ADVERTISEMENT

ADVERTISEMENT

സിടി സ്കാൻ സെന്‍റർ ഉദ്ഘാടനം ചെയ്തു

ഫോർട്ടുകൊച്ചി: പെരുമ്പടപ്പ് ഫാത്തിമ ആശുപത്രിയിൽ 24 മണിക്കൂർ പ്രവർത്തന സജ്ജമായ നൂതന സിടി സ്കാൻ സെന്‍റർ ഉദ്ഘാടനം ചെയ്തു. ബിഷപ് ഡോ. ജോസഫ് കരിയിൽ സെന്‍റർ ആശീർവദിച്ചു.

കെ.ജെ. മാക്സി എംഎൽഎ അധ്യക്ഷത വഹിച്ച യോഗത്തിൽ ഡോ. അജയകുമാർ, ഡോ. ശ്രീഗണേഷ് കെ. പ്രഭു, ഡോ. കുമരേശൻ, ഡയറക്ടർ ഫാ. സിജു ജോസഫ് പാലിയത്തറ, ഫാ. ആന്‍റണി തൈവീട്ടിൽ, ഫാ. സജു ആന്‍റണി പുന്നകാട്ടുശേരി, കെ.എസ്. സാബു, സേവ്യർ പൊള്ളയിൽ എന്നിവർ സംസാരിച്ചു.

ADVERTISEMENT

വാഹന പരിശോധനയ്ക്കിടെ എസ്ഐയെ വാഹനമിടിച്ച് കൊലപ്പെടുത്താൻ ശ്രമിച്ച പ്രതി കീഴടങ്ങി

മൂവാറ്റുപുഴ: വാഹന പരിശോധനയ്ക്കിടെ എസ്ഐയെ വാഹനമിടിച്ച് കൊലപ്പെടുത്താൻ ശ്രമിച്ച കേസിലെ ഒന്നാം പ്രതി കോടതിയിൽ കീഴടങ്ങി. ആനിക്കാട് കന്പനിപ്പടിയിൽ വാടകയ്ക്ക് താമസിക്കുന്ന വാഴത്തോപ്പ് മണിയാറംകുടി മുഹമ്മദ് ഷെറീഫ് ഷംസുദിനാണ്(25) മൂവാറ്റുപുഴ ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയിൽ ഇന്നലെ രാവിലെ കീഴടങ്ങിയത്. ഇയാളെ രണ്ടാഴ്ചത്തേക്ക് കോടതി റിമാൻഡ് ചെയ്തു. കല്ലൂർക്കാട് പോലീസ് സ്റ്റേഷനിലെ ഗ്രേഡ് എസ്ഐ ഇ.എം. മുഹമ്മദിനെയാണ് കഴിഞ്ഞ ശനിയാഴ്ച വൈകുന്നേരം കല്ലൂർക്കാട് വഴിയാഞ്ചിറ ഭാഗത്തു പരിശോധനയ്ക്കിടെ വാഹനം കയറ്റി കൊലപ്പെടുത്താൻ ശ്രമിച്ചത്. പതിവു വാഹന പരിശോധന നടത്തുന്നതിനിടയിലാണ് വഴിയാഞ്ചിറ ഭാഗത്ത് വഴിയരികിൽ സംശയാസ്പദമായ സാഹചര്യത്തിൽ കാർ നിർത്തിയിട്ടിരിക്കുന്നത് എസ്ഐയുടെ ശ്രദ്ധയിൽപ്പെട്ടത്. തുടർന്ന് കാറിനടുത്തെത്തി ചോദ്യം ചെയ്തതോടെ മുഹമ്മദ് ഷെറീഫ് കാറെടുത്ത് എസ്ഐയെ അപായപ്പെടുത്താൻ ശ്രമിച്ച ശേഷം രക്ഷപ്പെടുകയായിരുന്നു. പ്രതിയെ രക്ഷപെടാൻ സഹായിച്ച സുഹൃത്തുക്കളായ ഈരാറ്റുപേട്ട സ്വദേശികളായ ഷാഹിദ്, റഫ്സൽ എന്നിവരെ ക്ലലൂർക്കാട് പോലീസ് കഴിഞ്ഞ ദിവസം അറസ്റ്റ് ചെയ്തിരുന്നു. അപകടമുണ്ടാക്കിയ കാറിൽ മുഹമ്മദ് ഷെറീഫിനൊപ്പമുണ്ടായിരുന്ന തൊടുപുഴ സ്വദേശി ആസിഫിനായി പോലീസ് അന്വേഷണം ഊർജിതമാക്കി.

ഹെറോയിനുമായി പിടികൂടി

പെരുമ്പാവൂർ : ഹെറോയിനുമായി ഇതരസംസ്ഥാന തൊഴിലാളി പിടിയിൽ. പശ്ചിമബംഗാൾ സ്വദേശി എസ്.കെ. സജീബുൾ (28)നെയാണ് പെരുമ്പാവൂർ എക്സൈസ് റേഞ്ച് പാർട്ടി പിടികൂടിയത്. ഇയാളുടെ പക്കൽ നിന്നും ഒരു ഗ്രാം ഹെറോയിൻ എക്സൈസ് പിടിച്ചെടുത്തു. ഫിഷ് മാർക്കറ്റിന് സമീപത്ത് നിന്നുമാണ് ഇയാൾ പിടിയിലായത്.

കേബിളിൽ കുരുങ്ങി വീണ് സ്കൂട്ടർ യാത്രികന്‍റെ മൂക്കിന് ഗുരുതര പരിക്ക്

കാക്കനാട്: വൈദ്യുത പോസ്‌റ്റിൽ തൂങ്ങിക്കിടന്നിരുന്ന കേബിളിൽ കുരുങ്ങി റോഡിലേക്കു മറിഞ്ഞുവീണ സ്‌കൂട്ടർ യാത്രക്കാരന്‍റെ മൂക്കിന്‍റെ പാലമൊടിഞ്ഞു. ഒറ്റപ്പാലം മായന്നൂർ പുത്തൻപീടികയിൽ മുഹമ്മദ് ഫവാസിനാണ്(23) പരിക്കേറ്റത്. സ്വകാര്യ കമ്പനിയിലെ ഡെലിവറി ജീവനക്കാരനായ ഫവാസ് ബുധനാഴ്‌ച രാവിലെ 7.30യോടെ പാഴ്സലുമായി പോകുമ്പോഴാണ് അപകടം. സ്‌കൂട്ടറിന്‍റെ കണ്ണാടിയിലാണ് കേബിൾ കുരുങ്ങിയത്. നിയന്ത്രണംവിട്ട സ്കൂട്ടർ മതിലിൽ ഇടിച്ചു മറിയുകയായിരുന്നു. പിന്നാലെ കാറിൽ വരികയായിരുന്ന കിഴക്കേ ആഞ്ഞിക്കാത്ത് കെ.ഇ. അബ്‌ദുള്ളയാണ് ഫവാസിനെ കരിമക്കാട്ടെ സ്വകാര്യ ആശുപത്രിയിലെത്തിച്ചത്. അവിടെ പ്രഥമ ശുശ്രൂഷ നൽകിയ ശേഷം ഇടപ്പള്ളിയിലെ ആശുപത്രിയിലേക്ക് മാറ്റി. ഫവാസിന്‍റെ മൂക്കിന് ഡോകടർമാർ ശസ്ത്രക്രിയ നിർദേശിച്ചിരിക്കുകയാണ്.

സഹോദരങ്ങളെ ആക്രമിച്ച കേസിൽ മൂന്നുപേർ അറസ്റ്റിൽ

ഉദയംപേരൂർ: പ്രായപൂർത്തിയാകാത്ത പെൺകുട്ടിയെയും സഹോദരനെയും ആക്രമിച്ച കേസിൽ മൂന്നുപേരെ പോലീസ് അറസ്റ്റ് ചെയ്തു. നടക്കാവ് കുറവൻപറമ്പിൽ സുനീഷ്, ഉദയംപേരൂർ കുറവൻപറമ്പിൽ അനു, ഉദയംപേരൂർ കൊച്ചുതോട്ടത്തിൽപ്പറമ്പിൽ മിഥുൻ എന്നിവരെയാണ് പോക്സോ പ്രകാരം ഉദയംപേരൂർ പോലീസ് അറസ്റ്റ് ചെയ്തത്. തിങ്കളാഴ്ച രാത്രി പെൺകുട്ടിയും സഹോദരനുമൊന്നിച്ച് മുളന്തുരുത്തിയിലുള്ള ഹോട്ടലിൽ നിന്നും ഭക്ഷണം കഴിച്ച ശേഷം തിരികെ കാറിൽ വീട്ടിലേക്ക് പോകുന്നതിനിടെയായിരുന്നു സംഭവം. രാത്രി 11.30ഓടെ എംഎൽഎ റോഡിൽ നെടുവേലി ക്ഷേത്രത്തിനടുത്ത് കുറച്ചുപേർ റോഡിന് കുറുകെ നിന്ന് ഇവരിലൊരാളെ കാർ തട്ടിയതായി പറഞ്ഞ് കാർ തടഞ്ഞു നിർത്തുകയായിരുന്നു. തുടർന്ന് പ്രതികളിൽ രണ്ടുപേർ കാറിന്‍റെ ഡോർ വലിച്ചുതുറന്ന് സഹോദരന്‍റെ കവിളിലും ഷർട്ടിലും കുത്തിപ്പിടിച്ചു. പെൺകുട്ടി ശബ്ദമുണ്ടാക്കിയതോടെ പെൺകുട്ടിയിരുന്ന ഭാഗത്തെ ഡോർ വലിച്ച് തുറന്ന് പ്രതികളിലൊരാൾ നീളമുള്ള കുട കൊണ്ട് കാലിൽ കുത്തുകയായിരുന്നു. മറ്റൊരു പ്രതി പെൺകുട്ടിയുടെ ഉടുപ്പിൽ പിടിച്ചുവലിച്ച് ഷർട്ടിന്‍റെ ബട്ടണുകൾ പൊട്ടിച്ചതായും പരാതിയിൽ പറയുന്നു. ആക്രമണത്തിൽ പെൺകുട്ടിയുടെ കാലിന്‍റെ ചെറുവിരലിന്‍റെ അസ്ഥിക്ക് പൊട്ടലുണ്ടായതിനെ തുടർന്ന് ആശുപത്രിയിൽ ചികിത്സ തേടുകയായിരുന്നു. പ്രതികളെ റിമാൻഡ് ചെയ്തു.

എംഡിഎംഎയുമായി യുവാവ് പിടിയിൽ

ചെറായി: മുനമ്പം വൈദ്യരുപടി ബസ് സ്റ്റോപ്പിന് പടിഞ്ഞാറുവശം മുനമ്പം പോലീസ് നടത്തിയ റെയ്ഡിൽ ഒരു വീട്ടിൽ നിന്ന് ഒമ്പതു ഗ്രാം എംഡിഎംഎ പിടികൂടി. വീട്ടുകാരനായ അറുകാട്ടിൽ സനൂപ്, സുഹൃത്തുക്കളായ മുനമ്പം സ്വദേശി അനീർ, ജെസ്‌ലിൻ, ചെറായി സ്വദേശി കൃഷ്ണദേവ്, തത്തപ്പിള്ളി സ്വദേശി അനീഷ് എന്നിവരെയും അറസ്റ്റ് ചെയ്തു. ഇതിൽ സനൂപ് ഒഴിച്ച് എല്ലാവർക്കും സ്റ്റേഷൻ ജാമ്യം നൽകി വിട്ടയച്ചു. പോലീസിനു ലഭിച്ച രഹസ്യവിവരത്തെ തുടർന്നാണ് റെയ്ഡ് നടത്തിയത്. സനൂപിനെ ഇന്ന് കോടതിയിൽ ഹാജരാക്കും.

സ്‌കൂട്ടര്‍ മോഷ്ടാവ് കുടുങ്ങി

കൊച്ചി: സ്‌കൂട്ടര്‍ മോഷ്ടിച്ച കേസിലെ യുവാവ് അറസ്റ്റില്‍. തൃശൂര്‍ ചേര്‍പ്പ് സ്വദേശി നരേഷ് കൃഷ്ണ(19) നെയാണ് കളമശേരി പോലീസ് പിടികൂടിയത്. എറണാകുളം വട്ടേക്കുന്നം സ്വദേശിയുടെ ബൈക്കാണ് പ്രതി മോഷ്ടിച്ചത്. തൃശൂര്‍ കേന്ദ്രീകരിച്ച് നടത്തിയ അന്വേഷണത്തില്‍ അറസ്റ്റിലായ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

റെയില്‍വേ സ്റ്റേഷന്‍ നവീകരണം : നോര്‍ത്തില്‍ ആദ്യഘട്ടം റെഡി

കൊച്ചി: ആദ്യഘട്ട നവീകരണ പ്രവര്‍ത്തനങ്ങള്‍ പൂര്‍ത്തിയായ എറണാകുളം നോര്‍ത്ത് റെയില്‍വേ സ്റ്റേഷന്‍ ഡിസംബറില്‍ പൊതുജനങ്ങല്‍ക്കായി തുറന്നു നല്‍കും. ഇതിനായുള്ള തയാറെടുപ്പുകള്‍ നടത്തി വരുന്നതായി ഉദ്യോഗസ്ഥര്‍ പദ്ധതി അവലോകന യോഗത്തില്‍ ഹൈബി ഈഡന്‍ എംപിയെ അറിയിച്ചു. ഡിസംബറിനു ശേഷം പഴയ കെട്ടിടത്തിന്‍റെ ഭാഗങ്ങള്‍ പൊളിച്ചുമാറ്റി പുനര്‍നിർമാണം ആരംഭിക്കും. 2027 ജനുവരിയില്‍ കെട്ടിടം പൂര്‍ണ സജ്ജമാകുമെന്നും ഉദ്യോഗസ്ഥര്‍ അറിയിച്ചു. നോര്‍ത്ത് റെയില്‍വേ സ്റ്റേഷന്‍റെ രണ്ടാം പ്ലാറ്റ് ഫോമില്‍ നിന്ന് എസ്ആര്‍എം റോഡിലേക്ക് പ്രവേശിക്കുന്ന ഇടുങ്ങിയ റോഡ് വീതി കൂട്ടുന്നതിനും, റെയില്‍വേ ലൈനിന് സമാന്തരമായുള്ള റോഡ് വീതി കൂട്ടുന്നതിനും 50 സെന്‍റ് സ്ഥലം ആവശ്യമാണ്. പദ്ധതി നിര്‍ദേശം തയാറാക്കി അനുമതിക്കായി സമര്‍പ്പിക്കാന്‍ ഹൈബി ഈഡൻ എംപി ഉദ്യോഗസ്ഥര്‍ക്ക് നിര്‍ദേശം നല്‍കി. ടൗണ്‍ ഹാള്‍ മെട്രോ സ്റ്റേഷനുമായി ബന്ധിപ്പിക്കുന്നതിന് ഭൂമി ഏറ്റെടുക്കുകയോ, ലഭ്യമായ സ്ഥലത്ത് അത്യന്താധുനിക സാങ്കേതിക വിദ്യകളുടെ സാധ്യത പ്രയോജനപ്പെടുത്തി ലിങ്ക് ബ്രിഡ്ജ് നിര്‍മിക്കുകയോ ചെയ്യണമെന്ന് എംപി നിര്‍ദേശിച്ചു. ഇഎസ്‌ഐ ആശുപത്രിയില്‍ നിന്ന് ഒരു ഭാഗം ഭൂമി ഏറ്റെടുത്ത് ഒന്നാം പ്ലാറ്റ്‌ഫോം വികസിപ്പിക്കുന്നതിനുള്ള ശ്രമങ്ങള്‍ തുടരണമെന്നും പറഞ്ഞു. എറണാകുളം സൗത്തിലെ നവീകരണ പ്രവര്‍ത്തനങ്ങള്‍ പൂര്‍ത്തിയാക്കാന്‍ ഡിസംബര്‍ വരെയാണ് കോണ്‍ട്രാക്ടര്‍ക്ക് സമയം നല്‍കിയിരുന്നത്. എന്നാല്‍ അവശേഷിക്കുന്ന ജോലികള്‍ റീ ടെണ്ടര്‍ ചെയ്യേണ്ട അവസ്ഥയിലാണ്. കോണ്‍ട്രക്ടറില്‍ നിന്ന് പിഴ ഈടാക്കാനും യാത്രക്കാര്‍ക്ക് സ്റ്റേഷനിലേക്ക് പോകാന്‍ വേണ്ടത്ര സൗകര്യമൊരുക്കാനും എംപി നിര്‍ദേശം നല്‍കി. റെയില്‍വേ കൾവെര്‍ട്ടുകള്‍ ശുചീകരിക്കണം നഗരത്തിലെ റെയില്‍വേ കൾവെര്‍ട്ടുകള്‍ ശുചീകരിച്ച് നീരൊഴുക്ക് സാധ്യമാക്കാന്‍ റെയില്‍വേ തയാറാകണം. ഇതിനോടകം മൂടിയ കൾവെര്‍ട്ടുകള്‍ തുറന്ന് ശുചീകരിക്കണമെന്നും യോഗത്തില്‍ ആവശ്യമുയര്‍ന്നു. എളമക്കര പേരണ്ടൂര്‍ റോഡിലും, അറ്റ്‌ലാന്‍റിസ് റെയില്‍വേ ലെവല്‍ ക്രോസിംഗിലും ഓരോ റെയില്‍വേ അണ്ടര്‍പാസിന്‍റെ അടിയന്തര ആവശ്യമുണ്ടെന്നും എംപിയും എംഎല്‍എയും യോഗത്തില്‍ പറഞ്ഞു. സാധ്യതാ പഠനം നടത്തി റിപ്പോര്‍ട്ട് തയാറാക്കിയ ശേഷം ഇതിനായി റെയില്‍വേ ഫണ്ടിന്‍റെ അപര്യാപ്തത വന്നാല്‍ എംപി, എംഎല്‍എ ഫണ്ട് അനുവദിക്കുന്നത് പരിഗണിക്കുമെന്ന ഇവരും വ്യക്തമാക്കി. പച്ചാളം ഭാഗത്ത് റെയില്‍വേ സ്ഥാപിച്ചിട്ടുള്ള ഒരു ഹൈറ്റ് ബാരിയര്‍ പൊളിച്ച് നീക്കണമെന്നും ഇവര്‍ ആവശ്യപ്പെട്ടു. തൃപ്പൂണിത്തുറ 4.9 കോടിയുടെ പദ്ധതി പൂര്‍ത്തിയായി തൃപ്പൂണിത്തുറ റെയില്‍വേ സ്റ്റേഷനില്‍ 4.97 കോടി രൂപയുടെ പുനര്‍നിര്‍മാണ പദ്ധതികള്‍ പൂര്‍ത്തിയായി. 5.79 കോടിയുടെ പുതിയ പദ്ധതി നിര്‍ദേശങ്ങള്‍ റെയില്‍വേ ജനറല്‍ മാനേജര്‍ക്ക് സമര്‍പ്പിച്ചിരിക്കുകയാണ്. ഇവിടെ വര്‍ധിപ്പിച്ചിട്ടുള്ള ഉയര്‍ന്ന പാര്‍ക്കിംഗ് ഫീസ് മരവിപ്പിക്കണമെന്നു എംപി ആവശ്യപ്പെട്ടു. നിരക്ക് ഉയര്‍ത്തിയത് പുനഃപരിശോധിക്കുമെന്ന് റെയില്‍വേ അധികൃതര്‍ മറുപടി നല്‍കി. പുതിയ ട്രെയിന്‍ സ്റ്റോപ്പുകള്‍ അനുവദിക്കണം, ചോര്‍ച്ച അടയ്ക്കണം, കൃത്യമായ ഇടവേളകളില്‍ ആര്‍പിഎഫ് സാന്നിധ്യം ഉണ്ടായിരിക്കണം , റെയില്‍വേ സ്റ്റേഷനിലേക്ക് റെയില്‍വേ ഭൂമിയിലൂടെയുള്ള റോഡിന്‍റെ വീതി വര്‍ധിപ്പിക്കുന്നത് അടിയന്തരമായി പരിഗണിക്കണം തുടങ്ങിയ കാര്യങ്ങളും എംപി ആവശ്യപ്പെട്ടു. ഇടപ്പള്ളി സ്റ്റേഷന്‍ അമൃത് ഭാരത് പദ്ധതിയില്‍ ഉള്‍പ്പെടുത്തി വികസിപ്പിക്കണം, പുതിയ ട്രെയിന്‍ സ്റ്റോപ്പുകള്‍ അനുവദിക്കണമെന്നും അദ്ദേഹം ആവശ്യപ്പെട്ടു. വടുതല റെയില്‍വേ മേല്‍പ്പാലം പദ്ധതിയില്‍ അപ്രോച്ച് റോഡിനുള്ള ടെന്‍ഡര്‍ ക്ഷണിച്ചിട്ടുണ്ടെങ്കിലും പദ്ധതിയുടെ ഒരു പ്രധാന ഭാഗം റെയില്‍വേ ഇതുവരെ ടെന്‍ഡര്‍ ചെയ്തിരുന്നില്ല ഇത് ഈ മാസം തന്നെ ടെണ്ടര്‍ ചെയ്യുമെന്ന് റെയില്‍വേ അറിയിച്ചു.

ഗ്രാമങ്ങളുടെ സർഗസൗന്ദര്യം വായനശാലകൾ

പത്രങ്ങളും വാരികകളും മാസികകളും വായിച്ചിരിക്കാനും വായിച്ചതിനെക്കുറിച്ചു വർത്തമാനം പറയാനും അറിവു നേടാനും ഇടമൊരുക്കിയ ഗ്രാമീണ വായനശാലകൾ ഏതൊരു നാടിനും സർഗസൗന്ദര്യമാണ്. ആർത്തിയോടെ വായിച്ചുതീർക്കാൻ പുസ്തകങ്ങളുടെ ശേഖരവും കൂടിയാകുന്പോൾ, ഗ്രന്ഥശാലയ്ക്കു അറിവനുഭവങ്ങളുടെ തിളക്കം കൂടും. സജീവമായ വായനശാലകൾ നാടിന്‍റെയും നാട്ടുകാരുടെയും പൊതുബോധത്തിന്‍റെ അടയാളങ്ങൾ കൂടിയാണ്. നമ്മുടെ നാട്ടിൻപുറങ്ങളിലെയും മറ്റും വായനശാലകളുടെ സ്ഥിതി എന്താണ്? ഈ വായനാദിനത്തിൽ ജില്ലയിലെ വിവിധ ഭാഗങ്ങളിലുള്ള വായനശാലകളെക്കുറിച്ചറിയാം പണ്ടപ്പിള്ളി നാഷണല്‍ ലൈബ്രറി @ 1947 മൂവാറ്റുപുഴ: 1947ല്‍ സ്ഥാപിതമായ പണ്ടപ്പിള്ളി നാഷണല്‍ ലൈബ്രറി പല തലമുറകൾക്ക് വായനയുടെ വെളിച്ചം പകർന്ന ഗ്രന്ഥശാലയാണ്. മൂവാറ്റുപുഴ താലൂക്ക് ലൈബ്രറി കൗണ്‍സിലിനു കീഴിലെ എ ഗ്രേഡ് ഗ്രന്ഥശാലയിൽ 14,000 പുസ്തകങ്ങളുണ്ട്. നാനൂറിലധികം അംഗങ്ങള്‍ ഉണ്ട്. വീട്ടിലേക്ക് ഒരു പുസ്തകം പദ്ധതിയില്‍പ്പെടുത്തി ഗ്രന്ഥശാല പ്രവര്‍ത്തന പരിധിയിലെ എല്ലാ വീടുകളിലും പുസ്തകം എത്തിക്കുന്നുണ്ട്. എല്ലാ മാസവും ഒന്നിലധികം പരിപാടികള്‍ നടത്തി പ്രദേശവാസികളെ ഗ്രന്ഥശാലയിലേക്ക് ആകർഷിക്കുകയും ചെയ്യുന്ന പ്രവര്‍ത്തനം സജീവമാണെന്ന് ലൈബ്രറി പ്രസിഡന്‍റ് ടോമി വള്ളമറ്റവും സെക്രട്ടറി ടി. ശ്യാമളയും പറഞ്ഞു. ‘മഹാത്മാ'വെത്തിയ ഗ്രന്ഥശാല തൃപ്പൂണിത്തുറ: 92 വർഷമായി രാജനഗരിയുടെ അക്ഷര വെളിച്ചമാണു തൃപ്പൂണിത്തുറ മഹാത്മ ഗ്രന്ഥശാല. 1932ൽ ക്ഷേത്രപ്രവേശന സത്യഗ്രഹത്തിന്‍റെ പ്രചാരണത്തിന് എകെജി നടത്തിയ അയിത്തോച്ചാടന ജാഥ തൃപ്പൂണിത്തുറയിലെത്തിയപ്പോൾ നടത്തിയ ആഹ്വാനമായിരുന്നു ഗ്രന്ഥശാലയുടെ പിറവിക്ക് നിദാനമായത്. 1933 ജനുവരി 18ന് അഞ്ചുവിളക്ക് കവലയ്ക്ക് സമീപത്തെ ഓലമേഞ്ഞ കെട്ടിടത്തിന്‍റെ ഒരു ഭാഗം രണ്ടു രൂപ വാടകയ്ക്കെടുത്തായിരുന്നു ഗ്രന്ഥശാലയുടെ തുടക്കം. 1934 ജനുവരി 14ന് നടന്ന ആദ്യ വാർഷിക യോഗത്തിൽ മഹാത്മാഗാന്ധിയാണ് അധ്യക്ഷത വഹിച്ചത്. രണ്ടാമത്തെ വാർഷികത്തിന് രാഷ്ട്രപതി ബാബു രാജേന്ദ്രപ്രസാദും എത്തി. വാടക കെട്ടിടത്തിലായിരുന്ന ഗ്രന്ഥശാല ഇപ്പോൾ ലായം റോഡിലുള്ള സ്വന്തം കെട്ടിടത്തിലാണ്. 30,000 ത്തോളം പുസ്തകങ്ങളും 1000 ൽപ്പരം അംഗങ്ങളും അനേകം അക്കാദമിക് സിഡികളും ഇപ്പോൾ ഗ്രന്ഥശാലയ്ക്കുണ്ട്. തിങ്കേഴ്സ് ഫോറം, സ്റ്റഡി സെന്‍റർ, പ്രതീക്ഷ കലാവിഭാഗം, സീനിയർ സിറ്റിസൺ ഫോറം, സാഹിത്യ സമിതി, ഫിലിം ക്ലബ്, ബാലവേദി, വനിതാവേദി എന്നിവയും പ്രവർത്തിക്കുന്നുണ്ട്. ഉഷ മേനോനാണ് ലൈബ്രേറിയൻ. കോതമംഗലത്തെ ആദ്യ ഗ്രന്ഥശാല പോത്താനിക്കാട് : സമ്പൂര്‍ണ സാക്ഷരത കൈവരിച്ച രാജ്യത്തെ പ്രഥമ ഗ്രാമപഞ്ചായത്തായ പോത്താനിക്കാടിലെ പബ്ലിക് ലൈബ്രറി, കോതമംഗലം താലൂക്കിലെ ആദ്യത്തെ വായനാശാലയാണ്. 1947ല്‍ തുടങ്ങി. 890 അംഗങ്ങൾ, ഇംഗ്ലീഷ് ഉൾപ്പടെ 17000ത്തോളം പുസ്തകങ്ങൾ. കഴിഞ്ഞ 50 വര്‍ഷത്തോളമായി പോത്താനിക്കാട് ചാലപ്പാട്ട് വിശ്വനാഥ കൈമളാണ് ലൈബ്രേറിയന്‍. ചെറായി ബീച്ചിലുണ്ട് ജനകീയ വായനശാല വൈപ്പിൻ: വൈപ്പിനിൽ വിദേശികളക്കം എത്തുന്ന വായനശാലയാണ് ചെറായി ബീച്ചിലെ ജനകീയ വായനശാല. 27 വർഷത്തെ പഴക്കമുണ്ട്. ചെറായി ബീച്ച് ടൂറിസ്റ്റ് കേന്ദ്രത്തിനൊപ്പം പ്രായം. 7500 പുസ്തകങ്ങളും ദിനപ്പത്രങ്ങളും ആനുകാലിക പ്രസിദ്ധീകരണങ്ങളും ഇവിടെയുണ്ട്. 325 അംഗങ്ങൾ. ദിനംപ്രതി 50 പേരെങ്കിലും വായിക്കാൻ എത്തും. കൂടാതെ ബഡ്സ് സ്കൂളുകളിലും , കുടുംബശ്രീ യൂണിറ്റുകളിലും ഇവർ പുസ്തകം എത്തിച്ച് കൊടുക്കാറുണ്ട്. മലയാളത്തോടൊപ്പം ലോകോത്തര ഇംഗ്ലീഷ് പുസ്തകങ്ങളും ഇവിടെയുണ്ട്. ബീച്ചിലെത്തുന്ന വിദേശികൾ ഇവിടെ വന്ന് വായിക്കുന്നതിനാലാണ് ഇംഗ്ലീഷ് പുസ്തകങ്ങൾക്ക് പ്രാധാന്യം നൽകിയതെന്നു പ്രസിഡന്‍റ് കെ.ബി. രാജീവും സെക്രട്ടറി പി.ടി. സുധീർകുമാറും പറയുന്നു. ഗീതാ പ്രസാദാണു ലൈബ്രേറിയൻ. ഇതുകണ്ട് ഇവിടെയെത്തുന്ന വിദേശ സഞ്ചാരികളും ധാരാളം പുസ്തകങ്ങൾ വായനശാലക്ക് സംഭാവന നൽകാൻ തുടങ്ങിയതോടെ ഇംഗ്ലീഷ് പുസ്തക ശേഖരം ഇപ്പോൾ സമൃദ്ധമാണ്. വായനശാലയുടെ ടെറസിൽ വിദേശികൾക്കായി സൺ ബാത്ത് റീഡിംഗ് റൂം ഒരുക്കാനുള്ള തയാറെടുപ്പിലാണ് വായനശാല. പെരുന്പാവൂർ പെരുമ പെരുമ്പാവൂർ: കുന്നത്തുനാട് താലൂക്കിൽ 147 ലൈബ്രറികളിൽ 142 എണ്ണവും സജീവമാണ്. വളയൻചിറങ്ങര വി.എൻ കേശവപിള്ള ലൈബ്രറി, പുക്കാട്ടുപടി വള്ളത്തോൾ ലൈബ്രറി എന്നിവയാണ് പ്രർത്തനത്തിൽ മുന്നിലെന്നു താലൂക്ക് സെക്രട്ടറി എൻ.പി. അജയകുമാർ പറഞ്ഞു. മനക്കപ്പടി പബ്ലിക് ലൈബ്രറി, പുല്ലുവഴി മിത്രകല എന്നിവയും നല്ല നിലയിൽ പ്രവർത്തിക്കുന്നുണ്ട്. നിലവിൽ ലൈബ്രറികളിൽ നിർദേശിച്ചിട്ടുള്ള പരിപാടികൾ കാര്യക്ഷമമായി നടത്തിവരുന്നുണ്ട്. സർക്കാരിൽ നിന്നുള്ള ഗ്രാന്‍റുകൾ മുടങ്ങാറില്ല. ലൈബ്രറികൾ മാസത്തിൽ ഒരു പ്രോഗ്രാമെങ്കിലും സംഘടിപ്പിക്കുന്നുണ്ട്. വായനക്കാരുടെ എണ്ണം കുറവാണെങ്കിലും മറ്റ് പരിപാടികളിൽ ജനങ്ങളുടെ പ്രാതിനിധ്യം കുടുന്നുണ്ട്. പെരുന്പാവൂർ നഗരസഭയുടെ കീഴിലുള്ള പബ്ലിക് ലൈബ്രറിയും സജീവമാണ്. ചായക്കടയിൽ തുടങ്ങിയ വായനശാല ആലുവ: 1948 ഒക്ടോബർ 11ന് ഒരു ചായക്കടയിൽ പിറവിയെടുത്തതാണു കുട്ടമശേരി യുവജന വായനശാല. വാടകക്കെട്ടിടത്തിലേക്കു മാറിയപ്പോൾ 1952 ഡിസംബർ 12നു പ്രധാനമന്ത്രി ജവഹർലാൽ നെഹ്‌റുവാണ് ഉദ്ഘാടനം ചെയ്തത്. 1958ൽ കുട്ടമശേരി മനക്കലെ രമേശ്വരൻ ദാമോദരൻ നമ്പൂതിരിപ്പാട് സ്ഥലം നൽകി. നെഹ്റുവിന്‍റെ സാന്പത്തിക ഉപദേശകനായിരുന്ന പി.ജെ. തോമസാണ് വായനശാലയുടെ പുതിയ കെട്ടിടത്തിന് ശിലയിട്ടത്. ഇപ്പോൾ സ്വന്തം കെട്ടിടത്തിൽ. 25000 പുസ്തകങ്ങൾ ഉൾക്കൊള്ളുന്ന വായനശാലയിൽ ബിജു ഐപ്പാണ് ലൈബ്രേറിയൻ. രാവിലത്തെ പത്രവായനക്കാർ തന്നെ 60 ഓളം പേരുണ്ട്. 1956 ഓഗസ്റ്റ് 17 നു തുടങ്ങിയ മുനിസിപ്പൽ ലൈബ്രറിയും ആലുവ മേഖലയിലെ പ്രധാനപ്പെട്ട വായനാകേന്ദ്രമാണ്. പ്രതിദിനം നൂറുകണക്കിന് വായനക്കാരെത്തുന്നു. 1984 ൽ ലൈബ്രറിക്കു കുറ്റിപ്പുഴ കൃഷ്ണപിള്ളയുടെ പേരിട്ടു. മലയാളം, ഹിന്ദി, ഇംഗ്ലിഷ് ഭാഷകളിലായി 45,000 പുസ്തകങ്ങളുണ്ട്. 18 ലക്ഷം രൂപ ചെലവിൽ ഡിജിറ്റലൈസേഷൻ പദ്ധതി പ്രഖ്യാപിച്ചിട്ടുണ്ട്. 1500 പേർക്ക് ഇരിക്കാവുന്ന ഓപ്പൺ എയർസ്റ്റേജുമുണ്ട്. പുസ്തകം വീട്ടിലെത്തിക്കും കല്ലൂർക്കാട്: ആവശ്യക്കാർക്ക് വീടുകളിൽ പുസ്തകം എത്തിച്ചു നൽകുന്ന വായനാ വസന്തം പദ്ധതിയിലൂടെ ശ്രദ്ധേയമാണ് കല്ലൂർക്കാട് കോസ്മോ പൊളിറ്റൻ ലൈബ്രറി ആൻഡ് റീഡിംഗ് ക്ലബ്. 1947 ൽ രൂപീകൃതമായ ലൈബ്രറിയിൽ അംഗീകൃതമായി 600ഓളം അംഗങ്ങളുണ്ട്. 30000 ത്തിലേറെ പുസ്തകങ്ങൾ. 400ഓളം സജീവ സന്ദർശകർ. മുഴുവൻ സമയവും പത്രങ്ങൾ വായിക്കാം. ലൈബ്രറി ഉച്ചകഴിഞ്ഞ് മൂന്നു മുതൽ രാത്രി എട്ടുവരെ. ബാലവേദി, യുവജനവേദി, വനിതാ വേദി, വയോജനവേദി പ്രവർത്തനങ്ങളും സജീവമാണെന്നു ലൈബ്രേറിയൻ എം.എ. തോമസ് പറഞ്ഞു. സിഎസ്എ ലൈബ്രറി അങ്കമാലി: മുൻ നിയമസഭാ സ്പീക്കർ എ.പി. കുര്യന്‍റെ പ്രചോദനത്തിൽ അങ്കമാലിയിലെ സിഎസ്എ ലൈബ്രറി 1995നാണ് തുടങ്ങിയത്. 15,000 ഓളം പുസ്തകങ്ങളുണ്ട്. ഇഎംഎസിന്‍റെ കുടുംബത്തിലുണ്ടായിരുന്ന പുസ്തകങ്ങൾ ഈ ലൈബ്രറിയിലേക്കാണ് സംഭാവന ചെയ്തത്. ഡോ. സി.കെ. ഈപ്പനാണ് ലൈബ്രറിയുടെ പ്രസിഡന്‍റ്. വള്ളത്തോൾ വായനശാല 67 വയസ് കിഴക്കമ്പലം : പുക്കാട്ടുപടിയിലെ വള്ളത്തോൾ സ്മാരക വായനശാലയ്ക്ക് 67 വയസായി. നാട്ടുകാരും സന്നദ്ധത സംഘടനകളും ചേർന്ന് സ്വരൂപിച്ച തുകയുപയോഗിച്ചാണ് തുടക്കം. 3070 അംഗങ്ങളും 18000 ത്തിൽ പരം പുസ്തകങ്ങളുമുണ്ട്. 2018-ലെ സംസ്ഥാനത്തെ ഏറ്റവും നല്ല ലൈബ്രറിയ്ക്കുള്ള അവാർഡ് ലഭിച്ചു. വയോജന വേദി, വനിതാവേദി, യുവജനവേദി, ബാലവേദി എന്നിവയും സജീവം. രാവിലെ 6.45 മുതൽ രാത്രി 8.30 വരെ പ്രവർത്തനമുണ്ട്. 25 വർഷമായി രത്നമ്മ ഗോപാലനാണു ലൈബ്രേറിയൻ.

കൊച്ചി വായിക്കുകയാണ്... 1.80 ലക്ഷം പുസ്തകങ്ങളുമായി എറണാകുളം പബ്ലിക് ലൈബ്രറി

സിജോ പൈനാടത്ത് കൊച്ചി: കൊച്ചിക്കാർക്കു വായിക്കാനെവിടെ നേരം? ഈ ചോദ്യമുന്നയിക്കുന്നവർ കൊച്ചി നഗരമധ്യത്തിലെ 155 വർഷം പഴക്കമുള്ളൊരു ഗ്രന്ഥശാലയിലേക്കൊന്നു വരണം; കണ്ണു തുറന്നു കാണണം... അവിടെ എല്ലാ ദിനവും വന്നു വായിക്കുന്ന നൂറുകണക്കിന് അക്ഷരപ്രേമികൾക്കൊപ്പമിരുന്ന് തെല്ലു നേരം വായിക്കണം. ഇതു വായന പൂക്കുന്നിടം.... എറണാകുളം പബ്ലിക് ലൈബ്രറി. വാണിജ്യനഗരവാസികൾക്കു വായനയുടെ വസന്തകാലം സമ്മാനിക്കുന്ന പബ്ലിക് ലൈബ്രറിയിലെ ഇരിപ്പിടങ്ങളിൽ ആളൊഴിയാറില്ല. അക്ഷരങ്ങളോടുള്ള പ്രണയം മനസിൽ സൂക്ഷിക്കുന്നവരെത്രയോ പേരാണ്, ഒന്നിനും നേരമില്ലെന്നു പരിഭവിക്കുന്ന പുതിയ കാലത്തും ഇവിടെ വായനാനുഭവം തേടിയെത്തുന്നത്. മധ്യകേരളത്തിലെ ഏറ്റവും വലിയ ഗ്രന്ഥശാലയാണ് എറണാകുളം കോൺവന്‍റ് റോഡിലെ പബ്ലിക് ലൈബ്രറി. 1.80 ലക്ഷം പുസ്തകങ്ങൾ, 7500 അംഗങ്ങൾ. റീഡിംഗ്, റഫറൻസ്, ലെൻഡിംഗ് എന്നീ മൂന്നു വിഭാഗങ്ങളിലായി ചിട്ടയായ പ്രവർത്തനം. എ ക്ലാസ് അംഗത്വമുള്ളവർ 138 പേരാണ്. ബി ക്ലാസിൽ 1260 ഉം, സി ക്ലാസിൽ 3080 ഉം അംഗങ്ങൾ. 2688 പേർക്കു ലൈഫ് മെന്പർഷിപ്പുണ്ട്. പ്രഫ. എം.കെ. സാനുവും ഡോ. എം. ലീലാവതിയും പബ്ലിക് ലൈബ്രറിയിൽ ഓണററി അംഗത്വമുള്ളവരാണ്. ദിവസവുമെത്തുന്നത് 350 മുതൽ 500 വരെ വായനക്കാർ. ആഴ്ചയിലൊരിക്കലോ നിശ്ചിത ഇടവേളകളിലോ സന്ദർശകരായെത്തുന്നവർ വേറെയും. മലയാളത്തിലെ ഒട്ടുമിക്ക പുസ്തകങ്ങളും ഇവിടെയുണ്ട്. ഇംഗ്ലീഷ്, ഹിന്ദി, സംസ്കൃതം, കൊങ്കണി ഭാഷകളിലുള്ള പുസ്തകങ്ങളുണ്ട്. ഡിജിറ്റൽ ബുക്കുകളും എളുപ്പത്തിൽ ലഭിക്കും. 1870ൽ മഹാരാജാസ് കോളജിലെ പ്രിൻസിപ്പലായിരുന്ന എ.എഫ്. സീലിയുടെ മേൽനോട്ടത്തിലായിരുന്നു എറണാകുളം പബ്ലിക് ലൈബ്രറിയുടെ തുടക്കം. ജനങ്ങളിൽ നിന്നു സമാഹരിച്ച 2200 രൂപ ഉപയോഗിച്ചു. ഇംഗ്ലണ്ടില്‍ നിന്നു കൊണ്ടുവന്ന പുസ്തകങ്ങളായിരുന്നു ആദ്യം പബ്ലിക് ലൈബ്രറിയുടെ അലമാരയിലെത്തിയത്. പിന്നീടങ്ങോട്ടു പുതിയ കെട്ടിടങ്ങൾ, കൂടുതൽ പുസ്തകങ്ങൾ, സൗകര്യങ്ങൾ എല്ലാമായി എറണാകുളത്തിന്‍റെ വായനാധാരകളിൽ തലയെടുപ്പുള്ള ഇടമായി പബ്ലിക് ലൈബ്രറി വളർന്നു. ഇഷ്ടം നോവൽ സമൂഹത്തിന്‍റെ സമസ്ത മേഖലകളിലും നിന്നുള്ള വായനക്കാർ‌ പബ്ലിക് ലൈബ്രറിയിലെത്തുന്നുണ്ടെന്നു അഞ്ചു വർഷമായി ലൈബ്രേറിയനായ പ്രിയ കെ. പീറ്റർ പറഞ്ഞു. 40 മുതൽ 50 വരെ പ്രായക്കാരാണ് ഏറെയും. നോവൽ, ജീവചരിത്രം, ചരിത്രം എന്നീ വിഭാഗങ്ങളിലെ പുസ്തകങ്ങൾക്കാണ് ആവശ്യക്കാരേറെയും. നോവലുകളിൽ‌ എംടിയുടെ പുസ്തകങ്ങളാണ് അധികമായും വായനക്കാർ കൊണ്ടുപോകുന്നത്. ഒറ്റയിരിപ്പിൽ അദ്ദേഹത്തിന്‍റെ നോവൽ വായിച്ചു തീർക്കുന്നവരുണ്ട്. ചെറുപ്പക്കാർ റഫറൻസ് ഗ്രന്ഥങ്ങളും മത്സരപരീക്ഷകൾക്കു ഗുണകരമാകുന്ന പുസ്തകങ്ങളും തേടിയെത്താറുണ്ട്. പ്രിയ പറഞ്ഞു.

പ്ലസ് വണ്‍ പ്രവേശനോത്സവം

കല്ലൂർക്കാട്: സെന്‍റ് അഗസ്റ്റിൻസ് ഹയർ സെക്കൻഡറി സ്കൂളിലെ പ്ലസ് വണ്‍ വിദ്യാർഥികളുടെ പ്രവേശനോത്സവം ‘വരവേൽപ്പ് 2025’ സെന്‍റ് അഗസ്റ്റിൻസ് പാരിഷ് ഹാളിൽ നടന്നു. 2025 മാർച്ചിലെ പ്ലസ്ടു പരീക്ഷയിൽ ഉന്നത വിജയം നേടിയ വിദ്യാർഥികളെ ചടങ്ങിൽ ആദരിക്കുകയും ചെയ്തു. പഞ്ചായത്ത് പ്രസിഡന്‍റ് സുജിത്ത് ബേബി ഉദ്ഘാടനം ചെയ്തു. സ്കൂൾ മാനേജർ റവ.ഡോ. സ്റ്റനിസ്ലാവൂസ് കുന്നേൽ അധ്യക്ഷത വഹിച്ചു. കല്ലൂർക്കാട് പോലീസ് ഇൻസ്പെക്ടർ കെ. ഉണ്ണികൃഷ്ണൻ, എ.കെ. ജിബി, പി.ടി ജയൻ, ഫാ. പോൾസണ്‍ മാറാട്ടിൽ, ദീപ്തി ഷണ്മുഖൻ, ഷൈനി ജോസഫ്, സെബാസ്റ്റ്യൻ മാത്യു എന്നിവർ പ്രസംഗിച്ചു. മൂവാറ്റുപുഴ: വീട്ടൂർ എബനേസർ ഹയർ സെക്കൻഡറി സ്കൂളിൽ പ്ലസ് വണ്‍ വിദ്യാർഥികളുടെ പ്രവേശനോത്സവം ഡിവൈഎസ്പി സജി മാർക്കോസ് (എസ്എസ്ബി, എറണാകുളം റൂറൽ) ഉദ്ഘാടനം ചെയ്തു. പഞ്ചായത്തംഗം പി.കെ. എൽദോ അധ്യക്ഷത വഹിച്ചു. ഫാ. ജോർജ് മാന്തോട്ടം കോറെപ്പിസ്കോപ്പ അനുഗ്രഹപ്രഭാഷണം നടത്തി. സ്കൂൾ മാനേജർ കമാണ്ടർ സി.കെ. ഷാജി, എസ്. മോഹൻദാസ്, രേവതി കണ്ണൻ, ജീമോൾ കെ. ജോർജ്, ബിജുകുമാർ, എൽബി ഏലിയാസ് എന്നിവർ പ്രസംഗിച്ചു. കോതമംഗലം: സെന്‍റ് അഗസ്റ്റിൻസ് ഗേൾസ് ഹയർ സെക്കൻഡറി സ്കൂളിൽ പ്ലസ് വണ്‍ വിദ്യാർഥികളുടെ പ്രവേശനോത്സവം ‘വരവേൽപ്പ്-2025’ ആന്‍റണി ജോണ്‍ എംഎൽഎ ഉദ്ഘാടനം ചെയ്തു. നഗരസഭാംഗം കെ.വി. തോമസ്, ജോസ് വർഗീസ്, മദർ സിസ്റ്റർ മരിയാൻസി, സിസ്റ്റർ ലിസ് മരിയ, സിസ്റ്റർ റിനി മരിയ, സോണി മാത്യു എന്നിവർ പങ്കെടുത്തു.

മൂവാറ്റുപുഴ-കാവുംപടി റോഡിലെ കുഴി അപകട ഭീഷണിയാകുന്നു

മൂവാറ്റുപുഴ: ദിനംപ്രതി നൂറുകണത്തിന് വാഹനങ്ങൾ സഞ്ചരിക്കുന്ന മൂവാറ്റുപുഴ-കാവുംപടി റോഡിൽ രൂപപ്പെട്ടിരിക്കുന്ന കുഴി യാത്രക്കാർക്ക് അപകട ഭീഷണിയാകുന്നു. മൂവാറ്റുപുഴ പോലീസ് സ്റ്റേഷന് സമീപമാണ് റോഡിന് നടുവിലായി യാത്രക്കാരുടെ നടുവൊടിക്കും വിധമുള്ള വലിയ കുഴി രൂപപ്പെട്ടിരിക്കുന്നത്. മഴ പെയ്ത് റോഡിലും കുഴിയിലും വെള്ളം നിറയുന്നതോടെ വാഹനങ്ങൾ അപകടത്തിൽപ്പെടാൻ സാധ്യത ഏറെയാണ്. വെള്ളം നിറഞ്ഞു നിൽക്കുന്പോൾ കുഴിയുടെ വ്യാപ്തി അറിയാതെ എത്തുന്ന വാഹനങ്ങൾ കുഴിയിൽ ചാടുന്നത് പതിവായിരിക്കുകയാണ്. സ്ത്രീകൾ അടക്കമുള്ള ഇരുചക്ര വാഹന യാത്രക്കാരാണ് കൂടുതലായും ദുരിതത്തിൽപ്പെടുന്നത്. നഗര വികസന പ്രവർത്തനങ്ങളുടെ ഭാഗമായി വണ്‍വേ സന്പ്രദായം കർശനമാക്കിയതോടെ ചെറുതും വലുതുമായ നിരവധി വാഹനങ്ങളാണ് റോഡിലൂടെ സഞ്ചരിക്കുന്നത്. നഗരത്തിൽ ഗതാഗത നിയന്ത്രണം പ്രാബല്യത്തിൽ ഇരിക്കെ തൊടുപുഴ-ആരക്കുഴ തുടങ്ങിയ പ്രദേശങ്ങളിലേക്ക് പോകേണ്ട യാത്രക്കാർ ആശ്രയിക്കുന്ന കാവുംപടി റോഡിന്‍റെ നടുവിലായി രൂപപ്പെട്ടിരിക്കുന്ന വലിയ കുഴി യാത്രക്കാർക്ക് ദുരിതമായി മാറിയിരിക്കുകയാണ്. എത്രയും പെട്ടെന്ന് കുഴി നികത്തി അപകട ഭീഷണി ഒഴിവാക്കണമെന്നാണ് യാത്രക്കാരുടെ ആവശ്യം.

എബിഇടി പ്രോഗ്രാം ഇവാലുവേറ്ററായി നിയമിച്ചു

വാഴക്കുളം: വിശ്വജ്യോതി കോളജ് ഓഫ് എൻജിനീയറിംഗ് ആന്‍ഡ് ടെക്നോളജിയിലെ സിവിൽ എൻജിനീയറിംഗ് വിഭാഗം പ്രഫ. സി.കെ. അനൂപ്, മേരിലാൻഡ്, (യുഎസ്എ) ബാൾട്ടിമോറിലെ എബിഇടി (എബിഇടി-അക്രഡിറ്റേഷൻ ബോർഡ് ഓഫ് എൻജിനീയറിംഗ് ആന്‍ഡ് ടെക്നോളജി) ആസ്ഥാനത്ത് പ്രോഗ്രാം ഇവാലുവേറ്റർ കാൻഡിഡേറ്റ് പരിശീലനം പൂർത്തിയാക്കിയതിനെ തുടർന്ന് എബിഇടി പ്രോഗ്രാം ഇവാലുവേറ്ററായി നിയമിച്ചു. അപ്ലൈഡ് സയൻസ്, കന്പ്യൂട്ടിംഗ്, എൻജിനീയറിംഗ് സാങ്കേതികവിദ്യ എന്നിവയിലെ കോളജ്, യൂണിവേഴ്സിറ്റി പ്രോഗ്രാമുകൾക്ക് ആഗോളതലത്തിൽ അംഗീകാരം നൽകുന്ന അംഗീകരിക്കപ്പെട്ട സ്ഥാപനമാണ് എബിഇടി. വിദ്യാഭ്യാസ സ്ഥാപനങ്ങൾ നിർദിഷ്ട ഗുണനിലവാര മാനദണ്ഡങ്ങൾ പാലിക്കുന്നുണ്ടെന്ന് ഉറപ്പാക്കുന്നതിനുവേണ്ടിയാണ് എബിഇടി അക്രഡിറ്റേഷൻ നൽകുന്നത്.

കോതമംഗലം ഗ്രേറ്റര്‍ ലയണ്‍സ് ക്ലബ് നാലു വീടുകള്‍ക്ക് തറക്കല്ലിട്ടു

കൊച്ചി: ലയണ്‍സ് ഇന്‍റര്‍നാഷനല്‍ ഡിസ്ട്രിക്ട് 318 സി ചിറ്റിലപ്പിള്ളി ഫൗണ്ടേഷനുമായി സഹകരിച്ചു കൊണ്ട് ഈ വര്‍ഷം നടപ്പിലാക്കുന്ന ‘സ്വപ്ന ഭവനം' പദ്ധതിയുടെ ഭാഗമായി കോതമംഗലം ഗ്രേറ്റര്‍ ലയണ്‍സ് ക്ലബ് സ്‌പോണ്‍സര്‍ ചെയ്ത നാലു വീടുകള്‍ക്ക് വാടാട്ടുപാറ അരിക്കല്‍ സിറ്റിയില്‍ തറക്കല്ലിട്ടു. ഡിസ്ട്രിക് 318 സിയുടെ സെക്കൻഡ് വിഡിജി ലയണ്‍ കെ.പി. പീറ്റര്‍ കല്ലിടല്‍ കര്‍മം നിര്‍വഹിച്ചത്. ഗ്രേറ്റര്‍ ലയണ്‍സ് ക്ലബ് പ്രസിഡന്‍റ് ഡിജില്‍ സെബാസ്റ്റ്യന്‍ അധ്യക്ഷത വഹിച്ചു. സെന്‍റ് മേരിസ് പള്ളി വികാരി ഫാ. ജിനോ ഇഞ്ചപ്ലാക്കല്‍, ബ്ലോക്ക് പഞ്ചായത്തംഗം ജെയിംസ് കോറമ്പല്‍, കെ.എം. കോരച്ചന്‍, സി.എ. ടോണി ചാക്കോ, കെ.സി. മാത്യൂസ്, ബെറ്റി കൊരച്ചന്‍ എന്നിവര്‍ പ്രസംഗിച്ചു. എംഎസ്‌ജെ കോണ്‍വന്‍റ് ആണ് വീടുകള്‍ പണിയാന്‍ ഭൂമി വിട്ടുനല്‍കിയത്. എംഎസ്‌ജെ കോണ്‍വന്‍റിലെ സിസ്റ്റര്‍ ആന്‍റോ, സിസ്റ്റര്‍ ലീനസ്, ലയണ്‍സ് ക്ലബിലെ ജോര്‍ജ് മങ്ങാട്ട്, ബേബിച്ചന്‍ നിധിറിക്കല്‍, ജിജി പുളിക്കന്‍, പി.ടി. വര്‍ഗീസ് എന്നിവര്‍ ചടങ്ങില്‍ സന്നിഹിതരായിരുന്നു.

മിനിമാരത്തൺ സംഘടിപ്പിച്ചു

കോലഞ്ചേരി: യൂത്ത് കോൺഗ്രസ് കുന്നത്തുനാട് നിയോജകമണ്ഡലം കമ്മിറ്റിയുടെ 100 ദിന ലഹരിവിരുദ്ധ കാന്പയിന്‍റെ ഭാഗമായി യൂത്ത് കോൺഗ്രസ് കുന്നത്തുനാട് നിയോജകമണ്ഡലം കമ്മിറ്റിയുടെയും യൂത്ത് കോൺഗ്രസ് പുത്തൻകുരിശ് മണ്ഡലം കമ്മിറ്റിയുടെയും ആഭിമുഖ്യത്തിൽ എട്ട് കിലോമീറ്റർ മാരത്തൺ സംഘടിപ്പിച്ചു. സിന്തൈറ്റ് ഇൻഡസ്ട്രീസ് മാനേജിംഗ് ഡയറക്ടർ അജു ജേക്കബ് മാരത്തൺ ഫ്ലാഗ് ഓഫ് ചെയ്തു. നിയോജകമണ്ഡലം പ്രസിഡന്‍റ് ജെയ്സൽ ജബ്ബാർ അധ്യക്ഷനായി. എംഐടിഎസ് ഫിസിക്കൽ ട്രെയിനിംഗ് ഹെഡ് എൽരാജ് മംഗലത്ത് ലഹരിവിരുദ്ധ സന്ദേശം നൽകി. കാണിനാട് മിനി സ്റ്റേഡിയത്തിൽനിന്ന് ആരംഭിച്ച് വടവുകോട്, പുത്തൻകുരിശ്, പീച്ചിങ്ങച്ചിറ വഴി കാണിനാട്ടിൽ മാരത്തൺ സമാപിച്ചു. സമാപന യോഗത്തിൽ ഏഷ്യൻ പഞ്ചഗുസ്തി മീറ്റിൽ വെങ്കല മെഡൽ കരസ്ഥമാക്കിയ ഇന്ത്യൻ പഞ്ചഗുസ്തി താരം അരുൺ പി. ജോണിനെയും ഡ്വാർഫ് മാരത്തൺ റണ്ണർ സി.ആർ. ധനീഷിനെയും അജു ജേക്കബ് മെമന്‍റോ നൽകി ആദരിച്ചു.

റോഡിലെ കുഴിയിൽ വാഴനട്ട് വ്യാപാരിയുടെ പ്രതിഷേധം

മൂവാറ്റുപുഴ: റോഡ് തകർന്ന് യാത്രക്കാർ ദുരിതത്തിലായിട്ടും പിഡബ്ല്യുഡി അധികൃതർ തിരിഞ്ഞുനോക്കാത്തതിനെ തുടർന്ന് റോഡിലെ കുഴിയിൽ വാഴനട്ട് വ്യാപാരിയുടെ പ്രതിഷേധം. 2023ൽ ബിഎംബിസി നിലവാരത്തിൽ നിർമാണം പൂർത്തീകരിച്ച കീച്ചേരിപ്പടി - ഇഇസി മാർക്കറ്റ് റോഡിലാണ് യാത്രക്കാരെ അപകടത്തിലാക്കി നിരവധി കുഴികൾ രൂപപ്പെട്ടിരിക്കുന്നത്. എന്നാൽ ഉത്തരവാദിത്വപ്പെട്ട പിഡബ്ല്യുഡി അധികൃതർ തിരിഞ്ഞു നോക്കാത്തതിനെതുടർന്നാണ് പ്രദേശത്ത് വ്യാപാര സ്ഥാപനം നടത്തുന്ന ശെൽവൻ റോഡിലെ കുഴിയിൽ വാഴനട്ട് പ്രതിഷേധിച്ചത്. നഗരവികസനത്തിന്‍റെ ഭാഗമായി നഗരത്തിൽ ഗതാഗത നിയന്ത്രണം ഏർപ്പെടുത്തിയതോടെ കോതമംഗലം ഭാഗത്തേക്ക് പോകേണ്ട വാഹനങ്ങൾ ഇഇസി മാർക്കറ്റ് റോഡിലൂടെയാണ് സഞ്ചരിക്കുന്നത്. എന്നാൽ ചെറുതും വലുതുമായ നിരവധി കുഴികൾ രൂപപ്പെട്ടതോടെ യാത്രക്കാർ വലിയ ദുരിതത്തിലാണ്. കുഴിയിൽ വീണ് ഇരുചക്ര വാഹന യാത്രക്കാർ അപകടത്തിൽപ്പെടുന്നത് ഇവിടെ പതിവായിരിക്കുകയാണ്. ബുധനാഴ്ച രാവിലെ മൂന്നോളം ഇരുചക്ര വാഹന യാത്രക്കാർ കുഴിയിൽ വീണ് അപകടത്തിൽപ്പെടുകയും പരിക്കേൽക്കുകയും ചെയ്തതിനെതുടർന്നാണ് വാഴനട്ട് പ്രതിഷേധിച്ചതെന്ന് വ്യാപാരി ശെൽവൻ പറഞ്ഞു. എത്രയും പെട്ടെന്ന് റോഡിലെ കുഴികൾ അടച്ച് അപകട ഭീഷണി ഒഴിവാക്കണമെന്നാണ് ആവശ്യം ഉയർന്നിരിക്കുന്നത്.

മഴയിൽ തോടിന്‍റെ സംരക്ഷണ ഭിത്തി ഇടിഞ്ഞു

മൂവാറ്റുപുഴ: ശക്തമായ മഴയിൽ തോടിന്‍റെ സംരക്ഷണ ഭിത്തി തകർന്നു. മൂവാറ്റുപുഴ നഗരസഭയിലെ ഒന്നും മൂന്നും വാർഡുകളിലൂടെ കടന്നുപോകുന്ന മണിയം തോടിന്‍റെ സംരക്ഷണ ഭിത്തിയാണ് ചൊവ്വാഴ്ച പെയ്ത മഴയിൽ തകർന്നത്. വാഴപ്പിള്ളി മേഖലയിൽനിന്ന് ഒഴുകിയെത്തുന്ന മണിയം തോടിന്‍റെ സംരക്ഷണ ഭിത്തി ഇടിഞ്ഞതോടെ മൂന്നുകണ്ടം ഉന്നതി നിവാസികൾ ആശ്രയിക്കുന്ന റോഡ് അപകടാവസ്ഥയിലായിരിക്കുകയാണ്. പ്രദേശത്തെ 26ഓളം കുടുംബങ്ങൾ ആശ്രയിക്കുന്ന റോഡാണ് അപകാവസ്ഥായിലായിരിക്കുന്നത്. തോടിന്‍റെ മൂന്നാം വാർഡിൽ ഉൾപ്പെടുന്ന സംരക്ഷണ ഭിത്തി തകർന്ന് അവശിഷ്ടങ്ങൾ തോട്ടിൽ കിടക്കുന്നതിനാൽ തോട് കവിഞ്ഞ് ഒന്നാം വാർഡിൽ ഉൾപ്പെടുന്ന മൂന്നുകണ്ടം ഉന്നതിയിലേക്കാണ് വെള്ളം ഒഴുകിയെത്തുന്നത്. ഉന്നതി നിവാസികൾ ആശ്രയിക്കുന്ന റോഡിലേക്കും വീടിന്‍റെ സമീപ പ്രദേശങ്ങളിലേക്കും വെള്ളം ഒഴുകിയെത്തിയതോടെ ജീവിതം ദുസഹമായിരിക്കുകയാണെന്ന് പ്രദേശവാസികൾ പറഞ്ഞു. പ്രദേശത്തെ വെള്ളക്കെട്ടിന് പരിഹാരമെന്നോണം നേരത്തെ നഗരസഭയിൽനിന്ന് ഏഴ് ലക്ഷം അനുവദിച്ച് സംരക്ഷണ ഭിത്തി നിർമിച്ച് നൽകിയിരുന്നു. ഇവിടെനിന്നും കുറച്ച് മാറിയുള്ള പ്രദേശത്തെ സംരക്ഷണ ഭിത്തിയാണ് കഴിഞ്ഞ ദിവസം ഇടിഞ്ഞത്. നഗരസഭാംഗം മീര കൃഷ്ണൻ, അസം ബീഗം, നഗരസഭ സ്ഥിരംസമിതി അധ്യക്ഷൻ അജി മുണ്ടാട്ട് എന്നിവർ സ്ഥലം സന്ദർശിച്ചിരുന്നു. മൈനർ ഇറിഗേഷൻ വകുപ്പിന് പരാതി നൽകിയിട്ടുണ്ടെന്നും ഉടൻ പരിഹാരം കാണുമെന്നും നഗരസഭാധികൃതർ പറഞ്ഞു.

ആലങ്ങാട് സെന്‍റ് മേരീസ് പള്ളിയിൽ ഫാദേഴ്സ് ഡേ ആഘോഷിച്ചു

ആലങ്ങാട് : ആലങ്ങാട് സെന്‍റ് മേരീസ് പള്ളിയിൽ ഫാദേഴ്സ് ഡേ ആഘോഷിച്ചു. സെൻട്രൽ കമ്മിറ്റിയുടെ ആഭിമുഖ്യത്തിൽ നടന്ന ആഘോഷങ്ങൾക്ക് ഫാ. ഡിന്‍റോ മാണിക്കാത്താന്‍റെ നേതൃത്വത്തിളുള്ള ദിവ്യബലിയോടെ തുടക്കമായി. പ്രശസ്ത മോട്ടിവേറ്റർ ദമനൻ പായിപ്രയുടെ നേതൃത്വത്തിൽ മോട്ടിവേഷൻ ക്ലാസ് നടത്തി. പൊതുസമ്മേളനം പള്ളി വികാരി ഫാ. പോൾ ചുള്ളി ഉദ്ഘാടനം നടത്തി. വൈസ് ചെയർമാൻ ജോസ് ഗോപുരത്തിങ്കൽ അധ്യക്ഷത വഹിച്ചു. സിനിമാതാരം സുധീർ പറവൂർ മുഖ്യപ്രഭാഷണം നടത്തി. പ്രോഗ്രാം കൺവീനർ ജോർജ് പൊള്ളയിൽ, പിന്നണി ഗായകൻ ജ്യോതിഷ് ബാബു, സിഎംസി കോൺവെന്‍റ് മദർ സിസ്റ്റർ പ്രീത,കൈക്കാരൻമാരായ വർഗീസ് പൊള്ളയിൽ, അഗസ്റ്റിൻ കണ്ണമ്പുഴ,കമ്മിറ്റിഅംഗങ്ങളായ ലിസി രാജു, സോജോ കളപ്പറമ്പത്ത്, ജോജോ തോമസ്, മഞ്ജു ബിജു,സി.എ. ജോയ്, ചാൾസ് വലിയവീട്ടിൽ എന്നിവർ പ്രസംഗിച്ചു. തുടർന്ന് ഇടവകയിലെ മുതിർന്ന പൗരന്മാരെയും വിവിധ മേഖലകളിൽ കഴിവ് തെളിയിച്ചവരെയും ആദരിച്ചു.

വൈപ്പിനില്‍ ഒരു കളിസ്ഥലം കൂടി വരുന്നൂ

കൊച്ചി: വൈപ്പിന്‍ മണ്ഡലത്തിലെ കായിക പരിശീലനങ്ങള്‍ക്കു കരുത്തായി ഒരു കളിസ്ഥലം കൂടി ഒരുങ്ങുന്നു. കായികമേളകള്‍ നടത്താന്‍ ഉതകുന്ന രീതിയില്‍ എളങ്കുന്നപ്പുഴ ഗവ. ഹൈസ്‌കൂളിലെ മൈതാനം ആധുനിക രീതിയില്‍ നവീകരിക്കാനൊരുങ്ങുകയാണ് സംസ്ഥാന സര്‍ക്കാര്‍. ഇതിനായി ബജറ്റില്‍ 75 ലക്ഷം രൂപയാണ് അനുവദിച്ചിട്ടുള്ളത്. ഹാര്‍ബര്‍ എന്‍ജിനീയറിംഗ് വകുപ്പിനാണ് പദ്ധതിയുടെ നിര്‍വഹണ ചുമതല. മണ്ഡലത്തിലെ സ്‌കൂളുകളില്‍ കായിക പരിശീലനത്തിനുള്ള സൗകര്യങ്ങള്‍ ഉണ്ടായിരുന്നില്ല. മറ്റ് ഗ്രൗണ്ടുകള്‍ വാടകക്കെടുത്തായിരുന്നു ഉപജില്ലാ കായികമേള ഉള്‍പ്പെടെയുള്ളവ സംഘടിപ്പിച്ചിരുന്നത്. ഗ്രൗണ്ട് യാഥാർഥ്യമാകുന്നതോടെ മണ്ഡലത്തിലെ വിദ്യാർഥികള്‍ക്കും കായിക താരങ്ങള്‍ക്കും മികച്ച പരിശീലനം ഉറപ്പുവരുത്താനാകുമെന്നാണ് അധികൃതരുടെ പ്രതീക്ഷ. നേരത്തെ എളങ്കുന്നപ്പുഴയിലെ മാലിപ്പുറം സ്വതന്ത്ര മൈതാനത്തിന്‍റെ നവീകരണത്തിനായി എംഎല്‍എയുടെ ആസ്തി വികസന ഫണ്ടില്‍ നിന്ന് 99.4 ലക്ഷം രൂപ അനുവദിച്ചിരുന്നു.

കടൽക്ഷോഭം: നായരമ്പലത്ത് അടിയന്തര നടപടി വേണമെന്ന് മുൻ മന്ത്രി എസ്. ശർമ

വൈപ്പിൻ :കടൽ ക്ഷോഭത്തിൽ തകർച്ച ഭീഷണി നേരിടുന്ന നായരമ്പലം പുത്തൻ കടപ്പുറത്തെ ശ്രീ ബലമുരുക സ്വാമി ക്ഷേത്രം, സെന്‍റ് ആന്‍റണീസ് പള്ളി , സമീപത്തെ വീടുകൾ എന്നിവിടങ്ങളിൽ മുൻ മന്ത്രി എസ്. ശർമ സന്ദർശിച്ചു. ദുരിത ബാധിതർക്ക് അടിയന്തിര സഹായങ്ങൾ എത്തിക്കണമെന്ന് അദ്ദേഹം ജില്ലാ ഭരണകൂടത്തോടും ഫിഷറീസ് വകുപ്പിനോടും ആവശ്യപ്പെട്ടു. താത്കാലിക സംവിധാനമായി ജിയോ ബാഗ് സ്ഥാപിക്കുവാനും ശാശ്വത പരിഹരമായി ടെട്രോ പോഡ് ഉപയോഗിച്ച് കടൽ ഭിത്തി നിർമിക്കണമെന്നും അദ്ദേഹം ആവശ്യപ്പെട്ടു. എ.കെ. ഉല്ലാസ്, നരേന്ദ്രൻ, കെ.എ. അനീഷ് കുമാർ തുടങ്ങിയവരും ഒപ്പം ഉണ്ടായിരുന്നു. ഇന്ന് വൈകിട്ട് ഏഴിന് ജില്ലാ കളക്ടറുടെ ക്യാമ്പ് ഓഫീസിൽ നായരമ്പലത്തെ കടൽ ക്ഷോഭവുമായി ബന്ധപ്പെട്ട പ്രശ്നങ്ങൾ ചർച്ചചെയ്യുവാൻ പഞ്ചായത്ത്‌ പ്രസിഡന്‍റും വാർഡ് മെമ്പറും ഉൾപ്പടെ യുള്ളവരെ വിളിച്ചിട്ടുണ്ട്.

അത്യാധുനിക ശൗചാലയ പദ്ധതിയുമായി കോർപറേഷൻ

കൊച്ചി: വിദേശരാജ്യങ്ങളിലേതുപോലെ അത്യാധുനിക സൗകര്യങ്ങളുള്ള ശൗചാലയ പദ്ധതിയുമായി കൊച്ചി കോര്‍പറേഷന്‍. അര്‍ബന്‍ സൊല്യൂഷന്‍സ് കമ്പനി കൗണ്‍സില്‍ മുന്‍പാകെ സമര്‍പ്പിച്ച റെസ്‌റ്റോ കഫേ പദ്ധതിയോട് ഭരണ പ്രതിപക്ഷാംഗങ്ങള്‍ക്കിടയില്‍ ഭിന്നസ്വരങ്ങള്‍ ഉയര്‍ന്നെങ്കിലും മികവാര്‍ന്ന സൗകര്യങ്ങളോടെയുള്ള പൊതുശൗചാലയങ്ങള്‍ കൊച്ചിക്കും വേണമെന്ന നിലപാടാണ് ഭൂരപക്ഷം കൗണ്‍സിലര്‍മാരും ഉന്നയിച്ചത്. റെസ്റ്ററന്‍റും ഫുഡ്‌കോര്‍ട്ടും ഉള്‍പ്പടെയുള്ള 25 ആധുനിക ശൗചാലയങ്ങള്‍ ബിഒടി മാതൃകയില്‍ നിര്‍മിക്കുന്ന പദ്ധതിയാണ് അര്‍ബന്‍ സൊല്യൂഷന്‍സ് എന്ന സ്ഥാപനം കൗണ്‍സിലില്‍ അവതരിപ്പിച്ചത്. ഇതിനായി നഗരത്തിന്‍റെ കണ്ണായ സ്ഥലത്തുള്ള 75 സെന്‍റ് സ്ഥലം സൗജന്യമായി സ്ഥാപനത്തിന് കൈമാറണം. ഇവിടെ സ്ഥാപനം റെസ്‌റ്റോ കഫേ ആശയത്തില്‍ ടോയ്‌ലറ്റ് സമുച്ഛയം നിര്‍മിക്കും. താഴത്തെ നിലയിലാകും ശൗചാലം. ഭിന്നശേഷിക്കാര്‍ക്കും ഉപയോഗിക്കാന്‍ കഴിയുന്ന സൗകര്യങ്ങള്‍ ഇവിടെയുണ്ടാകും. മുകളിലെ നിലയില്‍ ശീതീകരിച്ച റസ്‌റ്റോറന്‍റും ആളുകള്‍ക്ക് ഇരിക്കാനുള്ള ഓപ്പണ്‍ സ്‌പേസും ഉണ്ടാകും. മൂന്ന് കാറ്റഗറിയില്‍ നിര്‍മിക്കുന്ന റെസ്റ്റോ കഫേയുടെ പ്രീമിയം വിഭാഗത്തിലുള്ള സമുച്ചയത്തില്‍ ശീതീകരിച്ച ശൗചാലത്തിന് പുറമേ മുകളിലെ നിലയില്‍ എസി റെസ്‌റ്റോറന്‍റ്, ഓപ്പണ്‍ എയര്‍ സ്‌പേസ്, താഴത്തെ നിലയില്‍ ഫുഡ്കിയോസ്‌ക് എന്നിവയുണ്ടാകും. ബി കാറ്റഗറിയില്‍ എസി റെസ്റ്ററന്‍റിന് വലുപ്പം കുറവായിരിക്കും. സി കാറ്റഗറിയില്‍ ഒറ്റ നില മാത്രമേ ഉണ്ടാകുകയുള്ളു. റെസ്റ്ററന്‍റും ഓപ്പണ്‍ സ്‌പേസും ഇല്ല. 20 കോടിയാണ് എസ്റ്റിമേറ്റ്. മാസം തോറും ഒരു കോടി ചെലവായും കണക്കാക്കുന്നു. ശൗചാലയം ഉപയോഗിക്കാന്‍ നഗരസഭ നിശ്ചയിച്ചിട്ടുള്ള നിരക്ക് ഈടാക്കും. 20 വര്‍ഷത്തിന് ശേഷം നഗരസഭയ്ക്ക് കൈമാറും വിധമാണ് കരാര്‍. പരസ്യം സ്ഥാപിക്കാന്‍ സ്ഥലം; എതിര്‍ത്ത് കൗണ്‍സിലര്‍മാര്‍ കൊച്ചി: റെസ്‌റ്റോ കഫെ നിര്‍മിക്കുന്നതിന് പകരമായി നഗരത്തില്‍ 3500 സ്‌ക്വയര്‍ മീറ്റര്‍ സ്ഥലം കമ്പനിക്ക് പരസ്യം സ്ഥാപിക്കാന്‍ നല്‍കണമെന്ന വ്യവസ്ഥയാണ് മേയര്‍ അടക്കം കൗണ്‍സിലര്‍മാര്‍ എതിര്‍ത്തത്. നഗരസഭയുടെ പരസ്യനയത്തിന് വിപരീതമാണിതെന്ന് യുഡിഎഫ് പാര്‍ലമെന്‍ററി പാര്‍ട്ടി നേതാവ് എം.ജി. അരിസ്റ്റോട്ടില്‍ ചൂണ്ടിക്കാട്ടി. വ്യക്തമായ ലാഭക്കണക്കില്ലാതെ ബിസിനസ് ഡീല്‍ മാത്രമാണ് കമ്പനി അവതരിപ്പിച്ച പ്രൊപ്പോസലിലുള്ളതെന്ന് ബിജെപി നേതാവ് പ്രിയാ പ്രശാന്തും വിമര്‍ശിച്ചു. നഗരത്തിലെ വിവിധ സ്ഥലങ്ങളില്‍ പരസ്യബോര്‍ഡുകള്‍, വാട്ടര്‍ കിയോസ്‌കുകള്‍, ഫീഡിംഗ് റൂമുകള്‍, ഓപ്പണ്‍ വര്‍ക്ക് സ്‌പേസുകള്‍, ട്രീ ഗാര്‍ഡുകള്‍ തുടങ്ങിയവ സ്ഥാപിച്ച് അതിലൂടെ പരസ്യം നല്‍കി വരുമാനം നേടുന്ന ആശയമാണ് കമ്പനി മുന്നോട്ട് വച്ചത്. പകരം നഗരസഭയ്ക്ക് ലഭിക്കുന്നത് പരസ്യനികുതി മാത്രം. എതിനെതിരെയാണ് ഭരണപക്ഷ കൗണ്‍സിലര്‍മാര്‍ പോലും വിമര്‍ശനം ഉന്നയിച്ചത്. പുറത്തുള്ള ഒരു കമ്പനിക്ക് കൊള്ളലാഭത്തിന് അവസരം ഒരുക്കുന്ന വ്യവസ്ഥയാണിതെന്ന് സിപിഎം അംഗം വി.എസ്. വിജു പറഞ്ഞു. സാധാരണക്കാനും പ്രയോജനം ലഭിക്കാന്‍ സൗജന്യമായി ശൗചാലയം ഉപയോഗിക്കാന്‍ ക്രമീകരണം ഒരുക്കുകയാണ് വേണ്ടതെന്ന് മറ്റൊരു സിപിഎം അംഗം ദിപിന്‍ ദിലീപ് പറഞ്ഞു. പരീക്ഷണാടിസ്ഥാനത്തില്‍ ആരംഭിക്കാം: മേയര്‍ കൊച്ചി: നഗരത്തില്‍ പുതിയ മാതൃകയില്‍ പൊതു ശൗചാലയങ്ങള്‍ വരേണ്ടത് ആവശ്യമെന്ന് മേയര്‍ എം. അനില്‍കുമാര്‍. അര്‍ബന്‍ സൊല്യൂഷന്‍സ് കമ്പനി കൗണ്‍സില്‍ മുന്‍പാകെ സമര്‍പ്പിച്ച റെസ്റ്റോ കഫേ പദ്ധതി പരീക്ഷണാടിസ്ഥാനത്തില്‍ നഗരത്തിലെ ചില പ്രദേശങ്ങളില്‍ ആരംഭിക്കും. പ്രവര്‍ത്തിപ്പിച്ച് വിജയിച്ചാല്‍ മാത്രം ബാക്കി ഇടങ്ങളില്‍ പൊതു ശൗചാലയവും റെസ്‌റ്റോ കഫെയും നിര്‍മിക്കാനുളള അനുമതി നല്‍കൂ. നഗരത്തില്‍ റെസ്‌റ്റോ കഫെ പദ്ധതി നടപ്പാക്കുന്നത് പരിശോധിക്കാന്‍ നഗരസഭാ സെക്രട്ടറിക്ക് ചുമതല നല്‍കി. ഇതിന് ശേഷമാകും പദ്ധതി നടപ്പാക്കുന്നതില്‍ കൗണ്‍സില്‍ തീരുമാനമെടുക്കുകയെന്നും മേയര്‍ പറഞ്ഞു.

പണ്ടാരച്ചിറ തോട് നവീകരണത്തിന് 100 കോടിയുടെ പദ്ധതി

കൊച്ചി: പശ്ചിമകൊച്ചിയിലെ പ്രധാന ജലാശയമായ പണ്ടാരച്ചിറ തോട് നവീകരണത്തിന് 100 കോടിയുടെ പദ്ധതി ആവിഷ്‌കരിച്ചതായി മേയര്‍ എം. അനില്‍കുമാര്‍ അറിയിച്ചു. സംസ്ഥാന സര്‍ക്കാരിന്‍റെ കനാല്‍ പുനരുജ്ജീവന ഉള്‍പ്പെട്ടിട്ടില്ലാത്തതിനാല്‍ അന്താരാഷ്ട്ര ഏജന്‍സികളുമായി സഹകരിച്ചാണ് പദ്ധതി നടപ്പാക്കുന്നത്. പദ്ധതിക്കാവശ്യമായ മുഴുവന്‍ തുകയും ഗ്രാന്‍റായി നല്‍കാമെന്ന് ഓഷ്യന്‍ റിസ്‌ക് ആന്‍ഡ് റിസിലന്‍സ് ആക്ഷന്‍ അലൈന്‍സ് എന്ന ഏജന്‍സി ഉറപ്പ് നല്‍കിയിട്ടുണ്ടെന്നും മേയര്‍ പറഞ്ഞു. വേലിയേറ്റ സമയങ്ങളില്‍ വെള്ളക്കെട്ടില്ലാതെ ജലമൊഴുക്ക് നിലനിര്‍ത്തുന്നതിന് പാലങ്ങളും കലുങ്കുകളും പുതുക്കി പണിയുക, ഖരമാലിന്യങ്ങളും കുളവാഴയും നിറയാതെ വെള്ളം സുഗമമായി ഒഴുകുന്നതിന് സ്ഥിരം സംവിധാനം ഏര്‍പ്പെടുത്തുക, ചെളി കോരുക, പാര്‍ശ്വഭിത്തികള്‍ ബലപ്പെടുത്തുക, സംരക്ഷണ ഭിത്തി നിര്‍മിക്കുകയും ബലപ്പെടുത്തുകയും ചെയ്യുക എന്നിവയാണ് പദ്ധതിയുടെ ഭാഗമായി പ്രധാനമായും ചെയ്യുന്നത്. ഇതോടൊപ്പം തോടിനോടു ചേര്‍ന്നുള്ള ഒഴിഞ്ഞ സ്ഥലങ്ങളില്‍ കളിസ്ഥലവും മലിനജല ശുദ്ധീകരണ പ്ലാന്‍റും പദ്ധതിയിലുണ്ട്. കൊച്ചിയുടെയും പള്ളുരുത്തിയുടെയും അതിര്‍ത്തി കൂടിയായ തോടിന്‍റെ 2.3 കിലോമീറ്റര്‍ വരുന്ന ഭാഗത്താണ് നവീകരണം. വിശദമായ ഡിപിആര്‍ തയാറാക്കുന്ന പ്രവര്‍ത്തനങ്ങള്‍ ആരംഭിച്ചിട്ടുണ്ട്. 50 ലക്ഷം രൂപയാണ് ഡിപിആര്‍ തയാറാക്കുന്നതിന് ചെലവഴിക്കുക. നാല് മാസത്തിനുള്ളില്‍ ഡിപിആര്‍ തയാറാക്കും. മേയറുടെ അധ്യക്ഷതയില്‍ ചേര്‍ന്ന യോഗത്തില്‍ ഐസിഎല്‍ഇഐ പ്രതിനിധി ഡോ. മോണാലിസ സെന്‍, ബെക്ടല്‍ പ്രതിനിധി താര എസ്. പിള്ള, മാറ്റര്‍ലാബ് പ്രതിനിധി ഡോ. ജയകുമാര്‍ തുടങ്ങിയവര്‍ പങ്കെടുത്തു.

മെട്രോപൊളിറ്റൻ ആസൂത്രണ സമിതി തെരഞ്ഞെടുപ്പിൽ കോൺഗ്രസിന് നേട്ടം

കാക്കനാട് : കൊച്ചി മെട്രോപൊളിറ്റൻ ആസൂത്രണ സമിതി (എംപിസി)യിലേക്ക് മുനിസിപ്പൽ കൗൺസിലർമാരുടെ പ്രതിനിധികളെ തെരഞ്ഞെടുക്കാൻ നടന്ന വോട്ടെടുപ്പിൽ കോൺഗ്രസ് സ്ഥാനാർഥികൾക്ക് ഏകപക്ഷീയ വിജയം. രണ്ട് അംഗങ്ങളെയാണ് തെരഞ്ഞെടുത്തത്. സിനി (അങ്കമാലി നഗരസഭാ ഉപാധ്യക്ഷ) റാഷിദ് ഉള്ളംപിള്ളി (തൃക്കാക്കര നഗരസഭ)യുമാണ് ഇന്നലെ നടന്ന തെരഞ്ഞെടുപ്പിൽ വിജയികളായത്. സിപിഎമ്മിലെ ഗ്രേസി ദേവസ്യയേയും (അങ്കമാലി നഗരസഭ) സിപിഐയിലെ സി.എം. ഷിനിനേയും (ഏലൂർ നഗരസഭ) ആണ് കോൺഗ്രസ് സ്ഥാനാർത്ഥികൾ പരാജയപ്പെടുത്തിയത്. കോൺഗ്രസ് സ്ഥാനാർഥികൾക്ക്141 വോട്ടുകളും ഇടതു സ്ഥാനാർഥികൾക്ക് 122 വോട്ടുകളും ലഭിച്ചു. രണ്ട് വോട്ടുകൾ അസാധുവായി. ആസൂത്രണ സമിതിയിലേക്കുള്ള ഗ്രാമപഞ്ചായത്തു പ്രതിനിധികളെ ചൊവ്വാഴ്ച തെരഞ്ഞെടുത്തിരുന്നു. കോർപറേഷൻ കൗൺസിലർമാരിൽ നിന്നുളള പ്രതിനിധികളെ ഇന്നുതെരഞ്ഞെടുക്കും. 74 കൗൺസിലർമാരിൽ നിന്നും നാലു പേരെയാണ് മെട്രോപൊളിറ്റൻ ആസൂത്രണ സമിതിയിലേക്ക് തെരഞ്ഞെടുക്കുന്നത്.

മഞ്ഞപ്ര സെന്‍റ് മേരീസ് യുപിഎസിൽ "ദീപിക നമ്മുടെ ഭാഷ' പദ്ധതി

മഞ്ഞപ്ര: മഞ്ഞപ്ര സെന്‍റ് മേരീസ് യുപി സ്കൂളിൽ "ദീപിക നമ്മുടെ ഭാഷ'പദ്ധതിയ്ക്കു തുടക്കം. മഞ്ഞപ്ര ഫൊറോന വികാരിയും സ്കൂൾ മാനേജരുമായ റവ.ഡോ. വർഗീസ് പൊട്ടയ്ക്കൽ ഉദ്ഘാടനം ചെയ്തു. പിടിഎ പ്രസിഡന്‍റ് ജിജോ ആന്‍റണി അധ്യക്ഷത വഹിച്ചു. പ്രധാനധ്യാപിക ജിജി പാപ്പച്ചൻ, ദീപിക കൊച്ചി ബ്യൂറോ ചീഫ് സിജോ പൈനാടത്ത്, സിസ്റ്റർ അഖില എന്നിവർ പ്രസംഗിച്ചു. ദീപിക കൊച്ചി സർക്കുലേഷൻ മാനേജർ ബിനോ വർഗീസ് വിദ്യാർഥികൾക്കു ലഹരിവിരുദ്ധ പ്രതിജ്ഞ ചൊല്ലിക്കൊടുത്തു.

പ്രയുക്തി തൊഴിൽ മേള 21ന്

കളമശേരി: കൊച്ചിന്‍ യുണിവേഴ്സിറ്റി എംപ്ലോയ്മെന്‍റ് ഇന്‍ഫര്‍മേഷൻ ആൻഡ് ഗൈഡന്‍സ് ബ്യൂറോ-മോ‍ഡൽ കരിയർ സെന്‍ററിന്‍റെ നേതൃത്വത്തിൽ 21ന് "പ്രയുക്തി തൊഴില്‍മേള" പൂത്തോട്ട സ്വാമി ശാശ്വതീകാനന്ദ കോളേജ് കാന്പസിൽ നടത്തും. താത്പര്യമുള്ള ഉദ്യോഗാർഥികൾ പേര്, വിദ്യാഭ്യാസയോഗ്യത എന്നിവ സഹിതം [email protected] എന്ന വിലാസത്തിലേക്ക് രജിസ്റ്റർ ചെയുക. തൊഴില്‍മേളയോടനുബന്ധിച്ച് കരിയർ സംബന്ധമായ സംശയനിവാരണത്തിന് ഒരു കരിയര്‍ ക്ലിനിക്കും കാന്പസില്‍ സംഘടിപ്പിക്കും. കൂടുതൽ വിവരങ്ങൾക്ക്, 0484-2576756 എന്ന നമ്പറിൽ ബന്ധപ്പെടുക.

"ഉദ്യോഗ്-25' മെഗാ ജോബ് ഫെയർ നാളെ

അങ്കമാലി : ഡി പോൾ ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്നോളജിയും ഫ്ലോറൻസ് എജുക്കേഷൻ കൺസൾട്ടൻസിയുടെയും ആഭിമുഖ്യത്തിൽ ടൗൺ എംപ്ലോയ്മെന്‍റ് എക്സ്ചേഞ്ചും നാഷണൽ കരിയർ സർവീസ് സഹകരിച്ച് സംഘടിപ്പിക്കുന്ന "ഉദ്യോഗ് 25" മെഗാ ജോബ് ഫെയർ നാളെ രാവിലെ ഒന്പതു മുതൽ വൈകീട്ട് അഞ്ചു വരെ ഡി പോൾ കാമ്പസിൽ നടക്കും. 50-ത്തിലധികം പ്രമുഖ കമ്പനികൾ പങ്കെടുക്കുന്നതിനായി രജിസ്റ്റർ ചെയ്തിട്ടുണ്ട്. ഉദ്യോഗാർഥികൾക്ക് വിവിധ മേഖലകളിൽ തൊഴിൽ അവസരങ്ങൾ കണ്ടെത്താനുള്ള മികച്ച വേദിയാകും ഈ ഫെയർ. രജിസ്ട്രേഷനായി www.depaul.edu.in സന്ദർശിക്കുക.

കടലാക്രമണം; കണ്ണമാലിയിൽ ദുരിതാശ്വാസ ക്യാന്പ് തുറന്നു

പളളുരുത്തി: രൂക്ഷമായ കടലാക്രമണത്തിന്‍റെ പശ്ചാത്തലത്തിൽ കണ്ണമാലിയിൽ ദുരിതാശ്വാസ ക്യാന്പ് തുറന്നു.കണ്ണമാലി പള്ളി പാരിഷ് ഹാളിലാണ് ക്യാന്പ് ആരംഭിച്ചിട്ടുള്ളത്. 250 ഓളം പേർ ക്യാന്പിലുണ്ടെന്ന് റവന്യൂ അധികൃതർ അറിയിച്ചു. ഇന്ന് കടൽ പൊതുവേ ശാന്തമായിരുന്നെങ്കിലും വീടുകളിൽ അടിഞ്ഞു കൂടിയിട്ടുള്ള ചെളിയും മാലിന്യങ്ങളും നീക്കം ചെയ്യാതെ ആളുകൾക്ക് വീടുകളിലേക്ക് മടങ്ങി പോകാൻ സാധിക്കാത്ത അവസ്ഥയാണ്.

ആരോഗ്യവിഭാഗം പരിശോധന; ചിറ്റാറ്റുകരയിൽ ഭക്ഷ്യോത്പാദന കേന്ദ്രം പൂട്ടി

പറവൂർ: ചിറ്റാറ്റുകര പഞ്ചായത്ത് ആരോഗ്യ വിഭാഗത്തിന്‍റെ നേതൃത്വത്തിൽ ഭക്ഷ്യോത്പാദന കേന്ദ്രങ്ങളിൽ പരിശോധന നടത്തി. ന്യൂനതകൾ കണ്ടെത്തിയ സ്ഥാപനങ്ങൾക്കെതിരെ നടപടി എടുത്തു. വൃത്തിഹീനമായ സാഹചര്യത്തിൽ ഭക്ഷ്യവസ്തുക്കൾ ഉത്പാദിപ്പിക്കുന്ന മാക്കനായി മെൽബ ഫുഡ്സ് എന്ന സ്ഥാപനം അടച്ചുപൂട്ടി പിഴ ചുമത്തി. ഇവിടെ ജീവനക്കാർക്ക് മതിയായ സൗകര്യങ്ങളൊരുക്കാതെയാണ് ഉത്പാദിപ്പിച്ച ഭക്ഷ്യവസ്തുക്കൾ പാക്ക് ചെയ്യുന്നതെന്ന് പരിശോധനയിൽ കണ്ടെത്തി. ശുചിത്വ നിലവാരത്തിലെ പോരായ്മകൾ, ഭക്ഷണസാധനങ്ങൾ കൈകാര്യം ചെയ്യുന്ന ജീവനക്കാർക്ക് ഹെൽത്ത് കാർഡിന്‍റെ അഭാവം, പുകയില നിരോധന നിയമ പ്രകാരമുള്ള മാനദണ്ഡങ്ങളുടെ ലംഘനം തുടങ്ങിയവ കണ്ടെത്തിയ നാല് സ്ഥാപനങ്ങൾക്കെതിരെ കേരള പൊതുജനാരോഗ്യ നിയമ പ്രകാരം നിയമ നടപടികൾ ആരംഭിച്ചു. ചിറ്റാറ്റുകര കുടുംബാരോഗ്യകേന്ദ്രം ഹെൽത്ത് ഇൻസ്പെക്ടർ പി.ജി. ആന്‍റണിയുടെ നേതൃത്വത്തിൽ നടത്തിയ പരിശോധനയിൽ പി.പി. രാധിക, അരുൺ സാഗർ, മിലി കൃഷ്ണൻ, കെ.എസ്. അമൃത എന്നിവരും ഉണ്ടായി. വരും ദിവസങ്ങളിലും പരിശോധന തുടരും. പകർച്ച വ്യാധികൾ, ഡെങ്കിപ്പനി, എലിപ്പനി, മഞ്ഞപ്പിത്തം എന്നിവക്കെതിരെ പ്രതിരോധ ജാഗ്രത പ്രവർത്തനങ്ങൾ ഉറപ്പാക്കണമെന്നും, ലക്ഷണങ്ങൾ കണ്ടാൽ ഉടനെ ആശുപത്രിയിൽ ചികിത്സ തേടണമെന്നും മെഡിക്കൽ ഓഫീസർ ഇൻ ചാർജ് ഡോ. ഫിലോമിനാ അലോഷ്യസ് അറിയിച്ചു.

നവജാത ശിശുവിന്‍റെ വാല്‍വ് ചുരുക്കം പരിഹരിച്ച് ആലുവ രാജഗിരി ആശുപത്രി

കൊച്ചി: രണ്ടു ദിവസം മാത്രം പ്രായമുളള നവജാത ശിശുവിന്‍റെ വാല്‍വ് ചുരുക്കം പരിഹരിച്ച് ആലുവ രാജഗിരി ആശുപത്രി. ശ്വാസംമുട്ടല്‍, മുലപ്പാല്‍ കുടിക്കുന്നതില്‍ കുറവ് എന്നീ ലക്ഷണങ്ങളോടെ ഗുരുതരാവസ്ഥയില്‍ അത്യാഹിത വിഭാഗത്തിലെത്തിയ ആലുവ സ്വദേശികളായ ദമ്പതികളുടെ കുഞ്ഞിനാണു ബലൂണ്‍ അയോട്ടിക് വാല്‍വോട്ടമിയിലൂടെ ജീവന്‍ രക്ഷിച്ചത്. പീഡിയാട്രിക് കാര്‍ഡിയോളജിസ്റ്റ് ഡോ. എസ്. വെങ്കിടേശ്വരന്‍റെ നിര്‍ദേശത്തെ തുടര്‍ന്ന് നടത്തിയ ഇക്കോ പരിശോധനയിലാണ് വാല്‍വ് ചുരുക്കം കണ്ടെത്തിയത്. ഹൃദയം നിലയ്ക്കാനുള്ള (കാര്‍ഡിയാക് ഷോക്ക്) സാധ്യത കണക്കിലെടുത്ത് കുഞ്ഞിനെ അടിയന്തരമായി ബലൂണ്‍ അയോട്ടിക് വാല്‍വോട്ടമിക്ക് വിധേയനാക്കി. അത്യന്തം സങ്കീര്‍ണമായ നടപടി ക്രമം പീഡിയാട്രിക് കാര്‍ഡിയോളജിസ്റ്റ് ഡോ.എസ്. വെങ്കിടേശ്വരന്‍റെ നേതൃത്വത്തിലാണ് വിജയകരമായി നടപ്പാക്കിയത്. കുഞ്ഞിന്‍റെ ജീവന്‍ നഷ്ടപ്പെടുമായിരുന്ന ഘട്ടത്തിലാണ് ബലൂണ്‍ അയോട്ടിക് വാല്‍വോട്ടമി നടപ്പാക്കിയതെന്ന് ഡോ. എസ്. വെങ്കിടേശ്വരന്‍ പറഞ്ഞു. കുഞ്ഞുങ്ങളില്‍ അപൂര്‍വമായാണ് ജന്മനാലുളള വാല്‍വ് ചുരുക്കം കാണാറുളളത്. വേഗത്തില്‍ ശരിയായ ചികിത്സ നല്‍കിയാല്‍ സങ്കീര്‍ണതകള്‍ ഇല്ലാതെ ഭേദമാക്കാന്‍ കഴിയുമെന്ന് ഡോ. എസ്. വെങ്കിടേശ്വരന്‍ അഭിപ്രായപ്പെട്ടു. രക്തയോട്ടം സാധാരണ രീതിയിലായതോടെ വെന്‍റിലേറ്റര്‍ പിന്തുണ സാവധാനം നീക്കം ചെയ്തു. ഒരാഴ്ച നീണ്ട ആശുപത്രി വാസത്തിനൊടുവില്‍ കുഞ്ഞുമായി ദമ്പതികള്‍ വീട്ടിലേക്ക് മടങ്ങി.

ബീച്ച് ടൂറിസം കോറിഡോർ പദ്ധതിക്കു 2.96 കോടി

വൈപ്പിൻ: ബീച്ച് ടൂറിസം കോറിഡോർ പദ്ധതിക്ക് 2.96 കോടി രൂപ അനുവദിച്ചതായി കെ.എൻ. ഉണ്ണിക്കൃഷ്ണൻ എംഎൽഎ അറിയിച്ചു. കുഴുപ്പിള്ളി, മുനമ്പം, ചെറായി ബീച്ചുകളുടെ നവീകരണത്തിനും സൗന്ദര്യവൽക്കരണത്തിനും ആയാണ് വിനോദസഞ്ചാര വകുപ്പ് തുക അനുവദിച്ചത്. മൂന്ന് ബീച്ചുകളിലായി നടപ്പാതകളുടെ നവീകരണം, അടിസ്ഥാന സൗകര്യങ്ങൾ വർധിപ്പിക്കൽ, കൈവരികളും ഇരിപ്പിടങ്ങളും ഒരുക്കൽ, സ്നാക്സ് ബാറുകൾ, കുട്ടികളുടെ കളി ഉപകരണങ്ങൾ, ഓപ്പൺ ജിം, പാർക്കിംഗ് ഏരിയ, പോലീസ് കൺട്രോൾ റൂം, വൈദ്യുതി വിളക്കുകൾ, നിലവിലുള്ള ടോയ്‌ലറ്റുകളുടെ നവീകരണം, സൗന്ദര്യവത്കരണം എന്നിവ പദ്ധതിയിൽ ഉൾപ്പെടുത്തിയിട്ടുണ്ട്. തിരുവനന്തപുരത്ത് ചേർന്ന വിനോദസഞ്ചാരവകുപ്പിന്‍റെ വർക്കിംഗ് ഗ്രൂപ്പ് മീറ്റിംഗിലാണ് പദ്ധതിക്ക് ഭരണാനുമതി ലഭിച്ചതെന്ന്എംഎൽഎ വ്യക്തമാക്കി.

അയ്യന്പുഴ പാണ്ടുപാറയിൽ 90 കുടുംബങ്ങൾക്ക് പട്ടയം ഉടന്‍

കാലടി: അയ്യമ്പുഴ പഞ്ചായത്തില്‍ പാണ്ടുപാറ പ്രദേശത്ത് 90 കുടുംബങ്ങള്‍ക്ക് പട്ടയം ഉടന്‍ ലഭ്യമാകുമെന്ന് റോജി എം. ജോണ്‍ എംഎൽഎ അറിയിച്ചു. സാങ്കേതിക തടസങ്ങളാല്‍ പതിറ്റാണ്ടുകളായി പട്ടയം ലഭിക്കാതെ ദുരിതാവസ്ഥയിലായ കുടുംബങ്ങള്‍ക്കാണ് ഇപ്പോള്‍ പ്രശ്ന പരിഹാരം ഉണ്ടാകുന്നത്. അയ്യമ്പുഴ വില്ലേജിലെ 189 മുതല്‍ 197 വരെയും, 200 മുതല്‍ 214 വരെയുമുള്ള സര്‍വേ നമ്പര്‍, റീ-സര്‍വേ നമ്പറുകള്‍ ബിടിആറില്‍ സര്‍ക്കാര്‍-വനം എന്ന് രേഖപ്പെടുത്തിയിരിക്കുന്നത് നീക്കി പുറമ്പോക്ക് എന്ന് മാറ്റി ഉത്തരവായിരുന്നതാണ്. ഈ സര്‍വേ നമ്പറുകളിലുള്ള കൈവശക്കാരുടെ സ്ഥലങ്ങള്‍ പരിശോധിച്ച് നിലവിലെ കൈവശം അനുസരിച്ച് സബ്-ഡിവിഷന്‍ സര്‍വ്വേ ചെയ്തിരുന്നതുമാണ്. 1969 ലെ സര്‍ക്കാര്‍ ഉത്തരവ് പ്രകാരം നിവലിലെ കൈവശക്കാരുടെ മുന്‍ഗാമികള്‍ക്ക് മൂന്ന് ഏക്കറില്‍ നിജപ്പെടുത്തി പതിച്ച് കൊടുക്കുവാന്‍ ഉത്തരവായിരുന്നു. എന്നാല്‍ റീ-സര്‍വേ സമയത്തെ പിശക് മൂലം പട്ടയം അനുവദിക്കുന്ന നടപടികള്‍ യഥാസമയം പൂര്‍ത്തീകരിച്ചിരുന്നില്ല. വിഷയം റോജി എം. ജോണ്‍ എംഎല്‍എ റവന്യു വകുപ്പ് മന്ത്രി വിളിച്ച് ചേര്‍ത്ത റവന്യു അസംബ്ലിയില്‍ നിരവധി തവണ ഉന്നയിക്കുകയും പ്രശ്നത്തിന് പരിഹാരം ഉണ്ടാകണമെന്ന് ആവശ്യപ്പെടുകയും ചെയ്തു, ഇത് പ്രത്യേകമായി പരിശോധിക്കാന്‍ ലാന്‍റ് റവന്യു കമ്മീഷണറോടും, ജില്ലാ കളക്ടറോടും ആവശ്യപ്പെടുകയും തുടര്‍ന്ന് കൈവശക്കാരില്‍ നിന്ന് വ്യക്തിഗത അപേക്ഷകള്‍ കൈപ്പറ്റി തുടര്‍ നടപടികള്‍ പൂര്‍ത്തീകരിച്ച് വരികയുമാണ്. ഇന്നലെ എംഎല്‍എയുടെ അധ്യക്ഷതയില്‍ അങ്കമാലിയില്‍ ചേര്‍ന്ന ഭൂമി പതിവ് കമ്മിറ്റി നടപടിക്രമങ്ങള്‍ പൂര്‍ത്തീകരിച്ച് 90 ഓളം അപേക്ഷകളില്‍ എത്രയും വേഗം പട്ടയം നല്‍കുന്നതിന് ശുപാര്‍ശ ചെയ്തു. ഏറ്റവും ഏടുത്ത് നടത്തുന്ന ജില്ലാതല പട്ടയ മേളയില്‍ തന്നെ ഭൂവുടമകള്‍ക്ക് പട്ടയം വിതരണ ചെയ്യുന്നതിനുള്ള നടപടികള്‍ സ്വീകരിക്കുമെന്ന് എംഎല്‍എ അറിയിച്ചു. യോഗത്തില്‍ ബ്ലോക്ക് പഞ്ചായത്ത് പ്രസിഡന്‍റ് കൊച്ചുത്രേസ്യ തങ്കച്ചന്‍, പഞ്ചായത്ത് പ്രസിഡന്‍റ് പി.യു. ജോമോന്‍ ജില്ലാ പഞ്ചായത്തംഗങ്ങളായ അനിമോള്‍ ബേബി, ശാരദാ മോഹന്‍, ടി.ഡി. സ്റ്റീഫന്‍, ആലുവ തഹസില്‍ദാര്‍ വി. ഡിക്സി ഫ്രാന്‍സിസ് ഉള്‍പ്പെടെ മറ്റ് റവന്യു വകുപ്പ് ഉദ്യോഗസ്ഥരും യോഗത്തില്‍ പങ്കെടുത്തു.

പാന്പുകടിയേറ്റ് ചികിത്സയിലായിരുന്ന വ്യാപാരി മരിച്ചു

കോതമംഗലം: പാന്പുകടിയേറ്റ് ചികിത്സയിലായിരുന്ന വ്യാപാരി മരിച്ചു. ചെറുവട്ടൂർ കാവാട്ട് കൊച്ചുമുഹമ്മദാ(65)ണ് മരിച്ചത്. കബറടക്കം നടത്തി. ചെറുവട്ടൂർ ഹൈക്കോടതി കവലയിലുള്ള സ്വന്തം പച്ചക്കറി കടയ്ക്കുള്ളിൽ വച്ച് പാന്പുകടിയേറ്റ് അങ്കമാലി ആശുപത്രിയിലെ തീവ്രപരിചരണ വിഭാഗത്തിൽ രണ്ടാഴ്ചയായി ചികിത്സയിലായിരുന്നു. ഭാര്യ: നബീസ ചെറുവട്ടൂർ ഓലിൽ മലയിൽ കുടുംബാംഗം. മക്കൾ: മജീന, റെജീന, റസീന, റിയാസ് (ദുബൈ). മരുമക്കൾ: സലാം ഓടയ്ക്കാലി, ഖാദിർ പോഞ്ഞാശേരി, റസൽ മുളവൂർ, ഹസ്ന റിയാസ്.

ബൈക്ക് മോഷ്ടാക്കൾ പിടിയിൽ

കളമശേരി: എളമക്കരയിൽ വാടകയ്ക്ക് താമസിക്കുന്ന ലക്ഷദ്വീപ് സ്വദേശിയുടെ ബൈക്ക് മോഷ്ടിച്ച കേസിലെ പ്രതികളെ കളമശേരി പോലീസ് അറസ്റ്റ് ചെയ്തു. തൃശൂർ തിരുവത്ര മൂട്ടിൽ മണത്തല മാത്രക്കോട്ട് അമൽ (23), ചേർത്തല തൃച്ചാറ്റുകുളം കൊല്ലംപറമ്പിൽ അൻസിൽ മണി (22) എന്നിവരെയാണ് അറസ്റ്റ് ചെയ്തത്. കളമശേരി ഇൻസ്പെക്ടർ എം.ബി. ലത്തീഫിന്‍റെ നേതൃത്വത്തിൽ സബ് ഇൻസ്പെക്ടർ ടി.എസ്. സനീഷ്, സിപിഒമാരായ സിനു ചന്ദ്രൻ, ലിബിൻ കുമാർ എന്നിവർ ചേർന്ന് പിടികൂടുകയായിരുന്നു. വാഹനം മോഷ്ടിച്ചു നമ്പർ പ്ലേറ്റ് മാറ്റി പ്രതികൾ ഉപയോഗിച്ച് വരികയായിരുന്നു. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

പനമ്പിള്ളിനഗറില്‍ കോടികള്‍ വിലമതിക്കുന്ന മിച്ചഭൂമി ഏറ്റെടുത്തു

കൊച്ചി: പനമ്പിള്ളി നഗറില്‍ കോടികള്‍ വിലമതിക്കുന്ന മിച്ചഭൂമി ഏറ്റെടുത്ത് റവന്യൂ വകുപ്പ്. എളംകുളം വില്ലേജിലെ 893/4,6,8, 9,10 സര്‍വേ നമ്പറുകളില്‍പ്പെട്ട 4.22 ഏക്കര്‍ സ്ഥലമാണ് ഒന്പതു വര്‍ഷം നീണ്ട നിയമ പോരാട്ടങ്ങള്‍ക്കൊടുവില്‍ റവന്യൂ സംഘം ഏറ്റെടുത്തത്. 1963ലെ ഭൂപരിഷ്‌കരണ നിയമത്തിന് പിന്നാലെ ഇതു മിച്ചഭൂമിയായി പ്രഖ്യാപിച്ചിരുന്നു. എന്നാല്‍ സ്ഥലമുടമകള്‍ നിയമനടപടികളുമായി മുന്നോട്ടു പോയതോടെ സാങ്കേതിക തടസങ്ങള്‍ മൂലം ഭൂമി ഏറ്റെടുക്കാന്‍ കഴിയാത്ത സ്ഥിതിയായി. 1973 മുതല്‍ ഇതു സംബന്ധിച്ചു കേസുകള്‍ ഉണ്ടായിരുന്നു. തുടര്‍ന്നു വൈക്കം മേഖല ലാൻഡ് ബോര്‍ഡ് ചെയര്‍മാന്‍റെ നിര്‍ദേശ പ്രകാരം നടപടിക്രമങ്ങള്‍ വേഗത്തിലാക്കിയതോടെയാണു ഭൂമി ഏറ്റെടുക്കാന്‍ കഴിഞ്ഞത്. കണയന്നൂര്‍ താലൂക്ക് തഹസില്‍ദാര്‍ ഡി. വിനോദിന്‍റെ നേതൃത്വത്തില്‍ ഭൂരേഖ തഹസില്‍ദാര്‍ സി.ആര്‍. ഷനോജ് കുമാര്‍, ഡെപ്യൂട്ടി തഹസില്‍ദാര്‍മാരായ ബിനോ തോമസ്, ബിജു ജോസ്, വില്ലേജ് ഓഫീസര്‍ പി. സജിത്ത്, സെക്ഷന്‍ ക്ലാര്‍ക്ക് മാര്‍ട്ടിന്‍ ടിനോയ് എന്നിവരടങ്ങിയ സംഘമാണ് നടപടിക്രമങ്ങള്‍ പൂര്‍ത്തിയാക്കിയത്.

കടൽകയറ്റം; എട്ടു വീടുകൾ തകർന്നു : ഉള്ളുലഞ്ഞ് കണ്ണമാലി

പള്ളുരുത്തി: കണ്ണമാലിയിൽ തുടർച്ചയായ മൂന്നാം ദിവസവും കടൽകയറ്റം രൂക്ഷമായതോടെ പ്രദേശത്ത് ജനജീവിതം പൂർണമായും സ്തംഭിച്ചു. എട്ടു വീടുകൾ തകർന്നു. ഇന്നലെ ഉച്ചയോടെ അതിശക്തമായാണ് കടൽ കരയിലേക്ക് അടിച്ചുകയറിയത്. ചെറിയ കടവ്, വാട്ടർ ടാങ്ക്, ഡിവൈൻ ചാപ്പൽ, ഗ്യാപ് റോഡ്, കാട്ടിപ്പറമ്പ്, കൈതവേലി, മാനാശേരി എന്നിവിടങ്ങളിലാണ് കടൽകയറ്റം രൂക്ഷമായത്. കഴിഞ്ഞ നാലു വർഷത്തിനിടെ ഏറ്റവും രൂക്ഷമായ കടൽകയറ്റമാണ് ചെല്ലാനത്ത് അനുഭവപ്പെടുന്നത്. അഞ്ഞൂറോളം വീടുകളിൽ വെള്ളം കയറി. വീടിനുള്ളിൽ ഉണ്ടായിരുന്ന ഭക്ഷ്യവസ്തുക്കൾ ഉൾപ്പെടെ ഉപയോഗശൂന്യമായി. കുടിക്കാൻ പോലൂം വെള്ളമില്ല. പ്രാഥമിക ആവശ്യങ്ങൾപോലും നിർവഹിക്കാനാകാത്ത സാഹചര്യമാണുള്ളത്. ബന്ധപ്പെട്ട വകുപ്പ് അധികൃതരുടെ നടപടിയിൽ പ്രതിഷേധിച്ച് ക്യാന്പുകളിൽ പോകാൻ ആരും തയാറാകുന്നില്ല. ഇവർ റോഡിലാണ് അഭയം തേടുന്നത്. ഇവർക്ക് ആവശ്യമായ ഭക്ഷണവും വെള്ളവും സന്നദ്ധ സംഘടനകൾ വഴി എത്തിക്കാൻ കൊച്ചി തഹസിൽദാർ ജോസഫ് ആന്‍റണി ഹെർട്ടിസ് മുൻകൈയെടുത്ത് നടപടി സ്വീകരിച്ചിട്ടുണ്ട്. എന്നാലും പ്രദേശവാസികളുടെ പ്രതിഷേധത്തിന് കുറവില്ല. ഇന്നലെ രാവിലെ ജിയോ ബാഗ് സ്ഥാപിക്കുന്ന ജോലികൾ ആരംഭിക്കുമെന്ന ഉറപ്പിൽ നാട്ടുകാർ റോഡ് ഉപരോധം താൽക്കാലികമായി അവസാനിപ്പിച്ചിരുന്നു. എന്നാൽ ഇന്നലെയും ജോലികൾ ആരംഭിച്ചില്ല. മഴയത്ത് ജോലികൾ ചെയ്യാൻ കഴിയില്ലെന്നാണ് അധികൃതർ വ്യക്തമാക്കിയത്. ഇതോടെ ജനം വീണ്ടും റോഡ് ഉപരോധം തുടങ്ങുകയായിരുന്നു. ചെറിയകടവിലും കണ്ണമാലിയിലുമാണ് റോഡ് ഉപരോധിച്ചത്. ഇതോടെ ഇതുവഴിയുള്ള ഗതാഗതം പൂർണമായും തടസപ്പെട്ടു. തഹസിൽദാർ ചെറിയ കടവിലെത്തി പ്രതിഷേധക്കാരുമായി ചർച്ച നടത്തി. താൽക്കാലിക പ്രതിരോധമായി ജിയോ ബാഗ് സ്ഥാപിക്കുന്നതിന് പകരം നിലവിൽ അനുവദിച്ച ഒന്നരക്കോടി രൂപ വിനിയോഗിച്ച് കരിങ്കല്ലുകൾ സ്ഥാപിക്കണമെന്ന ആവശ്യം പ്രതിഷേധക്കാർ മുന്നോട്ട് വച്ചു. ഇത് കളക്ടറുടെ ശ്രദ്ധയിൽപ്പെടുത്താമെന്ന് തഹസിൽദാർ സമരക്കാരെ അറിയിച്ചു. ഇതോടെ നാട്ടുകാർ ചെറിയ കടവിലെ റോഡ് ഉപരോധം അവസാനിപ്പിച്ചെങ്കിലും കണ്ണമാലിയിലെ ഉപരോധം തുടർന്നു.

നഗരത്തിലെ വെള്ളക്കെട്ട് : നഷ്ടം ഉണ്ടാകാതെയുള്ള നടപടികളാണ് നഗരസഭ സ്വീകരിക്കുന്നത്: മേയര്‍

കൊച്ചി: നഗരത്തിലെ വെളളക്കെട്ടുമായി ബന്ധപ്പെട്ട പ്രശ്‌നങ്ങളില്‍ സാമ്പത്തിക നഷ്ടം ഉണ്ടാകാതെയുള്ള സത്വരമായ നടപടികളാണ് നഗരസഭയുടെ ഭാഗത്ത് നിന്ന് ഉണ്ടാകാറുള്ളതെന്ന് മേയര്‍. എം. അനില്‍കുമാര്‍. ഇടപ്പള്ളി തോട് ഇറിഗേഷന്‍ ഡിപ്പാര്‍ട്ട്‌മെന്‍റിന് കൃത്യമായി ചെയ്യാന്‍ സാധിക്കാതെ വന്നത് കൊണ്ടാണ് ഒരു ടെന്‍ഡര്‍ കൂടി ക്ഷണിച്ചതെന്നും മേയര്‍ പറഞ്ഞു. പേരണ്ടൂര്‍ കനാലിന്‍റെ കാര്യത്തിലും സമാനമായ പ്രശ്‌നം നേരിട്ടിരുന്നു. ഇറിഗേഷന്‍ വിഭാഗമാണ് തേവര പേരണ്ടൂര്‍ കനാല്‍ നവീകരണം നടത്തേണ്ടത്. ഇറിഗേഷന്‍ വിഭാഗം രണ്ടു തവണ നടത്തിയ ടെന്‍ഡറില്‍ ആരും പങ്കെടുക്കാതായതോടെ പദ്ധതി നീളാന്‍ കാരണമായി. പിന്നീട് നാല് തവണയായി വിഭജിച്ച ശേഷമാണ് പദ്ധതി നടപ്പാക്കിയത്. പ്രതിപക്ഷം ആരോപിക്കുന്നത് പോലെ ടെന്‍ഡറില്‍ അഴിമതി നടന്നിട്ടുണ്ടോയെന്ന് പരിശോധിക്കാമെന്നും അപാകതകള്‍ പരിഹരിക്കുമെന്നും മേയര്‍ പറഞ്ഞു. കാനകളിലേയും തോടുകളിലേയും ചെളിയും പായലും നീക്കുന്നതിനുള്ള സില്‍ട്ട് പുഷര്‍, വീഡ് ഹാര്‍വെസ്റ്റര്‍, സക്ഷന്‍ കം ജെറ്റിംഗ് മെഷീനുകള്‍ എന്നിവ കൃത്യമായി പ്രവര്‍ത്തിക്കുന്നുണ്ട്. ഇത് ഹൈക്കോടതിക്ക് വരെ ബോധ്യമായ കാര്യമാണ്. എംജി റോഡിലെ കാനകളില്‍ ചെളി അടിഞ്ഞു കുടാന്‍ സാധ്യത കൂടുതലായതിനാല്‍ ഇവിടെ ഇടയ്ക്കിടെ ചെളി നീക്കുന്നുണ്ട്. അതാണ് എംജി റോഡില്‍ മെഷീന്‍ കൂടുതലായി ഉപയോഗിക്കാന്‍ കാരണമെന്നും മേയര്‍ പറഞ്ഞു.

മെട്രോപ്പൊളിറ്റന്‍ ആസൂത്രണ സമിതി : മുനിസിപ്പല്‍ കൗണ്‍സിലര്‍മാരുടെ പ്രതിനിധിയെ ഇന്ന് തെരഞ്ഞെടുക്കും

കൊച്ചി: വിശാല കൊച്ചിയുടെ വികസന സ്വപ്‌നത്തിനായി രൂപീകരിക്കുന്ന മെട്രോപ്പൊളിറ്റന്‍ ആസൂത്രണ സമിതിയിലേക്കുള്ള തെരഞ്ഞെടുപ്പ് ആരംഭിച്ചു. പഞ്ചായത്ത് പ്രസിഡന്‍റുമാരുടെ പ്രതിനിധി തെരഞ്ഞെടുപ്പില്‍ പി.എം. മനാഫ് (ആലങ്ങാട്), സജിത മുരളി (ഉദയംപേരൂര്‍), എന്‍.ജി. മേരി വിന്‍സന്‍റ് (കടമക്കുടി), രാജി സന്തോഷ് (ചൂര്‍ണിക്കര) എന്നിവരെയാണ് തെരഞ്ഞെടുത്തത്. മുനിസിപ്പല്‍ കൗണ്‍സിലര്‍മാരുടെ പ്രതിനിധികള്‍ക്കായുള്ള തെരഞ്ഞെടുപ്പ് ഇന്നും കോര്‍പറേഷന്‍ കൗണ്‍സിലര്‍മാരുടെ പ്രതിനിധികള്‍ക്കായുള്ള തെരഞ്ഞെടുപ്പ് നാളെയും നടക്കും. ജനറല്‍ വിഭാഗം, എസ്‌സി വിഭാഗം, സ്ത്രീസംവരണ വിഭാഗം തുടങ്ങിയ വിഭാഗങ്ങളിലാണ് തെരഞ്ഞെടുപ്പ് നടന്നത്. ജനറല്‍ വിഭാഗത്തില്‍ പി.എം. മനാഫിനും എസ്‌സി സംവരണ വിഭാഗത്തില്‍ സജിത മുരളിക്കും 15 വോട്ടുകള്‍ വീതം ലഭിച്ചു. സ്ത്രീ സംവരണ വിഭാഗത്തില്‍ മിനി രാജു, മേരി വിന്‍സന്‍റ്, രാജി സന്തോഷ് എന്നിവര്‍ നോമിനേഷന്‍ നല്‍കിയിരുന്നെങ്കിലും അവസാന നിമിഷം മിനി രാജു സ്ഥാനാര്‍ഥിത്വം പിന്‍വലിച്ചു. ഇതോടെ മേരി വിന്‍സെന്‍റ്, രാജി സന്തോഷ് എന്നിവര്‍ തെരഞ്ഞെടുക്കപ്പെട്ടു. ജില്ലാ കളക്ടറേറ്റ് പ്ലാനിംഗ് ഹാളില്‍ നടന്ന തെരഞ്ഞെടുപ്പില്‍ മെട്രോപ്പൊളിറ്റന്‍ ഏരിയയില്‍ ഉള്‍പ്പെടുന്ന 29 പഞ്ചായത്ത് പ്രസിഡന്‍റുമാര്‍ വോട്ട് ചെയ്തു. ജില്ലാ കളക്ടര്‍ എന്‍.എസ്.കെ. ഉമേഷ് വരണാധികാരിയായി. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍ പങ്കെടുത്തു. കൊച്ചി കോര്‍പറേഷന്‍, തൃപ്പൂണിത്തുറ, പെരുമ്പാവൂര്‍,കളമശേരി, പറവൂര്‍, ആലുവ, അങ്കമാലി, ഏലൂര്‍, തൃക്കാക്കര, മരട് മുനിസിപ്പാലിറ്റികളും പള്ളിപ്പുറം, കുഴുപ്പിള്ളി, എടവനക്കാട്, നായരമ്പലം, മുളവുകാട്, ഞാറയ്ക്കല്‍, ചേരാനല്ലൂര്‍, കടമക്കുടി, വരാപ്പുഴ, കോട്ടുവള്ളി, ഏഴിക്കര, കടുങ്ങല്ലൂര്‍, ആലങ്ങാട്, ചൂര്‍ണിക്കര, എടത്തല, കീഴ്മാട്, ശ്രീമൂലനഗരം, ചെങ്ങമനാട്, നെടുമ്പാശേരി, കാഞ്ഞൂര്‍, വാഴക്കുളം, ചെല്ലാനം, വടവുകോട് പുത്തന്‍കുരിശ്, ചോറ്റാനിക്കര, മുളന്തുരുത്തി, ഉദയംപേരൂര്‍,കുമ്പളം, കുമ്പളങ്ങി, എളങ്കുന്നപ്പുഴ പഞ്ചായത്തുകളുമാണ് കൊച്ചി മെട്രോപ്പൊളിറ്റന്‍ പ്രദേശത്ത് ഉള്‍പ്പെടുന്ന തദ്ദേശസ്ഥാപനങ്ങള്‍. കൊച്ചി മെട്രോപ്പൊളിറ്റന്‍ പ്രദേശം ഉള്‍പ്പെടുന്ന തദ്ദേശ സ്ഥാപനങ്ങളിലെ ജനപ്രതിനിധികളില്‍ നിന്നാണ് ആസൂത്രണസമിതി അംഗങ്ങളെ തെരഞ്ഞെടുക്കുന്നത്. അംഗങ്ങളില്‍ നിന്ന് ചെയര്‍മാനെയും തെരഞ്ഞെടുക്കും. മെട്രോപ്പൊളിറ്റന്‍ പ്രദേശത്തിന് മുഴുവനായി കരട് വികസന പദ്ധതി തയാറാക്കാന്‍ ഉദ്ദേശിച്ചുള്ളതാണ്ആസൂത്രണ കമ്മിറ്റി. 15 അംഗ കമ്മിറ്റിയില്‍ 10 പേരെ തദ്ദേശസ്ഥാപന ജനപ്രതിനിധികളില്‍ നിന്ന് തെരഞ്ഞെടുക്കും. അഞ്ചു പേരെ സര്‍ക്കാര്‍ നാമനിര്‍ദേശം ചെയ്യും. ഗ്രാമപഞ്ചായത്ത് പ്രസിഡന്‍റുമാരില്‍ നിന്ന് നാലുപേരെയും മുനിസിപ്പല്‍ കൗണ്‍സിലര്‍മാരില്‍ നിന്ന് രണ്ടംഗങ്ങളെയും കോര്‍പറേഷന്‍ കൗണ്‍സിലര്‍മാരില്‍ നിന്ന് നാല് അംഗങ്ങളെയുമാണ് തെരഞ്ഞെടുക്കുന്നത്. ഗ്രാമപഞ്ചായത്ത് പ്രസിഡന്‍റുമാരില്‍നിന്ന് തെരഞ്ഞെടുക്കപ്പെടുന്ന അംഗങ്ങളില്‍ രണ്ടു പേരും മുനിസിപ്പല്‍ കൗണ്‍സിലര്‍മാരില്‍ നിന്നുള്ള ഒരംഗവും കോര്‍പറേഷന്‍ കൗണ്‍സിലര്‍മാരില്‍ നിന്നുള്ള രണ്ട് അംഗങ്ങളും വനിതകളായിരിക്കണം. തദ്ദേശ സ്ഥാപനങ്ങളുടെ കാലാവധി തീരാന്‍ മാസങ്ങള്‍ മാത്രം ശേഷിക്കെ, ഇപ്പോള്‍ തെരഞ്ഞെടുക്കുന്ന ആസൂത്രണ സമിതിക്ക് എത്രനാള്‍ തുടരാന്‍ കഴിയുമെന്നതാണ് ആശങ്ക സൃഷ്ടിക്കുന്നത്. തെരഞ്ഞെടുപ്പിനുശേഷം തദ്ദേശ സ്ഥാപനങ്ങളില്‍ പുതിയ ഭരണസമിതി വരുന്നതോടെ ആസൂത്രണ സമിതിയില്‍ വീണ്ടും തെരഞ്ഞെടുപ്പ് നടത്തേണ്ടിവരും.

മഴയിൽ തളർന്നു റബർ ടാപ്പിംഗ്

ജിജു കോതമംഗലം കോതമംഗലം: തോരാതെ പെയ്യുന്ന മഴ റബർ ടാപ്പിംഗ് മേഖലയെ പ്രതിസന്ധിയിലാക്കി. മഴയത്ത് ടാപ്പിംഗ് നടത്തിയാൽ പുറംഭാഗം (പട്ട) നശിച്ചുപോകുമെന്നു കർഷകർ പറയുന്നു. ഷേഡുകൾ സ്ഥാപിച്ചിട്ടുള്ള മരങ്ങളിലും കനത്ത മഴയിലെ ടാപ്പിംഗ് ലഭിക്കുന്ന പാലിന്‍റെ അളവിനെ ബാധിക്കും. തൊഴിലാളി കുടുംബങ്ങൾ കടുത്ത സാമ്പത്തിക സാമ്പത്തിക ഞെരുക്കത്തിലായിരിക്കുകയാണ്. ഇടത്തരം ചെറുകിട കർഷക കുടുംബങ്ങളും, ചെറുകിട വ്യാപാരികളും പറഞ്ഞറിയിക്കാനാവാത്ത ദുരിതത്തിലാണ്. ജില്ലയിൽ കഴിഞ്ഞയാഴ്ചയിലുണ്ടായ കനത്ത കാറ്റിൽ 6800 റബർ മരങ്ങൾ ഒടിഞ്ഞുവീഴുകയോ മറിയുകയോ ചെയ്തിട്ടുണ്ടെന്നു കൃഷിവകുപ്പ് അധികൃതർ പറഞ്ഞു. ‌ഇതിൽ അയ്യായിരത്തോളം മരങ്ങൾ നിലവിൽ ടാപ്പിംഗ് നടത്തുന്നവയാണ്. 820 റബർ കർഷകർ തങ്ങളുടെ കൃഷി നശിച്ച വിവരം അധികൃതരെ അറിയിച്ചിട്ടുണ്ട്. സ്കൂൾ തുറന്നതോടെ കുട്ടികളുടെ യൂണിഫോമും, പുസ്തകങ്ങളും, ഫീസും, യാത്രയും എല്ലാം ചേർന്ന് അധികം പണച്ചെലവുണ്ടാകുന്ന ഘട്ടത്തിലാണ് കനത്ത മഴയിൽ ടാപ്പിംഗ് മേഖല പ്രതിസന്ധിയിലാകുന്നത്. ദിവസക്കൂലിക്കു പണിയെടുക്കുന്ന ടാപ്പിംഗ് തൊഴിലാളികളെ ഇതു കഷ്ടത്തിലാക്കി. ടാപ്പിംഗ് കുറയുന്പോൾ ആശ്രയിക്കാറുള്ള മറ്റു തൊഴിലുകളും പെരുമഴയിൽ എളുപ്പമല്ല. മഴ നീണ്ടുനിൽക്കുന്ന സാഹചര്യങ്ങളിൽ തൊഴിലാളി കുടുംബങ്ങൾക്ക് സൗജന്യ റേഷൻ ഏർപ്പെടുത്താനും സാമ്പത്തിക സഹായം നൽകാനും സർക്കാർ തയാറാകണമെന്ന ആവശ്യം ഉ‍യരുന്നുണ്ട്.

കൃഷിയിടങ്ങളിൽ‌ ദുരിതപ്പെയ്ത്ത് !

കൊച്ചി: പെരുമഴയും കനത്ത കാറ്റും കൃഷിയിടങ്ങളിൽ സങ്കടപ്പെയ്ത്താകുന്നു. ജില്ലയിൽ വാഴ, നെല്ല്, റബർ കൃഷികളിൽ വലിയ നാശനഷ്ടങ്ങളാണ് കാലവർഷം വിതയ്ക്കുന്നത്. കഴിഞ്ഞ ഒരാഴ്ചയ്ക്കിടെ ജില്ലയിൽ 24.5 കോടി രൂപയുടെ കാർഷിക വിളനാശമുണ്ടായെന്നു കൃഷിവകുപ്പിന്‍റെ കണക്കുകൾ വ്യക്തമാക്കുന്നു. ജൂണിൽ മാത്രം മഴയും കാറ്റും നഷ്ടമുണ്ടാക്കിയ കൃഷികൾക്കു കൃഷിവകുപ്പിൽ നിന്നു നഷ്ടപരിഹാരം ആവശ്യപ്പെട്ടുള്ള അപേക്ഷകരുടെ എണ്ണം 10,000 കടന്നു. 365 ഓളം ഹെക്ടറിലെ കൃഷിക്കു ചെറുതോ വലുതോ ആയ അളവിൽ കാലവർഷക്കെടുതിയുണ്ടായെന്നും കൃഷി വകുപ്പ് അധികൃതർ ചൂണ്ടിക്കാട്ടി. കാറ്റിലും വിലയിടിവിലും ഉലഞ്ഞ് വാഴക്കൃഷി മൂന്നു മാസം മുന്പു കിലോയ്ക്ക് 60 രൂപയിലധികം വില കിട്ടിയിരുന്ന ഏത്തക്കായ്ക്ക് ഇപ്പോൾ വില നാല്പതിലേക്കു താണു. വിലയിടിവിനൊപ്പം കനത്ത കാറ്റിലും മഴയിലുമുണ്ടായ നാശനഷ്ടങ്ങളും വാഴ കർഷകരെ വെട്ടിലാക്കി. കഴിഞ്ഞ മൂന്നാഴ്ചയ്ക്കിടെ 2.25 ലക്ഷത്തിലധികം വാഴ ജില്ലയിൽ കാലവർഷക്കെടുതിയിൽ നശിച്ചു. ഇതിൽ പകുതിയിലേറെയും കുലച്ചു പാകമായ വാഴകളാണെന്നു കൃഷിവകുപ്പ് ശേഖരിച്ച കണക്കുകൾ വ്യക്തമാക്കുന്നു. 3300 കർഷകരുടെ വാഴക്കൃഷി കാലവർഷത്തിൽ ഇതുവരെ നശിച്ചു. വാഴക്കൃഷിയിൽ‌ മാത്രം ജില്ലയിലെ നഷ്ടം 13 കോടിയലധികമാണ്. ഓണത്തിനു മികച്ച വില പ്രതീക്ഷിച്ചു വിളവെടുക്കാൻ പാകത്തിനു കൃഷി ചെയ്തിരുന്ന വാഴത്തോട്ടങ്ങൾ പലയിടത്തും, വെള്ളം കെട്ടി നശിക്കുന്ന സ്ഥിതിയിലാണ്. നെല്ല് വെള്ളത്തിൽ ഭാരിച്ച കൂലിയും നെൽപ്പാടങ്ങളിലെ അനുകൂല സാഹചര്യങ്ങൾ കുറഞ്ഞതും മൂലം നെൽകൃഷി നഷ്ടത്തിലായ കർഷകർക്കു കനത്ത മഴയും ദുരിതമായിട്ടുണ്ട്. 19 ഹെക്ടറിലെ നെൽകൃഷിക്ക് ഇതുവരെ ജില്ലയിൽ നാശം സംഭവിച്ചിട്ടുണ്ട്. പാകമായ നെല്ല് വെള്ളത്തിലായതും പാടത്തെ രൂക്ഷമായ വെള്ളക്കെട്ടുമെല്ലാം കർഷകർ നേരിടുന്ന പ്രതിസന്ധികളാണ്. അങ്കമാലി, കാലടി, നെടുന്പാശേരി, പെരുന്പാവൂർ, മൂവാറ്റുപുഴ മേഖലകളിലെല്ലാം കാലവർഷം കർഷകരെ കഷ്ടത്തിലാക്കിയിട്ടുണ്ട്. കാലവർഷക്കെടുതിയിൽ കൃഷി നശിച്ചവർക്കു സർക്കാർ സഹായം ലഭ്യമാക്കണമെന്ന ആവശ്യവുമായി കർഷക സംഘടനകൾ രംഗത്തെത്തിയിട്ടുണ്ട്. ജാതിക്ക കൃഷിയെയും കാറ്റും മഴയും ബാധിച്ചു. 4500 ജാതിക്കാ മരങ്ങൾക്കു കഴിഞ്ഞ രണ്ടാഴ്ചയ്ക്കിടെ നാശമുണ്ടായി. കോതമംഗലം താലൂക്കിന്‍റെ താഴ്ന്ന മേഖലകൾ ദിവസങ്ങളായി വെള്ളം കെട്ടി കൃഷി നശിക്കുന്ന സ്ഥിതിയിലാണ്. കപ്പ, വാഴ, ഇഞ്ചി തുടങ്ങിയ കൃഷികൾ വെള്ളത്തിനടിയിലായി. അടയ്ക്ക, കുരുമുളക്, പൈനാപ്പിൾ തുടങ്ങിയ കൃഷികളെയും കനത്ത മഴ ബാധിച്ചിട്ടുണ്ട്.

മാമലക്കണ്ടത്ത് കാറ്റില്‍ നാല് വീടുകള്‍ക്ക് ഭാഗികനാശം

കോതമംഗലം: മഴയ്‌ക്കൊപ്പം ഉണ്ടായ ശക്തമായ കാറ്റില്‍ കുട്ടമ്പുഴ പഞ്ചായത്തിലെ മാമലകണ്ടം മേഖലയില്‍ നാല് വീടുകള്‍ക്ക് ഭാഗികനാശം. 20 ഓളം കര്‍ഷകരുടെ വിവിധ കാര്‍ഷികവിളകള്‍ക്കും നാശം. മരങ്ങള്‍ വീണ് ഗതാഗത തടസവും വൈദ്യുത തൂണുകള്‍ ഒടിയുകയും വൈദ്യുത കമ്പികള്‍ പൊട്ടി വീണും പ്രദേശത്തെ വൈദ്യുതിയും നിലച്ചിരുന്നു. ഇന്നലെ പുലര്‍ച്ചെ 3.30 ഓടെയാണ് കാറ്റ് നാശം വിതച്ചത്. എളംബ്ലാശേരി ആദിവാസി ഉന്നതിയിലെ കന്നിയമ്മ ചെകിടന്‍ ഗിരിജ തങ്കപ്പന്‍, ലീല സത്യന്‍, മാമലകണ്ടം തൊണ്ടിമലയില്‍ ജാനു സുകുമാരന്‍ എന്നിവരുടെ വീടുകള്‍ക്കാണ് തകര്‍ച്ച നേരിട്ടത്. കന്നിയമ്മയുടെ വീടിന്‍റെ ഷീറ്റ് മേഞ്ഞ മേല്‍ക്കൂര മുഴുവനും മരങ്ങള്‍ വീണാണ് തകര്‍ന്നത്. ജാനു സുകുമാരന്‍റെ വീടിന് ഭാഗികമായി തകര്‍ച്ച നേരിട്ടു. കാലപ്പഴക്കംകൊണ്ട് ചോര്‍ച്ചയും മറ്റ് തകരാറും കാരണം പടുത വലിച്ച് കെട്ടി താമസിക്കുകയായിരുന്നു അഞ്ചംഗ കുടുംബം. മേല്‍ക്കൂരയുടെ ഒരു വശം തകര്‍ന്നതിനൊപ്പം കൃഷിനാശവും ഉണ്ടായിട്ടുണ്ട്. പുലര്‍ച്ചെ ആയതുകൊണ്ട് പലരും ഉറക്കത്തിലായിരുന്നു. എന്താണ് സംഭവിച്ചതെന്ന് ആദ്യം മനസിലായില്ല. വലിയൊരു ശബ്ദത്തോടെയാണ് കാറ്റ് വീശിയത്. പലരും പുറത്തേക്ക് ഓടി മാറുകയായിരുന്നു. മേല്‍ക്കൂര പൂര്‍ണമായും തകര്‍ന്ന കന്നിയമ്മയുടെ വീട്ടുസാധനങ്ങളുല്ലാം വെള്ളത്തിലായി. വൈദ്യുതി നിലച്ചതുകൊണ്ട് രാവിലെയാണ് നാശം വിലയിരുത്തിയത്. എളംബ്ലാശേരി ഊരുമൂപ്പന്‍ രാഘവന്‍ കോരാളിയില്‍, ചിന്നാണ്ടി പാട്ടന്‍, വാര്‍ഡ് മെംമ്പര്‍ ശ്രീജ ബിജു എന്നിവര്‍ ഉള്‍പ്പെടെ ഇരുപതോളം പേരുടെ റബര്‍, തെങ്ങ്, കവുങ്ങ്, ഏത്തവാഴ തുടങ്ങിയ വിവിധ വിളകളും നശിച്ചു. രാഘവന്‍റെ കൃഷിയിടത്തില്‍ ഉണ്ടായിരുന്ന വിവിധ ഇനം പഴവര്‍ഗ ചെടികളും കാറ്റെടുത്തു.

കുടുംബശ്രീ സിഡിഎസ് വാർഷികം സംഘടിപ്പിച്ചു

പിറവം: രാമമംഗലം പഞ്ചായത്ത് കുടുംബശ്രീ സിഡിഎസ് വാർഷികം സംഘടിപ്പിച്ചു. കൈതപ്പിളളിൽ ഓഡിറ്റോറിയത്തിൽ അനൂപ് ജേക്കബ് എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് പി.വി. സ്റ്റീഫൻ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് സ്‌മിത എൽദോസ് മുഖ്യപ്രഭാഷണം നടത്തി. മെമ്പർ സെക്രട്ടറി കെ. മനോജ്‌കുമാർ വാർഷിക റിപ്പോർട്ട് അവതരിപ്പിച്ചു. സിഡിഎസ് ചെയർപേഴ്സൺ ഷീബ, ജില്ലാ പഞ്ചായത്ത് പൊതുമരാമത്ത് സ്ഥിരംസമിതി അധ്യക്ഷ ആശ സനിൽ, രാമമംഗലം പഞ്ചായത്ത് വൈസ്പ്രസിഡന്‍റ് മേരി എൽദോ, ഷൈജ ജോർജ്, ആലീസ് ജോർജ്, ജിജോ ഏലിയാസ് തുടങ്ങിയവർ പ്രസംഗിച്ചു. വിവിധ മേഖലകളിൽ കഴിവുകൾ തെളിയിച്ച വ്യക്തിത്വങ്ങളെയും പരീക്ഷകളിൽ ജയം നേടിയവരെയും ആദരിച്ചു. കുടുംബശ്രീ അംഗങ്ങളുടെ അനുഭവം പങ്കുവയ്ക്കൽ, കലാപരിപാടികൾ എന്നിവയും നടന്നു.

ദീപിക ബാലജന സഖ്യം കൂത്താട്ടുകുളം മേഖല ഉദ്ഘാടനം

കൂത്താട്ടുകുളം: ദീപിക ബാലജന സഖ്യത്തിന്‍റെ തൊടുപുഴ പ്രവിശ്യാ പ്രവർത്തനവർഷ ഉദ്ഘാടനവും കൂത്താട്ടുകുളം മേഖല ഉദ്ഘാടനവും മേരിഗിരി പബ്ലിക് സ്കൂളിൽ കൂത്താട്ടുകുളം നഗരസഭ ചെയർപേഴ്സൺ വിജയ ശിവൻ നിർവഹിച്ചു. സ്കൂൾ പ്രിൻസിപ്പൽ ഫാ. മാത്യു കരീത്തറ അധ്യക്ഷത വഹിച്ചു. ദീപിക ബാലജന സഖ്യം ഡയറക്ടർ ഫാ. റോയി കണ്ണഞ്ചിറ (കൊച്ചേട്ടൻ) മുഖ്യ പ്രഭാഷണം നടത്തി. തൊടുപുഴ പ്രവിശ്യാ കോ ഓർഡിനേറ്റർ റോയ് ജെ. കല്ലറങ്ങാട്ട്, ദീപിക ബാലജന സഖ്യം സ്റ്റേറ്റ് റിസോഴ്സ് ടീം കോ ഓർഡിനേറ്റർ തോമസ് കുണിഞ്ഞി തുടങ്ങിയവർ പ്രസംഗിച്ചു.

വീടിന് മുകളിലേക്ക് മരങ്ങൾ കടപുഴകി വീണു

മൂവാറ്റുപുഴ: കഴിഞ്ഞ ദിവസമുണ്ടായ ശക്തമായ കാറ്റിലും മഴയിലും വീടിന് മുകളിലേക്ക് മരങ്ങൾ കടപുഴകി വീണു. ഞായറാഴ്ച വൈകുന്നേരം ആറോടെ ഈസ്റ്റ് മാറാടി പള്ളിക്കവലയ്‌ക്ക് സമീപം ആര്യപ്പിള്ളിയിൽ ഷിനാജ് ടി. റസാഖിന്‍റെ വീടിന് മുകളിലേക്കാണ് പുരയിടത്തിൽ നിന്നിരുന്ന പുളിമരവും തെങ്ങും കടപുഴകി വീണത്. മരം കടപുഴകി വീണ സമയം റസാഖിന്‍റെ മാതാവും കുട്ടിയും വീട്ടിലുണ്ടായിരുന്നെങ്കിലും പരിക്കുകളേൽക്കാതെ രക്ഷപ്പെട്ടു. വീടിന്‍റെ മേൽക്കൂര ഭാഗികമായി തകർന്നു. കോണ്‍ക്രീറ്റിന് പൊട്ടലും സംഭവിച്ചിട്ടുണ്ട്. പഞ്ചായത്തംഗവും വില്ലേജ് ഓഫീസറും സ്ഥലം സന്ദർശിച്ച് നാശനഷ്ടങ്ങൾ വിലയിരുത്തി.

കാടുകയറി മൂവാറ്റുപുഴ പ്രീമെട്രിക് ഹോസ്റ്റൽ

ഹോസ്റ്റൽ അടച്ചുപൂട്ടിയത് പുനരുദ്ധാരണത്തിന്‍റെ പേരിൽ മൂവാറ്റുപുഴ: പതിറ്റാണ്ടുകളായി മൂവാറ്റുപുഴ നഗരത്തിൽ പ്രവർത്തിച്ച് വന്നിരുന്ന പ്രീമെട്രിക് ഹോസ്റ്റൽ അടച്ചുപൂട്ടിയിട്ട് വർഷങ്ങൾ പിന്നിടുന്നു. ജില്ലയുടെ കിഴക്കൻ മേഖലയിലെ എസ്‌സി, എസ്ടി, ഒബിസി വിഭാഗത്തിൽപ്പെട്ട അഞ്ച് മുതൽ പത്താം ക്ലാസ് വരെ പഠിക്കുന്ന നിർധനരായ പെണ്‍കുട്ടികൾക്ക് പഠനത്തോടൊപ്പം താമസ സൗകര്യംകൂടി ഒരുക്കുന്നതിനായാണ് പട്ടികജാതി വികസന വകുപ്പ് വെള്ളൂർക്കുന്നത് പ്രീമെട്രിക് ഹോസ്റ്റൽ ആരംഭിച്ചത്. എന്നാൽ പുനരുദ്ധാരണ പ്രവർത്തനങ്ങളുടെ പേരിൽ മൂന്നു വർഷങ്ങൾക്ക് മുൻപാണ് ഹോസ്റ്റൽ അടച്ചുപൂട്ടിയത്. പിന്നീട് പുനരുദ്ധാരണ പ്രവർത്തനങ്ങൾ നടത്തുന്നതിന് അധികൃതർ തയാറായിട്ടില്ല. ഹോസ്റ്റലിൽ ഉണ്ടായിരുന്ന എസ്‌സി, എസ്ടി വിഭാഗത്തിൽപ്പെട്ട 27 പെണ്‍കുട്ടികളും ഒബിസി വിഭാഗത്തിൽപ്പെട്ട മൂന്നു പെണ്‍കുട്ടികളും ആലുവ, പെരുന്പാവൂർ പ്രദേശങ്ങളിലുള്ള ഹോസ്റ്റലിലേക്ക് മാറേണ്ടിവന്നിരുന്നു. പുനരുദ്ധാരണത്തിന്‍റെ പേരിൽ അടച്ചുപൂട്ടിയ ഹോസ്റ്റൽ ഇപ്പോൾ കാടുകയറി കിടക്കുന്ന അവസ്ഥയാണ്. ഹോസ്റ്റൽ അടച്ചുപൂട്ടിയതോടെ ജില്ലയിടെ കിഴക്കൻമേഖലയിലെ പട്ടികജാതി വിഭാഗത്തിൽപ്പെട്ട പെണ്‍കുട്ടികളുടെ പഠനം ദുഷ്കരമായിരിക്കുകയാണ്. അതേസമയം പട്ടികജാതി വികസന വകുപ്പാണ് പുനരുദ്ധാരണത്തിന്‍റെ പേരിൽ ഹോസ്റ്റൽ അടച്ചുപൂട്ടിയതെന്നാണ് നഗരസഭ അധികൃതർ പറയുന്നത്. ഹോസ്റ്റലിന്‍റെ പുനരുദ്ധാരണത്തിനായി നഗരസഭ 4.99 കോടി രൂപയുടെ എസ്റ്റിമേറ്റ് മന്ത്രിക്ക് തയാറാക്കി നൽകിയിരുന്നെന്നും എന്നാൽ പട്ടികജാതി വികസന വകുപ്പ് ഈ എസ്റ്റിമേറ്റ് അംഗീകരിക്കാതെ പൊതുമരാമത്ത് വകുപ്പ് തയാറാക്കി നൽകുന്ന എസ്റ്റിമേറ്റ് മാത്രമേ സ്വീകരിക്കു എന്ന നിലപാടെടുത്തതും പിന്നീട് പ്രീമെട്രിക് ഹോസ്റ്റലിന് പകരം പോസ്റ്റ്മെട്രിക് ഹോസ്റ്റലാണ് ഇനി നിർമിക്കേണ്ടതെന്ന് അറിയിച്ചതുമാണ് കാലതാമസം നേരിടാൻ കാരണമെന്ന് നഗരസഭാധ്യക്ഷൻ പി.പി. എൽദോസ് പറഞ്ഞു.

വെയ്റ്റിംഗ് ഷെഡിൽ ചെളിവെള്ളക്കെട്ട്

കോലഞ്ചേരി: മീമ്പാറ വെയ്റ്റിംഗ് ഷെഡിൽ ചെളിവെള്ളക്കെട്ട്. ബസ് യാത്രക്കാർക്ക് മഴക്കാലത്ത് ആശ്രയമായി മാറേണ്ട വെയ്റ്റിംഗ് ഷെഡിലാണ് മഴവെള്ളവും ഒഴുകിവരുന്ന ചെളി വെള്ളവും ഇരച്ച് കയറുന്നത്. വെയ്റ്റിംഗ് ഷെഡിൽ കയറിയ വെള്ളം കളയാൻ നിലവിൽ കാന കീറിയിരിക്കുകയാണ്. പൂതൃക്ക പഞ്ചായത്തിന്‍റെ കീഴിൽ 1978ൽ സ്ഥാപിച്ച വിശ്രമ കേന്ദ്രം കാലപ്പഴക്കം കൊണ്ട് നശിച്ച അവസ്ഥയിലാണ്. വാർക്കയിലെ കമ്പികൾ തുരുമ്പെടുത്ത് കോൺക്രീറ്റ് പാളികൾ പൊളിഞ്ഞ് താഴെ വീഴുന്ന അവസ്ഥയിലാണ്. ചൂണ്ടി - രാമമംഗലം റോഡ് ഉയർത്തി ടാർ ചെയ്തതോടെ നിലവിൽ കുഴിയിലാണ് വെയ്റ്റിംഗ് ഷെഡ് സ്ഥിതി ചെയ്യുന്നത്. നാടിനും യാത്രക്കാർക്കും ഉപകാരമാകുംവിധം അടിയന്തരമായി ഇത് പുനർനിർമിക്കണമെന്നാണ് നാട്ടുകാരുടെ ആവശ്യം.

ശ്രേഷ്ഠ ബാവയ്ക്ക് സ്വീകരണം നൽകി

കോതമംഗലം: ശ്രേഷ്ഠ കാതോലിക്ക ബസേലിയോസ് ജോസഫ് ബാവയ്ക്ക് മാർ ബസേലിയോസ് മെഡിക്കൽ മിഷൻ അസോസിയേഷന്‍റെ ആഭിമുഖ്യത്തിൽ മാർ ബസേലിയോസ് ഡെന്‍റൽ കോളജിൽ സ്വീകരണം നൽകി. കോതമംഗലം മേഖല മെത്രാപ്പോലീത്ത ഏലിയാസ് മാർ യൂലിയോസ് അധ്യക്ഷത വഹിച്ചു. മുതിർന്ന മാധ്യമ പ്രവർത്തകൻ ആർ. ശ്രീകണ്ഠൻ നായർ ഉദ്ഘാടനം നിർവഹിച്ചു. കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ അനുഗ്രഹ പ്രഭാഷണം നടത്തി. ഡീൻ കുര്യാക്കോസ് എംപി, ആന്‍റണി ജോണ്‍ എംഎൽഎ, എംബിഎംഎം അസോസിയേഷൻ സെക്രട്ടറി സലിം ചെറിയാൻ, മാർത്തോമാ ചെറിയപള്ളി വികാരി ഫാ. ജോസ് മാത്യു തച്ചേത്തുകുടി, നഗരസഭാധ്യക്ഷൻ കെ.കെ. ടോമി, നെല്ലിക്കുഴി പഞ്ചായത് പ്രസിഡന്‍റ് പി.എം. മജീദ്, മാർ ബസേലിയോസ് ഡെന്‍റൽ കോളജ് പ്രിൻസിപ്പൽ ബൈജു പോൾ കുര്യൻ, ട്രഷറർ ബിബിൻ ജോണ്‍, അസോസിയേഷൻ വൈസ് പ്രസിഡന്‍റ് കെ.ഒ. ഷാജി എന്നിവർ പ്രസംഗിച്ചു. ശ്രേഷ്ഠ ബാവായുടെ മുഖ്യ കാർമികത്വത്തിൽ മാർ ബസേലിയോസ് ഡെന്‍റൽ കോളജിന്‍റെ പുതിയ ഹോസ്റ്റൽ ബ്ലോക്കിന്‍റെ ശിലാസ്ഥാപനം നിർവഹിച്ചു. അതോടൊപ്പം കോളജിന്‍റെ 2025- 2026 പ്രവർത്തനങ്ങൾ ഉൾപ്പെടുത്തിയ ന്യൂസ് ലെറ്റർ ഏലിയാസ് മാർ യൂലിയോസ് മെത്രാപ്പോലീത്ത പ്രകാശനം ചെയ്തു. ചടങ്ങിൽ മാർത്തോമാ ചെറിയപള്ളി ഭരണ സമിതിയംഗങ്ങൾ, എംബിഎംഎം അസോസിയേഷന്‍റെ വിവിധ സ്ഥാപനങ്ങളിൽ നിന്നുള്ള ഡോക്ടർമാർ, അധ്യാപകർ, അനധ്യാപകർ, വിദ്യാർഥികൾ എന്നിവർ പങ്കെടുത്തു.

റോഡ് തകർന്ന നിലയിൽ

പാലക്കുഴ: തൊടുപുഴ - പിറവം റോഡിൽ പാലക്കുഴ എംസി കവലയ്ക്ക് സമീപം റോഡ് തകർന്ന നിലയിൽ. കുമരകം - കന്പംമേട് സ്റ്റേറ്റ് ഹൈവേയുടെ ഭാഗമായ ടി.പി റോഡിൽ പാലക്കുഴ എം.സി കവലയ്ക്ക് സമീപം റോഡിൽ വലിയകുഴികൾ രൂപപ്പെടുകയും നിത്യേന അപകടങ്ങൾ പതിവായിരിക്കുകയാണ്. ഈ റോഡിൽ മാറിക മുതൽ കരിന്പന വരെയുള്ള ഭാഗം ഒരു മാസം മുന്പാണ് പുനർനിർമിച്ചത്. റോഡ് ഉയർത്തുകയും ഇരുവശവും കോണ്‍ക്രീറ്റ് ചെയ്തു വെള്ളം കെട്ടിക്കിടക്കുന്നത് ഒഴിവാക്കുന്നതിനുള്ള മാർഗവും സ്വീകരിച്ചിരുന്നു. എന്നാൽ നിർമാണത്തിലെ അശാസ്ത്രീയതയും ഉപയോഗിച്ച വസ്തുക്കളുടെ ഗുണനിലവാരമില്ലായ്മയും ചുരുങ്ങിയ ദിവസങ്ങൾക്കുള്ളിൽ ഈ ഭാഗത്തെ റോഡിലെ ടാറിംഗ് പൊളിഞ്ഞു പോവുകയും വലിയ കുഴികൾ രൂപപ്പെടുന്നതിനും കാരണമായി. മഴക്കാലത്ത് കുഴികളിൽ വെള്ളം കെട്ടിനിന്ന് ഇവിടെ അപകടം നിത്യസംഭവമായി മാറിയിരിക്കുകയാണ്. ധാരാളം സ്കൂൾ വാഹനങ്ങളും, മറ്റും കടന്നുപോകുന്ന വഴിയാണിത്. അടിയന്തരമായി റോഡ് യുദ്ധകാലാടിസ്ഥാനത്തിൽ സഞ്ചാരയോഗ്യമാക്കണമെന്ന് ആവശ്യപ്പെട്ട് ബ്ലോക്ക് പഞ്ചായത്തംഗം സിബി ജോർജ് അധികാരികൾക്ക് പരാതി നൽകി.

കനത്ത മഴയിൽ വീട് തകർന്നു

പറവൂർ : തിങ്കൾ രാത്രി പെയ്ത കനത്ത മഴയിൽ വീട് തകർന്ന് വീണു. വടക്കേക്കര പഞ്ചായത്ത് 20-ാം വാർഡിൽ ചെട്ടിക്കാട് നാലുകണ്ടത്തിൽ ജാനകി കൃഷ്ണന്‍റെഋ വീടാണ് മഴയിലും കാറ്റിലും തകർന്നു വീണത്. ഇളയമകൻ രജീവും കുടുംബവുമാണ് 79 കാരിയായ ജാനകി കൃഷ്ണനോടൊപ്പം വീട്ടിൽ താമസിക്കുന്നത്. സ്കൂൾ അവധി ആയതിനാൽ ഇവർ ബന്ധു വീട്ടിൽ പോയതിനാൽ സംഭവസമയത്ത് വീട്ടിൽ ആരും ഉണ്ടാകാതിരുന്നത് വൻ അപകടം ഒഴിവാക്കി. വടക്കേക്കര പഞ്ചായത്ത് അധികൃതരുംമൂത്തകുന്നം വില്ലേജ് ഓഫീസ് ഉദ്യോഗസ്ഥരും സ്ഥലത്തെത്തി പരിശോധന നടത്തി. ഇവർക്ക് താമസിക്കാൻ താൽക്കാലിക സംവിധാനം ഒരുക്കിയിട്ടുണ്ട്.

റോഡിലേക്ക് മരംവീണ് വിദ്യാർഥിനി അടക്കം രണ്ടുപേർക്ക് പരിക്ക്

ഏലൂർ: ഏലൂർ പാട്ടുപുരക്കൽ കവലയിലുള്ള പതിറ്റാണ്ടുകൾ പഴക്കമുള്ള ക്ഷേത്ര പരിസരത്തെ കൂറ്റൻ ആൽമരത്തിന്‍റെ ഒരു ഭാഗം റോഡിലേക്ക് ഒടിഞ്ഞു വീണു. സ്കൂൾ കുട്ടിയടക്കം രണ്ടു പേർക്ക് പരിക്കേറ്റു. ഇന്നലെ രാവിലെ എട്ടോടെയായിരുന്നു സംഭവം. ധാരാളം കുട്ടികളും ജോലിക്ക് പോകാൻ എത്തിയ മുതിർന്നവരും ഇവിടെയുണ്ടായിരുന്നു. സ്വകാര്യ ബസിൽ ആളുകൾ കയറി പ്പോയ ഉടനെയാണ് അപകടമുണ്ടായത്. അതുകൊണ്ട് വൻ ദുരന്തം ഒഴിവായി. ഇവിടെ ബസ് കാത്ത് നിന്ന മഞ്ഞുമ്മൽ ഗാർഡിയൻ എഞ്ചൽസ് സ്കൂളിലെ വിദ്യാർഥിനിയും അധ്യാപികയുമാണ് അപകടത്തിൽപ്പെട്ടത്. ഒമ്പതാം ക്ലാസിൽ പഠിക്കുന്ന ഏലൂർ മന്ത്രത്ത് പമ്പിൽ കൃഷ്ണകുമാറിന്‍റെ മകൾ കീർത്തി (13) എന്ന കുട്ടിക്ക് തലയ്ക്കാണ് പരിക്ക്. പ്രാഥമിക ചികിത്സക്ക് ശേഷം വിദഗ്ധ ചികിത്സക്കായി അമൃത ആശുപത്രിയിലേക്ക് മാറ്റി, അധ്യാപികയായ ഏലൂരിൽ വാടകയ്ക്ക് താമസിക്കുന്ന ചേരാനല്ലൂർ തോട്ടക്കകത്ത് വീട്ടിൽ സ്ലെഫിൻ സാജു ( 54) മഞ്ഞുമ്മൽ ആശുപത്രിയിലുമാണ് ചികിത്സയ്ക്കായി പ്രവേശിപ്പിച്ചത്. ഇവർക്ക് കാലിൽ പൊട്ടലുണ്ട്. പരിസരത്തെ മൂന്നോളം വൈദ്യുത പോസ്റ്റുകൾ ഒടിഞ്ഞു വീണിരുന്നു. പ്രദേശത്തെ വൈദ്യുതി നിലച്ചു. സമീപത്തെ കടകൾക്കും നാശനഷ്ടമുണ്ടായി. മണിക്കൂറുകൾ ഗതാഗതക്കുരുക്കുമുണ്ടായി. ഏലൂർ, പറവൂർ ഭാഗത്തു നിന്നുമെത്തിയ ഫയർഫോഴ്സും പോലീസും നാട്ടുകാരും ചേർന്ന് ഏറെ നേരത്തെ പരിശ്രമത്തിനൊടുവിൽ മരം മുറിച്ചുമാറ്റിയാണ് ഗതാഗതം പുനസ്ഥാപിച്ചത്.

സേക്രഡ് ഹാർട്ട്‌ സിഎംഐ പബ്ലിക് സ്കൂളിൽ "ലോറേറ്റ്സ് ഡേ'

കൊച്ചി: ചെറിയ നേട്ടങ്ങളിൽ അഭിരമിക്കാതെ വലിയ ലക്ഷ്യങ്ങൾക്കു വേണ്ടി പ്രവർത്തിക്കണമെന്ന് എറണാകുളം സബ് കളക്ടർ കെ. മീര പറഞ്ഞു. തേവര സേക്രഡ് ഹാർട്ട്‌ സിഎംഐ പബ്ലിക് സ്കൂളിലെ 10, 12 ക്ലാസുകളിൽ മികച്ച വിജയം നേടിയ വിദ്യാർഥകളെ അനുമോദിക്കുന്ന സമ്മേളനം "ലോറേറ്റ്സ് ഡേ' ഉദ്ഘാടനം ചെയ്യുകയായിരുന്നു അവർ. പ്രിൻസിപ്പൽ ഫാ. വർഗീസ് കാച്ചപ്പള്ളി, വൈസ് പ്രിൻസിപ്പൽ വിനിത മെൻഡസ്, ഹെഡ്മിസ്ട്രസ് സിന്ധു തറയിൽ, കെജി ഹെഡ്മിസ്ട്രസ് ബിന്ദു തോമസ് എന്നിവർ പ്രസംഗിച്ചു. 10, 12 ക്ലാസുകളിലെ സ്കൂൾ ടോപ്പർമാരായ ശ്രാവൺ പ്രശാന്ത്, സെറിൻ പദുവ, മാർക്കോസ് ബി. വർഗീസ്, ബെൻ ജോർജ് സൈമൻ, അയാന തോമസ്, നിരഞ്ജൻ എം. മേനോൻ, ആൻ തെരേസ ജോർജ് എന്നിവരെ ആദരിച്ചു.

പുതിയ എല്‍ഇഡി വിളക്കുകള്‍ തെളിയുന്നില്ല; കരാറുകാരെ കുറ്റപ്പെടുത്തി മേയര്‍

കൊച്ചി: നഗരത്തില്‍ പുതുതായി സ്ഥാപിച്ച എല്‍ഇഡി ലൈറ്റുകള്‍ തെളിയുന്നില്ലെന്ന പ്രതിപക്ഷത്തിന്‍റെ ആരോപണത്തില്‍ കരാര്‍ കമ്പിനിയെ പഴിച്ച് മേയര്‍. വിഷയം ഉന്നയിച്ച് മുന്പ് സ്മാര്‍ട്ട് സിറ്റി സിഇഒയുടെയും ഡെപ്യൂട്ടി ചീഫ് എന്‍ജിനീയറുടെയും നേതൃത്വത്തില്‍ യോഗം നടത്തിയിരുന്നു. പരിഹാരം ഉണ്ടാകാത്തത് കൊണ്ട് ലൈറ്റുകള്‍ നന്നാക്കുന്നതിനായി സിഎസ്എംഎല്ലിന് കത്തു നല്‍കുമെന്നും മേയര്‍ അഡ്വ. എം. അനില്‍കുമാര്‍ കൗണ്‍സിലില്‍ പറഞ്ഞു. എല്‍ഇഡി ലൈറ്റുകളുടെ കാര്യത്തില്‍ കുറച്ച് പ്രശ്‌നങ്ങളുണ്ട്. പുതിയ ഏജന്‍സിയാണ് പദ്ധതി ഏറ്റെടുത്തിട്ടുളളത്. മഴക്കാലത്ത് ലൈറ്റുകള്‍ പോകുന്നത് പതിവാണ്. നോര്‍ത്ത് പാലം, ദേശീയപാതയിലുമെല്ലാം എല്‍ഇഡി ലൈറ്റുകള്‍ സ്ഥാപിച്ചു. ബാക്കി പോരായ്മകള്‍ പരിഹരിക്കുന്നതിന് കത്തു നല്‍കുമെന്നു മേയര്‍ പറഞ്ഞു.

എംഎംപിഎസ് വാർഷിക പൊതുയോഗം

ചെറായി: കടലിലെ അശാസ്ത്രീയ മത്സ്യബന്ധന രീതികളിൽ നിന്ന് സ്വയം ബോധവത്കരണത്തിലൂടെ പിൻതിരിയണമെന്ന് മുനമ്പം യന്ത്രവത്കൃത മത്സ്യബന്ധന പ്രവർത്തക സംഘം (എംഎംപിഎസ് ) വാർഷിക പൊതുയോഗം ആവശ്യപ്പെട്ടു. കടലിനെ മത്സ്യ ശോഷണത്തിൽ നിന്നും സംരക്ഷിക്കുന്നതിനു ബോട്ടുടമകൾക്കും തൊഴിലാളികൾക്കും ഒരുപോലെ ഉത്തരവാദിത്തം ഉണ്ടെന്നും യോഗം ചൂണ്ടിക്കാട്ടി. പ്രസിഡന്‍റ് ഒ.ജെ. ജെൻട്രിൻ അധ്യക്ഷനായി. പുതിയ ഭാരവാഹികളായി കെ.ബി. രാജീവ് - പ്രസിഡന്‍റ് , ഇ.കെ. ദിലീപ്- വൈസ് പ്രസിഡന്‍റ്, നീരജ് ടി. ആർ -സെക്രട്ടറി , ഷബീർ ബാവ - ജോ. സെക്രട്ടറി, സാംബൻ പോണത്ത് -ട്രഷറർ എന്നിവരെ തെരഞ്ഞെടുത്തു.

മണൽ ലോറി തടഞ്ഞതിന് മർദനം: സഹോദരന്മാർ അറസ്റ്റിൽ

ആലുവ: പെരിയാറിൽ നിന്ന് അനധികൃത മണൽ വാരിയെടുത്ത് കടക്കാൻ ശ്രമിച്ച ലോറി തടഞ്ഞ യുവാവിനെ ആക്രമിച്ച കേസിൽ സഹോദരങ്ങൾ പിടിയിൽ. ഉളിയന്നൂർ പനഞ്ചിക്കുഴി നിഷാദ് (47), ഷാജഹാൻ (40) എന്നിവരാണ് ആലുവ പോലീസിന്‍റെ പിടിയിലായത്.ആലുവ മാർക്കറ്റിന് സമീപം ആന്‍റണിയെയാണ് ഇവർ ക്രൂരമായി മർദ്ദിച്ചത്. സംഭവത്തെ തുടർന്ന് പ്രതികൾ ഒളിവിൽ പോയി. കഴിഞ്ഞ ദിവസം ഉളിയന്നൂരിലെ ഒളിസങ്കേതം വളഞ്ഞാണ് പിടികൂടിയത്. ഷാജഹാന് മണൽക്കടത്തുമായി ബന്ധപ്പെട്ട് മൂന്ന് കേസുകളുണ്ട്.പ്രതികളെകോടതിയിൽ ഹാജരാക്കി റിമാൻഡ് ചെയ്തു.

യൂത്ത് ലീഡര്‍ഷിപ്പ് പരിപാടി സംഘടിപ്പിച്ച് റോട്ടറി

കൊച്ചി: റോട്ടറി ക്ലബ് ഓഫ് കൊച്ചിന്‍ മിഡ്ടൗണ്‍ റോട്ടറി യൂത്ത് ലീഡര്‍ഷിപ്പ് പരിപാടി 'റൈല' സംഘടിപ്പിച്ചു. എളമക്കര അശോക വേള്‍ഡ് സ്‌കൂളില്‍ നടന്ന പരിപാടി പ്രസിഡന്‍റ് മരിയന്‍ പോള്‍ ഉദ്ഘാടനം ചെയ്തു. ഒന്‍പത്, 11 ക്ലാസുകളിലെ വിദ്യാര്‍ഥികള്‍ പരിശീലന പരിപാടിയില്‍ പങ്കെടുത്തു. പ്രശസ്ത പ്രഭാഷകരും മികച്ച റിസോഴ്സ് പേഴ്സണ്‍മാരും നേതൃത്വപരമായ ഗുണങ്ങളെക്കുറിച്ചും സംസാരത്തിലും എഴുത്തിലും ആശയവിനിമയ വൈദഗ്ധ്യത്തെക്കുറിച്ചും പരിശീലനം നല്‍കി.ബാബു ജോസഫ്, അനു സൂരജ്, സജിത റഷീദ്, അഡ്വ. നൈനാന്‍ ജോണ്‍ എന്നിവര്‍ ക്ലാസെടുത്തു.

നഗരസഭാ മന്ദിരം പുതുക്കി പണിയൽ; വൻ അഴിമതിയെന്ന് എൽഡിഎഫ്

അങ്കമാലി: അങ്കമാലി നഗരസഭാ ഓഫീസ് കെട്ടിടം പുതുക്കിപ്പണിയാൻ യുഡിഎഫ് ഭരണസമിതി ധൃതി കാട്ടുന്നത് ഈ ഇടപാടിൽ വൻ അഴിമതി നടന്നതിനാലാണെന്ന് എൽഡിഎഫ്. 1982 ൽ നിർമാണം പൂർത്തീകരിച്ച പഴയ നഗരസഭ ഓഫീസ് കെട്ടിടം തക്കസമയത്ത് അറ്റകുറ്റ പ്രവൃത്തി ചെയ്യാതെ അനാസ്ഥ കാണിക്കുകയും ഇപ്പോൾ ധൃതി പിടിച്ച് കെട്ടിടം പുതുക്കി പണിയാൻ തീരുമാനമെടുത്തതിനും പിന്നിൽ വൻ അഴിമതിയുണ്ടെന്ന് എൽഡിഎഫ് മുനിസിപ്പൽ കമ്മിറ്റി പ്രസ്ഥാവനയിൽ ചൂണ്ടിക്കാട്ടി. ഏത് സമയത്തും നിലം പൊത്താവുന്ന അവസ്ഥയിലായിരുന്നു ഈ കെട്ടിടം. തൂണുകളുടെ കമ്പികളെല്ലാം ദ്രവിച്ച് അടർന്ന് വീണുകൊണ്ടിരിക്കുകയാണ്. ഈ മന്ദിരത്തിന്‍റെ ജീർണാവസ്ഥ സംബന്ധിച്ച് വിദഗ്ധ സംഘ റിപ്പോർട്ട് നേരെത്തെ തേടിയിരുന്നതാണ്. എന്നാൽ, നഗരസഭാ ഭരണ കാലാവധി തീരാൻ മാസങ്ങൾ മാത്രം ബാക്കി നിൽക്കെ രണ്ട് കോടി എഴുപത്തിഏഴ് ലക്ഷം രൂപ ചെലവിട്ട് ഈ കെട്ടിടം പുതുക്കി പണിയുന്നതിന് പിന്നിൽ വൻ അഴിമതിയാണ് ഒളിഞ്ഞിരിക്കുന്നത്. കഴിഞ്ഞ നാല് വർഷക്കാലമായി കെട്ടിടത്തിന്‍റെ ജീർണാവസ്ഥ ചൂണ്ടിക്കാട്ടി പ്രതിപക്ഷ കൗൺസിലർമാരും എൽഡിഎഫും നിരവധി സമരങ്ങൾക്ക് നേതൃത്വം നൽകിയിരുന്നു. എന്നാൽ ഒരു നടപടിയും അതിൻമേൽ ഉണ്ടായില്ല. ഇപ്പോൾ തട്ടിക്കൂട്ടി ഒരു റിപ്പോർട്ട് തയാറാക്കി കോടികൾ ചെലവഴിച്ച് നടത്തുന്ന പുനരുദ്ധാരണ പ്രവൃത്തിയിൽ അഴിമതി മാത്രമാണുള്ളത്. അടിത്തറ ദ്രവിച്ചിരിക്കെ കോടികൾ ചെലവാക്കി പുതുക്കി പണിതാൽ എത്ര കാലം നിലനിൽക്കുമെന്ന് ഒരുറപ്പുമില്ല. അതിനാൽ ഇപ്പോൾ നടക്കുന്ന പ്രവൃത്തികൾ നിർത്തിവയ്ക്കണമെന്നും ഇല്ലെങ്കിൽ പ്രതിപക്ഷം ബഹുജനങ്ങളെ അണിനിരത്തി ശക്തമായ സമരപരിപാടികൾക്ക് നേതൃത്വം നൽകുമെന്നും എൽഡിഎഫ് മുനിസിപ്പൽ കമ്മിറ്റി മുന്നറിയിപ്പ് നൽകി. എൽഡിഎഫ് മണ്ഡലം കൺവീനർ അഡ്വ. കെ.കെ. ഷിബു, നേതാക്കളായ ബെന്നി മൂഞ്ഞേലി, എം.എസ്. ചന്ദ്രബോസ്, മാർട്ടിൻ ബി. മുണ്ടാടൻ, ജോർജ് കുര്യൻ പാറയ്ക്കൽ,സജി വർഗീസ്, ഗ്രേസി ദേവസി, പി.എൻ. ജോഷി തുടങ്ങിയവർ നിലം പൊത്താറായ കെട്ടിട്ടം സന്ദർശിച്ചു.

ഓഞ്ഞിത്തോട് റീസർവേ : തർക്ക പ്രദേശങ്ങളിൽ നാളെ പോലീസ് സംരക്ഷണയിൽ കല്ലിടൽ

ആലുവ: മൂന്ന് വർഷത്തിന് ശേഷം റീസർവേ പൂർത്തിയായ ഓഞ്ഞിത്തോടിൽ നാളെ പോലീസ് സഹായത്തോടെ അതിർത്തി കല്ലുകളിടും. പ്രശ്നബാധിത മേഖലയായ ഏലൂക്കരയിലെ 37 അടക്കം 213 അതിർത്തികല്ലുകളാണ് തോട് കടന്നു പോകുന്ന മേഖലകളിൽ ഇനിയും സ്ഥാപിക്കേണ്ടത്. മൂന്ന് വർഷം നീണ്ട സർവേയിൽ 300 ഓളം കല്ലുകൾ സ്ഥാപിച്ചിരുന്നു. കടുങ്ങല്ലൂർ പഞ്ചായത്തിൽ 404, ആലങ്ങാട് പഞ്ചായത്തിൽ 183 ഉൾപ്പെടെ ആകെ 587 കല്ലുകളാണ് ആകെ ഉള്ളത്. ഇനി ഇടേണ്ട 213 ൽ 132, 81 കല്ലുകളാണ് യഥാക്രമം കടുങ്ങല്ലൂർ, ആലങ്ങാട് പഞ്ചായത്തുകളിലായി സ്ഥാപിക്കേണ്ടത്. ഏറ്റവും കൂടുതൽ തർക്കം ഉള്ളത് ഇലഞ്ഞി ചുവടിലാണ്. രണ്ട് പഞ്ചായത്തുകളിലായി ഓഞ്ഞിത്തോടിന്‍റെ 64 കൈയേറ്റങ്ങളാണ് മൂന്ന് ഘട്ടങ്ങളായി നടത്തിയ റീസർവ്വെയിൽ കണ്ടെത്തിയത്. 2022 ൽ പുഴയുടെ അതിർത്തി നിർണയം നടത്തിയെങ്കിലും അതിർത്തി കല്ലുകൾ മുഴുവനായി സ്ഥാപിക്കുന്നതിൽ കടുങ്ങല്ലൂർ ആലങ്ങാട് പഞ്ചായത്തുകൾ, സർക്കാർ വകുപ്പുകളും താത്പര്യം എടുത്തില്ലെന്നാണ് ഓത്തിത്തോട് സംരക്ഷണ സമിതിയുടെ പരാതി. ഓഞ്ഞിത്തോട് സംരക്ഷണ ജനകീയ സമിതിയുടെ നേതൃത്വത്തിൽ ഹൈക്കോടതിയെ വീണ്ടും സമീപിച്ചതോടെയാണ് മുടങ്ങിക്കിടന്ന സർവേ നടപടികൾ പുന:രാരംഭിച്ചത്. കടുങ്ങല്ലൂർ ഗ്രാമപഞ്ചായത്തിലെ വിവിധ പ്രദേശങ്ങളിൽ മഴക്കാലത്ത് അനുഭവപ്പെടുന്ന വെള്ളക്കെട്ടിന് പരിഹാരമായി ഓഞ്ഞിത്തോട് വൃത്തിയാക്കുന്ന പദ്ധതി നടപ്പിലാക്കുമെന്ന് മന്ത്രി പി. രാജീവ് പറഞ്ഞു. ഓപ്പറേഷൻ വാഹിനിയിൽ പെടുത്തിയാണ് ശുചീകരണം നടപ്പിലാക്കുക.

ക്യാറ്റ്സ് ക്ലബ് പൂർത്തീകരിച്ചു നൽകിയ വീടിന്‍റെ താക്കോൽദാനം നടത്തി

കാലടി : ക്യാറ്റ്സ് ക്ലബ് മാണിക്യ മംഗലത്ത് പാതിവഴിയിൽ നിർമാണം നിലച്ച വനജ ഗോപിയുടെ വീട് പൂർത്തീകരിച്ച് നൽകി. ഇതിന്‍റെ താക്കോൽ സമർപ്പണം ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ നിർവഹിച്ചു. ക്ലബ് പ്രസിഡന്‍റ് ടി.കെ. സാജൻ അധ്യക്ഷത വഹിച്ചു. കാലടി ഗ്രാമപഞ്ചായത്ത് പ്രസിഡന്‍റ് ഷൈജൻ തോട്ടപ്പിള്ളി മുഖ്യാതിഥിയായി. വാർഡ് മെമ്പർ സ്മിത ബിജു, ക്ലബ് ഭാരവാഹികളായ അഡ്വ. കെ.ബി. സാബു, പി.എ. ജോയി, എം.ജെ.ജോൺസൺ, ടി.വി. രഘു എന്നിവർ പ്രസംഗിച്ചു. ക്ലബ് നൽകുന്ന ആറാമത്തെ വീടാണിത്. ഏഴാമത്തെ വീടിന്‍റെ പൂർത്തീകരണവും നടന്ന് കൊണ്ടിരിക്കുന്നു. കാലടിയിൽ കഴിഞ്ഞ 55 വർഷമായി പ്രവർത്തിക്കുന്ന 55 അംഗങ്ങളുള്ള ജീവകാരുണ്യ സന്നദ്ധ സേവന സംഘടനയാണ് ക്യാറ്റ്സ് ക്ലബ്.

ഹെറോയിനുമായി രണ്ടുപേർ അറസ്റ്റിൽ

പറവൂർ: ഹെറോയിനുമായി രണ്ടുപേർ എക്സൈസിന്‍റെ പിടിയിലായി. ആസാം സ്വദേശികളായ ഫറൂഖ്ദിൻ അഹമ്മദ് (30 ), മുഹമ്മദ് അലി (32) എന്നിവരെ വാണിയക്കാട് ഭാഗത്ത് നടന്ന പരിശോധനയ്ക്കിടെയാണ്. പറവൂർ എക്സൈസ് സർക്കിൾ ഇൻസ്പെക്ടർ എം.ഒ. വിനോദും സംഘവും ചേർന്ന് അറസ്റ്റ് ചെയ്തത്. ഇവരിൽ നിന്ന് 700 മില്ലിഗ്രാം ഹെറോയിനും സഞ്ചരിച്ചിരുന്ന സ്കൂട്ടറും പിടിച്ചെടുത്തിട്ടുണ്ട്. നിരവധി മയക്കുമരുന്ന് കേസുകളിൽ പ്രതികളാണിവർ. എക്സൈസ് ഇൻസ്പെക്ടർ നീതു മനോഹരൻ, പ്രിവന്‍റീവ് ഓഫീസർ സി.ജി. ഷാബു, കെ.എ. ശിവകുമാർ, ടി.ബി. സുബിൻ, പൗലോസ് ജേക്കബ് എന്നിവരും സംഘത്തിലുണ്ടായിരുന്നു.

എംഡിഎംഎയുമായി രണ്ടു പേർ പിടിയിൽ

മട്ടാഞ്ചേരി: എംഡിഎംഎയുമായി രണ്ടു പേർ മട്ടാഞ്ചേരി പോലീസിന്‍റെ പിടിയിലായി. മട്ടാഞ്ചേരി കൊച്ചിൻ കോളജ് ഭാഗത്ത് താമസിക്കുന്ന മുനീർ(32), തമിഴ്നാട് കൃഷ്ണഗിരി സിങ്കാരപ്പേട്ട സ്വദേശിയും ഇപ്പോൾ ബംഗളൂരുവിൽ താമസിക്കുന്ന ജെ. ജാബത്ത് (41) എന്നിവരെയാണ് 51 ഗ്രാം എംഡിഎംഎയുമായി മട്ടാഞ്ചേരി പോലീസ് ഇൻസ്പെക്ടർ കെ.എ. ഷിബിൻ, എസ്ഐ ജിമ്മി ജോസ് എന്നിവരുടെ നേതൃത്വത്തിൽ അറസ്റ്റ് ചെയ്തത്. ഓപ്പറേഷൻ ഡി ഹണ്ടിന്‍റെ ഭാഗമായി മട്ടാഞ്ചേരി പോലീസ് നടത്തിയ അന്വേഷണത്തിൽ മുനീർ മയക്കുമരുന്ന് വിൽപന നടത്തുന്നതായി വിവരം ലഭിച്ചിരുന്നു. തുടർന്ന് ഇയാൾ താമസിക്കുന്ന മട്ടാഞ്ചേരി കൊച്ചിൻ കോളജ് ഭാഗത്തുള്ള വീട്ടിൽ നടത്തിയ പരിശോധനയിലാണ് ഇയാളിൽ നിന്ന് മാരക മയക്കുമരുന്നായ എംഡിഎംഎ കണ്ടെടുത്ത് പ്രതിയെ അറസ്റ്റ് ചെയ്തത്. മുനീറിനെ വിശദമായി ചോദ്യം ചെയ്തതിൽ ഇയാൾക്ക് എംഡിഎംഎ വിൽപ്പനയ്ക്കായി നൽകിയത് ഖത്തർ ജയിലിൽ വച്ച് പരിചയപ്പെട്ട ജാബത്ത് എന്ന തമിഴ്നാട് സ്വദേശിയാണെന്നും ഇയാൾ ഇപ്പോൾ എറണാകുളത്തുണ്ടെന്നും അറിഞ്ഞതിനെ തുടർന്ന് നടത്തിയെ അന്വേഷണത്തിലാണ് ജാബത്തിനെ പിടികൂടിയത്. മുനീർ ഖത്തറിൽ ജോലി നോക്കി വരവെ മയക്ക്മരുന്ന് കൈവശം വച്ചതിന് അഞ്ചു വർഷം ജയിൽ ശിക്ഷ അനുഭവിച്ചിട്ടുണ്ട്. പിടിയിലായ ജാബത്ത് മയക്ക് മരുന്ന് കേസും തട്ടിപ്പ് കേസുമായി ഏഴ് വർഷത്തോളം ഖത്തർ ജയിലിൽ ഉണ്ടായിരുന്നതായി പോലീസ് പറഞ്ഞു. എസ്ഐ മിഥുൻ അശോക്, എഎസ്ഐ സമദ് തുടങ്ങിയവരുടെ നേതൃത്വത്തിലുള്ള സംഘമാണ് പ്രതികളെ പിടികൂടിയത്.

ജില്ലാ പഞ്ചായത്ത് കൈത്താങ്ങായി; 100 പേർക്ക് ഇനി നിവർന്നുനിൽക്കാം

കാക്കനാട്: ജില്ലാ പഞ്ചായത്തിന്‍റെ കൈത്താങ്ങും കളമശേരി റോട്ടറി ക്ലബ്ബിന്‍റെ സഹായവും കൂടിച്ചേർന്നപ്പോൾ കൃത്രിമ കാലുകളിൽ നിവർന്നുനിന്നത് അംഗപരിമിതിയുള്ള നൂറ് പേർ. ജില്ലാ പഞ്ചായത്ത്‌ പ്രിയദർശിനി ഹാളിൽ നടന്ന ചടങ്ങ് കളക്ടർ എൻ.എസ്.കെ. ഉമേഷ്‌ ഉദ്ഘാടനം ചെയ്തു. പ്രസിഡന്‍റ് മനോജ്‌ മൂത്തേടൻ അധ്യക്ഷത വഹിച്ചു. വൈസ് പ്രസിഡന്‍റ് എൽസി ജോർജ്, ജില്ലാ പഞ്ചായത്ത്‌ അംഗങ്ങളായ പി.എം. നാസർ, ലിസി അലക്സ്‌, ജില്ലാ പഞ്ചായത്ത്‌ സെക്രട്ടറി പി.എം. ഷെഫീഖ്, റോട്ടറി ക്ലബ് ഭാരവാഹികളായ തോമസ് വർഗീസ്, സുരേഷ് ബാബു, ഉമ്മൻ കെ ടി , വർഗീസ് സക്കറിയ, നാരായണ മേനോൻ, സക്കറിയ എബ്രഹാം, എൻ. ആനന്ദ് എന്നിവർ പ്രസംഗിച്ചു. കൃത്രിമകാലുകൾആവശ്യമുളളവർക്കായി ഒരു മാസം മുൻപ് ജില്ലാ പഞ്ചായത്തിൽ വച്ച് നടത്തിയ ക്യാമ്പിൽ പങ്കെടുത്തവർക്കാണ് ഇന്നലെ കൃത്രിമക്കാലുകൾ വിതരണം ചെയ്തത്.

"ആലപ്പുഴക്കാർ ഇൻ കൊച്ചി...' ഹൃദ്യമായി ഒത്തുചേരൽ

കൊച്ചി: ആലപ്പുഴയിൽ വേരുകളുള്ളവരും നിലവിൽ കൊച്ചിയിൽ താമസിക്കുന്നവരുമായ ആളുകൾക്കായി സംഘടിപ്പിച്ച "ആലപ്പുഴക്കാർ ഇൻ കൊച്ചി" സംഗമം ഹൃദയസ്പർശിയായി. ആലപ്പുഴയിലെ പഴയകാല ഓർമകൾ അയവിറക്കിയും സൗഹൃദങ്ങൾ പുതുക്കിയും കൊച്ചിയിലെ ആലപ്പുഴക്കാർ സന്തോഷം പങ്കുവച്ചു. കേരള പിഡബ്ല്യുഡി മുൻ ചീഫ് എൻജിനീയർ എം.എ. ചാക്കോ എട്ടുകെട്ടിൽ, ആലപ്പുഴ സൗത്ത് ഇന്ത്യൻ റബർ വർക്സ് മുൻ സിഇഒ ജി. കൃഷ്ണൻ എന്നിവരെ ചടങ്ങിൽ ആദരിച്ചു. എറണാകുളം രാമവർമ ക്ലബിൽ നടന്ന ചടങ്ങിൽ പ്രമുഖ സംവിധായകൻ സിബി മലയിൽ, വ്യവസായി ജോസ് പട്ടാറ, ഓം കുമാർ, ശ്രീകുമാർ, ബിന്ദു മാധവ്, രാജ്കുമാർ, ജോണി വാര്യംപറമ്പിൽ, ഔസേപ്പച്ചൻ വാളക്കുഴി എന്നിവരുൾപ്പെടെ നിരവധി പേർ പങ്കെടുത്തു. പ്രഫ. അയ്യങ്കാർ ഉൾപ്പെടെ അന്തരിച്ച ആലപ്പുഴയിലെ പ്രമുഖരെ യോഗം അനുസ്മരിച്ചു. ആലപ്പുഴ മുല്ലക്കൽ ചിറപ്പ്, പള്ളി പെരുന്നാളുകൾ, ബീച്ചിലെ കറക്കം, ദിൽഖുഷ്, ഐസിഎച്ച്, ബ്രദേഴ്സ് തുടങ്ങിയ ഇഷ്ടഭക്ഷണശാലകൾ, സി.ആർ. ലെതർ വർക്സ്, സെന്‍റ് ജോർജ് അംബ്രല്ല മാർട്ടിനടുത്തുള്ള കടകൾ, ലിയോ തേർട്ടീൻത് സ്കൂൾ, സെന്‍റ് ജോസഫ്സ് ഗേൾസ് സ്കൂൾ, കോളജ്, ഗോപി ചേട്ടന്‍റെ മുറുക്കാൻ കട, ആലപ്പുഴ ബീച്ച് തുടങ്ങിയ ആലപ്പുഴയുടെ ഓർമകൾ എല്ലാവരും പങ്കുവച്ചു. കൊച്ചിയിൽ സ്ഥിരതാമസമാക്കിയ ആലപ്പുഴക്കാരുടെ സംഗമം വരുംവർഷങ്ങളിലും നടത്തുമെന്നു സംഘാടകർ അറിയിച്ചു.

മഞ്ചക്കാട്-ഐക്കരവേലിത്താഴം റോഡരിക് ഇടിഞ്ഞു താഴ്ന്നു: ഭീതിയിൽ നാട്ടുകാർ

ചോറ്റാനിക്കര: റോഡരിക് ഇടിഞ്ഞുതാഴ്ന്നു. ഗതാഗത സൗകര്യം തടസപ്പെട്ട് നാട്ടുകാർ. ചോറ്റാനിക്കര പഞ്ചായത്ത് 11-ാം വാർഡിൽ മഞ്ചക്കാട് - ഐക്കരവേലിതാഴം റോഡിന്‍റെ ഒരു വശമാണ് സമീപത്തെ സ്വകാര്യ വ്യക്തിയുടെ ഭൂമിയിലേക്ക് ഇടിഞ്ഞു വീണിരിക്കുന്നത്. ഇതോടെ ഐക്കരവേലിതാഴം ഭാഗത്തുള്ള കുടുംബങ്ങൾ ദുരിതത്തിലായിരിക്കുകയാണ്. നിലവിൽ വാഹനങ്ങൾക്ക് കടന്നു പോകാൻ കഴിയാത്ത സ്ഥിതിയാണുള്ളത്. കഴിഞ്ഞ മാസാവസാനത്തോടെ പെയ്ത കനത്ത മഴയിലാണ് മെയ് 25ന് റോഡരിക് 50 അടിയോളം താഴേയ്ക്ക് ഇടിഞ്ഞത്. റോഡ് തകർച്ചയുടെ വക്കിലാണെന്ന് അന്നുമുതൽ ബന്ധപ്പെട്ടവരോട് പറഞ്ഞിട്ടും ആവശ്യമായ നടപടികൾ ആരും തന്നെ കൈക്കൊണ്ടില്ലെന്നാണ് പ്രദേശവാസികൾ പറയുന്നത്. ഇപ്പോൾ കാലവർഷം തിമിർത്ത് പെയ്യാൻ തുടങ്ങിയതോടെ റോഡിലൂടെയുള്ള കാൽനടയാത്ര പോലും അപകടത്തിലായിരിക്കുകയാണ്. മുൻപ് മണ്ണെടുത്ത് കുഴിയായി മാറിയ സ്വകാര്യ വ്യക്തിയുടെ ഭൂമിയുടെ അതിരിനോട് ചേർന്നാണ് റോഡ് കടന്നുപോകുന്നത്. 50 അടിയോളം ആഴമാണ് ഈ ഭാഗത്തുള്ളത്.ഇവിടെ പല ഭാഗത്തും റോഡരിക് ഇടിഞ്ഞിട്ടുണ്ട്. റോഡ് കടന്നുപോകുന്നതിന്‍റെ അവസാന ഭാഗത്ത് 40 ഓളം കുടുംബങ്ങളാണ് താമസിക്കുന്നത്. അപകടാവസ്ഥയെ തുടർന്ന് വാഹനഗതാഗതം തടസപ്പെട്ടതോടെ സ്കൂൾ വിദ്യാർഥികളും ദുരിതത്തിലായി. പാചകവാതക സിലിണ്ടറുകളുൾപ്പെടെ വീട്ടിലെത്തിക്കാൻ ആളുകൾ കഷ്ടപ്പെടുകയാണ്. ഇപ്പോൾ അര കിലോമീറ്ററോള നടന്നാണ് ആളുകൾ പ്രധാന റോഡിലേയ്ക്കെത്തുന്നത്. റോഡ് ഗതാഗത യോഗ്യമാക്കുന്നത് വരെ പഞ്ചായത്ത് മുൻകൈയെടുത്ത് മറ്റ് ഭാഗത്ത് കൂടി ഗതാഗത സൗകര്യമൊരുക്കണമെന്നും അതിനുവേണ്ട നടപടികൾ രണ്ട് ദിവസത്തിനുള്ളിലായില്ലെങ്കിൽ യൂത്ത് കോൺഗ്രസ് പ്രദേശവാസികളോടൊന്നിച്ച് സമരവുമായി മുന്നോട്ടു പോകുമെന്നും മുൻ നിയോജകമണ്ഡലം പ്രസിഡന്‍റ് ജോമോൻ ജോയ് പറഞ്ഞു. റോഡിന്‍റെ ഇടിഞ്ഞുവീണ വശം എത്രയും പെട്ടെന്ന് കരിങ്കൽ കെട്ടിയോ കോൺക്രീറ്റ് ചെയ്‌തോ സംരക്ഷിച്ച് ജനങ്ങൾക്ക് യാത്രാസൗകര്യമൊരുക്കണമെന്ന് ബ്ലോക്ക് പഞ്ചായത്തംഗം കെ.കെ. അജി ആവശ്യപ്പെട്ടു.

പ്ലാവിൽ നിന്നും വീണ് ഗൃഹനാഥൻ മരിച്ചു

ഇടക്കൊച്ചി: പ്ലാവിൽ ചക്ക പറിക്കാനായി കയറിയ ഗൃഹനാഥൻ വീണു മരിച്ചു. ഇടക്കൊച്ചി കോഴിക്കുട് സ്വദേശി എഡ് വിൻ ബായറാണ് മരത്തിന്‍റെ താഴെ മരിച്ചനിലയിൽ കണ്ടെത്തിയത്. ഉച്ചയ്ക്ക് ശേഷം വീട്ടിൽ നിന്ന് പോയ എഡ്്വിൻ തിരികെ എത്താത്തതിനെ തുടർന്നാണ് ബന്ധുക്കൾ അന്വേഷിച്ചിറങ്ങിയത്. പലപ്രാവശ്യം ഫോണിൽ ബന്ധപ്പെട്ടിട്ടും കിട്ടാത്തതിനെ തുടർന്ന് മകൻ കണ്ണങ്ങാട്ട് റോഡിലുള്ള പുരയിടത്തിൽ എത്തി നോക്കുന്പോഴാണ് എഡ് വിനെ പ്ലാവിന് താഴെ മരിച്ചു കിടക്കുന്നതായി കണ്ടെത്തിയത്. ചക്ക പറിക്കാൻ ഉപയോഗിച്ച തോട്ടിയും ഏണിയും പ്ലാവിനു താഴെ കിടക്കുന്ന അവസ്ഥയിലായിരുന്നു. മൃതദേഹം എറണാകുളം ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. സംസ്കാരം പിന്നീട്. ഭാര്യ: എഡ്വേഴ്സ്. മക്കൾ: നിമ്മി, എൽബിൽ.

ചെങ്ങമനാട്, നെടുമ്പാശേരി പഞ്ചായത്തുകളിൽ കാറ്റിൽ വ്യാപക നാശം

നെടുമ്പാശേരി: ചെങ്ങമനാട്, നെടുമ്പാശേരി പഞ്ചായത്തുകളിൽ ഞായറാഴ്ച വൈകിട്ട് കനത്ത മഴയോടൊപ്പമുണ്ടായ ശക്തമായ കാറ്റിൽ വിവിധ ഭാഗങ്ങളിൽ വ്യാപക നാശം. ചെങ്ങമനാട് 18-ാം വാർഡിൽ 80-ാം നമ്പർ അങ്കണവാടി കെട്ടിടത്തിന് മുകളിൽ സമീപത്തെ പറമ്പിലെ കൂറ്റൻ തേക്ക് മരം വീണ് മുൻ ഭാഗത്ത് സ്ഥാപിച്ച ഷീറ്റുകൾ നിലംപൊത്തി. കിഴക്ക്, പടിഞ്ഞാറ് ഭാഗത്തെ ഷീറ്റുകളാണ് മരം കടപുഴകി വീണ് നശിച്ചത്. കെട്ടിടത്തിനോ, മതിലുകൾക്കോ, കളി ഉപകരണങ്ങൾക്കോ കേടുപാടില്ല. ചെങ്ങമനാട് കൈത്തറി നെയ്ത്ത് സഹകരണ സംഘം വക കെട്ടിടത്തിന് മുകളിലും സമീപത്തെ സ്വകാര്യ വ്യക്തിയുടെ പറമ്പിലെ ഭീമൻ തേക്ക് മരം കടപുഴകി വീണ് ഷീറ്റും മേൽക്കൂരയും തകർന്നു. മേൽക്കൂര ഏത് നിമിഷവും നിലംപൊത്തുന്ന അവസ്ഥയിലാണ്. ഏതാനും തറികൾക്കും തെക്ക് വശത്തെ ഭിത്തിക്കും കേടുപാടുകളുണ്ടായിട്ടുണ്ട്. കടപുഴകി വീണ തേക്ക് മരം മാറ്റാനായിട്ടില്ല. ചെങ്ങമനാട് പഞ്ചായത്തിലെ എട്ട്, ഒൻപത്, 18 വാർഡുകളിൽ വ്യാപക കൃഷിനാശം സംഭവിച്ചു. മൂപ്പെത്തിയ ജാതി മരങ്ങളാണ് പ്രധാനമായും കടപുഴകി വീണത്. വിവിധയിനം വാഴകൾ, തെങ്ങ്, കവുങ്ങ്, മാവ് മരങ്ങളും കാറ്റിൽ നശിച്ചു. നെടുവന്നൂരിൽ കരുമത്തി ചാക്കപ്പൻ, പുത്തൻവീട്ടിൽ കരുമത്തി ബിജു ജോസഫ് എന്നിവരുടെ കൃഷികൾക്ക് ഭീമമായ നാശമുണ്ടായി. 18-ാം വാർഡിലെ പാലപ്രശേരി തെക്ക് കണ്ടംതുരുത്തിലും പലയിടത്തും ജാതി മരങ്ങളും വാഴ കൃഷികളും നശിച്ചു.

വീടിന്‍റെ മേൽക്കൂര തകർന്നു

വൈപ്പിൻ: മഴയെതുടർന്ന് വീടിന്‍റെ മേൽക്കൂരയുടെ ഒരു ഭാഗം നിലംപ്പൊത്തി. കിടന്നുറങ്ങിയിരുന്ന ആൾ അത്ഭുതകരമായി രക്ഷപ്പെട്ടു. പള്ളിപ്പുറം പഞ്ചായത്ത് 12-ാം വാർഡ് ചെറായി മരോട്ടിക്കൽ കൃഷ്ണന്‍റെ വീടാണ് തകർന്നത്. മുറിയിൽ കിടന്നുറങ്ങുകയായിരുന്ന മരുമകൻ സന്തോഷ് നിസാര പരിക്കുകളോടെ രക്ഷപ്പെട്ടു.

കടലേറ്റം: നായരമ്പലത്ത് വീടുകളിൽ വെള്ളം കയറി

വൈപ്പിൻ: വൈപ്പിൻ തീരത്ത് ശക്തമായ കടലാക്രമണത്തെ തുടരുന്നു. എടവനക്കാട്, ഞാറക്കൽ, പള്ളി വേളാങ്കണ്ണി കടപ്പുറം നായരമ്പലം പുത്തൻ കടപ്പുറം എന്നിവിടങ്ങളിൽ ഇന്നലെയും കടൽ കയറ്റം രൂക്ഷമായിരുന്നു. പുത്തൻ കടപ്പുറത്ത് ആറ് വീടുകളിൽ വെള്ളം കയറി. 50 ഓളം വീടുകൾക്ക് ഭീഷണിയുണ്ട്. പന്ത്രണ്ടാം വാർഡിൽ കൈതവളപ്പിൽ ജോഷി, സുധാ ബാബു, കാനപ്പിള്ളി മോളി, പള്ളിപ്പറമ്പിൽ ഷിജു, കണക്കാട്ടുശേരി അഭിലാഷ്, ബാബുരാജ് എന്നിവരുടെ വീടുകളിലാണ് വെള്ളം കയറിയത്. ശക്തമായ കടൽക്ഷോഭത്തിൽ പലയിടത്തും ജിയോ ബാഗ് ഉൾപ്പടെയുള്ള താത്കാലിക തടയണ സംവിധാനങ്ങൾ തകർന്ന് പോയി. തീരദേശ റോഡിന്‍റെ പല ഭാഗങ്ങളും തകർന്നിട്ടുണ്ട്. കാലാകാലങ്ങളിൽ കടൽ ഭിത്തി പുനർനിർമിക്കാത്ത നായരമ്പലത്തും ചെല്ലാനം മോഡലിൽ ടെട്രോപോഡ് ഉപയോഗിച്ചു കടൽഭിത്തി നിർമിക്കൽ മാത്രമാണ് ശാശ്വത പരിഹാരമെന്ന് പഞ്ചായത്തംഗം സി.സി. സിജി വ്യക്തമാക്കി.

നൂറ്റാണ്ടിലേറെ പഴക്കമുള്ള മുത്തശി മാവ് മറിഞ്ഞു വീണു

നെടുമ്പാശേരി: ഒരു നൂറ്റാണ്ടിലേറെ പഴക്കമുള്ള നെടുമ്പാശേരിയുടെ മുത്തശി മാവ് എന്ന് വിശേഷിക്കപ്പെടുന്ന മരം നിലംപൊത്തി. നെടുമ്പാശേരി മാർ അത്തനേഷ്യസ് ഹയർ സെക്കൻഡറി സ്കൂളിന്‍റെ മുറ്റത്ത് നിന്നിരുന്ന മാവാണ് മറിഞ്ഞത്. നിരവധി സ്കൂൾ കെട്ടിടങ്ങളുടെ നടുവിൽ നിന്നിരുന്ന ഈ മരം ഒഴിഞ്ഞ സ്ഥലത്തേക്ക് അദ്‌ഭുതകരമായിട്ടാണ് മറിഞ്ഞത്. ഒരു കെട്ടിടത്തിനും തകരാറുണ്ടായില്ല. കൊടിമരം മാത്രമാണ് മറിഞ്ഞത്. ഈ സ്കൂളിന്‍റെ സ്ഥാപകനായ വലിയപറമ്പിൽ ഗീവർഗീസ് മാർ ഗ്രിഗോറിയോസ് മെത്രാപ്പോലിത്തയാണ് ഈ മാവ് നട്ടതെന്ന് പ്രായം ചെന്ന ആളുകൾ സാക്ഷ്യപ്പെടുത്തുന്നു.

ആശ്വാസം ചാരിറ്റബിൾ സൊസൈറ്റി വാർഷിക സംഗമം

കൊച്ചി: പാലാരിവട്ടത്തെ ആശ്വാസം ചാരിറ്റബിൾ സൊസൈറ്റിയുടെ 14-ാമത് വാർഷിക സംഗമം ടി.ജെ. വിനോദ് എംഎൽഎ ഉദ്ഘാടനം ചെയ്തു. നടൻ ബാല, പിന്നണിഗായകൻ ബിജു നാരായണൻ എന്നിവർ മുഖ്യാതിഥികളായിരുന്നു. സൊസൈറ്റി പ്രസിഡന്‍റ് ഷൈജു കേളന്തറ അധ്യക്ഷത വഹിച്ചു. നിർധനരായ വൃക്ക രോഗികൾക്ക് കഴിഞ്ഞ 14 വർഷത്തിനിടെ 1.75 കോടി രൂപ ഡയാലിസിസിന് സാമ്പത്തിക സഹായം നൽകിയെന്ന് അദ്ദേഹം അറിയിച്ചു. 300 രോഗികൾക്ക് വൈദ്യുതി ബോർഡിലെ ജീവനക്കാർ നൽകുന്ന തുകയിൽ നിന്നാണ് സഹായം ലഭ്യമാക്കിയതെന്നും അദ്ദേഹം പറഞ്ഞു. ഫാ. ജോജി കുത്തുകാട്ട്, കെഎസ്ഇബി ഡെപ്യൂട്ടി ചീഫ് എൻജിനീയർ സുനിത ജോസ്, ഷിബു ചമ്മിണിക്കോടത്ത്, സ്റ്റീഫൻ നാനാട്ട്, സോണി കോവാട്ട്, ദീപക് സേവ്യർ തോമസ്, കെ.ജെ. മാർട്ടിൻ, സി.എസ്. ജോണി തുടങ്ങിയവർ പ്രസംഗിച്ചു.

വർക്ക്‌ഷോപ്പിന് മുന്നിൽ സൂക്ഷിച്ചിരുന്ന ബൈക്കുകൾ കത്തിനശിച്ചു

മരട്: വർക്ക്‌ഷോപ്പിന് മുന്നിൽ സൂക്ഷിച്ചിരുന്ന ബൈക്കുകൾ കത്തിനശിച്ചു. മരട് നഗരസഭ 14-ാം ഡിവിഷൻ എബിഎൽ റോഡിൽ തിങ്കളാഴ്ച രാവിലെ ഓഴോടെയായിരുന്നു സംഭവം. എൻജിൻ പണിക്കായി കൊണ്ടുവന്ന് സൂക്ഷിച്ചിരുന്ന ബൈക്കുകളാണ് കത്തിനശിച്ചത്. മൂന്ന് ബൈക്കുകൾ പൂർണമായും കത്തിനശിച്ചു. തൃപ്പൂണിത്തുറയിൽനിന്നും ഗാന്ധിനഗറിൽനിന്നും എത്തിയ അഗ്നിരക്ഷാസേനയാണ് തീയണച്ചത്. സമീപത്തുണ്ടായിരുന്ന കാർ തള്ളിനീക്കിയതിനാൽ കാറിന് തീപിടിച്ചില്ല. സാമൂഹ്യ വിരുദ്ധർ തീയിട്ടതാകാമെന്നാണ് നിഗമനം. ഷോർട്ട് സർക്യൂട്ടോ മറ്റോ ഉണ്ടാകാനുള്ള സാധ്യയില്ലെന്നും പറയുന്നു. ഗേറ്റിനകത്താണ് വർക്ക്ഷോപ്പ് സ്ഥിതി ചെയ്യുന്നത്. മരട് പോലീസിൽ വർക്ക്‌ഷോപ്പ് ഉടമ പരാതി നൽകി. ആറ് മാസം മുമ്പ് ഇവിടത്തെ പഴകിയ കെട്ടിടം പുലർച്ചെ തീപിടിച്ച് കത്തിനശിച്ചിരുന്നു.

യുവതിയെ കാപ്പ ചുമത്തി നാടുകടത്തി

തൃപ്പൂണിത്തുറ: യുവതിയെ കാപ്പ ചുമത്തി നാടുകടത്തി. ഹിൽപാലസ് പോലീസ് സ്റ്റേഷൻ പരിധിയിൽ നിരവധി കുറ്റകൃത്യങ്ങളിലെ പ്രതിയും പൊതുജന സമാധാന ലംഘന പ്രവർത്തനങ്ങളിൽ സ്ഥിരമായി ഏർപ്പെട്ടു വരുന്നയാളുമായ കരിങ്ങാച്ചിറ പാലത്തിങ്കൽ വീട് സൂര്യപ്രഭ (21) യെയാണ് സിറ്റി പോലീസ് കമ്മീഷണറുടെ ഉത്തരവ് പ്രകാരം നാടുകടത്തിയത്. സിറ്റി പോലീസിന്‍റെ പരിധിയിൽ പ്രവേശിക്കുന്നതിന് ആറ് മാസത്തേയ്ക്ക് തടഞ്ഞുകൊണ്ടുള്ളതാണ് കാപ്പ ഉത്തരവ്.

കാണാതായ പെൺകുട്ടികളെ കണ്ടെത്തി

പറവൂർ: പറവൂരിലെ എസ്‌‌‌‌സി എസ്ടി പ്രീമെട്രിക്ക് ഹോസ്റ്റലിൽനിന്നും കാണാതായ മൂന്നു പെൺകുട്ടികളെ കുന്ദംകുളത്തുനിന്നു പോലീസ് കണ്ടെത്തി. എട്ടും ഒമ്പതും ക്ലാസുകളിൽ പഠിക്കുന്ന കുട്ടികളെയാണ് തിങ്കളാഴ്ച്ച പുലർച്ചെ മുതൽ കാണാതായത്. രാത്രി ഭക്ഷണം കഴിക്കാൻ ഇവർ ഉണ്ടായിരുന്നെങ്കിലും പുലർച്ചെ നാലു മണിയോടെയുള്ള അന്വേഷണത്തിലാണ് ഇവരുടെ തിരോധാനം അധികൃതർ അറിയുന്നത്. തുടർന്ന് നഗരസഭയിലും നഗരസഭ പോലീസിലും പരാതി നൽകിയതിനെതുടർന്ന് അന്വേക്ഷണം ആരംഭിക്കുകയായിരുന്നു. ഇവരുടെ വശം ഫോൺ ഇല്ലാതിരുന്നതിനാൽ ആദ്യം അന്വേഷണം മുന്നോട്ട് പോയില്ല. രാവിലെ10 ഓടെ ഇതിലൊരു പെൺകുട്ടി മാതാവിനെ വിളിച്ച് തങ്ങൾ സുരക്ഷിതരാണെന്നും എന്നാൽ അന്വേഷിക്കേണ്ടതില്ലെന്നും പറഞ്ഞു. കുന്ദംകുളം ബസ് സ്റ്റാൻഡിൽ വച്ച് ഒരു സ്ത്രീയുടെ ഫോൺ വാങ്ങിയാണ് കുട്ടി വീട്ടിലേക്ക് വിളിച്ചതെന്ന് മനസിലാക്കിയ പോലീസ് അവിടെ എത്തി ഇവരെ കണ്ടെത്തുകയായിരുന്നു. ഇവരോടൊപ്പമുണ്ടായിരുന്ന ഒരാൺകുട്ടിയെയും പോലീസ് കസ്റ്റഡിയിലെടുത്തിട്ടുണ്ട്.

സിനിമാ പ്രദര്‍ശനവും പ്രഭാഷണവും 19ന്

കൊച്ചി: കൊച്ചിന്‍ ഫിലിം സൊസൈറ്റിയുടെ ആഭിമുഖ്യത്തില്‍ ചാവറ കള്‍ച്ചറല്‍ സെന്‍ററിന്‍റെ സഹകരണത്തോടെ ചലച്ചിത്ര പ്രദര്‍ശനവും പ്രഭാഷണവും സംഘടിപ്പിക്കുന്നു. 19 ന് വൈകീട്ട് 4.30ന് ചാവറ ലൈബ്രറി ഹാളില്‍. അമൃത വിഷ്യല്‍ മീഡിയ വിദ്യാര്‍ഥിനികളായ എസ്.എസ്. സ്‌നേഹ സംവിധാനം ചെയ്ത "പൂവ്', വൈഷ്ണവി സുരേഷിന്‍റെ "അഞ്ചേയം' എന്നീ ലഘു ചിത്രങ്ങളും, പ്രശസ്ത സംവിധായിക ആഗ്‌നെസ് മെര്‍ലറ്റന്‍റെ ആര്‍ട്ടമീസിയ എന്ന സിനിമയും പ്രദര്‍ശിപ്പിക്കും. ചിത്രകലയില്‍ സ്ത്രീകള്‍ക്ക് ശരീരഘടനാപഠനം നിഷിദ്ധമായിരുന്ന പത്തൊന്‍പതാം നൂറ്റാണ്ടില്‍ ഇറ്റലിയില്‍ ജീവിച്ചിരുന്ന ആര്‍ട്ടമീസിയ ജെന്‍റിലസ്‌കി എന്ന ചിത്രകാരിയുടെ സംഘര്‍ഷങ്ങള്‍ നിറഞ്ഞ ജീവചരിത്രമാണ് സിനിമയുടെ വിഷയം. ഈസിനിമയുടെ പശ്ചാത്തലത്തില്‍ പ്രഫ. സി.എസ്. ജയറാം പ്രഭാഷണം നടത്തും.

ജനത്തിന്‍റെ വിശുദ്ധീകരണമാണ് ശ്രേഷ്ഠ ബാവ ഏറ്റെടുത്തിരിക്കുന്നത്: മന്ത്രി പി. പ്രസാദ്

കുത്താട്ടുകുളം: ജനത്തിന്‍റെ വിശുദ്ധീകരണമാണ് ശ്രേഷ്ഠ കാതോലിക്ക മാർ ബസേലിയോസ് ജോസഫ് ബാവ ഏറ്റെടുത്തിരിക്കുന്നതെന്ന് മന്ത്രി പി. പ്രസാദ്. ഉള്ളിൽ നിന്ന് ഉറവപോലുള്ള മഹത്വത്താൽ കാതോലിക്ക ബാവ ഉത്തരവാദിത്വം നിറവേറ്റുമെന്നും മുന്നിൽനിന്ന് നയിക്കുമെന്നും മന്ത്രി പറഞ്ഞു. ശ്രേഷ്ഠ കാതോലിക്ക മാർ ബസേലിയോസ് ജോസഫ് ബാവയ്ക്ക് കൂത്താട്ടുകുളത്ത് നൽകിയ അനുമോദന സമ്മേളനം ഉദ്ഘാടനം ചെയ്യുകയായിരുന്നു മന്ത്രി. വടകര സെന്‍റ് ജോണ്‍സ് യാക്കോബായ പള്ളിയിൽ എത്തിച്ചേർന്ന ബാവയെ വികാരി ഫാ. പോൾ തോമസ് പീച്ചിയിൽ തിരിതെളിയിച്ച് സ്വീകരിച്ചു. ഇടവകയുടെ സഭാനേതൃത്വവും ഇടവകാംഗങ്ങളും നൽകിയ സ്വീകരണത്തിനു ശേഷം പള്ളിയിൽ പ്രത്യേക പ്രാർഥനാ ശുശ്രൂഷകൾ നടന്നു. തുടർന്ന് നിരവധി വാഹനങ്ങളുടെ അകന്പടിയോടെ കൂത്താട്ടുകുളത്ത് എത്തിച്ചേർന്ന ബാവയെ സ്വകാര്യ ബസ് സ്റ്റാൻഡിനു മുന്നിൽ നിന്നും സ്വീകരിച്ച് ടൗണ്‍ഹാളിലേയ്ക്ക് ആനയിച്ചു. തുടർന്ന് നടന്ന അനുമോദന സമ്മേളനം മന്ത്രി പി. പ്രസാദ് ഉദ്ഘാടനം ചെയ്തു. കണ്ടനാട് ഭദ്രാസന മെത്രാപ്പോലീത്ത ഡോ. മാത്യൂസ് മാർ ഇവാനിയോസ് അധ്യക്ഷത വഹിച്ചു. പാലാ രൂപത ബിഷപ് മാർ ജോസഫ് കല്ലറങ്ങാട് അനുഗ്രഹ പ്രഭാഷണം നടത്തി. ശേഷ്ഠ ബാവയ്ക്ക് കൂത്താട്ടുകുളം മേഖലയുടെ പ്രത്യേക ഉപഹാരം നൽകി. ജോസ് കെ. മാണി എംപി, അനൂപ് ജേക്കബ് എംഎൽഎ, മാത്യു കുഴൽനാടൻ എംഎൽഎ, കുത്താട്ടുകുളം നഗരസഭാധ്യക്ഷ വിജയ ശിവൻ, എൻഎസ്എസ് താലൂക്ക് യൂണിയൻ പ്രസിഡന്‍റ് ആർ. ശ്യാംദാസ്, എസ്എൻഡിപി യൂണിയൻ സെക്രട്ടറി സത്യൻ ചേരിയ്ക്കവാഴയിൽ, സഭ വൈദിക ട്രസ്റ്റി ഫാ. റോയ് ജോർജ് കട്ടച്ചിറ, സഭാ സെക്രട്ടറി ജേക്കബ് സി. മാത്യു, കമാൻഡർ കെ.എ. തോമസ്, ഫാ. പോൾ തോമസ് പീച്ചിയിൽ, ഫാ. ജെയിംസ് കുടിലിൽ, ഫാ. മാത്യു കരീത്തറ, മാർത്ത്മറിയം മുൻ സെക്രട്ടറി അമ്മിണി മാത്യു, പീറ്റർ കെ. ഏലിയാസ് എന്നിവർ പ്രസംഗിച്ചു.

കണ്ണമാലിയിൽ കടലേറ്റം രൂക്ഷം; നിസഹായരായി നിവാസികൾ

തോപ്പുംപടി: രണ്ടു ദിവസം തുടര്‍ച്ചയായി കടല്‍ കയറിയതോടെ കണ്ണമാലി ചെറിയകടവ് പ്രദേശത്ത് നിന്ന് ആളുകള്‍ ബന്ധുവീടുകളിലേക്ക് പലായനം തുടങ്ങി. കഴിഞ്ഞ ശനിയാഴ്ച ഒഴിഞ്ഞുനിന്ന കടലേറ്റം ഞായറാഴ്ചയും ഇന്നലെയും വീണ്ടും ശക്തമായി. കണ്ണമാലി പ്രദേശത്തെ നാലു മുതല്‍ എട്ട് വാര്‍ഡുകള്‍ വരെയുള്ള ജനങ്ങളാണ് വലിയ ദുരിതത്തിലായിരിക്കുന്നത്. തുടര്‍ച്ചയായ കടൽകയറ്റമായതിനാല്‍ വീടുകളില്‍ തങ്ങാന്‍ സാധിക്കുന്നില്ല. മുറികളില്‍ മുട്ടൊപ്പം വെള്ളമാണ്. മാലിന്യങ്ങളും വീടുകളിലേക്ക് കയറുന്നത് ബുദ്ധിമുട്ട് ഇരട്ടിയാക്കുന്നു. കണ്ണമാലി, ചെറിയകടവ്, കാട്ടിപ്പറമ്പ്, കൈതവേലി എന്നിവിടങ്ങളിലാണ് കടലേറ്റം രൂക്ഷമായിട്ടുള്ളത്. പ്രദേശത്തെ നാലു മുതല്‍ എട്ട് വാര്‍ഡുകളില്‍ പൂര്‍ണമായും വെള്ളം കയറിയ അവസ്ഥയിലാണ്. ഇവിടെ കടല്‍ വെള്ളം റോഡ് കവിഞ്ഞൊഴുകി. വാഹനങ്ങള്‍ക്ക് റോഡിലൂടെ സഞ്ചരിക്കാനാവാത്ത രീതിയില്‍ വെള്ളം ഉയര്‍ന്നിട്ടുണ്ട്. പഞ്ചായത്ത് അധികൃതര്‍ എന്ത് ചെയ്യണമെന്നറിയാത്ത അവസ്ഥയിലാണ്. കടലേറ്റം ശക്തമായതിനാല്‍ പ്രതിരോധ പ്രവര്‍ത്തനങ്ങളൊന്നും നടത്താന്‍ സാധിക്കുന്നില്ല. റോഡിനു കുറുകെ വള്ളം വച്ച് ഉപരോധവുമായി നാട്ടുകാർ കണ്ണമാലി: കടലേറ്റം രൂക്ഷമായതോടെ പൊറുതിമുട്ടിയ ജനങ്ങള്‍ കണ്ണമാലിയില്‍ റോഡ് ഉപരോധിച്ചു. വളളവുമായെത്തിയ പ്രതിഷേധക്കാര്‍ റോഡിനു കുറുകെ വള്ളം ഇറക്കി വച്ചാണ് ഉപരോധിച്ചത്. ചാക്കുകളും മരക്കൊന്പുകളും റോഡിനു കുറുകെയിട്ടു. ഇതേതുടർന്ന് ഏറെ നേരം ഗതാഗതം തടസപ്പെട്ടു.

കണ്ണമാലി പോലീസ് സ്ഥലത്തെത്തിയെങ്കിലും അധികൃതര്‍ എത്തി ഉറപ്പ് നല്‍കാതെ പിരിഞ്ഞു പോകില്ലെന്ന നിലപാടിലായിരുന്നു പ്രദേശവാസികൾ. ജില്ലാ കളക്ടര്‍ ഇടപെട്ടതിനെ തുടര്‍ന്ന് തഹസില്‍ദാര്‍ ജോസഫ് ഹെര്‍ട്ടിസ് സ്ഥലത്തെത്തി പ്രതിരോധ പ്രവര്‍ത്തനങ്ങള്‍ ഉടന്‍ ആരംഭിക്കാമെന്ന് നാട്ടുകാര്‍ക്ക് ഉറപ്പു നല്‍കി. കടലേറ്റം രൂക്ഷമായ പ്രദേശങ്ങളില്‍ ജിയോ ട്യൂബ് സ്ഥാപിക്കുന്ന പ്രവൃത്തി ഉടന്‍ ആരംഭിക്കുമെന്ന് തഹസില്‍ദാര്‍ പറഞ്ഞെങ്കിലും രാത്രിയോടെയാണ് ജനം പിരിഞ്ഞു പോയത്.

കൊച്ചി മെട്രോയ്ക്ക് എട്ടു വയസ്

കൊച്ചി: കൊച്ചിയിലെ നഗരയാത്രകൾക്ക് ചടുലവേഗം പകർന്ന മെട്രോ റെയിലിന് ഇന്ന് എട്ടു വയസ്. 2017 ജൂണ്‍ 17ന് ആരംഭിച്ച കൊച്ചി മെട്രോയിൽ ഓരോ വർഷവും യാത്രക്കാരുടെ എണ്ണം ഗണ്യമായി വർധിക്കുന്നുണ്ട്. അവധി ദിവസങ്ങളിലൊഴികെ പ്രതിദിനം ലക്ഷത്തിലേറെപ്പേര്‍ മെട്രോയില്‍ യാത്ര ചെയ്യുന്നുണ്ടെന്ന് കെഎംആർഎൽ അധികൃതർ പറഞ്ഞു. കഴിഞ്ഞ വര്‍ഷത്തെ യാത്രക്കാരുടെ എണ്ണം 3.5 കോടിയിരുന്നു. ഈ വര്‍ഷം 3.65 കോടി യാത്രക്കാരെയാണു പ്രതീക്ഷിക്കുന്നത്. മെട്രോ സേവനം ആരംഭിച്ച 2017-18 കാലയളവില്‍ വാര്‍ഷിക യാത്രക്കാരുടെ എണ്ണം 1.71 കോടിയായിരുന്നു. ചുരുങ്ങിയ കാലയളവിൽ പ്രവര്‍ത്തന ലാഭം നേടി, ഇന്ത്യന്‍ മെട്രോ കമ്പനികളിലും കൊച്ചി മെട്രോ മുന്നിലാണ്. 2023-24 സാമ്പത്തിക വര്‍ഷത്തെ പ്രവർത്തനലാഭം 22.5 കോടിയാണ്. മെട്രോയിലെ യാത്രക്കാരില്‍ യുവാക്കളാണ് കൂടുതലെന്നു കെഎംആർഎൽ അധികൃതർ അറിയിച്ചു. ലോകോത്തര നിലവാരത്തിലുള്ള സ്റ്റേഷനുകള്‍, ശുചിത്വവും വൃത്തിയും നിറഞ്ഞ പരിസരം, ശീതീകരിച്ച ട്രെയിന്‍, കൃത്യതയാര്‍ന്ന സേവനം, യുക്തിസഹമായ നിരക്ക് തുടങ്ങിയവ യൂവാക്കളെ മെട്രോയിലേക്ക് ആകര്‍ഷിക്കുന്ന ഘടങ്ങളാണ്. വിവിധ സ്റ്റേഷനുകളിൽ വന്നിറങ്ങുന്ന യാത്രക്കാർക്കു നഗരത്തിലെ പ്രധാന കേന്ദ്രങ്ങളിലേക്കെത്താൻ 15 ബസുകൾ ക്രമീകരിച്ചിട്ടുണ്ട്. വൈറ്റിലയില്‍ നിന്നും തൃപ്പൂണിത്തുറ നിന്നും ഇ-ഫീഡര്‍ ബസ് ഇന്‍ഫോപാര്‍ക്കിലേക്ക് ആരംഭിച്ചു. എലവേറ്റഡ് ട്രാം സാധ്യത മെട്രോയുടെ വിപുലീകരണത്തിന്‍റെ ഭാഗമായി ഹൈക്കോടതിയിൽ നിന്ന് തേവര വരെയുള്ള റൂട്ടില്‍ എലവേറ്റഡ് ട്രാം സര്‍വീസിനുള്ള സാധ്യത പഠനത്തിനും കെഎംആര്‍എല്‍ ഒരുങ്ങുകയാണ്. മെട്രോ രണ്ടാംഘട്ട വികസനത്തിന്‍റെ ഭാഗമായി പാലാരിവട്ടം-കാക്കനാട് ഇന്‍ഫോപാര്‍ക്ക് റൂട്ടില്‍ നിര്‍മാണം പുരോഗമിക്കുകയാണ്. മൂന്നാം ഘട്ടമായി ആലുവ-അങ്കമാലി റൂട്ടിലെ നിർമാണത്തിന് വിശദമായ പദ്ധതി റിപ്പോര്‍ട്ട് തയാറാക്കുന്ന പ്രാരംഭ പ്രവര്‍ത്തനങ്ങളും ആരംഭിച്ചതായി കെഎംആർ‌എൽ അറിയിച്ചു.

പെരിയാറിൽ ജലനിരപ്പുയർന്നു; മണപ്പുറം വെള്ളക്കെട്ടിൽ

ആലുവ: കനത്ത മഴയെത്തുടർന്ന് പെരിയാർ കരകവിഞ്ഞൊഴുകി ആലുവ മണപ്പുറത്തെ താത്കാലിക ശിവക്ഷേത്രത്തിന്‍റെ മേൽക്കൂരയുടെ താഴെ വരെ മുങ്ങി. പുലർച്ചെ 3.30 ഓടെയാണ് ക്ഷേത്രത്തിലെ ശിവലിംഗ പ്രതിഷ്ഠ മുങ്ങിയത്. ഇക്കുറി കാലവർഷത്തിലെ ആദ്യ ആറാട്ടാണിത്. നിരവധി ഭക്തരാണ് ആറാട്ട് കുളിക്കാനെത്തുന്നത്. അതേ സമയം പെരിയാറിന്‍റെ തീരത്ത് ജലനിരപ്പ് ഉയർന്നിട്ടില്ല. പെരിയാർ കരകവിഞ്ഞ് പ്രകൃതി ഒരുക്കുന്ന സ്വാഭാവിക വെള്ളപ്പൊക്കത്തിൽ ക്ഷേത്രം പൂർണമായും മുങ്ങുമ്പോഴാണ് ആലുവ മഹാദേവന് ആറാട്ട് നടക്കുന്നത്. മണൽപ്പരപ്പിൽ നിന്ന് താഴ്ത്തിയാണ് ക്ഷേത്ര മുറ്റം നിലകൊള്ളുന്നത്. ക്ഷേത്രം മുങ്ങിയാലും മണപ്പുറത്തെ ക്ഷേത്രത്തിൽ പൂജ നടത്തണമെന്ന ഐതിഹ്യമുള്ളതിനാൽ ക്ഷേത്ര ചുറ്റുമതിലിന് മുകളിൽ ശീവേലി തിടമ്പ് എത്തിച്ച് രാവിലെ അഭിഷേകം നടന്നു. മുൻ കാലങ്ങളിൽ പ്രത്യേക തോണിയിലാണ് താഴത്തെ ക്ഷേത്രത്തിൽ എത്തിയിരുന്നത്. പലപ്പോഴായി പെയ്ത കനത്ത മഴയും വിവിധ ഡാമുകളിൽ നിന്ന് കൂടുതൽ വെള്ളമെത്തിയതുമാണ് മണപ്പുറം ക്ഷേത്രം മുങ്ങാൻ കാരണമായത്. ബലി തർപ്പണത്തിന് എത്തുന്നവർക്ക് ക്ഷേത്ര ഓഡിറ്റോറിയത്തിൽ ദേവസ്വം ബോർഡും ഉപദേശക സമിതിയും സൗകര്യമൊരുക്കിയിട്ടുണ്ട്. മണപ്പുറത്തെ ക്ഷേത്രത്തറയിൽ താത്കാലികമായി കൂട്ടിയോജിപ്പിക്കുന്ന വിധത്തിൽ മരത്തടികളാൽ നിർമിക്കുന്ന താത്കാലിക ക്ഷേത്രത്തിലെ പ്രധാന ഭാഗങ്ങൾ മേടമാസം അവസാനത്തോടെ അഴിച്ചുമാറ്റിയിരുന്നു. ഇവിടത്തെ ശീവേലി തിടമ്പും മുകളിലെ പ്രധാന ക്ഷേത്രത്തിലേക്ക് മാറ്റി. ഈ ശീവേലി തിടമ്പ് എത്തിച്ചാണ് രാവിലെ അഭിഷേകം നടത്തിയത്.

വയോധികനെ വഴിയില്‍ ഉപേക്ഷിച്ച സംഭവം : അന്വേഷണത്തിന് ഉത്തരവിട്ട് മനുഷ്യാവകാശ കമ്മീഷന്‍

കൊച്ചി: തൃശൂര്‍ സ്വദേശിയായ 65-കാരനെ എറണാകുളം നോര്‍ത്ത് മേല്‍പ്പാലത്തിന് കീഴില്‍ ഉപേക്ഷിച്ച സംഭവം അസിസ്റ്റന്‍റ് പോലീസ് കമ്മീഷണര്‍ റാങ്കില്‍ കുറയാത്ത ഉദ്യോഗസ്ഥന്‍ അന്വേഷിക്കണമെന്ന് മനുഷ്യാവകാശ കമ്മീഷന്‍ ചെയര്‍പേഴ്‌സണ്‍ ജസ്റ്റീസ് അലക്‌സാണ്ടര്‍ തോമസ് എറണാകുളം ജില്ലാ പോലീസ് മേധാവിക്ക് നിര്‍ദേശം നല്‍കി. തൃശൂര്‍ സ്വദേശി ഷംസുദ്ദീനെയാണ് ഇക്കഴിഞ്ഞ 13ന് എറണാകുളം നോര്‍ത്ത് പാലത്തിന് താഴെ സഹോദരങ്ങള്‍ ഉപേക്ഷിച്ചു പോയതിനെ തുടര്‍ന്ന് അവശനിലയില്‍ കണ്ടെത്തിയത്. ഉപേക്ഷിക്കപ്പെട്ടയാളുടെ വിലാസം, മുതിര്‍ന്ന പൗരന്‍മാരുടെ സംരക്ഷണ നിയമത്തിന്‍റെ ലംഘനം സംഭവിച്ചിട്ടുണ്ടോ, സംഭവത്തില്‍ എഫ്‌ഐആര്‍ രജിസ്റ്റര്‍ ചെയ്തിട്ടുണ്ടോ തുടങ്ങിയ വിവരങ്ങള്‍ കൃത്യമായി അന്വേഷിച്ച് മൂന്നാഴ്ചക്കകം റിപ്പോര്‍ട്ട് സമര്‍പ്പിക്കണമെന്ന് കമ്മീഷന്‍ ആവശ്യപ്പെട്ടു. സാമൂഹികനീതിവകുപ്പ് ജില്ലാ ഓഫീസര്‍ സംഭവത്തെക്കുറിച്ച് അന്വേഷണം നടത്തണം. വയോധികന് ലഭ്യമാക്കിയ ചികിത്സ, പുനരധിവാസം ഉറപ്പാക്കിയിട്ടുണ്ടോ തുടങ്ങിയ വിവരങ്ങള്‍ അന്വേഷിച്ച് മൂന്നാഴ്ചയ്ക്കകം റിപ്പോര്‍ട്ട് സമര്‍പ്പിക്കണം. മുതിര്‍ന്ന പൗരന്‍മാരുടെ സംരക്ഷണ നിയമപ്രകാരം ഇപ്പോള്‍ ഉപേക്ഷിക്കപ്പെട്ട വയോധികനുമായി ബന്ധപ്പെട്ട് ആര്‍ഡിഒയ്ക്ക് മുന്നില്‍ കേസുകള്‍ നിലവിലുണ്ടോ എന്നും പരിശോധിക്കണം. അസിസ്റ്റന്‍റ് കമ്മീഷണറും ജില്ലാ സാമൂഹികനീതി ഓഫീസറും ജൂലൈ 15ന് രാവിലെ 10ന് എറണാകുളം ഗവ. ഗസ്റ്റ് ഹൗസില്‍ നടക്കുന്ന സിറ്റിംഗില്‍ നേരിട്ട് ഹാജരാകണമെന്നും ഉത്തരവില്‍ പറഞ്ഞു. പത്രവാര്‍ത്തയുടെ അടിസ്ഥാനത്തില്‍ സ്വമേധയാ രജിസ്റ്റര്‍ ചെയ്ത കേസിലാണ് നടപടി.

റെയില്‍വേ കള്‍വര്‍ട്ടുകളിലെ മാലിന്യനീക്കം പൂര്‍ത്തിയാകാത്തതില്‍ ഹൈക്കോടതിക്ക് അതൃപ്തി

കൊച്ചി: നഗരത്തിലെ റെയില്‍വേ കള്‍വര്‍ട്ടുകളിലെ മാലിന്യനീക്കം മഴക്കാലം എത്തിയിട്ടും പൂര്‍ത്തിയാകാത്തതില്‍ ഹൈക്കോടതിക്ക് അതൃപ്തി. 23 കള്‍വര്‍ട്ടുകളില്‍ 15 എണ്ണത്തിന്‍റെ ശുചീകരണമാണ് ഇന്നലെ വരെ പൂര്‍ത്തിയായതെന്ന് റെയില്‍വേ ഹൈക്കോടതിയെ അറിയിച്ചു. ഈ പ്രവൃത്തി സംബന്ധിച്ച് റെയില്‍വേയും കോര്‍പറേഷനും തമ്മില്‍ ധാരണയിലെത്താന്‍ വൈകിയതും കാലതാമസത്തിന് കാരണമായി. കള്‍വര്‍ട്ടുകളില്‍ പ്ലാസ്റ്റിക് മാലിന്യമടക്കം അടിയുന്നത് തടയാന്‍ ദീര്‍ഘകാലപരിഹാര നടപടികള്‍ ആവിഷ്‌കരിച്ച് നടപ്പാക്കണമെന്ന് ജസ്റ്റീസ് ദേവന്‍ രാമചന്ദ്രന്‍ നിര്‍ദേശിച്ചു. മഴ കഴിയുമ്പോള്‍ ഇതിനു തുടക്കം കുറിക്കണമെന്നും ആവശ്യപ്പെട്ടു. അടുത്തയാഴ്ച വിഷയം പരിഗണിക്കുമ്പോള്‍ പദ്ധതി നിര്‍ദ്ദേശം സമര്‍പ്പിക്കാമെന്ന് റെയില്‍വേ അറിയിച്ചു. നഗരത്തില്‍ വെള്ളം കെട്ടുന്ന ഹോട്‌സ്‌പോട്ടുകളില്‍ പ്രത്യേക ശ്രദ്ധവേണമെന്നും നിര്‍ദേശിച്ചു. കാനകളിലേയും തോടുകളിലേയും ചെളിനീക്കം പൂര്‍ത്തിയായിവരികയാണെന്ന് കോര്‍പറേഷന്‍ മറുപടി നല്‍കി. തൃക്കാക്കരയില്‍ നിന്ന് കൊച്ചി നഗരത്തിലേക്ക് വെള്ളം ഒഴുകിയെത്തുന്നതു സംബന്ധിച്ച റിപ്പോര്‍ട്ട് സമര്‍പ്പിക്കുന്നതിന് ജില്ലാ കളക്ടര്‍ സമയം തേടി. നഗരത്തിലെ വെള്ളക്കെട്ട് നിവാരണവുമായി ബന്ധപ്പെട്ട ഹര്‍ജികളിലാണ് അധികൃതര്‍ നിലപാടറിയിച്ചത്. വിഷയം വ്യാഴാഴ്ച വീണ്ടും പരിഗണിക്കും.

ചന്ദര്‍കുഞ്ച് അപ്പാര്‍ട്ട്‌മെന്‍റ് നിര്‍മാണത്തിലെ ക്രമക്കേട്: സിബിഐ അന്വേഷണമില്ല

കൊച്ചി: വൈറ്റില ചന്ദര്‍കുഞ്ച് അപ്പാര്‍ട്ട്‌മെന്‍റ് നിർമാണത്തിലെ ക്രമക്കേടുകള്‍ സംബന്ധിച്ച് സിബിഐ. അന്വേഷണത്തിന് ഉത്തരവിടണമെന്ന ആവശ്യം ഹൈക്കോടതി അനുവദിച്ചില്ല. ബലക്ഷയത്തിലായ ആര്‍മി ടവറുകള്‍ ഉടന്‍ പൊളിച്ചു നീക്കാനാണ് അധികൃതരുടെ തീരുമാനം. അതിനുമുമ്പ് മതിയായ അന്വേഷണം നടത്തിയില്ലെങ്കില്‍ നിർമാണത്തകരാറിന്‍റെ ഉത്തരവാദികള്‍ രക്ഷപ്പെടാന്‍ ഇടയാകുമെന്നായിരുന്നു ഫ്‌ളാറ്റിലെ അന്തേവാസിയായ റിട്ട. കേണല്‍ സിബി ജോര്‍ജ് നല്‍കിയ ഹര്‍ജിയിലെ വാദം. ദുരന്തനിവാരണ നിയമപ്രകാരം എഫ്‌ഐആര്‍ രജിസ്റ്റര്‍ ചെയ്യാന്‍ സിബിഐയോട് നിര്‍ദേശിക്കണമെന്നായിരുന്നു ആവശ്യം. എന്നാല്‍ അത്തരം ഉത്തരവിനുള്ള അസാധാരണ സാഹചര്യം നിലനില്‍ക്കുന്നില്ലെന്ന് വ്യക്തമാക്കിയാണ് ജസ്റ്റീസ് പി.വി. കുഞ്ഞികൃഷ്ണന്‍ ഹര്‍ജി തീര്‍പ്പാക്കിയത്.

ആർഎംപി കനാൽ ആഴം കൂട്ടാൻ ഓപ്പറേഷൻ വാഹിനി

വൈപ്പിൻ: ‘പുതുവൈപ്പിന്‍റെ ദുഖ’മെന്ന് കുപ്രസിദ്ധി നേടിയ ആർഎംപി കനാലിന്‍റെ മണൽ മൂടിയ ഭാഗത്ത് ഡ്രഡ്ജിംഗ് തുടങ്ങി. കൊച്ചി അഴിമുഖത്തോടു ചേർന്നുള്ള കനാലിന്‍റെ മുഖഭാഗം മണൽ മൂടിക്കിടക്കുന്നതിനാൽ പുതുവൈപ്പിന്‍റെ പടിഞ്ഞാറൻ മേഖലയിൽനിന്ന് മഴവെളളം ഇറങ്ങിപ്പോകാതെ വീടുകൾ പ്രളയ സമാനമായതിന്‍റെ പശ്ചാത്തലത്തിലാണ് നടപടി തുടങ്ങിയത്. നാട്ടുകാർ സമരസമിതി രൂപീകരിച്ച് പഞ്ചായത്തിനു മുന്നിൽ സമരം തുടങ്ങിയതോടെ പഞ്ചായത്ത് കളക്ടർക്ക് കത്തു നൽകി. യോഗം വിളിച്ച കളക്ടർ പോർട്ടിന്‍റെ അധീനതയിൽപ്പെട്ട ഈ ഭാഗം ഡ്രഡ്ജ് ചെയ്യാൻ പോർട്ടിനു നിർദേശം നൽകിയെങ്കിലും നടപടിയുണ്ടായില്ല. പ്രസിഡന്‍റ് രസികല പ്രിയരാജ് കളക്ടറോട് വിഷയത്തിന്‍റെ ഗൗരവം വിശദമാക്കിയതോടെ ഓപ്പറേഷൻ വാഹിനി പദ്ധതിയിൽപ്പെടുത്തി പണികൾ ചെയ്യാൻ ഇറിഗേഷൻ വകുപ്പിനു നിർദേശം നൽകുകയുമായിരുന്നു. പ്രശ്നത്തിന് ശാശ്വത പരിഹാരം തേടാനായി ശാസ്ത്രീയ പഠനം നടത്തുവാനും ഇറിഗേഷൻ വകുപ്പിനെ ചുമതലപ്പെടുത്തിയിട്ടുണ്ടെന്ന് പഞ്ചായത്ത് പ്രസിഡന്‍റ് അറിയിച്ചു. അതേസമയം ഇവിടെ ഡ്രഡ്ജിംഗിനു സ്ഥിരം സംവിധാനം വേണമെന്നും ഇതിനായി പ്ലാൻ ഫണ്ടിൽ പണം നീക്കിവെക്കണമെന്നും സമരസമിതി ചെയർമാൻ സി.ജി. ബിജു ആവശ്യപ്പെട്ടു.

ഇടമുളയിൽ വീടുകളിൽ വെള്ളം കയറി

ഏലൂർ: ഏലൂർ നഗരസഭ 13-ാം വാർഡായ ഇടമുള, ബോസ്കോ കോളനി, പവർലൂം എന്നിവിടങ്ങളിൽ വെള്ളം കയറി. രണ്ട് ദിവസമായി തോരാതെ പെയ്ത മഴയിൽ പെരിയാറിൽ ജലനിരപ്പ് ഉയർന്നതാണ് വീടുകളിൽ വെള്ളം കയറാൻ കാരണം. പരിസരത്തെ അഴുക്കുകളും മാലിന്യവും വെള്ളത്തിൽ വീട്ടുപടിക്കൽ നിറഞ്ഞു നിൽക്കുകയാണ്. കോവിഡും പനിയുമൊക്കെ പടർന്നു പിടിച്ചിരിക്കുന്ന സ്ഥലമാണിത്. ഒരു മഴ കൂടി പെയ്താൽ താമസക്കാരെ മാറ്റി പാർപ്പിക്കേണ്ടി വരുമെന്ന് വാർഡ് കൗൺസിലർ കെ.എം. ഇസ്മായിൽ പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]