തനിക്കു പേഴ്‌സണല്‍ മാനേജരില്ലെന്ന് ഉണ്ണി മുകുന്ദന്‍
Friday, July 11, 2025 2:17 AM IST
കൊച്ചി: സമൂഹമാധ്യമങ്ങളിലൂടെ പ്രചരിക്കുന്ന വ്യാജവാര്‍ത്തകളില്‍ പ്രതികരണവുമായി നടന്‍ ഉണ്ണി മുകുന്ദന്‍. തന്നെ പ്രതിനിധീകരിക്കുന്ന ഒരു പേഴ്‌സണല്‍ മാനേജര്‍ ഇല്ലെന്നും ഒരിക്കലും ഉണ്ടായിട്ടില്ലെന്നും ഉണ്ണി മുകുന്ദൻ അറിയിച്ചു.
എല്ലാ ഔദ്യോഗിക ആശയവിനിമയങ്ങളും സഹകരണങ്ങളും പ്രഫഷണല്‍ കാര്യങ്ങളും താന്‍ നേരിട്ടോ അല്ലെങ്കില്‍ സ്വന്തം നിര്‍മാണക്കമ്പനിയായ ഉണ്ണി മുകുന്ദന്‍ ഫിലിംസ് (യുഎംഎഫ്) വഴിയാണു കൈകാര്യം ചെയ്യുന്നതെന്നും സമൂഹമാധ്യമങ്ങളില്‍ പങ്കുവച്ച കുറിപ്പില്‍ താരം വ്യക്തമാക്കി.
തെറ്റായ അവകാശവാദങ്ങള്‍ പ്രചരിപ്പിക്കുന്നത് തുടരുന്നതു കണ്ടാല്‍ കര്‍ശനമായ നിയമനടപടി സ്വീകരിക്കുമെന്നും ഉണ്ണി മുകുന്ദന്‍ വ്യക്തമാക്കി. കൊച്ചിയില്‍ എംഡിഎംഎയുമായി പിടിയിലായ യുവതി ഉണ്ണി മുകുന്ദന്‍റെ മാനേജരാണെന്ന തരത്തിലായിരുന്നു സമൂഹമാധ്യമങ്ങളില്‍ പ്രചരണം നടന്നത്.