മുന്‍ എംഎല്‍എ എം. നാരായണന്‍ അന്തരിച്ചു
Wednesday, August 6, 2025 1:37 AM IST
കാഞ്ഞങ്ങാട്: മുന്‍ എംഎല്‍എയും സിപിഐ നേതാവുമായ എം. നാരായണന്‍ (73) അന്തരിച്ചു. വാര്‍ധക്യസഹജമായ അസുഖത്തെതുടര്‍ന്ന് കോഴിക്കോട് മെഡിക്കല്‍ കോളജില്‍ ചികിത്സയിലായിരുന്നു. 1991 മുതല്‍ 1996 വരെയും 1996 മുതല്‍ 2001 വരെയും ഹൊസ്ദുര്‍ഗ് നിയോജകമണ്ഡലം (ഇപ്പോഴത്തെ കാഞ്ഞങ്ങാട് നിയോജകമണ്ഡലം) എംഎല്‍എയായിരുന്നു.
18 വര്‍ഷം പോസ്റ്റുമാനായി ജോലി ചെയ്തിരുന്ന നാരായണന്‍ ജോലി രാജിവെച്ച ശേഷമാണ് സജീവരാഷ്ട്രീയത്തിലേക്കിറങ്ങുന്നത്. സിപിഐ ജില്ലാ കൗണ്‍സില്‍ അംഗം, കാഞ്ഞങ്ങാട് മണ്ഡലം സെക്രട്ടറി, കര്‍ഷക തൊഴിലാളി ഫെഡറേഷന്‍ സംസ്ഥാന സെക്രട്ടറി, ജില്ലാ സെക്രട്ടറി, ആദിവാസി മഹാസഭ സംസ്ഥാന സെക്രട്ടറി, ബികെഎംയു ജില്ലാ പ്രസിഡന്‍റ് എന്നീ നിലകളില്‍ പ്രവര്‍ത്തിച്ചിട്ടുണ്ട്. 2015-20 കാലയളവില്‍ കാസര്‍ഗോഡ് ജില്ലാ പഞ്ചായത്തംഗമായിരുന്നു.
എളേരി സ്വദേശിയായ നാരായണന്‍ എംഎല്‍എ ആയതിനുശേഷം മടിക്കൈ ബങ്കളത്തേക്കു താമസം മാറി. മുന്‍ ഹൊസ്ദുര്‍ഗ് എംഎല്‍എയും സിപിഐ ജില്ലാ കൗണ്‍സില്‍ അംഗവുമായ എം. കുമാരന്‍ സഹോദരനാണ്. പരേതരായ മാവുവളപ്പില്‍ ചന്തന്‍റെയും വെള്ളച്ചിയുടേയും മകനാണ്. ഭാര്യ: കെ.എം.സരോജിനി (റിട്ട. ആരോഗ്യവകുപ്പ് ജീവനക്കാരി).
മക്കള്‍: എന്‍. ഷീന (ഹെല്‍ത്ത് ഇന്‍സ്‌പെക്ടര്‍, കാസര്‍ഗോഡ് നഗരസഭ), ഷിംജിത്ത് (ഫോക്‌ലോര്‍ പരിശീലകന്‍, നാടന്‍പാട്ട് കലാകാരന്‍), ഷീബ. മരുമക്കള്‍: സുരേഷ്, രജനി (കയ്യൂര്‍), ഗോപാലന്‍. മറ്റു സഹോദരങ്ങള്‍: മാധവന്‍ (റിട്ട.സി പിസിആര്‍ഐ), കുഞ്ഞമ്പു (റിട്ട. ഫിഷറീസ്), പരേതരായ രാമന്‍, കണ്ണന്‍ (റിട്ട. സിപിസിആര്‍ഐ), ചിരുകണ്ഠന്‍, രാഘവന്‍, ബാലന്‍, കുഞ്ഞിരാമന്‍.