ADVERTISEMENT

ADVERTISEMENT

രാഹുല്‍ ഗാന്ധിയുടെ ജന്മദിനം ആഘോഷിച്ചു

കൊച്ചി: പാര്‍ലമെന്‍റ് പ്രതിപക്ഷ നേതാവ് രാഹുല്‍ ഗാന്ധിയുടെ 55-ാം ജന്മദിനം തേവര എസ്ഡി കോണ്‍വെന്‍റിലെ അന്തേവാസികള്‍ക്കൊപ്പം ഡിസിസി ആഘോഷിച്ചു. കെ.ബാബു എംഎല്‍എ ഉദ്ഘാടനം ചെയ്തു.

ടി.ജെ. വിനോദ് എംഎല്‍എ, ഡിസിസി പ്രസിഡന്‍റ് മുഹമ്മദ് ഷിയാസ്, ടി.എം. സക്കീര്‍ ഹുസൈന്‍, ടോണി ചമ്മിണി, അഡ്വ.ജെയ്‌സണ്‍ ജോസഫ്, ഡിസിസി ഭാരവാഹികളായ ജോസഫ് ആന്‍റണി,

എം.പി. ശിവദത്തന്‍, ബാബു വലിയവീട്ടില്‍, കെ.വി.പി. കൃഷ്ണകുമാര്‍, വിജു ചൂളക്കന്‍, കെ.എക്‌സ്. ഫ്രാന്‍സിസ് തുടങ്ങിയവര്‍ പങ്കെടുത്തു.

ADVERTISEMENT

ആതിര ജ്വല്ലറി തട്ടിപ്പ്: പണം തിരികെക്കിട്ടാൻ നിക്ഷേപകര്‍ പ്രക്ഷോഭത്തിന്

കൊച്ചി: ഹൈക്കോടതി ജംഗ്ഷനില്‍ പ്രവര്‍ത്തിച്ചിരുന്ന ആതിര ഗോള്‍ഡ് ആന്‍ഡ് സില്‍ക്സ് എന്ന സ്ഥാപനം വിവിധ സ്വര്‍ണ സമ്പാദ്യ പദ്ധതികളുടെ മറവില്‍ കോടികൾ തട്ടിയ സംഭവത്തില്‍ പണം തിരികെ ലഭിക്കണമെന്ന് ആവശ്യപ്പെട്ട് നിക്ഷേപകര്‍ പ്രക്ഷോഭത്തിലേക്ക്. ഇതിനു മുന്നോടിയായി പണം നഷ്ടപ്പെട്ടവര്‍ ചേര്‍ന്ന് ഇന്ന് കളക്ടര്‍ക്ക് പരാതി നല്‍കും. സ്ഥാപനത്തിന്റെ വിവിധ നിക്ഷേപ പദ്ധതികളിലൂടെ 5,000 ഓളം പേര്‍ക്കാണ് പണം നഷ്ടമായിട്ടുള്ളത്. സ്വകാര്യ ബാങ്കില്‍നിന്ന് കമ്പനി 19 കോടിയോളം രൂപ വായ്പ എടുത്തിരുന്നു. കഴിഞ്ഞ ഫെബ്രുവരിയില്‍ തിരിച്ചടവ് മുടങ്ങിയതിനെ തുടര്‍ന്ന് ബാങ്ക് എറണാകുളത്തെ ഇവരുടെ സ്ഥാപനം കണ്ടുകെട്ടിയതോടെയാണ് തട്ടിപ്പ് വിവരം പുറത്തറിയുന്നത്. ഈ ബാധ്യത തീര്‍ക്കുന്നതിനായി നിക്ഷേപകരുടെ 12 കോടിയോളം വരുന്ന സ്വര്‍ണം സ്വകാര്യ ബാങ്കിന് അധികൃതര്‍ കൈമാറിയെന്നും, ശേഷിക്കുന്ന തുകയടക്കാന്‍ പൂട്ടിക്കിടക്കുന്ന സ്ഥാപനത്തിലെ കോടികള്‍ വിലവരുന്ന തുണിത്തരങ്ങള്‍ തമിഴ്‌നാട്ടിലെ സംഘത്തിന് വില്‍ക്കാന്‍ ശ്രമിച്ചെന്നും ഇവര്‍ ആരോപിച്ചു. സംസ്ഥാനത്തിന്‍റെ വിവിധ ഭാഗങ്ങളില്‍ നിന്നുള്ളവര്‍ക്ക് പുറമേ ലക്ഷ്വദീപില്‍നിന്നുള്ളവരും തട്ടിപ്പിനിരയായിട്ടുണ്ട്. സര്‍ക്കാര്‍ ഇടപ്പെട്ട് നിക്ഷേപകരുടെ തുക തിരികെ ലഭിക്കുന്നതിനുള്ള നടപടി സ്വീകരിക്കണമെന്ന് നിക്ഷേപകര്‍ പത്രസമ്മേളനത്തില്‍ ആവശ്യപ്പെട്ടു. സ്ഥാപനങ്ങള്‍ക്ക് സ്വര്‍ണ, പണ നിക്ഷേപങ്ങള്‍ സ്വീകരിക്കുന്നതിന് ആര്‍ബിഐയുടെയും സര്‍ക്കാരിന്‍റെയും ലൈസന്‍സ് നിര്‍ബന്ധമാണ്. എന്നാല്‍ ആതിര ഗോള്‍ഡ് ആന്‍ഡ് സില്‍ക്‌സിന് ഇത്തരം ലൈസന്‍സില്ലെന്നും നിക്ഷേപിച്ച തുക തിരികെ ലഭിച്ചില്ലെന്നും കാണിച്ച് നിക്ഷേപകര്‍ പരാതിപ്പെട്ടതോടെ സ്ഥാപനത്തിന്‍റെ എംഡിയായ ആര്‍.ജെ. ആന്‍റണി, ജോസ്, ജോബി, ജോണ്‍സണ്‍ എന്നിവരെ അറസ്റ്റു ചെയ്തിരുന്നു. നിക്ഷേപകരും തട്ടിപ്പിന് ഇരകളുമായ ആര്‍. ജെഫ്രി പിന്‍ഹെയ്‌റോ, ടെസി ഡാല്‍ട്ടന്‍, ഫൈസല്‍ റഹ്‌മാന്‍, കെ.ആര്‍. ഷീല എന്നിവര്‍ പത്രസമ്മേളനത്തില്‍ പങ്കെടുത്തു. 70 ലക്ഷത്തിന്‍റെ നിക്ഷേപതട്ടിപ്പ്: ആതിരക്കെതിരെ പുതിയ കേസ് വൈപ്പിൻ: 70.7 ലക്ഷം രൂപയുടെ നിക്ഷേപ തട്ടിപ്പിൽ ആതിര ജ്വല്ലറി ഉടമയായ പള്ളിപ്പുറം രണ്ടു തൈക്കൽ ആന്‍റണിക്കെതിരെ പുതിയ ഒരു കേസുകൂടി മുനമ്പം പോലീസ് രജിസ്റ്റർ ചെയ്തു. പള്ളിപ്പുറം സ്വദേശിയായ ഗിൽബർട്ട് ആന്‍റണിയുടെ പരാതിയിലാണ് കേസ്. 2019 ഫെബ്രുവരി മുതൽ 2025 ജനുവരി വരെ പലപ്പോഴായി നിക്ഷേപമായി സ്വീകരിച്ചതാണ് 70.7 ലക്ഷം രൂപ. ഉറപ്പിനായി പ്രോമിസറി നോട്ടുകൾ നൽകിയിരുന്നുവത്രേ. കാലാവധി കഴിഞ്ഞിട്ടും നിക്ഷേപം തിരികെ നൽകാതെ വന്നതിനെ തുടർന്നാണ് നിക്ഷേപകൻ മുനമ്പം പോലീസിൽ പരാതി നൽകിയത്. സമാനമായ പരാതികളിൽ പറവൂരും കൊച്ചി സിറ്റിയിലുമായി ഇയാൾക്കെതിരെ കേസ് ഉണ്ടെന്ന് മുനസം പോലീസ് അറിയിച്ചു.

പോക്സോ കേസിൽ യുവാവിന് മൂന്നുവർഷം കഠിനതടവ്

പറവൂർ: 17 കാരിയുടെ നഗ്നചിത്രം വാങ്ങി മൊബൈൽ ഫോണിൽ സൂക്ഷിച്ച കേസിലെ പ്രതി വടക്കാഞ്ചേരി ഓട്ടുപാറ കല്ലോട്ടുകുഴി ചാൾസ് ബേബി(25)യെ മൂന്നുവർഷം കഠിന തടവിന് പറവൂർ അതിവേഗ സ്പെഷൽ കോടതി ജഡ്ജി ടി.കെ. സുരേഷ് ശിക്ഷിച്ചു. 55000 രൂപ പിഴയുമടക്കണം. തുക ഇരയ്ക്കു കൈമാറുവാനും നിർദേശിച്ചു. 2021 നവംബറിലാണ് പ്രതി ഇൻസ്റ്റാഗ്രാം വഴി പെൺകുട്ടിയെ പരിചയപ്പെടുന്നത്. സ്നേഹം നടിച്ച് പലപ്പോഴായി നഗ്ന ചിത്രങ്ങൾ മൊബൈൽ ഫോണിൽ അയച്ചുവാങ്ങി സൂക്ഷിച്ചുവെന്നതാണ് കേസിനാസ്പദമായ സംഭവം. പുത്തൻവേലിക്കര സിഐയായിരുന്ന വി. ജയകുമാറാണ് കുറ്റപത്രം സമർപ്പിച്ചത്. കേസിൽ പ്രോസിക്യൂഷന്‍റെ ഭാഗത്തുനിന്നും കേസിൽ 18 സാക്ഷികളെ വിസ്തരിക്കുകയും, 41 രേഖകളും രണ്ട് തൊണ്ടിമുതലുകളും തെളിവായി കോടതി മുമ്പാകെ ഹാജരാക്കുകയും ചെയ്തിരുന്നു. പ്രോസിക്യൂഷനു വേണ്ടി സ്പെഷൽ പബ്ലിക് പ്രോസിക്യൂട്ടർ പ്രവിത ഗിരീഷ്കുമാർ ഹാജരായി.

ലഹരി വസ്തുക്കളുമായി യുവാക്കള്‍ പിടിയില്‍

കൊച്ചി: വില്പനക്കായി സൂക്ഷിച്ചിരുന്ന ലഹരി വസ്തുക്കളുമായി യുവാക്കള്‍ അറസ്റ്റില്‍. വയനാട് സുത്താന്‍ബത്തേരി സ്വദേശി കെ.വി. ജിതിന്‍(23), കാക്കനാട് തുതിയൂര്‍ സ്വദേശി അഷിന്‍ ഷിബു(22) എന്നിവരെയാണ് കൊച്ചി സിറ്റി ഡാന്‍സാഫും, തൃക്കാക്കര പോലീസും ചേർന്ന് പിടികൂടിയത്. രഹസ്യവിവരത്തെത്തുടര്‍ന്ന് തൃക്കാക്കര ഓര്‍ക്കിഡ് അവന്യൂ റോഡില്‍ ജിതിന്‍ താമസിച്ചിരുന്ന വീട്ടില്‍ നടത്തിയ പരിശോധനയിലാണ് വില്‍പ്പനക്കായി സൂക്ഷിച്ചിരുന്ന 4.33 ഗ്രാം എംഡിഎംഎയും, 5.048 കിലോ കഞ്ചാവും പിടികൂടിയത്. മയക്കുമരുന്നിന്‍റെ ഉറവിടം സംബന്ധിച്ചു കൂടുതല്‍ അന്വേഷണം നടത്തിവരികയാണ്.

പ്രതികൂല കാലാവസ്ഥ: കോസ്റ്റ് ഗാര്‍ഡിന്‍റെ ഹെലികോപ്റ്റര്‍ ചേലാട് ഇറക്കി

കോതമംഗലം: ശക്തമായ കാറ്റും കനത്ത മഴയെയും തുടര്‍ന്ന് കോസ്റ്റ് ഗാര്‍ഡിന്‍റെ ഹെലികോപ്റ്റര്‍ ചേലാട് സെന്‍റ് ഗ്രിഗോറിയോസ് ദന്തല്‍ കോളജ് ഗ്രൗണ്ടില്‍ മുന്‍കരുതല്‍ ലാന്‍ഡിംഗ് നടത്തി. ഇന്നലെ ഉച്ചയ്ക്ക് 12.40നാണ് ഹെലികോപ്റ്റർ ഇറക്കിയത്. തീരദേശ പട്രോളിംഗ് നടത്തുകയായിരുന്ന കോസ്റ്റ് ഗാര്‍ഡ് (ചേതക്) ഹെലികോപ്റ്റര്‍ തിരികെ മടങ്ങുമ്പോഴാണ് പ്രതികൂല കാലാവസ്ഥ നേരിട്ടത്. ഇതോടെ കോതമംഗലം ചേലാട് സെന്‍റ് ഗ്രിഗോറിയസ് ദന്തല്‍ കോളജിലെ ഫുട്‌ബോള്‍ മൈതാനത്ത് ഹെലികോപ്റ്റര്‍ ഇറക്കുകയായിരുന്നു. അപ്രതീക്ഷിതമായി ഹെലികോപ്റ്റര്‍ താന്ന് പറന്നതും പറന്നിറങ്ങിയതും പ്രദേശവാസികളിലും കോളജില്‍ ഉണ്ടായിരുന്നവരിലും ആശങ്ക ഉണര്‍ത്തിയെങ്കിലും പിന്നീടാണ് കാര്യം വ്യക്തമായത്. കാലാവസ്ഥ അനുകൂലമായതോടെ ഹെലികോപ്റ്റര്‍ വീണ്ടും 1.40ഓടെ പറന്നുയര്‍ന്ന് നെടുമ്പാശേരിയിലെ സിജി എയര്‍ എന്‍ക്ലേവില്‍ സുരക്ഷിതമായി ലാന്‍ഡ് ചെയ്തു. ഇത് മുന്‍കരുതല്‍ ലാന്‍ഡിംഗ് മാത്രം ആണെന്നും അടിയന്തര ലാന്‍ഡിംഗ് അല്ലെന്നും അധിക്യതര്‍ വ്യക്തമാക്കി.

വൈറലെല്ലാം റിയലല്ല! ഷെയര്‍ ചെയ്താൽ പണികിട്ടും!

കൊച്ചി: കൗതുകമുണര്‍ത്തുന്നതും സമൂഹ മാധ്യമങ്ങളില്‍ പൊട്ടിച്ചിരി പടര്‍ത്തുന്നതുമായ, മലയാളികളുടെ രൂപസാദൃശ്യവും പച്ച മലയാളം സംസാരിക്കുന്നതുമായ എഐ വീഡിയോകള്‍ ഷെയര്‍ ചെയ്യാന്‍ വരട്ടെ, നിയമം ലഘിക്കുന്ന ഉള്ളടക്കങ്ങൾ ഉള്ളവയാണെങ്കില്‍ നിങ്ങള്‍ക്കും പണികിട്ടും. ഗൂഗിളിന്‍റെ വിഇഒ3 എന്ന എഐ ടൂളാണ് പ്രധാനമായും ഈ വീഡിയോകള്‍ക്ക് പിന്നില്‍. ടെക്സ്റ്റ്, ശബ്ദം, ചലനങ്ങള്‍ ഒന്നിച്ച് പ്രയോജനപ്പെടുത്തി 10 സെക്കന്‍ഡ് ദൈര്‍ഘ്യമുള്ള ക്ലിപ്പുകള്‍ നിര്‍മിക്കാന്‍ കഴിയുന്ന ടൂളാണിത്. അശ്ലീല പദങ്ങള്‍ ഉപയോഗിച്ചുള്ള പല വീഡിയോകളും, തെറ്റായ ദൃശ്യമാധ്യമ വാര്‍ത്തകളും നിലവില്‍ പ്രചരിക്കുന്നവയുടെ കൂട്ടത്തിലുണ്ട്. ഇത്തരം വീഡിയോകള്‍ കണ്ണുംപൂട്ടി ഷെയര്‍ ചെയ്യുന്നവരോടാണ് സൈബര്‍ വിദഗ്ധരുടെ മുന്നറിയിപ്പ്. വ്യക്തിഹത്യ, മതസ്പര്‍ദ്ധ, കലാപാഹ്വാനം തുടങ്ങിയവയുടെ പരിധിയില്‍ വരുന്ന ഇത്തരം വീഡിയോകള്‍ക്കെതിരെ കേസെടുക്കാന്‍ നിയമമുണ്ട്. വീഡിയോ നിര്‍മിച്ചവര്‍ക്ക് പുറമെ ഇത് പ്രചരിപ്പിച്ചവര്‍ക്കെതിരെയും കേസെടുക്കാം. മഴയുടെ പശ്ചാത്തലത്തില്‍ നിരവധി വീഡിയോകളാണ് കഴിഞ്ഞയിടെ സമൂഹമാധ്യമങ്ങളില്‍ പ്രചരിച്ചത്. ദൃശ്യമാധ്യമങ്ങളുടെ പശ്ചാത്തലത്തില്‍ പ്രചരിക്കുന്ന വ്യാജ വാര്‍ത്തകളാണ് കൂട്ടത്തില്‍ ഏറ്റവുമധികം പ്രശ്‌നങ്ങള്‍ സൃഷ്ടിക്കുന്നത്. ഷെയര്‍ ചെയ്യുന്നവരില്‍ ഭൂരിഭാഗം പേരും മുതിർന്നവരാണ്. നിലവില്‍ പ്രചരിക്കുന്ന വീഡിയോകളില്‍ ഭൂരിഭാഗവും വ്യാജ ഐഡികളില്‍ നിന്ന് പ്രചരിക്കുന്നവയുമാണ്. ഇതിനുപിന്നിലെ നിയമവശങ്ങള്‍ കുട്ടികളിലും മുതിര്‍ന്നവരിലും ഒരുപോലെ ബോധവത്കരണം നടത്തേണ്ടതാണെന്ന് സൈബര്‍ വിദഗ്ധര്‍ ചൂണ്ടിക്കാട്ടുന്നു.

ഉള്‍നാടന്‍ ജലാശയങ്ങളില്‍ ഊത്ത പിടിത്തത്തിന് നിരോധനം

കൊച്ചി: ഉള്‍നാടന്‍ ജലാശയങ്ങളില്‍ ജൂലൈ വരെ അനധികൃതമായി മത്സ്യങ്ങള്‍ പിടികൂടുന്നതിന് നിരോധനമേർപ്പെടുത്തി. മത്സ്യവംശനാശത്തിനും ജലജീവ വൈവിധ്യത്തിന്‍റെ ശോഷണത്തിനും വഴിയൊരുക്കുന്ന സാഹചര്യത്തിലാണ് നിരോധനം. നിയമലംഘനം നടത്തുന്നവര്‍ക്കെതിരെ ആറു മാസം വരെ തടവും 10,000 രൂപ വരെ പിഴയും ചുമത്തും. അടക്കം കൊല്ലി വല, 20 മില്ലിമീറ്ററില്‍ കുറഞ്ഞ കണ്ണിവലിപ്പമുള്ള വല, വൈദ്യുതി, തോട്ട എന്നീ രീതികള്‍ ഉപയോഗിച്ച് കൊണ്ടുള്ള മത്സ്യബന്ധനവും നിരോധിച്ചിട്ടുണ്ട്. ഇത്തരം അനധികൃത മത്സ്യബന്ധനം ശ്രദ്ധയില്‍പ്പെട്ടാല്‍ ജില്ലാ ഫിഷറീസ് ഡെപ്യൂട്ടി ഡയറക്ടറുടെ ഓഫീസിലോ അടുത്തുള്ള മത്സ്യഭവനുകളിലോ അറിയിക്കേണ്ടതാണെന്ന് ജില്ലാ ഫിഷറീസ് ഡെപ്യൂട്ടി ഡയറക്ടര്‍ അറിയിച്ചു.

അനധികൃത മത്സ്യബന്ധനം: എട്ട് ഫൈബര്‍ ബോട്ടുകള്‍ കസ്റ്റഡിയിലെടുത്തു

കൊച്ചി: ട്രോളിംഗ് നിരോധന കാലയളവില്‍ നിയമവിരുദ്ധ മത്സ്യബന്ധനം നടത്തിയ എട്ട് ഫൈബര്‍ ബോട്ടുകള്‍ ഫിഷറീസ് വകുപ്പ് ഉദ്യോഗസ്ഥര്‍ ഇന്നലെ കസ്റ്റഡിയിലെടുത്തു. കിളി മീന്‍, അരണ മീന്‍ എന്നിവ ഉള്‍പ്പെടെയുള്ള സമുദ്ര മത്സ്യങ്ങള്‍ പിടികൂടിയ ബോട്ടുകളാണ് പിടിച്ചെടുത്തത്. ട്രോളിംഗ് നിരോധനകാലത്തെ വേട്ട മത്സ്യസമ്പത്ത് ക്ഷയിക്കാനും, വ്യവസായ വരുമാനത്തിലും വിദേശനാണ്യ വരുമാനത്തിലും ഗുരുതരമായ നഷ്ടത്തിനും ഇടയാക്കുമെന്ന് അധികൃതര്‍ പറഞ്ഞു. കേരള ട്രോളിംഗ് നിരോധന ചട്ടങ്ങള്‍ക്കും കേരള മറൈന്‍ ഫിഷറീസ് റെഗുലേഷന്‍ ആക്ടിനും കീഴിലാണ് നടപടി. ട്രോളിംഗ് നിരോധന കാലയളവില്‍ ആഴക്കടൽ മത്സ്യബന്ധനം സംസ്ഥാനത്ത് കര്‍ശനമായി നിരോധിച്ചിട്ടുണ്ട്. ട്രോളിംഗ് നിരോധന കാലയളവില്‍ നിയമലംഘനങ്ങള്‍ തടയുന്നതിനായി കര്‍ശന നടപടികളും നിരീക്ഷണവും തുടരുമെന്നും ഫിഷറീസ് വകുപ്പ് അറിയിച്ചു.

മെട്രോപ്പൊളിറ്റന്‍ ആസൂത്രണ സമിതി തെരഞ്ഞെടുപ്പ്: കോര്‍പറേഷനില്‍ എല്‍ഡിഎഫ് വോട്ട് കോണ്‍ഗ്രസ് സ്ഥാനാര്‍ഥിക്ക്

കൊച്ചി: മെട്രോപ്പൊളിറ്റന്‍ ആസൂത്രണ സമിതിയിലേക്ക് കൊച്ചി കോര്‍പറേഷനില്‍ നിന്നുള്ള പ്രതിനിധികളെ കണ്ടെത്താന്‍ നടന്ന തെരഞ്ഞെടുപ്പില്‍ എല്‍ഡിഎഫ് വോട്ട് കോണ്‍ഗ്രസ് സ്ഥാനാര്‍ഥിക്ക്. വനിതാ സംവരണത്തില്‍ നടന്ന മത്സരത്തില്‍ യുഡിഎഫ് സ്ഥാനാര്‍ഥിയായി മത്സരിച്ച കെപിസിസി ജനറല്‍ സെക്രട്ടറി ദീപ്തി മേരി വര്‍ഗീസിനാണ് എല്‍ഡിഎഫില്‍ നിന്ന് വോട്ട് ചോര്‍ന്ന് കിട്ടിയതെന്ന് കോണ്‍ഗ്രസ് അവകാശപ്പെട്ടു. 74 അംഗ കൗണ്‍സിലില്‍ എല്‍ഡിഎഫിന് 38 ഉം യുഡിഎഫിന് 31 ഉം അംഗങ്ങളാണുള്ളത്. മുഴുവന്‍ വോട്ടുകളും ലഭിച്ചാല്‍ എല്‍ഡിഎഫ് സ്ഥാനാര്‍ഥിക്ക് 38 വോട്ട് കിട്ടണം. എന്നാല്‍ വനിതാ സംവരണത്തില്‍ മത്സരിച്ച എല്‍ഡിഎഫ് സ്ഥാനാര്‍ഥി ദീപ വര്‍മയ്ക്ക് ലഭിച്ചത് 34 വോട്ട് മാത്രമാണ്. ദീപ്തി മേരി വര്‍ഗീസിനാകട്ടെ 33 വോട്ടും ലഭിച്ചു. എല്‍ഡിഎഫിന് നഷ്ടമായ നാലില്‍ രണ്ട് വോട്ടാണ് ദീപ്തിക്ക് അധികമായി ലഭിച്ചതെന്നാണ് കോണ്‍ഗ്രസിന്‍റെ അവകാശവാദം. ശേഷിച്ച രണ്ടില്‍ ഒന്ന് അസാധുവാകുകയും ഒരെണ്ണം രേഖപ്പെടുത്താതെ പോകുകയുമായിരുന്നു. യോഗത്തില്‍ എത്താതിരുന്ന എല്‍ഡിഎഫ് അംഗം ടി.കെ. അഷറഫിന്‍റെ വോട്ടാണ് രേഖപ്പെടുത്താതെ പോയത്. ജനറല്‍ കാറ്റഗറിയില്‍ നടന്ന തെരഞ്ഞെടുപ്പില്‍ എല്‍ഡിഎഫ് സ്ഥാനാര്‍ഥി ബെന്നി ഫെര്‍ണാണ്ടസിന് 36 വോട്ടും യുഡിഎഫ് സ്ഥാനാര്‍ഥി എം.ജി. അരിസ്റ്റോട്ടിലിന് 31 വോട്ടും ലഭിച്ചു. അസാധുവായ ഒരു വോട്ടും രേഖപ്പെടുത്താതെ പോയ ഒരു വോട്ടും മാത്രമാണ് ബെന്നി ഫെര്‍ണാണ്ടസിന് നഷ്ടമായത്. അരിസ്റ്റോട്ടിലിനാകട്ടെ യുഡിഎഫിന്‍റെ മുഴുവന്‍ വോട്ടും ലഭിച്ചു. അഞ്ച് അംഗബലമുള്ള ബിജെപിയില്‍ ജനറല്‍ കാറ്റഗറിയില്‍ മത്സരിച്ച രഘുറാം പൈക്കും വനിതാ സംവരണത്തില്‍ മത്സരിച്ച പത്മകുമാരിക്കും നാല് വീതം വോട്ടുകള്‍ ലഭിച്ചു. ബിജെപി അംഗമായ പത്മജ എസ്. മേനോന്‍ യോഗത്തില്‍ പങ്കെടുത്തിരുന്നില്ല. അതാണ് ബിജെപി സ്ഥാനാര്‍ഥികളുടെ വോട്ടില്‍ കുറവ് വന്നത്. ആസൂത്രണ സമിതിയില്‍ കോര്‍പറേഷനില്‍ നിന്ന് നാലുപേരെ മാത്രമേ ഉള്‍പ്പെടുത്താന്‍ കഴിയുകയുള്ളൂ എന്നതിനാല്‍ കുറവ് വോട്ട് ലഭിച്ച ബിജെപി സ്ഥാനാര്‍ഥികള്‍ക്ക് അവസരം ലഭിക്കില്ല.

എസ്ഐയെ വാഹനമിടിച്ച് കൊല്ലാൻ ശ്രമിച്ച കേസ്: തെളിവെടുപ്പ് നടത്തി

മൂവാറ്റുപുഴ: പരിശോധനയ്ക്കിടെ എസ്ഐയെ വാഹനമിടിച്ച് കൊലപ്പെടുത്താൻ ശ്രമിച്ച കേസിൽ കല്ലൂർക്കാട് പോലീസിന്‍റെ കസ്റ്റഡിയിൽവിട്ട ഒന്നാം പ്രതിയെ സംഭവ സ്ഥലത്തെത്തിച്ച് തെളിവെടുപ്പ് നടത്തി. ആനിക്കാട് കന്പനിപ്പടിയിൽ വാടകയ്ക്ക് താമസിക്കുന്ന വാഴത്തോപ്പ് മണിയാറംകുടി മുഹമ്മദ് ഷെരീഫ് ഷംസുദിനെ (25)യാണ് പോലീസ് കസ്റ്റഡിയിൽ വാങ്ങിയശേഷം സംഭവ സ്ഥലമായ വഴിയാഞ്ചിറയിൽ എത്തിച്ച് തെളിവെടുപ്പ് നടത്തിയത്. മൂവാറ്റുപുഴ ജുഡീഷൽ ഫസ്റ്റ് ക്ലാസ് മജിസ്ട്രേറ്റ് കോടതി അഞ്ചു ദിവസത്തേക്കാണ് പോലീസ് കസ്റ്റഡിയിൽ വിട്ടിരിക്കുന്നത്. പരിശോധനയ്ക്കെത്തിയ എസ്ഐ തന്നെ, തന്‍റെ കാറിന്‍റെ സ്റ്റിയറിംഗിൽ പിടിച്ച് തിരിച്ചപ്പോൾ കാലിലൂടെ കയറുകയായിരുന്നുവെന്നാണ് പ്രതി തെളിവെടുപ്പിനിടെ പോലീസിന് മൊഴി നൽകിയിരിക്കുന്നത്. കല്ലൂർക്കാട് പോലീസ് സ്റ്റേഷനിലെ ഗ്രേഡ് എസ്ഐ ഇ.എം മുഹമ്മദിനെ കഴിഞ്ഞ ശനിയാഴ്ച വൈകുന്നേരം വഴിയാഞ്ചിറ ഭാഗത്ത് വാഹന പരിശോധനയ്ക്കിടെ കാർ കയറ്റി കൊലപ്പെടുത്താൻ ശ്രമിച്ചെന്നാണ് കേസ്. കാലിന് പരിക്കേറ്റ എസ്ഐ ഇ.എം മുഹമ്മദ് ചികിത്സയിലാണ്. ബുധനാഴ്ച കോടതിയിൽ കീഴടങ്ങിയ പ്രതിയെ മൂവാറ്റുപുഴ ജുഡീഷൽ ഫസ്റ്റ് ക്ലാസ് മജിസ്ട്രേറ്റ് കോടതി 14 ദിവസത്തേക്ക് റിമാൻഡ് ചെയ്തിരിക്കുകയാണ്.

ഗതാഗത നിയന്ത്രണം : വാഹനങ്ങള്‍ ഓടി തോന്നിയപോലെ

ഓട്ടോമാറ്റിക് സംവിധാനം പരാജയം കൊച്ചി: സ്മാര്‍ട്ട് മിഷന്‍ പദ്ധതിയുടെ ഭാഗമായി ഓട്ടോമാറ്റിക് സംവിധാനത്തിലേക്ക് മാറിയ നഗരത്തിലെ ഗതാഗത നിയന്ത്രണ സംവിധാനം വീണ്ടും പഴയപടിയായി. ഗതാഗത നിയമ ലംഘനങ്ങള്‍ തുടരുമ്പോഴും ഇതിനെതിരെ നടപടി സ്വീകരിക്കാന്‍ ഓട്ടോമാറ്റിക് സംവിധാനത്തിന് കഴിയുന്നില്ലെന്നതാണ് പ്രധാന പോരായ്മ. റെഡ് ലൈറ്റ് ലംഘിക്കുന്നവരെ പിടികൂടുന്ന കാമറകളടക്കം സ്ഥാപിച്ചിട്ടും ഇവയ്ക്ക് പുല്ലുവില നല്‍കിയാണ് വാഹനങ്ങള്‍ ചീറിപ്പായുന്നത്. ടെക്‌നോളജി ബേസ്ഡ് ഇന്‍റഗ്രേറ്റഡ് ട്രാഫിക് മാനേജ്‌മെന്‍റ് സിസ്റ്റം (ഐടിഎംഎസ്) ആണ് പദ്ധതിയുടെ ഭാഗമായി കൊച്ചിയില്‍ ഒരുക്കിയത്. വെഹിക്കിള്‍ ആക്ടുവേറ്റഡ് സിഗ്നലുകള്‍, കാല്‍നടക്കാര്‍ക്കു റോഡ് കുറുകെ കടക്കാന്‍ സ്വയം പ്രവര്‍ത്തിപ്പിക്കാവുന്ന പെലിക്കണ്‍ സിഗ്നല്‍, മൂന്ന് മോഡുകളില്‍ ഏരിയാ ട്രാഫിക് മാനേജ്‌മെന്‍റ്, നിരീക്ഷണ കാമറകള്‍, ചുവപ്പ് ലൈറ്റ് ലംഘനം നടത്തുന്ന വാഹനങ്ങളെ തിരിച്ചറിയാനുള്ള സംവിധാനം തുടങ്ങിയവയാണ് പദ്ധതിയുടെ ഭാഗമായി സജ്ജമാക്കിയിരുന്നത്. എന്നാല്‍ ഇവയില്‍ ഒന്നുംതന്നെ ഇന്ന് പ്രവര്‍ത്തിക്കുന്നില്ല. നഗരത്തിലെ തിരക്കനുസരിച്ചു സ്വയം പ്രവര്‍ത്തിക്കുന്ന വെഹിക്കിള്‍ ആക്ടുവേറ്റഡ് സിഗ്നലുകളാണ് പദ്ധതിയുടെ പ്രധാന ആകര്‍ഷണമായി ഉയര്‍ത്തിക്കാട്ടിയിരുന്നത്. വാഹനങ്ങള്‍ ഉള്ള ട്രാക്കിനും ഇല്ലാത്ത ട്രാക്കിനും വ്യത്യസ്ത പരിഗണന നല്‍കുന്നതായിരുന്നു ഇതിന്‍റെ പ്രത്യേകത. റഡാര്‍ സംവിധാനം ഉപയോഗിച്ച് വാഹനത്തിരക്ക് അനുസരിച്ച് ഓട്ടോമാറ്റിക്കായി സിഗ്നല്‍ സമയം ക്രമീകരിക്കുന്ന ഈ സംവിധാനം നിലവില്‍ പരാജയമാണ്. മഴയെത്തുടര്‍ന്ന് ഗതാഗതക്കുരുക്ക് രൂക്ഷമായ തിരക്കേറിയ ജംഗ്ഷനുകളില്‍ വാഹനങ്ങളുടെ തിരക്കനുസരിച്ച് കടത്തിവിടാന്‍ ഈ സംവിധാനങ്ങള്‍ക്കാകുന്നില്ല. റെഡ് ലൈറ്റ് ലംഘിക്കുന്നവരെ പിടികൂടാനുള്ള നവീന കാമറകളും കണ്ണടച്ച അവസ്ഥയിലാണ്. കാല്‍നടയാത്രക്കാര്‍ക്ക് റോഡ് കുറുകെ കടക്കാന്‍ സ്ഥാപിച്ച പെലിക്കണ്‍ സിഗ്നലുകളുകള്‍ മാത്രമാണ് ഒരുപരിധിവരെ പ്രവര്‍ത്തിക്കുന്നത്. പ്രത്യേകം സംവിധാനം ചെയ്ത സ്വിച്ചിലൂടെ കാല്‍നട യാത്രക്കാര്‍ക്കു തന്നെ ട്രാഫിക് നിയന്ത്രിക്കാമെന്നതാണ് ഇതിന്‍റെ പ്രത്യേകത.

ദീപിക ബാലസഖ്യം യൂണിറ്റ് പ്രവർത്തനോദ്ഘാടനം

വാഴക്കുളം: കുട്ടികളിൽ നന്മയും മൂല്യവും വളരേണ്ടത് കാലത്തിന്‍റെ ആവശ്യമാണെന്നു കോതമംഗലം രൂപത വികാരി ജനറാൾ മോണ്‍. പയസ് മലേക്കണ്ടത്തിൽ. കലൂർ ഐപ്പ് മെമ്മോറിയൽ ഹൈസ്കൂളിൽ ദീപിക ബാലസഖ്യം യൂണിറ്റ് പ്രവർത്തനോദ്ഘാടന സമ്മേളനത്തിൽ മുഖ്യപ്രഭാഷണം നടത്തുകയായിരുന്നു അദ്ദേഹം. കലൂർ സെന്‍റ് ജോണ്‍സ് പള്ളി വികാരി റവ.ഡോ. തോമസ് ചെറുപറന്പിൽ പ്രവർത്തനോദ്ഘാടനം നിർവഹിച്ചു. പിടിഎ പ്രസിഡന്‍റ് സജി പൗലോസ് അധ്യക്ഷത വഹിച്ചു. എസ്എസ്എൽസി പരീക്ഷയിൽ എ പ്ലസ് നേടിയ വിദ്യാർഥികളെ യോഗത്തിൽ ആദരിച്ചു. കല്ലൂർക്കാട് പഞ്ചായത്ത് സ്ഥിരം സമിതി അധ്യക്ഷ ഡെൽസി ലൂക്കാച്ചൻ, സ്കൂൾ മാനേജർ ഐപ്പ് വർഗീസ് കൊച്ചുകുടി, പ്രധാനാധ്യാപകൻ ജോസഫ് സക്കറിയാസ്, എം.കെ. ബിജു, ആർ. രാജേഷ്, ബിൻസി സജി, ജീന ജോർജ് തുടങ്ങിയവർ പങ്കെടുത്തു.

പ്ലസ് വണ്‍ പ്രവേശനോത്സവം സംഘടിപ്പിച്ചു

കൂത്താട്ടുകുളം: വടകര സെന്‍റ് ജോണ്‍സ് ഹയർ സെക്കൻഡറി സ്കൂൾ പ്ലസ് വണ്‍ പ്രവേശനോത്സവവും വിജയദിനാഘോഷവും നടന്നു. പരിപാടിയുടെ ഉദ്ഘാടനം തിരുമാറാടി പഞ്ചായത്ത് പ്രസിഡന്‍റ് സന്ധ്യമോൾ പ്രകാശ് നിർവഹിച്ചു. പിടിഎ പ്രസിഡന്‍റ് ജയ്മോൻ പി. ഏബ്രഹാം അധ്യക്ഷത വഹിച്ചു. വടകര സെന്‍റ് ജോണ്‍സ് ഓർത്തഡോക്സ് പള്ളി സഹവികാരി ഫാ. അഗസ്റ്റിൻ പുല്ലുകാല അനുഗ്രഹപ്രഭാഷണം നടത്തി. പാന്പാക്കുട ബ്ലോക്ക് പഞ്ചായത്തംഗം സിബി ജോർജ് മുഖ്യപ്രഭാഷണം നടത്തി. പ്ലസ് ടു പരീക്ഷകളിൽ ഉന്നത വിജയം കരസ്ഥമാക്കിയ വിദ്യാർഥികളെ ആദരിച്ചു. കോതമംഗലം: സെന്‍റ് ജോർജ് ഹയർ സെക്കൻഡറി സ്കൂളിൽ പ്ലസ് വണ്‍ വിദ്യാർഥികളുടെ പ്രവേശനോത്സവം ‘വരവേൽപ്പ് 2025’ നടത്തി. കോതമംഗലം കത്തീഡ്രൽ ഓഡിറ്റോറിയത്തിൽ നടന്ന സമ്മേളനം ആന്‍റണി ജോണ്‍ എംഎൽഎ ഉദ്ഘാടനം ചെയ്തു. സ്കൂൾ മാനേജർ റവ.ഡോ. മാത്യു കൊച്ചുപുരയ്ക്കൽ അധ്യക്ഷത വഹിച്ചു. പ്ലസ് വണ്‍ ക്ലാസുകളിൽ പ്രവേശനം നേടിയ വിദ്യാർഥികളും അവരുടെ രക്ഷിതാക്കളും യോഗത്തിൽ പങ്കെടുത്തു. തുടർന്ന് കുട്ടികൾക്കും രക്ഷകർത്താക്കൾക്കുമായി ബോധവൽക്കരണ ക്ലാസുകൾ സംഘടിപ്പിച്ചു. ജനമൈത്രി പോലീസ് മാസ്റ്റർ ട്രെയ്നർ കെ.പി. അജേഷ്, സ്കൂൾ സൗഹൃദ കോ-ഓർഡിനേറ്റർ സോണിയ ജോയി എന്നിവർ ക്ലാസുകൾ നയിച്ചു.

12 വീടുകളുടെ താക്കോൽ ദാനവും ലയണ്‍സ് ഗ്രാമം ഉദ്ഘാടനവും നാളെ

കോതമംഗലം: ലയണ്‍സ് ക്ലബ് നിർധന കുടുംബങ്ങൾക്ക് സ്ഥലവും വീടും സൗജന്യമായി നൽകുന്ന ലയണ്‍സ് ഗ്രാമം ഭവന പദ്ധതിയിൽ മലയിൻകീഴിൽ നിർമിച്ച 12 വീടുകളുടെ താക്കോൽ ദാനവും ലയണ്‍സ് ഗ്രാമത്തിന്‍റെ ഉദ്ഘാടനവും നാളെ നടക്കും. രാവിലെ 8.30 നു ലയണ്‍സ് ക്ലബ് ഹാളിൽ ഡീൻ കുര്യാക്കോസ് എംപി ഉദ്ഘാടനം നിർവഹിക്കും. ആന്‍റണി ജോണ്‍ എംഎൽഎ, നഗരസഭാധ്യക്ഷൻ കെ.കെ. ടോമി, ലയണ്‍സ് ഡിസ്ട്രിക്ട് ഗവർണർ രാജൻ എൻ. നന്പൂതിരി, പ്രോജക്റ്റിന്‍റെ മുഖ്യ പ്രൊമോട്ടർമാരായ ചിറ്റിലപ്പിള്ളി ഫൗണ്ടേഷൻ, ഇവിഎം ഗ്രൂപ്പ് ചെയർമാൻ ഇ.എം. ജോണി, നഗരസഭാംഗം കെ.വി. തോമസ്, പ്രോജക്റ്റ് കോ-ഓർഡിനേറ്റർ ജോസ് മംഗലി, ബിനോജ് ജോർജ്, സ്റ്റൈബി എൽദോ, ടോം ജെയിംസ്, സോണി ഏബ്രഹാം, ടി.കെ. സോണി എന്നിവർ പങ്കെടുക്കും. കോതമംഗലം ലയണ്‍സ് ക്ലബ് 50 വർഷം പൂർത്തിയാക്കിയ കഴിഞ്ഞ വർഷം നഗരസഭയിലെ പതിനെട്ടാം വാർഡിൽ 18 വീടുകൾ നിർമിച്ചു നൽകി. അതിന്‍റെ തുടർച്ചയായിട്ടാണ് ഇപ്പോൾ എട്ടാം വാർഡിൽ മലയിൻകീഴിൽ 12 വീടുകൾ കൂടി നിർമിച്ചു നൽകുന്നത്. കോതമംഗലം ലയണ്‍സ് ക്ലബ് ഗോൾഡൻ ജൂബിലി പ്രോജക്റ്റിന്‍റെ ഭാഗമായി ലക്ഷ്യമിട്ട 50 വീടുകളിൽ ശേഷിക്കുന്നത് വരും വർഷങ്ങളിൽ പൂർത്തിയാക്കുമെന്ന് ക്ലബ് ഭാരവാഹികൾ പത്രസമ്മേളനത്തിൽ അറിയിച്ചു.

പൊതുശ്മശാനം പ്രവർത്തനം നിലച്ചിട്ട് മൂന്ന് മാസം; പ്രതിഷേധം വ്യാപകം

മൂവാറ്റുപുഴ: പൊതുശ്മശാനം പ്രവർത്തന സജ്ജമാക്കാത്തതിനെതിരെ പ്രതിഷേധം വ്യാപകം. നഗരസഭയുടെ കീഴിൽ പ്രവർത്തിച്ചിരുന്ന പൊതുശ്മശാനം പ്രവർത്തനം നിലച്ചിട്ട് മൂന്നുമാസത്തിലേറെയായി. മൂവാറ്റുപുഴ നഗരത്തിലെയും സമീപ പഞ്ചായത്തുകളിലെയും ഏക ആശ്രയമായിരുന്ന ഈ പൊതുശ്മശാനം പ്രവർത്തനരഹിതമായതോടെ മൃതദേഹം ദഹിപ്പിക്കുന്നതിനായി തൊടുപുഴയിലും പെരുന്പാവൂരിലും കൊണ്ടുപോകേണ്ട അവസ്ഥയിലാണ് ജനങ്ങൾ. സംസ്കരിക്കുന്നതിനായി സ്വന്തമായി സ്ഥലമില്ലാത്ത പാവപ്പെട്ടവരെയാണ് ഇത് ഏറെ കഷ്ടപ്പെടുത്തുന്നത്. യുദ്ധകാലാടിസ്ഥാനത്തിൽ അറ്റകുറ്റപ്പണികൾ നടത്തി പ്രവർത്തനസജ്ജമാക്കണമെന്ന് ആവശ്യപ്പെട്ട് ഹിന്ദു ഐക്യവേദി മൂവാറ്റുപുഴ താലൂക്ക് സമിതി നഗരസഭ അധികൃതർക്ക് നിവേദനം നൽകി. അല്ലാത്തപക്ഷം ശക്തമായ പ്രക്ഷോഭ പരിപാടികൾ സംഘടിപ്പിക്കുമെന്ന് ഹിന്ദു ഐക്യവേദി ജില്ലാ സെക്രട്ടറി ബിജീഷ് ശ്രീധർ, താലൂക്ക് പ്രസിഡന്‍റ് എം.പി അപ്പു എന്നിവർ പറഞ്ഞു.

വായന ദിനാചരണം

വാഴക്കുളം: ഇൻഫന്‍റ് ജീസസ് ഹൈസ്കൂളിൽ വായന ദിനാചരണവും പോസ്റ്റർ മത്സരവും നടത്തി. കവിയും എഴുത്തുകാരനുമായ വി.കെ. സുധാകരൻ വായന ദിനാചരണം ഉദ്ഘാടനം ചെയ്തു. പോസ്റ്റർ മത്സരത്തിൽ വിജയികളായ കുട്ടികൾക്കുള്ള സമ്മാനദാനവും ഇതോടനുബന്ധിച്ച് നടത്തി. ഇലഞ്ഞി: സെന്‍റ് ഫിലോമിനാസ് പബ്ലിക് സ്കൂൾ ആന്‍ഡ് ജൂണിയർ കോളജിൽ വായന ദിനാചരണത്തിന്‍റെ ഭാഗമായി കുട്ടികൾ വീടുകളിൽനിന്ന് ഉപയോഗയോഗ്യമായ പുസ്തകങ്ങൾ കൊണ്ടുവന്ന് ക്ലാസ് ലൈബ്രറികൾക്ക് തുടക്കമിട്ടു. എല്ലാ ക്ലാസിലും രൂപീകൃതമായ ലൈബ്രറികൾ വെള്ളിയാഴ്ചകളിൽ ഓരോ കുട്ടിക്കും പുസ്തകങ്ങൾ കൈമാറും. പരിപാടിയുടെ ഉദ്ഘാടനം അബ്ദുൽ കലാമിന്‍റെ അഗ്നിച്ചിറകുകളിൽനിന്ന് ഒരു ഭാഗം വായിച്ച് ഫാ. ജോണ്‍ എർണ്യാകുളത്തിൽ ഉദ്ഘാടനം ചെയ്തു. ജോജു ജോസഫ് അധ്യക്ഷത വഹിച്ചു. ഇലഞ്ഞി: വിസാറ്റ് ആർട്സ് ആന്‍ഡ് സയൻസ് കോളജിന്‍റെ ആഭിമുഖ്യത്തിൽ വായനദിനം ആചരിച്ചു. ദിനാചരണത്തിന്‍റെ ഭാഗമായി സിഎംസി സിസ്റ്റേഴ്സിന്‍റെ നേതൃത്വത്തിൽ ഇലഞ്ഞിയിൽ സ്ഥാപിച്ചിട്ടുള്ള സിസ്റ്റർ മേരി ജോണ്‍ തോട്ടത്തിന്‍റെ പ്രതിമയിൽ പുഷ്പാർച്ചന നടത്തി. കോളജ് പ്രിൻസിപ്പൽ രാജു മാവുങ്കൽ ആമുഖ പ്രഭാഷണം നടത്തി. സിസ്റ്റർ സുദീപ സ്മാരകത്തെകുറിച്ചുള്ള വിവരണം നൽകി. കവിയും അധ്യാപകനുമായ ഇലഞ്ഞി മാത്യു സിസ്റ്റർ മേരി ബനീഞ്ജയുടെ ‘ലോകമേ യാത്ര’ എന്ന കവിത ആലപിച്ചു. വിസാറ്റ് ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് ഡയറക്ടർ കെ. ദിലീപ്, എൻജിനീയറിംഗ് കോളജ് പ്രിൻസിപ്പൽ കെ.ജെ. അനൂപ്, ഷാജി ആറ്റുപുറം എന്നിവരും ആർട്സ് ആന്‍ഡ് സയൻസ് കോളജിലെ വിദ്യാർഥികളും പുഷ്പാർച്ചന നടത്തി. വാഴക്കുളം: കലൂർ ഐപ്പ് മെമ്മോറിയൽ ഹൈസ്കൂളിൽ വായന ദിനാചരണം ഭാഷ ക്ലബ് കോ-ഓർഡിനേറ്റർ ഷാജി തോമസ് ഉദ്ഘാടനം ചെയ്തു. സ്കൂൾ പ്രധാനാധ്യാപകൻ ജോസഫ് സക്കറിയാസ് അധ്യക്ഷത വഹിച്ചു. എം.കെ. ബിജു സന്ദേശം നൽകി. മൂവാറ്റുപുഴ: ബാർ അസോസിയേഷനും അഭിഭാഷകരുടെ കലാ-സാംസ്കാരിക സംഘടനയായ ‘മേളം’വും സംയുക്തമായി വായന ദിനാചരണം സംഘടിപ്പിച്ചു. അഡീഷണൽ ജില്ല ജഡ്ജി കെ.എൻ. ഹരികുമാർ ഉദ്ഘാടനം ചെയ്തു. ബാർ അസോസിയേഷൻ പ്രസിഡന്‍റ് ജോസ് വർഗീസ് അധ്യക്ഷത വഹിച്ചു. അരിക്കുഴ: വായനദിനത്തോടനുബന്ധിച്ച് മുതിർന്ന ഗ്രന്ഥശാല പ്രവർത്തകരെ ആദരിച്ച് അരിക്കുഴ സെന്‍റ് സെബാസ്റ്റ്യൻസ് എൽപി സ്കൂൾ. സ്കൂളിലെ അധ്യാപകരുടെയും വിദ്യാർഥികളുടെയും നേതൃത്വത്തിൽ അരിക്കുഴ ഉദയ വൈഎംഎ ലൈബ്രറി പ്രസിഡന്‍റ് സിന്ധു വിജയനേയും സെക്രട്ടറി എം.കെ. അനിലിനെയുമാണ് ആദരിച്ചത്. വാഴക്കുളം: മണിയന്ത്രം ഗവ. യുപി സ്കൂളിൽ വായനദിനാചരണവും വിദ്യാരംഗം കലാ സാഹിത്യ വേദിയും ഉദ്ഘാടനം ചെയ്തു. പോസ്റ്റർ നിർമാണം, വായന കുറിപ്പ് അവതരണം, പുസ്തക പ്രദർശനം, വായന ക്വിസ് എന്നിവയും നടത്തി. ബ്ലോക്ക് പഞ്ചായത്തംഗം പ്രഫ. ജോസ് അഗസ്റ്റ്യൻ വിദ്യാരംഗം കലാ സാഹിത്യ വേദിയുടെ ഉദ്ഘാടനവും വായനദിന സന്ദേശവും നൽകി. പ്രധാനാധ്യാപിക റാണി എസ്. കല്ലടാന്തിയിൽ വായനദിനാചരണത്തിന് നേതൃത്വം നൽകി. കോതമംഗലം: ലൈബ്രറി കൗണ്‍സിലിന്‍റെ ആഭിമുഖ്യത്തിൽ വായന പക്ഷാചരണത്തിന്‍റെ താലൂക്കുതല ഉദ്ഘാടനം നടത്തി. ചെറുവട്ടൂർ ഗവ. മോഡൽ ഹയർ സെക്കൻഡറി സ്കൂളിൽ നടന്ന പരിപാടി ആന്‍റണി ജോണ്‍ എംഎൽഎ ഉദ്ഘാടനം ചെയ്തു. ലൈബ്രറി കൗണ്‍സിൽ പ്രസിഡന്‍റ് കെ.ഒ. കുര്യാക്കോസ് അധ്യക്ഷത വഹിച്ചു.

റോഡ് വികസനം; വീട് നഷ്ടപ്പെട്ട കുടുംബത്തിന് സ്ഥലം കൈമാറി

ഇലഞ്ഞി: നെല്ലൂരുപാറ പിഡബ്ല്യുഡി റോഡ് വികസനവുമായി ബന്ധപ്പെട്ട് കാലനിമറ്റം ജംഗ്ഷനിൽ വീട് നഷ്ടപ്പെടുന്ന കുടുംബത്തിന് സ്ഥലം കൈമാറി. സാമൂഹിക പ്രവർത്തകനും പ്രദേശവാസിയുമായ വി.ജെ. ലൂക്കോസ് വെള്ളമ്മതടത്തിലാണ് വീട് നഷ്ടപ്പെടുന്ന കെ.പി. പൗലോസിന് മൂന്നര സെന്‍റ് സ്ഥലം സൗജന്യമായി കൈമാറിയത്. റോഡ് വീതികൂട്ടി നിർമിക്കുന്പോൾ ഇവരുടെ ഭവനം നഷ്ടപ്പെടുന്ന അവസ്ഥയിലായിരുന്നു. ഏതാനും ആഴ്ചകൾക്കു മുൻപ് കാലാനിറ്റം ജംഗ്ഷൻ വികസനവുമായി ബന്ധപ്പെട്ട് അനൂപ് ജേക്കബ് എംഎൽഎയുടെ അധ്യക്ഷതയിൽ ഇലഞ്ഞി പഞ്ചായത്തിൽ ജനപ്രതിനിധികളുടെയും രാഷ്ട്രീയകക്ഷികളുടെയും യോഗം ചേർന്നിരുന്നു. ഈ യോഗത്തിൽ ജംഗ്ഷൻ വികസനം യാഥാർത്ഥ്യമാക്കുവാനും ഭവനം നഷ്ടപ്പെടുന്ന കുടുംബത്തിന് വിവിധ സംഘടനകളുടെയും വ്യക്തികളുടെയും സ്ഥാപനങ്ങളുടെയും സഹകരണത്തോടെ വീടുവച്ച് നൽകുവാനും ധാരണയായി. യോഗത്തിൽ പങ്കെടുത്ത വി.ജെ. ലൂക്കോസ് മൂന്നര സെന്‍റ് സ്ഥലം വാഗ്ദാനം ചെയ്യുകയായിരുന്നു. നടപടികൾ പൂർത്തിയാക്കി ആധാരം കെ.പി. പൗലോസിന് പഞ്ചായത്ത് പ്രസിഡന്‍റ് പ്രീതി അനിൽ, വൈസ് പ്രസിഡന്‍റ് ഷേർളി ജോയി, അംഗങ്ങളായ എം.പി. ജോസഫ്, മോളി ഏബ്രഹാം, സുമോൻ ചെല്ലപ്പൻ എന്നിവരുടെ സാന്നിധ്യത്തിൽ കൈമാറി.

കണ്ണമാലിയിലും ചെറിയ കടവിലും ആശ്വാസത്തിന്‍റെ പകൽ

ഫോർട്ടുകൊച്ചി: കടൽവെള്ളം കയറി ജനജീവിതം കണ്ണീരണിയിച്ച കണ്ണമാലിയിലും ചെറിയകടവിലും ഇന്നലെ ആശ്വാസത്തിന്‍റെ പകലായി മാറി. പുത്തൻതോട് സെന്‍റ് ജോസഫ്സ് ഹാളിൽ തുറന്ന ക്യാമ്പിലേക്ക് 25 ഓളം കുടുംബങ്ങളെ മാറ്റി പാർപ്പിച്ചിട്ടുണ്ട്. കടൽകയറ്റത്തിൽ അടിഞ്ഞുകൂടിയ മണ്ണ് ജെസിബിയുടെ സഹായത്തോടെ ചാക്കിൽ നിറച്ച് കടൽവെള്ളം രൂക്ഷമായി കേറുന്ന പ്രദേശങ്ങളിൽ നിക്ഷേപിക്കുന്ന പ്രവർത്തനങ്ങൾക്ക് ഇന്നലെ തുടക്കം കുറിച്ചു. പുത്തൻതോട് സെന്‍റ് ജൂഡ്ചാപ്പൽ കണ്ണമാലി ഫിഷറീസ് കെട്ടിടത്തിന് സമീപം കണ്ണമാലി പോലീസ് സ്റ്റേഷനു സമീപത്തു നിന്നുമാണ് മണ്ണ് നീക്കം ചെയ്യുന്നത്. 24 -ാം തീയതി മുതൽ കടൽ പ്രക്ഷുബ്ധമാകാനും കടൽ വെള്ള കയറ്റം ശക്തി പ്രാപിക്കാനും സാധ്യതയുണ്ടെന്നാണ് നാട്ടുകാർ പറയുന്നത്.

ആലുവ ജിടിഎൻ റോഡിൽ വെള്ളക്കെട്ട്: ദുരിതത്തിലായി കാൽനടയാത്രികർ

ആലുവ: മഴ ശക്തമായതോടെ കീഴ്മാട് - കുട്ടമശേരി സർക്കുലർ റോഡിലെ ജിടിഎൻ മേഖലയിൽ കനത്ത വെള്ളക്കെട്ട്. കാൽനടയാത്രക്കാരാണ് രണ്ട് കിലോമീറ്ററോളം വെളളക്കെട്ട് കാരണം ബുദ്ധിമുട്ടുന്നത്. മഴക്കാലപൂർവ വൃത്തിയാക്കൽ നടക്കാത്തതിനാൽ കാനനിറഞ്ഞൊഴുകിയാണ് മഴവെള്ളം റോഡിലേക്ക് പരക്കുന്നതെന്ന് പ്രദേശവാസികൾ കുറ്റപ്പെടുത്തി. കാനയ്ക്ക് മുകളിൽ കുറ്റിക്കാടുകളും വളർന്നു നിൽക്കുന്നുണ്ട്. പ്രവർത്തനം നിലച്ച ജി ടി എൻ കമ്പനിയുടെ മതിലും ഇടിഞ്ഞു വീഴാറായ നിലയിലാണ്. കെട്ടിടം മുഴുവനായി പൊളിച്ച് തറ നികത്തിയതോടെ ചെങ്കല്ല് കൊണ്ട് നിർമിച്ച മതിലുകളാണ് അപകടനിലയിലായത്. കീഴ്മാട് ഗ്രാമപഞ്ചായത്തിന്‍റെ കെടുകാര്യസ്ഥതയ്ക്കെതിരെ സർക്കാർ ഇടപെടണമെന്ന് പ്രദേശവാസികൾ ആവശ്യപ്പെട്ടു.

തെരുവ് നായ്ക്കൾ ഭീഷണിയാകുന്നു; പഞ്ചായത്തിന് പരാതി നല്കി

ഫോർട്ടുകൊച്ചി: കുന്പളങ്ങിയിൽ റോഡിൽ അലഞ്ഞുതിരിഞ്ഞു നടക്കുന്ന തെരുവ് നായ്ക്കൾ വിദ്യാർഥികളടക്കമുള്ളവർക്ക് ഭീഷണിയാകുന്നു.വിദ്യാർഥികളുടെ നേരെ കുരച്ചു കൊണ്ട് ഓടി വന്ന് കുട്ടികൾ റോഡിൽ വീണ് അപകടമുണ്ടാകുന്നതും വാഹനങ്ങൾക്ക് കുറുകെ ഓടി വന്ന് അപകടമുണ്ടാകുന്നതും കുമ്പളങ്ങിയിൽ നിത്യ സംഭവമായി മാറിയിരിക്കുകയാണ്. ഒന്പതു സ്കൂളുകളുള്ള കുമ്പളങ്ങിയിൽ ആയിരത്തിലേറെ വിദ്യാർഥികളാണ് പഠിക്കാനെത്തുന്നത്. നായ്ക്കളെ വന്ധീകരണം നടത്തി വിദ്യാർഥികളടക്കമുള്ളവരുടെ ജീവന് സുരക്ഷ ഉറപ്പുവരുത്തണമെന്നാവശ്യപ്പെട്ട് ജനാധിപത്യ കേരളകോൺഗ്രസ് കുമ്പളങ്ങി മണ്ഡലം പ്രസിഡന്‍റ് ടെൻസൻ കുറുപ്പശേരിയുടെ നേതൃത്വത്തിൽ കുമ്പളങ്ങി പഞ്ചായത്ത് പ്രസിഡന്‍റ് സൂസൻ ജോസഫിന് പരാതി നല്കി. പ്രധാന അധ്യാപകരും ടീച്ചേഴ്സും ഒപ്പിട്ട പരാതിയാണ് പഞ്ചായത്ത് പ്രസിഡന്‍റിന് നല്കിയത്. ജില്ലാ വൈസ് പ്രസിഡന്‍റ് തങ്കച്ചൻ, നിയോജക മണ്ഡലം സെക്രട്ടറി ഷിജു, മണ്ഡലം സെക്രട്ടറി ജസ്റ്റിൻ തുടങ്ങിയവരും സംബന്ധിച്ചിരുന്നു. പഞ്ചായത്തംഗങ്ങളായ ജോസി വേലിക്കകത്ത്, ജെൻസി ആന്‍റണി എന്നിവർക്കും പരാതി നല്കി.

തെങ്ങോട് സ്‌കൂളില്‍ സുരക്ഷാഭിത്തി നിര്‍മിക്കണമെന്ന് ഉമാ തോമസ്

കൊച്ചി: മണ്ണിടിച്ചില്‍ ഭീഷണി നേരിടുന്ന തെങ്ങോട് ഗവ. ഹൈസ്‌കൂളില്‍ കെട്ടിടം സംരക്ഷിക്കാന്‍ സുരക്ഷാഭിത്തി നിര്‍മിക്കണമെന്നാവശ്യപ്പെട്ട് ഉമാ തോമസ് എംഎല്‍എ വിദ്യാഭ്യാസ മന്ത്രിക്ക് കത്തയച്ചു. കഴിഞ്ഞ 16ന് ഇവിടെ മണ്ണിടിച്ചിലുണ്ടായി. കഴിഞ്ഞ കാലവര്‍ഷത്തില്‍ മണ്ണിടിച്ചിലുണ്ടായപ്പോള്‍ വിദ്യാഭ്യാസ മന്ത്രിക്ക് പരാതി നല്‍കിയിരുന്നു. ഉദ്യോഗസ്ഥരെത്തി പരിശോധന നടത്തിയെങ്കിലും തുടര്‍നടപടികള്‍ ഉണ്ടായില്ല. ജില്ലാ ദുരന്ത നിവാരണ ഫണ്ടില്‍ നിന്നും സംരക്ഷണ ഭിത്തിക്ക് ആവശ്യമായ തുക അനുവദിക്കണമെന്നാവശ്യപ്പെട്ട് എറണാകുളം ജില്ലാ കളക്ടര്‍ക്കും പരാതിയുടെ പകര്‍പ്പ് കൈമാറി. സുരക്ഷാഭിത്തി നിര്‍മിക്കുന്നതുവരെ കുട്ടികളുടെ പഠനം തടസപ്പെടാതിരിക്കാന്‍ സ്‌കൂള്‍ ഓഡിറ്റോറിയം ക്ലാസ് റൂമുകളായി തിരിക്കുന്നതിന് ആവശ്യപ്പെട്ട് തൃക്കാക്കര നഗരസഭാ സെക്രട്ടറിക്കും എംഎല്‍എ കത്ത് നല്‍കി.

സാഹിത്യ കഥാപാത്രങ്ങളെ അരങ്ങിലെത്തിച്ച് കുട്ടികളുടെ വേറിട്ട വായനദിനാചരണം

കിഴക്കമ്പലം: മലയാളത്തിലും വിശ്വ സാഹിത്യത്തിലും ഉള്‍പ്പെടെ വായനക്കാരെ ഏറെ സ്വാധീനിച്ച കഥാപാത്രങ്ങളെ ആവിഷ്‌കരിച്ച് വേറിട്ട വായനദിനാചരണവുമായി താമരച്ചാല്‍ സെന്‍റ് മേരീസ് പബ്ലിക് സ്‌കൂള്‍. വായനദിനാഘോഷങ്ങളുടെ ഭാഗമായി സ്‌കൂളില്‍ സംഘടിപ്പിച്ച ചടങ്ങിലാണ് പാത്തുമ്മയുടെ ആടും ബാല്യകാലസഖിയിലെ സുഹറയും മജീദും കാളിദാസനും ശകുന്തളയും കണ്ണകിയും ഝാന്‍സി റാണിയും ഷേക്‌സ്പിയറിന്‍റെ ലേഡി മാക്ബത്തും തുടങ്ങി 232 ഓളം കഥാപാത്രങ്ങള്‍ അരങ്ങിലെത്തിയത്. ഷെര്‍ലക് ഹോംസ്, തെന്നാലിരാമന്‍, ടെമ്പസ്റ്റ് തുടങ്ങിയ സാഹിത്യ കൃതികളില്‍ നിന്നുള്ള കഥാ ശകലങ്ങള്‍ വിദ്യാര്‍ഥികള്‍ നാടകരൂപത്തില്‍ അവതരിപ്പിച്ചു. സിനിമയും വായനയും എന്ന വിഷയത്തില്‍ സംവാദവും നടന്നു. സാഹിത്യകാരന്‍ പി.കെ. ഭരതന്‍ ഉദ്ഘാടനം ചെയ്തു. സ്‌കൂള്‍ മാനേജര്‍ ജേക്കബ് സി. മാത്യു, ജനറല്‍ സെക്രട്ടറി പി.എന്‍. ശ്ലീബ, സ്‌കൂള്‍ പ്രിന്‍സിപ്പാള്‍ രാഖി വിജയന്‍ എന്നിവര്‍ പ്രസംഗിച്ചു.

വനിതാ കമ്മീഷൻ കാലടി പ്ലാന്‍റേഷനിൽ

കാലടി : സംസ്ഥാന വനിതാകമ്മീഷൻ കാലടി പ്ലാന്‍റേഷനിൽ എത്തി. പ്ലാന്‍റേഷൻ കോർപറേഷന്‍റെ കാലടി ഗ്രൂപ്പിലെ എസ്റ്റേറ്റുകളിലെ സ്ത്രീ തൊഴിലാളികൾ ജോലിസ്ഥലത്ത് നേരിടുന്ന പ്രശ്നങ്ങൾ നേരിട്ട് മനസിലാക്കുന്നതിനും അവരുടെ പരാതികൾ കേൾക്കുന്നതിനുമാണ് കമ്മീഷൻ എത്തിയത്. ഇന്നലെ കാലടി ഗ്രൂപ്പ് ഹോസ്പിറ്റലിൽ നടത്തിയ ക്യാമ്പ് സംസ്ഥാന വനിതാ വികസന കോർപ്പറേഷൻ ബോർഡ് മെന്പർ അഡ്വ. ഇന്ദിര രവീന്ദ്രൻ ഉദ്ഘാടനം ചെയ്തു. വനിതാ കമ്മിഷൻ നിയമ ഓഫീസർ കെ. ചന്ദ്രശോഭ അധ്യക്ഷത വഹിച്ചു.

കൂനമ്മാവ് സ്‌കൂളില്‍ വായനമുറി

കൊച്ചി: വായനദിനത്തോടനുബന്ധിച്ച് കൂനമ്മാവ് ചാവറ ദര്‍ശന്‍ സിഎംഐ പബ്ലിക് സ്‌കൂളില്‍ വായനമുറി തുറന്നു. മലയാള വിഭാഗത്തിന്‍റെ നേതൃത്വത്തില്‍ ഒരുക്കിയ വായന മുറിയുടെ ഉദ്ഘാടനം സ്‌കൂള്‍ മാനേജറും പ്രിന്‍സിപ്പലുമായ ഫാ. മാര്‍ട്ടിന്‍ മുണ്ടാടന്‍ ഉദ്ഘാടനം ചെയ്തു. അക്കാഡമിക് കോ-ഓര്‍ഡിനേറ്റര്‍ അനില അലക്‌സാണ്ടര്‍, മലയാള വിഭാഗം മേധാവി പി.കെ. സിന്ധു തുടങ്ങിയവര്‍ പ്രസംഗിച്ചു.

കണ്ണമാലിയിലേക്ക് പൊതിച്ചോറുകളുമായി കോൾപിംഗ് പ്രവർത്തകർ

ഫോർട്ടുകൊച്ചി : കടൽക്ഷോഭത്തിൽ ദുരിതമനുഭവിക്കുന്ന കണ്ണമാലിയിൽ 500 ഓളം പൊതിച്ചോറുമായി കോൾപിംഗ് കൊച്ചി പ്രവർത്തകർവീടുകളിലെത്തി. കോൾപിംഗ് യൂണിറ്റുകളായ സാന്‍റാക്രൂസ് കോൾപിംഗ് , ദീപം കോൾപിംഗ് -അമരാവതി ,സെന്‍റ് ജോസഫ്‌സ് , പെഗാസസ് കോൾപിംഗ് -ചുള്ളിക്കൽ , ജ്യോതിസ് കോൾപിംഗ്, മേരി മാതാ കോൾപിംഗ്, സാഫ്രോൺ കോൾ പിംഗ്, ഹോളി ഫാമിലി - നസ്രേത്ത് എന്നീ യൂണിറ്റുകളാണ് പൊതിച്ചോർ വിതരണ പരിപാടിയിൽ പങ്കെടുത്തത്. ഭക്ഷണ പൊതികളുടെ വിതരണോത്ഘാടനം കണ്ണമാലി സെന്‍റ് ജോസഫ്‌സ് പള്ളി വികാരി ഫാ. ജോപ്പൻ അണ്ടിശേരി നിർവഹിച്ചു. രൂപത പ്രസിഡന്‍റ് അനു സെബാസ്റ്റ്യൻ, കോ ഓർഡിനേറ്റർ നിഷ ആൻസിറ്റ, സി.സി. പുഷ്പി എന്നിവർ നേതൃത്വം നല്കി.

ന്യൂസിലാൻഡിൽ മലയാളം ലൈബ്രറി ഒരുക്കി ജോബിൻ ജോർജ്

അങ്കമാലി: വായനദിനത്തോടനുബന്ധിച്ച് ന്യൂസിലാൻഡിലെ ന്യൂപ്ലീമൌത്തിൽ മലയാളം ലൈബ്രറി ഒരുക്കി അങ്കമാലി സ്വദേശി ജോബിൻ ജോർജ്. വായന ദിനാഘോഷത്തിന്‍റെ ഭാഗമായി ന്യൂസിലാന്‍റിലെ ന്യൂപ്ലീമൗത്തിലെ മലയാളികൾക്ക് വായിക്കുവാൻ അവസരം ഒരുക്കിയ അങ്കമാലി സ്വദേശി ജോബിൻ ജോർജിന്‍റെ ഫോൺ ഇൻ ലൈബ്രറി ശ്രദ്ധേയമാവുകയാണ്. തന്‍റെ ജോലിയോടൊപ്പം ഒഴിവു സമയങ്ങളിൽ കുട്ടികളിലും മുതിർന്നവരിലും വായനാശീലം വളർത്തുവാനുള്ള ശ്രമത്തിലാണ് ജോബിൻ ജോർജ്. നാട്ടിൽ നിന്നും മലയാളം പുസ്തകങ്ങൾ തപാൽ വഴി എത്തിക്കുകയായി രുന്നു. പുസ്തകങ്ങൾ നാട്ടിൽ നിന്നും ശേഖരിക്കാൻ തന്‍റെ സുഹൃത്തും ഗ്രന്ഥശാല പ്രവർത്തകനും ബുധസംഗമം സംഘടകനുമായ കാലടി എസ്. മുരളീധരന്‍റെ സഹായവും തേടി. വായനശാലയുടെ ഉദ്ഘാടനം റോജി. എം. ജോൺ എംഎൽഎ ഓൺലൈൻ വഴി നിർവഹിച്ചു. മലയാളി അസോസിയേഷൻ പ്രസിഡന്‍റ് മനോജ്‌ ചാക്കോ, മുൻ പ്രസിഡന്‍റ് സുബി കല്ലമണ്ണിൽ, ജാക്സൺ ജേക്കബ്, രേഖ ദിനു, ആസിഫ് എന്നിവർ ആശംസകൾ നേർന്നു. തികച്ചും സൗജന്യമായിട്ടാണ് ലൈബ്രറിയിലെ അംഗത്വം. വായിക്കാൻ പുസ്തകം ആവശ്യമുള്ളവർക്ക് ഫോണിൽ ബന്ധപ്പെട്ടാൽ പുസ്തകം അവരുടെ വീട്ടിൽ എത്തിച്ചു കൊടുക്കുന്നു. ന്യൂസിലാന്‍റിൽ മലയാളം പുസ്തകം ലഭ്യമല്ലാത്തത് കൊണ്ടും കുട്ടികളിൽ മലയാളം വായിക്കാനുള്ള അവസരം ഒരുക്കുക എന്ന ചിന്തയിൽ നിന്നാണ് മലയാളികൾക്കായി ഒരു വായനശാല എന്ന ആശയം തുടങ്ങുവാൻ തോന്നിയതെന്നും ജോബിൻ പറഞ്ഞു. ഇനിയും ഒത്തിരി മലയാളം പുസ്തസ്കങ്ങൾ നാട്ടിൽ നിന്ന് എത്തിക്കാനുള്ള ശ്രമത്തിലാണ് ജോബിൻ.

രാജഗിരി വിശ്വജ്യോതി കോളജില്‍ ദേശീയ യോഗാ സെമിനാര്‍ ഗവര്‍ണര്‍ ഉദ്ഘാടനം ചെയ്യും

പെരുമ്പാവൂര്‍: അന്താരാഷ്ട്ര യോഗാദിനാഘോഷത്തോടനുബന്ധിച്ച് പതഞ്ജലി യോഗാ ട്രെയിനിംഗ് ആന്‍ഡ് റിസര്‍ച്ച് സെന്‍ററിന്‍റെ(പൈതൃക്) നേതൃത്വത്തില്‍ പെരുമ്പാവൂരില്‍ ത്രിദിന ദേശീയ സെമിനാര്‍ സംഘടിപ്പിക്കുമെന്ന് സംഘാടകര്‍ വാർത്താസമ്മേളനത്തില്‍ അറിയിച്ചു. 21, 22, 23 തീയതികളില്‍ വേങ്ങൂര്‍ രാജഗിരി വിശ്വജ്യോതി കോളജിലാണ് പരിപാടി. 22ന് രാവിലെ 11ന് ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍ ഉദ്ഘാടനം ചെയ്യും. പൈതൃക് പ്രസിഡന്‍റ് ഡോ. എ. രാധാകൃഷ്ണന്‍ അധ്യക്ഷത വഹിക്കും. പ്രജ്ഞാ പ്രവാഹ് നാഷണല്‍ കണ്‍വീനര്‍ ജെ. നന്ദകുമാര്‍ മുഖ്യപ്രഭാഷണം നടത്തും. വൈകിട്ട് സാംസ്‌കാരിക പരിപാടി. 23 ന് വൈകിട്ട് മൂന്നിന് സമാപന സമ്മേളനം കേന്ദ്രമന്ത്രി ജോര്‍ജ് കുര്യന്‍ ഉദ്ഘാടനം ചെയ്യും. 21ന് രാവിലെ കോളേജ് വിദ്യാര്‍ഥികളുടെ യോഗാദിനാചരണം. കൊച്ചിന്‍ ഷിപ്യാര്‍ഡ് ചെയര്‍മാനും മാനേജിംഗ് ഡയറക്ടറുമായ മധു എസ്. നായര്‍, സ്‌കൈലൈന്‍ ഫൗണ്ടേഷന്‍സ് ആന്‍ഡ് സ്ട്രക്ചേഴ്‌സ് മാനേജിംഗ് ഡയറക്ടര്‍ ലവ കൃഷ്ണന്‍, തിരുവല്ല പൈതൃക് സ്‌കൂള്‍ ഓഫ് യോഗ ഡയറക്ടര്‍ എന്‍. സുധീഷ് കുമാര്‍, റവ. ഡോ. അഗസ്റ്റിന്‍ തോട്ടക്ക, ഡോ. എം.ഐ. ജോസഫ് എന്നിവരെ ആദരിക്കും. ഇതോടനുബന്ധിച്ചു നടത്തിയ വാർത്താസമ്മേളനത്തില്‍ പൈതൃക് ഡയറക്ടര്‍ കൈതപ്രം വാസുദേവന്‍ നമ്പൂതിരി, ജന. സെക്രട്ടറി ജി.ബി. ദിനചന്ദ്രന്‍, രാജഗിരി വിശ്വേജ്യോതി കോളജ് അസോ. ഡയറക്ടര്‍ ഫാ. ഡിബിന്‍ കരിങ്ങേന്‍, പ്രിന്‍സിപ്പല്‍ ഡോ. ഗിംസണ്‍ ഡി. പറമ്പില്‍, എം.ബി. സുരേന്ദ്രന്‍, ഡോ. മേഘ ജോബി എന്നിവര്‍ പങ്കെടുത്തു.

കോർപറേറ്റ് നിയമങ്ങൾ: സെമിനാർ നടത്തി

കൊച്ചി: ഇൻസ്റ്റിറ്റ്യൂട്ട് ഓഫ് ചാർട്ടേഡ് അക്കൗണ്ടന്‍റ്സ് ഓഫ് ഇന്ത്യ എറണാകുളം ബ്രാഞ്ച് 'കോർപറേറ്റ് നിയമങ്ങൾ' എന്ന വിഷയത്തിൽ ഏകദിന സെമിനാർ സംഘടിപ്പിച്ചു. കേരള, ലക്ഷദ്വീപ് രജിസ്ട്രാർ ഓഫ് കമ്പനീസ് അരുൺ പ്രസാദ് മുഖ്യാതിഥി ആയിരുന്നു. ഓഡിറ്റ് ഡോക്യുമെന്‍റേഷന്‍റെ പ്രാധാന്യത്തെക്കുറിച്ചും അത് റഗുലേറ്റർമാരിൽ ഉണ്ടാക്കുന്ന ഗുണങ്ങളെക്കുറിച്ചും അദ്ദേഹം സംസാരിച്ചു. ടെക്നിക്കൽ സെഷനിൽ ബേബി പോൾ, ജി.എൻ. രാമസ്വാമി, രാധേഷ് എൽ. ഭട്ട് എന്നിവർ സംസാരിച്ചു. ചെയർമാൻ എ.എസ്. ആനന്ദ് സ്വാഗതവും സെക്രട്ടറി രൂപേഷ് രാജഗോപാൽ നന്ദിയും പറഞ്ഞു.

ദീപിക നമ്മുടെ ഭാഷ പദ്ധതി

എറണാകുളം എസ്ആര്‍വി സ്‌കൂളില്‍ കൊച്ചി: എറണാകുളം എസ്ആര്‍വി വൊക്കേഷണല്‍ ഹയര്‍ സെക്കന്‍ഡറി സ്‌കൂളില്‍ ദീപിക നമ്മുടെ ഭാഷാ പദ്ധതിയ്ക്കു തുടക്കം. ലയണ്‍സ് ക്ലബ് കൊച്ചിന്‍ പ്രൈഡിന്‍റെ സഹകരണത്തോടെ ആരംഭിച്ച പദ്ധതിയുടെ ഉദ്ഘാടനം ക്ലബ് പ്രസിഡന്‍റ് എന്‍.ബി. രാധാകൃഷ്ണന്‍നായര്‍ നിര്‍വഹിച്ചു. പ്രിന്‍സിപ്പല്‍ ജിന്‍സി ജോസഫ് അധ്യക്ഷത വഹിച്ചു. ലയണ്‍സ് ഡിസ്ട്രിക്ട് 318 സി മീഡിയ സെക്രട്ടറി കുമ്പളം രവി, ദീപിക കൊച്ചി സര്‍ക്കുലേഷന്‍ മാനേജര്‍ ബിനോ വര്‍ഗീസ്, ക്ലബ് സെക്രട്ടറി റോബര്‍ട്ട് സേവ്യര്‍, ട്രഷറര്‍ മനോജ് സുകുമാരന്‍, മുന്‍ പ്രസിഡന്റ് യേശുദാസ് വേണാട്ട്, അധ്യാപകരായ അജിമോന്‍ പൗലോസ്, എം.ജി. പ്രസാദ്, ദീപിക ഏരിയ മാനേജര്‍ അനിതകുമാരി എന്നിവര്‍ പ്രസംഗിച്ചു. ചെറായി എസ്എംഎച്ച്എസ്എസിൽ ചെറായി: ചെറായി എസ്എം ഹയർ സെക്കൻഡറി സ്കൂളിൽ 'ദീപിക നമ്മുടെ ഭാഷ'പദ്ധതിയ്ക്കു തുടക്കം. ബ്യൂമെര്‍ക് ഇന്ത്യ ഫൗണ്ടേഷന്‍ സെക്രട്ടറി തുളസി വര്‍മ പദ്ധതിയുടെ ഉദ്ഘാടനം നിര്‍വഹിച്ചു. പ്രിൻസിപ്പൽ സി.കെ. ഗീത അധ്യക്ഷത വഹിച്ചു. വിജ്ഞാന വർധിനി സഭ മാനേജർ പ്രദീപ്‌ പൂത്തേരി, സെക്രട്ടറി ഷെല്ലി സുകുമാരൻ, സ്കൗട്ട് മാസ്റ്റർ വി.എസ്. സുനിൽ, സ്റ്റാഫ്‌ സെക്രട്ടറി കെ.എസ്. സ്മീര, ലൈബ്രേറിയൻ എൻ. ദിയ തുടങ്ങിയവര്‍ പ്രസംഗിച്ചു.

ഓഞ്ഞിത്തോട് റീസർവേ : തർക്കസ്ഥലത്ത് പോലീസ് സംരക്ഷണയിൽ അതിർത്തിക്കല്ല് സ്ഥാപിച്ചു

ആലുവ: ഓഞ്ഞിതോട് റീ സർവേയുടെ ഭാഗമായി തർക്ക പ്രദേശമായ എലൂക്കര ഇലഞ്ഞിച്ചുവടിൽ സർവേക്കല്ല് റവന്യൂ വകുപ്പ് സ്ഥാപിച്ചു. പോലീസിന്‍റെ സാന്നിധ്യത്തിൽ സർവേ കല്ലിടൽ പുന:രാരംഭിച്ചെങ്കിലും ദ്യശ്യങ്ങൾ പകർത്തുന്നവരെ തടഞ്ഞതായും പരാതിയുണ്ട്. ഇതോടെ രണ്ട് വർഷമായി സ്തംഭിച്ചിരുന്ന സർവേ കല്ലിടൽ പ്രവർത്തികൾക്കാണ് പരിഹാരമായത്. 2022 മുതൽ നടന്ന സർവേയിൽ 12 കിലോമീറ്റർ ദൂരത്തിൽ പുഴ ഭാഗം കൈയേറ്റം കണ്ടെത്തി കുറ്റികൾ സ്ഥാപിച്ചുവെങ്കിലും എതാനും കൈയേറ്റക്കാർ അത് പിഴുതു മാറ്റുകയായിരുന്നു. തോടിന്‍റെ ആരംഭഭാഗം കല്ലിടാൻ ചെന്ന അധികൃതരെ കൈയേറ്റക്കാർ തടയുകയും പ്രവേശന മാർഗം താഴിട്ടു പൂട്ടുകയും ചെയ്തിരുന്നു. തുടർന്നാണ് രണ്ട് വർഷം വൈകിയാണെങ്കിലും അതിർത്തി നിർണയത്തിനായി കോൺക്രീറ്റ് കല്ല് സ്ഥാപിക്കാൻ തീരുമാനിച്ചത്. എതിർപ്പുകൾ മറികടന്നാണ് കല്ല് സ്ഥാപിച്ചത്. ഈ സമയത്ത് ഫോട്ടോഗ്രാഫറുടെ കാമറ പ്രതിഷേധക്കാർ തട്ടിക്കളഞ്ഞതായാണ് പരാതി. പെരിയാറിൽ നിന്നുള്ള നീരൊഴുക്ക് ഓഞ്ഞിത്തോടിലേക്ക് വർധിപ്പിക്കുന്നതിന് ഓഞ്ഞിത്തോട് സംരക്ഷണ സമിതിയാണ് ഹൈക്കോടതിയെ ആദ്യം സമീപിച്ചത്. തുടർന്ന് 2022 മുതൽ സർവ്വെ നടന്നെങ്കിലും അതിർത്തി കല്ലിടുന്നതിൽ നിരവധി തടസങ്ങൾ ഉണ്ടായി. സർവേക്കുറ്റികൾ സ്ഥാപിച്ച സ്ഥലങ്ങളിൽ എടുത്ത് കളയുന്നതായും പരാതി ഉയർന്നിരുന്നു. ആകെ 587 കല്ലുകളാണ് ഓഞ്ഞിത്തോട് പ്രദേശം തിരിച്ചുപിടിക്കാതായി സ്ഥാപിക്കേണ്ടത്. ഇനി 200 ഓളം സർവ്വെക്കല്ലുകളാണ് പൂർത്തീകരിക്കേണ്ടത്. ആലങ്ങാട്, കടുങ്ങല്ലൂർ ഗ്രാമ പഞ്ചായത്തുകളിലായി കടന്നു പോകുന്ന ഓഞ്ഞിത്തോടിലെ ബാക്കി ഭാഗത്ത് കൂടി കല്ലിടൽ പൂർത്തിയായാൽ തോട് ആഴം കൂട്ടി വീതി കൂട്ടുവാൻ വേണ്ട നടപടികൾക്കായി സ്ഥലം എംഎൽ‌എ കൂടിയായ മന്ത്രി പി. രാജീവിനോട് അഭ്യർഥിക്കുമെന്ന് ഓഞ്ഞിത്തോട് സംരക്ഷണ സമിതി ഭാരവാഹികൾ അറിയിച്ചു.

വാഹന പരിശോധനയ്ക്കിടെ എസ്ഐയെ വാഹനമിടിച്ച് കൊലപ്പെടുത്താൻ ശ്രമിച്ച പ്രതി കീഴടങ്ങി

മൂവാറ്റുപുഴ: വാഹന പരിശോധനയ്ക്കിടെ എസ്ഐയെ വാഹനമിടിച്ച് കൊലപ്പെടുത്താൻ ശ്രമിച്ച കേസിലെ ഒന്നാം പ്രതി കോടതിയിൽ കീഴടങ്ങി. ആനിക്കാട് കന്പനിപ്പടിയിൽ വാടകയ്ക്ക് താമസിക്കുന്ന വാഴത്തോപ്പ് മണിയാറംകുടി മുഹമ്മദ് ഷെറീഫ് ഷംസുദിനാണ്(25) മൂവാറ്റുപുഴ ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയിൽ ഇന്നലെ രാവിലെ കീഴടങ്ങിയത്. ഇയാളെ രണ്ടാഴ്ചത്തേക്ക് കോടതി റിമാൻഡ് ചെയ്തു. കല്ലൂർക്കാട് പോലീസ് സ്റ്റേഷനിലെ ഗ്രേഡ് എസ്ഐ ഇ.എം. മുഹമ്മദിനെയാണ് കഴിഞ്ഞ ശനിയാഴ്ച വൈകുന്നേരം കല്ലൂർക്കാട് വഴിയാഞ്ചിറ ഭാഗത്തു പരിശോധനയ്ക്കിടെ വാഹനം കയറ്റി കൊലപ്പെടുത്താൻ ശ്രമിച്ചത്. പതിവു വാഹന പരിശോധന നടത്തുന്നതിനിടയിലാണ് വഴിയാഞ്ചിറ ഭാഗത്ത് വഴിയരികിൽ സംശയാസ്പദമായ സാഹചര്യത്തിൽ കാർ നിർത്തിയിട്ടിരിക്കുന്നത് എസ്ഐയുടെ ശ്രദ്ധയിൽപ്പെട്ടത്. തുടർന്ന് കാറിനടുത്തെത്തി ചോദ്യം ചെയ്തതോടെ മുഹമ്മദ് ഷെറീഫ് കാറെടുത്ത് എസ്ഐയെ അപായപ്പെടുത്താൻ ശ്രമിച്ച ശേഷം രക്ഷപ്പെടുകയായിരുന്നു. പ്രതിയെ രക്ഷപെടാൻ സഹായിച്ച സുഹൃത്തുക്കളായ ഈരാറ്റുപേട്ട സ്വദേശികളായ ഷാഹിദ്, റഫ്സൽ എന്നിവരെ ക്ലലൂർക്കാട് പോലീസ് കഴിഞ്ഞ ദിവസം അറസ്റ്റ് ചെയ്തിരുന്നു. അപകടമുണ്ടാക്കിയ കാറിൽ മുഹമ്മദ് ഷെറീഫിനൊപ്പമുണ്ടായിരുന്ന തൊടുപുഴ സ്വദേശി ആസിഫിനായി പോലീസ് അന്വേഷണം ഊർജിതമാക്കി.

ഹെറോയിനുമായി പിടികൂടി

പെരുമ്പാവൂർ : ഹെറോയിനുമായി ഇതരസംസ്ഥാന തൊഴിലാളി പിടിയിൽ. പശ്ചിമബംഗാൾ സ്വദേശി എസ്.കെ. സജീബുൾ (28)നെയാണ് പെരുമ്പാവൂർ എക്സൈസ് റേഞ്ച് പാർട്ടി പിടികൂടിയത്. ഇയാളുടെ പക്കൽ നിന്നും ഒരു ഗ്രാം ഹെറോയിൻ എക്സൈസ് പിടിച്ചെടുത്തു. ഫിഷ് മാർക്കറ്റിന് സമീപത്ത് നിന്നുമാണ് ഇയാൾ പിടിയിലായത്.

കേബിളിൽ കുരുങ്ങി വീണ് സ്കൂട്ടർ യാത്രികന്‍റെ മൂക്കിന് ഗുരുതര പരിക്ക്

കാക്കനാട്: വൈദ്യുത പോസ്‌റ്റിൽ തൂങ്ങിക്കിടന്നിരുന്ന കേബിളിൽ കുരുങ്ങി റോഡിലേക്കു മറിഞ്ഞുവീണ സ്‌കൂട്ടർ യാത്രക്കാരന്‍റെ മൂക്കിന്‍റെ പാലമൊടിഞ്ഞു. ഒറ്റപ്പാലം മായന്നൂർ പുത്തൻപീടികയിൽ മുഹമ്മദ് ഫവാസിനാണ്(23) പരിക്കേറ്റത്. സ്വകാര്യ കമ്പനിയിലെ ഡെലിവറി ജീവനക്കാരനായ ഫവാസ് ബുധനാഴ്‌ച രാവിലെ 7.30യോടെ പാഴ്സലുമായി പോകുമ്പോഴാണ് അപകടം. സ്‌കൂട്ടറിന്‍റെ കണ്ണാടിയിലാണ് കേബിൾ കുരുങ്ങിയത്. നിയന്ത്രണംവിട്ട സ്കൂട്ടർ മതിലിൽ ഇടിച്ചു മറിയുകയായിരുന്നു. പിന്നാലെ കാറിൽ വരികയായിരുന്ന കിഴക്കേ ആഞ്ഞിക്കാത്ത് കെ.ഇ. അബ്‌ദുള്ളയാണ് ഫവാസിനെ കരിമക്കാട്ടെ സ്വകാര്യ ആശുപത്രിയിലെത്തിച്ചത്. അവിടെ പ്രഥമ ശുശ്രൂഷ നൽകിയ ശേഷം ഇടപ്പള്ളിയിലെ ആശുപത്രിയിലേക്ക് മാറ്റി. ഫവാസിന്‍റെ മൂക്കിന് ഡോകടർമാർ ശസ്ത്രക്രിയ നിർദേശിച്ചിരിക്കുകയാണ്.

സഹോദരങ്ങളെ ആക്രമിച്ച കേസിൽ മൂന്നുപേർ അറസ്റ്റിൽ

ഉദയംപേരൂർ: പ്രായപൂർത്തിയാകാത്ത പെൺകുട്ടിയെയും സഹോദരനെയും ആക്രമിച്ച കേസിൽ മൂന്നുപേരെ പോലീസ് അറസ്റ്റ് ചെയ്തു. നടക്കാവ് കുറവൻപറമ്പിൽ സുനീഷ്, ഉദയംപേരൂർ കുറവൻപറമ്പിൽ അനു, ഉദയംപേരൂർ കൊച്ചുതോട്ടത്തിൽപ്പറമ്പിൽ മിഥുൻ എന്നിവരെയാണ് പോക്സോ പ്രകാരം ഉദയംപേരൂർ പോലീസ് അറസ്റ്റ് ചെയ്തത്. തിങ്കളാഴ്ച രാത്രി പെൺകുട്ടിയും സഹോദരനുമൊന്നിച്ച് മുളന്തുരുത്തിയിലുള്ള ഹോട്ടലിൽ നിന്നും ഭക്ഷണം കഴിച്ച ശേഷം തിരികെ കാറിൽ വീട്ടിലേക്ക് പോകുന്നതിനിടെയായിരുന്നു സംഭവം. രാത്രി 11.30ഓടെ എംഎൽഎ റോഡിൽ നെടുവേലി ക്ഷേത്രത്തിനടുത്ത് കുറച്ചുപേർ റോഡിന് കുറുകെ നിന്ന് ഇവരിലൊരാളെ കാർ തട്ടിയതായി പറഞ്ഞ് കാർ തടഞ്ഞു നിർത്തുകയായിരുന്നു. തുടർന്ന് പ്രതികളിൽ രണ്ടുപേർ കാറിന്‍റെ ഡോർ വലിച്ചുതുറന്ന് സഹോദരന്‍റെ കവിളിലും ഷർട്ടിലും കുത്തിപ്പിടിച്ചു. പെൺകുട്ടി ശബ്ദമുണ്ടാക്കിയതോടെ പെൺകുട്ടിയിരുന്ന ഭാഗത്തെ ഡോർ വലിച്ച് തുറന്ന് പ്രതികളിലൊരാൾ നീളമുള്ള കുട കൊണ്ട് കാലിൽ കുത്തുകയായിരുന്നു. മറ്റൊരു പ്രതി പെൺകുട്ടിയുടെ ഉടുപ്പിൽ പിടിച്ചുവലിച്ച് ഷർട്ടിന്‍റെ ബട്ടണുകൾ പൊട്ടിച്ചതായും പരാതിയിൽ പറയുന്നു. ആക്രമണത്തിൽ പെൺകുട്ടിയുടെ കാലിന്‍റെ ചെറുവിരലിന്‍റെ അസ്ഥിക്ക് പൊട്ടലുണ്ടായതിനെ തുടർന്ന് ആശുപത്രിയിൽ ചികിത്സ തേടുകയായിരുന്നു. പ്രതികളെ റിമാൻഡ് ചെയ്തു.

എംഡിഎംഎയുമായി യുവാവ് പിടിയിൽ

ചെറായി: മുനമ്പം വൈദ്യരുപടി ബസ് സ്റ്റോപ്പിന് പടിഞ്ഞാറുവശം മുനമ്പം പോലീസ് നടത്തിയ റെയ്ഡിൽ ഒരു വീട്ടിൽ നിന്ന് ഒമ്പതു ഗ്രാം എംഡിഎംഎ പിടികൂടി. വീട്ടുകാരനായ അറുകാട്ടിൽ സനൂപ്, സുഹൃത്തുക്കളായ മുനമ്പം സ്വദേശി അനീർ, ജെസ്‌ലിൻ, ചെറായി സ്വദേശി കൃഷ്ണദേവ്, തത്തപ്പിള്ളി സ്വദേശി അനീഷ് എന്നിവരെയും അറസ്റ്റ് ചെയ്തു. ഇതിൽ സനൂപ് ഒഴിച്ച് എല്ലാവർക്കും സ്റ്റേഷൻ ജാമ്യം നൽകി വിട്ടയച്ചു. പോലീസിനു ലഭിച്ച രഹസ്യവിവരത്തെ തുടർന്നാണ് റെയ്ഡ് നടത്തിയത്. സനൂപിനെ ഇന്ന് കോടതിയിൽ ഹാജരാക്കും.

സ്‌കൂട്ടര്‍ മോഷ്ടാവ് കുടുങ്ങി

കൊച്ചി: സ്‌കൂട്ടര്‍ മോഷ്ടിച്ച കേസിലെ യുവാവ് അറസ്റ്റില്‍. തൃശൂര്‍ ചേര്‍പ്പ് സ്വദേശി നരേഷ് കൃഷ്ണ(19) നെയാണ് കളമശേരി പോലീസ് പിടികൂടിയത്. എറണാകുളം വട്ടേക്കുന്നം സ്വദേശിയുടെ ബൈക്കാണ് പ്രതി മോഷ്ടിച്ചത്. തൃശൂര്‍ കേന്ദ്രീകരിച്ച് നടത്തിയ അന്വേഷണത്തില്‍ അറസ്റ്റിലായ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

റെയില്‍വേ സ്റ്റേഷന്‍ നവീകരണം : നോര്‍ത്തില്‍ ആദ്യഘട്ടം റെഡി

കൊച്ചി: ആദ്യഘട്ട നവീകരണ പ്രവര്‍ത്തനങ്ങള്‍ പൂര്‍ത്തിയായ എറണാകുളം നോര്‍ത്ത് റെയില്‍വേ സ്റ്റേഷന്‍ ഡിസംബറില്‍ പൊതുജനങ്ങല്‍ക്കായി തുറന്നു നല്‍കും. ഇതിനായുള്ള തയാറെടുപ്പുകള്‍ നടത്തി വരുന്നതായി ഉദ്യോഗസ്ഥര്‍ പദ്ധതി അവലോകന യോഗത്തില്‍ ഹൈബി ഈഡന്‍ എംപിയെ അറിയിച്ചു. ഡിസംബറിനു ശേഷം പഴയ കെട്ടിടത്തിന്‍റെ ഭാഗങ്ങള്‍ പൊളിച്ചുമാറ്റി പുനര്‍നിർമാണം ആരംഭിക്കും. 2027 ജനുവരിയില്‍ കെട്ടിടം പൂര്‍ണ സജ്ജമാകുമെന്നും ഉദ്യോഗസ്ഥര്‍ അറിയിച്ചു. നോര്‍ത്ത് റെയില്‍വേ സ്റ്റേഷന്‍റെ രണ്ടാം പ്ലാറ്റ് ഫോമില്‍ നിന്ന് എസ്ആര്‍എം റോഡിലേക്ക് പ്രവേശിക്കുന്ന ഇടുങ്ങിയ റോഡ് വീതി കൂട്ടുന്നതിനും, റെയില്‍വേ ലൈനിന് സമാന്തരമായുള്ള റോഡ് വീതി കൂട്ടുന്നതിനും 50 സെന്‍റ് സ്ഥലം ആവശ്യമാണ്. പദ്ധതി നിര്‍ദേശം തയാറാക്കി അനുമതിക്കായി സമര്‍പ്പിക്കാന്‍ ഹൈബി ഈഡൻ എംപി ഉദ്യോഗസ്ഥര്‍ക്ക് നിര്‍ദേശം നല്‍കി. ടൗണ്‍ ഹാള്‍ മെട്രോ സ്റ്റേഷനുമായി ബന്ധിപ്പിക്കുന്നതിന് ഭൂമി ഏറ്റെടുക്കുകയോ, ലഭ്യമായ സ്ഥലത്ത് അത്യന്താധുനിക സാങ്കേതിക വിദ്യകളുടെ സാധ്യത പ്രയോജനപ്പെടുത്തി ലിങ്ക് ബ്രിഡ്ജ് നിര്‍മിക്കുകയോ ചെയ്യണമെന്ന് എംപി നിര്‍ദേശിച്ചു. ഇഎസ്‌ഐ ആശുപത്രിയില്‍ നിന്ന് ഒരു ഭാഗം ഭൂമി ഏറ്റെടുത്ത് ഒന്നാം പ്ലാറ്റ്‌ഫോം വികസിപ്പിക്കുന്നതിനുള്ള ശ്രമങ്ങള്‍ തുടരണമെന്നും പറഞ്ഞു. എറണാകുളം സൗത്തിലെ നവീകരണ പ്രവര്‍ത്തനങ്ങള്‍ പൂര്‍ത്തിയാക്കാന്‍ ഡിസംബര്‍ വരെയാണ് കോണ്‍ട്രാക്ടര്‍ക്ക് സമയം നല്‍കിയിരുന്നത്. എന്നാല്‍ അവശേഷിക്കുന്ന ജോലികള്‍ റീ ടെണ്ടര്‍ ചെയ്യേണ്ട അവസ്ഥയിലാണ്. കോണ്‍ട്രക്ടറില്‍ നിന്ന് പിഴ ഈടാക്കാനും യാത്രക്കാര്‍ക്ക് സ്റ്റേഷനിലേക്ക് പോകാന്‍ വേണ്ടത്ര സൗകര്യമൊരുക്കാനും എംപി നിര്‍ദേശം നല്‍കി. റെയില്‍വേ കൾവെര്‍ട്ടുകള്‍ ശുചീകരിക്കണം നഗരത്തിലെ റെയില്‍വേ കൾവെര്‍ട്ടുകള്‍ ശുചീകരിച്ച് നീരൊഴുക്ക് സാധ്യമാക്കാന്‍ റെയില്‍വേ തയാറാകണം. ഇതിനോടകം മൂടിയ കൾവെര്‍ട്ടുകള്‍ തുറന്ന് ശുചീകരിക്കണമെന്നും യോഗത്തില്‍ ആവശ്യമുയര്‍ന്നു. എളമക്കര പേരണ്ടൂര്‍ റോഡിലും, അറ്റ്‌ലാന്‍റിസ് റെയില്‍വേ ലെവല്‍ ക്രോസിംഗിലും ഓരോ റെയില്‍വേ അണ്ടര്‍പാസിന്‍റെ അടിയന്തര ആവശ്യമുണ്ടെന്നും എംപിയും എംഎല്‍എയും യോഗത്തില്‍ പറഞ്ഞു. സാധ്യതാ പഠനം നടത്തി റിപ്പോര്‍ട്ട് തയാറാക്കിയ ശേഷം ഇതിനായി റെയില്‍വേ ഫണ്ടിന്‍റെ അപര്യാപ്തത വന്നാല്‍ എംപി, എംഎല്‍എ ഫണ്ട് അനുവദിക്കുന്നത് പരിഗണിക്കുമെന്ന ഇവരും വ്യക്തമാക്കി. പച്ചാളം ഭാഗത്ത് റെയില്‍വേ സ്ഥാപിച്ചിട്ടുള്ള ഒരു ഹൈറ്റ് ബാരിയര്‍ പൊളിച്ച് നീക്കണമെന്നും ഇവര്‍ ആവശ്യപ്പെട്ടു. തൃപ്പൂണിത്തുറ 4.9 കോടിയുടെ പദ്ധതി പൂര്‍ത്തിയായി തൃപ്പൂണിത്തുറ റെയില്‍വേ സ്റ്റേഷനില്‍ 4.97 കോടി രൂപയുടെ പുനര്‍നിര്‍മാണ പദ്ധതികള്‍ പൂര്‍ത്തിയായി. 5.79 കോടിയുടെ പുതിയ പദ്ധതി നിര്‍ദേശങ്ങള്‍ റെയില്‍വേ ജനറല്‍ മാനേജര്‍ക്ക് സമര്‍പ്പിച്ചിരിക്കുകയാണ്. ഇവിടെ വര്‍ധിപ്പിച്ചിട്ടുള്ള ഉയര്‍ന്ന പാര്‍ക്കിംഗ് ഫീസ് മരവിപ്പിക്കണമെന്നു എംപി ആവശ്യപ്പെട്ടു. നിരക്ക് ഉയര്‍ത്തിയത് പുനഃപരിശോധിക്കുമെന്ന് റെയില്‍വേ അധികൃതര്‍ മറുപടി നല്‍കി. പുതിയ ട്രെയിന്‍ സ്റ്റോപ്പുകള്‍ അനുവദിക്കണം, ചോര്‍ച്ച അടയ്ക്കണം, കൃത്യമായ ഇടവേളകളില്‍ ആര്‍പിഎഫ് സാന്നിധ്യം ഉണ്ടായിരിക്കണം , റെയില്‍വേ സ്റ്റേഷനിലേക്ക് റെയില്‍വേ ഭൂമിയിലൂടെയുള്ള റോഡിന്‍റെ വീതി വര്‍ധിപ്പിക്കുന്നത് അടിയന്തരമായി പരിഗണിക്കണം തുടങ്ങിയ കാര്യങ്ങളും എംപി ആവശ്യപ്പെട്ടു. ഇടപ്പള്ളി സ്റ്റേഷന്‍ അമൃത് ഭാരത് പദ്ധതിയില്‍ ഉള്‍പ്പെടുത്തി വികസിപ്പിക്കണം, പുതിയ ട്രെയിന്‍ സ്റ്റോപ്പുകള്‍ അനുവദിക്കണമെന്നും അദ്ദേഹം ആവശ്യപ്പെട്ടു. വടുതല റെയില്‍വേ മേല്‍പ്പാലം പദ്ധതിയില്‍ അപ്രോച്ച് റോഡിനുള്ള ടെന്‍ഡര്‍ ക്ഷണിച്ചിട്ടുണ്ടെങ്കിലും പദ്ധതിയുടെ ഒരു പ്രധാന ഭാഗം റെയില്‍വേ ഇതുവരെ ടെന്‍ഡര്‍ ചെയ്തിരുന്നില്ല ഇത് ഈ മാസം തന്നെ ടെണ്ടര്‍ ചെയ്യുമെന്ന് റെയില്‍വേ അറിയിച്ചു.

ഗ്രാമങ്ങളുടെ സർഗസൗന്ദര്യം വായനശാലകൾ

പത്രങ്ങളും വാരികകളും മാസികകളും വായിച്ചിരിക്കാനും വായിച്ചതിനെക്കുറിച്ചു വർത്തമാനം പറയാനും അറിവു നേടാനും ഇടമൊരുക്കിയ ഗ്രാമീണ വായനശാലകൾ ഏതൊരു നാടിനും സർഗസൗന്ദര്യമാണ്. ആർത്തിയോടെ വായിച്ചുതീർക്കാൻ പുസ്തകങ്ങളുടെ ശേഖരവും കൂടിയാകുന്പോൾ, ഗ്രന്ഥശാലയ്ക്കു അറിവനുഭവങ്ങളുടെ തിളക്കം കൂടും. സജീവമായ വായനശാലകൾ നാടിന്‍റെയും നാട്ടുകാരുടെയും പൊതുബോധത്തിന്‍റെ അടയാളങ്ങൾ കൂടിയാണ്. നമ്മുടെ നാട്ടിൻപുറങ്ങളിലെയും മറ്റും വായനശാലകളുടെ സ്ഥിതി എന്താണ്? ഈ വായനാദിനത്തിൽ ജില്ലയിലെ വിവിധ ഭാഗങ്ങളിലുള്ള വായനശാലകളെക്കുറിച്ചറിയാം പണ്ടപ്പിള്ളി നാഷണല്‍ ലൈബ്രറി @ 1947 മൂവാറ്റുപുഴ: 1947ല്‍ സ്ഥാപിതമായ പണ്ടപ്പിള്ളി നാഷണല്‍ ലൈബ്രറി പല തലമുറകൾക്ക് വായനയുടെ വെളിച്ചം പകർന്ന ഗ്രന്ഥശാലയാണ്. മൂവാറ്റുപുഴ താലൂക്ക് ലൈബ്രറി കൗണ്‍സിലിനു കീഴിലെ എ ഗ്രേഡ് ഗ്രന്ഥശാലയിൽ 14,000 പുസ്തകങ്ങളുണ്ട്. നാനൂറിലധികം അംഗങ്ങള്‍ ഉണ്ട്. വീട്ടിലേക്ക് ഒരു പുസ്തകം പദ്ധതിയില്‍പ്പെടുത്തി ഗ്രന്ഥശാല പ്രവര്‍ത്തന പരിധിയിലെ എല്ലാ വീടുകളിലും പുസ്തകം എത്തിക്കുന്നുണ്ട്. എല്ലാ മാസവും ഒന്നിലധികം പരിപാടികള്‍ നടത്തി പ്രദേശവാസികളെ ഗ്രന്ഥശാലയിലേക്ക് ആകർഷിക്കുകയും ചെയ്യുന്ന പ്രവര്‍ത്തനം സജീവമാണെന്ന് ലൈബ്രറി പ്രസിഡന്‍റ് ടോമി വള്ളമറ്റവും സെക്രട്ടറി ടി. ശ്യാമളയും പറഞ്ഞു. ‘മഹാത്മാ'വെത്തിയ ഗ്രന്ഥശാല തൃപ്പൂണിത്തുറ: 92 വർഷമായി രാജനഗരിയുടെ അക്ഷര വെളിച്ചമാണു തൃപ്പൂണിത്തുറ മഹാത്മ ഗ്രന്ഥശാല. 1932ൽ ക്ഷേത്രപ്രവേശന സത്യഗ്രഹത്തിന്‍റെ പ്രചാരണത്തിന് എകെജി നടത്തിയ അയിത്തോച്ചാടന ജാഥ തൃപ്പൂണിത്തുറയിലെത്തിയപ്പോൾ നടത്തിയ ആഹ്വാനമായിരുന്നു ഗ്രന്ഥശാലയുടെ പിറവിക്ക് നിദാനമായത്. 1933 ജനുവരി 18ന് അഞ്ചുവിളക്ക് കവലയ്ക്ക് സമീപത്തെ ഓലമേഞ്ഞ കെട്ടിടത്തിന്‍റെ ഒരു ഭാഗം രണ്ടു രൂപ വാടകയ്ക്കെടുത്തായിരുന്നു ഗ്രന്ഥശാലയുടെ തുടക്കം. 1934 ജനുവരി 14ന് നടന്ന ആദ്യ വാർഷിക യോഗത്തിൽ മഹാത്മാഗാന്ധിയാണ് അധ്യക്ഷത വഹിച്ചത്. രണ്ടാമത്തെ വാർഷികത്തിന് രാഷ്ട്രപതി ബാബു രാജേന്ദ്രപ്രസാദും എത്തി. വാടക കെട്ടിടത്തിലായിരുന്ന ഗ്രന്ഥശാല ഇപ്പോൾ ലായം റോഡിലുള്ള സ്വന്തം കെട്ടിടത്തിലാണ്. 30,000 ത്തോളം പുസ്തകങ്ങളും 1000 ൽപ്പരം അംഗങ്ങളും അനേകം അക്കാദമിക് സിഡികളും ഇപ്പോൾ ഗ്രന്ഥശാലയ്ക്കുണ്ട്. തിങ്കേഴ്സ് ഫോറം, സ്റ്റഡി സെന്‍റർ, പ്രതീക്ഷ കലാവിഭാഗം, സീനിയർ സിറ്റിസൺ ഫോറം, സാഹിത്യ സമിതി, ഫിലിം ക്ലബ്, ബാലവേദി, വനിതാവേദി എന്നിവയും പ്രവർത്തിക്കുന്നുണ്ട്. ഉഷ മേനോനാണ് ലൈബ്രേറിയൻ. കോതമംഗലത്തെ ആദ്യ ഗ്രന്ഥശാല പോത്താനിക്കാട് : സമ്പൂര്‍ണ സാക്ഷരത കൈവരിച്ച രാജ്യത്തെ പ്രഥമ ഗ്രാമപഞ്ചായത്തായ പോത്താനിക്കാടിലെ പബ്ലിക് ലൈബ്രറി, കോതമംഗലം താലൂക്കിലെ ആദ്യത്തെ വായനാശാലയാണ്. 1947ല്‍ തുടങ്ങി. 890 അംഗങ്ങൾ, ഇംഗ്ലീഷ് ഉൾപ്പടെ 17000ത്തോളം പുസ്തകങ്ങൾ. കഴിഞ്ഞ 50 വര്‍ഷത്തോളമായി പോത്താനിക്കാട് ചാലപ്പാട്ട് വിശ്വനാഥ കൈമളാണ് ലൈബ്രേറിയന്‍. ചെറായി ബീച്ചിലുണ്ട് ജനകീയ വായനശാല വൈപ്പിൻ: വൈപ്പിനിൽ വിദേശികളക്കം എത്തുന്ന വായനശാലയാണ് ചെറായി ബീച്ചിലെ ജനകീയ വായനശാല. 27 വർഷത്തെ പഴക്കമുണ്ട്. ചെറായി ബീച്ച് ടൂറിസ്റ്റ് കേന്ദ്രത്തിനൊപ്പം പ്രായം. 7500 പുസ്തകങ്ങളും ദിനപ്പത്രങ്ങളും ആനുകാലിക പ്രസിദ്ധീകരണങ്ങളും ഇവിടെയുണ്ട്. 325 അംഗങ്ങൾ. ദിനംപ്രതി 50 പേരെങ്കിലും വായിക്കാൻ എത്തും. കൂടാതെ ബഡ്സ് സ്കൂളുകളിലും , കുടുംബശ്രീ യൂണിറ്റുകളിലും ഇവർ പുസ്തകം എത്തിച്ച് കൊടുക്കാറുണ്ട്. മലയാളത്തോടൊപ്പം ലോകോത്തര ഇംഗ്ലീഷ് പുസ്തകങ്ങളും ഇവിടെയുണ്ട്. ബീച്ചിലെത്തുന്ന വിദേശികൾ ഇവിടെ വന്ന് വായിക്കുന്നതിനാലാണ് ഇംഗ്ലീഷ് പുസ്തകങ്ങൾക്ക് പ്രാധാന്യം നൽകിയതെന്നു പ്രസിഡന്‍റ് കെ.ബി. രാജീവും സെക്രട്ടറി പി.ടി. സുധീർകുമാറും പറയുന്നു. ഗീതാ പ്രസാദാണു ലൈബ്രേറിയൻ. ഇതുകണ്ട് ഇവിടെയെത്തുന്ന വിദേശ സഞ്ചാരികളും ധാരാളം പുസ്തകങ്ങൾ വായനശാലക്ക് സംഭാവന നൽകാൻ തുടങ്ങിയതോടെ ഇംഗ്ലീഷ് പുസ്തക ശേഖരം ഇപ്പോൾ സമൃദ്ധമാണ്. വായനശാലയുടെ ടെറസിൽ വിദേശികൾക്കായി സൺ ബാത്ത് റീഡിംഗ് റൂം ഒരുക്കാനുള്ള തയാറെടുപ്പിലാണ് വായനശാല. പെരുന്പാവൂർ പെരുമ പെരുമ്പാവൂർ: കുന്നത്തുനാട് താലൂക്കിൽ 147 ലൈബ്രറികളിൽ 142 എണ്ണവും സജീവമാണ്. വളയൻചിറങ്ങര വി.എൻ കേശവപിള്ള ലൈബ്രറി, പുക്കാട്ടുപടി വള്ളത്തോൾ ലൈബ്രറി എന്നിവയാണ് പ്രർത്തനത്തിൽ മുന്നിലെന്നു താലൂക്ക് സെക്രട്ടറി എൻ.പി. അജയകുമാർ പറഞ്ഞു. മനക്കപ്പടി പബ്ലിക് ലൈബ്രറി, പുല്ലുവഴി മിത്രകല എന്നിവയും നല്ല നിലയിൽ പ്രവർത്തിക്കുന്നുണ്ട്. നിലവിൽ ലൈബ്രറികളിൽ നിർദേശിച്ചിട്ടുള്ള പരിപാടികൾ കാര്യക്ഷമമായി നടത്തിവരുന്നുണ്ട്. സർക്കാരിൽ നിന്നുള്ള ഗ്രാന്‍റുകൾ മുടങ്ങാറില്ല. ലൈബ്രറികൾ മാസത്തിൽ ഒരു പ്രോഗ്രാമെങ്കിലും സംഘടിപ്പിക്കുന്നുണ്ട്. വായനക്കാരുടെ എണ്ണം കുറവാണെങ്കിലും മറ്റ് പരിപാടികളിൽ ജനങ്ങളുടെ പ്രാതിനിധ്യം കുടുന്നുണ്ട്. പെരുന്പാവൂർ നഗരസഭയുടെ കീഴിലുള്ള പബ്ലിക് ലൈബ്രറിയും സജീവമാണ്. ചായക്കടയിൽ തുടങ്ങിയ വായനശാല ആലുവ: 1948 ഒക്ടോബർ 11ന് ഒരു ചായക്കടയിൽ പിറവിയെടുത്തതാണു കുട്ടമശേരി യുവജന വായനശാല. വാടകക്കെട്ടിടത്തിലേക്കു മാറിയപ്പോൾ 1952 ഡിസംബർ 12നു പ്രധാനമന്ത്രി ജവഹർലാൽ നെഹ്‌റുവാണ് ഉദ്ഘാടനം ചെയ്തത്. 1958ൽ കുട്ടമശേരി മനക്കലെ രമേശ്വരൻ ദാമോദരൻ നമ്പൂതിരിപ്പാട് സ്ഥലം നൽകി. നെഹ്റുവിന്‍റെ സാന്പത്തിക ഉപദേശകനായിരുന്ന പി.ജെ. തോമസാണ് വായനശാലയുടെ പുതിയ കെട്ടിടത്തിന് ശിലയിട്ടത്. ഇപ്പോൾ സ്വന്തം കെട്ടിടത്തിൽ. 25000 പുസ്തകങ്ങൾ ഉൾക്കൊള്ളുന്ന വായനശാലയിൽ ബിജു ഐപ്പാണ് ലൈബ്രേറിയൻ. രാവിലത്തെ പത്രവായനക്കാർ തന്നെ 60 ഓളം പേരുണ്ട്. 1956 ഓഗസ്റ്റ് 17 നു തുടങ്ങിയ മുനിസിപ്പൽ ലൈബ്രറിയും ആലുവ മേഖലയിലെ പ്രധാനപ്പെട്ട വായനാകേന്ദ്രമാണ്. പ്രതിദിനം നൂറുകണക്കിന് വായനക്കാരെത്തുന്നു. 1984 ൽ ലൈബ്രറിക്കു കുറ്റിപ്പുഴ കൃഷ്ണപിള്ളയുടെ പേരിട്ടു. മലയാളം, ഹിന്ദി, ഇംഗ്ലിഷ് ഭാഷകളിലായി 45,000 പുസ്തകങ്ങളുണ്ട്. 18 ലക്ഷം രൂപ ചെലവിൽ ഡിജിറ്റലൈസേഷൻ പദ്ധതി പ്രഖ്യാപിച്ചിട്ടുണ്ട്. 1500 പേർക്ക് ഇരിക്കാവുന്ന ഓപ്പൺ എയർസ്റ്റേജുമുണ്ട്. പുസ്തകം വീട്ടിലെത്തിക്കും കല്ലൂർക്കാട്: ആവശ്യക്കാർക്ക് വീടുകളിൽ പുസ്തകം എത്തിച്ചു നൽകുന്ന വായനാ വസന്തം പദ്ധതിയിലൂടെ ശ്രദ്ധേയമാണ് കല്ലൂർക്കാട് കോസ്മോ പൊളിറ്റൻ ലൈബ്രറി ആൻഡ് റീഡിംഗ് ക്ലബ്. 1947 ൽ രൂപീകൃതമായ ലൈബ്രറിയിൽ അംഗീകൃതമായി 600ഓളം അംഗങ്ങളുണ്ട്. 30000 ത്തിലേറെ പുസ്തകങ്ങൾ. 400ഓളം സജീവ സന്ദർശകർ. മുഴുവൻ സമയവും പത്രങ്ങൾ വായിക്കാം. ലൈബ്രറി ഉച്ചകഴിഞ്ഞ് മൂന്നു മുതൽ രാത്രി എട്ടുവരെ. ബാലവേദി, യുവജനവേദി, വനിതാ വേദി, വയോജനവേദി പ്രവർത്തനങ്ങളും സജീവമാണെന്നു ലൈബ്രേറിയൻ എം.എ. തോമസ് പറഞ്ഞു. സിഎസ്എ ലൈബ്രറി അങ്കമാലി: മുൻ നിയമസഭാ സ്പീക്കർ എ.പി. കുര്യന്‍റെ പ്രചോദനത്തിൽ അങ്കമാലിയിലെ സിഎസ്എ ലൈബ്രറി 1995നാണ് തുടങ്ങിയത്. 15,000 ഓളം പുസ്തകങ്ങളുണ്ട്. ഇഎംഎസിന്‍റെ കുടുംബത്തിലുണ്ടായിരുന്ന പുസ്തകങ്ങൾ ഈ ലൈബ്രറിയിലേക്കാണ് സംഭാവന ചെയ്തത്. ഡോ. സി.കെ. ഈപ്പനാണ് ലൈബ്രറിയുടെ പ്രസിഡന്‍റ്. വള്ളത്തോൾ വായനശാല 67 വയസ് കിഴക്കമ്പലം : പുക്കാട്ടുപടിയിലെ വള്ളത്തോൾ സ്മാരക വായനശാലയ്ക്ക് 67 വയസായി. നാട്ടുകാരും സന്നദ്ധത സംഘടനകളും ചേർന്ന് സ്വരൂപിച്ച തുകയുപയോഗിച്ചാണ് തുടക്കം. 3070 അംഗങ്ങളും 18000 ത്തിൽ പരം പുസ്തകങ്ങളുമുണ്ട്. 2018-ലെ സംസ്ഥാനത്തെ ഏറ്റവും നല്ല ലൈബ്രറിയ്ക്കുള്ള അവാർഡ് ലഭിച്ചു. വയോജന വേദി, വനിതാവേദി, യുവജനവേദി, ബാലവേദി എന്നിവയും സജീവം. രാവിലെ 6.45 മുതൽ രാത്രി 8.30 വരെ പ്രവർത്തനമുണ്ട്. 25 വർഷമായി രത്നമ്മ ഗോപാലനാണു ലൈബ്രേറിയൻ.

കൊച്ചി വായിക്കുകയാണ്... 1.80 ലക്ഷം പുസ്തകങ്ങളുമായി എറണാകുളം പബ്ലിക് ലൈബ്രറി

സിജോ പൈനാടത്ത് കൊച്ചി: കൊച്ചിക്കാർക്കു വായിക്കാനെവിടെ നേരം? ഈ ചോദ്യമുന്നയിക്കുന്നവർ കൊച്ചി നഗരമധ്യത്തിലെ 155 വർഷം പഴക്കമുള്ളൊരു ഗ്രന്ഥശാലയിലേക്കൊന്നു വരണം; കണ്ണു തുറന്നു കാണണം... അവിടെ എല്ലാ ദിനവും വന്നു വായിക്കുന്ന നൂറുകണക്കിന് അക്ഷരപ്രേമികൾക്കൊപ്പമിരുന്ന് തെല്ലു നേരം വായിക്കണം. ഇതു വായന പൂക്കുന്നിടം.... എറണാകുളം പബ്ലിക് ലൈബ്രറി. വാണിജ്യനഗരവാസികൾക്കു വായനയുടെ വസന്തകാലം സമ്മാനിക്കുന്ന പബ്ലിക് ലൈബ്രറിയിലെ ഇരിപ്പിടങ്ങളിൽ ആളൊഴിയാറില്ല. അക്ഷരങ്ങളോടുള്ള പ്രണയം മനസിൽ സൂക്ഷിക്കുന്നവരെത്രയോ പേരാണ്, ഒന്നിനും നേരമില്ലെന്നു പരിഭവിക്കുന്ന പുതിയ കാലത്തും ഇവിടെ വായനാനുഭവം തേടിയെത്തുന്നത്. മധ്യകേരളത്തിലെ ഏറ്റവും വലിയ ഗ്രന്ഥശാലയാണ് എറണാകുളം കോൺവന്‍റ് റോഡിലെ പബ്ലിക് ലൈബ്രറി. 1.80 ലക്ഷം പുസ്തകങ്ങൾ, 7500 അംഗങ്ങൾ. റീഡിംഗ്, റഫറൻസ്, ലെൻഡിംഗ് എന്നീ മൂന്നു വിഭാഗങ്ങളിലായി ചിട്ടയായ പ്രവർത്തനം. എ ക്ലാസ് അംഗത്വമുള്ളവർ 138 പേരാണ്. ബി ക്ലാസിൽ 1260 ഉം, സി ക്ലാസിൽ 3080 ഉം അംഗങ്ങൾ. 2688 പേർക്കു ലൈഫ് മെന്പർഷിപ്പുണ്ട്. പ്രഫ. എം.കെ. സാനുവും ഡോ. എം. ലീലാവതിയും പബ്ലിക് ലൈബ്രറിയിൽ ഓണററി അംഗത്വമുള്ളവരാണ്. ദിവസവുമെത്തുന്നത് 350 മുതൽ 500 വരെ വായനക്കാർ. ആഴ്ചയിലൊരിക്കലോ നിശ്ചിത ഇടവേളകളിലോ സന്ദർശകരായെത്തുന്നവർ വേറെയും. മലയാളത്തിലെ ഒട്ടുമിക്ക പുസ്തകങ്ങളും ഇവിടെയുണ്ട്. ഇംഗ്ലീഷ്, ഹിന്ദി, സംസ്കൃതം, കൊങ്കണി ഭാഷകളിലുള്ള പുസ്തകങ്ങളുണ്ട്. ഡിജിറ്റൽ ബുക്കുകളും എളുപ്പത്തിൽ ലഭിക്കും. 1870ൽ മഹാരാജാസ് കോളജിലെ പ്രിൻസിപ്പലായിരുന്ന എ.എഫ്. സീലിയുടെ മേൽനോട്ടത്തിലായിരുന്നു എറണാകുളം പബ്ലിക് ലൈബ്രറിയുടെ തുടക്കം. ജനങ്ങളിൽ നിന്നു സമാഹരിച്ച 2200 രൂപ ഉപയോഗിച്ചു. ഇംഗ്ലണ്ടില്‍ നിന്നു കൊണ്ടുവന്ന പുസ്തകങ്ങളായിരുന്നു ആദ്യം പബ്ലിക് ലൈബ്രറിയുടെ അലമാരയിലെത്തിയത്. പിന്നീടങ്ങോട്ടു പുതിയ കെട്ടിടങ്ങൾ, കൂടുതൽ പുസ്തകങ്ങൾ, സൗകര്യങ്ങൾ എല്ലാമായി എറണാകുളത്തിന്‍റെ വായനാധാരകളിൽ തലയെടുപ്പുള്ള ഇടമായി പബ്ലിക് ലൈബ്രറി വളർന്നു. ഇഷ്ടം നോവൽ സമൂഹത്തിന്‍റെ സമസ്ത മേഖലകളിലും നിന്നുള്ള വായനക്കാർ‌ പബ്ലിക് ലൈബ്രറിയിലെത്തുന്നുണ്ടെന്നു അഞ്ചു വർഷമായി ലൈബ്രേറിയനായ പ്രിയ കെ. പീറ്റർ പറഞ്ഞു. 40 മുതൽ 50 വരെ പ്രായക്കാരാണ് ഏറെയും. നോവൽ, ജീവചരിത്രം, ചരിത്രം എന്നീ വിഭാഗങ്ങളിലെ പുസ്തകങ്ങൾക്കാണ് ആവശ്യക്കാരേറെയും. നോവലുകളിൽ‌ എംടിയുടെ പുസ്തകങ്ങളാണ് അധികമായും വായനക്കാർ കൊണ്ടുപോകുന്നത്. ഒറ്റയിരിപ്പിൽ അദ്ദേഹത്തിന്‍റെ നോവൽ വായിച്ചു തീർക്കുന്നവരുണ്ട്. ചെറുപ്പക്കാർ റഫറൻസ് ഗ്രന്ഥങ്ങളും മത്സരപരീക്ഷകൾക്കു ഗുണകരമാകുന്ന പുസ്തകങ്ങളും തേടിയെത്താറുണ്ട്. പ്രിയ പറഞ്ഞു.

പ്ലസ് വണ്‍ പ്രവേശനോത്സവം

കല്ലൂർക്കാട്: സെന്‍റ് അഗസ്റ്റിൻസ് ഹയർ സെക്കൻഡറി സ്കൂളിലെ പ്ലസ് വണ്‍ വിദ്യാർഥികളുടെ പ്രവേശനോത്സവം ‘വരവേൽപ്പ് 2025’ സെന്‍റ് അഗസ്റ്റിൻസ് പാരിഷ് ഹാളിൽ നടന്നു. 2025 മാർച്ചിലെ പ്ലസ്ടു പരീക്ഷയിൽ ഉന്നത വിജയം നേടിയ വിദ്യാർഥികളെ ചടങ്ങിൽ ആദരിക്കുകയും ചെയ്തു. പഞ്ചായത്ത് പ്രസിഡന്‍റ് സുജിത്ത് ബേബി ഉദ്ഘാടനം ചെയ്തു. സ്കൂൾ മാനേജർ റവ.ഡോ. സ്റ്റനിസ്ലാവൂസ് കുന്നേൽ അധ്യക്ഷത വഹിച്ചു. കല്ലൂർക്കാട് പോലീസ് ഇൻസ്പെക്ടർ കെ. ഉണ്ണികൃഷ്ണൻ, എ.കെ. ജിബി, പി.ടി ജയൻ, ഫാ. പോൾസണ്‍ മാറാട്ടിൽ, ദീപ്തി ഷണ്മുഖൻ, ഷൈനി ജോസഫ്, സെബാസ്റ്റ്യൻ മാത്യു എന്നിവർ പ്രസംഗിച്ചു. മൂവാറ്റുപുഴ: വീട്ടൂർ എബനേസർ ഹയർ സെക്കൻഡറി സ്കൂളിൽ പ്ലസ് വണ്‍ വിദ്യാർഥികളുടെ പ്രവേശനോത്സവം ഡിവൈഎസ്പി സജി മാർക്കോസ് (എസ്എസ്ബി, എറണാകുളം റൂറൽ) ഉദ്ഘാടനം ചെയ്തു. പഞ്ചായത്തംഗം പി.കെ. എൽദോ അധ്യക്ഷത വഹിച്ചു. ഫാ. ജോർജ് മാന്തോട്ടം കോറെപ്പിസ്കോപ്പ അനുഗ്രഹപ്രഭാഷണം നടത്തി. സ്കൂൾ മാനേജർ കമാണ്ടർ സി.കെ. ഷാജി, എസ്. മോഹൻദാസ്, രേവതി കണ്ണൻ, ജീമോൾ കെ. ജോർജ്, ബിജുകുമാർ, എൽബി ഏലിയാസ് എന്നിവർ പ്രസംഗിച്ചു. കോതമംഗലം: സെന്‍റ് അഗസ്റ്റിൻസ് ഗേൾസ് ഹയർ സെക്കൻഡറി സ്കൂളിൽ പ്ലസ് വണ്‍ വിദ്യാർഥികളുടെ പ്രവേശനോത്സവം ‘വരവേൽപ്പ്-2025’ ആന്‍റണി ജോണ്‍ എംഎൽഎ ഉദ്ഘാടനം ചെയ്തു. നഗരസഭാംഗം കെ.വി. തോമസ്, ജോസ് വർഗീസ്, മദർ സിസ്റ്റർ മരിയാൻസി, സിസ്റ്റർ ലിസ് മരിയ, സിസ്റ്റർ റിനി മരിയ, സോണി മാത്യു എന്നിവർ പങ്കെടുത്തു.

മൂവാറ്റുപുഴ-കാവുംപടി റോഡിലെ കുഴി അപകട ഭീഷണിയാകുന്നു

മൂവാറ്റുപുഴ: ദിനംപ്രതി നൂറുകണത്തിന് വാഹനങ്ങൾ സഞ്ചരിക്കുന്ന മൂവാറ്റുപുഴ-കാവുംപടി റോഡിൽ രൂപപ്പെട്ടിരിക്കുന്ന കുഴി യാത്രക്കാർക്ക് അപകട ഭീഷണിയാകുന്നു. മൂവാറ്റുപുഴ പോലീസ് സ്റ്റേഷന് സമീപമാണ് റോഡിന് നടുവിലായി യാത്രക്കാരുടെ നടുവൊടിക്കും വിധമുള്ള വലിയ കുഴി രൂപപ്പെട്ടിരിക്കുന്നത്. മഴ പെയ്ത് റോഡിലും കുഴിയിലും വെള്ളം നിറയുന്നതോടെ വാഹനങ്ങൾ അപകടത്തിൽപ്പെടാൻ സാധ്യത ഏറെയാണ്. വെള്ളം നിറഞ്ഞു നിൽക്കുന്പോൾ കുഴിയുടെ വ്യാപ്തി അറിയാതെ എത്തുന്ന വാഹനങ്ങൾ കുഴിയിൽ ചാടുന്നത് പതിവായിരിക്കുകയാണ്. സ്ത്രീകൾ അടക്കമുള്ള ഇരുചക്ര വാഹന യാത്രക്കാരാണ് കൂടുതലായും ദുരിതത്തിൽപ്പെടുന്നത്. നഗര വികസന പ്രവർത്തനങ്ങളുടെ ഭാഗമായി വണ്‍വേ സന്പ്രദായം കർശനമാക്കിയതോടെ ചെറുതും വലുതുമായ നിരവധി വാഹനങ്ങളാണ് റോഡിലൂടെ സഞ്ചരിക്കുന്നത്. നഗരത്തിൽ ഗതാഗത നിയന്ത്രണം പ്രാബല്യത്തിൽ ഇരിക്കെ തൊടുപുഴ-ആരക്കുഴ തുടങ്ങിയ പ്രദേശങ്ങളിലേക്ക് പോകേണ്ട യാത്രക്കാർ ആശ്രയിക്കുന്ന കാവുംപടി റോഡിന്‍റെ നടുവിലായി രൂപപ്പെട്ടിരിക്കുന്ന വലിയ കുഴി യാത്രക്കാർക്ക് ദുരിതമായി മാറിയിരിക്കുകയാണ്. എത്രയും പെട്ടെന്ന് കുഴി നികത്തി അപകട ഭീഷണി ഒഴിവാക്കണമെന്നാണ് യാത്രക്കാരുടെ ആവശ്യം.

എബിഇടി പ്രോഗ്രാം ഇവാലുവേറ്ററായി നിയമിച്ചു

വാഴക്കുളം: വിശ്വജ്യോതി കോളജ് ഓഫ് എൻജിനീയറിംഗ് ആന്‍ഡ് ടെക്നോളജിയിലെ സിവിൽ എൻജിനീയറിംഗ് വിഭാഗം പ്രഫ. സി.കെ. അനൂപ്, മേരിലാൻഡ്, (യുഎസ്എ) ബാൾട്ടിമോറിലെ എബിഇടി (എബിഇടി-അക്രഡിറ്റേഷൻ ബോർഡ് ഓഫ് എൻജിനീയറിംഗ് ആന്‍ഡ് ടെക്നോളജി) ആസ്ഥാനത്ത് പ്രോഗ്രാം ഇവാലുവേറ്റർ കാൻഡിഡേറ്റ് പരിശീലനം പൂർത്തിയാക്കിയതിനെ തുടർന്ന് എബിഇടി പ്രോഗ്രാം ഇവാലുവേറ്ററായി നിയമിച്ചു. അപ്ലൈഡ് സയൻസ്, കന്പ്യൂട്ടിംഗ്, എൻജിനീയറിംഗ് സാങ്കേതികവിദ്യ എന്നിവയിലെ കോളജ്, യൂണിവേഴ്സിറ്റി പ്രോഗ്രാമുകൾക്ക് ആഗോളതലത്തിൽ അംഗീകാരം നൽകുന്ന അംഗീകരിക്കപ്പെട്ട സ്ഥാപനമാണ് എബിഇടി. വിദ്യാഭ്യാസ സ്ഥാപനങ്ങൾ നിർദിഷ്ട ഗുണനിലവാര മാനദണ്ഡങ്ങൾ പാലിക്കുന്നുണ്ടെന്ന് ഉറപ്പാക്കുന്നതിനുവേണ്ടിയാണ് എബിഇടി അക്രഡിറ്റേഷൻ നൽകുന്നത്.

കോതമംഗലം ഗ്രേറ്റര്‍ ലയണ്‍സ് ക്ലബ് നാലു വീടുകള്‍ക്ക് തറക്കല്ലിട്ടു

കൊച്ചി: ലയണ്‍സ് ഇന്‍റര്‍നാഷനല്‍ ഡിസ്ട്രിക്ട് 318 സി ചിറ്റിലപ്പിള്ളി ഫൗണ്ടേഷനുമായി സഹകരിച്ചു കൊണ്ട് ഈ വര്‍ഷം നടപ്പിലാക്കുന്ന ‘സ്വപ്ന ഭവനം' പദ്ധതിയുടെ ഭാഗമായി കോതമംഗലം ഗ്രേറ്റര്‍ ലയണ്‍സ് ക്ലബ് സ്‌പോണ്‍സര്‍ ചെയ്ത നാലു വീടുകള്‍ക്ക് വാടാട്ടുപാറ അരിക്കല്‍ സിറ്റിയില്‍ തറക്കല്ലിട്ടു. ഡിസ്ട്രിക് 318 സിയുടെ സെക്കൻഡ് വിഡിജി ലയണ്‍ കെ.പി. പീറ്റര്‍ കല്ലിടല്‍ കര്‍മം നിര്‍വഹിച്ചത്. ഗ്രേറ്റര്‍ ലയണ്‍സ് ക്ലബ് പ്രസിഡന്‍റ് ഡിജില്‍ സെബാസ്റ്റ്യന്‍ അധ്യക്ഷത വഹിച്ചു. സെന്‍റ് മേരിസ് പള്ളി വികാരി ഫാ. ജിനോ ഇഞ്ചപ്ലാക്കല്‍, ബ്ലോക്ക് പഞ്ചായത്തംഗം ജെയിംസ് കോറമ്പല്‍, കെ.എം. കോരച്ചന്‍, സി.എ. ടോണി ചാക്കോ, കെ.സി. മാത്യൂസ്, ബെറ്റി കൊരച്ചന്‍ എന്നിവര്‍ പ്രസംഗിച്ചു. എംഎസ്‌ജെ കോണ്‍വന്‍റ് ആണ് വീടുകള്‍ പണിയാന്‍ ഭൂമി വിട്ടുനല്‍കിയത്. എംഎസ്‌ജെ കോണ്‍വന്‍റിലെ സിസ്റ്റര്‍ ആന്‍റോ, സിസ്റ്റര്‍ ലീനസ്, ലയണ്‍സ് ക്ലബിലെ ജോര്‍ജ് മങ്ങാട്ട്, ബേബിച്ചന്‍ നിധിറിക്കല്‍, ജിജി പുളിക്കന്‍, പി.ടി. വര്‍ഗീസ് എന്നിവര്‍ ചടങ്ങില്‍ സന്നിഹിതരായിരുന്നു.

മിനിമാരത്തൺ സംഘടിപ്പിച്ചു

കോലഞ്ചേരി: യൂത്ത് കോൺഗ്രസ് കുന്നത്തുനാട് നിയോജകമണ്ഡലം കമ്മിറ്റിയുടെ 100 ദിന ലഹരിവിരുദ്ധ കാന്പയിന്‍റെ ഭാഗമായി യൂത്ത് കോൺഗ്രസ് കുന്നത്തുനാട് നിയോജകമണ്ഡലം കമ്മിറ്റിയുടെയും യൂത്ത് കോൺഗ്രസ് പുത്തൻകുരിശ് മണ്ഡലം കമ്മിറ്റിയുടെയും ആഭിമുഖ്യത്തിൽ എട്ട് കിലോമീറ്റർ മാരത്തൺ സംഘടിപ്പിച്ചു. സിന്തൈറ്റ് ഇൻഡസ്ട്രീസ് മാനേജിംഗ് ഡയറക്ടർ അജു ജേക്കബ് മാരത്തൺ ഫ്ലാഗ് ഓഫ് ചെയ്തു. നിയോജകമണ്ഡലം പ്രസിഡന്‍റ് ജെയ്സൽ ജബ്ബാർ അധ്യക്ഷനായി. എംഐടിഎസ് ഫിസിക്കൽ ട്രെയിനിംഗ് ഹെഡ് എൽരാജ് മംഗലത്ത് ലഹരിവിരുദ്ധ സന്ദേശം നൽകി. കാണിനാട് മിനി സ്റ്റേഡിയത്തിൽനിന്ന് ആരംഭിച്ച് വടവുകോട്, പുത്തൻകുരിശ്, പീച്ചിങ്ങച്ചിറ വഴി കാണിനാട്ടിൽ മാരത്തൺ സമാപിച്ചു. സമാപന യോഗത്തിൽ ഏഷ്യൻ പഞ്ചഗുസ്തി മീറ്റിൽ വെങ്കല മെഡൽ കരസ്ഥമാക്കിയ ഇന്ത്യൻ പഞ്ചഗുസ്തി താരം അരുൺ പി. ജോണിനെയും ഡ്വാർഫ് മാരത്തൺ റണ്ണർ സി.ആർ. ധനീഷിനെയും അജു ജേക്കബ് മെമന്‍റോ നൽകി ആദരിച്ചു.

റോഡിലെ കുഴിയിൽ വാഴനട്ട് വ്യാപാരിയുടെ പ്രതിഷേധം

മൂവാറ്റുപുഴ: റോഡ് തകർന്ന് യാത്രക്കാർ ദുരിതത്തിലായിട്ടും പിഡബ്ല്യുഡി അധികൃതർ തിരിഞ്ഞുനോക്കാത്തതിനെ തുടർന്ന് റോഡിലെ കുഴിയിൽ വാഴനട്ട് വ്യാപാരിയുടെ പ്രതിഷേധം. 2023ൽ ബിഎംബിസി നിലവാരത്തിൽ നിർമാണം പൂർത്തീകരിച്ച കീച്ചേരിപ്പടി - ഇഇസി മാർക്കറ്റ് റോഡിലാണ് യാത്രക്കാരെ അപകടത്തിലാക്കി നിരവധി കുഴികൾ രൂപപ്പെട്ടിരിക്കുന്നത്. എന്നാൽ ഉത്തരവാദിത്വപ്പെട്ട പിഡബ്ല്യുഡി അധികൃതർ തിരിഞ്ഞു നോക്കാത്തതിനെതുടർന്നാണ് പ്രദേശത്ത് വ്യാപാര സ്ഥാപനം നടത്തുന്ന ശെൽവൻ റോഡിലെ കുഴിയിൽ വാഴനട്ട് പ്രതിഷേധിച്ചത്. നഗരവികസനത്തിന്‍റെ ഭാഗമായി നഗരത്തിൽ ഗതാഗത നിയന്ത്രണം ഏർപ്പെടുത്തിയതോടെ കോതമംഗലം ഭാഗത്തേക്ക് പോകേണ്ട വാഹനങ്ങൾ ഇഇസി മാർക്കറ്റ് റോഡിലൂടെയാണ് സഞ്ചരിക്കുന്നത്. എന്നാൽ ചെറുതും വലുതുമായ നിരവധി കുഴികൾ രൂപപ്പെട്ടതോടെ യാത്രക്കാർ വലിയ ദുരിതത്തിലാണ്. കുഴിയിൽ വീണ് ഇരുചക്ര വാഹന യാത്രക്കാർ അപകടത്തിൽപ്പെടുന്നത് ഇവിടെ പതിവായിരിക്കുകയാണ്. ബുധനാഴ്ച രാവിലെ മൂന്നോളം ഇരുചക്ര വാഹന യാത്രക്കാർ കുഴിയിൽ വീണ് അപകടത്തിൽപ്പെടുകയും പരിക്കേൽക്കുകയും ചെയ്തതിനെതുടർന്നാണ് വാഴനട്ട് പ്രതിഷേധിച്ചതെന്ന് വ്യാപാരി ശെൽവൻ പറഞ്ഞു. എത്രയും പെട്ടെന്ന് റോഡിലെ കുഴികൾ അടച്ച് അപകട ഭീഷണി ഒഴിവാക്കണമെന്നാണ് ആവശ്യം ഉയർന്നിരിക്കുന്നത്.

മഴയിൽ തോടിന്‍റെ സംരക്ഷണ ഭിത്തി ഇടിഞ്ഞു

മൂവാറ്റുപുഴ: ശക്തമായ മഴയിൽ തോടിന്‍റെ സംരക്ഷണ ഭിത്തി തകർന്നു. മൂവാറ്റുപുഴ നഗരസഭയിലെ ഒന്നും മൂന്നും വാർഡുകളിലൂടെ കടന്നുപോകുന്ന മണിയം തോടിന്‍റെ സംരക്ഷണ ഭിത്തിയാണ് ചൊവ്വാഴ്ച പെയ്ത മഴയിൽ തകർന്നത്. വാഴപ്പിള്ളി മേഖലയിൽനിന്ന് ഒഴുകിയെത്തുന്ന മണിയം തോടിന്‍റെ സംരക്ഷണ ഭിത്തി ഇടിഞ്ഞതോടെ മൂന്നുകണ്ടം ഉന്നതി നിവാസികൾ ആശ്രയിക്കുന്ന റോഡ് അപകടാവസ്ഥയിലായിരിക്കുകയാണ്. പ്രദേശത്തെ 26ഓളം കുടുംബങ്ങൾ ആശ്രയിക്കുന്ന റോഡാണ് അപകാവസ്ഥായിലായിരിക്കുന്നത്. തോടിന്‍റെ മൂന്നാം വാർഡിൽ ഉൾപ്പെടുന്ന സംരക്ഷണ ഭിത്തി തകർന്ന് അവശിഷ്ടങ്ങൾ തോട്ടിൽ കിടക്കുന്നതിനാൽ തോട് കവിഞ്ഞ് ഒന്നാം വാർഡിൽ ഉൾപ്പെടുന്ന മൂന്നുകണ്ടം ഉന്നതിയിലേക്കാണ് വെള്ളം ഒഴുകിയെത്തുന്നത്. ഉന്നതി നിവാസികൾ ആശ്രയിക്കുന്ന റോഡിലേക്കും വീടിന്‍റെ സമീപ പ്രദേശങ്ങളിലേക്കും വെള്ളം ഒഴുകിയെത്തിയതോടെ ജീവിതം ദുസഹമായിരിക്കുകയാണെന്ന് പ്രദേശവാസികൾ പറഞ്ഞു. പ്രദേശത്തെ വെള്ളക്കെട്ടിന് പരിഹാരമെന്നോണം നേരത്തെ നഗരസഭയിൽനിന്ന് ഏഴ് ലക്ഷം അനുവദിച്ച് സംരക്ഷണ ഭിത്തി നിർമിച്ച് നൽകിയിരുന്നു. ഇവിടെനിന്നും കുറച്ച് മാറിയുള്ള പ്രദേശത്തെ സംരക്ഷണ ഭിത്തിയാണ് കഴിഞ്ഞ ദിവസം ഇടിഞ്ഞത്. നഗരസഭാംഗം മീര കൃഷ്ണൻ, അസം ബീഗം, നഗരസഭ സ്ഥിരംസമിതി അധ്യക്ഷൻ അജി മുണ്ടാട്ട് എന്നിവർ സ്ഥലം സന്ദർശിച്ചിരുന്നു. മൈനർ ഇറിഗേഷൻ വകുപ്പിന് പരാതി നൽകിയിട്ടുണ്ടെന്നും ഉടൻ പരിഹാരം കാണുമെന്നും നഗരസഭാധികൃതർ പറഞ്ഞു.

സിടി സ്കാൻ സെന്‍റർ ഉദ്ഘാടനം ചെയ്തു

ഫോർട്ടുകൊച്ചി: പെരുമ്പടപ്പ് ഫാത്തിമ ആശുപത്രിയിൽ 24 മണിക്കൂർ പ്രവർത്തന സജ്ജമായ നൂതന സിടി സ്കാൻ സെന്‍റർ ഉദ്ഘാടനം ചെയ്തു. ബിഷപ് ഡോ. ജോസഫ് കരിയിൽ സെന്‍റർ ആശീർവദിച്ചു. കെ.ജെ. മാക്സി എംഎൽഎ അധ്യക്ഷത വഹിച്ച യോഗത്തിൽ ഡോ. അജയകുമാർ, ഡോ. ശ്രീഗണേഷ് കെ. പ്രഭു, ഡോ. കുമരേശൻ, ഡയറക്ടർ ഫാ. സിജു ജോസഫ് പാലിയത്തറ, ഫാ. ആന്‍റണി തൈവീട്ടിൽ, ഫാ. സജു ആന്‍റണി പുന്നകാട്ടുശേരി, കെ.എസ്. സാബു, സേവ്യർ പൊള്ളയിൽ എന്നിവർ സംസാരിച്ചു.

ആലങ്ങാട് സെന്‍റ് മേരീസ് പള്ളിയിൽ ഫാദേഴ്സ് ഡേ ആഘോഷിച്ചു

ആലങ്ങാട് : ആലങ്ങാട് സെന്‍റ് മേരീസ് പള്ളിയിൽ ഫാദേഴ്സ് ഡേ ആഘോഷിച്ചു. സെൻട്രൽ കമ്മിറ്റിയുടെ ആഭിമുഖ്യത്തിൽ നടന്ന ആഘോഷങ്ങൾക്ക് ഫാ. ഡിന്‍റോ മാണിക്കാത്താന്‍റെ നേതൃത്വത്തിളുള്ള ദിവ്യബലിയോടെ തുടക്കമായി. പ്രശസ്ത മോട്ടിവേറ്റർ ദമനൻ പായിപ്രയുടെ നേതൃത്വത്തിൽ മോട്ടിവേഷൻ ക്ലാസ് നടത്തി. പൊതുസമ്മേളനം പള്ളി വികാരി ഫാ. പോൾ ചുള്ളി ഉദ്ഘാടനം നടത്തി. വൈസ് ചെയർമാൻ ജോസ് ഗോപുരത്തിങ്കൽ അധ്യക്ഷത വഹിച്ചു. സിനിമാതാരം സുധീർ പറവൂർ മുഖ്യപ്രഭാഷണം നടത്തി. പ്രോഗ്രാം കൺവീനർ ജോർജ് പൊള്ളയിൽ, പിന്നണി ഗായകൻ ജ്യോതിഷ് ബാബു, സിഎംസി കോൺവെന്‍റ് മദർ സിസ്റ്റർ പ്രീത,കൈക്കാരൻമാരായ വർഗീസ് പൊള്ളയിൽ, അഗസ്റ്റിൻ കണ്ണമ്പുഴ,കമ്മിറ്റിഅംഗങ്ങളായ ലിസി രാജു, സോജോ കളപ്പറമ്പത്ത്, ജോജോ തോമസ്, മഞ്ജു ബിജു,സി.എ. ജോയ്, ചാൾസ് വലിയവീട്ടിൽ എന്നിവർ പ്രസംഗിച്ചു. തുടർന്ന് ഇടവകയിലെ മുതിർന്ന പൗരന്മാരെയും വിവിധ മേഖലകളിൽ കഴിവ് തെളിയിച്ചവരെയും ആദരിച്ചു.

വൈപ്പിനില്‍ ഒരു കളിസ്ഥലം കൂടി വരുന്നൂ

കൊച്ചി: വൈപ്പിന്‍ മണ്ഡലത്തിലെ കായിക പരിശീലനങ്ങള്‍ക്കു കരുത്തായി ഒരു കളിസ്ഥലം കൂടി ഒരുങ്ങുന്നു. കായികമേളകള്‍ നടത്താന്‍ ഉതകുന്ന രീതിയില്‍ എളങ്കുന്നപ്പുഴ ഗവ. ഹൈസ്‌കൂളിലെ മൈതാനം ആധുനിക രീതിയില്‍ നവീകരിക്കാനൊരുങ്ങുകയാണ് സംസ്ഥാന സര്‍ക്കാര്‍. ഇതിനായി ബജറ്റില്‍ 75 ലക്ഷം രൂപയാണ് അനുവദിച്ചിട്ടുള്ളത്. ഹാര്‍ബര്‍ എന്‍ജിനീയറിംഗ് വകുപ്പിനാണ് പദ്ധതിയുടെ നിര്‍വഹണ ചുമതല. മണ്ഡലത്തിലെ സ്‌കൂളുകളില്‍ കായിക പരിശീലനത്തിനുള്ള സൗകര്യങ്ങള്‍ ഉണ്ടായിരുന്നില്ല. മറ്റ് ഗ്രൗണ്ടുകള്‍ വാടകക്കെടുത്തായിരുന്നു ഉപജില്ലാ കായികമേള ഉള്‍പ്പെടെയുള്ളവ സംഘടിപ്പിച്ചിരുന്നത്. ഗ്രൗണ്ട് യാഥാർഥ്യമാകുന്നതോടെ മണ്ഡലത്തിലെ വിദ്യാർഥികള്‍ക്കും കായിക താരങ്ങള്‍ക്കും മികച്ച പരിശീലനം ഉറപ്പുവരുത്താനാകുമെന്നാണ് അധികൃതരുടെ പ്രതീക്ഷ. നേരത്തെ എളങ്കുന്നപ്പുഴയിലെ മാലിപ്പുറം സ്വതന്ത്ര മൈതാനത്തിന്‍റെ നവീകരണത്തിനായി എംഎല്‍എയുടെ ആസ്തി വികസന ഫണ്ടില്‍ നിന്ന് 99.4 ലക്ഷം രൂപ അനുവദിച്ചിരുന്നു.

കടൽക്ഷോഭം: നായരമ്പലത്ത് അടിയന്തര നടപടി വേണമെന്ന് മുൻ മന്ത്രി എസ്. ശർമ

വൈപ്പിൻ :കടൽ ക്ഷോഭത്തിൽ തകർച്ച ഭീഷണി നേരിടുന്ന നായരമ്പലം പുത്തൻ കടപ്പുറത്തെ ശ്രീ ബലമുരുക സ്വാമി ക്ഷേത്രം, സെന്‍റ് ആന്‍റണീസ് പള്ളി , സമീപത്തെ വീടുകൾ എന്നിവിടങ്ങളിൽ മുൻ മന്ത്രി എസ്. ശർമ സന്ദർശിച്ചു. ദുരിത ബാധിതർക്ക് അടിയന്തിര സഹായങ്ങൾ എത്തിക്കണമെന്ന് അദ്ദേഹം ജില്ലാ ഭരണകൂടത്തോടും ഫിഷറീസ് വകുപ്പിനോടും ആവശ്യപ്പെട്ടു. താത്കാലിക സംവിധാനമായി ജിയോ ബാഗ് സ്ഥാപിക്കുവാനും ശാശ്വത പരിഹരമായി ടെട്രോ പോഡ് ഉപയോഗിച്ച് കടൽ ഭിത്തി നിർമിക്കണമെന്നും അദ്ദേഹം ആവശ്യപ്പെട്ടു. എ.കെ. ഉല്ലാസ്, നരേന്ദ്രൻ, കെ.എ. അനീഷ് കുമാർ തുടങ്ങിയവരും ഒപ്പം ഉണ്ടായിരുന്നു. ഇന്ന് വൈകിട്ട് ഏഴിന് ജില്ലാ കളക്ടറുടെ ക്യാമ്പ് ഓഫീസിൽ നായരമ്പലത്തെ കടൽ ക്ഷോഭവുമായി ബന്ധപ്പെട്ട പ്രശ്നങ്ങൾ ചർച്ചചെയ്യുവാൻ പഞ്ചായത്ത്‌ പ്രസിഡന്‍റും വാർഡ് മെമ്പറും ഉൾപ്പടെ യുള്ളവരെ വിളിച്ചിട്ടുണ്ട്.

അത്യാധുനിക ശൗചാലയ പദ്ധതിയുമായി കോർപറേഷൻ

കൊച്ചി: വിദേശരാജ്യങ്ങളിലേതുപോലെ അത്യാധുനിക സൗകര്യങ്ങളുള്ള ശൗചാലയ പദ്ധതിയുമായി കൊച്ചി കോര്‍പറേഷന്‍. അര്‍ബന്‍ സൊല്യൂഷന്‍സ് കമ്പനി കൗണ്‍സില്‍ മുന്‍പാകെ സമര്‍പ്പിച്ച റെസ്‌റ്റോ കഫേ പദ്ധതിയോട് ഭരണ പ്രതിപക്ഷാംഗങ്ങള്‍ക്കിടയില്‍ ഭിന്നസ്വരങ്ങള്‍ ഉയര്‍ന്നെങ്കിലും മികവാര്‍ന്ന സൗകര്യങ്ങളോടെയുള്ള പൊതുശൗചാലയങ്ങള്‍ കൊച്ചിക്കും വേണമെന്ന നിലപാടാണ് ഭൂരപക്ഷം കൗണ്‍സിലര്‍മാരും ഉന്നയിച്ചത്. റെസ്റ്ററന്‍റും ഫുഡ്‌കോര്‍ട്ടും ഉള്‍പ്പടെയുള്ള 25 ആധുനിക ശൗചാലയങ്ങള്‍ ബിഒടി മാതൃകയില്‍ നിര്‍മിക്കുന്ന പദ്ധതിയാണ് അര്‍ബന്‍ സൊല്യൂഷന്‍സ് എന്ന സ്ഥാപനം കൗണ്‍സിലില്‍ അവതരിപ്പിച്ചത്. ഇതിനായി നഗരത്തിന്‍റെ കണ്ണായ സ്ഥലത്തുള്ള 75 സെന്‍റ് സ്ഥലം സൗജന്യമായി സ്ഥാപനത്തിന് കൈമാറണം. ഇവിടെ സ്ഥാപനം റെസ്‌റ്റോ കഫേ ആശയത്തില്‍ ടോയ്‌ലറ്റ് സമുച്ഛയം നിര്‍മിക്കും. താഴത്തെ നിലയിലാകും ശൗചാലം. ഭിന്നശേഷിക്കാര്‍ക്കും ഉപയോഗിക്കാന്‍ കഴിയുന്ന സൗകര്യങ്ങള്‍ ഇവിടെയുണ്ടാകും. മുകളിലെ നിലയില്‍ ശീതീകരിച്ച റസ്‌റ്റോറന്‍റും ആളുകള്‍ക്ക് ഇരിക്കാനുള്ള ഓപ്പണ്‍ സ്‌പേസും ഉണ്ടാകും. മൂന്ന് കാറ്റഗറിയില്‍ നിര്‍മിക്കുന്ന റെസ്റ്റോ കഫേയുടെ പ്രീമിയം വിഭാഗത്തിലുള്ള സമുച്ചയത്തില്‍ ശീതീകരിച്ച ശൗചാലത്തിന് പുറമേ മുകളിലെ നിലയില്‍ എസി റെസ്‌റ്റോറന്‍റ്, ഓപ്പണ്‍ എയര്‍ സ്‌പേസ്, താഴത്തെ നിലയില്‍ ഫുഡ്കിയോസ്‌ക് എന്നിവയുണ്ടാകും. ബി കാറ്റഗറിയില്‍ എസി റെസ്റ്ററന്‍റിന് വലുപ്പം കുറവായിരിക്കും. സി കാറ്റഗറിയില്‍ ഒറ്റ നില മാത്രമേ ഉണ്ടാകുകയുള്ളു. റെസ്റ്ററന്‍റും ഓപ്പണ്‍ സ്‌പേസും ഇല്ല. 20 കോടിയാണ് എസ്റ്റിമേറ്റ്. മാസം തോറും ഒരു കോടി ചെലവായും കണക്കാക്കുന്നു. ശൗചാലയം ഉപയോഗിക്കാന്‍ നഗരസഭ നിശ്ചയിച്ചിട്ടുള്ള നിരക്ക് ഈടാക്കും. 20 വര്‍ഷത്തിന് ശേഷം നഗരസഭയ്ക്ക് കൈമാറും വിധമാണ് കരാര്‍. പരസ്യം സ്ഥാപിക്കാന്‍ സ്ഥലം; എതിര്‍ത്ത് കൗണ്‍സിലര്‍മാര്‍ കൊച്ചി: റെസ്‌റ്റോ കഫെ നിര്‍മിക്കുന്നതിന് പകരമായി നഗരത്തില്‍ 3500 സ്‌ക്വയര്‍ മീറ്റര്‍ സ്ഥലം കമ്പനിക്ക് പരസ്യം സ്ഥാപിക്കാന്‍ നല്‍കണമെന്ന വ്യവസ്ഥയാണ് മേയര്‍ അടക്കം കൗണ്‍സിലര്‍മാര്‍ എതിര്‍ത്തത്. നഗരസഭയുടെ പരസ്യനയത്തിന് വിപരീതമാണിതെന്ന് യുഡിഎഫ് പാര്‍ലമെന്‍ററി പാര്‍ട്ടി നേതാവ് എം.ജി. അരിസ്റ്റോട്ടില്‍ ചൂണ്ടിക്കാട്ടി. വ്യക്തമായ ലാഭക്കണക്കില്ലാതെ ബിസിനസ് ഡീല്‍ മാത്രമാണ് കമ്പനി അവതരിപ്പിച്ച പ്രൊപ്പോസലിലുള്ളതെന്ന് ബിജെപി നേതാവ് പ്രിയാ പ്രശാന്തും വിമര്‍ശിച്ചു. നഗരത്തിലെ വിവിധ സ്ഥലങ്ങളില്‍ പരസ്യബോര്‍ഡുകള്‍, വാട്ടര്‍ കിയോസ്‌കുകള്‍, ഫീഡിംഗ് റൂമുകള്‍, ഓപ്പണ്‍ വര്‍ക്ക് സ്‌പേസുകള്‍, ട്രീ ഗാര്‍ഡുകള്‍ തുടങ്ങിയവ സ്ഥാപിച്ച് അതിലൂടെ പരസ്യം നല്‍കി വരുമാനം നേടുന്ന ആശയമാണ് കമ്പനി മുന്നോട്ട് വച്ചത്. പകരം നഗരസഭയ്ക്ക് ലഭിക്കുന്നത് പരസ്യനികുതി മാത്രം. എതിനെതിരെയാണ് ഭരണപക്ഷ കൗണ്‍സിലര്‍മാര്‍ പോലും വിമര്‍ശനം ഉന്നയിച്ചത്. പുറത്തുള്ള ഒരു കമ്പനിക്ക് കൊള്ളലാഭത്തിന് അവസരം ഒരുക്കുന്ന വ്യവസ്ഥയാണിതെന്ന് സിപിഎം അംഗം വി.എസ്. വിജു പറഞ്ഞു. സാധാരണക്കാനും പ്രയോജനം ലഭിക്കാന്‍ സൗജന്യമായി ശൗചാലയം ഉപയോഗിക്കാന്‍ ക്രമീകരണം ഒരുക്കുകയാണ് വേണ്ടതെന്ന് മറ്റൊരു സിപിഎം അംഗം ദിപിന്‍ ദിലീപ് പറഞ്ഞു. പരീക്ഷണാടിസ്ഥാനത്തില്‍ ആരംഭിക്കാം: മേയര്‍ കൊച്ചി: നഗരത്തില്‍ പുതിയ മാതൃകയില്‍ പൊതു ശൗചാലയങ്ങള്‍ വരേണ്ടത് ആവശ്യമെന്ന് മേയര്‍ എം. അനില്‍കുമാര്‍. അര്‍ബന്‍ സൊല്യൂഷന്‍സ് കമ്പനി കൗണ്‍സില്‍ മുന്‍പാകെ സമര്‍പ്പിച്ച റെസ്റ്റോ കഫേ പദ്ധതി പരീക്ഷണാടിസ്ഥാനത്തില്‍ നഗരത്തിലെ ചില പ്രദേശങ്ങളില്‍ ആരംഭിക്കും. പ്രവര്‍ത്തിപ്പിച്ച് വിജയിച്ചാല്‍ മാത്രം ബാക്കി ഇടങ്ങളില്‍ പൊതു ശൗചാലയവും റെസ്‌റ്റോ കഫെയും നിര്‍മിക്കാനുളള അനുമതി നല്‍കൂ. നഗരത്തില്‍ റെസ്‌റ്റോ കഫെ പദ്ധതി നടപ്പാക്കുന്നത് പരിശോധിക്കാന്‍ നഗരസഭാ സെക്രട്ടറിക്ക് ചുമതല നല്‍കി. ഇതിന് ശേഷമാകും പദ്ധതി നടപ്പാക്കുന്നതില്‍ കൗണ്‍സില്‍ തീരുമാനമെടുക്കുകയെന്നും മേയര്‍ പറഞ്ഞു.

പണ്ടാരച്ചിറ തോട് നവീകരണത്തിന് 100 കോടിയുടെ പദ്ധതി

കൊച്ചി: പശ്ചിമകൊച്ചിയിലെ പ്രധാന ജലാശയമായ പണ്ടാരച്ചിറ തോട് നവീകരണത്തിന് 100 കോടിയുടെ പദ്ധതി ആവിഷ്‌കരിച്ചതായി മേയര്‍ എം. അനില്‍കുമാര്‍ അറിയിച്ചു. സംസ്ഥാന സര്‍ക്കാരിന്‍റെ കനാല്‍ പുനരുജ്ജീവന ഉള്‍പ്പെട്ടിട്ടില്ലാത്തതിനാല്‍ അന്താരാഷ്ട്ര ഏജന്‍സികളുമായി സഹകരിച്ചാണ് പദ്ധതി നടപ്പാക്കുന്നത്. പദ്ധതിക്കാവശ്യമായ മുഴുവന്‍ തുകയും ഗ്രാന്‍റായി നല്‍കാമെന്ന് ഓഷ്യന്‍ റിസ്‌ക് ആന്‍ഡ് റിസിലന്‍സ് ആക്ഷന്‍ അലൈന്‍സ് എന്ന ഏജന്‍സി ഉറപ്പ് നല്‍കിയിട്ടുണ്ടെന്നും മേയര്‍ പറഞ്ഞു. വേലിയേറ്റ സമയങ്ങളില്‍ വെള്ളക്കെട്ടില്ലാതെ ജലമൊഴുക്ക് നിലനിര്‍ത്തുന്നതിന് പാലങ്ങളും കലുങ്കുകളും പുതുക്കി പണിയുക, ഖരമാലിന്യങ്ങളും കുളവാഴയും നിറയാതെ വെള്ളം സുഗമമായി ഒഴുകുന്നതിന് സ്ഥിരം സംവിധാനം ഏര്‍പ്പെടുത്തുക, ചെളി കോരുക, പാര്‍ശ്വഭിത്തികള്‍ ബലപ്പെടുത്തുക, സംരക്ഷണ ഭിത്തി നിര്‍മിക്കുകയും ബലപ്പെടുത്തുകയും ചെയ്യുക എന്നിവയാണ് പദ്ധതിയുടെ ഭാഗമായി പ്രധാനമായും ചെയ്യുന്നത്. ഇതോടൊപ്പം തോടിനോടു ചേര്‍ന്നുള്ള ഒഴിഞ്ഞ സ്ഥലങ്ങളില്‍ കളിസ്ഥലവും മലിനജല ശുദ്ധീകരണ പ്ലാന്‍റും പദ്ധതിയിലുണ്ട്. കൊച്ചിയുടെയും പള്ളുരുത്തിയുടെയും അതിര്‍ത്തി കൂടിയായ തോടിന്‍റെ 2.3 കിലോമീറ്റര്‍ വരുന്ന ഭാഗത്താണ് നവീകരണം. വിശദമായ ഡിപിആര്‍ തയാറാക്കുന്ന പ്രവര്‍ത്തനങ്ങള്‍ ആരംഭിച്ചിട്ടുണ്ട്. 50 ലക്ഷം രൂപയാണ് ഡിപിആര്‍ തയാറാക്കുന്നതിന് ചെലവഴിക്കുക. നാല് മാസത്തിനുള്ളില്‍ ഡിപിആര്‍ തയാറാക്കും. മേയറുടെ അധ്യക്ഷതയില്‍ ചേര്‍ന്ന യോഗത്തില്‍ ഐസിഎല്‍ഇഐ പ്രതിനിധി ഡോ. മോണാലിസ സെന്‍, ബെക്ടല്‍ പ്രതിനിധി താര എസ്. പിള്ള, മാറ്റര്‍ലാബ് പ്രതിനിധി ഡോ. ജയകുമാര്‍ തുടങ്ങിയവര്‍ പങ്കെടുത്തു.

മെട്രോപൊളിറ്റൻ ആസൂത്രണ സമിതി തെരഞ്ഞെടുപ്പിൽ കോൺഗ്രസിന് നേട്ടം

കാക്കനാട് : കൊച്ചി മെട്രോപൊളിറ്റൻ ആസൂത്രണ സമിതി (എംപിസി)യിലേക്ക് മുനിസിപ്പൽ കൗൺസിലർമാരുടെ പ്രതിനിധികളെ തെരഞ്ഞെടുക്കാൻ നടന്ന വോട്ടെടുപ്പിൽ കോൺഗ്രസ് സ്ഥാനാർഥികൾക്ക് ഏകപക്ഷീയ വിജയം. രണ്ട് അംഗങ്ങളെയാണ് തെരഞ്ഞെടുത്തത്. സിനി (അങ്കമാലി നഗരസഭാ ഉപാധ്യക്ഷ) റാഷിദ് ഉള്ളംപിള്ളി (തൃക്കാക്കര നഗരസഭ)യുമാണ് ഇന്നലെ നടന്ന തെരഞ്ഞെടുപ്പിൽ വിജയികളായത്. സിപിഎമ്മിലെ ഗ്രേസി ദേവസ്യയേയും (അങ്കമാലി നഗരസഭ) സിപിഐയിലെ സി.എം. ഷിനിനേയും (ഏലൂർ നഗരസഭ) ആണ് കോൺഗ്രസ് സ്ഥാനാർത്ഥികൾ പരാജയപ്പെടുത്തിയത്. കോൺഗ്രസ് സ്ഥാനാർഥികൾക്ക്141 വോട്ടുകളും ഇടതു സ്ഥാനാർഥികൾക്ക് 122 വോട്ടുകളും ലഭിച്ചു. രണ്ട് വോട്ടുകൾ അസാധുവായി. ആസൂത്രണ സമിതിയിലേക്കുള്ള ഗ്രാമപഞ്ചായത്തു പ്രതിനിധികളെ ചൊവ്വാഴ്ച തെരഞ്ഞെടുത്തിരുന്നു. കോർപറേഷൻ കൗൺസിലർമാരിൽ നിന്നുളള പ്രതിനിധികളെ ഇന്നുതെരഞ്ഞെടുക്കും. 74 കൗൺസിലർമാരിൽ നിന്നും നാലു പേരെയാണ് മെട്രോപൊളിറ്റൻ ആസൂത്രണ സമിതിയിലേക്ക് തെരഞ്ഞെടുക്കുന്നത്.

മഞ്ഞപ്ര സെന്‍റ് മേരീസ് യുപിഎസിൽ "ദീപിക നമ്മുടെ ഭാഷ' പദ്ധതി

മഞ്ഞപ്ര: മഞ്ഞപ്ര സെന്‍റ് മേരീസ് യുപി സ്കൂളിൽ "ദീപിക നമ്മുടെ ഭാഷ'പദ്ധതിയ്ക്കു തുടക്കം. മഞ്ഞപ്ര ഫൊറോന വികാരിയും സ്കൂൾ മാനേജരുമായ റവ.ഡോ. വർഗീസ് പൊട്ടയ്ക്കൽ ഉദ്ഘാടനം ചെയ്തു. പിടിഎ പ്രസിഡന്‍റ് ജിജോ ആന്‍റണി അധ്യക്ഷത വഹിച്ചു. പ്രധാനധ്യാപിക ജിജി പാപ്പച്ചൻ, ദീപിക കൊച്ചി ബ്യൂറോ ചീഫ് സിജോ പൈനാടത്ത്, സിസ്റ്റർ അഖില എന്നിവർ പ്രസംഗിച്ചു. ദീപിക കൊച്ചി സർക്കുലേഷൻ മാനേജർ ബിനോ വർഗീസ് വിദ്യാർഥികൾക്കു ലഹരിവിരുദ്ധ പ്രതിജ്ഞ ചൊല്ലിക്കൊടുത്തു.

പ്രയുക്തി തൊഴിൽ മേള 21ന്

കളമശേരി: കൊച്ചിന്‍ യുണിവേഴ്സിറ്റി എംപ്ലോയ്മെന്‍റ് ഇന്‍ഫര്‍മേഷൻ ആൻഡ് ഗൈഡന്‍സ് ബ്യൂറോ-മോ‍ഡൽ കരിയർ സെന്‍ററിന്‍റെ നേതൃത്വത്തിൽ 21ന് "പ്രയുക്തി തൊഴില്‍മേള" പൂത്തോട്ട സ്വാമി ശാശ്വതീകാനന്ദ കോളേജ് കാന്പസിൽ നടത്തും. താത്പര്യമുള്ള ഉദ്യോഗാർഥികൾ പേര്, വിദ്യാഭ്യാസയോഗ്യത എന്നിവ സഹിതം [email protected] എന്ന വിലാസത്തിലേക്ക് രജിസ്റ്റർ ചെയുക. തൊഴില്‍മേളയോടനുബന്ധിച്ച് കരിയർ സംബന്ധമായ സംശയനിവാരണത്തിന് ഒരു കരിയര്‍ ക്ലിനിക്കും കാന്പസില്‍ സംഘടിപ്പിക്കും. കൂടുതൽ വിവരങ്ങൾക്ക്, 0484-2576756 എന്ന നമ്പറിൽ ബന്ധപ്പെടുക.

"ഉദ്യോഗ്-25' മെഗാ ജോബ് ഫെയർ നാളെ

അങ്കമാലി : ഡി പോൾ ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്നോളജിയും ഫ്ലോറൻസ് എജുക്കേഷൻ കൺസൾട്ടൻസിയുടെയും ആഭിമുഖ്യത്തിൽ ടൗൺ എംപ്ലോയ്മെന്‍റ് എക്സ്ചേഞ്ചും നാഷണൽ കരിയർ സർവീസ് സഹകരിച്ച് സംഘടിപ്പിക്കുന്ന "ഉദ്യോഗ് 25" മെഗാ ജോബ് ഫെയർ നാളെ രാവിലെ ഒന്പതു മുതൽ വൈകീട്ട് അഞ്ചു വരെ ഡി പോൾ കാമ്പസിൽ നടക്കും. 50-ത്തിലധികം പ്രമുഖ കമ്പനികൾ പങ്കെടുക്കുന്നതിനായി രജിസ്റ്റർ ചെയ്തിട്ടുണ്ട്. ഉദ്യോഗാർഥികൾക്ക് വിവിധ മേഖലകളിൽ തൊഴിൽ അവസരങ്ങൾ കണ്ടെത്താനുള്ള മികച്ച വേദിയാകും ഈ ഫെയർ. രജിസ്ട്രേഷനായി www.depaul.edu.in സന്ദർശിക്കുക.

കടലാക്രമണം; കണ്ണമാലിയിൽ ദുരിതാശ്വാസ ക്യാന്പ് തുറന്നു

പളളുരുത്തി: രൂക്ഷമായ കടലാക്രമണത്തിന്‍റെ പശ്ചാത്തലത്തിൽ കണ്ണമാലിയിൽ ദുരിതാശ്വാസ ക്യാന്പ് തുറന്നു.കണ്ണമാലി പള്ളി പാരിഷ് ഹാളിലാണ് ക്യാന്പ് ആരംഭിച്ചിട്ടുള്ളത്. 250 ഓളം പേർ ക്യാന്പിലുണ്ടെന്ന് റവന്യൂ അധികൃതർ അറിയിച്ചു. ഇന്ന് കടൽ പൊതുവേ ശാന്തമായിരുന്നെങ്കിലും വീടുകളിൽ അടിഞ്ഞു കൂടിയിട്ടുള്ള ചെളിയും മാലിന്യങ്ങളും നീക്കം ചെയ്യാതെ ആളുകൾക്ക് വീടുകളിലേക്ക് മടങ്ങി പോകാൻ സാധിക്കാത്ത അവസ്ഥയാണ്.

ആരോഗ്യവിഭാഗം പരിശോധന; ചിറ്റാറ്റുകരയിൽ ഭക്ഷ്യോത്പാദന കേന്ദ്രം പൂട്ടി

പറവൂർ: ചിറ്റാറ്റുകര പഞ്ചായത്ത് ആരോഗ്യ വിഭാഗത്തിന്‍റെ നേതൃത്വത്തിൽ ഭക്ഷ്യോത്പാദന കേന്ദ്രങ്ങളിൽ പരിശോധന നടത്തി. ന്യൂനതകൾ കണ്ടെത്തിയ സ്ഥാപനങ്ങൾക്കെതിരെ നടപടി എടുത്തു. വൃത്തിഹീനമായ സാഹചര്യത്തിൽ ഭക്ഷ്യവസ്തുക്കൾ ഉത്പാദിപ്പിക്കുന്ന മാക്കനായി മെൽബ ഫുഡ്സ് എന്ന സ്ഥാപനം അടച്ചുപൂട്ടി പിഴ ചുമത്തി. ഇവിടെ ജീവനക്കാർക്ക് മതിയായ സൗകര്യങ്ങളൊരുക്കാതെയാണ് ഉത്പാദിപ്പിച്ച ഭക്ഷ്യവസ്തുക്കൾ പാക്ക് ചെയ്യുന്നതെന്ന് പരിശോധനയിൽ കണ്ടെത്തി. ശുചിത്വ നിലവാരത്തിലെ പോരായ്മകൾ, ഭക്ഷണസാധനങ്ങൾ കൈകാര്യം ചെയ്യുന്ന ജീവനക്കാർക്ക് ഹെൽത്ത് കാർഡിന്‍റെ അഭാവം, പുകയില നിരോധന നിയമ പ്രകാരമുള്ള മാനദണ്ഡങ്ങളുടെ ലംഘനം തുടങ്ങിയവ കണ്ടെത്തിയ നാല് സ്ഥാപനങ്ങൾക്കെതിരെ കേരള പൊതുജനാരോഗ്യ നിയമ പ്രകാരം നിയമ നടപടികൾ ആരംഭിച്ചു. ചിറ്റാറ്റുകര കുടുംബാരോഗ്യകേന്ദ്രം ഹെൽത്ത് ഇൻസ്പെക്ടർ പി.ജി. ആന്‍റണിയുടെ നേതൃത്വത്തിൽ നടത്തിയ പരിശോധനയിൽ പി.പി. രാധിക, അരുൺ സാഗർ, മിലി കൃഷ്ണൻ, കെ.എസ്. അമൃത എന്നിവരും ഉണ്ടായി. വരും ദിവസങ്ങളിലും പരിശോധന തുടരും. പകർച്ച വ്യാധികൾ, ഡെങ്കിപ്പനി, എലിപ്പനി, മഞ്ഞപ്പിത്തം എന്നിവക്കെതിരെ പ്രതിരോധ ജാഗ്രത പ്രവർത്തനങ്ങൾ ഉറപ്പാക്കണമെന്നും, ലക്ഷണങ്ങൾ കണ്ടാൽ ഉടനെ ആശുപത്രിയിൽ ചികിത്സ തേടണമെന്നും മെഡിക്കൽ ഓഫീസർ ഇൻ ചാർജ് ഡോ. ഫിലോമിനാ അലോഷ്യസ് അറിയിച്ചു.

നവജാത ശിശുവിന്‍റെ വാല്‍വ് ചുരുക്കം പരിഹരിച്ച് ആലുവ രാജഗിരി ആശുപത്രി

കൊച്ചി: രണ്ടു ദിവസം മാത്രം പ്രായമുളള നവജാത ശിശുവിന്‍റെ വാല്‍വ് ചുരുക്കം പരിഹരിച്ച് ആലുവ രാജഗിരി ആശുപത്രി. ശ്വാസംമുട്ടല്‍, മുലപ്പാല്‍ കുടിക്കുന്നതില്‍ കുറവ് എന്നീ ലക്ഷണങ്ങളോടെ ഗുരുതരാവസ്ഥയില്‍ അത്യാഹിത വിഭാഗത്തിലെത്തിയ ആലുവ സ്വദേശികളായ ദമ്പതികളുടെ കുഞ്ഞിനാണു ബലൂണ്‍ അയോട്ടിക് വാല്‍വോട്ടമിയിലൂടെ ജീവന്‍ രക്ഷിച്ചത്. പീഡിയാട്രിക് കാര്‍ഡിയോളജിസ്റ്റ് ഡോ. എസ്. വെങ്കിടേശ്വരന്‍റെ നിര്‍ദേശത്തെ തുടര്‍ന്ന് നടത്തിയ ഇക്കോ പരിശോധനയിലാണ് വാല്‍വ് ചുരുക്കം കണ്ടെത്തിയത്. ഹൃദയം നിലയ്ക്കാനുള്ള (കാര്‍ഡിയാക് ഷോക്ക്) സാധ്യത കണക്കിലെടുത്ത് കുഞ്ഞിനെ അടിയന്തരമായി ബലൂണ്‍ അയോട്ടിക് വാല്‍വോട്ടമിക്ക് വിധേയനാക്കി. അത്യന്തം സങ്കീര്‍ണമായ നടപടി ക്രമം പീഡിയാട്രിക് കാര്‍ഡിയോളജിസ്റ്റ് ഡോ.എസ്. വെങ്കിടേശ്വരന്‍റെ നേതൃത്വത്തിലാണ് വിജയകരമായി നടപ്പാക്കിയത്. കുഞ്ഞിന്‍റെ ജീവന്‍ നഷ്ടപ്പെടുമായിരുന്ന ഘട്ടത്തിലാണ് ബലൂണ്‍ അയോട്ടിക് വാല്‍വോട്ടമി നടപ്പാക്കിയതെന്ന് ഡോ. എസ്. വെങ്കിടേശ്വരന്‍ പറഞ്ഞു. കുഞ്ഞുങ്ങളില്‍ അപൂര്‍വമായാണ് ജന്മനാലുളള വാല്‍വ് ചുരുക്കം കാണാറുളളത്. വേഗത്തില്‍ ശരിയായ ചികിത്സ നല്‍കിയാല്‍ സങ്കീര്‍ണതകള്‍ ഇല്ലാതെ ഭേദമാക്കാന്‍ കഴിയുമെന്ന് ഡോ. എസ്. വെങ്കിടേശ്വരന്‍ അഭിപ്രായപ്പെട്ടു. രക്തയോട്ടം സാധാരണ രീതിയിലായതോടെ വെന്‍റിലേറ്റര്‍ പിന്തുണ സാവധാനം നീക്കം ചെയ്തു. ഒരാഴ്ച നീണ്ട ആശുപത്രി വാസത്തിനൊടുവില്‍ കുഞ്ഞുമായി ദമ്പതികള്‍ വീട്ടിലേക്ക് മടങ്ങി.

ബീച്ച് ടൂറിസം കോറിഡോർ പദ്ധതിക്കു 2.96 കോടി

വൈപ്പിൻ: ബീച്ച് ടൂറിസം കോറിഡോർ പദ്ധതിക്ക് 2.96 കോടി രൂപ അനുവദിച്ചതായി കെ.എൻ. ഉണ്ണിക്കൃഷ്ണൻ എംഎൽഎ അറിയിച്ചു. കുഴുപ്പിള്ളി, മുനമ്പം, ചെറായി ബീച്ചുകളുടെ നവീകരണത്തിനും സൗന്ദര്യവൽക്കരണത്തിനും ആയാണ് വിനോദസഞ്ചാര വകുപ്പ് തുക അനുവദിച്ചത്. മൂന്ന് ബീച്ചുകളിലായി നടപ്പാതകളുടെ നവീകരണം, അടിസ്ഥാന സൗകര്യങ്ങൾ വർധിപ്പിക്കൽ, കൈവരികളും ഇരിപ്പിടങ്ങളും ഒരുക്കൽ, സ്നാക്സ് ബാറുകൾ, കുട്ടികളുടെ കളി ഉപകരണങ്ങൾ, ഓപ്പൺ ജിം, പാർക്കിംഗ് ഏരിയ, പോലീസ് കൺട്രോൾ റൂം, വൈദ്യുതി വിളക്കുകൾ, നിലവിലുള്ള ടോയ്‌ലറ്റുകളുടെ നവീകരണം, സൗന്ദര്യവത്കരണം എന്നിവ പദ്ധതിയിൽ ഉൾപ്പെടുത്തിയിട്ടുണ്ട്. തിരുവനന്തപുരത്ത് ചേർന്ന വിനോദസഞ്ചാരവകുപ്പിന്‍റെ വർക്കിംഗ് ഗ്രൂപ്പ് മീറ്റിംഗിലാണ് പദ്ധതിക്ക് ഭരണാനുമതി ലഭിച്ചതെന്ന്എംഎൽഎ വ്യക്തമാക്കി.

അയ്യന്പുഴ പാണ്ടുപാറയിൽ 90 കുടുംബങ്ങൾക്ക് പട്ടയം ഉടന്‍

കാലടി: അയ്യമ്പുഴ പഞ്ചായത്തില്‍ പാണ്ടുപാറ പ്രദേശത്ത് 90 കുടുംബങ്ങള്‍ക്ക് പട്ടയം ഉടന്‍ ലഭ്യമാകുമെന്ന് റോജി എം. ജോണ്‍ എംഎൽഎ അറിയിച്ചു. സാങ്കേതിക തടസങ്ങളാല്‍ പതിറ്റാണ്ടുകളായി പട്ടയം ലഭിക്കാതെ ദുരിതാവസ്ഥയിലായ കുടുംബങ്ങള്‍ക്കാണ് ഇപ്പോള്‍ പ്രശ്ന പരിഹാരം ഉണ്ടാകുന്നത്. അയ്യമ്പുഴ വില്ലേജിലെ 189 മുതല്‍ 197 വരെയും, 200 മുതല്‍ 214 വരെയുമുള്ള സര്‍വേ നമ്പര്‍, റീ-സര്‍വേ നമ്പറുകള്‍ ബിടിആറില്‍ സര്‍ക്കാര്‍-വനം എന്ന് രേഖപ്പെടുത്തിയിരിക്കുന്നത് നീക്കി പുറമ്പോക്ക് എന്ന് മാറ്റി ഉത്തരവായിരുന്നതാണ്. ഈ സര്‍വേ നമ്പറുകളിലുള്ള കൈവശക്കാരുടെ സ്ഥലങ്ങള്‍ പരിശോധിച്ച് നിലവിലെ കൈവശം അനുസരിച്ച് സബ്-ഡിവിഷന്‍ സര്‍വ്വേ ചെയ്തിരുന്നതുമാണ്. 1969 ലെ സര്‍ക്കാര്‍ ഉത്തരവ് പ്രകാരം നിവലിലെ കൈവശക്കാരുടെ മുന്‍ഗാമികള്‍ക്ക് മൂന്ന് ഏക്കറില്‍ നിജപ്പെടുത്തി പതിച്ച് കൊടുക്കുവാന്‍ ഉത്തരവായിരുന്നു. എന്നാല്‍ റീ-സര്‍വേ സമയത്തെ പിശക് മൂലം പട്ടയം അനുവദിക്കുന്ന നടപടികള്‍ യഥാസമയം പൂര്‍ത്തീകരിച്ചിരുന്നില്ല. വിഷയം റോജി എം. ജോണ്‍ എംഎല്‍എ റവന്യു വകുപ്പ് മന്ത്രി വിളിച്ച് ചേര്‍ത്ത റവന്യു അസംബ്ലിയില്‍ നിരവധി തവണ ഉന്നയിക്കുകയും പ്രശ്നത്തിന് പരിഹാരം ഉണ്ടാകണമെന്ന് ആവശ്യപ്പെടുകയും ചെയ്തു, ഇത് പ്രത്യേകമായി പരിശോധിക്കാന്‍ ലാന്‍റ് റവന്യു കമ്മീഷണറോടും, ജില്ലാ കളക്ടറോടും ആവശ്യപ്പെടുകയും തുടര്‍ന്ന് കൈവശക്കാരില്‍ നിന്ന് വ്യക്തിഗത അപേക്ഷകള്‍ കൈപ്പറ്റി തുടര്‍ നടപടികള്‍ പൂര്‍ത്തീകരിച്ച് വരികയുമാണ്. ഇന്നലെ എംഎല്‍എയുടെ അധ്യക്ഷതയില്‍ അങ്കമാലിയില്‍ ചേര്‍ന്ന ഭൂമി പതിവ് കമ്മിറ്റി നടപടിക്രമങ്ങള്‍ പൂര്‍ത്തീകരിച്ച് 90 ഓളം അപേക്ഷകളില്‍ എത്രയും വേഗം പട്ടയം നല്‍കുന്നതിന് ശുപാര്‍ശ ചെയ്തു. ഏറ്റവും ഏടുത്ത് നടത്തുന്ന ജില്ലാതല പട്ടയ മേളയില്‍ തന്നെ ഭൂവുടമകള്‍ക്ക് പട്ടയം വിതരണ ചെയ്യുന്നതിനുള്ള നടപടികള്‍ സ്വീകരിക്കുമെന്ന് എംഎല്‍എ അറിയിച്ചു. യോഗത്തില്‍ ബ്ലോക്ക് പഞ്ചായത്ത് പ്രസിഡന്‍റ് കൊച്ചുത്രേസ്യ തങ്കച്ചന്‍, പഞ്ചായത്ത് പ്രസിഡന്‍റ് പി.യു. ജോമോന്‍ ജില്ലാ പഞ്ചായത്തംഗങ്ങളായ അനിമോള്‍ ബേബി, ശാരദാ മോഹന്‍, ടി.ഡി. സ്റ്റീഫന്‍, ആലുവ തഹസില്‍ദാര്‍ വി. ഡിക്സി ഫ്രാന്‍സിസ് ഉള്‍പ്പെടെ മറ്റ് റവന്യു വകുപ്പ് ഉദ്യോഗസ്ഥരും യോഗത്തില്‍ പങ്കെടുത്തു.

പാന്പുകടിയേറ്റ് ചികിത്സയിലായിരുന്ന വ്യാപാരി മരിച്ചു

കോതമംഗലം: പാന്പുകടിയേറ്റ് ചികിത്സയിലായിരുന്ന വ്യാപാരി മരിച്ചു. ചെറുവട്ടൂർ കാവാട്ട് കൊച്ചുമുഹമ്മദാ(65)ണ് മരിച്ചത്. കബറടക്കം നടത്തി. ചെറുവട്ടൂർ ഹൈക്കോടതി കവലയിലുള്ള സ്വന്തം പച്ചക്കറി കടയ്ക്കുള്ളിൽ വച്ച് പാന്പുകടിയേറ്റ് അങ്കമാലി ആശുപത്രിയിലെ തീവ്രപരിചരണ വിഭാഗത്തിൽ രണ്ടാഴ്ചയായി ചികിത്സയിലായിരുന്നു. ഭാര്യ: നബീസ ചെറുവട്ടൂർ ഓലിൽ മലയിൽ കുടുംബാംഗം. മക്കൾ: മജീന, റെജീന, റസീന, റിയാസ് (ദുബൈ). മരുമക്കൾ: സലാം ഓടയ്ക്കാലി, ഖാദിർ പോഞ്ഞാശേരി, റസൽ മുളവൂർ, ഹസ്ന റിയാസ്.

ബൈക്ക് മോഷ്ടാക്കൾ പിടിയിൽ

കളമശേരി: എളമക്കരയിൽ വാടകയ്ക്ക് താമസിക്കുന്ന ലക്ഷദ്വീപ് സ്വദേശിയുടെ ബൈക്ക് മോഷ്ടിച്ച കേസിലെ പ്രതികളെ കളമശേരി പോലീസ് അറസ്റ്റ് ചെയ്തു. തൃശൂർ തിരുവത്ര മൂട്ടിൽ മണത്തല മാത്രക്കോട്ട് അമൽ (23), ചേർത്തല തൃച്ചാറ്റുകുളം കൊല്ലംപറമ്പിൽ അൻസിൽ മണി (22) എന്നിവരെയാണ് അറസ്റ്റ് ചെയ്തത്. കളമശേരി ഇൻസ്പെക്ടർ എം.ബി. ലത്തീഫിന്‍റെ നേതൃത്വത്തിൽ സബ് ഇൻസ്പെക്ടർ ടി.എസ്. സനീഷ്, സിപിഒമാരായ സിനു ചന്ദ്രൻ, ലിബിൻ കുമാർ എന്നിവർ ചേർന്ന് പിടികൂടുകയായിരുന്നു. വാഹനം മോഷ്ടിച്ചു നമ്പർ പ്ലേറ്റ് മാറ്റി പ്രതികൾ ഉപയോഗിച്ച് വരികയായിരുന്നു. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

പനമ്പിള്ളിനഗറില്‍ കോടികള്‍ വിലമതിക്കുന്ന മിച്ചഭൂമി ഏറ്റെടുത്തു

കൊച്ചി: പനമ്പിള്ളി നഗറില്‍ കോടികള്‍ വിലമതിക്കുന്ന മിച്ചഭൂമി ഏറ്റെടുത്ത് റവന്യൂ വകുപ്പ്. എളംകുളം വില്ലേജിലെ 893/4,6,8, 9,10 സര്‍വേ നമ്പറുകളില്‍പ്പെട്ട 4.22 ഏക്കര്‍ സ്ഥലമാണ് ഒന്പതു വര്‍ഷം നീണ്ട നിയമ പോരാട്ടങ്ങള്‍ക്കൊടുവില്‍ റവന്യൂ സംഘം ഏറ്റെടുത്തത്. 1963ലെ ഭൂപരിഷ്‌കരണ നിയമത്തിന് പിന്നാലെ ഇതു മിച്ചഭൂമിയായി പ്രഖ്യാപിച്ചിരുന്നു. എന്നാല്‍ സ്ഥലമുടമകള്‍ നിയമനടപടികളുമായി മുന്നോട്ടു പോയതോടെ സാങ്കേതിക തടസങ്ങള്‍ മൂലം ഭൂമി ഏറ്റെടുക്കാന്‍ കഴിയാത്ത സ്ഥിതിയായി. 1973 മുതല്‍ ഇതു സംബന്ധിച്ചു കേസുകള്‍ ഉണ്ടായിരുന്നു. തുടര്‍ന്നു വൈക്കം മേഖല ലാൻഡ് ബോര്‍ഡ് ചെയര്‍മാന്‍റെ നിര്‍ദേശ പ്രകാരം നടപടിക്രമങ്ങള്‍ വേഗത്തിലാക്കിയതോടെയാണു ഭൂമി ഏറ്റെടുക്കാന്‍ കഴിഞ്ഞത്. കണയന്നൂര്‍ താലൂക്ക് തഹസില്‍ദാര്‍ ഡി. വിനോദിന്‍റെ നേതൃത്വത്തില്‍ ഭൂരേഖ തഹസില്‍ദാര്‍ സി.ആര്‍. ഷനോജ് കുമാര്‍, ഡെപ്യൂട്ടി തഹസില്‍ദാര്‍മാരായ ബിനോ തോമസ്, ബിജു ജോസ്, വില്ലേജ് ഓഫീസര്‍ പി. സജിത്ത്, സെക്ഷന്‍ ക്ലാര്‍ക്ക് മാര്‍ട്ടിന്‍ ടിനോയ് എന്നിവരടങ്ങിയ സംഘമാണ് നടപടിക്രമങ്ങള്‍ പൂര്‍ത്തിയാക്കിയത്.

കടൽകയറ്റം; എട്ടു വീടുകൾ തകർന്നു : ഉള്ളുലഞ്ഞ് കണ്ണമാലി

പള്ളുരുത്തി: കണ്ണമാലിയിൽ തുടർച്ചയായ മൂന്നാം ദിവസവും കടൽകയറ്റം രൂക്ഷമായതോടെ പ്രദേശത്ത് ജനജീവിതം പൂർണമായും സ്തംഭിച്ചു. എട്ടു വീടുകൾ തകർന്നു. ഇന്നലെ ഉച്ചയോടെ അതിശക്തമായാണ് കടൽ കരയിലേക്ക് അടിച്ചുകയറിയത്. ചെറിയ കടവ്, വാട്ടർ ടാങ്ക്, ഡിവൈൻ ചാപ്പൽ, ഗ്യാപ് റോഡ്, കാട്ടിപ്പറമ്പ്, കൈതവേലി, മാനാശേരി എന്നിവിടങ്ങളിലാണ് കടൽകയറ്റം രൂക്ഷമായത്. കഴിഞ്ഞ നാലു വർഷത്തിനിടെ ഏറ്റവും രൂക്ഷമായ കടൽകയറ്റമാണ് ചെല്ലാനത്ത് അനുഭവപ്പെടുന്നത്. അഞ്ഞൂറോളം വീടുകളിൽ വെള്ളം കയറി. വീടിനുള്ളിൽ ഉണ്ടായിരുന്ന ഭക്ഷ്യവസ്തുക്കൾ ഉൾപ്പെടെ ഉപയോഗശൂന്യമായി. കുടിക്കാൻ പോലൂം വെള്ളമില്ല. പ്രാഥമിക ആവശ്യങ്ങൾപോലും നിർവഹിക്കാനാകാത്ത സാഹചര്യമാണുള്ളത്. ബന്ധപ്പെട്ട വകുപ്പ് അധികൃതരുടെ നടപടിയിൽ പ്രതിഷേധിച്ച് ക്യാന്പുകളിൽ പോകാൻ ആരും തയാറാകുന്നില്ല. ഇവർ റോഡിലാണ് അഭയം തേടുന്നത്. ഇവർക്ക് ആവശ്യമായ ഭക്ഷണവും വെള്ളവും സന്നദ്ധ സംഘടനകൾ വഴി എത്തിക്കാൻ കൊച്ചി തഹസിൽദാർ ജോസഫ് ആന്‍റണി ഹെർട്ടിസ് മുൻകൈയെടുത്ത് നടപടി സ്വീകരിച്ചിട്ടുണ്ട്. എന്നാലും പ്രദേശവാസികളുടെ പ്രതിഷേധത്തിന് കുറവില്ല. ഇന്നലെ രാവിലെ ജിയോ ബാഗ് സ്ഥാപിക്കുന്ന ജോലികൾ ആരംഭിക്കുമെന്ന ഉറപ്പിൽ നാട്ടുകാർ റോഡ് ഉപരോധം താൽക്കാലികമായി അവസാനിപ്പിച്ചിരുന്നു. എന്നാൽ ഇന്നലെയും ജോലികൾ ആരംഭിച്ചില്ല. മഴയത്ത് ജോലികൾ ചെയ്യാൻ കഴിയില്ലെന്നാണ് അധികൃതർ വ്യക്തമാക്കിയത്. ഇതോടെ ജനം വീണ്ടും റോഡ് ഉപരോധം തുടങ്ങുകയായിരുന്നു. ചെറിയകടവിലും കണ്ണമാലിയിലുമാണ് റോഡ് ഉപരോധിച്ചത്. ഇതോടെ ഇതുവഴിയുള്ള ഗതാഗതം പൂർണമായും തടസപ്പെട്ടു. തഹസിൽദാർ ചെറിയ കടവിലെത്തി പ്രതിഷേധക്കാരുമായി ചർച്ച നടത്തി. താൽക്കാലിക പ്രതിരോധമായി ജിയോ ബാഗ് സ്ഥാപിക്കുന്നതിന് പകരം നിലവിൽ അനുവദിച്ച ഒന്നരക്കോടി രൂപ വിനിയോഗിച്ച് കരിങ്കല്ലുകൾ സ്ഥാപിക്കണമെന്ന ആവശ്യം പ്രതിഷേധക്കാർ മുന്നോട്ട് വച്ചു. ഇത് കളക്ടറുടെ ശ്രദ്ധയിൽപ്പെടുത്താമെന്ന് തഹസിൽദാർ സമരക്കാരെ അറിയിച്ചു. ഇതോടെ നാട്ടുകാർ ചെറിയ കടവിലെ റോഡ് ഉപരോധം അവസാനിപ്പിച്ചെങ്കിലും കണ്ണമാലിയിലെ ഉപരോധം തുടർന്നു.

നഗരത്തിലെ വെള്ളക്കെട്ട് : നഷ്ടം ഉണ്ടാകാതെയുള്ള നടപടികളാണ് നഗരസഭ സ്വീകരിക്കുന്നത്: മേയര്‍

കൊച്ചി: നഗരത്തിലെ വെളളക്കെട്ടുമായി ബന്ധപ്പെട്ട പ്രശ്‌നങ്ങളില്‍ സാമ്പത്തിക നഷ്ടം ഉണ്ടാകാതെയുള്ള സത്വരമായ നടപടികളാണ് നഗരസഭയുടെ ഭാഗത്ത് നിന്ന് ഉണ്ടാകാറുള്ളതെന്ന് മേയര്‍. എം. അനില്‍കുമാര്‍. ഇടപ്പള്ളി തോട് ഇറിഗേഷന്‍ ഡിപ്പാര്‍ട്ട്‌മെന്‍റിന് കൃത്യമായി ചെയ്യാന്‍ സാധിക്കാതെ വന്നത് കൊണ്ടാണ് ഒരു ടെന്‍ഡര്‍ കൂടി ക്ഷണിച്ചതെന്നും മേയര്‍ പറഞ്ഞു. പേരണ്ടൂര്‍ കനാലിന്‍റെ കാര്യത്തിലും സമാനമായ പ്രശ്‌നം നേരിട്ടിരുന്നു. ഇറിഗേഷന്‍ വിഭാഗമാണ് തേവര പേരണ്ടൂര്‍ കനാല്‍ നവീകരണം നടത്തേണ്ടത്. ഇറിഗേഷന്‍ വിഭാഗം രണ്ടു തവണ നടത്തിയ ടെന്‍ഡറില്‍ ആരും പങ്കെടുക്കാതായതോടെ പദ്ധതി നീളാന്‍ കാരണമായി. പിന്നീട് നാല് തവണയായി വിഭജിച്ച ശേഷമാണ് പദ്ധതി നടപ്പാക്കിയത്. പ്രതിപക്ഷം ആരോപിക്കുന്നത് പോലെ ടെന്‍ഡറില്‍ അഴിമതി നടന്നിട്ടുണ്ടോയെന്ന് പരിശോധിക്കാമെന്നും അപാകതകള്‍ പരിഹരിക്കുമെന്നും മേയര്‍ പറഞ്ഞു. കാനകളിലേയും തോടുകളിലേയും ചെളിയും പായലും നീക്കുന്നതിനുള്ള സില്‍ട്ട് പുഷര്‍, വീഡ് ഹാര്‍വെസ്റ്റര്‍, സക്ഷന്‍ കം ജെറ്റിംഗ് മെഷീനുകള്‍ എന്നിവ കൃത്യമായി പ്രവര്‍ത്തിക്കുന്നുണ്ട്. ഇത് ഹൈക്കോടതിക്ക് വരെ ബോധ്യമായ കാര്യമാണ്. എംജി റോഡിലെ കാനകളില്‍ ചെളി അടിഞ്ഞു കുടാന്‍ സാധ്യത കൂടുതലായതിനാല്‍ ഇവിടെ ഇടയ്ക്കിടെ ചെളി നീക്കുന്നുണ്ട്. അതാണ് എംജി റോഡില്‍ മെഷീന്‍ കൂടുതലായി ഉപയോഗിക്കാന്‍ കാരണമെന്നും മേയര്‍ പറഞ്ഞു.

മെട്രോപ്പൊളിറ്റന്‍ ആസൂത്രണ സമിതി : മുനിസിപ്പല്‍ കൗണ്‍സിലര്‍മാരുടെ പ്രതിനിധിയെ ഇന്ന് തെരഞ്ഞെടുക്കും

കൊച്ചി: വിശാല കൊച്ചിയുടെ വികസന സ്വപ്‌നത്തിനായി രൂപീകരിക്കുന്ന മെട്രോപ്പൊളിറ്റന്‍ ആസൂത്രണ സമിതിയിലേക്കുള്ള തെരഞ്ഞെടുപ്പ് ആരംഭിച്ചു. പഞ്ചായത്ത് പ്രസിഡന്‍റുമാരുടെ പ്രതിനിധി തെരഞ്ഞെടുപ്പില്‍ പി.എം. മനാഫ് (ആലങ്ങാട്), സജിത മുരളി (ഉദയംപേരൂര്‍), എന്‍.ജി. മേരി വിന്‍സന്‍റ് (കടമക്കുടി), രാജി സന്തോഷ് (ചൂര്‍ണിക്കര) എന്നിവരെയാണ് തെരഞ്ഞെടുത്തത്. മുനിസിപ്പല്‍ കൗണ്‍സിലര്‍മാരുടെ പ്രതിനിധികള്‍ക്കായുള്ള തെരഞ്ഞെടുപ്പ് ഇന്നും കോര്‍പറേഷന്‍ കൗണ്‍സിലര്‍മാരുടെ പ്രതിനിധികള്‍ക്കായുള്ള തെരഞ്ഞെടുപ്പ് നാളെയും നടക്കും. ജനറല്‍ വിഭാഗം, എസ്‌സി വിഭാഗം, സ്ത്രീസംവരണ വിഭാഗം തുടങ്ങിയ വിഭാഗങ്ങളിലാണ് തെരഞ്ഞെടുപ്പ് നടന്നത്. ജനറല്‍ വിഭാഗത്തില്‍ പി.എം. മനാഫിനും എസ്‌സി സംവരണ വിഭാഗത്തില്‍ സജിത മുരളിക്കും 15 വോട്ടുകള്‍ വീതം ലഭിച്ചു. സ്ത്രീ സംവരണ വിഭാഗത്തില്‍ മിനി രാജു, മേരി വിന്‍സന്‍റ്, രാജി സന്തോഷ് എന്നിവര്‍ നോമിനേഷന്‍ നല്‍കിയിരുന്നെങ്കിലും അവസാന നിമിഷം മിനി രാജു സ്ഥാനാര്‍ഥിത്വം പിന്‍വലിച്ചു. ഇതോടെ മേരി വിന്‍സെന്‍റ്, രാജി സന്തോഷ് എന്നിവര്‍ തെരഞ്ഞെടുക്കപ്പെട്ടു. ജില്ലാ കളക്ടറേറ്റ് പ്ലാനിംഗ് ഹാളില്‍ നടന്ന തെരഞ്ഞെടുപ്പില്‍ മെട്രോപ്പൊളിറ്റന്‍ ഏരിയയില്‍ ഉള്‍പ്പെടുന്ന 29 പഞ്ചായത്ത് പ്രസിഡന്‍റുമാര്‍ വോട്ട് ചെയ്തു. ജില്ലാ കളക്ടര്‍ എന്‍.എസ്.കെ. ഉമേഷ് വരണാധികാരിയായി. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍ പങ്കെടുത്തു. കൊച്ചി കോര്‍പറേഷന്‍, തൃപ്പൂണിത്തുറ, പെരുമ്പാവൂര്‍,കളമശേരി, പറവൂര്‍, ആലുവ, അങ്കമാലി, ഏലൂര്‍, തൃക്കാക്കര, മരട് മുനിസിപ്പാലിറ്റികളും പള്ളിപ്പുറം, കുഴുപ്പിള്ളി, എടവനക്കാട്, നായരമ്പലം, മുളവുകാട്, ഞാറയ്ക്കല്‍, ചേരാനല്ലൂര്‍, കടമക്കുടി, വരാപ്പുഴ, കോട്ടുവള്ളി, ഏഴിക്കര, കടുങ്ങല്ലൂര്‍, ആലങ്ങാട്, ചൂര്‍ണിക്കര, എടത്തല, കീഴ്മാട്, ശ്രീമൂലനഗരം, ചെങ്ങമനാട്, നെടുമ്പാശേരി, കാഞ്ഞൂര്‍, വാഴക്കുളം, ചെല്ലാനം, വടവുകോട് പുത്തന്‍കുരിശ്, ചോറ്റാനിക്കര, മുളന്തുരുത്തി, ഉദയംപേരൂര്‍,കുമ്പളം, കുമ്പളങ്ങി, എളങ്കുന്നപ്പുഴ പഞ്ചായത്തുകളുമാണ് കൊച്ചി മെട്രോപ്പൊളിറ്റന്‍ പ്രദേശത്ത് ഉള്‍പ്പെടുന്ന തദ്ദേശസ്ഥാപനങ്ങള്‍. കൊച്ചി മെട്രോപ്പൊളിറ്റന്‍ പ്രദേശം ഉള്‍പ്പെടുന്ന തദ്ദേശ സ്ഥാപനങ്ങളിലെ ജനപ്രതിനിധികളില്‍ നിന്നാണ് ആസൂത്രണസമിതി അംഗങ്ങളെ തെരഞ്ഞെടുക്കുന്നത്. അംഗങ്ങളില്‍ നിന്ന് ചെയര്‍മാനെയും തെരഞ്ഞെടുക്കും. മെട്രോപ്പൊളിറ്റന്‍ പ്രദേശത്തിന് മുഴുവനായി കരട് വികസന പദ്ധതി തയാറാക്കാന്‍ ഉദ്ദേശിച്ചുള്ളതാണ്ആസൂത്രണ കമ്മിറ്റി. 15 അംഗ കമ്മിറ്റിയില്‍ 10 പേരെ തദ്ദേശസ്ഥാപന ജനപ്രതിനിധികളില്‍ നിന്ന് തെരഞ്ഞെടുക്കും. അഞ്ചു പേരെ സര്‍ക്കാര്‍ നാമനിര്‍ദേശം ചെയ്യും. ഗ്രാമപഞ്ചായത്ത് പ്രസിഡന്‍റുമാരില്‍ നിന്ന് നാലുപേരെയും മുനിസിപ്പല്‍ കൗണ്‍സിലര്‍മാരില്‍ നിന്ന് രണ്ടംഗങ്ങളെയും കോര്‍പറേഷന്‍ കൗണ്‍സിലര്‍മാരില്‍ നിന്ന് നാല് അംഗങ്ങളെയുമാണ് തെരഞ്ഞെടുക്കുന്നത്. ഗ്രാമപഞ്ചായത്ത് പ്രസിഡന്‍റുമാരില്‍നിന്ന് തെരഞ്ഞെടുക്കപ്പെടുന്ന അംഗങ്ങളില്‍ രണ്ടു പേരും മുനിസിപ്പല്‍ കൗണ്‍സിലര്‍മാരില്‍ നിന്നുള്ള ഒരംഗവും കോര്‍പറേഷന്‍ കൗണ്‍സിലര്‍മാരില്‍ നിന്നുള്ള രണ്ട് അംഗങ്ങളും വനിതകളായിരിക്കണം. തദ്ദേശ സ്ഥാപനങ്ങളുടെ കാലാവധി തീരാന്‍ മാസങ്ങള്‍ മാത്രം ശേഷിക്കെ, ഇപ്പോള്‍ തെരഞ്ഞെടുക്കുന്ന ആസൂത്രണ സമിതിക്ക് എത്രനാള്‍ തുടരാന്‍ കഴിയുമെന്നതാണ് ആശങ്ക സൃഷ്ടിക്കുന്നത്. തെരഞ്ഞെടുപ്പിനുശേഷം തദ്ദേശ സ്ഥാപനങ്ങളില്‍ പുതിയ ഭരണസമിതി വരുന്നതോടെ ആസൂത്രണ സമിതിയില്‍ വീണ്ടും തെരഞ്ഞെടുപ്പ് നടത്തേണ്ടിവരും.

മഴയിൽ തളർന്നു റബർ ടാപ്പിംഗ്

ജിജു കോതമംഗലം കോതമംഗലം: തോരാതെ പെയ്യുന്ന മഴ റബർ ടാപ്പിംഗ് മേഖലയെ പ്രതിസന്ധിയിലാക്കി. മഴയത്ത് ടാപ്പിംഗ് നടത്തിയാൽ പുറംഭാഗം (പട്ട) നശിച്ചുപോകുമെന്നു കർഷകർ പറയുന്നു. ഷേഡുകൾ സ്ഥാപിച്ചിട്ടുള്ള മരങ്ങളിലും കനത്ത മഴയിലെ ടാപ്പിംഗ് ലഭിക്കുന്ന പാലിന്‍റെ അളവിനെ ബാധിക്കും. തൊഴിലാളി കുടുംബങ്ങൾ കടുത്ത സാമ്പത്തിക സാമ്പത്തിക ഞെരുക്കത്തിലായിരിക്കുകയാണ്. ഇടത്തരം ചെറുകിട കർഷക കുടുംബങ്ങളും, ചെറുകിട വ്യാപാരികളും പറഞ്ഞറിയിക്കാനാവാത്ത ദുരിതത്തിലാണ്. ജില്ലയിൽ കഴിഞ്ഞയാഴ്ചയിലുണ്ടായ കനത്ത കാറ്റിൽ 6800 റബർ മരങ്ങൾ ഒടിഞ്ഞുവീഴുകയോ മറിയുകയോ ചെയ്തിട്ടുണ്ടെന്നു കൃഷിവകുപ്പ് അധികൃതർ പറഞ്ഞു. ‌ഇതിൽ അയ്യായിരത്തോളം മരങ്ങൾ നിലവിൽ ടാപ്പിംഗ് നടത്തുന്നവയാണ്. 820 റബർ കർഷകർ തങ്ങളുടെ കൃഷി നശിച്ച വിവരം അധികൃതരെ അറിയിച്ചിട്ടുണ്ട്. സ്കൂൾ തുറന്നതോടെ കുട്ടികളുടെ യൂണിഫോമും, പുസ്തകങ്ങളും, ഫീസും, യാത്രയും എല്ലാം ചേർന്ന് അധികം പണച്ചെലവുണ്ടാകുന്ന ഘട്ടത്തിലാണ് കനത്ത മഴയിൽ ടാപ്പിംഗ് മേഖല പ്രതിസന്ധിയിലാകുന്നത്. ദിവസക്കൂലിക്കു പണിയെടുക്കുന്ന ടാപ്പിംഗ് തൊഴിലാളികളെ ഇതു കഷ്ടത്തിലാക്കി. ടാപ്പിംഗ് കുറയുന്പോൾ ആശ്രയിക്കാറുള്ള മറ്റു തൊഴിലുകളും പെരുമഴയിൽ എളുപ്പമല്ല. മഴ നീണ്ടുനിൽക്കുന്ന സാഹചര്യങ്ങളിൽ തൊഴിലാളി കുടുംബങ്ങൾക്ക് സൗജന്യ റേഷൻ ഏർപ്പെടുത്താനും സാമ്പത്തിക സഹായം നൽകാനും സർക്കാർ തയാറാകണമെന്ന ആവശ്യം ഉ‍യരുന്നുണ്ട്.

കൃഷിയിടങ്ങളിൽ‌ ദുരിതപ്പെയ്ത്ത് !

കൊച്ചി: പെരുമഴയും കനത്ത കാറ്റും കൃഷിയിടങ്ങളിൽ സങ്കടപ്പെയ്ത്താകുന്നു. ജില്ലയിൽ വാഴ, നെല്ല്, റബർ കൃഷികളിൽ വലിയ നാശനഷ്ടങ്ങളാണ് കാലവർഷം വിതയ്ക്കുന്നത്. കഴിഞ്ഞ ഒരാഴ്ചയ്ക്കിടെ ജില്ലയിൽ 24.5 കോടി രൂപയുടെ കാർഷിക വിളനാശമുണ്ടായെന്നു കൃഷിവകുപ്പിന്‍റെ കണക്കുകൾ വ്യക്തമാക്കുന്നു. ജൂണിൽ മാത്രം മഴയും കാറ്റും നഷ്ടമുണ്ടാക്കിയ കൃഷികൾക്കു കൃഷിവകുപ്പിൽ നിന്നു നഷ്ടപരിഹാരം ആവശ്യപ്പെട്ടുള്ള അപേക്ഷകരുടെ എണ്ണം 10,000 കടന്നു. 365 ഓളം ഹെക്ടറിലെ കൃഷിക്കു ചെറുതോ വലുതോ ആയ അളവിൽ കാലവർഷക്കെടുതിയുണ്ടായെന്നും കൃഷി വകുപ്പ് അധികൃതർ ചൂണ്ടിക്കാട്ടി. കാറ്റിലും വിലയിടിവിലും ഉലഞ്ഞ് വാഴക്കൃഷി മൂന്നു മാസം മുന്പു കിലോയ്ക്ക് 60 രൂപയിലധികം വില കിട്ടിയിരുന്ന ഏത്തക്കായ്ക്ക് ഇപ്പോൾ വില നാല്പതിലേക്കു താണു. വിലയിടിവിനൊപ്പം കനത്ത കാറ്റിലും മഴയിലുമുണ്ടായ നാശനഷ്ടങ്ങളും വാഴ കർഷകരെ വെട്ടിലാക്കി. കഴിഞ്ഞ മൂന്നാഴ്ചയ്ക്കിടെ 2.25 ലക്ഷത്തിലധികം വാഴ ജില്ലയിൽ കാലവർഷക്കെടുതിയിൽ നശിച്ചു. ഇതിൽ പകുതിയിലേറെയും കുലച്ചു പാകമായ വാഴകളാണെന്നു കൃഷിവകുപ്പ് ശേഖരിച്ച കണക്കുകൾ വ്യക്തമാക്കുന്നു. 3300 കർഷകരുടെ വാഴക്കൃഷി കാലവർഷത്തിൽ ഇതുവരെ നശിച്ചു. വാഴക്കൃഷിയിൽ‌ മാത്രം ജില്ലയിലെ നഷ്ടം 13 കോടിയലധികമാണ്. ഓണത്തിനു മികച്ച വില പ്രതീക്ഷിച്ചു വിളവെടുക്കാൻ പാകത്തിനു കൃഷി ചെയ്തിരുന്ന വാഴത്തോട്ടങ്ങൾ പലയിടത്തും, വെള്ളം കെട്ടി നശിക്കുന്ന സ്ഥിതിയിലാണ്. നെല്ല് വെള്ളത്തിൽ ഭാരിച്ച കൂലിയും നെൽപ്പാടങ്ങളിലെ അനുകൂല സാഹചര്യങ്ങൾ കുറഞ്ഞതും മൂലം നെൽകൃഷി നഷ്ടത്തിലായ കർഷകർക്കു കനത്ത മഴയും ദുരിതമായിട്ടുണ്ട്. 19 ഹെക്ടറിലെ നെൽകൃഷിക്ക് ഇതുവരെ ജില്ലയിൽ നാശം സംഭവിച്ചിട്ടുണ്ട്. പാകമായ നെല്ല് വെള്ളത്തിലായതും പാടത്തെ രൂക്ഷമായ വെള്ളക്കെട്ടുമെല്ലാം കർഷകർ നേരിടുന്ന പ്രതിസന്ധികളാണ്. അങ്കമാലി, കാലടി, നെടുന്പാശേരി, പെരുന്പാവൂർ, മൂവാറ്റുപുഴ മേഖലകളിലെല്ലാം കാലവർഷം കർഷകരെ കഷ്ടത്തിലാക്കിയിട്ടുണ്ട്. കാലവർഷക്കെടുതിയിൽ കൃഷി നശിച്ചവർക്കു സർക്കാർ സഹായം ലഭ്യമാക്കണമെന്ന ആവശ്യവുമായി കർഷക സംഘടനകൾ രംഗത്തെത്തിയിട്ടുണ്ട്. ജാതിക്ക കൃഷിയെയും കാറ്റും മഴയും ബാധിച്ചു. 4500 ജാതിക്കാ മരങ്ങൾക്കു കഴിഞ്ഞ രണ്ടാഴ്ചയ്ക്കിടെ നാശമുണ്ടായി. കോതമംഗലം താലൂക്കിന്‍റെ താഴ്ന്ന മേഖലകൾ ദിവസങ്ങളായി വെള്ളം കെട്ടി കൃഷി നശിക്കുന്ന സ്ഥിതിയിലാണ്. കപ്പ, വാഴ, ഇഞ്ചി തുടങ്ങിയ കൃഷികൾ വെള്ളത്തിനടിയിലായി. അടയ്ക്ക, കുരുമുളക്, പൈനാപ്പിൾ തുടങ്ങിയ കൃഷികളെയും കനത്ത മഴ ബാധിച്ചിട്ടുണ്ട്.

മാമലക്കണ്ടത്ത് കാറ്റില്‍ നാല് വീടുകള്‍ക്ക് ഭാഗികനാശം

കോതമംഗലം: മഴയ്‌ക്കൊപ്പം ഉണ്ടായ ശക്തമായ കാറ്റില്‍ കുട്ടമ്പുഴ പഞ്ചായത്തിലെ മാമലകണ്ടം മേഖലയില്‍ നാല് വീടുകള്‍ക്ക് ഭാഗികനാശം. 20 ഓളം കര്‍ഷകരുടെ വിവിധ കാര്‍ഷികവിളകള്‍ക്കും നാശം. മരങ്ങള്‍ വീണ് ഗതാഗത തടസവും വൈദ്യുത തൂണുകള്‍ ഒടിയുകയും വൈദ്യുത കമ്പികള്‍ പൊട്ടി വീണും പ്രദേശത്തെ വൈദ്യുതിയും നിലച്ചിരുന്നു. ഇന്നലെ പുലര്‍ച്ചെ 3.30 ഓടെയാണ് കാറ്റ് നാശം വിതച്ചത്. എളംബ്ലാശേരി ആദിവാസി ഉന്നതിയിലെ കന്നിയമ്മ ചെകിടന്‍ ഗിരിജ തങ്കപ്പന്‍, ലീല സത്യന്‍, മാമലകണ്ടം തൊണ്ടിമലയില്‍ ജാനു സുകുമാരന്‍ എന്നിവരുടെ വീടുകള്‍ക്കാണ് തകര്‍ച്ച നേരിട്ടത്. കന്നിയമ്മയുടെ വീടിന്‍റെ ഷീറ്റ് മേഞ്ഞ മേല്‍ക്കൂര മുഴുവനും മരങ്ങള്‍ വീണാണ് തകര്‍ന്നത്. ജാനു സുകുമാരന്‍റെ വീടിന് ഭാഗികമായി തകര്‍ച്ച നേരിട്ടു. കാലപ്പഴക്കംകൊണ്ട് ചോര്‍ച്ചയും മറ്റ് തകരാറും കാരണം പടുത വലിച്ച് കെട്ടി താമസിക്കുകയായിരുന്നു അഞ്ചംഗ കുടുംബം. മേല്‍ക്കൂരയുടെ ഒരു വശം തകര്‍ന്നതിനൊപ്പം കൃഷിനാശവും ഉണ്ടായിട്ടുണ്ട്. പുലര്‍ച്ചെ ആയതുകൊണ്ട് പലരും ഉറക്കത്തിലായിരുന്നു. എന്താണ് സംഭവിച്ചതെന്ന് ആദ്യം മനസിലായില്ല. വലിയൊരു ശബ്ദത്തോടെയാണ് കാറ്റ് വീശിയത്. പലരും പുറത്തേക്ക് ഓടി മാറുകയായിരുന്നു. മേല്‍ക്കൂര പൂര്‍ണമായും തകര്‍ന്ന കന്നിയമ്മയുടെ വീട്ടുസാധനങ്ങളുല്ലാം വെള്ളത്തിലായി. വൈദ്യുതി നിലച്ചതുകൊണ്ട് രാവിലെയാണ് നാശം വിലയിരുത്തിയത്. എളംബ്ലാശേരി ഊരുമൂപ്പന്‍ രാഘവന്‍ കോരാളിയില്‍, ചിന്നാണ്ടി പാട്ടന്‍, വാര്‍ഡ് മെംമ്പര്‍ ശ്രീജ ബിജു എന്നിവര്‍ ഉള്‍പ്പെടെ ഇരുപതോളം പേരുടെ റബര്‍, തെങ്ങ്, കവുങ്ങ്, ഏത്തവാഴ തുടങ്ങിയ വിവിധ വിളകളും നശിച്ചു. രാഘവന്‍റെ കൃഷിയിടത്തില്‍ ഉണ്ടായിരുന്ന വിവിധ ഇനം പഴവര്‍ഗ ചെടികളും കാറ്റെടുത്തു.

കുടുംബശ്രീ സിഡിഎസ് വാർഷികം സംഘടിപ്പിച്ചു

പിറവം: രാമമംഗലം പഞ്ചായത്ത് കുടുംബശ്രീ സിഡിഎസ് വാർഷികം സംഘടിപ്പിച്ചു. കൈതപ്പിളളിൽ ഓഡിറ്റോറിയത്തിൽ അനൂപ് ജേക്കബ് എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് പി.വി. സ്റ്റീഫൻ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് സ്‌മിത എൽദോസ് മുഖ്യപ്രഭാഷണം നടത്തി. മെമ്പർ സെക്രട്ടറി കെ. മനോജ്‌കുമാർ വാർഷിക റിപ്പോർട്ട് അവതരിപ്പിച്ചു. സിഡിഎസ് ചെയർപേഴ്സൺ ഷീബ, ജില്ലാ പഞ്ചായത്ത് പൊതുമരാമത്ത് സ്ഥിരംസമിതി അധ്യക്ഷ ആശ സനിൽ, രാമമംഗലം പഞ്ചായത്ത് വൈസ്പ്രസിഡന്‍റ് മേരി എൽദോ, ഷൈജ ജോർജ്, ആലീസ് ജോർജ്, ജിജോ ഏലിയാസ് തുടങ്ങിയവർ പ്രസംഗിച്ചു. വിവിധ മേഖലകളിൽ കഴിവുകൾ തെളിയിച്ച വ്യക്തിത്വങ്ങളെയും പരീക്ഷകളിൽ ജയം നേടിയവരെയും ആദരിച്ചു. കുടുംബശ്രീ അംഗങ്ങളുടെ അനുഭവം പങ്കുവയ്ക്കൽ, കലാപരിപാടികൾ എന്നിവയും നടന്നു.

ദീപിക ബാലജന സഖ്യം കൂത്താട്ടുകുളം മേഖല ഉദ്ഘാടനം

കൂത്താട്ടുകുളം: ദീപിക ബാലജന സഖ്യത്തിന്‍റെ തൊടുപുഴ പ്രവിശ്യാ പ്രവർത്തനവർഷ ഉദ്ഘാടനവും കൂത്താട്ടുകുളം മേഖല ഉദ്ഘാടനവും മേരിഗിരി പബ്ലിക് സ്കൂളിൽ കൂത്താട്ടുകുളം നഗരസഭ ചെയർപേഴ്സൺ വിജയ ശിവൻ നിർവഹിച്ചു. സ്കൂൾ പ്രിൻസിപ്പൽ ഫാ. മാത്യു കരീത്തറ അധ്യക്ഷത വഹിച്ചു. ദീപിക ബാലജന സഖ്യം ഡയറക്ടർ ഫാ. റോയി കണ്ണഞ്ചിറ (കൊച്ചേട്ടൻ) മുഖ്യ പ്രഭാഷണം നടത്തി. തൊടുപുഴ പ്രവിശ്യാ കോ ഓർഡിനേറ്റർ റോയ് ജെ. കല്ലറങ്ങാട്ട്, ദീപിക ബാലജന സഖ്യം സ്റ്റേറ്റ് റിസോഴ്സ് ടീം കോ ഓർഡിനേറ്റർ തോമസ് കുണിഞ്ഞി തുടങ്ങിയവർ പ്രസംഗിച്ചു.

വീടിന് മുകളിലേക്ക് മരങ്ങൾ കടപുഴകി വീണു

മൂവാറ്റുപുഴ: കഴിഞ്ഞ ദിവസമുണ്ടായ ശക്തമായ കാറ്റിലും മഴയിലും വീടിന് മുകളിലേക്ക് മരങ്ങൾ കടപുഴകി വീണു. ഞായറാഴ്ച വൈകുന്നേരം ആറോടെ ഈസ്റ്റ് മാറാടി പള്ളിക്കവലയ്‌ക്ക് സമീപം ആര്യപ്പിള്ളിയിൽ ഷിനാജ് ടി. റസാഖിന്‍റെ വീടിന് മുകളിലേക്കാണ് പുരയിടത്തിൽ നിന്നിരുന്ന പുളിമരവും തെങ്ങും കടപുഴകി വീണത്. മരം കടപുഴകി വീണ സമയം റസാഖിന്‍റെ മാതാവും കുട്ടിയും വീട്ടിലുണ്ടായിരുന്നെങ്കിലും പരിക്കുകളേൽക്കാതെ രക്ഷപ്പെട്ടു. വീടിന്‍റെ മേൽക്കൂര ഭാഗികമായി തകർന്നു. കോണ്‍ക്രീറ്റിന് പൊട്ടലും സംഭവിച്ചിട്ടുണ്ട്. പഞ്ചായത്തംഗവും വില്ലേജ് ഓഫീസറും സ്ഥലം സന്ദർശിച്ച് നാശനഷ്ടങ്ങൾ വിലയിരുത്തി.

കാടുകയറി മൂവാറ്റുപുഴ പ്രീമെട്രിക് ഹോസ്റ്റൽ

ഹോസ്റ്റൽ അടച്ചുപൂട്ടിയത് പുനരുദ്ധാരണത്തിന്‍റെ പേരിൽ മൂവാറ്റുപുഴ: പതിറ്റാണ്ടുകളായി മൂവാറ്റുപുഴ നഗരത്തിൽ പ്രവർത്തിച്ച് വന്നിരുന്ന പ്രീമെട്രിക് ഹോസ്റ്റൽ അടച്ചുപൂട്ടിയിട്ട് വർഷങ്ങൾ പിന്നിടുന്നു. ജില്ലയുടെ കിഴക്കൻ മേഖലയിലെ എസ്‌സി, എസ്ടി, ഒബിസി വിഭാഗത്തിൽപ്പെട്ട അഞ്ച് മുതൽ പത്താം ക്ലാസ് വരെ പഠിക്കുന്ന നിർധനരായ പെണ്‍കുട്ടികൾക്ക് പഠനത്തോടൊപ്പം താമസ സൗകര്യംകൂടി ഒരുക്കുന്നതിനായാണ് പട്ടികജാതി വികസന വകുപ്പ് വെള്ളൂർക്കുന്നത് പ്രീമെട്രിക് ഹോസ്റ്റൽ ആരംഭിച്ചത്. എന്നാൽ പുനരുദ്ധാരണ പ്രവർത്തനങ്ങളുടെ പേരിൽ മൂന്നു വർഷങ്ങൾക്ക് മുൻപാണ് ഹോസ്റ്റൽ അടച്ചുപൂട്ടിയത്. പിന്നീട് പുനരുദ്ധാരണ പ്രവർത്തനങ്ങൾ നടത്തുന്നതിന് അധികൃതർ തയാറായിട്ടില്ല. ഹോസ്റ്റലിൽ ഉണ്ടായിരുന്ന എസ്‌സി, എസ്ടി വിഭാഗത്തിൽപ്പെട്ട 27 പെണ്‍കുട്ടികളും ഒബിസി വിഭാഗത്തിൽപ്പെട്ട മൂന്നു പെണ്‍കുട്ടികളും ആലുവ, പെരുന്പാവൂർ പ്രദേശങ്ങളിലുള്ള ഹോസ്റ്റലിലേക്ക് മാറേണ്ടിവന്നിരുന്നു. പുനരുദ്ധാരണത്തിന്‍റെ പേരിൽ അടച്ചുപൂട്ടിയ ഹോസ്റ്റൽ ഇപ്പോൾ കാടുകയറി കിടക്കുന്ന അവസ്ഥയാണ്. ഹോസ്റ്റൽ അടച്ചുപൂട്ടിയതോടെ ജില്ലയിടെ കിഴക്കൻമേഖലയിലെ പട്ടികജാതി വിഭാഗത്തിൽപ്പെട്ട പെണ്‍കുട്ടികളുടെ പഠനം ദുഷ്കരമായിരിക്കുകയാണ്. അതേസമയം പട്ടികജാതി വികസന വകുപ്പാണ് പുനരുദ്ധാരണത്തിന്‍റെ പേരിൽ ഹോസ്റ്റൽ അടച്ചുപൂട്ടിയതെന്നാണ് നഗരസഭ അധികൃതർ പറയുന്നത്. ഹോസ്റ്റലിന്‍റെ പുനരുദ്ധാരണത്തിനായി നഗരസഭ 4.99 കോടി രൂപയുടെ എസ്റ്റിമേറ്റ് മന്ത്രിക്ക് തയാറാക്കി നൽകിയിരുന്നെന്നും എന്നാൽ പട്ടികജാതി വികസന വകുപ്പ് ഈ എസ്റ്റിമേറ്റ് അംഗീകരിക്കാതെ പൊതുമരാമത്ത് വകുപ്പ് തയാറാക്കി നൽകുന്ന എസ്റ്റിമേറ്റ് മാത്രമേ സ്വീകരിക്കു എന്ന നിലപാടെടുത്തതും പിന്നീട് പ്രീമെട്രിക് ഹോസ്റ്റലിന് പകരം പോസ്റ്റ്മെട്രിക് ഹോസ്റ്റലാണ് ഇനി നിർമിക്കേണ്ടതെന്ന് അറിയിച്ചതുമാണ് കാലതാമസം നേരിടാൻ കാരണമെന്ന് നഗരസഭാധ്യക്ഷൻ പി.പി. എൽദോസ് പറഞ്ഞു.

വെയ്റ്റിംഗ് ഷെഡിൽ ചെളിവെള്ളക്കെട്ട്

കോലഞ്ചേരി: മീമ്പാറ വെയ്റ്റിംഗ് ഷെഡിൽ ചെളിവെള്ളക്കെട്ട്. ബസ് യാത്രക്കാർക്ക് മഴക്കാലത്ത് ആശ്രയമായി മാറേണ്ട വെയ്റ്റിംഗ് ഷെഡിലാണ് മഴവെള്ളവും ഒഴുകിവരുന്ന ചെളി വെള്ളവും ഇരച്ച് കയറുന്നത്. വെയ്റ്റിംഗ് ഷെഡിൽ കയറിയ വെള്ളം കളയാൻ നിലവിൽ കാന കീറിയിരിക്കുകയാണ്. പൂതൃക്ക പഞ്ചായത്തിന്‍റെ കീഴിൽ 1978ൽ സ്ഥാപിച്ച വിശ്രമ കേന്ദ്രം കാലപ്പഴക്കം കൊണ്ട് നശിച്ച അവസ്ഥയിലാണ്. വാർക്കയിലെ കമ്പികൾ തുരുമ്പെടുത്ത് കോൺക്രീറ്റ് പാളികൾ പൊളിഞ്ഞ് താഴെ വീഴുന്ന അവസ്ഥയിലാണ്. ചൂണ്ടി - രാമമംഗലം റോഡ് ഉയർത്തി ടാർ ചെയ്തതോടെ നിലവിൽ കുഴിയിലാണ് വെയ്റ്റിംഗ് ഷെഡ് സ്ഥിതി ചെയ്യുന്നത്. നാടിനും യാത്രക്കാർക്കും ഉപകാരമാകുംവിധം അടിയന്തരമായി ഇത് പുനർനിർമിക്കണമെന്നാണ് നാട്ടുകാരുടെ ആവശ്യം.

ശ്രേഷ്ഠ ബാവയ്ക്ക് സ്വീകരണം നൽകി

കോതമംഗലം: ശ്രേഷ്ഠ കാതോലിക്ക ബസേലിയോസ് ജോസഫ് ബാവയ്ക്ക് മാർ ബസേലിയോസ് മെഡിക്കൽ മിഷൻ അസോസിയേഷന്‍റെ ആഭിമുഖ്യത്തിൽ മാർ ബസേലിയോസ് ഡെന്‍റൽ കോളജിൽ സ്വീകരണം നൽകി. കോതമംഗലം മേഖല മെത്രാപ്പോലീത്ത ഏലിയാസ് മാർ യൂലിയോസ് അധ്യക്ഷത വഹിച്ചു. മുതിർന്ന മാധ്യമ പ്രവർത്തകൻ ആർ. ശ്രീകണ്ഠൻ നായർ ഉദ്ഘാടനം നിർവഹിച്ചു. കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ അനുഗ്രഹ പ്രഭാഷണം നടത്തി. ഡീൻ കുര്യാക്കോസ് എംപി, ആന്‍റണി ജോണ്‍ എംഎൽഎ, എംബിഎംഎം അസോസിയേഷൻ സെക്രട്ടറി സലിം ചെറിയാൻ, മാർത്തോമാ ചെറിയപള്ളി വികാരി ഫാ. ജോസ് മാത്യു തച്ചേത്തുകുടി, നഗരസഭാധ്യക്ഷൻ കെ.കെ. ടോമി, നെല്ലിക്കുഴി പഞ്ചായത് പ്രസിഡന്‍റ് പി.എം. മജീദ്, മാർ ബസേലിയോസ് ഡെന്‍റൽ കോളജ് പ്രിൻസിപ്പൽ ബൈജു പോൾ കുര്യൻ, ട്രഷറർ ബിബിൻ ജോണ്‍, അസോസിയേഷൻ വൈസ് പ്രസിഡന്‍റ് കെ.ഒ. ഷാജി എന്നിവർ പ്രസംഗിച്ചു. ശ്രേഷ്ഠ ബാവായുടെ മുഖ്യ കാർമികത്വത്തിൽ മാർ ബസേലിയോസ് ഡെന്‍റൽ കോളജിന്‍റെ പുതിയ ഹോസ്റ്റൽ ബ്ലോക്കിന്‍റെ ശിലാസ്ഥാപനം നിർവഹിച്ചു. അതോടൊപ്പം കോളജിന്‍റെ 2025- 2026 പ്രവർത്തനങ്ങൾ ഉൾപ്പെടുത്തിയ ന്യൂസ് ലെറ്റർ ഏലിയാസ് മാർ യൂലിയോസ് മെത്രാപ്പോലീത്ത പ്രകാശനം ചെയ്തു. ചടങ്ങിൽ മാർത്തോമാ ചെറിയപള്ളി ഭരണ സമിതിയംഗങ്ങൾ, എംബിഎംഎം അസോസിയേഷന്‍റെ വിവിധ സ്ഥാപനങ്ങളിൽ നിന്നുള്ള ഡോക്ടർമാർ, അധ്യാപകർ, അനധ്യാപകർ, വിദ്യാർഥികൾ എന്നിവർ പങ്കെടുത്തു.

റോഡ് തകർന്ന നിലയിൽ

പാലക്കുഴ: തൊടുപുഴ - പിറവം റോഡിൽ പാലക്കുഴ എംസി കവലയ്ക്ക് സമീപം റോഡ് തകർന്ന നിലയിൽ. കുമരകം - കന്പംമേട് സ്റ്റേറ്റ് ഹൈവേയുടെ ഭാഗമായ ടി.പി റോഡിൽ പാലക്കുഴ എം.സി കവലയ്ക്ക് സമീപം റോഡിൽ വലിയകുഴികൾ രൂപപ്പെടുകയും നിത്യേന അപകടങ്ങൾ പതിവായിരിക്കുകയാണ്. ഈ റോഡിൽ മാറിക മുതൽ കരിന്പന വരെയുള്ള ഭാഗം ഒരു മാസം മുന്പാണ് പുനർനിർമിച്ചത്. റോഡ് ഉയർത്തുകയും ഇരുവശവും കോണ്‍ക്രീറ്റ് ചെയ്തു വെള്ളം കെട്ടിക്കിടക്കുന്നത് ഒഴിവാക്കുന്നതിനുള്ള മാർഗവും സ്വീകരിച്ചിരുന്നു. എന്നാൽ നിർമാണത്തിലെ അശാസ്ത്രീയതയും ഉപയോഗിച്ച വസ്തുക്കളുടെ ഗുണനിലവാരമില്ലായ്മയും ചുരുങ്ങിയ ദിവസങ്ങൾക്കുള്ളിൽ ഈ ഭാഗത്തെ റോഡിലെ ടാറിംഗ് പൊളിഞ്ഞു പോവുകയും വലിയ കുഴികൾ രൂപപ്പെടുന്നതിനും കാരണമായി. മഴക്കാലത്ത് കുഴികളിൽ വെള്ളം കെട്ടിനിന്ന് ഇവിടെ അപകടം നിത്യസംഭവമായി മാറിയിരിക്കുകയാണ്. ധാരാളം സ്കൂൾ വാഹനങ്ങളും, മറ്റും കടന്നുപോകുന്ന വഴിയാണിത്. അടിയന്തരമായി റോഡ് യുദ്ധകാലാടിസ്ഥാനത്തിൽ സഞ്ചാരയോഗ്യമാക്കണമെന്ന് ആവശ്യപ്പെട്ട് ബ്ലോക്ക് പഞ്ചായത്തംഗം സിബി ജോർജ് അധികാരികൾക്ക് പരാതി നൽകി.

കനത്ത മഴയിൽ വീട് തകർന്നു

പറവൂർ : തിങ്കൾ രാത്രി പെയ്ത കനത്ത മഴയിൽ വീട് തകർന്ന് വീണു. വടക്കേക്കര പഞ്ചായത്ത് 20-ാം വാർഡിൽ ചെട്ടിക്കാട് നാലുകണ്ടത്തിൽ ജാനകി കൃഷ്ണന്‍റെഋ വീടാണ് മഴയിലും കാറ്റിലും തകർന്നു വീണത്. ഇളയമകൻ രജീവും കുടുംബവുമാണ് 79 കാരിയായ ജാനകി കൃഷ്ണനോടൊപ്പം വീട്ടിൽ താമസിക്കുന്നത്. സ്കൂൾ അവധി ആയതിനാൽ ഇവർ ബന്ധു വീട്ടിൽ പോയതിനാൽ സംഭവസമയത്ത് വീട്ടിൽ ആരും ഉണ്ടാകാതിരുന്നത് വൻ അപകടം ഒഴിവാക്കി. വടക്കേക്കര പഞ്ചായത്ത് അധികൃതരുംമൂത്തകുന്നം വില്ലേജ് ഓഫീസ് ഉദ്യോഗസ്ഥരും സ്ഥലത്തെത്തി പരിശോധന നടത്തി. ഇവർക്ക് താമസിക്കാൻ താൽക്കാലിക സംവിധാനം ഒരുക്കിയിട്ടുണ്ട്.

റോഡിലേക്ക് മരംവീണ് വിദ്യാർഥിനി അടക്കം രണ്ടുപേർക്ക് പരിക്ക്

ഏലൂർ: ഏലൂർ പാട്ടുപുരക്കൽ കവലയിലുള്ള പതിറ്റാണ്ടുകൾ പഴക്കമുള്ള ക്ഷേത്ര പരിസരത്തെ കൂറ്റൻ ആൽമരത്തിന്‍റെ ഒരു ഭാഗം റോഡിലേക്ക് ഒടിഞ്ഞു വീണു. സ്കൂൾ കുട്ടിയടക്കം രണ്ടു പേർക്ക് പരിക്കേറ്റു. ഇന്നലെ രാവിലെ എട്ടോടെയായിരുന്നു സംഭവം. ധാരാളം കുട്ടികളും ജോലിക്ക് പോകാൻ എത്തിയ മുതിർന്നവരും ഇവിടെയുണ്ടായിരുന്നു. സ്വകാര്യ ബസിൽ ആളുകൾ കയറി പ്പോയ ഉടനെയാണ് അപകടമുണ്ടായത്. അതുകൊണ്ട് വൻ ദുരന്തം ഒഴിവായി. ഇവിടെ ബസ് കാത്ത് നിന്ന മഞ്ഞുമ്മൽ ഗാർഡിയൻ എഞ്ചൽസ് സ്കൂളിലെ വിദ്യാർഥിനിയും അധ്യാപികയുമാണ് അപകടത്തിൽപ്പെട്ടത്. ഒമ്പതാം ക്ലാസിൽ പഠിക്കുന്ന ഏലൂർ മന്ത്രത്ത് പമ്പിൽ കൃഷ്ണകുമാറിന്‍റെ മകൾ കീർത്തി (13) എന്ന കുട്ടിക്ക് തലയ്ക്കാണ് പരിക്ക്. പ്രാഥമിക ചികിത്സക്ക് ശേഷം വിദഗ്ധ ചികിത്സക്കായി അമൃത ആശുപത്രിയിലേക്ക് മാറ്റി, അധ്യാപികയായ ഏലൂരിൽ വാടകയ്ക്ക് താമസിക്കുന്ന ചേരാനല്ലൂർ തോട്ടക്കകത്ത് വീട്ടിൽ സ്ലെഫിൻ സാജു ( 54) മഞ്ഞുമ്മൽ ആശുപത്രിയിലുമാണ് ചികിത്സയ്ക്കായി പ്രവേശിപ്പിച്ചത്. ഇവർക്ക് കാലിൽ പൊട്ടലുണ്ട്. പരിസരത്തെ മൂന്നോളം വൈദ്യുത പോസ്റ്റുകൾ ഒടിഞ്ഞു വീണിരുന്നു. പ്രദേശത്തെ വൈദ്യുതി നിലച്ചു. സമീപത്തെ കടകൾക്കും നാശനഷ്ടമുണ്ടായി. മണിക്കൂറുകൾ ഗതാഗതക്കുരുക്കുമുണ്ടായി. ഏലൂർ, പറവൂർ ഭാഗത്തു നിന്നുമെത്തിയ ഫയർഫോഴ്സും പോലീസും നാട്ടുകാരും ചേർന്ന് ഏറെ നേരത്തെ പരിശ്രമത്തിനൊടുവിൽ മരം മുറിച്ചുമാറ്റിയാണ് ഗതാഗതം പുനസ്ഥാപിച്ചത്.

സേക്രഡ് ഹാർട്ട്‌ സിഎംഐ പബ്ലിക് സ്കൂളിൽ "ലോറേറ്റ്സ് ഡേ'

കൊച്ചി: ചെറിയ നേട്ടങ്ങളിൽ അഭിരമിക്കാതെ വലിയ ലക്ഷ്യങ്ങൾക്കു വേണ്ടി പ്രവർത്തിക്കണമെന്ന് എറണാകുളം സബ് കളക്ടർ കെ. മീര പറഞ്ഞു. തേവര സേക്രഡ് ഹാർട്ട്‌ സിഎംഐ പബ്ലിക് സ്കൂളിലെ 10, 12 ക്ലാസുകളിൽ മികച്ച വിജയം നേടിയ വിദ്യാർഥകളെ അനുമോദിക്കുന്ന സമ്മേളനം "ലോറേറ്റ്സ് ഡേ' ഉദ്ഘാടനം ചെയ്യുകയായിരുന്നു അവർ. പ്രിൻസിപ്പൽ ഫാ. വർഗീസ് കാച്ചപ്പള്ളി, വൈസ് പ്രിൻസിപ്പൽ വിനിത മെൻഡസ്, ഹെഡ്മിസ്ട്രസ് സിന്ധു തറയിൽ, കെജി ഹെഡ്മിസ്ട്രസ് ബിന്ദു തോമസ് എന്നിവർ പ്രസംഗിച്ചു. 10, 12 ക്ലാസുകളിലെ സ്കൂൾ ടോപ്പർമാരായ ശ്രാവൺ പ്രശാന്ത്, സെറിൻ പദുവ, മാർക്കോസ് ബി. വർഗീസ്, ബെൻ ജോർജ് സൈമൻ, അയാന തോമസ്, നിരഞ്ജൻ എം. മേനോൻ, ആൻ തെരേസ ജോർജ് എന്നിവരെ ആദരിച്ചു.

പുതിയ എല്‍ഇഡി വിളക്കുകള്‍ തെളിയുന്നില്ല; കരാറുകാരെ കുറ്റപ്പെടുത്തി മേയര്‍

കൊച്ചി: നഗരത്തില്‍ പുതുതായി സ്ഥാപിച്ച എല്‍ഇഡി ലൈറ്റുകള്‍ തെളിയുന്നില്ലെന്ന പ്രതിപക്ഷത്തിന്‍റെ ആരോപണത്തില്‍ കരാര്‍ കമ്പിനിയെ പഴിച്ച് മേയര്‍. വിഷയം ഉന്നയിച്ച് മുന്പ് സ്മാര്‍ട്ട് സിറ്റി സിഇഒയുടെയും ഡെപ്യൂട്ടി ചീഫ് എന്‍ജിനീയറുടെയും നേതൃത്വത്തില്‍ യോഗം നടത്തിയിരുന്നു. പരിഹാരം ഉണ്ടാകാത്തത് കൊണ്ട് ലൈറ്റുകള്‍ നന്നാക്കുന്നതിനായി സിഎസ്എംഎല്ലിന് കത്തു നല്‍കുമെന്നും മേയര്‍ അഡ്വ. എം. അനില്‍കുമാര്‍ കൗണ്‍സിലില്‍ പറഞ്ഞു. എല്‍ഇഡി ലൈറ്റുകളുടെ കാര്യത്തില്‍ കുറച്ച് പ്രശ്‌നങ്ങളുണ്ട്. പുതിയ ഏജന്‍സിയാണ് പദ്ധതി ഏറ്റെടുത്തിട്ടുളളത്. മഴക്കാലത്ത് ലൈറ്റുകള്‍ പോകുന്നത് പതിവാണ്. നോര്‍ത്ത് പാലം, ദേശീയപാതയിലുമെല്ലാം എല്‍ഇഡി ലൈറ്റുകള്‍ സ്ഥാപിച്ചു. ബാക്കി പോരായ്മകള്‍ പരിഹരിക്കുന്നതിന് കത്തു നല്‍കുമെന്നു മേയര്‍ പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]