ADVERTISEMENT

ADVERTISEMENT

റോഡ് വൃത്തിയാക്കി കെഎല്‍എം മാതൃകയായി

മാടപ്പള്ളി: റോഡ് വൃത്തിയാക്കി കേരള ലേബര്‍ മൂവ്‌മെന്‍റ് മാടപ്പള്ളി മേരിമാതാ യൂണിറ്റ് മാതൃകയായി. മാടപ്പള്ളി പോസ്റ്റ് ഓഫീസ്പടി-കാലായിമേപ്പുറം റോഡാണ് കെഎല്‍എം യൂണിറ്റ് വൃത്തിയാക്കിയത്. ഭാരവാഹികളായ ജിജി കല്ലഞ്ചിറ, ഡാമിച്ചന്‍ തെക്കേക്കാരയ്ക്കാട്ട്, സോജി ചെന്നിക്കര, തുടങ്ങിയവര്‍ നേതൃത്വം നല്‍കി.

ADVERTISEMENT

‘കാതല്‍ പ്രാതല്‍’ നാലാം വര്‍ഷത്തിലേക്ക്

കാഞ്ഞിരപ്പള്ളി: കുന്നുംഭാഗം ഗവണ്‍മെന്‍റ് സ്‌കൂളിലെ ‘കാതല്‍ പ്രാതൽ’‍ പ്രഭാതഭക്ഷണ പരിപാടിയുടെ നാലാം വര്‍ഷത്തിലെ പദ്ധതിയുടെ ഉദ്ഘാടനം ചീഫ് വിപ്പ് ഡോ. എന്‍. ജയരാജ് നിര്‍വഹിച്ചു. സ്‌കൂളില്‍ അനുവദിച്ച റെഡ്ക്രോസ് യൂണിറ്റിന്‍റെ ഉദ്ഘാടനവും ചീഫ് വിപ്പ് നിര്‍വഹിച്ചു. ചിറക്കടവ് പഞ്ചായത്ത് പ്രസിഡന്‍റ് സി.ആര്‍. ശ്രീകുമാര്‍ അധ്യക്ഷത വഹിച്ചു. ജില്ലാ പഞ്ചായത്തംഗം ടി.എന്‍. ഗിരീഷ് കുമാര്‍, ബ്ലോക്ക് പഞ്ചായത്ത് മെംബര്‍ ബി. രവീന്ദ്രന്‍ നായര്‍, ചിറക്കടവ് പഞ്ചായത്ത് വൈസ് പ്രസിഡന്‍റ് സതി സുരേന്ദ്രന്‍, മെംബര്‍മാരായ സുമേഷ് ആന്‍ഡ്രൂസ്, കെ.എ. ഏബ്രഹാം, ഷാക്കി സജീവ് എന്നിവര്‍ പ്രസംഗിച്ചു.

എരുമേലിയിലെ കെഎസ്ആർടിസിയെ മാറ്റും; അപ്പീൽ നൽകുമെന്ന് എംഎൽഎ

എരുമേലി: കെട്ടിടം ദുർബലമായി അപകടത്തിലാണെന്നതു മുൻനിർത്തി എരുമേലിയിലെ കെഎസ്ആർടിസി ഓപ്പറേറ്റിംഗ് സെന്‍റർ ഇത്തവണത്തെ ശബരിമല സീസണിന് മുമ്പ് അനുയോജ്യമായ സ്ഥലം കണ്ടെത്തി മാറ്റി സ്ഥാപിക്കാൻ തീരുമാനം. ഓപ്പറേറ്റിംഗ് സെന്‍റർ ഉൾപ്പെട്ട സ്ഥലം സ്വകാര്യ വ്യക്തിക്കു മൂന്നു മാസത്തിനകം ഒഴിഞ്ഞു കൊടുക്കണമെന്ന പാലാ സബ് കോടതിയുടെ വിധി സ്റ്റേ ചെയ്യാൻ വേണ്ടി അപ്പീൽ ഹർജി ജില്ലാ കോടതിയിൽ നൽകാനും തീരുമാനിച്ചു. ഇന്നലെ എരുമേലി പഞ്ചായത്ത്‌ ഹാളിൽ ചേർന്ന യോഗത്തിലാണ് തീരുമാനങ്ങൾ. പൊളിച്ചുപണിയണം കോടതിവിധിക്കെതിരേ അപ്പീൽ ഹർജി സമർപ്പിക്കാൻ കെഎസ്ആർടിസി പൊൻകുന്നം എടിഒയെ ചുമതലപ്പെടുത്തിയെന്നും ഈ ഹർജിയിൽ ദേവസ്വം ബോർഡിനോടു കക്ഷി ചേരണമെന്നു നിർദേശിച്ചിട്ടുണ്ടെന്നും സെബാസ്റ്റ്യൻ കുളത്തുങ്കൽ എംഎൽഎ യോഗത്തിൽ അറിയിച്ചു. കോടതിവിധി പ്രകാരമല്ല ഓപ്പറേറ്റിംഗ് സെന്‍റർ ഒഴിയാൻ തീരുമാനിച്ചതെന്നും സെന്‍ററിലെ കെട്ടിടം അപകടത്തിലായതിനാലാണെന്നും അദ്ദേഹം പറഞ്ഞു. ഓപ്പറേറ്റിംഗ് സെന്‍റർ കെട്ടിടം തകർച്ചയിലും അപകടത്തിലുമാണ്. അറ്റകുറ്റപ്പണികൊണ്ടു ഗുണമില്ലെന്നും പൊളിച്ചുമാറ്റി പുതിയ കെട്ടിടം നിർമിക്കുന്നതാണ് ഉത്തമമെന്നും പൊതുമരാമത്ത്, ദേവസ്വം, ഗതാഗത വകുപ്പുകളിലെ എൻജിനിയർ വിഭാഗം ഉദ്യോഗസ്ഥർ റിപ്പോർട്ട് നൽകിയിരുന്നു. സ്ഥലം ഒഴിയില്ല പഴയ കെട്ടിടം പൊളിച്ചുമാറ്റി സെന്‍ററിൽ പുതിയ കെട്ടിടം നിർമിക്കണമെങ്കിൽ നിലവിലുള്ള കോടതിവിധി മൂലം കഴിയില്ലന്നു യോഗം വിലയിരുത്തി. അതേസമയം, ഈ സ്ഥലം സ്വകാര്യ വ്യക്തിയുടെ സ്വന്തമാണെന്നുള്ള അവകാശവാദം അംഗീകരിക്കാനാവില്ലെന്ന് എംഎൽഎ പറഞ്ഞു. അതുകൊണ്ടുതന്നെ സ്ഥലം ഒഴിഞ്ഞുകൊടുക്കാനാവില്ല. കേരളത്തിൽ ആദ്യമായി ജനകീയാസൂത്രണ പദ്ധതിയിലൂടെ 1998ൽ ജനങ്ങൾ നിർമിച്ച കെട്ടിടമാണ് ഓപ്പറേറ്റിംഗ് സെന്‍റർ എന്നിരിക്കേ അന്നൊന്നും ഉന്നയിക്കാത്ത തർക്കവും അവകാശവാദവും ഇപ്പോൾ എങ്ങനെ അംഗീകരിക്കാനാകുമെന്ന് എംഎൽഎ ചോദിച്ചു. വര്‍ഷങ്ങളായി ദേവസ്വം ബോര്‍ഡിന്‍റെ ഉടമസ്ഥതയിലുണ്ടായിരുന്ന ഭൂമിയിലാണ് സെന്‍റർ പ്രവർത്തിക്കുന്നത്. ഇത് അന്യാധീനപ്പെടാനോ നഷ്ടപ്പെടാനോ അനുവദിക്കില്ലെന്നും എല്ലാ നിയമനടപടികളും ഇതിനായി സ്വീകരിക്കുമെന്നും എംഎല്‍എ പറഞ്ഞു. പഞ്ചായത്ത്‌ പ്രസിഡന്‍റ് സുബി സണ്ണി, ബ്ലോക്ക് അംഗം ടി.എസ്. കൃഷ്ണകുമാര്‍, ദേവസ്വം ബോര്‍ഡ് അസിസ്റ്റന്‍റ് എൻജിനിയർ ഹാരീഷ്, കെഎസ്ആര്‍ടിസി ഡിടിഒ എസ്. രമേശ്, പൊൻകുന്നം എടിഒ എസ് . അനില്‍കുമാര്‍, സെന്‍റർ ചാര്‍ജ് ഓഫീസർ ഷാജി കെ. പാലക്കാട്ട്, എഡിഇ ഗിരീഷ്, സൂപ്രണ്ട് രജനിമോള്‍, ഓവര്‍സിയര്‍ കിരണ്‍ എന്നിവരും പഞ്ചായത്ത്‌ അംഗങ്ങളും വിവിധ രാഷ്‌ട്രീയകക്ഷി നേതാക്കളും യോഗത്തിൽ പങ്കെടുത്തു. സ്ഥലം കണ്ടെത്താൻ നിർദേശം ഓപ്പറേറ്റിംഗ് സെന്‍റർ മാറ്റാൻ അനുയോജ്യമായ സർക്കാർ സ്ഥലമോ സ്വകാര്യ സ്ഥലമോ കണ്ടെത്താൻ കെഎസ്ആർടിസിക്കും പഞ്ചായത്തിനും യോഗത്തിൽ ചുമതല നൽകി. അനുയോജ്യമായ സ്ഥലം ലഭിക്കുന്നതോടെ സെന്‍റർ മാറ്റുന്നതിനു സർക്കാർ അനുമതി തേടും. ഇതിനായി ദേവസ്വം, ഗതാഗതമന്ത്രിമാരുടെ സാന്നിധ്യത്തിൽ ഉന്നതതല യോഗം തിരുവനന്തപുരത്തു ചേരുമെന്നും സ്വകാര്യ ഭൂമിയാണ് കിട്ടുന്നതെങ്കിൽ വാടക നൽകുന്നത് സംബന്ധിച്ച് ഈ യോഗത്തിൽ ചർച്ച ചെയ്തു തീരുമാനിക്കുമെന്നും എംഎൽഎ പറഞ്ഞു. യോഗത്തിനു ശേഷം എംഎൽഎയുടെ നേതൃത്വത്തിൽ ഓപ്പറേറ്റിംഗ് സെന്‍ററിന്‍റെ ശോചനീയാവസ്ഥ സന്ദർശിച്ചു വിലയിരുത്തി. സെന്‍ററിൽ യോഗം ചേർന്നു ബസ് സർവീസുകൾ കാര്യക്ഷമമാക്കുന്നത് സംബന്ധിച്ച് ഉദ്യോഗസ്ഥരുമായി ചർച്ച നടത്തുകയും ചെയ്തു.

വന്യമൃഗ ആക്രമണത്തിനെതിരേ കോൺഗ്രസ് ധർണ

മുണ്ടക്കയം ഈസ്റ്റ്‌: പെരുവന്താനം പഞ്ചായത്തിൽ നിരന്തരമായി ഉണ്ടായിക്കൊണ്ടിരിക്കുന്ന കാട്ടാന ആക്രമണത്തിൽ പ്രതിഷേധിച്ച് കോൺഗ്രസ്‌ പെരുവന്താനം മണ്ഡലം കമ്മിറ്റിയുടെ നേതൃത്വത്തിൽ മുണ്ടക്കയം മുപ്പത്തഞ്ചാംമൈൽ വനംവകുപ്പ് ഓഫീസിനു മുന്നിൽ ധർണയും ജംഗ്ഷനിൽ ഉപവാസ സമരവും നടത്തി. ഇടുക്കി ഡിസിസി പ്രസിഡന്‍റ് സി.പി. മാത്യു ഉദ്ഘാടനം ചെയ്തു. മണ്ഡലം പ്രസിഡന്‍റ് ഷിനോജ് ജേക്കബ് അധ്യക്ഷത വഹിച്ചു. കോൺഗ്രസ്‌ ബ്ലോക്ക്‌ പ്രസിഡന്‍റ് ജോർജ് കൂറുമ്പുറം, നേതാക്കളായ വി.സി. ജോസഫ് വെട്ടിക്കാട്ട്, മധുസൂദനൻ, ജോൺ പി. തോമസ്, ഷാജഹാൻ മഠത്തിൽ, കെ.കെ. ജനാർദനൻ, നിജിനി ഷംസുദീൻ, കെ.എൻ. രാമദാസ്, കെ.ആർ. വിജയൻ, ശരത് ഒറ്റപ്ലാക്കൽ, ഷിയാസ് മൂത്തേടത്ത്, ഡോമിന സജി, എബിൻ കുഴിവേലി, ഷീബ ബിനോയ്‌, എൻ.എ. വഹാബ്, ടി.പി. ഹനീസ് തുടങ്ങിയവർ പ്രസംഗിച്ചു.

വാഴകളിൽ ഇലപ്പുള്ളി രോഗം പടരുന്നു; കർഷകർ കടുത്ത പ്രതിസന്ധിയിൽ

മുണ്ടക്കയം: വാഴകളിൽ ഇലപ്പുള്ളിരോഗം പടരുന്നത് സംസ്ഥാനത്തെ വാഴകർഷകരെ പ്രതിസന്ധിയിലാക്കുന്നു. കാലാവസ്ഥാവ്യതിയാനമാണ് ഇലപ്പുള്ളി രോഗം പടർന്നുപിടിക്കുവാൻ കാരണം. വാഴയുടെ ഇലകളിൽ മഞ്ഞനിറം പ്രത്യക്ഷപ്പെടുന്നതാണ് രോഗത്തിന്‍റെ ആദ്യ ലക്ഷണം. പിന്നീട് ഇത് മറ്റ് ഇലകളിലേക്ക് വ്യാപിക്കുകയും വാഴയുടെ വളർച്ച മുരടിച്ച് നശിക്കുകയുമാണ് ചെയ്യുന്നത്. ഏത്തവാഴകളിലാണ് ഇലപ്പുള്ളി രോഗം ഏറ്റവും കൂടുതൽ പിടിപെടുന്നത്. എന്നാൽ ഈ വർഷം മറ്റു വാഴകളിലേക്കും ഈ രോഗം വ്യാപിക്കുന്നുണ്ട്. മുൻ വർഷങ്ങളെ അപേക്ഷിച്ച് ഈ വർഷം ഇലപ്പുള്ളി രോഗം വ്യാപകമായാണ് വാഴകളിൽ പടർന്നുപിടിക്കുന്നത്. കാലാവസ്ഥാവ്യതിയാനമാണ് പ്രധാന കാരണമെന്ന് കൃഷി വിദഗ്ധർ പറയുന്നു. മേയ് മാസത്തിൽ ആരംഭിച്ച മഴ ഇടതടവില്ലാതെ പെയ്യുന്നതാണ് കുമിൾമൂലമുള്ള ഇലപ്പുള്ളി രോഗം വാഴകളിൽ പടരാൻ കാരണം. മുണ്ടക്കയം പഞ്ചായത്തിന്‍റെ പുഞ്ചവയൽ, 504, കണ്ണിമല അടക്കമുള്ള മേഖലകളിൽ രോഗം വ്യാപകമാണ്. ആദ്യ ലക്ഷണം കാണുന്പോൾതന്നെ കൂടുതൽ വാഴകളിലേക്ക് കുമിൾരോഗം പടരാതിരിക്കാൻ കർഷകർ വാഴയുടെ ഇലകൾ വെട്ടിമാറ്റും. ഇതു പലപ്പോഴും വാഴയുടെ വളർച്ചയെ സാരമായി ബാധിക്കും. രോഗം കൂടുതലായി പിടിപെട്ടാൽ വാഴ ചുവടെ പിഴുതുകളയേണ്ട ഗതികേടിലാണെന്നു കർഷകർ പറയുന്നു. പിഴുതു മാറ്റുന്ന വാഴകളും ഇലയും തോട്ടത്തിൽനിന്ന് ഏറെ ദൂരെ കൊണ്ടുപോയി നശിപ്പിച്ചു കളയണം. മറ്റു വാഴകളിലേക്കു രോഗം പടരാതിരിക്കാനാണ് ഇങ്ങനെ ചെയ്യുന്നത്. രോഗം പടർന്നുപിടിച്ചതോടെ ഓണം വിപണി ലക്ഷ്യമാക്കി വാഴക്കൃഷി ചെയ്ത കർഷകർക്ക് ഈ വർഷം നിരാശയാണ് ഫലം. പ്രദേശത്തെ നൂറുകണക്കിന് വാഴകളാണ് ഇലപ്പുള്ളി രോഗം പിടിപെട്ടതിനെത്തുടർന്ന് കർഷകർക്ക് വെട്ടിമാറ്റേണ്ടി വന്നത്. ഇതോടെ വായ്പെടുത്തും സ്ഥലം പാട്ടത്തിനെടുത്തും കൃഷിയിറക്കിയ കർഷകരാണ് ദുരിതത്തിലായത്.

പ്രതിഷേധം അടിസ്ഥാനരഹിതമെന്ന്

പാറത്തോട്: റോഡുപണി വൈകുന്നതിനെതിരേ പാറത്തോട് പഞ്ചായത്തിലെ കുന്നുംഭാഗം നിവാസികള്‍ ഉന്നയിച്ച ആരോപണം അടിസ്ഥാനരഹിതമെന്ന് പഞ്ചായത്ത് പ്രസിഡന്‍റ് കെ.കെ. ശശികുമാര്‍ പത്ര സമ്മേളനത്തില്‍ പറഞ്ഞു. 15-ാം വാര്‍ഡില്‍ കഴിഞ്ഞ വര്‍ഷത്തെ പദ്ധതിയില്‍ ഉള്‍പ്പെടുത്തി കുന്നുംഭാഗം റോഡ് നവീകരണത്തിനായി പത്തു ലക്ഷം രൂപ പഞ്ചായത്തില്‍നിന്ന് അനുവദിച്ചിരുന്നു. റോഡിന്‍റെ കയറ്റം കുറച്ച് സൈഡ് കോണ്‍ക്രീറ്റ് ചെയ്ത് റോഡ് നവീകരിക്കാനാണ് തുക വകയിരുത്തിയത്. കരാറുകാരന്‍ സമയബന്ധിതമായി പണി പൂര്‍ത്തിയാക്കുന്നതില്‍ വീഴ്ച വരുത്തിയതിനാല്‍ പ്രവൃത്തി അടിയന്തരമായി തുടരാന്‍ ആവശ്യപ്പെട്ടിട്ടുണ്ട്. എന്‍ജിനിയറിംഗ് വിഭാഗത്തില്‍ ഉദ്യോഗസ്ഥരുടെ കുറവുമൂലം പല പ്രവൃത്തികളും സമയബണ്ഡിതമായി പൂര്‍ത്തിയാക്കാന്‍ സാധിക്കാതെ വരുന്നുണ്ട്. കുന്നുംഭാഗം റോഡിന്‍റെ പണികള്‍ എത്രയും പെട്ടെന്ന് പൂര്‍ത്തിയാക്കാന്‍ വേണ്ട നടപടികള്‍ പഞ്ചായത്ത് ഭരണസമിതി സ്വീകരിച്ചിട്ടുണ്ട്. പഞ്ചായത്ത് പ്രസിഡന്‍റിനെ അപകീര്‍ത്തിപ്പെടുത്തുന്ന രീതിയില്‍ സോഷ്യല്‍ മീഡിയ വഴി പ്രചാരണം നടത്തുന്നവര്‍ക്കെതിരേയും കഴിഞ്ഞ ദിവസം പഞ്ചായത്ത് ഓഫീസിന്‍റെ പ്രവര്‍ത്തനങ്ങള്‍ തടസപ്പെടുത്തിയവര്‍ക്കെതിരേയും നിയമനടപടികള്‍ സ്വീകരിക്കുമെന്നും പ്രസിഡന്‍റ് പറഞ്ഞു. പത്രസമ്മേളനത്തില്‍ മെംബര്‍മാരായ ജോണിക്കുട്ടി മഠത്തിനകം, വിജയമ്മ വിജയലാല്‍, കെ.എ. സിയാദ്, ഡയസ് കോക്കാട്ട് എന്നിവരും പങ്കെടുത്തു.

പാലാ ളാലം പഴയ പള്ളിയില്‍ എട്ടുനോമ്പ് തിരുനാളും മരിയന്‍ കണ്‍വന്‍ഷനും

പാലാ: മരിയന്‍ തീര്‍ഥാടന കേന്ദ്രമായ പാലാ ളാലം പഴയ പള്ളിയില്‍ എട്ടു നോമ്പാചരണത്തിന്‍റെ ഭാഗമായി 25 മുതല്‍ സെപ്റ്റംബര്‍ എട്ടുവരെ മരിയന്‍ കണ്‍വന്‍ഷനും പരിശുദ്ധ കന്യകമറിയത്തിന്‍റെ ജനനത്തിരുനാളും 414-ാമത് കല്ലിട്ട തിരുനാളും സംയുക്തമായി നടത്തും. തിരുനാളിനൊരുക്കമായി 25 മുതല്‍ 29 വരെ മരിയന്‍ കണ്‍വന്‍ഷന്‍ ഉണ്ടായിരിക്കും. വൈകുന്നേരം അഞ്ചുമുതല്‍ രാത്രി ഒന്‍പതുവരെ നടക്കുന്ന കണ്‍വന്‍ഷന്‍ ഏഴുമുട്ടം താബോര്‍ ധ്യാനകേന്ദ്രം ഡയറക്ടര്‍ ഫാ. ജോര്‍ജി പള്ളിക്കുന്നേല്‍ നയിക്കും. 30നു വൈകുന്നേരം നാലിന് ബിഷപ് മാര്‍ ജോസഫ് കല്ലറങ്ങാട്ട് പുതിയ കൊടിമരത്തിന്‍റെ വെഞ്ചരിപ്പും തിരുനാള്‍ കൊടിയേറ്റും നിര്‍വഹിക്കും. തുടര്‍ന്ന് വിശുദ്ധ കുര്‍ബാന, സന്ദേശം, നൊവേന, തിരുസ്വരൂപ പ്രതിഷ്ഠ. വികാരി ഫാ. ജോസഫ് തടത്തില്‍ മുഖ്യകാര്‍മികത്വം വഹിക്കും. 30 മുതല്‍ സെപ്റ്റംബര്‍ ഏഴു വരെ തീയതികളിൽ പുലര്‍ച്ചെ 4.30 മുതല്‍ 5.30 വരെ ദിവ്യകാരുണ്യ ആരാധനയും ജപമാലയും രാവിലെ 5.30, 7.00, 9.30, വൈകുന്നരം 4.00, 7.00 എന്നീ സമയങ്ങളില്‍ വിശുദ്ധ കുര്‍ബാനയും നൊവേനയും വൈകുന്നേരം 5.45ന് ജപമാല പ്രദഷിണവും ഉണ്ടായിരിക്കും. സെപ്റ്റംബര്‍ ഒന്നിന് ഉച്ചകഴിഞ്ഞ് നാലിന് വിശുദ്ധ കുര്‍ബാന, സന്ദേശം, നൊവേന - ബിഷപ് മാര്‍ ജോസഫ് സ്രാമ്പിക്കല്‍. പ്രധാന തിരുനാള്‍ ദിനമായ സെപ്റ്റംബര്‍ എട്ടിന് പുലര്‍ച്ചെ 4.30നു ദിവ്യകാരുണ്യ ആരാധനയും ജപമാലയും. രാവിലെ 5.30, 7.00, 9.30, 12.30 - വിശുദ്ധ കുര്‍ബാന, സന്ദേശം, നൊവേന. ഉച്ചകഴിഞ്ഞ് 3.45ന് പ്രസുദേന്തി വാഴ്ച. നാലിന് തിരുനാള്‍ റാസയും നൊവേനയും. റവ.ഡോ. അഗസ്റ്റിന്‍ കൂട്ടിയാനി മുഖ്യ കാര്‍മികത്വം വഹിക്കും. ഫാ. മാത്യു കണിയാംപടിക്കല്‍, ഫാ. മാത്യു തെരുവന്‍കുന്നേല്‍, ഫാ. ആന്‍റണി വില്ലന്താനത്ത് എന്നിവര്‍ സഹകാര്‍മികത്വം വഹിക്കും. തുടര്‍ന്ന് ടൗണ്‍ ചുറ്റിയുള്ള തിരുനാള്‍ പ്രദഷിണം. വികാരി ഫാ. ജോസഫ് തടത്തില്‍, പാസ്റ്ററല്‍ അസിസ്റ്റന്‍റ് ഫാ. ജോസഫ് ആലഞ്ചേരി, സഹവികാരിമാരായ ഫാ. സ്‌കറിയ മേനാംപറമ്പില്‍, ഫാ. ആന്‍റണി നങ്ങാപറമ്പില്‍ തുടങ്ങിയവര്‍ തിരുനാള്‍ കര്‍മങ്ങള്‍ക്കും കൈക്കാരന്മാരായ ജോര്‍ജുകുട്ടി ഞാവള്ളില്‍, ബേബി ചക്കാലയ്ക്കല്‍, ടെന്‍സന്‍ വലിയകാപ്പില്‍, സാബു തേനംമാക്കല്‍ എന്നിവര്‍ തിരുനാള്‍ ആഘോങ്ങള്‍ക്കും നേതൃത്വം നൽകും.

ഇതു നടപ്പാലമല്ല, കെണിപ്പാലം

കൊല്ലപ്പള്ളി: കൊല്ലപ്പള്ളി-മേലുകാവ് റോഡില്‍ ഓട നിര്‍മാണത്തിന്‍റെ ഭാഗമായി സ്ഥാപിച്ച താത്കാലിക പാലം അപകടക്കെണിയായി. ഞായറാഴ്ച വൈകുന്നേരം പാലം ഒടിഞ്ഞുവീണ് ഒരാൾക്കു പരിക്കേറ്റു. കവലവഴിമുക്കിനും കടനാട് പുളിഞ്ചുവട് കവലയ്ക്കും മധ്യേ പണിയുന്ന കലുങ്കില്‍ താത്കാലികമായി നിര്‍മിച്ച തടിപ്പാലമാണ് നാട്ടുകാർക്കു പേടിസ്വപ്നമായത്. ആദ്യം ഇട്ട തടിപ്പാലം ഒടിഞ്ഞതിനെത്തുടർന്ന് ഇന്നലെ പുതിയ തടിപ്പാലം സ്ഥാപിച്ചു. പതിനഞ്ചോളം വീട്ടുകാര്‍ ഉപയോഗിക്കുന്ന റോഡില്‍ താത്കാലികമായി സ്ഥാപിച്ച പാലമാണ് ഒരു ദിവസത്തിനുള്ളില്‍ തകര്‍ന്നത്. പഴകി ദ്രവിച്ച തടിയാണ് പാലത്തിനായി ഉപയോഗിച്ചത്. ഇതിൽ കയറിയ നാട്ടുകാരനായ ഉന്നത എക്‌സൈസ് ഉദ്യോഗസ്ഥനാണ് പാലത്തടി ഒടിഞ്ഞുവീണു പരിക്കേറ്റത്. നാലു തടികള്‍ക്കു മീതെ പലകയും ആണിയും ഉപയോഗിച്ചു നിര്‍മിച്ച നടപ്പാലത്തിന്‍റെ ഒരു തടി ഒടിഞ്ഞുവീഴുകയായിരുന്നു. ആശുപത്രിയില്‍ ചികിത്സ തേടിയ ഇദ്ദേഹത്തിന് കൈക്കു മൂന്നു പൊട്ടലുണ്ട്. വിദ്യാര്‍ഥികള്‍ ഉള്‍പ്പെടെയുള്ളവര്‍ ആശങ്കയോടെയാണ് ഈ പാലത്തിൽ ക‍യറുന്നത്.

ഒഡീഷ സംഭവത്തിൽ കര്‍ശന നടപടി വേണം: കത്തോലിക്ക കോണ്‍ഗ്രസ്

ഇലഞ്ഞി: ഒഡീഷയില്‍ വൈദികരെയും കന്യാസ്ത്രീമാരെയും ആക്രമിച്ചതില്‍ കത്തോലിക്ക കോണ്‍ഗ്രസ് പ്രതിഷേധിച്ചു. രൂപത ഡയറക്ടര്‍ റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍ ഉദ്ഘാടനം ചെയ്തു. ഇലഞ്ഞി ഫൊറോന വികാരി ഫാ. ജോസഫ് ഇടത്തുംപറമ്പില്‍ അധ്യക്ഷത വഹിച്ചു. സംഭവത്തില്‍ കര്‍ശന നടപടി സ്വീകരിക്കണമെന്ന് യോഗം കേന്ദ്രസര്‍ക്കാരിനോട് ആവശ്യപ്പെട്ടു. ജനറല്‍ സെക്രട്ടറി ജോസ് വട്ടുകുളം, ജോയി കണിപറമ്പില്‍, സി.എം. ജോര്‍ജ്, ടോമി കണ്ണീറ്റുമ്യാലില്‍, രാജേഷ് പാറയില്‍, ബേബി ആലുങ്കല്‍, റോയ് ചുമ്മാര്‍, ഷാജി എറണ്യാകുളം, രാജു അരുകുഴിപ്പില്‍, രാജേഷ് കോട്ടയില്‍ എന്നിവര്‍ പ്രസംഗിച്ചു.

ബസ് കാത്തിരിപ്പുകേന്ദ്രങ്ങളുടെ നിര്‍മാണം

കടനാട്: ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി കടനാട് പഞ്ചായത്തിലെ കൊല്ലപ്പള്ളി-മേലുകാവ് റോഡില്‍ വാളികുളം എസ് വളവിലും എലിവാലി ജംഗ്ഷനിലും ബസ് കാത്തിരിപ്പ് കേന്ദ്രങ്ങളുടെ നിര്‍മാണം ആരംഭിച്ചു. വാളികുളം എസ് വളവില്‍ നടന്ന ഉദ്ഘാടനസമ്മേളനത്തില്‍ ജില്ലാ പഞ്ചായത്ത് മെംബർ രാജേഷ് വാളിപ്ലാക്കല്‍ ഉദ്ഘാടനം നിര്‍വഹിച്ചു. കടനാട് പഞ്ചായത്ത് പ്രസിഡന്‍റ് ജിജി തമ്പി അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് വി.ജി. സോമന്‍, ബ്ലോക്ക് പഞ്ചായത്ത് മെംബർ ബിജു പറത്താനം, പഞ്ചായത്ത് മെംബർ ജയ്സി സണ്ണി, ബെന്നി ഈരൂരിക്കല്‍, സജി നെല്ലന്‍കുഴി, രാജേഷ് കൊരട്ടിയില്‍, തമ്പി ഉപ്പുമാക്കല്‍, വി.കെ. മനോഹരന്‍, സാബു ഓടയ്ക്കല്‍, ബേബി വെട്ടിക്കുഴിയില്‍ തുടങ്ങിയവര്‍ പ്രസംഗിച്ചു.

തലനാട്ടിൽ പുറമ്പോക്കിൽ നിന്നിരുന്ന മരങ്ങൾ വെട്ടിയ നിലയിൽ

തലനാട്: പഞ്ചായത്തില്‍ മീനച്ചിലാറിന്‍റെ ഭാഗമായ തോടിന്‍റെ പുറമ്പോക്കില്‍നിന്നിരുന്ന വര്‍ഷങ്ങള്‍ പഴക്കമുള്ള മരങ്ങള്‍ സ്വകാര്യ വ്യക്തി വെട്ടിനിരത്തി. ലക്ഷങ്ങള്‍ വിലമതിക്കുന്ന ആഞ്ഞിലി അടക്കമുള്ള മരങ്ങളാണ് നശിപ്പിച്ചിരിക്കുന്നത്. തലനാട് പഞ്ചായത്ത് അഞ്ചാം വാര്‍ഡില്‍ ചാമപ്പാറയിലാണ് സംഭവം. ഏഴു വലിയ മരങ്ങള്‍ വെട്ടിയതായി തലനാട് പഞ്ചായത്ത് സെക്രട്ടറി നടത്തിയ പരിശോധനയില്‍ കണ്ടെത്തി. സ്വകാര്യ ഭൂമിയിലെ കൃഷിക്കു തടസമാകാതിരിക്കാനാണ് മരം വെട്ടിയതെന്ന് കരുതുന്നു. കുറേ മരത്തടികള്‍ കടത്തിയതായും സംശയിക്കുന്നു. മരച്ചില്ലകള്‍ വെട്ടി പുഴയില്‍ തള്ളിയിട്ടുമുണ്ട്. തീക്കോയി പള്ളിവാതുക്കല്‍ സ്വദേശിയാണ് ഇതിനു പിന്നിലെന്നാണ് സൂചന. വില്ലേജ് ഓഫീസര്‍ സ്ഥലം സന്ദര്‍ശിച്ച് വിലയിരുത്തിയശേഷം പരാതി നല്‍കും.

കര്‍ഷകര്‍ക്കൊപ്പം നില്‍ക്കാന്‍ രൂപത പ്രതിജ്ഞാബദ്ധം: മാര്‍ കല്ലറങ്ങാട്ട്

പാലാ: കര്‍ഷകര്‍ക്ക് ആത്മവിശ്വാസവും പ്രത്യാശയും പകര്‍ന്ന് കൃഷി പോത്സാഹിപ്പിക്കുന്നതിനും മൂല്യവര്‍ധിത ഉത്പന്ന നിര്‍മാണവും വിപണനവും വഴി അധിക വരുമാനസമ്പാദനത്തിനും കര്‍ഷകര്‍ക്കൊപ്പം നില്‍ക്കാന്‍ രൂപത പ്രതിജ്ഞാബദ്ധമാണെന്ന് ബിഷപ് മാര്‍ ജോസഫ് കല്ലറങ്ങാട്ട്. പാലാ രൂപതയുടെ കാര്‍ഷികമുന്നേറ്റ പ്രവര്‍ത്തനങ്ങള്‍ക്കായി രൂപീകരിച്ച അഗ്രി തിങ്ക് ടാങ്കിന്‍റെ പ്രഥമ സമ്മേളനത്തില്‍ അധ്യക്ഷത വഹിച്ച് പ്രസംഗിക്കുകയായിരുന്നു ബിഷപ്. ബിഷപ്സ് ഹൗസില്‍ ചേര്‍ന്ന യോഗത്തില്‍ ഡോ. പി.സി. സിറിയക്, ജില്ലാ പ്രിന്‍സിപ്പല്‍ കൃഷി ഓഫീസര്‍മാരായ ജോ ജോസഫ്, ഷേര്‍ളി സഖറിയ, മുന്‍ പ്രിന്‍സിപ്പല്‍ കൃഷി ഓഫീസര്‍മാരായ ബോസ് ജോസഫ്, സലോമി തോമസ്, ഡെപ്യൂട്ടി ഡയറക്ടര്‍ ജോ പൈനാപ്പള്ളി, മുന്‍ ഡെപ്യൂട്ടി ഡയറക്ടര്‍മാരായ ജോര്‍ജ് ജോസഫ്, സിബി കോയിപ്പള്ളി, റിട്ടയേഡ് ഫാം സൂപ്രണ്ട് ജോണ്‍സണ്‍ പുറവക്കാട്ട്, വിശ്വാസ് ഫുഡ് മാനേജിംഗ് ഡയറക്ടര്‍ സോണി ഏറത്തേല്‍, കര്‍ഷക പ്രതിനിധികളായ കുര്യാക്കോസ് പടവന്‍, ഔസേപ്പച്ചന്‍ മേക്കാട്ട്, രാജു മാത്യു, ടോം ജേക്കബ് ആലയ്ക്കല്‍, ടിംസ് പോത്തന്‍ നെടുമ്പുറം, ഔസേപ്പച്ചന്‍ വെള്ളിമൂഴയില്‍ തുടങ്ങിയവര്‍ ആശയങ്ങള്‍ പങ്കുവച്ചു. വികാരി ജനറാള്‍ മോണ്‍. സെബാസ്റ്റ്യന്‍ വേത്താനത്ത്, പാലാ സോഷ്യല്‍ വെല്‍ഫെയര്‍ സൊസൈറ്റി ഡയറക്ടര്‍ ഫാ. തോമസ് കിഴക്കേല്‍, അസി.ഡയറക്ടര്‍മാരായ ഫാ. ജോസഫ് താഴത്തുവരിക്കയില്‍, ഫാ. ഫ്രാന്‍സീസ് ഇടത്തിനാല്‍, അസി. ഫിനാന്‍സ് മാനേജര്‍ ഫാ. കുര്യന്‍ മുക്കാംകുഴി, പബ്ലിക് റിലേഷന്‍സ് ഓഫീസര്‍ ഡാന്‍റീസ് കൂനാനിക്കല്‍, പ്രോജക്‌ട് ഓഫീസര്‍മാരായ പി.വി. ജോര്‍ജ് പുരയിടം, ടോണി സണ്ണി, പാലാ സാന്‍തോം ഫാര്‍മര്‍ പ്രൊഡ്യൂസര്‍ കമ്പനിയുടെ സിഇഒ വിമല്‍ ജോണി, സാന്‍തോം ഫുഡ് ഫാക്‌ടറി ഓപ്പറേഷന്‍ മാനേജര്‍ ടോണി കാനാട്ട് എന്നിവര്‍ നേതൃത്വം നല്‍കി.

എകെസിസി ചക്കാമ്പുഴ യൂണിറ്റ് എൽഡേഴ്സ് മീറ്റ് സംഘടിപ്പിച്ചു

ചക്കാമ്പുഴ: ചക്കാമ്പുഴ ഇടവകയെ രൂപപ്പെടുത്തുന്നതിൽ നിസ്തുല സംഭാവനകൾ നൽകിയ 80 പിന്നിട്ട 80-ലധികം മാതാപിതാക്കൾക്ക് ആദരവൊരുക്കി എകെസിസി ചക്കാമ്പുഴ യൂണിറ്റ് സുകൃതപഥം എൽഡേഴ്സ് മീറ്റ് സംഘടിപ്പിച്ചു. ഇടവക വികാരി വെരി റവ. ജോസഫ് വെട്ടത്തേൽ അധ്യക്ഷത വഹിച്ച ചടങ്ങിൽ റവ.ഫാ. മാത്യു മുതു പ്ലാക്കൽ, യൂണിറ്റ് പ്രസിഡന്‍റ് സണ്ണി കുരിശമൂട്ടിൽ, കിൻഫ്ര ഫിലിം ആൻഡ് വീഡിയോ പാർക്ക് ചെയർമാൻ ബേബി ഉഴുത്തുവാൻ, യൂണിറ്റ് ഭാരവാഹികളായ തങ്കച്ചൻ കളരിക്കൽ, പി.ജെ. മാത്യു പാലത്താനം തുടങ്ങിയവർ സംസാരിച്ചു. വിശുദ്ധ കുർബാനയും സ്നേഹവിരുന്നും ചടങ്ങിന്‍റെ ഭാഗമായി സംഘടിപ്പിച്ചിരുന്നു. ഫോട്ടോ പതിപ്പിച്ച സ്മാരക ഫലകവും ഉത്തരീയവും മാതാപിതാക്കൾക്ക് സമ്മാനമായി നൽകി.

കേരള സംസ്‌കാര പഠനം: ജപ്പാന്‍ വിദ്യാര്‍ഥിസംഘം എസ്ബി കോളജില്‍

ചങ്ങനാശേരി: കേരളത്തിന്‍റെ സംസ്‌കാരവും വൈജ്ഞാനിക പാരമ്പര്യവും നേരിട്ടറിയാന്‍ ജപ്പാനിലെ സോഫിയ സര്‍വകലാശാലയില്‍നിന്നുള്ള വിദ്യാര്‍ഥി സംഘം എസ്ബി കോളജിലെത്തി. സെന്‍റ് ബര്‍ക്ക്മാന്‍സ് കോളജും അസംപ്ഷന്‍ കോളജും സംയുക്തമായി സോഫിയ യൂണിവേഴ്‌സിറ്റിയുമായി സഹകരിച്ച് സംഘടിപ്പിക്കുന്ന കേരള സ്റ്റഡി പ്രോഗ്രാം 2025ന്‍റെ ഭാഗമായാണ് വിദ്യാര്‍ഥികള്‍ കോളജില്‍ എത്തിയത്. 14 വരെ നീളുന്ന പഠന പരിപാടിയുടെ ഭാഗമായി കേരളത്തിന്‍റെ സാമൂഹിക, സാംസ്‌കാരിക, പാരിസ്ഥിതിക വിഷയങ്ങളില്‍ ആഴത്തിലുള്ള പഠനമാണ് വിദ്യാര്‍ഥികള്‍ക്കായി ഒരുക്കിയിരിക്കുന്നത്. കോളജിലെത്തിയ ജപ്പാന്‍ സംഘത്തെ പ്രിന്‍സിപ്പല്‍ റവ.ഡോ. ടെഡി കാഞ്ഞൂപ്പറമ്പിലിന്‍റെ നേതൃത്വത്തില്‍ സ്വീകരിച്ചു. തുടര്‍ന്ന് നടന്ന അക്കാദമിക സെഷനുകള്‍ക്ക് കോളജിലെ വിവിധ ഡിപ്പാര്‍ട്ട്‌മെന്‍റുകളിലെ അധ്യാപകര്‍ നേതൃത്വം നല്‍കി. കേരളത്തിന്‍റെ സവിശേഷമായ പാരിസ്ഥിതിക പ്രാധാന്യം, കുട്ടനാടിന്‍റെ കാലാവസ്ഥാ വ്യതിയാനങ്ങള്‍, തനത് ഭക്ഷണ സംസ്‌കാരം, ആയുര്‍വേദത്തിന്‍റെ പ്രാധാന്യം, കേരളത്തിന്‍റെ വികസന മാതൃക, നവോത്ഥാന ചരിത്രം തുടങ്ങിയ വിഷയങ്ങളില്‍ വിദ്യാര്‍ഥികള്‍ക്കായി ക്ലാസുകള്‍ സംഘടിപ്പിച്ചു. ഡോ. രഞ്ജിത് തോമസ്, ഡോ. നിഥിന്‍ വര്‍ഗീസ്, ജോര്‍ജ് മാത്യു, ഡോ. ജോര്‍ജ് ജോര്‍ജ് എന്നിവരാണ് പരിപാടികള്‍ക്ക് നേതൃത്വം നല്‍കുന്നത്.

ക്രൈസ്തവ വിശ്വാസം പീഡനങ്ങളില്‍ തളരില്ല: മാര്‍ തോമസ് തറയില്‍

ചങ്ങനാശേരി: പീഡനങ്ങളില്‍ തളരുന്നതല്ല വളരുന്നതാണ് ക്രൈസ്തവ വിശ്വാസമെന്ന് ആര്‍ച്ച്ബിഷപ് മാര്‍ തോമസ് തറയില്‍. സെന്‍റ് മേരീസ് മെത്രാപ്പോലീത്തന്‍ പള്ളിയില്‍ നടന്നുവന്ന മരിയന്‍ കണ്‍വന്‍ഷന്‍റെ സമാപനത്തില്‍ സന്ദേശം നല്‍കുകയായിരുന്നു ആര്‍ച്ച്ബിഷപ്. വിശ്വാസം ശക്തിപ്പെടുന്നതിലാണ് ക്രിസ്ത്യാനി സഹനങ്ങളിലൂടെ കടന്നുപോകുന്നതെന്നും ആര്‍ച്ച്ബിഷപ് കൂട്ടിച്ചേര്‍ത്തു. വികാരി ഫാ. ജോസഫ് വാണിയപ്പുരയ്ക്കല്‍ ആമുഖപ്രസംഗം നടത്തി.

അഞ്ചമ്പലദര്‍ശനവും വള്ളസദ്യയും കെഎസ്ആര്‍ടിസി നൂറു ട്രിപ്പുകള്‍ പൂര്‍ത്തിയാക്കി

തൃക്കൊടിത്താനം: പഞ്ചപാണ്ഡവ ക്ഷേത്രദര്‍ശനവും ആറന്മുള വള്ളസദ്യയും ഉൾപ്പെടുത്തി കെഎസ്ആര്‍ടിസി ഒരുക്കിയ തീര്‍ഥയാത്ര നൂറു ട്രിപ്പ് പൂര്‍ത്തിയാക്കി. ജൂലൈ 27 മുതലാണ് ബസ് സര്‍വീസ് ആരംഭിച്ചത്. ഇന്നലെ വരെ നൂറു ട്രിപ്പുകളാണ് സര്‍വീസ് നടത്തിയത്. കാസര്‍ഗോഡ് മുതല്‍ തിരുവനന്തപുരം വരെയുള്ള വിവിധ ഡിപ്പോകളില്‍ നിന്നാണ് ബസുകള്‍ എത്തിയത്. ഒക്‌ടോബര്‍ രണ്ടുവരെയാണ് യാത്ര. നൂറാമത് ട്രിപ്പിലെത്തിയ തീര്‍ഥാടകരെ പഞ്ച ദിവ്യദേശ ദര്‍ശന്‍ ചെയര്‍മാന്‍ ബി. രാധാകൃഷ്ണമേനോന്‍റെ നേതൃത്വത്തില്‍ സ്വീകരിച്ചു. സെക്രട്ടറി പ്രസാദ് കളത്തൂര്‍, ഉപദേശക സമിതി പ്രസിഡന്‍റ് വിനോദ് ചക്കിട്ടപറമ്പില്‍, സെക്രട്ടറി പി.ആര്‍. രാജേഷ്, വൈസ് പ്രസിഡന്‍റ് പി.കെ. പ്രസാദ്, ജയന്‍ എസ്.വി. സദനം, വി. ശശിധരന്‍, ഹരി നേതശേരില്‍, ശ്യാം സുന്ദര്‍, ജയശ്രീ ചൈതന്യ, ഗീതാ നായര്‍ ഗീതാലയം, വത്സല ശ്യാം എന്നിവര്‍ പ്രസംഗിച്ചു.

ആവേശത്തിരയിളക്കി ചങ്ങനാശേരി ബോട്ട്ക്ലബ് ഫാന്‍സ് ടീം മെഗാസംഗമം

ചങ്ങനാശേരി: നെഹ്‌റുട്രോഫി മത്സരത്തില്‍ പങ്കെടുക്കുന്ന ചങ്ങനാശേരി ബോട്ട്ക്ലബിന് പിന്തുണയേകാന്‍ ചങ്ങനാശേരി ബോട്ട്ക്ലബ് ഫാന്‍സ് ടീം മെഗാ മീറ്റ് മീഡിയവില്ലേജില്‍ സംഘടിപ്പിച്ചു. നൂറുകണക്കിന് ഫാന്‍സ് ടീമംഗങ്ങള്‍ പങ്കെടുത്ത യോഗത്തില്‍ അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട് അധ്യക്ഷത വഹിച്ചു. ഏഷ്യാനെറ്റ് സീനിയര്‍ റിപ്പോര്‍ട്ടറും ഈ വര്‍ഷത്തെ നെഹ്‌റുട്രോഫി മാധ്യമ അവാര്‍ഡ് ജേതാവുമായ ബിദിന്‍ എം. ദാസ് ഉദ്ഘാടനം നിര്‍വഹിച്ചു. മീഡിയാവില്ലേജ് എക്‌സിക്യൂട്ടീവ് ഡയറക്ടര്‍ ഫാ. ജോഫി പുതുപ്പറമ്പില്‍, മീഡിയ വില്ലേജ് ബര്‍സാര്‍ ഫാ. ലിബിന്‍ തുണ്ടുകളം, ബോട്ട് ക്ലബ് ക്യാപ്റ്റന്‍ സണ്ണി ഇടിമണ്ണിക്കല്‍ എന്നിവര്‍ പ്രസംഗിച്ചു. ചങ്ങനാശേരി ബോട്ട് ക്ലബിന്‍റെ ഔദ്യോഗിക ജേഴ്‌സി ലോഞ്ചിംഗും സംഭാവന കൂപ്പണിന്‍റെ പ്രകാശനവും ബോട്ട്ക്ലബിന്‍റെ തീം സോംഗ് പ്രദര്‍ശനവും നടന്നു.

അതിരൂപത യുവദീപ്തി-എസ്എംവൈഎം യുവജനദിനാഘോഷം റിവൈവ് -2കെ25

നെടുംകുന്നം: യുവദീപ്തി-എസ്എംവൈഎം ചങ്ങനാശേരി അതിരൂപതയുടെ യുവജനദിനാഘോഷം റിവൈവ് -2കെ25 നെടുംകുന്നം സെന്‍റ് ജോണ്‍സ് ദി ബാപ്റ്റിസ്റ്റ് ദേവാലയ ഓഡിറ്റോറിയത്തില്‍ നടത്തി. അതിരൂപത പ്രസിഡന്‍റ് അരുണ്‍ ടോം അധ്യക്ഷത വഹിച്ചു. ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്തു. സംഗീത സംവിധായകന്‍ അല്‍ഫോന്‍സ് ജോസഫ് മുഖ്യപ്രഭാഷണം നടത്തി. അതിരൂപത മ്യൂസിക് ബാന്‍ഡ് റൂഹ ബാന്‍ഡ് ഉദ്ഘാടനവും നടന്നു. വികാരി ജനറാള്‍ മോണ്‍. ആന്‍റണി എത്തയ്ക്കാട്ട്, അതിരൂപത ഡയറക്ടര്‍ ഫാ. സാവിയോ മാനാട്ട്, അസിസ്റ്റന്‍റ് ഡയറക്ടര്‍ ഫാ. ടോണി പുതുവീട്ടില്‍ക്കളം, ഫൊറോന വികാരി ഫാ. വര്‍ഗീസ് കൈതപ്പറമ്പില്‍, ഫൊറോന പ്രസിഡന്‍റ് നോയല്‍ പ്രേംസണ്‍, ഫൊറോന ഡയറക്ടര്‍ ഫാ. ആന്‍റണി കാച്ചാംകോട്, അതിരൂപത ഡെപ്യൂട്ടി പ്രസിഡന്‍റ് എലിസബത്ത് വര്‍ഗീസ്, ജനറല്‍ സെക്രട്ടറി ക്രിസ്റ്റി കെ. കുഞ്ഞുമോന്‍, ട്രഷറര്‍ അലക്‌സ് മഞ്ഞുമേല്‍ എന്നിവര്‍ പ്രസംഗിച്ചു.

ചങ്ങനാശേരി പോലീസ് സ്റ്റേഷന്‍ പുതിയകെട്ടിടം: 3.5 കോടിയുടെ പദ്ധതി

ചങ്ങനാശേരി: കേരളത്തിലെ ഏറ്റവും കൂടുതല്‍ തുക മുടക്കിയുള്ള പോലീസ് സ്റ്റേഷന്‍ നിര്‍മാണമാണ് ചങ്ങനാശേരിയില്‍ നടക്കുന്നത്. ആര്‍ക്കിടെക്ചറൽ ഡ്രോയിംഗ് പ്രകാരം പോര്‍ച്ച് ഏരിയ, സ്റ്റെയര്‍ റൂം ഉള്‍പ്പെടെ 1113 ചതുരശ്രമീറ്റര്‍ വിസ്തീര്‍ണ്ണമുള്ള രണ്ടുനില കെട്ടിടമാണ് വിഭാവനം ചെയ്തിരിക്കുന്നത്. ഈ കെട്ടിടത്തിന് താഴത്തെ നിലയുടെ വിസ്തീര്‍ണ്ണം 462 ചതുരശ്രമീറ്റര്‍ ആണ്. താഴത്തെ നിലയില്‍ വെയിറ്റിംഗ് ഏരിയ, ഓഫീസ് മുറികള്‍, റെക്കോര്‍ഡിംഗ് റൂം, സ്ത്രീകള്‍ക്കും പുരുഷന്മാര്‍ക്കും ട്രാന്‍സ്‌ജെന്‍ഡര്‍കള്‍ക്കും പ്രത്യേകം ലോക്കപ്പുകള്‍, ശുചിമുറികള്‍, യൂണിഫോം മാറ്റുന്നതിനുള്ള മുറികള്‍ തുടങ്ങിയവ ഉള്‍പ്പെടുത്തിയിരിക്കുന്നു. കെട്ടിടത്തിന്‍റെ മുകളിലത്തെ നിലയുടെ വിസ്തീര്‍ണം 524 ചതുരശ്രമീറ്ററാണ്. മുകളിലെ നിലയില്‍ കോണ്‍ഫറന്‍സ് ഹാള്‍, തൊണ്ടിമുതല്‍ സൂക്ഷിക്കാനുള്ള മുറി, സിപിഒ വിശ്രമമുറി, എഎസ്‌ഐ, ജിഎസ്‌ഐ ഇവര്‍ക്കായുള്ള മുറികള്‍, അടുക്കള, സ്റ്റോര്‍ മുറി, ഡൈനിംഗ് ഏരിയ, ടോയ്‌ലറ്റ് ബ്ലോക്ക് എന്നിവയാണ് ഉള്‍പ്പെടുത്തിയിരിക്കുന്നത്. സംസ്ഥാനത്ത് ആദ്യമായിട്ടാണ് 3.5 കോടി രൂപ മുടക്കി ഇത്തരത്തില്‍ ഒരു പോലീസ് സ്റ്റേഷനായി ഒരു കെട്ടിടം പണിയുന്നത്. ആധുനിക സൗകര്യങ്ങളുള്ള വിശാലമായ കെട്ടിടം കെട്ടിട നിര്‍മാണത്തിനുള്ള ഭരണാനുമതിയും സാങ്കേതിക അനുമതിയും ലഭിക്കുകയും 2023-24 വര്‍ഷത്തെ ബജറ്റ് തുകയില്‍നിന്നും 3.5 കോടി രൂപ അനുവദിച്ചിട്ടുള്ളതുമാണ്. കെട്ടിടം രൂപകല്പന ചെയ്തത് പൊതുമരാമത്ത് വകുപ്പ് ആര്‍ക്കിടെക്ചറല്‍ വിഭാഗമാണ്. ശിലാസ്ഥാപനം നാളെ ചങ്ങനാശേരി: പോലീസ് സ്റ്റേഷന്‍റെ പുതിയ കെട്ടിടത്തിന്‍റെ ശിലാസ്ഥാപന കര്‍മം നാളെ (ചൊവ്വ)3.30ന് മുഖ്യമന്ത്രി പിണറായി വിജയന്‍ ഓണ്‍ലൈനായി നിര്‍വഹിക്കും. ചങ്ങനാശേരി അരിക്കത്തില്‍ കണ്‍വന്‍ഷന്‍ ഹാളില്‍ ചേരുന്ന സമ്മേളനത്തില്‍ മന്ത്രി വി.എന്‍. വാസവന്‍ അധ്യക്ഷത വഹിക്കും. ജോബ് മൈക്കിള്‍ എംഎല്‍എ മുഖ്യപ്രഭാഷണം നടത്തും. കൊടിക്കുന്നില്‍ സുരേഷ് എംപി, സംസ്ഥാന പോലീസ് മേധാവി രവാഡ ചന്ദ്രശേഖര്‍, എഡിജിപി എച്ച്. വെങ്കിടേഷ്, ഐജി എസ്. ശ്യാംസുന്ദര്‍, ഡിഐജി സതീഷ് ബിനോ, ജില്ലാ പോലീസ് മേധാവി ഷാഹുല്‍ ഹമീദ്, ചങ്ങനാശേരി ഡിവൈഎസ്പി കെ.പി. ടോംസണ്‍, പൊതുമരാമത്ത് ചീഫ് എന്‍ജിനിയര്‍ എന്‍. ദീപു എന്നിവര്‍ പ്രസംഗിക്കും.

"സഹകരണ'മില്ലാതെ സഹികെട്ട "ജനകീയന്‍' ഓട്ടം നിര്‍ത്തി

മറ്റത്തിപ്പാറ: കഴിഞ്ഞ പതിനേഴു വര്‍ഷമായി നാട്ടുകാരുടെ ഏക ആശ്രമമായിരുന്ന "ജനകീയന്‍' ബസ് സര്‍വീസ് നിലച്ചു. കരിങ്കുന്നം-നീലൂര്‍ റൂട്ടിലെ ഏക ബസായിരുന്നു ജനകീയന്‍. മറ്റത്തിപ്പാറ ഗ്രാമത്തിലെ 76 പേര്‍ ചേര്‍ന്ന് വാങ്ങിയ ജനകീയന്‍ ബസിന് ഓട്ടം ഇപ്പോള്‍ നിര്‍ത്തേണ്ടി വന്നു. സഹകരണബാങ്ക് ചതിച്ചതോടെയാണിത്. ബസിന്‍റെ ലാഭവിഹിതം നിക്ഷേപിച്ച സഹകരണ ബാങ്ക് കൈവിട്ടപ്പോഴാണ് അറ്റകുറ്റപ്പണികള്‍ പൂര്‍ത്തിയാക്കാനാവാതെ സര്‍വീസ് നിര്‍ത്തിവയ്‌ക്കേണ്ട അവസ്ഥയിലെത്തിയത്. പതിനേഴു വർഷം മുന്പ് മറ്റത്തിപ്പാറ എന്ന കൊച്ചുഗ്രാമത്തിലെ യാത്രാക്ലേശത്തിനു പരിഹാരമായി മറ്റത്തിപ്പാറ ഹോളിക്രോസ് പള്ളി അങ്കണത്തില്‍ നാട്ടുകാര്‍ ഒത്തുകൂടി സ്വന്തമായി ഒരു ബസ് വാങ്ങാന്‍ തീരുമാനിച്ചു. അതിനായി ജനകീയ ബസ് ഐക്യവേദി രൂപീകരിച്ചു. നാട്ടുകാരായ 76 പേര്‍ 10,000 രൂപ വീതം നല്‍കി ഒരു സെക്കന്‍ഡ് ഹാന്‍ഡ് ബസ് വാങ്ങി. ജനങ്ങളുടെ വണ്ടിക്ക് ജനകീയന്‍ എന്ന് പേരുമിട്ടു. 2008 മാര്‍ച്ച് 17ന് ബസ് കരിങ്കുന്നത്തുനിന്ന് നീലൂരിലേക്ക് ഓടിത്തുടങ്ങി. അങ്ങോട്ടുമിങ്ങോട്ടുമായി 18 ട്രിപ്പുകളാണ് ബസ് ഒരു ദിവസം ഓടിയിരുന്നത്. ലാഭകരമായി ഓടിയിരുന്ന സമയത്ത് ചെലവ് കഴിഞ്ഞുള്ള തുക കടനാട് സഹകരണബാങ്കിന്‍റെ മറ്റത്തിപ്പാറ ബ്രാഞ്ചില്‍ നിക്ഷേപിച്ചിരുന്നു. മൂന്നു ലക്ഷം രൂപയോളം നിക്ഷേപമുണ്ടായിരുന്നു. ബാങ്ക് പ്രതിസന്ധിയിലായതിനാല്‍ ഈ തുക തിരികെ കിട്ടിയില്ല. അതാണ് ബസ് നിര്‍ത്താനുള്ള പ്രധാന കാരണം. സഹകരണ ബാങ്കിലെ നിക്ഷേപത്തുക തിരികെ കിട്ടിയാല്‍ ബസ് പണിത് ഇറക്കാം. ഓഗസ്റ്റ് രണ്ടിനാണ് ഒടുവില്‍ സര്‍വീസ് നടത്തിയത്. ജനകീയന്‍ ഓട്ടം നിര്‍ത്തുമ്പോള്‍ വലയുന്നത് വിദ്യാര്‍ഥികള്‍ ഉള്‍പ്പെടെയുള്ള യാത്രക്കാരാണ്. ഇടുക്കി, കോട്ടയം ജില്ലകളുടെ അതിര്‍ത്തി ഗ്രാമമാണ് മറ്റത്തിപ്പാറ. പല ബസ് സര്‍വീസുകളും ഓടി നിര്‍ത്തിയ ഈ നാട്ടില്‍ ജനകീയന്‍ ബസ് ഒരു വലിയ ആശ്വാസമായിരുന്നു. കടനാട് സഹകരണ ബാങ്കിലെ നിക്ഷേപത്തുക തിരികെ ലഭിക്കുന്നതിന് നടപടി സ്വീകരിക്കണമെന്ന് ആവശ്യപ്പെട്ട് മുഖ്യമന്ത്രിക്കും സഹകരണമന്ത്രിക്കും മറ്റത്തിപ്പാറ നിവാസികള്‍ നിവേദനം നല്‍കി കാത്തിരിക്കുകയാണ്.

പുലർച്ചെ വീടിനുള്ളിൽ കയറിയ ഇതര സംസ്ഥാനക്കാരനെ പിടികൂടി

വെള്ളൂർ: രാത്രി വീടിനുള്ളിൽ കയറിയ ഇതര സംസ്ഥാനക്കാരനെ നാട്ടുകാർ പിടികൂടി പോലീസിനു കൈമാറി. കഴിഞ്ഞ ദിവസം പുലർച്ചെ ഇറുമ്പയം കല്ലുവേലി ഭാഗത്ത് റിട്ടയേർഡ് കെഎസ്ആർടിസി ഡ്രൈവർ രാജേന്ദ്രന്‍റെ വീട്ടിൽ കയറിയ അസം സ്വദേശിയായെയാണ് ഗൃഹനാഥൻ ഫോണിൽ വിളിച്ച് അറിയിച്ചതിനെത്തുടർന്ന് സ്ഥലത്തെത്തിയ ബ്ലോക്ക് കോൺഗ്രസ് പ്രസിഡന്‍റ് എം.ആർ. ഷാജിയും സുഹൃത്തുക്കളും ചേർന്ന് ബലപ്രയോഗത്തിലൂടെ കീഴ്പ്പെടുത്തിയത്. രാത്രി ഒന്നിനു ശേഷം ട്രൗസർ മാത്രം ധരിച്ച് വീട്ടിനുള്ളിൽ കയറിയ നാൽപ്പതുകാരനെ ഏറെ പണിപ്പെട്ടാണ് നാട്ടുകാർ കീഴ്പ്പെടുത്തിയത്. വെള്ളൂർ എസ് ഐ ശിവദാസന്‍റെ നേതൃത്വത്തിൽ പോലീസ് സ്ഥലത്തെത്തി ഇയാളെ കസ്റ്റഡിയിലെടുത്തു. തിരുട്ടുഗ്രാമത്തിലെ മോഷ്ടാക്കൾ വെളളൂരിൽ ഭീതിപരത്തി മോഷണം നടത്തിയത് ഏതാനും മാസങ്ങൾക്ക് മുമ്പായിരുന്നു. വെള്ളൂർ പഞ്ചായത്ത്‌ അധികൃതരും പോലീസും വെള്ളൂരിലെ ഇതര സംസ്‌ഥാന തൊഴിലാളി ക്യാമ്പുകളിൽ പരിശോധന നടത്തി രേഖകൾ പരിശോധിക്കണമെന്ന ആവശ്യം ഉയർന്നെങ്കിലും അധികൃതർ നടപടി സ്വീകരിച്ചില്ലെന്ന് ബ്ലോക്ക് കോൺഗ്രസ് വൈസ് പ്രസിഡന്‍റ് എ.ആർ.ഷാജി ആരോപിച്ചു.

അന്നമോള്‍ക്ക് സ്‌കൂളും നാടും ഇന്ന് അന്ത്യാഞ്ജലിയേകും

പാലാ: ചേതനയറ്റ ശരീരമായി അന്നമോള്‍ ഇന്ന് അവസാനമായി സ്‌കൂളിലെത്തും. നൂറുകണക്കിന് പനിനീര്‍ പുഷ്പങ്ങള്‍കൊണ്ട് പ്രിയപ്പെട്ട സഹപാഠികള്‍ കുഞ്ഞുമാലാഖയ്ക്ക് അന്ത്യാഞ്ജലി അര്‍പ്പിക്കും. മുണ്ടാങ്കലിൽ കഴിഞ്ഞ ദിവസമുണ്ടായ വാഹനാപകടത്തില്‍ മരിച്ച പാലാ സെന്‍റ് മേരീസ് സ്‌കൂളിലെ ആറാം ക്ലാസ് വിദ്യാര്‍ഥിനി അല്ലപ്പാറ പാലക്കുഴക്കുന്നില്‍ സുനിലിന്‍റെ മകള്‍ അന്നമോളുടെ ഭൗതികശരീരം ഇന്നു രാവിലെ 8.30 ഓടെ സ്‌കൂളിലെത്തിക്കും. തങ്ങളുടെ പ്രിയ കൂട്ടുകാരിയുടെ വേര്‍പാട് സഹപാഠികളെയും അധ്യാപകരെയും ദുഃഖത്തിലാഴ്ത്തിയിരിക്കുകയാണ്. അന്നമോള്‍ക്ക് അന്ത്യയാത്ര നല്‍കാന്‍ സ്‌കൂളില്‍ തയാറെടുപ്പുകള്‍ പൂര്‍ത്തിയായി. അധ്യാപകരും വിദ്യാര്‍ഥികളും രക്ഷാകര്‍ത്താക്കളും അന്തിമോപചാരം അർപ്പിക്കും. സ്‌കൂളിലെ ചടങ്ങുകള്‍ക്കു ശേഷം 9.30ഓടെ മൃതദേഹം അല്ലപ്പാറയിലുള്ള വസതിയിലും തുടര്‍ന്ന് 11 മുതല്‍ പ്രവിത്താനം സെന്‍റ് അഗസ്റ്റിന്‍സ് ഫൊറോന പള്ളി പാരിഷ് ഹാളിലും പൊതുദര്‍ശനത്തിന് വയ്ക്കും. സംസ്‌കാരശുശ്രൂഷകള്‍ 12ന് പള്ളിയില്‍ നടക്കും.

കപ്പേളച്ചിറയിലെ മാലിന്യം നീക്കണം

വൈക്കം: നഗരസഭയുടെ കപ്പേളച്ചിറയിലെ ഡംപിംഗ് യാർഡിൽ ആശുപത്രി മാലിന്യങ്ങളടക്കം കുന്നു കൂട്ടിയതിനെത്തുടർന്ന് ദുർഗന്ധം വമിക്കുന്നതായി പരാതി. ജൈവ-അജൈവ മാലിന്യങ്ങൾ ഡംപിംഗ് യാർഡിൽ വാഹനങ്ങളിൽ കൊണ്ടുവന്ന് കുന്നുകൂട്ടുന്നതല്ലാതെ തരംതിരിച്ച് സംസ്കരിക്കുന്നില്ലെന്ന് പ്രദേശവാസികൾ ആരോപിക്കുന്നു. ഡംപിംഗ് യാർഡിന്‍റെ സമീപത്തു താമസിക്കുന്ന നിർധന കുടുംബങ്ങൾക്ക് ചീഞ്ഞഴുകുന്ന മാലിന്യങ്ങൾ ആരോഗ്യപ്രശ്നമുണ്ടാക്കുന്നുണ്ട്. മാലിന്യങ്ങൾ ഒഴുകിയിറങ്ങി സമീപത്തെ തോടുകളിലും കരിയാറിലും മലിനീകരണത്തിനുമിടയാക്കുന്നു. പ്രദേശവാസികളുടെ ആരോഗ്യസംരക്ഷണത്തിനായി ആശുപത്രി മാലിന്യങ്ങളടക്കം നീക്കുന്നതിന് അധികൃതർ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

തോട്ടുവ-കുറുപ്പന്തറ-കല്ലറ റോഡിന് 5.80 കോടി രൂപ അനുവദിച്ചു: മോൻസ്

കടുത്തുരുത്തി: പൊതുമരാമത്ത് വകുപ്പിനു കീഴിലുള്ള കുറവിലങ്ങാട് ആലപ്പുഴ മിനി ഹൈവേ റോഡില്‍ ശോച്യാവസ്ഥയിലായ തോട്ടുവ-കുറുപ്പന്തറ-കല്ലറ പുത്തന്‍പള്ളി റോഡിന്‍റെ ദുരവസ്ഥ പരിഹരിച്ച് ഉന്നത നിലവാരത്തില്‍ നവീകരിക്കുന്നതിനായി 5.80 കോടി രൂപ അനുവദിച്ചതായി മോന്‍സ് ജോസഫ് എംഎല്‍എ അറിയിച്ചു. റോഡ് തകര്‍ന്നുകിടക്കുന്ന വിവരം ചിത്രം സഹിതം ദീപിക അടുത്തിടെ പ്രസിദ്ധീകരിച്ചിരുന്നു. കടുത്തുരുത്തി മണ്ഡലത്തിലേക്ക് നവകേരള സദസ് വികസന പദ്ധതിയുടെ ഭാഗമായി സംസ്ഥാന സര്‍ക്കാര്‍ അനുവദിച്ച ഏഴു കോടി രൂപയില്‍നിന്ന് 5.80 ലക്ഷം രൂപ കുറുപ്പന്തറ ജംഗ്ഷനിലൂടെ കടന്നുപോകുന്ന മെയിന്‍ റോഡിന്‍റെ ബിഎം ആന്‍ഡ് ബിസി ടാറിംഗിന് മാറ്റിവച്ചിരിക്കുകയാണെന്ന് എംഎല്‍എ അറിയിച്ചു. കുറുപ്പന്തറ ജംഗ്ഷന്‍ വികസന പദ്ധതിയും കുറുപ്പന്തറ റെയില്‍വേ ഗേറ്റ് ഭാഗത്ത് വെള്ളക്കെട്ട് പ്രശ്നങ്ങള്‍ പരിഹരിക്കുന്നതും ഉള്‍പ്പെടെയുള്ള അടിയന്തര നിര്‍മാണ പ്രവര്‍ത്തനങ്ങള്‍ നടപ്പാക്കാന്‍ ഇതോടൊപ്പം നടപടി സ്വീകരിക്കുമെന്നും മോന്‍സ് ജോസഫ് എംഎല്‍എ അറിയിച്ചു.

കോട്ടയം-കൊല്ലം മെമുവിന്‍റെ കോച്ചുകള്‍ വര്‍ധിപ്പിക്കണമെന്ന്

കടുത്തുരുത്തി: ദിവസവും വൈകുന്നേരം കോട്ടയത്തുനിന്ന് പുറപ്പെടുന്ന കോട്ടയം-കൊല്ലം മെമു ട്രെയിനിന്‍റെ കോച്ചുകള്‍ വർധിപ്പിക്കണമെന്ന ആവശ്യം ശക്തമായി. കോച്ചുകൾ കുറവായതിനാൽ യാത്രക്കാര്‍ ദുരിതത്തിലാണ്. സ്ത്രീകള്‍, വിദ്യാര്‍ഥികള്‍, ജോലിക്കാര്‍, മെഡിക്കല്‍ കോളജില്‍നിന്നു വരുന്ന രോഗികള്‍, ഗര്‍ഭിണികളായ വനിതകള്‍ ഉള്‍പ്പെടെ നൂറുകണക്കിന് ആള്‍ക്കാര്‍ക്കുള്ള ഏക യാത്രാമാര്‍ഗമാണ് എട്ട് കോച്ചുകള്‍ മാത്രമുള്ള ഈ ട്രെയിന്‍. വൈകുന്നേരം 3.25നു പുറപ്പെടുന്ന പരശുറാം എക്‌സ്പ്രസിനുശേഷം നിലവില്‍ കോട്ടയത്തുനിന്നു കൊല്ലത്തേക്ക് പോകാന്‍ ഈ മെമു മാത്രമാണുള്ളത്. വൈകുന്നേരം 5.40ന് പുറപ്പെടുന്ന ഈ ട്രെയിനില്‍ കയറാന്‍ 5.15 ന് സ്റ്റേഷനില്‍ എത്തിയാല്‍പോലും ട്രെയിൻ ഏതാണ്ട് നിറഞ്ഞ അവസ്ഥയായിരിക്കും. നിരവധിപ്പേർ‍ നിലത്തിരിക്കുകയും ഡോറുകളില്‍ പിടിച്ചുനില്‍ക്കുകയും ചെയ്യുന്നത് സ്ഥിരം കാഴ്ചയാണ്. തിരുവല്ല, ചെങ്ങന്നൂര്‍ സ്റ്റേഷനെത്തുമ്പോഴേക്കും ട്രെയിനില്‍ കയറാന്‍പോലും കഴിയാത്ത സ്ഥിതിയാകും. അമിതമായ തിരക്കുമൂലമുണ്ടാകുന്ന ദുര്‍ഗന്ധവും വിയര്‍പ്പ് നാറ്റവും കാരണം യാത്രക്കാര്‍ തലകറങ്ങിവീഴുന്നതു പതിവാണ്. കോവിഡിനുശേഷമാണ് യാത്രാ ക്ലേശം ഇത്തരത്തിലായതെന്നും ട്രെയിന്‍ യാത്ര ഇപ്പോള്‍ പേടിസ്വപ്നമാണെന്നും സ്ത്രീ യാത്രക്കാര്‍ പറയുന്നു. ലേഡീസ് കമ്പാര്‍ട്ട്മെന്‍റില്‍ യാത്ര ചെയ്യുന്നവര്‍ക്ക് ടോയ്‌ലറ്റില്‍ പോകാന്‍പോലും കഴിയാറില്ലെന്ന് വനിതകള്‍ പറയുന്നു. കൊല്ലത്തുനിന്നു രാവിലെ പുറപ്പെടുന്ന കൊല്ലം മെമു, വേണാട് എക്സ്പ്രസ്, പരശുരാം എക്സ്പ്രസ്, ശബരി എക്സ്പ്രസ് എന്നീ അഞ്ച് ട്രെയിനുകളില്‍ പോകുന്നവര്‍ക്ക് വൈകുന്നേരം മടക്കയാത്രയ്ക്കു ലഭിക്കുന്നത് ഈ ഒരു ട്രെയിന്‍ മാത്രമാണ്. അതുകൊണ്ടുതന്നെ ഈ സര്‍വീസിന്‍റെ കോച്ചുകള്‍ വര്‍ധിപ്പിക്കേണ്ടത് അത്യാവശ്യമാണ്. കൊല്ലത്തുനിന്ന് ആലപ്പുഴ വഴിയുള്ള മെമു സര്‍വീസുകളില്‍ 16 കോച്ചുകള്‍ വരെ കൂട്ടിയെങ്കിലും, അതേനിലയില്‍ കോട്ടയം വഴി പോകുന്ന സര്‍വീസുകളില്‍ ഇതുവരെ ആ പരിഷ്‌കരണം നടപ്പാക്കിയിട്ടില്ല. കൊല്ലത്തെ മെമു ഷെഡിന്‍റെ പണി പൂര്‍ത്തിയായിട്ട് മാത്രമേ കോച്ചുകള്‍ വര്‍ധിപ്പിക്കുകയുള്ളൂവെന്ന അധികാരികളുടെ മനോഭാവവും മെമു ഷെഡിന്‍റെ പണിയുടെ മെല്ലെപ്പോക്കും യാത്രക്കാരുടെ മെച്ചപ്പെട്ട യാത്രാ ആവശ്യത്തെ അനിശ്ചിതത്വത്തിലാക്കുന്നു. മെമു ഷെഡിന്‍റെ പണി പൂര്‍ത്തിയാകുന്നതിനു മുമ്പുതന്നെ കോച്ച് വര്‍ധന നടപ്പാക്കണമെന്നാണ് യാത്രക്കാരുടെ ആവശ്യം.

വെയര്‍ഹൗസ് ബോധവത്കരണ ക്ലാസ്

പാമ്പാടി: വെയര്‍ഹൗസ് ഡിപ്പാര്‍ട്ട്‌മെന്‍റ് അഥോറിറ്റിയും ഇന്‍സ്റ്റിറ്റ്യൂട്ട് ഓഫ് കോ-ഓപ്പറേറ്റീവ് മാനേജ്‌മെന്‍റും പാമ്പാടി സര്‍വീസ് സഹകരണ ബാങ്കും സംയുക്തമായി കര്‍ഷകര്‍ക്കായി വെയര്‍ഹൗസ് ബോധവത്കരണ ക്ലാസ് സംഘടിപ്പിച്ചു. കാര്‍ഷികോത്പന്നങ്ങള്‍ വെയര്‍ഹൗസില്‍ സൂക്ഷിക്കുന്നതിന്‍റെയും അതുവഴി ഉണ്ടാകുന്ന നേട്ടങ്ങളും ക്ലാസില്‍ വിശദീകരിച്ചു. മന്‍സൂര്‍ ഐസിഎം ഫാക്കല്‍റ്റി ഡോ.ആര്‍. രശ്മി, ഐസിഎം കോഴ്‌സ് അസിസ്റ്റന്‍റ് അനില പി. നായര്‍ എന്നിവര്‍ ക്ലാസുകളെടുത്തു. പങ്കെടുത്ത മുഴുവന്‍ കര്‍ഷകര്‍ക്കും തയ്‌വാന്‍ പിങ്ക് പേരത്തൈകള്‍ ബാങ്ക് വിതരണം ചെയ്തു. സംസ്ഥാന സഹകരണ യൂണിയന്‍ ഡയറക്‌ടര്‍ കെ.എം. രാധാകൃഷ്ണന്‍ ഉദ്ഘാടനം ചെയ്തു. ബാങ്ക് പ്രസിഡന്‍റ് വി.എം. പ്രദീപ് അധ്യക്ഷനായി. വൈസ് പ്രസിഡന്‍റ് ജോജോ ശാമുവല്‍, കെ.എസ്. ഗിരീഷ് ഭരണസമിതിയംഗങ്ങളായ പി.എം. വര്‍ഗീസ്, കെ.വി. തോമസ്, കെ.കെ. തങ്കപ്പന്‍, കെ.വൈ. ചാക്കോ, ശ്രീകല ശ്രീകുമാര്‍ എന്നിവര്‍ പ്രസംഗിച്ചു.

ബൈബിള്‍ പകര്‍ത്തിയെഴുതി

പങ്ങട: ഓര്‍ത്തഡോക്‌സ് സഭയുടെ കോട്ടയം ഭദ്രാസനത്തിന്‍റെ ശതോത്തര സുവര്‍ണ ജൂബിലിയുടെ ഭാഗമായി ഭദ്രാസന സണ്‍ഡേസ്‌കൂളിന്‍റെ ആഭിമുഖ്യത്തില്‍ ഏഴായിരം പേര്‍ ചേര്‍ന്ന് ബൈബിള്‍ പകര്‍ത്തിയെഴുതി. പങ്ങട സെന്‍റ് മേരീസ് ഓര്‍ത്തഡോക്‌സ് പള്ളിയില്‍ ഡോ. യൂഹാനോന്‍ മാര്‍ ദിയസ്‌കോറസ് മെത്രാപ്പോലീത്താ ഉദ്ഘാടനം നിര്‍വഹിച്ചു. ഡയറക്ടര്‍ വിനോദ് എം. സഖറിയ, വികാരി ഫാ. വർഗീസ് ജേക്കബ്, ഡോ. രാജേഷ് കുര്യന്‍, വി.വി. വർഗീസ്, അജിത് മാത്യു, ഏബ്രഹാം ജോണ്‍ എന്നിവര്‍ നേതൃത്വം നല്‍കി. ഭദ്രാസനത്തിലെ 80 പള്ളികളില്‍നിന്നായി വൈദികര്‍, അധ്യാപകര്‍, വിദ്യാര്‍ഥികള്‍, മാതാപിതാക്കള്‍, ഭരണസമിതിയംഗങ്ങള്‍, ആത്മീയ സംഘടനാ പ്രവര്‍ത്തകര്‍ എന്നിവര്‍ ചേര്‍ന്നാണ് പകര്‍ത്തെഴുത്ത് പൂര്‍ത്തിയാക്കിയത്. എഴുതി പൂര്‍ത്തീകരിച്ച ബൈബിള്‍ വിവിധ വാല്യങ്ങളായി പാമ്പാടി മാര്‍ കുറിയാക്കോസ് ദയറായില്‍ സൂക്ഷിക്കും.

വനിതകളുടെ ആരോഗ്യം: കുമ്മണ്ണൂരിൽ വനിതാ ഫിറ്റ്നസ് സെന്‍റർ

കോട്ടയം: കിടങ്ങൂരില്‍ വനിതാ ഫിറ്റ്നസ് സെന്‍റര്‍ ആരംഭിച്ചു. കുമ്മണ്ണൂരിലെ സാംസ്‌കാരിക നിലയത്തിന് പുറകുവശം വയോജന വിശ്രമകേന്ദ്രത്തിന്‍റെ മുകളിലത്തെ നിലയിലാണ് ഫിറ്റ്നസ് സെന്‍റര്‍ ആരംഭിച്ചത്. പരിശീലകയെയും പഞ്ചായത്ത് നിയമിച്ചിട്ടുണ്ട്. കിടങ്ങൂര്‍ പഞ്ചായത്തിലെ 2024-25 വര്‍ഷത്തെ പദ്ധതിയില്‍ ഉള്‍പ്പെടുത്തി ഒന്പത് ലക്ഷം രൂപ ജനറല്‍ പ്ലാന്‍ ഫണ്ട് വിനിയോഗിച്ചാണ് നിര്‍മാണം പൂര്‍ത്തീയാക്കിയത്. പഞ്ചായത്ത് പ്രസിഡന്‍റ് ഇ.എം. ബിനു സെന്‍റര്‍ ഉദ്ഘാടനം ചെയ്തു. വൈസ് പ്രസിഡന്‍റ് ടീനാ മാളിയേക്കല്‍ അധ്യക്ഷത വഹിച്ചു. ജില്ലാ പഞ്ചായത്തംഗം ജോസ്മോന്‍ മുണ്ടയ്ക്കല്‍ മുഖ്യപ്രഭാഷണം നടത്തി. ഡംബല്‍, കെറ്റില്‍ ബെല്‍, വ്യായാമ സൈക്കിള്‍, മെഡിസിന്‍ ബോള്‍, ജിം ബോള്‍, ബാര്‍ ബെല്‍, വെയ്റ്റ് പ്ലേറ്റ്, ജിം റോപ്പ്, സ്റ്റെപ്പര്‍ എന്നീ ഉപകരണങ്ങളാണ് നിലവില്‍ സെന്‍ററിലുള്ളത്. ബ്ലോക്ക് പഞ്ചായത്തംഗം ഡോ. മേഴ്സി ജോണ്‍ മൂലക്കാട്ട്, അശോക് കുമാര്‍ പൂതമന, പഞ്ചായത്തംഗങ്ങളായ കെ.ജി. വിജയന്‍, ലൈസമ്മ ജോര്‍ജ്, തോമസ് മാളിയേയ്ക്കല്‍, കുഞ്ഞുമോള്‍ ടോമി എന്നിവര്‍ പങ്കെടുത്തു.

പൂര്‍വവിദ്യാര്‍ഥി സംഗമം

കോട്ടയം: ബിസിഎം കോളജിന്‍റെ സപ്തതി വാര്‍ഷികത്തോടനുബന്ധിച്ചു പൂര്‍വവിദ്യാര്‍ഥി സംഗമം സംഘടിപ്പിച്ചു. 1975, 2000 വര്‍ഷങ്ങളില്‍ പഠിച്ചിറങ്ങിയ വിദ്യാര്‍ഥിനികളെ കോളജ് മാനേജര്‍ ഫാ. ഏബ്രഹാം പറമ്പേട്ട്, പ്രിന്‍സിപ്പല്‍ ഡോ. കെ.വി. തോമസ് എന്നിവര്‍ ചേര്‍ന്ന് ആദരിച്ചു. കേരളത്തില്‍നിന്നു റിപ്പബ്ലിക്ദിന പരേഡ് നയിച്ച പെണ്‍കുട്ടിയും ബിസിഎം കോളജിലെ പൂര്‍വി വിദ്യാര്‍ഥിനിയുമായ കെ.വി. ഗീതാകുമാരിയെയും ആദരിച്ചു. പൂര്‍വ വിദ്യാര്‍ഥി സംഘടനയുടെ ഭാരവാഹികളായി ജിഷ ഷാജി (പ്രസിഡൻ്), ഡോ. റോസമ്മ ഫിലിപ്പ് (വൈസ് പ്രസിഡന്‍റ്) എന്നിവരെയും പുതിയ ജനറല്‍ ബോഡിയെയും തെരഞ്ഞെടുത്തു. വരും വര്‍ഷങ്ങളിലും ഓഗസ്റ്റിലെ രണ്ടാം ശനിയാഴ്ച പൂര്‍ വിദ്യാര്‍ഥി സംഗമദിനമായി ആചരിക്കാൻ തീരുമാനിച്ചു.

തൊഴിലുറപ്പ് പദ്ധതി തകർക്കാൻ ശ്രമം: തിരുവഞ്ചൂർ

കോട്ടയം: കോടിക്കണക്കിനു ജനവിഭാഗങ്ങളെ സംരക്ഷിക്കുന്നതിനായി യുപിഎ സര്‍ക്കാര്‍ നടപ്പാക്കിയ തൊഴിലുറപ്പ് പദ്ധതിയെ കേന്ദ്ര-സംസ്ഥാന സര്‍ക്കാരുകളുടെ അനാവശ്യമായ ഇടപെടലിലൂടെ തകര്‍ക്കാനുള്ള ശ്രമമാണ് നടക്കുന്നതെന്ന് തിരുവഞ്ചൂര്‍ രാധാകൃഷ്ണന്‍ എംഎല്‍എ. കോട്ടയത്ത് നടന്ന മഹാത്മാഗാന്ധി എംപ്ലോയ്‌മെന്‍റ് ഗ്യാരന്‍റീസ്‌കീം സ്റ്റാഫ് അസോസിയേഷൻ സംസ്ഥാന പ്രതിനിധി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. യൂണിയന്‍ സംസ്ഥാന പ്രസിഡന്‍റ് തോമസ് കല്ലാടന്‍, യുഡിഎഫ് ജില്ലാ കണ്‍വീനര്‍ ഫില്‍സണ്‍ മാത്യൂസ്, കെ.ശിവരാമന്‍, എസ്.രാജീവ്, കെ.ജി. ഹരിദാസ്, സംസ്ഥാന വര്‍ക്കിംഗ് പ്രസിഡന്‍റ് പെരിങ്ങമല സജീബ് ഖാന്‍, സെക്രട്ടറി മുഹ്‌സിന്‍ തൃശൂര്‍ തുടങ്ങിയവര്‍ പ്രസംഗിച്ചു.

ചൂട്ടുവേലി ജംഗ്ഷനില്‍ വാഹനങ്ങള്‍ കൂട്ടിയിടിച്ചു

കോട്ടയം: എംസി റോഡിലെ ചൂട്ടുവേലി ജംഗ്ഷനില്‍ വാഹനങ്ങള്‍ കൂട്ടിയിടിച്ചു. ഇന്നലെ ഉച്ചകഴിഞ്ഞ് 2.30നു പെരുമ്പാവൂരില്‍നിന്നു തിരുവനന്തപുരം ഭാഗത്തേക്കു പോകുകയായിരുന്ന ലോറി മുന്നില്‍ പോയ കാറിലും കാര്‍ മറ്റൊരു കാറിലും ഇടിക്കുകയായിരുന്നു. അപകടത്തില്‍ ആര്‍ക്കും പരിക്കില്ലെങ്കിലും വാഹനങ്ങള്‍ മാറ്റാന്‍ വൈകിയതിനാൽ വന്‍ ഗതാഗതക്കുരുക്കുണ്ടായി. പോലീസ് സ്ഥലത്തെത്താന്‍ വൈകിയതായും പരാതിയുണ്ട്. ലോറി സ്‌കൂട്ടറിനെ മറികടക്കുമ്പോള്‍ മുന്നിലുണ്ടായിരുന്ന കാറില്‍ ഇടിച്ചു. ഇടിയുടെ ആഘാതത്തില്‍ മുന്നോട്ടു പോയി കറങ്ങിയ കാര്‍ തിരിഞ്ഞു വീണ്ടും ലോറിയുടെ മുന്നില്‍ ഇടിച്ചുനിന്നു. ഇതിനിടെ‍ എതിര്‍ദിശയില്‍നിന്നു വന്ന മറ്റൊരു കാറിലും കാര്‍ ഇടിച്ചു. രണ്ടു കാറുകളിലുമായി നാലുപേരുണ്ടായിരുന്നെങ്കിലും ആര്‍ക്കും പരിക്കില്ല. അപകടമുണ്ടായത് റോഡിന്‍റെ മധ്യത്തിലായതിനാല്‍ ഗതാഗതക്കുരുക്കും രൂപപ്പെട്ടു. പോലീസ് എത്തിയശേഷം വാഹനങ്ങള്‍ മാറ്റിയാല്‍ മതിയെന്ന് തീരുമാനിച്ചതോടെ ഇരുവശങ്ങളിലേക്കും കുരുക്ക് ഒരു കിലോമീറ്ററിലേറെ നീണ്ടു. അരമണിക്കൂറിനുശേഷം ഗാന്ധിനഗര്‍ പോലീസ് സ്ഥലത്തെത്തിയപ്പോഴേക്കും ഗതാഗതക്കുരുക്ക് രൂക്ഷമായിരുന്നു. ഗതാഗതക്കുരുക്ക് ഒഴിവാക്കിയശേഷം അപകടത്തില്‍പ്പെട്ട വാഹനങ്ങള്‍ സ്റ്റേഷനിലേക്കു മാറ്റി.

സഞ്ചാരികളെ മാടിവിളിച്ച് കുമരകത്തെ ആന്പൽവസന്തം

കുമരകം: അന്തർദേശീയ ടൂറിസം ഭൂപടത്തിലെ മുഖ്യകേന്ദ്രങ്ങളിൽ ഒന്നായ കുമരകം പുതിയ കാഴ്ചാനുഭവങ്ങളൊരുക്കി സഞ്ചാരികളെ മാടിവിളിക്കുന്നു. വേമ്പനാട്ടു കായൽപരപ്പിൽ പുരവഞ്ചികളിൽ സഞ്ചരിച്ചും കൈത്തോടുകളിലൂടെ യാത്ര ചെയ്തു ഗ്രാമീണജീവിതത്തിന്‍റെ വിശുദ്ധി നേരിട്ടു കണ്ടറിയുകയും കയർ പിരിക്കലും ഓലമെടയലും തെങ്ങ് ചെത്തുമെല്ലാം കണ്ടാസ്വദിക്കുകയുമായിരുന്നു കുമരകം സന്ദർശനത്തിന്‍റെ ഇതുവരെയുള്ള മുഖ്യാകർഷണങ്ങളെങ്കിൽ പത്തുപങ്കിലെ ആന്പൽ വസന്തത്തിലൂടെ പുതിയൊരു കാഴ്ചാനുഭവംകൂടി സഞ്ചാരികൾക്ക് പ്രകൃതി സമ്മാനിച്ചിരിക്കുകയാണ്. ഏതാണ്ട് മൂന്നൂറേക്കറിൽ പരന്നു കിടക്കുന്ന വയലാണ് പത്തുപങ്ക് പാടശേഖരം. ഇവിടെനിന്നു കിഴക്കോട്ടു നോക്കിയാൽ കാണാനാകുന്നത് കണ്ണഞ്ചിപ്പിക്കുന്ന കാഴ്‌ചവിസ്‌മയം. കണ്ണെത്താദൂരത്തോളം ആമ്പൽപ്പൂക്കൾ. കായൽ കുളിർകാറ്റേറ്റ് രസിക്കാൻ സ്വദേശികളും വിദേശികളുമായ നൂറുകണക്കിനാളുകളാണ് ദിനംപ്രതി ഇവിടേക്കെത്തിക്കൊണ്ടിരിക്കുന്നത്. സഞ്ചാരികളെ സ്വീകരിച്ചു ചെറുവള്ളങ്ങളിലേറ്റി പത്തുപങ്കിന്‍റെ വിരിമാറിലൂടെ, ആമ്പൽപ്പൂക്കൾക്കിടയിലൂടെ ഉല്ലാസ യാത്രയൊരുക്കാൻ നാട്ടുകാർ ചെറുയാനങ്ങളുമായി കാത്തുനിൽപ്പുണ്ട്. രണ്ടുമണിക്കൂർ യാത്ര, അത് അവിസ്മരണീയ അനുഭവമായി മാറും. കണ്ണാടിച്ചാലിൽനിന്നു തെക്കോട്ടു സഞ്ചരിച്ച് നാരകത്രപ്പാലം കടന്ന് പടിഞ്ഞാറെമൂല വഴി മുത്തേരിമട പാലത്തിങ്കലെത്താം. ചന്തക്കവലയിൽനിന്നു ആശാരിശേരി വഴിയും മുത്തേരിമടയിലെത്താം. ഇരുചക്രവാഹനങ്ങളിലാണെങ്കിൽ നേരിട്ട് ദൈവത്തിന്‍റെ മൂലയിലെത്താം. പുരവഞ്ചികളിലും മോട്ടോർ ബോട്ടുകളിലും പത്തുപങ്കിലെത്താൻ കഴിയും. പുഞ്ചക്കൃഷിപ്പണികൾ ആരംഭിക്കുന്നതുവരെ പുലരികളിൽ വർണവിസ്മയം തീർത്ത് ആമ്പൽപൂക്കൾ പത്തുപങ്കിലേക്ക് സന്ദർശകരെ മാടി വിളിക്കും.

അങ്കണവാടികളില്‍ ഇതുവരെ ബിരിയാണി വേവായിട്ടില്ല

കോട്ടയം: അങ്കണവാടി കുട്ടികള്‍ക്ക് മന്ത്രി വീണാ ജോര്‍ജ് നല്‍കിയ ബിരിയാണി ഉറപ്പ് നടപ്പായില്ല. പ്രവേശനോത്സവ ദിവസം ചില അങ്കണവാടികളില്‍ മുട്ട ബിരിയാണി വിളമ്പിയതല്ലാതെ ബിരിയാണി ചെമ്പു പോലും വാങ്ങാനായിട്ടില്ല. ഒരു കുട്ടിക്ക് അഞ്ചു രൂപയാണ് ഭക്ഷണത്തിന് സര്‍ക്കാര്‍ വിഹിതം. ഒരു മുട്ടയ്ക്ക് ഏഴു രൂപയും ഒരു കിലോ ബിരിയാണി അരിക്ക് 120 രൂപയുമുള്ളപ്പോള്‍ ഒരു കുട്ടിക്കും ബിരിയാണി നല്‍കാനാവില്ല. അധിക ഫണ്ട് ലഭിക്കാതെ ആയയുടെയും അധ്യാപികയുടെയും വേതനത്തില്‍നിന്ന് ബിരിയാണി നല്‍കുക അസാധ്യം. മാത്രവുമല്ല ഏറെ ആയമാര്‍ക്കും ബിരിയാണി പാചകം വശവുമില്ല. മുട്ട ബിരിയാണി, പുലാവ് ഉള്‍പ്പെടെയാണ് മെനു പരിഷ്‌കരിച്ചിരുന്നത്. പഞ്ചസാരയുടെയും ഉപ്പിന്‍റെയും അളവ് കുറച്ച് പോഷക മാനദണ്ഡപ്രകാരം ഊര്‍ജവും പ്രോട്ടീനും ഉള്‍പ്പെടുത്തി രുചികരമാക്കിയാണ് ഭക്ഷണ മെനു പരിഷ്‌കരിച്ചത്. ഇതുകൂടാതെ പാലും പിടിയും ഓംലറ്റും മുളപ്പിച്ച പയറും ന്യൂട്രിലഡുവും ഒക്കെ മെനുവിലുണ്ട്. മെനുവിനെക്കുറിച്ചും ഉള്‍പ്പെടുത്തേണ്ട പോഷകമൂല്യത്തെക്കുറിച്ചുമൊക്കെ ജീവനക്കാര്‍ക്ക് ബോധവത്കരണം നല്‍കിയ ശേഷം ഒരു മാസത്തിനകം പുതിയ മെനു നടപ്പാക്കുമെന്നായിരുന്നു വനിതാ ശിശുവികസന വകുപ്പിന്‍റെ പ്രഖ്യാപനം. അരിക്കലമല്ലാതെ ബിരിയാണി ചെമ്പ് ഒരു അങ്കണവാടിയിലുമില്ല. പാത്രം വാങ്ങാനുള്ള പണംകൂടി അനുവദിക്കണമെന്ന് അധ്യാപികമാര്‍ പറയുന്നു.

ക്ഷീരമേഖലയില്‍നിന്നു കര്‍ഷകര്‍ പിന്തിരിയുന്നു

കോട്ടയം: ഉത്പാദനച്ചെലവ് ക്രമാതീതമായി ഉയർന്നതോടെ പിടിച്ചുനിൽക്കാനാവാതെ ക്ഷീരമേഖലയില്‍നിന്നു കര്‍ഷകര്‍ പിന്തിരിയുന്നു. ഇതോടെ ജില്ലയിലെ പാല്‍ ഉത്പാദത്തില്‍ വന്‍ കുറവാണുണ്ടായിരിക്കുന്നത്. ജില്ലയില്‍ 2000 മുതല്‍ 3000 ലിറ്ററിന്‍റെ കുറവാണ് ദിവസേനയുണ്ടാകുന്നത്. കാലിത്തീറ്റയുടെ വിലവര്‍ധനയും പരിപാലന ചെലവും പശുക്കള്‍ക്കുണ്ടാകുന്ന രോഗവും കര്‍ഷകര്‍ക്ക് തിരിച്ചടിയാണ്. ഓരോ ദിവസവും കഴിയുമ്പോള്‍ ഒന്നും രണ്ടും പശുക്കളെ വളര്‍ത്തി ഉപജീവനം കഴിക്കുന്ന ചെറുകിട കര്‍ഷകർ ഈ മേഖലയില്‍നിന്നു പിന്‍വാങ്ങുകയാണ്. മറ്റു കൃഷികള്‍ക്കൊപ്പം പശുവളര്‍ത്തല്‍ നടത്തുന്നവര്‍ മാത്രമാണ് പിടിച്ചുനിൽക്കുന്നത്. നാളുകളായി പാലിന് ലഭിക്കുന്ന വിലയേക്കാള്‍ വളരെ കൂടുതലാണ് ഉത്പാദനച്ചെലവ്. ഒരു ലിറ്റര്‍ പാല്‍ ഉത്പാദിപ്പിക്കാന്‍ 54-55 രൂപ വരെ ചെലവ് വരും. എന്നാല്‍ വരുമാനം ഇതിലും കുറവാണ്. ഇതിനു പുറമേ പശുക്കള്‍ക്ക് അസുഖം വന്നാല്‍ മരുന്നുകള്‍ വാങ്ങുന്നതിനു ചെലവ് വേറെവരുമെന്നും കഷ്ടപ്പാടിനുള്ള പ്രതിഫലം ക്ഷീരമേഖലയില്‍നിന്ന് ലഭിക്കുന്നില്ലെന്നുമാണ് കര്‍ഷകര്‍ പറയുന്നത്. മുന്‍കാലങ്ങളില്‍ പശുക്കള്‍ക്കു പച്ചപ്പുല്ല്, കച്ചി എന്നിവയാണ് ധാരാളമായി നല്കിയിരുന്നത്. പടിഞ്ഞാറന്‍ മേഖലകളില്‍ ഒഴികെയുള്ള സ്ഥലങ്ങളില്‍ നെല്‍കൃഷി കുറഞ്ഞതോടെ കച്ചിക്കു വലിയ ക്ഷാമം നേരിടുന്നുണ്ട്. കച്ചിയുടെ വിലയും വര്‍ധിപ്പിച്ചു. മുന്‍പ് സൗജന്യമായിട്ടാണ് തോട്ടങ്ങളില്‍നിന്ന് കൈത ലഭിച്ചിരുന്നത്. എന്നാല്‍ ഇന്ന് ഏക്കറിന് രണ്ടായിരം രൂപയെങ്കിലും നല്‍കേണ്ട സ്ഥിതിയാണ്. ചെറുകിട ക്ഷീരകര്‍ഷകര്‍ക്കു പോതപ്പുല്ല് വച്ചുപിടിപ്പിച്ച് പശുക്കള്‍ക്കു നല്കുന്നതിനു സാധ്യമാവില്ല. ഇതിനെല്ലാം പുറമെ കാലിത്തീറ്റ വിലയിലും കിലോഗ്രാമിനു 10 രൂപയുടെ വര്‍ധനയുണ്ടായി. മുന്‍പ് 20-25 രൂപയ്ക്കു വരെ ലഭിച്ചിരുന്ന കാലിത്തീറ്റ കിലോയ്ക്കു 30 രൂപയ്ക്ക് മുകളില്‍ നല്‍കണം. മഴക്കാലം ആരംഭിച്ചതോടെ പശുക്കള്‍ക്കുണ്ടാകുന്ന അസുഖങ്ങളും വലിയ തോതില്‍ വര്‍ധിച്ചിട്ടുണ്ട്. തൈലേറിയ, അകിടുവീക്കം, ദഹനപ്രശ്നം തുടങ്ങിയ രോഗങ്ങളാണ് കൂടുതല്‍ പശുക്കളിലും കണ്ടുവരുന്നത്. കഴിഞ്ഞ രണ്ടു മാസത്തിനിടയില്‍ ജില്ലയുടെ വിവിധ മേഖലകളില്‍ നിരവധി പശുക്കള്‍ ചത്തിട്ടുണ്ട്. മൃഗസംരക്ഷണവകുപ്പ് ഏറെ സജ്ജീകരണങ്ങള്‍ ഉണ്ടെന്ന് അവകാശപ്പെടുമ്പോഴും രോഗങ്ങള്‍ പെട്ടെന്ന് കണ്ടെത്തി ചികിത്സിക്കുന്നതിന് നിലവില്‍ വേണ്ട സൗകര്യങ്ങളില്ലെന്നു കര്‍ഷകര്‍ പറയുന്നു. xz ഉത്പാദന ചെലവ് വര്‍ധിക്കുന്നത് പിടിച്ചുനിര്‍ത്താന്‍ സര്‍ക്കാര്‍ തലത്തില്‍ നടപടി ഉണ്ടാകണമെന്നാണ് കര്‍ഷകര്‍ ആവശ്യപ്പെടുന്നത്.

ഓളപ്പരപ്പിലെ ഒളി‌മ്പിക്സിൽ മാറ്റുരയ്ക്കാൻ ജില്ലയിൽനിന്ന് മൂന്നു ജലരാജാക്കന്മാർ

കുമരകം: ആലപ്പുഴ പുന്നമടക്കായലിൽ 30നു നടക്കുന്ന ഓളപ്പരപ്പിലെ ഒളിമ്പിക്സിൽ മാറ്റുരയ്ക്കാൻ ജില്ലയിൽനിന്നു മൂന്നു ജലരാജാക്കന്മാർ ഒരുക്കം തുടങ്ങി. കുമരകം ടൗൺ ബോട്ട് ക്ലബ്, കുമരകം ഇമ്മാനുവേൽ ബോട്ട് ക്ലബ്, ചങ്ങനാശേരി ബോട്ട് ക്ലബ് എന്നീ പ്രമുഖ ക്ലബ്ബുകളാണ് ജില്ലയിൽ നെഹ്റു ട്രോഫി എത്തിക്കാൻ തുഴയെറിയാൻ പുന്നമടയിലെത്തുക. കുട്ടനാട്ടിലെ വള്ളംകളി പ്രേമികളുടെ ഹരമായിരുന്ന കുമരകത്തെ ക്ലബ്ബുകൾ ആലപ്പുഴയിൽ മിന്നുന്ന പ്രകടനം കാഴ്ച വയ്ക്കുകയും പല റിക്കാർഡുകൾക്കും ഉടമകളാകുകയും ചെയ്തിട്ടുണ്ട്. എന്നാൽ കഴിഞ്ഞ ഒമ്പതു വർഷമായി മുൻ പ്രധാനമന്ത്രി ജവഹർലാൽ നെഹ്റുവിന്‍റെ കൈയൊപ്പുള്ള വെള്ളിക്കപ്പുമായി കുമരകത്തെത്താൻ കഴിഞ്ഞിട്ടില്ല. കുമരകത്തെ ആദ്യ ക്ലബ്ബായ കുമരകം ബോട്ട് ക്ലബ് 2002-ൽ വെള്ളംകുളങ്ങര ചുണ്ടനിൽ സുവർണ ജൂബിലി ട്രോഫി നേടിയ കരുത്തന്മാരാണ്. എന്നാൽ സാമ്പത്തിക പ്രതിസന്ധിമൂലം ഇക്കുറി മത്സരരംഗത്തില്ല. കുമരകം ടൗൺ ബോട്ട് ക്ലബ് തുടർച്ചയായ നാലു വർഷങ്ങളിൽ നെഹ്റു ട്രോഫിയിൽ മുത്തമിട്ട കരുത്തന്മാരാണെങ്കിലും കഴിഞ്ഞവർഷങ്ങളിൽ നിർഭാഗ്യം മൂലം കപ്പ് നേടാനായില്ല. 2023 ൽ ചമ്പക്കുളം ചുണ്ടനിൽ മത്സരിച്ചപ്പോൾ മില്ലി സെക്കൻഡിന്‍റെ വ്യത്യാസത്തിൽ രണ്ടാം സ്ഥാനത്തായി. കഴിഞ്ഞ വർഷം നടുഭാഗം ചുണ്ടനിൽ മത്സരിച്ചപ്പോൾ മൂന്നാംസ്ഥാനക്കാരായി. കഴിഞ്ഞ വർഷങ്ങളിൽ നിന്ന് പാഠം ഉൾക്കൊണ്ട് ഇത്തവണ വലിയ മുന്നൊരുക്കത്തോടെയാണ് കുമരകം ടൗൺ ബോട്ട് ക്ലബ് പുന്നമടയിൽ അങ്കം കുറിക്കുക. കഴിഞ്ഞ വർഷം നീരണിഞ്ഞ പുതിയ പായിപ്പാടൻ ചുണ്ടനിലാണ് മത്സരിക്കുന്നത്. ഒരു മാസത്തെ പരിശീലനമാണ് തുഴച്ചിൽകാർക്ക് ക്ലബ് നൽകുക. പഴയ പായിപ്പാടൻ ചുണ്ടനിൽ 10 ദിവസത്തെ പരിശീലനം പൂർത്തിയാക്കിയ ക്ലബ് ഇന്നലെമുതൽ പുതിയ പായിപ്പാടൻ ചുണ്ടനിൽ പരിശീലനം തുടങ്ങി. മന്ത്രി വി.എൻ. വാസവൻ പരിശീലനം ഉദ്ഘാടനം ചെയ്തു. ക്യാപ്റ്റൻ ടോണി വർക്കി ഫ്ലാഗ് ഓഫ് ചെയ്തു. കുമരകത്തിന്‍റെ സ്വന്തം ചുണ്ടനായ നടുവിലേപ്പറമ്പൻ ചുണ്ടനാണ് കുമരകത്തുനിന്നും പുന്നമട കായലിൽ മാറ്റുരയ്ക്കുന്ന രണ്ടാമത്തെ ചുണ്ടൻ. കുമരകം ഇമ്മാനുവേൽ ബോട്ട് ക്ലബ്ബാണ് ചുണ്ടൻ തുഴയുന്നത്. ഇമ്മാനുവേൽ ബോട്ട് ക്ലബ്ബിന്‍റെ പരിശീലനം ഔദ്യോഗികമായി തുടങ്ങുന്നത് 15നാണ്. 2022ൽ രണ്ടാം സ്ഥാനം കരസ്ഥമാക്കിയവരാണിവർ. ചങ്ങനാശേരി ബോട്ട് ക്ലബ്ബും ഇന്നു പരിശീലനം ആരംഭിക്കും. ചമ്പക്കുളം ചുണ്ടനിലാണ് ചങ്ങനാശേരി ബോട്ട് ക്ലബ് മത്സരിക്കുക.

കാർഷിക വായ്പകളിൽ പലിശരഹിത മോറട്ടോറിയം പ്രഖ്യാപിക്കണം: മോന്‍സ് ജോസഫ്

കോട്ടയം: കര്‍ഷകര്‍ വിവിധ ധനകാര്യസ്ഥാപനങ്ങളില്‍ നിന്നെടുത്തിട്ടുള്ള വായ്പകള്‍ തിരിച്ചടയ്ക്കാത്തതിന്‍റെ പേരില്‍ സംസ്ഥാനവ്യാപകമായി നടത്തുന്ന ജപ്തിനടപടികള്‍ നിര്‍ത്തി വയ്ക്കണമെന്നും പലിശരഹിത മോറട്ടോറിയം പ്രഖ്യാപിക്കണമെന്നും കേരള കോണ്‍ഗ്രസ് സംസ്ഥാന എക്‌സിക്യൂട്ടീവ് ചെയര്‍മാന്‍ മോന്‍സ് ജോസഫ് എംഎല്‍എ. കേരള കര്‍ഷക യൂണിയന്‍ സംസ്ഥാന കമ്മിറ്റിയോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സെപ്റ്റംബറില്‍ നിയോജകമണ്ഡലം യോഗങ്ങളും ഒക്ടോബര്‍ ആദ്യവാരം സംസ്ഥാനപ്രതിനിധി സമ്മേളനവും നടത്താൻ യോഗം തീരുമാനിച്ചു. സംസ്ഥാന പ്രസിഡന്‍റ് വര്‍ഗീസ് വെട്ടിയാങ്കല്‍ അധ്യക്ഷത വഹിച്ചു. ജോയി ഏബ്രഹാം, കെ. ഫ്രാന്‍സിസ് ജോര്‍ജ് എംപി, തോമസ് ഉണ്ണിയാടന്‍, ജോസ് ജയിംസ് നിലപ്പന, തോമസ് കണ്ണന്തറ, ജെയ്‌സണ്‍ ജോസഫ്, വി.ജെ. ലാലി, ജോയി ചെട്ടിശേരി, പോള്‍സണ്‍ ജോസഫ്, ജോണ്‍സ് ജോര്‍ജ് കുന്നപ്പള്ളില്‍, നിതിന്‍ സി. വടക്കന്‍, കുഞ്ഞ് കളപ്പുര, ജയിംസ് പതാരംചിറ തുടങ്ങിയവര്‍ പ്രസംഗിച്ചു

കാലാവസ്ഥാവ്യതിയാന ആഘാതം വിദ്യാഭ്യാസത്തിലും

കോട്ടയം: കാലാവസ്ഥാവ്യതിയാനം അടുത്ത കാലത്തായി പഠനവും അലങ്കോലമാക്കുകയാണ്. പെരുമഴയും വെള്ളപ്പൊക്കവും കാരണം ജൂണ്‍-ജൂലൈ മാസങ്ങളില്‍ നഷ്ടമായത് ആറ് അധ്യയന ദിനങ്ങള്‍. കോട്ടയം, കാഞ്ഞിരപ്പള്ളി വിദ്യാഭ്യാസ ജില്ലകളില്‍ നഷ്ടമായത് എട്ട് ദിനങ്ങള്‍. ദുരിതാശ്വാസ ക്യാമ്പുകളായി മാറ്റിയ സ്‌കൂളുകള്‍ക്ക് നഷ്ടമായത് 15 ദിവസത്തെ അധ്യയനം. ഓണപ്പരീക്ഷ 20 മുതല്‍ 27 വരെ നടക്കാനിരിക്കെ ഈ ടേമിലെ പാഠങ്ങള്‍ അധ്യാപകര്‍ക്ക് ഓടിച്ചുവിടേണ്ട സ്ഥിതിയാണ്. ചില അധ്യാപകര്‍ ക്ലാസ് നോട്ടുകള്‍ കുട്ടികള്‍ക്ക് വാട്‌സ് ആപ്പിലും ഇ മെയിലിലും നല്‍കുന്നു. എസ്എസ്എല്‍സി, പ്ലസ് ടു കുട്ടികള്‍ക്ക് സ്‌പെഷല്‍ ക്ലാസുകള്‍ നടത്തിയും രാവിലെയും വൈകുന്നേരവും അധികസമയം പഠിപ്പിച്ചുമാണ് പാഠങ്ങള്‍ സമയബന്ധിതമായി തീര്‍ക്കുന്നത്. ഒന്നാം ടേം പരീക്ഷ പൂര്‍ത്തിയാക്കി ഓഗസ്റ്റ് 29-ന് സ്‌കൂളുകള്‍ അടയ്ക്കും. സെപ്റ്റംബര്‍ എട്ടിന് തുറക്കും. ഓണാവധിക്കാലത്ത് സ്‌പെഷല്‍ ക്ലാസുകള്‍ക്ക് അനുമതിയില്ല. ഡിസംബര്‍ 11 മുതല്‍ 18 വരെയാണ് ക്രിസ്മസ് പരീക്ഷ. ഡിസംബര്‍ 19-ന് അടച്ച് 29-ന് തുറക്കും. പ്ലസ്ടു പ്രാക്ടിക്കല്‍ പരീക്ഷ 2026 ജനുവരി 22-നും പ്ലസ് വണ്‍, പ്ലസ്ടു മോഡല്‍ പരീക്ഷകള്‍ ഫെബ്രുവരി 16 മുതല്‍ 23 വരെയും നടക്കണം. വാര്‍ഷികപരീക്ഷ മാര്‍ച്ച് രണ്ടുമുതല്‍ 30 വരെയാണ്. മധ്യവേനലവധിക്കായി മാര്‍ച്ച് 31-ന് സ്‌കൂളുകള്‍ അടയ്ക്കുകയും വേണം. വിദ്യാഭ്യാസ കലണ്ടര്‍പ്രകാരം പൊതുവിദ്യാലയങ്ങളില്‍ യുപി വിഭാഗത്തില്‍ 200 അധ്യയനദിനങ്ങളും ഹൈസ്‌കൂളില്‍ 204 അധ്യയനദിനങ്ങളുമുണ്ട്. എല്‍പിയില്‍ 198 അധ്യയനദിവസങ്ങളും നിശ്ചയിച്ചിട്ടുണ്ട്. യുപിക്ക് രണ്ട് ശനിയും ഹൈസ്‌ക്കൂളിന് ആറ് ശനിയും പ്രവൃത്തിദിനമായിരിക്കും.

സിപിഐയെ ഇനി സന്തോഷ്‌കുമാര്‍ നയിക്കും

വൈക്കം: സിപിഐ ജില്ലാ സെക്രട്ടറിയായി വി. കെ. സന്തോഷ്‌കുമാറിനെ തെരഞ്ഞെടുത്തു. വൈക്കത്തു നടന്ന ജില്ലാ സമ്മേളനം ഏകകണ്ഠമായിട്ടാണ് പുതിയ സെക്രട്ടറിയെ തെരഞ്ഞെടുത്തത്. നിലവില്‍ എഐടിയുസി ജില്ലാ സെക്രട്ടറിയും സിപിഐ സംസ്ഥാന കൗണ്‍സിലംഗവുമാണ്. തലപ്പലം സ്വദേശിയായ സന്തോഷ് കുമാര്‍ എഐഎസ്എഫിലൂടെയാണ് പൊതുരംഗത്ത് എത്തുന്നത്. എഐഎസ്എഫ് ജില്ലാ സെക്രട്ടറി, എഐവൈഎഫ് ജില്ലാ സെക്രട്ടറി എന്നീ നിലയില്‍ പ്രവര്‍ത്തിച്ചു. സിപിഐ മീനച്ചില്‍ താലൂക്ക് കമ്മിറ്റിയുടെ അസിസ്റ്റന്‍റ് സെക്രട്ടറിയായും പ്രവര്‍ത്തിച്ചു. 14 വര്‍ഷക്കാലം സിപിഐ പൂഞ്ഞാര്‍ മണ്ഡലം സെക്രട്ടറിയും 10 വര്‍ഷക്കാലം ജില്ലാ അസിസ്റ്റന്‍റ് സെക്രട്ടറിയുമായിരുന്നു. നിലവില്‍ എഐടിയുസി ജില്ലാ സെക്രട്ടറിയും എഐടിയുസി ദേശീയ കൗണ്‍സില്‍ അംഗവുമാണ്. മീനച്ചില്‍ താലൂക്ക് ചെത്ത് തൊഴിലാളി യൂണിയന്‍ പ്രസിഡന്‍റ്, മീനച്ചില്‍ മദ്യ വ്യവസായ തൊഴിലാളി യൂണിയന്‍ പ്രസിഡന്‍റ്, സപ്ലൈകോ എംപ്ലോയീസ് യൂണിയന്‍ ജില്ലാ പ്രസിഡന്‍റ്, ചുമട്ടു തൊഴിലാളി യൂണിയന്‍, നിര്‍മാണ തൊഴിലാളി യൂണിയന്‍ തുടങ്ങി നിരവധി ട്രേഡ് യൂണിയനുകളുടെ ഭാരവാഹിയാണ്. നിലവില്‍ സംസ്ഥാന മിനിമം വേജ് ബോര്‍ഡ് അഡ്വൈസറി മെമ്പറുമാണ്. പൂഞ്ഞാറിലെ ആദ്യകാല കമ്യൂണിസ്റ്റ് പാര്‍ട്ടി പ്രവര്‍ത്തകനായിരുന്ന വി. എസ്. കുട്ടപ്പന്‍റെയും ടി. കെ. പൊന്നമ്മയുടെയും മകനാണ്. ഭാര്യ: ശ്രീദേവി. മക്കള്‍: ജീവന്‍, ജീവ. തെരഞ്ഞെടുക്കപ്പെട്ടത് ഏകകണ്ഠമായി വൈക്കം: കഴിഞ്ഞ തവണ ഏറ്റുമാനൂരില്‍ നടന്ന ജില്ലാ സമ്മേളനത്തില്‍ അപ്രതീക്ഷിത തോല്‍വിയറിഞ്ഞ വി. കെ. സന്തോഷ്‌കുമാര്‍ വൈക്കം സമ്മേളനത്തില്‍ ഏകകണ്ഠമായ തെരഞ്ഞെടുപ്പിലൂടെയാണ് ജില്ലാ സെക്രട്ടറി സ്ഥാനത്ത് എത്തുന്നത്. ഏറ്റുമാനൂര്‍ സമ്മേളനത്തില്‍ സംസ്ഥാന സെക്രട്ടറി കാനം രാജേന്ദ്രന്‍റെ നേതൃത്വത്തില്‍ സംസ്ഥാന നേതൃത്വം സന്തോഷ്‌കുമാറിനെ സെക്രട്ടറിയാക്കാനായിരുന്നു തീരുമാനിച്ചിരുന്നത്. എന്നാല്‍ അവസാനം വോട്ടെടുപ്പിലൂടെ വി.ബി. ബിനു സന്തോഷ്‌കുമാറിനെ പരാജയപ്പെടുത്തി സെക്രട്ടറിയാകുകയായിരുന്നു. ഇത്തവണ സമ്മേളനം ആരംഭിക്കുന്നതിനു വളരെനാള്‍ മുമ്പേ ജില്ലാ സെക്രട്ടറി സ്ഥാനം ഒഴിയാന്‍ താത്പര്യം പ്രകടിപ്പിച്ച് വി.ബി. ബിനു സംസ്ഥാന നേതൃത്വത്തിനു കത്തു നല്‍കിയിരുന്നു. ഇതോടെ സന്തോഷ്‌കുമാറിനെ സെക്രട്ടറി സ്ഥാനത്തേക്ക് പരിഗണിക്കുകയായിരുന്നു. ജില്ലാ അസിസ്റ്റന്‍റ് സെക്രട്ടറി ജോണ്‍ വി.ജോസഫിനുവേണ്ടി ജില്ലാ നേതൃത്വത്തിലെ ഒരു വിഭാഗം വാദിച്ചെങ്കിലും സംസ്ഥാന നേതൃത്വം സന്തോഷിനെ പിന്തുണയ്ക്കുകയായിരുന്നു. എഐടിയുസി ജില്ലാ സെക്രട്ടറിയായി നല്ല രീതിയില്‍ പ്രവര്‍ത്തിച്ചു വരികയായിരുന്നു സന്തോഷ്. പാര്‍ട്ടിയിലെ വിഭാഗീയതയിലോ ഗ്രൂപ്പിലോ ഒന്നും സന്തോഷ് ഭാഗഭാക്കല്ലായിരുന്നു. സ്ഥാനമൊഴിഞ്ഞ ജില്ലാ സെക്രട്ടറി വി. ബി. ബിനു സംസ്ഥാന എക്‌സിക്യൂട്ടീവംഗമായേക്കും. 51 ജില്ലാ കൗണ്‍സില്‍ അംഗങ്ങളെയും അഞ്ചു ക്ഷണിതാക്കളെയും സമ്മേളനം തെരഞ്ഞെടുത്തു. മുതിര്‍ന്ന നേതാക്കളായ പി. കെ. കൃഷ്ണന്‍, സി. കെ. ശശിധരന്‍ എന്നിവര്‍ ജില്ലാ കൗണ്‍സിലില്‍ നിന്നും ഒഴിവായി. വനിതകളെയും യുവാക്കളെയും കൗണ്‍സിലില്‍ ഉള്‍പ്പെടുത്തിയിട്ടുണ്ട്. ജ്യോതിരാജ്, സന്തോഷ് കേശവനാഥ്, പി.എസ്. സുനില്‍, പി.ആര്‍. തങ്കച്ചന്‍, ഷമ്മാസ്, മിനിമോള്‍ ബിജു, സിന്ധു അനില്‍കുമാര്‍, സ്വപ്‌ന റെജി എന്നിരാണ് പുതിയ കൗണ്‍സില്‍ അംഗങ്ങള്‍. സംസ്ഥാന സെക്രട്ടറി ബിനോയി വിശ്വം, കേന്ദ്ര നേതാക്കളായ കെ.പി. രാജേന്ദ്രന്‍, പി. സന്തോഷ്‌കുമാര്‍ എന്നിവര്‍ തെരഞ്ഞെടുപ്പിനു നേതൃത്വം നല്‍കി.

കാഞ്ഞിരപ്പള്ളി സെന്‍റ് ഡൊമിനിക്‌സ് കത്തീഡ്രൽ ദ്വിശതാബ്ദി ജൂബിലി ആഘോഷങ്ങള്‍ സമാപിച്ചു

കാഞ്ഞിരപ്പള്ളി: മാര്‍ത്തോമ്മ ക്രിസ്ത്യാനികളുടെ അപ്പസ്‌തോലികവും സാംസ്‌കാരികവുമായ പൈതൃകമുള്ള ഇടമാണ് കാഞ്ഞിരപ്പള്ളിയെന്ന് സീറോ മലബാര്‍ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍. കാഞ്ഞിരപ്പള്ളി സെന്‍റ് ഡൊമിനിക്സ് കത്തീഡ്രല്‍ ദ്വിശതാബ്ദി ജൂബിലി ആഘോഷ സമാപന സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു മാര്‍ റാഫേല്‍ തട്ടില്‍. കാഞ്ഞിരപ്പളളി രൂപതയുടെ വളര്‍ച്ച കൂട്ടായ്മയുടെയും കൂട്ടുത്തരവാദിത്വത്തിന്‍റെയും ശ്രമഫലമായാണ്. രൂപതയുടെ ജൂബിലി ആഘോഷത്തിന്‍റെ കൊടിയേറ്റമാണ് കത്തീഡ്രലിന്‍റെ ദ്വിശതാബ്ദി ആഘോഷം. മിഷനറിമാരെ സഭയ്ക്ക് സംഭാവന ചെയ്തവരാണ് ക്രിസ്ത്യാനികള്‍. ദൈവവിളിയിലും കുടുംബ പ്രാര്‍ഥനയിലും കുറവുവരാതെ ക്രിസ്ത്യാനികള്‍ ശ്രദ്ധിക്കണം. സഭയുടെ മിഷന്‍ പ്രവര്‍ത്തനങ്ങള്‍ക്കു ശക്തി പകരാന്‍ കാഞ്ഞിരപ്പള്ളി കത്തീഡ്രല്‍ ഇടവകയ്ക്കു കഴിഞ്ഞിട്ടുണ്ടെന്നും മാര്‍ റാഫേല്‍ തട്ടില്‍ പറഞ്ഞു. കാഞ്ഞിരപ്പള്ളി ബിഷപ് മാര്‍ ജോസ് പുളിക്കല്‍ അധ്യക്ഷത വഹിച്ചു. കത്തീഡ്രല്‍ ഇടവക കാഞ്ഞിരപ്പള്ളി രൂപതയുടെ ശക്തികേന്ദ്രമാണെന്നും ഇടവകയുടെ വളര്‍ച്ച രൂപതയുടെ വളര്‍ച്ചയ്ക്ക് ആധാരമായെന്നും മാര്‍ ജോസ് പുളിക്കല്‍ പറഞ്ഞു. ബിഷപ് മാര്‍ മാത്യു അറയ്ക്കല്‍ അനുഗ്രഹപ്രഭാഷണം നടത്തി. ടീം കത്തീഡ്രലിന്‍റെ ജൂബിലി ഗാന ആലാപനത്തോടെ ആരംഭിച്ച സമ്മേളനത്തില്‍ ആര്‍ച്ച്പ്രീസ്റ്റ് റവ.ഡോ. കുര്യന്‍ താമരശേരി, മുന്‍ വികാരി ഫാ. വര്‍ഗീസ് പരിന്തിരിക്കല്‍, സിസ്റ്റര്‍ മെര്‍ലി സിഎംസി, ഫാ. ബേബി മുല്ലൂര്‍പറമ്പില്‍ എസ്ജെ, ടി.സി ചാക്കോ വാവലുമാക്കല്‍, മെറീനാ റ്റോമി കാവുങ്കല്‍, ജോസഫ് മാത്യു പതിപ്പള്ളില്‍, ഷോണ്‍ മുണ്ടാട്ടുചുണ്ടയില്‍, സെബാസ്റ്റ്യന്‍ ജോസ് എള്ളൂക്കുന്നേല്‍ എന്നിവര്‍ പ്രസംഗിച്ചു. സമ്മേളനത്തിനു മുന്നോടിയായി കത്തീഡ്രലില്‍ നടന്ന സമൂഹബലിയില്‍ ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍ മുഖ്യകാര്‍മികത്വം വഹിച്ചു സന്ദേശം നല്കി. മതത്തിന്‍റെ വേലിക്കെട്ടുകള്‍ക്കപ്പുറത്ത് മാനവികതയ്ക്ക് പ്രാധാന്യം കൊടുത്ത് ചിന്തിക്കുന്ന ഒരു സമൂഹവും സംസ്‌കാരവും ഇവിടെ ഉണ്ടായിരുന്നുവെന്നും അത് നമുക്ക് അഭിമാനം നല്‍കുന്നതാണെന്നും ബിഷപ് പറഞ്ഞു. കഴിഞ്ഞ രണ്ടിനാണ് ജൂബിലി സമാപന ആഘോഷങ്ങള്‍ക്കു തിരി തെളിഞ്ഞത് തുടര്‍ന്ന് വിവിധ ദിവസങ്ങളിലായി ഇടവകകളുടെ സംഗമവും കൂട്ടായ്മകളുടെ സംഗമവും കാരുണ്യ ഭവനങ്ങളുടെ സംഗമവും കുടുംബ സംഗമവും വൈദിക സന്യസ്ത സംഗമവും നടന്നിരുന്നു. ഇന്നലെ നടന്ന സമൂഹബലിയിലും സമ്മേളനത്തിലും നൂറുകണക്കിനു വിശ്വാസികള്‍ പങ്കെടുത്തു.

ചുരുളന്‍ വള്ളത്തിലേറാന്‍ ഇനി രവീന്ദ്രബാബു ഭട്ടതിരി ഇല്ല

കോട്ടയം: ചിങ്ങത്തിലെ മൂലംനാളില്‍ കുമാരനല്ലൂര്‍ മങ്ങാട്ടില്ലത്തുനിന്നും ചുരുളന്‍ വള്ളത്തിലേറാന്‍ ഇനി രവീന്ദ്രബാബു ഭട്ടതിരി ഇല്ല. കഴിഞ്ഞ നാലു തവണ തിരുവോണത്തോണിയുടെ അകമ്പടി തോണിയുടെ സാരഥിയായിരുന്നു ഇന്നലെ അന്തരിച്ച രവീന്ദ്രബാബു ഭട്ടതിരി. ആറന്മുള കാട്ടൂരില്‍നിന്ന് കുമാരനല്ലൂരിലേക്ക് കുടിയേറിയ മങ്ങാട്ടില്ലത്തെ കാരണവരാണ് നാലര നൂറ്റാണ്ടായി പാര്‍ഥസാരഥിക്കുള്ള ഓണവിഭവങ്ങളുമായി ആചാരപരമായ യാത്ര പോയിരുന്നത്. യാത്രയുടെ അവകാശം രവീന്ദ്രബാബുവിനായിരുന്നെങ്കിലും വൃക്ക സംബന്ധമായ അസുഖത്തെ തുടര്‍ന്ന് ചികിത്സയിലായതോടെ സഹോദരപുത്രന്‍ അനൂപ് നാരായണ ഭട്ടതിരിയാണ് കഴിഞ്ഞ വര്‍ഷം ചുരുളന്‍ വള്ളത്തില്‍ യാത്ര പുറപ്പെട്ടത്. ജ്യേഷ്ഠന്‍ നാരായണ ഭട്ടതിരി അന്തരിച്ചശേഷം ആചാരനിയോഗം ഏറ്റെടുത്ത രവീന്ദ്രബാബു ഇതിനോടകം നാലുവട്ടം യാത്രപോയി. മൂലം നാളില്‍ കുമാരനല്ലൂര്‍ മങ്ങാട്ടില്ലക്കടവില്‍നിന്ന് വളവരവച്ച ചുരുളനില്‍ മൂന്നു തുഴച്ചില്‍ക്കാരോടൊപ്പമായിരുന്നു യാത്ര. കുമാരനല്ലൂര്‍ ദേവീക്ഷേത്രത്തില്‍ ദര്‍ശനവും പായസ നിവേദ്യവും നടത്തിയാണ് പുഴകളും കായലുകളും കടന്നുള്ള യാത്രയ്ക്ക് തോണിയേറിയിരുന്നത്. തിരുവോണത്തിനു മുമ്പ് ആര്‍ ബ്ലോക്ക് കായല്‍വഴി കിടങ്ങറയിലെത്തി ചക്കുളത്തുകാവിലും തിരുവല്ല മൂവടത്തുമഠത്തിലുമെത്തി വിശ്രമശേഷം പൂരാടത്തിനു വൈകുന്നേരം പമ്പയാറ്റിലൂടെ ആറന്മുള സത്രത്തിലെത്തി വിശ്രമിക്കും. ഉത്രാടത്തിന് രാവിലെ ആറന്മുളയില്‍നിന്ന് അയിരൂര്‍ പുതിയകാവിലെത്തി ഉച്ചപൂജയില്‍ പങ്കെടുക്കുന്ന ബാബു ഭട്ടതിരി പിന്നീട് മൂലകുടുംബക്ഷേത്രമായ കാട്ടൂര്‍ മഹാവിഷ്ണു ക്ഷേത്രത്തിലെ ദര്‍ശന ശേഷം അവിടെനിന്നും കരക്കാര്‍ നിറയ്ക്കുന്ന വിഭവങ്ങളുമായി ആറന്മുളയിലേക്ക് തിരുവോണത്തോണിയുമായി യാത്രയാകുന്നതായിരുന്നു പതിവ്. തിരുവോണപ്പുലര്‍ച്ചെ ജലഘോഷയാത്ര ആറന്മുള ക്ഷേത്രക്കടവിലെത്തും. തുടര്‍ന്ന് ഓണവിഭവങ്ങള്‍ സമര്‍പ്പിക്കും. പൊന്നോണത്തിന് ആറന്മുള ക്ഷേത്രത്തില്‍ നടക്കുന്ന എല്ലാ ചടങ്ങുകളിലും പങ്കെടുക്കുന്ന രവീന്ദ്രബാബു ഭട്ടതിരി ചെലവുമിച്ചം പണക്കിഴി കാണിക്കവഞ്ചിയില്‍ സമര്‍പ്പിച്ച ശേഷമാണ് കുമാരനല്ലൂരിലേക്ക് തിരിച്ചിരുന്നത്.

ദേവഹരിതം പദ്ധതിക്കു തുടക്കം

പൂഞ്ഞാര്‍: ഹരിത കേരളം മിഷന്‍റെ ആഭിമുഖ്യത്തില്‍ ദേവഹരിതം പദ്ധതിക്ക് പൂഞ്ഞാര്‍ കോയിക്കല്‍ ദേവസ്വം ബോര്‍ഡിനു കീഴിലുള്ള മധുരമീനാക്ഷി ദേവീക്ഷേത്രത്തില്‍ തുടക്കമായി. നവകേരളം കര്‍മപദ്ധതി കോ-ഓര്‍ഡിനേറ്റര്‍ ഡോ. ടി.എന്‍. സീമ ഉദ്ഘാടനം ചെയ്തു. കേരളത്തിലെ ആരാധനാലയങ്ങളുടെ പരിസരപ്രദേശങ്ങളുടെ സംരക്ഷണത്തിനും പച്ചപ്പ് വര്‍ധിപ്പിക്കുന്നതിനും വേണ്ടിയുള്ള പദ്ധതിയാണ് ദേവഹരിതം. പൂഞ്ഞാർ എസ്എംവി ഹയര്‍ സെക്കന്‍ഡറി സ്‌കൂളിന്‍റെയും എടിഎം പബ്ലിക് ലൈബ്രറിയുടെയും സഹകരണത്തോടെയാണ് മധുരമീനാക്ഷി ദേവീക്ഷേത്രത്തില്‍ പദ്ധതി നടപ്പിലാക്കുന്നത്. ചന്ദനം, ചെത്തി, തുളസി, മന്ദാരം, പിച്ചകം, കമണ്ഡലു തുടങ്ങി വിവിധതരത്തിലുള്ള സസ്യങ്ങളാണ് ക്ഷേത്ര പരിസരപ്രദേശങ്ങളില്‍ നട്ടുപിടിപ്പിക്കുന്നത്. കൂടാതെ ചെമ്പരത്തി ഉപയോഗിച്ച് ജൈവവേലിയും നിര്‍മിക്കുന്നുണ്ട്. പൂഞ്ഞാര്‍ പഞ്ചായത്ത് പ്രസിഡന്‍റ് ഗീതാ നോബിൾ അധ്യക്ഷത‌‌ വഹിച്ചു. ഈരാറ്റുപേട്ട ബ്ലോക്ക് പഞ്ചായത്തംഗം രമാ മോഹന്‍, നവകേരളം കര്‍മപദ്ധതി ജില്ലാ കോ-ഓര്‍ഡിനേറ്റര്‍ എന്‍.എസ്. ഷൈന്‍, ജില്ലാ ലൈബ്രറി കൗണ്‍സില്‍ അംഗം ബി. രമേഷ് വെട്ടിമറ്റം, പരിസ്ഥിതി പ്രവര്‍ത്തകന്‍ എബി ഇമ്മാനുവല്‍, പ്രഫ. സുധ വര്‍മ, ബ്ലോക്ക് റിസോഴ്‌സ് പേഴ്‌സണ്‍ വിഷ്ണു പ്രസാദ്, ഹെഡ്മിസ്ട്രസ് എ.ആര്‍. അനുജ വര്‍മ, സ്‌കൂള്‍ പ്രിന്‍സിപ്പല്‍ എസ്. ജയശ്രീ, എടിഎം പബ്ലിക് ലൈബ്രറി സെക്രട്ടറി വി.കെ. ഗംഗാധരന്‍ എന്നിവര്‍ പങ്കെടുത്തു.

വെള്ളക്കെട്ടില്‍ വലഞ്ഞ് രാമപുരം എസ്എച്ച് ഗേള്‍സ് സ്‌കൂള്‍ വിദ്യാര്‍ഥികള്‍

രാമപുരം: എസ്എച്ച് ഗേള്‍സ് ഹൈസ്‌കൂളിന് മുന്‍പിലെ വെള്ളക്കെട്ടുമൂലം വിദ്യാര്‍ഥികളും അധ്യാപകരും വലയുന്നു. ചെറുതായി ഒരു മഴ വന്നാല്‍ റോഡിന് സൈഡില്‍ കൂടെ മാത്രമല്ല റോഡിന് നടുവിലൂടെ പോലും നടക്കാന്‍ വയ്യാത്ത സാഹചര്യമാണുള്ളത്. മഴക്കാലം ആരംഭിക്കുമ്പോള്‍ തുടങ്ങുന്ന വെള്ളക്കെട്ട് ചെളിയും തെന്നലും ഒക്കെയായി തുടരും. മഴ വന്നാല്‍ റോഡ് തോടാകുമെന്ന് നാട്ടുകാര്‍ പറയുന്നു. കുറിഞ്ഞി, പിഴക്, രാമപുരം ഭാഗങ്ങളില്‍നിന്നു വരുന്ന റോഡുകള്‍ ഒന്നിച്ചുചേരുന്ന സ്ഥലമാണിത്. അമിതവേഗത്തില്‍ എത്തുന്ന വാഹനങ്ങള്‍ വിദ്യാര്‍ഥികളുടെ ദേഹത്തേക്ക് വെള്ളം തെറിപ്പിക്കുന്നത് പതിവാണ്. വെള്ളക്കെട്ട് ഒഴിവാക്കാനായി വിദ്യാർഥികൾ റോഡിലേക്കു കയറുന്നത് അപകടഭീഷണി വർധിപ്പിക്കുകയാണ്. വൈദ്യുതിപോസ്റ്റുകളില്‍നിന്നു വലിച്ചുകെട്ടിയിരിക്കുന്ന സ്റ്റേ കമ്പികളും ഈ വെള്ളക്കെട്ടില്‍ തന്നെയാണുള്ളത്. എത്രയും വേഗം അധികാരികളുടെ ശ്രദ്ധ ഈ വിഷയത്തില്‍ ഉണ്ടാകണമെന്ന് രക്ഷിതാക്കളും അധ്യാപകരും ആവശ്യപ്പെട്ടു.

എൺപത് പിന്നിട്ട മാതാപിതാക്കള്‍ക്ക് ആദരവുമായി എകെസിസി ചക്കാമ്പുഴ യൂണിറ്റ്

ചക്കാമ്പുഴ: ചക്കാമ്പുഴ ഇടവകയെ രൂപപ്പെടുത്തുന്നതില്‍ നിസ്തുല സംഭാവനകള്‍ നല്‍കിയ 80 പിന്നിട്ട എണ്‍പതില്‍പരം മാതാപിതാക്കള്‍ക്ക് ആദരവൊരുക്കി എകെസിസി ചക്കാമ്പുഴ യൂണിറ്റ് സുകൃതപഥം എല്‍ഡേഴ്‌സ് മീറ്റ് സംഘടിപ്പിച്ചു. വിശുദ്ധ കുര്‍ബാനയും സ്‌നേഹവിരുന്നും ചടങ്ങിന്‍റെ ഭാഗമായി നടത്തി. ഫോട്ടോ പതിപ്പിച്ച സ്മാരക ഫലകവും ഉത്തരീയവും സമ്മാനമായി നല്‍കിയാണ് മാതാപിതാക്കളെ യാത്രയാക്കിയത്. വികാരി ഫാ. ജോസഫ് വെട്ടത്തേല്‍ സംഗമം ഉദ്ഘാടനം ചെയ്തു. ഫാ. മാത്യു മുതുപ്ലാക്കല്‍, യൂണിറ്റ് പ്രസിഡന്‍റ് സണ്ണി കുരിശുംമൂട്ടില്‍, കിന്‍ഫ്ര ഫിലിം ആന്‍ഡ് വീഡിയോ പാര്‍ക്ക് ചെയര്‍മാന്‍ ബേബി ഉഴുത്തുവാല്‍, യൂണിറ്റ് ഭാരവാഹികളായ തങ്കച്ചന്‍ കളരിക്കല്‍, പി.ജെ. മാത്യു പാലത്താനം തുടങ്ങിയവര്‍ പ്രസംഗിച്ചു.

"സഹകരണ'മില്ലാതെ സഹികെട്ട "ജനകീയന്‍' ഓട്ടം നിര്‍ത്തി

മറ്റത്തിപ്പാറ: കഴിഞ്ഞ പതിനേഴു വര്‍ഷമായി നാട്ടുകാരുടെ ഏക ആശ്രമമായിരുന്ന "ജനകീയന്‍' ബസ് സര്‍വീസ് നിലച്ചു. കരിങ്കുന്നം-നീലൂര്‍ റൂട്ടിലെ ഏക ബസായിരുന്നു ജനകീയന്‍. മറ്റത്തിപ്പാറ ഗ്രാമത്തിലെ 76 പേര്‍ ചേര്‍ന്ന് വാങ്ങിയ ജനകീയന്‍ ബസിന് ഓട്ടം ഇപ്പോള്‍ നിര്‍ത്തേണ്ടി വന്നു. സഹകരണബാങ്ക് ചതിച്ചതോടെയാണിത്. ബസിന്‍റെ ലാഭവിഹിതം നിക്ഷേപിച്ച സഹകരണ ബാങ്ക് കൈവിട്ടപ്പോഴാണ് അറ്റകുറ്റപ്പണികള്‍ പൂര്‍ത്തിയാക്കാനാവാതെ സര്‍വീസ് നിര്‍ത്തിവയ്‌ക്കേണ്ട അവസ്ഥയിലെത്തിയത്. പതിനേഴു വർഷം മുന്പ് മറ്റത്തിപ്പാറ എന്ന കൊച്ചുഗ്രാമത്തിലെ യാത്രാക്ലേശത്തിനു പരിഹാരമായി മറ്റത്തിപ്പാറ ഹോളിക്രോസ് പള്ളി അങ്കണത്തില്‍ നാട്ടുകാര്‍ ഒത്തുകൂടി സ്വന്തമായി ഒരു ബസ് വാങ്ങാന്‍ തീരുമാനിച്ചു. അതിനായി ജനകീയ ബസ് ഐക്യവേദി രൂപീകരിച്ചു. നാട്ടുകാരായ 76 പേര്‍ 10,000 രൂപ വീതം നല്‍കി ഒരു സെക്കന്‍ഡ് ഹാന്‍ഡ് ബസ് വാങ്ങി. ജനങ്ങളുടെ വണ്ടിക്ക് ജനകീയന്‍ എന്ന് പേരുമിട്ടു. 2008 മാര്‍ച്ച് 17ന് ബസ് കരിങ്കുന്നത്തുനിന്ന് നീലൂരിലേക്ക് ഓടിത്തുടങ്ങി. അങ്ങോട്ടുമിങ്ങോട്ടുമായി 18 ട്രിപ്പുകളാണ് ബസ് ഒരു ദിവസം ഓടിയിരുന്നത്. ലാഭകരമായി ഓടിയിരുന്ന സമയത്ത് ചെലവ് കഴിഞ്ഞുള്ള തുക കടനാട് സഹകരണബാങ്കിന്‍റെ മറ്റത്തിപ്പാറ ബ്രാഞ്ചില്‍ നിക്ഷേപിച്ചിരുന്നു. മൂന്നു ലക്ഷം രൂപയോളം നിക്ഷേപമുണ്ടായിരുന്നു. ബാങ്ക് പ്രതിസന്ധിയിലായതിനാല്‍ ഈ തുക തിരികെ കിട്ടിയില്ല. അതാണ് ബസ് നിര്‍ത്താനുള്ള പ്രധാന കാരണം. സഹകരണ ബാങ്കിലെ നിക്ഷേപത്തുക തിരികെ കിട്ടിയാല്‍ ബസ് പണിത് ഇറക്കാം. ഓഗസ്റ്റ് രണ്ടിനാണ് ഒടുവില്‍ സര്‍വീസ് നടത്തിയത്. ജനകീയന്‍ ഓട്ടം നിര്‍ത്തുമ്പോള്‍ വലയുന്നത് വിദ്യാര്‍ഥികള്‍ ഉള്‍പ്പെടെയുള്ള യാത്രക്കാരാണ്. ഇടുക്കി, കോട്ടയം ജില്ലകളുടെ അതിര്‍ത്തി ഗ്രാമമാണ് മറ്റത്തിപ്പാറ. പല ബസ് സര്‍വീസുകളും ഓടി നിര്‍ത്തിയ ഈ നാട്ടില്‍ ജനകീയന്‍ ബസ് ഒരു വലിയ ആശ്വാസമായിരുന്നു. കടനാട് സഹകരണ ബാങ്കിലെ നിക്ഷേപത്തുക തിരികെ ലഭിക്കുന്നതിന് നടപടി സ്വീകരിക്കണമെന്ന് ആവശ്യപ്പെട്ട് മുഖ്യമന്ത്രിക്കും സഹകരണമന്ത്രിക്കും മറ്റത്തിപ്പാറ നിവാസികള്‍ നിവേദനം നല്‍കി കാത്തിരിക്കുകയാണ്.

അന്നമോള്‍ക്ക് സ്‌കൂളും നാടും ഇന്ന് അന്ത്യയാത്രയേകും

പാലാ: ചേതനയറ്റ ശരീരമായി അന്നമോള്‍ ഇന്ന് അവസാനമായി സ്‌കൂളിലെത്തും. നൂറുകണക്കിന് പനിനീര്‍ പുഷ്പങ്ങള്‍കൊണ്ട് പ്രിയപ്പെട്ട സഹപാഠികള്‍ കുഞ്ഞുമാലാഖയ്ക്ക് അന്ത്യാഞ്ജലി അര്‍പ്പിക്കും. മുണ്ടാങ്കലിൽ കഴിഞ്ഞ ദിവസമുണ്ടായ വാഹനാപകടത്തില്‍ മരിച്ച പാലാ സെന്‍റ് മേരീസ് സ്‌കൂളിലെ ആറാം ക്ലാസ് വിദ്യാര്‍ഥിനി അല്ലപ്പാറ പാലക്കുഴക്കുന്നില്‍ സുനിലിന്‍റെ മകള്‍ അന്നമോളുടെ ഭൗതികശരീരം ഇന്നു രാവിലെ 8.30 ഓടെ സ്‌കൂളിലെത്തിക്കും. തങ്ങളുടെ പ്രിയ കൂട്ടുകാരിയുടെ വേര്‍പാട് സഹപാഠികളെയും അധ്യാപകരെയും ദുഃഖത്തിലാഴ്ത്തിയിരിക്കുകയാണ്. അന്നമോള്‍ക്ക് അന്ത്യയാത്ര നല്‍കാന്‍ സ്‌കൂളില്‍ തയാറെടുപ്പുകള്‍ പൂര്‍ത്തിയായി. അധ്യാപകരും വിദ്യാര്‍ഥികളും രക്ഷാകര്‍ത്താക്കളും അന്തിമോപചാരം അർപ്പിക്കും. സ്‌കൂളിലെ ചടങ്ങുകള്‍ക്കു ശേഷം 9.30ഓടെ മൃതദേഹം അല്ലപ്പാറയിലുള്ള വസതിയിലും തുടര്‍ന്ന് 11 മുതല്‍ പ്രവിത്താനം സെന്‍റ് അഗസ്റ്റിന്‍സ് ഫൊറോന പള്ളി പാരിഷ് ഹാളിലും പൊതുദര്‍ശനത്തിന് വയ്ക്കും. സംസ്‌കാരശുശ്രൂഷകള്‍ 12ന് പള്ളിയില്‍ നടക്കും.

കൊഴുവനാല്‍ അഗ്രി ഫെസ്റ്റ് 15ന്

പാലാ: കത്തോലിക്ക കോണ്‍ഗ്രസ് കൊഴുവനാല്‍ യൂണിറ്റും സ്വാശ്രയസംഘവും പാലാ സോഷ്യല്‍ വെല്‍ഫെയര്‍ സൊസൈറ്റിയുടെ നേതൃത്വത്തില്‍ 15ന് കൊഴുവനാല്‍ അഗ്രി ഫെസ്റ്റ് നടത്തും. അഗ്രിമ സെന്‍ട്രല്‍ കാര്‍ഷിക നഴ്‌സറിയുടെ സഹകരണത്തോടെ രാവിലെ ആറിന് ആരംഭിക്കുന്ന അഗ്രിഫെസ്റ്റില്‍ നാടന്‍, വിദേശ ഫലവൃക്ഷത്തൈകളും പച്ചക്കറികളും സ്വന്തമാക്കാന്‍ ആളുകള്‍ക്ക് അവസരമുണ്ട്. ശ്രീലങ്കന്‍ തെങ്ങിന്‍ തൈകള്‍, മങ്കുവ കൊക്കോത്തൈകള്‍, മറയൂര്‍ ചന്ദനത്തൈകള്‍ അടക്കം 101ല്‍ പരം സ്വദേശ, വിദേശ ഫലപുഷ്പത്തൈകള്‍, ഹൈബ്രിഡ് പച്ചക്കറിത്തൈകള്‍, ജൈവ വളങ്ങള്‍, പൂച്ചെടികള്‍, ഇലച്ചെടികള്‍, ചെടിച്ചട്ടികള്‍, ജൈവവളങ്ങള്‍, കീടനാശിനികള്‍ തുടങ്ങി ഓരോ വീടുകളിലും അടുക്കളത്തോട്ടം മുതല്‍ കാര്‍ഷികനഴ്‌സറിവരെ ഒരുക്കാനാവശ്യമായ എല്ലാ ഘടകങ്ങളും ചേര്‍ത്താണ് അഗ്രി ഫെസ്റ്റ് സംഘടിപ്പിക്കുന്നത്. രാവിലെ 6.30ന് അഗ്രി ഫെസ്റ്റിന്‍റെ ഉദ്ഘാടനം ഫൊറോന വികാരി ഫാ. ജോസ് നെല്ലിക്കത്തെരുവില്‍ നിര്‍വഹിക്കും. പാലാ സോഷ്യല്‍ വെല്‍ഫെയര്‍ സൊസൈറ്റി ഡയറക്ടര്‍ ഫാ. തോമസ് കിഴക്കേല്‍ ആദ്യ വില്പന നിര്‍വഹിക്കും. ഉച്ചകഴിഞ്ഞ് 2.30ന് ആരംഭിക്കുന്ന കാര്‍ഷിക സെമിനാറിന് ജില്ലാ അസിസ്റ്റന്‍റ് പ്രിന്‍സിപ്പല്‍ കൃഷി ഓഫീസര്‍ സ്‌നേഹലത മാത്യൂസ് നേതൃത്വം നൽകും. വൈകുന്നേരം 5.30 വരെ അഗ്രി ഫെസ്റ്റിന്‍റെ ഭാഗമായുള്ള പ്രദര്‍ശന-വിപണനമേള ഉണ്ടായിരിക്കും.

സെന്‍റ് ഡൊമിനിക്‌സ് കത്തീഡ്രല്‍ ഇടവക സ്ഥാപനത്തിന്‍റെ ദ്വിശദാബ്ദി ജൂബിലി ആഘോഷങ്ങള്‍ക്ക് പ്രൗഢോജ്വല സമാപനം

കാഞ്ഞിരപ്പള്ളി: സെന്‍റ് ഡൊമിനിക്‌സ് കത്തീഡ്രല്‍ ഇടവക സ്ഥാപനത്തിന്‍റെ ദ്വിശദാബ്ദി ജൂബിലി ആഘോഷ സമാപനം പ്രൗഢോജ്വലമായി. സമാപന ദിനമായ ഇന്നലെ നടന്ന വിശുദ്ധ കുര്‍ബാനയിലും സമ്മേളനത്തിലും പങ്കെടുത്തത് ആയിരങ്ങളാണ്. രാവിലെ ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കി. തുടര്‍ന്നു നടന്ന സമാപന സമ്മേളനം സീറോ മലബാര്‍ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ ഉദ്ഘാടനം ചെയ്തു. ബിഷപ് മാര്‍ ജോസ് പുളിക്കല്‍, മാര്‍ മാത്യു അറയ്ക്കല്‍, റവ.ഡോ. കുര്യൻ താമരശേരി തുടങ്ങിയവർ പ്രസംഗിച്ചു. 1825 ഓഗസ്റ്റ് നാലിനാണ് വിശുദ്ധ ദുമ്മിനിങ്കോസിന്‍റെ (വിശുദ്ധ ഡൊമിനിക്) നാമത്തിൽ പുത്തന്‍പള്ളിയെന്ന് അറിയപ്പെടുന്ന പള്ളി സ്ഥാപിച്ചത്. കത്തീഡ്രലിന്‍റെ ദ്വിശതാബ്ദി ആഘോഷങ്ങളോടനുബന്ധിച്ച് വിപുലമായ പരിപാടികളാണ് സംഘടിപ്പിച്ചിരുന്നത്. ഒരാഴ്ച നീണ്ടുനിന്ന സമാപനാഘോഷങ്ങൾ വർണാഭമായ വിളംബര റാലിയോടെയാണ് ആരംഭിച്ചത്. സാംസ്കാരിക സമ്മേളനം, കത്തീഡ്രലിന്‍റെ ഭാഗമായിരുന്ന ഇടവകകളുടെ സംഗമം, കുടുംബ സംഗമം, ഇടവകയിലെ കൂട്ടായ്മകളുടെ സംഗമം, കാരുണ്യ ഭവനങ്ങളുടെ സംഗമം, പ്രാർഥനാദിനം, വൈദിക-സന്യസ്ത സംഗമം തുടങ്ങി വ്യത്യസ്തങ്ങളായ പരിപാടികൾ ജൂബിലി സമാപനത്തോടനുബന്ധിച്ചു നടന്നിരുന്നു.

വാഴൂരിലെ വയോജനങ്ങൾ വാഗമണ്ണിൽ

വാഴൂർ: ഗ്രാമപഞ്ചായത്ത് നടപ്പിലാക്കിയ വയോജന വിനോദയാത്രയുടെ ഭാഗമായി 16 വാർഡിൽ നിന്നുള്ള വയോജനങ്ങൾ വാഗമൺ സന്ദർശിച്ചു ജനകീയാസൂത്രണ പദ്ധതിയിൽ വയോജനങ്ങൾക്കുള്ള പ്രത്യേക പദ്ധതി പ്രകാരമാണ് വിനോദയാത്ര സംഘടിപ്പിച്ചത്. ഒരു വാർഡിൽനിന്ന് ഒരു ബസാണ് വിനോദയാത്രയ്ക്ക് ക്രമീകരിച്ചിരുന്നത്. രാവിലെ 8.30ന് പഞ്ചായത്ത് ഓഫീസിന് മുമ്പിൽനിന്നു യാത്ര ആരംഭിച്ചു. വാഗമൺ, പരുന്തുംപാറ എന്നിവിടങ്ങളിലെ സന്ദർശനത്തിനു ശേഷം രാത്രി എട്ടോടെ തിരികെ കൊടുങ്ങൂരിലെത്തി. എല്ലാ വാഹനങ്ങളിലും ഭക്ഷണവും വെള്ളവും ക്രമീകരിച്ചിരുന്നു. 500 വയോജനങ്ങളും 75 വോളണ്ടിയർമാരുമുണ്ടായിരുന്നു. രണ്ടാം തവണയാണ് വാഴൂർ ഗ്രാമപഞ്ചായത്ത് വയോജന വിനോദയാത്ര സംഘടിപ്പിച്ചത്. ആദ്യതവണ 600 വയോജനങ്ങളുമായി കൊച്ചി മെട്രോയും വാട്ടർ മെട്രോയും സന്ദർശിച്ചിരുന്നു. വയോജന ക്ഷേമത്തിന്‍റെ ഭാഗമായി വയോജന കലോത്സവം, വയോജനങ്ങൾക്ക് പകൽവീട് തുടങ്ങി വൈവിധ്യമാർന്ന പരിപാടികൾ പഞ്ചായത്ത് സംഘടിപ്പിച്ചിരുന്നു.

ജാതി അധിക്ഷേപം: അടൂർ ഗോപാലകൃഷ്ണൻ മാപ്പ് പറയണമെന്ന്

മുണ്ടക്കയം: കേരള കോൺഗ്രസ്-എമ്മിന്‍റെ പോഷക സംഘടനയായ കേരള ദളിത് ഫ്രണ്ട്-എമ്മിന്‍റെ പൂഞ്ഞാർ നിയോജകമണ്ഡലം കൺവൻഷൻ മുണ്ടക്കയം സഹകരണ ബാങ്ക് ഓഡിറ്റോറിയത്തിൽ നടന്നു. ചീഫ് വിപ്പ് ഡോ. എൻ. ജയരാജ് ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് വി.വി. സോമൻ അധ്യക്ഷത വഹിച്ചു. സെബാസ്റ്റ്യൻ കുളത്തുങ്കൽ എംഎൽഎ മുഖ്യപ്രഭാഷണം നടത്തി. ദളിത് ഫ്രണ്ട്-എമ്മിൽ പുതിയതായി ചേർന്ന പ്രവർത്തകർക്കുള്ള മെംബർഷിപ്പ് വിതരണം സാജൻ കുന്നത്ത് നിർവഹിച്ചു. തിരുവനന്തപുരത്ത് നടന്ന സിനിമ കോൺക്ലേവിൽ ദളിത് കലാകാരന്മാരെ തരംതാഴ്ത്തി സംസാരിച്ച സിനിമാ സംവിധായകൻ അടൂർ ഗോപാലകൃഷ്ണൻ മാപ്പ് പറയണമെന്ന് ആവശ്യപ്പെട്ട് ക്യാമ്പിൽ പ്രമേയം അവതരിപ്പിച്ചു. പട്ടികജാതി, പട്ടികവർഗ ജനവിഭാഗങ്ങൾക്ക് സർക്കാർ വകുപ്പുകൾ മുഖേനയുള്ള ആനുകൂല്യങ്ങൾ സംബന്ധിച്ച് കെ.എസ്. മോഹനൻ വിശദീകരിച്ചു. ദളിത് ഫ്രണ്ട്-എം ജില്ലാ പ്രസിഡന്‍റ് രാമചന്ദ്രൻ അള്ളുംപുറം, സംസ്ഥാന ജനറൽ സെക്രട്ടറി രാജു കുഴിവേലിൽ, ജനപ്രതിനിധികളായ ടി.ജെ. മോഹനൻ, കെ.പി. സുജീലൻ, പി.പി. സുകുമാരൻ, ദളിത്‌ ഫ്രണ്ട്-എം ഭാരവാഹികളായ സണ്ണി കുറ്റുവേലി, ശ്രീകുമാർ പറത്താനം, കെ.പി. റെജി, അജേഷ് കുമാർ, സച്ചിൻ സനിൽ, ഇ.ഡി. കുട്ടപ്പൻ, ബിന്ദു മടുക്ക തുടങ്ങിയവർ പ്രസംഗിച്ചു.

ചെസ് ടൂർണമെന്‍റ്: സെന്‍റ് ജോസഫ്സ് സെൻട്രൽ സ്കൂളിന് ഓവറോൾ കിരീടം

മുണ്ടക്കയം: സെന്‍റ് ജോസഫ്സ് സെൻട്രൽ സ്കൂളിന്‍റെ ആഭിമുഖ്യത്തിൽ ഏഴാമത് ഓൾ കേരള സ്റ്റുഡന്‍റ്സ് ചെസ് ടൂർണമെന്‍റ് നടന്നു. സിബിഎസ്ഇ, ഐസിഎസ്ഇ, സ്റ്റേറ്റ് സിലബസിലുള്ള അമ്പതോളം സ്കൂളുകളിൽനിന്നായി നാനൂറിൽപരം കുട്ടികൾ മത്സരത്തിൽ പങ്കെടുത്തു. മുണ്ടക്കയം സെന്‍റ് ജോസഫ്സ് സെൻട്രൽ സ്കൂൾ ഓവറോൾ ചാമ്പ്യൻഷിപ്പും പള്ളിക്കത്തോട് അരവിന്ദ വിദ്യാമന്ദിർ സ്കൂൾ രണ്ടാം സ്ഥാനവും പാലാ ചാവറ പബ്ലിക് സ്കൂൾ മൂന്നാം സ്ഥാനവും കരസ്ഥമാക്കി. പിടിഎ പ്രസിഡന്‍റ് ജിജി നിക്കോളാസ് ചെസ് ടൂർണമെന്‍റ് ഉദ്ഘാടനം ചെയ്തു. പിടിഎ വൈസ് പ്രസിഡന്‍റുമാരായ ജെം തോമസ്, സ്വപ്ന റോയ് എന്നിവർ സമ്മാനദാനം നിർവഹിച്ചു. സ്കൂൾ മാനേജർ ഫാ. മത്തായി മണ്ണൂർവടക്കേതിൽ, പ്രിൻസിപ്പൽ ഫാ. തോമസ് നാലന്നടിയിൽ, വൈസ് പ്രിൻസിപ്പൽ ആന്‍റണി കുരുവിള, ചെസ് മാസ്റ്റർ ഷൈജു ആൻഡ്രൂസ് എന്നിവർ നേതൃത്വം നൽകി.

വന്യമൃഗശല്യം ശാശ്വതമായി പരിഹരിക്കും: സെബാസ്റ്റ്യൻ കുളത്തുങ്കൽ എംഎൽഎ

മുണ്ടക്കയം: കൃഷിയിടങ്ങൾക്കും കർഷകർക്കും നേരേയുണ്ടാകുന്ന വന്യമൃഗങ്ങളുടെ കടന്നുകയറ്റം ശാശ്വതമായി പരിഹരിക്കുന്നതിനുള്ള നടപടികൾ സ്വീകരിക്കുമെന്ന് സെബാസ്റ്റ്യൻ കുളത്തുങ്കൽ എംഎൽഎ. കണ്ണിമല ഫാർമേഴ്സ് ക്ലബ്ബിന്‍റെ കർഷകസംഗമം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കർഷകപക്ഷ ഇടപെടലുകളിൽ കണ്ണിമല ഫാർമേഴ്സ് ക്ലബ്ബിന്‍റെ പ്രവർത്തനങ്ങൾ മാതൃകാപരമാണെന്നും എംഎൽഎ കൂട്ടിച്ചേർത്തു. ചടങ്ങിൽ കർഷകപ്രതിഭകളെ അദ്ദേഹം ആദരിച്ചു. ക്ലബ് പ്രസിഡന്‍റ് പി.ഡി. ജോൺ പവ്വത്ത് അധ്യക്ഷത വഹിച്ചു. കണ്ണിമല സെന്‍റ് ജോസഫ്സ് പള്ളി വികാരി ഫാ. ജേക്കബ് പുറ്റനാനിക്കൽ, ബ്ലോക്ക് പഞ്ചായത്തംഗം പി.കെ. പ്രദീപ്, ഗ്രാമപഞ്ചായത്തംഗം ബിൻസി മാനുവൽ, മുൻ ഗ്രാമപഞ്ചായത്ത് പ്രസിഡന്‍റ് ബേബിച്ചൻ പ്ലാക്കാട്ട്, ക്ലബ് സെക്രട്ടറി സാബു തോമസ് തകടിയേൽ, ജൂബിച്ചൻ ആന്‍റണി, എ.ജെ. അലക്സ് റോയ്, വി.ആർ. സുകുമാരൻ, ടി.എസ്. മോഹൻദാസ്, ലൂയിസ് തോമസ്, കെ.എൻ. ഷിബു, എം.ജി. തോമസ്, ക്രിസ്റ്റോ ജോൺ, ടി.വി. തോമസ്, തോമസ് ഫിലിപ്പ്, ഇന്‍റു മേഴ്സൺ, ജയിംസ് മാവുങ്കൽ തുടങ്ങിയവർ പ്രസംഗിച്ചു. കാർഷിക പഠന പരിപാടികൾക്ക് വി.സി. സെബാസ്റ്റ്യൻ നേതൃത്വം നൽകി. ജിൻസ് വേലനിലം ജൈവവളക്കിറ്റുകളും ജൂബിച്ചൻ ആന്‍റണി പച്ചക്കറി തൈകളും കർഷകർക്ക് വിതരണം ചെയ്തു.

എരുമേലി കെഎസ്ആർടിസി ബസ് സ്റ്റാൻഡ്: യോഗം ഇന്ന്

എരുമേലി: കെഎസ്ആർടിസി ബസ് സ്റ്റാൻഡ് സ്ഥലം ഒഴിയണമെന്ന പാലാ സബ് കോടതി വിധി സംബന്ധിച്ചും കെട്ടിടത്തിന്‍റെ അപകടാവസ്ഥ ചർച്ച ചെയ്യുന്നതിനും ബസ് സർവീസുകൾ സംബന്ധിച്ച പരാതികൾ പരിഹരിക്കുന്നതിനുമായി സെബാസ്റ്റ്യൻ കുളത്തുങ്കൽ എംഎൽഎയുടെ സാന്നിധ്യത്തിൽ ഇന്നു രാവിലെ 10.30ന് പഞ്ചായത്ത് ഹാളിൽ യോഗം ചേരും. പഞ്ചായത്ത്, കെഎസ്ആർടിസി, ദേവസ്വം ബോർഡ് തുടങ്ങി ബന്ധപ്പെട്ട ഉദ്യോഗസ്ഥർ പങ്കെടുക്കും. കോടതിവിധിക്കെതിരേ അപ്പീൽ നൽകുക, പഴയ ഓഫീസ് കെട്ടിടം പൊളിച്ചുമാറ്റി പുതിയ ബസ് സ്റ്റാൻഡ് കെട്ടിടം നിർമിക്കുക, ശുചിമുറി കോംപ്ലക്സ് നിർമിക്കുക, ശബരിമല സർവീസുകൾ കാര്യക്ഷമമാക്കുക, ലാഭകരമല്ലാത്തതിന്‍റെ പേരിൽ ഗ്രാമീണ മേഖല ആശ്രയിച്ചിരുന്ന ബസ് സർവീസുകൾ നിർത്തലാക്കിയതിനാൽ പകരം യാത്രാസൗകര്യം സജ്ജമാക്കുക തുടങ്ങിയവയാണ് ചർച്ച ചെയ്യുന്ന പ്രധാന പ്രശ്നങ്ങൾ.

മതിൽ ഇടിഞ്ഞുവീണ് നിർമാണത്തൊഴിലാളി മരിച്ചു

പൊൻകുന്നം: വീടിന്‍റെ മതിൽ നിർമിക്കുന്നതിനിടെ ഇടിഞ്ഞ് ദേഹത്തുവീണ് തൊഴിലാളി മരിച്ചു. പൊൻകുന്നം ശാന്തിഗ്രാം മടുക്കോലിപ്പറമ്പിൽ അബ്ദുൾ നാസർ (53) ആണ് മരിച്ചത്. ശനിയാഴ്ച വൈകുന്നേരം പൊൻകുന്നം-ചിറക്കടവ് റോഡിൽ വീടിന്‍റെ മതിൽ നിർമിക്കുന്നതിനിടെയാണ് അബ്ദുൾ നാസറിന്‍റെ ദേഹത്തേക്ക് മതിലിന്‍റെ ഒരുഭാഗം ഇടിഞ്ഞുവീണത്. സാരമായി പരിക്കേറ്റ ഇദ്ദേഹത്തെ കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ചെങ്കിലും രക്ഷിക്കാനായില്ല. ഭാര്യ: റെജീന. മക്കൾ: ഷിഹാസ് നാസർ, ഷിഹാന നാസർ. മരുമക്കൾ: ഇഫ്‌സാ, ബി. മാഹീൻ. കബറടക്കം ന‌ടത്തി.

കണ്ണിമലയിൽ വീണ്ടും അപകടം; ചരക്കുലോറി തലകീഴായി മറിഞ്ഞു

എരുമേലി: കണ്ണിമലയിൽ ചരക്കുമായെത്തിയ ലോറി മറിഞ്ഞു. ഇന്നലെ പുലർച്ചെ മൂന്നോടെയായിരുന്നു അപകടം. ഡ്രൈവർക്ക് നിസാര പരിക്കേറ്റു. ലോറി കയറ്റം കയറുന്നതിനിടെ നിയന്ത്രണംവിട്ട് പുറകോട്ട് ഉരുണ്ട് മറിയുകയായിരുന്നു. കൊല്ലത്തുനിന്നു കുമളിയിലേക്ക് കശുവണ്ടിത്തോടുമായി പോയ ലോറിയാണ് മറിഞ്ഞത്. കഴിഞ്ഞ അഞ്ചിനാണ് ഇവിടെ കെഎസ്ആർടിസി ബസ് ഇറക്കത്തിൽ ബ്രേക്ക്‌ തകരാർ മൂലം ക്രാഷ് ബാരിയറിൽ ഇടിച്ചശേഷം എതിർവശത്തെ റബർത്തോട്ടത്തിലേക്ക് കയ്യാല ഇടിച്ചു തകർത്ത് കയറിയത്. പൂഞ്ഞാർ-എരുമേലി സംസ്ഥാന പാതയിലാണ് കണ്ണിമലയിലെ എസ് ആകൃതിയിലുള്ള ചെങ്കുത്തായ കയറ്റം. ദുർഘടമായ വളവാണ് ഇറക്കത്തിലും കയറ്റത്തിലും ഒരേപോലെ അപകടം സൃഷ്ടിച്ചു കൊണ്ടിരിക്കുന്നത്. വളവുതിരിഞ്ഞു കയറി ചെങ്കുത്തായ കയറ്റം കയറുമ്പോൾ ഭാരമേറിയ വാഹനങ്ങൾ ഏറെ പ്രയാസകരമായാണ് സഞ്ചരിക്കുന്നത്. ഇറക്കത്തിലാണെങ്കിൽ വളവിൽ എത്തുമ്പോൾ വേഗത തീരെ കുറച്ചാൽ മാത്രമാണ് അപകടരഹിതമായി സഞ്ചരിക്കാനാവുക. എന്നു മായും എസ് വളവ്? അപകടവളവ് മാറ്റാനുള്ള നടപടി നിർദിഷ്‌ട ഭരണിക്കാവ്-മുണ്ടക്കയം 183 എ ദേശീയപാതയുടെ നിർമാണത്തിലുണ്ടാകുമെന്നാണ് മരാമത്ത് അധികൃതർ പറയുന്നത്. നാലുവരിയായി വിഭാവനം ചെയ്തിട്ടുള്ള ഈ പാതയുടെ നിർമാണം ആരംഭിച്ചിട്ടില്ല. ഇതിന് ഇനിയും കാലതാമസമുണ്ടാകുമെന്നാണ് അറിയുന്നത്. അതുവരെ അപകടത്തിന്‍റെ മുനമ്പിലൂടെ യാത്ര ചെയ്യേണ്ട സ്ഥിതിയാണെന്ന് നാട്ടുകാർ പറയുന്നു. നിർദിഷ്‌ട പാതയ്ക്ക് എരുമേലി-മുണ്ടക്കയം റോഡിൽ ഉൾപ്പെടെ സ്ഥലമേറ്റെടുക്കലിന് വിജ്ഞാപനം പുറപ്പെടുവിച്ചിട്ടുണ്ട്. നിലവിൽ ഈ വളവിൽ അപകടങ്ങൾ കുറയ്ക്കാൻ താത്കാലികമായി കരിങ്കല്ലുകൊണ്ട് സംരക്ഷണഭിത്തിയും ക്രാഷ്ബാരിയർ സ്ഥാപിക്കലും മാത്രമാണ് നടന്നിട്ടുള്ളത്. എസ് ആകൃതിയിലുള്ള ഈ വളവിൽ സമാന്തര റോഡ് നിർമിക്കണമെന്ന് നാട്ടുകാർ നിരന്തരമായി ആവശ്യമുയർത്തുന്നുണ്ട്. ഇക്കഴിഞ്ഞ ശബരിമല സീസൺ ഉൾപ്പെടെ കഴിഞ്ഞകാല ശബരിമല സീസണുകളിലായി ഒട്ടേറെ അപകടങ്ങളാണ് സംഭവിച്ചത്. ശബരിമല സീസണുകളിൽ രാത്രിയും പകലും പോലീസ് കാവൽ നിന്നാണ് വാഹനങ്ങൾ കടത്തിവിട്ടിരുന്നത്. എന്നിട്ടം അപകടങ്ങൾ സംഭവിച്ചിരുന്നു.

കൊടിക്കുന്നില്‍ സുരേഷ് എംപി സിസ്റ്റര്‍ എലൈസ ചെറിയാന്‍റെ സഹോദരന്‍റെ വസതി സന്ദര്‍ശിച്ചു

കുറുമ്പനാടം: ഒഡീഷയിലെ ജലേശ്വറില്‍ ബജ്‌രംഗ്ദള്‍ പ്രവര്‍ത്തകരുടെ ആക്രമണത്തിനിരയായ സിസ്റ്റര്‍ എലൈസ ചെറിയാന്‍റെ പെരുമ്പനച്ചിയിലുള്ള സഹോദരന്‍ പുതുപ്പറമ്പില്‍ ചെറിയാന്‍ ജോസഫിന്‍റെ വസതി കൊടിക്കുന്നില്‍ സുരേഷ് എംപി സന്ദര്‍ശിച്ചു. കുടുംബാംഗങ്ങളെ ആശ്വസിപ്പിച്ചു. അക്രമികള്‍ക്കെതിരേ കര്‍ശന നടപടി വേണമെന്ന് ഒഡീഷാ മുഖ്യമന്ത്രിക്കയച്ച കത്തില്‍ ആവശ്യപ്പെട്ടതായി എംപി പറഞ്ഞു. കോണ്‍ഗ്രസ് നേതാക്കളായ ബാബു കുരീത്തറ, ആന്‍റണി കുന്നുംപുറം, പി.എം. മോഹനന്‍പിള്ള തുടങ്ങിയവരും എംപിക്കൊപ്പമുണ്ടായിരുന്നു.

സര്‍ഗക്ഷേത്ര പ്രഭാഷണ പരമ്പര: ഇന്ന് സിബി മലയില്‍

ചങ്ങനാശേരി: ചെത്തിപ്പുഴ സര്‍ഗക്ഷേത്ര പ്രഫഷണല്‍ ഫോറത്തിന്‍റെ ആഭിമുഖ്യത്തിലുള്ള 45-ാമത് എന്‍റെ ജീവിതം പ്രഭാഷണ-സംവാദ പരമ്പരയില്‍ ഇന്ന് വൈകുന്നേരം ആറിന് പ്രശസ്ത സിനിമാ സംവിധായകന്‍ സിബി മലയില്‍ തന്‍റെ ജീവിതാനുഭവങ്ങള്‍ പങ്കുവയ്ക്കും. സര്‍ഗക്ഷേത്ര സീനിയര്‍ സിറ്റിസണ്‍സ് ഫോറം, ഡോ. ജോര്‍ജ് പടനിലം ഫൗണ്ടേഷന്‍ ട്രസ്റ്റ്, സര്‍ഗക്ഷേത്ര 89.6 എഫ്എം റേഡിയോ, ക്രിസ്തുജ്യോതി കോളജ്, എസ്ബി കോളജ് എന്‍എസ്എസ് യൂണിറ്റ് എന്നിവരുടെ പങ്കാളിത്തത്തോടെ നടപ്പാക്കുന്ന സുരക്ഷിതമല്ലാത്തതും വാസയോഗ്യമല്ലാത്തതുമായ വീടുകള്‍ നവീകരിച്ച് ദുര്‍ബല കുടുംബങ്ങളെ സഹായിക്കുന്ന റീബില്‍ഡ് പദ്ധതിയുടെ ലോഗോ പ്രകാശനവും ചടങ്ങില്‍ നടക്കും. സര്‍ഗക്ഷേത്ര രക്ഷധികാരി ഫാ. തോമസ് കല്ലുകളം സിഎംഐ അധ്യക്ഷത വഹിക്കും. ഡയറക്ടര്‍ ഫാ. അലക്‌സ് പ്രായിക്കളം സിഎംഐ, സീനിയര്‍ സിറ്റിസണ്‍സ് ഫോറം പ്രസിഡന്‍റ് ജോസ് ജോസഫ്, പ്രഫഷണല്‍ ഫോറം സെക്രട്ടറി ആന്‍റണി ജേക്കബ്, ഡോ. അഗസ്റ്റിന്‍, ഡോ. ആന്‍റണി തോമസ്, ടി.കെ. തോമസുകുട്ടി എന്നിവര്‍ പ്രസംഗിക്കും.

തുരുത്തിയില്‍ ഓടിക്കൊണ്ടിരുന്ന കാറിനു തീപിടിച്ചു; യാത്രക്കാര്‍ രക്ഷപ്പെട്ടു

ചങ്ങനാശേരി: എന്‍എച്ച് 183 (എംസി റോഡില്‍) തുരുത്തിയില്‍ ഓടിക്കൊണ്ടിരുന്ന കാറിനു തീപിടിച്ചു. കാറിലുണ്ടായിരുന്നവര്‍ രക്ഷപ്പെട്ടു. തുരുത്തി മിഷന്‍ പള്ളിക്കു സമീപം ഇന്നലെ രാത്രി ഏഴിനാണ് സംഭവം. രണ്ടു പേരാണ് കാറിലുണ്ടായിരുന്നത്. തീ പടര്‍ന്നയുടന്‍ തന്നെ കാറില്‍ ഉണ്ടായിരുന്നവര്‍ പുറത്തിറങ്ങിയതിനാല്‍ വന്‍ അപകടം ഒഴിവായി. സമീപത്തെ വീട്ടുകാര്‍ വെള്ളമൊഴിച്ച് തീയണയ്ക്കാന്‍ ശ്രമിച്ചെങ്കിലും തീ കെടുത്താനായില്ല. ചങ്ങനാശേരിയില്‍നിന്നും കോട്ടയത്തുനിന്നും ഫയര്‍ ഫോഴ്‌സും ചങ്ങനാശേരിയില്‍നിന്നും പോലീസും എത്തിയാണ് തീയണച്ചത്. പൂവം സ്വദേശി അനൂപും സുഹൃത്തും കോട്ടയത്തേക്കു പോകുമ്പോഴാണ് അപകടം. സംഭവത്തെത്തുടര്‍ന്ന് റോഡില്‍ അരമണിക്കൂറോളം ഗതാഗതം തടസപ്പെട്ടു. ബാറ്ററിയുടെ ഷോര്‍ട്ട് സര്‍ക്യൂട്ടാണ് തീപിടിത്തത്തിനു കാരണമെന്ന് ഫയര്‍ഫോഴ്‌സ് അധികൃതര്‍ പറഞ്ഞു.

മുസ്‌ലിം ലീഗിന്‍റെ ഊന്നുവടിയില്ലാതെ കേരളത്തിലെ കോണ്‍ഗ്രസിന് നില്‍ക്കാന്‍ പറ്റില്ലെന്ന് വെള്ളാപ്പള്ളി

ചങ്ങനാശേരി: മുസ്‌ലിം ലീഗിന്‍റെ ഊന്നുവടിയില്ലാതെ കേരളത്തിലെ കോണ്‍ഗ്രസിന് നില്‍ക്കാന്‍ പറ്റാത്ത അവസ്ഥയാണെന്ന് എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. എസ്എന്‍ഡിപി യോഗം ചങ്ങനാശേരി യൂണിയന്‍റെ ശാഖാ നേതൃസംഗമം കോണ്ടൂര്‍ ബാക്ക് വാട്ടര്‍ റിസോര്‍ട്ടില്‍ ഉദ്ഘാടനം ചെയ്യുകയായിരുന്നു അദ്ദേഹം. മുസ്‌ലിം ലീഗിനെ എങ്ങനെ മതേതര പാര്‍ട്ടിയെന്നു പറയാനാകുമെന്ന് അദ്ദേഹം ചോദിച്ചു. യോഗം വൈസ് പ്രസിഡന്‍റ് തുഷാര്‍ വെള്ളാപ്പള്ളി സംഘടനാ വിശദീകരണം നടത്തി. യോഗം ദേവസ്വം സെക്രട്ടറി അരയാക്കണ്ടി സന്തോഷ് സംഘടനാ സന്ദേശം നല്‍കി. യൂണിയന്‍ പ്രസിഡന്‍റ് ഗിരീഷ് കോനാട്ട്, സെക്രട്ടറി സുരേഷ് പരമേശ്വരന്‍, വൈസ് പ്രസിഡന്‍റ് പി.എം. ചന്ദ്രന്‍ തുടങ്ങിയവര്‍ പ്രസംഗിച്ചു. ചങ്ങനാശേരി യൂണിയന്‍റെ കീഴിലുള്ള 59 ശാഖകളുടെ ഭാരവാഹികള്‍, കുടുംബയൂണിറ്റ് ഭാരവാഹികള്‍, പോഷകസംഘടനാ ഭാരവാഹികള്‍ ഉള്‍പ്പെടെ 1800ലധികം പേര്‍ പങ്കെടുത്തു.

പോളയും മാലിന്യവും തിങ്ങി എസി കനാല്‍; മരം വീണു തകര്‍ന്ന മതിൽ പുനര്‍നിര്‍മിച്ചുമില്ല

മനയ്ക്കച്ചിറ ടൂറിസം പദ്ധതി നാശോന്മുഖം ചങ്ങനാശേരി: വര്‍ഷങ്ങള്‍ക്കുമുമ്പ് ലക്ഷങ്ങള്‍ മുടക്കി നിര്‍മിച്ച മനയ്ക്കച്ചിറ ടൂറിസം പദ്ധതി ഇപ്പോൾ കണ്ടാല്‍ ആരും മൂക്കത്ത് കൈവയ്ക്കും. കനാലിൽ പോളയുംപായലും തിങ്ങി മാലിന്യകേന്ദ്രമായി. മരംവീണു തകര്‍ന്ന മതിലിന്‍റെ പുനര്‍നിര്‍മാണം നടന്നിട്ടില്ല. സാമൂഹ്യവിരുദ്ധരുടെ വിഹാരകേന്ദ്രമായി മാറിയതോടെ എസി കനാലിന്‍റെ വശങ്ങളില്‍ കുടുംബമായി താമസിക്കുന്നവരുടെ ജീവിതം ദുരിതപൂര്‍ണമായി. വര്‍ഷങ്ങളോളം ഓണക്കാലത്ത് ജലോത്സവം നടന്നിരുന്ന കനാലാണ് ചെളിക്കുളമായി അവശേഷിച്ചിരിക്കുന്നത്. ടൂറിസം പദ്ധതിയുടെ ഭാഗമായി നിര്‍മിച്ച മതിലും വേലിക്കെട്ടും പല ഭാഗത്തും നശിച്ച നിലയിലാണ്. രണ്ടുമാസം മുമ്പുണ്ടായ കാറ്റിലും മഴയിലും മരം കടപുഴകി വീണ് പദ്ധതിയുടെ തുടക്കഭാഗത്ത് അമ്പതു മീറ്ററോളം മതില്‍ തകര്‍ന്നിരുന്നു. ഈ ഭാഗത്തുകൂടി പകലും രാത്രിയും ആളുകള്‍ അതിക്രമിച്ചു കയറുന്നുണ്ട്. ഒരാള്‍ പൊക്കത്തിലാണ് കനാലില്‍ പുല്ലും കാട്ടുചെടികളും വളര്‍ന്നുനില്‍ക്കുന്നത്. കനാലിലെ മാലിന്യത്തില്‍നിന്നുയരുന്ന ദുര്‍ഗന്ധം സമീപവാസികളെ ഏറെ വലയ്ക്കുകയാണ്. വിഷപ്പാമ്പുകളും മറ്റ് ഇഴജന്തുക്കളും ഇവിടെ വിഹരിക്കുകയാണ്. കാമുകീ-കാമുകന്മാരുടെ അഴിഞ്ഞാട്ടവും ലഹരിസംഘങ്ങളുടെ വിഹാരവും സ്വൈര ജീവിതത്തിനു വിഘാതമാകുന്നുവെന്ന് നാട്ടുകാർ പറയുന്നു. കനാല്‍ ആഴം കൂട്ടി വൃത്തിയാക്കുന്നതിനൊപ്പം ഈ ഭാഗങ്ങളില്‍ പോലീസ് പട്രോളിംഗ് ശക്തമാക്കണമെന്ന ആവശ്യവും ഉയര്‍ന്നിട്ടുണ്ട്. എസി കനാല്‍ പള്ളാത്തുരുത്തിയില്‍ തുറന്നാല്‍ കനാലിന്‍റെ ചുറ്റുപാടുകളിലും കുട്ടനാടിന്‍റെ വിവിധ പ്രദേശങ്ങളിലുമുള്ള വെള്ളപ്പൊക്കത്തിനു പരിഹാരം കാണാനാകുമെന്നും കനാല്‍ വികസനസമിതി ചൂണ്ടിക്കാട്ടുന്നു.

ന്യൂനപക്ഷാവകാശങ്ങള്‍ ലംഘിക്കപ്പെടുമ്പോള്‍ ഭരണകൂടങ്ങള്‍ക്ക് നിസംഗത: മോണ്‍. എത്തയ്ക്കാട്ട്

ചങ്ങനാശേരി: രാജ്യത്ത് ന്യൂനപക്ഷാവകാശങ്ങളും ഭരണഘടനയും നിര്‍ബാധം ലംഘിക്കപ്പെടുമ്പോള്‍ ഭരണാധിപന്മാര്‍ നിസംഗത പുലര്‍ത്തുകയാണെന്ന് അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട്. കത്തോലിക്ക കോണ്‍ഗ്രസിന്‍റെ പ്രവര്‍ത്തനങ്ങള്‍ ഉള്‍ക്കൊള്ളുന്ന ദീപകം മാര്‍ഗരേഖ പ്രകാശനം ചെയ്ത് പ്രസംഗിക്കുകയായിരുന്നു അദ്ദേഹം. ഭരണഘടന ഉറപ്പുനല്‍കുന്ന മതസ്വാതന്ത്ര്യവും പൗരസ്വാതന്ത്ര്യവും രാജ്യത്ത് സംരക്ഷിക്കപ്പെടണമെന്ന് അദ്ദേഹം ആവശ്യപ്പെട്ടു. അതിരൂപത അതിരൂപത പ്രസിഡന്‍റ് ബിജു സെബാസ്റ്റ്യന്‍ അധ്യക്ഷത വഹിച്ചു. തിരുവനന്തപുരം ഫൊറോനാ പ്രസിഡന്‍റ് വി.സി. വില്‍സണ്‍ മാര്‍ഗരേഖയുടെ ആദ്യപതിപ്പ് ഏറ്റുവാങ്ങി. ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പില്‍, ഗ്ലോബല്‍ ജനറല്‍ സെക്രട്ടറി ഡോ. ജോസ്‌കുട്ടി ജെ. ഒഴുകയില്‍, ഡയറക്ടര്‍ ഫാ. സെബാസ്റ്റ്യന്‍ ചാമക്കാല, ജനറല്‍ സെക്രട്ടറി ബിനു ഡൊമിനിക്, ജോസ് വെങ്ങാന്തറ, ജോര്‍ജ് വര്‍ക്കി, സി.ടി. തോമസ്, ജോര്‍ജുകുട്ടി മുക്കത്ത്, ഷിജി ജോണ്‍സണ്‍, റോസിലിന്‍ കെ. കുരുവിള, രാജേഷ് ജോണ്‍ എന്നിവര്‍ പ്രസംഗിച്ചു.

ബിജെപി അംഗത്തെ അയോഗ്യനാക്കി

കടുത്തുരുത്തി: പഞ്ചായത്ത് അംഗത്തെ തെരഞ്ഞെടുപ്പ് കമ്മീഷൻ അയോഗ്യനാക്കി. മുളക്കുളം പഞ്ചായത്ത് രണ്ടാം വാർഡ് ബിജെപി അംഗം വടുകുന്നപ്പുഴ മരോട്ടിക്കൽ അജിത് കുമാറിനെതിരേയാണ് സംസ്ഥാന തെരഞ്ഞെടുപ്പ് കമ്മീഷൻ അയോഗ്യത പ്രഖ്യാപിച്ചത്. 2023 ലാണ് കേസിനാസ്പദമായ സംഭവം. അജിത്കുമാറിന്‍റെ പേരിലുള്ള ടാക്സിക്കാർ പൊതുമരാമത്ത് വകുപ്പിന് വാടകയ്ക്ക് ഓടി പഞ്ചായത്തിൽനിന്നും ലക്ഷങ്ങൾ കൈപ്പറ്റിയെന്നതാണ് കേസ്. പഞ്ചായത്തിലെ ഒന്നാം വാർഡംഗം സിപിഎം പ്രതിനിധി കെ.ആർ. അരുൺ നൽകിയ പരാതിയെത്തുടർന്നാണ് നടപടി. എന്നാൽ പരാതിക്കാരൻകൂടി ഉൾപ്പെട്ട കമ്മിറ്റിയാണ് തനിക്ക് വണ്ടി ഓടാൻ അനുവാദം നൽകിയതെന്നും, തുടർന്ന് പരാതി വന്നപ്പോൾ കരാർ റദ്ദാക്കുകയും അതിനുശേഷം മാസങ്ങൾ കഴിഞ്ഞാണ് കേസ് നൽകിയതെന്നും അജി വാദിച്ചെങ്കിലും തെരഞ്ഞെടുപ്പ് കമ്മീഷൻ ഇത് തള്ളുകയായിരുന്നു.

കള്ളുചെത്ത് വ്യവസായത്തോടുള്ള വിവേചനം അവസാനിപ്പിക്കണമെന്ന്

വൈക്കം: കള്ളുചെത്ത് വ്യവസായത്തോടുള്ള സർക്കാരിന്‍റെ വിവേചനം അവസാനിപ്പിക്കണമെന്നും വ്യവസായത്തെ തകർച്ചയിൽനിന്ന് രക്ഷിക്കണമെന്നും സിപിഐ ജില്ലാ സമ്മേളനം പ്രമേയത്തിലൂടെ ആവശ്യപ്പെട്ടു. കേരളത്തിലെ പ്രമുഖ പരമ്പരാഗത വ്യവസായ കള്ളുചെത്ത് വ്യവസായം തകർച്ചയെ നേരിടുകയാണ്. ജില്ലയിൽ മാത്രം ആയിരക്കണക്കിന് തൊഴിലാളികളാണ് ഈ രംഗത്ത് പണിയെടുത്തിരുന്നതെന്നും കള്ള് വ്യവസായത്തെ സംരക്ഷിക്കുന്ന പുതിയ മദ്യനയം വേണമെന്നും പ്രമേയം ആവശ്യപ്പെട്ടു. ചെത്തുതൊഴിലാളി ഫെഡറേഷൻ (എഐടിയുസി) സംസ്ഥാന ജനറൽ സെക്രട്ടറി ടി.എൻ. രമേശൻ പ്രമേയം അവതരിപ്പിച്ചു.

മരങ്ങാട്ടുപിള്ളി സെന്‍റ് തോമസ് ഹൈസ്‌കൂള്‍ പ്ലാറ്റിനം ജൂബിലി നിറവില്‍

മരങ്ങാട്ടുപിള്ളി: മരങ്ങാട്ടുപിള്ളി ഗ്രാമത്തിന്‍റെ തിലകക്കുറിയായി വര്‍ത്തിക്കുന്ന സെന്‍റ് തോമസ് ഹൈസ്‌കൂള്‍ പ്ലാറ്റിനം ജൂബിലി നിറവിലേക്ക്. 11ന് ഉച്ചകഴിഞ്ഞ് രണ്ടിന് സെന്‍റ് ഫ്രാന്‍സിസ് അസീസി ഓഡിറ്റോറിയത്തില്‍ നടക്കുന്ന ജൂബിലി ആഘോഷ സമ്മേളനത്തിൽ സ്‌കൂള്‍ മാനേജര്‍ ഫാ. ജോസഫ് ഞാറക്കാട്ടില്‍ അധ്യക്ഷത വഹിക്കും. ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്യും. മോന്‍സ് ജോസഫ് എംഎല്‍എ സ്മാര്‍ട്ട് ക്ലാസ് റൂമുകളുടെ ഉദ്ഘാടനം നിര്‍വഹിക്കും. രൂപത കോർപറേറ്റ് സെക്രട്ടറി ഫാ. ജോര്‍ജ് പുല്ലുകാലായില്‍ മുഖ്യപ്രഭാഷണം നടത്തും. മുന്‍ അഡീഷണല്‍ ചീഫ് സെക്രട്ടറി ടി.കെ. ജോസ് ജൂബിലി ലോഗോ പ്രകാശനം ചെയ്യും. ത്രിതല പഞ്ചായത്ത് പ്രതിനിധികൾ, രാഷ്‌ട്രീയ, സാമുദായിക, സാംസ്‌കാരിക നേതാക്കള്‍ തുടങ്ങിയവര്‍ പ്രസംഗിക്കും. 1920ല്‍ ഫാ. വര്‍ഗീസ് പുളിക്കീല്‍ സെന്‍റ് ഫ്രാന്‍സിസ് അസീസി പള്ളി വികാരിയായിരുന്നപ്പോള്‍ ആരംഭിച്ച എല്‍പി സ്‌കൂളാണ് 1948ല്‍ യുപി സ്‌കൂളായും 1951 ഓഗസ്റ്റില്‍ ഹൈസ്‌കൂളായും ഉയര്‍ത്തപ്പെട്ടത്. മരങ്ങാട്ടുപിള്ളി പ്രദേശത്തെ നാനാജാതി മതസ്ഥരായ കുട്ടികള്‍ക്ക് മികവുറ്റ അടിസ്ഥാന വിദ്യാഭ്യാസം നല്‍കുക എന്ന ലക്ഷ്യത്തോടെ ആരംഭിച്ച വെര്‍ണാക്കുലര്‍ മലയാളം സ്‌കൂളാണ് സെന്‍റ് തോമസ് സ്‌കൂളായി മാറിയത്. ഫാ. ഏബ്രഹാം തൊണ്ടിക്കലായിരുന്നു സ്‌കൂളിന്‍റെ ആദ്യത്തെ ഹെഡ്മാസ്റ്റര്‍. സ്‌കൂള്‍ മാനേജര്‍മാരായ ഫാ. സെബാസ്റ്റ്യന്‍ ആലപ്പാട്ടുകുന്നേല്‍, ഫാ. ജോര്‍ജ് വഞ്ചിപ്പുരയ്ക്കല്‍ എന്നിവര്‍ വികസനപ്രവര്‍ത്തനങ്ങള്‍ ഒരുക്കി. ഇപ്പോള്‍ സ്‌കൂള്‍ മാനേജര്‍ ഫാ. ജോസഫ് ഞാറക്കാട്ടില്‍, ഹെഡ്മിസ്ട്രസ് ലിന്‍റാ എസ്. പുതിയാപറമ്പില്‍, പിടിഎ പ്രസിഡന്‍റ് റോബിന്‍ കരിപ്പാത്ത് എന്നിവര്‍ നേതൃത്വം നല്‍കുന്നു. സെന്‍റ് തോമസില്‍ പഠിച്ചു പടിയിറങ്ങിയ അനേകം പൂര്‍വവിദ്യാര്‍ഥികള്‍ സമൂഹത്തിലെ വിവിധ മേഖലകളില്‍ പ്രശോഭിക്കുന്നു. പാഠ്യ-പാഠ്യേതര പ്രവര്‍ത്തനങ്ങളില്‍ സ്‌കൂള്‍ മികച്ച നിലവാരം പുലര്‍ത്തി വരുന്നു. വര്‍ഷങ്ങളായി ശാസ്ത്രവിഷയങ്ങളില്‍ ദേശീയ-സംസ്ഥാന-ജില്ലാ തലങ്ങളിലും, കാര്‍ഷിക പ്രവര്‍ത്തനങ്ങളില്‍ സംസ്ഥാന-ജില്ലാ തലങ്ങളിലും, പാലാ രൂപത എഡ്യൂക്കേഷണല്‍ ഏജന്‍സി 2022ല്‍ ഏര്‍പ്പെടുത്തിയ കാര്‍ഷിക സ്‌കൂളിനുള്ള പ്രഥമ അവാര്‍ഡും 2024ലെ അവാര്‍ഡും സ്കൂളിനു ലഭിച്ചു. പത്രസമ്മേളനത്തില്‍ സ്‌കൂള്‍ മാനേജര്‍ ഫാ. ജോസഫ് ഞാറക്കാട്ടില്‍, ഹെഡ്മിസ്ട്രസ് ലിന്‍റാ എസ്. പുതിയാപറമ്പില്‍, ജനറല്‍ കണ്‍വീനര്‍ അലക്‌സ് കൊട്ടാരം, പിടിഎ പ്രസിഡന്‍റ് റോബിന്‍ കരിപ്പാത്ത്, ജോണ്‍സണ്‍ പുളിക്കിയില്‍, ജോസുകുട്ടി ഉപ്പാന്തടം, ടി.എസ്. ജയിംസ് എന്നിവര്‍ പങ്കെടുത്തു.

കാലപ്പഴക്കമേറിയ വെട്ടിക്കാട്ടുമുക്ക് പാലത്തിന് സമാന്തരമായി പുതിയ പാലം നിർമിക്കണമെന്ന്

തലയോലപ്പറമ്പ്: തലയോലപ്പറമ്പ് - എറണാകുളം റോഡിലെ വെട്ടിക്കാട്ടുമുക്ക് പാലത്തിന് സമാന്തരമായി പുതിയ പാലം നിർമിക്കണമെന്ന ആവശ്യം ശക്തമാകുന്നു. അരനൂറ്റാണ്ടിലധികം പഴക്കമുള്ള വീതികുറഞ്ഞ പാലം ഗതാഗതക്കുരുക്കിനും അപകടങ്ങൾക്കും ഇടയാക്കുകയാണ്. പ്രതിദിനം ആയിരക്കണക്കിനു വാഹനങ്ങൾ കടന്നുപോകുന്ന വീതി കുറഞ്ഞ പാലത്തിൽ വലിയ വാഹനങ്ങൾ കടന്നുവരുമ്പോൾ ഇരുചക്രവാഹന യാത്രികരും കാൽനടക്കാരും ജീവൻ രക്ഷിച്ചെടുക്കുന്നത് തലനാരിഴയ്ക്കാണ്. സമീപ റോഡിനായി വളരെക്കുറച്ച് സ്ഥലം മാത്രം ഏറ്റെടുക്കേണ്ടിവരും. പാലത്തിലെ അപകടസ്ഥിതി കണക്കിലെടുത്ത് പാലത്തിനിരുവശവും കാൽനടക്കാർക്ക് സുരക്ഷിതമായി സഞ്ചരിക്കാൻ നടപ്പാത തീർക്കണമെന്ന് പ്രദേശവാസികൾ വർഷങ്ങളായി ആവശ്യപ്പെട്ടുവരികയാണെങ്കിലും അധികൃതർ നടപടി സ്വീകരിച്ചില്ല. വെള്ളൂർ പേപ്പർ മിൽ, സ്വകാര്യ സിമന്‍റ് കമ്പനി എന്നിവിടങ്ങളിലേക്ക് രാപകൽ വ്യത്യാസമില്ലാതെ ടൺകണക്കിനു നിർമാണസാമഗ്രികളുമായി ഭാരവണ്ടികൾ ഈ പാലം കടന്നാണ് പോകുന്നത്. തലയോലപ്പറമ്പ് ഡി.ബി. കോളജും പാലത്തിനടുത്താണ് സ്ഥിതിചെയ്യുന്നത്. വാഹനങ്ങൾക്കും കാൽനടക്കാർക്കും സുരക്ഷിതമായി സഞ്ചരിക്കാനാകുന്നതരത്തിൽ വീതികൂട്ടി ഇരുവശങ്ങളിലും നടപ്പാതയോടുകൂടിയ പാലം നിർമ്മിക്കുന്നതിന് അധികൃതർ നടപടി സ്വീകരിക്കണമെന്ന് വെട്ടിക്കാട്ടുമുക്ക്, വടകര നിവാസികൾ ആവശ്യപ്പെട്ടു.

കാൽനൂറ്റാണ്ടിന്‍റെ അനുഭവങ്ങളുമായി അവരെത്തി, പ്രിയ കലാലയത്തിലേക്ക്

കുറവിലങ്ങാട്: ഓർമകളുടെ വേലിയേറ്റമായിരുന്നു ആ മുഖങ്ങളിലെല്ലാം. ആ ഓർമകളിലേക്ക് മുങ്ങിത്താഴാനാണ് വിദേശങ്ങളിൽനിന്നടക്കമുള്ളർ തങ്ങൾ കളിച്ചുവളർന്ന ദേവമാതായുടെ വിളികേട്ട് ഓടിയെത്തിയത്. സഹപാഠികളായ 60 പേരിൽ അകാലത്തിൽ പൊലിഞ്ഞ ഒരാളൊഴികെയുള്ളവരെല്ലാം ഒരുമിച്ചുവെന്നത് സംഘാടക മികവുമായി. കേവലമൊരു സംഗമത്തിനപ്പുറം പ്രിയകലാലയത്തിന്‍റെ കരവലയത്തിൽ ഏറെനേരമിരുന്നും സൗഹൃദം പങ്കിട്ടും ഓർമകൾ പങ്കുവച്ചുമാണ് അവർ പിരിഞ്ഞത്. ഇപ്പോഴത്തെ ജീവിതാന്തസുകളിലേക്ക് അവരെ നയിച്ച കലാലയത്തിന് ഗുരുദക്ഷിണ കണക്കെ ചില ഉപഹാരങ്ങളും അവർ സമ്മാനിച്ചു. കോളജിലെ 1997-2000 ബികോം ബാച്ച് വിദ്യാർഥികളാണ് കുടുംബമായി സംഗമിച്ച് ശ്രദ്ധനേടിയത്. സ്‌നേഹക്കൂട്ടിലേക്ക് പൂർവ അധ്യാപകരും മാനേജരും പ്രിൻസിപ്പലുമടക്കമുള്ളവരും എത്തിയത് വലിയ അംഗീകാരവുമായി. സംഗമം ഗേവ മുൻ ഗവർണർ പി.എസ്. ശ്രീധരൻ പിള്ള ഉദ്ഘാടനം ചെയ്തു. പഴയമയുടെ സൗന്ദര്യത്തിലേക്കുള്ള നടത്തം അനിവാര്യമാണെന്ന് അദ്ദേഹം പറഞ്ഞു. ജയിംസ് പുല്ലാപ്പള്ളി അധ്യക്ഷത വഹിച്ചു. മാനേജർ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, പ്രിൻസിപ്പൽ ഡോ. സുനിൽ സി. മാത്യു, വൈസ് പ്രിൻസിപ്പൽ ഫാ. മാത്യു കവളമ്മാക്കൽ, ബർസാർ ഫാ. ജോസഫ് മണിയഞ്ചിറ, പ്രഫ.ടി.സി. കുര്യാക്കോസ്, ജോർജ് മാത്യു, ഡോ. അനീഷ് തോമസ്, റോബിൻ എണ്ണംപ്രായിൽ, അബിൻ കുര്യൻ, അനീഷ് കുഴികൊമ്പിൽ, അനീഷ് മേൽവെട്ടം എന്നിവർ പ്രസംഗിച്ചു. രേഖ വിനോദ്, ശോഭ ജയിംസ്, ബിസ്മി ശശി, ജോർജ് തോമസ്, വിമൽരാജ്, ബിൻസി സനോജ്, റിന്നി, വിമല അനീഷ്, രാജേഷ് എന്നിവർ നേതൃത്വം നൽകി.

കൃഷിയും പുരയിടങ്ങളും നശിപ്പിച്ച് പന്നിക്കൂട്ടം

ഞീഴൂര്‍: കാഞ്ഞിരംപാറ ഭാഗത്ത് കൃഷിയും പുരയിടങ്ങളും നശിപ്പിച്ച് പന്നിക്കൂട്ടം. ഉടമകളില്ലാത്ത പന്നിക്കൂട്ടം കൃഷിയിടങ്ങള്‍ നശിപ്പിച്ചു തുടങ്ങിയതോടെ നാട്ടുകാരും വീട്ടുകാരും കൃഷിക്കാരുമെല്ലാം ദുരിതത്തിലായി. പഞ്ചായത്തിലെ ഒന്നാം വാര്‍ഡില്‍പ്പെടുന്ന കാഞ്ഞിരംപാറ ഭാഗത്താണ് പന്നികള്‍ കൂട്ടത്തോടെയെത്തി കൃഷിയിടങ്ങളും മറ്റും നശിപ്പിക്കുന്നത്. കുഞ്ഞുങ്ങള്‍ ഉള്‍പ്പെടെയുള്ള പന്നിക്കൂട്ടം കൃഷിയിടത്തിലെത്തി നാശം വരുത്തി മടങ്ങുകയാണ്. ഇവ എങ്ങനെ ഇവിടയെത്തിയെന്ന് ആര്‍ക്കുമറിയില്ല. നാട്ടുകാര്‍ പരാതി നല്‍കിയതിനെത്തുടര്‍ന്ന് അധികൃതര്‍ സ്ഥലത്തെത്തി പരിശോധന നടത്തിയെങ്കിലും ഉടമകളെ കണ്ടെത്താനായില്ല. പന്നികള്‍ നശിപ്പിച്ച കൃഷിയിടങ്ങള്‍ നാട്ടുകാര്‍ പഞ്ചായത്തധികൃതരെ കാണിച്ചുകൊടുത്തു. സമീപവാസികള്‍ വളര്‍ത്തുന്ന പന്നികളാണെന്ന് പരാതി ഉയര്‍ന്നതിനെത്തുടര്‍ന്ന് ഇത്തരത്തില്‍ അന്വേഷിച്ചെങ്കിലും തങ്ങളുടെയല്ല പന്നികളെന്നു വീട്ടുകാര്‍ പറഞ്ഞു. പന്നികളെ പിടികൂടാന്‍ വനംവകുപ്പ് അധികൃതരുടെ സഹായം തേടാനുള്ള നീക്കത്തിലാണ് പഞ്ചായത്ത്. കാഞ്ഞിരംപാറ ഭാഗത്ത് ഏക്കറുകണക്കിന് സ്ഥലം കാടുപിടിച്ചു കിടപ്പുണ്ട്. ഇവിടെയാവും പന്നിക്കൂട്ടങ്ങളുള്ളതെന്നു നാട്ടുകാര്‍ പറയുന്നു. ഞീഴൂര്‍ പഞ്ചായത്ത് പ്രദേശത്ത് കുറക്കന്മാരുടെ ശല്യവും രൂക്ഷമാണെന്നു നാട്ടുകാര്‍ പറയുന്നു.

കടുത്തുരുത്തി റെയില്‍വേ മേല്‍പ്പാലം : സ്ഥലമെടുപ്പ് നടപടികള്‍ 3 മാസത്തിനകം പൂര്‍ത്തിയാക്കും: മോന്‍സ് ജോസഫ്

കടുത്തുരുത്തി: മുട്ടുചിറ-കല്ലറ റോഡില്‍ വാലാച്ചിറ റെയില്‍വേ ഗേറ്റ് ഒഴിവാക്കുന്നതിനുവേണ്ടി ആവിഷ്‌കരിച്ചിരിക്കുന്ന കടുത്തുരുത്തി റെയില്‍വേ മേല്‍പ്പാലത്തിന്‍റെ സ്ഥലമെടുപ്പ് നടപടിക്രമങ്ങള്‍ മൂന്നു മാസത്തിനുള്ളില്‍ പൂര്‍ത്തിയാക്കുമെന്ന് മോന്‍സ് ജോസഫ് എംഎല്‍എ അറിയിച്ചു. ബന്ധപ്പെട്ട ഉദ്യോഗസ്ഥര്‍ പങ്കെടുത്ത യോഗത്തിലാണ് ഇതുസംബന്ധിച്ച തീരുമാനമായത്. റെയില്‍വേ മേല്‍പ്പാലത്തിനുവേണ്ടി സ്ഥലം വിട്ടുതരുന്ന വിസ്തൃതി കണക്കാക്കി വിലനിര്‍ണയം നടത്തുന്നതിനുള്ള അവാര്‍ഡ് എന്‍ക്വയറി തുടങ്ങുന്നതിനു മുന്നോടിയായുള്ള വിവിധ നടപടിക്രമങ്ങള്‍ പൂര്‍ത്തിയാക്കുന്നതിനും യോഗം തീരുമാനിച്ചു. ഇതുപ്രകാരം ഭൂമി ഏറ്റെടുക്കാനുള്ള 19 (1) വിജ്ഞാപനം പുറപ്പെടുവിക്കേണ്ടതുണ്ട്. ഇക്കാര്യത്തില്‍ സര്‍ക്കാര്‍ അനുമതി തേടിക്കൊണ്ടുള്ള ഫയല്‍ റവന്യു വകുപ്പിലെ ഉന്നതോദ്യോഗസ്ഥര്‍ക്ക് കൈമാറിയിട്ടുണ്ട്. അനുമതി ലഭിച്ചതിനുശേഷം 30 ദിവസത്തെ സമയപരിധി പിന്നിട്ടാല്‍ ഭൂമി ഏറ്റെടുക്കല്‍ നടപടികള്‍ ആരംഭിക്കാന്‍ കഴിയും. തുടര്‍ന്ന് റവന്യു വകുപ്പില്‍നിന്നു റെയില്‍വേ മേല്‍പ്പാലം നിര്‍മാണച്ചുമതല നല്‍കിയിട്ടുള്ള പൊതുമരാമത്ത് വകുപ്പിന്‍റെ കീഴില്‍ പ്രവര്‍ത്തിക്കുന്ന റോഡ്സ് ആന്‍ഡ് ബ്രിഡ്ജസ് കോര്‍പറേഷന് ഏറ്റെടുത്തിട്ടുള്ള ഭൂമിയുടെ രേഖകള്‍ കൈമാറും. ഇതിനുശേഷമാണ് റെയില്‍വേ മേല്‍പ്പാലത്തിന്‍റെ ടെണ്ടര്‍ നടപടികള്‍ ആരംഭിക്കാന്‍ കഴിയുകയെന്ന് എംഎല്‍എ അറിയിച്ചു. കടുത്തുരുത്തി റെയില്‍വേ മേല്‍പ്പാലത്തിനുവേണ്ടി ഏറ്റെടുക്കുന്ന സ്ഥലത്ത് വീട് പൂര്‍ണമായും നഷ്ടപ്പെടുന്ന കുടുംബത്തിന് നഷ്ടപരിഹാരം നല്‍കാന്‍ വ്യവസ്ഥ ചെയ്യുന്ന ആര്‍ആര്‍ പാക്കേജിന് ലാന്‍ഡ് റവന്യു കമ്മീഷണര്‍ അംഗീകാരം നല്‍കിയതായും എംഎല്‍എ അറിയിച്ചു. ഇതുപ്രകാരം വീട് പൂര്‍ണമായും നഷ്ടപ്പെടുന്ന കുടുംബത്തിന് 4,60,000 രൂപ അനുവദിച്ചു നല്‍കി. ഇപ്പോള്‍ നടന്നുകൊണ്ടിരിക്കുന്ന റെയില്‍വേ മേല്‍പ്പാല നിര്‍മാണ പ്രവൃത്തിയുടെ മുന്നൊരുക്കമായി ചെയ്യുന്ന കാര്യങ്ങള്‍ പരമാവധി വേഗത്തില്‍ പൂര്‍ത്തിയാക്കാന്‍ എംഎല്‍എ ബന്ധപ്പെട്ട ഉദ്യോഗസ്ഥര്‍ക്ക് നിര്‍ദേശം നല്‍കി. മുട്ടുചിറ-കല്ലറ റോഡില്‍ വാലാച്ചിറ റെയില്‍വേ ഗേറ്റ് ഒഴിവാക്കി കടുത്തുരുത്തി റെയില്‍വേ മേല്‍പ്പാലം നിര്‍മിക്കുന്നതിന് മോന്‍സ് ജോസഫ് എംഎല്‍എ മുന്‍കൈയെടുത്ത് സംസ്ഥാന ബജറ്റില്‍ ഉള്‍പ്പെടുത്തി 2017-18 സാമ്പത്തിക വര്‍ഷത്തില്‍ 30 കോടി രൂപയുടെ ഭരണാനുമതി നേടിയിരുന്നു. മേല്‍പ്പാല നിര്‍മാണത്തിനുവേണ്ടി കിഫ്ബി ബോര്‍ഡ് മീറ്റിംഗ് 19.33 കോടി രൂപയുടെ ഭരണാനുമതിയാണ് പ്രഥമഘട്ടത്തില്‍ നല്‍കിയിരുന്നത്. പുതുക്കിയ എസ്റ്റിമേറ്റിന്‍റെ അടിസ്ഥാനത്തില്‍ സംസ്ഥാന സര്‍ക്കാര്‍ പ്രഖ്യാപിച്ചിരിക്കുന്ന പുതുക്കിയ നിരക്ക് ഇതുപ്രകാരം റിവേഴ്‌സ്ഡ് എസ്റ്റിമേറ്റ് തയാറാക്കി സര്‍ക്കാരിലേക്ക് സമര്‍പ്പിക്കും.

പ്രതി അറസ്റ്റില്‍

പള്ളിക്കത്തോട്: ബാര്‍ ജീവനക്കാരനെ ആക്രമിച്ചു കൊലപ്പെടുത്താന്‍ ശ്രമിച്ച കേസിലെ പ്രതി അറസ്റ്റില്‍. തത്തംപള്ളിക്കുന്ന് കൊച്ചുപറമ്പില്‍ മനോജി(49)നെയാണ് പള്ളിക്കത്തോട് പോലീസ് അറസ്റ്റ് ചെയ്തത്. കഴിഞ്ഞദിവസം കൊടുങ്ങൂർ ഗ്രാൻഡ് അവന്യു ബാര്‍ ഹോട്ടല്‍ അടച്ചതിനുശേഷവും സെക്യൂരിറ്റി കാബിന്‍ ഭാഗത്തുനിന്നു പോകാതിരുന്ന പ്രതി സെക്യൂരിറ്റി ജീവനക്കാരനായ രാജനെ തള്ളി നിലത്തിടുകയും മാരകമായി പരിക്കേല്‍പ്പിക്കുകയുമായിരുന്നു. രാജന്‍ ഇപ്പോള്‍ മെഡിക്കല്‍ കോളജില്‍ ചികിത്സയിലാണ്. പള്ളിക്കത്തോട് പോലീസ് എസ്എച്ച്ഒ പി.എസ്. രാജേഷിന്‍റെ നേതൃത്വത്തില്‍ എസ്‌ഐ പി.എന്‍. ഷാജി, എഎസ്‌ഐ റെജി ജോണ്‍, എസ്‌സിപിഒ സുജീഷ്, സിപിഒ ശ്രീരാജന്‍, സിപിഒമാരായ രാജേഷ്, ജയലാല്‍ എന്നിവര്‍ ചേര്‍ന്നാണ്പ്രതിയെ അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

ഏറ്റുമാനൂരിൽ ദേശീയ വ്യാപാരി ദിനാചരണം

ഏറ്റുമാനൂർ: കേരള വ്യാപാരി വ്യവസായി ഏകോപന സമിതി ഏറ്റുമാനൂർ യൂണിറ്റായ ഏറ്റുമാനൂർ ചേംബർ ഓഫ് കൊമേഴ്സിന്‍റെ നേതൃത്വത്തിൽ ദേശീയ വ്യാപാരി ദിനാചരണം നടത്തി. വ്യാപാരഭവൻ അങ്കണത്തിൽ പതാക ഉയർത്തി. തുടർന്നു നടത്തിയ സമ്മേളനം പ്രസിഡന്‍റ് എൻ.പി. തോമസ് ഉദ്ഘാടനം ചെയ്തു. ജനറൽ കൺവീനർ ടി.എം. യാക്കൂബ് അധ്യക്ഷത വഹിച്ചു. എൻ.കെ. സുകുമാരൻ നായർ, ജോർജ് തോമസ് മുണ്ടയ്ക്കൽ, എം.എൻ. സജി മുരിങ്ങയിൽ, പി.സി. സുരേഷ്, രാജു താര, ശ്യാം ബഷീർ, വി.എം. മാത്യു, ജോപോൾ ജോർജ് തുടങ്ങിയവർ പ്രസംഗിച്ചു.

വിദേശ ജോലി വാഗ്ദാനം ചെയ്തു തട്ടിപ്പ്: പ്രതി അറസ്റ്റിൽ

ഏറ്റുമാനൂർ: ഓസ്ട്രേലിയയിൽ ജോലി വാഗ്ദാനം ചെയ്തു പണം തട്ടിയെടുത്ത കേസിലെ പ്രതി അറസ്റ്റിൽ. പിറവം തിരുമാറാടി കാക്കൂർ കുഴിവേലിക്കണ്ടത്തിൽ ശരത് ശശി(30) യെയാണ് ഏറ്റുമാനൂർ പോലീസ് അറസ്റ്റ് ചെയ്തത്. കോടതിയിൽ ഹാജരാക്കിയ ഇയാളെ റിമാൻഡ് ചെയ്തു. പട്ടിത്താനം സ്വദേശിയായ യുവതിയിൽനിന്ന് ഓസ്ട്രേലിയയിൽ ജോലി വാഗ്ദാനം ചെയ്ത് 3,72,000 രൂപ ഇയാൾ വാങ്ങിയെടുത്തശേഷം ജോലി തരപ്പെടുത്തി നൽകാതെ വിശ്വാസവഞ്ചന നടത്തിയെന്നാണ് കേസ്. ഏറ്റുമാനൂർ പോലീസ് സ്റ്റേഷൻ ഇൻസ്പെക്ടർ എ.എസ്. അൻസലിന്‍റെ നേതൃത്വത്തിൽ എസ്ഐമാരായ എ.എസ്. അഖിൽദേവ്, ആ‌ഷ്‌ലി രവി, റെജിമോൻ സി.ടി, സീനിയർ സിവിൽ പോലീസ് ഓഫീസർ സുനിൽ കുര്യൻ, സിവിൽ പോലീസ് ഓഫീസർമാരായ വി.കെ. അനീഷ്, അജിത്ത് എം. വിജയൻ എന്നിവർ ചേർന്ന് മലയാറ്റൂരിൽനിന്നാണ് പ്രതിയെ പിടികൂടിയത്.

കാപ്പ നിയമപ്രകാരം തടവിലാക്കാൻ ഉത്തരവ്

ഏറ്റുമാനൂർ: യുവാവിനെ കാപ്പ നിയമപ്രകാരം കരുതൽ തടങ്കലിൽ അടയ്ക്കാൻ ഉത്തരവ്. കാണക്കാരി ചാത്തമല കുഴിവേലിൽ രാഹുൽ രാജു(24)വിനെയാണ് ജില്ലാ കളക്ടറുടെ ഉത്തരവു പ്രകാരം തടങ്കലിലാക്കുന്നത്. ജില്ലാ പോലീസ് മേധാവി എ. ഷാഹുൽഹമീദിന്‍റെ റിപ്പോർട്ടിന്‍റെ അടിസ്ഥാനത്തിലാണ് നടപടി. കുറവിലങ്ങാട്, ഏറ്റുമാനൂർ പോലീസ് സ്റ്റേഷനുകളിലായി അഞ്ചോളം ക്രിമിനൽ കേസുകളിൽ പ്രതിയാണ് ഇയാൾ.

മാങ്ങാനത്തും പരിസരപ്രദേശത്തും വ്യാപക മോഷണം

കോട്ടയം: മാങ്ങാനത്തും പരിസരപ്രദേശത്തും വ്യാപക മോഷണം. മാങ്ങാനത്ത് പാംസ് വില്ലയിലെ വീട്ടില്‍നിന്ന് അമ്പത് പവന്‍ സ്വര്‍ണം മോഷ്ടിച്ചു. വില്ലയിലെ അടച്ചുകിടന്ന മറ്റു വീടുകളിലും തുരുത്തേല്‍പാലത്തിനു സമീപമുള്ള രണ്ടു വീടുകളിലും മോഷ്ടാക്കളെത്തി. അഞ്ചു പേരടങ്ങുന്ന സംഘത്തിന്‍റെ സിസി ടിവി ദൃശ്യങ്ങള്‍ പോലീസിന് ലഭിച്ചിട്ടുണ്ട്. വെള്ളിയാഴ്ച രാത്രിയാണു മോഷണം അരങ്ങേറിയത്. മാങ്ങാനം പാംസ് വില്ലയിലെ 21-ാം നമ്പര്‍ കോട്ടേജിലാണു മോഷണം നടന്നത്. വില്ലയുടെ വാതില്‍ തകര്‍ത്ത് ഉള്ളില്‍ക്കടന്ന മോഷ്ടാവ് അമ്പത് പവന്‍ സ്വര്‍ണം കവര്‍ന്നു. ഇന്നലെ പുലര്‍ച്ചെ രണ്ടിനും ആറിനും ഇടയിലാണു മോഷണം നടന്നത്. വില്ലയിലെ താമസക്കാരായ അമ്മയും മകളും രോഗബാധയെത്തുടര്‍ന്നു മാങ്ങാനത്തെ സ്വകാര്യ ആശുപത്രിയില്‍ രാത്രിയില്‍ ചികിത്സയ്ക്കായി പോയിരുന്നു. ഇതിനുശേഷം ഇവര്‍ പുലര്‍ച്ചെ തിരികെയെത്തിയപ്പോഴാണു മോഷണം നടന്ന വിവരം അറിഞ്ഞത്. വീടിന്‍റെ മുന്‍വാതില്‍ തകര്‍ത്ത് മോഷ്ടാവ് ഉള്ളില്‍ പ്രവേശിക്കുകയായിരുന്നു. തുടര്‍ന്നു തൊട്ടടുത്ത മുറിയിലെ അലമാരയ്ക്കുള്ളില്‍ സൂക്ഷിച്ചിരുന്ന സ്വര്‍ണമാണു കവര്‍ന്നത്. മോഷണം വിവരം വീട്ടുകാര്‍ കോട്ടയം ഈസ്റ്റ് പോലീസിനെ അറിയിക്കുകയായിരുന്നു. ഈസ്റ്റ് പോലീസ്‌സ്റ്റേഷന്‍ എസ്എച്ച്ഒ ശ്രീജിത്തിന്‍റെ നേതൃത്വത്തിലുള്ള പോലീസ് സംഘം സ്ഥലത്തെത്തി പരിശോധന നടത്തി. മാങ്ങാനം തുരുത്തേല്‍ പാലത്തിനു സമീപമുള്ള ആള്‍ത്താമസമില്ലാത്ത വീട്ടിലും രാത്രി മോഷണശ്രമം നടന്നു. പ്രദേശത്തെ വീടുകളില്‍ കയറുന്ന മോഷ്ടാവിന്‍റെ സിസിടിവി ദൃശ്യം ലഭിച്ചിട്ടുണ്ട്. തുരുത്തേല്‍പ്പാലത്തിനുസമീപം ആളില്ലാത്ത വീട് കുത്തിത്തുറന്ന് ഉള്ളില്‍ കയറാനാണു പ്രതി ശ്രമിച്ചിരിക്കുന്നത്. ഈ വീടിന്‍റെ പുറത്തുനിന്നുള്ള ദൃശ്യമാണ് ലഭിച്ചത്. പോലീസ്, ഫിംഗര്‍ പ്രിന്‍റ് വിദഗ്ധര്‍ സ്ഥലത്തെത്തി പരിശോധന നടത്തി. സിസിടിവി ദൃശ്യത്തിന്‍റെ അടിസ്ഥാനത്തില്‍ പോലീസ് പരിശോധന ആരംഭിച്ചു. പ്രദേശത്ത് മോഷ്ടാക്കളുടെയും സാമൂഹിക വിരുദ്ധരുടെയും ശല്യം രൂക്ഷമാണെന്നും അടിയന്തരമായി പോലീസ് നടപടിയെടുക്കണമെന്നും നഗരസഭാംഗം ജൂലിയസ് ചാക്കോ ആവശ്യപ്പെട്ടു.

ചങ്ങനാശേരി അതിരൂപതയുടെ നേതൃത്വത്തില്‍ ധന്യന്‍ മാര്‍ മാത്യു മാക്കീല്‍ അനുസ്മരണം നാളെ

ചങ്ങനാശേരി: ചങ്ങനാശേരി വികാരിയാത്തിന്‍റെ രണ്ടാമതു മേലധ്യക്ഷനായും പിന്നീട് കോട്ടയം വികാരി അപ്പസ്‌തോലിക്കയായും ചുമതല നിര്‍വഹിച്ച ധന്യന്‍ മാര്‍ മാത്യു മാക്കീലിന്‍റെ അനുസ്മരണവും പ്രാര്‍ഥനാശുശ്രൂഷകളും നാളെ രാവിലെ ഏഴിന് അദ്ദേഹത്തിന്‍റെ കബറിടം സ്ഥിതിചെയ്യുന്ന കോട്ടയം ഇടയ്ക്കാട് സെന്‍റ് ജോര്‍ജ് ക്നാനായ കത്തോലിക്ക ഫൊറോന പള്ളിയില്‍ ചങ്ങനാശേരി അതിരൂപതയുടെ ആഭിമുഖ്യത്തില്‍ നടത്തും. ആര്‍ച്ച്ബിഷപ് മാര്‍ തോമസ് തറയില്‍ വിശുദ്ധകുര്‍ബാനയ്ക്കും കബറിടത്തില്‍ ഒപ്പീസിനും മുഖ്യകാര്‍മികത്വം വഹിക്കും. ചങ്ങനാശേരി അതിരൂപതാ വികാരി ജനറാള്‍മാരായ മോണ്‍. ആന്‍റണി എത്തയ്ക്കാട്ട്, മോണ്‍. മാത്യു ചങ്ങങ്കരി, മോണ്‍. സ്‌കറിയാ കന്യാകോണില്‍, മോണ്‍. ജോണ്‍ തെക്കേക്കര, കോട്ടയം അതിരൂപത വികാരി ജനറാള്‍മാരായ മോണ്‍. തോമസ് ആനിമൂട്ടില്‍, മോണ്‍. മൈക്കിള്‍ വെട്ടിക്കാട്ട്, ഇടയ്ക്കാട് പള്ളി വികാരി ഫാ. സൈമണ്‍ പുല്ലാട്ട്, രണ്ട് അതിരൂപതകളിലെയും വൈദികര്‍, സന്യസ്തര്‍, അല്മായ പ്രതിനിധികള്‍ എന്നിവര്‍ പങ്കുചേരും. 1896 ഓഗസ്റ്റ് 11 നാണ് മാര്‍ മാത്യു മാക്കീല്‍ ചങ്ങനാശേരി വികാരിയാത്തിന്‍റെ വികാരി അപ്പസ്‌തോലിക്കയായി നിയമിതനാകുന്നത്. അദ്ദേഹത്തിന്‍റെ സ്ഥാനാരോഹണത്തിന്‍റെ 130-ാം വാര്‍ഷികാചരണ ആരംഭവും 2025 മേയ് 23ന് മാര്‍ മാക്കീല്‍ ധന്യന്‍ പദവിയിലേക്ക് ഉയര്‍ത്തപ്പെട്ടതിനു ദൈവസന്നിധിയിലുള്ള കൃതജ്ഞതയര്‍പ്പണവും എന്ന നിലയിലാണ് ചങ്ങനാശേരി അതിരൂപത ഈ അനുസ്മരണം നടത്തുന്നത്. ചങ്ങനാശേരി അതിരൂപതാ കൂരിയാംഗങ്ങള്‍, കോട്ടയം ലൂര്‍ദ് ഫൊറോനാപ്പള്ളി വികാരി ഫാ. ജേക്കബ് വട്ടയ്ക്കാട്ട്, താഴത്തങ്ങാടി തിരുഹൃദയപ്പള്ളി വികാരി ഫാ. ജോസ് തെക്കേപ്പുറം, കൈക്കാരന്മാര്‍, പാരീഷ് കൗണ്‍സില്‍ അംഗങ്ങള്‍, സംഘടനാ ഭാരവാഹികള്‍ തുടങ്ങിയവര്‍ നേതൃത്വം നല്‍കുമെന്ന് ചങ്ങനാശേരി അതിരൂപത പബ്ലിക് റിലേഷന്‍സ് വിഭാഗം അറിയിച്ചു.

മെഡി. കോളജിലെ നിർമാണ പ്രവർത്തനങ്ങൾ : സമയബന്ധിതമായി പൂർത്തീകരിക്കാൻ മന്ത്രിതല യോഗത്തിൽ തീരുമാനം

ഏറ്റുമാനൂർ: കോട്ടയം മെഡിക്കൽ കോളജിൽ നിലവിൽ നടന്നുകൊണ്ടിരിക്കുന്ന നിർമാണ പ്രവർത്തനങ്ങൾ സമയബന്ധിതമായി പൂർത്തീകരിക്കാൻ തിരുവനന്തപുരത്ത് ചേർന്ന മന്ത്രിതല യോഗത്തിൽ തീരുമാനം. വിവിധ നിർമാണ പ്രവൃത്തികളുടെ പുരോഗതി വിലയിരുത്തുന്നതിനായി മന്ത്രിമാരായ വി.എൻ. വാസവൻ, വീണാ ജോർജ് എന്നിവർ വിളിച്ച അവലോകന യോഗത്തിലാണ് ഇതുസംബന്ധിച്ച തീരുമാനം കൈക്കൊണ്ടത്. എംബിബിഎസ് വിദ്യാർഥികളുടെ മെൻസ് ഹോസ്റ്റലിന്‍റെ നവീകരണ പ്രവർത്തനങ്ങൾ അടിയന്തരമായി പൂർത്തീകരിക്കാനും തീരുമാനിച്ചു. നിർമാണ പ്രവർത്തനങ്ങൾക്കിടയിൽ നേരിടേണ്ടിവരുന്ന സാങ്കേതിക വിഷയങ്ങൾ വിശദമായി വിലയിരുത്തി അടിയന്തരമായി പരിഹരിക്കും. കെഎസ്ഇബി, പിഡബ്ല്യുഡി (ബിൽഡിംഗ്) ഉൾപ്പെടെയുള്ള വിവിധ വകുപ്പുകളെ ഏകോപിപ്പിച്ചുകൊണ്ട് നിർമാണ പ്രവർത്തനങ്ങൾ ത്വരിതപ്പെടുത്തും. കഴിഞ്ഞ ഒമ്പതു വർഷംകൊണ്ട് ഇടതുപക്ഷ ജനാധിപത്യമുന്നണി സർക്കാർ കോട്ടയം മെഡിക്കൽ കോളജിനായി ചെലവഴിച്ചത് 956.79 കോടി രൂപയാണ്. ഈ സർക്കാർ ഇതുവരെ 746.10 കോടി രൂപയാണ് മെഡിക്കൽ കോളജിനായി നൽകിയിരിക്കുന്നത്. അത്യാധുനിക സംവിധാനങ്ങളോടുകൂടിയ അഞ്ചു ബ്ലോക്കുകൾ പൂർത്തിയാകുമ്പോൾ കോട്ടയം മെ‍ഡിക്കൽ കോളജ് സൂപ്പർ സ്പെഷാലിറ്റി പദവിയിലേക്ക് എത്തിച്ചേരും. നിർമാണം പൂർത്തീകരിച്ച സർജറി ബ്ലോക്കിൽ വിവിധ സർജറി വിഭാഗങ്ങളെ ഏകീകരിപ്പിച്ചുകൊണ്ട് ഒറ്റ ബ്ലോക്കിൽ സർജറി നടത്താൻ സാധിക്കും. റേഡിയോ ഡയഗ്‌നോസിസ്, ഇഎൻടി, അസ്ഥിചികിത്സ, ജനറൽ സർജറി, അനസ്തേഷ്യ വിഭാഗങ്ങളും പതോളജി-മൈക്രോബയോളജി-ബയോകെമിസ്ട്രി ലാബ് വിഭാഗങ്ങളും ഇവിടെ ഏകീകരിക്കപ്പെടും. 257 കോടി രൂപയുടെ പദ്ധതിയിൽ 169 കോടി നിർമാണങ്ങൾക്കും ബാക്കി തുക ഉപകരണങ്ങൾക്കും അനുബന്ധ പ്രവർത്തനങ്ങൾക്കുമാണ്. ബ്ലോക്കിലുള്ള 18 ഓപ്പറേഷൻ തിയറ്ററുകളിൽ രണ്ടു മൈനർ തിയറ്ററുകളും 14 മേജർ തിയറ്ററുകളും രണ്ട് സെപ്റ്റിക് ഓപ്പറേഷൻ തിയറ്ററുകളുമാണുള്ളത്. 22 കിടക്കകൾ വീതമുള്ള രണ്ടു തീവ്രപരിചരണ യൂണിറ്റുകളും 12 കിടക്കകളുള്ള ഐസൊലേഷൻ തീവ്രപരിചരണ മുറികളുമുണ്ട്. 526 കിടക്കകളാണ് ഇവിടെ സജ്ജീകരിച്ചിരിക്കുന്നത്. നിലവിലെ കാർഡിയോളജി-കാർഡിയോ തൊറാസിക് ബ്ലോക്കിന് സമീപത്തായാണ് 36 കോടി രൂപ ചെലവിൽ കാർഡിയോളജി ബ്ലോക്ക് ഒന്നാംഘട്ടത്തിന്‍റെ നിർമാണം നടക്കുന്നത്. അത്യാഹിത വിഭാഗത്തിന് സമീപമാണ് 22 കോടി രൂപ ചെലവിൽ പുതിയ ക്രിട്ടിക്കൽ കെയർ ബ്ലോക്ക് നിർമിക്കുന്നത്. അഞ്ച് നിലകളുള്ള ഈ വിഭാഗത്തിൽ അടിയന്തര സാഹചര്യത്തിലുള്ള ശസ്ത്രക്രിയകൾ അടക്കമുള്ള കാര്യങ്ങൾ പെട്ടെന്ന് ചെയ്യാനാണ് ഉദ്ദേശിക്കുന്നത്. പത്ത് കോടിരൂപ ചെലവിൽ പകർച്ചവ്യാധി നിയന്ത്രണ വിഭാഗത്തിന്‍റെ ബ്ലോക്കും നിർമാണമാരംഭിച്ചിട്ടുണ്ട്. പ്രവർത്തനങ്ങൾ വിലയിരുത്താൻ ചേർന്ന യോഗത്തിൽ മന്ത്രിമാർക്കു പുറമേ വിവിധ വകുപ്പുകളിലെ ഉന്നത ഉദ്യോഗസ്ഥരും പങ്കെടുത്തു.

ദര്‍ശന കാര്‍ട്ടൂണ്‍, ചിത്രരചനാ മത്സരത്തില്‍ കുട്ടികളുടെ വൻ പങ്കാളിത്തം

കോട്ടയം: ദര്‍ശന സാംസ്‌കാരികകേന്ദ്രം ന്യൂഡല്‍ഹി ചില്‍ഡ്രന്‍സ് ബുക്ക് ട്രസ്റ്റുമായി ചേര്‍ന്ന് സംഘടിപ്പിച്ച 28-ാം ദര്‍ശന അഖില കേരള ശങ്കേഴ്‌സ് ചിത്രരചന, കാര്‍ട്ടൂണ്‍ മത്സരത്തില്‍ കേരളത്തിലെ വിവിധ വിദ്യാലയങ്ങളില്‍ നിന്നായി 2200 കുട്ടികള്‍ പങ്കെടുത്തു. മന്ത്രി വി. എന്‍. വാസവന്‍ ഉദ്ഘാടനം ചെയ്തു. ദര്‍ശന സാംസ്‌കാരികകേന്ദ്രം ഡയറക്ടര്‍ ഫാ. എമില്‍ പുള്ളിക്കാട്ടില്‍ സിഎംഐ അധ്യക്ഷത വഹിച്ചു. യോഗത്തില്‍ ഡോ. അഞ്ജു മരിയന്‍ സെബാസ്റ്റ്യന്‍ രചിച്ച് കേരള സംസ്ഥാന ബാലസാഹിത്യ ഇന്‍സ്റ്റിറ്റ്യൂട്ട് പ്രസിദ്ധീകരിച്ച "മാമലക്കാട്ടിലെ മിഠായി മരം’ മന്ത്രി വി. എന്‍. വാസവന്‍ പ്രകാശനം ചെയ്തു. ജോഷി മാത്യു, സിജിത അനില്‍, പ്രദീപ് കുമാര്‍, കാര്‍ട്ടൂണിസ്റ്റ് രാജു നായര്‍, പി.കെ. ആനന്ദക്കുട്ടന്‍, ആര്‍ട്ടിസ്റ്റ് അശോകന്‍, ടി.എസ്. ശങ്കര്‍ എന്നിവര്‍ പ്രസംഗിച്ചു. മത്സരത്തില്‍ പങ്കെടുത്ത എല്ലാ കുട്ടികള്‍ക്കും സമ്മാന കിറ്റുകള്‍ നൽകി. പെയിന്‍റിംഗില്‍ പി.ആര്‍. ശ്രീഹരി (കാടാച്ചിറ എച്ച്എസ്എസ്, കണ്ണൂര്‍) ശങ്കര്‍ അവാര്‍ഡ് നേടി. നഴ്‌സറി ഗ്രൂപ്പില്‍ ഒന്നാം സ്ഥാനം എഡ്രീന സാറ എബി (സെന്‍റ് മര്‍സില്‍നാസ് സ്‌കൂള്‍ കോട്ടയം), രണ്ടാം സ്ഥാനം ബെര്‍ണീസ് സൂസന്‍ ബെഞ്ചമിന്‍ (ഗവ.എല്‍പിഎസ്, പൂവന്‍തുരുത്ത് ), മൂന്നാം സ്ഥാനം നിലീന നിസി ലിജുമോന്‍ (സേക്രഡ് ഹാര്‍ട്ട് പബ്ലിക് സ്‌കൂള്‍, കോട്ടയം) എന്നിവർ കരസ്ഥമാക്കി. എ ഗ്രൂപ്പില് (1, 2 ക്ലാസുകള്‍) ഒന്നാം സ്ഥാനം ഓവിയന്‍ ലിബീഷ് (സി . സാവിയോ പബ്ലിക് സ്‌കൂള്‍, കല്ലറ), രണ്ടാം സ്ഥാനം ഋഷികേശ് ആര്‍. നായര്‍ (സേക്രഡ് ഹാര്‍ട്ട് പബ്ലിക് സ്‌കൂള്‍, കോട്ടയം), മൂന്നാം സ്ഥാനം അശ്വിത ആര്‍. (ലൂര്‍ദ് പബ്ലിക് സ്‌കൂള്‍, കോട്ടയം). ബി ഗ്രൂപ്പില്‍ (3, 4 ക്ലാസുകള്‍ ) ഒന്നാം സ്ഥാനം അഭിനന്ദ് ബിനോയ് (ഹോളി ഫാമിലി എല്‍പി സ്‌കൂള്‍ കോട്ടയം, രണ്ടാം സ്ഥാനം ശ്രേയ ആര്‍. (എംഡിഎല്‍പി സ്‌കൂള്‍ പാമ്പാടി ), മൂന്നാം സ്ഥാനം പദ്മശ്രീ ശിവകുമാര്‍ (ലെറ്റര്‍ലാന്‍ഡ് സ്‌കൂള്‍ ആലപ്പുഴ). സി ഗ്രൂപ്പില്‍ (5, 6, 7 ക്ലാസുകള്‍ ) ഒന്നാം സ്ഥാനം ലക്ഷ്മി കൃഷ്ണ ആര്‍. (ചിന്മയ വിദ്യാലയ,കോട്ടയം), രണ്ടാം സ്ഥാനം താര ജിജോ (മാര്‍ ബസേലിയസ് പബ്ലിക് സ്‌കൂള്‍, കോട്ടയം ), മൂന്നാം സ്ഥാനം അവന്തിക പി. നായര്‍ (ശ്രീശങ്കര ഇംഗ്ലീഷ് മീഡിയം സ്‌കൂള്‍ , ചേര്‍ത്തല). ഡി ഗ്രൂപ്പില്‍ (8, 9, 10 ക്ലാസുകള്‍) ഒന്നാം സ്ഥാനം വി.എസ്. അനന്യ (ഗവ. ഗേള്‍സ് എച്ച്എസ് എസ്, വൈക്കം) രണ്ടാം സ്ഥാനം ക്രിസ്റ്റല്‍ മേരി റോയ് (കെഇ സ്‌കൂള്‍ മാന്നാനം), മൂന്നാം സ്ഥാനം ആര്യനന്ദ കെ.എന്‍. (ചിന്മയ വിദ്യാലയ, കോട്ടയം ). ഇ. ഗ്രൂപ്പില്‍ (11, 12 ക്ലാസുകള്‍) ഒന്നാം സ്ഥാനം മാനസമീര (ഗവ. ഗേള്‍സ് എച്ച്എസ് എസ് ഹരിപ്പാട്), രണ്ടാം സ്ഥാനം അഭിജിത് ബിനോയ് (ഹോളി ഫാമിലി എച്ച്എസ്എസ്, കോട്ടയം) മൂന്നാം സ്ഥാനം ഇനിയ എ (സെന്‍റ് ആന്‍സ് ഗേള്‍സ് എച്ച്എസ് എസ്, കോട്ടയം. സ്‌പെഷല്‍ സ്‌കൂളില്‍ ഒന്നാം സ്ഥാനം ആരോമല്‍ ജോസഫ്, (സേവാഗ്രാം സെപ്ഷല്‍ സ്‌കൂള്‍, വെട്ടിമുകള്‍), രണ്ടാം സ്ഥാനം നവമി ഫ്രാന്‍സിസ് (സാന്‍ജോസ് വിദ്യാലയ ഏറ്റുമാനൂര്‍), മൂന്നാം സ്ഥാനം ആല്‍ബിന്‍ ജോര്‍ജ് (ലിലി ലയണ്‍സ് സ്‌പെഷല്‍ സ്‌കൂള്‍, പുലിയൂര്‍). കാര്‍ട്ടൂണ്‍ ഒന്നാം സ്ഥാനം ഇനിയ എ (സെന്‍റ് ആന്‍സ് ഗേള്‍സ് എച്ച്എസ് എസ് കോട്ടയം), രണ്ടാം സ്ഥാനം സൗരവ് ആര്‍. കൃഷ്ണ (ലൂര്‍ദ് പബ്ലിക് സ്‌കൂള്‍ കോട്ടയം), മൂന്നാം സ്ഥാനം സുമയ്യ നൗഷാദ് (സെന്‍റ് ജോസഫ് എച്ച്എസ്എസ്, ആലപ്പുഴ). കാരിക്കേച്ചറില്‍ ഒന്നാം സ്ഥാനം അതുല്‍ എസ്. രാജ്, രണ്ടാം സ്ഥാനം ദീപ എസ്, ഷാജി പി. ഏബ്രഹാം, അന്‍സു മരിയ ജോ എന്നിവര്‍ പങ്കിട്ടു.

അടിമുടി ദുരൂഹത, ചുരുളഴിയാന്‍ കേസുകളേറെ

കോട്ടയം: നാലു സ്ത്രീകളുടെ തിരോധാനക്കേസില്‍ ചോദ്യംചെയ്യലിനോടു സഹകരിക്കാതെ ക്രൈം ബ്രാഞ്ചിനെ പത്തു ദിവസമായി കുഴപ്പിക്കുന്ന ചേര്‍ത്തല പള്ളിപ്പുറം ചെങ്ങുംതറയില്‍ സെബാസ്റ്റ്യ(67)ന്‍റെ മുന്‍കാല ജീവിതത്തില്‍ അടിമുടി ദുരൂഹത. പത്താം ക്ലാസ് തോറ്റ സെബാസ്റ്റ്യന്‍ എസ്എസ്എല്‍സി പാസായതായി തയാറാക്കിയ ബുക്ക് വ്യാജമാണെന്ന് സംശയിക്കുന്നു. ഇതേ വ്യാജ എസ്എസ്എല്‍സി ബുക്ക് വിവിധ ആവശ്യങ്ങള്‍ക്ക് ഇയാള്‍ വിവിധ സ്ഥാപനങ്ങളില്‍ രേഖയായി സമര്‍പ്പിച്ചിട്ടുണ്ട്. എസ്എസ്എല്‍സി തോറ്റശേഷം ടൈപ്പ് റൈറ്റിംഗ് പഠിച്ചു. തുടർന്ന് ചേര്‍ത്തല-അരീക്കുറ്റി റൂട്ടിലെ സ്വകാര്യ ബസിലെ ഡോര്‍ കീപ്പറായും ടാക്‌സി ഡ്രൈവറായും ജോലി ചെയ്തു. പിന്നീട് വാഹന കച്ചവടത്തിലേക്കു തിരിഞ്ഞു. ഒരു അംബാസഡറും സ്വരാജ് മസ്ദ വാനും ഇന്നോവയും ഉള്‍പ്പെടെ പലപ്പോഴായി വന്നുപോയ വാഹനങ്ങളേറെയും കള്ളവണ്ടികളായിരുന്നു. ആര്‍സി ബുക്കുകള്‍ വ്യാജമായി തയാറാക്കിയാണു പലതും വിറ്റിരുന്നത്. ചില വാഹനങ്ങള്‍ക്ക് യാതൊരു രേഖകളും ഉണ്ടായിരുന്നില്ല. പലയിടങ്ങളില്‍ ടാക്‌സി ഡ്രൈവര്‍മാരെ കൊലചെയ്തു കാറുകള്‍ കൈവശപ്പെടുത്തി കേരളത്തെ നടുക്കിയ കേസുകളില്‍ സെബാസ്റ്റ്യന് പങ്കാളിത്തമോ അറിവോ ഉണ്ടായിരുന്നതായി പോലീസ് സംശയിക്കുന്നു. സ്‌കൂള്‍കാലം മുതൽ മോഷണം ചെറുപ്പത്തില്‍ കുഞ്ഞച്ചന്‍ എന്നറിയപ്പെട്ടിരുന്ന ഇയാള്‍ സ്‌കൂള്‍കാലം മുതല്‍ നാട്ടില്‍ പതിവായി ചെറിയ മോഷണങ്ങള്‍ നടത്തിയിരുന്നു. പലരില്‍നിന്നും പണം കടം വാങ്ങുകയും തിരികെ കൊടുക്കാതിരിക്കുകയും ചെയ്തിരുന്നു. അടുത്തകാലം വരെ കടം വാങ്ങിയ പണം ആവശ്യപ്പെട്ട് നിരവധി പേര്‍ ഇയാളുടെ ചേര്‍ത്തലയിലെ വീട്ടില്‍ എത്തിയിരുന്നു. ഇത്തരത്തില്‍ സമ്മര്‍ദം കൂടുമ്പോള്‍ സെബാസ്റ്റ്യന്‍ ഏറ്റുമാനൂര്‍ വെട്ടിമുകളിലുള്ള ഭാര്യവീട്ടിലെത്തി ആഴ്ചകള്‍ താമസിച്ചശേഷം ചേര്‍ത്തലയിലേക്ക് മടങ്ങും. വാഹനത്തട്ടിപ്പുകളും പണമിടപാടും പതിവായിരുന്ന കാലത്ത് പോലീസ് സ്‌റ്റേഷനുകള്‍ കയറിയിറങ്ങേണ്ടിവന്നപ്പോഴൊക്കെ കോഴ കൊടുത്ത് പുറത്തിറങ്ങുകയായിരുന്നു. ചേര്‍ത്തല സ്വദേശി ബിന്ദു പത്മനാഭന്‍, ഐഷ, സിന്ധു എന്നിവരുടെ തിരോധാനത്തില്‍ പോലീസ് ചോദ്യം ചെയ്തപ്പോള്‍ പോലീസിലെ അടുപ്പക്കാരുടെ ഇടപെടലിലാണ് രക്ഷപ്പെട്ടുകൊണ്ടിരുന്നത്. 52-ാം വയസിലാണ് സെബാസ്റ്റ്യന്‍ വിവാഹം കഴിച്ചത്. എന്നാല്‍ സാമ്പത്തിക ഇടപാടുകളില്‍ ഇയാള്‍ക്ക് ഒട്ടേറെ സ്ത്രീകളുമായി അടുപ്പമുണ്ടായിരുന്നതായി പ്രദേശവാസികള്‍ പറയുന്നു. അറുപതാം വയസിലാണ് സെബാസ്റ്റ്യന്‍ സ്ത്രീകളെ വകവരുത്തി തുടങ്ങിയതെന്നു പോലീസ് ഇപ്പോള്‍ കരുതുന്നില്ല. മുന്‍പും സമാനമായ കൃത്യങ്ങള്‍ ചെയ്തിട്ടുണ്ടെന്ന വിശ്വാസത്തിലാണ് അന്വേഷണ സംഘം. എട്ടുവര്‍ഷം മുന്‍പ് ഇയാള്‍ പുതിയ മാരുതി റിറ്റ്‌സ് കാര്‍ വാങ്ങിയിരുന്നു. വെട്ടിമുകളിലുള്ള ഭാര്യവീട്ടില്‍ കിടക്കുന്ന ഈ കാറില്‍നിന്നാണു കഴിഞ്ഞദിവസം കത്തിയും കമ്പിയും ഡീസല്‍ കാനും പോലീസ് കണ്ടെടുത്തത്. ചേര്‍ത്തലയില്‍ രണ്ടേകാല്‍ ഏക്കര്‍ കാടുകയറിയ പുരയിടത്തിലാണു കാലങ്ങളായി സെബാസ്റ്റ്യന്‍ താമസിക്കുന്നത്. ഇവിടെയുള്ള വറ്റാത്ത കിണറില്‍നിന്നു വേനലില്‍ പ്രദേശവാസികള്‍ വെള്ളം കോരുന്നതും വഴി നടക്കുന്നതും സെബാസ്റ്റ്യന്‍ ഇരുപതു വര്‍ഷം മുന്‍പ് തടഞ്ഞിരുന്നു. സഹോദരങ്ങളുമായും അകൽച്ച അന്‍പത് വര്‍ഷം മുന്‍പ് പിതാവ് മരിച്ചപ്പോള്‍ ഈ ഭൂമി ഭാഗം ചെയ്തിരുന്നില്ല. സെബാസ്റ്റ്യനും മൂന്നു സഹോദരിമാരും ഉള്‍പ്പെടെ ആറു മക്കള്‍ക്ക് സ്വത്തില്‍ അവകാശമുണ്ട്. ഒരു സഹോദരന്‍ മരിക്കുകയും മറ്റൊരാള്‍ എക്‌സൈസില്‍ ജോലി നേടി നാടുവിടുകയും ചെയ്തു. സഹോദരിമാരുടെ വിവാഹം കഴിഞ്ഞതോടെ സ്ഥലം സെബാസ്റ്റ്യന്‍റെ കൈവശമായി. സ്വത്ത് അവകാശപ്പെട്ട് സഹോദരങ്ങള്‍ വന്നപ്പോള്‍ ഏറെക്കാലം അവരുമായി വഴക്കും അകല്‍ച്ചയുമായിരുന്നു. അടുത്തിടെ സ്ഥലം ഭാഗിക്കാന്‍ മധ്യസ്ഥര്‍ മുഖേന ധാരണയായപ്പോള്‍ റോഡിനോടു ചേര്‍ന്ന ഭാഗം വേണമെന്ന് സെബാസ്റ്റ്യന്‍ നിബന്ധന വച്ചു. സെബാസ്റ്റ്യന്‍റെ എല്ലാ സാമ്പത്തിക ഇടപാടുകളിലും കൃത്യങ്ങളിലും സഹായിയായിരുന്ന പ്രദേശവാസിയായ യുവാവിന്‍റെ ആത്മഹത്യക്കു പിന്നിലും ദുരൂഹതയുണ്ട്. കാണാതായ സ്ത്രീകളില്‍പ്പെട്ട ബിന്ദു പത്മനാഭന്‍റെ തിരോധാനത്തില്‍ സെബാസ്റ്റ്യന്‍ സംശയത്തില്‍പ്പെട്ടപ്പോള്‍ ഈ യുവാവിനെയും പോലീസ് തുടരെ ചോദ്യം ചെയ്തിരുന്നു. സമ്മര്‍ദം താങ്ങാനാവാതെ ഇയാള്‍ ജീവനൊടുക്കുകയോ അതല്ലെങ്കില്‍ സെബാസ്റ്റ്യന്‍ അപായപ്പെടുത്തുകയോ ആയിരുന്നുവെന്ന് സംശയിക്കുന്നു. കോടികളുടെ സ്വത്തും നിക്ഷേപവും അപഹരിക്കാന്‍ ബിന്ദു പത്മനാഭന്‍റെ പേരിലും സെബാസ്റ്റ്യന്‍ വ്യാജ എസ്എസ്എല്‍സി ബുക്കും വ്യാജ ആധാരവും തയാറാക്കിയിരുന്നു. ജെയ്‌നമ്മയുടെ കൊലപാതകം: മൊബൈല്‍ ഫോണ്‍ നിര്‍ണായക തെളിവ് കോട്ടയം: കൊല്ലപ്പെട്ട അതിരമ്പുഴ കോട്ടമുറി കാക്കനാട്ടുകാലായില്‍ ജെയ്‌നമ്മ (55)യുടെ മൊബൈല്‍ ഫോണ്‍ കണ്ടെത്താന്‍ പോലീസിന്‍റെ ഊര്‍ജിത അന്വേഷണം. ജെയ്‌നമ്മ വധക്കേസില്‍ കസ്റ്റഡിയിലുള്ള പ്രതി ചേര്‍ത്തല ചൊങ്ങുംതറ സെബാസ്റ്റ്യന്‍ (68) കഴിഞ്ഞ മാസം 19 വരെ ഈ ഫോണ്‍ ഉപയോഗിച്ചിരുന്നതായി കണ്ടെത്തിയിട്ടുണ്ട്. കസ്റ്റഡിയില്‍ തുടരെ ചോദ്യം ചെയ്തിട്ടും മൊബൈല്‍ എവിടെയുണ്ടെന്ന് പ്രതി വെളിപ്പെടുത്തുന്നില്ല. വെട്ടിമുകളിലുള്ള ഭാര്യവീട്ടിലും ചേര്‍ത്തലയിലെ വീട്ടിലും പോലീസ് തെരച്ചില്‍ നടത്തിയെങ്കിലും ഫോണ്‍ കണ്ടെത്താനായില്ല. കേസില്‍ നിര്‍ണായക തെളിവായ മൊബൈല്‍ ഫോണിന്‍റെ ടവര്‍ ലൊക്കേഷന്‍ കേന്ദ്രീകരിച്ച് ഇത് റീചാര്‍ജ് ചെയ്ത കടകളിലെല്ലാം പോലീസ് വിവരങ്ങള്‍ തേടിയിരുന്നു. കഴിഞ്ഞ മാസം 19 ന് ഈരാറ്റുപേട്ട നൈനാന്‍പള്ളിക്കു സമീപത്തെ കടയില്‍നിന്ന് ജെയ്നമ്മയുടെ നമ്പരില്‍ 99 രൂപയ്ക്ക് റീചാര്‍ജ് ചെയ്തത് സിസിടിവി ദൃശ്യങ്ങളില്‍ കണ്ടെത്തിയിട്ടുണ്ട്. ഇതിനുശേഷമാണ് ഫോണ്‍ അപ്രത്യക്ഷമായിരിക്കുന്നത്. കഴിഞ്ഞ വര്‍ഷം ഡിസംബര്‍ 24ന് കാണാതായ ഘട്ടത്തില്‍ ജെയ്നമ്മ പള്ളിപ്പുറത്തെ പ്രാഥമികാരോഗ്യകേന്ദ്രത്തില്‍ ചികിത്സതേടിയിരുന്നു. ആ ദിവസങ്ങളില്‍ ജെയ്‌നമ്മയെ കൊലപ്പെടുത്തി പഴ്സും മരുന്നും വാച്ചും സെബാസ്റ്റ്യന്‍ ചേര്‍ത്തലയിലെ വീട്ടില്‍ അടുപ്പില്‍ കത്തിച്ചെന്നാണ് സംശയം. കാണാതാകുമ്പോള്‍ ജെയ്‌നമ്മ 11 പവന്‍ സ്വര്‍ണാഭരണങ്ങള്‍ ധരിച്ചിരുന്നതായാണ് സഹോദരങ്ങള്‍ മൊഴി നല്‍കിയിരിക്കുന്നത്. ഇതില്‍ എട്ടര പവന്‍ ചേര്‍ത്തല പള്ളിപ്പുറത്തെ ധനകാര്യ സ്ഥാപനത്തില്‍ ഓട്ടോഡ്രൈവര്‍ മനോജിന്‍റെ പേരില്‍ പണയം വച്ചതായി വിവരമുണ്ട്. ജെയ്‌നമ്മയെ കൊലപ്പെടുത്തിയശേഷമായിരിക്കും സഹായിയായ മനോജിനെ ഇതിന് നിയോഗിച്ചതെന്ന് സംശയിക്കുന്നു. ചേര്‍ത്തലയിലെ വീട്ടുവളപ്പില്‍ കണ്ടെത്തിയ ശരീരാവശിഷ്ടങ്ങളുടെ ഡിഎന്‍എ ഫലം ലഭിക്കാതെ അന്വേഷണം മുന്നോട്ടുനീങ്ങില്ല. സെബാസ്റ്റ്യനുമായി സാമ്പത്തിക ഇടപാടുണ്ടായിരുന്ന ചേര്‍ത്തല സ്വദേശികളായ ബിന്ദു, ഐഷ, സിന്ധു എന്നിവരുടെ തിരോധാനത്തിലും ഇയാള്‍ സംശയത്തിലാണ്. കണ്ടെത്തിയ ശരീരഭാഗങ്ങള്‍ ഈ മൂന്നു സ്ത്രീകളില്‍ ആരുടേതെങ്കിലുമാണെങ്കില്‍ ജെയ്‌നമ്മയുടെ മൃതദേഹം എവിടെ മറവുചെയ്തുവെന്നത് കണ്ടെത്തേണ്ടിവരും.

എൽഡിഎഫിലെത്തിയത് കേരള കോണ്‍ഗ്രസ്-എമ്മിന്‍റെ നേതാക്കള്‍ മാത്രമെന്ന് സിപിഐ റിപ്പോർട്ട്

വൈക്കം: കേരള കോണ്‍ഗ്രസ്-എമ്മിന്‍റെ നേതാക്കള്‍ മാത്രമാണ് എല്‍ഡിഎഫിലുള്ളതെന്നും അണികള്‍ ഇപ്പോഴും യുഡിഎഫിലാണെന്നും മാണി ഗ്രൂപ്പ് മുന്നണിയിലെത്തിയിട്ടും കാര്യമായ പ്രയോജനം ഇടതു മുന്നണിക്ക് ലഭിച്ചില്ലെന്നും സിപിഐ ജില്ലാ സമ്മേളന റിപ്പോര്‍ട്ട്. ഇന്നലെ രാവിലെ പ്രതിനിധി സമ്മേളനത്തിനുശേഷം ജില്ലാ സെക്രട്ടറി വി.ബി. ബിനു അവതരിപ്പിച്ച റിപ്പോര്‍ട്ടിലാണു കേരള കോണ്‍ഗ്രസ് മാണി വിഭാഗത്തിനെതിരേ ഒളിയമ്പ്. മാണി ഗ്രൂപ്പ് അണികളുടെ മനസും വികാരവും യുഡിഎഫിന് അനുകൂലമാണെന്നും റിപ്പോര്‍ട്ടില്‍ പറയുന്നു. പാലക്കാട് ഭൂഗര്‍ഭജലും ശുദ്ധജലവും ചൂഷണം ചെയ്ത് ബ്രുവറി തുടങ്ങുന്ന സര്‍ക്കാരിനും എക്‌സൈസ് വകുപ്പിനുമെതിരേ റിപ്പോര്‍ട്ടില്‍ വിമര്‍ശനമുണ്ട്. പരമ്പരാഗത കള്ളുചെത്ത് വ്യവസായത്തെ സഹായിക്കാന്‍ ഒരു നടപടിയും സ്വീകരിക്കാത്ത സര്‍ക്കാരും മന്ത്രി എം.ബി. രാജേഷും ബ്രൂവറിക്കു പിന്നാലെയാണെന്നും കുറ്റപ്പെടുത്തുന്നു. സിപിഐയുടെ മന്ത്രിമാരായി കൃഷിമന്ത്രി പി. പ്രസാദും സിവില്‍ സപ്ലൈസ് മന്ത്രി ജി.ആര്‍. അനിലുമുണ്ടായിട്ടും നെല്ലുസംഭരണ കാര്യത്തില്‍ വലിയ പരാജയമാണുണ്ടായിരിക്കുന്നത്.ജനങ്ങളുമായി ഏറ്റവും അടുത്തിടപെടുന്ന കൃഷി, സപ്ലൈകോ വകുപ്പുകള്‍ക്ക് ആവശ്യമായ പണം നല്‍കാത്തത് സര്‍ക്കാരിന്‍റെ കാര്യക്ഷമതയുടെ കുറവാണെന്നും റിപ്പോര്‍ട്ടില്‍ പറയുന്നു. ട്രാവന്‍കൂര്‍ സിമന്‍റ്സ്, കോട്ടയം ടെക്‌സ്റ്റയില്‍സ്, കെപിപിഎല്‍, സപ്ലൈകോ എന്നിവിടങ്ങളില്‍ തൊഴിലാളികള്‍ക്കു ശമ്പളമില്ലാത്ത അവസ്ഥയെന്നു മാത്രമല്ല പ്രസ്ഥാനങ്ങൾ തകര്‍ച്ചയിലുമാണ്. കയര്‍, കക്ക, മത്സ്യ മേഖലകളെയും സര്‍ക്കാര്‍ അവഗണിക്കുകയാണെന്നും പറയുന്നു. ജില്ലാ സെക്രട്ടറിയുടെ റിപ്പോര്‍ട്ടിന്മേല്‍ ഗ്രൂപ്പു ചര്‍ച്ചകള്‍ക്കുശേഷം ഇന്നലെ വൈകുന്നേരത്തോടെ പൊതുചര്‍ച്ച ആരംഭിച്ചു. പൊതു ചര്‍ച്ചയിലും മേല്‍ വിഷയങ്ങളില്‍ പ്രതിനിധികള്‍ രൂക്ഷമായ വിമര്‍ശനമാണ് ഉയര്‍ത്തിയത്. ഇന്നു രാവിലെയും പൊതുചര്‍ച്ച തുടരും. വൈകുന്നേരം നേതാക്കളുടെ മറുപടിക്കുശേഷം പുതിയ ഭാരവാഹികളെ തെരഞ്ഞെടുത്ത് സമ്മേളനം അവസാനിക്കും.

ജനാധിപത്യം അട്ടിമറിച്ച് നരഭോജികള്‍ അധികാരത്തിലെത്തുന്നു: രമേശ് ചെന്നിത്തല

ചരല്‍ക്കുന്ന് (പത്തനംതിട്ട): സാമൂഹിക മാധ്യമങ്ങളിലൂടെ കുപ്രചാരണം നടത്തി ജനാധിപത്യ സംവിധാനത്തെ അട്ടിമറിച്ച് നരഭോജികള്‍ അധികാരത്തിലെത്തുകയാണെന്ന് കോണ്‍ഗ്രസ് പ്രവര്‍ത്തക സമിതിയംഗം രമേശ് ചെന്നിത്തല. കെപിസിസി കലാ സാംസ്‌കാരിക വിഭാഗമായ സംസ്‌കാര സാഹിതിയുടെ സംസ്ഥാന ക്യാന്പ് ഉ്ദഘാടനം ചെയ്തു പ്രസംഗിക്കുകയായിരുന്നു അദ്ദേഹം. തീവ്രവലതുപക്ഷങ്ങളെ മുഖ്യധാരാ മാധ്യമങ്ങള്‍ നിരാകരിക്കുന്നതുകൊണ്ട് സോഷ്യല്‍ മീഡിയയാണ് ഇവരുടെ ഏറ്റവും വലിയ ആയുധം. ഒരു നുണ നൂറുവട്ടം ആവര്‍ത്തിച്ച് സത്യമാക്കുക എന്ന ഗീബല്‍സിയന്‍ തന്ത്രത്തിന്‍റെ പതിനായിരം ഇരട്ടി വലുപ്പമാണ് സോഷ്യല്‍ മീഡിയ സമ്മാനിക്കുന്നതെന്ന് രമേശ്‌ ചെന്നിത്തല പറഞ്ഞു. തെറ്റായ വാര്‍ത്തകളും സത്യമെന്നു തോന്നിപ്പിക്കുന്ന കഥകളും യഥാര്‍ഥ സത്യങ്ങളെ മറച്ചുവച്ചുകൊണ്ടുള്ള ഗോസിപ്പുകളുമാണ് ഇവരുടെ പ്രധാന ആയുധമെന്നും ചെന്നിത്തല പറഞ്ഞു. ചെയര്‍മാന്‍ സി.ആർ. മഹേഷ് അധ്യക്ഷത വഹിച്ചു. വര്‍ക്കിംഗ് ചെയര്‍മാന്‍ എന്‍.വി. പ്രദീപ് കുമാർ, ജനറല്‍ കണ്‍വീനര്‍ ആലപ്പി അഷ്‌റഫ്, സംഘടനാ ചുമതലയുള്ള ജനറല്‍ സെക്രട്ടറി അനി വര്‍ഗീസ് തുടങ്ങിയവര്‍ പ്രസംഗിച്ചു. തുടര്‍ന്ന് എല്ലാ ജില്ലകളില്‍ നിന്നുമുള്ള പ്രതിനിധികളുടെ നേതൃത്വത്തില്‍ സംഘടനാ ചര്‍ച്ച നടത്തി. ജനറല്‍ സെക്രട്ടറി ഷിജു സ്‌കറിയ സംഘടനാ റിപ്പോര്‍ട്ട് അവതരിപ്പിച്ചു. എഴുത്തുകാരന്‍ വിനോയ് തോമസ് വര്‍ത്തമാനകാലം എഴുത്തും ജീവിതവും എന്ന വിഷയത്തില്‍ പ്രഭാഷണം നടത്തി. ക്യാംപില്‍ എല്ലാ ജില്ലകളില്‍ നിന്നുമുള്ള 220 പ്രതിനിധികള്‍ പങ്കെടുക്കുന്നുണ്ട്. വൈകുന്നേരം നടന്ന കലാസന്ധ്യ നടന്‍ ഗിന്നസ് പക്രു ഉദ്ഘാടനം ചെയ്തു. ഇന്ന് രാവിലെ പത്തിനു പ്രതിപക്ഷ നേതാവ് വി.ഡി. സതീശന്‍ ക്യാന്പിനെ അഭിസംബോധന ചെയ്യും. മികച്ച യുവസംരംഭകനുള്ള പുരസ്‌കാരം ബംഗളൂരു ജോസ്‌കോ ഗ്രൂപ്പ് ഓഫ് ഇന്‍സ്റ്റിറ്റ്യൂഷന്‍സ് ചെയര്‍മാന്‍ അഡ്വ. സജു ടി. ജോസഫിനു സമ്മാനിക്കും. തുടര്‍ന്നു നടക്കുന്ന സെമിനാറില്‍ നെഹ്‌റുവിയന്‍ ആശയം-കാലിക പ്രസക്തി എന്ന വിഷയത്തില്‍ മഹാത്മാഗാന്ധി യൂണിവേഴ്‌സിറ്റി മുന്‍ വൈസ് ചാന്‍സലര്‍ ഡോ. സിറിയക് തോമസ് സ്റ്റഡി ക്ലാസിന് നേതൃത്വം നല്‍കും. തുടര്‍ന്ന് 11 ന് യുഡിഎഫ് കൺവീനർ അടൂര്‍ പ്രകാശ് എംപി, ആന്‍റോ ആന്‍റണി എംപി എന്നിവര്‍ പ്രസംഗിക്കും.

തേങ്ങാവിലയില്‍ നേരിയ കുറവ്; വെളിച്ചെണ്ണയ്ക്കു കുറവില്ല

കോട്ടയം: കുതിച്ചുകയറിയ തേങ്ങാവില മെല്ലെ കുറഞ്ഞുതുടങ്ങി. 85-93 രൂപ വരെ എത്തിയ തേങ്ങാവില ഒരാഴ്ചയ്ക്കുള്ളില്‍ 70 രൂപയിലെത്തി. അടുത്തയാഴ്ച 65 രൂപയിലേക്ക് താഴുമെന്നാണ് സൂചന. തമിഴ്‌നാട്, കര്‍ണാടക, ആന്ധ്രാ സംസ്ഥാനങ്ങളില്‍നിന്നുള്ള തേങ്ങാവരവ് വര്‍ധിച്ചതാണ് വിലക്കയറ്റത്തിന് നേരിയ ആശ്വാസമായത്. വില നിയന്ത്രിക്കുന്നതില്‍ സര്‍ക്കാര്‍ പിടിപ്പുകേട് തുടര്‍ന്നാല്‍ ഓണത്തിനു വീണ്ടും വില ഉയരാം. അതേസമയം വെളിച്ചെണ്ണവിലയില്‍ കുറവൊന്നുമായില്ല. തേങ്ങയ്ക്കും കൊപ്രയ്ക്കും വില കൂടിയ സമയത്ത് ഉത്പാദിപ്പിച്ച് വില്‍പനയ്‌ക്കെത്തിച്ച പഴയ സ്റ്റോക്കായതിനാല്‍ ലിറ്ററിന് 450 രൂപയ്ക്കു മുകളിലാണ്. അടുത്തയാഴ്ച വെളിച്ചൈണ്ണ വില 400 രൂപയിലേക്ക് താഴുമെന്ന് വ്യാപാരികള്‍ പറഞ്ഞു. തെങ്ങും തേങ്ങയും കുറഞ്ഞതാണ് ഇത്ര വലിയ ക്ഷാമത്തിനും വിലക്കയറ്റത്തിനും കാരണമായത്. തെങ്ങില്‍ ചെല്ലിശല്യം വ്യാപകമായതിനാല്‍ തെങ്ങു നടാന്‍ ആരും താത്പര്യപ്പെടുന്നില്ല. ലഭ്യത കുറഞ്ഞതിനാല്‍ പത്തു വര്‍ഷത്തിനിടെ കിലോയ്ക്ക് 68 രൂപയാണ് തേങ്ങാവിലയില്‍ വര്‍ധനവുണ്ടായത്. 2015ല്‍ ചില്ലറവില 25 രൂപയായിരുന്നത് കഴിഞ്ഞ മാസം 93 രൂപ വരെയെത്തി. കഴിഞ്ഞ വര്‍ഷം 60 രൂപവരെ എത്തിയ നാളികേരവില മാര്‍ച്ചിനുശേഷം കുതിച്ചുകയറുകയായിരുന്നു.

എരുമേലി കെഎസ്ആർടിസി ബസ് സ്റ്റാൻഡ് സ്ഥലം ഒഴിയാൻ കോടതി ഉത്തരവ്

എരുമേലി: കെഎസ്ആർടിസി ബസ് സ്റ്റാൻഡ് ഒഴിയാൻ പാലാ സബ് കോടതി ഉത്തരവിട്ടു. മൂന്നു മാസത്തിനകം സ്ഥലം ഒഴിഞ്ഞുകൊടുക്കണമെന്നാണ് ഉത്തരവ്. ഇതോടെ സ്ഥലത്തിനു വാടക വാങ്ങിക്കൊണ്ടിരുന്ന ദേവസ്വം ബോർഡും സ്ഥലം കൈവശംവച്ചിരിക്കുന്ന കെഎസ്ആർടിസിയും സ്ഥലത്ത് ജനകീയാസൂത്രണ പദ്ധതിയിൽ കെട്ടിടം നിർമിച്ചു കൊടുത്ത എരുമേലി പഞ്ചായത്തും വെട്ടിലായിരിക്കുകയാണ്. 11ന് യോഗം വിഷയം ചർച്ചചെയ്യാൻ 11ന് രാവിലെ പത്തിന് എരുമേലി പഞ്ചായത്ത്‌ കോൺഫറൻസ് ഹാളിൽ യോഗം ചേരുമെന്ന് സെബാസ്റ്റ്യൻ കുളത്തുങ്കൽ എംഎൽഎ അറിയിച്ചു. കോടതി ഉത്തരവ് സ്റ്റേ ചെയ്യാനുള്ള നിയമനടപടികൾ സംബന്ധിച്ച് യോഗം ചർച്ച ചെയ്യും. ഉടമ സ്വകാര്യവ്യക്തി സ്ഥലത്തിന്‍റെ യഥാർഥ ഉടമ എരുമേലി വികസന സമിതി മുൻ പ്രസിഡന്‍റും പരേതനുമായ അഡ്വ. പി.ആർ. രാജഗോപാൽ ആണെന്ന് ഇദ്ദേഹത്തിന്‍റെ ഭാര്യ ഗോപി രാജഗോപാൽ തെളിവുകൾ ഹാജരാക്കി കോടതിയിൽ നൽകിയ ഹർജിയിൽ ദേവസ്വം ബോർഡ്, കെഎസ്ആർടിസി അധികൃതർ എന്നിവരുടെ വാദം കേട്ട ശേഷമാണ് കോടതി ഉത്തരവ് പുറപ്പെടുവിച്ചിരിക്കുന്നത്. മൂന്നു മാസത്തിനകം സ്ഥലം ഒഴിഞ്ഞ് രാജഗോപാലിന്‍റെ ഭാര്യക്ക് വിട്ടുകൊടുക്കാനാണ് ഉത്തരവ്. 1977 ൽ തന്‍റെ ഭർത്താവ് 50 സെന്‍റ് സ്ഥലം കെഎസ്ആർടിസി ക്ക് വാക്കാൽ അനുവദിച്ചതാണെന്നും ഇതിനു രേഖ നൽകിയിട്ടില്ലന്നും എരുമേലിയിൽ ശബരിമല സീസണിലെ തിരക്കു പരിഹരിക്കാൻവേണ്ടി കെഎസ്ആർടിസി ബസുകൾ പാർക്ക് ചെയ്യുന്നതിന് താത്കാലിക സൗകര്യം എന്ന നിലയിലാണ് പൊതു പ്രവർത്തകൻ എന്ന നിലയിൽ അദ്ദേഹം തന്‍റെ സ്ഥലം നൽകിയതെന്നും എന്നാൽ, പല തവണ തിരികെ സ്ഥലം ആവശ്യപ്പെട്ടിട്ടും വിട്ടുകിട്ടിയില്ല എന്നും ഗോപി രാജഗോപാൽ കോടതിയിൽ അറിയിച്ചു. അതേസമയം ഈ സ്ഥലം തങ്ങൾക്കു പാട്ടവാടക ആയി തിരുവിതാംകൂർ ദേവസ്വം ബോർഡാണ് നൽകിയതെന്നും വർഷം തോറും ആയിരം രൂപ വീതം പാട്ടത്തുക നൽകുന്നുണ്ടെന്നും ഇതിന് 2029 വരെ കാലാവധി ഉണ്ടെന്നും കെഎസ്ആർടിസി അധികൃതർ കോടതിയിൽ അറിയിച്ചു. എന്നാൽ, സ്ഥലത്തിന്‍റെ ഉടമസ്ഥാവകാശം തെളിയിക്കുന്ന രേഖകൾ ഹാജരാക്കാൻ ദേവസ്വം ബോർഡിനായിട്ടില്ല. ഇതു മുൻനിർത്തിയാണ് സ്ഥലം വിട്ടുകൊടുക്കാൻ കോടതി ഉത്തരവിട്ടത്. കേരളത്തിലെ ആദ്യ ജനകീയ ഡിപ്പോ സംസ്ഥാനത്ത് ജനങ്ങൾ നിർമിച്ച ആദ്യ കെഎസ്ആർടിസി ഓപ്പറേറ്റിംഗ് സെന്‍റർ ആണ് എരുമേലിയിലേത്. ഇടയ്ക്കു നഷ്ടം മൂലം അധികൃതർ പൂട്ടിയപ്പോൾ ജനങ്ങൾ ഒറ്റക്കെട്ടായി ദിവസങ്ങളോളം സത്യഗ്രഹം നടത്തി സെന്‍റർ തുറന്നുപ്രവർത്തിപ്പിക്കുകയായിരുന്നു. ഏതാനും വർഷം മമ്പും സെന്‍റർ നിർത്താൻ അധികൃതർ ശ്രമിച്ചിരുന്നു. പഞ്ചായത്ത്‌ അംഗങ്ങൾ ചേർന്നാണ് ഈ ശ്രമം തടഞ്ഞത്. തുടക്കം 27 വർഷം മുമ്പ് 1998 നവംബർ 28 നാണ് സെന്‍റർ ആരംഭിച്ചത്. ഇതിനായി നേതൃത്വം നൽകിയ പൊതു പ്രവർത്തകരിൽ ടി.പി. തൊമ്മി, ജോബ്‌കുട്ടി ഡൊമിനിക്, എൻ.ബി. ഉണ്ണികൃഷ്ണൻ, അനന്തൻ, ബഷീർ കറുകഞ്ചേരി എന്നിവർ ഇന്ന് ജീവനോടെയില്ല. ഇവർക്കൊപ്പം പൊതുപ്രവർത്തന രംഗത്ത് സജീവമായിരുന്ന വി.പി. സുഗതൻ, സഖറിയ ഡൊമിനിക് ചെമ്പകത്തുങ്കൽ, പി.എ. സലിം, ജോസ് മടുക്കക്കുഴി, പി.എ. ഇർഷാദ്, വി.എസ്. ഷുക്കൂർ, ജോസ് പഴയതോട്ടം, ജയേഷ് തമ്പാൻ തുടങ്ങിയവർ ചേർന്നാണ് സെന്‍ററിന്‍റെ തുടക്കം യാഥാർഥ്യമാക്കിയത്. ഗതാഗതവകുപ്പിന്‍റെയും ദേവസ്വം ബോർഡിന്‍റെയും മന്ത്രിയായിരുന്ന പി.ആർ. കുറുപ്പാണ് ഉദ്ഘാടനം നിർവഹിച്ചത്. നാട്ടുകാരുടെ സംഭാവനയും ജീവനക്കാരുടെ സംഘടനയായ എംപ്ലോയീസ് അസോസിയേഷന്‍റെ നേതൃത്വത്തിൽ ജില്ലയിലെ ഇതര ഡിപ്പോകളിലെ അംഗങ്ങളിൽനിന്നു കൂപ്പൺ പിരിച്ചു തുക സമാഹരിച്ചും കൂടിയാണ് നിർമാണത്തിന് ഫണ്ട് കണ്ടെത്തിയത്. കോവിഡ് കാലത്തിന് മുൻപ് 29 സർവീസുകൾ വരെ എത്തിയ സ്ഥാനത്ത് ഇപ്പോൾ 24 ഷെഡ്യുളുകൾ ആണ് ഓപ്പറേറ്റ് ചെയ്യുന്നത്. 130 ഓളം ജീവനക്കാരുണ്ട്. ശബരിമല സീസിൽ പമ്പ സ്പെഷ്യൽ സർവീസിൽ മാത്രം ഒന്നരക്കോടി രൂപയോളം ആണ് വരുമാനം നേടിക്കൊണ്ടിരിക്കുന്നത്.

തൊഴിലധിഷ്ഠിത പദ്ധതികൾ വിദ്യാലയങ്ങളിൽ നടപ്പിലാക്കിയ ബ്ലോക്ക് പഞ്ചായത്ത് മാതൃക: ചീഫ് വിപ്പ്

കാഞ്ഞിരപ്പള്ളി: വിദ്യാലയങ്ങൾ കേന്ദ്രീകരിച്ച് വിദ്യാഭ്യാസത്തോടൊപ്പം തൊഴിലധിഷ്ഠിത-സംരംഭകത്വ പദ്ധതികൾ നടപ്പിലാക്കുന്ന കാഞ്ഞിരപ്പള്ളി ബ്ലോക്ക് പഞ്ചായത്ത് കേരളത്തിലെ തദ്ദേശസ്ഥാപനങ്ങൾക്ക് മാതൃകയാണെന്ന് ചീഫ് വിപ്പ് ഡോ. എൻ. ജയരാജ്. കാഞ്ഞിരപ്പള്ളി സെന്‍റ് ഡൊമിനിക്സ് കോളജിൽ നടന്ന ഇഡി ക്ലബ് അംഗങ്ങൾക്കുള്ള നൈപുണ്യ പരിശീലന പദ്ധതിയുടെ ഉദ്ഘാടനം നിർവഹിച്ചു പ്രസംഗിക്കുകയായിരുന്നു അദ്ദേഹം. ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് അധ്യക്ഷത വഹിച്ച യോഗത്തിൽ വൈസ് പ്രസിഡന്‍റ് ജോളി മടുക്കക്കുഴി മുഖ്യപ്രഭാഷണം നടത്തി. പ്രിൻസിപ്പൽ ഡോ. സീമോൻ തോമസ്, ബ്ലോക്ക് പഞ്ചായത്ത് മെംബർമാരായ ടി.ജെ. മോഹനൻ, ഷക്കീല നസീർ, സാജൻ കുന്നത്ത്, മാഗി ജോസഫ്, ജോഷി മംഗലം, ഡാനി ജോസ്, അനു ഷിജു, കോളജ് ബർസാർ റവ.ഡോ. മനോജ് പാലക്കുടി എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]