ADVERTISEMENT

ADVERTISEMENT

സന്നദ്ധ രക്തദാതാദിനം ആചരിച്ചു

തൃശൂർ: വൈഎംസിഎയുടെ നേതൃത്വത്തിൽ സന്നദ്ധ രക്തദാതാക്കളെയും രക്തദാന സംഘടനകളെയും ആദരിച്ചു. 134 തവണ രക്തം ദാനംചെയ്ത ടൈനി ഫ്രാൻസിസ് ഉദ്ഘാടനംചെയ്തു. തൃശൂർ വൈഎംസിഎ പ്രസിഡന്‍റ് ഷാജി ചെറിയാൻ അധ്യക്ഷത വഹിച്ചു. ട്രഷറർ ജോജു മഞ്ഞില സ്വാഗതവും ജനറൽ സെക്രട്ടറി ജിൽസൺ ജോസ് നന്ദിയും പറഞ്ഞു.

ADVERTISEMENT

ഇരിങ്ങാലക്കുട ക്രൈസ്റ്റ് കോളജിലെ ഭൂഗര്‍ഭ വകുപ്പ് ജിയോളജി പ്രവൃത്തിപരിചയമേള സംഘടിപ്പിച്ചു

ഇരിങ്ങാലക്കുട: ക്രൈസ്റ്റ് കോളജിലെ ഭൂഗര്‍ഭ വകുപ്പിലെ അധ്യാപകരും വിദ്യാര്‍ഥികളും പരിയാരം സെന്‍റ്് ജോര്‍ജ് ഹയര്‍ സെക്കന്‍ഡറി സ്‌കൂളില്‍ ജിയോളജി പ്രവൃത്തിപരിചയമേള സംഘടിപ്പിച്ചു. ഭാരതീയ ഭൗശാസ്ത്ര മന്ത്രാലയത്തിന്‍റെ നേതൃത്വത്തിലാണു പരിപാടി സംഘടിപ്പിച്ചത്. സ്‌കൂള്‍ പ്രധാനാധ്യാപകന്‍ സന്തോഷ് ദേവസി അധ്യക്ഷത വഹിച്ചു. ഡോ. ആന്‍റോ ഫ്രാന്‍സിസ് (അസി. പ്രഫസര്‍, ജിയോളജി സെല്‍ഫ് ഫിനാന്‍സിംഗ് തലവന്‍), ഡോ. ലിന്‍റോ ആലപ്പാട്ട് (അസി. പ്രഫസര്‍, ജിയോളജി വകുപ്പ്, ഡീന്‍, റിസര്‍ച്ച്, ടീച്ചിംഗ് ലേണിംഗ് സെന്‍റര്‍), കോ-ഓര്‍ഡിനേറ്റര്‍ ഡോ. ആന്‍സോ (അസി. പ്രഫസര്‍, ജിയോളജി വിഭാഗം) എന്നിവര്‍ പ്രസംഗിച്ചു. വിവിധതരത്തിലുള്ള ധാതുക്കള്‍, പാറകള്‍, ജലസ്രോതസുകള്‍, ഫോസിലുകള്‍ തുടങ്ങിയവയുടെ ആകര്‍ഷകമായ ശേഖരങ്ങള്‍ പ്രദര്‍ശിപ്പിച്ചിരുന്നു. പൗഡര്‍, വാച്ച്, കണ്മഷി, അലങ്കാരവസ്തുക്കള്‍ തുടങ്ങി നിത്യജീവിതത്തില്‍ ഒഴിച്ചുകൂടാനാകാത്ത ഒരുപാടുവസ്തുക്കള്‍ നിര്‍മിക്കാന്‍ ഉപയോഗിക്കുന്ന ധാതുക്കള്‍, വെള്ളത്തില്‍ പൊങ്ങിക്കി ടക്കുന്ന പാറ, വജ്രം കാണപ്പെടുന്ന പാറ, ഇതുകൂടാതെ പാറയിലെ ധാതുക്കള്‍ കാണാന്‍ മൈക്രോസ്‌കോപ്പ് പ്രദര്‍ശനം എന്നിവയെല്ലാം പ്രവൃത്തി പരിചയമേളയെ വേറിട്ട അനുഭവമാക്കി. ദശലക്ഷക്കണക്കിനുവര്‍ഷം മുന്‍പ് കടലില്‍ ജീവിച്ചിരുന്ന ജീവികളുടെ ഫോസിലുകള്‍, മരം കല്ലായി രൂപാന്തരപ്പെട്ട പേട്രിഫൈഡ് വുഡ് എന്നിവയ്‌ക്കൊപ്പം നഗ്‌ന‌നേത്രങ്ങള്‍ക്ക് കാണാന്‍ കഴിയാത്ത സൂക്ഷ്മ ഫോസിലുകള്‍ മൈക്രോസ്‌കോപ്പിലൂടെ കാണാന്‍ അവസരം ലഭിച്ചതു വിദ്യര്‍ഥികളിലും അധ്യാപകരിലും അദ്ഭുതം ഉളവാക്കി.

മുടിക്കോട് വൻ ഗതാഗതക്കുരുക്ക്; സർവീസ് റോഡ് ചെളിക്കുളം

പട്ടിക്കാട്: ദേശീയപാതയിൽ മുടിക്കോട് സെന്‍ററിൽ ഗതാഗതക്കുരുക്ക് തുടരുന്നു. ഇന്നലെ വൈകീട്ട് പാലക്കാട് ഭാഗത്തേക്കുള്ള പാതയിൽ മുടിക്കോട് മുതൽ ആറാംകല്ല് മേൽപ്പാലം വരെയാണ് വാഹനങ്ങൾ കുരുങ്ങിക്കിടന്നത്. പാലക്കാട് ഭാഗത്തേക്കുള്ള വാഹനങ്ങളെ ആറാംകല്ല് മുതൽ സർവീസ് റോഡിലൂടെ കടത്തിവിടാൻ തുടങ്ങിയതാണ് ഗതാഗതക്കുരുക്ക് രൂക്ഷമാകാൻ കാരണം. തൃശൂർ ഭാഗത്തേക്കുള്ള പാതയും പൂർണമായും തകർന്ന നിലയിലാണ്. മഴ ആരംഭിച്ചതോടെ സർവീസ് റോഡ് ചെളിക്കുളമായി മാറി. റോഡിന്‍റെ തകർച്ചയും ഗതാഗതനിയന്ത്രണത്തിലെ അപാകതയും യാത്രക്കാരെ ഏറെ ബുദ്ധിമുട്ടിക്കുന്നുണ്ട്. വേണ്ട നടപടികൾ സ്വീകരിക്കാൻ അധികൃതർ ശ്രമിക്കുന്നുമില്ല.

വിരുപ്പാക്ക സ്പിന്നിംഗ് മിൽ: ചെയർമാനും എംഡിയും ചാർജെടുത്തു

പുന്നംപറമ്പ്: ചെയർമാനും എം ഡിയും മില്ലിലെത്തി ചാർജെടുത്തു. വിരുപ്പാക്ക തൃശൂർ കോ- ഓപ്പറേറ്റീവ് സ്പിന്നിംഗ് മില്ലിൽ ചാർജെടുത്ത ചെയർമാൻ ഡോ. കെ.എസ്. കൃപകുമാറും എംഡി എബി തോമസും സന്ദർശനവും നടത്തി. അടച്ചുപൂട്ടിയ മിൽ എപ്പോൾ പ്രവർത്തന സജ്ജമാകുമെന്നതിൽ അനിശ്ചിതത്വം തുടരുകയാണ്. 1985ൽ പ്രവർത്തനം ആരംഭിച്ച മില്ല് ഒട്ടേറെ പ്രതിസന്ധികളിൽ നട്ടംതിരിഞ്ഞ് 2023 ഫെബ്രുവരി ആറിന് താഴിട്ട് പൂട്ടി. മില്ലിന്‍റെ പ്രവർത്തനം ഊർജ്വസലമാക്കാൻ സംസ്ഥാന വ്യവസായ വാണിജ്യവകുപ്പ് അഡീഷണൽ ഡയറക്ടറും ടെക്സ്റ്റൈൽസ് - കൈത്തറി വകുപ്പ് ഡയറക്ടറും പരിസരവാസിയുമായ ഡോ. കെ.എസ് . കൃപകുമാറിനെ സർക്കാർ മില്ലിന്‍റെ സാരഥിയാക്കി. സങ്കീർണമായ പ്രശ്നങ്ങളെ ക്കുറിച്ച് തൊഴിലാളി നേതാക്കളുമായും മില്ലിന്‍റെ പ്രൗഢി തിരിച്ചെടുക്കാൻ ഉതകുന്ന സംവിധാനങ്ങളുണ്ടാക്കാൻ പൂർണ സഹകരണവും ഉണ്ടാകുമെന്ന് ചെയർമാൻ മില്ല് സന്ദർശന വേളയിൽ പറഞ്ഞു. കഴിഞ്ഞ ഏപ്രിൽ 25ന് എംഡിയായിരുന്ന ശ്രീകുമാറിനെ മാറ്റി എബി തോമസിനെ എംഡി സ്ഥാനത്തേക്ക് സർക്കാർ നിയമിച്ചിരുന്നു. ശുഭ പ്രതീക്ഷയിൽ മുന്നോട്ട് ചലിക്കണമെങ്കിൽ ഒട്ടേറെ കടമ്പകൾ താണ്ടണം. വൻ തുക കുടിശികയുള്ളതിനാൽ വിച്ഛേദിച്ച വൈദ്യുതി ബന്ധം പുനഃസ്ഥാപിക്കണം. വിരമിച്ച ജീവനക്കാർക്ക് ആനുകൂല്യം നൽകണം. രണ്ടരവർഷമായി തൊഴിലാളികളുടെ ജീവിതവും നരകതുല്യമാണ്. പഴയ മെഷീനുകളെല്ലാം തുരുമ്പെടുത്തു. പുതിയത് ഇറക്കിയിട്ടുണ്ടെങ്കിലും അതെല്ലാം കാലതാമസമില്ലാതെ പ്രവർത്തിപ്പിക്കണം. മേഞ്ഞ ഷീറ്റുകളെല്ലാം വാനരപടയുടെ വിളയാട്ടത്തിൽ തകർന്നു തരിപ്പണമായി. സ്റ്റോക്കുണ്ടായിരുന്ന പഞ്ഞിക്കെട്ടുകളെല്ലാം നിരീക്ഷണവും, പരിപാലനവുമില്ലാത്ത സാഹചര്യത്തിൽ മുള്ളൻപന്നികൾ നശിപ്പിച്ചു. ടൈംകീപ്പർ പി. മൊയ്തു, സഹകരണ ബാങ്ക് പ്രസിഡന്‍റ് എൻ. കെ. പ്രമോദ് കുമാർ, വിവിധ രാഷ്ട്രീയ തൊഴിലാളി യൂണിയൻ ഭാരവാഹികൾ സന്ദർശനവേളയിൽ ചെയർമാനും എംഡിക്കു മൊപ്പമുണ്ടായിരുന്നു.

മാലിന്യം തള്ളാനെത്തിയ വാഹനം നാട്ടുകാർ തടഞ്ഞു

വടക്കാഞ്ചേരി: ജനവാസ മേഖലയിൽ മാലിന്യം തള്ളാനെത്തിയ വാഹനം നാട്ടുകാർ തടഞ്ഞു. വടക്കാഞ്ചേരി മേലേമ്പാട്ട് ആലിൻചുവട് പരിസരത്താണ് വർക്ക്ഷോപ്പ് മാലിന്യം പിക്കപ്പ് വാനിൽ കൊണ്ടുവന്ന്‌ തള്ളിയത്. സംഭവത്തിൽ 25,000 രൂപ പിഴ ഈടാക്കാനും മാലിന്യം പ്രദേശത്തുനിന്നും നീക്കം ചെയ്യാനും നഗരസഭ ആരോഗ്യ വിഭാഗം നോട്ടീസ് നൽകിയെങ്കിലുംഇന്നലെയും മാലിന്യം നീക്കം ചെയ്യാതെ മണ്ണിട്ടു നികത്താനുള്ള ശ്രമം നാട്ടുകാർ തടയുകയും ചെയ്തു. ക്രഷിയിടത്തോടുചേർന്നുള്ള നീർചാലിലാണ് മാലിന്യംതള്ളിയത്.വിവരമറിയിച്ചതിനെ തുടർന്ന് വടക്കാഞ്ചേരി പോലീസ് സ്ഥലത്തെത്തി മേൽ നടപടികൾ സ്വീകരിച്ചു. മാലിന്യം കൊണ്ടുവന്ന വാഹനംഅന്യസംസ്ഥാനരജിസ്ട്രേഷനിലുള്ളതാണന്നും പൂർണ്ണമായ രേഖകളൊന്നും ഇല്ലെന്നുംപോലീസ് പറഞ്ഞു.

ചിരകാലസ്വപ്നം പൂവണിയുന്നു ; കൊണ്ടാഴി - കുത്താന്പുള്ളി പാലം നിർമാണം അവസാനഘട്ടത്തിൽ

ചേലക്കര: കൊണ്ടാഴി ഗ്രാമപഞ്ചായത്ത് നിവാസികളുടെ ചിരകാലസ്വപ്നമായ കൊണ്ടാഴി-കുത്താന്പുള്ളി പാലത്തിന്‍റെ നിർമാണം അവസാനഘട്ടത്തിൽ. കേരളത്തിന്‍റെ നെയ്ത്തുഗ്രാമമായ കുത്താന്പുള്ളിയെ വള്ളുവനാടുമായും മലബാർ മേഖലയുമായും ബന്ധിപ്പിക്കുന്ന പാലമാണിത്. കൊണ്ടാഴി പഞ്ചായത്തിലെ കൊണ്ടാഴി വില്ലേജിനെയും തിരുവില്വാമല പഞ്ചായത്തിലെ കണിയാർകോട് വില്ലേജിനെയും ബന്ധിപ്പിച്ച് ഗായത്രിപ്പുഴയ്ക്കു കുറുകെയാണു പാലം നിർമിച്ചത്. കിഫ്ബി പദ്ധതിയിൽ ഉൾപ്പെടുത്തി സ്ഥലമേറ്റെടുക്കൽ ഉൾപ്പെടെ 33.14 കോടി രൂപയാണ് പാലം നിർമാണത്തിന് അനുവദിച്ചത്. പുഴയ്ക്കു കുറുകെയുള്ള പ്രധാന പാലം, കുത്താന്പുള്ളി ഭാഗത്തെ അനുബന്ധ റോഡിൽ വരുന്ന വയഡക്ട് പാലം, ജലസേചന കനാലിനു കുറുകെയുള്ള ചെറിയ പാലം എന്നിവയും പാലത്തിന്‍റെ അപ്രോച്ച് റോഡുമാണു പദ്ധതിയിലുള്ളത്. വയഡക്ട് പാലത്തിന്‍റെയും മൈനർ കനാൽ പാലത്തിന്‍റെയും നിർമാണം ആദ്യഘട്ടത്തിൽതന്നെ പൂർത്തിയായിരുന്നു. പുഴയ്ക്കു കുറുകെയുള്ള പ്രധാന പാലത്തിന് 11 മീറ്റർ വീതിയും 155.74 മീറ്റർ നീളവുമുണ്ട്. 12 മീറ്ററാണ് അപ്രോച്ച് റോഡിന്‍റെ വീതി. യു.ആർ. പ്രദീപ് എംഎൽഎ ആയിരിക്കെ 2017-18 കാലഘട്ടത്തിലാണ് കിഫ്ബിയിൽനിന്ന് 19 കോടി രൂപ അനുവദിക്കുകയും ടെൻഡർ നടപടികളാരംഭിക്കുകയും ചെയ്തത്. പിന്നീട് കെ. രാധാകൃഷ്ണൻ മന്ത്രിയായിരിക്കെ നടപടികൾ വേഗത്തിലാക്കി. 1.606 ഹെക്ടർ ഭൂമിയാണു പാലത്തിനായി ഏറ്റെടുത്തത്. നഷ്ടപരിഹാരത്തുക 6.27 കോടി രൂപ പാലം നിർമാണത്തിനുമുന്പ് കൈമാറി ചരിത്രം സൃഷ്ടിക്കുകയും ചെയ്തു. നിലവിൽ ഇരുഭാഗത്തെയും അപ്രോച്ച് റോഡിൽ ആദ്യഘട്ട ഡിബിഎം ടാറിംഗ് നടത്തി. പ്രധാന പാലത്തിന്‍റെ അവസാന സ്ലാബ് വാർക്കലും കഴിഞ്ഞദിവസം പൂർത്തിയായി. ഇപ്പോൾ പാലത്തിന്‍റെ ഹാൻഡ് റെയിലുകളുടെ നിർമാണം നടന്നുവരികയാണെന്നും നിലവിൽ ടാർ ചെയ്ത ഭാഗത്ത് എസി ടാറിംഗ് താമസിയാതെ നടത്തുമെന്നും കെആർഎഫ്ബിഐ അസി. എക്സിക്യൂട്ടീവ് എൻജിനീയർ ഇ.ഐ. സജിത് പറഞ്ഞു.

ഓടിക്കൊണ്ടിരുന്ന സ്കൂട്ടറിനു തീപിടിച്ചു; യാത്രക്കാരൻ രക്ഷപ്പെട്ടു

ചെറുതുരുത്തി: ഓടിക്കൊണ്ടിരുന്ന സ്കൂട്ടറിനു തീപിടിച്ച് പൂർണമായും കത്തി നശിച്ചു. യാത്ര ചെയ്തിരുന്ന പാഞ്ഞാൾ സ്വദേശി സുബ്രഹ്മണ്യൻ (50) പരിക്കേൽക്കാതെ രക്ഷപെട്ടു. ഇന്നലെ രാവിലെ ആറരയ്ക്ക് ഷൊർണൂർ കുളപ്പുള്ളി മെറ്റൽ ഭാഗത്ത് ഭാര്യയെ കൊണ്ടാക്കി തിരിച്ചുവരുന്നതിനിടെയാണ് ചെറുതുരുത്തി സെന്‍ററിൽ സുബ്ര ഹ്മണ്യൻ സഞ്ചരിച്ചിരുന്ന സ്കൂട്ടറിൽ നിന്ന് പുക ഉയരുകയും കത്തുകയും ചെയ്തത്. ഉടനെ വാഹനം നിർത്തി സുബ്രഹ്മണ്യൻ ചാടിയിറങ്ങിയതിനെ തുടർന്ന് പരിക്കേൽകാതെ രക്ഷപ്പെട്ടു. നാട്ടുകാർ നോക്കിനിൽക്കെയാണ് ബൈക്ക് പൂർണമായി കത്തിനശിച്ചത്. ചെറുതുരുത്തി പോലീസ് സംഭവസ്ഥലത്തെത്തി. ഷൊർണൂർ അഗ്നിരക്ഷാസേന സ്ഥലത്തെത്തി തീയണച്ചു. പെട്രോൾ ടാങ്ക് പൊട്ടിത്തെറിക്കുമോ എന്ന ഭയം കൊണ്ടാണ് രക്ഷാപ്രവർത്തനത്തിന് ശ്രമിക്കാതിരുന്നതെന്ന് നാട്ടുകാർ പറയുന്നു.

സഭയെ സർക്കാരുകൾ അവഗണിക്കുന്നു: അതിരൂപത പാസ്റ്ററൽ കൗണ്‍സിൽ

തൃശൂർ: കത്തോലിക്കാസമുദായം കാലങ്ങളായി അനുഭവിക്കുന്ന നിരവധിപ്രശ്നങ്ങളിൽ കേന്ദ്ര-സംസ്ഥാന സർക്കാരുകൾ തുടരുന്ന അവഗണനയിലും നിസംഗതയിലും തൃശൂർ അതിരൂപത പാസ്റ്ററൽ കൗണ്‍സിൽ പ്രതിഷേധിച്ചു. ജെ.ബി. കോശി കമ്മീഷൻ, വിദ്യാഭ്യാസ അവകാശങ്ങളിലുള്ള കടന്നുകയറ്റം, വന്യജീവി ആക്രമണം, കടലോരമേഖലകളിലെ പ്രതിസന്ധികൾ, മുനന്പം വിഷയം, മതപരിവർത്തന നിരോധനനിയമത്തിന്‍റെ മറവിലുള്ള ആക്രമണങ്ങൾ, ക്രൈസ്തവസംഭാവനകളുടെ തമസ്കരണം എന്നിവയിലുള്ള സഭയുടെ പരാതികളും ഉത്കണ്ഠകളും ബധിരകർണങ്ങളിലാണു പതിക്കുന്നതെന്നു യോഗം വിലയിരുത്തി. ഇക്കാര്യത്തിൽ സമുദായാംഗങ്ങളിലുള്ള കടുത്ത അസംതൃപ്തിയും വേദനയും അധികാരികളെ അറിയിക്കാനും ശക്തമായ പ്രചാരണ - പ്രതികരണ പരിപാടികൾക്കു രൂപംനൽകാനും യോഗം തീരുമാനിച്ചു. അതിരൂപത പാസ്റ്ററൽ കൗണ്‍സിൽ യോഗം ആർച്ച്ബിഷപ് മാർ ആൻഡ്രൂസ് താഴത്ത് ഉദ്ഘാടനം ചെയ്തു. സഹായമെത്രാൻ മാർ ടോണി നീലങ്കാവിൽ അധ്യക്ഷനായി. "പ്രത്യാശയുടെ തീർഥാടകർ' എന്ന വിഷയത്തിൽ ഫാ. ദിൽജോ ഒലക്കേങ്കിൽ, "സമുദായ ശാക്തീകരണം' എന്ന വിഷയത്തിൽ പ്രഫ. കെ.എം. ഫ്രാൻസിസ് എന്നിവർ ക്ലാസ് നയിച്ചു. ജോയിന്‍റ് സെക്രട്ടറി എൽസി വിൻസന്‍റ് പ്രവർത്തന റിപ്പോർട്ടും എ.ഡി. ഷാജു ഫൊറോനകളിലെ ചർച്ചാറിപ്പോർട്ടും അവതരിപ്പിച്ചു. വികാരി ജനറാൾമാരായ മോണ്‍. ജോസ് കോനിക്കര, മോണ്‍. ജെയ്സണ്‍ കൂനംപ്ലാക്കൽ, ചാൻസലർ ഫാ. ഡൊമിനിക്ക് തലക്കോടൻ, പാസ്റ്ററൽ കൗണ്‍സിൽ സെക്രട്ടറി ജോഷി വടക്കൻ എന്നിവർ പ്രസംഗിച്ചു. അഡ്വ. അജി വർഗീസ് പ്രമേയം അവതരിപ്പിച്ചു.

വാട്ടർ എഫിഷ്യന്‍റ് തൃശൂർ സമർപ്പണം നാളെ മുഖ്യമന്ത്രി നിർവഹിക്കും

തൃശൂർ: സംസ്ഥാനത്ത് ആദ്യമായി ശുദ്ധജലം കാര്യക്ഷമതയോടെ ഗുണഭോക്താക്കളിലേക്ക് എത്തിക്കാനുള്ള വാട്ടർ എഫിഷ്യന്‍റ് തൃശൂരിന്‍റെ (വെറ്റ്) സമർപ്പണം നാളെ രാവിലെ 11.30നു കോർപറേഷൻ അങ്കണത്തിൽ മുഖ്യമന്ത്രി പിണറായി വിജയൻ നിർവഹിക്കുമെന്ന് മേയർ എം.കെ. വർഗീസ് പത്രസമ്മേളനത്തിൽ പറഞ്ഞു. പീച്ചി ഡാമില്‍നിന്നുള്ള ട്രീറ്റ് ചെയ്ത വെള്ളം തേക്കിന്‍കാട് മൈതാനിയിലെ ഓവര്‍ഹെഡ് ടാങ്കിലെത്തിച്ച് വിതരണം ചെയ്യുന്നത് ഓണ്‍ലൈനിലാക്കി എവിടെനിന്നുവേണമെങ്കിലും കാണാവുന്നതും യഥാസമയം പരിശോധിച്ച് പോരായ്മകള്‍ കണ്ടെത്തി പരിഹരിക്കാനാകുന്നതുമാണ് വെറ്റ് പദ്ധതി. ജലത്തിന്‍റെ വരവിൽ അളവുകുറയുന്നതും ലൈനില്‍ ലീക്ക് ഉണ്ടാകുന്നതും അനധികൃതമായി ജലമെടുക്കുന്നതും ഈ സംവിധാനംവഴി ഉടനടി പരിഹരിക്കാനാകും. സംസ്ഥാനത്ത് ആദ്യമായാണ് ഇത്തരമൊരു വാട്ടര്‍ എഫിഷ്യന്‍റ് പദ്ധതി വിഭാവനംചെയ്തു നടപ്പാക്കുന്നത്. 5.59 കോടി രൂപ അമൃത് പദ്ധതിയില്‍ ഉള്‍പ്പെടുത്തി പൂര്‍ത്തീകരിച്ച പ്രവൃത്തി യുഎല്‍സിസിയാണു കോര്‍പറേഷനുവേണ്ടി നിർവഹിച്ചിട്ടുള്ളത്. ഉദ്ഘാടനച്ചടങ്ങിൽ മന്ത്രിമാരായ അഡ്വ.കെ. രാജന്‍, എം.ബി. രാജേഷ്, കേന്ദ്രസഹമന്ത്രി സുരേഷ് ഗോപി, ജില്ലാ കളക്ടര്‍ അര്‍ജുന്‍ പാണ്ഡ്യന്‍ തുടങ്ങിയവരും പങ്കെടുക്കും. 4,000 സ്മാര്‍ട്ട് മീറ്ററുകള്‍, ലോറാവാൻ സംവിധാനം, ജലത്തിന്‍റെ ഗുണനിലവാരം ഓണ്‍ലൈനായി പരിശോധിക്കുന്നതിനുള്ള സംവിധാനം തുടങ്ങിയവ ഒരുക്കാൻ അമൃത് 2.0 പദ്ധതിയില്‍ ഉള്‍പ്പെടുത്തി വെറ്റ് 2.0 എന്ന പ്രവൃത്തികൂടി കോര്‍പറേഷന്‍ വിഭാവനം ചെയ്തിട്ടുണ്ടെന്നും മേയർ എം.കെ. വർഗീസ് പറഞ്ഞു.

ഓപ്പറേഷൻ ഗ്രേ ഹണ്ട്: അറസ്റ്റിലായത് 218 പ്രതികൾ

തൃശൂർ: തൃശൂർ റൂറൽ പോലീസ് നടപ്പാക്കിയ ഓപ്പറേഷൻ ഗ്രേ ഹണ്ടിൽ ഈ മാസം ഒന്നു മുതൽ 12 വരെ 218 പേരെ അറസ്റ്റ് ചെയ്തു. ജില്ലയിലെ വിവിധ കേസുകളിൽ കോടതിയിൽ ഹാജരാകാതെ മുങ്ങി നടക്കുന്ന ജാമ്യമില്ലാ വകുപ്പ് പ്രകാരമുള്ള വാറണ്ട് പുറപ്പെടുവിച്ച പ്രതികളെയും, ദീർഘകാലം കോടതിയിൽ ഹാജരാകാതെ മുങ്ങി നടക്കുന്ന പിടികിട്ടാപ്പുള്ളി വാറണ്ടുള്ള പ്രതികളെയും പിടികൂടുന്നതിനായി തൃശൂർ റൂറൽ എസ് പി ബി.കൃഷ്ണകുമാറിന്‍റെ നിർദേശപ്രകാരം തൃശൂർ റൂറൽ പോലീസ് ആണ് സ്പെഷ്യൽ ഡ്രൈവായി ഓപ്പറേഷൻ ഗ്രേ ഹണ്ട് നടത്തിയത്. കോടതി പിടികിട്ടാപ്പുള്ളികളായി പ്രഖ്യാപിച്ച ജാമ്യമില്ലാ വാറണ്ടുള്ള 16 പ്രതികളെയും, കോടതിയുടെ ശിക്ഷാവിധി അനുസരിക്കാതെ മുങ്ങിനടന്നിരുന്ന ജാമ്യമില്ലാ വാറണ്ടുള്ള അഞ്ചു പ്രതികളെയും, ജാമ്യമില്ലാ വാറണ്ടിൽ ഹാജരാകാതെ മുങ്ങിനടന്നിരുന്ന മറ്റ് 197 പ്രതികളെയുമാണ് അറസ്റ്റ് ചെയ്തത്. ഇവരെ വിവിധ കോടതികളിൽ ഹാജരാക്കിയത്. കൈപ്പമംഗലത്തുനിന്ന് 32 പേരെയും ഇരിങ്ങാലക്കുടയിൽനിന്ന് 17 പേരെയും കാട്ടൂരിൽനിന്ന് 11 പ്രതികളെയും പിടികൂടി. ആളൂർ-4, അന്തിക്കാട്-5, അതിരപ്പള്ളി- 7, ചാലക്കുടി- 16, കൊടകര- 6, ചേർപ്പ്- 20, വെള്ളിക്കുളങ്ങര- 4, കൊരട്ടി- 13, മാള- 22, വാടാനപ്പിള്ളി- 6, വലപ്പാട്- 10, പുതുക്കാട്- 12, കൊടുങ്ങല്ലൂർ- 19, മതിലകം- 14 എന്നിങ്ങനെയാണ് ബാക്കി അറസ്റ്റ്. ചാലക്കുടി ഡിവൈഎസ്പി പി.സി. ബിജുകുമാർ, കൊടുങ്ങല്ലൂർ ഡിവൈഎസ്പി വി.കെ. രാജു, ഇരിങ്ങാലക്കുട ഡിവൈഎസ്പി കെ.ജി. സുരേഷ് എന്നിവരുടെ നേതൃത്വത്തിൽ അതാത് സ്റ്റേഷനുകളിലെ ഇൻസ്പെക്ടർമാരാണ് പ്രതികളെ പിടികൂടിയത്.

ലോക് അദാലത്തിൽ ആറായിരത്തോളം കേസുകൾ തീർപ്പാക്കി

തൃശൂർ: ജില്ലാ നിയമസേവന അഥോറിറ്റി ലോക് അദാലത്തിൽ ആറായിരത്തോളം കേസുകൾ തീർപ്പാക്കി. ജില്ലയിലെ മജിസ്‌ട്രേറ്റ് കോടതികളിൽ കെട്ടിക്കിടന്ന പിഴയൊടുക്കി തീർക്കാവുന്ന കേസുകൾ, എംഎസിടി കേസുകൾ, ബാങ്ക്, സിവിൽ കേസുകൾ, മറ്റു വിവിധ കേസുകൾ എന്നിവയിലൂടെ 22 കോടിയോളം രൂപയുടെ വ്യവഹാരങ്ങളാണു തീർപ്പാക്കിയത്. പ്രിൻസിപ്പൽ ജില്ലാ ജഡ്ജി പി.പി. സൈതലവി, ജില്ലാ നിയമസേവന അഥോറിറ്റി സെക്രട്ടറി, സബ് ജഡ്ജി സരിത രവീന്ദ്രൻ എന്നിവർ അദാലത്തിനു നേതൃത്വംനൽകി. എംഎസിടി ജഡ്ജി സി.ആർ. രവിചന്ദർ, സെക്കൻഡ് അഡീഷണൽ ജില്ലാ ജഡ്ജി കെ.എം. രതീഷ് കുമാർ, റിട്ടയേർഡ് ജില്ലാ ജഡ്ജി പി.എസ്. അനന്തകൃഷ്ണൻ, റിട്ട. ജില്ലാ ജഡ്ജി കെ. രവീന്ദ്രബാബു, സെക്കൻഡ് അഡീഷണൽ സബ് ജഡ്ജി കെ.എം. ശ്രീദേവി, പ്രിൻസിപ്പൽ മുൻസിഫ് ആൻമേരി കുരിയാക്കോസ് മണലേൽ എന്നിവർ പരാതികളിൽ തീർപ്പുകല്പിച്ചു.

പവനൻ അവാർഡ് വൈശാഖന്

തൃശൂർ: കേരള യുക്തിവാദി സംഘത്തിന്‍റെ പവനൻ സെക്യുലർ അവാർഡിന് കഥാകൃത്ത് വെെശാഖനെ തെരഞ്ഞെടുത്തു. 10,000 രൂപയും പ്രശ്സതിപത്രവും ഫലകവും അടങ്ങുന്നതാണ് അവാർഡ്. കൂരിപ്പുഴ ശ്രീകുമാർ, അഡ്വ. കെ.എൻ. അനിൽ കുമാർ, ഗംഗൻ അഴീക്കോട്, അഡ്വ. രാജഗോപാൽ വാകത്താനം, ടി.കെ. ശക്തിധരൻ എന്നിവരടങ്ങുന്ന കമ്മിറ്റിയാണ് അവാർഡ് ജേതാവിനെ തെരഞ്ഞെടുത്തത്. 22 ന് രാവിലെ 10 ന് സാഹിത്യ അക്കാദമിയിൽ നടക്കുന്ന പവനപർവം അനുസ്മരണത്തിൽ ഹൈക്കോടതി ജഡ്ജ് വി.ജി. അരുണ്‍ ഉദ്ഘാടനവും അവാർഡ് ദാനവും നിർവഹിക്കും. മുൻമന്ത്രി കെ.പി. രാജേന്ദ്രൻ പ്രശ്സതിപത്രം സമർപ്പിക്കും. പത്രസമ്മേളനത്തിൽ ടി.കെ. ശക്തിധരൻ, കെ.എസ്. സത്താർ, കെ.എസ്. സുധാകരൻ എന്നിവർ പങ്കെടുത്തു.

മെഡിക്കൽ കോളജിനോടുള്ള അവഗണന തുടർക്കഥയാകുന്നുവെന്ന് കോൺഗ്രസ്

മുളങ്കുന്നത്തുകാവ്: തൃശൂർ ഗവൺമെന്‍റ് മെഡിക്കൽ കോളജിനോടുള്ള സർക്കാരിന്‍റെ സമീപനത്തിന്‍റെ ഏറ്റവുമൊടുവിലത്തെ ഉദാഹരണമാണു ഹൃദയരോഗികളുടെ ദുരവസ്ഥയെന്നു കെപിസിസി സെക്രട്ടറിയും ആശുപത്രി വികസന സമിതി അംഗവുമായ രാജേന്ദ്രൻ അരങ്ങത്ത്. കാർഡിയോളജി, ന്യൂറോളജി, ഗ്യാസ്ട്രോളജി, യൂറോളജി, റേഡിയോളജി വിഭാഗങ്ങളിലടക്കം ഡോക്ടർമാരുടെയും മറ്റു ജീവനക്കാരുടെയും കുറവുനികത്താൻ സർക്കാർ തയാറായിട്ടില്ല. ഹൃദയ ശസ്ത്രക്രിയ വിഭാഗത്തിൽ പരിചയമുള്ള ടെക്നീഷ്യന്മാരില്ലാത്തതിനാൽ പാവപ്പെട്ട രോഗികളുടെ ശസ്ത്രക്രിയ മുടങ്ങുന്ന അവസ്ഥയാണ്. ഒഴിവുകൾ നികത്താൻ സർക്കാർ തയാറാകണമെന്നും രാജേന്ദ്രൻ അരങ്ങത്ത് ആവശ്യപ്പെട്ടു. വിഷയത്തിൽ അടിയന്തര ഇടപെടൽ ആവശ്യപ്പെട്ട് മുഖ്യമന്ത്രിക്കും സംസ്ഥാന മനുഷ്യാവകാശ കമ്മീഷനും കത്തയച്ചു.

രക്തദാനക്യാമ്പ് നടത്തി

ചാലക്കുടി: മർച്ചന്‍റ്സ് യൂത്ത് വിംഗിന്‍റെ നേതൃത്വത്തിൽ സെന്‍റ് ജെയിംസ് ഹോസിപിറ്റലുമായി സഹകരിച്ച് രക്തദാനക്യാമ്പ് നടത്തി. യൂത്ത്‌വിംഗ് പ്രസിഡന്‍റ് ലിന്‍റോ തോമസിന്‍റെ അധ്യക്ഷതയിൽ ചേർന്ന യോഗം സെന്‍റ് ജെയിംസ് ഹോസ്പിറ്റൽ ഡയറക്ടർ റവ.ഡോ. ആന്‍റു ആലപ്പാടൻ ഉദ്ഘാടനം ചെയ്തു. കേരള വ്യാപാരി വ്യവസായി ഏകോപനസമിതി ജില്ലാ ജനറൽ സെക്രട്ടറി എൻ.ആർ. വിനോദ്കുമാർ മുഖ്യപ്രഭാഷണം നടത്തി. മർച്ചന്‍റ്സ് അസോസിയേഷൻ പ്രസിഡന്‍റ് ജോയ് മൂത്തേടൻ ആമുഖപ്രഭാഷണം നടത്തി. അസോസിയേഷൻ ജനറൽ സെക്രട്ടറി ബിനു മഞ്ഞളി, ട്രഷറര്‍ ഷൈജു പുത്തൻപുരക്കൽ, ടി.ബി. ബിനു, ചന്ദ്രൻ കൊളത്താപ്പിള്ളി, എം.ഡി. ഡേവിസ്, എൻ.എ. ഗോവിന്ദൻകുട്ടി, ഡേവിസ് വെളിയത്ത്, റെയ്സൺ ആലുക്ക, ബിജു മാളക്കാരൻ, ആന്‍റോ മേനാച്ചേരി, ആന്‍റോ എരിഞ്ഞേരി, ഇ.ടി. ബഷീർ, വനിതാവിംഗ് ജില്ലാ ട്രഷറര്‍ ഷൈന ജോർജ്, വനിതാ‌വിംഗ് പ്രസിഡന്‍റ് സിന്ധു ബാബു, സെക്രട്ടറി നീബ രാജേഷ്, ട്രഷറര്‍ സിനി സന്തോഷ് എന്നിവർ പ്രസംഗിച്ചു.

കുഴിക്കാട്ടുശേരിയിൽ എട്ടാമിടം തിരുനാൾ ഇന്ന്

കുഴിക്കാട്ടുശേരി: വിശുദ്ധ മറിയം ത്രേസ്യ - ധന്യൻ ഫാ. ജോസഫ് വിതയത്തിൽ തീർത്ഥാടന കേന്ദ്രത്തിൽ വിശുദ്ധ മറിയം ത്രേസ്യയുടെ തിരുനാളിന്‍റെ എട്ടാമിടം ഇന്നു നടക്കും. കുടുംബങ്ങളുടെ മധ്യസ്ഥയായ വിശുദ്ധയുടെ തിരുനാളിന്‍റെ എട്ടാമിടദിനത്തിൽ രാവിലെ 10. 30 ന് ആഘോഷമായ ദിവ്യബലി, പ്രദക്ഷിണം, തിരുശേഷിപ്പ് വണക്കം എന്നീ തിരുക്കർമങ്ങൾക്ക് ഫാ. ജോസഫ് ഗോപുരം മുഖ്യകാർമികനാകും. തിരുനാളിനുള്ള ഒരുക്കങ്ങൾ പൂർത്തിയായി. ഇരിങ്ങാലക്കുട രൂപത വികാരി ജനറാൾ മോൺ. ജോളി വടക്കൻ ചെയർമാനായി കമ്മിറ്റികൾ പ്രവർത്തിക്കുന്നുണ്ട്. തീർഥാടന‌കേന്ദ്രം റെക്ടർ ഫാ. ജോൺ കവലക്കാട്ട്, പ്രമോട്ടർ ഫാ. സെബാസ്റ്റ്യൻ അരിക്കാട്ട്, ഹോളി ഫാമിലി സന്യാസിനി സമൂഹത്തിന്‍റെ സുപ്പീരിയർ ജനറൽ മദർ ആനി കുര്യാക്കോസ് സിഎച്ച് എഫ്, അഡ്മിനിസ്ട്രേറ്ററും ജനറൽ കൺവീനറുമായ സിസ്റ്റർ എൽസി സേവ്യർ സിഎച്ച്എഫ്, വൈസ് പോസ്റ്റുലേറ്റർ സിസ്റ്റർ വിനയ സിഎച്ച്എഫ്, ജനറൽ കൺവീനർ സണ്ണി പഴയാറ്റിൽ എന്നിവരുടെ നേതൃത്വത്തിൽ വിവിധ കമ്മിറ്റികൾ പ്രവർത്തിച്ചുവരുന്നു.

പൂര്‍വവിദ്യാര്‍ഥി സ്നേഹസംഗമം നടത്തി

ഇരിങ്ങാലക്കുട: ഗവ. മോഡല്‍ ബോയ്സ് ഹൈസ്‌കൂളില്‍ 1984-85 കാലയളവില്‍ പഠിച്ചിരുന്ന പൂര്‍വവിദ്യാര്‍ഥികളുടെ സ്നേഹസംഗമം മുന്‍ കേരള പോലീസ് ഫുട്ബോള്‍ ടീം ക്യാപ്റ്റനും പോ ലീസ് കമാന്‍ഡന്‍റുമായ സി.പി. അശോകന്‍ കേക്ക് മുറിച്ച് ഉദ് ഘാടനം ചെയ്തു. വിജയ് പാറയില്‍ അധ്യക്ഷത വഹിച്ചു. വിദ്യാധരന്‍, ടെല്‍സണ്‍ കോട്ടോളി, യൂസഫ്, രാധാകൃഷ്ണന്‍, ദിനേഷ്കുമാര്‍, ഡോ. സാജു മാമ്പിള്ളി, രവി ബോംബെ എന്നിവര്‍ പ്രസംഗിച്ചു. സമ്മേളനത്തില്‍ കേരള പോലീസില്‍നിന്നു വിരമിക്കുന്ന സന്തോഷ് ട്രോഫി താരം കൂടിയായ സി.പി. അശോകനെ ആദരിച്ചു.

സന്നദ്ധരക്തദാന ക്യാമ്പ്

കൊടകര: സഹൃദയ കോളജ് ഓഫ് അഡ്വാന്‍സ്ഡ് സ്റ്റഡീസിലെ എന്‍എസ്എസ് യൂണിറ്റിന്‍റെ നേതൃത്വത്തില്‍ ലോകരക്തദാന ദിനാചരണത്തിന്‍റെ ഭാഗമായി സന്നദ്ധ രക്തദാന ക്യാമ്പ് സംഘടിപ്പിച്ചു. തൃശൂര്‍ ഐഎംഎ ബ്ലഡ് ബാങ്കിന്‍റെ സഹകരണത്തോടെ നടന്ന രക്തദാന ക്യാമ്പ് കോളജ് എക്‌സിക്യൂട്ടീവ് ഡയറക്ടര്‍ റവ. ഡോ. ഡേവിസ് ചെങ്ങിനിയാടന്‍ ഉദ്ഘാടനം ചെയ്തു. പ്രിന്‍സിപ്പല്‍ ഡോ. കെ.എല്‍. ജോയ്, ഐഎംഎ ബ്ലഡ് ബാങ്ക് ടെക്‌നിക്കല്‍ സൂപ്പര്‍വൈസര്‍ ടി.എസ്.സുരേഷ് ബാബു, ഐഎംഎ ബ്ലഡ് ബാങ്ക് മെഡിക്കല്‍ ഓഫീസര്‍ ഡോ. പ്രദീപ്കുമാര്‍, സ്റ്റുഡന്‍റ് കോ-ഓഡിനേറ്റര്‍ അര്‍ജുന്‍‌കൃഷ് ണ എന്നിവര്‍ സംസാരിച്ചു. എന്‍എസ്എസ് യൂണിറ്റിനെ സന്നദ്ധ രക്തദാന രംഗത്തെ മികച്ച പ്രവര്‍ത്തനത്തിനുള്ള അവാര്‍ഡ് നല്‍കി തൃശൂര്‍ വൈഎംസിഎ ആദരിച്ചു.

പഠനോപകരണവിതരണം നടത്തി

കൊരട്ടി: കോൺഗ്രസ്‌ കൊരട്ടി മണ്ഡലം കമ്മിറ്റിയുടെ നേതൃത്വത്തിൽ അർഹരായ വിദ്യാർഥികൾക്ക് പഠനോപകരണങ്ങൾ വിതരണം ചെയ്തു. പഞ്ചായത്തിലെ 19 വാർഡുകളെ 6 മേഖലകളായി തിരിച്ച് 250 കുട്ടികൾക്കു പഠനോപകരണങ്ങൾ വിതരണം ചെയ്യുന്ന പദ്ധതി സനീഷ്കുമാർ ജോസഫ് എംഎൽഎ ഉദ്ഘാടനം ചെയ്തു. മണ്ഡലം പ്രസിഡന്‍റ് അഡ്വ. ആൽബിൻ പൗലോസ് അധ്യക്ഷത വഹിച്ചു. ഗ്രാമ പഞ്ചായത്ത് അംഗങ്ങളായ വർഗീസ് പയ്യപ്പിള്ളി, ഗ്രേസി സ്കറിയ, പോൾസി ജിയോ, മണ്ഡലം ഭാരവാഹികളായ ജോഷി വല്ലൂരാൻ, സച്ചിൻ രാജ്, വി.കെ. കൃഷ്ണൻ, ബിജോയ്‌ പാപ്പച്ചൻ, ജോമി തോമസ്, ബൈജു മുള്ളൻകുഴി എന്നിവർ പ്രസംഗിച്ചു. കൊടകര: മർച്ചന്‍റ്സ് അസോസിയേഷന്‍റെ നേതൃത്വത്തിൽ കൊടകര ജനമൈത്രി പോലീസ് സ്റ്റേഷന്‍റെ പരിധിയിൽപെട്ട സാന്പത്തികമായി പിന്നോക്കമുള്ള വിദ്യാർഥികൾക്ക് സ്കൂൾ ബാഗുകൾ, കുട, നോട്ട്ബുക്കുകൾ വിതരണം ചെയ്തു. എസ്എച്ച്ഒ സി.ഐ. ദാസ് ഏറ്റുവാങ്ങി. കൊടകര മർച്ചന്‍റ്സ് അസോസിയേഷൻ പ്രസിഡന്‍റ് ഷാജി ജോസഫ്, ജനറൽ സെക്രട്ടറി ബാബു ജോർജ്, യൂത്തുവിംഗ് പ്രസിഡന്‍റ് സിന്‍റോ പുതുമ എന്നിവർ പ്രസംഗിച്ചു. കൊടകര പോലീസ് അംഗങ്ങളായ ഷീബ, സിപിഒ സജു, ബേബി, അജി എന്നിവർ പങ്കെടുത്തു. ചാലക്കുടി: ദളിത് കോൺഗ്രസ്‌ ബ്ലോക്ക്‌ കമ്മിറ്റിയുടെ നേതൃത്വത്തിൽ എസ്‌സി - എസ്‌ടി കുട്ടികൾക്കുള്ള പഠനോപകരണ വിതരണവും ലഹരി വിരുദ്ധ ക്ലാസും നടത്തി. സനീഷ്കുമാർ ജോസഫ് എംഎൽഎ ഉദ്ഘാടനം ചെയ്തു. ദളിത് കോൺഗ്രസ് ബ്ലോക്ക് പ്രസിഡന്‍റ് ശശി വട്ടേക്കാട് അധ്യക്ഷത വഹിച്ചു. എക്സൈസ് അസി. ഇൻസ്പെക്ടർ കെ. കെ. രാജു ലഹരിവിരുദ്ധ ക്ലാസ് നയിച്ചു. ബ്ലോക്ക് പഞ്ചായത്ത് പ്രസിഡന്‍റ് വേണു കണ്ടരുമഠത്തിൽ, ദളിത് കോൺഗ്രസ് ജില്ലാ പ്രസിഡന്‍റ് സന്തോഷ് ഐത്താടൻ, കോൺഗ്രസ് സംസ്ഥാന ജനറൽ സെക്രട്ടറി എം.കെ. രാജേഷ്‌ കുമാർ, ഡിസിസി ജനറൽ സെക്രട്ടറി കെ. ജെയിംസ് പോൾ, സേവാദൾ സംസ്ഥാന ജനറൽ സെക്രട്ടറി ബാബു ജോസഫ് പുത്തനങ്ങാടി, സുലോചന രാജൻ, ദളിത് കോൺഗ്രസ് ജില്ലാ സെക്രട്ടറിമാരായ കെ.കെ. രവി, രാജ്കുമാർ സിത്താര, ദളിത് കോൺഗ്രസ് മണ്ഡലം പ്രസിഡന്‍റ് കുമാരൻ വെട്ടിയാട്ടിൽ, പ്രിയ മംഗലശേരി എന്നിവർ പ്രസംഗിച്ചു. മേലൂർ: സർവീസ് സഹകരണ ബാങ്കിന്‍റെ ആഭിമുഖ്യത്തിൽ എസ്എസ്എൽസി, പ്ലസ് ടു പരീക്ഷകളിൽ മുഴുവൻ വിഷയങ്ങൾക്കും എ പ്ലസ് നേടിയ ബാങ്ക് സഹകാരികളുടെ മക്കളെ വിദ്യാഭ്യാസ പുരസ്കാരങ്ങൾ നൽകി ആദരിച്ചു. ചടങ്ങിനോടനുബന്ധിച്ച് പഠനോപകരണങ്ങളുടെ വിതരണവും നടന്നു. ജില്ല പഞ്ചായത്ത് പ്രസിഡന്‍റ് വി.എസ്. പ്രിൻസ് ഉദ് ഘാടനം ചെയ്തു. ബാങ്ക് പ്രസിഡ‌ന്‍റ്് ഇ.കെ. കൃഷ്ണൻ അധ്യക്ഷനായി. ഭരണസമിതി അംഗങ്ങളായ മധു തൂപ്രത്ത്, എൻ.ജി. സന്തോഷ്കുമാർ, പൗലോസ് തെക്കൻ, ജോമോൻ നെറ്റിക്കാടൻ, ഫ്രാൻസിസ് മേനാച്ചേരി, സന്ധ്യ ബാബു, സിന്ധു രാധാകൃഷ്ണൻ, സിസിലി തോമസ്, ബാങ്ക് സെക്രട്ടറി എം. സിന്ധു എന്നിവർ പ്രസംഗിച്ചു.

കൊരട്ടി, മുരിങ്ങൂർ ദേശീയപാത: ഗ്രാമീണറോഡുകൾ തകരുന്നു; കാടുകുറ്റിയിൽ പ്രതിഷേധ ധർണ

കാടുകുറ്റി: ദേശീയപാതയിലെ ഗതാഗതക്കുരുക്ക് ഒഴിവാക്കാൻ വാഹനങ്ങൾ വഴിതിരിച്ചുവിടുന്നതുമൂലം കാടുകുറ്റി പഞ്ചായത്തിലെ ഗ്രാമീണ - പൊതുമരാമത്ത് റോഡുകൾ തകരുന്നുവെന്നും ഭാരവണ്ടികളും എയർബസുകളും ഇതിലുടെ കടത്തിവിടുന്നതിന് നിയന്ത്രണം ഏർപ്പെടുത്തണമെന്നും ആവശ്യപ്പെട്ട് ജനകീയ സമിതിയുടെ ആഭിമുഖ്യത്തിൽ പഞ്ചായത്ത് കാര്യാലയത്തിനു മുന്നിൽ പ്രതിഷേധ ധർണ. വാട്ടർ അഥോറിറ്റി കുഴിച്ച കുഴികളിൽ രാത്രികാലങ്ങളിൽ വലിയ വാഹനങ്ങളുടെ ടയറുകൾ താഴുന്നതായും ഇന്‍റർനെറ്റ്, കേബിൾ ടി.വി, സർവീസ് വയറുകൾ എന്നിവ വാഹനങ്ങളിൽ കുടുങ്ങി പൊട്ടിവീഴുന്നതായും സമരക്കാർ ചൂണ്ടിക്കാട്ടി. ഇതുസംബന്ധിച്ച് പ്രദേശവാസികൾ ഒപ്പിട്ട പരാതി ഗ്രാമപഞ്ചായത്ത് പ്രസിഡന്‍റിനും സെക്രട്ടറിക്കും കൈമാറി. ജയൻ ജോസഫ് പട്ടത്ത് ധർണ ഉദ്ഘാടനം ചെയ്തു. മുൻ ഗ്രാമപഞ്ചായത്ത് പ്രസിഡന്‍റ് തോമസ് ഐ. കണ്ണത്ത് മുഖ്യപ്രഭാഷണം നടത്തി. സിയോൺ ധ്യാനകേന്ദ്രം ഡയറക്ടർ ഫാ. ജിജോ, പയസ് പാറയിൽ, ഷിബു വട്ടോലി, എം.ആർ.ഡേവീസ്, ബിനോജ് കെ.ജോസ്, ലോനച്ചൻ അമ്പൂക്കൻ, ജോർജ് പാറയിൽ, മാൽക്കം എന്നിവർ പ്രസംഗിച്ചു.

അശാസ്ത്രീയ നിർമാണത്തിനെതിരെ കൊരട്ടിയിൽ ജനകീയകൂട്ടായ്മ

കൊരട്ടി: ദേശീയപാത ചിറങ്ങര, കൊരട്ടി, മുരിങ്ങൂർ എന്നിവിടങ്ങളിലെ അടിപ്പാത - മേൽപ്പാല നിർമാണത്തിലെ അശാസ്ത്രീയതക്കെതിരെയും മെല്ലെപ്പോക്കിനെതിരെയും എൽഡിഎഫ് കൊരട്ടി പഞ്ചായത്ത് കമ്മിറ്റിയുടെ നേതൃത്വത്തിൽ പ്രതിഷേധ കൂട്ടായ്മ സംഘടിപ്പിച്ചു. വിഷയത്തോട് സ്ഥലം എംപിയും എം എൽഎയും ഗുരുതരമായ കൃത്യവിലോപവും അനാസ്ഥയും പുലർത്തുന്നതായി യോഗത്തിൽ ആരോപണമുയർന്നു. പ്രതിഷേധ ജനകീയ കൂട്ടായ്മ സിപി എം ചാലക്കുടി ഏരിയ സെക്രട്ടറി കെ.എസ്. അശോകൻ ഉദ്ഘാടനം ചെയ്തു. സിപിഐ മണ്ഡലം കമ്മിറ്റി അംഗം ടി.വി. രാമകൃഷ്ണൻ അധ്യക്ഷത വഹിച്ചു. ഗ്രാമപഞ്ചായത്ത് പ്രസിഡന്‍റ്് പി.സി. ബിജു, എൽഡിഎഫ് നേതാക്കളായ ഡെന്നീസ് കെ. ആന്‍റണി, കെ.പി. തോമസ്, കെ.എ. ജോജി, ജോർജ് വി. ഐനിക്കൽ, ഡേവിസ് മാമ്പ്ര, എ.എ. ബിജു, കെ.കെ. രാജൻ, അഡ്വ. കെ.ആർ. സുമേഷ് എന്നിവർ പ്രസംഗിച്ചു.

മതിലകം ഗ്രാമപഞ്ചായത്ത് വിദ്യാഭ്യാസ അവാർഡ് വിതരണം

പള്ളിവളവ്: മതിലകം ഗ്രാമപഞ്ചായത്തിന്‍റെ ആഭിമുഖ്യത്തിൽ വിദ്യാഭ്യാഅവാർഡ് വിതരണം സംഘടിപ്പിച്ചു. എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയവർക്കാണ് വിദ്യാഭ്യാസ അവാർഡ് നൽകി അനുമോദിച്ചത്. ഇ.ടി. ടൈസൺ എംഎൽഎ ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്‍റ്് സീനത്ത് ബഷീർ അധ്യക്ഷത വഹിച്ചു. എംഇഎസ് അസ്മാബി കോളജ് പൊളിറ്റിക്കൽ സയൻസ് വിഭാഗം മേധാവി ഡോ. സനന്ദ് സദാനന്ദൻ മുഖ്യപ്രഭാഷണം നടത്തി. ജില്ലാ പഞ്ചായത്തംഗം സുഗത ശശിധരൻ, ബ്ലോക്ക് പഞ്ചായത്ത് വൈസ് പ്രസിഡന്‍റ് ഹഫ്സ ഒഫൂർ, പഞ്ചായത്ത് വൈസ് പ്രസിഡന്‍റ്് ടി.എസ്. രാജു, പഞ്ചായത്ത്‌ ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ സുമതി സുന്ദരൻ, വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ പ്രിയ ഹരിലാൽ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ എം.കെ. പ്രേമാനന്ദൻ, പഞ്ചായത്ത്‌ സെക്രട്ടറി കെ.എസ്. രാമദാസ്, പഞ്ചായത്തംഗങ്ങൾ തുടങ്ങിയവർ പങ്കെടുത്തു. വിരമിച്ച അധ്യാപകരായ ടി.എസ്. സജീവൻ, വി.കെ. മുജീബ് റഹ്മാൻ എന്നിവരെ എംഎൽഎ ആദരിച്ചു.

എലിഞ്ഞിപ്ര കുടുംബാരോഗ്യകേന്ദ്രത്തിൽ ഭീഷണിയായി വൻമരങ്ങൾ

എലിഞ്ഞിപ്ര: കുടുംബാരോഗ്യകേന്ദ്രത്തിനു മുന്നിൽ വൻമരങ്ങൾ അപകടഭീഷണി ഉയർത്തു ന്നു. സാധാരണക്കാരായ രോഗികൾ ചികിത്സക്കായി ആശ്രയിക്കുന്ന ആതുരാലയത്തിൽ ദിനംപ്രതി നൂറുകണക്കിന് രോഗികളാണു ചികിത്സയ്ക്കുവേണ്ടി എത്തുന്നത്. മരങ്ങളുടെ വിഷയം ആശുപത്രി വികസനസമിതിയിൽ പലവട്ടം ഉന്നയിക്കപ്പെട്ടിട്ടുള്ളതാണ്. എന്നാൽ മരങ്ങൾ മുറിക്കുന്നതിലെ നിയമപ്രശ്നങ്ങളുടെ പേരിൽ അധികൃതർ ഇക്കാര്യത്തിൽ അലംഭാവം പുലർത്തുകയാണെന്നും അടിയന്തരമായി മരച്ചില്ലകൾ മുറിച്ചുമാറ്റിയില്ലെങ്കിൽ അപകടം എപ്പോൾ വേണമെങ്കിലും സംഭവിക്കാമെന്നും ബ്ലോക്ക് പഞ്ചായത്ത് പ്രസിഡന്‍റ് വേണു കണ്ടരുമഠത്തിൽ ചൂണ്ടിക്കാട്ടി.

സെന്‍റ്് ജോസഫ് കോളജില്‍ നേത്രദാന ബോധവത്കരണ കര്‍മപരിപാടിക്കു തുടക്കം

ഇരിങ്ങാലക്കുട: ലയണ്‍സ് ക്ലബ് ഓഫ് സെന്‍റ് ജോസഫ് കോളജ് ഇരിങ്ങാലക്കുടയുടെ നേതൃത്വത്തില്‍ സെന്‍റ്് ജോസഫ് കോളജ് എന്‍എസ്എസ് യൂണിറ്റിന്‍റെ സഹകരണത്തോടെ നേത്രദാന ബോധവത്കരണ കര്‍മപരിപാടിക്കു തുടക്കംകുറിച്ചു. നേത്രദാന ബോധവത്കരണ കര്‍മസേന അംഗത്വ ഫോം വിദ്യാര്‍ഥികള്‍ സോണ്‍ ചെയര്‍മാന്‍ അഡ്വ. ജോണ്‍ നിധിന്‍ തോമസിനു കൈമാറി. നൂറ് വിദ്യാര്‍ഥികള്‍ ഉള്‍പ്പെടുന്ന കര്‍മസേന രൂപീകരിച്ചു. അഡ്വ. ജോണ്‍ നിധിന്‍ തോമസ് നേത്രദാന ബോധവത്കരണ പരിപാടി ഉദ്ഘാടനം ചെയ്തു. എന്‍എസ്എസ് പ്രോഗ്രാം ഓഫീസര്‍ വീണ സാനി അധ്യക്ഷത വഹിച്ചു. ഹെല്‍ന വര്‍ഗീസ് സ്വാഗതവും മാളവിക നന്ദിയും പറഞ്ഞു. ലയണ്‍സ് ക്ലബ് കോ-ഓര്‍ഡിനേറ്റര്‍ മഞ്ജു പ്രതിജ്ഞവാചകം ചൊല്ലിക്കൊടുത്തു. എന്‍എസ്എസ് പ്രോഗ്രാം ഓഫീസര്‍ ഉര്‍സുല, ഹൃദ്യ എന്നിവര്‍ പ്രസംഗിച്ചു.

ദേശീയപാത 66 അപകടപാത; എടക്കഴിയൂരിൽ കെണി

ചാവക്കാട്: നിർമാണത്തിനിടയിൽ വിള്ളൽവീണ ദേശീയപാത 66ലെ കുഴികൾ വാഹനങ്ങൾക്കും കാൽനടക്കാർക്കും ഭീഷണിയായി. എടക്കഴിയൂര്‍ സലഫി മസ്ജിദിനു വടക്ക് സര്‍വീസ് റേഡിനോട് ചേര്‍ന്ന് രൂപപ്പെട്ട വലിയ കുഴി അപകടം ക്ഷണിച്ചു വരുത്തുന്ന കെണിയായി. കാന നിര്‍മാണം വന്നെത്തിനില്‍ക്കുന്ന സ്ഥലത്താണ് കുഴി. സമീപത്തെ ട്രാസ് ഫോര്‍മറും കുഴിയിലെ വെള്ളകെട്ടില്‍ അകപെട്ടിരിക്കുകയാണ്. അപകട സൂചനയായി ദേശീയപാത അധികൃതര്‍ ഒരു പിവിസി പൈപ്പ് കുത്തിവെച്ചതല്ലാതെ മറ്റു സുരക്ഷാ വലയങ്ങളൊന്നുമില്ല. ആയിരക്കണക്കിനു ചെറുതും വലുതുമായ വാഹനങ്ങളാണ് ഇതിലെ കടന്നുപോകുന്നത്. സീതിസാഹിബ് ഹയര്‍ സെക്കൻഡറി സ്‌കൂളിലെ നൂറുകണക്കിനു വിദ്യാര്‍ഥികളും, മറ്റു ജനങ്ങളും ഇതുവഴിയാണ് പോകുന്നത്. മഴശക്തമായാല്‍ കുഴിയും, റോഡും, വെള്ളകെട്ടാല്‍ തിരിച്ചറിയാന്‍ കഴിയാത്ത അവസ്ഥയാണ്. കാന നിര്‍മാണത്തിന്‍റെ കൂര്‍ത്ത കമ്പികളും ഉയര്‍ന്നു നില്‍ക്കുന്നതു ഭീഷണിയാണ് .

ദേശീയപാതയിലെ കുഴി; വീണ്ടും ലോറി മറിഞ്ഞു

പുന്നയൂർക്കുളം: അകലാട് മൂന്നയിനിയിൽ ദേശീയപാതയിലെ കുഴിയിൽ ചാടി മരം കയറ്റി വന്ന ലോറി ചെരിഞ്ഞു. മൂന്നയിനി റഹ്മത്ത് ഹാളിന് സമീപമാണ് സംഭവം. ദേശീയപാത 66ലെ സർവീസ് റോഡുകളുടെ വശങ്ങളിലെ കുഴിയടയ്ക്കാത്തതാണ് അപകടത്തിന് കാരണം. കുഴിയടയ്ക്കണമെന്ന് നിരവധിതവണ നാട്ടുകാർ ആവശ്യപ്പെട്ടതിനെ തുടർന്ന് കഴിഞ്ഞദിവസം കുഴികളിൽ കമ്പനി ഇട്ട മണൽ കനത്ത മഴയിൽ ഒലിച്ചുപോയി വെള്ളം നിറഞ്ഞ് റോഡും കുഴികളും തിരിച്ചറിയാൻ കഴിയാൻ കഴിയാത്ത വിധമായി. കുഴിയറിയാതെ വാഹനങ്ങൾ കുഴിയിൽ ചാടി ഭാരം കയറ്റിയ വാഹനങ്ങൾ അപകടത്തിൽപ്പെടുന്നത് നിത്യസംഭവമായി. ഒടുവിൽ നടന്ന അപകടം ഡ്രൈവറുടെയും നാട്ടുകാരുടേയും സമയോചിതമായ ഇടപെടലിനെതുടർന്ന് വാഹനം മറിയാതെ വൻ അപകടത്തിൽ നിന്നും രക്ഷപ്പെട്ടു. തുടർന്ന് മൂന്ന് ജെസിബി ഉപയോഗിച്ച് കുഴിയിൽ നിന്നും കയറ്റി.

കല്ലൂരിലെ അപകടവളവില്‍ കാര്‍ കാനയിലേക്ക് മറിഞ്ഞു

തൃക്കൂർ: കല്ലൂരിലെ അപകട വളവില്‍ നിയന്ത്രണംവിട്ട കാര്‍ കാനയിലേക്ക് മറിഞ്ഞു. അപകടത്തില്‍ ഡ്രൈവര്‍ പരിക്കേല്‍ക്കാതെ രക്ഷപ്പെട്ടു. ഇന്നലെ രാവിലെ പത്തരയോടെയായിരുന്നു അപകടം. കല്ലൂര്‍ നായരങ്ങാടി ഭാഗത്തുനിന്ന് വന്നിരുന്ന കാര്‍ നിയന്ത്രണം വിട്ട് കാനയിലേക്ക് മറിയുകയായിരുന്നു. കാറിന്‍റെ ഒരു ഭാഗം കാനയില്‍ വീണ നിലയിലാണ്. കല്ലൂര്‍ സ്വദേശി സഞ്ചരിച്ച കാറാണ് അപകടത്തില്‍പ്പെട്ടത്. ഈ ഭാഗത്തെ റോഡിന്‍റെ അശാസ്ത്രീയതയാണ് അപകടങ്ങള്‍ക്ക് കാരണമെന്ന ആക്ഷേപമുണ്ട്.നിരവധി അപകടങ്ങളാണ് അടുത്തകാലത്തായി ഇവിടെ സംഭവിച്ചത്. മുന്‍പുണ്ടായ അപകടത്തില്‍ തകര്‍ന്ന കലുങ്കിന്‍റെ സംരക്ഷണഭിത്തി ഇതുവരെ പുനര്‍നിര്‍മിച്ചിട്ടില്ല. കേന്ദ്ര റോഡ് ഫണ്ട് ഉപയോഗിച്ച് നിര്‍മിച്ച ജില്ലയിലെ ആദ്യത്തെ റോഡാണിത്. കൊടുംവളവുള്ള ഈ ഭാഗത്ത് റോഡ് ചെരിഞ്ഞ രീതിയില്‍ നിര്‍മിച്ചതാണ് അപകടങ്ങള്‍ക്ക് കാരണമെന്ന ആക്ഷേപമുണ്ട്. റോഡിന്‍റെ അപാകത പരിഹരിക്കണമെന്നാവശ്യപ്പെട്ട് തൃക്കൂര്‍ പഞ്ചായത്തംഗം സലീഷ് ചെമ്പാറ അധികൃതര്‍ക്ക് പരാതി നല്‍കിയെങ്കിലും യാതൊരു നടപടിയും ഇതുവരെയുണ്ടായിട്ടില്ലെന്നും പറയുന്നു.

പുതുക്കാട് സിഗ്‌നലില്‍ വാനിന് പുറകില്‍ ലോറി ഇടിച്ചു

പുതുക്കാട്: ദേശീയപാത പുതുക്കാട് സിഗ്‌നലില്‍ നിര്‍ത്തിയിട്ടിരുന്ന വാനിന് പുറകില്‍ ലോറി ഇടിച്ചു കയറി. ഇന്നലെ ഉച്ചയ്ക്ക് 12നായിരുന്നു അപകടം. തിരുവനന്തപുരത്ത് നിന്നും പാലക്കാട് പോവുകയായിരുന്ന മിനി വാനിന് പുറകില്‍ ലോറി ഇടിക്കുകയായിരുന്നു. അങ്കമാലിയില്‍ നിന്നു പട്ടിക്കാട് പോവുകയായിരുന്നു ലോറി. ആര്‍ക്കും പരിക്കില്ല. ഇതിനിടെ ഗതാഗതക്കുരുക്കില്‍പെട്ട ടോറസ് ലോറി മുന്‍പിലുണ്ടായിരുന്ന കാറിലിടിച്ച് അപകടം സംഭവിച്ചിരുന്നു. അപകടത്തെ തുടര്‍ന്ന് ദേശീയപാതയില്‍ അരമണിക്കൂറോളം ഗതാഗതം തടസം ഉണ്ടായി.

അമലയിൽ മെറിറ്റ് ഡേ

തൃശൂർ: അമല മെഡിക്കൽ കോളജ് പ്രിൻസിപ്പലായിരുന്ന ഡോ. എം.ജെ. സിറിയക്കിന്‍റെ സ്മരണാർഥം നടത്തിയ മെറിറ്റ് ഡേയിൽ സബ് കളക്ടർ അഖിൽ മേനോൻ മുഖ്യാതിഥിയായി. അമല ജോയിന്‍റ് ഡയറക്ടർമാരായ ഫാ. ആന്‍റണി പെരിഞ്ചേരി, ഫാ. ഡെൽജോ പുത്തൂർ, ഫാ. ഷിബു പുത്തൻപുരയ്ക്കൽ അസോസിയേറ്റ് ഡയറക്ടർ ഫാ. ആന്‍റണി മണ്ണുമെൽ, വൈസ് പ്രിൻസിപ്പൽ ഡോ. ദീപ്തി രാമകൃഷ്ണൻ, നഴ്സിംഗ് സ്കൂൾ പ്രിൻസിപ്പൽ സിസ്റ്റർ മിനി, എച്ച്ആർ മാനേജർ അഡ്വ. ഫിൽജോ വർഗീസ്എന്നിവർ പ്രസംഗിച്ചു. വിവിധ മേഖലകളിൽ മികവുതെളിയിച്ച നൂറോളം വിദ്യാർഥികളെയും റാങ്ക് ജേതാക്കളെയും സ്റ്റാഫ് അംഗങ്ങളെയും ആദരിച്ചു.

സിപിഎം നാട്ടിക ഏരിയ കമ്മിറ്റി ഓഫീസ് ഉദ്ഘാടനം 16ന്

തൃപ്രയാർ: നിർമാണം പൂർത്തിയാക്കിയ സിപിഎം നാട്ടിക ഏരിയ കമ്മിറ്റി ഓഫിസായ സിഒ പൗലോസ് മാസ്റ്റർ മന്ദിരം 16 ന് വൈകീട്ട് നാലിന് മുഖ്യമന്ത്രി പിണറായി വിജയൻ ഉദ്ഘാടനം ചെയ്യുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. തുടർന്ന് തൃപ്രയാർ ടിഎസ് ജിഎ സ്റ്റേഡിയത്തിൽ പൊതുസമ്മേളനം നടക്കും. സിപിഎം സംസ്ഥാന സെക്രട്ടേറിയറ്റ് അംഗം പി.കെ. ബിജു, ജില്ലാ സെക്രട്ടറി കെ.വി. അബ്‌ദുൾ ഖാദർ, എ.സി. മൊയ്ത‌ീൻ, എം.എം. വർഗീസ്, മന്ത്രി ആർ. ബിന തുടങ്ങിയവർ പങ്കെടുക്കും. പത്ത് സെന്‍റ് സ്ഥലത്ത് 6000 സ്ക്വയർഫീറ്റിലാണ് അത്യാധുനിക സൗകര്യങ്ങളോടെയുള്ള കെട്ടിടം നിർമിച്ചിട്ടുള്ളത്. മെയിൻ ഹാൾ, വർഗ ബഹുജന സംഘടന ഹാൾ, ചെത്ത് തൊഴിലാളി യൂണിയൻ ഓഫീസ്, ലക്ഷ്മി സൈഗാൾ കാരുണ്യ കേന്ദ്രം ഓഫീസ്, ഏരിയ സെക്രട്ടറിയുടെ ഓഫീസ്, ഏരിയ കമ്മിറ്റി യോഗം ചേരുവാനുള്ള ഹാൾ, മീഡിയ റൂം, രണ്ട് വിശ്രമ റൂം, മുകളിലത്തെ നിലയിൽ 200 പേർക്ക് ഇരിക്കാവുന്ന ഹാൾ എന്നിങ്ങനെയാണ് സജ്ജമായിട്ടുള്ളത്. ഇതിനോട് ചേർന്നാണ് മൂന്ന് സെന്‍റ്് സ്ഥലത്ത് കെ.വി. പീതാംബരൻ സ്‌മാരക ലൈബ്രറി മന്ദിരം കൂടി ഉയരുന്നത്. പത്രസമ്മേളനത്തിൽ സംഘാടക സമിതി കൺവീനർ എം.എ. ഹാരീസ് ബാബു, ചെയർമാൻ പി.എം. അഹമ്മദ്, അഡ്വ. വി.കെ. ജ്യോതി പ്രകാശ്, കെ.ആർ. സീത, ടി.എസ.് മധുസൂദനൻ എന്നിവർ പങ്കെടുത്തു.

തിരുനാൾ ആഘോഷിച്ചു

പഴുവിൽ: പഴുവിൽ സെന്‍റ്് ആന്‍റണീസ് ഫൊറോന ദേവാലയത്തിൽ ഇടവക മധ്യസ്ഥനായ വിശുദ്ധ അന്തോണീസിന്‍റെ തിരുനാൾ ആഘോഷിച്ചു. രാവിലെ വിശുദ്ധകുർബാന, കൂടുതുറക്കൽ, ആഘോഷമായ പാട്ടുകുർബാന, ലദീഞ്ഞ്, നൊവേന, പള്ളിചുറ്റി പ്രദക്ഷിണം, ബാൻഡ്് വാദ്യം, നേർച്ചഊട്ട് എന്നിവ ഉണ്ടായിരുന്നു. രാവിലെ നടന്ന ആഘോഷമായ തിരുനാൾ പാട്ടുകുർബാനയ്ക്ക് ചെന്നായ്പ്പാറ തിരുഹൃദയാശ്രമം ഡയറക്ടർ ഫാ. ജോഷി കണ്ണമ്പുഴ മുഖ്യകാർമികത്വം വഹിച്ചു. കൊട്ടേക്കാട് ഫൊറോന ദേവാലയത്തിലെ അസി. വികാരി ഫാ. മിഥുൻ ചുങ്കത്ത് തിരുനാൾ സന്ദേശം നൽകി. അസി. വികാരി ഫാ. ഡേവിസ് പുലിക്കോട്ടിൽ സഹകാർമികത്വം വഹിച്ചു. ഫൊറോന വികാരി റവ. ഡോ. വിൻസെന്‍റ്് ചെറുവത്തൂർ, ഫാ. ഡേവിസ് പുലിക്കോട്ടിൽ, ടിന്‍റോ ജോസ്, ഡിനോ ദേവസി, ആന്‍റോ മേയ്ക്കാട്ടുകുളം, അനിൽ ആന്‍റണി, റിനോയ് ജോൺസൺ, അന്തോണി നാമധാരികൾ, തിരുനാൾ കമ്മറ്റി അംഗങ്ങൾ, യുവജന സംഘടകൾ, സെന്‍റ ആന്‍റണീസ് കുടുംബകൂട്ടായ്മ തുടങ്ങിയവർ പരിപാടികൾക്ക് നേതൃത്വം നൽകി.

സൂപ്രണ്ടിനെ തടഞ്ഞുവച്ച കേസ്; പ്രതികളെ വെറുതെവിട്ടു

വടക്കാഞ്ചേരി: മുളങ്കുന്നത്തുകാവ് സർക്കാർ മെഡിക്കൽ കോളജിൽ നിയമവിരുദ്ധമായും അന്യായമായും എച്ച്ഡിഎസ് ജീവനക്കാരനെ പിരിച്ചുവിട്ടതിൽ പ്രതിഷേധിച്ച് ആശുപത്രി സൂപ്രണ്ടിനെ ഓഫീസിൽ തടഞ്ഞുവച്ച കേസിൽ പ്രതികളെ വെറുതെവിട്ടു. പ്രതികളായ പുഴയ്ക്കൽ ബ്ലോക്ക് പഞ്ചായത്ത് മുൻ പ്രസിഡന്‍റും എച്ച്ഡിഎസ് എംപ്ലോയീസ് അസോസിയേഷൻ പ്രസിഡന്‍റുമായ സി.വി. കുരിയാക്കോസ്, വർക്കിംഗ് പ്രസിഡന്‍റ് പി.എസ്. ഉണ്ണികൃഷ്ണൻ എന്നിവരെ വടക്കാഞ്ചേരി ജുഡീഷ്യൽ ഫസ്റ്റ്ക്ലാസ് മജിസ്ട്രേറ്റ് നസീബ് എ അബ്ദുൽറസാക്ക് വെറുതെവിട്ടു. 2017ൽ ഡോ. ബിജു കൃഷ്ണൻ സൂപ്രണ്ടായിയിരുന്ന സമയത്താണ് കേസിനാസ്പദമായ സംഭവം ഉണ്ടായത്. പ്രതികൾക്കുവേണ്ടി അഡ്വ.ഇ കെ മഹേഷ് ഹാജരായി.

മാധവിക്കുട്ടിപുരസ്‌കാരം സമർപ്പിച്ചു

പുന്നയൂർക്കുളം: സാഹിത്യകാരി മാധവിക്കുട്ടിയുടെ പേരിൽ പുന്നയൂർക്കുളം സാഹിത്യസമിതി ഏർപ്പെടുത്തിയ പുരസ്‌കാരസമർപ്പണവും സമിതി വാർഷിക സമ്മേളനവും മന്ത്രി പി. രാജീവ് ഉദ്ഘാടനം ചെയ്തു. പ്രസിഡന്‍റ് ഉമ്മർ അറയ്ക്കൽ അധ്യക്ഷത വഹിച്ചു. പുരസ്‌്കാര ജേതാവ് സുഭാഷ് ചന്ദ്രൻ 25,000 രൂപയും പ്രശസ്തി പത്രവും ഫലകവും ഏറ്റുവാങ്ങി. സാഹിത്യനിരൂപകൻ പ്രഫ. കെ. വി. സജയ് പ്രഭാക്ഷണം നടത്തി. പഞ്ചായത്ത്‌ പ്രസിഡന്‍റ്് ജാസ്മിൻ ഷെഹീർ, സഹകരണ ബാങ്ക് പ്രസിഡന്‍റ് പി. ഗോപാലൻ, സാഹിത്യകാരൻ അബ്ദുൾ പുന്നയൂർകുളം, ടി.പി. ഉണ്ണി, ബാഹുലേയൻ താമരശേരി, കെ.ബി. സുകുമാരൻ, ഷാജൻ വാഴപ്പുള്ളി, രാജേഷ് കടാമ്പുള്ളി എന്നിവർ പ്രസംഗിച്ചു.ഗിരീശൻ ഭട്ടതിരിപ്പാട്, സജൻ കുമാർ, ബൈജുകുമാർ എന്നിവരുടെ ചിത്ര പ്രദർശനവും ഉണ്ടായിരുന്നു.

അച്ഛനെയും മുത്തശിയേയും അക്രമിച്ച കേസിൽ യുവാവ് അറസ്റ്റിൽ

കൊരട്ടി: അച്ഛനെയും മുത്തശിയേയും ആക്രമിച്ച് പരിക്കേൽപ്പിച്ച കേസിൽ സ്റ്റേഷൻ റൗഡിയും കോനൂർ പള്ളിപറമ്പിൽ ഗല്ലറ്റിന്‍റെ മകനുമായ അശ്വിനെ (23) കൊരട്ടി സിഐ അമൃത് രംഗനും സംഘവും അറസ്റ്റ് ചെയ്തു. പണം ചോദിച്ചിട്ട് കൊടുക്കാത്തതിലുള്ള വൈരാഗ്യമാണ് അശ്വിന്‍റെ അച്ചമ്മ ഗ്രേസിയെയും പിതാവ് ഗല്ലറ്റിനെയും ആക്രമിക്കാൻ കാരണം. ഗ്രേസിയുടെ പരാതിയിലാണ് കേസെടുത്തത്. നടപടിക്രമങ്ങൾക്ക് ശേഷം പ്രതിയെ കോടതിയിൽ ഹാജരാക്കി റിമാൻഡ്് ചെയ്തു. ഇയാൾക്കെതിരെ ഒരു വധശ്രമക്കേസും വീട്ടിൽ അതിക്രമിച്ച് കയറി ഭീഷണിപ്പെടുത്തിയ കേസും കൊരട്ടി സ്റ്റേഷനിലുണ്ട്. മയക്കുമരുന്ന് ഉപയോഗിച്ച രണ്ട് കേസും ഇയാൾക്കെതിരെയുണ്ട്. കൊരട്ടി സിഐ അമൃത്‌രംഗനു പുറമെ എസ്ഐമാരായ ഒ.ജി. ഷാജു, സുമേഷ്, ത്രേസ്യ, ജോയ്, സിവിൽ പോലീസ് ഓഫീസർമാരാരയ സജീഷ്കുമാർ, ദീപു എന്നിവരാണ് പ്രതിയെ അറസ്റ്റ് ചെയ്തത്.

ഉദ്ഘാടനത്തിന് കാത്തുനിൽക്കുന്നില്ല; അന്തേവാസികളുടെ സുരക്ഷയാണ് മുഖ്യം

കൊരട്ടി: തിരുമുടിക്കുന്ന് ഗാന്ധിഗ്രാം ത്വക്ക്‌രോഗാശുപത്രിയിലെ അന്തേവാസികൾ നിലവിൽ താമസിക്കുന്ന കെട്ടിടങ്ങൾ ജീർണാവസ്ഥയിലായതിനാൽ പുതുതായി നിർമിച്ച ഐപി ബ്ലോക്കിന്‍റെ ഉദ്ഘാടനത്തിന് കാത്തുനിൽക്കാതെ മാറ്റി പാർപ്പിക്കാൻ ജില്ലാ കളക്ടറുടെ അനുമതി. അന്തേവാസികളുടെ സുരക്ഷയാണ് മുഖ്യമെന്നും പുതിയ ബ്ലോക്കിലേക്ക് മാറ്റുന്നതിനാവശ്യമായ നടപടികൾ സ്വീകരിച്ച് റിപ്പോർട്ട് നൽകണമെന്നും ആവശ്യപ്പെട്ട് ആശുപത്രി സൂപ്രണ്ടിന് കളക്ടർ കത്ത് നൽകിയിട്ടുണ്ട്. കാലവർഷം കടുത്തതോടെ ചോർന്നൊലിക്കുന്ന കെട്ടിടത്തിൽ ദുരിതം പേറിയാണ് അന്തേവാസികൾ കഴിയുന്നതെന്ന് കാണിച്ച് ഗ്രാമപഞ്ചായത്തും ആശുപത്രി അധികൃതരും കളക്ടർക്ക് കത്ത് നൽകിയിരുന്നു. രണ്ടാഴ്ച മുമ്പുണ്ടായ കാറ്റിലും മഴയിലും ഇവർ താമസിക്കുന്ന കെട്ടിടത്തിന് മുകളിലേക്ക് മരം വീണിരുന്നു. 17 കോടി രൂപ വിനിയോഗിച്ച് സ്ത്രീകൾക്കും പുരുഷന്മാർക്കും പ്രത്യേകം താമസിക്കാൻ രണ്ടു ബ്ലോക്കുകളായാണ് പുതിയ ഐപി വിഭാഗം നിർമിച്ചിരിക്കുന്നത്. ആധുനിക സൗകര്യങ്ങളോടുകൂടിയ കെട്ടിടത്തിന്‍റെ നിർമാണം പൂർത്തിയായെങ്കിലും അഗ്നി സുരക്ഷാ സംവിധാനം ഇനിയും ഒരുക്കിയിട്ടില്ല. പുരുഷന്മാർക്കായി നിർമിച്ച ബ്ലോക്കിന്‍റെ ഇലക്ട്രിക്കൽ പ്രവൃത്തികൾ പൂർത്തീകരിച്ചിട്ടുണ്ട്. അവശേഷിക്കുന്ന ഭാഗത്തെ പ്രവൃത്തികൾ പൂർത്തീകരിക്കാനാണ് കാലതാമസം നേരിടുന്നത്. പുരുഷ വാർഡിലേക്ക് ഫയർ ഡിപ്പാർട്ട്മെന്‍റിൽ നിന്നും അനുവാദം വാങ്ങി താൽക്കാലികമായി പ്രവർത്തിക്കാമെന്ന എക്സിക്യൂട്ടീവ് എൻജിനീയറുടെ റിപ്പോർട്ട് പരിഗണിച്ചാണ് ഇവിടേക്ക് അന്തേവാസികള മാറ്റി പാർപ്പിക്കാൻ കളക്ടർ അനുമതി നൽകിയിരിക്കുന്നത്.

നെല്ലായിയില്‍ ലോറി കെട്ടിടത്തിന്‍റെ ബേസ്‌മെന്‍റിലേക്ക് ഇടിച്ചുകയറി

നെല്ലായി: ദേശീയപാതയിലെ നെല്ലായി ജംഗ്്ഷനില്‍ നിയന്ത്രണംവിട്ട ലോറി നിര്‍മാണം നടക്കുന്ന കെട്ടിടത്തിന്‍റെ ബേസ്‌മെന്‍റിലേക്ക് ഇടിച്ചുകയറി. ഇന്നലെ പുലര്‍ച്ചെ 4.45 ഓടെ യായിരുന്നു അപകടം. ദേശീയപാതയിലൂടെ ചാലക്കുടി ഭാഗത്തേക്ക് പോയിരുന്ന ലോറിയാണ് നെല്ലായിയില്‍ വെച്ച് ‍ നിയന്ത്രണം വിട്ടത്. തുടര്‍ന്ന് അതിവേഗ പാതയില്‍ നിന്ന് സര്‍വീസ് റോഡിലേക്ക് കടന്ന ലോറി സമീപത്ത് നിര്‍മാണം നടന്നിരുന്ന നാലു നില കെട്ടിടത്തിന്‍റെ ബേസ്‌മെന്‍റിലേക്ക് പാഞ്ഞുകയറുകയായിരുന്നു. അപകടത്തില്‍ ഡ്രൈവര്‍ക്ക് പരിക്കേറ്റു. നിര്‍മാണ സാമഗ്രികള്‍ക്ക് മുകളിലൂടെ കടന്നാണ് ലോറി ബേസ്‌മെന്‍റിലേക്ക് എത്തിയത്. കെട്ടിടത്തിനുമുന്നില്‍ നിര്‍മാണപ്രവര്‍ത്തനങ്ങള്‍ക്കായി എടുത്ത കുഴിയില്‍ ലോറി അകപ്പെടാതിരുന്നത് കൂടുതല്‍ അപകടം ഒഴിവാക്കി. അപകട സമയത്ത് സര്‍വീസ് റോഡില്‍ പ്രഭാതനടത്തത്തിനിറങ്ങിയവര്‍ ഉണ്ടായിരുന്നെങ്കിലും പരിക്കേല്‍ക്കാതെ രക്ഷപ്പെട്ടു

ലോക രക്തദാനദിനാചരണം

ചാലക്കുടി: രക്‌തദാനത്തിലൂടെ ജീവനാണ് പങ്കുവച്ചു നൽകുന്നതെന്ന് റവ. ഡോ. ആന്‍റണി വടക്കേക്കര വിസി. മുരിങ്ങൂർ ഡിംസ് മീഡിയ കോളജിൽ, ഡിംസ് സോഷ്യൽ സർവീസിന്‍റെ ആഭിമുഖ്യത്തിൽ ലോക രക്തദാനദിനാചാരണം ഉദ്ഘാടനം ചെയ്തു സംസാരിക്കുകയായിരുന്നു കോളേജ് ഡയറക്ടറായ അദ്ദേഹം. കേരളത്തിലുടനീളം രക്തദാന പ്രവർത്തനങ്ങളിൽ സജീവ സാന്നിധ്യമായ വിജിത് വിജയൻ ഈ രംഗത്തെ അറിവും അനുഭവങ്ങളും വിദ്യാർഥികളുമായി പങ്കുവച്ചു. ഇതിനോടകം അമ്പതിൽ അധികം തവണ രക്തദാനം ചെയ്ത വിജിത് വിജയനെ ചടങ്ങിൽ ആദരിച്ചു. കോളജ് പ്രിൻസിപ്പൽ ഡോ. സിനോജ് ആന്‍റണി, അധ്യാപകരായ സാഗി പോൾ, ബേബി വിൻസെന്‍റ്്, ജിജോ ജോസഫ്, യൂണിയൻ പ്രതിനിധി ലിറ്റിൽ റോസ് എന്നിവർ പ്രസംഗിച്ചു.

കൊടകര ദേശീയപാതയില്‍ ഇന്നോവകാര്‍ വിളക്കുകാലില്‍ ഇടിച്ചുതകര്‍ന്നു

കൊടകര: ദേശീയ പാതയിലെ കൊടകര ഗാന്ധിനഗറിനു സമീപം നിയന്ത്രണം വിട്ട കാര്‍ വിളക്കുകാലിലിടിച്ചു തകര്‍ന്നു. കാറിലുണ്ടായിരുന്ന അഞ്ചുയാത്രക്കാരില്‍ രണ്ടുപേര്‍ക്ക് പേര്‍ക്ക് പരിക്കേറ്റു. ഇവര്‍ കൊടകരയിലെ സ്വകാര്യ ആശുപത്രിയില്‍ ചികിത്സ തേടി. ഇന്നലെ ഉച്ചയ്ക്ക് പന്ത്രണ്ടോടെയാണ് അപകടം. ചാലക്കുടി ഭാഗത്തേക്ക് പോയിരുന്ന ഇന്നോവകാര്‍ ദേശീയപാതയിലെ കൊടകര മേല്‍പ്പാലം അവസാനിക്കുന്ന ഭാഗത്ത് വെച്ചാണ് നിയന്ത്രണം വിട്ട് പോതയോരത്തെ വിളക്കുകാലില്‍ ഇടിച്ചത്. ഇടിയുടെ ആഘാതത്തില്‍ വിളക്കുകാല്‍ ഇളകി സര്‍വിസ് റോഡിലേക്ക് വീണു. സര്‍വീസ് റോഡിലേക്ക് പാഞ്ഞുകയറിയ കാറിന്‍റെ ചക്രങ്ങള്‍ ഊരിത്തെറിച്ചു. നാട്ടുകാര്‍ ചേര്‍ന്നാണ് കാറിലുണ്ടായവരെ ആശുപത്രിയിലെത്തിച്ചത്.

മാപ്രാണം ഹോളിക്രോസില്‍ ഫുട്ബോള്‍ ലഹരി ക്യാമ്പ്

മാപ്രാണം: മാപ്രാണം ഹോളിക്രോസ് ഹയര്‍സെക്കന്‍ഡറി സ്‌കൂളില്‍ ഫുട്ബോള്‍ ലഹരിയെന്ന ക്യാമ്പ് സംഘടിപ്പിച്ചു. സന്തോഷ് ട്രോഫി കേരള ടീമിന്‍റെ കോച്ച് ഹാരി ബെന്നി ക്യാമ്പ് ഉദ്ഘാടനം ചെയ്തു. കായികാധ്യാപകന്‍ സിജോ ജോണിയുടെ നേതൃത്വത്തില്‍ നടത്തപ്പെടുന്ന ക്യാമ്പിന് സ്‌കൂള്‍ മാനേജര്‍ ഫാ. ജോണി മേനാച്ചേരി, വാര്‍ഡ് കൗണ്‍സിലര്‍ ബൈജു കുറ്റിക്കാടന്‍, പിടിഎ പ്രസിഡന്‍റ് ജ്യോതി കെ. രാമകൃഷ്ണന്‍, അസി. മാനേജര്‍ ഡിക്‌സന്‍ കാഞ്ഞൂക്കാരന്‍, പ്രിന്‍സിപ്പല്‍ പി. എ. ബാബു, ഹെഡ്‌സിസ്ട്രസ്് മജ്ഞു, സി.വി. ജോസ് എന്നിവര്‍ സംസാരിച്ചു.

സഹകരണ ബാങ്കിന്‍റെ നേതൃത്വത്തിൽ കൊരട്ടിയിൽ ഞാറ്റുവേലച്ചന്ത തുടങ്ങി

‌കൊരട്ടി: സാമൂഹ്യ പ്രതിബദ്ധതയിലൂന്നി ഒട്ടേറെ മാതൃകാപ്രവർത്തനങ്ങൾ കാഴ്ചവയ്ക്കുന്ന കൊരട്ടി സർവീസ് സഹകരണ ബാങ്കിന്‍റെ നേതൃത്വത്തിൽ ഞാറ്റുവേലച്ചന്ത ആരംഭിച്ചു. ബാങ്കിന്‍റെ റെയിൽവേ സ്റ്റേഷൻ ശാഖയോട് ചേർന്നാണ് ഒരാഴ്ച നീണ്ടുനിൽക്കുന്ന ചന്ത ഒരുക്കിയിരിക്കുന്നത്. മുൻ കൃഷിമന്ത്രി വി.എസ്. സുനിൽകുമാർ ഉദ്ഘാടനം ചെയ്തു. ബാങ്ക് പ്രസിഡന്‍റ് അഡ്വ. കെ.എ. ോജി അധ്യക്ഷനായി. മണ്ണറിവ് പൊന്നറിവ് എന്ന വിഷയത്തിൽ എൻ.കെ. തങ്കരാജ് സെമിനാർ നയിച്ചു. ഫലവൃക്ഷ തൈകൾ, പൂച്ചെടികൾ, നടീൽ വസ്തുക്കൾ, പച്ചക്കറി വിത്തുകൾ, ഗ്രോബാഗുകൾ, അഗ്രോ മെഷിനറികൾ തുടങ്ങിയവയുടെ വിപുലമായ ശേഖരമാണ് ചന്തയിൽ ഒരുക്കിയിരിക്കുന്നത്. ബ്ലോക്ക് പഞ്ചായത്ത് അംഗം സിന്ധു രവി, വാർഡ് മെമ്പർ ജെയ്നി ജോഷി, ബാങ്ക് സെക്രട്ടറി എൻ.ജി. സനിൽകുമാർ, വൈസ് പ്രസിഡന്‍റ്് എം.കെ. സുഭാഷ്, ഡയറക്ടർ ബോർഡ് അംഗം പി.ബി രാജു എന്നിവർ പ്രസംഗിച്ചു.

വീടുകയറി അക്രമിച്ച പ്രതി അറസ്റ്റില്‌

വടക്കാഞ്ചേരി: വീടുകയറി അക്രമിച്ച കേസിൽ ഒളിവിൽപോയ പ്രതിയെ വടക്കാഞ്ചേരി പോലീസ് അറസ്റ്റ് ചെയ്തു. ശ്രീരാമസേന സംസ്ഥാന ഭാരവാഹിയും കോട്ടയം മടപ്പിള്ളി സ്വദേശിയുമായ പുത്തൻപുരയ്ക്കൽ വീട്ടിൽ ആദർശ് വി.നായരെയാണ് പോലീസ് പെരുമ്പാവൂരിൽനിന്നു അറസ്റ്റ് ചെയ്തത്. സംഘടനയിൽനിന്നു വിട്ടുപോയതിന്‍റെ വിരോധത്താൽ തെക്കുംകര ഊരോക്കാട് എടവനക്കാട് സ്വദേശി രഞ്ജിത്തിനെയും കുടുംബത്തേയും വീടുകയറി ആക്രമിച്ച കേസിലാണ് ഇയാളെ അറസ്റ്റ് ചെയ്തത്. ആക്രമണത്തിൽ രഞ്ജിത്തിനും മകൾക്കും അമ്മയ്ക്കും പരിക്കേറ്റിരുന്നു. കഴിഞ്ഞവർഷം മാർച്ചിലായിരുന്നു സംഭവം. കേസിൽ മറ്റു രണ്ടു പ്രതികളെ പോലീസ് നേരത്തെ അറസ്റ്റ് ചെയ്തു. വടക്കാഞ്ചേരി സിഐ റിജിൻ എം.തോമസിന്‍റെ നേതൃത്വത്തിലുള്ള സംഘമാണ് പ്രതിയെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതിയെ റിമാന്‌ഡ്ചെയ്തു.

അരിമ്പൂരിൽ യുവാവിനെ ആക്രമിച്ച കേസിൽ രണ്ടുപേർ അറസ്റ്റിൽ

അന്തിക്കാട്: യുവാവിനെ ആക്രമിച്ച് പരിക്കേൽപ്പിച്ച കേസിൽ രണ്ടുപേർ അറസ്റ്റിൽ. വെളത്തൂർ സ്വദേശി തൃപ്പാക്കൽവീട്ടിൽ ബിനീഷ്(30), മനക്കൊടി ആശാരിമൂല സ്വദേശി കോട്ടപ്പടി വീട്ടിൽ സുരാഗ്(30) എന്നിവരെയാണ് അന്തിക്കാട് പോലീസ് അറസ്റ്റ് ചെയ്തത്. കഴിഞ്ഞ ഏപ്രിൽ 29ന് റോഡിൽവച്ച് വെളുത്തൂർ സ്വദേശി ആലങ്ങാട്ട്വീട്ടിൽ രഞ്ജിത്ത്(38)നെ ആക്രമിച്ച് പരിക്കേൽപിച്ച സംഭവത്തിലാണ് അറസ്റ്റ്. മുൻവൈരാഗ്യമാണ് ആക്രമണത്തിന് കാരണമെന്ന് പ്രതികൾ പോലിസിന് മൊഴിനൽകി. ആക്രമണത്തിൽ രഞ്ജിത്തിന്‍റെ തലയിൽ മുറിവേൽക്കുകയും വാരിയെല്ല് പൊട്ടുകയും ചെയ്തു. സംഭവത്തിനുശേഷം ഒളിവിൽ കഴിഞ്ഞിരുന്ന പ്രതികളെ കൈനൂരിൽനിന്നാണ് പോലീസ് അറസ്റ്റ് ചെയ്തത്. കോടതിയിൽ ഹാജരാക്കിയ പ്രതികളിൽ സുരാഗിനെ റിമാന്‌ഡ് ചെയ്തു. അന്തിക്കാട് പോലീസ് സ്റ്റേഷൻ സബ് ഇൻസ്പെക്ടർ കെ.എസ്. സുബിന്ദ്, സിവിൽ പോലീസ് ഓഫീസർമാരായ പ്രതീഷ്, അനീഷ്, ഫൈസൽ എന്നിവർ ചേർന്നാണ് പ്രതികളെ പിടികൂടിയത്.

നാട്ടികയിൽ വീടുകയറി ആക്രമണം: ജനൽച്ചില്ലുകളും വാഹനവും തകർത്തു

തൃപ്രയാർ: നാട്ടികയിൽ വീടിനുനേരേ ഗുണ്ടാ ആക്രമണം. നാട്ടിക സി.യു. കൃഷ്ണൻകുട്ടി റോഡിൽ കുന്നത്ത് മുരളിയുടെ വീടിനുനേരേയാണ് ആക്രമണം നടന്നത്. കാറിലെത്തിയ ആറംഗസംഘം വീടിന്‍റെ ജനൽച്ചില്ലുകൾ എറിഞ്ഞു തകർക്കുകയും വരാന്തയിലെ കസേരയും ചെടിച്ചെട്ടിയും അടിച്ചു പൊളിക്കുകയും ചെയ്തു. മുറ്റത്ത് പാർക്ക് ചെയ്തിരുന്ന ഇരുചക്രവാഹനവും കേടുവരുത്തി. ഇന്നലെ രാവിലെ 7.15 നാണ് സംഭവം. വീട്ടുകാർ പുറത്തുവന്നതോടെ സംഘം കാറിൽ രക്ഷപ്പെട്ടു. വാഹനത്തിന്‍റെ നമ്പർ തിരിച്ചറിഞ്ഞ വീട്ടുകാർ വലപ്പാട് പോലീസിൽ പരാതി നൽകി. പോലീസ് അന്വേഷണം ആരംഭിച്ചു.

ചോർന്നൊലിക്കുന്ന ഷെഡിൽ ദുരിതജീവിതവുമായി വയോധിക

ചിറ്റാട്ടുകര: ചോർന്നൊലിക്കുന്ന ഷെഡിൽ ദുരിതജീവിതം നയിക്കുകയാണ് വയോധിക. എളവള്ളി ഗ്രാമപഞ്ചായത്ത് ഒന്നാംവാർഡിൽ പോൾമാസ്റ്റർ പടിക്കുസമീപം താമസിക്കുന്ന നാലുപുരയ്ക്കൽ സാവിത്രിയും കുടുംബവുമാണ് ദുരിതജീവിതം നയിക്കുന്നത്. മഴ പെയ്താൽ സാവിത്രിയുടെ വീടിനുള്ളിൽ വെള്ളംകയറും. കാറ്റൊന്നു ശക്തമായാൽ കവുങ്ങിൻപാളിയും തകര ഷീറ്റും ഉപയോഗിച്ച് ആറുവർഷം മുമ്പ് നിർമിച്ച ഷെഡിന്‍റെ മേൽക്കൂരയിലെ ഷീറ്റും ഇളകും. ഷീറ്റ് തുരുമ്പെടുത്ത് നശിച്ചതോടെ മേൽക്കൂരയിൽ ടാർപോളിൻ ഉപയോഗിച്ചാണ് മഴവെള്ളം തടഞ്ഞുനിർത്തുന്നത്. കാലപ്പഴക്കത്താൽ ഇതും ദ്രവിച്ച അവസ്ഥയിലാണ്. വീടിന്‍റെ ചുമരുകളും കാലപ്പഴക്കത്താൽ ജീർണാവസ്ഥയിലാണ്. ഇഴജന്തുക്കളുടെ ശല്യവുമുള്ളതായി സാവിത്രി പറയുന്നു. സാവിത്രി കൂലിപ്പണിക്കാരനായ മകന്‍റെ സംരക്ഷണയിലാണ് കഴിഞ്ഞിരുന്നത്. എന്നാൽ ഒരുവർഷം മുമ്പുണ്ടായ ബൈക്കപകടത്തിൽ കാലിന് പരിക്കുപറ്റിയതിനാൽ മകന് ജോലിക്കുപോകാൻ കഴിയാത്ത അവസ്ഥയാണ്. മകനും ഭാര്യയും രണ്ട് കുഞ്ഞുങ്ങൾക്കുമൊപ്പം ചോർന്നൊലിക്കുന്ന വീട്ടിലാണ് സാവിത്രി ഇപ്പോൾ കഴിയുന്നത്. വീടിന്‍റെ ദുരവസ്ഥ പരിഹരിക്കുന്നതിന് സാവിത്രിയും കുടുംബവും മുട്ടാത്ത വാതിലുകളില്ല. വാർഡ് മെമ്പറോടും പഞ്ചായത്ത് അധികാരികളോടും ദയനീയാവസ്ഥ ബോധിപ്പിച്ചെങ്കിലും പരിഹാരമൊന്നും ആയില്ല. തന്‍റെ ദുരവസ്ഥ പരിഹരിക്കുന്നതിന് സുമാനസുകളുടെ സഹായം തേടുകയാണ് 76 കാരിയായ സാവിത്രി.

21,000 പേരുടെ കേശദാനം; അമലയിൽ വിഗ് നൽകിയത് 2,100 പേർക്ക്

തൃശൂർ: കാൻസർ മൂലം മുടി നഷ്ടമായവർക്കു സൗജന്യമായി വിഗുകൾ നിർമിച്ചുകൊടുക്കുന്ന അമല മെഡിക്കൽ കോളജ് ആശുപത്രിയുടെ പദ്ധതിയിൽ ഇതുവരെ വിഗ് നിർമിക്കാൻ മുടി നൽകിയത് ഇരുപത്തിയൊന്നായിരം പേർ. വിഗ് നിർമിച്ചുകൊടുത്തത് 2,100 പേർക്കും. 465 പുരുഷന്മാർ ഉൾപെടെ മൂന്നു മുതൽ 70 വയസു വരെയുള്ളവർ അമലയുടെ സ്നേഹക്കൂട്ടായ്മയിലേക്ക് മുടി ദാനംചെയ്തതുകൊണ്ടാണ് സൗജന്യമായി വിഗുകൾ കൊടുക്കാൻ കഴിഞ്ഞതെന്ന് ജോയിന്‍റ് ഡയറക്ടർ ഫാ. ജെയ്സണ്‍ പറഞ്ഞു. മറ്റ് ആശുപത്രികളിൽ ചികിത്സതേടുന്ന രോഗികൾക്കും അമലയിൽനിന്ന് വിഗുകൾ സൗജന്യമായി നൽകുന്നുണ്ട്. അമല ഓഡിറ്റോറിയത്തിൽ നടന്ന 37-ാമത് സൗജന്യ വിഗ് വിതരണച്ചടങ്ങിൽ മുരളി പെരുനെല്ലി എംഎൽഎ ഉദ്ഘാടനം നിർവഹിച്ചു. 200 കാൻസർ രോഗികൾക്കാണു ചടങ്ങിൽ സൗജന്യമായി വിഗ് നൽകിയത്. അമല മെഡിക്കൽ കോളജ് ഡയറക്ടർ ഫാ. ജൂലിയസ് അറയ്ക്കൽ സിഎംഐ അധ്യക്ഷത വഹിച്ചു. ജോയിന്‍റ് ഡയറക്ടർ ഫാ. ജെയ്സണ്‍ മുണ്ടൻമാണി സിഎംഐ, അമല മെഡിക്കൽ കോളജ് വൈസ് പ്രിൻസിപ്പൽ ഡോ. ദീപ്തി രാമകൃഷ്ണൻ, പത്തോളജി വിഭാഗം സീനിയർ റസിഡന്‍റ് ഡോ. ബിബി സൂസൻ എബി, വെൽനസ് വിഭാഗം മേധാവി ഡോ. സിസ്റ്റർ നാൻസി, പ്രോഗ്രാം കോഓർഡിനേറ്റർ പി.കെ. സെബാസ്റ്റ്യൻ, എം.ഡി. തോമാസ്, വി. ലിജ എന്നിവർ പങ്കെടുത്തു. കേശദാനം = സ്നേഹദാനം ക്യാന്പുകൾ സംഘടിപ്പിച്ച 30 സ്ഥാപനങ്ങളെയും മുടി നൽകിയ 51 വ്യക്തികളെയും കഴിഞ്ഞ അഞ്ചുമാസത്തിനുള്ളിൽ കേശദാനക്യാന്പ് നടത്തിയ 24 സ്ഥാപനങ്ങളെയും ആദരിച്ചു. അമല നഴ്സിംഗ് കോളജിലെ വിദ്യാർഥികളും അമല ആശുപത്രിയിലെ ജീവനക്കാരും ഉൾപ്പെടെ 51 പേർ ചടങ്ങിൽ മുടി മുറിച്ചുനൽകി.

വിദ്യാർഥികൾക്ക് ലഹരിമുക്ത കാന്പയിൻ

നെല്ലിക്കുന്ന്: സെന്‍റ് സെബാസ്റ്റ്യൻസ് ഗേൾസ് ഹൈസ്കൂളിൽ ലഹരിക്കെതിരേ ബോധവത്ക്കരണ കാന്പയിൻ നടത്തി. സ്കൂൾ പ്രിൻസിപ്പൽ സിസ്റ്റർ ദീപ ഫ്രാൻസിസ് ഉദ്ഘാടനം ചെയ്തു. പിടിഎ പ്രസിഡന്‍റ് ബിജു ജോസഫ് അധ്യക്ഷത വഹിച്ചു. ദേവമാത സ്കൂൾ അധ്യാപകനും എഴുത്തുകാരനുമായ എ.ഡി. ഷാജു ലഹരിവിമുക്തക്ലാസ് നയിച്ചു. ഡോ. അശ്വതി, സിസ്റ്റർ കീർത്തന, ബിജു ജോസഫ്, ടീനു ജോയ് എന്നിവർ വിവിധ വിഷയങ്ങളിൽ ബോധവത്ക്കരണം നടത്തി.

ഫാം ഫെഡ് തട്ടിപ്പ്: പ്രതികളുമായി തെളിവെടുപ്പു നടത്തി

ഗുരുവായൂർ: കോടികളുടെ തട്ടിപ്പുനടത്തിയ കേസിൽ ഫാം ഫെഡ് ചെയർമാൻ സി. രാജേഷ് പിള്ള, എംഡി അഖിൻ ഫ്രാൻസിസ് എന്നിവരെ ഗുരുവായൂർ ടെമ്പിൾ പോലീസ് കസ്റ്റഡിയിൽവാങ്ങി തെളിവെടുപ്പുനടത്തി. കിഴക്കേനടയിൽ റെയിൽവേ മേൽപ്പാലത്തിന് സമീപമുള്ള ബ്രാഞ്ചിൽ എത്തിച്ചാണ് തെളിവെടുപ്പ് നടത്തിയത്. ഇവിടെനിന്ന് തട്ടിപ്പുമായി ബന്ധപ്പെട്ട രേഖകളും സ്ഥാപനത്തിന്‍റെ വിവിധ സീലുകളും പോലീസ് കണ്ടെടുത്തു. പ്രതികളെ ഇന്ന് എറണാകുളം കിന്‌ഫ്രപാർക്കിലെ റീജണൽ ഓഫീസിൽ എത്തിച്ചു കൂടുതൽ തെളിവെടുപ്പ് നടത്തും. തെളിവെടുപ്പ് പൂർത്തിയാക്കിയശേഷം തിങ്കളാഴ്ച ചാവക്കാട് ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയിൽ ഹാജരാക്കും. നിക്ഷേപ തട്ടിപ്പ് നടത്തിയതിന് ഫാം ഫെഡിനെതിരെ 68 പരാതികളാണ് ടെമ്പിൾ പോലീസിലുള്ളത്. 19 കോടി രൂപയുടെ തട്ടിപ്പ് നടന്നതായാണ് ഇതുവരെയുള്ള പരാതി. ഗുരുവായൂർ ബ്രാഞ്ചിൽമാത്രം ആയിരത്തിലധികം അംഗങ്ങളുണ്ട്. ഇരുപതിനായിരംരൂപ മുതൽ മൂന്നരക്കോടി വരെയാണ് നിക്ഷേപം നടത്തിയിരിക്കുന്നത്. കേസുമായി ബന്ധപ്പെട്ട് കൂടുതൽ അന്വേഷണത്തിന്‍റെ ഭാഗമായി ഡയറക്ടർമാരായ രാജേഷ് പിള്ളയുടെ ഭാര്യ ധന്യ, അഖിൻ ഫ്രാൻസിന്‍റെ ഭാര്യ ഷിനി എന്നിവരേയും കേസിൽ പ്രതിചേർക്കുമെന്ന് ടെമ്പിൾ എസ്എച്ച്ഒ ജി. അജയകുമാർ പറഞ്ഞു. ഇവരുടെ മുൻകൂർ ജാമ്യവ്യവസ്ഥ അവസാനിക്കുന്ന മുറയ്ക്ക് പോലീസ് അറസ്റ്റ് രേഖപ്പെടുത്തും. ആവശ്യമെങ്കിൽ മറ്റ് രണ്ട് ഡയറക്ടർമാരെയും കേസിൽ ഉൾപ്പെടുത്തും.

വെറ്ററിനറി സർവകലാശാല മണ്ണുത്തി കാന്പസിൽ വിവിധ സ്ഥാപനങ്ങളുടെ ഉദ്ഘാടനം 16ന്

തൃശൂർ: കേരള വെറ്ററിനറി ആൻഡ് അനിമൽ സയൻസസ് സർവകലാശാലയുടെ മണ്ണുത്തിയിലെ വർഗീസ് കുര്യൻ ഇൻസ്റ്റിറ്റ്യൂട്ട് ഓഫ് ഡയറി ആൻഡ് ഫുഡ് ടെക്നോളജി കാന്പസിൽ റഫറൽ അനലിറ്റിക്കൽ ഡയഗ്നോസ്റ്റിക് ലബോറട്ടറി, പെണ്‍കുട്ടികൾക്കുള്ള ഹോസ്റ്റൽ, ഓഡിറ്റോറിയം എന്നിവയുടെ ഉദ്ഘാടനം 16നു മുഖ്യമന്ത്രി പിണറായി വിജയൻ നിർവഹിക്കുമെന്നു സംരംഭകത്വവിഭാഗം ഡയറക്ടർ പ്രഫ. ഡോ. ടി.എസ്. രാജീവ് പത്രസമ്മേളനത്തിൽ പറഞ്ഞു. രാവിലെ 10.30നു നടക്കുന്ന ചടങ്ങിൽ മന്ത്രി ജെ. ചിഞ്ചുറാണി അധ്യക്ഷത വഹിക്കും. മന്ത്രി കെ. രാജൻ മുഖ്യാതിഥിയാകും. പത്രസമ്മേളനത്തിൽ വെറ്ററിനറി ആൻഡ് അനിമൽ സയൻസസ് ഡീൻ പ്രഫ. ഡോ. കെ. അല്ലി, വികെഐഡിഎഫ്ടി ഡീൻ പ്രഫ. ഡോ. എസ്.എൻ. രാജാകുമാർ, പ്രഫ. ഡോ. പി.ടി. സുരാജ്, അസിസ്റ്റന്‍റ് പ്രഫ. ഡോ. ദീപ ജോളി എന്നിവരും പങ്കെടുത്തു.

ഹെസെക്കിയേലിന് മാർപാപ്പയുടെ അനുഗ്രഹം

പുത്തൂർ: ലെയോ പതിനാലാമൻ മാർപാപ്പയുടെ അനുഗ്രഹം ഏറ്റുവാങ്ങി ഒരുവയസുകാരൻ ഹെസെക്കിയേൽ ഷീജൻ. പുത്തൂർ ഓലിക്കൽ ഷീജൻ - ലിൻസി ദമ്പതികളുടെ അഞ്ചാമത്തെ മകനാണ് ഹെസെക്കിയേൽ. മേയ് 28ന് സെന്‍റ്് പീറ്റേഴ്സ് സ്ക്വയറിലെ പേപ്പൽ ഓഡിയൻസിൽ വിശ്വാസികള ആശീർവദിച്ച് മാർപാപ്പ നീങ്ങുന്നതിനിടെയാണ് ഹെസേക്കയിലിനെ ഇരുകൈകളുംവച്ച് അനുഗ്രഹിച്ചത്. തിങ്ങിനിറഞ്ഞ ജനക്കൂട്ടത്തിനിടയിൽനിന്ന് മാർപാപ്പയുടെ അംഗരക്ഷകർ ഹെസേക്കിയലിനെ എടുത്തുയർത്തി മാർപാപ്പയുടെ അടുത്തെത്തിക്കുകയായിരുന്നു. കത്തോലിക്കസഭ പത്രത്തിന്‍റെ മരിയൻ തീർഥാടനത്തിന്‍റെ ഭാഗമായാണു ഷീജനും കുടുംബവും വത്തിക്കാനിൽ എത്തിയത്.

സഹൃദയ എംബിഎ കോളജില്‍ ഇന്‍റര്‍നാഷണല്‍ കോണ്‍ഫറന്‍സ് സംഘടിപ്പിച്ചു

കൊടകര: സഹൃദയ ഇന്‍സ്റ്റിറ്റ്യൂട്ട് ഓഫ് മാനേജ്‌മെന്‍റ് സ്റ്റഡീസില്‍ രണ്ടാമത് ഇന്‍റര്‍നാഷണല്‍ കോണ്‍ഫറന്‍സ് ഓണ്‍ മാനേജ്‌മെന്‍റ്് റിസര്‍ച്ച് "സഹൃദയസിംസ്' എന്ന പേരില്‍ ആഗോളതല ദ്വിദിന ശില്പശാല സംഘടിപ്പിച്ചു. മലേഷ്യയിലെ സെയിറ്റോ യൂണിവേഴ്‌സിറ്റി വൈസ് ചാന്‍സലര്‍ ഡോ. വിനീത ഗുപ്തന്‍ കോണ്‍ഫറന്‍സ് ഉദ്ഘാടനം ചെയ്തു. കോണ്‍ഫറന്‍സ് ചെയര്‍ അതിഥിയായി മുംബൈ എന്‍എം‌ ഐഎംഎസ് പ്രൊവോസ്റ്റ് ആന്‍ഡ് ഡീന്‍ ഡോ. ജസ്റ്റിന്‍ പോള്‍ സന്നിഹിതനായിരുന്നു. ടാറ്റാ കണ്‍സള്‍ട്ടന്‍സി സര്‍വീസസ് സ്ട്രാറ്റജിക് ഇനിഷ്യേറ്റീവ് കേരള ഹെഡ് സുജാത മാധവ്ചന്ദ്രന്‍, കോയമ്പത്തൂര്‍ കാരുണ്യ യൂണിവേഴ്‌സിറ്റി സ്‌കൂള്‍ ഓഫ് മാനേജ്‌മെന്‍റ്് പ്രൊഫസര്‍ ആന്‍ഡ് ഡീന്‍ ഡോ. ജെ. ക്ലെമന്‍റ് എന്നിവർ പ്രസംഗിച്ചു. കോണ്‍ഫറന്‍സിനോടനുബന്ധിച്ച് നടന്ന പ്ലീനറി സെഷനില്‍ അമൃത്‌സര്‍ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് മാനേജ്‌മെന്‍റ് മാര്‍ക്കറ്റിംഗ് അസി. പ്രൊഫസറും മീഡിയ ആന്‍ഡ് പിആര്‍ ചെയര്‍പേഴ്‌സനുമായ അശ്വതി അശോകന്‍ അജിത, മലേഷ്യന്‍ യൂണിവേഴ്‌സിറ്റി സിഇഒ ഡോ. സെല്‍വരാജ് ഒയ്യന്‍ പിള്ളൈ ഒയ്യന്‍ എന്നിവര്‍ പങ്കെടുത്തു. കോണ്‍ഫറന്‍സില്‍ പങ്കെടുത്ത റിസര്‍ച്ച് സ്‌കോളേഴ്‌സി ന്‍റെ തെരഞ്ഞെടുത്ത പേപ്പര്‍ എബ്‌സ്ട്രാക്ടുകള്‍ കോണ്‍ഫറന്‍സ് പ്രൊസീഡിംഗ്സ് ബുക്ക് ഓഫ് എബ്‌സ്ട്രാക്‌സ് എന്ന പേരിലുള്ള പുസ്തകം വിശിഷ്ടാതിഥികള്‍‌ചേര്‍ന്ന് പ്രകാശനം ചെയ്തു. കോണ്‍ഫറന്‍സിന്‍റെ ഭാഗമായി സിംസ് ലൈബ്രറി ബുക്ക് ഫെസ്റ്റ് സംഘടിപ്പിച്ചു. സിംസ് എക്‌സിക്യൂട്ടീവ് ഡയറക്ടര്‍ റവ.ഡോ. ജിനോ ജോണി മാളക്കാരന്‍, ഡയറക്ടര്‍ ഡോ. ധന്യ അലക്‌സ്, റിസര്‍ച്ച് കോ-ഓര്‍ഡിനേറ്റര്‍ റവ. ഡോ. ബിനോയ്‌ തോമസ് എന്നിവര്‍ കോണ്‍ഫറന്‍സിനു നേതൃത്വം നല്‍കി.

നന്മയുടെ ഹൃദയതാളവുമായി സാന്ത്വനമേളം

കെ.കെ. അർജുനൻ അയ്യന്തോൾ: മഴ പെയ്യുന്നുണ്ടായിരുന്നെങ്കിലും കളക്ടറേറ്റിനു മുന്നിലായി ശിങ്കാരിമേളം കൊട്ടിത്തിമർക്കുന്നതു കണ്ടപ്പോൾ എല്ലാവർക്കും അത്ഭുതം. എന്താണ് പെരുമഴയത്തൊരു മേളമെന്നറിയാൻ അന്വേഷിച്ചപ്പോഴാണ് ആ മേളം നന്മയുടെ ഹൃദയതാളമുള്ള സാന്ത്വനമേളമാണെന്നു മനസിലായത്. രണ്ടുവയസുകാരിയുടെ ജീവൻ രക്ഷിക്കാൻ ചികിത്സാധനസഹായത്തിനായി മുപ്പതു മേളകലാകാരന്മാർ മേളം കൊട്ടി ഒരു കുടുംബത്തിനു താങ്ങും തണലുമാവാനുള്ള ശ്രമത്തിലായിരുന്നു. മുളങ്കുന്നത്തുകാവ് കെൽട്രോണ്‍ നഗറിൽ താമസിക്കുന്ന ഓട്ടോ ഡ്രൈവറായ കുറുപ്പുള്ളിക്കാട് ബിനീഷ ്- രശ്മി ദന്പതികളുടെ രണ്ടു വയസും ഒന്പതുമാസവും പ്രായമുള്ള മകൾ ആദ്യനന്ദയുടെ ചികിത്സക്കായി എട്ടുലക്ഷം രൂപ ശേഖരിക്കാനുള്ള ശ്രമത്തിന്‍റെ ഭാഗമായാണു നാടാകെ മേളം കൊട്ടി പണം സ്വരൂപിക്കാൻ ചിറ്റിലപ്പിള്ളി പുലരി കലാസമിതിയുടെ ആഭിമുഖ്യത്തിലുള്ള 30 കലാകാരന്മാർ തീവ്രശ്രമം നടത്തിക്കൊണ്ടിരിക്കുന്നത്. എറണാകുളം അമൃത ആശു പത്രിയിൽ കഴിയുന്ന ആദ്യനന്ദയ് ക്ക് ഇപ്പോൾത്തന്നെ ലക്ഷങ്ങൾ ചികിത്സയ്ക്കായി ചെലവായിട്ടുണ്ട്. ഇനി ആവശ്യമായിവരുന്ന തുക ഒപ്പിക്കാനുള്ള ശ്രമത്തിലാണു ബന്ധുക്കളും നാട്ടുകാരും. മേള സംഘത്തിലെ ഒരംഗത്തിന്‍റെ സുഹൃത്താണ് ആദ്യനന്ദയുടെ പിതാവ്. ചികിത്സാ ധനസഹായത്തിനായി പഞ്ചായത്ത് പ്രസിഡന്‍റ് അടക്കമുള്ളവരുടെ നേതൃത്വത്തിൽ സമിതി രൂപീകരിച്ചിട്ടുണ്ട്. ഇക്കാര്യങ്ങളറിഞ്ഞപ്പോഴാണ് ഈ കലാകാരന്മാർ ശിങ്കാരിമേളവുമായി ധനസഹായംതേടി ഇറങ്ങിയത്. ജില്ലയുടെ വിവിധ ഭാഗങ്ങളി ൽ ഇവർ മേളം അവതരിപ്പിക്കുന്നുണ്ട്. പുലരി കലാസമിതിയുടെ ക്യാപ്റ്റൻ സുബിൻ ചിറ്റിലപ്പിള്ളി, മാനേജർ അഭിലാഷ് എന്നിവരുടെ നേതൃത്വത്തിൽ കളക്ടറേറ്റിനു മുന്നിൽനിന്നാണ് ഇവർ ആദ്യപരിപാടി തുടങ്ങിയത്. മഴയെ കൂസാതെയുള്ള മേളം എന്തിനാണെന്ന് അറിഞ്ഞതോടെ കളക്ടറേറ്റിനു മുന്നിലുണ്ടായിരുന്നവർ തങ്ങളാൽകഴിയും വിധമുള്ള സഹായം നൽകാൻ മടിച്ചില്ല.

കെട്ടിടനിർമാണത്തിന് മണ്ണെടുത്ത കുഴിയിലേക്ക് ഓഫീസ് ഇടിഞ്ഞുവീണ് രണ്ടുപേർക്കു പരിക്ക്

ചാലക്കുടി: സൗത്ത് ജംഗ്ഷനിൽ കെട്ടിട സമുച്ചയം നിർമിക്കാൻ എടുത്ത വലിയ കുഴിയിലേക്ക് താത്കാലിക ഓഫീസ് ഇടിഞ്ഞുവീണു. ഓഫീസിനകത്തുണ്ടായിരുന്ന രണ്ടു‌പേർ പരിക്കു കളോടെ രക്ഷപ്പെട്ടു. ചാലക്കുടി ഷാജു അഗസ്റ്റിൻ അക്കര (55), മകൻ ആർനോൾഡ് (27) എന്നിവരെ സെന്‍റ് ജെയിംസ് ആശുപത്രിയിൽ പ്രവേശിപ്പിച്ചു. ഇന്നലെ ഉച്ചക്ക് 12.45 നാണ് അപകടമുണ്ടായത്. കെട്ടിട സമുച്ചയം നിർമിക്കാൻ എടുത്ത 20 അടി താഴ്ചയിലുള്ള വെള്ളം നിറഞ്ഞ കുഴിയിലേക്കാണ് ഓഫീസ് ഇടിഞ്ഞുവീണത്. ഉടനെ ഇവിടെ ജോലി ചെയ്തിരുന്ന തൊഴിലാളികൾ ഇവരെ രക്ഷപ്പെടുത്തി. തൊട്ടടുത്തുള്ള ഫയർ ഫോഴ്സ് സംഭവം കണ്ട് ഓടിയെത്തി രക്ഷാപ്രവർത്തനം നടത്തി. റോഡിനോടുചേർന്ന ഭാഗമാണ് ഇടിഞ്ഞത്. അപകടഭീഷ ണിയെത്തുടർന്ന് മുൻപിലുള്ള റോഡിൽ ഗതാഗതം നിരോധിച്ച് അടച്ചുകെട്ടി. കെട്ടിട നിർമാണത്തിനുവേണ്ടി താത്കാലികമായിനിർമിച്ച ഓഫീസിലിരുന്ന് ജോ ലി ചെയ്യുമ്പോഴാണ് ഓഫീസ് ഇടിഞ്ഞുവീണത്.

പുതുക്കാട് മേല്പാലം: മണ്ണുപരിശോധന തുടങ്ങി

പുതുക്കാട്: ദേശീയപാതയിലെ പുതുക്കാട് സിഗ്നൽ ജംഗ്ഷനിലെ നിർദിഷ്ട മേൽപ്പാലത്തിന്‍റെ സ്ഥലപരിശോധന തുടങ്ങി. ഇന്നലെ ദേശീയപാതയ്ക്കു സമീപം കുഴിയെടുത്ത് മണ്ണിന്‍റെ ഉറപ്പ് പരിശോധിക്കുന്ന നടപടികൾ ആരംഭിച്ചു. ഹരിയാന ആസ്ഥാ നമായ ധരിവാൾ ബിൽഡ്ടെക് കമ്പനിക്കാണു നിർമാണ ചുമതല. രണ്ടുവർഷംകൊണ്ട് പൂർത്തിയാക്കാനാണ് കരാർ. 570 കോടിയാണു പ്രതീക്ഷിക്കുന്ന ചെലവ്. തുടർച്ചയായ അപകടങ്ങളെത്തുടർന്ന് പുതുക്കാട് കെഎസ് ആർടിസി സ്റ്റാൻഡിനു മുന്നിലെ യു ടേൺ അടച്ചതോടെ മേല് പാലം പണി അടിയന്തരമായി ആരംഭിക്കണമെന്നും തൃശൂർ ഭാഗത്തേക്കുള്ള യാത്രക്കാർക്ക് ബസ് കയറാനും ഇറങ്ങാനും സുരക്ഷിതമായ താത്കാലിക സംവിധാനം ഒരുക്കണമെന്നും ആവശ്യപ്പെട്ട് കെ. കെ. രാമചന്ദ്രൻ എംഎൽഎ ദേശീ യപാത അഥോറിറ്റി പ്രോജക്ട് ഡയറക്ടർക്ക് കത്ത് നൽകിയിരുന്നു. അപകടങ്ങൾ പതിവായ പുതുക്കാട് സെന്‍ററിൽ മേല്പാലം വേണമെന്ന ആവശ്യത്തിന് വർഷങ്ങളുടെ പഴക്കമുണ്ട്. സിഗ്നൽ ജംഗ്ഷനിൽ പ്രതിദിനം 4,000 പേർ ദേശീയപാത മുറിച്ചുകടക്കുന്നുവെന്നാണ് ദേശീയപാത അഥോറിറ്റിയുടെ കണക്ക്. സിഗ്നൽ വരുന്നതിനുമുമ്പ് രണ്ടുവർഷത്തിനിടെ പുതുക്കാട് സെന്‍റ റിൽ മാത്രം 26 അപകടമരണങ്ങളാണ് ഉണ്ടായത്. ദേശീയപാതയിൽ കെഎസ് ആർടിസി സ്റ്റാൻഡിനുസമീപത്തും പോലീസ് സ്റ്റേഷനു സമീപത്ത യു- ടേണുംകൂടി നോക്കിയാൽ അപകടമരണങ്ങൾ അമ്പതിലേറെയായിരുന്നു. ആമ്പല്ലൂർ, കുറുമാലി, നന്തിക്കര പ്രദേശങ്ങളും സ്ഥിരം അപകടമേഖലകളായിരുന്നു. തുടർന്ന് ദേശീയപാത അഥോറിറ്റി പുതുക്കാട് സെന്‍ററിനെ ബ്ലാക്ക് സ്പോട്ടിൽ ഉൾപ്പെടുത്തി. അപകടങ്ങൾ പതിവായപ്പോഴാണ് നാട്ടുകാർ മേല്പാലം എന്ന ആവശ്യവുമായി പ്രക്ഷോഭമാരംഭിച്ചത്.

പുതുക്കാട് സെന്‍റ് ആന്‍റണീസ് സ്‌കൂളില്‍ മെറിറ്റ് ഡേ

പുതുക്കാട്: സെന്‍റ് ആന്‍റണീസ് ഹൈസ്‌കൂളില്‍ മെറിറ്റ് ഡേ ആഘോഷിച്ചു. പുതുക്കാട് ഗ്രാമപഞ്ചായത്ത് പ്രസിഡന്‍റ് കെ.എം. ബാബുരാജ് ഉദ്ഘാടനംചെയ്തു. സ്‌കൂള്‍ മാനേജര്‍ ഫാ. പോള്‍ തേയ്ക്കാനത്ത് അധ്യക്ഷതവഹിച്ചു. കൊടകര ബ്ലോക്ക് പഞ്ചായത്ത് സ്റ്റാന്‌ഡിംഗ് കമ്മിറ്റി ചെയര്‍മാന്‍ അല്‍ജോ പുളിക്കന്‍, ഗ്രാമപഞ്ചായത്തംഗം സെബി കൊടിയന്‍, സെന്‍റ് ആന്‍റണീസ് ഹയര്‍സെക്കന്‌ഡറി സ്‌കൂള്‍ പ്രിന്‍സിപ്പല്‌ ടോബി തോമസ്, പ്രധാനാധ്യാപകന്‍ എം. യൂജിന്‍ പ്രിന്‍സ്, സെന്‍റ് ആന്‍റണീസ് എല്‍പി സ്‌കൂള്‍ പ്രധ്യാനാധ്യാപിക ലൈസി ജോണ്‍, പിടിഎ പ്രസിഡന്‍റ് ഷാജു മാടമ്പി, എംപിടിഎ പ്രസിഡന്‍റ് സതി സുധീര്‍, എം.പി. രാജു എന്നിവര്‍ സംസാരിച്ചു. ചടങ്ങില്‍ എസ്എസ്എല്‍സി പരീക്ഷയില്‍ മുഴുവന്‍ വിഷയങ്ങളിലും എ പ്ലസ് നേടിയ വിദ്യാര്‍ഥികളേയും എല്‍എസ്എസ്, യുഎസ്എസ്, എന്‍എംഎംഎസ്, സംസ്‌കൃതം സ്‌കോളര്‍ഷിപ്പ് എന്നിവ നേടിയ വിജയികളെയും നൂറുശതമാനം വിജയംകരസ്ഥമാക്കിയ വിദ്യാര്‍ഥികളേയും ആദരിച്ചു.

കൃഷിയും ജനജീവിതവും ദുരിതത്തിലാക്കി ആഫ്രിക്കൻ ഒച്ച്

വടക്കാഞ്ചേരി: നഗരസഭയിലെ മുണ്ടത്തിക്കോട് പ്രദേശത്ത് ജനങ്ങളെ ദുരിതത്തിലാക്കി ആഫ്രിക്കൻ ഒച്ച്. 39, 40, 41 ഡിവിഷനുകളിൽ അഞ്ചുവർഷം മുൻപാണ് ആഫ്രിക്കൻ ഒച്ചിനെ കണ്ടുതുടങ്ങിയത്. ഇപ്പോൾ പ്രദേശത്ത് ലക്ഷക്കണക്കിന് ഒച്ചുകളാണുള്ളത്. ഇവ തെങ്ങും കവുങ്ങും തുടങ്ങി പച്ചക്കറികൾ, വാഴ എന്നിവയും മറ്റെല്ലാ കൃഷികളും നശിപ്പിക്കുകയാണ്. വീട്ടിനകത്തേക്കും ഇവയുടെ ശല്യം വ്യാപിച്ചിരിക്കുകയാണ്. നിരവധിതവണ സർക്കാരിലും നഗരസഭയിലും കൃഷിഭവനിലും പരാതിനൽകിയെങ്കിലും ഒച്ചുകളെ കാണുന്നസ്ഥലത്ത് ഉപ്പിട്ടാൽ മതി നശിച്ചുപോകുമെന്നാണ് മറുപടി ലഭിച്ചത്. ജനങ്ങൾ ഉപ്പിട്ട് നശിപ്പിക്കാൻനോക്കിയിട്ടും എണ്ണം കൂടുകയല്ലാതെ കുറയുന്നില്ല. ഈ സാഹചര്യത്തിൽ കൗൺസിലർമാരായ കെ. അജിത്കുമാർ, രമണി പ്രേമദാസൻ, കെ.എൻ. പ്രകാശൻ എന്നിവരുടെ നേതൃത്വത്തിൽ നാട്ടുകാരും കുടുംബശ്രീ, തൊഴിലുറപ്പ് പ്രവർത്തകരുംചേർന്ന് ജനകീയ ആഫ്രിക്കൻ ഒച്ച് നിർമാർജന പരിപാടിക്ക് തുടക്കംകുറിച്ചു. ഇതിനുശേഷവും ഒച്ച് ശല്യം കുറഞ്ഞില്ലെങ്കിൽ സർക്കാർ കർഷകർക്കും സ്ഥലവാസികൾക്കും സഹായം ലഭ്യമാക്കുകയും ഒച്ചിനെ നശിപ്പിക്കാൻ കർമപദ്ധതി ആവിഷ്ക്കരിക്കുകയും ചെയ്യണമെന്ന് ജനപ്രതിനിധികൾ ആവശ്യപ്പെട്ടു.

കർഷക കോൺഗ്രസ് ധർണ

ചാവക്കാട്: കർഷക കോൺഗ്രസ് ചാവക്കാട് മണ്ഡലം കമ്മിറ്റിയുടെ നേതൃത്വത്തിൽ കൃഷിഭവന് മുന്നിൽ ധർണനടത്തി. ലോകബാങ്ക് കർഷകർക്കായി നൽകിയ 139 കോടി രൂപ കർഷകർക്ക് കൊടുക്കാതെ വകമാറ്റി ചെലവാക്കിയതിൽ പ്രതിഷേധിച്ചാണ് ധർണ നടത്തിയത്. ജില്ലാ പ്രസിഡന്‍റ് രവി പോലുവളപ്പിൽ ഉദ്ഘാടനംചെയ്തു. മണ്ഡലം പ്രസിഡന്‍റ് അബ്ദുസലാം അധ്യക്ഷതവഹിച്ചു. നിയോജകമണ്ഡലം പ്രസിഡന്‍റ് സ്റ്റീഫൺ ജോസ് മുഖ്യപ്രഭാഷണംനടത്തി. ജില്ലാ സെക്രട്ടറി എം.എൽ. ജോസഫ്, ഷുക്കൂർ, റുക്കിയ ഷൗക്കത്ത്, ഷൈല നാസർ, റഹിം, ജോയി എന്നിവർ പ്രസംഗിച്ചു.

വിരുപ്പാക്ക മില്‌ തുറക്കുമോ?

വടക്കാഞ്ചേരി: വിരുപ്പാക്ക തൃശൂർ കോ-ഓപ്പറേറ്റീവ് സ്പിന്നിംഗ്‌ മില്ലിന് പുതിയ ചെയർമാനും എംഡിയുമായി. മിൽ എന്ന് തുറക്കുമെന്ന കാര്യത്തിൽ മാത്രമാണ് അനിശ്ചിതത്വം. 1985ൽ തുടങ്ങിയ മില്ല് അടച്ചുപൂട്ടിയിട്ട് രണ്ടുവർഷവും നാലുമാസവുമായി. അസംസ്കൃതവസ്തുവായ പഞ്ഞി ഇല്ലാത്തതിനാൽ 2023 ഫെബ്രുവരി ആറുമുതല്‌ കമ്പനി ലേ ഓഫിലാണ്. പിന്നീട് തുറന്നില്ല. രണ്ട് ലോഡ് ‌പഞ്ഞിയെത്തിയപ്പോഴേക്കും വൈദ്യുതിബന്ധം വിഛേദിക്കപ്പെട്ടു. സിഐടിയു അടക്കമുള്ള തൊഴിലാളി സംഘടനകൾ ഒട്ടേറെ സമരംനടത്തി. പ്രതിസന്ധി ഒഴിവാക്കാൻ സർക്കാർ ഊർജിതപ്രവർത്തനമാരംഭിച്ചു. സംസ്ഥാന വ്യവസായ, വാണിജ്യ വകുപ്പ് അഡീഷണൽ ഡയറക്ടറും ടെക്സ്റ്റൈൽ കൈത്തറി ഡയറക്ടറുമായ തെക്കുംകര സ്വദേശി ഡോ.കെ.എസ്. കൃപകുമാറാണ് പുതിയ ചെയർമാൻ. നാട്ടുകാരനായ ഒരാൾ ആദ്യമായാണ് ചെയർമാനാകുന്നത്. ഉദ്യോഗസ്ഥനായ പ്രഥമ ചെയർമാനാണ് കൃപകുമാർ. പൂട്ടിക്കിടക്കുന്ന മില്ലിനെ രക്ഷിക്കുകയാണ്‌ ലക്ഷ്യം. നാളെ രാവിലെ 11ന് എംഡിയും ചെയർമാനും കമ്പനി സന്ദർശിക്കാൻ എത്തുന്നുണ്ട്. എന്നാലിത് പഞ്ചായത്ത് തെരഞ്ഞെടുപ്പ് മുന്നിൽകണ്ട് സർക്കാർ നടത്തുന്ന തട്ടിപ്പാണെന്നും ജനങ്ങൾ തിരിച്ചറിയുമെന്നും കോൺഗ്രസ് നേതാക്കൾ പറഞ്ഞു.

ലൈഫ് ഗുണഭോക്താക്കൾക്ക് പണം നൽകിയില്ല

എരുമപ്പെട്ടി: എരുമപ്പെട്ടി ഗ്രാമപഞ്ചായത്തിലെ ലൈഫ് ഭവന നിർമാണ പദ്ധതിയിൽ ഉൾപ്പെട്ട് ഭവനനിർമാണം പൂർത്തിയാക്കിയ ഗുണഭോക്താക്കൾക്ക് പഞ്ചായത്ത് പണംനൽകുന്നില്ലെന്ന് പരാതി. ഭരണസമിതിയുടെ അനാസ്ഥ സാധാരണക്കാരായ ജനങ്ങളെ ദുരിതത്തിലാക്കുകയാണെന്നാരോപിച്ച് പ്രതിഷേധവുമായി കോൺഗ്രസ് മണ്ഡലം കമ്മിറ്റി രംഗത്തെത്തി.അർഹതപ്പെട്ട ലൈഫ് ഗുണഭോക്താക്കൾക്ക് എത്രയുംപെട്ടെന്ന് പണം നൽകണമെന്നാവശ്യപ്പെട് കോൺഗ്രസ് മണ്ഡലം പ്രസിഡന്‍റ് എം.എം. നിഷാദ് പഞ്ചായത്ത് സെക്രട്ടറിക്ക് നിവേദനംനൽകി. ജനറൽ വിഭാഗത്തിൽ 156 പേരും എസ്‌സി വിഭാഗത്തിൽ 115 പേരുമാണ് ഇതുവരെ എഗ്രിമെന്‍റ് വച്ചിട്ടുള്ളത്. ഇതിൽ ഭൂരിഭാഗംപേരും പണിപൂർത്തീകരിച്ചവരും മെയിൻവാർപ്പ് പൂർത്തീകരിച്ചവരുമാണ്. എന്നാൽ ഇവരിൽ ഒരാൾക്കുപോലും ലൈഫ് പദ്ധതിയിൽ പറയുന്ന നാലുലക്ഷം രൂപ കൊടുക്കുവാൻ പഞ്ചായത്ത് ഭരണസമിതിക്ക് സാധിച്ചിട്ടില്ല. രണ്ടു വർഷത്തിലധികമായി പലരും ഉള്ള വീടുപൊളിച്ച് വലിയതുക നൽകി വാടക വീടുകളിലാണ് താമസിക്കുന്നത്. പഞ്ചായത്ത് പ്രസിഡന്‍റ് നൽകിയ ഉറപ്പ് വിശ്വസിച്ച് പലരും പലിശയ്ക്കും മറ്റും പണം കടമെടുത്താണ് പണി പൂർത്തീകരിച്ചത്. സമയബന്ധിതമായി പണം ലഭിക്കാത്തതിനാൽ ഇവർക്ക് വലിയൊരു സംഖ്യ കടബാധ്യതയായിരിക്കുകയാണ്. പലരും ആത്മഹത്യയുടെ വക്കിലാണ്. ലൈഫ് ഗുണഭോക്താക്കൾക്ക് സാധാരണഗതിയിൽ നാലുഘട്ടങ്ങളിലാണ് പണം അനുവദിക്കാറുള്ളത് ആദ്യഘട്ടത്തിൽ 40,000 രൂപയും തറപ്പണി പൂർത്തീകരിച്ചാൽ ഒരുലക്ഷം രൂപയും ലിന്‌ഡൽ ഉയരം പൂർത്തീകരിച്ചാൽ വീണ്ടും ഒരുലക്ഷം രൂപയും പിന്നീട് മെയിൻ വാർപ്പ് കഴിഞ്ഞാൽ ഒരുലക്ഷം രൂപയും അവസാനഘട്ടം പൂർത്തീകരിച്ചാൽ അറുപതിനായിരം രൂപയുമാണ് നൽകാറുള്ളത്. എന്നാൽ എരുമപ്പെട്ടി പഞ്ചായത്ത് ഇപ്രകാരമല്ല പണം നൽകുന്നതെന്നും പ്രസിഡന്‍റും നിർവഹണ ഉദ്യോഗസ്ഥനും തങ്ങളുടെ ഇഷ്ടക്കാർക്ക് തോന്നിയപോലെ പണം നൽകുന്നതായും കോൺഗ്രസ് നേതാക്കൾ ആരോപിച്ചു. ഈ ഭരണസമിതിയുടെ കാലാവധി അവസാനിക്കുന്നതിന് അഞ്ചുമാസംമാത്രം ബാക്കിനിൽക്കെ സാധാരണക്കാരുടെ പ്രതീക്ഷയായ വീട് എന്ന സ്വപ്നം പൂർത്തീകരിക്കുന്നതിന് പണം അനുവദിക്കണമെന്നും അല്ലാത്തപക്ഷം ശക്തമായ സമരപരിപാടികൾ ആരംഭിക്കുമെന്നും മണ്ഡലം പ്രസിഡന്‍റ് എം.എം. നിഷാദ് പറഞ്ഞു. നേതാക്കളായ പി.എസ്. സുനീഷ്, എൻ.കെ. കബീർ, ഷഫീന അസീസ്, പഞ്ചായത്ത് പ്രതിപക്ഷനേതാവ് എം.സി. ഐജു, മെമ്പർ റിജി ജോർജ് എന്നിവരും നിവേദനംനൽകിയ സംഘത്തിലുണ്ടായിരുന്നു.

മച്ചാട് സെന്‍റ് ആന്‍റണീസ് ദേവാലയത്തിൽ തിരുനാൾ ഇന്ന്

പുന്നംപറമ്പ്: മച്ചാട് സെന്‍റ് ആന്‍റണീസ് ദേവാലയത്തിൽ ഇടവക മധ്യസ്ഥനായ വിശുദ്ധ അന്തോണീസിന്‍റെ ഊട്ടുതിരുനാൾ ഇന്ന് ആഘോഷിക്കും. തിരുനാൾ ദിവസമായ ഇന്നുരാവിലെ 10ന് നടക്കുന്ന ആഘോഷമായ തിരുനാൾ പാട്ടുകുർബാനയ്ക്ക് പൂമല ലിറ്റിൽഫ്ലവർ ദേവാലയത്തിലെ വികാരി ഫാ. സിന്‍റോ തൊറയൻ മുഖ്യകാർമികത്വംവഹിക്കും. ജൂബിലി മിഷൻ ആശുപത്രി അസി.ഡയറക്ടർ ഫാ. ജസ്റ്റിൻ പൂഴിക്കൽ തിരുനാൾസന്ദേശം നൽകും. ഇടവക വികാരി ഫാ. ജോജോ എടതുരുത്തി സഹകാർമികനാകും. തുടർന്ന് പള്ളിയുടെ ഹാർമണി ഹാളിൽ ഊട്ടുനേർച്ച ആശീർവാദവും വിതരണവും നടക്കും.

വെള്ളക്കെട്ടിലായി ഊരകം റോഡ്

ചേർപ്പ്: കഴിഞ്ഞദിവസമുണ്ടായ ശക്തമായ മഴയിൽ ഊരകം സെന്‍ററിന് സമീപം റോഡില്‌ വെള്ളക്കെട്ട്. റോഡിന് ഇരുവശത്തെയും തോടുകൾ മണ്ണുനിറഞ്ഞ് മൂടപ്പെട്ട അവസ്ഥയിലായതിനാൽ വെള്ളം ഒഴുകിപ്പോകാൻ കഴിയാത്തതിനാലാണ് റോഡിൽ വെള്ളക്കെട്ട് രൂപപ്പെട്ടത്. വെള്ളത്തിലൂടെ ഒഴുകിവരുന്ന മാലിന്യങ്ങൾ ഊരകം മയമ്പിള്ളി ക്ഷേത്രത്തിന് മുൻവശത്ത് അടിയുന്നതായും പരാതിയുണ്ട്. മഴക്കാലത്തിനുമുമ്പ് വെള്ളക്കെട്ട് പരിഹരിക്കണമെന്നാവശ്യപ്പെട്ട് ചേർപ്പ് ബ്ലോക്ക് കോൺഗ്രസ് കമ്മിറ്റി ജനറല്‌ സെക്രട്ടറി അയിച്ചിയിൽ രാധാകൃഷ്ണൻ ചേർപ്പ് ഗ്രാമപഞ്ചായത്ത് അധികൃതർക്ക് നിവേദനംനൽകിയിരുന്നു. ഇതേതുടർന്ന് പഞ്ചായത്ത് ഭരണസമിതി പിഡബ്ല്യുഡി, കെഎസ്ടിപി റോഡ് നിർമാണ അധികൃതർക്ക് വിവരം നൽകിയിട്ടും നടപടിയില്ലാത്ത അവസ്ഥയും നിലനിൽക്കുന്നു.

അംബേദ്കർ ഗ്രാമം പദ്ധതിയിൽ ഒരു കോടിയുടെ വികസനം നടപ്പിലാക്കി

പരിയാരം: അംബേദ്ക്കർ ഗ്രാമം പദ്ധതിയിൽ ഉൾപ്പെടുത്തി ഒരു കോടി രൂപയുടെ വികസനം പൂർത്തീകരിച്ചതിന്‍റെ ഉദ്ഘാടനം സനീഷ് കുമാർ ജോസഫ് എംഎൽഎ നിർവഹിച്ചു. ആധുനികവത്ക്കരിച്ച കമ്യൂണിറ്റി ഹാൾ, രണ്ട് കോൺക്രീറ്റ് റോഡുകൾ, 20 കുടുംബങ്ങൾക്ക് വീട് മെയിന്‍റനൻസ്, കമ്യൂണിറ്റിഹാളിലേക്ക് വേണ്ട കസേരകൾ മറ്റു ഫർണീച്ചറുകൾ തുടങ്ങിയ വികസന പ്രവർത്തനങ്ങളും ഉൾകൊള്ളിച്ച് നിർമാണം പൂർത്തീകരിച്ചത്. പഞ്ചായത്ത് പ്രസിഡന്‍റുമായ ശിവദാസൻ അധ്യക്ഷത വഹിച്ചു. ജില്ല പഞ്ചായത്ത് അംഗം ജെനീഷ് പി. ജോസ്, ബ്ലോക്ക് പഞ്ചായത്ത് അംഗം പി.പി. പോളി, പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻമാരായ ഷീബ ഡേവീസ് അല്ലി ഡേവീസ്, മെബർമാരായ വി.സി. വിഷ്ണു, കെ.എസ് രാധാകൃഷ്ണൻ, ഷിജു എന്നിവർ പ്രസംഗിച്ചു.

നിര്‍മാണ പ്രവൃത്തികള്‍ നിലച്ചു: സമരസമിതി വിപുലീകരണ യോഗം നാളെ

ഇരിങ്ങാലക്കുട: കേന്ദ്രമന്ത്രിയും ഉദ്യോഗസ്ഥരും വന്നുപോയതിന് പിന്നാലെ കല്ലേറ്റുംകരയിലുള്ള ഇരിങ്ങാലക്കുട റെയില്‍വേ സ്റ്റേഷനിലെ നിര്‍മാണ പ്രവൃത്തികള്‍ നിലച്ചതായി ആരോപണം. സ്റ്റേഷനോടുള്ള അവഗണനയ്ക്കെതിരേ ജനകീയ പ്രക്ഷോഭം ശക്തമായപ്പോള്‍ ഡിആര്‍എം ഉള്‍പ്പടെയുള്ള റെയില്‍വേ ഉദ്യോഗസ്ഥരും കേന്ദ്രമന്ത്രിയുടെ ഓഫീസ് ഉദ്യോഗസ്ഥരും മറ്റും സ്റ്റേഷന്‍ സന്ദര്‍ശിച്ചിരുന്നു. ഇതിനു പിന്നാലെ സ്റ്റേഷന്‍ പ്ലാറ്റ്‌ഫോമില്‍ ചില അറ്റകുറ്റപണികള്‍ തുടങ്ങുകയും ചെയ്തു. ഒടുവില്‍ തൃശൂര്‍ ലോക്‌സഭാംഗവും കേന്ദ്രമന്ത്രിയുമായ സുരേഷ് ഗോപിയും സ്റ്റേഷനിലെത്തി. ഈ ദിവസങ്ങളിലൊക്കെ സ്റ്റേഷനില്‍ എന്തൊക്കെയൊ വികസനം വരികയാണെന്ന പ്രതീതി വരുത്തി തിരക്കിട്ട ചില പണികള്‍ നടക്കുന്നുണ്ടായിരുന്നു. എന്നാല്‍ മന്ത്രിയുടെ സന്ദര്‍ശനത്തിന്‍റെ പിറ്റേദിവസം തന്നെ എല്ലാ പണികളും നിലച്ചതായി റെയില്‍വേ സ്റ്റേഷന്‍ വികസന സമരത്തിന്‍റെ മുഖ്യസംഘാടകന്‍ വര്‍ഗീസ് തൊടുപറമ്പില്‍ ആരോപിച്ചു. ടൈല്‍സ് വിരിക്കാന്‍ കോണ്‍ക്രീറ്റ് ചെയ്തതെല്ലാം മഴയില്‍ ഒലിച്ചു വികൃതമായി. എന്തുകൊണ്ടാണ് പണികള്‍ നിലച്ചതെന്നോ, ഇനി എന്നാണ് പണികള്‍ പുനരാരംഭിക്കുകയെന്നോ ഉത്തരവാദപ്പെട്ട ആര്‍ക്കും അറിയില്ല. റെയില്‍വേ സ്റ്റേഷനോട് കാലങ്ങളായി അധികൃതര്‍ കാണിക്കുന്ന അവഗണന ഇനിയും തുടരുമെന്നതിന്‍റെ തെളിവാണിതെന്ന് വര്‍ഗീസ് തൊടുപറമ്പില്‍ പറഞ്ഞു. നിര്‍ത്തലാക്കിയ തീവണ്ടികള്‍ക്ക് ഇവിടെ വീണ്ടും സ്റ്റോപ്പ് അനുവദിക്കുന്ന കാര്യത്തില്‍ പോലും കേന്ദ്രമന്ത്രി കൂടിയായ ലോക്‌സഭാംഗത്തിന്‍റെ ഇടപെടലുകള്‍ യാതൊരു ഫലവുമില്ലാതായി. കേന്ദ്രസര്‍ക്കാര്‍ ഇനിയും തീരുമാനം പ്രഖ്യാപിക്കാത്ത അമൃത് ഭാരത് റെയില്‍വേ സ്റ്റേഷന്‍ വികസന പദ്ധതിയുടെ രണ്ടാം ഘട്ടത്തില്‍ ഉള്‍പ്പെടുത്തുമെന്ന വാഗ്ദാനവും അടിസ്ഥാനമില്ലാത്തതാണ്. റെയില്‍വേ സ്റ്റേഷന്‍റെ ഒരു ഭാഗം എപ്പോള്‍ വേണമെങ്കിലും ഇടിഞ്ഞു വീഴാവുന്ന അവസ്ഥയിലാണ്. സ്റ്റേഷന്‍റെ ഘടന മാറ്റുമ്പോള്‍ റെയില്‍വേ സ്റ്റേഷന്‍റെ സ്ഥാനം മാറിയേക്കാം എന്ന മന്ത്രിയുടെ പ്രസ്താവനയും സംശയാസ്പദമാണ്. ജനകീയ സമരം കൂടുതല്‍ ശക്തമാക്കുന്നതിനായി വിവിധ പ്രദേശങ്ങളിലുള്ളവരുടെ പ്രാതിനിധ്യത്തോടെ കല്ലേറ്റുംകര റെയില്‍വേ സമരസമിതി വിപുലീകരണ യോഗം നാളെഉച്ചതിരിഞ്ഞ് മൂന്നിന് കല്ലേറ്റുംകരയിലുള്ള സ്വദേശിമിഷന്‍ കാര്യാലയത്തില്‍ ചേരും. സമരസമിതി ഓഫീസിന്‍റെ ഉദ്ഘാടനം പ്രമുഖ മനുഷ്യാവകാശ പ്രവര്‍ത്തകന്‍ ജോയ് കൈതാരത്ത് നിര്‍വഹിക്കും.

മാള യഹൂദ സിനഗോഗിന്‍റെ മേൽക്കൂര തകർന്ന സംഭവം: അപാകതകൾ ഉടൻ പരിഹരിക്കുമെന്ന് എംഎൽഎ

മാള: കനത്ത മഴയെ തുടർന്ന് മാള സിനഗോഗിന്‍റെ മേൽക്കൂരയുടെ നടുഭാഗം തകർന്നുവീണതാണെന്ന് വി.ആർ. സുനിൽകുമാർ എംഎൽഎ. ദിവസങ്ങൾക്കു മുമ്പ് മേൽക്കൂര വളഞ്ഞ് അപകടാവസ്ഥയിലായത് ശ്രദ്ധയിൽപ്പെട്ടതിനെ തുടർന്ന് പരിഹരിക്കുന്നതിനു വേണ്ട പ്രാരംഭ നടപടികൾ മുസിരിസ് കൈക്കൊള്ളുന്നതിനിടെയാണ് ബുധനാഴ്ച രാത്രിയിൽ കനത്ത മഴയിൽ സിനഗോഗ് മേൽക്കൂര നിലംപതിച്ചത്. 2017ൽ സിനഗോഗ് മുസിരിസ് പൈതൃക പദ്ധതി ഏറ്റെടുത്തതിനെ തുടർന്ന് സംരക്ഷണ നടപടികൾക്കായി 75 .5 ലക്ഷം രൂപ സർക്കാർ അനുവദിക്കുകയും മാള സിനഗോഗിന്‍റെ കൺസർവേഷൻ പദ്ധതിയും മ്യൂസിയം നിർമാണവും പ്രവൃത്തിയിൽ നിർദേശിച്ചിരുന്നത്. അതിന്‍റെ ആദ്യഭാഗമായ സിനഗോഗിന്‍റെ കൺസർവേഷൻ പ്രവൃത്തിക്ക് വേണ്ടി നിർവഹണ ചുമതലയുള്ള ഇൻകെൽന് 45 ലക്ഷം രൂപയുടെ പ്രവൃത്തി നടത്തുന്നതിന് ചുമതല 2019 ൽ നൽകിയിരുന്നു. നിർവഹണ ഏജൻസി ഇൻകെൽ ഏകദേശം 31 ലക്ഷത്തിന്‍റെ എസ്റ്റിമേറ്റ് തയ്യാറാക്കി ടെൻഡർ നടപടി സ്വീകരിച്ചു. 2019 ഡിസംബർ മാസം കരാറുകാരനെ ഏൽപ്പിച്ചു നൽകുകയും ഇൻകെലിന്‍റെ മേൽനോട്ടത്തിൽ പ്രവൃത്തികൾ 2023 മാർച്ചിൽ പൂർത്തീകരിക്കുകയും ചെയ്തതായി മനസിലാക്കുന്നു. കരാറുകാരന് ഏകദേശം 18 .46 ലക്ഷം രൂപ നൽകിയിട്ടുണ്ട്. പ്രതിഷേധം ശക്തം മാള: ചരിത്രസ്മാരകമായ മാളയിലെ യഹൂദ സിനഗോഗിന്‍റെ മേൽക്കൂരയ്ക്ക് കേടുപാടുകൾ സംഭവിച്ചതിൽ പ്രതിഷേധം ശക്തം. അറ്റകുറ്റപ്പണികൾ നടത്തിയതിലെ അപാകതയാണ് പ്രശ്നങ്ങൾക്ക് വഴിവച്ചതെന്ന് ആരോപിച്ചുകൊണ്ട് പ്രതിഷേധ പ്രകടനങ്ങളും ധർണ്ണയും നടന്നു. മാള മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പഞ്ചായത്ത് ഓഫീസിലേക്ക് മാർച്ച് നടത്തി. സിനഗോഗിന്‍റെ മേൽക്കൂര ഇടിഞ്ഞു വീണതുമായി ബന്ധപ്പെട്ട് വിജിലൻസ് അന്വേഷണം നടത്തണമെന്ന് മണ്ഡലം പ്രസിഡന്‍റ് സന്തോഷ് ആത്തപ്പിള്ളി ആവശ്യപ്പെട്ടു. ഡിസിസി ജനറൽ സെക്രട്ടറി എ. എ. അഷറഫ് ഉദ്ഘാടനം ചെയ്തു. മാർച്ചിന് മണ്ഡലം പ്രസിഡന്‍റ് സന്തോഷ് ആത്തപ്പിള്ളി അധ്യക്ഷത വഹിച്ചു. സംഭവത്തിൽ മുസിരീസ് അധികാരികൾക്കെതിരെ നടപടി സ്വീകരിക്കണമെന്ന് ആവശ്യപ്പെട്ട് ബിജെപി മാള മണ്ഡലം കമ്മിറ്റിയുടെ നേതൃത്വത്തിൽ സിനഗോഗിന് മുന്നിൽ പ്രതിഷേധ ധർണ നടത്തി. ബിജെപി സൗത്ത് ജില്ല ജനറൽ സെക്രട്ടറി കെ.പി. ഉണ്ണികൃഷ്ണൻ ഉദ്ഘാടനം ചെയ്തു. മണ്ഡലം പ്രസിഡന്‍റ് കെ.എസ്. അനൂപ് അധ്യക്ഷത വഹിച്ചു. ചരിത്രപ്രസിദ്ധമായ മാള യുദപള്ളി തകർന്നതിനെ പറ്റി സമഗ്ര അന്വേഷണം നടത്തണം എന്ന് ആർജെഡി മണ്ഡലം യോഗം ചേർന്ന് ആവശ്യപ്പെട്ടു. പല ഘട്ടങ്ങളിലും പുന രുധാനവും മറ്റും ബന്ധപെട്ടു സർവകക്ഷി യോഗം വിളിക്കണം എന്ന് ആവശ്യപ്പെട്ടിട്ടും ആയതു വിളിക്കാതെ വ്യക്തി താത്പര്യങ്ങൾക്കു വഴങ്ങിയാണ് പ്രവർത്തനം നടത്തിയതെന്നും യോഗം കുറ്റപ്പെടുത്തി. മണ്ഡലം പ്രസിഡന്‍റ് ഡേവിസ് കണ്ണമ്പിള്ളി, സംസ്ഥാന കമ്മിറ്റിയഗം കെ.സി. വർഗീസ് തുടങ്ങിയവർ സംസാരിച്ചു.

നിയന്ത്രണംവിട്ട കാർ പോസ്റ്റിലിടിച്ച് മറിഞ്ഞു

കയ്പമംഗലം: കൂരിക്കുഴി പഞ്ഞംപള്ളി മോസ്കോ പാലത്തിന് സമീപം നിയന്ത്രണം വിട്ട കാർ ഇലക്ട്രിക് പോസ്റ്റിലിടിച്ച് മറിഞ്ഞു. അപകടത്തിൽ ആർക്കും പരിക്കില്ല. പടിഞ്ഞാറെ ടിപ്പു സുൽത്താൻ റോഡിൽ ഇന്നലെ രാവിലെ പത്തരയോടെയായിരുന്നു അപകടം. എടവിലങ്ങ് സ്വദേശി സഫ്‌വാൻ ആണ് കാറിലുണ്ടായിരുന്നത്. അപകടത്തെതുടർന്ന് റോഡിൽ ഗതാഗതം സ്‌തംഭിച്ചു. കയ്‌പമംഗലം പോലീസും, കെഎസ്ഇബി അധികൃതരും സ്ഥലത്തെത്തിയിരുന്നു.

കുടുംബശ്രീ ഹോം ഷോപ്പ് ഇനി കൊടുങ്ങല്ലൂരിലും

കൊടുങ്ങല്ലൂർ: പ്രാദേശികമായി കുടുംബശ്രീ അംഗങ്ങൾ നിർമിക്കുന്ന ഉത്പ്പന്നങ്ങളുടെ വില്പനയ്ക്കായി കുടുംബശ്രീ രൂപീകരിച്ച ഹോംഷോപ്പ് പദ്ധതി കൊടുങ്ങല്ലൂർ നഗരസഭയിൽ ആരം ഭിച്ചു. അഡ്വ. വി.ആർ. സുനിൽകുമാർ എംഎൽഎ ഉദ്ഘാടനം നിർവഹിച്ചു. കൊടുങ്ങല്ലൂർ നഗരസഭ ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ എൽസി പോൾ അധ്യക്ഷത വഹിച്ചു. ചടങ്ങിൽ കൊടുങ്ങല്ലൂർ നഗരസഭ കൗൺസിലർമാരായ ടി.എസ്. സജീവൻ, കെ.ആർ. ജൈത്രൻ, രഞ്ജിത, ശാലിനി വെങ്കിടേഷ്, രേഖ, ധന്യ, കൊടുങ്ങല്ലൂർ സിഡിഎസ് 1 ചെയർപേഴ്സൺ ശ്രീദേവി തിലകൻ, സിഡിഎസ് 2 ചെയർപേഴ്സൺ ശാലിനി ദേവി, എടത്തിരുത്തി ചെയർപേഴ്സൺ ശ്രീദേവി ദിനേശ്, കുടുംബശ്രീ ജില്ലാ മിഷൻ അസിസ്റ്റന്‍റ് കോ ഒാർഡിനേറ്റർ കെ. രാധാകൃഷ്ണൻ, ഹോംഷോപ്പ് മാനേജ്മെന്‍റ്് അംഗം രാഖി സുധീഷ് എന്നിവർ അറിയിച്ചു. പ്രാദേശികമായി കുടുംബശ്രീ യൂണിറ്റുകൾ നിർമിക്കുന്ന വിഷരഹിതവും, മായം കലരാത്തതും, മനോഹരമായ പായ്ക്കുകളിൽ ഗുണമേന്മയേറിയ ഉത്പ്പന്നങ്ങൾക്ക് പ്രാദേശികമായിതന്നെ വിപണി കണ്ടെത്തുന്ന നൂതന പദ്ധതിയാണ് കുടുംബശ്രീ ഹോംഷോപ്പ് പദ്ധതി. കുടുംബശ്രീ ഉത്പാദക യൂണിറ്റുകൾ നിർമിക്കുന്ന ഉത്പ്പന്നങ്ങൾ മാനേജ്മെന്‍റ് ടീം ശേഖരിച്ച് വാർഡുകളിൽ പ്രവർത്തിക്കുന്ന ഹോംഷോപ്പ് ഓണർമാരുടെ വീടുകളിൽ എത്തിച്ചു നൽകുകയും ഹോം ഷോപ്പ് ഓണർമാർ അവരുടെ വാർഡുകളിലെ വീടുകളിൽ വിപണം നടത്തുകയും ചെയ്യുക എന്നുള്ളതാണ് പദ്ധതി. ഉത്പാദന മേഖലയിലും വിപണ രംഗത്തുമായി ധാരാളം വനിതകൾക്ക് ജോലിയും സ്ഥിരവരുമാനവും ഉറപ്പുവരുത്താൻ ഈ പദ്ധതിയിലൂടെ കഴിഞ്ഞിട്ടുണ്ട്. പ്രാദേശികമായി നിർമിക്കുന്ന ഉത്പ്പന്നങ്ങൾക്ക് പ്രാദേശികമായി വിപണി കണ്ടെത്തുന്നതിലൂടെ പ്രാദേശിക സാമ്പത്തിക വികസനത്തിൽ പങ്കുവഹിക്കാനും പദ്ധതിയിലൂടെ സാധിക്കുന്നു എന്നുള്ളതാണ് ഈ പദ്ധതിയുടെ പ്രത്യേകത.

ടി.കെ. ചാത്തുണ്ണിയുടെ സ്മരണയിൽ ഗവ. ബോയ്സ് ഹൈസ്കൂൾ മൈതാനം

ചാലക്കുടി: നിരവധി ഫുട്ബോൾ മേളകൾക്ക് സാക്ഷ്യംവഹിച്ച ഗവ. ബോയ്സ് ഹൈസ്കൂൾ മൈതാനിയിൽ ടി.കെ. ചാത്തുണ്ണിയുടെ സ്മരണയിൽ ഫുട്ബോൾ പ്രേമികൾ ഒത്തുചേർന്നു. ടി.കെ. ചാത്തുണ്ണിയുടെ ഒന്നാം ചരമവാർഷിക ദിനത്തിലാണ് പഴയകാല താരങ്ങൾ ഉൾപ്പെടെയുള്ള ഫുട്ബോൾ പ്രേമികൾ ഒത്തുചേർന്നത്. ചാലക്കുടി നഗരസഭയും പൗരാവലിയും സംയുക്തമായി സംഘടിപ്പിച്ച അനുസ്മരണച്ചടങ്ങ് സനീഷ്കുമാർ ജോസഫ് എംഎൽഎ ഉദ്ഘാടനം ചെയ്തു. നഗരസഭ ചെയർമാൻ ഷിബു വാലപ്പൻ അധ്യക്ഷത വഹിച്ചു. മികച്ച മലയാളി പരിശീലകനുള്ള പുരസ്കാരം വിക്ടർ മഞ്ഞിലയ്ക്കും ഫുട്ബോൾ പ്രവർത്തനത്തിന് ഇണ്ണുനീലി വായനശാല ഫുട്ബോൾ അക്കാദമിക്കും എംഎൽഎ സമ്മാനിച്ചു. മുൻ അന്തർദേശിയ താരങ്ങളായ എം.എം. ജേക്കബ്, സി.വി. പാപ്പച്ചൻ, മാർട്ടിൻ സി മാത്യു, സോളി സേവ്യർ എന്നിവരും ഇന്ത്യൻ ഫുട്ബോൾ ടീമംഗമായ എം.എം. രാഹുൽ, കേരള ഫുട്ബോൾ അസോസിയേഷൻ പ്രസിഡന്‍റ് നവാസ് മീരാൻ, നഗരസഭ വൈസ് ചെയർപേഴ്സൻ സി. ശ്രീദേവി, കൗൺസിലർമാരായ സി.എസ്. സുരേഷ്, നിത പോൾ, ബിജു ചിറയത്ത്, എം.എം. അനിൽകുമാർ, സെന്‍റ് മേരീസ് പള്ളി വികാരി ഫാ. വർഗീസ് പാത്താടൻ, കാർമൽ സ്കൂൾ പ്രിൻസിപ്പൽ ഫാ. ജോസ് താണിക്കൽ, സി. വി. ഫ്രാൻസിസ്, സി.എ. മത്തായി, റഷീദ്, ഷൈജു ദാമോദരൻ തുടങ്ങിയവർ പ്രസംഗിച്ചു. സ്വർണലത ചാത്തുണ്ണിയും കൂടുംബാംഗങ്ങളും ചടങ്ങിൽ പങ്കെടുത്തു. നഗരസഭ ഫുട്ബോൾ കോച്ചിംഗ് ക്യാമ്പിലേയും വനിതകളുടെയും വെറ്ററൻസ് കളിക്കാരുടെയും പ്രദർശന മത്സരങ്ങളും നടന്നു.

ഹൈസ്കൂൾ പ്രവൃത്തിദിനവും സമയവും പുനക്രമീകരിച്ചത് പ്രതിഷേധാർഹം

തൃശൂർ: കേരളത്തിലെ പൊതുവിദ്യാഭ്യാസത്തെ തകർക്കുന്ന ഹൈസ്കൂൾ അക്കാദമിക് കലണ്ടർ ഉത്തരവ് ഉടൻ പിൻവലിക്കണമെന്ന് കേരള പ്രദേശ് സ്കൂൾ ടീച്ചേഴ്സ് അസോസിയേഷൻ ജില്ലാ കമ്മിറ്റി സർക്കാരിനോട് ആവശ്യപ്പെട്ടു. ഈ വർഷത്തെ മെന്പർഷിപ്പ് വിതരണ ഉദ്ഘാടനം കെപിസിസി സെക്രട്ടറി എ. പ്രസാദ് നിർവഹിച്ചു. വെസ്റ്റ് ഫോർട്ട് സെന്‍റ് ആൻസ് സ്കൂളിലെ സിംല, അധ്യാപിക സജി എന്നിവർ എറ്റുവാങ്ങി. ജില്ലാ പ്രസിഡന്‍റ് പി.സി. ശ്രീപത്മനാഭൻ അധ്യക്ഷത വഹിച്ചു. സംസ്ഥാന വൈസ് പ്രസിഡന്‍റ് സാജു ജോർജ് മുഖ്യപ്രഭാഷണം നടത്തി. ജില്ലാ സെക്രട്ടറി ജയപ്രകാശ് പാറപ്പുറത്ത്, ട്രഷറർ സി.എ. മുഹമദ് റാഫി, ടി.യു. ജയ്സണ്‍, റെയ്ജു പോൾ, കെ.ജെ. ജോബി, സി.ജെ. റെയ്മണ്ട്, ജസ്‌ലിൻ ജോർജ് തുടങ്ങിയവർ പ്രസംഗിച്ചു.

കോർപറേഷൻ കെട്ടിടത്തിലെ വാട്ടർടാങ്കിൽ ചത്ത പക്ഷികൾ!

തൃശൂർ: കോർപറേഷന്‍റെ ജയ്ഹിന്ദ് കെട്ടിടത്തിലെ വാട്ടർ ടാങ്കിൽ ചത്ത കിളികളും പായലും പൂപ്പലും. കെട്ടിടത്തിലെ വാടകക്കാർക്കും ജയ്ഹിന്ദ് മാർക്കറ്റിലെ കച്ചവടക്കാർക്കും വിതരണം ചെയ്തിരുന്ന കുടിവെള്ള ടാങ്കിലാണ് ഇവ കണ്ടെത്തിയത്. സ്ഥാപനങ്ങളിലെ ചിലർക്ക് ആരോഗ്യപ്രശ്നങ്ങൾ ഉണ്ടായതിനെത്തുടർന്ന് ടാങ്ക് പരിശോധിച്ചപ്പോഴാണു ദുരവസ്ഥ ശ്രദ്ധയിൽപ്പെട്ടത്. കെട്ടിടത്തിലെ ബാങ്കുകൾ, കച്ചവടസ്ഥാപനങ്ങൾ എന്നിവിടങ്ങളിലേക്കു വരുന്നവർ ഈ ടാങ്കിൽനിന്നുള്ള വെള്ളം കുടിക്കാൻ ഉപയോഗിച്ചിട്ടുണ്ടെങ്കിൽ അവർക്കും ഗുരുതര ആരോഗ്യപ്രശ്നങ്ങൾ ഉണ്ടാകാനിടയുണ്ട്. നിലവിൽ ടാങ്കറിൽ കൊണ്ടുവരുന്ന വെള്ളം ഈ ടാങ്കിലേക്കു പന്പ് ചെയ്താണു ഉപയോഗിക്കുന്നത്. നേരത്തെ കുടിവെള്ളത്തിനു ദുർഗന്ധമുണ്ടായപ്പോൾ കോർപറേഷനിൽ പലതവണ പരാതി നൽകിയിരുന്നതായും ഒടുവിൽ പൈപ്പിൽനിന്നു തൂവലുകളുടെ ഭാഗങ്ങൾ ഉൾപ്പെടെ വന്നുതുടങ്ങിയപ്പോഴാണ് ടാങ്ക് പരിശോധിച്ചതെന്നും വ്യാപാരികൾ പറഞ്ഞു. അടച്ചുവച്ചിരുന്ന ടാങ്കായിരുന്നുവെന്നും അതെങ്ങനെയാണ് തുറന്നുകിടക്കാൻ ഇടയായതെന്ന് അറിയില്ലെന്നും ആരോഗ്യ സ്റ്റാൻഡിംഗ് കമ്മിറ്റി ചെയർമാൻ പി.കെ. ഷാജൻ പറഞ്ഞു. എന്നാൽ ഇത് ഒറ്റപ്പെട്ട സംഭവമല്ലെന്നു കൗണ്‍സിലർ ജോണ്‍ ഡാനിയൽ ആരോപിച്ചു. വാടകയ്ക്കു കൊടുത്തിട്ടുള്ള കോർപറേഷന്‍റെ ഒട്ടുമിക്ക കെട്ടിടങ്ങളുടെയും അവസ്ഥ ഇതുതന്നെയാണ്. കോർപറേഷൻ കെട്ടിടങ്ങളുടെ ശോചനീയാവസ്ഥ നിരവധി തവണ വ്യാപാരികൾ ശ്രദ്ധയിൽപ്പെടുത്തിയിട്ടുണ്ടെങ്കിലും ഒരു നടപടിയും എടുത്തിട്ടില്ല എന്നതിനു തെളിവാണ് ഈ സംഭവമെന്നും അദ്ദേഹം പറഞ്ഞു.

ഏതു സാഹചര്യവും നേരിടാൻ സജ്ജമെന്നു ജില്ലാ കളക്ടർ

തൃശൂർ: മഴമുന്നറിയിപ്പുകൾ അനുനിമിഷം മാറാൻ സാധ്യതയുള്ളതിനാൽ അതിനു കാത്തുനിൽക്കാതെ രക്ഷാനടപടികളുമായി മുന്നോട്ടുപോകണമെന്നു ജില്ലാ കളക്ടർ അർജുൻ പാണ്ഡ്യൻ മഴക്കാല മുന്നൊരുക്ക അവലോകനയോഗത്തിൽ നിർദേശിച്ചു. വിവിധ വകുപ്പുകൾ ഏതു സാഹചര്യവും നേരിടാൻ സജ്ജമാണെന്നും അദ്ദേഹം അറിയിച്ചു. കഴിഞ്ഞമാസം പെയ്ത മഴയിൽ ജില്ലയിൽ നാലു വീടുകൾ പൂർണമായും 194 വീടുകൾ ഭാഗികമായും തകർന്നതായും നാലുപേർ മരിച്ചതായും തഹസിൽദാർമാർ അറിയിച്ചു. നഷ്ടപരിഹാരത്തിനുള്ള നടപടികൾ വേഗത്തിലാക്കാൻ കളക്ടർ നിർദേശംനൽകി. ജില്ലയിലെ ആവശ്യത്തിനുള്ള ക്യാന്പുകളും സൈക്ലോണ്‍ ഷെൽട്ടറും പ്രവർത്തനസജ്ജമാണെന്നും ഇവയുടെ ഫിറ്റ്നസ് പരിശോധന നടക്കുന്നതായും യോഗം വിലയിരുത്തി. ദേശീയപാതയിലെ ഓടകളിലെ തടസങ്ങൾ നീക്കണം, കാടുപിടിച്ചുകിടക്കുന്നവ വെട്ടിത്തെളിക്കണം, സർവീസ് റോഡുകളിലെ കുഴികൾ രൂപപ്പെടുന്പോൾ തന്നെ അടയ്ക്കണം തുടങ്ങിയവ എൻഎച്ച്എഐയോടു നിർദേശിച്ചു. പ്രവൃത്തി പുരോഗമിക്കുകയാണെന്നും വേഗത്തിൽ പൂർത്തിയാക്കുമെന്നും എൻഎച്ച്എഐ അറിയിച്ചു. ആദിവാസിമേഖലകളിലെ ഭക്ഷണകിറ്റ് വിതരണം മൂന്നു ദിവസത്തിനുള്ളിൽ പൂർത്തിയാക്കുമെന്നു ട്രൈബൽ ഡെവലപ്മെന്‍റ് ഓഫീസർ അറിയിച്ചു. ജില്ലയിലെ ഡാമുകളിൽ സംഭരണശേഷിയിലും കുറവ് വെള്ളമാണു നിലവിലെന്ന് മേജർ ഇറിഗേഷൻ വകുപ്പ് എക്സിക്യൂട്ടീവ് എൻജിനീയർ അറിയിച്ചു. ഡെങ്കിപ്പനി, ഹെപ്പറ്റൈറ്റിസ് ബി, എലിപ്പനി എന്നിവയ്ക്കെതിരേ പ്രതിരോധപ്രവർത്തനങ്ങൾ ശക്തമാക്കിയതായി ആരോഗ്യവകുപ്പ് അറിയിച്ചു. ലൈനുകളുടെയും മറ്റും അറ്റകുറ്റപ്പണികൾ പൂർത്തിയാക്കിയതായി കെഎസ്ഇബി അറിയിച്ചു. അടിയന്തരഘട്ടങ്ങൾ നേരിടാൻ ക്വിക് റെസ്പോണ്‍സ് ടീം രൂപീകരിച്ചു. ജില്ല പഞ്ചായത്ത് പ്രസിഡന്‍റ് വി.എസ്. പ്രിൻസ്, സബ് കളക്ടർ അഖിൽ വി. മേനോൻ, ഡെപ്യൂട്ടി കളക്ടർ സ്മിത റാണി, വിവിധ വകുപ്പ് ഉദ്യോഗസ്ഥർ എന്നിവർ പങ്കെടുത്തു.

തീരമേഖലയിൽ മിന്നൽ ചുഴലി; രണ്ടുപേർക്ക് പരിക്ക്

ചാവക്കാട്: പുത്തൻകടപ്പുറത്ത് മിന്നൽ ചുഴലിക്കാറ്റിൽ മേൽക്കൂരയിലെ ഓട് തകർന്നുവീണ് യുവാവിനും മകനും പരിക്ക്. ഭാര്യയും എട്ടുമാസം പ്രായമുള്ള പിഞ്ചുകുഞ്ഞും പരിക്കേൽക്കാതെ രക്ഷപ്പെട്ടു. തിരുവത്ര പുത്തൻകടപ്പുറം എച്ച്ഐ മദ്രസയ്ക്കു സമീപം മേപ്പുറത്ത് നൗഫൽ (40), മകൻ സയാൻ (ഏഴ്) എന്നിവരെ പരിക്കുകളോടെ ചാവക്കാട് താലൂക്ക് ആശുപത്രിയിൽ പ്രവേശിപ്പിച്ചു. കാറ്റിൽ രണ്ടു വീടുകളുടെ മേൽക്കൂര ഭാഗികമായി തകർന്നു. ഇന്നലെ പുലർച്ചെ ഒന്നരയോടെയാണ് സംഭവം. നൗഫലിന്‍റെയും, പടിഞ്ഞാറെ പുരയ്ക്കൽ അബ്ദുട്ടിയുടെയും വീടുകൾക്കാണ് നാശം. സമീപത്തെ ബദർ മസ്ജിദിന്‍റെ മേൽക്കൂരയിലെ ഷീറ്റുകൾ കാറ്റിൽ പറന്നു പോയി. അബ്ദുട്ടിയുടെ വിറകുപുരയ്ക്കും കേടുപറ്റി. മരംവീണ് മതിൽ തകർന്നു. ഒരുമനയൂർ നോർത്ത് തെരുവത്ത് വീട്ടിൽ ജബ്ബാറിന്‍റെ ഓടുമേഞ്ഞ വീടിനു മുകളിലേക്ക് സമീപത്തെ പറമ്പിലെ മാവിന്‍റെ കൊമ്പ് ഒടിഞ്ഞുവീണു. വീട് ഭാഗികമായി തകർന്നിട്ടുണ്ട്. പുത്തൻകടപ്പുറത്ത് നഗരസഭാധ്യക്ഷ ഷീജ പ്രശാന്ത്, വാർഡ് കൗൺസിലർ ഉമ്മു റഹ്മത്ത്, ഉദ്യോഗസ്ഥർ എന്നിവർ സ്ഥലം സന്ദർശിച്ചു.

കുഴപ്പിച്ച് വഴിനീളെ കുഴി

സി.ജി. ജിജാസൽ തൃശൂർ: ഇതല്ല ഇതിനപ്പുറവും ചാടിക്കടന്നതാ എന്ന ഡയലോഗുമായി ജനം കുണ്ടും കുഴികളും ചാടിക്കടക്കുന്ന കാഴ്ച കാണണോ, തൃശൂർ നഗരത്തിൽ വന്നാൽമതി. കുഴികളായ കുഴികളെല്ലാം കുഴപ്പിക്കാൻ തുടങ്ങിയപ്പോൾ റോഡരികിലേക്കും നടപ്പാതകളിലേക്കും കയറി വാഹനങ്ങളും ഓടാൻ തുടങ്ങിയിരിക്കുകയാണ്. കുടുംബങ്ങൾക്കും കുട്ടികൾക്കും ഭയത്തോടെ പുറത്തിറങ്ങേണ്ട അവസ്ഥ. സമയക്രമം പാലിക്കാൻ ബസുകളും അവയ്ക്കു പിന്നാലെ മറ്റുവാഹനങ്ങളും കുതിക്കാൻ തുടങ്ങിയതോടെ നഗരത്തിൽ ഇരുചക്ര വാഹനങ്ങൾക്കും അപകടഭീഷണിയാണ്. നേരം ഇരുട്ടിവെളുക്കുന്പോഴേക്കും പുതിയ കുഴികൾ പ്രത്യക്ഷപ്പെടും. അതറിയാതെ യാത്രക്കാർ അപകടത്തിലുംപെടും. പൂങ്കുന്നത്തെ റോഡ് നിർമാണവുമായി ബന്ധപ്പെട്ട് ഭാരവാഹനങ്ങൾ അടക്കമുള്ളവ കടന്നുപോകാൻ തുടങ്ങിയതോടെ പൂങ്കുന്നം ഉദയനഗർ റോഡിന്‍റെ സ്ഥിതി ഏറെ പരിതാപകരമായി. റോഡിന്‍റെ തുടക്കം മുതൽ ഒടുക്കം വരെ പലയിടങ്ങളിലും ഭീമൻ കുഴികളും വെള്ളക്കെട്ടുകളും രൂപപ്പെട്ട നിലയിലാണ്. അയ്യന്തോളിലേക്കുള്ള എളുപ്പവഴിയായ കാർത്യായനി അന്പലം വഴി പഞ്ചിക്കൽ തോടിനോടു ചേർന്നുള്ള റോഡും തോടായ നിലയിലാണ്. ചെന്പുക്കാവ്, രാമനിലയം റോഡുകളിലും ആളെ വീഴ്ത്തുന്ന അപകടക്കുഴികൾ പ്രത്യക്ഷപ്പെട്ടിട്ടുണ്ട്. വടക്കേച്ചിറയ്ക്ക് സമീപം ഏതാനും മാസങ്ങൾക്കു മുൻപ് പാച്ച് വർക്ക് ചെയ്ത റോഡും മഴയിൽ തകർന്നു. മഴയൊന്ന് പെയ്തൊഴിയുന്പോഴേക്കും ടാറിട്ടത് ഒലിച്ചുപോകുന്ന സ്ഥിതിയുമുണ്ട്. സ്വകാര്യ ബസുകൾക്ക് റോഡുകളിലെ തകർച്ചയേക്കാൾ തലവേദനയാകുന്നത് ശക്തൻ സ്റ്റാൻഡിലേക്ക് കടക്കുന്പോഴും മടങ്ങുന്പോഴുമുള്ള ഭീമൻ കുഴികളും ചെളിക്കുളങ്ങളുമാണ്. നേരത്തെ തകർന്ന് തരിപ്പണമായിക്കിടന്നിരുന്ന സ്റ്റാൻഡ് കോണ്‍ക്രീറ്റിംഗ് നടത്തി മനോഹരമാക്കിയെങ്കിലും പ്രവേശനവഴികളുടെ ശോച്യാവസ്ഥ വലിയ ദുരിതമാണ് യാത്രികർക്ക് സമ്മാനിക്കുന്നത്. മഴ കൂടുതൽ തീവ്രമാകാനിരിക്കെ കുഴികൾ അടിയന്തരമായി അടച്ചില്ലെങ്കിൽ കഷ്ടപ്പാട് ഇരട്ടിയാകും.

നാഷണൽ ഹൈവേ അധികൃതർക്കെതിരേ നരഹത്യയ്ക്ക് കേസെടുക്കണം: എംഎൽഎ

മുരിങ്ങൂർ: ദേശീയപാതയിലെ രൂക്ഷമായ ഗതാഗതക്കുരുക്കിനും വെള്ളക്കെട്ടിനും പരിഹാരം വേണമെന്നാവശ്യപ്പെട്ട് മുരിങ്ങൂർ ജംഗ്ഷനിലെ ചെളിക്കുണ്ടിലിരുന്ന് സനീഷ് കുമാർ ജോസഫ് എംഎൽഎയുടെ പ്രതിഷേധം. കോരിച്ചൊരിയുന്ന മഴയെ അവഗണിച്ച് രാവിലെ ഒന്പതരയോടെ ആരംഭിച്ച കുത്തിയിരിപ്പ് സമരത്തിൽ ചാലക്കുടി മണ്ഡലത്തിൽ നിന്നെത്തിയ പാർട്ടി പ്രവർത്തകരും പ്രദേശവാസികളും പങ്കെടുത്തു. നിർമാണ പ്രവൃത്തികളിലെ പിഴവുമൂലം അപകടങ്ങളും മരണങ്ങളും തുടരുന്ന സാഹചര്യത്തിൽ എൻഎച്ച്എഐക്കെതിരെ നരഹത്യയ്ക്ക് കേസെടുക്കാൻ സംസ്ഥാന സർക്കാർ തയാറാകണമെന്ന് എംഎൽഎ ആവശ്യപ്പെട്ടു. കഴിഞ്ഞ ഏഴു മാസക്കാലമായി ചാലക്കുടിയിലെയും സമീപ പഞ്ചായത്തുകളിലെയും ജനങ്ങളെ അധികൃതർ ബന്ദികളാക്കിയിരിക്കുകയാണ്. കച്ചവടക്കാർ, രോഗികളുമായി പോകുന്ന ആംബുലൻസ്, എയർപോർട്ട് യാത്രികർ, വിദ്യാർഥികൾ, തൊഴിലാളികൾ അടക്കമുള്ള ജനങ്ങൾ അനുഭവിക്കുന്ന ദുരിതങ്ങൾക്ക് അറുതിവേണമെന്നും അദ്ദേഹം ആവശ്യപ്പെട്ടു. സമരം ഉച്ചയ്ക്ക് 1.15 വരെ നീണ്ടു. തുടർന്ന് നാഷണൽ ഹൈവേ അഥോറിറ്റി സൈറ്റ് ഇൻചാർജ് അമൽ അനുനയ നീക്കവുമായി സ്ഥലത്തെത്തി. മഴയ്ക്ക് ശമനമാകുന്നമുറയ്ക്ക് ഗതാഗതം സുഗമമാക്കാൻ നിലവിലെ സർവീസ് റോഡുകൾ റീ ടാറിംഗ് ചെയ്യാമെന്നും ദിവസങ്ങൾക്കകം കൂടിയാലോചനയ്ക്കായി യോഗം വിളിച്ചുചേർക്കാമെന്നും എംഎൽഎ മുന്നാേട്ടുവച്ച ആവശ്യങ്ങൾ അനുഭാവപൂർവം പരിഗണിക്കാമെന്നുമുള്ള ഉറപ്പിൽ സമരം അവസാനിപ്പിക്കുകയായിരുന്നു. ചാലക്കുടി നഗരസഭ ചെയർമാൻ ഷിബു വാലപ്പൻ, ബ്ലോക്ക് കോൺഗ്രസ് പ്രസിഡന്‍റ് വി.ഒ. പൈലപ്പൻ, ഡിസിസി സെക്രട്ടറി ജെയിംസ് പോൾ, പരിയാരം ബ്ലോക്ക് കോൺഗ്രസ് പ്രസിഡന്‍റ് എം.ടി. ഡേവീസ്, മേലൂർ മണ്ഡലം പ്രസിഡന്‍റ് രാജേഷ് മേനോത്ത്, കാടുകുറ്റി മണ്ഡലം പ്രസിഡന്‍റ് തോമസ് ഐ. കണ്ണത്ത്, കൊരട്ടി മണ്ഡലം പ്രസിഡന്‍റ് ഇൻചാർജ് ആൽബിൻ പൗലോസ്, കോടശേരി മണ്ഡലം പ്രസിഡന്‍റ് സുനിൽ സി. മേനോൻ തുടങ്ങിയവരുടെ നേതൃത്വത്തിലാണ് കുത്തിയിരിപ്പ് സമരം നടന്നത്. കൊരട്ടി സിഐ അമൃത് രംഗന്‍റെ നേതൃത്വത്തിൽ വൻ പോലീസ് സന്നാഹവും സ്ഥലത്ത് ക്യാമ്പ് ചെയ്തിരുന്നു.

മിമിക്രി കലാകാരൻ കലാഭവൻ നിജു കുഴഞ്ഞുവീണ് മരിച്ചു

വാടാനപ്പള്ളി: മിമിക്രി കലാകാരനും നടനുമായ കലാഭവൻ നിജു(48) കർണ്ണാടകയിലെ സിനിമ ലൊക്കേഷനിൽ കുഴഞ്ഞുവീണ് മരിച്ചതായി ബന്ധുക്കൾക്ക് വിവരം ലഭിച്ചു. ബുധനാഴ്ച്ച രാത്രിയാണ് നെഞ്ചുവേദന അനുഭവപ്പെട്ടത്. തുടർന്ന് ആശുപത്രിയിൽ എത്തിച്ചെങ്കിലും മരിച്ചിരുന്നു. ലൊക്കേഷനിൽ ഒരാഴ്ചക്കിടെ നിജുവടക്കം നാലു പേർ മരിച്ചതായാണ് വിവരം. മാളികപ്പുറമടക്കം വിവിധ സിനിമകളിലും മിന്നുകെട്ട് അടക്കം വിവിധ ടിവി സീരിയലുകളിലും ശ്രദ്ധേയമായ വേഷങ്ങളിൽ അഭിനയിച്ചിട്ടുണ്ട്. കലാഭവനിലൂടെയാണ് മിമിക്രി രംഗത്തേക്ക് കടന്നുവന്നത്. നിരവധി വേദികളിലും ചാനലുകളിലും പ്രോഗ്രാം അവതരിപ്പിച്ച് ശ്രദ്ധ നേടിയിരുന്നു. വാടാനപ്പള്ളി പോലീസ് സ്‌റ്റേഷനു കിഴക്ക് വാക്കാട്ട് പരേതനായ കുമാരന്‍റെ മകനാണ്. മൂന്ന് മാസം മുമ്പ് ചേട്ടൻ മധു വൃക്കരോഗം ബാധിച്ച് മരിച്ചിരുന്നു. കുടുംബത്തിന്‍റെ വേദന വിട്ടുമാറും മുമ്പാണ് നിജുവിന്‍റെ മരണം. മരണ വിവരമറിഞ്ഞ് ബന്ധുക്കൾ കർണാടകയിലേക്ക് പോയിട്ടുണ്ട്. ഭാര്യ: സുരജ. മക്കൾ: നിമ്മി, നീതു.

പനി ബാധിച്ച് യുവാവ് മരിച്ചു

കൊടുങ്ങല്ലൂർ: പനി ബാധിച്ച് ചികിത്സയിലായിരുന്ന യുവാവ് മരിച്ചു. നഗരസഭയിലെ പടാകുളത്തിനു സമീപം തച്ചിപ്പറമ്പിൽ ഗോപാലൻ മകൻ സുജിത്ത്(43) ആണ് മരിച്ചത്. എലിപ്പനിയാണെന്നാണ് സംശയിക്കുന്നു. പനിഗുരുതരമായതിനെ തുടർന്ന് തൃശൂർ മെഡിക്കൽ കോളജിൽ ചികിത്സയിലിരിക്കെയാണ് മരണം. സംസ്കാരം നടത്തി.

എലിപ്പനി ബാധിച്ച് ആമ്പല്ലൂര്‍ സ്വദേശി മരിച്ചു

ആമ്പല്ലൂര്‍: എലിപ്പനി ബാധിച്ച് മധ്യവയസ്കൻ മരിച്ചു. വില്ലേജ് കോര്‍ട്ട് റോഡില്‍ താമസിക്കുന്ന വേങ്ങാശേരി വീട്ടില്‍ രവീന്ദ്രനാണ്(60) ആണ് മരിച്ചത്. എറണാകുളത്തെ സ്വകാര്യ ആശുപത്രിയില്‍ ചികിത്സയിലിരിക്കെ ഇന്നലെ ഉച്ചയ്ക്കായിരുന്നു മരണം. ഈ മാസം 5 മുതലാണ് രവീന്ദ്രന് പനി തുടങ്ങിയത്. പനി മാറാത്തതിനെ തുടര്‍ന്ന് ചൊവ്വാഴ്ച തൃശൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. തുടര്‍ന്നാണ് എലിപ്പനിയാണെന്ന് സ്ഥിരീകരിച്ചു. പിന്നീട് ആരോഗ്യനില വഷളായതിനെ തുടര്‍ന്ന കൊച്ചിയിലെ സ്വകാര്യ ആശുപത്രിയില്‍ രവീന്ദ്രനെ പ്രവേശിപ്പിച്ചിരുന്നുവെങ്കിലും ജീവന്‍ രക്ഷിക്കാനായില്ല. സംസ്‌കാരം ഇന്ന് രാവിലെ 11.30ന് വടൂക്കര ശ്രീനാരായണ ശ്മശാനിയില്‍. ഭാര്യ: മിനി. മക്കള്‍: അമരീഷ്, അക്ഷയ്.

ദേവാലയങ്ങളില്‌ തിരുനാളാഘോഷം

പറവട്ടാനി വിമലനാഥ ദേവാലയം വിശുദ്ധ അന്തോണീസിന്‍റെ തിരുശേഷിപ്പു പ്രതിഷ്ഠയും 25-ാം ഊട്ടുതിരുനാളും നാളെ മുതൽ 15വരെ ആഘോഷിക്കുമെന്ന് വികാരി റവ. ഡോ. റോയ് മൂക്കൻ പത്രസമ്മേളനത്തിൽ പറഞ്ഞു. നാളെ വൈകീട്ട് ലൂർദ് പള്ളിയിൽ വിശുദ്ധ കുർബാന, ലദീഞ്ഞ്, നൊവേന എന്നിവയ്ക്കുശേഷം 5.30ന് പാദുവായിൽനിന്നു കൊണ്ടുവന്ന വിശുദ്ധ അന്തോണീസിന്‍റെ തിരുശേഷിപ്പു വഹിച്ചുകൊണ്ടുള്ള പ്രദക്ഷിണം. 14നു വിശുദ്ധ അന്തോണീസിന്‍റെ തിരുശേഷിപ്പു പ്രതിഷ്ഠയും കൂടുതുറക്കൽ ശുശ്രൂഷയും അന്തോണി സംഗമവും. രാവിലെ 6.15നു വിശുദ്ധ കുർബാന, ലദീഞ്ഞ്, നൊവേന എന്നിവയ്ക്കു അതിരൂപത സഹായമെത്രാൻ മാർ ടോണി നീലങ്കാവിൽ കാർമികനാകും. 15നു തിരുനാൾ ദിനത്തിൽ രാവിലെ 6.15നു വിശുദ്ധ കുർബാന, ലദീഞ്ഞ്, നൊവേന. തുടർന്ന് നേർച്ചഭക്ഷണം വെഞ്ചരിപ്പ്. രാവിലെ 11 മുതൽ ഉച്ചകഴിഞ്ഞു രണ്ടുവരെ നേർച്ചഭക്ഷണം, പായസം വിതരണം. രാവിലെ 9.30ന് തിരുനാൾ പാട്ടുകുർബാനയ്ക്കു ക്രൈസ്റ്റ് വില്ല ഡയറക്ടർ ഫാ. സനോജ് അറങ്ങാശേരി കാർമികനാകും. ഡിബിസിഎൽസി അസിസ്റ്റന്‍റ് ഡയറക്ടർ ഫാ. സനൽ മാളിയേക്കൽ തിരുനാൾ സന്ദേശം നല്കും. ആറ്റത്ര സെന്‍റ് ഫ്രാൻസിസ് ദേവാലയം വിശുദ്ധ അന്തോണീസിന്‍റെ ഊട്ടുതിരുനാൾ നാളെ ആഘോഷിക്കും. ഇറ്റലിയിലെ പാദുവായിൽനിന്ന് കൊണ്ടുവന്ന വിശുദ്ധ അന്തോണീസിന്‍റെ അത്ഭുത തിരുശേഷിപ്പ് സൂക്ഷിച്ചിരിക്കുന്ന കപ്പേളയിൽ ലദീഞ്ഞ്, നൊവേന തിരുകർമങ്ങൾ നടക്കും. രാവിലെ 7.30 മുതൽ 10.30 വരെയും ഉച്ചയ്ക്ക് 12 മുതൽ മൂന്നു വരേയും ഊട്ടുനേർച്ച ഉണ്ടായിരിക്കും. രാവിലെ 10.30ന് നടക്കുന്ന തിരുനാൾ ദിവ്യബലിക്ക് മൊൽബൺ രൂപത ബിഷപ് എമരിറ്റസ് മാർ ബോസ്കോ പുത്തൂർ മുഖ്യകാർമികനാകും. വികാരി ഫാ. ജോമോൻ മുരിങ്ങാത്തേരി, കടങ്ങോട് പള്ളി വികാരി ഫാ. സന്തോഷ് അന്തിക്കാട്ട് എന്നിവർ സഹകാർമികരാകും. രാവിലെയും വൈകീട്ടും നടക്കുന്ന വിശുദ്ധ കുർബാനയ്ക്ക് പുതുരുത്തി പള്ളി വികാരി ഫാ. റിജോ വിതയത്തിൽ കൊഴുക്കുള്ളിക്കാരനും പതിയാരം പള്ളി നടത്തു വികാരി ഫാ. ഷോജോമോൻ എസ്ഡിവിയും കാർമികരാകും. വൈകിട്ട് 5.30ന് കോട്ടപ്പുറം സെന്‍റ് ആന്‍റണീസ് കപ്പേളയിലേക്ക് വിശുദ്ധന്‍റെ തിരുസ്വരൂപംവഹിച്ചുകൊണ്ട് തിരുനാൾ പ്രദക്ഷിണം നടക്കും. നേർച്ചഭക്ഷണം പായസത്തിനും പാഴ്സൽ സൗകര്യമൊരുക്കിയിട്ടുണ്ട്. പുത്തൻപീടിക സെന്‍റ് ആന്‍റണീസ് കപ്പേള തിരുനാളിന് കൊടിയേറി. വികാരി ഫാ. ജോസഫ് മുരിങ്ങാത്തേരി കൊടിയേറ്റം നിർവഹിച്ചു. നാളെയാണ് തിരുനാൾ. വൈകിട്ട് ആറിന് ആഘോഷമായ തിരുനാൾ കുർബാന, പ്രദക്ഷിണം, തുടർന്ന് നേർച്ച ഊട്ട് ഉണ്ടായിരിക്കും. അസി. വികാരി ഫാ. ജോഫിൻ അക്കരപ്പട്ട്യേക്കൽ, കൈക്കാരന്മാരായ സണ്ണി കുരുതുകുളങ്ങര, ജോസഫ് അരിമ്പൂർ, ആൾഡ്രിൻ ജോസ്, ജോജി മാളിയേക്കൽ എന്നിവർ നേതൃത്വംനൽകി. പഴുവിൽ സെന്‍റ് ആന്‍റണീസ് ഫൊറോനാ ദേവാലയം വിശുദ്ധ അന്തോണീസിന്‍റെ തിരുനാളിന് കൊടിയേറി. രാവിലെനടന്ന വിശുദ്ധ കുർബാനയ്ക്കുശേഷം ഫൊറോന വികാരി റവ.ഡോ. വിൻസന്‍റ് ചെറുവത്തൂർ കൊടിയേറ്റം നിർവഹിച്ചു. നാളെയാണ് തിരുനാൾ. രാവിലെ ആറിന് വിശുദ്ധ കുർബാന, 10ന് ലദീഞ്ഞ്, നൊവേന, ആഘോഷമായ പാട്ടുകുർബാന, പള്ളി ചുറ്റി പ്രദക്ഷിണം, ബാന്‌ഡ് വാദ്യം, ഉച്ചയ്ക്ക് 1.30 വരെ നേർച്ച ഊട്ട് എന്നിവ ഉണ്ടായിരിക്കും. ഫൊറോന വികാരി റവ.ഡോ. വിൻസെന്‍റ് ചെറുവത്തൂർ, അസി.വികാരി ഫാ. ഡേവിസ് പുലിക്കോട്ടിൽ, ട്രസ്റ്റിമാരായ ടിന്‍റോ ജോസ്, ഡിനോ ദേവസി, ആന്‍റോ മേയ്ക്കാട്ടുകുളം, അനിൽ ആന്‍റണി, തിരുനാൾ കൺവീനർ റിനോയ് ജോൺസൺ തുടങ്ങിയവർ നേതൃത്വംനൽകി. അമ്മാടം കിഴക്കേ കപ്പേള പള്ളി വിശുദ്ധ അന്തോണീസിന്‍റെ തിരുനാൾ 15ന് ആഘോഷിക്കും. വൈകീട്ട് 5.30ന് വളപ്രദിക്ഷണവും ഏഴിന് ലദീഞ്ഞും നൊവേനയും ഉണ്ടാകും. തിരുനാളിന്‍റെ കൊടിയേറ്റം ഫാ. ജെയിംസ് ഇഞ്ചോടിക്കാരൻ നിർവഹിച്ചു. പി.ഒ. വിൽസൻ, പി.കെ. അഗസ്റ്റിൻ, പി.വി. ജോസ്, എ.എൻ. അന്തോണി എന്നിവർ നേതൃത്വംനൽകി.

മനംനിറച്ച് മല്ലൻകുഴി നീർച്ചോല

എരുമപ്പെട്ടി: പ്രകൃതിസ്നേഹികളുടെ മനംനിറച്ച് ഒഴുകുകയാണ് കടങ്ങോട് മല്ലൻകുഴി നീർച്ചോല. മഴപെയ്‌ത് തുടങ്ങിയതോടെ കൂടുതൽ മനോഹരിയായ മല്ലൻകുഴിയുടെ കുളിരണിയാൻ നിരവധിപേരാണ് ഇവിടെയെത്തുന്നത്. കടങ്ങോട് വനാതിർത്തിയിലൂടെ ഒഴുകുന്ന നീർച്ചോലയാണ് മല്ലൻകുഴി. വന ദേവനായ മല്ലന്‍റെ കാൽപാദം പതിഞ്ഞ് കുഴിയുണ്ടായ പ്രദേശമായതിനാലാണ് മല്ലൻകുഴിയെന്ന പേര് വന്നതെന്നാണ് ഐതിഹ്യം. നീർച്ചോലയ്ക്കുസമീപം മല്ലൻകാവും സ്ഥിതിചെയ്യുന്നുണ്ട്. ആഴംകുറഞ്ഞ ജലാശയങ്ങളും അപകട സാധ്യതകുറവുള്ള ചെറു വെള്ളച്ചാട്ടങ്ങളുമാണ് മല്ലൻകുഴിയുടെ പ്രത്യേകത. മഴക്കാലമായാൽ നിരവധി കുടുംബങ്ങളാണ് ഇവിടെയെത്തുന്നത്.ജില്ലയിലെ ഇക്കോ ടൂറിസം മാപ്പിൽ മല്ലൻകുഴി ഇടംനേടിയിട്ടുണ്ട്. അതിനാൽ ഗ്രാമീണ ടൂറിസം ലക്ഷ്യമിട്ട് കടങ്ങോട് ഗ്രാമപഞ്ചായത്ത് മല്ലൻകുഴി നീർത്തട പദ്ധതിക്ക് രൂപംനൽകിയിട്ടുണ്ട്. വേനൽ കനത്താൽ മല്ലൻകുഴി വറ്റിവരളും. മഴക്കാലത്ത് വെള്ളംതടഞ്ഞ് നിർത്തുവാൻ സംവിധാനമില്ലാത്തതാണ് വരൾച്ചയ്ക്ക് ഇടയാക്കുന്നത്. ഇതുപരിഹരിക്കുന്നതിനുവേണ്ടിയാണ് ഫൈബർ റീ ഇൻഫോഴ്സ്ഡ് പ്ലാസ്റ്റിക് ഉപയോഗിച്ചുള്ള ചീർപ്പുകളോടു കൂടിയുള്ള തടയണ നിർമിക്കാൻ പദ്ധതി തയാറാക്കിയിരിക്കുന്നത്. നഗരസഞ്ചയ പദ്ധതിയിൽ ഉൾപ്പെടുത്തി കേന്ദ്ര ധനകാര്യ കമ്മീഷന്‍റെ 2.40 കോടിയും ഗ്രാമ പഞ്ചായത്ത് തനത് ഫണ്ട് 4,87,000 രൂപയും ചെലവഴിച്ചാണ് പദ്ധതി നടപ്പിലാക്കുന്നത്.

ജില്ലാ ആശുപത്രിയിൽ പാലിയേറ്റീവ് രോഗികളോട് അവഗണനയെന്ന് കോൺഗ്രസ്

വടക്കാഞ്ചേരി: ജില്ലാ ആശുപത്രിയിലെത്തുന്ന രോഗികളോട് അധികൃതരുടെ അവഗണനയാണന്ന് കോൺഗ്രസ് ആരോപിച്ചു. ഒപി ടിക്കറ്റെടുത്ത് മുന്നൂറ് മീറ്റർ കയറ്റംകയറിയാണ് ഡിഇഐസിയുടെ ഐസൊലേഷൻ വാർഡിൽ പ്രവർത്തിക്കുന്ന പാലിയേറ്റീവ് സെന്‍ററിലേക്ക് എത്തുക. ഡോക്ടറെ കണ്ടു കഴിഞ്ഞാൽ മരുന്നുവാങ്ങിക്കാൻ വീണ്ടും ഫാർമസിയിലേക്ക് തിരിച്ച് അതേ ദൂരം എത്തണം. വാങ്ങിയ മരുന്ന് ഡോക്ടറെ കാണിച്ച് ഉറപ്പുവരുത്താൻ വീണ്ടും അത്രയുംദൂരം വീണ്ടും പോകണം. ശാരീരിക അവശതകൾ അനുഭവിക്കുന്നവരും രോഗങ്ങൾക്ക് കീഴ്പ്പെട്ടവരുമായ പാവപ്പെട്ട രോഗികളെയാണ് ഇത്തരത്തിൽ അധികൃതർ ദുരിതത്തിലാക്കുന്നത്. നിലവിൽ ആറാമത്തെ തവണയാണ് പാലിയേറ്റിവ് പരിചരണവിഭാഗത്തിന്‍റെ സെന്‍റർ മാറ്റുന്നത്. മെയ് 15 മുതലാണ് പുതിയ സ്ഥലത്തേക്കുമാറ്റിയത്. മുന്നൂറിലധികംരോഗികളാണ് പാലിയേറ്റീവ് പരിചരണവിഭാഗത്തെ ആശ്രയിക്കുന്നത്. ഇതിനെതിരേ ബ്ലോക്ക് കോൺഗ്രസ് പ്രസിഡന്‍റ് പി.ജി. ജയദീപ്, മണ്ഡലം കോൺഗ്രസ് പ്രസിഡന്‍റ് എം.എച്ച്. ഷാനവാസ്, നഗരസഭ പ്രതിപക്ഷനേതാവ് എസ്.എ.എ. ആസാദ്, ജയൻ മംഗലം, കെ.കെ അബൂബക്കർ, എൻ. ഗോപാലകൃഷ്ണൻ എന്നിവർ ആശുപത്രി സന്ദർശിച്ച് സൂപ്രണ്ടിന് നിവേദനംനൽകി. അടിയന്തരമായി നടപടികൾ കൈകൊള്ളണമെന്നും പരിഹാരമുണ്ടായില്ലങ്കിൽ ശക്തമയ സമരപരിപാടികൾ നടത്തുമെന്നും കോൺഗ്രസ് നേതാക്കൾ അറിയിച്ചു.

എയ്യാൽ നിർമലമാത കോൺവന്‍റ് സ്കൂൾ സിൽവർ ജൂബിലി ആഘോഷം

തൃശൂർ: എയ്യാൽ നിർമലമാത കോണ്‍വന്‍റ് സ്കൂൾ സിൽവർ ജൂബിലി ആഘോഷ പരിപാടികൾ പ്രൊവിൻഷ്യാൾ സിസ്റ്റർ ഡോ. മേഴ്സിറ്റ കണ്ണന്പുഴ ഉദ്ഘാടനം ചെയ്തു. സിൽവർ ജൂബിലി പവലിയന്‍റെ ഉദ്ഘാടനം സിസ്റ്റർ ഡോ. മേഴ്സിറ്റ കണ്ണന്പുഴയും. മുൻ പ്രൊവിൻഷ്യാൾ സിസ്റ്റർ ഡോ. സോഫി പെരേപ്പാടനും ചേർന്നു നിർവഹിച്ചു. സിൽവർ ജൂബിലി ലോഗോ പ്രകാശനം മുൻ പ്രൊവിൻഷ്യാളും മാനേജരുമായ സിസ്റ്റർ ലിറ്റിൽ മരിയ എസ്എബിഎസും മുൻ പ്രിൻസിപ്പൽ സിസ്റ്റർ ഡോ. ഷാൻ മരിയയും ചേർന്നു നിർവഹിച്ചു. സിൽവർ ജൂബിലി ആഘോഷത്തോടനുബന്ധിച്ചുള്ള ചാരിറ്റി പ്രവർത്തനത്തിന്‍റെ ഭാഗമായി ഡയാലിസിസ് രോഗികൾക്കു സഹായം നൽകി. അധ്യാപിക ജോസി ജോസ്, ഫാ. പോൾ അറയ്ക്കൽ, പ്രിൻസിപ്പൽ സിസ്റ്റർ ജിയോ തെരേസ്, എ.ജെ. ആൻജോ, സിസ്റ്റർ സിറില്ല, സിസ്റ്റർ ലിൻസ മരിയ, സിസ്റ്റർ ഡോ. ഷാൻ മരിയ, കടങ്ങോട് പഞ്ചായത്ത് പ്രസിഡന്‍റ് മീന ഷാജൻ, വാർഡ് അംഗം കെ.ആർ. സിമി, പൂർവവിദ്യാർഥി ഡോ. എഡ്‌വിൻ സുഭാഷ്, പിടിഎ പ്രസിഡന്‍റ് ദീപക് ആന്‍റോ, അധ്യാപിക ജിജി ജോർജ് എന്നിവർ പ്രസംഗിച്ചു.

സംസ്ഥാനപാതയിലെ ഡിവൈഡർ അപകടക്കെണിയാകുന്നു

മുണ്ടൂർ: തൃശൂർ - കുറ്റിപ്പുറം സംസ്ഥാനപാതയിൽ മുണ്ടൂർ മുതൽ കൈപ്പറമ്പ് വരെയുള്ള ഭാഗത്ത് റോഡിന് നടുക്കിൽ പണികഴിയാത്ത ഡിവൈഡർ പഴുതുകളിൽ ബൈക്കുകളും ചെറുവാഹനങ്ങളും ചാടി അപകടം പതിവാകുന്നു. ഈ ഭാഗത്തെ റോഡ് പണി കഴിഞ്ഞ് മാസങ്ങൾ പിന്നിട്ടു. ഡിവൈഡർ പണി ഇതുവരെ തുടങ്ങിയിട്ടില്ല. ഡിവൈഡർ പണിയുവാൻ വേണ്ടി അരമീറ്റർ വീതിയിലും അരയടി താഴ്ചയിലും ഇട്ട വിടവ് അപകടക്കെണിയായിരിക്കുകയാണ്. ഈ വിടവ് ചാടിച്ചുവേണം വാഹനങ്ങൾക്ക് കടന്നുപോകാൻ. ഇതിൽ കുടുങ്ങുന്ന വാഹനങ്ങളും ഏറെയാണ്. ബസ് ഉൾപ്പെടെ വലിയ വാഹനങ്ങൾ പലപ്പോഴും ഡിവൈഡർ കേപ്പ് നടുഭാഗത്താക്കി രണ്ടുവശത്തിൽ കൂടി പോകുന്നതും അപകടത്തിന് കാരണമാകുന്നു. പുറ്റേക്കര സെന്‍റ് ജോർജ് ഹൈസ്കൂള്‌, സെന്‍റ് മേരീസ് എൽപി സ്കൂള്‌, ആരാധനാലയങ്ങൾ എന്നിവയ്ക്കുമുന്നിലും മറ്റു പല ചെറുവഴികളിലേക്കും സംസ്ഥാനപാതയിൽനിന്ന് തിരിയുന്ന ഭാഗത്തെ വിടവ് എങ്കിലും അടിയന്തരമായി അടയ്ക്കണമെന്ന് ആവശ്യപ്പെട്ടു കേരള കോൺഗ്രസ് ജില്ലാ പ്രസിഡന്‍റ് സി.വി. കുര്യാക്കോസ് ജില്ലാ കളക്ടർക്ക് കത്തുനൽകി. അധികാരികളോട് എത്രയുംപെട്ടെന്ന് പ്രശ്നപരിഹാരം കാണാൻ ആവശ്യപ്പെട്ടു. മുണ്ടൂർ ജംഗ്ഷനിലെ സിഗ്നൽ ലൈറ്റുകൾ റോഡ് നിർമാണം തുടങ്ങുന്ന സമയത്ത് ഓഫാക്കിയതാണ്. ഇപ്പോൾ നിർമാണംകഴിഞ്ഞതുമൂലം വാഹനങ്ങൾ അമിതവേഗതയിലാണ് ഇതുവഴി കടന്നുപോകുന്നത്. റോഡ് മുറിച്ചുകടക്കാൻ നിൽക്കുന്ന വിദ്യാർഥികളും ചെറുവഴികളിൽ നിന്നുള്ള വാഹനങ്ങളും ഈ സിഗ്നൽ പ്രവർത്തിക്കാത്തതുമൂലം ഏറെനേരം വഴിയോരത്ത് കുടുങ്ങിനിൽക്കേണ്ട അവസ്ഥയാണെന്നും സിഗ്നൽ എത്രയും പെട്ടെന്ന് പ്രവർത്തനസജ്ജമാക്കണമെന്നും പ്രദേശവാസികളും ആവശ്യപ്പെട്ടു.

ശക്തൻ സ്റ്റാൻഡിലെ വെള്ളക്കെട്ട്: തുണിയലക്കി പ്രതിഷേധിച്ചു

തൃശൂർ: ശക്തൻ ബസ് സ്റ്റാൻഡിന്‍റെ ശോചനീയാവസ്ഥ പരിഹരിക്കണമെന്നാവശ്യപ്പെട്ട് വെള്ളക്കെട്ടിൽ തുണിയലക്കി പ്രതിഷേധിച്ചു. പൊതുപ്രവർത്തക ബീനയുടെയും ഹസീനയുടെയും നേതൃത്വത്തിലാണ് പ്രതിഷേധിച്ചത്. പുതുതായി കോണ്‍ക്രീറ്റ് ചെയ്ത ഭാഗത്തുനിന്നു ബസുകൾ പുറത്തേക്കു പോകുന്ന വഴിയിലാണു വെള്ളക്കെട്ട്. ഈ വഴിയിലൂടെയാണു കാൽനടയാത്രക്കാരും സ്റ്റാൻഡിലേക്ക് എത്തുന്നത്. ഏറെ പ്രതിഷേധങ്ങൾക്കൊടുവിൽ ബസ് സ്റ്റാൻഡ് കോടികൾ ചെലവിട്ടു കോണ്‍ക്രീറ്റ് ചെയ്തെങ്കിലും സ്റ്റാൻഡിലേക്കു കയറുന്ന വഴികളും പുറത്തേക്ക് ഇറങ്ങുന്ന വഴികളും പഴയപടിയിലാണ്. കുണ്ടും കുഴിയും നിറഞ്ഞ വഴിയിൽ മഴ തുടങ്ങിയതോടെ ചെളിയും നിറഞ്ഞു. വെള്ളക്കെട്ട് പരിഹരിക്കണമെന്ന് നിരന്തരമായി ആവശ്യപ്പെട്ടിട്ടും നടപടിയെടുക്കാതെ വന്നതോടെയാണ് പരസ്യ പ്രതിഷേധവുമായി രംഗത്തുവന്നത്.

മേഖലാ കാര്യാലയം മാലിന്യം സൂക്ഷിക്കുന്ന കെട്ടിടത്തിലേക്ക്, പ്രതിഷേധിച്ച് കോൺഗ്രസ്

തൃശൂർ: പുതുക്കിപ്പണിയുന്നതിന്‍റെ ഭാഗമായി കോർപറേഷൻ കൂർക്കഞ്ചേരി മേഖലാ കാര്യാലയം നിലവിൽ പ്രവർത്തിക്കുന്നിടത്തുനിന്ന് മൂന്നര കിലോമീറ്റർ അകലെ പ്ലാസ്റ്റിക് മാലിന്യം സൂക്ഷിക്കുന്ന (എംസിഎഫ്) കെട്ടിടത്തിലേക്കു മാറ്റാൻ ശ്രമിക്കുന്നതു പ്രദേശവാസികളോടുള്ള വഞ്ചനയാണെന്നു പ്രതിപക്ഷ നേതാവ് രാജൻ ജെ.പല്ലൻ. മേഖലാ കാര്യാലയം മാറ്റത്തിനെതിരേ കോർപറേഷൻ ഓഫീസിൽ കോൺഗ്രസ് കൗൺസിലർമാർ നടത്തിയ പ്രതിഷേധസമരം ഉദ്ഘാടനംചെയ്യുകയായിരുന്നു അദ്ദേഹം. നിലവിൽ കണിമംഗലത്തു പ്രവർത്തിക്കുന്ന മേഖലാ കാര്യാലയം നെടുപു‌ഴയിലെ വനിതാ വ്യവസായ കേന്ദ്രത്തിലെ പ്ലാസ്റ്റിക് മാലിന്യം ശേഖരിക്കുന്നിടത്തേക്കാണു മാറ്റിസ്ഥാപിക്കുന്നത്. വാഹന സൗകര്യമില്ലാത്ത ഇടുങ്ങിയ റോഡിൽ സ്ഥിതിചെയ്യുന്ന കെട്ടിടത്തിലേക്ക് ഓഫീസ് മാറ്റുന്നതിനെതിരേയാണു പ്രതിഷേധം. കൂർക്കഞ്ചേരി മേഖലയിലുള്ളവർക്ക് ഇവിടേക്ക് ഓട്ടോയിൽ പോകണമെങ്കിൽ വലിയ പണച്ചെലവുവരും. ബസ് സർവീസ് ഇല്ലാത്ത വഴിയാണിത്. ജനങ്ങൾക്ക് സൗകര്യപ്രദമായ സ്ഥലത്തേക്ക് ഓഫീസ് മാറ്റണമെന്നും പ്രതിപക്ഷനേതാവ് ആവശ്യപ്പെട്ടു. കാര്യാലയം പൊളിച്ചുപണിയുന്നത് സ്വാഗതാർഹമാണെന്നും അദ്ദേഹം പറഞ്ഞു. സ്റ്റാൻഡിംഗ് കമ്മിറ്റി ചെയർമാൻ ജയപ്രകാശ് പൂവത്തിങ്കൽ അധ്യക്ഷത വഹിച്ചു. ഉപനേതാവ് ഇ.വി. സുനിൽരാജ്, സ്റ്റാൻഡിംഗ് കമ്മിറ്റി ചെയർമാൻമാരായ മുകേഷ് കൂളപ്പറമ്പിൽ, ശ്യാമള മുരളീധരൻ, കൗൺസിലർമാരായ വിനേഷ് തയ്യിൽ, ആൻസി ജേക്കബ് എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]