ADVERTISEMENT

ADVERTISEMENT

മൂര്‍ക്കനാട് സെന്‍റ് ആന്‍റണീസ് എല്‍പി സ്‌കൂളില്‍ സ്മാര്‍ട്ട് ക്ലാസ് റൂമുകള്‍ തുറന്നു

മൂര്‍ക്കനാട്: സെന്‍റ് ആന്‍റണീസ് എല്‍പി സ്‌കൂളില്‍ സ്മാര്‍ട്ട് ക്ലാസ് റൂമുകളുടെ ഉദ്ഘാടനം ഉന്നത വിദ്യാഭ്യാസ മന്ത്രി ഡോ. ആര്‍. ബിന്ദു നിര്‍വഹിച്ചു. ഇരിങ്ങാലക്കുട നഗരസഭ ചെയര്‍പേഴ്‌സണ്‍ മേരിക്കുട്ടി ജോയ് അധ്യക്ഷത വഹിച്ചു. സ്‌കൂള്‍ മാനേജര്‍ ഫാ. സിന്‍റോ മാടവന അനുഗ്രഹപ്രഭാഷണം നടത്തി.

ഹെഡ്മിസ്ട്രസ് കെ.ഐ. റീന, വാര്‍ഡ് കൗണ്‍സിലര്‍ നസീമ കുഞ്ഞുമോന്‍, പോള്‍ തേറുപറമ്പില്‍, കെ.എ. വര്‍ഗീസ്, പ്രീത ഫിലിപ്പ്, സിനി ആന്‍റോ എന്നിവര്‍ പ്രസംഗിച്ചു.

ADVERTISEMENT

ഷോക്കേറ്റ് കെഎസ്ഇബി ജീവനക്കാരൻ മരിച്ചു

വടക്കാഞ്ചേരി: ഷോക്കേറ്റ് കെഎസ്ഇബി ജീവനക്കാരൻ മരിച്ചു. കൊടുമ്പ് സ്വദേശി ചാത്തൻച്ചിറ സുധാകരൻ(44) ആണ് മരിച്ചത്. ഇന്നലെ രാവിലെ 11നായിരുന്നു സംഭവം. കെഎസ്ഇബി വടക്കാഞ്ചേരി സ്റ്റേഷനു കീഴിലെ ഒന്നാംകല്ല് പ്രദേശത്ത് കടയിൽ വൈദ്യൂതിയില്ലെന്ന കടയുടമയുടെ പരാതിയുടെ അടിസ്ഥാനത്തിൽ പരിശോധിക്കാൻ പോയിതായിരുന്നു സുധാകരൻ. കടയിലേക്കുള്ള സർവീസ് വയർ മാറ്റി കണക്ഷൻ നൽകുന്നതിനിടെയാണ് സുധാകരന് ഷോക്കേറ്റത്. വൈദ്യുതിഘാതമേറ്റ സുധാകരൻ വൈദ്യൂതി പോസ്റ്റിൽ തന്നെ കിടക്കുകയായിരുന്നു. വിവരമറിയിച്ചതിനെ തുടർന്ന് വടക്കാഞ്ചേരി ഫയർഫോഴ്സെത്തി കെഎസ്ഇബി ജീവനകാരുടെ സഹായത്തോടെ സുധാകരനെ താഴെയിറക്കുകയായിരുന്നു. തുടർന്ന് വടക്കാഞ്ചേരി ജില്ലാ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. വടക്കാഞ്ചേരി പോലീസ് സ്ഥലത്തെത്തി മേൽനടപടികൾ സ്വീകരിച്ചു. സംഭവത്തെ കുറിച്ച് അന്വേഷിക്കാൻ കെഎസ്ഇബിയുടെ ഉന്നതഉദ്യോഗസ്ഥർ സ്ഥലത്തെത്തി അന്വേഷണം നടത്തി. അമ്മ: അമ്മിണി. ഭാര്യ: പ്രസന്ന. മക്കൾ: പുണ്യ, തീർത്ഥ.

കേരളത്തിൽ സ്പോർട്സ് ഇൻസ്റ്റിറ്റ്യൂട്ട് സ്ഥാപിക്കും: മന്ത്രി വി. അബ്ദുറഹ്‌മാൻ

ചാലക്കുടി: കേരളത്തിൽ സ്പോർട്സ് ഇൻസ്റ്റിറ്റ്യൂട്ട് സ്ഥാപിക്കുമെന്നും കാലിക്കട്ട് യൂണിവേഴ്സിറ്റി കേന്ദ്രീകരിച്ച് പരിശീലന കോഴ്സുകൾ ആരംഭിക്കുമെന്ന് കായിക മന്ത്രി വി. അബ്ദുറഹ്‌മാൻ. ഗവ. മോഡൽ ബോയ്സ് ഹൈസ്കൂൾ ടി.കെ. ചാത്തുണ്ണി സ്മാരക മൈതാനത്തിൽ അഞ്ചുകോടി രൂപ ചെലവിൽ നിർമിക്കുന്ന സ്റ്റേഡിയത്തിന്‍റെ നിർമാണോദ്ഘാടനവും 1.27 കോടി രൂപ ചെലവിൽ മേപ്പിൾ വുഡ് ഫ്ലോറിംഗ് നടത്തിയ എം.എൽ. ജേക്കബ് സ്മാരക ഇൻഡോർ സ്റ്റേഡിയത്തിന്‍റെ പ്രവർത്തനോദ്ഘാടനവും നിർവഹിച്ചു സംസാരിക്കുകയായിരുന്നു മന്ത്രി. സനീഷ്കുമാർ ജോസഫ് എംഎൽഎ അധ്യക്ഷത വഹിച്ചു. നഗരസഭ ചെയർമാൻ ഷിബു വാലപ്പൻ, സ്റ്റാൻഡിംഗ് കമ്മറ്റി ചെയർമാന്മാരായ പ്രീതി ബാബു, ആനി പോൾ, യുഡിഎഫ് ലീഡർ അഡ്വ. ബിജു. എസ്. ചിറയത്ത്, പ്രതിപക്ഷനേതാവ് സി.എസ്. സുരേഷ് കൗൺസിലർ നിത പോൾ. എഡ്യുക്കേഷൻ ഡെപ്യുട്ടി ഡയറക്ടർ പി.എം. ബാലകൃഷ്ണൻ, കായിക വകുപ്പ് ഡെപ്യുട്ടി ഡയറക്ടർ സി.എസ്. രമേഷ്, സ്പോർട്സ് എക്സി. എൻജി നീയർ മുഹമ്മദ് അഷറഫ്, വി.ഒ. പൈലപ്പൻ, പോൾ പുല്ലൻ, വി.ഐ. പോൾ, ഹെഡ്മിസ്ട്രസ് പി. മിനി എന്നിവർ പ്രസംഗിച്ചു.

നീരൊഴുക്കുതടഞ്ഞ സംഭവം അന്വേഷിക്കാനെത്തിയ ജനപ്രതിനിധിക്കെതിരേ വധഭീഷണി മുഴക്കിയതായി പരാതി

എസ്.എൻ. പുരം: വെള്ളത്തിന്‍റെ നീരൊഴുക്ക് തടഞ്ഞ സംഭവത്തെക്കുറിച്ച് അന്വേഷിക്കാനെത്തിയ ജനപ്രതിനിധിക്കെതിരെ വധഭീഷണി മുഴക്കിയതായി പരാതി. ശ്രീനാരായണപുരം പഞ്ചായത്ത് പ്രദേശങ്ങളിലെ പല തോടുകളും വ്യാപകമായി സ്വകാര്യ വ്യക്തികൾ മൂടിയതിനെ തുടർന്ന് രൂക്ഷമായ വെള്ളക്കെട്ടാണ് അനുഭവപ്പെടുന്നത്. രണ്ടാം വാർഡിൽ പോഴങ്കാവ് വെസ്റ്റ് ഭാഗത്ത് രജിത സുന്ദരൻ റോഡിനു പടിഞ്ഞാറുവശത്ത് വിവിധ തോടുകളിലൂടെ ഒഴുകി എത്തിച്ചേരുന്ന മഴവെള്ളം സ്വകാര്യ വ്യക്തിയുടെ തോട്ടിലൂടെ വടക്കോട്ടൊഴുകി മറ്റൊരു തോട്ടിൽ ചെന്നുചേർന്നശേഷം പെരുന്തോട്ടിൽ എത്തിച്ചേരുകയായിരുന്നു പതിവ്. എന്നാൽ സ്ഥലമുടമയായ മരോട്ടിക്കൽ ജോബി വെള്ളത്തിന്‍റെ ഒഴുക്ക് തടസപ്പെടു ത്തുകയും തുടർന്ന് പഞ്ചായത്ത്‌ ദുരന്തനിവാരണസേനയുടെ നേതൃത്വത്തിൽ തടസംനീക്കി വെള്ളം ഒഴുക്കിവിട്ട ജനപ്രതിനിധിയായ ജയ സുനിൽരാജിനെതിരെ വധഭീഷണി മുഴക്കുകയും ചെയ്തു. ഈ പ്രദേശത്ത് പ്രായം ചെന്നവരും വിധവകളും രോഗികളും ഉൾപ്പെടുന്ന പത്തോളം കുടുംബങ്ങൾ വെള്ളക്കെട്ടുമൂലം ദുരിതമനുഭവിച്ചുകൊണ്ടിരിക്കുക യാണ്. പരമ്പരാഗതമായി വലിയ തോതിൽ വെള്ളം പെരുന്തോടിലേക്ക് ഒഴുകിപ്പോയിരുന്ന സ്വകാര്യ വ്യക്തികളുടെ ഉടമസ്ഥതയിലുള്ള തോടുകൾ നികത്തപ്പെട്ടതിനാൽ മഴക്കാലത്ത് അതിരൂക്ഷമായ വെള്ളക്കെട്ടും വേനൽക്കാലത്ത് ശുദ്ധജലക്ഷാമവും നിലനിലക്കുന്ന പരിസ്ഥിതി ലോലപ്രദേശമാണിത്. ശ്രീനാരായണപുരം സ്റ്റാന്‍ ഡിംഗ് കമ്മിറ്റി ചെയർ‌പേഴ്സൺ കൂടിയായ ജയ സുനിൽ രാജിനെതിരെ ഫോണിലൂടെയാണ് ജോബി ഭീഷണി മുഴക്കിയത്. മുമ്പും ഇയാൾ തനിക്കെതിരെ ഭീഷണി ഉയർത്തി സംസാരിച്ചിട്ടുണ്ടെന്നും ജനപ്രതിനിധി പറഞ്ഞു. സംഭവത്തിൽ ജയ സുനിൽരാജ് മതിലകം പോലീസിൽ രേഖാമൂലം പരാതി നൽകിയിട്ടുണ്ട്. ജനപ്രതിനിധിക്കെതിരെ ഉണ്ടായ ഭീഷണി സംബന്ധി ദുരന്തനിവാരണ ആക്ട് പ്രകാരം നിയമനടപടികളിലേക്ക് പഞ്ചായത്തും കടന്നിട്ടുണ്ട്.

ഓണവിപണി ലക്ഷ്യംവച്ചുള്ള 15000 കുലച്ച നേന്ത്രവാഴകള്‍ വെള്ളത്തില്‍

ഇരിങ്ങാലക്കുട: കനത്ത മഴയില്‍ കൃഷിനാശം തുടരുന്നു. നേരത്തെ എത്തിയ മഴയും പാടങ്ങളില്‍നിന്ന് വെള്ളമിറങ്ങാത്തതും കര്‍ഷകരെ ദുരിതത്തിലാക്കി. ഓണ വിപണി ലക്ഷ്യം വച്ച് കൃഷി ഇറക്കിയ വാഴകളാണ് വെള്ളത്തിലായത്. 15000 കുലച്ച നേന്ത്രവാഴകളാണ് അരയ്ക്ക് ഒപ്പം വെള്ളത്തില്‍ മുങ്ങിനില്‍ക്കുന്നത്. പൊറത്തിശേരി കൃഷിഭവന്‍, വല്ലച്ചിറ കൃഷിഭവന്‍, കാറളം, മുരിയാട്, തൊട്ടിപ്പാള്‍ എന്നീ പ്രദേശങ്ങളിലുമാണ് വ്യാപകമായ കൃഷിനാശം സം ഭവിച്ചിരിക്കുന്നത്. കരുവന്നൂര്‍ പുഴയ്ക്കല്‍ പ്രകാശന്‍, കരുവന്നൂര്‍ തളിയക്കാട്ടില്‍ വേലായുധന്‍, കരുവന്നൂര്‍ തെക്കൂടന്‍ വത്സന്‍, പി.കെ. ദാസന്‍ തൊട്ടിപ്പാള്‍, പി.കെ. രവീന്ദ്രന്‍ മുരിയാട് , കെ.സി. ആന്‍റണി കാറളം, ടി.എ. പോള്‍ കരുവന്നൂര്‍, കെ. വി. ബാബു ആറാട്ടുപുഴ, കെ.സി. ജെയിംസ് ആറാട്ടുപുഴ എന്നീ കര്‍ഷകരുടെ വാഴകൃഷിയാണ് വെള്ളത്തിലായത്. ബാങ്കില്‍നിന്നും വായ്പയെടുത്തും കടം വാങ്ങിയും കൃഷി ആരംഭിച്ച കര്‍ഷകര്‍ ദുരിത പ്പെയ്ത്തില്‍ കടക്കെണിയിലാവുമോ എന്ന ആശങ്കയിലാണ്. വിളവിന് പാകമാവാത്ത വാഴകളാണ് നശിച്ചവയിലേറേയും. ദശലക്ഷങ്ങളുടെ നഷ്ടമാണ് കര്‍ഷകര്‍ക്കുണ്ടായത്. ശക്തമായ കാറ്റില്‍ കുറച്ച് വാഴകള്‍ ഒടിഞ്ഞുവീണിരുന്നു. ദിവസങ്ങളായി വെള്ളം കെട്ടി നില്‍ക്കുന്നതുകാരണം വേരുകള്‍ ചീഞ്ഞ് വാഴ നശിക്കും. കൃഷിനാശം സംഭവിച്ച കര്‍ഷകര്‍ക്ക് സര്‍ക്കാരിന്‍റെ സാമ്പത്തിക സഹായവും ഇന്‍ഷ്വര്‍ ചെയ്ത കര്‍ഷകര്‍ക്ക് ഇന്‍ഷ്വര്‍ തുകയും ലഭിക്കുന്നതിന് ആവശ്യമായ നടപടികള്‍ സര്‍ക്കാര്‍ എത്രയും വേഗം സ്വീകരിക്കണമെന്ന് മൈത്രി ഇരിങ്ങാലക്കുട ഫാര്‍മര്‍ പ്രൊഡ്യൂസര്‍ കമ്പനി ചെയര്‍മാന്‍ കെ.സി. ജെയിംസ് ആവശ്യപ്പെട്ടു.

പെയ്‌തൊഴിയാതെ ദുരിതം; വെള്ളം ഇറങ്ങുന്നില്ല

ഇരിങ്ങാലക്കുട: കരുവന്നൂര്‍ പുഴയിലും കെഎല്‍ഡിസി കനാലിലും ഇലനിരപ്പ് ഉയര്‍ന്നതോടെ താഴ്ന്ന പ്രദേശങ്ങള്‍ കൂടുതല്‍ വെള്ളക്കെട്ടിലായി. കഴിഞ്ഞ ദിവസത്തേതിനെക്കാല്‍ കൂടുതല്‍ പേരാണ് ഇന്നലെ ദുരിതാശ്വാസ ക്യാമ്പുകളിലെത്തിയത്. ഇരിങ്ങാലക്കുട നഗരസഭയിലെ പൊറത്തിശേരി, കാട്ടൂര്‍, കാറളം, പടിയൂര്‍, മുരിയാട് എന്നീ പഞ്ചായത്തുകളിലെയും താഴ്ന്ന പ്രദേശങ്ങളില്‍ വെള്ളക്കെട്ട് രൂക്ഷമാണ്. പുളിക്കലച്ചിറ താത്കാലിക ബണ്ടിലൂടെ വെള്ളം ഒഴുക്കിക്കളായന്‍ ശ്രമങ്ങള്‍ ആരംഭിച്ചതോടെ പ്രദേശത്തെ ജലനിരപ്പ് താഴ്ന്നു തുടങ്ങിയിട്ടുണ്ട്. റോഡുകളില്‍ വെള്ളം കയറിയതിനെ തുടര്‍ന്ന് നന്തി - കരാഞ്ചിറ റൂട്ടിലും മൂര്‍ക്കനാട് -കാറളം റൂട്ടിലും തൊമ്മാന പാടത്ത് വെള്ളം ഉയര്‍ന്നതിനെ തുടര്‍ന്ന് തൊമ്മാന - ചെങ്ങാറ്റുമുറി റോഡിലെയും ഗതാഗതം നിർത്തിവച്ചിരിക്കുകയാണ്. മുകുന്ദപുരം താലൂക്കില്‍ 345 പേരാണ് ദുരിതാശ്വാസ ക്യാമ്പുകളില്‍ കഴിയുന്നത്. 131 വീടുകളില്‍നിന്നും 139 പുരുഷന്മാരും 159 സ്ത്രീകളും 47 കുട്ടികളുമാണ് ക്യാമ്പുകളിലുള്ളത്. എടത്തിരിഞ്ഞി എച്ച്ഡിപി സ്‌കൂളില്‍ 33 വീടുകളില്‍ നിന്നായി 65 പേരും കാറളം എഎല്‍പി സ്‌കൂളില്‍ 29 വീടുകളില്‍ നിന്നും 82 പേരും കരാഞ്ചിറ സെന്‍റ് സേവിയേഴ്‌സ് സ്‌കൂളില്‍ 14 വീടുകളില്‍നിന്ന് 60 പേരും കാട്ടൂര്‍ പോംപെ സെന്‍റ് മേരീസ് സകൂളില്‍ 23 വീടുകളില്‍ നിന്നും 60 പേരും കാമ്പുകളിലുണ്ട്. വേളൂക്കര പഞ്ചായത്ത് കെട്ടിടം, താണിശേരി ലിറ്റില്‍ ഫ്ലവര്‍ സ്‌കൂള്‍, കരുവന്നൂര്‍ സെന്‍റ് ജോസഫ്‌സ് സ്‌കൂള്‍, എടക്കുളം എസ്എന്‍ സ്‌കൂള്‍, പുല്ലൂര്‍ സാംസ്‌കാരിക നിലയം, പുല്ലൂര്‍ എസ്എന്‍ സ്‌കൂള്‍, തൊട്ടിപ്പാള്‍ യുപി സ്‌കൂള്‍ എന്നിവടങ്ങളിലും കാമ്പുകള്‍ പ്രവര്‍ത്തിക്കുന്നുണ്ട്.

ഏതു സാഹചര്യം നേരിടാനും തയാർ: കെ. രാജൻ

നെടുപുഴ: ഗവ. വിമൻസ് പോളിടെക്നിക് കോളജിൽ ആരംഭിച്ച ദുരിതാശ്വാസ ക്യാന്പ് മന്ത്രി കെ. രാജൻ സന്ദർശിച്ച് സ്ഥിതിഗതികൾ വിലയിരുത്തി. മഴക്കാലം നേരിടുന്നതിനായി സർക്കാരും ജില്ലാ ഭരണകൂടങ്ങളും തയാറാണെന്നും ഏതു ഘട്ടത്തിലും ഏതു സാഹചര്യത്തെയും നേരിടാൻ കഴിയുന്ന തരത്തിലുള്ള തയാറെടുപ്പുകൾ എടുത്തിട്ടുണ്ടെന്നും മന്ത്രി പറഞ്ഞു. അടിയന്തരസാഹചര്യമുണ്ടായാൽ നേരിടുന്നതിനായി തദ്ദേശസ്വയംഭരണ വകുപ്പും റവന്യൂ വകുപ്പും കൂടിയാലോചിച്ച് അയ്യായിരത്തോളം ക്യാന്പുകൾക്കുള്ള സ്ഥലങ്ങൾ കണ്ടെത്തിയിട്ടുണ്ടെന്നും മന്ത്രി അറിയിച്ചു. നെടുപുഴയിലെ 43, 44 ഡിവിഷനുകളിൽപ്പെട്ട മുല്ലയ്ക്കൽതുരുത്ത്, മല്ലിത്തറ തുടങ്ങിയ പ്രദേശങ്ങളിൽ വെള്ളം കയറിയതിനെതുടർന്നാണ് ഇവിടത്തെ കുടുംബങ്ങളെ ക്യാന്പിലേക്കു മാറ്റിയത്. നിലവിൽ 18 കുടുംബങ്ങളിൽനിന്നായി 66 പേർ ക്യാന്പിലുണ്ട്. ക്യാന്പിൽ കഴിയുന്നവർക്കു വേണ്ട സൗകര്യങ്ങൾ ഉറപ്പുവരുത്തുന്നതിനു വില്ലേജ് ഓഫീസറെയും തഹസിൽദാറെയും മന്ത്രി ചുമതലപ്പെടുത്തി. വൈദ്യസഹായം ആവശ്യമുള്ളവർക്കു ചികിത്സാസഹായം നൽകുന്നതിനായി ദുരിതാശ്വാസനിധിയിലേക്ക് അപേക്ഷ സമർപ്പിക്കുന്നതിനും ഉദ്യോഗസ്ഥർക്കു മന്ത്രി നിർദേശം നൽകി. കൗണ്‍സിലർമാരായ ദിനേഷ് തയ്യിൽ, എ.ആർ. രാഹുൽനാഥ്, എഡിഎം ടി. മുരളി, വില്ലേജ് ഓഫീസർ കെ.വി. വനിത തുടങ്ങിയവർ സന്നിഹിതരായി.

വിദ്യാർഥികൾ നൂതനാശയങ്ങളുടെ സ്രഷ്ടാക്കളാകണം: മന്ത്രി ബിന്ദു

തൃശൂർ: വിദ്യാർഥികൾ പുതിയ അറിവുകളുടെയും ആശയങ്ങളുടെയും സ്രഷ്ടാക്കളാകണമെന്നു മന്ത്രി ഡോ. ആർ. ബിന്ദു പറഞ്ഞു. സെന്‍റ് തോമസ് കോളജിൽ റൂസ പദ്ധതിയിൽ ഉൾപ്പെടുത്തി 78 ലക്ഷം രൂപ ചെലവഴിച്ചു നിർമിച്ച മൾട്ടിപർപ്പസ് ഹാൾ ഉദ്ഘാടനം നിർവഹിക്കുകയായിരുന്നു മന്ത്രി. സംസ്ഥാന- കേന്ദ്ര സർക്കാരുകളുടെ സംയുക്തപദ്ധതിയായ റൂസ പ്രോജക്ടിന്‍റെ ഭാഗമായി കോളജിനു രണ്ടുകോടി രൂപ അനുവദിച്ച് ഒരു കോടി രൂപയുടെ പ്രവർത്തനങ്ങൾ ആരംഭിച്ചു. 22 ലക്ഷം രൂപ വിനിയോഗിച്ച് ഹോസ്റ്റൽ നവീകരണവും 78 ലക്ഷം രൂപ ചെലവഴിച്ച് മൾട്ടിപർപ്പസ് ഹാൾ നിർമാണവും പൂർത്തിയാക്കി. കോളജിന്‍റെ ചേറൂരിലെ സെന്‍റിനറി കാമ്പസിൽ നിർമാണം പൂർത്തിയാക്കിയ മൾട്ടിപർപ്പസ് ഹാൾ വിദ്യാർഥികളുടെ വിവിധ പഠന, പഠനേതരപ്രവർത്തനങ്ങൾക്കായി ഉപയോഗിക്കും. കലാകായിക പരിപാടികൾ, വിവിധ ക്ലബ്ബുകളുടെ പ്രവർത്തനങ്ങൾ, പ്ലേസ്‌മെന്‍റ് ആക്ടിവിറ്റികൾ, എക്സ്പീരിയൻസ് ലേണിംഗ് ആക്ടിവിറ്റീസ്, സ്കിൽ ട്രെയിനിംഗ് ആക്ടിവിറ്റീസ് തുടങ്ങിയവയ്ക്കായി 800 സ്ക്വയർ മീറ്റർ വിസ്തൃതിയിൽ നിർമാണം പൂർത്തിയാക്കിയ മൾട്ടിപർപ്പസ് ഹാളിൽ സൗകര്യമൊരുക്കുമെന്നും മന്ത്രി പറഞ്ഞു. സെന്‍റ് തോമസ് കോളജ് മാനേജർകൂടിയായ ബിഷപ് മാർ ടോണി നീലങ്കാവിൽ അധ്യക്ഷനായി. പ്രിൻസിപ്പൽ റവ.ഡോ. കെ.എ. മാർട്ടിൻ, റവ.ഡോ. ഫ്ലെർജിൻ ആന്‍റണി, റൂസ കോ ഓർഡിനേറ്റർ ഡോ. എം.ടി. തോമസ്, ജനപ്രതിനിധികൾ, അധ്യാപകർ തുടങ്ങിയവർ പങ്കെടുത്തു.

അമലയിൽ വായനവാരാഘോഷവും പി.എൻ. പണിക്കർ അനുസ്മരണവും 24ന്

തൃശൂർ: അമല മെഡിക്കൽ കോളജ്, നഴ്സിംഗ് കോളജ്, നഴ്സിംഗ് സ്കൂൾ, പാരാമെഡിക്കൽ, ആയുർവേദം എന്നിവയുടെ ആഭിമുഖ്യത്തിൽ വായനവാരാഘോഷവും പി.എൻ. പണിക്കർ അനുസ്മരണവും 24ന് ഉച്ചകഴിഞ്ഞു മൂന്നിനു സാഹിത്യകാരൻ വൈശാഖൻ ഉദ്ഘാടനം ചെയ്യും. അമലയിലെ വിവിധ കോളജുകളിലെ നല്ല ലൈബ്രറി വായനക്കാരെ ആദരിക്കൽ, സാഹിത്യ ക്വിസ് മത്സര വിജയികൾക്കു സമ്മാനങ്ങൾ നല്കൽ, മെഡിക്കൽ കോളജ് വിദ്യാർഥികളുടെ മാഗസിൻ പ്രൊമോ റിലീസ്, സീനിയർ സയന്‍റിഫിക് റിസർച്ച് ഓഫീസർ ഡോ. ജോബി തോമസ് എഴുതിയ നാലു പുസ്തകങ്ങളുടെ പ്രകാശനം എന്നിവയും വൈശാഖൻ നിർവഹിക്കും. അമല ഡയറക്ടർ ഫാ. ജൂലിയസ് അറയ്ക്കൽ സിഎംഐ അധ്യക്ഷത വഹിക്കും. വായനയും മാനസികാരോഗ്യവും എന്ന വിഷയത്തിലുള്ള സെമിനാർ അമല കമ്യൂണിറ്റി മെഡിസിൻ വിഭാഗം തലവൻ പ്രഫ. ഡോ. സി.ആർ. സാജു അവതരിപ്പിക്കും. പി.എൻ.പണിക്കർ അനുസ്മരണം കൊടകര സഹൃദയ കോളജ് ലൈബ്രേറിയൻ ഡോ. ബി. ഷാജി നിർവഹിക്കും. ഡെപ്യൂട്ടി ലൈബ്രേറിയൻ ജിക്കൊ കോടങ്കണ്ടത്ത് വായനപ്രതിജ്ഞയ്ക്കു നേതൃത്വം നല്കും. പ്രഫസറും ചീഫ് ലൈബ്രേറിയനുമായ ഡോ. എ.ടി. ഫ്രാൻസിസ്, ലൈബ്രേറിയൻ വി.ജെ. ലിറ്റി, പ്രിൻസിപ്പൽമാർ, വിദ്യാർഥിപ്രതിനിധികൾ എന്നിവർ പ്രസംഗിക്കും. പത്രസമ്മേളനത്തിൽ ഡോ. എ.ടി. ഫ്രാൻസിസ്, എക്സ്റ്റേണൽ ഓപ്പറേഷൻസ് ജനറൽ മാനേജർ ബോർജിയോ ലൂവിസ്, വി.ജെ. ലിറ്റി, പിആർഒ ജോസഫ് വർഗീസ് എന്നിവർ പങ്കെടുത്തു.

പാലിയേക്കര ടോൾ കേസ്: സംസ്ഥാന സർക്കാർ നിലപാട് ദുരൂഹമെന്നു ജോസഫ് ടാജറ്റ്

തൃശൂർ: വർഷാവർഷം സെപ്റ്റംബർ ഒന്നിനു ടോൾനിരക്ക് വർധിപ്പിക്കുന്നതിനെതിരേ കേരള ഹൈക്കോടതിയിൽ നൽകിയ കേസിൽ ഒന്നാം എതിർകക്ഷിയായ സംസ്ഥാന സർക്കാർ സ്വീകരിക്കുന്ന നിലപാട് ദുരൂഹമാണെന്നു ഡിസിസി പ്രസിഡന്‍റും ജില്ലാ പഞ്ചായത്ത്‌ പ്രതിപക്ഷനേതാവുമായ അഡ്വ. ജോസഫ് ടാജറ്റ് പറഞ്ഞു. കേസിന്‍റെ അവസാനവാദം നടന്നുവരികയാണ്. ഈ മാസം 23 നാണു ഇനി കേസെടുക്കുക. സംസ്ഥാന സർക്കാർ ഇതുവരെ ഒരു കൗണ്ടർപോലും നൽകിയിട്ടില്ല. ഇക്കാര്യത്തിൽ സർക്കാർ ഇനിയെങ്കിലും നിലപാടു വ്യക്തമാക്കണമെന്ന് ആവശ്യപ്പെട്ട് സംസ്ഥാന പൊതുമരാമത്ത് മന്ത്രിക്കു കത്തുനൽകി. ജസ്റ്റീസുമാരായ മുഹമ്മദ്‌ മുഷ്താഖ്, ജോൺസൺ ജോൺ എന്നിവർ അംഗങ്ങളായ ഡിവിഷൻ ബഞ്ചാണു വാദം കേൾക്കുന്നത്. ആവശ്യത്തിനു സേവനം നൽകാതെ ടോൾ പിരിക്കാൻ എന്തവകാശമെന്നു കോടതി ചോദിച്ചിട്ടും സംസ്ഥാനസർക്കാർ മൗനം ദീക്ഷിക്കുന്നതു കരാർകമ്പനിയെ സഹായിക്കാനാണെന്നു ജോസഫ് ടാജറ്റ് കുറ്റപ്പെടുത്തി. നിബന്ധനകൾ പാലിക്കാതെയും കരാറിലെ പഞ്ച് ലിസ്റ്റിലെ പ്രവൃത്തികൾ ചെയ്തുതീർക്കാതെയും സേഫ്റ്റി ഓഡിറ്റ് റിപ്പോർട്ടിൽ പറയുന്ന പരിഹാരമാർഗങ്ങൾ പൂർത്തിയാക്കാതെയും ടോൾനിരക്ക് വർധിപ്പിക്കരുതെന്ന ആവശ്യവുമായാണു ജോസഫ് ടാജറ്റ് കോടതിയെ സമീപിച്ചിട്ടുള്ളത്.

മഴ, റോഡ്, തോട്, പിന്നെ മ്മ്ടെ സ്റ്റാൻഡും

സി.ജി. ജിജാസൽ തൃശൂർ: വട്ടത്തിൽചുറ്റി കഷ്ടത്തിലായി ബസുകളും യാത്രക്കാരും, തൃശൂരിൽ ആനവണ്ടി കയറാൻ അഭ്യാസിയാകണം! ആളുകൾമാത്രമല്ല, ബസുകളും. മഴ ശക്തമായതോടെ ഇരുചക്രവാഹനങ്ങൾക്കു താത്കാലിക അവധി നൽകിയും അല്ലാതെയും ബസുകളിൽ അഭയംതേടുന്ന യാത്രക്കാരെയാണ് ഒരു ബസ് സ്റ്റാൻഡും ചില ഉദ്യോഗസ്ഥരുംകൂടി ദുരിതത്തിലാക്കുന്നത്. കോടികൾ വകയിരുത്തിയുള്ള വികസനപ്രവർത്തങ്ങൾക്കു സാക്ഷ്യംവഹിക്കുമെന്നു പറഞ്ഞ കെഎസ്ആർടിസി സ്റ്റാൻഡിൽ മഴ കനത്തതോടെ രൂപപ്പെട്ട ചോർച്ചയും വെള്ളക്കെട്ടും ചെളിക്കുളവും യാത്രക്കാരെയും ബസ് ജീവനക്കാരെയും ഒരുപോലെയാണ് നട്ടംതിരിക്കുന്നത്. സ്ഥലപരിമിതി നേരിടുന്ന സ്റ്റാൻഡിൽ ബസുകൾക്കു സുഗമമായി കയറാനും ഇറങ്ങാനും സിഗ്നൽസംവിധാനം നടപ്പാക്കിയെങ്കിലും ഇപ്പോഴും ബസുകൾ പഴയപടിതന്നെ പോകുന്നതു പ്രദേശത്തു ഗതാഗതക്കുരുക്കും സൃഷ്ടിക്കുന്നുണ്ട്. ഇതിനിടെ പ്രവേശനകവാടത്തിൽ വെള്ളക്കെട്ട് രൂപപ്പെട്ടതോടെ സ്റ്റാൻഡിൽ എത്തുന്ന യാത്രക്കാർ തലയിലും തോളിലും ലഗേജ് ചുമന്നും വെള്ളത്തിലിട്ട കല്ലിൽകൂടി ചാടി ച്ചാടിയുമാണ് സ്റ്റാൻഡിലേക്കു പ്രവേശിക്കുന്നത്. കുഴികൾ നിറഞ്ഞ സ്റ്റാൻഡിൽ നിന്നുതിരിയാനാവാതെ ബസുകൾ ബുദ്ധിമുട്ടുന്പോൾ, മഴപെയ്താൽ ചോർന്നൊലിക്കുന്ന സ്റ്റാൻഡ് കെട്ടിടത്തിൽ കുടപിടിച്ചിരിക്കേണ്ട അവസ്ഥയിലാണ് യാത്രക്കാർ. ഇതിനിടെ ദൂരങ്ങൾ താണ്ടിയെത്തുന്ന ബസുകളെ വീണ്ടും തിക്കിലും തിരക്കിലും വട്ടംചുറ്റിക്കുന്ന പോലീസ് ഉദ്യോഗസ്ഥരുടെ അശാസ്ത്രീയഗതാഗതനിയന്ത്രണവും യാത്രക്കാരെയും ജീവനക്കാരെയും ഏറെ വലയ്ക്കുന്നുണ്ട്. നവീകരണപ്രവർത്തനങ്ങൾക്കായി നേരത്തേ പ്രഖ്യാപിച്ച പല പദ്ധതികളും ചാറ്റൽമഴയായി ഒതുങ്ങിയെങ്കിലും, നിലവിൽ പി. ബാലചന്ദ്രൻ എംഎൽഎയുടെ ആസ്തിവികസന ഫണ്ടിൽനിന്ന് രണ്ടരക്കോടി രൂപ അനുവദിക്കുകയും പൊതുമരാമത്ത് എക്സിക്യൂട്ടീവ് എൻജിനീയറെ നിർമാണ ഉദ്യോഗസ്ഥനായും നിശ്ചയിക്കുകയും ചെയ്തിട്ടുണ്ട്. അടുത്ത മഴയ്ക്കുമുൻപേയെങ്കിലും നവീകരണം നടപ്പാക്കുമോയെന്ന് ഇനി കണ്ടറിയണമെന്നും യാത്രക്കാർ പറഞ്ഞു.

ദേശീയപാത നിർമാണം: വീഴ്ചകൾക്കെതിരേ നടപടിക്കു നിർദേശം

തൃശൂർ: ജില്ലാ റോഡ് സുരക്ഷാസമിതി യോഗം ജില്ലാ കളക്ടർ അർജുൻ പാണ്ഡ്യന്‍റെ അധ്യക്ഷതയിൽ ചേർന്നു. ദേശീയപാത 544ൽ നിർമാണപ്രവർത്തനങ്ങൾ സുരക്ഷാമാനദണ്ഡങ്ങൾ പാലിക്കാതെയാണ് നടക്കുന്നതെന്നു മോട്ടോർ വെഹിക്കിൾ ഡിപ്പാർട്ട്മെന്‍റ് യോഗത്തിൽ ചൂണ്ടിക്കാട്ടി. കഴിഞ്ഞ യോഗത്തിലും ഇക്കാര്യങ്ങൾ പരിഹരിക്കണമെന്നു നിർദേശം ഉണ്ടായിട്ടും നടപടിയുണ്ടായില്ലെന്നു യോഗം വിലയിരുത്തി. ഇതിന്‍റെ അടിസ്ഥാനത്തിൽ, നിർമാണത്തിലെ സുരക്ഷാവീഴ്ചയെത്തുടർന്ന് അപകടമെന്തെങ്കിലുമുണ്ടായാൽ കരാറുകാർക്കും ദേശീയപാത അഥോറിറ്റിക്കുമെതിരേ നിയമനടപടി സ്വീകരിക്കുമെന്നു ചൂണ്ടിക്കാട്ടി നോട്ടീസ് നൽകാൻ കളക്ടർ നിർദേശം നൽകി. പൊതുറോഡുകളിൽ നിയമവിരുദ്ധമായി സ്ഥാപിച്ചിട്ടുള്ള ബോർഡുകൾ, ബാനറുകൾ, ആർച്ചുകൾ തുടങ്ങിയവ നീക്കം‌ചെയ്യാൻ റോഡ് സുരക്ഷാ കമ്മീഷണർ നിർദേശം നൽകിയിരുന്നു. ജില്ലയിലെ റോഡുകളിൽ ഇത്തരത്തിലുള്ളവ അനധികൃതമായി സ്ഥാപിച്ചിട്ടുണ്ടോയെന്ന‌ു പരിശോധിച്ച് നോട്ടീസ് നൽകുവാൻ പോലീസിനും മോട്ടോർ വാഹനവകുപ്പിനും തദ്ദേശസ്ഥാപനങ്ങൾക്കും നിർദേശം നൽകി. പല നടപ്പാതകളിലെയും സ്ലാബുകൾ തകർന്നും കാടുപിടിച്ചുമാണ് കിടക്കുന്നതെന്ന് യോഗത്തിൽ ഉദ്യോഗസ്ഥർ ചൂണ്ടിക്കാട്ടി. കാടുവെട്ടിത്തെളിച്ച് ഫുട്പാത്തുകൾ സഞ്ചാരയോഗ്യമാക്കുവാനും തകർന്ന സ്ലാബുകൾ നീക്കി പുതിയവ സ്ഥാപിക്കുന്നതിനും നടപടികൾ സ്വീകരിക്കുവാൻ പിഡബ്ല്യുഡിക്കും എൻഎച്ച്ഐഎക്കും കെഎസ്ടിപിക്കും കളക്ടർ നിർദേശം നൽകി. കളക്ടറുടെ ചേംബറിൽ ചേർന്ന യോഗത്തിൽ കോലഴി പഞ്ചായത്ത് പ്രസിഡന്‍റ് ലക്ഷ്മി വിശ്വംഭരൻ, സിറ്റി പോലീസ് കമ്മീഷണർ ആർ. ഇളങ്കോ, ആർടിഒ (എൻഫോഴ്സ്മെന്‍റ്) കെ.ബി. സിന്ധു, വിവിധ വകുപ്പ് ഉദ്യോഗസ്ഥർ തുടങ്ങിയവർ പങ്കെടുത്തു.

എരുമപ്പെട്ടി സ്കൂളിലെ ഭക്ഷ്യവിഷബാധ; കിണർവെള്ളത്തിൽ ബാക്ടീരിയ

എരുമപ്പെട്ടി: ഗവ. എൽപി സ്കൂളിലെ ഭക്ഷ്യവിഷബാധയില്‌ കിണർ വെള്ളത്തിന്‍റെ പരിശോധനാഫലം പുറത്തുവന്നു. കോളിഫോം ബാക്ടീരിയയുടെയും ഇകോളിയുടെയും സാന്നിധ്യം കുടിവെള്ളത്തിൽ കണ്ടെത്തിയതായി ആരോഗ്യവകുപ്പ്. സ്കൂൾ പ്രവേശനോത്സവംകഴിഞ്ഞ് രണ്ടു ദിവസങ്ങൾക്കുള്ളിലാണ് എരുമപ്പെട്ടി ഗവ.എൽപി സ്കൂളിലെ 100 വിദ്യാർഥികൾക്ക് ഭക്ഷ്യവിഷബാധയേറ്റതായി കണ്ടെത്തിയത്. വയറിളക്കം, ഛർദ്ദി, പനി തുടങ്ങിയ അസുഖങ്ങൾമൂലം കുട്ടികൾ വിവിധ ആശുപത്രികളിൽ ചികിത്സതേടി. തുടർന്നുനടത്തിയ പരിശോധനയിൽ കിണറിലെ കുടിവെള്ളത്തിൽ അമീബിക് സാന്നിധ്യം കണ്ടെത്തി. പിന്നീട് വിദഗ്ധസംഘമെത്തി വെള്ളത്തിന്‍റെ സാമ്പിളെടുത്ത് തൃശൂർ കിഴക്കുംപാട്ടുകരയിലുള്ള വാട്ടർ അഥോറിറ്റി ലാബിൽ നടത്തിയ വിശദമായ പരിശോധനയിലാണ് കോളിഫോം ബാക്ടീരിയയുടേയും ഇകോളി യുടെയും സാന്നിധ്യം കണ്ടെത്തിയത്. പ്രതിവിധിയായി കിണറിൽ സൂപ്പർ ക്ലോറിനേഷൻ നടത്തുകയും ശേഷം വെള്ളം പുറത്തേക്കൊഴുക്കിയശേഷം ക്ലാേറിൻ ടാബ്‌ലറ്റ് കിണറിലിടുന്നതിനും ആരോഗ്യവകുപ്പ് നിർദേശിച്ചു. കുട്ടികൾക്കുണ്ടായ ആരോഗ്യപ്രശ്നത്തെതുടർന്ന് സ്കൂളിൽ ഇതുവരെയും ഭക്ഷണം പാചകം ചെയ്തുനൽകുകയോ, കുടിവെള്ളം കുട്ടികൾ ഉപയോഗിക്കുകയോ ചെയ്തിട്ടില്ലെന്ന് പ്രധാന അധ്യാപിക കെ.എ. സുജിനി അറിയിച്ചു. രണ്ടുപേർ ആശുപത്രിയിൽ ചികിത്സയിൽ കഴിയുന്നുണ്ടെന്നും പ്രധാനാധ്യാപിക അറിയിച്ചു.

കായികമേഖലയിൽ നടപ്പിലാക്കുന്നത് സമാനതകളില്ലാത്ത വികസനം: മന്ത്രി

കൈപ്പറമ്പ്: സമാനതകളില്ലാത്ത വികസനപ്രവർത്തനങ്ങളാണ് കായിക മേഖലയിൽ സംസ്ഥാന സർക്കാർ നടപ്പിലാക്കുന്നതെന്ന് കായികമന്ത്രി വി. അബ്ദുറഹ്‌മാ ൻ. മുണ്ടൂരിലെ ഇഎംഎസ് ഇൻഡോർ സ്റ്റേഡിയത്തിലെ മേപ്പിൾവുഡ് ഫ്ലോറിംഗ് ഉദ്ഘാടനംചെയ്ത് സംസാരിക്കുകയായിരുന്നു. സേവ്യർ ചിറ്റിലപ്പിള്ളി എംഎൽഎ അധ്യക്ഷതവഹിച്ചു. കായികവകുപ്പിന്‍റെ 47.5 ലക്ഷം ചെലവഴിച്ചാണ് സ്റ്റേഡിയത്തിലെ മേപ്പിൾ വുഡ് ഫ്ലോറിംഗ് പൂർത്തീകരിച്ചത്. ഇതോടെ ജില്ലയിലെ പ്രധാന മൾട്ടി പർപ്പസ് ഇൻഡോർ സ്റ്റേഡിയം എന്ന രീതിയിൽ ഇഎംഎസ് സ്റ്റേഡിയം ഉപയോഗപ്രദമായി. സ്റ്റേഡിയത്തിന്‍റെ ഭാഗമായുള്ള കിച്ചന്‍റെയും ഡൈനിംഗ് ഹാളിന്‍റെയും കെട്ടിടനിർമാണം പുരോഗമിക്കുകയാണെന്ന് എംഎൽഎ സൂചിപ്പിച്ചു. ഗ്രാമീണമേഖലയിലെ കായികവികസനത്തിനായി സർക്കാർ നടപ്പാക്കുന്ന കളിക്കളം പദ്ധതിയുടെ ഭാഗമായി ലഭിച്ച അമ്പതുലക്ഷവും എംഎൽഎയുടെ ആസ്തിവികസന ഫണ്ടിൽനിന്ന് അമ്പതുലക്ഷം രൂപയും ചേർത്ത് ഒരുകോടി രൂപയുടെ പഞ്ചായത്ത് ഗ്രൗണ്ടിന്‍റെ നവീകരണപ്രവർത്തനങ്ങളുടെ പ്രഖ്യാപനവും ചടങ്ങിൽ നടത്തി. പുഴയ്ക്കൽ ബ്ലോക്ക് പഞ്ചായത്ത് പ്രസിഡന്‍റ് ലീല രാമകൃഷ്ണൻ മുഖ്യാതിഥിയായി. ജില്ലാ പഞ്ചായത്ത് അംഗങ്ങളായ ജിമ്മി ചൂണ്ടൽ, ലിനി, ഗ്രാമപഞ്ചായത്ത് പ്രസിഡന്‍റ് കെ.കെ. ഉഷ, വൈസ് പ്രസിഡന്‍റ് കെ.എം. ലെനിൻ, സ്റ്റാൻഡിംഗ് കമ്മിറ്റി അംഗങ്ങൾ പ്രസംഗിച്ചു.

രാഹുൽ ഗാന്ധിയുടെ സാന്നിധ്യം മതേതര ഇന്ത്യക്ക് അനിവാര്യം: ജോസഫ് ടാജറ്റ്

പുല്ലഴി: രാഹുൽ ഗാന്ധിയുടെ സാന്നിധ്യം മതേതര ഇന്ത്യക്ക് അനിവാര്യമാണെന്നു ഡിസിസി പ്രസിഡഡന്‍റ് അഡ്വ. ജോസഫ് ടാജറ്റ്. സംഘപരിവാർ ശക്തികളുടെ രാജ്യഭരണത്തിൽ ഭരണഘടനയും ഭരണഘടനാസ്ഥാപനങ്ങളും തകർക്കപ്പെടാതിരിക്കുന്നതിൽ രാജ്യത്തു വലിയ പങ്കുവഹിക്കുന്ന പ്രധാന വ്യക്തിത്വമാണ് രാഹുൽ ഗാന്ധി എന്നും അദ്ദേഹം പറഞ്ഞു. രാഹുൽഗാന്ധിയുടെ 55-ാം പിറന്നാൾ ആഘോഷത്തിന്‍റെ ഭാഗമായി ഡിസിസിയുടെ നേതൃത്വത്തിൽ പുല്ലഴി സെന്‍റ് ജോസഫ് ഓൾഡേജ് ഹോമിലെ അന്തേവാസികളോടൊപ്പം പിറന്നാൾമധുരം പങ്കുവച്ചുകൊണ്ടു നടന്ന സ്നേഹവിരുന്ന് ഉദ്ഘാടനംചെയ്തു സംസാരിക്കുകയായിരുന്നു അദ്ദേഹം. ഓൾഡേജ് ഹോം ഡയറക്ടർ ഫാ. ലിജോ ചിറ്റിലപ്പിള്ളി അധ്യക്ഷത വഹിച്ചു. നേതാക്കളായ എം.പി. വിൻസെന്‍റ്, ജോസ് വള്ളൂർ, ടി.വി. ചന്ദ്രമോഹൻ, ജോസഫ് ചാലിശേരി, സുനിൽ അന്തിക്കാട്, രാജേന്ദ്രൻ അരങ്ങത്ത്, എ. പ്രസാദ്, ഐ.പി. പോൾ, കെ.കെ. ബാബു തുടങ്ങിയവർ സന്നിഹിതരായി. ചടങ്ങിനു മുന്നോടിയായി ഡിസിസി ഓഫീസിൽ നേതാക്കളും പ്രവർത്തകരും പിറന്നാൾകേക്ക് മുറിച്ചു. ജില്ലയിലെ വിവിധ മണ്ഡലം കോണ്‍ഗ്രസ് കമ്മിറ്റികളുടെ നേതൃത്വത്തിൽ രാഹുൽ ഗാന്ധിയുടെ പിറന്നാളിനോടനുബന്ധിച്ച് വിവിധ സന്നദ്ധപ്രവർത്തനങ്ങളും ആഘോഷപരിപാടികളും സംഘടിപ്പിച്ചു.

കനാലിൽ നിറയെ ചണ്ടി, കുളവാഴ; എൻജിനീയറെ ഉപരോധിച്ചു

തൃശൂർ: ഇറിഗേഷൻ കനാലിൽ അടിഞ്ഞുകൂടിയിരിക്കുന്ന ചണ്ടി, കുളവാഴ എന്നിവ നീക്കംചെയ്യണമെന്നാവശ്യപ്പെട്ട് കോൾപ്പടവ് സഹകരണസംഘം ഭാരവാഹികളും കർഷകരും ചേർന്ന് ഇറിഗേഷൻ ഡിവിഷൻ എക്സിക്യൂട്ടീവ് എൻജിനീയറെ ഉപരോധിച്ചു. ചെന്പുക്കാവ് ഇറിഗേഷൻ ഓഫീസിനു മുന്പിൽ മൂന്നുമണിക്കൂർ നീണ്ട കുത്തിയിരിപ്പുസമരം പി. ബാലചന്ദ്രൻ എംഎൽഎയും ജില്ലാ കളക്ടർ അർജുൻ പാണ്ഡ്യനും ഇടപെട്ടതിനുപിന്നാലെ, വിഷയത്തിൽ ചർച്ച നടത്താമെന്ന ഉറപ്പിൽ പിൻവലിച്ചു. ഇന്നു രാവിലെ 11.30 നു സബ് കളക്ടറുടെ ചേംബറിൽ കോൾപ്പടവ് സഹകരണ സംഘം ഭാരവാഹികളും കർഷകരും ചർച്ചയിൽ പങ്കെടുക്കും. പി. ബാലചന്ദ്രൻ എംഎൽഎ കഴിഞ്ഞ ഏപ്രിലിൽ വിളിച്ചുചേർത്ത യോഗത്തിൽ ചണ്ടിയും കുളവാഴയും നീക്കി നീരൊഴുക്ക് സുഗമമാക്കണമെന്ന് ഇറിഗേഷൻ ഉദ്യോഗസ്ഥരോട് കർഷകർ ആവശ്യപ്പെട്ടിരുന്നു. മേയ് 10 നു തടസങ്ങൾ മാറ്റി വെള്ളം ഒഴുകുന്നതിനുള്ള സൗകര്യമുണ്ടാകണമെന്നായിരുന്നു കർഷകർ ആവശ്യപ്പെട്ടത്. എന്നാൽ ഉദ്യോഗസ്ഥർ നിസംഗത പാലിക്കുകയായിരുന്നു. പുല്ലഴി കോൾപ്പടവിലെ ചെറുപാലത്തിനുസമീപത്ത് അടിഞ്ഞുകൂടിയ ചണ്ടിയും കുളവാഴയും വെള്ളമൊഴുക്ക് തടസപ്പെടുത്തി. മഴ ശക്തമായതോടെ പ്രദേശമാകെ വെള്ളക്കെട്ടുഭീഷണിയിലാണ്. പെരിങ്ങാവ്, പുഴയ്ക്കൽ, അയ്യന്തോൾ, ഗാന്ധിനഗർ, കുറിഞ്ഞാക്കൽ എന്നിവിടങ്ങളും വെള്ളക്കെട്ടുഭീഷണിയിലാണ്. കുളവാഴ, ചണ്ടി എന്നിവ നീക്കംചെയ്യാനുള്ള ടെൻഡർ നടപടികൾക്ക് അനുമതിക്കായി തിരുവനന്തപുരത്തേക്ക് അപേക്ഷനൽകിയിട്ടുണ്ടെന്നാണ് ഇറിഗേഷൻ വകുപ്പ് ഉദ്യോഗസ്ഥരുടെ നിലപാട്. എന്നാൽ ടെൻഡർ നടപടികൾ പൂർത്തീകരിച്ച് കുളവാഴയും ചണ്ടിയും നീക്കംചെയ്യുന്പോഴേക്കും ഇനിയും ഒരുമാസം കഴിയുമെന്നു കർഷകർ പറഞ്ഞു. നടപടികൾ വേഗത്തിലാക്കാമെന്നും 15 ദിവസത്തെ സാവകാശം നൽകണമെന്നും ഇറിഗേഷൻ എക്സിക്യൂട്ടീവ് എൻജിനീയർ പറഞ്ഞെങ്കിലും നിലവിലെ സാഹചര്യം ചൂണ്ടിക്കാട്ടി കർഷകർ പ്രതിഷേധം കടുപ്പിച്ചു. ഇതോടെയാണ് എംഎൽഎയും കളക്ടറും ഇടപെട്ടത്. കോൾ കർഷകസംഘം പ്രതിനിധി കെ.കെ. കൊച്ചുമുഹമ്മദ്, കോൾപ്പടവ് പ്രസിഡന്‍റ് കൊളങ്ങാട്ട് ഗോപിനാഥൻ, ഡയറക്ടർമാരായ കെ. രാമദാസ്, കെ.പി. ആന്‍റണി, കെ.എൻ. രഘു, കെ.കെ. ജയൻ, സാവിത്രി ശങ്കരൻകുട്ടി, മണി ബാലൻ, സജിത മോഹൻദാസ് എന്നിവർ നേതൃത്വം നൽകി.

തൊഴിലുറപ്പുതൊഴിലാളികൾക്ക് സഹ. ബാങ്കിന്‍റെ ജപ്തിനോട്ടീസ്

എരുമപ്പെട്ടി: ഗ്രാമപഞ്ചായത്തിലെ 19 തൊഴിലുറപ്പ് തൊഴിലാളികൾക്ക് എരുമപ്പെട്ടി പഞ്ചായത്ത് സഹകരണ ബാങ്കിന്‍റെ ജപ്തി നോട്ടീസ്. സൗജന്യമാണെന്ന് വാഗ്ദാനംചെയ്ത് പഞ്ചായത്ത് ആട്ടിൻകൂടും പശുതൊഴുത്തും നിർമിച്ചുനൽകിയ തൊഴിലാളികൾക്കാണ് ജപ്തി ഭീഷണിയുള്ളത്. തൊഴിലാളികളുടെ പേരിൽ സിപിഎം ഭരണസമിതി തട്ടിപ്പുനടത്തിയെന്നാരോപിച്ച് കോൺഗ്രസ് രംഗത്തെത്തിയിരിക്കുകയാണ്. 2021- 22 സാമ്പത്തികവർഷത്തിലാണ് എരുമപ്പെട്ടി പഞ്ചായത്ത് പ്രസിഡന്‍റ് എസ്. ബസന്ത്‌ ലാൽ പഞ്ചായത്തിലെ കർഷകരായിട്ടുള്ള തൊഴിലുറപ്പ് തൊഴിലാളികൾക്ക് കാലിത്തൊഴുത്ത്, ആട്ടിൻകൂട്, കോഴിക്കൂട് എന്നിവ തൊഴിലുറപ്പ് പദ്ധതിയിലൂടെ സൗജന്യമായി പണിതുനൽകാമെന്ന് അറിയിച്ച് അപേക്ഷ ക്ഷണിച്ചത്. ആദ്യഘട്ടത്തിൽ 19 ഗുണഭോക്താക്കളെ തെരഞ്ഞെടുത്തു. എടക്കര അഗ്രോ പ്രൊഡ്യൂസർ കമ്പനിയ്ക്ക് വെണ്ടറായി ചുമതലനൽകി. പിന്നീട് ഗുണഭോക്താക്കളെ വിളിച്ച് ഒരുലക്ഷം മുതൽ 1.60 ലക്ഷം രൂപ വരെ ഇവരുടെ പേരിൽ സിപിഎമ്മിന്‍റെ നേതൃത്വത്തിലുള്ള എരുമപ്പെട്ടി പഞ്ചായത്ത് സർവീസ് സഹകരണ ബാങ്കിൽനിന്നു ലോൺ എടുപ്പിച്ചു. ഈ തുക പഞ്ചായത്ത് പ്രസിഡന്‍റിന്‍റെ സാന്നിധ്യത്തിൽ എടക്കര സൊസൈറ്റിക്ക് കൈമാറുകയുംചെയ്തു. ഈ പണം പഞ്ചായത്ത് തിരിച്ചടയ്ക്കുമെന്നാണ് പ്രസിഡന്‍റ് ഗുണഭോക്താക്കളെ അറിയിച്ചിരുന്നത്. എന്നാൽ പണം ലഭിക്കാൻ കാലതാമസം നേരിട്ടപ്പോൾ പലപ്രാവശ്യം ഈ വിഷയം ഗ്രാമസഭയിൽ ഉൾപ്പെടെ ഗുണഭോക്താക്കൾ ഉന്നയിച്ചിരുന്നു. ബാങ്കിൽനിന്ന് യാതൊരുവിധ ബാധ്യതയും ഗുണഭോക്താക്കൾക്ക് വരില്ലെന്നും തുക പഞ്ചായത്ത് ഏറ്റെടുക്കുമെന്നും പഞ്ചായത്ത് പ്രസിഡന്‍റ് അറിയിച്ചു. എന്നാൽ മൂന്നു വർഷമായിട്ടും ബാങ്കിന് പണംനൽകാൻ പഞ്ചായത്ത് തയാറായില്ല. ഈ സാഹചര്യത്തിലാണ് തൊഴിലാളികളായ ഗുണഭോക്താക്കൾക്ക് ജപ്തി നോട്ടീസ് വന്നിരിക്കുന്നത്. പഞ്ചായത്ത് പ്രസിഡന്‍റിനോട് വിവരം പറഞ്ഞപ്പോൾ തനിക്കറിയില്ലെന്നും ഉദ്യോഗസ്ഥരുടെ വീഴ്‌ചയാണെന്നുമാണ് പ്രസിഡന്‍റ് പറയുന്നത്. പ്രസിഡന്‍റ് ഉദ്ഘാടനംനടത്തിയ പദ്ധതിയെക്കുറിച്ച് അറിയില്ലെന്ന് പറയുന്നത് വഞ്ചനയാണെന്നും പാവപ്പെട്ട തൊഴിലാളികളെ ബലിയാടാക്കി വൻ തട്ടിപ്പാണ് പദ്ധതിയുടെ പേരിൽ നടത്തിയിട്ടുള്ളതെന്ന് കോൺഗ്രസ് ആരോപിക്കുന്നു. പാവപ്പെട്ട കുടുംബങ്ങളെ ജപ്തിയിലേയ്ക്ക് തള്ളിവിട്ട പഞ്ചായത്ത് ഭരണസമിതി ഉടൻ ഇതിന് പരിഹാരംകാണണമെന്നും അല്ലാത്തപക്ഷം ഇവർക്ക് നീതിലഭിക്കുന്നതിനുവേണ്ടി ശക്തമായ സമര പരിപാടികളും നിയമനടപടിയുമായി മുന്നോട്ടുപോകുമെന്നും കോൺഗ്രസ് മണ്ഡലം കോൺഗ്രസ് കമ്മിറ്റി അറിയിച്ചു. മണ്ഡലം പ്രസിഡന്‍റ് എം.എം നിഷാദ്, ബ്ലോക്ക് നേതാക്കളായ എൻ.കെ. കബീർ, പി.എസ്. സുനീഷ്, പഞ്ചായത്ത് മെമ്പർമാരായ എം.സി. ഐജു, റിജി ജോർജ് എന്നിവരോടൊപ്പം എത്തിയ ഗുണഭോക്താക്കൾ പഞ്ചായത്തിൽ പരാതിനൽകി.

ഡിജിറ്റല്‍ റവന്യൂ കാര്‍ഡ് നവംബറില്‍ പുറത്തിറക്കും: മന്ത്രി കെ. രാജന്‍

പറപ്പൂക്കര: ഡിജിറ്റല്‍ റവന്യുകാര്‍ഡ് നവംബര്‍ മാസത്തില്‍ പുറത്തിറക്കുമെന്ന് മന്ത്രി കെ. രാജന്‍ അറിയിച്ചു. തൊട്ടിപ്പാള്‍ സ്മാര്‍ട്ട് വില്ലേജ് ഓഫീസിന്‍റെ ഉദ്ഘാടനം നിര്‍വഹിക്കുകയായിരുന്നു അദ്ദേഹം. കേരളത്തില്‍ ഡിജിറ്റല്‍ റീസര്‍വെ കഴിഞ്ഞ വില്ലേജുകളില്‍നിന്നാണ് കാര്‍ഡ് നല്‍കുന്നതിനുള്ള നടപടികള്‍ ആരംഭിക്കുന്നത്. ഒരു വില്ലേജ് ഓഫീസില്‍നിന്ന് ലഭിക്കേണ്ട ഭൂമി, കെട്ടിടം, ബാധ്യത സംബന്ധമായ സേവനങ്ങളെല്ലാം എടിഎം കാര്‍ഡ് രൂപത്തില്‍, പത്തക്ക ഡിജിറ്റല്‍ നമ്പറുള്ള കാര്‍ഡിലൂടെ അറിയാന്‍ കഴിയുമെന്നും മന്ത്രി പറഞ്ഞു. സംസ്ഥാന സര്‍ക്കാരിന്‍റെ പ്ലാന്‍ഫണ്ടിൽ ഉള്‍പ്പെടുത്തി 44 ലക്ഷം രൂപ വിനിയോഗിച്ചാണ് തൊട്ടിപ്പാള്‍ സ്മാര്‍ട്ട് വില്ലേജ് ഓഫീസ് കെട്ടിടത്തിന്‍റെ നിര്‍മാണം പൂര്‍ത്തിയാക്കിയത്. ചടങ്ങില്‍ കെ.കെ. രാമചന്ദ്രന്‍ എംഎല്‍എ അധ്യക്ഷതവഹിച്ചു. ജില്ലാ പഞ്ചായത്ത് പ്രസിഡന്‍റ് വി.എസ്. പ്രിന്‍സ്, ജില്ലാ കളക്ടര്‍ അര്‍ജുന്‍ പാണ്ഡ്യന്‍, ഇരിങ്ങാലക്കുട ബ്ലോക്ക് പഞ്ചായത്ത് പ്രസിഡന്‍റ് ലളിതാ ബാലന്‍, പറപ്പൂക്കര ഗ്രാമപഞ്ചായത്ത് പ്രസിഡന്‍റ് ഇ.കെ. അനൂപ്, നിര്‍മിതികേന്ദ്രം റീജണല്‍ എന്‍ജിനീയര്‍ സതീദേവി, പറപ്പൂക്കര ഗ്രാമപഞ്ചായത്ത് വൈസ് പ്രസിഡന്‍റ് ബീന സുരേന്ദ്രന്‍, ബ്ലോക്ക് പഞ്ചായത്ത് സ്ഥിരംസമിതി അധ്യക്ഷന്മാരായ പി.ടി. കിഷോര്‍, റീന ഫ്രാന്‍സിസ്, പഞ്ചായത്തംഗങ്ങളായ ദിനേശ് വെള്ളപ്പാടി, ഷീബ സുരേന്ദ്രന്‍, ഐശ്വര്യ അനീഷ്, അഡീഷണല്‍ ജില്ലാ മജിസ്‌ട്രേറ്റ് ടി. മുരളി, മുകുന്ദപുരം തഹസില്‍ദാര്‍ കെ.എം. സമീഷ് എന്നിവർ സംസാരിച്ചു. എരുമപ്പെട്ടി: കോട്ടപ്പുറം - ചിറ്റണ്ട ഗ്രൂപ്പ് വില്ലേജി സ്മാർട്ട് വില്ലേജ് ഓഫീസ് കെട്ടിടം നിർമാണ ഉദ്ഘാടനം മന്ത്രി കെ. രാജൻ നിർവഹിച്ചു. കുണ്ടന്നൂർ ഏദൻ വെഡിംഗ് സെന്‍ററിൽനടന്ന ചടങ്ങിൽ മന്ത്രി കെ. രാജൻ ഓൺലൈനായി നിർവഹിച്ചു. എ.സി. മൊയ്തീൻ എംഎൽഎ അധ്യക്ഷതവഹിച്ചു. പഞ്ചായത്ത് പ്രസിഡന്‍റ് എസ്. ബസന്ത് ലാൽ, ജില്ലാപഞ്ചായത്തംഗം ജലീൽ ആദൂർ, തലപ്പിള്ളി തഹസിൽദാർ എം.ആർ. രാജേഷ്, കുണ്ടന്നൂർ കർമല മാതാ പള്ളി വികാരി സെബി കവലക്കാട്, വടക്കാഞ്ചേരി ബ്ലോക്ക് പഞ്ചായത്ത് സ്റ്റാൻഡിംഗ് കമ്മിറ്റി ചെയർപേഴ്സൺ പുഷ്പ രാധാകൃഷ്ണൻ, പഞ്ചായത്ത് സ്റ്റാൻഡിംഗ് കമ്മിറ്റി ചെയർപേഴ്സൺമാരായ സുമന സുഗതൻ, ഷീജ സുരേഷ്, അംഗങ്ങളായ പി.എം. സജി, ഇ.എസ്. സുരേഷ്, കെ.ബി. ബബിത, എൽ.ആർ. ഡെപ്യൂട്ടി കളക്ടർ എം.സി. ജ്യോതി, എം.എസ്. സിദ്ധൻ എന്നിവർ സംസാരിച്ചു. പുന്നംപറമ്പ്: സംസ്ഥാനത്തെ മുഴുവൻ വില്ലേജ് ഓഫീസുകളും സ്മാർട്ടാക്കുമെന്ന് മന്ത്രി കെ. രാജൻ. തലപ്പിള്ളി താലൂക്കിലെ തെക്കുംകര പഞ്ചായത്തിലെ തെക്കുംകര - മണലിത്തറ ഗ്രൂപ്പ് വില്ലേജിന്‍റെ കെട്ടിട നിർമാണോദ്ഘാടനം ഓൺലൈനിൽ നിർവഹിക്കുകയായിരുന്നു മന്ത്രി. സേവ്യർ ചിറ്റിലപ്പിള്ളി എംഎൽഎ അധ്യക്ഷതവഹിച്ചു. ഡെ. കളക്ടർ എം.സി. ജ്യോതി, പഞ്ചായത്ത് പ്രസിഡന്‍റ് ടി.വി. സുനിൽകുമാർ, പഞ്ചായത്ത് വൈസ് പ്രസിഡന്‍റ് ഇ. ഉമാലക്ഷ്മി, ബ്ലോക്ക് പഞ്ചായത്ത് സ്ഥിരംസമിതി അധ്യക്ഷ എം.കെ. ശ്രീജ, പഞ്ചായത്ത് സ്ഥിരംസമിതി അധ്യക്ഷൻമാരായ പി. ആർ. രാധാകൃഷ്ണൻ, സബിത സതീഷ്, വി.സി. സജീന്ദ്രൻ, ബ്ലോക്ക് പഞ്ചായത്ത് മെമ്പർ ബിജു കൃഷ്ണൻ തുടങ്ങിയവർ പ്രസംഗിച്ചു.

മൃതദേഹം തിരിച്ചറിഞ്ഞു

കൊടുങ്ങല്ലൂർ: കഴിഞ്ഞദിവസം അഴീക്കോട് പുഴയിൽ കണ്ടെത്തിയ അജ്ഞാത യുവാവിന്‍റെ മൃതദേഹം തിരിച്ചറിഞ്ഞു. കൊടകര ചുങ്കാലിൽ നിന്നു കഴിഞ്ഞ 17 മുതൽ കാണാതായ റിട്ട. കെഎസ്ഇബി ഉദ്യോഗസ്ഥൻ തുമ്പരത്തി പ്രകാശന്‍റെയും, വരന്തരപ്പിള്ളി പോലീസ്‌സ്റ്റേഷനിലെ സിപിഒ പ്രസീതയുടെയുടെയും മകനായ ആയുഷ് (25)ആണ് മരിച്ചത്. കളമശേരി ലോ കോളജിലെ മൂന്നാം വർഷ വിദ്യാർഥിയായിരുന്നു. അഴീക്കോട് മുനമ്പം പാലത്തിന്‍റെ ആറാംതൂണിനു സമീപം വ്യാഴാഴ്ച ഉച്ചയോടെ പാലം നിർമാണ തൊഴിലാളികളാണ് മുതദേഹം കണ്ടെത്തിയത്. വിവരം അറിയിച്ചതിനെതുടർന്ന് കൊടുങ്ങല്ലൂർ പോലീസ് എത്തി നടപടികൾ പൂർത്തിയാക്കി മൃതദേഹം പോസ്റ്റ്മോർട്ടത്തിനായി തൃശൂർ മെഡിക്കൽ കോളജിലേയ്ക്ക് മാറ്റി. ആത്മജ് സഹോദരനാണ്.

വാഹനാപകടത്തില്‍ പരിക്കേറ്റ ശാന്തിക്കാരന്‍ മരിച്ചു

കയ്പമംഗലം: രണ്ട് വര്‍ഷങ്ങൾക്കു മുമ്പ് കയ്പമംഗലം വഴിയമ്പലത്തുണ്ടായ വാഹനാപകടത്തില്‍ പരിക്കേറ്റ് ചികിത്സയിലായിരുന്ന ശാന്തിക്കാരന്‍ മരിച്ചു. കയ്പമംഗലം കാരാപ്പുള്ളി ക്ഷേത്രത്തിനടുത്ത് ഈരേക്കാട്ട് രാജീവ് (50) ആണ് മരിച്ചത്. 2023 മാര്‍ച്ച് 30 നായിരുന്നു അപകടമുണ്ടായത്. വഴിയമ്പലത്ത് ബസ് സ്റ്റോപ്പില്‍ നില്‍ക്കുകയായിരുന്ന ഇദ്ദേഹത്തെ നിയന്ത്രണം വിട്ടെത്തിയ പിക്കപ്പ് വാന്‍ ഇടിക്കുകയായിരുന്നു. മുന്നില്‍ പോയിരുന്ന കാറിലിടിച്ച് നിയന്ത്രണം തെറ്റിയ പിക്കപ്പ് വാന്‍ 25 മീറ്ററോളം അകലേയ്ക്ക് തെറിച്ച് രാജീവ് ശാന്തിയുടെ ദേഹത്തും ബസ് സ്റ്റോപ്പിലും ഇടിച്ച് മറിയുകയായിരുന്നു. ഗുരുതരമായി പരിക്കേറ്റ ഇദ്ദേഹം ചികിത്സയിലും കിടപ്പിലുമായിരുന്നു. ഇന്നലെ വൈകീട്ട് ഏഴരയോടെയായിരുന്നു മരണം. സംസ്കാരം പിന്നീട്. അച്ഛൻ: നടീപറമ്പത്ത് ചന്ദ്രശേഖരൻ. അമ്മ: ഈരേക്കാട്ട് തങ്കം. ഭാര്യ: പ്രിയലക്ഷ്മി. മക്കൾ: മധുരിമ, ശബരിനാഥ്‌, പരേതനായ രുദ്രനാഥ്.

കനാലിൽ കാണാതായ യുവാവിന്‍റെ മൃതദേഹം കണ്ടെത്തി

ഇരിങ്ങാലക്കുട: എടതിരിഞ്ഞി - കാട്ടൂര്‍ റോഡില്‍ കോതറ പാലത്തിന് അടുത്തുള്ള കെഎല്‍ഡിസി കനാലില്‍ കുളിക്കാന്‍ ഇറങ്ങിയതിനെ തുടര്‍ന്ന് കാണാതായ യുവാവിന്‍റെ മൃതദേഹം കണ്ടെത്തി. ചളിങ്ങാട് തോട്ടുപറമ്പത്ത് കരീമിന്‍റെ മകന്‍ ഷാനവാസ് (23) ആണ് മരിച്ചത്. സംസ്‌കാരം ചളിങ്ങാട് ജുമ മസ്ജിദില്‍ നടത്തി. ബുധനാഴ്ച വൈകീട്ട് നാലരയോടെ ആയിരുന്നു അപകടം നടന്നത്. സുഹൃത്തും കൂരിക്കുഴി സ്വദേശിയുമായ മജീദിനൊപ്പം കനാലില്‍ കുളിക്കാന്‍ ഇറങ്ങിയതായിരുന്നു. തുടര്‍ന്ന് ഫയര്‍ ഫോഴ്‌സ്, കാട്ടൂര്‍ പോലീസ് , സ്‌കൂബാ സംഘം എന്നിവരുടെയും നാട്ടുകാരുടെയും നേതൃത്വത്തില്‍ തിരച്ചില്‍ നടത്തി വരികയായിരുന്നു. കാണാതായ സ്ഥലത്തു നിന്നും മൂന്ന് കിലോമീറ്ററോളം ദൂരെ പെരിഞ്ഞനം പൊന്‍മാനിക്കുടം ഭാഗത്ത് കനോലി കനാലില്‍ തടഞ്ഞ് നില്‍ക്കുന്ന നിലയിലാണ് മൃതദേഹം കണ്ടെത്തിയിരിക്കുന്നത്. മാതാവ്: മുംതാസ്. സഹോദരന്‍: ഷഹബാസ് (ഗള്‍ഫ്).

ഉച്ചഭക്ഷണ മെനു കൊള്ളാം, ആവശ്യത്തിനു തുക അനുവദിക്കണം

തൃശൂർ: വിദ്യാഭ്യാസമന്ത്രി പ്രഖ്യാപിച്ച സ്കൂൾകുട്ടികൾക്കുള്ള പുതുക്കിയ ഉച്ചഭക്ഷണ മെനു അനുസരിച്ചു ഭക്ഷണം നൽകാൻ പുതുക്കിയ ഫണ്ട് ആവശ്യമാണെന്നു കെപിഎസ്ടിഎ. പുതുക്കിയ മെനു കുട്ടികൾക്കു നൽകേണ്ടതാണെന്നും തീരുമാനം സ്വാഗതംചെയ്യുന്നതായും വ്യക്തമാക്കി. പുതുക്കിയ മെനു അനുസരിച്ചു ഭക്ഷണം നല്കാൻ നിലവിൽ ലോവർ പ്രൈമറിക്ക് 6.78 രൂപയാണ് അനുവദിച്ചിട്ടുള്ളത്. ഈ തുകവച്ച് എങ്ങനെയാണ് ഇത്രയും വിശാലമായ ഉച്ചഭക്ഷണം നൽകുന്നത്. നിലവിൽ അനുവദിച്ചിട്ടുള്ള തുകപോലും മാസങ്ങളോളം കുടിശികയാവുകയും കേസ് ഹൈക്കോടതി പരിഗണിക്കുന്ന മുറയ്ക്കുമാത്രം മൂന്നും നാലും മാസത്തെ കുടിശിക അനുവദിക്കുകയും ചെയ്യുന്ന സർക്കാർ, കുട്ടികളോട് ആത്മാർഥതയുണ്ടെങ്കിൽ ഉച്ചഭക്ഷണത്തുക വർധിപ്പിക്കണം. ഉച്ചഭക്ഷണവിതരണത്തിനുവേണ്ടി പ്രഥമാധ്യാപകർ പണം പിരിക്കാൻ ഇറങ്ങണമെന്ന മന്ത്രിയുടെ പ്രസ്താവന അംഗീകരിക്കാനാകില്ല. പുതുക്കിയ വിഭവങ്ങൾ പാചകംചെയ്തു നല്കാൻ നൂറു കുട്ടികൾക്കു മുകളിൽ രണ്ടു പാചകത്തൊഴിലാളികളെ അനുവദിക്കാൻ സർക്കാർ തയാറാകണം. ചെലവിനുള്ള തുക മുൻകൂറായി അനുവദിക്കണമെന്നും കെപിഎസ്ടിഎ യോഗം ആവശ്യപ്പെട്ടു. ജില്ല പ്രസിഡന്‍റ് പി.സി. ശ്രീപദ്മനാഭൻ അധ്യക്ഷത വഹിച്ചു. സെക്രട്ടറി ജയപ്രകാശ് പാറപ്പുറത്ത്, സി.എ. മുഹമ്മദ് റാഫി, സാജു ജോർജ്, ടി.യു. ജയ്സൺ, റെയ്ജു പോൾ തുടങ്ങിയവർ പ്രസംഗിച്ചു.

ഉദ്ഘാടനംകഴിഞ്ഞിട്ട് മാസങ്ങൾമാത്രം; മലയോര ഹൈവേയിൽ കുഴി

പട്ടിക്കാട്: ഉദ്ഘാടനംകഴിഞ്ഞ് അധികം വൈകാതെതന്നെ മലയോരഹൈവേയിൽ കുഴി രൂപപ്പെട്ടു. പീച്ചി ഡാം റോഡിൽ ആൽപ്പാറ ഐപിസി ഹെബ്രോൺ ഹാൾ കാമ്പസിനു സമീപമാണ് റോഡിന്‍റെ പ്രതലം അടർന്നുപോയി കുഴി ഉണ്ടായിരിക്കുന്നത്. മലയോര ഹൈവേയിൽ പലയിടത്തും മഴവെള്ളം കെട്ടിക്കിടക്കുകയാണ്. കാനകൾ ഉണ്ടെങ്കിലും റോഡിൽ എത്തുന്ന മഴവെള്ളം കാനകളിലേക്ക് എത്തുന്നില്ല. ഭൂമിയുടെ കിടപ്പും റോഡിന്‍റെ ചരിവും അനുസരിച്ചു കാനകൾ നിർമിക്കാത്തതാണ് ഇതിനു കാരണം. റോഡിനെക്കാൾ ഉയർന്നുനിൽക്കുന്ന പ്രദേശത്തുനിന്നും എത്തുന്ന മഴവെള്ളം റോഡിലേക്കാണ് ഒഴുകിയെത്തുന്നത്. മുമ്പ് ഇങ്ങനെ എത്തുന്ന മഴവെള്ളം റോഡരികിലെ കാനയിലൂടെ ഒഴുകിപ്പോവുമായിരുന്നു. എന്നാൽ പുതിയതായി നിർമിച്ച കാനയിലേക്കു വെള്ളം ഒഴുകിപ്പോകാൻ മാർഗമില്ല. പലയിടത്തും കാനകൾക്കു തുടർച്ചയില്ലാത്തതും പ്രശ്നമാണ്. വെള്ളം റോഡിൽ കെട്ടിക്കിടക്കുന്ന സ്ഥിതി ഉണ്ടായാൽ റോഡ് പലയിടത്തും തകരാൻ സാധ്യതയുണ്ട്.

ഒന്പത് ആടുകളെ കാണാതായ വിഷമത്തിൽ ദമ്പതികൾ

വടക്കാഞ്ചേരി: ഏകഉപജീവനമാർഗമായ ഒന്പത് ആടുകളെ കാണാതായതിന്‍റെ മനോവിഷമത്തിൽ വൃദ്ധദമ്പതികളായ തിരാണിയും രാധയും. തിങ്കളാഴ്ച ആടുകളെ കൊറ്റംകോട് വനമേഖലയിൽ തുറന്നുവിട്ടതാണ്. മഴപെയ്തപ്പോൾ കുട എടുക്കാനായി പോയി തിരിച്ചെത്തിയപ്പോഴേക്കും ആടുകളെ കാണാതായി. വന്യജീവികൾ ആക്രമിച്ചുകൊലപ്പെടുത്തിയോ ആരെങ്കിലും പിടിച്ചുകൊണ്ടുപോയോ എന്നീ സംശയങ്ങൾ ഉയരുന്നുണ്ട്. വടക്കാഞ്ചേരി പോലീസിൽ പരാതി നൽകിയിട്ടുണ്ട്. തെക്കുംകര പഞ്ചായത്തിലെ ഊരോക്കാട് കൊറ്റംകോട് സ്വദേശികളായ വെള്ളിത്തിര തിരാണി (75), ഭാര്യ രാധ (70) എന്നിവരാണ് ഈ ഹതഭാഗ്യർ. കൂലിപ്പണി ചെയ്ത് മൂന്നുമക്കളിൽ രണ്ടു പെൺമക്കളെ വിവാഹം ചെയ്തയച്ചു. മകൻ വിവാഹത്തിനുശേഷം ഇവർക്കൊപ്പമല്ല താമസം. ആടുകളുടെ പാലും കാഷ്ഠവുമാണ് ഇവരുടെ ഏക വരുമാനമാർഗം. ആടുകളെ കാണാനില്ലാത്തതിന്‍റെ മനോവിഷമത്തിൽ ഭക്ഷണം പോലും കഴിക്കാതെയിരിക്കുകയാണ് ഈ വൃദ്ധദമ്പതികൾ.

പീച്ചി ഡാം ഇന്നു തുറക്കും

തൃശൂർ: ഇന്നു രാവിലെ ഒന്പതോടെ പീച്ചി ഡാം തുറക്കുമെന്നും മണലി, കരുവന്നൂര്‍ പുഴകളില്‍ ജലനിരപ്പ് പരമാവധി 20 സെന്‍റീമീറ്റര്‍ ഉയരാന്‍ സാധ്യതയുള്ളതിനാൽ ഇരുകരയിലുമുള്ളവർ ജാഗ്രത പുലര്‍ത്തണമെന്നും ജില്ലാ ദുരന്തനിവാരണ അഥോറിറ്റി ചെയര്‍മാൻകൂടിയായ ജില്ലാ കളക്ടര്‍ അര്‍ജുന്‍ പാണ്ഡ്യന്‍ അറിയിച്ചു. പുഴയില്‍ ഇറങ്ങുന്നതിനും കുളിക്കുന്നതിനും വസ്ത്രങ്ങള്‍ അലക്കുന്നതിനും ഫോട്ടോ എടുക്കുന്നതിനും മത്സ്യബന്ധനത്തിനും നിയന്ത്രണം ഏര്‍പ്പെടുത്തി. അപകടസാഹചര്യം നേരിടാൻ ജില്ലാ ഫയര്‍ ഓഫീസര്‍ തയാറെടപ്പുകൾ സ്വീകരിക്കണമെന്നു നിർദേശിച്ചു. ഡാമിലെ ജലനിരപ്പിന്‍റെ തോത് ഓരോ മണിക്കൂര്‍ ഇടവേളകളിലും ജില്ലാ അടിയന്തരഘട്ട കാര്യനിര്‍വഹണകേന്ദ്രത്തില്‍ എക്സിക്യൂട്ടീവ് എൻജിനീയര്‍ ഇറിഗേഷന്‍ ഡിവിഷന്‍ റിപ്പോര്‍ട്ട് ചെയ്യണമെന്നും ഉത്തരവില്‍ പറഞ്ഞു.

മുടിക്കോട് സർവീസ് റോഡിന്‍റെ ‌വീതി കൂട്ടുന്നു

പട്ടിക്കാട്: ദേശീയപാതയിൽ മുടിക്കോട് ക്ഷേത്രത്തിനുമുന്നിലായി സർവീസ് റോഡ് വീതികൂട്ടുന്നതിനുള്ള പണികൾ ആരംഭിച്ചതായി മന്ത്രി കെ. രാജൻ അറിയിച്ചു. അടിപ്പാതയ്ക്കുവേണ്ടിയെടുത്ത കുഴിയിൽ മണ്ണിട്ടുനികത്തി രണ്ടു വാഹനങ്ങൾക്കു കടന്നുപോകാനുള്ള സൗകര്യമാണ് ഒരുക്കുന്നത്. മണ്ണിട്ടുനികത്തുന്ന പണികൾ പുരോഗമിക്കുകയാണ്. തുടർന്നു ടാർ വേസ്റ്റ് ഉപയോഗിച്ച് ഉറപ്പിച്ചശേഷം വാഹനങ്ങൾ കടത്തിവിടും. കൂടാതെ സർവീസ് റോഡരികിൽ സ്ഥിതിചെയ്യുന്ന രണ്ട് ഇലക്ട്രിക് പോസ്റ്റുകൾ മാറ്റുന്ന നടപടികളും ഉടൻ ആരംഭിക്കും. രണ്ടുദിവസം മഴ ഒഴിഞ്ഞുനിന്നാലുടൻ ഡ്രം മിക്‌സ് ഉപയോഗിച്ചു മുഴുവനായി ഓവർലേ ചെയ്യുന്നതിനുള്ള നടപടി സ്വീകരിക്കുമെന്നും മന്ത്രി അറിയിച്ചു. ഗതാഗതം നിരോധിച്ചു തൃശൂർ: മഴ ശക്തമായതിനെതുടർന്ന് കുറ്റൂർ- ചാമക്കാട് റോഡിൽ വിൽവെക്സ് കമ്പനി മുതൽ ചാമക്കാട് പാടം അവസാനിക്കുന്നതുവരെ വാഹനഗതാഗതം നിരോധിച്ചതായി പിഡബ്ല്യുഡി റോഡ്സ് സെക്‌ഷനിലെ അസിസ്റ്റന്‍റ് എൻജിനീയർ അറിയിച്ചു. പാടത്തെ വെള്ളം റോഡിലേക്ക് ഒഴുകുന്നതിനെത്തുടർന്ന് അപകടസാധ്യതയുണ്ടെന്നു സ്ഥലം സന്ദർശിച്ചപ്പോൾ ബോധ്യപ്പെട്ടതിനാലാണ് തീരുമാനമെന്നും വ്യക്തമാക്കി. ലോറി താഴ്ന്നു; കല്ലിടുക്കിൽ വൻ കുരുക്ക് പട്ടിക്കാട്: ദേശീയപാത കല്ലിടുക്കിൽ വൻ ഗതാഗതക്കുരുക്ക്. സർവീസ് റോഡിൽ കണ്ടെയ്‌നർ ലോറി താഴ്ന്നതോടെയാണ് ഗതാഗതക്കുരക്ക് രൂക്ഷമായത്. തൃശൂർ ഭാഗത്തേക്കുള്ള നിരവധി വാഹനങ്ങളാണ് ദേശീയപാതയിൽ കുടങ്ങിക്കിടക്കുന്നത്. കല്ലിടുക്ക് മുതൽ ആരംഭിച്ച കുരുക്ക് ചുവന്നമണ്ണ് വരെ നീണ്ടു. രാവിലെ ജോലിക്ക് പോകുന്ന നിരവധി ജീവനക്കാരാണ് റോഡിൽ കുടുങ്ങിക്കിടന്നത്. ദേശീയപാതയിലെ ഗതാഗതക്കുരുക്കിന് പരിഹാരം കാണാൻ മന്ത്രി കെ. രാജന്‍റെ നേതൃത്വത്തിൽ ഉന്നതതല സംഘം സ്ഥലം സന്ദർശിച്ചിരുന്നു. എന്നിട്ടും വേണ്ട പരിഹാരം കാണാൻ അധികൃതർക്ക് സാധിച്ചിട്ടില്ല. സർവീസ് റോഡിൽ കുടുങ്ങിക്കിടക്കുന്ന വാഹനങ്ങൾ അടിയന്തരമായി നീക്കം ചെയ്യാൻ വേണ്ട സംവിധാനങ്ങൾ ഇല്ലാത്തതാണ് പ്രധാന വിഷയം. നിലവിൽ ജെസിബി ഉപയോഗിച്ചാണ് വാഹനങ്ങൾ തള്ളിമാറ്റിയിടുന്നത്. അതിനു പകരം അടിപ്പാത നിർമാണം നടക്കുന്ന സ്ഥലങ്ങളിൽ ക്രെയിൻ സർവീസുകൾ ലഭ്യമാക്കണമെന്നാണ് നാട്ടുകാരുടെ അഭിപ്രായം. മാത്രമല്ല സർവീസ് റോഡ് സഞ്ചാരയോഗ്യമാക്കുകയും വേണം.

യാത്ര പുറപ്പെടാം, മണിക്കൂറുകൾക്കുമുൻപേ

തൃശൂർ: നിങ്ങളിതുവരെ പുറപ്പെട്ടില്ലേ എന്നു മാന്നാർ മത്തായി സ്പീക്കിംഗ് സിനിമയിൽ ഇന്നസെന്‍റിനോടു ചോദിക്കുന്പോൾ ഒരു മണിക്കൂർമുൻപേ പുറപ്പെടണോ, പുറപ്പെട്ടു എന്നു മറുപടി പറയുന്നുണ്ട്. തൃശൂരിൽനിന്ന് പുഴയ്ക്കൽവഴി ഗുരുവായൂർ ഭാഗത്തേക്കോ തിരിച്ചോ വരുന്നവർ ഈ ഡയലോഗ് മനസിലോർത്തുകൊണ്ട് ഒന്നല്ല , രണ്ടു മണിക്കൂർ മുൻപേ പുറപ്പെടുക. കാരണം, അയ്യന്തോൾവഴി വളഞ്ഞ് അവിടത്തെ കുരുക്കെല്ലാം മറികടന്ന് പുഴയ്ക്കലിലെ തീരാക്കുരുക്കിനുള്ളിലൂടെ നിന്നും ഇഴഞ്ഞും കുത്തിക്കയറ്റിയും മറ്റു വണ്ടികളിലുള്ളവരുടെ തെറിവിളികേട്ടും പോലീസിന്‍റെ നിർദേശം‌കേട്ടും ഗട്ടറുകളിൽനിന്ന് ഗട്ടറുകളിലേക്കു ചാഞ്ചാടിയും മുതുവറയിലെത്തുന്പോൾ ഒരിഞ്ചുപോലും മുന്നോട്ടുപോകാതെ നിശ്ചലം മണിക്കൂറുകൾ നീണ്ടുനിവർന്നു കിടന്നും മുതുവറ താണ്ടുന്പോഴേക്കും സമയം ഒരുപാടു കഴിഞ്ഞിട്ടുണ്ടാകും. മാസങ്ങളായി ഇതുവഴി കടന്നുപോകുന്ന വാഹനയാത്രക്കാർ ദുരിതം അനുഭവിച്ചുകൊണ്ടിരിക്കുകയാണ്. ഗുരുവായൂരിൽ വിവാഹം നടത്തണമെന്ന നേർച്ചയും ആഗ്രഹവും നിറവേറ്റാൻ പുഴയ്ക്കൽവഴി ഗുരുവായൂരിലേക്കു പോവുകയാണെങ്കിൽ തലേദിവസംതന്നെ പോവുക. കൃത്യസമയത്തു യാത്ര പുറപ്പെട്ടാൽ താലികെട്ടിനു സമയത്തെത്താൻ കഴിയില്ല. സിനിമ കാണാനായാലും നെടുന്പാശേരി വിമാനത്താവളത്തിലേക്കായാലും മണിക്കൂറുകൾക്കു മുന്പുതന്നെ പുറപ്പെടണം. റോഡ് നവീകരണവും തകർന്നുതരിപ്പണമായ റോഡുമെല്ലാം ചേർന്നാണ് ഈ മേഖലയിൽ ഗതാഗതക്കുരുക്ക് രൂക്ഷമാക്കുന്നത്. പരിഹാരം കണ്ടെത്താൻ ഇതുവരെയായിട്ടില്ല.

കുരുക്കില്‍ വലഞ്ഞ് ആമ്പല്ലൂര്‍; വാഹനനിര പുതുക്കാടുവരെ

ആമ്പല്ലൂര്‍: അടിപ്പാതനിര്‍മാണം നടക്കുന്ന ആമ്പല്ലൂരില്‍ ഗതാഗതക്കുരുക്ക് രൂക്ഷമാകുന്നു. തൃശൂര്‍ ഭാഗത്തേക്കുള്ള പാതയിലായിരുന്നു ഗതാഗതക്കുരുക്ക്. ശക്തമായ മഴ പെയ്താല്‍ ദേശീയപാതയില്‍ ഗതാഗതസ്തംഭനം ഉണ്ടാകുന്നതു പതിവുകാഴ്ചയാണ്. കുരുക്കിനു പരിഹാരം കാണാന്‍ പല മാര്‍ഗവും അവലംബിച്ചിട്ടും ഒന്നും ഫലപ്രദമാകുന്നില്ല. ചില സമയങ്ങളില്‍ പുതുക്കാട് സെന്‍റര്‍വരെ വാഹനനിര നീണ്ടു. അടിപ്പാതനിര്‍മാണം നടക്കുന്ന ഭാഗത്തു സര്‍വീസ് റോഡിലൂടെയാണ് വാഹനങ്ങള്‍ കടത്തിവിടുന്നത്. അരമണിക്കൂറിലേറെ സമയമെടുത്താണ് വാഹനങ്ങള്‍ ആമ്പല്ലൂര്‍ കടക്കുന്നത്. സര്‍വീസ് റോഡിലെ കുഴിയും വെള്ളക്കെട്ടും ഗതാഗതക്കുരുക്കിനു കാരണമാകുന്നുണ്ട്.

മഴ + ബ്ലോക്ക് = തോരാദുരിതം

തൃശൂർ: ശക്തമായ മഴ തുടർന്ന ജില്ലയിൽ ഇന്നലെയും ജനങ്ങൾക്കു സമ്മാനിച്ചതു തീരാമഴയിലെ തോരാദുരിതമാണ്. മഴയും റോഡുകളിലെ നിർമാണപ്രവർത്തനങ്ങളും കുഴിയും ഗതാഗതക്കുരുക്കുമാണ് ഭൂരിഭാഗംപേരെയും നട്ടംതിരിച്ചതെങ്കിൽ പോലീസിന്‍റെ ഗതാഗതനിയന്ത്രണത്തിൽ കെഎസ്ആർടിസി യാത്രക്കാരും കുടുങ്ങി. നഗരത്തിൽതന്നെ എംജി റോഡ്, കിഴക്കേകോട്ട, റെയിൽവേ സ്റ്റേഷൻ പരിസരം, പൂത്തോൾ റോഡ്, വഞ്ചിക്കുളം റോഡ് എന്നിവിടങ്ങളിൽ ഏറെനേരം കഴിഞ്ഞാണ് വാഹനങ്ങൾക്ക് അല്പദൂരമെങ്കിലും സഞ്ചരിക്കാൻ കഴിഞ്ഞത്. ഇതിനിടെ കെഎസ്ആർടിസി പരിസരത്തെ പോലീസിന്‍റെ അശാസ്ത്രീയനിയന്ത്രണം കെഎസ്ആർടിസി യാത്രക്കാരെയും ഏറെ വലച്ചു. സ്റ്റാൻഡിലേക്കു കയറാൻ വന്ന വാഹനങ്ങളെ പ്രധാന പ്രവേശനകവാടത്തിൽ കൂടി കയറാൻ സമ്മതിക്കാതിരുന്നതും ബസ് ജീവനക്കാരുടെ എതിർപ്പിനു വഴിവച്ചു. സ്റ്റാൻഡ് ചുറ്റി വരുന്ന വാഹനങ്ങളെ വീണ്ടും ചുറ്റിച്ച് സ്റ്റാൻഡിലേക്കു കയറാൻ പറഞ്ഞതാണ് എതിർപ്പിന് ഇടയാക്കിയത്. ഇതിനുപുറമെ ഒരേസമയം ബസുകൾ സ്റ്റാൻഡിലേക്കു കയറാനും ഇറങ്ങാനും ശ്രമിച്ചതും വലിയരീതിയിൽ ഗതാഗതസ്തംഭനം സൃഷ്ടിച്ചു.

103 കുടുംബങ്ങളില്‍നിന്ന് 258 പേര്‍ ദുരിതാശ്വാസ ക്യാമ്പുകളില്‍

ഇരിങ്ങാലക്കുട: തുടര്‍ച്ചയായി പെയ്ത മഴയില്‍ മണ്ഡലത്തിലെ കൂടുതല്‍ പ്രദേശങ്ങള്‍ വെള്ളക്കെട്ടിലായി. പടിയൂരിനും കാറളത്തിനും പുറമേ കാട്ടൂരിലും പൂമംഗലത്തും ദുരിതാശ്വാസ ക്യാമ്പുകള്‍ തുറന്നു. കാട്ടൂരിലെ നന്തിലത്ത് പാടം, ഇട്ടിക്കുന്ന്, മുനയം, ചെമ്പന്‍ചാല്‍, മധുരംപിള്ളി, മാവുംവളവ്, പറയന്‍കടവ്, ചേലക്കത്തറ, മാങ്കുറ്റിത്തറ എന്നിവിടങ്ങളില്‍ വലിയ വെള്ളക്കെട്ടാണ്. പൂമംഗലത്ത് എടക്കുളം പടിഞ്ഞാറ് വിവേകാനന്ദ നഗര്‍, ഞാറേരി, തേമാലിത്തറ, കൊളമ്പിത്താഴം എന്നിവിടങ്ങളിലാണ് വീടുകളില്‍ വെള്ളം കയറിയത്. പടിയൂര്‍ പത്തനങ്ങാടി, കൂത്തുമാക്കല്‍, മുഞ്ഞനാട് മേഖലകളിലാണ് വെള്ളക്കെട്ട് രൂക്ഷം. കാറളം പള്ളം, നന്തി, ഹരിപുരം കല്ലട പ്രദേശങ്ങളില്‍ കൂടുതല്‍ പ്രദേശങ്ങള്‍ വെള്ളത്തിലായി. വീടുകളില്‍ വെള്ളം കയറിയതോടെ പല കുടുംബങ്ങളും ബന്ധുവീടുകളിലേക്ക് മാറി. മുകുന്ദപുരം താലൂക്കില്‍ 258 പേര്‍ ദുരിതാശ്വാസ ക്യാമ്പുകളില്‍ കഴിയുകയാണ്. 103 വീടുകളില്‍നിന്നും 98 പുരുഷന്മാരും 128 സ്ത്രീകളും 32 കുട്ടികളുമാണ് ക്യാമ്പുകളിലുള്ളത്. എടത്തിരിഞ്ഞി എച്ചഡിപി, കാറളം എഎല്‍പി സ്‌കൂള്‍, താണിശേരി സെന്റ് മേരീസ് എല്‍പി സ്‌കൂള്‍, വേളൂക്കര പഞ്ചായത്ത് കെട്ടിടം, കാട്ടൂര്‍ പോംപേ സ്‌കൂള്‍, കരാഞ്ചിറ സെന്റ് സേവിയേഴ്‌സ് സ്‌കൂള്‍, കരുവന്നൂര്‍ സെന്‍റ് ജോസഫ്‌സ് സ്‌കൂള്‍, എടക്കുളം എസ്എന്‍ സ്‌കൂള്‍ എന്നിവടങ്ങളിലാണ് ദുരിതാശ്വാസ ക്യാമ്പുകള്‍ പ്രവര്‍ത്തിക്കുന്നത്.

റോഡിലെ കുഴി; ഇരിങ്ങാലക്കുട മേഖലയിലെ ബസുടമകള്‍ സമരത്തിലേക്ക്

ഇരിങ്ങാലക്കുട: റോഡിലെ കുഴികളിൽ പ്രതിഷേധി ച്ച് ഇരിങ്ങാലക്കുട മേഖലയിലെ ബസ്ഉടമകള്‍ സമരത്തിന്. ഇരിങ്ങാലക്കുട ബസ് സ്റ്റാൻഡ് - എകെപി റോഡില്‍ സണ്ണി സില്‍ക്സിന്‍റെയും റിലയന്‍സ് സൂപ്പര്‍മാര്‍ക്കറ്റിന്‍റെയും മുമ്പിലുള്ള റോഡ് വാഹനങ്ങള്‍ക്കു സഞ്ചരിക്കാന്‍ സാധിക്കാത്തവിധത്തില്‍ കുണ്ടും കുഴിയും ആയിരിക്കുകയാണ്. നിരവധിതവണ നഗരസഭാ അധികൃതര്‍ക്ക് നിവേദനം നല്കിയിട്ടും ഇതുവരെ ഒരു നടപടിയും ഉണ്ടായിട്ടില്ല. അടിയന്തരമായി ഇരിങ്ങാലക്കുട നഗരസഭ ഈ കാര്യത്തില്‍ നടപടി എടുത്തില്ലെങ്കില്‍ ഇരിങ്ങാലക്കുട മേഖലയിലെ ബസുകള്‍ ബസ് സ്റ്റാന്‍ഡില്‍നിന്ന് എകെപി ജംഗ്ഷന്‍വരെയുള്ള റോഡ് ഒരു മുന്നറിയിപ്പുമില്ലാതെ ബഹിഷ്‌കരിക്കുമെന്ന് അറിയിച്ചു. ഇക്കാര്യം സംബന്ധിച്ച് ഇരിങ്ങാലക്കുട ജോയിന്‍റ് ആര്‍ടിഒ, റൂറല്‍ ജില്ലാ പോലീസ് മേധാവി, മുനിസിപ്പല്‍ ചെയര്‍പേഴ്സണ്‍ എന്നിവര്‍ക്കു കത്ത് നല്കിയിട്ടുണ്ടെന്നു കെ.ജെ. ജോണ്‍സണ്‍, വി.വി. അനില്‍കുമാര്‍, കെ. നന്ദകുമാര്‍ എന്നിവര്‍ സംയുക്ത പ്രസ്താവനയില്‍ അറിയിച്ചു.

ചാലക്കുടി സർവീസ് സഹകരണ ബാങ്ക് ടൗൺ ബ്രാഞ്ച് കെട്ടിടം ഉദ്ഘാടനം

ചാലക്കുടി: യുഡിഎഫ് അധികാരത്തിൽ വന്നാൽ സഹകരണമേഖലയിൽ ആദ്യം ചെയ്യാൻ പോകുന്നത് സഹകരണ ബാങ്കുകളിലെ നിക്ഷേപങ്ങൾക്ക് പരിധിയില്ലാതെ ഗാരന്‍റി നൽകുക എന്നതാണെന്ന് പ്രതിപക്ഷ നേതാവ് വി.ഡി. സതീശൻ. ചാലക്കുടി സർവീസ് സഹകരണ ബാങ്ക് ടൗൺ ബ്രാഞ്ച് ഓഫീസ് കെട്ടിടം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. സനീഷ്കുമാർ ജോസഫ് എംഎൽഎ അധ്യക്ഷത വഹിച്ചു. നഗരസഭ ചെയർമാൻ ഷിബുവാലപ്പൻ സ്ട്രോംഗ് റൂം ഉദ്ഘാടനം ചെയ്തു. ബാങ്ക് പ്രസിഡന്‍റ് വി.എൽ. ജോൺസൺ, മുൻ ചെയർമാൻമരായ വി.ഒ. പൈലപ്പൻ, എബി ജോർജ്, കൗൺസിലർ നിതാ പോൾ, ബാങ്ക് പ്രസിഡന്‍റുമാരായ ഇട്ടൂപ്പ് അയിനിക്കാടൻ, ജോയി മൂത്തേടൻ, മുൻപ്രസിഡന്‍റുമാരായ ഒ.എസ്. ചന്ദ്രൻ, ആന്‍റോ മെലേപ്പുറം, ജോയി മാളിയേക്കൽ, മുൻസെക്രട്ടറി കെ.പി. സാബിൻ, വൈസ് പ്രസിഡന്‍റ് റീന ഡേവീസ്, കെ.ജെ. മിനി എന്നിവർ പ്രസംഗിച്ചു.

സ്പെഷല്‍ ഡ്രൈവിലൂടെ 383 പ്രതികള്‍ അറസ്റ്റില്‍

ഇരിങ്ങാലക്കുട: തൃശൂര്‍ റൂറല്‍ ജില്ലാ പോലീസ് ജില്ലയിലെ വിവിധ കേസുകളില്‍ ദീര്‍ഘകാലം കോടതിയില്‍ ഹാജരാകാതെ മുങ്ങിനടക്കുന്ന പിടികിട്ടാപ്പുള്ളി വാറന്‍റുള്ള പ്രതികളെയും ശിക്ഷാവിധി അനുസരിക്കാതെ മുങ്ങിനടന്നിരുന്ന ജാമ്യമില്ലാ വാറന്‍റുള്ള പ്രതികളെയും കോടതിയില്‍ ഹാജരാകാതെ മുങ്ങിനടക്കുന്ന ജാമ്യമില്ലാത്ത വാറന്‍റ് പുറപ്പെടുവിച്ച പ്രതികളെയും പിടികൂടുന്നതിനായി തൃശൂര്‍ റൂറല്‍ പോലീസ് ജില്ലയില്‍ ജൂണ്‍ ഒന്നു മുതല്‍ 18 വരെ നടത്തിയ സ്പെഷല്‍ ഡ്രൈവിന്‍റെ ഭാഗമായി 383 പേരെ വിവിധ സ്ഥലങ്ങളില്‍നിന്ന് അറസ്റ്റുചെയ്ത് വിവിധ കോടതികളില്‍ ഹാജരാക്കി. കോടതി പിടികിട്ടാപ്പുള്ളികളായി പ്രഖ്യാപിച്ച ജാമ്യമില്ലാ വാറന്‍റുള്ള 22 പ്രതികളെയും കോടതിയുടെ ശിക്ഷാവിധി അനുസരിക്കാതെ മുങ്ങിനടന്നിരുന്ന ജാമ്യമില്ലാ വാറന്‍റുള്ള ഏഴു പ്രതികളെയും ജാമ്യമില്ലാ വാറന്‍റില്‍ ഹാജരാകാതെ മുങ്ങി നടന്നിരുന്ന മറ്റ് 354 പ്രതികളെയും ഉള്‍പ്പടെ 383 പ്രതികളെയാണ് ഓപ്പറേഷന്‍ ഹണ്ടിലൂടെ അറസ്റ്റുചെയ്ത് വിവിധ കോടതികളില്‍ ഹാജരാക്കിയത്. അറസ്റ്റ് ചെയ്ത സ്ഥലവും ബ്രാക്കറ്റില്‍ അറസ്റ്റ് ചെയ്യപ്പെട്ടവരുടെ എണ്ണവും യഥാക്രമം: കയ്പമംഗലം (73), ഇരിങ്ങാലക്കുട (45), കാട്ടൂര്‍ (12), ആളൂര്‍ (10), അന്തിക്കാട് (8), അതിരപ്പിള്ളി (11), ചാലക്കുടി (17), കൊടകര (8), ചേര്‍പ്പ് (26), വരന്തരപ്പിള്ളി (8), വെള്ളിക്കുളങ്ങര (4), കൊരട്ടി (25), മാള (53), വാടാനപ്പിള്ളി (7), വലപ്പാട് (14), പുതുക്കാട് (18), കൊടുങ്ങല്ലൂര്‍ (25) മതിലകം (15). ചാലക്കുടി ഡിവൈഎസ്പി പി.സി. ബിജുകുമാര്‍, കൊടുങ്ങല്ലൂര്‍ ഡിവൈഎസ്പി വി.കെ. രാജു, ഇരിങ്ങാലക്കുട ഡിവൈഎസ്പി കെ.ജി. സുരേഷ്, ഇന്‍സ്പെക്ടര്‍മാരായ കെ.ആര്‍. ബിജു (കയ്പമംഗലം), എം.കെ. ഷാജി (മതിലകം), എം.എസ്. ഷാജന്‍ (ഇരിങ്ങാലക്കുട), ഇ.ആര്‍. ബൈജു (കാട്ടൂര്‍), എ.എസ്. സരിന്‍ (അന്തിക്കാട്), എം.കെ. സജീവ് (ചാലക്കുടി), പി.കെ. ദാസ് (കൊടകര), എം.കെ. രമേഷ് (വലപ്പാട്), വി. ബിജു (അതിരപ്പിള്ളി), അമൃതരംഗന്‍ (കൊരട്ടി), രമേഷ് (ചേര്‍പ്പ്), എന്‍.ബി. ഷൈജു (വാടാനപ്പിള്ളി), കെ. കൃഷ്ണന്‍ (വെള്ളിക്കുളങ്ങര), മഹേന്ദ്രസിംഹന്‍ (പുതുക്കാട്), ബി.കെ. അരുണ്‍ (കൊടുങ്ങല്ലൂര്‍), സജിന്‍ ശശി (മാള), എം. അഫ്സല്‍ (ആളൂര്‍), കെ.പി. മനോജ് (വരന്തരപ്പിള്ളി) എന്നിവരാണ് ഓപ്പറേഷന്‍ ഗ്രേ ഹണ്ട് സ്പെഷല്‍ ഡ്രൈവിനു നേതൃത്വംനല്‍കിയത്.

മാധ്യമപ്രവർത്തകയെ കെെയേറ്റംചെയ്യാൻ ശ്രമം; ആറുപേർ പിടിയിൽ

ചാവക്കാട്: മാധ്യമപ്രവർത്തകയെ കെെയേറ്റം ചെയ്യാൻ ശ്രമിക്കുകയും ജോലിതടസപ്പെടുത്തി മൊബൈൽഫോൺ തട്ടിയെടുക്കുകയുംചെയ്ത സംഭവത്തിൽ ആറുപേർ പിടിയിൽ. കടപ്പുറം മുനക്കക്കടവ് സ്വദേശികളായ പടിഞ്ഞാറേപുരയ്ക്കൽ മുഹമ്മദ് റാഫി(61), പോക്കാക്കില്ലത്ത് ഹുസൈൻ(37), പടിഞ്ഞാറേപുരക്കൽ ഷാനവാസ്(43), കറുത്ത ശിഹാബ്(43), പുതുവീട്ടിൽ ഷാഹുൽഹമീദ്(63), പൊന്നാക്കാരൻ മുഹമ്മദാലി(54) എന്നിവരെയാണ് ചാവക്കാട് എസ്എച്ച്ഒ വി.വി. വിമലിന്‍റെ നേതൃത്വത്തിൽ പോലീസ് അറസ്റ്റ് ചെയ്തത്. ഇക്കഴിഞ്ഞ തിങ്കളാഴ്ച കടപ്പുറം മുനയ്ക്കക്കടവിലായിരുന്നു സംഭവം. കടൽക്ഷോഭവാർത്ത റിപ്പോർട്ട് ചെയ്യാനെത്തിയ സർക്കിൾ ന്യൂസിന്‍റെ കെ.എസ്. പാർവതിയെയാണ് കെെയേറ്റംചെയ്തത്. കടൽക്ഷോഭദൃശ്യം ഫോണിൽ പകർത്തുന്നതിനിടയിൽ ഒരുസംഘം ദൃശ്യംപകർത്താൻ അനുവദിക്കില്ലെന്നുപറഞ്ഞു ഭീഷണിമുഴക്കുകയായിരുന്നു. പിന്നീട് സംഘം ഫോൺ തട്ടിയെടുത്തു. ഏറെനേരത്തിനുശേഷം നാട്ടുകാരിൽ ചിലർ ഇടപെട്ടാണ് ഫോൺ തിരികെവാങ്ങി നൽകിയത്. വിവരമറിഞ്ഞ് ചാവക്കാട് പോലീസ് സ്ഥലത്തെത്തി. പാർവതിയുടെ പരാതിയിൽ പത്തുപേർക്കെതിരെ കേസെടുത്തു.

ചോർന്നൊലിച്ച് ബെൽമൗത്ത് ഷോപ്പിംഗ് കോംപ്ലക്സ്

തൃശൂർ: സ്വരാജ് റൗണ്ടിലെ കോർപറേഷൻവക ബെൽമൗത്ത് ഷോപ്പിംഗ് കോംപ്ലക്സ് കെട്ടിടം തകർച്ചയുടെ വക്കിൽ. 1979ൽ പണികഴിഞ്ഞ കെട്ടിടം കനത്ത മഴയിൽ ചോർന്നൊലിക്കുന്നു. മേൽക്കൂരയുടെ സിമന്‍റുപാളികൾ അടർന്ന് ഇരുന്പുകന്പികൾ പൊട്ടിവീഴാവുന്ന സ്ഥിതിയിലാണ്. കെട്ടിടത്തിന്‍റെ ബലക്ഷയത്തിൽ മുൻ കോർപറേഷൻ കൗണ്‍സിലറും എച്ച്എംഎസ് ജില്ലാ പ്രസിഡന്‍റുമായ പി.ഒ. അബ്ദുൾ മുത്തലിഖ് കോർപറേഷൻ സെക്രട്ടറിക്കു പരാതി നൽകി. നാലു നിലകളിലായി 59 കടകളും ഒരു പാരലൽ കോളജും ഷോപ്പിംഗ് കോംപ്ലക്സിൽ പ്രവർത്തിക്കുന്നുണ്ട്. കെട്ടിടത്തിന്‍റെ ശുചിമുറികളും പരിതാപകരമായ അവസ്ഥയിലാണ്. ശുചിമുറിയിൽനിന്നുള്ള വെള്ളവും പുറത്തു കെട്ടിക്കിടക്കുന്നു. കെട്ടിടം ഇടിഞ്ഞ് ആളപായമുണ്ടാകുന്നതിനുമുന്പ് സുരക്ഷിതമാക്കണമെന്നു അബ്ദുൾ മുത്തലിഖ് ആവശ്യപ്പെട്ടു.

എരുമപ്പെട്ടി പള്ളിയിൽ പ്രതിഷ്ഠാതിരുനാൾ

എരുമപ്പെട്ടി: തിരുഹൃദയ ഫൊറോന പള്ളിയിൽ ഈശോയുടെ തിരുഹൃദയ പ്രതിഷ്ഠാതിരുനാൾ 26, 27 തീയതികളിൽ ആഘോഷിക്കും. കൊടികയറ്റം വികാരി ഫാ. ജോഷി ആളൂർ നിർവഹിച്ചു. തിരുക്കർമങ്ങളിൽ അസി. വികാരി ഫാ. ജീസ് അക്കരപട്ട്യേക്കൽ, ഫാ. ഷോജോ മഞ്ഞാടിക്കൽ, ഡീക്കൻ ബിൻസ് മുട്ടത്തിൽ എന്നിവർ സഹകാർമികരായി. നവനാൾ തിരുക്കർമങ്ങൾക്കു തുടക്കമായി. കൈക്കാരന്മാരായ ടി.എസ്. ജെയ്സണ്‍, ടി.ഒ. ഷൈജു, എം.കെ. ജോണ്‍സണ്‍, എം.വി. ഷാന്‍റോ, തിരുനാൾ ജനറൽ കണ്‍വീനർ കെ.സി. ഡേവിസ് എന്നിവർ പരിപാടികൾക്കു നേതൃത്വം നൽകി. തിരുനാളിനോടനുബന്ധിച്ച് ഹിന്ദി, സുറിയാനി, മലങ്കര, ലത്തീൻ ക്രമങ്ങളിൽ വിശുദ്ധ കുർബാനകൾ ഒരുക്കിയിട്ടുണ്ട്. 26നു വൈകീട്ട് ആറിനു രൂപം എഴുന്നള്ളിപ്പ്, വിശുദ്ധ കുർബാന, ലദീഞ്ഞ്, നൊവേന. തൃശൂർ അതിരൂപത വികാരി ജനറാൾ മോണ്‍. ജോസ് കോനിക്കര കാർമികത്വം വഹിക്കും. തുടർന്നു നേർച്ചവിതരണം, ബാൻഡ് വാദ്യം. തിരുനാൾദിനമായ 27നു രാവിലെ ആറിനും എട്ടിനും വൈകുന്നേരം ആറിനും വിശുദ്ധ കുർബാന, രാവിലെ പത്തിനു തിരുനാൾ റാസ കുർബാന. ഫാ. ജോണ്‍ പുത്തൂർ കാർമികത്വം വഹിക്കും. ഫാ. പോൾ മുട്ടത്ത് സന്ദേശം നൽകും. അന്നു രാവിലെ ഏഴുമുതൽ ഉച്ചകഴിഞ്ഞു മൂന്നുവരെ നേർച്ചഊട്ട് ഉണ്ടായിരിക്കും.

ദുരിതാശ്വാസ ക്യാമ്പുകൾ എംഎൽഎ സന്ദർശിച്ചു

ചേർപ്പ്: കനത്ത മഴയിൽ വെള്ളം ഉയർന്നതിനെ തുടർന്ന് ചേർപ്പ് വെസ്റ്റ് ഗവ. ജൂണിയർ ബേസിക് സ്കൂൾ, ചേർപ്പ് ഗവ. ഹയർ സെക്കൻഡറി സ്കൂളുകളിലെ ദുരിതാശ്വാസ ക്യാന്പുകൾ സി.സി. മുകുന്ദൻ എംഎൽഎയും ജനപ്രതിനിധികളും ഉദ്യോഗസ്ഥരും സന്ദർശിച്ചു. ജില്ലാ കളക്ടറുമായി ബന്ധപ്പെട്ട് ദുരിതാശ്വാസ ക്യാമ്പുകളിലേക്ക് സർക്കാരിന്‍റെ സഹായങ്ങൾ ലഭ്യമാക്കിയതായും ക്യാമ്പിന്‍റെ നടത്തിപ്പ് വില്ലേജ് ഓഫീസറും ഗ്രാമപഞ്ചായത്ത് പ്രസിഡന്‍റ്് അടക്കമുള്ള ജനപ്രതിനിധികളും ഉത്തരവാദിത്വത്തോടെ നിർവഹിക്കുന്നതായും ക്യാന്പ് സന്ദർശിച്ച എംഎൽഎ പറഞ്ഞു. ബ്ലോക്ക് പഞ്ചായത്ത് പ്രസിഡന്‍റ്് എ.കെ. രാധാകൃഷ്ണൻ, ഗ്രാമപഞ്ചായത്ത് പ്രസിഡന്‍റ്് സുജിഷ കളിയത്ത്, വില്ലേജ് ഓഫീസർ ശ്രീവിദ്യ രാമചന്ദ്രൻ, ഗ്രാമപഞ്ചായത്ത്‌ സെക്രട്ടറി മുംതാസ് അക്ബറലി, ഗ്രാമപഞ്ചായത്ത് അംഗങ്ങളായ ധന്യ സുനിൽ, നസീജ മുത്തലീഫ്, വിദ്യ രമേഷ് തുടങ്ങിയവർ സന്നിഹിതരായിരുന്നു.

സ്ലൂയിസുകൾ തുറക്കാത്തതുമൂലം വെള്ളക്കെട്ട്: കോൺഗ്രസ് മാർച്ച് നടത്തി

ചാഴൂർ: പഞ്ചായത്തിലെ പാടശേഖരങ്ങളിലെ സ്ലൂയിസുകൾ തുറക്കാതെ മനുഷ്യനിർമിത ദുരന്തം ജനങ്ങൾക്ക് സമ്മാനിച്ച ഉദ്യോഗസ്ഥരുടെയും ജനപ്രതിനിധികളുടേയും നടപടിക്കെതിരെ കോൺഗ്രസ് ചാഴൂർ മണ്ഡലം കമ്മിറ്റി ചാഴൂർ കൃഷിഭവൻ മാർച്ച് നടത്തി. ഡിസിസി വൈസ് പ്രസിഡന്‍റ് സി.ഒ.ജേക്കബ് ഉദ്ഘാടനം ചെയ്തു. സുനിൽ ലാലൂർ മുഖ്യ പ്രഭാഷണം നടത്തി. മണ്ഡലം പ്രസിഡന്‍റ് ഷൈജു സായിറാം അധ്യക്ഷത വഹിച്ചു. ബ്ലോക്ക് കോൺഗ്രസ് അംഗങ്ങളായ സി.എം. പരമശിവൻ, അശോക് കോമത്ത് കാട്ടിൽ, ജോഷി ആലപ്പാട്ട്, കെ.കെ. രാജേഷ്, പി.കെ. ഇബ്രാഹിം, സലാം കക്കേരി. ഷീമ ആന്‍റണി എന്നിവർ പ്രസംഗിച്ചു.

തൃപ്രയാർ ശ്രീരാമ ഗവ. പോളിടെക്നിക് വജ്രജൂബിലി കെട്ടിടസമുച്ചയം ഉദ്ഘാടനം ഇന്ന്

തൃപ്രയാർ: 10 കോടി രൂപ ചെലവഴിച്ച് നിർമിച്ച ശ്രീരാമ ഗവ. പോളിടെക്നിക് വജ്രജൂബിലി കെട്ടിടസമുച്ചയം ഇന്ന് ഉദ്ഘാടനം ചെയ്യുമെന്ന് സ്കൂൾ അധികൃതർ പത്രസമ്മേളനത്തിൽ അറിയിച്ചു. കെട്ടിടത്തിൽ വിദ്യാർഥികൾക്കുള്ള ലാബുകൾ, പൊതുജനങ്ങൾക്കും ഉപയോഗിക്കാവുന്ന 100 കമ്പ്യൂട്ടറുകളുള്ള കോമൺകമ്യൂണിറ്റി സെന്‍ററും ഉണ്ട്. ഓൺലൈൻ എക്സാമിനേഷൻ സെന്‍ററും പ്രവർത്തിക്കും. കൂടാതെ അത്യാധുനിക സംവിധാനത്തോടെയുള്ള മെറ്റീരിയൽ ടെസ്റ്റിംഗ് സൗകര്യവും ഒരു ക്കും. ഇന്ന് ഉച്ചയ്ക്ക് 12 ന് മന്ത്രി ആർ. ബിന്ദു ഉദ്ഘാടനം നിർവഹിക്കും. സി.സി. മുകുന്ദൻ എംഎൽഎ അധ്യക്ഷത വഹിക്കും. പത്രസമ്മേളനത്തിൽ പ്രിൻസിപ്പൽ ടി.എസ്. ബാബുരാജ്, വിവിധ വകുപ്പുമേധാവികളായ സി.എ. അരുൺ, ഇ.പി. അജയ്കുമാർ, പി.ജി. ജിന്‍റോ ഫ്രാൻസിസ് എന്നിവർ പങ്കെടുത്തു.

പുതുക്കാട് തട്ടുകടകളില്‍ ആരോഗ്യവകുപ്പിന്‍റെ മിന്നല്‍പരിശോധന; രണ്ടു കടകള്‍ അടപ്പിച്ചു

പുതുക്കാട്: സെന്‍ററിലെ തട്ടുകടകളില്‍ ആരോഗ്യവകുപ്പിന്‍റെ മിന്നല്‍പരിശോധന. വൃത്തിഹീനമായ സാഹചര്യത്തില്‍ ഭക്ഷണം പാകംചെയ്തതും പഴകിയ ഭക്ഷണം കണ്ടെത്തിയതുമായ രണ്ടു കടകള്‍ അടയ്ക്കാന്‍ നിര്‍ദേശം നല്‍കി. രണ്ടു ദിവസത്തിനുള്ളില്‍ മറ്റുള്ള തട്ടുകള്‍ വൃത്തിയാക്കിയശേഷം ആരോഗ്യവകുപ്പിനെ അറിയിക്കാനും ഉദ്യോഗസ്ഥര്‍ നിര്‍ദേശിച്ചു. പുതുക്കാട് സെന്‍ററിലെ കടകളില്‍നിന്ന് വാങ്ങിയ ഭക്ഷണത്തില്‍നിന്ന് കഴിഞ്ഞ ദിവസങ്ങളില്‍ പുഴുവിനെയും തേരട്ടയെയും കണ്ടെത്തിയതിനു പിന്നാലെയാണ് ആരോഗ്യവകുപ്പിന്‍റെ പരിശോധന. വഴിയാത്രക്കാരാണ് കൂടുതലായി പരാതിയുമായെത്തുന്നത്. ദേശീയപാതയോരത്തെ കടകളില്‍നിന്ന് ഭക്ഷണം കഴിച്ച് മടങ്ങുന്ന ദൂരസ്ഥലങ്ങളിലുള്ളവര്‍ക്ക് അസ്വസ്ഥത അനുഭവപ്പെട്ടതായും പരാതി ഉയര്‍ന്നിരുന്നു. രണ്ടാഴ്ചയിലൊരിക്കല്‍ രാത്രി പരിശോധന കര്‍ശനമാക്കുമെന്നും ഉദ്യോഗസ്ഥര്‍ അറിയിച്ചു. പുതുക്കാട് ഹെല്‍ത്ത് ഇന്‍സ്‌പെക്ടര്‍ ആര്‍. രാജേഷ്, പഞ്ചായത്തുതല ഹെല്‍ത്ത് ഇന്‍സ്‌പെക്ടര്‍ കെ.ജി. ഗീതുപ്രിയ, ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരായ അബ്ദുള്‍ റസാഖ്, നിമ്മി എന്നിവരുടെ നേതൃത്വത്തിലാണു പരിശോധന നടത്തിയത്.

കമാൻഡ് മുഖം താത്കാലിക ബണ്ട് തകർന്നു; നാലു പഞ്ചായത്തുകൾ വെള്ളക്കെട്ടുഭീഷണിയിൽ

ചേർപ്പ്: കരുവന്നൂർ വൈക്കോച്ചിറ കമാൻഡ് മുഖത്തെ താത്കാലിക ബണ്ട് തകർന്നു. പുഴ കവിഞ്ഞ് വെള്ളം ജനവാസകേന്ദ്രങ്ങളിലേക്ക് ഒഴുകുന്നതിനാൽ നാലു പഞ്ചായത്തുകളിലെ താഴ്ന്ന പ്രദേശങ്ങൾ വെള്ളക്കെട്ട് ഭീഷണിയിലായി. ചേർപ്പ്, ചാഴൂർ, പാറളം, അരിമ്പൂർ പഞ്ചായത്തുകളാണ് വെള്ളക്കെട്ട് ഭീഷണി നേരിടുന്നത്. കഴിഞ്ഞ വർഷം രണ്ടായിരത്തോളം വീടുകളിലും കൃഷിസ്ഥലത്തും വെള്ളക്കെട്ട് സൃഷ്ടിച്ച അതേ‌സാഹചര്യമാണ് നിലവിൽ. കരുവന്നൂർ പുഴയിലെ വെള്ളം നിയന്ത്രിക്കാൻ കഴിഞ്ഞ ഒാഗസ്റ്റിൽ പത്തുലക്ഷം രൂപ ചെലവാക്കി കമാൻഡ് മുഖത്ത് പണിത താത്കാലിക തടയണയാണു തകർന്നത്. ഈ ബണ്ട് നിർമാണം അശാസ്ത്രീയമാണെന്ന് ആരോപണം ഉയർന്നിരുന്നു. കഴിഞ്ഞ വർഷം കമാൻഡ് മുഖം തകർന്നതിനെത്തുടർന്ന് പുഴയിൽനിന്നും വൻതോതിൽ വെള്ളം ഒഴുകി നാലു പഞ്ചായത്തുകളിലായി രണ്ടായിരത്തോളം വീടുകളിൽ വെള്ളം കയറിയിരുന്നു. വൻതോതിൽ കൃഷിനാശവും രണ്ടായിരത്തിലധികം ആളുകൾ ദുരിതാശ്വാസ ക്യാമ്പുകളിൽ അഭയം തേടേണ്ട സാഹചര്യവും ഉണ്ടായിരുന്നു. തദ്ദേശ സ്ഥാപനങ്ങൾ നൽകിയ പത്തുലക്ഷം രൂപ ഉപയോഗിച്ചാണ് തടയണ നിർമിച്ചത്. തടയണയുടെ പണി കഴിയുംമുമ്പേ കനാലിൽനിന്നും പുഴയിലേക്ക് വെള്ളം തിരിച്ചൊഴുകിയതിനാൽ തടയണകൊണ്ട് ഗുണം ഉണ്ടാ യില്ല. എങ്കിലും മഴ ശക്തിപ്രാപിച്ച് പുഴയിൽനിന്നും വെള്ളം കവിഞ്ഞൊഴുകിയുള്ള പ്രശ്നങ്ങൾ ഉണ്ടാകില്ലെന്നായിരുന്നു നാട്ടുകാരുടെ പ്രതീക്ഷ. എന്നാൽ ആ പ്രതീക്ഷയും അസ്ഥാനത്തായി. ഫലത്തിൽ അശാസ്ത്രീയമായ പണികൾമൂലം പത്തുലക്ഷം രൂപ പാഴാവുകയാണുണ്ടായതെന്നു നാട്ടുകാർ ആരോപിച്ചു.

വടക്കാഞ്ചേരി നഗരസഭ ഇനി സമ്പൂർണതിമിരവിമുക്തം

വടക്കാഞ്ചേരി: നഗരസഭയും ലയൺസ് ക്ലബ്ബും തൃശൂർ ആര്യ ഐ കെയർ കണ്ണാശുപത്രിയും സംയുക്തമായി നടത്തിയ "കാഴ്‌ച 2024-25" സമ്പൂർണ തിമിരവിമുക്ത നഗരസഭ പദ്ധതിയുടെ പ്രഖ്യാപനം 28 ന് രാവിലെ 10 ന് പാലസ് റോഡിലെ ലയൺസ് ഹാളിൽ നടത്തുമെന്ന് ഭാരവാഹികൾ പത്രസമ്മേളനത്തിൽ പറഞ്ഞു. വടക്കാഞ്ചേരി നഗരസഭയുടെ 41 ഡിവിഷനിലുള്ളവർക്കായി ലയൺസ് ക്ലബ് ഹാളിലും വിവിധ‌സ്ഥലങ്ങളിലുമായി നടത്തിയ സൗജന്യ നേത്ര‌പരിശോധനയും നേത്ര സംരക്ഷണ ബോധവത്കരണ ക്ലാസും പൂർത്തിയാ യി. പദ്ധതിയുടെ ഭാഗമായി തിമിരശ സ്ത്രക്രിയയും സൗജന്യ മരുന്നുവിതരണവും നടന്നു. സാമ്പത്തികമായി പിന്നാക്കംനിൽക്കുന്ന ജനങ്ങൾക്ക് ഏറെ ആശ്വാസമാകുന്നതിനു പദ്ധതിക്കുകഴിഞ്ഞു. തിമിരവിമുക്ത വടക്കാഞ്ചേരി നഗരസഭ എന്ന ലക്ഷത്തിലേക്ക് പദ്ധതിയെ എത്തിക്കുന്നതിനും സാധിച്ചു. വർഷത്തിൽ 365 ദിവസവും സൗജന്യ ഡയബറ്റിക് രക്തപരിശോധന, തിമിര നിർണയ കണ്ണ് പരിശോധന, ബിആർസിയുടെ കീഴിലുള്ള 700ലധികം വിദ്യാർഥികൾക്കു സൗജന്യ കണ്ണടവിതരണം എന്നിവ നടത്തിയതായും ഭാരവാഹികൾ പറഞ്ഞു. പത്രസമ്മേളനത്തിൽ നഗരസഭ ചെയർമാൻ പി.എൻ. സുരേന്ദ്രൻ, ലയൺസ് ക്ലബ് പ്രസിഡന്‍റ് എ. പി. ജോൺസൻ, സെക്രട്ടറി വിൽസൻ കുന്നുംപ്പിള്ളി, ആര്യ കണ്ണാശുപത്രി പിആർഒ സുനീഷ് ചന്ദ്രൻ, സി.എ. ശങ്കരൻകു ട്ടി എന്നിവർ പങ്കെടുത്തു.

ട്രോളിംഗ് നിരോധനം ലംഘിച്ചു; തമിഴ്നാട് വള്ളം പിടിച്ചു

ചാവക്കാട്: ട്രോളിംഗ് നിരോധനം ലംഘിച്ച് മത്സ്യബന്ധനം നടത്താൻ ശ്രമിച്ച വള്ളം പിടികൂടി. മത്സ്യബന്ധനത്തിനായി തമിഴ്നാട്ടിൽനിന്നു കളർകോഡ് മാറ്റി ബ്ലാങ്ങാട് ബീച്ചിലെത്തി മത്സ്യബന്ധനത്തിനായി ഒരുങ്ങുന്നതിനിടയിലാണ് മറൈൻ എൻഫോഴ്സ്മെന്‍റ് ചീഫ് ഗാർഡിന്‍റെ നേതൃത്വത്തിലുള്ള പ്രത്യേകസംഘം വള്ളവും എൻജിനും വലകളും പിടിച്ചെടുത്തത്. കളർ കോഡും ജീവൻരക്ഷ ഉപകരണങ്ങളും ഇല്ലാതെയാണ് മത്സ്യബന്ധനത്തിന് എത്തിയത്. നിയമം ലംഘിച്ച കുളച്ചൽ സ്വദേശി ഡേവിഡ് അശ്വിന്‍റെ ഉടമസ്ഥതയിലുള്ള "പുനിത പ്രകാശിയമ്മാൾ' എന്ന ആഴക്കടൽ മത്സ്യബന്ധന യാനമാണ് ചീഫ് ഗാർഡ് വി.ജി. അജിത്ത്കുമാർ, അഴീക്കോട് ഫിഷറീസ് സ്റ്റേഷൻ അസി. ഡയറക്ടർ ഡോ. സി. സീമയുടെയും നേതൃത്വത്തിൽ നടത്തിയ പ്രത്യേക കോമ്പിംഗ് ഓപ്പറേഷന്‍റെ ഭാഗമായി പിടിച്ചെടുത്തത്. 20,000 രൂപ പിഴ ചുമത്തി. മറൈൻ എൻഫോഴ്സ്മെന്‍റ് ആൻഡ് വിജിലൻസ് വിംഗ് ഓഫീസർമാരായ ഇ.ആർ. ഷിനിൽകുമാർ, വി.എൻ.പ്രശാന്ത്കുമാർ, പി.എം. ഷൈബു, കോസ്റ്റൽ എസ്ഐമാരായ ലോഫിരാജ്, ജോബി വർഗീസ് തുടങ്ങിയവർ പരിശോധനസംഘത്തിൽ ഉണ്ടായിരുന്നു.

വിജയോത്സവം സംഘടിപ്പിച്ചു

"സൗഹാർദം 2025' ചാലക്കുടി: നഗരസഭ 15-ാംവാർഡ് വികസന സമിതിയുടെയും കുടുംബശ്രീയുടെയും റസിഡൻഷ്യൽ അസോസിയേഷൻ കോഡിനേഷൻ കമ്മിറ്റിയുടെയും നേതൃത്വത്തിൽ മെറിറ്റ് ഡേ സൗഹാർദം 2025 നടത്തി. സനീഷ് കുമാർ ജോസഫ് എംഎൽഎ ഉദ്ഘാടനം നിർവഹിച്ചു. വാർഡ് കൗൺസിലർ അഡ്വ. ബിജു എസ്. ചിറയത്ത് അധ്യക്ഷത വഹിച്ചു. എസ്എസ്എൽസി പ്ലസ്ടു പരീക്ഷകളിൽ ഉന്നത വിജയം കരസ്ഥമാക്കിയ വിദ്യാർഥികളെ ആദരിച്ചു. ലണ്ടൻ കാർഡിഫ് സർവകലാശാലയിൽ നിന്ന് ബിസിനസ് ഇന്‍റലിജിൻസിൽ പിഎച്ച്ഡി കരസ്ഥമാക്കിയ ഹിമ ജോർജിനെയും, സുഗമ ഹിന്ദി പരീക്ഷയിൽ എവൺ കരസ്ഥമാക്കിയ ഈസ് ബൽ റോസ് ബെന്നിയെയും ആദരിച്ചു. പ്രമുഖ സാഹിത്യകാരി പ്രൊഫ ലിറ്റി ചാക്കോ മോട്ടിവേഷണൽ ക്ലാസ് നയിച്ചു. മേരി നളൻ, പി.വി. വേണു, എം.കെ ജോസ്, മുരളീധരൻ പൈങ്കിൽ, ഷീബ ഷൈജു, റിജുല ഉണ്ണികൃഷ്ണൻ എന്നിവർ പ്രസംഗിച്ചു. മൂര്‍ക്കനാട് സെന്‍റ് ആന്‍റണീസ് മൂര്‍ക്കനാട്: സെന്‍റ്് ആന്‍റണീസ് ഹയര്‍ സെക്കന്‍ഡറി സ്‌കൂളില്‍ വിജയോത്സവം സംഘടിപ്പിച്ചു. രൂപത കോര്‍പ്പറേറ്റ് മാനേജര്‍ ഫാ. സീജോ ഇരുമ്പന്‍ ഉദ്ഘാടനം നിര്‍വഹിച്ചു. സ്‌കൂള്‍ മാനേജര്‍ ഫാ. സിന്‍റോ മാടവന ചടങ്ങില്‍ അധ്യക്ഷത വഹിച്ചു. കെഎല്‍എഫ് ഗ്രൂപ്പ് ഡയറക്ടര്‍ ജോണ്‍ ഫ്രാന്‍സിസ് മുഖ്യാതിഥിയായിരുന്നു. പ്രിന്‍സിപ്പല്‍ കെ.എ. വര്‍ഗീസ്, വാര്‍ഡ് കൗണ്‍സിലര്‍ നസീമ കുഞ്ഞുമോന്‍, പിടിഎ പ്രസിഡന്‍റ്് രാജു ആന്‍റണി, ട്രസ്റ്റി പോള്‍ തേരുപറമ്പില്‍, സ്‌കൂള്‍ ഹെഡ്മിസ്ട്രസ് പ്രീത ഫിലിപ്പ്, എല്‍പി ഹെഡ്മിസ്ട്രസ് കെ.എ. റീന, സ്റ്റാഫ് സെക്രട്ടറി ആശാ ജി. കിഴക്കേടത്ത്, ഫസ്റ്റ് അസിസ്റ്റന്‍റ് ടി.ജെ. ജാന്‍സി, സ്‌കൂള്‍ വൈസ് ചെയര്‍പേഴ്സണ്‍ കുമാരി ലിനറ്റ് ലിജോമോന്‍ എന്നിവര്‍ സംസാരിച്ചു. ഇരിങ്ങാലക്കുട എൽഎഫ് കോണ്‍വന്‍റ്് ഇരിങ്ങാലക്കുട: ലിറ്റില്‍ ഫ്ളവര്‍ കോണ്‍വന്‍റ് ഹൈസ്‌കൂളില്‍ വിജയോത്സവം തൃശൂര്‍ റൂറല്‍ സ് പെഷല്‍ ബ്രാഞ്ച് ഡിവൈഎസ് പി ബിജോയ് ഉദ്ഘാടനം ചെയ്തു. ഉദയ എഡ്യുക്കേഷണല്‍ കൗണ്‍സിലര്‍ സിസ്റ്റര്‍ മരിയറ്റ് സിഎംസി അധ്യക്ഷത വഹിച്ചു. പിടിഎ പ്രസിഡന്‍റ് സിവിന്‍ കെ. വര്‍ഗീസ്, ലോക്കല്‍ മാനേജര്‍ സിസ്റ്റര്‍ ഹാന്‍സി സിഎംസി, അധ്യാപക പ്രതിനിധി ജൂലി ജെയിംസ്, വിദ്യാര്‍ഥി പ്രതിനിധി ആയിഷ നവാര്‍, പ്രധാന അധ്യാപിക സിസ്റ്റര്‍ സുധീപ സിഎംസി, കണ്‍വീനര്‍ ജെയ്ഫിന്‍ ഫ്രാന്‍സിസ് എന്നിവര്‍ പ്രസംഗിച്ചു. കാട്ടുങ്ങച്ചിറ ലിസ്യു കോണ്‍വന്‍റ്് ഇരിങ്ങാലക്കുട: കാട്ടുങ്ങച്ചിറ ലിസ്യു കോണ്‍വന്‍റ് ഇംഗ്ലീഷ് മീഡിയം ഹൈസ്‌കൂളില്‍ വിജയോത്സവ് 2കെ25 പ്രൊവിന്‍ഷ്യല്‍ കൗണ്‍സിലര്‍ സിസ്റ്റര്‍ മേരിറ്റ് ഉദ്ഘാടനം ചെയ്തു. ലിസ്യു കോണ്‍വന്‍റ്് മദര്‍ സുപ്പീരിയര്‍ സിസ്റ്റര്‍ ടെസ്‌ലിന്‍ അധ്യക്ഷത വഹിച്ചു. മുഴുവന്‍ വിഷയങ്ങള്‍ക്കും എ പ്ലസ് കരസ്ഥമാക്കിയ വിദ്യാര്‍ഥികള്‍ക്കുള്ള ട്രോഫി സിസ്റ്റര്‍ മേരിറ്റ് വിതരണം ചെയ്തു. മറ്റു വിദ്യാര്‍ഥികളെ മെഡലുകള്‍ നല്‍കി ഹെഡ്മിസ്ട്ര്സ് സിസ്റ്റര്‍ ജീന ആദരിച്ചു. പിടിഎ പ്രസിഡന്‍റ്് വി.വി. ജെയ്സണ്‍, അധ്യാപികമാരായ രാജശ്രീ, ബിന്ദു എന്നിവര്‍ പ്രസംഗിച്ചു. കുറ്റിക്കാട് സെന്‍റ്് സെബാസ്റ്റ്യൻസ് കുറ്റിക്കാട്: സെന്‍റ് സെബാസ്റ്റ്യൻസ് ഹയർ സെക്കൻഡറി സ്കൂളിന്‍റെ വിജയോത്സവം ഇരിങ്ങാലക്കുട രൂപത ബിഷപ് മാർ പോളി കണ്ണൂക്കാടൻ ഉദ്ഘാടനം ചെയ്തു. മാനേജർ ഫാ. ലിജു പോൾ പറമ്പേത്ത് അധ്യക്ഷത വഹിച്ചു. ഗവ. എയ്ഡഡ് ഹയർസെക്കൻഡറി സ്കൂളുകളിൽ, സംസ്ഥാനത്ത് ഒന്നാം സമ്മാനം നേടിയ സെന്‍റ് സെബാസ്റ്റ്യൻസ് ഹയർ സെക്കൻഡറി സ്കൂളിനുള്ള മെമെന്‍റോ ബിഷപ് സമ്മാനിച്ചു, സനീഷ്കുമാർ ജോസഫ് എംഎൽഎ മുഖ്യാതിഥിയായിരുന്നു. ഇരിങ്ങാലക്കുട കോർപ്പറേറ്റ് മാനേജർ ഫാ. സീജോ ഇരുമ്പൻ പരിയാരം ഗ്രാമപഞ്ചായത്ത് പ്രസിഡന്‍റ് മായ ശിവദാസൻ, വൈസ് പ്രസിഡന്‍റ് ഡെസ്റ്റിൻ താക്കോൽക്കാരൻ,ജില്ലാ പഞ്ചായത്ത് മെമ്പർ ജെനീഷ് പി ജോസ്, പിടിഎ പ്രസിഡന്‍റ് ജോൺ പാറയ്ക്കൽ ഹൈസ്കൂൾ എച്ച് എം എം.ടി. ജെയ്സൻ എൽപിഎച്ച്എം ജെസി ജോസ്, ജോസി ജോർജ്, പി.വി. ഷിബു, വി.എസ്. സച്ചു പ്രിൻസിപ്പൽ പി.കെ. ആന്‍റു, സിന്ധു എബ്രഹാം എന്നിവർ പ്രസംഗിച്ചു.

നേട്ടവുമായി ക്രൈസ്റ്റ് കോളജ് അധ്യാപിക

ഇരിങ്ങാലക്കുട: ക്രൈസ്റ്റ് കോളജ് ഫിസിക്സ് വിഭാഗം അധ്യാപികയും ഗവേഷണവിദ്യാര്‍ഥിയുമായ സ്റ്റിജി ജോസിനു ചെന്നൈ കാഞ്ചീപുരം, ഐഐഐടിഡിമില്‍ വെച്ച് നടന്ന നാലാമത് ഐഇഇഇ വയര്‍ലെസ്, ആന്‍റിന ആന്‍ഡ് മൈക്രോവേവ് കോണ്‍ഫറന്‍സില്‍ ബെസ്റ്റ് പ്രസന്‍റേഷന്‍ അവാര്‍ഡ് ലഭിച്ചു. നാല് ദിവസങ്ങളിലായി നടന്ന പരിപാടിയില്‍ വയര്‍ലെസ് മൈക്രോവേവ് കമ്യൂണിക്കേഷന്‍ രംഗത്തെ ഭാവി സാധ്യതകളെ പറ്റി അവതരിപ്പിച്ചതിനാണ് അംഗീകാരം ലഭിച്ചത്. 5ജി നെറ്റ്‌വര്‍ക്കില്‍ നിന്നും മാറി 6ജി, 7ജി നെറ്റ്‌വര്‍ക്ക് തുടങ്ങി ഉയര്‍ന്ന ഫ്രീക്വന്‍സിയിലെ കമ്യൂണിക്കേഷന്‍ സാധ്യതകള്‍ ആണ് സ്റ്റിജി അവതരിപ്പിച്ചത്. ഐഇഇഇ എ.പി.എസ് പ്രസിഡന്‍റും ഓസ്ട്രേലിയ യൂണിവേഴ്സിറ്റി ഓഫ് ക്വീന്‍സ്‌ലാന്‍ഡ് പ്രഫസറും ആയ ക്രിസ്റ്റഫര്‍ ഫ്യൂമൈ ക്യാഷ് അവാര്‍ഡും പ്രശസ്തിപത്രവും സമ്മാനിച്ചു. വാംസ് 2025 എന്ന പേരില്‍ നടത്തുന്ന ഈ സിമ്പോസിയത്തില്‍ വളര്‍ന്ന് വരുന്ന ഗവേഷണ വിദ്യാര്‍ഥികളെ പ്രോത്സാഹിപ്പിക്കുന്നതിന്‍റെ ഭാഗമായി സ്റ്റിജിക്ക് ലഭിച്ച ഈ അംഗീകാരത്തിന്‍റെ നിറവില്‍ ആണ് ക്രൈസ്റ്റ് കോളജ്. കോളജിലെ ഫിസിക്സ് വിഭാഗം അധ്യാപകന്‍ ആയ ഡോ. അജിത്തിന്‍റെ കീഴിലാണ് സ്റ്റിജി ഗവേഷണം നടത്തുന്നത്. കോളജ് പ്രിന്‍സിപ്പല്‍ ഡോ. ഫാ.ജോളി ആന്‍ഡ്രൂസ് അഭിനന്ദനങ്ങള്‍ അര്‍പ്പിച്ച് സംസാരിച്ചു.

കനാലില്‍ കുളിക്കാനിറങ്ങിയ യുവാവിനെ ഒഴുക്കില്‍പ്പെട്ട് കാണാതായി

ഇരിങ്ങാലക്കുട: കനാലില്‍ കുളിക്കാനിറങ്ങിയ യുവാവിനെ ഒഴുക്കില്‍പ്പെട്ട് കാണാതായി. ചളിങ്ങാട് തോട്ടുപറമ്പത്ത് പരേതനായ കരീം മകന്‍ ഷാനവാസി(23)നെയാണ് കാണാതായത്. പടിയൂര്‍ പഞ്ചായത്തിലെ കെഎല്‍ഡിസി കനാലില്‍ കോതറ പാലത്തിനുസമീപം ഇന്നലെ വൈകീട്ട് നാല് മണിയോടെയാണ് സംഭവം. സുഹൃത്തായ കൂരിക്കുഴി സ്വദേശി മജീദിനൊപ്പം കുളിക്കുന്നതിനിടയില്‍ കാല്‍വഴുതി ഒഴുക്കില്‍പെടുകയായിരുന്നു. സംഭവമറിഞ്ഞ് നാട്ടുകാരും ഇരിങ്ങാലക്കുടയില്‍നിന്നു ഫയര്‍ഫോഴ്‌സ് സംഘവും സ്ഥലത്തെത്തി തെരച്ചില്‍ നടത്തിയെങ്കിലും യുവാവിനെ കണ്ടെത്താനായില്ല. തൃശൂരില്‍ നിന്നും സ്‌കൂബ ടീമും കനാലില്‍ തെരച്ചില്‍ നടത്തി. ഇരിങ്ങാലക്കുട ഫയര്‍ സ്റ്റേഷന്‍ ഓഫീസര്‍ കെ.എസ്. ഡിബിന്‍റെ നേതൃത്വത്തിലുള്ള സംഘവും വൈശാഖിന്‍റെ നേതൃത്വത്തിലുള്ള സ്‌കൂബ ടീമും തെരച്ചിലിന് നേതൃത്വം നല്‍കി. കനത്ത മഴയും വെള്ളത്തിന്‍റെ ശക്തമായ അടിയൊഴുക്കും മൂലം തെരച്ചിലിനെ ഏറെ ബാധിച്ചു. രാത്രി എട്ടുമണിയോടെ തെരച്ചില്‍ നിര്‍ത്തിയെങ്കിലും ഇന്നു രാവിലെ ഒമ്പതോടെ വീണ്ടും പുനരാരംഭിക്കും.

പുളിക്കലച്ചിറ ബണ്ട് പൊളിക്കില്ല; വെള്ളം ഒഴുക്കിവിടും

ഇരിങ്ങാലക്കുട: പടിയൂര്‍ പഞ്ചായത്തിലെ രണ്ട് വാര്‍ഡുകളിലെ ജനങ്ങളെ ദുരിതത്തിലാക്കിയ വെള്ളക്കെട്ടിനു പരിഹാരം കാണാനുള്ള അടിയന്തരനടപടികള്‍ തുടങ്ങി. പടിയൂര്‍- പൂമംഗലം പഞ്ചായത്തുകളെ ബന്ധിപ്പിക്കുന്ന പുളിക്കലച്ചിറ പാലംനിര്‍മാണത്തോടനുബന്ധിച്ച് നിര്‍മിച്ചിട്ടുള്ള താത്കാലിക ബണ്ട്റോഡ് നിലനിർത്തി ക്കൊണ്ടുതന്നെ പുളിക്കലച്ചിറ പാടത്തെ അധികജലം ഒഴുക്കിവിടാനുള്ള നിര്‍മാണ പ്രവൃത്തികളാണ് ജില്ലാ ഭരണകൂടത്തിന്‍റെ നിര്‍ദേശമനുസരിച്ച് ആരംഭിച്ചിരിക്കുന്നത്. തോടിന്‍റെ ഇരുവശത്തുമായി ചാലുകള്‍ കീറുന്ന പ്രവൃത്തി പൂര്‍ത്തിയായിക്കഴിഞ്ഞു. ജലത്തിന്‍റെ ഒഴുക്ക് കുറയുന്നതോടെ പൈപ്പുകള്‍ സ്ഥാപിക്കുന്ന പ്രവൃത്തി ഇന്ന് ആരംഭിക്കും. അധികജലം ഒഴുക്കി വിടാനുള്ള നിര്‍മാണ പ്രവര്‍ത്തനങ്ങളോടൊപ്പംതന്നെ അടുത്തമാസം ആരംഭിക്കുന്ന നാലമ്പലദര്‍ശനം സുഗമമാക്കാന്‍ വേണ്ടി താത്കാലിക ബണ്ട് റോഡ് ശക്തിപ്പെടുത്തുന്ന പ്രവൃത്തികളും അടിയന്തരമായി പൂര്‍ത്തീകരിക്കും. ചാലക്കുടി സ്വദേശിയായ ജിന്‍സനാണ് ഇപ്പോള്‍ നടക്കുന്ന നിര്‍മാണ പ്രവര്‍ത്തനങ്ങളുടെ കരാര്‍ എറ്റെടുത്തിരിക്കുന്നത്.

കനോലി കനാൽ കവിഞ്ഞു; തീരദേശം വെള്ളക്കെട്ടിൽ

കയ്പമംഗലം: കനോലി കനാൽ കവിഞ്ഞതോടെ കയ്പമംഗലം, എടത്തിരുത്തി പഞ്ചായത്തുകളിൽ നിരവധി വീടുകൾ വെള്ളക്കെട്ടിലായി. നീരൊഴുക്കു വർധിച്ചതോടെ പുഴകവിഞ്ഞ് വെള്ളം ഒഴുകിയെത്തിയത് ജനങ്ങളെ ദുരിതത്തിലാക്കി. എടത്തിരുത്തി ആറാം വാർഡ് കോഴിത്തുമ്പ്, കയ്പമംഗലം എട്ട്, ഒമ്പത് വാർഡുകളിലെ ചളിങ്ങാട്, കാക്കാത്തിരുത്തി താഴ്‌വാരം എന്നിവിടങ്ങളിലാണ് വെള്ളക്കെട്ട് രൂക്ഷമായിട്ടുള്ളത്. ഈ ഭാഗങ്ങളിലായി ഇരുന്നൂറോളം വീടുകൾ വെള്ളക്കെട്ടിലായി. വീട്ടുകാരിൽ പലരും ബന്ധുവീടുകളിലേക്കും മറ്റും മാറിയിരിക്കുകയാണ്. 14 കുടുംബങ്ങളെ പഞ്ചായത്ത് ദുരിതാശ്വാസക്യാമ്പിലേക്കും മാറ്റിയിട്ടുണ്ട്. ഇവർക്കുവേണ്ട എല്ലാ സൗകര്യവും സഹായവും ചെയ്തിട്ടുണ്ടെന്ന് കയ്പമംഗലം പഞ്ചായത്ത് പ്രസിഡന്‍റ് ശോഭന രവി പറഞ്ഞു. ഇ.ടി. ടൈസൺ എംഎൽഎ, പഞ്ചായത്ത് പ്രസിഡന്‍റ് ശോഭന രവി, പഞ്ചായത്തംഗങ്ങളായ എം.എസ്. സുജിത്ത്, വി.ബി. ഷെഫീഖ് എന്നിവർ വെള്ളക്കെട്ട് പ്രദേശങ്ങൾ സന്ദർശിച്ചു.

തൃശൂരിലെ വനഭൂമിപട്ടയ അപേക്ഷകള്‍ 25നകം സമര്‍പ്പിക്കാൻ നിർദേശം

തൃശൂർ: ജില്ലയിലെ വനഭൂമിപട്ടയത്തിനായി കേന്ദ്രാനുമതിക്കുള്ള അപേക്ഷകള്‍ 25 നകം പരിവേഷ് പോര്‍ട്ടലില്‍ ഉള്‍പ്പെടുത്തി കേന്ദ്ര സര്‍ക്കാരിലേക്ക് അയയ്ക്കാന്‍ മന്ത്രി കെ. രാജന്‍ നിര്‍ദേശം നല്‍കി. സംയുക്തപരിശോധന പൂര്‍ത്തീകരിച്ചിട്ടുള്ള അപേക്ഷകളില്‍ ഓരോ സ്ഥലവും പ്രത്യേകം സര്‍വേ നടത്തി ടോപോ ഷീറ്റിലേക്കു മാറ്റിയാണു പരിവേഷ് പോര്‍ട്ടലിലൂടെ അയയ്ക്കുന്നത്. വിവിധ താലൂക്കുകളിലായി 4,111 അപേക്ഷകളാണ് തയാറാക്കിയിട്ടുള്ളത്. റവന്യൂ മന്ത്രിയുടെ പ്രത്യേക നിര്‍ദേശപ്രകാരം എട്ടു സര്‍വേ ടീമുകള്‍ രൂപീകരിച്ച് പ്രത്യേക വാഹനങ്ങള്‍ ഉള്‍പ്പെടെയുള്ള സൗകര്യങ്ങള്‍ നല്‍കിയാണ് 892.5301 ഹെക്ടര്‍ ഭൂമി അളന്ന് പ്രത്യേകം സ്കെച്ചുകള്‍ തയാറാക്കിയത്. പ്രത്യേക ഓഫീസും അനുവദിച്ചിരുന്നു. തൃശൂര്‍ -1590, തലപ്പിള്ളി -1,643, ചാലക്കുടി -1,430, കുന്നംകുളം -19, മുകുന്ദപുരം -57 എന്നിങ്ങനെയാണ് ഇപ്പോള്‍ അയയ്ക്കുന്ന അപേക്ഷകള്‍. 230 പട്ടയങ്ങള്‍ എൽഎ നമ്പർ ഒന്ന് ഓഫീസില്‍ വിതരണത്തിനു തയാറായിട്ടുണ്ട്. 359 പട്ടയഫയലുകളിലുള്ള നടപടികള്‍ അന്തിമഘട്ടത്തിലാണെന്നു മന്ത്രി പറഞ്ഞു. വിവരശേഖരണത്തില്‍ ജില്ലയില്‍ ലഭിച്ച 8,355 അപേക്ഷകളില്‍ സംയുക്തപരിശോധന വേഗത്തിൽ പൂർത്തിയാക്കി നടപടികള്‍ ആരംഭിക്കാനും മന്ത്രി നിര്‍ദേശം നല്‍കി. യോഗത്തില്‍ ലാൻഡ് റവന്യൂ ജോയിന്‍റ് കമ്മീഷണര്‍ എ. ഗീത, ജില്ലാ കളക്ടര്‍ അര്‍ജുന്‍ പാണ്ഡ‍്യന്‍, റവന്യൂ അഡീഷണല്‍ സെക്രട്ടറി അനു എസ്. നായര്‍, എല്‍.ആര്‍. ഡെപ്യൂട്ടി കളക്ടര്‍ ജ്യോതി, ഡെപ്യൂട്ടി കളക്ടര്‍ രാജേഷ്, തഹസില്‍ദാര്‍മാര്‍ തുടങ്ങിയവര്‍ പങ്കെടുത്തു.

കള്ളക്കേസെടുക്കുന്ന വനംവകുപ്പ് ഉദ്യോഗസ്ഥർക്കെതിരേ നടപടി എടുക്കണം: കേരള കോൺഗ്രസ് -എം

തൃശൂർ: വനം - വന്യജീവിനിയമങ്ങളിലെ കർശനവ്യവസ്ഥകൾ ഉൾപ്പെടുത്തി കള്ളക്കേസെടുത്ത് ജനങ്ങളെ ദ്രോഹിക്കുന്ന വനംവകുപ്പ് ഉദ്യോഗസ്ഥർക്കെതിരേ കർശനനിയമനടപടികൾ സ്വീകരിക്കണമെന്നു കേരള കോണ്‍ഗ്രസ്‌ -എം ജില്ലാ നേതൃയോഗം ആവശ്യപ്പെട്ടു. വ്യക്തമായ തെളിവുകളും ലബോറട്ടറി പരിശോധനാഫലങ്ങളുമില്ലാതെ വനം വകുപ്പ് ഉദ്യോഗസ്ഥർ കേസെടുത്ത് ജനങ്ങളെ ജയിലിലടയ്ക്കുന്നത് അംഗീകരിക്കാനാവില്ലെന്നും വ്യക്തമാക്കി. സംസ്ഥാന ജനറൽ സെക്രട്ടറി അഡ്വ. ജോസ് ജോസഫ് ഉദ്ഘാടനം ചെയ്തു. ജില്ലാ പ്രസിഡന്‍റ് ഉണ്ണികൃഷ്ണൻ ഈച്ചരത്ത് അധ്യക്ഷത വഹിച്ചു. സംസ്ഥാന ഉന്നതാധികാരസമിതി അംഗം സെബാസ്റ്റ്യൻ ചൂണ്ടൽ, സംസ്ഥാന സ്റ്റിയറിംഗ് കമ്മിറ്റി അംഗങ്ങളായ ബേബി മാത്യു കാവുങ്കൽ, ഡെന്നീസ് ആന്‍റണി, സെക്രട്ടേറിയറ്റ് അംഗം അഡ്വ. പി.ഐ. മാത്യു, ജില്ലാ സെക്രട്ടറിമാരായ ബേബി നെല്ലിക്കുഴി, ജിമ്മി വർഗീസ്, ബിജു ആന്‍റണി, നിയോജകമണ്ഡലം പ്രസിഡന്‍റുമാരായ വി.എം. മാണി, ജോസ് മുതുകാട്ടിൽ, സി.ടി. ബാബു, ബിനിൽ പ്രതാപൻ, ബെന്നി ചെറുവത്തൂർ, ജില്ലാ ഐടി കോ- ഓർഡിനേറ്റർ സാംസണ്‍ ചിരിയങ്കണ്ടത്ത് തുടങ്ങിയവർ പ്രസംഗിച്ചു.

ചങ്ങമ്പുഴ അനുസ്മരണവും സാഹിത്യസംഗമവും

തൃശൂർ: കവി ചങ്ങമ്പുഴയുടെ 77-ാം ചരമവാർഷികദിനത്തിൽ നടത്തിയ അനുസ്മരണവും സാഹിത്യസംഗമവും കവി ആലങ്കോട് ലീലാകൃഷ്ണൻ ഉദ്ഘാടനം ചെയതു. സദ്ഭാവന ബുക്സ് എഡിറ്റർ സുനിൽ മടപ്പള്ളി അധ്യക്ഷത വഹിച്ചു. ഡോ. എസ്.കെ. വസന്തൻ മുഖ്യപ്രഭാഷണവും മഹാത്മാഗാന്ധി യൂണിവേഴ്സിറ്റി സ്കൂൾ ഓഫ് ലെറ്റേഴ്സ് ഡയറക്ടർ ഡോ. ഹരികുമാർ ചങ്ങമ്പുഴ അനുസ്മരണവും നിർവഹിച്ചു. ചങ്ങമ്പുഴ അനുസ്മരണസമിതി,സദ്ഭാവന ബുക്സ്, പഞ്ചാക്ഷരം ബുക്സ് എന്നിവയുടെ ആഭിമുഖ്യത്തിലായിരുന്നു പരിപാടി. ഡോ. പി.വി. കൃഷ്ണൻനായരും എം.എസ്. ബാലകൃഷ്ണനും ചങ്ങമ്പുഴയുടെ കവിതകളെക്കുറിച്ച് പ്രഭാഷണം നടത്തി. പഞ്ചാക്ഷരം ബുക്സ് എഡിറ്റർ ഇ.ആർ. ഉണ്ണി, ഗിന്നസ് സത്താർ ആദൂർ, രമ്യ ബാലകൃഷ്ണൻ, ചങ്ങമ്പുഴ സാഹിതി പുരസ്കാരജേതാവ് കാവല്ലൂർ മുരളീധരൻ എന്നിവർ പ്രസംഗിച്ചു. ചടങ്ങിൽ ചങ്ങമ്പുഴ സ്മാരക പുരസ്കാരങ്ങൾ ആലങ്കോട് ലീലാകൃഷ്ണൻ സമ്മാനിച്ചു. ചങ്ങമ്പുഴക്കവിതകളുടെ ആലാപനവും ഗീത മേലേഴത്ത് അവതരിപ്പിച്ച ചങ്ങമ്പുഴക്കവിത വാഴക്കുലയുടെ നൃത്താവിഷ്കാരവുമുണ്ടായി.

പോലീസ് ചോദിക്കും, ഉത്തരം പറഞ്ഞോണം

തൃശൂർ: പോലീസ് ചോദിക്കും, ഉത്തരം പറഞ്ഞോണം. ലഹരിവിരുദ്ധദിനത്തോടനുബന്ധിച്ച് ഈ മാസം 21നു തൃശൂർ സിറ്റി പോലീസാണ് വിദ്യാർഥികൾക്കും അവരുടെ രക്ഷിതാക്കൾക്കുമായി ക്വിസ് മത്സരം സംഘടിപ്പിക്കുന്നത്. മക്കളും രക്ഷിതാക്കളും ഒരുമിച്ച് അണിനിരക്കുന്ന ക്വിസ് മത്സരം എന്ന പ്രത്യേകതയാണ് ഇതിനുള്ളത്. ലഹരിയുടെ ഉന്മൂലനം നമുക്കു വീട്ടിൽനിന്നും തുടങ്ങാം എന്ന ഓർമപ്പെടുത്തലോടെയായിരിക്കും ക്വിസ് മത്സരം തുടങ്ങുക. ജില്ലയിലെ ഹൈസ്കൂൾ, ഹയർസെക്കൻഡറി, കോളജ് വിദ്യാർഥികൾക്കും അവരുടെ രക്ഷിതാക്കൾക്കും ക്വിസ് മത്സരത്തിൽ പങ്കെടുക്കാം. ആനുകാലികപൊതുവിജ്ഞാനവുമായി ബന്ധപ്പെട്ട ചോദ്യങ്ങൾ ഉൾപ്പെടുത്തിക്കൊണ്ടുള്ളതാണ് മത്സരം. 21നു രാവിലെ പത്തിനു ശക്തൻനഗറിലെ തൃശൂർ സിറ്റി പോലീസ് മേധാവിയുടെ ഓഫീസിനു സമീപമുള്ള ട്രെയിനിംഗ് സെന്‍ററിലാണ് മത്സരം. രജിസ്റ്റർ ചെയ്യുന്ന ആദ്യ മുപ്പതു പേർക്കാണ് അവസരം. ഫോൺ: 9497975510.

ജൂബിലിയിൽ ഔഷധ കഞ്ഞിക്കൂട്ട് ഉദ്ഘാടനം

തൃശൂർ: ജൂബിലി ആയുർവേദ മിഷൻ ആശുപത്രി പുറത്തിറക്കുന്ന ഔഷധക്കഞ്ഞിക്കൂട്ടിന്‍റെ ഉദ്ഘാടനം രാമവർമപുരം ജൂബിലി ആയുർവേദ കാന്പസിൽ അതിരൂപത മെത്രാപ്പോലീത്ത മാർ ആൻഡ്രൂസ് താഴത്ത് നിർവഹിച്ചു. ഫാ. ഫ്രാൻസിസ് പള്ളിക്കുന്നത്ത്, ജൂബിലി മിഷൻ ആശുപത്രി ഡയറക്ടർ ഫാ. റെന്നി മുണ്ടൻകുരിയൻ, ചീഫ് എക്സിക്യൂട്ടീവ് ഓഫീസർ ഡോ. ബെന്നി ജോസഫ് നീലങ്കാവിൽ, റിസർച്ച് ഡയറക്ടർ ഡോ. ഡി.എം. വാസുദേവൻ, ഫാ. സനോജ് അറങ്ങാശേരി, ആയുർവേദ ചീഫ് കണ്‍സൾട്ടന്‍റ് സിസ്റ്റർ ഡോ. ഡൊണാറ്റ, ഡോ. ഹാർവിൻ ജോർജ്, സ്റ്റാഫ് അംഗങ്ങൾ എന്നിവർ പങ്കെടുത്തു. ജൂബിലി ആയുർവേദ ഫാർമസിയിൽ കഞ്ഞിക്കിറ്റ് ലഭിക്കും.

എലിപ്പനിമരണങ്ങൾ കൂടുന്നു; ജാഗ്രത

തൃശൂർ: എലിപ്പനിമരണങ്ങൾ കൂടുന്നു. ജാഗ്രത വേണമെന്നും സ്വയംചികിത്സ പാടില്ലെന്നും ആരോഗ്യവകുപ്പിന്‍റെ മുന്നറിയിപ്പ്. ഒന്നരമാസം പിന്നിടുന്പോഴേക്കും ജില്ലയിൽ 21 പേർക്കാണ് എലിപ്പനി ബാധിച്ചത്. 26 പേർ രോഗലക്ഷണങ്ങളോടെ ചികിത്സതേടിയപ്പോൾ നാലു മരണങ്ങളും റിപ്പോർട്ട് ചെയ്തിട്ടുണ്ട്. ഈ വർഷം ഇതുവരെ എട്ടു മരണങ്ങൾ റിപ്പോർട്ട് ചെയ്തപ്പോൾ മേയ് മാസംമാത്രം മൂന്നുമരണമാണ് റിപ്പോർട്ട് ചെയ്തിട്ടുള്ളത്. മേയിൽ 16 പേർക്കും ഈ മാസം അഞ്ചുപേർക്കും എലിപ്പനി സ്ഥിരീകരിച്ചപ്പോൾ കഴിഞ്ഞമാസം 14 പേരും ഈ മാസം 12 പേരും രോഗലക്ഷണങ്ങളോടെ ചികിത്സ തേടി. മുൻവർഷങ്ങളെ അപേക്ഷിച്ച് എലിപ്പനിയുടെ എണ്ണത്തിൽ കാര്യമായ വർധന രേഖപ്പെടുത്തിയിട്ടില്ലെങ്കിലും മരണങ്ങൾ വർധിക്കുന്നതായാണ് റിപ്പോർട്ട്. ജില്ലയുടെ എല്ലാ ഭാഗങ്ങളിലും എലിപ്പനി റിപ്പോർട്ട് ചെയ്യുന്നുണ്ട്. എലിപ്പനി വരുംവഴി എലി, പട്ടി, പൂച്ച, കന്നുകാലികൾ തുടങ്ങിയവയുടെ മൂത്രവും വിസർജ്യങ്ങളുംവഴി പകരുന്ന രോഗമാണ് എലിപ്പനി. ഇവയുടെ മൂത്രവും വിസർജ്യവുംവഴി മണ്ണിലും വെള്ളത്തിലും എത്തുന്ന രോഗാണുക്കൾ മുറിവുകൾവഴി ശരീരത്തിൽ എത്തിയാണ് രോഗം ഉണ്ടാകുന്നത്. ലക്ഷണങ്ങൾ * ക്ഷീണത്തോടെയുള്ള പനി, തലവേദന, പേശിവേദന. * കണ്ണിൽ ചുവപ്പ്. * മൂത്രക്കുറവ്. * മഞ്ഞപ്പിത്തലക്ഷണങ്ങളും കണ്ടേക്കാം. മുൻകരുതൽ വേണം * കാർഷികപ്രവൃത്തികളിലോ ശുചീകരണപ്രവർത്തനങ്ങളിലോ ഏർപ്പെടുന്നവർ കട്ടിയുള്ള ഗംബൂട്ടുകൾ, കൈയുറകൾ എന്നിവ ധരിക്കുക. * കൈകാലുകളിലും മറ്റു ശരീരഭാഗങ്ങളിലും മുറിവുള്ളവർ മുറിവ് ഉണങ്ങുന്നതുവരെ ഇത്തരം പ്രവർത്തനങ്ങളിൽ ഏർപ്പെടരുത്. * ഡോക്സിസൈക്ലിൻ ഗുളികകൾ ആരോഗ്യപ്രവർത്തകരുടെ നിർദേശാനുസരണം കഴിക്കുക. * കെട്ടിക്കിടക്കുന്ന വെള്ളത്തിൽ ഇറങ്ങുന്നത് കഴിവതും ഒഴിവാക്കുക. * സംഭരണടാങ്കുകളിലെ ജലത്തിൽ എലിക്കാഷ്ഠം, മൂത്രം എന്നിവ വീഴുന്നില്ല എന്ന് ഉറപ്പുവരുത്തുക. മഞ്ഞപ്പിത്തമാണെന്നു കരുതരുത്: ഡിഎംഒ എലിപ്പനിക്കു മഞ്ഞപ്പിത്തരോഗലക്ഷണങ്ങൾ കൂടി കാണിക്കുമെന്നുള്ളതിനാൽ മഞ്ഞപ്പിത്തം ആണെന്നു തെറ്റിദ്ധരിക്കരുതെന്നും നാടൻചികിത്സകളും മറ്റും ചെയ്യുന്നത് അപകടകരമാണെന്നും ഡിഎംഒ ടി.പി. ശ്രീദേവി പറഞ്ഞു. രോഗലക്ഷണങ്ങൾ കണ്ടാൽ ഉടൻ വൈദ്യസഹായം തേടുക. സ്വയം ചികിത്സ ചെയ്യരുത് . പനിയോ മറ്റു രോഗലക്ഷണങ്ങളുമായോ ചികിത്സതേടുന്പോൾ മലിനജലവുമായി സന്പർക്കമുണ്ടായിട്ടുണ്ടെങ്കിൽ അത് ആരോഗ്യപ്രവർത്തകരെ പ്രത്യേകം അറിയിക്കുക.

വാതില്‍മാടം; സംരക്ഷണഭിത്തി നിര്‍മിക്കാന്‍ 50 ലക്ഷം അനുവദിച്ച് സുരേഷ് ഗോപി

ഇരിങ്ങാലക്കുട: വാതില്‍മാടം സങ്കേതത്തിലെ വീടുകള്‍ക്കു ഭീഷണിയായ കുന്നില്‍നിന്നുള്ള മണ്ണിടിച്ചില്‍ ഒഴിവാക്കാന്‍ സംരക്ഷണഭിത്തി നിര്‍മിക്കാന്‍ 50 ലക്ഷം രൂപ അനുവദിച്ച് കേന്ദ്രമന്ത്രി സുരേഷ് ഗോപി. മണ്ണിടിച്ചില്‍ നേരിടുന്ന വാതില്‍മാടം സങ്കേതം സന്ദര്‍ശിക്കവേ അപകടഭീഷണി ഉയര്‍ത്തുന്ന കുന്ന് കണ്ടാണ് സുരേഷ് ഗോപി അതിനാവശ്യമായ തുക അനുവദിക്കാമെന്ന് ഉറപ്പുനല്‍കിയത്. അടുത്ത ദിവസംതന്നെ ജില്ലാ കളക്ടറും പ്ലാനിംഗ് ഓഫീസറുമായി ബന്ധപ്പെട്ട് തുക അനുവദിക്കാനുള്ള നടപടി കൈക്കൊള്ളാന്‍ ഒപ്പമുണ്ടായിരുന്ന പേഴ്സണല്‍ സ്റ്റാഫുകള്‍ക്കു മന്ത്രി നിര്‍ദേശം നല്‍കി. നേരത്തേ കുന്നിടിച്ചില്‍ ഒഴിവാക്കാന്‍ എംഎല്‍എയായിരുന്ന പ്രഫ.കെ.യു. അരുണന്‍ 68 ലക്ഷം അനുവദിച്ചിരുന്നെങ്കിലും നടപടിയൊന്നുമായില്ലെന്നു സമീപവാസികള്‍ ശ്രദ്ധയില്‍പ്പെടുത്തിയപ്പോഴാണ് സുരേഷ് ഗോപി ആവശ്യമായ തുക അനുവദിക്കാന്‍ നിര്‍ദേശം നല്‍കിയത്. എന്നാല്‍, എംപി ഫണ്ടില്‍നിന്ന് 50 ലക്ഷംമാത്രമേ അടിയന്തരമായി അനുവദിക്കാന്‍ കഴിയുകയുള്ളൂവെന്ന് ഉദ്യോഗസ്ഥര്‍ പറഞ്ഞപ്പോള്‍ ബാക്കി തുക നോക്കാമെന്നും സുരേഷ് ഗോപി പറഞ്ഞു. ഇതിലെന്തെങ്കിലും തടസങ്ങളുണ്ടെങ്കില്‍ പരിഹരിക്കാനും പദ്ധതി യാഥാര്‍ഥ്യമാക്കാനും ഒപ്പമുണ്ടായിരുന്ന നേതാക്കളോടു മന്ത്രി ആവശ്യപ്പെട്ടു. പ്രദേശത്തെ വീട്ടുകാരെ സംരക്ഷിക്കാന്‍ നഗരസഭയും എംഎല്‍എയും ഇടപെടണമെന്നും അതിന് എല്ലാ സഹായങ്ങളും ചെയ്യാന്‍ താന്‍ സന്നദ്ധനാണെന്നും സുരേഷ് ഗോപി പറഞ്ഞു.

നാട്ടികയിൽ കടലേറ്റം രൂക്ഷം ; വിനോദസഞ്ചാരകേന്ദ്രത്തിന്‍റെ 30 കുടിലുകൾ കടലെടുത്തു

തൃപ്രയാർ: കനത്ത മഴയും കാറ്റും നാട്ടികയിൽ കടലേറ്റം രൂക്ഷമാക്കി. വിനോദസഞ്ചാരികൾക്കായി നിർമിച്ച കുടിലുകൾ കടലെടുത്തു. നാട്ടിക ബീച്ച് റിസോർട്ടിനു സമീപമാണ് കടലേറ്റം രൂക്ഷമായിട്ടുള്ളത്. ഇവിടെ വിനോദ സഞ്ചാരികൾക്കായി നിർമിച്ച മുപ്പതോളം കുടിലുകളും സമീപപ്രദേശങ്ങളിലെ തെങ്ങുകളും കടലെടുത്തു. കുഴിപ്പൻതിരമാലകളാണു നാശത്തിനു കാരണമായതെന്ന് സമീപവാസികൾ പറയുന്നു. കുറച്ചുകാലങ്ങൾക്കുമുമ്പ് ഈ പ്രദേശത്ത് കുഴിപ്പൻതിരമാലകൾ കാരണം 20 മീറ്ററോളം കടലെടുത്തുപോയിരുന്നു. ഇതിനോടൊപ്പം നിരവധി കാറ്റാടിമരങ്ങളും തെങ്ങുകളും കടപുഴകി നശിച്ചിരുന്നു. മഴക്കെടുതി: ജില്ലയിൽ ദുരിതാശ്വാസ ക്യാമ്പുകൾ 22 ആയി തൃശൂർ: ജില്ലയിൽ മഴയുടെ ശക്തി ചെറുതായി കുറഞ്ഞെങ്കിലും ഇടവിട്ടു ശക്തമായ മഴ പലയിടത്തും പെയ്തു. ദുരിതാശ്വാസ ക്യാമ്പുകളുടെ എണ്ണം കൂടി. നിലവിൽ 22 ദുരിതാശ്വാസക്യാമ്പുകൾ പ്രവർത്തിക്കുന്നുണ്ട്. 197 കുടുംബങ്ങളാണ് ക്യാമ്പുകളിലുള്ളത്. ആകെ 550 പേരിൽ 175 പുരുഷൻമാരും 247 സ്ത്രീകളും 128 കുട്ടികളുമുണ്ട്.

വാഹനാപകടത്തില്‍ പരിക്കേറ്റയാൾ മരിച്ചു

കയ്പമംഗലം: വാഹനാപകടത്തില്‍ പരിക്കേറ്റ് ചികിത്സയിലിരുന്നയാള്‍ മരിച്ചു. മതിലകം ഒന്നാംകല്ല് വടക്ക് കൈതക്കാട്ട് ഷോബി(53) ആണ് മരിച്ചത്. ഞായറാഴ്ച രാത്രി ഒമ്പതരയോടെ പടിഞ്ഞാറെ ടിപ്പുസുല്‍ത്താന്‍ റോഡില്‍ പടിഞ്ഞാറെ വെമ്പല്ലൂര്‍ അസ്മാബി കോളജിനടുത്ത് ബൈക്കുകള്‍ കൂട്ടിയിടിച്ചാണ് അപകടം. ഗുരുതരമായി പരിക്കേറ്റതിനെ തുടര്‍ന്ന് കൊടുങ്ങല്ലൂരിലെ സ്വകാര്യ ആശുപത്രിയില്‍ ചികിത്സയിലിരിക്കെ ഇന്നലെ പുലര്‍ച്ചെയാണ് മരിച്ചത്. അസ്മാബി കോളേജിനടുത്ത് പച്ചക്കറി കടയിലെ തൊഴിലാളിയായിരുന്നു. അപകടത്തില്‍ പരിക്കേറ്റ മറ്റ് മൂന്നു പേരും ചികിത്സയിലാണ്. സംസ്കാരം നടത്തി. ഭാര്യ: സീന. മക്കൾ: ആദിൽ മാധവ്, അഞ്ജന (സെന്‍റ് ജോസഫ് ഹയർ സെക്കൻഡറി സ്കൂൾ പ്ലസ് വൺ വിദ്യാർഥിനി).

യുവാവ് വീടിനുള്ളിൽ മരിച്ചനിലയിൽ

കയ്പമംഗലം: പെരിഞ്ഞനത്ത് യുവാവിനെ വീടിനുള്ളിൽ മരിച്ചനിലയിൽ കണ്ടെത്തി. ചക്കരപ്പാടം പടിഞ്ഞാറ് ഏറാട്ട് വീട്ടിൽ വാസുവിന്‍റെ മകൻ വിനീഷ്(41) ആണ് മരിച്ചത്. കുറച്ചുദിവസമായി വീട്ടിൽ തനിച്ചായിരുന്ന വിനീഷിനെ പുറത്തുകാണാതായതിനെ തുടർന്ന് ബന്ധുക്കളെത്തി വാതിൽ തുറന്നുനോക്കിയപ്പോൾ അടുക്കളഭാഗത്ത് മരിച്ചനിലയിൽ കണ്ടത്. വിനീഷും അമ്മയുമാണ് വീട്ടിൽ താമസിച്ചിരുന്നത്. അമ്മ വീട്ടിലുണ്ടായിരുന്നില്ല. കയ്പമംഗലം പോലീസ് സ്ഥലത്തെത്തി മേൽനടപടികൾ സ്വീകരിച്ചു.

മൃതദേഹം തിരിച്ചറിഞ്ഞു

വെള്ളിക്കുളങ്ങര: മുപ്ലിവനത്തില്‍ കണ്ടെത്തിയ മൃതദേഹം വൃദ്ധമന്ദിരത്തില്‍ നിന്ന് കാണാതായ വര്‍ഗീസ്(63) എന്നയാളുടേതാണെന്ന് തിരിച്ചറിഞ്ഞതായി പോലീസ് അറിയിച്ചു. മുപ്ലിയിലുള്ള പിതൃഭവന്‍ വൃദ്ധമന്ദിരത്തിലെ അന്തേവാസിയായ വർഗീസിനെ ഒരു മാസം മുമ്പാണ് കാണാതായത്. മരണകാരണം പരിശോധനകള്‍ക്കുശേഷം മാത്രമേ വ്യക്തമാകൂ. തൃശൂര്‍ മെഡിക്കല്‍ കോളജില്‍ പോസ്റ്റുമോര്‍ട്ടത്തിനു ശേഷം മൃതദേഹം ബന്ധുക്കള്‍ക്ക് വിട്ടുനല്‍കി.

യുവതി തീകൊളുത്തി മരിച്ചനിലയിൽ

ചാലക്കുടി: പരിയാരത്ത് യുവതിയെ തീകൊളുത്തി മരിച്ചനിലയിൽ കണ്ടെത്തി. പരിയാരം സെന്‍റ് ജോർജ് പള്ളിക്കു സമീപം കരേടത്ത് വീട്ടിൽ ഷാജു ഭാര്യ സിമി(45)യാണ് മരിച്ചത്. ഇന്നലെ വൈകീട്ട് 5.45 നായിരുന്നു സംഭവം. വീട്ടിലെ മുകളിലെ കിടപ്പുമുറിയിൽ മണ്ണെണ്ണയൊഴിച്ച് തീ കൊളുത്തുകയായിരുന്നുവെന്ന് പറയുന്നു. സിമി നാലുമാസം മുമ്പ് ഇസ്രയേലിൽ ഹോം നഴ്‌സ് ആയി ജോലിക്ക് പോയിരുന്നു. ജോലി ശരിയാവാത്തതിനെ തുടർന്ന് ഒരാഴ്ച്ച മുമ്പ് വീട്ടിൽ തിരിച്ചെത്തിയതാണ്. വിവരമറിഞ്ഞ് ഫയർഫോഴ്സും പോലീസും സ്ഥലത്തെത്തി.

വീട്ടമ്മ ട്രെയിൻതട്ടി മരിച്ചു

മുരിങ്ങൂർ: റെയിൽവേ ട്രാക്ക് മുറിച്ചു കടക്കവെ വീട്ടമ്മ ട്രെയിൻതട്ടി മരിച്ചു. പറമ്പിക്കാടൻ സുകുമാരൻ ഭാര്യ മണി(63) ആണ് മരിച്ചത്. ഇന്നലെ രാവിലെ പത്തോടെയായിരുന്നു സംഭവം. ഉടൻ ചാലക്കുടിയിലെ സ്വകാര്യ ആശുപത്രിയിൽ എത്തിച്ചെങ്കിലും മരണം സംഭവിച്ചു. ഇരുട്രാക്കുകളിൽ നിന്നും ട്രെയിൻ വരുന്നത് കണ്ട് പെട്ടെന്ന് ഒഴിഞ്ഞു മാറുന്നതിനിടെയായിരുന്നു അപകടം. സംസ്കാരം നടത്തി. മക്കൾ: മിഥുൻരാജ്, സുമ. മരുമകൻ: സുധീർ.

നൂറുകണക്കിനു വീടുകൾ, റോഡുകള്‌ വെള്ളത്തിൽ

കടൽക്ഷോഭം രൂക്ഷം ചാവക്കാട്: കാറ്റും മഴയും ശക്തമായതിന് പിന്നാലെ കടൽക്ഷോഭവും രൂക്ഷമായി. കടപ്പുറം പഞ്ചായത്തിന്‍റെ തീരമേഖലയായ തൊട്ടാപ്പ് മുതൽ അഴിമുഖംവരെയുള്ള പ്രദേശങ്ങളിലാണ് ചെറിയൊരു ഇടവേളയ്ക്കുശേഷം വീണ്ടും കടലാക്രമണം രൂക്ഷമായത്. കടൽ ആഞ്ഞടിക്കുകയാണ്. ഭിത്തി തകർന്ന സ്ഥലത്തും ഭിത്തിയുള്ള സ്ഥലത്തും കടൽ കരയ്ക്ക് കയറുന്നു. തീരവാസികൾ നിസഹയരാണ്. മഴ അൽപം മാറിനിൽക്കുന്നുണ്ടെങ്കിലും ഇടവിട്ട് കറ്റോടുകൂടിയ മഴ പെയ്യുന്നതിനാൽ വെള്ളക്കെട്ടിന് കാര്യമായ കുറവ് വന്നിട്ടില്ല. പുന്ന പേരകം, വഞ്ചിക്കടവ്, തെക്കഞ്ചേരി തുടങ്ങി പ്രദേശങ്ങൾ വെള്ളക്കെട്ടിൽതന്നെ. ഇവിടെനിന്ന് പല വീട്ടുകാരും ബന്ധുവീടുകളിലേക്കും കടപ്പുറത്തെ ഷെൽട്ടറിലേക്കുംമാറി. ദേശീയപാത 66 നിർമാണത്തിന്‍റെ ഭാഗമായി വില്യം സിൽപാലം പണിയുന്നതിനായി കനോലി കനാൽ ഭാഗികമായി നികത്തിയിടത്തുനിന്ന് മൂന്ന് മീറ്റർ വീതിയിൽ മണൽ നീക്കിയതിനെ തുടർന്ന് ചെറിയതോതിൽ വെള്ളം ഒഴിയുന്നുണ്ട്. പുന്നപ്രദേശം ഒറ്റപ്പെട്ട നിലയിലാണ്. ഇവിടത്തുകാർക്ക് പുറത്തുപോകാനുളള മുക്കുട്ട, കോഴിക്കുളങ്ങര, കോഴിത്തറ, പുതിയറ എന്നീ നാലു റോഡുകളും വെള്ളക്കെട്ടിൽ മുങ്ങി. ദ്വീപിൽ അകപ്പെട്ട അവസ്ഥയിലാണ് പുന്നകാർ. കനോലി കനാലിനോടുചേർന്ന് കിടക്കുന്ന പ്രദേശത്തെ വെള്ളം കനാലിലേക്കാണ് ഒഴുകിയിരുന്നത്. കനാൽ കരകവിഞ്ഞതിനാൽ ഒഴുക്ക് നിലച്ചതാണ് പുന്ന, പേരകം സ്വദേശികളെ ദുരിതത്തിലാക്കിയത്. ദേശീയപാത നിർമാണത്തിന്‍റെ ഭാഗമായി പുന്നയൂർക്കുളം മന്ദലാംകുന്നിൽ വെള്ളക്കെട്ടിൽ കുടുങ്ങിയ 15 വീട്ടുകാരുടെ പ്രശ്നം പരിഹരിക്കാൻ ഇന്ന് 3.30ന് ചാവക്കാട് റസ്റ്റ് ഹൗസിൽ ചർച്ചയുണ്ട്. എന്നാൽ മലപ്പുറം ജില്ലയിലെ വെളിയങ്കോട് ലോക്ക് കം ബ്രിഡ്ജിന്‍റെ നിർമാണത്തിനായി കനോലി കനാലിൽ തടയണ കെട്ടിയതിനെ തുടർന്ന് തൃശൂർ, മലപ്പുറം ജില്ലകളിലായി നൂറുകണക്കിന് വീടുകൾ വെള്ളത്തിലാണ്. കനാലിന്‍റെ ഇരുകരയിലായി കിലോമീറ്ററുകൾ ദൂരത്തിൽ വെള്ളക്കെട്ടാണ്. ജില്ലയിലെ പുന്നയൂർ, എടക്കര, പുന്നയൂർക്കുളം, മല്ലാട്, പനന്തറ, അണ്ടത്തോട് തുടങ്ങിയ പ്രദേശങ്ങൾ വെള്ളത്തിലായി ഒട്ടേറെ വീട്ടുകാർ താമസംമാറി. കനാലിലെ തടയണ പൊളിക്കണമെന്നാണ് നാട്ടുകാരുടെ ആവശ്യം. എന്നാൽ നിർമാണം തടസപ്പെടുമെന്നും വേഗത്തിൽ പണി പൂർത്തികരിക്കാമെന്ന നിലപാടിലാണ് കരാറുകാരൻ പറയുന്നത്. മഴ തുടർന്നാൽ കനാൽ തീരത്തെ സ്ഥിതി വഷളാകുമെന്ന് തീരവാസികൾ ചൂണ്ടിക്കാട്ടുന്നു. റോഡിൽ വെള്ളംകയറി ചേർപ്പ്: കനത്ത മഴയെ തുടർന്ന് പള്ളിപ്പുറം ആലപ്പാട് റോഡിൽ വെള്ളംകയറി. ഇരുഭാഗങ്ങളിലെ കോൾപടവുകളിൽനിന്ന് വെള്ളം റോഡിലേക്ക് കവിഞ്ഞതിനെ തുടർന്നാണ് വെള്ളക്കെട്ട് രൂപപ്പെട്ടിരിക്കുന്നത്. പാലക്കലിൽ നിന്ന് അമ്മാടം, പള്ളിപ്പുറം, പുള്ള്, മനക്കൊടി, തൃപ്രയാർ ഭാഗങ്ങളിലേക്ക് പോകുന്ന വഴികൂടിയാണിത്. മഴ തുടർന്നാൽ വാഹനഗതാഗതവും തടസപ്പെടുന്ന അവസ്ഥയിലാണ്. സ്കൂളിനു മുകളിലേക്ക് മരക്കൊമ്പ് പൊട്ടിവീണു എരുമപ്പെട്ടി: വെള്ളറക്കാട് വിവേകസാഗരം യുപി സ്കൂളിലെ ക്ലാസ് മുറിയുടെ മുകളിലേക്ക് മരക്കൊമ്പ് പൊട്ടിവീണ് ഓടുകൾ തകർന്നു. ഇന്നലെ പുലർച്ചെയുണ്ടായ ശക്തമായ കാറ്റിലും മഴയിലുമാണ് തേക്ക് മരത്തിന്‍റെ കൊമ്പ് പൊട്ടിവീണത്. ഒന്ന്, രണ്ട് ക്ലാസുകളുടെ മുകളിലേക്കാണ് മരക്കൊമ്പ് വീണത്. പുലർച്ചെയായതിനാൽ വൻ അപകടം ഒഴിവായി. മേൽക്കൂരയിലെ ഓടുകൾ തകർന്നു. തൊട്ടടുത്തപറമ്പിൽ നിന്നിരുന്ന ഉണങ്ങിയ മരവും സ്കൂളിലേക്ക് വീണു. മരംവീണ് വീടുതകർന്നു പുന്നംപറമ്പ്: കഴിഞ്ഞദിവസമുണ്ടായ ശക്തമായ കാറ്റിലും മഴയിലും മരം വീണു വീടുതകർന്നു. തെക്കുംകര വിരുപ്പാക്ക നമ്പ്രത്ത്‌ വ‌‌ീട്ടിൽ തങ്കമ്മയുടെ വീടിനു മുകളിലേക്കാണ് വലിയപുളിമരം കാറ്റിൽവീണത്. അർധരാത്രിയിലായിരുന്നു സംഭവം. വീട്ടിൽ ഉറങ്ങുകയായിരുന്നവർ തലനാരിഴയ്ക്കാണ് രക്ഷപ്പെട്ടത്. തങ്കമ്മയും മരുമകൾ പ്രീതയും രണ്ടു മക്കളുമാണ് വീട്ടിൽ ഉണ്ടായിരുന്നത്. ഓട് തലയിൽവീണ് രണ്ടുപേർക്ക് ചെറിയ പരിക്കേറ്റു. വീടിന്‍റെ മേൽക്കൂര പൂർണമായി തകർന്നു. മകൻ വിനോദ് ജോലിസ്ഥലത്തായിരുന്നു. മഴയില്‌ വീട് തകർന്നു പാവറട്ടി: ശക്തമായ കാറ്റിലും മഴയിലും പാവറട്ടിയിൽ വീടുതകർന്നു. പാവറട്ടി പഞ്ചായത്തിലെ വെൻമേനാട് ആശുപത്രിപടിക്കുസമീപം താമസിക്കുന്ന കെ. ദേവദാസിന്‍റെ വീടാണ് മഴയിൽ തകർന്നത്. വീടിന്‍റെ മണ്ണുകൊണ്ട് നിർമിച്ച ചുമര് മഴയിൽ തകർന്നുവീണു. ഓടിട്ട വീടിന്‍റെ മേൽക്കൂരയിലെ കഴുക്കോലുകളും ദ്രവിച്ച അവസ്ഥയിലാണ്. വീടിനുള്ളിൽ സൂക്ഷിച്ചിരുന്ന പാത്രങ്ങൾ, വിവിധ രേഖകൾ, സൈക്കിൾ എന്നിവ നശിച്ചു. വീടിനുചുറ്റും വെള്ളക്കെട്ട് രൂപപ്പെട്ട നിലയിലാണ്. വീട്ടിൽനിന്നു താമസംമാറേണ്ട അവസ്ഥയിലാണ് കുടുംബം. പുന്നയൂര്‍ക്കുളം: ശക്തമായ മഴയില്‍ വീട് തകര്‍ന്നുവീണു. തൃപ്പറ്റ് ജയാനന്ദന്‍റെ വീടാണ് കാറ്റിൽ തകര്‍ന്നുവീണത്. കഴിഞ്ഞദിവസം രാത്രിയിലാണ് സംഭവം. തൊഴിലാളിയായ ജയാനന്ദൻ ഒറ്റയ്ക്കാണ് താമസം. ആളപായമില്ല. കുന്നംകുളം: ഇന്നലെ രാത്രിയിൽ പെ യ്ത കനത്തമഴയിൽ ചൊവ്വന്നൂരിൽ ഇരുനില വീട് തകർന്നുവീണു. കുന്നംകുളം ചൊവ്വന്നൂർ അയ്യപ്പത്ത് റോഡിൽ കോലാടിപറമ്പിൽ ബിജേഷും കുടുംബവും താമസിച്ചിരുന്ന വീടാണ് തകർന്നത്. ഇന്നലെ പുലർച്ചെ നാലോടെ വീടിന്‍റെ ചുവരുകൾ പൊട്ടുന്ന ശബ്ദംകേട്ട് ബിജീഷും ഭാര്യയും രണ്ടു കുട്ടികൾ അടങ്ങുന്ന കുടുംബം പുറത്തേക്ക് ഓടിയതിനാൽ വൻ ദുരന്തം ഒഴിവായി. അൽപനിമിഷത്തിനുള്ളിൽ വീട് പൂർണമായും നിലംപൊത്തുകയായിരുന്നു. കുടുംബ ക്ഷേത്രത്തിൽ പോകുന്നതിനായി ബിജേഷ് നേരത്തെ എഴുന്നേറ്റു. ഈ നേരത്താണ് ചുമർ പൊട്ടുന്നത് ശ്രദ്ധയിൽപ്പെട്ടത്. ഇതോടെയാണ് ഭാര്യയും കുട്ടികളുമായി പുറത്തേക്ക് ഓടിയത്. മഴയിൽ വീടിന്‍റെ ചുവരുകൾക്കിടയിലേക്ക് വെള്ളം ഇറങ്ങിയതാണ് ഇടിയാൻ കാരണമായതെന്ന് കരുതുന്നു. വീട്ടുസാധനങ്ങൾ എല്ലാം നശിച്ചു. മേഖലയിൽ ഇന്നലെ വൈകിട്ട് മുതൽ കനത്ത മഴയാണ് ഉണ്ടായിരുന്നത്. റോഡിലെ വെള്ളക്കെട്ട് ഒഴിവാക്കാൻ നാട്ടുകാർ അന്തിക്കാട്: കനത്തമഴയെ തുടർന്ന് ദിവസങ്ങളായി നിലനിൽക്കുന്ന അന്തിക്കാട് വാമനമൂർത്തി ക്ഷേത്രം റോഡിലെ വെള്ളക്കെട്ട് ഒഴിവാക്കാൻ നാട്ടുകാർ രംഗത്തിറങ്ങി. ഇതുവഴിയുള്ള യാത്ര അപകടം നിറഞ്ഞതായതോടെയാണ് കൈക്കോട്ടും പിക്കാസുമായി നാട്ടുകാർ രംഗത്തിറങ്ങിയത്. റോഡ് അരികിലെ പാഴ് പുല്ലുകളും മറ്റും വെട്ടി വൃത്തിയാക്കിയ നാട്ടുകാർ കൈക്കോട്ട് ഉപയോഗിച്ച് റോഡരികിൽ ചെറിയ കാനയുണ്ടാക്കി വെള്ളം ഒഴുക്കിവിടാനുള്ള ശ്രമങ്ങളാണ് നടത്തിയത്. കിഴക്കുഭാഗത്തുനിന്നു ചെറിയ കാനകോരി പടിഞ്ഞാറുഭാഗത്തെ പ്രധാന റോഡരികിലെ കാനയിലേക്കാണ് ഇവർ വെള്ളം ഒഴുക്കിവിട്ടത്. കളത്തൻപറമ്പിൽ ജയൻ, ടി.ജെ. ബെന്നി, സി.ജെ. ബിജു, എം.വി. സുദർശൻ എന്നിവരാണ് തിങ്കളാഴ്ച രാവിലെ മുതൽ മണിക്കൂറുകളോളം നീണ്ടുനിന്ന സന്നദ്ധ പ്രവർത്തനങ്ങൾ ചെയ്തത്. തണ്ണീർത്തടം കരകവിഞ്ഞൊഴുകി അന്തിക്കാട്: കനത്തമഴയിൽ കെ.കെ. മേനോൻ ഷെഡിന് വടക്കുഭാഗത്തെ തണ്ണീർത്തടം കരകവിഞ്ഞൊഴുകിയതോടെ അന്തിക്കാട് റോഡ് വെള്ളത്തിലായി. നിരവധി ഇരുചക്രവാഹനങ്ങളിലെ എൻജിനുകളിൽ വെള്ളംകയറി യാത്രക്കാർ വലഞ്ഞു. അന്തിക്കാട് സെന്‍റർ, വാമനമൂർത്തി ക്ഷേത്രപരിസരം, കെ.കെ. മേനോൻ ഷെഡിന്‍റെ പടിഞ്ഞാറുഭാഗം തുടങ്ങി നിരവധി പ്രദേശങ്ങളിലെ വെള്ളം ഒഴുകിപ്പോയിരുന്ന പുറമ്പോക്ക് തോട്ടിലെ ഒഴുക്കുനിലച്ചതാണ് വെള്ളം കയറാൻ പ്രധാനകാരണം. പുറമ്പോക്ക് തോട്ടിലൂടെ എത്തുന്ന മഴവെള്ളം 150 മീറ്ററോളം കഴിഞ്ഞാൽ പിന്നീട് സ്വകാര്യ വ്യക്തികളുടെ വീട്ടുപറമ്പുകളിലൂടെയും കര പാടങ്ങളിലുടെയും ഒഴുകി മാത്തുതോട് വഴി കനോലി കനാലിലേക്കാണ് ഒഴുകിപ്പോയിരുന്നത്. സ്വകാര്യ വ്യക്തികൾ തോടുകൾ മതിൽകെട്ടിയും വീട് നിർമിച്ചും അടച്ചതോടെയാണ് വെള്ളം ഒഴുകിപോകാൻ കഴിയാതെ വെള്ളക്കെട്ട് രൂപപെട്ടതെന്ന് നാട്ടുകാർ പറയുന്നു. സ്വകാര്യവ്യക്തികൾ സ്ഥാപിച്ച ഓവുകൾ പഞ്ചായത്ത് ഇടപെട്ട് എടുത്തുമാറ്റി പകരം കാന നിർമിച്ച് വെള്ളമൊഴുക്കിക്കളയലാണ് ശാശ്വത പരിഹാരമെന്ന് നാട്ടുകാർ പറയുന്നു. കെ.കെ. മേനോൻ - പേരാൻ മാർക്കറ്റ് ന്യൂ ലിങ്ക് റോഡിൽ വെള്ളമൊഴുകിയെത്തുന്ന തോടിനെ ബന്ധിപ്പിക്കുന്ന രീതിയിൽ കലുങ്ക് സ്ഥാപിക്കണമെന്ന ആവശ്യവും ശക്തമാണ്. മിന്നൽചുഴലി - എളവള്ളിയിലും പാവറട്ടിയിലും വ്യാപകനാശം പാവറട്ടി: കനത്ത മഴയ്ക്കൊപ്പം മിന്നൽ ചുഴലിയും. എളവള്ളി, പാവറട്ടി പഞ്ചായത്തുകളിൽ വ്യാപക നാശനഷ്ടം. പ്രദേശത്തെ വിടുകളിലെ മരങ്ങൾ കടപുഴകിവീണും വീടുകളുടെ ഓടും ഷീറ്റുകളും പറന്നുപോയും ഇലക്ട്രിക് പോസ്റ്റുകൾ തകർന്നും നാശനഷ്ടങ്ങൾ ഉണ്ടായി. കാക്കശ്ശേരി ഹനുമാൻകാവ് ക്ഷേത്രത്തിനുസമീപം നിർത്താട്ടിൽ മനോജ്കുമാറിന്‍റെ വീട്ടിൽ നിർത്തിയിട്ടിരുന്ന കാറിനു മുകളിൽ മാവ് മുറിഞ്ഞുവീണു. ചുഴലി ബിജുവിന്‍റെ വീടിനു മുകളിലേക്ക് ശക്തമായ കാറ്റിൽ തെങ്ങുവീണു. വീടിന് കേടുപാടുകൾ സംഭവിച്ചു. ആതിര ചാരിറ്റബിൾ സൊസൈറ്റിയുടെ മുകളിലേക്ക് മാവ് കടമുറിഞ്ഞുവീണു. പാവറട്ടി പഞ്ചായത്തിൽ കുറ്റിക്കാട്ട് അന്തോണിയുടെ വീടിനുമുകളിൽ പ്ലാവ് വീണു. നീലങ്കാവിൽ എൻ.ജെ. ലിയോയുടെ വീട്ടിൽ രണ്ട് മാവ് കടമുറിഞ്ഞുവീണു. പുത്തൂർ ഡേവിസിന്‍റെ വീട്ടിലെ ഷീറ്റ് കാറ്റിൽ പറന്നുപോയി. പാമ്പിങ്ങൽ മുരളിയുടെ വീട്ടിലെ അയിനിമരവും ഊരുപറമ്പിൽ രാമകൃഷ്ണന്‍റെ വീട്ടിലെ മാവും കാറ്റിൽ വീണു. മുരളി പെരുനെല്ലി എംഎൽഎ സിപിഎം ജില്ലാ സെക്രട്ടറിയേറ്റംഗം ടി.വി. ഹരിദാസൻ, മണലൂർ ഏരിയ കമ്മിറ്റി അംഗം പി.ജി. സുബിദാസ്, ചിറ്റാട്ടുകര ലോക്കൽ സെക്രട്ടറി ബി.ആർ. സന്തോഷ്, മുല്ലശ്ശേരി ബ്ലോക്ക് പഞ്ചായത്ത് പ്രസിഡന്‍റ് ലതി വേണുഗോപാൽ, ബ്ലോക്ക് പഞ്ചായത്ത് അംഗം ചെറുപുഷ്പം ജോണി, എളവള്ളി വില്ലേജ് ഓഫീസർ ജോയ്സി എന്നിവർ നാശനഷ്ടങ്ങളുണ്ടായ പ്രദേശങ്ങൾ സന്ദർശിച്ചു. പറപ്പൂക്കരയില്‍ വീട്ടുകാരെ ദുരിതാശ്വാസ ക്യാമ്പിലേക്ക് മാറ്റി പറപ്പൂക്കര: ശക്തമായ മഴയില്‍ പറപ്പൂക്കര പഞ്ചായത്തിലെ തൊട്ടിപ്പാള്‍ മാടപ്പുറം, ജൂബിലിനഗര്‍ എന്നിവിടങ്ങളിലെ വീടുകളില്‍ വെള്ളംകയറി. തൊട്ടിപ്പാള്‍ കെഎസ്‌യുപി സ്‌കൂളില്‍ ആരംഭിച്ച ദുരിതാശ്വാസ ക്യാമ്പിലേക്ക് വീട്ടുകാരെ മാറ്റി. ആറ് പുരുഷന്‍മാരും ആറ് സ്ത്രീകളും ഒരു കുട്ടിയും ഉള്‍പ്പടെ 13 പേരാണ് ക്യാമ്പിലുള്ളത്. പഞ്ചായത്ത് പ്രസിഡന്‍റ് ഇ.കെ. അനൂപ്, വില്ലേജ് അധികൃതര്‍ എന്നിവരുടെ നേതൃത്വത്തിലാണ് വീട്ടുകാരെ ദുരിതാശ്വാസ ക്യാമ്പിലേക്ക് മാറ്റിയത്.

ഈ വഴി "പെരുവഴി'

തൃശൂർ: മഴയുടെ ശക്തി കുറഞ്ഞെങ്കിലും റോഡിലെ തിരക്കിന്‍റെയും വെള്ളക്കെട്ടിന്‍റെയും തോത് കുറയാത്തതു ജനങ്ങൾക്കു സമ്മാനിച്ചതു ദുരിതയാത്ര. പൂങ്കുന്നത്തു റോഡിന്‍റെ നിർമാണവുമായി ബന്ധപ്പെട്ട് വാഹനങ്ങൾ വഴിതിരിച്ചുവിട്ടത്തോടെ അയ്യന്തോൾ കുടുംബകോടതിക്കുസമീപം വൻഗതാഗത ക്കുരുക്കാണ്. നാളേറെയായി ഈ പ്രശ്നം തുടരുന്നുണ്ടെങ്കിലും മഴ ശക്തമായതോടെ യാത്രാക്ലേശവും കുത്തനേ കൂടി. ഇതിനിടെ സമയക്രമം പാലിക്കാൻ സ്വകാര്യ ബസുകൾ നിരതെറ്റിച്ചുവരുന്നതും വൻ ഗതാഗതതടസമാണ് സൃഷ്ടിക്കുന്നത്. വെള്ളം വെള്ളം സർവത്ര... മഴയൊന്നു പെയ്യുന്പോഴേക്കും നിറയുന്ന തോടുകളും പിറകെ പുഴയാകുന്ന റോഡുകളും തൃശൂരിൽ പതിവുകാഴ്ചയാണ്. ഇത്തവണയും ആ കാഴ്ചകൾക്ക് ഒരു കുറവുമില്ല. മഴക്കാലമുന്നൊരുക്കങ്ങളുടെ ഭാഗമായി തോടുനവീകരണം പൂർത്തീകരിച്ചെങ്കിലും അയ്യന്തോൾ പഞ്ചിക്കൽ തോട് നിറഞ്ഞ് റോഡിലേക്കു വെള്ളം കയറിയത് യാത്രക്കാരെ വലച്ചു. റോഡിലെ കുഴികൾ അറിയാതെ വാഹനങ്ങൾ വെള്ളത്തിൽ കുടുങ്ങിയതും ജനങ്ങളെ ബുദ്ധിമുട്ടിലാക്കി. അയ്യന്തോൾ പ്രിയദർശിനിനഗറിലും റോഡിൽ വെള്ളം കയറി. പൂങ്കുന്നം എംഎൽഎ റോഡിൽ തോടുനിറഞ്ഞ് റോഡിലേക്കു വെള്ളം ശക്തമായി ഒഴുകിയെത്തിയത് വാഹനങ്ങളെയും കാൽനടയാത്രികരെയും ഒരുപോലെ നട്ടംതിരിച്ചു. തോടിനോടുചേർന്നുള്ള കടയിലേക്കും വെള്ളംകയറി. പാന്പൂർ ചെന്പിശേരി പാലത്തിനുതാഴെയും തോട് കരകവിഞ്ഞ് വീടുകൾക്കുചുറ്റും വെള്ളക്കെട്ടും ഉണ്ടായി. പലരും വെള്ളം കയറുമെന്ന ഭീതിയിൽ സാധനസമഗ്രികളെല്ലാം ഭദ്രമായി ബന്ധുവീടുകളിലേക്കും വീടുകളിലെ ഉയർന്ന ഭാഗങ്ങളിലേക്കും മാറ്റിവച്ചിരിക്കുകയാണ്.

വെള്ളക്കെട്ട് ഒഴിയുന്നില്ല, ക്യാമ്പിലേക്ക് കൂടുതൽപേർ

കയ്പമംഗലം: എടത്തിരുത്തിയിലും കയ്പമംഗലത്തും വെള്ളക്കെട്ട് ഒഴിയുന്നില്ല; ജനങ്ങളുടെ ദുരിതം രൂക്ഷമാകുന്നു. കൂരിക്കുഴിയിലെയും ചാമക്കാലയിലെയും ദുരിതാശ്വാസ ക്യാമ്പിൽ എത്തുന്ന ആളുകളുടെ എണ്ണവും വർധിച്ചു. കൂരിക്കുഴിയിൽ എട്ടു കുടുംബാംഗങ്ങളിൽ‌നിന്നായി 18 പേരും ചാമക്കാല ക്യാമ്പിൽ 18 കുടുംബങ്ങളിൽ‌നിന്നായി 38 ആളുകളുമാണ് ഇപ്പോഴും ക്യാമ്പിൽ കഴിയുന്നത്. കയ്പമംഗലം ഒൻപതാം വാർഡിന്‍റെ പലപ്രദേശങ്ങളിലും വെള്ളം കയറിയിട്ടുണ്ട്. രണ്ട്, മൂന്ന്, അഞ്ച്, ആറ് വാർഡുകളിലും വെള്ളക്കെട്ട് രൂക്ഷമാണ്. അതേ‌സമയം പെരിഞ്ഞനം പഞ്ചായത്തിലെ ഗവ. യുപി സ്കൂളിൽ പ്രവർത്തിച്ചിരുന്ന ക്യാമ്പ് ഇന്നലെ അവസാനിപ്പിച്ചിട്ടുണ്ട്.

കനത്ത മഴ, വാഴത്തോട്ടങ്ങളില്‍ വെള്ളംകയറി

കോടാലി: ദിവസങ്ങളായി തുടരുന്ന മഴ മറ്റത്തൂരിലെ വാഴക്കര്‍ഷകരെ ദുരിതത്തിലാക്കുന്നു. പാടങ്ങളോടു‌ചേര്‍ന്നുള്ള താഴ്ന്ന‌പ്രദേശങ്ങളിലെ വാഴത്തോട്ടങ്ങളില്‍ വെള്ളം കയറിയതാണു കര്‍ഷകരെ പ്രതിസന്ധിയിലാക്കുന്നത്. ഓണവിപണി ലക്ഷ്യംവെച്ച് കൃഷിചെയ്തിട്ടുള്ള നൂറുകണക്കിനു നേന്ത്രവാഴകളാണ് വെള്ളത്തില്‍ മുങ്ങിനില്‍ക്കുന്നത്. ഒരു മാസം മുമ്പ് കൃഷിയിറക്കിയ വാഴകളും വെള്ളത്തിലാണ്. വാഴകളുടെ ചുവട്ടില്‍ നാലുദിവസത്തിലേറെ വെള്ളം കെട്ടിനിന്നാല്‍ വാഴകള്‍ക്ക് പഴുപ്പുബാധിച്ച് ഒടിഞ്ഞുവീഴുമെന്ന് കര്‍ഷകര്‍ പറയുന്നു. മറ്റത്തൂരിലെ ചേലക്കാട്ടുകര, മാങ്കുറ്റിപ്പാടം, കൊടുങ്ങ, കോപ്ലിപ്പാടം, മന്ദരപ്പിള്ളി, നൂലുവള്ളി എന്നിവിടങ്ങളിലെല്ലാം വാഴത്തോട്ടങ്ങള്‍ വെള്ളത്തില്‍ മുങ്ങിനില്‍ക്കുകയാണ്. വിളവെടുപ്പിനു പാകമായ തോ ട്ടങ്ങളില്‍ വെള്ളക്കെട്ടുള്ളതിനാല്‍ വാഴക്കുലകള്‍ വെട്ടിയെടുക്കാന്‍ കഴിയാത്ത സാഹചര്യവുമുണ്ട്. ഇനിയും രണ്ടു ദിവസത്തിലേറെ കനത്തമഴ തുടര്‍ന്നാല്‍ വലിയ നഷ്ടം നേരിടേണ്ടിവരുമെന്ന് വാഴകര്‍ഷകര്‍ പറയുന്നു.

മോഡൽ ഹയർസെക്കൻഡറി സ്കൂൾ സ്റ്റേഡിയത്തിന് ചാത്തുണ്ണിയുടെ പേരിടും

ചാലക്കുടി: ഗവ. മോഡൽ ഹയർസെക്കൻഡറി സ്കൂളിൽ അഞ്ചുകോടി രൂപ ചെലവിൽ നിർമിക്കുന്ന സ്റ്റേഡിയത്തിനു ദേശീയ ഫുട്ബോൾ ടീം മുൻ കോച്ചും താരവുമായിരുന്ന അന്തരിച്ച ടി.കെ. ചാത്തുണ്ണിയുടെ നാമകരണം നടത്താൻ നഗരസഭ തീരുമാനം. വുഡ് ഫ്ലോറിംഗ് ഉൾപ്പെടെയുള്ള നിർമാണപ്രവൃത്തികൾ പൂർത്തിയായ നഗരസഭയിലെ എം.എൽ. ജേക്കബ് സ്മാരക ഇൻഡോർ സ്റ്റേഡിയം 20നു പ്രവർത്തനമാരംഭിക്കും. ഒരു കോടിയിലേറെ രൂപ ചെലവിലാണ് മേപ്പിൾ മരത്തടിയിൽ ഫ്ലോറിംഗും വൈദ്യുതി പെയിന്‍റിംഗ് പ്രവൃത്തികളും പൂർത്തിയാക്കിയത്. ഇൻഡോർ സ്റ്റേഡിയത്തിൽ ബാസ്കറ്റ്ബോൾ, വോളിബോൾ, ഷട്ടിൽ ബാഡ്മിന്‍റണ്‍ പരിശീലനത്തിനും വ്യായാമത്തിനും ഉപയോഗിക്കാനും തീരുമാനിച്ചു. ഇൻഡോർ സ്റ്റേഡിയത്തിന്‍റെ പ്രവർത്തനോദ്ഘാടനവും ഗവ. മോഡൽ ഹയർ സെക്കൻഡറി സ്കൂൾ സ്റ്റേഡിയത്തിന്‍റെ നിർമാണോദ്ഘാടനവും മന്ത്രി നിർവഹിക്കുമെന്നു ചെയർമാൻ കൗണ്‍സിലിനെ അറിയിച്ചു. പവലിയനും സിന്തറ്റിക് ട്രാക്കും ടോയ്‌്‌ലറ്റ് ബ്ലോക്കും ഉൾപ്പെടെയുള്ള ടർഫ് മൈതാനമാണു കായികവകുപ്പ് നിർമിക്കുന്നത്. സ്റ്റേഡിയത്തോടു ചേർന്നുള്ള മൈതാനവും ടൗണ്‍ ഹാൾ മൈതാനവും പാർക്കിംഗിനുനൽകി ഫീസ് ഈടാക്കും. കലാഭവൻ മണി പാർക്കിൽ കാന്‍റീൻ ആരംഭിക്കും. നഗരസഭ താലൂക്ക് ആശുപത്രി വഴി നടപ്പാക്കുന്ന സാന്ത്വനം പാലിയേറ്റീവ് പരിചരണപദ്ധതിക്ക് പുതിയ വാഹനം വാങ്ങിനൽകുമെന്ന വൈസ് ചെയർപേഴ്സൻ സി. ശ്രീദേവിയുടെ ഓഫർ കൗണ്‍സിൽ അംഗീകരിച്ചു. ശുചീകരണപ്രവർത്തനങ്ങൾക്ക് വാർഡ്തല സമിതിക്ക് 10000 രൂപ വീതം നൽകിയിട്ടുണ്ടെന്ന് ചെയർപേഴ്സണ്‍ അറിയിച്ചു. 28ന് എസ്എസ്എൽസി, പ്ലസ് ടു വിജയികളെ ടൗണ്‍ഹാളിൽ അനുമോ ദിക്കും. നഗരസഭയിലെ അസി. എൻജിനീയറുടെ പ്രവർത്തനത്തിൽ കൗണ്‍സിൽ അസംതൃപ്തി രേഖപ്പെടുത്തി. ചെയർമാൻ ഷിബു വാലപ്പൻ അധ്യക്ഷത വഹിച്ചു.

ചാലക്കുടി സർവീസ് സഹകരണ ബാങ്ക് ടൗൺ ബ്രാഞ്ച് ഓഫീസ് ഉദ്ഘാടനം നാളെ

ചാലക്കുടി: ചാലക്കുടി സർവീസ് സഹകരണ ബാങ്കിന്‍റെ കെട്ടിട സമുച്ചയത്തിന്‍റെയും ടൗൺ ബ്രാഞ്ച് ഓഫീസിന്‍റെയും ഉദ്ഘാടനം നാളെ രാവിലെ 10 ന് പ്രതിപക്ഷനേതാവ് വി.ഡി. സതീശൻ നിർവഹിക്കും. സനീഷ്‌കുമാർ ജോസഫ് എംഎൽഎ അധ്യക്ഷത വഹിക്കും. ബെന്നി ബെഹനാൻ എംപി മുഖ്യാതിഥിയായിരി ക്കും. സ്ട്രോംഗ് റൂം ഉദ്ഘാടനം നഗരസഭ ചെയർമാൻ ഷിബു വാലപ്പൻ നിർവഹിക്കും. ആദ്യനിക്ഷേപം സ്വീകരിക്കൽ തൃശൂർ ജോയിന്‍റ്് രജിസ്ട്രാർ ജൂബി ടി. കുര്യാക്കോസ് നിർവഹിക്കും. 1961 ൽ ആണ് ചാലക്കുടി സർവീസ് സഹകരണ ബാങ്ക് പ്രവർത്തനം ആരംഭിച്ചത്. ബാങ്കിന് ചാലക്കുടി ടൗണിൽ പഴയ ഹെഡ് ഓഫീസ് പ്രവർത്തിച്ചിരുന്ന സ്ഥലത്ത് ഒന്നരക്കോടി രൂപ ചെലവിൽ മൂന്നു നിലകളിലായാണ് പുതിയ ഓഫീസ്‌ കെട്ടിടം നിർമിച്ചിട്ടുള്ളത്. പ്രസിഡന്‍റ് വി.എൽ. ജോൺസൺ, സെക്രട്ടറി കെ.ജെ. മിനി, ഭരണസമിതി അംഗങ്ങളായ ഒ.എസ്. ചന്ദ്രൻ, ആന്‍റോ മേലേപ്പുറം, ജോയ് മാളിയേക്കൽ, ബി.എ. അബ്ദുൾ മജീദ്, റീന ഡേവിസ്, റിൻ്റോസ് കണ്ണമ്പുഴ, ജോസ് പുല്ലൻ, ഷനിൽ കുത്തോട്ടുങ്ങക്കാരൻ, ദിലീപ് പേരാമ്പ്രത്ത്, സിനി സന്തോഷ്, ഇന്ദിര ബാബു എന്നിവർ പത്രസമ്മേളനത്തിൽ പങ്കെടുത്തു.

താത്കാലിക ബണ്ട് പൊളിക്കില്ല; പഞ്ചായത്ത് പ്രസിഡന്‍റിനെ തടഞ്ഞു

ഇരിങ്ങാലക്കുട: പടിയൂര്‍ പഞ്ചായത്തിലെ രണ്ടുവാര്‍ഡുകളിലെ നൂറോളം വീടുകള്‍ വെള്ളക്കെട്ടിലായ വിഷയത്തിനു പരിഹാരമായി വാര്‍ഡ് നിവാസികളും ജനപ്രതിനിധികളും ആവശ്യപ്പെട്ടതുപ്രകാരം പുളിക്കലച്ചിറ പാലംനിര്‍മാണത്തിനായി നിര്‍മിച്ച താത്കാലിക ബണ്ട് പൊളിക്കില്ല. താത്കാലിക ബണ്ട് നിലനിർത്തിക്കൊണ്ടുതന്നെ വെള്ളക്കെട്ടിന് പരിഹാരം കാണാന്‍ ആവശ്യമായ നിര്‍മാണ പ്രവര്‍ത്തനങ്ങള്‍ നാളെ മുതല്‍ തന്നെ ആരംഭിക്കാനാണ് തീരുമാനമെന്ന് പിഡബ്ല്യുഡി ബ്രിഡ്ജസ് വിഭാഗം അധികൃതര്‍ അറിയിച്ചു. താത്കാലിക ബണ്ട് പൊളിക്കുന്നത് അടുത്ത മാസം ആരംഭിക്കുന്ന നാലമ്പലദര്‍ശനത്തിന് പ്രതിസന്ധി സൃഷ്ടിക്കുമെന്നും ബണ്ട് നിലനിറുത്തിക്കൊണ്ടുതന്നെ വിഷയത്തിന് പരിഹാരം കാണാനും സുഗമമായി വെള്ളം ഒഴുകിപ്പോകാനുള്ള നടപടികള്‍ സ്വീകരിക്കാനുമാണ് തീരുമാനിച്ചിരിക്കുന്നതെന്ന് ബ്രിഡ്ജസ് വിഭാഗം അറിയിച്ചു. ബണ്ട് പൊളിക്കണമെന്ന ആവശ്യത്തില്‍ ഉറപ്പ് ലഭിക്കാതെ വന്നതോടെ വൈകീട്ട് നാലിന് പഞ്ചായത്ത് ഓഫീസിന് മുന്നില്‍ ഭരണസമിതിയിലെ ബിജെപി അംഗങ്ങളുടെ നേതൃത്വത്തില്‍ പഞ്ചായത്ത് ഓഫീസില്‍നിന്നും മടങ്ങി ഔദ്യോഗിക വാഹനത്തില്‍ കയറാന്‍ ഒരുങ്ങിയ പഞ്ചായത്ത് പ്രസിഡന്‍റിനെ തടഞ്ഞു. നടപടി സ്വീകരിക്കേണ്ടി‌വരുമെന്ന് പോലീസ് വിശദീകരിച്ചപ്പോള്‍ പ്രതിഷേധവുമായി വാര്‍ഡ് നിവാസികള്‍ റോഡില്‍ കുത്തിയിരുന്നു. തുടര്‍ന്ന് പോലീസ് ഇവരെ ബലപ്രയോഗത്തിലൂടെ മാറ്റുകയായിരുന്നു. രാവിലെ വില്ലേജ് അധികൃതര്‍ നല്‍കിയ റിപ്പോര്‍ട്ട് അനുസരിച്ച് ബണ്ട് പൊളിക്കുകയോ അല്ലെങ്കില്‍ കൂടുതല്‍ വ്യാസമുള്ള പൈ പ്പുകള്‍ സ്ഥാപിച്ച് വെള്ളക്കെട്ട് ഒഴിവാക്കുകയോ ചെയ്യാ നാണ് ജില്ലാ ഭരണകൂടം നിര്‍ദേശിച്ചത്. അതേ‌സമയം പഞ്ചായത്തിലെ പത്തനങ്ങാടി, കോതേറ്റിപ്പാടം പ്രദേശങ്ങളിലെ വെള്ളക്കെട്ട് തുടരുകയാണ്. എതാനും പേര്‍ ക്യാമ്പിലേക്കും മറ്റുള്ളവര്‍ ബന്ധുവീടുകളിലേക്കുമാണു മാറിയിരിക്കുന്നത്. വിടപറഞ്ഞ മുന്‍ പഞ്ചായത്ത് പ്രസിഡന്‍റ് കെ.സി. ബിജുവിന്‍റെ വീട് അടക്കം വെള്ളക്കെട്ടിലാണ്. 2018 ലെ പ്രളയത്തിനുശേഷം ഇതാദ്യമായാണ് ഇത്രയും വെള്ളം കയറുന്നതെന്നും കഴിഞ്ഞ രണ്ടു ദിവസങ്ങളില്‍ മഴ കുറഞ്ഞെങ്കിലും വെള്ളക്കെട്ടിന് മാറ്റമുണ്ടായിട്ടില്ലെന്നും പ്രദേശത്തു നിന്നുള്ള വീട്ടുകാര്‍ പറഞ്ഞു.

മാധ്യമങ്ങള്‍ പ്രത്യാശപകരുന്ന വാര്‍ത്തകള്‍ക്കു മുന്‍തൂക്കം നല്‍കണം: മാര്‍ പോളി കണ്ണൂക്കാടന്‍

ഇരിങ്ങാലക്കുട: വായനക്കാരുടെയും പ്രേക്ഷകരുടെയും ശ്രദ്ധനേടാനുള്ള മത്സരത്തില്‍ നിഷേധാത്മകവാര്‍ത്തകള്‍ പെരുകിവരികയാണെന്നും യഥാര്‍ഥ മാധ്യമ‌പ്രവര്‍ത്തനം നന്മയുടെയും സ്‌നേഹത്തിന്‍റെയും പ്രത്യാശയുടെയും വാര്‍ത്തകള്‍ക്കാണ് പ്രാധാന്യം നല്‍കേണ്ടതെന്നും മാര്‍ പോളി കണ്ണൂക്കാടന്‍. കഴിഞ്ഞ 15 വര്‍ഷമായി ഇരിങ്ങാലക്കുട രൂപത പ്രതിവര്‍ഷം നടത്തിവരുന്ന പ്രാദേശിക മാധ്യമപ്രവര്‍ത്തകരുടെ കൂട്ടായ്മയെ അഭിസംബോധന ചെയ്യുകയായിരുന്നു ബിഷപ്. യുദ്ധവും സംഘര്‍ഷങ്ങളും മദ്യവും ലഹരിയും മറ്റു സാമൂഹികതിന്മകളും സമൂഹത്തെ അതീവ ആശങ്കയിലാക്കുന്ന ഇന്നത്തെ സാഹചര്യത്തില്‍ നല്ല വാര്‍ത്തകളാണ് ജനം ആഗ്രഹിക്കുന്നതെന്ന് മാധ്യമങ്ങള്‍ തിരിച്ചറിയണം. സാധ്യമായ തോതില്‍ തങ്ങള്‍ക്കു ചുറ്റിലുമുള്ള നന്മയുടെയും സാഹോദര്യത്തിന്‍റെയും സഹകരണത്തിന്‍റെയും മാതൃകകളെ പ്രാദേശിക മാധ്യമപ്രവര്‍ത്തകര്‍ക്കു ചൂണ്ടിക്കാട്ടാന്‍ കഴിയും. നിഷേധ വാര്‍ത്തകള്‍ക്കല്ല, പോസിറ്റീവ് - സര്‍ഗാത്മക - വാര്‍ത്തകള്‍ക്കാണു പ്രാധാന്യം നൽ കേ ണ്ടതെ ന്നും ബിഷപ്ഓര്‍മിപ്പിച്ചു. വികാരി ജനറാൾമാരായ മോണ്‍. ജോസ് മാളിയേക്കല്‍, മോണ്‍. വില്‍സണ്‍ ഈരത്തറ, മോണ്‍. ജോളി വടക്കന്‍, കേരളസഭ മാനേജിംഗ് ഡയറക്ടർ ഫാ. ജെയ്സണ്‍ വടക്കുംഞ്ചേരി, ഫാ. സിന്‍റോ മാടവന, ഫാ. അനൂപ് കോലങ്കണ്ണി, ഫാ. ടിന്‍റോ കൊടിയന്‍, സെബി മാളിയേക്കൽ, ജോസ് തളിയത്ത് എന്നിവര്‍ പ്രസംഗിച്ചു.

വിശുദ്ധ അന്തോണീസിന്‍റെ മരണത്തിരുനാൾ ആഘോഷിച്ചു

ചെട്ടിക്കാട്: വിശുദ്ധ അന്തോണീസിന്‍റെ തീർഥാടന ദേവാലയത്തി ൽ അത്ഭുത‌പ്രവർത്തകനായ വിശുദ്ധന്‍റെ മരണത്തിരുനാൾ ഭക്തിസാന്ദ്രമായി. രാവിലെ 6.15 മുതൽ വൈകിട്ട് 6.30വരെ ദിവ്യബലി നൊവേന, ആരാധന എന്നിവ നടന്നു. തിരുനാൾ ദിവ്യബലിക്ക് ഫാ. പ്രിൻസ് പഴമ്പിള്ളി ഒഎസ്ജെ മുഖ്യകാർമികനായി. വിശുദ്ധ അന്തോണീസിന്‍റെ തിരുശേഷിപ്പുകളായ അഴുകാത്ത നാവ്, കൈയുടെ അസ്ഥി, സാഭാവസ്ത്രത്തിന്‍റെ ഒരു ഭാഗം എന്നിവ സുക്ഷിച്ചിരിക്കുന്ന ഇന്ത്യയിലെ ഏക തീർത്ഥാടന കേന്ദ്രമായതിനാൽ വിശുദ്ധന്‍റെ മരണത്തിരുനാളിൽ പങ്കെടുക്കുന്നതിനും തിരുശേഷിപ്പുകൾ വണ ങ്ങുന്നതിനും അയൽസംസ്ഥാനങ്ങളിൽനിന്നുൾപ്പടെയുള്ള തീർഥാടകരുടെ വൻ തിരക്കാണ് അനുഭവപ്പെട്ടത്. റെക്ടർ റവ. ഡോ. ബെന്നി വാഴക്കൂട്ടത്തിൽ, ഫാ. അജയ് ആന്‍റണി പുത്തൻപറമ്പിൽഎന്നിവർ ആഘോഷങ്ങൾക്കു നേതൃത്വം നൽകി.

പെരുമാറ്റച്ചട്ടം ലംഘിച്ചെന്ന്; മുഖ്യമന്ത്രിക്കെതിരേ കോണ്‍ഗ്രസ് പരാതി നൽകി

തൃശൂർ: മുഖ്യമന്ത്രി പെരുമാറ്റച്ചട്ടം ലംഘിച്ചെന്നു പരാതിനൽകി കോണ്‍ഗ്രസ് നേതാവും കോർപറേഷൻ കൗണ്‍സിലറുമായ ജോണ്‍ ഡാനിയൽ. നിലന്പൂർ നിയോജകമണ്ഡലത്തിലെ ഉപതെരഞ്ഞെടുപ്പ് നടക്കാനിരിക്കെ, കേരള പോലീസിൽ കൂടുതൽ വനിതകൾക്കു ജോലിനൽകുമെന്നു മുഖ്യമന്ത്രി പിണറായി വിജയൻ നടത്തിയ പ്രഖ്യാപനം മാതൃകാ തെരഞ്ഞെടുപ്പുപെരുമാറ്റച്ചട്ടങ്ങളുടെ ലംഘനമാണെന്നാരോപിച്ചാണ് കെപിസിസി സെക്രട്ടറികൂടിയായ ജോണ്‍ ഡാനിയൽ കേന്ദ്ര തെരഞ്ഞെടുപ്പു കമ്മീഷനു പരാതി നൽകിയത്. തെരഞ്ഞെടുപ്പുവേളകളിൽ അധികാരസ്ഥാനത്തിരിക്കുന്നവർ വോട്ടർമാരെ സ്വാധീനിക്കാൻ സാധ്യതയുള്ള ആനുകൂല്യപ്രഖ്യാപനങ്ങളോ സൗജന്യങ്ങളോ സഹായപദ്ധതികളോ പ്രഖ്യാപിക്കുന്നതു ചട്ടലംഘനമാണെന്നു പരാതിയിൽ ചൂണ്ടിക്കാട്ടി. പെരുമാറ്റച്ചട്ടലംഘനത്തിനു മുഖ്യമന്ത്രിക്കെതിരേ അടിയന്തര നടപടി സ്വീകരിക്കണമെന്നും ഇ-മെയിലിൽ അയച്ച പരാതിയിൽ ആവശ്യപ്പെട്ടു. തിങ്കളാഴ്ച തൃശൂർ രാമവർമപുരം പോലീസ് അക്കാദമിയിൽ പരിശീലനം പൂർത്തിയാക്കിയ വനിതാ സിവിൽ പോലീസ് ഓഫീസർമാരുടെ പാസിംഗ്ഔട്ട് പരേഡിൽ സല്യൂട്ട് സ്വീകരിച്ചു നടത്തിയ പ്രസംഗം ചൂണ്ടിക്കാട്ടിയാണു പരാതി.

എക്‌സൈസ് സ്റ്റാഫ് അസോ. ജില്ലാ സമ്മേളനം

തൃശൂർ: കേരള സ്റ്റേറ്റ് എക്‌സൈസ് സ്റ്റാഫ് അസോസിയേഷന്‍ ജില്ലാ സമ്മേളനം മുരളി പെരുനെല്ലി എംഎൽഎ ഉദ്ഘാടനം ചെയ്തു. ജില്ലാ പ്രസിഡന്‍റ് ഒ.ജെ. രാജീവ് അധ്യക്ഷത വഹിച്ചു. ജില്ലാ സെക്രട്ടറി എൻ.എൻ. ജയേഷ്, തൃശൂര്‍ ഡെപ്യൂട്ടി എക്‌സൈസ് കമ്മീഷണര്‍ വി. സുഭാഷ്, സംഘടന സംസ്ഥാന പ്രസിഡന്‍റ് ടി. സജുകുമാര്‍, സംസ്ഥാന ജനറല്‍ സെക്രട്ടറി കെ. സന്തോഷ്‌കുമാര്‍, ടി.ബി. ഉഷ തുടങ്ങിയവർ പ്രസംഗിച്ചു. ഒ.ജെ. രാജീവിനെ പ്രസിഡന്‍റായും എന്‍.എന്‍. ജയേഷിനെ സെക്രട്ടറിയായും എ. മണികണ്ഠനെ ട്രഷററായും സി. അജയ്കുമാര്‍, എം.ബി. വത്സരാജ്, പി.വി. ബെന്നി എന്നിവരെ സംസ്ഥാന കമ്മിറ്റി അംഗങ്ങളായും തെരഞ്ഞെടുത്തു.

കരുവന്നൂർ: മരിച്ച പൗലോസിന്‍റെ വീട് സുരേഷ് ഗോപി സന്ദര്‍ശിച്ചു

ഇരിങ്ങാലക്കുട: വിദഗ്ധചികിത്സയ്ക്കു കരുവന്നൂര്‍ സഹകരണബാങ്കില്‍നിന്നു നിക്ഷേപത്തുക ലഭിക്കാതെ മരിച്ച പൊറത്തിശേരി കോട്ടയ്ക്കകത്തുകാരന്‍ പൗലോസിന്‍റെ വീട് കേന്ദ്രമന്ത്രി സുരേഷ് ഗോപി സന്ദര്‍ശിച്ചു. പൗലോസിന്‍റെ ഭാര്യയോടും സഹോദരങ്ങളോടും വിവരങ്ങള്‍ ചോദിച്ചറിഞ്ഞ്, ആശ്വസിപ്പിച്ച് മന്ത്രി മടങ്ങി. ജില്ലാ പ്രസിഡന്‍റ് എ.ആര്‍. ശ്രീകുമാര്‍, ജനറല്‍ സെക്രട്ടറിമാരായ കൃപേഷ് ചെമ്മണ്ട, കെ.പി. ഉണ്ണികൃഷ്ണന്‍, കെ.പി. ജോര്‍ജ്, മണ്ഡലം പ്രസിഡന്‍റ് ആര്‍ച്ച അനീഷ്, മണ്ഡലം ജനറല്‍ സെക്രട്ടറിമാരായ ഷൈജു കുറ്റിക്കാട്ട്, വി.സി. രമേഷ്, സന്തോഷ് ചെറാക്കുളം, പി.എസ്. അനില്‍കുമാര്‍, എ. നാഗേഷ്, ശ്യാംജി മാടത്തിങ്കല്‍, രിമ പ്രകാശ്, അജീഷ് പൈക്കാട്ട്, രമേഷ് അയ്യര്‍, ടി.കെ. ഷാജു, സൂരജ് കടുങ്ങാടന്‍, സൂരജ് നമ്പ്യാങ്കാവ്, അഖിലാഷ് വിശ്വനാഥന്‍ എന്നിവരും ഉണ്ടായിരുന്നു.

തൊമ്മാന പാടത്തേക്കു ട്രാവലര്‍ മറിഞ്ഞ് മൂന്നുപേര്‍ക്കു പരിക്കേറ്റു

ഇരിങ്ങാലക്കുട: നിയന്ത്രണംവിട്ട ടെന്പോ ട്രാവലര്‍ പുല്ലൂർ തൊമ്മാനപാടത്തേക്ക് മറിഞ്ഞ് യാത്രക്കാരായ മൂന്നുപേര്‍ക്ക് പരിക്കേറ്റു. ഇന്നലെ രാവിലെ 7.45 ഓടെയായിരുന്നു അപകടം. ആരുടെയും പരിക്കുകള്‍ ഗുരുതരമല്ല. വലപ്പാട് കേന്ദ്രീകരിച്ച് പ്രവര്‍ത്തിക്കുന്ന മണപ്പുറം ഫിനാന്‍സ് സ്ഥാപനത്തിലേക്ക് ആമ്പല്ലൂര്‍, കൊടകര സ്വദേശികളായ യാത്രക്കാരുമായി പോവുകയായിരുന്ന വണ്ടിയാണ് അപകടത്തില്‍ പെട്ടത്. എതിരെനിന്ന് അമിത വേഗതയില്‍ വന്നിരുന്ന ലോറിക്ക് സൈഡ് കൊടുക്കുന്നതിനിടയില്‍ നിയന്ത്രണം വിട്ട് കൈവരിയില്‍ ഇടിച്ച് വണ്ടി മറിയുകയായിരുന്നുവെന്ന് ജീവനക്കാര്‍ പറഞ്ഞു. ലോറി നിറുത്താതെ ഓടിച്ചുപോയി. പതിനെട്ടു പേരാണ് വണ്ടിയില്‍ ഉണ്ടായിരുന്നത്. ഉടനെ സ്ഥലത്ത് എത്തിയ ക്രെയിന്‍ ഉപയോഗിച്ച് ഒന്പതോടെ വണ്ടി പാടത്തുനിന്ന് എടുത്തുമാറ്റുകയായിരുന്നു.

മഴ; ജില്ലയിൽ 26 വീടുകൾ തകർന്നു

തൃശൂർ: ജില്ലയിൽ ശക്തമായി തുടരുന്ന മഴയിൽ 23 വീടുകൾ ഭാഗികമായും മൂന്നു വീടുകൾ പൂർണമായും തകർന്നു. തലപ്പിള്ളി താലൂക്കിൽ നാലും മുകുന്ദപുരത്ത് രണ്ടും കുന്നംകുളത്ത് എട്ടും തൃശൂരിൽ നാലും കൊടുങ്ങല്ലൂരിൽ രണ്ടും ചാവക്കാട് മൂന്നും വീടുകളാണ് ഭാഗികമായി തകർന്നത്. തൃശൂർ താലൂക്കിൽ രണ്ടും തലപ്പിള്ളിയിൽ ഒരു വീടും പൂർണമായി തകർന്നിട്ടുണ്ട്. ചാലക്കുടി താലൂക്കിൽ ഒരു കിണർ ഇടിഞ്ഞുതാണു. ജില്ലയിലെ എല്ലാ താലൂക്ക് കേന്ദ്രപരിധിയിലും ശക്തമായ മഴ ലഭിച്ചു. നിലവിലുള്ള 16 ദുരിതാശ്വാസക്യാന്പുകളിൽ 116 കുടുംബങ്ങളാണുള്ളത്. 337 പേരാണ് ക്യാന്പുകളിൽ ആകെയുള്ളത്. ഇതിൽ 110 പുരുഷൻമാരും 146 സ്ത്രീകളുമുണ്ട്. 81 കുട്ടികളും.

പുത്തൻപള്ളിക്കു സമീപം കെട്ടിടം തകർന്നുവീണു

തൃശൂർ: പുത്തൻപള്ളിക്കു മുന്പിലുള്ള പഴയ കെട്ടിടം തകർന്നു. ദിവസങ്ങൾക്കുമുന്പ് പെരിഞ്ചേരി ടോണിയുടെ ഉടമസ്ഥതയിലുള്ള കെട്ടിടത്തിന്‍റെ ഉൾഭാഗം ഭാഗികമായി തകർന്നിരുന്നു. ആവശ്യത്തിനു മുൻകരുതലെടുക്കാതെ ഇതരസംസ്ഥാന തൊഴിലാളികളെ ഉപയോഗിച്ചു പൊളിച്ചുമാറ്റാൻ ആരംഭിച്ചതു സമീപത്തുള്ളവരെയും ആശങ്കയിലാഴ്ത്തി. കെട്ടിടം പൊളിഞ്ഞുവീണത് അറിയിച്ചതിനെത്തുടർന്നു സ്ഥലത്തെത്തിയ കൗണ്‍സിലർ ജോണ്‍ ഡാനിയലാണ് കോർപറേഷൻ സെക്രട്ടറിയെ വിവരമറിയിച്ചത്. ഇതിനുപിന്നാലെയാണ് രണ്ട് തൊഴിലാളികളെ അയച്ച് പൊളിക്കൽ ആരംഭിച്ചത്. വേണ്ടത്ര മുൻകരുതൽ എടുത്തുമാത്രമേ കെട്ടിടം പൊളിക്കാവൂ എന്നു സ്ഥലത്തെത്തിയ കോർപറേഷൻ അസിസ്റ്റന്‍റ് എൻജിനീയർ നിർദേശം നൽകി. നിരവധി വാഹനങ്ങളും കാൽനടയാത്രക്കാരും കെട്ടിടത്തിനുമുന്നിലൂടെ കടന്നുപോകുന്പോഴാണ് പൊളിക്കൽ തുടങ്ങിയത്. പൊളിക്കുന്നവരുടെയും ജീവൻ അപകടത്തിലാക്കുംവിധമാണ് പൊളിക്കൽ നടന്നതെന്നു ജോണ്‍ ഡാനിയൽ പറഞ്ഞു. കോർപറേഷന്‍റെ പട്ടികയിലുള്ള അപകടാവസ്ഥയിലുള്ള കെട്ടിടമാണ് തകർന്നതെന്നും അപകടങ്ങൾ ആവർത്തിക്കുന്പോഴും അധികൃതർ ഇടപെടാത്തതിൽ ജനങ്ങൾക്ക് ആശങ്കയുണ്ടെന്നും അദ്ദേഹം കൂട്ടിച്ചേർത്തു.

പ്രതിഷേധം അതിരുവിട്ട് "അടി’യന്തര കൗണ്‍സിൽ

തൃശൂർ: അജൻഡകൾ ചർച്ചചെയ്യാതെ മേയറുടെ അപ്രതീക്ഷിത ഇറങ്ങിപ്പോക്ക്. കോണ്‍ഗ്രസ് നടത്തിയ പ്രതിഷേധം അതിരുവിട്ടു. മേയറെ തടഞ്ഞ് കൗണ്‍സിലർമാർ. സംരക്ഷണം ഒരുക്കിയ പോലീസും കൗണ്‍സിലർമാരും തമ്മിൽ ഉന്തുംതള്ളും. സംഘർഷഭൂമിയായി കോർപറേഷൻ. മേയറുടെ ചേംബറിനു മുൻപിൽ കിടന്നു പ്രതിഷേധിച്ച് ബിജെപി കൗണ്‍സിലർമാർ. ഇന്നലെ ചേർന്ന അടിയന്തര കൗണ്‍സിൽ യോഗത്തിലാണ് നാടകീയരംഗങ്ങൾ അരങ്ങേറിയത്. അയ്യന്തോൾ ഷോപ്പിംഗ് കോംപ്ലക്സ് കെട്ടിടം പൊളിക്കുന്നതിനു മുന്നോടിയായി വാടകക്കാരെ മാറ്റുന്നതുമായി ബന്ധപ്പെട്ടുണ്ടായ ആദ്യചർച്ചകൾ പൂർത്തിയാകുംമുൻപേയാണ് മേയർ അപ്രതീക്ഷിതമായി ഇറങ്ങിപ്പോയത്. തുടർന്നു നടുത്തളത്തിൽ ഇറങ്ങി കോണ്‍ഗ്രസ് പ്രതിഷേധം ആരംഭിക്കുകയായിരുന്നു. വസ്തുനികുതിപിരിവിൽ തൃശൂർ കോർപറേഷന് അപാകത പറ്റിയെന്ന കോടതിവിധി ചർച്ചചെയ്യാതിരിക്കാനാണ് അജൻഡ എത്തുന്നതിനുമുന്നേ മേയർ കൗണ്‍സിൽ യോഗം പിരിച്ചുവിട്ടതെന്ന് ആരോപിച്ച് കോണ്‍ഗ്രസും ബിജെപി കൗണ്‍സിലർമാരും മേയറെ പിന്തുടർന്നു ചേംബറിനകത്തും പുറത്തും പ്രതിഷേധം തുടർന്നു. മേയറെ വളഞ്ഞു മുദ്രാവാക്യംവിളിയുമായി കോണ്‍ഗ്രസ് കൗണ്‍സിലർമാർ കുത്തിയിരുന്നു പ്രതിഷേധം നടത്തിയപ്പോൾ ചേംബറിനുപുറത്ത് നിലത്തുകിടന്നായിരുന്നു ബിജെപി പ്രതിഷേധം. കൗണ്‍സിലർമാരുടെ സമരത്തെ ആദ്യം ചിരിച്ചുതള്ളിയ മേയർക്ക് പിന്നീട് പുറത്തിറങ്ങാൻ കഴിയാതായതോടെ സംരക്ഷണത്തിനായി പോലീസ് സംഘവും സ്ഥലത്തു തന്പടിച്ചു. ഇതിനിടെ സമരം പൊളിക്കാൻ ചേംബറിനകത്തു ഭരണമുന്നണി കൗണ്‍സിലർമാർ പാട്ടുപാടിയും ചിരിച്ചും പ്രതിരോധം തീർത്തു. ഒരുമണിക്കൂറോളം നീണ്ട സമരത്തിനൊടുവിൽ പത്രസമ്മേളനത്തിനായി മേയർ പുറത്തിറങ്ങാൻ ശ്രമിക്കവേ കോണ്‍ഗ്രസ് കൗണ്‍സിലമാർ കൈകോർത്തും വട്ടമിട്ടും മേയറെ തടഞ്ഞതോടെ പ്രതിഷേധം അതിരുവിടുകയായിരുന്നു. പോലീസ് വലയം ഭേദിച്ച് മേയറെ തടയാൻ കൗണ്‍സിലർമാർ ശ്രമിച്ചതോടെ പോലീസും കൗണ്‍സിലർമാരും തമ്മിൽ കൈയാങ്കളിയിൽ എത്തി. ഇതിനിടെ മേയർ കൗണ്‍സിൽ ഹാളിലേക്ക് എത്തിയിരുന്നു. തുടർന്ന് മേയറുടെ രാജി ആവശ്യപ്പെട്ടും പോലീസിനു ഗോ ബാക്ക് വിളിച്ചും കൗണ്‍സിലർമാർ കോർപറേഷൻ ഓഫീസ് സമരഭൂമിയാക്കി. അജൻഡ ചർച്ചചെയ്താൽ ഇടതുഭരണസമിതിക്കുണ്ടായ വീഴ്ച പുറത്തുവരുമെന്നു മനസിലായ മേയർ കൗണ്‍സിൽ പിരിച്ചുവിടുകയായിരുന്നുവെന്നും മേയർ വച്ച അജൻഡ അവർക്കുതന്നെ തിരിച്ചടി യായെന്ന തിരിച്ചറിവിലാണ് മേയർ ഏകപക്ഷീയമായി കൗണ്‍സിൽ പിരിച്ചുവിട്ടു തടിതപ്പിയതെന്നും ജനങ്ങളിൽനിന്നും നികുതിയുടെ പേരിൽ വൻകൊള്ളയാണ് ഇടതുഭരണസമിതി നടത്തിയതെന്നും കോണ്‍ഗ്രസ്ആരോപിച്ചു. നികുതിയിലെ കടുംവെട്ട് ഹൈക്കോടതി തടഞ്ഞു: രാജൻ ജെ. പല്ലൻ കോർപറേഷനിലെ രണ്ടുലക്ഷത്തോളം വരുന്ന നികുതിദായകരിൽനിന്ന് ഈടാക്കിയ നികുതിപിരിവ് നിയമവിരുദ്ധമാണെന്നും കേസ് കൊടുത്ത 198 ആളുകളുടെയും 2016 മുതലുള്ള അധികനികുതി ഒഴിവാക്കിക്കൊണ്ടാണ് ഹൈക്കോടതി ഉത്തരവിട്ടതെന്നും പ്രതിപക്ഷ നേതാവ് രാജൻ ജെ. പല്ലൻ പറഞ്ഞു. കേസിൽ കൗണ്‍സിൽ അപ്പീൽ പോകാൻ തീരുമാനിക്കുന്നതിനുമുന്പ്, എൽഡിഎഫ് ഭരണസമിതി ജനങ്ങളുടെ പക്കൽനിന്നും അധികനികുതിയും പലിശയും പിരിക്കണമെന്ന് ആവശ്യപ്പെട്ടുകൊണ്ട് കൗണ്‍സിൽ അറിയാതെ അപ്പീൽ പോകുന്നത് അംഗീകരിക്കില്ല. ജനങ്ങൾക്ക് അനുകൂലമായ ഹൈക്കോടതി വിധിക്കെതിരേ അപ്പീൽ പോകരുത്. നികുതിദായകരിൽനിന്നും അധികം വാങ്ങിയ തുക തിരിച്ചുനൽകണമെന്നും കോടതിവിധിയിലൂടെ കോർപറേഷനുണ്ടാകുന്ന കോടിക്കണക്കിനു രൂപയുടെ നഷ്ടം ബന്ധപ്പെട്ട ഉദ്യോഗസ്ഥരിൽനിന്ന് ഈടാക്കണമെന്നും പ്രതിപക്ഷ നേതാവ് ആവശ്യപ്പെട്ടു. പ്രതിഷേധം അന്വേഷണം തടസപ്പെടുത്താൻ: മേയർ നികുതിപിരിവുമായി ബന്ധപ്പെട്ട്, മുൻമേയർമാരായ ഐ.പി. പോൾ, രാജൻ ജെ. പല്ലൻ എന്നിവരുടെ കാലത്ത് ടാക്സേഷൻ നടപടി പൂർത്തീകരിക്കാത്തതും കൗണ്‍സിൽ തീരുമാനപ്രകാരം അന്തിമവിജ്ഞാപനം പത്രപ്പരസ്യം ചെയ്തിട്ടില്ലാത്തതുമാണെന്നു മേയർ എം.കെ. വർഗീസ്. ഇതിന്‍റെ ഭാഗമായി 198 പേരിൽനിന്നു നികുതി പിരിക്കാൻ പാടില്ല എന്ന് ഹൈക്കോടതി ഉത്തരവായിട്ടുണ്ട്. ഈ ഉത്തരവുപ്രകാരം കോടികളുടെ നഷ്ടം കോർപറേഷനു വരുമെന്നാണ് കണക്കാക്കുന്നത്. ഇതിന്‍റെ യഥാർഥ ഉത്തരവാദികളെ കണ്ടുപിടിക്കണമെന്നു മേയർ എന്ന നിലയിൽ താൻ പ്രത്യേക കുറിപ്പ് തയാറാക്കിനൽകിയിരുന്നു. ഇതിനെതുടർന്ന് അന്വേഷണം തടസപ്പെടുത്തുക എന്നതാണ് കൗൺസിൽ അലങ്കോലപ്പെടുത്തലിന്‍റെ അജൻഡയെന്നും മേയർ പത്രസമ്മേളനത്തിൽ ആരോപിച്ചു. നിയമപരമായ നടപടികൾപ്രകാരം കുറ്റവാളികളെ കണ്ടുപിടിച്ച് കോർപറേഷനു വരുന്ന നഷ്ടം ഉത്തരവാദികളിൽ നിന്നുതന്നെ ഈടാക്കുന്നതാണ്. ഇതു ജനങ്ങൾ തിരിച്ചറിയാതിരിക്കാനാണ് കൗണ്‍സിലിൽ കോണ്‍ഗ്രസ് കപടനാടകം നടത്തിയതെന്നും അദ്ദേഹം പറഞ്ഞു.

ഗ്യാസ് സിലിണ്ടര്‍ ചോര്‍ന്ന് പൊള്ളലേറ്റ വയോധികന്‍ മരിച്ചു

പുതുക്കാട്: കണ്ണംമ്പത്തൂരില്‍ വീട്ടിലെ ഗ്യാസ് സിലിണ്ടറിലെ ചോര്‍ച്ച പരിശോധിക്കുന്നതിനിടെയുണ്ടായ തീപിടിത്തത്തില്‍ പൊള്ളലേറ്റ് ചികിത്സയിലായിരുന്ന വട്ടണാത്ര സ്വദേശി മരിച്ചു. കൈനാത്തൂടന്‍ വീട്ടില്‍ അശോകൻ (62) ആണ് മരിച്ചത്. ഗ്യാസ് സിലിണ്ടര്‍ സര്‍വീസ് ചെയ്യാനെത്തിയ അശോകന്‍ അടുക്കളയില്‍ സിലിണ്ടര്‍ പരിശോധിക്കുന്നതിനിടെയായിരുന്നു അപകടം. മേയ് 30ന് കണ്ണമ്പത്തൂര്‍ പൊന്നാമ്പിടി ബിന്ദുവിന്‍റെ വീട്ടിലായിരുന്നു സംഭവം. അപകടത്തില്‍ ഗുരുതരമായി പൊള്ളലേറ്റ ബിന്ദു ചികിത്സയിലാണ്. എറണാകുളത്തെ സ്വകാര്യ ആശുപത്രിയില്‍ ചികിത്സയിലിരിക്കെയാണ് മരിച്ചത്.

വനത്തിനുള്ളില്‍ അഴുകിയനിലയില്‍ മൃതദേഹം കണ്ടെത്തി

കോടാലി: താളൂപ്പാടം മുപ്ലിവനത്തില്‍ പുരുഷന്‍റെ മൃതദേഹം അഴുകിയനിലയില്‍ കണ്ടെത്തി. മുരിക്കുങ്ങല്‍ മുപ്ലി റോഡിലെ ഫോറസ്റ്റ് സ്‌റ്റേഷന് ഒരു കിലോമീറ്ററോളം അകലെ വനത്തിനുള്ളിലെ നീര്‍ച്ചോലയിലാണ് മൃതദേഹം കണ്ടെത്തിയത്. മുപ്ലിയിലുള്ള പിതൃഭവന്‍ ഓള്‍ഡ് ഏജ് ഹോമില്‍നിന്ന് ഒരുമാസംമുമ്പ് കാണാതായ വയോധികന്‍റേതാണ് മൃതദേഹമെന്നു സംശയിക്കുന്നു. ഇയാളുടേതെന്നു കരുതുന്ന ഷര്‍ട്ടും ബെല്‍റ്റും മുതദേഹത്തിനരികില്‍നിന്നു കണ്ടെടുത്തിട്ടുണ്ട്. വനവിഭവങ്ങള്‍ ശേഖരിക്കുന്നതിനിടെ ആദിവാസികളാണ് മൃതദേഹം കണ്ട് വിവരം വനപാലകരെ അറിയിച്ചത്. ഇന്‍സ്‌പെക്ടര്‍ കെ. കൃഷ്ണന്‍റെ നേതൃത്വത്തില്‍ വെള്ളിക്കുളങ്ങര പോലീസും വനപാലകരും ഫോറന്‍സിക്, ഫിംഗര്‍പ്രിന്‍റ് വിദഗ്ധരും സ്ഥലത്തെത്തി മേല്‍നടപടി സ്വീകരിച്ചശേഷം മൃതദേഹം പോസ്റ്റുമോര്‍ട്ടത്തിനായി തൃശൂര്‍ മെഡിക്കല്‍ കോളജ് ആശുപത്രിയിലേക്കു കൊണ്ടുപോയി.

കക്ക വാരുന്നതിനിടെ പുഴയിൽ മുങ്ങിമരിച്ചു

കൊടുങ്ങല്ലൂർ: പുഴയിൽ കക്ക വാരാൻ ഇറങ്ങിയ തൊഴിലാളി മുങ്ങിമരിച്ചു. ആനാപ്പുഴ പാലിയംതുരുത്ത് കോഴിപ്പറമ്പിൽ ഗോപാലൻ മകൻ ബോസ്(65)ആണ് മരിച്ചത്. തിങ്കളാഴ്ച വൈകീട്ട് ആനാപ്പുഴ കനാൽ ഓഫീസിനു മുമ്പിലുള്ള പുഴയിലാണ് കക്കവാരാൻ ഇറങ്ങിയത്. കനത്ത മഴയെത്തുടർന്ന് പുഴയിൽ വെള്ളവും ഒഴുക്കും കൂടുതലായിരുന്നു. ഇതിനിടയിൽ ഒഴുക്കിൽപ്പെട്ട് കാണാതാവുകയായിരുന്നു. കൊടുങ്ങല്ലൂർ ഫയർഫോഴ്സും നാട്ടുകാരും ചേർന്ന് തെരച്ചിൽ നടത്തിയെങ്കിലും കണ്ടുകിട്ടിയില്ല. ഇന്നലെ ഉച്ചയോടെയാണ് മൃതദേഹം കണ്ടെത്തിയത്. പോലീസ് നടപടികൾക്കുശേഷം താലൂക്ക് ആശുപത്രിയിൽ പോസ്റ്റ്മോർട്ടം നടത്തി. സംസ്കാരം നടത്തി. ഭാര്യ: സജിത. മക്കൾ: ബിനോയ്, ബിനിൽ

അനുമോദനവും ആദരിക്കലും

എരുമപ്പെട്ടി: കോൺഗ്രസ് എരുമപ്പെട്ടി മണ്ഡലം ഒന്നാംവാർഡ് മഹാത്മാഗാന്ധി കൂട്ടായ്മയുടെ നേതൃത്വത്തിൽ വിവിധ മേഖലകളിൽ കഴിവ് തെളിയിച്ചവരെ ആദരിച്ചു. എസ്എസ്എൽസി, പ്ലസ് ടു വിജിയികളെ അനുമോദിച്ചു. ഡിസിസി സെക്രട്ടറി ഷാഹിദ റഹ്മാൻ ഉദ്ഘാടനംചെയ്തു. ബ്ലോക്ക് സെക്രട്ടറി കെ. ഗോവിന്ദൻകുട്ടി അധ്യക്ഷനായി. ദീപിക പ്രാദേശികലേഖിക എരുമപ്പെട്ടി പ്രസ്ക്ലബ് സെക്രട്ടറിയുമായ കെ.ആർ. രാധിക ഉൾപ്പടെയുള്ളവരെയാണ് ചടങ്ങിൽ ആദരിച്ചത്. യുഡിഎഫ് നിയോജകമണ്ഡലം കൺവീനർ അമ്പലപ്പാട്ട് മണികണ്ഠൻ മുഖ്യാതിഥിയായി. കോൺഗ്രസ് മണ്ഡലം പ്രസിഡന്‍റ് എം.എം. നിഷാദ്, ബ്ലോക്ക് വൈസ് പ്രസിഡന്‍റ് എൻ.കെ. കബീർ, മുൻ പഞ്ചായത്ത് പ്രസിഡന്‍റ് മീന ശലമോൻ, മഹിളാ കോൺഗ്രസ് നേതാക്കളായ സെഫീന അസീസ്, വിനോദിനി, പാലയ്ക്കൽ പഞ്ചായത്ത് മെമ്പർ റീന വർഗീസ്, കോൺഗ്രസ് വാർഡ് പ്രസിഡന്‍റ് പി.എസ്. ബാലകൃഷ്ണൻ എന്നിവർ സംസാരിച്ചു. നൂറ് വിദ്യാർഥികൾക്ക് നോട്ടുപുസ്തകങ്ങൾ വിതരണംചെയ്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]