ADVERTISEMENT

ADVERTISEMENT

"ലിസ് മെഡ് 2025 അപ്ഡേറ്റ്' ശില്പശാല

കൊച്ചി: എറണാകുളം ലിസി ആശുപത്രിയിലെ ജനറൽ മെഡിസിൻ വിഭാഗം "ലിസ് മെഡ് 2025 അപ്ഡേറ്റ്" ശില്പശാല നടത്തി.

ലേ മെറിഡിയൻ ഹോട്ടലിൽ നടന്ന പരിപാടി ആശുപത്രി ഡയറക്ടർ റവ. ഡോ. പോൾ കരേടൻ ഉദ്ഘാടനം ചെയ്തു.

മെഡിസിൻ വിഭാഗം മേധാവി ഡോ. ജോർജ് പൗലോസ്, ഡോ. അഗസ്റ്റിൻ കുര്യാക്കോസ്, ഡോ. ജോർജ് സേവ്യർ, ഡോ. ബിജു ജേക്കബ് എന്നിവർ പങ്കെടുത്തു.

ADVERTISEMENT

പച്ചത്തുരുത്ത് നിർമാണോദ്ഘാടനം

തിരുമാറാടി: ഒരു തൈ നടാം ജനകീയ ക്യാന്പയിന്‍റെ ഭാഗമായി മണിമലക്കുന്ന് ടി.എം. ജേക്കബ് മെമ്മോറിയൽ ഗവ. കോളജിൽ പച്ചത്തുരുത്ത് നിർമാണോദ്ഘാടനം അനൂപ് ജേക്കബ് എംഎൽഎ നിർവഹിച്ചു. പഞ്ചായത്തിന്‍റെയും ഹരിതകേരളം മിഷന്‍റെയും മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയുടെയും ഗെയിൽ ഇന്ത്യ ലിമിറ്റഡിന്‍റെയും സഹകരണത്തോടെ ഒരേക്കറിലാണ് ഫലവൃക്ഷത്തോട്ടം - പച്ചതുരുത്ത് നിർമിക്കുന്നത്. പഞ്ചായത്ത് പ്രസിഡന്‍റ സന്ധ്യാമോൾ പ്രകാശ് അധ്യക്ഷത വഹിച്ചു. യോഗത്തിൽ ഹരിതകേരളം മിഷൻ ജില്ലാ കോ-ഓർഡിനേറ്റർ എസ്. രഞ്ജിനി പദ്ധതി വിശദീകരണം നടത്തി.

സ്പോർട്സ് ആയുർവേദ കണ്‍സൾട്ടേഷൻ സെന്‍റർ പ്രവർത്തനം ആരംഭിച്ചു

മൂവാറ്റുപുഴ: കായിക മേഖലയിൽ പതിറ്റാണ്ടുകളുടെ പാരന്പര്യവും നിരവധി ദേശീയ അന്തർദേശീയ താരങ്ങളെ കായിക ലോകത്തിന് സംഭാവന ചെയ്തിട്ടുള്ള നിർമല കോളജ് (ഓട്ടോണോമസ്) കായിക വിഭാഗത്തിന്‍റെ നേതൃത്വത്തിൽ നാഷണൽ ആയുഷ് മിഷന്‍റെയും സ്പോർട്സ് ആയുർവേദ റിസർച്ച് സെല്ലിന്‍റെയും സഹകരണത്തോടെ സ്പോർട്സ് ആയുർവേദ കണ്‍സൾട്ടേഷൻ സെന്‍റർ പ്രവർത്തനം ആരംഭിച്ചു. നാഷണൽ ആയുഷ് മിഷൻ എറണാകുളം ജില്ലാ പ്രോഗ്രാം മാനേജർ കെ.വി.പി. ജയകൃഷ്ണൻ ആയുർവേദ സെന്‍ററിന്‍റെ ഉദ്ഘാടനം നിർവഹിച്ചു. കോളജ് ഓഡിയോ വിഷ്വൽ ഹാളിൽ നടന്ന സമ്മേളനത്തിൽ കോളജ് പ്രിൻസിപ്പൽ റവ.ഡോ. ജസ്റ്റിൻ കെ. കുര്യാക്കോസ് അധ്യക്ഷത വഹിച്ചു. നാഷണൽ ആയുഷ് മിഷൻ ഇടുക്കി ജില്ലാ പ്രോഗ്രാം മാനേജർ കെ.എസ്. ശ്രീദർശൻ മുഖ്യ പ്രഭാഷണം നടത്തി. ആർ. വിനീത്, ബോബു ആന്‍റണി, ആർ. വിനീത്, ഫ്രെഡി, ലിസ റെയ്ച്ചൽ സജി, മിനു റോസമ്മ ജോസഫ്, അനുപ്രിയ പി. മാണി, അർജുൻ രാജേന്ദ്രൻ, അഞ്ജലി എന്നിവർ വിവിധ വിഷയങ്ങളിൽ കുട്ടികൾക്ക് ക്ലാസുകൾ നയിച്ചു.

മെറിറ്റ് ഡേയും അധ്യയന വർഷാരംഭവും

കോതമംഗലം: കറുകടം മൗണ്ട് കാർമൽ കോളജിൽ മെറിറ്റ് ഡേയും പുതിയ അധ്യയന വർഷത്തിന്‍റെ ആരംഭവും നടത്തി. ചടങ്ങിന്‍റെ ഭാഗമായി സംഘടിപ്പിച്ച സമ്മേളനത്തിൽ റിട്ട. എസ്പി കെ.ജി. സൈമണ്‍ മുഖ്യാതിഥിയായി പങ്കെടുത്ത് സർട്ടിഫിക്കറ്റുകളും അവാർഡുകളും വിതരണം ചെയ്തു. യോഗത്തിൽ മാനേജർ ഫാ. സെബാസ്റ്റ്യൻ വടക്കേപ്പറന്പിൽ അധ്യക്ഷത വഹിച്ചു. വൈസ് പ്രിൻസിപ്പൽ ഫാ. ജോസ് അലക്സ് യോഗത്തിൽ സന്ദേശം നൽകി കുട്ടികളെ കോളജിലേക്ക് സ്വാഗതം ചെയ്തു.

മൂവാറ്റുപുഴയിൽ ഗതാഗത നിയന്ത്രണത്തിന് മാറ്റം

മൂവാറ്റുപുഴ: റോഡ് വികസനം മൂലം ഉണ്ടായിക്കൊണ്ടിരിക്കുന്ന ഗതാഗത തടസം നീക്കുന്ന വിഷയം ചർച്ച ചെയ്യുന്നതിന് മൂവാറ്റുപുഴ ട്രാഫിക് സബ് ഇൻസ്പെക്ടറുമായി മൂവാറ്റുപുഴ മർച്ചന്‍റ്സ് അസോസിയേഷൻ കമ്മിറ്റിയംഗങ്ങൾ നടത്തിയ ചർച്ചയിൽ ഗതാഗത നിയന്ത്രണത്തിന് മാറ്റം വരുത്തി. കച്ചേരിത്താഴം മുതൽ പോസ്റ്റ് ഓഫീസ് ജംഗ്ഷൻ വരെ ഇരുഭാഗത്തേക്കും ടൂവീലറുകളും ത്രീ വീലറുകളും ഗതാഗതം അനുവദിക്കുന്നതിന് ധാരണയായി. പുനരുദ്ധാരണം നടന്നുകൊണ്ടിരിക്കുന്ന റോഡിലെ ജോലികൾ പുരോഗമിക്കുന്നതിനോടൊപ്പം തന്നെ കടകളിലേക്ക് റാന്പുകൾ ഒഴിവാക്കി ഗതാഗത യോഗ്യമാക്കുന്നതിനും തത്വത്തിൽ ധാരണയായി. ചർച്ചയിൽ മർച്ചന്‍റ്സ് അസോസിയേഷൻ പ്രസിഡന്‍റ് അജ്മൽ ചക്കുങ്കൽ, ജനറൽ സെക്രട്ടറി കെ.എ. ഗോപകുമാർ, ട്രഷറർ കെ.എം. ഷംസുദ്ദീൻ, ബോബി എസ്. നെല്ലിക്കൽ, പി.യു. ഷംസുദ്ദീൻ, മഹേഷ് കമ്മത്ത് തുടങ്ങിയവർ പങ്കെടുത്തു.

‘മൂവാറ്റുപുഴയിൽ എംസി റോഡിലെ അറ്റകുറ്റപ്പണികൾ വേഗം പൂർത്തിയാക്കണം’

മൂവാറ്റുപുഴ: നഗരത്തിലെ എംസി റോഡിൽ അറ്റകുറ്റപ്പണികൾ വേഗം പൂർത്തിയാക്കണമെന്ന് ഐഎൻഎൽ മൂവാറ്റുപുഴ മണ്ഡലം കമ്മിറ്റി ആവശ്യപ്പെട്ടു. നാളുകളായി തുടരുന്ന റോഡ് പണി ജനങ്ങൾക്ക് നരകതുല്യമായ അനുഭവങ്ങളാണ് നൽകികൊണ്ടിരിക്കുന്നത്. നിരവധി അപകടങ്ങളാണ് ഇക്കാലയളവിൽ ഇവിടെ ഉണ്ടായിട്ടുള്ളത്. വലിയ ഗർത്തങ്ങളിൽ വീണ് വാഹനങ്ങൾക്ക് കേടുപാടുകൾ സംഭവിക്കുന്നതുമൂലം രൂക്ഷമായ ഗതാഗതക്കുരുക്കാണ് ഉണ്ടാകുന്നത്. കൂടാതെ റോഡിൽ വെള്ളക്കെട്ട് കൂടിയാകുന്പോൾ ദുരിതം ഇരട്ടിയായിരിക്കുകയാണ്. നിലവിലുള്ള റോഡുകൾ ഉയർത്തിയത് കാരണം വ്യാപാര സ്ഥാപനങ്ങളിൽ വെള്ളം കയറുന്ന അവസ്ഥയാണുള്ളത്. കടമുറികളെക്കാളും ഉയരത്തിൽ വന്നിട്ടുള്ള ഫുട്പാത്തുകൾ വ്യാപാരികളുടെ കച്ചവടത്തെ സാരമായി ബാധിച്ചിട്ടുണ്ട്. ഭാവിയിൽ ഈ കച്ചവട സ്ഥാപനങ്ങൾ അടച്ചുപൂട്ടേണ്ട അവസ്ഥയാണുള്ളതെന്നും യോഗം ആരോപിച്ചു.

‘മൂവാറ്റുപുഴ ജനറൽ ആശുപത്രിയിൽ ഫീവർ ക്ലിനിക് തുടങ്ങണം’

മൂവാറ്റുപുഴ: ജില്ലയുടെ കിഴക്കൻ മേഖലയിൽ പനി ബാധിതരുടെ എണ്ണം ക്രമാതീതമായി ഉയർന്ന സാഹചര്യത്തിൽ അടിയന്തരമായി ജനറൽ ആശുപത്രിയിൽ ഫീവർ ക്ലിനിക്കും വാർഡും തുടങ്ങണമെന്ന് മുൻ എംഎൽഎ എൽദോ ഏബ്രഹാം. മഴക്കാല പൂർവ ശുചീകരണ പ്രവർത്തനങ്ങൾ കടലാസിൽ ഒതുങ്ങിയതും പ്രഹസനമായതും ഡെങ്കിപ്പനി ബാധിതരുടെ എണ്ണത്തിൽ വൻ വർധനവുണ്ടാക്കി. ഹെപ്പറ്റൈറ്റിസ് എ, ബി വൈറസുകൾ വഴിയുള്ള മഞ്ഞപ്പിത്തവും മൂവാറ്റുപുഴ മേഖലയിൽ വ്യാപകമായി. ശുദ്ധജല ശ്രോതസുകൾ മലിനപ്പെടാതെ സംരക്ഷിക്കുന്ന പ്രവർത്തങ്ങളിൽ തദ്ദേശ സ്വയംഭരണ സ്ഥാപനങ്ങളുടെ ഇടപെടലുകൾ ഫലപ്രദമാകാത്തത് മഞ്ഞപ്പിത്തം വ്യാപിക്കാൻ ഇടവരുത്തി. ഹൈപ്പറ്റൈറ്റിസ് ബി ബാധിതരെ സംബന്ധിച്ചുള്ള വിവരങ്ങൾ ആരോഗ്യ വകുപ്പ് അധികാരികളെ പലതവണ അറിയിച്ചുവെങ്കിലും യാതൊരു നടപടിയുമില്ല. പ്രതിരോധ കുത്തിവയ്പ് സൗജന്യമായി രോഗ ബാധിത മേഖലകളിൽ ഉറപ്പാക്കാൻ ആവശ്യപ്പെട്ടെങ്കിലും ആരോഗ്യ വകുപ്പ് നിസംഗത തുടരുകയാണ്. വിവിധ വകുപ്പുകളെ ഏകോപിപ്പിച്ച് പ്രതിരോധ പ്രവർത്തനവും ചികിത്സാ സൗകര്യങ്ങളും വേഗതയിൽ ഒരുക്കണമെന്ന് മുൻ എംഎൽഎ എൽദോ ഏബ്രഹാം ജില്ലാ മെഡിക്കൽ ഓഫീസറോട് ആവശ്യപ്പെട്ടു.

നേര്യമംഗലം - വാളറ : ‘ദേശീയപാത നിർമാണം നിർത്തിവയ്ക്കാനുള്ള ഹൈക്കോടതി ഉത്തരവിൽ അന്വേഷണം വേണം’

കോതമംഗലം: ദേശീയപാതയുടെ നിർമാണവുമായി ബന്ധപ്പെട്ട് നേര്യമംഗലം മുതൽ വാളറ വരെയുള്ള നിർമാണ പ്രവർത്തനങ്ങൾ നിർത്തിവയ്ക്കുവാൻ ഹൈക്കോടതി ഉത്തരവിട്ട സാഹചര്യത്തെക്കുറിച്ച് വിശദമായ അന്വേഷണം വേണമെന്ന് കത്തോലിക്കാ കോൺഗ്രസ് കോതമംഗലം രൂപത കമ്മിറ്റി ആവശ്യപ്പെട്ടു. ഭരണനേതൃത്വവും സർക്കാരും ബന്ധപ്പെട്ടവരും അറിയാതെയാണോ സർക്കാർ ഉദ്യോഗസ്ഥരും ചീഫ് സെക്രട്ടറിയും നിലപാട് എടുക്കുന്നതും സത്യവാങ്മൂലം നൽകുന്നതും എന്ന് അറിയുവാൻ ജനങ്ങൾക്ക് താല്പര്യമുണ്ട്. വനംവകുപ്പ് അധികൃതരുടെയും കപട പരിസ്ഥിതിവാദികളുടെയും ഗൂഢ നീക്കവും രാഷ്ട്രീയ നേതൃത്വങ്ങളുടെ നിസംഗതയുമാണ് ഉദ്യോഗസ്ഥർ തോന്നിയവാസം കാണിക്കാൻ സാഹചര്യം ഒരുക്കുന്നത്. ദേശീയപാതയുടെ ഇരുവശവും ആകെ നൂറടി വീതിയിൽ വനം വകുപ്പിന് അധികാരമില്ലെന്നും ഇത് റവന്യൂ ഭൂമിയാണെന്നുമുള്ള മുൻ കോടതി ഉത്തരവ് മറച്ചുവച്ചുകൊണ്ട് അപൂർണമായ സത്യവാങ്മൂലമാണ് ഉദ്യോഗസ്ഥർ സമർപ്പിച്ചിരിക്കുന്നത്. ഇതിനാലാണ് ഈ കോടതിവിധി എതിരായി തീർന്നത്. ജനപക്ഷത്തു നിന്നുകൊണ്ടുള്ള മനുഷ്യത്വപരമായ സമീപനം ഉദ്യോഗസ്ഥർ സ്വീകരിക്കാതെ വരുമ്പോൾ അവരെ തിരുത്തുവാനും നിലയ്ക്കു നിർത്തുവാനും ഭരണ നേതൃത്വം തയാറാകണമെന്ന് കത്തോലിക്കാ കോൺഗ്രസ് ആവശ്യപ്പെട്ടു. രൂപത പ്രസിഡന്‍റ് സണ്ണി കടൂത്താഴെ അധ്യക്ഷത വഹിച്ചു. രൂപത ഡയറക്ടർ ഫാ. മാനുവൽ പിച്ചളക്കാട്ട് ഉദ്ഘാടനം ചെയ്തു.

മൂവാറ്റുപുഴ കെഎസ്ആർടിസി ബസ് സ്റ്റേഷന് ശാപമോക്ഷം

മൂവാറ്റുപുഴ: വർഷങ്ങളുടെ കാത്തിരിപ്പിന് ശേഷം മൂവാറ്റുപുഴ കെഎസ്ആർടിസി ബസ് സ്റ്റേഷന് ശാപമോക്ഷമാകുന്നു. കെഎസ്ആർടിസി ഡിപ്പോ നവീകരണം ഇന്ന് ആരംഭിക്കും. രാവിലെ 10ന് നടക്കുന്ന നിർമാണോദ്ഘാടനം മാത്യു കുഴൽനാടൻ എംഎൽഎ നിർവഹിക്കും. നഗരസഭാധ്യക്ഷൻ പി.പി. എൽദോസ് അധ്യക്ഷത വഹിക്കും. മാത്യു കുഴൽനാടൻ എംഎൽഎയുടെ 2023-24 വർഷത്തെ ആസ്തി വികസന ഫണ്ടിൽനിന്നു 4.25 കോടി ചെലവഴിച്ചാണ് പുതിയ കെട്ടിട സമുച്ചയമുൾപ്പെടെയുള്ള നവീകരണം പൂർത്തീകരിക്കുന്നത്. മൂവാറ്റുപുഴയുടെ മുഖച്ഛായ മാറ്റുന്ന രീതിയിൽ ക്ലോക്ക് ടവർ അടക്കം ഉൾപ്പെടുത്തിക്കൊണ്ട് യാത്രക്കാർക്ക് ആവശ്യമായ എല്ലാ സൗകര്യങ്ങളോടുംകൂടി അത്യാധുനിക നിലവാരത്തിലാണ് ബസ് സ്റ്റേഷന്‍റെ നവീകരണം. നിലവിൽ പണി പൂർത്തീകരിക്കാത്ത കെട്ടിടത്തിന് സാമാന്തരമായി രണ്ട് നിലകളുള്ള പുതിയ കെട്ടിടം ഉണ്ടാകും. സ്റ്റേഷൻ മാസ്റ്റർ റൂം, ഇൻഫർമേഷൻ ഏരിയ, വനിത, പുരുഷ ജീവനക്കാർക്ക് പ്രത്യേകം വിശ്രമ മുറികൾ എന്നിവയുമുണ്ടാവും. നിലവിൽ പണി പൂർത്തീകരിക്കാതെ കിടക്കുന്ന കെട്ടിടവും ഇതോടൊപ്പം നവീകരിച്ച് ടൈൽ, പെയിന്‍റിംഗ് ഉൾപ്പെടെയുള്ള ബാക്കി ജോലികൾ പൂർത്തീകരിച്ച് ഉപയോഗപ്രദമാക്കും. യാത്രികർക്കുള്ള കാത്തിരിപ്പ് കേന്ദ്രവും ആധുനിക നിലവാരത്തിൽ സജ്ജീകരിക്കും. പുതിയ രീതിയിലുള്ള ഓഫീസ് മുറികൾ, യാത്രക്കാർക്ക് വേണ്ടിയുള്ള ശുചിമുറികൾ, വാഷ് ഏരിയ അടക്കമുള്ള സൗകര്യങ്ങളും നവീകരണത്തോടെ സാധ്യമാകും. യാത്രികർക്കും ജീവനക്കാർക്കും പൊതുജനങ്ങൾക്കുമായി കോഫി ഷോപ്പും, ഭക്ഷണശാലയും അടക്കമുള്ളവയും ഈ പദ്ധതിയിൽ ഉൾപ്പെട്ടിട്ടുണ്ട്. വർഷങ്ങളുടെ കാത്തിരിപ്പിന് ശേഷമാണ് കെഎസ്ആർടിസി നവീകരണം യാഥാർഥ്യത്തിലേക്ക് എത്തുന്നത്. ഈ പദ്ധതിയുടെ നിർമാണ പ്രവർത്തനത്തിന്‍റെ ചുമതല പൊതുമരാമത്ത് കെട്ടിട വിഭാഗത്തിലാണ് നൽകിയിരിക്കുന്നത്.

ഏലൂർ പാടശേഖരത്തിൽ നെൽവിത്ത് വിതച്ചു

ഏലൂർ: നീണ്ട നാളത്തെ കൂട്ടായ പരിശ്രമങ്ങൾക്ക് ഒടുവിൽ ഏലൂർ വടക്കുംഭാഗം പാടശേഖരത്തിൽ പ്രതീക്ഷയുടെയും സമൃദ്ധിയുടെയും വിത്തെറിഞ്ഞ് കർഷകർ. കഴിഞ്ഞദിവസം പാടമൊരുക്കി കർഷകർ നെൽവിത്ത് വിതച്ചു. ചടങ്ങിൽ ഏലൂർ നഗരസഭാ ചെയർമാൻ എ.ഡി. സുജിൽ വിത്തിട്ട് വിതയുടെ ഉദ്ഘാടനം നടത്തി. ചടങ്ങിൽ കൃഷി ഓഫീസർ, വടക്കുംഭാഗം നെല്ലുത്പാദക സംഘം പ്രവർത്തകർ തുടങ്ങിയവരും പങ്കെടുത്തു.

വ്യാപാരി വ്യവസായി സമിതി യൂണിറ്റ് വാർഷികം

നെടുമ്പാശേരി : കേരള വ്യാപാരി വ്യവസായി സമിതി കുറുമശേരി യൂണിറ്റ് വാർഷികവും വിദ്യാഭ്യാസ പുരസ്കാരദാനവും നടന്നു. വ്യാപാരി വ്യവസായി സമിതി ജില്ലാ പ്രസിഡന്‍റ് റോബിൻ ജോൺ ഉദ്ഘാടനം ചെയ്തു. സിപിഎം അങ്കമാലി ഏരിയ സെക്രട്ടറി കെ.പി. റെജീഷ് വിദ്യാഭ്യാസ പുരസ്കാരം വിതരണം ചെയ്തു. പുതിയ അംഗത്വ വിതരണം പാറക്കടവ് ലോക്കൽ സെക്രട്ടറി ജിബിൻ വർഗീസ് ഉദ്ഘാടനം ചെയ്തു. ചികിത്സാ സഹായം പഞ്ചായത്തംഗം ജിഷ ശ്യാം വിതരണം ചെയ്തു. നടൻ നിവസ് മരിയ മുഖ്യാതിഥിയായിരുന്നു. യൂണിറ്റ് പ്രസിഡന്‍റ് എം.എസ്. അരുൺകുമാർ അധ്യക്ഷനായി. ഭാരവാഹികളായിഎം എസ്. അരുൺകുമാർ (പ്രസിഡന്‍റ്), കെ.ആർ. രതീഷ് (സെക്രട്ടറി), ജീസന്‍ ജോസഫ് (ട്രഷറർ) എന്നിവരെ തെരഞ്ഞെടുത്തു.

ഗോശ്രീ സമാന്തര പാലം അറ്റകുറ്റപ്പണി: പ്രതിഷേധ സമരം നടത്തി

കൊച്ചി: ഗോശ്രീ രണ്ടാം പാലത്തിലെ സമാന്തര പാലത്തിന്‍റെ അറ്റകുറ്റപ്പണി യുദ്ധകാലാടിസ്ഥാനത്തില്‍ പൂര്‍ത്തിയാക്കണമെന്ന് ആവശ്യപ്പെട്ട് ഗോശ്രീ മനുഷ്യാവകാശ സംരക്ഷണ സമിതിയുടെ നേതൃത്വത്തില്‍ പ്രതിഷേധ സമരം നടത്തി. പ്രതീകാത്മകമായി ടാര്‍ ചെയതാണ് സമരം സംഘടിപ്പിച്ചത്. സമിതി ചെയര്‍മാന്‍ പോള്‍ ജെ. മാമ്പിള്ളി ഉദ്ഘാടനം ചെയ്തു. അറ്റകുറ്റപ്പണിക്കായി സമാന്തര പാലം അടച്ചതോടെ പ്രദേശത്ത് ഗതാഗതക്കുരുക്ക് രൂക്ഷമായി. നിലവില്‍ വാഹനങ്ങള്‍ പോകുന്ന പാലത്തില്‍ കുണ്ടും കുഴിയും രൂപപ്പെട്ടിട്ടുണ്ട്. ഇതിന് പരിഹാരം കാണുന്നതില്‍ അധികാരികള്‍ അലംഭാവം കാട്ടുകയാണ്. ഇത്തരം സാഹചര്യങ്ങള്‍ ഒഴിവാക്കാന്‍ മൊബൈല്‍ ടാറിംഗ് സംവിധാനം ഏര്‍പ്പെടുത്തണമെന്നും അദ്ദേഹം പറഞ്ഞു. സംഭവത്തില്‍ മന്ത്രിക്കും ജില്ലാ കളക്ടര്‍ക്കും നിവേദനം നല്‍കുമെന്ന് ഭാരവാഹികള്‍ പറഞ്ഞു.

40 ലക്ഷത്തിന്‍റെ സേവന പദ്ധതികളുമായി പെരുമ്പാവൂര്‍ ലയണ്‍സ്

പെരുമ്പാവൂര്‍: ലയണ്‍സ് ക്ലബ്ബ് 2025-26 വര്‍ഷത്തെ വിവിധ സേവന പദ്ധതികള്‍ക്കായി 40 ലക്ഷം രൂപ ചെലവഴിക്കുമെന്ന് ക്ലബ്ബ് ഭാരവാഹികള്‍ വാര്‍ത്താ സമ്മേളനത്തില്‍ പറഞ്ഞു. നിര്‍ദ്ധനരായ ഭവനരഹിതര്‍ക്ക് വീടുവച്ചു നൽകും. വൃക്ക രോഗിക്ക് ചികിത്സാ സഹായം, പ്രമേഹ രോഗ ബോധവത്കരണം, ലഹരി വിരുദ്ധ പ്രവര്‍ത്തനങ്ങള്‍, കുട്ടികളിലെ കാന്‍സര്‍ ചികിത്സാ സഹായം, കുട്ടികളിലെ കാഴ്ച വൈകല്യങ്ങള്‍ കണ്ടുപിടിക്കുന്നതിനും പരിഹരിക്കുന്നതിനുള്ള സഹായം, വിവിധ മെഡിക്കല്‍ ക്യാമ്പുകള്‍, ഹൈസ്‌കൂളുകളില്‍ സാനിറ്ററി നാപ്കിന്‍ ഡെസ്‌ട്രോയേഴ്സ് വിതരണം, ബസ് കാത്തിരിപ്പ് കേന്ദ്രം നിര്‍മാണം തുടങ്ങിയവയാണ് ഈ വര്‍ഷത്തെ സേവന പദ്ധതികള്‍. പെരുമ്പാവൂര്‍ താലൂക്ക് ആശുപത്രിയിലെ രോഗികള്‍ക്ക് ഉച്ചഭക്ഷണ പദ്ധതി അഞ്ചാം വര്‍ഷവും തുടരും. ഉച്ചഭക്ഷണ പദ്ധതി ഉദ്ഘാടനം മുനിസിപ്പല്‍ ചെയര്‍മാന്‍ പോള്‍ പാത്തിക്കല്‍ നിര്‍വഹിച്ചു. സേവന പദ്ധതികളുടെ ഉദ്ഘാടനം മുന്‍ ഡിസ്ട്രിക്ട് ഗവര്‍ണര്‍ ലയണ്‍ ഡോ. ബീന രവി കുമാര്‍ നിര്‍വഹിച്ചു. ക്ലബ്ബ് പ്രസിഡന്‍റ് പോള്‍ പൊട്ടയ്ക്കല്‍, സെക്രട്ടറി പ്രഫ. സാറാമ്മ എം. മാത്യു, ട്രഷറര്‍ പി. മനോജ് തുടങ്ങിയവര്‍ വാര്‍ത്താസമ്മേളനത്തില്‍ പങ്കെടുത്തു.

ഹോമിയോ മെഡിക്കല്‍ ക്യാമ്പ് സംഘടിപ്പിച്ചു

കൊച്ചി: അങ്കമാലി നഗരസഭയും നാഷണല്‍ ഹെല്‍ത്ത് മിഷനും സംയുക്തമായി വിന്‍സെന്‍ഷ്യന്‍ സര്‍വീസ് സൊസൈറ്റി സെന്‍റര്‍ ഫോര്‍ റൂറല്‍ ഡവലപ്‌മെന്‍റുമായി സഹകരിച്ച് മഴക്കാലപൂര്‍വ പ്രതിരോധ മരുന്ന് വിതരണവും ആരോഗ്യ പരിശോധനാ ക്യാമ്പും അങ്കമാലി വിഎസ്എസ്‌സിആര്‍ഡിയില്‍ നടന്നു. ആരോഗ്യകാര്യ സ്ഥിരംസമിതി അധ്യക്ഷന്‍ മനു നാരായണന്‍ ഉദ്ഘാടനം ചെയ്തു. മേരിമാതാ പ്രോവിന്‍സിന്‍റെ സോഷ്യല്‍ വര്‍ക്ക് ആന്‍ഡ് മിഷന്‍ കൗണ്‍സിലര്‍ ഫാ. ബിജു മൂഞ്ഞേലി അധ്യക്ഷത വഹിച്ചു. ഡോ.അലക്‌സ് വര്‍ഗീസ് ആമുഖ പ്രഭാഷണം നടത്തി. കില റിസോഴ്‌സ് പേഴ്‌സണ്‍ ശശി പത്മനാഭന്‍ ആശംസകള്‍ അര്‍പ്പിച്ച് സംസാരിച്ചു. അങ്കമാലി ഹോമിയോ ഡിസ്‌പെന്‍സറിയുടെ മെഡിക്കല്‍ ഓഫീസര്‍ ബിന്ദു ദിവാകരന്‍ രോഗപ്രതിരോധ പ്രവര്‍ത്തനങ്ങളെക്കുറിച്ചും മഴക്കാലത്ത് അനുവര്‍ത്തിക്കേണ്ട മുന്‍കരുതലുകളെ പറ്റിയും പകര്‍ച്ചവ്യാധികളുടെ ഉറവിട നിര്‍മ്മാര്‍ജ്ജനം എന്നിവയെ കുറിച്ചും ബോധവത്കരണ ക്ലാസെടുത്തു. തുടര്‍ന്ന് മെഡിക്കല്‍ ക്യാമ്പ് നടത്തി മരുന്നുകള്‍ വിതരണം ചെയ്തു. ക്ഷേമകാര്യസ്ഥിരം സമിതി അധ്യക്ഷ ഷൈനി മാര്‍ട്ടിന്‍ സ്വാഗതവും മേരിമാതാ പ്രോവിന്‍സിന്‍റെ സോഷ്യല്‍ വര്‍ക്ക് ഡയറക്ടര്‍ ഫാ. ഡിബിന്‍ പെരിഞ്ചേരി നന്ദിയും പറഞ്ഞു.

കടുങ്ങല്ലൂരിന് ‘താലൂക്ക് തലവേദന'

ആലുവ: കടുങ്ങല്ലൂർ ഗ്രാമപഞ്ചായത്ത് ഏത് താലൂക്കിൽ വരുമെന്ന് ചോദിച്ചാൽ ഗൂഗിൾ പറയും "ആലുവ താലൂക്ക് ' എന്ന് ! പക്ഷെ റവന്യൂരേഖകൾ പ്രകാരം പറവൂർ താലൂക്കിലും. അതുതന്നെയാണ് കടുങ്ങല്ലൂർ നിവാസികളുടെ തലവേദനയും. കടുങ്ങല്ലൂർ പഞ്ചായത്തിനെ ആലുവ താലൂക്കിൽ ഉൾപ്പെടുത്തിയെന്ന ഗസറ്റ് വിജ്ഞാപനം ഇറങ്ങി പത്തു വർഷം കഴിഞ്ഞിട്ടും മൂന്ന് വില്ലേജിലും രണ്ട് താലൂക്കുകളിലുമായാണ് സർക്കാർ സേവനങ്ങൾ ലഭിക്കുന്നത്. 2014 സെപ്‌റ്റംബർ 23 ന് താലൂക്ക് മാറ്റം പ്രഖ്യാപിച്ച് അസാധാരണ ഗസറ്റ് വിജ്ഞാപനം ഇറക്കിയപ്പോൾ ഇതെല്ലാം പരിഹരിക്കപ്പെടുമെന്നാണ് എല്ലാവരും പ്രതീക്ഷിച്ചത്. എന്നാൽ ആശയക്കുഴപ്പം ഇന്നും തുടരുകയാണ്. നേരത്തെ പറവൂരിൽ ആയിരുന്ന ആർടി ഓഫീസ്, സിവിൽ സപ്ലൈസ്, എംപ്ലോയ്മെന്‍റ് ഓഫീസ്, ലേബർ ഓഫീസ് തുടങ്ങിയ സേവനങ്ങൾ ആലുവ താലൂക്കിന് കീഴിലേക്ക് ആക്കിയെങ്കിലും റവന്യൂ വകുപ്പിന്‍റെ താലൂക്ക് മാറ്റം ഇനിയും നടപ്പിലായിട്ടില്ല. അതിനാൽ പാസ്പോർട്ട്, പിഎസ്‌സി, സ്‌കൂൾ, കോളജ് പ്രവേശന അപേക്ഷകളിൽ 'താലൂക്ക് ആലുവ ' എന്ന് രേഖപ്പെടുത്തിയാൽ അപേക്ഷകൾ നിരസിക്കപ്പെടും. മൂന്ന് വില്ലേജുകളിലായി മുറിഞ്ഞുകിടക്കുന്ന പഞ്ചായത്തിനെ ഒരു വില്ലേജിന്‍റെ പരിധിയിലാക്കണമെന്നതും ജനങ്ങളുടെ ആവർത്തിച്ചുള്ള ആവശ്യമാണ്. കടുങ്ങല്ലൂർ പഞ്ചായത്തിലെ ഭൂരിഭാഗം സ്ഥലങ്ങളും കടുങ്ങല്ലൂർ വില്ലേജിലാണ്. അതേസമയം പടിഞ്ഞാറെ കടുങ്ങല്ലൂർ മേഖല ആലങ്ങാട് വില്ലേജ് ഓഫീസിന് കീഴിലും കണിയാംകുന്ന് മേഖല ആലുവ വെസ്റ്റ് വില്ലേജിന് കീഴിലും. ആലുവ നഗരവുമായി അതിർത്തി പങ്കിടുന്ന കടുങ്ങല്ലൂർ പഞ്ചായത്തിന് ആലുവ താലൂക്ക് ആസ്ഥാനമാണ് ഏറ്റവും സൗകര്യപ്രദം. പറവൂർ താലൂക്ക് ഓഫീസ് 15 കിലോമീറ്റർ ദൂരെയാണ്. റേഷൻ കാർഡും ഡ്രൈവിംഗ് ലൈസൻസും ആലുവയിലേക്ക് മാറ്റിയത് പരിഗണിച്ച് റവന്യൂ രേഖകളിലും ആലുവ താലൂക്ക് ആക്കണമെന്നാണ് കടുങ്ങല്ലൂർ പഞ്ചായത്ത് ജനപ്രതിനിധികളുടെയും ആവശ്യം.

ചെങ്ങൽ സെന്‍റ് ജോസഫ്സ് ജിഎച്ച്എസിൽ ചെണ്ടുമല്ലി കൃഷി

കാലടി: ചെങ്ങൽ സെന്‍റ് ജോസഫ്സ് ജിഎച്ച്എസിൽ ഓണത്തിന് ഒരു കുട്ടപ്പൂവ് എന്ന ലക്ഷ്യവുമായി നടത്തുന്ന ചെണ്ടുമല്ലി കൃഷി കാഞ്ഞൂർ പഞ്ചായത്ത് മെമ്പറും ക്ഷീരകർഷകനുമായ കൃഷ്ണകുമാർ ഉദ്ഘാടനം ചെയ്തു. പ്രധാനാധ്യാപിക സിസ്റ്റർ ജയ്സ് തെരേസ്, വാർഡ് മെമ്പർ കെ.വി. പോളച്ചൻ എന്നിവർ സന്നിഹിതരായിരുന്നു.

പട്ടികജാതി വിദ്യാർഥിയെ മർദിച്ച സംഭവം: 18ന് പോലീസ് സ്റ്റേഷൻ മാർച്ച്

വൈപ്പിൻ: പൂഞ്ഞാർ ജി.വി. രാജാ സ്പോർട്സ് സ്കൂളിലെ പത്താം ക്ലാസ് വിദ്യാർഥി ഞാറക്കൽ മാരാത്തറ സാജുവിന്‍റെ മകൻ ആദിത്യ(15)നെ സംഘം ചേർന്ന് മർദിച്ച സംഭവത്തിൽ പോലീസ് നടപടികൾ ഇഴയുന്നുവെന്നാരോപിച്ച് 18ന് എസ്‌സി -എസ്ടി സംയുക്ത സമിതി ഞാറക്കൽ പോലീസ് സ്റ്റേഷനിലേക്ക് മാർച്ച് നടത്തും. രാവിലെ 11 നാണ് മാർച്ച്. കഴിഞ്ഞ15ന് പെരുമ്പിള്ളിയിൽ ഉള്ള ഫുട്ബോൾ ടർഫിൽവച്ചാണ് മർദനം നടന്നത്. ഞാറക്കൽ പോലീസിൽ പരാതി നൽകിയെങ്കിലും പ്രതികൾ പ്രായപൂർത്തിയായവരല്ലെന്ന് പറഞ്ഞ് പോലീസ് ജുവനൈൽ ബോർഡിനു റിപ്പോർട്ടു നൽകുക മാത്രമാണ് ചെയ്തത്. അതേസമയം പ്രതികളിൽ 18 വയസ് പൂർത്തിയായ രണ്ടുപേർ ഉണ്ടായിരുന്നുവെന്നും അവരെ പോലീസ് വെറുതെ വിട്ടയച്ചെന്നുമാണ് ആരോപണം. ഇവർക്കെതിരെ പട്ടികജാതി പീഡന നിരോധന നിയമം അനുസരിച്ച് കേസുകൾ എടുക്കണമെന്നാവശ്യപ്പെട്ടാണ് ഇപ്പോൾ പോലീസ് സ്റ്റേഷൻ മാർച്ച് സംഘടിപ്പിക്കുന്നത്.

കോൺഗ്രസ് നേതാക്കൾക്ക് എതിരേ കേസ്

വൈപ്പിൻ : ആരോഗ്യ മേഖലയിൽ സംസ്ഥാന സർക്കാർ പുലർത്തുന്ന അവഗണനയ്ക്കെതിരെ മാലിപ്പുറം ആശുപത്രിക്ക് മുന്നിൽ കോൺഗ്രസ് നടത്തിയ ധർണയിൽ ഞാറക്കൽ പോലീസ് കേസെടുത്തു. പൊതുഗതാഗതം തടസപ്പെടുത്തിയെന്നാരോപിച്ചാണ് കേസ്. കോൺഗ്രസ് വൈപ്പിൻ ബ്ലോക്ക് പ്രസിഡന്‍റ് എ.പി. ആന്‍റണി ഉൾപ്പെടെ കണ്ടാലറിയാവുന്ന 10 പേരാണ് പ്രതികൾ.

ഐഒസി എൽപിജി പ്ലാന്‍റിൽ ഗേറ്റ് മീറ്റിംഗ് നടത്തി

തൃപ്പൂണിത്തുറ: ഐഒസി എൽപിജി ബോട്ട്ലിംഗ് പ്ലാന്‍റിലെ ലോഡിംഗ് ആൻഡ് അൺലോഡിംഗ്, ഹൗസ് കീപ്പിങ്ങ് തൊഴിലാളികളുടെ സേവന വേതന കരാർ പുതുക്കാത്തതിൽ പ്രതിഷേധിച്ച് 15ന് സംയുക്ത സമര സമിതി ഐഒസി സ്റ്റേറ്റ് ഓഫീസിലേക്ക് മാർച്ചും ധർണയും നടത്തുന്നതിന്‍റെ ഭാഗമായി ഉദയംപേരൂർ ഐഒസി എൽപിജി പ്ലാന്‍റിൽ സമരസമിതിയുടെ നേതൃത്വത്തിൽ ഗേറ്റ് മീറ്റിംഗ് സംഘടിപ്പിച്ചു. കേരള പെട്രോളിയം ആൻഡ് ഗ്യാസ് വർക്കേഴ്സ് യൂണിയൻ (സിഐടിയു) സംസ്ഥാന പ്രസിഡന്‍റ് പി.ആർ.മുരളീധരൻ ഉദ്ഘാടനം ചെയ്തു. സംയുക്ത സമരസമിതി ചെയർമാൻ ജോൺ ജേക്കബ് അധ്യക്ഷത വഹിച്ചു. ട്രേഡ് യൂണിയൻ നേതാക്കളായ എൻ.കെ. ജോർജ്, രാജു പി. നായർ, പി.കെ. ബാബു, കെ.എം.അനിൽ കുമാർ, എം.പി. പ്രദീപ്, കമൽഗിപ്ര, പി.സി. സുനിൽ കുമാർ തുടങ്ങിയവർ പ്രസംഗിച്ചു.

മരടിലെ കുടിവെള്ള ക്ഷാമം : പ്രശ്നം അടിയന്തരമായി പരിഹരിക്കുമെന്ന് എംഎൽഎ

മരട്: മരട് നഗരസഭാ പ്രദേശത്തെ രൂക്ഷമായ കുടിവെള്ള ക്ഷാമവുമായി ബന്ധപ്പെട്ട് വാട്ടർ അഥോറിറ്റി എറണാകുളം സൂപ്രണ്ടിംഗ് എൻജിനീയർ ഉൾപ്പെടെയുള്ള ഉദ്യോഗസ്ഥരുമായി മരട് നഗരസഭയിൽ യോഗം ചേർന്നു. വിഷയം ജലവിഭവ മന്ത്രിയുടെ ശ്രദ്ധയിൽപ്പെടുത്തിയതിനെ തുടർന്ന് പ്രശ്നം പരിഹരിക്കുന്നതിനായി അടിയന്തിര ഇടപെടലുകൾ നടത്താമെന്ന് മന്ത്രി ഫോണിലൂടെ ഉറപ്പു നൽകിയതായി കെ.ബാബു എംഎൽഎ അറിയിച്ചു. നിലവിലുള്ള ലീക്കുകൾ അടിയന്തിരമായി അറ്റകുറ്റപ്പണി നടത്തുവാനും നെട്ടൂർ പമ്പിംഗ് സ്റ്റേഷനിൽനിന്നും മരട് ഭാഗവുമായി ബന്ധിപ്പിക്കുന്ന കുണ്ടന്നൂർ ഭാഗത്തെ പുഴയിൽ എച്ച്ഡി പൈപ്പിൽ ലീക്കുണ്ടോയെന്ന് അടിയന്തിരമായി പരിശോധിക്കാനും യോഗത്തിൽ തീരുമാനിച്ചു. മരടിന് നൽകികൊണ്ടിരിക്കുന്ന 15 എംഎൽഡി ശുദ്ധജലം കൃത്യമായി നൽകുന്നുണ്ടോയെന്ന് പരിശോധിക്കുന്നതിനായി നെട്ടൂർ വാട്ടർ ട്രീറ്റ്മെന്‍റ് പ്ലാന്‍റിൽ നിന്നും മരടിലേയ്ക്ക് നൽകുന്ന വെള്ളത്തിന്‍റെ റീഡിംഗ് സമയബന്ധിതമായി നഗരസഭയെ അറിയിക്കാമെന്ന് ജല അഥോറിറ്റി ഉറപ്പു നൽകി. ഒരാഴ്ച്ചയ്ക്കു ശേഷം വിഷയം സംബന്ധിച്ചുള്ള റിവ്യു മീറ്റിംഗ് നഗരസഭയിൽ ചേരാമെന്ന് സൂപ്രണ്ടിംഗ് എൻജിനീയർ ഉറപ്പു നൽകിയതായും നഗരസഭാ ചെയർമാൻ പറഞ്ഞു. കെ.ബാബു എംഎൽഎയുടെ അധ്യക്ഷതയിൽ നടന്ന യോഗത്തിൽ നഗരസഭാ ചെയർപേഴ്സൺ ആന്‍റണി ആശാംപറമ്പിൽ, ഡെപ്യൂട്ടി ചെയർപേഴ്സൺ അഡ്വ. രശ്മി സനിൽ, വാട്ടർ അഥോറിറ്റി സൂപ്രണ്ടിംഗ് എൻജിനീയർ എസ്. രതീഷ് കുമാർ, നഗരസഭ സ്റ്റാൻഡിംഗ് കമ്മിറ്റി ചെയർമാന്മാർ, കൗൺസിലർമാർ, വാട്ടർ അഥോറിറ്റി ഉദ്യോഗസ്ഥർ തുടങ്ങിയവർ പങ്കെടുത്തു.

ആര്‍എംബിഎഫ് കൊച്ചിന്‍ കിംഗ്‌സ് ഭാരവാഹികള്‍ സ്ഥാനമേറ്റു

കൊച്ചി: റോട്ടറി മീന്‍സ് ബിസിനസ് ഫെല്ലോഷിപ്പ് (ആര്‍എംബിഎഫ്) കൊച്ചിന്‍ കിംഗ്‌സ് ഭാരവാഹികള്‍ സ്ഥാനമേറ്റു. പ്രിന്‍സ് ഫ്രാന്‍സിസ് ചെയര്‍മാനായ പുതിയ കമ്മിറ്റിയാണ് നിലവില്‍ വന്നത്. അസറ്റ് ഹോംസ് സ്ഥാപകനും മാനേജിംഗ് ഡയറക്ടറുമായ സുനില്‍ കുമാര്‍ പരിപാടി ഉദ്ഘാടനം ചെയ്തു. പ്രിന്‍സ് ഫ്രാന്‍സിസ് പുതിയ പ്രവര്‍ത്തന പദ്ധതികള്‍ അവതരിപ്പിച്ചു. വൈസ് ചെയര്‍മാന്‍ വിവേക് ഷേനോയ്, മുന്‍ ചെയര്‍മാന്‍ സുദിന്‍ ജോണ്‍ വിളങ്ങാടന്‍ എന്നിവര്‍ പ്രസംഗിച്ചു.

മലയിടംതുരുത്ത് പ്രത്യാശഭവന്‍റെ പുതിയകെട്ടിടം കൂദാശ ഇന്ന്

കിഴക്കമ്പലം: മലയിടംതുരുത്ത് പ്രത്യാശഭവൻ (ആകാപ്പറവ) പുതിയ കെട്ടിടത്തിന്‍റെ കൂദാശയും പൊതു സമ്മേളനവും ഇന്ന് വൈകുനേരം ആറിന് പ്രത്യാശ ഭവൻ അങ്കണത്തിൽ നടക്കും. ശ്രേ ഷ്ഠ കാതോലിക മാർ ബസേലിയോസ് ജോസഫ് ബാവയും മാത്യൂസ് മാർ അഫ്രേം മെത്രാപ്പോലീത്തയും ചേർന്ന് വെഞ്ചിരിപ്പ് കർമം നിർവഹിക്കും. തുടർന്ന് നടക്കുന്ന പൊതുസമ്മേളനത്തിൽ ബെന്നി ബഹനാൻ എംപിയും അഡ്വ. പി.വി. ശ്രീനിജൻ എംഎൽഎയും മുഖ്യതിഥികളാകും. ചടങ്ങിൽ സ്ഥാപനഡയറക്ടർ ഡീക്കൻ വർഗീസ് കുട്ടി പുറമഠം, സെക്രട്ടറി റോമി സ്ലീബ കീരിക്കാട്ടിൽ, പ്രോഗ്രാം കൺവീനർ ഫാ. ഷാജി വർഗീസ് പാറക്കാടൻ,സഭാ സെക്രട്ടറി ജേക്കബ് സി. മാത്യു, പഞ്ചായത്തംഗം കെ.ഇ. കൊച്ചുണ്ണി എന്നിവർ സംസാരിക്കും. തെരുവിൽ അലയുന്നവർക്ക് അഭയ കേന്ദ്രമായ പ്രത്യാശ ഭവൻ 30 വർഷം പിന്നിടുകയാണ്. വിവിധ കോർപറേറ്റ് കമ്പനികളുടെ സഹകരണത്തോടെയാണ് പുതിയ കെട്ടിടത്തിന്‍റെ നിർമാണം പൂർത്തിയാക്കിയത്. ഇതോടൊപ്പം പുതിയ ലിഫ്റ്റിന്‍റെ സമർപ്പണവും നടക്കും. അറുപത്തിമൂന്നു പേരാണ് ഇവിടെ അന്തേവാസികളായി ഉള്ളത്.

ആലുവ ചൂണ്ടി ജംഗ്ഷനിൽ വ്യാപാരികൾ കുഴിയിൽ പന നട്ട് പ്രതിഷേധിച്ചു

ആലുവ: മഴ മാറിയിട്ടും ചൂണ്ടി ജംഗ്ഷനിൽ റോഡ് ടാർ ചെയ്യാത്തതിൽ പ്രതിഷേധിച്ച് വ്യാപാരികൾ കുഴിയിൽ പനനട്ട് പ്രതിഷേധിച്ചു. ആലുവ-മൂന്നാർ റോഡിൽ ചൂണ്ടി മേഖലയിലെ വെള്ളം നിറഞ്ഞ കുഴികളിൽ വീണ് ഇരുചക്രവാഹന യാത്രികർക്ക് പരിക്കേറ്റതോടെയാണ് പ്രതിഷേധം ശക്തമായിരിക്കുന്നത്. റോഡിന്‍റെ മോശം സ്ഥിതിയെക്കുറിച്ച് 'ദീപിക' പലവട്ടം റിപ്പോർട്ട് ചെയ്തിട്ടുണ്ട്. യാത്രക്കാർ അപകടത്തിൽ പെടുന്ന വീഡിയോകൾ വൈറലാവുകയും ചെയ്തു. റോഡിൻെറ മോശപ്പെട്ട അവസ്ഥയെക്കുറിച്ച് ജില്ലാ കളക്ടറോട്ഹൈക്കോടതി വിശദീകരണം ചോദിച്ചപ്പോൾ മഴ മാറി നിന്നാൽ ഉടൻ ടാറിംഗ് നടത്തുമെന്നാണ് റിപ്പോർട്ട് നൽകിയത്. എന്നാൽ മഴ മാറി നിന്ന ഇടവേളകൾ ലഭിച്ചിട്ടും പൊതുമരാമത്ത് വകുപ്പ് ടാറിംഗ് ചെയ്യുന്നില്ലെന്ന് നാട്ടുകാരും ആരോപിച്ചു. ഇതിൽ സഹികെട്ടാണ് ജനങ്ങൾ തന്നെ നടുറോഡിൽ പന നട്ട് പ്രതികരിച്ചത്.

ലഹരി വസ്തുക്കളുമായി യുവാക്കള്‍ അറസ്റ്റില്‍

കൊച്ചി: നഗരത്തില്‍ കഞ്ചാവും എംഡിഎംഎയുമായി യുവാക്കള്‍ അറസ്റ്റില്‍. കൊല്ലം പട്ടണപുരം സ്വദേശി എസ്.ഹേമന്ദ് (21), വയനാട് സ്വദേശി അക്ഷയ് റെജി(21) എന്നിവരെ പാലാരിവട്ടം പോലീസും ഡാന്‍സാഫ് സംഘവും ചേര്‍ന്നാണ് പിടികൂടിയത്. തമ്മനം പല്ലിശേരി റോഡിലെ ഡ്രീം ടവേഴ്‌സ് റസിഡന്‍ഷ്യല്‍ അപ്പാര്‍ട്ട്‌മെന്‍റില്‍ നടത്തിയ പരിശോധനയിലാണ് പ്രതികള്‍ പിടിയിലായത്. ഹേമന്ദിന്‍റെ പക്കല്‍ നിന്ന് 1.390 കിലോ കഞ്ചാവും അക്ഷയ്‌ റെജിയുടെ പക്കല്‍ നിന്ന് 2.21 ഗ്രാം എംഡിഎംഎയുടെ പിടിച്ചെടുത്തു.

എയർ ഇന്ത്യയുടെ മുംബൈ സർവീസ് റദ്ദാക്കി

നെടുമ്പാശേരി: ഇന്നലെ രാത്രി 8.10ന് നെടുമ്പാശേരിയിൽ നിന്നു മുംബൈയ്ക്ക് പുറപ്പെടേണ്ട എയർ ഇന്ത്യ വിമാനം പ്രതികൂല കാലാവസ്ഥയെ തുടർന്ന് അവസാന നിമിഷം സർവീസ് റദ്ദാക്കി. യാത്രക്കാർ വിമാനത്തികത്ത് കയറിയ ശേഷമാണ് യാത്ര റദ്ദാക്കിയതായി അറിയിച്ചത്. തുടർന്ന് ഇവരെ തിരിച്ചിറക്കുകയായിരുന്നു. വിമാനം എപ്പോൾ പുറപ്പെടുമെന്ന് രാത്രി വൈകിയും അറിയിച്ചിട്ടില്ല.

എംഡിഎംഎയുമായി യുട്യൂബര്‍ പിടിയിലായ സംഭവം : യാതൊരു ബന്ധവുമില്ലെന്ന് ഒബ്‌സ്‌ക്യുറ എന്‍റര്‍ടെയ്ന്‍മെന്‍റ്സ്

കൊച്ചി: കൊച്ചിയില്‍ യുട്യൂബര്‍ എംഡിഎംഎയുമായി പിടിയിലായ സംഭവത്തില്‍ കമ്പനിക്ക് യാതൊരു ബന്ധവും ഇല്ലെന്ന് റിന്‍സി ജോലി ചെയ്തിരുന്ന ഒബ്‌സ്‌ക്യൂറ എന്‍റര്‍ടെയ്ന്‍മെന്‍റ്. റിന്‍സി മുംതാസ് കമ്പനിയിലെ സ്ഥിര ജീവനക്കാരിയല്ലെന്ന് ഉടമ സെബാന്‍ അഗസ്റ്റിന്‍ പത്രസമ്മേളനത്തില്‍ അറിയിച്ചു. സംഭവം വ്യക്തിപരമാണെന്നും കമ്പനി ഒരു രീതിയിലും ഇതിനെ പ്രോത്സാഹിപ്പിച്ചിട്ടില്ലെന്നും സെബാന്‍ അഗസ്റ്റിന്‍ പറഞ്ഞു. കമ്പനിയിലെ സിനിമയുമായി ബന്ധപ്പെട്ട ജോലികള്‍ ചെയ്യുന്നവരില്‍ ഒരാള്‍ മാത്രമാണ് റിന്‍സി. ഇതിനുള്ള പണം നല്‍കുമെന്നാല്ലാതെ മാസശമ്പളം നല്‍കുന്ന ജീവനക്കാരിയുമല്ല. മൂന്നുവര്‍ഷമായി ഇവരോടൊപ്പം ജോലി ചെയ്യുന്നു. റിന്‍സി ലഹരി ഉപയോഗിക്കുന്ന ആളാണെന്ന് തനിക്ക് അറിയില്ലായിരുന്നു. മാത്രമല്ല, ഇവര്‍ താമസിക്കുന്ന സ്ഥലവും കമ്പനി എടുത്തു നല്‍കിയതല്ല. അതുകൊണ്ടുതന്നെ ഇവരുടെ ഇത്തരത്തിലുള്ള പ്രവൃത്തിയുമായി കമ്പനിക്ക് യാതൊരു ബന്ധവുമില്ലെന്നും തങ്ങളുടെ സ്ഥാപനത്തെ മോശമായി ചിത്രീകരിക്കരുതെന്നും സെബാന്‍ അഗസ്റ്റിന്‍ പറഞ്ഞു.

നടുറോഡില്‍ പെണ്‍കുട്ടിയെ അപമാനിച്ചു : 53-കാരന് മൂന്ന് വര്‍ഷം കഠിനതടവും പിഴയും

കൊച്ചി: ഓഫീസിലേക്കുപോയ യുവതിയെ നടുറോഡില്‍ തടഞ്ഞുനിര്‍ത്തി അപമാനിച്ച കേസിലെ പ്രതി വടുതല മരോട്ടിപ്പറമ്പില്‍ ഡാനി ഡമീഷി(53)നെതിരെ എറണാകുളം അഡീഷണല്‍ ചീഫ് ജുഡീഷ്യല്‍ മജിസ്‌ട്രേറ്റ് കോടതി മൂന്നു വര്‍ഷം കഠിന തടവിനും 30,000 രൂപ പിഴയും ശിക്ഷ വിധിച്ചു. 2022 ജൂലൈ 17നായിരുന്നു കേസിനാസ്പദമായ സംഭവം. ബൈക്കില്‍ യുവതിയെ പിന്തുടര്‍ന്ന പ്രതി കലൂര്‍ ആസാദ് റോഡില്‍ ആളൊഴിഞ്ഞ ഭാഗത്ത് വച്ച് ശരീരഭാഗം പ്രദര്‍ശിപ്പിച്ച് അപമാനിക്കുകായിരുന്നു. അഡീഷണല്‍ ചീഫ് ജുഡീഷ്യല്‍ മജിസ്‌ട്രേറ്റ് ബി.എസ്. സജിനിയാണ് ശിക്ഷ വിധിച്ചത്. പ്രോസിക്യൂഷന് വേണ്ടി അഡീഷണൽ പബ്ലിക് പ്രോസിക്യൂട്ടര്‍ ടി.പി. വിനിത ഹാജരായി.

അഞ്ചു കിലോഗ്രാം കഞ്ചാവുമായി രണ്ടു പേർ പിടിയിൽ

പെരുമ്പാവൂർ: അഞ്ച് കിലോഗ്രാം കഞ്ചാവുമായി രണ്ട് ഇതര സംസ്ഥാനത്തൊഴിലാളികൾ പിടിയിൽ. വെസ്റ്റ് ബംഗാൾ മുർഷിദാബാദ് സ്വദേശികളായ റബീൻ മണ്ഡൽ (24), ആശിഷ് സർക്കാർ (32) എന്നിവരേയാണ് പെരുമ്പാവൂർ എഎസ്പിയുടെ പ്രത്യേക അന്വേഷണ സംഘവും തടിയിട്ടപറമ്പ് പോലീസും ചേർന്ന് പിടികൂടിയത്. ജില്ലാ പോലീസ് മേധാവി എം. ഹേമലതയ്ക്ക് ലഭിച്ച രഹസ്യവിവരത്തിന്‍റെ അടിസ്ഥാനത്തിലായിരുന്നു പരിശോധന. ആലുവ എൻഎഡി ഭാഗത്ത് താമസിക്കുന്ന ആശിഷ് സർക്കാർ സ്കൂട്ടറിൽ കഞ്ചാവുമായി എത്തി കൈമാറുന്നതിനിടയിലാണ് പിടിയിലായത്. റോബിൻ ഭായ് എന്നറിയപ്പെടുന്ന റബിൻ മണ്ഡലിനെ മാർച്ചിൽ ഒമ്പതര കിലോഗ്രാം കഞ്ചാവുമായി പെരുമ്പാവൂർ ബംഗാൾ കോളനിയിൽ നിന്ന് അന്വേഷണസംഘം അറസ്റ്റ് ചെയ്തിരുന്നു. തുടർന്ന് ജയിലിൽ ആയിരുന്ന ഇയാൾ ഒന്നര മാസം മുമ്പാണ് മോചിതനായത്. മലയാളികളായ യുവാക്കളും ഇതര സംസ്ഥാന തൊഴിലാളികളുമായിരുന്നു ഇയാളുടെ കസ്റ്റമേഴ്സ്. രാത്രികാലങ്ങളിൽ ആയിരുന്നു ഇയാളുടെ കഞ്ചാവ് വില്പന. ചെമ്പറക്കി , പോഞ്ഞാശേരി ഭാഗങ്ങളിലായിരുന്നു കച്ചവടം. ചെമ്പരക്കിയിൽ നിന്നുമാണ് ഇവർ പിടിയിലായത്. രണ്ടാഴ്‌ചയ്ക്കുള്ളിൽ 25 കിലോയോളം കഞ്ചാവാണ് പെരുമ്പാവൂർ മേഖലയിൽ നിന്ന് പോലീസ് പിടികൂടിയത്.

ടാപ്പിംഗ് തൊഴിലാളിക്കു നേരെ പാഞ്ഞടുത്ത് കാട്ടാനക്കൂട്ടം

കോതമംഗലം: കാട്ടാനക്കൂട്ടം റബർ ടാപ്പിംഗ് തൊഴിലാളിക്കു നേരെ അക്രമാസക്തരായി പാഞ്ഞടുത്തു. ഇന്നലെ രാവിലെ കോട്ടപ്പടി ചീനിക്കുഴിയിൽ റബർ ടാപ്പിംഗിനെത്തിയ തൊഴിലാളി പവ്വത്തിൽ ജോയിക്ക് നേരേയാണു കാട്ടാനക്കൂട്ടം പാഞ്ഞടുത്തത്. വ്യാഴാഴ്ച രാത്രി രണ്ടു ബൈക്ക് യാത്രികർക്കു നേരെ ആനകൾ തിരിഞ്ഞതിന്‍റെ ഞെട്ടൽ വിട്ടുമാറും മുൻപാണു മണിക്കൂറുകൾക്കുള്ളിൽ മറ്റൊരു ആക്രമണ ശ്രമം. രാവിലെ ഏഴോടെ റബർ ടാപ്പിംഗിനെത്തിയതായിരുന്നു ജോയി. സമീപത്തെ വീട്ടിൽ ഓടിക്കയറി രക്ഷപ്പെടുകയായിരുന്നു. വ്യാഴാഴ്ച രാത്രി കോലേക്കാട്ട് അനിൽ, മാന്പിള്ളി ഇന്‍റീരിയൽ സ്ഥാപനം നടത്തുന്ന നിതീഷ് എന്നിവരാണു ആനയുടെ ആക്രമണത്തിൽ നിന്ന് തലനാരിഴയ്ക്ക് രക്ഷപ്പെട്ടത്. അനിലിന്‍റെ ബൈക്ക് ചവിട്ടിമറിച്ചാണ് ആന കടന്നുപോയത്. കുട്ടിയാനയടക്കം ആറ് ആനകളാണു പ്ലാമുടി ഭാഗത്ത് നിലയുറപ്പിച്ചിരിക്കുന്നത്. കോട്ടപ്പാറ വനാതിർത്തി പങ്കിടുന്ന പ്ലാമുടി, കൂവക്കണ്ടം, കല്ലുളി, ഷാപ്പുംപടി, മൂന്നാംതോട്, വാവേലി, വടക്കുംഭാഗം, ചേലക്കാപ്പള്ളി, മുട്ടത്തുപാറ, ഉപ്പുകണ്ടം, ചീനിക്കുഴി തുടങ്ങിയ പ്രദേശങ്ങളിലെല്ലാം ആനകളെ ഭയന്നാണ് ജനങ്ങൾ കഴിയുന്നത്. പ്ലാമുടിക്ക് സമീപം വ്യാഴാഴ്ച രാത്രി ഭീതിപരത്തിയ കാട്ടാനക്കൂട്ടം കാട്ടിലേക്ക് മടങ്ങിയത് ഇന്നലെ രാവിലെ ഏഴരയോടെയാണ്. നിരവധി ജനവാസമേഖലകളിലൂടെയാണ് ആനകൾ ചുറ്റിത്തിരിഞ്ഞത്. പുരയിടങ്ങളിലും റോഡുകളിലും ആനകൾ എത്തി. പഞ്ചായത്ത് ആസ്ഥാനമായ ചേറങ്ങനാൽ ജംഗ്ഷന് മുക്കാൽ കിലോമീറ്റർ അടുത്തുവരെ ആനക്കൂട്ടം കടന്നു കൂടി. ദിവസങ്ങൾക്ക് മുന്പ് വനപാലകർക്ക് നേരെയും ആനകൾ പാഞ്ഞടുത്തിരുന്നു. നാല് പിടിയാനകളും രണ്ട് കുട്ടിയാനകളും ഉൾപ്പെട്ട സംഘം കുറച്ച് ദിവസങ്ങളായി ജനവാസ മേഖലകളിൽ സ്ഥിരം സാന്നിദ്ധ്യമാണ്. ഇവ ഏഴിനു ശേഷമാണ് കാട്ടിലേക്ക് മടങ്ങുന്നത്. പഞ്ചായത്തിലെ കൂടുതൽ പ്രദേശങ്ങളും ആന ഭീഷണിയുടെ പരിധിയിലായി. വനം വകുപ്പിനെതിരെ ജനരോഷം ശക്തമാകുകയാണ്. അങ്കണവാടി കെട്ടിടത്തിന് ചുറ്റുമുള്ള വൈദ്യുതി വേലി തകർത്ത് കാട്ടാനക്കൂട്ടം കാലടി: കാലടി പ്ലാന്‍റേഷൻ അതിരപ്പിള്ളി എസ്റ്റേറ്റ് 17-ാം ബ്ലോക്കിലെ അങ്കണവാടിക്ക് ചുറ്റും സ്ഥാപിച്ചിരുന്ന വൈദ്യുതി വേലി എണ്ണ പ്പന മറിച്ചിട്ട് കാട്ടാനക്കൂട്ടം തകർത്തു. ഇന്നലെ പുലർച്ചെ അഞ്ച് ആനകളടങ്ങുന്ന കൂട്ടമാണ് പന തള്ളിയിട്ട് വൈദ്യുതി വേലി തകർത്തത്. അതിരാവിലെ ജോലിക്ക് പോയിരുന്ന പ്ലാന്‍റേഷൻ തൊഴിലാളികൾ കാട്ടനാക്കൂട്ടം പന മറിച്ചിട്ട് തിന്നുന്നതു കണ്ട് ഒച്ചയെടുത്തതോടെ നാലെണ്ണം കാട് കയറി. എന്നാൽ മോഴയാന പന തിന്നുകഴിയുന്നതു വരെ അവിടെ നിലയിറപ്പിച്ചു. പിന്നീട് കൂടുതൽ ആളുകൾ എത്തി ആനയെ ശബ്ദമുണ്ടാക്കി തുരത്തുകയായിരുന്നു. സ്ഥലത്തെത്തിയ ഓയിൽ പാം ഫീൽഡ് ഓഫിസർ കെ.എം. ജോഫിയുടെ നേതൃത്വത്തിൽ വൈദ്യുതി വേലി പുനഃസ്ഥാപിച്ചു. നാളുകൾക്ക് മുന്പ് അങ്കണവാടിക്ക് സമീപമെത്തിയ കാട്ടാനയെ കണ്ടു ഭയന്ന ടീച്ചറും ഹെൽപ്പറും കുട്ടികളുമായി ഇറങ്ങി ഓടിയിരുന്നു. പിന്നീടാണ് കെട്ടിടത്തിന് ചുറ്റും വൈദ്യുതി വേലി സ്ഥാപിച്ചത്. ആനകൾ സ്ഥിരമായി ഇറങ്ങുന്ന ഇവിടെ നിന്നും അംഗൻവാടി മാറ്റി സ്ഥാപിക്കണമെന്നാണ് നാട്ടുകാരുടെ ആവശ്യം.

വീട് കുത്തിപ്പൊളിച്ച് മോഷണം : ലക്ഷങ്ങളുടെ സാമഗ്രികൾ നഷ്ടമായി

കിഴക്കന്പലം: ചേലക്കുളത്ത് പൂട്ടിയിട്ട വീട് കുത്തിപ്പൊളിച്ച് മോഷണം. വീട്ടുപകരണങ്ങളും പാത്രങ്ങളും ഉൾപ്പെടെ ലക്ഷങ്ങൾ വിലവരുന്ന സാധനങ്ങൾ കളവ് പോയിട്ടുണ്ട്. ചേലക്കുളം കാവുങ്ങൽ പറമ്പ് പറക്കുന്നത്ത് അബ്ദുൽ ഖാദറിന്‍റെ മകൻ യൂനുസിന്‍റെ വീട്ടിലാണ് ബുധനാഴ്ച രാത്രി മോഷണം നടന്നത്. വീടിന്‍റെ മുൻവശത്തുള്ള വാതിൽ പൊളിച്ചാണ് മോഷ്ടാവ് അകത്തുകയറിയത്. ആൾത്താമസം ഇല്ലാതിരുന്നതിനാൽ സ്വർണവും പണവും വീട്ടിൽ സൂക്ഷിച്ചിരുന്നില്ല. യൂനുസും കുടുംബവും വിദേശത്താണ് ജോലി ചെയ്യുന്നത്. മൂന്നു വർഷമേ ആയിട്ടുള്ളൂ പുതിയ വീടുവച്ചിട്ട്. പിതാവ് അബ്ദുൽ ഖാദർ വൈകിട്ട് വീട്ടിൽ ചെന്ന് നോക്കിയപ്പോഴാണ് വീട് കുത്തിത്തുറന്ന വിവരം അറിയുന്നത്. ഉടൻ തന്നെ കുന്നത്തുനാട് പോലീസിൽ വിവരമറിയിച്ചു. പോലീസ് സ്ഥലത്തെത്തി അന്വേഷണം ആരംഭിച്ചു. ഒരാഴ്ചയ്ക്ക് മുമ്പ് മറ്റൊരു വീട്ടിലും സമാനമായ സംഭവം ഉണ്ടായതായി നാട്ടുകാരൻ പറഞ്ഞു.

കെ. ജയകുമാറിന്‍റെ ഗാനരചനയുടെ 50 വര്‍ഷം ആഘോഷിക്കുന്നു

കൊച്ചി: എം.കെ.അര്‍ജുനന്‍ മാസ്റ്റര്‍ ഫൗണ്ടേഷന്‍റെ നേതൃത്വത്തില്‍ മുന്‍ ചീഫ് സെക്രട്ടറിയും എഴുത്തുകാരനും കവിയും ഗാനരചയിതാവുമായ കെ. ജയകുമാറിന്‍റെ ഗാനരചനയുടെ 50 വര്‍ഷം ആഘോഷിക്കുന്നു. 20ന് വൈകീട്ട് അഞ്ചിന് എറണാകുളം ഫൈന്‍ ആര്‍ട്‌സ് ഹാളില്‍ നടക്കുന്ന ചടങ്ങില്‍ പിന്നണി ഗായകര്‍ ഒരുക്കുന്ന ഗാനമേള, നൃത്തശില്പം, മറ്റു കലാപരിപാടികള്‍ എന്നിവ ഉണ്ടായിരിക്കുമെന്ന് സംഘാടകര്‍ പത്രസമ്മേളനത്തില്‍ അറിയിച്ചു. ടി.ജെ. വിനോദ് എംഎല്‍എ, ഗോകുലം ഗോപാലന്‍, ഡോ. അനൂപ്, വിദ്യാധരന്‍ മാസ്റ്റര്‍, ടി.എസ്. രാധാകൃഷ്ണന്‍, നടന്‍ ദേവന്‍, ജയരാജ് വാര്യര്‍, ബിജിബാല്‍, സാജന്‍ പള്ളുരുത്തി തുടങ്ങി രാഷ്ട്രീയ സാമൂഹ്യ സാംസ്‌കാരിക ചലച്ചിത്ര മേഖലയിലെ പ്രമുഖര്‍ പങ്കെടുക്കും. പത്രസമ്മേളനത്തില്‍ ഫൗണ്ടേഷന്‍ ഭാരവാഹികളായ ഫാ.അനില്‍ ഫിലിപ്പ്, ജോസഫ് ആന്‍റണി, അശോകന്‍ അര്‍ജുനന്‍, വി.കെ. പ്രകാശന്‍ തുടങ്ങിയവര്‍ പങ്കെടുത്തു.

പൊതുപണിമുടക്ക് ദിനത്തിലെ അക്രമം; മൂന്നു പ്രതികളുടെ ജാമ്യാപേക്ഷ തള്ളി

മൂവാറ്റുപുഴ: പൊതുപണിമുടക്ക് ദിനത്തിൽ മൂവാറ്റുപുഴ നഗരത്തിൽ മാധ്യമ പ്രവർത്തകനെ ആക്രമിക്കുകയും കെഎസ്ആർടിസി ബസിന്‍റെ ചില്ല് തകർക്കുകയും ചെയ്ത കേസിൽ പോലീസ് അറസ്റ്റ് ചെയ്ത മൂന്നു പ്രതികളുടെ ജാമ്യാപേക്ഷ കോടതി തള്ളി. റിമാൻഡിൽ കഴിയുന്ന പുളിഞ്ചോട് മറ്റത്തിൽ രാജഗോപാലൻ, പാലത്തിങ്കൽ ഷുക്കൂർ, രണ്ടാർ കാന്പകാലായിൽ അജാസ് എന്നിവരുടെ ജാമ്യാപേക്ഷയാണ് മൂവാറ്റുപുഴ ഫസ്റ്റ് ക്ലാസ് മജിസ്ട്രേറ്റ് കോടതി തള്ളിയത്. മൂന്നു പ്രതികളും മൂവാറ്റുപുഴ സബ് ജയിലിലാണ്. ബുധനാഴ്ച നടന്ന പൊതുപണിമുടക്കിൽ സമരാനുകൂലികൾ കെഎസ്ആർടിസി ബസിന്‍റെ ചില്ല് കല്ലെറിഞ്ഞ് തകർക്കുകയും ഇതിന്‍റെ ദൃശ്യങ്ങൾ ചിത്രീകരിക്കുന്നതിനിടെ പ്രാദേശിക മാധ്യമ പ്രവർത്തകൻ അനൂപ് സത്യനെ സംഘം ആക്രമിക്കുകയുമായിരുന്നു. മൂവാറ്റുപുഴ സ്വകാര്യ ആശുപത്രിയിൽ ചികിത്സ തേടിയ അനൂപ് മൂവാറ്റുപുഴ പോലീസ് സ്റ്റേഷനിൽ പരാതി നൽകിയതിന്‍റെ അടിസ്ഥാനത്തിൽ സിഐ ബേസിൽ തോമസിന്‍റെ നേതൃത്വത്തിലുള്ള പോലീസ് സംഘം പ്രതികളെ ഉടൻ പിടികൂടി. തുടർന്ന് കോടതിയിൽ ഹജരാക്കിയ പ്രതികളെ റിമാൻഡ് ചെയ്യുകയായിരുന്നു.

ആലുവയിൽ കലുങ്കിന്‍റെ കൈവരി തകർത്ത് കൂറ്റൻ ട്രെയിലർ ലോറി തലകീഴായി മറിഞ്ഞു

കേബിളുകൾ മുറിഞ്ഞു, കുടിവെള്ള പൈപ്പുകൾ പൊട്ടി ആലുവ: ദേശീയപാതയിൽ പുളിഞ്ചോട് മെട്രോ സ്റ്റേഷനു സമീപം 22 ചക്രത്തിന്‍റെ, ട്രെയിലർ ലോറി കലുങ്കിന്‍റെ കൈവരി തകർത്ത് 20 അടിയോളം ആഴമുള്ള കാനയിലേക്ക് തലകീഴായി മറിഞ്ഞു. ഡ്രൈവറും ക്ലീനറും നിസാരപരിക്കുകളോടെ അത്ഭുതകരമായി രക്ഷപ്പെട്ടു. ഇന്നലെ പുലർച്ചെ നാലോടെ എറണാകുളം ഭാഗത്തേക്ക് സിമന്‍റ് കയറ്റിപ്പോവുകയായിരുന്ന ട്രെയിലർ ലോറി മെട്രോ പില്ലർ 75ന് സമീപമാണ് മറിഞ്ഞത്. ദേശീയപാതയ്ക്ക് സമാന്തരമായി റെയിൽവേ ട്രാക്കും കടന്നുപോകുന്നുണ്ട്. രണ്ടും വേർതിരിക്കുന്നത് ദേശീയപാതയുടെ അടിയിലൂടെ പോകുന്ന കാനയാണ്. ഡ്രൈവർ ഉറങ്ങിപ്പോയതാണ് അപകട കാരണമെന്നാണ് സൂചന. നാഗാലാൻഡ് രജിസ്ട്രേഷനിലുള്ള ട്രെയിലർ ആർഎംസി റെഡിമിക്സ് യൂണിറ്റിലേക്ക് ഗോഡൗണിൽ നിന്നും സിമന്‍റ് കൊണ്ടുപോവുകയായിരുന്നു. വലിയ ശബ്ദംകേട്ട് സമീപവാസികളെത്തി ടോർച്ചടിച്ചു നോക്കിയപ്പോഴാണ് ട്രെയിലർ മറിഞ്ഞതായി കണ്ടത്. വള്ളിപ്പടർപ്പുകളും വലിയ ചെടികളും ഉള്ളതിനാൽ ലോറി മറിഞ്ഞുകിടക്കുന്നത് ഇതുവഴി കടന്നു പോകുന്നവർക്ക് പെട്ടെന്ന് കാണാനാകില്ല. അപകടത്തെതുടർന്ന് സ്വകാര്യകമ്പനികളുടെ ഇന്‍റർനെറ്റ് കേബിളുകൾ മുറിഞ്ഞു. കുടിവെള്ള പൈപ്പുകളും പൊട്ടി. ഇവയുടെ അറ്റകുറ്റപ്പണി ഇന്നലെ തന്നെ ആരംഭിച്ചു. വാഹനങ്ങൾ കുറഞ്ഞ ശേഷം രാത്രി വൈകിയാണ് രണ്ട് ക്രെയിനുകളുടെ സഹായത്തോടെ, മറിഞ്ഞ ട്രെയിലർ ഉയർത്തുന്ന ജോലി ആരംഭിച്ചത്.

പാന്പുകടിയേറ്റ് യുവതി മരിച്ചു

അരൂർ: യുവതി പാന്പുകടിയേറ്റ് മരിച്ചു. അരൂർ പഞ്ചായത്തിലെ പതിനാറാം വാർഡിൽ കോതാട്ട് ഡിനൂബിന്‍റെ ഭാര്യ നീതു (32) ആണ് മരിച്ചത്. വ്യഴാഴ്ച രാവിലെ ഒന്പതോടെയാണ് വീടിന്‍റെ പിന്നിലുള്ള വർക്ക് ഏരിയയിൽ വച്ച് പാന്പുകടിയേറ്റത്. എറണാകുളത്തെ സ്വകാര്യ ആശുപത്രിയിൽ പ്രവേശിപ്പിക്കപ്പെട്ട നീതു ഇന്നലെ വൈകിട്ട് ആറോടെ മരിച്ചു. ഭർത്താവ് ഡിനൂബ് വിദേശത്താണ്. മകൾ: അലിയ (അഞ്ച്). സംസ്കാരം ഇന്നു 10ന് ഇടക്കൊച്ചി മക്പ്പേല സെമിത്തേരിയിൽ.

ടിപ്പറിടിച്ച് സ്കൂട്ടർ യാത്രികൻ മരിച്ചു

അങ്കമാലി: കിടങ്ങൂർ യൂദാപുരം പള്ളിക്ക് സമീപം ടിപ്പറിടിച്ച് സ്കൂട്ടർ യാത്രികൻ മരിച്ചു. കറുകുറ്റി കറുന്പൻ പൈനാടത്ത് പാലിയുടെ മകൻ ജോയ് (58) ആണ് മരിച്ചത്. മഞ്ഞപ്ര ഭാഗത്തേയ്ക്ക് പോകുന്ന വഴി അതേ വശത്തേക്കു പോകുകയായിരുന്ന ടിപ്പർ ലോറിയുമായി ഇടിക്കുകയായിരുന്നു. തുടർന്ന് അങ്കമാലി എൽഎഫ് ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. ഭാര്യ: റീന കല്ലേറ്റുംക്കര പള്ളിപ്പാട്ട് കുടുംബാംഗം. മക്കൾ: ബ്ലസൻ (മെട്രോ), ബ്ലസി (യുകെ). മരുമകൻ: ജോസഫ് കൂരൻ കല്ലൂക്കാരൻ കറുകുറ്റി (യുകെ). സംസ്കാരം പിന്നീട്.

അഖിലേന്ത്യ മത്സ്യത്തൊഴിലാളി കോണ്‍ഗ്രസ് മാര്‍ച്ചും ധര്‍ണയും

കൊച്ചി: കേന്ദ്ര ബ്ലൂ ഇക്കണോമി നയത്തിന്‍റെ ഭാഗമായി കടലിലെ മത്സ്യ സമ്പത്ത് സ്വകാര്യ കുത്തകകള്‍ക്ക് കൊള്ളയടിക്കാനുള്ള തീരുമാനത്തില്‍ നിന്ന് പിന്മാറണമെന്നാവശ്യപ്പെട്ട് കൊച്ചിയില്‍ മാര്‍ച്ചും ധര്‍ണയും നടത്തുമെന്ന് അഖിലേന്ത്യ മത്സ്യത്തൊഴിലാളി കോണ്‍ഗ്രസ് ഭാരവാഹികള്‍ പത്രസമ്മേളനത്തില്‍ പറഞ്ഞു. രാവിലെ 10ന് എറണാകുളം മറൈന്‍ഡ്രൈവില്‍ നിന്ന് ആരംഭിക്കുന്ന മാര്‍ച്ച് സിഎംഎഫ്ആര്‍ഐക്കു മുന്നില്‍ സമാപിക്കും. തുടര്‍ന്ന് ധര്‍ണ പ്രതിപക്ഷ നേതാവ് വി.ഡി. സതീശന്‍ ഉദ്ഘാടനം ചെയ്യുമെന്ന് സംസ്ഥാന പ്രസിഡന്‍റ് ജി. ലീലാകൃഷ്ണന്‍, സംസ്ഥാന ജനറല്‍ സെക്രട്ടറി എം.എല്‍. സുരേഷ്, ജില്ലാ പ്രസിഡന്‍റ് എ.സി. ക്ലാരന്‍സ് എന്നിവര്‍ പറഞ്ഞു.

ചിലപ്പോള്‍ കത്തും...കോര്‍പറേഷന് തലവേദനയായി എല്‍ഇഡി തെരുവ് വിളക്കുകള്‍

കൊച്ചി: ഊര്‍ജ സംരക്ഷണത്തിനായി നഗര വീഥികളിലെ വഴിവിളക്കുകള്‍ എല്‍ഇഡി സംവിധാനത്തിലേക്ക് മാറ്റുന്ന പദ്ധതി പൂര്‍ത്തീകരണത്തിലേക്ക് അടുക്കുമ്പോഴും പദ്ധതിയുടെ ഭാഗമായി സ്ഥാപിച്ച പകുതിയിലേറെ തെരുവ് വിളക്കുകളും പ്രവര്‍ത്തിക്കുന്നില്ല. കഴിഞ്ഞ ഒരു വര്‍ഷമായി ഈ പ്രശ്‌നം നിലനില്‍ക്കുന്നുണ്ടെന്നാണ് കൗണ്‍സിലര്‍മാരുടെ ആക്ഷേപം. പരാതി ഉയരുന്ന സ്ഥലങ്ങളില്‍ ലൈറ്റുകള്‍ നന്നാക്കുമെങ്കിലും വീണ്ടും പ്രവര്‍ത്തന രഹിതമാകും. കൗണ്‍സിലില്‍ ഭരണപക്ഷമടക്കം ആക്ഷേപം ഉന്നയിച്ചതിനെ തുടർന്ന് ബന്ധപ്പെട്ട വകുപ്പ് ഉദ്യോഗസ്ഥരുമായി ഡെപ്യൂട്ടി മേയര്‍ ഇന്ന് മീറ്റിംഗ് വിളിച്ചിട്ടുണ്ട്. 40 കോടി മുടക്കി കൊച്ചിന്‍ സ്മാര്‍ട്ട് മിഷന്‍ ലിമിറ്റഡിന്‍റെ നേതൃത്വത്തിലാണ് ലൈറ്റുകള്‍ സ്ഥാപിക്കുന്ന പ്രവൃത്തികള്‍ നടക്കുന്നത്. ആദ്യ ഷെഡ്യൂള്‍ പ്രകാരം 2023 ഡിസംബറില്‍ പദ്ധതി പൂര്‍ത്തീകരിക്കേണ്ടതാണ്. പിന്നീട് 2024 ഡിസംബറിലേക്ക് നീട്ടി. നിലവിൽ ഈ മാസം അവസാനത്തോടെ പദ്ധതി പൂര്‍ത്തിയാക്കാന്‍ കഴിയുമെന്നാണ് സിഎസ്എംഎല്‍ അധികൃതര്‍ അറിയിച്ചത്. പൊന്നുരുന്നി, മണപ്പാട്ടിപ്പറമ്പ് റോഡ്, ഗിരിനഗര്‍, ഫോര്‍ട്ടുകൊച്ചി, എരുവേലി, കരിപ്പാലം, മട്ടാഞ്ചേരി, മൂലംകുഴി, ഇടക്കൊച്ചി, പള്ളുരുത്തി തുടങ്ങിയ മിക്ക സ്ഥലങ്ങളിലും എല്‍ഇഡിയിലേക്ക് മാറിയ മിക്ക തെരുവുവിളക്കുകളും പ്രവര്‍ത്തിക്കുന്നില്ല. കെഎസ്ഇബിയുടെ പിന്തുണയില്ലാത്തതാണ് കേടായ ലൈറ്റുകള്‍ നന്നാക്കുന്നത് കാലതാമസം നേരിടുന്നതിന്‍റെ പ്രധാന കാരണമായി സിഎസ്എംഎല്‍ ആരോപിക്കുന്നത്. ഇപ്പോള്‍, പദ്ധതി പൂര്‍ത്തിയാക്കുക എന്നതാണ് ലക്ഷ്യമെന്നും അടുത്ത മാസം മുതല്‍ അറ്റകുറ്റപ്പണികള്‍ക്കായിരിക്കും മുഖ്യ പരിഗണനയെന്നും സിഎസ്എംഎല്‍ ഉദ്യോഗസ്ഥര്‍ പറഞ്ഞു. നഗരത്തിലെ തെരുവ് വിളക്കുകള്‍ എല്‍ഇഡിയിലേക്ക് മാറുന്നതിന് മുന്‍പ് കോർപ റേഷന്‍റെ പ്രതിമാസ വൈദ്യുതി ബില്‍ ഏകദേശം 1.5 കോടി രൂപയായിരുന്നു. 2025 ഏപ്രിലില്‍ ബിൽ 1.24 കോടി രൂപയായും മേയില്‍ 1.33 കോടിയായും ജൂണില്‍ 1.29 കോടിയുമായും കുറഞ്ഞു. പദ്ധതി നടപ്പാക്കി കഴിഞ്ഞാല്‍ വൈദ്യുതി ബില്ലുകള്‍ 40 ശതമാനമായി കുറയ്ക്കാന്‍ കഴിയുമെന്ന് കോര്‍പറേഷന്‍ അവകാശപ്പെടുന്നു. ഇന്ന് യോഗം ചേരും കൊച്ചി: നഗരത്തിലെ തെരുവ് വിളക്കുകള്‍ പ്രവര്‍ത്തിക്കാത്തതുമായി ബന്ധപ്പെട്ട പരാതികളില്‍ പരിഹാരം കാണുന്നതിനായി കൊച്ചി കോര്‍പറേഷനില്‍ ഇന്ന് പ്രത്യേക യോഗം ചേരും. മേയറുടെ അസാന്നിധ്യത്തില്‍ ഡെപ്യൂട്ടി മേയര്‍ കെ.എ. അന്‍സിയയുടെ നേതൃത്വത്തിലാണ് യോഗം. സിഎസ്എംഎലിന്‍റെയും കെഎസ്ഇബിയുടെയും ഉദ്യോഗസ്ഥര്‍, കൗണ്‍സിലര്‍മാര്‍, കൊച്ചി കോര്‍പറേഷന്‍ എന്‍ജിനീയറിംഗ് വിഭാഗം ഉദ്യോഗസ്ഥര്‍ എന്നിവര്‍ പങ്കെടുക്കും.

ജില്ലാ ജയിലില്‍ "പച്ചത്തുരുത്ത്' ഒരുങ്ങുന്നു

കൊച്ചി: ഹരിത കേരളം മിഷന്‍റെ ഒരു തൈ നടാം ജനകീയ കാമ്പയിന്‍റെ ഭാഗമായി കാക്കനാട് ജില്ലാ ജയിലില്‍ പച്ചത്തുരുത്ത് ഒരുങ്ങുന്നു. ജയിലിലെ 40 സെന്‍റ് സ്ഥലത്ത് ഗെയില്‍ ഇന്ത്യ ലിമിറ്റഡ്, ജില്ലാജയില്‍, തൃക്കാക്കര നഗരസഭ എന്നിവരുടെ സംയുക്താഭിമുഖ്യത്തിലാണ് പദ്ധതി നടപ്പിലാക്കുന്നത്. ഗെയില്‍ ഇന്ത്യ ലിമിറ്റഡിന്‍റെ സ്‌പോണ്‍സര്‍ഷിപ്പില്‍ നൂറോളം ഫലവൃക്ഷ തൈകള്‍ പദ്ധതിക്കായി ലഭ്യമാക്കിയിട്ടുണ്ട്. ഒഴിഞ്ഞുകിടക്കുന്ന പൊതു സ്വകാര്യസ്ഥലങ്ങള്‍, പൊതുമേഖലാ വ്യവസായസ്ഥാപനങ്ങളിലെ തരിശുഭൂമി, മാലിന്യ നിക്ഷേപ കേന്ദ്രങ്ങളായി മാറിയ സ്ഥലങ്ങള്‍ എന്നിവിടങ്ങളില്‍ പ്രാദേശികമായി വളരുന്ന മരങ്ങള്‍ നട്ടുവളര്‍ത്തി പ്രാദേശിക ജൈവവൈവിധ്യം സാധ്യമാക്കുന്ന ചെറുകാടുകള്‍ സൃഷ്ടിച്ചെടുക്കുകയാണ് പദ്ധതിയിലൂടെ ലക്ഷ്യമിടുന്നത്. ഉമ തോമസ് എംഎല്‍എ പദ്ധതിയുടെ ഉദ്ഘാടനം നിര്‍വഹിച്ചു. ജില്ലാജയില്‍ സുപ്രണ്ട് എം.എം. ഹാരിസ് അധ്യക്ഷത വഹിച്ച ചടങ്ങില്‍ തൃക്കാക്കര നഗരസഭ ചെയര്‍പേഴ്‌സണ്‍ രാധാമണിപിള്ള മുഖ്യാതിഥിയായി. ഗെയില്‍ (ഇന്ത്യ) ലിമിറ്റഡ് ജനറല്‍ മാനേജര്‍ എം. വിജു, വെല്‍ഫയര്‍ ഓഫീസര്‍ ബേസില്‍, വാര്‍ഡ് കൗണ്‍സിലര്‍ സി.സി. വിജു, ഹരിത കേരളം മിഷന്‍ ജില്ലാ കോ-ഓര്‍ഡിനേറ്റര്‍ എസ്. രഞ്ജിനി, ഹരിതകേരളം മിഷന്‍ റിസോഴ്‌സ് പേഴ്‌സണ്‍ റ്റി.എസ്. ദീപു തുടങ്ങിയവരും പങ്കെടുത്തു.

കെഎസ്ആർടിസി ബസ് അപ്രോച്ചിലേക്ക് ചരിഞ്ഞുനിന്നു, ഒഴിവായത് വൻ ദുരന്തം

ചെറായി: എതിരെ വന്ന വാഹനത്തിനു സൈഡ് കൊടുക്കുന്നതിനിടെ കെഎസ്ആർടി സി തിരുകൊച്ചി ബസ് ചെറായി പാലത്തിന്‍റെ അപ്രോച്ചിലേക്ക് ചരിഞ്ഞു. രണ്ട് യാത്രക്കാർക്ക് നിസാര പരിക്കേറ്റു. ബസ് മറിയാതിരുന്നതിനാൽ വൻ ദുരന്തമാണ് ഒഴിവായത്. ഇന്നലെ രാവിലെ ഒന്പതോടെ ചെറായി പാലത്തിന്‍റെ പടിഞ്ഞാറെ അപ്രോച്ചി ലായിരുന്നു സംഭവം. കൊടുങ്ങല്ലൂരിൽനിന്ന് നിറയെ യാത്രക്കാരുമായി പറവൂർ -ഗോശ്രീ വഴി കാക്കനാട്ടേക്ക് പോകുകയായിരുന്നു ബസാണ് അപകടത്തിൽപ്പെട്ടത്.

എംഡിഎംഎയുമായി അറസ്റ്റിലായ യുട്യൂബര്‍ക്ക് സിനിമാ മേഖലയിലും ലഹരി ഇടപാട്

കൊച്ചി: കൊച്ചിയില്‍ എംഡിഎംഎയുമായി അറസ്റ്റിലായ യുട്യൂബര്‍ക്ക് സിനിമാ മേഖലയിലും ലഹരി ഇടപാട്. അറസ്റ്റിലായ കോഴിക്കോട് ചുങ്കം സ്വദേശിനിയും യുട്യൂബറുമായ റിന്‍സി മുംതാസ്(32) മുഖേന സിനിമ മേഖലയിലുള്ള നിരവധി പേര്‍ ലഹരി വസ്തുക്കള്‍ വാങ്ങിയിരുന്നതായി പോലീസ് കണ്ടെത്തി. ഇവരുടെ പേരുവിരങ്ങള്‍ ശേഖരിച്ച് വരികയാണ്. വരും ദിവസങ്ങളില്‍ ഇവരെ കേന്ദ്രീകരിച്ചും അന്വേഷണം ഉണ്ടായേക്കും. സിനിമയുടെ പ്രമോഷന്‍ ജോലികള്‍ കൈകാര്യം ചെയ്തിരുന്ന റിന്‍സി ഈ ബന്ധങ്ങള്‍ ഉപയോഗിച്ചാണ് സിനിമ പ്രവര്‍ത്തകരുമായി അടുപ്പം സ്ഥാപിച്ചത്. പിന്നീട് ലഹരി ആവശ്യമുള്ളവര്‍ക്ക് കൈമാറുകയായിരുന്നുവെന്നാണ് കണ്ടെത്തല്‍. ഇവരോടൊപ്പം അറസ്റ്റിലായ കല്ലായി സ്വദേശിയും റിന്‍സിയുടെ സുഹൃത്തുമായ യാസര്‍ അറഫാത്തിനും(34) ഈ ലഹരി ഇടപാടുകളില്‍ പങ്കുളളതായാണ് വിവരം. പ്രതികളെ കസ്റ്റഡിയില്‍ വാങ്ങി വിശദമായി ചോദ്യം ചെയ്യാനുള്ള നീക്കത്തിലാണ് പോലീസ്. യുട്യൂബ് വ്ലോഗിന്‍റെ മറവിലാണ് റിന്‍സി നഗരത്തില്‍ ലഹരി ഇടപാടുകള്‍ നടത്തിയിരുന്നത്. ഫ്ലാറ്റ് വാടകയ്‌ക്കെടുത്ത് എംഡിഎംഎ കച്ചവടം ഓപ്പറേഷന്‍ ഡി ഹണ്ടിന്‍റെ ഭാഗമായി കഴിഞ്ഞദിവസം നഗരത്തില്‍ നടത്തിയ വ്യാപക തെരച്ചിലിനിടെയാണ് കാക്കനാട് പാലച്ചുവടില്‍ നിന്നും റിന്‍സി മുംതാസും, യാസര്‍ അറഫാത്തും ഡാന്‍സാഫ് സംഘത്തിന്‍റെ പിടിയിലായത്. പാലച്ചുവട് ഭാഗത്തുള്ള റിന്‍സിയുടെ പേരില്‍ വാടകയ്ക്കെടുത്ത ഫ്ലാറ്റിലാണ് ഇരുവരും എംഡിഎംഎ വില്പന നടത്തിയിരുന്നത്. ഇരുടെ പക്കല്‍ നിന്നും 20.55 ഗ്രാം എംഡിഎംഎയാണ് പിടിച്ചെടുത്തത്. ആവശ്യക്കാര്‍ക്ക് പറയുന്ന സ്ഥലത്ത് ലഹരി എത്തിച്ചു കൊടുത്തിരുന്ന ഇവരെ കാണാന്‍ നിരവധി സന്ദര്‍ശകരും ഫ്ലാറ്റില്‍ വന്നുപോയിരുന്നതായി പോലീസ് കണ്ടെത്തിയിട്ടുണ്ട്. ഇവരുടെ പേരുവിവരങ്ങളും പോലീസ് അന്വേഷിക്കുകയാണ്. ഡി ഹണ്ടിന്‍റെ ഭാഗമായി നടത്തി പരിശോധനയില്‍ ചേരാനെല്ലൂര്‍ മാതിരപ്പിള്ളി മട്ടുമ്മല്‍ ഭാഗത്തുനിന്നും 2.80 ഗ്രാം എംഡിഎംഎയുമായി ഡാന്‍സാഫ് കൊല്ലം പുനലൂര്‍ സ്വദേശി മുഹമ്മദ് റഫീഖ്(28) എന്നയാളെയും അറസ്റ്റ് ചെയ്തു.

എനിക്ക് പേഴ്‌സണല്‍ മാനേജര്‍ ഇല്ല; വ്യാജ വാര്‍ത്തകളില്‍ പ്രതികരണവുമായി ഉണ്ണി മുകുന്ദന്‍

കൊച്ചി: സമൂഹ മാധ്യമങ്ങളിലൂടെ പ്രചരിക്കുന്ന വ്യാജ വാര്‍ത്തകളില്‍ പ്രതികരണവുമായി നടന്‍ ഉണ്ണി മുകുന്ദന്‍. തന്നെ പ്രതിനിധീകരിക്കുന്ന ഒരു പേഴ്‌സനല്‍ മാനേജര്‍ ഇല്ലെന്നും ഒരിക്കലും ഉണ്ടായിട്ടില്ലെന്നും ഉണ്ണി മുകുന്ദന്‍ വ്യക്തമാക്കി. എല്ലാ ഔദ്യോഗിക ആശയവിനിമയങ്ങളും, സഹകരണങ്ങളും, പ്രഫഷണല്‍ കാര്യങ്ങളും താന്‍ നേരിട്ടോ അല്ലെങ്കില്‍ സ്വന്തം നിര്‍മ്മാണ കമ്പനിയായ ഉണ്ണി മുകുന്ദന്‍ ഫിലിംസ്(യുഎംഎഫ്) വഴിയാണ് കൈകാര്യം ചെയ്യുന്നതെന്നും സമൂഹമാധ്യമങ്ങളില്‍ പങ്കുവച്ച കുറിപ്പില്‍ താരം വ്യക്തമാക്കി. തന്നെക്കുറിച്ച് തെറ്റായതോ തെറ്റിദ്ധരിപ്പിക്കുന്നതോ ആയ വിവരങ്ങള്‍ പ്രചരിപ്പിക്കുന്നതില്‍ നിന്ന് വ്യക്തികളോടും പ്ലാറ്റ്‌ഫോമുകളോടും മാറി നില്‍ക്കണമെന്ന് അഭ്യര്‍ഥിക്കുന്നു. അത്തരം തെറ്റായ അവകാശവാദങ്ങള്‍ പ്രചരിപ്പിക്കുന്നത് തുടരുന്നതു കണ്ടാല്‍ അവര്‍ക്കെതിരെ കര്‍ശനമായ നിയമനടപടി സ്വീകരിക്കുമെന്നും കുറിപ്പില്‍ ഉണ്ണി മുകുന്ദന്‍ വ്യക്തമാക്കി. കൊച്ചിയില്‍ എംഎഡിഎംഎയുമായി പിടിയിലായ യുവതി ഉണ്ണി മുകുന്ദന്‍റെ മാനേജര്‍ ആണെന്ന തരത്തിലായിരുന്നു സമൂഹമാധ്യമങ്ങളില്‍ പ്രചരണം നടന്നത്. ഇതോടെയാണ് വിശദീകരണവുമായി നടന്‍ രംഗത്തെത്തിയത്.

നടന്നത് പിടിവലി : ഉണ്ണി മുകുന്ദന്‍ മാനേജരെ മര്‍ദിച്ചിട്ടില്ലെന്ന് കുറ്റപത്രം

കൊച്ചി: മുന്‍ മാനേജറെ മര്‍ദിച്ചിട്ടില്ലെന്ന നടന്‍ ഉണ്ണിമുകുന്ദന്‍റെ വാദങ്ങള്‍ ശരിവച്ച് പോലീസിന്‍റെ കുറ്റപത്രം. പിടിവലിയിലാണ് മുന്‍ മാനേജര്‍ വിബിന്‍ കുമാറിന് പരിക്കേറ്റതെന്നും കൂളിംഗ് ഗ്ലാസ് വലിച്ചെറിഞ്ഞ് നാശനഷ്ടമുണ്ടാക്കിയതായുമാണ് ഇന്‍ഫോപാര്‍ക്ക് പോലീസിന്‍റെ കണ്ടെത്തല്‍. ഇതോടെ നേരത്തെ ചുമത്തിയ ജാമ്യമില്ലാ വകുപ്പുകൾ ഒഴിവാക്കി കേസില്‍ പോലീസ് കോടതിയില്‍ കുറ്റപത്രം സമര്‍പ്പിച്ചു. ഉണ്ണിമുകുന്ദന്‍റെ കാക്കനാട്ടെ ഫ്ലാറ്റിലെത്തി പോലീസ് ഇയാളെ ചോദ്യം ചെയ്തിരുന്നു. വിബിനെ മര്‍ദിച്ചിട്ടില്ലെന്നും കണ്ണട വലിച്ചെറിഞ്ഞത് വൈകാരിക പ്രകടനം മാത്രമെന്നുമാണ് ഉണ്ണി മുകുന്ദന്‍ മൊഴി നല്‍കിയത്. ടൊവിനോ ചിത്രമായ നരിവേട്ടയെ പ്രശംസിച്ച് സമൂഹമാധ്യമങ്ങളില്‍ പോസ്റ്റിട്ടതിന് തന്നെ മര്‍ദിച്ചുവെന്നായിരുന്നു വിബിന്‍റെ പരാതി. സിസിടിവി ദൃശ്യങ്ങളടക്കം പരിശോധിച്ചാണ് മര്‍ദനമുണ്ടായിട്ടില്ലെന്ന ഇന്‍ഫോപാര്‍ക്ക് പോലീസിന്‍റെ കണ്ടെത്തല്‍.

കൈക്കൂലി കേസ്: ഇഡി ഉദ്യോഗസ്ഥന് മുന്‍കൂര്‍ ജാമ്യം

കൊച്ചി: വിജിലന്‍സ് രജിസ്റ്റര്‍ ചെയ്ത കൈക്കൂലി കേസില്‍ പ്രതിയായ എന്‍ഫോഴ്‌സ്‌മെന്‍റ് ഡയറക്ടറേറ്റിലെ (ഇഡി) മുതിര്‍ന്ന ഉദ്യോഗസ്ഥന്‍ ശേഖര്‍ കുമാറിന് ഹൈക്കോടതി മുന്‍കൂര്‍ ജാമ്യം അനുവദിച്ചു. എന്‍ഫോഴ്‌സ്‌മെന്‍റ് ഡയറക്ടറേറ്റിന്‍റെ കൊച്ചി ഓഫീസില്‍ അസിസ്റ്റന്‍റ് ഡയറക്ടര്‍ ആയിരിക്കേ കളളപ്പണക്കേസ് ഒതുക്കിത്തീര്‍ക്കാന്‍ ഇടനിലക്കാര്‍ മുഖേന കോഴ ആവശ്യപ്പെട്ടെന്നാണ് ആരോപണം. ചാര്‍ട്ടേഡ് അക്കൗണ്ടന്‍റ് അടക്കം മൂന്നുപേരെ നേരത്തെ അറസ്റ്റുചെയ്തിരുന്നു. ഒന്നാം പ്രതിയായ ശേഖര്‍ കുമാറിനെതിരെ തെളിവ് ശേഖരണം തുടരുന്നുവെന്നായിരുന്നു വിജിലന്‍സ് നിലപാട്. എന്നാല്‍ താന്‍ അന്വേഷിക്കുന്ന കളളപ്പണക്കേസിലെ പ്രതിയുടെ മൊഴിയുടെ അടിസ്ഥാനത്തിലാണ് വിജിലന്‍സ് കേസ് എന്നായിരുന്നു ശേഖര്‍ കുമാറിന്‍റെ നിലപാട്. ആരോപണത്തിന് പിന്നാലെ ഉദ്യോഗസ്ഥനെ ഷില്ലോങ്ങിലേക്ക് സ്ഥലം മാറ്റിയിരുന്നു.

ഓട്ടത്തിനിടെ റോഡ് റോളറിന്‍റെ ചക്രം ഊരിമാറി

പള്ളുരുത്തി: ഓട്ടത്തിനിടെ റോഡ് റോളറിന്‍റെ ചക്രം ഊരിമാറി. ഡ്രൈവറും നാട്ടുകാരും ചേർന്ന് ഊരിമാറിയ ചക്രം തടഞ്ഞുനിർത്തി റോഡരികിലേക്ക് തള്ളി നീക്കിയതിനാൽ വലിയ അപകടം ഒഴിവായി. പള്ളുരുത്തി സുറിയാനി പള്ളിയുടെ മുന്നിൽ ഇന്നലെ രാവിലെ ഒമ്പതോടെയായിരുന്നു സംഭവം. തോപ്പുംപടിയിൽ നിന്ന് വരികയായിരുന്ന റോഡ് റോളർ പള്ളുരുത്തി ഇഎസ്ഐ റോഡിലേക്ക് തിരിയുമ്പോൾ ഷാഫ്റ്റ് ഒടിയുകയും ചക്രം ഊരിമാറുകയുമായിരുന്നു. ചക്രം മാറിയതോടെ വാഹനം ഒരു വശം കുത്തി റോഡിലേക്ക് ചരിഞ്ഞു. ടി.ജെ. മത്തായി എന്ന കരാർ കമ്പനിയുടേതാണ് റോഡ് റോളർ.

ദേശീയപാതയിലെ രൂക്ഷമായ ഗതാഗതക്കുരുക്ക് : ചീഫ് സെക്രട്ടറിയുടെ ഇടപെടല്‍ ആവശ്യപ്പെട്ട് ഹൈക്കോടതി

കൊച്ചി: സംസ്ഥാനത്തെ ദേശീയപാതയിലെ രൂക്ഷമായ ഗതാഗതക്കുരുക്ക് ഒഴിവാക്കാന്‍ ചീഫ് സെക്രട്ടറിയുടെ ഇടപെടല്‍ ആവശ്യപ്പെട്ട് ഹൈക്കോടതി. പദ്ധതി ഡയറക്ടര്‍, കരാറുകാരന്‍, ബന്ധപ്പെട്ട സര്‍ക്കാര്‍ ഉദ്യോഗസ്ഥര്‍ എന്നിവരടക്കം ബന്ധപ്പെട്ടവെര ഉള്‍പ്പെടുത്തി ചീഫ് സെക്രട്ടറി യോഗം വിളിക്കണമെന്ന് ചീഫ് ജസ്റ്റീസ് നിധിന്‍ ജാംദാര്‍, ജസ്റ്റീസ് ബസന്ത് ബാലാജി എന്നിവരടങ്ങുന്ന ഡിവിഷന്‍ ബെഞ്ച് നിര്‍ദേശിച്ചു. ഗതാഗതക്കുരുക്ക് പ്രശ്‌നം ഗുരുതരമായ വിഷയമാണെന്നും പ്രശ്‌ന പരിഹാരത്തിന് ബന്ധപ്പെട്ടവര്‍ മുന്‍ഗണന നല്‍കണമെന്നും വ്യക്തമാക്കിയ കോടതി തുടര്‍ന്ന് ഹര്‍ജി വീണ്ടും 10 ദിവസത്തിനുശേഷം പരിഗണിക്കാന്‍ മാറ്റി. ബന്ധപ്പെട്ട ഉദ്യോഗസ്ഥരടങ്ങുന്ന ഉന്നതതല യോഗം നടത്തേണ്ടത് ആവശ്യമാണെന്ന് സര്‍ക്കാറിന് വേണ്ടി സ്റ്റേറ്റ് അറ്റോര്‍ണി കോടതിയെ അറിയിച്ചിരുന്നു. പാലിയേക്കര ടോള്‍ പിരിവ് നിര്‍ത്തിവച്ച് കളക്ടര്‍ പുറപ്പെടുവിച്ച ഉത്തരവ് പുനഃസ്ഥാപിക്കണമെന്നാവശ്യപ്പെട്ട് ഒ.ജെ. ജനീഷ് നല്‍കിയ ഹര്‍ജിയാണ് കോടതിയുടെ പരിഗണനയിലുള്ളത്. ടോള്‍ പിരിവ് നിര്‍ത്തിവയ്ക്കുന്നത് ജനപ്രിയ നടപടിയാണെങ്കിലും ഇതു മൂലം കരാറുകാരനുണ്ടാകുന്ന നഷ്ടം ആരാണ് നികത്തുകയെന്ന് കോടതി ചോദിച്ചു. ഇക്കാര്യത്തില്‍ കളക്ടര്‍ക്ക് നിയമ പ്രകാരം ഇതിന് അധികാരമുണ്ടോയെന്നാണ് പരിഗണിക്കേണ്ടതെന്നും കോടതി പറഞ്ഞു. കളക്ടറുടെ നടപടി ബിഎന്‍എസ്എസ് പ്രകാരമാണെന്ന് സര്‍ക്കാര്‍ അറിയിച്ചു. ടോള്‍ പിരിവ് നിര്‍ത്തുന്നതല്ലാതെ മറ്റു മാര്‍ഗങ്ങളില്ലേയെന്നും കോടതി ആരാഞ്ഞു.

വന്യമൃഗ സാന്നിധ്യം : വനംവകുപ്പ് ജാഗ്രത പുലർത്തണം: താലൂക്ക് വികസന സമിതി

കോതമംഗലം: കോതമംഗലം താലൂക്കിലെ വനമേഖലയോട് ചേർന്നുവരുന്ന പല പ്രദേശങ്ങളിലും വന്യമൃഗങ്ങളുടെ സാന്നിധ്യം പതിവായി കണ്ടുവരുന്ന സാഹചര്യത്തിൽ വനം വകുപ്പിന്‍റെ കൃത്യമായ നിരീക്ഷണവും ജാഗ്രതയുമുണ്ടാകണമെന്ന് താലൂക്ക് വികസന സമിതി യോഗം. വന്യമൃഗശല്യം തടയുന്നതിന് പ്രഖ്യാപിച്ചിട്ടുള്ള ഫെൻസിംഗ്, ഹാങ്ങിംഗ് ഫെൻസിംഗ്, ട്രഞ്ച് എന്നീ പദ്ധതികളുടെ കാര്യക്ഷമവും സമയബന്ധിതവുമായ പൂർത്തീകരണം ബന്ധപ്പെട്ട ഡിഎഫ്ഒമാർ ഉറപ്പുവരുത്തണമെന്നും യോഗം നിർദേശിച്ചു. കൊച്ചി-ധനുഷ്കോടി ദേശീയപാത കടന്നുപോകുന്ന കോതമംഗലം മണ്ഡലത്തിലെ പല പ്രദേശങ്ങളിലും രൂപപ്പെടുന്ന വെള്ളക്കെട്ട് അടിയന്തരമായി പരിഹരിക്കാൻ ദേശീയപാത അധികൃതർ ഫലപ്രദമായ നടപടികൾ സ്വീകരിക്കണമെന്നും യോഗം ആവശ്യപ്പെട്ടു. കാല വർഷക്കെടുതിയിലുണ്ടായ നാശനഷ്ടങ്ങളെക്കുറിച്ച് യോഗം വിശദമായി ചർച്ച ചെയ്തു. വീടുകൾക്കും കൃഷി ഉൾപ്പെടെ ഉണ്ടായിട്ടുള്ള നാശനഷ്ടങ്ങൾക്ക് സമയബന്ധിതമായി തന്നെ നഷ്ടപരിഹാരം ലഭ്യമാക്കാൻ ബന്ധപ്പെട്ട വകുപ്പുകൾ പ്രത്യേകമായി ശ്രദ്ധിക്കണമെന്ന് യോഗം നിർദേശിച്ചു. കുട്ടന്പുഴ-വെള്ളാരംകുത്ത്-മണികണ്ഠൻചാൽ കെഎസ്ആർടിസി ബസ് സർവീസും, കോതമംഗലം നെല്ലിമറ്റം-വാളാച്ചിറ-പൈങ്ങോട്ടൂർ കെഎസ്ആർടിസി ബസ് സർവീസും മുടങ്ങുന്നില്ലെന്ന് അധികൃതർ ഉറപ്പുവരുത്തണമെന്ന് യോഗം നിർദേശിച്ചു. കോതമംഗലം മിനി സിവിൽ സ്റ്റേഷൻ കോണ്‍ഫറൻസ് ഹാളിൽ ചേർന്ന യോഗത്തിൽ ആന്‍റണി ജോണ്‍ എംഎൽഎ അധ്യക്ഷത വഹിച്ചു. യോഗത്തിൽ നഗരസഭാ വൈസ് ചെയർപേഴ്സണ്‍ സിന്ധു ഗണേശൻ, തഹസിൽദാർ എം. അനിൽകുമാർ, കോട്ടപ്പടി പഞ്ചായത്ത് പ്രസിഡന്‍റ് മിനി ഗോപി, കുട്ടന്പുഴ പഞ്ചായത്ത് പ്രസിഡന്‍റ് കാന്തി വെള്ളക്കയ്യൻ, കീരംപാറ പഞ്ചായത്ത് പ്രസിഡന്‍റ് എം.പി ഗോപി, രാഷ്ട്രീയ പാർട്ടി പ്രതിനിധികളായ എം.എസ്. എൽദോസ്, ആന്‍റണി പാലക്കുഴി, ബേബി പൗലോസ്, സാജൻ അന്പാട്ട്, തോമസ് വട്ടപ്പാറ എന്നിവർ പങ്കെടുത്തു.

വടാട്ടുപാറയിൽ ഉമ്മൻ ചാണ്ടി പാലിയേറ്റീവ് ഫൗണ്ടേഷൻ

കോതമംഗലം: വടാട്ടുപാറയിൽ ഉമ്മൻ ചാണ്ടി പാലിയേറ്റീവ് ഫൗണ്ടേഷൻ രൂപീകരിച്ചു. വടാട്ടുപാറ രാഖീസ് ഗ്രീൻ പാർക്കിൽ നടന്ന യോഗം പോത്താനിക്കാട് ഫാർമേഴ്സ് ബാങ്ക് പ്രസിഡന്‍റ് ബോബൻ ജേക്കബ് ഉദ്ഘാടനം ചെയ്തു. ബ്ലോക്ക് പഞ്ചായത്ത് സ്ഥിരംസമിതി അംഗം ജയിംസ് കോറന്പേൽ അധ്യക്ഷത വഹിച്ചു. പി.ഐ. പൈലി, സാബു ജോസ് എന്നിവർ പ്രസംഗിച്ചു. വടാട്ടുപാറ മേഖല ചെയർമാനായി ജോബി കാരാംഞ്ചേരിയെ തെരഞ്ഞൈടുത്തു.

ചന്പമല-വെങ്കുളം ഫ്ളാറ്റ് : പദ്ധതി വൈകുന്നതിനെതിരേ കോണ്‍ഗ്രസ് പ്രതിഷേധം

കൂത്താട്ടുകുളം: ചന്പമല - വെങ്കുളം ഫ്ളാറ്റ് ഭവന പദ്ധതി നടപ്പാക്കാത്തതിനെതിരേ കോണ്‍ഗ്രസ് പ്രതിഷേധം ശക്തമാകുന്നു. കോണ്‍ഗ്രസ് നേതാക്കളുടെ നേതൃത്വത്തിൽ പദ്ധതി പ്രദേശത്ത് റീത്തുവച്ച് പ്രതിഷേധിച്ചു. വെങ്കുളത്ത് നടന്ന പ്രതിഷേധയോഗം എഐസിസി അംഗം ജെയ്സണ്‍ ജോസഫ് ഉദ്ഘാടനം ചെയ്തു. കഴിഞ്ഞ നാലര വർഷത്തിനിടയിൽ കൂത്താട്ടുകുളം നഗരസഭാ ഭരണസമിതി ഒരു പദ്ധതി പോലും നടപ്പാക്കിയിട്ടില്ല. നിർമാണത്തിന് മുഴുവൻ തുകയും നൽകാമെന്ന് അനൂപ് ജേക്കബ് എംഎൽഎ പല പ്രാവശ്യം അറിയിച്ചിട്ടും സ്റ്റേഡിയം പണി പൂർത്തീകരിക്കാനാവാത്തതും, കൂത്താട്ടുകുളത്തെ റിംഗ് റോഡ് പദ്ധതി, നഗരസഭാ കാര്യാലയം, നഗരസഭാ ഷോപ്പിംഗ് കോംപ്ലക്സ് തുടങ്ങിയ പദ്ധതികളൊന്നും നടപ്പാക്കാനാവാത്തത് ഭരണനേതൃത്വത്തിന്‍റെ കഴിവുകേടാണെന്നും ജെയ്സൻ ജോസഫ് പറഞ്ഞു. പിറവം ബ്ലോക്ക് കോണ്‍ഗ്രസ് പ്രസിഡന്‍റ് പി.സി. ജോസ്, മണ്ഡലം പ്രസിഡന്‍റ് റെജി ജോണ്‍, നഗരസഭാ പ്രതിപക്ഷ നേതാവ് പ്രിൻസ് പോൾ ജോണ്‍, നഗരസഭാംഗങ്ങളായ പി.സി. ഭാസ്ക്കരൻ, ബോബൻ വർഗീസ്, സിബി കൊട്ടാരം, ജിജോ ടി. ബേബി, സി.എ തങ്കച്ചൻ, ലിസി ജോസ്, ടി.എസ് സാറ, മറ്റ് നേതാക്കളായ ജിനീഷ് വൻനിലം, കെ.സി ഷാജി, വിശ്വനാഥൻ, സാബു മേച്ചേരി, എ.ജെ കാർത്തിക്, അമൽ മോഹൻ തുടങ്ങിയവർ പ്രസംഗിച്ചു.

കെഎസ്‌യു ജില്ലാ വൈസ് പ്രസിഡന്‍റിനെ എസ്എഫ്ഐ പ്രവർത്തകർ മർദിച്ചതായി പരാതി

മൂവാറ്റുപുഴ: മൂവാറ്റുപുഴ നിർമല കോളജിൽ കെഎസ്‌യു ജില്ലാ വൈസ് പ്രസിഡന്‍റിനെ എസ്എഫ്ഐ പ്രവർത്തകർ മർദിച്ചതായി പരാതി. കെഎസ്‌യു ജില്ലാ വൈസ് പ്രസിഡന്‍റ് അമൽ എൽദോസിനാണ് മർദനമേറ്റത്. എസ്എഫ്ഐ സംസ്ഥാന വ്യാപകമായി ആഹ്വാനം ചെയ്ത പഠിപ്പുമുടക്ക് സമരത്തിന്‍റെ ഭാഗമായി കോളജിലെ കെഎസ്‌യു പ്രവർത്തകരായ വിദ്യാർഥികളെ എസ്എഫ്ഐ പ്രവർത്തകരും, പാർട്ടി പ്രവർത്തകരും ചേർന്ന് മർദിച്ചതറിഞ്ഞെത്തിയ കെഎസ്‌യു പ്രവർത്തകരെ യാതൊരു പ്രകോപനവും ഇല്ലാതെ എസ്എഫ്ഐ പ്രവർത്തകർ മർദിക്കുകയായിരുന്നുവെന്ന് അമൽ പറഞ്ഞു. കോളജിനു പുറത്തുനിന്നുള്ള പാർട്ടി പ്രവർത്തകരും ചേർന്നാണ് മർദിച്ചതെന്നും കെഎസ്‌യു പ്രവർത്തകർ പുറത്ത് കടക്കാതിരിക്കാൻ എസ്എഫ്ഐ പ്രവർത്തകർ ഗേറ്റുകൾ അടച്ചുപൂട്ടിയെന്നും തുടർന്ന് പോലീസ് എത്തിയാണ് പുറത്തുകടന്നതെന്നും അമൽ എൽദോസ് പറഞ്ഞു. പരിക്കേറ്റ അമൽ എൽദോസ് മൂവാറ്റുപുഴയിലെ സ്വകാര്യ ആശുപത്രിയിൽ ചികിത്സതേടി.

പണിമുടക്ക് ദിനത്തിലെ അതിക്രമം: ദേശീയ മനുഷ്യാവകാശ കമ്മീഷനിൽ പരാതി

മൂവാറ്റുപുഴ: ദേശീയ പണിമുടക്കിന്‍റെ പേരിൽ സമരാനുകൂലികൾ കെഎസ്ആർടിസി ബസിന്‍റെ ചില്ലു തകർക്കുകയും വാഹനങ്ങൾ തടഞ്ഞ് ഭീഷണി മുഴക്കുകയും മാധ്യമ പ്രവർത്തകനെ ആക്രമിക്കുകയും ചെയ്ത സംഭവത്തിൽ ദേശീയ മനുഷ്യാവകാശ കമ്മീഷനിൽ പരാതി. സംഭവങ്ങൾ കുറ്റകരമായ മനുഷ്യാവകാശ ലംഘനമാണെന്നു കാണിച്ച് പൊതുപ്രവർത്തകനായ മുണ്ടയ്ക്കൽ എം.ജെ. ഷാജിയാണ് കമ്മീഷന് പരാതി നൽകി. സിഐടിയു ഏരിയാ സെക്രട്ടറി, എഐടിയുസി മണ്ഡലം സെക്രട്ടറി ഉൾപ്പെടെ സംയുക്ത ട്രേഡ് യൂണിയൻ നേതാക്കളെ എതിർകക്ഷികളാക്കിയാണ് ഷാജി കമ്മീഷന് പരാതി നൽകിയിരിക്കുന്നത്. സംസ്ഥാനത്തെ നിരവധിയിടങ്ങളിൽ കടന്നുകയറ്റങ്ങളും മനുഷ്യാവകാശ ലംഘനങ്ങളും അരങ്ങേറിയിട്ടുണ്ട്. ഇതും അന്വേഷണ പരിധിയിൽ കൊണ്ടുവരണമെന്നും പരാതിയിൽ പറയുന്നു.

വോളിബോളിൽ മിന്നും ജയവുമായി വിമലഗിരി ഇന്‍റർനാഷണൽ സ്കൂൾ

മൂവാറ്റുപുഴ: വിമലഗിരി ഇന്‍റർനാഷണൽ സ്കൂളിന് വോളിബോൾ ചാന്പ്യൻഷിപ്പിൽ മിന്നും ജയം. ഐസിഎസ്ഇ എറണാകുളം സോണ്‍ വോളിബോൾ ചാന്പ്യൻഷിപ്പിൽ അണ്ടർ 17, അണ്ടർ 14 വിഭാഗങ്ങളിലാണ് വിമലഗിരി ഇന്‍റർനാഷനൽ സ്കൂൾ ചാന്പ്യന്മാരായത്. വിമല സെൻട്രൽ സ്കൂൾ പെരുന്പാവൂർ, ജ്ഞാനോദയം സെൻട്രൽ സ്കൂൾ കാലടി എന്നിവരെ തുടർച്ചയായ രണ്ടു സെറ്റുകൾക്ക് പരാജയപ്പെടുത്തിയാണ് വിമലഗിരി കീരിടം നേടിയത്.

ശ്രേഷ്ഠ കാതോലിക്കാ ബാവയ്ക്ക് സ്വീകരണം നൽകി

കോതമംഗലം: ശ്രേഷ്ഠ കാതോലിക്ക ബസേലിയോസ് ജോസഫ് ബാവയ്ക്ക് ചേലാട് സെന്‍റ് ഗ്രിഗോറിയോസ് ഡെന്‍റൽ കോളജിന്‍റെ ആഭിമുഖ്യത്തിൽ സ്വീകരണം നൽകി. അനുമോദന സമ്മളനം മന്ത്രി റോഷി അഗസ്റ്റിൻ ഉദ്ഘാടനം ചെയ്തു. ഏലിയാസ് മാർ യൂലിയോസ് മെത്രാപ്പോലീത്ത അധ്യക്ഷത വഹിച്ചു. യൂഹാനോൻ മാർ തെയോഡോഷ്യസ് മെത്രാപ്പോലീത്ത മുഖ്യപ്രഭാഷണം നടത്തി. മെത്രാപ്പോലീത്തമാരായ മാത്യൂസ് മോർ അഫ്രേം, ഏലിയാസ് മാർ അത്താനാസിയോസ്, ഡീൻ കുര്യാക്കോസ് എംപി, ആന്‍റണി ജോണ്‍ എംഎൽഎ, കോളജ് ഡയറക്ടർ തന്പു ജോർജ് തുകലൻ, ട്രസ്റ്റ് സെക്രട്ടറി ടി.യു. കുരുവിള, യാക്കോബായ സഭ വൈദിക ട്രസ്റ്റി ഫാ. റോയി കട്ടച്ചിറ, സെക്രട്ടറി ജേക്കബ് സി. മാത്യു, പ്രിൻസിപ്പൽ ഡോ. ജെയിൻ മാത്യു, വൈസ് പ്രിൻസിപ്പൽ ഡോ. ടീന ജേക്കബ്, എംഎ കോളജ് അസോസിയേഷൻ സെക്രട്ടറി ഡോ. വിന്നി വർഗീസ്, ജില്ലാ പഞ്ചായത്തംഗം കെ.കെ ദാനി, പിണ്ടിമന പ്രഞ്ചായത്ത് പ്രസിഡന്‍റ് ജെസി സാജു, കെ.എ. തോമസ്, പ്രഫ. കെ.പി. തോമസ്, പ്രഫ. എം.എ. പൗലോസ്, പ്രഫ. ബേബി എം. വർഗീസ് എന്നിവർ പ്രസംഗിച്ചു.

പണിമുടക്കിനിടെ അക്രമം: പ്രതികളെ റിമാൻഡ് ചെയ്തു

മൂവാറ്റുപുഴ: പൊതുപണിമുടക്ക് ദിനത്തിൽ മൂവാറ്റുപുഴ നഗരത്തിൽ മാധ്യമ പ്രവർത്തകനെ ആക്രമിക്കുകയും കെഎസ്ആർടിസി ബസിന്‍റെ ചില്ല് തകർക്കുകയും ചെയ്ത കേസിൽ പോലീസ് അറസ്റ്റ് ചെയ്ത മൂന്നുപേരെ കോടതിയിൽ ഹാജരാക്കി റിമാൻഡ് ചെയ്തു. പുളിഞ്ചോട് മറ്റത്തിൽ രാജഗോപാലൻ, പാലത്തിങ്കൽ ഷുക്കൂർ, രണ്ടാർ കാന്പകാലായിൽ അജാസ് എന്നിവരെയാണ് റിമാൻഡ് ചെയ്തത്. സമരാനുകൂലികൾ കെഎസ്ആർടിസി ബസിന്‍റെ ചില്ല് തകർത്ത ദൃശ്യങ്ങൾ ചിത്രീകരിക്കുന്നതിനിടെയാണ് പ്രാദേശിക മാധ്യമ പ്രവർത്തകൻ അനൂപ് സത്യനെ സംഘം ആക്രമിച്ചത്. മൂവാറ്റുപുഴ സ്വകാര്യ ആശുപത്രിയിൽ ചികിത്സ തേടിയ അനൂപ് മൂവാറ്റുപുഴ പോലീസ് സ്റ്റേഷനിൽ പരാതി നൽകുകയായിരുന്നു. സിഐ ബേസിൽ തോമസിന്‍റെ നേതൃത്വത്തിലുള്ള പോലീസ് സംഘം പ്രതികളെ ഉടൻ പിടികൂടിയിരുന്നു.

‘എന്‍റെ നാട് ’സോഷ്യൽ ഓഡിറ്റിംഗ് ഉദ്ഘാടനം നാളെ

കോതമംഗലം: പത്താം വർഷത്തിലേക്ക് കടക്കുന്ന എന്‍റെ നാട് ജനകീയ കൂട്ടായ്മയുടെ പ്രവർത്തനങ്ങൾ സോഷ്യൽ ഓഡിറ്റിംഗിലേക്ക്. പാലിയേറ്റീവ് കെയർ, ഭക്ഷ്യസുരക്ഷാ മാർക്കറ്റ്, കർഷക വിപണി, എഡ്യൂകെയർ, വിവിധ ക്ഷേമ പെൻഷനുകൾ തുടങ്ങി 30ൽ അധികം മേഖലകളിലെ 100പരം പദ്ധതികളുടെ ഓഡിറ്റിംഗാണ് നടക്കുന്നത്. സംസ്ഥാന ആസൂത്രണ ബോർഡ് മുൻ അംഗം സി.പി. ജോണ്‍ നാളെ സോഷ്യൽ ഓഡിറ്റ് ഉദ്ഘാടനം ചെയ്യും. ഒരു മാസം നീളുന്ന വിപുലമായ സോഷ്യൽ ഓഡിറ്റിന് നേതൃത്വം കൊടുക്കുന്നത് തൃക്കാക്കര ഭാരതമാതാ കോളജ് സോഷ്യൽ വർക്ക് വിഭാഗമാണ്. പദ്ധതികളുടെ ഫലപ്രാപ്തിയും കുറവും, അടിയന്തര ഇടപെടൽ ആവശ്യമുള്ള മേഖലകളും തിരിച്ചറിയുക എന്നതാണ് സോഷ്യൽ ഓഡിറ്റിലൂടെ ലക്ഷ്യം വയ്ക്കുന്നതെന്ന് എന്‍റെ നാട് ചെയർമാൻ ഷിബു തെക്കുംപുറം പറഞ്ഞു. പദ്ധതികൾ, ഗുണഭോക്താക്കൾ, സ്വാധീനം, ഫലപ്രാപ്തി എന്നിവ ശാസ്ത്രീയമായി തിട്ടപ്പെടുത്തുകയാണ് ചെയ്യുന്നത്, സോഷ്യൽ ഓഡിറ്റിന് നേതൃത്വം നൽകുന്ന തൃക്കാക്കര ഭാരതമാതാ കോളജ് സോഷ്യൽ വർക്ക് വിഭാഗത്തിലെ ഡോ. ഷീന രാജൻ ഫിലിപ്പ് വിശദീകരിച്ചു. കോതമംഗലത്തെ മുഴുവൻ വീടുകളും സന്ദർശിച്ച് ഓരോ കുടുംബത്തിന്‍റെയും ആവശ്യകതകൾ മനസിലാക്കുന്ന വിശദമായ ഒരു ഫീൽഡ് സർവേ അടുത്ത് എന്‍റെ നാട് പൂർത്തിയാക്കിയിരുന്നു. നാടിന്‍റെ എല്ലാ കോണിലും നടന്നെത്തി മുഴുവൻ കുടുംബങ്ങളും മനുഷ്യരുമായി സംവദിക്കുന്ന ഗാന്ധിദർശൻ ജനസന്പർക്കയാത്ര കോതമംഗലത്ത് നടന്നു കൊണ്ടിരിക്കുന്നു. അതിനിടയിലാണ് സോഷ്യൽ ഓഡിറ്റ് പ്രക്രിയ. അംഗങ്ങളുടെ എണ്ണമെടുത്താൽ കേരളത്തിൽ പ്രാദേശിക തലത്തിലുള്ള ഏറ്റവും വലിയ ജനകീയ കൂട്ടായ്മയാണ് ഇപ്പോൾ എന്‍റെ നാട്. വാർഡുതലം മുതലുള്ള വളരെ മികച്ച ജനകീയ സംഘടനാ സംവിധാനവും സുസജ്ജമായ ഓഫീസ് സെക്രട്ടേറിയറ്റും എന്‍റെ നാടിനുണ്ട്.

എംഡിഎംഎയുമായി യുവാവ് പിടിയിൽ

മൂവാറ്റുപുഴ: എംഡിഎംഎയുമായി യുവാവ് എക്സൈസ് പിടിയിൽ. പേഴയ്ക്കാപ്പിള്ളി തണ്ടിയേക്കൽ ഷാമോ(28) നെയാണ് 1.42 ഗ്രാം കഞ്ചാവുമായി പേഴയ്ക്കാപ്പിള്ളിയിൽ മൂവാറ്റുപുഴ എക്സൈസ് സിഐ ജി. കൃഷ്ണ കുമാറിന്‍റെ നേതൃത്വത്തിലുള്ള സംഘം അറസ്റ്റു ചെയ്തത്. എംഡിഎംഎ ഉപയോഗിക്കുന്ന പ്രതികളിൽ നിന്ന് ലഭിച്ച വിവരത്തെ തുടർന്നാണ് മുൻപും എംഡിഎംഎ കേസിൽ പ്രതിയായിരുന്ന ഷാമോനെ എക്സൈസ് പിടികൂടിയത്. എക്സൈസ് സംഘത്തെ കണ്ട് ഓടി രക്ഷപ്പെടാൻ ശ്രമിച്ച പ്രതി കൈയിലുണ്ടായിരുന്ന എംഡിഎംഎ സമീപത്തുള്ള കഐസ്ഇബിയുടെ മതിൽകെട്ടിനുള്ളിലേക്ക് വലിച്ചെറിയുകയായിരുന്നു. തുടർന്ന് നാട്ടുകാരും എക്സൈസ് സംഘവും നടത്തിയ തെരച്ചിലിനൊടുവിലാണ് എംഡിഎംഎ കണ്ടെത്തിയത്. പ്രതിയുടെ മൊബൈൽ ഫോണും എക്സൈസ് പിടിച്ചെടുത്തു. പ്രതി ലഹരി ഇടപാട് നടത്തുവാൻ മറ്റുള്ളവരുമായി ബന്ധപ്പെടുന്ന ഫോണ്‍ സംഭാഷണവും എക്സൈസിന് ലഭിച്ചിട്ടുണ്ട്. പെരുന്പാവൂർ, പേഴയ്ക്കാപ്പിള്ളി ഭാഗങ്ങളിൽ എംഡിഎംഎ വില്പന നടത്തുന്നയാളാണ് പ്രതിയെന്നും ബാംഗ്ലൂരിൽ നിന്നുമാണ് എംഡിഎംഎ എത്തിക്കുന്നതെന്നും എക്സൈസ് ഇൻസ്പെക്ടർ ജി. കൃഷ്ണകുമാർ പറഞ്ഞു. പ്രിവന്‍റീവ് എക്സൈസ് ഓഫീസർമാരായ അജയകുമാർ, ഷബീർ, സിവിൽ എക്സൈസ് ഓഫീസർമാരായ മാഹിൻ, രഞ്ജിത്ത്, അനുരാജ്, ബിജു ഐസക്, വനിത എക്സൈസ് ഓഫീസർ അനിത എന്നിവരുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.

ശോഭന സ്കൂൾ ജംഗ്ഷനിൽ വാഹനങ്ങളുടെ കൂട്ടയിടി

കോതമംഗലം: വിദ്യാർഥികൾ സഞ്ചിരിച്ചിരുന്ന ഓട്ടോറിക്ഷയിൽ ഇടിക്കാതിരിക്കാൻ പെട്ടെന്ന് ബ്രേക്ക് ചെയ്ത കാറിനു പിന്നിൽ മറ്റൊരു കാറും സ്വകാര്യ ബസും ഇടിച്ചെങ്കിലും തലനാരിഴയ്ക്ക് അപകടം ഒഴിവായി. ദേശീയപാതയിൽ ശോഭന സ്കൂൾ ജംഗ്ഷനിൽ ഇന്നലെ രാവിലെയായിരുന്നു അപകടം. വിദ്യാർഥികളുമായി സ്കൂളിലേക്ക് പോകുകയായിരുന്ന ഓട്ടോറിക്ഷയിൽ ഇടിക്കാതിരിക്കാൻ പെട്ടെന്ന് ബ്രേക്കിട്ട കാറിൽ പിന്നിലുണ്ടായിരുന്ന മറ്റൊരു കാറും, അതിന് പിന്നിൽ സ്വകാര്യ ബസും ഇടിക്കുകയായിരുന്നു. ഇതോടെ മൂന്ന് വാഹനങ്ങൾക്കും കേടുപാടു സംഭവിച്ചു. യാത്രക്കാർക്ക് ആർക്കും പരിക്കില്ല. തലനാരിഴ വ്യത്യാസത്തിലാണ് വിദ്യാർഥികൾ കയറിയ ഓട്ടോറിക്ഷ അപകടത്തിൽപ്പെടാതെ രക്ഷപ്പെട്ടത്. സ്കൂളിൽ കുട്ടികൾ വരികയും പോകുകയും ചെയ്യുന്ന രാവിലെയും വൈകുന്നേരവും വലിയ തിരക്കാണ് ഇവിടെയുണ്ടാകുന്നത്. തിരക്കേറിയ സമയങ്ങളിൽ ഇവിടെ പോലീസിനെ ഡ്യൂട്ടിക്ക് നിയമിക്കണമെന്ന് നാട്ടുകാർ പലവട്ടം പരാതിപ്പെട്ടെങ്കിലും നടപടിയായിട്ടില്ല. പ്രദേശത്ത് ഗതാഗതകുരുക്കും പതിവാണ്. ചെറുതും വലുതുമായ നിരവധി അപകടങ്ങളാണ് ഇവിടെ ദിനംപ്രതി ഉണ്ടായിക്കൊണ്ടിരിക്കുന്നത്. അപകടങ്ങൾ ഒഴിവാക്കാൻ അധികൃതർ വേണ്ട നടപടി സ്വീകരിക്കണമെന്നാണ് ജനങ്ങളുടെ ആവശ്യം.

വാഹനാപകടം : ഓട്ടോറിക്ഷ ഡ്രൈവർക്ക് ഗുരുതര പരിക്ക്

മൂവാറ്റുപുഴ: ഓട്ടോറിക്ഷയും ചരക്കുവാഹനവും കൂട്ടിയിടിച്ചുണ്ടായ അപകടത്തിൽ ഓട്ടോറിക്ഷ ഡ്രൈവർക്ക് ഗുരുതര പരിക്ക്. മൂവാറ്റുപുഴ കാവുംപടി റോഡിൽ ഇന്നലെ പുലർച്ചെ അഞ്ചോടെയുണ്ടായ അപകടത്തിൽ രണ്ടാർ പറയൻകുടി ഹരിദാസിനാണ് പരിക്കേറ്റത്. പിഒ ജംഗ്ഷനിൽ നിന്ന് കാവുംപടി റോഡിലൂടെ കച്ചേരിത്താഴത്തേക്ക് പോകുകയായിരുന്ന ഓട്ടോറിക്ഷ മൂവാറ്റുപുഴ നിർമല ജൂണിയർ സ്കൂളിനു സമീപത്തുവച്ച് എതിർദിശയിലെത്തിയ ചരക്ക് വാഹനത്തിൽ ഇടിക്കുകയായിരുന്നു. ഇടിയുടെ ആഘാതത്തിൽ ഹരിദാസ് റോഡിലേക്ക് തെറിച്ചു വീണു. താടിയെല്ലിന് ഗുരുതരമായി പരിക്കേറ്റ ഹരിദാസിനെ കോലഞ്ചേരി മെഡിക്കൽ കോളജ് ആശുപത്രിയിലും, കൈക്ക് പരിക്കേറ്റ ചരക്കു വാഹന ഡ്രൈവർ ഇരിഞ്ഞാലക്കുട സ്വദേശി ആന്‍റണിയെ മൂവാറ്റുപുഴ ജനറൽ ആശുപത്രിയിലും പ്രവേശിപ്പിച്ചു. ചാലക്കുടിയിൽ നിന്ന് ചരക്കുമായി കോലഞ്ചേരിക്കു പോകുകയായിരുന്ന വാഹനമാണ് അപകടത്തിൽപ്പെട്ടത്. അപകടത്തിൽ ഓട്ടോറിക്ഷ പൂർണമായും തകർന്നു. ദിവസങ്ങൾക്കുമുൻപ് ജല അഥോറിറ്റിയുടെ പൈപ്പ് അറ്റകുറ്റപ്പണികളെ തുടർന്ന് റോഡിൽ കൂട്ടിയിട്ട മണ്ണിന് മുകളിലൂടെ കയറിയാണ് ഓട്ടോറിക്ഷ നിയന്ത്രണം നഷ്ടപ്പെട്ട് ചരക്കുവാഹനത്തിലിടിച്ചതെന്ന് ദൃക്സാക്ഷികൾ പറഞ്ഞു.

ചായക്കടയിൽ കയറി യുവതിയെ കുത്തിപ്പരിക്കേൽപ്പിച്ചു

കോലഞ്ചേരി: പഴന്തോട്ടത്തിനു സമീപം പുളിഞ്ചോട്ടിൽ കവലയിലെ ചായക്കടയിൽ കയറി യുവതിയെ കുത്തി പരിക്കേൽപ്പിച്ചു. പെരിങ്ങോൾ കണ്യാട്ടുകുടിയിൽ സാറാക്കുട്ടി ബിനോയി (49) യെയാണ് സമീപത്ത് വാടകയ്ക്കു താമസിക്കുന്ന പ്രതി ആറന്മുള പള്ളിയമ്പിൽ ശ്രീനാഥ് രംഗൻ(37) ആക്രമിച്ചത്. ഇയാളെ ഓടിക്കൂടിയ നാട്ടുകാർ പിടികൂടി പോലീസിൽ ഏൽപിച്ചു. ഇന്നലെ ഉച്ചകഴിഞ്ഞു രണ്ടോടെയാരുന്നു സംഭവം. യുവതിയുടെ കടയിൽ ചായ ചോദിച്ചെത്തിയ പ്രതി ചായയെടുക്കാൻ ഇവർ തിരിയുന്നതിനിടെ കൈയിൽ കരുതിയിരുന്ന കത്തി കഴുത്തിൽവച്ച് ഇവരുടെ മാല ആവശ്യപ്പെടുകയായിരുന്നു. പ്രതിയെ തള്ളി മാറ്റുന്നതിനിടെ യുവതിയുടെ കഴുത്തിനും കൈവിരലിനും പരുക്കേറ്റു. പുളിഞ്ചുവടിലെ സ്വകാര്യ കമ്പനിയിലെ ജീവനക്കാരനായിരുന്നു പ്രതി. പരിക്കേറ്റ യുവതി കോലഞ്ചേരി മെഡിക്കൽ കോളജിൽ അടിയന്തിര ശസ്ത്രക്രിയ കഴിഞ്ഞ് തീവ്രപരിചരണ വിഭാഗത്തിൽ ചികിത്സയിലാണ്. സംഭവത്തിൽ പുത്തൻകുരിശ് പോലീസ് അന്വേഷണം ആരംഭിച്ചു.

കുടുംബശ്രീ മാധ്യമ ശില്പശാല

കൊച്ചി: കുടുംബശ്രീ ജില്ലാ മിഷന്‍റെ നേതൃത്വത്തില്‍ ജില്ലാതല മാധ്യമ ശില്പശാല സംഘടിപ്പിച്ചു. ഇന്‍ഫര്‍മേഷന്‍ ആന്‍ഡ് പബ്ലിക് റിലേഷന്‍സ് വകുപ്പിന്‍റെയും എറണാകുളം പ്രസ് ക്ലബ്ബിന്‍റെയും സഹകരണത്തോടെയായിരുന്നു മാധ്യമ ശില്പശാല സംഘടിപ്പിച്ചത്. സമൃദ്ധി @ കൊച്ചി ഇന്‍കുബേഷന്‍ സെന്‍ററില്‍ നടന്ന പരിപാടിയില്‍ ജില്ലാ മിഷന്‍ കോ-ഓര്‍ഡിനേറ്റര്‍ റ്റി.എം. റെജീന അധ്യക്ഷയായിരുന്നു. ജില്ലാ പബ്ലിക് ഇന്‍ഫര്‍മേഷന്‍ ഓഫീസര്‍ എന്‍.ബി. ബിജു ശില്പശാല ഉദ്ഘാടനം ചെയ്തു. പ്രസ് ക്ലബ് പ്രസിഡന്‍റ് ആര്‍. ഗോപകുമാര്‍, ജോയിന്‍റ് സെക്രട്ടറി ഷബ്‌ന സിയാദ് എന്നിവര്‍ മുഖ്യാതിഥികളായി. കൊച്ചി ഈസ്റ്റ് സിഡിഎസ് ചെയര്‍പേഴ്‌സണ്‍ മേരി മിനി, കൊച്ചി സൗത്ത് സി.ഡി.എസ് ചെയര്‍പേഴ്‌സണ്‍ ലതാ ബാബു എന്നിവര്‍ പ്രസംഗിച്ചു. അസിസ്റ്റന്‍റ് ജില്ലാ മിഷന്‍ കോ-ഓര്‍ഡിനേറ്റര്‍മാരായ അമ്പിളി തങ്കപ്പന്‍, എം.ഡി. സന്തോഷ്, കെ.സി. അനുമോള്‍, ജില്ലാ പ്രോഗ്രാം മാനേജര്‍മാര്‍ എന്നിവര്‍ പങ്കെടുത്തു.

സുസ്ഥിര വികസനമെന്നത് ജലസ്രോതസുകൾ സംരക്ഷിക്കൽ: ഡോ. ബിജു കുമാര്‍

കൊച്ചി: കേരളത്തിന്‍റെ സുസ്ഥിര വികസനമെന്നത് നമ്മുടെ ജൈവ വൈവിധ്യവും സവിശേഷമായ ഭൂപ്രകൃതിയും ജലസ്രോതസുകളും സംരക്ഷിക്കുക എന്നുള്ളതാണെന്ന് കുഫോസ് വൈസ് ചാന്‍സലര്‍ ഡോ. ബിജു കുമാര്‍. തേവര സേക്രഡ് ഹാര്‍ട്ട് കോളജിലെ ഡിപ്പാര്‍ട്ട്മെന്‍റ് ഓഫ് എന്‍വയോണ്‍മെന്‍റല്‍ സ്റ്റഡീസിന്‍റെ നേതൃത്വത്തില്‍ സംഘടിപ്പിക്കുന്ന 'ലേക്ക് വ്യൂ എന്‍വിറത്തണ്‍' അന്താരാഷ്ട്ര കോണ്‍ക്ലേവ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കൊച്ചി കോര്‍പറേഷന്‍റെ നേതൃത്വത്തില്‍ ഇപ്പോള്‍ നടക്കുന്ന കനാല്‍ ശുദ്ധീകരണ പ്രവര്‍ത്തനങ്ങള്‍ കേരളത്തിന്‍റെ മറ്റ് ഭാഗങ്ങളിലേക്ക് കൂടി വ്യാപിപ്പിച്ചാല്‍ വേമ്പനാട്ട് കായല്‍ സ്വാഭാവികമായി ശുദ്ധീകരിക്കപ്പെടുമെന്നും, അത് കേരളത്തിന്‍റെ വിവിധ തലത്തിലുള്ള വികസനത്തിന് കാരണമാകുമെന്നും അദ്ദേഹം കൂട്ടിച്ചേര്‍ത്തു. അമേരിക്കയിലെ ഇല്ലിനോയിസ് വെസ്‌ലിയന്‍ യൂണിവേഴ്‌സിറ്റിയിലെ കെമിസ്ട്രി പ്രഫസറും ഗ്രീന്‍ കെമിസ്ട്രിയുടെ പ്രയോക്താവുമായ പ്രഫ. റാം മോഹന്‍ മുഖ്യപ്രഭാഷണം നിര്‍വഹിച്ചു. ഡോ. സജി ബേബി (എംഐടി, പീസ് യൂണിവേഴ്‌സിറ്റി, പൂനെ), ഡോ. മറിയാമ്മ ഫിലിപ്പ് (നിംഹാന്‍സ്, ബംഗളൂരു), എസ്. ഗണപതി വെങ്കിട്ട സുബ്രഹ്മണ്യന്‍ (അണ്ണാ യൂണിവേഴ്‌സിറ്റി ചെന്നൈ), ഡോ. മഹേഷ് മോഹന്‍ (മഹാത്മാഗാന്ധി യൂണിവേഴ്‌സിറ്റി, കോട്ടയം) എന്നിവര്‍ പ്രസംഗിച്ചു. ഇന്ന് കോണ്‍ക്ലേവില്‍ ഡോ. ആര്‍. ബിന്ദു മുഖ്യാതിഥിയായി സംസാരിക്കും. ബിപിസിഎലിന്‍റെയും ആലുവ മിത്രാദാം റിനൂവബിള്‍ എനര്‍ജി സെന്‍ററിന്‍റെയും സഹകരണത്തോടെ സംഘടിപ്പിക്കുന്ന കോണ്‍ക്ലേവില്‍ രാജ്യത്തും വിദേശത്തുമുള്ള 200ലധികം ഗവേഷകര്‍, അധ്യാപകര്‍, വിദ്യാര്‍ഥികള്‍ എന്നിവർ പങ്കെടുക്കുന്നുണ്ട്.

നൈപുണ്യ കോളജില്‍ നിദര്‍ശന-2025 ആഘോഷിച്ചു

അങ്കമാലി: കറുകുറ്റി നൈപുണ്യ മാനേജ്‌മെന്‍റ് ആന്‍ഡ് ഇന്‍ഫര്‍മേഷന്‍ ടെക്‌നോളജിയില്‍ 2025 അധ്യയന വര്‍ഷത്തെ ബിരുദ ബിരുദാനന്തര വിദ്യാര്‍ഥികളുടെ വിദ്യാരംഭച്ചടങ്ങ് നിദര്‍ശന 2025 ആഘോഷിച്ചു. സര്‍വവിജ്ഞാന കോശം ഡയറക്ടറും എഴുത്തുകാരിയും ആലുവ യൂ സി കോളജ് മുന്‍ അധ്യാപികയുമായ ഡോ. മ്യൂസ് മേരി ജോര്‍ജ് പരിപാടിയില്‍ മുഖ്യാതിഥിയായിരുന്നു. എറണാകുളം-അങ്കമാലി അതിരൂപത പ്രോ പ്രോട്ടോ സിഞ്ചെല്ലൂസ് റവ. ഡോ. ജിമ്മി പൂച്ചക്കാട്ട് അധ്യക്ഷത വഹിച്ചു. അസിസ്റ്റന്‍റ് എക്‌സിക്യൂട്ടീവ് ഡയറക്ടര്‍ ഫാ. ജിമ്മി കുന്നത്തൂര്‍, കോളജ് പ്രിന്‍സിപ്പലും എക്‌സിക്യൂട്ടീവ് ഡയറക്ടറുമായ റവ. ഡോ. പോളച്ചന്‍ കൈത്തോട്ടുങ്കല്‍, എംബിഎ ഡയറക്ടര്‍ ഡോ. പി.എം. ജേക്കബ്, അസിസ്റ്റന്‍റ് എക്‌സിക്യൂട്ടീവ് ഡയറക്ടര്‍ ഫാ. ടോണി മാണിക്കത്താന്‍, ഡീന്‍ ഓഫ് സ്റ്റഡീസ് ഡോ. ജോയ് ജോസഫ് പുതുശേരി, വൈസ് പ്രിന്‍സിപ്പല്‍മാരായ ഫാ. ഡിസ്റ്റോ കദളിക്കാട്ടില്‍, ട്രീസ പാറയ്ക്കല്‍, രക്ഷകര്‍ത്തൃ പ്രതിനിധി ജോഷി ജോസഫ്, കോളജ് യൂണിയന്‍ ചെയര്‍പേഴ്‌സണ്‍ ഹന്ന, പ്രോഗ്രാം കോ-ഓര്‍ഡിനേറ്റര്‍ ജിത്തു ഡോയല്‍ തുടങ്ങിയവര്‍ പ്രസംഗിച്ചു. വിവിധ അധ്യാപകര്‍ രചിച്ച പുസ്തകങ്ങളുടെയും കോളജ് മാഗസിന്‍റെയും പ്രകാശനവും ചടങ്ങില്‍ നടന്നു. ഡോക്ടറല്‍ ബിരുദം നേടിയ അധ്യാപകരെയും ഉന്നത വിജയം കരസ്ഥമാക്കിയ വിദ്യാര്‍ഥികളെയും ആദരിച്ചു. ഡയറക്ടര്‍ ഓഫ് എക്‌സാമിനേഷന്‍ എമിലി ഇട്ടിയച്ചന്‍, വിശിഷ്ടാതിഥികള്‍ക്ക് കോളജിന്‍റെ സ്‌നേഹോപഹാരം സമര്‍പ്പിച്ചു. കലാപരിപാടികളും ഉണ്ടായിരുന്നു.

കഞ്ചാവുമായി പിടിയിൽ

പെരുമ്പാവൂർ: 1.300 കി. ഗ്രാം കഞ്ചാവുമായി ഇതര സംസ്ഥാനത്തൊഴിലാളി പിടിയിൽ. വെസ്റ്റ് ബംഗാൾ മൂർഷിദാബാദ് സ്വദേശി എലം ഷെയ്ഖ് (29) നെയാണ്പെരുമ്പാവൂർ എ എസ് പി യുടെ പ്രത്യേക അന്വേഷണ സംഘം പിടികൂടിയത്. രഹസ്യവിവരത്തെ തുടർന്ന് കുറച്ചു നാളുകളായി ഇയാൾ അന്വേഷണസംഘത്തിന്‍റെ നിരീക്ഷണത്തിലായിരുന്നു. രണ്ടുവർഷത്തോളം ബംഗാൾ കോളനിയിൽ കട നടത്തിയിരുന്ന ഇയാൾ പിന്നീട് കഞ്ചാവ് കച്ചവടത്തിലേക്ക് തിരിയുകയായിരുന്നു. കഞ്ചാവ് തൂക്കാൻ ഉപയോഗിക്കുന്ന ത്രാസും കവറുകളും ഇയാളിൽ നിന്ന് കണ്ടെടുത്തു. കോടതിയിൽ ഹാജരാക്കിയ എലം ഷേഖിനെ റിമാൻഡ് ചെയ്തു.

എടവനക്കാട്ടെ കടൽഭിത്തി : ഫണ്ട് അനുവദിച്ചിട്ടും ഭരണാനുമതിയായില്ല; പദ്ധതി ത്രിശങ്കുവിൽ

വൈപ്പിൻ : കടൽക്ഷോഭം രൂക്ഷമായ എടവനക്കാട് ചെല്ലാനം മോഡൽ ടെട്രാപോഡുകൾ ഉപയോഗിച്ചു കടൽത്തി നിർമിക്കുന്നതിനായി പണം അനുവദിച്ച് മൂന്നുമാസം പിന്നിട്ടിട്ടും ഭരണാനുമതി കിട്ടാത്തതിനാൽ പദ്ധതി ഇപ്പോഴും ത്രിശങ്കുവിൽ. രോഷാകുലരായ നാട്ടുകാർ വീണ്ടും സമരത്തിനിറങ്ങുന്നു. നാട്ടുകാരും പഞ്ചായത്തും റോഡ് ഉപരോധിച്ചു നടത്തിയ വൻ സമരത്തിനൊടുവിലാണ് എംഎൽഎയും കളക്ടറും ഇടപെട്ട് ചർച്ചകൾ നടത്തി പദ്ധതി പ്രഖ്യാപിച്ചത്. ഇതുപ്രകാരം 35 കോടി രൂപ ജിഡയും 15 കൂടി സംസ്ഥാന സർക്കാരും 10 കോടി ഡിസാസ്റ്റർ മാനേജ്മെന്‍റ് വിഹിതവും നൽകാമെന്നായിരുന്നു വാഗ്ദാനം. ഏപ്രിൽ എട്ടിനു ചേർന്ന ജിഡ യോഗത്തിലാണ് 35 കോടിനൽകാൻ തീരുമാനമെടുത്തത്. എന്നാൽ ഈ ഫണ്ട് തികയാത്തസാഹചര്യത്തിലാണ് സംസ്ഥാന സർക്കാരും ഡിസാസ്റ്റർ മാനേജ്മെന്‍റും ഫണ്ട് നൽകാമെന്ന് ഏറ്റത്. എന്നാൽ ഇതിനുശേഷം ഇതിന്‍റെ ഭരണാനുമതി ഉൾപ്പെടെയുള്ള മറ്റു തുടർ നടപടികൾ എങ്ങും എത്തിയില്ലെന്നാണ് പഞ്ചായത്തിന്‍റെയും നാട്ടുകാരുടെയും പരാതി. ഈ സാഹചര്യത്തിലാണ് കടൽത്തി നിർമാണം ആവശ്യപ്പെട്ട് വീണ്ടും നാട്ടുകാർ വീണ്ടും സമരത്തിന് ഇറങ്ങുന്നത്. ഇതിന്‍റെ ഭാഗമായി 19ന് ജനകീയ സമരസമിതിയുടെ നേതൃത്വത്തിൽ എടവനക്കാട് വില്ലേജ് ഓഫീസിനു മുന്നിൽ ധർണ നടക്കും. കൂടാതെ പ്രതീകാത്മക ടെട്രാപോർഡും സ്ഥാപിച്ച് പ്രതിഷേധിക്കുകയും ചെയ്യും. രാവിലെ 10ന് ആരംഭിക്കുന്ന സമരപരിപാടികൾ അഡ്വ. എ. ജയശങ്കർ ഉദ്ഘാടനം ചെയ്യും.

നാലു വയസുകാരന്‍റെ മരണം: ആശുപത്രിയിലേക്ക് പ്രതിഷേധ മാര്‍ച്ച്

കൊച്ചി: ചെവിയിലെ പഴുപ്പ് നീക്കാന്‍ ശസ്ത്രക്രിയയ്ക്ക് വിധേയനായ നാലു വയസുകാരന്‍ മരിച്ചത് ചികിത്സാ പിഴവുമൂലമെന്ന് ആരോപിച്ച് ആക്ഷന്‍ കൗണ്‍സിലിന്‍റെ നേതൃത്വത്തില്‍ കലൂര്‍ കറുകപ്പിള്ളിയിലെ ഇഎന്‍ടി ആശുപത്രിയിലേക്ക് പ്രതിഷേധ മാര്‍ച്ച് നടത്തി. ദേശാഭിമാനി ജംഗ്ഷനില്‍ നിന്ന് ആരംഭിച്ച മാര്‍ച്ച് ആശുപത്രിക്ക് മുന്നില്‍ പോലീസ് തടഞ്ഞു. തുടര്‍ന്ന് പ്രതിഷേധക്കാരും പോലീസും തമ്മില്‍ വാക്കേറ്റവും ഉന്തും തള്ളുമുണ്ടായി. ഏറെ നേരത്തെ ശ്രമത്തിനൊടുവിലാണ് പോലീസ് പ്രതിഷേധക്കാരെ നീക്കിയത്. തുടര്‍ന്ന് നടന്ന പൊതുയോഗത്തില്‍ ആക്ഷന്‍ കൗണ്‍സില്‍ ചെയര്‍മാനും ഡിവിഷന്‍ കൗണ്‍സിലറുമായ ആര്‍. രതീഷ് അധ്യക്ഷത വഹിച്ചു. ആക്ഷന്‍ കൗണ്‍സില്‍ ചെയര്‍മാന്‍ കെ.ടി. സാജന്‍, കോര്‍പറേഷന്‍ സ്ഥിരംസമിതി അധ്യക്ഷ സി.ഡി. വത്സലകുമാരി തുടങ്ങിയവര്‍ പങ്കെടുത്തു. ചെവിയിലെ പഴുപ്പ് നീക്കാന്‍ ശസ്ത്രക്രിയയ്ക്ക് വിധേയനായ വെണ്ണല ചേലപ്പറമ്പ് വീട്ടില്‍ സി.ബി. അബിയുടെ മകന്‍ ബദ്രിനാഥാണ് മരിച്ചത്. കഴിഞ്ഞ മാസം മൂന്നിനായിരുന്നു സംഭവം. മേയ് 15നാണ് ചെവിയിലെ പഴുപ്പ് നീക്കാന്‍ കുട്ടിക്ക് ശസ്ത്രക്രിയ നടത്തിയത്. വൈകാതെ ആശുപത്രി വിടുകയും ചെയ്തു. തുടര്‍ പരിശോധനയ്ക്ക് എത്തിയപ്പോള്‍ അഡ്‌നോയിഡ് ഗ്ലാന്‍ഡിന് തകരാറുണ്ടെന്നും ചെവിക്ക് പിന്നിലെ അസ്ഥിയില്‍ മാംസം പിടിക്കുന്നുണ്ടെന്നും ഓപ്പറേഷനിലൂടെ ഇത് നീക്കണമെന്നും ഡോക്ടര്‍ അറിയിച്ചു. ജൂണ്‍ രണ്ടിന് ആശുപത്രിയില്‍ വീണ്ടും പ്രവേശിപ്പിച്ചു. മൂന്നിന് രാവിലെ 11.30നായിരുന്നു ഓപ്പറേഷന്‍. ആറു മണിക്കൂര്‍ നീണ്ട ശസ്ത്രക്രിയ ആയതിനാല്‍ അനസ്‌തേഷ്യ നല്‍കുമെന്നും അറിയിച്ചു. ഉച്ചകഴിഞ്ഞ് മൂന്നോടെ തങ്ങള്‍ അറിയാതെ കുട്ടിയെ മറ്റൊരു ആശുപത്രിയിലേക്ക് അധികൃതര്‍ മാറ്റി. തീവ്രപരിചരണ വിഭാഗത്തില്‍ ചികിത്സയിലിരിക്കെ വൈകിട്ട് 5.30ഓടെ കുട്ടി മരിക്കുകയായിരുന്നു എന്നാണ് കുടുംബത്തിന്‍റെ ആരോപണം.

ആലുവ നഗരസഭാ ശതാബ്ദി ആഘോഷം: മുൻ സെക്രട്ടറിയെയും എതിർകക്ഷിയാക്കി

ആലുവ: ശതാബ്ദി ആഘോഷ ഭാഗമായി നടത്തിപ്പ് കമ്മിറ്റി രൂപീകരിച്ചതും ആലുവ നഗരസഭയുടെ പാൻ നമ്പർ ഉപയോഗിച്ച് ബാങ്ക് അക്കൗണ്ടിലേക്ക് പണപ്പിരിവ് നടത്തിയതും ചട്ടവിരുദ്ധമെന്ന് തദ്ദേശവകുപ്പ് ഓംബുഡ്സ്മാൻ. സ്വാഗത സംഘം രൂപീകരിച്ച നടപടി ക്രമങ്ങളുടേയും ബാങ്ക് അക്കൗണ്ട് വഴി നടന്ന പണമിടപാടുകളുടേയും വിശദമായ റിപ്പോർട്ട് സമർപ്പിക്കാൻ ആലുവ നഗരസഭ സെക്രട്ടറിയ്ക്ക് ഓംബുഡ്സ്മാൻ നോട്ടീസ് നൽകി. പരാതി വിഷയവുമായി ബന്ധപ്പെട്ട കാലയളവിലെ ആലുവ നഗരസഭാ സെക്രട്ടറിയായിരുന്ന മുഹമ്മദ് ഷാഫിയെ ചെയർമാൻ, സെക്രട്ടറി എന്നിവർക്ക് പുറമേ മൂന്നാം എതിർ കക്ഷിയായി ചേർക്കാനും ഓംബുഡ്‌സ്മാൻ ഉത്തരവായി. പ്രതിപക്ഷ കൗൺസിലറായ എൻ. ശ്രീകാന്തിന്‍റെ പരാതിയിലാണ് തുടർ നടപടി. 2021 ൽ ഒരു വർഷം നീണ്ടു നിന്ന നഗരസഭ ശതാബ്ദി ആഘോഷങ്ങൾ നടത്തുന്നതിനായി ശതാബ്ദി ആഘോഷ കമ്മിറ്റി രൂപീകരിച്ചിരുന്നു. അനുവദനീയമായതിനേക്കാൾ കൂടുതൽ അംഗങ്ങളെ ചേർത്തതാണ് പ്രധാനപ്പെട്ട ക്രമക്കേട് ആയി ഓംബുഡ്സ്മാൻ വിലയിരുത്തിയത്. നഗരസഭയുടെ പ്രവർത്തനങ്ങൾക്ക് കമ്മിറ്റികൾ രൂപീകരിക്കുമ്പോൾ മുനിസിപ്പൽ ആക്ട് പ്രകാരം മൂന്നിലൊന്ന് അംഗങ്ങളെ മാത്രമെ പുറത്ത് നിന്ന് ഉൾപ്പെടുത്താനാകൂ. മാത്രമല്ല നിയമിക്കപ്പെടുന്ന ആളുകളുടെ എണ്ണം കമ്മിറ്റിയിലെ അംഗങ്ങളുടെ ആകെ എണ്ണത്തിന്‍റെ മൂന്നിലൊന്നിൽ കവിയാൻ പാടില്ല. നഗരസഭയ്ക്ക് പുറത്ത് നിന്നുള്ളവരേയും ഉൾപ്പെടുത്തി ജംബോ കമ്മിറ്റി ഉണ്ടാക്കിയത് ഇതൊന്നും പാലിച്ചില്ലെന്നാണ് പരാതി. പല കമ്മിറ്റികളുടേയും ചുമതലയിൽ നിന്ന് ആലുവയിലെ കൗൺസിലർമാരെ ഒഴിവാക്കി പകരം ചേർത്തത് ആലുവ നിവാസികളല്ലാത്ത വ്യക്തികളെയാണ്. ശതാബ്ദി ആഘോഷ കമ്മിറ്റിയുടെ ബാങ്ക് അക്കൗണ്ട് തുടങ്ങിയത് നഗരസഭയുടെ പാൻനമ്പർ ഉപയോഗിച്ചാണ്. അതിനാൽ നഗരസഭ സെക്രട്ടറിയാണ് ബാങ്ക് അക്കൗണ്ടും കൈകാര്യം ചേയ്യേണ്ടത്. എന്നാൽ സെക്രട്ടറിയുടെ ഒപ്പും സീലും ഒഴിവാക്കിയാണ് പണമിടപാട് നടന്നത്. ഇതും ചട്ടലംഘനത്തിൽ വരുന്നതിനാൽ ആരാണ് പണം കൈകാര്യം ചെയ്തതെന്ന വിശദീകരണവും 15 ദിവസിത്തിനകം സമർപ്പിക്കാൻ ഓംബുഡ്സ്മാൻ ജസ്റ്റിസ് പി.ഡി. രാജൻ ആലുവ നഗരസഭ സെക്രട്ടറിയോട് ആവശ്യപ്പെട്ടിട്ടുണ്ട്.

അങ്കമാലി-ആലുവ ദേശീയപാതയിൽ മരം മറിഞ്ഞു വീണ് ഗതാഗതം തടസപ്പെട്ടു

നെടുമ്പാശേരി : അങ്കമാലി-ആലുവ ദേശീയപാതയിലേക്ക് മരം മറിഞ്ഞുവീണ് ഗതാഗതം തടസപ്പെട്ടു. ദേശീയപാതയിൽ ചെറിയ വാപ്പാലശേരി ഭാഗത്താണ് മരം റോഡിലേക്ക് മറിഞ്ഞത്. ഇന്നലെ രാവിലെ ആറോടെയായിരുന്നു സംഭവം. ഈ സമയം ശക്തമായ മഴയും കാറ്റും ഉണ്ടായിരുന്നു. മരം മറിഞ്ഞ് റോഡ് സൈഡിൽ പാർക്ക് ചെയ്തിരുന്ന ടാങ്കറിന്‍റെ മുകളിൽ തങ്ങി നിന്നതിനാൽ വൻ ദുരന്തം ഒഴിവാകുകയായിരുന്നു. ടാങ്കറിന്‍റെ കാബിന് ഭാഗികമായി കേടുപാടുകൾ സംഭവിച്ചിട്ടുണ്ട്. അങ്കമാലിയിൽനിന്നും ഫയർഫോഴ്സ് എത്തിയാണ് മരം മുറിച്ചു മാറ്റിയത്. ഇതേ തുടർന്ന് ചെറിയ വാപ്പാലശേരി മുതൽ കരിയാട് വരെ ഒന്നര മണിക്കൂറോളം ഒരു വശത്ത് കൂടിയുള്ള ഗതാഗതം തടസപ്പെട്ടു. ഇരുവശത്തേക്കുമുള്ള വാഹനങ്ങൾ അങ്കമാലി ഭാഗത്തേക്കുള്ള റോഡിലൂടെ തിരിച്ചു വിടുകയായിരുന്നു.

ലൈഫ്: ഗുണഭോക്താക്കൾക്ക് ആധാരം കൈമാറി

മരട്: മരട് നഗരസഭയിലെ ലൈഫ് പദ്ധതിയിലെ ഗുണഭോക്താക്കൾക്ക് വാങ്ങിയ ഭൂമിയുടെ ആധാരം കൈമാറി. നഗരസഭാ ചെയർപേഴ്സൺ ആന്‍റണി ആശാംപറമ്പിൽ അധ്യക്ഷത വഹിച്ച ചടങ്ങിൽ കെ.ബാബു എംഎൽഎ ആധാരം കൈമാറി. ഡെപ്യൂട്ടി ചെയർപേഴ്സൺ അഡ്വ. രശ്മി സനിൽ, സ്ഥിരം സമിതിയധ്യക്ഷന്മാരായ ബേബി പോൾ, റിനി തോമസ്, ശോഭ ചന്ദ്രൻ, കൗൺസിലർമാരായ ചന്ദ്രകലാധരൻ, പി.ഡി.രാജേഷ്, ബെൻഷാദ് നടുവിലവീട്, മിനി ഷാജി, സിബി സേവ്യർ, മോളി ഡെന്നി , ജയ ജോസഫ് തുടങ്ങിയവർ പ്രസംഗിച്ചു. നാല് ഗുണഭോക്താക്കൾക്കാണ് ഭൂമി വാങ്ങി നൽകിയത്.

കിണറ്റിൽ വീണ വൃദ്ധയെ അഗ്നിരക്ഷാസേന രക്ഷപ്പെടുത്തി

നെടുമ്പാശേരി : കിണറ്റിൽ വീണ വൃദ്ധയെ അഗ്നിരക്ഷാസേന എത്തി രക്ഷപ്പെടുത്തി. നെടുമ്പാശേരി പഞ്ചായത്തിലെ രണ്ടാം വാർഡായ പൊയ്ക്കാട്ടുശേരിയിൽ ഇടതലശേരി വീട്ടിൽ സതി വേലായുധ (78) നാണ് കിണറ്റിൽ വീണത്. വീടിനടുത്ത് 35 അടിയോളം താഴ്ചയുള്ള കുടിവെള്ള കിണറ്റിലാണ് വൃദ്ധ അകപ്പെട്ടത്. നിലവിളി കേട്ട് ഓടിയെത്തിയ അയൽവാസികളാണ് അഗ്നിരക്ഷാസേനയെ വിവരം അറിയിച്ചത്. അങ്കമാലി ഫയർ ആൻഡ് റെസ്ക്യൂ ഓഫീസർ വിപിൻ പി. ഡാനിയേൽ കിണറ്റിലിറങ്ങി വൃദ്ധയെ വലയിൽ കയറ്റി മുകളിലേക്ക് വലിച്ചു കയറ്റുകയായിരുന്നു. അസിസ്റ്റന്‍റ് സ്റ്റേഷൻ ഓഫീസർ പി.വി. സുനിൽകുമാർ , ഫയർ ആൻഡ് റെസ്ക്യൂ ഓഫീസർമാരായ ജി.പി. ഹരി , ടി.എസ്. അജയൻ , റെജി എസ്. വാരിയർ, വിനു വർഗീസ്, അഭിഷ് ഗോപി, എസ്. സലിത്ത് എന്നിവരും രക്ഷാപ്രവർത്തനത്തിൽ പങ്കാളികളായി.

അല്ലപ്രയിൽ തെരുവുനായ ആക്രമണം: ഏഴ് പേർക്ക് പരിക്ക്

പെരുമ്പാവൂർ : അല്ലപ്രയിൽ തെരുവുനായ കടിച്ച് ഏഴ് പേർക്ക് പരിക്കേറ്റു. അല്ലപ്ര അറയ്ക്ക കുടി സൈബി സാജു , കൊല്ലമ്മാവു കുടി രവീന്ദ്രൻ, അനസ്, രണ്ട് അതിഥി തൊഴിലാളികൾ, കുട്ടികൾ ഉൾപ്പെടെ പരിക്കേറ്റിട്ടുണ്ട്. കടിയേറ്റവരെ എറണാകുളം മെഡിക്കൽ കോളജിൽ പ്രവേശിപ്പിച്ചു. ഇന്നലെ വൈകിട്ട് അഞ്ചിന് ചാത്തൻകുളം അക്വിഡറ്റ് ഭാഗത്തായിരുന്നു നായയുടെ ആക്രമണം. നായ ഓടിക്കൊണ്ടിരിക്കുന്നതിനിടയിലാണ് കാൽ നടക്കാരെ ആക്രമിച്ചത്.

ലോറി മേൽപ്പാലത്തിന് മുകളിൽ കുടുങ്ങി; ഗതാഗതക്കുരുക്കിൽപ്പെട്ട് റിഫൈനറി റോഡ്

തൃപ്പൂണിത്തുറ: ലോഡുമായി വന്ന ലോറി എസ്‌എൻ ജംഗ്ഷൻ മേൽപ്പാലത്തിന് മുകളിൽ വച്ച് ബ്രേക്ക്‌ ഡൗണായതിനെ തുടർന്ന് റിഫൈനറി റോഡിൽ അര മണിക്കൂറോളം ഗതാഗതം നിലച്ചു. വ്യാഴാഴ്ച്ച വൈകിട്ട് 6.15 ഓടെയാണ് ലോറി മേൽപ്പാലത്തിനു നടുവിലായി കുടുങ്ങിയത്. ഇതോടെ പിന്നിൽ വന്ന വാഹനങ്ങൾക്ക് പാലത്തിലൂടെ കടന്നു പോകാൻ പറ്റാതെ റോഡിൽ വാഹനങ്ങളുടെ നീണ്ട നിര രൂപപ്പെടുകയായിരുന്നു. ഇരുമ്പനം വിളക്ക് ജംഗ്ഷന് സമീപംവരെയും എസ്എൻ ജംഗ്ഷനു സമീപം വരെയും വാഹനങ്ങളുടെ നിര നീണ്ടു. പിന്നീട് ക്രെയിനെത്തിച്ച് ലോറി പിന്നിലേക്ക് മാറ്റിയാണ് ഗതാഗതം പുനഃസ്‌ഥാപിച്ചത്.

"ദീപിക നമ്മുടെ ഭാഷ പദ്ധതി' : എടത്തല ഗവ. ഹൈസ്കൂളിൽ ദീപിക നമ്മുടെ ഭാഷ പദ്ധതി

ആലുവ : എടത്തല ഗവ. ഹൈസ്കൂളിൽ "ദീപിക നമ്മുടെ ഭാഷ പദ്ധതി' ആരംഭിച്ചു. എടത്തല സഹകരണ ബാങ്ക് പ്രസിഡന്‍റ് കെ.എം. ഷംസുദീൻ ദീപിക പത്രം ഇ.എസ്. ശിവനന്ദൻ, റിൻഷാന ഫാത്തിമ എന്നീ വിദ്യാർഥികൾക്ക്‌ നൽകി പദ്ധതി ഉദ്ഘാടനം ചെയ്തു. പ്രധാനാധ്യാപിക എ.കെ. ഗിരിജ, പിടിഎ പ്രസിഡന്‍റ് ഹക്കിം, സ്കൂൾ സീനിയർ അസിസ്റ്റന്‍റ് ആർ. ഷാനി, പി.കെ. ജാസ്മിൻ, കുക്കു വർക്കി, ശാന്തി കൃഷ്ണൻ, ഏരിയ മാനേജർ ടി.എ. നിബിൻ എന്നിവർ സംസാരിച്ചു. എടത്തല സർവീസ് സഹകരണ ബാങ്ക് ആണ് സ്കൂളിൽ ദീപിക പത്രം സ്പോൺസർ ചെയ്തിരിക്കുന്നത്.

ടൂറിസം പദ്ധതി കടലാസിൽ : പെരിയാറിലെ പരുന്തുറാഞ്ചി മണപ്പുറം നശിക്കുന്നു

ബോബൻ ബി. കിഴക്കേത്തറ ആലുവ: പരിസ്ഥിതി സൗഹൃദ വിനോദ സഞ്ചാര പദ്ധതി പതിനാല് വർഷമായി കടലാസിൽ ഒതുങ്ങിയതോടെ പെരിയാറിലെ പരുന്തുറാഞ്ചി ചെറുദ്വീപ് നാശത്തിന്‍റെ വക്കിൽ. ആലുവ മണപ്പുറത്തെ ഹരിത വനവുമായി ബന്ധിപ്പിച്ച ബോട്ട് ജെട്ടിയും സ്റ്റേജുമെല്ലാം നിർമിച്ചെങ്കിലും ലക്ഷങ്ങൾ വെള്ളത്തിലായി. നിറയെ മണൽ പരന്ന് 40 ഏക്കറോളം വിസ്തീർണം ഉണ്ടായിരുന്ന ചെറു ദ്വീപിന്‍റെ മനോഹാരിത നിലനിർത്താൻ വിനോദ സഞ്ചാര ഭൂപടത്തിൽ ഉൾപ്പെടുത്തണമെന്നത് ദശാബ്ദങ്ങളായുള്ള ആവശ്യമാണ്. അതിനായി മാറി മാറി വരുന്ന മന്ത്രിമാർ വാഗ്ദാനങ്ങൾ നടത്താറുണ്ട്. 2010 ൽ ഒക്ടോബറിൽ അന്നത്തെ ടൂറിസം മന്ത്രിയായിരുന്ന കൊടിയേരി ബാലകൃഷ് ണനാണ് എക്കോ-ടൂറിസം പ്രോജക്റ്റ് പ്രഖ്യാപിച്ച് ആദ്യഘട്ട നിർമാണങ്ങൾക്ക് തുടക്കമിട്ടത്.എന്നാൽ പദ്ധതി മുന്നോട്ട് കൊണ്ടു പോകേണ്ട ജില്ലാ ടൂറിസം കൗൺസിൽ താത്പര്യം എടുത്തില്ല. ലക്ഷക്കണക്കിന് രൂപ മുടക്കി പരുന്ത് റാഞ്ചിയിൽ നിർമിച്ച സ്റ്റേജ് നശിച്ചുപോയി. കടവുകൾ കേന്ദ്രീകരിച്ച് അനധികൃതമായി മണൽ വാരിക്കൊണ്ടു പോയി. മേൽമണൽ തീർന്നപ്പോൾ മണൽത്തിട്ട തന്നെ ഇടിച്ചെടുത്ത് കടത്തി. സീപോർട്ട്-എയർപോർട്ട് ഭാഗമായി പെരിയാറിന് കുറുകെ പാലങ്ങൾ വന്നപ്പോൾ മണൽക്കടത്തിന് വേഗവും കൂടി. 2018ലെ പ്രളയം കഴിഞ്ഞപ്പോൾ പരുന്ത് റാഞ്ചിയിൽ മണലിന് പകരം ചെറുകാടുകളും പുൽപ്പരപ്പുകളും ചെളിയുമാണ്. നിലവിൽ 25 ഏക്കർ വരുന്ന ചെറു ദ്വീപ് നിലനിർത്താൻ സർക്കാർ ഇടപെടണമെന്നാണ് പ്രദേശവാസികൾ ആവശ്യപ്പെട്ടുന്നത്. ആലുവ മണപ്പുറത്തിനും മഹിളാലയം പാലത്തിനും നടുവിൽ വരുന്ന പരുന്ത് റാഞ്ചി മണപ്പുറം ചെങ്ങമനാട് പഞ്ചായത്തിന് കീഴിലാണ് വരുന്നത്. ദ്വീപിന്‍റെ മനോഹാരിത ആസ്വദിക്കാൻ വഞ്ചി വാടകയ്ക്ക് എടുത്ത് ചെറു സംഘങ്ങൾ എത്താറുണ്ട്. പോത്തുകളേയും പശുക്കളേയും ഇവിടേയ്ക്ക് ഉടമകൾ അഴിച്ചുവിടുന്നതിനാൽ അധികനേരം സന്ദർശകർക്ക് തങ്ങാനാവില്ല. എത്തിച്ചേരാൻ സൗകര്യമൊരുക്കുകയും പരുന്ത് റാഞ്ചി മണപ്പുറത്തെ ചുറ്റും കെട്ടി സംരക്ഷിക്കുകയും ചെയ്താൽ നല്ലൊരു ടൂറിസം കേന്ദ്രമാക്കി കേന്ദ്രമാക്കി മാറ്റുവാൻ സാധിക്കും. മറുകരയിലെ സംസ്ഥാന സീഡ് ഫാമിലേക്ക് സോളാർ ബോട്ട് എത്തിയിട്ടുണ്ട്. ഈ ഗതാഗത സംവിധാനം ചെങ്ങമനാട് പഞ്ചായത്തിലെ തുരുത്തിൽ നിന്ന് ഉപയോഗിച്ച് ആലുവയുടെ വിനോദ സഞ്ചാര സാധ്യത ഉപയോഗിക്കണമെന്നാണ് പ്രകൃതി സ്നേഹികൾ ആവശ്യപ്പെടുന്നത്.

അഭയഭവൻ അന്തേവാസി മരിച്ചു

പെരുന്പാവൂർ: കൊച്ചിൻ സിറ്റി വനിതാ പോലീസ് മുഖേന അഭയഭവനിൽ പ്രവേശിപ്പിച്ച ബിനോയ് റോസ്‌ലെറ്റ് (53) ഹൃദയാഘാതം മൂലം കളമശേരി മെഡിക്കൽ കോളജ് ആശുപത്രിയിൽ ചികിത്സയിലിരിക്കെ മരിച്ചു. മൃതദേഹം പെരുന്പാവൂർ താലൂക്ക് ആശുപത്രി മോർച്ചറിയിൽ. ഈ വ്യക്തിയെക്കുറിച്ച് എന്തെങ്കിലും വിവരങ്ങൾ അറിയുന്നവർ അഭയ ഭവനുമായി ബന്ധപ്പെടണം. ഫോണ്‍: 7558037295.

ദന്പതികൾ സഞ്ചരിച്ച സ്കൂട്ടറിൽ പിക്കപ്പ് വാനിടിച്ച് ഭർത്താവ് മരിച്ചു

കോതമംഗലം: ദന്പതികൾ സഞ്ചരിച്ച സ്കൂട്ടറിൽ പിക്കപ്പ് വാൻ ഇടിച്ച് ഗുരുതര പരിക്കേറ്റ് ചികിത്സയിലായിരുന്ന ഭർത്താവ് മരിച്ചു. ഭാര്യയ്ക്ക് ഗുരുതര പരിക്കേറ്റു. നാടുകാണി ഏറുന്പുറം നഗറിൽ വട്ടത്തറ വി.കെ. ഭാസി (68) ആണ് മരിച്ചത്. തിങ്കളാഴ്ച വൈകിട്ട് മലയിൻകീഴ് കുന്പളത്തുമുറി ബസ് കാത്തിരിപ്പ് കേന്ദ്രത്തിന് സമീപമായിരുന്നു അപകടം. ഭാര്യ അമ്മിണിയുമൊത്ത് സ്കൂട്ടറിൽ കോതമംഗലത്ത്നിന്ന് നാടുകാണിയിലേക്ക് വരവെ എതിർദിശയിൽനിന്നു വരികയായിരുന്ന പിക്കപ്പ് വാൻ ഇടിക്കുകയായിരുന്നു. ഇടിയുടെ ആഘാതത്തിൽ റോഡിലേക്ക് തെറിച്ചുവീണ ഭാസിയുടെ തലയ്ക്കും മുഖത്തും പരിക്കും കാലുകൾ വട്ടം ഒടിയുകയും മൂന്നു വാരിയെല്ലുകൾക്ക് പൊട്ടലേൽക്കുകയും ചെയ്തിരുന്നു. അമ്മിണിയുടെ ഇടുപ്പെല്ലിന് പൊട്ടലുണ്ട്. പരിക്കേറ്റ ഇരുവരെയും ഇടിച്ച വാഹനത്തിൽ തന്നെ കോതമംഗലത്തെ സ്വകാര്യ ആശുപത്രിയിൽ എത്തിച്ച് പ്രാഥമിക ചികിത്സ നൽകി. കോട്ടയം മെഡിക്കൽ കോളജ് ആശുപത്രിയിൽ ചികിത്സയിലിരിക്കെ ഇന്നലെ രാവിലെയാണ് ഭാസി മരിച്ചത്. ഊഞ്ഞാപ്പാറ കാഞ്ഞികുന്ന് ഭാഗത്ത് തട്ടുകട നടത്തിവരുകയായിരുന്നു ഭാസി. സംസ്കാരം ഇന്ന് നാലിന് വാക്കത്തിപ്പാറ എസ്‌സി ശ്മശാനത്തിൽ. മക്കൾ: ബാബു, ബൈജു.

നേര്യമംഗലം വനം റേഞ്ചിൽ വിത്തൂട്ട് പദ്ധതിക്ക് തുടക്കമായി

കോതമംഗലം: നേര്യമംഗലം വനം റേഞ്ചിൽ വിത്തൂട്ട് പദ്ധതിയുടെ ഉദ്ഘാടനവും വനമഹോത്സവ സമാപനവും ഇഞ്ചത്തൊട്ടി ഫോറസ്റ്റ് സ്റ്റേഷനിൽ നടന്നു. ആന്‍റണി ജോണ്‍ എംഎൽഎ ഉദ്ഘാടനം ചെയ്തു. കുട്ടന്പുഴ പഞ്ചായത്ത് വൈസ് പ്രസിഡന്‍റ് സൽമ പരീത് അധ്യക്ഷത വഹിച്ചു. മൂന്നാർ ഡിവിഷണൽ ഫോറസ്റ്റ് ഓഫീസർ എൻ.ടി. സിബിൻ പദ്ധതി വിശദീകരിച്ചു. ബ്ലോക്ക് പഞ്ചായത്തംഗങ്ങളായ കെ.കെ. ഗോപി, പി.എം. കണ്ണൻ, പഞ്ചായത്തംഗം മിനി മനോഹരൻ, സ്കൂൾ പ്രിൻസിപ്പൽ സി.എസ്. അജി എന്നിവർ പങ്കെടുത്തു.

‘ജോബ് ഫെയറുകൾ സംഘടിപ്പിക്കും'

നേര്യമംഗലം: നിർധന കുടുംബങ്ങളിൽനിന്നും മികച്ച മാർക്കോടെ വിജയം നേടുന്ന വിദ്യാർഥികൾക്കായി തെരഞ്ഞെടുത്ത കോളജുകളിൽ ജോബ് ഫെയറുകൾ സംഘടിപ്പിക്കാൻ താത്പര്യമെടുക്കുമെന്ന് ഡീൻ കുര്യാക്കോസ് എംപി. കോണ്‍ഗ്രസ് നേര്യമംഗലം മണ്ഡലം കമ്മറ്റിയുടെ നേതൃത്വത്തിൽ എസ്എസ്എൽസി, പ്ലസ്ടു പരീക്ഷകളിൽ ഉന്നത വിജയം നേടിയ വിദ്യാർഥികളെ അനുമോദിക്കുന്ന ചടങ്ങ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. കോണ്‍ഗ്രസ് മണ്ഡലം പ്രസിഡന്‍റ് ജോമോൻ ജോസ് അധ്യക്ഷത വഹിച്ചു. കെപിസിസി അംഗം എ.ജി. ജോർജ്, കോണ്‍ഗ്രസ് കവളങ്ങാട് ബ്ലോക്ക് പ്രസിഡന്‍റ് ബാബു ഏലിയാസ്, കോതമംഗലം ബ്ലോക്ക് പ്രസിഡന്‍റ് ഷമീർ പനക്കൽ, കവളങ്ങാട് പഞ്ചായത്ത് മുൻ പ്രസിഡന്‍റ് സൈജന്‍റ് ചാക്കോ, കർഷക കോണ്‍ഗ്രസ് സംസ്ഥാന ജനറൽ സെക്രട്ടറി പി.സി. ജോർജ് എന്നിവർ പ്രസംഗിച്ചു.

കെഎസ്ആർടിസി ബസിനു കല്ലെറിഞ്ഞ പ്രതി അറസ്റ്റിൽ

മൂവാറ്റുപുഴ: കേന്ദ്ര സർക്കാരിന്‍റെ തൊഴിൽ വിരുദ്ധനയങ്ങൾക്കെതിരെ സംയുക്ത ട്രേഡ് യൂണിയൻ ആഹ്വാനം ചെയ്ത അഖിലേന്ത്യാ പണിമുടക്കിൽ മൂവാറ്റുപുഴയിൽ കെഎസ്ആർടിസി ബസിന് നേരെ കല്ലെറിഞ്ഞ സംഭവത്തിൽ പ്രതി അറസ്റ്റിൽ. പുളിഞ്ചുവട് പാലത്തിങ്കൽ ഷുക്കൂറിനെ (55) ആണ് മൂവാറ്റുപുഴ പോലീസ് ഇൻസ്പെക്ടർ ബേസിൽ തോമസിന്‍റെ നേതൃത്വത്തിൽ അറസ്റ്റ് ചെയ്തത്. കെഎസ്ആർടിസി ഡ്രൈവർ നൽകിയ പരാതിയുടെ അടിസ്ഥാനത്തിൽ മൂവാറ്റുപുഴ പോലീസ് കേസ് രജിസ്റ്റർ ചെയ്തതിനെ തുടർന്നാണ് നടപടി. പ്രതികളെ ഇന്ന് മൂവാറ്റുപുഴ കോടതിയിൽ ഹാജരാക്കും.

മാധ്യമ പ്രവർത്തകനെ മർദ്ദിച്ച സംഭവത്തിൽ ഒരാൾ കസ്റ്റഡിയിൽ

മൂവാറ്റുപുഴ: ദൃശ്യങ്ങൾ പകർത്തുന്നതിനിടെ മാധ്യമ പ്രവർത്തകനെ മർദ്ദിച്ച സംഭവത്തിൽ ഒരാൾ കസ്റ്റഡിയിൽ. ഓട്ടോറിക്ഷ തൊഴിലാളിയായ മുടവൂർ മറ്റത്തിൽ രാജഗോപാലനെ (57) യാണ് പോലീസ് കസ്റ്റഡിയിലെടുത്തിരിക്കുന്നത്. മൂവാറ്റുപുഴയിലെ പ്രാദേശിക കേബിൾ ടിവി ചാനലിലെ റിപ്പോർട്ടർ അനൂപ് സത്യൻ (38)നാണ് പരിക്കേറ്റത്. അഖിലേന്ത്യ പണിമുടക്കുമായി ബന്ധപ്പെട്ട് വെള്ളൂർക്കുന്നത് വാഹനങ്ങൾ തടഞ്ഞ സമരാനുകൂലികൾക്കൊപ്പമുണ്ടായിരുന്ന ഇ‍യാൾ കെഎസ്ആർടിസി ബസിനുനേരെയുണ്ടായ കല്ലേറിന്‍റെ ദൃശ്യങ്ങൾ പകർത്തുന്നതിനിടെ മാധ്യമ പ്രവർത്തകനെ മർദിക്കുകയായിരുന്നു. സംഭവത്തിൽ പരിക്കേറ്റ അനൂപ് സത്യൻ മൂവാറ്റുപുഴയിലെ സ്വകാര്യ ആശുപത്രിയിൽ ചികിത്സതേടി.

കോതമംഗലത്ത് റാലിയും പൊതു സമ്മേളനവും നടത്തി

കോതമംഗലം: യുഡിഎഫ് തൊഴിലാളി സംഘടനകളുടെ നേതൃത്വത്തിൽ ദേശീയ പണിമുടക്കിനോടുബന്ധിച്ച് കോതമംഗലത്ത് റാലിയും പൊതുസമ്മേളനവും നടത്തി. ഡിസിസി ജനറൽ സെക്രട്ടറി അബു മൊയ്തീൻ ഉദ്ഘാടനം ചെയ്തു. ഐഎൻടിയുസി റീജണൽ പ്രസിഡന്‍റ് കെ.സി. മാത്യൂസ് അധ്യക്ഷത വഹിച്ചു. ഷെമീർ പനയ്ക്കൽ, ബാബു ഏലിയാസ്, ഇബ്രാഹിം കവലയിൽ, എം.എസ്. എൽദോസ്, ഭാനുമതി രാജു, ചന്ദ്രലേഖ ശശിധരൻ, സീതി മുഹമ്മദ്, അനസ് മൂവാറ്റുപുഴ, എംബി. സുഗതൻ, ബിനോയി സി. പുല്ലൻ, ബേസിൽ തണ്ണിക്കോട്ട്, ശശി കുഞ്ഞുമോൻ, കെ.ഇ. കാസിം, ജമാൽ കുന്പശേരി, കെ.വി. ആന്‍റണി, മുഹമ്മദ് ഇക്ബാൽ, ശ്രീരാജ്, യദു ജയൻ, തുടങ്ങിയവർ എന്നിവർ പ്രസംഗിച്ചു. കൂത്താട്ടുകുളത്ത് സമാധാനപരം കൂത്താട്ടുകുളം: സംയുക്ത ട്രേഡ് യൂണിയനുകൾ ആഹ്വാനം ചെയ്ത പണിമുടക്ക് കൂത്താട്ടുകുളത്ത് സമാധാനപരം. പണിമുടക്കിന്‍റെ ഭാഗമായി തൊഴിലാളികളുടെ നേതൃത്വത്തിൽ പ്രതിഷേധ പ്രകടനം നടന്നു. സിഐടിയു ജില്ലാ വൈസ് പ്രസിഡന്‍റ് പി.എസ്.മോഹനൻ ഉദ്ഘാടനം ചെയ്തു.

അഖിലേന്ത്യ പണിമുടക്ക് : മൂവാറ്റുപുഴയിൽ സംഘർഷം

മൂവാറ്റുപുഴ: കേന്ദ്ര സർക്കാരിന്‍റെ തൊഴിൽ വിരുദ്ധനയങ്ങൾക്കെതിരെ സംയുക്ത ട്രേഡ് യൂണിയൻ ആഹ്വാനം ചെയ്ത അഖിലേന്ത്യ പണിമുടക്കിൽ മൂവാറ്റുപുഴയിൽ സംഘർഷം. വെള്ളൂർക്കൂന്നത്ത് സമരാനുകൂലികൾ വഴിതടയാനെത്തിയതോടെയാണ് സംഘർഷത്തിനു തുടക്കം. വെള്ളൂർക്കുന്നം റോഡിന്‍റെ ഒരു ഭാഗം ക്രെയിൻ ഉപയോഗിച്ചും മറുഭാഗം സമരാനുകൂലികൾ ഒത്തുകൂടിയും വാഹനങ്ങൾ പൂർണമായും തടഞ്ഞു. വിമാനത്താവളത്തിലേക്കും, മരണാനന്തര ചടങ്ങുകളിലും പങ്കെടുക്കാൻ എത്തിയ വാഹനങ്ങൾ കൂടി തടഞ്ഞതോടെ നേരിയ തർക്കം ഉടലെടുത്തിരുന്നു. ഇതുവഴിയെത്തിയ കെഎസ്ആർടിസി ബസ് പ്രവർത്തകർ തടഞ്ഞ് തർക്കത്തിലേർപ്പെട്ടു. ഇതിനിടെയാണ് നിരവധി വാഹനങ്ങൾ വെള്ളൂർക്കുന്നം അന്പലത്തിനു മുന്നിലൂടെ റോഡിലൂടെ പോയത്. ഇക്കൂട്ടത്തിലൊരു കെഎസ്ആർടിസി ബസും പോകുന്നതറിഞ്ഞ് സമരാനുകൂലികൾ അലറി വിളിച്ചുകൊണ്ട് ഇടവഴിയിലേക്കെത്തി. സമരാനുകൂലികളിൽ ഒരാൾ കല്ലെറിഞ്ഞ് ബസിന്‍റെ ചില്ല് തകർക്കുകയും ഡ്രൈവറെയും കണ്ടക്ടറേയും കൈയേറ്റം ചെയ്തതായും പരാതിയുണ്ട്. കോഴിക്കോടു നിന്നും പാലായിലേക്ക് സർവീസ് നടത്തിയ കെഎസ്ആർടിസി ബസിന്‍റെ ചില്ലുകളാണ് തകർത്തത്. ഇതിനിടെ ചില്ല് തകർത്ത ദൃശ്യങ്ങളും മറ്റും പകർത്താനെത്തിയ മാധ്യമ പ്രവർത്തകനെ സമരാനുകൂലികളിലൊരാൾ അക്രമിച്ചു. അഖിലേന്ത്യ പണിമുടക്കിൽ നഗരത്തിലാകെ ഹർത്താൽ പ്രതീതിയായിരുന്നു ദൃശ്യമായിരുന്നത്. കടകന്പോളങ്ങളും പെട്രോൾ പന്പുകളും പൂർണമായും അടഞ്ഞു കിടന്നു. എന്നാൽ തുറന്നു പ്രവർത്തിച്ച ബാങ്ക്, ഹോട്ടൽ തുടങ്ങിയ ഏതാനും ചില സ്ഥാപനങ്ങൾ സമരാനുകൂലികൾ അടപ്പിച്ചു. കോലഞ്ചേരിയിൽ പണിമുടക്ക് പൂർണം കോലഞ്ചേരി: കോലഞ്ചേരിയിലും സമീപ പ്രദേശങ്ങളിലും ദേശീയ പണിമുടക്ക് പൂർണമായിരുന്നു. ബഹുഭൂരിഭാഗം വാണിജ്യ സ്ഥാപനങ്ങളും ഹോട്ടലുകളും കടകന്പോളങ്ങളും ഓഫീസുകളും പ്രവർത്തിച്ചില്ല. സ്വകാര്യ ബസുകൾ ഓടിയില്ലെങ്കിലും മൂവാറ്റുപുഴയിൽ നിന്നും എറണാകുളത്തേക്ക് കെഎസ്ആർടിസി വിരളമായി ഓടിയിരുന്നു. മെഡിക്കൽ കോളജ് സ്ഥിതി ചെയ്യുന്ന കോലഞ്ചേരി ടൗണിൽ ഓട്ടത്തിനായി എത്തിയ ഓട്ടോറിക്ഷകൾ സമരാനുകൂലികൾ പറഞ്ഞുവിട്ടു. കാറുൾപ്പെടുന്ന സ്വകാര്യ വാഹനങ്ങളും ടൂവീലറുകളും നിരത്തുകളിൽ പല സമയത്തും ഓടുന്നുണ്ടായിരുന്നു. കോലഞ്ചേരി പള്ളി പെരുന്നാളിനോടനുബന്ധിച്ച് പള്ളിയുടെ ചുറ്റളവിൽ സ്ഥിതി ചെയ്യുന്ന താത്കാലിക കടകൾ തുറന്നു പ്രവർത്തിച്ചു. ഇടത് പക്ഷ സംഘടനയുടെ നേതൃത്വത്തിൽ കോലഞ്ചേരിയിലും കോണ്‍ഗ്രസ് അനുകൂല സംഘടനകളുടെ നേതൃത്വത്തിൽ അന്പലമുഗളിലും രാവിലെ വിശദീകരണ യോഗങ്ങളും പ്രകടനവും നടത്തി.

പിഎസ് മിഷൻ ആശുപത്രി ദിനാഘോഷം

മരട്: പിഎസ് മിഷൻ ആശുപത്രിയുടെ 64-ാമത് ആശുപത്രി ദിനാഘോഷം തെരേസ്യൻ കർമലീത്താ സന്യാസി സമൂഹത്തിന്‍റെ സുപ്പീരിയർ ജനറൽ മദർ ഷഹില ഉദ്ഘാടനം ചെയ്തു. പ്രൊവിൻഷ്യാൾ സുപ്പീരിയർ സിസ്റ്റർ പേഴ്സി, ഇടവക വികാരി ഫാ. ഷൈജു തോപ്പിൽ, പ്രൊവിൻഷ്യാൾ കൗൺസിലർ സിസ്റ്റർ ഡോ. ശാലിനി, ഡയറക്ടർ സിസ്റ്റർ ഡോ. ആനി ഷീല, ഡോ.(ലഫ്.കേണൽ) മാത്യു ജോർജ്, ആൻ തോമസ്, ഡോ. വിദ്യേശ്വരി തുടങ്ങിയവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]