, കോളജ് എന്നിവിടങ്ങളിലേക്കു ജനങ്ങൾക്ക് പോകാൻ 20 കിലോമീറ്ററിലധികം കൂടുതലായി യാത്ര ചെയ്യേണ്ട സ്ഥിതിയാണുള്ളതെന്നു ചർച്ചയിൽ ഫ്രാൻസിസ് ജോർജ് മന്ത്രിയെ ധരിപ്പിച്ചു. പാലം തകർന്നിട്ട് മൂന്നു വർഷം കഴിഞ്ഞിട്ടും പുനർനിർമിക്കാനുള്ള യാതൊരു നടപടിയും സംസ്ഥാന സർക്കാർ സ്വീകരിച്ചിട്ടില്ല. പാലം പുനർനിർമാണത്തിനായി മാണി സി. കാപ്പൻ എംഎൽഎ നിരന്തരമായി ശ്രമിച്ചുവരുകയായിരുന്നു. 17.5 കോടി വേണം പൊതുമരാമത്ത് വകുപ്പ് തയാറാക്കിയ എസ്റ്റിമേറ്റ് അനുസരിച്ച് പാലം പുതുക്കിപ്പണിയാൻ 2.5 കോടിയും മേച്ചാലിലേക്കുള്ള 7.5 കിലോമീറ്റർ റോഡ് നിർമാണത്തിന് 15 കോടിയും ഉൾപ്പെടെ 17.5 കോടി രൂപ അനുവദിക്കണമെന്നാണ് ചർച്ചയിൽ ഫ്രാൻസിസ് ജോർജ് ആവശ്യപ്പെട്ടത്. പട്ടികവർഗ വിഭാഗത്തിനുള്ള പ്രത്യേക സ്കീമിൽനിന്നു തുക അനുവദിക്കുന്ന കാര്യം അനുഭാവപൂർവം പരിഗണിക്കുമെന്ന് മന്ത്രി ഉറപ്പു നൽകിയതായി ഫ്രാൻസിസ് ജോർജ് എംപിയും മാണി സി. കാപ്പൻ എംഎൽഎയും പറഞ്ഞു.

സ്‌കൂള്‍മുറ്റങ്ങൾ കീഴടക്കി തെരുവുനായ്ക്കള്‍;‌ ആശങ്കയോടെ മാതാപിതാക്കളും അധ്യാപകരും

പാലാക്കാട്: സ്‌കൂള്‍മുറ്റങ്ങൾ തെരുവുനായ്ക്കള്‍ കീഴടക്കുന്നു. ഇവയുടെ ഭീഷണി കാരണം കുട്ടികള്‍ക്ക് സ്‌കൂള്‍മുറ്റം പേടിസ്വപ്‌നമായി മാറുകയാണ്. ഓടിക്കളിച്ചും ചിരിച്ചും കൂട്ടംകൂടി സൊറ പറഞ്ഞിരുന്നതുമായ സ്‌കൂള്‍മുറ്റത്ത് തെരുവുനായ്ക്കള്‍ കുട്ടികള്‍ക്കു നേരേ കുരച്ചു ചാടുന്നതും ആക്രമണ സ്വഭാവത്തോടെ ഓടിക്കുന്നതും പതിവായി. തെരുവുനായ ഭീഷണി മൂലം പല കുട്ടികളും സ്‌കൂളില്‍ പോകാന്‍ മടിക്കുന്നതായി മാതാപിതാക്കള്‍ പറഞ്ഞു. പാലാക്കാട് നിര്‍മല്‍ ജ്യോതി പബ്ലിക് സ്‌കൂള്‍, പാലാ ഗവൺമെന്‍റ് സ്‌കൂള്‍ എന്നിവിടങ്ങളില്‍ തെരുവുനായ ശല്യം രൂക്ഷമാണ്. മറ്റു സ്‌കൂളുകളുടെയും ആരാധനാലയങ്ങളുടെയും പരിസരത്തും മുറ്റത്തും സ്ഥിതി വിഭിന്നമല്ല. സ്‌കൂൾ വിദ്യാർഥികൾക്കു ശല്യമായി മാറിയിരിക്കുന്ന തെരുവുനായ്ക്കളെ ഇവിടെനിന്നു മാറ്റുന്നതിനോ നശിപ്പിച്ചുകളയുന്നതിനോ വേണ്ട നടപടി എത്രയും വേഗം സ്വീകരിക്കണമെന്ന് പിടിഎ കമ്മിറ്റി അധികാരികളോട് ആവശ്യപ്പെട്ടു.

ബയോടെക്‌നോളജി കരിയര്‍ ഓറിയന്‍റേഷന്‍ സെമിനാര്‍

രാമപുരം: മാര്‍ ആഗസ്തീനോസ് കോളജ് ബയോടെക്നോളജി ഡിപ്പാര്‍ട്ട്മെന്‍റിന്‍റെ നേതൃത്വത്തില്‍ ലൈഫ് സയന്‍സ് മേഖലയില്‍ രാജ്യത്തും അന്താരാഷ്‌ട്ര തലത്തിലും ലഭ്യമായ ഉന്നത വിദ്യാഭ്യാസ ഗവേഷണ രംഗങ്ങളിലെ സാധ്യതകളെയും നൂതന രീതികളെയും കുറിച്ച് സെമിനാര്‍ സംഘടിപ്പിച്ചു. ജര്‍മനിയിലെ ജെസ്റ്റ്‌സ് ലീബിഗ് യൂണിവേഴ്‌സിറ്റിയിലെ ഗവേഷകരായ ഡോ. അനൂപ് വടക്കന്‍ ചെറിയാന്‍, ഡോ. ശ്രുതി മരിയ അഗസ്റ്റിന്‍ എന്നിവര്‍ സെമിനാര്‍ നയിച്ചു. കോളജ് മാനേജര്‍ ഫാ. ബെര്‍ക്കുമാന്‍സ് കുന്നുംപുറം ഉദ്ഘാടനം ചെയ്തു. പ്രിന്‍സിപ്പല്‍ ഡോ. റെജി വര്‍ഗീസ് മേക്കാടന്‍ അധ്യക്ഷത വഹിച്ചു.ഡിപ്പാര്‍ട്ട്മെന്‍റ് മേധാവി ഡോ. സജേഷ്‌ കുമാര്‍, വിദ്യാര്‍ഥി പ്രതിനിധി മഹീഷ് മോഹനന്‍ തുടങ്ങിയവര്‍ പ്രസംഗിച്ചു.

കന്യാസ്ത്രീമാരുടെ അറസ്റ്റ് മതനിരപേക്ഷതയ്ക്ക് കളങ്കം: സെബാസ്റ്റ്യൻ കുളത്തുങ്കൽ എംഎൽഎ

ഈരാറ്റുപേട്ട: കന്യാസ്ത്രീമാരെ അന്യായമായി അറസ്റ്റ് ചെയ്യുകയും തടങ്കലില്‍ വയ്ക്കുകയും ചെയ്ത നടപടി ബിജെപിയുടെ ന്യൂനപക്ഷവിരുദ്ധ സമീപനത്തിന്‍റെ പ്രത്യക്ഷ തെളിവാണെന്ന് സെബാസ്റ്റ്യന്‍ കുളത്തുങ്കല്‍ എംഎല്‍എ. ഛത്തീസ്ഗഡില്‍ കന്യാസ്ത്രീമാരെ അന്യായമായി അറസ്റ്റ് ചെയ്തതില്‍ പ്രതിഷേധിച്ച് കേരള കോണ്‍ഗ്രസ്-എം പൂഞ്ഞാര്‍ നിയോജകമണ്ഡലം കമ്മിറ്റിയുടെ ആഭിമുഖ്യത്തില്‍ നടത്തിയ ധര്‍ണ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. നിയോജകമണ്ഡലം പ്രസിഡന്‍റ് സാജന്‍ കുന്നത്ത് അധ്യക്ഷത വഹിച്ചു.

ബിജെപി തകര്‍ക്കാന്‍ ശ്രമിക്കുന്നത് മതേതര മൂല്യങ്ങളെ: തിരുവഞ്ചൂര്‍ രാധാകൃഷ്ണന്‍

പാലാ: ബിജെപി തകര്‍ക്കാന്‍ ശ്രമിക്കുന്നത് ഭരണഘടനയിലൂടെ കോണ്‍ഗ്രസ് സൃഷ്ടിച്ച മതേതര മൂല്യങ്ങളെയെന്ന് തിരുവഞ്ചൂര്‍ രാധാകൃഷ്ണന്‍ എംഎല്‍എ. ഛത്തീസ്ഗഡില്‍ കന്യാസ്ത്രീമാരെ കള്ളക്കേസ് ചുമത്തി അറസ്റ്റ് ചെയ്തതിനെതിരേ കോണ്‍ഗ്രസ് പാലാ ബ്ലോക്ക് കമ്മിറ്റി സംഘടിപ്പിച്ച പ്രതിഷേധയോഗം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ബിജെപിയുടെ നീക്കങ്ങള്‍ രാജ്യത്തിന്‍റെ ഭരണഘടനയ്ക്കെതിരാണെന്ന് വ്യക്തമാക്കുന്നതായും അദ്ദേഹം ചൂണ്ടിക്കാട്ടി. രാമപുരം: കോണ്‍ഗ്രസ് ഭരണങ്ങാനം ബ്ലോക്ക് കമ്മിറ്റിയുടെ നേതൃത്വത്തില്‍ രാമപുരം ടൗണില്‍ നടത്തിയ പ്രതിഷേധ യോഗം കോണ്‍ഗ്രസ് രാഷ്‌ട്രീയകാര്യ സമിതി അംഗം ജോസഫ് വാഴയ്ക്കന്‍ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് മോളി പീറ്റര്‍ അധ്യക്ഷത വഹിച്ചു. അഡ്വ. ബിജു പുന്നത്താനം, തോമസ് കല്ലാടന്‍, ആര്‍. പ്രേംജി, മനോജ് ചീങ്കല്ലേല്‍, അപ്പച്ചന്‍ മൈലയ്ക്കല്‍, ബെന്നി താന്നിയില്‍, സണ്ണി കാര്യപ്പുറം, സി.ടി. രാജന്‍, ബെന്നി കച്ചിറമറ്റം, സൗമ്യ സേവ്യര്‍ തുടങ്ങിയവര്‍ പ്രസംഗിച്ചു.

ലയൺസ് ക്ലബ് ഭാരവാഹികളുടെ സ്ഥാനാരോഹണം

പൈക: പൈക സെൻട്രൽ ലയൺസ് ക്ലബ്ബിന്‍റെ വാർഷികവും പുതിയ ഭാരവാഹികളുടെ സ്ഥാനാരോഹണച്ചടങ്ങും ഇന്നു രാത്രി ഏഴിന് നരിതൂക്കിൽ ആർക്കേഡിൽ നടത്തും. സെബാസ്റ്റ്യൻ കുളത്തുങ്കൽ എംഎൽഎ ഉദ്ഘാടനം ചെയ്യും. പ്രസിഡന്‍റ് സാജൻ തൊടുക അധ്യക്ഷത വഹിക്കും. ലയൺ എംജിഎഫ് മാർട്ടിൻ ഫ്രാൻസിസ് പുതിയ ഭാരവാഹികളുടെ സ്ഥാനാരോഹണച്ചടങ്ങ് നിർവഹിക്കും. പുതിയ ഭാരവാഹികളായി മാത്തച്ചൻ നരിതൂക്കിൽ - പ്രസിഡന്‍റ്, അൽഫോൺസ് കുരിശുംമൂട്ടിൽ, ജോസ് തെക്കേൽ - വൈസ് പ്രസിഡന്‍റുമാർ, ജോസുകുട്ടി ഞാവള്ളിക്കുന്നേൽ - സെക്രട്ടറി, ഏബ്രഹാം കോക്കാട്ട് - ട്രഷറർ, ജോണി പനച്ചിക്കൽ - അഡ്മിനിസ്ട്രേറ്റർ എന്നിവരെ തെരഞ്ഞെടുത്തു.

വചനപ്രഘോഷണം

പാലാ: ബൈബിള്‍ പ്രീച്ചേഴ്‌സ് സൊസൈറ്റിയുടെ ആഭിമുഖ്യത്തില്‍ ഇന്ന് 12.30 മുതല്‍ 4.15 വരെ പാലാ സെന്‍റ് തോമസ് സ്‌കൂള്‍ ഓഡിറ്റോറിയത്തില്‍ വചനപ്രഘോഷണവും ദിവ്യകാരുണ്യ സൗഖ്യാരാധനയും നടക്കും. ഫാ. ഷാജി ചിലമ്പിക്കുന്നേല്‍ വചനപ്രഘോഷണം നടത്തും. ഫാ. ജോസഫ് അരിമറ്റത്ത്, ഫാ. തോമസ് പുതുപ്പറമ്പില്‍ എന്നിവര്‍ ശുശ്രൂഷകള്‍ക്ക് നേതൃത്വം നല്‍കും. അരുവിത്തുറ: സെന്‍റ് ജോർജ് ഫൊറോന പള്ളിയിൽ ഇന്ന് സായാഹ്ന വചനപ്രഘോഷണവും സൗഖ്യാരാധനയും നടത്തും. വൈകുന്നേരം നാലിന് വിശുദ്ധ കുർബാന. തുടർന്ന് വചനപ്രഘോഷണം, 7.30ന് ദിവ്യകാരുണ്യ ആരാധന. ഫാ. ജയിംസ് ഏഴാനികാട്ട് ധ്യാനം നയിക്കും.

ചങ്ങനാശേരി പോലീസ് സ്റ്റേഷനിലെ മര്‍ദനം : അഡ്വ. റോയി തോമസിന്‍റെ 21 വര്‍ഷത്തെ നിയമപോരാട്ടത്തിന് വിജയം

ചങ്ങനാശേരി: പോലീസ് മര്‍ദനമേറ്റ അഭിഭാഷകന് 21 വര്‍ഷത്തിനുശേഷം നീതി. പോലീസ് ഉപദ്രവിച്ചതിനെതുടര്‍ന്ന് നഷ്‌ടപരിഹാരം ആവശ്യപ്പെട്ടുകൊണ്ട് ചങ്ങനാശേരി ബാറിലെ അഭിഭാഷകന്‍ അഡ്വ. റോയി തോമസാണ് അന്നത്തെ എസ്‌ഐ കെ. ശ്രീകുമാറിനും മൂന്നു പോലീസ് ഉദ്യോഗസ്ഥര്‍ക്കുമെതിരേ സിവില്‍ കേസ് നല്‍കിയത്. 2004ലാണ് കേസിന് ആസ്പദമായ സംഭവം നടന്നത്. അന്പതിനായിരം രൂപ നഷ്ടപരിഹാരം അനുവദിച്ച് 2004 മുതലുള്ള പലിശയും ചെലവും സഹിതം ഈടാക്കിയെടുക്കുന്നതിനാണ് കോടതി ഉത്തരവിട്ടത്. കെ. ശ്രീകുകുമാറിന് പിന്നീട് ഡിവൈഎസ്പിയായി പ്രമോഷന്‍ ലഭിച്ചിരുന്നു. ചങ്ങനാശേരി മുന്‍സിഫ് കോടതിയില്‍ നല്‍കിയിരുന്ന കേസ് കോട്ടയം മുന്‍സിഫ് കോടതിയിലേക്ക് മാറ്റുകയും തെളിവെടുത്ത ശേഷം വിചാരണക്കോടതി കേസ് തള്ളുകയും ചെയ്തു. തുടര്‍ന്ന് കോട്ടയം ജില്ലാ കോടതിയില്‍ നല്‍കിയ അപ്പീലിലാണ് വിധിയുണ്ടായിരിക്കുന്നത്. കേസ് നടക്കുന്നതിനിടെ കെ. ശ്രീകുമാര്‍ അന്തരിച്ചതിനാല്‍ ശേഷിക്കുന്ന പ്രതികളില്‍നിന്നു തുക ഈടാക്കിയെടുക്കുന്നതിനാണ് വിധി. തൃക്കൊടിത്താനം സെന്‍റ് സേവ്യേഴ്‌സ് പള്ളിയുമായി ബന്ധപ്പെട്ട ഒരു പരാതി എതിര്‍കക്ഷികളുമായി പറഞ്ഞുതീര്‍ക്കുന്നതിനാണ് 2004 മാര്‍ച്ച് 24ന് പള്ളിയെ പ്രതിനിധീകരിച്ച് അഡ്വ. റോയി തോമസ് ചങ്ങനാശേരി പോലീസ് സ്റ്റേഷനില്‍ എത്തിയത്. അന്ന് എസ്‌ഐയായിരുന്ന കെ. ശ്രീകുമാര്‍ അപമര്യാദയായി പെരുമാറിയതുമൂലം പോലീസ് സ്റ്റേഷനില്‍നിന്നും ഇറങ്ങിപ്പോയ അഡ്വ. റോയി തോമസിനെ എസ്‌ഐ കെ. ശ്രീകുമാറിന്‍റെ നിര്‍ദേശമനുസരിച്ച് ബിജു, ശ്രീകുമാര്‍, ജമാല്‍ എന്നീ പോലീസുകാര്‍ റോഡില്‍നിന്നു പിടിച്ചുവലിച്ചും തൂക്കിയെടുത്തും സ്റ്റേഷനിലെത്തിക്കുകയും തടവില്‍ വയ്ക്കുകയും മാനസികമായും ശാരീരികമായും പീഡിപ്പിക്കുകയും ചെയ്തുവെന്നായിരുന്നു പരാതി. വിവരമറിഞ്ഞ് പോലീസ് സ്റ്റേഷനിലെത്തിയ ചങ്ങനാശേരി ബാര്‍ അസോസിയേഷനിലെ അഭിഭാഷകരുടെ ഇടപെടലില്‍ എസ്‌ഐ കെ. ശ്രീകുമാര്‍ അഡ്വ. റോയി തോമസിനെ വിട്ടുനല്‍കുന്നതിനു നിര്‍ബന്ധിതനായി. പോലീസ് അതിക്രമത്തില്‍ പരിക്കേറ്റ അഡ്വ. റോയി തോമസ് ആശുപത്രിയില്‍ ചികിത്സയില്‍ കഴിഞ്ഞിരുന്നു. സംഭവത്തിൽ ചങ്ങനാശേരി ബാര്‍ അസോസിയേഷന്‍ രണ്ടാഴ്ച കോടതി ബഹിഷ്‌കരിക്കുകയും പോലീസ് സ്റ്റേഷനു മുമ്പില്‍ ധര്‍ണ അടക്കമുള്ള സമരമുറകള്‍ സ്വീകരിക്കുകയും കേരള ഹൈക്കോടതിയില്‍ ഹര്‍ജി നല്‍കുകയും ചെയ്തിരുന്നു. കേരള സര്‍ക്കാര്‍ വിഷയത്തില്‍ ഉന്നതതല അന്വേഷണം പ്രഖ്യാപിക്കുകയും അന്നത്തെ മധ്യമേഖലാ ഡിഐജി മുഹമ്മദ് യാസിന്‍ അന്വേഷണം നടത്തി എസ്‌ഐ കെ. ശ്രീകുമാറിനെതിരേ വകുപ്പുതല നടപടികള്‍ സ്വീകരിക്കുകയും ചെയ്തിരുന്നു.

ഓണം ഖാദി മേള ജില്ലാതല ഉദ്ഘാടനം ഇന്ന്

കോട്ടയം: ഓണം ഖാദി മേളയുടെ ജില്ലാതല ഉദ്ഘാടനം ഇന്ന് ഉച്ചകഴിഞ്ഞു മൂന്നിനു തിരുനക്കര ബാങ്ക് എംപ്ലോയീസ് ഹാളില്‍ മന്ത്രി വി.എന്‍. വാസവന്‍ നിര്‍വഹിക്കും. തിരുവഞ്ചൂര്‍ രാധാകൃഷ്ണന്‍ എംഎല്‍എ അധ്യക്ഷത വഹിക്കും. നഗരസഭാ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ ആദ്യ വില്പനയും ജില്ലാ പഞ്ചായത്ത് പ്രസിഡന്‍റ് ഹേമലത പ്രേം സാഗര്‍ ഗ്രാമ വ്യവസായ ഉത്പന്നങ്ങളുടെ വില്പനയും ജില്ലാ കളക്ടര്‍ ജോണ്‍ വി. സാമുവല്‍ സമ്മാന കൂപ്പണുകളുടെ വിതരണോദ്ഘാടനവും നിര്‍വഹിക്കും. ഖാദി ബോര്‍ഡ് അംഗങ്ങളായ കെ.എസ്. രമേഷ് ബാബു, കമലാ സദാനന്ദന്‍, സാജന്‍ തൊടുകയില്‍, ഖാദി ജില്ലാ പ്രോജക്ട് ഓഫീസര്‍ ജെസി ജോണ്‍, വിവിധ സര്‍വീസ് സംഘടനാ പ്രതിനിധികള്‍ എന്നിവര്‍ പ്രസംഗിക്കും.

നഗരപരിധിയില്‍ മാലിന്യം തള്ളുന്നവരെ പിടികൂടാന്‍ പോര്‍ട്ടബിള്‍ കാമറകള്‍

ചങ്ങനാശേരി: ചങ്ങനാശേരി നഗരസഭാ പരിധിയിലെ പൊതു ഇടങ്ങളില്‍ മാലിന്യം തള്ളുന്നവരെ പിടികൂടുന്നതിനും നിയമനടപടികള്‍ സ്വീകരിക്കുന്നതിനുമായി വിവിധ ഇടങ്ങളിലേക്ക് മാറ്റി സ്ഥാപിക്കാവുന്ന മൂന്നു പോര്‍ട്ടബിള്‍ കാമറകള്‍ സജ്ജമായി. നഗരസഭാ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍ ഉദ്ഘാടനം നിര്‍വഹിച്ചു. വൈസ് ചെയര്‍മാന്‍ മാത്യൂസ് ജോര്‍ജ് അധ്യക്ഷത വഹിച്ചു. ആരോഗ്യ സ്റ്റാൻഡിംഗ് കമ്മിറ്റി ചെയര്‍പേഴ്‌സണ്‍ എല്‍സമ്മ ജോബ്, ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ പി.എ. നിസാര്‍, കൗണ്‍സിലര്‍മാരായ ബീന ജോബി, രാജു ചാക്കോ, ഗീതാ അജി, ഉഷാ മുഹമ്മദ് ഷാജി, ബാബു തോമസ്, കുഞ്ഞുമോള്‍ സാബു, മുനിസിപ്പല്‍ സെക്രട്ടറി എന്‍.കെ വൃജ, ക്ലീന്‍സിറ്റി മാനേജര്‍ എം. മനോജ് തുടങ്ങിയവര്‍ പ്രസംഗിച്ചു.

മറ്റം കോളനി റോഡ് തകര്‍ന്നു: നാട്ടുകാര്‍ സമരത്തില്‍

ചങ്ങനാശേരി: വര്‍ഷങ്ങളായി തകര്‍ന്നുകിടക്കുന്ന സെന്‍റ് ജോസഫ്‌സ് ഹയര്‍ സെക്കന്‍ഡറി സ്‌കൂള്‍-മറ്റം കോളനി റോഡ് പുനര്‍നിര്‍മിക്കണമെന്നാവശ്യപ്പെട്ട് കോണ്‍ഗ്രസ് 34 -ാം വാര്‍ഡ് കമ്മിറ്റി സമരത്തിലേക്ക്. തകര്‍ന്നുകിടക്കുന്ന റോഡിന്‍റെ ഓടകള്‍ക്കു മുകളിലുള്ള തകര്‍ന്ന സ്ലാബുകളും കാല്‍നടയും ഗതാഗതവും ദുഷ്‌കരമാക്കുന്നു. റോഡ് നന്നാക്കാത്തതിലെ നഗരസഭാധികൃതരുടെ അനാസ്ഥയ്‌ക്കെതിരേ നടന്ന ധര്‍ണ കെപിസിസി അംഗം ഡോ. അജീസ് ബെന്‍ മാത്യൂസ് ഉദ്ഘാടനം ചെയ്തു. വാര്‍ഡ് കമ്മിറ്റി വൈസ് പ്രസിഡന്‍റ് വിനോദ് ആന്‍ഡ്രൂസ് അധ്യക്ഷത വഹിച്ചു. കോണ്‍ഗ്രസ് വെസ്റ്റ് മണ്ഡലം പ്രസിഡന്‍റ് തോമസ് അക്കര, എ.എ. ഫ്രാന്‍സിസ്, രേഖാ വിനോദ്, ആല്‍ബിന്‍ തോമസ് എന്നിവര്‍ പ്രസംഗിച്ചു. വാര്‍ഡ് കമ്മിറ്റി പ്രസിഡന്‍റ് മാത്തുക്കുട്ടി മുളയ്ക്കല്‍ കണ്‍വീനറായി സമരസമിതി രൂപീകരിച്ചു.

അങ്കണവാടിയിൽനിന്ന് വെളിച്ചെണ്ണ മോഷ്ടിച്ചയാള്‍ കാണാമറയത്ത്

ചങ്ങനാശേരി: വെളിച്ചെണ്ണ വില കുത്തനെ ഉയരുമ്പോള്‍ പെരുമ്പനച്ചി അങ്കണവാടിയുടെ പൂട്ടുപൊളിച്ച് സ്റ്റോര്‍ റൂമില്‍ ഭദ്രമായി സൂക്ഷിച്ചിരുന്ന നാല് ലിറ്റര്‍ വെളിച്ചെണ്ണ കവര്‍ന്നയാളെത്തേടി തൃക്കൊടിത്താനം പോലീസ്. പെരുമ്പനച്ചി ഗവൺമെന്‍റ് എല്‍പി സ്‌കൂളിന്‍റെ അടുക്കളയുടെ പൂട്ട് പൊളിച്ച് അരിപ്പെട്ടിയില്‍ സൂക്ഷിച്ചിരുന്ന വെട്ടുകത്തി എടുത്താണ് തൊട്ടുചേര്‍ന്നുള്ള അങ്കണവാടിയുടെ സ്റ്റോര്‍ റൂം കുത്തിത്തുറന്നത്. വെളിച്ചെണ്ണയ്ക്കൊപ്പം രണ്ടരക്കിലോ റാഗിപ്പൊടിയും നാല് കിലോ ശര്‍ക്കരയും മോഷണം പോയിരുന്നു. കേടായതിനെത്തുടര്‍ന്ന് അഴിച്ചുവച്ച ഒരു ഫാനും മോഷണം പോയിട്ടുണ്ട്. അങ്കണവാടിയിലേക്ക് ഭക്ഷ്യസാധനങ്ങള്‍ സ്റ്റോക്ക് വന്ന തൊട്ടടുത്ത ദിവസമാണ് മോഷണം നടന്നത്. തൃക്കൊടിത്താനം എസ്എച്ച്ഒ എം.ജെ. അരുണിന്‍റെ നേതൃത്വത്തിലുള്ള പോലീസ് സംഘമാണ് വെളിച്ചെണ്ണ മോഷ്ടാവിനെ തെരയുന്നത്.

കറുകച്ചാൽ ടൗണിന്‍റെ ചലനങ്ങൾ ഇനി കാമറക്കണ്ണിൽ

കറുകച്ചാൽ: പിഡബ്ല്യുഡി തീരുമാനമെടുത്തു.... കറുകച്ചാൽ ടൗണിന്‍റെ ചലനങ്ങൾ ഇനി കാമറക്കണ്ണുകൾ ഒപ്പിയെടുക്കും. ടൗണിന്‍റെ വിവിധ ഭാഗങ്ങളിൽ 10 കാമറകളാണ് സ്ഥാപിക്കുന്നത്. കറുകച്ചാൽ പഞ്ചായത്തുപടി മുതൽ നെത്തല്ലൂർ ജംഗ്ഷൻ വരെയുള്ള വിവിധ ഭാഗങ്ങൾ ഇവയുടെ പരിധിയിൽ വരും. ടൗണിന്‍റെ വിവിധ ഇടങ്ങളിൽ കാമറ സ്ഥാപിക്കുന്നതിന് ആറു വർഷം മുമ്പ് ജില്ലാ പഞ്ചായത്ത് പദ്ധതി തയാറാക്കുകയും 30 ഇടങ്ങളിൽ കാമറ സ്ഥാപിക്കുന്നതിനു 10 ലക്ഷം രൂപ വകയിരുത്തി പിഡബ്ല്യുഡി ഇലക്‌ട്രോണിക്സ് വിഭാഗത്തെ ചുമതല ഏൽപ്പിച്ചിരുന്നു. എന്നാൽ, പദ്ധതി നീണ്ടുപോയി. പിന്നീട് എസ്റ്റിമേറ്റ് എടുത്തപ്പോൾ കാമറകളുടെ എണ്ണം 16 ആയി കുറയുകയും തുക 20 ലക്ഷമായി ഉയരുകയും ചെയ്തു. തുടർന്ന് 20 ലക്ഷം രൂപ നാലുവർഷം മുമ്പ് ജില്ലാ പഞ്ചായത്ത് പിഡബ്ല്യുഡി ഇലക്‌ട്രോണിക്സ് വിഭാഗത്തിൽ അടച്ചെങ്കിലും പദ്ധതി നടപ്പിലായില്ല. തുക കൈമാറി വർഷങ്ങൾ കഴിഞ്ഞിട്ടും കാമറ സ്ഥാപിക്കാത്തതിനാൽ ജില്ലാ പഞ്ചായത്ത് തുക മടക്കി നൽകാൻ ആവശ്യപ്പെട്ടു. തുടർന്ന് കാമറ സ്ഥാപിക്കാൻ പിഡബ്ല്യുഡി നടപടികൾ സ്വീകരിച്ചു. പ്രൈവറ്റ് ബസ് സ്റ്റാൻഡിലും, മല്ലപ്പള്ളി, മണിമല റോഡുകളിലും കാമറകൾ സ്ഥാപിക്കും. പോലീസ് സ്റ്റേഷനിലാണ് സ്ക്രീനും അനുബന്ധ ഉപകരണങ്ങളും ക്രമീകരിച്ചിരിക്കുന്നത്.

കന്യാസ്ത്രീമാരുടെ അറസ്റ്റ്: തുടരുന്ന പ്രതിഷേധം

മേരി മൗണ്ട് പള്ളിയില്‍ ചങ്ങനാശേരി: ഛത്തീസ്ഗഡില്‍ ജയിലില്‍ കഴിയുന്ന കന്യാസ്ത്രിമാര്‍ക്ക് ഐക്യദാര്‍ഢ്യം പ്രഖ്യാപിച്ച് മേരി മൗണ്ട് റോമന്‍ കത്തോലിക്കാ പള്ളിയിൽ‍ സംഘടിപ്പിച്ച സമ്മേളനവും പ്രാര്‍ഥനാസംഗമവും വികാരി ഫാ. മാത്യു ഒഴത്തില്‍ ഉദ്ഘാടനം ചെയ്തു. പാരിഷ് കൗണ്‍സില്‍ സെക്രട്ടറി ഫ്രാന്‍സിസ് ബി. സാവിയോ അധ്യക്ഷത വഹിച്ചു. ഫാ. ജിസ് ആനിക്കല്‍, ജസ്റ്റിന്‍ ബ്രൂസ്, സിസ്റ്റര്‍ അനൂപ എന്നിവര്‍ പ്രസംഗിച്ചു. ളായിക്കാട് പള്ളിയിൽ ളായിക്കാട്: ഛത്തീസ്ഗഡില്‍ അറസ്റ്റിലായി ജയിലില്‍ അടയ്ക്കപ്പെട്ട സിസ്റ്റേഴ്‌സിനോട് ഐക്യദാര്‍ഢ്യം പ്രകടിപ്പിച്ച് ളായിക്കാട് സെന്‍റ് ജോസഫ് ദേവാലയത്തില്‍ വികാരി ഫാ. മാത്യു താന്നിയത്തിന്‍റെ നേതൃത്വത്തില്‍ ഉപവാസപ്രാര്‍ഥനയും ദിവ്യകാരുണ്യ ആരാധനയും നടത്തി. പ്രതിഷേധത്തിന്്‍ ഫാ. മാത്യു താന്നിയത്ത്, ഫാ. ജോമോന്‍ കടപ്പറക്കുന്നല്‍, സി.സി. ബാബു, ആന്‍റണി കളത്തിപ്പറമ്പില്‍, റെജി ആന്‍റണി, ജോര്‍ജുകുട്ടി ചെറ്റക്കാട്, ജോര്‍ജ് മരങ്ങാട്ട് എന്നിവര്‍ നേതൃത്വം വഹിച്ചു. കേരള കോണ്‍ഗ്രസ് മാടപ്പള്ളി: ഛത്തീസ്ഗഡില്‍ ക്രൈസ്തവ സന്യാസിനിമാരെ അന്യായമായി അറസ്റ്റ് ചെയ്തതില്‍ കേരള കോണ്‍ഗ്രസ് മാടപ്പള്ളി മണ്ഡലം കമ്മിറ്റി പ്രതിഷേധിച്ചു. മണ്ഡലം പ്രസിഡന്‍റ് കുഞ്ഞ് കൈതമറ്റം അധ്യക്ഷത വഹിച്ചു. സൈന തോമസ്, പഞ്ചായത്തംഗം രമ്യ റോയ്, ബേബിച്ചന്‍ ഓലിക്കര, ജയിംസ് പഴയചിറ, അപ്പച്ചന്‍കുട്ടി കപ്യാരുപറമ്പില്‍, ഷിനോ ഓലിക്കര, ജോയിച്ചന്‍ കാലായില്‍ എന്നിവര്‍ പ്രസംഗിച്ചു. പായിപ്പാട്: ഛത്തീസ്ഗഡില്‍ കന്യാസ്ത്രീകളെ അറസ്റ്റ് ചെയ്തതില്‍ പ്രതിഷേധിച്ച് കേരള കോണ്‍ഗ്രസ് പായിപ്പാട് മണ്ഡലം കമ്മിറ്റിയുടെ നേതൃത്വത്തില്‍ നാലുകോടി കവലയില്‍ ധര്‍ണയും പൊതുസമ്മേളനവും നടത്തി. മണ്ഡലം പ്രസിഡന്‍റ് ജോഷി കുറുക്കന്‍കുഴിയുടെ അധ്യക്ഷതയില്‍ കേരള കോണ്‍ഗ്രസ് ഉന്നതാധികാര സമിതിയംഗം വി.ജെ. ലാലി ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് മാത്തുക്കുട്ടി പ്ലാത്താനം ഭരണഘടനാ സംരക്ഷണ പ്രതിജ്ഞ ചൊല്ലിക്കൊടുത്തു. സെബാസ്റ്റ്യന്‍ സ്രാങ്കല്‍, ജെസി പുളിമൂട്ടില്‍, ഡാര്‍ളി ടെജി, റോജി സെബാസ്റ്റ്യന്‍ തുടങ്ങിയവര്‍ പ്രസംഗിച്ചു. നെടുംകുന്നം ഫൊറോന കറുകച്ചാല്‍: ഭാരതത്തിലെ ഓരോ കന്യാസ്ത്രീയും വ്രതം എടുക്കുന്നതുതന്നെ അവശതയിലായവരെ സംരക്ഷിക്കുമെന്നുള്ള പ്രതിജ്ഞയോടുകൂടി ആണെന്നും ഇതു മൂലമുള്ള ഏതു പീഡകൾ സഹിച്ചാലും അവശത അനുഭവിക്കുന്നവരെ സംരക്ഷിക്കാന്‍ തയാറാണെന്നും ചങ്ങനാശേരി അതിരൂപത വികാരി ജനറല്‍ മോണ്‍. സ്‌കറിയ കന്യാകോണില്‍. കന്യാസ്ത്രീകളെ അകാരണമായി അറസ്റ്റ് ചെയ്തു ജയിലില്‍ അടച്ചതിനെതിരേ കത്തോലിക്ക കോണ്‍ഗ്രസ് നെടുംകുന്നം ഫൊറോനയുടെ നേതൃത്വത്തില്‍ കറുകച്ചാലില്‍ സംഘടിപ്പിച്ച പ്രതിഷേധ യോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഫൊറോന പ്രസിഡന്‍റ് ജോമോന്‍ ഇടത്താഴെ അധ്യക്ഷത വഹിച്ചു. ഫൊറോന വികാരി ഫാ. വര്‍ഗീസ് കൈതപ്പറമ്പില്‍, ഫാ. റ്റോബിന്‍ പള്ളിക്കല്‍, കത്തോലിക്ക കോണ്‍ഗ്രസ് അതിരൂപത പ്രസിഡന്‍റ് ബിജു സെബാസ്റ്റ്യന്‍, അതിരൂപത വൈസ് പ്രസിഡന്‍റ് ഷിജി ജോൺസൺ, യുവദീപ്തി-എസ്എംവൈഎം ഫൊറോന പ്രസിഡന്‍റ് നോയല്‍ പ്രേംസണ്‍, പി.ജെ. ചാക്കോ പനമുക്കം, സിസ്റ്റര്‍ ബെറ്റി എസ്എബിഎസ്, ജോസഫ് പത്തുംപാടം എന്നിവര്‍ പ്രസംഗിച്ചു. കേരള കോണ്‍ഗ്രസ്-എം മാടപ്പള്ളി: ഛത്തീസ്ഗഡില്‍ കന്യാസ്ത്രീമാരെ അറസ്റ്റ് ചെയ്ത് ജയിലില്‍ അടച്ച നടപടിക്കെതിരേ കേരള കോണ്‍ഗ്രസ് -എം മാടപ്പള്ളി മണ്ഡലം കമ്മിറ്റി സംഘടിപ്പിച്ച ധര്‍ണ ജോബ് മൈക്കിള്‍ എംഎല്‍എ ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് ലാലിച്ചന്‍ കുന്നിപ്പറമ്പില്‍, മണ്ഡലം പ്രസിഡന്‍റ് അലക്‌സാണ്ടര്‍ പ്രാക്കുഴി, ലിനു ജോബ്, എം.എ. മാത്യു, ബിനോയ് മുക്കാടന്‍, ഫിലോമിന മാത്യു, ബിനു തെക്കേക്കര, ഷിബു കൊല്ലറുകുന്നേല്‍, അജിന്‍ അറയ്ക്കല്‍, ടോമിച്ചന്‍ കടന്തോട്, കുഞ്ഞുമോന്‍ താന്നിമൂട്ടില്‍ എന്നിവര്‍ പ്രസംഗിച്ചു. പുന്നവേലിയിൽ മൗനജാഥ പുന്നവേലി: കന്യാസ്ത്രീകളെ അന്യായമായി തുറങ്കിലടിച്ചതിനെ അപലപിച്ചുകൊണ്ട് പുന്നവേലി എക്യുമെനിക്കൽ ക്രിസ്ത്യൻ ഫെലോഷിപ്പിന്‍റെ ആഭിമുഖ്യത്തിൽ മൗനജാഥയും ഐക്യദാർഢ്യപ്രഖ്യാപനവും നടത്തി. പുന്നവേലി ലിറ്റിൽ ഫ്ളവർ ഇടവക വികാരി ഫാ. മാത്യു അഞ്ചിൽ, സെന്‍റ് ജയിംസ് സിഎസ്ഐ ഇടവക വികാരി ഫാ. ഷിബിൻ വർഗീസ്. സെന്‍റ് തോമസ് മാർത്തോമ്മാ ഇടവക വികാരി ഫാ. സുനിൽ ജോർജ് മാത്യു എന്നിവർ പ്രസംഗിച്ചു.

തകർച്ചാഭീഷണിയിലായ പനമ്പുകാട് കലുങ്ക് പുനർനിർമിക്കണം

വൈക്കം: വൈക്കം-പനമ്പുകാട് റോഡിലെ കാലപ്പഴക്കത്താൽ ജീർണിച്ച് തകർച്ചാഭീഷണിയിലായ പനമ്പുകാട് കലുങ്ക് പുനർനിർമിക്കണമെന്ന ആവശ്യം ശക്തമായി. പനമ്പുകാട് നാട്ടുതോട് കായലുമായിചേരുന്ന ഭാഗത്ത് 30 വർഷം മുമ്പ് നിർമിച്ച കലുങ്കാണ് തകർച്ചാഭീഷണിയിലായത്. പാലത്തിന്‍റെ അടിഭാഗത്ത് കോൺക്രീറ്റ് അടർന്ന് തുരുമ്പിച്ച് ജീർണിച്ച കമ്പികൾ തെളിഞ്ഞ നിലയിലാണ്. പാലത്തിനോടു ചേർന്ന് ഉണ്ടായിരുന്ന കൽക്കെട്ട് തകർന്നിട്ട് നാളുകളായി. കൽക്കെട്ട് തകർന്ന ഭാഗത്തുകൂടി ഇരുചക്ര വാഹന യാത്രികൻ ഏതാനും മാസം മുമ്പ് കായലിലേക്ക് വീണിരുന്നു. നാട്ടുകാർ കണ്ട് ഉടൻ രക്ഷിച്ചതിനാൽ ആളപായം ഒഴിവായി. ഇഷ്ടിക കയറ്റി വന്ന മിനിലോറിയും ഇവിടെ മറിഞ്ഞിട്ടുണ്ട്.

കന്യാസ്ത്രീകളുടെ അറസ്റ്റ് : നാടാകെ പ്രതിഷേധം

കടുത്തുരുത്തി: ഛത്തിസ്ഗഡില്‍ കന്യാസ്ത്രീകളെ അകാരണമായി അറസ്റ്റ് ചെയ്ത സംഭവത്തില്‍ പ്രതിഷേധം തുടരുന്നു. വിവിധ കേന്ദ്രങ്ങളില്‍ പ്രാര്‍ഥനകളും പ്രതിഷേധവും സംഘടിപ്പിച്ചു. ഛത്തീസ്ഗഡില്‍ മിഷണറി പ്രവര്‍ത്തനരംഗത്ത് പ്രവര്‍ത്തിക്കുന്ന രണ്ട് കന്യാസ്ത്രീകളെ കള്ളക്കേസില്‍ കുടുക്കി അറസ്റ്റ് ചെയ്ത നടപടിയില്‍ അറുനൂറ്റിമംഗലം സെന്‍റ് തോമസ് മലകയറ്റപള്ള പ്രതിഷേധിച്ചു. പിതൃവേദി, വിന്‍സെന്‍റ് ഡി പോള്‍, മാതൃവേദി, എകെസിസി, എസ്എംവൈഎം, മിഷന്‍ ലീഗ് സംഘടനകളും ഇടവക സമൂഹവും ചേര്‍ന്നാണ് പ്രതിഷേധം നടത്തിയത്. വികാരി ഫാ.അഗസ്റ്റിന്‍ വരിക്കമാക്കില്‍ നേതൃത്വം നല്‍കി. കടുത്തുരുത്തി സെന്‍റ് മേരീസ് ഫൊറോന താഴത്തുപള്ളി സഹവികാരി ഫാ.ജോണ്‍ നടുത്തടം ഉദ്ഘാടനം ചെയ്തു. വൈകുന്നേരത്തെ വിശുദ്ധ കുര്‍ബാനയെത്തുടര്‍ന്ന് പ്രതിഷേധ സമ്മേളനവും കന്യാസ്ത്രീകളോടുള്ള ഐക്യദാര്‍ഢ്യവുമായി മലമുകളിലേക്ക് കുരിശിന്‍റെ വഴിയും നടത്തി. മദര്‍ സുപ്പീരിയര്‍ സിസ്റ്റര്‍ ടെസി കുരിശുംമൂട്ടില്‍ എസ്എച്ച്, വി.കെ. കുര്യന്‍ വടകരകാലായില്‍ തുടങ്ങിയവര്‍ പ്രസംഗിച്ചു. തലയോലപ്പറന്പ് സെന്‍റ് ജോർജ് ഇടവക തലയോലപ്പറമ്പ്: ഛത്തീസ്ഗഡിൽ അടിസ്ഥാനരഹിതമായ ആരോപണങ്ങൾ ഉന്നയിച്ച് അറസ്റ്റ് ചെയ്തു ജയിലിലടച്ച കന്യാസ്ത്രീകളുടെ മോചനത്തിനായി തലയോലപ്പറമ്പ് ഇടവകയുടെ നേതൃത്വത്തിൽ പ്രതിഷേധ റാലി നടത്തി. പള്ളിയിൽ നിന്നാരംഭിച്ച് നഗരം ചുറ്റി പള്ളിക്കവലയിലെ കപ്പേളയ്ക്ക് മുന്നിൽ റാലി സമാപിച്ചു.തുടർന്ന് നടന്ന പ്രതിഷേധ സംഗമം ഇടവക വികാരി റവ. ഡോ. ബെന്നി ജോൺ മാരാം പറമ്പിൽ ഉദ്ഘാടനം ചെയ്തു. സഹ വികാരി ഫാ. ആൽജോ കളപ്പുരയ്ക്കൽ, കുര്യാ ക്കോസ് മഠത്തിക്കുന്നേൽ, ബേബി പുത്തൻപറമ്പിൽ, ജോൺസൻ കൊച്ചു പറമ്പിൽ,റിൻസൺ പന്നിക്കോട്ടിൽ,തങ്കച്ചൻ കളമ്പുകാട്, ഇമ്മാനുവേൽ അരയത്തേൽ എന്നിവർ പ്രസംഗിച്ചു. കേരള കോൺഗ്രസ്-എം തലയോലപ്പറന്പ് മണ്ഡലം കമ്മിറ്റി തലയോലപ്പറമ്പ്: കേരള കോൺഗ്രസ്-എം തലയോലപ്പറമ്പ് മണ്ഡലം കമ്മിറ്റി ഛത്തീസ്ഗഡിൽ കന്യാസ്ത്രീകളെ അറസ്റ്റ് ചെയ്തു തുറങ്കലിൽ അടച്ചതിൽ പ്രതിഷേധിച്ച് കേരളകോൺഗ്രസ്-എം തലയോലപ്പറമ്പ് മണ്ഡലം കമ്മിറ്റിയുടെ നേതൃത്വത്തിൽ പ്രതിഷേധ മാർച്ചും യോഗവും നടത്തി. സംസ്ഥാന കമ്മിറ്റി അംഗം സി.ജെ.ജോൺ പാലയ്ക്കകാലാ മാർച്ച് ഉദ്ഘാടനം ചെയ്തു. മണ്ഡലം പ്രസിഡന്‍റ് ആന്‍റണി കളമ്പുകാടൻ അധ്യക്ഷത വഹിച്ചു. പി.വി. കുര്യൻ പ്ലാക്കോട്ടയിൽ, രാജു പട്ടശേരി, സിബി ഉപ്പാണിയിൽ,പോൾ അലക്സ് പാറശേരി തുടങ്ങിയവർ പ്രസംഗിച്ചു. മരങ്ങോലി സെന്‍റ് മേരീസ് ഇടവക മരങ്ങോലി: ഛത്തീസ്ഗഡില്‍ മനുഷ്യക്കടത്തും മതപരിവര്‍ത്തനവും ആരോപിച്ച് ജയിലിടച്ച സിസ്റ്റര്‍ വന്ദന ഫ്രാന്‍സീസിനും സിസ്റ്റര്‍ പ്രീതി മേരിക്കും ഐക്യദാര്‍ഢ്യം പ്രഖ്യാപിച്ച് മരങ്ങോലി ഇടവകയില്‍ വിശുദ്ധ കുര്‍ബാനയും ആരാധനയും ജപമാല റാലിയും നടത്തി. തിരുകര്‍മങ്ങള്‍ക്ക് വികാരി റവ.ഡോ. ജോസഫ് പരിയാത്ത് കാര്‍മികത്വം വഹിച്ചു. ജപമാല റാലിക്ക് വികാരിക്കൊപ്പം ഫാ.ജയിംസ് പാലയ്ക്കത്തടത്തില്‍, ഫാ.ജോബി പാലയ്ക്കത്തടത്തില്‍ കൈക്കാരന്മാരായ ബേബി ചെങ്ങംന്താനം, ഫ്രാന്‍സീസ് ഊളവള്ളിയ്ക്കല്‍, ബോബി കരികുളത്തേല്‍, പാരീഷ് കൗണ്‍സില്‍ സെക്രട്ടറി ബെന്നി കൊഴുപ്പന്‍കുറ്റി, ജോമോന്‍ കളപ്പുരയ്ക്കല്‍ എന്നിവര്‍ നേതൃത്വം നൽകി. കലയത്തുംകുന്ന്, പൊതി പള്ളികൾ കടുത്തുരുത്തി: ഛത്തീസ്ഗഡില്‍ മിഷനറി പ്രവര്‍ത്തനം നടത്തിക്കൊണ്ടിരുന്ന മലയാളികളായ രണ്ടു കന്യാസ്ത്രീകളെ അറസ്റ്റ് ചെയ്തു ജയിലില്‍ അടച്ച നടപടിക്കെതിരേ കലയത്തുംകുന്ന് സെന്‍റ് ആന്‍റണീസ് പള്ളിയുടെയും പൊതി സെന്‍റ് മൈക്കിള്‍സ് പള്ളിയുടെയും സംയുക്താഭിമുഖ്യത്തില്‍ മൗനജാഥയും പ്രതിഷേധയോഗവും നടത്തി. ജയിലില്‍ അടച്ചിരിക്കുന്ന കന്യാസ്ത്രീകളെ എത്രയുംവേഗം മോചിപ്പിക്കണമെന്നു യോഗം ആവശ്യപ്പെട്ടു. യോഗത്തില്‍ സെന്‍റ് ആന്‍റണീസ് പള്ളി വികാരി ഫാ.പോള്‍ കോട്ടക്കല്‍, സെന്‍റ് മൈക്കിള്‍സ് പള്ളി പ്രതിനിധി പീറ്റര്‍ തറപ്പേല്‍, എ.കെ. ജോര്‍ജ് ആറാക്കല്‍, എ.യു. ടോമി ആറാക്കല്‍ എന്നിവര്‍ പ്രസംഗിച്ചു. കേരള കോണ്‍ഗ്രസ്-എം ഞീഴൂര്‍ മണ്ഡലം കമ്മിറ്റി ഞീഴൂര്‍: കേരള കോണ്‍ഗ്രസ്-എം ഞീഴൂര്‍ മണ്ഡലം കമ്മിറ്റിയുടെ നേതൃത്വത്തില്‍ ഛത്തീസ്ഗഡില്‍ കന്യാസ്ത്രീകളെ കള്ളക്കേസില്‍ അറസ്റ്റ് ചെയ്ത നടപടിയില്‍ പ്രതിഷേധിച്ചു പ്രതിഷേധജ്വാലയും പ്രകടനവും ധര്‍ണയും നടത്തി. പാര്‍ട്ടി ഉന്നതാധികാര സമിതിയംഗം സഖറിയാസ് കുതിരവേലി ഉദ്ഘാടനം ചെയ്തു. മണ്ഡലം പ്രസിഡന്‍റ് പി.റ്റി കുര്യന്‍ അധ്യക്ഷത വഹിച്ചു. മണ്ഡലം സെക്രട്ടറി ജോര്‍ജ് മാത്യു ഐക്കരേട്ട്, പഞ്ചായത്ത് പ്രസിഡന്‍റ് ശ്രീകല ദിലീപ്, ബ്ലോക്ക് പഞ്ചായത്തംഗം നളിനി രാധാകൃഷ്ണന്‍, ജനപ്രതിനിധികളായ തോമസ് പനക്കന്‍, ജോര്‍ജ് കൂവേലി, ജോണ്‍സണ്‍ തെങ്ങുംപള്ളി എന്നിവര്‍ പ്രസംഗിച്ചു.

നിയന്ത്രണംവിട്ട കാർ മതിലിൽ ഇടിച്ചുകയറി

തലയോലപ്പറമ്പ്: നിയന്ത്രണംവിട്ട കാർ മതിലിൽ ഇടിച്ചുകയറി. കാറിൽ സഞ്ചരിച്ചിരുന്ന മറവൻതുരുത്ത് സ്വദേശിയായ യുവാവ് പരിക്കേൽക്കാതെ അത്ഭുതകരമായി രക്ഷപ്പെട്ടു. ഇടിയുടെ ആഘാതത്തിൽ കാറിന്‍റെ മുൻഭാഗം പൂർണമായി തകർന്നു. ഇന്നലെ പുലർച്ചെ മുന്നോടെ ടോൾ പാലാംകടവ് റോഡിൽ ചാണിപ്പാടത്തിനു സമീപത്തായിരുന്നു അപകടം. ബബിത മൻസിലിൽ അബ്ദുൽ ഖാദറിന്‍റെ മതിലിലേക്കാണ് കാർ ഇടിച്ചു കയറിയത്.

വരുമാനത്തിലും റാങ്കിംഗിലും മുന്നേറിയെങ്കിലും വൈക്കം റോഡിന് അവഗണന

കടുത്തുരുത്തി; വരുമാനത്തിലും റാങ്കിംഗിലും കുതിച്ചുയര്‍ന്ന് വൈക്കം റോഡ് റെയില്‍വേ സ്റ്റേഷന്‍. അതേസമയം പുതിയ സ്റ്റോപ്പുകളുടെ കാര്യത്തില്‍ റെയില്‍വേയുടെ അവഗണന തുടരുന്നു. ദക്ഷിണറെയില്‍വേ തിരുവനന്തപുരം ഡിവിഷന്‍റെ 2024-25 സാമ്പത്തിക വര്‍ഷത്തെ കണക്കിലാണ് വരുമാനത്തിലും റാങ്കിംഗിലും കടുത്തുരുത്തി ആപ്പാഞ്ചിറയിലെ വൈക്കം റോഡ് റെയില്‍വേ സ്റ്റേഷന്‍ മുന്നേറ്റം നടത്തിയത്. മുന്‍വര്‍ഷത്തെ 70,16,379 രൂപയില്‍ നിന്നും 92,49,047 രൂപയിലേക്കും റാങ്കിംഗില്‍ 45ൽനിന്ന് 37 ലേക്കും വൈക്കം റോഡ് സ്റ്റേഷന്‍ മുന്നേറി. തൊട്ടടുത്ത റെയില്‍വേ സ്റ്റേഷനുകളില്‍ വരുമാനം ഇടിയുമ്പോഴാണ് പുതിയ ട്രെയിന്‍ സ്റ്റോപ്പുകള്‍ ലഭിക്കാതെ വൈക്കത്തിന്‍റെ ഈ നേട്ടമെന്നതു ശ്രദ്ധേയം. ഇതുവരെയും റിസര്‍വേഷന്‍ കൗണ്ടര്‍ എന്ന ആവശ്യം പരിഗണിക്കപ്പെട്ടിട്ടില്ലെങ്കിലും ആകെ വരുമാനത്തിന്‍റെ സിംഹഭാഗവും സംഭാവന ചെയ്യുന്നത് റിസര്‍വേഷന്‍ വഴിയാണെന്നത് വൈക്കം റോഡിന്‍റെ മാത്രം പ്രത്യേകതയാണ്. വൈക്കം, കടുത്തുരുത്തി, പാലാ നിയോജകമണ്ഡലങ്ങളിലെ ജനങ്ങള്‍ക്ക് ഏറ്റവും സൗകര്യപ്രദവും മെയിന്‍ ലൈനില്‍ ഐലന്‍ഡ് പ്ലാറ്റ്ഫോമുകള്‍ ഉള്‍പ്പെടെ മൂന്ന് പ്ലാറ്റ് ഫോമുകളുമുള്ള കോട്ടയം-എറണാകുളം മെയിന്‍ റോഡിനോട് ചേര്‍ന്ന ഏക സ്റ്റേഷനായ നിരവധി തീര്‍ഥാടന കേന്ദ്രങ്ങള്‍ക്കും ടൂറിസം കേന്ദ്രങ്ങള്‍ക്കും അടുത്ത സ്റ്റേഷനായ വൈക്കം റോഡ് സ്റ്റേഷനോടുള്ള റെയില്‍വേ അവഗണന ഇനിയെങ്കിലും അവസാനിപ്പിക്കണമെന്നാണ് യാത്രക്കാരുടെ ആവശ്യം. മണ്ഡലത്തില്‍ നിന്നുള്ള കേന്ദ്രസഹമന്ത്രി അടക്കമുള്ള ജനപ്രതിനിധികള്‍ ഇക്കാര്യത്തില്‍ ഇടപെട്ട് കൂടുതല്‍ ട്രെയിനുകള്‍ക്ക് സ്റ്റോപ്പ് അനുവദിപ്പിക്കണമെന്നു യാത്രക്കാര്‍ ആവശ്യമുന്നയിക്കുന്നു.

അതിരന്പുഴ പള്ളിയിൽ വിശുദ്ധ അൽഫോൻസാമ്മയുടെ തിരുനാളിനു കൊടിയേറി

അതിരമ്പുഴ: സെന്‍റ് മേരീസ് ഫൊറോന പള്ളിയിൽ അൽഫോൻസാ ട്രസ്റ്റിന്‍റെ നേതൃത്വത്തിൽ നടത്തുന്ന വിശുദ്ധ അൽഫോൻസാമ്മയുടെ തിരുനാളിനു കൊടിയേറി. വികാരി ഫാ. മാത്യു പടിഞ്ഞാറേക്കുറ്റ് കൊടിയേറ്റ് കർമം നിർവഹിച്ചു. തുടർന്ന് വിശുദ്ധ കുർബാനയും മധ്യസ്ഥ പ്രാർഥനയും നടത്തി. ഇന്ന് വൈകുന്നേരം അഞ്ചിന് വിശുദ്ധ കുർബാന. നാളെ വൈകുന്നേരം 4.5ന് വിശുദ്ധ കുർബാന, വചന സന്ദേശം: ഫാ. അലൻ കാഞ്ഞിരത്തുംമൂട്ടിൽ. മെഴുകുതിരി പ്രദക്ഷിണം, നേർച്ചവിതരണം.

ദ്വിദിന അന്താരാഷ്‌ട്ര സെമിനാറിനു തുടക്കം

കോട്ടയം: നിര്‍മിത ബുദ്ധിയുടെ യുഗത്തില്‍ ലൈബ്രറികളുടെ പ്രസക്തിയും സാധ്യതകളും പുതിയ മാനങ്ങള്‍ കണ്ടെത്തുകയാണെന്ന് എംജി യൂണിവേഴ്‌സിറ്റി രജിസ്ട്രാര്‍ ഡോ. ബിസ്മി ഗോപാലകൃഷ്ണന്‍. കേരള കോളജ് ലൈബ്രേറിയന്‍സ് അസോസിയേഷന്‍, എംജി യൂണിവേഴ്സിറ്റി റീജന്‍റെയും ബിഷപ് ചൂളപ്പറമ്പില്‍ മെമ്മോറിയല്‍ കോളജ് ലൈബ്രറിയുടെയും സംയുക്താഭിമുഖ്യത്തില്‍ മഹാത്മാ ഗാന്ധി യൂണിവേഴ്സിറ്റിയുമായി സഹകരിച്ച് ബിസിഎം കോളജില്‍ സംഘടിപ്പിച്ച ദ്വിദിന അന്താരാ‌ഷ്‌ട്ര സെമിനാര്‍ ബിബ്ലിയോസ്ഫിയര്‍ 2025 ഉദ്ഘാടനം ചെയ്ത് പ്രസംഗിക്കുകയായിരുന്നു ഡോ. ബിസ്മി. കോളജ് മാനേജര്‍ ഫാ. ഏബ്രഹാം പറമ്പേട്ട് അധ്യക്ഷത വഹിച്ചു. പ്രിന്‍സിപ്പല്‍ ഡോ. കെ.വി. തോമസ്, ബിസിഎം കോളജ് ലൈബ്രേറിയന്‍ സിസ്റ്റര്‍ ജിന്‍സി ഫിലിപ്പ്, ഡോ. അനറ്റ് സുമന്‍ ജോസ്, ലിസ് ജേക്കബ്, മുഹമ്മദ് സിയാദ് എന്നിവര്‍ പ്രസംഗിച്ചു. സെമിനാറിന്‍റെ ആദ്യ ദിനത്തിലെ ക്ലാസുകൾക്ക് സ്വീഡനിലെ ഉപ്സല യൂണിവേഴ്സിറ്റി അസോസിയേറ്റ് പ്രഫസര്‍ ഡോ. സൂരജ് ജോസ്, സെന്‍റ് സ്റ്റീഫന്‍സ് കോളജ് ലൈബ്രേറിയന്‍ എസ്. ജാസിമുദ്ദീന്‍ എന്നിവര്‍ നേതൃത്വം നല്‍കി.

ലൂര്‍ദിയന്‍ ബാസ്‌കറ്റ് ബോള്‍: വാഴക്കുളം കാര്‍മല്‍, കോഴിക്കോട് പ്രോവിഡൻസ്, കോട്ടയം ലൂർദ് ജേതാക്കൾ

കോട്ടയം: ലൂര്‍ദിയന്‍ ബാസ്‌കറ്റ്ബോള്‍ കിരീടം വാഴക്കുളം കാര്‍മല്‍ സിഎംഐ സ്‌കൂളിന്. 20-ാമത് ലൂര്‍ദിയന്‍ ബാസ്‌കറ്റ് ബോള്‍ ടൂര്‍ണമെന്‍റിന്‍റെ ആണ്‍കുട്ടികളുടെ വിഭാഗം ഫൈനലില്‍ കോട്ടയം ലൂര്‍ദിനെ പരാജയപ്പെടുത്തി വാഴക്കുളം കാര്‍മല്‍ സിഎംഐ (36-21) ജേതാക്കളായി. ടൂര്‍ണമെന്‍റിലെ മികച്ച കളിക്കാരനായി വാഴക്കുളം കാര്‍മല്‍ സിഎംഐയുടെ നൈജല്‍ ജേക്കബിനെയും ഭാവി വാഗ്ദാനമായി കോട്ടയം ലൂര്‍ദിന്‍റെ ജോയല്‍ എം. ചാക്കോയെയും തെരഞ്ഞെടുത്തു. പെണ്‍കുട്ടികളുടെ വിഭാഗം ഫൈനലില്‍ കോട്ടയം മൗണ്ട് കാര്‍മലിനെ പരാജയപ്പെടുത്തി കോഴിക്കോട് പ്രൊവിഡന്‍സ് (51-64) ജേതാക്കളായി. പെണ്‍കുട്ടികളുടെ വിഭാഗത്തില്‍ മികച്ച കളിക്കാരിയായി കോഴിക്കോട് പ്രൊവിഡന്‍സിന്‍റെ കെ. അക്ഷരയെയും ഭാവി വാഗ്ദാനമായി കോട്ടയം മൗണ്ട് കാര്‍മലിന്‍റെ ഡെനിയ മെര്‍സാ ഡിമലിനെയും തെരഞ്ഞെടുത്തു. ജൂണിയര്‍ വിഭാഗം ആണ്‍കുട്ടികളുടെ മത്സരത്തില്‍ പുതുപ്പള്ളി ഡോണ്‍ ബോസ്‌കോയെ (32-18) പരാജയപ്പെടുത്തി കോട്ടയം ലൂര്‍ദ് ജേതാക്കളായി. ലൂര്‍ദിന്‍റെ ഷോണ്‍ ജയിംസ് മികച്ച കളിക്കാരനായും ഡോണ്‍ ബോസ്‌കോയുടെ അലന്‍ തോമസ് ഭാവി വാഗ്ദാനമായും തെരഞ്ഞെടുക്കപ്പെട്ടു. ജൂണിയര്‍ വിഭാഗം പെണ്‍കുട്ടികളുടെ മത്സരത്തില്‍ മൗണ്ട് കാര്‍മലിനെ (21-20) പരാജയപ്പെടുത്തി കോട്ടയം ലൂര്‍ദ് ജേതാക്കളായി. ലൂര്‍ദിന്‍റെ ജില്‍ഷാ മറിയം ജിനു മികച്ച കളിക്കാരിയായും മൗണ്ട് കാര്‍മലിന്‍റെ ജസ്റ്റീന ജോസഫ് ഭാവി വാഗ്ദാനമായും തെരഞ്ഞെടുക്കപ്പെട്ടു. സമാപന സമ്മേളനം കോട്ടയം വിജിലന്‍സ് ജഡ്ജി കെ.വി. രജനീഷ് ഉദ്ഘാടനം ചെയ്തു സമ്മാനങ്ങള്‍ നല്‍കി. സ്‌കൂള്‍ മാനേജര്‍ ഫാ. ജേക്കബ് വട്ടയ്ക്കാട്ട് അധ്യക്ഷത വഹിച്ചു. പ്രിന്‍സിപ്പല്‍ ഫാ. തോമസ് പാറത്താനം, കണ്‍വീനര്‍ സിജോ സൈമണ്‍ എന്നിവര്‍ പ്രസംഗിച്ചു.

അൽഫോൻസാ തീർഥാടനം: പതാക പ്രയാണം നടത്തി

ആർപ്പൂക്കര: വിശുദ്ധ അൽഫോൻസാമ്മയുടെ ജന്മഗൃഹത്തിലേക്ക് ചങ്ങനാശേരി അതിരൂപത ചെറുപുഷ്പ മിഷൻലീഗിന്‍റെ ആഭിമുഖ്യത്തിൽ ഇന്നു നടത്തുന്ന തീർഥാടനത്തിനു മുന്നോടിയായി കുടമാളൂർ മേഖലയുടെ നേതൃത്വത്തിൽ ഇന്നലെ പതാക പ്രയാണം നടത്തി. ആർപ്പൂക്കര ചെറുപുഷ്പ ദേവാലയത്തിൽ മിഷൻലീഗ് സ്ഥാപക ഡയറക്ടർ ഫാ. ജോസഫ് മാലിപ്പറമ്പിലിന്‍റെ കബറിടത്തിൽ അതിരൂപത ഡയറക്ടർ റവ.ഡോ. വർഗീസ് പുത്തൻപുരയ്ക്കലിന്‍റെയും അസിസ്റ്റൻ്റ് ഡയറക്ടർ ഫാ. സെബാസ്റ്റ്യൻ മാമ്പറയുടെയും കാർമികത്വത്തിൽ പ്രത്യേക പ്രാർഥന നടത്തി. തുടർന്ന് കുടമാളൂർ മേഖലാ പ്രസിഡന്‍റ് അമൽ ജോസഫ് പതാക ഏറ്റുവാങ്ങി. അൽഫോൻസാ ജന്മഗൃഹത്തിൽ പ്രയാണം എത്തിയ ശേഷം അതിരൂപത പ്രസിഡന്‍റ് ഫെബിൻ അഗസ്റ്റിൻ പതാക ഉയർത്തി. തുടർന്ന് ഫാ. ജോസ് പറപ്പള്ളിയുടെ കാർമികത്വത്തിൽ വിശുദ്ധ കുർബാന അർപ്പിച്ചു. ആർച്ച് പ്രീസ്റ്റ് റവ.ഡോ. ജോർജ് മംഗലത്ത് സന്ദേശം നൽകി. മേഖലാ ഓർഗനൈസിംഗ് പ്രസിഡന്‍റ് ജെറിൻ കളപ്പുര, സിസ്റ്റർ ആൽഫി അന്ന എഫ്സിസി, ലൂക്ക് അലക്സ് പിണമറുകിൽ, സാലിച്ചൻ തുമ്പേക്കളം, ജോൺ പനച്ചിക്കൽ, എന്നിവർ നേതൃത്വം നൽകി.

ഇതരസംസ്ഥാന തൊഴിലാളിയുടെ മൃതദേഹം മെഡിക്കൽ കോളജിൽ ഉപേക്ഷിച്ചെന്ന്

ഗാന്ധിനഗർ: വെസ്റ്റ് ബംഗാൾ സ്വദേശിയുടെ മൃതദേഹം നഷ്ടപരിഹാരം ആവശ്യപ്പെട്ടതിന്‍റെ പേരിൽ കരാറുകാരൻ ആശുപത്രിയിൽ ഉപേക്ഷിച്ചെന്നു പരാതി. എറണാകുളത്ത് കെട്ടിടം പണിക്കിടെ വീണു പരിക്കേറ്റ നിൽരത്തൻ ബിശ്വാസിനെ (41) കഴിഞ്ഞ 22നാണ് കോട്ടയം മെഡിക്കൽ കോളജ് ആശുപത്രിയിലെത്തിച്ചത്. ചികിത്സയിലിരിക്കെ ബുധനാഴ്ച മരിച്ചു. വ്യാഴാഴ്ച രാവിലെ പോസ്റ്റ്മോർട്ടത്തിനുശേഷം മൃതദേഹം നാട്ടിലേക്കു കൊണ്ടുപോകാൻ ആംബുലൻസ് എത്തിയപ്പോഴാണ് തർക്കമുണ്ടായത്. നഷ്ടപരിഹാരം നൽകണമെന്ന് മരിച്ചയാളുടെ സുഹൃത്തുക്കൾ ആവശ്യപ്പെട്ടതിനെ ത്തുടർന്ന് കരാറുകാരൻ പണം നൽകാൻ തയാറായില്ല. ഇതേത്തുടർന്ന് കരാറുകാരൻ അയച്ച ആംബുലൻസ് മടങ്ങിപ്പോയി. ഇന്നലെ ഉച്ചയ്ക്ക് വീണ്ടും ആംബുലൻസ് വന്നപ്പോൾ സുഹൃത്തുക്കളെ കണ്ടില്ല. ബന്ധുക്കളുടെയോ സുഹൃത്തുക്കളുടെയോ കരാറുകാരന്‍റെയോ ആധാർ കാർഡ് അടക്കമുള്ള രേഖകളുടെ കോപ്പി കൊടുത്താലേ മൃതദേഹം വിട്ടുനൽകാൻ സാധിക്കുകയുള്ളൂവെന്ന് ആശുപത്രി ജീവനക്കാർ അറിയിച്ചു. രേഖകൾ ഇല്ലാത്തതിനാൽ മൃതദേഹം കൊണ്ടുപോകാൻ ആളില്ലാതെ മോർച്ചറിയിൽ സൂക്ഷിച്ചിരിക്കുകയാണ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]