ADVERTISEMENT

ADVERTISEMENT

ആത്മാഭിമാന സംഗമം നടത്തി

മൂവാറ്റുപുഴ: കെഎസ്‌കെടിയു ആവോലി വില്ലേജ് കമ്മിറ്റിയുടെ നേതൃത്വത്തില്‍ ക്ഷേമ പെന്‍ഷന്‍, ലൈഫ് ഗുണഭോക്താക്കളുടെ ആത്മാഭിമാന സംഗമം നടത്തി. സിപിഎം ഏരിയ സെക്രട്ടറി അനീഷ് എം. മാത്യു ഉദ്ഘാടനം ചെയ്തു.

വില്ലേജ് പ്രസിഡന്‍റ് വിജയ വിജയന്‍ അധ്യക്ഷത വഹിച്ചു. കെഎസ്‌കെടിയു ഏരിയ പ്രസിഡന്‍റ് ടി.എന്‍. മോഹനന്‍, സിപിഎം ലോക്കല്‍ സെക്രട്ടറി സി.കെ. സോമന്‍, കെഎസ്‌കെടിയു വില്ലേജ് സെക്രട്ടറി ടി.പി. സൈജു, കെ.പി. പരീത് എന്നിവര്‍ പ്രസംഗിച്ചു.

ADVERTISEMENT

ആതിര നിക്ഷേപ തട്ടിപ്പ്: അഞ്ചുലക്ഷം നഷ്ടമായ അമ്മയും മകനും പരാതി നൽകി

വൈപ്പിൻ: നിക്ഷേപ തട്ടിപ്പ് ആരോപിച്ച് ആതിര ജ്വല്ലറിയുടെ സഹോദരസ്ഥാപനമായിരുന്ന ആതിര ഫൈനാൻസിനെതിരെ പള്ളിപ്പുറം മാണി ബസാർ സ്വദേശികളായ അമ്മയും മകനും മുനമ്പം പോലീസിൽ പരാതി നൽകി. വർഷത്തിൽ 12 ശതമാനം പലിശ വാഗ്ദാനം ചെയ്ത് അമ്മയിൽ നിന്നും നാലു ലക്ഷം രൂപയും മകനിൽ നിന്ന് ഒരു ലക്ഷം രൂപയുമുൾപ്പെടെ അഞ്ചുലക്ഷം കൈപ്പറ്റി കാലാവധി കഴിഞ്ഞിട്ടും പണവും പലിശയും തിരികെ നൽകിയില്ലെന്നാണ് ആരോപണം. പണവും പലിശയും തിരികെ ലഭിക്കാതായതോടെയാണ് ഇവർ പോലീസിനെ സമീപിച്ചത്. പരാതിയിൽ ഉടമ രണ്ടു തൈക്കൽ ആന്‍റണിക്കെതിരെ മുനമ്പം പോലീസ് വഞ്ചനാ കുറ്റത്തിന് കേസ് രജിസ്റ്റർ ചെയ്തിട്ടുണ്ട്.

സിപിഎം നേതൃത്വത്തിലുള്ളത് ഒളികാമറ വച്ചവര്‍: മുഹമ്മദ് ഷിയാസ്

കൊച്ചി: സമൂഹയമാധ്യമങ്ങളിലെ പ്രചാരണങ്ങൾക്കു പിന്നില്‍ കോണ്‍ഗ്രസ് ആണെന്ന സിപിഎം നേതാവ് കെ.ജെ.ഷൈന്‍റെ പ്രസ്താവന എന്ത് അടിസ്ഥാനത്തിലാണെന്ന് ഡിസിസി പ്രസിഡന്‍റ് മുഹമ്മദ് ഷിയാസ്.സിപിഎം ഗൂഢാലോചനയില്‍ പുറത്തുവന്ന ആരോപണത്തിന് പിന്നില്‍ പാര്‍ട്ടിയിലെ അധികാരരാഷ്ട്രീയമാണ്. മുൻ ജില്ലാ സെക്രട്ടറിയുടെ ഓഫീസില്‍ ഒളികാമറ വച്ച് അദ്ദേഹത്തെ കുടുക്കി, കുടുംബജീവിതവും സമൂഹത്തിലെ സല്‍പ്പേരും ഇല്ലാതാക്കിയ നേതാക്കളാണ് ജില്ലയിലെ സിപിഎമ്മിന്‍റേത്. ഒളികാമറ വിവാദത്തില്‍ നടപടി നേരിട്ടവര്‍ ഇന്നും ഉന്നതസ്ഥാനത്ത് പ്രവര്‍ത്തിക്കുന്നുണ്ട്. അധികാരത്തിനും പണത്തിനും വേണ്ടി എന്തും ചെയ്യുന്ന നേതാക്കളാണ് ജില്ലയിലേതെന്ന് സിപിഎം സംസ്ഥാന സെക്രട്ടറി എം.വി. ഗോവിന്ദന്‍ തന്നെ സാക്ഷ്യപ്പെടുത്തിയിട്ടുമുണ്ട്. അവരുടെ വനിതാ നേതാക്കള്‍ക്ക് പോലും പൊതു ജീവിതവും രാഷ്ട്രീയ ജീവിതവും മുന്നോട്ടു കൊണ്ടുപോകാന്‍ സാധിക്കാത്ത തരത്തില്‍ സിപിഎം എന്ന പാര്‍ട്ടി മാറിക്കഴിഞ്ഞു. പ്രതിപക്ഷ നേതാവിനെ ബോധപൂര്‍വം ഈ വിഷയത്തിലേക്ക് വലിച്ചിഴയ്ക്കാനാണ് സിപിഎം നേതൃത്വം ശ്രമിക്കുന്നത്. എന്നാല്‍ കോണ്‍ഗ്രസിന്‍റെയും പ്രതിപക്ഷ നേതാവിന്‍റെയും മേൽ മെക്കിട്ട് കയറാന്‍ വരേണ്ടന്നും ആരോപണം അടിസ്ഥാന രഹിതമാണെന്നും ഷിയാസ് പറഞ്ഞു. കെ.ജെ.ഷൈനെതിരേ ഉയര്‍ന്ന ആരോപണം ദിവസങ്ങളായി ജില്ലയുടെ വിവിധ മേഖലകളില്‍ പ്രചരിക്കുന്നതാണ്. ഇത് പത്രമാധ്യമത്തില്‍ വാര്‍ത്തയായി വന്നതിനു പിന്നാലെയാണ് സമൂഹമാധ്യമങ്ങളില്‍ ചര്‍ച്ചയായത്. എന്നാല്‍ ആരോപണത്തിന്‍റെ തുടക്കം എവിടെനിന്നാണെന്ന് സിപിഎം ഇതുവരെ അന്വേഷിച്ചിട്ടില്ല. ഇത്തരം വിഷയങ്ങള്‍ ഊതിക്കത്തിക്കാന്‍ കോണ്‍ഗ്രസ് പാര്‍ട്ടിയോ ഉത്തരവാദിത്വപ്പെട്ട നേതാക്കളോ ശ്രമിച്ചിട്ടില്ല. സമൂഹ മാധ്യമങ്ങളെ നിയന്ത്രിക്കാന്‍ സാധിക്കാത്ത സാഹചര്യമാണ് ഇന്നുള്ളത്. കോണ്‍ഗ്രസിന്‍റെ പ്രവര്‍ത്തകര്‍, ഉത്തരവാദിത്വപ്പെട്ട നേതാക്കള്‍ എന്നിവരോട് സമൂഹമാധ്യമങ്ങളില്‍ സംയമനം പാലിക്കാന്‍ നിര്‍ദേശം നല്‍കിയിട്ടുണെന്നും ഡിസിസി പ്രസിഡന്‍റ് പറഞ്ഞു.

കെ.ജെ. ഷൈനിന്‍റെ പരാതിയിൽ കേസ്; മൊഴിയെടുത്ത് സൈബർ പോലീസ്

കൊച്ചി: സാമൂഹിക മാധ്യമങ്ങളിലൂടെയുള്ള സൈബര്‍ ആക്രമണത്തിനും അപവാദ പ്രചാരണങ്ങള്‍ക്കുമെതിരെ സിപിഎം വനിതാ നേതാവ് കെ.ജെ.ഷൈന്‍ നല്‍കിയ പരാതിയില്‍ എറണാകുളം റൂറല്‍ സൈബര്‍ പോലീസ് മൊഴി രേഖപ്പെടുത്തി. ഷൈനിന്‍റെ നോർത്ത് പറവൂരിലെ വീട്ടിലെത്തിയ പോലീസ് ഒരു മണിക്കൂറിലേറെ സമയമെടുത്താണ് വിശദമായ മൊഴി രേഖപ്പെടുത്തിയത്. വ്യാപകമായ സൈബര്‍ ആക്രമണവും അപവാദ പ്രചാരണവും നേരിടുന്നതായി ചൂണ്ടിക്കാട്ടി ഷൈന്‍ കഴിഞ്ഞ ദിവസം മുഖ്യമന്ത്രിക്കും ഡിജിപി, വനിതാ കമ്മീഷന്‍ എന്നിവര്‍ക്ക് പരാതി നല്‍കിയിരുന്നു. ഇതിന് പിന്നാലെയാണ് ഇന്നലെ വീട്ടിലെത്തി വിശദമായ മൊഴിയെടുത്ത ശേഷം റൂറല്‍ ജില്ലാ സൈബര്‍ പോലീസ് കേസെടുത്തത്. വനിതാ പോലീസിന്‍റെ സാന്നിധ്യത്തിലായിരുന്നു മൊഴിയെടുക്കൽ. സാമൂഹിക മാധ്യമങ്ങളിലൂടെയുള്ള അധിക്ഷേപ കമന്‍റുകളുടെ സ്‌ക്രീൻ ഷോട്ടുകൾ, യു ട്യൂബ് ലിങ്കുകള്‍ ഉള്‍പ്പെടെയുള്ള തെളിവുകളും പോലീസിന് കൈമാറിയിട്ടുണ്ട്. സ്ത്രീത്വത്തെ അപമാനിച്ചതുമായി ബന്ധപ്പെട്ട വകുപ്പുകള്‍, ഐടി നിയമത്തിലെ വിവിധ വകുപ്പുകൾ എന്നിവ ചുമത്തിയാണ് കേസെടുത്തിരിക്കുന്നത്. സംഭവവുമായി ബന്ധപ്പെട്ടുള്ള വാർത്ത പ്രസിദ്ധീകരിച്ചവരും യുട്യൂബ് ചാനലും കോൺഗ്രസ് അനുകൂല വെബ്പോർട്ടലും വ്യക്തിഗത സാമൂഹിക മാധ്യമ അക്കൗണ്ടുകളുമാണ് പ്രതിസ്ഥാനത്ത്. സി.കെ. ഗോപാലകൃഷ്ണന്‍ എന്നയാളുടെ ഫേസ്ബുക്ക് പേജിലാണ് ആദ്യമായി പോസ്റ്റ് പ്രത്യക്ഷപ്പെട്ടതെന്നും ഇയാള്‍ കോണ്‍ഗ്രസ് മണ്ഡലം സെക്രട്ടറിയും സൈബര്‍ വിംഗ് ചുമതലക്കാരനുമാണെന്നും ഷൈനിന്‍റെ ഭര്‍ത്താവ് ആരോപിച്ചിട്ടുണ്ട്. കോണ്‍ഗ്രസുമായി ബന്ധമുള്ള നിരവധി വ്യക്തികള്‍ ഈ പോസ്റ്റ് പങ്കുവച്ചിട്ടുണ്ടെന്നും ഉന്നത നേതാക്കളും ഇതില്‍ ഉള്‍പ്പെട്ടിട്ടുണ്ടെന്നും അദ്ദേഹം പറഞ്ഞു. യൂട്യൂബില്‍ മറ്റൊരാള്‍ ഇട്ട ലിങ്ക് പങ്കുവയ്ക്കുക മാത്രമാണ് ചെയ്തതെന്നും ഗോപാലകൃഷ്ണൻ വ്യക്തമാക്കി. പ്രതിപക്ഷനേതാവ് അറിയാതെ തനിക്കെതിരെ ആരോപണം ഉയരില്ല: കെ.ജെ. ഷൈന്‍ കൊച്ചി: രാഹുല്‍ മാങ്കൂട്ടത്തില്‍ വിവാദത്തില്‍ നിന്ന് ശ്രദ്ധ തിരിക്കുന്നതിനാണ് തനിക്കെതിരെ കോണ്‍ഗ്രസ് അപവാദ പ്രചാരണം നടത്തുന്നതെന്ന് സിപിഎം വനിതാ നേതാവ് കെ.ജെ. ഷൈന്‍. പ്രതിപക്ഷനേതാവ് അറിയാതെ തനിക്കെതിരെ ഇത്തരമൊരു ആരോപണം ഉയരില്ല. കോണ്‍ഗ്രസിന്‍റെ നിസഹായാവസ്ഥയാണ് ഇതിലൂടെ വെളിപ്പെടുന്നതെന്നും കെ.ജെ. ഷൈന്‍ പറഞ്ഞു. കഴിഞ്ഞദിവസം പൊതുപരിപാടിക്കിടെ ഒരു ബോംബ് വരുന്നുണ്ടെന്ന് കോണ്‍ഗ്രസ് പ്രാദേശിക നേതാവ് പറഞ്ഞിരുന്നു. എന്ത് കേട്ടാലും ധൈര്യമായി ഇരുന്നോളണം. തന്നെയും എംഎല്‍എയും ചേര്‍ത്തുള്ള വാര്‍ത്തയാണെന്നായിരുന്നു മുന്നറിയിപ്പ്. ഇതിനുപിന്നാലെയാണ് പോസ്റ്ററുകള്‍ പ്രത്യക്ഷപ്പെട്ടത്. എന്നാല്‍ തന്‍റെ പേരെടുത്ത് പറയാതിരുന്നതുകൊണ്ട് പരാതി നല്‍കിയില്ല. പിന്നീട് കടുത്ത സൈബര്‍ ആക്രമണം തനിക്ക് നേരിട്ടതോടെയാണ് പരാതി നല്‍കിയത്. സാംസ്‌കാരിക പ്രവര്‍ത്തകന്‍ എന്നറിയപ്പെടുന്ന കോണ്‍ഗ്രസിന്‍റെ സോഷ്യല്‍ മീഡിയ കൈകാര്യം ചെയ്യുന്ന ഗോപാലകൃഷ്ണന്‍ എന്നയാളുടെ ഫേസ്ബുക്ക് പേജിലൂടെയാണ് ഈ കഥ ആദ്യം പ്രചരിച്ചത്. പ്രതിപക്ഷനേതാവ് വി.ഡി. സതീശന്‍ അറിയാതെ ഇതൊന്നും നടക്കില്ലെന്ന ബോധ്യം തനിക്കുണ്ട്. സ്ത്രീ വിരുദ്ധമായ മൂല്യബോധവും സ്ത്രീകളെക്കുറിച്ച് ലൈംഗികമായി അപവാദം പറഞ്ഞാല്‍ ആത്മരതിയും കിട്ടുന്ന കുറച്ച് ആളുകളുണ്ട്. വലതുപക്ഷ രാഷ്ട്രീയത്തില്‍ നിന്നാണ് ഈ പ്രചാരണം വന്നതെന്ന് ഉറപ്പാണ്. സ്ത്രീകള്‍ ഇനിയും പൊതുരംഗത്തേക്ക് വരണം. അപവാദ പ്രചാരണം നടത്തിയ ആരെയും വെറുതെ വിടില്ലെന്നും കെ.ജെ. ഷൈന്‍ പറഞ്ഞു.

ഗൂഢാലോചന: കെ.എന്‍. ഉണ്ണികൃഷ്ണൻ എംഎൽഎ‍

കൊച്ചി: തനിക്കെതിരെ നടക്കുന്ന അപവാദ പ്രചാരണം ഗൂഢാലോചനയുടെ ഭാഗമാണെന്ന് കെ.എന്‍. ഉണ്ണികൃഷ്ണന്‍ എംഎല്‍എ. പിന്നില്‍ കോണ്‍ഗ്രസ് രാഷ്ട്രീയമാണ്. കുറ്റവാളികള്‍ മാതൃകാപരമായി ശിക്ഷിക്കപ്പെടുമെന്നാണ് പ്രതീക്ഷ. സംഭവത്തിന് പിന്നില്‍ സിപിഎമ്മാണെന്ന് വി.ഡി. സതീശന്‍ വിശ്വസിക്കുന്നെങ്കില്‍ തെളിവുകള്‍ പുറത്തുവിടട്ടേയെന്നും എംഎല്‍എ പറഞ്ഞു. തുടക്കത്തില്‍ പ്രതികരിക്കേണ്ടതില്ലെന്ന് കരുതിയെങ്കിലും പ്രചാരണം ശക്തമായതോടെ പൊതുസമൂഹത്തില്‍ തെറ്റിദ്ധാരണ ഒഴിവാക്കാനാണ് ഫേസ്ബുക്കിലൂടെ വിശദീകരണവും നിയമനടപടിയുമായി മുന്നോട്ട് പോകാന്‍ തീരുമാനിച്ചത്. തനിക്കെതിരെ വികസനപ്രവര്‍ത്തനങ്ങളുമായി ബന്ധപ്പെട്ട് ആരോപണങ്ങളൊന്നും ഉന്നയിക്കാന്‍ സാധിക്കില്ല. നൂറ് വര്‍ഷത്തിനിടയില്‍ നടക്കാത്ത വികസന പ്രവര്‍ത്തനങ്ങള്‍ കൊണ്ടുവരാന്‍ ശ്രമിക്കുമ്പോള്‍ മറ്റൊരു ആരോപണവും ഉന്നയിക്കാന്‍ കഴിയാത്തവരാണ് വ്യക്തിഹത്യയിലേക്ക് തിരിയുന്നത്. സിപിഎമ്മിനുള്ളില്‍ ഇത്തരം പ്രവണതകള്‍ പ്രോത്സാഹിപ്പിക്കില്ല. തെറ്റ് ചെയ്യുന്നവരെ കണ്ടെത്തി ശിക്ഷിക്കാന്‍ പാര്‍ട്ടിക്ക് കൃത്യമായ സംവിധാനമുണ്ടെന്നും അദ്ദേഹം പറഞ്ഞു.

ഓൺലൈൻ തട്ടിപ്പ്: ഇതരസംസ്ഥാന തൊഴിലാളിക്കും സുഹൃത്തിനും 96,000 രൂപ നഷ്ടമായി

വൈപ്പിൻ: ഓൺലൈൻ തട്ടിപ്പിനിരയായി ഇതരസംസ്ഥാന തൊഴിലാളിയായ യുവതിക്കും സുഹൃത്തിനും 96,000 രൂപ നഷ്ടമായതായി പരാതി. മുളവുകാട് ബോൾഗാട്ടിയിൽ വാടക താമസിക്കുന്ന ഗുജറാത്ത് ഖാൻപൂർ സ്വദേശി നസറിൻ ബാനു(23)വിനും സുഹൃത്തിനുമാണ് പണം നഷ്ടമായത്. തുടർന്ന് ഇവർ മുളവുകാട് പോലീസിൽ പരാതി നൽകി. കഴിഞ്ഞ ഒമ്പതിന് വാട്സ്ആപ്പിലൂടെയാണ് തട്ടിപ്പുകാർ നസറിൻ ബാനുവിനെ സമീപിച്ചത്. ഓൺലൈനിൽ നൽകുന്ന ടാസ്കുകൾ പൂർത്തീകരിച്ച് കഴിഞ്ഞാൽ പണം നൽകാമെന്നായിരുന്നു വാഗ്ദാനം. തുടർന്ന് സംഘം ശിവാനി എന്ന ടെലഗ്രാം ഐഡിയിൽ ടാസ്കുകൾ അയച്ചുകൊടുത്തു. ഇവ പൂർത്തിയാക്കുന്നതിനിടെ തട്ടിപ്പു സംഘം ബാനുവിന്‍റെ യൂണിയൻ ബാങ്കിലുള്ള അക്കൗണ്ടിൽ നിന്നും 46,000 രൂപയും സുഹൃത്തിന്‍റെ എച്ച്ഡിഎഫ്സി ബാങ്കിലുള്ള അക്കൗണ്ടിൽ നിന്നും 50,000 രൂപയും കവർന്നെടുക്കുകയായിരുന്നു. തുടർന്നാണ് പോലീസിൽ പരാതി നൽകിയത്. പരാതിയിൽ മുളവുകാട് പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.

സ്കൂട്ടറിലെത്തി വയോധികയുടെ മാല കവർന്നു

തൃപ്പൂണിത്തുറ: സ്കൂട്ടറിൽ എത്തിയയാൾ വയോധികയുടെ ഒന്നേമുക്കാൽ പവൻ വരുന്ന സ്വർണമാല പൊട്ടിച്ചെടുത്ത് കടന്നുകളഞ്ഞു. എരൂർ വെസ്റ്റ് കേണൽ വിശ്വനാഥൻ റോഡിൽ വടക്കച്ചിറ വീട്ടിൽ മീനാക്ഷി(70)യുടെ മാലയാണ് നഷ്ടപ്പെട്ടത്. പുലർച്ചെ 5.55ഓടെ എരൂർ പിഷാരികോവിൽ റോഡിലായിരുന്നു സംഭവം. വീട്ടുജോലികൾ ചെയ്യുന്ന ഇവർ പുലർച്ചെ ജോലിനോക്കുന്ന വീട്ടിലേക്ക് നടന്നുപോകുമ്പോൾ മഴക്കോട്ടും ഹെൽമറ്റും ധരിച്ച് സ്കൂട്ടറിലെത്തിയയാൾ അടുത്തെത്തി ക്ഷേത്രത്തിന്‍റെ പേരു പറഞ്ഞ് ഇത് എവിടെയാണെന്ന് തിരക്കി. സ്ഥലം പറഞ്ഞുകൊടുത്ത ശേഷം മുന്നോട്ടു നീങ്ങുന്നതിനിടെ സ്കൂട്ടർ സ്റ്റാൻഡിൽവച്ച പ്രതി പിന്നാലെയെത്തി ഇവരുടെ മാല പൊട്ടിച്ചെടുക്കുകയായിരുന്നു. ഇയാൾ ഫസീനോ സ്കൂട്ടറിൽ വരുന്നതും മാല പൊട്ടിച്ചെടുത്ത് ഓടുന്നതും സിസി ടിവി ദൃശ്യങ്ങളിൽ പതിഞ്ഞിട്ടുണ്ട്. ഹിൽപാലസ് സ്റ്റേഷനിൽ നൽകിയ പരാതിയിൽ പോലീസ് കേസെടുത്ത് അന്വേഷണമാരംഭിച്ചു. മുളന്തുരുത്തി സ്റ്റേഷൻ പരിധിയിൽ കഴിഞ്ഞ ദിവസം നടന്ന മാല പൊട്ടിക്കൽ സംഭവത്തിലും ഫസീനോ സ്കൂട്ടറിലാണ് മോഷ്ടാവ് എത്തിയിട്ടുള്ളതെന്ന് പറയുന്നു.

തപാല്‍ മാര്‍ഗം ലഹരി കടത്ത് : കൊച്ചിയില്‍ രണ്ടു കോടിയുടെ ഹൈബ്രിഡ് കഞ്ചാവ് പിടികൂടി

സംഘത്തിലെ പ്രധാനി അറസ്റ്റിൽ കൊച്ചി: കൊച്ചിയില്‍ വീണ്ടും കൊറിയര്‍ വഴി കഞ്ചാവ് കടത്ത്. തപാല്‍ മാര്‍ഗം തായ്‌ലൻഡില്‍ നിന്നെത്തിച്ച രണ്ടു കോടി രൂപയുടെ ഹൈബ്രഡിഡ് കഞ്ചാവുമായി ഒരാള്‍ കസ്റ്റംസ് പിടിയിലായി. വടുതല ബോട്ട് ജെട്ടി സ്വദേശി സക്കറിയ ടൈറ്റസ്(23)ആണ് പിടിയിലായത്. സ്ഥിരമായി കഞ്ചാവ് ഉപയോഗിച്ചിരുന്ന സക്കറിയ വിദേശത്ത് നിന്ന് ഹൈബ്രിഡ് കഞ്ചാവ് എത്തിക്കുന്ന സംഘത്തിലെ പ്രധാനിയാണെന്നാണ് സൂചന. മൂന്നു ദിവസം മുമ്പാണ് എറണാകുളം കാരിക്കാമുറിയിലെ വിദേശ തപാല്‍ ഓഫീസിലേക്ക് തായ്‌ലൻഡില്‍ നിന്നും കൊറിയര്‍ എത്തിയത്. കളമശേരിയില്‍ പ്രവര്‍ത്തിക്കുന്ന പ്രമുഖ വാഹന ഷോറൂമിന്‍റെ മേല്‍വിലാസത്തില്‍ എത്തിയ കൊറിയറില്‍ പാലക്കാട് സ്വദേശിനിയുടെ പേരും ഫോണ്‍നമ്പറുമാണ് ഉണ്ടായിരുന്നത്. സംശയം തോന്നിയ തപാല്‍ ഉദ്യോഗസ്ഥര്‍ വിവരം കസ്റ്റംസിനെ അറിയിച്ചതിനെത്തുടര്‍ന്ന് കസ്റ്റംസ് നടത്തിയ വിശദ പരിശോധനയില്‍ പാഴ്‌സലിനുള്ളില്‍ കഞ്ചാവ് പോലുള്ള ലഹരി വസ്തുവാണെന്ന് കണ്ടെത്തുകയായിരുന്നു. തുടര്‍ന്ന് പാഴ്‌സലില്‍ രേഖപ്പെടുത്തിയ ഫോണ്‍ നമ്പറില്‍ ബന്ധപ്പെട്ടപ്പോള്‍ കോള്‍ എടുത്തത് സക്കറിയ ആയിരുന്നു. പാഴ്‌സല്‍ എത്തിയിട്ടുണ്ടെന്നും വീട്ടില്‍ എത്തിച്ചു നല്‍കാമെന്നും കസ്റ്റംസ് അറിയിച്ചപ്പോള്‍ തപാല്‍ ഓഫീസില്‍ നേരിട്ടെത്തി കൈപ്പറ്റിക്കൊള്ളാമെന്ന് സക്കറിയ അറിയിക്കുകയായിരുന്നു. ഇതേത്തുടര്‍ന്ന് ഇന്നലെ രാവിലെ കാരിക്കാമുറിയിലെ ഓഫീസിലെത്തിയ സക്കറിയയെ കസ്റ്റംസ് പിടികൂടുകയായിരുന്നു. അറസ്റ്റ് ചെയ്ത് കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. വിപണിയില്‍ രണ്ടു കോടി വിലവരുന്ന ഹൈബ്രിഡ് കഞ്ചാവ് വാങ്ങാന്‍ സക്കറിയക്ക് എവിടെ നിന്നാണ് പണം ലഭിച്ചതെന്നതടക്കം സംഭവത്തിലെ മറ്റ് ആളുകളുടെ പങ്കും കസ്റ്റംസ് അന്വേഷിച്ച് വരികയാണ്.

ശ്രീനാരായണ ഗുരു സമാധി ദിനം; ഒരുക്കങ്ങള്‍ പൂര്‍ത്തിയായി

മൂവാറ്റുപുഴ: 98-ാത് ശ്രീനാരായണ ഗുരുദേവ ദിവ്യ മഹാസമാധി ദിനം ഭക്തിനിര്‍ഭരമായി ആചരിക്കുന്നതിന് കടാതി ശാഖയില്‍ ഒരുക്കങ്ങള്‍ പൂര്‍ത്തിയായി. നാളെ രാവിലെ ഒമ്പതിന് ക്ഷേത്രം ശാന്തിയുടെ നേതൃത്വത്തില്‍ നടക്കുന്ന ഗുരുപൂജയില്‍ നൂറ് കണക്കിന് ഗുരുദേവ ഭക്തര്‍ ഉപവാസവും പ്രാര്‍ഥനയും അനുഷ്ഠിക്കും. തുടര്‍ന്ന് നടക്കുന്ന സമാധിദിന സമ്മേളനത്തില്‍ എസ്എന്‍ഡിപി യോഗം മൂവാറ്റുപുഴ യൂണിയന്‍ നേതൃത്വം സമാധിദിന സന്ദേശം നല്‍കും. നെടുങ്കണ്ടം യൂണിയന്‍ ഡയറക്ടര്‍ ബോര്‍ഡംഗം കെ.എന്‍. തങ്കപ്പന്‍ ഗുരുദേവ പ്രഭാഷണം നടത്തും. ചടങ്ങുകള്‍ക്ക് ശാഖാ പ്രസിഡന്‍റ് കെ.എസ്. ഷാജി, കല്ലാര്‍ ശാഖാ വൈസ് പ്രസിഡന്‍റ് എസ്. ദിലീപ്, ശാഖാ സെക്രട്ടറി എം.എസ്. ഷാജി, സമാധിദിന കണ്‍വീനര്‍ എ.എസ്. രാജേഷ് എന്നിവര്‍ അറിയിച്ചു.

കളഞ്ഞുകിട്ടിയ സ്വർണം ഉടമയെ തിരികെയേൽപ്പിച്ചു

അങ്കമാലി: കെഎസ്ആർടിസി ബസ് സ്റ്റാൻഡിൽനിന്നും കളഞ്ഞുകിട്ടിയ സ്വർണ പാദസരം ഉടമയെ കണ്ടെത്തി തിരികെയേൽപ്പിച്ചു. ശുചീകരണ ജോലിക്കിടയിൽ റോസിക്കാണ് പാദസരം കിട്ടിയത്. സ്വർണം കളഞ്ഞുകിട്ടിയ വിവരം റോസിയിൽ നിന്നറിഞ്ഞ ചിലർ സോഷ്യൽ മീഡിയ വഴി നടത്തിയ ശ്രമഫലമായി ഉടമയെ കണ്ടെത്തി. തുടർന്ന് സ്റ്റാൻഡിൽ വച്ചു തന്നെ ഉടമയായ സ്മിതക്ക് റോസി പാദസരം കൈമാറി.

മൂവാറ്റുപുഴ റിവര്‍ ടൂറിസം ഫെസ്റ്റ്

മൂവാറ്റുപുഴ: ലോക ടൂറിസം വാരാഘോഷത്തിന്‍റെ ഭാഗമായി മൂവാറ്റുപുഴ ടൂറിസം ഡെവലപ്പ്‌മെന്‍റ് കോ-ഓപ്പറേറ്റീവ് സൊസൈറ്റി (എംടിഡിസിഎസ്)യും മൂവാറ്റുപുഴ നിര്‍മല കോളജ് ടൂറിസം വിഭാഗവും ചേര്‍ന്ന് 26 മുതല്‍ 28 വരെ ത്രിവേണി സംഗമം വാക്ക്‌വേയില്‍ മൂവാറ്റുപുഴ റിവര്‍ ടൂറിസം ഫെസ്റ്റ് നടത്തും. ഫെസ്റ്റിന്‍റെ സംഘാടക സമിതി രൂപീകരണ യോഗവും ലോഗോ പ്രകാശനവും ഇന്ന് വൈകുന്നേരം നാലിന് മൂവാറ്റുപുഴ ഗ്രാന്‍ഡ് സെന്‍റര്‍ മാളില്‍ നടക്കുമെന്ന് എംടിഡിസിഎസ് പ്രസിഡന്‍റ് എല്‍ദോ ബാബു വട്ടക്കാവന്‍, മൂവാറ്റുപുഴ നിര്‍മല കോളജ് ടൂറിസം വിഭാഗം മേധാവി പി.എസ്. സബിത എന്നിവര്‍ അറിയിച്ചു.

എംബിറ്റ്‌സ് ദിനം ആചരിച്ചു

കോതമംഗലം: മാർത്തോമ്മ ചെറിയപള്ളിയുടെ കീഴിലുള്ള എംബിറ്റ്‌സ് എൻജിനീയറിംഗ് ആൻഡ് പോളിടെക്‌നിക് കോളജുകളുടെ 16-ാമത് വാർഷികം - എംബിറ്റ്‌സ് ദിനം ആചരിച്ചു. ഏലിയാസ് മാർ യൂലിയോസ് മെത്രാപ്പോലീത്ത വാർഷികം ഉദ്ഘാടനം ചെയ്തു. മാർത്തോമ്മ ചെറിയ പള്ളി വികാരി ഫാ. ജോസ് മാത്യു തച്ചേത്തുകുടി അധ്യക്ഷത വഹിച്ചു. പാഠ്യ പഠ്യേതര രംഗത്ത് മികവ് പുലർത്തിയ അധ്യാപകരെയും വിദ്യാർഥികളെയും അനുമോദിച്ചു. സാങ്കേതിക സർവകലാശാല മികച്ച പ്രോഗ്രാം ഓഫീസർ അവാർഡ് നേടിയ എൻജിനീയറിംഗ് കോളജ് പ്രോഗ്രാം ഓഫീസർ ഷിജു രാമചന്ദ്രൻ, ഓൾ ഇന്ത്യ ട്രെയിനിംഗ് ആൻഡ് പ്ലേസ്മെന്‍റ് ഓഫീസേഴ്സ് അസോസിയേഷൻ ജോയിന്‍റ് സെക്രട്ടറിയായി തെരഞ്ഞെടുക്കപ്പെട്ട ജെന്‍റി ജോയി, ഐഇഇഇ സീനിയർ ഗ്രേഡ് ആയി തെരഞ്ഞെടുക്കപ്പെട്ട ഡോ. സി.എസ്. സജിൻ, പിഎച്ച്ഡി കരസ്ഥമാക്കിയ ഡോ. തോമസ് ജോർജ്, ഡോ. എം.എം. ഷിജി, ഡോ പി. റിനി വർഗീസ് എന്നീ അധ്യാപകർ, എൻഎസ്എസ് നാഷണൽ ക്യാമ്പിൽ കേരളത്തെ പ്രതിനിധീകരിച്ച വിദ്യാർഥികളായ ഷെഫിൻ ബി. ചെറിയാൻ, സംഗീത എസ്. കുമാർ, ദേശീയ പഞ്ചഗുസ്തി മത്സരത്തിൽ കേരളത്തിനായി പങ്കെടുത്ത ജസ്റ്റോ ജസ്റ്റിൻ പള്ളിക്കുന്നേൽ എന്നിവരെയും, പാഠ്യരംഗത്ത് മികവ് പുലർത്തിയ വിദ്യാർഥികളെയും, കോളജിൽ 10 വർഷം പൂർത്തീകരിച്ച ജീവനക്കാരെയും ആദരിച്ചു. ഡയറക്ടർ ഡോ. ഷാജൻ കുര്യാക്കോസ്, ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ, കോളജ് സെക്രട്ടറി ബിനോയ് മണ്ണഞ്ചേരി, ചെയർമാൻ മാത്യു എം. കുന്നശേരി, ട്രഷറർ ബിനു കെ. വർഗീസ്, മാർത്തോമ്മ ചെറിയപള്ളി ട്രസ്റ്റി എബി വർഗീസ്, എംബിഎംഎം അസോസിയേഷൻ സെക്രട്ടറി സലിം ചെറിയാൻ, മാർ ബേസിൽ സ്കൂൾ മാനേജർ പൗലോസ് കെ. മാത്യു, എൻജിനീയറിംഗ് കോളജ് പ്രിൻസിപ്പൽ ഡോ. തോമസ് ജോർജ്, പോളി ടെക്നിക് കോളജ് പ്രിൻസിപ്പൽ പ്രഫ. പോൾസൺ പീറ്റർ എന്നിവർ പ്രസംഗിച്ചു.

കാവുംപടി റോഡിലേക്കുള്ള ഗതാഗതത്തിന് നിയന്ത്രണം

മൂവാറ്റുപുഴ: കച്ചേരിത്താഴത്ത് കാന നിര്‍മാണത്തിന്‍റെ ഭാഗമായി കാവുംപടി റോഡിലേക്കുള്ള ഗതാഗതത്തിന് നിയന്ത്രണം ഏര്‍പ്പെടുത്തി. കച്ചേരിത്താഴത്തുനിന്നും കാവുംപടി റോഡിലേക്കുള്ള പ്രവേശനത്തിലാണ് കാന നിർമാണത്തിനായി റോഡ് കുഴിക്കുന്നത്. ജോലികള്‍ ആരംഭിച്ചതോടെ കാവുംപടി റോഡിലേക്കുള്ള പ്രവേശനത്തിനും, കാവുംപടി റോഡില്‍നിന്നും കച്ചേരിത്താഴത്തേക്കുള്ള പ്രവേശനത്തിനും നിരോധനം ഏര്‍പ്പെടുത്തിയിട്ടുണ്ട്.

കൂത്താട്ടുകുളം നഗരസഭ 25ന് എൽഡിഎഫ് ഉപരോധിക്കും

കൂത്താട്ടുകുളം: യുഡിഎഫ് ഭരണസമിതിയുടെ കെടുകാര്യസ്ഥതക്കെതിരെ എൽഡിഎഫ് മുനിസിപ്പൽ സമിതിയുടെ നേതൃത്വത്തിൽ 25ന് നഗരസഭ ഉപരോധം നടത്തുമെന്ന് നേതാക്കൾ വാർത്താ സമ്മേളനത്തിൽ അറിയിച്ചു. സമരം സിപിഎം ജില്ലാ സെക്രട്ടറി എസ്. സതീഷ് ഉദ്ഘാടനം ചെയ്യും. സമര പ്രചാരണാർഥം 23ന് രാവിലെ 8.30ന് ഇടയാർ ഓലക്കാട് നിന്നും ആരംഭിക്കുന്ന വാഹന ജാഥ സിപിഐ സംസ്ഥാന കൗൺസിൽ അംഗം കെ.എൻ. സുഗതൻ ഉദ്ഘാടനം ചെയ്യും. നാലേമുക്കാൽ വർഷം സുസ്ഥിരവും അഴിമതി രഹിതവുമായ ഭരണം നടത്തിയെന്നും. അപേക്ഷിച്ച എല്ലാവർക്കും വീടുനൽകിയെന്നും നേതാക്കൾ പത്രസമ്മേളനത്തിൽ പറഞ്ഞു. വികസന പ്രവർത്തനങ്ങളെ ആകെ തകർക്കുന്ന നിലപാട് സ്വീകരിക്കുന്ന യുഡിഎഫിനെതിരെയുള്ള ജനകീയ പ്രതിരോധമായി സമരം മാറുമെന്ന് അവർ പറഞ്ഞു. വാർത്താ സമ്മേളനത്തിൽ സി.എൻ. പ്രഭകുമാർ, സണ്ണി കുര്യാക്കോസ്, ഫെബീഷ് ജോർജ്, ബിനീഷ് കെ. തുളസിദാസ്, എം.എം. അശോകൻ, അരുൺ അശോകൻ എന്നിവർ പങ്കെടുത്തു.

തിരുമാറാടി പഞ്ചായത്തിനു മുന്നിൽ യുഡിഎഫ് അംഗങ്ങൾ പ്രതിഷേധിച്ചു

തിരുമാറാടി: തിരുമാറാടി പഞ്ചായത്തിലെ മൂന്നാം വാർഡിൽ പാറമടയ്ക്ക് അനുമതി നൽകിയതിൽ പ്രതിഷേധിച്ച് പഞ്ചായത്ത് ഓഫീസിനു മുന്നിൽ യുഡിഎഫ് അംഗങ്ങൾ പ്രതിഷേധ സമരം നടത്തി. പഞ്ചായത്തിലെ മൂന്നാം വാർഡിലെ റോൺകോ ഗ്രാനൈറ്റ്സിന് പഞ്ചായത്ത് സെക്രട്ടറി ലൈസൻസ് നൽകിയതിൽ പ്രതിഷേധിച്ചാണ് യുഡിഎഫ് പാർലമെന്‍ററി പാർട്ടിയുടെ നേതൃത്വത്തിൽ പ്രതിഷേധ സമരം നടത്തിയത്. വികസനകാര്യ സ്ഥിരംസമിതി അധ്യക്ഷ അനിത ബേബി ഉദ്ഘാടനം ചെയ്തു. പഞ്ചായത്തംഗം നെവിൻ ജോർജ് അധ്യക്ഷത വഹിച്ചു. പഞ്ചായത്തംഗങ്ങളായ സുനി ജോൺസൺ, എം.സി. അജി, ആതിര സുമേഷ്, വാസസ്ഥല സംരക്ഷണ സമിതി ഭാരവാഹികളായ ടി.പി. ജോൺ, പി.സി. ജോളി, ജോൺസൺ അരീത്തടത്തിൽ പ്രകൃതി സംരക്ഷണ സമിതിയിൽ നിന്നും ജോയ് പടിഞ്ഞാറേടത്ത്, ജോൺസൺ നെടുംതടത്തിൽ, മണ്ഡലം മല സംരക്ഷണ സമിതി പ്രതിനിധി പി.ടി. സജീവൻ എന്നിവർ പ്രസംഗിച്ചു.

ലൈഫ് ഭവനങ്ങളുടെ താക്കോല്‍ദാനം ഇന്ന്

കോതമംഗലം: വാരപ്പെട്ടി പഞ്ചായത്ത് അങ്കണത്തില്‍ സ്ഥാപിച്ച ഗാന്ധി പ്രതിമയുടെ അനാച്ഛാദനവും ലൈഫ് ഭവനങ്ങളുടെ താക്കോല്‍ദാനവും ഇന്ന് നടക്കും. രാവിലെ 11ന് ഗാന്ധി പ്രതിമ അനാച്ഛാദനവും ലൈഫ് ഭവനങ്ങള്‍ക്കുള്ള ആദ്യഗഡു ചെക്ക് വിതരണവും പ്രതിപക്ഷ നേതാവ് വി.ഡി. സതീശന്‍ നിര്‍വഹിക്കും. എന്‍എസ്എസ് കരയോഗം ഹാളില്‍ നടക്കുന്ന ചടങ്ങില്‍ ലൈഫ് വീടുകളുടെ താക്കോല്‍ദാനവും, അതിദരിദ്രക്കര്‍ക്കുള്ള പദ്ധതി പൂര്‍ത്തകരിച്ചതിന്‍റെ പ്രഖ്യാപനവും ഡീന്‍ കുര്യാക്കോസ് എംപി നിര്‍വഹിക്കും. ആന്‍റണി ജോൺ എംഎൽഎ അധ്യക്ഷത വഹിക്കും. അങ്കണവാടി ജീവനക്കാര്‍, ആശ പ്രവര്‍ത്തകര്‍, മുന്‍ ജനപ്രതിനിധികള്‍, ഹരിതകര്‍മ സേനാംഗങ്ങള്‍, വിവിധ മേഖലയില്‍ വ്യക്തിമുദ്ര പതിപ്പിച്ച വിശിഷ്ട വ്യക്തികള്‍ എന്നിവരെ ചടങ്ങിൽ ആദരിക്കും.

പ്ലാസ്റ്റിക് വിമുക്ത സന്ദേശവുമായി കദളിക്കാട് സ്കൂളിൽ ബയോ ഫെസ്റ്റ്

വാഴക്കുളം: പ്ലാസ്റ്റിക് വിമുക്ത വിദ്യാലയം എന്ന സന്ദേശവുമായി കദളിക്കാട് വിമലമാതാ ഹൈസ്കൂൾ വിദ്യാർഥികൾ ബയോഫെസ്റ്റ് നടത്തി. ഒറ്റത്തവണ ഉപയോഗ ശേഷം ഉപേക്ഷിക്കുന്ന പ്ലാസ്റ്റിക്, പ്രകൃതിക്കും ജീവജാലങ്ങള്‍ക്കും വരുത്തുന്ന ദുരിതങ്ങള്‍ മനസിലാക്കിയാണു പ്രകൃതിദത്ത ഉല്പന്നങ്ങള്‍ കൊണ്ടു നിര്‍മിച്ച വസ്തുക്കളുടെ പ്രദര്‍ശനം സ്‌കൂളില്‍ നടത്തിയത്. അഞ്ചു മുതല്‍ ഒമ്പതു വരെക്ലാസുകളിലെ വിദ്യാര്‍ഥികള്‍ പ്രകൃതിദത്ത വസ്തുക്കളായ ഇല, ചകിരി, കടലാസ്, തുണി തുടങ്ങിയവ ഉപയോഗിച്ചാണ് നിർമാണ പ്രവർത്തനങ്ങൾ നടത്തിയത്. ചകിരി ഉപയോഗിച്ച് കുരുവിക്കൂട്, കളിമണ്ണിൽ ആന, വീട്, കാർഡ് ബോർഡ് ഉപയോഗിച്ച് ആഡംബര ടൂറിസ്റ്റ് ബസ്, ലോറി, കടലാസ് പൂക്കൾ, കുട, തവള, രാമച്ചവേരുപയോഗിച്ച് തൊപ്പി എന്നിവയും കുട്ടികൾ നിർമിച്ചു പ്രദർശനത്തിനെത്തിച്ചു. പുതുതലമുറയില്‍ പ്രകൃതി ദത്ത വസ്തുക്കളുടെ ഉപയോഗം പ്രോത്സാഹിപ്പി ക്കുക എന്ന ലക്ഷ്യത്തോടെയാണു ഫെസ്റ്റ് സംഘടിപ്പിച്ചതെന്നു പ്രധാനാധ്യാപിക സിസ്റ്റര്‍ നിർമൽ മരിയ പറഞ്ഞു. അധ്യാപകരായ സിസ്റ്റര്‍ ജോമിയ, സിസ്റ്റർ എബിറ്റ എന്നിവർ നേതൃത്വം നൽകി. സ്‌കൂൾ പരിസ്ഥിതി ക്ലബ് അംഗങ്ങളുടെ സഹകരണത്തോടെയായിരുന്നു ഫെസ്റ്റ്.

ഓട നിർമാണത്തിനിടെ കച്ചേരിത്താഴത്ത് പൈപ്പുപൊട്ടി കുടിവെള്ളം പാഴായി

മൂവാറ്റുപുഴ: ഓട നിർമാണത്തിനിടെ കച്ചേരിത്താഴത്ത് കുടിവെള്ള പൈപ്പ് പൊട്ടി ലക്ഷക്കണക്കിന് ലിറ്റർ വെള്ളം പാഴായി. നഗരത്തിൽ കുടിവെള്ള വിതരണം നിലച്ചു. വെള്ളിയാഴ്ച വൈകിട്ടാണ് കച്ചേരിത്താഴത്തേക്കെത്തുന്ന കാവുംപടി റോഡ് മണ്ണുമാന്തി യന്ത്രം ഉപയോഗിച്ച് ഓട കുഴിക്കുന്നതിനിടെ വലിയ പൈപ്പ് പൊട്ടിയത്. കുറച്ചുനാൾ മുൻപ് നഗര വികസനത്തിന്‍റെ ഭാഗമായി മാറ്റിസ്ഥാപിച്ച പുതിയ പൈപ്പാണ് പൊട്ടിയത്. ശക്തിയോടെ വെള്ളം പുറത്തേക്കൊഴുകിയതോടെ കാന നിറഞ്ഞു. ജലവിതരണം നിർത്തി ഈ വെള്ളം മോട്ടോർ ഉപയോഗിച്ച് അടിച്ചു വറ്റിക്കാനുള്ള ശ്രമം തുടങ്ങി. പൈപ്പ് പൊട്ടിയതോടെ ഓട നിർമാണവും നിലച്ചു. വെള്ളം നിറഞ്ഞതോടെ കാവുംപടി റോഡിലേക്ക് തിരിയുന്ന ഭാഗം തോട് പോലെയായി

പോലീസിനെ ആക്രമിച്ചു രക്ഷപ്പെട്ട കഞ്ചാവ് പ്രതി ബംഗ്ലാ അതിര്‍ത്തിയില്‍ പിടിയില്‍

കൊച്ചി: പോലീസിനെ ആക്രമിച്ച് രക്ഷപ്പെട്ട കഞ്ചാവ് കേസ് പ്രതിയെ ബംഗ്ലാദേശ് അതിര്‍ത്തില്‍ നിന്നു പിടികൂടി. പശ്ചിമബംഗാള്‍ ഉത്തര്‍ബിനാജ്പൂര്‍ സ്വദേശി തന്‍വീര്‍ ആലം (32) ആണ് എറണാകുളം നോര്‍ത്ത് പോലീസിന്‍റെ പിടിയിലായത്. 2024 സെപ്റ്റംബര്‍ 19ന് 2.5 കിലോഗ്രാം കഞ്ചാവുമായി കലൂര്‍ ഭാഗത്തെ ലോഡ്ജില്‍ നിന്നു ഇയാളെ പിടികൂടിയ ഡാന്‍സാഫ് സംഘത്തെ ആക്രമിച്ച് രക്ഷപ്പെടുകയായിരുന്നു. കഴിഞ്ഞ ഒരു വര്‍ഷക്കാലത്തെ നിരീക്ഷണത്തിന് ശേഷമാണ് എറണാകുളം നോര്‍ത്ത് പോലീസ് സംഘം ബംഗ്ലാദേശ് അതിര്‍ത്തിയില്‍ നിന്നു പ്രതിയെ പിടികൂടിയത്. നോര്‍ത്ത് എസ്‌ഐ ബിജുവിന്‍റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്. കേരളത്തിലെത്തിച്ച പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

റോഡിൽ വീണ കോൺക്രീറ്റ് മിശ്രിതം നീക്കം ചെയ്തു

ഇരുമ്പനം: കോൺക്രീറ്റ് മിക്സർ ലോറിയിൽനിന്നും റോഡിൽ വീണ കോൺക്രീറ്റ് മിശ്രിതം അഗ്നിരക്ഷാ സംഘത്തിന്‍റെ നേതൃത്വത്തിൽ നീക്കം ചെയ്തു. റിഫൈനറി റോഡിൽ ബെവ്കോയ്ക്ക് സമീപത്തെ റോഡിലാണ് വെള്ളിയാഴ്ച്ച ഉച്ചയോടെ കോൺക്രീറ്റ് മിശ്രിതം വീണത്. പിന്നാലെ ഇതുവഴി പോയ ഇരുചക്ര വാഹനങ്ങൾ തെന്നി വീണ് യാത്രക്കാർക്ക് സാരമായി പരിക്കേൽക്കാൻ തുടങ്ങിയതോടെ മുൻകൗൺസിലർ ടി.കെ.സുരേഷ് പോലീസിനെയും അഗ്നിരക്ഷാ സേനയെയും വിളിച്ചറിയിക്കുകയായിരുന്നു. തുടർന്ന് ഇവർ സ്ഥലത്തെത്തി അപകട സാധ്യതയായി കിടന്ന കോൺക്രീറ്റ് മിശ്രിതം നീക്കം ചെയ്ത് ഈ ഭാഗത്തെ റോഡ് വാട്ടർ ജെറ്റ് ഉപയോഗിച്ച് കഴുകി വൃത്തിയാക്കി ഗതാഗതയോഗ്യമാക്കി.

ഫോർട്ട് കൊച്ചിയിലെ റിസോർട്ടിൽ തീപിടിത്തം

ഫോര്‍ട്ട്കൊച്ചി: കസ്റ്റംസ് ജെട്ടിക്ക് സമീപം ടൂറിസ്റ്റ് റിസോര്‍ട്ടിലെ വേസ്റ്റ് വാട്ടര്‍ ട്രീറ്റ്മെന്‍റ് പ്ളാന്‍റ് കെട്ടിടത്തില്‍ തീ പിടിത്തം. ഹോട്ടല്‍ ഫോര്‍ട്ട് ഹൗസിലെ ഓല മേഞ്ഞ കെട്ടിട ഭാഗത്താണ് തീപിടിച്ചത്. തീ ആളി പടര്‍ന്നത് പരിഭ്രാന്തി പരത്തി. ഇന്നലെ വൈകിട്ട് 5.15ഓടെയാണ് സംഭവം. മട്ടാഞ്ചേരിയില്‍ നിന്നെത്തിയ അഗ്നി ശമനസേനയുടെ രണ്ട് യൂണിറ്റ് ഒരു മണിക്കൂര്‍ നേരത്തേ പരിശ്രമത്തിനൊടുവിലാണ് തീയണച്ചത്. സംഭവസമയത്ത് ഈ ഭാഗത്ത് ടൂറിസ്റ്റുകള്‍ ഇല്ലാതിരുന്നതിനാലും സമീപ കെട്ടിടങ്ങളിലേക്ക് തീ പടരാതെ നിയന്ത്രണ വിധേയമാക്കിയതിനാലും വലിയ അപകടമാണ് ഒഴിവായത്. സ്റ്റേഷന്‍ ഓഫീസര്‍ എസ്.സുരേഷ്, സീനിയര്‍ ഫയര്‍ ആൻഡ് റസ്ക്യൂ ഓഫീസര്‍ സുഭാഷ്, ഫയര്‍മാന്‍മാരായ ബിനോയ് മാര്‍ട്ടിന്‍, എം.മനു തുടങ്ങിയവരുടെ നേതൃത്വത്തിലാണ് തീയണച്ചത്.ഷോര്‍ട്ട് സര്‍ക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം ഏകദേശം ഒരു ലക്ഷം രൂപയുടെ നഷ്ടം കണക്കാക്കുന്നതായി ഫയര്‍ഫോഴ്സ് അധികൃതര്‍ അറിയിച്ചു.

നെറ്റ് സീറോ കാർബൺ പദ്ധതിരേഖ 22ന് മന്ത്രി പ്രകാശനം ചെയ്യും

വൈപ്പിൻ: ഗോശ്രീ മേഖലയിൽ നെറ്റ് സീറോ കാർബൺ എന്ന ലക്ഷ്യം കൈവരിക്കുന്നതിന് ഹരിത കേരളം മിഷന്‍റെ സാങ്കേതിക സഹായത്തോടെ പദ്ധതി വരുന്നു. ജിഡയുടേയും തദേശ സ്ഥാപനങ്ങളുടെയും പിന്തുണയോടെ നടപ്പിലാക്കുന്ന പദ്ധതിയുടെ വിശദമായ പദ്ധതിരേഖ 22ന് ബോൾഗാട്ടി പാലസിൽ മന്ത്രി പി. രാജീവ് പ്രകാശനം ചെയ്യും. ഉച്ചയ്ക്ക് 12ന് നടക്കുന്ന ചടങ്ങിൽ കെ.എൻ. ഉണ്ണിക്കൃഷ്ണൻ എംഎൽഎ അധ്യക്ഷനാകും. പദ്ധതിക്ക് മുന്നോടിയായി ഗോശ്രീ പ്രദേശത്തെ എട്ടു പഞ്ചായത്തുകളിലും കാർബൺ എമിഷൻ സർവേ പൂർത്തീകരിച്ചിട്ടുണ്ട്. ജലസ്രോതസുകളുടെ പുനരുദ്ധാരണം, കണ്ടൽക്കാടുകൾ ഉൾപ്പെടുന്ന മേഖലയുടെ ഹരിതവൽക്കരണം, മാലിന്യസംസ്കരണം എന്നിവക്ക് ഊന്നൽ നൽകി പദ്ധതികൾ രൂപീകരിക്കുകയാണ് ആദ്യഘട്ടം. സർക്കാർ-അർധ സർക്കാർ ഓഫീസുകൾക്കായും പദ്ധതി തയാറാക്കിയിട്ടുണ്ട്. ഈ വർഷം സൗരോർജ മേഖലയുമായി ബന്ധപ്പെട്ട പ്രവർത്തനങ്ങളാണ് പൂർത്തീകരിക്കുക. കൃഷി-ജലസേചന വകുപ്പുകളുടെ ആഭിമുഖ്യത്തിൽ തോടുകൾ, കുളങ്ങൾ, പൊതു കിണറുകൾ എന്നിവയുടെ പുനരുജ്ജീവനം സാധ്യമാക്കും. ഹരിത സമൃദ്ധി വാർഡ്, തരിശു രഹിത ഗ്രാമം എന്നീ പദ്ധതികൾ കൃഷിവകുപ്പിന്‍റെ സഹകരണത്തോടെ ഏറ്റെടുക്കുമെന്നും എംഎൽഎ പറഞ്ഞു.

പറവൂർ ഡോൺ ബോസ്കോ ആശുപത്രി 30-ാം വാർഷികവും നഴ്സിംഗ് സ്കൂൾ രജത ജൂബിലിയും

പറവൂർ: പറവൂർ ഡോൺബോസ്കോ ആശുപത്രിയുടെ മുപ്പതാം വാർഷികവും ഡോൺ ബോസ്കോ നഴ്സിംഗ് സ്കൂളിന്‍റെ രജത ജൂബിലിയും 22ഉം 23ഉം ബാച്ച് നേഴ്സിംഗ് വിദ്യാർഥികളുടെ ബിരുദദാനവും ഇന്ന് വൈകിട്ട് 4.30ന് ആശുപത്രി ആശുപത്രി അങ്കണത്തിൽ നടത്തും. ഡോൺ ബോസ്കോ ചാരിറ്റബിൾ ട്രസ്റ്റിന്‍റെ ചെയർമാനും കോട്ടപ്പുറം രൂപതാ മെത്രാനുമായ ഡോ. അംബ്രോസ് പുത്തൻവീട്ടിൽ സമ്മേളനത്തിൽ അധ്യക്ഷത വഹിക്കും. പ്രതിപക്ഷ നേതാവ് വി.ഡി. സതീശൻ ഉദ്ഘാടനം നിർവഹിക്കും. ഡോൺ ബോസ്കോ ആശുപത്രി സ്ഥാപനങ്ങളുടെ സ്ഥാപകൻ ആർച്ച് ബിഷപ്പ് എമിരിറ്റസ് ഡോ. ഫ്രാൻസിസ് കല്ലറക്കൽ, ബിഷപ് ഡോ. ജോസഫ് കാരിക്കശേരി, മുനിസിപ്പൽ ചെയർപേഴ്സൺ ബീന ശശിധരൻ, സിനി ആർട്ടിസ്റ്റ് വിനോദ് കെടാമംഗലം, ട്രെയിൻഡ് നേഴ്സസ് അസോസിയേഷൻ ഓഫ് ഇന്ത്യ പ്രസിഡന്‍റ് പ്രഫ. രേണു സൂസൻ തോമസ്, മുൻ എംപി കെ.പി. ധനപാലൻ, മുൻമന്ത്രി എസ്. ശർമ, ഡോൺ ബോസ്കോ ചാരിറ്റബിൾ ട്രസ്റ്റിന്‍റെയും സ്ഥാപനങ്ങളുടെയും ഡയറക്ടർ ഫാ. ക്ലോഡിംഗ് ബിവേര എന്നിവർ പ്രസംഗിക്കും.

പി.പി. തങ്കച്ചൻ അനുസ്മരണം

അങ്കമാലി: പി.പി . തങ്കച്ചന്‍റെ നിര്യാണത്തില്‍ അങ്കമാലി ബ്ലോക്ക് കോണ്‍ഗ്രസ് കമ്മിറ്റിയുടെ നേതൃത്വത്തില്‍ അനുശോചന സമ്മേളനം നടത്തി. ബ്ലോക്ക് കോണ്‍ഗ്രസ് പ്രസിഡന്‍റ് ആന്‍റു മാവേലി അധ്യക്ഷത വഹിച്ചു. ബെന്നി ബഹനാന്‍ എംപി, മുന്‍ എംഎല്‍എ പി.ജെ. ജോയി, അങ്കമാലി മുനിസിപ്പല്‍ ചെയര്‍മാന്‍ ഷിയോ പോള്‍, അകപ്പറമ്പ് കത്തീഡ്രല്‍ വികാരി ഫാ. ഗീവര്‍ഗീസ് അരീയ്ക്കല്‍, ആര്‍എസ്പി ജില്ലാ സെക്രട്ടറി ജോര്‍ജ് സ്റ്റീഫന്‍, മുന്‍ മുനിസിപ്പല്‍ ചെയര്‍മാന്മാരായ മാത്യു തോമസ്, കെ. കുട്ടപ്പന്‍, നഗരസഭ പ്രതിപക്ഷ പാര്‍ലിമെന്‍ററി പാര്‍ട്ടി നേതാവ് ടി.വൈ. ഏല്യാസ് തുടങ്ങിയവർ പ്രസംഗിച്ചു.

ജൂബിലി തീർഥാടനം

ഫോർട്ടുകൊച്ചി: സഭയുടെ ജൂബിലിയാഘോഷത്തോടനുബന്ധിച്ച് കുമ്പളങ്ങി സെന്‍റ് ജോസഫ് പള്ളിയുടെ നേതൃത്വത്തിൽ ദേവാലയ തീർഥാടനം നടത്തി. കൊച്ചി-ആലപ്പുഴ രൂപതകളിലെ 15 ലേറെ ദേവാലങ്ങളിലാണ് തീർഥാടനം നടത്തിയത്. വികാരി ഫാ. ആന്‍റണി നെടുംപറമ്പലിന്‍റെ നേതൃത്വത്തിൽ നടന്ന തീർഥാടനത്തിൽ 200 ലേറെ വിശ്വാസികൾ പങ്കെടുത്തു. സഹവികാരി ഫാ. എയ്ഡ്രിൻ ഡിസൂസ, കൺവീനർ ജോബ് വെളിപറമ്പിൽ, സെക്രട്ടറി മെറ്റിൽഡാ മൈക്കിൾ, ഖജാൻജി വി.ജെ. ആന്‍റണി, ജോർജ് നാങ്കേരി, സൈമൺ കുന്നേൽ തുടങ്ങിയവർ തീർഥാടന യാത്രയ്ക്ക് നേതൃത്വം നല്കി.

മദര്‍ ഏലീശ്വ: വരാപ്പുഴ സെന്‍റ് ജോസഫ്‌സ് കോണ്‍വെന്‍റില്‍ സിമ്പോസിയം 21ന്

വരാപ്പുഴ: മദര്‍ ഏലീശ്വയെ വാഴ്ത്തപ്പെട്ടവളായി പ്രഖ്യാപിക്കുന്നതിന്‍റെ ഭാഗമായി വരാപ്പുഴ സെന്‍റ് ജോസഫ്‌സ് കോണ്‍വെന്‍റില്‍ 21ന് ഉച്ചയ്ക്ക് 2.30ന് മദര്‍ ഏലീശ്വ സിമ്പോസിയം നടക്കും. ഡോ. ചാള്‍സ് ഡയസ് ഉദ്ഘാടനം നിര്‍വഹിക്കും. മഞ്ഞുമ്മല്‍ പ്രൊവിന്‍ഷ്യാള്‍ ഡോ. അഗസ്റ്റിന്‍ മുല്ലൂര്‍ അനുഗ്രഹ പ്രഭാഷണം നടത്തും. സിടിസി സുപ്പീരിയര്‍ ജനറല്‍ മദര്‍ ഷഹീല അധ്യക്ഷത വഹിക്കും. സ്ത്രീ പത്തൊന്‍പതാം നൂറ്റാണ്ടിലെ സാംസ്‌കാരിക സാമൂഹ്യ രാഷ്ട്രീയ പശ്ചാത്തലത്തില്‍ - എന്ന വിഷയത്തില്‍ ഡോ. ജെ. ദേവികയും (പ്രഫ. സെന്‍റര്‍ ഫോര്‍ ഡവലപ്പ്‌മെന്‍റ് സ്റ്റഡീസ്, തിരുവനന്തപുരം, ചരിത്രകാരി), സ്ത്രീ വിദ്യാഭ്യാസം 19-ാം നൂറ്റാണ്ടില്‍ - എന്ന വിഷയത്തില്‍ ഡോ. വിനില്‍ പോള്‍ (അസി. പ്രഫ., എഴുത്തുകാരന്‍), സ്ത്രീ സന്യാസം ഭാരതത്തില്‍ - എന്ന വിഷയത്തില്‍ ഡോ. എസ്.ജെ. ബെന്നി ചിറമ്മേല്‍ (ഡയറക്ടര്‍, കോട്ടപ്പുറം എഡ്യൂക്കേഷന്‍ കമ്മീഷന്‍), ധന്യ മദര്‍ ഏലീശ്വ: ചരിത്രം രചിച്ച സന്യാസിനി - എന്ന വിഷയത്തില്‍ സിസ്റ്റര്‍ ഡോ. സൂസി കിണറ്റിങ്കലും പ്രബന്ധം അവതരിപ്പിക്കും. ജീവനാദം ചീഫ് എഡിറ്റര്‍ ജെക്കോബി ജോര്‍ജ് പ്രസംഗിക്കും.

കളഞ്ഞുകിട്ടിയ സ്വർണം ഉടമയെ തിരികെ ഏല്പിച്ചു

അങ്കമാലി: കെഎസ്ആർടിസി ബസ്റ്റാൻഡിൽനിന്നും കളഞ്ഞുകിട്ടിയ സ്വർണ പാദസരം ഉടമയെ കണ്ടെത്തി തിരികെയേല്പിച്ചു. ശുചീകരണ ജോലിക്കിടയിൽ റോസിക്കാണ് പാദസരം കിട്ടിയത്. സ്വർണം കളഞ്ഞുകിട്ടിയ വിവരം റോസിയിൽ നിന്നറിഞ്ഞ ചിലർ സോഷ്യൽ മീഡിയ വഴി നടത്തിയ ശ്രമഫലമായി ഉടമയെ കണ്ടെത്തി. തുടർന്ന് സ്റ്റാൻഡിൽ വച്ചു തന്നെ ഉടമയായ സ്മിതക്ക് റോസി പാദസരം കൈമാറി.

ലൈറ്റ് ഡിം ചെയ്യാത്തതിനെച്ചൊല്ലി തർക്കം; യാത്രക്കാരനെ ബസ് ഡ്രൈവർ മർദിച്ചു

കളമശേരി: ബസിന്‍റെ ലൈറ്റ് ഡിം ചെയ്യാൻ ആവശ്യപ്പെട്ടതിനെ തുടർന്നുണ്ടായ തർക്കത്തിൽ യാത്രക്കാരനെ ബസ് ഡ്രൈവർ മർദിച്ചു. സംഭവത്തിൽ ബസ് ഡ്രൈവർ ചേർത്തല സ്വദേശി അനുദർശിനെ പോലീസ് അറസ്റ്റ് ചെയ്തു. കളമശേരി അപ്പോളോ കവലയിൽ ബസ് കാത്തു നിൽക്കുകയായിരുന്ന തൃശൂർ സ്വദേശി ജിജോ ജോർജിനാണ് ഇന്നലെ രാത്രി പത്തോടെ ദീർഘദൂര ബസ് ഡ്രൈവറുടെ മർദനമേറ്റത്. പരിക്കേറ്റ ഇയാളെ കളമശേരി മെഡിക്കൽ കോളജിൽ പ്രവേശിപ്പിച്ചു. ബസ് കാത്തുനിൽക്കുകയായിരുന്ന ജിജോ ഈ സമയം ഇതുവഴിയെത്തിയ ബസിന്‍റെ ലൈറ്റ് ഡിം ചെയ്യാൻ ആവശ്യപ്പെട്ടു. ഇതേ തുടർന്നു ഡ്രൈവറും ജിജോയും തമ്മിൽ തർക്കമുണ്ടാകുകയും ബസിൽ നിന്നും ചാടിയിറങ്ങിയ ഡ്രൈവർ ജിജോയെ മർദിക്കുകയും കൈയിലുണ്ടായിരുന്ന ആയുധം ഉപയോഗിച്ച് തലയ്ക്കടിച്ച് പരിക്കേൽപ്പിക്കുകയുമായിരുന്നു. സംഭവം കണ്ട നാട്ടുകാർ ഇത് ചോദ്യം ചെയ്തതോടെ ഡ്രൈവർ രക്ഷപെടാൻ ശ്രമിച്ചു. തുടർന്ന് ബസ് തടഞ്ഞു നിർത്തി നാട്ടുകാർ വിവരം പോലീസിൽ അറിയിക്കുകയായിരുന്നു. സ്ഥലത്തെത്തിയ പോലീസ് ബസ് ഡ്രൈവർ അനുദർശിനെ അറസ്റ്റ് ചെയ്തു. സംഭവത്തെത്തുടർന്ന് ദേശീയപാതയിൽ മണിക്കൂറുകളോളം ഗതാഗതക്കുരുക്കുണ്ടായി.

അരൂർ-കുമ്പളങ്ങി പാലം : നിർമാണത്തിന് തടസമായി ചങ്ങാട സർവീസ്

അരൂർ: ചങ്ങാട സർവീസ് മാറ്റാൻ വൈകുന്നതു മൂലം അരൂർ-കുമ്പളങ്ങി പാലം നിർമാണ പ്രവർത്തികൾക്ക് തടസമാകുന്നു. കെൽട്രോൺ-കുമ്പളങ്ങി കടവിലെ ചങ്ങാട സർവീസ് മാറ്റിയാൽ മാത്രമേ നിർമാണ സാമഗ്രികളും, യന്ത്രസാമഗ്രികളും ഇറക്കി പണി വേഗത്തിൽ ആരംഭിക്കാൻ കഴിയു എന്ന് കരാറുകാരൻ നേരത്തെ അറിയിച്ചിരുന്നു. പണി തുടങ്ങി രണ്ടാഴ്ച പിന്നിടുന്പോൾ കെൽട്രോൺ ഫെറിയിൽ ചങ്ങാടത്തിലെത്തുന്ന വാഹനങ്ങളും യാത്രക്കാരും പാലം പണിനടക്കുന്നതിന് ഇടയിലൂടെയാണ് യാത്ര ചെയ്യുന്നത്. നിർമാണം നടക്കേണ്ട അരൂർ കെൽട്രോൺ -കുമ്പളങ്ങി കടത്തുകടവിൽ ചങ്ങാട സർവീസ് മാറ്റാത്തത് മൂലം നിർമാണ സാമഗ്രികൾ ഇറക്കാനും കഴിയുന്നില്ലെന്ന് കരാറുകാരൻ പറയുന്നു. കുമ്പളങ്ങി പഞ്ചായത്തിനാണ് പാലം പണിക്കുള്ള സൗകര്യങ്ങൾ ഒരുക്കി കൊടുക്കാനുള്ള ചുമതല. നിലവിൽ കെൽട്രോൺ - കുമ്പളങ്ങി കടവിലുള്ള ചങ്ങാട സർവീസ് അമ്മനേഴം- കുമ്പളങ്ങി ജനതാ കടത്തുകടവിലേക്ക് മാറ്റാനുള്ള നടപടികൾ അനന്തമായി നീളുകയാണ്. കുമ്പളങ്ങി ജനതാ കടത്തുകടവിൽ ബോട്ട് ജെട്ടി നിർമാണം ഇപ്പോഴും നടക്കുകയാണ്. അരൂർ അമ്മനേഴം ജെട്ടിയിലെ ആഴം കൂട്ടലും, ബോട്ട് ജെട്ടിയിൽ ഇടിക്കാതിരിക്കാനുള്ള തെങ്ങിൻ കുറ്റികൾ നാട്ടലും മറ്റും അരൂർ പഞ്ചായത്ത് ചെയ്യണമെന്നാണ് ഇരു പഞ്ചായത്തുകളുടെയും ധാരണ. ജെട്ടിയുടെ നിർമാണം ഇഴയുന്ന സാഹചര്യത്തിൽ അരൂർ-കുമ്പളങ്ങി പഞ്ചായത്തുകളുടെ സംയുക്ത യോഗം വീണ്ടും വിളിച്ച് ചേർത്താലെ അടിയന്തിര പരിഹാരം കണ്ടെത്താനാകൂ.

ലോറിയിടിച്ച് പത്ര ഏജന്‍റിന് പരിക്ക്

മരട്: പത്രവിതരണത്തിനിടെ ടോറസ് ലോറിയിടിച്ച് പത്ര ഏജന്‍റിന് ഗുരുതര പരിക്കേറ്റു. മരട് അയിനി റോഡ് പഞ്ചരവള്ളി വീട്ടിൽ പി.എൽ. രവി(66)യ്ക്കാണ് ഇന്നലെ രാവിലെ ഏഴിനുണ്ടായ അപകടത്തിൽ പരിക്കേറ്റത്. സൈക്കിളിൽ പത്രവിതരണം നടത്തുന്നതിനിടെയായിരുന്നു അപകടം. ബൈക്ക് യാത്രക്കാരായ രണ്ടുപേർക്കും അപകടത്തിൽ പരിക്കേറ്റു. വലതുകാലിന് ഗുരുതര പരിക്കേറ്റ രവിയെ എറണാകുളത്തെ സ്വകാര്യ ആശുപത്രിയിൽ അത്യാഹിത വിഭാഗത്തിൽ പ്രവേശിപ്പിച്ചു. പോലീസ് കേസെടുത്തു.

നിർത്തിവച്ച കിൻഫ്ര ജലവിതരണ പദ്ധതി: യോഗം ഉടനെന്ന് മന്ത്രി

ആലുവ: തർക്കത്തെ തുടർന്ന് നിർത്തിവച്ച കിൻഫ്ര ജലവിതരണ പദ്ധതി പുനരാരംഭിക്കാൻ യോഗം ഉടൻ വിളിച്ചു ചേർക്കുമെന്ന് പൊതുമരാമത്ത് മന്ത്രി മുഹമ്മദ് റിയാസ് നിയമസഭയിൽ പറഞ്ഞു. ആലുവ എംഎൽഎ അൻവർ സാദത്ത് ഉന്നയിച്ച സബ്മിഷന് മറുപടി നൽകുകയായിരുന്നു മന്ത്രി. കിൻഫ്ര പദ്ധതി പൂർത്തിയാകുന്ന മുറക്കുമാത്രമേ തോട്ടുമുഖം-മണലിമുക്ക് റോഡ് പുനർനിർമാണം നടക്കുകയുള്ളൂവെന്നും മന്ത്രി അറിയിച്ചു. ആലുവ നിയോജക മണ്ഡലത്തിൽ ചെറുതും വലുതുമായ 12 റോഡുകൾ ബിഎംബിസി നിലവാരത്തിൽ പുനരുദ്ധരിക്കണമെന്നാവശ്യപ്പെട്ടാണ് സബ്മിഷൻ കൊണ്ടുവന്നത്.

ഇന്‍റർ ബാസ്കറ്റ്ബോൾ ടൂർണമെന്‍റ് : തേവര സേക്രഡ് ഹാര്‍ട്ട് സിഎംഐ ജേതാക്കള്‍

കൊച്ചി: തേവര സേക്രഡ് ഹാര്‍ട്ട് സിഎംഐ പബ്ലിക് സ്‌കൂളിന്‍റെ ആഭിമുഖ്യത്തില്‍ നടന്ന 12-ാമത് ഫാ.ജോര്‍ജ് കോയിക്കര ഇന്‍റര്‍ സ്‌കൂള്‍ ബാസ്‌കറ്റ് ബോള്‍ ടൂര്‍ണമെന്‍റില്‍ ആതിഥേയരായ സേക്രഡ് ഹാര്‍ട്ട് സിഎംഐ പബ്ലിക് സ്‌കൂള്‍ ജേതാക്കൾ. ലീഗടിസ്ഥാനത്തില്‍ നടന്ന ടൂര്‍ണമെന്‍റില്‍ തേവര ടീം (43- 42) എന്ന സ്‌കോറിന് വടുതല ഡോണ്‍ ബോസ്‌കോ സ്‌കൂളിനേയും (50- 29) എന്ന സ്‌കോറിന് അങ്കമാലി വിശ്വജ്യോതി സ്‌കൂളിനേയും (58 - 57) എന്ന സ്‌കോറിന് ഭവന്‍സ് സ്‌കൂള്‍ ഗിരിനഗറിനേയും പരാജയപ്പെടുത്തി. വിശ്വജ്യോതി സ്‌കൂളിനേയും ഭവന്‍സ് സ്‌കൂളിനേയും പരാജയപ്പെടുത്തി വടുതല ഡോണ്‍ ബോസ്കോ സ്‌കൂള്‍ രണ്ടാമതെത്തി. എറണാകുളം ജില്ലാ ബാസ്‌കറ്റ് ബോള്‍ അസോസിയേഷന്‍ പ്രസിന്‍റ് ശിഹാബ് നീറുങ്കല്‍, സെക്രട്ടറി ജെയ്‌സണ്‍ പീറ്റര്‍, ഫാ. ജോര്‍ജ് കോയിക്കര, പ്രിന്‍സിപ്പല്‍ റവ. ഡോ. വര്‍ഗീസ് കാച്ചപ്പിള്ളി എന്നിവര്‍ വിജയികള്‍ക്ക് ട്രോഫികളും ക്യാഷ് അവാര്‍ഡും സമ്മാനിച്ചു.

അരയേക്കർ സർക്കാർ ഭൂമി തിരിച്ചുപിടിച്ച് റവന്യൂ അധികൃതർ

കാക്കനാട്: 20 കോടി രൂപ മതിപ്പുവിലയുള്ള അരയേക്കറോളം സർക്കാർ ഭൂമി അനധികൃതമായി കൈവശംവച്ചിരുന്ന സ്വകാര്യവ്യക്തികളിൽ നിന്ന് തിരികെ പിടിച്ച് റവന്യൂ അധികൃതർ. സീപോർട്ട്-എയർപോർട്ട് റോഡിൽ ടി.വി. സെന്‍ററിനു സമീപം ഡി.എൽ എഫ് ഫ്ലാറ്റ് സമുച്ചയത്തിനടുത്തുള്ള റവന്യൂ പുറമ്പോക്കാണിത്. കാക്കനാട് വില്ലേജിൽ ബ്ലോക്നമ്പർ 9ൽറീസർവേ നമ്പർ 365/1ൽപെട്ട അരയേക്കർ ഭൂമിയാണ് തിരികെ പിടിച്ചത്. കാക്കനാട് അത്താണി സ്വദേശിയും പൊതു പ്രവർത്തകനുമായ പ്രമേഷ് വി.ബാബു നൽകിയ പരാതിയെ തുടർന്നാണ് നടപടി. കുറച്ചുനാൾമുമ്പ് ഈസ്ഥലം വേലികെട്ടി തിരിക്കുകയും ഇവിടെ ഉണ്ടായിരുന്ന ലക്ഷക്കണക്കിനു രൂപ വിലമതിക്കുന്ന മരങ്ങൾ മുറിച്ചു കടത്തുകയും ചെയ്തത് പ്രദേശവാസികളുടെ ശ്രദ്ധയിൽപ്പെട്ടിരുന്നു. മെട്രോ റയിൽ നിർമാണത്തിനായി ഏറ്റെടുത്ത ഭൂമിയാണെന്നും സ്ഥലം ഒരുക്കുന്നതിന്‍റെ ഭാഗമായി മരം മുറിച്ചു നീക്കിയതാണെന്നും ഭൂമി കൈവശപ്പെടുത്തിയവർ പറഞ്ഞതിനെ തുടർന്ന് മെട്രോ റെയിൽ സ്ഥലമെടുപ്പ് വിഭാഗത്തിൽ നടത്തിയ അന്വേഷണത്തിലാണ് യാഥാർഥ്യം വെളിപ്പെട്ടത്. മെട്രോ റയിൽ പദ്ധതിക്കായി ഈഭൂമി ഏറ്റെടുത്തിട്ടിലെന്ന് അറിഞ്ഞതോടെയാണ് റവന്യു വകുപ്പിൽ പരാതി നൽകിയതെന്ന് പ്രമേഷ്. വി ബാബു പറഞ്ഞു. മെട്രോ റയിൽ നിർമാണത്തിന് ഉപയോഗിച്ചിരുന്ന ജെസിബി ഉപയോഗിച്ചാണ് ഇവിടെ നിന്നു മുറിച്ച മരങ്ങൾ നീക്കംചെയ്തത്. പരാതിയെ തുടർന്ന് കണയന്നൂർ തഹസിൽദാർ ഡി.വിനോദ്, ഡപ്യൂട്ടി തഹസിൽദാർ ബിനോ തോമസ്, കാക്കനാട് വില്ലേജ്ഓഫീസർ എന്നിവർ സ്ഥലത്തെത്തുകയും ജെസിബി പിടിച്ചെടുത്ത് തൃക്കാക്കര സ്റ്റേഷനിലേക്ക് മാറ്റുകയും ചെയ്തു. കാക്കനാട് വില്ലേജിൽ പലയിടങ്ങളിലും ഏക്കറുകണക്കിനു റവന്യൂ ഭൂമി ഇത്തരത്തിൽ പലരും കൈയേറി അവകാശം സ്ഥാപിച്ചിട്ടുണ്ട്.ഇവയിൽ പലതും ഒഴിപ്പിച്ച് റവന്യൂ വകുപ്പ് ബോർഡുകൾ സ്ഥാപിച്ചെങ്കിലും കൈയേറ്റക്കാർ ഇതേ ഭൂമിയിൽ തന്നെ കുടിൽ കെട്ടി ഇപ്പോഴും താമസിക്കുന്നുണ്ട്. കളക്ടറേറ്റിനു വിളിപ്പാടകലെ രണ്ടരയേക്കറിലധികം റവന്യൂഭൂമി സ്വകാര്യ വ്യക്തികൾ കൈവശം വച്ചിട്ടും കോടതികളിൽ കേസുകൾ നിലനിൽക്കുന്നതിനാൽ ഇവ പിടിച്ചെടുക്കാൻ റവന്യൂ അധികൃതർക്കു കഴിയുന്നില്ല.

മത്സ്യബന്ധനത്തിനിടെ തൊഴിലാളി കുഴഞ്ഞുവീണു മരിച്ചു

ചെറായി: കടലിൽ മത്സ്യബന്ധനത്തിനിടെ വള്ളത്തിൽ കുഴഞ്ഞുവീണ തൊഴിലാളി മരിച്ചു. തിരുവനന്തപുരം നെയ്യാറ്റിൻകര കുളത്തൂർ സ്വദേശി പുതുവൽ പുരയിടത്തിൽ പെർലിക് മകൻ അജിൻ ബോസാ(42)ണ് മരിച്ചത്. 18ന് പുലർച്ചെ ഒന്നരയോടെ മുനമ്പം ഭാഗത്ത് പടിഞ്ഞാറാണ് സംഭവം. കൂടെ ഉണ്ടായിരുന്നവർ തീരത്ത് എത്തിച്ചു. കുഴുപ്പിള്ളിയിലെ സ്വകാര്യ ആശുപത്രിയിൽ എത്തിച്ചാണ് മരണം സ്ഥിരീകരിച്ചത്. ഫോർട്ട് കൊച്ചി ഹോസ്റ്റൽ പോലീസ് കേസെടുത്തിട്ടുണ്ട്. മൃതദേഹം പോസ്റ്റ്മോർട്ടം നടത്തി ബന്ധുക്കൾ വിട്ടുകൊടുത്തു.

വയോധികനെ കിണറ്റിൽ മരിച്ചനിലയിൽ കണ്ടെത്തി

ചെറായി: വയോധികനെ വീടിനടുത്തുള്ള പഞ്ചായത്ത് കിണറ്റിൽ മരിച്ചനിലയിൽ കണ്ടെത്തി. എടവനക്കാട് ഇല്ലത്തുപടി പടിഞ്ഞാറ് തൈപ്പറമ്പിൽ ശേഖരന്‍റെ മകൻ തമ്പി (68) ആണ് മരിച്ചത്. വ്യാഴാഴ്ച രാത്രി എട്ടരയോടെയാണ് സംഭവം. വീട്ടുകാരും നാട്ടുകാരും ചേർന്ന് ഉടൻ കുഴുപ്പിള്ളിയിലെ സ്വകാര്യ ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു. മൃതദേഹം പോസ്റ്റ്മോർട്ടതിനു ശേഷം സംസ്കരിച്ചു.

തയ്യൽ കട ഉടമ സ്ഥാപനത്തിലെ ശുചിമുറിയിൽ മരിച്ചനിലയിൽ

കാലടി: കാഞ്ഞൂർ പാറപ്പുറത്ത് തയ്യൽ കട ഉടമയെ സ്ഥാപനത്തിലെ ശുചിമുറിയിൽ മരിച്ച നിലയിൽ കണ്ടെത്തി. പാറപ്പുറം സ്വദേശി ചെല്ലപ്പനെ (64) ആണ് മരിച്ച നിലയിൽ കണ്ടെത്തിയത്. വൈകുന്നേരമായിയിട്ടും കട തുറക്കാത്തതിനെ തുടർന്ന് നാട്ടുകാർ എത്തി നോക്കിയപ്പോഴാണ് മൃതദേഹം കണ്ടത്. കാലടി പോലീസ് മേൽനടപടികൾ സ്വീകരിച്ചു. മൃതദേഹം പോസ്റ്റ്‌മോർട്ടത്തിനു ശേഷംബന്ധുക്കൾക്ക് വിട്ടുനൽകും.

വാഹനാപകടത്തിൽ പരിക്കേറ്റ മർച്ചന്‍റ് നേവി ഉദ്യോഗസ്ഥൻ മരിച്ചു

വാഴക്കുളം: സ്‌കൂട്ടര്‍ അപകടത്തില്‍ പരിക്കേറ്റ് ചികിത്സയിലായിരുന്ന മര്‍ച്ചന്‍റ് നേവി ഉദ്യോഗസ്ഥന്‍ മരിച്ചു. മഞ്ഞള്ളൂര്‍ വടകോട് മറ്റത്തിനാനിക്കല്‍ മാത്യുവിന്‍റെ മകന്‍ കിരണ്‍(32) ആണ് മരിച്ചത്. കഴിഞ്ഞ 12ന് തൊടുപുഴ ധന്വന്തരി കവലയിലായിരുന്നു അപകടം. ഇയാൾ ഓടിച്ചിരുന്ന സ്കൂട്ടർ നിയന്ത്രണംവിട്ട് വഴിയോരത്ത് ഇടിക്കുകയായിരുന്നു. തൊടുപുഴയിലെ സ്വകാര്യ ആശുപത്രിയില്‍ ചികിത്സയിലിരിക്കെയാണ് മരണം. സംസ്‌കാരം ഇന്ന് 11ന് വടകോട് സെന്‍റ് സെബാസ്റ്റ്യന്‍സ് പള്ളിയില്‍. മാതാവ് ഷൈനി.ഭാര്യ ജെംസി ജോണി(നഴ്‌സ് സൗദി) കുറിച്ചിത്താനം പഴയമാക്കല്‍ കുടുംബാംഗം.

പാറമടയിൽ അഴുകിയ മൃതദേഹം കണ്ടെത്തി

കാലടി: അയ്യമ്പുഴ പഞ്ചായത്തിലെ പ്രവർത്തനം നിലച്ച പാറമടയിൽനിന്ന് ദിവസങ്ങളോളം പഴക്കമുള്ള അഴുകിയ മൃതദേഹം കണ്ടെത്തി. ശരീരത്തിന്‍റെ പകുതി ഭാഗം മാത്രമേ ഉള്ളൂ. പാറമടയിൽ ചൂടയിടാൻ വന്നവരുടെ ചൂണ്ടയിൽ മൃതദേഹം കുടുങ്ങുകയായിരുന്നു. തുടർന്ന് ഇവർ പോലീസിൽ വിവരം അറിയിച്ചു. മരിച്ചയാളെ തിരിച്ചറിഞ്ഞിട്ടില്ല. മരണത്തിൽ ദൂരൂഹത സംശയിക്കുന്നു. പോലീസ് ഉദ്യോഗസ്ഥരുടെ നേതൃത്വത്തിൽ പാറമടയിൽ ഇന്നു വിശദമായ പരിശോധന നടത്തും. അയ്യമ്പുഴ പോലീസ് സ്ഥലത്തെത്തി മേൽനടപടികൾ സ്വീകരിച്ചു.

കാർ സ്കൂട്ടറിലിടിച്ച് തലകീഴായി മറിഞ്ഞു

ഉദയംപേരൂർ: കാർ നിയന്ത്രണംവിട്ട് സ്കൂട്ടറിൽ ഇടിച്ച് തലകീഴായി മറിഞ്ഞു. പുല്ലുകാട്ട് കാവിന് സമീപത്ത് ഇന്നലെ ഉച്ചയ്ക്ക് 12ഓടെയായിരുന്നു അപകടം. കാർ സ്കൂട്ടറിൽ ഇടിച്ച ശേഷം തൊട്ടടുത്തുള്ള താഴ്ന്ന പറമ്പിലേയ്ക്ക് തലകീഴായി മറിയുകയായിരുന്നു. ഉടൻ നാട്ടുകാരെത്തി പരിക്കേറ്റവരെ ആശുപത്രിയിലെത്തിച്ചു. ആരുടെയും പരുക്ക് ഗുരുതരമല്ല.

ബിരിയാണി പാഴ്‌സലിനെച്ചൊല്ലി ട്രാഫിക് സ്റ്റേഷനില്‍ ഹോംഗാര്‍ഡുകള്‍ തമ്മിൽത്തല്ലി

രണ്ടുപേർക്ക് പരിക്ക് പള്ളുരുത്തി: വിരമിക്കല്‍ ചടങ്ങിന്‍റെ ഭാഗമായി നടത്തിയ സല്‍ക്കാരത്തിനിടെ ബാക്കി വന്ന ബിരിയാണി പാഴ്‌സല്‍ ചെയ്ത സംഭവത്തെ ചൊല്ലി ഹോം ഗാര്‍ഡുകള്‍ തമ്മിൽത്തല്ലി. ഹോം ഗാര്‍ഡുകളായ ജോര്‍ജ്, രാധാകൃഷ്ണന്‍ എന്നിവര്‍ക്ക് പരിക്കേറ്റു. പള്ളുരുത്തി ട്രാഫിക് പോലീസ് സ്‌റ്റേഷന് മുന്നിലാണ് സംഭവം. പള്ളുരുത്തി ട്രാഫിക് പോലീസ് സ്‌റ്റേഷനുമായി ബന്ധപ്പെട്ട് ജോലി ചെയ്യുന്ന ഹോംഗാര്‍ഡിന്‍റെ വിരമിക്കല്‍ ചടങ്ങിന്‍റെ ഭാഗമായി പോലീസ് ഉദ്യോഗസ്ഥര്‍ക്കും ഹോം ഗാര്‍ഡുകള്‍ക്കും ഉച്ചഭക്ഷണമായി ബിരിയാണി ഒരുക്കിയിരുന്നു. എല്ലാവരും ഭക്ഷണം കഴിച്ചതിനുശേഷം ബാക്കി വന്ന ബിരിയാണി പാഴ്സല്‍ ചെയ്യുന്നതിനിടെ ഒരാള്‍ക്ക് ചിക്കന്‍ കഷണം കൂടുതല്‍ എടുത്തതിനെയും മറ്റൊരാള്‍ക്ക് കുറഞ്ഞുപോ‌യതിനെയും ചൊല്ലി ഇരുവരും തമ്മില്‍ തര്‍ക്കം ഉണ്ടാവുകയും അടിപിടിയില്‍ കലാശിക്കുകയുമായിരുന്നു. തമ്മിലടിയില്‍ രാധാകൃഷ്ണന്‍റെ തലയ്ക്ക് പരിക്കേറ്റു. ഇദ്ദേഹത്തെ ജനറല്‍ ആശുപത്രിയില്‍ പ്രവേശിപ്പിച്ചു. ഇരുവരും തമ്മില്‍ നേരത്തെ വൈരാഗ്യമുണ്ടായിരുന്നതായി സഹപ്രവര്‍ത്തകരായ ഗാര്‍ഡുകള്‍ പറയുന്നു. സംഭവത്തില്‍ ഇതുവരെ പരാതി ലഭിച്ചിട്ടില്ലെന്നും അന്വേഷണം നടത്തുന്നുണ്ടെന്നും പള്ളുരുത്തി പോലീസ് പറഞ്ഞു.

കേരളത്തിന്‍റെ ചികിത്സാമികവിന് വരകളിലൂടെ നന്ദി അറിയിച്ച് കെനിയന്‍ ചിത്രകാരി

കൊച്ചി: ചികിത്സയ്ക്കായി കെനിയൻ സംഘത്തോടൊപ്പം എത്തിയ കെനിയന്‍ ചിത്രകാരി ജോയ് റിച്ചു കേരളത്തിന്‍റെ ചികിത്സാ മികവിന് നന്ദി അറിയിച്ചത് തന്‍റെ കലാസൃഷ്ടിയിലൂടെ. രാജഗിരി ആശുപത്രിയിലെ വിശാലമായ ലോബിയില്‍ സ്ഥാപിച്ച കാന്‍വാസില്‍ ഈ ആഫ്രിക്കന്‍ ചിത്രകാരി വരച്ച് തീര്‍ത്ത ചിത്രം ഒരുപാട് അര്‍ത്ഥങ്ങള്‍ ഉള്‍ക്കൊള്ളുന്നതായിരുന്നു. ചികിത്സയും സാംസ്‌കാരിക പര്യടനവും സമന്വയിപ്പിച്ച യാത്രയുടെ ഭാഗമായി ജോയ് റിച്ചു അടക്കം 20 അംഗസംഘമാണ് രാജഗിരി ആശുപത്രിയില്‍ എത്തിയത്. മെഡിക്കല്‍ ടൂറിസത്തിന് അനുയോജ്യമാണ് കേരളത്തിന്‍റെ ഭൂപ്രകൃതിയും ഇവിടുത്തെ മികവുറ്റ ആരോഗ്യ പ്രവര്‍ത്തകരുമെന്ന് ജോയ് റിച്ചു അഭിപ്രായപ്പെട്ടു. കെനിയന്‍ വേരുകളും അന്താരാഷ്ട്ര യാത്രകളും ഇടകലരുന്നതാണ് റിച്ചുവിന്‍റെ സൃഷ്ടികള്‍. കൊക്കകോള, പോര്‍ഷെ, ന്യൂയോര്‍ക്ക് ടൈംസ്, മാസ്റ്റര്‍കാര്‍ഡ് ഉള്‍പ്പെടെയുള്ള ആഗോള ബ്രാന്‍ഡുകള്‍ക്ക് വേണ്ടി അവര്‍ പ്രവര്‍ത്തിച്ചിട്ടുണ്ട്. കൊക്കകോളയുടെ ആദ്യത്തെ ആഫ്രിക്കന്‍ പ്രചോദിത പാനീയമായ വൂസാഹ് രൂപകല്‍പ്പന ചെയ്തത് ജോയ് റിച്ചുവാണ്. കാന്‍സ് ലയണ്‍സ് സീ ഇറ്റ് ബി ഇറ്റ് അവാര്‍ഡ് 2024ല്‍ അവര്‍ സ്വന്തമാക്കി.

അഭിലാഷ് വധം: പ്രതികളുടെ ജീവപര്യന്തം : ഹൈക്കോടതി ശരിവച്ചു

വൈപ്പിൻ: മുനമ്പം സ്വദേശിയായ അഭിലാഷിനെ കൊലപ്പെടുത്തിയ കേസിൽ കൃഷ്ണകുമാർ എന്ന മുനമ്പം കൃഷ്ണൻ അടക്കമുള്ള ആറു പ്രതികളുടെ ജീവപര്യന്തം ശിക്ഷ ഹൈക്കോടതി ശരിവച്ചു. വിചാരണക്കോടതിയുടെ വിധിക്കെതിരെ മുനമ്പം സ്വദേശികളായ പ്രതികൾ നൽകിയ അപ്പീലാണ് ഹൈക്കോടതി തള്ളിയത്. അഭിലാഷിന്‍റെയും മുനമ്പം കൃഷ്ണന്‍റെയും ഗുണ്ടാ സംഘങ്ങൾ തമ്മിലുള്ള കുടിപ്പകയാണ് കൊലപാതകത്തിനു കാരണം. 2005 മേയ് 19നാണ് അഭിലാഷിനെ പറവൂർ പെരുമ്പടന്നയിൽ വച്ച് വെട്ടിക്കൊലപ്പെടുത്തിയത്. കേസിൽ നോർത്ത് പറവൂർ പോലീസ് സ്റ്റേഷനിൽ രജിസ്റ്റർ ചെയ്ത കേസിൽ പറവൂർ അഡിഷണൽ ജില്ലാ സെഷൻസ് കോടതി ഗുണ്ടാ തലവൻ മുനമ്പം കൃഷ്ണൻ, സഹോദരങ്ങൾ ആയ ബാബു, ബൈജു, കൂടാതെ വിശപ്പൻ എന്ന് വിളിക്കുന്ന രമേശ്‌,സുരേഷ്, കുമാർ എന്നിവർക്ക് ജീവപര്യന്തം ശിക്ഷ വിധിച്ചിരുന്നു. പ്രതികൾ 2019 മുതൽ വിയ്യൂർ സെൻട്രൽ ജയിലിൽ ശിക്ഷ അനുഭവിച്ചുവരുന്നവരാണ്.

യുവാവിനെ ആക്രമിച്ചു : കവര്‍ച്ച; പ്രതികള്‍ പിടിയില്‍

കൊച്ചി: യുവാവിനെ ആക്രമിച്ച് മൊബൈൽ ഫോണും പണവും കവര്‍ന്ന കേസിലെ പ്രതികള്‍ അറസ്റ്റില്‍. കൊല്ലം സ്വദേശികളായ കരുനാഗപ്പിള്ളി തൊടിയൂര്‍ സീനത്ത് മന്‍സിലില്‍ മുഹമ്മദ് അലി (26), ഭൂതകുളം കളക്കോട് തുണ്ടില്‍ ഫിറോസ്(23)എന്നിവരെയാണ് എറണാകുളം നോര്‍ത്ത് പോലീസ് അറസ്റ്റ് ചെയ്തത്. 17ന് പുലര്‍ച്ചെയായിരുന്നു കേസിനാസ്പദമായ സംഭവം. നോര്‍ത്ത് മേല്‍പ്പാലത്തിനു സമീപത്തുവച്ച് പത്തനംതിട്ട സ്വദേശിയായ യുവാവിനെ ആക്രമിച്ച് പരിക്കേല്‍പ്പിച്ച ശേഷം മൊബൈല്‍ ഫോണും പണവും അപഹരിക്കുകയായിരുന്നു. സുഹൃത്തിനെ കാണാന്‍ നഗരത്തിലെത്തിയ യുവാവിനെയാണ് പ്രതികള്‍ ആക്രമിച്ചത്. സംഭവത്തിനു ശേഷം ഒളിവില്‍ പോയ പ്രതികളെ എറണാകുളം നോര്‍ത്ത് പ്രിന്‍സിപ്പല്‍ എസ് ഐ എയിന്‍ ബാബുവിന്‍റെ നേതൃത്വത്തിലുള്ള അന്വേഷണസംഘമാണ് പിടികൂടിയത്.

കോണ്‍ഗ്രസിന് പങ്കില്ല: മുഹമ്മദ് ഷിയാസ്

കൊച്ചി: സിപിഎം വനിതാ നേതാവ് കെ.ജെ.ഷൈനിനെതിരായ സൈബര്‍ ആക്രമണത്തില്‍ കോണ്‍ഗ്രസിനോ, ഔദ്യോഗിക കോണ്‍ഗ്രസ് ഹാന്‍ഡിലുകള്‍ക്കോ ബന്ധമില്ലെന്ന് ഡിസിസി പ്രസിഡന്‍റ് മുഹമ്മദ് ഷിയാസ് പത്രസമ്മേളനത്തില്‍ പറഞ്ഞു. പത്രത്തില്‍ വന്ന വാര്‍ത്തയാണ് സമൂഹമാധ്യമങ്ങളില്‍ പ്രചരിക്കുന്നതെന്നും ഇതെങ്ങനെയാണ് കോണ്‍ഗ്രസിന്‍റെ തലയില്‍ കെട്ടിവയ്ക്കുകയെന്നും അദ്ദേഹം പറഞ്ഞു. സിപിഎമ്മിന്‍റെ ഉത്തരവാദിത്വപ്പെട്ട ജില്ലാ സെക്രട്ടറി തന്നെ ഇത്രയധികം മോശമായ പ്രസ്താവന നടത്തിയത് അപലപനീയമാണ്. പ്രസ്താവന പിന്‍വലിക്കണം. സിപിഎമ്മിലെ അധികാര തര്‍ക്കം കോണ്‍ഗ്രസിന്‍റെ തലയില്‍ കെട്ടിവയ്ക്കാനാണ് സിപിഎം ജില്ലാ സെക്രട്ടറി ശ്രമിക്കുന്നതെന്നും മുഹമ്മദ് ഷിയാസ് പറഞ്ഞു. സമൂഹ മാധ്യമങ്ങള്‍ക്ക് വാര്‍ത്ത എങ്ങനെ ലഭിച്ചു, എങ്ങനെയാണ് ഈ വാര്‍ത്ത പത്രത്തില്‍ വന്നത്, ഇത്തരം കാര്യങ്ങള്‍ ജില്ലാ സെക്രട്ടറി അന്വേഷിക്കുന്നത് നല്ലതായിരിക്കും. സിപിഎമ്മിനകത്തെ അധികാര രാഷ്ട്രീയത്തിന്‍റെ പിന്നില്‍ നടന്ന ഗൂഡാലോചനകളും അതുമായി ബന്ധപ്പെട്ട വാര്‍ത്തകളാണ് ഇത്. അതെങ്ങനെയാണ് കോണ്‍ഗ്രസിന്‍റെ തലയില്‍ കെട്ടിവയ്ക്കുന്നത്. സിപിഎം നേതാക്കള്‍ തമ്മിലുള്ള തര്‍ക്കങ്ങള്‍ അന്വേഷിക്കേണ്ട ജില്ലാ സെക്രട്ടറി കോണ്‍ഗ്രസിനെ പഴിച്ചതില്‍ കാര്യമില്ല. മാധ്യമങ്ങളിലൂടെ കോണ്‍ഗ്രസിനെതിരേ അടിസ്ഥാനരഹിതമായ കാര്യങ്ങള്‍ ആരോപിക്കുന്നത് എന്ത് അടിസ്ഥാനത്തിലാണ്. സമീപകാലങ്ങളില്‍ സ്ത്രീകള്‍ക്കും കുട്ടികള്‍ക്കും എതിരായി ഉയര്‍ന്നു വരുന്ന എല്ലാ ആക്രമണങ്ങള്‍ക്കും എതിരെ ശക്തമായ നിലപാടാണ് പാര്‍ട്ടിയും നേതാക്കളും സ്വീകരിച്ചിട്ടുള്ളത്. ഇരകള്‍ക്ക് അനുകൂല നിലപാടെടുക്കുന്ന പാര്‍ട്ടിയാണ് കോണ്‍ഗ്രസ് എന്ന് ജനങ്ങള്‍ക്ക് ബോധ്യമുണ്ടെന്നും അദ്ദേഹം പറഞ്ഞു.

രാഷ്ട്രീയമായും നിയമപരമായും നേരിടും: കെ.എന്‍. ഉണ്ണികൃഷ്ണന്‍

കൊച്ചി: സാമൂഹ്യമാധ്യമങ്ങളിലൂടെ തനിക്കെതിരെ നടത്തിക്കൊണ്ടിരിക്കുന്ന വ്യാജപ്രചരണങ്ങളെ രാഷ്ട്രീയമായും നിയമപരമായും നേരിടുമെന്ന് കെ.എന്‍.ഉണ്ണികൃഷ്ണന്‍ എംഎല്‍എ. തെറ്റായ പ്രചരണം നടത്തുന്നവരെ നിയമത്തിന്‍റെ മുന്നില്‍ എത്തിക്കും. കമ്യൂണിസ്റ്റ് പ്രസ്ഥാനത്തെയും ഇടതുപക്ഷത്തെയും തകര്‍ക്കുന്നതിന് നേതാക്കന്മാരെ തേജോവധം ചെയ്യുകയും അപകീര്‍ത്തിപ്പെടുത്തുകയും ചെയ്യുകയെന്നത് വലതുപക്ഷ രാഷ്ട്രീയ ശക്തികള്‍ എന്നും സ്വീകരിച്ചുപോരുന്ന രീതിശാസ്ത്രം ആണ്. ഒരു ഗീബല്‍സിയന്‍ തന്ത്രമാണ് ഇവിടെ പയറ്റുന്നത്. തകര്‍ന്നുകൊണ്ടിരിക്കുന്ന കോണ്‍ഗ്രസ് രാഷ്ട്രീയത്തെ ഉയര്‍ത്തെഴുന്നേല്പിക്കാനും ജീര്‍ണതയുടെ അഗാധ ഗര്‍ത്തങ്ങളില്‍ നിന്നും രക്ഷ നേടുന്നതിനുമുള്ള ഒരു നെറികെട്ട പ്രചാരണം മാത്രമാണിതെന്നും കെ.എന്‍.ഉണ്ണികൃഷ്ണന്‍ പറഞ്ഞു.

വ്യാജപ്രചാരണം; കെ.ജെ. ഷൈന്‍ പരാതി നല്‍കി

കൊച്ചി: സാമൂഹ്യമാധ്യമങ്ങളിലൂടെ തനിക്കെതിരെ നടത്തുന്ന അപവാദ പ്രചാരണങ്ങള്‍ക്കെതിരെ സിപിഎം പറവൂര്‍ ഏരിയ കമ്മിറ്റി അംഗം കെ.ജെ.ഷൈന്‍ മുഖ്യമന്ത്രിക്കും ഡിജിപിക്കും വനിതാ കമ്മീഷനും പരാതി നല്‍കി. ആന്തരിക ജീര്‍ണതകള്‍മൂലം കേരള സമൂഹത്തിനുമുന്നില്‍ തല ഉയര്‍ത്താനാകാത്ത വലതുപക്ഷ രാഷ്ട്രീയത്തെ രക്ഷിക്കാന്‍ തന്‍റെ പേരും ചിത്രവും വച്ച് അപമാനിക്കാന്‍ ശ്രമിച്ച സാമൂഹമാധ്യമ ഹാന്‍ഡിലുകള്‍ക്കും മാധ്യമങ്ങള്‍ക്കുമെതിരെ തെളിവുകള്‍ സഹിതമാണ് പരാതി നല്‍കിയതെന്ന് കെ.ജെ.ഷൈന്‍ ഫേസ്ബുക്കില്‍ കുറിച്ചു. രാഷ്ട്രീയ പ്രവര്‍ത്തക, ജനപ്രതിനിധി, അധ്യാപക സംഘടനാ നേതാവ് എന്നീ തലങ്ങളില്‍ പ്രവര്‍ത്തിച്ചു കൊണ്ടിരിക്കുന്ന തന്നെക്കുറിച്ചും തന്‍റെജീവിത പങ്കാളിയെക്കുറിച്ചും കഴിഞ്ഞ കുറച്ചു ദിവസങ്ങളായി സാമൂഹ്യമാധ്യമങ്ങളിലൂടെ വ്യാജപ്രചരണങ്ങളാണ് നടത്തിക്കൊണ്ടിരിക്കുന്നത്. രാഷ്ട്രീയമായും വ്യക്തിപരമായും തകര്‍ക്കുകയെന്ന ലക്ഷ്യത്തോടെയുള്ള നെറികെട്ട, ജീര്‍ണതയുടെ രാഷ്ട്രീയത്തെ നിയമപരമായും രാഷ്ട്രീയമായും നേരിടും. പൊതുപ്രവര്‍ത്തനം നടത്തുന്നത് സ്ത്രീകളുടെകൂടി അവകാശമാണെന്ന ബോധ്യം വരുന്നതരത്തില്‍ പൊതുസമൂഹവും ഭരണസംവിധാനവും ഇടപെടുമെന്ന വിശ്വാസം തനിക്കുണ്ടെന്നും കെ.ജെ.ഷൈന്‍ ഫേസ്ബുക്കില്‍ കുറിച്ചു. പിന്നിൽ കോണ്‍ഗ്രസെന്ന് സിപിഎം കൊച്ചി: കോണ്‍ഗ്രസിന്‍റെ വികൃതമായ മുഖത്തെ മൂടിവയ്ക്കാന്‍, സിപിഎമ്മിന്‍റെ ജനകീയ നേതാക്കന്മാരെ കരിവാരി തേയ്ക്കാനുള്ള ശ്രമമാണ് കോണ്‍ഗ്രസിലെ സോഷ്യല്‍ മീഡിയ സംഘം ചെയ്യുന്നതെന്ന് സിപിഎം ജില്ലാ സെക്രട്ടറി എസ്.സതീഷ്. കേള്‍ക്കുന്നവര്‍ക്ക് ശരിയെന്ന് തോന്നിപ്പിക്കും വിധം സമയവും സ്ഥലവും എല്ലാം പറഞ്ഞ് ഒരു വ്യാജ വീഡിയോ ഇവര്‍ ചെയ്യുന്നു. തുടര്‍ന്ന് പ്രചാരണം നടത്തുന്നു. ഇത്തരം ഹീനമായ പ്രവര്‍ത്തികളിലൂടെ ജനപ്രതിനിധികളെയും മാതൃകാ പ്രവര്‍ത്തനം നടത്തുന്ന വനിതാ നേതാക്കളെയും തകര്‍ക്കാമെന്നും കോണ്‍ഗ്രസിന്റെ ജീര്‍ണത മറച്ചുവയ്ക്കാന്‍ കഴിയുമെന്നും കരുതേണ്ട. ഇത്തരം പ്രവര്‍ത്തികളെ രാഷ്ട്രീയമായും നിയമപരമായും നേരിടും. ശരിയായി പൊതുപ്രവര്‍ത്തന രംഗത്ത് നില്‍ക്കുന്ന മുഴുവന്‍ വനിതാ പ്രവര്‍ത്തകരെയും സംരക്ഷിക്കുകയും പിന്തുണയ്ക്കുമെന്നും അദ്ദേഹം പറഞ്ഞു. രാഹുല്‍ മാങ്കൂട്ടത്തിലിന്‍റെ വിഷയം പുറത്തുവന്നതോടെകൂടി വലിയ രൂപത്തില്‍ കോണ്‍ഗ്രസിന്‍റെ ജീര്‍ണതയുടെ മുഖം വെളിവാക്കപ്പെട്ടു. ഇതിനെ പ്രതിരോധിക്കാന്‍ സോഷ്യല്‍ മീഡിയയിലൂടെ ഇരകളെ വ്യക്തിഹത്യ നടത്തിയും വ്യാജ പ്രചരണങ്ങള്‍ അഴിച്ചുവിട്ടും കോണ്‍ഗ്രസിന്‍റെ സോഷ്യല്‍ മീഡിയ വിഭാഗം നടത്തുന്ന പ്രചാരണങ്ങള്‍ കേരളം കണ്ടുകൊണ്ടിരിക്കുകയാണ്. കോണ്‍ഗ്രസ് വനിതാ നേതാക്കന്മാരെ പോലും തെറിവിളിക്കാനും ആക്ഷേപിക്കാനും ഇവര്‍ക്ക് മടിയില്ലെന്നും എസ്.സതീഷ് പറഞ്ഞു.

അഡ്വക്കേറ്റ്സ് ഫോറം ഭാരവാഹികൾ

മൂവാറ്റുപുഴ: ഓള്‍ കേരള നോട്ടറി അഡ്വക്കേറ്റ്സ് ഫോറം എറണാകുളം ജില്ല പ്രസിഡന്‍റായി ജോണി മെതിപ്പാറ (മൂവാറ്റുപുഴ), ജനറല്‍ സെക്രട്ടറിയായി ടി.കെ. കുഞ്ഞുമോന്‍ (ആലുവ) എന്നിവരെ തെരഞ്ഞെടുത്തു. മറ്റ് ഭാരവാഹികള്‍ ട്രഷറര്‍ - രാജു ജി. ഷേണോയ്, വൈസ് പ്രസിഡന്‍റുമാര്‍ - ലെജി എബ്രഹാം, അനീദ ബീഗം, സെക്രട്ടറി - ശാലിനി കൃഷ്ണകുമാര്‍. കമ്മിറ്റിയംഗങ്ങള്‍ - സി.കെ ജോര്‍ജ്, എം.എം അലിക്കുഞ്ഞ്, പി.എന്‍ സിന്ധു, ബിജു പി. തോമസ്, എ.ആര്‍ ബിജോയ്, ഓള്‍ കേരള നോട്ടറി അഡ്വക്കേറ്റ്സ് ഫോറത്തിന്‍റെ ജില്ലാ സമ്മേളനത്തിലാണ് തെരഞ്ഞെടുപ്പ് നടത്തിയത്. ജില്ലാ സമ്മേളനം മുന്‍ ആക്ടിംഗ് ചീഫ് ജസ്റ്റിസ് സി.കെ. അബ്ദുല്‍ റഹീം ഉദ്ഘാടനം ചെയ്തു. ഫോറം സംസ്ഥാന സെക്രട്ടറി പി.എ. ഇസ്മായില്‍ ഖാന്‍ അധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി അബ്ദുല്‍ ഖാദര്‍ കണ്ണേഴത്ത് സര്‍ട്ടിഫിക്കറ്റ് വിതരണം നടത്തി. സംസ്ഥാന ട്രഷറര്‍ റസാഖ് ക്ലാസ് നയിച്ചു. ചടങ്ങില്‍ സീനിയര്‍ നോട്ടറിമാരായ വീരാവുണ്ണി, ജോര്‍ജ്, ആയിഷ യൂസുഫ്, ലെജി എബ്രഹാം എന്നിവരെ ആദരിച്ചു. എറണാകുളം ജില്ലയിലെ വിവിധ കോര്‍ട്ട് സെന്‍ററുകളില്‍നിന്നുള്ള നോട്ടറി അഭിഭാഷകര്‍ സമ്മേളനത്തില്‍ പങ്കെടുത്തു.

ലയൺസ് ഇന്‍റർനാഷണൽ പീസ് പോസ്റ്റർ മത്സരം ജില്ലാതല ഉദ്ഘാടനം

കോതമംഗലം: ലയൺസ് ഇന്‍റർനാഷണൽ ഡിസ്ട്രിക്ട് 318 സിയുടെ ആഭിമുഖ്യത്തിൽ പീസ് പോസ്റ്റർ മത്സരം നടത്തി. ജില്ലാതല ഉദ്ഘാടനം കോതമംഗലം എംഎ ഇന്‍റർനാഷണൽ സ്കൂളിൽ നടന്നു. ഡിസ്ട്രിക്ട് ഗവർണർ കെ.ബി. ഷൈൻ കുമാർ ഉദ്ഘാടനം നിർവഹിച്ചു. പീസ് പോസ്റ്റർ ഡിസ്ട്രിക്ട് സെക്രട്ടറി ബോബി പോൾ അധ്യക്ഷത വഹിച്ചു. എംഎ ഇന്‍ററർനാഷണൽ സ്കൂൾ പ്രിൻസിപ്പൽ കെ.അനിത നായർ, ഡിസ്ട്രിക്ട് കാബിനറ്റ് സെക്രട്ടറി സജി ചമേലി ഡിസ്ട്രിക്ട് കാബിനറ്റ് ട്രഷറര്‍ വർഗീസ് ജോസഫ്, ചീഫ് പ്രോഗ്രാം കോ-ഓർഡിനേറ്റർ അഡ്വ. ജോസ് മംഗലി, റീജണൽ ചെയർമാൻ എൽദോസ് ഐസക്, സോൺ ചെയർമാൻ ഡിജിൽ സെബാസ്റ്റ്യൻ, കോതമംഗലം ഗ്രേറ്റർ ലയൺസ് ക്ലബ് പ്രസിഡന്‍റ് റെബി ജോർജ്, ക്ലബ് സെക്രട്ടറി കെ.എം.കോരച്ചൻ എന്നിവർ പ്രസംഗിച്ചു. ലയൺസ് ഇന്‍റർനാഷണൽ പ്രോഗ്രാമിന്‍റെ ഭാഗമാണ് പീസ് പോസ്റ്റർ മത്സരം. കലയിലൂടെയും സർഗാത്മകതയിലൂടെയും സമാധാനത്തെക്കുറിച്ചുള്ള തങ്ങളുടെ കാഴ്ചപ്പാട് പ്രകടിപ്പിക്കാൻ യുവ വിദ്യാർഥികളെ പ്രോത്സാഹിപ്പിക്കുക എന്നതാണ് ഇതിന്‍റെ ലക്ഷ്യം. ടുഗദർ ആസ് വൺ എന്ന പ്രമേയത്തെ അടിസ്ഥാനമാക്കി 11-13 പ്രായക്കാർക്കായി നടത്തുന്ന മത്സരത്തിലെ വിജയിക്ക് 5000 യുഎസ് ഡോളറും രണ്ടു കുടുംബാംഗങ്ങൾക്കൊപ്പം യുഎസിലേക്കുള്ള യാത്രയുമാണ് സമ്മാനം. 23 മെറിറ്റ് അവാർഡ് ജേതാക്കൾക്ക് 500 യുഎസ് ഡോളർ വീതം സമ്മാനമായി ലഭിക്കും.

ജപ്തി നടപടിക്കെതിരേ പ്രതിഷേധവുമായി മുന്‍ പഞ്ചായത്ത് പ്രസിഡന്‍റ്

മൂവാറ്റുപുഴ: സഹകരണ ബാങ്കിന്‍റെ ജപ്തി നടപടിക്കെതിരേ പ്രതിഷേധവുമായി മുന്‍ പഞ്ചായത്ത് പ്രസിഡന്‍റ്. ഏനാനല്ലൂര്‍ സഹകരണ ബാങ്കിന്‍റെ ജപ്തി നടപടിക്കെതിരേ ആയവന പഞ്ചായത്ത് മുൻ പ്രസിഡന്‍റ് പി.എസ് അജീഷാണ് പ്രതിഷേധമുയർത്തിയത്. ബാങ്ക് അധികൃതർ സഹകരണ വകുപ്പ് ഉദ്യോഗസ്ഥരുടെ നേതൃത്വത്തിൽ പോലീസ് സഹായത്തോടെ പുന്നമറ്റം സ്വദേശിയായ സലീമിന്‍റെ വീട്ടില്‍ ഇന്നലെ ജപ്തിക്കെത്തിയപ്പോഴാണ് മുൻ പ്രസിഡന്‍റ് പ്രതിഷേധവുമായെത്തിയത്. 2018ല്‍ പരസ്പര ജാമ്യത്തില്‍ സലീമും ഭാര്യയും 20,000 രൂപ വീതം ബാങ്കില്‍ നിന്ന് വായ്പ എടുത്തിരുന്നു. പല പ്രാവശ്യം നേരിട്ടും തപാൽ മുഖേനയും ആവശ്യപ്പെട്ടിട്ടും തിരിച്ചടവ് ഉണ്ടാകാത്ത സാഹചര്യത്തിലാണ് സഹകരണ വകുപ്പ് ഉദ്യോഗസ്ഥർ നിയമപ്രകാരം ജപ്തി നടത്താനെത്തിയത്. പണം അടയ്ക്കുന്നതിന് രണ്ട് ദിവസത്തെ സാവകാശം കൂടി വേണമെന്ന് വീട്ടുകാർ ആവശ്യപ്പെട്ടു. എന്നാൽ ഒരാളുടെയെങ്കിലും വായ്പ പൂര്‍ണമായും അടയ്ക്കണമെന്ന നിലപാടിലായിരുന്നു അധികൃതർ. വായ്പക്കാരുടെ കുടുംബാംഗങ്ങളുടെ വാർദ്ധക്യ സഹജമായ രോഗാവസ്ഥയും കുട്ടികളുടെ വിദ്യാഭ്യാസാവശ്യവുമാണ് വായ്പ തിരിച്ചടവിന് തടസമായതെന്ന് അജീഷ് പറഞ്ഞു. ഏതാനും ദിവസത്തെ സാവകാശം ചോദിച്ചപ്പോൾ പണമടച്ചില്ലെങ്കില്‍ ജപ്തി ചെയ്യും എന്ന അധികൃതരുടെ നിലപാടിനെയാണ് എതിർത്തതെന്നും അജീഷ് അറിയിച്ചു. തുടർന്ന് 38,000 രൂപ നല്‍കി ഒരാളുടെ ബാധ്യത അവസാനിപ്പിച്ചതോടെയാണ് അധികൃതര്‍ ജപ്തി നടപടിയില്‍നിന്ന് പിന്‍മാറിയത്. ഇതര വായ്പ ഏതാനും ദിവസങ്ങൾക്കകം അടച്ചു തീർക്കണമെന്ന നിർദേശവും അധികൃതര്‍ നല്‍കി. ഏഴു വർഷമായ വായ്പക്ക് സാധാരണ പലിശ മുതലിലും അധികരിച്ച സാഹചര്യത്തിൽ നിയമപരമായ നടപടിക്രമങ്ങൾ പൂര്‍ത്തിയാക്കിയാണ് ജപ്തിക്കെത്തിയതെന്ന് അധികൃതർ അറിയിച്ചു.

ആന്‍റി റാഗിംഗ് ബോധവത്കരണ സെമിനാർ

ഇലഞ്ഞി: വിസാറ്റ് ഗ്രൂപ്പ്‌ ഓഫ് ഇൻസ്റ്റിറ്റ്യൂഷനിൽ ആന്‍റി റാഗിംഗ് ബോധവത്കരണ സെമിനാർ സംഘടിപ്പിച്ചു. ഇന്‍റേണൽ ക്വാളിറ്റി അഷുറൻസ് സെല്ലിന്‍റെ ആഭിമുഖ്യത്തിൽ നടന്ന സെമിനാർ കൂത്താട്ടുകുളം പോലീസ് സബ് ഇൻസ്‌പെക്ടർ പി.വി. ശാന്തകുമാർ ഉദ്ഘാടനം ചെയ്തു. വിസാറ്റ് ഗ്രൂപ്പ്‌ ഓഫ് ഇൻസ്ടിട്യൂഷൻ ഡയറക്ടർ ഡോ. കെ. ദിലീപ്, വിസാറ്റ് എൻജി‍നിയറിംഗ് കോളജ് പ്രിൻസിപ്പൽ ഡോ. കെ.ജെ. അനൂപ്, വിസാറ്റ് ആർട്സ് ആൻഡ് സയൻസ് കോളജ് വൈസ് പ്രിൻസിപ്പൽ ഡോ. ലാലി ആന്‍റണി, പബ്ലിക് റിലേഷൻ ഓഫീസർ ഷാജി ആറ്റുപുറം, ഐക്യുഎസി കോർഡിനേറ്റർ അസി. പ്രഫ. ദിവ്യ നായർ, ആന്‍റി റാഗിംഗ് സെൽ കോർഡിനേറ്റർമാരായ അസി. പ്രഫ. ജി. അഞ്ജന, അസി. പ്രഫ. നീതു പൗലോസ്, ആന്‍റി റാഗിംഗ് സെൽ സ്റ്റുഡന്‍റ്സ് കോർഡിനേറ്റർമാരായ ആദിത്യ നിരഞ്ജൻ വിനോദ്, ഭരത് രാജ്‌, ആശ സനൽകുമാർ തുടങ്ങിയവർ സംസാരിച്ചു. തുടർന്ന് സബ് ഇൻസ്‌പെക്ടർ ശാന്തകുമാറിന്‍റെ നേതൃത്വത്തിൽ ആന്‍റി റാഗിംഗ് ബോധവൽക്കരണ ക്ലാസ് നടന്നു.

അഭിമാനത്തിന്‍റെ "പച്ചത്തുരുത്തിൽ' ന്യൂമാൻ കോളജ്

തൊടുപുഴ: കേരള സർക്കാരിന്‍റെ പച്ചത്തുരുത്ത് പുരസ്കാരം തൊടുപുഴ ന്യൂമാൻ കോളജിന്. ഇടുക്കി ജില്ലയിലെ ഏറ്റവും മികച്ച പച്ചത്തുരുത്തായി സർക്കാർ തെരഞ്ഞെടുത്ത കോളജിനുള്ള പുരസ്കാരം ന്യൂമാൻ കോളജ്, പത്തനംതിട്ട ജില്ലാ കളക്ടർ എസ്. ഹരികിഷോറിൽനിന്ന് ഏറ്റുവാങ്ങി. 1964ൽ സഹ്യന്‍റെ മടിത്തട്ടിൽ, തൊടുപുഴയാറിന്‍റെ സമീപത്ത് സ്ഥാപിതമായ കോളജാണ് കലാലയ വിഭാഗത്തിൽ മികച്ച പച്ചത്തുരുത്തായി അംഗീകരിക്കപ്പെട്ടത്. 2021ൽ ഹരിത കേരളം മിഷന്‍റെ ഇടപെടലിലൂടെ ഏകദേശം 10 സെന്‍റ് വരണ്ട ഭൂമിയിൽ തുടക്കമിട്ട പച്ചത്തുരുത്ത് ഇന്ന് ഒരേക്കറിൽ, അതിജീവനത്തിന്‍റെ മാതൃകയും ജൈവവൈവിധ്യ സംരക്ഷണത്തിന്‍റെ അടയാളവുമായി മാറി. ന്യൂമാനിലെ ബൊട്ടാണിക്കൽ ഗാർഡനിൽ വ്യത്യസ്ത വിഭാഗത്തിലുൾപ്പെട്ട വിവിധയിനം സസ്യങ്ങളെ നട്ട് പരിപാലിക്കുമ്പോൾ തുളസി, അശ്വഗന്ധ, ശംഖുപുഷ്പം തുടങ്ങിയ ആയുർവേദ സസ്യങ്ങളും ഇവിടെയുണ്ട്. സുഗന്ധവ്യഞ്ജനങ്ങളെ "സ്പൈസ് ഗാർഡൻ' എന്ന വിഭാഗത്തിൽ പരിപാലിക്കുന്നു. ഏലം, കുരുമുളക്, കറുവപ്പട്ട, ഇഞ്ചി, ഗ്രാമ്പൂ തുടങ്ങിയ സസ്യങ്ങൾ ഇവിടെയുണ്ട്. ആന്തൂറിയം, ജെർബറ, റോസ്, ഗ്ലാഡിയോളസ് തുടങ്ങിയ പുഷ്പങ്ങൾ കാന്പസിനെ കൂടുതൽ സുന്ദരിയാക്കുന്നു. ജ്യോതിശാസ്ത്രത്തിന്‍റെ അടയാളങ്ങളായ 27 ഇനം സസ്യങ്ങളെ "സ്റ്റാർ ഫോറസ്റ്റ്' എന്ന വിഭാഗത്തിൽ ഉൾപ്പെടുത്തി സംരക്ഷിച്ചിട്ടുണ്ട്. "ഫ്ലോറ ഓഫ് ന്യൂമാൻ’ എന്ന ശാസ്ത്രഗ്രന്ഥവും പുറത്തിറക്കിയിട്ടുണ്ട്. ഹരിതകേരളം മിഷന്‍റെ നേതൃത്വത്തിൽ ആരംഭിച്ച "നെറ്റ് സീറോ കാർബൺ കേരളം ജനങ്ങളിലൂടെ' എന്ന പദ്ധതിയിൽ ന്യൂമാൻ കോളജിനെയും ഉൾപ്പെടുത്തിയിട്ടുണ്ട്. അഞ്ഞൂറിലധികം വൃക്ഷങ്ങൾ കലാലയത്തിന്‍റെ വിവിധ മേഖലകളിൽ പരിപാലിക്കുന്നതിലൂടെ കാർബൺ സെക്കസ്ട്രേഷനിൽ കോളജ് പുതിയ മാതൃക സൃഷ്ടിക്കുകയാണ്. കോളജ് രക്ഷധികാരിയായ മാർ ജോർജ് മഠത്തിക്കണ്ടത്തിൽ, മാനേജർ മോൺ. ഡോ.പയസ് മലേകണ്ടത്തിൽ, കോർപറേറ്റ് എഡ്യൂക്കേഷൻ സെക്രട്ടറി റവ.ഡോ.പോൾ പാറത്താഴം എന്നിവരുടെ മേൽനോട്ടത്തിൽ ബയോഡൈവേഴ്സിറ്റി ക്ലബ് കോർഡിനേറ്റർ ഡോ. ജയ്ബി സിറിയക്, കോളജ് ബർസാർ ഫാ. ബെൻസൺ ആന്‍റണി, വൈസ് പ്രിൻസിപ്പൽ ഡോ. സാജു എബ്രഹാം, അധ്യാപകർ, അനധ്യാപകർ,വിദ്യാർഥികൾ തുടങ്ങിയവരുടെ ഒത്തൊരുമയും കഠിനാധ്വാനവുമാണ് നേട്ടത്തിനു പിന്നിലെന്ന് പ്രിൻസിപ്പൽ ഡോ.ജെന്നി കെ. അലക്സ് അറിയിച്ചു.

എസ്പിസി പാസിംഗ് ഔട്ട് പരേഡ്

കോലഞ്ചേരി: വെണ്ണിക്കുളം സെന്‍റ് ജോർജസ് ഹയർ സെക്കൻഡറി സ്കൂളിലെ സൂപ്പർ സീനിയർ സ്റ്റുഡന്‍റ് പോലീസ് കേഡറ്റുകളുടെ (എസ്പിസി) പാസിംഗ് ഔട്ട് പരേഡ് നടത്തി. തിരുവാണിയൂർ പഞ്ചായത്ത് പ്രസിഡന്‍റ് സി.ആർ. പ്രകാശ് അഭിവാദ്യം സ്വീകരിച്ചു. രണ്ടുവർഷത്തെ ചിട്ടയായ പരിശീലനം പൂർത്തിയാക്കിയ 41 കേഡറ്റുകളാണ് രണ്ട് പ്ലട്ടൂണുകൾ ആയി തിരിഞ്ഞ് പാസിംഗ് പരേഡിന് മൈതാനത്ത് അണിനിരന്നത്. എറണാകുളം റൂറൽ എഡിഎൻഒ പി.എസ്. മുഹമ്മദ് അഷറഫ് കേഡറ്റുകൾക്ക് സത്യപ്രതിജ്ഞ ചൊല്ലിക്കൊടുത്തു. സ്കൂൾ മാനേജർ ഐ.കെ. ജോർജ്, സ്കൂൾ ബോർഡ് ചെയർമാനും കരിങ്ങാച്ചിറ കത്തീഡ്രൽ വികാരിയുമായ ഫാ. റ്റിജോ മർക്കോസ്, കരിങ്ങാച്ചിറ കത്തീഡ്രൽ ട്രസ്റ്റി എം.പി. പോൾ, ചോറ്റാനിക്കര പോലീസ് സബ് ഇൻസ്പെക്ടർ പി.ഇ. ഷാജി, വാർഡ് മെമ്പർമാരായ സജി പീറ്റർ, എം.എൻ. മനു, ഹെഡ്മാസ്റ്റർ ബെൻസൺ വർഗീസ്, പ്രിൻസിപ്പാൾ ഗ്ലെന്നിസ് രാജൻ, പിടിഎ പ്രസിഡന്‍റ് അജി കൊട്ടാരത്തിൽ, മാതൃസംഘം ചെയർപേഴ്സണും ബ്ലോക്ക് പഞ്ചായത്ത് മെമ്പറുമായ ഓമന നന്ദകുമാർ, സന്തോഷ് ടി.കെ. എന്നിവർ പരേഡിന്‍റെ ഫ്രണ്ട് സല്യൂട്ട് അഭിവാദ്യം സ്വീകരിച്ചു. ലക്ഷ്മി എസ്. വാര്യർ പരേഡ് കമാൻഡറായും ഏയ്ഞ്ചൽ ബെന്നി സെക്കൻഡ് ഇന്‍ കമാൻഡറായും അർജുൻ ബിജു, ആർ. ഗൗരി ലക്ഷ്മി എന്നിവർ പ്ലട്ടൂൺ കമാൻഡർമാരായും പാസിംഗ് ഔട്ട് പരേഡ് മുന്നിൽ നിന്ന് നയിച്ചു. സുബ്രത മൈത്തി ബെസ്റ്റ് കേഡറ്റായി തെരഞ്ഞെടുക്കപ്പെട്ടു.

വാരപ്പെട്ടി ഐസൊലേഷൻ വാർഡ് ഉടൻ പ്രവർത്തനമാരംഭിക്കും

കോതമംഗലം: നിയോജക മണ്ഡലം തല ഐസൊലേഷൻ വാർഡ് വാരപ്പെട്ടിയിൽ ഉടൻ പ്രവർത്തനം ആരംഭിക്കുമെന്ന് മന്ത്രി വീണാ ജോർജ് നിയമസഭയിൽ അറിയിച്ചു. ഐസൊലേഷൻ സെന്‍ററിന്‍റെ നിർമാണം വേഗത്തിൽ പൂർത്തീകരിച്ച് സെന്‍ററിന്‍റെ പ്രവർത്തനങ്ങൾ ആരംഭിക്കണമെന്നുള്ള ആന്‍റണി ജോൺ എംഎൽഎയുടെ ചോദ്യത്തിന് മറുപടിയായിട്ടാണ് നിയമസഭയിൽ മന്ത്രി ഇക്കാര്യം സഭയിൽ വ്യക്തമാക്കിയത്. കോതമംഗലം മണ്ഡലത്തിൽ വാരപ്പെട്ടി പഞ്ചായത്തിലെ ഐസൊലേഷൻ സെന്‍ററിന്‍റെ നിർമാണം നിലവിൽ 95 ശതമാനം പൂർത്തീകരിച്ചിട്ടുണ്ട്.10 കിടക്കകളുള്ള ഐസൊലേഷൻ വാർഡിനു വേണ്ട മെഡിക്കൽ, ഗ്യാസ് സൗകര്യങ്ങൾ ഉൾപ്പെടെ എല്ലാവിധ ഉപകരണങ്ങളും ഉൾപ്പെടുന്ന 2400 സ്വയർ ഫീറ്റ് വിസ്തീർണമുള്ള പ്രീ എൻജിനിയറിംഗ് സ്ട്രക്‌ചറുകളും ഉപയോഗിച്ചുള്ള നിർമാണമാണ് നടന്നുവരുന്നത്. 10 ഐസിയു ബെഡ്, ഡോക്ടർ റൂം -ഒന്ന്, നഴ്സിംഗ് സ്റ്റേഷൻ, പ്രൊസീഡിയർ റൂം, ഏഴ് ടോയ്‌ലറ്റ്, മെഡിക്കൽ ഗ്യാസ് പ്ലാന്‍റ് എന്നീ സൗകര്യങ്ങളാണ് ഐസൊലേഷൻ വാർഡിൽ ഒരുക്കിയിരിക്കുന്നത്. എംഎൽഎ ഫണ്ടും, കിഫ്ബി ഫണ്ടും, തുല്യമായി വിനിയോഗിച്ച് 1,75,96,748 രൂപയാണ് ഐസോലേഷൻ വാർഡ് നിർമാണത്തിനായി അനുവദിച്ചിരിക്കുന്നത്. ഇലക്ട്രിക് കണക്ഷൻ ലഭിക്കുന്ന മുറയ്ക്ക് പ്രവർത്തനം ആരംഭിക്കുമെന്നും അറിയിച്ചു.

കോട്ടപ്പടിയിൽ സൗജന്യ മെഗാ മെഡിക്കൽ ക്യാമ്പ് നാളെ

കോതമംഗലം: കോട്ടപ്പടി മാർ ഏലിയാസ് കോളജ് സോഷ്യൽ വർക്ക് ഡിപ്പാർട്ട്മെന്‍റിന്‍റെ നേതൃത്വത്തിൽ കോതമംഗലം ഐഎംഎയുമായി സഹകരിച്ച് 20-ന് രാവിലെ 10 മുതൽ ഉച്ചയ്ക്ക് രണ്ട് വരെ സൗജന്യ മെഗാ മെഡിക്കൽ ക്യാമ്പ് നടത്തുന്നു. മാർ ഏലിയാസ് കോളജ് ഓഡിറ്റോറിയത്തിൽ നടത്തുന്ന ക്യാമ്പിൽ ജനറൽ മെഡിസിൻ, ഹൃദയ, നേത്ര, ദന്ത, ശ്രവണ, രക്ത പരിശോധനകളും മരുന്നുകളും ലഭ്യമാകും. ദി ഐ ഫൗണ്ടേഷൻ സൂപ്പർ സ്പെഷാലിറ്റി ഹോസ്പിറ്റൽ, ഇന്ദിരാഗാന്ധി ഡെന്‍റൽ കോളജ്, പീസ് വാലി നെല്ലിക്കുഴി, ആസ്റ്റർ മെഡിസിറ്റി തുടങ്ങിയ സ്ഥാപനങ്ങൾ ക്യാമ്പിൽ സഹകരിക്കുന്നുണ്ട്. ആദ്യം രജിസ്റ്റർ ചെയ്യുന്ന 100 വനിതാ ഗുണഭോക്താക്കൾക്ക് സൗജന്യ പോഷകാഹാര കിറ്റ് നൽകും. വിവരങ്ങൾക്ക് 8129414122

നിരോധിത പുകയില ഉത്പന്നങ്ങളുമായി മൂന്നുപേർ പിടിയിൽ

വൈപ്പിൻ: നിരോധിച്ച 40 പാക്കറ്റ് പുകയില ഉത്പന്നങ്ങളുമായി മൂന്നു പേരെ മുളവുകാട് പോലീസ് കസ്റ്റഡിയിലെടുത്തു. പള്ളുരുത്തി സ്വദേശി അജുബാൻ (31), കണ്ണൂർ മുട്ടം സ്വദേശികളായ അഷ്കർ (25), മുഹമ്മദ് ഇമ്രാൻ (19) എന്നിവരാണ് പിടിയിലായത്. പോലീസ് പെട്രോളിംഗിനിടെ കാളമുക്ക് ഗോശ്രീ പാലത്തിന് സമീപം പെട്ടിക്കടയിൽ നടത്തിയ പരിശോധനയിൽ 13 പാക്കറ്റ് ഹാൻസും 27 പാക്കറ്റ് കൂൾ ലിപ്പുമാണ് പോലീസ് പിടിച്ചെടുത്തത്. കേസെടുത്ത ശേഷം മൂവരെയും ജാമ്യത്തിൽ വിട്ടയച്ചു.

ആലുവ സെന്‍റ് മേരീസ് സ്കൂളിന് മുന്നിൽ അനധികൃത പാർക്കിംഗെന്ന് പരാതി

ആലുവ: സെന്‍റ് മേരീസ് ഹൈസ്‌കൂള്‍ പ്രവേശന കവാടത്തില്‍ അനധികൃത വാഹന പാര്‍ക്കിംഗ് കാരണം മറ്റു വാഹനങ്ങള്‍ക്ക് കടന്നു പോകാനാകുന്നില്ലെന്ന് പരാതി. ഇന്നലെ അധ്യാപക യോഗ്യത പരീക്ഷയായ കെ ടെറ്റ് പരീക്ഷയുടെ ചോദ്യപ്പേപ്പര്‍ വഹിച്ചു വന്ന മിനി ലോറി വിദ്യാലയത്തിലേക്ക് കടക്കാനാവാതെ ഏറെ വിഷമിച്ചു. തുടര്‍ന്ന് ഉടമകളെ കണ്ടെത്തി വാഹനങ്ങള്‍ മാറ്റിയശേഷമാണ് ലോറി സ്‌കൂള്‍ കോന്പൗണ്ടിലേക്ക് കയറ്റാനായത്. പോലീസിനോട് നിരന്തരം പരാതി പറഞ്ഞിട്ടും യാതൊരു നടപടിയും ഉണ്ടാകുന്നില്ലെന്ന് പ്രധാന അധ്യാപകന്‍ ജെയ്‌മോന്‍ പറഞ്ഞു. നോ പാര്‍ക്കിംഗ് ബോര്‍ഡ് വച്ചാല്‍ തൊട്ടടുത്ത ദിവസം കാണാതാകുകയാണ് പതിവ്. കഴിഞ്ഞ ദിവസം കായിക മേള നടന്നപ്പോഴും വാഹനങ്ങള്‍ക്ക് കടന്നു പോകാന്‍ ബുദ്ധിമുട്ടിയിരുന്നു. പിഎസ്‌സി പരീക്ഷയടക്കം വിവിധ പരീക്ഷകളുടെ സ്ഥിരകേന്ദ്രം കൂടിയാണ് സെന്‍റ് മേരീസ് ഹൈസ്‌കൂള്‍.

വൈപ്പിൻ ബ്ലോക്കിൽ സിപിഎമ്മിന്‍റെ വികസനജാഥ : ജനങ്ങളെ തെറ്റിദ്ധരിപ്പിക്കാനെന്ന് പ്രതിപക്ഷം

വൈപ്പിൻ : വൈപ്പിൻ ബ്ലോക്ക് പഞ്ചായത്തിന്‍റെ അഞ്ചുവർഷത്തെ ഭരണ നേട്ടങ്ങൾ ജനങ്ങളിൽ എത്തിക്കാൻ സിപിഎം വൈപ്പിൻ ബ്ലോക്കിൽ സുസ്ഥിര വികസന ജാഥ നടത്തി. രണ്ടുദിവസം നീണ്ടു നിന്ന ജാഥ പെരുമ്പിള്ളിയിൽ സിപിഎം ഏരിയ സെക്രട്ടറി എ.പി. പ്രിനിൽ ഉദ്ഘാടനം ചെയ്തു. പി. ഡി. ലൈജു അധ്യക്ഷനായി. അതേസമയം വികസന നേട്ടങ്ങൾ, എന്നുപറഞ്ഞ് സിപിഎം നടത്തുന്ന വികസന ജാഥ ജനങ്ങളെ തെറ്റിദ്ധരിപ്പിക്കാനെന്ന് ബ്ലോക്ക്പഞ്ചായത്ത് പ്രതിപക്ഷമായ കോൺഗ്രസ് ആരോപിച്ചു. ബ്ലോക്കിലെ അഞ്ചുവർഷത്തെ ഭരണം വെറും പ്രഖ്യാപനങ്ങളിൽ മാത്രമായി ഒതുങ്ങിയെന്നാണ് പ്രതിപക്ഷ നേതാവ് അഗസിൻ പറയുന്നത്. വികസനം ലക്ഷ്യമാക്കി ബ്ലോക്ക് പഞ്ചായത്ത് നടത്തിയ വികസന ശില്പശാലയിൽ ഉയർന്നുവന്ന ഒരു പദ്ധതി പോലും ഭരണസമിതിക്ക് നടപ്പിലാക്കാൻ കഴിഞ്ഞില്ലെന്നത് ഏറ്റവും വലിയ ഉദാഹരണമാണെന്നും ഇദ്ദേഹം ചൂണ്ടിക്കാട്ടി. മാത്രമല്ല വിജിലൻസ് കേസും, ഞാറക്കൽ ആശുപത്രിയിലെ കെട്ടിട നമ്പർ ലഭ്യമാക്കാൻ തീരുമാനമില്ലാതെ സ്വകാര്യ ഏജൻസി യെ ഏൽപ്പിച്ച അഴിമതി ആരോപണവും ഭരണത്തിന്‍റെ നിറം കെടുത്തിയെന്ന് പ്രതിപക്ഷം ചൂണ്ടിക്കാട്ടി.

അങ്കമാലിയിൽ ത്രിദിന ദേശീയ നൃത്തോത്സവം "ത്രിഭംഗി' ഇന്നു മുതൽ

അങ്കമാലി: കേരള സംഗീത നാടക അക്കാദമി സംഘടിപ്പിക്കുന്ന "ത്രിഭംഗി മധ്യമേഖല ദേശീയ നൃത്തോത്സവം" ഇന്ന് മുതൽ നടക്കും. അങ്കമാലി എ.പി. കുര്യന്‍ സ്മാരക സിഎസ്എ ഓഡിറ്റോറിയത്തിലാണ് ഈ ത്രിദിന നൃത്തോത്സവം അരങ്ങേറുന്നത്. പ്രശസ്ത നര്‍ത്തകിയും നൃത്താധ്യാപികയുമായ ചിത്ര സുകുമാരനാണ് ഫെസ്റ്റിവല്‍ ഡയറക്ടര്‍ ഇന്ന് വൈകീട്ട് അഞ്ചിന് അക്കാദമി ചെയര്‍പേഴ്‌സണ്‍ മട്ടന്നൂര്‍ ശങ്കരന്‍കുട്ടി നൃത്തോത്സവം ഉദ്ഘാടനം ചെയ്യും. അക്കാദമി സെക്രട്ടറി കരിവെള്ളൂര്‍ മുരളി ആമുഖഭാഷണം നടത്തും. കലാമണ്ഡലം ക്ഷേമാവതി വിശിഷ്ടാതിഥിയായി പങ്കെടുക്കും. സ്വാഗതസംഘം ചെയര്‍പേഴ്‌സണ്‍ അഡ്വ. കെ.കെ. ഷിബു അധ്യക്ഷത വഹിക്കും. ബെന്നി ബെഹനാന്‍ എംപി, റോജി എം.ജോണ്‍ എംഎല്‍എ എന്നിവർ മുഖ്യാതിഥികളായി പങ്കെടുക്കും. മധ്യമേഖല "ത്രിഭംഗി" ദേശീയ നൃത്തോത്സവത്തെ വ്യവസായ മന്ത്രി പി. രാജീവ് അഭിസംബോധനചെയ്യും. വാർത്താസമ്മേളനത്തിൽ സ്വാഗതസംഘം ചെയർമാൻ അഡ്വ. കെ.കെ. ഷിബു, ജനറൽ കൺവീനർ ടോണി പറമ്പി, സിഎസ്എ വൈസ് പ്രസിഡന്‍റ് എം.പി. രാജൻ, ട്രഷറർ കെ.എൻ. വിഷ്ണു മാസ്റ്റർ, പ്രോഗ്രാം കമ്മിറ്റി ചെയർപേഴ്സൺ മായറാണി, കൺവീനർ പ്രിയ കിഷോർ എന്നിവർ പങ്കെടുത്തു.

എംജി യൂണിവേഴ്സിറ്റി ആർച്ചറി ചാമ്പ്യൻഷിപ്പ്: യുസി, മഹാരാജാസ് ജേതാക്കൾ

ആലുവ: യുസി കോളജിൽ നടന്ന മഹാത്മാഗാന്ധി സർവകലാശാലാ ഇന്‍റർസോൺ ആർച്ചറി ചാമ്പ്യൻഷിപ്പിൽ പുരുഷ വിഭാഗത്തിൽ ആലുവ യുസി കോളജും വനിതാ വിഭാഗത്തിൽ എറണാകുളം മഹാരാജാസ് കോളജും ജേതാക്കളായി. പുരുഷ വിഭാഗത്തിൽ നെടുങ്കണ്ടം എംഇഎസ് കോളജും എറണാകുളം മഹാരാജാസ് കോളജും യഥാക്രമം രണ്ടും മൂന്നും സ്ഥാനങ്ങൾ നേടി. വനിതാ വിഭാഗത്തിൽ എംഇഎസ് കോളജ് നെടുങ്കണ്ടം, ആലുവ യുസി കോളജ് എന്നിവർ രണ്ടും മൂന്നും സ്ഥാനങ്ങൾ കരസ്ഥമാക്കി. ഒക്ടോബറിൽ പഞ്ചാബിലെ ഗുരുകാശി സർവകലാശാലയിൽ നടക്കുന്ന അഖിലേന്ത്യാ അന്തർ സർവകലാശാലാ ചാമ്പ്യൻഷിപ്പിൽ വിജയികൾ പങ്കെടുക്കും.

യുവാവിനെ കാപ്പ ചുമത്തി നാടുകടത്തി

കൊച്ചി: നിരവധി കേസുകളിലെ പ്രതിയായ യുവാവിനെ കാപ്പ നിയമപ്രകാരം നാടുകടത്തി. എറണാകുളം കണയന്നൂര്‍ കസ്തൂര്‍ബാ നഗറില്‍ വലിയന്തറ മെജോ ജോസി(26)നെയാണ് നാടുകടത്തിയത്. കൊച്ചി സിറ്റി പോലീസ് കമ്മീഷണര്‍ പുട്ട വിമലാദിത്യയുടെ ഉത്തരവു പ്രകാരം ഒരു വര്‍ഷത്തേക്ക് കൊച്ചി സിറ്റി പരിധിയില്‍ പ്രവേശിക്കുന്നത് വിലക്കികൊണ്ടാണ് ഉത്തരവ്. ഉത്തരവ് ലംഘിച്ചാല്‍ മൂന്നുവര്‍ഷം വരെ നീളുന്ന തടവുശിക്ഷ ലഭിക്കും. ഇയാള്‍ക്കെതിരെ എറണാകുളം ടൗണ്‍ സൗത്ത് പോലീസ് സ്‌റ്റേഷനില്‍ നരഹത്യാശ്രമം, കഠിന ദേഹോപദ്രവം,അടിപിടി തുടങ്ങിയ വകുപ്പുകളിൽ ആറോളം കേസുകള്‍ നിലവിലുണ്ട്.

അംബേദ്കർ ഗ്രാമം പദ്ധതിക്ക് അനുമതിയായി: പി. രാജീവ്

ആലുവ: കടുങ്ങല്ലൂര്‍ ഗ്രാമപഞ്ചായത്തിലെ കണിയാംകുന്ന് പുതുവല്‍പറമ്പ് നഗറില്‍ അംബേദ്കര്‍ ഗ്രാമം പദ്ധതിയും കളമശേരി എച്ച്എംടി നഗറില്‍ അംബേദ്കര്‍ സെറ്റിൽമെന്‍റ് പദ്ധതിയും നടപ്പാക്കുന്നതിന് സര്‍ക്കാര്‍ അനുമതി ലഭിച്ചതായി മന്ത്രി പി. രാജീവ് അറിയിച്ചു. അടിസ്ഥാന സൗകര്യങ്ങള്‍ വികസിപ്പിക്കുന്നതിന് ഒരു കോടി രൂപയുടെ വീതം വികസന പ്രവര്‍ത്തനങ്ങളാണ് നടക്കുക. റോഡുകള്‍, ഫുട്പാത്തുകള്‍, ആശയവിനിമയ സൗകര്യങ്ങള്‍, കുടിവെള്ള സൗകര്യങ്ങള്‍, ഡ്രെയിനേജ് സൗകര്യങ്ങള്‍, വൈദ്യുതീകരണം, തെരുവ് വിളക്കുകള്‍, സാനിറ്റേഷന്‍, ഭവന പുനരുദ്ധാരണം, മാലിന്യ നിര്‍മാര്‍ജനം, പൊതു സൗകര്യങ്ങള്‍ മെച്ചപ്പെടുത്തല്‍, സംരക്ഷണ ഭിത്തി നിര്‍മാണം, ഇറിഗേഷന്‍, വരുമാനദായകപദ്ധതികള്‍, ഇന്‍റര്‍നെറ്റ് കണക്ഷന്‍ ലഭ്യമാക്കല്‍ തുടങ്ങി വ്യത്യസ്ത വികസന പ്രവര്‍ത്തനങ്ങള്‍ ഇവിടെ ഏറ്റെടുക്കും.

ദേശീയ ആരോഗ്യ മാധ്യമ ഉച്ചകോടി 20 മുതല്‍ കൊച്ചിയില്‍

കൊച്ചി: എറണാകുളം പ്രസ്‌ ക്ലബ് ആസ്റ്റര്‍ മെഡ്‌സിറ്റി, ഐഎംഎ കൊച്ചി എന്നിവരുമായി സഹകരിച്ച് സംഘടിപ്പിക്കുന്ന നാഷണല്‍ ഹെല്‍ത്ത് ജേര്‍ണലിസം സമ്മിറ്റ് 20, 21 തീയതികളില്‍ കൊച്ചിയില്‍ നടക്കും. 20ന് രാവിലെ 10.30ന് ജസ്റ്റീസ് ദേവന്‍ രാമചന്ദ്രന്‍ ഉദ്ഘാടനം ചെയ്യും. കലൂര്‍ ഐഎംഎ ഹൗസില്‍ നടക്കുന്ന പരിപാടിയിൽ രാജ്യത്തിന്‍റെ വിവിധ ഭാഗങ്ങളില്‍ നിന്നെത്തുന്ന മുപ്പതിലേറെ മാധ്യമപ്രവര്‍ത്തകര്‍ പങ്കെടുക്കും. എറണാകുളം പ്രസ്‌ ക്ലബ് പ്രസിഡന്റ് ആര്‍. ഗോപകുമാര്‍ അധ്യക്ഷത വഹിക്കും. ആസ്റ്റര്‍ മെഡ്‌സിറ്റി സിഇഒ ഡോ. നളന്ദ ജയദേവ് ആമുഖപ്രസംഗം നടക്കും. എംപിമാരായ ബെന്നി ബഹനാന്‍, ഹൈബി ഈഡന്‍, ടി.ജെ. വിനോദ് എംഎല്‍എ എന്നിവര്‍ പങ്കെടുക്കും. വിവിധ സെഷനുകളില്‍ പ്രിസ്ക്രൈബിംഗ് ദി റൈറ്റ് ഡോസേജ്, സെക്കന്‍ഡ് വിക്ടിം, നാവിഗേറ്റിംഗ് ഗ്രേ സോണ്‍സ്, ഹീല്‍ ഇന്‍ ഇന്ത്യ, ഇന്റര്‍സെക്ഷന്‍ ഓഫ് എഐ, ലേര്‍ണിംഗ് ഫ്രം കോവിഡ് തുടങ്ങിയ വിഷയങ്ങള്‍ ചര്‍ച്ച ചെയ്യും. വൈകുന്നേരം 4.30ന് നടക്കുന്ന ഫയര്‍ സൈഡ് ചാറ്റില്‍ പത്മഭൂഷണ്‍ ജേതാവ് ഡോ. ജോസ് ചാക്കോ പെരിയപ്പുറം ചികിത്സാ രംഗത്തെ അനുഭവങ്ങള്‍ പങ്കുവയ്ക്കും. 21ന് ഉച്ചയ്ക്ക് 2.30ന് നടക്കുന്ന സമാപന സമ്മേളനം പ്രതിപക്ഷ നേതാവ് വി.ഡി. സതീശന്‍ ഉദ്ഘാടനം ചെയ്യും. കൊച്ചി മേയര്‍ എം. അനില്‍കുമാര്‍ മുഖ്യാതിഥിയാകും. ആസ്റ്റര്‍ മെഡ്‌സിറ്റി ചീഫ് ഓപ്പറേറ്റിംഗ് ഓഫീസര്‍ ഡോ. ഷുഹൈബ് ഖാദര്‍, ഐഎംഎ കൊച്ചിന്‍ സെക്രട്ടറി ഡോ. സച്ചിന്‍ സുരേഷ് തുടങ്ങിയവര്‍ പത്രസമ്മേളനത്തില്‍ പങ്കെടുത്തു.

ലയൺസ് ഇന്‍റർനാഷണൽ പീസ് പോസ്റ്റർ മത്സരം ജില്ലാതല ഉദ്ഘാടനം

കോതമംഗലം: ലയൺസ് ഇന്‍റർനാഷണൽ ഡിസ്ട്രിക്ട് 318 സിയുടെ ആഭിമുഖ്യത്തിൽ പീസ് പോസ്റ്റർ മത്സരം നടത്തി. ജില്ലാതല ഉദ്ഘാടനം കോതമംഗലം എംഎ ഇന്‍റർനാഷണൽ സ്കൂളിൽ നടന്നു. ഡിസ്ട്രിക്ട് ഗവർണർ കെ.ബി. ഷൈൻ കുമാർ ഉദ്ഘാടനം നിർവഹിച്ചു. പീസ് പോസ്റ്റർ ഡിസ്ട്രിക്ട് സെക്രട്ടറി ബോബി പോൾ അധ്യക്ഷത വഹിച്ചു. എംഎ ഇന്‍ററർനാഷണൽ സ്കൂൾ പ്രിൻസിപ്പൽ കെ.അനിത നായർ, ഡിസ്ട്രിക്ട് കാബിനറ്റ് സെക്രട്ടറി സജി ചമേലി ഡിസ്ട്രിക്ട് കാബിനറ്റ് ട്രഷറര്‍ വർഗീസ് ജോസഫ്, ചീഫ് പ്രോഗ്രാം കോ-ഓർഡിനേറ്റർ അഡ്വ. ജോസ് മംഗലി, റീജണൽ ചെയർമാൻ എൽദോസ് ഐസക്, സോൺ ചെയർമാൻ ഡിജിൽ സെബാസ്റ്റ്യൻ, കോതമംഗലം ഗ്രേറ്റർ ലയൺസ് ക്ലബ് പ്രസിഡന്‍റ് റെബി ജോർജ്, ക്ലബ് സെക്രട്ടറി കെ.എം.കോരച്ചൻ എന്നിവർ പ്രസംഗിച്ചു. ലയൺസ് ഇന്‍റർനാഷണൽ പ്രോഗ്രാമിന്‍റെ ഭാഗമാണ് പീസ് പോസ്റ്റർ മത്സരം. ടുഗദർ ആസ് വൺ എന്ന പ്രമേയത്തെ അടിസ്ഥാനമാക്കി 11-13 പ്രായക്കാർക്കായി നടത്തുന്ന മത്സരത്തിലെ വിജയിക്ക് 5000 യുഎസ് ഡോളറും രണ്ടു കുടുംബാംഗങ്ങൾക്കൊപ്പം യുഎസിലേക്കുള്ള യാത്രയുമാണ് സമ്മാനം. 23 മെറിറ്റ് അവാർഡ് ജേതാക്കൾക്ക് 500 യുഎസ് ഡോളർ വീതം സമ്മാനമായി ലഭിക്കും.

ജില്ലാ കളക്ടര്‍ക്ക് സ്വീകരണം

കൊച്ചി: എറണാകുളം വൈഎംസിഎയുടെ ആഭിമുഖ്യത്തില്‍ ജില്ലാ കളക്ടര്‍ ജി. പ്രിയങ്കയ്ക്ക് സ്വീകരണം നല്‍കി. ചടങ്ങ് ടി.ജെ. വിനോദ് എംഎല്‍എ ഉദ്ഘാടനം ചെയ്തു. വൈഎംസിഎ പ്രസിഡന്റ് മാത്യു മുണ്ടാട്ട് അധ്യക്ഷത വഹിച്ചു. വൈഎംസിഎയുടെ 2025-26ലെ പ്രവര്‍ത്തനോദ്ഘാടനം ജില്ലാ കളക്ടര്‍ ജി. പ്രിയങ്ക നിര്‍വഹിച്ചു. നിര്‍ധനരായ ഹൃദ്രോഗികള്‍ക്കുള്ള ശസ്ത്രക്രിയയ്ക്കുള്ള ധനസഹായം ലിസി ആശുപത്രിയിലെ കാര്‍ഡിയാക് അനസ്‌തേഷ്യ വകുപ്പ് മേധാവി ഡോ. ജേക്കബ് ഏബ്രഹാമിന് കളക്ടര്‍ കൈമാറി. കൂടാതെ ഡയാലിസിസ് കൂപ്പണും നിര്‍ധനരായ രോഗികള്‍ക്ക് വിതരണം ചെയ്തു. വൈഎംസിഎയുടെ പ്രസിദ്ധീകരണമായ വൈഎംസിഎ പള്‍സിന്‍റെ പ്രകാശനം ടി.ജെ. വിനോദ് എംഎല്‍എ നിര്‍വഹിച്ചു.

ലക്ഷദ്വീപ് സ്‌കൂളുകള്‍ക്ക് റോബോട്ടിക് കിറ്റുകള്‍ നല്‍കി

കൊച്ചി: ലക്ഷദ്വീപില്‍ കേരളത്തിലെ പാഠ്യപദ്ധതി പിന്തുടരുന്ന ഒമ്പത് ദ്വീപുകളിലെ പത്താം ക്ലാസ് വിദ്യാര്‍ഥികള്‍ക്കായി കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എഡ്യുക്കേഷന്‍ (കൈറ്റ്) റോബോട്ടിക് പഠനത്തിനായി റോബോട്ടിക് കിറ്റുകള്‍ വിതരണം ചെയ്തു. മൂന്ന് വിദ്യാര്‍ഥികള്‍ക്ക് ഒരു കിറ്റ് എന്ന നിലയില്‍ ആകെ 100 റോബോട്ടിക് കിറ്റുകളാണ് കൈറ്റ് നല്‍കിയത്. കിറ്റ് വിതരണത്തിനൊപ്പം ലക്ഷദ്വീപിലെ ഹൈസ്‌കൂള്‍ തലത്തില്‍ ഐസിടി പാഠപുസ്തകങ്ങള്‍ പഠിപ്പിക്കുന്ന അധ്യാപകര്‍ക്കും ഡയറ്റ് ഫാക്കല്‍റ്റികള്‍ക്കുമായി അഞ്ചു ദിവസത്തെ പ്രത്യേക പരിശീലനത്തിനും തുടക്കമായി. കൈറ്റിന്‍റെ എറണാകുളത്തുള്ള റീജണല്‍ റിസോഴ്‌സ് സെന്ററിലാണ് പരിശീലനം. മന്ത്രി വി. ശിവന്‍കുട്ടി ഓണ്‍ലൈനായി പരിശീലന പരിപാടി ഉദ്ഘാടനം ചെയ്തു. കൈറ്റ് സിഇഒ കെ. അന്‍വര്‍ സാദത്ത് സ്‌കൂളുകള്‍ക്കുള്ള റോബോട്ടിക് കിറ്റുകള്‍ വിതരണം ചെയ്തു.

യൂദാപുരം പള്ളിയിൽ വിശുദ്ധ യൂദാശ്ലീഹായുടെ തിരുനാൾ നേർച്ചസദ്യ പന്തലിന് കാൽനാട്ടി

അങ്കമാലി: ചരിത്ര പ്രസിദ്ധമായ അങ്കമാലി യൂദാപുരം തീർഥാടന കേന്ദ്രത്തിൽ അത്ഭുത പ്രവർത്തകനായ വിശുദ്ധ യൂദാശ്ലീഹായുടെ തിരുനാളിന് ഒരുക്കുന്ന നേർച്ചസദ്യയുടെ പന്തലിന്‍റെ കാൽനാട്ടുകർമം നടത്തി. ഇടവക വികാരിയും റെക്ടറുമായ ഫാ. സെബാസ്റ്റ്യൻ കറുകപ്പിള്ളിയുടെ കാർമ്മികത്വത്തിൽ ആശീർവദിച്ച യൂദാശ്ലീഹായുടെ ചിത്രം ആലേഖനം ചെയ്ത പതാക പന്തലിലെ കൊടി മരത്തിൽ സ്ഥാപിച്ചാണ് പന്തലിന്‍റെ കാൽനാട്ട് കർമ്മം നടത്തിയത്. ചടങ്ങിൽ ബെന്നി ബഹനാൻ എംപി, സഹവികാരി ഫാ. എബി ഫ്രാൻസീസ് ഡ്യൂറോം, തുറവൂർ പഞ്ചായത്ത് പ്രസിഡന്‍റ് ജെസി ജോയ്, വൈസ് പ്രസിഡന്‍റ് റോയ് ചിറയ്ക്കൽ, മെമ്പർമാരായ എം.എസ്. ശ്രീകാന്ത്, സാലി വിൽസൻ, ബ്ലോക്ക് പഞ്ചായത്ത് മെമ്പർ സീലിയ വിന്നി, പ്രസുദേന്തിമാരായ ഡോ. വർഗീസ് മൂലൻ , സുബിൻ ജോർജ്, ഡോ. പ്രിയങ്ക എഡിസൺ, സഞ്ജയ് യോഹന്നാൻ, തിരുനാൾ കമ്മിറ്റി കൺവീനർ ഹെർബർട്ട് ജെയിംസ്, സെക്രട്ടറി ഒ.ജി. കിഷോർ, കൈക്കാരന്മാരായ വില്യം പ്ലാസിഡ്, കിഷോർ പാപ്പാളി, സിസ്റ്റർ റോസ് മിറ്റി, മീഡിയ കൺവീനർ ടി.പി. ചാക്കോച്ചൻ തുടങ്ങിയവർ പങ്കെടുത്തു. ഒക്ടോബർ 30 നാണ് ചരിത്ര പ്രസിദ്ധമായ ഊട്ടുതിരുന്നാൾ. മൂന്ന് ലക്ഷം പേർക്കാണ് ഈ വർഷം നേർച്ച സദ്യ ഒരുക്കുന്നത്. നവനാൾ നൊവേന ഒക്ടോബർ 17 ന് ആരംഭിയ്ക്കും. വിപുലമായ ഒരുക്കങ്ങളും ആരംഭിച്ചു.

ദീപിക നമ്മുടെ ഭാഷ പദ്ധതി : നെടുങ്ങപ്ര സെന്‍റ് ആന്‍റണീസ് യുപി സ്കൂളിൽ

പെരുമ്പാവൂർ : നെടുങ്ങപ്ര സെന്‍റ് ആന്‍റണീസ് യുപി സ്കൂളിൽ ദീപിക നമ്മുടെ ഭാഷ പദ്ധതിയുടെ ഉദ്ഘാടനം മുടിക്കരായി സെന്‍റ് പീറ്റർ ആൻഡ്‌ പോൾ ഫൊറോനാ വികാരി ഫാ. ജെയിംസ് കക്കുഴിയും നെടുങ്ങപ്ര സെന്‍റ് ആന്‍റ്ണീസ് പള്ളി വികാരിയും സ്കൂൾ മാനേജരുമായ ഫാ. പൗലോസ് നെടുംതടത്തിലും ചേർന്ന് സ്കൂൾ ലീഡർമാരായ അദ്വൈത് ഷബിൻ, ആരാധ്യ പി. അഭിലാഷ് എന്നിവർക്ക്് ദീപിക പത്രം നൽകി നിർവഹിച്ചു. ദീപിക ഫ്രണ്ട്‌സ് ക്ലബ്‌ മുടിക്കരായി ഫൊറോന പ്രസിഡന്‍റ് രാജു മാങ്കുഴ, സ്കൂൾ പ്രധാനാധ്യാപിക സിസ്റ്റർ റിയ, അധ്യാപകരായ ജിൻസി പോൾ, റിൻസി സെബാസ്റ്റ്യൻ, ബെന്‍റില ബെന്നി, കണിക തോമസ്, ദീപിക ഏരിയ മാനേജർ റ്റി.എ. നിബിൻ എന്നിവർ സംസാരിച്ചു.

സമരപ്രഖ്യാപനം ഫലിച്ചു : ഗോശ്രീ മേൽപ്പാലത്തിലെ കുഴികൾ നികത്തി

വൈപ്പിൻ : നാട്ടുകാരുടെ സമരപ്രഖ്യാപനം വന്നതോടെ ഗോശ്രീ വല്ലാർപാടം മേൽപാലത്തിലെ കുഴികൾ നികത്തി നാഷണൽ ഹൈവേ അധികൃതർ തടിയൂരി. ഈ സാഹചര്യത്തിൽ ഇന്ന് നാഷണൽ ഹൈവേ അഥോറിറ്റി എറണാകുളം ഓഫീസിനു മുന്നിൽ റസിഡന്‍റ്സ് അസോസിയേഷനുകളുടെ അപ്പക്സ് സംഘടനയായ ഫ്രാഗ് നടത്താൻ നിശ്ചയിച്ചിരുന്ന പ്രതിഷേധ സമരം ഉപേക്ഷിച്ചു. ഈ മേൽപ്പാലത്തിലെ കുഴികൾ നികത്താതെ ദേശീയപാത അധികൃതർ യാത്രക്കാരെ വട്ടം കറക്കുകയായിരുന്നു. ഇതിനിടെ ഇവിടെ പലപ്പോഴും ചെറുവാഹനങ്ങൾ അപകടത്തിൽപ്പെടാൻ തുടങ്ങി. ഇതേത്തുടർന്ന് അപകടത്തിൽപ്പെട്ടവരും അവരുടെ ബന്ധുക്കളും ചേർന്നാണ് ഫ്രാഗിന്‍റെ നേതൃത്വത്തിൽ ഇന്ന് പ്രതിഷേധ സമരത്തിന് ആഹ്വാനം ചെയ്തിരുന്നത്.

ബൈക്കിടിച്ച് കാൽനടയാത്രികൻ മരിച്ചു

ചെറായി: റോഡ് മുറിച്ചുകടക്കുന്നതിനിടെ ബൈക്ക് ഇടിച്ച് കാൽനടയാത്രക്കാരൻ മരിച്ചു. എടവനക്കാട് ബ്ലാവേലിൽ ഗോപിയുടെ മകൻ ഷാജി (54) ആണ് മരിച്ചത്. ഇന്നലെ പുലർച്ചെ നാലിന് എടവനക്കാട് എഇഒ സ്റ്റോപ്പിലായിരുന്നു അപകടം. ഉടൻ കുഴുപ്പിള്ളിയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം ഇന്ന് ഉച്ചയ്ക്ക് 12ന് നായരമ്പലം പൊതുശ്മശാനത്തിൽ. ഭാര്യ: ജയ. മക്കൾ: ആതിര, ആരതി.

മംഗലത്തുതാഴത്തെ കലുങ്ക് പുനർനിർമാണം പൂർത്തിയായി

കൂത്താട്ടുകുളം: പാലാ റോഡിൽ മംഗലത്തുതാഴത്തെ കലുങ്ക് പുനർനിർമാണം പൂർത്തിയായി. 17 ദിവസം കൂടി കഴിഞ്ഞാൽ ഗതാഗതത്തിന് തുറന്നു കൊടുക്കും. കോൺഗ്രീറ്റ് ബലവത്താകാനുള്ള ദിവസങ്ങൾ പൂർത്തിയായ ശേഷമേ തുറന്നു നൽകുവെന്ന് അധികൃതർ പറഞ്ഞു. റോഡിലെ ഗതാഗതം പൂർണമായി നിരോധിച്ചശേഷം കലുങ്ക് പൂർണമായും പൊളിച്ചുനീക്കിയത് പ്രദേശവാസികൾക്കും വ്യാപാരികൾക്കും ഏറെ ബുദ്ധിമുട്ട് ഉണ്ടാക്കി. നഗരസഭയിലെ മൂന്നു ഡിവിഷനുകളിലെ ജനങ്ങൾ കിലോമീറ്ററുകൾ ചുറ്റിയും നടന്നുമാണ് നഗരത്തിലെത്തുന്നത്. ഒരു കോടി 20 ലക്ഷം രൂപ ചിലവഴിച്ചാണ് ഒരു വർഷം മുമ്പ് രാമപുരം കവല മുതൽ മംഗലത്തുതാഴം വരെയുള്ള റോഡ് നവീകരണവും കലുങ്ക് നിർമാണവും പൂർത്തീകരിച്ചത്. നിർമാണം പൂർത്തിയായി ആഴ്ചകൾ കൊണ്ട് റോഡ് തകർന്നു. ഒരുമാസം മുമ്പ് കലുങ്കിന്‍റെ മുകൾഭാഗത്തെ കോൺക്രീറ്റ് സ്ലാബ് തകർന്നതിന്‍റെ അടിസ്ഥാനത്തിലാണ് കലുങ്ക് പൂർണമായി പൊളിച്ചു നിർമിച്ചത്. കലുങ്ക് നിർമിച്ച കരാറുകാരന്‍റെ ചെലവിലാണ് പുനർനിർമാണം നടന്നിരിക്കുന്നത്. കലുങ്കിന്‍റെ ഇരുവശങ്ങളിലും ഉള്ള അപ്രോച്ച് റോഡുകളും പൊളിച്ചു നീക്കിയ ടൈലുകളും പൂർവസ്ഥിതിയിലാക്കുന്ന മുറയ്ക്ക് റോഡ് തുറന്നു നൽകും.

ഭൂതത്താൻകെട്ട് മിനി ജല വൈദ്യുത പദ്ധതി എത്രയും വേഗം പൂർത്തീകരിക്കും: മന്ത്രി

കോതമംഗലം: ഭൂതത്താൻകെട്ട് മിനി ജല വൈദ്യുത പദ്ധതിയുമായി ബന്ധപ്പെട്ട് കെഎസ്എബിയും കരാർ കമ്പനിയുമായുള്ള മീറ്റിംഗിന്‍റെ അടിസ്ഥാനത്തിലും തുടർന്നുള്ള ഹൈക്കോടതി ഉത്തരവിന്‍റെ അടിസ്ഥാനത്തിലും പദ്ധതി എത്രയും വേഗം പൂർത്തീകരിക്കുന്നതിനുള്ള തുടർനടപടികൾ കെഎസ്ഇബി സ്വീകരിക്കുമെന്ന് വൈദ്യുതി മന്ത്രി എ.കെ. കൃഷ്ണൻകുട്ടി നിയമസഭയിൽ അറിയിച്ചു. ഭൂതത്താൻകെട്ട് മിനി ജല വൈദ്യുത പദ്ധതിയുടെ ശേഷിക്കുന്ന പ്രവർത്തികൾ പൂർത്തീകരിച്ചു പദ്ധതി അടിയന്തരമായി കമ്മീഷൻ ചെയ്യണമെന്ന് ആവശ്യപ്പെട്ടുകൊണ്ട് ആന്‍റണി ജോൺ എംഎൽഎയുടെ സബ്മിഷന് മറുപടിയായിട്ടാണ് മന്ത്രി ഇക്കാര്യം വ്യക്തമാക്കിയത്.

കോതമംഗലത്ത് കൗണ്‍സിലറുടെ നേതൃത്വത്തിൽ 25 കുടുംബങ്ങള്‍ക്ക് വീടൊരുങ്ങി

25 വീടുകളുടെ സമര്‍പ്പണവും 6 വീടുകളുടെ താക്കോല്‍ദാനവും 20ന് കോതമംഗലം: കോതമംഗലത്ത് കൗണ്‍സിലറുടെ നേതൃത്വത്തിൽ 25 കുടുംബങ്ങള്‍ക്ക് വീടൊരുങ്ങി. കോതമംഗലം നഗരസഭ 18-ാം വാര്‍ഡില്‍ കൗണ്‍സിലര്‍ ഷിബു കുര്യാക്കോസിന്‍റെ നേതൃത്വത്തിലാണ് വീടുകളുടെ നിര്‍മാണം പൂര്‍ത്തിയാക്കിയത്. 25 വീടുകളുടെ സമര്‍പ്പണവും ആറ് വീടുകളുടെ താക്കോല്‍ദാനവും 20ന് രാവിലെ 9.30-ന് പ്രതിപക്ഷ നേതാവ് വി.ഡി. സതീശന്‍ ഉദ്ഘാടനം ചെയ്യും. 1.25 ഏക്കര്‍ സ്ഥലത്ത് മൂന്ന് സെന്‍റ് വീതം സ്ഥലത്താണ് വില്ലകള്‍ പോലെ റോഡിന് ഇരുവശത്തുമായാണ് ചെറു വീടുകള്‍ നിര്‍മിച്ചിരിക്കുന്നത്. 3.5 കോടി രൂപയാണ് നിര്‍മാണച്ചെലവ്. വാടക കെട്ടിടങ്ങളിലും വാസയോഗ്യമല്ലാത്ത വീടുകളിലും താമസിച്ചിരുന്നവർ വീടെന്ന സ്വപ്‌നം യാഥാര്‍ഥ്യമായതിന്‍റെ സന്തോഷത്തിലാണ്. തെരഞ്ഞെടുപ്പ് വേളയില്‍ വീട് സന്ദര്‍ശന സമയത്താണ് ഇവരുടെ ദുരവസ്ഥ ശ്രദ്ധയില്‍പ്പെട്ടതെന്ന് ഷിബു കുര്യാക്കോസ് പറഞ്ഞു. വീടില്ലാത്ത നിരവധി പേര്‍ ഇനിയുമുണ്ട്. ഇത്തരത്തില്‍ നൂറ് വീട് നിര്‍മിച്ച് നല്‍കണമെന്നാണ് തന്‍റെ സ്വപ്‌നമെന്ന് ഷിബു പറഞ്ഞു. മാര്‍ ബേസില്‍ സ്‌കൂളിന് പിന്നില്‍ 500 മീറ്റര്‍ മാറി കുരൂര്‍ തോടിന് അരുകിലായി ഇന്ദിരാനഗറിലാണ് 25 ഭവനങ്ങള്‍ നിര്‍മിച്ചിരിക്കുന്നത്. പ്രധാനമന്ത്രി ആവാസ് യോജന പദ്ധതിയിലൂടെ 16 വീടുകളും ലയണ്‍സ് ക്ലബ് മുഖേന അഞ്ച് വീടുകളുമാണ് നിര്‍മിച്ചിരിക്കുന്നത്. ലയണ്‍സ് ക്ലബ് ഇതു കൂടാതെ 13 ലക്ഷം രൂപ കൂടി നിര്‍മാണ സഹായമായി നല്‍കിയിരുന്നു. നാല് പേര്‍ക്ക് ഏഴ് ലക്ഷം രൂപയുടെ വായ്പയിലൂടെയാണ് വീട് പണിത് നല്‍കിയിരിക്കുന്നത്. സ്ഥലം വാങ്ങിയാണ് ഓരോരുത്തര്‍ക്കും 500 മുതല്‍ 650 ചതുരശ്രയടി വിസ്തീര്‍ണത്തിലാണ് വീട് നിര്‍മിച്ച് നല്‍കിയത്. 16 അടി വീയില്‍ വഴിയും വെളിച്ചവും വെള്ളവും ലഭ്യമാക്കിയിട്ടുണ്ട്. വീടുകളുടെ സമര്‍പ്പണ ചടങ്ങില്‍ സിനിമാ താരം സിദ്ദിഖ് മുഖ്യാതിഥിയാവും. കോതമംഗലം രൂപതാധ്യക്ഷന്‍ ജോര്‍ജ് മഠത്തിക്കണ്ടത്തില്‍, ഏലിയാസ് മാര്‍ യൂലിയോസ് മെത്രാപ്പോലീത്ത എന്നിവര്‍ അനുഗ്രപ്രഭാഷണം നടത്തും. ആന്‍റണി ജോണ്‍ എംഎല്‍എ അധ്യക്ഷത വഹിക്കും. എംപിമാരായ ഡീന്‍ കുര്യാക്കോസ്, ബെന്നി ബഹനാന്‍, എംഎല്‍എമാരായ മാത്യു കുഴല്‍നാടന്‍, എല്‍ദോസ് കുന്നപ്പിള്ളി, റോജി എം. ജോണ്‍, മുന്‍ മന്ത്രി ടി.യു. കുരുവിള, ജില്ല പഞ്ചായത്ത് പ്രസിഡന്‍റ് മനോജ് മൂത്തേടന്‍, നഗരസഭാധ്യക്ഷന്‍ കെ.കെ. ടോമി, ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീര്‍ എന്നിവര്‍ പെങ്കെടുക്കും.

മൗണ്ട് കാർമൽ കോളജിന് മിനിസ്റ്റേഴ്‌സ് എക്സലൻസ് അവാർഡ്

കോതമംഗലം: ഉന്നത വിദ്യാഭ്യാസ മേഖലയിൽ മികവു പുലർത്തുന്ന സ്ഥാപനങ്ങൾക്കായി സംസ്ഥാന സർക്കാർ ഏർപ്പെടുത്തിയ എക്സലൻഷ്യ-2025 മിനിസ്റ്റേഴ്‌സ് എക്സലൻസ് അവാർഡ് കറുകടം മൗണ്ട് കാർമൽ കോളജിന് ലഭിച്ചു. തിരുവനന്തപുരം ടാഗോർ തീയറ്ററിൽ നടന്ന ചടങ്ങിൽ മന്ത്രി ആർ. ബിന്ദുവിൽനിന്നും കറുകടം മൗണ്ട് കാർമൽ കോളജിന് വേണ്ടി പ്രിൻസിപ്പൽ ഫാ. ഷാജി മംഗലത്ത്, ഐക്യുഎസി കോർഡിനേറ്റർ മിസ്. അനീറ്റ സാറ തങ്കച്ചൻ, ഐക്യുഎസി സെക്രട്ടറി രമ്യ ചന്ദ്രൻ എന്നിവർ ചേർന്ന് ഏറ്റുവാങ്ങി. നാക് എപ്ലസ്പ്ലസ്, എപ്ലസ്, എ ഗ്രേഡ് നേടിയിട്ടുള്ള സ്ഥാപനങ്ങളേയും എൻഐആർഎഫ്, കെഐആർഎഫ് എന്നിവയിൽ മുന്നിൽ നിൽക്കുന്ന സ്ഥാപനങ്ങളേയും മിനിസ്റ്റേഴ്സ‌് അവാർഡ് നൽകി ആദരിച്ചു.

കടവൂരില്‍ ഓപ്പണ്‍ ജിംനേഷ്യം ഉദ്ഘാടനം ചെയ്തു

പോത്താനിക്കാട്: കടവൂര്‍ ഗവ. വൊക്കേഷണല്‍ ഹയര്‍ സെക്കന്‍ഡറി സ്കൂള്‍ കോമ്പൗണ്ടില്‍ ബ്ലോക്ക് പഞ്ചായത്ത് ഫണ്ട് ഉപയോഗിച്ചു നിര്‍മിച്ച ഓപ്പണ്‍ ജിംനേഷ്യത്തിന്‍റെ ഉദ്ഘാടനം കോതമംഗലം ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീര്‍ നിര്‍വഹിച്ചു. പൈങ്ങോട്ടൂര്‍ പഞ്ചായത്ത് പ്രസിഡന്‍റ് ജിജി ഷിജു അധ്യക്ഷത വഹിച്ചു. ജില്ലാപഞ്ചായത്തംഗം റാണിക്കുട്ടി ജോര്‍ജ്, ബ്ലോക്ക് പഞ്ചായത്ത് വൈസ് പ്രസിഡന്‍റ് ഡയാന നോബി, പഞ്ചായത്ത് വൈസ് പ്രസിഡന്‍റ് സാബു മത്തായി, ബ്ലോക്ക് പഞ്ചായത്തംഗങ്ങളായ ജോമി തെക്കേക്കര, ജെയിംസ് കോറമ്പേല്‍, സാലി ഐപ്പ്, ആനീസ് ഫ്രാന്‍സിസ് തുടങ്ങിയവര്‍ പ്രസംഗിച്ചു.

പിറവം ഐടിഐയിൽ യുവ സംരംഭക സംഗമം

പിറവം: എംഎസ്എം ഐടിഐയില്‍ യുവ സംരംഭക സംഗമം നടത്തി. പരിപാടിയുടെ ഉദ്ഘാടനം എംഎസ്എം ഐടിഐ രക്ഷാധികാരി ബിഷപ്പ് യൂഹാനോൻ മാർ തിയോഡോഷ്യസ് നിർവഹിച്ചു. ചടങ്ങിൽ മുനിസിപ്പൽ ചെയർപേഴ്സൺ ജൂലി സാബു, വൈസ് ചെയർമാൻ കെ.പി. സലിം, കൗൺസിലർ ഏലിയാമ്മ ഫിലിപ്പ് എന്നിവർ പങ്കെടുത്തു. പുതിയ അധ്യായന വർഷ ആരംഭിക്കുന്നതിന്‍റെ ഭാഗമായി നടന്ന ചടങ്ങിലാണ് മികച്ച സംരംഭകരെ ആദരിക്കലും ഐടിഐ കാമ്പസിൽ തുടങ്ങുന്ന ആൽഫ ഇൻഡസ്ട്രീസിന്‍റെ ഉദ്ഘടനവും നടന്നത്. യുവ സംരഭക സംഗമത്തിൽ മികച്ച യുവ സംരംഭകനും സംസ്ഥാന കർഷക അവാർഡ് ജേതാവുമായ മോനു മാമ്മൻ, മികച്ച വ്യവസായ സംരംഭകൻ സോണി ജോൺ, ഐടിഐ മുൻ സ്റ്റുഡന്‍റും പ്രധാനമന്ത്രിയുടെ അവാർഡ് ജേതാവുമായ കെ.കെ. ബിനു എന്നിവർക്കു എക്സലൻസ് അവാർഡ് നൽകി ആദരിച്ചു. തുടർന്ന് മുഖാമുഖം മോട്ടിവേഷൻ സംവാദം നടന്നു. ഐടിഐയില്‍ കഴിഞ്ഞ വർഷം വിജയം നേടിയവരെ പുരസ്കാരം നൽകി ആദരിച്ചു. സർട്ടിഫിക്കറ്റുകളും വിതരണം ചെയ്തു. ചടങ്ങിൽ ഐടിഐ ഡയറക്ടർ ഫാ.ഡോ. വർഗീസ് ബേബി മടത്തിക്കുന്നത്ത്, പ്രിസിപ്പൽ നീതു സോമൻ എന്നിവർ പ്രസംഗിച്ചു.

കുന്നത്തുനാട് മണ്ഡലത്തിൽ പുതുതായി 2864 മുൻഗണനാ റേഷൻ കാർഡുകൾ

കോലഞ്ചേരി: സർക്കാർ അധികാരത്തിൽ വന്നശേഷം കുന്നത്തുനാട് മണ്ഡലത്തിൽ പുതുതായി 2864 പേർക്ക് മുൻഗണന റേഷൻ കാർഡുകളും 164 പേർക്ക് എഎവൈ റേഷൻ കാർഡുകളും വിതരണം ചെയ്തതായി ഭക്ഷ്യ പൊതുവിതരണ മന്ത്രി ജി.ആർ. അനിൽ നിയമസഭയിൽ വ്യക്തമാക്കി. ഇതു സംബന്ധിച്ച പി.വി. ശ്രീനിജിൻ എംഎൽഎ യുടെ നിയമസഭാ ചോദ്യത്തിന് മറുപടിയായിട്ടാണ് മന്ത്രി ഇക്കാര്യം അറിയിച്ചത്. സർക്കാർ അധികാരത്തിൽ വന്നശേഷം കുന്നത്തുനാട് മണ്ഡലത്തിൽനിന്നും മുൻഗണന വിഭാഗത്തിലേക്കുള്ള കാർഡുകൾക്കായി 3527 അപേക്ഷകളും എഎ വൈ കാർഡുകൾക്കായി 183 അപേക്ഷകളും സർക്കാരിൽ ലഭ്യമായിട്ടുണ്ട്. ഇതിനിന്നാണ് 2864 പേർക്ക് മുൻഗണന കാർഡുകളും 164 പേർക്ക് എ എ വൈ കാർഡുകളും അനുവദിച്ചത്. അനർഹരായ 1085 പേരെ മുൻഗണനാ കാർഡുകളിൽ നിന്നും 198 പേരെ എഎവൈ കാർഡുകളിൽനിന്നും ഒഴിവാക്കിയതായും മന്ത്രി അറിയിച്ചു.

താറാവ് കൂട്ടിൽനിന്നും പെരുമ്പാമ്പിനെ പിടികൂടി

പോത്താനിക്കാട്: തെക്കേ പുന്നമറ്റത്ത് താറാവ് കൂട്ടിൽ കയറിയ പെരുമ്പാമ്പിനെ പിടികൂടി കുളമാവ് വനമേഖലയിൽ തുറന്നു വിട്ടു. കുഴിവേലിക്കുന്നേൽ വിജയന്‍റെ താറാവ് കൂട്ടിനുള്ളിലെ വലയിൽ കുടുങ്ങിക്കിടന്ന പെരുമ്പാമ്പിനെ അയൽവാസിയായ കോൺഗ്രസ് ബൂത്ത് പ്രസിഡന്‍റ് ബാബു ഭാർഗവനാണ് ഇന്നലെ രാവിലെ കണ്ടെത്തിയത്. ഉടൻ വനപാലകരെ വിളിച്ചു വിവരമറിയച്ചതിനെ തുടർന്ന് കാളിയാർ ഫോറസ്റ്റ് ഓഫീസിലെ ഉദ്യോഗസ്ഥരെത്തി പാമ്പിനെ പിടികൂടുകയായിരുന്നു.

കൂത്താട്ടുകുളത്തെ റോഡുകളുടെ അറ്റകുറ്റപ്പണികൾ തിങ്കളാഴ്ച മുതൽ

കൂത്താട്ടുകുളം: വിവിധ റോഡുകളുടെ അറ്റകുറ്റപ്പണികൾ തിങ്കളാഴ്ച മുതൽ ആരംഭിക്കും. കൂത്താട്ടുകുളം മാർക്കറ്റ് റോഡ്, കൂത്താട്ടുകുളം-പാലാ റോഡ്, കമ്പം-തേനി ഹൈവേയുടെ ഭാഗമായിട്ടുള്ള പാലക്കുഴ റോഡ് തുടങ്ങിയ റോഡുകളുടെ അറ്റപ്പണികൾ ആദ്യഘട്ടത്തിൽ പൂർത്തിയാകും. കാലാവസ്ഥ അനുകൂലമല്ലാത്തതിനാൽ കുഴികളിൽ മെറ്റൽ നികത്തിയാകും പണികൾ നടത്തുക. കാലാവസ്ഥ അനുകൂലമാകുന്ന മുറയ്ക്ക് ടാറിംഗ് ജോലികൾ ആരംഭിക്കും. കൂത്താട്ടുകുളം-പാലാ റോഡിൽ രാമപുരം കവല മുതൽ മംഗലത്തുതാഴം വരെയുള്ള റോഡ് പൂർണമായി തകർന്നിട്ട് രണ്ട് മാസത്തിലേറെയായി. കാൽനടയാത്രയ്ക്ക് പോലും കഴിയാത്ത അവസ്ഥയിലാണ് നിലവിൽ ഈ റോഡ്. മംഗലത്തു താഴത്തെ കലുങ്ക് നിർമാണത്തിനായി നിലവിൽ ഈ റോഡിലെ ഗതാഗതം പൂർണമായി നിരോധിച്ചിരിക്കുകയാണ്. ഗതാഗത നിരോധന കാലയളവിൽ റോഡിൽ അറ്റകുറ്റപ്പണികൾ നടത്താത്തതിൽ വലിയ ആക്ഷേപം നിലവിലുണ്ട്. ഗതാഗതം നിരോധിച്ച സാഹചര്യത്തിൽ ഈ പ്രദേശത്തെ കച്ചവട സ്ഥാപനങ്ങളിലും പ്രദേശത്ത് താമസിക്കുന്നവർക്കും വലിയ ബുദ്ധിമുട്ടുകളാണ് ഉണ്ടാകുന്നത്. കാലാവസ്ഥ അനുകൂലമായ സാഹചര്യത്തിൽ റോഡിന്‍റെ അറ്റകുറ്റപ്പണികൾ നടത്താതെ മഴ ആരംഭിച്ചപ്പോൾ നിർമാണ പ്രവർത്തനങ്ങൾ തുടങ്ങുന്നത് വലിയ ആക്ഷേപത്തിന് ഇടയാക്കുന്നുണ്ട്.

ബാറ്ററി മോഷ്ടിച്ചെന്നാരോപിച്ച് മർദനം; നിയമസഭയിൽ ഉന്നയിച്ച് എംഎൽഎ

മൂവാറ്റുപുഴ: ഇന്‍വെര്‍ട്ടര്‍ ബാറ്ററി മോഷ്ടിച്ചെന്നാരോപിച്ച് മൂവാറ്റുപുഴ പോലീസ് ആരക്കുഴ വള്ളിക്കട സ്വദേശിയായ അമല്‍ ആന്‍റണിയെ ആളുമാറി മര്‍ദിച്ച സംഭവം നിയമസഭയില്‍ അടിയന്തര പ്രമേയ ചര്‍ച്ചയ്ക്കിടെ ഉന്നയിച്ച് മാത്യു കുഴല്‍നാടന്‍ എംഎല്‍എ. എന്നാല്‍ പോലീസിന്‍റെ പ്രവര്‍ത്തിയെ ന്യായീകരിക്കുന്ന വാദമാണ് മുഖ്യമന്ത്രി നിയമസഭയില്‍ എംഎല്‍എയ്ക്ക് മറുപടിയായി നല്‍കിയത്. സിസിടിവി ദൃശ്യങ്ങളുടെ അടിസ്ഥാനത്തില്‍ അന്വേഷണത്തിനിടെയുണ്ടായ നിസഹകരണം മൂലമാണ് അമലിനെ സ്റ്റേഷനിലേക്ക് കൊണ്ടുപോയതെന്നും കടയുടമയുടെ സ്ഥിരീകരണത്തിന് ശേഷം വിട്ട് അയക്കുകയാണ് ചെയ്തതെന്നും മുഖ്യമന്ത്രി സഭയില്‍ പറഞ്ഞു. സംഭവത്തില്‍ വ്യാപകമായ പ്രതിഷേധങ്ങള്‍ ഉയര്‍ന്നിട്ടും ഒരു മാസത്തില്‍ അധികം പിന്നിട്ടിട്ടും നിയമസഭയില്‍ ചോദ്യം ഉയര്‍ന്നപ്പോള്‍ മാത്രമാണ് ഉന്നത ഉദ്യോഗസ്ഥര്‍ റിപ്പോര്‍ട്ട് നല്‍കാന്‍ പോലും തയ്യാറായത്. കാക്കി കുപ്പായം ധരിച്ച് അഴിമതിയും, അക്രമവും, ഗുണ്ടായിസവും നടത്തുന്ന ഉദ്യോഗസ്ഥരെ സംരക്ഷിക്കുന്ന സമീപനമാണ് സര്‍ക്കാരിന്‍റെതെന്നും എംഎല്‍എ കുറ്റപ്പെടുത്തി. കഴിഞ്ഞ 12നാണ് സംഭവം നടന്നത്. അമല്‍ നിരപരാധിയാണെന്ന് തെളിഞ്ഞതോടെ വീട്ടിലേക്ക് പൊയ്‌ക്കൊള്ളാന്‍ പോലീസ് നിര്‍ദേശിക്കുകയായിരുന്നു. പോലീസ് മര്‍ദനത്തില്‍ അമലിന്‍റെ മുതുകിനും കഴുത്തിനും ഗുരുതര പരിക്കേറ്റിരുന്നതാണ് മെഡിക്കല്‍ റിപ്പോര്‍ട്ട്. ഒരു മാസത്തിനു ശേഷവും ചികിത്സയിലാണ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]