ADVERTISEMENT

ADVERTISEMENT

വീടിന്‍റെ മേൽക്കൂര പൊളിച്ച് മോഷണം

കുമരകം: വീടിന്‍റെ മേൽക്കൂരയിലെ ഷീറ്റും സീലിംഗും പൊളിച്ചുനീക്കി മോഷണം നടത്തി. പഞ്ചായത്ത്16-ാം വാർഡിൽ കുളപ്പറമ്പിൽ കെ.എസ്. ജെസ്മോന്‍റെ വീട്ടിലാണ് മോഷണം നടന്നത്. വീടിന്‍റെ തെക്കുവശം ചേർന്നുള്ള കെട്ടിടത്തിലെ കടമുറിയിൽ സൂക്ഷിച്ചിരുന്ന ഗ്രൈൻഡിംഗ് മെഷീനും ഡ്രില്ലിംഗ് ഉപകരണവുമാണ് മോഷണം പോയത്.

സമീപ പ്രദേശങ്ങളിലും അടുത്തനാളുകളിൽ മോഷണം നടന്നിട്ടുള്ളതായി നാട്ടുകാർ പരാതിപ്പെട്ടിട്ടുണ്ട്. കുമരകം പോലീസിൽ പരാതി ലഭിച്ചതായും അന്വേഷണം നടത്തിവരുന്നതായും എസ്എച്ച്ഒ കെ. ഷിജി അറിയിച്ചു. കുമരകത്ത് ക്ഷേത്രങ്ങളിൽ മോഷണം നടത്തിക്കൊണ്ടിരുന്ന മൂന്നുപേരെ കുമരകം പോലീസ് പിടികൂടി റിമാൻഡു ചെയ്യിച്ചിട്ടുണ്ട്.

ADVERTISEMENT

സമ്മേളനം ആത്മവിമര്‍ശനത്തിന്‍റെ വേദിയാകും

കോട്ടയം: വൈക്കത്ത് കൊടിയേറിയ സിപിഐ ജില്ലാ സമ്മേളനം ഇന്നും നാളെയും ആത്മവിമര്‍ശനത്തിന്‍റെയും ആശങ്കകളുടെയും വേദിയാകും. ഇതോടകം പൂര്‍ത്തിയായ 11 ജില്ലാസമ്മേളനങ്ങളിലും നിലവിലെ ഭരണം തൃപ്തികരമല്ലെന്നും സിപിഐയുടെ നാലു മന്ത്രിമാരും പരാജയമാണെന്നുമുള്ള വിമര്‍ശനമാണ് പ്രതിനിധി ചര്‍ച്ചകളില്‍ ഉയര്‍ന്നത്. നെല്ല് ഉള്‍പ്പെടെ കാര്‍ഷികമേഖലയിലെ തകര്‍ച്ച സമ്മേളനം നടക്കുന്ന വൈക്കം ഉള്‍പ്പെടെ പ്രദേശങ്ങളില്‍ ജനപിന്തുണ നഷ്ടമാകാന്‍ കാരണമായി. നാല് മാസം മുന്‍പ് നെല്ലു വിറ്റ് പണം കിട്ടാത്തവരും 30 കിലോ നെല്ല് മില്ലുകാര്‍ക്ക് കിഴിവുകൊടുക്കേണ്ടിവന്നവരും സമ്മേളനത്തില്‍ നഷ്ടാനുഭവങ്ങള്‍ നിരത്തുമെന്നാണു സൂചന. സിപിഐ സെക്രട്ടറി ബിനോയ് വിശ്വം പാര്‍ട്ടിയിലും മുന്നണിയിലും പരാജയമാണെന്നുമുള്ള വിമര്‍ശനം സ്വന്തം ജില്ലയിലും ആവര്‍ത്തിക്കാം. സിപിഎം മേധാവിത്വത്തിന് അടിയറവു പറഞ്ഞതിനാല്‍ അര്‍ഹമായ വിഹിതം സിപിഐയുടെ വകുപ്പുകള്‍ക്ക് വാങ്ങിയെടുക്കാന്‍ സാധിക്കുന്നില്ല.പൊതുവിതരണരംഗത്തെ പരാജയം തദ്ദേശ തെരഞ്ഞെടുപ്പില്‍ തിരിച്ചടിയുണ്ടാക്കാമെന്ന വിമര്‍ശനം എല്ലാ ജില്ലകളിലുണ്ടായി. മാവേലി സ്റ്റോറുകള്‍ പൂച്ച പ്രസവിക്കാനുള്ള ഇടങ്ങളായെന്നും അവിടെ പാറ്റകള്‍വരെ പട്ടിണിയിലാണെന്നുമാണ് കൊല്ലം സമ്മേളനത്തില്‍ വിമര്‍ശനം ഉയര്‍ന്നത്. കൊല്ലത്ത് സ്‌കൂളില്‍ കുട്ടി ഷോക്കേറ്റു മരിച്ചത് കുട്ടിയുടെ അശ്രദ്ധ മൂലമാണെന്ന അനവസര പ്രതികരണം വന്നപ്പോഴാണ് ചിഞ്ചുറാണി എന്നൊരു മന്ത്രിയുണ്ടെന്ന് ജനങ്ങള്‍ മനസിലാക്കിയതെന്നു വരെ കൊല്ലത്ത് ആക്ഷേപം ഉയര്‍ന്നു. കേരള കോണ്‍ഗ്രസ്-എമ്മിന് സിപിഎം ജില്ലയില്‍ അധികപരിഗണന നല്‍കുന്നുവെന്നതായിരുന്നു കഴിഞ്ഞ ജില്ലാ സമ്മേളനത്തിലെയും വിമര്‍ശനം. സിപിഐയ്ക്ക് ലഭിച്ചിരുന്ന കാഞ്ഞിരപ്പള്ളി സീറ്റ് (പഴയ വാഴൂര്‍) മാണി വിഭാഗത്തിന നല്‍കിയോടെ വൈക്കത്തു മാത്രമാണ് അരിവാള്‍ നെല്‍ക്കതിര്‍ ശേഷിക്കുന്നത്. വാഴൂരില്‍ പാര്‍ട്ടിക്ക് ഇതോടെ സംവിധാനവും പ്രവര്‍ത്തവും കുറഞ്ഞു. കഴിഞ്ഞ തദ്ദേശ തെരഞ്ഞെടുപ്പിലും സിപിഐക്ക് ജില്ലയില്‍ പരിഗണന ലഭിച്ചില്ല. ലോക്‌സഭാ തെരഞ്ഞെടുപ്പില്‍ തോമസ് ചാഴികാടനുവേണ്ടി സിപിഎം ഉണര്‍ന്നു പ്രവര്‍ത്തിക്കാതെ വന്നതിനാല്‍ അര ലക്ഷം എല്‍ഡിഎഫ് വോട്ടുകള്‍ ചോര്‍ന്നു. അതേസമയം സിപിഐയുടെ ശക്തികേന്ദ്രമായ വൈക്കത്തുമാത്രം ചാഴികാടന് ലീഡ് നേടിക്കൊടുക്കാനായി. റബര്‍ മേഖലയിലെ ആശങ്കകളും പ്രതിനിധികള്‍ ഉന്നയിക്കും.

സിപിഐ ജില്ലാ സമ്മേളനത്തിന് വൈക്കത്ത് തുടക്കമായി

വൈക്കം: സിപിഐ ജില്ലാ സമ്മേളനത്തിന് പി. കൃഷ്ണപിള്ളയുടെ ജന്മനാടായ വൈക്കത്ത് തുടക്കമായി. ഒന്നര പതിറ്റാണ്ടിന് ശേഷമാണ് പാർട്ടി ജില്ലാ സമ്മേളനത്തിന് വൈക്കം വേദിയായത്. ഇന്നലെ വൈകുന്നേരം അഞ്ചിന് വൈക്കം വലിയ കവലയിൽനിന്ന് സമ്മേളനഗരിയിലേക്ക് റെഡ് വോളണ്ടിയർമാരുടെ പരേഡ് നടന്നു. സംഘാടകസമിതി പ്രസിഡന്‍റ് ജോൺ വി.ജോസഫ് പതാക ഉയർത്തി. കാനം രാജേന്ദ്രൻ നഗറിൽ ചേർന്ന പൊതുസമ്മേളനം സംസ്ഥാന സെക്രട്ടറി ബിനോയ് വിശ്വം ഉദ്ഘാടനം ചെയ്തു. അമേരിക്കയുടെ ഇറക്കുമതിതിരുവ വർധനവ് രാജ്യത്തെ പ്രതികൂലമായി ബാധിക്കുമെന്നും ട്രംപിന് അനുകൂലമായി പ്രധാനമന്ത്രി മോദിനില കൊണ്ടിട്ടും രാജ്യത്തിൻ്റെ താൽപര്യങ്ങൾ സംരക്ഷിക്കാനായില്ലെന്നും ഉദ്ഘാടന പ്രസംഗത്തിൽ ബിനോയ് വിശ്വം കുറ്റപ്പെടുത്തി. ജില്ലാ സെക്രട്ടറി വി.ബി. ബിനു അധ്യക്ഷത വഹിച്ചു. ആർ.രാജേന്ദ്രൻ, സി.കെ.ശശിധരൻ, ദേശീയ എക്സിക്യൂട്ടീവ് അംഗം പി. സന്തോഷ്കുമാർ എംപി,ജോൺ വി.ജോസഫ്, കെ.അജിത്ത്, എം.ഡി. ബാബുരാജ് തുടങ്ങിയവർ പ്രസംഗിച്ചു. പ്രതിനിധി സമ്മേളനം ഇന്ന്രാവിലെ 9.30ന് വൈക്കം എൻഎസ്എസ് ഓഡിറ്റോറിയത്തിലെ ആർ. ബിജുനഗറിൽ പ്രതിനിധി സമ്മേളനം ആരംഭിക്കും. ജില്ലയിലെ 11 മണ്ഡലം സമ്മേളനങ്ങളിൽനിന്നു തെരഞ്ഞെടുക്കപ്പെട്ട 325 പ്രതിനിധികളാണ് സമ്മേളനത്തിൽ പങ്കെടുക്കുന്നത്. 10.30 ന് വലിയ കവലയിലെ പ്രത്യേകം തയാറാക്കിയ സ്ക്വയറിലെ രക്തസാക്ഷി മണ്ഡപത്തിൽ പുഷ്പാർച്ചന നടത്തും. മുതിർന്ന നേതാവ് കെ.എസ്. മാധവൻ പതാക ഉയർത്തും. 11ന് സിപിഐ ദേശീയ എക്സിക്യൂട്ടീവ് അംഗം പി. സന്തോഷ്കുമാർ എംപി പ്രതിനിധി സമ്മേളനം ഉദ്ഘാടനം ചെയ്യും.

ക്രമരഹിത നിയമനം ചോദ്യംചെയ്തതിനു കള്ളക്കേസെന്ന്

കോട്ടയം: പ്രമുഖ ബാങ്കില്‍ സ്വീപ്പര്‍ അറ്റന്‍ഡര്‍ തസ്തികയിലേക്ക് ക്രമരഹിതമായി ജീവനക്കാരെ നിയമിച്ചത് ചോദ്യം ചെയ്ത തനിക്കെതിരേ കള്ളക്കേസുകള്‍ നല്‍കിയെന്ന് കാഞ്ഞിരപ്പള്ളി തമ്പലക്കാട് സ്വദേശി കെ. സന്ദീപ്. അനധികൃതമായി നിയമനം ലഭിച്ചവരാണു കള്ളക്കേസുകള്‍ നല്‍കിയത്. 2014ല്‍ പരസ്യം നല്‍കി റിക്രൂട്ട്‌മെന്‍റ് സ്വീപ്പര്‍ അറ്റന്‍ഡര്‍ പോസ്റ്റിലേക്ക് നടത്തിയ നിയമനം അനധികൃതമായിരുന്നു. പത്താം ക്ലാസ് വിജയിച്ചവരും പ്ലസ് ടു തോറ്റവര്‍ക്കുമാണു പ്രവേശനം നല്‍കേണ്ടത്. എന്നാല്‍ പ്ലസ് ടു, ഡിഗ്രി പരീക്ഷകള്‍ പാസായവര്‍ക്ക് പണം വാങ്ങി നിയമനം നല്‍കുകയാണുണ്ടായത്. ഉന്നത ഉദ്യോഗസ്ഥരുടെ സ്വാധീനത്തിലാണ് നിയമനം. പ്രാഥമിക അന്വേഷണത്തില്‍ 75 ലധികം ജീവനക്കാര്‍ അനധികൃതമായി പ്രവേശനം നേടിയെന്നു കണ്ടെത്തിയെന്നും സന്ദീപ് പത്രസമ്മേളനത്തില്‍ ആരോപിച്ചു. പ്രവേശനം നേടിയവര്‍ പ്ലസ് ടു പാസായതായി അന്വേഷണത്തില്‍ കണ്ടെത്തിയിട്ടുണ്ട്. ക്രമക്കേട് സംബന്ധിച്ച് റീജണല്‍ ഓഫീസില്‍ പരാതി നല്‍കുകയും ചെയ്തു. തനിക്കെതിരേ നല്‍കിയ പരാതികള്‍ വ്യാജമാണെന്ന് ഹൈക്കോടതി കണ്ടെത്തി വെറുതേവിട്ടെങ്കിലും ബാങ്ക് ജീവനക്കാരുടെ ഭീഷണി തുടരുകയാണെന്നും സന്ദീപ് പറഞ്ഞു.

ബിന്ദുവിന്‍റെ കുടുംബത്തിന് ധനസഹായം കൈമാറി

കോട്ടയം: മെഡിക്കല്‍ കോളജ് ആശുപത്രിക്കെട്ടിടഭാഗം തകര്‍ന്നുണ്ടായ അപകടത്തില്‍ മരിച്ച തലയോലപ്പറമ്പ് ഉമ്മാംകുന്ന് മേപ്പോത്തുകുന്നേല്‍ ബിന്ദുവിന് സര്‍ക്കാര്‍ പ്രഖ്യാപിച്ച സഹായധനം മന്ത്രി വി.എന്‍. വാസവന്‍ വീട്ടിലെത്തി കൈമാറി. ഇന്നലെ ഉച്ചകഴിഞ്ഞ് രണ്ടിനു വീടു സന്ദര്‍ശിച്ച മന്ത്രി പത്തു ലക്ഷം രൂപയുടെ ചെക്ക് ബിന്ദുവിന്‍റെ ഭര്‍ത്താവ് കെ. വിശ്രുതന്‍, അമ്മ സീതമ്മ, മകന്‍ നവനീത് എന്നിവര്‍ക്ക് കൈമാറി. ബിന്ദുവിന്‍റെ മരണത്തെത്തുടര്‍ന്ന് അടിയന്തര സഹായധനമായി 50,000 രൂപ നേരത്തേ സര്‍ക്കാര്‍ നല്‍കിയിരുന്നു. സി.കെ. ആശ എംഎല്‍എ, ജില്ലാ കളക്ടര്‍ ജോണ്‍ വി. സാമുവല്‍, എഡിഎം എസ്. ശ്രീജിത്ത്, വടയാര്‍ വില്ലേജ് ഓഫീസര്‍ മോളി ഡാനിയേല്‍ എന്നിവര്‍ കൂടെയുണ്ടായിരുന്നു. ബിന്ദുവിന്‍റെ കുടുംബത്തോടൊപ്പം സര്‍ക്കാര്‍ എന്നുമുണ്ടെന്ന് മന്ത്രി വി.എന്‍. വാസവന്‍ പറഞ്ഞു. മകള്‍ നവമിയുടെ ചികിത്സയ്ക്ക് ആവശ്യമായ എല്ലാ സഹായവും സര്‍ക്കാര്‍ നല്‍കി. മകന്‍ നവനീതിന് ദേവസ്വം ബോര്‍ഡില്‍ ജോലി നല്‍കാന്‍ മന്ത്രിസഭയുടെ ശിപാര്‍ശ പ്രകാരം ദേവസ്വം ബോര്‍ഡ് തീരുമാനിച്ചിട്ടുണ്ട്. അപേക്ഷ ലഭിച്ചാലുടന്‍ ജോലിയില്‍ പ്രവേശിപ്പിക്കും. എംജി സര്‍വകലാശാലയ്ക്കു കീഴിലുള്ള കോളജുകളിലെ എന്‍എസ്എസ് യൂണിറ്റുകളുടെ നേതൃത്വത്തില്‍ വീടിന്‍റെ നിര്‍മാണം ഇന്നു തുടങ്ങും. സര്‍ക്കാരിന്‍റെ പിന്തുണയിലും സഹായത്തിലും ഏറെ തൃപ്തിയുണ്ടെന്ന് ഭര്‍ത്താവ് വിശ്രുതനും അമ്മ സീതമ്മയും പറഞ്ഞു.

സിവില്‍ സര്‍വീസ് കായികമേള സെലക്‌ഷന്‍ ട്രയല്‍സ്

കോട്ടയം: സ്പോര്‍ട്സ് കൗണ്‍സിലിന്‍റെ ആഭിമുഖ്യത്തില്‍ സര്‍ക്കാര്‍ ജീവനക്കാര്‍ക്കായി സംഘടിപ്പിക്കുന്ന ജില്ലാതല സിവില്‍ സര്‍വീസ് കായിക മത്സരങ്ങളുടെ സെലക്‌ഷന്‍ ട്രയല്‍സ് 21, 22 തീയതികളില്‍ നടക്കും. അത്‌ലറ്റിക്സ്, ഫുട്‌ബോള്‍, വോളിബോള്‍, ബാസ്‌കറ്റ്ബോള്‍, ഹോക്കി, ഷട്ടില്‍, ഗുസ്തി, ബാഡ്മിന്‍റണ്‍, ബെസ്റ്റ് ഫിസിക്, പവര്‍ ലിഫ്റ്റിംഗ്, വെയ്റ്റ് ലിഫ്റ്റിംഗ്, കബഡി, ഖോ-ഖോ, സ്വിമ്മിംഗ്, ലോണ്‍ ടെന്നീസ് എന്നിവയുടെ സെലക്‌ഷന്‍ ട്രയല്‍സ് 21ന് പാലാ മുനിസിപ്പല്‍ സ്റ്റേഡിയത്തിലും ടേബിള്‍ ടെന്നീസ്, ചെസ്, ക്രിക്കറ്റ്, കാരംസ്, യോഗ എന്നിവയുടെ 22ന് കോട്ടയം ഇന്‍ഡോര്‍ സ്റ്റേഡിയത്തിലും നടക്കും. പങ്കെടുക്കുന്നവര്‍ രാവിലെ ഒന്‍പതിന് റിപ്പോര്‍ട്ട് ചെയ്യണം. ആറു മാസത്തില്‍ കൂടുതല്‍ സര്‍വീസുള്ള സ്ഥിരം ജീവനക്കാര്‍ക്കു പങ്കെടുക്കാം. മേലധികാരി സാക്ഷ്യപ്പെടുത്തിയ ഫോട്ടോ പതിച്ച എലിജിബിലിറ്റി ഫോം, രജിസ്ട്രേഷന്‍ ഫീസ് 200 രൂപ എന്നിവ സഹിതം 18ന് തിങ്കളാഴ്ച വൈകുന്നേരം അഞ്ചിന് മുമ്പായി ജില്ലാ സ്പോര്‍ട് കൗണ്‍സില്‍ ഓഫീസില്‍ ലഭ്യമാക്കണം. ഒന്നില്‍ കൂടുതല്‍ ഇനങ്ങളില്‍ പങ്കെടുക്കുന്നവര്‍ പ്രത്യേകം എലിജിബിലിറ്റി ഫോറത്തിന്‍റെ പകര്‍പ്പുകള്‍ ലഭ്യമാക്കണമെന്നും ജില്ലാ സ്പോര്‍ട്സ് കൗണ്‍സില്‍ സെക്രട്ടറി അറിയിച്ചു. 0481 -2563825, 8547575248.

ജയ്നമ്മയെ അറിയാമെന്ന് സെബാസ്റ്റ്യൻ; അന്വേഷണം വഴിത്തിരിവിലേക്ക്

ഏറ്റുമാനൂർ: അതിരമ്പുഴ കോട്ടമുറി സ്വദേശി ജയ്നമ്മ തിരോധാനക്കേസിലെ അന്വേഷണം വഴിത്തിരിവിലേക്ക്. അന്വേഷണത്തന്‍റെ ആദ്യഘട്ടത്തിൽ ചോദ്യം ചെയ്യലിനോട് സഹകരിക്കാതിരുന്ന പ്രതിയെന്നു കരുതുന്ന സെബാസ്റ്റ്യൻ ചോദ്യം ചെയ്യൽ മുന്നോട്ടു പോകുംതോറും അന്വേഷണ സംഘത്തോട് മനസു തുറന്നു വരുന്നതായാണ് സൂചന. സെബാസ്റ്റ്യന്‍റെ ഭാര്യയുടെ വെട്ടിമുകളിലെ വീട്ടുമുറ്റത്ത് പാർക്ക് ചെയ്തിരുന്ന സെബാസ്റ്റ്യന്‍റെ കാറിൽനിന്ന് ക്രൈംബ്രാഞ്ച് അന്വേഷണ സംഘം കത്തി, ചുറ്റിക, ഡീസലിന്‍റെ ഗന്ധമുള്ള കന്നാസ്, പഴ്സ് എന്നിവ കണ്ടെടുത്തിരുന്നു. 20 ലിറ്ററിന്‍റെ കന്നാസിൽ സെബാസ്റ്റ്യൻ ഡീസൽ വാങ്ങിയതായി സ്ഥിരീകരിച്ചിട്ടുണ്ട്. വ്യാഴാഴ്ച രാത്രി 11 ഓടെയാണ് കോട്ടയം ക്രൈംബ്രാഞ്ച് മിന്നൽ പരിശോധന നടത്തിയത്. കേസിൽ നിർണായകമാകാവുന്ന തെളിവുകൾ ഈ പരിശോധനയിലൂടെ ലഭിച്ചതായാണ് സൂചന. ചോദ്യം ചെയ്യലിന്‍റെ ആദ്യ ഘട്ടത്തിൽ സെബാസ്റ്റ്യൻ അന്വേഷണം വഴിതെറ്റിക്കുന്ന രീതിയിൽ പരസ്പര വിരുദ്ധമായ മൊഴി നൽകിയും തെറ്റായ വിവരങ്ങൾ നൽകിയും അന്വേഷണ സംഘത്തെ വലയ്ക്കുകയായിരുന്നു. എന്നാൽ, പിന്നീട് ജയ്നമ്മയെ പരിചയമുണ്ടെന്ന് ചോദ്യം ചെയ്യലിൽ ഇയാൾ സമ്മതിച്ചു. ഇരുവരും ഒന്നിച്ച് ചേർത്തലയിലെ ധ്യാനകേന്ദ്രം ഉൾപ്പെടെയുള്ള പ്രാർഥനാലയങ്ങളിൽ പോയിട്ടുണ്ടെന്നും പറയുന്നുണ്ട്. പക്ഷേ തിരോധാനക്കേസിലേക്ക് വഴിതുറക്കുന്ന വിവരങ്ങൾ നൽകുന്നില്ല. 10 ദിവസമായി ക്രൈംബ്രാഞ്ചിന്‍റെ കസ്റ്റഡിയിൽ. കസ്റ്റഡി കാലാവധി പൂർത്തിയായതിനെത്തുടർന്ന് വ്യാഴാഴ്ച കോടതിയിൽ ഹാജരാക്കിയ ഇയാളെ എഴുദിവസത്തേക്കുകൂടി ക്രൈംബ്രാഞ്ചിന്‍റെ കസ്റ്റഡിയിൽ വിട്ടു. സെബാസ്റ്റ്യന്‍റെ വീടിനോടു ചേർന്നുള്ള പുരയിടത്തിൽനിന്നു ലഭിച്ച മൃതദേഹാവശിഷ്ടങ്ങളുടെ ശാസ്ത്രീയ പരിശോധനാ ഫലങ്ങളും ഡിഎൻഎ പരിശോധനയുടെ ഫലവും ലഭിക്കുന്നതോടെ അന്വേഷണത്തിന് കൂടുതൽ വ്യക്തത കൈവരും. ജയ്നമ്മയുടെ മൊബൈൽ ഫോൺ കേന്ദ്രീകരിച്ചുള്ള അന്വേഷണമാണ് ക്രൈംബ്രാഞ്ച് അന്വേഷണ സംഘത്തെ സെബാസ്റ്റ്യനിലേക്ക് എത്തിച്ചത്. എന്നാൽ ഈ മൊബൈൽ ഫോൺ കണ്ടെത്താൻ ഇനിയും സാധിച്ചിട്ടില്ല. ജയ്നമ്മ തിരോധാനത്തിനു പിന്നിൽ സെബാസ്റ്റ്യൻ തന്നെയെന്ന് അന്വേഷണ സംഘത്തിന് ഉറപ്പായിട്ടുണ്ട്. കൂടുതൽ തെളിവുകൾ ലഭ്യമാകുന്നതോടെ സെബാസ്റ്റ്യന് കുറ്റം സമ്മതിക്കേണ്ടിവരുമെന്നു തന്നെയാണ് അന്വേഷണ സംഘം കരുതുന്നത്.

ആവേശം, അഭിമാനം കളര്‍ ഇന്ത്യയില്‍ തെളിഞ്ഞ് മാരിവില്ല്

കോട്ടയം: ദീപിക ഉയര്‍ത്തുന്ന സാമൂഹിക പ്രതിബദ്ധതയുടെ പതാകവാഹകരായി പുത്തന്‍ തലമുറയിലെ അനേകായിരം കുട്ടികള്‍ കളര്‍ ഇന്ത്യക്ക് നിറം പകര്‍ന്നു. ലഹരിക്കെതിരേ പോരാടുക, ഭാരതത്തന്‍റെ ഐക്യവും അഖണ്ഡതയും ഊട്ടിയുറപ്പിക്കുക എന്നീ സന്ദേശങ്ങളുമായി ദീപികയും ദീപിക ബാലസഖ്യവും കൈകോര്‍ത്ത് സംഘടിപ്പിച്ച ‘ദീപിക കളര്‍ ഇന്ത്യ’ മത്സരത്തെ സ്‌കൂളുകളും അധ്യാപകരും വിദ്യാര്‍ഥികളും ആവേശത്തോടെ വരവേറ്റു. ജില്ലയില്‍ വിവിധ സ്‌കൂളുകളിലായി ഒരു ലക്ഷത്തിലധികം വിദ്യാര്‍ഥികളാണ് ഒരേസമയം ഈ ചരിത്രയജ്ഞത്തില്‍ പങ്കാളികളായത്. ഭാരത സ്വാതന്ത്ര്യസമര ചരിത്രപാതയില്‍ എക്കാലവും അലയടിക്കുന്ന അഭിമാനപ്രക്ഷോഭമായ ക്വിറ്റ് ഇന്ത്യാ അനുസ്മരണദിനത്തിലാണ് നാളെയുടെ പ്രതീക്ഷകളായ ഇളംതലമുറ ദേശസ്‌നേഹത്തിന്‍റെ നിറക്കൂട്ട് നിറച്ചത്. രാജ്യത്തിന്‍റെ 79-ാമത് സ്വാതന്ത്ര്യദിനാഘോഷത്തിന്‍റെ ഭാഗമായി ദീപിക സംഘടിപ്പിക്കുന്ന കളര്‍ ഇന്ത്യ സീസണ്‍ 4 ജില്ലാതലം കോട്ടയം ലൂര്‍ദ് പബ്ലിക് സ്‌കൂള്‍ ആന്‍ഡ് ജൂണിയര്‍ കോളജില്‍ ചാണ്ടി ഉമ്മന്‍ എംഎല്‍എ ഉദ്ഘാടനം ചെയ്തു. ദീപിക ചീഫ് എഡിറ്റര്‍ റവ.ഡോ. ജോര്‍ജ് കുടിലില്‍ അധ്യക്ഷത വഹിച്ചു. ലൂര്‍ദ് ഫൊറോന പള്ളി വികാരി ഫാ. ജേക്കബ് വട്ടയ്ക്കാട്ട് മുഖ്യപ്രഭാഷണം നടത്തി. കാരിത്താസ് ആശുപത്രി ഡയറക്ടര്‍ റവ.ഡോ. ബിനു കുന്നത്ത്, സ്വാ ഡയമണ്ട്‌സ് ഡയറക്ടര്‍ ഫെലിക്‌സ് ജോണി കുരുവിള, ലൂര്‍ദ് പബ്ലിക് സ്‌കൂള്‍ പ്രിന്‍സിപ്പല്‍ ഫാ. തോമസ് പാറത്താനം എന്നിവര്‍ പ്രസംഗിച്ചു. ദീപിക പിആര്‍ഒ മാത്യു കൊല്ലമലക്കരോട്ട് സ്വാഗതവും ലൂര്‍ദ് സ്‌കൂള്‍ അധ്യാപിക എം.എ. പുഷ്പ കൃതജ്ഞതയും പറഞ്ഞു. വിവിധ സ്‌കൂളുകളില്‍നിന്നുള്ള പ്രമുഖര്‍ ഉദ്ഘാടനങ്ങള്‍ നടത്തി.എല്‍കെജി മുതല്‍ പ്ലസ് ടു വരെയുള്ളവരാണു വിവിധ വിഭാഗങ്ങളിലായി വര്‍ണോത്സവത്തില്‍ മാറ്റുരച്ചത്. മത്സരത്തോടനുബന്ധിച്ചു വിദ്യാര്‍ഥികള്‍ ദേശീയോദ്ഗ്രഥന പ്രതിജ്ഞ ചൊല്ലി.

എരുമേലി കൊച്ചുതോട്ടിൽ രാസമാലിന്യമൊഴുകുന്നു

എരുമേലി: ടൗണിന് സമീപമുള്ള കൊച്ചുതോട്ടിൽ രാസമാലിന്യമൊഴുകുന്നതായി പരാതി. തുരിശ് കലർന്ന നിലയിൽ വെളുപ്പുനിറത്തിൽ വെള്ളം ഒഴുകുന്നത് സമീപത്തെ വ്യാപാരികളുടെ ശ്രദ്ധയിൽപ്പെട്ടതോടെ പഞ്ചായത്ത്‌, ആരോഗ്യ വകുപ്പ് അധികൃതരെ അറിയിക്കുകയായിരുന്നു. ഇന്നലെ ഉച്ചയ്ക്കാണ് വെള്ളത്തിന്‍റെ നിറം മാറിത്തുടങ്ങിയത്. കഴിഞ്ഞ ദിവസം നീലനിറത്തിൽ വെള്ളം ഒഴുകിയിരുന്നു. രണ്ട് സംഭവങ്ങളും പഞ്ചായത്ത്‌, ആരോഗ്യ വകുപ്പ് അധികൃതരെ നാട്ടുകാർ അറിയിച്ചിട്ടും നടപടികൾ ഉണ്ടായിട്ടില്ല. വലിയതോട്ടിലാണ് കൊച്ചുതോട് അവസാനിക്കുന്നത്. മണിമലയാറിലെ കൊരട്ടിയിലാണ് വലിയ തോട് എത്തിച്ചേരുന്നത്. മണിമലയാറ്റിൽ ഒട്ടേറെ കുടിവെള്ള വിതരണ പദ്ധതികൾ പ്രവർത്തിക്കുന്നുണ്ട്. വെള്ളത്തിൽ രാസമാലിന്യമൊഴുകുന്നത് കുടിവെള്ള വിതരണത്തെ അനാരോഗ്യകരമാക്കുമെന്നും അധികൃതർ എത്രയും വേഗം നടപടികൾ സ്വീകരിക്കണമെന്നും നാട്ടുകാർ ആവശ്യപ്പെട്ടു.

നിയോജകമണ്ഡലം കൺവൻഷനും പ്രതിഭകളെ ആദരിക്കലും

മുണ്ടക്കയം: ദളിത് ഫ്രണ്ട്-എം പൂഞ്ഞാർ നിയോജക മണ്ഡലം കൺവൻഷനും വിവിധ രംഗങ്ങളിൽ മികവ് പ്രകടിപ്പിച്ച പ്രതിഭകളെ ആദരിക്കലും നാളെ നടക്കുമെന്ന് കേരള കോൺഗ്രസ്-എം പൂഞ്ഞാർ നിയോജകമണ്ഡലം പ്രസിഡന്‍റ് സാജൻ കുന്നത്ത്, ദളിത് ഫ്രണ്ട്-എം നിയോജകമണ്ഡലം പ്രസിഡന്‍റ് വി.വി. സോമൻ എന്നിവർ പത്രസമ്മേളനത്തിൽ അറിയിച്ചു. ഉച്ചകഴിഞ്ഞ് 2.30ന് മുണ്ടക്കയം സഹകരണ ബാങ്ക് ഓഡിറ്റോറിയത്തിൽ നടക്കുന്ന സമ്മേളനം വി.വി. സോമന്‍റെ അധ്യക്ഷതയിൽ ചീഫ് വിപ്പ് ഡോ. എൻ. ജയരാജ് ഉദ്ഘാടനം ചെയ്യും. സെബാസ്റ്റ്യൻ കുളത്തുങ്കൽ എംഎൽഎ മുഖ്യപ്രഭാഷണം നടത്തും. പുതിയതായി ദളിത് ഫ്രണ്ട്-എമ്മിലേക്ക് കടന്നുവരുന്ന അംഗങ്ങളെ നിയോജകമണ്ഡലം പ്രസിഡന്‍റ് സാജൻ കുന്നത്ത് മെംബർഷിപ്പ് നൽകി സ്വീകരിക്കും. കേരള കോൺഗ്രസ്-എം സംസ്ഥാന ജനറൽ സെക്രട്ടറി ജോർജുകുട്ടി ആഗസ്തി, ദളിത് ഫ്രണ്ട്-എം സംസ്ഥാന പ്രസിഡന്‍റ് ഉഷാലയം ശിവരാജൻ, ജില്ലാ പ്രസിഡന്‍റ് രാമചന്ദ്രൻ അള്ളുംപുറം, സംസ്ഥാന സെക്രട്ടറി രാജു കുഴിവേലിൽ, ജനപ്രതിനിധികളായ ടി.ജെ. മോഹനൻ, കെ.പി. സുജീലൻ, കെ.എസ്. മോഹനൻ, പി.പി. സുകുമാരൻ തുടങ്ങിയവർ പ്രസംഗിക്കും. പത്രസമ്മേളനത്തിൽ സംസ്ഥാന കമ്മിറ്റിയംഗം സണ്ണി കുറ്റിവേലി, നിയോജകമണ്ഡലം വൈസ് പ്രസിഡന്‍റ് പി.ടി. അശോകൻ പതാരിൽ, നിയോജകമണ്ഡലം കമ്മിറ്റിയംഗം ഇ.ടി. രഞ്ജിത്ത് എന്നിവരും പങ്കെടുത്തു.

വീട് കുത്തിത്തുറന്ന് മോഷണം: പ്രതി അറസ്റ്റിൽ

കാഞ്ഞിരപ്പള്ളി: വീട് കുത്തിത്തുറന്ന് മോഷണം നടത്തിയ കേസിലെ പ്രതി അറസ്റ്റിൽ. കൊട്ടാരക്കര കൊല്ലം കരിപ്ര സ്വദേശി അഭിരാജ് (32) ആണ് അറസ്റ്റിലായത്. കഴിഞ്ഞ് 21നായിരുന്നു സംഭവം. കാഞ്ഞിരപ്പള്ളി പാറത്തോട്ടിൽ വാടക വീടിന്‍റെ അടുക്കള ഭാഗത്തുള്ള കതക് ചവിട്ടിത്തുറന്ന് വീടിനുള്ളിൽ കയറി കിടപ്പുമുറിയുടെ അലമാരയിൽ ലോക്കറിനുള്ളിൽ സൂക്ഷിച്ചിരുന്ന 18 ഗ്രാം തൂക്കം വരുന്നതും 1,80,000 രൂപ വില വരുന്നതുമായ സ്വർണമാല മോഷ്ടിക്കുകയായിരുന്നു. ഭാര്യയുടെ ചികിത്സയ്ക്കായി കാഞ്ഞിരപ്പള്ളി ആശുപത്രിയിൽ പോയി തിരികെ വന്നപ്പോഴാണ് മോഷണം നടന്ന വിവരം അറിയുന്നത്. വീടിന്‍റെ അടുക്കള വാതിൽ തകർന്ന നിലയിലും വീടിനുള്ളിലെ മൂന്ന് അലമാരകളും കുത്തിത്തുറന്ന നിലയിലുമായിരുന്നു. പോലീസ് നടത്തിയ ശാസ്ത്രീയമായ അന്വേഷണത്തിൽ അടിമാലി ടൗണിൽ ലോഡ്ജിൽ ഒളിച്ചു താമസിക്കുകയായിരുന്ന പ്രതിയെ അറസ്റ്റ് ചെയ്യുകയായിരുന്നു.

എരുമേലി കൊച്ചുതോട്ടിൽ രാസമാലിന്യമൊഴുകുന്നു

എരുമേലി: ടൗണിന് സമീപമുള്ള കൊച്ചുതോട്ടിൽ രാസമാലിന്യമൊഴുകുന്നതായി പരാതി. തുരിശ് കലർന്ന നിലയിൽ വെളുപ്പുനിറത്തിൽ വെള്ളം ഒഴുകുന്നത് സമീപത്തെ വ്യാപാരികളുടെ ശ്രദ്ധയിൽപ്പെട്ടതോടെ പഞ്ചായത്ത്‌, ആരോഗ്യ വകുപ്പ് അധികൃതരെ അറിയിക്കുകയായിരുന്നു. ഇന്നലെ ഉച്ചയ്ക്കാണ് വെള്ളത്തിന്‍റെ നിറം മാറിത്തുടങ്ങിയത്. കഴിഞ്ഞ ദിവസം നീലനിറത്തിൽ വെള്ളം ഒഴുകിയിരുന്നു. രണ്ട് സംഭവങ്ങളും പഞ്ചായത്ത്‌, ആരോഗ്യ വകുപ്പ് അധികൃതരെ നാട്ടുകാർ അറിയിച്ചിട്ടും നടപടികൾ ഉണ്ടായിട്ടില്ല. വലിയതോട്ടിലാണ് കൊച്ചുതോട് അവസാനിക്കുന്നത്. മണിമലയാറിലെ കൊരട്ടിയിലാണ് വലിയ തോട് എത്തിച്ചേരുന്നത്. മണിമലയാറ്റിൽ ഒട്ടേറെ കുടിവെള്ള വിതരണ പദ്ധതികൾ പ്രവർത്തിക്കുന്നുണ്ട്. വെള്ളത്തിൽ രാസമാലിന്യമൊഴുകുന്നത് കുടിവെള്ള വിതരണത്തെ അനാരോഗ്യകരമാക്കുമെന്നും അധികൃതർ എത്രയും വേഗം നടപടികൾ സ്വീകരിക്കണമെന്നും നാട്ടുകാർ ആവശ്യപ്പെട്ടു.

ദീപിക കളർ ഇന്ത്യ പെയിന്‍റിംഗ് കോന്പറ്റീഷൻ വർണാഭമായി

കാഞ്ഞിരപ്പള്ളി: ദീപിക കളര്‍ ഇന്ത്യ പെയിന്‍റിംഗ് കോന്പറ്റീഷൻ സീസണ്‍-4 കാഞ്ഞിരപ്പള്ളി മേഖലാതല ഉദ്ഘാടനം കുന്നുംഭാഗം സെന്‍റ് ജോസഫ്സ് പബ്ലിക് സ്കൂളിൽ കാഞ്ഞിരപ്പള്ളി രൂപത വികാരി ജനറാൾ ഫാ. ബോബി അലക്സ് മണ്ണംപ്ലാക്കൽ നിർവഹിച്ചു. പ്രിൻസിപ്പൽ സിസ്റ്റർ ലിറ്റിൽ റോസ് എസ്എബിഎസ് അധ്യക്ഷത വഹിച്ച യോഗത്തിൽ രാഷ്‌ട്രദീപിക ലിമിറ്റഡ് ഡയറക്ടർ ഷെവ. വി.സി. സെബാസ്റ്റ്യൻ മുഖ്യപ്രഭാഷണം നടത്തി. ഡിസിഎൽ നാഷണൽ കോ-ഓർഡിനേറ്റർ വർഗീസ് കൊച്ചുകുന്നേൽ, സീനിയർ മാനേജർ ബിജു തോമസ്, സീനിയർ ഏരിയാ മാനേജർ സിജു ജോർജ് എന്നിവർ പ്രസംഗിച്ചു. ചിത്രകാരി മേഘ അജി കാൻവാസിൽ ചിത്രരചന നടത്തിയാണ് മത്സരത്തിന് തുടക്കമിട്ടത്. മേഖലയിലെ 25000ൽപരം കുട്ടികൾ വിവിധ സ്കൂളുകളിലായി മത്സരത്തിൽ പങ്കുചേർന്നു. മുണ്ടക്കയം: ദീപിക കളർ ഇന്ത്യ മുണ്ടക്കയം മേഖലാതല മത്സര ഉദ്ഘാടനം മുണ്ടക്കയം സെന്‍റ് ജോസഫ് സെൻട്രൽ സ്കൂളിൽ രാഷ്‌ട്രദീപിക ലിമിറ്റഡ് ഡയറക്ടർ ഷെവ. അഡ്വ. വി.സി. സെബാസ്റ്റ്യൻ നിർവഹിച്ചു. ഡിസിഎൽ നാഷണൽ കോ-ഓർഡിനേറ്റർ വർഗീസ് കൊച്ചുകുന്നേൽ മുഖ്യപ്രഭാഷണം നടത്തി. പ്രിൻസിപ്പൽ ഫാ. തോമസ് നല്ലന്നാടിയിൽ, സ്കൂൾ മാനേജർ ഫാ. മത്തായി മണ്ണൂർവടക്കേതിൽ, അൻസാഫ് സിയാദ്, എബിൻ സോണി, ശ്രീദേവി ബിജു തുടങ്ങിയവർ പ്രസംഗിച്ചു.

യൂത്ത് ഫ്രണ്ട്-എം റാലിയും പൊതുസമ്മേളനവും ഇന്ന്

പാലാ: യൂത്ത് ഫ്രണ്ട്-എം യുവജന റാലിയും പൊതുസമ്മേളനവും ഇന്നു വൈകുന്നേരം നാലിന് പാലാ ടൗണില്‍ നടക്കും. യൂത്ത് ഫ്രണ്ട്-എം പാലാ നിയോജകമണ്ഡലം കമ്മിറ്റിയുടെ ആഭിമുഖ്യത്തില്‍ നിയോജക മണ്ഡലത്തിലെ 12 പഞ്ചായത്തുകളില്‍നിന്നും പാലാ മുനിസിപ്പാലിറ്റിയില്‍ നിന്നുമാണ് യുവജനങ്ങള്‍ പങ്കെടുക്കുന്ന മഹാറാലി നടത്തുന്നത്. റാലിക്കു ശേഷം നടക്കുന്ന പൊതുസമ്മേളനം ജോസ് കെ. മാണി എംപി ഉദ്ഘാടനം ചെയ്യും. യൂത്ത് ഫ്രണ്ട്-എം പാലാ നിയോജകമണ്ഡലം പ്രസിഡന്‍റ് തോമസുകുട്ടി വരിക്കയില്‍ അധ്യക്ഷത വഹിക്കും. റാലിക്കും പൊതുസമ്മേളനത്തിനും നിയോജകമണ്ഡലം പ്രസിഡന്‍റ് തോമസുകുട്ടി വരിക്കയില്‍, സംസ്ഥാന സെക്രട്ടറിമാരായ സുനില്‍ പയ്യപ്പള്ളി, സിജോ പ്ലാത്തോട്ടം, ടോബി തൈപ്പറമ്പില്‍, മനു തെക്കേല്‍ തുടങ്ങിയവര്‍ നേതൃത്വം നല്‍കും.

ശ്രീനാരായണഗുരു ഓപ്പൺ യൂണിവേഴ്‌സിറ്റി പ്രാദേശികകേന്ദ്രം ദേവമാതാ കോളജിൽ

കുറവിലങ്ങാട്: അനേകായിരങ്ങൾക്ക് ഉന്നതവിദ്യാഭ്യാസത്തിനും തുടർപഠനത്തിനും അവസരം സമ്മാനിക്കുന്ന ശ്രീനാരായണഗുരു ഓപ്പൺ യൂണിവേഴ്‌സിറ്റിയുടെ പ്രാദേശികകേന്ദ്രം ദേവമാതാ കോളജിൽ പ്രവർത്തനം ആരംഭിക്കും. ഇതുസംബന്ധിച്ച അനുമതി ലഭിച്ചതായി കോളജ് മാനേജർ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, പ്രിൻസിപ്പൽ ഡോ. സുനിൽ സി. മാത്യു, വൈസ് പ്രിൻസിപ്പൽ ഫാ. മാത്യു കവളമ്മാക്കൽ ബർസാർ ഫാ. ജോസഫ് മണിയഞ്ചിറ എന്നിവർ വാർത്താസമ്മേളനത്തിൽ അറിയിച്ചു. നാക് അക്രഡിറ്റേഷനിൽ 3.67 ഗ്രേഡ് പോയിന്‍റും എൻഐആർഎഫ്, കെആർഎഫ് നിലവാരത്തിൽ ജില്ലയിൽതന്നെ മുൻനിരയിലുമുള്ള കോളജിന് സംസ്ഥാനത്തെ ആദ്യത്തെ വിദൂരവിദ്യാഭ്യാസ സർവകലാശാലയുടെ കേന്ദ്രമാകാൻ കഴിഞ്ഞത് വലിയ നേട്ടമായിട്ടുണ്ട്. ശ്രീനാരായണഗുരു ഓപ്പൺ സർവകലാശാലയുടെ 32 കോഴ്‌സുകളിൽ 28 കോഴ്‌സുകൾക്കാണ് ദേവമാതാ കോളജിൽ അവസരം ലഭിക്കുക. കോളജിന്‍റെ ലൈബ്രറി, ലബോറട്ടറി സൗകര്യങ്ങളും പുതിയ കോഴ്‌സുകളിലെത്തുന്ന പഠിതാക്കൾക്കായി പ്രയോജനപ്പെടുത്തും. അടുത്ത മാസത്തോടെ പ്രവേശനനടപടികൾ ആരംഭിക്കുമെന്ന് സ്റ്റഡി സെന്‍റർ കോ-ഓർഡിനേറ്റർ റെനീഷ് തോമസ് പറഞ്ഞു. കോളജിന് അനുവദിച്ചിട്ടുള്ള കോഴ്‌സുകൾ ബിഎ മലയാളം, ഇംഗ്ലീഷ്, ഹിന്ദി, അറബിക്, സംസ്‌കൃതം, അഫ്‌സൽ ഉൽ ഉലമ, ഇക്കണോമിക്‌സ്, സോഷ്യോളജി, ഹിസ്റ്ററി, ഫിലോസഫി, പൊളിറ്റിക്കൽ സയൻസ്, സൈക്കോളജി, നാനോ എന്‍റർപ്രണർഷിപ്പ്, ബിസിഎ, ബിബിഎ, ബികോം. എംഎ മലയാളം, ഇംഗ്ലീഷ്, അറബിക്, ഹിന്ദി, സംസ്‌കൃതം, ഇക്കണോമിക്‌സ്, സോഷ്യോളജി, ഹിസ്റ്ററി, ഫിലോസഫി, പൊളിറ്റിക്കൽ സയൻസ്, പബ്ലിക് അഡ്മിനിസ്‌ട്രേഷൻ, എംകോം.

കര്‍ശന നടപടി വേണം: കത്തോലിക്ക കോണ്‍ഗ്രസ്

പാലാ: ഒഡീഷയിലെ ജലേശ്വറില്‍ വൈദികരെയും കന്യാസ്ത്രീകളെയും ആക്രമിച്ചതില്‍ കത്തോലിക്കാ കോണ്‍ഗ്രസ് പാലാ രൂപതാസമിതി പ്രതിഷേധിച്ചു. ന്യൂനപക്ഷങ്ങള്‍ക്കെതിരേ തുടര്‍ച്ചയായി ആക്രമണങ്ങള്‍ ഉണ്ടാകാന്‍ കാരണം കുറ്റക്കാര്‍ക്കെതിരേ അധികാരികളുടെ ഭാഗത്തുനിന്നു നടപടികള്‍ ഉണ്ടാകാത്തതാണെന്ന് സമിതി വിലയിരുത്തി. ആക്രമിക്കപ്പെട്ട മലയാളി വൈദികനായ ഫാ. ലിജോ നിരപ്പേലിന്‍റെ വീട് കത്തോലിക്ക കോണ്‍ഗ്രസ് രൂപത ഡയറക്ടര്‍ റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍, പ്രസിഡന്‍റ് ഇമ്മാനുവല്‍ നിധീരി, ജനറല്‍ സെക്രട്ടറി ജോസ് വട്ടുകുളം തുടങ്ങിയവരുടെ നേതൃത്വത്തില്‍ സന്ദര്‍ശിച്ച് ബന്ധുക്കളെ ആശ്വസിപ്പിച്ചു.

മരങ്ങാട്ടുപിള്ളി സെന്‍റ് തോമസ് ഹൈസ്‌കൂള്‍ പ്ലാറ്റിനം ജൂബിലി നിറവില്‍

മരങ്ങാട്ടുപിള്ളി: മരങ്ങാട്ടുപിള്ളി ഗ്രാമത്തിന്‍റെ തിലകക്കുറിയായി വര്‍ത്തിക്കുന്ന സെന്‍റ് തോമസ് ഹൈസ്‌കൂള്‍ പ്ലാറ്റിനം ജൂബിലി നിറവിലേക്ക്. 11ന് ഉച്ചകഴിഞ്ഞ് രണ്ടിന് സെന്‍റ് ഫ്രാന്‍സിസ് അസീസി ഓഡിറ്റോറിയത്തില്‍ നടക്കുന്ന ജൂബിലി ആഘോഷ സമ്മേളനത്തിൽ സ്‌കൂള്‍ മാനേജര്‍ ഫാ. ജോസഫ് ഞാറക്കാട്ടില്‍ അധ്യക്ഷത വഹിക്കും. ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്യും. മോന്‍സ് ജോസഫ് എംഎല്‍എ സ്മാര്‍ട്ട് ക്ലാസ് റൂമുകളുടെ ഉദ്ഘാടനം നിര്‍വഹിക്കും. രൂപത കോർപറേറ്റ് സെക്രട്ടറി ഫാ. ജോര്‍ജ് പുല്ലുകാലായില്‍ മുഖ്യപ്രഭാഷണം നടത്തും. മുന്‍ അഡീഷണല്‍ ചീഫ് സെക്രട്ടറി ടി.കെ. ജോസ് ജൂബിലി ലോഗോ പ്രകാശനം ചെയ്യും. ത്രിതല പഞ്ചായത്ത് പ്രതിനിധികൾ, രാഷ്‌ട്രീയ, സാമുദായിക, സാംസ്‌കാരിക നേതാക്കള്‍ തുടങ്ങിയവര്‍ പ്രസംഗിക്കും. 1920ല്‍ ഫാ. വര്‍ഗീസ് പുളിക്കീല്‍ സെന്‍റ് ഫ്രാന്‍സിസ് അസീസി പള്ളി വികാരിയായിരുന്നപ്പോള്‍ ആരംഭിച്ച എല്‍പി സ്‌കൂളാണ് 1948ല്‍ യുപി സ്‌കൂളായും 1951 ഓഗസ്റ്റില്‍ ഹൈസ്‌കൂളായും ഉയര്‍ത്തപ്പെട്ടത്. മരങ്ങാട്ടുപിള്ളി പ്രദേശത്തെ നാനാജാതി മതസ്ഥരായ കുട്ടികള്‍ക്ക് മികവുറ്റ അടിസ്ഥാന വിദ്യാഭ്യാസം നല്‍കുക എന്ന ലക്ഷ്യത്തോടെ ആരംഭിച്ച വെര്‍ണാക്കുലര്‍ മലയാളം സ്‌കൂളാണ് സെന്‍റ് തോമസ് സ്‌കൂളായി മാറിയത്. ഫാ. ഏബ്രഹാം തൊണ്ടിക്കലായിരുന്നു സ്‌കൂളിന്‍റെ ആദ്യത്തെ ഹെഡ്മാസ്റ്റര്‍. സ്‌കൂള്‍ മാനേജര്‍മാരായ ഫാ. സെബാസ്റ്റ്യന്‍ ആലപ്പാട്ടുകുന്നേല്‍, ഫാ. ജോര്‍ജ് വഞ്ചിപ്പുരയ്ക്കല്‍ എന്നിവര്‍ വികസനപ്രവര്‍ത്തനങ്ങള്‍ ഒരുക്കി. ഇപ്പോള്‍ സ്‌കൂള്‍ മാനേജര്‍ ഫാ. ജോസഫ് ഞാറക്കാട്ടില്‍, ഹെഡ്മിസ്ട്രസ് ലിന്‍റാ എസ്. പുതിയാപറമ്പില്‍, പിടിഎ പ്രസിഡന്‍റ് റോബിന്‍ കരിപ്പാത്ത് എന്നിവര്‍ നേതൃത്വം നല്‍കുന്നു. സെന്‍റ് തോമസില്‍ പഠിച്ചു പടിയിറങ്ങിയ അനേകം പൂര്‍വവിദ്യാര്‍ഥികള്‍ സമൂഹത്തിലെ വിവിധ മേഖലകളില്‍ പ്രശോഭിക്കുന്നു. പാഠ്യ-പാഠ്യേതര പ്രവര്‍ത്തനങ്ങളില്‍ സ്‌കൂള്‍ മികച്ച നിലവാരം പുലര്‍ത്തി വരുന്നു. വര്‍ഷങ്ങളായി ശാസ്ത്രവിഷയങ്ങളില്‍ ദേശീയ-സംസ്ഥാന-ജില്ലാ തലങ്ങളിലും, കാര്‍ഷിക പ്രവര്‍ത്തനങ്ങളില്‍ സംസ്ഥാന-ജില്ലാ തലങ്ങളിലും, പാലാ രൂപത എഡ്യൂക്കേഷണല്‍ ഏജന്‍സി 2022ല്‍ ഏര്‍പ്പെടുത്തിയ കാര്‍ഷിക സ്‌കൂളിനുള്ള പ്രഥമ അവാര്‍ഡും 2024ലെ അവാര്‍ഡും സ്കൂളിനു ലഭിച്ചു. പത്രസമ്മേളനത്തില്‍ സ്‌കൂള്‍ മാനേജര്‍ ഫാ. ജോസഫ് ഞാറക്കാട്ടില്‍, ഹെഡ്മിസ്ട്രസ് ലിന്‍റാ എസ്. പുതിയാപറമ്പില്‍, ജനറല്‍ കണ്‍വീനര്‍ അലക്‌സ് കൊട്ടാരം, പിടിഎ പ്രസിഡന്‍റ് റോബിന്‍ കരിപ്പാത്ത്, ജോണ്‍സണ്‍ പുളിക്കിയില്‍, ജോസുകുട്ടി ഉപ്പാന്തടം, ടി.എസ്. ജയിംസ് എന്നിവര്‍ പങ്കെടുത്തു.

ഫോട്ടോഗ്രഫി വർക്ക്ഷോപ്പ് സംഘടിപ്പിച്ചു

ചങ്ങനാശേരി: അസംപ്‌ഷൻ കോളജ് കമ്യൂണിക്കേറ്റീവ് ഇംഗ്ലീഷ് വിഭാഗത്തിന്‍റെ നേതൃത്വത്തിൽ ഫോട്ടോഗ്രഫി വർക്ക്ഷോപ്പ് നടത്തി. പ്രഫഷണൽ ഫോട്ടോഗ്രാഫർ ഡീജേഷ് മദനൻ പരിശീലന പരിപാടികൾക്ക് നേതൃത്വം നൽകി. യുവതലമുറയ്ക്ക് ഫോട്ടോഗ്രാഫിയുടെ സാധ്യതകളെ കുറിച്ചു മനസിലാക്കാൻ ഇത്തരത്തിലുള്ള പരിശീലന പരിപാടികൾ സഹായിക്കുമെന്ന് കമ്യൂണിക്കേറ്റീവ് ഇംഗ്ലീഷ് വിഭാഗം മേധാവി ഫാ. ബിജു കാഞ്ചിക്കൽ അഭിപ്രായപ്പെട്ടു. വിവിധ ഡിപ്പാർട്മെന്‍റുകളിൽ നിന്നായി നിരവധി വിദ്യാർഥികൾ വർക്ക്‌ഷോപ്പിൽ പങ്കെടുത്തു.

സാമ്രാജ്യത്തെ വിരുദ്ധ സദസ് സംഘടിപ്പിച്ച് അരുവിത്തുറ കോളജിലെ പൊളിറ്റിക്സ് വിഭാഗം

അരുവിത്തുറ: ക്വിറ്റ് ഇന്ത്യ ദിനത്തിൽ സാമ്രാജ്യത്തെ വിരുദ്ധ പ്രതിജ്ഞയും സദസും സംഘടിപ്പിച്ച് അരുവിത്തുറ സെന്‍റ് ജോർജ് കോളജിലെ പൊളിറ്റിക്സ് വിഭാഗം. ബിഗ് ബോസ് മുൻ താരവും വാഗ്മിയുമായ ഡോ. അഡോണി ടി. ജോൺ വിദ്യാർഥികൾക്ക് പ്രതിജ്ഞ ചൊല്ലിക്കൊടുത്തു. തുടർന്ന് നടന്ന സാമ്രാജ്യത്വ വിരുദ്ധ സദസ് അദ്ദേഹം ഉദ്ഘാടനം ചെയ്തു. നവലിബറൽ സാമ്രാജ്യത്വം രാജ്യത്തിന്‍റെ സമസ്ത മേഖലകളിലും പിടിമുറുക്കിയ സാഹചര്യത്തിൽ ക്വിറ്റ് ഇന്ത്യ ദിനത്തിന്‍റെ സ്മരണകൾ പോലും ഒരു സമരമായി മാറുമെന്ന് അദ്ദേഹം പറഞ്ഞു. ചടങ്ങിൽ കോളജ് ബർസാർ റവ.ഫാ. ബിജു കുന്നയ്ക്കാട്ട്, വൈസ് പ്രിൻസിപ്പൽ ഡോ. ജിലു ആനി ജോൺ, പൊളിറ്റിക്സ് വിഭാഗം മേധാവി ഡോ. തോമസ് പുളിക്കൻ, പൊളിറ്റിക്സ് വിഭാഗം അധ്യാപകനായ സിറിൾ സൈമൺ തുടങ്ങിയവർ സംസാരിച്ചു.

ഭൗതികശാസ്ത്രത്തിലെ ജീവൻ രക്ഷാ ഉപായങ്ങൾ: അരുവിത്തുറ കോളജിൽ പ്രഭാഷണ പരമ്പര

അരുവിത്തുറ: ഭൗതികശാസ്ത്രത്തിലെ ജീവൻ രക്ഷാ ഉപായങ്ങളെക്കുറിച്ചും ആരോഗ്യരംഗത്ത് ഭൗതികശാസ്ത്രത്തിന്‍റെ സ്വാധീനത്തെക്കുറിച്ചും അരുവിത്തുറ സെന്‍റ് ജോർജ് കോളജിൽ പ്രഭാഷണ പരമ്പര സംഘടിപ്പിച്ചു. തൊടുപുഴ ന്യൂമാൻ കോളജിലെ ഭൗതിക ശാസ്ത്ര വിഭാഗം മേധാവി ഡോ. ബിനാ മേരി ജോൺ പ്രഭാഷണ പരമ്പരയുടെയും ഫിസിക്സ് അസോസിയേഷന്‍റെയും ഉദ്ഘാടനം നിർവഹിച്ചു. ഭൗതികശാസ്ത്രം ആരോഗ്യ മേഖലയുടെ അഭിവാജ്യ ഘടകമായി മാറിക്കഴിഞ്ഞു. ഭൗതികശാസ്ത്രത്തിലെ പുതിയ കണ്ടെത്തലുകൾ ആരോഗ്യ മേഖലയിൽ വിപ്ലവകരമായ മാറ്റങ്ങൾ സൃഷ്‌ടിക്കുമെന്നും അവർ പറഞ്ഞു. ഡിപ്പാർട്ട്മെന്‍റ് മേധാവി ഡോ. സന്തോഷ് കുമാർ അധ്യക്ഷത വഹിച്ച ചടങ്ങിൽ വൈസ് പ്രിൻസിപ്പൽ ഡോ. ജിലു ആനി ജോൺ ആശംസകൾ നേർന്നു. ചടങ്ങിൽ വിദ്യാർഥികൾക്കൊപ്പം അധ്യാപകരായ ഡോ. സുമേഷ് ജോർജ്, ബിറ്റി ജോസഫ്, ഡാനാ ജോസ്, മരിയ ജോസ്, നിഷ ജോസഫ് തുടങ്ങിയവർ പങ്കെടുത്തു.

എസ്എൻസിപി യോഗം താലൂക്ക് നേതൃസംഗമം നാളെ

ചങ്ങനാശേരി: എസ്എൻഡിപി യോഗം ചങ്ങനാശേരി യൂണിയന്‍റെ ശാഖാ നേതൃത്വ സംഗമം നാളെ ഉച്ചകഴിഞ്ഞ് രണ്ടിനു കോണ്ടൂർ ബാക്ക് വാട്ടർ റിസോർട്ടിൽ നടത്തും. എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ അധ്യക്ഷത വഹിക്കും. വൈസ് പ്രസിഡന്‍റ് തുഷാർ വെള്ളാപ്പള്ളി സംഘടനാ വിശദീകരണം നടത്തും. എസ്എൻഡിപി യോഗം ദേവസ്വം സെക്രട്ടറി അരയാക്കണ്ടി സന്തോഷ് സംഘടനാ സന്ദേശം നൽകും. ചങ്ങനാശേരി യൂണിയന്‍റെ കീഴിലുള്ള 59 ശാഖകളുടെ ഭാരവാഹികൾ, കുടുംബയൂണിറ്റ് ഭാരവാഹികൾ, പോഷക സംഘടനാ ഭാരവാഹികൾ ഉൾപ്പെടെ 1800ൽ അധികം പേർ പങ്കെടുക്കും. ആനുകാലിക വിഷയങ്ങളെ സംബന്ധിച്ച കാര്യങ്ങൾ സംഗമത്തിൽ ചർച്ച ചെയ്യും. നേതൃത്വ സംഗമത്തിനുള്ള ഒരുക്കങ്ങൾ പൂർത്തിയായതായി യൂണിയൻ പ്രസിഡന്‍റ് ഗിരീഷ് കോനാട്ട്, സെക്രട്ടറി സുരേഷ് പരമേശ്വരൻ, വൈസ് പ്രസിഡന്‍റ് പി.എം. ചന്ദ്രൻ എന്നിവർ അറിയിച്ചു.

അപ്‌സര തിയറ്ററിനു മുമ്പില്‍ റോഡും ഓടയുടെ സ്ലാബും തകര്‍ന്നു

ചങ്ങനാശേരി: റോഡ് നന്നാക്കണേല്‍ വാഴ കുലയ്ക്കണോ... നഗരവാസികളായ ആളുകളുടെ ചോദ്യമാണിത്. ചങ്ങനാശേരി വാഴൂര്‍ റോഡില്‍ അരമനപ്പടിക്കടുത്ത് അപ്‌സര തീയറ്ററിനു മുമ്പില്‍ റോഡിന്‍റെ ഓടയുടെ മുകളിലെ സ്ലാബ് തകര്‍ന്നതിനെ തുടര്‍ന്നാണ് നാട്ടുകാരും ഓട്ടോറിക്ഷ ഡ്രൈവര്‍മാരും ചേര്‍ന്നു വാഴ നട്ടത്. പ്രതിഷേധസൂചകമായാണ് വാഴ നട്ടത്. നഗരസഭാധികൃതരോ പൊതുമരാമത്ത് ഉദ്യോഗസ്ഥരോ റോഡിന്‍റെ ശോച്യാവസ്ഥ പരിഹരിക്കാൻ നടപടിയെടുക്കുമെന്നു കരുതിയായിരുന്നു വാഴ നട്ടത്. എന്നാല്‍, അധികാരികളുടെ ഭാഗത്തുനിന്നു യാതൊരു പ്രതികരണവും ഉണ്ടാകാതെ വന്നതോടെയാണ് റോഡ് നന്നാകണേല്‍ വാഴ കുലയ്ക്കണോയെന്ന് ആളുകള്‍ ചോദിച്ചു തുടങ്ങിയത്.

എസി റോഡിലെ മനയ്ക്കച്ചിറയിൽ വാഹനങ്ങളുടെ കൂട്ടയിടി; ഒരാൾക്കു പരിക്ക്

ചങ്ങനാശേരി: എസി റോഡിൽ മനയ്ക്കച്ചിറ കോണ്ടൂർ റിസോർട്ടിന് സമീപം അമിതവേഗത്തിലെത്തിയ കാർ മറ്റൊരു കാറിലും സ്കൂട്ടറിലും ഇടിച്ച് അപകടം. ഇന്നലെ രാത്രി ഒമ്പതോടെയാണ് സംഭവം. പെരുന്ന ഭാഗത്തുനിന്നു ആലപ്പുഴ ഭാഗത്തേക്ക് പോയ മാരുതി കാറിൽ ആലപ്പുഴ ഭാഗത്തുനിന്ന് അമിത വേഗത്തിൽ വന്ന മറ്റൊരു കാർ ഇടിക്കുകയായിരുന്നു. അപകടശേഷം നിർത്താതെ പോയ ആലപ്പുഴ ഭാഗത്തുനിന്നു വന്ന കാർ ബൈക്കിൽ ഇടിച്ചിട്ടും നിർത്താതെ മുന്നോട്ടുപോയെങ്കിലും 100 മീറ്റർ അകലെ കോണ്ടൂർ റിസോർട്ടിനു മുന്നിൽ തനിയെ നിന്നു പോവുകയായിരുന്നു. ഇടിയുടെ ആഘാതത്തിൽ മാരുതിക്കാർ തലകീഴായി മറിഞ്ഞു. അപകടത്തിൽ ഗുരുതരമായ പരിക്കേറ്റ സ്കൂട്ടർ യാത്രികനെ നാട്ടുകാർ ആശുപത്രിയിൽ പ്രവേശിപ്പിച്ചു. പരിക്കേറ്റ സ്കൂട്ടർ യാത്രികൻ തന്‍റെയൊപ്പം മറ്റൊരാൾ കൂടിയുണ്ടെന്ന് പറഞ്ഞതിനെത്തുടർന്ന് പോലീസും ഫയർഫോഴ്സും എത്തി പ്രദേശത്ത് തെരച്ചിൽ നടത്തി. അപകടത്തിനിടയാക്കിയ എറണാകുളം രജിസ്ട്രേഷനിലുള്ള കാറിലുണ്ടായിരുന്ന രണ്ടുപേർ സംഭവസ്ഥലത്തുനിന്നും അപകട ശേഷം രക്ഷപ്പെട്ടതായി ദൃക്സാക്ഷികൾ പറഞ്ഞു. ഈ കാറിന്‍റെ മുൻവശം പൂർണമായി തകർന്ന് ടയറുകൾ ഇളകിയ നിലയിലാണ്. മാരുതിക്കാറിനും നാശം നേരിട്ടിട്ടുണ്ട്.

തെങ്ങണയില്‍ പരസ്യബോര്‍ഡ് സ്ഥാപിക്കവേ വൈദ്യുതലൈനില്‍ തട്ടി; രണ്ടുപേര്‍ക്കു ഷോക്കേറ്റു

ചങ്ങനാശേരി: പരസ്യ ബോര്‍ഡ് സ്ഥാപിക്കുന്നതിനിടെ‍ ബോര്‍ഡ് ചെരിഞ്ഞ് ട്രാന്‍സ്‌ഫോര്‍മറിലെ 11 കെവി ലൈനിലേക്കുവീണ് രണ്ടു യുവാക്കള്‍ക്ക് ഷോക്കേറ്റു. തിരുവനന്തപുരം സ്വദേശികളായ രാജേഷ്(28), ജിത്തു (26) എന്നിവര്‍ക്കാണ് പരിക്കേറ്റത്. ഇന്നലെ ഉച്ചകഴിഞ്ഞ് 2.45ന് തെങ്ങണ ജംഗ്ഷനിലുള്ള വസ്ത്രവ്യാപാര സ്ഥാപനത്തിന്‍റെ ബോക്‌സ് രൂപത്തിലുള്ള ഫ്‌ളെക്‌സ് ബോര്‍ഡ് ഇരുമ്പുപൈപ്പില്‍ സ്ഥാപിക്കുമ്പോള്‍ ബോര്‍ഡ് സമീപത്തെ ട്രാന്‍സ്‌ഫോര്‍മറിലേക്കുള്ള 11 കെവി ലൈനില്‍ തട്ടുകയായിരുന്നു. വസ്ത്രസ്ഥാപനത്തിനുവേണ്ടി സ്ഥാപിച്ച ട്രാന്‍സ്‌ഫോർമറിലാണ് ബോര്‍ഡ് മുട്ടിയത്. വൈദ്യുതാഘാതമേറ്റ രാജേഷ് ട്രാന്‍സ്‌ഫോര്‍മറിന്‍റെ വേലിക്കെട്ടിനു പുറത്തേക്കും ജിത്തു വേലിക്കെട്ടിനകത്തേക്കും വീണു. അബോധാവസ്ഥയിലായ രാജേഷിന് സംഭവസ്ഥലത്തുണ്ടായിരുന്ന പാമ്പാടി താലൂക്ക് ആശുപത്രിയിലെ ആംബുലന്‍സ് ഡ്രൈവര്‍ തെങ്ങണ നടപ്പുറം അഭിലാഷ് സിപിആര്‍ നല്‍കിയതോടെ ബോധം തിരികെക്കിട്ടി. തുടര്‍ന്ന് രാജേഷിനെ ഓട്ടോറിക്ഷയില്‍ ചങ്ങനാശേരി ജനറല്‍ ആശുപത്രിയില്‍ എത്തിച്ചു. പിന്നാലെ ഇതുവഴി എത്തിയ പാമ്പാടി ഫയര്‍ഫോഴ്‌സ് യൂണിറ്റിന്‍റെ വാഹനം അഭിലാഷ് കൈകാണിച്ചുനിര്‍ത്തി സഹായമഭ്യര്‍ഥിച്ചു. ഫയര്‍ഫോഴ്‌സിന്‍റെയും അപകട വിവരമറിഞ്ഞെത്തിയ കെഎസ്ഇബി തെങ്കണ സെക്ഷനിലെ ജീവനക്കാരുടേയും സഹായത്തോടെ വൈദ്യുതിബന്ധം വിച്ഛേദിച്ചാണ് ട്രാന്‍സ്ഫോർമറിന്‍റെ വേലിക്കെട്ടിനുള്ളില്‍ കുടുങ്ങിയ ജിത്തുവിനെ രക്ഷപ്പെടുത്തി ജനറല്‍ ആശുപത്രിയിലെത്തിച്ചത്. തുടർന്ന് ഇരുവരെയും കോട്ടയം മെഡിക്കല്‍ കോളജ് ആശുപത്രിയിലേക്കു മാറ്റി. രാജേഷിന്‍റെ കൈവെള്ളയ്ക്ക് ഗുരുതരമായി പൊള്ളലേറ്റിട്ടുണ്ട്. ജിത്തുവിന് നിസാര പരിക്കേയുള്ളൂ.

ബോധവത്കരണ ക്ലാസ് നടത്തി

കടുത്തുരുത്തി: റോട്ടറി ക്ലബ് ഓഫ് കടുത്തുരുത്തിയുടെ നേതൃത്വത്തില്‍ വെള്ളൂര്‍ ഭാവന്‍സ് ന്യൂസ് പ്രിന്‍റ് വിദ്യാലയത്തില്‍ മയക്കുമരുന്നിനെതിരേ ബോധവത്കരണ ക്ലാസ് നടത്തി. റോട്ടറി ക്ലബ് പ്രസിഡന്‍റും മുരിക്കന്‍സ് ഗ്രൂപ്പ് മാനേജിംഗ് ഡയറക്ടറുമായ ജോര്‍ജ് ജി. മുരിക്കന്‍ ഉദ്ഘാടനം നിര്‍വഹിച്ചു. ജില്ലാ ലീഗല്‍ സെല്‍ എസ്‌ഐ എസ്.എം. ഗോപകുമാര്‍ സെമിനാര്‍ നയിച്ചു. റോട്ടറി ക്ലബ് അംഗങ്ങളായ സെക്രട്ടറി അഡ്വ. ജോസ് ജോസഫ്, തോമസ് കുഴിവേലില്‍, റിട്ട. കേണല്‍ പി.ജെ. സൈമണ്‍, എം.യു. ബേബി, ജോയി മാത്യു, ജോമോന്‍ ജോസഫ് എന്നിവര്‍ പ്രസംഗിച്ചു.

വിപിന്‍റെ ദുരൂഹമരണം: ക്രൈംബ്രാഞ്ച് അന്വേഷണത്തിൽ പ്രതീക്ഷയർപ്പിച്ച് കുടുംബം

വൈക്കം: ലോക്കൽ പോലീസ് അന്വേഷണത്തിൽ കാര്യമായപുരോഗതി ഉണ്ടാകാതിരുന്ന സാഹചര്യത്തിൽ ഫിഷ്ഫാം ഉടമയുടെ മരണത്തിലെ ദുരൂഹത ക്രൈംബ്രാഞ്ച് അന്വേഷണത്തിലൂടെ നീങ്ങുമെന്ന പ്രതീക്ഷയിലാണ് മരണപ്പെട്ട വിപിന്‍റെ ഭാര്യയും മക്കളും. കുടുംബം സിബിഐ അന്വേഷണമാണ് ആവശ്യപ്പെട്ടിരുന്നതെങ്കിലും ഹൈക്കോടതി ക്രൈംബ്രാഞ്ച് അന്വേഷണത്തിന് കഴിഞ്ഞ ദിവസം ഉത്തരവിട്ടിരുന്നു. വൈക്കം തോട്ടകം അട്ടാറ പാലത്തിനു പടിഞ്ഞാറുഭാഗത്ത് കരിയാറിന്‍റെ കൈവഴിയോടു ചേർന്നുള്ള ഫിഷ് വേൾഡ് അക്വാ ടൂറിസം സെന്‍റർ ഉടമ ടിവി പുരം ചെമ്മനത്തുകര മുല്ലക്കേരിൽ വിപിൻ നായരെ(54) കഴിഞ്ഞ ജൂൺ ഒൻപതിനാണ് ഫാമിൽനിന്നു നൂറു മീറ്റർ അകലെ കരിയാറിന്‍റെ കൈവഴിയിൽ കാലിലും കഴുത്തിലും ഇഷ്ടിക കെട്ടി മരിച്ചനിലയിൽ കണ്ടെത്തിയത്. പോലീസ് ആദ്യം മുതൽ വിപിൻ ജീവനൊടുക്കിയെന്ന നിഗമനത്തിലെത്താനാണ് ശ്രമിച്ചതെന്ന് വിപിന്‍റെ കുടുംബം ആരോപിക്കുന്നു. കടുത്ത സാമ്പത്തിക പ്രതിസന്ധി ഉണ്ടായിരുന്നപ്പോൾ അചഞ്ചലനായി നിന്ന വിപിന് കടങ്ങൾ വീട്ടിത്തുടങ്ങി വന്ന സമയത്ത് ആത്മഹത്യ ചെയ്യേണ്ട ഒരു കാര്യവുമുണ്ടായിരുന്നില്ലെന്നാണ് കുടുംബാംഗങ്ങൾ പറയുന്നത്. വിപിനെ കാണാനില്ലെന്നു പരാതിപ്പെട്ടിട്ടും ആദ്യ മണിക്കൂറിൽ കാര്യമായ അന്വേഷണം പോലീസ് നടത്തിയില്ല. ബന്ധുക്കളുടെ ആവശ്യപ്രകാരമാണ് കരിയാറിൽ തെരച്ചിൽ നടത്തിയത്. വിപിൻ ഫാമിൽ എത്തിയ അന്നുരാത്രി അവിടെ മറ്റാരൊക്കെയോ അവിടെ എത്തിയിരുന്നെന്നും അവരാണ് വിപിനെ അപായപ്പെടുത്തിയതെന്നുമാണ് ഭാര്യ അനില സംശയിക്കുന്നത്.

സിവൈഎംഎല്‍ സ്‌കൂള്‍ കലോത്സവം

പാലാ: പാലാ സിവൈഎംഎല്‍ സംഘടനയുടെ 78-ാമത് വാര്‍ഷികവും സ്‌കൂള്‍ കലോത്സവവും ഒന്‍പത്, 10 തീയതികളില്‍ സിവൈഎംഎല്‍ ഹാളില്‍ നടത്തുമെന്ന് ഭാരവാഹികള്‍ പത്രസമ്മേളനത്തില്‍ അറിയിച്ചു. കലാമത്സരങ്ങളുടെ ഉദ്ഘാടനം നാളെ രാവിലെ 9.30ന് കിഴതടിയൂര്‍ ബാങ്ക് പ്രസിഡന്‍റ് എം.എസ്. ശശിധരന്‍ നിര്‍വഹിക്കും. എല്‍പി, യുപി, എച്ച്എസ് വിഭാഗങ്ങളില്‍ ആണ്‍കുട്ടികള്‍ക്കും പെണ്‍കുട്ടികള്‍ക്കും മത്സരങ്ങള്‍ നടക്കും. എച്ച്എസ്എസ് വിഭാഗത്തിന് സംയുക്തമായാണ് മത്സരം. നാളെ രാവിലെ 9.30 മുതല്‍ മുതല്‍ സംഗീതം, പ്രസംഗം മത്സരങ്ങള്‍ നടക്കും. പ്രസംഗവിഷയം എല്‍പി വിഭാഗത്തിന് ശുചിത്വകേരളം, യുപി വിഭാഗത്തിന് ആരോഗ്യവും കായികവിദ്യാഭ്യാസവും എന്നതായിരിക്കും. മറ്റു വിഭാഗങ്ങള്‍ക്കു മത്സരത്തിന് 10 മിനിട്ട് മുമ്പ് വിഷയം നല്‍കും. ഉച്ചകഴിഞ്ഞ് രണ്ടു മുതല്‍ ഓര്‍ഗന്‍, വയലിന്‍ മത്സരങ്ങള്‍ നടക്കും. മൂന്നു മുതല്‍ കവിതാരചനാ മത്സരം. 10ന് ഉച്ചകഴിഞ്ഞ് 2.30 മുതല്‍ ചിത്രരചനാ മത്സരം മഹാത്മാഗാന്ധി ഗവൺമെന്‍റ് എച്ച്എസ്എസില്‍ നടക്കും. പങ്കെടുക്കുന്ന എല്ലാവര്‍ക്കും പ്രോത്സാഹന സമ്മാനങ്ങള്‍ നല്‍കും. പങ്കെടുക്കാന്‍ ആഗ്രഹിക്കുന്നവര്‍ ഒന്‍പതിന് രാവിലെ ഒന്‍പതു മുതല്‍ സിവൈഎംഎല്‍ ഹാളില്‍ പേര് രജിസ്റ്റര്‍ ചെയ്യണം. ഫോണ്‍: 9495064205. പത്രസമ്മേളനത്തില്‍ സിവൈഎംഎല്‍ പ്രസിഡന്‍റ് പി.ജെ. ഡിക്സണ്‍ പെരുമണ്ണില്‍, സോണി വലിയകാപ്പില്‍, സജി പുളിക്കല്‍, ജോബി കുളത്തറ, ഷാജി പന്തപ്ലാക്കല്‍, സതീഷ് മണര്‍കാട്, ജോജോ കുടക്കച്ചിറ, ബിജു വാതല്ലൂര്‍, അനൂപ് ടെന്‍സന്‍ എന്നിവര്‍ പങ്കെടുത്തു.

കാൽ നൂറ്റാണ്ടിന്‍റെ ഓർമകൾ ചേർത്തുവച്ച് സ്‌നേഹക്കൂടൊരുക്കാൻ 1997-2000 ബികോം ബാച്ച്

കുറവിലങ്ങാട്: കൗമാരത്തിന്‍റെ ആവേശം ജ്വലിപ്പിച്ച കലാലയ ജീവിതത്തിന്‍റെ ഓർമകൾ കാൽ നൂറ്റാണ്ട് തികയ്ക്കുമ്പോൾ അവർ വീണ്ടും ആ പടികൾ കയറുകയാണ്. ദേവമാതാ കോളജിലെ 1997-2000 ബാച്ച് ബികോം വിദ്യാർഥികളാണ് പ്രിയകലാലയത്തിലേക്ക് വീണ്ടും എത്തുന്നത്. വിവിധ മേഖലകളിൽ ഉന്നതനിലയിൽ സേവനം ചെയ്യുന്നവരടക്കമുള്ള വിദ്യാർഥികളെല്ലാം സ്‌നേഹക്കൂടെന്ന സംഗമത്തിലെത്തും. ഒരുവർഷം നീണ്ടുനിൽക്കുന്ന ആഘോഷപരിപാടികൾക്കാണ് നേതൃത്വം നൽകുന്നതെന്ന് പ്രതിനിധികളായ ജയിംസ് പുല്ലാപ്പള്ളി, റോബിൻ എണ്ണംപ്രായിൽ, അനീഷ് തോമസ്, അനീഷ് കുഴികൊമ്പിൽ എന്നിവർ വാർത്താസമ്മേളനത്തിൽ അറിയിച്ചു. വെബ്‌സൈറ്റ് പ്രകാശനം, പുസ്തകപ്രകാശനം, കൈപ്പുസ്തക പ്രകാശനം എന്നിവ സംഗമത്തിന്‍റെ ഭാഗമായി നടക്കും. ഒട്ടേറെ ജീവകാരുണ്യപ്രവർത്തനങ്ങൾ ഈ ബാച്ചിന്‍റെ നേതൃത്വത്തിൽ കോളജിൽ നടപ്പിലാക്കുന്നതായി ഭാരവാഹികൾ പറഞ്ഞു. ഓരോ വർഷവും രണ്ട് വിദ്യാർഥികളുടെ മുഴുവൻ പഠനച്ചെലവും സ്‌കോളർഷിപ്പുകളും ഈ ബാച്ച് നൽകുന്നുണ്ട്. നാളെ 9.30ന് കോളജ് ഇ-ലേണിംഗ് ഹാളിലാണ് സ്‌നേഹക്കൂട് വിളിച്ചുചേർത്തിട്ടുള്ളത്. ഗോവ മുൻ ഗവർണർ പി.എസ്. ശ്രീധരൻപിള്ള മുഖ്യാതിഥിയായി പങ്കെടുക്കും. കോളജ് മാനേജർ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, പ്രിൻസിപ്പൽ ഡോ. സുനിൽ സി. മാത്യു, ബർസാർ ഫാ. ജോസഫ് മണിയഞ്ചിറ, കൊമേഴ്‌സ് വിഭാഗം മുൻ മേധാവികളായ പ്രഫ. ടി.സി. കുര്യാക്കോസ്, പ്രഫ. ജോർജ് മാത്യു, വകുപ്പ്മേധാവി ഡോ. അനീഷ് മാത്യു, റോബിൻ ജോർജ് എണ്ണംപ്രായിൽ, അബിൻ കുര്യൻ പനങ്കുഴ, അനീഷ് ജോസഫ് എന്നിവർ പ്രസംഗിക്കും.

നേരേകടവ്-മാക്കേക്കടവ് കായൽ പാലം 80 ശതമാനം നിർമാണം പൂർത്തിയായി

വൈക്കം: ആലപ്പുഴ ജില്ലയിലെ തൈക്കാട്ടുശേരി പഞ്ചായത്തിനെയും കോട്ടയം ജില്ലയിലെ ഉദയനാപുരം പഞ്ചായത്തിനയും തമ്മിൽ ബന്ധിപ്പിക്കുന്ന നേരേകടവ്- മാക്കേക്കടവ് പാലത്തിന്‍റെ നിർമാണം 80 ശതമാനം പൂർത്തിയായി. നിർമാണവുമായി ബന്ധപ്പെട്ട 80 ഗർഡറിൽ 61 എണ്ണം പൂർത്തിയായി. ഗർഡറുകളെല്ലാം മാക്കേക്കടവിൽ കരയിൽ നിർമിച്ചശേഷമാണ് കായലിനു മുകളിൽ സ്ഥാപിക്കുന്നത്. 22 സ്പാനുകളിൽ (നാല് ഗർഡറുകൾ ചേരുന്ന ഭാഗം) 15 എണ്ണം സ്ഥാപിച്ചു. ഇതിൽ 13-ാമത്തെ സ്പാനിന്‍റെ കോൺക്രീറ്റിംഗാണ് ഇപ്പോൾ നടന്നുവരുന്നത്. വേമ്പനാട്ടുകായലിന് കുറുകെ 800 മീറ്റർ നീളത്തിലാണ് പാലം നിർമിക്കുന്നത്. 2026 ആദ്യത്തോടെ നിർമാണം പൂർത്തിയാക്കുകയെന്ന ലക്ഷ്യത്തിലാണ് നിർമാണപ്രവർത്തനങ്ങൾ മുന്നോട്ടു പോകുന്നത്. വർഷങ്ങൾ നീണ്ട കേസുകളും തർക്കങ്ങളുമായി നിലച്ച നിർമാണം 2024 മാർച്ച് മാസമാണ് പുനരാരംഭിച്ചിത്. പ്രതീക്ഷിച്ചതിലും വേഗത്തിലാന്ന് നിർമാണപ്രവർത്തനങ്ങൾ മുന്നോട്ടുപോകുന്നതെന്ന് സി.കെ. ആശ എംഎൽഎ അറിയിച്ചു.

ഇറുമ്പയം പെരുന്തട്ട് സ്റ്റേഡിയം നിര്‍മാണം അവസാനഘട്ടത്തില്‍

വെള്ളൂര്‍: പഞ്ചായത്തിലെ ഇറുമ്പയം പെരുന്തട്ടില്‍ മൂന്നു കോടി രൂപ ചെലവഴിച്ചു നിര്‍മിക്കുന്ന സ്റ്റേഡിയം അവസാനഘട്ടത്തിലേക്ക്. സംസ്ഥാന സര്‍ക്കാര്‍ 2020-21ലെ ബജറ്റില്‍ കായികവകുപ്പിന് പ്ലാന്‍ ഫണ്ട് വഴിയാണ് സ്റ്റേഡിയം നിര്‍മാണത്തിനു തുക അനുവദിച്ചത്. ഗാലറിയുടെ നവീകരണം, മഡ്ഫുട്‌ബോള്‍ കോര്‍ട്ട്, ഫ്‌ളഡ് ലൈറ്റിംഗ്, എല്‍ഇഡി ലൈറ്റിംഗ് സംവിധാനത്തോടുകൂടിയ ഇന്‍ഡോര്‍ ബാഡ്മിന്‍റണ്‍ കോര്‍ട്ട്, ശുചിമുറി, ഗേറ്റ്, ഡ്രെയ്‌നേജ്, ഫെന്‍സിംഗ് എന്നി സൗകര്യങ്ങളാണ് സ്റ്റേഡിയം സമുച്ചയത്തില്‍ ഒരുക്കുന്നത്. 85 ശതമാനം പ്രവൃത്തികള്‍ നിലവില്‍ പൂര്‍ത്തികരിച്ചിട്ടുണ്ട്. സ്റ്റേഡിയത്തില്‍ സോളാര്‍ ലൈറ്റിംഗ് സിസ്റ്റവും ഓപ്പണ്‍ ജിം അടക്കമുള്ള സൗകര്യങ്ങളും‍ ചെയ്യാനുള്ള നടപടികള്‍ പൂര്‍ത്തിയായിവരുകയാണ്. മന്ത്രി വി. അബ്ദുറഹ്മാനാണ് സ്റ്റേഡിയത്തിന്‍റെ നിര്‍മാണ ഉദ്ഘാടനം നിര്‍വഹിച്ചത്. സ്‌പോര്‍ട്‌സ് കേരള ഫൗണ്ടേഷനാണ് സ്റ്റേഡിയത്തിന്‍റെ നിര്‍വഹണ ഏജന്‍സി. സെപ്റ്റംബര്‍ അവസാനത്തോടെ സ്റ്റേഡിയം പൊതുജനങ്ങള്‍ക്ക് തുറന്നുകൊടുക്കുക എന്ന രീതിയിലാണ് നിര്‍മാണ പ്രവര്‍ത്തനങ്ങള്‍ മുന്നോട്ടുപോകുന്നത്. വൈക്കം നിയോജക മണ്ഡലത്തില്‍ പൂര്‍ണമായും സര്‍ക്കാര്‍ ഉടമസ്ഥതയിലുളള അക്കരപ്പാടം ടര്‍ഫ് സ്റ്റേഡിയം കഴിഞ്ഞ മാസമാണു തുറന്നുകൊടുത്തത്. വൈക്കം തെക്കേനട ബോയ്‌സ് ഹയര്‍ സെക്കന്‍ഡറി സ്‌കൂളിലും ഗവണ്‍മെന്‍റ് വൈക്കം വെസ്റ്റ് വൊക്കേഷണല്‍ ഹയര്‍ സെക്കന്‍ഡറി സ്‌കൂളിലും രണ്ടു സ്റ്റേഡിയങ്ങള്‍ കൂടി നിര്‍മിക്കാനുളള നടപടികളും പൂര്‍ത്തിയായിവരികയാണെന്ന് സി.കെ. ആശ എംഎല്‍എ പറഞ്ഞു.

വൈക്കം റോഡ് റെയില്‍വേ സ്റ്റേഷൻ : പ്ലാറ്റ്ഫോമില്‍ വെള്ളക്കെട്ട്; യാത്രക്കാര്‍ തെന്നിവീഴുന്നു

കടുത്തുരുത്തി: വൈക്കം റോഡ് (ആപ്പാഞ്ചിറ) റെയില്‍വേ സ്റ്റേഷനില്‍ പ്ലാറ്റ്ഫോമില്‍ വെള്ളം കെട്ടിനിന്നു യാത്രക്കാര്‍ തെന്നിവീഴുന്നത് പതിവായി. മഴ പെയ്യുന്ന ദിവസങ്ങളില്‍ റെയില്‍വേയുടെ മേല്‍പാലത്തില്‍നിന്നു വീഴുന്ന വെള്ളം പ്ലാറ്റ്ഫോമിലേക്കാണ് ഒഴുകിവരുന്നത്. ഇത്തരത്തില്‍ വെള്ളം ഒഴുകിവരുന്ന ഭാഗത്ത് പായല്‍ പിടിച്ചാണ് ഇതുവഴി നടന്നുവരുന്ന യാത്രക്കാര്‍ വീഴാനിടയാകുന്നത്. കഴിഞ്ഞ ദിവസങ്ങളില്‍ നിരവധി ആളുകള്‍ ഇവിടെ കാല്‍വഴുതി വീഴുകയുണ്ടായി. ചിലര്‍ തലനാരിഴയ്ക്കാണ് പരിക്കേല്‍ക്കാതെ രക്ഷപ്പെട്ടത്. പ്ലാറ്റ്ഫോമില്‍ വീണ് സ്ഥിരം യാതക്കാര്‍ ഉള്‍പ്പെടെയുള്ളവരുടെ യാത്ര മുടങ്ങിയ സംഭവങ്ങളുമുണ്ട്. സൂക്ഷിച്ചു നടന്നില്ലെങ്കില്‍ കാല്‍വഴുതി റെയില്‍വേ ട്രാക്കിലേക്ക് ആളുകള്‍ വീഴും. റെയില്‍വേ പ്ലാറ്റ് ഫോമിന് മുകളിലൂടെയുള്ള ആപ്പാഞ്ചിറ പാലത്തിലെ വെള്ളം ഒഴുകുന്ന ഭാഗങ്ങള്‍ അടയ്ക്കുകയോ മറ്റൊരു സ്ഥലത്തുകൂടി വെള്ളം ഒഴുകിപ്പോകാനുമുള്ള സംവിധാനം ഏര്‍പ്പെടുത്തുകയോ വേണമെന്ന് റെയില്‍വേ യാത്രക്കാരും നാട്ടുകാരും ആവശ്യപ്പെട്ടു. ഇക്കാര്യത്തില്‍ അലംഭാവം കാണിച്ചാല്‍ ശക്തമായ പ്രതിഷേധവുമായി എത്തുമെന്ന് നാട്ടുകാരും റെയില്‍വേ യാത്രക്കാരും പറഞ്ഞു.

ബൈബിൾ പകർത്തിയെഴുതി ചരിത്രം കുറിക്കാൻ സണ്‍ഡേ സ്‌കൂള്‍ വിദ്യാര്‍ഥികൾ

കോട്ടയം: ബൈബിള്‍ 6800 പേര്‍ ചേര്‍ന്ന് പകര്‍ത്തിയെഴുതി ചരിത്രത്തിന്‍റെ ഭാഗമാകാന്‍ സണ്‍ഡേ സ്‌കൂള്‍ വിദ്യാര്‍ഥികളും അധ്യാപകരും. മലങ്കര ഓര്‍ത്തഡോക്‌സ് സഭാ കോട്ടയം ഭദ്രാസനത്തിന്‍റെ ശതോത്തര സുവര്‍ണ ജൂബിലിയുടെ ഭാഗമായി ഭദ്രാസന സണ്‍ഡേസ്‌കൂള്‍ പ്രസ്ഥാനത്തിന്‍റെ ആഭിമുഖ്യത്തിലാണ് സൺഡേസ്‌കൂള്‍ അധ്യാപകരും വിദ്യാര്‍ഥികളും രക്ഷകര്‍ത്താക്കളും ചേര്‍ന്ന് വിശുദ്ധ വേദപുസ്തകം പകര്‍ത്തിയെഴുതുന്നത്. ഭദ്രാസന മെത്രാപ്പോലീത്ത ഡോ. യൂഹാനോന്‍ മാര്‍ ദിയസ്‌കോറസ്, വൈദികര്‍, ഭാരവാഹികള്‍ അടക്കം 6800 വിശ്വാസികളാണ് 40 ദിവസത്തെ ആത്മീയ ഒരുക്കത്തിനുശേഷം 10നു വിശുദ്ധ കുര്‍ബാനയ്ക്കുശേഷം ഒരേസമയം വിശുദ്ധ വേദപുസ്തകം കൈയെഴുത്തായി എഴുതുന്നത്. പാമ്പാടി മേഖലയിലെ പങ്ങട സെന്‍റ് മേരീസ് ഓര്‍ത്തഡോക്‌സ് പള്ളിയില്‍ ഡോ. യൂഹാനോന്‍ മാര്‍ ദിയസ്‌കോറസ് വചനമെഴുത്തിന്‍റെ ഉദ്ഘാടനം നിര്‍വഹിക്കും. പകര്‍ത്തിയെഴുതുന്ന ബൈബിള്‍ പാമ്പാടി മാര്‍ കുറിയാക്കോസ് ദയറായില്‍ ശതോത്തര സുവര്‍ണ ജൂബിലിയുടെ ഓര്‍മയ്ക്കായി സൂക്ഷിക്കും. ഭദ്രാസന വൈസ്പ്രസിഡന്‍റ് റവ.ഡോ. തോമസ് പി. സഖറിയ, ഡയറക്ടര്‍ വിനോദ് എം. സഖറിയ, സെക്രട്ടറി കുര്യാക്കോസ് തോമസ്, ജനറല്‍ കണ്‍വീനര്‍മാരായ ഏബ്രഹാം ജോണ്‍, അജിത് മാത്യു, വി.വി. വര്‍ഗീസ്, ഇടവക വൈദികര്‍ ഡിസ്ട്രിക്ട് പ്രസിഡന്‍റുമാര്‍, ഇന്‍സ്‌പെക്ടര്‍മാര്‍, സെക്രട്ടറിമാര്‍, ഹെഡ്മാസ്റ്റര്‍മാര്‍, മെല്‍ സോ കണ്‍വീനര്‍മാര്‍ എന്നിവര്‍ വിവിധ പ്രോഗ്രാമുകള്‍ക്ക് നേതൃത്വം നല്‍കും.

ബിഇഎഫ്‌ഐ ഏരിയാ സമ്മേളനം

കോട്ടയം: ഗ്രാമീണ ബാങ്കുകള്‍ സ്വകാര്യവത്കരിക്കാനുള്ള കേന്ദ്രസര്‍ക്കാര്‍ നീക്കം ഉപേക്ഷിക്കണമെന്ന് കേരള ഗ്രാമീണ ബാങ്ക് എംപ്ലോയീസ് യൂണിയന്‍ / ഓഫീസേഴ്‌സ് യൂണിയന്‍ കോട്ടയം ഏരിയാ സമ്മേളനം ആവശ്യപ്പെട്ടു. ബിഇഎഫ്‌ഐ സംസ്ഥാന കമ്മിറ്റിയംഗം യു. അഭിനന്ദ് ഉദ്ഘാടനം ചെയ്തു. വനിതാ കണ്‍വീനര്‍ രമ്യാ രാജ് അധ്യക്ഷത വഹിച്ചു. ഏരിയാ കണ്‍വീനര്‍ സി. അനീഷ് കുമാര്‍, മനു ദാസ്, കെജിബിഒയു സംസ്ഥാന കമ്മിറ്റി അംഗം സി. ലക്ഷ്മി, സംസ്ഥാന വൈസ് പ്രസിഡന്‍റ് വി.പി. ശ്രീരാമന്‍ തുടങ്ങിയവര്‍ പ്രസംഗിച്ചു. ഏരിയാ സമ്മേളനം മനുദാസിനെ കണ്‍വീനറായും ആര്‍. ഗൗരിയെ ജോയിന്‍റ് കണ്‍വീനറായും തെരഞ്ഞെടുത്തു.

സിസ്റ്റര്‍ ഫ്‌ളാവിയ സ്മാരക ക്വിസ്: എസ്എച്ച് പങ്ങട, എംഡി എച്ച്എസ്എസ് ജേതാക്കള്‍

തോട്ടയ്ക്കാട്: ഇരവുചിറ സെന്‍റ് ജോര്‍ജ് യുപി സ്‌കൂളില്‍ നടന്ന സിസ്റ്റര്‍ ഫ്‌ളാവിയ എഫ്‌സിസി സ്മാരക ഇന്‍റര്‍ സ്‌കൂള്‍ ക്വിസില്‍ ഹൈസ്‌കൂള്‍ വിഭാഗത്തില്‍ പങ്ങട എസ്എച്ച് ഹൈസ്‌കൂളിലെ അക്ഷര പ്രസാദ്-സൈറ സാലിഹ് ടീം ജേതാക്കളായി. ചങ്ങനാശേരി സെന്‍റ് ജോസഫ്‌സ് സകൂളിലെ അനുപുണ്യ ബിജു-അനുനേദ്യ ബിജു ടീം രണ്ടാംസ്ഥാനത്തും സെന്‍റ് ആന്‍സ് ജിഎച്ച്എസിലെ ജാന്‍വി ആന്‍ ജോസി-അതുല്യ സന്തോഷ് ടീം മൂന്നാം സ്ഥാനത്തുമെത്തി. വിജയികള്‍ യഥാക്രമം 5000, 3000, 2000 രൂപ വീതം കാഷ് അവാര്‍ഡ് സ്വന്തമാക്കി. യുപിയില്‍ കോട്ടയം എംഡി എച്ച്എസ്എസിലെ നിഷാന്‍ ഷറഫ്-നിഷാന്‍ സനൂപ് ടീം ഒന്നാം സ്ഥാനവും (2500 രൂപ) പുതുപ്പള്ളി ഡോണ്‍ ബോസ്‌കോയിലെ ഭഗത് ശങ്കര്‍ -അഷെയ്ല്‍ മാക്‌സില്‍ സഖ്യം രണ്ടാം സ്ഥാനവും (1500) പങ്ങട എസ്എച്ചിലെ ഡാലിയ ജിനോ-ഗൗരീനന്ദ മനോജ് ടീം മൂന്നാം സ്ഥാനവും (1000) സ്വന്തമാക്കി. സിസ്റ്റര്‍ ഫ്‌ളാവിയ കണ്ട്രാമറ്റം എഫ്‌സിസി അനുസ്മരണ സമ്മേളനം ചങ്ങനാശേരി അസംപ്ഷന്‍ കോളജ് മുന്‍ പ്രിന്‍സിപ്പല്‍ സിസ്റ്റര്‍ ജിയോ മരിയ ഉദ്ഘാടനം ചെയ്തു. ഡോ. പി.ജെ. തോമസ് അനുസ്മരണ പ്രഭാഷണം നടത്തി. എഫ്‌സിസി ദേവമാതാ പ്രോവിന്‍സ് പ്രൊവിന്‍ഷ്യല്‍ സിസ്റ്റര്‍ ബ്രിജി, മദര്‍ സുപ്പീരിയര്‍ സിസ്റ്റര്‍ ബ്രിജിറ്റ്, ഹെഡ്മിസ്ട്രസ് സിസ്റ്റര്‍ കരുണ, സെന്‍റ് മേരീസ് പള്ളി വികാരി ഫാ. ജയിംസ് അത്തിക്കളം, ജോഷി ഫിലിപ്പ്, പി.എസ്. സന്ദീപ് കുമാര്‍, ജോമോന്‍ മാത്യു, ജോമിച്ചന്‍ ജോസ് തുടങ്ങിയവര്‍ പ്രസംഗിച്ചു.

റോഡിലെ ഗർത്തം അപകട‌ക്കെണി

കോത്തല: സ്‌കൂൾ വിദ്യാർഥികളെ കയറ്റി വാഹനം തിരിക്കുന്നതിനിടെ റോഡ് ഇടിഞ്ഞുതാണു. 13-ാം മൈൽ-വല്യപാറ റോഡിൽ പുത്തൻകണ്ടം ഭാഗത്താണു ഗർത്തം രൂപപ്പെട്ടത്. കഴിഞ്ഞദിവസമായിരുന്നു സംഭവം. വിദ്യാർഥികളെ കയറ്റി ബസ് മുന്പോട്ടെടുത്തയുടൻ റോഡ് നാലടിയോളം ഇടിഞ്ഞു താഴുകയായിരുന്നു. ഡ്രൈവറുടെ സമയോചിതമായ ഇടപെടലിലാണ് അപകടം ഒഴിവായത്. റോഡിനോടു ചേർന്നാണ് പാലമറ്റം തോടുള്ളത്. വെള്ളക്കല്ലുങ്കൽ, ഗന്ധർവസ്വാമി ക്ഷേത്രങ്ങളിലേക്കു പോകുന്നതിന് ആശ്രയിക്കുന്നതും ഈ റോഡിനെയാണ്. പഞ്ചായത്ത് അധികൃതർ സ്‌ഥലം സന്ദർശിച്ചു. മുളങ്കമ്പുകൾ ഉപയോഗിച്ച് നാട്ടുകാർ മുന്നറിയിപ്പ് സംവിധാനമൊരുക്കിയിട്ടുണ്ട്.

ഫാ. സുരേഷ് പട്ടേട്ട് സൗമ്യതയുടെ സേവന മുഖം

അപ്രതീക്ഷിത വിയോഗത്തിൽ ദുഃഖത്തിലായി പ്രിയപ്പെട്ടവർ വെള്ളികുളം/കടുവാക്കുളം: സൗമ്യതയുടെ സേവന മുഖമായിരുന്നു എംസിബിഎസ് സന്യാസ സമൂഹാംഗമായ ഫാ. സുരേഷ് പട്ടേട്ട്. മുപ്പത്തിമൂന്നാം വയസിലെ അദ്ദേഹത്തിന്‍റെ അപ്രതീക്ഷിത വിയോഗം പ്രിയപ്പെട്ടവരെ കണ്ണീരിലാഴ്ത്തി. എല്ലാവരോടും എപ്പോഴും പ്രസന്നഭാവത്തിൽ ഇടപെടുകയും സൗഹാർദം സൂക്ഷിക്കുകയും ചെയ്യുന്ന അദ്ദേഹം അരുണാചൽപ്രദേശിൽ പാവങ്ങളുടെ ഇടയിൽ സേവനം ചെയ്തുവരവേയാണ് രോഗത്തിന്‍റെ പിടിയിലായത്. പാലാ വെള്ളികുളം ഇടവകാംഗമായ ഈ യുവമിഷനറി 2021 മുതൽ അരുണാചൽ പ്രദേശിൽ സേവനം ചെയ്തുവരികയായിരുന്നു. അവധി കഴിഞ്ഞ് അദ്ദേഹം അരുണാചലിലേക്ക് മടങ്ങിപ്പോയിട്ട് ഏതാനും ആഴ്ചകളേ ആയിയിരുന്നുള്ളൂ. ഇതിനിടയിൽ ഇദ്ദേഹമടക്കമുള്ള വൈദികർക്ക് ടൈഫോയ്ഡ് പിടിപെടുകയായിരുന്നു. മികച്ച ചികിത്സയ്ക്കായി ഇദ്ദേഹത്തെ ഒരാഴ്ച മുന്പ് ഗോഹട്ടിയിലെ നെംകെയർ സൂപ്പർ സ്പെഷാലിറ്റി ആശുപത്രിയിലും പിന്നീട് ഡൽഹി അപ്പോളോ ആശുപത്രിയിലും പ്രവേശിപ്പിച്ചെങ്കിലും രോഗം വഷളായി ലോകത്തോടു വിടപറഞ്ഞു. ഇദ്ദേഹത്തിന്‍റെ വിയോഗം ജന്മനാടായ വെള്ളികുളത്തും അദ്ദേഹം ശുശ്രൂഷ ചെയ്ത കടുവാക്കുളത്തും ഏറെപ്പേരെ നൊന്പരത്തിലാഴ്ത്തി. പാവപ്പെട്ട കുട്ടികൾക്ക് പഠിക്കാൻ അദ്ദേഹം സഹായം എത്തിച്ചു നൽകിയിരുന്നതായി അടുപ്പമുള്ളവർ പറയുന്നു. വെള്ളികുളം പട്ടേട്ട് എമ്മച്ചന്‍ എന്നു സെബാസ്റ്റ്യന്‍റെയും മേരിക്കുട്ടിയുടെയും നാലു മക്കളില്‍ രണ്ടാമത്തെ മകനാണ് സുരേഷ് അച്ചന്‍. സ്കൂൾ പഠനത്തിനു ശേഷം എംസിബിഎസ് സഭയിൽ ചേർന്നു. 2020 ജനുവരി ഒന്നിന് വെള്ളികുളം പള്ളിയില്‍ സീറോ മലബാര്‍ സഭ കൂരിയ ബിഷപ് മാര്‍ സെബാസ്റ്റ്യന്‍ വാണിയപ്പുരയ്ക്കലില്‍നിന്നാണ് പൗരോഹിത്യം സ്വീകരിച്ചത്. സുരേഷ് അച്ചന്‍റെ പിതാവ് എമ്മച്ചന്‍ മികച്ച ഒരു ശില്പിയാണ്. നിരവധി പള്ളികളുടെ അള്‍ത്താരയും രൂപങ്ങളും അദ്ദേഹം നിർമിച്ചിട്ടുണ്ട്. ആന്‍ മരിയ, തോമസ് (സച്ചു), അല്‍ഫോന്‍സ (ഐറിന്‍ ) എന്നിവരാണ് സഹോദരങ്ങള്‍.

അപകടഭീഷണിയായ മരം വെട്ടി നീക്കണം

വെള്ളൂർ: ദേശീയപാതയോരത്ത് അപകടഭീഷണിയായ തേക്കുമരം വെട്ടി നീക്കണമെന്ന ആവശ്യം ശക്തമായി. തകിടിയേൽ എൽപി സ്‌കൂളിലെ മതിലിനോടു ചേർന്നാണു മരം നിൽക്കുന്നത്. ഇവിടെ ബസ് കാത്തിരിപ്പു കേന്ദ്രവുമുണ്ട്. മരംവെട്ടുന്നതുമായി ബന്ധപ്പെട്ട് കെഎസ്ഇബി അധികൃതർക്ക് പരാതി നൽകിയെങ്കിലും നടപടികളില്ല. തേക്കുമരം നിൽക്കുന്നതിന്‍റെ ഒരു ഭാഗത്ത് മണ്ണിടിയുന്നുണ്ട്. അതിനാൽ മഴക്കാലമായതോടെ മരത്തിന്‍റെ നിൽപ് അപകടത്തിനിടയാക്കുമെന്നു പ്രദേശവാസികൾ പറയുന്നു. 24 മണിക്കൂറും തിരക്കേറിയ റോഡരികിലാണ് ഈ ദുരിതം. കൂടാതെ മരത്തിന്‍റെ ശിഖരങ്ങൾ വൈദ്യുതി ലൈനിൽ തട്ടി നിൽക്കുന്നതും അപകടത്തിനിടയാക്കും. മരത്തിന്‍റെ നിൽപ് സ്‌കൂളിനും ഭീഷണിയാണ്.

മഴ... കൃത്യമായി അറിയാന്‍ ‘ഐ ഇന്‍ ദി സ്‌കൈ’

മഴപ്രവചനങ്ങള്‍ നല്‍കുന്നതിനായി എഐ അധിഷ്ഠിത പ്ലാറ്റ്‌ഫോം തയാറാക്കി ഐസിസിഎസ് കോട്ടയം: നിര്‍മിതി ബുദ്ധിയുടെ സഹായത്തോടെ രണ്ടു മണിക്കൂര്‍ മുമ്പേ പ്രാദേശിക വിശദാംശങ്ങള്‍ സഹിതം കൃത്യമായി മഴസാധ്യത അറിയാനാകുന്ന കാലാവസ്ഥാ പ്രവചനം വരുന്നു. കോട്ടയത്തെ കാലാവസ്ഥാ വ്യതിയാന പഠനങ്ങള്‍ക്കുള്ള ഇന്‍സ്റ്റിറ്റ്യൂട്ട് ഫോര്‍ ക്ലൈമറ്റ് ചേഞ്ച് സ്റ്റഡീസ് (ഐസിസിഎസ്) തത്സമയ മഴപ്രവചനങ്ങള്‍ നല്‍കുന്നതിനായി രൂപം കൊടുത്ത എഐ അധിഷ്ഠിത പ്ലാറ്റ്‌ഫോമായ ഐ ഇന്‍ ദി സ്‌കൈ ഐസിസിഎസ് നൗ കാസ്റ്റിംഗ് സിസ്റ്റം കാലാവസ്ഥ വെല്ലുവിളികളെ നേരിടാന്‍ തുണയേകും. മൊബൈല്‍ ആപ് വഴി ആളുകള്‍ക്ക് വിവരങ്ങള്‍ അറിയാന്‍ കഴിയുന്ന രീതിയിലാണിത് തയാറാക്കുന്നത്. മഴ കൃത്യമായി പ്രവചിക്കാനാകുന്ന ഈ സംവിധാനത്തിനു പെട്ടെന്നുള്ളതും തീവ്രവുമായ മഴയെ നേരിടുന്നതിനു ജനങ്ങളെ സജ്ജരാക്കാന്‍ കഴിയും. തീവ്രമഴ സംബന്ധിച്ചും മണ്ണിടിച്ചില്‍ സംബന്ധിച്ചും സമയബന്ധിതമായ മുന്നറിയിപ്പുകള്‍ നല്‍കാന്‍ ദുരന്ത നിവാരണ അഥോറിറ്റിക്കടക്കം ഏറെ പ്രയോജനം ചെയ്യും. ഇന്ന് തിരുവനന്തപുരത്ത് നടക്കുന്ന ശാസ്ത്ര സാങ്കേതിക പരിസ്ഥിതി കൗണ്‍സില്‍ (കെഎസ്‌സിഎസ്ടിഇ) ഗവേഷണ വികസന ഉച്ചകോടിയില്‍ ഐസിസിഎസ് പദ്ധതി അവതരിപ്പിക്കുന്നുണ്ട്. കോട്ടയത്തു കഞ്ഞിക്കുഴിയില്‍ പ്രവര്‍ത്തിക്കുന്ന ഐസിസിഎസ് കാലാവസ്ഥാമാറ്റങ്ങള്‍, കേരളത്തിന്‍റെ പരിസ്ഥിതി, നദീതടങ്ങള്‍, തീരദേശം തുടങ്ങിയ വിവിധ രംഗങ്ങളിലുണ്ടാക്കുന്ന മാറ്റങ്ങള്‍ എന്നിവ സംബന്ധിച്ച ഗവേഷണപ്രവര്‍ത്തനങ്ങളിലാണ് ശ്രദ്ധയൂന്നുന്നത്. കണ്ണൂര്‍ സര്‍വകലാശാലയുമായി സഹകരിച്ച് മിനി-പോര്‍ട്ടബിള്‍ വെതര്‍ സ്റ്റേഷന്‍റെ വികസനത്തിനും പദ്ധതിയുണ്ട്. ഇതു സംബന്ധിച്ച കരാറില്‍ ഐസിസിഎസ് ഉടന്‍ ഒപ്പുവയ്ക്കും. കാലാവസ്ഥാ നിരീക്ഷണത്തിലും പ്രവചനത്തിലും ദേശീയ, അന്തര്‍ദ്ദേശീയ സ്ഥാപനങ്ങളും സംഘടനകളും സര്‍വകലാശാലകളും ഉള്‍പ്പെടെയുള്ളവരുടെ ശാസ്ത്ര സാങ്കേതിക വിജ്ഞാനങ്ങള്‍ക്കൂടി പ്രയോജനപ്പെടുത്തി കൃത്യമായ പദ്ധതികളാവിഷ്‌കരിക്കുന്നതിനും ഐസിസിഎസിന് കഴിയുന്നുവെന്ന് ഡയറക്‌ടര്‍ ഡോ.കെ. രാജേന്ദ്രന്‍ പറഞ്ഞു. കാലാവസ്ഥാ ഗവേഷണത്തിനുള്ള മുന്‍നിരകേന്ദ്രമാക്കി ഐസിസിഎസിനെ മാറ്റുന്നതിനുള്ള ശ്രമങ്ങള്‍ക്ക് കിഫ്ബി വഴി സംസ്ഥാനസര്‍ക്കാര്‍ പിന്തുണ നല്‍കുന്നുണ്ട്. നിലവില്‍ കഞ്ഞിക്കുഴി ദീപ്തിനഗര്‍ റോഡില്‍ പ്രവര്‍ത്തിക്കുന്ന സ്ഥാപനം അടുത്തമാസം ഗാന്ധിനഗറിലേക്ക് മാറും.

കോട്ടയത്തിന്‍റെ സാംസ്‌കാരികനിലയം റൂബി ജൂബിലി നിറവില്‍

കോട്ടയം: അക്ഷരനഗരിയുടെ സാംസ്‌കാരികകേന്ദ്രമായ ദര്‍ശന നാല്‍പതാമാണ്ടിന്‍റെ പ്രഭയില്‍. കലാ, സംസ്‌കാരിക, വിദ്യാഭ്യാസ കേന്ദ്രമെന്ന നിലയില്‍ ദര്‍ശന കോട്ടയത്തിന്‍റെ അഭിമാനസ്തംഭമാണ്. സിഎംഐ സഭയുടെ നേതൃത്വത്തിലുള്ള സാംസ്‌കാരിക കേന്ദ്രത്തിന് അന്നത്തെ മുഖ്യമന്ത്രിയായിരുന്ന കെ. കരുണാകരനാണ് ഭദ്രദീപം കൊളുത്തിയത്. പ്രഥമ ഡയറക്ടര്‍ ഫാ. ജോസഫ് വലിയതാഴത്തിന്‍റെ ദീര്‍ഘവീക്ഷണവും അധ്വാനവും അര്‍പ്പണവുമായിരുന്നു ദര്‍ശനയുടെ വിജയത്തിന് അടിത്തറ. സാഹോദര്യവും സമഭാവനയും മതമൈത്രിയുമാണ് ദര്‍ശനയുടെ മുദ്ര. മുന്‍ രാഷ്‌ട്രപതി എ.പി.ജെ. അബ്ദുല്‍ കലാം തുടങ്ങി തകഴി, ബഷീര്‍, പ്രേം നസീര്‍, ഒഎന്‍വി കുറുപ്പ്, സി. അച്യുതമേനോന്‍, ഗുരു നിത്യചൈതന്യ യതി, സുകുമാര്‍ അഴീക്കോട്, എം.കെ. സാനു, കമലാ സുരയ്യ തുടങ്ങി ഒട്ടേറെപ്പേരുടെ സാന്നിധ്യം ഇവിടെയുണ്ടായി. സാഹിത്യ സാംസ്‌കാരിക നായകന്മാര്‍ പ്രഭാഷണങ്ങള്‍ നടത്തി. സംവാദങ്ങള്‍, ചലച്ചിത്ര മേളകള്‍, സംഗീതപരിപാടികള്‍, നാടകോത്സവങ്ങള്‍, പുസ്തകമേള തുടങ്ങി ഒട്ടേറെ കലാപ്രവര്‍ത്തനങ്ങളാണ് ദര്‍ശന നടത്തിയത്. ദര്‍ശന പുസ്തകമേള പുസ്തക പ്രദര്‍ശനം മാത്രമല്ല മറിച്ച് വായനയുടെ വളര്‍ച്ചയ്ക്കായുള്ള മഹായജ്ഞമായിരുന്നു. നാടക കലയെയും നാടക പ്രവര്‍ത്തകരെയും പ്രോത്സാഹിപ്പിക്കാന്‍ എല്ലാ വര്‍ഷവും സംഘടിപ്പിക്കുന്ന പ്രഫഷണല്‍ നാടകമത്സരം കലാസ്വാദകര്‍ക്ക് ഹൃദ്യമായ വിരുന്നാണ്. കുട്ടികള്‍ക്കായുള്ള കലാദര്‍ശനയില്‍ നൃത്ത സംഗീത വാദ്യ കലകളില്‍ പരിശീലനം നല്‍കുന്നു. ഫാ. എമില്‍ പുള്ളിക്കാട്ടില്‍ സിഎംഐയാണ് ദര്‍ശനയുടെ നിലവിലെ ഡയറക്ടര്‍. റൂബി ജൂബിലി സമ്മേളനം ഇന്ന് റൂബി ജൂബിലി സമ്മേളനം മാമ്മന്‍ മാപ്പിള ഹാളില്‍ ഇന്ന് ഉച്ചകഴിഞ്ഞ് 3.15ന് മഹാരാഷ്‌ട്ര ഗവര്‍ണര്‍ സി.പി. രാധാകൃഷ്ണന്‍ ഉദ്ഘാടനം ചെയ്യും. മന്ത്രി വി.എന്‍. വാസവന്‍ അധ്യക്ഷത വഹിക്കും. ചാവറ എക്സലന്‍സ് പുരസ്‌കാരങ്ങള്‍ ഗോവ മുന്‍ഗവര്‍ണര്‍ പി.എസ്. ശ്രീധരന്‍ പിള്ളയ്ക്കും ബിഷപ് മാര്‍ ജോസ് പുളിക്കലിനും സമ്മാനിക്കും. ഗവ. ചീഫ് വിപ്പ് ഡോ. എന്‍. ജയരാജ് എംഎല്‍എ, തിരുവഞ്ചൂര്‍ രാധാകൃഷ്ണന്‍ എംഎല്‍എ എന്നിവര്‍ മുഖ്യപ്രഭാഷണം നടത്തും. സിഎംഐ പ്രൊവിന്‍ഷല്‍ റവ.ഡോ. ഏബ്രഹാം വെട്ടിയാങ്കല്‍ അനുഗ്രഹപ്രഭാഷണം നടത്തും. ചാണ്ടി ഉമ്മന്‍ എംഎല്‍എ പ്രസംഗിക്കും. കാരിത്താസ് ഹോസ്പിററല്‍ ഡയറക്ടര്‍ റവ.ഡോ. ബിനു കുന്നത്ത്, പ്രസ് ക്ലബ് ജേണലിസം ഇന്‍സ്റ്റിറ്റ്യൂട്ട് ഡയറക്ടര്‍ തെക്കിന്‍കാട് ജോസഫ്, ബിസിഎം കോളജ് എന്നിവര്‍ക്ക് പ്രത്യേക ചാവറ അവാര്‍ഡുകള്‍ നല്‍കി ആദരിക്കും. ദര്‍ശന എല്ലാവരുടെയും സാംസ്‌കാരിക കേന്ദ്രം ദര്‍ശന സാംസ്‌കാരിക കേന്ദ്രം ഡയറക്ടര്‍ ഫാ. എമില്‍ പുള്ളിക്കാട്ടില്‍ ദീപികയോട്: ദര്‍ശനയുടെ പ്രസക്തി കാലഘട്ടത്തിനു യോജിച്ച വലിയൊരു പ്രസ്ഥാനമാണ് ദര്‍ശന. കലാ, സാംസ്‌കാരിക പ്രവര്‍ത്തനങ്ങളിലും വിദ്യഭ്യാസ പഠന പ്രവര്‍ത്തനങ്ങളിലും നാടിനു നല്‍കിയത് വലിയ സംഭവനകളാണ്. ഇത് എല്ലാവരുടെയും സാംസ്‌കാരിക കേന്ദ്രമാണ്, എല്ലാവര്‍ക്കും വേണ്ടിയുള്ള ദര്‍ശന ഭവനമാണ്. ദര്‍ശന ഉയര്‍ത്തുന്ന മാനം മാനവികതയാണ് ദര്‍ശനയുടെ അടിസ്ഥാനം. ദര്‍ശന പോലെയുള്ള സ്ഥാപനങ്ങള്‍ ഉയര്‍ത്തുന്ന മാനവികതയും മതേതരത്വവും സാംസ്‌കാരിക ഉന്നമനവുമാണ് കോട്ടയത്തിന്‍റെ മാനവികതയും സാംസ്‌കാരികതയും. പ്രധാന പരിപാടികള്‍ സാംസ്കാരിക, വിദ്യഭ്യാസ മേഖലകളിലാണ് ദര്‍ശനയുടെ പ്രവര്‍ത്തനം. നാടകോത്സവം, ഫിലിം ഫെസ്റ്റിവല്‍, കാര്‍ട്ടൂണ്‍ മത്സരം തുടങ്ങി വിവിധ പരിപാടികള്‍ക്കൊപ്പം കലാദര്‍ശനയിലൂടെ സംഗീതം, നൃത്തം, വാദ്യോപകരണം എന്നിവയില്‍ പരിശീലനം നല്‍കുന്നു. ഭാഷാനൈപുണ്യ പരിപാടികള്‍, വിദേശഭാഷാ പരിശീലനം, കംപ്യൂട്ടര്‍ പരിശീലനം എന്നിവയും നടത്തുന്നു. ജൂബിലിവര്‍ഷ പരിപാടി ജൂബിലിയോടനുബന്ധിച്ച് ഒരാഴ്ച നീണ്ടുനില്‍ക്കുന്ന സാംസ്‌കാരികോത്സവം നടത്തും. അന്യംനിന്നുപോകുന്ന കലകളും സാംസ്‌കാരികതയും തിരിച്ചു കൊണ്ടുവരാന്‍ ശ്രമിക്കും. കുട്ടികള്‍ക്കും മുതിര്‍ന്നവര്‍ക്കുമായി വിവിധ വിദ്യാഭ്യാസ പഠനപ്രവര്‍ത്തനങ്ങളും ആരംഭിക്കും.

നാലു സ്ത്രീകളുടെ തിരോധാനം: സെബാസ്റ്റ്യനെ വീണ്ടും കസ്റ്റഡിയില്‍ വിട്ടു

കോട്ടയം: അതിരമ്പുഴ സ്വദേശിനി ജെയ്‌നമ്മയുടേതുള്‍പ്പെടെ നാലു സ്ത്രീകളുടെ തിരോധാനക്കേസില്‍ ചേര്‍ത്തല പള്ളിപ്പുറം ചെങ്ങുംതറ സി.എം. സെബാസ്റ്റ്യ(67)നെ വീണ്ടും ക്രൈംബ്രാഞ്ചിന്‍റെ കസ്റ്റഡിയില്‍ വിട്ടു. ഓഗസ്റ്റ് 12 വരെയാണ് ഏറ്റുമാനൂര്‍ മജിസ്ട്രറ്റ് കോടതി കസ്റ്റഡി അനുവദിച്ചത്. അന്വേഷണ ഉദ്യോഗസ്ഥര്‍ ഉപദ്രവിച്ചില്ലെന്നും അഭിഭാഷകനില്ലാത്തതിനാല്‍ തനിക്ക് നിയമസഹായം വേണമെന്നും സെബാസ്റ്റ്യന്‍ കോടതിയില്‍ പറഞ്ഞു. പള്ളിപ്പുറത്തെ വീട്ടില്‍ കണ്ടെത്തിയ അസ്ഥികളുടെ ഡിഎന്‍എ ഫലം ഇന്നോ നാളെയോ അറിയാനാകും. ജെയ്‌നമ്മ കൊല്ലപ്പെട്ടതായി സ്ഥിരീകരിച്ചിട്ടുണ്ട്. എന്നാല്‍ സെബാസ്റ്റ്യന്‍റെ വലയിലായശേഷം കാണാതായ ചേര്‍ത്തല സ്വദേശികളായ ബിന്ദു, ഐഷ, സിന്ധു എന്നിവരെക്കുറിച്ച് ഇപ്പോഴും വിവരമില്ല. ഇവരെയെല്ലാം സെബാസ്റ്റ്യന്‍ കൊലപ്പെടുത്തിയെന്നാണ് അന്വേഷണസംഘത്തിന്‍റെ നിഗമനം. ഏഴു ദിവസം കോട്ടയം ക്രൈം ബ്രാഞ്ച് തുടരെ ചോദ്യം ചെയ്തിട്ടും സെബാസ്റ്റ്യന്‍ വ്യക്തമായ മറുപടി നല്‍കുന്നില്ല. സെബാസ്റ്റ്യന്‍റെ ഭാര്യ സുബി, ചേര്‍ത്തലയിലെ സുഹൃത്തായ റോസമ്മ എന്നിവരെ വീണ്ടും ചോദ്യംചെയ്യാനാണ് ക്രൈംബ്രാഞ്ച് നീക്കം. ഗ്രൗണ്ട് പെനട്രേറ്റിംഗ് റഡാര്‍ ഉപയോഗിച്ച് ഇന്നലെ പ്രതി സെബാസ്റ്റ്യന്‍റെ പള്ളിപ്പുറത്തെ വീട്ടുവളപ്പിലും സുഹൃത്ത് റോസമ്മ, കാണാതായ ബിന്ദു പത്മനാഭന്‍ എന്നിവരുടെ വീടുകളിലും പരിശോധന നടത്തിയിരുന്നു. ജെയ്‌നമ്മയുടെ തിരോധാനക്കേസ് അന്വേഷിക്കുന്നത് കോട്ടയം ക്രൈം ബ്രാഞ്ച് ആണ്. ചേര്‍ത്തല സ്വദേശികളായ ബിന്ദു പത്മനാഭന്‍, സിന്ധു, ഐഷ എന്നിവരുടെ തിരോധാനം അന്വേഷിക്കുന്നത് ആലപ്പുഴ ക്രൈം ബ്രാഞ്ചുമാണ്.

രങ്കനാഥനെ നെഞ്ചോടു ചേർത്തു കേരളം

ഈരാറ്റുപേട്ട: തമിഴില്‍ ബിരുദാനന്തര ബിരുദവും എംഎഡുമുള്ള തമിഴ്‌നാട് സ്വദേശി എം. രങ്കനാഥന്‍ അവിടെ ജോലി കിട്ടാതെ ഈരാറ്റുപേട്ട ഗവ. എച്ച്എസ്എസ് പരിസരം വൃത്തിയാക്കുന്ന ജോലി തുടങ്ങിയത് വാർത്തയായതോടെ രങ്കനാഥനെ തേടി അന്വേഷണങ്ങൾ. കഴിഞ്ഞ ദിവസം ജോലിക്കിടയില്‍ ഹെഡ്മിസ്ട്രസ് ഷീലാ സലിമിനോട് രങ്കനാഥന്‍ ജീവിത കഥ പറഞ്ഞപ്പോള്‍ ടീച്ചര്‍ക്കും വിസ്മയം. എംഎ, എംഡ് ബിദുരമുണ്ടെന്നും അധ്യാപകനാകാന്‍ ആഗ്രഹമുണ്ടെന്നും രങ്കനാഥന്‍ പറഞ്ഞു. ഇത്രത്തോളം വിദ്യാഭ്യാസമുള്ള കൂലിപ്പണിക്കാരന്‍റെ ജീവിതാധ്വാനം കുട്ടികള്‍ക്കു മുമ്പില്‍ പങ്കുവയ്ക്കാന്‍ ടീച്ചര്‍ രങ്കനാഥന് അവസരം കൊടുക്കുകയായിരുന്നു. ഇതു വാർത്തയായതോടെയാണ് ആളുകൾ രങ്കനാഥനെ അന്വേഷിച്ചുതുടങ്ങിയത്. സ്കൂളിലെ പുറംജോലി തേനി സ്വദേശിയായ രങ്കനാഥന്‍ ഉത്തമപാളയം കോംബൈ ആര്‍സി സ്‌കൂളിലാണു പഠിച്ചത്. പ്ലസ് ടുവിനു ശേഷം മധുര അമേരിക്കന്‍ കോളജില്‍നിന്നു തമിഴ് സാഹിത്യത്തില്‍ ഡിഗ്രിയും കാമരാജ് യൂണിവേഴ്‌സിറ്റിയില്‍നിന്നു കറസ്‌പോണ്ടന്‍സായി പിജിയും മാര്‍ത്താണ്ഡം സെന്‍റ് ജോസഫ്‌സ് ടീച്ചര്‍ എഡ്യുക്കേഷന്‍ കോളജില്‍നിന്നു ബിഎഡും ട്രിച്ചി ജീവന്‍ കോളജ് ഓഫ് എഡ്യുക്കേഷനില്‍നിന്ന് എംഎഡും നേടി. തുടര്‍ന്ന് കോംബൈ എസ്‌കെപി സ്‌കൂളില്‍ ഒരു വര്‍ഷം താത്കാലിക അധ്യാപക ജോലി നോക്കി. ആറായിരം രൂപയായിരുന്നു ശമ്പളം. അതും കൃത്യമായി കിട്ടിയിരുന്നില്ല. ഇതോടെ രങ്കനാഥന്‍ പെരുമ്പാവൂരിലെത്തി പല പണികള്‍ ചെയ്യുന്നതിനിടെ കൂടുതല്‍ കൂലി പ്രതീക്ഷിച്ചാണ് ഈരാറ്റുപേട്ടയിലെത്തിയത്. ഇപ്പോള്‍ ദിവസം 1,100 രൂപ കിട്ടുന്നു. തമിഴ്‌നാട്ടില്‍ 500-600 രൂപ മാത്രമാണ് കൂലി. ഈരാറ്റുപേട്ട സ്‌കൂളിലെ എല്ലാ പുറം ജോലികളും ഭംഗിയായി ചെയ്യുന്നു. പ്രധാനാധ്യാപികയുടെ നിര്‍ദേശത്തെത്തുടര്‍ന്ന് കുട്ടികള്‍ക്കു മുന്നില്‍ രങ്കനാഥന്‍ തന്‍റെ ജീവിതം കൂട്ടിച്ചേര്‍ത്താണ് സംസാരിച്ചത്. പഠിച്ചാല്‍ ആരും തഴയപ്പെടില്ല. ഇവിടെ കൂലിപ്പണിക്കാരനായിട്ടാണ് വന്നതെങ്കിലും നിങ്ങളോടു സംസാരിക്കാന്‍ അവസരം കിട്ടിയത് പഠിച്ചവനായതിനാലാണ്. വലിയ പ്രതീക്ഷയിലാണ് താന്‍ ജീവിക്കുന്നത് ഇവിടെ പണിയെടുത്ത് കിട്ടുന്ന തുക കൊണ്ട് എൽഎൽബി പഠിക്കണമെന്നാണ് ആഗ്രഹമെന്നും രങ്കനാഥന്‍ പറഞ്ഞു. സിനിമാമോഹം തമിഴ്നാട്ടില്‍ ഉയര്‍ന്ന ജോലി കിട്ടിയില്ലെങ്കിലും തമിഴ് ഭാഷയെയും സംസ്ഥാനത്തെയും തള്ളിപ്പറയാൻ രങ്കനാഥനില്ല. സമയം കിട്ടുമ്പോഴൊക്കെ തമിഴ് പാട്ടുകള്‍ എഴുതി ട്യൂണ്‍ ചെയ്യും. തമിഴില്‍ പ്രസംഗിക്കും. തമിഴ് താരങ്ങളുടെ ശബ്ദം അനുകരിക്കും. പാട്ടുപാടും ഡാന്‍സ് കളിക്കും. പരമ്പരാഗത തമിഴ് ആയോധന കലയായ സിലമ്പവും വശമുണ്ട്. സിനിമാ തിരക്കഥ എഴുതണമെന്ന അഗ്രഹവും രങ്കനാഥനുണ്ട്. കൈയില്‍ നല്ല കഥകളുണ്ട്. മെഡിക്കല്‍ ലാബ് ടെക്‌നീഷനായ സെല്‍വിയാണ് ഭാര്യ. മകന്‍ എല്‍കെജി വിദ്യാര്‍ഥി ദേശിഹന്‍.

സിപിഐ ജില്ലാ സമ്മേളനം; ചുവപ്പുസേനാ പരേഡും പൊതുസമ്മേളനവും ഇന്ന്

വൈക്കം: ജില്ലാ സമ്മേളനത്തില്‍ സെക്രട്ടറി സ്ഥാനമൊഴിയാന്‍ വി.ബി. ബിനു. ഇന്നു മുതല്‍ വൈക്കത്ത് നടക്കുന്ന സിപിഐ ജില്ലാ സമ്മേളനം പുതിയ ജില്ലാ സെക്രട്ടറിയെ തെരഞ്ഞെടുക്കും. നിലവിലെ സെക്രട്ടറി വി.ബി. ബിനു ഒരു ടേം കൂടി സെക്രട്ടറിയാകാന്‍ താത്പര്യമില്ലെന്നു കാണിച്ച് സംസ്ഥാന നേതൃത്വത്തിനു നേരത്തേ കത്തു നല്‍കിയിരുന്നു. കത്ത് സംസ്ഥാന നേതൃത്വം അംഗീകരിച്ചു. കഴിഞ്ഞ സമ്മേളനത്തില്‍ വി.ബി. ബിനുവിനോടു സെക്രട്ടറി സ്ഥാനത്തേക്ക് മത്സരിച്ചു തോറ്റ എഐടിയുസി ജില്ലാ സെക്രട്ടറി കൂടിയായ വി.കെ. സന്തോഷ്‌കുമാറിനെയാണ് സംസ്ഥാന നേതൃത്വം പരിഗണിക്കുന്നത്. എന്നാല്‍ നിലവിലെ ജില്ലാ അസി. സെക്രട്ടറി ജോണ്‍ വി. ജോസഫിനെ സെക്രട്ടറിയാക്കണമെന്ന നിര്‍ദേശവും ജില്ലാ നേതൃത്വത്തില്‍ ഒരു വിഭാഗത്തിനുണ്ട്. മത്സരം ഒഴിവാക്കി സമവായത്തില്‍ സെക്രട്ടറിയെ തെരഞ്ഞെടുക്കാനുള്ള നീക്കത്തിലാണ് സംസ്ഥാന നേതൃത്വം. സംസ്ഥാന സെക്രട്ടറി ബിനോയി വിശ്വം, ദേശീയ എക്‌സിക്യൂട്ടീവംഗം പി. സന്തോഷ്‌കുമാര്‍, മന്ത്രി കെ. രാജന്‍, മന്ത്രി പി. പ്രസാദ് എന്നിവര്‍ സമ്മേളനത്തില്‍ മുഴുവന്‍ സമയവും പങ്കെടുക്കുന്നുണ്ട്. സമ്മേളനത്തിനു തുടക്കം കുറിച്ച് ഉച്ചകഴിഞ്ഞ് മൂന്നിന് വൈക്കം വലിയകവലയില്‍നിന്നു ബോട്ട് ജെട്ടി മൈതാനിയിലേക്ക് റെഡ് വോളണ്ടിയര്‍ പരേഡ് ആരംഭിക്കും. ജില്ലയുടെ വിവിധ ഭാഗങ്ങളില്‍നിന്നുള്ള പതാക, ബാനര്‍, കൊടിമര ജാഥകളും മാര്‍ച്ചിനൊപ്പം ബോട്ടുജെട്ടി മൈതാനിയില്‍ സംഗമിക്കും. തുടര്‍ന്ന് 5.15ന് സ്വാഗതസംഘം ചെയര്‍മാന്‍ ജോണ്‍ വി. ജോസഫ് പതാക ഉയര്‍ത്തും. തുടര്‍ന്നു ചേരുന്ന പൊതുസമ്മേളനം സിപിഐ സംസ്ഥാന സെക്രട്ടറി ബിനോയി വിശ്വം ഉദ്ഘാടനം ചെയ്യും. മന്ത്രി കെ. രാജന്‍ മുഖ്യപ്രഭാഷണം നടത്തും. പി. വസന്തം, ആര്‍. രാജേന്ദ്രന്‍, കെ.കെ. അഷറഫ് എന്നിവര്‍ പ്രസംഗിക്കും. നാളെ രാവിലെ 10ന് എന്‍എസ്എസ് ഓഡിറ്റോറിയത്തില്‍ ചേരുന്ന പ്രതിനിധി സമ്മേളനം ദേശീയ എക്‌സിക്യൂട്ടീവംഗം പി. സന്തോഷ്‌കുമാര്‍ എംപി ഉദ്ഘാടനം ചെയ്യും. മറ്റന്നാള്‍ പുതിയ സെക്രട്ടറിയേയും ജില്ലാ കൗണ്‍സിലിനെയും തെരഞ്ഞെടുക്കും.

മുണ്ടാങ്കലിൽ വാഹനാപകടത്തില്‍ മരിച്ച യുവതികള്‍ക്ക് അന്ത്യാഞ്ജലി

പാലാ: പാലാ-തൊടുപുഴ ഹൈവേയില്‍ മുണ്ടാങ്കലില്‍ കഴിഞ്ഞ ദിവസമുണ്ടായ വാഹനാപകടത്തില്‍ മരിച്ച യുവതികള്‍ക്ക് നാട് കണ്ണീരോടെ വിട നല്‍കി. മരിച്ച ജോമോളുടെ ഏകമകള്‍ പാലാ സെന്‍റ് മേരീസ് സ്കൂള്‍ ആറാം ക്ലാസ് വിദ്യാര്‍ഥിനി അന്നമോള്‍ പരിക്കേറ്റ് ഗുരുതരാവസ്ഥയില്‍ മെഡിസിറ്റിയില്‍ ചികിത്സയിലായതിനാല്‍ അമ്മയ്ക്ക് അവസാന മുത്തം നല്‍കാന്‍ സാധിച്ചില്ല. ബന്ധുക്കളുടെ വിലാപം ഏവരുടെയും കണ്ണുകളെ ഈറനണിയിച്ചു. വേഗതയിലെത്തിയ കാര്‍ നിയന്ത്രണംവിട്ട് സ്‌കൂട്ടറുകളില്‍ ഇടിച്ചുണ്ടായ അപകടത്തിലാണ് യുവതികളുടെ ജീവന്‍ പൊലിഞ്ഞത്. മരിച്ച മേലുകാവുമറ്റം നെല്ലംകുഴിയില്‍ എന്‍.കെ. സന്തോഷിന്‍റെ ഭാര്യ ധന്യയുടെ സംസ്‌കാരം ബുധനാഴ്ച നടത്തിയിരുന്നു. അല്ലപ്പാറ പാലക്കുഴക്കുന്നേല്‍ സുനിലിന്‍റെ ഭാര്യ ജോമോള്‍ സുനിലിന്‍റെ (35) സംസ്‌കാരം ഇന്നലെയാണ് നടത്തിയത്. ജോമോളുടെ മൃതദേഹം ഇന്നലെ രാവിലെ 9.30 മുതല്‍ പ്രവിത്താനം പള്ളി പാരീഷ് ഹാളില്‍ പൊതുദര്‍ശനത്തിന് എത്തിച്ചിരുന്നു. ഭവനത്തിലും പാരീഷ് ഹാളിലും പള്ളിയിലും നാടിന്‍റെ നാനാഭാഗങ്ങളില്‍ നിന്നും നിരവധി ആളുകളാണ് അന്തിമോപചാരം അര്‍പ്പിക്കാന്‍ എത്തിയത്. അന്നമോള്‍ പഠിക്കുന്ന പാലാ സെന്‍റ് മേരീസ് സ്‌കൂളിലെ കുട്ടികളും സഹപാഠികളും അധ്യാപകരും അന്നമോളുടെ മാതാവിന് അന്തിമോപചാരം അര്‍പ്പിക്കാന്‍ എത്തിയിരുന്നു. അന്നമോള്‍ ആരോഗ്യത്തോടെ തിരിച്ചുവരണമേ... പ്രാര്‍ഥനയോടെ സഹപാഠികളും ഉറ്റവരും പാലാ: മുണ്ടാങ്കലിലുണ്ടായ അപകടത്തില്‍ പരിക്കേറ്റ് മാര്‍ സ്ലീവാ മെഡിസിറ്റിയില്‍ ചികിത്സയില്‍ കഴിയുന്ന അന്നമോള്‍ മരുന്നുകളോട് പ്രതികരിക്കുന്നുണ്ടെന്നാണ് ഡോക്ടര്‍മാര്‍ അറിയിച്ചത്. അന്നമോള്‍ പൂര്‍ണ ആരോഗ്യം വീണ്ടെടുക്കുന്നതിന് അവളുടെ വിദ്യാലയമായ പാലാ സെന്‍റ് മേരീസ് സ്‌കൂളില്‍ കുട്ടികളുടെ നേതൃത്വത്തില്‍ പ്രത്യേക പ്രാര്‍ഥനകള്‍ നടക്കുന്നുണ്ട്. സ്‌കൂള്‍ ചാപ്പലില്‍ സഹപാഠികളും അധ്യാപകരും ഇടതടവില്ലാതെ മുട്ടിപ്പായി പ്രാര്‍ഥിക്കുന്നു. സ്‌കൂളിലെ മിടുക്കിയായ കുട്ടിയാണ് അന്നമോളെന്ന് അധ്യാപകര്‍ പറഞ്ഞു. ജാമ്യം നിഷേധിച്ച് കോടതി കോട്ടയം: പാലാ മുണ്ടാങ്കല്‍ ഭാഗത്ത് ഉണ്ടായ വാഹനാപകടത്തില്‍ രണ്ട് സ്ത്രീകള്‍ മരണപ്പെടുകയും ആറാം ക്ലാസ് വിദ്യാര്‍ഥിനിക്ക് ഗുരുതരമായ പരിക്കേല്‍ക്കുകയും ചെയ്ത അപകടത്തിൽ വാഹനം ഓടിച്ചിരുന്ന നെടുങ്കണ്ടം ചെറുവിള വീട്ടില്‍ ചന്ദൂസ് (24) പാലാ ജുഡീഷല്‍ ഒന്നാം ക്ലാസ് മജിസ്‌ട്രേട്ട് കോടതിയില്‍ സമര്‍പ്പിച്ച ജാമ്യാപേക്ഷ തള്ളി.

കടപ്ലാമറ്റത്ത് ഒരു കോടിയുടെ സ്റ്റേഡിയം വരുന്നു

കടപ്ലാമറ്റം: പഞ്ചായത്ത് ആസ്ഥാനത്ത് സ്റ്റേഡിയം ആധുനിക സൗകര്യങ്ങളുള്ള സ്റ്റേഡിയം വരുന്നു. കായിക രംഗത്ത് വലിയ മുന്നേറ്റത്തിനു സാധ്യതകൾ തുറന്നുകൊണ്ടാണ് സ്റ്റേഡിയം ഉയരുന്നത്. ഒരു കോടി രൂപ ചെലവിട്ടാണ് സ്റ്റേഡിയം സജ്ജമാക്കുന്നത്. കടപ്ലാമറ്റം ജംഗ്ഷനോടു ചേർന്നു കാഞ്ഞിരപ്പാറ ഭാഗത്ത് പഞ്ചായത്ത് വിട്ടുനൽകിയ ഒരേക്കർ സ്ഥലത്താണ് സ്റ്റേഡിയം. യുവജന കായികക്ഷമത കൂട്ടാൻ സംസ്ഥാന കായികവകുപ്പ് ആവിഷ്‌കരിച്ച പദ്ധതിയുമായി ചേർത്ത് എംഎൽഎ ഫണ്ട് കൂടി നൽകിയാണ് സ്റ്റേഡിയം യാഥാർഥ്യമാക്കുന്നതെന്ന് മോൻസ് ജോസഫ് എംഎൽഎ അറിയിച്ചു. കായിക വകുപ്പ് കടുത്തുരുത്തി നിയോജകമണ്ഡലത്തിൽ അനുവദിച്ച ഗ്രാമീണ കളിക്കളം നിർമാണ പദ്ധതിയിലാണ് സ്റ്റേഡിയം നിർമാണം. കായികക്ഷേമ വകുപ്പ് അനുവദിച്ച 50 ലക്ഷം രൂപയും എംഎൽഎയുടെ പ്രാദേശിക വികസന ഫണ്ടിൽനിന്ന് അനുവദിച്ച 50 ലക്ഷം രൂപയും ഉൾപ്പെടുത്തിയതാണ് ഫണ്ട്. സമീപ പഞ്ചായത്തുകൾക്കും കടപ്ലാമറ്റത്ത് സ്റ്റേഡിയം നിർമിക്കുന്നതിലൂടെ സമീപ പഞ്ചായത്തുകളായ മരങ്ങാട്ടുപള്ളി, കിടങ്ങൂർ, കുറവിലങ്ങാട് പ്രദേശങ്ങളിൽനിന്നുള്ള യുവതലമുറയ്ക്കും സഹായകമാകും. പൊതുജനങ്ങൾക്കു സുരക്ഷിതമായി വ്യായാമം ചെയ്യാനും സ്റ്റേഡിയം ഉപയോഗിക്കാം. നിർമാണോദ്ഘാടനം 14ന് രണ്ടിനു നടക്കും. മോൻസ് ജോസഫ് എംഎൽഎ അധ്യക്ഷനാകുന്ന സമ്മേളനത്തിൽ കായികമന്ത്രി മന്ത്രി വി. അബ്ദുറഹ്‌മാൻ ഉദ്ഘാടനം നിർവഹിക്കും. ജനപ്രതിനിധികൾ പങ്കെടുക്കും. ഇതുമായി ബന്ധപ്പെട്ട കാര്യങ്ങൾ ചർച്ചചെയ്യാൻ ജനപ്രതിനിധികളും ഉദ്യോഗസ്ഥരും പങ്കെടുക്കുന്ന വികസന യോഗം11ന് ഉച്ചകഴിഞ്ഞ് മൂന്നിന് കടപ്ലാമറ്റം പഞ്ചായത്തിൽ ചേരുമെന്ന് എംഎൽഎ അറിയിച്ചു.

ഫാ. സുരേഷ് പട്ടേട്ട് സൗമ്യതയുടെ സേവന മുഖം

വെള്ളികുളം/കടുവാക്കുളം: സൗമ്യതയുടെ സേവന മുഖമായിരുന്നു എംസിബിഎസ് സന്യാസ സമൂഹാംഗമായ ഫാ. സുരേഷ് പട്ടേട്ട്. മുപ്പത്തിമൂന്നാം വയസിലെ അദ്ദേഹത്തിന്‍റെ അപ്രതീക്ഷിത വിയോഗം പ്രിയപ്പെട്ടവരെ കണ്ണീരിലാഴ്ത്തി. എല്ലാവരോടും എപ്പോഴും പ്രസന്നഭാവത്തിൽ ഇടപെടുകയും സൗഹാർദം സൂക്ഷിക്കുകയും ചെയ്യുന്ന അദ്ദേഹം അരുണാചൽ പ്രദേശിൽ പാവങ്ങളുടെ ഇടയിൽ സേവനം ചെയ്തുവരവേയാണ് രോഗത്തിന്‍റെ പിടിയിലായത്. പാലാ വെള്ളികുളം ഇടവകാംഗമായ ഈ യുവമിഷനറി 2021 മുതൽ അരുണാചൽ പ്രദേശിൽ സേവനം ചെയ്തുവരികയായിരുന്നു. അവധി കഴിഞ്ഞ് അദ്ദേഹം അരുണാചലിലേക്ക് മടങ്ങിപ്പോയിട്ട് ഏതാനും ആഴ്ചകളേ ആയിയിരുന്നുള്ളൂ. ഇതിനിടയിൽ ഇദ്ദേഹമടക്കമുള്ള വൈദികർക്ക് ടൈഫോയ്ഡ് പിടിപെടുകയായിരുന്നു. മികച്ച ചികിത്സയ്ക്കായി ഇദ്ദേഹത്തെ ഒരാഴ്ച മുന്പ് ഗോഹട്ടിയിലെ നെംകെയർ സൂപ്പർ സ്പെഷാലിറ്റി ആശുപത്രിയിലും പിന്നീട് ഡൽഹി അപ്പോളോ ആശുപത്രിയിലും പ്രവേശിപ്പിച്ചെങ്കിലും രോഗം വഷളായി ലോകത്തോടു വിടപറഞ്ഞു. ഇദ്ദേഹത്തിന്‍റെ വിയോഗം ജന്മനാടായ വെള്ളികുളത്തും അദ്ദേഹം ശുശ്രൂഷ ചെയ്ത കടുവാക്കുളത്തും ഏറെപ്പേരെ നൊന്പരത്തിലാഴ്ത്തി. പാവപ്പെട്ട കുട്ടികൾക്ക് പഠിക്കാൻ അദ്ദേഹം സഹായം എത്തിച്ചു നൽകിയിരുന്നതായി അടുപ്പമുള്ളവർ പറയുന്നു. വെള്ളികുളം പട്ടേട്ട് എമ്മച്ചന്‍ എന്നു സെബാസ്റ്റ്യന്‍റെയും മേരിക്കുട്ടിയുടെയും നാലു മക്കളില്‍ രണ്ടാമത്തെ മകനാണ് സുരേഷ് അച്ചന്‍. സ്കൂൾ പഠനത്തിനു ശേഷം എംസിബിഎസ് സഭയിൽ ചേർന്നു. 2020 ജനുവരി ഒന്നിന് വെള്ളികുളം പള്ളിയില്‍ സീറോ മലബാര്‍ സഭ കൂരിയ ബിഷപ് മാര്‍ സെബാസ്റ്റ്യന്‍ വാണിയപ്പുരയ്ക്കലില്‍നിന്നാണ് പൗരോഹിത്യം സ്വീകരിച്ചത്. സുരേഷ് അച്ചന്‍റെ പിതാവ് എമ്മച്ചന്‍ മികച്ച ഒരു ശില്പിയാണ്. നിരവധി പള്ളികളുടെ അള്‍ത്താരയും രൂപങ്ങളും അദ്ദേഹം നിർമിച്ചിട്ടുണ്ട്. ആന്‍ മരിയ, തോമസ് (സച്ചു), അല്‍ഫോന്‍സ (ഐറിന്‍ ) എന്നിവരാണ് സഹോദരങ്ങള്‍. അച്ചന്‍റെ ആകസ്മിക വിയോഗത്തില്‍ വെള്ളികുളം പള്ളി വികാരി ഫാ.സ്‌കറിയ വേകത്താനവും ഇടവകയിലെ ഭക്തസംഘടനകളും അനുശോചനം രേഖപ്പെടുത്തി.

"കുട്ടികളും കൃഷിയിലേക്ക്' അധ്യാപക സമ്മേളനം ഇന്ന്

പാലാ: ഇളംതലമുറയില്‍ കാര്‍ഷിക അവബോധം സൃഷ്ടിക്കാനും കൃഷിയിലേക്ക് ആകര്‍ഷിക്കാനും ലക്ഷ്യമിട്ട് പാലാ രൂപതയുടെ കോര്‍പറേറ്റ് എഡ്യുക്കേഷന്‍ ഏജന്‍സിയുടെ നേതൃത്വത്തില്‍ പാലാ സോഷ്യല്‍ വെല്‍ഫെയര്‍ സൊസൈറ്റിയുടെ സഹകരണത്തോടെ നടപ്പിലാക്കുന്ന "കുട്ടികളും കൃഷിയിലേക്ക്' എന്ന പദ്ധതിയുടെ ഭാഗമായുള്ള അധ്യാപക സംഗമം ഇന്നു രണ്ടിന് നടത്തപ്പെടും. ബിഷപ് ഹൗസ് ഹാളില്‍ ചേരുന്ന സമ്മേളനം ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്യും. വികാരി ജനറാള്‍ മോണ്‍. സെബാസ്റ്റ്യന്‍ വേത്താനത്ത് അധ്യക്ഷത വഹിക്കും. പാലാ സോഷ്യല്‍ വെല്‍ഫെയര്‍ സൊസൈറ്റി ഡയറക്ടര്‍ ഫാ. തോമസ് കിഴക്കേല്‍, പാലാ രൂപത കോര്‍പറേറ്റീവ് എഡ്യുക്കേഷന്‍ ഏജന്‍സി സെക്രട്ടറി ഫാ. ജോര്‍ജ് പുല്ലുകാലായില്‍, പിഎസ്ഡബ്ല്യുഎസ് അസിസ്റ്റന്‍റ് ഡയറക്ടര്‍മാരായ ഫാ. ജോസഫ് താഴത്തുവരിക്കയില്‍, ഫാ. ഫ്രാന്‍സിസ് ഇടത്തിനാല്‍, പാലാ സാന്തോം എഫ്പിസി ചെയര്‍മാന്‍ സിബി മാത്യു കണിയാമ്പടി, കൃഷി അസിസ്റ്റന്‍റ് ഡയറക്ടര്‍ ബിനി ഫിലിപ്പ് എന്നിവര്‍ പ്രസംഗിക്കും. രൂപതയിലെ നൂറില്‍പരം സ്‌കൂളുകളില്‍നിന്നും ചില്‍ഡ്രന്‍സ് ഫാര്‍മേഴ്‌സ് ക്ലബ്ബിന്‍റെ ചുമതലയുള്ള അധ്യാപകര്‍ സമ്മേളനത്തില്‍ സംബന്ധിക്കും. സ്‌കൂളുകളില്‍ പച്ചക്കറിക്കൃഷി തുടങ്ങുന്നതിനാവശ്യമായുള്ള സൗജന്യ പച്ചക്കറിത്തൈകളുടെ വിതരണോദ്ഘാടനവും ബിഷപ് നിര്‍വഹിക്കും. സമ്മേളനത്തില്‍ പങ്കെടുക്കുന്ന അധ്യാപകരുടെ രജിസ്‌ട്രേഷന്‍ 1.30ന് ആരംഭിക്കും.

പ്രൊ-മെന്‍റർ പ്രോജക്ടുമായി പുഞ്ഞാർ സെന്‍റ് ആന്‍റണീസിലെ കുട്ടിപ്പോലീസ്

പൂഞ്ഞാർ: സിഎംഐ ഇയർ ഓഫ് എഡ്യുക്കേഷന്‍റെ ഭാഗമായി പൂഞ്ഞാർ സെന്‍റ് ആന്‍റണീസ് ഹയർ സെക്കൻഡറി സ്കൂളിലെ എസ്പിസി യൂണിറ്റ്, പ്രൊ-മെന്‍റർ, നോളഡ്ജ് ക്വസ്റ്റ് പ്രോഗ്രാം എന്നീ പ്രോജക്ടുകൾ ആരംഭിക്കും. പ്രൊ-മെന്‍റർ പ്രോജക്ടിലൂടെ വിദ്യാർഥികൾക്കും പൊതുജനങ്ങൾക്കും കരിയർ രംഗത്തെ വിദഗ്ധരുമായി നേരിട്ട് സംവദിക്കുന്നതിനുള്ള അവസരമാണ് ഒരുക്കുന്നത്. വിവിധ തൊഴിൽ രംഗങ്ങളിൽ വ്യക്തിമുദ്ര പതിപ്പിച്ചവർ ആ രംഗത്തെ സാധ്യതകളും വെല്ലുവിളികളും അതിനായി പഠിക്കേണ്ട കോഴ്സുകളും അനുഭവങ്ങളുടെ വെളിച്ചത്തിൽ പങ്കുവയ്ക്കും. പൂഞ്ഞാർ സെന്‍റ് ആന്‍റണീസ് ഹയർ സെക്കൻഡറി സ്കൂളിലെ ചാവറ ഹാളിൽ ശനിയാഴ്ചകളിലും പൊതു അവധി ദിവസങ്ങളിലുമായി നടത്തുന്ന അർധദിന സെഷനുകളിൽ വിദ്യാർഥികൾക്കും രക്ഷിതാക്കൾക്കും പൊതുജനങ്ങൾക്കും സൗജന്യമായി പങ്കെടുക്കാം. താത്പര്യമുള്ളവർ 9895871371 എന്ന വാട്സാപ്പ് നമ്പറിൽ രജിസ്റ്റർ ചെയ്യണം. പ്രോഗ്രാമുകൾ നടക്കുന്ന ദിവസവും സമയവും മുൻകൂട്ടി അറിയിക്കും. പ്രൊ-മെന്‍റർ പ്രോജക്‌ട് പ്രഖ്യാപനം സ്കൂൾ മാനേജർ ഫാ. സിബി മഞ്ഞക്കുന്നേൽ സിഎംഐ നിർവഹിച്ചു. കുട്ടികളിൽ പൊതുവിജ്ഞാനം വളർത്തുന്നതിനുള്ള എസ്പിസി പ്രോജക്ടായ നോളഡ്ജ് ക്വസ്റ്റ് പ്രോഗ്രാം വാർഡ് മെംബർ അനിൽകുമാർ മഞ്ഞപ്ലാക്കൽ ഉദ്ഘാടനം ചെയ്തു. ഈരാറ്റുപേട്ട എഎസ്ഐ കെ.എസ്. ഗീത, സ്കൂൾ പ്രിൻസിപ്പൽ വിൽസൺ ജോസഫ്, ഹെഡ്മിസ്ട്രസ് സിസ്റ്റർ സൂസി മൈക്കിൾ, പിടിഎ പ്രസിഡന്‍റ് എബി പൂണ്ടിക്കുളം, എസ്പിസി ഓഫീസർമാരായ ടോണി തോമസ് പുതിയാപറമ്പിൽ, മരീന ഏബ്രഹാം, ഡ്രിൽ ഇൻസ്ട്രക്‌ടർ കെ.ബി. സനീഷ്, കേഡറ്റ് പ്രതിനിധികളായ ആൻസൻ സോമി, മെറിൻ ജോജി, അനുഷ്ക റെജി എന്നിവർ പ്രസംഗിച്ചു.

കാൽ നൂറ്റാണ്ടിന്‍റെ ഓർമകൾ ചേർത്ത് സ്‌നേഹക്കൂടൊരുക്കാൻ ഈ ബികോം ബാച്ച്

കുറവിലങ്ങാട്: കൗമാരത്തിന്‍റെ ആവേശം ജ്വലിപ്പിച്ച കലാലയ ജീവിതത്തിന്‍റെ ഓർമകൾ കാൽ നൂറ്റാണ്ട് തികയ്ക്കുമ്പോൾ അവർ വീണ്ടും ആ പടികൾ കയറുകയാണ്. ദേവമാതാ കോളജിലെ 1997-2000 ബാച്ച് ബികോം വിദ്യാർഥികളാണ് പ്രിയകലാലയത്തിലേക്ക് വീണ്ടും എത്തുന്നത്. വിവിധ മേഖലകളിൽ ഉന്നതനിലയിൽ സേവനം ചെയ്യുന്നവരടക്കമുള്ള വിദ്യാർഥികളെല്ലാം സ്‌നേഹക്കൂടെന്ന സംഗമത്തിലെത്തും. ഒരുവർഷം നീണ്ടുനിൽക്കുന്ന ആഘോഷപരിപാടികൾക്കാണ് നേതൃത്വം നൽകുന്നതെന്ന് പ്രതിനിധികളായ ജയിംസ് പുല്ലാപ്പള്ളി, റോബിൻ എണ്ണംപ്രായിൽ, അനീഷ് തോമസ്, അനീഷ് കുഴികൊമ്പിൽ എന്നിവർ വാർത്താസമ്മേളനത്തിൽ അറിയിച്ചു. വെബ്‌സൈറ്റ് പ്രകാശനം, പുസ്തകപ്രകാശനം, കൈപ്പുസ്തക പ്രകാശനം എന്നിവ സംഗമത്തിന്‍റെ ഭാഗമായി നടക്കും. ഒട്ടേറെ ജീവകാരുണ്യപ്രവർത്തനങ്ങൾ ഈ ബാച്ചിന്‍റെ നേതൃത്വത്തിൽ കോളജിൽ നടപ്പിലാക്കുന്നതായി ഭാരവാഹികൾ പറഞ്ഞു. ഓരോവർഷവും രണ്ട് വിദ്യാർഥികളുടെ മുഴുവൻ പഠനച്ചെലവും സ്‌കോളർഷിപ്പുകളും ഈ ബാച്ച് നൽകുന്നുണ്ട്. നാളെ 9.30ന് കോളജ് ഇ-ലേണിംഗ് ഹാളിലാണ് സ്‌നേഹക്കൂട് വിളിച്ചുചേർത്തിട്ടുള്ളത്. ഗോവ മുൻ ഗവർണർ പി.എസ്. ശ്രീധരൻപിള്ള മുഖ്യാതിഥിയായി പങ്കെടുക്കും. കോളജ് മാനേജർ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, പ്രിൻസിപ്പൽ ഡോ. സുനിൽ സി. മാത്യു, ബർസാർ ഫാ. ജോസഫ് മണിയഞ്ചിറ, കൊമേഴ്‌സ് വിഭാഗം മുൻ മേധാവികളായ പ്രഫ. ടി.സി. കുര്യാക്കോസ്, പ്രഫ. ജോർജ് മാത്യു, വകുപ്പ്മേധാവി ഡോ. അനീഷ് മാത്യു, റോബിൻ ജോർജ് എണ്ണംപ്രായിൽ, അബിൻ കുര്യൻ പനങ്കുഴ, അനീഷ് ജോസഫ് എന്നിവർ പ്രസംഗിക്കും.

കാഞ്ഞിരപ്പള്ളി ജനറൽ ആശുപത്രി രാത്രികാല ആംബുലൻസ് സർവീസ് പുനസ്ഥാപിക്കണമെന്ന്

പൊൻകുന്നം: കാഞ്ഞിരപ്പള്ളി ജനറൽ ആശുപത്രി രാത്രികാല ആംബുലൻസ് സർവീസ് പുനസ്ഥാപിക്കണമെന്ന് ബിജെപി കോട്ടയം ഈസ്റ്റ്‌ ജില്ലാ സെക്രട്ടറി ജി. ഹരിലാൽ ആവശ്യപ്പെട്ടു. ഉദ്ഘാടനങ്ങൾ പൊടിപൊടിക്കുന്ന കാഞ്ഞിരപ്പള്ളി ജനറൽ ആശുപത്രിയിൽ രാത്രി എട്ടിനുശേഷം ആംബുലൻസ് സർവീസ് ഇല്ല എന്നത് ഞെട്ടിക്കുന്ന യാഥാർത്ഥ്യമാണ്. നൂറുകണക്കിന് സാധാരണക്കാരാണ് കാഞ്ഞിരപ്പള്ളി ജനറൽ ആശുപത്രിയെ ആശ്രയിക്കുന്നത്. വൈകിട്ട് എട്ടുവരെ മാത്രമാണ് നിലവിൽ ആംബുലൻസ് സർവീസുകൾ നടത്തുന്നത്. താലൂക്ക് ആശുപത്രിയിൽനിന്ന് വിദഗ്ധ ചികിത്സയ്ക്കായി മറ്റ് ആശുപത്രികളിലേക്ക് പോകേണ്ടിവരുന്ന സാധാരണക്കാരന്‍റെ അവസ്ഥ അത്യന്തം പരിതാപകരമാണ്. രാത്രിയിൽ സ്വകാര്യ ആംബുലൻസുകളെ മാത്രം ആശ്രയിക്കേണ്ട അവസ്ഥയിലാണ് രോഗികൾ. മതിയായ ജീവനക്കാർ ഇല്ലാത്തതിനാൽ ആംബുലൻസ് സർവീസ് രാത്രിയിൽ നടത്താൻ സാധിക്കുന്നില്ല എന്ന അധികൃതരുടെ ന്യായം പ്രതിഷേധാർഹമാണ്. രണ്ട് ആംബുലൻസുകൾ സർവീസ് നടത്തിയിരുന്നതിൽ ഒരെണ്ണം മാത്രമാണ് ഇപ്പോൾ സർവീസ് നടത്തുന്നത്. അതും രാത്രി എട്ടുമുതൽ ലഭ്യമല്ല. രാത്രികാല ആംബുലൻസ് സർവീസുകൾ ഉടൻ പുനസ്ഥാപിക്കണമെന്നും അപകടത്തിനു ശേഷമുള്ള അറ്റകുറ്റപ്പണിക്കായി കയറ്റിയിരിക്കുന്ന രണ്ടാമത്തെ ആംബുലൻസും ഉടൻ നിരത്തിലിറക്കാനുള്ള നടപടികൾ സ്വീകരിക്കണമെന്നും ജി ഹരിലാൽ ആവശ്യപ്പെട്ടു.

ഓടാതെ ഒരു വർഷമായി എരുമേലിയിൽ ഹരിതകർമസേനയുടെ പുതിയ വാഹനം

എരുമേലി: എട്ട് ലക്ഷം രൂപയുടെ വാഹനം വാങ്ങി ഒരു വർഷമായിട്ടും ഉപയോഗിക്കാതെ എരുമേലി പഞ്ചായത്ത്‌ അധികൃതർ. വാഹനം പഞ്ചായത്ത്‌ ഓഫീസിനടുത്ത് റോഡരികിൽ ഇട്ടിരിക്കുകയാണ്. വാഹനത്തിന്‍റെ ഇൻഷ്വറൻസ് കാലാവധി കഴിഞ്ഞു. കഴിഞ്ഞ വർഷം മേയിലാണ് വാഹനം വാങ്ങിയത്. അജൈവ മാലിന്യങ്ങൾ കൊണ്ടുപോകുന്നതിന് ഹരിതകർമസേനയ്ക്കുവേണ്ടിയാണ് മഹീന്ദ്ര കമ്പനിയുടെ പുതിയ പിക്കപ്പ് വാൻ വാങ്ങിയത്. ഡ്രൈവറെ നിയമിക്കാൻ കഴിഞ്ഞിരുന്നില്ല. ഇതിനുള്ള നടപടികൾ കഴിഞ്ഞ മാസമാണ് ആരംഭിച്ചത്. വൈകാതെ ഡ്രൈവറെ നിയമിച്ച് വാഹനം നിരത്തിലിറക്കുമെന്ന് പഞ്ചായത്ത്‌ ഭരണസമിതി പറയുന്നു. അതേസമയം ഭരണസമിതിയിലെ ഗുരുതരമായ അനാസ്ഥയാണ് ഒരു വർഷമായി വാഹനം ഉപയോഗിക്കാതിരുന്നതെന്ന് പ്രതിപക്ഷ അംഗം മാത്യു ജോസഫ് ആരോപിച്ചു. ഓടാതെ കിടന്നതുമൂലം ടയറുകൾ, ബാറ്ററി ഉൾപ്പെടെ ഇനി ഉപയോഗിക്കാനാവില്ലന്നും ഇതിന്‍റെ നഷ്ടം ബന്ധപ്പെട്ടവരിൽനിന്ന് ഈടാക്കണമെന്നും മാത്യു ജോസഫ് ആവശ്യപ്പെട്ടു.

എരുമേലി പില്‍ഗ്രിം അമിനിറ്റി സെന്‍റർ നവീകരണത്തിനായി 1.65 കോടി

എരുമേലി: ജില്ലാ ടൂറിസം പ്രൊമോഷന്‍ കൗണ്‍സിലിന്‍റെ എരുമേലി കൊരട്ടിയിലുള്ള പില്‍ഗ്രിം അമിനിറ്റി സെന്‍ററിന്‍റെ നവീകരണത്തിനായി 1.65 കോടി രൂപ ടൂറിസം വകുപ്പില്‍നിന്ന് അനുവദിച്ചതായി സെബാസ്റ്റ്യന്‍ കുളത്തുങ്കല്‍ എംഎല്‍എ. ശബരിമല തീര്‍ഥാടകര്‍ക്ക് സൗകര്യം ഒരുക്കുന്നതിനായുള്ള സെന്‍ററിന്‍റെ ഭാഗമായി നാലര ഏക്കര്‍ സ്ഥലത്ത് അഞ്ചു കെട്ടിടങ്ങളും 80 മുറികളുള്ള നാല് ടോയ്‌ലറ്റ് കോംപ്ലക്‌സുകളും നിലവിലുണ്ട്. കഴിഞ്ഞ വര്‍ഷം ഒരു കോടി രൂപ അനുവദിച്ച് റോഡ് കോണ്‍ക്രീറ്റിംഗും കിടങ്ങുകളുടെ അറ്റകുറ്റപ്പണികളും നടത്തിയിരുന്നു. അവശേഷിക്കുന്ന നവീകരണ പ്രവര്‍ത്തനങ്ങള്‍ ഉള്‍പ്പെടെ പൂര്‍ത്തീകരിക്കുന്നതിനാണ് 1.65 കോടി രൂപ അനുവദിച്ചിരിക്കുന്നത്. അനുവദിക്കപ്പെട്ട തുക ഉപയോഗിച്ച് ടോയ്‌ലറ്റ് കോംപ്ലക്‌സുകളുടെ പുനരുദ്ധാരണ പ്രവര്‍ത്തനങ്ങള്‍ക്കു പുറമേ ഓപ്പണ്‍ ബാത്ത് ഏരിയ നവീകരിക്കുകയും ചെയ്യും. നാലു ഡോര്‍മറ്ററികളുടെ നവീകരണം, സംരക്ഷണഭിത്തി, അടുക്കള നവീകരണം, മാലിന്യ സംസ്‌കരണ സംവിധാനം, പുതിയ കവാടം, പൂന്തോട്ട നിര്‍മാണം, വൈദ്യുതീകരണം, പ്ലംബിംഗ് ഉള്‍പ്പെടെയുള്ള അറ്റകുറ്റപ്പണികളും നിര്‍വഹിക്കും. ശബരിമല തീര്‍ഥാടകരുടെ സൗകര്യം കണക്കാക്കിയാണു പില്‍ഗ്രിം അമിനിറ്റി സെന്‍ററിന്‍റെ നവീകരണ പ്രവര്‍ത്തനങ്ങള്‍ നടത്തുന്നത്. സര്‍ക്കാര്‍ അംഗീകൃത ഏജന്‍സിയായ സില്‍ക്കിനെയാണ് നിര്‍മാണച്ചുമതല ഏല്‍പ്പിച്ചിട്ടുള്ളത്. നടപടിക്രമങ്ങള്‍ പൂര്‍ത്തീകരിച്ച് എത്രയും വേഗം നിര്‍മാണം ആരംഭിക്കുമെന്നും എംഎല്‍എ അറിയിച്ചു.

ദീപിക കളര്‍ ഇന്ത്യ പെയിന്‍റിംഗ് മത്സരം ഇന്ന്

കാഞ്ഞിരപ്പള്ളി: ദീപിക കളര്‍ ഇന്ത്യ പെയിന്‍റിംഗ് കോന്പറ്റീഷൻ സീസണ്‍ -4 കാഞ്ഞിരപ്പള്ളി മേഖലാതല ഉദ്ഘാടനം ഇന്നു രാവിലെ 9.45ന് കുന്നുംഭാഗം സെന്‍റ് ജോസഫ്സ് പബ്ലിക് സ്കൂളിൽ നടക്കും. കാഞ്ഞിരപ്പള്ളി രൂപതാ വികാരി ജനറാൾ ഫാ. ബോബി അലക്സ് മണ്ണംപ്ലാക്കൽ ഉദ്ഘാടനം നിർവഹിക്കും. പ്രിൻസിപ്പൽ സിസ്റ്റർ ലിറ്റിൽ റോസ് എസ്എബിഎസ് അധ്യക്ഷതവഹിക്കുന്ന യോഗത്തിൽ രാഷ്‌ട്രദീപിക ലിമിറ്റഡ് ഡയറക്ടർ ഷെവ. അഡ്വ. വി.സി. സെബാസ്റ്റ്യൻ മുഖ്യപ്രഭാഷണം നടത്തും. ദീപിക രൂപതാ ഡയറക്ടർ ഫാ. ജസ്റ്റിൻ മതിയത്ത്, ഡിസിഎൽ നാഷണൽ കോ-ഓർഡിനേറ്റർ വർഗീസ് കൊച്ചുകുന്നേൽ, ചിത്രകാരി മേഘ അജി എന്നിവർ പ്രസംഗിക്കും. മുണ്ടക്കയം മേഖലാതല ഉദ്ഘാടനം സെന്‍റ് ജോസഫ്സ് സെൻട്രൽ സ്കൂളിൽ നടക്കും.

ചിറക്കടവ് എസ്ആർവി എൻഎസ് എസ് ഹൈസ്കൂളിൽ "മാ കെയർ സെന്‍റർ’ പ്രവർത്തനം ആരംഭിച്ചു

ചിറക്കടവ്: പഞ്ചായത്ത് കുടുംബശ്രീ സിഡിഎസിന്‍റെ ആഭിമുഖ്യത്തിൽ സംസ്ഥാന മിഷന്‍റെ നിർദേശാനുസരണം ചിറക്കടവ് എസ്ആർവിഎൻഎസ്എസ് ഹൈസ്കൂളിൽ മാ കെയർ സെന്‍റർ പ്രവർത്തനം ആരംഭിച്ചു. സ്കൂൾ കോമ്പൗണ്ടിൽ മാനേജ്മെന്‍റ് ഒരുക്കിയ പ്രത്യേക കെട്ടിടത്തിലാണ് സെന്‍റർ പ്രവർത്തിക്കുന്നത്. കുട്ടികൾക്കാവശ്യമായ പഠനോപകരണങ്ങളും ഹരിത പ്രോട്ടോകോൾ പാലിച്ചുകൊണ്ടുള്ള ലഘു ഭക്ഷണ പദാർഥങ്ങളും ലഭ്യമാക്കുകയും ചെയ്യുന്നതോടൊപ്പം കലാലയങ്ങളിൽ വിദ്യാർഥികൾക്കിടയിൽ വർധിച്ചുവരുന്ന ലഹരി ഉപയോഗം പൂർണമായും ഉന്മൂലനം ചെയ്യുന്നതിനും വേണ്ടിയാണ് മാകെയർ സെന്‍റർ ലക്ഷ്യമിട്ടിരിക്കുന്നത്. പഞ്ചായത്ത് വൈസ് പ്രസിഡന്‍റ് സതി സുരേന്ദ്രന്‍റെ അധ്യക്ഷതയിൽ പ്രസിഡന്‍റ് സി.ആർ. ശ്രീകുമാർ ഉദ്ഘാടനം നിർവഹിച്ചു. സ്കൂൾ മാനേജർ ശശികുമാർ, ഹെഡ്മാസ്റ്റർ എ.ആർ. അനിൽകുമാർ, സിഡിഎസ് ചെയർപേഴ്സൺ ഉഷാ പ്രകാശ്, പഞ്ചായത്ത് മെംബർ എം.ടി. ശോഭന,സിഡിഎസ് അംഗം സുനിത അനിൽകുമാർ എന്നിവർ പ്രസംഗിച്ചു.

അന്തർ സംസ്ഥാന ഓൺലൈൻ തട്ടിപ്പ് കേസിലെ പ്രതി പിടിയിൽ

മുണ്ടക്കയം ഈസ്റ്റ്: പശ്ചിമ ബംഗാളിൽ നടന്ന ഓൺലൈൻ തട്ടിപ്പുമായി ബന്ധപ്പെട്ട് ഒളിവിൽ കഴിഞ്ഞിരുന്ന പാലക്കാട് ചങ്കരംചാത്ത് സ്വാതിനിവാസിൽ ആനന്ദൻ പി. തമ്പി (42) പെരുവന്താനം പോലീസിന്‍റെ പിടിയിൽ. പശ്ചിമ ബംഗാളിൽ നടന്ന ആറു ലക്ഷം രൂപയുടെ ഓൺലൈൻ തട്ടിപ്പുമായി ബന്ധപ്പെട്ട് വിധാൻ നഗർ പോലീസ് ഹോട്ടൽ ജീവനക്കാരനായ ആനന്ദനെ ഒന്നര മാസങ്ങൾക്കു മുമ്പ് കോട്ടയത്തെത്തി അറസ്റ്റ് ചെയ്തിരുന്നു. കോടതിയിൽ ഹാജരാക്കിയശേഷം പ്രതിയെ ഇവിടെനിന്ന് ജൂൺ 27 ന് ഷാലിമാർ എക്സ്പ്രസിൽ ട്രെയിൻ മാർഗം പശ്ചിമ ബംഗാളിലേക്ക് കൊണ്ടുപോകുംവഴി കോയമ്പത്തൂരിന് സമീപം പോത്തന്നൂർ ഭാഗത്തുവച്ച് ഇയാൾ ട്രെയിനിൽനിന്ന് ചാടി രക്ഷപ്പെടുകയായിരുന്നു. ഇവിടെനിന്നു മുങ്ങിയ പ്രതി പിന്നീട് പെരുവന്താനം പോലീസ് സ്റ്റേഷൻ പരിധിയിൽ വള്ളിയങ്കാവിലെത്തി ലോഡ്ജിൽ മുറിയെടുത്ത് കുടുംബസമേതം ഒളിവിൽ കഴിയുകയായിരുന്നു. വള്ളിയങ്കാവിൽ ഒരാൾ കുടുംബസമേതം സംശയാസ്പദമായി താമസിക്കുന്നുണ്ടെന്ന രഹസ്യവിവരത്തിന്‍റെ അടിസ്ഥാനത്തിൽ പെരുവന്താനം സിഐ ത്രിദീപ് ചന്ദ്രന്‍റെ നേതൃത്വത്തിലുള്ള പോലീസ് സംഘം നടത്തിയ പരിശോധനയിലാണ് ഇയാളെ പിടികൂടുന്നത്. പശ്ചിമ ബംഗാളിലെ ഓൺലൈൻ തട്ടിപ്പ് സംഘം തട്ടിപ്പ് നടത്തി ലഭിക്കുന്ന പണം കേരളത്തിലുള്ള ആനന്ദന്‍റെ അക്കൗണ്ടിലേക്ക് നിക്ഷേപിക്കുകയും ഇതിന് കമ്മീഷൻ കൈപ്പറ്റിയശേഷം ബാക്കി തുക തട്ടിപ്പുകാരുടെ മറ്റ് അക്കൗണ്ടുകളിലേക്ക് മാറ്റി നൽകുകയുമാണ് ഇയാൾ ചെയ്തിരുന്നതെന്നു പറയുന്നു. പശ്ചിമ ബംഗാളിൽ എത്തിച്ച് കൂടുതൽ തെളിവെടുപ്പ് നടത്തിയെങ്കിൽ മാത്രമേ ഇയാൾ ഏതൊക്കെ രീതിയിലുള്ള ഓൺലൈൻ തട്ടിപ്പിന് കൂട്ടുനിന്നു എന്ന വിവരം വ്യക്തമാവുകയുള്ളൂ. പശ്ചിമബംഗാൾ സംഘങ്ങളുമായി ചേർന്ന് കേരളത്തിൽനിന്നുള്ള ആളുകളുടെ പണം തട്ടിയിട്ടുണ്ടോ എന്ന വിവരവും തുടർന്നുള്ള അന്വേഷണത്തിലേ ബോധ്യമാവുകയുള്ളൂ. പെരുവന്താനം സബ് ഇൻസ്പെക്ടർ സതീഷ്, സീനിയർ സിവിൽ പോലീസ് ഓഫീസർ ഷമീർ, സിപിഒ മാരായ ജോമോൻ, സുനീഷ് എസ്. നായർ എന്നിവർ ചേർന്നാണ് പ്രതിയെ പിടികൂടിയത്. പിടിയിലായ പ്രതിയെ പോത്തന്നൂർ പോലീസിന് കൈമാറും.

ജില്ലാ അത്‌ലറ്റിക്സ്: സെന്‍റ് ഡൊമിനിക് കോളജ് ജേതാക്കൾ

കാഞ്ഞിരപ്പള്ളി: ജില്ലാ ജൂണിയർ അത്‌ലറ്റിക്‌സ് ചാമ്പ്യൻഷിപ്പിൽ കാഞ്ഞിരപ്പള്ളി സെന്‍റ് ഡൊമിനിക്‌സ് കോളജ് ടീം ജേതാക്കൾ. ആൺകുട്ടികളുടെ 20 വയസിന് താഴെയുള്ള വിഭാഗത്തിൽ 160 പോയിന്‍റ് നേടിയാണ് ചാമ്പ്യൻ കിരീടം നിലനിർത്തിയത്. 10 സ്വർണം, ആറ് വെള്ളി, ഏഴ് വെങ്കല മെഡലുകൾ എന്നിവ കോളജ് നേടി. ജോൺ സ്റ്റീഫൻ, അർജുൻ സനീഷ്, ടി. അഞ്ചൽ ദീപ് , അമൃതേഷ് മുരളി, അനിരുദ്ധ് സതീഷ്, റബീഹ് അഹമ്മദ്, ആൽഫ്രഡ് ജോജോ എന്നിവർ സ്വർണ മെഡലുകൾ നേടി. കോളജിൽ പ്രവർത്തിച്ചുവരുന്ന സംസ്ഥാന സ്പോർട്സ് കൗൺസിൽ അക്കാദമിയിലാണ് കുട്ടികൾ പരിശീലനം നേടുന്നത്. 16 മത്സരാർഥികളാണ് സെന്‍റ് ഡൊമിനിക്‌സിനെ പ്രതിനിധീകരിച്ച് ചാമ്പ്യൻഷിപ്പിൽ പങ്കെടുത്തത്. കായികവിഭാഗം നേതൃത്വം നൽകുന്ന അക്കാദമിയിൽ അധ്യാപകരായ പ്രവീൺ തര്യൻ, സംസ്ഥാന സ്പോർട്സ് കൗൺസിൽ പരിശീലകൻ ജൂലിയസ് ജെ. മനയാനി, ഹൈറേഞ്ച് അക്കാദമി പരിശീലകൻ സന്തോഷ് ജോർജ് എന്നിവരുടെ കീഴിലാണ് പരിശീലനം. മികച്ച പ്രകടനം കാഴ്ചവച്ച താരങ്ങളെയും പരിശീലകരെയും കോളജ് മാനേജ്മെന്‍റും പ്രിൻസിപ്പലും പിടിഎയും അഭിനന്ദിച്ചു.

പഠനത്തോടൊപ്പം സംരംഭകരാകാന്‍ പദ്ധതിയുമായി ബ്ലോക്ക് പഞ്ചായത്ത്

കാഞ്ഞിരപ്പളളി: കലാലയ ജീവിതത്തോടൊപ്പം സംരംഭകരാകുവാന്‍ പദ്ധതിയുമായി കാഞ്ഞിരപ്പളളി ബ്ലോക്ക് പഞ്ചായത്ത്. ഒരു വിദ്യാര്‍ഥി പഠനത്തോടൊപ്പം പാര്‍ട്ട് ടൈം ജോലിയും അതിലൂടെ പഠനത്തിനാവശ്യമായ തുകയും കണ്ടെത്താനുളള തൊഴിലധിഷ്ഠിത പദ്ധതികളാണ് ബ്ലോക്ക് പഞ്ചായത്ത് ഈ വര്‍ഷത്തെ പദ്ധതിയിലൂടെ നടപ്പിലാക്കുന്നത്. ബ്ലോക്ക് പരിധിയിലുളള കാഞ്ഞിരപ്പള്ളി എസ്ഡി കോളജ്, എരുമേലി എംഇഎസ് കോളജ് എന്നിവിടങ്ങളിലെ വിദ്യാര്‍ഥികള്‍ക്ക് പഠനത്തോടൊപ്പം വിദഗ്ധ പരിശീലനം നല്‍കി ജോലി ഉറപ്പാക്കുക എന്ന ലക്ഷ്യം മുന്‍നിര്‍ത്തി ആവിഷ്കരിച്ച പദ്ധതിയാണ് എന്‍റർപ്രണർഷിപ് ഡെവലപ്മെന്‍റ് ക്ലബ് അംഗങ്ങള്‍ക്ക് നൈപുണ്യ പരിശീലനം. പദ്ധതിയുടെ ഭാഗമായി റബര്‍ ടെക്നോളജി, പ്ലാസ്റ്റിക് ടെക്നോളജി, ഭക്ഷ്യസംസ്കരണം, ബ്യൂട്ടീഷന്‍ കോഴ്സ്, അഗ്രോ ഫുഡ് ലാബ് എന്നിവയാണ് പ്രാഥമികമായി ഉള്‍പ്പെടുത്തിയിട്ടുള്ളത്. പ്രാഥമികമായി ഉള്‍പ്പെടുത്തിയ കോളജുകളല്ലാതെ മറ്റു വിദ്യാര്‍ഥികള്‍ക്കും തുടര്‍ന്നും അവസരം ഉറപ്പാക്കും. പരിപാടിയുടെ ഉദ്ഘാടനം ചീഫ് വിപ്പ് ഡോ. എന്‍. ജയരാജ് ഇന്നു രാവിലെ 10.30ന് സെന്‍റ് ഡൊമിനിക്സ് കോളജ് ഓഡിറ്റോറിയത്തില്‍ നിർവഹിക്കും. കോളജ് തലത്തില്‍ ഒഴിവു ദിനങ്ങളില്‍ ബ്ലോക്ക് പഞ്ചായത്ത് പദ്ധതിയിലൂടെ ഈ കോഴ്സുകള്‍ കുട്ടികള്‍ക്ക് പഠിക്കാവുന്നതാണെന്ന് ബ്ലോക്ക് പഞ്ചായത്ത് പ്രസിഡന്‍റ് അജിതാ രതീഷ്, വൈസ് പ്രസിഡന്‍റ് ജോളി മടുക്കക്കുഴി, മെംബർമാരായ ജയശ്രീ ഗോപിദാസ്, ടി.ജെ. മോഹനന്‍, ഷക്കീല നസീര്‍, ബിഡിഒ എസ്. സജീഷ്, വ്യവസായ വികസന ഓഫീസര്‍ കെ.കെ. ഫൈസല്‍, എസ്ഡി കോളജ് ഇഡി ക്ലബ് കോ-ഓര്‍ഡിനേറ്റര്‍ റാണി അല്‍ഫോന്‍സാ ജോസ് തുടങ്ങിയവര്‍ പത്രസമ്മേളനത്തില്‍ അറിയിച്ചു.

അമേരിക്കയിൽ മരിച്ചനിലയിൽ കണ്ടെത്തിയ ദന്പതികളുടെ സംസ്കാരം നാളെ

കോട്ടയം: കഴിഞ്ഞ ദിവസം അമേരിക്കയിലെ ഹാരിസ്ബർഗിൽ മരിച്ച നിലയിൽ കണ്ടെത്തിയ മലയാളി ദന്പതികളുടെ സംസ്കാരം നാളെ. കുമരകം വാക്കയിൽ സി. ജി പ്രസാദ് (76) ഭാര്യ ആനി പ്രസാദ് (73) എന്നിവരെയാണ് കിടപ്പുമുറിയിൽ മരിച്ച നിലയിൽ കണ്ടെത്തിയത്. ശീതീകരണ സംവിധാനത്തിലെ തകരാർ മൂലം വാതക ചോർച്ചയുണ്ടായി മരണം സംഭവിച്ചെന്നാണ് പ്രാധമിക സൂചന. ഇരുവരുടെയും സംസ്കാരം നാളെ ഫിലാഡൽഫിയ സെന്‍റ് പീറ്റഴ്സ് സിറിയൻ ഓർത്തഡോക്സ് കത്തീഡ്രൽ പൈൻഗ്രൂവ് സെമിത്തെരിയിൽ. മക്കൾ: സന്ധ്യ, കാവ്യ (ഇരുവരും യുഎസ്എ). മരുമകൻ: ഡോൺ കാസ്ട്രോ.

ഹാഷിഷ് ഓയിലുമായി യുവാവ് പിടിയിൽ

മുണ്ടക്കയം: ജില്ലാ പോലീസ് മേധാവിയുടെ സ്പെഷൽ ടീം ഡാൻസഫ് നടത്തിയ പരിശോധനയിൽ രണ്ടു ഗ്രാം ഹാഷിഷ് ഓയിലുമായി യുവാവ് പിടിയിൽ. ഈരാറ്റുപേട്ട അമ്പഴത്തിനാൽ സയിദലി നിയാസ് (21) ആണ് മുണ്ടക്കയം കോസ്‌വേ ജംഗ്ഷനിൽ പിടിയിലായത്. ബംഗളൂരുവിൽനിന്ന് ഈരാറ്റുപേട്ടയിലേക്ക് ബുള്ളറ്റിൽ ഹാഷിഷ് ഓയിലുമായി വരുന്നത് സംബന്ധിച്ചു ജില്ലാ പോലീസ് മേധാവിക്കു ലഭിച്ച രഹസ്യവിവരത്തെത്തുടർന്നു ഡാൻസഫ് ടീം ഇയാളെ പിന്തുടർന്ന് മുണ്ടക്കയത്തുവച്ച് പിടികൂടുകയായിരുന്നു. തുടർന്ന് നടത്തിയ പരിശോധനയിൽ പ്രത്യേകം സൂക്ഷിച്ച നിലയിൽ രണ്ട് ഗ്രാം ഹാഷിഷ് ഓയിൽ കണ്ടെടുത്തു. ഇതേത്തുടർന്ന് ഇയാൾ സഞ്ചരിച്ച ബൈക്കും കസ്റ്റഡിയിലെടുത്തു. പ്രതിയെ കാഞ്ഞിരപ്പള്ളി കോടതിയിൽ ഹാജരാക്കി. ഇയാൾ ലഹരിക്കടത്ത് സംഘത്തിൽപ്പെട്ടയാളാണോയെന്നും മറ്റു ലഹരിസംഘങ്ങളുമായി ഇയാൾക്ക് ബന്ധമുണ്ടോയെന്ന കാര്യവും പോലീസ് അന്വേഷിച്ചു വരികയാണ്.

പൊളിച്ചിട്ട റോഡിന്‍റെ പണി വൈകുന്നു ; ‌പഞ്ചായത്ത് ഒാഫീസിൽ കുത്തിയിരിപ്പും പ്രതിഷേധവും

പാറത്തോട്: റോഡ് പണി വൈകുന്നതിൽ പ്രതിഷേധവുമായി ഗുണഭോക്താക്കൾ. പാറത്തോട് പതിനഞ്ചാം വാർഡിലുൾപ്പെട്ട കുന്നുംഭാഗം നിവാസികളാണ് പഞ്ചായത്ത് ഓഫീസിലെത്തി കുത്തിയിരുന്നു പ്രതിഷേധിച്ചത്. പ്രധാന വാതില്‍ ഉപരോധിച്ച് പഞ്ചായത്ത് പ്രസിഡന്‍റിനെ ഓഫീസിലേക്കു പ്രവേശിപ്പിക്കാതെ തടഞ്ഞും പ്രദേശവാസികള്‍ പ്രതിഷേധിച്ചു. പിന്നീട് പഞ്ചായത്ത് പ്രസിഡന്‍റും പഞ്ചായത്തംഗങ്ങളും പ്രദേശവാസികളുമായി നടത്തിയ ചര്‍ച്ചയില്‍ ഉടന്‍ പണി തുടങ്ങാമെന്ന ഉറപ്പിലാണ് സമരം അവസാനിപ്പിച്ചത്. നവീകരണം നീട്ടിക്കൊണ്ടുപോകുന്ന കരാറുകാരനെ നീക്കം ചെയ്യണമെന്നും പ്രദേശവാസികള്‍ ആവശ്യപ്പെട്ടു. പൊളിച്ചിട്ട് രണ്ടു മാസം പാറത്തോട് പഞ്ചായത്ത് 15-ാം വാര്‍ഡിലെ ഉയര്‍ന്ന പ്രദേശമായ കുന്നുംഭാഗം പ്രദേശത്തേക്കുള്ള റോഡാണ് പൊളിച്ചിട്ടിരിക്കുന്നത്. പാറത്തോട്-ഇടക്കുന്നം റോഡില്‍ താമരപ്പടിയില്‍നിന്നു കുന്നുംഭാഗത്തേക്കു പ്രവേശിക്കുന്നതാണ് റോഡ്. 75-ഓളം കുടുംബങ്ങളുടെ ഏക ആശ്രയമായ റോഡ് പൊളിച്ചിട്ടതോടെ വാഹനങ്ങള്‍ താഴെ വച്ച് കയറിപ്പോകേണ്ട സ്ഥിതിയാണ്. കയറ്റം കുറച്ച് നവീകരിക്കുന്നതിന്‍റെ ഭാഗമായിട്ടാണ് കഴിഞ്ഞ മേയ് മാസത്തില്‍ റോഡ് പൊളിച്ചത്. 10 ലക്ഷം രൂപയാണു നവീകരണത്തിന് അനുവദിച്ചത്. വാർഡ് മെംബർ ഷാലമ്മ ജയിംസ്, കൺവീനർ തങ്കൻ എന്നിവരുടെ നേതൃത്വത്തിലായിരുന്നു മുപ്പതോളം വരുന്ന കുടുംബങ്ങളുടെ പ്രതിഷേധം.

അരുവിത്തുറ കോളജിൽ നവാഗത ദിനാഘോഷം

അരുവിത്തുറ: യുവത്വത്തിന്‍റെ ഉൾതുടിപ്പുകളുമായി അരുവിത്തുറ സെന്‍റ് ജോർജ് കോളജിൽ നവാഗത ദിനാഘോഷം അരങ്ങേറി. അഘോഷങ്ങളുടെ ഉദ്ഘാടനം കോളജ് ബർസാർ റവ.ഫാ. ബിജു കുന്നയ്ക്കാട്ട് നിർവഹിച്ചു. വൈസ് പ്രിൻസിപ്പൽ ഡോ. ജിലു ആനി ജോൺ അധ്യക്ഷത വഹിച്ച ചടങ്ങിൽ ഐക്യുഎസി കോഓർഡിനേറ്റർ ഡോ. സുമേഷ് ജോർജ്, പ്രോഗ്രാം കോഓർഡിനേറ്റർ ഡോ. നിനുമോൾ സെബാസ്റ്റ്യൻ, ഡോ. തോമസ് പുളിക്കൻ തുടങ്ങിയവർ സംസാരിച്ചു. നവാഗത വിദ്യാർഥികളുടെ സർഗവാസനങ്ങൾ പീലിവിടർത്തിയ കാലാമാമാങ്കത്തെ അവേശപൂർവമാണ് കലാലയം ഏറ്റെടുത്തത്.

കന്യാസ്ത്രീമാരുടെ അറസ്റ്റ്: എല്‍ഡിഎഫ് പ്രതിഷേധ കൂട്ടായ്മ നടത്തി

ചങ്ങനാശേരി: ഛത്തീസ്ഗഡില്‍ കന്യാസ്ത്രീമാരെ അറസ്റ്റു ചെയ്ത് തുറങ്കിലടച്ച ബിജെപി സര്‍ക്കാരിന്‍റെ ഫാസിസ്റ്റ് നടപടിയില്‍ പ്രതിഷേധിച്ച് എല്‍ഡിഎഫ് ചങ്ങനാശേരി മണ്ഡലം കമ്മിറ്റിയുടെ നേതൃത്വത്തില്‍ പ്രതിഷേധ കൂട്ടായ്മ നടത്തി. കെഎസ്ആര്‍ടിസി ജംഗ്ഷനില്‍ നടന്ന പരിപാടി സിപിഎം ജില്ലാ സെക്രട്ടേറിയറ്റംഗം റെജി സഖറിയ ഉദ്ഘാടനം ചെയ്തു. സിപിഐ ജില്ലാ എക്‌സിക്യൂട്ടീവ് അംഗം കെ. മാധവന്‍ പിള്ള അധ്യക്ഷത വഹിച്ചു. നേതാക്കളായ കെ.സി.ജോസഫ്, കെ.ഡി.സുഗതന്‍, ലാലിച്ചന്‍ കുന്നിപറമ്പില്‍, എം.ആര്‍. രഘുദസ്, ജി. രാധാകൃഷ്ണന്‍, പ്രേംചന്ദ് മാവേലി, ബോബന്‍ കോയിപ്പളളി, ബെന്നി സി. ചീരഞ്ചിറ എന്നിവര്‍ പ്രസംഗിച്ചു.

പായിപ്പാട് ബിഎഡ് കോളജ് സംഘടിപ്പിച്ച ഹിരോഷിമ ദിനം ശ്രദ്ധേയമായി

ചങ്ങനാശേരി: എണ്‍പതാം ഹിരോഷിമ വാര്‍ഷികാചരണത്തി ന്‍റെ ഭാഗമായി പായിപ്പാട് ബിഎഡ് കോളജില്‍ ഐക്യുസിഇയുടെയും എന്‍എസ്എസ് യൂണിറ്റിന്‍റെയും സംയുക്താഭിമുഖ്യത്തില്‍ സമാധാന സന്ദേശ സദസും റാലിയും സംഘടിപ്പിച്ചു. കോളജില്‍നിന്നു പായിപ്പാട് ജംഗ്ഷനിലേക്കാണ് റാലി നടത്തിയത്. വിദ്യാര്‍ഥികളും അധ്യാപകരും സമാധാന സന്ദേശമുദ്രാവാക്യം മുഴക്കി നടത്തിയ റാലി പഞ്ചായത്ത് അംഗം ആനി രാജു ഫ്ലാഗ്ഓഫ് ചെയ്തു. കോളജ് പ്രിന്‍സിപ്പല്‍ ഡോ. രാജീവ് പുലിയൂര്‍ അധ്യക്ഷത വഹിച്ചു. എന്‍എസ്എസ് പ്രോഗ്രാം ഓഫീസര്‍ ഗീത നാരായണന്‍, വിദ്യാര്‍ഥി പ്രതിനിധികളായ അതുല്യ, ശ്രീലക്ഷ്മി എന്നിവര്‍ പ്രസംഗിച്ചു. വിദ്യാര്‍ഥികളുടെ നൃത്താവിഷ്‌കാരവും തെരുവുനാടകവും അരങ്ങേറി.

മെത്രാപ്പോലീത്തന്‍ പള്ളിയില്‍ മരിയന്‍ കണ്‍വന്‍ഷന്‍ ആരംഭിച്ചു

ചങ്ങനാശേരി: സെന്‍റ് മേരീസ് മെത്രാപ്പോലീത്തന്‍ പള്ളിയില്‍ റവ.ഡോ. അലോഷ്യസ് കുളങ്ങരയുടെ നേതൃത്വത്തിലുള്ള കോഴിക്കോട് ഹോളി സ്പിരിറ്റ് മിനിസ്ട്രി ടീം നയിക്കുന്ന മരിയന്‍ കണ്‍വന്‍ഷനും വിമോചന പ്രാര്‍ഥനയും ആരംഭിച്ചു. വികാരി ജനറാള്‍ മോണ്‍. ആന്‍റണി എത്തക്കാട് ഉദ്ഘാടനം നിര്‍വഹിച്ചു. വികാരി ഫാ. ജോസഫ് വാണിയപ്പുരയ്ക്കല്‍ അധ്യക്ഷത വഹിച്ചു. ഫാ. മിന്‍റു മൂന്നുപറയില്‍ വിശുദ്ധ കുര്‍ബാന അര്‍പ്പിച്ചു. ഫാ. ജോസഫ് കുറശേരി, ഫാ. ആന്‍റണി അറയ്ക്കത്തറ, ഫാ. ജോക്കബ് കളരിക്കല്‍ തുടങ്ങിയവര്‍ പ്രസംഗിച്ചു. എല്ലാ ദിവസവും വൈകുന്നേരം 4.30 ന് ജപമാല, അഞ്ചിന് വിശുദ്ധ കുര്‍ബാന തുടര്‍ന്നു രാത്രി ഒമ്പതുവരെ വചനപ്രഘോഷണം, ആരാധന.

നടുറോഡിൽ തർക്കിച്ച് കെഎസ്ആർടിസി, സ്വകാര്യ ബസ് ജീവനക്കാർ : കോട്ടയം-കറുകച്ചാല്‍ റോഡിൽ ഗതാഗതം സ്തംഭിച്ചു

കറുകച്ചാല്‍: കെഎസ്ആര്‍ടിസി, സ്വകാര്യ ബസ് ജീവനക്കാര്‍ തമ്മില്‍ തര്‍ക്കം. ഗതാഗതം തടസപ്പെട്ടു. നെത്തല്ലൂര്‍ ജംഗ്ഷനില്‍ ഇന്നലെ രാവിലെ 1.30നാണ് സംഭവം. കറുകച്ചാലില്‍നിന്നു കോട്ടയത്തേക്ക് പോവുകയായിരുന്ന ഇരു ബസുകളും പരസ്പരം ഉരസിയതിനെ ചൊല്ലിയാണ് തര്‍ക്കമുടലെടുത്തത്. സ്വകാര്യ ബസ് നെത്തല്ലൂര്‍ ജംഗ്ഷനില്‍ നിര്‍ത്തി യാത്രക്കാരെ ഇറക്കിക്കയറ്റുന്നതിനിടയില്‍ ഈ ബസിനെ കെഎസ്ആര്‍ടിസി ബസ് മറികടന്നപ്പോളാണ് ബസുകള്‍ തമ്മില്‍ ഉരസിയത്. സംഭവത്തില്‍ ആര്‍ക്കും പരിക്കില്ലെങ്കിലും യാത്രക്കാരും ജീവനക്കാരും തമ്മില്‍ തര്‍ക്കം ഉടലെടുത്തതിനാല്‍ അരമണിക്കൂറോളം കോട്ടയം-കറുകച്ചാല്‍ റോഡില്‍ ഗതാഗതം തടസപ്പെടുകയായിരുന്നു. സംഭവമറിഞ്ഞ് കറുകച്ചാലില്‍നിന്നു പോലീസ് എത്തിയാണ് പ്രശ്‌നം പരിഹരിച്ചത്. കോട്ടയം-കോഴഞ്ചേരി റൂട്ടില്‍ സര്‍വീസ് നടത്തുന്ന കെഎസ്ആര്‍ടിസി ബസാണ് അപകടത്തില്‍പ്പെട്ടത്. കെഎസ്ആര്‍ടിസി ബസിന്‍റെ വഴി തടഞ്ഞ് സ്വകാര്യ ബസ് മുന്നോട്ട് എടുത്തതാണ് അപകടത്തിന് കാരണമാെതെന്നും കെഎസ്ആര്‍ടിസിയുടെ സമയത്താണ് സ്വകാര്യബസ് സര്‍വീസ് നടത്തിയതെന്നും മല്ലപ്പള്ളി ഡിപ്പോ സ്റ്റേഷന്‍ മാസ്റ്റര്‍ പറഞ്ഞു.

നെഹ്‌റു ട്രോഫി : ചങ്ങനാശേരി ബോട്ട്ക്ലബ് തീവ്രഒരുക്കത്തില്‍

ചങ്ങനാശേരി: പുന്നമടക്കായലില്‍ 30ന് നടക്കുന്ന നെഹ്‌റുട്രോഫി ജലോത്സവത്തിലും തുടര്‍ന്നുള്ള ലീഗ് മത്സരങ്ങളിലും വിജയക്കൊടി പാറിക്കാന്‍ സിബിസി സജ്ജമായതായി ഡയറക്ടര്‍മാരായ ഫാ. സെബാസ്റ്റ്യന്‍ പുന്നശേരി, ഫാ. ജോഫി പുതുപ്പറമ്പ്, ഫാ. ലിപിന്‍ തുണ്ടുകളം, ക്യാപ്റ്റന്‍ സണ്ണി തോമസ് ഇടിമണ്ണിക്കല്‍ എന്നിവര്‍ പത്രസമ്മേളനത്തില്‍ അറിയിച്ചു. അഞ്ചുവിളക്കിന്‍റെ നാടായ ചങ്ങനാശേരിയുടെ പെരുമ ലോകം മുഴുവന്‍ എത്തിക്കുന്നതിനും മാനവികത വളര്‍ത്തുന്നതിനും പരമാവധി ജീവകാരുണ്യ പ്രവര്‍ത്തനങ്ങള്‍ നടപ്പിലാക്കുന്നതിനും ലക്ഷ്യമിട്ട് മീഡിയാ വില്ലേജിന്‍റെ ആഭിമുഖ്യത്തില്‍ വളര്‍ന്നു വരുന്ന കൂട്ടായ്മയ്ക്കാണ് സിബിസി നേതൃത്വം നല്‍കുന്നത്. ഇക്കുറി ചമ്പക്കുളം ചുണ്ടനില്‍ മത്സരിക്കുന്ന സിബിസിയെ വിജയകിരീടം അണിയിക്കാനുള്ള സര്‍വവിധ പിന്തുണയുമായി ഫാന്‍സ് അസോസിയേഷനും സജീവമായി രംഗത്തുണ്ട്. സിബിസി ഫാന്‍സ് അസോസിയേഷൻ സമ്മേളനം ഒമ്പതിന് ഒമ്പതിന് വൈകുന്നേരം അഞ്ചിന് കുരിശുംമൂട് മീഡിയാ വില്ലേജില്‍ നടക്കുന്ന ഫാന്‍സ് അസോസിയേഷന്‍ ജനറല്‍ ബോഡി സമ്മേളനം നെഹ്‌റു ട്രോഫി മാധ്യമ അവാര്‍ഡ് ജേതാവ് ബിദിന്‍ എം. ദാസ് ഉദ്ഘാടനം ചെയ്യും. ഏഴിന് രാവിലെ ഒമ്പതിന് ചുണ്ടന്‍ വള്ളം ചമ്പക്കുളത്തുനിന്ന് ഘോഷയാത്രയായി കിടങ്ങറയില്‍ എത്തിക്കും. ഒമ്പത്, പത്ത് തീയതികളില്‍ സെലക്‌ഷന്‍ ട്രയല്‍ നടക്കും. 11ന് ആരംഭിക്കുന്ന ക്യാമ്പ് 14 വരെ തീയതികളില്‍ തീവ്ര പരിശീലനവും 14, 15 തീയതികളില്‍ വള്ളംകളി പ്രഫഷണലുകളെ അണിനിരത്തിയുള്ള പരിശീലനവും നടക്കും. 15ന് ട്രയല്‍ മത്സരം 15ന് നടക്കുന്ന ട്രയല്‍ മത്സരത്തിന്‍റെ ഉദ്ഘാടനം ജോബ് മൈക്കിള്‍ എംഎല്‍എ നിര്‍വഹിക്കും. അന്നേദിവസം തന്നെ സിബിസി ബോര്‍ഡ് ഓഫ് ഡയറക്ടര്‍മാരുടെ സാന്നിധ്യത്തില്‍ ചുണ്ടന്‍വള്ളത്തിന്‍റെ വെഞ്ചരിപ്പും നടക്കും. 23ന് ഫാന്‍സ് അസോസിയേഷന്‍റെ നേതൃത്വത്തില്‍ നടക്കുന്ന വിളംബര പ്രയാണം മീഡിയാ വില്ലേജില്‍നിന്ന് ആരംഭിച്ച് പെരുന്നയില്‍ സമാപിക്കും. പരിപാടികളുടെ വിജയത്തിനായി ലോകമെങ്ങുമുള്ള ചങ്ങനാശേരിക്കാരെ സ്വാഗതം ചെയ്യുന്നതായി സംഘാടക സമിതി അറിയിച്ചു. പത്രസമ്മേളനത്തില്‍ സിബിസി പ്രസിഡന്‍റ് ജയിംസ് കല്ലുപാത്ര, സെക്രട്ടറി തോമസ് കൊടുപ്പുന്നക്കളം, ലീഡിംഗ് ക്യപ്റ്റന്‍ ബൈജപ്പന്‍ ചേന്നങ്കരി, പിആര്‍ഒ ബിനീഷ് തോമസ് എന്നിവും ഓര്‍നൈസിംഗ് കമ്മറ്റി അംഗങ്ങളും പങ്കെടുത്തു. നീക്കിയിരിപ്പ് തുക കാന്‍സര്‍ കെയര്‍ ഫണ്ടിലേക്ക് 2024ലെ നെഹ്‌റു ട്രോഫിയില്‍ പങ്കെടുത്ത സിബിസിയുടെ ചെലവുകഴിച്ചുള്ള രണ്ടുലക്ഷം രൂപ കാന്‍സര്‍ കെയര്‍ഫണ്ടായി കുറിച്ചി, വാഴപ്പള്ളി, മാടപ്പള്ളി, തൃക്കൊടിത്താനം, പായിപ്പാട് പഞ്ചായത്തുകളുടെയും ചങ്ങനാശേരി മുനിസിപ്പാലിറ്റിയുടെയും സിഡിഎസ് ചെയര്‍പേഴ്‌സണ്‍, വൈസ് ചെയര്‍ പേഴ്‌സണ്‍ എന്നിവർക്ക് ഡയറക്ടര്‍ബോര്‍ഡംഗങ്ങളായ ഷാജി പാലാത്ര, ടോമി അര്‍ക്കാഡിയ, ഗിരീഷ് കോനാട്ട്, അഡ്.വ പി.എസ്.ശ്രീധരന്‍, എച്ച്. മുസമ്മില്‍ എന്നിവര്‍ ചേര്‍ന്നു കൈമാറി. ടിന്‍സു മാത്യു, ടോമി സി. വാടയില്‍, ടോണി സി. കല്ലുകളം, ഡോ. ജോസഫ് തോമസ്, സി.എം. മാത്യു, ഷാജന്‍ ഓവേലില്‍, സോനു പതാലില്‍, ജോര്‍ജുകുട്ടി കട്ടപ്പുറം, ജോസഫ് ഏബ്രഹാം തെക്കേക്കര എന്നിവര്‍ പ്രസംഗിച്ചു.

ചങ്ങനാശേരി മുനിസിപ്പല്‍ സ്റ്റേഡിയം മുഖം മിനുക്കുന്നു

ചങ്ങനാശേരി: മുനിസിപ്പല്‍ സ്റ്റേഡിയത്തിന്‍റെ നവീകരണ പ്രവര്‍ത്തനങ്ങള്‍ അവസാന ഘട്ടത്തിലേക്ക്. കായികവകുപ്പ് അനുവദിച്ച 5.25 കോടി രൂപ വിനിയോഗിച്ചാണ് സ്റ്റേഡിയം നവീകരിക്കുന്നത്. 109 മീറ്റര്‍ നീളവും 69 മീറ്റര്‍ വീതിയുമുള്ള ഗ്രൗണ്ടില്‍ ആധുനിക സംവിധാനങ്ങളാണ് ഒരുങ്ങുന്നത്. പ്രഭാതസവാരിക്കായി പൊതുജനങ്ങള്‍ക്ക് പ്രയോജനപ്രദമാകുന്ന വാക്ക്-വേയും ഒരുങ്ങുന്നുണ്ട്. ഏറെ വര്‍ഷങ്ങളായി ശോച്യാവസ്ഥയിലായിരുന്ന സ്റ്റേഡിയം നവീകരിക്കുന്നത് സ്‌കൂള്‍, കോളജ് വിദ്യാര്‍ഥികള്‍ക്ക് ഏറെ പ്രയോജനം ചെയ്യും. ദേശീയതല ടൂര്‍ണമെന്‍റുകള്‍ക്ക് അനുയോജ്യമായ എല്‍ഇഡി ഫ്ലഡ്‌ലിറ്റ് സ്ഥാപിക്കല്‍, ഫെന്‍സിംഗ്, കേര്‍ബ് പണികള്‍ എന്നിവ പൂര്‍ത്തീകരിച്ചു. ഇറക്കുമതി ചെയ്ത ബര്‍മൂഡ ഗ്രാസാണ് ഗ്രൗണ്ടിലുപയോഗിക്കുന്നത്. നിലവില്‍ അത് ഗ്രൗണ്ടില്‍ വച്ചുപിടിപ്പിക്കുന്നതിന്‍റെ പണികള്‍ പൂര്‍ത്തീകരിച്ചു വരികയാണ്. ഗ്രൗണ്ട് പരിപാലനത്തിനായി സ്പ്രിംക്ലര്‍ സംവിധാനവും ദിവസേന 20,000 ലിറ്റര്‍ വെള്ളത്തിന്‍റെ ലഭ്യത ഉറപ്പാക്കാനായി അണ്ടര്‍ഗ്രൗണ്ട് വാട്ടര്‍ ടാങ്കും പമ്പ് റൂമും ഒരുക്കിയിട്ടുണ്ട്. 77,500 ചതുരശ്ര അടി വിസ്തീര്‍ണമുള്ള ഫുട്‌ബോള്‍ ഗ്രൗണ്ടിനു പുറമേ മഡ് വോളിബോള്‍ കോര്‍ട്ട്, ക്രിക്കറ്റ് പ്രാക്ടീസ് പിച്ച്, എയര്‍ കണ്ടീഷന്‍ഡ് ഇന്‍ഡോര്‍ ജിം എന്നീ സൗകര്യങ്ങളുമൊരുങ്ങുന്നുണ്ട്. ഒരേസമയം രണ്ടായിരത്തില്‍പ്പരം കാണികളെ ഉള്‍ക്കൊള്ളിക്കാവുന്ന ഗാലറിയുടെ ടെന്‍സൈല്‍ റൂഫിംഗിന്‍റെ പണികള്‍ പുരോഗമിക്കുന്നു. വസ്ത്രം മാറുന്നതിനുള്ള മുറിയും സ്ത്രീകള്‍ക്കും പുരുഷന്മാര്‍ക്കും ടോയ്‌ലറ്റ് സൗകര്യവും സജ്ജീകരിച്ചിട്ടുണ്ട്. സെപ്റ്റംബര്‍ അവസാനത്തോടെ നവീകരണ പ്രവര്‍ത്തനങ്ങള്‍ പൂര്‍ത്തിയാക്കി സ്റ്റേഡിയം ഉദ്ഘാടനം ചെയ്യാനാണ് ലക്ഷ്യമിടുന്നതെന്ന് ജോബ് മൈക്കിള്‍ എംഎല്‍എ പറഞ്ഞു.

പ്രഫ.എം.കെ. സാനു അനുസ്മരണം

തലയോലപ്പറമ്പ്: വൈക്കം മുഹമ്മദ് ബഷീർ സ്മാരക സമിതിയുടെ ആഭിമുഖ്യത്തിൽ പ്രഫ. എം.കെ. സാനുവിന്‍റെ നിര്യാണത്തിൽ അനുസ്മരണ യോഗം നടത്തി. തലയോലപ്പറമ്പ് ഫെഡറൽ നിലയത്തിൽ നടന്ന യോഗം മുൻ സ്പീക്കർ വി.എം. സുധീരൻ ഉദ്ഘാടനം ചെയ്തു. മോഹൻ.ഡി. ബാബു അധ്യക്ഷത വഹിച്ചു. സമിതി ജനറൽ സെക്രട്ടറി പി.ജി. ഷാജിമോൻ, എം. ഗോപാലകൃഷ്ണൻ, എം.കെ. ഷിബു, ആര്യ കരുണാകരൻ, കെ.ഡി. ദേവരാജൻ, അഡ്വ. ശ്രീകാന്ത് സോമൻ, ഡി. കുമാരി കരുണാകരൻ തുടങ്ങിയവർ പങ്കെടുത്തു.

പനമ്പുകാട് കായലോരത്തെ തകർന്ന സംരക്ഷണഭിത്തി പുനർനിർമിക്കണം

ഉദയനാപുരം: വൈക്കം - പനമ്പുകാട് റോഡിലെ കായലോരത്തുള്ള തകർച്ചാഭീഷണിയിലായ കലുങ്കിന്‍റെ സമീപറോഡ് കരിങ്കൽ സംരക്ഷണഭിത്തിയടക്കം കായലിലേക്ക് ഇടിഞ്ഞുതാണത് അപകടത്തിനിടയാക്കുന്നു. കായലും നാട്ടുതോടും ചേരുന്ന ഭാഗത്ത് 30 വർഷം മുമ്പ് നിർമിച്ച കലുങ്ക് പാലം കാലപ്പഴക്കത്താൽ ജീർണിച്ച് കോൺക്രീറ്റ് അടർന്ന് തുരുമ്പിച്ചു ദ്രവിച്ച കമ്പികൾ തെളിഞ്ഞ നിലയിലാണ്. കലുങ്കിനോടു ചേർന്ന ഭാഗം മുതൽ 20 മീറ്ററോളം ദൂരം കരിങ്കൽക്കെട്ട് കായലിലേക്ക് ഇടിഞ്ഞുതാണ നിലയിലാണ്. വീതികുറഞ്ഞ റോഡിലൂടെ വരുന്ന വാഹനം കലുങ്കിറങ്ങുമ്പോൾ വാഹനം ഒതുക്കാനാകാതെ ഇരുചക്ര വാഹനയാത്രികർ കായലിൽ പതിക്കുന്ന സ്ഥിതിയിലാണ്. ഏതാനും മാസങ്ങൾക്കു മുമ്പ് കലുങ്ക് ഇറങ്ങുന്നതിനിടയിൽ ഇരുചക്ര വാഹനത്തിലെത്തിയ യുവാവ് സംരക്ഷണ ഭിത്തി ഇടിഞ്ഞുതാണ ഭാഗത്തുകൂടി കായലിലേക്കു പതിച്ചിരുന്നു. പ്രദേശവാസികൾ ഉടൻ കായലിൽച്ചാടി രക്ഷിച്ചതിനാൽ ആളപായം ഒഴിവായി. കായലോരത്തെ കരിങ്കൽ സംരക്ഷണ ഭിത്തി പുനർനിർമിച്ച് ഗതാഗതം സുരക്ഷിതമാക്കണമെന്നാണ് നാട്ടുകാരുടെ ആവശ്യം.

നിരീക്ഷണ കാറകൾ ഗുണനിലവാരമില്ലാത്തതെന്ന്

തലയോലപ്പറമ്പ്: മാലിന്യനിക്ഷേപം കണ്ടെത്തുന്നതിനായി പഞ്ചായത്ത് തലയോലപ്പറമ്പിൽ സ്ഥാപിച്ച കാമറകൾ ഗുണനിലവാരമില്ലാത്തതാണെന്ന് ആരോപണം. 9.5 ലക്ഷം രൂപ വിനിയോഗിച്ച് പഞ്ചായത്തിലെ പ്രധാന കേന്ദ്രങ്ങളിൽ 20 സോളാർ നിരീക്ഷണ കാമറകളാണ് സ്ഥാപിച്ചത്. പൊതുവിപണിയിൽ 13,500 രൂപയ്ക്ക് ലഭിക്കുന്ന കാമറകൾ തലയോലപ്പറമ്പിലെ ഏജൻസി തൊടുപുഴ നഗരസഭയിൽ സ്ഥാപിച്ചിട്ടുണ്ടെന്നും ഇതേ ഗുണനിലവാരമുള്ള കാമറ 45,000 രൂപയ്ക്കാണ് തലയോലപ്പറമ്പ് പഞ്ചായത്ത് സ്ഥാപിച്ചതെന്നും പ്രതിപക്ഷാംഗങ്ങൾ ആരോപിച്ചു. പദ്ധതി നടത്തിപ്പിൽ ക്രമക്കേടുണ്ടെന്നും അന്വേഷണം നടത്തി കുറ്റക്കാർക്കെതിരേ നടപടി സ്വീകരിക്കണമെന്ന് യുഡിഎഫ് പാർലമെന്‍ററി പാർട്ടി നേതാവ് ജോസ് വേലിക്കകം, കോൺഗ്രസ് മണ്ഡലം പ്രസിഡന്‍റ് കെ.ഡി. ദേവരാജൻ എന്നിവർ വാർത്താസമ്മേളനത്തിൽ ആവശ്യപ്പെട്ടു.

പിറവം റോഡ് റെയില്‍വേ സ്റ്റേഷനില്‍ മതില്‍ ഇടിഞ്ഞുവീണു

കടുത്തുരുത്തി: പിറവം റോഡ് റെയില്‍വേ സ്റ്റേഷനു സമീപം പ്ലാറ്റ് ഫോമിനോടു ചേര്‍ന്നുള്ള മതില്‍ ഇടിഞ്ഞുവീണു. ഏകദേശം 200 മീറ്റര്‍ നീളമുള്ള മതിലിന്‍റെ നടുഭാഗമാണ് കഴിഞ്ഞദിവസം രാത്രി തകര്‍ന്നത്. മതിലിന്‍റെ നിര്‍മാണത്തിലെ അപാകതകളാണ് തകര്‍ച്ചയ്ക്കു കാരണമെന്ന് ആക്ഷേപമുണ്ട്. സമീപത്തുള്ള റോഡിലേക്കു മതില്‍ ചാഞ്ഞാണ് നില്‍ക്കുന്നത്. മതിലിന്‍റെ അടിഭാഗത്ത് വിള്ളലുകള്‍ കാണാം. ശേഷിക്കുന്ന മതില്‍ ഭാഗങ്ങങ്ങളും എപ്പോള്‍ വേണമെങ്കിലും നിലംപതിക്കാവുന്ന അവസ്ഥയിലാണ്. വാഹനയാത്രക്കാരുടെയും കാല്‍നടയാത്രക്കാരുടെയും സുരക്ഷ കണക്കിലെടുത്ത് റെയില്‍വേ അധികൃതര്‍ ഇടപെട്ട് അപകടാവസ്ഥ ഒഴിവാക്കണമെന്ന് ആവശ്യമുയര്‍ന്നിട്ടുണ്ട്. രാത്രിയായതിനാല്‍ മതില്‍ ഇടിഞ്ഞു വീണ സമയത്ത് വാഹനങ്ങള്‍ ഒന്നും ഇതുവഴി സഞ്ചരിക്കാത്തതിനാല്‍ അപകടം ഒഴിവായി.

വൈക്കത്തെ രണ്ടു സ്കൂളുകളിൽ സ്റ്റേഡിയം നിർമാണോദ്ഘാടനം 14ന്

വൈക്കം: സംസ്ഥാന സർക്കാരിന്‍റെ 2024-25 സാമ്പത്തിക വർഷത്തിലെ ബജറ്റിൽ ഉൾപ്പെടുത്തി വൈക്കത്ത് അനുവദിച്ച രണ്ടു സ്റ്റേഡിയങ്ങളുടെ നിർമാണോദ്ഘാടനം 14ന് കേരള കായികവകുപ്പ് മന്ത്രി വി. അബ്ദുറഹ്‌മാൻ നിർവഹിക്കും. 2.5 കോടി രൂപ വിനിയോഗിച്ച് നിർമിക്കുന്ന വൈക്കം തെക്കേനട ഗവൺമെന്‍റ് ഹയര്‍ സെക്കന്‍ഡറി സ്‌കൂൾ സ്റ്റേഡിയത്തിന്‍റെ നിർമാണോദ്ഘാടനം സ്കൂൾ ഗ്രൗണ്ടിൽ രാവിലെ 10.30നും രണ്ടു കോടി രൂപ വിനിയോഗിച്ച് നിർമിക്കുന്ന വൈക്കം വെസ്റ്റ് ഗവൺമെന്‍റ് വൊക്കേഷണല്‍ ഹയര്‍ സെക്കന്‍ഡറി സ്‌കൂൾ സ്റ്റേഡിയത്തിന്‍റെ ഉദ്ഘാടനം രാവിലെ 11.30നും നടക്കും. രണ്ടു സ്‌കൂൾ സ്‌റ്റേഡിയങ്ങളിലും ഫുട്‌ബോള്‍, വോളിബോള്‍, ബാഡ്മിന്‍റണ്‍ കോര്‍ട്ടുകള്‍ അടക്കമുള്ള നിർമാണപ്രവർത്തനങ്ങളാണ് നടക്കുന്നത്. വൈക്കം തെക്കേനട ഗവൺമെന്‍റ് ഹയര്‍ സെക്കന്‍ഡറി സ്‌കൂളില്‍ സ്റ്റേഡിയത്തിനു പുറമേ ഒരു അത്‌ലറ്റിക് ട്രാക്കും ലോംഗ്ജംപ് പിറ്റടക്കം നിര്‍മിക്കുന്ന രീതിയിലാണ് പ്ലാന്‍ തയാറാക്കിയിട്ടുള്ളത്. സർക്കാർ മേഖലയിലെ ആദ്യത്തെ ടർഫ് സ്റ്റേഡിയത്തിന്‍റെ ഉദ്ഘാടനം കഴിഞ്ഞ മാസം അക്കരപ്പാടത്ത് കായികവകുപ്പ് മന്ത്രി നിർവഹിച്ചിരുന്നു. വെള്ളൂർ പഞ്ചായത്തിലെ ഇറുമ്പയം പെരുന്തട്ട് സ്റ്റേഡിയത്തിന്‍റെ നിർമാണപ്രവർത്തനം അവസാനഘട്ടത്തിലാണ്.

മാഞ്ഞൂര്‍ പഞ്ചായത്തില്‍ മണ്ണെടുപ്പ് നടത്തിയ വാഹനങ്ങള്‍ അധികൃതരെത്തി പിടികൂടി

കോതനല്ലൂര്‍: ജില്ലയില്‍ മണ്ണു ഖനന നിരോധനം നിലനില്‍ക്കേ മാഞ്ഞൂര്‍ പഞ്ചായത്തില്‍ മണ്ണെടുപ്പു നടത്തിയ വാഹനങ്ങള്‍ റവന്യു, പോലീസ് അധികൃതരെത്തി പിടികൂടി. മാഞ്ഞൂര്‍ പഞ്ചായത്ത് മേഖലയില്‍ അനധികൃതമായി മണ്ണെടുപ്പ് നടക്കുന്നതായി വിവരമറിഞ്ഞെത്തിയാണ് നടപടി. ജില്ലാ കളക്ടര്‍ക്കു ലഭിച്ച പരാതിയില്‍ പരിശോധനയ്‌ക്കെത്തിയ സംഘം നാലു ടിപ്പര്‍ ലോറികളും രണ്ടു ജെസിബിയും പിടിച്ചെടുത്തു. മാഞ്ഞൂര്‍ പഞ്ചായത്തിലെ കൊണ്ടൂകാലാ ഭാഗത്തു നിന്നുമാണ് ലോറികളും ജെസിബിയും പിടികൂടിയത്. പോലീസ് വേഷം മാറിയെത്തിയാണ് വാഹനങ്ങള്‍ പിടികൂടിയത്. വീടു നിര്‍മാണത്തിനെന്ന പേരില്‍ അനുമതി വാങ്ങി പഞ്ചായത്തിന്‍റെ വിവിധ പ്രദേശങ്ങളില്‍നിന്നു വ്യാപകമായി മണ്ണു കടത്തുകയാണ്. അനധികൃതമായെടുക്കുന്ന മണ്ണുമായുള്ള ടിപ്പര്‍ ലോറികളുടെ ഓട്ടത്തില്‍ ഗ്രാമീണ റോഡുകള്‍ പലതും വ്യാപകമായി തകര്‍ന്നിരിക്കുയാണ്. കനത്ത മഴയും മണ്ണിടിച്ചിലും മൂലം ജില്ലയില്‍ ഇന്നലെ വരെ ഖനന നിരോധനം നില്‍നില്‍ക്കുകയാണ്. ഇതു കാറ്റില്‍പ്പറത്തിയാണ് അനധികൃത മണ്ണെടുപ്പ് നടത്തിയിരുന്നത്. മൂന്നു ദിവസത്തിലേറേയായി കനത്ത മഴയത്തും മണ്ണെടുപ്പ് നടക്കുന്നതിനെത്തുടര്‍ന്ന് നാട്ടുകാര്‍ ജില്ലാ കളക്ടര്‍ക്ക് പരാതി നല്‍കിയിരുന്നു. തുടര്‍ന്നാണ് തഹസില്‍ദാരുടെ നേതൃത്വത്തില്‍ റവന്യു, പോലീസ് സംഘം സ്ഥലത്തെത്തി പരിശോധന നടത്തി വാഹനങ്ങള്‍ പിടികൂടിയത്. തുടര്‍ന്ന് സ്ഥല ഉടമയ്ക്കു സ്റ്റോപ്പ് മെമ്മോ നല്‍കിയതായും കോതനല്ലൂര്‍ വില്ലേജ് ഓഫീസര്‍ അറിയിച്ചു. പഞ്ചായത്തില്‍നിന്നും റവന്യു വകുപ്പില്‍നിന്നും മറ്റു വകുപ്പുകളില്‍നിന്നും ഭവന നിര്‍മാണത്തിനെന്ന പേരില്‍ പെര്‍മിറ്റും അനുമതിയും വാങ്ങി മണ്ണും, കല്ലുമെടുക്കുന്ന സംഘം സജീവമാണെന്നും ഇത്തരക്കാര്‍ക്കെതിരേ ശക്തമായ നടപടിയെടുക്കണമെന്നും നാട്ടുകാര്‍ ആവശ്യപ്പെടുന്നു. മുമ്പും പലതവണ ഇത്തരക്കാരെ പിടികൂടിയെങ്കിലും ദിവസങ്ങള്‍ക്കുള്ളില്‍ ഇവര്‍ വീണ്ടും സജീവമാകുകയാണ് പതിവെന്നും നാട്ടുകാര്‍ ചൂണ്ടിക്കാണിക്കുന്നു. മണ്ണ്, കല്ല് ഖനനം നടത്തുന്ന വാഹനങ്ങള്‍ക്ക് പലതിനും ശരിയായ രേഖഖകളില്ലെന്നും പിടികൂടുന്ന വാഹനങ്ങള്‍ പിഴയടച്ചു പുറത്തിറക്കി വീണ്ടും ഇതേ പണികള്‍ നടത്തുകയാണെന്നും ആക്ഷേപമുണ്ട്. ഇത്തരത്തില്‍ അനധികൃത പ്രവര്‍ത്തനം നടത്തുന്ന സംഘം മാഞ്ഞൂര്‍ കേന്ദ്രീകരിച്ചു പ്രവര്‍ത്തിക്കുന്നതായും പറയുന്നു.

അപകടകരമായി ചാഞ്ഞുനിന്ന വൈദ്യുതിത്തൂണുകൾ‌ പിഴുതുമാറ്റി

പെരുവ: പ്രതിഷേധങ്ങള്‍ക്കൊടുവില്‍ അപകടക്കെണിയൊരുക്കി റോഡിലേക്കു ചാഞ്ഞുനിന്ന വൈദ്യുതി തൂണുകള്‍ കെഎസ്ഇബി അധികൃതര്‍ പിഴുതു മാറ്റി. ലൈനുകള്‍ പുതിയ പോസ്റ്റുകളിലേക്കു മാറ്റിയിട്ടും അപകടാവസ്ഥയില്‍ റോഡിലേക്കു ചാഞ്ഞുനില്‍ക്കുന്ന പോസ്റ്റുകള്‍ സംബന്ധിച്ച വാര്‍ത്ത കഴിഞ്ഞ ദിവസം ദീപിക പ്രസിദ്ധീകരിച്ചിരുന്നു. ഇതേത്തുടര്‍ന്നാണ് നടപടി. കെഎസ്ഇബി പെരുവ സബ് ഡിവിഷന്‍റെ കീഴിലുള്ള കുന്നപ്പള്ളി ആക്യമാലി ജംഗ്ഷനില്‍നിന്നു മടത്താട്ട് കോളനി വരെയുള്ള വൈദ്യുതി തൂണുകളാണ് റോഡിലേക്കു മറിഞ്ഞുവീഴാറായ നിലയില്‍ അപകടാവസ്ഥയില്‍ സ്ഥിതി ചെയ്തിരുന്നത്. ഇതിലൂടെയുള്ള വൈദ്യുതി ലൈനുകള്‍ മാറ്റി പുതിയ തൂണുകളിലേക്കു സ്ഥാപിച്ചെങ്കിലും ചരിഞ്ഞുനില്‍ക്കുന്ന തൂണുകള്‍ മാറ്റാന്‍ അധികൃതര്‍ നടപടിയെടുത്തിരുന്നില്ല. ദിവസവും നൂറുകണക്കിന് വാഹനങ്ങളും കാല്‍നട യാത്രക്കാരും സഞ്ചരിക്കുന്ന വഴിയാണിത്. ചരിഞ്ഞു നില്‍ക്കുന്ന നിരവധി തൂണുകള്‍ മാറ്റിസ്ഥാപിച്ച വൈദ്യുതി ലൈനിന്‍റെ മധ്യത്തിലായിരുന്നു സ്ഥിതി ചെയ്തിരുന്നത്. വൈദ്യുതത്തൂണുകള്‍ മറിഞ്ഞുവീണാല്‍ വൈദ്യുതി ലൈന്‍ ഉള്‍പ്പെടെ പൊട്ടിവീഴാന്‍ സാധ്യത ഏറെയായിരുന്നു.

വൈക്കം താലൂക്ക് ആശുപത്രിക്ക് പുതിയ കെട്ടിടം ഒരുങ്ങുന്നു

വൈക്കം: വൈക്കത്തിന്‍റെ ആരോഗ്യമേഖലയ്ക്കു കൂടുതല്‍ കരുത്തേകി വൈക്കം താലൂക്ക് ആശുപത്രിയുടെ ആധുനിക നിലവാരത്തിലുള്ള പുതിയ കെട്ടിടനിര്‍മാണം പുരോഗമിക്കുന്നു. കിഫ്ബി വഴി 55.83 കോടി രൂപ ചെലവിലാണ് നിര്‍മാണം. 11504.32 ചതുരശ്ര മീറ്ററില്‍ സംസ്ഥാന ഹൗസിംഗ് ബോര്‍ഡാണ് നാലു നിലകളിലായി കെട്ടിടം നിര്‍മിക്കുന്നത്. നിലവില്‍ അവസാനഘട്ട നിര്‍മാണ പ്രവൃത്തികളായ ഇലക്‌ട്രിക്കല്‍ ജോലികള്‍, പ്ലംബിംഗ്, ടൈല്‍ പാകല്‍ എന്നിവയാണ് നടക്കുന്നത്. ഒ.പി, അത്യാഹിതവിഭാഗം, ഫാര്‍മസി, വിശ്രമിക്കാനുള്ള സ്ഥലം, റിസപ്ഷന്‍ എന്നിവ താഴത്തെ നിലയില്‍ പ്രവര്‍ത്തിക്കും. രണ്ടാം നിലയില്‍ സ്പെഷല്‍ ഒപികള്‍ നേത്രരോഗവിഭാഗം, ശിശുരോഗവിഭാഗം, ത്വക്‌രോഗ വിഭാഗം, യൂറോളജി, ഇഎന്‍ടി, കാര്‍ഡിയോളജി, പാലിയേറ്റീവ് കെയര്‍, പിഎംആര്‍ എന്നീ വിഭാഗങ്ങളും പ്രവര്‍ത്തിക്കും. മൂന്നാംനില പൂര്‍ണമായും വാര്‍ഡുകള്‍ക്കും മുറികള്‍ക്കുമായി മാറ്റിവച്ചിരിക്കുകയാണ്. 285 ബെഡുകളും 16 പേ വാര്‍ഡ് മുറികളുമാണുള്ളത്. ഇവിടെ ശൗചാലയ സൗകര്യവും ഉണ്ട്. നാലാം നിലയില്‍ രണ്ട് ഓപ്പറേഷന്‍ തിയറ്ററും ഒരു മൈനര്‍ ഓപ്പറേഷന്‍ തിയറ്ററും സര്‍ജിക്കല്‍ ഐസിയുവും പ്രവര്‍ത്തിക്കും. രണ്ടും മൂന്നും നാലും നിലകള്‍ 2346 മീറ്ററിലാണ് നിര്‍മാണം. എക്സ് റേ, അള്‍ട്രാ സൗണ്ട് സ്‌കാനിംഗ് എന്നിവയ്ക്കുള്ള സൗകര്യങ്ങളും ഉണ്ടാവും. കൂടാതെ നാല് ലിഫ്റ്റുകള്‍, വിശാലമായ പാര്‍ക്കിംഗ് സൗകര്യം, സീവേജ് ട്രീറ്റ്മെന്‍റ് പ്ലാന്‍റ്, സെക്യൂരിറ്റി ക്യാബിന്‍, ആംബുലന്‍സ് ഷെഡ്, ഇലക്ട്രിക്കല്‍ മുറി എന്നിവയും ഇതിനോടനുബന്ധിച്ച് ഉണ്ടാവും. ടെറസില്‍ സോളാര്‍ പാനലുകളും സജ്ജമാക്കും. നിലവില്‍ വൈക്കം താലൂക്ക് ആശുപത്രി പ്രവര്‍ത്തിക്കുന്നത് വനിതാ-ശിശു സംരക്ഷണ ആശുപത്രി കെട്ടിടത്തിലാണ്. ദിവസേന ആയിരത്തിനടുത്ത് രോഗികള്‍ ഒപിയിലെത്തുന്ന വൈക്കം താലൂക്ക് ആശുപത്രിയില്‍ 35 ഡോക്ടര്‍മാരുടെ സേവനം ലഭ്യമാണ്. പുതിയ കെട്ടിടവും സൗകര്യങ്ങളും വരുന്നതോടെ വൈക്കത്തിന്‍റെ ആരോഗ്യമേഖലയുടെ സമഗ്രവികസനം സാധ്യമാകുമെന്നും ആറുമാസത്തിനുള്ളില്‍ കെട്ടിടംപണി പൂര്‍ത്തിയാക്കി പൊതുജനങ്ങള്‍ക്കായി തുറന്നുകൊടുക്കുമെന്നും സി.കെ. ആശ എംഎല്‍എ പറഞ്ഞു.

അധിക വാറന്‍റി കാലയളവില്‍ സേവനം നിഷേധിച്ച കമ്പനിക്ക് പിഴയിട്ട് കമ്മീഷന്‍

കോട്ടയം: അധിക വാറന്‍റി കാലയളവില്‍ കേടായ ടിവി നന്നാക്കി നല്‍കാതിരുന്നതിനു സോപ്പര്‍ നോയിഡ എന്ന കമ്പനിക്ക് പിഴ ചുമത്തി ജില്ലാ ഉപഭോക്തൃ തര്‍ക്ക പരിഹാര കമ്മീഷന്‍. കറുകച്ചാല്‍ സ്വദേശി മാത്യു നല്‍കിയ പരാതിയിലാണ് ഉത്തരവ്. 30 ദിവസത്തിനുള്ളില്‍ ടിവി പ്രവര്‍ത്തനക്ഷമമാക്കി നല്‍കുകയോ ഒന്‍പത് ശതമാനം പലിശയോടുകൂടി 10,000 രൂപ തിരികെ നല്‍കുകയോ ചെയ്യണം. നഷ്ടപരിഹാരമായി 10,000 രൂപയും കോടതി ചെലവിലേക്കായി 2,000 രൂപയും നല്‍കണം. 2021 ഓഗസ്റ്റ് 20 ന് തിരുവല്ലയിൽ‍നിന്ന് 25,500 രൂപയ്ക്ക് ഒരു വര്‍ഷ വാറണ്ടിയുള്ള എം വണ്‍ ടിവിക്കു സോപ്പര്‍ നോയിഡ എന്ന കമ്പനിയുടെ രണ്ടുവര്‍ഷത്തെ അധിക വാറന്‍റി മാത്യു എടുത്തിരുന്നു. 2024 ഫെബ്രുവരിയില്‍ ടിവി തകരാറിലായി. ഏപ്രിലില്‍ സോപ്പര്‍ നോയിഡ കമ്പനി ഡിസ്‌പ്ലേ മാറ്റി നല്‍കിയെങ്കിലും മൂന്നാഴ്ചക്കുശേഷം തകരാര്‍ ആവര്‍ത്തിച്ചു. ഇത് കമ്പനിയെ അറിയിച്ചപ്പോള്‍ പരാതി നിരസിച്ചതോടെയാണ് കോട്ടയം ഉപഭോക്തൃ തര്‍ക്ക പരിഹാര കമ്മീഷനില്‍ പരാതി നല്‍കിയത്. പരാതി വിശദമായി പരിശോധിച്ച അഡ്വ. വി.എസ്. മനുലാല്‍ പ്രസിഡന്‍റും അഡ്വ. ആര്‍. ബിന്ദു, കെ.എം. ആന്‍റോഎന്നിവര്‍ അംഗങ്ങളുമായിട്ടുള്ള ജില്ലാ ഉപഭോക്തൃതര്‍ക്ക പരിഹാര കമ്മീഷന്‍ വാറന്‍റി പീരിയഡില്‍ നല്‍കേണ്ട സേവനം സോപ്പര്‍ നോയിഡ നല്‍കിയിട്ടില്ലെന്ന് കണ്ടെത്തി ഉത്തരവിടുകയായിരുന്നു.

അയ്മനത്ത് മണ്ണ് പരിശോധനാ കാമ്പയിന്‍

കോട്ടയം: ജില്ലാ മണ്ണ് പരിവേഷണ കാര്യാലയവും കാര്‍ഷികവികസന കര്‍ഷക്ഷേമ വകുപ്പും ചേര്‍ന്ന് അയ്മനം പഞ്ചായത്ത് കമ്യൂണിറ്റി ഹാളില്‍ ബ്ലോക്കുതല മണ്ണുപരിശോധനാ കാമ്പയിന്‍ നടത്തി. ഏറ്റുമാനൂര്‍ ബ്ലോക്ക് പഞ്ചായത്ത് പ്രസിഡന്‍റ് ആര്യാ രാജന്‍ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് വിജി രാജേഷ് അധ്യക്ഷത വഹിച്ചു. മണ്ണുപരിശോധനയുടെ അടിസ്ഥാനത്തിലുള്ള ശാസ്ത്രീയ മണ്ണ് പരിപാലനത്തെക്കുറിച്ച് ബോധവത്കരണം നടത്തുകയാണ് ലക്ഷ്യം. സമഗ്ര പച്ചക്കറി ഉത്പാദന യജ്ഞത്തിന്‍റെ വിത്ത് വിതരണോദ്ഘാടനം ഏറ്റുമാനൂര്‍ ബ്ലോക്ക് പഞ്ചായത്ത് വൈസ് പ്രസിഡന്‍റ് എ.എം. ബിന്നു നിര്‍വഹിച്ചു. നീണ്ടൂര്‍ പഞ്ചായത്ത് പ്രസിഡന്‍റ് വി.കെ പ്രദീപ്, അതിരമ്പുഴ പഞ്ചായത്ത് പ്രസിഡന്‍റ് ജോസ് അമ്പലക്കുളം, അയ്മനം പഞ്ചായത്ത് വൈസ് പ്രസിഡന്‍റ് മനോജ് കരീമഠം, ഏറ്റുമാനൂര്‍ ബ്ലോക്ക് പഞ്ചായത്തംഗം കെ.കെ ഷാജിമോന്‍, കുമരകം പഞ്ചായത്തംഗം സ്മിത സുനില്‍, അയ്മനം പഞ്ചായത്തംഗം കെ.ആര്‍. ജഗദീഷ്, മണ്ണുപര്യവേക്ഷണ കേന്ദ്രം അസിസ്റ്റന്‍റ് ഡയറക്ടര്‍ എന്‍.വി. ശ്രീകല, സോയില്‍ സര്‍വേ ഓഫീസര്‍ നിത്യചന്ദ്ര, കുമരകം പ്രാദേശിക ഗവേഷണകേന്ദ്രം അസോസിയേറ്റ് പ്രഫ. ഡോ. വി.എസ്. ദേവി, ഏറ്റുമാനൂര്‍ കൃഷി അസിസ്റ്റന്‍റ് ഡയറക്ടര്‍ ടി.ജ്യോതി, അയ്മനം കൃഷി ഓഫീസര്‍ ആര്‍. രമ്യാരാജ് എന്നിവര്‍ പങ്കെടുത്തു.

റെഡ് റണ്‍ മാരത്തണ്‍ മത്സരം

കോട്ടയം: രാജ്യാന്തര യുവജന ദിനാചരണത്തോടനുബന്ധിച്ച് കോളജ് വിദ്യാര്‍ഥികളില്‍ എച്ച്‌ഐവി, എയ്ഡ്‌സിനെക്കുറിച്ച് അവബോധം സൃഷ്ടിക്കുന്നതിനായി റെഡ് റണ്‍ മാരത്തണ്‍ മത്സരം നടത്തി. കേരള സ്റ്റേറ്റ് എയ്ഡ്സ് കണ്‍ട്രോള്‍ സൊസൈറ്റി, ജില്ലാ മെഡിക്കല്‍ ഓഫീസ്, ആരോഗ്യ കേരളം, നാഷണല്‍ സര്‍വീസ് സ്‌കീം എന്നിവയുടെ സംയുക്താഭിമുഖ്യത്തിലാണ് മത്സരം സംഘടിപ്പിച്ചത്. മാരത്തണ്‍ ആണ്‍കുട്ടികളുടെ വിഭാഗത്തില്‍ ഷിബിന്‍ ആന്‍റോ, കെ.എം. അജിത്, കെ.ജെ. ജീവന്‍ (മൂവരും എസ്ബി കോളജ്, ചങ്ങനാശേരി) എന്നിവര്‍ യഥാക്രമം ഒന്ന്, രണ്ട്, മൂന്ന് സ്ഥാനങ്ങള്‍ നേടി. പെണ്‍കുട്ടികളുടെ വിഭാഗത്തില്‍ കെ.എസ്. ശില്‍പ (അസംപ്ഷന്‍ കോളജ് ചങ്ങനാശേരി), എ.എം. അഞ്‌ജന (അല്‍ഫോന്‍സ കോളജ് പാലാ), കെ.പി. സരിക (അല്‍ഫോന്‍സ കോളജ് പാലാ) എന്നിവര്‍ ഒന്നും രണ്ടും മൂന്നും സ്ഥാനങ്ങള്‍ നേടി. ഒന്നാം സ്ഥാനം ലഭിച്ച ടീം 11ന് തൃശൂരില്‍ നടക്കുന്ന സംസ്ഥാനതല മത്സരത്തില്‍ പങ്കെടുക്കും. കോട്ടയം സിഎംഎസ് കോളജില്‍ നിന്നാരംഭിച്ച മാരത്തണ്‍ വെസ്റ്റ് പോലീസ് സ്റ്റേഷന്‍ സി.ഐ. പ്രശാന്ത് കുമാര്‍ ഫ്ലാഗ് ഓഫ് ചെയ്തു. ജില്ലാ മെഡിക്കല്‍ ഓഫീസര്‍ ഡോ.എന്‍. പ്രിയ വിജയികള്‍ക്കുള്ള സര്‍ട്ടിഫിക്കറ്റുകള്‍ വിതരണം ചെയ്തു.

ഹിരോഷിമാദിനം ആചരിച്ചു

പാമ്പാടി: വിമലാംബിക സീനിയര്‍ സെക്കന്‍ഡറി സ്‌കൂളില്‍ ഹിരോഷിമാ ദിനാചരണം നടത്തി. രണ്ടാം ലോകമഹായുദ്ധത്തോടനുബന്ധിച്ച് 80 വര്‍ഷങ്ങള്‍ക്കുമുമ്പ് അമേരിക്ക ജപ്പാനിലെ ഹിരോഷിമയില്‍ അണുബോംബ് വര്‍ഷിച്ചതിന്‍റെ അനുസ്മരണമാണ് കുട്ടികള്‍ സ്‌കൂള്‍ അങ്കണത്തില്‍ ഒത്തുചേര്‍ന്ന് സമാധാനറാലിയായി നടത്തിയത്. കുട്ടികള്‍ക്കായി പോസ്റ്റര്‍ മേക്കിംഗ്, കളറിംഗ് മത്സരങ്ങള്‍ എന്നിവയും സംഘടിപ്പിച്ചു. സ്‌കൂള്‍ മാനേജര്‍ റവ. ഡോ. പ്രദീപ് വാഴത്തറമലയില്‍ കുട്ടികള്‍ക്ക് സമാധാനസന്ദേശം നല്‍കി. പ്രിന്‍സിപ്പൽ റൂബി ബെന്നി, വൈസ് പ്രിന്‍സിപ്പൽ എ.ജെ. അഗസ്റ്റിന്‍ എന്നിവര്‍ പരിപാടികള്‍ക്ക് നേതൃത്വം നല്‍കി. കോട്ടയം: ഐപ്‌സോ ജില്ലാ കമ്മിറ്റിയുടെ നേതൃത്വത്തില്‍ തിരുനക്കര ഗാന്ധി ക്വയറില്‍ ഹിരോഷിമ ദിനം അനുസ്മരിച്ചു. ഐപ്‌സോ സംസ്ഥാന ജനറല്‍ സെക്രട്ടറി വി.ബി. ബിനു ഉദ്ഘാടനം ചെയ്തു. സംസ്ഥാന കമ്മിറ്റി അംഗം അനിയന്‍ മാത്യു അധ്യക്ഷത വഹിച്ചു. ജില്ലാ സെക്രട്ടറി കെ.ആര്‍. ശ്രീനിവാസന്‍, സംസ്ഥാന സെക്രട്ടറി ബൈജു വയത്ത്, പി.കെ. ആനന്ദക്കുട്ടന്‍, അര്‍ജുനന്‍ പിള്ള, ബി. ആനന്ദക്കുട്ടന്‍, കെ. ഗോപാലകൃഷ്ണന്‍, ജിതേഷ് ജെ. ബാബു, വി.കെ. ശാന്തമ്മ, നിതിന്‍ സണ്ണി, പി.ആര്‍. ബേബി, ജസ്റ്റിന്‍ നടരാജന്‍, കെ.വി. ഷാജി തുടങ്ങിയവര്‍ പ്രസംഗിച്ചു.

കഞ്ചാവുമായി ഇതരസംസ്ഥാന തൊഴിലാളി പിടിയില്‍

അതിരമ്പുഴ: കഞ്ചാവുമായി ഇതരസംസ്ഥാന തൊഴിലാളി പിടിയില്‍. ഒഡിഷ കാലഹണ്ടി സ്വദേശിയായ ദുസ്മന്ത് നായ്കാണ് പോലീസിന്‍റെ പിടിയിലായത്. ജില്ലാ ഡാന്‍സാഫ് ടീമും ഗാന്ധിനഗര്‍ പോലീസും സംയുക്തമായി നടത്തിയ പരിശോധനയിലാണ് പ്രതി പിടിയിലായത്. വില്‍പ്പനയ്ക്കായി സൂക്ഷിച്ചിരുന്ന 1.588 കിലോ കഞ്ചാവ് ഇയാളുടെ പക്കല്‍നിന്നു പിടിച്ചെടുത്തിട്ടുണ്ട്. അതിരമ്പുഴ എംജി യൂണിവേഴ്‌സിറ്റി റോഡില്‍ നിന്നാണ് പ്രതിയെ പിടികൂടിയത്. ഇയാളെ കോടതിയില്‍ ഹാജരാക്കി.

മീനച്ചിലാറ്റില്‍ നിര്‍നായ പെരുകി; മുന്നറിയിപ്പുമായി വനം വകുപ്പ്

കോട്ടയം: മീനച്ചിലാറ്റില്‍ നിര്‍നായകളുടെ എണ്ണം വര്‍ധിച്ച സാഹചര്യത്തില്‍ മുന്നറിയിപ്പുമായി വനം വകുപ്പ്. കുളക്കടവുകള്‍, ആറിനോടു ചേര്‍ന്നുള്ള റോഡ് സൈഡുകള്‍ എന്നിവിടങ്ങളില്‍ സാന്നിധ്യമുണ്ടെന്നും ജാഗ്രത പാലിക്കണമെന്നുമാണ് വനംവകുപ്പിന്‍റെ മുന്നറിയിപ്പ്. കുമരകം റോഡില്‍ ഇല്ലിക്കല്‍ പാലത്തിനു സമീപമുള്ള കുളിക്കടവില്‍ കുളിച്ചുകൊണ്ടിരുന്ന വേളൂര്‍ സ്വദേശി സി.ടി. കൊച്ചുമോന്‍റെ കാലില്‍ കഴിഞ്ഞ ദിവസം നിര്‍നായ കടിച്ചു പരിക്കേല്‍പ്പിച്ചതാണ് ഒടുവിലത്തെ സംഭവം. കഴിഞ്ഞ മാസം ആദ്യം നിര്‍നായയുടെ കടിയേറ്റു ചികിത്സ തേടിയ വേളൂര്‍ പാണംപടി കലയംകേരില്‍ ഇബ്രാഹിംകുട്ടിയുടെ ഭാര്യ നിസാനി മരണപ്പെട്ടിരുന്നു. വംശനാശ ഭീഷണി നേരിടുന്ന വിഭാഗത്തിൽപ്പെട്ടതിനാല്‍ നീര്‍നായയെ വേട്ടയാടിയാല്‍ തടവും പിഴയും ലഭിക്കുമെന്നും വനംവകുപ്പ് അധികൃതര്‍ മുന്നറിയിപ്പു നല്‍കുന്നു. മീനച്ചിലാറ്റില്‍ പേരൂര്‍, പൂവത്തുംമൂട്, പാറമ്പുഴ പ്രദേശങ്ങളിലും നിര്‍നായ ശല്യമുണ്ട്. പ്രജനനകാലത്തും കുഞ്ഞുങ്ങളുണ്ടായ ശേഷവും നിര്‍നായകള്‍ മനുഷ്യരെ അക്രമിക്കുന്നതായി വനംവകുപ്പ് അധികൃതര്‍ പറഞ്ഞു.

ജൂബിലിനിറവിൽ ദര്‍ശന: ആഘോഷം നാളെ

കോട്ടയം: കലാ-സംസ്‌കാരിക-വിദ്യാഭ്യാസ മേഖലകളില്‍ നാലു പതിറ്റാണ്ട് പൂര്‍ത്തിയാക്കുന്ന കോട്ടയം ദര്‍ശന കള്‍ച്ചറല്‍ സെന്‍ററിന്‍റെ റൂബി ജൂബിലി ആഘോഷങ്ങള്‍ക്ക് നാളെ തിരിതെളിയും. കോട്ടയം മാമ്മന്‍ മാപ്പിള ഹാളില്‍ ഉച്ചകഴിഞ്ഞ് 3.15ന് നടക്കുന്ന ചടങ്ങുകള്‍ മഹാരാഷ്ട്ര ഗവര്‍ണര്‍ സി.പി. രാധാകൃഷ്ണന്‍ ഉദ്ഘാടനം ചെയ്യും. തുടര്‍ന്ന് ചാവറ അനുസ്മരണപ്രഭാഷണവും ചാവറ എക്സലന്‍സ് അവാര്‍ഡ് വിതരണവും നടത്തും. മന്ത്രി വി.എന്‍. വാസവന്‍ ചടങ്ങില്‍ അധ്യക്ഷത വഹിക്കും. ഈ വര്‍ഷത്തെ ചാവറ എക്സലന്‍സ് പുരസ്‌കാരങ്ങള്‍ മുന്‍ ഗോവ ഗവര്‍ണര്‍ പി.എസ്. ശ്രീധരന്‍പിള്ളയ്ക്കും കാഞ്ഞിരപ്പള്ളി രൂപത ബിഷപ് മാര്‍ ജോസ് പുളിക്കലിനും സമ്മാനിക്കും. ചീഫ് വിപ്പ് ഡോ. എന്‍. ജയരാജ്, തിരുവഞ്ചൂര്‍ രാധാകൃഷ്ണന്‍ എംഎല്‍എ എന്നിവര്‍ മുഖ്യപ്രഭാഷണം നടത്തും. ചാണ്ടി ഉമ്മന്‍ എംഎല്‍എ ആശംസകള്‍ അര്‍പ്പിക്കും. സിഎംഐ പ്രൊവിന്‍ഷ്യാൾ റവ.ഡോ. ഏബ്രഹാം വെട്ടിയാങ്കല്‍ അനുഗ്രഹ പ്രഭാഷണം നടത്തും. ആതുരശുശ്രൂഷ, പുസ്തക രചന, വിദ്യാഭ്യാസ സംഭാവനകള്‍ പരിഗണിച്ച് കാരിത്താസ് ഹോസ്പിറ്റല്‍ ഡയറക്ടര്‍ റവ.ഡോ. ബിനു കുന്നത്ത്, കോട്ടയം പ്രസ് ക്ലബ് ജേണലിസം ഇന്‍സ്റ്റിറ്റ്യൂട്ട് ഡയറക്ടര്‍ തെക്കിന്‍കാട് ജോസഫ്, ബിസിഎം കോളജ് കോട്ടയം എന്നിവര്‍ക്ക് പ്രത്യേക ചാവറ അവാര്‍ഡുകള്‍ നല്‍കി ആദരിക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]