ഡാറ്റ അനലിറ്റിക്സ് ഇന്നൊവേഷൻ ലാബ് ഉദ്ഘാടനം ചെയ്തു
Thursday, July 10, 2025 5:48 AM IST
കാഞ്ഞിരപ്പള്ളി: അമൽ ജ്യോതി എൻജിനിയറിംഗ് കോളജും ഷിക്കാഗോയിലെ (അമേരിക്ക) എംഹസ്റ്റ് യൂണിവേഴ്സിറ്റിയുമായി സഹകരിച്ച് അത്യാധുനിക ഡാറ്റ അനലിറ്റിക്സ് ഇന്നൊവേഷൻ ലാബ് എംഹസ്റ്റ് യൂണിവേഴ്സിറ്റിയിൽ ആരംഭിച്ചു.
എംഹസ്റ്റ് യൂണിവേഴ്സിറ്റി കാമ്പസിൽ നടന്ന ചടങ്ങിൽ അമൽ ജ്യോതി കോളജ് രക്ഷാധികാരി ബിഷപ് മാർ ജോസ് പുളിക്കൽ, എംഹസ്റ്റ് യൂണിവേഴ്സിറ്റി പ്രസിഡന്റ് ഡോ. ട്രോയ് വാങ്കെൻ, ഷിക്കാഗോ രൂപത ബിഷപ് മാർ ജോയ് ആലപ്പാട്ട്, അമൽ ജ്യോതി കോളജ് മാനേജർ ഫാ. ബോബി അലക്സ് മണ്ണംപ്ലാക്കൽ, എംഹസ്റ്റ് യൂണിവേഴ്സിറ്റി കംപ്യൂട്ടർ സയൻസ് ആൻഡ് ഇൻഫർമേഷൻ സിസ്റ്റംസ് വകുപ്പ് മേധാവി ഡോ. ജയിംസ് കുളിച്ച്, ടാബോർ ഇൻഫോടെക്ക് ഡയറക്ടർ ഡോ. ജോബി ഏബ്രഹാം തുടങ്ങിയവർ പ്രസംഗിച്ചു.
അമൽ ജ്യോതിയിലെ കംപ്യൂട്ടർ സയൻസ് വിഭാഗം കുട്ടികൾക്ക് ഇന്റർനാഷണൽ ലെവലിലുള്ള പ്രോജക്ടുകൾ ചെയ്യാനും ഇന്റേൺഷിപ് ചെയ്യാനും ഇതുവഴി സാധിക്കും. ഇരു സ്ഥാപനങ്ങളിലെയും അധ്യാപകർക്കും വിദ്യാർഥികൾക്കും ഗവേഷണത്തിനും പ്രോജക്ടുകൾക്കും പഠനത്തിനും പരസ്പരം സഹകരണം സാധിക്കുന്ന വിധത്തിലാണു പ്രവർത്തനം. എംഹസ്റ്റ് യൂണിവേഴ്സിറ്റിയിലെ അധ്യപകരും ടാബോർ ഇൻഫോടെക്കിലെ സോഫ്റ്റ്വേർ എൻജിനിയർമാരും കുട്ടികൾക്കു പരിശീലനം നൽകും.
മാസ്റ്റർ ഓഫ് സയൻസ് (ഡാറ്റ അനലിറ്റിക്സ്) പ്രോഗ്രാം വഴി കുട്ടികൾക്ക് ആദ്യ വർഷം അമൽ ജ്യോതിയിലും രണ്ടാം വർഷം അമേരിക്കയിലും പഠനം നടത്താം. പഠനത്തിനുശേഷം മൂന്നു വർഷം സ്റ്റേ ബാക്കും ഉണ്ടാകും. ബിടെക്, എംസിഎ, എംഎസ്സി കഴിഞ്ഞവർക്ക് എംഎസ് ഡാറ്റ അനലിറ്റിക്സ് കോഴ്സിനു ചേരാം.
ആദ്യ വർഷം കഴിഞ്ഞു പഠനം നിർത്തുന്നവർക്കു പോസ്റ്റ് ഗ്രാജുവേറ്റ് സർട്ടിഫിക്കറ്റ് ഇൻ ആർട്ടിഫിഷൽ ഇന്റലിജൻസ് ആൻഡ് ഡാറ്റാ സയൻസ് സർട്ടിഫിക്കറ്റ് നൽകും. ആദ്യ വർഷം ടോഫെൽ, ഐഇൽറ്റിഎസ് പോലുള്ള ഇംഗ്ലീഷ് ടെസ്റ്റുകൾക്കുള്ള പരിശീലനവും ഉണ്ടാകും. ആദ്യ ബാച്ചിൽ അമേരിക്കൻ വീസ ലഭിച്ച കുട്ടികളാണ് എംഹസ്റ്റ് യൂണിവേഴ്സിറ്റിയിലുള്ള പ്രവർത്തനങ്ങൾക്കു നേതൃത്വം നൽകുന്നത്. രണ്ടാമത് ബാച്ച് അടുത്ത മാസം ആരംഭിക്കും.
എംഹസ്റ്റ് യൂണിവേഴ്സിറ്റി, കംപ്യൂട്ടർ സയൻസ് ആൻഡ് ഇൻഫർമേഷൻ സിസ്റ്റംസ് വകുപ്പ് മേധാവി ഡോ. ജയിംസ് കുളിച്ച്, അമൽ ജ്യോതി എൻജിനിയറിംഗ് കോളജ് കംപ്യൂട്ടർ സയൻസ് ആൻഡ് എൻജിനിയറിംഗ് മേധാവി ഡോ. ജൂബി മാത്യു, എംഹസ്റ്റ് യൂണിവേഴ്സിറ്റിയിലെ പ്രഫസറും ടാബോർ ഇൻഫോടെക്ക് ഡയറക്ടറുമായ ഡോ. ജോബി ഏബ്രഹാം എന്നിവരാണ് കോഴ്സുകൾക്കു നേതൃത്വം നൽകുന്നത്.