ADVERTISEMENT

ADVERTISEMENT

ആഴകം ഇമ്മാനുവൽ ഓർഫനേജ് രജത ജൂബിലി ആഘോഷിച്ചു

മൂക്കന്നൂർ: ആഴകം ഇമ്മാനുവൽ ഓർഫനേജിന്‍റെ സിൽവർ ജൂബിലി ആഘോഷം റോജി എം ജോൺ എംഎൽഎ ഉദ്ഘാടനം ചെയ്തു. മൂക്കന്നൂർ പഞ്ചായത്ത് പ്രസിഡന്‍റ് കെ.വി. ബിബീഷ് അധ്യക്ഷത വഹിച്ചു.

വാർഡ് മെമ്പർമാരായ പി.വി. മോഹനൻ, ജെസ്റ്റി ദേവസിക്കുട്ടി, ജയരാധാകൃഷ്ണൻ എന്നിവർ ആശംസകൾ നേർന്നു. ഓർഫനേജ് ചെയർമാൻ പാസ്റ്റർ ബാബു ഐസക്ക്, ഡയറക്ടർ റവ. വർഗീസ് തുടിയൻ, മുൻ ഇമ്മാനുവൽ സ്കൂൾ പ്രിൻസിപ്പൽ ആലീസ് വർഗീസ് എന്നിവർ ചേർന്ന് ഉപഹാരം ഏറ്റുവാങ്ങി.

ADVERTISEMENT

അഖിലേന്ത്യ മത്സ്യത്തൊഴിലാളി കോണ്‍ഗ്രസ് മാര്‍ച്ചും ധര്‍ണയും

കൊച്ചി: കേന്ദ്ര ബ്ലൂ ഇക്കണോമി നയത്തിന്‍റെ ഭാഗമായി കടലിലെ മത്സ്യ സമ്പത്ത് സ്വകാര്യ കുത്തകകള്‍ക്ക് കൊള്ളയടിക്കാനുള്ള തീരുമാനത്തില്‍ നിന്ന് പിന്മാറണമെന്നാവശ്യപ്പെട്ട് കൊച്ചിയില്‍ മാര്‍ച്ചും ധര്‍ണയും നടത്തുമെന്ന് അഖിലേന്ത്യ മത്സ്യത്തൊഴിലാളി കോണ്‍ഗ്രസ് ഭാരവാഹികള്‍ പത്രസമ്മേളനത്തില്‍ പറഞ്ഞു. രാവിലെ 10ന് എറണാകുളം മറൈന്‍ഡ്രൈവില്‍ നിന്ന് ആരംഭിക്കുന്ന മാര്‍ച്ച് സിഎംഎഫ്ആര്‍ഐക്കു മുന്നില്‍ സമാപിക്കും. തുടര്‍ന്ന് ധര്‍ണ പ്രതിപക്ഷ നേതാവ് വി.ഡി. സതീശന്‍ ഉദ്ഘാടനം ചെയ്യുമെന്ന് സംസ്ഥാന പ്രസിഡന്‍റ് ജി. ലീലാകൃഷ്ണന്‍, സംസ്ഥാന ജനറല്‍ സെക്രട്ടറി എം.എല്‍. സുരേഷ്, ജില്ലാ പ്രസിഡന്‍റ് എ.സി. ക്ലാരന്‍സ് എന്നിവര്‍ പറഞ്ഞു.

ചിലപ്പോള്‍ കത്തും...കോര്‍പറേഷന് തലവേദനയായി എല്‍ഇഡി തെരുവ് വിളക്കുകള്‍

കൊച്ചി: ഊര്‍ജ സംരക്ഷണത്തിനായി നഗര വീഥികളിലെ വഴിവിളക്കുകള്‍ എല്‍ഇഡി സംവിധാനത്തിലേക്ക് മാറ്റുന്ന പദ്ധതി പൂര്‍ത്തീകരണത്തിലേക്ക് അടുക്കുമ്പോഴും പദ്ധതിയുടെ ഭാഗമായി സ്ഥാപിച്ച പകുതിയിലേറെ തെരുവ് വിളക്കുകളും പ്രവര്‍ത്തിക്കുന്നില്ല. കഴിഞ്ഞ ഒരു വര്‍ഷമായി ഈ പ്രശ്‌നം നിലനില്‍ക്കുന്നുണ്ടെന്നാണ് കൗണ്‍സിലര്‍മാരുടെ ആക്ഷേപം. പരാതി ഉയരുന്ന സ്ഥലങ്ങളില്‍ ലൈറ്റുകള്‍ നന്നാക്കുമെങ്കിലും വീണ്ടും പ്രവര്‍ത്തന രഹിതമാകും. കൗണ്‍സിലില്‍ ഭരണപക്ഷമടക്കം ആക്ഷേപം ഉന്നയിച്ചതിനെ തുടർന്ന് ബന്ധപ്പെട്ട വകുപ്പ് ഉദ്യോഗസ്ഥരുമായി ഡെപ്യൂട്ടി മേയര്‍ ഇന്ന് മീറ്റിംഗ് വിളിച്ചിട്ടുണ്ട്. 40 കോടി മുടക്കി കൊച്ചിന്‍ സ്മാര്‍ട്ട് മിഷന്‍ ലിമിറ്റഡിന്‍റെ നേതൃത്വത്തിലാണ് ലൈറ്റുകള്‍ സ്ഥാപിക്കുന്ന പ്രവൃത്തികള്‍ നടക്കുന്നത്. ആദ്യ ഷെഡ്യൂള്‍ പ്രകാരം 2023 ഡിസംബറില്‍ പദ്ധതി പൂര്‍ത്തീകരിക്കേണ്ടതാണ്. പിന്നീട് 2024 ഡിസംബറിലേക്ക് നീട്ടി. നിലവിൽ ഈ മാസം അവസാനത്തോടെ പദ്ധതി പൂര്‍ത്തിയാക്കാന്‍ കഴിയുമെന്നാണ് സിഎസ്എംഎല്‍ അധികൃതര്‍ അറിയിച്ചത്. പൊന്നുരുന്നി, മണപ്പാട്ടിപ്പറമ്പ് റോഡ്, ഗിരിനഗര്‍, ഫോര്‍ട്ടുകൊച്ചി, എരുവേലി, കരിപ്പാലം, മട്ടാഞ്ചേരി, മൂലംകുഴി, ഇടക്കൊച്ചി, പള്ളുരുത്തി തുടങ്ങിയ മിക്ക സ്ഥലങ്ങളിലും എല്‍ഇഡിയിലേക്ക് മാറിയ മിക്ക തെരുവുവിളക്കുകളും പ്രവര്‍ത്തിക്കുന്നില്ല. കെഎസ്ഇബിയുടെ പിന്തുണയില്ലാത്തതാണ് കേടായ ലൈറ്റുകള്‍ നന്നാക്കുന്നത് കാലതാമസം നേരിടുന്നതിന്‍റെ പ്രധാന കാരണമായി സിഎസ്എംഎല്‍ ആരോപിക്കുന്നത്. ഇപ്പോള്‍, പദ്ധതി പൂര്‍ത്തിയാക്കുക എന്നതാണ് ലക്ഷ്യമെന്നും അടുത്ത മാസം മുതല്‍ അറ്റകുറ്റപ്പണികള്‍ക്കായിരിക്കും മുഖ്യ പരിഗണനയെന്നും സിഎസ്എംഎല്‍ ഉദ്യോഗസ്ഥര്‍ പറഞ്ഞു. നഗരത്തിലെ തെരുവ് വിളക്കുകള്‍ എല്‍ഇഡിയിലേക്ക് മാറുന്നതിന് മുന്‍പ് കോർപ റേഷന്‍റെ പ്രതിമാസ വൈദ്യുതി ബില്‍ ഏകദേശം 1.5 കോടി രൂപയായിരുന്നു. 2025 ഏപ്രിലില്‍ ബിൽ 1.24 കോടി രൂപയായും മേയില്‍ 1.33 കോടിയായും ജൂണില്‍ 1.29 കോടിയുമായും കുറഞ്ഞു. പദ്ധതി നടപ്പാക്കി കഴിഞ്ഞാല്‍ വൈദ്യുതി ബില്ലുകള്‍ 40 ശതമാനമായി കുറയ്ക്കാന്‍ കഴിയുമെന്ന് കോര്‍പറേഷന്‍ അവകാശപ്പെടുന്നു. ഇന്ന് യോഗം ചേരും കൊച്ചി: നഗരത്തിലെ തെരുവ് വിളക്കുകള്‍ പ്രവര്‍ത്തിക്കാത്തതുമായി ബന്ധപ്പെട്ട പരാതികളില്‍ പരിഹാരം കാണുന്നതിനായി കൊച്ചി കോര്‍പറേഷനില്‍ ഇന്ന് പ്രത്യേക യോഗം ചേരും. മേയറുടെ അസാന്നിധ്യത്തില്‍ ഡെപ്യൂട്ടി മേയര്‍ കെ.എ. അന്‍സിയയുടെ നേതൃത്വത്തിലാണ് യോഗം. സിഎസ്എംഎലിന്‍റെയും കെഎസ്ഇബിയുടെയും ഉദ്യോഗസ്ഥര്‍, കൗണ്‍സിലര്‍മാര്‍, കൊച്ചി കോര്‍പറേഷന്‍ എന്‍ജിനീയറിംഗ് വിഭാഗം ഉദ്യോഗസ്ഥര്‍ എന്നിവര്‍ പങ്കെടുക്കും.

ജില്ലാ ജയിലില്‍ "പച്ചത്തുരുത്ത്' ഒരുങ്ങുന്നു

കൊച്ചി: ഹരിത കേരളം മിഷന്‍റെ ഒരു തൈ നടാം ജനകീയ കാമ്പയിന്‍റെ ഭാഗമായി കാക്കനാട് ജില്ലാ ജയിലില്‍ പച്ചത്തുരുത്ത് ഒരുങ്ങുന്നു. ജയിലിലെ 40 സെന്‍റ് സ്ഥലത്ത് ഗെയില്‍ ഇന്ത്യ ലിമിറ്റഡ്, ജില്ലാജയില്‍, തൃക്കാക്കര നഗരസഭ എന്നിവരുടെ സംയുക്താഭിമുഖ്യത്തിലാണ് പദ്ധതി നടപ്പിലാക്കുന്നത്. ഗെയില്‍ ഇന്ത്യ ലിമിറ്റഡിന്‍റെ സ്‌പോണ്‍സര്‍ഷിപ്പില്‍ നൂറോളം ഫലവൃക്ഷ തൈകള്‍ പദ്ധതിക്കായി ലഭ്യമാക്കിയിട്ടുണ്ട്. ഒഴിഞ്ഞുകിടക്കുന്ന പൊതു സ്വകാര്യസ്ഥലങ്ങള്‍, പൊതുമേഖലാ വ്യവസായസ്ഥാപനങ്ങളിലെ തരിശുഭൂമി, മാലിന്യ നിക്ഷേപ കേന്ദ്രങ്ങളായി മാറിയ സ്ഥലങ്ങള്‍ എന്നിവിടങ്ങളില്‍ പ്രാദേശികമായി വളരുന്ന മരങ്ങള്‍ നട്ടുവളര്‍ത്തി പ്രാദേശിക ജൈവവൈവിധ്യം സാധ്യമാക്കുന്ന ചെറുകാടുകള്‍ സൃഷ്ടിച്ചെടുക്കുകയാണ് പദ്ധതിയിലൂടെ ലക്ഷ്യമിടുന്നത്. ഉമ തോമസ് എംഎല്‍എ പദ്ധതിയുടെ ഉദ്ഘാടനം നിര്‍വഹിച്ചു. ജില്ലാജയില്‍ സുപ്രണ്ട് എം.എം. ഹാരിസ് അധ്യക്ഷത വഹിച്ച ചടങ്ങില്‍ തൃക്കാക്കര നഗരസഭ ചെയര്‍പേഴ്‌സണ്‍ രാധാമണിപിള്ള മുഖ്യാതിഥിയായി. ഗെയില്‍ (ഇന്ത്യ) ലിമിറ്റഡ് ജനറല്‍ മാനേജര്‍ എം. വിജു, വെല്‍ഫയര്‍ ഓഫീസര്‍ ബേസില്‍, വാര്‍ഡ് കൗണ്‍സിലര്‍ സി.സി. വിജു, ഹരിത കേരളം മിഷന്‍ ജില്ലാ കോ-ഓര്‍ഡിനേറ്റര്‍ എസ്. രഞ്ജിനി, ഹരിതകേരളം മിഷന്‍ റിസോഴ്‌സ് പേഴ്‌സണ്‍ റ്റി.എസ്. ദീപു തുടങ്ങിയവരും പങ്കെടുത്തു.

കെഎസ്ആർടിസി ബസ് അപ്രോച്ചിലേക്ക് ചരിഞ്ഞുനിന്നു, ഒഴിവായത് വൻ ദുരന്തം

ചെറായി: എതിരെ വന്ന വാഹനത്തിനു സൈഡ് കൊടുക്കുന്നതിനിടെ കെഎസ്ആർടി സി തിരുകൊച്ചി ബസ് ചെറായി പാലത്തിന്‍റെ അപ്രോച്ചിലേക്ക് ചരിഞ്ഞു. രണ്ട് യാത്രക്കാർക്ക് നിസാര പരിക്കേറ്റു. ബസ് മറിയാതിരുന്നതിനാൽ വൻ ദുരന്തമാണ് ഒഴിവായത്. ഇന്നലെ രാവിലെ ഒന്പതോടെ ചെറായി പാലത്തിന്‍റെ പടിഞ്ഞാറെ അപ്രോച്ചി ലായിരുന്നു സംഭവം. കൊടുങ്ങല്ലൂരിൽനിന്ന് നിറയെ യാത്രക്കാരുമായി പറവൂർ -ഗോശ്രീ വഴി കാക്കനാട്ടേക്ക് പോകുകയായിരുന്നു ബസാണ് അപകടത്തിൽപ്പെട്ടത്.

എംഡിഎംഎയുമായി അറസ്റ്റിലായ യുട്യൂബര്‍ക്ക് സിനിമാ മേഖലയിലും ലഹരി ഇടപാട്

കൊച്ചി: കൊച്ചിയില്‍ എംഡിഎംഎയുമായി അറസ്റ്റിലായ യുട്യൂബര്‍ക്ക് സിനിമാ മേഖലയിലും ലഹരി ഇടപാട്. അറസ്റ്റിലായ കോഴിക്കോട് ചുങ്കം സ്വദേശിനിയും യുട്യൂബറുമായ റിന്‍സി മുംതാസ്(32) മുഖേന സിനിമ മേഖലയിലുള്ള നിരവധി പേര്‍ ലഹരി വസ്തുക്കള്‍ വാങ്ങിയിരുന്നതായി പോലീസ് കണ്ടെത്തി. ഇവരുടെ പേരുവിരങ്ങള്‍ ശേഖരിച്ച് വരികയാണ്. വരും ദിവസങ്ങളില്‍ ഇവരെ കേന്ദ്രീകരിച്ചും അന്വേഷണം ഉണ്ടായേക്കും. സിനിമയുടെ പ്രമോഷന്‍ ജോലികള്‍ കൈകാര്യം ചെയ്തിരുന്ന റിന്‍സി ഈ ബന്ധങ്ങള്‍ ഉപയോഗിച്ചാണ് സിനിമ പ്രവര്‍ത്തകരുമായി അടുപ്പം സ്ഥാപിച്ചത്. പിന്നീട് ലഹരി ആവശ്യമുള്ളവര്‍ക്ക് കൈമാറുകയായിരുന്നുവെന്നാണ് കണ്ടെത്തല്‍. ഇവരോടൊപ്പം അറസ്റ്റിലായ കല്ലായി സ്വദേശിയും റിന്‍സിയുടെ സുഹൃത്തുമായ യാസര്‍ അറഫാത്തിനും(34) ഈ ലഹരി ഇടപാടുകളില്‍ പങ്കുളളതായാണ് വിവരം. പ്രതികളെ കസ്റ്റഡിയില്‍ വാങ്ങി വിശദമായി ചോദ്യം ചെയ്യാനുള്ള നീക്കത്തിലാണ് പോലീസ്. യുട്യൂബ് വ്ലോഗിന്‍റെ മറവിലാണ് റിന്‍സി നഗരത്തില്‍ ലഹരി ഇടപാടുകള്‍ നടത്തിയിരുന്നത്. ഫ്ലാറ്റ് വാടകയ്‌ക്കെടുത്ത് എംഡിഎംഎ കച്ചവടം ഓപ്പറേഷന്‍ ഡി ഹണ്ടിന്‍റെ ഭാഗമായി കഴിഞ്ഞദിവസം നഗരത്തില്‍ നടത്തിയ വ്യാപക തെരച്ചിലിനിടെയാണ് കാക്കനാട് പാലച്ചുവടില്‍ നിന്നും റിന്‍സി മുംതാസും, യാസര്‍ അറഫാത്തും ഡാന്‍സാഫ് സംഘത്തിന്‍റെ പിടിയിലായത്. പാലച്ചുവട് ഭാഗത്തുള്ള റിന്‍സിയുടെ പേരില്‍ വാടകയ്ക്കെടുത്ത ഫ്ലാറ്റിലാണ് ഇരുവരും എംഡിഎംഎ വില്പന നടത്തിയിരുന്നത്. ഇരുടെ പക്കല്‍ നിന്നും 20.55 ഗ്രാം എംഡിഎംഎയാണ് പിടിച്ചെടുത്തത്. ആവശ്യക്കാര്‍ക്ക് പറയുന്ന സ്ഥലത്ത് ലഹരി എത്തിച്ചു കൊടുത്തിരുന്ന ഇവരെ കാണാന്‍ നിരവധി സന്ദര്‍ശകരും ഫ്ലാറ്റില്‍ വന്നുപോയിരുന്നതായി പോലീസ് കണ്ടെത്തിയിട്ടുണ്ട്. ഇവരുടെ പേരുവിവരങ്ങളും പോലീസ് അന്വേഷിക്കുകയാണ്. ഡി ഹണ്ടിന്‍റെ ഭാഗമായി നടത്തി പരിശോധനയില്‍ ചേരാനെല്ലൂര്‍ മാതിരപ്പിള്ളി മട്ടുമ്മല്‍ ഭാഗത്തുനിന്നും 2.80 ഗ്രാം എംഡിഎംഎയുമായി ഡാന്‍സാഫ് കൊല്ലം പുനലൂര്‍ സ്വദേശി മുഹമ്മദ് റഫീഖ്(28) എന്നയാളെയും അറസ്റ്റ് ചെയ്തു.

എനിക്ക് പേഴ്‌സണല്‍ മാനേജര്‍ ഇല്ല; വ്യാജ വാര്‍ത്തകളില്‍ പ്രതികരണവുമായി ഉണ്ണി മുകുന്ദന്‍

കൊച്ചി: സമൂഹ മാധ്യമങ്ങളിലൂടെ പ്രചരിക്കുന്ന വ്യാജ വാര്‍ത്തകളില്‍ പ്രതികരണവുമായി നടന്‍ ഉണ്ണി മുകുന്ദന്‍. തന്നെ പ്രതിനിധീകരിക്കുന്ന ഒരു പേഴ്‌സനല്‍ മാനേജര്‍ ഇല്ലെന്നും ഒരിക്കലും ഉണ്ടായിട്ടില്ലെന്നും ഉണ്ണി മുകുന്ദന്‍ വ്യക്തമാക്കി. എല്ലാ ഔദ്യോഗിക ആശയവിനിമയങ്ങളും, സഹകരണങ്ങളും, പ്രഫഷണല്‍ കാര്യങ്ങളും താന്‍ നേരിട്ടോ അല്ലെങ്കില്‍ സ്വന്തം നിര്‍മ്മാണ കമ്പനിയായ ഉണ്ണി മുകുന്ദന്‍ ഫിലിംസ്(യുഎംഎഫ്) വഴിയാണ് കൈകാര്യം ചെയ്യുന്നതെന്നും സമൂഹമാധ്യമങ്ങളില്‍ പങ്കുവച്ച കുറിപ്പില്‍ താരം വ്യക്തമാക്കി. തന്നെക്കുറിച്ച് തെറ്റായതോ തെറ്റിദ്ധരിപ്പിക്കുന്നതോ ആയ വിവരങ്ങള്‍ പ്രചരിപ്പിക്കുന്നതില്‍ നിന്ന് വ്യക്തികളോടും പ്ലാറ്റ്‌ഫോമുകളോടും മാറി നില്‍ക്കണമെന്ന് അഭ്യര്‍ഥിക്കുന്നു. അത്തരം തെറ്റായ അവകാശവാദങ്ങള്‍ പ്രചരിപ്പിക്കുന്നത് തുടരുന്നതു കണ്ടാല്‍ അവര്‍ക്കെതിരെ കര്‍ശനമായ നിയമനടപടി സ്വീകരിക്കുമെന്നും കുറിപ്പില്‍ ഉണ്ണി മുകുന്ദന്‍ വ്യക്തമാക്കി. കൊച്ചിയില്‍ എംഎഡിഎംഎയുമായി പിടിയിലായ യുവതി ഉണ്ണി മുകുന്ദന്‍റെ മാനേജര്‍ ആണെന്ന തരത്തിലായിരുന്നു സമൂഹമാധ്യമങ്ങളില്‍ പ്രചരണം നടന്നത്. ഇതോടെയാണ് വിശദീകരണവുമായി നടന്‍ രംഗത്തെത്തിയത്.

നടന്നത് പിടിവലി : ഉണ്ണി മുകുന്ദന്‍ മാനേജരെ മര്‍ദിച്ചിട്ടില്ലെന്ന് കുറ്റപത്രം

കൊച്ചി: മുന്‍ മാനേജറെ മര്‍ദിച്ചിട്ടില്ലെന്ന നടന്‍ ഉണ്ണിമുകുന്ദന്‍റെ വാദങ്ങള്‍ ശരിവച്ച് പോലീസിന്‍റെ കുറ്റപത്രം. പിടിവലിയിലാണ് മുന്‍ മാനേജര്‍ വിബിന്‍ കുമാറിന് പരിക്കേറ്റതെന്നും കൂളിംഗ് ഗ്ലാസ് വലിച്ചെറിഞ്ഞ് നാശനഷ്ടമുണ്ടാക്കിയതായുമാണ് ഇന്‍ഫോപാര്‍ക്ക് പോലീസിന്‍റെ കണ്ടെത്തല്‍. ഇതോടെ നേരത്തെ ചുമത്തിയ ജാമ്യമില്ലാ വകുപ്പുകൾ ഒഴിവാക്കി കേസില്‍ പോലീസ് കോടതിയില്‍ കുറ്റപത്രം സമര്‍പ്പിച്ചു. ഉണ്ണിമുകുന്ദന്‍റെ കാക്കനാട്ടെ ഫ്ലാറ്റിലെത്തി പോലീസ് ഇയാളെ ചോദ്യം ചെയ്തിരുന്നു. വിബിനെ മര്‍ദിച്ചിട്ടില്ലെന്നും കണ്ണട വലിച്ചെറിഞ്ഞത് വൈകാരിക പ്രകടനം മാത്രമെന്നുമാണ് ഉണ്ണി മുകുന്ദന്‍ മൊഴി നല്‍കിയത്. ടൊവിനോ ചിത്രമായ നരിവേട്ടയെ പ്രശംസിച്ച് സമൂഹമാധ്യമങ്ങളില്‍ പോസ്റ്റിട്ടതിന് തന്നെ മര്‍ദിച്ചുവെന്നായിരുന്നു വിബിന്‍റെ പരാതി. സിസിടിവി ദൃശ്യങ്ങളടക്കം പരിശോധിച്ചാണ് മര്‍ദനമുണ്ടായിട്ടില്ലെന്ന ഇന്‍ഫോപാര്‍ക്ക് പോലീസിന്‍റെ കണ്ടെത്തല്‍.

കൈക്കൂലി കേസ്: ഇഡി ഉദ്യോഗസ്ഥന് മുന്‍കൂര്‍ ജാമ്യം

കൊച്ചി: വിജിലന്‍സ് രജിസ്റ്റര്‍ ചെയ്ത കൈക്കൂലി കേസില്‍ പ്രതിയായ എന്‍ഫോഴ്‌സ്‌മെന്‍റ് ഡയറക്ടറേറ്റിലെ (ഇഡി) മുതിര്‍ന്ന ഉദ്യോഗസ്ഥന്‍ ശേഖര്‍ കുമാറിന് ഹൈക്കോടതി മുന്‍കൂര്‍ ജാമ്യം അനുവദിച്ചു. എന്‍ഫോഴ്‌സ്‌മെന്‍റ് ഡയറക്ടറേറ്റിന്‍റെ കൊച്ചി ഓഫീസില്‍ അസിസ്റ്റന്‍റ് ഡയറക്ടര്‍ ആയിരിക്കേ കളളപ്പണക്കേസ് ഒതുക്കിത്തീര്‍ക്കാന്‍ ഇടനിലക്കാര്‍ മുഖേന കോഴ ആവശ്യപ്പെട്ടെന്നാണ് ആരോപണം. ചാര്‍ട്ടേഡ് അക്കൗണ്ടന്‍റ് അടക്കം മൂന്നുപേരെ നേരത്തെ അറസ്റ്റുചെയ്തിരുന്നു. ഒന്നാം പ്രതിയായ ശേഖര്‍ കുമാറിനെതിരെ തെളിവ് ശേഖരണം തുടരുന്നുവെന്നായിരുന്നു വിജിലന്‍സ് നിലപാട്. എന്നാല്‍ താന്‍ അന്വേഷിക്കുന്ന കളളപ്പണക്കേസിലെ പ്രതിയുടെ മൊഴിയുടെ അടിസ്ഥാനത്തിലാണ് വിജിലന്‍സ് കേസ് എന്നായിരുന്നു ശേഖര്‍ കുമാറിന്‍റെ നിലപാട്. ആരോപണത്തിന് പിന്നാലെ ഉദ്യോഗസ്ഥനെ ഷില്ലോങ്ങിലേക്ക് സ്ഥലം മാറ്റിയിരുന്നു.

ഓട്ടത്തിനിടെ റോഡ് റോളറിന്‍റെ ചക്രം ഊരിമാറി

പള്ളുരുത്തി: ഓട്ടത്തിനിടെ റോഡ് റോളറിന്‍റെ ചക്രം ഊരിമാറി. ഡ്രൈവറും നാട്ടുകാരും ചേർന്ന് ഊരിമാറിയ ചക്രം തടഞ്ഞുനിർത്തി റോഡരികിലേക്ക് തള്ളി നീക്കിയതിനാൽ വലിയ അപകടം ഒഴിവായി. പള്ളുരുത്തി സുറിയാനി പള്ളിയുടെ മുന്നിൽ ഇന്നലെ രാവിലെ ഒമ്പതോടെയായിരുന്നു സംഭവം. തോപ്പുംപടിയിൽ നിന്ന് വരികയായിരുന്ന റോഡ് റോളർ പള്ളുരുത്തി ഇഎസ്ഐ റോഡിലേക്ക് തിരിയുമ്പോൾ ഷാഫ്റ്റ് ഒടിയുകയും ചക്രം ഊരിമാറുകയുമായിരുന്നു. ചക്രം മാറിയതോടെ വാഹനം ഒരു വശം കുത്തി റോഡിലേക്ക് ചരിഞ്ഞു. ടി.ജെ. മത്തായി എന്ന കരാർ കമ്പനിയുടേതാണ് റോഡ് റോളർ.

ദേശീയപാതയിലെ രൂക്ഷമായ ഗതാഗതക്കുരുക്ക് : ചീഫ് സെക്രട്ടറിയുടെ ഇടപെടല്‍ ആവശ്യപ്പെട്ട് ഹൈക്കോടതി

കൊച്ചി: സംസ്ഥാനത്തെ ദേശീയപാതയിലെ രൂക്ഷമായ ഗതാഗതക്കുരുക്ക് ഒഴിവാക്കാന്‍ ചീഫ് സെക്രട്ടറിയുടെ ഇടപെടല്‍ ആവശ്യപ്പെട്ട് ഹൈക്കോടതി. പദ്ധതി ഡയറക്ടര്‍, കരാറുകാരന്‍, ബന്ധപ്പെട്ട സര്‍ക്കാര്‍ ഉദ്യോഗസ്ഥര്‍ എന്നിവരടക്കം ബന്ധപ്പെട്ടവെര ഉള്‍പ്പെടുത്തി ചീഫ് സെക്രട്ടറി യോഗം വിളിക്കണമെന്ന് ചീഫ് ജസ്റ്റീസ് നിധിന്‍ ജാംദാര്‍, ജസ്റ്റീസ് ബസന്ത് ബാലാജി എന്നിവരടങ്ങുന്ന ഡിവിഷന്‍ ബെഞ്ച് നിര്‍ദേശിച്ചു. ഗതാഗതക്കുരുക്ക് പ്രശ്‌നം ഗുരുതരമായ വിഷയമാണെന്നും പ്രശ്‌ന പരിഹാരത്തിന് ബന്ധപ്പെട്ടവര്‍ മുന്‍ഗണന നല്‍കണമെന്നും വ്യക്തമാക്കിയ കോടതി തുടര്‍ന്ന് ഹര്‍ജി വീണ്ടും 10 ദിവസത്തിനുശേഷം പരിഗണിക്കാന്‍ മാറ്റി. ബന്ധപ്പെട്ട ഉദ്യോഗസ്ഥരടങ്ങുന്ന ഉന്നതതല യോഗം നടത്തേണ്ടത് ആവശ്യമാണെന്ന് സര്‍ക്കാറിന് വേണ്ടി സ്റ്റേറ്റ് അറ്റോര്‍ണി കോടതിയെ അറിയിച്ചിരുന്നു. പാലിയേക്കര ടോള്‍ പിരിവ് നിര്‍ത്തിവച്ച് കളക്ടര്‍ പുറപ്പെടുവിച്ച ഉത്തരവ് പുനഃസ്ഥാപിക്കണമെന്നാവശ്യപ്പെട്ട് ഒ.ജെ. ജനീഷ് നല്‍കിയ ഹര്‍ജിയാണ് കോടതിയുടെ പരിഗണനയിലുള്ളത്. ടോള്‍ പിരിവ് നിര്‍ത്തിവയ്ക്കുന്നത് ജനപ്രിയ നടപടിയാണെങ്കിലും ഇതു മൂലം കരാറുകാരനുണ്ടാകുന്ന നഷ്ടം ആരാണ് നികത്തുകയെന്ന് കോടതി ചോദിച്ചു. ഇക്കാര്യത്തില്‍ കളക്ടര്‍ക്ക് നിയമ പ്രകാരം ഇതിന് അധികാരമുണ്ടോയെന്നാണ് പരിഗണിക്കേണ്ടതെന്നും കോടതി പറഞ്ഞു. കളക്ടറുടെ നടപടി ബിഎന്‍എസ്എസ് പ്രകാരമാണെന്ന് സര്‍ക്കാര്‍ അറിയിച്ചു. ടോള്‍ പിരിവ് നിര്‍ത്തുന്നതല്ലാതെ മറ്റു മാര്‍ഗങ്ങളില്ലേയെന്നും കോടതി ആരാഞ്ഞു.

വന്യമൃഗ സാന്നിധ്യം : വനംവകുപ്പ് ജാഗ്രത പുലർത്തണം: താലൂക്ക് വികസന സമിതി

കോതമംഗലം: കോതമംഗലം താലൂക്കിലെ വനമേഖലയോട് ചേർന്നുവരുന്ന പല പ്രദേശങ്ങളിലും വന്യമൃഗങ്ങളുടെ സാന്നിധ്യം പതിവായി കണ്ടുവരുന്ന സാഹചര്യത്തിൽ വനം വകുപ്പിന്‍റെ കൃത്യമായ നിരീക്ഷണവും ജാഗ്രതയുമുണ്ടാകണമെന്ന് താലൂക്ക് വികസന സമിതി യോഗം. വന്യമൃഗശല്യം തടയുന്നതിന് പ്രഖ്യാപിച്ചിട്ടുള്ള ഫെൻസിംഗ്, ഹാങ്ങിംഗ് ഫെൻസിംഗ്, ട്രഞ്ച് എന്നീ പദ്ധതികളുടെ കാര്യക്ഷമവും സമയബന്ധിതവുമായ പൂർത്തീകരണം ബന്ധപ്പെട്ട ഡിഎഫ്ഒമാർ ഉറപ്പുവരുത്തണമെന്നും യോഗം നിർദേശിച്ചു. കൊച്ചി-ധനുഷ്കോടി ദേശീയപാത കടന്നുപോകുന്ന കോതമംഗലം മണ്ഡലത്തിലെ പല പ്രദേശങ്ങളിലും രൂപപ്പെടുന്ന വെള്ളക്കെട്ട് അടിയന്തരമായി പരിഹരിക്കാൻ ദേശീയപാത അധികൃതർ ഫലപ്രദമായ നടപടികൾ സ്വീകരിക്കണമെന്നും യോഗം ആവശ്യപ്പെട്ടു. കാല വർഷക്കെടുതിയിലുണ്ടായ നാശനഷ്ടങ്ങളെക്കുറിച്ച് യോഗം വിശദമായി ചർച്ച ചെയ്തു. വീടുകൾക്കും കൃഷി ഉൾപ്പെടെ ഉണ്ടായിട്ടുള്ള നാശനഷ്ടങ്ങൾക്ക് സമയബന്ധിതമായി തന്നെ നഷ്ടപരിഹാരം ലഭ്യമാക്കാൻ ബന്ധപ്പെട്ട വകുപ്പുകൾ പ്രത്യേകമായി ശ്രദ്ധിക്കണമെന്ന് യോഗം നിർദേശിച്ചു. കുട്ടന്പുഴ-വെള്ളാരംകുത്ത്-മണികണ്ഠൻചാൽ കെഎസ്ആർടിസി ബസ് സർവീസും, കോതമംഗലം നെല്ലിമറ്റം-വാളാച്ചിറ-പൈങ്ങോട്ടൂർ കെഎസ്ആർടിസി ബസ് സർവീസും മുടങ്ങുന്നില്ലെന്ന് അധികൃതർ ഉറപ്പുവരുത്തണമെന്ന് യോഗം നിർദേശിച്ചു. കോതമംഗലം മിനി സിവിൽ സ്റ്റേഷൻ കോണ്‍ഫറൻസ് ഹാളിൽ ചേർന്ന യോഗത്തിൽ ആന്‍റണി ജോണ്‍ എംഎൽഎ അധ്യക്ഷത വഹിച്ചു. യോഗത്തിൽ നഗരസഭാ വൈസ് ചെയർപേഴ്സണ്‍ സിന്ധു ഗണേശൻ, തഹസിൽദാർ എം. അനിൽകുമാർ, കോട്ടപ്പടി പഞ്ചായത്ത് പ്രസിഡന്‍റ് മിനി ഗോപി, കുട്ടന്പുഴ പഞ്ചായത്ത് പ്രസിഡന്‍റ് കാന്തി വെള്ളക്കയ്യൻ, കീരംപാറ പഞ്ചായത്ത് പ്രസിഡന്‍റ് എം.പി ഗോപി, രാഷ്ട്രീയ പാർട്ടി പ്രതിനിധികളായ എം.എസ്. എൽദോസ്, ആന്‍റണി പാലക്കുഴി, ബേബി പൗലോസ്, സാജൻ അന്പാട്ട്, തോമസ് വട്ടപ്പാറ എന്നിവർ പങ്കെടുത്തു.

വടാട്ടുപാറയിൽ ഉമ്മൻ ചാണ്ടി പാലിയേറ്റീവ് ഫൗണ്ടേഷൻ

കോതമംഗലം: വടാട്ടുപാറയിൽ ഉമ്മൻ ചാണ്ടി പാലിയേറ്റീവ് ഫൗണ്ടേഷൻ രൂപീകരിച്ചു. വടാട്ടുപാറ രാഖീസ് ഗ്രീൻ പാർക്കിൽ നടന്ന യോഗം പോത്താനിക്കാട് ഫാർമേഴ്സ് ബാങ്ക് പ്രസിഡന്‍റ് ബോബൻ ജേക്കബ് ഉദ്ഘാടനം ചെയ്തു. ബ്ലോക്ക് പഞ്ചായത്ത് സ്ഥിരംസമിതി അംഗം ജയിംസ് കോറന്പേൽ അധ്യക്ഷത വഹിച്ചു. പി.ഐ. പൈലി, സാബു ജോസ് എന്നിവർ പ്രസംഗിച്ചു. വടാട്ടുപാറ മേഖല ചെയർമാനായി ജോബി കാരാംഞ്ചേരിയെ തെരഞ്ഞൈടുത്തു.

ചന്പമല-വെങ്കുളം ഫ്ളാറ്റ് : പദ്ധതി വൈകുന്നതിനെതിരേ കോണ്‍ഗ്രസ് പ്രതിഷേധം

കൂത്താട്ടുകുളം: ചന്പമല - വെങ്കുളം ഫ്ളാറ്റ് ഭവന പദ്ധതി നടപ്പാക്കാത്തതിനെതിരേ കോണ്‍ഗ്രസ് പ്രതിഷേധം ശക്തമാകുന്നു. കോണ്‍ഗ്രസ് നേതാക്കളുടെ നേതൃത്വത്തിൽ പദ്ധതി പ്രദേശത്ത് റീത്തുവച്ച് പ്രതിഷേധിച്ചു. വെങ്കുളത്ത് നടന്ന പ്രതിഷേധയോഗം എഐസിസി അംഗം ജെയ്സണ്‍ ജോസഫ് ഉദ്ഘാടനം ചെയ്തു. കഴിഞ്ഞ നാലര വർഷത്തിനിടയിൽ കൂത്താട്ടുകുളം നഗരസഭാ ഭരണസമിതി ഒരു പദ്ധതി പോലും നടപ്പാക്കിയിട്ടില്ല. നിർമാണത്തിന് മുഴുവൻ തുകയും നൽകാമെന്ന് അനൂപ് ജേക്കബ് എംഎൽഎ പല പ്രാവശ്യം അറിയിച്ചിട്ടും സ്റ്റേഡിയം പണി പൂർത്തീകരിക്കാനാവാത്തതും, കൂത്താട്ടുകുളത്തെ റിംഗ് റോഡ് പദ്ധതി, നഗരസഭാ കാര്യാലയം, നഗരസഭാ ഷോപ്പിംഗ് കോംപ്ലക്സ് തുടങ്ങിയ പദ്ധതികളൊന്നും നടപ്പാക്കാനാവാത്തത് ഭരണനേതൃത്വത്തിന്‍റെ കഴിവുകേടാണെന്നും ജെയ്സൻ ജോസഫ് പറഞ്ഞു. പിറവം ബ്ലോക്ക് കോണ്‍ഗ്രസ് പ്രസിഡന്‍റ് പി.സി. ജോസ്, മണ്ഡലം പ്രസിഡന്‍റ് റെജി ജോണ്‍, നഗരസഭാ പ്രതിപക്ഷ നേതാവ് പ്രിൻസ് പോൾ ജോണ്‍, നഗരസഭാംഗങ്ങളായ പി.സി. ഭാസ്ക്കരൻ, ബോബൻ വർഗീസ്, സിബി കൊട്ടാരം, ജിജോ ടി. ബേബി, സി.എ തങ്കച്ചൻ, ലിസി ജോസ്, ടി.എസ് സാറ, മറ്റ് നേതാക്കളായ ജിനീഷ് വൻനിലം, കെ.സി ഷാജി, വിശ്വനാഥൻ, സാബു മേച്ചേരി, എ.ജെ കാർത്തിക്, അമൽ മോഹൻ തുടങ്ങിയവർ പ്രസംഗിച്ചു.

കെഎസ്‌യു ജില്ലാ വൈസ് പ്രസിഡന്‍റിനെ എസ്എഫ്ഐ പ്രവർത്തകർ മർദിച്ചതായി പരാതി

മൂവാറ്റുപുഴ: മൂവാറ്റുപുഴ നിർമല കോളജിൽ കെഎസ്‌യു ജില്ലാ വൈസ് പ്രസിഡന്‍റിനെ എസ്എഫ്ഐ പ്രവർത്തകർ മർദിച്ചതായി പരാതി. കെഎസ്‌യു ജില്ലാ വൈസ് പ്രസിഡന്‍റ് അമൽ എൽദോസിനാണ് മർദനമേറ്റത്. എസ്എഫ്ഐ സംസ്ഥാന വ്യാപകമായി ആഹ്വാനം ചെയ്ത പഠിപ്പുമുടക്ക് സമരത്തിന്‍റെ ഭാഗമായി കോളജിലെ കെഎസ്‌യു പ്രവർത്തകരായ വിദ്യാർഥികളെ എസ്എഫ്ഐ പ്രവർത്തകരും, പാർട്ടി പ്രവർത്തകരും ചേർന്ന് മർദിച്ചതറിഞ്ഞെത്തിയ കെഎസ്‌യു പ്രവർത്തകരെ യാതൊരു പ്രകോപനവും ഇല്ലാതെ എസ്എഫ്ഐ പ്രവർത്തകർ മർദിക്കുകയായിരുന്നുവെന്ന് അമൽ പറഞ്ഞു. കോളജിനു പുറത്തുനിന്നുള്ള പാർട്ടി പ്രവർത്തകരും ചേർന്നാണ് മർദിച്ചതെന്നും കെഎസ്‌യു പ്രവർത്തകർ പുറത്ത് കടക്കാതിരിക്കാൻ എസ്എഫ്ഐ പ്രവർത്തകർ ഗേറ്റുകൾ അടച്ചുപൂട്ടിയെന്നും തുടർന്ന് പോലീസ് എത്തിയാണ് പുറത്തുകടന്നതെന്നും അമൽ എൽദോസ് പറഞ്ഞു. പരിക്കേറ്റ അമൽ എൽദോസ് മൂവാറ്റുപുഴയിലെ സ്വകാര്യ ആശുപത്രിയിൽ ചികിത്സതേടി.

പണിമുടക്ക് ദിനത്തിലെ അതിക്രമം: ദേശീയ മനുഷ്യാവകാശ കമ്മീഷനിൽ പരാതി

മൂവാറ്റുപുഴ: ദേശീയ പണിമുടക്കിന്‍റെ പേരിൽ സമരാനുകൂലികൾ കെഎസ്ആർടിസി ബസിന്‍റെ ചില്ലു തകർക്കുകയും വാഹനങ്ങൾ തടഞ്ഞ് ഭീഷണി മുഴക്കുകയും മാധ്യമ പ്രവർത്തകനെ ആക്രമിക്കുകയും ചെയ്ത സംഭവത്തിൽ ദേശീയ മനുഷ്യാവകാശ കമ്മീഷനിൽ പരാതി. സംഭവങ്ങൾ കുറ്റകരമായ മനുഷ്യാവകാശ ലംഘനമാണെന്നു കാണിച്ച് പൊതുപ്രവർത്തകനായ മുണ്ടയ്ക്കൽ എം.ജെ. ഷാജിയാണ് കമ്മീഷന് പരാതി നൽകി. സിഐടിയു ഏരിയാ സെക്രട്ടറി, എഐടിയുസി മണ്ഡലം സെക്രട്ടറി ഉൾപ്പെടെ സംയുക്ത ട്രേഡ് യൂണിയൻ നേതാക്കളെ എതിർകക്ഷികളാക്കിയാണ് ഷാജി കമ്മീഷന് പരാതി നൽകിയിരിക്കുന്നത്. സംസ്ഥാനത്തെ നിരവധിയിടങ്ങളിൽ കടന്നുകയറ്റങ്ങളും മനുഷ്യാവകാശ ലംഘനങ്ങളും അരങ്ങേറിയിട്ടുണ്ട്. ഇതും അന്വേഷണ പരിധിയിൽ കൊണ്ടുവരണമെന്നും പരാതിയിൽ പറയുന്നു.

വോളിബോളിൽ മിന്നും ജയവുമായി വിമലഗിരി ഇന്‍റർനാഷണൽ സ്കൂൾ

മൂവാറ്റുപുഴ: വിമലഗിരി ഇന്‍റർനാഷണൽ സ്കൂളിന് വോളിബോൾ ചാന്പ്യൻഷിപ്പിൽ മിന്നും ജയം. ഐസിഎസ്ഇ എറണാകുളം സോണ്‍ വോളിബോൾ ചാന്പ്യൻഷിപ്പിൽ അണ്ടർ 17, അണ്ടർ 14 വിഭാഗങ്ങളിലാണ് വിമലഗിരി ഇന്‍റർനാഷനൽ സ്കൂൾ ചാന്പ്യന്മാരായത്. വിമല സെൻട്രൽ സ്കൂൾ പെരുന്പാവൂർ, ജ്ഞാനോദയം സെൻട്രൽ സ്കൂൾ കാലടി എന്നിവരെ തുടർച്ചയായ രണ്ടു സെറ്റുകൾക്ക് പരാജയപ്പെടുത്തിയാണ് വിമലഗിരി കീരിടം നേടിയത്.

ശ്രേഷ്ഠ കാതോലിക്കാ ബാവയ്ക്ക് സ്വീകരണം നൽകി

കോതമംഗലം: ശ്രേഷ്ഠ കാതോലിക്ക ബസേലിയോസ് ജോസഫ് ബാവയ്ക്ക് ചേലാട് സെന്‍റ് ഗ്രിഗോറിയോസ് ഡെന്‍റൽ കോളജിന്‍റെ ആഭിമുഖ്യത്തിൽ സ്വീകരണം നൽകി. അനുമോദന സമ്മളനം മന്ത്രി റോഷി അഗസ്റ്റിൻ ഉദ്ഘാടനം ചെയ്തു. ഏലിയാസ് മാർ യൂലിയോസ് മെത്രാപ്പോലീത്ത അധ്യക്ഷത വഹിച്ചു. യൂഹാനോൻ മാർ തെയോഡോഷ്യസ് മെത്രാപ്പോലീത്ത മുഖ്യപ്രഭാഷണം നടത്തി. മെത്രാപ്പോലീത്തമാരായ മാത്യൂസ് മോർ അഫ്രേം, ഏലിയാസ് മാർ അത്താനാസിയോസ്, ഡീൻ കുര്യാക്കോസ് എംപി, ആന്‍റണി ജോണ്‍ എംഎൽഎ, കോളജ് ഡയറക്ടർ തന്പു ജോർജ് തുകലൻ, ട്രസ്റ്റ് സെക്രട്ടറി ടി.യു. കുരുവിള, യാക്കോബായ സഭ വൈദിക ട്രസ്റ്റി ഫാ. റോയി കട്ടച്ചിറ, സെക്രട്ടറി ജേക്കബ് സി. മാത്യു, പ്രിൻസിപ്പൽ ഡോ. ജെയിൻ മാത്യു, വൈസ് പ്രിൻസിപ്പൽ ഡോ. ടീന ജേക്കബ്, എംഎ കോളജ് അസോസിയേഷൻ സെക്രട്ടറി ഡോ. വിന്നി വർഗീസ്, ജില്ലാ പഞ്ചായത്തംഗം കെ.കെ ദാനി, പിണ്ടിമന പ്രഞ്ചായത്ത് പ്രസിഡന്‍റ് ജെസി സാജു, കെ.എ. തോമസ്, പ്രഫ. കെ.പി. തോമസ്, പ്രഫ. എം.എ. പൗലോസ്, പ്രഫ. ബേബി എം. വർഗീസ് എന്നിവർ പ്രസംഗിച്ചു.

പണിമുടക്കിനിടെ അക്രമം: പ്രതികളെ റിമാൻഡ് ചെയ്തു

മൂവാറ്റുപുഴ: പൊതുപണിമുടക്ക് ദിനത്തിൽ മൂവാറ്റുപുഴ നഗരത്തിൽ മാധ്യമ പ്രവർത്തകനെ ആക്രമിക്കുകയും കെഎസ്ആർടിസി ബസിന്‍റെ ചില്ല് തകർക്കുകയും ചെയ്ത കേസിൽ പോലീസ് അറസ്റ്റ് ചെയ്ത മൂന്നുപേരെ കോടതിയിൽ ഹാജരാക്കി റിമാൻഡ് ചെയ്തു. പുളിഞ്ചോട് മറ്റത്തിൽ രാജഗോപാലൻ, പാലത്തിങ്കൽ ഷുക്കൂർ, രണ്ടാർ കാന്പകാലായിൽ അജാസ് എന്നിവരെയാണ് റിമാൻഡ് ചെയ്തത്. സമരാനുകൂലികൾ കെഎസ്ആർടിസി ബസിന്‍റെ ചില്ല് തകർത്ത ദൃശ്യങ്ങൾ ചിത്രീകരിക്കുന്നതിനിടെയാണ് പ്രാദേശിക മാധ്യമ പ്രവർത്തകൻ അനൂപ് സത്യനെ സംഘം ആക്രമിച്ചത്. മൂവാറ്റുപുഴ സ്വകാര്യ ആശുപത്രിയിൽ ചികിത്സ തേടിയ അനൂപ് മൂവാറ്റുപുഴ പോലീസ് സ്റ്റേഷനിൽ പരാതി നൽകുകയായിരുന്നു. സിഐ ബേസിൽ തോമസിന്‍റെ നേതൃത്വത്തിലുള്ള പോലീസ് സംഘം പ്രതികളെ ഉടൻ പിടികൂടിയിരുന്നു.

‘എന്‍റെ നാട് ’സോഷ്യൽ ഓഡിറ്റിംഗ് ഉദ്ഘാടനം നാളെ

കോതമംഗലം: പത്താം വർഷത്തിലേക്ക് കടക്കുന്ന എന്‍റെ നാട് ജനകീയ കൂട്ടായ്മയുടെ പ്രവർത്തനങ്ങൾ സോഷ്യൽ ഓഡിറ്റിംഗിലേക്ക്. പാലിയേറ്റീവ് കെയർ, ഭക്ഷ്യസുരക്ഷാ മാർക്കറ്റ്, കർഷക വിപണി, എഡ്യൂകെയർ, വിവിധ ക്ഷേമ പെൻഷനുകൾ തുടങ്ങി 30ൽ അധികം മേഖലകളിലെ 100പരം പദ്ധതികളുടെ ഓഡിറ്റിംഗാണ് നടക്കുന്നത്. സംസ്ഥാന ആസൂത്രണ ബോർഡ് മുൻ അംഗം സി.പി. ജോണ്‍ നാളെ സോഷ്യൽ ഓഡിറ്റ് ഉദ്ഘാടനം ചെയ്യും. ഒരു മാസം നീളുന്ന വിപുലമായ സോഷ്യൽ ഓഡിറ്റിന് നേതൃത്വം കൊടുക്കുന്നത് തൃക്കാക്കര ഭാരതമാതാ കോളജ് സോഷ്യൽ വർക്ക് വിഭാഗമാണ്. പദ്ധതികളുടെ ഫലപ്രാപ്തിയും കുറവും, അടിയന്തര ഇടപെടൽ ആവശ്യമുള്ള മേഖലകളും തിരിച്ചറിയുക എന്നതാണ് സോഷ്യൽ ഓഡിറ്റിലൂടെ ലക്ഷ്യം വയ്ക്കുന്നതെന്ന് എന്‍റെ നാട് ചെയർമാൻ ഷിബു തെക്കുംപുറം പറഞ്ഞു. പദ്ധതികൾ, ഗുണഭോക്താക്കൾ, സ്വാധീനം, ഫലപ്രാപ്തി എന്നിവ ശാസ്ത്രീയമായി തിട്ടപ്പെടുത്തുകയാണ് ചെയ്യുന്നത്, സോഷ്യൽ ഓഡിറ്റിന് നേതൃത്വം നൽകുന്ന തൃക്കാക്കര ഭാരതമാതാ കോളജ് സോഷ്യൽ വർക്ക് വിഭാഗത്തിലെ ഡോ. ഷീന രാജൻ ഫിലിപ്പ് വിശദീകരിച്ചു. കോതമംഗലത്തെ മുഴുവൻ വീടുകളും സന്ദർശിച്ച് ഓരോ കുടുംബത്തിന്‍റെയും ആവശ്യകതകൾ മനസിലാക്കുന്ന വിശദമായ ഒരു ഫീൽഡ് സർവേ അടുത്ത് എന്‍റെ നാട് പൂർത്തിയാക്കിയിരുന്നു. നാടിന്‍റെ എല്ലാ കോണിലും നടന്നെത്തി മുഴുവൻ കുടുംബങ്ങളും മനുഷ്യരുമായി സംവദിക്കുന്ന ഗാന്ധിദർശൻ ജനസന്പർക്കയാത്ര കോതമംഗലത്ത് നടന്നു കൊണ്ടിരിക്കുന്നു. അതിനിടയിലാണ് സോഷ്യൽ ഓഡിറ്റ് പ്രക്രിയ. അംഗങ്ങളുടെ എണ്ണമെടുത്താൽ കേരളത്തിൽ പ്രാദേശിക തലത്തിലുള്ള ഏറ്റവും വലിയ ജനകീയ കൂട്ടായ്മയാണ് ഇപ്പോൾ എന്‍റെ നാട്. വാർഡുതലം മുതലുള്ള വളരെ മികച്ച ജനകീയ സംഘടനാ സംവിധാനവും സുസജ്ജമായ ഓഫീസ് സെക്രട്ടേറിയറ്റും എന്‍റെ നാടിനുണ്ട്.

എംഡിഎംഎയുമായി യുവാവ് പിടിയിൽ

മൂവാറ്റുപുഴ: എംഡിഎംഎയുമായി യുവാവ് എക്സൈസ് പിടിയിൽ. പേഴയ്ക്കാപ്പിള്ളി തണ്ടിയേക്കൽ ഷാമോ(28) നെയാണ് 1.42 ഗ്രാം കഞ്ചാവുമായി പേഴയ്ക്കാപ്പിള്ളിയിൽ മൂവാറ്റുപുഴ എക്സൈസ് സിഐ ജി. കൃഷ്ണ കുമാറിന്‍റെ നേതൃത്വത്തിലുള്ള സംഘം അറസ്റ്റു ചെയ്തത്. എംഡിഎംഎ ഉപയോഗിക്കുന്ന പ്രതികളിൽ നിന്ന് ലഭിച്ച വിവരത്തെ തുടർന്നാണ് മുൻപും എംഡിഎംഎ കേസിൽ പ്രതിയായിരുന്ന ഷാമോനെ എക്സൈസ് പിടികൂടിയത്. എക്സൈസ് സംഘത്തെ കണ്ട് ഓടി രക്ഷപ്പെടാൻ ശ്രമിച്ച പ്രതി കൈയിലുണ്ടായിരുന്ന എംഡിഎംഎ സമീപത്തുള്ള കഐസ്ഇബിയുടെ മതിൽകെട്ടിനുള്ളിലേക്ക് വലിച്ചെറിയുകയായിരുന്നു. തുടർന്ന് നാട്ടുകാരും എക്സൈസ് സംഘവും നടത്തിയ തെരച്ചിലിനൊടുവിലാണ് എംഡിഎംഎ കണ്ടെത്തിയത്. പ്രതിയുടെ മൊബൈൽ ഫോണും എക്സൈസ് പിടിച്ചെടുത്തു. പ്രതി ലഹരി ഇടപാട് നടത്തുവാൻ മറ്റുള്ളവരുമായി ബന്ധപ്പെടുന്ന ഫോണ്‍ സംഭാഷണവും എക്സൈസിന് ലഭിച്ചിട്ടുണ്ട്. പെരുന്പാവൂർ, പേഴയ്ക്കാപ്പിള്ളി ഭാഗങ്ങളിൽ എംഡിഎംഎ വില്പന നടത്തുന്നയാളാണ് പ്രതിയെന്നും ബാംഗ്ലൂരിൽ നിന്നുമാണ് എംഡിഎംഎ എത്തിക്കുന്നതെന്നും എക്സൈസ് ഇൻസ്പെക്ടർ ജി. കൃഷ്ണകുമാർ പറഞ്ഞു. പ്രിവന്‍റീവ് എക്സൈസ് ഓഫീസർമാരായ അജയകുമാർ, ഷബീർ, സിവിൽ എക്സൈസ് ഓഫീസർമാരായ മാഹിൻ, രഞ്ജിത്ത്, അനുരാജ്, ബിജു ഐസക്, വനിത എക്സൈസ് ഓഫീസർ അനിത എന്നിവരുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.

ശോഭന സ്കൂൾ ജംഗ്ഷനിൽ വാഹനങ്ങളുടെ കൂട്ടയിടി

കോതമംഗലം: വിദ്യാർഥികൾ സഞ്ചിരിച്ചിരുന്ന ഓട്ടോറിക്ഷയിൽ ഇടിക്കാതിരിക്കാൻ പെട്ടെന്ന് ബ്രേക്ക് ചെയ്ത കാറിനു പിന്നിൽ മറ്റൊരു കാറും സ്വകാര്യ ബസും ഇടിച്ചെങ്കിലും തലനാരിഴയ്ക്ക് അപകടം ഒഴിവായി. ദേശീയപാതയിൽ ശോഭന സ്കൂൾ ജംഗ്ഷനിൽ ഇന്നലെ രാവിലെയായിരുന്നു അപകടം. വിദ്യാർഥികളുമായി സ്കൂളിലേക്ക് പോകുകയായിരുന്ന ഓട്ടോറിക്ഷയിൽ ഇടിക്കാതിരിക്കാൻ പെട്ടെന്ന് ബ്രേക്കിട്ട കാറിൽ പിന്നിലുണ്ടായിരുന്ന മറ്റൊരു കാറും, അതിന് പിന്നിൽ സ്വകാര്യ ബസും ഇടിക്കുകയായിരുന്നു. ഇതോടെ മൂന്ന് വാഹനങ്ങൾക്കും കേടുപാടു സംഭവിച്ചു. യാത്രക്കാർക്ക് ആർക്കും പരിക്കില്ല. തലനാരിഴ വ്യത്യാസത്തിലാണ് വിദ്യാർഥികൾ കയറിയ ഓട്ടോറിക്ഷ അപകടത്തിൽപ്പെടാതെ രക്ഷപ്പെട്ടത്. സ്കൂളിൽ കുട്ടികൾ വരികയും പോകുകയും ചെയ്യുന്ന രാവിലെയും വൈകുന്നേരവും വലിയ തിരക്കാണ് ഇവിടെയുണ്ടാകുന്നത്. തിരക്കേറിയ സമയങ്ങളിൽ ഇവിടെ പോലീസിനെ ഡ്യൂട്ടിക്ക് നിയമിക്കണമെന്ന് നാട്ടുകാർ പലവട്ടം പരാതിപ്പെട്ടെങ്കിലും നടപടിയായിട്ടില്ല. പ്രദേശത്ത് ഗതാഗതകുരുക്കും പതിവാണ്. ചെറുതും വലുതുമായ നിരവധി അപകടങ്ങളാണ് ഇവിടെ ദിനംപ്രതി ഉണ്ടായിക്കൊണ്ടിരിക്കുന്നത്. അപകടങ്ങൾ ഒഴിവാക്കാൻ അധികൃതർ വേണ്ട നടപടി സ്വീകരിക്കണമെന്നാണ് ജനങ്ങളുടെ ആവശ്യം.

വാഹനാപകടം : ഓട്ടോറിക്ഷ ഡ്രൈവർക്ക് ഗുരുതര പരിക്ക്

മൂവാറ്റുപുഴ: ഓട്ടോറിക്ഷയും ചരക്കുവാഹനവും കൂട്ടിയിടിച്ചുണ്ടായ അപകടത്തിൽ ഓട്ടോറിക്ഷ ഡ്രൈവർക്ക് ഗുരുതര പരിക്ക്. മൂവാറ്റുപുഴ കാവുംപടി റോഡിൽ ഇന്നലെ പുലർച്ചെ അഞ്ചോടെയുണ്ടായ അപകടത്തിൽ രണ്ടാർ പറയൻകുടി ഹരിദാസിനാണ് പരിക്കേറ്റത്. പിഒ ജംഗ്ഷനിൽ നിന്ന് കാവുംപടി റോഡിലൂടെ കച്ചേരിത്താഴത്തേക്ക് പോകുകയായിരുന്ന ഓട്ടോറിക്ഷ മൂവാറ്റുപുഴ നിർമല ജൂണിയർ സ്കൂളിനു സമീപത്തുവച്ച് എതിർദിശയിലെത്തിയ ചരക്ക് വാഹനത്തിൽ ഇടിക്കുകയായിരുന്നു. ഇടിയുടെ ആഘാതത്തിൽ ഹരിദാസ് റോഡിലേക്ക് തെറിച്ചു വീണു. താടിയെല്ലിന് ഗുരുതരമായി പരിക്കേറ്റ ഹരിദാസിനെ കോലഞ്ചേരി മെഡിക്കൽ കോളജ് ആശുപത്രിയിലും, കൈക്ക് പരിക്കേറ്റ ചരക്കു വാഹന ഡ്രൈവർ ഇരിഞ്ഞാലക്കുട സ്വദേശി ആന്‍റണിയെ മൂവാറ്റുപുഴ ജനറൽ ആശുപത്രിയിലും പ്രവേശിപ്പിച്ചു. ചാലക്കുടിയിൽ നിന്ന് ചരക്കുമായി കോലഞ്ചേരിക്കു പോകുകയായിരുന്ന വാഹനമാണ് അപകടത്തിൽപ്പെട്ടത്. അപകടത്തിൽ ഓട്ടോറിക്ഷ പൂർണമായും തകർന്നു. ദിവസങ്ങൾക്കുമുൻപ് ജല അഥോറിറ്റിയുടെ പൈപ്പ് അറ്റകുറ്റപ്പണികളെ തുടർന്ന് റോഡിൽ കൂട്ടിയിട്ട മണ്ണിന് മുകളിലൂടെ കയറിയാണ് ഓട്ടോറിക്ഷ നിയന്ത്രണം നഷ്ടപ്പെട്ട് ചരക്കുവാഹനത്തിലിടിച്ചതെന്ന് ദൃക്സാക്ഷികൾ പറഞ്ഞു.

ചായക്കടയിൽ കയറി യുവതിയെ കുത്തിപ്പരിക്കേൽപ്പിച്ചു

കോലഞ്ചേരി: പഴന്തോട്ടത്തിനു സമീപം പുളിഞ്ചോട്ടിൽ കവലയിലെ ചായക്കടയിൽ കയറി യുവതിയെ കുത്തി പരിക്കേൽപ്പിച്ചു. പെരിങ്ങോൾ കണ്യാട്ടുകുടിയിൽ സാറാക്കുട്ടി ബിനോയി (49) യെയാണ് സമീപത്ത് വാടകയ്ക്കു താമസിക്കുന്ന പ്രതി ആറന്മുള പള്ളിയമ്പിൽ ശ്രീനാഥ് രംഗൻ(37) ആക്രമിച്ചത്. ഇയാളെ ഓടിക്കൂടിയ നാട്ടുകാർ പിടികൂടി പോലീസിൽ ഏൽപിച്ചു. ഇന്നലെ ഉച്ചകഴിഞ്ഞു രണ്ടോടെയാരുന്നു സംഭവം. യുവതിയുടെ കടയിൽ ചായ ചോദിച്ചെത്തിയ പ്രതി ചായയെടുക്കാൻ ഇവർ തിരിയുന്നതിനിടെ കൈയിൽ കരുതിയിരുന്ന കത്തി കഴുത്തിൽവച്ച് ഇവരുടെ മാല ആവശ്യപ്പെടുകയായിരുന്നു. പ്രതിയെ തള്ളി മാറ്റുന്നതിനിടെ യുവതിയുടെ കഴുത്തിനും കൈവിരലിനും പരുക്കേറ്റു. പുളിഞ്ചുവടിലെ സ്വകാര്യ കമ്പനിയിലെ ജീവനക്കാരനായിരുന്നു പ്രതി. പരിക്കേറ്റ യുവതി കോലഞ്ചേരി മെഡിക്കൽ കോളജിൽ അടിയന്തിര ശസ്ത്രക്രിയ കഴിഞ്ഞ് തീവ്രപരിചരണ വിഭാഗത്തിൽ ചികിത്സയിലാണ്. സംഭവത്തിൽ പുത്തൻകുരിശ് പോലീസ് അന്വേഷണം ആരംഭിച്ചു.

കുടുംബശ്രീ മാധ്യമ ശില്പശാല

കൊച്ചി: കുടുംബശ്രീ ജില്ലാ മിഷന്‍റെ നേതൃത്വത്തില്‍ ജില്ലാതല മാധ്യമ ശില്പശാല സംഘടിപ്പിച്ചു. ഇന്‍ഫര്‍മേഷന്‍ ആന്‍ഡ് പബ്ലിക് റിലേഷന്‍സ് വകുപ്പിന്‍റെയും എറണാകുളം പ്രസ് ക്ലബ്ബിന്‍റെയും സഹകരണത്തോടെയായിരുന്നു മാധ്യമ ശില്പശാല സംഘടിപ്പിച്ചത്. സമൃദ്ധി @ കൊച്ചി ഇന്‍കുബേഷന്‍ സെന്‍ററില്‍ നടന്ന പരിപാടിയില്‍ ജില്ലാ മിഷന്‍ കോ-ഓര്‍ഡിനേറ്റര്‍ റ്റി.എം. റെജീന അധ്യക്ഷയായിരുന്നു. ജില്ലാ പബ്ലിക് ഇന്‍ഫര്‍മേഷന്‍ ഓഫീസര്‍ എന്‍.ബി. ബിജു ശില്പശാല ഉദ്ഘാടനം ചെയ്തു. പ്രസ് ക്ലബ് പ്രസിഡന്‍റ് ആര്‍. ഗോപകുമാര്‍, ജോയിന്‍റ് സെക്രട്ടറി ഷബ്‌ന സിയാദ് എന്നിവര്‍ മുഖ്യാതിഥികളായി. കൊച്ചി ഈസ്റ്റ് സിഡിഎസ് ചെയര്‍പേഴ്‌സണ്‍ മേരി മിനി, കൊച്ചി സൗത്ത് സി.ഡി.എസ് ചെയര്‍പേഴ്‌സണ്‍ ലതാ ബാബു എന്നിവര്‍ പ്രസംഗിച്ചു. അസിസ്റ്റന്‍റ് ജില്ലാ മിഷന്‍ കോ-ഓര്‍ഡിനേറ്റര്‍മാരായ അമ്പിളി തങ്കപ്പന്‍, എം.ഡി. സന്തോഷ്, കെ.സി. അനുമോള്‍, ജില്ലാ പ്രോഗ്രാം മാനേജര്‍മാര്‍ എന്നിവര്‍ പങ്കെടുത്തു.

സുസ്ഥിര വികസനമെന്നത് ജലസ്രോതസുകൾ സംരക്ഷിക്കൽ: ഡോ. ബിജു കുമാര്‍

കൊച്ചി: കേരളത്തിന്‍റെ സുസ്ഥിര വികസനമെന്നത് നമ്മുടെ ജൈവ വൈവിധ്യവും സവിശേഷമായ ഭൂപ്രകൃതിയും ജലസ്രോതസുകളും സംരക്ഷിക്കുക എന്നുള്ളതാണെന്ന് കുഫോസ് വൈസ് ചാന്‍സലര്‍ ഡോ. ബിജു കുമാര്‍. തേവര സേക്രഡ് ഹാര്‍ട്ട് കോളജിലെ ഡിപ്പാര്‍ട്ട്മെന്‍റ് ഓഫ് എന്‍വയോണ്‍മെന്‍റല്‍ സ്റ്റഡീസിന്‍റെ നേതൃത്വത്തില്‍ സംഘടിപ്പിക്കുന്ന 'ലേക്ക് വ്യൂ എന്‍വിറത്തണ്‍' അന്താരാഷ്ട്ര കോണ്‍ക്ലേവ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കൊച്ചി കോര്‍പറേഷന്‍റെ നേതൃത്വത്തില്‍ ഇപ്പോള്‍ നടക്കുന്ന കനാല്‍ ശുദ്ധീകരണ പ്രവര്‍ത്തനങ്ങള്‍ കേരളത്തിന്‍റെ മറ്റ് ഭാഗങ്ങളിലേക്ക് കൂടി വ്യാപിപ്പിച്ചാല്‍ വേമ്പനാട്ട് കായല്‍ സ്വാഭാവികമായി ശുദ്ധീകരിക്കപ്പെടുമെന്നും, അത് കേരളത്തിന്‍റെ വിവിധ തലത്തിലുള്ള വികസനത്തിന് കാരണമാകുമെന്നും അദ്ദേഹം കൂട്ടിച്ചേര്‍ത്തു. അമേരിക്കയിലെ ഇല്ലിനോയിസ് വെസ്‌ലിയന്‍ യൂണിവേഴ്‌സിറ്റിയിലെ കെമിസ്ട്രി പ്രഫസറും ഗ്രീന്‍ കെമിസ്ട്രിയുടെ പ്രയോക്താവുമായ പ്രഫ. റാം മോഹന്‍ മുഖ്യപ്രഭാഷണം നിര്‍വഹിച്ചു. ഡോ. സജി ബേബി (എംഐടി, പീസ് യൂണിവേഴ്‌സിറ്റി, പൂനെ), ഡോ. മറിയാമ്മ ഫിലിപ്പ് (നിംഹാന്‍സ്, ബംഗളൂരു), എസ്. ഗണപതി വെങ്കിട്ട സുബ്രഹ്മണ്യന്‍ (അണ്ണാ യൂണിവേഴ്‌സിറ്റി ചെന്നൈ), ഡോ. മഹേഷ് മോഹന്‍ (മഹാത്മാഗാന്ധി യൂണിവേഴ്‌സിറ്റി, കോട്ടയം) എന്നിവര്‍ പ്രസംഗിച്ചു. ഇന്ന് കോണ്‍ക്ലേവില്‍ ഡോ. ആര്‍. ബിന്ദു മുഖ്യാതിഥിയായി സംസാരിക്കും. ബിപിസിഎലിന്‍റെയും ആലുവ മിത്രാദാം റിനൂവബിള്‍ എനര്‍ജി സെന്‍ററിന്‍റെയും സഹകരണത്തോടെ സംഘടിപ്പിക്കുന്ന കോണ്‍ക്ലേവില്‍ രാജ്യത്തും വിദേശത്തുമുള്ള 200ലധികം ഗവേഷകര്‍, അധ്യാപകര്‍, വിദ്യാര്‍ഥികള്‍ എന്നിവർ പങ്കെടുക്കുന്നുണ്ട്.

നൈപുണ്യ കോളജില്‍ നിദര്‍ശന-2025 ആഘോഷിച്ചു

അങ്കമാലി: കറുകുറ്റി നൈപുണ്യ മാനേജ്‌മെന്‍റ് ആന്‍ഡ് ഇന്‍ഫര്‍മേഷന്‍ ടെക്‌നോളജിയില്‍ 2025 അധ്യയന വര്‍ഷത്തെ ബിരുദ ബിരുദാനന്തര വിദ്യാര്‍ഥികളുടെ വിദ്യാരംഭച്ചടങ്ങ് നിദര്‍ശന 2025 ആഘോഷിച്ചു. സര്‍വവിജ്ഞാന കോശം ഡയറക്ടറും എഴുത്തുകാരിയും ആലുവ യൂ സി കോളജ് മുന്‍ അധ്യാപികയുമായ ഡോ. മ്യൂസ് മേരി ജോര്‍ജ് പരിപാടിയില്‍ മുഖ്യാതിഥിയായിരുന്നു. എറണാകുളം-അങ്കമാലി അതിരൂപത പ്രോ പ്രോട്ടോ സിഞ്ചെല്ലൂസ് റവ. ഡോ. ജിമ്മി പൂച്ചക്കാട്ട് അധ്യക്ഷത വഹിച്ചു. അസിസ്റ്റന്‍റ് എക്‌സിക്യൂട്ടീവ് ഡയറക്ടര്‍ ഫാ. ജിമ്മി കുന്നത്തൂര്‍, കോളജ് പ്രിന്‍സിപ്പലും എക്‌സിക്യൂട്ടീവ് ഡയറക്ടറുമായ റവ. ഡോ. പോളച്ചന്‍ കൈത്തോട്ടുങ്കല്‍, എംബിഎ ഡയറക്ടര്‍ ഡോ. പി.എം. ജേക്കബ്, അസിസ്റ്റന്‍റ് എക്‌സിക്യൂട്ടീവ് ഡയറക്ടര്‍ ഫാ. ടോണി മാണിക്കത്താന്‍, ഡീന്‍ ഓഫ് സ്റ്റഡീസ് ഡോ. ജോയ് ജോസഫ് പുതുശേരി, വൈസ് പ്രിന്‍സിപ്പല്‍മാരായ ഫാ. ഡിസ്റ്റോ കദളിക്കാട്ടില്‍, ട്രീസ പാറയ്ക്കല്‍, രക്ഷകര്‍ത്തൃ പ്രതിനിധി ജോഷി ജോസഫ്, കോളജ് യൂണിയന്‍ ചെയര്‍പേഴ്‌സണ്‍ ഹന്ന, പ്രോഗ്രാം കോ-ഓര്‍ഡിനേറ്റര്‍ ജിത്തു ഡോയല്‍ തുടങ്ങിയവര്‍ പ്രസംഗിച്ചു. വിവിധ അധ്യാപകര്‍ രചിച്ച പുസ്തകങ്ങളുടെയും കോളജ് മാഗസിന്‍റെയും പ്രകാശനവും ചടങ്ങില്‍ നടന്നു. ഡോക്ടറല്‍ ബിരുദം നേടിയ അധ്യാപകരെയും ഉന്നത വിജയം കരസ്ഥമാക്കിയ വിദ്യാര്‍ഥികളെയും ആദരിച്ചു. ഡയറക്ടര്‍ ഓഫ് എക്‌സാമിനേഷന്‍ എമിലി ഇട്ടിയച്ചന്‍, വിശിഷ്ടാതിഥികള്‍ക്ക് കോളജിന്‍റെ സ്‌നേഹോപഹാരം സമര്‍പ്പിച്ചു. കലാപരിപാടികളും ഉണ്ടായിരുന്നു.

കഞ്ചാവുമായി പിടിയിൽ

പെരുമ്പാവൂർ: 1.300 കി. ഗ്രാം കഞ്ചാവുമായി ഇതര സംസ്ഥാനത്തൊഴിലാളി പിടിയിൽ. വെസ്റ്റ് ബംഗാൾ മൂർഷിദാബാദ് സ്വദേശി എലം ഷെയ്ഖ് (29) നെയാണ്പെരുമ്പാവൂർ എ എസ് പി യുടെ പ്രത്യേക അന്വേഷണ സംഘം പിടികൂടിയത്. രഹസ്യവിവരത്തെ തുടർന്ന് കുറച്ചു നാളുകളായി ഇയാൾ അന്വേഷണസംഘത്തിന്‍റെ നിരീക്ഷണത്തിലായിരുന്നു. രണ്ടുവർഷത്തോളം ബംഗാൾ കോളനിയിൽ കട നടത്തിയിരുന്ന ഇയാൾ പിന്നീട് കഞ്ചാവ് കച്ചവടത്തിലേക്ക് തിരിയുകയായിരുന്നു. കഞ്ചാവ് തൂക്കാൻ ഉപയോഗിക്കുന്ന ത്രാസും കവറുകളും ഇയാളിൽ നിന്ന് കണ്ടെടുത്തു. കോടതിയിൽ ഹാജരാക്കിയ എലം ഷേഖിനെ റിമാൻഡ് ചെയ്തു.

എടവനക്കാട്ടെ കടൽഭിത്തി : ഫണ്ട് അനുവദിച്ചിട്ടും ഭരണാനുമതിയായില്ല; പദ്ധതി ത്രിശങ്കുവിൽ

വൈപ്പിൻ : കടൽക്ഷോഭം രൂക്ഷമായ എടവനക്കാട് ചെല്ലാനം മോഡൽ ടെട്രാപോഡുകൾ ഉപയോഗിച്ചു കടൽത്തി നിർമിക്കുന്നതിനായി പണം അനുവദിച്ച് മൂന്നുമാസം പിന്നിട്ടിട്ടും ഭരണാനുമതി കിട്ടാത്തതിനാൽ പദ്ധതി ഇപ്പോഴും ത്രിശങ്കുവിൽ. രോഷാകുലരായ നാട്ടുകാർ വീണ്ടും സമരത്തിനിറങ്ങുന്നു. നാട്ടുകാരും പഞ്ചായത്തും റോഡ് ഉപരോധിച്ചു നടത്തിയ വൻ സമരത്തിനൊടുവിലാണ് എംഎൽഎയും കളക്ടറും ഇടപെട്ട് ചർച്ചകൾ നടത്തി പദ്ധതി പ്രഖ്യാപിച്ചത്. ഇതുപ്രകാരം 35 കോടി രൂപ ജിഡയും 15 കൂടി സംസ്ഥാന സർക്കാരും 10 കോടി ഡിസാസ്റ്റർ മാനേജ്മെന്‍റ് വിഹിതവും നൽകാമെന്നായിരുന്നു വാഗ്ദാനം. ഏപ്രിൽ എട്ടിനു ചേർന്ന ജിഡ യോഗത്തിലാണ് 35 കോടിനൽകാൻ തീരുമാനമെടുത്തത്. എന്നാൽ ഈ ഫണ്ട് തികയാത്തസാഹചര്യത്തിലാണ് സംസ്ഥാന സർക്കാരും ഡിസാസ്റ്റർ മാനേജ്മെന്‍റും ഫണ്ട് നൽകാമെന്ന് ഏറ്റത്. എന്നാൽ ഇതിനുശേഷം ഇതിന്‍റെ ഭരണാനുമതി ഉൾപ്പെടെയുള്ള മറ്റു തുടർ നടപടികൾ എങ്ങും എത്തിയില്ലെന്നാണ് പഞ്ചായത്തിന്‍റെയും നാട്ടുകാരുടെയും പരാതി. ഈ സാഹചര്യത്തിലാണ് കടൽത്തി നിർമാണം ആവശ്യപ്പെട്ട് വീണ്ടും നാട്ടുകാർ വീണ്ടും സമരത്തിന് ഇറങ്ങുന്നത്. ഇതിന്‍റെ ഭാഗമായി 19ന് ജനകീയ സമരസമിതിയുടെ നേതൃത്വത്തിൽ എടവനക്കാട് വില്ലേജ് ഓഫീസിനു മുന്നിൽ ധർണ നടക്കും. കൂടാതെ പ്രതീകാത്മക ടെട്രാപോർഡും സ്ഥാപിച്ച് പ്രതിഷേധിക്കുകയും ചെയ്യും. രാവിലെ 10ന് ആരംഭിക്കുന്ന സമരപരിപാടികൾ അഡ്വ. എ. ജയശങ്കർ ഉദ്ഘാടനം ചെയ്യും.

നാലു വയസുകാരന്‍റെ മരണം: ആശുപത്രിയിലേക്ക് പ്രതിഷേധ മാര്‍ച്ച്

കൊച്ചി: ചെവിയിലെ പഴുപ്പ് നീക്കാന്‍ ശസ്ത്രക്രിയയ്ക്ക് വിധേയനായ നാലു വയസുകാരന്‍ മരിച്ചത് ചികിത്സാ പിഴവുമൂലമെന്ന് ആരോപിച്ച് ആക്ഷന്‍ കൗണ്‍സിലിന്‍റെ നേതൃത്വത്തില്‍ കലൂര്‍ കറുകപ്പിള്ളിയിലെ ഇഎന്‍ടി ആശുപത്രിയിലേക്ക് പ്രതിഷേധ മാര്‍ച്ച് നടത്തി. ദേശാഭിമാനി ജംഗ്ഷനില്‍ നിന്ന് ആരംഭിച്ച മാര്‍ച്ച് ആശുപത്രിക്ക് മുന്നില്‍ പോലീസ് തടഞ്ഞു. തുടര്‍ന്ന് പ്രതിഷേധക്കാരും പോലീസും തമ്മില്‍ വാക്കേറ്റവും ഉന്തും തള്ളുമുണ്ടായി. ഏറെ നേരത്തെ ശ്രമത്തിനൊടുവിലാണ് പോലീസ് പ്രതിഷേധക്കാരെ നീക്കിയത്. തുടര്‍ന്ന് നടന്ന പൊതുയോഗത്തില്‍ ആക്ഷന്‍ കൗണ്‍സില്‍ ചെയര്‍മാനും ഡിവിഷന്‍ കൗണ്‍സിലറുമായ ആര്‍. രതീഷ് അധ്യക്ഷത വഹിച്ചു. ആക്ഷന്‍ കൗണ്‍സില്‍ ചെയര്‍മാന്‍ കെ.ടി. സാജന്‍, കോര്‍പറേഷന്‍ സ്ഥിരംസമിതി അധ്യക്ഷ സി.ഡി. വത്സലകുമാരി തുടങ്ങിയവര്‍ പങ്കെടുത്തു. ചെവിയിലെ പഴുപ്പ് നീക്കാന്‍ ശസ്ത്രക്രിയയ്ക്ക് വിധേയനായ വെണ്ണല ചേലപ്പറമ്പ് വീട്ടില്‍ സി.ബി. അബിയുടെ മകന്‍ ബദ്രിനാഥാണ് മരിച്ചത്. കഴിഞ്ഞ മാസം മൂന്നിനായിരുന്നു സംഭവം. മേയ് 15നാണ് ചെവിയിലെ പഴുപ്പ് നീക്കാന്‍ കുട്ടിക്ക് ശസ്ത്രക്രിയ നടത്തിയത്. വൈകാതെ ആശുപത്രി വിടുകയും ചെയ്തു. തുടര്‍ പരിശോധനയ്ക്ക് എത്തിയപ്പോള്‍ അഡ്‌നോയിഡ് ഗ്ലാന്‍ഡിന് തകരാറുണ്ടെന്നും ചെവിക്ക് പിന്നിലെ അസ്ഥിയില്‍ മാംസം പിടിക്കുന്നുണ്ടെന്നും ഓപ്പറേഷനിലൂടെ ഇത് നീക്കണമെന്നും ഡോക്ടര്‍ അറിയിച്ചു. ജൂണ്‍ രണ്ടിന് ആശുപത്രിയില്‍ വീണ്ടും പ്രവേശിപ്പിച്ചു. മൂന്നിന് രാവിലെ 11.30നായിരുന്നു ഓപ്പറേഷന്‍. ആറു മണിക്കൂര്‍ നീണ്ട ശസ്ത്രക്രിയ ആയതിനാല്‍ അനസ്‌തേഷ്യ നല്‍കുമെന്നും അറിയിച്ചു. ഉച്ചകഴിഞ്ഞ് മൂന്നോടെ തങ്ങള്‍ അറിയാതെ കുട്ടിയെ മറ്റൊരു ആശുപത്രിയിലേക്ക് അധികൃതര്‍ മാറ്റി. തീവ്രപരിചരണ വിഭാഗത്തില്‍ ചികിത്സയിലിരിക്കെ വൈകിട്ട് 5.30ഓടെ കുട്ടി മരിക്കുകയായിരുന്നു എന്നാണ് കുടുംബത്തിന്‍റെ ആരോപണം.

ആലുവ നഗരസഭാ ശതാബ്ദി ആഘോഷം: മുൻ സെക്രട്ടറിയെയും എതിർകക്ഷിയാക്കി

ആലുവ: ശതാബ്ദി ആഘോഷ ഭാഗമായി നടത്തിപ്പ് കമ്മിറ്റി രൂപീകരിച്ചതും ആലുവ നഗരസഭയുടെ പാൻ നമ്പർ ഉപയോഗിച്ച് ബാങ്ക് അക്കൗണ്ടിലേക്ക് പണപ്പിരിവ് നടത്തിയതും ചട്ടവിരുദ്ധമെന്ന് തദ്ദേശവകുപ്പ് ഓംബുഡ്സ്മാൻ. സ്വാഗത സംഘം രൂപീകരിച്ച നടപടി ക്രമങ്ങളുടേയും ബാങ്ക് അക്കൗണ്ട് വഴി നടന്ന പണമിടപാടുകളുടേയും വിശദമായ റിപ്പോർട്ട് സമർപ്പിക്കാൻ ആലുവ നഗരസഭ സെക്രട്ടറിയ്ക്ക് ഓംബുഡ്സ്മാൻ നോട്ടീസ് നൽകി. പരാതി വിഷയവുമായി ബന്ധപ്പെട്ട കാലയളവിലെ ആലുവ നഗരസഭാ സെക്രട്ടറിയായിരുന്ന മുഹമ്മദ് ഷാഫിയെ ചെയർമാൻ, സെക്രട്ടറി എന്നിവർക്ക് പുറമേ മൂന്നാം എതിർ കക്ഷിയായി ചേർക്കാനും ഓംബുഡ്‌സ്മാൻ ഉത്തരവായി. പ്രതിപക്ഷ കൗൺസിലറായ എൻ. ശ്രീകാന്തിന്‍റെ പരാതിയിലാണ് തുടർ നടപടി. 2021 ൽ ഒരു വർഷം നീണ്ടു നിന്ന നഗരസഭ ശതാബ്ദി ആഘോഷങ്ങൾ നടത്തുന്നതിനായി ശതാബ്ദി ആഘോഷ കമ്മിറ്റി രൂപീകരിച്ചിരുന്നു. അനുവദനീയമായതിനേക്കാൾ കൂടുതൽ അംഗങ്ങളെ ചേർത്തതാണ് പ്രധാനപ്പെട്ട ക്രമക്കേട് ആയി ഓംബുഡ്സ്മാൻ വിലയിരുത്തിയത്. നഗരസഭയുടെ പ്രവർത്തനങ്ങൾക്ക് കമ്മിറ്റികൾ രൂപീകരിക്കുമ്പോൾ മുനിസിപ്പൽ ആക്ട് പ്രകാരം മൂന്നിലൊന്ന് അംഗങ്ങളെ മാത്രമെ പുറത്ത് നിന്ന് ഉൾപ്പെടുത്താനാകൂ. മാത്രമല്ല നിയമിക്കപ്പെടുന്ന ആളുകളുടെ എണ്ണം കമ്മിറ്റിയിലെ അംഗങ്ങളുടെ ആകെ എണ്ണത്തിന്‍റെ മൂന്നിലൊന്നിൽ കവിയാൻ പാടില്ല. നഗരസഭയ്ക്ക് പുറത്ത് നിന്നുള്ളവരേയും ഉൾപ്പെടുത്തി ജംബോ കമ്മിറ്റി ഉണ്ടാക്കിയത് ഇതൊന്നും പാലിച്ചില്ലെന്നാണ് പരാതി. പല കമ്മിറ്റികളുടേയും ചുമതലയിൽ നിന്ന് ആലുവയിലെ കൗൺസിലർമാരെ ഒഴിവാക്കി പകരം ചേർത്തത് ആലുവ നിവാസികളല്ലാത്ത വ്യക്തികളെയാണ്. ശതാബ്ദി ആഘോഷ കമ്മിറ്റിയുടെ ബാങ്ക് അക്കൗണ്ട് തുടങ്ങിയത് നഗരസഭയുടെ പാൻനമ്പർ ഉപയോഗിച്ചാണ്. അതിനാൽ നഗരസഭ സെക്രട്ടറിയാണ് ബാങ്ക് അക്കൗണ്ടും കൈകാര്യം ചേയ്യേണ്ടത്. എന്നാൽ സെക്രട്ടറിയുടെ ഒപ്പും സീലും ഒഴിവാക്കിയാണ് പണമിടപാട് നടന്നത്. ഇതും ചട്ടലംഘനത്തിൽ വരുന്നതിനാൽ ആരാണ് പണം കൈകാര്യം ചെയ്തതെന്ന വിശദീകരണവും 15 ദിവസിത്തിനകം സമർപ്പിക്കാൻ ഓംബുഡ്സ്മാൻ ജസ്റ്റിസ് പി.ഡി. രാജൻ ആലുവ നഗരസഭ സെക്രട്ടറിയോട് ആവശ്യപ്പെട്ടിട്ടുണ്ട്.

അങ്കമാലി-ആലുവ ദേശീയപാതയിൽ മരം മറിഞ്ഞു വീണ് ഗതാഗതം തടസപ്പെട്ടു

നെടുമ്പാശേരി : അങ്കമാലി-ആലുവ ദേശീയപാതയിലേക്ക് മരം മറിഞ്ഞുവീണ് ഗതാഗതം തടസപ്പെട്ടു. ദേശീയപാതയിൽ ചെറിയ വാപ്പാലശേരി ഭാഗത്താണ് മരം റോഡിലേക്ക് മറിഞ്ഞത്. ഇന്നലെ രാവിലെ ആറോടെയായിരുന്നു സംഭവം. ഈ സമയം ശക്തമായ മഴയും കാറ്റും ഉണ്ടായിരുന്നു. മരം മറിഞ്ഞ് റോഡ് സൈഡിൽ പാർക്ക് ചെയ്തിരുന്ന ടാങ്കറിന്‍റെ മുകളിൽ തങ്ങി നിന്നതിനാൽ വൻ ദുരന്തം ഒഴിവാകുകയായിരുന്നു. ടാങ്കറിന്‍റെ കാബിന് ഭാഗികമായി കേടുപാടുകൾ സംഭവിച്ചിട്ടുണ്ട്. അങ്കമാലിയിൽനിന്നും ഫയർഫോഴ്സ് എത്തിയാണ് മരം മുറിച്ചു മാറ്റിയത്. ഇതേ തുടർന്ന് ചെറിയ വാപ്പാലശേരി മുതൽ കരിയാട് വരെ ഒന്നര മണിക്കൂറോളം ഒരു വശത്ത് കൂടിയുള്ള ഗതാഗതം തടസപ്പെട്ടു. ഇരുവശത്തേക്കുമുള്ള വാഹനങ്ങൾ അങ്കമാലി ഭാഗത്തേക്കുള്ള റോഡിലൂടെ തിരിച്ചു വിടുകയായിരുന്നു.

ലൈഫ്: ഗുണഭോക്താക്കൾക്ക് ആധാരം കൈമാറി

മരട്: മരട് നഗരസഭയിലെ ലൈഫ് പദ്ധതിയിലെ ഗുണഭോക്താക്കൾക്ക് വാങ്ങിയ ഭൂമിയുടെ ആധാരം കൈമാറി. നഗരസഭാ ചെയർപേഴ്സൺ ആന്‍റണി ആശാംപറമ്പിൽ അധ്യക്ഷത വഹിച്ച ചടങ്ങിൽ കെ.ബാബു എംഎൽഎ ആധാരം കൈമാറി. ഡെപ്യൂട്ടി ചെയർപേഴ്സൺ അഡ്വ. രശ്മി സനിൽ, സ്ഥിരം സമിതിയധ്യക്ഷന്മാരായ ബേബി പോൾ, റിനി തോമസ്, ശോഭ ചന്ദ്രൻ, കൗൺസിലർമാരായ ചന്ദ്രകലാധരൻ, പി.ഡി.രാജേഷ്, ബെൻഷാദ് നടുവിലവീട്, മിനി ഷാജി, സിബി സേവ്യർ, മോളി ഡെന്നി , ജയ ജോസഫ് തുടങ്ങിയവർ പ്രസംഗിച്ചു. നാല് ഗുണഭോക്താക്കൾക്കാണ് ഭൂമി വാങ്ങി നൽകിയത്.

കിണറ്റിൽ വീണ വൃദ്ധയെ അഗ്നിരക്ഷാസേന രക്ഷപ്പെടുത്തി

നെടുമ്പാശേരി : കിണറ്റിൽ വീണ വൃദ്ധയെ അഗ്നിരക്ഷാസേന എത്തി രക്ഷപ്പെടുത്തി. നെടുമ്പാശേരി പഞ്ചായത്തിലെ രണ്ടാം വാർഡായ പൊയ്ക്കാട്ടുശേരിയിൽ ഇടതലശേരി വീട്ടിൽ സതി വേലായുധ (78) നാണ് കിണറ്റിൽ വീണത്. വീടിനടുത്ത് 35 അടിയോളം താഴ്ചയുള്ള കുടിവെള്ള കിണറ്റിലാണ് വൃദ്ധ അകപ്പെട്ടത്. നിലവിളി കേട്ട് ഓടിയെത്തിയ അയൽവാസികളാണ് അഗ്നിരക്ഷാസേനയെ വിവരം അറിയിച്ചത്. അങ്കമാലി ഫയർ ആൻഡ് റെസ്ക്യൂ ഓഫീസർ വിപിൻ പി. ഡാനിയേൽ കിണറ്റിലിറങ്ങി വൃദ്ധയെ വലയിൽ കയറ്റി മുകളിലേക്ക് വലിച്ചു കയറ്റുകയായിരുന്നു. അസിസ്റ്റന്‍റ് സ്റ്റേഷൻ ഓഫീസർ പി.വി. സുനിൽകുമാർ , ഫയർ ആൻഡ് റെസ്ക്യൂ ഓഫീസർമാരായ ജി.പി. ഹരി , ടി.എസ്. അജയൻ , റെജി എസ്. വാരിയർ, വിനു വർഗീസ്, അഭിഷ് ഗോപി, എസ്. സലിത്ത് എന്നിവരും രക്ഷാപ്രവർത്തനത്തിൽ പങ്കാളികളായി.

അല്ലപ്രയിൽ തെരുവുനായ ആക്രമണം: ഏഴ് പേർക്ക് പരിക്ക്

പെരുമ്പാവൂർ : അല്ലപ്രയിൽ തെരുവുനായ കടിച്ച് ഏഴ് പേർക്ക് പരിക്കേറ്റു. അല്ലപ്ര അറയ്ക്ക കുടി സൈബി സാജു , കൊല്ലമ്മാവു കുടി രവീന്ദ്രൻ, അനസ്, രണ്ട് അതിഥി തൊഴിലാളികൾ, കുട്ടികൾ ഉൾപ്പെടെ പരിക്കേറ്റിട്ടുണ്ട്. കടിയേറ്റവരെ എറണാകുളം മെഡിക്കൽ കോളജിൽ പ്രവേശിപ്പിച്ചു. ഇന്നലെ വൈകിട്ട് അഞ്ചിന് ചാത്തൻകുളം അക്വിഡറ്റ് ഭാഗത്തായിരുന്നു നായയുടെ ആക്രമണം. നായ ഓടിക്കൊണ്ടിരിക്കുന്നതിനിടയിലാണ് കാൽ നടക്കാരെ ആക്രമിച്ചത്.

ലോറി മേൽപ്പാലത്തിന് മുകളിൽ കുടുങ്ങി; ഗതാഗതക്കുരുക്കിൽപ്പെട്ട് റിഫൈനറി റോഡ്

തൃപ്പൂണിത്തുറ: ലോഡുമായി വന്ന ലോറി എസ്‌എൻ ജംഗ്ഷൻ മേൽപ്പാലത്തിന് മുകളിൽ വച്ച് ബ്രേക്ക്‌ ഡൗണായതിനെ തുടർന്ന് റിഫൈനറി റോഡിൽ അര മണിക്കൂറോളം ഗതാഗതം നിലച്ചു. വ്യാഴാഴ്ച്ച വൈകിട്ട് 6.15 ഓടെയാണ് ലോറി മേൽപ്പാലത്തിനു നടുവിലായി കുടുങ്ങിയത്. ഇതോടെ പിന്നിൽ വന്ന വാഹനങ്ങൾക്ക് പാലത്തിലൂടെ കടന്നു പോകാൻ പറ്റാതെ റോഡിൽ വാഹനങ്ങളുടെ നീണ്ട നിര രൂപപ്പെടുകയായിരുന്നു. ഇരുമ്പനം വിളക്ക് ജംഗ്ഷന് സമീപംവരെയും എസ്എൻ ജംഗ്ഷനു സമീപം വരെയും വാഹനങ്ങളുടെ നിര നീണ്ടു. പിന്നീട് ക്രെയിനെത്തിച്ച് ലോറി പിന്നിലേക്ക് മാറ്റിയാണ് ഗതാഗതം പുനഃസ്‌ഥാപിച്ചത്.

"ദീപിക നമ്മുടെ ഭാഷ പദ്ധതി' : എടത്തല ഗവ. ഹൈസ്കൂളിൽ ദീപിക നമ്മുടെ ഭാഷ പദ്ധതി

ആലുവ : എടത്തല ഗവ. ഹൈസ്കൂളിൽ "ദീപിക നമ്മുടെ ഭാഷ പദ്ധതി' ആരംഭിച്ചു. എടത്തല സഹകരണ ബാങ്ക് പ്രസിഡന്‍റ് കെ.എം. ഷംസുദീൻ ദീപിക പത്രം ഇ.എസ്. ശിവനന്ദൻ, റിൻഷാന ഫാത്തിമ എന്നീ വിദ്യാർഥികൾക്ക്‌ നൽകി പദ്ധതി ഉദ്ഘാടനം ചെയ്തു. പ്രധാനാധ്യാപിക എ.കെ. ഗിരിജ, പിടിഎ പ്രസിഡന്‍റ് ഹക്കിം, സ്കൂൾ സീനിയർ അസിസ്റ്റന്‍റ് ആർ. ഷാനി, പി.കെ. ജാസ്മിൻ, കുക്കു വർക്കി, ശാന്തി കൃഷ്ണൻ, ഏരിയ മാനേജർ ടി.എ. നിബിൻ എന്നിവർ സംസാരിച്ചു. എടത്തല സർവീസ് സഹകരണ ബാങ്ക് ആണ് സ്കൂളിൽ ദീപിക പത്രം സ്പോൺസർ ചെയ്തിരിക്കുന്നത്.

ടൂറിസം പദ്ധതി കടലാസിൽ : പെരിയാറിലെ പരുന്തുറാഞ്ചി മണപ്പുറം നശിക്കുന്നു

ബോബൻ ബി. കിഴക്കേത്തറ ആലുവ: പരിസ്ഥിതി സൗഹൃദ വിനോദ സഞ്ചാര പദ്ധതി പതിനാല് വർഷമായി കടലാസിൽ ഒതുങ്ങിയതോടെ പെരിയാറിലെ പരുന്തുറാഞ്ചി ചെറുദ്വീപ് നാശത്തിന്‍റെ വക്കിൽ. ആലുവ മണപ്പുറത്തെ ഹരിത വനവുമായി ബന്ധിപ്പിച്ച ബോട്ട് ജെട്ടിയും സ്റ്റേജുമെല്ലാം നിർമിച്ചെങ്കിലും ലക്ഷങ്ങൾ വെള്ളത്തിലായി. നിറയെ മണൽ പരന്ന് 40 ഏക്കറോളം വിസ്തീർണം ഉണ്ടായിരുന്ന ചെറു ദ്വീപിന്‍റെ മനോഹാരിത നിലനിർത്താൻ വിനോദ സഞ്ചാര ഭൂപടത്തിൽ ഉൾപ്പെടുത്തണമെന്നത് ദശാബ്ദങ്ങളായുള്ള ആവശ്യമാണ്. അതിനായി മാറി മാറി വരുന്ന മന്ത്രിമാർ വാഗ്ദാനങ്ങൾ നടത്താറുണ്ട്. 2010 ൽ ഒക്ടോബറിൽ അന്നത്തെ ടൂറിസം മന്ത്രിയായിരുന്ന കൊടിയേരി ബാലകൃഷ് ണനാണ് എക്കോ-ടൂറിസം പ്രോജക്റ്റ് പ്രഖ്യാപിച്ച് ആദ്യഘട്ട നിർമാണങ്ങൾക്ക് തുടക്കമിട്ടത്.എന്നാൽ പദ്ധതി മുന്നോട്ട് കൊണ്ടു പോകേണ്ട ജില്ലാ ടൂറിസം കൗൺസിൽ താത്പര്യം എടുത്തില്ല. ലക്ഷക്കണക്കിന് രൂപ മുടക്കി പരുന്ത് റാഞ്ചിയിൽ നിർമിച്ച സ്റ്റേജ് നശിച്ചുപോയി. കടവുകൾ കേന്ദ്രീകരിച്ച് അനധികൃതമായി മണൽ വാരിക്കൊണ്ടു പോയി. മേൽമണൽ തീർന്നപ്പോൾ മണൽത്തിട്ട തന്നെ ഇടിച്ചെടുത്ത് കടത്തി. സീപോർട്ട്-എയർപോർട്ട് ഭാഗമായി പെരിയാറിന് കുറുകെ പാലങ്ങൾ വന്നപ്പോൾ മണൽക്കടത്തിന് വേഗവും കൂടി. 2018ലെ പ്രളയം കഴിഞ്ഞപ്പോൾ പരുന്ത് റാഞ്ചിയിൽ മണലിന് പകരം ചെറുകാടുകളും പുൽപ്പരപ്പുകളും ചെളിയുമാണ്. നിലവിൽ 25 ഏക്കർ വരുന്ന ചെറു ദ്വീപ് നിലനിർത്താൻ സർക്കാർ ഇടപെടണമെന്നാണ് പ്രദേശവാസികൾ ആവശ്യപ്പെട്ടുന്നത്. ആലുവ മണപ്പുറത്തിനും മഹിളാലയം പാലത്തിനും നടുവിൽ വരുന്ന പരുന്ത് റാഞ്ചി മണപ്പുറം ചെങ്ങമനാട് പഞ്ചായത്തിന് കീഴിലാണ് വരുന്നത്. ദ്വീപിന്‍റെ മനോഹാരിത ആസ്വദിക്കാൻ വഞ്ചി വാടകയ്ക്ക് എടുത്ത് ചെറു സംഘങ്ങൾ എത്താറുണ്ട്. പോത്തുകളേയും പശുക്കളേയും ഇവിടേയ്ക്ക് ഉടമകൾ അഴിച്ചുവിടുന്നതിനാൽ അധികനേരം സന്ദർശകർക്ക് തങ്ങാനാവില്ല. എത്തിച്ചേരാൻ സൗകര്യമൊരുക്കുകയും പരുന്ത് റാഞ്ചി മണപ്പുറത്തെ ചുറ്റും കെട്ടി സംരക്ഷിക്കുകയും ചെയ്താൽ നല്ലൊരു ടൂറിസം കേന്ദ്രമാക്കി കേന്ദ്രമാക്കി മാറ്റുവാൻ സാധിക്കും. മറുകരയിലെ സംസ്ഥാന സീഡ് ഫാമിലേക്ക് സോളാർ ബോട്ട് എത്തിയിട്ടുണ്ട്. ഈ ഗതാഗത സംവിധാനം ചെങ്ങമനാട് പഞ്ചായത്തിലെ തുരുത്തിൽ നിന്ന് ഉപയോഗിച്ച് ആലുവയുടെ വിനോദ സഞ്ചാര സാധ്യത ഉപയോഗിക്കണമെന്നാണ് പ്രകൃതി സ്നേഹികൾ ആവശ്യപ്പെടുന്നത്.

അഭയഭവൻ അന്തേവാസി മരിച്ചു

പെരുന്പാവൂർ: കൊച്ചിൻ സിറ്റി വനിതാ പോലീസ് മുഖേന അഭയഭവനിൽ പ്രവേശിപ്പിച്ച ബിനോയ് റോസ്‌ലെറ്റ് (53) ഹൃദയാഘാതം മൂലം കളമശേരി മെഡിക്കൽ കോളജ് ആശുപത്രിയിൽ ചികിത്സയിലിരിക്കെ മരിച്ചു. മൃതദേഹം പെരുന്പാവൂർ താലൂക്ക് ആശുപത്രി മോർച്ചറിയിൽ. ഈ വ്യക്തിയെക്കുറിച്ച് എന്തെങ്കിലും വിവരങ്ങൾ അറിയുന്നവർ അഭയ ഭവനുമായി ബന്ധപ്പെടണം. ഫോണ്‍: 7558037295.

ദന്പതികൾ സഞ്ചരിച്ച സ്കൂട്ടറിൽ പിക്കപ്പ് വാനിടിച്ച് ഭർത്താവ് മരിച്ചു

കോതമംഗലം: ദന്പതികൾ സഞ്ചരിച്ച സ്കൂട്ടറിൽ പിക്കപ്പ് വാൻ ഇടിച്ച് ഗുരുതര പരിക്കേറ്റ് ചികിത്സയിലായിരുന്ന ഭർത്താവ് മരിച്ചു. ഭാര്യയ്ക്ക് ഗുരുതര പരിക്കേറ്റു. നാടുകാണി ഏറുന്പുറം നഗറിൽ വട്ടത്തറ വി.കെ. ഭാസി (68) ആണ് മരിച്ചത്. തിങ്കളാഴ്ച വൈകിട്ട് മലയിൻകീഴ് കുന്പളത്തുമുറി ബസ് കാത്തിരിപ്പ് കേന്ദ്രത്തിന് സമീപമായിരുന്നു അപകടം. ഭാര്യ അമ്മിണിയുമൊത്ത് സ്കൂട്ടറിൽ കോതമംഗലത്ത്നിന്ന് നാടുകാണിയിലേക്ക് വരവെ എതിർദിശയിൽനിന്നു വരികയായിരുന്ന പിക്കപ്പ് വാൻ ഇടിക്കുകയായിരുന്നു. ഇടിയുടെ ആഘാതത്തിൽ റോഡിലേക്ക് തെറിച്ചുവീണ ഭാസിയുടെ തലയ്ക്കും മുഖത്തും പരിക്കും കാലുകൾ വട്ടം ഒടിയുകയും മൂന്നു വാരിയെല്ലുകൾക്ക് പൊട്ടലേൽക്കുകയും ചെയ്തിരുന്നു. അമ്മിണിയുടെ ഇടുപ്പെല്ലിന് പൊട്ടലുണ്ട്. പരിക്കേറ്റ ഇരുവരെയും ഇടിച്ച വാഹനത്തിൽ തന്നെ കോതമംഗലത്തെ സ്വകാര്യ ആശുപത്രിയിൽ എത്തിച്ച് പ്രാഥമിക ചികിത്സ നൽകി. കോട്ടയം മെഡിക്കൽ കോളജ് ആശുപത്രിയിൽ ചികിത്സയിലിരിക്കെ ഇന്നലെ രാവിലെയാണ് ഭാസി മരിച്ചത്. ഊഞ്ഞാപ്പാറ കാഞ്ഞികുന്ന് ഭാഗത്ത് തട്ടുകട നടത്തിവരുകയായിരുന്നു ഭാസി. സംസ്കാരം ഇന്ന് നാലിന് വാക്കത്തിപ്പാറ എസ്‌സി ശ്മശാനത്തിൽ. മക്കൾ: ബാബു, ബൈജു.

നേര്യമംഗലം വനം റേഞ്ചിൽ വിത്തൂട്ട് പദ്ധതിക്ക് തുടക്കമായി

കോതമംഗലം: നേര്യമംഗലം വനം റേഞ്ചിൽ വിത്തൂട്ട് പദ്ധതിയുടെ ഉദ്ഘാടനവും വനമഹോത്സവ സമാപനവും ഇഞ്ചത്തൊട്ടി ഫോറസ്റ്റ് സ്റ്റേഷനിൽ നടന്നു. ആന്‍റണി ജോണ്‍ എംഎൽഎ ഉദ്ഘാടനം ചെയ്തു. കുട്ടന്പുഴ പഞ്ചായത്ത് വൈസ് പ്രസിഡന്‍റ് സൽമ പരീത് അധ്യക്ഷത വഹിച്ചു. മൂന്നാർ ഡിവിഷണൽ ഫോറസ്റ്റ് ഓഫീസർ എൻ.ടി. സിബിൻ പദ്ധതി വിശദീകരിച്ചു. ബ്ലോക്ക് പഞ്ചായത്തംഗങ്ങളായ കെ.കെ. ഗോപി, പി.എം. കണ്ണൻ, പഞ്ചായത്തംഗം മിനി മനോഹരൻ, സ്കൂൾ പ്രിൻസിപ്പൽ സി.എസ്. അജി എന്നിവർ പങ്കെടുത്തു.

‘ജോബ് ഫെയറുകൾ സംഘടിപ്പിക്കും'

നേര്യമംഗലം: നിർധന കുടുംബങ്ങളിൽനിന്നും മികച്ച മാർക്കോടെ വിജയം നേടുന്ന വിദ്യാർഥികൾക്കായി തെരഞ്ഞെടുത്ത കോളജുകളിൽ ജോബ് ഫെയറുകൾ സംഘടിപ്പിക്കാൻ താത്പര്യമെടുക്കുമെന്ന് ഡീൻ കുര്യാക്കോസ് എംപി. കോണ്‍ഗ്രസ് നേര്യമംഗലം മണ്ഡലം കമ്മറ്റിയുടെ നേതൃത്വത്തിൽ എസ്എസ്എൽസി, പ്ലസ്ടു പരീക്ഷകളിൽ ഉന്നത വിജയം നേടിയ വിദ്യാർഥികളെ അനുമോദിക്കുന്ന ചടങ്ങ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. കോണ്‍ഗ്രസ് മണ്ഡലം പ്രസിഡന്‍റ് ജോമോൻ ജോസ് അധ്യക്ഷത വഹിച്ചു. കെപിസിസി അംഗം എ.ജി. ജോർജ്, കോണ്‍ഗ്രസ് കവളങ്ങാട് ബ്ലോക്ക് പ്രസിഡന്‍റ് ബാബു ഏലിയാസ്, കോതമംഗലം ബ്ലോക്ക് പ്രസിഡന്‍റ് ഷമീർ പനക്കൽ, കവളങ്ങാട് പഞ്ചായത്ത് മുൻ പ്രസിഡന്‍റ് സൈജന്‍റ് ചാക്കോ, കർഷക കോണ്‍ഗ്രസ് സംസ്ഥാന ജനറൽ സെക്രട്ടറി പി.സി. ജോർജ് എന്നിവർ പ്രസംഗിച്ചു.

കെഎസ്ആർടിസി ബസിനു കല്ലെറിഞ്ഞ പ്രതി അറസ്റ്റിൽ

മൂവാറ്റുപുഴ: കേന്ദ്ര സർക്കാരിന്‍റെ തൊഴിൽ വിരുദ്ധനയങ്ങൾക്കെതിരെ സംയുക്ത ട്രേഡ് യൂണിയൻ ആഹ്വാനം ചെയ്ത അഖിലേന്ത്യാ പണിമുടക്കിൽ മൂവാറ്റുപുഴയിൽ കെഎസ്ആർടിസി ബസിന് നേരെ കല്ലെറിഞ്ഞ സംഭവത്തിൽ പ്രതി അറസ്റ്റിൽ. പുളിഞ്ചുവട് പാലത്തിങ്കൽ ഷുക്കൂറിനെ (55) ആണ് മൂവാറ്റുപുഴ പോലീസ് ഇൻസ്പെക്ടർ ബേസിൽ തോമസിന്‍റെ നേതൃത്വത്തിൽ അറസ്റ്റ് ചെയ്തത്. കെഎസ്ആർടിസി ഡ്രൈവർ നൽകിയ പരാതിയുടെ അടിസ്ഥാനത്തിൽ മൂവാറ്റുപുഴ പോലീസ് കേസ് രജിസ്റ്റർ ചെയ്തതിനെ തുടർന്നാണ് നടപടി. പ്രതികളെ ഇന്ന് മൂവാറ്റുപുഴ കോടതിയിൽ ഹാജരാക്കും.

മാധ്യമ പ്രവർത്തകനെ മർദ്ദിച്ച സംഭവത്തിൽ ഒരാൾ കസ്റ്റഡിയിൽ

മൂവാറ്റുപുഴ: ദൃശ്യങ്ങൾ പകർത്തുന്നതിനിടെ മാധ്യമ പ്രവർത്തകനെ മർദ്ദിച്ച സംഭവത്തിൽ ഒരാൾ കസ്റ്റഡിയിൽ. ഓട്ടോറിക്ഷ തൊഴിലാളിയായ മുടവൂർ മറ്റത്തിൽ രാജഗോപാലനെ (57) യാണ് പോലീസ് കസ്റ്റഡിയിലെടുത്തിരിക്കുന്നത്. മൂവാറ്റുപുഴയിലെ പ്രാദേശിക കേബിൾ ടിവി ചാനലിലെ റിപ്പോർട്ടർ അനൂപ് സത്യൻ (38)നാണ് പരിക്കേറ്റത്. അഖിലേന്ത്യ പണിമുടക്കുമായി ബന്ധപ്പെട്ട് വെള്ളൂർക്കുന്നത് വാഹനങ്ങൾ തടഞ്ഞ സമരാനുകൂലികൾക്കൊപ്പമുണ്ടായിരുന്ന ഇ‍യാൾ കെഎസ്ആർടിസി ബസിനുനേരെയുണ്ടായ കല്ലേറിന്‍റെ ദൃശ്യങ്ങൾ പകർത്തുന്നതിനിടെ മാധ്യമ പ്രവർത്തകനെ മർദിക്കുകയായിരുന്നു. സംഭവത്തിൽ പരിക്കേറ്റ അനൂപ് സത്യൻ മൂവാറ്റുപുഴയിലെ സ്വകാര്യ ആശുപത്രിയിൽ ചികിത്സതേടി.

കോതമംഗലത്ത് റാലിയും പൊതു സമ്മേളനവും നടത്തി

കോതമംഗലം: യുഡിഎഫ് തൊഴിലാളി സംഘടനകളുടെ നേതൃത്വത്തിൽ ദേശീയ പണിമുടക്കിനോടുബന്ധിച്ച് കോതമംഗലത്ത് റാലിയും പൊതുസമ്മേളനവും നടത്തി. ഡിസിസി ജനറൽ സെക്രട്ടറി അബു മൊയ്തീൻ ഉദ്ഘാടനം ചെയ്തു. ഐഎൻടിയുസി റീജണൽ പ്രസിഡന്‍റ് കെ.സി. മാത്യൂസ് അധ്യക്ഷത വഹിച്ചു. ഷെമീർ പനയ്ക്കൽ, ബാബു ഏലിയാസ്, ഇബ്രാഹിം കവലയിൽ, എം.എസ്. എൽദോസ്, ഭാനുമതി രാജു, ചന്ദ്രലേഖ ശശിധരൻ, സീതി മുഹമ്മദ്, അനസ് മൂവാറ്റുപുഴ, എംബി. സുഗതൻ, ബിനോയി സി. പുല്ലൻ, ബേസിൽ തണ്ണിക്കോട്ട്, ശശി കുഞ്ഞുമോൻ, കെ.ഇ. കാസിം, ജമാൽ കുന്പശേരി, കെ.വി. ആന്‍റണി, മുഹമ്മദ് ഇക്ബാൽ, ശ്രീരാജ്, യദു ജയൻ, തുടങ്ങിയവർ എന്നിവർ പ്രസംഗിച്ചു. കൂത്താട്ടുകുളത്ത് സമാധാനപരം കൂത്താട്ടുകുളം: സംയുക്ത ട്രേഡ് യൂണിയനുകൾ ആഹ്വാനം ചെയ്ത പണിമുടക്ക് കൂത്താട്ടുകുളത്ത് സമാധാനപരം. പണിമുടക്കിന്‍റെ ഭാഗമായി തൊഴിലാളികളുടെ നേതൃത്വത്തിൽ പ്രതിഷേധ പ്രകടനം നടന്നു. സിഐടിയു ജില്ലാ വൈസ് പ്രസിഡന്‍റ് പി.എസ്.മോഹനൻ ഉദ്ഘാടനം ചെയ്തു.

അഖിലേന്ത്യ പണിമുടക്ക് : മൂവാറ്റുപുഴയിൽ സംഘർഷം

മൂവാറ്റുപുഴ: കേന്ദ്ര സർക്കാരിന്‍റെ തൊഴിൽ വിരുദ്ധനയങ്ങൾക്കെതിരെ സംയുക്ത ട്രേഡ് യൂണിയൻ ആഹ്വാനം ചെയ്ത അഖിലേന്ത്യ പണിമുടക്കിൽ മൂവാറ്റുപുഴയിൽ സംഘർഷം. വെള്ളൂർക്കൂന്നത്ത് സമരാനുകൂലികൾ വഴിതടയാനെത്തിയതോടെയാണ് സംഘർഷത്തിനു തുടക്കം. വെള്ളൂർക്കുന്നം റോഡിന്‍റെ ഒരു ഭാഗം ക്രെയിൻ ഉപയോഗിച്ചും മറുഭാഗം സമരാനുകൂലികൾ ഒത്തുകൂടിയും വാഹനങ്ങൾ പൂർണമായും തടഞ്ഞു. വിമാനത്താവളത്തിലേക്കും, മരണാനന്തര ചടങ്ങുകളിലും പങ്കെടുക്കാൻ എത്തിയ വാഹനങ്ങൾ കൂടി തടഞ്ഞതോടെ നേരിയ തർക്കം ഉടലെടുത്തിരുന്നു. ഇതുവഴിയെത്തിയ കെഎസ്ആർടിസി ബസ് പ്രവർത്തകർ തടഞ്ഞ് തർക്കത്തിലേർപ്പെട്ടു. ഇതിനിടെയാണ് നിരവധി വാഹനങ്ങൾ വെള്ളൂർക്കുന്നം അന്പലത്തിനു മുന്നിലൂടെ റോഡിലൂടെ പോയത്. ഇക്കൂട്ടത്തിലൊരു കെഎസ്ആർടിസി ബസും പോകുന്നതറിഞ്ഞ് സമരാനുകൂലികൾ അലറി വിളിച്ചുകൊണ്ട് ഇടവഴിയിലേക്കെത്തി. സമരാനുകൂലികളിൽ ഒരാൾ കല്ലെറിഞ്ഞ് ബസിന്‍റെ ചില്ല് തകർക്കുകയും ഡ്രൈവറെയും കണ്ടക്ടറേയും കൈയേറ്റം ചെയ്തതായും പരാതിയുണ്ട്. കോഴിക്കോടു നിന്നും പാലായിലേക്ക് സർവീസ് നടത്തിയ കെഎസ്ആർടിസി ബസിന്‍റെ ചില്ലുകളാണ് തകർത്തത്. ഇതിനിടെ ചില്ല് തകർത്ത ദൃശ്യങ്ങളും മറ്റും പകർത്താനെത്തിയ മാധ്യമ പ്രവർത്തകനെ സമരാനുകൂലികളിലൊരാൾ അക്രമിച്ചു. അഖിലേന്ത്യ പണിമുടക്കിൽ നഗരത്തിലാകെ ഹർത്താൽ പ്രതീതിയായിരുന്നു ദൃശ്യമായിരുന്നത്. കടകന്പോളങ്ങളും പെട്രോൾ പന്പുകളും പൂർണമായും അടഞ്ഞു കിടന്നു. എന്നാൽ തുറന്നു പ്രവർത്തിച്ച ബാങ്ക്, ഹോട്ടൽ തുടങ്ങിയ ഏതാനും ചില സ്ഥാപനങ്ങൾ സമരാനുകൂലികൾ അടപ്പിച്ചു. കോലഞ്ചേരിയിൽ പണിമുടക്ക് പൂർണം കോലഞ്ചേരി: കോലഞ്ചേരിയിലും സമീപ പ്രദേശങ്ങളിലും ദേശീയ പണിമുടക്ക് പൂർണമായിരുന്നു. ബഹുഭൂരിഭാഗം വാണിജ്യ സ്ഥാപനങ്ങളും ഹോട്ടലുകളും കടകന്പോളങ്ങളും ഓഫീസുകളും പ്രവർത്തിച്ചില്ല. സ്വകാര്യ ബസുകൾ ഓടിയില്ലെങ്കിലും മൂവാറ്റുപുഴയിൽ നിന്നും എറണാകുളത്തേക്ക് കെഎസ്ആർടിസി വിരളമായി ഓടിയിരുന്നു. മെഡിക്കൽ കോളജ് സ്ഥിതി ചെയ്യുന്ന കോലഞ്ചേരി ടൗണിൽ ഓട്ടത്തിനായി എത്തിയ ഓട്ടോറിക്ഷകൾ സമരാനുകൂലികൾ പറഞ്ഞുവിട്ടു. കാറുൾപ്പെടുന്ന സ്വകാര്യ വാഹനങ്ങളും ടൂവീലറുകളും നിരത്തുകളിൽ പല സമയത്തും ഓടുന്നുണ്ടായിരുന്നു. കോലഞ്ചേരി പള്ളി പെരുന്നാളിനോടനുബന്ധിച്ച് പള്ളിയുടെ ചുറ്റളവിൽ സ്ഥിതി ചെയ്യുന്ന താത്കാലിക കടകൾ തുറന്നു പ്രവർത്തിച്ചു. ഇടത് പക്ഷ സംഘടനയുടെ നേതൃത്വത്തിൽ കോലഞ്ചേരിയിലും കോണ്‍ഗ്രസ് അനുകൂല സംഘടനകളുടെ നേതൃത്വത്തിൽ അന്പലമുഗളിലും രാവിലെ വിശദീകരണ യോഗങ്ങളും പ്രകടനവും നടത്തി.

പിഎസ് മിഷൻ ആശുപത്രി ദിനാഘോഷം

മരട്: പിഎസ് മിഷൻ ആശുപത്രിയുടെ 64-ാമത് ആശുപത്രി ദിനാഘോഷം തെരേസ്യൻ കർമലീത്താ സന്യാസി സമൂഹത്തിന്‍റെ സുപ്പീരിയർ ജനറൽ മദർ ഷഹില ഉദ്ഘാടനം ചെയ്തു. പ്രൊവിൻഷ്യാൾ സുപ്പീരിയർ സിസ്റ്റർ പേഴ്സി, ഇടവക വികാരി ഫാ. ഷൈജു തോപ്പിൽ, പ്രൊവിൻഷ്യാൾ കൗൺസിലർ സിസ്റ്റർ ഡോ. ശാലിനി, ഡയറക്ടർ സിസ്റ്റർ ഡോ. ആനി ഷീല, ഡോ.(ലഫ്.കേണൽ) മാത്യു ജോർജ്, ആൻ തോമസ്, ഡോ. വിദ്യേശ്വരി തുടങ്ങിയവർ പ്രസംഗിച്ചു.

പറവൂരിൽ രണ്ടു വിദ്യാർഥികളെ തെരുവുനായ കടിച്ചു

പറവൂർ: പറവൂരിൽ പത്തും 14ഉം വയസ് പ്രായമുള്ള രണ്ടു വിദ്യാർഥികളെ തെരുവുനായ കടിച്ചു. തട്ടുകടവിൽ താമസിക്കുന്ന പറമ്പൻ വീട്ടിൽ ആൻഡ്രൂവിന്‍റെ മകൾ ആൻഡ്രിയ, പറവൂർ യാക്കോബായ പള്ളിക്ക് സമീപം താമസിക്കുന്ന അമ്പാട്ട് വീട്ടിൽ ഗിരിയുടെ മകൻ ഈവാൻ എന്നിവർക്കാണ് കടിയേറ്റത്. ചൊവ്വാഴ്ച വൈകീട്ട് വീടിനു സമീപം കളിച്ചു കൊണ്ടിരിക്കുകയായിരുന്ന ആൻഡ്രിയയുടെ ഇടതുകാലിലാണ് നായ ആദ്യം കടിച്ചത്. താഴെ വീണപ്പോൾ മുഖത്തും കടിക്കുകയായിരുന്നു. ഇന്നലെ രാവിലെ വീടിനു സമീപം റോഡിൽ നിൽക്കുന്പോഴാണ് ഇവാന്‍റെ കാലിൽ നായ കടിച്ചത്. ഇരുവരെയും കളമശേരി മെഡിക്കൽ കോളജ് ആശുപത്രിയിൽ എത്തിച്ച് ചികിത്സ നൽകി. വിദ്യാർഥിക്കു തെരുവുനായയുടെ കടിയേറ്റു പെരുമ്പാവൂർ: കൂവപ്പടി പഞ്ചായത്തിൽ വിദ്യാർഥിക്കു തെരുവു നായ യുടെ കടിയേറ്റു. കഴിഞ്ഞ ദിവസം വൈകുന്നേരം ട്യൂഷനു പോകുമ്പോളാണ് വിദ്യാർഥിയെ തെരുവുനായ കടിച്ചത്. പന്ത്രണ്ടാം വാർഡിൽ വേളാങ്കണ്ണി മാതാ കപ്പേളക്ക് സമീപം അയ്മുറി കക്കാട്ടുപറമ്പിൽ മനോജിന്‍റെ മകൻ ഗൗരീഷ് (7) നെയാണ് കടിച്ചത്. പരിക്കുകളോടെ കളമശേരി മെഡിക്കൽ കോളജിൽ പ്രവേശിപ്പിച്ചു. ഒരു മാസം മുൻപ് കയ്യുത്തിയാലിന് സമീപം യുവാവിന് മുഖത്ത് നായയുടെ കടിയേറ്റിരുന്നു. ഇദ്ദേഹം ഇപ്പോഴും ചികിത്സയിലാണ്.

ഓണവിപണി: പൂക്കളും പച്ചക്കറികളും പെരുന്പാവൂരിൽ കൃഷി തുടങ്ങി

പെരുന്പാവൂർ: ഓണവിപണിയില്‍ പൂക്കളെത്തിക്കാൻ കുടുംബശ്രീ ആരംഭിക്കുന്ന 'നിറപ്പൊലിമ'യ്ക്കും വിഷരഹിത പച്ചക്കറികള്‍ ഒരുക്കുന്ന 'ഓണക്കനി'ക്കും പെരുമ്പാവൂർ നഗരസഭയിൽ തുടക്കം കുറിച്ചു.നഗരസഭ ചെയർമാൻ പോൾ പാത്തിക്കൽ ഉദ്ഘാടനം നിർവഹിച്ചു. പൊതുമരാമത്ത് സ്റ്റാൻഡിംഗ് കമ്മിറ്റി ചെയർപേഴ്സൺ റഷീദ ലത്തീഫ് അധ്യക്ഷ വഹിച്ചു. സിഡിഎസ് ചെയർപേഴ്സൺ ജാസ്മിൻ ബഷീർ, എഡിഎസ് സെക്രട്ടറി ജെസ്‌ലി ഷാനി, പ്രസിഡന്‍റ് സീന ഉസ്മാൻ, റംല ഇബ്രാഹിം, അയൽക്കൂട്ടം അംഗങ്ങൾ, തൊഴിലുറപ്പ് തൊഴിലാളികൾ, രാഷ്ട്രീയ നേതാക്കൾ എന്നിവർ പങ്കെടുത്തു. നഗരസഭ മൂന്നാം വാർഡ് കാഞ്ഞിരക്കാട് പള്ളിപ്പടിയിൽ ശ്രദ്ധ അയൽക്കൂട്ടത്തിന്‍റെ നേതൃത്വത്തിൽ ആണ് പദ്ധതി ആരംഭിച്ചത്. വിഷമില്ലാത്ത പച്ചക്കറികളും ഓണപ്പൂക്കളത്തിനുള്ള പൂവുകളും നാട്ടില്‍ ഉല്‍പാദിപ്പിക്കുന്നതിലൂടെ കുടുംബശ്രീക്ക് കീഴിലെ കര്‍ഷകവനിതകള്‍ക്ക് കൂടുതല്‍ തൊഴിലവസരങ്ങള്‍ ഒരുക്കുകയാണ് പദ്ധതിയുടെ ലക്ഷ്യം. കുടുംബശ്രീ സിഡിഎസിന്‍റെ നേതൃത്വത്തില്‍ നഗരസഭയുമായി ചേര്‍ന്നാണ് ഇത് നടപ്പാക്കുന്നത്. രണ്ടു നിറങ്ങളിലെ ബന്ദി, വിവിധയിനം പയര്‍, വെണ്ട, പടവലം, മുളക്, വഴുതന തുടങ്ങിയവ കൃഷിചെയ്യും. വിളകൾ ഓണത്തോടനുബന്ധിച്ച് കുടുംബശ്രീ ചന്തകള്‍ വഴി വിപണിയിലെത്തിക്കും.

ഭാരവാഹികളെ തെരഞ്ഞെടുത്തു

കൊച്ചി: ബാങ്കേഴ്‌സ് ക്ലബ് കൊച്ചിയുടെ പുതിയ പ്രസിഡന്‍റായി ബിബി അഗസ്റ്റിന്‍ (ജോ. ജനറല്‍ മാനേജര്‍, സൗത്ത് ഇന്ത്യന്‍ ബാങ്ക്), സെക്രട്ടറിയായി ജെ. ജില്‍ജിത്ത് (അസി. ജനറല്‍ മാനേജര്‍, സൗത്ത് ഇന്ത്യന്‍ ബാങ്ക്), ട്രഷററായി വി.ടി. വിനീത് കുമാര്‍ (അസി. മാനേജര്‍, സൗത്ത് ഇന്ത്യന്‍ ബാങ്ക്) എന്നിവരെ തെരഞ്ഞെടുത്തു. ഹോട്ടല്‍ ഹില്‍പാലസില്‍ നടന്ന 52-ാമത് വാര്‍ഷിക പൊതുയോഗത്തിലാണ് പുതിയ ഭാരവാഹികളെ തെരഞ്ഞെടുത്തത്.

കാണാതായ വീട്ടമ്മയ്ക്കായി കായലിൽ തെരച്ചിൽ

പനങ്ങാട്: കുമ്പളത്ത് കഴിഞ്ഞ ദിവസം കാണാതായ വീട്ടമ്മയുടെ ചെരിപ്പ് കായലിനരികിൽ കണ്ടെത്തിയതോടെ ഫയർഫോഴ്സ് സ്കൂബാ ടീം കായലിൽ തെരച്ചിൽ നടത്തി. കുമ്പളം തുരുത്തിപ്പറമ്പിൽ പരേതനായ ഗോപിയുടെ ഭാര്യ വനജ (60)യെയാണ് ചൊവ്വാഴ്ച രാവിലെ മുതൽ കാണാതായത്. ബുധനാഴ്ച ഉച്ചയോടെ കുമ്പളം നോർത്ത് കള്ള് ഷാപ്പിന് എതിർവശത്തുള്ള കായലിന് സമീപമാണ് ചെരിപ്പ് കണ്ടെത്തിയത്. തുടർന്ന് പനങ്ങാട് പൊലീസും കടവന്ത്രയിൽ നിന്നെത്തിയ ഫയർഫോഴ്സും തിരച്ചിലാരംഭിക്കുകയായിരുന്നു. വൈകിട്ട് അഞ്ചോടെ തെരച്ചിൽ അവസാനിപ്പിച്ച് സ്കൂബ ടീം മടങ്ങി. പ്രദേശത്തെ സിസിടിവി കേന്ദ്രീകരിച്ചും അന്വേഷണം പുരോഗമിക്കുന്നുണ്ട്. പള്ളിയിൽ തിരി കത്തിക്കാനെന്ന് പറഞ്ഞാണ് ചൊവ്വാഴ്ച രാവിലെ വനജ പോയതെന്ന് നാട്ടുകാർ പറയുന്നു. എന്നാൽ വൈകിട്ടും തിരിച്ചെത്താത്തതിനെ തുടർന്നാണ് അന്വേഷണമാരംഭിച്ചത്.

ഇടക്കൊച്ചിയിൽ താത്കാലിക തടയണ നിർമാണം ആരംഭിച്ചു

പള്ളുരുത്തി: ഇടക്കൊച്ചിയിൽ കായൽ വേലിയേറ്റ വെള്ളക്കെട്ട് തടയുന്നതിനുള്ള താത്കാലിക തടയണയുടെ നിർമാണം തുടങ്ങി. കൗൺസിലർമാരായ അഭിലാഷ് തോപ്പിൽ, ജീജ ടെൻസൻ എന്നിവരുടെ ആവശ്യം പരിഗണിച്ച് ജില്ലാ കളക്ടർ അനുവദിച്ച അഞ്ച് ലക്ഷം രൂപ വിനിയോഗിച്ചാണ് നിർമാണം. ദുരന്തനിവാരണ ഫണ്ടിൽ നിന്നാണ് തുക അനുവദിച്ചത്. തടയണയുടെ നിർമാണോദ്ഘാടനം കൗൺസിലർമാരായ ജീജ ടെൻസനും അഭിലാഷ് തോപ്പിലും ചേർന്ന് നിർവഹിച്ചു. ചടങ്ങിൽ പൊതുപ്രവർത്തകരും പ്രദേശവാസികളും പങ്കെടുത്തു. തടയണക്കുള്ള എസ്റ്റിമേറ്റ് നഗരസഭയാണ് തയാറാക്കിയത്. 3,95,000 രൂപയുടേതാണ് എസ്റ്റിമേറ്റ്. വേലിയേറ്റ ദുരിതത്തിലായ ഇടക്കൊച്ചി കമ്പനി പറമ്പ് ഭാഗം, കുട്ടികൃഷ്ണൻ വൈദ്യർ റോഡ്, അംബേദ്കർ റോഡ് എന്നിവിടങ്ങളിലാണ് കായൽ വേലിയേറ്റ വെള്ളക്കെട്ട് മൂലം ജനങ്ങൾ ദുരിതം അനുഭവിക്കുന്നത്. ഈ പ്രദേശങ്ങളിലേക്ക് തുറന്നു കിടക്കുന്ന വലിയ കനാലുകൾ വഴിയാണ് കായൽ വെള്ളം ഇവിടേക്ക് ഒഴുകിയെത്തുന്നത്. താത്കാലിക തടയണയുടെ നിർമാണം പൂർത്തിയാകുന്നതോടെ കായലിൽ നിന്ന് കയറുന്ന വെള്ളം ഒരു പരിധി വരെ തടഞ്ഞു നിർത്താനാകും. കനാലുകൾക്ക് കുറുകെയാണ് തടയിണ നിർമാണം. ആർക്കും എളുപ്പത്തിൽ പ്രവർത്തിപ്പിക്കുവാൻ പറ്റുന്ന രീതിയിലാണ് തടയണ നിർമിക്കുന്നതെന്ന് കരാറുകാരൻ പറഞ്ഞു. ഇറിഗേഷൻ വകുപ്പ് ഇവിടെ നടപ്പിലാക്കുന്ന സ്ലൂയിസുകൾ ടെൻഡർ നടപടിയായിട്ടുണ്ട്. നഗരസഭ ചെറുതും വലുതുമായി ഏഴ് സ്ളൂയിസുകൾക്ക് കൂടി അനുമതി നൽകിയിട്ടുണ്ട്.

തോപ്പുംപടി ഹാർബറിനു പുതുമോടി : ഒന്നാം ഘട്ടം സെപ്റ്റംബറിൽ പൂർത്തിയാകും

കൊച്ചി: തോപ്പുംപടിയിലെ മത്സ്യബന്ധന തുറമുഖത്തിന്‍റെ നവീകരണ പ്രവർത്തനങ്ങളുടെ ആദ്യഘട്ടം സെപ്റ്റംബറിൽ പൂർത്തിയാകും. 169.17 കോടി രൂപയുടെ പദ്ധതി 2026ൽ പൂർത്തീകരിക്കാനാണു ലക്ഷ്യം. കൊച്ചി തുറമുഖ അഥോറിറ്റിയുടെ നേതൃത്വത്തിലാണ് നിർമാണ പ്രവർത്തനങ്ങൾ. 54 ശതമാനം നിർമാണ പ്രവർത്തനങ്ങൾ പൂർത്തീകരിച്ചു. നിർമാണം പൂർത്തിയാകുന്നതോടെ 700 മത്സ്യബന്ധന ബോട്ടുകൾക്കും 10000 മത്സ്യത്തൊഴിലാളികൾക്കും നേരിട്ടു പ്രയോജനം ലഭിക്കുമെന്നാണു പ്രതീക്ഷ. പരോക്ഷമായി 30000 ഓളം തൊഴിലാളികൾക്കും തുറമുഖത്തിന്‍റെ പ്രയോജനം ലഭിക്കും. തുറമുഖത്തിനാവശ്യമായ ഡ്രഡ്ജിംഗ് അടുത്ത മാസം നടത്തും. പ്രവർത്തനരഹിതമായ ഹൈമാസ്റ്റ് ലൈറ്റുകൾ ഉടൻ അറ്റകുറ്റപ്പണികൾ നടത്തി ഉപയോഗയോഗ്യമാക്കും. ‌‌വല തുന്നുന്നതിനുള്ള സൗകര്യങ്ങൾ കൂടുതൽ വിപുലമാക്കും. സംഭരണ സൗകര്യങ്ങളും, കുടി വെള്ളം, ശുചിമുറി സംവിധാനങ്ങളും ആധുനികരീതിയിൽ സജ്ജമാക്കും. പദ്ധതി പ്രവർത്തനങ്ങൾ വേഗത്തിലാക്കുന്നതിന് ഹൈബി ഈഡൻ എംപിയുടെ അധ്യക്ഷതയിൽ കഴിഞ്ഞ ദിവസം കൊച്ചിയിൽ അവലോകന യോഗം നടത്തിയിരുന്നു. തുറമുഖ അഥോറിറ്റി ഉദ്യോഗസ്ഥർ പങ്കെടുത്തു.

പൈപ്പ് ലൈൻ റോഡിൽ വ്യാപക കൈയേറ്റം : സർവേക്കല്ലിട്ട് സ്ഥലം ഏറ്റെടുക്കണമെന്ന ആവശ്യം ശക്തമാകുന്നു

ആലുവ: വിശാല കൊച്ചിയിലേക്ക് ഭൂഗർഭ പൈപ്പ് വഴി കുടിവെള്ളം എത്തിക്കുന്ന പൈപ്പ് ലൈൻ റോഡിലെ കൈയേറ്റങ്ങൾ ഒഴിപ്പിക്കാൻ സർവേക്കല്ലുകൾ സ്ഥാപിക്കണമെന്നാവശ്യം ശക്തമാകുന്നു. ആലുവ പിഎച്ച് ഡിവിഷൻ ഓഫീസ് മുതൽ ഇടപ്പള്ളി തോടുവരെയുള്ള 12.3 കിലോമീറ്റർ ദൂരത്തിൽ മാത്രം 93 കൈയേറ്റങ്ങളാണ് ആലുവ അസി. എക്സിക്യൂട്ടീവ് എൻജിനീയർ നടത്തിയ സർവേയിൽ കണ്ടെത്തിയത്. കൈയേറ്റക്കാർക്ക് നോട്ടീസ് നൽകിത്തുടങ്ങിയെങ്കിലും വീണ്ടും വ്യാപകമായ കയ്യേറ്റം നടക്കുന്നതായാണ് പ്രദേശവാസികളുടെ പരാതി. കഴിഞ്ഞ ദിവസം വാട്ടർ അതോറിറ്റി ഓഫീസിന് മുന്നിൽ തന്നെ ഇരുമ്പിൽ നിർമ്മിച്ച ലോട്ടറി തട്ടുകൾ സ്ഥാപിച്ചാണ് കൈയേറ്റം നടന്നത്. ആലുവ, കണയന്നൂർ താലൂക്കുകളിലായി ഉൾപ്പെടുന്ന പൈപ്പ് ലൈൻ റോഡിൻെറ സർവ്വെ നടത്തി സർവേക്കല്ലുകൾ സ്ഥാപിക്കണമെന്ന് വാട്ടർ അഥോറിറ്റി ആവശ്യപ്പെട്ടിട്ട് വർഷങ്ങളായി. തട്ടുകടകൾ മുതൽ മുതൽ വലിയ ഗോഡൗകൾ വരെ വാട്ടർ അതോറിറ്റിയുടെ കൈയേറ്റ പട്ടികയിൽ ഉണ്ട്. ഭൂഗർഭ പൈപ്പ് ഉള്ളതിനാൽ വലിയ ഭാരവണ്ടികൾക്ക് പൈപ്പ് ലൈൻ റോഡിൽ നിരോധനമുണ്ട്. ആറോളം സ്ഥലങ്ങളിൽ ഉയരം കുറഞ്ഞ ക്രോസ് ബാറുകൾ വച്ചിട്ടുമുണ്ട്. എന്നാൽ ചില സ്ഥലങ്ങളിൽ ഇവ മാറ്റി വച്ചിട്ടുണ്ട്. സ്കൂൾ ബസുകൾ പോകാനായി ആലുവ നിർമല സ്ക്കൂളിന് മാത്രമാണ് ഇളവ് നൽകിയിരിക്കുന്നത്. പ്രധാന പൈപ്പ് ലൈൻ റോഡിന് സമാന്തരമായി കാസിനോ തിയറ്റേറിന് മുന്നിലൂടെ മറ്റൊരു പൈപ്പ് ലൈൻ കൂടി പോകുന്നുണ്ട്. ഈ റോഡിലും കയ്യേറ്റമുണ്ട്. അടിയന്തിര പ്രാധാന്യത്തോടെ സർവേകല്ലിട്ടില്ലെങ്കിൽ പുറമ്പോക്ക് ഭൂമി അന്യാധീനപ്പെടുമെന്നാണ് പ്രദേശവാസികൾ മുന്നറിയിപ്പ് നൽകുന്നത്.

എടക്കുന്ന് നൈപുണ്യ പബ്ലിക് സ്കൂളിന് പുരസ്കാരം

അങ്കമാലി: കേരളത്തിലെ മികച്ച 10 സ്കൂളുകളിൽ ഒന്നായി എടക്കുന്ന് നൈപുണ്യ പബ്ലിക് സ്കൂൾ പുരസ്കാരം നേടി. ബിസിനസ് ഇൻസൈറ്റ് മാഗസിൻ ആപസ്കുക്ക് കമ്പനിയുമായി സഹകരിച്ച് ഏർപ്പെടുത്തിയ അവാർഡാണ് എടക്കുന്ന് നൈപുണ്യ പബ്ലിക്ക് സ്കൂൾ നേടിയത്. എറണാകുളം ഗോകുലം കൺവൻഷൻ സെന്‍ററിൽ നടന്ന ചടങ്ങിൽ സ്കൂളിനു വേണ്ടി എക്സിക്യൂട്ടീവ് ഡയറക്ടർ റവ. ഡോ. ബിന്‍റോ കിലുക്കൻ അവാർഡ് ഏറ്റുവാങ്ങി. പ്രിൻസിപ്പൽ രാജലക്ഷ്മി, അസിസ്റ്റന്‍റ് ഡയറക്ടർ ഫാ. ക്രിസ്റ്റി, വൈസ് പ്രിൻസിപ്പൽ രജിത ജോസഫ് എന്നിവർ ചടങ്ങിൽ പങ്കെടുത്തു.

കോടികൾ മുടക്കി നവീകരിച്ച അന്ധകാരത്തോട് വീണ്ടും കാട് കയറുന്നു

തൃപ്പൂണിത്തുറ: കോടികൾ മുടക്കി പുനരുദ്ധാരണം നടത്തി മനോഹരമാക്കിയ തൃപ്പൂണിത്തുറയിലെ അന്ധകാരത്തോട് തുടർ പരിചരണമില്ലാത്തതിനെ തുടർന്ന് വീണ്ടും കാടുകയറുന്നു. തോടിന്‍റെ ഇരുവശങ്ങളിലും പുല്ലും പച്ചയും വള്ളിപ്പടർപ്പുകളും പടർന്നു കയറിക്കഴിഞ്ഞു. തോടിന്‍റെ ഭിത്തിയിൽ കരിങ്കൽ പാകിയിട്ടിരിക്കുന്നതിന്‍റെ വിടവുകളിൽ നിന്നും കുറ്റിച്ചെടികളും വൃക്ഷത്തൈകളും വളർന്നു വലുതാകുകയാണ്. പുറമേ നിന്നുള്ള മാലിന്യങ്ങൾ വലിച്ചെറിയാതിരിക്കാനായി 10 അടിയോളം ഉയരത്തിൽ സ്ഥാപിച്ചിട്ടുള്ള ഫൈബർ വേലികളിലും വള്ളിപ്പടർപ്പുകൾ പടർന്നു കയറിക്കഴിഞ്ഞു. തോടിന്‍റെ തെക്കുഭാഗത്തുള്ള വേലി പുറത്തു കാണാൻ സാധിക്കാത്ത വിധം മുഴുവനായി പച്ച കയറിയിരിക്കുകയാണ്. ഈ സ്ഥിതിയിലെങ്കിലും തോടിൽ ശുചീകരണ പ്രവർത്തനങ്ങൾ നടത്താനാരംഭിച്ചില്ലെങ്കിൽ തോട് പുനരുദ്ധാരണം നടത്തിയതിന് മുൻപേയുണ്ടായ സ്ഥിതിയിലേയ്ക്ക് മടങ്ങാൻ കാലതാമസമുണ്ടാകാത്ത അവസ്ഥയാണ് നിലവിലുള്ളത്. മുൻപ് തോടിനിരുവശവും ചെറുവൃക്ഷങ്ങൾ വളർന്ന് കയറി അവയുടെ വേരുകൾ മൂലം വശങ്ങളിലെ കരിങ്കല്ലുകൾ മുഴുവൻ ഇളകിമാറി കാടും പടലും പടർന്നു കയറി, ഇരുട്ട് മൂടി ഒഴുക്ക് നിലച്ച് പേരിനെ അന്വർത്ഥമാക്കും വിധം കിടന്നിരുന്ന അന്ധകാരത്തോട് എം.സ്വരാജ് എംഎൽഎയായിരുന്ന കാലത്താണ് 10 കോടി രൂപ ചെലവ് ചെയ്ത് ശുചീകരണ പ്രവർത്തനങ്ങൾ നടത്തി നീരൊഴുക്ക് സുഗമമാക്കിയത്. അന്ന് ചെയ്ത പ്രവർത്തനങ്ങളുടെ ഗുണഫലം ലഭിക്കാനാകാത്ത രീതിയിലാണ് തോടിൽ മുഴുവൻ ഇപ്പോൾ കാട് കയറിയിരിക്കുന്നത്.

മന്ത്രിക്കുനേരെ കരിങ്കൊടി: കോൺഗ്രസ് പ്രവർത്തകർക്ക് ജാമ്യം

ആലുവ : ആരോഗ്യ മേഖലയിലെ തകർച്ചയിൽ പ്രതിഷേധിച്ച് മന്ത്രി വി.എൻ. വാസവനെതിരെ അങ്കമാലി അഡലക്സ് കൺവൻഷൻ സെന്‍ററിന് മുന്നിൽ കരിങ്കൊടി കാണിച്ച സംഭവത്തിൽ റിമാൻഡിലായ യൂത്ത് കോൺഗ്രസ് നേതാക്കൾക്ക് നാലു ദിവസത്തിന് ശേഷം ജാമ്യം ലഭിച്ചു. യൂത്ത് കോൺഗ്രസ് സംസ്ഥാന ജനറൽ സെക്രട്ടറി ലിന്‍റോ പി. ആന്‍റോ, ഭാരവാഹികളായ സോണി പനന്താനം,ജോണി ക്രിസ്റ്റഫർ വിപിൻദാസ് ,റിൻസ് ജോസ് തുടങ്ങിയവർക്കാണ് ഉപാധികളോടെ കോടതി ജാമ്യം നൽകിയത്. ആലുവ സബ് ജയിലിനു മുന്നിൽ ബെന്നി ബഹനാൻ എംപി, റോജി എം. ജോൺ എംഎൽഎ, കെപിസിസി ജനറൽ സെക്രട്ടറി അബ്ദുൽ മുത്തലിബ്, ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ തുടങ്ങിയവർ ചേർന്ന് സ്വീകരിച്ചു.

"ദീപിക നമ്മുടെ ഭാഷ പദ്ധതി' : അകനാട് ഗവ. ഹയർ സെക്കൻഡറി സ്കൂളിൽ

പെരുമ്പാവൂർ: മുടക്കുഴ അകനാട് ഗവ. ഹയർ സെക്കൻഡറി സ്കൂളിൽ "ദീപിക നമ്മുടെ ഭാഷ പദ്ധതി'യുടെ ഉദ്ഘാടനം മുടക്കുഴ സർവീസ് സഹകരണ ബാങ്ക് പ്രസിഡന്‍റ് ജോഷി തോമസ് നിർവഹിച്ചു. ബാങ്ക് വൈസ് പ്രസിഡന്‍റ് എം.ജി. സന്തോഷ്‌ കുമാർ, മുടക്കുഴ ഗ്രാമ പഞ്ചായത്ത്‌ പ്രസിഡന്‍റ് പി.പി. അവറാച്ചൻ, ബാങ്ക് ഭരണ സമിതി അംഗങ്ങളായ പി.പി. ഗോപിനാഥൻ നായർ, ആർ. ശ്രീജിത്ത്‌ ,രമേശ് കുമാർ, ഷാജി കീച്ചേരി, ശ്രീജ ബിജു, റിനി ബെന്നി, മിമി ലിനോയി, പോൾ വർഗീസ്, ടി.കെ. സാബു, സ്കൂൾ പ്രിൻസിപ്പൽ യു. സിന്ധു, പ്രധാനാധ്യാപിക വി. സ്മിത അധ്യാപകരായ റംസി, ജയദേവ്, അമ്പിളി, രാജി, ജിസ്മി, പ്രമിത, ഏരിയ മാനേജർ റ്റി.എ. നിബിൻ എന്നിവർ സംസാരിച്ചു. പത്രം സ്പോൺസർ ചെയ്തിരിക്കുന്നത് മുടക്കുഴ സഹകരണ ബാങ്കാണ്.

"ദീപിക നമ്മുടെ ഭാഷ പദ്ധതി' : അയിരൂര്‍ സെന്‍റ് ജോസഫ് ഗവ.എല്‍പി സ്‌കൂളില്‍

നെടുമ്പാശേരി: അയിരൂര്‍ സെന്‍റ് ജോസഫ് ഗവ. എല്‍പി സ്‌കൂളില്‍ 'ദീപിക നമ്മുടെ ഭാഷ പദ്ധതി'ക്കു തുടക്കം. കുന്നുകര ഗ്രാമപഞ്ചായത്ത് വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണും സ്‌കൂള്‍ പിടിഎ പ്രസിഡന്‍റുമായ സിജി വര്‍ഗീസ് ഉദ്ഘാടനം ചെയ്തു. പ്രധാനാധ്യാപകന്‍ പി.എല്‍. കേഴ്‌സണ്‍ അധ്യക്ഷത വഹിച്ചു. വാര്‍ഡ് മെമ്പര്‍ മിനി പോളി, എംപിടിഎ പ്രസിഡന്‍റ് നോബി ലൈജു, അധ്യാപിക കെ.ജെ. ജോബിന, ബൈജു കോട്ടക്കല്‍, പി.എല്‍. ജിജോ എന്നിവര്‍ പ്രസംഗിച്ചു.

കാപ്പ: സ്ഥിരം കുറ്റവാളികളായ രണ്ടുപേരെ നാടുകടത്തി

ചെറായി: മുനമ്പം പോലീസ് സ്റ്റേഷൻ അതിർത്തിയിൽ സ്ഥിരം കുറ്റവാളികളായ രണ്ടുപേരെ കാപ്പ നിയമപ്രകാരം പോലീസ് നാടുകടത്തി. ചെറായി കേളതറ വീട്ടിൽ ആഷിക് ബാബു(28), നികത്തിൽ ജിത്ത് രാജ് (21) എന്നിവരെയാണ് ആറുമാസത്തേക്ക് എറണാകുളം റൂറൽ ജില്ലാ പോലീസ് അധികാരപരിധിയിൽ പ്രവേശിക്കുന്നത് വിലക്കി നാടുകടത്തിയത്.

ലഹരിമരുന്നുമായി യുവാവ് പിടിയിൽ

പറവൂർ: ചെറായി ബീച്ച് കേന്ദ്രീകരിച്ച് വില്പന നടത്തുന്നതിനായി സൂക്ഷിച്ചിരുന്ന എംഡിഎംഎ, ഹാഷിഷ് ഓയിൽ, കഞ്ചാവ് എന്നിവയുമായി യുവാവ് പോലീസ് പിടിയിലായി. വടക്കേക്കര പട്ടണം ആളംതുരുത്ത് കല്ലൂത്തറ വീട്ടിൽ വൈശാഖി(31)നെയാണ് റൂറൽ ജില്ലാ ഡാൻസാഫ് ടീമും വടക്കേക്കര പോലീസും ചേർന്ന് അറസ്റ്റ് ചെയ്തത്. ഇയാളുടെ പക്കൽനിന്ന് 3.05 ഗ്രാം എംഡിഎംഎ, 79.73 ഗ്രാം ഹാഷിഷ് ഓയിൽ, 10.75 ഗ്രാം കഞ്ചാവ് എന്നിവ കണ്ടെടുത്തു. ജില്ലാ പോലീസ് മേധാവി എം. ഹേമലതയ്ക്ക് ലഭിച്ച രഹസ്യവിവരത്തിന്‍റെ അടിസ്ഥാനത്തിലായിരുന്നു പരിശോധന. 21 ഡപ്പികളിലായാണ് ഹാഷിഷ് ഓയിൽ സൂക്ഷിച്ചിരുന്നത്. വീടിന്‍റെ ടെറസിൽ പ്രത്യേകം സജ്ജമാക്കിയ ഭാഗത്ത് ഒളിപ്പിച്ച നിലയിലായിരുന്നു ലഹരി മരുന്ന്. കോയമ്പത്തൂരിൽ നിന്നാണ് ലഹരിമരുന്ന് കൊണ്ടുവന്നതെന്ന് പ്രതി പോലീസിനോട് പറഞ്ഞു. ഇയാൾ മയക്കുമരുന്ന് ശൃംഖലയിലെ കണ്ണിയാണെന്നും കൂടെയുള്ളവരെക്കുറിച്ച് വിശദമായ അന്വേഷണം പുരോഗമക്കുന്നതായും പോലീസ് പറഞ്ഞു. നർക്കോട്ടിക്ക് സെൽ ഡിവൈഎസ്പി ജെ. ഉമേഷ് കുമാർ, മുനമ്പം ഡിവൈഎസ്പി എസ്. ജയകൃഷ്ണൻ, ഇൻസ്പെക്ടർ കെ.ആർ. ബിജു എന്നിവരാണ് അന്വേഷണ സംഘത്തിലുണ്ടായിരുന്നത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

റിഫൈനറിയിലെ തീപിടുത്തം : മൂന്നു ദിവസത്തിനകം റിപ്പോര്‍ട്ട് സമര്‍പ്പിക്കാന്‍ നിര്‍ദേശം

കൊച്ചി: അമ്പലമുകള്‍ കൊച്ചിന്‍ റിഫൈനറിയിലെ തീപിടുത്തത്തിന്‍റെ കാരണം കണ്ടെത്തി മൂന്നു ദിവസത്തിനകം റിപ്പോര്‍ട്ട് സമര്‍പ്പിക്കാന്‍ നിര്‍ദേശം. തീപിടിത്തത്തെ തുടര്‍ന്നുള്ള സ്ഥിതിഗതികള്‍ അവലോകനം ചെയ്യാന്‍ ജില്ലാ കളക്ടര്‍ എന്‍.എസ്. കെ ഉമേഷിന്‍റെ അധ്യക്ഷതയില്‍ കളക്ടറേറ്റില്‍ യോഗത്തിലാണ് നിര്‍ദേശം. റിപ്പോര്‍ട്ട് സമര്‍പ്പിക്കാന്‍ ദുരന്തനിവാരണ വിഭാഗം ഡെപ്യൂട്ടി കളക്ടര്‍ കെ.മനോജിന്‍റെ നേതൃത്വത്തില്‍ കമ്പനി സെക്യൂരിറ്റി ഓഫീസര്‍, ഇലക്ട്രിക്കല്‍ ഇന്‍സ്‌പെക്ടര്‍, കെഎസ്ഇബി ഉദ്യോഗസ്ഥര്‍ എന്നിവർ അംഗങ്ങളായ സമിതിയെ ചുമതലപ്പെടുത്തി. കമ്പനിയുടെ സമീപ പ്രദേശങ്ങള്‍ താമസത്തിന് യോഗ്യമാണോ എന്ന് പരിശോധിച്ച് റിപ്പോര്‍ട്ട് സമര്‍പ്പിക്കാന്‍ മലിനീകരണ നിയന്ത്രണ ബോര്‍ഡ് എന്‍ജിനീയര്‍, ഗ്രാമ പഞ്ചായത്ത് ഹെല്‍ത്ത് ഇന്‍സ്‌പെക്ടര്‍, വില്ലേജ് ഓഫീസര്‍, കമ്പനി പ്രതിനിധികള്‍ എന്നിവര്‍ അടങ്ങിയ സമിതി രൂപീകരിച്ചു. സമിതി സമീപ പ്രദേശങ്ങളിലെ വീടുകള്‍ സന്ദര്‍ശിച്ച് രണ്ട് ദിവസത്തിനകം റിപ്പോര്‍ട്ട് സമര്‍പ്പിക്കണം. കമ്പനിയുടെ ദുരന്തനിവാരണ രൂപരേഖ പരിശോധിച്ച് ആവശ്യമെങ്കില്‍ മാറ്റങ്ങള്‍ വരുത്തി ഒരാഴ്ചയ്ക്കകം പുതിയ രൂപരേഖ സമര്‍പ്പിക്കാന്‍ ഡെപ്യൂട്ടി കളക്ടര്‍, ഹസാര്‍ഡ് അനലിസ്റ്റ്, കമ്പനി ഡി.എം പ്ലാന്‍ കോ-ഓര്‍ഡിനേറ്റര്‍ എന്നിവര്‍ക്ക് നിര്‍ദേശം നല്‍കി. പ്രദേശവാസികളുടെ സ്ഥലം ഏറ്റെടുക്കുന്നത് സംബന്ധിച്ച് ഉന്നതതല യോഗം ഉടന്‍ ചേരുമെന്ന് കളക്ടര്‍ അറിയിച്ചു. പ്രദേശവാസികളെ ചോറ്റാനിക്കരയിലേക്ക് മാറ്റി അമ്പലമുകൾ: തീപിടുത്തത്തെ തുടർന്നുണ്ടായ കനത്ത പുക മൂലം ദേഹാസ്വാസ്ഥ്യവും ശ്വാസതടസവുമടക്കം അനുഭവപ്പെ ട്ട് ബുദ്ധിമുട്ടിലായ അയ്യങ്കുഴി നിവാസികളെ ചോറ്റാനിക്കരയിലേക്ക് മാറ്റി. കമ്പനി അധികൃതരുടെ നേതൃത്വത്തിലാണ് പ്രദേശവാസികളെ ചോറ്റാനിക്കര ഇന്ദ്രപ്രസ്ഥം ഹോട്ടലിലേക്ക് ചൊവ്വാഴ്ച രാത്രിതന്നെ മാറ്റി താമസിപ്പിച്ചത്. പ്രദേശവാസികളുടെ പ്രതിഷേധത്തെ തുടർന്ന് ഇന്നലെ ജില്ലാ കളക്ടറുമായി നടത്തിയ ചർച്ചയിൽ 10 ദിവസത്തിനുള്ളിൽ അയ്യങ്കുഴിയുൾപ്പെടുന്ന പ്രദേശം കമ്പനി ഏറ്റെടുക്കുന്ന കാര്യത്തിൽ ഉന്നത ഉദ്യോഗസ്ഥരുമായി ഓൺലൈനിലോ നേരിട്ടോ ചർച്ച നടത്താൻ തീരുമാനമായി. കൂടാതെ ദുരന്ത നിവാരണ അഥോറിറ്റി അംഗങ്ങൾ, വടവുകോട് - പുത്തൻകുരിശ് പഞ്ചായത്ത് പ്രതിനിധികൾ, മലിനീകരണ നിയന്ത്രണ ബോർഡ് അംഗങ്ങൾ, പ്രദേശവാസികളിൽ നിന്നുള്ള പ്രതിനിധികൾ എന്നിവർ സംയുക്തമായി അയ്യങ്കുഴി ഉൾപ്പെടുന്ന പ്രദേശങ്ങളിൽ പരിശോധന നടത്തി ഇവിടം വാസയോഗ്യമാണോയെന്ന കാര്യത്തിൽ തീരുമാനമെടുക്കാനും ധാരണയായി. വാസയോഗ്യമല്ലെന്ന വിലയിരുത്തലിൽ എത്തുകയാണെങ്കിൽ ബദൽ സംവിധാനം കണ്ടെത്തുന്നതു വരെ പ്രദേശവാസികളെ ചോറ്റാനിക്കരയിൽ തന്നെ താമസിപ്പിക്കാനും തീരുമാനിച്ചു. കളക്ടറുമായുള്ള ചർച്ചയിൽ ബെന്നി ബഹനാൻ എംപി, പി.വി. ശ്രീനിജൻ എംഎൽഎ, ജനകീയ സമിതി പ്രസിഡന്‍റ് വി.ആർ. രാധാകൃഷ്ണൻ, സെക്രട്ടറി സജികുമാർ വി.എൻ, പഞ്ചായത്ത് പ്രസിഡന്‍റ് സോണിയ മുരുകേശൻ, വൈസ് പ്രസിഡന്‍റ് കെ.കെ.അശോക് കുമാർ തുടങ്ങിയവർ പങ്കെടുത്തു.

കളക്ടറേറ്റ് സ്ഫോടനത്തിന് ഇന്ന് 16 വയസ്

കാക്കനാട്: നാട് ഞെട്ടിവിറച്ച എറണാകുളം കളക്ടറേറ്റ് സ്ഫോടനത്തിന് ഇന്ന് 16 വയസ്. ബോംബ് വച്ചത് ആരാണെന്നോ എന്തിനുവേണ്ടിയെന്നോ കണ്ടെത്താൻ കഴിയാതെ അന്വേഷണം ഏറെക്കുറെ ഉപേക്ഷിച്ച മട്ടാണെങ്കിലും തീവ്രവാദ വിരുദ്ധ സ്ക്വാഡും, ലോക്കൽ ആഭ്യന്തര സുരക്ഷാ വിഭാഗം, ക്രൈംബ്രാഞ്ച് വിഭാഗങ്ങളിൽ നിന്നായി 200 ലധികം ഉദ്യോഗസ്ഥർ മാസങ്ങളോളം അന്വേഷിച്ചിട്ടും ഇന്നോളം ഒരു തുമ്പും കണ്ടെത്താൻ കഴിഞ്ഞില്ല. ഒരു കിലോമീറ്റർ ദൂരത്തിലാണ് അന്ന് സ്ഫോടന ശബ്ദം ഉയർന്നത്. 2009 ജൂലൈ 10 ന് ഉച്ചക്ക് മൂന്നിന് ആയിരത്തോളം ജീവനക്കാരും അഞ്ഞൂറോളം ജീവനക്കാരും കളക്‌ടറേറ്റ് സമുച്ചയത്തിന്‍റെ അഞ്ചാം നിലയിൽ നടന്ന സ്ഫോടനത്തിൽ ഞെട്ടിവിറച്ചു. സർവേ വിഭാഗത്തിലെ ഒരു ജീവനക്കാരനും അന്ന് നിസാര പരിക്കേറ്റു. ജീനക്കാരെ മുതൽ പാഴ്ക്കടലാസ് ഏജൻസികളെ വരെ ചോദ്യം ചെയ്തു. അന്വേഷണം രാജ്യാതിർത്തി വിട്ടും വ്യാപിപ്പിച്ചെങ്കിലും കുറ്റക്കാരിൽ ഒരാളെയും ഇന്നോളം കണ്ടെത്താൻ കഴിഞ്ഞിട്ടില്ല. തടിയന്‍റവിടെ നസീറിന്‍റെ പങ്കും അന്വേഷിച്ച സംഘം സ്ഫോടനം ആസൂത്രണം ചെയ്ത മുഖ്യപ്രതി അഫ്ഗാനിസ്ഥാനിലേക്കും, മറ്റു രണ്ടുപേർ ഗൾഫ് നാടുകളിലേക്കും കടന്നതായും സംശയിച്ചു. ബോംബ് സ്ഫോടനത്തിനു ശേഷം കളക്ട്രേറ്റിൽ സുരക്ഷാ ജീവനക്കാരെ നിയോഗിച്ചിട്ടുണ്ടെങ്കിലും വളപ്പാകെ പാഴ്മരങ്ങളും, വള്ളിച്ചെടികളും പുല്ലും വളർന്ന് ശ്മശാന സമാനമായി കിടക്കുകയാണ്. മോട്ടോർ വാഹന വകുപ്പ് പല ഘട്ടങ്ങളിലായി പിടിച്ചിട്ട ഒട്ടേറെ വാഹനങ്ങളും തുരുമ്പെടുത്ത് കിടക്കുന്ന കലക്‌ടറേറ്റ് വളപ്പ് സുരക്ഷയില്ലാത്ത ഇടമായി മാറിക്കഴിഞ്ഞു. കളക്‌ടറേറ്റ് പരിസരം വൃത്തിയാക്കാനുള്ള ഒരു നടപടിയും ജില്ലാ ഭരണകൂടം കൈക്കൊള്ളാത്തതും അപകട ഭീഷണി വർധിപ്പിക്കുന്നുണ്ട്.

ഭാര്യയെ ആക്രമിക്കുന്നതു തടയുന്നതിനിടെ വയോധികനു കുത്തേറ്റു; അയൽവാസി അറസ്റ്റിൽ

വൈപ്പിൻ: കത്തിയുമായി ഭാര്യയെ ആക്രമിക്കാനെത്തിയ അയൽവാസിയെ തടയുന്നതിനിടെ വയോധികനു കുത്തേറ്റു. ഞാറക്കൽ കിഴക്കേ അപ്പങ്ങാട് കല്ലച്ചാംമുറി വീട്ടിൽ ജോണി(72) ക്കാണ് കഴിഞ്ഞ ദിവസം കുത്തേറ്റത്. അയൽവാസി സെബാസ്റ്റ്യൻ(55)നെ ഞാറക്കൽ പോലീസ് അറസ്റ്റ് ചെയ്തു. അകാരണമായി വീട്ടിലേക്ക് കല്ലെടുത്തെറിഞ്ഞത് ജോണിയുടെ ഭാര്യ മേരി ചോദ്യംചെയ്തതാണ് പ്രതിയെ പ്രകോപിപ്പിച്ചത്. നെഞ്ചിൽ മൂന്നു മുറിവുകളേറ്റ ജോണിയെ ഉടൻ എറണാകുളത്തെ സ്വകാര്യ ആശുപത്രിയിൽ പ്രവേശിപ്പിച്ചു ശസ്ത്രക്രിയ നടത്തി. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

കടവൂർ മേഖലയിൽ കാട്ടാനയിറങ്ങി; ജനം ഭീതിയിൽ

പോത്താനിക്കാട്: മുള്ളരിങ്ങാട് വനത്തിൽനിന്ന് കടവൂർ ജനവാസ മേഖലയിൽ ഇറങ്ങിയ കാട്ടാനകൾ പ്രദേശവാസികളെ മണിക്കൂറുകളോളം ഭീതിയിലാക്കി. രണ്ട് കൊന്പനാനകളാണ് ഇന്നലെ പുലർച്ചെ നാട്ടിലേക്കിറങ്ങിയത്. ചാത്തമറ്റം - മുള്ളരിങ്ങാട് റോഡ് മറികടന്നെത്തിയ കാട്ടാനകൾ രണ്ടു ദിവസമായി പൊത്തൻചീനി വനാതിർത്തിയിലുള്ള വടക്കേ പുന്നമറ്റത്ത് പല പുരയിടങ്ങളിലും കൃഷി നശിപ്പിച്ചിരുന്നു. ചൊവാഴ്ച അർധരാത്രി വനമേഖലയിൽ നിന്ന് അഞ്ച് കിലോമീറ്റർ അകലെയുള്ള കടവൂർ ടൗണിൽ ഇറങ്ങിയ കാട്ടാനകൾ പിന്നീട് കക്കടാശേരി - കാളിയാർ റോഡിൽ യാത്രാ തടസം സൃഷ്ടിച്ചു. നാട്ടുകാർ ബഹളം വച്ചും പടക്കംപൊട്ടിച്ചും ഇവിടെ നിന്ന് ഓടിച്ച ആനകൾ കാളിയാർ പുഴയിൽ എത്തി. അവിടെ കുറച്ചു നേരം വെള്ളത്തിൽ കിടന്നശേഷം പുഴയുടെ അക്കരെ കുമാരമംഗലം പഞ്ചായത്തിലെ പയ്യാവിലേക്ക് കടന്നു. അവിടെ നാട്ടുകാർ ചേർന്ന് ആനയെ തുരത്തി മറുകരയിലേക്ക് വിട്ടു. ഇതിനിടെ ഡീൻ കുര്യാക്കോസ് എംപി, കോതമംഗലം ഡിഎഫ്ഒ, മുള്ളരിങ്ങാട്, കാളിയാർ ഫോറസ്റ്റ് റേഞ്ച് ഓഫീസർമാർ, തൊടുപുഴ ഫോറസ്റ്റ് വിജിലൻസ് വിഭാഗം, പോത്താനിക്കാട് പോലീസ് എന്നിവരുടെ നേതൃത്വത്തിൽ വലിയൊരു സംഘവും സ്ഥലത്തെത്തി. ആളുകൾ സ്ഥലത്തേക്ക് വരുന്നത് തടയാൻ പ്രധാന വഴികളെല്ലാം പോലീസ് അടച്ചു. പിന്നീട് പുഴയുടെ കരയിലുള്ള റബർ തോട്ടത്തിൽ തന്പടിച്ച ആനകളെ തുരത്തുന്നതിന് ആർആർടി സംഘം ശ്രമം തുടങ്ങി. ഒടുവിൽ രാവിലെ 11ഓടെ പടക്കം പൊട്ടിച്ചും ബഹളം വച്ചും ആനകളെ കക്കടാശേരി-കാളിയാർ റോഡ് കടത്തി. റോഡ് മുറിച്ചുകടന്ന ആനകൾ സമീപത്തെ റബർ തോട്ടത്തിലേക്കാണ് ഇറങ്ങിയത്. ഇതിനിടെ ആനകളിലൊന്ന് റബർ തോട്ടത്തിലെ കുളത്തിൽ വീണെങ്കിലും തനിയെ കരകയറി. ഇതിനുശേഷം ആനകൾ പൊത്തൻ ചീനി വനത്തിലെ വെട്ടിക്കലോലി ഭാഗത്ത് തന്പടിക്കുകയായിരുന്നു. തുടർന്ന് വനം വകുപ്പ് ഉദ്യോഗസ്ഥരും നാട്ടുകാരും ആനകൾ തിരികെ വരുന്നത് തടയാൻ സ്ഥലത്ത് കാവൽ നിന്നു. ഒടുവിൽ ചാത്തമറ്റം മല കയറി ആനകൾ മുള്ളരിങ്ങാട് വനത്തിലേക്ക് പോയശേഷമാണ് എല്ലാവരും മടങ്ങിയത്.

കുടുംബനാഥൻ വീട്ടിൽ മരിച്ചനിലയിൽ : ജപ്തി ഭീഷണിമൂലമെന്ന് ബന്ധുക്കൾ

നെടുന്പാശേരി: വീടും സ്ഥലവും ജപ്തി ചെയ്യുമെന്ന, ധനകാര്യ സ്ഥാപനത്തിന്‍റെ അറിയിപ്പിനെതുടർന്ന് മനോവിഷമത്തിലായിരുന്ന കുടുംബനാഥൻ മരിച്ചനിലയിൽ. പാറക്കടവ് കുറുമശേരി പഴൂർ വീട്ടിൽ മധുമോഹനെ (46) ആണ് വീട്ടിലെ കിടപ്പുമുറിയിൽ തൂങ്ങി മരിച്ചനിലയിൽ കണ്ടെത്തിയത്. ഭാര്യയും മക്കളും ഭാര്യവീട്ടിലായിരുന്നു. പലവട്ടം ഫോണ്‍ വിളിച്ചിട്ടും എടുക്കാത്തതിനെ തുടർന്ന് സഹോദരൻ അന്വേഷിച്ച് വീട്ടിലെത്തിയപ്പോഴാണ് മരിച്ചനിലയിൽ കണ്ടത്. വീട്ടുകാർ പറയുന്നത് ഇങ്ങനെ: പ്രവാസിയായിരുന്ന മധു വീട് നിർമിക്കുന്നതിനായി കേരള ബാങ്കിന്‍റെ കുറുമശേരി ശാഖയിൽനിന്ന് 15 വർഷം മുന്പ് 21 ലക്ഷം രൂപ വായ്പയെടുത്തിരുന്നു. 2018ൽ നാട്ടിലെത്തിയ ശേഷം വിദേശത്തേക്ക് പോയില്ല. പിന്നീട് നാട്ടിൽ പലതരം ജോലികൾ ചെയ്തെങ്കിലും വിജയിച്ചില്ല. ഇതോടെ വായ്പാ തിരിച്ചടവ് മുടങ്ങി. വായ്പ പലിശ സഹിതം 36 ലക്ഷം രൂപയായി ഉയർന്നു. പോലീസ് സന്നാഹത്തോടെ വീടും പറന്പും ജപ്തി ചെയ്യാൻ ബാങ്ക് അധികൃതർ എത്തുമെന്ന് ബാങ്കിന്‍റെ അഭിഭാഷകൻ നേരത്തെ അറിയിച്ചിരുന്നു. വീട് വിറ്റ് വായ്പ തീർക്കാമെന്ന് ബാങ്ക് അധികൃതരെ അറിയിച്ചെങ്കിലും സമയം നീട്ടി നൽകാൻ തയാറായില്ല. വീട് വാങ്ങാൻ സന്നദ്ധമായവർ 15 ദിവസം അവധി ചോദിച്ചിരുന്നു. എന്നിട്ടും ബാങ്ക് ജപ്തി നടപടി നിർത്തിവച്ചില്ല. ഇതേതുടർന്നാണുള്ള മനോവിഷമത്തിലാണ് മധുമോഹൻ ആത്മഹത്യ ചെയ്തത്. ചെങ്ങമനാട് പോലീസ് സ്ഥലത്തെത്തി തുടർ നടപടികൾ സ്വീകരിച്ചു. അതേസമയം ആത്മഹത്യാ ക്കുറിപ്പ് കണ്ടെത്തിയിട്ടില്ലെന്ന് പോലീസ് പറഞ്ഞു. പോസ്റ്റ്മോർട്ടത്തിനുശേഷം മൃതദേഹം ബന്ധുക്കൾക്ക് വിട്ടുകൊടുത്തു. സംസ്കാരം നടത്തി. ഭാര്യ: ശ്യാമ (അപ്പോളോ ആശുപത്രി). മക്കൾ: കൃഷ്ണപ്രിയ, ശിവപ്രിയ.

പണിമുടക്കില്‍ വലഞ്ഞ് ജില്ല

കൊച്ചി: കേന്ദ്ര സര്‍ക്കാരിന്‍റെ തൊഴിലാളി വിരുദ്ധനയങ്ങള്‍ക്കെതിരെ നടന്ന പണിമുടക്ക് ജില്ലയില്‍ പൂര്‍ണം. പൊതുഗതാഗത സംവിധാനങ്ങളും കടകമ്പോളങ്ങളും അടഞ്ഞുകിടന്നതോടെ പൊതുജനം വലഞ്ഞു. കളക്ടറേറ്റില്‍ ഉള്‍പ്പെടെ സര്‍ക്കാര്‍ സ്ഥാപനങ്ങളില്‍ ഭൂരിഭാഗം ജീവനക്കാരും ജോലിക്കെത്തിയില്ല. അധ്യാപകരും പണിമുടക്കിയതോടെ ജില്ലയിലെ സ്‌കൂളുകളും കോളജുകളും അടഞ്ഞുകിടന്നു. കേന്ദ്രസര്‍ക്കാര്‍ ഓഫീസുകളും, പൊതുമേഖലാ സ്ഥാപനങ്ങളും, ഫ്കടറികളും, ഷോപ്പിംഗ് മാളുകളും, ഹോട്ടലുകളും നിശ്ചലമായി. ഏതാനും ചില ബാങ്കുകള്‍ തുറന്നു പ്രവര്‍ത്തിച്ചു. ജില്ലയിലെ പ്രധാന വ്യാപാര കേന്ദ്രങ്ങളിലൊന്നായ എറണാകുളം മാര്‍ക്കറ്റും ബ്രോഡ്‌വേയും നിശ്ചലമായിരുന്നു. അതേസമയം ട്രെയിന്‍ സര്‍വീസുകളെ പണിമുടക്ക് ബാധിക്കാതിരുന്നതിനാല്‍ വിവിധ ആവശ്യങ്ങള്‍ക്കായി ജില്ലയിലെ റെയില്‍വേ സ്റ്റേഷനുകളിലെത്തിയ യാത്രക്കാര്‍ വലഞ്ഞു. ഓട്ടോ, ടാക്‌സി സര്‍വീസുകളും പണിമുടക്കിന്‍റെ ഭാഗമായി. കൊച്ചി നഗരത്തില്‍ ചുരുക്കം ചില യൂബര്‍ ഓട്ടോകളും ടാക്‌സികളും നിരത്തിലിറങ്ങി. പലയിടങ്ങളിലും സമരാനുകൂലികള്‍ ഇവരെ തടഞ്ഞു. നഗരത്തില്‍ കൊച്ചി മെട്രോ സര്‍വീസ് നടത്തിയത് പൊതുഗതാഗതത്തെ ആശ്രയിക്കുന്ന യാത്രക്കാര്‍ക്ക് ആശ്വാസമായി. ജില്ലയില്‍ നോര്‍ത്ത് പറവൂരില്‍ നിന്ന് മാത്രമാണ് ഏതാനും ചില സര്‍വീസുകള്‍ കെഎസ്ആര്‍ടിസി ഓപ്പറേറ്റ് ചെയ്തത്. ഇതൊഴിച്ചാല്‍ മറ്റ് ഡിപ്പോകളില്‍ നിന്നുള്ള ദീര്‍ഘദുര സര്‍വീസുകളടക്കം സ്തംഭിച്ചു. 1800 ഓളം വരുന്ന സ്വകാര്യ ബസുകളും നിരത്തിലിറങ്ങിയില്ല. ജില്ലയുടെ ഗ്രാമ പ്രദേശങ്ങളില്‍ പണിമുടക്ക് ബന്ദായി മാറി. കളമശേരി മെഡിക്കല്‍ കോളജ് ഉള്‍പ്പെടെയുള്ള ജില്ലയിലെ ആശുപത്രികളുടെ പ്രവര്‍ത്തനത്തെ പണിമുടക്ക് ബാധിച്ചില്ല. സംയുക്ത ട്രേഡ് യൂണിയന്‍ സംഘടനകളുടെ നേതൃത്വത്തില്‍ ജില്ലയിലെ 35ഓളം കേന്ദ്രങ്ങളില്‍ പ്രകടനവും ധര്‍ണയും പൊതുയോഗങ്ങളും നടന്നു. പണിമുടക്കി കളക്ടറേറ്റ് പണിമുടക്ക് ദിനത്തില്‍ കളക്ടറേറ്റിലും ഹാജര്‍നില തീരെ കുറവായിരുന്നു. 85 ഓഫീസുകളിലായി 1400 ജീവനക്കാരാണ് കളക്ടറേറ്റിലുള്ളത്. ഇതില്‍ 44 ഓഫീസ് ഇന്നലെ തുറന്നെങ്കിലും പല ഓഫീസിലും ഒന്നോ രണ്ടോ ജീവനക്കാര്‍ മാത്രമാണ് ഹാജരായത്. കളക്ടറുടെ കീഴിലുള്ള ഓഫീസുകളില്‍ ആകെയുള്ള 200 ഓളം ജീവനക്കാരില്‍ അഞ്ചുപേര്‍ മാത്രമാണ് ഹാജരായത്. ഇന്‍ഫോപാര്‍ക്കില്‍ 60 ശതമാനം ഓഫീസുകളും തുറന്നു പ്രവര്‍ത്തിച്ചു. കൊച്ചിയില്‍ ബസ് തടഞ്ഞു; പറവൂരില്‍ സര്‍വീസ് നടത്തി പണിമുടക്ക് ദിവസം എറണാകുളം കെഎസ്ആര്‍ടിസി ഡിപ്പോയില്‍ നിന്നും കോഴിക്കോട്ടേക്ക് സര്‍വീസ് നടത്താനിരുന്ന ലോ ഫ്‌ളോര്‍ ബസ് സമരാനുകൂലികള്‍ തടഞ്ഞു. കോഴിക്കോട് ഡിപ്പോയില്‍ നിന്നും എറണാകുളത്തെത്തി തിരികെ പോകാനാരുന്ന ബസ് ആണ് തടഞ്ഞത്. സമരം അവസാനിച്ച ശേഷം സര്‍വീസ് പുനരാരംഭിച്ചാല്‍ മതിയെന്ന് സമരക്കാര്‍ ബസ് ജീവനക്കാരെ അറിയിക്കുകയായിരുന്നു. എന്നാല്‍ സര്‍വീസ് നടത്താന്‍ സംരക്ഷണം ഒരുക്കണമെന്ന് സ്റ്റേഷന്‍ മാസ്റ്ററോട് ആവശ്യപ്പെട്ടിട്ട് പോലീസ് സുരക്ഷ ഒരുക്കിയില്ലെന്ന് ബസ് ജീവനക്കാര്‍ ആരോപിച്ചു. എസി ബസ് ആയതിനാല്‍ മറ്റ് നാശനഷ്ടങ്ങള്‍ ഭയന്നാണ് സര്‍വീസ് നടത്താന്‍ തയാറാകാതിരുന്നതെന്ന് ഡിടിഒ പറഞ്ഞു. നോര്‍ത്ത് പറവൂര്‍ കെഎസ്ആര്‍ടിസി ഡിപ്പോയില്‍ നിന്നും ആലുവ അടക്കമുള്ള പ്രദേശങ്ങളിലേക്ക് 20 ഓളം സര്‍വീസുകള്‍ കെഎസ്ആര്‍ടിസി ഓപ്പറേറ്റ് ചെയ്തു. സമരാനുകൂലികള്‍ ബസ് തടഞ്ഞെങ്കിലും പോലീസ് സംരക്ഷണയില്‍ സര്‍വീസുകള്‍ നടത്തി. ഇതിനുപുറമേ തൃപ്പൂണിത്തുറ സ്റ്റാച്ച്യു ജംഗ്ഷനില്‍ പ്രാദേശിക സര്‍വീസ് നടത്തിയ കെഎസ്ആര്‍ടിസി ബസ് സമരക്കാര്‍ തടഞ്ഞു. ഇവരെ പിന്നീട് പോലീസെത്തി നീക്കി. 74 ഷെഡ്യൂളുകളുള്ള എറണാകുളത്ത് നിന്നും ഒരു സര്‍വീസും നടത്തിയില്ല. ഇതിനുപുറമേ ആലുവ, മൂവാറ്റുപുഴ, കൂത്താട്ടുകുളം, പിറവം, അങ്കമാലി എന്നിവിടങ്ങളിലും കെഎസ്ആര്‍ടിസി സര്‍വീസ് സ്തംഭിച്ചു. മൂവാറ്റുപുഴയിലും പെരുമ്പാവൂരിലും നേരിയ സംഘര്‍ഷം മൂവാറ്റുപുഴയില്‍ സമരാനുകൂലികള്‍ കെഎസ്ആര്‍ടിസി ബസ് തടഞ്ഞു. രാവിലെ 11ഓടെ വെള്ളൂര്‍കുന്നത്തായിരുന്നു സംഭവം. കോഴിക്കോട് നിന്ന് പാലായിലേക്ക് പോയ സൂപ്പര്‍ഫാസ്റ്റ് ബസ് ആണ് സമരക്കാര്‍ തടഞ്ഞത്. ബസ് ജീവനക്കാരുമായി വാക്കേറ്റമുണ്ടായതിനെത്തുടര്‍ന്ന് ബസിന്റെ മുന്‍വശത്തെ ചില്ല് സമരക്കാര്‍ തല്ലിതകര്‍ത്തു. സംഭവം റിപ്പോര്‍ട്ട് ചെയ്യാനെത്തിയ പ്രാദേശിക മാധ്യമപ്രവര്‍ത്തകന് പരിക്കേറ്റു. പെരുമ്പാവൂരില്‍ എഎം റോഡില്‍ പാലക്കാട്ടുതാഴം പാലത്തിനു സമീപം പുറത്ത് നിന്നും യാത്രക്കാരുമായി വന്ന ഓട്ടോറിക്ഷകളുടെ ടയറിന്‍റെ കാറ്റ് സമരാനുകൂലികള്‍ അഴിച്ചുവിട്ടത് ചെറിയ സംഘര്‍ഷത്തിന് വഴി ഒരുക്കി. തിരക്കില്ലാതെ കൊച്ചി മെട്രോ സര്‍ക്കാര്‍ ഓഫീസുകളും സ്വകാര്യ സ്ഥാപനങ്ങളുമടക്കം നിശ്ചലമായതോടെ കൊച്ചി മെട്രോയിലെ യാത്രക്കാരുടെ എണ്ണവും കുറഞ്ഞു. നാമമാത്രമായ ആളുകള്‍ മാത്രമാണ് ഇന്നലെ മെട്രോയില്‍ യാത്ര ചെയ്തത്. ഭൂരിഭാഗം സര്‍വീസുകളിലും ഒട്ടുമിക്ക സീറ്റുകളും കാലിയായിരുന്നു. കഴിഞ്ഞ ദിവസത്തെ സ്വകാര്യ ബസ് പണിമുടക്കില്‍ മെട്രോയില്‍ ഇരട്ടിയിലധികം ആളുകള്‍ യാത്രചെയ്തിരുന്നു. നഗര-ഗ്രാമങ്ങളില്‍ പണിമുടക്ക് പൂര്‍ണം പെരുമ്പാവൂര്‍ മേഖലയില്‍ പണിമുടക്ക് പൂര്‍ണമായിരുന്നു. കെഎസ്ആര്‍ടിസി രാവിലെ ദീര്‍ഘദൂര സര്‍വീസ് നടത്തിയെങ്കിലും പിന്നീട് നിര്‍ത്തിവച്ചു. കടകമ്പോളങ്ങള്‍ അടഞ്ഞ് കിടന്നു. തുറന്നു പ്രവര്‍ത്തിച്ച ഏതാനും കടകളും ബാങ്ക്, പോസ്റ്റ് ഓഫീസ് എന്നിവ സമരക്കാര്‍ എത്തി അടപ്പിച്ചു. ആലുവയില്‍ സ്വകാര്യ ബസുകള്‍ രണ്ടാം ദിനവും പണിമുടക്കി. 50 ഓളം ഷെഡ്യൂളുകളുള്ള കെഎസ്ആര്‍ടിസി സര്‍വീസ് നടത്തിയില്ല. വ്യാപാരശാലകള്‍ അടഞ്ഞുകിടന്നു. ഏതാനും ഹോട്ടലുകളും മെഡിക്കല്‍ ഷോപ്പുകളും തുറന്നു പ്രവര്‍ത്തിച്ചു. തൃപ്പൂണിത്തുറയില്‍ പണിമുടക്ക് പൂര്‍ണമായിരുന്നു. വാണിജ്യ സ്ഥാപനങ്ങളും ഹോട്ടലുകളും ഓഫീസുകളും പ്രവര്‍ത്തിച്ചില്ല. സ്വകാര്യ ബസുകളും ഓട്ടോ, ടാക്‌സി എന്നിവയും നിരത്തുകളില്‍ നിന്ന് വിട്ടുനിന്നു. സമരസമിതിയുടെ നേതൃത്വത്തില്‍ സ്റ്റാച്ച്യു ജംഗ്ഷനില്‍ വിശദീകരണ യോഗം നടത്തി. കിഴക്കമ്പലത്ത് സ്വകാര്യ വാഹനങ്ങള്‍ നിരത്തിലിറങ്ങി. സര്‍ക്കാര്‍ സ്ഥാപനങ്ങളടക്കം അടഞ്ഞുകിടന്നു. വൈപ്പിന്‍ മേഖലയില്‍ ഹാര്‍ബറുകളടക്കം നിശ്ചലമായി. കിഴക്കന്‍ മേഖലയായ കോതമംഗലത്ത് പണിമുടക്ക് ജനജീവിതത്തെ സാരമായി ബാധിച്ചു. ഉള്‍പ്രദേശങ്ങളില്‍ ഏതാനും ചില കടകള്‍ തുറന്നു പ്രവര്‍ത്തിച്ചു. ഏതാനും ചിലയിടങ്ങളില്‍ സ്വകാര്യ വാഹനങ്ങള്‍ സമരക്കാര്‍ തടഞ്ഞു. സര്‍ക്കാര്‍ ഓഫീസുകളടക്കം തുറന്നില്ല. വിമാനത്താവളത്തിന്‍റെ പ്രവർത്തനം പതിവു പോലെ നെടുമ്പാശേരി: പൊതുപണിമുടക്ക് കൊച്ചി രാജ്യാന്തര വിമാനത്താവളത്തിന്‍റെ പ്രവർത്തത്തെ ബാധിച്ചില്ലെന്ന് സിയാൽ അധികൃതർ വ്യക്തമാക്കി. ജീവനക്കാരുടെ ഹാജർ സാധാരണ നിലയിലായിരുന്നു. പ്രീപെയ്ഡ് ടാക്സി സർവീസും മെട്രോ ബസ് സർവീസും ഉണ്ടായിരുന്നതിനാൽ യാത്രക്കാർക്ക് വന്നു പോകുവാൻ ബുദ്ധിമുട്ടുണ്ടായില്ല. പൊതുമേഖലാ സ്ഥാപനമായ കാംകോയിലും ജീവനക്കാർ ഹാജരായി.

അഭിഭാഷക ക്ളാർക്ക് കായലിൽ മരിച്ചനിലയിൽ

പറവൂർ: പറവൂർ ബാറിലെ അഭിഭാഷക ക്ളർക്കായ മൂത്തകുന്നം കളവന്പാറ പരേതനായ ചന്ദ്രശേഖരന്‍റെ മകൻ കെ.സി. അജിത്തിനെ (54) കോട്ടപ്പുറം കായലിൽ മരിച്ചനിലയിൽ കണ്ടെത്തി. ഇന്നലെ വൈകിട്ട് ആറോടെ മുസിരീസ് ജെട്ടിക്ക് സമീപം കോസ്റ്റൽ പോലീസാണ് മൃതദേഹം കണ്ടത്തിയത്. വടക്കേക്കര പോലീസിന് കൈമാറിയ മൃതദേഹം ഇൻക്വസ്റ്റ് നടപടികൾക്കുശേഷം പറവൂർ താലൂക്ക് ആശുപത്രിയിലേക്ക് മാറ്റി. ബുധനാഴ്ച ഉച്ചയ്ക്കുശേഷമാണ് വീട്ടിൽ നിന്ന് കാണാതായത്. കുറച്ചനാളുകളായി മാനസിക ആരോഗ്യ പ്രശ്നങ്ങളുണ്ടായതിനെ തുടർന്ന് ചികിത്സയിലായിരുന്നു. കഴിഞ്ഞ ദിവസമാണ് ആശുപത്രിയിൽ നിന്ന് ഡിസ്ചാർജ് ചെയ്തത്. സംസ്കാരം ഇന്ന്. അമ്മ: പരേതയായ ഐഷ. ഭാര്യ: നിഷ. മകൾ: ആര്യ നന്ദ.

കാറിടിച്ച് ബൈക്ക് യാത്രികൻ മരിച്ചു

തൃപ്പൂണിത്തുറ: ബൈക്കും കാറും കൂട്ടിയിടിച്ച് ബൈക്ക് യാത്രക്കാരനായ യുവാവ് തത്ക്ഷണം മരിച്ചു. പെരുന്പളം കാളത്തോട് ജെട്ടിയ്ക്ക് സമീപം മനയ്ക്കിപ്പറന്പിൽ രാജപ്പന്‍റെ മകൻ എം.ആർ. രതീഷ് (42) ആണ് മരിച്ചത്. തൃപ്പൂണിത്തുറ മിനി ബൈപ്പാസിൽ ശ്രീവെങ്കടേശ്വര സ്കൂളിന് സമീപം ചൊവ്വാഴ്ച രാത്രി 11നായിരുന്നു അപകടം. ചന്പക്കര മത്സ്യമാർക്കറ്റിലെ യൂണിയൻ തൊഴിലാളിയാണ്. പോസ്റ്റ്മോർട്ടത്തിനുശേഷം സംസ്കാരം ഇന്ന് രാവിലെ 10ന് വീട്ടുവളപ്പിൽ. മാതാവ്: കാർത്യായനി. ഭാര്യ: കാർത്തിക. മക്കൾ: രുദ്ര, റാണക്.

‘കുട്ടന്പുഴ ബംഗ്ലാവ് കടവിൽ പാലം നിർമിക്കണം’

കോതമംഗലം: കുട്ടന്പുഴ പഞ്ചായത്തിലെ അഞ്ച് വാർഡുകൾ അടങ്ങുന്ന വടാട്ടുപാറ പ്രദേശത്തെയും കുട്ടന്പുഴയേയും തമ്മിൽ ബന്ധിപ്പിക്കുന്ന കുട്ടന്പുഴ ടൗണിലെ ബംഗ്ലാവ് കടവിൽ പാലം നിർമിക്കണമെന്ന ആവശ്യം ശക്തമാകുന്നു. 1980-85 കാലഘട്ടത്തിൽ പൂയംകുട്ടി ഇലക്ട്രിക് സിറ്റി പ്രോജക്ടിൽ ഉൾപ്പെടുത്തി കുട്ടന്പുഴയ്ക്ക് സമീപം ഇടമലയാറും കണ്ടൻപാറ പുഴയും തമ്മിൽ സംഗമിക്കുന്ന ആനക്കയം കേന്ദ്രീകരിച്ച് പാലം പണിയുന്നതിന് കെഎസ്ഇബി നടപടികൾ ആരംഭിച്ചിരുന്നു. എന്നാൽ പൂയംകുട്ടി പ്രോജക്ടിന് കേന്ദ്ര സർക്കാർ അനുമതി നിഷേധിച്ചതോടെ പാലം എന്ന സ്വപ്നവും നിലച്ചു. 2009ലെ പിഡബ്ലുഡി ഉത്തരവ് പ്രകാരം നെടുന്പാശേരി - കൊടൈക്കനാൽ സ്റ്റേറ്റ് ഹൈവേയുടെ ഭാഗമായി ഭൂതത്താൻകെട്ട് - വടാട്ടുപാറ - പലവൻപടി - ആനക്കയം - കുട്ടന്പുഴ റോഡ് ഏറ്റെടുക്കുകയുണ്ടായി. ഇതിന്‍റെ ഭാഗമായി ആനക്കയത്ത് പിഡബ്ലുഡിയുടെ നേതൃത്വത്തിൽ പാലം പണിയുവാൻ നടപടികൾ ആരംഭിക്കുകയും സംസ്ഥാന ബജറ്റിൽ ഭരണാനുമതിയില്ലാത്ത ഹെഡിൽ 100 രൂപ ടോക്കണ്‍ അഡ്വാൻസായി ഉൾപ്പെടുത്തുകയും 12 കോടി അടങ്കൽ തുക വരുന്ന എസ്റ്റിമേറ്റ് എടുക്കുകയും ചെയ്തിരുന്നു. ആനക്കയത്ത് പാലം പണിയുന്നതിന്‍റെ ഭാഗമായി വടാട്ടുപാറ-കുട്ടന്പുഴ റോഡിൽ ആനക്കയം ഭാഗത്ത് അപ്രോച്ച് റോഡ് നിർമിക്കുന്നതിനായി വനം വകുപ്പിന്‍റെ 36 സെന്‍റ് സ്ഥലം ഏറ്റെടുക്കേണ്ടതുണ്ടായിരുന്നു. എന്നാൽ ഇത് നടന്നില്ല. ആനക്കയത്ത് വനം വകുപ്പിന്‍റെ ശക്തമായ എതിർപ്പിനെ തുടർന്നും സ്ഥലം വിട്ടുകിട്ടാത്ത സാഹചര്യത്തിലാണ് കുട്ടന്പുഴ ബംഗ്ലാവ് കടവ് കേന്ദ്രീകരിച്ച് പാലം പണിയണമെന്ന ആവശ്യം ഉയർന്നുവന്നത്. ഈ ആവശ്യം ഉന്നയിച്ച് 2016-2017 കാലഘട്ടത്തിൽ കുട്ടന്പുഴ പഞ്ചായത്ത് ഗ്രാമവികസന സമിതി പൊതുമരാമത്ത് മന്ത്രിക്ക് നിവേദങ്ങൾ സമർപ്പിച്ചതിനേതുടർന്ന് പിഡബ്ലുഡി പാലത്തിന്‍റെ എസ്റ്റിമേറ്റ് എടുത്തിരുന്നു. കുട്ടന്പുഴ ബംഗ്ലാവ് കടവ് ഭാഗത്ത് 180 മീറ്റർ നീളത്തിൽ പാലം പണിയുന്നതിന് 18 കോടി ചെലവ് വരുമെന്നാണ് കണക്കാക്കിയിട്ടുള്ളത്. ഇപ്പോൾ ഈ എസ്റ്റിമേറ്റ് തിരുത്തി 18 കോടിയിൽനിന്നും 25 കോടിയാക്കി എസ്റ്റിമേറ്റ് തുക ഉയർത്തിയിട്ടുണ്ട്. കുട്ടന്പുഴ പഞ്ചായത്തിലെ ആകെ ജനസംഖ്യ 24,451 ആണ്. അതിൽ 12,000ത്തിൽപ്പരം ജനങ്ങൾ താമസിക്കുന്നത് വടാട്ടുപാറ പ്രദേശത്താണ്. വടാട്ടുപാറ നിവാസികൾക്ക് കുട്ടന്പുഴ പഞ്ചായത്ത് ആസ്ഥാത്ത് എത്തണമെങ്കിൽ രണ്ട് ബസുകൾ മാറി കയറി 30 കിലോ മീറ്റർ ദൂരം യാത്ര ചെയ്താലേ കുട്ടന്പുഴയിലുള്ള പഞ്ചായത്ത്, വില്ലേജ് ഓഫീസുകൾ, പോലീസ് സ്റ്റേഷൻ, കുടുംബാരോഗ്യ കേന്ദ്രം, ഹയർ സെക്കൻഡറി സ്കൂൾ, മൃഗാശുപത്രി, ട്രൈബൽ ഓഫീസ്, ബാങ്കുകൾ അടക്കമുള്ള സ്ഥാപനങ്ങളിൽ എത്തിചേരുവാൻ കഴിയൂ. ഇത് ഇടമലയാർ - താളുക്കണ്ടം ട്രൈബൽ നിവാസികൾക്കും വളരെയേറെ ഗുണപ്രഥമാകും. 2009 മുതൽ 2025 വരെ കഴിഞ്ഞ 17 വർഷമായിട്ട് ആനക്കയം കുട്ടന്പുഴ ബംഗ്ലാവ് കടവ് പാലം നിർമാണത്തിനായി സർക്കാർ സംസ്ഥാന ബജറ്റിൽ ഭരണാനുമതിയില്ലാത്ത ഹെഡിൽ വെറും 100 രൂപ മാത്രമാണ് ഉൾകൊള്ളിച്ചുവരുന്നത്. ഭരണാനുമതിയുള്ള ഹെഡിൽ ഏറ്റവും ചുരുങ്ങിയത് ഒരു ലക്ഷം രൂപ എങ്കിലും അനുവദിച്ചാലേ 25 കോടി എസ്റ്റിമേറ്റുള്ള കുട്ടന്പുഴ ബംഗ്ലാവ് കടവ് പാലത്തിന് അഡ്മിനിസ്ട്രേറ്റീവ് അനുമതി ലഭിക്കുകയുള്ളു. ഈ കാര്യത്തിൽ ജനങ്ങളെ കബളിപ്പിച്ച് സ്ഥലം എംഎൽഎയും സർക്കാരും ഒത്തുകളിക്കുകയാണെന്ന് പഞ്ചായത്ത് ഗ്രാമവികസന സമിതി കുറ്റപ്പെടുത്തി. കുട്ടന്പുഴ ബംഗ്ലാവ് കടവ് ഭാഗത്ത് പാലം നിർമിക്കുന്ന കാര്യത്തിൽ സർക്കാരും പിഡബ്ലുഡിയും വലിയ ഉദാസീനതകാട്ടിയ സാഹചര്യത്തിൽ കുട്ടന്പുഴ പഞ്ചായത്ത് ഗ്രാമവികസന സമിതി കേരള സംസ്ഥാന മനുഷ്യാവകാശ കമ്മീഷനിൽ ഹർജി ഫയൽ ചെയ്യുകയും തുടർന്ന് 2024 ജൂണ്‍ 21ന് അടിയന്തരമായി പാലം പണിയണമെന്ന് കാണിച്ച് ഉത്തരവുകൾ ഉണ്ടാവുകയും ചെയ്തിട്ടുള്ളതാണ്. നടപടി ഉണ്ടാകാത്തതിനെതുടർന്ന് കുട്ടന്പുഴ പഞ്ചായത്ത് ഗ്രാമവികസന സമിതി ഹൈക്കോടതിയിൽ കേസ് ഫയൽ ചെയ്തിരിക്കുകയാണ്. എത്രയും വേഗത്തിൽ പാലം നിർമിക്കണമെന്ന് കുട്ടന്പുഴ പഞ്ചായത്ത് ഗ്രാമവികസന സമിതിക്ക് വേണ്ടി ഷാജി പയ്യാനിക്കൽ സർക്കാരിനോട് ആവശ്യപ്പെട്ടു.

വീണ ജോർജിന്‍റെ രാജിക്കായി മാർച്ചും ധർണയും നടത്തി

വാഴക്കുളം: മന്ത്രി വീണ ജോർജിന്‍റെ രാജി ആവശ്യപ്പെട്ട് മഞ്ഞള്ളൂർ ബ്ലോക്ക് കോണ്‍ഗ്രസ് കമ്മിറ്റിയുടെ നേതൃത്വത്തിൽ കല്ലൂർക്കാട് ഗവ. ആരോഗ്യ കേന്ദ്രത്തിലേക്ക് മാർച്ചും ധർണയും നടത്തി. ധർണ യൂത്ത് കോണ്‍ഗ്രസ് സംസ്ഥാന വൈസ് പ്രസിഡന്‍റ് ഒ.ജെ. ജനീഷ് ഉദ്ഘാടനം ചെയ്തു. ബ്ലോക്ക് പ്രസിഡന്‍റ് സുഭാഷ് കടയ്ക്കോട്ട് അധ്യക്ഷത വഹിച്ചു. കെപിസിസി ജനറൽ സെക്രട്ടറി റോയി കെ. പൗലോസ് മാർച്ച് ഉദ്ഘാടനം ചെയ്തു. കെപിസിസി എക്സിക്യൂട്ടീവംഗം എ. മുഹമ്മദ് ബഷീർ മുഖ്യപ്രഭാഷണം നടത്തി. കോലഞ്ചേരി: മന്ത്രി വീണ ജോർജ് രാജിവയ്‌ക്കുക, സർക്കാർ ആശുപത്രികളുടെ ശോചനീയവസ്ഥയ്ക്ക് പരിഹാരം കാണുക എന്നീ അവശ്യങ്ങൾ ഉന്നയിച്ചു പുത്തൻകുരിശ് ബ്ലോക്ക് കോൺഗ്രസ് കമ്മിറ്റിയുടെ ആഭിമുഖ്യത്തിൽ മാർച്ചും ധർണയും നടത്തി. പുത്തൻകുരിശ് ടൗണിൽനിന്ന് ആരംഭിച്ച മാർച്ച് വടവുകോട് ആശുപത്രിക്ക് സമീപം പോലീസ് തടഞ്ഞു. തുടർന്ന് നടത്തിയ ധർണ കെപിസിസി ന്യൂനപക്ഷ സെൽ ചെയർമാൻ ടി.എം. സക്കീർ ഹുസൈൻ ഉദ്ഘടനം ചെയ്തു. ബ്ലോക്ക് കോൺഗ്രസ് പ്രസിഡന്‍റ് പോൾസൺ പീറ്റർ അധ്യക്ഷത വഹിച്ചു. മന്ത്രി വീണയ്ക്ക് നേരെ കരിങ്കൊടി കോലഞ്ചേരി: വരിക്കോലിയിൽ ആരോഗ്യമന്ത്രി വീണ ജോർജിന് നേരെ കോൺഗ്രസ്, യൂത്ത് കോൺഗ്രസ് പ്രവർത്തകർ കരിങ്കൊടി കാണിച്ച് പ്രതിഷേധിച്ചു. വരിക്കോലി മുത്തൂറ്റ് എൻജിനീയറിംഗ് കോളജിലെ പരിപാടിയിൽ പങ്കെടുക്കാൻ പോകുന്ന വഴിക്കാണ് കോൺഗ്രസ് പ്രവർത്തകർ പുത്തൻകുരിശ് ടൗണിൽ മന്ത്രിയെ വഴിയിൽ കരിങ്കൊടി കാണിച്ചത്. വരിക്കോലി മുത്തൂറ്റ് കോളജിന് മുന്നിലാണ് യൂത്ത് കോൺഗ്രസ് നിയോജക മണ്ഡലം പ്രസിഡന്‍റ് ജെയ്സൽ ജബ്ബാറിന്‍റെ നേതൃത്വത്തിൽ പ്രവർത്തകർ മന്ത്രിയെ കരിങ്കൊടി കാണിച്ചത്. പുത്തൻകുരിശ് ബ്ലോക്ക് കോൺഗ്രസ് പ്രസിഡന്‍റ് പോൾസൺ പീറ്ററിന്‍റെയും മണ്ഡലം പ്രസിഡന്‍റുമാരായ മനോജ് കാരക്കാട്ട്, എസ്. സുജിത്ത് എന്നിവരുടെ നേതൃത്വത്തിലാണ് കോൺഗ്രസ് പ്രവർത്തകർ മന്ത്രിയെ വഴിയിൽ തടഞ്ഞത്.

പിണ്ടിമന, പൈങ്ങോട്ടൂർ പഞ്ചായത്തുകളിൽ കാട്ടാനശല്യം വ്യാപകം

കോതമംഗലം: കോതമംഗലം താലൂക്കിന്‍റെ പിണ്ടിമന, പൈങ്ങോട്ടൂർ പഞ്ചായത്തുകളിൽ വീണ്ടും കാട്ടാന ശല്യം വ്യാപകം. പിണ്ടിമന പഞ്ചായത്തിലെ വേട്ടാന്പാറ, പടിപ്പാറ പ്രദേശങ്ങളിലും പൈങ്ങോട്ടൂർ പഞ്ചായത്തിലെ കടവൂർ വടക്കേ പുന്നമറ്റം ഭാഗത്തുമാണ് ഇന്നലെ കാട്ടാനകുട്ടത്തിന്‍റെ ആക്രമണമണം നേരിട്ടത്. സന്ധ്യ കഴിഞ്ഞാൽ ആനകൾ നാട്ടിലെത്തും. പടിപ്പാറ - വാവേലി റോഡിലും വേട്ടാന്പാറ - മാലിപ്പാറ റോഡിലും ആനകൾ വനത്തിലെന്നപോലെയാണ് സഞ്ചരിക്കുന്നത്. മറ്റ് ഇട റോഡുകളിലെ അവസ്ഥയും വ്യത്യസ്തമല്ല. വാഹനങ്ങളും കാൽനടക്കാരും ആനയുണ്ടോയെന്ന് നോക്കി വേണം റോഡിലിറങ്ങാൻ. നേരം പുലർന്നാൽ മാത്രമാണ് ജനങ്ങൾക്ക് റോഡിലൂടെ ഭയമില്ലാതെ സഞ്ചരിക്കാൻ കഴിയുക. ഓരോ ദിവസവും നിരവധി പേരുടെ കൃഷിയിടങ്ങളാണ് ആനകളുടെ വിഹാരകേന്ദ്രമാകുന്നത്. നട്ടുവളർത്തിയതെല്ലാം ആനകൾക്ക് തീറ്റയാകുകയോ ചവിട്ടിമെതിക്കപ്പെടുകയോ ചെയ്യും. കഴിഞ്ഞ രാത്രിയിലെത്തിയ ആനക്കൂട്ടം പടിപ്പാറക്ക് സമീപത്തെ റബർ തോട്ടത്തിൽ നിന്നിരുന്ന പന മറിച്ചിട്ട് തിന്നു തീർത്താണ് മടങ്ങിയത്. കൃഷി ചെയ്തിരുന്ന വാഴയും തിന്നു. കയ്യാലകൾ വ്യാപകമായി തകർത്തു. പൈങ്ങോട്ടൂർ പഞ്ചായത്തിലെ കടവൂർ വടക്കേ പുന്നമറ്റത്ത് അടപ്പൂർ ജോണി, ഏനാനിക്കൽ ജോഷി എന്നിവരുടെ കൃഷിയിടത്തിലാണ് കാട്ടാനകൾ നാശം വിതച്ചത്. ആനകൾ മൂലം പൊറുതിമുട്ടിയപ്പോഴും അധികാരികളുടെ ഭാഗത്തുനിന്ന് യാതൊരു ഇടപെടലും ഉണ്ടാകാത്തതിൽ പ്രതിഷേധം വ്യാപകമാണ്. വടക്കേപുന്നമറ്റത്തും കാട്ടാനകൾ പോത്താനിക്കാട്: കടവൂർ, വടക്കേപുന്നമറ്റം പ്രദേശങ്ങളിൽ വീണ്ടും കാട്ടാനകൾ ഇറങ്ങി കൃഷികൾ നശിപ്പിച്ചു. ഇന്നലെ പുലർച്ചെ മൂന്നോടെ വടക്കേപുന്നമറ്റം പള്ളിക്ക് സമീപം എനാനിക്കൽ ജോഷി, അടപ്പൂർ ജോണി എന്നിവരുടെ കൃഷികളാണ് നശിപ്പിച്ചത്. സമീപവാസികളായ ഇരുവരുടെയും റബർ തോട്ടങ്ങളിലെ പൈനാപ്പിൾ, പ്ലാവ്, റബർ തുടങ്ങിയവ ആനകൾ തിന്നുകയും ചവിട്ടി മെതിക്കുകയും ചെയ്‌തു. നൂറുകണക്കിന് കന്നാരകൾ ഇളകി പറിഞ്ഞുപോയിട്ടുണ്ട്. രണ്ട് പ്ലാവുകളുടെ ശിഖരങ്ങൾ ഒടിച്ചാണ് ചക്കകൾ തിന്നതെന്ന് പറമ്പുടമകൾ പറഞ്ഞു. കഴിഞ്ഞ രണ്ട് വർഷമായി ഒറ്റക്കണ്ടം, മുള്ളരിങ്ങാട്, ചാത്തമറ്റം, വടക്കേപുന്നമറ്റം, പുതകുളം, കടവൂർ, നാലാംബ്ലോക്ക് മേഖലകളിലെല്ലാം മാസത്തിൽ രണ്ടും മൂന്നും തവണ കാട്ടാനകൾ കൃഷികൾ നശിപ്പിക്കുന്നുണ്ട്. പ്രദേശങ്ങളിൽ കുരങ്ങ്, കാട്ടുപന്നി, മുള്ളൻപന്നി തുടങ്ങിയവയും കൃഷികൾ നശിപ്പിക്കാറുണ്ട്. കർഷകർ പരാതി പറഞ്ഞാൽ പലപ്പോഴും അവർ പ്രതികരിക്കാറില്ലെന്നും പരക്കെ ആക്ഷേപമുണ്ട്.

വായന പക്ഷാചരണം

മൂവാറ്റുപുഴ: മൂവാറ്റുപുഴ താലൂക്ക് ലൈബ്രറി കൗണ്‍സിൽ മുൻസിപ്പൽ നേതൃസമിതിയുടെ സഹകരണത്തോടെ കിഴക്കേക്കര ഗവ. ഈസ്റ്റ് ഹൈസ്കൂളിൽ നടത്തിയ വായന പക്ഷാചരണത്തിന്‍റെ സമാപന സമ്മേളനവും ഐ.വി. ദാസ് അനുസ്മരണവും എഴുത്തുകാരി ലേഖ കാക്കനാട് ഉദ്ഘാടനം ചെയ്തു. താലൂക്ക് ലൈബ്രറി കൗണ്‍സിൽ പ്രസിഡന്‍റ് ജോഷി സ്കറിയ അധ്യക്ഷത വഹിച്ചു. നഗരസഭാംഗം മേരിക്കുട്ടി ചാക്കോ മുഖ്യ പ്രഭാഷണം നടത്തി. സ്കൂളിലെ വിവിധ ക്ലബുകളുടെ ഉദ്ഘാടനം കവിയും ഗാനരചയിതാവുമായ ജയകുമാർ ചെങ്ങമനാട് നിർവഹിച്ചു. ഗ്രന്ഥശാല പ്രസ്ഥാനത്തെ ജനകീയമാക്കിയ ഐ.വി. ദാസ് അനുസ്മരണ പ്രഭാഷണം താലൂക്ക് ലൈബ്രറി കൗണ്‍സിൽ വൈസ് പ്രസിഡന്‍റും എഴുത്തുകാരിയുമായ സിന്ധു ഉല്ലാസ് നിർവഹിച്ചു. ജില്ലാ ലൈബ്രറി കൗണ്‍സിൽ അംഗം കെ. മോഹനൻ, നേതൃസമിതി കണ്‍വീനർ ആർ. രാജീവ്, താലൂക്ക് എക്സിക്യൂട്ടീവംഗം എം.എ. എൽദോസ്, വി.എൻ. സന്തോഷ് കുമാർ, എൻ.കെ. രാജൻ, സി.കെ. ഉണ്ണി, ടി. വിജയകുമാരി എന്നിവർ പ്രസംഗിച്ചു. തുടർന്ന് അക്ഷരമാണ് ലഹരി എന്ന സന്ദേശമുൾക്കൊള്ളുന്ന കുട്ടികളുടെ സംഗീത ശിൽപ്പവും അവതരിപ്പിച്ചു. കഴിഞ്ഞ 19ന് പി.എൻ. പണിക്കരുടെ ചരമദിനത്തിൽ ആരംഭിച്ച വായന പക്ഷാചരണ പരിപാടി ഐ.വി. ദാസിന്‍റെ ജന്മദിനമായ ഇന്നലെയാണ് സമാപിച്ചത്. താലൂക്കിലെ 73 ഗ്രന്ഥശാലകളിലും സ്കൂൾ, കോളജ് തലങ്ങളിലും വായന പഷാചരണത്തിന്‍റെ ഭാഗമായി വിവിധ പരിപാടികൾ സംഘടിപ്പിച്ചതായി താലൂക്ക് കൗണ്‍സിൽ സെക്രട്ടറി സി.കെ. ഉണ്ണി അറിയിച്ചു.

കോതമംഗലത്ത് പണിമുടക്ക് പൂർണം

കോതമംഗലം: കോതമംഗലം മേഖലയിൽ പണിമുടക്ക് പൂർണം. കെഎസ്ആർടിസി ബസുകൾ മാത്രമായിരുന്നു ജനങ്ങൾക്ക് ആശ്രയം. സ്വകാര്യ ബസുകളില്ലാത്തതിനാൽ അത്യാവശ്യക്കാർ മാത്രമാണ് യാത്രയ്‌ക്കിറങ്ങിയത്. അതിനാൽ ടൗണിൽ പതിവ് ജനതിരക്ക് ഉണ്ടായിരുന്നില്ല. വ്യാപാര സ്ഥാപനങ്ങളിലും കച്ചവടം കുറഞ്ഞു. വിദ്യാഭ്യാസ സ്ഥാപനങ്ങളിൽ വിദ്യാർഥികളുടെ ഹാജർ നിലയും കുറവായിരുന്നു. പണിമുടക്ക് ദുരിതമായി മാറിയെന്ന് പലരും പ്രതികരിച്ചു. ബസ് ഉടമകളും തൊഴിലാളികളും കോതമംഗലത്ത് പ്രകടനവും സമ്മേളനവും നടത്തി.

വിദ്യാഭ്യാസ ഉപഡയറക്ടർ ഓഫീസിന് മുന്നിൽ ധർണ

മൂവാറ്റുപുഴ: വിദ്യാഭ്യാസ രംഗത്ത് ഇടതുപക്ഷ സർക്കാറിന്‍റെ ദീർഘവീക്ഷണമില്ലാത്ത നടപടികൾ വരും തലമുറയെ തകർക്കുമെന്ന് മുസ്ലിം ലീഗ് സംസ്ഥാന സെക്രട്ടേറിയറ്റംഗം കെ.എം. അബ്ദുൽ മജീദ്. കേരളത്തിന്‍റെ സാന്പത്തിക രംഗത്ത് നിസ്തുല സംഭാവനകൾ നൽകിയ അറബി ഭാഷയോട് സർക്കാർ സ്വീകരിക്കുന്ന ചിറ്റമ്മനയം തിരുത്തണമെന്നും അദ്ദേഹം ആവശ്യപ്പെട്ടു. കേരള അറബിക് ടീച്ചേഴ്സ് ഫെഡറേഷൻ എറണാകുളം ജില്ല കമ്മിറ്റി വിദ്യാഭ്യാസ ഉപഡയറക്ടർ ഓഫീസിന് മുന്നിൽ നടത്തിയ ധർണ ഉദ്ഘാടനം ചെയ്യുകയായിരുന്നു അദ്ദേഹം. ഗുണനിലവാര പദ്ധതി (ക്യുഐപി)യിൽ നിന്ന് കെഎടിഎഫിനെ സർക്കാർ ഒഴിവാക്കിയ നടപടി നീതീകരിക്കാൻ സാധിക്കില്ലെന്നും ഹയർ സെക്കൻഡറി പഠിക്കുന്ന കുട്ടികളുടെ എണ്ണം പരിഗണിച്ച് ഭാഷാധ്യാപക നിർണയം നടത്തണമെന്നും ഉച്ചഭക്ഷണത്തിന് തുക കാലാനുസൃതമായി വർധിപ്പിക്കണമെന്നും അബ്ദുൽ മജീദ് ആവശ്യപ്പെട്ടു. കെഎടിഎഫ് ജില്ല പ്രസിഡന്‍റ് എം.എം. നാസർ അധ്യക്ഷത വഹിച്ചു. സംസ്ഥാന സെക്രട്ടറി അബ്ദുൽ റഷീദ് ഖാസിമി മുഖ്യ പ്രഭാഷണം നടത്തി. തുടർന്ന് ജില്ല വിദ്യാഭ്യാസ ഉപഡയറക്ടർക്ക് വിവിധ ആവശ്യങ്ങൾ ഉന്നയിച്ച് നിവേദനവും നൽകി.

മൂവാറ്റുപുഴ കച്ചേരിത്താഴത്ത് ബസ് കാത്തിരിപ്പു കേന്ദ്രം അപകടാവസ്ഥയിൽ

മൂവാറ്റുപുഴ: ഏറെ കൊട്ടിഘോഷിച്ച് ഉദ്ഘാടനം നിർവഹിച്ച കച്ചേരിത്താഴത്തെ ബസ് കാത്തിരിപ്പു കേന്ദ്രം അപകടാവസ്ഥയിൽ. മേൽക്കൂരയെ താങ്ങി നിർത്തുന്ന ഇരുന്പു പൈപ്പുകൾ തുരുന്പെടുത്ത് നശിച്ചതോടെ ഏതു നിമിഷവും താഴേക്കു പതിച്ച് അപകടമുണ്ടാകുന്ന നിലയിലയിലാണ് കച്ചേരിത്താഴം ബസ് കാത്തിരിപ്പു കേന്ദ്രം. വവ്വാൽ ചിറകിന്‍റ മാതൃകയിൽ കച്ചേരിത്താഴത്ത് 40 ലക്ഷം ചെലവഴിച്ചു നിർമിച്ച ബസ് കാത്തുനിൽപ്പ് കേന്ദ്രത്തിന്‍റെ മേൽക്കൂരയാണ് തുരുന്പെടുത്ത് അപകടാവസ്ഥയിലായിരിക്കുന്നത്. കൂറ്റൻ തൂണുകൾക്കു മുകളിൽ ടെൻസൈൽ ഫാബ്രിക് ഉപയോഗിച്ചാണ് മേൽക്കൂര തീർത്തത്. വിലകൂടിയ ടെൻസൈൽ ഫാബ്രിക് ദീർഘകാലം ഈടു നിൽക്കുമെങ്കിലും ഇവ സ്ഥാപിച്ചിരിക്കുന്ന ഇരുന്പു പൈപ്പുകളിലാണ് തുരുന്പ് വ്യാപിച്ചിരുന്നത്. 2019ൽ ആണ് ബസ് കാത്തിരിപ്പു കേന്ദ്രത്തിന്‍റെ നിർമാണം പൂർത്തിയായത്. ഇതിനു ശേഷം ഇന്നു വരെ ഇതിൽ അറ്റകുറ്റപ്പണികൾ നടന്നിട്ടില്ല. പൈപ്പിലെ തുരുന്പ് നീക്കം ചെയ്ത് പെയിന്‍റടിച്ചില്ലെങ്കിൽ മേൽക്കൂര തകർന്നു വീഴാനുള്ള സാധ്യത ഉണ്ടെന്നാണ് ബസ് കാത്തിരിപ്പു കേന്ദ്രത്തിനു സമീപമുള്ള വ്യാപാരികളും യാത്രക്കാരും പറയുന്നത്.

ഹോട്ടലിന് ലൈസൻസില്ല; 5,000 രൂപ പിഴ

ആലുവ: പഞ്ചായത്ത് ഓഫീസിന് മുന്നിൽ വർഷങ്ങളായി പ്രവർത്തിക്കുന്ന ഹോട്ടൽ ലൈസൻസില്ലെത്ത പരാതിയെ തുടർന്ന് പ്രവർത്തനം നിർത്തിവയ്ക്കാൻ സെക്രട്ടറി നോട്ടീസ് നൽകി. ദേശീയപാതയിൽ കമ്പനിപ്പടി മെട്രോ സ്റ്റേഷന് സമീപം പ്രവർത്തിക്കുന്ന മരുഭൂമിയിലെ ചായക്കട എന്ന ഹോട്ടലിനാണ് നിർത്തിവയ്ക്കാനും 5,000 രൂപ പിഴ അടയ്ക്കാനും നോട്ടീസ് ലഭിച്ചത്. കഴിഞ്ഞ ദിവസം ആരോഗ്യ വിഭാഗം നടത്തിയ പരിശോധനയിലാണ് ചൂർണ്ണിക്കര ഗ്രാമപഞ്ചായത്തിൽ നിന്നുള്ള ലൈസൻസ് ഇല്ലാതെയും മതിയായ ശുചിത്വ സംവിധാനങ്ങൾ ഒരുക്കാതെയും ഭക്ഷണ ശാല നടത്തുന്നതായി കണ്ടെത്തിയത്. ചൂർണിക്കര സ്വദേശി നൽകിയ പരാതിയിലാണ് ആരോഗ്യ വിഭാഗം പരിശോധന നടത്തിയത്. എന്നാൽ വർഷങ്ങളായി പ്രവർത്തിക്കുന്ന സ്ഥാപനത്തിന് അധികൃതർ മൗനാനുവാദം കൊടുത്തതായാണ് സൂചന.

സെന്‍റ് തെരേസാസിൽ ബിരുദദാന ചടങ്ങ്

കൊച്ചി: എറണാകുളം സെന്‍റ് തെരേസാസ് കോളജിൽ ബിരുദദാന ചടങ്ങ് ജില്ല അസി. കളക്ടർ പാർവതി ഗോപകുമാർ ഉദ്ഘാടനം ചെയ്തു. സ്ത്രീകൾ ആത്മവിശ്വാസം വളർത്തുകയും സാമ്പത്തികമായി സ്വതന്ത്രയാവുകയും ചെയ്യേണ്ടതു പ്രധാനമാണെന്ന് അവർ ഓർമിപ്പിച്ചു. സിസ്റ്റർ ടെസ, സിസ്റ്റർ ഫ്രാൻസിസ് ആൻ, പ്രിൻസിപ്പൽ ഡോ. അനു ജോസഫ്, ഡോ. അർസല പോൾ എന്നിവർ പ്രസംഗിച്ചു. വിവിധ വിഭാഗങ്ങളിലെ ഉന്നതവിജയികളെ അസി. കളക്ടർ ആദരിച്ചു.

പെരുമ്പാവൂരിൽ വൈസ്‌മെൻ ഇന്‍റർനാഷണൽ സോൺ-ഡിസ്ട്രിക്ട് സമ്മേളനം

പെരുമ്പാവൂർ: ഈ വർഷം ആയിരം ഡയാലിസിസ് രോഗികൾക്ക് സാമ്പത്തിക സഹായം നൽകുമെന്ന് വൈസ്‌മെൻ ഇന്‍റർനാഷണൽ സോൺ-ഡിസ്ട്രിക്ട് ഭാരവാഹികൾ അറിയിച്ചു. വൈസ്‌മെൻ സോൺ-ഡിസ്ട്രിക്റ്റ് സമ്മേളനം പെരുമ്പാവൂരിലെ ലൂക്ക് മെമ്മോറിയൽ പബ്ലിക് സ്കൂളിൽ നടന്നു. ലെഫ്റ്റനന്‍റ് റീജിയണൽ ഡയറക്ടറായി ഡാനി സ്കറിയ ലുക്കും ഡിസ്ട്രിക്ട് ഗവർണറായി മാത്യൂസ് കാക്കൂരാനും ചുമതലയെടുത്തു. സമ്മേളനം മിഡ് വെസ്റ്റ് ഇന്ത്യ റീജിയണൽ ഡയറക്ടർ സാജു എം. കറുത്തേടം ഉദ്ഘാടനം ചെയ്തു. സോൺ-ഡിസ്ട്രിക്റ്റ് ഭാരവാഹികളുടെ സ്ഥാനാരോഹണ ചടങ്ങ് മിഡ് വെസ്റ്റ് ഇന്ത്യ റീജിയണൽ ഡയറക്ടർ പി.ജെ. കുര്യാച്ചൻ നിർവഹിച്ചു. ലെഫ്റ്റനന്‍റ് റീജിയണൽ ഡയറക്ടർ അഡ്വ. വർഗീസ് മൂലൻ സമ്മേളനത്തിൽ അധ്യക്ഷനായിരുന്നു. സോൺ-ഡിസ്ട്രിക്ട് തലത്തിൽ മികച്ച പ്രവർത്തനം കാഴ്ചവെച്ച ക്ലബ്ബുകൾക്കും വ്യക്തികൾക്കും നൽകുന്ന അവാർഡുകളുടെ ഉദ്ഘാടന കർമം വൈസ്‌മെൻ ഇന്‍റർനാഷണൽ കൗൺസിൽ അംഗം മാത്യൂസ് എബ്രഹാം നിർവഹിച്ചു.

ലിറ്റില്‍ സോയ് 2.0യിൽ പുതിയ മെനു

കൊച്ചി: പനന്പിള്ളി നഗറിലെ ലിറ്റില്‍ സോയ് 2.0യിൽ ഇനി വൈവിധ്യമാർന്ന സ്ട്രീറ്റ് ഭക്ഷണ രുചികളും. ബാങ്കോക്കിലെയും പെനാങ്ങിലെയും ജക്കാര്‍ത്തയിലെയും സ്ട്രീറ്റ് ഫുഡ് രുചിയനുഭവങ്ങൾ ഇവിടെ ലഭിക്കും. ‌ തായ് ശൈലിയിലുള്ള ഗ്രില്‍ഡ് സ്റ്റഫ്ഡ് ചിക്കന്‍ വിംഗ്സിന്‍റെ (പീക്ക് ഗായ് യാംഗ്) മയപ്പെടുത്തുന്ന ഗ്ലേസ്, സ്‌പൈസി ബാംഗ് ബാംഗ് സ്‌പൈസി കോളിഫ്‌ളവര്‍, സാംബാല്‍ ചേര്‍ത്ത ഗ്രില്‍ ബാലിനീസ് ബേ പ്രോണ്‍സ്, മലായ് നാസി മാമാക് തുടങ്ങിയവ ഇവിടെയുണ്ടാകും. പ്രശസ്തമായ ഭക്ഷണശാലകളില്‍ നിന്ന് പ്രചോദനം ഉള്‍ക്കൊണ്ട പുതിയ വിഭവങ്ങളാണ് ലിറ്റില്‍ സോയിയുടെ അടുക്കളയില്‍ ഒരുക്കുന്നത്. ക്ലാസിക് വിഭവങ്ങള്‍ക്ക് മാറ്റമില്ല. കൊറിയന്‍ ബുള്‍ഡാക്ക് ചിക്കന്‍, ഇചിറാക്കു രാമെന്‍, എക്‌സ്ഒ ഫ്രൈഡ് റൈസ് ബൗള്‍ തുടങ്ങിയ ജനപ്രിയ വിഭവങ്ങളും ലഭ്യമാണെന്ന് അധികൃതർ അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]