ADVERTISEMENT

ADVERTISEMENT

ജൈവ കൃഷി പരിശീലന പരിപാടി സംഘടിപ്പിച്ചു

ചെറുപുഴ: ഭാരതിയ പ്രകൃതി കൃഷി പദ്ധതിയുടെ ഭാഗമായി പെരിങ്ങോം-വയക്കര കൃഷിഭവന്‍റെ നേതൃത്വത്തിൽ ജൈവ കൃഷി പരിശീലന പരിപാടി സംഘടിപ്പിച്ചു. പെരിങ്ങോം-വയക്കര പഞ്ചായത്ത്‌ വൈസ് പ്രസിഡന്‍റ് ബിന്ദു രാജൻ കുട്ടി ഉദ്ഘാടനം ചെയ്തു. സംസ്ഥാന കർഷകമിത്ര അവാർഡ് ജേതാവ് ശ്രീധരൻ നമ്പൂതിരി ക്ലാസ് നയിച്ചു.

ജൈവ കർഷകനായ ഇല്ലിക്കൽ അൻവർ അനുഭവം പങ്കുവച്ചു. ട്രെക്കോഡെർമ സമ്പുഷ്ട ചാണകവളം നിർമാണത്തിൽ പരിശീലനവും നൽകി. കൃഷി ഓഫീസർ ടി.വി. തുഷാര, അസിസ്റ്റന്‍റ് കൃഷി ഓഫീസർ ജയന്തി, കൃഷി അസിസ്റ്റന്‍റ് പി.വി. ബിന്ദു, എം.വി. സുരേഷ് എന്നിവർ പ്രസംഗിച്ചു.

ADVERTISEMENT

തലശേരി ജനറൽ ആശുപത്രി ചിൽഡ്രൻസ് വാർഡ് ഐസിയു അടച്ചു

തലശേരി: കാലവർഷം ശക്തി പ്രാപിച്ചതോടെ മേൽക്കൂരയിലെ ചോർച്ചയെത്തുടർന്ന് തലശേരി ജനൽ ആശുപത്രിയിലെ ചിൽഡ്രൻസ് വാർഡ് ഐസിയു ഗത്യന്തരമില്ലാതെ അടച്ചുപൂട്ടി. ഗുരുതരാവസ്ഥയിൽ ഐസിയുവിൽ ചികിത്സയിലുള്ള കുട്ടികളെ പരിയാരത്തെ കണ്ണൂർ ഗവ. മെഡിക്കൽ കോളജിലേക്ക് മാറ്റി. ഐസിയുവിലെ മോണിറ്റർ, സ്കാനർ ഉൾപ്പടെയുള്ള വിലപിടിപ്പുള്ള യന്ത്രങ്ങളും സുരക്ഷിത സ്ഥാനത്തേക്ക് മാറ്റിയിരിക്കുകയാണ്. കാലവർഷം തുടങ്ങുന്നതിന് മുന്നോടിയായി ഇക്കഴിഞ്ഞ മേയ് അവസാനവാരം ചെയ്ത മഴയിലും ചുഴലിക്കു സമാനമായ കാറ്റിലും കടലോരത്തെ കെട്ടിടത്തിൽ പ്രവർത്തിക്കുന്ന ചിൽഡ്രൻസ് വാർഡിന്‍റെ മേൽക്കൂരയിലെ ആസ്ബസ്റ്റോസ് ഷീറ്റുകൾ ഇളകി വീണിരുന്നു. ഇതോടെയാണ് വാർഡിലെ പലയിടത്തും ചോർച്ചയാരംഭിച്ചത്. ഐസിയുവിലാണ് കൂടുതൽ പ്രശ്നങ്ങളുണ്ടായത്. അഞ്ചു കുട്ടികളെ കിടത്തി ചികിത്സിക്കാൻ സൗകര്യമുള്ള ഐസിയു അടച്ചിടേണ്ടി വന്നിരുന്നു. ഇവിടെ ചികിത്സയിലായിരുന്ന കുട്ടികളെ അന്ന് സമീപത്ത സർക്കാർ ആശുപത്രികളിലേക്ക് മാറ്റിയിരുന്നു. വിവരം ദുരന്ത നിവാരണ സമിതിക്ക് ആശുപത്രി അധികൃതർ റിപ്പോർട്ട് നൽകി. പ്രശ്നം പരിഹരിക്കാൻ നഗരസഭ ഇടപെട്ട് 30 ലക്ഷം രൂപ അടിയന്തരമായി അനുവദിച്ചിട്ടുണ്ട്. വാർഡ് നവീകരിക്കാൻ ടെൻഡർ നടപടികൾ ആരംഭിച്ചിട്ടുണ്ട്. വിഷയം സംബന്ധിച്ച് വിവരങ്ങൾ തേടി മഹിള കോൺഗ്രസ് വൈസ് പ്രസിഡന്‍റ് എ. ശർമിള ആശുപത്രി സൂപ്രണ്ടിന് അപേക്ഷ നൽകിയിട്ടുണ്ട്.

ഉന്നത വിജയികൾക്ക് അതിരൂപത കോർപറേറ്റ്തല അനുമോദനം

ചെമ്പേരി: തലശേരി അതിരൂപത കോർപറേറ്റ് എഡ്യുക്കേഷണൽ ഏജൻസിയുടെ കീഴിലെ വിദ്യാലയങ്ങളിൽ നിന്ന് എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയവർക്കും മികച്ച നേട്ടം കൈവരിച്ച സ്കൂളുകൾക്കുമുള്ള അതിരൂപതതല അനുമോദനം ചെന്പേരി വിമൽ ജ്യോതി എൻജിനിയറിംഗ് കോളജിൽ നടന്നു. ആർച്ച്ബിഷപ് മാർ ജോസഫ് പാംപ്ലാനി ഉദ്ഘാടനം ചെയ്തു. ആറു വിഭാഗങ്ങളിലായി നടത്തിയ പരിപാടിയിൽ 1300 വിദ്യാർഥികളെയും സമ്പൂർണ വിജയം നേടിയ സ്കൂളുകളെയും പുരസ്കാരം നൽകി ആദരിച്ചു.അതിരൂപത കോർപറേറ്റ് മാനേജർ ഫാ.സോണി വടശേരിൽ അധ്യക്ഷത വഹിച്ചു. ആർച്ച്ബിഷപ് എമരിറ്റസുമാരായ മാർ ജോർജ് വലിയമറ്റം, മാർ ജോർജ് ഞറളക്കാട്ട്, അതിരൂപത വികാരി ജനറാൾ മോൺ. സെബാസ്റ്റ്യൻ പാലാക്കുഴി, സജീവ് ജോസഫ് എംഎൽഎ, കണ്ണൂർ ആർഡിഡി ബിയാട്രിസ് മരിയ, തളിപ്പറമ്പ് എഇഒ കെ.വാസന്തി എന്നിവർ പങ്കെടുത്തു.

തേർത്തല്ലി-മൗവ്വത്താനി റോഡ് ചെളിക്കുളമായി

പെരുമ്പടവ്: തേർത്തല്ലി-മൗവ്വത്താനി റോഡ് ചെളിക്കുളമായി. നേരത്തെ തന്നെ തകർന്നു തുടങ്ങിയ റോഡ് മഴ ശക്തമായതോടെയാണ് ചെളിക്കുളമായത്. ഇതോടെ കാൽനടയാത്ര പോലും ദുഷ്കരമായി. റോഡ് തകർന്നതോടെ ടാക്സി വാഹനങ്ങൾ ട്രിപ്പ് പോകാൻ മടിക്കുകയാണ്. പ്രദേശത്തെ ചെങ്കൽ ക്വാറികളിൽ നിന്ന് ചെങ്കല്ലുമായി പോകുന്ന ലോറികളാണ് റോഡിന്‍റെ തകർച്ചയ്ക്ക് ആക്കം കൂട്ടുന്നതെന്നാണ് പരാതി. വർഷങ്ങൾക്ക് മുന്പ് മലയോര വികസന ഏജൻസിയിൽ പെടുത്തി ടാറിംഗ് നടത്തിയിരുന്നതാണ്. ആലക്കോട് പഞ്ചായത്ത് ജനകീയാസൂത്രണ പദ്ധതിയിൽ ഉൾപ്പെടുത്തി കുറച്ചുഭാഗം ടാറിംഗ് നടത്താറുണ്ട്. എന്നാൽ, ഏറെ താമസിക്കാതെ റോഡ് തകരുകയാണ് പതിവാണ്. തിമിരി, പെരുമ്പടവ്, ചെറുപാറ, പാടിച്ചാൽ പ്രദേശങ്ങങ്ങളെ തേർത്തല്ലിയുമായി ബന്ധിപ്പിക്കുന്ന പ്രധാന റോഡാണിത്. ഈ റോഡ് പൊതുമരാമത്ത് വകുപ്പ് ഏറ്റെടുത്ത് മെക്കാഡം ടാറിംഗ് നടത്തണം എന്നാണ് നാട്ടുകാരുടെ ആവശ്യം.

കുളമുണ്ട്, സൂക്ഷിക്കുക !

തളിപ്പറമ്പ്: വടക്കാഞ്ചേരി ചോയിച്ചേരി പാലത്തിന് സമീപത്തെ തകർന്ന റോഡും സമീപത്തെ കുളവും അപകട ഭീഷണി ഉയർത്തുന്നു. കുറ്റിക്കോലിൽ നിന്നും വടക്കാഞ്ചേരി വഴി ബക്കളത്തേക്ക് പോകുന്ന റോഡിലാണ് കുളത്തിലേക്ക് അബദ്ധത്തിൽ വാഹനങ്ങൾ വീണ് ഏത് നിമിഷവും അപകടമുണ്ടാകുന്ന സാഹചര്യമുള്ളത്. നിരവധി തവണ അധികാരികളുടെ ശ്രദ്ധയിൽപ്പെടുത്തിയിട്ടും നടപടിയില്ലാത്തത് പ്രതിഷേധത്തിന് ഇടയാക്കുകയാണ്. ദേശീയപാത കുറ്റിക്കോലിൽ നിന്നും ആരംഭിച്ച് കടമ്പേരി-ബക്കളം-ധർമശാല എന്നിവിടങ്ങളിലേക്ക് എത്തുന്ന റോഡിൽ വടക്കാഞ്ചേരി ചോയിച്ചേരി പാലത്തിന് സമീപത്താണ് അപകടഭീഷണി നിലനിൽക്കുന്നത്. ഇവിടെ സ്വകാര്യ വ്യക്തിയുടെ സ്ഥലത്തുള്ള വർഷങ്ങൾ പഴക്കമുള്ള കുളത്തിന് സമീപമാണ് റോഡ് തകർന്ന് അപകട ഭീഷണി ഉയർത്തുന്നത്. കൂടാതെ റോഡിലൂടെ ഒഴുകിയെത്തുന്ന മഴവെള്ളം കുളത്തിലേക്ക് ഒഴുകിപ്പോകുന്ന ഭാഗത്ത് റോഡിനോട് ചേർന്ന് കുളത്തിന്‍റെ കല്ലുകൾ ഇളകി നിൽക്കുകയാണ്. സ്കൂൾ വാഹനങ്ങളും ബസുകൾ ഉൾപ്പെടെ ദിനംപ്രതി നിരവധി വാഹനങ്ങൾ കടന്നുപോകുന്ന റോഡിൽ രാത്രിയിലും വാഹനങ്ങളുടെ തിരക്കുണ്ടാകാറുണ്ട്. അപകട സാധ്യത കണക്കിലെടുത്ത് ക്രാഷ് ബാരിയറുകളും മുന്നറിയിപ്പ് ബോർഡുകൾ സ്ഥാപിക്കുകയും കുളത്തോട് ചേർന്ന ഭാഗം ബലപ്പെടുത്തണമെന്നുമാണ് നാട്ടുകാർ ആവശ്യപ്പെടുന്നത്.

കോൺഗ്രസ് പരിശീലന കളരി നടത്തി

ആലക്കോട്: തെരഞ്ഞെടുപ്പ് മുന്നൊരുക്കത്തിന്‍റെ ഭാഗമായി ആലക്കോട് ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ പരിശീലന കളരി സംഘടിപ്പിച്ചു. ആലക്കോട് വ്യാപാര ഭവനിൽ സജീവ് ജോസഫ് എംഎൽഎ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് ജോസ് വട്ടമല അധ്യക്ഷത വഹിച്ചു. ബൂത്ത് പ്രസിഡന്‍റുമാർ, വാർഡ് പ്രസിഡന്‍റുമാർ, ബിഎൽഎമാർ എന്നിവർ പങ്കെടുത്തു. എൻ.എൻ. പ്രസന്നകുമാർ ക്ലാസ് നയിച്ചു. പരിശീലന പരിപാടിയിൽ പങ്കെടുത്തവർക്കുള്ള സർട്ടിഫിക്കറ്റ് വിതരണം യുഡിഎഫ് ജില്ലാ ചെയർമാൻ പി.ടി. മാത്യു നിർവഹിച്ചു. ഡിസിസി ജനറൽ സെക്രട്ടറിമാരായ തോമസ് വക്കത്താനം, ബിജു പുളിയംതൊട്ടി, ജോഷി കണ്ടത്തിൽ, എ.ഡി. സാബൂസ്, ദേവസ്യ പാലപ്പുറം, വത്സമ്മ വാണിശേരി, ബാബു പള്ളിപ്പുറം, ടോമി കുമ്പിടിയാമാക്കൽ, ജോയിച്ചൻ പള്ളിയാലിൽ, റോയി ചക്കാനിക്കുന്നേൽ എന്നിവർ പ്രസംഗിച്ചു.

ലഹരി വിരുദ്ധ ബോധവത്കരണ ക്ലാസ്

ചെറുപുഴ: പ്രാപ്പൊയിൽ ഗവ. ഹയർ സെക്കൻഡറി സ്കൂളിൽ എസ്പിസിയുടെ നേതൃത്വത്തിൽ ലഹരി വിരുദ്ധ ബോധവത്കരണ ക്ലാസ് നടത്തി. മുഖ്യാധ്യാപകൻ കെ.വി. രാജൻ അധ്യക്ഷത വഹിച്ചു. ചെറുപുഴ പോലീസ് സ്റ്റേഷൻ സീനിയർ സിവിൽ പോലീസ് ഓഫീസർ കെ.സി. രതീഷ് ക്ലാസെടുത്തു. സീനിയർ അസിസ്റ്റന്‍റ് കെ.വി. രാധാകൃഷ്ണൻ,എസ്പിസി എസിപിഒ ടി.എം. ഷിജു, സ്റ്റാഫ് കോ-ഓർഡിനേറ്റർ പി.കെ. രാമചന്ദ്രൻ, അനന്യ പ്രകാശ് എന്നിവർ പ്രസംഗിച്ചു. ചെറുപുഴ സ്റ്റേഷനിലെ സിപിഒ കെ.അനിത, സുനീഷ് ജോർജ്, ജിൻസി തോമസ് എന്നിവർ നേതൃത്വം നൽകി. വായാട്ടുപറമ്പ്: സമഗ്ര ഗുണമേന്മ വിദ്യാഭ്യാസ പദ്ധതിയുടെ ഭാഗമായി "ലഹരി വസ്തുക്കളുടെ ഉപയോഗവും ദൂഷ്യവശങ്ങളും' എന്ന വിഷയത്തെ ആസ്പദമാക്കി വായാട്ടുപറമ്പ് സെന്‍റ് ജോസഫ് യുപി സ്കൂളിൽ കുട്ടികൾക്കായി ബോധവത്കരണ ക്ലാസ് നടത്തി. ആലക്കോട് എഎസ്ഐ സദാനന്ദൻ ക്ലാസ് നയിച്ചു. സ്കൗട്ട് ആൻഡ് ഗൈഡ് യൂണിറ്റിന്‍റെ ആഭിമുഖ്യത്തിലാണ് ക്ലാസ് സംഘടിപ്പിച്ചത്.

കെഎസ്‌എസ്‌പിഎ മണ്ഡലം സമ്മേളനം

ചെമ്പേരി: കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ (കെഎസ്‌എസ്‌പിഎ) ഏരുവേശി മണ്ഡലം അർധവാർഷിക സമ്മേളനവും യൂണിറ്റിൽ പുതുതായി അംഗത്വം സ്വീകരിച്ച പതിനാല് അംഗങ്ങൾക്കുള്ള വരവേൽപ്പും ചളിമ്പറമ്പ് സുരഭി ഓഡിറ്റോറിയത്തിൽ നടന്നു. സജീവ് ജോസഫ് എംഎൽഎ ഉദ്ഘാടനം ചെയ്തു. കെഎസ്എസ്പിഎ മണ്ഡലം പ്രസിഡന്‍റ് ഏബ്രഹാം തോമസ് അധ്യക്ഷത വഹിച്ചു.ഏരുവേശി പഞ്ചായത്ത്‌ പ്രസിഡന്‍റ് മിനി ഷൈബി മുഖ്യപ്രഭാഷണം നടത്തി. കെഎസ്എസ്പിഎ ജില്ലാ സെക്രട്ടറി പാട്ടത്തിൽ സുഖദേവൻ പുതിയ അംഗങ്ങളെ ഷാൾ അണിയിച്ച് സംഘടനയിലേക്ക് സ്വീകരിച്ചു. പരിമിതികളെ മറികടന്ന് ചിത്രകലയിൽ പ്രതിഭ തെളിയിക്കുന്ന ടി.ടി. മനോഹർ, പ്ലസ്‌ ടു പരീക്ഷയിൽ ഉന്നത വിജയം നേടിയ ചെമ്പേരി നിർമല ഹയർ സെക്കൻഡറി സ്കൂൾ വിദ്യാർഥികളായ നിത മനോജ്‌, ജയിൻ ജോൺസൺ, ജിയന്ന വർഗീസ് എന്നിവരെ സംസ്ഥാന സെക്രട്ടേറിയറ്റംഗം പി.പി. ചന്ദ്രാഗതൻ മെമന്‍റോ നൽകി ആദരിച്ചു. ജില്ലാ ജോയിന്‍റ് സെക്രട്ടറി എം.പി. കുഞ്ഞുമൊയ്‌തീൻ, ജോസ് അഗസ്റ്റിൻ, ജോസ് മേമടം, കെ. ബാബു, വിൽസൺ മാത്യു, എം.എം. ലീല, ബാബുക്കുട്ടി ജോർജ്, സാലി ജോസ്, ഷീൻ ഏബ്രഹാം, പി.ജെ. സ്കറിയ, ടോമി മാത്യു എന്നിവർ പ്രസംഗിച്ചു.

എൻഡോവ്മെന്‍റ് വിതരണവും വിവിധ ക്ലബുകളുടെ ഉദ്ഘാടനവും

വായാട്ടുപറമ്പ്: വായാട്ടുപറമ്പ് സെന്‍റ് ജോസഫ്സ് ഹയർ സെക്കൻഡറി സ്കൂളിൽ 2024-25 അധ്യയന വർഷത്തെ എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ കുട്ടികൾക്കുള്ള ആദരവും എൻഡോവ്മെന്‍റ് വിതരണവും വിദ്യാരംഗം കലാസാഹിത്യവേദി, വിവിധ ക്ലബുകളുടെ ഉദ്ഘാടനവും നടത്തി. സ്കൂൾ ഓഡിറ്റോറിയത്തിൽ നടന്ന സമ്മേളനം ഇരിക്കൂർ ഉപജില്ല വിദ്യാരംഗം കലാസാഹിത്യവേദി കോ-ഓർഡിനേറ്റർ കെ.പി. സുനിൽകുമാർ ഉദ്ഘാടനം ചെയ്തു. പിടിഎ പ്രസിഡന്‍റ് സുനിൽ കീഴാരത്തിൽ അധ്യക്ഷത വഹിച്ചു. സ്കൂൾ മാനേജർ റവ. ഡോ. തോമസ് തെങ്ങുംപള്ളി അനുഗ്രഹ പ്രഭാഷണം നടത്തി. സ്കൂൾ പ്രിൻസിപ്പൽ സജി ജോർജ്, മുഖ്യാധ്യാപകൻ ബിജു സി. ഏബ്രഹാം, മുൻ മുഖ്യാധ്യാപിക സോഫിയ ചെറിയാൻ, യുപി സ്കൂൾ മുഖ്യാധ്യാപകൻ ബെന്നി പുത്തൻനട, മദർ പിടിഎ പ്രസിഡന്‍റ് ലിബി വിനോ, എൽസ, എൽന എന്നിവർ പ്രസംഗിച്ചു.

തളിപ്പറമ്പ് നഗരത്തിൽ കുഴി ‌

തളിപ്പറമ്പ്: തളിപ്പറമ്പ് നഗരത്തിലെ ദേശീയ പാതയിലെ കുഴി അപകടഭീഷണി ഉയർത്തുന്നു. തളിപ്പറമ്പ് നഗരത്തിൽ ബസ്‌ സ്റ്റാൻഡിലേക്ക് പ്രവേശിക്കുന്ന ഭാഗത്തിന്‍റെ എതിർവശത്തായാണ് കുഴി രൂപപ്പെട്ടത്. ആഴം കൂടിയ കുഴിയായതു കൊണ്ട് തന്നെ ഇരുചക്രവാഹനയാത്രക്കാർക്കും കാൽ നടയാത്രക്കാർക്കും വൻ അപകട ഭീഷണിയാണ് ഉയർത്തുന്നത്. അപകടകരമായി നിൽക്കുന്ന ഈ കുഴിയുടെ അപകടാവസ്ഥ അധികൃതരെ അറിയിച്ചിട്ടും ഇവിടേക്ക് തിരിഞ്ഞ് പോലും നോക്കുന്നില്ലെന്ന് സമീപത്തുള്ള വ്യാപാരികൾ പറഞ്ഞു.

നാടാകെ ഇറങ്ങി, കളിസ്ഥലമൊരുക്കാൻ

പയ്യാവൂർ: അടിച്ചേരി ഗ്രാമത്തിലെ കുട്ടികൾക്ക് ഒത്തുചേരാനും കായിക വിനോദത്തിനുമായി കളിസ്ഥലമൊരുക്കാൻ നാടാകെ ആവേശത്തോടെ രംഗത്ത്. കളിസ്ഥലമൊരുക്കാനുള്ള സ്ഥലം വാങ്ങാനാണ് നാടൊന്നാകെ ആവേശപൂർവം പരിശ്രമം തുടങ്ങിയത്. മലപ്പട്ടം അടിച്ചേരിയിൽ 1957ൽ പ്രവർത്തനമാരംഭിച്ച കൃഷ്ണപിള്ള സ്മാരക വായനശാലക്കായി മുൻ എംപി കെ.കെ. രാഗേഷ് അനുവദിച്ച തുക ഉപയോഗിച്ച് നിർമിച്ച പുതിയ കെട്ടിടം ഉദ്ഘാടനത്തിനൊരുങ്ങുന്നതിനിടയിലാണ് കളിസ്ഥലത്തിനാവശ്യമായ ധനസമാഹരണത്തിനായി പരസ്പര സഹായ നിധി എന്ന പേരിൽ നാട്ടുകാരുടെ സഹകരണത്തോടെ വായനശാല കമ്മിറ്റി രംഗത്തിറങ്ങിയിരിക്കുന്നത്. വരും തലമുറയിലെ കുട്ടികളുടെ കായിക പരിശീലനം ലക്ഷ്യമാക്കിയുള്ള ഈ മാതൃകാ പ്രവർത്തന ത്തിന് വളരെ നല്ല സഹകരണമാണ് ലഭിക്കുന്നത്. ഒരുസെന്‍റ് സ്ഥലം എന്ന ചലഞ്ച് പ്രകാരം 45 സെന്‍റ് സ്ഥലം കളിസ്ഥലത്തിനായി ഇതിനകം തന്നെ വായനശാല പ്രവർത്തകരുടെ ശ്രമഫലമായി വാങ്ങിയിട്ടുണ്ട്. കളിസ്ഥലത്തിനാവശ്യമായ ബാക്കി സ്ഥലം കൂടി വാങ്ങുന്നതിനാണ് പരസ്പര സഹായ നിധിയെന്ന പേരിൽ കുറി തുടങ്ങിയത്. പൊതുജനങ്ങളിൽ നിന്ന് ആവേശകരമായ പ്രതികരണങ്ങളാണ് ഈ കുറിക്ക് ലഭിച്ചുകൊണ്ടിരിക്കുന്നതെന്ന് വായനശാല ഭാരവാഹികൾ പറയുന്നു. പഞ്ചായത്ത് മെംബർ കെ.വി. സുധാകരൻ കൺവീനറും, പി. വാസന്തി ചെയർമാനും വായനശാല പ്രസിഡന്‍റ് എം.വി. പുരുഷോത്തമൻ, സെക്രട്ടറി അയത്ത് ലക്ഷ്മണൻ എന്നിവർ ഉൾപ്പെടുന്ന അമ്പത്തൊന്നംഗ സംഘാടക സമിതിയാണ് ഇതിനായി രംഗത്തുള്ളത്.

പടിയൂർ പൂവത്ത് ലോറി നിയന്ത്രണം വിട്ട് പുഴയരികിലേക്കു മറിഞ്ഞു

ഇരിട്ടി: ഇരിട്ടി-തളിപ്പറമ്പ് സംസ്ഥാന പാതയിൽ പടിയൂർ പൂവത്ത് ലോറി നിയന്ത്രണം വിട്ട് പുഴയരികിലേക്ക് മറിഞ്ഞു. ഇരിട്ടിയിൽ നിന്നും തളിപ്പറമ്പിലേക്ക് ചരക്കുമായ പോയ ലോറിയാണ് അപകടത്തിൽപ്പെട്ടത്. സംസ്ഥാന പാതയിൽ പുഴയോടു ചേർന്ന അപകട സാധ്യതയുള്ള ഭാഗമാണിത്. ഇവിടെ അപകട സൂചനാമുന്നറിയിപ്പ് ബോർഡുകളോ റോഡിനെയും പുഴയോരത്തെയും വേർതിരിക്കുന്ന രീതിയിൽ സംരക്ഷണ വേലികളോ തീർത്തിട്ടില്ല. റോഡിനോട് ചേർന്ന പുഴയുടെ ഭാഗം വലിയ ആഴവും ചുഴിയുമുള്ള പ്രദേശമാണ്. നിയന്ത്രണം വിട്ട ലോറി റോഡരികിലെ വൈദ്യുതി തൂൺ തകർത്താണു മറിഞ്ഞത്. അപകടത്തിൽ ആർക്കും പരിക്കില്ല.

വിട പറഞ്ഞത് സംരംഭകനും മാധ്യമപ്രവർത്തകനും

ഉളിക്കൽ: അയിരാണിക്കൽ ജോയ്കുട്ടി ഏബ്രഹാം എന്ന എജെ നെറ്റ് ജോയിച്ചേട്ടൻ വിടപറയുന്പോൾ മലയോരത്തിന് നഷ്ടമാകുന്നത് കേബിൾ നെറ്റ്‌വർക്ക് മാധ്യമത്തെ മലയോരത്തിന് സമ്മാനിച്ച സംരംഭകനും കൂടിയാണ്. മലയോര മേഖലയിൽ കേബിൾ നെറ്റ്‌വർക്ക് പരിചിതമല്ലാതിരുന്ന കാലത്ത് ഡിഷ് ടിവിയെ പിന്തള്ളി ആലക്കോട് മുതൽ ഉളിക്കൽ, പായം, അയ്യൻകുന്ന്, ആറളം പഞ്ചായത്തുകളെ ബന്ധിപ്പിച്ചുകൊണ്ട് കേബിൾ നെറ്റ്‌വർക്ക് സ്ഥാപിച്ചു. എ.ജെ. നെറ്റ് എന്ന തന്‍റെ കേബിൾ വാർത്താചാനലിലൂടെ മലയോരത്തിന്‍റെ എല്ലാ വിശേഷങ്ങളും ജനങ്ങളെ അറിയിക്കുന്നതിനൊപ്പം മലയോരത്തിന്‍റെ ആവശ്യങ്ങൾ അധികൃതരുടെ ശ്രദ്ധയിൽപെടുത്തി പരിഹാരം കണ്ടെത്തുന്നതിലും രണ്ടര പതിറ്റാണ്ട് കാലം സജീവമായി പ്രവർത്തിച്ചു. ഇരിട്ടി എംജി കോളജ് ഭരണ സമിതിയംഗമായും ഇരിട്ടി താലൂക്ക് പത്രപ്രവർത്തക യൂണിയൻ പ്രസ് ഫോറം പ്രസിഡന്‍റ് എന്നീ നിലകളിലും പ്രവർത്തിച്ചു വരുന്നതിനൊപ്പം ഇരിട്ടി ഗ്രീൻ ലീഫ് ഹോട്ടികൾച്ചറൽ സൊസൈറ്റി , ലയൺസ് ക്ലബ് എന്നിവയിലും സജീവമായിരുന്നു. ഇന്നലെ ഉച്ചകഴിഞ്ഞ് 3.30 ഓടെ ഉളിക്കൽ ടൗണിൽ പൊതുദർശനത്തിന് ഭൗതികശരീരത്തിൽ സമൂഹത്തിന്‍റെ നാനാതുറകളിലുള്ളവർ അന്ത്യോപചാരം അർപ്പിച്ചു. ഇന്ന് ഉച്ചയ്ക്ക് 12ന് അറബി അസംബ്ലീസ് ഓഫ് ഗോഡ് ചർച്ചിൽ സംസ്കാരം നടക്കും. ഉച്ചകഴിഞ്ഞ് മൂന്നിന് ഇരിട്ടി താലൂക്ക് പത്രപ്രവർത്തക യൂണിയന്‍റെ നേതൃത്വത്തിൽ ഉളിക്കൽ ടൗണിൽ സർവകക്ഷി അനുസ്‌മരണം നടക്കും. ജോയ്കുട്ടി ഏബ്രഹാമിന്‍റെ നിര്യാണത്തിൽ കെപിസിസി പ്രസിഡന്‍റ് സണ്ണി ജോസഫ് എംഎംൽഎ, സജീവ് ജോസഫ് എംഎൽഎ, കെ.കെ.ശൈലജ എംഎൽഎ, ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യൻ എന്നിവർ അനുശോചിച്ചു.

വിജയോത്സവം സംഘടിപ്പിച്ചു

കൂത്തുപറമ്പ്: നിർമലഗിരി റാണി ജയ് ഹയർ സെക്കൻഡറി സ്കൂളിൽ വിജയോത്സവം സംഘടിപ്പിച്ചു. സ്കൂളിലെ പൂർവ വിദ്യാർഥിനി ഡോ. ദീപ രാജ്മോഹൻ ഉദ്ഘാടനം ചെയ്തു. സ്കൂൾ ലോക്കൽ മാനേജർ സിസ്റ്റർ ലിസ്മരിയ പാറക്കൽ അധ്യക്ഷത വഹിച്ചു. സ്കൂൾ പ്രിൻസിപ്പൽ ഡോ. സിസ്റ്റർ മേഴ്സി കുന്നത്തുപുരയിടം, പിടിഎ പ്രസിഡന്‍റ് അഷ്റഫ് ഹാജി, അധ്യാപികമാരായ എസ്. സജിത, യു.കെ. അഭിനവ്യ, വിദ്യാർഥികളായ ശ്രേദ ശ്രീജിത്ത്, ദിയ പ്രശാന്ത് തുടങ്ങിയവർ പ്രസംഗിച്ചു. എൽഎസ്എസ്, യുഎസ്എസ്, എസ്എസ്എൽസി, പ്ലസ് ടു പരീക്ഷകളിൽ മികച്ച വിജയം നേടിയ വിദ്യാർഥികളെ ചടങ്ങിൽ അനുമോദിച്ചു.

അറ്റകുറ്റപ്പണിക്കിടെ ദേഹാസ്വാസ്ഥ്യം; കരാര്‍ ജീവനക്കാരന്‍ വൈദ്യുത തൂണിൽ കുടുങ്ങി

കൂത്തുപറമ്പ്: വൈദ്യുത ലൈനില്‍ അറ്റകുറ്റപ്പണിക്കിടെ ദേഹാസ്വാസ്ഥ്യത്തെ തുടര്‍ന്ന് കരാര്‍ ജീവനക്കാരന്‍ തൂണിൽ കുടുങ്ങി. കൊല്ലം സ്വദേശി രാജേഷാണ് ദേഹാസ്വാസ്ഥ്യം അനുഭവപ്പെട്ട് വൈദ്യുത തൂണിൽ കുടുങ്ങിയത്. ഏറെ നേരത്തെ പരിശ്രമത്തിനുശേഷം സഹപ്രവര്‍ത്തകരും നാട്ടുകാരും ചേര്‍ന്ന് ഇദ്ദേഹത്തെ താഴെയിറക്കി. ഇന്നലെ ഉച്ചയ്ക്ക് 12.30 യോടെയായിരുന്നു സംഭവം. അതുവഴി കടന്നു പോകുകയായിരുന്ന പാർസൽ ലോറിയുടെ മുകളിൽ കയറി അതിസാഹസികമായി രാജേഷിനെ താഴെയിറക്കുകയായിരുന്നു. രാജേഷിനെ ഉടൻ കൂത്തുപറമ്പ് താലൂക്ക് ആശുപത്രിയിൽ പ്രവേശിപ്പിച്ചു. വിവരമറിഞ്ഞ് കൂത്തുപറമ്പ് പോലീസും അഗ്നിരക്ഷാസേനയും സ്ഥലത്തെത്തിയിരുന്നു.

കാലാങ്കിയിൽ കാട്ടാന; വ്യാപകമായി കൃഷി നശിപ്പിച്ചു

ഉളിക്കൽ: കാലാങ്കിയിലെ ജനവാസ മേഖലയിൽ കാട്ടാന ഇറങ്ങി വ്യാപക കൃഷിനാശം വരുത്തി. ചൂണ്ടനാനി ജോർജ്, കണ്ണച്ചേൽ സാലി, മൈലുമ്മൂട്ടിൽ റോയ് തുടങ്ങിയവരുടെ തെങ്ങ്, വാഴ, കശുമാവ് തുടങ്ങിയ കൃഷികൾ നശിപ്പിച്ചു. വ്യാഴാഴ്ച രാത്രി 12ന് ശേഷമാണ് സംഭവം. കുറച്ചു ദിവസങ്ങളായി മേഖലയിൽ കാട്ടാനയുള്ളതിനാൽ ഉറങ്ങാതെ കാവലിരുന്നെങ്കിലും വ്യാഴാഴ്ച അർധരാത്രി ഉറങ്ങിപ്പോയ സമയത്താണ് ആനക്കൂട്ടം എത്തിയതെന്നാണ് ചൂണ്ടനാനി ജോർജ് പറയുന്നത്. ജോർജിന്‍റെ പുരയിടത്തിലാണ് കൂടുതൽ നാശനഷ്‌ടം വരുത്തിയിരിക്കുന്നത്. വീടിന് സമീപം വരെയെത്തിയ ആനക്കൂട്ടം കായ്ഫലമുള്ള തെങ്ങുകൾ ചുവടെ പിഴുതു നശിപ്പിച്ചു. വാഴ, കവുങ്ങ് തുടങ്ങി നിരവധി കാർഷിക വിളകൾ ചവിട്ടി നശിപ്പിച്ചു. വീടിന് സമീപത്തു നിന്ന മാവിലെ മാങ്ങകൾ മുഴുവൻ കുലുക്കി പറിച്ചു. കൃഷിയിടത്തിലെ കയ്യാലകൾ മുഴുവൻ ചവിട്ടിപ്പൊളിച്ച നിലയിലാണ്. കർണാടക വനമേഖലയിൽ നിന്ന് ഇറങ്ങുന്ന ആനകളാണ് മേഖലയിൽ വ്യാപക നാശം വിതയ്ക്കുന്നത്. ഏക്കർ കണക്കിന് വരുന്ന കൃഷിയിടങ്ങളിലാണ് ആനക്കൂട്ടം ഇറങ്ങിയത്. ഒന്നിൽ കൂടുതൽ ആനകൾ ഉണ്ടെന്നും പടക്കം പൊട്ടിച്ചും മറ്റും ആനയെ തുരത്താൻ ശ്രമിച്ചിട്ടും ആനകൾ പിൻമാറുന്നില്ലെന്നും പ്രദേശവാസികൾ പറയുന്നു. സെക്ഷൻ ഫോറസ്റ്റ് ഓഫീസർ എ.കെ.ബാലന്‍റെ നേതൃത്വത്തിലുള്ള വനപാലക സംഘം സ്ഥലത്തെത്തി പരിശോധന നടത്തി. ബീറ്റ് ഫോറസ്റ്റ് ഓഫീസർമാരായ സുജിത്ത് രാഘവൻ, പി.ആർ. ഡിവിൻ, പി.സി. മിഥുൻ, വാച്ചർ രജീഷ് എന്നിവരും സംഘത്തിൽ ഉണ്ടായിരുന്നു. പ്രദേശത്ത് സോളാർവേലിയുണ്ടെങ്കിലും ഒന്നും പ്രവർത്തനക്ഷമമല്ല. പുതിയ സോളാർ തൂക്കുവേലി ഏതാനും ദിവസം മാത്രമാണ് പ്രവർത്തിച്ചതെന്നും നാട്ടുകാർ പറയുന്നു.

ചെമ്പന്തൊട്ടി സ്വദേശി കുവൈറ്റിൽ കെട്ടിടത്തിൽനിന്നു വീണു മരിച്ചു

ചെമ്പന്തൊട്ടി: കുവൈറ്റിലെ മംഗഫിൽ കണ്ണൂർ ചെമ്പന്തൊട്ടി സ്വദേശിയായ യുവാവിനെ കെട്ടിടത്തിൽനിന്നു വീണു മരിച്ച നിലയിൽ കണ്ടെത്തി. ചെമ്പന്തൊട്ടി -കോറങ്ങോട് പരേതരായ കൈപ്പളളിയിൽ മത്തായി-അന്നമ്മ(റിട്ട. അധ്യാപിക, ചെമ്പന്തൊട്ടി ചെറുപുഷ്പം യുപി സ്കൂൾ) ദന്പതികളുടെ മകൻ ജോസ് മാത്യു (42) ആണ് മരിച്ചത്. ഭാര്യ: അൽഫോൻസ (നഴ്സ്, കുവൈറ്റ്). മക്കൾ: ആരോൺ (ഒന്പത്), സിയ (ആറ്), നിഹ (നാല്). സഹോദരങ്ങൾ: സാന്‍റി (യുഎസ്എ), ഷാജി (മംഗളൂരു), ഫാ. സജി കൈപ്പള്ളിൽ (എംഎസ്എഫ്എസ്, ആസാം), ജോഷി (സൗദി അറേബ്യ), ഷിജി (ബറോഡ), ഷീജ പുറവയൽ (അധ്യാപിക, ഇരിട്ടി ഹയർ സെക്കൻഡറി സ്കൂൾ ), ടോണി (മഹാരാഷ്‌ട്ര). മൃതദേഹം മോർച്ചറിയിൽ സൂക്ഷിച്ചിരിക്കുകയാണ്. സംസ്കാരം പിന്നീട് ചെമ്പന്തൊട്ടി സെന്‍റ് ജോർജ് ഫൊറോന പള്ളിയിൽ.

അവശനിലയിൽ കണ്ടെത്തിയ ആൾ മരിച്ചു

തലശേരി: പുതിയ ബസ് സ്റ്റാൻഡിൽ അവശനിലയിൽ കണ്ടെത്തിയ ആൾ ചികിത്സയിലിരിക്കെ മരിച്ചു. പാനൂരിനടുത്ത് ചമ്പാട് സ്വദേശി കെ.പി. ദേവദാസൻ (57) ആണ് മരിച്ചത്. ഇക്കഴിഞ്ഞ ബുധനാഴ്ച രാത്രി പട്രോളിംഗ് നടത്തുകയായിരുന്ന പോലീസ് ഉദ്യോഗസ്ഥരാണ് അവശനിലയിൽ കണ്ടെത്തിയ ഇയാളെ തലശേരി ജനറൽ ആശുപത്രിയിൽ എത്തിച്ചത്. മൃതദേഹം നടപടിക്രമങ്ങൾക്കുശേഷം ബന്ധുക്കൾക്ക് കൈമാറി.

വധശ്രമക്കേസിൽ ജാമ്യത്തിലിറങ്ങിയ ഓട്ടോഡ്രൈവർ തൂങ്ങിമരിച്ച നിലയിൽ

കണ്ണൂർ: വധശ്രമക്കേസിൽ അറസ്റ്റിലായി ജാമ്യത്തിലിറങ്ങിയ ഓട്ടോഡ്രൈവറെ തൂങ്ങിമരിച്ച നിലയിൽ കണ്ടെത്തി. ചെറുമാവിലായി കുന്നന്പ്രം സ്വദേശി വി.എൻ. സുനിൽകുമാറിനെയാണ് (51) വ്യാഴാഴ്ച രാത്രി 8.45 ഓടെ വീട്ടിലെ കിടപ്പുമുറിയിലെ ഫാനിൽ തൂങ്ങിമരിച്ച നിലയിൽ കണ്ടെത്തിയത്. മൂന്നുപെരിയയിലെ ഓട്ടോഡ്രൈവറാണ് സുനിൽകുമാർ.രണ്ടു മാസം മുന്പ് ഭാര്യയെ പെട്രോളൊഴിച്ച് വധിക്കാൻ ശ്രമിച്ച സംഭവത്തിൽ സുനിൽകുമാറിനെ എടക്കാട് പോലീസ് അറസ്റ്റ് ചെയ്തിരുന്നു. തുടർന്ന് ഇയാൾ ശിക്ഷ അനുഭവിച്ചുവരികയായിരുന്നു. രണ്ടു ദിവസം മുന്പാണ് ജാമ്യത്തിലിറങ്ങിയത്.

വയോധിക തോട്ടില്‍ മരിച്ച നിലയില്‍

പെരിങ്ങോം: തേങ്ങ പെറുക്കുന്നതിനിടയില്‍ വയോധികയെ തോട്ടില്‍വീണ് മരിച്ച നിലയില്‍ കണ്ടെത്തി. കാളീശ്വരം ആലക്കാട്ടെ ആലയില്‍ മാധവിയെയാണ് (70) കാളീശ്വരത്തെ തോട്ടിലെ വെള്ളത്തില്‍ വീണ് മരിച്ചത്. ഭര്‍ത്താവ്: കെ.രാഘവന്‍. മക്കള്‍: രാധാകൃഷ്ണന്‍, രമ്യ. മരുമകന്‍: സോമശേഖരന്‍.

ദേശീയ വായനാ മഹോത്സവം: ജില്ലയിൽ വിപുലമായ പരിപാടികൾ

കണ്ണൂർ: പി.എൻ. പണിക്കർ സ്മാരക ദേശീയ വായനാ മഹോത്സവത്തിന്‍റെ ഭാഗമായി 19 മുതൽ ജൂലൈ 18 വരെ ഒരു മാസക്കാലം ജില്ലയിൽ വിവിധ പരിപാടികൾ സംഘടിപ്പിക്കാൻ കണ്ണൂർ മഹാത്മാ മന്ദിരത്തിൽ ചേർന്ന പി.എൻ. പണിക്കർ ഫൗണ്ടേഷൻ ജില്ലാ നേതൃ യോഗം തീരുമാനിച്ചു. കേരള സർക്കാരിന്‍റെ വിദ്യാഭ്യാസ വകുപ്പ്, ഇൻഫർമേഷൻ ഡിപ്പാർട്ട്മെന്‍റ്, മറ്റു സംഘടനകൾ എന്നിവയുടെ സഹകരണത്തോടെ വായന പ്രോത്സാഹിപ്പിക്കാനുള്ള കലാസാംസ്‌കാരിക പരിപാടികൾ, വിദ്യാഭ്യാസ സ്ഥാപനങ്ങളിലും മറ്റു സ്ഥാപനങ്ങളിലും ലഹരിവിരുദ്ധ കാമ്പയിൻ, വിദ്യാർഥികൾക്ക് ക്വിസ് മത്സരം, ചിത്രരചന മത്സരം എന്നിവ സംഘടിപ്പിക്കും. 19ന് നടക്കുന്ന ജില്ലാതല ഉദ്ഘാടനം ജില്ലാ കളക്ടറുടെ നേതൃത്വത്തിൽ നടക്കുന്നതാണ്. യോഗത്തിൽ ഇ.വി.ജി നമ്പ്യാർ അധ്യക്ഷത വഹിച്ചു. പി.എൻ. പണിക്കർ ഫൗണ്ടേഷൻ സംസ്ഥാന ജനറൽ സെക്രട്ടറി കാരയിൽ സുകുമാരൻ ഉദ്ഘാടനം ചെയ്തു. ഭാരവാഹികളായ കെ.സി. സതീശൻ, സി.വി. രാജഗോപാലൻ, അഡ്വ. മനോജ് കണ്ടത്തിൽ, പവിത്രൻ കോതേരീ, കെ.സരള, കെ. ഭാസ്കരൻ, ഷമീൽ ഇഞ്ചിക്കൽ,ഒ.പി. വിജയകുമാർ, എം. ശരവണൻ,സൗമി ഇസബെൽ, രാമദാസ് കതിരൂർ, കെ. കെ. സുകുമാരൻ എന്നിവർ പ്രസംഗിച്ചു.

വിജയോത്സവം സംഘടിപ്പിച്ചു

ഇരിട്ടി: അങ്ങാടിക്കടവ് സേക്രഡ് ഹാര്‍ട്ട് ഹയര്‍ സെക്കന്‍ഡറി സ്‌കൂളില്‍ വിജയോത്സവം അയ്യന്‍കുന്ന് പഞ്ചായത്ത് പ്രസിഡന്‍റ് കുര്യാച്ചന്‍ പൈമ്പള്ളികുന്നേല്‍ ഉദ്ഘാടനം ചെയ്തു. സ്‌കൂള്‍ അസിസ്റ്റന്‍റ് മാനേജര്‍ ഫാ. പ്രിന്‍സ് വെട്ടികാട്ടില്‍ അധ്യക്ഷത വഹിച്ചു. ഫുള്‍ എ പ്ലസ്, അഞ്ച് എ പ്ലസ് ലഭിച്ച വിദ്യാര്‍ഥികളെ മൊമന്‍റോ നല്കി ആദരിച്ചു. പ്രിന്‍സിപ്പല്‍ സോളി തോമസ്, സജി ജോസഫ്, ഷിബോ കൊച്ചുവേലിക്കകത്ത്, ഷിജി കാഞ്ഞമല, വെളിമാനം സെന്‍റ് സെബാസ്റ്റ്യന്‍സ് എച്ച്എസ്എസ് പ്രിന്‍സിപ്പല്‍ ഡാഫി. കെ. മാണി തുടങ്ങിയവർ പ്രസംഗിച്ചു.

പറശിനിക്കടവ് ബസ് സ്റ്റാൻഡ് കോംപ്ലക്സിനും കൺവൻഷൻ സെന്‍ററിനും മന്ത്രിസഭാനുമതി

ധർമശാല: പറശിനിക്കടവിൽ ബസ് സ്റ്റാൻഡ് കോംപ്ലക്സ്, കൺവൻഷൻ സെന്‍റർ എന്നിവ നിർമിക്കാൻ മന്ത്രിസഭയുടെ അനുമതി. 27കോടി രൂപ ചെലവിലുള്ള പദ്ധതിയുടെ നടത്തിപ്പിന് കിഫ്ബി പദ്ധതികളുടെ നിർവഹണ ഏജൻസിയായ ഇംപാക്ട് കേരളയെ ഏൽപിക്കാനാണ് ബുധനാഴ്ച ചേർന്ന മന്ത്രിസഭായോഗം അനുതി നൽകിയത്‌. ബേസ്‌മെന്‍റ് പാർക്കിംഗ് ഉൾപ്പെടെ അഞ്ചുനിലകളിലായി 61,000ചതുരശ്ര അടിയിലാണ് ബസ് സ്റ്റാൻഡ് കോംപ്ലക്സും കൺവൻഷൻ സെന്‍ററും നിർമിക്കുക. താഴത്തെ നിലയിലും ഒന്നാം നിലയിലും പൂർണമായും വാണിജ്യാവശ്യത്തിനുളള അന്പത് മുറികളാണ് ഉണ്ടാവുക. പത്ത് വിശ്രമമുറികളും രണ്ട്‌ വലിയ ഡോർമിറ്ററിയുമാണ്‌ രണ്ടാം നിലയിൽ ഒരുക്കുക. മൂന്നാം നിലയിൽ ഗെയിമിംഗ് സ്‌പേസ്‌, ഫുഡ്‌കോർട്ട്. കൺവൻഷൻ സെന്‍ററിനോടു ചേർന്ന് സെമി ഓപ്പൺ ടെറസും കോവർക്കിംഗ സ്‌പേസും സജ്ജീകരിക്കും. പറശിനി അമ്പലം മുതൽ മോറാഴ നീലിയാർ കോട്ടം വരെയുള്ള തീർഥാടന വഴിയുൾപ്പെടുന്ന വെള്ളിക്കീൽ-പറശിനിക്കടവ് ടൂറിസം കോറിഡോറിന്‌ എട്ടുകോടിരൂപയുടെ പ്രവൃത്തിക്കും അനുമതിയായിട്ടുണ്ട്‌. വിസ്മയ പാർക്ക്, സ്നേക്ക് പാർക്ക്, നീലിയാർ കോട്ടം, ധർമശാല ആർട് ഗ്യാലറി എന്നിവയാണ് ഈ കോറിഡോറിലുൾപ്പെടുന്നത്.തീർഥാടകരുൾപ്പടെയുള്ളവർക്ക് താമസസൗകര്യമൊരുക്കാൻ സർക്കാർ വിശ്രമമന്ദിരത്തിന്‌ അഞ്ച്‌കോടിരൂപയും വകയിരുത്തിയിരുന്നു. ആരോഗ്യവകുപ്പിന്‍റെ കൈയിലുള്ള 50 സെന്‍റ് സ്ഥലം ഇതിനായി പൊതുമരാമത്ത് വകുപ്പിന് കൈമാറിയിട്ടുണ്ട്. പറശിനിയിലെ ബോട്ട് സർവീസ് ശക്തിപ്പെടുത്താൻ രണ്ട്‌ എസി ബോട്ടുകളും ഉടനെത്തും. ഇതിന്‌ രണ്ടുകോടിരൂപയും ബോട്ട്‌ജെട്ടി വിപുലീകരിക്കാൻ മൂന്നരക്കോടി രൂപയും പറശിനിപുഴയുടെ തീരസംരക്ഷണത്തിന്‌ ഒരു കോടിരൂപയും അനുവദിച്ചിട്ടുണ്ട്‌. പറശിനിയുടെ മുഖഛായതന്നെ മാറ്റുന്ന പദ്ധതികളാണ് സർക്കാർ നടപ്പാക്കുന്നതെന്ന് എം.വി. ഗോവിന്ദൻ എംഎൽഎ പറഞ്ഞു.

കരിന്തളം-പയ്യന്പള്ളി കെവി ലൈൻ അലൈൻമെന്‍റ് മാറ്റം: സർവേയ്ക്കെത്തിയ സംഘത്തെ തടഞ്ഞു

കണിച്ചാർ: കരിന്തളം -പയ്യമ്പള്ളി 440 കെവിയുടെ അലൈൻമെന്‍റ് മാറ്റത്തിന് സർവേയ്ക്കെത്തിയ കെഎസ്ഇബി ഉദ്യോഗസ്ഥരെ നാട്ടുകാർ തടഞ്ഞു. കണിച്ചാർ ടൗണിലൂടെ ലൈൻ കടന്നുപോകുന്ന ഭാഗത്ത് പുതിയ സർവേക്കെത്തിയ സംഘത്തെയാണ് നാട്ടുകാർ തടഞ്ഞത്. നാട്ടുകാരുടെ പ്രതിഷേധത്തെ തുടർന്ന ഉദ്യോഗസ്ഥർ സർവേ നടത്താതെ മടങ്ങി. 2016 ൽ സർക്കാർ അംഗീകരിച്ച കേളകം -കണിച്ചാർ പഞ്ചായത്തിന്‍റെ അതിർത്തിയിലൂടെയുള്ള അലൈൻമെന്‍റ് തന്നെ നടപ്പാക്കണണെന്നാവശ്യപ്പട്ടായിരുന്നു പ്രതിഷേധം. കെഎസ്ഇബി ട്രാൻസ്കിഡ് വിഭാഗം അസിസ്റ്റന്‍റ് എക്സിക്യൂട്ടീവ് എൻജിനിയർ പി.ബി. അമർനാഥ്, അസിസ്റ്റന്‍റ്എൻജിനിയർമാരായ എം.വി.പ്രശാന്തൻ, ആർ. പാർഥപൻ, ആർ. സംഗീത എന്നിവരുടെ നേതൃത്വത്തിലുള്ള സംഘത്തെയാണ് നാട്ടുകാർ തടഞ്ഞത്. പോണിച്ചേരി കുഞ്ഞുകൃഷ്ണൻ, സെബാസ്റ്റ്യൻ മാണിക്യത്താഴെ, ജോസ് പുള്ളിക്കുളവിൽ, ലോറൻസ് മുഞ്ഞനാട്ട്, ചാക്കോ തയ്ക്കുന്നേൽ, മത്തായി മൂലെച്ചാലിൽ തുടങ്ങിയവരുടെ നേതൃത്വത്തിലായിരുന്നു പ്രതിഷേധം. പുതിയ അലൈൻമെന്‍റിൽ 27 പേർക്ക് വീടുകൾ നഷ്ടമാകുമെന്നതിനാലും ടൗണിലെ വ്യാപാരസ്ഥാപനങ്ങൾ ഭീഷണിയിലാകുമെന്നതിനാലും പുതിയ അലൈൻമെന്‍റ് അംഗീകരിക്കില്ലെന്ന് പ്രതിഷേധക്കാർ അറിയിച്ചു.നേരത്തെ നിശ്ചയിച്ച അലൈൻമെന്‍റ് മാറ്റുന്നതിന് പിന്നിൽ ചില രാഷ്‌ട്രീയ കളികളുണ്ടെന്നും ഇവർ ആരോപിച്ചു. സർക്കാർ അംഗീകരിച്ച അലൈൻമെന്‍റ് കടന്നുപോകുന്ന പ്രദേശത്ത് നാട്ടുകാർ ബദൽ അലൈൻമെന്‍റ് മുന്നോട്ടുവച്ചിരുന്നു. ഇതിന്‍റെ സാധ്യത പരിശോധിക്കാൻ കളക്ടറുടെ നിർദേശത്തെ തുടർന്നാണ് ഉദ്യോഗസ്ഥർ കണിച്ചാർ ടൗണിൽ എത്തിയത്. എന്നാൽ ഇത് ഏകപക്ഷീയമായ തീരുമാനമാണെന്നും ഇത് സംബന്ധിച്ച് യാതൊരു വിവരവും ബന്ധപ്പെട്ടവർ തങ്ങളെ അറിയിച്ചിട്ടില്ല എന്നും പ്രദേശത്തുള്ളവർ പറഞ്ഞു.

കർഷക തൊഴിലാളി യൂണിയൻ പോസ്റ്റ് ഓഫീസ് മാർച്ച് നടത്തി

ഇരിട്ടി: കർഷക തൊഴിലാളികൾക്ക് ദേശീയ നിയമം കൊണ്ടുവരിക, കർഷക തൊഴിലാളികളുടെ ടെൻഷൻ 6000 രൂപയായി വർധിപ്പിക്കുക, ക്ഷേമനിധി കുടിശിക വിതരണം ചെയ്യുക, തൊഴിലുറപ്പ് അട്ടിമറിക്കാനുള്ള കേന്ദ്ര നടപടി അവസാനിപ്പിക്കുക, തൊഴിൽ ദിനങ്ങൾ 200 ആയി ഉയർത്തുക തുടങ്ങിയ ആവശ്യങ്ങൾ ഉന്നയിച്ച് കർഷക തൊഴിലാളി യൂണിയൻ (ബികെഎംയു ) പോസ്റ്റ് ഓഫീസ് മാർച്ചും ധർണയും നടത്തി. എഐടിയുസിയുടെ നേതൃത്വത്തിൽ ദേശീയ പ്രക്ഷോഭത്തിന്‍റെ ഭാഗമായാണ് മാർച്ചും ധർണയും നടത്തിയത്. ഇരിട്ടി മണ്ഡലം കമ്മിറ്റിയുടെ നേതൃത്വത്തിൽ ആറളം ഫാം പോസ്റ്റ് ഓഫീസിലേക്ക് നടന്ന മാർച്ചും ധർണയും എഐടിയുസി ജില്ലാ ജനറൽ സെക്രട്ടറി കെ.ടി. ജോസ് ഉദ്ഘാടനം ചെയ്തു. സിപിഐ ഇരിട്ടി മണ്ഡലം കമ്മറ്റി അംഗം കെ.ബി. ഉത്തമൻ അധ്യക്ഷത വഹിച്ചു. കർഷക തൊഴിലാളി യൂണിയൻ (ബികെഎംയു) ഇരിട്ടി മണ്ഡലം സെക്രട്ടറി പി.കെ. കരുണാകരൻ , അമൽ , രാധാ കോട്ടി, ഉഷ, എന്നിവർപ്രസംഗിച്ചു.

അക്കരെ കൊട്ടിയൂരിൽ താത്കാലിക ശ്രീകോവിൽ നിർമാണമാരംഭിച്ചു

കൊട്ടിയൂർ: വൈശഖ മഹോത്സവത്തിന്‍റെ ഭാഗമായി അക്കരെ കൊട്ടിയൂരിൽ മണിത്തറയ്ക്ക് മുകളിൽ താല്കാലിക ശ്രീകോവിൽ നിർമാണമാരംഭിച്ചു. ഇന്നലെ ഉച്ചകഴിഞ്ഞ് ആരംഭിച്ച ശ്രീകോവിൽ നിർമാണം തിരുവോണം നാളിൽ പന്തീരടിക്കു മുമ്പായി പൂർത്തിയാക്കും. വർഷത്തിലൊരു തീർഥാടനകാലം മാത്രമുള്ള അക്കരെ കൊട്ടിയൂരിൽ സ്ഥിരം ശ്രീകോവിൽ പാടില്ലെന്നതിനാലാണ് താത്കാലിക ശ്രീകോവിൽ നിർമിക്കുന്നത്. ഈറ്റ, ഞെട്ടിപ്പനയോല എന്നിവയുപയോഗിച്ചാണ് നിർമാണം. ഉത്സവാവസാനം ചിത്രനാളിൽ ശ്രീകോവിൽ കടപുഴക്കിയെടുത്ത് തിരുവഞ്ചിറയിൽ നിക്ഷേപിച്ചാണ് അക്കരെ കൊട്ടിയൂർ നട അടയ്ക്കുക. കൊട്ടിയൂർ ക്ഷേത്രത്തിലെ പ്രധാന ആരാധനകളിൽ ഒന്നായ തിരുവോണം ആരാധന 15ന് നടക്കും. ഇളനീർ വയ്ക്കൽ 17നും ഇളനീരാട്ടം 18നും നടക്കും.

ഇരിട്ടിയിലെ നിരീക്ഷണ കാമറകൾ കണ്ണടച്ചു

ഇരിട്ടി: നഗരത്തിലെ കുറ്റകൃത്യങ്ങളും സാമൂഹ്യവിരുദ്ധ പ്രവർത്തനങ്ങളും തടയുന്നതിനായി ഇരിട്ടി ടൗണിലും പരിസരങ്ങളഇലും സ്ഥാപിച്ച 20 നിരീക്ഷണ കാമറകളും കണ്ണടച്ചു. ഇതോടെ നഗരത്തിലും പരിസരങ്ങളിലും കുറ്റകൃത്യം നടത്തുന്നവരെ കണ്ടെത്തുന്നതിനായി പോലീസ് ബുദ്ധിമുട്ടുന്നു. ഇരിട്ടി പോലീസ് സ്റ്റേഷനുമായിട്ടായിരുന്നു കാമറകൾ ബന്ധിപ്പിച്ചിരുന്നത്. നഗരവും പരിസരവും കാമറക്കണ്ണിലായിരുന്നപ്പോൾ ഓരോ പ്രദേശവും സ്റ്റേഷനിൽ ഇരുന്നു കൊണ്ടുതന്നെ പോലീസിന് നിരീക്ഷിക്കാമായിരുന്നു. അറ്റകുറ്റപ്പണികൾ നടത്താതെ വന്നതോടെയാണ് കാമറകൾ പ്രവർത്തന രഹിതമായത്. ഇതോടെ രാത്രി കാലങ്ങളിൽ ഉൾപ്പെടെ നടക്കുന്ന ചെറുതും വലുതുമായ കുറ്റകൃത്യങ്ങൾ കണ്ടെത്താൻ പോലീസ് വ്യാപാര സ്ഥാപനങ്ങളിൽ സ്ഥാപിച്ച നിരീക്ഷണ കാമറകളുടെ ദൃശ്യങ്ങൾ ശേഖരിച്ച് അന്വേഷണം നടത്തേണ്ട അവസ്ഥയിലാണ്. കഴിഞ്ഞ ദിവസം ഇരിട്ടി പുതിയ ബസ് സ്റ്റാൻഡിൽ വഴിയോര കച്ചവട കേന്ദ്രത്തിൽ നിന്ന് കുടകൾ മോഷണം പോയത് കണ്ടെത്താൻ വ്യാപാര സ്ഥാപനങ്ങളിലെ കാമറ ദൃശ്യങ്ങളാണ് പോലീസ് ആശ്രയിച്ചത്. പുതിയപാലം സിഗ്നലിൽ ഡിവൈഡർ തകർത്ത വാഹനത്തെ കണ്ടെത്താൻ കാമറയുടെ അഭാവത്തിൽ ഇതുവരെ സാധിച്ചിട്ടില്ല. കേരള-കർണാടക അതിർത്തി പട്ടണമായ ഇരിട്ടിയിൽ 2021 ആദ്യപകുതിയിലാണ് കാമറകൾ സ്ഥാപിച്ചത്. എറണാകുളം ആസ്ഥാനമായി പ്രവർത്തിക്കുന്ന ജനറൽ ഓട്ടോമേഷൻ എന്ന സ്ഥപനമായിരുന്നു സ്ഥാപിച്ചത്. സ്ഥാപിച്ചതു മുതൽ സ്ഥാപനത്തിൽ നിന്ന് എഎംസി കാലാവധിക്കുള്ളിൽ പോലും കൃത്യമായി സർവീസ് ലഭിച്ചിരുന്നില്ലെന്നാണ് പോലീസ് വൃത്തങ്ങൾ പറയുന്നത്. നേരത്തെ ചില കാമറകൾ പ്രവർത്തിക്കാതെ വന്നപ്പോൾ പോലീസുകാർ തന്നെ സ്വന്തം നിലക്ക് പണം നൽകി പ്രവർത്തന ക്ഷമമാക്കിയിരുന്നു. ഇത്തവണ മുഴുവൻ കാമറകളും ഒന്നിച്ച് പ്രവർത്തന രഹിതമായതോടെ വലിയ തുക ആവശ്യമാണ്. വിഷയം ബന്ധപ്പെട്ട അധികാരികളെ അറിയിച്ചിട്ടുണ്ടെങ്കിലും നടപടികൾ ഉണ്ടായിട്ടില്ല. ടൗണുകളിൽ സിസിടിവി കാമറകൾ വേണമെന്ന് സർക്കാർ ഉത്തരവുണ്ടെങ്കിലും പരിപാലനത്തിനും അറ്റകുറ്റപ്പണികൾക്കും ഫണ്ട് ലഭിക്കാറില്ലെന്നും ആക്ഷേപമുണ്ട്. ‌ പോലീസ് സ്റ്റേഷൻ പരിസരത്തും കാമറ വേണം ഇരിട്ടി-കൂട്ടുപഴ അന്തർ സംസ്ഥാന പാതയിൽ പ്രവർത്തിക്കുന്ന ഇരിട്ടി പോലീസ് സ്റ്റേഷൻ പരിസരത്തും കാമറ സ്ഥാപിക്കണമെന്ന ആവശ്യവും ഉയരുന്നുണ്ട്. കർണാടകയിൽ നിന്ന് വരുന്നതും പോകുന്നതുമായി വാഹനങ്ങൾ നിരീക്ഷിക്കാൻ കാമറ ആവശ്യമാണ്. അന്തർ സംസ്ഥാന കുറ്റകൃത്യങ്ങളുടെ അന്വേഷണത്തിനും ഇത് സഹായമാകും. ഇരിട്ടി ടൗണിലെ കാമറകൾ അടിയന്തരമായി പ്രവർത്ത സജ്ജമാക്കാനുള്ള നടപടികൾ സർക്കാർ സ്വീകരിക്കണമെന്നാണ് വ്യാപാരികളും ജനങ്ങളും ആവശ്യപ്പെടുന്നത്.

ബേബി മെമ്മോറിയൽ ഹോസ്പിറ്റലിൽ കണ്ടിന്യൂയിംഗ് മെഡിക്കൽ എഡ്യുക്കേഷൻ സംഘടിപ്പിച്ചു

കണ്ണൂർ: കണ്ണൂർ ബേബി മെമ്മോറിയൽ ഹോസ്പിറ്റൽ കണ്ണൂരിലെ "Save the Knee' എന്ന പേരിൽ കണ്ടിന്യൂയിംഗ് മെഡിക്കൽ എഡ്യുക്കേഷൻ (സിഎംഇ) പരിപാടി സംഘടിപ്പിച്ചു. കാൽമുട്ടിന്‍റ സംരക്ഷണം, രോഗനിർണയം, ചികിത്സ എന്നിവയിലെ ഏറ്റവും പുതിയ സാങ്കേതിക വിദ്യകളും സമീപനങ്ങളും ശക്തിപ്പെടുത്തി ഓർത്തോപീഡിക് സർജൻമാർക്കും വിദഗ്ധർക്കും അറിവ് കൈമാറുന്നതിനുള്ള വേദിയായി 'Save the Knee' സിഎംഇ പരിപാടി. നൂതന ഓർത്തോപീഡിക് പരിചരണത്തിന് ഊന്നൽ നൽകി കാൽമുട്ടിന്‍റെ ആരോഗ്യം, റോബോട്ടിക് കാൽമുട്ട് മാറ്റിവയ്ക്കൽ എന്നിവയ്ക്കുള്ള മുന്നേറ്റങ്ങളും മറ്റും ചർച്ച ചെയ്യാൻ പ്രമുഖ ഓർത്തോപീഡിക് പ്രഫഷണലുകളും പരിപാടിയിൽ പങ്കെടുത്തു. ഹോട്ടൽ മാഗ്നറ്റിൽ നടന്ന പരിപാടി ബിഎംഎച്ച് കണ്ണൂർ ആൻഡ് പയ്യന്നൂർ ക്ലസ്റ്റർ സിഇഒ നിരൂപ് മുണ്ടയാടൻ ഉദ്ഘാടനം ചെയ്തു. കണ്ണൂർ ഓർത്തോ ക്ലബ് സെക്രട്ടറിയും ഓർഗനൈസിംഗ് ചെയർമാനും ബിഎംഎച്ച് കണ്ണൂരിലെ സീനിയർ കൺസൾട്ടന്‍റ് ആൻഡ് ചീഫ് ഓഫ് ഓർത്തോപീഡിക്സുമായ ഡോ. ജ്യോതിപ്രശാന്ത്, ബിഎംഎച്ച് കണ്ണൂരിലെ മെഡിക്കൽ അഡ്‌വൈസർ ഡോ. ഇ.കെ. മുഹമ്മദ് അബ്ദുൾ നാസർ , അസോസിയേഷൻ ഫോർ അഡ്വാൻസ്ഡ് സ്പൈനൽ ആൻഡ് നീ സർജറീസ് (എഎഎസ്കെ) പ്രസിഡന്‍റ് ഡോ. ജോൺ ടി. ജോൺ, കേരള ഓർത്തോപീഡിക് അസോസിയേഷൻ (കെഒഎ) പ്രസിഡന്‍റ് ഡോ. കെ.ആർ. ശ്രീനാഥ്, കണ്ണൂർ ഓർത്തോ ക്ലബ് സെക്രട്ടറി ഡോ. നവീൻ സി. ബാലൻ, ആർത്രോസ്കോപ്പി സൊസൈറ്റി ഓഫ് കേരളയുടെ മുൻ പ്രസിഡന്‍റ് ഡോ. സെബിൻ വിശ്വനാഥ് എന്നിവർ പ്രസംഗിച്ചു.

അഞ്ച് ഹൗസിംഗ് ബോര്‍ഡ് ഉദ്യോഗസ്ഥര്‍ക്കെതിരേ വിജിലന്‍സ് കേസ്

കാസര്‍ഗോഡ്: കേരള ഹൗസിംഗ് ബോര്‍ഡ് കാസര്‍ഗോഡ് ഡിവിഷനിലെ അഞ്ച് ഉദ്യോഗസ്ഥര്‍ക്കെതിരെ വിജിലന്‍സ് കേസ്. അസി. സെക്രട്ടറിയായിരുന്ന ഇ.എം. ശാന്തകുമാരി, അസി. എക്സിക്യൂട്ടീവ് എന്‍ജിനിയറായിരുന്ന ടി.പി.യൂസഫ്, അസി. സെക്രട്ടറിയായിരുന്ന സരസ്വതിഅമ്മ, അസി. എന്‍ജിനിയറായിരുന്ന എ.രാധാകൃഷ്ണന്‍, ഫസ്റ്റ് ഗ്രേഡ് ഡ്രാഫ്റ്റ്‌സ്മാനായിരുന്ന പി.സുഗതന്‍ എന്നിവര്‍ക്കെതിരെയാണ് കേസെടുത്തത്. കേരള സംസ്ഥാന ഭവന നിര്‍മാണബോര്‍ഡിന്‍റെ കാസര്‍ഗോഡ് ഇന്ദിരാനഗറിലുള്ള ഡിവിഷന്‍ ഓഫീസിലെ ഉദ്യോഗസ്ഥര്‍ നിര്‍മാണം പൂര്‍ത്തിയാകാത്ത വീടുകള്‍ക്ക് കംപ്ലീഷന്‍ സര്‍ട്ടിഫിക്കറ്റ് നല്‍കി വ്യക്തികള്‍ക്ക് ഭവനവായ്പ പൂര്‍ണമായും അനുവദിക്കുകയും വായ്പ സ്വീകരിച്ചവര്‍ വായ്പ തിരിച്ചടയ്ക്കാത്തത് വഴി ബോര്‍ഡിന് 1,22,56,026 രൂപയുടെ നഷ്ടം സംഭവിച്ചതായും ഓഡിറ്റില്‍ കണ്ടെത്തിയിരുന്നു. ഇതേത്തുടര്‍ന്ന് ബോര്‍ഡിന് നഷ്ടം സംഭവിച്ചതില്‍ ഉത്തരവാദികളായ ഉദ്യോഗസ്ഥര്‍ക്കെതിരെ കേസ് രജിസ്റ്റര്‍ ചെയ്യുന്നതിന് സര്‍ക്കാര്‍ ഉത്തരവ് ലഭിച്ചതിന്‍റെ അടിസ്ഥാനത്തിലാണ് നടപടി.

ചെങ്ങളായി-ചുഴലി റോഡിലെ ഗർത്തം: വിദഗ്ധ പരിശോധനയ്ക്ക് ശിപാർശ

ചെങ്ങളായി: ചെങ്ങളായി - ചുഴലി റോഡിൽ രൂപപ്പെട്ട ഗർത്തം സംബന്ധിച്ച് വിശദമായ പഠനം നടത്താൻ സ്ഥലം സന്ദർശിച്ച സംഘം ശിപാർശ ചെയ്തു. തിരുവനന്തപുരത്തുനിന്നുള്ള എൽഎസ്ജിഡി ചീഫ് എൻജിനീയർ, ജില്ലാ എൽഎസ്ജിഡി എക്സിക്യൂട്ടീവ് എൻജിനീയർ, ജിയോളജിസ്റ്റ് എന്നിവരടങ്ങിയ സംഘമാണ് ദുരന്തനിവാരണ അഥോറിറ്റിയോട് വിശദപഠനം നടത്തണമെന്ന് ശിപാർശ ചെയ്തിരിക്കുന്നത്. തിരുവനന്തപുരത്തെ ദേശീയ ഭൗമ ശാസ്ത്ര പഠനകേന്ദ്രത്തിലെ ആധുനിക സംവിധാനങ്ങൾ ഉപയോഗിച്ച് പരിശോധന നടത്തണമെന്നാണ് ആവശ്യപ്പട്ടിരിക്കുന്നത്. പഠനകേന്ദ്രത്തിലെ റെസിസ്റ്റിവിറ്റി ഇമേജിംഗ് യന്ത്ര സംവിധാനം ഉപയോഗിച്ച് പരിശോധന നടത്തമെന്നും എങ്കിൽ മാത്രമേ ഭൂമിക്കടിയിലെ മണ്ണ്, പാറ, വെള്ളം എന്നിവയുടെ സ്വഭാവം, ഗർത്തം രൂപപ്പെട്ടതിന്‍റെ ആഘാതം എന്നിവ കണ്ടെത്താനാകൂവെന്നും റിപ്പോർട്ടിൽ പറയുന്നു. വിദഗ്ധ സംഘത്തെ എത്രയും പെട്ടെന്ന് അയക്കണമെന്ന് ജില്ലാ പഞ്ചായത്ത് മുഖ്യമന്ത്രിയുടെ ഓഫീസിനോട് അഭ്യർഥിച്ചിട്ടുണ്ടെന്ന് പ്രസിഡന്‍റ് കെ.കെ. രത്നകുമാരി പറഞ്ഞു. വിദഗ്ധസംഘത്തിന്‍റെ പരിശോധനയ്ക്ക് ശേഷമേ റോഡ് പുനർനിർമാണം നടത്തുക. കഴിഞ്ഞ മൂന്നിനാണ് ചെങ്ങളായി - അരിമ്പ്ര - ചുഴലി റോഡിൽ നാല് മീറ്റർ ആഴത്തിൽ ഗർത്തം രൂപപ്പെട്ടത്. പ്രദേശത്ത് വിശദമായ പരിശോധന എത്രയും പെട്ടെന്ന് നടത്തി ജനങ്ങളുടെ ആശങ്ക പരിഹരിക്കണമെന്ന് ചെങ്ങളായി പഞ്ചായത്ത് പ്രസിഡന്‍റ് വി.പി.മോഹനനും ആവശ്യപ്പെട്ടു.

ഫാഷന്‍ ഡിസൈനിംഗിന്‍റെ മറവില്‍ മയക്കുമരുന്ന് കടത്ത്: യുവാവ് അറസ്റ്റില്‍

കാസര്‍ഗോഡ്: ബംഗളൂരു കേന്ദ്രീകരിച്ച് പ്രവര്‍ത്തിക്കുന്ന മയക്കുമരുന്ന് മാഫിയയിലെ പ്രധാന കണ്ണിയായ യുവാവ് അറസ്റ്റില്‍. കണ്ണൂര്‍ പള്ളിക്കുന്ന് സ്വദേശി ഹംസ മുസമ്മില്‍ (22) ആണ് കണ്ണൂരില്‍ വച്ച് മഞ്ചേശ്വരം പോലീസിന്‍റെ പിടിയിലായത്. ഫെബ്രുവരിയില്‍ 75 ഗ്രാം എംഡിഎംഎ പിടികൂടിയ കേസിലെ പ്രതികള്‍ക്ക് എംഡിഎംഎ എത്തിച്ചു കൊടുത്ത പ്രധാന പ്രതിയാണ് ഹംസ. ബംഗളൂരുവില്‍ ഫാഷന്‍ ഡിസൈനറായി ജോലി ചെയ്ത് വന്നിരുന്ന ഇയാള്‍ ഇതിന്‍റെ മറവില്‍ വന്‍തോതില്‍ മയക്കുമരുന്ന് കച്ചവടം നടത്തി വരികയായിരുന്നു. ഇയാളുടെ നാലു ബാങ്ക് ആക്കൗണ്ടുകള്‍ പോലീസ് കണ്ടെത്തി പരിശോധിച്ചപ്പോള്‍ ലക്ഷക്കണക്കിന് രൂപയുടെ ഇപാടുകളാണ് ഓരോ മാസവും മയക്കുമരുന്ന് കച്ചവടത്തിനായി നടത്തിയതും നേടിയെടുത്തതും. മഞ്ചേശ്വരം ഇന്‍സ്‌പെക്ടര്‍ ഇ.അനൂപ് കുമാര്‍, എസ്‌ഐ രതീഷ് ഗോപി, എഎസ്‌ഐ അതുല്‍ റാം, എസ്‌സിപിഒ ധനേഷ്, സിപിഒമാരായ സന്ദീപ്, പ്രശോഭ് എന്നിവരടങ്ങുന്ന സംഘമാണ് പ്രതിയെ പിടികൂടിയത്.

വിമാനത്തിൽ മുഖ്യമന്ത്രിക്കു നേരെയുണ്ടായ വധശ്രമ കേസ്; മൂന്നു വർഷമായിട്ടും കുറ്റപത്രം സമർപ്പിച്ചില്ല, കാരണം കേന്ദ്രാനുമതി ലഭിക്കാത്തത്

കണ്ണൂര്‍: മുഖ്യമന്ത്രി പിണറായി വിജയനെ വിമാനത്തിൽ വച്ച് യൂത്ത് കോൺഗ്രസ് പ്രവർത്തകർ വധിക്കാൻ ശ്രമിച്ചെന്ന കേസിൽ മൂന്നു വർഷമായിട്ടും കുറ്റപത്രം സമർപ്പിച്ചില്ല. സ്വർണക്കടത്ത് കേസിൽ മുഖ്യമന്ത്രി രാജിവെക്കണമെന്നാവശ്യപ്പെട്ട് യൂത്ത് കോൺഗ്രസ് സംസ്ഥാന വ്യാപകമായി നടത്തി വന്ന പ്രതിഷേധത്തിനിടെ 2022 ജൂണ്‍ 13നായിരുന്നു കേസിനാസ്പദമായ സംഭവം. കണ്ണൂരിൽ നിന്നും തിരുവനന്തപുരത്തേക്കുള്ള വിമാന യാത്രയ്ക്കിടെ യൂത്ത് കോൺഗ്രസ് നേതാവ് ഫർസീൻ മജീദ്, നവീൻകുമാർ, സുനിത് എന്നിവർ മുഖ്യമന്ത്രിക്കെതിരെ പ്രതിഷേധിക്കുകയും വധിക്കാൻ ശ്രമിച്ചെന്നുമാണ് കേസ്. വിമാന റാഞ്ചൽ ശ്രമം ഉൾപ്പടെയുള്ള വകുപ്പുകൾ ചേർത്തായിരുന്നു പോലീസ് കേസ് രജിസ്റ്റർ ചെയ്തത്. എന്നാൽ വിമാനറാഞ്ചൽ വകുപ്പ് ചേർത്ത് കുറ്റപത്രം സമർപ്പിക്കുന്നതിന് കേന്ദ്രവ്യോമഗതാഗത മന്ത്രാലയത്തിന്‍റെ അനുമതി ആവശ്യമാണ്. ഇതിനായി കഴിഞ്ഞ വർഷം ഏപ്രിലിൽ കുറ്റപത്രം കേന്ദ്ര സർക്കാരിന്‍റെ അനുമതിക്കായി അയച്ചിരുന്നു. ഓഗസ്റ്റിൽ കുറ്റപത്രത്തിന് അനുമതി നൽകണമെന്നാവശ്യപ്പെട്ട് കത്തയച്ചുവെങ്കിലും കേന്ദ്രം അനുമതി നൽകിയിട്ടില്ല. വ്യോമയാന മന്ത്രാലയവും കേന്ദ്ര ഏജൻസികളും നടത്തിയ അന്വേഷണത്തിൽ കുറ്റപത്രത്തിൽ പറയുന്നതു പോലുള്ള വിമാനറാഞ്ചൽ ശ്രമം ഉണ്ടായിട്ടില്ലെന്നും പ്രതിഷേധം മാത്രമാണ് നടന്നതെന്നുമുള്ള റിപ്പോർട്ടിനെ തുടർന്നാണ് അനുമതി നൽകാത്തതെന്നും വിവരമുണ്ട്. ഈ സാഹചര്യത്തിൽ വിമാനറാഞ്ചൽ വകുപ്പ് ഒഴിവാക്കി കുറ്റപത്രം സമർപ്പിക്കേണ്ടി വരും എന്നാണ് നിയമവിദഗ്ദ്ധർ അഭിപ്രായപ്പെടുന്നത്. മുഖ്യമന്ത്രിയെ വധിക്കാൻ ഗൂഢാലോചന നടത്തിയതിന് അന്നത്തെ യൂത്ത് കോൺഗ്രസ് വൈസ് പ്രസിഡന്‍റും മുൻ എംഎൽഎയുമായ കെ. ശബരിനാഥിനെതിരെയും കേസെടുത്തിരുന്നു. വിമാനത്തിൽ വച്ച് പ്രതിഷേധക്കാർ മുഖ്യമന്ത്രിയുടെ അടുത്തേക്ക് ചെന്ന് മുദ്രാവാക്യം വിളിച്ചപ്പോൾവിമാനത്തിലെ യാത്രക്കാരനായ സിപിഎം നേതാവ് ഇ.പി. ജയരാജൻ ഇവരെ മർദിച്ചതായും പരാതിയുണ്ട്. വിമാനത്തിൽ വച്ച് ഇ.പി. ജയരാജൻ തങ്ങളെ മർദിച്ചുവെന്ന് കാണിച്ച് ഫർസീൻ മജീദും നവീൻകുമാറും നൽകിയ പരാതിയിൽ ഇ.പി. ജയരാജനെതിരെ കേസെടുത്തിരുന്നു. കള്ളക്കേസിൽ കുടുക്കിയ സർക്കാർ വേട്ടയാടൽ തുടരുന്നു: ഫർസീൻ മജീദ് മുഖ്യമന്ത്രിക്കെതിരെ പ്രതിഷേധിച്ചതിന്‍റെ പേരിൽ സർക്കാരും സിപിഎമ്മും തന്നെ വേട്ടയാടിക്കൊണ്ടിരിക്കുകയാണെന്ന് അധ്യാപകനായ ഫർസീൻ മജീദ് പറഞ്ഞു. കേസില്‍ പ്രതി ചേര്‍ക്കപ്പെട്ടതിനെ തുടർന്ന് മാനേജ്മെന്‍റ് ആറ് മാസത്തേക്ക് സസ്‌പെൻഡ് ചെയ്തിരുന്നു. സസ്പെൻഷൻ കാലാവധിക്കുശേഷം മാനേജ്മെന്‍റ് തിരിച്ചെടുത്തെങ്കിലും വിദ്യാഭ്യാസ വകുപ്പ് അംഗീകരിച്ചിട്ടില്ല. ഇതു കാരണം ശന്പളമുൾപ്പടെയുള്ള ആനുകൂല്യങ്ങൾ മരവിപ്പിച്ചിരിക്കുകയാണ്. മുഖ്യമന്ത്രിക്കെതിരെ വിമാനത്തിൽ പ്രതിഷേധിച്ചതിന് കള്ളക്കേസുകൾ ചുമത്തിയ ആഭ്യന്തര വകുപ്പിന് കുറ്റപത്രം പോലും സമർപ്പിക്കാൻ കഴിയുന്നില്ലെന്നത് വലിയ വീഴ്ചയാണ്. മുഖ്യമന്ത്രിക്ക് ഇതാണ് ഗതിയെങ്കിങ്കിൽ സാധാരണക്കാര്‍ക്ക് എന്ത് നീതിയാണ് ലഭിക്കുക.

കാറഡുക്ക സഹകരണസംഘം തട്ടിപ്പ്; മൂന്നുകോടി തിരിച്ചുപിടിക്കാനായില്ല

കാസര്‍ഗോഡ്: സിപിഎമ്മിന്‍റെ നിയന്ത്രണത്തിലുള്ള കാറഡുക്ക അഗ്രികള്‍ച്ചറിസ്റ്റ് വെല്‍ഫയര്‍ സഹകരണസംഘം തട്ടിപ്പില്‍ കേസെടുത്ത് അന്വേഷണം ഒരുവര്‍ഷം പിന്നിട്ടിട്ടും പണം തിരിച്ചുപിടിക്കാന്‍ കഴിഞ്ഞിട്ടില്ല. ലോക്കറില്‍നിന്നും കടത്തിക്കൊണ്ടുപോയ 332 പവന്‍ സ്വര്‍ണവും തിരിച്ചുപിടിക്കാന്‍ സാധിച്ചെങ്കിലും മൂന്നു കോടിയിലേറെ രൂപ എങ്ങോട്ടുപോയെന്നത് ഇപ്പോഴും ചോദ്യചിഹ്നമാണ്. സഹകരണവകുപ്പ് തട്ടിപ്പ് കണ്ടെത്തിയതിനെതുടര്‍ന്ന് കഴിഞ്ഞവര്‍ഷം മേയ് 13നാണ് ആദൂര്‍ പോലീസ് കേസെടുത്തത്. സംസ്ഥാന ക്രൈംബ്രാഞ്ചിന്‍റെ സാമ്പത്തിക കുറ്റാന്വേഷണവിഭാഗമാണ് ഇപ്പോള്‍ കേസ് അന്വേഷിക്കുന്നത്. തട്ടിപ്പ് നടത്തിയ സഹകരണസംഘം സെക്രട്ടറിയും ഡിവൈഎഫ്‌ഐ മുന്‍ ജില്ലാകമ്മിറ്റി അംഗവുമായ കര്‍മംതൊടിയിലെ കെ. രതീശന്‍ ഉള്‍പ്പെടെ 11 പേരാണ് കേസിലെ പ്രതികള്‍. പള്ളിക്കര പഞ്ചായത്തംഗം ബേക്കല്‍ ഹദ്ദാദ് നഗറിലെ കെ. അഹമ്മദ് ബഷീര്‍, പറക്കളായി ഏഴാംമൈലിലെ എ. അബ്ദുള്‍ ഗഫൂര്‍, കാഞ്ഞങ്ങാട് നെല്ലിക്കാട്ടെ എ. അനില്‍കുമാര്‍, പയ്യന്നൂരില്‍ താമസിക്കുന്ന ജബ്ബാര്‍ മഞ്ചക്കണ്ടി, കോഴിക്കോട് അരക്കിണര്‍ സ്വദേശി സി.നബീന്‍, നെല്ലിക്കാട്ടെ എ. അജയകുമാര്‍, പെരിയയിലെ ഷെഫീഖ്, ഭാര്യ ഫാത്തിമത്ത് താഹിറ, പള്ളിക്കരയിലെ ഖദീജ ത്ത് ഫൗസിയ, മകള്‍ ആയിഷ ത്ത് ഫായിസ എന്നിവരാണ് കേസിലെ മറ്റു പ്രതികള്‍. ഇതില്‍ അജയകുമാറിനെ അറസ്റ്റ് ചെയ്യാന്‍ ബാക്കിയുണ്ട്. ആദ്യത്തെ അഞ്ചുപേര്‍ക്ക് മാത്രമാണ് കേസുമായി നേരിട്ട് ബന്ധം. ബാക്കിയുള്ളവര്‍ സ്വര്‍ണം പണ യംവയ്ക്കാന്‍ സഹായിച്ചവരാണ്. പ്രധാന പ്രതികള്‍ പിടിയിലായിട്ടും നഷ്ടപ്പെട്ട പണം തിരിച്ചുപിടിക്കാന്‍ കഴിയാത്തത് അന്വേഷണസംഘത്തിന് മുന്നില്‍ വെല്ലുവിളിയായി നില്‍ക്കുകയാണ്. ലോക്കറില്‍നിന്ന് തട്ടിയെടുത്ത സ്വര്‍ണം പണയംവച്ച് എടുത്ത ഒന്നേകാല്‍ കോടി രൂപ രാഘവേന്ദ്ര എന്നയാള്‍ക്ക് നല്‍കിയെന്നാണ് പ്രതികളുടെ മൊഴി. എന്നാല്‍ ഇങ്ങനെ ഒരാള്‍ക്ക് പണം കൊടുത്തതിന്‍റെ ഒരു രേഖയും പ്രതികളുടെ കൈവശമില്ല. ഈ പേരിലുള്ള ഒരാളെ കണ്ടെത്താന്‍ അന്വേഷണസംഘത്തിന് സാധിച്ചിട്ടില്ല. ബാക്കി മൂന്നുകോടി രൂപ 2020 മുതല്‍ പല ഘട്ടങ്ങളായാണ് രതീശന്‍ കൂട്ടുപ്രതികള്‍ക്ക് നല്‍കിയത്. പലവഴിക്കാണ് അതു പോയതും. ഇതില്‍ ഹവാല ബന്ധം ഉള്‍പ്പെടെ കണ്ടെത്തുകയും ചെയ്തിരുന്നു. പ്രതികള്‍ പണയംവച്ച സ്വര്‍ണം വിവിധ ബാങ്കുകളില്‍നിന്ന് അന്വേഷണസംഘം കണ്ടെത്തിയിരുന്നു. കാനറ ബാങ്കിലുള്ള 100 പവനോളം സ്വര്‍ണം കോടതി ഉത്തരവിന്‍റെ അടിസ്ഥാനത്തില്‍ അവിടെത്തന്നെ സൂക്ഷിച്ചിട്ടുണ്ട്. ഇതിന്‍റെ തിരിച്ചറിയല്‍ നടപടികള്‍ ഉടനെ നടക്കും. പണം തിരിച്ചുപിടിക്കാന്‍ സാധിച്ചില്ലെങ്കില്‍ തദ്ദേശ തെരഞ്ഞെടുപ്പില്‍ സിപിഎമ്മിന് അത് വലിയ തിരിച്ചടിയാകും. ഇവിടെ പണം നിക്ഷേപിച്ചവരില്‍ ഭൂരിഭാഗവും സിപിഎമ്മുകാരാണ്.

കാട്ടാനയുടെ ആക്രമണത്തിൽ പരിക്കേറ്റ സുരിജക്ക് സർക്കാർ ധനസഹായം വൈകുന്നു

ഇരിട്ടി: ഏഴു ദിവസം മുന്പ് വീടിന്‍റെ മുറ്റത്ത് വച്ച് കാട്ടാന ആക്രമണത്തിൽ പരിക്കേറ്റ കച്ചേരിക്കടവിലെ നടുവിലെ കിഴക്കേതിൽ സുരിജ വിശ്വനാഥന്‍റെ ചികിത്സാ ധനസഹായം വൈകുന്നു. കണ്ണൂരിലെ സ്വകാര്യ ആശുപത്രിയിലെ ഐസിയുവിൽ ചികിത്സയിലാണ് സുരിജ. 11 വാരി എല്ലുകൾക്ക് പൊട്ടൽ സംഭവിക്കുകയും ശ്വാസകോശത്തിൽ ഉൾപ്പെടെ പരിക്കേൽക്കുകയും ചെയ്ത സുരിജക്ക് രണ്ടു ലക്ഷത്തിലധികം രൂപ ഇപ്പോൾ തന്നെ ചികിത്സയ്ക്കായി ചെലവായിക്കഴിഞ്ഞു. സാമ്പത്തികമായി ഏറെ പിന്നാക്കം നിൽക്കുന്ന കുടുംബത്തിന് താങ്ങാൻ കഴിയുന്നതിൽ അധികമാണ് ചികിത്സാ ചെലവുകൾ. താലൂക്കിൽനിന്ന് ലഭിക്കുമെന്ന് പറയുന്ന 16000 രൂപയും ആശുപത്രി ബില്ലുകൾ സമർപ്പിച്ചാൽ വനം വകുപ്പ് നൽകുന്ന ഒരു ലക്ഷം രൂപ ചികിത്സ ധനസഹായവും ലഭിക്കാൻ വൈകുന്നത് നിർധന കുടുംബത്തെ ദുരിതത്തിലാ‍ക്കിയിരിക്കുകയാണ് . ഇവർക്ക് തുടർചികിത്സയും ആവശ്യമാണ്. ഇതിനും ഭീമമായ തുക കണ്ടെത്തണം. സർക്കാർ അടിയന്തര സഹായം നൽകണമെന്ന് എല്ലാ സംഘടനകളും ആവശ്യപ്പെട്ടിട്ടും അപകടം നടന്ന ഒരാഴ്ച പിന്നിടുമ്പോഴും യാതൊരു സഹായവും കുടുംബത്തിന് ലഭിച്ചിട്ടില്ല. അടിയന്തര സഹായം ലഭിക്കാൻ പ്രായോഗിക ബുദ്ധിമുട്ടുകൾ തഹസിൽദാർ അനുവദിക്കുന്ന 16000 രൂപയുടെ അടിയന്തിര ധനസഹായത്തിന് പോലും കടമ്പകൾ ഏറെയാണ്. വനംവകുപ്പിന്‍റെ ധനസഹായം ലഭിക്കണമെങ്കിൽ ബില്ലുകളും മറ്റ് വിവരങ്ങളും സമർപ്പിക്കേണ്ടതുണ്ട്. രണ്ടു വർഷം മുന്പ് നടന്ന അപകടത്തിന്‍റെ നഷ്‌ടപരിഹാരമാണ് ഇപ്പോൾ വനം വകുപ്പ് നല്കികൊണ്ടിരിക്കുന്നത്. വന്യമൃഗ ആക്രമണത്തിൽ പരിക്കേറ്റാൽ വനംവകുപ്പ് നൽകുന്ന പരമാവധി ചികിത്സാ സഹായം ഒരു ലക്ഷം രൂപയാണ്. കച്ചേരിക്കടവിൽ തന്നെ ഡൊമിനിക്ക് എന്നയാളെ കാട്ടാന ആക്രമിച്ചതിന്‍റെ ചികിത്സാ ധനസഹായം ലഭിച്ചത് രണ്ടു വർഷത്തിന് ശേഷമാണ്. സുരിജയുടെ ഒരാഴ്ചത്തെ ചികിത്സാ ചെലവുതന്നെ രണ്ടുലക്ഷം കടന്നു. ഒരു വർഷത്തോളം തുടർചികിത്സ ആവശ്യമായ സുരിജക്ക് ലക്ഷങ്ങളുടെ ചികിത്സ ആവശ്യമാണ്. ചികിത്സ ധനസഹായ കമ്മിറ്റി രൂപീകരിച്ചു സാമ്പത്തികമായി ഏറെ പിന്നാക്കം നിൽക്കുന്ന കുടുംബത്തെ സഹായിക്കുന്നതിനായി കച്ചേരിക്കടവിൽ ചികിത്സാ ധനസഹായ കമ്മിറ്റി രൂപീകരിച്ചു. അയ്യൻകുന്ന് ഗ്രാമപഞ്ചായത്ത് പ്രസിഡന്‍റ് കുര്യാച്ചൻ പൈമ്പളിക്കുന്നലിന്‍റെ അധ്യക്ഷതയിൽ ജനപ്രതിനിധികളും നാട്ടുകാരും ചേർന്നാണ് ചികിത്സാസഹായ സമിതി രൂപീകരിച്ചത്. കച്ചേരിക്കടവിൽ ബാരാപോൾ പുഴയോരത്ത് കർണാടക വനത്തോട് ചേർന്ന് കേരളത്തിന്‍റെ റവന്യൂ ഭൂമിയിൽ താമസിക്കുന്ന കുടുംബങ്ങളിൽ ഒന്നാണിവർ. മാക്കൂട്ടത്ത് കുമ്മട്ടിക്കട നടത്തിയായിരുന്നു ഇവർ ജീവിത മാർഗം കണ്ടെത്തിയിരുന്നത്. ജീവിതമാർഗം ഒന്നുമില്ലാത്ത കുടുംബത്തിന് മനുഷ്യത്വത്തിന്‍റെ പേരിൽ സർക്കാർ അടിയന്തര ധനസഹായം നൽകണമെന്നാണ് നാട്ടുകാരുടെ ആവശ്യം.

ചെറുപുഴ പഞ്ചായത്ത് മിനി സ്റ്റേഡിയം നവീകരിക്കുന്നു

ചെറുപുഴ: ചെറുപുഴ പഞ്ചായത്ത് മിനി സ്റ്റേഡിയം നവീകരിക്കുന്നതിനായി കായിക യുവജന ക്ഷേമ വകുപ്പ് 50 ലക്ഷം രൂപ അനുവദിച്ചു. നവകേരള സദസിൽ കായിക മേഖലയുമായി ബന്ധപ്പെട്ട് ലഭിച്ച അപേക്ഷകൾ പരിഗണിച്ചാണു ചെറുപുഴ പഞ്ചായത്ത് മിനി സ്റ്റേഡിയത്തിന്‍റെ നവീകരണ പ്രവൃത്തിക്ക് സർക്കാർ തുക അനുവദിച്ചിരിക്കുന്നത്. സ്റ്റേഡിയം നവീകരിക്കുന്നതിന്‍റെ പ്രാരംഭപ്രവർത്തനങ്ങൾ വിലയിരുത്തുന്നതിന് ടി.ഐ. മധുസൂദനൻ എംഎൽഎയുടെ നേതൃത്വത്തിൽ പഞ്ചായത്ത് പ്രസിഡന്‍റ് കെ.എഫ്. അലക്സാണ്ടർ, ആരോഗ്യ വിദ്യാഭ്യാസ സ്റ്റാന്‍റിംഗ് കമ്മിറ്റി ചെയർമാൻ എം. ബാലകൃഷ്ണൻ, കായിക വകുപ്പ് ഉത്തരമേഖലാ ഡപ്യൂട്ടി ഡയറക്‌ടർ ടി. അനീഷ്, സ്പോർട്സ് ഫൗണ്ടേഷൻ അസിസ്റ്റന്‍റ് എക്സിക്യൂട്ടീവ് എൻജിനിയർ ബി. ഡാലിയ, അസിസ്റ്റന്‍റ് എൻജിനിയർ എസ്. പവിശങ്കർ, കെ.ഡി. അഗസ്റ്റിൻ, പി. കൃഷ്ണൻ, ആർ.കെ. പദ്മനാഭൻ, എം.ആർ. രതീഷ് എന്നിവരാണു സ്റ്റേഡിയം സന്ദർശിച്ചത്. മിനി ഗാലറി, തിരുമേനി തോടിന്‍റെ സൈഡിൽ ഉയർത്തിയുള്ള മതിൽ, ചെറുപുഴയിൽ നിന്നും വരുന്ന റോഡിന്‍റെ ഇടതുഭാഗത്ത് സംരക്ഷണ ഭിത്തി എന്നിവ നിർമിക്കും. പ്രവൃത്തി ഉടൻ ആരംഭിക്കുമെന്ന് എംഎൽഎ പറഞ്ഞു.

കുണ്ടും കുഴിയുമായി കരുവഞ്ചാൽ പഴയ പാലം

കരുവഞ്ചാൽ: ഏറെ മുറവിളികൾക്കൊടുവിൽ കരുവഞ്ചാൽ പുതിയ പാലം യാഥാർഥ്യമായെങ്കിലും മലയോര ഹൈവേയും തളിപ്പറമ്പ് കൂർഗ് ബോർഡർ റോഡും സംഗമിക്കുന്നതും മലയോര മേഖലയിലെ പ്രധാന ടൗണും അനുദിനം വികസിച്ചുകൊണ്ടിരിക്കുന്നതുമായ കരുവഞ്ചാൽ ടൗണിൽ ഗതാഗതം സുഗമമാകണമെങ്കിൽ പഴയ പാലം കൂടി സംരക്ഷിക്കപ്പെടണം. ടൗണിൽ ഏറെ ഗതാഗത പ്രശ്നങ്ങൾ നിലനിൽക്കുന്നതിനാൽ കരുവഞ്ചാലിൽ നിന്നും ആലക്കോടേക്ക് പോകുന്ന വാഹനങ്ങൾ ഇപ്പോഴും പഴയ പാലത്തിലൂടെയാണ് സർവീസ് നടത്തുന്നത്. എന്നാൽ, ഈ പാലത്തിന്‍റെ നിലവിലെ അവസ്ഥ അതിദയനീയമാണ്. ടാറിംഗ് പൊട്ടിപ്പൊളിഞ്ഞ് വലിയ ഗർത്തങ്ങൾ രൂപപ്പെട്ടിട്ടുണ്ട്. കൂടാതെ പാലത്തിന്‍റെ കൈവരികളും തകർന്ന നിലയിലാണ്. പഴയ പാലം സംരക്ഷിക്കണം എന്ന് ആവശ്യപ്പെട്ട് കരുവഞ്ചാൽ വ്യാപാരി വ്യവസായി ഏകോപന സമിതി ഗതാഗത മന്ത്രിക്കും സ്ഥലം എംഎൽഎക്കും ബ്രിഡ്ജ് എക്സിക്യൂട്ടീവ് എൻജിനിയർക്കും ഒരു വർഷം മുമ്പേ നിവേദനം നൽകിയിരുന്നു. പുതിയ പാലം വന്നതിനാൽ വെള്ളത്തിന്‍റെ ഒഴുക്ക് നോക്കി സംരക്ഷണം നൽകുന്നതിനുള്ള നടപടികൾ സ്വീകരിക്കാമെന്ന് ഉറപ്പു നൽകിയെങ്കിലും ഇതുവരെ നടപടി ഒന്നും ഉണ്ടായിട്ടില്ല. പാലത്തിന് ബലക്ഷയം ഇല്ല എന്ന് അധികാരികൾ പറയുന്നുണ്ടെങ്കിലും പാലത്തിലെ കുഴികളും കൈവരികളും തകർന്നു നിൽക്കുന്നതിനാൽ യാത്രക്കാർ പേടിയോടെയാണ് ഇതിലെ യാത്ര ചെയ്യുന്നത്. പാലത്തിനോട് ചേർന്ന് വില്ലേജ് ഓഫീസിന് സമീപത്തായി പുറമ്പോക്ക് ഭൂമിയും നിലനിൽക്കുന്നുണ്ട്. ഈ പുറമ്പോക്ക് ഭൂമി കളിക്കളമായി പ്രദേശത്തെ യുവജനങ്ങൾ വർഷങ്ങളായി ഉപയോഗിച്ചു പോരുന്നതാണ്. ട പുതിയ പാലത്തിന്‍റെ പണി നടക്കുന്ന സമയത്ത് ഇവിടെ വെള്ളം കയറി കരയിടിഞ്ഞതിനാൽ കളിസ്ഥലം ഉൾപ്പെടെ ഒഴുകിപ്പോയി. ഇവിടെ പുഴയോരം കെട്ടി സംരക്ഷിച്ച് കളിസ്ഥലം സംരക്ഷിക്കാനുള്ള നടപടി ഉണ്ടാകണമെന്ന് കായിക പ്രേമികളും ആവശ്യപ്പെടുന്നു. കരുവഞ്ചാൽ ടൗണിൽ വർധിച്ചുവരുന്ന ഗതാഗത പ്രശ്നങ്ങൾക്ക് പരിഹാരം ഉണ്ടാകണമെങ്കിൽ പഴയ പാലം സംരക്ഷിച്ചേ മതിയാകൂ എന്നും ഇതിനാവശ്യമായ നടപടികൾ സ്വീകരിച്ചു വരികയാണ്. ആവശ്യമായ എസ്റ്റിമേറ്റ് തയാറാക്കാൻ എൻജിനിയറോട് ആവശ്യപ്പെട്ടിട്ടുണ്ട്. ഇതോടൊപ്പം പുഴയുടെ സമീപത്തുള്ള പുറമ്പോക്ക് ഭൂമി സംരക്ഷിച്ച് അവിടെയുള്ള കളിസ്ഥലം നിലനിർത്തുന്നതിനും പാലത്തിന്‍റെ തൂണ് ബലപ്പെടുത്തുന്നതിനും ആവശ്യമായ നടപടികൾ സ്വീകരിച്ചു വരികയാണ്. -സജീവ് ജോസഫ് എംഎൽഎ പഴയ പാലം സംരക്ഷിക്കാൻ അടിയന്തര നടപടി സ്വീകരിക്കണമെന്ന് വ്യാപാരി വ്യവസായി ഏകോപന സമിതി കരുവഞ്ചാൽ യൂണിറ്റ് പ്രസിഡന്‍റ് ജയിംസ് പുത്തൻപുര ആവശ്യപ്പെട്ടു. ഇപ്പോൾ ഇതുവഴിയുള്ള യാത്ര ഏറെ ദുർഘടമാണ്. ചെറിയ തോതിൽ മെയിന്‍റൻസ് നടത്തിയാൽ പാലത്തിന്‍റെ കൈവരികളും പാലവും സംരക്ഷിക്കാവുന്നതാണ്. -ജയിംസ് പുത്തൻപുര (പ്രസിഡന്‍റ്, വ്യാപാരി വ്യവസായി ഏകോപന സമിതി കരുവഞ്ചാൽ)

ചെറുപുഴ സെന്‍റ് മേരീസ് ഹൈസ്കൂളിൽ മെറിറ്റ് ഡേ

ചെറുപുഴ: ചെറുപുഴ സെന്‍റ് മേരീസ് ഹൈസ്കൂളിൽ മെറിറ്റ് ഡേ തലശേരി അതിരൂപതാ കോർപറേറ്റ് മാനേജർ ഫാ. സോണി വടശേരി ഉദ്ഘാടനം ചെയ്തു. ചെറുപുഴ പഞ്ചായത്ത് വൈസ് പ്രസിഡന്‍റ് റെജി പുളിക്കൽ അധ്യക്ഷത വഹിച്ചു. സ്കൂൾ മാനേജർ ഫാ. ഫിലിപ്പ് ഇരുപ്പക്കാട്ട്, മുഖ്യാധ്യാപിക മേരിക്കുട്ടി മാത്യു, മുൻ മുഖ്യാധ്യാപകൻ ജെസ്റ്റിൻ മാത്യു, ചെറുപുഴ സെന്‍റ് മേരീസ് പള്ളി കോ-ഓർഡിനേറ്റർ ബിനോയി സോപാനം, പിടിഎ പ്രസിഡന്‍റ് കെ. സജി, ചെറുപുഴ ജെഎം യുപി സ്കൂൾ മാനേജർ കെ.കെ. വേണുഗോപാൽ, ആർ.യു. ശ്രീലക്ഷ്മി എന്നിവർ പ്രസംഗിച്ചു. 78 വിദ്യാർഥികളാണ് സ്കൂളിൽ നിന്നും എസ്എസ്എൽസി പരീക്ഷയിൽ എല്ലാ വിഷയങ്ങൾക്കും എ പ്ലസ് കരസ്ഥമാക്കിയത്. ഇവർക്കൊപ്പം മറ്റു മേഖലകളിൽ കഴിവു തെളിയിച്ച വിദ്യാർഥികളെയും അനുമോദിച്ചു. സ്കൂൾ മാനേജർ ഫാ. ഫിലിപ്പ് ഇരുപ്പക്കാട്ട്, മുൻ മുഖ്യാധ്യാപകൻ ജെസ്റ്റിൻ മാത്യു എന്നിവരെ പൊന്നാടയണിയിച്ച് ആദരിച്ചു. സ്കൂളിലെ ചിത്രകലാ അധ്യാപകനായ ജെഫിൻ ജോസ് തയാറാക്കിയ സ്കൂളിന്‍റെ ലോഗോയും അടുത്തവർഷം എസ്എസ്എൽസി പരീക്ഷയിൽ 200 ഫുൾ എപ്ലസ് നേടുന്നതിന് തയാറാക്കിയ "മിഷൻ-200' ന്‍റെ ലോഗോയും ചടങ്ങിൽ പ്രകാശനം ചെയ്തു. നടനും സംവിധായകനും അധ്യാപകനുമായ ബന്ന ചേന്ദമംഗല്ലൂർ മുഖ്യപ്രഭാഷണം നടത്തി. അധ്യാപകരും രക്ഷിതാക്കളും വിദ്യാർഥികളും ഉൾപ്പെടെ നിരവധിപേർ മെറിറ്റ് ഡേയിൽ പങ്കെടുത്തു.

നായനാർ മലയിൽ വീണ്ടും ക്വാറി തുടങ്ങാൻ നീക്കം: തടയാൻ പരാതി നൽകി

ചെമ്പന്തൊട്ടി: പ്രവർത്തനം നിർത്തിവയ്പ്പിച്ചിരുന്ന ചെമ്പന്തൊട്ടി നായനാർ മലയിലെ കരിങ്കൽ ക്വാറി വീണ്ടും തുടങ്ങാനുള്ള നീക്കം തടയണമെന്ന് ആവശ്യപ്പെട്ട് പ്രദേശത്തെ വാർഡ് കൗൺസിലർമാരായ എം.വി. ഷീന, കെ.ജെ. ചാക്കോ കൊന്നയ്ക്കൽ എന്നിവർ ശ്രീകണ്ഠപുരം നഗരസഭാധികൃതർക്ക് പരാതി നൽകി. കണ്ണൂർ ജില്ലയിൽ ഓറഞ്ച് അലർട്ട് നിലനിൽക്കുന്ന സാഹചര്യത്തിൽ നായനാർ മലയിലെ മൂളിയാൻ ക്വാറി പ്രവർത്തിക്കുന്നതായി സ്ഥലം സന്ദർശിച്ച തങ്ങൾക്ക് ബോധ്യപ്പെട്ടതായി പരാതിയിൽ പറയുന്നു. നഗരസഭ സ്റ്റോപ്പ് മെമ്മോ നൽകിയതിനെ തുടർന്ന് മാസങ്ങളായി പ്രവർത്തനം നിലച്ചിരുന്ന ക്വാറി നഗരസഭ അറിയാതെ വീണ്ടും പ്രവർത്തിക്കുന്നതിൽ ജനങ്ങൾ ഭയാശങ്കയിലാണ്.ആയതിനാൽ എത്രയും വേഗം സ്റ്റോപ്പ് മെമ്മോ നൽകാൻ നടപടിയുണ്ടാകണമെന്നാണ് പരാതിയിലെ ആവശ്യം. ചെമ്പന്തൊട്ടിയിൽ സംയുക്ത യോഗം ഇന്ന് ചെമ്പന്തൊട്ടി വികസന സമിതിയുടെയും നായനാർ മല ക്വാറി വിരുദ്ധ സമിതിയുടെയും സംയുക്ത യോഗം ഇന്ന് വൈകുന്നേരം അഞ്ചിന് ചെമ്പന്തൊട്ടി പാരിഷ് ഹാളിൽ ചേരും. ശ്രീകണ്ഠപുരം-നടുവിൽ റോഡ്‌ നവീകരണ പ്രവൃത്തി, സർവീസ് റോഡുകളിലെ പണികളും പള്ളം, കൊക്കായി പാലങ്ങളുടെ നിർമാണം എന്നിവയിൽ കരാറുകാരൻ കാണിക്കുന്ന അനാസ്ഥയും നായനാർ മലയിലെ ക്വാറി വീണ്ടും പ്രവർത്തനം തുടങ്ങാനുള്ള നീക്കം പ്രതിരോധിക്കുന്നത് സംബന്ധിച്ചും യോഗം ചർച്ച ചെയ്യും.

ക്രിയേറ്റീവ് കോർണർ ഉദ്ഘാടനം ചെയ്തു

ആലക്കോട്: പരപ്പ ഗവ. യുപി സ്കൂളിൽ ക്രിയേറ്റീവ് കോർണറിന്‍റെ ഉദ്ഘാടനം ആലക്കോട് പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ എം.എ. ഖലീൽ റഹ്മാൻ നിർവഹിച്ചു. പിടിഎ പ്രസിഡന്‍റ് അബ്‌ദുൾ ഫത്താഹ് അധ്യക്ഷത വഹിച്ചു. പൊതുവിദ്യാഭ്യാസ മേഖലയിലെ അപ്പർ പ്രൈമറി ക്ലാസുകളിലെ കുട്ടികളുടെ പഠന പ്രവർത്തനങ്ങളെ കൂടുതൽ ക്രിയാത്മകമാക്കുന്നതിനുള്ള പഠനാന്തരീക്ഷം ഒരുക്കുക എന്ന ലക്ഷ്യത്തോടെ സമഗ്ര ശിക്ഷ കേരളം കുസാറ്റുമായി സഹകരിച്ചാണ് ക്രിയേറ്റീവ് കോർണർ യാഥാർഥ്യമാക്കിയത്. സ്കൂൾ സീനിയർ അസിസ്റ്റന്‍റ് കെ. ശ്രുതി, എം.ആർ. സൗമ്യ, എ.വി. രശ്മി, എം.വി. ഹലീമ, രജനി , എൻ. ജറിൻ എന്നിവർ പ്രസംഗിച്ചു.

കുടുംബ സംഗമവും സ്ഥാനാരോഹണവും

പയ്യാവൂർ: വൈഎംസിഎ പയ്യാവൂർ യൂണിറ്റ് കുടുംബ സംഗമവും പുതിയ ഭാരവാഹികളുടെ സ്ഥാനാരോഹണവും വൈഎംസിഎ ഹാളിൽ നടന്നു. സജീവ് ജോസഫ് എംഎൽഎ ഉദ്ഘാടനം ചെയ്തു. യൂണിറ്റ് പ്രസിഡന്‍റ് ജോസ് മാത്യു മണ്ഡപത്തിൽ അധ്യക്ഷത വഹിച്ചു. പ്രോഗ്രാം ഡയറക്ടർ ടി.ടി. സെബാസ്റ്റ്യൻ ആമുഖ പ്രഭാഷണവും ചമതച്ചാൽ സെന്‍റ് സ്റ്റീഫൻസ് പള്ളി വികാരി ഫാ. ജിബിൽ കുഴിവേലിൽ അനുഗ്രഹ പ്രഭാഷണവും നടത്തി. യൂണിറ്റ് സെക്രട്ടറി ഷാജി പാറമ്പുഴ റിപ്പോർട്ട് അവതരിപ്പിച്ചു. വൈഎംസിഎ സബ് റീജണൽ ചെയർമാൻ ബെന്നി ജോൺ ചേരിയ്ക്കത്തടത്തിൽ, വനിതാ ഫോറം ചെയർപേഴ്സൺ ഗാഥ സജി എന്നിവർ പുതിയ ഭാരവാഹികളുടെ സ്ഥാനാരോഹണം നടത്തി. ജനറൽ കൺവീനർ ഷാജി ജോസഫ് പുതിയ അംഗങ്ങൾക്ക് സത്യപ്രതിജ്ഞ ചൊല്ലിക്കൊടുത്തു. എക്സിക്യൂട്ടീവ് മെംബർ മത്തായി വീട്ടിയാങ്കൽ, സ്റ്റാൻഡിംഗ് കമ്മിറ്റി ചെയർമാൻ പി.എ. ബേബി, ജോയി കരിന്തോളിൽ, വിൽസൺ ചാക്കോ, ആൻസി പുളിയംമാക്കൽ, സിജോ മുല്ലക്കരി, ജിഷ സിജോ എന്നിവർ പ്രസംഗിച്ചു. ഉന്നത വിജയം നേടിയപ്രതിഭകളെ ആദരിച്ചു. വൈഎംസിഎ സ്ഥാപക ദിനാചരണവും, മഴക്കാല രോഗ പ്രതിരോധ ഹോമിയോ ഗുളിക വിതരണവും നടത്തി. ആന്‍റണി പുളിയംമാക്കൽ, മാത്തുക്കുട്ടി തുടിയംപ്ലാക്കൽ, ലിന്‍റോ വണ്ടാക്കുന്നേൽ, ജോണി തെക്കേടത്ത് എന്നിവർ നേതൃത്വം നല്കി.

കോൺഗ്രസ് നേതൃ പരിശീലന ക്യാമ്പ്

ഇരിട്ടി: തദ്ദേശ സ്വയംഭരണ തെരഞ്ഞെടുപ്പ് മുന്നൊരുക്കങ്ങളുടെ ഭാഗമായി കോൺഗ്രസ് പേരാവൂർ നിയോജക മണ്ഡലം നേതൃ പരിശീലന ക്യാമ്പ് "വിഷൻ 25' ഇരിട്ടി ഫാൽക്കൺ പ്ലാസ ഓഡിറ്റോറിയത്തിൽ ഡിസിസി പ്രസിഡന്‍റ് മാർട്ടിൻ ജോർജ് ഉദ്ഘാടനം ചെയ്തു. കെപിസിസിയുടെ ആഹ്വാന പ്രകാരം തിരുവനന്തപുരം രാജീവ് ഗാന്ധി ഇൻസ്റ്റിറ്റ്യൂട്ട് ഓഫ് ഡവലപ്മെന്‍റ് സ്റ്റഡീസിന്‍റെ നേതൃത്വത്തിലാണ് ക്യാമ്പ്. കെപിസിസി മെംബർ പി.സി. ഷാജി അധ്യക്ഷത വഹിച്ചു. ആർജിഐഡിഎസ് ഡയറക്ടർ ഡോ. പി.പി. ബാലൻ മുഖ്യപ്രഭാഷണം നടത്തി. ബ്ലോക്ക് കോൺഗ്രസ് കമ്മിറ്റി പ്രസിഡന്‍റുമാരായ പി.എ. നസീർ, ജൂബിലി ചാക്കോ, ഡിസിസി നേതാക്കളായ ലിസി ജോസഫ്, പി.കെ. ജനാർദനൻ, കെ. വേലായുധൻ, ജയ്സൺ കാരക്കാട്ട്, വി.ടി. തോമസ്, സാജു യോമസ് എന്നിവർ പ്രസംഗിച്ചു. പി.കെ. സത്യൻ, എം.വി. പ്രേമരാജൻ, കെ.സി. ശ്രീജിത്ത്, എ.പി. മധു, കെ.വി. ജയചന്ദ്രൻ, ഷീജ സെബാസ്റ്റ്യൻ എന്നിവർ ക്ലാസെടുത്തു. പേരാവൂർ അസംബ്ലി മണ്ഡലത്തിലെ വിവിധ പഞ്ചായത്തുകളിൽ നിന്നായി 90 ഓളം പ്രതിനിധികൾ പങ്കെടുത്തു.

കാർ നിയന്ത്രണം വിട്ടു മറ്റൊരു കാറിലും വൈദ്യുത തൂണിലും ഇടിച്ച് അപകടം

മട്ടന്നൂർ: കണ്ണൂർ വിമാനത്താവള റോഡിൽ കാർ നിയന്ത്രണം വിട്ടു മറ്റൊരു കാറിലും വൈദ്യുത തൂണിലും ഇടിച്ച് അപകടം. ഇന്നലെ വൈകുന്നേരം വായാന്തോട്-വിമാനത്താവള റോഡിലായിരുന്നു അപകടം. മട്ടന്നൂർ ഭാഗത്ത് നിന്നു വിമാനത്താവള ഭാഗത്തേക്കു പോകുകയായിരുന്ന കാർ നിയന്ത്രണം വിട്ടു റോഡരികിൽ നിർത്തിയിട്ട മറ്റൊരു കാറിൽ ഇടിച്ചശേഷം വൈദ്യുത തൂണിൽ ഇടിക്കുകയായിരുന്നു. വൈദ്യുത തൂൺ തകർന്നതിനാൽ പ്രദേശത്ത് വൈദ്യുത ബന്ധം തടസപ്പെട്ടു. ഇരു കാറുകളും അപകടത്തിൽ തകർന്നു.

പട്ടികജാതിക്കാരിയെ ആക്രമിച്ച് ഹോട്ടലൊഴിപ്പിച്ച ബിജെപി നേതാക്കൾക്കെതിരേ കേസ്

കണ്ണൂർ: കഴിഞ്ഞ പാർലമെന്‍റ് തെരഞ്ഞെടുപ്പ് സമയത്ത് പാർട്ടി തെരഞ്ഞെടുപ്പ് ഓഫീസ് ആവശ്യത്തിന് വേണ്ടി പട്ടികജാതിക്കാരിയായ സംരഭക വാടക കെട്ടിടത്തിൽ നടത്തി വന്ന ഹോട്ടൽ ബലമായി ഒഴിപ്പിക്കുകയും സംരഭകയെ മർദിക്കുകയും ചെയ്തതിന് ബിജെപി ജില്ലാ നേതാക്കൾക്കെതിരേ പട്ടികജാതി-വർഗ നിയമപ്രകാരം കേസെടുത്തു. ബിജെപി ജില്ലാ വൈസ് പ്രസിഡന്‍റ് കെ.പി. ജസ്വന്ത്, മീഡിയാ സെൽ ജില്ലാ കൺവീനർ ജോഷിത്ത്, ജില്ലാ നേതാവ് ജിതിൻ എന്നിവർക്കെതിരെയാണ് കേസ്. കണ്ണൂർ താണയിൽ പ്രതികളുടെ ഉടമസ്ഥതയിലുള്ള "തറവാട്' എന്ന ഹോട്ടൽ അര ലക്ഷം രൂപ അഡ്വാൻസും പ്രതിദിനം 1500 രൂപ വാടകയ്ക്കെടുത്ത് നടത്തി വന്നിരുന്ന തോട്ടട അവേരപറന്പ് സ്വദേശിനി തെക്കൻ കാഞ്ചനയുടെ പരാതിയിലാണ് നടപടി. വായ്പയെടുത്ത് ഹോട്ടലിൽ ഒരുക്കിയ നാലുലക്ഷം രൂപയുടെ ഫർണിച്ചറുകളും പാത്രങ്ങളും തകർത്തുവെന്നും കാഞ്ചന നൽകിയ പരാതിയിൽ പറയുന്നു. സംഭവം നടന്നപ്പോൾ കണ്ണൂർ ടൗൺ സ്റ്റേഷനിൽ പരാതി നൽകിയിട്ടും നടപടി ഉണ്ടായില്ലെന്നും ഇവർ പറഞ്ഞു. പിന്നീട് കേരള പട്ടികജനസമാജത്തിന്‍റെ സഹായത്തോടെ ഡിജിപിക്കും ഉത്തരമേഖല ഡിഐജിക്കും പരാതി നൽകിയതിനെ തുടർന്ന് ഇപ്പോൾ ടൗൺ പോലീസ് വിളിപ്പിച്ച് മൊഴി രേഖപ്പെടുത്തുകയായിരുന്നു കണ്ണൂർ എസിപിക്കാണ് അന്വേഷണ ചുമതല. എസ്‌സി, എസ്ടി പരാതിയിൽ സ്റ്റേഷൻ എസ്എച്ച്ഒവിന് എഫ്ഐആർ രജിസ്റ്റർ ചെയ്യാൻ മാത്രമേ അധികാരമുള്ളൂ എന്നിരിക്കെ ടൗൺ എസ്എച്ച്ഒ ശ്രീജിത്ത് കൊടേരി അമിതാധികാരം ഉപയോഗിച്ച് പ്രതികളെ സഹായിക്കുകയായിരുന്നുവെന്ന് കേരള പട്ടികജന സമാജം കുറ്റപ്പെടുത്തി. അധികാര ദുർവിനിയോഗം നടത്തി കുറ്റക്കാരെ സംരക്ഷിക്കാൻ ശ്രമിച്ച എസ്എച്ച്ഒ ക്കെതിരെ പട്ടികജാതി-വർഗ നിയമപ്രകാരം കേസെടുക്കണമെന്ന് കേരള പട്ടികജന സമാജം ജനറൽ സെക്രട്ടറി തെക്കൻ സുനിൽകുമാർ ആവശ്യപ്പെട്ടു.

കൊട്ടിയൂരിൽ ഇന്ദിരാഗാന്ധി സഹ. ആശുപത്രിയുടെ സൗജന്യ മെഡിക്കൽ സേവന കേന്ദ്രമാരംഭിച്ചു

കൊട്ടിയൂർ: വൈശാഖ മഹോത്സവത്തിന് എത്തിച്ചേരുന്ന ഭക്ത ജനങ്ങൾക്ക് അത്യാവശ്യ സൗകര്യങ്ങൾ ഒരുക്കുന്നതിന്‍റെ ഭാഗമായി ജില്ലാ യൂത്ത് കെയറും തലശേരി ഇന്ദിരഗാന്ധി സഹകരണ ആശുപത്രിയും സംയുക്തമായി സൗജന്യ മെഡിക്കൽ സേവനവും സൗജന്യ കാപ്പി വിതരണവും ആരംഭിച്ചു. പേരാവൂർ നിയോജക മണ്ഡലം യൂത്ത് കെയറിന്‍റെ നേതൃത്വത്തിലാണ് കാപ്പി വിതരണം ചെയ്യുന്നത്. പദ്ധതികളുടെ ഉദ്ഘാടനം ഡിസിസി പ്രസിഡന്‍റ് മാർട്ടിൻ ജോർജ് നിർവഹിച്ചു. ഇന്ദിരാഗാന്ധി സഹകരണാശുപത്രി പ്രസിഡന്‍റ് കെ.പി. സാജു, യൂത്ത് കോൺഗ്രസ്‌ ജില്ലാ ജനറൽ സെക്രട്ടറി വിജിത്ത് നീലഞ്ചേരി, കൊട്ടിയൂർ പഞ്ചായത്ത്‌ പ്രസിഡന്‍റ് റോയി നമ്പുടാകം, കണ്ടോത്ത് ഗോപി, റോബർട്ട് വെള്ളാംവെള്ളി, നിമിഷ രഘുനാഥ്, മിഥുൻ മാറോളി, നിധിൻ നടുവനാട്, പി.സി. രാമകൃഷ്ണൻ, ജിനേഷ് ചെമ്പേരി, വിപിൻ ജോസഫ്, ജിബിൻ ജയ്സൺ, ജിജോ അറയ്ക്കൽ, മിജേഷ് ചാവശേരി, റയീസ് ഉളിയിൽ, അബ്ദുൾ റഷീദ്, ജോബിഷ് ജോസഫ്, അശ്വന്ത്, സി.കെ. അർജുൻ എന്നിവർ പങ്കെടുത്തു.

എടൂർ സെന്‍റ് മേരീസ് ഹയർ സെക്കൻഡറി സ്കൂളിൽ വിജയോത്സവം നടത്തി

ഇരിട്ടി: എടൂർ സെന്‍റ് മേരീസ്‌ ഹയർ സെക്കൻഡറി സ്കൂളിൽ മികച്ച വിജയം നേടിയ വിദ്യാർഥികളെ അനുമോദിച്ചു. വിജയോത്സവം എന്ന പേരിൽ സംഘടിപ്പിച്ച അനുമോദന പരിപാടി തലശേരി അതിരൂപത കോർപറേറ്റ് എഡ്യുക്കേഷൻ ഏജൻസി മാനേജർ ഫാ. സോണി വടശേരി ഉദ്ഘാടനം ചെയ്തു. സ്കൂളിലെ പൂർവ വിദ്യാർഥിയും അവാർഡ് ജേതാവുമായ തിരുവനന്തപുരം ലീഡ്സ് അക്കാഡമി ഡയറക്ടർ അനുരൂപ് സണ്ണിയെ ചടങ്ങിൽ ആദരിച്ചു. അദ്ദേഹം കുട്ടികളുമായി സംവദിച്ചു. സ്കൂളിലെ ഏറ്റവും അർഹതപ്പെട്ട വിദ്യാർഥിക്കായി തലശേരി കോർപറേറ്റ് വിദ്യാഭ്യാസ ഏജൻസി നൽകുന്ന സ്‌നേഹവീട് പദ്ധതിയിൽ നിന്നും വീട് അനുവദിച്ച കുട്ടിക്ക് നൽകുന്ന സ്ഥലത്തിന്‍റെ രേഖകൾ സ്കൂൾ മാനേജർ ഫാ. തോമസ് വടക്കേമുറിയിലിന് കൈമാറി. എടൂർ സ്വദേശി മാത്യു കവുങ്ങുംപള്ളിലാണ് വീട് നിർമിക്കാനായി എട്ടര സെന്‍റ് സ്ഥലം വിട്ടുനൽകുന്നത്. പ്രിൻസിപ്പൽ ലിൻസി പി. സാം, ഹൈസ്കൂൾ മുഖ്യാധ്യാപിക സിസിലി ജോസഫ്, യുപി സ്കൂൾ മുഖ്യാധ്യാപിക സെലിൻ വി. ജോൺ, ആറളം പഞ്ചായത്ത്‌ സ്റ്റാൻഡിംഗ് കമ്മിറ്റി ചെയർമാൻ ജോസ് അന്ത്യാംകുളം, സ്റ്റാഫ്‌ സെക്രട്ടറി ബീന തെരെസ സെബാസ്റ്റ്യൻ എന്നിവർ പ്രസംഗിച്ചു.

ഐജിഎഫ്ജി ഹോപ്പ് ഗ്രാമ ഒന്പതാംഘട്ട കിറ്റുകൾ വിതരണം ചെയ്തു

ഉളിക്കൽ: സുപ്രീം കോടതി റിട്ട. ജസ്റ്റിസ് കുര്യൻ ജോസഫ് രക്ഷാധികാരിയായ ഇരിട്ടി ഐജിഎഫ്ജി ഗ്രാമദീപം കൂട്ടായ്മയുടെയും സോബിൻസ് ഗ്രീൻസ് ചരിറ്റബിൾ ട്രസ്റ്റിന്‍റെയും സംയുക്താഭിമുഖ്യത്തിൽ ഐജിഎഫ്ജി ഹോപ്പ് ഗ്രാമ ഒന്പതാംഘട്ട കിറ്റുകൾ വിതരണം ചെയ്തു. കിടപ്പുരോഗികൾക്കായുള്ള ഡയപ്പർ, അണ്ടർ പാഡ്, സർജിക്കൽ ഗ്ലൗസ്, യൂറിൻ ബാഗ്, വെറ്റ് ടിഷ്യൂ കോട്ടൺ എന്നിവ അടങ്ങുന്ന കിറ്റുകളാണ് വിതരണം ചെയ്തത്. വിതരണോദ്ഘാടനം ഉളിക്കൽ ഉണ്ണിമിശിഹാ പള്ളി വികാരി ഫാ. തോമസ് കിടാരത്തിൽ എംപിസി ഹോസ്പിറ്റൽ എംഡി ഡോ. എം.പി. ചന്ദ്രാഗതന് കൈമാറി നിർവഹിച്ചു. ഡൽഹി സോബിൻസ് ഗ്രീൻസ് പ്രതിനിധിയായ ജ്യോതി ജോൺ, ഐജിഎഫ്ജി ഗ്രാമദീപം കൂട്ടായ്മയുടെ കോ-ഓർഡിനേറ്റർമാരായ വിമൽ മാത്യു ഉപ്പുകണ്ടത്തിൽ, സജേഷ് സെബാസ്റ്റ്യൻ, കെ.കെ. മോൻസി ഉളിക്കൽ എന്നിവർ പ്രസംഗിച്ചു. കിറ്റുകൾ ആവശ്യക്കാരുടെ വീടുകളിൽ പ്രവർത്തകർ നേരിട്ട് എത്തിച്ചു നൽകും.

കണ്ണൂര്‍ നഗരപാത വികസനം ; ഭൂമി ഏറ്റെടുക്കല്‍ നടപടികള്‍ക്ക് അനുമതി: പ്രവൃത്തി വേഗത്തിലാക്കാൻ മന്ത്രിയുടെ നിർദേശം

കണ്ണൂർ: കണ്ണൂര്‍ നഗരപാത വികസന പദ്ധതിയില്‍ ഉള്‍പ്പെടുത്തി വികസിപ്പിക്കുന്ന വളപട്ടണം മന്ന-ചാല ജംഗ്ഷന്‍ (എന്‍എച്ച് 66) റോഡിന്‍റെ ഭൂമി ഏറ്റെടുക്കല്‍ നടപടികള്‍ വ്യവസ്ഥക്കു വിധേയമായി 2013-ലെ എല്‍എആര്‍ആര്‍ നിയമപ്രകാരം മുന്നോട്ട് പോകാന്‍ സര്‍ക്കാര്‍ അനുമതി നല്‍കി. ഈ പദ്ധതിയിൽ ഉൾപ്പെടുത്തി വികസിപ്പിക്കുന്ന റോഡുകൾക്കായി കണ്ടെത്തിയ 4.748 ഹെക്ടര്‍ ഭൂമിയില്‍ നെല്‍വയല്‍ ഉള്‍പ്പെട്ടിട്ടുണ്ടെങ്കില്‍ അത് 2008ലെ കേരള നെല്‍വയല്‍ തണ്ണീര്‍ത്തട സംരക്ഷണ ആക്‌ടിലെയും ബന്ധപ്പെട്ട ചട്ടങ്ങളിലെയും നടപടിക്രമങ്ങള്‍ പാലിച്ച് മാത്രമേ പരിവര്‍ത്തനം ചെയ്യാവൂ എന്ന വ്യവസ്ഥക്കു വിധേയമായി നിയമപ്രകാരം ഏറ്റെടുക്കല്‍ നടപടികളുമായി മുന്നോട്ട് പോകാനാണ് സര്‍ക്കാര്‍ അനുമതി നല്‍കിയത്. കണ്ണൂരിലെ ഗതാഗത കുരുക്ക് പരിഹരിക്കുന്നതിനായി നഗരത്തിലൂടെ കടന്നുപോകുന്ന 11 റോഡുകള്‍ വീതി കൂട്ടി അന്താരാഷ്‌ട്ര നിലവാരത്തിലേക്ക് ഉയര്‍ത്തുന്ന കണ്ണൂര്‍ സിറ്റി റോഡ് പദ്ധതിക്കായി 738 കോടി രൂപ സര്‍ക്കാര്‍ അനുവദിച്ചിരുന്നു. പദ്ധതിയില്‍ ഏറ്റവും പ്രധാനപ്പെട്ട റോഡാണ് വളപട്ടണം മന്ന-ചാല ജംഗ്ഷന്‍ റോഡ്. സാങ്കേതിക നടപടികള്‍ വേഗത്തിലാക്കുന്നതുമായി ബന്ധപ്പെട്ട് മന്ത്രി കടന്നപ്പള്ളി രാമചന്ദ്രൻ കെ.വി. സുമേഷ് എംഎൽഎ, ജില്ലാ കളക്ടർ അരുൺ കെ. വിജയൻ എന്നിവരുമായി കൂടിക്കാഴ്ച നടത്തി. പ്രവൃത്തികള്‍ വേഗത്തിലാക്കാന്‍ മന്ത്രി നിര്‍ദേശം നല്‍കി. പദ്ധതിക്കായി ജില്ലയിലെ വിവിധ വില്ലേജുകളില്‍ നിന്നും ഭൂമി ഏറ്റെടുക്കുന്നതുമായി ബന്ധപ്പെട്ട് സെന്‍റർ ഫോര്‍ സോഷ്യോ ഇക്കണോമിക് ആന്‍ഡ് എന്‍വയോണ്‍മെന്‍റല്‍ സ്റ്റഡീസ് (സിഎസ്ഇഎസ്) കൊച്ചി നടത്തിയ സാമൂഹികാഘാത പഠന റിപ്പോര്‍ട്ട്, ജില്ലാ കളക്ടറുടെ റിപ്പോര്‍ട്ട് എന്നിവയുടെ അടിസ്ഥാനത്തിലാണ് അനുമതി.

മട്ടന്നൂരിൽ തെരുവുനായ ശല്യം രൂക്ഷം: രണ്ടുപേർക്കു കടിയേറ്റു

മട്ടന്നൂർ: മട്ടന്നൂരിലും പരിസരങ്ങളിലും തെരുവുനായ ശല്യം വർധിക്കുന്നു. രണ്ടു ദിവസത്തിനിടെ കുട്ടിയടക്കം രണ്ടുപേർക്ക് തെരുവു നായയുടെ കടിയേറ്റു. ഉരുവച്ചാൽ ഇടപ്പഴശിയിൽ വിദ്യാർഥിനി നായ്ക്കൂട്ടത്തിൽ രക്ഷപ്പെട്ടത് തലനാരിഴയ്ക്ക്. ചൊവ്വാഴ്ച രാത്രി 7.30 ഓടെ മട്ടന്നൂർ-തലശേരി റോഡില്‍ കാനറാ ബാങ്കിനു സമീപത്തു നിന്നാണ് ആറു വയസുകാരൻ ആദമിന്‍റെ കൈക്ക് തെരുവുനായയുടെ കടിയേറ്റത്. കുട്ടിയെ മട്ടന്നൂരിലെ സ്വകാര്യ ആശുപത്രിയിലെത്തിച്ച് പ്രഥമ ശുശ്രൂഷ നൽകിയശേഷം കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. ബുധനാഴ്ച രാവിലെ പത്രവിതരണക്കാരനെയാണു തെരുവു നായ ആക്രമിച്ചത്. പുലര്‍ച്ചെ മട്ടന്നൂര്‍ മഹാദേവ ക്ഷേത്രത്തിനു സമീപത്തു നിന്നാണ് ഇല്ലംമൂലയിലെ വത്സന് കടിയേറ്റത്. ഉരുവച്ചാൽ ഇടപ്പഴശിയിൽ ചൊവ്വാഴ്ച വൈകുന്നേരം സ്കൂൾ വിട്ടു വരികയായിരുന്ന കുട്ടിക്ക് നേരെയും തെരുവ് നായയുടെ ആക്രമണ ശ്രമമുണ്ടായി. ഇടപ്പഴശിയിലെ ഫാത്തിമയാണു തലനാരിഴയ്ക്ക് നായക്കൂട്ടത്തിന്‍റെ ആക്രമണത്തിൽ നിന്നും രക്ഷപ്പെട്ടത്. കുട്ടി ഓടി രക്ഷപ്പെടുകയായിരുന്നു.

കുപ്പം കപ്പണത്തട്ടിൽ മഴ പെയ്താൽ ദുരിതം തുടരും

സ്വന്തം ലേഖകൻ തളിപ്പറമ്പ്: മഴ പെയ്താൽ കുപ്പം കപ്പണത്തട്ടിൽ മണ്ണിടിച്ചിൽ തുടരാനുള്ള സാഹചര്യമാണ് നിലനിൽക്കുന്നതെന്ന് പരിസരവാസികൾ. ചില ഭാഗങ്ങളിൽ മണ്ണിടിച്ചിൽ തടയാനായി ചാക്കുകളിൽ ജില്ലിപ്പൊടി നിറച്ചും കരിങ്കൽ ചീളുകൾ കൊണ്ട് മതിലുകൾ തീർത്തും മണ്ണിലേക്ക് വെള്ളം ഇറങ്ങാതിരിക്കാൻ പ്ലാസ്റ്റിക് ഷീറ്റുകൾ വിരിച്ചും പ്രതിരോധം തീർത്തിട്ടുണ്ടെങ്കിലും അശാസ്ത്രീയമായ മണ്ണെടുപ്പ് കാരണം മുകളിൽ നിന്ന് കുതിച്ച് വരുന്ന വെള്ളം കാരണമുണ്ടാകുന്ന മണ്ണിടിച്ചിലിനെ പ്രതിരോധിക്കാൻ ഇവയ്ക്ക് സാധിക്കില്ലെന്നാണ് പ്രദേശവാസികൾ പറയുന്നത്. മണ്ണിടിച്ചിലിനെ പ്രതിരോധിക്കാൻ സിമന്‍റ് പ്ലാസ്റ്റർ ചെയ്ത ഭാഗം ഇടിഞ്ഞ് വീണത് ഉദാഹരണമായി ഇവർ ചൂണ്ടിക്കാട്ടുന്നു. നിലവിൽ വാഹനങ്ങൾ സർവീസ് നടത്തുന്ന റോഡിൽ വെള്ളം ഒഴുകി റോഡ് തകർന്നതും വലിയ അപകട ഭീഷണിയാണ് സൃഷ്ടിക്കുന്നതെന്ന് നാട്ടുകാർ പറയുന്നു. മാത്രമല്ല സർവീസ് റോഡിന് താഴെയായുള്ള ഭാഗവും മഴയത്ത് ഇടിഞ്ഞുതാഴാൻ സാധ്യതയേറെയാണെന്ന് പറയുന്നു. കാലവർഷാരംഭം മുതൽ നിരവധി തവണ ഇവിടെ മണ്ണിടിച്ചിൽ ഉണ്ടായിരുന്നു. തുടർന്ന് പ്രദേശവാസികൾ ദേശീയപാതാ ഉപരോധം നടത്തിയിരുന്നു. ഇതുവഴിയുള്ള ഗതാഗതം നിരോധിച്ച് മണ്ണിടിച്ചിൽ തടയാനുള്ള പ്രവൃത്തികൾ നടത്തിയിരുന്നു. ഇതിന്‍റെ ഭാഗമായി പതിനൊന്ന് ദിവസത്തിന് ശേഷം കഴിഞ്ഞാഴ്ചയാണ് റോഡ് തുറന്ന് കൊടുത്തത്. സിഎച്ച് നഗറിൽ കണ്ണീർ മഴക്കാലം ഒരിടവേളക്ക് ശേഷം മഴ വീണ്ടും ശക്തമാകുമ്പോൾ ഭയന്ന് കഴിയുകയാണ് സിഎച്ച് നഗർ നിവാസികൾ. കാലവർഷാരംഭം മുതൽ ദേശീയപാതാനിർമാണത്തിനായി കുപ്പം കപ്പണത്തട്ട് ഭാഗത്ത് കുന്നുകൂട്ടിയിട്ട മണ്ണും ചെളിയുമാണ് സിഎച്ച് നഗറിലെ വീടുകളിലേക്ക് ഒഴുകിയെത്തി കൊണ്ടിരിക്കുന്നത്. കപ്പണത്തട്ട് ഭാഗത്ത് കുന്നിടിച്ചുതാഴ്ത്തിയിടത്തുനിന്ന് ഇടിഞ്ഞുവീഴുന്ന മണ്ണും ചെളിയും ഈ ഭാഗത്തേക്കാണെത്തുന്നത്. ഇതു കാരണം ദുരിതം അനുഭവിക്കുകയാണ് സിഎച്ച് നഗർ നിവാസികൾ. കാലവർഷമാരംഭത്തിൽ വന്ന അതിശക്തമായ മഴയും കപ്പണത്തട്ടിലെ മണ്ണിടിച്ചിലും സിഎച്ച് നഗറിനെ ചെളിയിൽ മുക്കിയിരുന്നു. നാല്പതോളം വീടുകളിലാണ് ചെളിയും വെള്ളവുമിരച്ചെത്തിയിരുന്നത്. ഈ ഭാഗത്തേക്കുള്ള റോഡും വീട്ടുമുറ്റവുമെല്ലാം ചെളിയിൽ മുങ്ങിയിരിന്നു. ബുഷ്റ, മറിയം, ശബാന, മുസ്തഫ ഹാജി, ആമിന, ഫാത്തിമ തുടങ്ങിയവരുടെ വീട്ടിനകത്ത് വരെ വെള്ളം കയറിയിരുന്നു. ഇതേതുടർന്ന് ഇലക്‌ട്രോണിക്സ് വസ്തുക്കൾ അടക്കമുള്ളവ നശിച്ചിരുന്നു. നഷ്ടപരിഹാരം ലഭ്യമാക്കുമെന്ന് അധികൃതർ ഉറപ്പുകൊടുത്തിരിന്നുവെങ്കിലും ഒരു നടപടിയും ഇക്കാര്യത്തിൽ ഉണ്ടായില്ല എന്ന് ഇവർ ആരോപിക്കുന്നു. ശബാനയുടെ വീടിന്‍റെ പിറകുവശത്തും പറമ്പിലും ചളി അടിഞ്ഞത് മാറ്റാൻ ഇതുവരെ നിർമാണ കമ്പനിക്കാർ തയാറായിട്ടില്ല. വെള്ളത്തിന്‍റെ കുത്തൊഴുക്കിൽ മണ്ണിടിഞ്ഞ് ഷൈമയുടെ വീട് ഏതു നിമിഷവും തകർന്ന് വീഴാവുന്ന നിലയിലാണ്. ഈ ദുരിതത്തിന് ശാശ്വതപരിഹാരം കണ്ടില്ലെങ്കിൽ ഓരോ മഴയും സിഎച്ച് നഗറിന് സമ്മാനിക്കുന്നത് പ്രളയ സമാനമായ അവസ്ഥയാണ്. മഴ പെയ്താൽ ഭീതി കാരണം ഒന്നുറങ്ങാൻ പോലും സാധിക്കാത്ത അവസ്ഥയിലാണ സിഎച്ച് നഗർ നിവാസികൾ.

16 കാരിയെ ഗർഭിണിയാക്കിയ യുവാവ് അറസ്റ്റിൽ

പഴയങ്ങാടി: പഴയങ്ങാടി പോലിസ് സ്റ്റേഷൻ പരിധിയിൽ 16 കാരിയായ വിദ്യാർഥിനിയെ പീഡിപ്പിച്ച് ഗർഭിണിയാക്കിയ കേസിൽ യുവാവിനെ പഴയങ്ങാടി പോലീസ് അറസ്റ്റ് ചെയ്തു. എരിപുരം ചെങ്ങൽ സ്വദേശിയായ സനുവിനെയാണ് (22) പഴയങ്ങാടി സിഐയും സംഘവും അറസ്റ്റ് ചെയ്തത്. 16കാരിയെ ഇൻസ്റ്റയിലൂടെ പ്രണയം നടിച്ച് വീട്ടിൽ എത്തിയാണ് പീഡിപ്പിച്ചത്. കുട്ടിക്ക് ദേഹാസ്വാസ്ഥ്യം അനുഭവപ്പെട്ടതിനെ തുടർന്ന് ആശുപത്രിയിൽ എത്തിയപ്പോഴാണ് പെൺകുട്ടി രണ്ടുമാസം ഗർഭിണിയാണെന്ന് അറിഞ്ഞത്. തുടർന്ന്, ആശുപത്രി അധികൃതർ ചൈൽഡ് ലൈൻ പ്രവർത്തകരെ വിവരം അറിയിക്കുകയും അവർ പോലീസിൽ വിവരം അറിയിക്കുകയുമായിരുന്നു. പയ്യന്നൂർ കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

ജാമ്യത്തിലിറങ്ങി മുങ്ങിയ പീഡനക്കേസിലെ പ്രതി 20 വർഷത്തിനു ശേഷം പിടിയിൽ

കണ്ണൂർ: രണ്ട് പെൺകുട്ടികളെ തട്ടിക്കൊണ്ടുപോയി പീഡിപ്പിച്ച കേസിൽ ജാമ്യത്തിലിറങ്ങി മുങ്ങിയ വിരുതനെ 20 വർഷത്തിനു ശേഷം ടൗൺ സിഐ ശ്രീജിത്ത് കൊടേരിയുടെ നേതൃത്വത്തിൽ അറസ്റ്റ് ചെയ്തു. ചെറുവത്തൂർ കെഎംകെ തിയേറ്ററിന് സമീപം രാഗി മന്ദിരം ഹൗസിൽ എം.പി. രാകേഷ് (45)ആണ് പിടിയിലായത്. 2005 ൽ കണ്ണൂർ ടൗൺ പോലീസ് സ്റ്റേഷൻ പരിധിയിലായിരുന്ന സംഭവം. രണ്ട് പെൺകുട്ടികളെ കാണാനില്ലെന്ന പരാതിയെ തുടർന്ന് നടത്തിയ അന്വേഷണത്തിലാണ് പീഡന വിവരം പുറത്തറിഞ്ഞത്. ഇയാളും കൂട്ടാളിയും ചേർന്ന് തട്ടിക്കൊണ്ടുപോയി മൈസൂരു, ചെന്നൈ തുടങ്ങിയ സ്ഥലങ്ങളിൽ എത്തിച്ച് പീഡിപ്പിച്ചത്. പോക്സോ കുറ്റം അന്ന് നിലവിലുണ്ടായിരുന്നില്ല. ബലാത്സംഗത്തിന് കേസെടുത്ത് പ്രതികളെ അറസ്റ്റ് ചെയ്തെങ്കിലും പിന്നീട് രാകേഷ് ജാമ്യത്തിലിറങ്ങി മുങ്ങിയതായിരുന്നു. അതിനുശേഷം ഇയാളെക്കുറിച്ചൊരു വിവരവുമുണ്ടായില്ല. ഒന്നാം പ്രതിയെ മുന്നേ അറസ്റ്റ് ചെയ്ത് കോടതിയിൽ ഹാജരാക്കിയിരുന്നു. തുടർന്ന് രണ്ടാം പ്രതിക്കായി പോലീസ് പ്രത്യേക സ്ക്വാഡ് രൂപീകരിച്ച് അന്വേഷണം നടത്തിവരുന്നതിനിടെ പ്രതി പുതുച്ചേരിയിലുണ്ടെന്ന് വിവരം ലഭിച്ചു. പോലീസ് സംഘം പുതുച്ചേരി കോട്ടക്കുപ്പത്ത് നിന്നാണ് പിടികൂടിയത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു. എസ്ഐ മാത്യൂസ് ഡിസിൽവ ജാക്സൺ, സ്‌ക്വാഡ് അംഗങ്ങളായ സി.പി. നാസർ, ബൈജു, വിനിൽ, മിഥുൻ, റമീസ് എന്നിവരും പ്രതിയെ പിടികൂടിയ സംഘത്തിലുണ്ടായിരുന്നു.

പത്തു കിലോ കഞ്ചാവുമായി യുവാവ് അറസ്റ്റിൽ

ആലക്കോട്: ആലക്കോട് എക്സൈസ് നടത്തിയ അന്വേഷണത്തിൽ പത്തുകിലോയോളം കഞ്ചാവുമായി യുവാവ് അറസ്റ്റിൽ. റേഞ്ച് ഓഫീസിലെ എക്സൈസ് ഇൻസ്പെക്ടർ സി.എച്ച്. നസീബിന്‍റെ നേതൃത്വത്തിൽ ആലക്കോട്- കരുവഞ്ചാൽ ഭാഗങ്ങളിൽ നടത്തിയ റെയ്ഡിലാണ് 9.900 കിലോഗ്രാം കഞ്ചാവുമായി കരുവഞ്ചാൽ നറുക്കുംകരയിലെ ജോഷി പ്രകാശിനെ (23) അറസ്റ്റ് ചെയ്തത്. സ്കൂട്ടറിലും ബാഗിലുമായി സൂക്ഷിച്ച നിലയിലായിരുന്നു കഞ്ചാവ്. ആലക്കോട് എക്സൈസ് പാർട്ടി ഒരു മാസത്തോളം നടത്തിയ രഹസ്യ നിരീക്ഷണത്തിന്‍റെ ഭാഗമായാണ് ജോഷി പ്രകാശിനെ പിടികൂടിയത്. കരുവഞ്ചാലിൽനിന്ന് ചൊവ്വാഴ്ച രാത്രി 11.30 തോടെയാണ് ഇയാൾ പിടിയിലാകുന്നത്. മംഗളൂരുവിൽനിന്ന് കഞ്ചാവ് വാങ്ങി മലയോര മേഖലയിൽ വില്പന നടത്തുന്നയാളാണ് പ്രതിയെന്നും ഇയാൾക്കെതിരേ മുമ്പും കഞ്ചാവ് കേസ് നിലവിലുണ്ടെന്നും എക്സൈസ്‌സംഘം പറഞ്ഞു. അന്വേഷണ സംഘത്തിൽ എക്സൈസ് ഇൻസ്പെക്ടർ ഗ്രേഡ് കെ.വി. ഗിരീഷ് , അസി.എക്സൈസ് ഇൻസ്പെക്ടർ ഗ്രേഡ് ടി. കെ. തോമസ്, പ്രിവന്‍റീവ് ഓഫീസർ ഗ്രേഡ് സി. കെ.ഷിബു, സിവിൽ എക്സൈസ് ഓഫീസർമാരായ പി. കെ. രാജീവ്, ടി.പ്രണവ്, ജിതിൻ ആന്‍റണി, കെ.വി. സന്തോഷ് എന്നിവരും ഉണ്ടായിരുന്നു.

തലശേരിയിൽ ഗുണ്ടർട്ടിന്‍റെ പേരിൽ കോളജ്

തലശേരി: മലയാള ഭാഷയ്ക്കും മലയാള പത്രപ്രവർത്തനത്തിനും ഒട്ടേറെ സംഭാവന നൽകിയ ഹെർമൻ ഗുണ്ടർട്ടിന്‍റെ പേരിൽ തലശേരിയിൽ കോളജ് ആരംഭിക്കുന്നു. തലശേരി എഡ്യുക്കേഷണൽ ആൻഡ് കൾച്ചറൽ സൊസൈറ്റിക്കാണ് ഇതുസംബന്ധിച്ച് സർക്കാർ അനുമതി നൽകിയത്. ഈ അധ്യയന വർഷം തന്നെ പ്രവർത്തനമാരംഭിക്കാനാണ് അനുമതി. സ്വാശ്രയ കോളജായാണ് പ്രവർത്തിക്കുക. നേരത്തെ കണ്ണൂർ യൂണിവേഴ്സിറ്റി സിൻഡിക്കറ്റ് അനുമതി നൽകിയിരുന്നു. കൊമേഴ്സ് (കോ-ഓപ്പറേഷൻ), കൊമേഴ്സ് (ലോജിസ്റ്റിക്സ്), ബിസിഎ, ബിഎസ്‌സി കംപ്യൂട്ടർ സയൻസ് (എഐ ആൻഡ് മെഷീൻ ലേണിംഗ്), ബിബിഎ (ട്രാവൽ ആൻഡ് ടൂറിസം), ഇംഗ്ലീഷ്, ഹിസ്റ്ററി എന്നീ ഏഴ് ബിരുദ കോഴ്സുകൾക്കാണ് അനുമതി. ഈ സൊസൈറ്റിയാണ് തലശേരിയിലെ ക്രൈസ്റ്റ് കോളജ്, ഹെർമൻ ഗുണ്ടർട്ട് റഫറൻസ് ലൈബ്രറി എന്നീ സ്ഥാപനങ്ങൾ നടത്തുന്നത്.

അൽഫാമിന് അരുചി: ഹോട്ടൽ അടയ്ക്കാൻ നോട്ടീസ് നല്‍കി

പയ്യന്നൂര്‍: ഓര്‍ഡര്‍ ചെയ്തപ്പോള്‍ ലഭിച്ച ഭക്ഷണത്തിലെ ചിക്കന് അരുചിയും ദുര്‍ഗന്ധവും. പരാതിപ്പെട്ടതിനെ തുടര്‍ന്നെത്തിയ പോലീസിനും സംഭവം ബോധ്യപ്പെട്ടു. തുടര്‍ന്നെത്തിയ നഗരസഭ ആരോഗ്യ വിഭാഗം സ്ഥാപനമടച്ചിടാന്‍ നോട്ടീസ് നല്‍കി. ഇന്നലെ പുലര്‍ച്ചെ മൂന്നേമുക്കാലോടെ പെരുമ്പയിലെ അവക്കാഡോ കഫേയിലാണ് പരാതിക്കാസ്പദമായ സംഭവം. സുഹൃത്തുക്കളായ ഏഴിലോട്ടെ റാഫി, കുഞ്ഞിമംഗലത്തെ നെഹിയാന്‍, രാമന്തളിയിലെ ശാസിന്‍ എന്നിവരാണ് ഇവിടെ ഭക്ഷണം കഴിക്കാന്‍ കയറിയത്. അല്‍ഫാമും മറ്റും ഓര്‍ഡര്‍ ചെയ്ത ഇവര്‍ക്കുമുമ്പില്‍ എത്തിയ ചിക്കന്‍ കടിച്ചപ്പോള്‍തന്നെ അരുചിയും ദുര്‍ഗന്ധവും ഉണ്ടായെന്ന് യുവാക്കള്‍ പറഞ്ഞു. ഈ വിവരം സ്ഥാപന നടത്തിപ്പുകാരന്‍റെ ശ്രദ്ധയില്‍പെടുത്തിയപ്പോള്‍ അവരംഗീകരിക്കാന്‍ തയാറാവാതിരുന്നതിനെ തുടര്‍ന്ന് പോലീസില്‍ വിവരമറിയിക്കുകയായിരുന്നു. ഇതേതുടര്‍ന്ന് സ്ഥലത്തെത്തിയ പയ്യന്നൂര്‍ എസ്ഐ ശ്രീധരന്‍റെ നേതൃത്വത്തിലുള്ള പോലീസ് സംഘത്തിനും യുവാക്കള്‍ക്ക് ലഭിച്ച ചിക്കന്‍റെ ദുര്‍ഗന്ധം ബോധ്യപ്പെട്ടതിനെ തുടര്‍ന്ന് നഗരസഭ ആരോഗ്യ വിഭാഗത്തെ വിവരമറിയിക്കുകയായിരുന്നു. ഇവരെത്തി ഭക്ഷണ സാമ്പിള്‍ പരിശോധനക്ക് വിധേയമാക്കിയതിനെ തുടര്‍ന്ന് സ്ഥാപനമടച്ചിടാന്‍ നോട്ടീസ് നല്‍കുകയായിരുന്നു. പിഴയീടാക്കുമെന്നും ഫുഡ് ആൻഡ് സേഫ്റ്റി വിഭാഗത്തിന് റിപ്പോര്‍ട്ട് ചെയ്യുമെന്നും പയ്യന്നൂര്‍ നഗരസഭ ആരോഗ്യ വിഭാഗം അറിയിച്ചു.

റാങ്കുകളുടെ പൊൻതിളക്കത്തിൽ അങ്ങാടിക്കടവ് ഡോൺബോസ്കോ കോളജ്

ഇരിട്ടി: മലയോര മേഖലയിൽ ഉന്നത വിദ്യാഭ്യാസ സ്ഥാപനമായ ഡോൺബോസ്‌കോ അങ്ങാടിക്കടവിന് റാങ്കുകളുടെ പൊൻതിളക്കം. കണ്ണൂർ യൂണിവേഴ്സിറ്റിയിൽ ഈ വർഷം ബിഎസ് സി സൈക്കോളജി, ബിസിഎ, ബിഎസ്ഡബ്ല്യുവിലും ഒന്നാം റാങ്ക് ഡോൺ ബോസ്‌കോ അങ്ങാടിക്കടവിലെ വിദ്യാർഥികൾക്കാണ്. ടി. ആദിത്യ, സി. നന്ദന സുധീർ, അക്ഷയ് മുരളി എന്നീ വിദ്യാർഥികളാണ് ഒന്നാം റാങ്ക് നേടി മലയോരത്തെ വിദ്യാഭ്യാസ സ്ഥാപനത്തിന്‍റെ യശസ് ഉയർത്തിയത്. മലയോര മേഖലയിൽ പൊൻതിളക്കമായി പ്രവർത്തിച്ചുവരുന്ന കോളജ് കണ്ണൂർ യൂണിവേഴ്സിറ്റിയിലെ ആദ്യത്തെ നാക്ക് അക്രഡിറ്റഡ് അൺഎയ്ഡഡ് കോളജുകളിൽ ഒന്നാണ്. കൂടാതെ ബിഎസ്ഡബ്ല്യുവിൽ കണ്ണൂർ യൂണിവേസിറ്റിയിലെ ആദ്യ അഞ്ചു റാങ്കുകളും ഡോൺബോസ്‌കോ കോളജിന് തന്നെയാണ്. പഠനത്തിനൊപ്പം കലാകായിക രംഗങ്ങളിലും കോളജിന്‍റെ സംഭാവന വളരെ വലുതാണ്. കണ്ണൂർ യൂണിവേസിറ്റിയിലെ മികച്ച എൻഎസ്എസ് യൂണിറ്റിനുള്ള പുരസ്‌കാരം അഞ്ചുതവണ ഡോൺബോസ്‌കോ കോളജിന് ലഭിച്ചിട്ടുണ്ട്. കണ്ണൂർ യൂണിവേഴ്‌സിറ്റിക്ക് കീഴിൽ ബിഎസ്‌സി ആർട്ടിഫിഷ്യൽ ഇന്‍റലിജൻസ് ആൻഡ് മെഷീൻ ലേർണിംഗ്, ബി എസ്‌സി സൈബർ സെക്യൂരിറ്റി, ബിഎസ്‌സി ഡാറ്റ അനലിറ്റിക്‌സ് എന്നീ ഏറ്റവും പുതിയ കോഴ്സുകൾ ലഭ്യമായ ഏക കോളജും ഡോൺ ബോസ്കോ അങ്ങാടിക്കടവ് മാത്രമാണ്. കംപ്യൂട്ടർ ആപ്ലിക്കേഷൻ, കൊമേഴ്‌സ്, വിഷ്വൽ കമ്യൂണിക്കേഷൻ, മാനേജ്‌മെന്‍റ് സ്റ്റഡീസ്, സൈക്കോളജി, ഇംഗ്ലീഷ് ലിറ്ററേച്ചർ തുടങ്ങി വിവിധ വകുപ്പുകളിലെ വിവിധ പിജി, യുജി കോഴ്സുകൾക്കുള്ള അഡ്മിഷൻ പുരോഗമിച്ചുകൊണ്ടിരിക്കുകയാണ്.

കർഷക ദ്രോഹ നടപടികൾ അവസാനിപ്പിക്കണം: കത്തോലിക്ക കോൺഗ്രസ്

ശ്രീകണ്ഠപുരം: കർഷക ദ്രോഹ നടപടികൾ അവസാനിപ്പിക്കണമെന്ന് കത്തോലിക്കാ കോൺഗ്രസ് തലശേരി അതിരൂപത എക്സിക്യൂട്ടീവ് യോഗം ആവശ്യപ്പെട്ടു. വന്യമൃഗശല്യം, കീടാണുബാധ, കാലാവസ്ഥ വ്യതിയാനം, വിലയിടിവ് എന്നിവ മൂലം പ്രതിസന്ധിയിലായിരിക്കുന്ന കർഷകരുടെ ഭൂനികുതി സംസ്ഥാന സർക്കാർ ഇരട്ടിയിലധികമായാണ് വർധിപ്പിച്ചത്. ഭീമമായ ഭൂനികുതി വർധന സാധാരണ കർഷകർ നികുതി അടയ്ക്കാൻ ചെല്ലുമ്പോഴാണ് അറിയുന്നത്. ആവശ്യമായ തുക കൈവശമില്ലാത്തതിനാൽ കൃഷിഭൂമിയുടെ ഉടമകൾക്ക് നികുതി അടയ്ക്കാനാകാതെ തിരികെ പോരേണ്ട അവസ്ഥയാണ്. കാർഷികമേഖലയെ പ്രോത്സാഹിപ്പിക്കുന്ന പദ്ധതികൾ ആവിഷ്കരിച്ച് സാധാരണക്കാരായ കർഷകർക്കും തൊഴിലാളികൾക്കും സഹായകരമാകുന്ന നിലപാടുകൾ സ്വീകരിക്കാൻ കൃഷിവകുപ്പും വർധിച്ചുവരുന്ന വന്യമൃഗ ആക്രമണങ്ങൾ മൂലം മനുഷ്യജീവനുണ്ടാകുന്ന ഭീഷണിക്കെതിരേ ആവശ്യമായ സംരക്ഷണ നടപടികൾക്ക് വനംവകുപ്പും തയാറാകണമെന്ന് യോഗം ആവശ്യപ്പെട്ടു. ശ്രീകണ്ഠപുരം കോട്ടൂർ സെന്‍റ് തോമസ് പാരിഷ് ഹാളിൽ ചേർന്ന യോഗം ചെമ്പന്തൊട്ടി മേഖലാ ഡയറക്ടർ ഫാ. ജോബി ചെരുവിൽ ഉദ്ഘാടനം ചെയ്തു. അതിരൂപത പ്രസിഡന്‍റ് ഫിലിപ്പ് വെളിയത്ത് അധ്യക്ഷത വഹിച്ചു. ഗ്ലോബൽ ട്രഷറർ ടോണി പുഞ്ചക്കുന്നേൽ, ജനറൽ സെക്രട്ടറി ജിമ്മി ആയിത്തമറ്റം, ഫാ. ജോബി എടത്തിനാൽ, അതിരൂപത ട്രഷറർ സുരേഷ് കാഞ്ഞിരത്തിങ്കൽ, ഗ്ലോബൽ സെക്രട്ടറി ഷീജ കാറുകുളം, ചെമ്പന്തൊട്ടി മേഖലാ പ്രസിഡന്‍റ് ജോസഫ് മാത്യു കൈതമറ്റം, അതിരൂപത വൈസ് പ്രസിഡന്‍റുമാരായ ബെന്നിച്ചൻ മഠത്തിനകം, ഷിനോ പാറയ്ക്കൽ, ഐ.സി. മേരി, മേഖലാ സെക്രട്ടറി ഷാജിമോൻ കളപ്പുരയ്ക്കൽ എന്നിവർ പ്രസംഗിച്ചു.

സിസിടിവി അറ്റകുറ്റ പ്രവൃത്തിക്കിടെ വീണു പരിക്കേറ്റ യുവാവ് മരിച്ചു

കൂത്തുപറമ്പ്: സിസിടിവി അറ്റകുറ്റ പ്രവൃത്തിക്കിടെ വീണു പരിക്കേറ്റ യുവാവ് മരിച്ചു. കൂത്തുപറമ്പ് സ്പെഷൽ സബ് ജയിലിലെ സിസിടിവിയുടെ അറ്റകുറ്റപ്പണിക്കിടെ ഉണ്ടായ അപകടത്തിൽ പരിക്കേറ്റ തൃശൂർ എൽ തുരുത്ത് കരിയാട്ടുകരയിലെ ഒടയാട്ടിൽ ഹൗസിൽ ഒ.എസ്. അക്ഷയ് (29) ആണ് മരിച്ചത്. മേയ് അഞ്ചിനായിരുന്നു സംഭവം. ജോലിക്കിടെ മുകളിൽ നിന്ന് വീണ് ഗുരുതരമായി പരിക്കേറ്റ് കണ്ണൂരിലെ ആശുപത്രിയിൽ ചികിത്സയിലായിരുന്നു. ചൊവ്വാഴ്ച ഇയാളെ ബന്ധുക്കൾ ആശുപത്രിയിൽ നിന്നും ഡിസ്ചാർജ് ചെയ്തു സ്വദേശമായ തൃശൂരിലേക്ക് തുടർ ചികിത്സയ്ക്കായി കൊണ്ടുപോകും വഴി ചാലക്കുടിയിൽ വച്ചാണ് മരിച്ചത്.

കപ്പലപകടങ്ങളിൽ ക്രിമിനൽ കേസെടുക്കണം: കെഎൽസിഎ

കണ്ണൂർ: തുടർച്ചയായി കേരളതീരത്തിനടുത്ത് ഉണ്ടാകുന്ന കപ്പലപകടങ്ങൾ തീരവാസികളിൽ ആശങ്ക പരത്തുകയും മത്സ്യത്തൊഴിലാളികളുടെ ഉപജീവന മാർഗത്തെ തടസപ്പെടുത്തുകയും ചെയ്യുകയാ ണെന്ന് കെഎൽസിഎ കണ്ണൂർ രൂപത സമിതി. അപകടങ്ങൾ പരിസ്ഥിതിക്ക് ഉണ്ടാക്കുന്ന ആഘാതം സംബന്ധിച്ച് കൃത്യമായ വിവരങ്ങൾ അധികൃതർ പുറത്തുവിടണം. കേരള തീരത്ത് ഉണ്ടാക്കിയിട്ടുള്ള പാരിസ്ഥിതിക പ്രശ്നങ്ങൾ കണക്കിലെടുത്ത് ക്രിമിനൽ കേസുകൾ ഉൾപ്പെടെയുള്ള നിയമനടപടി കൾ ഉണ്ടാകണമെന്നും സമിതി ആവശ്യപ്പെട്ടു. പി ആൻഡ് ഐ ഇൻഷ്വറൻസ് വ്യവസ്ഥകളിലൂടെ ഇത്തരത്തിൽ ഉണ്ടാകുന്ന നഷ്ടങ്ങൾക്ക് കൃത്യമായ നഷ്ടപരിഹാരം വിലയിരുത്തി തിരുവാസികൾക്കും തൊഴിലാളികൾക്കും അവ ലഭ്യമാക്കണം. അതിനു ള്ള നടപടികൾ ആരംഭിക്കാൻ സംസ്ഥാന സർക്കാർ സർക്കാരും കേന്ദ്രസർക്കാരും തയാറാകണം. സമുദ്ര അപകട അന്വേഷണം നടത്തി പരിസ്ഥിതിക്ക് ഉണ്ടായിട്ടുള്ള ആഘാതം കൃത്യമായി റിപ്പോർട്ട് ചെയ്യപ്പെടണം. ഉദാസീന നിലപാടുകൾ അധികൃതർ സ്വീകരിക്കുകയാണെങ്കിൽ തീര മേഖലയിൽ ശക്തമായ പ്രക്ഷോഭങ്ങൾ നേരിടേണ്ടി വരുമെന്ന് കേരള ലാറ്റിൻ കാത്തലിക് അസോസിയേഷൻ സംസ്ഥാന ട്രഷറർ രതീഷ് ആന്‍റണി, കണ്ണൂർ രൂപത പ്രസിഡൻറ് ഗോഡ്സൺ ഡിക്രൂസ്, രൂപത ജനറൽ സെക്രട്ടറി ശ്രീജൻ ഫ്രാൻസിസ്, ഡയറക്ടർ ഫാ. മാർട്ടിൻ രായപ്പൻ, മുൻ സംസ്ഥാന പ്രസിഡന്‍റ് ആന്‍റണി നൊറോണ, സംസ്ഥാന സെക്രട്ടറി ജോൺ ബാബു, ക്രിസ്റ്റഫർ കല്ലറക്കൽ എന്നിവർ മുന്നറിയിപ്പു നല്കി.

കൊട്ടിയൂർ വൈശാഖ മഹോത്സവത്തിന് 100 ട്രിപ്പുകള്‍ ഒരുക്കി കെഎസ്ആര്‍ടിസി

കണ്ണൂർ: കേരളത്തിലെ എല്ലാ കെഎസ്ആര്‍ടിസി യൂണിറ്റുകളില്‍നിന്ന് കൊട്ടിയൂർ വൈശാഖ മഹോത്സവത്തോടനുബന്ധിച്ചു ട്രിപ്പുകള്‍ സജ്ജമാക്കി. ജൂണ്‍ 11 ന് തീർഥാടകര്‍ വൈക്കം ഡിപ്പോയില്‍ നിന്നും കൊട്ടിയൂരില്‍ എത്തിച്ചേരും. കണ്ണൂര്‍ ഡിടിഒ വി. മനോജ് കുമാറിന്‍റെ നേതൃത്വത്തില്‍ വിപുലമായ സന്നാഹങ്ങളാണ് കൊട്ടിയൂര്‍ വൈശാഖ മഹോത്സവത്തിന് സജ്ജീകരിച്ചിട്ടുള്ളത്. ഇതിനോടനുബന്ധിച്ച് കണ്ണൂര്‍ യൂണിറ്റില്‍നിന്നു കൊട്ടിയൂരിലേക്ക് സ്‌പെഷല്‍ തീര്‍ഥാടക പാക്കേജുകളും നടത്തുന്നുണ്ട്. രാവിലെ 6.30ന് കണ്ണൂരില്‍നിന്ന് ആരംഭിച്ച് മമ്മാനിക്കുന്ന് മഹാദേവി ക്ഷേത്രം, മൃദംഗശൈലേശ്വരി ക്ഷേത്രം, പുരളിമല മുത്തപ്പ ക്ഷേത്രം, കൊട്ടിയൂര്‍ മഹാദേവക്ഷേത്രം എന്നിവ ദര്‍ശിച്ച് രാത്രി എട്ടിന് കണ്ണൂരില്‍ എത്തിച്ചേരുന്ന രീതിയിലാണ് പാക്കേജ് തയാറാക്കിയിട്ടുള്ളത്. സൂപ്പര്‍ ഡീലക്‌സ് ബസുകള്‍ ആണ് ഉപയോഗിക്കുന്നത്. ഒരാള്‍ക്ക് 490 രൂപയാണ് ചാര്‍ജ് . ജൂലൈ 14, 18, 21, 24 തീയതികളില്‍ ഷെഡ്യൂള്‍ ട്രിപ്പുകളും കൂടാതെ കുടുംബശ്രീ യൂണിറ്റുകള്‍ക്കും മറ്റ് സംഘടനകള്‍ക്കും സ്‌പെഷല്‍ ട്രിപ്പുകളും അറേഞ്ച് ചെയ്യും. ഫോണ്‍: 9497007857, 9895859721.‌

ചാവശേരി പത്തൊമ്പതാം മൈലിൽ ജീപ്പ് മറിഞ്ഞു

മട്ടന്നൂർ: ചാവശേരി പത്തൊമ്പതാം മൈലിൽ ജീപ്പ് നിയന്ത്രണം വിട്ടു വൈദ്യുത തൂണിലിടിച്ച് മറിഞ്ഞു അപകടം. അപകടത്തിൽ യാത്രക്കാർ പരിക്കേൽക്കാതെ അദ്ഭുതകരമായി രക്ഷപ്പെട്ടു. ഇന്നലെ രാവിലെ ആറരയോടെയിരുന്നു അപകടം. മൈസൂരിൽ നിന്ന് മട്ടന്നൂരിലേക്ക് വരികയായിരുന്ന ജീപ്പാണ് അപകടത്തിൽപ്പെട്ടത്. ജീപ്പ് റോഡരികിൽ നിർത്തിയിട്ട ആൾട്ടോ കാറിലും വൈദ്യുത തൂണിലും ഇടിച്ച ശേഷം മറിയുകയായിരുന്നു. ഇടിയുടെ ആഘാതത്തിൽ കോൺക്രീറ്റ് ചെയ്ത ഇരുമ്പിന്‍റെ വൈദ്യുത തൂൺ അടക്കം റോഡിലേക്ക് വീണു. വാഹനത്തിൽ അഞ്ച് പേരുണ്ടായിരുന്നുവെങ്കിലും എല്ലാവരും പരിക്കേൽക്കാതെ അത്ഭുതകരമായി രക്ഷപ്പെട്ടു. മറിഞ്ഞ വാഹനം പിന്നീട് ക്രെയിൻ ഉപയോഗിച്ച് നാട്ടുകാരുടെ സഹായത്തോടെ റോഡിൽ നിന്ന് നീക്കി. അപകടത്തെ തുടർന്നു അരമണിക്കൂറോളം മട്ടന്നൂർ-ഇരിട്ടി റൂട്ടിൽ ഗതാഗതം തടസപ്പെട്ടു. മട്ടന്നൂർ പോലീസ് സ്ഥലത്തെത്തിയിരുന്നു.

മോഷ്‌ടിച്ച ഫോണിലെ വിവരങ്ങള്‍ പ്രചരിപ്പിച്ചു; ആറു പേർക്കെതിരേ കേസ്

പയ്യന്നൂര്‍: നിര്‍ത്തിയിട്ട കാറില്‍നിന്നും പണവും മൊബൈല്‍ ഫോണും കവര്‍ന്നു. ഫോണിലെ വിവരങ്ങള്‍ വാട്‌സാപ്പ് ഗ്രൂപ്പുണ്ടാക്കി പ്രചരിപ്പിച്ചതായും പരാതി. തായിനേരിയിലെ കെ.കെ. സുബൈറിന്‍റെ പരാതിയില്‍ കാരയിലെ എം.ടി.പി. ഷഫീഖ്, എ. സൈഫുദീന്‍ എന്നിവര്‍ക്കും കൂടെയുണ്ടായിരുന്ന കണ്ടാലറിയാവുന്ന നാലു പേര്‍ക്കുമെതിരെ പയ്യന്നൂര്‍ പോലീസ് കേസെടുത്തു. കഴിഞ്ഞ വ്യാഴാഴ്ച രാത്രി പത്തോടെ തായിനേരി സര്‍വീസ് സ്റ്റേഷനു മുന്നിലെ റോഡിലാണ് സംഭവം. ഇവിടെ റോഡരികില്‍ നിര്‍ത്തിയിട്ടിരുന്ന പരാതിക്കാരന്‍റെ കാറിന്‍റെ ഡോര്‍ തുറന്നാണ് കാറിലെ ബോക്‌സില്‍ സൂക്ഷിച്ചിരുന്ന 32,000 രൂപയും മൊബൈല്‍ഫോണും മോഷ്ടിച്ചത്. പരാതിക്കാരന്‍റെ സുഹൃത്ത് മോഷണം നടത്തുന്നത് കണ്ടതിനാലാണ് പ്രതികളെ തിരിച്ചറിയാനായത്. മോഷ്ടിക്കപ്പെട്ട മൊബൈലിലുണ്ടായിരുന്ന പരാതിക്കാരന്‍റെ സ്വകാര്യ വിവരങ്ങളും കുടുംബ ചിത്രങ്ങളും സ്‌കൂള്‍ സംബന്ധമായ വിവരങ്ങളും സാമൂഹിക മാധ്യമങ്ങളിലൂടെ പ്രതികള്‍ പ്രചരിപ്പിച്ചതായും പരാതിയുണ്ട്.

മഹാത്മാഗാന്ധി കുടുംബ സംഗമവും പ്രതിഭകളെ ആദരിക്കലും നടത്തി

ഇരിട്ടി: കോൺഗ്രസ് കരിക്കോട്ടക്കരി മണ്ഡലം കമ്മിറ്റിയുടെ നേതൃത്വത്തിൽ മഹാത്മാഗാന്ധി കുടുംബ സംഗമങ്ങളുടെ മണ്ഡലതല സമ്മേളനം കരിക്കോട്ടക്കരിയിലെ കൂമന്തോട് വാർഡിൽ നടന്നു. കെപിസിസി പ്രസിഡന്‍റ് സണ്ണി ജോസഫ് എംഎൽഎ ഉദ്ഘാടനം ചെയ്തു. ഡിസിസി ജനറൽ സെക്രട്ടറി ബെന്നി തോമസ് മഹാത്മാഗാന്ധി അനുസ്മരണ പ്രഭാഷണം നടത്തി. അയ്യൻകുന്ന് പഞ്ചായത്ത് പ്രസിഡന്‍റ് കുര്യാച്ചൻ പൈമ്പള്ളിക്കുന്നേൽ ഉന്നത വിജയം നേടിയ വിദ്യാർഥികൾക്ക് ഉപഹാരങ്ങൾ നൽകി. ഡിസിസി സെക്രട്ടറി വി.ടി. തോമസ്, കെ.സി. ചാക്കോ , ജോസഫ് വട്ടുകുളം, മാത്യു എം കണ്ടത്തിൽ, ജയിൻസ് ടി മാത്യു, മനോജ് എം കണ്ടത്തിൽ, റോസിലി വിൽസൺ, അഗസ്റ്റിൻ തടത്തിൽ, റെന്നി ആലപ്പാട്ട് എന്നിവർ പ്രസംഗിച്ചു. ആദ്യകാല കോൺഗ്രസ് പ്രവർത്തകരെയും എസ്എസ്എൽസി പ്ലസ് ടു പരീക്ഷകളിൽ മികച്ച വിജയം നേടിയവരെയും സംസ്ഥാന തുല്യതാ പരീക്ഷയിൽ മികച്ച വിജയം നേടിയവരെയും കലാസാഹിത്യ രംഗങ്ങളിൽ നേട്ടങ്ങൾ കൈവരിച്ചവരെയും ആദരിച്ചു. കെപിസിസി പ്രസിഡന്‍റായതിന് ശേഷം ആദ്യമായി കരിക്കോട്ടക്കരിയിലെത്തിയ സണ്ണി ജോസഫിന് മണ്ഡലം കമ്മിറ്റി സ്വീകരണവും ഒരുക്കിയിരുന്നു.

ആറളം ഫാം റോഡിൽ കാട്ടാന മരം റോഡിന് കുറുകെ കുത്തിവീഴ്ത്തി

ഇരിട്ടി: ആറളം ഫാമിലും പുനരധിവാസ മേഖലയിലും കാട്ടാനകൾ കുടിലുകൾ ഉൾപ്പടെ തകർത്ത് ഭീഷണി ഉയർത്തുന്നതിനിടെ റോഡരികിലെ മരം കാട്ടാന കുത്തി വീഴ്ത്തി. കഴിഞ്ഞ ദിവസം രാത്രി ബ്ലോക്ക് പതിമൂന്നിലെ പരിപ്പ് തോട്-കോട്ടപ്പാറ റോഡിലാണ് കാട്ടാന മരം കുത്തി വീഴ്ത്തിയത്. ഇതേ തുടർന്ന് ഇതുവഴിയുള്ള ഗതാഗതം തടസപ്പെട്ടു. വനപാലകരും ആർആർടി സംഘവും വാഹനത്തിൽ പട്രോളിംഗ് നടത്താനുപയോഗിക്കുന്ന റോഡുകളിൽ ഒന്നാണിത്. ആർആർടി ഡെപ്യൂട്ടി റേഞ്ചർ എം. ഷൈനികുമാറിന്‍റെ നേതൃത്വത്തിലുള്ള സംഘം സ്ഥലത്തെത്തി മരം മുറിച്ചു മാറ്റിയാണ് ഗതാഗതം പുനസ്ഥാപിച്ചത്. ഫാം മേഖലയിൽ നിന്ന് കാട്ടാനകളെ വനപാലകർ പലപ്പോഴായി കാട്ടിലേക്ക് തുരത്തിയെന്ന്‌ അവകാശപ്പെടുന്പോഴും കാടു കയറ്റിയ ആനകൾ ഫാമിൽ തിരിച്ചെത്തുകയാണ്.

വാറ്റുകേന്ദ്രം തകര്‍ത്തു

പയ്യന്നൂര്‍: രാമന്തളി പഞ്ചായത്തിലെ കുന്നരു കരിയിച്ചാലിലെ വ്യാജ ചാരായ വാറ്റുകേന്ദ്രം എക്‌സൈസ് തകര്‍ത്തു. തളിപ്പറമ്പ് എക്‌സൈസ് സര്‍ക്കിള്‍ ഓഫീസിലെ അസി. എക്സൈസ് ഇന്‍സ്പെക്ടര്‍ കെ.കെ. രാജേന്ദ്രന്‍റെ നേതൃത്വത്തിലുള്ള സംഘമാണ് പരിശോധന നടത്തിയത്. എക്‌സൈസിന് ലഭിച്ച രഹസ്യ വിവരത്തിന്‍റെ അടിസ്ഥാനത്തില്‍ നടത്തിയ പരിശോധനയിലാണ് വാറ്റുകേന്ദ്രം കണ്ടെത്തിയത്. വാറ്റുകേന്ദ്രത്തില്‍ ചാരായം വാറ്റാന്‍ വേണ്ടി തയാറാക്കിയ 460 ലിറ്റര്‍ വാഷും വാറ്റ് ഉപകരണങ്ങളും കണ്ടെടുത്തു. വാറ്റുകേന്ദ്രം നടത്തിവന്ന പ്രതികളെ കണ്ടെത്താനുള്ള അന്വേഷണമാരംഭിച്ചതായി എക്‌സൈസ് അധിക്യതര്‍ അറിയിച്ചു. സംഘത്തിൽ സിവില്‍ എക്‌സൈസ് ഓഫീസര്‍ ടി.വി. ശ്രീകാന്ത്, പി.വി. സനേഷ്, ഡ്രൈവര്‍ അനില്‍കുമാര്‍ എന്നിവരും ഉണ്ടായിരുന്നു.

ആറളം തോട്ടുകടവ് പാലം മെയിൻ സ്ലാബിന്‍റെ വാർപ്പ് പൂർത്തിയായി

ഇരിട്ടി: ആറളം തോട്ടുകടവ് പാലം മെയിൻ സ്ലാബിന്‍റെ കോൺക്രീറ്റ് ജോലികൾ പൂർത്തിയായി. എടൂർ പഴയ പോസ്‌റ്റ് ഓഫീസ് ജംഗ്ഷൻ-ആറളം, ഇരിട്ടി-ജബ്ബാർക്കടവ്, പായം -ആറളം എന്നീ എന്നീ റോഡുകളെ ആറളവുമായി ബന്ധിപ്പിക്കുന്നതാണ് ഏച്ചില്ലത്തിനു സമീപമുള്ള തോട്ടുകടവ് പാലം. കാലപ്പഴക്കം മൂലം അപകടാവസ്‌ഥയിലായ പഴയപാലം പൊളിച്ചു നീക്കിയാണ് പുതിയപാലം നിർമിക്കുന്നത്. ജില്ലാ പഞ്ചായത്ത് അനുവദിച്ച 1.25 കോടി രൂപ ചെലവിലാണ് പാലം പണിയുന്നത്. നിർമാണ പ്രവൃത്തികൾ കഴിഞ്ഞ വർഷം ഏപ്രിൽ അഞ്ചിനായിരുന്നു ആരംഭിച്ചത്. പല സാങ്കേതിക കാരണങ്ങളാലും പ്രതികൂല കാലാവസ്ഥയുമാണ് പാലം പണി നീണ്ടു പോകാൻ ഇടയാക്കിയത്. 12 പൈലിംഗ് തൂണുകളിലായി 10 മീറ്റർ നീളവും എട്ടു മീറ്റർ വീതിയിലുമാണ് പാലം പണിയുന്നത്. പഴയപാലം പൊളിച്ചതോടെ ഗതാഗതം പയോറ, കൂട്ടക്കളം ഭാഗത്തു കൂടിയാണ് തിരിച്ചുവിട്ടിരിക്കുന്നത് .ടാറിംഗ് അടക്കം അപ്രോച്ച് റോഡിനായി ജില്ലാ പഞ്ചായത്ത് 30 ലക്ഷം രൂപ വകയിരുത്തിയിട്ടുണ്ട്.

60 വർഷത്തെ ഒാർമകളുമായി പൂർവ വിദ്യാർഥി സംഗമം

കണ്ണൂർ: അപൂർവതകളിൽ സന്പന്നമായ കണ്ണൂർ ഗവ. ട്രെയിനിംഗ് സ്കൂൾ ഇത്തവണ ശ്രദ്ധേയമായത് പൂർവ വിദ്യാർഥി സംഗമത്തിലൂടെ. 1964-68 ബാച്ചിലെ അധ്യാപക -വിദ്യാർഥികളുടെ ( ജിടടിഐ-മെൻ) സംഗമമാണ് കൗതുകവും അപൂർവങ്ങളിൽ അപൂർവവുമായി മാറിയത്. 1964 മുതൽ 68 വരെ പരിശീലനം നേടിയ 75 വയസു മുതൽ പ്രായമുള്ളവരാണാണ് കുടുബ സംഗമത്തിൽ ട്രെയിനിംഗ് സ്കൂളിൽ ഒത്തുചേർന്നത്. അന്നത്തെ ബാച്ചിലെ പലരും മരണപ്പെട്ടെങ്കിലും അവശഷിക്കുന്നവരിൽ ശാരീരിക അവശതകൾ കണക്കിലെടുക്കാതെ ട്രെയിനിംഗ് സ്കൂൾ പരിസരത്തെത്തിയവരിൽ ഓരോരുത്തരും തങ്ങൾക്കു ജീവിതം നൽകിയ ഈ വിദ്യാലയത്തിലെ പൂർവകാല സ്മരണകൾ പങ്കുവച്ചു. അവരിൽ 90 വയസായ കരിക്കോട്ടക്കരിയിലെ മാത്യു കണ്ടത്തിലിന്‍റേയും മുസമ്മൽ കണ്ണൂരിന്‍റേയും സാന്നിധ്യം മറ്റുള്ളവർക്ക് ആവേശം പകരുന്നതായി. അക്കാലത്തെ മുഖ്യാധ്യാപകനായ 98 വയസ് പ്രായമുള്ള എൻ. ബാലകൃഷനെ പൂർവ വിദ്യാർഥി പ്രതിനിധികൾ കിഴുന്നപ്പാറയിലുള്ള ഭവനത്തിൽചെന്ന് ആദരിച്ച ശേഷമാണ് ട്രെയിനിംഗ് സ്കൂൾ ഹാളിലെ സംഗമം ആരംഭിച്ചത്. പൂർവ വിദ്യാർഥി സംഗമം ട്രെയിനിംഗ് സ്കൂൾ പ്രിൻസിപ്പൽ കെ.വി. അഞ്ജന ഉദ്ഘാടനം ചെയ്തു. കണ്ണർ കോർപറേഷൻ പ്ലാനിംഗ് റിസോർസ് പേഴ്സൺ പി.പി. കൃഷ്ണൻ അധ്യക്ഷത വഹിച്ചു. കെ.വി. ദിവാകരൻ, വി. ചന്തുക്കുട്ടി, പി.കെ. ലക്ഷ്മണൻ, എ.വി. ചന്ദ്രൻ, കെ.വി. ബാലൻ, ടി.വി. ബാലകൃഷ്ണൻ, കെ.പി. കൃഷ്ണൻ തുടങ്ങിയവർ പ്രസംഗിച്ചു. കവിതകൾ ചൊല്ലിയും പാട്ടുപാടിയുമാണ് ഇവർ സന്തോഷം പങ്കുവച്ചത്. വിദ്യാലയ പരിസരത്ത് "പൂർവ വിദ്യാർഥി ഓർമ മരം" ( തൈ മാവ്) നട്ടായിരുന്നു മടക്കം.

ലഹരി-മോഷണ കേസുകളിലെ പിടികിട്ടാപ്പുള്ളി അറസ്റ്റിൽ

തളിപ്പറമ്പ്: നിരവധി ലഹരിക്കേസുകളിലും മോഷണക്കേസുകളിലും പ്രതിയായ പിടികിട്ടാപ്പുള്ളി തളിപ്പറന്പ് പോലീസിന്‍റെ പിടിയിൽ. പറശിനിക്കടവ് സ്വദേശി അശ്വിനെയാണ് (28) തിങ്കളാഴ്ച രാത്രി തളിപ്പറന്പ് പോലീസ് അറസ്റ്റ് ചെയ്തത്. അഞ്ചു കേസുകളിൽ ഇയാളെ കോടതി പിടികിട്ടാപ്പുള്ളിയായി പ്രഖ്യാപിച്ചിരുന്നു. കഞ്ചാവ് കേസുകൾക്കു പുറമെ കടകളിൽ കയറിയുള്ള പണം മോഷണം, വീട്ടിൽ കയറി കട്ടിൽ കവർന്ന കേസിലും പ്രതിയാണ്. അടുത്ത കാലത്തായി കഞ്ചാവ് വിൽപനയും ഉപയോഗവും നടത്തി വരുന്നതായി പോലീസിന് വിവരം ലഭിച്ചതിനെ തുടർന്ന് എസ്പിയുടെ ലഹരി വിരുദ്ധ സ്ക്വാഡും ഇയാൾക്കായി തെരച്ചിൽ നടത്തി വരികയായിരുന്നു. ലഹരി വസ്തുക്കൾ വാങ്ങിക്കുന്നവരെ അളവിൽ കൃത്രിമം കാട്ടി കബളിപ്പിച്ചതായും പറയുന്നു. ഇതേ തുടർന്ന് ഒരു സംഘം തിങ്കളാഴ്ച ഇയാളെ അന്വേഷിച്ച് പറശിനിക്കടവിലെത്തി മർദിച്ചിരുന്നു. സംഭവം ശ്രദ്ധയിൽ പെട്ട നാട്ടുകാർ തടഞ്ഞുവെക്കുകയും പോലീസിൽ വിവരമറിയിക്കുകയുമായിരുന്നു. തുടർന്ന് സ്ഥലത്തെത്തിയ പോലീസ് അറസ്റ്റ് രേഖപ്പെടുത്തി. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. മർദിച്ച സംഘത്തിലുള്ളവരെ പോലീസ് ചോദ്യം ചെയ്തു വരികയാണ്.

ക്രൈസ്തവ സമൂഹം മലബാറിന്‍റെ ചരിത്രപഥങ്ങളിൽ പ്രകാശനം ചെയ്തു

ചാണോക്കുണ്ട്: റോമിലെ ഗ്രിഗോറിയൻ സർവകലാശാലയിൽ സഭാചരിത്രവുമായി ബന്ധപ്പെട്ട് ഡോ. ഷിജു വാക്കയിൽ തയാറാക്കിയ ഗവേഷണ പ്രബന്ധത്തിന്‍റെ മലയാള വിവർത്തനമായ ക്രൈസ്തവ സമൂഹം മലബാറിന്‍റെ ചരിത്രപഥങ്ങളിൽ എന്ന പുസ്തകം പ്രകാശനം ചെയ്തു. പോർച്ചുഗീസ് അധിനിവേശം മുതൽ 1932 വരെ നീണ്ടു നിൽക്കുന്ന മലബാറിലെ ക്രൈസ്‌തവ സമൂഹത്തിന്‍റെ വളർച്ചയുടെ ചരിത്രവും രേഖാചിത്രവുമാണ് പുസ്തകത്തിൽ പ്രതിപാദിക്കുന്നത്. കരുണാപുരം സെന്‍റ് മേരീസ് സെമിനാരിയിൽ നടന്ന ചടങ്ങിൽ റെക്ടർ ഫാ. ആന്‍റണി അമ്പാട്ട് പുസ്തകത്തിന്‍റെ പ്രകാശനം നിർവഹിച്ചു. വായാട്ടുപറമ്പ് ഫൊറോന വികാരി ഫാ. തോമസ് തെങ്ങുംപള്ളിൽ ആദ്യപ്രതി ഏറ്റുവാങ്ങി. മലയാള പരിഭാഷ നിർവഹിച്ച ഫാ. ജിയോ പുളിക്കൽ പുസ്തക പരിചയം നടത്തി. ഫാ. റോയി കഴിപ്ലാക്കൽ, ജോർജ് ഓലിക്കുന്നേൽ, മാത്യു ചാണാക്കാട്ടിൽ, സി.ജെ. ജോൺ ചെരിയൻകാലായിൽ എന്നിവർ പ്രസംഗിച്ചു.

13 ലോറികളിലെ 26 ബാറ്ററികൾ മോഷ്ടിച്ച രണ്ടുപേർ പിടിയിൽ

മട്ടന്നൂർ: രാത്രികാലങ്ങളിൽ റോഡരികിൽ നിർത്തിയിടുന്ന വാഹനങ്ങളുടെ ബാറ്ററികൾ കവരുന്ന രണ്ടംഗ സംഘം മട്ടന്നൂർ പോലീസിന്‍റെ പിടിയിൽ. ജില്ലയിലെ വിവിധയിടങ്ങളിൽ നിന്ന് ബാറ്ററികൾ മോഷണം നടത്തിയ കണ്ണൂർ നാറാത്ത് സ്വദേശി പി.പി. മുഹമ്മദ്‌ നൗഷാദ് (37), മമ്മാക്കുന്ന് സ്വദേശി എ.സി. റമീസ് (43) എന്നിവരെയാണ് മട്ടന്നൂർ ഇൻസ്പെക്‌ടർ എം. അനിലിന്‍റെ നേതൃത്വത്തിലുള്ള പോലീസ് അറസ്റ്റു ചെയ്തത്. കഴിഞ്ഞ ദിവസം ചാവശേരിയിൽ നിർത്തിയിട്ട ലോറിയുടെ ബാറ്ററി മോഷണം നടത്തിയിരുന്നു. ലോറി ഉടമ വിജേഷ് ഉൾപ്പെടെയുള്ളവരുടെ പരാതിയിൽ കേസെടുത്ത് അന്വേഷണം നടത്തി വരുന്നതിനിടെയാണ് ഇരുവരും പിടിയിലായത്. നിരവധി ലോറികളുടെ ബാറ്ററികളാണ് ഇവർ മോഷ്‌ടിച്ചത്. ജില്ലയിൽ വിവിധ സ്ഥലങ്ങളിൽ അടുത്ത കാലത്തായി നടന്ന ബാറ്ററി മോഷണങ്ങൾക്കു പിന്നിൽ ഇവരാണെന്നു തെളിഞ്ഞതായി പോലീസ് പറഞ്ഞു. കൂത്തുപറമ്പ് പോലീസ് സ്റ്റേഷനിൽ ഇവർക്കെതിരെ ബാറ്ററി മോഷണത്തിനു കേസെടുത്ത് അന്വേഷണം നടന്നുവരികയാണ്. എടക്കാട്, തോട്ടട, കൊളോളം, പാലോട്ടുപള്ളി, ചാവശേരി, നരയമ്പാറ, ചക്കരക്കല്ല്, കുട്ടിക്കുന്ന് തുടങ്ങിയ സ്ഥലങ്ങളിൽ നിന്ന് 13 ലോറികളിൽ നിന്നായി 26 ബാറ്ററികൾ മോഷണം നടത്തിയത് ഇവരാണെന്നു കണ്ടെത്തിയതായി പോലീസ് പറഞ്ഞു. സിസി ടിവി കാമറകൾ കേന്ദ്രീകരിച്ചു നടത്തിയ അന്വേഷണത്തിലാണു പ്രതികൾ പോലീസിന്‍റെ വലയിലായത്. മട്ടന്നൂർ എസ്ഐ പി. സജീവൻ, സീനിയർ സിവിൽ പോലീസ് ഓഫീസർ കെ. ജിനീഷ്, സിവിൽ പോലീസ് ഓഫീസർമാരായ കെ. രതീഷ്, ഷംസീർ അഹമ്മദ് എന്നിവർ ചേർന്നാണു പ്രതികളെ പിടികൂടിയത്. പ്രതികളെ മട്ടന്നൂർ കോടതിയിൽ ഹാജരാക്കി.

പരിശീലന കളരി സംഘടിപ്പിച്ചു

പയ്യാവൂർ: കോൺഗ്രസ് പയ്യാവൂർ മണ്ഡലം കമ്മിറ്റിയുടെ ആഭിമുഖ്യത്തിൽ വാർഡ്, ബൂത്ത് പ്രസിഡന്‍റുമാർ, ബിഎൽഎമാർ എന്നിവർക്കായി സംഘടിപ്പിച്ച തെരഞ്ഞെടുപ്പ് മുന്നൊരുക്ക പരിശീലന കളരി പയ്യാവൂർ ഇന്ദിരാഭവനിൽ നടന്നു. ബ്ലോക്ക് പ്രസിഡന്‍റ് എ.ജെ. ജോസഫ് ഉദ്ഘാടനം ചെയ്തു. മണ്ഡലം പ്രസിഡന്‍റ് ഇ.കെ. കുര്യൻ അധ്യക്ഷത വഹിച്ചു. ബ്ലോക്ക് ജനറൽ സെക്രട്ടറി അഗസ്റ്റിൻ വേങ്ങക്കുന്നേൽ, യൂത്ത് കോൺഗ്രസ് നേതാവ് രഞ്ജി അറബി എന്നിവർ ക്ലാസ് നയിച്ചു. കെ.വി. ഫ്രാൻസിസ്, ഡെയ്സി മഞ്ഞനാൽ, കുര്യാച്ചൻ മുണ്ടയ്ക്കൽ, കുര്യാക്കോസ് തെരുവത്ത്, സൈമൺ പെരുവക്കുന്നേൽ, പയസ് ചക്കാങ്കൽ എന്നിവർ പ്രസംഗിച്ചു.

വളർത്തുടാങ്കിൽ നിന്ന് രണ്ട് ക്വിന്‍റലോളം മത്സ്യം മോഷ്ടിച്ചു

മയ്യിൽ: മീൻ വളർത്തുടാങ്കിൽ നിന്ന് മത്സ്യ കർഷകന്‍റെ രണ്ടു ക്വിന്‍റലോളം മീനുകളെ മോഷ്ടിച്ചു കടത്തി. മലപ്പട്ടം മേപ്പറമ്പിലെ എ.വി.നാരായണന്‍റെ മത്സ്യങ്ങളാണ് മോഷണം പോയത്.വീടിനുപിറകിൽ റബർ തോട്ടത്തിൽ ഒരുക്കിയ ടാങ്കിന്‍റെ മേൽഭാഗത്തെ വല മുറിച്ചാണ് മോഷണം നടത്തിയത്. ജൂൺ ഒന്നിനും രണ്ടിനും മീനുകൾക്ക് തീറ്റയിട്ടു നൽകിയപ്പോൾ സംശയം തോന്നി പരിശോധിച്ചപ്പോഴാണ് മോഷണം ശ്രദ്ധയിൽ പെട്ടത്. 750 വരാൽ മീനുകളായിരുന്നു ടാങ്കിൽ ഉണ്ടായിരുന്നത്. പരിശോധിച്ചപ്പോൾ ഏഴെണ്ണം മാത്രമേ ഉണ്ടായിരുന്നുള്ളൂ. മേയ് 31 രാത്രിയായിരിക്കും മോഷണം നടന്നതെന്നാണ് കരുതുന്നത്. നാരായണന്‍റെ പരാതിയിൽ മയ്യിൽ പോലീസ് കേസെടുത്ത് അന്വേഷണം ആരംഭിച്ചു. കേരള കർഷകസംഘം നേതാക്കൾ മോഷണം നടന്ന സ്ഥലം സന്ദർശിച്ചു. രണ്ടു ലക്ഷത്തിന്‍റെ നഷ്ടം അടുത്ത മാസം വിളവെടുക്കാനിരിക്കെയാണ് മത്സ്യങ്ങൾ മോഷണം പോയത്. രണ്ടു ലക്ഷം രൂപയുടെ നഷ്ടം ഉണ്ട്. ഫിഷറീസ് വകുപ്പിന്‍റെ സഹായത്തോടെയാണ് മത്സ്യ കൃഷി ചെയ്തു വരുന്നത്. കഴിഞ്ഞ എട്ടു വർഷമായി ഈ മേഖലയിൽ പ്രവർത്തിച്ചു വരുന്ന തനിക്ക് ഇത് ആദ്യാനുഭവമാണ്. സ്ഥലത്തെ കുറിച്ചും മീനുകളുടെ വളർച്ചയെ കുറിച്ചും കൃത്യമായി അറിയാവുന്നവരോ അല്ലെങ്കിൽ ഇവരുടെ സഹായത്തോടു കൂടിയോ ആകാം മോഷണം നടന്നതെന്ന് സംശയിക്കുന്നു.

60 വർഷത്തെ ഒാർമകളുമായി പൂർവ വിദ്യാർഥി സംഗമം

കണ്ണൂർ: അപൂർവതകളിൽ സന്പന്നമായ കണ്ണൂർ ഗവ. ട്രെയിനിംഗ് സ്കൂൾ ഇത്തവണ ശ്രദ്ധേയമായത് പൂർവ വിദ്യാർഥി സംഗമത്തിലൂടെ. 1964-68 ബാച്ചിലെ അധ്യാപക -വിദ്യാർഥികളുടെ ( ജിടടിഐ-മെൻ) സംഗമമാണ് കൗതുകവും അപൂർവങ്ങളിൽ അപൂർവവുമായി മാറിയത്. 1964 മുതൽ 68 വരെ പരിശീലനം നേടിയ 75 വയസു മുതൽ പ്രായമുള്ളവരാണാണ് കുടുബ സംഗമത്തിൽ ട്രെയിനിംഗ് സ്കൂളിൽ ഒത്തുചേർന്നത്. അന്നത്തെ ബാച്ചിലെ പലരും മരണപ്പെട്ടെങ്കിലും അവശഷിക്കുന്നവരിൽ ശാരീരിക അവശതകൾ കണക്കിലെടുക്കാതെ ട്രെയിനിംഗ് സ്കൂൾ പരിസരത്തെത്തിയവരിൽ ഓരോരുത്തരും തങ്ങൾക്കു ജീവിതം നൽകിയ ഈ വിദ്യാലയത്തിലെ പൂർവകാല സ്മരണകൾ പങ്കുവച്ചു. അവരിൽ 90 വയസായ കരിക്കോട്ടക്കരിയിലെ മാത്യു കണ്ടത്തിലിന്‍റേയും മുസമ്മൽ കണ്ണൂരിന്‍റേയും സാന്നിധ്യം മറ്റുള്ളവർക്ക് ആവേശം പകരുന്നതായി. അക്കാലത്തെ മുഖ്യാധ്യാപകനായ 98 വയസ് പ്രായമുള്ള എൻ. ബാലകൃഷനെ പൂർവ വിദ്യാർഥി പ്രതിനിധികൾ കിഴുന്നപ്പാറയിലുള്ള ഭവനത്തിൽചെന്ന് ആദരിച്ച ശേഷമാണ് ട്രെയിനിംഗ് സ്കൂൾ ഹാളിലെ സംഗമം ആരംഭിച്ചത്. പൂർവ വിദ്യാർഥി സംഗമം ട്രെയിനിംഗ് സ്കൂൾ പ്രിൻസിപ്പൽ കെ.വി. അഞ്ജന ഉദ്ഘാടനം ചെയ്തു. കണ്ണർ കോർപറേഷൻ പ്ലാനിംഗ് റിസോർസ് പേഴ്സൺ പി.പി. കൃഷ്ണൻ അധ്യക്ഷത വഹിച്ചു. കെ.വി. ദിവാകരൻ, വി. ചന്തുക്കുട്ടി, പി.കെ. ലക്ഷ്മണൻ, എ.വി. ചന്ദ്രൻ, കെ.വി. ബാലൻ, ടി.വി. ബാലകൃഷ്ണൻ, കെ.പി. കൃഷ്ണൻ തുടങ്ങിയവർ പ്രസംഗിച്ചു. കവിതകൾ ചൊല്ലിയും പാട്ടുപാടിയുമാണ് ഇവർ സന്തോഷം പങ്കുവച്ചത്. വിദ്യാലയ പരിസരത്ത് "പൂർവ വിദ്യാർഥി ഓർമ മരം" ( തൈ മാവ്) നട്ടായിരുന്നു മടക്കം.

കെഎസ്ഇബി ഓഫീസിലേക്ക് മാർച്ച് നടത്തി

ആലക്കോട്: കരിന്തളം-വയനാട് 400 കെവി വൈദ്യുത ലൈൻ കടന്നു പോകുമ്പോൾ ഭൂമിയും വീടും നഷ്ടപ്പെടുന്നവർ ആലക്കോട് കെഎസ്ഇബി ഓഫീസിലേക്ക് മാർച്ചും ധർണയും നടത്തി. കർഷകരുടെ വിളകൾക്കും, വൃക്ഷങ്ങൾക്കും, നഷ്ടപ്പെടുന്ന ഭൂമിക്കും, വീടിനും, യാതൊരുവിധ നഷ്ടപരിഹാര പാക്കേജും പ്രഖ്യാപിക്കാതെ കെഎസ്ഇബി ഉദ്യോഗസ്ഥർ കർഷകന്‍റെ ഭൂമിയിൽ കടന്നുകയറി പ്രവൃത്തി ആരംഭിക്കാനുള്ള ശ്രമം അവസാനിപ്പിക്കുക, മതിയായ നഷ്ടപരിഹാര പാക്കേജ് ഉടൻ പ്രഖ്യാപിക്കുക തുടങ്ങിയ ആവശ്യങ്ങൾ ഉന്നയിച്ച് ആക്‌ഷൻ കമ്മിറ്റിയുടെ നേതൃത്വത്തിലാണ് മാർച്ചും ധർണയും നടത്തിയത്. ശക്തമായ മഴയെപ്പോലും അവഗണിച്ച് സ്ത്രീകൾ അടക്കം നൂറു കണക്കിന് ആളുകളാണ് ആലക്കോട് ടൗണിൽ നിന്നാരംഭിച്ച മാർച്ചിൽ പങ്കെടുത്തത്. 2018 ൽ കുറ്റി സ്ഥാപിച്ച് നാളിതുവരെയായിട്ടും നഷ്ടപരിഹാര പാക്കേജ് പ്രഖ്യാപിക്കാതെ കർഷകരെ മാനസികമായി ബുദ്ധിമുട്ടിക്കുന്ന കെഎസ്ഇബി ഉദ്യോഗസ്ഥരുടെ ധിക്കാരപരമായ നടപടി അവസാനിപ്പിക്കണമെന്ന് സമരസമിതി ആവശ്യപ്പെട്ടു. ആലക്കോട് ടൗണിൽ നിന്ന് രണ്ടു കിലോമീറ്റർ നടന്ന് അരങ്ങത്തുള്ള കെഎസ്ഇബി ഓഫീസിൽ എത്തിയാണ് ധർണയും പൊതുയോഗവും നടത്തിയത്. ധർണ ആലക്കോട് പഞ്ചായത്ത് പ്രസിഡന്‍റ് ജോജി കന്നിക്കാട്ട് ഉദ്ഘാടനം ചെയ്തു. ആക്‌ഷൻ കമ്മിറ്റി കൺവീനർ ടോമി കുമ്പിടിയാമാക്കൽ അധ്യക്ഷത വഹിച്ചു. ഉദയഗിരി ഗ്രാമപഞ്ചായത്ത് പ്രസിഡന്‍റ് കെ.എസ്. ചന്ദ്രശേഖരൻ, ആലക്കോട് ഫൊറോന വികാരി ഫാ. ആന്‍റണി പുന്നൂർ, കെ.പി. സാബു, ബിജുപുളിയൻതൊട്ടി, ജോഷി കണ്ടത്തിൽ, വി.എ. റഹീം, പി.സി. ആയിഷ, അപ്പുക്കു ട്ടൻ സ്വാമി മഠം തുടങ്ങിയവർ പ്രസംഗിച്ചു.

കാപ്പിമല സ്വദേശി ബൈക്കിടിച്ചു മരിച്ചു

ആലക്കോട്: കാപ്പിമല സ്വദേശി കാസർഗോഡ് ബദിയടുക്കയിൽ ബൈക്കിടിച്ച് മരിച്ചു. കാപ്പിമലയിലെ മൂലേപ്പറമ്പിൽ സാജു (62) ആണ് മരിച്ചത്. തിങ്കളാഴ്ച രാത്രി 8.30 ന് ബദിയടുക്ക നീർച്ചാലിലായിരുന്നു അപകടം. സാജു കുറച്ചുകാലമായി ബദിയടുക്കയിലാണു താമസം. ഇവിടെ ലോട്ടറി സ്റ്റാളും നടത്തിവരുന്നുണ്ട്. രാത്രി ടൗണിൽ നിന്നു വീട്ടിലേക്കു നടന്നുപോകുന്നതിനിടെ കെഎൽ 19 എച്ച്എൻ 2195 നന്പർ ബൈക്കിടിക്കുകയായിരുന്നു. ഉടൻ കാസർഗോഡ് താലൂക്ക് ആശുപത്രിയിലെത്തിച്ചുവെങ്കിലും ജീവൻ രക്ഷിക്കാനായില്ല. പരേതനായ മൂലേപ്പറമ്പിൽ ജോർജ്-ഒറ്റത്തൈ വേലമാർക്കുടിയിൽ മേഴ്സി ദമ്പതികളുടെ മകനാണ്. ഭാര്യ: ഡെയ്‌സി. മകൾ: ശ്രുതി. സഹോദരൻ: രാജു.

മഴക്കാല പൂർവ കാർഷിക പരിപാലനം

ഉളിക്കൽ: കേന്ദ്ര കൃഷി മന്ത്രാലയം, കാർഷിക വികസന കർഷക ക്ഷേമവകുപ്പ്, ഇന്ത്യൻ കൗൺസിൽ ഓഫ് അഗ്രികൾച്ചറൽ റിസർച്ച്, കൃഷി വിജ്ഞാൻ കേന്ദ്രം എന്നിവയുടെ സംയുക്താഭിമുഖ്യത്തിൽ വികസിത സങ്കൽപ്പ് അഭിയാൻ പദ്ധതിയുടെ ഭാഗമായി മഴക്കാല പൂർവ കാർഷിക പരിപാലനം പഠന ക്യാമ്പ് സംഘടിപ്പിച്ചു. ഉളിക്കൽ കൃഷിഭവനിൽ ഇരിക്കൂർ കൃഷി അസിസ്റ്റന്‍റ് ഡയറക്ടർ കെ.ജെ. രേഖ ഉദ്ഘാടനം ചെയ്തു. കൃഷി വിജ്ഞാൻ കേന്ദ്രം അസിസ്റ്റന്‍റ് പ്രഫസർ പാർവതി പീലിക്കോട്, തോട്ടവിള ഗവേഷണ കേന്ദ്രം ശാസ്ത്രജ്ഞ ഡോ. ഡാലിയ മോൾ എന്നിവർ വിവിധ വിഷയങ്ങളിൽ ക്ലാസെടുത്തു. ഉളിക്കൽ കൃഷി ഓഫീസർ ജിംസി മരിയ, കൃഷി അസിസ്റ്റന്‍റ് ആന്മരിയ തോമസ് എന്നിവർ പ്രസംഗിച്ചു.

സോഫ നിർമാണ യൂണിറ്റിന് സമീപം തീപിടിത്തം; ഇരുചക്രവാഹനങ്ങൾ കത്തിനശിച്ചു

മട്ടന്നൂർ: കൊളപ്പയിൽ സോഫ നിർമാണ സ്ഥാപനത്തിനു സമീപത്തുണ്ടായ തീപിടിത്തത്തിൽ രണ്ട് ഇരുചക്രവാഹനങ്ങൾ കത്തിനശിച്ചു. കെ. ജലീലിന്‍റെ ഉടമസ്ഥതയിലുള്ള സോഫ നിർമാണ സ്ഥാപനത്തിന്‍റെ സമീപം കൂട്ടിയിട്ട വസ്തുക്കൾക്കാണ് തീപിടിച്ചത്. ഇതിൽ നിന്നും സമീപത്ത് നിർത്തിയിട്ട ഇരുചക്രവാഹനങ്ങളിലേക്ക് തീ പടരുകയായിരുന്നു. ഇന്നലെ ഉച്ച കഴിഞ്ഞ് മൂന്നോടെയായിരുന്ന സംഭവം. അഗ്നിരക്ഷാ സേനയും നാട്ടുകാരും ചേർന്ന് തീയണച്ചതിനാൽ മറ്റിടങ്ങളിലേക്ക് പടരുന്നത് തടയാനായി. രണ്ടു ലക്ഷം രൂപയുടെ നഷ്ടം കണക്കാക്കുന്നു.

കൊട്ടിയൂർ ഉത്സവം: കേളകം പോലീസ് സ്റ്റേഷൻ ഔട്ട്പോസ്റ്റ് ഉദ്ഘാടനം ചെയ്തു

കൊട്ടിയൂർ: കൊട്ടിയൂർ ഉത്സവ നഗരിയിൽ സ്ഥാപിച്ച കേളകം പോലീസ് സ്റ്റേഷന്‍റെ ഔട്ട് പോസ്റ്റിന്‍റെയും കണ്ണൂർ റൂറൽ ജില്ലാ പോലീസ് തയാറാക്കിയ ഹെൽപ്പ് ലൈൻ ക്യൂആർ കോഡിന്‍റെയും ഉദ്ഘാടനം നടത്തി. പേരാവൂർ ഡിവൈഎസ്പി-കെ.വി. പ്രമോദൻ ഉദ്ഘാടനം ചെയ്തു. ക്യൂആർ കോഡ് സംവിധാനത്തിലൂടെ കൊട്ടിയൂരിലെ പാർക്കിംഗ് ലഭ്യതയെക്കുറിച്ചും പോലീസ്, ദേവസ്വം ബോർഡ്, അഗ്നിരക്ഷാസേന തുടങ്ങിയ വകുപ്പുകൾ, എമർജൻസി ഫോൺ നമ്പറുകൾ, കൊട്ടിയൂർ ക്ഷേത്രം സംബന്ധിച്ചുള്ള പൂർണവിവരങ്ങളും ഉൾക്കൊള്ളിച്ചുകൊണ്ടാണ് വെബ്സൈറ്റ് തയാറാക്കിയിട്ടുള്ളത്. ക്യൂആർ കോഡുവഴി ഓരോ സമയവും പാർക്കിംഗ് അപ്ഡേഷൻ അറിയാവുന്നതാണ്. ചടങ്ങിൽ കേളകം എസ്എച്ച്ഒ ഇതിഹാസ് താഹ അധ്യക്ഷത വഹിച്ചു. എസ്ഐ വർഗീസ് തോമസ്, ദേവസ്വം എക്സിക്യൂട്ടീവ് കെ. ഗോകുൽ, മാനേജർ നാരായണൻ, എസ്ഐമാരായ പ്രവീൺ, ശശീന്ദ്രൻ, ട്രസ്റ്റിമാർ, പോലീസ് ഉദ്യേഗസ്ഥർ എന്നിവർ ചടങ്ങിൽ പങ്കെടുത്തു.

പരിസ്ഥിതി സംരക്ഷണ പദ്ധതിയുമായി കണ്ണൂർ കോ-ഓപ്പ് അർബൻ ബാങ്ക്

കണ്ണൂര്‍: സ്‌കൂളുകളില്‍ പരിസ്ഥിതി പരിപാലനത്തിനായി അക്കൗണ്ട് ബന്ധിത പദ്ധതിയുമായി കണ്ണൂർ കോ-ഓപ്പറേറ്റീവ് അർബൻ ബാങ്ക്. സഹകരണ വകുപ്പും വിദ്യാഭ്യാസ വകുപ്പും ആയുഷ് വകുപ്പും സംയുക്തമായാണ് പദ്ധതി നടപ്പാക്കുക. താവക്കര ഗവ. യു പി സ്‌കൂളിനുപുറമെ സെന്‍റ് തെരേസാസ് ആംഗ്ലോ ഇന്ത്യന്‍ ടീച്ചര്‍ ട്രെയിനിംഗ് ഇന്‍സ്റ്റിറ്റ്യൂട്ട്, താവക്കരയിലെ മദ്രസ മാ അദാനിയ എൽപി സ്കൂൾ എന്നിവയെയാണ് അക്കൗണ്ട് ബന്ധിത പരിസ്ഥിതി സംരക്ഷണ പരിപാടിയിൽ ആദ്യഘട്ടത്തിൽ ഉൾപ്പടുത്തിയിരിക്കുന്നത്. പദ്ധതിയുടെ മേല്‍നോട്ട ചുമതല സഹകരണ വകുപ്പിനാണ്. സ്‌കൂള്‍ പിടിഎ അര്‍ബന്‍ ബാങ്കില്‍ തുടങ്ങുന്ന അക്കൗണ്ടില്‍ ചെടികള്‍ പരിപാലിക്കാനുള്ള തുക ആയുഷ് വകുപ്പ് നിക്ഷേപിക്കും. തുടര്‍ന്ന് എല്ലാ മാസവും ചെടിയുടെ വളര്‍ച്ചാപുരോഗതി റിപ്പോര്‍ട്ടും ഫോട്ടോയും സഹിതം സഹകരണ സംഘം രജിസ്ട്രാര്‍ (ജനറല്‍)ക്ക് നല്‍കണം. നെല്ലി, അശോകം, കൂവളം, വേപ്പ്, കണികൊന്ന, കറ്റാര്‍ വാഴ, മുരിങ്ങ എന്നിവയാണ് നട്ടു പരിപാലിക്കുക. ലോകപരിസ്ഥിതി ദിനാചരണത്തിന്‍റെ ഭാഗമായി സ്‌കൂളുകള്‍ക്ക് ഔഷധത്തൈകളും വിതരണം ചെയ്തു. വിതരണോദ്ഘാടനം ബാങ്ക് ചെയർമാൻ രാജീവൻ എളയാവൂർ നിർവഹിച്ചു. താവക്കര ഗവ. യു പി സ്‌കൂളില്‍ നടന്ന ചടങ്ങില്‍ മുഖ്യാധ്യാപകൻ കെ.വി. പ്രശാന്തൻ, പിടഎ പ്രസിഡന്‍റ് രമ്യ എന്നിവർ ഔഷധ തൈകൾ ഏറ്റുവാങ്ങി.

കണ്ടക്ടർ സായുജിനെ അനുമോദിച്ചു

ഇരിട്ടി: ജോലിക്കിടയിൽ ബസ് ഡ്രൈവർ കുഴഞ്ഞുവീണപ്പോൾ ബസ് നിയന്ത്രിച്ച് യാത്രക്കാരെ അപകടത്തിൽ നിന്ന് രക്ഷിച്ച കണ്ടക്ടർ സായൂജിന് അഭിനന്ദന പ്രവാഹം. തലശേരി -മാട്ടറ റൂട്ടിൽ ഓടുന്ന മോണാസ ബസിലെ കണ്ടക്ടർ സായൂജിനെ ഇരിട്ടി പ്രൈവറ്റ് ബസ് ഉടമ സംഘത്തിന്‍റെ നേതൃത്വത്തിൽ അനുമോദിച്ചു. ഞായറാഴ്ച രാവിലെയാണ് ബസ് ഓടിക്കുന്നതിനിടെ ഡ്രൈവർ അശ്വന്ത് കുഴഞ്ഞുവീണത്. സംഭവം ക്ലീനർ ശ്രദ്ധയിൽ പെടുത്തിയതോടെയാണ് കണ്ടക്ടർ സായൂജ് അവസരോചിതമായി ഇടപെടുകയും ബ്രേക്കിട്ട് ബസ് നിറുത്തി യാത്രികരെ രക്ഷിക്കുകയുമായിരുന്നു. യാത്രക്കാരുടെ സഹായത്തോടെ ഡ്രൈവർ അശ്വന്തിനെ ഉടനെ ആശുപത്രിയിൽ എത്തിക്കാൻ കഴിഞ്ഞതും സായുജിന്‍റെ സമയോജിതമായ ഇടപെടലും മനസാന്നിധ്യവുമായിരുന്നു. ഇരിട്ടി പ്രൈവറ്റ് ബസ് ഉടമ സംഘത്തിന്‍റെ നേതൃത്വത്തിൽ ഇരിട്ടി ബസ്റ്റാൻഡിൽ നടന്ന അനുമോദന യോഗത്തിൽ ഇരിട്ടി മോട്ടോർ വെഹിക്കിൾ ഇൻസ്‌പെക്ടർ കെ. രാജീവൻ സായൂജന് ഉപഹാരം നൽകി. ബസ് ഉടമാ സംഘം നേതാക്കളായ അജയൻ പായം, ബെന്നി ടൈറ്റസ് , ജോസ് ജോർജ് , പി.പി. പോൾ, എം. പ്രഭാകരൻ, എം.എസ്. സാബു, റഷീദ് കേരള, എ. ഭാസ്‌കരൻ എന്നിവർ പ്രസംഗിച്ചു .

ചൊക്ലി പള്ളിക്കുനിയിൽ എംഡിഎംഎയും കഞ്ചാവുമായി മൂന്നു യുവാക്കൾ പിടിയിൽ

തലശേരി: ചൊക്ലി പള്ളിക്കുനിയിൽ 2.68 ഗ്രാം എംഡിഎംഎയും 62.99 ഗ്രാം കഞ്ചാവുമായി മൂന്ന് യുവാക്കൾ പിടിയിൽ. അഴിയൂർ സ്വദേശി കെ. വിപിൻ, ചൊക്ലി ആണ്ടിപ്പീടികയിലെ സി.എസ്. സമീർ, ന്യൂമാഹി സ്വദേശി എൻ.കെ.എം. കമറുദ്ദീൻ എന്നിവരെയാണ് ചൊക്ലി പോലീസ് അറസ്റ്റ് ചെയ്തത്. ഇന്നലെ രാവിലെ ചൊക്ലി സിഐ കെ.വി. മഹേഷിന്‍റെ നേതൃത്വത്തിൽ പള്ളിക്കുനി ജംഗ്ഷനിൽ വാഹന പരിശോധനയ്ക്കിടെയാണ് എംഡിഎംഎയും കഞ്ചാവുമായി യുവാക്കൾ പിടിയിലായത്. മേക്കുനിയിൽ നിന്ന് മോന്താൽ ഭാഗത്തേക്കു പോവുകയായിരുന്നു വെള്ള ആൾട്ടോ കാർ പോലീസ് പരിശോധിക്കവെയാണു ഡാഷ് ബോർഡിൽ കവറിലാക്കി സൂക്ഷിച്ച 2.68 ഗ്രാം എംഡിഎയും 62.99 ഗ്രാം കഞ്ചാവും കണ്ടെത്തിയത്. പ്രതികൾ സഞ്ചരിച്ച വാഹനവും പോലീസ് കസ്റ്റഡിയിലെടുത്തു. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. എസ്ഐ. കെ. സജിത്ത്, പോലീസ് ഉദ്യോഗസ്ഥരായ പ്രജിത്ത്, നൗഫൽ, ശ്രീജിത്ത് തുടങ്ങിയവരും പരിശോധനാ സംഘത്തിലുണ്ടായിരുന്നു. എംഡിഎംഎ പിടികൂടി കണ്ണൂർ:തെക്കിബസാറിൽ പോലീസ് നടത്തിയ പരിശോധനയിൽ എംഡിഎംഎയുമായി യുവാവിനെ പിടികൂടി. തയ്യിൽ പടന്നയിലെ സി.എച്ച്. ആരിഫിനെയാണ്(41) കണ്ണൂർ ‌ടൗൺ പോലീസ് പിടികൂടിയത്. എസ്ഐ ദീപ്തിയും സംഘവും നടത്തിയ പരിശോധനയിലാണ് യുവാവ് പിടിയിലായത്. ഇയാളുടെ കൈയിൽ നിന്നും 0.47 ഗ്രാം എംഡിഎംഎ പിടിച്ചെടുത്തു.

കണ്ണൂർ ഗവ. മെഡിക്കൽ കോളജിൽ മലിനജല നിർമാർജനത്തിന് സമ്പൂർണ പദ്ധതി

പരിയാരം: കണ്ണൂർ ഗവ. മെഡിക്കൽ കോളജിലെ നിലവിലുള്ള മലിനജല പ്ലാന്‍റിന്‍റെ നവീകരണ പ്രവൃത്തികൾ ഐആർടിസി പൂർത്തീകരിച്ചതായി ആശുപത്രി വികസന സമിതി ജനറൽ ബോഡി യോഗത്തിൽ എച്ച്ഡിഎസ് സെക്രട്ടറി കൂടിയായ മെഡിക്കൽ സൂപ്രണ്ട് അറിയിച്ചു. 75 ലക്ഷം രൂപ സർക്കാരും 35 ലക്ഷം രൂപ ആശുപത്രി വികസന സമിതിയും ചെലവഴിച്ചാണ് ട്രീറ്റ്മെന്‍റ് പ്ലാന്‍റിന്‍റെ നവീകരണ പ്രവൃത്തികൾ നിർവഹിച്ചത്. പാലക്കാട് ആസ്ഥാനമായി പ്രവർത്തിക്കുന്ന സർക്കാർ ഏജൻസിയായ ഐആർടിസിയാണ് പ്രവൃ ത്തികളുടെ കരാർ ഏറ്റെടുത്തത്. നിലവിലുള്ള പ്യൂരിഫിക്കേഷൻ പ്ലാന്‍റ് അറ്റകുറ്റപ്പണി പൂർത്തീകരിച്ച് കമ്മീഷൻ ചെയ്തിട്ടുണ്ട്. പഴയ 25 ലക്ഷം ലിറ്റർ ശേഷിയുള്ള കളക്ഷൻ ടാങ്കിന്‍റെ നവീകരണവും പൂർത്തിയാക്കിയിട്ടുണ്ട്. 50 ലക്ഷം ലിറ്റർ സംഭരണശേഷിയുള്ള പുതിയ ഒരു കളക്ഷൻ ടാങ്ക് നിർമിക്കേണ്ടത് അത്യാവശ്യമാണെന്നും യോഗം വിലയിരുത്തി. ഐആർടിസിയോട് പുതിയ കളക്ഷൻ ടാങ്കിനുള്ള എസ്റ്റിമേറ്റ് അടിയന്തരമായി സമർപ്പിക്കുവാൻ സമിതി ആവശ്യപ്പെട്ടിട്ടുണ്ട്. മെഡിക്കൽ കോളജിലെ ഭാവി വികസന സാധ്യതകൾ മുൻകൂട്ടി കണ്ടുകൊണ്ടുള്ള സമ്പൂർണ മലിനജല ശുദ്ധീകരണ പദ്ധതിയാണ് ഒരുങ്ങുന്നത്. പ്രസ്തുത വിഷയത്തിലെ പ്രദേശവാസികളുടെ ആശങ്കകൾക്കും ഇതോടെ പരിഹാരമാവുകയാണ്. ഈ വർഷം ഡിസംബർ മാസത്തോടെ പുതിയ കളക്ഷൻ ടാങ്ക് അടക്കമുള്ള പ്ലാന്‍റിന്‍റെ കമ്മീഷനിംഗ് പൂർത്തിയാകുമെന്നാണ് പ്രതീക്ഷ.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]