ADVERTISEMENT

ADVERTISEMENT

കെഎസ്ഇബി ജീവനക്കാർക്ക് മെഡിക്കൽ കിറ്റ് നൽകി മേരിക്വീൻസ് മിഷൻ ആശുപത്രി

കാഞ്ഞിരപ്പള്ളി: നാടിന് പ്രകാശമേകാൻ ഏത് അടിയന്തര സാഹചര്യങ്ങളിലും അഹോരാത്രം സേവനം ചെയ്യുന്ന കെഎസ്ഇബി ജീവനക്കാർക്ക് അത്യാഹിത ഘട്ടങ്ങളിൽ ഉപയോഗിക്കുന്നതിന് ആവശ്യമായ മരുന്നുകൾ ഉൾപ്പെടുന്ന മെഡിക്കൽ കിറ്റ് നൽകി കാഞ്ഞിരപ്പള്ളി മേരിക്വീൻസ് മിഷൻ ആശുപത്രി.

കെഎസ്ഇബി പൊൻകുന്നം ഡിവിഷനു കീഴിലുള്ള സബ് ഡിവിഷനുകളിലെ അസിസ്റ്റന്‍റ് എക്സിക്യൂട്ടീവ് എൻജിനിയർമാർ, പാമ്പാടി മുതൽ കൂട്ടിക്കൽവരെയുള്ള വിവിധ വൈദ്യുതി സെക്‌ഷനുകളിലെ അസിസ്റ്റന്‍റ് എൻജിനിയർമാർ തുടങ്ങിയവർ പങ്കെടുത്ത ചടങ്ങിൽ മേരിക്വീൻസിലെ എമർജൻസി ഫിസിഷൻ ഡോ. നവീൻ വടക്കൻ ജീവനക്കാരുടെ സംശയങ്ങൾക്ക് ഉത്തരം നൽകി.

ഓരോ സെക്‌ഷനുകൾക്കും ലഭ്യമാക്കിയ മെഡിക്കൽ കിറ്റുകൾ പൊൻകുന്നം വൈദ്യുതി ഡിവിഷൻ എൻജിനിയർ ഡെന്നീസ്‌ ജോസഫിന്‍റെ സാന്നിധ്യത്തിൽ അതാത് സെക്‌ഷനുകളിലെ അസിസ്റ്റന്‍റ് എൻജിനിയർമാർക്ക് മേരിക്വീൻസ് ഫിനാൻഷൽ അഡ്മിനിസ്ട്രേറ്റർ ഫാ. മാർട്ടിൻ മണ്ണനാൽ സിഎംഐ കൈമാറി.

ADVERTISEMENT

കരിപ്പൂത്തട്ട് ഗവ. ഹൈസ്കൂളിന്‍റെ പഴയ കെട്ടിടം നിലംപൊത്താറായ നിലയിൽ

ആർപ്പൂക്കര: വിദ്യാർഥികളുടെയും അധ്യാപകരുടെയും ജീവനു ഭീഷണിയായി കരിപ്പൂത്തട്ട് ഗവൺമെന്‍റ് ഹൈസ്കൂളിന്‍റെ പഴയ കെട്ടിടം ഏതു സമയത്തും നിലംപൊത്താമെന്ന നിലയിൽ. 70ൽ അധികം വർഷം പഴക്കമുള്ള കെട്ടിടമാണിത്. കെട്ടിടം ശോച്യാവസ്ഥയിലായതിനെത്തുടർന്ന് തൊട്ടടുത്തുള്ള കെട്ടിടത്തിലേക്ക് ക്ലാസുകൾ മാറ്റുകയായിരുന്നു. കെട്ടിടത്തിന്‍റെ ഭിത്തികൾക്ക് ബലക്ഷയം സംഭവിച്ചും മേൽക്കൂര ഓടുകൾ തകർന്ന് മഴവെള്ളം ഉള്ളിലേക്കു വീഴുന്ന നിലയിലുമാണ്. ഏതുസമയത്തും നിലംപൊത്താവുന്ന ഈ കെട്ടിടത്തിന്‍റെ അടുത്തുകൂടിയാണ് വിദ്യാർഥികളും അധ്യാപകരും ക്ലാസ് മുറികളിലേക്കു പോകുന്നത്. ഇതിന്‍റെ തൊട്ടടുത്ത് ഓടിക്കളിക്കുന്ന കുട്ടികൾ അധ്യാപകരുടെ കണ്ണുവെട്ടിച്ച് പൊളിഞ്ഞ ജനൽവഴി കെട്ടിടത്തിന്‍റെ ഉള്ളിൽ പ്രവേശിക്കാറുമുണ്ട്. ഇത് വലിയ അപകടങ്ങൾക്ക് വഴിവച്ചേക്കാം. ഒന്നു മുതൽ 10 വരെ ക്ലാസുകളിലായി 70ഓളം കുട്ടികളും അധ്യാപകരും അനധ്യാപകരുമായി 17 ജീവനക്കാരുമുണ്ട്. ഈ കെട്ടിടം പൊളിച്ചുനീക്കണമെന്നാവശ്യപ്പെട്ട് നിരവധി തവണ സ്കൂൾ അധികൃതർ ജില്ലാ പഞ്ചായത്ത് അധികൃതരെ സമീപിച്ചെങ്കിലും നടപടിയായില്ല. 2022 മുതൽ പഴയ കെട്ടിടത്തിൽ ക്ലാസ് നടക്കുന്നില്ല. 24ൽ ആർപ്പൂക്കര പഞ്ചായത്ത് എൻജിനിയർ കെട്ടിടം പ്രവർത്തനയോഗ്യമല്ലെന്നു റിപ്പോർട്ട് നൽകിയിട്ടുള്ളതാണ്. സ്കൂൾ കെട്ടിടത്തിന് പുറകുവശത്ത് കാടുകയറി ഇഴജന്തുക്കളുടെ ശല്യവും രൂക്ഷമാണ്. ഇക്കാര്യം ആർപ്പൂക്കര പഞ്ചായത്ത്-ജില്ലാ പഞ്ചായത്ത് അധികൃതരെയും അറിയിച്ചെങ്കിലും പരിസരം വൃത്തിയാക്കാൻ നടപടിയില്ല. അതേസമയം, കാർത്തികപ്പള്ളിയിൽ കഴിഞ്ഞദിവസം സ്കൂൾ കെട്ടിടം ഇടിഞ്ഞുവീണ് അപകടമുണ്ടായ സാഹചര്യത്തിൽ പഴയ സ്കൂൾ കെട്ടിടം പൊളിച്ചുനീക്കാൻ നടപടിയെടുത്തിട്ടുണ്ടെന്ന് ഇന്നലെ ജില്ലാ പഞ്ചായത്ത് അധികൃതർ അറിയിച്ചെന്ന് പ്രധാനാധ്യാപകൻ ദീപു ജി. പറഞ്ഞു. സ്കൂളിന് ഭീഷണിയായി കൂറ്റൻ തേക്ക് മരം ആർപ്പുക്കര: കരിപ്പൂത്തട്ട് ഗവൺമെന്‍റ് ഹൈസ്കൂളിന് ഭീഷണിയായി കൂറ്റൻ തേക്കുമരവും. സ്കൂൾ കെട്ടിടത്തോട് ചേർന്നാണ് കൂറ്റൻ തേക്കുമരം നിൽക്കുന്നത്. ശക്തമായ കാറ്റിലും മഴയിലും തേക്കുമരം ആടിയുലയുന്നത് വിദ്യാർഥികൾക്കും അധ്യാപകർക്കും സമീപത്തെ വീട്ടുകാർക്കും ഭീഷണിയായിരിക്കുയാണ്. തേക്കിന്‍റെ അടിഭാഗത്ത് വേര് ഇളകുന്ന തരത്തിൽ വലിയ പൊത്ത് രൂപപ്പെട്ടിട്ടുണ്ട്. ഇതിൽ പാമ്പ് കയറി ഇരിക്കുന്നത് കണ്ടിട്ടുണ്ടെന്ന് സമീപവാസി പറഞ്ഞു. തേക്ക് വെട്ടിമാറ്റുന്നതിന് സ്കൂൾ അധികൃതർ പലതവണ ജില്ലാ പഞ്ചായത്ത് അധികൃതരെ സമീപിച്ചിരുന്നു. ഇതിന്‍റെ അടിസ്ഥാനത്തിൽ വനംവകുപ്പ് ഉദ്യോഗസ്ഥരെത്തി മുൻവർഷം തേക്ക് ലേലം ചെയ്യുന്നതിന് വിലയിട്ടിരുന്നു. രണ്ടരലക്ഷം രൂപയാണ് വില നിശ്ചയിച്ചത്. എന്നാൽ ലേലം വിളിക്കാൻ കച്ചവടക്കാരെത്തിയില്ല. തുടർന്ന് കഴിഞ്ഞവർഷം ഒരു ലക്ഷത്തിരണ്ടായിരം രൂപ വില നിശ്ചയിക്കുകയും ഒരു കച്ചവടക്കാരൻ മരം ലേലത്തിൽ പിടിക്കുകയും ചെയ്തിരുന്നു. മറ്റൊരു കച്ചവടക്കാരൻ ഇതിനെതിരേ പരാതി നൽകിയതോടെ മരം മുറി നടന്നില്ല. ഇന്നലെ തേക്കിന്‍റെ കമ്പ് ഇറക്കുന്നതിന് ജില്ലാ പഞ്ചായത്ത് ഫണ്ട് അനുവദിച്ചതായാണ് വിവരം.

ബിസിഎം കോളജ് സ്ത്രീ വിദ്യാഭ്യാസത്തിന്‍റെയും ശക്തീകരണത്തിന്‍റെയും ഉദാത്ത മാതൃക: മന്ത്രി വാസവന്‍

കോട്ടയം: കോട്ടയത്തിന്‍റെ അഭിമാനമായ ബിസിഎം കോളജ് സ്ത്രീ വിദ്യാഭ്യാസത്തിന്‍റെയും ശക്തീകരണത്തിന്‍റെയും ഉദാത്ത മാതൃകയാണെന്ന് മന്ത്രി വി.എന്‍. വാസവന്‍. കോളജിന്‍റെ സപ്തതി ആഘോഷ സമാപന സമ്മേളനം ഉദ്ഘാടനം ചെയ്യുകയായിരുന്നു മന്ത്രി വാസവന്‍. സ്ത്രീകള്‍ വിദ്യാസമ്പന്നരാകുന്നതുവഴി രാജ്യ പുരോഗതി തന്നെയാണ് സാധ്യമാകുന്നതെന്നും മന്ത്രി പറഞ്ഞു. കോട്ടയം ആര്‍ച്ച്ബിഷപ് മാര്‍ മാത്യു മൂലക്കാട്ട് അധ്യക്ഷത വഹിച്ചു. തിരുവഞ്ചൂര്‍ രാധാകൃഷ്ണന്‍ എംഎല്‍എ മുഖ്യപ്രഭാഷണം നടത്തി. കോളജ് മാനേജര്‍ ഫാ. ഏബ്രഹാം പറമ്പേട്ട് അനുഗ്രഹപ്രഭാഷണം നടത്തി. സപ്തതി വര്‍ഷത്തില്‍ കോളജിലെ അധ്യാപകരും വിദ്യാര്‍ഥികളും ചേര്‍ന്നൊരുക്കിയ പുസ്തകത്തിന്‍റെ പ്രകാശനം ആര്‍ച്ച്ബിഷപ് മാര്‍ മാത്യു മൂലക്കാട്ട്, കോളജ് മാനേജര്‍ ഫാ. ഏബ്രഹാം പറമ്പേട്ടിനു നല്‍കി നിര്‍വഹിച്ചു. കൊമേഴ്‌സ്, മാത്തമാറ്റിക്‌സ് റിസര്‍ച്ച് സെന്‍ററുകളുടെ ഉദ്ഘാടനം ആര്‍ച്ച്ബിഷപ് മാർ മാത്യു മൂലക്കാട്ടും സെന്‍റര്‍ ഫോര്‍ വുമണ്‍ എംപവര്‍മെന്‍റ് ആന്‍ഡ് അപ്കില്ലിംഗ് ഉദ്ഘാടനം മന്ത്രി വി.എന്‍. വാസവനും നിര്‍വഹിച്ചു. ബിസിഎം ലീഡ് ഐഎഎസ് അക്കാദമിയുടെ ഉദ്ഘാടനം തിരുവഞ്ചൂര്‍ രാധാകൃഷ്ണനും സെന്‍റര്‍ ഫോര്‍ റോബോട്ടിക് ആന്‍ഡ് എഐയുടെ ഉദ്ഘാടനം തോമസ് ചാഴികാടനും സെന്‍റര്‍ ഫോര്‍ ഫോറിന്‍ ലാംഗ്വേജസ് ഉദ്ഘാടനം ഡോ. ജോസ് ജയിംസും സെന്‍റര്‍ ഫോര്‍ പേഴ്‌സണല്‍ ഡെവലപ്‌മെന്‍റ് ആന്‍ഡ് പ്ലേസ്‌മെന്‍റ് ഉദ്ഘാടനം ഫാ. ഏബ്രഹാം പറമ്പേട്ടും ബിസിഎം ഏവിയേഷന്‍ അക്കാദമിയുടെ ഉദ്ഘാടനം ഷെവലിയാര്‍ ജോയി ജോസഫ് കൊടിയന്തറയും നിര്‍വഹിച്ചു. സെന്‍റർ ഫോര്‍ ഇന്ത്യന്‍ നോളജ് സിസ്റ്റത്തിന്‍റെ ഉദ്ഘാടനം സിസ്റ്റര്‍ കരുണയും സെന്‍റര്‍ ഫോര്‍ ഇന്നൊവേഷന്‍ ഇന്‍കുബേഷന്‍ ആന്‍ഡ് എന്‍റര്‍പ്രണര്‍ഷിപ്പിന്‍റെ ഉദ്ഘാടനം ഡോ. പ്രിയ തോമസും സപ്തതി സ്മാരക സ്‌കോളര്‍ഷിപ്പ് - ബിസിഎം കെയര്‍ ഉദ്ഘാടനം കോളജ് വിദ്യാഭ്യാസ കോര്‍പറേറ്റ് സെക്രട്ടറി ഫാ. ഫില്‍മോന്‍ കളത്രയും നിര്‍വഹിച്ചു. കോളജ് പ്രിന്‍സിപ്പല്‍ പ്രഫ. ഡോ. കെ.വി. തോമസ് സ്വാഗതവും വൈസ് പ്രിന്‍സിപ്പല്‍ ഡോ. അന്നു തോമസ് കൃതജ്ഞതയും പറഞ്ഞു.

പുരയിടത്തിന്‍റെ സംരക്ഷണഭിത്തി ഇടിഞ്ഞുവീണു; അപകടം ഒഴിവായി

കടുവാക്കുളം: സമീപ പുരയിടത്തിന്‍റെ എട്ടടി ഉയരമുള്ള സംരക്ഷണഭിത്തി വീട്ടുമുറ്റത്തേക്ക് ഇടിഞ്ഞുവീണു. പുലര്‍ച്ചെയായതിനാല്‍ വന്‍ അപകടം ഒഴിവായതായി വീട്ടുകാര്‍. കടുവാക്കുളത്തിനു സമീപം ഇടുങ്ങാടി ഭാഗത്ത് തട്ടാംപള്ളില്‍ മുരളിയുടെ വീട്ടുമുറ്റത്തേക്കാണ് കരിങ്കല്ലില്‍ പണിത മതില്‍ ഇടിഞ്ഞുവീണത്. ഇന്നലെ പുലര്‍ച്ചെ അഞ്ചിനാണ് സംഭവം. ഈ സമയം കുടുംബാംഗങ്ങള്‍ വീടിനുള്ളിലായിരുന്നതുകൊണ്ട് അനിഷ്ട സംഭവങ്ങള്‍ ഒഴിവായി. വീടിനോട് അടുത്തുനില്‍ക്കുന്ന മതിലിന്‍റെ അവശിഷ്ടങ്ങള്‍ വീടിന്‍റെ ഭിത്തിയില്‍ വന്ന് ഇടിച്ചനിലയിലായിരുന്നു. സംഭവത്തെത്തുടര്‍ന്ന് കരിങ്കല്ലുകളും മണ്ണും നീക്കം ചെയ്യുന്നതിനുള്ള നടപടികള്‍ തുടങ്ങി.

വനിതാ കമ്മീഷന്‍ അദാലത്തില്‍ 9 പരാതികള്‍ തീര്‍പ്പാക്കി

കോട്ടയം: വനിതാ കമ്മീഷന്‍ ജില്ലാ അദാലത്തില്‍ ഒന്പത് പരാതികള്‍ തീര്‍പ്പാക്കി. വനിതാ കമ്മീഷനംഗം ഇന്ദിര രവീന്ദ്രന്‍റെ നേതൃത്വത്തില്‍ കളക്ടറേറ്റിലെ വിപഞ്ചിക ഹാളില്‍ നടന്ന അദാലത്തില്‍ ആകെ 75 പരാതികളാണ് പരിഗണനയ്ക്കു വന്നത്. ഒരെണ്ണത്തില്‍ ഭൂരേഖ തഹസില്‍ദാരുടെ റിപ്പോര്‍ട്ട് തേടി. 65 പരാതികള്‍ അടുത്ത അദാലത്തിലേക്കു മാറ്റി. ഒരു പുതിയ പരാതി പരിഗണിക്കുകയും ചെയ്തു. സ്വകാര്യ കോളജുകളില്‍ ദീര്‍ഘകാലമായി ജോലി ചെയ്യുന്ന അധ്യാപകരെ അകാരണമായി പിരിച്ചുവിടുന്ന പ്രവണത കമ്മീഷന്‍റെ ശ്രദ്ധയില്‍പ്പെട്ടു. അനധികൃതമായുള്ള പിരിച്ചുവിടലിനെതിരേ ശക്തമായ നിയമം നടപ്പാക്കേണ്ടത് ആവശ്യമാണെന്ന് കമ്മീഷന്‍ വ്യക്തമാക്കി. തൊഴിലിടങ്ങളിലുള്ള പീഡനം തടയുന്നതിനുള്ള നിയമമായ പോഷ് ആക്ട് പ്രകാരം രൂപീകരിച്ചിട്ടുള്ള ഇന്‍റേണല്‍ കമ്മിറ്റി (ഐസി) പരാതികളുടെ അടിസ്ഥാനത്തില്‍ എതിര്‍കക്ഷികള്‍ക്കെതിരേ എടുക്കുന്ന നടപടികള്‍ ശരിയായി പാലിക്കുന്നില്ലെന്ന് കമ്മീഷന്‍ പറഞ്ഞു. പുതിയ ഐസികള്‍ രൂപീകരിക്കേണ്ട‌തിന്‍റെയും നിലവിലുള്ള ഐസികള്‍ ശക്തമായി പ്രവര്‍ത്തിക്കേണ്ടതിന്‍റെയും ആവശ്യകത കമ്മീഷന്‍ ചൂണ്ടിക്കാട്ടി. വസ്തുതര്‍ക്കത്തെച്ചൊല്ലിയുള്ള ഉപദ്രവം, വിവാഹേതര ബന്ധം മുഖാന്തരം അനാഥമാകുന്ന കുട്ടികളുടെ സുരക്ഷിതത്വം എന്നീ വിഷയങ്ങളും കമ്മീഷന്‍ പരിഗണിച്ചു. ഷൈനി ഗോപി, സി.കെ. സുരേന്ദ്രന്‍, സി.എ. ജോസ് എന്നിവര്‍ അദാലത്തില്‍ പങ്കെടുത്തു.

മെഡിക്കൽ കോളജ് ആശുപത്രി കെട്ടിടം തകർന്ന് മരണപ്പെട്ട ബിന്ദുവിന്‍റെ മകൾ ഡിസ്ചാർജായി

ഗാന്ധിനഗർ: കോട്ടയം മെഡിക്കൽ കോളജ് ആശുപത്രിയിൽ കെട്ടിടം തകർന്നുവീണ് മരിച്ച തലയോലപ്പറമ്പ് സ്വദേശിനി ബിന്ദുവിന്‍റെ മകൾ നവമി ശസ്ത്രക്രിയയ്ക്കു ശേഷം ഇന്നലെ ഡിസ്ചാർജായി. സഹോദരൻ നവനീത്, ബിന്ദുവിന്‍റെ സഹോദരി രേണുക, ബന്ധു എന്നിവരോ‌ടൊപ്പമാണ് ഇന്നലെ വൈകുന്നേരം ആശുപത്രിയിൽനിന്ന് നവമി മടങ്ങിയത്. രേണുകയുടെ മകൾ ദിവ്യയുടെ എറണാകുളത്തെ വീട്ടിലാണ് നവമിയെ വിശ്രമത്തിനായി കൊണ്ടുപോയത്. ആംബുലൻസിലായിരുന്നു യാത്ര. ഇനി ഒരു മാസം കഴിഞ്ഞ് വീണ്ടും തുടർപരിശോധനയ്ക്കായി ആശുപത്രിയിൽ എത്തണമെന്ന നിർദേശം ഡോക്ടർമാർ നൽകിയിട്ടുണ്ട്. ശരീരത്തിലുണ്ടായ അണുബാധയെത്തുടർന്ന് കഴിഞ്ഞ ജൂലൈ ഒന്നിനാണ് പിതാവ് വിശ്രുതൻ, അമ്മ ബിന്ദു എന്നിവർ നവമിയെ കോട്ടയം മെഡിക്കൽ കോളജ് ആശുപത്രിയിൽ കൊണ്ടുവന്ന് അഡ്മിറ്റ് ചെയ്തത്. എന്നാൽ, ജൂലൈ മൂന്നിന് ആശുപത്രിക്കെട്ടിടം തകർന്ന് അമ്മ ബിന്ദു മരണപ്പെട്ടതോടെ ചികിത്സ നിർത്തിവച്ച് നവമി വീട്ടിലേക്ക് മടങ്ങിയിരുന്നു. പിന്നീട് സംസ്കാര ചടങ്ങുകൾക്കു ശേഷം ജൂലൈ ഏഴിന് വീണ്ടും കോട്ടയം മെഡിക്കൽ കോളജ് ആശുപത്രിയിൽ അഡ്മിറ്റായി, ഒമ്പതിന് ശസ്ത്രക്രിയ നടത്തി. ഒമ്പത് മണിക്കൂർ നീണ്ടുനിന്ന നവമിയുടെ ശസ്ത്രക്രിയ ന്യൂറോസർജറി വിഭാഗവും അനസ്തേഷ്യവിഭാഗവും ചേർന്നാണ് നടത്തിയത്. ഡിസ്ചാർജ് ചെയ്യുന്ന സമയം മന്ത്രി വി.എൻ. വാസവൻ, ആശുപത്രി സൂപ്രണ്ട് ഡോ. ടി.കെ. ജയകുമാർ, പ്രിൻസിപ്പൽ ഡോ. വർഗീസ് പുന്നൂസ്, ന്യൂറോ സർജറി മേധാവി സതീഷ്‌ ചന്ദ്രൻ തുടങ്ങിയവരും എത്തിയിരുന്നു.

തട്ടിപ്പ് കേസില്‍ പ്രതി പിടിയിലായി

പാമ്പാടി: പെരുമ്പാവൂരുള്ള ക്രഷറില്‍ ഓടിച്ച ലോറിയുടെ സിസി തവണകൾ അടയ്ക്കാമെന്നും ടെസ്റ്റിംഗ് ജോലികളും നടത്തിക്കൊള്ളാമെന്നും പറഞ്ഞു വിശ്വസിപ്പിച്ച് തട്ടിപ്പ് നടത്തിയ കേസില്‍ പ്രതി പിടിയിലായി. തൊടുപുഴ കരിമണ്ണൂര്‍ പരീക്കല്‍ വീട്ടില്‍ സന്തോഷ് കുമാരന്‍ (51) ആണ് പാമ്പാടി പോലീസിന്‍റെ പിടയിലായത്. വാഹനത്തിന്‍റെ മാസത്തവണകള്‍ അടയ്ക്കാതെയും ടെസ്റ്റിംഗ് നടപടികള്‍ ചെയ്യാതെയും വാഹനം തിരികെ നല്‍കാതെയും പരാതിക്കാരനെ തട്ടിപ്പു നടത്തുകയായിരുന്നു. കേരളത്തിലെ വിവിധ സ്റ്റേഷനുകളില്‍ പുരാവസ്തു, വാഹന തട്ടിപ്പുകേസുകള്‍ ഉള്‍പ്പെടെ 14 കേസുകളില്‍ ഇയാള്‍ പ്രതിയാണ്. ഒളിവില്‍ കഴിഞ്ഞുവന്നിരുന്ന പ്രതിയെ പാമ്പാടി പോലീസിന്‍റെ നേതൃത്വത്തില്‍ ഈരാറ്റുപേട്ടയില്‍നിന്നാണ് പിടികൂടിയിത്. പ്രതിയെ കോടതിയില്‍ ഹാജരാക്കി.

മാലിന്യത്തിനും കൂറ്റന്‍ മരങ്ങള്‍ക്കും നടുവില്‍ വീർപ്പുമുട്ടി ചങ്ങനാശേരി ഗവ. എച്ച്എസ്എസ്

ചങ്ങനാശേരി: മാലിന്യത്തിനും കൂറ്റന്‍മരങ്ങള്‍ക്കും നടുവിലാണ് ചങ്ങനാശേരി ഗവൺമെന്‍റ് സ്‌കൂള്‍. എല്‍പി, യുപി, ഹൈസ്‌കൂള്‍, ഹയര്‍ സെക്കന്‍ഡറി വിഭാഗങ്ങളിലായി വിദ്യാര്‍ഥികള്‍ പഠിക്കുന്ന ഈ സ്‌കൂളിന്‍റെ വിവിധ കെട്ടിടങ്ങളിലേക്ക് പടുകൂറ്റന്‍ മരങ്ങള്‍ എപ്പോഴും നിലംപൊത്താവുന്ന നിലയില്‍ ചാഞ്ഞും ചരിഞ്ഞും നില്‍ക്കുകയാണ്. സ്‌കൂള്‍ പരിസരത്തെ ചില മരങ്ങളുടെ ശിഖരങ്ങള്‍ വെട്ടിമാറ്റിയെങ്കിലും പല മരങ്ങളും അപകടാവസ്ഥ യിൽ നില്ക്കുകയാണ്. യുപി, ഹയര്‍സെക്കന്‍ഡറി സ്‌കൂളുകളുടെ ശൗചാലയങ്ങളുടെ മുകളിലേക്കും വന്‍മരങ്ങള്‍ ചാഞ്ഞുനില്‍ക്കുന്നുണ്ട്. ഈ മരങ്ങളുടെ ശിഖരങ്ങള്‍ വെട്ടിമാറ്റി കുട്ടികളുടെ സുരക്ഷ ഉറപ്പാക്കണമെന്നാവശ്യപ്പെട്ട് സ്‌കൂള്‍ അധികൃതര്‍ നഗരസഭാ ഭരണാധികാരികള്‍ക്ക് അറിയിപ്പ് നല്‍കിയിട്ടുണ്ട്. സ്‌കൂളിന്‍റെ പിന്നിലെ മതിൽ നിലംപൊത്താറായ നിലയിലാണ്. സ്‌കൂളിനു പിന്നിലുള്ള കവാടത്തിനു സമീപമുള്ള മാലിന്യക്കൂമ്പാരം വിദ്യാര്‍ഥികള്‍ക്കും അധ്യാപകര്‍ക്കും രോഗഭീഷണിക്കു കാരണമാണ്. സ്‌കൂള്‍ പരിസരങ്ങളില്‍ തെരുവുനായ്ക്കളുടെ ശല്യവും പതിവാണ്.

ഉമ്മന്‍ ചാണ്ടി സമാനതകളില്ലാത്ത ഭരണാധികാരി: വി.ജെ. ലാലി

ചങ്ങനാശേരി: എല്ലാ മനുഷ്യരുടെയും ജീവിതത്തെ ഒരുപോലെ സ്വാധീനിച്ച സമാനതകളില്ലാത്ത ഭരണാധികാരിയായിരുന്ന് ഉമ്മന്‍ ചാണ്ടിയെന്നു കേരള കോണ്‍ഗ്രസ് ഉന്നതാധികാര സമിതി അംഗം വി.ജെ. ലാലി. കേരള എന്‍ജിഒ അസോസിയേഷന്‍ ജില്ലാ കമ്മിറ്റിയുടെ നേതൃത്വത്തില്‍ സംഘടിപ്പിച്ച ഉമ്മന്‍ ചാണ്ടി അനുസ്മരണ സമ്മേളനവും കാരുണ്യപ്രവര്‍ത്തനങ്ങളുടെ ഉദ്ഘാടനവും നിര്‍വഹിച്ചു പ്രസംഗിക്കുകയായിരുന്നു അദ്ദേഹം. എന്‍ജിഒ അസോസിയേഷന്‍ ജില്ലാ പ്രസിഡന്‍റ് സതീഷ് ജോര്‍ജ് അധ്യക്ഷനായിരുന്നു. അസോസിയേഷന്‍ സംസ്ഥാന സെക്രട്ടേറിയറ്റ് അംഗം അഷറഫ് പറപ്പള്ളി, റോജന്‍ മാത്യു, പ്രകാശ് ജേക്കബ്, തോമസ് അക്കര, എന്‍.എസ്. സന്തോഷ്, റോബി ജെ., കെ.സി. പ്രതീഷ്കുമാര്‍, പ്രശാന്ത് സി., സനീഷ് എ., അരവിന്ദാക്ഷന്‍ കെ., ഷാഹുല്‍ ഹമീദ് തുടങ്ങിയവര്‍ പ്രസംഗിച്ചു. ചങ്ങനാശേരി ജനറല്‍ ആശുപത്രിയിലും ആയുര്‍വേദ ആശുപത്രിയിലും രോഗികള്‍ക്കും കൂട്ടിരിപ്പുകാര്‍ക്കും ഉച്ചഭക്ഷണം വിതരണം ചെയ്തു.

ആളുമാറി യുവാവിനെ വെട്ടിയ കേസിൽ രണ്ടുപേർ അറസ്റ്റിൽ

തൃക്കൊടിത്താനം: യുവാവിനെ ആളുമാറി വെട്ടിയ കേസിൽ ഗുണ്ടകൾ അറസ്റ്റിൽ. കൊലപാതകക്കേസുകൾ ഉൾപ്പെടെയുള്ള കേസുകളിൽ പ്രതിയായ കുപ്രസിദ്ധ ഗുണ്ട തൃക്കൊടിത്താനം കൊച്ചുപറമ്പിൽ പ്രമോദ് പ്രസന്നൻ, കൂട്ടാളി പ്രൈസ്മോൻ എന്നിവരെയാണ് തൃക്കൊടിത്താനം പോലീസ് അറസ്റ്റ് ചെയ്തത്. കഴിഞ്ഞദിവസം പായിപ്പാട് വെള്ളാപ്പള്ളി ഭാഗത്ത് ഗുണ്ടകൾ ബഹളമുണ്ടാക്കിയത് ചോദ്യം ചെയ്ത ആൾ എന്നു കരുതി 17ന് രാത്രി 7.30ന് പായിപ്പാട് വെള്ളാപ്പള്ളി ഭാഗത്തുനിന്നും ഓമണ്ണിൽ ഭാഗത്തേക്കുള്ള റോഡിലൂടെ നടന്നുപോയ ഒളപ്പമണ്ണിൽ സാബുവിനെയാണ് നീളമുള്ള കത്തി ഉപയോഗിച്ച് പ്രതികൾ തലയ്ക്ക് വെട്ടിപ്പരിക്കേൽപ്പിച്ചു കൊലപ്പെടുത്താൻ ശ്രമിച്ചത്. ബഹളത്തെത്തുടർന്ന് ആളുകൾ ഓടിക്കൂടിയപ്പോൾ സ്ഥലത്തുനിന്നും രക്ഷപ്പെട്ട പ്രതികൾ ജില്ല വിട്ടുപോവുകയായിരുന്നു. തുടർന്ന് സ്റ്റേഷൻ ഹൗസ് ഓഫീസർ എം.ജെ. അരുൺ, സബ് ഇൻസ്പെക്ർമാരായ ജിജി ലൂക്കോസ്, ഗിരീഷ് കുമാർ എന്നിവരുടെ നേതൃത്വത്തിൽ പോലീസ് ഉദ്യോഗസ്ഥരായ മണികണ്ഠൻ, ബിജു, സജീവ് എന്നിവർ ഉൾപ്പെടുന്ന പോലീസ് സംഘം പ്രതികൾക്കായി അന്വേഷണം നടത്തിവരികയായിരുന്നു. കൃത്യത്തിനുശേഷം ട്രെയിൻ മാർഗം ഒളിവിൽപ്പോയ പ്രമോദ് പ്രസന്നനെയും പ്രൈസിനെയും ഷൊർണൂർ റെയിൽവേ പോലീസ് ഉദ്യോഗസ്ഥരായ ഒ.പി. ബാബു, അബ്ദുൽ സത്താർ, ബിബിൻ മാത്യു എന്നിവരുടെ സഹായത്തോടെ ഷൊർണൂർ റെയിൽവേ പോലീസ് സ്റ്റേഷനിൽ വച്ചു തടഞ്ഞുവച്ചു. തുടർന്ന് തൃക്കൊടിത്താനം പോലീസെത്തി ഇവരെ അറസ്റ്റ് ചെയ്യുകയായിരുന്നു. നേരത്തെ അയൽവാസിയെ വെട്ടിപ്പരിക്കേൽപ്പിക്കാൻ ശ്രമിച്ച ഒരു സ്ത്രീയുടെ നേതൃത്വത്തിലായിയിരുന്നു ആ ക്രമണമെന്നും പോലീസ് പറഞ്ഞു. ഈ സ്ത്രീയുടെ പങ്കിനെക്കുറിച്ച് അന്വേഷിച്ചു വരുന്നതായി എസ്എച്ച്ഒ എം.ജെ. അരുൺ പറഞ്ഞു.

നിയന്ത്രണംവിട്ട് കാറുകളിലിടിച്ച കാര്‍ ഫര്‍ണിച്ചര്‍ കടയിലേക്കിടിച്ചു കയറി

നാലുകോടി: പെരുന്തുരുത്തി ബൈപാസ് റോഡില്‍ നാലുകോടി ജംഗ്ഷനു സമീപം നിയന്ത്രണം നഷ്ടമായ കാര്‍ രണ്ടു കാറുക ളിലിടിച്ച ശേഷം കടയിലേക്ക് പാഞ്ഞുകയറി. ഇന്നലെ ഉച്ചയ്ക്ക് ഒന്നിനാണ് അപകടം. തിരുവല്ല ഭാഗത്തുനിന്നു വന്ന കാര്‍ നിയന്ത്രണംവിട്ട് എതിരേ വന്ന കാറിൽ ആദ്യം ഇടിച്ചു. തുടര്‍ന്ന് സമീപത്ത് പാര്‍ക്ക് ചെയ്ത മറ്റൊരു കാറിലും ഇടിച്ചു, പിന്നാലെ ലൂക്കോസ് മാമ്മന്‍റെ ഉടമസ്ഥതയിലുള്ള ഫര്‍ണിച്ചര്‍ സ്ഥാപനത്തിലേക്ക് ഇടിച്ചുകയറി. അപകടത്തില്‍ ആര്‍ക്കും പരിക്കില്ല. അപകടനേരത്ത് കടയിലും ആളില്ലായിരുന്നു.

കപ്പയും മീന്‍കറിയും വിളമ്പി സീ ഫുഡ് ഫെസ്റ്റിവല്‍

ചങ്ങനാശേരി: കടലില്‍ ലൈബീരിയന്‍ ചരക്കുകപ്പല്‍ മുങ്ങിയതിനെത്തുടര്‍ന്ന് കടല്‍ മത്സ്യം ഭക്ഷ്യയോഗ്യമല്ലെന്ന ചില കേന്ദ്രങ്ങളുടെ പ്രചരണത്തിനെതിരേ മത്സ്യ അനുബന്ധ തൊഴിലാളി യൂണിയന്‍ സിഐടിയു ചങ്ങനാശേരി ഏരിയ കമ്മിറ്റിയുടെ നേതൃത്വത്തില്‍ സീ ഫുഡ് ഫെസ്റ്റിവല്‍ നടത്തി. പാകം ചെയ്ത വിവിധ കടല്‍ മത്സ്യങ്ങളും കപ്പയും വിതരണം ചെയ്തു. കെഎസ്ആര്‍ടിസി ജംഗ്ഷനില്‍ നടന്ന സീ ഫുഡ് ഫെസ്റ്റിവല്‍ ജോബ് മൈക്കിള്‍ എംഎല്‍എ ഉദ്ഘാടനം ചെയ്തു. ഏരിയ പ്രസിഡന്‍റ് അബ്ദുള്‍ സത്താര്‍ അധ്യക്ഷത വഹിച്ചു. നഗരസഭാ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍, എം.എസ്. സാനു, എ. സഫറുള്ള, കെ.ഡി. സുഗതന്‍ എന്നിവര്‍ പ്രസംഗിച്ചു.

വി.എസ് സ്മരണകളിൽ‍ ചങ്ങനാശേരി

ചങ്ങനാശേരി: ചങ്ങനാശേരിക്കുമുണ്ട് വി.എസിനെക്കുറിച്ചുള്ള ജ്വലിക്കുന്ന ഓര്‍മകള്‍. നിരവധി രാഷ്‌ട്രീയ, സമര പരിപാടികള്‍ക്കും തെരഞ്ഞെടുപ്പ് പ്രചാരണങ്ങള്‍ക്കും വി.എസ്. അച്യുതാനന്ദന്‍ ചങ്ങനാശേരിയിലെത്തി ആവേശം പകര്‍ന്നിട്ടുണ്ട്. പി.എ. സെയ്തുമുഹമ്മദ്, വി.ആര്‍. ഭാസ്‌കരന്‍, പി.ജെ. സാമുവേല്‍, പ്രഫ.എം.ടി. ജോസഫ് തുടങ്ങിയ ചങ്ങനാശേരിയിലെ സീനിയര്‍ സിപിഎം നേതാക്കളുമായും അദ്ദേഹം ബന്ധം പുലര്‍ത്തിയിരുന്നു. ചങ്ങനാശേരി നഗസഭ പെരുന്നയില്‍ നിര്‍മിച്ച ബസ് ടെര്‍മിനല്‍ കം ഷോപ്പിംഗ് കോംപ്ലക്‌സിന്‍റെ ഉദ്ഘാടന ചടങ്ങില്‍ അന്നത്തെ പ്രതിപക്ഷ നേതാവായിരുന്ന വി.എസ്. അച്യുതാനന്ദന്‍ മുഖ്യാതിഥിയായി പങ്കെടുത്തിരുന്നു. ഗ്രാമവികസന മന്ത്രിയായിരുന്ന അന്തരിച്ച സി.എഫ്. തോമസായിരുന്നു ഉദ്ഘാടകന്‍. 2005 ജൂലൈ 18നായിരുന്നു ഉദ്ഘാടന ചടങ്ങ്. കൃഷ്ണകുമാരി രാജശേഖരന്‍ ചെയര്‍പേഴ്‌സണും മാത്യൂസ് ജോര്‍ജ് വൈസ് ചെയര്‍മാനുമായ ഇടതു ഭരണസമിതിയുടെ കാലത്താണ് ടെര്‍മിനല്‍ നിര്‍മാണം പൂര്‍ത്തിയാക്കിയത്.

37-ാമത് അല്‍ഫോന്‍സാ തീര്‍ഥാടനം ഓഗസ്റ്റ് രണ്ടിന്; ഒരുക്കങ്ങളാരംഭിച്ചു

ചങ്ങനാശേരി: വിശുദ്ധ അല്‍ഫോന്‍സാമ്മയുടെ ജന്മഗൃഹത്തിലേക്കും കുടമാളൂര്‍ മേജര്‍ ആര്‍ക്കി എപ്പിസ്‌ക്കോപ്പല്‍ തീര്‍ഥാടന കേന്ദ്രത്തിലേക്കും ചങ്ങനാശേരി അതിരൂപതാ ചെറുപുഷ്പ മിഷന്‍ ലീഗിന്‍റെ നേതൃത്വത്തിലുള്ള അല്‍ഫോന്‍സാ തീര്‍ഥാടനം ഓഗസ്റ്റ് രണ്ടിനു നടക്കും. "ഭൂമിയിലെ മാലാഖ' എന്ന പേരില്‍ അല്‍ഫോന്‍സാമ്മയുടെ സൂക്തങ്ങള്‍ മനഃപാഠമാക്കിയും സുകൃതാഭ്യാസങ്ങള്‍ ചെയ്തും ആയിരക്കണക്കിന് കുഞ്ഞുമിഷനറിമാര്‍ തീര്‍ഥാടനത്തിനായി ഒരുങ്ങുകയാണ്. അതിന്‍റെ ഭാഗമായി 24ന് അല്‍ഫോന്‍സാ സെമിനാറും അല്‍ഫോന്‍സാ ക്വിസ് മത്സരം 27ന് ഓണ്‍ലൈനായും നടത്തും. തീര്‍ഥാടനത്തിനു മുന്നോടിയായി വിവിധ മേഖലകളിലും ശാഖകളിലും ദീപശിഖ- ഛായാചിത്ര പ്രയാണങ്ങള്‍, കുട്ടികളുടെ നേതൃത്വത്തില്‍ ഭവന സന്ദര്‍ശനങ്ങള്‍ എന്നിവ നടക്കും. പതിനായിരക്കണക്കിന് വിശ്വാസികള്‍ പങ്കെടുക്കുന്ന തീര്‍ഥാടനം ആത്മീയ അനുഭവമാക്കി മാറ്റാന്‍ വിവിധ പരിപാടികള്‍ അതിരൂപതാ ചെറുപുഷ്പ മിഷന്‍ലീഗ് ഡയറക്ടര്‍ റവ.ഡോ. വര്‍ഗീസ് പുത്തന്‍പുരയ്ക്കല്‍, അസി. ഡയറക്ടര്‍മാരായ ഫാ. സെബാസ്റ്റ്യന്‍ മാമ്പറ, ഫാ. ആന്‍റണി കിഴക്കേത്തലയ്ക്കല്‍, തീര്‍ഥാടന കമ്മിറ്റി കണ്‍വീനര്‍ ജോണ്‍സണ്‍ കാഞ്ഞിരക്കാട്ട്, ജോയിന്‍റ് കണ്‍വീനര്‍ സാലിച്ചന്‍ തുമ്പേക്കളം, അതിരൂപതാ ജോയിന്‍റ് ഡയറക്ടര്‍ സിസ്റ്റര്‍ ജെസ്‌ലിന്‍ ജെഎസ്, സിസ്റ്റര്‍ മേരി റോസ് ഡിഎസ്എഫ്എസ്, ആനിമേറ്റര്‍ ബോബി തോമസ്, അതിരൂപത ഓര്‍ഗനൈസർ പ്രസിഡന്‍റ് ടിന്‍റോ സെബാസ്റ്റ്യന്‍, ജനറല്‍ സെക്രട്ടറി എബിന്‍ ജോസഫ് എന്നിവര്‍ അറിയിച്ചു.

നമ്പർ തിരുത്തി ലോട്ടറിക്കടയിൽ നിന്നു പണം തട്ടിയെടുത്തു

നെടുംകുന്നം: നമ്പർ തിരുത്തിയ ലോട്ടറി ടിക്കറ്റ് നൽകി ലോട്ടറിക്കടയിൽനിന്ന് അയ്യായിരം രൂപ തട്ടിയെടുത്തു. നെടുംകുന്നം കവലയിൽ പ്രവർത്തിക്കുന്ന എസ്.എൽ. മഞ്ജുവിന്‍റെ കടയിൽ നിന്നാണ് കബളിപ്പിച്ച് പണം തട്ടിയെടുത്തത്. ഇന്നലെ ഉച്ചയ്ക്ക് 1.30ഓടെയാണ് സംഭവം. മുണ്ടും ഷർട്ടും ധരിച്ചെത്തിയ പ്രായമായ ആൾ നമ്പർ തിരുത്തിയ ടിക്കറ്റ് കൊടുത്തശേഷം പണം വാങ്ങി മുങ്ങുകയായിരുന്നു. ഒറ്റനോട്ടത്തിൽ നമ്പർ തിരുത്തിയത് മനസിലാകില്ല. സൂക്ഷ്മപരിശോധനയിലാണ് തട്ടിപ്പ് മനസിലായത്. പരാതിയെത്തുടർന്ന് കറുകച്ചാൽ പോലീസ് നിരീക്ഷണ കാമറകൾ കേന്ദ്രീകരിച്ച് തെളിവുകൾ ശേഖരിച്ചു.

മദ്യലഹരിയിൽ ഹൈമാസ്റ്റ് വിളക്കിൽ കയറിയയാളെ പോലീസ് താഴെയിറക്കി

കറുകച്ചാല്‍: മദ്യലഹരിയില്‍ ഹൈമാസ്റ്റ് ലൈറ്റിനു മുകളില്‍ കയറി ജനങ്ങളെയും പോലീസിനെയും വലച്ചയാളെ അനുനയത്തില്‍ പോലീസ് താഴെയിറക്കി. കറുകച്ചാല്‍ സെന്‍ട്രല്‍ ജംഗ്ഷനിലെ ഹൈമാസ്റ്റ് വിളക്കില്‍ മദ്യലഹരിയില്‍ കയറിയ കറുകച്ചാല്‍ കാരയ്ക്കാശേരിയില്‍ കെ.കെ. വേണു (51) വിനെയാണ് ശ്രമപ്പെട്ട് പോലീസ് നിലത്തിറക്കി രക്ഷിച്ചത്. ഇന്നലെ ഉച്ചകഴിഞ്ഞു മൂന്നിന് സെന്‍ട്രല്‍ ജംഗ്ഷനിലെ റൗണ്ടാനയ്ക്ക് സമീപത്തുള്ള ഹൈമാസ്റ്റ് വിളക്കിലാണ് ഇയാള്‍ കയറിയത്. മധ്യഭാഗം വരെ കയറിയ വേണു കേബിളില്‍ പിടിച്ചിരിക്കുകയായിരുന്നു. നാട്ടുകാര്‍ വിവരമറിയിച്ചതോടെ കറുകച്ചാല്‍ പോലീസെത്തി ഇയാളെ അനുനയിപ്പിച്ച് താഴെയിറക്കി. പിന്നീട് വീട്ടുകാര്‍ക്കൊപ്പം പറഞ്ഞയച്ചു.

കുറുപ്പന്തറ മേല്‍പ്പാലത്തിന് അംഗീകാരം കിട്ടിയിട്ട് 10 വര്‍ഷം

കുറുപ്പന്തറ: 2015-ലാണ് മേല്‍പ്പാലം നിര്‍മാണത്തിന് റെയില്‍വേ അംഗീകാരം നല്‍കിയത്. 2018-ലെ സംസ്ഥാന ബജറ്റിൽ പാലം നിര്‍മാണത്തിനുള്ള 30.56 കോടി രൂപ അനുവദിച്ചു. തുടര്‍ന്ന് റെയില്‍വേ ആവശ്യപ്പെട്ട പ്രകാരം ജിഎഡി (ജനറല്‍ അറേഞ്ച്‌മെന്‍റ് ഡ്രോയിംഗ് ഇന്‍ കണ്‍സ്ട്രക്ഷന്‍ ഏരിയ) സമര്‍പ്പിക്കുകയും റെയില്‍വേ പദ്ധതി അംഗീകരിക്കുകയും ചെയ്തിരുന്നു. പൊന്നുംവില നടപടി അനുസരിച്ച് നോട്ടിഫിക്കേഷന്‍ പുറപ്പെടുവിച്ച് സര്‍വേ നടപടികള്‍ പൂര്‍ത്തീകരിച്ചു സ്ഥല വിലയും കെട്ടിട വിലയും നിര്‍ണയം നടത്തി. ഇതിനിടെ രണ്ടുപേര്‍ കോടതിയില്‍ കേസ് നല്‍കിയതോടെയാണ് മേല്‍പ്പാലം നിര്‍മാണത്തിന്‍റെ തുടര്‍നടപടികള്‍ നിലച്ചത്. 2024 ഫെബ്രുവരിയില്‍ പ്രധാനമന്ത്രി നരേന്ദ്ര മോദി നിര്‍മാണോദ്ഘാടനം നിര്‍വഹിച്ച മേല്‍പ്പാലങ്ങളുടെ കൂട്ടത്തില്‍ കുറുപ്പന്തറ റെയില്‍വേ മേല്‍പ്പാലവും ഉള്‍പ്പെട്ടിരുന്നു. പാലത്തിന്‍റെ രൂപരേഖ കുറവിലങ്ങാട്-കല്ലറ റോഡില്‍ കുറുപ്പന്തറ റെയില്‍വേ ഗേറ്റിലാണ് മേല്‍പ്പാലം നിര്‍മിക്കുന്നത്. പാലത്തിന്‍റെ കുറുപ്പന്തറ ജംഗ്ഷനില്‍നിന്നു വരുന്ന ഭാഗത്ത് ഗേറ്റിന് മുമ്പായി 141.08 മീറ്ററും മണ്ണാറപ്പാറയില്‍നിന്നുള്ള ഭാഗത്ത് ഗേറ്റിന് മുമ്പായി 218.75 മീറ്ററും റെയില്‍വേ ലൈന്‍ വരുന്ന ഭാഗത്ത് 33.93 മീറ്ററും ഉള്‍പ്പെടെ 393.76 മീറ്ററാണ് മേല്‍പ്പാലത്തിന്‍റെ ആകെയുള്ള നീളം. 10.15 മീറ്റര്‍ വീതി വരുന്ന പാലത്തിന്‍റെ കാര്യേജ് വേയുടെ വീതി 7.5 മീറ്ററും ഫുട്പാത്തിന്‍റേത് 1.5 മീറ്ററുമാണ്. ഗതാഗതക്കുരുക്ക് റെയില്‍വേ സ്റ്റേഷനു സമീപത്തുതന്നെയാണ് റെയില്‍വേ ഗേറ്റ്. ട്രെയിനുകള്‍ സ്റ്റേഷനില്‍ പിടിച്ചിടുന്ന സമയത്തും ഗേറ്റ് അടഞ്ഞുതന്നെ കിടക്കും. ഇരുവശങ്ങളിലും ഈ സമയം വാഹനങ്ങളുടെ നീണ്ടനിര രൂപപ്പെടുന്നു. ഇതിനു പരിഹാരം വേണമെന്നത് നാട്ടുകാരുടെ ദീര്‍ഘകാല ആവശ്യമാണ്. കുറുപ്പന്തറയില്‍ റെയില്‍വേ മേല്‍പ്പാലം വേണമെന്ന ആവശ്യത്തിന് പതിറ്റാണ്ടുകളുടെ പഴക്കമുണ്ട്. ഇരട്ടപ്പാത പൂര്‍ത്തിയായതോടെ സ്റ്റേഷനോടു ചേര്‍ന്നുള്ള കുറുപ്പന്തറ റെയില്‍വേ ക്രോസില്‍ നാല് ട്രാക്കുകളുണ്ട്. റെയില്‍വേ ക്രോസ് അടയ്ക്കുന്ന സമയത്ത് ഗതാഗതക്കുരുക്കും അപകടങ്ങളും പതിവാണ്. നടപടികള്‍ വേഗത്തിലാക്കാനായി അധികൃതര്‍ ഉണര്‍ന്നു പ്രവര്‍ത്തിക്കണം.

കോൺക്രീറ്റ് റോഡിന് ഓടയില്ല, ഗ്രന്ഥശാലയും വീടുകളും വെള്ളക്കെട്ടിൽ

ടിവിപുരം: തീരദേശത്തിലൂടെ കോടികൾ ചെലവഴിച്ച് നിർമിച്ച കോൺക്രീറ്റ് റോഡിനൊപ്പം ഓട നിർമിക്കാതിരുന്നതിനെത്തുടർന്ന് ഗ്രന്ഥശാലാ പരിസരവും വീടുകളും വെള്ളക്കെട്ടിലമരുന്നു. ടിവിപുരം മൂത്തേടത്തുകാവ് കോട്ടച്ചിറയിലെ പണ്ഡിറ്റ് കെ.പി. കറുപ്പൻ മെമ്മോറിയൽ ഗ്രന്ഥശാലാ പരിസരവും സമീപത്തെ വീടുകളുമാണ് ആഴ്ചകളായി വെള്ളക്കെട്ട് ദുരിതത്തിലായത്. റോഡിനു സമീപം വേമ്പനാട്ടുകായലുമായി ബന്ധപ്പെട്ട് ഒഴുകുന്ന തോടു‌ണ്ടെങ്കിലും റോഡിലെ വെള്ളം കായലിലേക്കോ തോട്ടിലേക്കോ ഒഴുക്കാൻ ഓടയില്ല. കോൺക്രീറ്റ് റോഡ് തീർത്തതോടെ സമീപവീടുകളിലെ പുരയിടങ്ങളും റോഡിനൊപ്പം ഉയർന്നതോടെ പെയ്ത്തുവെള്ളം റോഡിൽ കെട്ടിനിൽക്കുകയാണ്. കെട്ടിനിൽക്കുന്ന വെള്ളത്തിൽ മാലിന്യങ്ങൾ കലർന്നതോടെ ഗുരുതരമായ ആരോഗ്യപ്രശനങ്ങൾക്കിടയാക്കുമെന്ന ആശങ്കയിലാണ് പ്രദേശവാസികൾ. റോഡിലെ വെള്ളത്തിൽ പതിവായി നീന്തിപ്പോകുന്നതിനാൽ വയോജനങ്ങൾക്കും വിദ്യാർഥികൾക്കും കാലിൽ ചൊറിച്ചിലനുഭവപ്പെടുന്നുണ്ട്. ഗ്രന്ഥശാലയിലും അനുബന്ധിച്ചുള്ള വായനശാലയിലും നിരവധി വയോജനങ്ങൾ എത്തുന്നുണ്ട്. വെള്ളം നിറഞ്ഞ റോഡിലൂടെ സഞ്ചരിക്കുന്ന വയോജനങ്ങൾ വീണു പരിക്കേൽക്കുമെന്ന സ്ഥിതിയാണുള്ളതെന്ന് പ്രദേശവാസികൾ കുറ്റപ്പെടുത്തുന്നു. മൂത്തേടത്തുകാവിൽ തുടങ്ങി പഴുതുവള്ളിവരെയുള്ള മൂന്നു കിലോമീറ്ററിലധികം വരുന്ന റോഡിന്‍റെ ഓടയില്ലാത്ത ഭാഗങ്ങളിൽ വെള്ളക്കെട്ടുണ്ടെന്ന് നാട്ടുകാർ ആരോപിക്കുന്നു. റോഡിലെ വെള്ളമൊഴുകാൻ ഓട നിർമിക്കണമെന്ന ആവശ്യം ഉന്നയിച്ചിരുന്നെങ്കിലും ബന്ധപ്പെട്ടവർ അവഗണിച്ചതായി നാട്ടുകാർ ആരോപിക്കുന്നു. റോഡിലെ വെള്ളക്കെട്ട് നീക്കി ഗതാഗതം സുരക്ഷിതമാക്കണമെന്നാണ് നാട്ടുകാരുടെ ആവശ്യം.

തലയോലപ്പറമ്പുകാരുടെ സിഐഡി ഭായ് ഇനി ഓർമച്ചിത്രം

തലയോലപ്പറമ്പ്: തലയോലപ്പറമ്പുകാരുടെ പ്രിയങ്കരനായ സിഐഡി ബാല്‍കിഷന്‍ സിംഗെന്ന ഭായി ഇനി ഓര്‍മച്ചിത്രം. പതിറ്റാണ്ടുകളായി കുട്ടികള്‍ക്കും മുതിര്‍ന്നവര്‍ക്കും പ്രിയങ്കരനായിരുന്ന സുമുഖനായിരുന്ന ഈ പഞ്ചാബി നാലുപതിറ്റാണ്ടായി തലയോലപ്പറമ്പിന്‍റെ രാപകലുകളിലെ സജീവ സാന്നിധ്യമായിരുന്നു. തികച്ചും മാന്യമായി പെരുമാറിയിരുന്ന ഭായിക്ക് നിരവധി കുടുംബങ്ങള്‍ സന്തോഷത്തോടെ ഭക്ഷണം നല്‍കിയിരുന്നു. തലയോലപ്പറമ്പ് കാര്‍ലൈന്‍ സ്റ്റുഡിയോ ഉടമ സന്തോഷിന്‍റെ ഫോട്ടോ ശേഖരത്തില്‍ ഭായിയുടെ മിഴിവുള്ള ചിത്രങ്ങളുണ്ട്. അഴിമതിക്കാരായ ഉദ്യോഗസ്ഥരെ പിടികൂടാന്‍ എത്തിയ സിഐഡിയാണെന്നു ധരിച്ച് ഭയപ്പാടോടെയാണ് ഒരു കാലത്ത് നാട്ടുകാര്‍ നോക്കിക്കണ്ടിരിരുന്നത്. തോര്‍ത്ത് തലയില്‍ കെട്ടി നീട്ടിവളര്‍ത്തിയ താടിയുമായാണ് ഭായി നടന്നിരുന്നത്. ചില സ്ഥാപനങ്ങളുടെ പരസ്യത്തിലെ മോഡലായിവരെ ഭായി മാറിയിരുന്നു. 2021-ല്‍ പനിബാധിച്ചു ചികിത്സയ്ക്കായി എറണാകുളം ജനറല്‍ ആശുപത്രിയില്‍ പ്രവേശിപ്പിച്ചിരുന്ന ഭായി കൊച്ചി വില്ലിംഗ്ടൺ ഐലന്‍ഡില്‍ അലഞ്ഞുതിരിയുന്നുവെന്നറിഞ്ഞ് തലയോലപ്പറമ്പ് സ്വദേശി ഫിറോഷ് മാവുങ്കനും കാര്‍ലൈന്‍ സ്റ്റുഡിയോ ഉടമ ചാര്‍ളിയുമടക്കമുള്ളവര്‍ കൊച്ചിയിലെത്തി ഭായിയെ കണ്ടെത്തി വല്ലകം ജീവനിലയത്തിലെത്തിച്ചു. ഞായറാഴ്ച രാവിലെ 10നാണ് മരണപ്പെട്ടത്. മൃതദേഹം വൈക്കം താലൂക്ക് ആശുപത്രി മോര്‍ച്ചറിയില്‍. നാളെ രാവിലെ 10ന് തലയോലപ്പറമ്പ് ജംഗ്ഷനില്‍ പൊതുദര്‍ശനത്തിനുശേഷം 11ന് വൈക്കം നഗരസഭാ ശ്മശാനത്തില്‍ സംസ്‌കരിക്കും.

കരിക്കിടാൻ കയറിയയാൾ തെങ്ങിനു മുകളിൽവച്ച് മരിച്ചു

തലയോലപ്പറമ്പ്: തലയോലപ്പറമ്പ് വടയാറിൽ കരിക്കിടാൻ തെങ്ങിൽ കയറിയ ഉദയനാപുരം സ്വദേശി തെങ്ങിന് മുകളിൽവച്ച് ബോധരഹിതനായതിനെത്തുടർന്ന് മരിച്ചു. കർക്കടക വാവിന് വില്പന നടത്താനായി കരിക്കിടാൻ കയറിയ ഉദയനാപുരം ഇരുമ്പൂഴിക്കര കൊച്ചുമൂലാംതോട്ടിൽ ഷിബു (51)വാണ് മരിച്ചത്. തലയോലപ്പറമ്പ് വടയാർ തേവലക്കാട്ടിൽ ഇന്നലെ രാവിലെ 10 ഓടെയായിരുന്നു സംഭവം. ഇരുവേലിക്കാട് ബലരാമന്‍റെ ഉടമസ്ഥതയിലുള്ള തെക്കേപുതുശേരിൽ പാടശേഖരത്തിന്‍റെ ബണ്ടിൽ നിൽക്കുന്ന തെങ്ങിൽനിന്നു കരിക്കിടാനായി കയറിയതായിരുന്നു ഇയാൾ. മൂന്നു തെങ്ങിൽനിന്നു കരിക്ക് ഇട്ടശേഷമാണ് ഇയാൾ നാലാമത്തെ തെങ്ങിന്‍റെ മുകളിൽ കയറിയപ്പോഴാണ് ബോധരഹിതനായത്. സമയം കഴിഞ്ഞിട്ടും ഇയാൾ താഴെ ഇറങ്ങി വരാത്തതിനെത്തുടർന്ന് ബലരാമനും നാട്ടുകാരും ചേർന്ന് നോക്കിയപ്പോഴാണ് തെങ്ങിന് മുകളിൽ ഷിബു കുഴഞ്ഞ് വീണ് കിടക്കുന്നതു കണ്ടത്. വൈക്കം ഫയർഫോഴ്സിൽ വിവരമറിയിച്ചതിനെത്തുടർന്ന് ഫയർഫോഴ്സ് യൂണിറ്റ് എത്തി വല ഉപയോഗിച്ച് മൃതദേഹം താഴെ ഇറക്കുകയായിരുന്നു. തലയോലപ്പറമ്പ് പോലീസ് മേൽനടപടി സ്വീകരിച്ചു. പോസ്റ്റ്മോർട്ടം നടപടികൾക്ക് ശേഷം മൃതദേഹം താലൂക്ക് ആശുപത്രി മോർച്ചറിയിൽ. സംസ്കാരം ബുധനാഴ്ച രാവിലെ 10ന് വീട്ടുവളപ്പിൽ. ഷിബുവിന്‍റെ ഭാര്യ: സജിത. മക്കൾ: ജയകൃഷ്ണൻ, ജയലക്ഷ്മി.

കുറപ്പന്തറ റെയില്‍വേ മേല്‍പ്പാലം: രേഖകൾ റോഡ്‌സ് ആന്‍ഡ് ബ്രിഡ്ജസ് കോര്‍പറേഷന് കൈമാറി

കുറപ്പന്തറ: കുറവിലങ്ങാട്-കല്ലറ റോഡില്‍ നിര്‍മിക്കുന്ന കുറപ്പന്തറ റെയില്‍വേ മേല്‍പ്പാലത്തിന്‍റെ നിര്‍മാണത്തിനു മുന്നോടിയായി റവന്യു വകുപ്പ് ഏറ്റെടുത്ത എല്ലാ സ്ഥലങ്ങളും ഭൂമിയുടെ മഹസര്‍ തയാറാക്കിയ രേഖകളും പൊതുമരാമത്ത് വകുപ്പിനു കീഴിലുള്ള റോഡ്‌സ് ആന്‍ഡ് ബ്രിഡ്ജസ് കോര്‍പറേഷന് മോന്‍സ് ജോസഫ് എംഎല്‍എ കൈമാറി. പദ്ധതി ടെന്‍ഡര്‍ ചെയ്യുന്നതിനു മുന്നോടിയായാണ് സ്ഥലവും രേഖകളും കൈമാറിയത്. കുറുപ്പന്തറ ഭാഗത്തുനിന്ന് കല്ലറ ഭാഗത്തേക്ക് നേരിട്ട് എല്ലാ സ്ഥലങ്ങളും പരിശോധിച്ച് റവന്യു വകുപ്പിന്‍റെ കൈവശമുള്ള രേഖകളാണ് റോഡ്‌സ് ആന്‍ഡ് ബ്രിഡ്ജസ് കോര്‍പറേഷന്‍ അധികൃതര്‍ക്ക് കൈമാറിയത്. 2018-ല്‍ കിഫ്ബിയില്‍നിന്ന് സ്ഥലം ഏറ്റെടുക്കുന്നതിനും നിര്‍മാണത്തിനും മോന്‍സ് ജോസഫ് എംഎല്‍എ ഇടപെട്ട് 30.56 കോടി രൂപ അനുവദിച്ചു. തുടര്‍ന്ന് റെയില്‍വേ ആവശ്യപ്പെട്ട പ്രകാരം ജിഎഡി സമര്‍പ്പിക്കുകയും (ജനറല്‍ അറേഞ്ച്‌മെന്‍റ് ഡ്രോയിംഗ് ഇന്‍ കണ്‍സ്ട്രക്‌ഷന്‍ ഏരിയ) റെയില്‍വേ പദ്ധതി അംഗീകരിക്കുകയും ചെയ്തു. കുറവിലങ്ങാട് - ആലപ്പുഴ മിനി ഹൈവേയില്‍ റെയില്‍വേ ക്രോസിംഗ് മൂലമുണ്ടാകുന്ന ഗതാഗതക്കുരുക്ക് പരിഹരിക്കുന്നതിനാണ് മേല്‍പ്പാല ആശയം മുന്നോട്ടുവന്നത്.

കെസിവൈഎല്‍ കോട്ടയം അതിരൂപത യുവജന ദിനാഘോഷം

കല്ലറ: കെസിവൈഎല്‍ കോട്ടയം അതിരൂപത യുവജന ദിനാഘോഷം കല്ലറ സെന്‍റ് തോമസ് ക്‌നാനായ കത്തോലിക്ക പള്ളിയില്‍ നടത്തി. അതിരൂപത പ്രസിഡന്‍റ് ജോണീസ് പി. സ്റ്റീഫന്‍റെ അധ്യക്ഷതയില്‍ കൂടിയ സമ്മേളനം കോട്ടയം ആര്‍ച്ച്ബിഷപ് മാര്‍ മാത്യു മൂലക്കാട്ട് ഉദ്ഘാടനം ചെയ്തു. ചാണ്ടി ഉമ്മന്‍ എംഎല്‍എ മുഖ്യപ്രഭാഷണം നടത്തി. ചലച്ചിത്രതാരവും തിരക്കഥാകൃത്തുമായ രഞ്ജി പണിക്കര്‍ മുഖ്യതിഥിയായിരുന്നു. അതിരൂപത ചാപ്ലയിന്‍ ഫാ. മാത്തുക്കുട്ടി കുളക്കാട്ടുകുടിയില്‍ ആമുഖസന്ദേശം നല്‍കി. കൈപ്പുഴ ഫൊറോന വികാരി ഫാ. സാബു മാലിത്തുരുത്തേല്‍ സമ്മാനദാനം നിര്‍വഹിച്ചു. ഇടവക വികാരി ഫാ. സ്റ്റീഫന്‍ കണ്ടാരപ്പള്ളി, യൂണിറ്റ് ചാപ്ലയിന്‍ ഫാ. ജോബി കാച്ചനോലിക്കല്‍, ഫൊറോന ചാപ്ലയിന്‍ ഫാ. ഫില്‍മോന്‍ കളത്ര, അതിരൂപത സെക്രട്ടറി ചാക്കോ ഷിബു, യൂണിറ്റ് പ്രസിഡന്‍റ് അഭിലാഷ് ടോമി ജോര്‍ജ് എന്നിവര്‍ പ്രസംഗിച്ചു. യുവജനദിനാഘോഷത്തോടനുബന്ധിച്ച് സംഘടിപ്പിച്ച ക്നാനായ പാരമ്പര്യ ആചാര ദൃശ്യാവിഷ്‌കാര മത്സരത്തിന്‍റെ ഉദ്ഘാടനം മന്ത്രി റോഷി അഗസ്റ്റിന്‍ നിര്‍വഹിച്ചു. ദൃശ്യാവിഷ്‌കാര മത്സരത്തില്‍ വിവിധ യൂണിറ്റുകളില്‍നിന്നായി 14 ടീമുകള്‍ പങ്കെടുത്തു. ചുങ്കം, കടുത്തുരുത്തി, കൂടല്ലൂര്‍ യൂണിറ്റുകള്‍ യഥാക്രമം ഒന്നും രണ്ടും മൂന്നും സ്ഥാനങ്ങള്‍ കരസ്ഥമാക്കി. മോനിപ്പള്ളി, പുന്നത്തുറ, ഉഴവൂര്‍, കൈപ്പുഴ, മാറിക എന്നീ യൂണിറ്റുകള്‍ പ്രോത്സാഹന സമ്മാനത്തിനും അര്‍ഹത നേടി. ജില്ലാ-സംസ്ഥാന-ദേശീയ-അന്തര്‍ദേശീയതലത്തില്‍ സമ്മാനങ്ങള്‍ നേടിയ പ്രതിഭകളെ യോഗത്തില്‍ ആദരിച്ചു. അതിരൂപത വികാരി ജനറാള്‍ ഫാ. തോമസ് ആനിമൂട്ടിലിന്‍റെ നേതൃത്വത്തില്‍ വിശുദ്ധ കുര്‍ബാനയോടെ ആരംഭിച്ച അതിരൂപത യുവജനദിനാഘോഷത്തില്‍ അതിരൂപത ഡയറക്ടര്‍ ഷെല്ലി ആലപ്പാട്ട് പതാക ഉയര്‍ത്തി. രണ്ടായിരത്തോളം യുവജനങ്ങള്‍ സമ്മേളനത്തില്‍ പങ്കെടുത്തു.

മാർച്ചും ധർണയും നടത്തി

വല്ലകം: വല്ലകം ക്ഷീരോത്പാദക സഹകരണ സംഘത്തിലെ അഴിമതിക്കും കെടുകാര്യസ്ഥതയ്ക്കുമെതിരേ കേരള കർഷക സംഘം ഉദയനാപുരം ഈസ്റ്റ് മേഖലാ കമ്മിറ്റിയുടെ നേതൃത്വത്തിൽ മാർച്ചും ധർണയും സംഘടിപ്പിച്ചു. മാർച്ചിനു ശേഷം ക്ഷീരസംഘത്തിനു മുന്നിൽ നടന്ന ധർണാസമരം കേരള കർഷകസംഘം ജില്ലാ എക്സിക്യൂട്ടീവ് അംഗം കെ. കുഞ്ഞപ്പൻ ഉദ്ഘാടനം ചെയ്തു. കർഷകസംഘം വൈക്കം ഏരിയാ സെക്രട്ടറി ടി.ടി. സെബാസ്റ്റ്യൻ അധ്യക്ഷതവഹിച്ചു.

നേത്രപരിശോധനാ ക്യാമ്പ് നടത്തി

വൈക്കം: ആശ്രയ സന്നദ്ധസേവന സംഘടനയുടെ ആഭിമുഖ്യത്തിൽ ജില്ലാ ആശുപത്രി മൊബൈൽ ഒഫ്താൽ യൂണിറ്റിന്‍റെയും ദേശീയ അന്ധതാനിയന്ത്രണ സമിതിയുടെയും സഹകരണത്തോടെ സൗജന്യ നേത്രപരിശോധനാ ക്യാമ്പ് നടത്തി. വൈക്കം മടിയത്ര എസ്എൻഡിപി ഹാളിൽ നടന്ന ക്യാമ്പ് താലൂക്ക് ആശുപത്രി സൂപ്രണ്ട് ഡോ. ട്വിങ്കിൾ പ്രഭാകർ ഉദ്ഘാടനം ചെയ്തു. ആശ്രയ ചെയർമാൻ പി.കെ. മണിലാൽ അധ്യക്ഷത വഹിച്ചു. പി.ഡി. ഉണ്ണി, പ്രീത രാജേഷ്, ഇടവട്ടം ജയകുമാർ, ബി. ചന്ദ്രശേഖരൻ, ബി. രാജശേഖരൻ, ജഗദീഷ് അക്ഷര, വി. അനൂപ്, വർഗീസ് പുത്തൻചിറ, രാജശ്രീ വേണുഗോപാൽ, പി.ഡി. ബിജിമോൾ, ടി.ആർ. ശശികുമാർ, വൈക്കം ജയൻ, എം.കെ. മഹേശൻ, സന്ധ്യാ വിനോദ്, രജനി പീതാംബരൻ, പി.വി. ഷാജിഎന്നിവർ പ്രസംഗിച്ചു. ജില്ലാ ആശുപത്രി ഒഫ്താൽമോളജിക് സർജൻ ഡോ. അനുആന്‍റണി ക്യാമ്പിന് നേതൃത്വം നൽകി.

കോട്ടയം സമരവേദികളിലും മുന്‍നിരയില്‍

കോട്ടയം: പാര്‍ട്ടി സെക്രട്ടറി, കര്‍ഷക തൊഴിലാളി യൂണിയന്‍ നേതാവ്, പ്രതിപക്ഷ നേതാവ്, മുഖ്യമന്ത്രി എന്നീ നിലകളില്‍ കോട്ടയം ജില്ലയുമായി നിരന്തരം ബന്ധപ്പെട്ട നേതാവായിരുന്നു വി.എസ്. അച്യുതാനന്ദന്‍. കര്‍ഷക തൊഴിലാളി നേതാവായിരിക്കെ ആര്‍ ബ്ലോക്കിലെയും അപ്പര്‍ കുട്ടനാട്ടിലെയും കര്‍ഷക തൊഴിലാളികളെ സംഘടിപ്പിക്കാനും സമരങ്ങള്‍ക്ക് നേതൃത്വം കൊടുക്കാനും പലതവണ എത്തിയിട്ടുണ്ട്. പാര്‍ട്ടി സെക്രട്ടറിയായിരുന്നപ്പോള്‍ സംഘടനാ പ്രവര്‍ത്തനങ്ങള്‍ക്ക് നേതൃത്വം കൊടുക്കാനും കോട്ടയത്ത് എത്തിയിരുന്നു. കെ.കെ. ജോസഫ്, എം.ജെ. ജേക്കബ്, വി.കെ. ഗോപിനാഥന്‍, തമ്പി പൊടിപാറ, എം.പി. സെബാസ്റ്റ്യന്‍ എന്നിവരായിരുന്നു അടുപ്പമുള്ള സിപിഎം നേതാക്കള്‍. വി.എസ് ഗ്രൂപ്പ് പാര്‍ട്ടിയില്‍ ശക്തിപ്പെട്ടപ്പോള്‍ വി.കെ. ഗോപിനാഥന്‍റെ നേതൃത്വത്തില്‍ കുറെയാളുകള്‍ വി.എസിനൊപ്പം നിലകൊണ്ടു. പ്രതിപക്ഷ നേതാവായിരിക്കെ കിളിരൂരിലെ ശാരിയുടെ മരണവുമായി ബന്ധപ്പെട്ട് ആദ്യംമുതല്‍ വിഎസ് പോരാട്ടത്തിനുണ്ടായിരുന്നു. മൂന്നാര്‍ കൈയേറ്റം ഒഴിപ്പിക്കാന്‍ സമരം നയിച്ചതിനു ശേഷം വേമ്പനാട്ടു കായലിലെ കൈയേറ്റത്തിനെതിരേ സമരത്തിനു നേതൃത്വം കൊടുത്തു. കുമരകം മുതല്‍ തണ്ണീര്‍മുക്കം വരെ ഡിവൈഎഫ്‌ഐ സംഘടിപ്പിച്ച മനുഷ്യച്ചങ്ങലയ്ക്കും വി.എസ് എത്തിയിരുന്നു. മുഖ്യമന്ത്രിയായപ്പോള്‍ ജില്ലയിലെ എല്ലാ നിയോജക മണ്ഡലങ്ങളിലും സര്‍ക്കാര്‍ പരിപാടികളിലും സമ്മേളനങ്ങളിലും എത്തിയിരുന്നു. ഒടുവില്‍ പ്രതിപക്ഷ നേതാവായിരിക്കെ മൂന്നിലവിലെ അനധികൃത ക്വാറി സന്ദര്‍ശിക്കാനും എത്തി. ഔദ്യോഗിക പദവികള്‍ വഹിച്ചിരുന്നപ്പോള്‍ കോട്ടയത്ത് എത്തിയാല്‍ നാട്ടകം ഗസ്റ്റ് ഹൗസിലും കോട്ടയം റസ്റ്റ് ഹൗസിലുമായിരുന്നു താമസം. പതിവു ദിനചര്യകളായ യോഗ, നടത്തം, എണ്ണ തേച്ചുള്ള കുളി, പ്രത്യേക ഭക്ഷണങ്ങള്‍ എന്നിവയെല്ലാം നിര്‍ബന്ധമായിരുന്നു. അനുശോചന പ്രവാഹം കോട്ടയം: മുന്‍ മുഖ്യമന്ത്രി വി.എസ്. അച്യുതാനന്ദന്റെ വിയോഗത്തില്‍ മന്ത്രി വി.എന്‍. വാസവന്‍, ചീഫ് വിപ്പ് ഡോ. എന്‍. ജയരാജ്, എംപിമാരായ ജോസ് കെ. മാണി, ആന്‍റോ ആന്‍റണി, കൊടിക്കുന്നില്‍ സുരേഷ്, ഫ്രാന്‍സിസ് ജോര്‍ജ്, എംഎല്‍എമാരായ സി.കെ. ആശ, ചാണ്ടി ഉമ്മന്‍, ജോബ് മൈക്കിള്‍, തിരുവഞ്ചൂര്‍ രാധാകൃഷ്ണന്‍, സെബാസ്റ്റ്യന്‍ കുളത്തുങ്കല്‍, മാണി സി. കാപ്പന്‍, മോന്‍സ് ജോസഫ്, ബിജെപി നേതാവ് പി.സി. ജോര്‍ജ്, ബിജെപി സംസ്ഥാന വൈസ് പ്രസിഡന്‍റ് ഷോണ്‍ ജോര്‍ജ്, തൃണമൂല്‍ കോണ്‍ഗ്രസ് നേതാവ് സജി മഞ്ഞക്കടമ്പില്‍, ബിജെപി ജില്ലാ പ്രസിഡന്‍റ് ലിജിന്‍ ലാല്‍, വിവിധ രാഷ്ട്രീയ കക്ഷി നേതാക്കളായ വൈക്കം വിശ്വന്‍, വി.ബി. ബിനു, നാട്ടകം സുരേഷ്, ഫിലിപ്പ് ജോസഫ്, ടി.ആര്‍. രഘുനാഥന്‍, കെ.സുരേഷ്‌കുറുപ്പ്, എം.ടി. കുര്യന്‍, ബെന്നി മൈലാടൂര്‍ തുടങ്ങിയവര്‍ അനുശോചിച്ചു. മഹാത്മാ ഗാന്ധി സര്‍വകലാശാലാ വൈസ് ചാന്‍സലര്‍ ഡോ. സി.ടി. അരവിന്ദകുമാര്‍ അനുശോചിച്ചു. ഉന്നത വിദ്യാഭ്യാസ മേഖലയില്‍ ക്രിയാത്മകമായ പല പരിഷ്കാരങ്ങളും അദ്ദേഹത്തിന്‍റെ ഭരണകാലത്ത് നടപ്പാക്കിയിരുന്നതായി വൈസ് ചാന്‍സലര്‍ അനുസ്മരിച്ചു. പൂഞ്ഞാറിലുണ്ട് വി.എസ്. അച്യുതാനന്ദന്‍ റോഡ് കോട്ടയം: പൂഞ്ഞാറില്‍ വി.എസ്. അച്യുതാനന്ദന്‍റെ പേരില്‍ റോഡുണ്ട്. പി.സി. ജോര്‍ജ് മുന്‍കൈയെടുത്ത് വി.എസിന്‍റെ അനുമതിയോടെയാണ് റോഡ് നിര്‍മിച്ചതും പേരിട്ടതും. പൂഞ്ഞാര്‍ തെക്കേക്കര പഞ്ചായത്തില്‍ പെരിങ്ങുളത്തിനുള്ള റോഡില്‍നിന്നു ചള്ളരിക്കുന്നിലേക്കാണ് വി.എസ് റോഡ്. മുഖ്യമന്ത്രിയായിരുന്ന സമയത്ത് വി.എസ് എത്തിയാണ് റോഡ് ഉദ്ഘാടനം ചെയ്തത്.

വിവാദമായ മുണ്ടക്കയം പ്രസംഗം

കോട്ടയം: കേരള കോണ്‍ഗ്രസിലായിരുന്ന കാലത്ത് പി.സി. ജോര്‍ജുമായി വി.എസ്. അച്യുതാനന്ദനു വലിയ അടുപ്പമുണ്ടായിരുന്നു. കിളിരൂര്‍ പെണ്‍വാണിഭ കേസില്‍ ഇരയുടെ നീതിക്കായും മതികെട്ടാന്‍ അഴിമതി, മൂന്നാര്‍ കൈയേറ്റം വിഷയങ്ങളിലും വി.എസിനൊപ്പം പോരാടാന്‍ ജോര്‍ജുണ്ടായിരുന്നു. പി.സി. ജോര്‍ജിന്‍റെ മണ്ഡലമായിരുന്ന പൂഞ്ഞാറില്‍ വി.എസിന്‍റെ ഒളിവുജീവിതത്തിനിടെ പോലീസ് പിടിയിലായപ്പോള്‍ ഇടിയന്‍ വാസുപിള്ളയുടെ നേതൃത്വത്തില്‍ കടുത്ത മര്‍ദനമാണ് വി.എസിനു നേരിടേണ്ടി വന്നത്. അന്ന് തോക്കിന്‍റെ ബയണറ്റുകൊണ്ട് ഉള്ളംകാല്‍ അടിച്ചുപൊട്ടിച്ചിരുന്നു. പി.സി. ജോര്‍ജ് ഒരിക്കല്‍ വി.എസിന്‍റെ അടുത്തെത്തിയപ്പോള്‍ ബയണറ്റ് കുത്തിയിറക്കി കാല്‍ തകര്‍ത്തു എന്നു പറയുന്നത് നേരോ എന്നു ചോദിച്ചു. ഇരിപ്പിടത്തില്‍നിന്നും കാല്‍ മേശപ്പുറത്തേക്ക് കയറ്റിവച്ചു കാലിലെ പാടുകള്‍ വി.എസ് കാണിച്ചുകൊടുത്തതായി പി.സി. ജോര്‍ജ് ഓര്‍മിച്ചു. 2016 ലെ നിയമസഭാ തെരഞ്ഞെടുപ്പില്‍ പി.സി. ജോര്‍ജ് സ്വതന്ത്രനായി പൂഞ്ഞാറില്‍ മത്സരിക്കുമ്പോള്‍ എല്‍ഡിഎഫ് സ്ഥാനാര്‍ഥിയുടെ പ്രചാരണത്തിനെത്തണമെന്ന് വി.എസിനു പാര്‍ട്ടി നിര്‍ദേശം നല്‍കി. ഇതോടെ പി.സി. ജോര്‍ജിനെതിരേ പ്രസംഗിക്കാന്‍ വി.എസിനു വല്ലാത്ത ബുദ്ധിമുട്ട്. വി.എസ് പി.സി. ജോര്‍ജിനെ വിളിച്ച് എവിടെയാടോ പ്രസംഗിക്കേണ്ടത്, എന്താണ് പ്രസംഗിക്കേണ്ടതെന്ന് ചോദിച്ചു. അപ്പോള്‍ ഇഷ്ടമുള്ളത് പ്രസംഗിച്ചോ, വരുന്നതില്‍ സന്തോഷമേയുള്ളൂവെന്ന് ജോര്‍ജ് പറഞ്ഞു. മുണ്ടക്കയത്ത് പ്രസംഗിക്കാനെത്തിയ വി.എസ് പ്രസംഗത്തിനൊടുവില്‍ പി.സിക്ക് വോട്ടു ചെയ്യാന്‍ അഭ്യര്‍ഥിച്ചു. പി.സി. ജോര്‍ജാണോ പി.സി. ജോസഫാണോ എന്നു പ്രവര്‍ത്തകര്‍ ചോദിച്ചപ്പോള്‍ നീട്ടിയും കുറുക്കിയും തനതു ശൈലിയില്‍ അതു നിങ്ങള്‍ക്ക് അറിയാമല്ലോ എന്ന് പറഞ്ഞ് പ്രസംഗം അവസാനിപ്പിച്ചു. വി.എസിന്‍റെ അന്നത്തെ പ്രസംഗം വലിയ വിവാദമായി മാറി. കാലം അടയാളപ്പെടുത്തിയ കോട്ടയം സമ്മേളനം കോട്ടയം: സിപിഎം വിഭാഗീയത അഥവാ പിണറായി-വിഎസ് ചേരിപ്പോര് അതിന്‍റെ മൂര്‍ധന്യതയില്‍ നില്‍ക്കുന്ന കാലത്തായിരുന്നു 2008 ഫെബ്രവരി 14നു കോട്ടയത്ത് പാര്‍ട്ടി സംസ്ഥാനസമ്മേളനം നടന്നത്. വി.എസ് ഗ്രൂപ്പിനെ ഏറെക്കുറെ പൂര്‍ണമായി വെട്ടിനിരത്തി പിണറായി പക്ഷം പാര്‍ട്ടി ആധിപത്യം പിടിച്ച സമ്മേളനത്തിന്‍റെ സമാപനദിവസം നാഗമ്പടത്തുണ്ടായ സംഭവവികാസങ്ങള്‍ കാലം മറന്നിട്ടില്ല. സമ്മേളനവേദിയിലേക്ക് വി.എസ് വൈകിയെത്തിയപ്പോള്‍ അണികളുടെ ആവേശം അതിരുവിട്ടു. വി.എസ് പ്രസംഗിക്കുമ്പോള്‍ ആവേശഭരിതരായ പ്രവര്‍ത്തകരുടെ അച്ചടക്കമില്ലായ്മയെ പിണറായി രൂക്ഷമായി വിമര്‍ശിച്ചു: ‘’ഇത് സിപിഎം സമ്മേളനമാണ്, ഉഷാ ഉതുപ്പിന്‍റെ ഗാനമേളയല്ല’’ എന്ന പറഞ്ഞാണ് പിണറായി അണികളെ ശാസിച്ചത്. പിണറായിയുടെ മുന്നറിയിപ്പിനെത്തുടര്‍ന്നും വി.എസ് അനുകൂല മുദ്രാവാക്യം വിളികളും ബഹളവും തുടര്‍ന്നു. അതോടെ ‘’ഇങ്ങനെയൊരു സമ്മേളനമാകുമ്പോള്‍ പല തരക്കാര്‍ കടന്നുവരും. അവരെ നിയന്ത്രിക്കേണ്ടതു വോളണ്ടിയര്‍മാരാണ്. അണിഞ്ഞിരിക്കുന്ന ഡ്രസിന്‍റെ അന്തസ് വോളണ്ടിയര്‍മാര്‍ കാണിക്കണം’’ എന്ന് പിണറായി നിര്‍ദേശിച്ചു. അതോടെ റെഡ് വോളണ്ടിയര്‍മാര്‍ ഇടപെട്ട് മുദ്രാവാക്യം വിളിച്ചവരെ നിയന്ത്രിച്ചു. വി.എസ് ആരാധകരായ പ്രവര്‍ത്തകരും റെഡ് വോളണ്ടിയര്‍മാരും തമ്മില്‍ സംഘര്‍ഷമുണ്ടായി. സ്വാഗതവും അധ്യക്ഷപ്രസംഗവും ഉദ്ഘാടനപ്രസംഗവും പേരിനുമാത്രം നടന്നു. ബാക്കി പ്രസംഗകര്‍ക്കു സംസാരിക്കാന്‍ അവസരമുണ്ടായില്ല. നന്ദിപ്രകാശനം പോലും ഇല്ലാതെയാണ് സമ്മേളനം അവസാനിച്ചത്.

വാലാനിക്കല്‍ വീട്ടിലെ ഒളിവുജീവിതവും മൂവേലിത്തോട്ടിലെ കുളിയും...

ജിബിന്‍ കുര്യന്‍ കോട്ടയം: പൂഞ്ഞാര്‍ മലകളില്‍നിന്നുള്ള ചെറുചാലുകള്‍ സംഗമിക്കുന്ന മൂവേലിത്തോട്ടിലെ കുളിയും വാലാനിക്കല്‍ വീട്ടിലെ ഒളിവുജീവിതവും ഈരാറ്റുപേട്ടയില്‍നിന്നും പോലീസ് മര്‍ദനമേറ്റ് പാലാ ലോക്കപ്പിലേക്കുള്ള യാത്രയും വി.എസ്. അച്യുതാനന്ദന്‍ പലപ്പോഴും അനുസ്മരിച്ചിട്ടുണ്ട്. പോലീസിന്‍റെ ക്രൂര മര്‍ദനമേറ്റ വിഎസിന് പാലാ ഗവണ്‍മെന്‍റ് ആശുപത്രിയില്‍ ചികിത്സയില്‍ കഴിയേണ്ടിവന്നു. 1946 ഓഗസ്റ്റില്‍ ആലപ്പുഴയില്‍ നടന്ന ട്രേഡ് യൂണിയന്‍ കൗണ്‍സിലുകളുടെ സംയുക്ത സമ്മേളനത്തില്‍ പ്രസംഗിച്ചവര്‍ക്കെതിരേ ദിവാന്‍ സി.പി. രാമസ്വാമി അയ്യരുടെ പോലീസ് അറസ്റ്റ് വാറണ്ട് പുറപ്പെടുവിച്ചു. പുന്നപ്ര-വയലാര്‍ സമരവുമായി ബന്ധപ്പെട്ടു വി.എസ് പോലീസിന്‍റെ കണ്ണുവെട്ടിച്ചാണ് പൂഞ്ഞാറില്‍ ഒളിവു താമസത്തിനെത്തിയത്. കര്‍ഷകനും പാര്‍ട്ടി അനുഭാവിയുമായ വാലാനിക്കല്‍ ഇട്ടിണ്ടാന്‍റെ വീട്ടിലായിരുന്നു ഒളിവില്‍ കഴിഞ്ഞത്. ഇട്ടിണ്ടാന്‍റെ മകന്‍ സഹദേവന്‍ കമ്യൂണിസ്റ്റ് പാര്‍ട്ടി പ്രവര്‍ത്തകനായിരുന്നു. ഇദ്ദേഹവും വിഎസുമായുള്ള ബന്ധമാണ് പൂഞ്ഞാറിലെത്താന്‍ കാരണമായത്. ആലപ്പുഴയില്‍നിന്നു കുമരകംവഴി കോട്ടയത്തെത്തി നടന്നാണ് വാലാനിക്കല്‍ വീട്ടിലെത്തുന്നത്. 20 ദിവസം പൂഞ്ഞാറില്‍ താമസിച്ചു. വൈദ്യനായിരുന്ന ഇട്ടിണ്ടാനെ കാണാന്‍ ധാരാളം പേര്‍ എത്തിയിരുന്ന സാഹചര്യത്തില്‍ അവിടെ സുരക്ഷിതമല്ലെന്നു കണ്ടതോടെ സഹദേവന്‍ ഇട്ടിണ്ടാന്‍റെ സഹോദരി ചള്ളരിക്കുന്ന് കരിമാലിപ്പുഴയിലെ കുഞ്ഞുപെണ്ണിന്‍റെ വീട്ടിലേക്കു വി.എസിനെ മാറ്റി. ഗോപാലന്‍ എന്ന പേരിലായിരുന്നു വി.എസിന്‍റെ ജീവിതം. ഒളിവിലും പതിവ് ദിനചര്യകള്‍ വി.എസ് മുടക്കിയിരുന്നില്ല. ദിവസം രണ്ടു പ്രാവശ്യം പച്ചവെള്ളത്തില്‍ കുളിക്കണമെന്ന് നിര്‍ബന്ധമുണ്ടായിരുന്നു. ഇതു വീട്ടുകാര്‍ തടഞ്ഞെങ്കിലും ഒരു നേരമെങ്കിലും മൂവേലിത്തോട്ടില്‍ പോയി കുളിക്കുമായിരുന്നു. പതിവില്ലാതെ തോട്ടില്‍ ഒരാള്‍ കുളിക്കുന്നതു കണ്ട് അതുവഴി പോയ ഒരു അധ്യാപകനാണ് പോലീസില്‍ വിവരം അറിയിക്കുന്നത്. അങ്ങനെ പോലീസ് ഒരു ദിവസം പുലര്‍ച്ചെ കുളിക്കുന്നതിനിടയില്‍ വി.എസിനെ പിടികൂടുകയായിരുന്നു. ഇടിയന്‍ വാസുപിള്ള എന്ന ഇന്‍സ്പെക്ടറുടെ നേതൃത്വത്തിലായിരുന്നു അറസ്റ്റ്. ഈരാറ്റുപേട്ട സ്റ്റേഷനില്‍ രണ്ടു ദിവസത്തെ മര്‍ദനത്തിനു ശേഷം പാലായിലെ പോലീസ് ലോക്കപ്പിലേക്കു മാറ്റി. മരിച്ചെന്നു കരുതി കാട്ടില്‍ ഉപേക്ഷിക്കാൻ കൊണ്ടുപോകുമ്പോള്‍ ജീവനുണ്ടെന്ന സംശയത്തില്‍ പാലാ ഗവണ്‍മെന്‍റ് ആശുപത്രിയില്‍ പ്രവേശിപ്പിക്കുകയായിരുന്നു. രണ്ടാഴ്ച ചികിത്സയ്ക്കു ശേഷമാണ് വി.എസിനെ പൂജപ്പുര സെന്‍ട്രല്‍ ജയിലിലേക്കു മാറ്റിയത്. മുഖ്യമന്ത്രിയായിരുന്ന സമയത്ത് വി.എസ് വാലാനിക്കല്‍ വീട്ടില്‍ സന്ദര്‍ശനം നടത്തിയിരുന്നു.

കർക്കടക വാവുബലി

ഇളങ്ങുളം: 44-ാം നമ്പർ എസ്എൻഡിപി യോഗം ശാഖയിലെ ശ്രീനാരായണ ഗുരുദേവ ക്ഷേത്രത്തിൽ 24നു രാവിലെ 5.30ന് കർക്കടക വാവുബലി, പിതൃസായൂജ്യപൂജ എന്നിവ നടത്തും. പൊൻകുന്നം: എസ്എൻഡിപി യോഗം 1044-ാം നമ്പർ ശാഖാ ഗുരുദേവക്ഷേത്രാങ്കണത്തിൽ 24ന് രാവിലെ കർക്കിടക വാവുബലി നടക്കും. പാറത്തോട് തൃപ്പാലപ്ര ഭഗവതീ ക്ഷേത്രത്തോടനുബന്ധിച്ചുള്ള തീർഥക്കുളക്കരയിൽ 24ന് രാവിലെ ആറുമുതൽ പിതൃതർപ്പണത്തിനുള്ള സൗകര്യമുണ്ടായിരിക്കും. തിലഹവനം, സായൂജ്യപൂജ തുടങ്ങിയ ചടങ്ങുകളും നടക്കും. ഇളമ്പള്ളി എസ്എൻഡിപിയോഗം 4840-ാം നമ്പർ ശാഖാ ശ്രീനാരായണ ഗുരുദേവ ക്ഷേത്രത്തിൽ കർക്കിടക വാവിന് ബലിതർപ്പണം, പിതൃസായൂജ്യപൂജ എന്നിവയുണ്ടായിരിക്കും. ചേനപ്പാടി ധർമശാസ്താക്ഷേത്ര കടവിൽ 24ന് രാവിലെ 5.30 മുതൽ കർക്കടക വാവുബലി നടത്തും. തിലഹവനം, നമസ്‌കാരം എന്നിവയുമുണ്ട്. ഉരുളികുന്നം ഐശ്വര്യഗന്ധർവസ്വാമി ഭദ്രകാളിക്ഷേത്രത്തിൽ 24ന് രാവിലെ കർക്കടക വാവുബലി നടത്തും. ക്ഷേത്രത്തിന് കിഴക്കേനടയിലെ ചിറയുടെ കടവിലാണ് ബലി. ചെറുവള്ളി ദേവീക്ഷേത്രത്തിൽ 24ന് രാവിലെ അഞ്ചുമുതൽ കർക്കടകവാവുബലി നടത്തും. ചേനപ്പാടി ഇടയാറ്റുകാവ് ക്ഷേത്രത്തിൽ 24ന് രാവിലെ അഞ്ചുമുതൽ കർക്കടക വാവുബലി നടത്തും. മണിമലയാറിന്‍റെ തീരത്ത് മഹാദേവസന്നിധിയിലെ കടവിലാണ് ബലി. മേൽശാന്തി വിഷ്ണുശർമ കാർമികത്വം വഹിക്കും. ചിറക്കടവ് മഹാദേവക്ഷേത്രത്തിൽ കർക്കടകവാവിന് ബലിയിടാൻ സൗകര്യമുണ്ടായിരിക്കും. പടിഞ്ഞാറെ നടയിലെ മൈതാനത്താണ് 24ന് തർപ്പണം നടത്താൻ ക്രമീകരണമൊരുക്കും. കർക്കടകവാവുദിനത്തിൽ ക്ഷേത്രത്തിൽ മീനരി വഴിപാടുണ്ടെന്ന് മഹാദേവസേവാസംഘം ഭാരവാഹികൾ അറിയിച്ചു.

ജനറൽ ആശുപത്രിയിൽ മോഷണം നടത്തിയ പ്രതി അറസ്റ്റിൽ

കാഞ്ഞിരപ്പള്ളി: ജനറൽ ആശുപത്രിയിലെ സ്റ്റോർറൂമിൽ അതിക്രമിച്ചു കയറി മോഷണം നടത്തിയ പ്രതി അറസ്റ്റിൽ. മൂവാറ്റുപുഴ വാഴപ്പള്ളി മുടവൂർ കോരുമല പുത്തൻപുരയിൽ അർജുൻ സുരേഷി(28)നെയാണ് പൊൻകുന്നം പോലീസ് അറസ്റ്റ് ചെയ്തത്. ഞായറാഴ്ച രാവിലെ 9.15 ഓടെ ആശുപത്രിയുടെ സ്റ്റോർമുറിയിൽ കയറിയ പ്രതി 3,000 രൂപയോളം വിലവരുന്ന സാമഗ്രികൾ മോഷ്ടിക്കുകയായിരുന്നു. മോഷണത്തിനുശേഷം രക്ഷപ്പെടാൻ ശ്രമിച്ച പ്രതിയെ ആശുപത്രിയിലെ ഡോക്‌ടറും മറ്റു ജീവനക്കാരും ചേർന്ന് തടഞ്ഞുവച്ചശേഷം പോലീസിൽ അറിയിച്ചു. സ്ഥലത്തെത്തിയ പൊൻകുന്നം പോലീസ് പ്രതിയെ അറസ്റ്റ് ചെയ്ത് കോടതിയിൽ ഹാജരാക്കി. മൂവാറ്റുപുഴ പോലീസ് സ്റ്റേഷൻ റൗഡി ലിസ്റ്റിൽ ഉൾപ്പെട്ട പ്രതി അർജുൻ കോതമംഗലം, പെരുമ്പാവൂർ സ്റ്റേഷനുകളിൽ ഉൾപ്പെടെ വിവിധ കേസുകളിൽ പ്രതിയാണ്.

പൂഞ്ഞാർ മണ്ഡലത്തിലെ മികച്ച പഞ്ചായത്ത് മെംബർമാരെ ആദരിക്കും

തിടനാട്: അധ്വാനവർഗം കൾച്ചറൽ ഫോറത്തിന്‍റെ ആഭിമുഖ്യത്തിൽ പൂഞ്ഞാർ നിയോജകമണ്ഡലത്തിലെ മികച്ച പഞ്ചായത്ത്‌ മെംബറെ കണ്ടെത്തി ആദരിക്കുന്നതിന്‍റെ ഭാഗമായി ഈ മേഖലയിലെ പഞ്ചായത്ത്‌ മെംബർമാരിൽനിന്ന് വിവരങ്ങൾ ശേഖരിക്കുന്നു. താത്പര്യമുള്ള മെംബർമാർ, തങ്ങളുടെ കാലാവധിക്കുള്ളിൽ പൂർത്തീകരിക്കുന്ന അഞ്ച് ബൃഹത്തായ പദ്ധതികളുടെ വിവരങ്ങൾ നൽകണം. ഈ പദ്ധതികളുടെ മെറിറ്റ് വിദഗ്ധസമിതി പരിശോധിച്ച് മികച്ച പഞ്ചായത്ത്‌ മെംബറെ തെരഞ്ഞെടുക്കും. തെരഞ്ഞെടുക്കപ്പെടുന്ന ഗ്രാമ പഞ്ചായത്ത് മെംബർക്ക് 10,000 രൂപ കാഷ് അവാർഡും മംഗളപത്രവും നൽകും. അവാർഡ് നൽകുന്ന തീയതി പിന്നീട് അറിയിക്കും. പങ്കെടുക്കാൻ ആഗ്രഹിക്കുന്നവർ 24നു വൈകുന്നേരം ആറിനു മുമ്പായി, തോമസ് അഴകത്ത്, തിടനാട് എന്ന അഡ്രസിലോ 9847775001 ഫോൺനമ്പറിലോ ബന്ധപ്പെടണം.

വി.എസ് അവകാശബോധം ഉറപ്പിച്ച ജനനായകൻ: ഡോ. എൻ. ജയരാജ്

പൊൻകുന്നം: മണ്ണിലധ്വാനിക്കുന്ന ജനതയുടെ അവകാശബോധം ഉറപ്പിച്ച ഉജ്വല ജനനായകനെയാണ് വി.എസിന്‍റെ അന്ത്യത്തോടെ കേരളത്തിന് നഷ്ടമായതെന്ന് ചീഫ് വിപ്പ് ഡോ. എൻ. ജയരാജ്. സമൂഹത്തിന്‍റെ വളർച്ചയ്ക്കുവേണ്ടി എപ്പോഴും പ്രവർത്തിച്ച, കേരളത്തിന്‍റെ വികസനത്തിന് അടിസ്ഥാനശിലയിടുന്നതിൽ അതുല്യ സംഭാവന നൽകിയ വ്യക്തിയാണ് വി.എസ്. അച്യുതാനന്ദൻ. അദ്ദേഹത്തിന്‍റെ സ്നേഹസ്മരണയ്ക്ക് മുമ്പിൽ ഏറെ ആദരവോടെ പ്രണാമം അർപ്പിക്കുന്നതായി ചീഫ് വിപ്പ് ഡോ. എൻ. ജയരാജ് അനുശോചന സന്ദേശത്തിൽ പറഞ്ഞു. വി.എസിന്‍റെ ജ്വലിക്കുന്ന ഓർമയിൽ കോരുത്തോട് കോരുത്തോട്: മുൻ മുഖ്യമന്ത്രി വി.എസ്. അച്യുതാനന്ദന്‍റെ വിയോഗത്തിൽ അദ്ദേഹത്തിന്‍റെ ജ്വലിക്കുന്ന ഓർമകൾ പങ്കിടുകയാണ് കോരുത്തോട് നിവാസികൾ. 2005ലാണ് മുണ്ടക്കയം പഞ്ചായത്തിൽനിന്നും വേർപെട്ട് കോരുത്തോട് പഞ്ചായത്ത് നിലവിൽ വരുന്നത്. അന്ന് സംസ്ഥാനത്തെ പ്രതിപക്ഷ നേതാവായിരുന്നു വി.എസ്. അച്യുതാനന്ദൻ. ഇടതുപക്ഷത്തിന് ഭൂരിപക്ഷം ലഭിച്ച കോരുത്തോട് പഞ്ചായത്ത് മന്ദിരത്തിന്‍റെ ഉദ്ഘാടനത്തിനായിട്ട് അന്നെത്തിയത് വി.എസ്. അച്യുതാനന്ദനായിരുന്നു. 2005 ഡിസംബർ ആറിനാണ് പഞ്ചായത്തിന്‍റെ ഉദ്ഘാടനത്തിനായി വി.എസ്. അച്യുതാനന്ദൻ കോരുത്തോട്ടിൽ എത്തിയത്. നീട്ടിയും കുറുക്കിയും അണികളെ ആവേശത്തിലാക്കുന്ന വി.എസ്. അച്യുതാനന്ദന്‍റെ പ്രസംഗം ഇപ്പോഴും കോരുത്തോട് നിവാസികളുടെ മനസിലുണ്ട്. തന്‍റെ തീപ്പൊരി പ്രസംഗത്തിലൂടെ കേരളക്കരയെ ഒന്നാകെ കൈയിലെടുത്തിരുന്ന വി.എസ്. അച്യുതാനന്ദന്‍റെ പ്രസംഗം കേൾക്കാൻ അന്ന് കോരുത്തോട്ടിലേക്ക് ആയിരക്കണക്കിന് ആളുകളാണ് എത്തിയത്. തങ്ങളുടെ ആരാധ്യ നേതാവ് വിടപറഞ്ഞതിന്‍റെ വേദനയിലാണ് കോരുത്തോട് ഗ്രാമം.

37-ാമത് അല്‍ഫോന്‍സ തീര്‍ഥാടനം ഓഗസ്റ്റ് രണ്ടിന്; ഒരുക്കങ്ങളാരംഭിച്ചു

ചങ്ങനാശേരി: വിശുദ്ധ അല്‍ഫോന്‍സാമ്മയുടെ ജന്മഗൃഹത്തിലേക്കും കുടമാളൂര്‍ മേജര്‍ ആര്‍ക്കി എപ്പിസ്‌ക്കോപ്പല്‍ തീര്‍ഥാടന കേന്ദ്രത്തിലേക്കും ചങ്ങനാശേരി അതിരൂപത ചെറുപുഷ്പ മിഷന്‍ ലീഗിന്‍റെ നേതൃത്വത്തിലുള്ള അല്‍ഫോന്‍സ തീര്‍ഥാടനം ഓഗസ്റ്റ് രണ്ടിനു നടക്കും. ഭൂമിയിലെ മാലാഖ എന്ന പേരില്‍ അല്‍ഫോന്‍സാമ്മയുടെ സൂക്തങ്ങള്‍ മനഃപാഠമാക്കിയും സുകൃതാഭ്യാസങ്ങള്‍ ചെയ്തും ആയിരക്കണക്കിന് കുഞ്ഞുമിഷനറിമാര്‍ തീര്‍ഥാടനത്തിനായി ഒരുങ്ങുകയാണ്. അതിന്‍റെ ഭാഗമായി 24ന് അല്‍ഫോന്‍സ സെമിനാറും അല്‍ഫോന്‍സ ക്വിസ്മത്സരം 27 നും ഓണ്‍ലൈനായി നടത്തും. തീര്‍ഥാടനത്തിനു മുന്നോടിയായി വിവിധ മേഖലകളിലും ശാഖകളിലും ദീപശിഖ- ഛായാചിത്ര പ്രയാണങ്ങള്‍, കുട്ടികളുടെ നേതൃത്വത്തില്‍ ഭവന സന്ദര്‍ശനങ്ങള്‍ എന്നിവ നടക്കും. പതിനായിരക്കണക്കിന് വിശ്വാസികള്‍ പങ്കെടുക്കുന്ന തീര്‍ഥാടനം ആത്മീയ അനുഭവമാക്കി മാറ്റാന്‍ വിവിധ പരിപാടികള്‍ അതിരൂപത ചെറുപുഷ്പ മിഷന്‍ലീഗ് ഡയറക്ടര്‍ റവ.ഡോ. വര്‍ഗീസ് പുത്തന്‍പുരയ്ക്കല്‍, അസി. ഡയറക്ടര്‍മാരായ ഫാ. സെബാസ്റ്റ്യന്‍ മാമ്പറ, ഫാ. ആന്‍റണി കിഴക്കേത്തലയ്ക്കല്‍, തീര്‍ഥാടന കമ്മിറ്റി കണ്‍വീനര്‍ ജോണ്‍സണ്‍ കാഞ്ഞിരക്കാട്ട്, ജോയിന്‍റ് കണ്‍വീനര്‍ സാലിച്ചന്‍ തുമ്പേക്കളം, അതിരൂപതാ ജോയിന്‍റ് ഡയറക്ടര്‍ സിസ്റ്റര്‍ ജെസ്‌ലിന്‍ ജെഎസ്, സിസ്റ്റര്‍ മേരി റോസ് ഡിഎസ്എഫ്എസ്, ആനിമേറ്റര്‍ ബോബി തോമസ്, അതിരൂപത ഓര്‍ഗനൈസർ പ്രസിഡന്‍റ് ടിന്‍റോ സെബാസ്റ്റ്യന്‍, ജനറല്‍ സെക്രട്ടറി എബിന്‍ ജോസഫ് എന്നിവര്‍ അറിയിച്ചു. പുല്ലാനിത്തകിടി പള്ളിയിൽ പുല്ലാനിത്തകിടി: വിശുദ്ധ റീത്തായുടെ പള്ളിയിൽ വിശുദ്ധ അൽഫോൻസാമ്മയുടെ തിരുനാളിന് തുടക്കമായി. രാവിലെ 6.30ന് വിശുദ്ധ കുർബാന, നൊവേന. 27ന് സൺഡേ സ്കൂളിന്‍റെ നേതൃത്വത്തിൽ ഇടവകക്കാർക്ക് മുഴുവനായി ഭരണങ്ങാനം തീർഥാടനം നടത്തും. 28നു രാവിലെ 6.30ന് വിശുദ്ധ കുർബാന, തുടർന്ന് നേർച്ചവിതരണവും അൽഫോൻസാ നാമധാരികളുടെ സംഗമവും ഉണ്ടായിരിക്കുമെന്ന് വികാരി ഫാ. ജോസുകുട്ടി ഇടത്തിനകം അറിയിച്ചു.

പാറത്തോട്ടിൽ പട്ടാപ്പകൽ രണ്ടര പവൻ മാല കവർന്നു

കാഞ്ഞിരപ്പള്ളി: പാറത്തോട്ടിൽ പട്ടാപ്പകൽ മോഷണം. വീടിന്‍റെ വാതിൽ ചവിട്ടിത്തുറന്ന് അകത്തുകടന്ന മോഷ്ടാവ് അലമാരയിലുണ്ടായിരുന്ന രണ്ടര പവൻ മാല കവർന്നു. ഇടക്കുന്നം റോഡിൽ വാടകയ്ക്ക് താമസിക്കുന്ന കുളപ്പുറം ഒന്നാംമൈൽ മുണ്ടപ്ലാക്കൽ മാത്തുക്കുട്ടിയുടെ വീട്ടിലാണ് മോഷണം നടന്നത്. മാത്തുക്കുട്ടിയും ഭാര്യ മോളി മാത്യുവും ഇരുപത്താറാം മൈലിലെ ആശുപത്രിയിൽ പോയ സമയത്തായിരുന്നു മോഷണം. വീടിന്‍റെ പുറകുവശത്തെ രണ്ടു വാതിലുകൾ ചവിട്ടിത്തുറന്ന മോഷ്ടാവ് അലമാരയിലുണ്ടായിരുന്ന രണ്ടര പവന്‍റെ മാലയും കുരിശും അപഹരിക്കുകയായിരുന്നു. 11.20ഓടെയാണ് ഇവർ ആശുപത്രിയിൽ പോയത്. തിരികെ ഉച്ചയ്ക്ക് 1.15ഓടെ വീട്ടിലെത്തിയപ്പോഴാണ് മോഷണവിവരം അറിയുന്നത്. അലമാരയിലെ വസ്ത്രങ്ങളാകെ വലിച്ചുവാരി നിലത്തിട്ട നിലയിലാണ്. അലമാരയിലുണ്ടായിരുന്ന ഫാൻസി ആഭരണങ്ങളും നഷ്ടപ്പെട്ടു. കാഞ്ഞിരപ്പള്ളി പോലീസ് സ്ഥലത്തെത്തി അന്വേഷണം ആരംഭിച്ചു. സമീപത്തെ വീടുകളിലെ സിസിടിവി ദൃശ്യങ്ങളടക്കം കേന്ദ്രീകരിച്ചാണ് അന്വേഷണം.

ലോറിയില്‍ കൊണ്ടുവന്ന ഹിറ്റാച്ചി വീട്ടുമുറ്റത്തേക്ക് മറിഞ്ഞു

കടനാട്: ലോറിയില്‍ കൊണ്ടുപോകുകയായിരുന്ന ഹിറ്റാച്ചി റോഡിന്‍റെ തിട്ടയിടിഞ്ഞ് വീട്ടുമുറ്റത്തേക്ക് മറിഞ്ഞു. ഇന്നലെ ഉച്ചയ്ക്ക് കടനാട്-ഐങ്കൊമ്പ് റോഡിനോട് ചേര്‍ന്ന് ചിറ്റേട്ട് സെബാസ്റ്റ്യന്‍ ഫ്രാന്‍സിസിന്‍റെ വീട്ടുമുറ്റത്തേക്കാണ് ഹിറ്റാച്ചി വീണത്. അപകടത്തില്‍പ്പെടാതെ വീട്ടുകാര്‍ അദ്ഭുതകരമായി രക്ഷപ്പെടുകയായിരുന്നു. ലോറി ചരിഞ്ഞെങ്കിലും മറിയാതെനിന്നു. അപകടത്തില്‍ രണ്ട് വൈദ്യുതിപോസ്റ്റുകൾ തകര്‍ന്നു. അഞ്ച് അടി കൂടി മാറിയാണ് അപകടം നടന്നിരുന്നതെങ്കില്‍ ഹിറ്റിച്ചി വീടിനു മുകളില്‍ പതിച്ചേനെ.

പിപി റോഡില്‍ വീണ്ടും അപകടം

പാലാ: പാലാ-പൊന്‍കുന്നം റോഡില്‍ വീണ്ടും അപകടം. പന്ത്രണ്ടാംമൈലില്‍ നിര്‍ത്തിയിട്ടിരുന്ന കാറില്‍ നിയന്ത്രണംവിട്ട മിനിലോറി ഇടിച്ചുകയറി. മിനിലോറി ഇടിച്ച് കാര്‍ മുന്നോട്ടുനീങ്ങി സമീപത്തെ ടെലിഫോണ്‍ പോസ്റ്റിലിടിച്ചു. അപകടത്തിൽ ഹോണ്ട സിറ്റി കാര്‍ തകര്‍ന്നു. എയര്‍ബാഗ് പ്രവര്‍ത്തിച്ചതിനാല്‍ കാറിനുള്ളിലുണ്ടായിരുന്ന സ്ത്രീ പരിക്കേല്‍ക്കാതെ രക്ഷപ്പെട്ടു. മിനിലോറി റോഡില്‍ മറിഞ്ഞെങ്കിലും ഡ്രൈവര്‍ നിസാര പരിക്കുകളോടെ രക്ഷപ്പെട്ടു. ഇന്നലെ ഉച്ചകഴിഞ്ഞ് മൂന്നുമണിയോടെയായിരുന്നു അപകടം. കാഞ്ഞിരപ്പള്ളിയിലെ അറവുശാലയില്‍നിന്നു മൃഗങ്ങളുടെ തോൽ കയറ്റി വന്ന ലോറിയാണ് അപകടത്തില്‍പ്പെട്ടത്. പാലാ പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു. കഴിഞ്ഞ ദിവസം ഇവിടെ ഓട്ടോറിക്ഷകൾ കൂട്ടിയിടിത്ത് ഒരാള്‍ക്ക് പരിക്കേറ്റിരുന്നു.

കായകല്പ അവാർഡിൽ തിളങ്ങി കാണക്കാരി ഹോമിയോ ആശുപത്രി

കുറവിലങ്ങാട്: സംസ്ഥാന ആയുഷ് മിഷന്‍റെ കോട്ടയം ജില്ലാതല അവാർഡിൽ തിളങ്ങി കാണക്കാരി ഗവ. ഹോമിയോ ആശുപത്രി. ജില്ലയിലെ ഒന്നാം സ്ഥാനമാണ് ആശുപത്രി നേടിയിട്ടുള്ളത്. ഹോമിയോപ്പതി വിഭാഗത്തിൽ കാണക്കാരി ഹോമിയോ ആശുപത്രി 93.33 ശതമാനം മാർക്കോടെയാണ് ഒന്നാംസ്ഥാനം നേടിയത്. ശുചിത്വം, ഫലപ്രദമായ മാലിന്യസംസ്‌കരണം, അണുബാധ നിയന്ത്രണം എന്നിവ പ്രോത്സാഹിപ്പിക്കാൻ സർക്കാർ ആവിഷ്‌കരിച്ചതാണ് കായകല്പ പുരസ്‌കാരങ്ങൾ. എൻഎബിഎച്ച് എൻട്രി സർട്ടിഫിക്കേഷനും ആയുഷ് ഹെൽത്ത് ആൻഡ് വെൽനസ് സെന്‍ററും ഹോമിയോപ്പതി വകുപ്പിന്‍റെ മോഡൽ ഡിസ്‌പെൻസറിയുമാണ് കാണക്കാരി ഹോമിയോ ആശുപത്രി. ജീവനക്കാരുടെ കൂട്ടായ പ്രവർത്തനത്തിലൂടെയാണ് ജില്ലയിൽ ഒന്നാം സ്ഥാനം നേടാൻ ഹോമിയോ ആശുപത്രിക്ക് കഴിഞ്ഞതെന്ന് കാണക്കാരി പഞ്ചായത്ത് പ്രസിഡന്‍റ് അംബിക സുകുമാരൻ, വൈസ് പ്രസിഡന്‍റ് ബിജു പഴയപുരയ്ക്കൽ, മെഡിക്കൽ ഓഫീസർ ഡോ. എസ്. അഭിരാജ് എന്നിവർ അറിയിച്ചു.

അരുവിത്തുറ കോളജിൽ ലോക യുവജന നൈപുണ്യ വികസന ദിനാഘോഷവും കൊമേഴ്സ് അസോസിയേഷൻ ഉദ്ഘാടനവും

അരുവിത്തുറ: സെന്‍റ് ജോർജ് കോളജിൽ കെമിസ്ട്രി വിഭാഗം ലോകയുവജന നൈപുണ്യ വികസന ദിനാഘോഷവും കൊമേഴ്സ് അസോസിയേഷൻ ഉദ്ഘാടനവും നടത്തി. പിജി ഡിപ്പാർട്ട്മെന്‍റ് ഓഫ് കെമിസ്ട്രിയുടെയും എയ്ഡഡ് വിഭാഗം കൊമേഴ്സിന്‍റെയും നേതൃത്വത്തിലാണ് പരിപാടികൾ സംഘടിപ്പിച്ചത്. പരിപാടികളുടെ ഉദ്ഘാടനം ഇന്ത്യൻ ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ടെക്നോളജി ഇൻക്യുബേഷൻ സെന്‍റർ കോട്ടയം സിഇഒ ടി.ജി. മിട്ടു നിർവഹിച്ചു. കഴിഞ്ഞ വർഷം മികച്ച റാങ്കുകൾ നേടിയ വിദ്യാർഥികളെയും വിവിധ ഇന്‍റർനാഷണൽ സ്ഥാപനങ്ങളിൽ ജോലി നേടിയ വിദ്യാർഥികളെയും ആദരിച്ചു. കെമിസ്ട്രി ബിരുദാനന്തരബിരുദ വിഭാഗത്തിന്‍റെ നേതൃത്വത്തിൽ "ജ്വലിക്കുന്ന യുവത്വം: നൈപുണ്യവികസനവും സാധ്യതകളുടെ കണ്ടെത്തലും' എന്ന വിഷയത്തിൽ സംഘടിപ്പിച്ച ശില്പശാല കോളജിലെ പൂർവവിദ്യാർഥിയും പൂഞ്ഞാർ സെന്‍റ് ആന്‍റണീസ് ഹയർ സെക്കൻഡറി സ്കൂൾ അധ്യാപകനുമായ ജോബിൻ കുരുവിള ഉദ്ഘാടനം ചെയ്തു. ബർസാർ ഫാ. ബിജു കുന്നക്കാട്ട് അധ്യക്ഷത വഹിച്ചു. വൈസ് പ്രിൻസിപ്പൽ ഡോ. ജിലു ആനി ജോൺ, നാക് കോ-ഓർഡിനേറ്റർ ഡോ. മിഥുൻ ജോൺ, കെമിസ്ട്രി വിഭാഗം മേധാവി ഡോ. ഗ്യാബിൾ ജോർജ്, കോട്ടയം ഐഐഐടി ഇൻക്യുബേഷന്‍ സെന്‍റർ മാനേജർ അരവിന്ദ് തുടങ്ങിയവർ പ്രസംഗിച്ചു.

അല്‍ഫോന്‍സ തീര്‍ഥാടനം ഭക്തിസാന്ദ്രമായി

പാലാ: വിശുദ്ധ അല്‍ഫോന്‍സാമ്മയുടെ പുണ്യകുടീരം സ്ഥിതിചെയ്യുന്ന ഭരണങ്ങാനത്തേക്കു പാലാ രൂപത എസ്എംവൈഎം, ജീസസ് യൂത്ത് അംഗങ്ങള്‍ നടത്തിയ തീര്‍ഥാടനം ഭക്തിസാന്ദ്രമായി. നൂറുകണക്കിന് യുവജനങ്ങളാണ് 20 ഫൊറോനകളില്‍നിന്നായി എത്തിച്ചേര്‍ന്നത്. വൈകുന്നേരം 4.30ന് ഭരണങ്ങാനം അല്‍ഫോന്‍സ തീര്‍ഥാടനകേന്ദ്രത്തില്‍ റംശ പ്രാര്‍ഥന എസ്എംവൈഎം പാലാ രൂപത ഡയറക്ടര്‍ ഫാ. മാണി കൊഴുപ്പന്‍കുറ്റി നയിച്ചു. അഞ്ചിന് നടന്ന വിശുദ്ധ കുര്‍ബാനയ്ക്ക് രൂപത വികാരി ജനറാള്‍ മോൺ. സെബാസ്റ്റ്യന്‍ വേത്താനത്ത് നേതൃത്വം നല്‍കി. തുടര്‍ന്ന് ആഘോഷമായ ജപമാല പ്രദക്ഷിണം നടത്തി. ജീസസ് യൂത്ത് ഡയറക്ടര്‍ ഫാ. മാത്യു എണ്ണയ്ക്കാപ്പിള്ളി, എസ്എംവൈഎം പ്രസിഡന്‍റ് അന്‍വിന്‍ സോണി ഓടച്ചുവട്ടില്‍, ആല്‍ബിന‍ കൊട്ടാരം, സിസ്റ്റര്‍ നവീന സിഎംസി, റോബിന്‍ താന്നിമല, ബില്‍ന സിബി, ജോസഫ് തോമസ് തുടങ്ങിയവര്‍ നേതൃത്വം നല്‍കി.

അല്‍ഫോന്‍സാമ്മ സഹനത്തിലൂടെ ദൈവരാജ്യം സ്വന്തമാക്കിയവള്‍: ബിഷപ് ഡോ. ആനാപറമ്പില്‍

ഭരണങ്ങാനം: അല്‍ഫോന്‍സാമ്മ സഹനത്തിലൂടെ ദൈവരാജ്യവിരുന്ന് സ്വന്തമാക്കിയവളാണെന്ന് ആലപ്പുഴ ബിഷപ് ഡോ. ജയിംസ് റാഫേല്‍ ആനാപറമ്പില്‍. അല്‍ഫോന്‍സാ തിരുനാളിന്‍റെ മൂന്നാം ദിനമായ ഇന്നലെ കബറിടത്തിങ്കല്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കുകയായിരുന്നു ബിഷപ്. സഹനത്തിന്‍റെ പാതയിലൂടെ അല്‍ഫോന്‍സാമ്മ തന്നെത്തന്നെ സ്വയം ദൈവികമായ യാഗവസ്തുവായി രൂപാന്തരപ്പെടുത്തി ഈശോയുമായി ഗാഢമായ ഐക്യം പ്രാപിച്ചു. ഈ ഗാഢ ഐക്യമാണ് നിത്യജീവിതത്തിലേക്ക് മഹത്വീകൃതയായി പ്രവേശിച്ച് നമുക്ക് സ്വര്‍ഗീയ മധ്യസ്ഥയായി നില്‍ക്കാന്‍ അല്‍ഫോന്‍സാമ്മയെ പ്രാപ്തയാക്കിയതെന്നും ബിഷപ് പറഞ്ഞു. മൂന്നാം ദിനമായ ഇന്നലെ ഫാ. ഏബ്രഹാം കണിയാംപടിക്കല്‍, ഫാ. കുര്യന്‍ മുക്കാംകുഴിയില്‍, ഫാ. സെബാസ്റ്റ്യന്‍ തെക്കെക്കരോട്ട്, ഫാ. ജിജോ പ്ലാത്തോട്ടം, ഫാ. മാത്യു വാഴചാരിക്കല്‍, ഫാ. തോമസ് ചില്ലയ്ക്കല്‍, ഫാ. തോമസ് മേനാച്ചേരി, ഫാ. തോമസ് കൊച്ചോടയ്ക്കല്‍ എന്നിവര്‍ വിശുദ്ധ കുര്‍ബാന അര്‍പ്പിച്ചു. ഫാ. ജോസഫ് കദളിയില്‍ റംശാ പ്രാര്‍ഥനയ്ക്കും ഫാ. ജേക്കബ് കടുതോടില്‍ ജപമാല പ്രദക്ഷിണത്തിനും കാര്‍മികത്വം വഹിച്ചു. ഇന്നത്തെ തിരുക്കർമങ്ങൾ രാവിലെ 5.30, 6.45, 8.30, ഉച്ചകഴിഞ്ഞ് 2.30, 3.30, വൈകുന്നേരം 5.00, രാത്രി 7.00 - വിശുദ്ധ കുര്‍ബാന. രാവിലെ 10ന് വിശുദ്ധ കുര്‍ബാന (മലങ്കര ക്രമം) - പത്തനംതിട്ട രൂപത ബിഷപ് സാമുവല്‍ മാര്‍ ഐറേനിയസ്, 11.30ന് വിശുദ്ധ കുര്‍ബാന - താമരശേരി ബിഷപ് മാര്‍ റെമീജിയോസ് ഇഞ്ചനാനിയില്‍. വൈകുന്നേരം 4.30ന് റംശ, 61.5ന് ജപമാല പ്രദക്ഷിണം.

പാലാ ജനറൽ ആശുപത്രിയിൽ 12 കോടിയുടെ അത്യാധുനിക ഉപകരണങ്ങൾ സ്ഥാപിക്കുന്നതിന് ഭരണാനുമതി

പാലാ: കെ.എം. മാണി മെമ്മോറിയല്‍ ജനറല്‍ ആശുപത്രിയിൽ ആര്‍ജിസിബിയുടെ പദ്ധതിയില്‍ റേഡിയോ ഡയഗ്‌നോസ്റ്റിക് ഉപകരണങ്ങളായ സിടി സ്‌കാനര്‍ കം സിമുലേറ്റര്‍, അള്‍ട്രാസൗണ്ട് സ്‌കാനര്‍ ഉള്‍പ്പെടെ 12 കോടി രൂപയുടെ അത്യാധുനിക ഉപകരങ്ങള്‍ സ്ഥാപിക്കുന്നതിന് സംസ്ഥാന സര്‍ക്കാരില്‍നിന്ന് ഭരണാനുമതി ലഭ്യമായതായി ജോസ് കെ. മാണി എംപി. ഇതു സംബന്ധിച്ച് മന്ത്രി വീണാ ജോര്‍ജുമായും ആര്‍ജിസിബി ഡയറക്ടറുമായും നിരന്തര ചര്‍ച്ചകള്‍ നടത്തിയിരുന്നതായി ജോസ് കെ. മാണി പറഞ്ഞു. കേന്ദ്രസര്‍ക്കാര്‍ സ്ഥാപനമായ രാജീവ് ഗാന്ധി സെന്‍റര്‍ ഫോര്‍ ബയോടെക്നോളജി സംസ്ഥാന സര്‍ക്കാരുമായി സഹകരിച്ചു പാലാ ജനറല്‍ ആശുപത്രിയിൽ സ്ഥാപിച്ചിരിക്കുന്ന സ്പെഷാലിറ്റി ലാബോറട്ടറിയുടെ രണ്ടാംഘട്ടമെന്ന നിലയിലാണ് നൂതന സാങ്കേതിക വിദ്യയോടു കൂടിയുള്ള ഡയഗ്‌നോസ്റ്റിക്സ് ഉപകരണങ്ങള്‍ സ്ഥാപിക്കുന്നത്. സംസ്ഥാനത്തെ ജനറല്‍ ആശുപത്രികളില്‍ ആദ്യമായാണ് സിടി സ്‌കാനര്‍ കം സിമുലേറ്റര്‍ ഉള്‍പ്പെടെയുള്ള സംവിധാനം പാലായില്‍ ഒരുങ്ങുന്നത്. രോഗനിര്‍ണയത്തില്‍ ഏറെ പ്രധാനപ്പെട്ട ഡയഗ്‌നോസ്റ്റിക് പരിധോനകള്‍ ഏറ്റവും ആധുനിക നിലവാരത്തില്‍ സാധാരണ ജനങ്ങള്‍ക്ക് പാലായിലെ രാജീവ് ഗാന്ധി സെന്‍റര്‍ ഫോര്‍ ബയോടെക്‌നോളജി നിലവില്‍ നല്‍കിവരുന്നുണ്ട്. കാന്‍സര്‍ മാര്‍ക്കറുകള്‍, മോളിക്യൂലാര്‍ വൈറോളജി പരിശോധനകള്‍ ഉള്‍പ്പെടെയുള്ള മള്‍ട്ടി സ്പെഷാലിറ്റി പരിശോധനകളാണ് ചെയ്യുന്നത്. വിദഗ്ധ പഠനങ്ങള്‍ അനുസരിച്ച് ഓരോ വര്‍ഷവും കേരളത്തില്‍ 60,000 പുതിയ കാന്‍സര്‍ കേസുകള്‍ റിപ്പോര്‍ട്ട് ചെയ്യുന്നുണ്ട്. രോഗനിര്‍ണയം ആദ്യഘട്ടത്തില്‍ നടത്തിയാല്‍ വിവിധയിനം കാന്‍സറുകള്‍ ചികിത്സിച്ചു ഭേദമാക്കാന്‍ സാധിക്കും. പാലായില്‍ ഡയഗ്‌നോസ്റ്റിക്സ് സൗകര്യം ലഭ്യമാകുന്നതോടെ കോട്ടയം ജില്ല ഉള്‍പ്പെടെയുള്ള മലയോരപ്രദേശങ്ങളിലെ കാന്‍സര്‍ രോഗികള്‍ക്കും മറ്റു രോഗികള്‍ക്കും വളരെ കുറഞ്ഞ നിരക്കില്‍ ചികിത്സ ലഭ്യമാകും.

ഹൈടെക് ഫാമിംഗ് സാധ്യതകളുടെ അനന്ത ലോകം: മാര്‍ കല്ലറങ്ങാട്ട്

പാലാ: ഹൈടെക് ഫാമിംഗ് സാധ്യതകളുടെ അനന്ത ലോകമെന്നു ബിഷപ് മാര്‍ ജോസഫ് കല്ലറങ്ങാട്ട്.കത്തോലിക്ക കോണ്‍ഗ്രസ് പാലാ രൂപതാസമിതി നടത്തുന്ന 11-ാമത് അടുക്കളത്തോട്ട മത്സരത്തിന്‍റെ പാലാ സോണ്‍ വിത്ത് വിതരണം ബിഷപ്സ് ഹൗസില്‍ ഉദ്ഘാടനം ചെയ്തു പ്രസംഗിക്കുകയായിരുന്നു ബിഷപ്. കാര്‍ഷികസംസ്‌കാരമാണ് ഏറ്റവും മികച്ച സംസ്‌കാരമെന്നും ഇന്നത്തെ യുവജനങ്ങള്‍ക്ക് കാര്‍ഷികമേഖലയോട് താത്പര്യം കുറയുന്ന സാഹചര്യത്തിലാണ് കുടുംബകൃഷിയുടെ പ്രാധാന്യമെന്നും മാർ കല്ലറങ്ങാട്ട് പറഞ്ഞു. ഏറ്റവുധികം ആളുകള്‍ പങ്കെടുക്കുന്ന കാര്‍ഷിക മത്സരമാണിത്. വിജയികള്‍ക്ക് ആകര്‍ഷകമായ സമ്മാനങ്ങളാണ് നല്‍കുന്നത്. രൂപത പ്രസിഡന്‍റ് ഇമ്മാനുവല്‍ നിധീരി അധ്യക്ഷത വഹിച്ച യോഗത്തില്‍ റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍, ജോസ് വട്ടുകുളം, ജോയി കണിപറമ്പില്‍, ആന്‍സമ്മ സാബു, ജോണ്‍സണ്‍ വീട്ടിയാങ്കല്‍, സി.എം. ജോര്‍ജ്, പയസ് കവളംമാക്കല്‍, ജോണ്‍സണ്‍ ചെറുവള്ളി, ബെന്നി കിണറ്റുകര, എഡ്‌വിന്‍ പാമ്പാറ, രാജേഷ് പാറയില്‍, ജോബിന്‍ പുതിയടത്തുചാലില്‍, സിന്ധു ജെയ്ബു, ബെല്ലാ സിബി, ലിബി മണിമല തുടങ്ങിയവര്‍ സംസാരിച്ചു. ടോമി കണ്ണീറ്റുമാലില്‍ സെമിനാര്‍ നയിച്ചു.

അരുവിത്തുറ കോളജിൽ യുവജന നൈപുണ്യ ദിനാഘോഷവും കൊമേഴ്സ് അസോസിയേഷൻ ഉദ്ഘാടനവും

അരുവിത്തുറ: സെന്‍റ് ജോർജ് കോളജിൽ കെമിസ്ട്രി വിഭാഗം ലോകയുവജന നൈപുണ്യ വികസന ദിനാഘോഷവും കൊമേഴ്സ് അസോസിയേഷൻ ഉദ്ഘാടനവും നടന്നു. കോളജിലെ പിജി ഡിപ്പാർട്ട്മെന്‍റ് ഓഫ് കെമിസ്ട്രിയുടെയും എയ്ഡഡ് വിഭാഗം കോമേഴ്സിന്‍റെയും നേതൃത്വത്തിലാണ് പരിപാടികൾ സംഘടിപ്പിച്ചത്. പരിപാടികളുടെ ഉദ്ഘാടനം ഇന്ത്യൻ ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ടെക്നോളജി ഇൻക്യുബേഷൻ സെന്‍റർ കോട്ടയം സിഇഒ മിട്ടു ടിജി നിർവഹിച്ചു. കഴിഞ്ഞ വർഷം മികച്ച റാങ്കുകൾ നേടിയ വിദ്യാർഥികളെയും ഇന്‍റർനാഷണൽ സ്ഥാപനങ്ങളിൽ ജോലി നേടിയ വിദ്യാർഥികളെയും ചടങ്ങിൽ ആദരിച്ചു.

കെമിസ്ട്രി വിഭാഗത്തിന്‍റെ നേതൃത്വത്തിൽ "ജ്വലിക്കുന്ന യുവത്വം: നൈപുണ്യ വികസനവും സാധ്യതകളുടെ കണ്ടെത്തലും' എന്ന വിഷയത്തിൽ സംഘടിപ്പിച്ച ശില്പശാല കോളജിലെ പൂർവ വിദ്യാർഥിയും പൂഞ്ഞാർ സെന്‍റ് ആന്‍റണീസ് ഹയർ സെക്കൻഡറി സ്കൂൾ അധ്യാപകനുമായ ജോബിൻ കുരുവിള ഉദ്ഘാടനം ചെയ്തു. കോളജ് ബർസാർ റവ.ഫാ. ബിജു കുന്നയ്ക്കാട്ട് അധ്യക്ഷത വഹിച്ച ചടങ്ങുകളിൽ വൈസ് പ്രിൻസിപ്പൽ ഡോ. ജിലു ആനി ജോൺ, നാക്ക് കോഓർഡിനേറ്റർ ഡോ. മിഥുൻ ജോൺ, കെമിസ്ട്രി വിഭാഗം മേധാവി ഡോ. ഗ്യാബിൾ ജോർജ്, കോട്ടയം ഐഐഐടി ഇൻക്യുബേഷന്‍ സെന്‍റർ മാനേജർ അരവിന്ദ് തുടങ്ങിയവർ സംസാരിച്ചു.

എകെഎം സുവര്‍ണജൂബിലി ബാസ്‌കറ്റ്‌ബോള്‍ വിജയികള്‍

ചങ്ങനാശേരി: മോര്‍ക്കുളങ്ങര എകെഎം പബ്ലിക് സ്‌കൂളിന്‍റെ ഗോള്‍ഡന്‍ ജൂബിലിയോടനുബന്ധിച്ച് സംഘടിപ്പിച്ച ഓള്‍ കേരള ബാസ്‌കറ്റ്‌ബോള്‍ 3x3 ടൂര്‍ണമെന്‍റില്‍ 114 ടീമുകള്‍ മത്സരിച്ചു. അണ്ടര്‍ 17 കാറ്റഗറിയില്‍ ആതിഥേയരായ എകെ എം ടീം വിജയിച്ചു. അണ്ടര്‍ 11, അണ്ടര്‍13 വിഭാഗങ്ങളിൽ എകെഎം ടീം റണ്ണറപ്പായി. അണ്ടര്‍ 19 കാറ്റഗറിയില്‍ എറണാകുളം ആര്‍എസ്ഇ അക്കാഡമിയും അണ്ടര്‍ 11 കാറ്റഗറിയില്‍ ജ്യോതിനികേതനും വിജയിച്ചു. പെണ്‍കുട്ടികളുടെ വിഭാഗത്തില്‍ എല്‍എഫ് കൊരട്ടിയും ജ്യോതി നികേതനും വിജയികളായി. മാനേജര്‍ സിസ്റ്റര്‍ മരിയറ്റ്, പ്രിന്‍സിപ്പല്‍ സിസ്റ്റര്‍ ടിന്‍സി വാഴക്കാട്, ഫിസിക്കല്‍ എജുക്കേഷന്‍ ടീച്ചര്‍ സനീഷ് വി.എസ്., ബാസ്‌കറ്റ്‌ബോള്‍ കോച്ച് കെവിന്‍ ജോസഫ്, സ്റ്റാഫ് സെക്രട്ടറി സിന്ധു വര്‍ഗീസ് എന്നിവര്‍ പ്രസംഗിച്ചു.

ചേരിക്കല്‍ അങ്കണവാടിക്കെട്ടിടം നാടിനു സമര്‍പ്പിച്ചു

മാടപ്പള്ളി: മാടപ്പള്ളി പഞ്ചായത്ത് 18-ാം വാര്‍ഡിലെ ചേരിക്കല്‍ 34-ാം നമ്പര്‍ അങ്കണവാടി മന്ത്രി വി.എന്‍. വാസവന്‍ നാടിന് സമര്‍പ്പിച്ചു. ജില്ലാ പഞ്ചായത്ത് 2023-24 വാര്‍ഷിക പദ്ധതിയില്‍ അനുവദിച്ച 22 ലക്ഷം രൂപ ചെലവഴിച്ചാണ് അങ്കണവാടി കെട്ടിടം നിര്‍മിച്ചത്. 14 വര്‍ഷമായി വാടകക്കെട്ടിടത്തില്‍ പ്രവര്‍ത്തിച്ചിരുന്ന അങ്കണവാടിക്ക് വാര്‍ഡ് മെംബര്‍ പി.എം. നൗഫലിന്‍റെ ഇടപെടലില്‍ കാടാത്തുകളത്തില്‍ ഡോ. മാത്യു മാത്യു - റോസി മാത്യു ദമ്പതികള്‍ മൂന്ന് സെന്‍റ് സ്ഥലം സൗജന്യമായി വിട്ടുനല്‍കുകയായിരുന്നു. ജോബ് മൈക്കിള്‍ എംഎല്‍എ അധ്യക്ഷത വഹിച്ചു. ജില്ലാ പഞ്ചായത്ത് വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ മഞ്ജു സുജിത്ത് മുഖ്യപ്രഭാഷണം നടത്തി. മാടപ്പള്ളി ബ്ലോക്ക് പഞ്ചായത്ത് പ്രസിഡന്‍റ് എന്‍. രാജു ഉപകരണങ്ങള്‍ കൈമാറി. അങ്കണവാടിക്ക് സ്ഥലം നല്‍കിയ ദമ്പതികളെ മാടപ്പള്ളി പഞ്ചായത്ത് പ്രസിഡന്‍റ് മണിയമ്മ രാജപ്പന്‍ ആദരിച്ചു. വാര്‍ഡ് മെംബര്‍ പി.എം. നൗഫല്‍, ഐസിഡിഎസ് സൂപ്പര്‍വൈസര്‍ അഞ്ജലി അരവിന്ദ് എന്നിവര്‍ പ്രസംഗിച്ചു.

"കലാം ക്വിസ് സീസൺ-4' 26ന്

കോട്ടയം: കൈപ്പുഴ സെന്‍റ് ജോര്‍ജ് വൊക്കേഷണല്‍ ഹയര്‍ സെക്കന്‍ഡറി സ്‌കൂളിൽ വിദ്യാര്‍ഥികള്‍ക്കായി സംസ്ഥാന തലത്തില്‍ കലാം ക്വിസ് സീസണ്‍-4 നടത്തും. 26ന് രാവിലെ 9.30ന് സ്‌കൂള്‍ ഓഡിറ്റോറിയത്തിലാണ് മത്സരം. ഹൈസ്‌കൂള്‍ വിഭാഗത്തില്‍ സംസ്ഥാന തലത്തിലും യുപി, എല്‍പി വിഭാഗത്തിൽ ജില്ലാ തലത്തിലുമാണ് മത്സരം. ഒരു സ്‌കൂളില്‍നിന്ന് രണ്ടു പേരടങ്ങുന്ന ഒരു ടീമിന് പങ്കെടുക്കാം. പ്രിലിമിനറി റൗണ്ടില്‍നിന്ന് തെരഞ്ഞെടുക്കപ്പെടുന്ന അഞ്ചു ടീമുകളായിരിക്കും ഫൈനലിലേക്കു യോഗ്യത നേടുക. ഫൈനല്‍ മത്സരം, ഓഡിയോ വിഷ്വല്‍ റൗണ്ടുകള്‍ കൂടി ഉള്‍പ്പെട്ടതായിരിക്കും. 10000, 8000, 5000, 2000, 1000 എന്നിങ്ങനെയാണ് സമ്മാനത്തുക. യുപി, എല്‍പി വിഭാഗത്തിന് പ്രിലിമിനറി മത്സരം മാത്രമേ ഉണ്ടായിരിക്കുകയുള്ളൂ. സമ്മാനത്തുക 3000, 2000, 1000 രൂപ. ഡോ. എ.പി.ജെ അബ്ദുൾ കലാമിന്‍റെ ജീവിതരേഖകള്‍, ജനറല്‍ സയന്‍സ്, പൊതു വിജ്ഞാനം എന്നിവയാണ് വിഷയം. രജിസ്‌ട്രേഷന്‍ ഫീസ് ഹൈസ്‌കൂള്‍തലം 200 രൂപ. യുപി,എൽപിക്ക് ഫീസില്ല. പേര്, ക്ലാസ്, സ്‌കൂള്‍ എന്നീ വിവരങ്ങള്‍ 23ന് വൈകുന്നേരം അഞ്ചിന് മുമ്പായി [email protected] എന്ന വിലാസത്തിലേക്കോ ഫോണ്‍ നമ്പരിലേക്ക് വാട്‌സ് ആപ്പ് മുഖേനയോ അയയ്ക്കുക. ഫോണ്‍: 9446720035, 8304023368.

ഉമ്മന്‍ ചാണ്ടി ജനമനസുകളിലെ കാരുണ്യത്തിന്‍റെ മുഖം: മാര്‍ പെരുന്തോട്ടം

ചങ്ങനാശേരി: കാരുണ്യത്തിന്‍റെ മുഖമായി ജനമനസുകളിൽ‍ ജീവിക്കുന്ന ഭരണാധിപനാണ് മുന്‍മുഖ്യമന്ത്രി ഉമ്മന്‍ ചാണ്ടിയെന്ന് ആര്‍ച്ച്ബിഷപ് മാര്‍ ജോസഫ് പെരുന്തോട്ടം. മന്ന ചാരിറ്റബിള്‍ ട്രസ്റ്റിന്‍റെ നേതൃത്വത്തില്‍ മുന്‍ മുഖ്യമന്ത്രി ഉമ്മന്‍ ചാണ്ടിയുടെ രണ്ടാം ചരമവാര്‍ഷികത്തോടനുബന്ധിച്ച് കുറുമ്പനാടം ഫൊറോന പള്ളി ഓഡിറ്റോറിയത്തില്‍ സംഘടിപ്പിച്ച അനുസ്മരണവും മെഡിക്കല്‍ ക്യാമ്പും ഉദ്ഘാടനം ചെയ്യുകയായിരുന്നു ആര്‍ച്ച്ബിഷപ്. മന്ന ചാരിറ്റബിള്‍ ട്രസ്റ്റ് മാനേജിംഗ് ട്രസ്റ്റി ഡോ. മറിയ ഉമ്മന്‍ അധ്യക്ഷത വഹിച്ചു. ജോബ് മൈക്കിള്‍ എംഎല്‍എ മുഖ്യസന്ദേശം നല്‍കി. എന്‍എസ്എസ് സെക്രട്ടറി ഹരികുമാര്‍ കോയിക്കല്‍ ഉമ്മന്‍ചാണ്ടി അനുസ്മരണ പ്രഭാക്ഷണം നടത്തി. ഇമാം മന്‍സൂര്‍ അല്‍ ഖാസിമി മുഖ്യാതിഥിയായിരുന്നു. ചെത്തിപ്പുഴ സെന്‍റ് തോമസ് ആശുപത്രി അസിസ്റ്റന്‍റ് ഡയറക്ടര്‍ ഫാ. ജോസ് പുത്തന്‍ചിറ, കുറുമ്പനാടം സെന്‍റ് ആന്‍റണീസ് ഫൊറോന പള്ളി വികാരി റവ.ഡോ. ജോബി കറുകപ്പറമ്പില്‍, മറിയാമ്മ ഉമ്മന്‍, പ്രോഗ്രാം കോ-ഓര്‍ഡിനേറ്റര്‍ സോബിച്ചന്‍ കണ്ണമ്പള്ളി, അമല്‍ ജി. പോള്‍ തുടങ്ങിയവര്‍ പ്രസംഗിച്ചു. മന്ന ചാരിറ്റബിള്‍ ട്രസ്റ്റ് ഉമ്മന്‍ ചാണ്ടി സ്‌നേഹസ്പര്‍ശം പദ്ധതിയുടെ ഭാഗമായി ചെത്തിപ്പുഴ സെന്‍റ് തോമസ് ആശുപത്രിയുമായി സഹകരിച്ച് നടത്തിയ സൗജന്യ മെഗാ മെഡിക്കല്‍ ക്യാമ്പില്‍ നിരവധിപ്പേര്‍ക്കു സൗജന്യമരുന്നും ചികിത്സയും നല്‍കി.

വിദ്യാലയ സ്മരണകള്‍ ഉണര്‍ത്തി എസ്എച്ചില്‍ 1985 ബാച്ച് മാണിക്യസംഗമം

ചങ്ങനാശേരി: എസ്എച്ച് ഇംഗ്ലീഷ് മീഡിയം ഹയര്‍ സെക്കന്‍ഡറി സ്‌കൂളിലെ 1985 എസ്എസ്എല്‍സി ബാച്ച് മാണിക്യസംഗമം സ്‌നേഹസംഗമമായി. രാവിലെ എട്ടിന് സ്‌കൂള്‍ ചാപ്പലില്‍ ബാച്ച് അംഗം കാത്തലിക് ഹെല്‍ത്ത് അസോസിഷന്‍റെ (ഛായ്) ദേശീയ പ്രസിഡന്‍റ് റവ.ഡോ. മാത്യു പി. ഏബ്രഹാം വിശുദ്ധകുര്‍ബാന അര്‍പ്പിച്ചു. സ്‌കൂള്‍ ഓഡിറ്റോറിയത്തില്‍ നടന്ന സമ്മേളനം ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്തു. ചങ്ങനാശേരി ബൈപാസ് റോഡില്‍ എസ്എച്ച് സ്‌കൂള്‍ കവാടത്തിനു സമീപം ഫാത്തിമ മാതാ കുരിശടിയോടു ചേര്‍ന്ന് 1985 ബാച്ച് വിദ്യാര്‍ഥികള്‍ സ്‌കൂളിന്‍റെ സഹകരണത്തോടെ അഞ്ചുലക്ഷത്തോളം രൂപ മുടക്കി നിര്‍മിച്ച ലാൻഡ്സ്‌കേപ്പിന്‍റെ സമര്‍പ്പണം മാര്‍ തോമസ് തറയില്‍ നിര്‍വഹിച്ചു. റവ.ഡോ. മാത്യു പി. ഏബ്രഹാം അധ്യക്ഷത വഹിച്ചു. ബാച്ച് അംഗങ്ങള്‍ക്കുള്ള ഉപഹാരങ്ങള്‍ ആര്‍ച്ച്ബിഷപ് സമ്മാനിച്ചു. ബാച്ചുകാരുടെ അധ്യാപകന്‍ പി.സി. ജോസഫിനെ ആദരിച്ചു. സ്‌കൂള്‍ മാനേജര്‍ ഫാ. ജോസഫുകുട്ടി നെടുംപറമ്പില്‍, പ്രഫ. ജോസി ജോസഫ്, വിനോദ് വാര്യര്‍, ടിറ്റി കോട്ടപ്പുറം, മാര്‍ട്ടിന്‍ തോട്ടാശേരി, ജോമോന്‍ ചെറുകര എന്നിവര്‍ പ്രസംഗിച്ചു.

അഞ്ചുവിളക്കിന്‍റെ നഗരം ഇരുട്ടില്‍; നഗരസഭ വൈദ്യുതിബിൽ അടയ്‌ക്കണം

തെളിയാത്തത് രണ്ടായിരത്തിലധികം വഴിവിളക്കുകള്‍ ചങ്ങനാശേരി: ചങ്ങനാശേരി നഗരത്തില്‍ തെളിയാത്തത് രണ്ടായിരത്തിലധികം വഴിവിളക്കുകള്‍. നഗരത്തിലെ പല വാര്‍ഡുകളും ഇരുട്ടിന്‍റെ പിടിയില്‍. 37 വാര്‍ഡുകളിലായി 5600 വഴിവിളക്കുകളാണുള്ളത്. ഇതുകൂടാതെ നഗരപരിധിയിലുള്ള എന്‍എച്ച്-1839 (എംസി), ചങ്ങനാശേരി-വാഴൂര്‍, ചങ്ങനാശേരി ബൈപാസ്, ചങ്ങനാശേരി-കവിയൂര്‍, ടിബി, മാര്‍ക്കറ്റ് റോഡുകളില്‍ 100, 70 വോള്‍ട്ടുകളുടെ ഇരുനൂറോളം വിളക്കുകളും കണ്ണടച്ചിട്ട് ഒരു വര്‍ഷം പിന്നിട്ടു. കഴിഞ്ഞ ഡിസംബറിനുശേഷം വഴിവിളക്കുകളുടെ അറ്റകുറ്റപ്പണികള്‍ നടന്നിട്ടില്ല. അന്നു മുഴുവന്‍ വാര്‍ഡുകളിലും അറ്റകുറ്റപ്പണികള്‍ നടത്തിയതുമില്ല. അറ്റകുറ്റപ്പണികള്‍ നടന്നിട്ട് ഏഴുമാസം പിന്നിട്ടുകഴിഞ്ഞു. 5600 വിളക്കുകളില്‍ 1400 എണ്ണം സര്‍ക്കാര്‍ നിലാവ് പദ്ധതി പ്രകാരം നല്‍കിയ വിളക്കുകളാണ്. ഈ വിളക്കുകളുടെ വില നഗരസഭ ഏഴുവര്‍ഷംകൊണ്ട് കെഎസ്ഇബിക്ക് അടയ്ക്കണമെന്നാണ് നിബന്ധന. കേടാകുന്ന വഴിവിളക്കുകള്‍ മാറി നല്‍കാമെന്ന് കെഎസ്ഇബിയുടെ വ്യവസ്ഥയുണ്ട്. എന്നാല്‍, മാറ്റി നല്‍കാന്‍ കെഎസ്ഇബിയുടെ പക്കല്‍ ബള്‍ബുകളില്ലാത്ത അവസ്ഥയാണ്. വഴിവിളക്കുകള്‍ തെളിഞ്ഞില്ലെങ്കിലും നഗരസഭ ഭീമമായ വൈദ്യുതി ചാര്‍ജ് അടയ്‌ക്കേണ്ടിവരും. ഇതൊന്നും നഗരസഭ വേണ്ട രീതിയില്‍ പരിശോധിക്കുന്നില്ലെന്ന വിമര്‍ശനം ശക്തമാണ്. പുതിയവര്‍ഷം വഴിവിളക്കുകള്‍ തെളിക്കാന്‍ ഡിപിസി പത്തുലക്ഷം രൂപയുടെ അനുമതി നല്‍കിയിട്ടുണ്ട്. പുതിയ ടെന്‍ഡര്‍ വിളിക്കാതെ കഴിഞ്ഞവര്‍ഷത്തെ കരാറുകാരനെ അറ്റകുറ്റപ്പണി ഏല്പിക്കാന്‍ കഴിഞ്ഞ നഗരസഭാ കൗണ്‍സില്‍ യോഗം തീരുമാനിച്ചെങ്കിലും നടപടികള്‍ നീളുന്നതില്‍ ഭരണ, പ്രതിപക്ഷ കൗണ്‍സിലര്‍മാരില്‍ അതൃപ്തി ഉയര്‍ന്നിട്ടുണ്ട്. നഗരസഭാ കാര്യാലയത്തിനു മുമ്പിലുള്ള ബസ് സ്റ്റോപ്പില്‍ രാത്രിയിൽ വെളിച്ചമില്ലാത്തത് യാത്രക്കാര്‍ക്ക് ബുദ്ധിമുട്ട് സൃഷ്ടിക്കുന്നതായും പരാതിയുണ്ട്.

ഏറ്റുമാനൂരിലെ കുരുക്കഴിക്കാൻ നടപടിയുണ്ടാകണം

ഏറ്റുമാനൂർ: അഴിയാത്ത കുരുക്കിൽനിന്ന് രക്ഷനേടാൻ ഏറ്റുമാനൂരിനു മുന്നിൽ വഴി തെളിയുമോ? പട്ടിത്താനം - മണർകാട് ബൈപാസ് റോഡ് പൂർത്തിയാകുകയും റിംഗ് റോഡ് യാഥാർഥ്യമാകുകയും ചെയ്യുന്നതോടെ നഗരത്തിലെ ഗതാഗതക്കുരുക്കിന് അയവുണ്ടാകുമെന്നായിരുന്നു പ്രതീക്ഷ. പക്ഷേ, ബൈപാസ് റോഡ് നിർമാണം പൂർത്തിയായിട്ടും കിലോമീറ്ററുകൾ നീളുന്ന ഗതാഗതക്കുരുക്ക് പതിവാണ്. ഗതാഗതക്കുരുക്കുണ്ടായാൽ പട്ടിത്താനം ജംഗ്ഷൻ മുതൽ പാറോലിക്കൽ ജംഗ്ഷൻ വരെ എംസി റോഡ് ഇപ്പോഴും നിശ്ചലമാകുകയാണ്. റിംഗ് റോഡിലാണ് അടുത്ത പ്രതീക്ഷ. എന്നാൽ, റിംഗ് റോഡിന്‍റെ നിർമാണം ആരംഭിച്ചിട്ടുപോലുമില്ല. റോഡ് യാഥാർഥ്യമാകാൻ ഇനിയും ഏറെ കാത്തിരിക്കേണ്ടതുണ്ട്. നിലവിലെ സാഹചര്യത്തിൽ ഗതാഗതക്കുരുക്ക് കാലങ്ങളോളം തുടരാനാണ് സാധ്യത. റിംഗ് റോഡിൽ കുരുക്കഴിയുമോ? നിർദിഷ്‌ട റിംഗ് റോഡ് വന്നാൽത്തന്നെ ഗതാഗതക്കുരുക്കിന് പരിഹാരമാകാൻ സാധ്യതയില്ലെന്ന് ചൂണ്ടിക്കാണിക്കപ്പെടുന്നു. എംസി റോഡിൽ തുമ്പശേരിപ്പടിയിൽനിന്ന് ആരംഭിച്ച് പട്ടിത്താനം റൗണ്ടാന ജംഗ്ഷനിലാണ് റിംഗ് റോഡ് അവസാനിക്കുന്നത്. തുമ്പശേരിപ്പടിയും പട്ടിത്താനം ജംഗ്ഷനും ഗതാഗതക്കുരുക്കിൽ പെടുന്ന സ്ഥലങ്ങളായതിനാൽ റിംഗ് റോഡു കൊണ്ട് ഉദ്ദേശിച്ച ഫലം ഉണ്ടാകാനിടയില്ലെന്നാണ് അഭിപ്രായമുയരുന്നത്. ബദൽ മാർഗങ്ങൾ വികസിപ്പിക്കണം രൂക്ഷമായ ഗതാഗതക്കുരുക്ക് രൂപപ്പെടുന്ന മേഖലയ്ക്ക് മുമ്പുതന്നെ ഗതാഗതം തിരിച്ചുവിടാനാകുന്ന രീതിയിൽ റോഡുകൾ വികസിപ്പിക്കണം. കാരിത്താസ് ജംഗ്ഷനിൽനിന്ന് റെയിൽവേ മേൽപാലം കടന്ന് ഒറ്റക്കപ്പിലുമാവ്, ഐക്കരക്കുന്നേൽ ജംഗ്ഷൻ വഴി പാറോലിക്കൽ - മുട്ടപ്പള്ളി റോഡിലെത്തി അതിരമ്പുഴ, ആനമല വഴി കാണക്കാരി അമ്പലം ജംഗ്ഷനിൽ എറണാകുളം റോഡിലെത്താവുന്ന രീതിയിൽ ഗതാഗതം വഴി തിരിച്ചുവിടാവുന്നതാണ്. വിവിധ മേഖലകളിലെ റോഡുകളുടെ സാധ്യത പഠിച്ച് ഗതാഗതം ക്രമീകരിക്കാനുള്ള നടപടികൾ ഉണ്ടാകണമെന്ന നിർദേശമാണ് ഉയരുന്നത്.

വൈക്കത്ത് ഒന്പതു റോഡുകൾ പിഎംജിഎസ്‌വൈ പദ്ധതിയിൽ

വൈക്കം: വൈക്കം നിയോജക മണ്ഡലത്തിലെ ഒന്പത് റോഡുകൾ പിഎംജിഎസ്‌‌വൈ പദ്ധതിയുടെ പ്രാഥമിക ലിസ്റ്റിൽപ്പെടുത്തി നിർമാണപ്രവർത്തനങ്ങൾക്ക് അനുമതിയായതായി കെ. ഫ്രാൻസിസ് ജോർജ് എംപി അറിയിച്ചു. റോഡുകൾ ഏറ്റെടുത്ത് നിർമാണാനുമതി ലഭ്യമാക്കുന്നതിനുള്ള ഇടപെടലുകൾ നടത്തണമെന്നാവശ്യം ഉന്നയിച്ച് കേരള കോൺഗ്രസ് വൈക്കം നിയോജക മണ്ഡലം പ്രസിഡന്‍റ് പോൾസൺ ജോസഫിന്‍റെ നേതൃത്വത്തിൽ ഫ്രാൻസിസ് ജോർജ് എംപിക്ക് നിവേദനം നൽകയിരുന്നു. കപിക്കാട് -കല്ലുപുര- വാക്കേത്തറ റോഡ്, വെച്ചൂർ ഔട്ട് പോസ്റ്റ് - മറ്റം - കൊടുതുരുത്ത് റോഡ്, തലയോലപ്പറമ്പ് ഡി.ബി കോളജ് കല്ലുങ്കൽ - കോലോത്ത് റോഡ്, പുത്തൻപാലം - പുന്നപ്പൊഴി - പാലച്ചുവട് - കല്ലറ റോഡ്, കൊല്ലശേരി - പാറേൽ സൊസൈറ്റി റോഡ്, ഇറുമ്പയം പോസ്റ്റ് ഓഫീസ് - മധുരവേലി റോഡ്, തലയോലപ്പറമ്പ്പാലം - കോലത്താർ കനാൽ റോഡ്, കോനേരി- ആലങ്കേരി - പാടശേഖരം റോഡ്, കളത്രക്കരി -വടയാർ കടത്തുകടവു റോഡ് തുടങ്ങി ജനവാസ കേന്ദ്രങ്ങളെ തമ്മിൽ ബന്ധിപ്പിക്കുന്ന ആറു മുതൽ എട്ടു മീറ്റർ വരെ വീതിയുള്ള മൺറോഡുകളും സമാന തരത്തിലുള്ള റോഡുകളുമാണ് പ്രാഥമിക ലിസ്റ്റിൽ ഉൾപ്പെട്ടിട്ടുള്ളത്.

നിയന്ത്രണംവിട്ട കാര്‍ റോഡില്‍നിന്ന് ഓടയിലേക്ക് തെന്നിയിറങ്ങി അപകടം

പെരുവ: നിയന്ത്രണം വിട്ട കാര്‍ റോഡില്‍നിന്ന് ഓടയിലേക്കു തെന്നിയിറങ്ങി അപകടം. ആര്‍ക്കും പരിക്കില്ല. ഇന്നലെ ഉച്ചകഴിഞ്ഞ് രണ്ടിന് മുളക്കുളം വടുകുന്നപ്പുഴ കോളനിക്കു സമീപമാണ് അപകടം. ഞീഴൂര്‍ സ്വദേശികളായ ദമ്പതികള്‍ സഞ്ചരിച്ച കാറാണ് അപകടത്തില്‍പ്പെട്ടത്. പിറവത്ത് ബന്ധുവീട്ടില്‍ പോയി തിരികെ വരുന്നവഴി എതിരേ വന്ന വണ്ടിക്ക് സൈഡ് കൊടുത്തതാണ് അപകടത്തിനു കാരണം. മുളക്കുളം മുതല്‍ വടകുന്നപ്പുഴ എസ്എന്‍ഡിപി ക്ഷേത്രം വരെയുള്ള ഭാഗത്ത് കോണ്‍ക്രീറ്റ് ഉയര്‍ത്തി ചെയ്തിരിക്കുന്നതു മൂലം റോഡിന് ഇരുവശവും കട്ടിംഗ് രൂപപ്പെട്ടിരിക്കുകയാണ്. ഇവിടെ അപകടം പതിവാണ്. മൂന്നുമാസം മുമ്പ് നിയന്ത്രണംവിട്ട ആംബുലന്‍സ് മറിഞ്ഞ് ആംബുലന്‍സിലുണ്ടായിരുന്ന രോഗി മരിച്ചതും ഈ ഭാഗത്താണ്. നിരവധി തവണ ബന്ധപ്പെട്ട അധികൃതരെ വിവരമറിയിച്ചിട്ടും പ്രശ്‌നപരിഹാരത്തിന് യാതൊരു നടപടിയുമെടുക്കുന്നില്ലെന്ന് നാട്ടുകാര്‍ പറയുന്നു.

മുക്കൂട്ടുകഷായം ശരിയായി പ്രയോഗിച്ചാൽ വൈക്കവും തിരിച്ചുപിടിക്കാനാകും: തിരുവഞ്ചൂർ

ഉയനാപുരം: തെരഞ്ഞെടുപ്പിൽ വിജയിക്കാനുള്ള മുക്കൂട്ടുകഷായം നമ്മുടെ പക്കലുണ്ടെന്നും അതു ശരിയായി പ്രയോഗിച്ചാൽ വൈക്കവും യുഡിഎഫിന് തിരിച്ചുപിടിക്കാൻ കഴിയുമെന്ന് മുൻമന്ത്രി തിരുവഞ്ചൂർ രാധാകൃഷ്ണൻ. ഉദയനാപുരം മണ്ഡലം രണ്ടാം വാർഡ് കോൺഗ്രസ് കമ്മറ്റിയുടെ ആഭിമുഖ്യത്തിൽ സംഘടിപ്പിച്ച മഹാത്മാഗാന്ധി കുടുംബസംഗമം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. അഡ്വ.പി. പരമേശ്വരൻ, കെ.കെ. ബാലകൃഷ്ണൻ എന്നിവരുടെ വിജയത്തിലൂടെ വൈക്കത്ത് യുഡിഎഫിന്‍റെ സാധ്യത മുമ്പ് തെളിയിച്ചിട്ടുണ്ടെന്നും അദ്ദേഹം കുട്ടിച്ചേർത്തു. വാർഡ്പ്രസിഡന്‍റ് സജീവ് ഫ്രാൻസീസ് അധ്യക്ഷത വഹിച്ചു. കെപിസിസി അംഗം മോഹൻ ഡി. ബാബു മുഖ്യപ്രഭാഷണം നടത്തി. മെറിറ്റ് അവാർഡ് വിതരണം തിരുവഞ്ചൂർ രാധാകൃഷ്ണൻ എംഎൽഎ, മണ്ഡലം പ്രസിഡന്‍റ് പി.ഡി. ഉണ്ണി എന്നിവർ നിർവഹിച്ചു. മുതിർന്ന കോൺഗ്രസ് പ്രവർത്തകരെ ആദരിച്ചു. അക്കരപ്പാടംശശി, വി. ബിൻസ്, സുജാത ടീച്ചർ കളരിക്കത്തറ, മനോഹരൻ അടിയാപറമ്പിൽ തുടങ്ങിയവർ പ്രസംഗിച്ചു.

തെരുവുനായ ആക്രമണത്തിൽ ആട് ചത്തു; മറ്റൊന്നിനു പരിക്ക്

തലയോലപ്പറമ്പ്: കൂട്ടമായി എത്തിയ തെരുവുനായ്ക്കൾ കൂടിന് സമീപം കെട്ടിയിട്ടിരുന്ന അടിനെ കടിച്ചുകൊന്നു. ആക്രമണത്തിൽ മറ്റൊരു ആടിനു പരിക്കേറ്റു. ഇന്നലെ ഉച്ചയ്ക്ക് 2.30ന് തലയോലപ്പറമ്പ് തലപ്പാറയിലായിരുന്നു തെരുവുനായ്ക്കളുടെ ആക്രമണം. തലപ്പാറ പുളിംചുവട്ടിൽ ലില്ലി ജോസഫിന്‍റെ രണ്ട വയസ് പ്രായമുള്ള മുട്ടനാടിനെയാണ് കൊന്നത്. രണ്ടു വയസുള്ള പെണ്ണാടിനാണ് ഗുരുതരമായി പരിക്കേറ്റത്. കഴിഞ്ഞ 12ന് തെരുവുനായ്ക്കളുടെ ആക്രമണത്തിൽ ഇവരുടെ ആറുമാസം പ്രായമുള്ള ആട്ടിൻകുട്ടിക്ക് ഗുരുതരമായി പരിക്കേറ്റിരുന്നു. തുടർന്ന് വാക്സിൻ എടുത്തെങ്കിലും രണ്ടു ദിവസം കഴിഞ്ഞ് ചത്തു. ആട് വളർത്തിയാണ് നിർധനയായ ലില്ലി രണ്ടു മക്കളെ നഴ്സിംഗ് പഠിപ്പിക്കുന്നത്. ഇവരുടെ ബന്ധുവും സമീപവാസിയുമായ പുളിംചുവട്ടിൽ ജോണിയുടെ മൂന്നു കോഴികളെയും ഒരു താറാവിനെയും തെരുവുനായ്ക്കൾ കഴിഞ്ഞദിവസം കടിച്ചുകൊന്നിരുന്നു. തലപ്പാറയും സമീപ പ്രദേശവും തെരുവുനായ്ക്കളുടെ വിഹാരകേന്ദ്രമായിരിക്കുകയാണ്. കൂടമായെത്തുന്ന തെരുവുനായ്ക്കൾ വളർത്തുമൃഗങ്ങളെയും, കാൽനടയാത്രക്കാരെയും ആക്രമിക്കുന്നത് പതിവായിട്ടും അധികൃതർ നടപടി സ്വീകരിക്കുന്നില്ലെന്ന് പ്രദേശവാസികൾ ആരോപിക്കുന്നു.

ആറുമാസത്തിനകം 85% വീടുകളിലും കുടിവെള്ളമെത്തും: മന്ത്രി റോഷി

വൈക്കം: ആറുമാസത്തിനകം കേരളത്തിലെ 85ശതമാനം കുടുംബങ്ങളിലും കുടിവെള്ളമെത്തുമെന്ന് ജലവിഭവ വകുപ്പ് മന്ത്രി റോഷി അഗസ്റ്റിൻ. തലയാഴം പഞ്ചായത്തിലെ വിവിധ പാടശേഖരങ്ങളുടെ അടിസ്ഥാന സൗകര്യ വികസനപ്രവർത്തനങ്ങളുടെ നിർമാണോദ്ഘാടനം പള്ളിയാട് എസ്എൻയുപി സ്കൂളിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സർക്കാർ അധികാരമേൽക്കുമ്പോൾ17ലക്ഷം കുടുംബങ്ങളിലാണ് കുടിവെളളം ലഭിച്ചിരുന്നത്. ജലമിഷൻ പദ്ധതിയിലൂടെ ഇന്നത് 43 ലക്ഷമായി ഉയർന്നു. 35 ലക്ഷം കുടുംബങ്ങളിൽക്കൂടി വെള്ളമെത്തിക്കാനാനുള്ള നടപടികൾ ദ്രുതഗതിയിൽ പുരോഗമിക്കുകയാണ്. കാർഷികമേഖലയ്ക്കു മുന്തിയ പരിഗണന നൽകുന്ന സർക്കാരാണ് സംസ്ഥാനം ഭരിക്കുന്നതെന്നും ഇതിനായി കൃഷി വകുപ്പുമായി ചേർന്ന് ജലസേചന വകുപ്പും കുട്ടനാട് പാക്കേജിലടക്കം ഉൾപ്പെടുത്തി നിരവധികാര്യങ്ങൾ നടപ്പിലാക്കി വരികയാണെന്നും അദ്ദേഹം കുട്ടിച്ചേർത്തു. തലയാഴം പഞ്ചായത്ത് പരിധിയിലെ കണ്ണുവള്ളിക്കരി, മൂന്നാംവേലിക്കരി, വട്ടക്കരി, ഏനേഴം, പനച്ചിത്തുരുത്ത്, മണ്ണാത്തുശേരി, മുണ്ടാർ മൂന്ന്, ചെട്ടിക്കരി, വനംസൗത്ത്, വരമ്പിനകം, എന്നീ പാടശേഖരങ്ങളുടെ അടിസ്ഥാന സൗകര്യ വികസനത്തിനായി ജലസേചന വകുപ്പ് കുട്ടനാട് പാക്കേജിൽ ഉൾപ്പെടുത്തി ആറുകോടി 10 ലക്ഷം രൂപയാണ് അനുവദിച്ചിരിക്കുന്നത്. പുറംബണ്ട് നിർമാണം, റീട്ടെയിനിംഗ് വാൾ നിർമാണവും ബലപ്പെടുത്തലും, മോട്ടോർഷെഡ് നിർമാണവും പരിപാലനവും തുടങ്ങി വിവിധ അടിസ്ഥാന സൗകര്യ വികസനപ്രവർത്തനങ്ങളാണ് നടത്തുന്നത്. 804 ഏക്കർ വരുന്ന പാടശേഖരങ്ങൾക്കാണ് പദ്ധതി പ്രകാരം ഗുണം ലഭിക്കുന്നത്. സി.കെ. ആശ എംഎൽഎ അധ്യക്ഷത വഹിച്ചു. വൈക്കം ബ്ലോക്ക് പഞ്ചായത്ത് പ്രസിഡന്‍റ് എസ്. ബിജു, തലയാഴം പഞ്ചായത്ത് പ്രസിഡന്‍റ് രമേശ് പി. ദാസ്, കേരള കോൺഗ്രസ്-എം സംസ്ഥാന കമ്മറ്റി അംഗം ബിജു പറപ്പള്ളി, ജോസ് കാട്ടിപ്പറമ്പിൽ, എൻ. സോമൻ, വൈസ് പ്രസിഡന്‍റ് ജെൽസി സോണി, ബ്ലോക്ക് പഞ്ചായത്തംഗം കെ.കെ. രഞ്ജിത്ത്, പഞ്ചായത്തംഗങ്ങളായ ടി. മധു, ഉദയപ്പൻ, സിനി സലി, കുട്ടനാട് ഡെവലപ്മെന്‍റ് സർക്കിൾ സൂപ്രണ്ടിംഗ് എൻജിനിയർ കെ. രാജേഷ്, ഉൾനാടൻ ജലഗതാഗതം ആൻഡ് കുട്ടനാട് പാക്കേജ് ചീഫ് എൻജിനിയർ സി.കെ. ശ്രീകല, കുട്ടനാട് ഡെവലപ്മെന്‍റ് ഡിവിഷൻ എക്സിക്യൂട്ടീവ് എൻജിനിയർ ആർ. അജയകുമാർ, വൈക്കം ബ്ലോക്ക് കൃഷി അസിസ്റ്റന്‍റ് ഡയറക്ടർ വിനു ചന്ദ്രബോസ്, തലയാഴം കൃഷി ഓഫീസർ രേഷ്മ ഗോപി, രാജേന്ദ്രൻ നായർ, ടി.കെ. സുമേഷ്, വി.പോപ്പി, ലക്ഷ്മണൻ എന്നിവർ പങ്കെടുത്തു.

കാർത്യായനിയമ്മയെ ആദരിച്ചു

കൂരോപ്പട: കൂരോപ്പട വില്ലേജ് ഓഫീസിനു സൗജന്യമായി സ്ഥലം സംഭാവന ചെയ്ത ആധുനിക കൂരോപ്പടയുടെ ശില്പി ആശാരിപറമ്പിൽ ഗോപാലപിള്ളയുടെ മകൾ കാർത്ത്യായനിയമ്മയെ ചാണ്ടി ഉമ്മൻ എംഎൽഎ, ജില്ലാ കളക്ടർ ജോൺ വി.സാമുവൽ എന്നിവർ പൊന്നാടയണിയിച്ച് ആദരിച്ചു. ജില്ലാ പഞ്ചായത്തംഗം രാധാ വി. നായർ, ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി, പഞ്ചായത്ത് പ്രസിഡന്‍റ് അമ്പിളി മാത്യൂ, ബ്ലോക്ക് പഞ്ചായത്തംഗം ടി.എം. ജോർജ് , പഞ്ചായത്തംഗങ്ങളായ അനിൽ കൂരോപ്പട, കുഞ്ഞൂഞ്ഞമ്മ കുര്യൻ, ബാബു വട്ടുകുന്നേൽ, സന്ധ്യാ സുരേഷ്, ഷീലാ ചെറിയാൻ, വില്ലേജ് ഓഫീസർ വിനു തുടങ്ങിയവർ പങ്കെടുത്തു. വില്ലേജ് ഓഫീസ് കൂടാതെ പഞ്ചായത്ത് ഓഫീസ്, പഞ്ചായത്ത് ഷോപ്പിംഗ് കോംപ്ലക്സ്‌, ചന്ത മൈതാനം, പബ്ലിക് ലൈബ്രറി എന്നിവയ്ക്കും ഇന്നു കോടികൾ വിലമതിക്കുന്ന സ്ഥലം സൗജന്യമായി നൽകിയത് ആശാരിപറമ്പിൽ ഗോപാലപിള്ളയായിരുന്നു.

ഉമ്മൻചാണ്ടി അനുസ്മരണം ഇന്ന്

ഏറ്റുമാനൂർ: മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ ഉമ്മൻചാണ്ടിയുടെ രണ്ടാം ചരമ വാർഷിക അനുസ്മരണവും കാരുണ്യ ധനസഹായ വിതരണവും ഇന്ന് വൈകുന്നേരം നാലിന് ഏറ്റുമാനൂർ മണ്ഡലം കോൺഗ്രസ് കമ്മിറ്റി ഹാളിൽ നടക്കും. മണ്ഡലം പ്രസിഡന്‍റ് പി.വി. ജോയി പൂവംനിൽക്കുന്നതിൽ അധ്യക്ഷത വഹിക്കുന്ന സമ്മേളനം തിരുവഞ്ചൂർ രാധാകൃഷ്ണൻ എംഎൽഎ ഉദ്ഘാടനം ചെയ്യും. ധനസഹായ വിതരണം ഡിസിസി പ്രസിഡന്‍റ് നാട്ടകം സുരേഷ് നിർവഹിക്കും. വിദ്യാഭ്യാസ അവാർഡ് വിതരണം ഐഎൻടിയുസി ജില്ലാ പ്രസിഡന്‍റ് ഫിലിപ്പ് ജോസഫും ചികിത്സ ധനസഹായ വിതരണം യുഡിഎഫ് ജില്ലാ കൺവീനർ ഫിൽസൺ മാത്യുവും നിർവഹിക്കും. ഡിസിസി വൈസ് പ്രസിഡന്‍റ് അഡ്വ. ജി. ഗോപകുമാർ അനുസ്മരണ സന്ദേശം നൽകും.

പാമ്പാടി ബ്ലോക്കില്‍ ജനകീയ ശുചീകരണ പ്രവര്‍ത്തനങ്ങള്‍ക്ക് തുടക്കം

പള്ളിക്കത്തോട്: മാലിന്യമുക്തം നവകേരളം കാമ്പയിന്‍റെ ഭാഗമായി പൊതുഇട ജനകീയ ശുചീകരണ പ്രവര്‍ത്തനങ്ങള്‍ക്ക് പാമ്പാടി ബ്ലോക്കില്‍ തുടക്കമായി. ബ്ലോക്ക് പഞ്ചായത്തുതല പരിപാടിയുടെ ഭാഗമായി അരുവിക്കുഴി ടൂറിസ്റ്റ് കേന്ദ്രം വൃത്തിയാക്കി. ശുചീകരണ പരിപാടിയുടെ ഉദ്ഘാടനം പാമ്പാടി ബ്ലോക്ക് പഞ്ചായത്ത് പ്രസിഡന്റ് ബെറ്റി റോയി മണിയങ്ങാട്ട് നിര്‍വഹിച്ചു. ബ്ലോക്ക് വൈസ് പ്രസിഡന്‍റ് പ്രഫ.എം.കെ. രാധാകൃഷ്ണന്‍ അധ്യക്ഷനായിരുന്നു. സംസ്ഥാന മന്ത്രതലാ യോഗതീരുമാനപ്രകാരം നവംബര്‍ ഒന്നുവരെ എല്ലാ മൂന്നാം ശനിയാഴ്ചകളിലുമാണ് തദ്ദേശ സ്വംയംഭരണ സ്ഥാപനങ്ങള്‍ ജനകീയ ശുചീകരണ പ്രവര്‍ത്തനങ്ങള്‍ പൊതു ഇടങ്ങളില്‍ നടത്തുന്നത്. സന്നദ്ധ സംഘടനകള്‍ക്കും പരിപാടിയില്‍ പങ്കുചേരാന്‍ അവസരമുണ്ട്. മികച്ച പ്രവര്‍ത്തനം നടത്തുന്ന സംഘടനകള്‍ക്ക് പുരസ്‌കാരങ്ങളും വിതരണം ചെയ്യും.

കോഴിക്കള്ളനായ പെരുന്പാന്പ് പിടിയിൽ

കുമരകം: പഞ്ചായത്തിലെ വായനശാല പ്രദേശവാസികൾക്ക് ആശ്വാസം, ഇനി അവരുടെ കോഴികളെ കുടുതലായി കാണാതാകുകയില്ല. കോഴിമോഷ്ടാവായ പെരുമ്പാമ്പ് പിടിയിലായി. പ്രദേശത്തെ പല വീടുകളിലെയും കോഴികളെ പതിവായി കാണാതായിരുന്നു. എന്നാൽ, കോഴികളെ കാണാതാകുന്നത് എങ്ങനെയെന്ന് ആർക്കും പിടികിട്ടിയിരുന്നില്ല. യഥാർഥ കോഴിക്കള്ളൻ ഇന്നലെ പിടിയിലായി. ഒമ്പതാം വാർഡിലെ വായനശാലക്കു സമീപമുള്ള ഒരു വ്യക്തിയുടെ വീട്ടിലെ കോഴിക്കൂട്ടിൽനിന്നാണ് കൂറ്റൻ പെരുന്പാമ്പിനെ പിടികൂടിയത്. ഫോറസ്റ്റ് വകുപ്പിൽ വിവരം അറിയിച്ചതിനെത്തുടർന്ന് കോട്ടയത്തെ ഫോറസ്റ്റ് ഓഫീസിന്‍റെ നിർദേശമനുസരിച്ച് സർപ്പ വോളണ്ടിയർ പി.സി. അഭിനേഷ് സ്ഥലത്തെത്തി പെരന്പാമ്പിനെ പിടികൂടി , ഉൾവനത്തിൽ പാമ്പിനെ തുറന്നു വിടുമെന്ന് അഭിനേഷ് പറഞ്ഞു.

കനത്ത മഴയില്‍ വീട് തകര്‍ന്നു

പനച്ചിക്കാട്: കനത്തമഴയില്‍ പനച്ചിക്കാട് എട്ടാം വാര്‍ഡില്‍ വീട് തകര്‍ന്നുവീണു. അടുക്കളയും ചിമ്മിനിയും അടക്കം തകര്‍ന്നുവീണ വീട്ടില്‍നിന്നു കുടുംബാംഗങ്ങള്‍ രക്ഷപ്പെട്ടത് തലനാരിഴയ്ക്ക്. പനച്ചിക്കാട് ആയുര്‍വേദ ആശുപത്രിക്കു സമീപം കിളിമംഗലം രാധാകൃഷ്ണന്‍റെ വീടിനാണ് നാശനഷ്ടങ്ങള്‍ സംഭവിച്ചത്. ശനിയാഴ്ച രാത്രി ഒന്‍പതിന് പെയ്ത കനത്ത മഴയിലാണ് വീടിന്‍റെ ഒരു വശം തകര്‍ന്നുവീണത്. രാധാകൃഷ്ണന്‍റെ അമ്മയും ഭാര്യയും മകനുമാണ് വീട്ടിലുണ്ടായിരുന്നത്. ഓടും, ഷീറ്റും മേഞ്ഞ വീടിന്‍റെ അടുക്കളഭാഗം പൂര്‍ണമായി തകര്‍ന്നതിനാല്‍ കുടുംബം വാടകവീടിനെ ആശ്രയിച്ചിരിക്കുകയാണിപ്പോള്‍.

മെഡിസെപ്പിന് ഉള്‍പ്പെടെയുള്ള കോടികളുടെ ബാധ്യത സർക്കാർ തീര്‍ക്കണമെന്ന് യുഡിഎഫ്

കോട്ടയം: മെഡിസെപ്പ് ഉള്‍പ്പെടെ കോടികളുടെ ആശുപത്രികള്‍ക്കുള്ള ബാധ്യത തീര്‍ക്കാന്‍ സര്‍ക്കാര്‍ തയാറാവണമെന്ന് യുഡിഎഫ് കണ്‍വീനര്‍ ഫില്‍സണ്‍ മാത്യൂസ്. ജില്ലാ കോണ്‍ഗ്രസ് കമ്മിറ്റി ഓഫീസില്‍ ചേര്‍ന്ന യുഡിഎഫ് കോട്ടയം നിയോജമണ്ഡലം പ്രവര്‍ത്തക യോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മണ്ഡലം ചെയര്‍മാന്‍ അബ്ദുള്‍ സലാം അധ്യക്ഷത വഹിച്ചു. യുഡിഎഫ് കണ്‍വീനര്‍ എസ്. രാജീവ്, സെക്രട്ടറി ജോയ് ചെട്ടിശേരി, ഡിസിസി ഭാരവാഹികളായ മോഹന്‍ കെ. നായര്‍, യൂജിന്‍ തോമസ്, നന്തിയോട് ബഷീര്‍, അസീസ് കുമാരനല്ലൂര്‍, ഷവാസ് ഷെരീഫ്, എബി പൊന്നാട്ട് എന്നിവര്‍ പ്രസംഗിച്ചു.

മെഡി. കോളജ് ആശുപത്രി കവാടം ഇരുട്ടിൽ

ഗാന്ധിനഗർ: മെഡിക്കൽ കോളജ് ആശുപത്രി കവാടം ഇരുട്ടിൽ. അത്യാഹിതത്തിലേക്ക് പ്രവേശിക്കുന്ന കവാടമാണ് ഇരുട്ടിലായിരിക്കുന്നത്. ഇവിടെ വഴി വിളക്കുകളോ മറ്റു സംവിധാനങ്ങളോ ഇല്ലാത്തതാണ് ഇതിനു കാരണം. ഇതേത്തുടർന്ന് രാത്രികാലങ്ങളിൽ രോഗികളുമായി വരുന്ന ആംബുലൻസ് അടക്കമുള്ള വാഹനങ്ങൾക്ക് അത്യാഹിത വിഭാഗത്തിലേക്കുള്ള വഴി തെറ്റുന്നത് പതിവായിരിക്കുകയാണ്. അതേസമയം ഇവിടെ ഹൈമാസ്റ്റ് ലൈറ്റ് സ്ഥാപിച്ച് അതിന്‍റെ ക്രമീകരണങ്ങളും പൂർത്തിയായതാണ്. ലൈറ്റ് തെളിക്കുന്നതിന്‍റെ ഉദ്ഘാടനം മാത്രം നടന്നാൽ മതി. ഇതു വൈകുന്നതാണ് നിലവിൽ ആശുപത്രി കവാടം ഇരുട്ടിലായിരിക്കുന്നതിന് കാരണം. ഇവിടെ വെളിച്ചം ഇല്ലാതായിട്ട് ഒരു വർഷം പിന്നിട്ടു. ഏറ്റുമാനൂർ എംഎൽഎയും മന്ത്രിയുമായ വി.എൻ. വാസവൻ അനുവദിച്ച എട്ടര ലക്ഷം രൂപ ചെലവഴിച്ചാണ് ഹൈമാസ്റ്റ് ലെറ്റ് സ്ഥാപിച്ചിരിക്കുന്നത്.

ഏറ്റുമാനൂരിലെ കുരുക്കഴിക്കാൻ നടപടിയുണ്ടാകണം

ഏറ്റുമാനൂർ: അഴിയാത്ത കുരുക്കിൽനിന്ന് രക്ഷനേടാൻ ഏറ്റുമാനൂരിനു മുന്നിൽ വഴി തെളിയുമോ? പട്ടിത്താനം - മണർകാട് ബൈപാസ് റോഡ് പൂർത്തിയാകുകയും റിംഗ് റോഡ് യാഥാർഥ്യമാകുകയും ചെയ്യുന്നതോടെ നഗരത്തിലെ ഗതാഗതക്കുരുക്കിന് അയവുണ്ടാകുമെന്നായിരുന്നു പ്രതീക്ഷ. പക്ഷേ, ബൈപാസ് റോഡ് നിർമാണം പൂർത്തിയായിട്ടും കിലോമീറ്ററുകൾ നീളുന്ന ഗതാഗതക്കുരുക്ക് പതിവാണ്. ഗതാഗതക്കുരുക്കുണ്ടായാൽ പട്ടിത്താനം ജംഗ്ഷൻ മുതൽ പാറോലിക്കൽ ജംഗ്ഷൻ വരെ എംസി റോഡ് ഇപ്പോഴും നിശ്ചലമാകുകയാണ്. റിംഗ് റോഡിലാണ് അടുത്ത പ്രതീക്ഷ. എന്നാൽ, റിംഗ് റോഡിന്‍റെ നിർമാണം ആരംഭിച്ചിട്ടുപോലുമില്ല. റോഡ് യാഥാർഥ്യമാകാൻ ഇനിയും ഏറെ കാത്തിരിക്കേണ്ടതുണ്ട്. നിലവിലെ സാഹചര്യത്തിൽ ഗതാഗതക്കുരുക്ക് കാലങ്ങളോളം തുടരാനാണ് സാധ്യത. റിംഗ് റോഡിൽ കുരുക്കഴിയുമോ? നിർദിഷ്‌ട റിംഗ് റോഡ് വന്നാൽത്തന്നെ ഗതാഗതക്കുരുക്കിന് പരിഹാരമാകാൻ സാധ്യതയില്ലെന്ന് ചൂണ്ടിക്കാണിക്കപ്പെടുന്നു. എംസി റോഡിൽ തുമ്പശേരിപ്പടിയിൽനിന്ന് ആരംഭിച്ച് പട്ടിത്താനം റൗണ്ടാന ജംഗ്ഷനിലാണ് റിംഗ് റോഡ് അവസാനിക്കുന്നത്. തുമ്പശേരിപ്പടിയും പട്ടിത്താനം ജംഗ്ഷനും ഗതാഗതക്കുരുക്കിൽ പെടുന്ന സ്ഥലങ്ങളായതിനാൽ റിംഗ് റോഡു കൊണ്ട് ഉദ്ദേശിച്ച ഫലം ഉണ്ടാകാനിടയില്ലെന്നാണ് അഭിപ്രായമുയരുന്നത്. ബദൽ മാർഗങ്ങൾ വികസിപ്പിക്കണം രൂക്ഷമായ ഗതാഗതക്കുരുക്ക് രൂപപ്പെടുന്ന മേഖലയ്ക്ക് മുമ്പുതന്നെ ഗതാഗതം തിരിച്ചുവിടാനാകുന്ന രീതിയിൽ റോഡുകൾ വികസിപ്പിക്കണം. കാരിത്താസ് ജംഗ്ഷനിൽനിന്ന് റെയിൽവേ മേൽപാലം കടന്ന് ഒറ്റക്കപ്പിലുമാവ്, ഐക്കരക്കുന്നേൽ ജംഗ്ഷൻ വഴി പാറോലിക്കൽ - മുട്ടപ്പള്ളി റോഡിലെത്തി അതിരമ്പുഴ, ആനമല വഴി കാണക്കാരി അമ്പലം ജംഗ്ഷനിൽ എറണാകുളം റോഡിലെത്താവുന്ന രീതിയിൽ ഗതാഗതം വഴി തിരിച്ചുവിടാവുന്നതാണ്. വിവിധ മേഖലകളിലെ റോഡുകളുടെ സാധ്യത പഠിച്ച് ഗതാഗതം ക്രമീകരിക്കാനുള്ള നടപടികൾ ഉണ്ടാകണമെന്ന നിർദേശമാണ് ഉയരുന്നത്.

പരിപ്പ്-തൊള്ളായിരം-വരമ്പിനകം റോഡിൽ നാട്ടുകാരുടെ ശ്രമദാനം

അയ്മനം: വർഷങ്ങളായി തകർന്നുകിടക്കുന്ന പരിപ്പ് -തൊള്ളായിരം റോഡിലെ കുഴികൾ നാട്ടുകാർ അടച്ചു . മഴ കനത്തതോടെ നടക്കാൻപോലും കഴിയാത്ത ദുരവസ്ഥയിലായിരുന്നു റോഡ്. പരിപ്പിൽനിന്നും തൊള്ളായിരം വഴി പടിഞ്ഞാറേക്കുള്ള യാത്രാ ദുരിതപൂർണമായിട്ട് വർഷങ്ങളായി. ഒരു അത്യാഹിതമുണ്ടായാൽ ആംബുലൻസ് പോലും എത്തില്ലെന്നാണ് നാട്ടുകാരുടെ ആക്ഷേപം. സഹികെട്ടാണ് നാട്ടുകാർ മുൻകൈയെടുത്തു കുഴികൾ അടയ്ക്കുന്നത്. പരിപ്പ് ഹൈസ്കൂളിന്‍റെ ബസ് പോകുന്ന ഈ റോഡ് തീർത്തും സഞ്ചാരയോഗ്യമല്ലാത്തതിനെ ത്തുടർന്ന് കുട്ടികളുടെ സ്കൂൾ യാത്ര ദുഷ്കരമായ സാഹചര്യത്തിലാണ് മാതാപിതാക്കളും നാട്ടുകാരും മുൻകൈയെടുത്ത് കുഴികൾ മക്കിട്ട് നികത്തുന്നത്. ഇന്നലെ രാവിലെ തുടങ്ങിയ അധ്വാനം പ്രതികൂല കാലാവസ്ഥമൂലം പൂർത്തിയായിട്ടില് . പണിതീരാത്ത തൊള്ളായിരം പാലത്തിന്‍റെ സമീപത്തെ റോഡിലാണ് ഇന്നലെ ശ്രമദാനം നടത്തിയത്.

രാമപുരം നാലമ്പലങ്ങളില്‍ ഭക്തജനത്തിരക്ക്

രാമപുരം: നാലമ്പല തീര്‍ഥാടന കാലത്തിലെ ആദ്യ ഞായറാഴ്ചയായ ഇന്നലെ അഭൂതപൂര്‍വമായ ഭക്തജന തിരക്കാണ് രാമപുരത്തെ നാലമ്പലങ്ങളില്‍ അനുഭവപ്പെട്ടത്. പുലര്‍ച്ചെ നാലിന് നിര്‍മാല്യദര്‍ശനത്തിന് നട തുറക്കുന്നതിന് മുന്പ് മുതല്‍ ഭക്തജനങ്ങളുടെ നീണ്ട നിരയുണ്ടായിരുന്നു. പുതുപ്പള്ളി എംഎല്‍എ ചാണ്ടി ഉമ്മനും ഇന്നലെ ദര്‍ശനത്തിനെത്തിയിരുന്നു. ഭക്തജനങ്ങള്‍ക്ക് അന്നദാനം വിളമ്പിക്കൊടുത്തശേഷം അന്നദാനവും കഴിച്ചാണ് മടങ്ങിയത്. ബിജു പുന്നത്താനം, പഞ്ചായത്ത് പ്രസിഡന്‍റ് ലിസമ്മ മത്തച്ചന്‍, മോളി പീറ്റര്‍, കെ.കെ. ശാന്താറാം, സണ്ണി കാര്യപ്പുറം, റോബി ഊടുപുഴ, മനോജ് ചീങ്കല്ലേല്‍ പ്രദോഷ് പാലവേലി, സജി ചീങ്കല്ലേല്‍ തുടങ്ങിയ നേതാക്കളും അദ്ദേഹത്തോടൊപ്പമുണ്ടായിരുന്നു. നാലമ്പല ദര്‍ശന കമ്മിറ്റി പ്രസിഡന്‍റ് എ.ആര്‍. ബുദ്ധന്‍, പ്രാണ്‍ അമനകര മന, പ്രദീപ് അമനകര മന എന്നിവര്‍ ചേര്‍ന്ന് എംഎല്‍എയെ സ്വീകരിച്ചു. പ്രതികൂലമായ കാലാവസ്ഥയിലും പ്രതീക്ഷിച്ചതിലും കൂടുതല്‍ ഭക്തജനങ്ങളെത്തിയതിനാല്‍ മണിക്കൂറുകള്‍ ക്യൂ നിന്നാണ് തീര്‍ത്ഥാടകര്‍ ദര്‍ശനം പൂര്‍ത്തിയാക്കി മടങ്ങിയത്. സംസ്ഥാനത്തെ വിവിധ ഡിപ്പോകളില്‍ നിന്നുമായി കെഎസ്ആര്‍ടിസി മുപ്പതോളം സര്‍വീസുകളും നടത്തി.

നഗരമധ്യത്തിലെ കടത്ത് സർവീസ് കൗതുകമാകുന്നു...

കോട്ടയം: കൊതുമ്പുവള്ളത്തില്‍ ആറിനും തോടിനുമൊക്കെ കുറുകെ കടന്നുള്ള യാത്രകള്‍ അന്യമാകുമ്പോള്‍ കോട്ടയം നഗരമധ്യത്തില്‍ താഴത്തങ്ങാടി ഇടക്കാട്ടുപള്ളി കടവിലെ 62 കാരനായ രാജുവും കടത്തുസര്‍വീസും കൗതുക കാഴ്ചയാകുന്നു. കോട്ടയം നഗരസഭയെയും അയ്മനം പഞ്ചായത്തിനെയും ബന്ധിപ്പിച്ചാണ് ഇടയ്ക്കാട്ടുപള്ളി കടവിലെ കടത്ത്. ഇരുകരകളിലും വാഹനമുള്ളവര്‍ക്ക് മൂന്നു കിലോമീറ്റര്‍ അധികം ചുറ്റിയാല്‍ താഴത്തങ്ങാടി പാലത്തിലൂടെ അക്കരെയെത്താമെങ്കിലും മറ്റു യാത്രക്കാര്‍ക്ക് കടത്താണ് ആശ്രയം. ഞായറാഴ്ചകളില്‍ പള്ളിയിലേക്കും ക്ഷേത്രങ്ങളിലേക്കും എത്താനും കൂടുതല്‍ പേരും കടത്തുസര്‍വീസിനെയാണ് ആശ്രയിക്കുന്നത്. അയ്മനം പഞ്ചായത്തിന്‍റെ കീഴിലാണ് കടത്തുവള്ള സര്‍വീസ്. 15 വര്‍ഷമായി മര്യാത്തുരുത്ത് വെട്ടിക്കാട്ടുവീട്ടില്‍ രാജുവാണ് വള്ളത്തില്‍ യാത്രക്കാരെ അക്കരെയിക്കരെ എത്തിക്കുന്നത്. ഒരു ദിവസംപോലും മുടങ്ങാതെ രാജു കടവിലുണ്ടാകും. രാവിലെ ഏഴിനു തുടങ്ങി വൈകുന്നേരം ആറുവരെയാണ് സര്‍വീസ്. ഞായറാഴ്ച ഉച്ചവരെയാണ് സര്‍വീസ്. ആവശ്യക്കാര്‍ ഉണ്ടെങ്കില്‍ ഫോണില്‍ വിളിച്ചാല്‍ ഓടിയെത്തും. കടത്തു സര്‍വീസിനു പ്രതിദിനം 525 രൂപയാണ് ശമ്പളം. പഞ്ചായത്താണ് ശമ്പളവും വള്ളത്തിന്‍റെ വാടകയും നല്‍കുന്നത്. കടത്തിന് യാത്രക്കാര്‍ക്ക് ചാര്‍ജ് ഇല്ല. അറ്റകുറ്റപ്പണികള്‍ സ്വയം ചെയ്യണം. സ്വകാര്യവ്യക്തിയുടെ വള്ളമാണ്. സ്വന്തമായി ചെറുവള്ളവുമുണ്ട്. തടികൊണ്ടുള്ള വള്ളത്തില്‍ കടത്തുകാരനടക്കം മൂന്നുപേര്‍ക്കേ ഒരേ സമയം സഞ്ചരിക്കാനാകൂ. വെള്ളപ്പൊക്കക്കാലത്തും ശക്തമായ ഒഴുക്കിലും പേടിയില്ലാതെ രാജു വള്ളമിറക്കി ആളുകളെ മറുകരയില്‍ എത്തിക്കും. ചെറുപ്പത്തില്‍ത്തന്നെ നീന്തല്‍ പരിശീലിച്ചതിനാല്‍ വെള്ളത്തെ പേടിയില്ല. 2018ലെ പ്രളയ രക്ഷാപ്രവര്‍ത്തനങ്ങളിലും പങ്കാളിയായി. അക്കരെ കടവിനോടു ചേര്‍ന്നാണ് രാജുവും ഭാര്യ സുമ, മക്കളായ രാഹുല്‍, രഞ്ജിത, മരുമകന്‍ കണ്ണന്‍ എന്നിവര്‍ താമസിക്കുന്നത്.

അതിരമ്പുഴയുടെ ജനകീയ മുഖമായ ജെ. ജോസഫിന് അന്ത്യാഞ്ജലി

അതിരമ്പുഴ: വിദ്യാർഥി രാഷ്‌ട്രീയത്തിലൂടെ പൊതുപ്രവർത്തനമാരംഭിച്ച് അതിരമ്പുഴയുടെ ജനകീയ മുഖമായി മാറിയ ജെ. ജോസഫിന് ഇന്നും നാളെയുമായി നാട് അന്ത്യാഞ്ജലി അർപ്പിക്കും. കേരള വിദ്യാർഥി കോൺഗ്രസിലൂടെ രാഷ്‌ട്രീയ പ്രവർത്തനം ആരംഭിച്ച ജെ. ജോസഫ് പിന്നീട് കേരള യൂത്ത്ഫ്രണ്ടിന്‍റെ ഓഫീസ് ചാർജുള്ള ജില്ലാ ജനറൽ സെക്രട്ടറിയായി. കേരള കോൺഗ്രസ് എമ്മിന്‍റെ മണ്ഡലം പ്രസിഡന്‍റ്, ജില്ലാ സെക്രട്ടറി എന്നീ നിലകളിലും പ്രവർത്തിച്ചു. പതിറ്റാണ്ടുകൾ അതിരമ്പുഴയുടെ രാഷ്‌ട്രീയ, സാമൂഹിക മണ്ഡലങ്ങളിലെ നിറസാന്നിധ്യമായിരുന്നു ജെ. ജോസഫ്. അതിരമ്പുഴ പഞ്ചായത്ത് മെംബർ, വൈസ് പ്രസിഡന്‍റ്, പ്രസിഡന്‍റ്, അതിരമ്പുഴ റീജണൽ സർവീസ് സഹകരണ ബാങ്ക് വൈസ് പ്രസിഡന്‍റ് സ്ഥാനങ്ങളും വഹിച്ചു. കെ.എം. മാണിയുമായി അദ്ദേഹത്തിന്‍റെ മരണം വരെ അടുത്തബന്ധം കാത്തുസൂക്ഷിച്ചു. കേരള കോൺഗ്രസ് -എം എൽഡിഎഫിലേക്ക് മാറിയപ്പോൾ കേരളാ കോൺഗ്രസിലൂടെ യുഡിഎഫിൽത്തന്നെ ഉറച്ചുനിന്നു. നിലവിൽ കേരള കോൺഗ്രസ് സ്റ്റിയറിംഗ് കമ്മിറ്റി അംഗമായിരുന്നു. ജോർജ് ജോസഫ് പൊടിപാറയുടെ തണലിൽ കെഎസ്‌യുവിന്‍റെ ഉറച്ച കോട്ടയായിരുന്ന മാന്നാനം കെഇ കോളജിൽ പൊടിപാറയുടെ ശൈലിയിൽത്തന്നെ കെഎസ്‌സി പ്രവർത്തകരെ അണിനിരത്തി കോളജ് യൂണിയൻ പിടിച്ചെടുത്തത് ജെ. ജോസഫിന്‍റെ രാഷ്‌ട്രീയ ജീവിതത്തിലെ തിളങ്ങുന്ന അധ്യായമായിരുന്നു. പിന്നെ വർഷങ്ങളോളം അവിടെ കെഎസ്‌സി അജയ്യശക്തിയായി നിലകൊണ്ടു. ഇന്ന് വൈകുന്നേരം 4.30ന് അതിരമ്പുഴ പഞ്ചായത്ത് ഓഫീസിലെയും അഞ്ചിന് അതിരമ്പുഴ റീജണൽ സർവീസ് സഹകരണ ബാങ്കിലെയും പൊതുദർശനത്തിനുശേഷം മൃതദേഹം 5.30ന് വീട്ടിൽ കൊണ്ടുവരും. സംസ്കാരം നാളെ ഉച്ചകഴിഞ്ഞ് രണ്ടിനു വീട്ടിലെ ശുശ്രൂഷകൾക്കുശേഷം അതിരമ്പുഴ സെന്‍റ് മേരീസ് ഫൊറോന പള്ളിയിൽ നടത്തും.

ആറിനു കുറുകെ മരം വീണ് നീരൊഴുക്ക് തടസപ്പെട്ടിട്ട് മാസങ്ങൾ

അയ്മനം: ആറിനു കുറുകെ മരം വീണ് നീരൊഴുക്ക് തടസപ്പെട്ടിട്ട് മാസങ്ങൾ. കല്ലുമട എസ്എൻഡിപി ശാഖാ ഓഫീസിനു സമീപം മീനച്ചിലാറിന്‍റെ കൈവഴിയിലാണ് ആഞ്ഞിലിമരം മറിഞ്ഞ് ആറിന് കുറുകെ കിടക്കാൻ തുടങ്ങിയിട്ട് ഒരു മാസത്തിലേറെയായത്. കുപ്പികളും, പ്ലാസ്റ്റിക് മാലിന്യങ്ങളും അടിഞ്ഞ് നീരൊക്കിന് തടസമായിരിക്കുകയാണിവിടെ. മീൻ പിടിക്കാൻ ചെറുവള്ളത്തിൽ പോലും യാത്ര ചെയ്യാൻ കഴിയാത്ത അവസ്ഥയാണിപ്പോൾ. കെട്ടുവള്ളങ്ങളും, യാത്രബോട്ടുകളും പൊയ്ക്കൊണ്ടിരുന്ന ആറിലാണ് മരം കിടക്കുന്നത്. 2018ലെ വെള്ളപ്പൊക്കത്തിനു ശേഷം കല്ലുമട പാലത്തിനു സമീപം എക്കൽ അടിഞ്ഞതും നീരൊഴുക്കിനും ജലഗതാഗതത്തിനും തടസമായി. ആഴം കുറഞ്ഞ് വേനൽക്കാലത്തിന് മുൻപുതന്നെ വെള്ളം വറ്റുന്ന അവസ്ഥയിലായ ആറ്റിൽ മരം വീണത് വലിയ പ്രതിസന്ധിയാണ് സൃഷ്ടിച്ചിരിക്കുന്നത്. ടൂറിസവുമായി ബന്ധപ്പെട്ടും ഈ അറിന് വളരെ പ്രാധാന്യമാണുള്ളത്. കനാൽ ടൂറിസത്തിന്‍റെ അനന്തസാധ്യതകൾ മുന്നിൽ നിൽക്കുമ്പോൾ ഇവയൊക്കെ സംരക്ഷിക്കപ്പെട്ടില്ലെങ്കിൽ ടൂറിസം മേഖലയിൽനിന്നും നമുക്ക് തിരിച്ചടിയുണ്ടാകും. പദ്ധതികളും, പ്ലാനുകളും ഉണ്ടെങ്കിലും എല്ലാം ജലരേഖകൾ പോലെയാണ് . ഓണാഘോഷത്തിന്‍റെ ഭാഗമായി ഐതീഹ്യം പേറുന്ന കുമാരനല്ലൂർ ഊരുചുറ്റ് വള്ളംകളി കടന്നുപോകുന്ന ആറ്റിലാണ് മരം വീണുകിടക്കുന്നതെന്നും അതു നീക്കം ചെയ്യേണ്ടത് അനിവാര്യമാണെന്നുമുള്ള പരിഗണന അധികൃതർക്കില്ല.

തായ് രുചികള്‍ ആസ്വദിക്കാന്‍ അവസരമൊരുക്കി ലുലു

കോട്ടയം: തായ്‌ലന്‍ഡിന്‍റെ ഭക്ഷണ വൈവിധ്യങ്ങളുടെ വിപുലമായ ശ്രേണിയൊരുക്കുന്ന ലുലു തായ് ഫിയസ്റ്റയ്ക്ക് തുടക്കമായി. കൊച്ചി, കോട്ടയം മാളുകളിലായിട്ടാണ് തായ് ഭക്ഷ്യമേള ആരംഭിച്ചിരിക്കുന്നത്. തായ്‌ലൻഡിന്‍റെ വാണിജ്യ മന്ത്രാലയത്തിന്‍റെ കീഴിലുള്ള ഇന്‍റര്‍നാഷണല്‍ ട്രേഡ് പ്രൊമോഷനും റോയല്‍ തായ് ഗവണ്‍മെന്‍റ്, മുംബൈ തായ് ട്രേഡ്‌സെന്‍റര്‍ എന്നിവയുമായി കൈകോര്‍ത്താണ് ലുലു തായ് ഫിയസ്റ്റ സംഘടിപ്പിക്കുന്നത്. ഇരുരാജ്യങ്ങളിലെയും ഭക്ഷ്യവൈവിധ്യങ്ങളെ പരിചയപ്പെടുത്താന്‍ ലക്ഷ്യമിട്ടുള്ളതാണ് പരിപാടി. തായ് ഭക്ഷണങ്ങളുടെ പവലിയനും ഉത്പന്നങ്ങളുടെ വിപുലമായ ശ്രേണിയുമാണ് ഒരുങ്ങുന്നത്. ഇരു രാജ്യങ്ങളും കൈകോര്‍ക്കുന്ന ഭക്ഷണമേളയില്‍ തായ്‌ലന്‍ഡിന്‍റെ തനതു ഭക്ഷണ വിഭവങ്ങള്‍ മേളയിലൊരുങ്ങും. കൂടാതെ തായ് സ്‌പെഷല്‍ ചിക്കന്‍ കറി അടക്കം വേറിട്ട ഭക്ഷങ്ങളും ആസ്വദിക്കാം. തായ് ഷെഫുമാര്‍ ഒരുക്കുന്ന ലൈവ് പാചകവും അരങ്ങേറും. കോട്ടയം മുനിസിപ്പല്‍ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ തായ് ഫിയസ്റ്റ ഉദ്ഘാടനം ചെയ്തു. ചടങ്ങില്‍ തായ് ട്രേഡ് സെന്‍റര്‍ എക്‌സിക്യൂട്ടീവ് ഡയറക്ടര്‍ സണ്‍ചാവീ പട്ടാനച്ചാക്ക്, ലുലു ഗ്രൂപ്പ് ഇന്ത്യ സിഒഒ രജിത് രാധാകൃഷ്ണന്‍, ലുലു ഇന്ത്യ റീട്ടെയില്‍ ജനറല്‍ മാനേജര്‍ സുധീഷ് നായര്‍, ലുലു കൊച്ചി റീജണല്‍ ഡയറക്ടര്‍ സാദിഖ് ഖാസിം, കോട്ടയം ലുലുമാള്‍ ജനറല്‍ മാനേജര്‍ നികിന്‍ ജോസഫ്, ഡെപ്യൂട്ടി മാനേജര്‍ ഹരികൃഷ്ണന്‍, അസിസ്റ്റന്‍റ് ബൈയിംഗ് മാനേജര്‍ ഇസ്മയില്‍ അല്‍ ജമീര്‍ തുടങ്ങിയവര്‍ പങ്കെടുത്തു. തായ് ഫിയസ്റ്റ 31ന് സമാപിക്കും.

അല്‍ഫോന്‍സാമ്മ സഹനങ്ങളെ വിശുദ്ധിയിലേക്കുള്ള പുഷ്പങ്ങളാക്കി: മാര്‍ മാത്യു മൂലക്കാട്ട്

ഭരണങ്ങാനം: തന്‍റെ ജീവിതംകൊണ്ടു വിശുദ്ധിയുടെ പരിമളം നിരന്തരം പരത്തിയ അല്‍ഫോന്‍സാമ്മ സഹന പാതകളില്‍ വിരിഞ്ഞ ഒരു മനോഹര പുഷ്പമാണെന്ന് കോട്ടയം ആർച്ച്ബിഷപ് മാർ മാത്യു മൂലക്കാട്ട്.അൽഫോൻസാ തിരുനാളിന്‍റെ രണ്ടാം ദിനമായ ഇന്നലെ വിശുദ്ധ അല്‍ഫോന്‍സാമ്മയുടെ കബറിടത്തിങ്കല്‍ വിശുദ്ധ കുര്‍ബാനയര്‍പ്പിച്ച് സന്ദേശം നല്‍കുകയായിരുന്നു അദ്ദേഹം. അല്‍ഫോന്‍സാമ്മ സഹനങ്ങളെ വിശുദ്ധിയിലേക്കുള്ള പുഷ്പങ്ങളാക്കി മാറ്റിയതുപോലെ നമ്മുടെ ജീവിതത്തില്‍ ദൈവം നല്‍കുന്ന ക്ലേശങ്ങളെ സന്തോഷത്തോടെ സ്വീകരിച്ച് അവയില്‍ നിന്ന് ശക്തി പ്രാപിച്ചു ദൈവ മഹത്വത്തിനായി ജീവിക്കാന്‍ നമ്മള്‍ ആത്മാര്‍ഥമായി പരിശ്രമിക്കണമെന്നും മാർ മാത്യു മൂലക്കാട്ട് പറഞ്ഞു. തിരുനാളിനോടനുബന്ധിച്ച് ഫാ. മാത്യു കുറ്റിയാനിക്കല്‍, ഫാ. ജോയല്‍ പണ്ടാരപ്പറമ്പില്‍ , ഫാ. ജേക്കബ് വടക്കേല്‍, ഫാ. പയസ് മലേക്കണ്ടം, ഫാ. മാത്യു പുന്നത്താനത്തുകുന്നേല്‍, രൂപത വികാരി ജനറാള്‍ മോണ്‍. സെബാസ്റ്റ്യന്‍ വേത്താനത്ത്, ഫാ. തോമസ് ഓലായത്തില്‍ എന്നിവര്‍ വിശുദ്ധ കുര്‍ബാനകള്‍ അര്‍പ്പിച്ചു. വൈകുന്നേരം 4.30 ന് റംശാ പ്രാര്‍ഥനയ്ക്ക് ഫാ. ജയിംസ് പനച്ചിക്കല്‍ കരോട്ടും 6.15ന് ജപമാല പ്രദക്ഷിണത്തിന് ഫാ.ആന്‍റണി വില്ലന്താനവും കാര്‍മികത്വം വഹിച്ചു. ഫാ. ബാബു കാക്കാനിയില്‍ ഹിന്ദിയിലും ഫാ. ജോർജ് ചീരാംകുഴിയില്‍ ഇംഗ്ലീഷിലും വിശുദ്ധ കുര്‍ബാന അര്‍പ്പിച്ചു. കേരളത്തിലെ അതിഥി തൊഴിലാളികളുടെ സംരക്ഷണത്തിനായി എസ്‌വിഡി സഭ നടത്തുന്ന സര്‍വസേവ സംഘ് ഡയറക്ടര്‍ ഫാ. ബാബു കാക്കാനിയുടെ നേതൃത്വത്തില്‍ അതിഥി തൊഴിലാളി കൂട്ടായ്മയും നടന്നു. യുവജന കൂട്ടായ്മയും ജപമാല പ്രദക്ഷിണവും ഭരണങ്ങാനം: വിശുദ്ധ അൽഫോൻസാമ്മയുടെ തിരുനാളിന്‍റെ ഭാഗമായി പാലാ രൂപത എസ്എംവൈഎം, ജീസസ് യൂത്ത് എന്നിവയുടെ നേതൃത്വത്തില്‍ അല്‍ഫോന്‍സാ തിര്‍ഥാടനം നടത്തി. ഡയറക്ടര്‍മാരായ ഫാ. മാണി കൊഴുപ്പംകുറ്റിയും ഫാ. മാത്യു എണ്ണയ്ക്കാപ്പള്ളിയും കൂട്ടായ്മയ്ക്ക് നേതൃത്വം നല്‍കി. നൂറുകണക്കിനു യുവജനങ്ങൾ കൂട്ടായ്മയിലും ജപമാല പ്രദക്ഷിണത്തിലും പങ്കുചേർന്നു. ഇന്നത്തെ തിരുക്കർമങ്ങൾ പുലര്‍ച്ചെ 5.30, രാവിലെ 6.45, 8.30, പത്ത്. ഉച്ചകഴിഞ്ഞ് 2.30, 3.30, അഞ്ച്, രാത്രി ഏഴ് എന്നീ സമയങ്ങളില്‍ വിശുദ്ധ കുര്‍ബാന. രാവിലെ 11.15ന് ആലപ്പുഴ ബിഷപ് മാര്‍ ജയിംസ് റാഫേല്‍ ആനാപറമ്പില്‍ ലത്തീന്‍ ക്രമത്തില്‍ വിശുദ്ധ കുര്‍ബാന അര്‍പ്പിക്കും. വൈകുന്നേരം 4.30 ന് റംശാ, 6.15ന് ജപമാല പ്രദക്ഷിണം.

ത്രിവേണി മൊബൈല്‍ സ്റ്റോറുകളുടെ പ്രവര്‍ത്തനം പാടെ നിലച്ചു

കോട്ടയം: സാധാരണക്കാര്‍ക്ക് ഭക്ഷ്യധാന്യങ്ങളും പലചരക്കുസാധനങ്ങളും ന്യായവിലയില്‍ ഗ്രാമപ്രദേശങ്ങളില്‍ എത്തിച്ചിരുന്ന ത്രിവേണി മൊബൈല്‍ വാഹന യൂണിറ്റുകളുടെ പ്രവര്‍ത്തനം ജില്ലയില്‍ നിലച്ചു. ജില്ലയിലെ ഒമ്പത് നിയോജക മണ്ഡലങ്ങളിലും മൊബൈല്‍ യൂണിറ്റുകള്‍ പ്രവര്‍ത്തിച്ചിരുന്നു. ഏറ്റുമാനൂര്‍, പുതുപ്പള്ളി എന്നിവിടങ്ങളിലെ യൂണിറ്റുകളാണു ഏറ്റവുമൊടുവില്‍ പൂട്ടിയത്. കണ്‍സ്യൂമര്‍ ഫെഡിന്‍റെ കോട്ടയം പുത്തനങ്ങാടി ഗോഡൗണിനുസമീപം മൊബൈല്‍ യൂണിറ്റിന്‍റെ അഞ്ചു വാഹനങ്ങള്‍ തുരുമ്പെടുത്ത് നശിക്കുകയാണ്. മറ്റു മണ്ഡലങ്ങളില്‍ ഉപയോഗിച്ചിരുന്ന വാഹനങ്ങളാണ് ഇവിടെ അധികൃതര്‍ ഉപേക്ഷിച്ചിരിക്കുന്നത്. ത്രിവേണി, നന്മ സ്റ്റോറുകളിലെ ഉത്പന്നങ്ങളും ഗ്രാമപ്രദേശങ്ങളില്‍ വാഹനത്തില്‍ എത്തിക്കുന്ന പദ്ധതിയാണിത്. മലയോര മേഖലകള്‍ക്കും പടിഞ്ഞാറന്‍ മേഖലകള്‍ക്കും ഒരേപോലെ പ്രയോജനമായിരുന്നു മൊബൈല്‍ യൂണിറ്റുകള്‍. ചെറിയ ഇടവഴികളില്‍കൂടി പോലും പോകാവുന്ന വിധത്തിലുള്ള വാഹനങ്ങളാണ് ഉപയോഗിച്ചിരുന്നത്. നിശ്ചിത റൂട്ടുകളില്‍ രണ്ടാഴ്ചയ്ക്കുള്ളില്‍ സാധനങ്ങളുമായി വാഹനങ്ങള്‍ എത്തിയിരുന്നു. മഴക്കാലത്ത് അടക്കം ത്രിവേണിയുടെ വാഹനത്തിലുള്ള കച്ചവടം ഏറെ ഉപകരിച്ചുവെന്നു മലയോര വാസികളും പടിഞ്ഞാറന്‍ നിവാസികളും പറയുന്നു. മലയോര മേഖലയില്‍ പലരും കിലോമീറ്ററുകള്‍ നടന്നും വാഹനങ്ങളിലുമെത്തിയാണ് കണ്‍സ്യൂമര്‍ ഫെഡ് സാധനങ്ങള്‍ വാങ്ങിയിരുന്നത്. പടിഞ്ഞാറന്‍ മേഖലയിലും ഇതേ അവസ്ഥയായിരുന്നു. തീരപ്രദേശങ്ങളിലുള്ളവര്‍ക്കായി ഫ്‌ളോട്ടിംഗ് ത്രിവേണി സൂപ്പര്‍ സ്റ്റോറും പ്രവര്‍ത്തിച്ചിരുന്നു. ഇതിന്‍റെ പ്രവര്‍ത്തനവും നിലച്ചു. പ്രവര്‍ത്തനം നിലച്ചതോടെ കാഞ്ഞിരം ജെട്ടിയുടെ ഒരു ഭാഗത്താണ് ബോട്ട് സൂക്ഷിച്ചിരുന്നത്. സംരക്ഷണം ഇല്ലാതായതോടെ ബോട്ടില്‍ വെള്ളം കയറി പകുതിയും മുങ്ങി. അറ്റകുറ്റപ്പണിക്ക് ഒരു ലക്ഷം രൂപയായിരുന്നു എസ്റ്റിമേറ്റ്. 50 ലക്ഷം രൂപ മുടക്കി നിര്‍മിച്ച ഫ്‌ളോട്ടിംഗ് സ്റ്റോറിനു 10,000 ചതുരശ്ര അടി വിസ്തീര്‍ണമാണ് ഉണ്ടായിരുന്നത്. പൊതുഅവധി ദിവസങ്ങള്‍ ഒഴികെ എല്ലാ ദിവസങ്ങളിലും ഉള്‍നാടന്‍ ജലഗതാഗത സര്‍വീസിന്‍റെ മാതൃകയില്‍ പ്രധാന ബോട്ട് ജെട്ടികളില്‍ സൂപ്പര്‍ സ്റ്റോര്‍ പാര്‍ക്ക് ചെയ്തിരുന്നു. പലചരക്കു സാധനങ്ങള്‍ക്കു പുറമേ പഴം, പച്ചക്കറി വില്‍പനയും ഉണ്ടായിരുന്നു. സഞ്ചരിക്കുന്ന ത്രിവേണി മാര്‍ക്കറ്റുകള്‍ വീണ്ടും പ്രവര്‍ത്തനം ആരംഭിക്കുവാന്‍ നടപടി സ്വീകരിക്കണമെന്ന ആവശ്യം ശക്തമായി.

കോഴായിലെ കുടുംബശ്രീ കഫേ ഹിറ്റ്; ആദ്യ മൂന്നു മാസം അരക്കോടി വിറ്റുവരവ്

കോട്ടയം: ജില്ലയിലെ കുടുംബശ്രീയുടെ പ്രീമിയം കഫേ തുടക്കത്തില്‍ത്തന്നെ ഹിറ്റ്. ആദ്യ മൂന്നുമാസം കൊണ്ടുതന്നെ അരക്കോടിയിലേറെ രൂപയുടെ ബിസിനസുമായി കുറവിലങ്ങാടു കോഴായിലെ പ്രീമിയം കഫേ കുടുംബശ്രീയുടെ സംരംഭകചരിത്രത്തില്‍ത്തന്നെ പുതിയ അധ്യായമാവുകയാണ്. കോഴാ കെ.എം. മാണി തണല്‍ വിശ്രമകേന്ദ്രത്തിലാണ് കഫേ പ്രവർത്തിക്കുന്നത്. ദിവസവും ശരാശരി 60,000 രൂപയ്ക്കു മുകളിലുള്ള കച്ചവടമാണ് ഇവിടെ നടക്കുന്നത്. ഒരു ലക്ഷം രൂപയ്ക്കു മുകളില്‍ കച്ചവടം നടന്ന ദിവസങ്ങളുണ്ട്. ഏപ്രില്‍ എട്ടിനാണ് പ്രീമിയം റെസ്റ്ററന്‍റ് ആരംഭിച്ചത്. ജൂലൈ 16 വരെയുള്ള കണക്കനുസരിച്ച് റെസ്റ്ററന്‍റിലെ ഭക്ഷണവില്‍പനയിലൂടെ മാത്രം 54,69,487 രൂപയാണ് പ്രീമിയം കഫേയുടെ വരുമാനം. തുടങ്ങി രണ്ടാം മാസംതന്നെ പ്രതിമാസ ബിസിനസ് 20 ലക്ഷം രൂപ കടന്നിരുന്നു. മിതമായ നിരക്കില്‍, പ്രീമിയം നിലവാരത്തിലുള്ള റെസ്റ്ററന്‍റും എംസി റോഡരികില്‍ വിശാലമായ പാര്‍ക്കിംഗ് സൗകര്യവും ഏറ്റവും മികച്ച ടേക്ക് എ ബ്രേക്ക് വഴിയോരവിശ്രമസൗകര്യവുമാണ് കഫേയുടെ ഹൈലൈറ്റ്. 24 മണിക്കൂറും ടേക്ക് എ ബ്രേക്കും ശുചിമുറി സൗകര്യവും സൗജന്യമായി ലഭിക്കും. രാവിലെ 6.30 മുതല്‍ രാത്രി 11.30 വരെയാണ് കഫേയുടെ പ്രവര്‍ത്തനം. ഊണും ബിരിയാണിയുമാണ് ഏറ്റവും കൂടുതല്‍ വില്‍പനയുളളത്. പിടിയും കോഴിയും പോലെയുള്ള സ്‌പെഷല്‍ വിഭവങ്ങളും ചൈനീസ് വിഭവങ്ങളുമുണ്ട്. ആരോഗ്യകരമായ ഭക്ഷണം ആവിയിലൂടെ എന്ന മന്ത്രത്തിന് പ്രാധാന്യം നല്‍കി ചോറും ഇഡലിയും ഇടിയപ്പവും സാമ്പാറും കുടിവെള്ളവും അടക്കമുള്ളവ സ്റ്റീമര്‍ ഉപയോഗിച്ച് ആവിയിലാണ് പാചകം ചെയ്യുന്നത്. ഇതിനായി അഞ്ച് സ്റ്റീമറുകളുണ്ട്. രണ്ടു ഷിഫ്റ്റുകളിലായി 13 പാചകക്കാരാണ് കഫേയിലുള്ളത്. ഇവരടക്കം 52 കുടുംബശ്രീ വനിതകള്‍ക്കു തൊഴില്‍ നല്‍കുന്ന സംരംഭമായി പ്രീമിയം കഫേ മാറി. കുടുംബശ്രീ ജില്ലാ മിഷന്‍റെ മേല്‍നോട്ടത്തിലും പിന്തുണയിലുമാണ് പ്രീമിയം കഫേയുടെ പ്രവര്‍ത്തനങ്ങള്‍ മുന്നോട്ടു പോകുന്നത്. നിലവില്‍ രണ്ടാം നിലയില്‍ സ്ത്രീകള്‍ക്കായുള്ള ഷീ ലോഡ്ജിന്‍റെ നിര്‍മാണപ്രവൃത്തികള്‍ നടന്നുകൊണ്ടിരിക്കുകയാണ്. അതു പൂര്‍ത്തിയായാലുടന്‍ ഒന്നാം നിലയില്‍ ഗ്രില്‍ഡ് വിഭവങ്ങള്‍ അടക്കം നല്‍കുന്ന ഓപ്പണ്‍ റെസ്റ്ററന്‍റ് കൂടി ആരംഭിക്കാന്‍ പദ്ധതിയുണ്ട്. ഉഴവൂര്‍ ബ്‌ളോക്കിനു കീഴിലുള്ള ഏഴു സിഡിഎസ് ചെയര്‍പേഴ്സണ്‍മാരുടെ എക്‌സിക്യൂട്ടീവ് കമ്മിറ്റിയാണ് കഫേയുടെ ചുമതല വഹിക്കുന്നത്. വിപുലമായ സൗകര്യങ്ങൾ വിനോദ സഞ്ചാരികള്‍ക്കും കൂട്ടമായെത്തുന്നവര്‍ക്കും മുന്‍കൂട്ടി അറിയിച്ചാല്‍ ഒരുമിച്ചിരുന്നു ഭക്ഷണം കഴിക്കാൻ കഫേയിലും മുകള്‍നിലയിലെ ഹാളിലും സൗകര്യമൊരുക്കുന്നുണ്ട്. 6235152829 എന്ന വാട്‌സ്ആപ്പ് നമ്പറിലോ, 8281624939 നമ്പറിലോ ബന്ധപ്പെട്ടാല്‍ യാത്രാസംഘങ്ങള്‍ക്കു മുന്‍കൂറായി ഭക്ഷണം ഉറപ്പാക്കാം. കഫേയുടെ മുകള്‍ നിലയിലുള്ള 120 പേര്‍ക്കിരിക്കാവുന്ന എസി ഹാളിന്‍റെ നടത്തിപ്പുചുമതലയും കുടുംബശ്രീക്കാണ്. സ്വകാര്യപരിപാടികള്‍ക്കും ഹാള്‍ വിട്ടുനല്‍കുന്നുണ്ട്. 10,000 രൂപയാണ് വാടക. പരിപാടികള്‍ക്കാവശ്യമായ ഭക്ഷണവും പ്രീമിയം കഫേയില്‍ നിന്നു ലഭിക്കും.

ആമ്പല്‍ ടൂറിസം കാണാന്‍ ടൂറിസംമന്ത്രി നാളെ എത്തും

കോട്ടയം: മലരിക്കലിലെ മനം നിറയ്ക്കും കാഴ്ച കാണാന്‍ ടൂറിസം മന്ത്രിയെത്തുന്നു. നോക്കെത്താ ദൂരത്തോളം പിങ്ക് നിറം നിറച്ച് പരന്നുകിടക്കുന്ന ആമ്പല്‍പ്പൂവസന്തം കാണാനും ടൂറിസം സാധ്യതകള്‍ വിലയിരുത്താനുമാണ് മന്ത്രി പി.എ. മുഹമ്മദ് റിയാസ് നാളെ രാവിലെ ഏഴിന് മലരിക്കലില്‍ എത്തുന്നത്. ജൂണ്‍, ജൂലൈ, ഓഗസ്റ്റ് മാസങ്ങളിലായാണ് മലരിക്കലിലെ പാടശേഖരങ്ങളില്‍ ആമ്പല്‍ വിരിയുന്നത്. കൊയ്ത്ത് കഴിഞ്ഞ പാടശേഖരങ്ങളിലേക്ക് വെള്ളം കയറ്റുന്നതോടെ ആമ്പലുകള്‍ പൂക്കാന്‍ തുടങ്ങും. 1800 ഏക്കറുള്ള ജെ ബ്ലോക്ക് ഒന്‍പതിനായിരം പാടശേഖരത്തിന്‍റെ മലരിക്കല്‍ ഭാഗത്തും 820 ഏക്കറുള്ള തിരുവായിക്കരി പാടത്തുമായാണ് ആമ്പല്‍ പൂക്കള്‍ വസന്തം ഒരുക്കുന്നത്. രാത്രി വിരിയുന്ന പൂക്കള്‍ രാവിലെ പത്തോടെ വാടിത്തുടങ്ങും. സന്ദര്‍ശകര്‍ക്ക് വള്ളങ്ങളില്‍ ആമ്പലുകള്‍ക്കിടയിലൂടെ യാത്ര ചെയ്ത് കാഴ്ചകള്‍ കാണാനുള്ള സൗകര്യങ്ങള്‍ ഇവിടെയുണ്ട്. മീനച്ചിലാര്‍-മീനന്തറയാര്‍-കൊടൂരാര്‍ പുനഃസംയോജന പദ്ധതി, തിരുവാര്‍പ്പ് പഞ്ചായത്ത്, മലരിക്കല്‍ ടൂറിസം സൊസൈറ്റി, കാഞ്ഞിരം സര്‍വീസ് സഹകരണ ബാങ്ക്, തിരുവാര്‍പ്പ് വില്ലേജ് സര്‍വീസ് സഹകരണ ബാങ്ക്, ജെ-ബ്ലോക്ക്, തിരുവായ്ക്കരി പാടശേഖര സമിതികള്‍ എന്നിവര്‍ സംയുക്തമായാണ് ആമ്പല്‍ ഫെസ്റ്റ് നടത്തുന്നത്. കോട്ടയം - കുമരകം റോഡില്‍ ഇല്ലിക്കല്‍ കവലയില്‍ നിന്നും തിരുവാര്‍പ്പ് റോഡിലൂടെ തിരിഞ്ഞു പോകണം. കാഞ്ഞിരം ബോട്ട് ജെട്ടി റോഡിലൂടെ കാഞ്ഞിരം പാലം കയറിയിറങ്ങുന്ന സ്ഥലമാണ് മലരിക്കല്‍. കുമരകത്തുനിന്നും ഒമ്പതു കിലോമീറ്ററും കോട്ടയത്തുനിന്നും ഏഴര കിലോമീറ്ററും സഞ്ചരിച്ചാല്‍ മലരിക്കലില്‍ എത്തിച്ചേരാം. പുത്തന്‍ റോഡിന്‍റെ വശങ്ങളില്‍ ഇരുനൂറിലധികം വാഹനങ്ങള്‍ പാര്‍ക്ക് ചെയ്യാം. കൂടാതെ സമീപ പ്രദേശങ്ങളിലെ വീടുകളില്‍ 30 രൂപ പാര്‍ക്കിംഗ് ഫീസോടെ വാഹനങ്ങള്‍ പാര്‍ക്ക് ചെയ്യാം. രാവിലെ ആറു മുതല്‍ ഏഴുവരെയുള്ള സമയങ്ങളില്‍ എത്തിയാല്‍ കൂടുതല്‍ ദൃശ്യഭംഗിയോടെ പൂക്കള്‍ കാണാം. സെപ്റ്റംബര്‍ പകുതിവരെ ആമ്പല്‍പ്പൂവസന്തം ഉണ്ടാവും. 160 വള്ളങ്ങളാണ് സന്ദര്‍ശകര്‍ക്കായി ഒരുക്കിയിട്ടുള്ളത്. ആമ്പല്‍പ്പാടം ചുറ്റിക്കാണാന്‍ ഒരാള്‍ക്ക് 100 രൂപയാണ് വള്ളത്തിന് ഫീസ്. ഒരു മണിക്കൂറിന് ആയിരം രൂപ നല്‍കി വള്ളം വാടകയ്ക്കുമെടുക്കാം.

പുതുക്കിയ സ്‌കൂള്‍ സദ്യ ലിസ്റ്റ് ഫയലില്‍ ഒതുങ്ങി

കോട്ടയം: സര്‍ക്കാര്‍ കൈയടി വാങ്ങാന്‍ പ്രഖ്യാപിച്ച അടിപൊളി സ്‌കൂള്‍ സദ്യ മെനു ഒരു ദിവസംപോലും നടപ്പാക്കാന്‍ സാഹചര്യമില്ല. സര്‍ക്കാര്‍ കൈയയച്ച് സഹായിച്ചാല്‍ മാത്രം ആഴ്ചയില്‍ ഒന്നോ രണ്ടോ ദിവസം സദ്യ നല്‍കാം. ഉച്ചഭക്ഷണത്തിന് നിലവില്‍ പ്രൈമറി കുട്ടികള്‍ക്ക് ആറു രൂപയും യുപിയില്‍ എട്ടു രൂപയുമാണ് ലഭിക്കുന്നത്. ആഴ്ചയില്‍ ഒരു മുട്ടയും രണ്ടു ദിവസം 150 മില്ലി വീതം പാലും വേണം. പാല്‍ ലിറ്ററിന് 52 രൂപയും മുട്ടയ്ക്ക് 6.50 രൂപയുമാണ്. പച്ചക്കറി, എണ്ണ, തേങ്ങാവിലയും കുത്തനെ കയറുന്നു. സ്‌കൂള്‍ ഫണ്ട് ഉപയോഗിച്ച് പുതിയ മെനു നടപ്പാക്കാനാണ് വിദ്യാഭ്യാസ വകുപ്പിന്‍റെ നിര്‍ദേശം. തദ്ദേശസ്ഥാപന സഹകരണത്തോടെയും സ്‌പോണ്‍സര്‍ഷിപ്പിലൂടെയും എല്ലാ പ്രൈമറി സ്‌കൂളുകളിലും പ്രഭാത ഭക്ഷണംകൂടി ഉള്‍പ്പെടുത്തണമെന്നും നിര്‍ദേശമുണ്ട്. ഉച്ചഭക്ഷണ ഫണ്ടില്‍ 60 ശതമാനം കേന്ദ്രവിഹിതവും 40 ശതമാനം സംസ്ഥാന വിഹിതവുമാണ്. മുട്ടയ്ക്കും പാലിനും അധികതുക അനുവദിക്കുന്നില്ല. ചില സ്‌കൂളുകള്‍ തുക താങ്ങാനാവാതെ മുട്ടയും പാലും നിര്‍ത്തി. രണ്ടിനം കറിയും തോരനും ചോറിനൊപ്പമുണ്ടാവണമെന്നതും നടപ്പാക്കുന്നില്ല. അന്തരീക്ഷ മലിനീകരണമൊഴിവാക്കാന്‍ പാചകം ഗ്യാസ് അടുപ്പില്‍ വേണമെന്നാണ് നിബന്ധന. ചെലവേറിയെങ്കിലും 2016 ല്‍ നിശ്ചയിച്ച നിരക്കാണ് ഇപ്പോഴും പിന്തുടരുന്നത്.

അമോണിയ പ്ലാന്‍റ് നടപ്പിലാവില്ല, വിഷയം നിയമസഭയിൽ ഉന്നയിക്കും: മാണി സി. കാപ്പൻ എംഎൽഎ

എലിക്കുളം: ആളുറുമ്പ് പടിഞ്ഞാറ്റുമലയിൽ പ്രവർത്തനമാരംഭിക്കുവാൻ ഒരുങ്ങുന്ന അമോണിയ പ്ലാന്‍റിനെതിരേ ജനരോഷം വ്യാപകമായ സാഹചര്യത്തിൽ മാണി സി. കാപ്പൻ എംഎൽഎ സ്ഥലം സന്ദർശിച്ചു. തുടർന്ന് പ്രദേശവാസികളെ കണ്ട് പ്ലാന്‍റ് നിർമാണം നടപ്പില്ലെന്ന ഉറപ്പു നൽകി. പടിഞ്ഞാറ്റിൻമലയിലെ ഒന്നര ഏക്കറോളം ഭൂമി തൊടുപുഴ സ്വദേശിയിൽനിന്നു വാങ്ങിയ ശേഷം അമോണിയ ഫാക്‌ടറി നിർമിക്കാനുള്ള തീരുമാനമാണ് നിലവിലുള്ളത്. കർഷകർ കൂടുതലായി അധിവസിക്കുന്ന സ്ഥലമാണ് ഇവിടെ. പ്ലാന്‍റ് നിലവിൽ വന്നാൽ ഇവിടത്തെ പ്രകൃതിയുടെ സന്തുലിതാവസ്ഥ ഉൾപ്പെടെ താളംതെറ്റും. ദിനംപ്രതി 40,000 ലിറ്ററോളം ജലം ആവശ്യമായി വരുന്ന അമോണിയ പ്ലാന്‍റ് നിലവിൽവന്നാൽ 350ലേറെ കുടുംബങ്ങൾ താമസിക്കുന്ന ഇവിടത്തെ ജലലഭ്യത ഇല്ലാതെയാവും. കൂടാതെ ഇവിടെ നിന്നാണ് പൊന്നൊഴുകും തോടിന്‍റെ ഉദ്ഭവവും.പ്ലാന്‍റ് വന്നാൽ മീനച്ചിലാറ്റിൽവരെ ഇവിടത്തെ മാലിന്യമെത്തും. പ്രാരംഭ പ്രവർത്തനങ്ങൾക്കു തുടക്കമായ അമോണിയ പ്ലാന്‍റിനെതിരേ നാട്ടുകാരോടൊപ്പം സമരത്തിനൊരുങ്ങുമെന്നും മാണി സി. കാപ്പൻ പറഞ്ഞു. സ്ഥലം സന്ദർശിച്ച മാണി സി. കാപ്പൻ എംഎൽഎയ്ക്ക് നാട്ടുകാർ ഇത് സംബന്ധിച്ച നിവേദനവും നൽകി. എലിക്കുളം പഞ്ചായത്തംഗങ്ങളായ മാത്യൂസ് പെരുമനങ്ങാട്, ആശ റോയി, പൊതുപ്രവർത്തകനായ സാബിച്ചൻ പാംപ്ലാനിയിൽ, ജനകീയ കമ്മിറ്റി ചെയർമാൻ ജോസഫ് മാത്യു തെക്കേക്കുറ്റ്, കൺവീനർ ജോർജുകുട്ടി ജേക്കബ് കുരുവിനാക്കുന്നേൽ, വൈസ് ചെയമാൻ ജിമ്മിച്ചൻ മണ്ഡപത്തിൽ, ജോയിന്‍റ് കൺവീനറായ ജസ്റ്റിൻ മണ്ഡപത്തിൽ തുടങ്ങിയവരും എംഎൽഎയ്ക്കൊപ്പം ഉണ്ടായിരുന്നു.

ഉമ്മൻ ചാണ്ടി അനുസ്മരണം

പെരുവന്താനം: കോൺഗ്രസ് പെരുവന്താനം മണ്ഡലം കമ്മിറ്റിയുടെ നേത്യത്വത്തിൽ ഉമ്മൻ ചാണ്ടി അനുസ്മരണം സംഘടിപ്പിച്ചു. പെരുവന്താനം ദേശീയ വായനശാലയിൽ നടന്ന അനുസ്മരണ യോഗം ഡിസിസി ജനറൽ സെക്രട്ടറി സിറിയക് തോമസ് ഉദ്ഘാടനം ചെയ്തു. കോൺഗ്രസ് മണ്ഡലം പ്രസിഡന്‍റ് ഷിനോജ് ജേക്കബ് അധ്യക്ഷത വഹിച്ചു. എം.കെ. ഷാജഖാൻ മഠത്തിൽ, ഡിസിസി മെംബർമാരായ വി.സി. ജോസഫ്, ജോൺ പി. തോമസ്, സി.ടി. മാത്യു ചരളയിൽ, മുഹമ്മദ് ഷിഫ, പഞ്ചായത്ത് പ്രസിഡന്‍റ് നിജിനി ഷംഷുദീൻ, കോൺഗ്രസ് ഏലപ്പാറ ബ്ലോക്ക് കമ്മിറ്റി ജനറൽ സെക്രട്ടറിമാരായ കെ.എൻ. രാമദാസ്, കെ.ആർ. വിജയൻ, ഷിയാസ് മുത്തേടത്ത്, ശരത് ഒറ്റപ്ലാക്കൽ എന്നിവർ പ്രസംഗിച്ചു.

തീർഥാടക വാഹനം മതിലിലും വൈദ്യുതിപോസ്റ്റിലും ഇടിച്ച് അപകടം

മുണ്ടക്കയം: മുണ്ടക്കയം-കോരുത്തോട് റോഡിൽ വണ്ടൻപതാലിൽ ശബരിമല തീർഥാടകർ സഞ്ചരിച്ചിരുന്ന ആഡംബര കാർ അപകടത്തിൽപ്പെട്ടു. ശനിയാഴ്ച അർധരാത്രിയോടെയായിരുന്നു അപകടം. ശബരിമല തീർഥാടനം കഴിഞ്ഞു മടങ്ങിയ കർണാടക സ്വദേശികളുടെ വാഹനമാണ് അപകടത്തിൽപ്പെട്ടത്. അപകടത്തിൽ വാഹന യാത്രക്കാർക്ക് നിസാര പരിക്കേറ്റു. റോഡിന്‍റെ വശത്തെ വീടിന്‍റെ മതിലും സമീപത്തെ വൈദ്യുതിപോസ്റ്റിലും ടെലിഫോൺ പോസ്റ്റിലും ഇടിച്ചാണ് വാഹനം നിന്നത്. വൈദ്യുതിപോസ്റ്റിൽ ഇടിച്ച് വാഹനം നിന്നതിനാൽ സമീപത്തെ വീട്ടിലേക്ക് ഇടിച്ചുകയറാതെ വലിയ അപകടം ഒഴിവായി. ഡ്രൈവർ ഉറങ്ങിപ്പോയതാണ് അപകടത്തിനു കാരണമായതെന്ന് പറയപ്പെടുന്നു. വാഹനം ഇടിച്ചതിനെത്തുടർന്ന് മുണ്ടക്കയം പഞ്ചായത്ത് മെംബർ പി.എം. ഫൈസൽമോന്‍റെ വീടിന്‍റെ ഭിത്തിക്കും മതിലിനും കേടുപാട് സംഭവിച്ചിട്ടുണ്ട്. മുണ്ടക്കയം-കോരുത്തോട് റോഡിൽ ശബരിമല തീർഥാടകർ അപകടത്തിൽപ്പെടുന്നത് വർധിക്കുകയാണ്.

പാമ്പാടി ബ്ലോക്ക് പഞ്ചായത്തില്‍ ജനകീയ ശുചീകരണ പ്രവര്‍ത്തനങ്ങള്‍ക്കു തുടക്കം

പള്ളിക്കത്തോട്: മാലിന്യമുക്തം നവകേരളം കാമ്പയിന്‍റെ ഭാഗമായി പൊതുഇട ജനകീയ ശുചീകരണ പ്രവര്‍ത്തനങ്ങള്‍ക്ക് പാമ്പാടി ബ്ലോക്കില്‍ തുടക്കമായി. ബ്ലോക്ക് പഞ്ചായത്തുതല പരിപാടിയുടെ ഭാഗമായി അരുവിക്കുഴി ടൂറിസ്റ്റ് കേന്ദ്രം വൃത്തിയാക്കി. ശുചീകരണ പരിപാടിയുടെ ഉദ്ഘാടനം പാമ്പാടി ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി മണിയങ്ങാട്ട് നിര്‍വഹിച്ചു. ബ്ലോക്ക് വൈസ് പ്രസിഡന്‍റ് പ്രഫ. എം.കെ. രാധാകൃഷ്ണന്‍ അധ്യക്ഷത വഹിച്ചു. സംസ്ഥാന മന്ത്രിതല യോഗ തീരുമാനപ്രകാരം നവംബര്‍ ഒന്നുവരെ എല്ലാ മൂന്നാം ശനിയാഴ്ചകളിലുമാണ് തദ്ദേശ സ്വയംഭരണ സ്ഥാപനങ്ങള്‍ ജനകീയ ശുചീകരണ പ്രവര്‍ത്തനങ്ങള്‍ പൊതുഇടങ്ങളില്‍ നടത്തുന്നത്. സന്നദ്ധ സംഘടനകള്‍ക്കും പരിപാടിയില്‍ പങ്കുചേരാന്‍ അവസരമുണ്ട്. മികച്ച പ്രവര്‍ത്തനം നടത്തുന്ന സംഘടനകള്‍ക്ക് പുരസ്‌കാരങ്ങളും വിതരണം ചെയ്യും.

52-ാം സ്‌നേഹവീടിന്‍റെ നിര്‍മാണം ആരംഭിച്ചു

മുത്തോലി: ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ നേതൃത്വം നൽകുന്ന സ്നേഹദീപം ഭവനപദ്ധതി പ്രകാരമുള്ള 52-ാം സ്നേഹവീടിന്‍റെ ശിലാസ്ഥാപനം മുത്തോലിയില്‍ മരിയസദനം ഡയറക്ടർ സന്തോഷ് ജോസഫ് നിര്‍വഹിച്ചു. മുത്തോലി സെന്‍റ് ജോര്‍ജ് പള്ളി വികാരി ഫാ. കുര്യന്‍ വരിക്കമാക്കല്‍ ശിലയുടെ വെഞ്ചരിപ്പ് നടത്തി. ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍, കാരുണ്യ ചാരിറ്റബിള്‍ ട്രസ്റ്റ് ചെയര്‍മാന്‍ സെബാസ്റ്റ്യന്‍ പുരയിടം, സ്നേഹദീപം ഭാരവാഹികളായ കെ.സി. മാത്യു കേളപ്പനാല്‍, സോജന്‍ വാരപ്പറമ്പില്‍, ഹരിദാസ് അടമത്തറ, അവിനാഷ് വലിയമംഗലം, ജേക്കബ് മഠത്തില്‍, മാത്തുകുട്ടി നരിക്കാട്ട്, ബേബി ഏറത്തുമല, ജോര്‍ജ് ആന്‍റണി കാനാട്ട്, ജോയി കുന്നപ്പള്ളിയില്‍, റോമി ഞാറ്റുകാലകുന്നേല്‍, സണ്ണി കോയിപ്പുറം എന്നിവര്‍ പ്രസംഗിച്ചു.

വിന്‍സെന്‍റ് ഡി പോള്‍ കാരുണ്യപ്രവര്‍ത്തനം മഹത്തരം: മാര്‍ ജോസഫ് കല്ലറങ്ങാട്ട്

പാലാ: വിന്‍സെന്‍റ് ഡി പോള്‍ സൊസൈറ്റിയുടെ നേതൃത്വത്തില്‍ രൂപതയില്‍ നടത്തുന്ന കാരുണ്യപ്രവര്‍ത്തനങ്ങള്‍ മഹത്തരമെന്ന് ബിഷപ് മാര്‍ ജോസഫ് കല്ലറങ്ങാട്ട്. പാലാ രൂപത പ്ലാറ്റിനം ജൂബിലിയോടനുബന്ധിച്ച് പാലാ സെന്‍ട്രല്‍ കൗണ്‍സില്‍ നടത്തിയ വാര്‍ഷികസമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു ബിഷപ്. സിസി പ്രസിഡന്‍റ് ബേബി ജോസഫ് അധ്യക്ഷത വഹിച്ചു. പാലാ ഹോം പ്രോജക്‌ടിന്‍റെ ഭാഗമായി 1500 വീടുകള്‍ ഭവനരഹിതര്‍ക്കു നല്‍കി. യോഗത്തില്‍ ഡോ. ജോസ് കോട്ടയില്‍, ദേശീയ വൈസ് പ്രസിഡന്‍റ് സെബാസ്റ്റ്യന്‍ തോമസ്, കേരള റീജണല്‍ കോ-ഓര്‍ഡിനേറ്റര്‍ സിസ്റ്റര്‍ ലെനി ഏബ്രഹാം, പാലാ സിസി വൈസ് പ്രസിഡന്‍റ് ഡോ. കെ.കെ. ജോസ്, സെക്രട്ടറി കെ.സി. മാത്യു, ട്രഷറര്‍ എന്‍.കെ. ജോസ്, ട്വിന്നിംഗ് ഓഫീസര്‍ സിറിയക് താമരക്കാട്ട്, തോംസണ്‍, ഡോ. ജോസ് കെ. സേവ്യര്‍, ഡോ. ഫ്രഡറിക് ഓസാനാം, വനിതാ പ്രതിനിധികളായ സിസ്റ്റര്‍ മേരിക്കുട്ടി ഫിലിപ്പ്, സിസ്റ്റര്‍ റെജി വാലിക്കുന്നേല്‍ തുടങ്ങിയവര്‍ പ്രസംഗിച്ചു. വിന്‍സെന്‍ഷ്യന്‍ കാരിസം സംബന്ധിച്ച് സെബാസ്റ്റ്യന്‍ തോമസ് ക്ലാസ് നയിച്ചു.

പാലാ ബൈപാസിന്‍റെ വളവു നിവരാന്‍ ഇനിയും കാത്തിരിക്കണോ?

പാലാ: വിശാലമായ ബൈപാസ് നിര്‍മിച്ചിട്ട് ചെറിയൊരു ഭാഗത്തെ സ്ഥലം ഏറ്റെടുത്ത് വളവു നിവര്‍ത്താന്‍ നടപടിയില്ലാത്തത് സുഗമമായ ഗതാഗതത്തിന് തടസമാകുന്നു. പാലായുടെ ഗതാഗത സ്വപ്നങ്ങള്‍ക്ക് കുതിപ്പേകി നിര്‍മിച്ച സമാന്തര റോഡിന്‍റെ മൂന്നാംഘട്ടത്തിലെ വളവുള്ള ഭാഗം നിവര്‍ത്തുന്നതിനുള്ള നടപടികള്‍ നിശ്ചലമാണ്. അരുണാപുരം ഭാഗത്ത് മരിയന്‍ ജംഗ്ഷനില്‍ ഒരു വീടും സ്ഥലവും ഏറ്റെടുക്കുന്നതിനാണ് നടപടികളില്ലാത്തത്. സ്ഥലം ഏറ്റെടുക്കുന്നതിനുള്ള നടപടികള്‍ നിയമക്കുരുക്കിലായിട്ട് വര്‍ഷങ്ങളായി. തൊട്ടടുത്ത പുലിയന്നൂര്‍ ജംഗ്ഷനില്‍ രണ്ടു വര്‍ഷം മുമ്പ് വാഹനാപടകങ്ങള്‍ വര്‍ധിക്കുകയും മരണങ്ങളുണ്ടാകുകയും ചെയ്തപ്പോള്‍ ഗതാഗത പരിഷ്‌കാരം ഏര്‍പ്പെടുത്തിയിരുന്നു. ഇതനുസരിച്ച് പാലാ ഭാഗത്തേക്കുള്ള വാഹനങ്ങള്‍ മരിയന്‍ ജംഗ്ഷനിലെത്തി പഴയ റോഡിലൂടെ മുന്നോട്ടുപോയി സംസ്ഥാന പാതയില്‍ വീണ്ടും പ്രവേശിക്കണം. പാലാ സമാന്തര പാതയിലെ വാഹനത്തിരക്കിന് പുറമേയാണ് സംസ്ഥാനപാതയില്‍ നിന്നുള്ള വാഹനങ്ങളും ഇതുവഴി കടന്നുപോകുന്നത്. ബൈപാസില്‍ ഇരു വശത്തുനിന്നും വരുന്ന വാഹനങ്ങള്‍ ഏറ്റെടുക്കാനുള്ള സ്ഥലം ചുറ്റി കൊടും വളവ് മറികടന്നുവേണം യാത്ര തുടരാന്‍. സമാന്തര പാതയുടെ അവശേഷിക്കുന്ന ഭാഗം ഏറ്റെടുത്ത് നിര്‍മാണം പൂര്‍ത്തിയാക്കി റൗണ്ടാന സജ്ജമാക്കിയാല്‍ പ്രശ്നങ്ങള്‍ക്ക് പരിഹാരമാകുമെന്ന് സമീപവാസിയായ കെ.ആര്‍. ബാബു പറഞ്ഞു. ഇതുകൂടി ഏറ്റെടുത്ത് നിര്‍മാണം നടത്തിയാല്‍ മാത്രമേ സമാന്തരപാതയുടെ പ്രയോജനം പൂര്‍ണമായി ലഭിക്കുകയുള്ളൂ. ബൈപാസ് നഗരത്തില്‍ പ്രവേശിക്കാതെതന്നെ വിവിധ പ്രധാന റോഡുകളിലേക്ക് തിരിഞ്ഞുപോകുന്നതിനും സഹായിക്കുന്നതാണ്. പാലാ-പൂഞ്ഞാര്‍ സംസ്ഥാനപാതയില്‍ പുലിയന്നൂര്‍ ജംഗ്ഷനില്‍ തുടങ്ങി പാലാ-തൊടുപുഴ റോഡില്‍ കിഴതടിയൂര്‍ ജംഗ്ഷന്‍ വരെയാണ് സമാന്തര പാത. സമാന്തര പാതയുടെ വിവിധ ഘട്ടങ്ങളില്‍ സ്ഥലം ഏറ്റെടുക്കുന്നതിന് നിയമക്കുരുക്കുകള്‍ ഏറെയായിരുന്നു. എന്നാല്‍ വര്‍ഷങ്ങള്‍കൊണ്ട് അരുണാപുരത്തെ സ്ഥലം ഒഴിച്ചുള്ളവ ഏറ്റെടുത്ത് നിര്‍മാണം നടത്താന്‍ സാധിച്ചു. ദിവസേന ആയിരക്കണക്കിന് വാഹനങ്ങള്‍ കടന്നുപോകുന്ന സമാന്തര പാതയിലെ കൊടും വളവുള്ള ഭാഗത്ത് സ്ഥലം ഏറ്റെടുത്ത് നിര്‍മാണം നടത്തി റൗണ്ടാന ഉള്‍പ്പെടെയുള്ള പരിഷ്‌കാരങ്ങള്‍ ഏര്‍പ്പെടുത്തുന്നതിന് സര്‍ക്കാര്‍ തലത്തില്‍ ഊര്‍ജിത നടപടി വേണമെന്ന് ജനപ്രതിനിധികളും നാട്ടുകാരും ആവശ്യപ്പെടുന്നു.

പനച്ചികപ്പാറ ചെക്ക്ഡാം റോഡ് തകർന്ന് യാത്ര ദുരിതമായി

പൂഞ്ഞാർ: പൂഞ്ഞാർ പഞ്ചായത്ത് മൂന്നാം വാർഡിൽപ്പെട്ട പനച്ചിപ്പാറ ചെക്ക്ഡാം റോഡിലെ വെള്ളക്കെട്ട് ദുരിതമായി. മുൻപ് വെള്ളക്കെട്ട് മാറുന്നതിനായി പഞ്ചായത്ത്‌ റോഡിൽ നിരത്തിയ ടൈലുകൾ നിർമാണത്തിലെ അപാകത മൂലം ഇളകി വാഹനയാത്ര ബുദ്ധിമുട്ടായതിനെത്തുടർന്ന് ഒരു മാസം മുൻപ് ടൈലുകൾ നീക്കം ചെയ്തു. നാളിതുവരെ റോഡ് പുനരുദ്ധരിക്കാൻ യാതൊന്നും ചെയ്യാത്തതാണ് വെള്ളക്കെട്ട് രൂപപ്പെടാൻ കാരണം. നിത്യേന വിദ്യാർഥികൾ ഉൾപ്പെടെ നൂറുകണക്കിന് കാൽനട യാത്രക്കാരും നിരവധി വാഹനങ്ങളും കടന്നുപോകുന്ന റോഡിലാണ് വെള്ളക്കെട്ടു മൂലം ദുരിതമായത്. അടിയന്തരമായി റോഡിലെ വെള്ളക്കെട്ട് മാറ്റാൻ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]