മേഖലാ കൺവൻഷനും ഐഡി കാർഡ് വിതരണവും നടത്തി

ചെറുപുഴ: കേരളാ റിയൽ എസ്റ്റേറ്റ് ഏജന്‍റ്സ് അസോസിയേഷൻ ചെറുപുഴ മേഖലാ കൺവൻഷനും ഐഡി കാർഡ് വിതരണവും നടന്നു. ചെറുപുഴ മേഖലാ ഓഫീസിൽ യുഡിഎഫ് കണ്ണൂർ ജില്ലാ ചെയർമാൻ പി.ടി. മാത്യു ഉദ്ഘാടനം ചെയ്തു.

ഐഡി കാർഡുകളും വിതരണം ചെയ്തു. ചെറുപുഴ മേഖലാ പ്രസിഡന്‍റ് തങ്കച്ചൻ വെള്ളറക്കൽ അധ്യക്ഷത വഹിച്ചു.

ജിൻസ് മാത്യു, ജിജി ചാക്കോ, സിനു അരീക്കൽ, ഷിജു തോട്ടിങ്കൽ, കെ.എം. ഗോപി തുടങ്ങിവർ പ്രസംഗിച്ചു.

ADVERTISEMENT

അഞ്ച് വർഷംകൊണ്ട് അരലക്ഷത്തിലേറെ കുടുംബങ്ങളെ അതിദാരിദ്ര്യത്തിൽനിന്ന് മോചിപ്പിച്ചു: മന്ത്രി എം.ബി.രാജേഷ്

കണ്ണൂർ: അഞ്ചുവർഷംകൊണ്ട് സംസ്ഥാനത്തെ 52,635 കുടുംബങ്ങളെ അതിദാരിദ്ര്യത്തിൽ നിന്ന് മോചിപ്പിക്കാൻ സർക്കാരിനായെന്ന് മന്ത്രി എം.ബി. രാജേഷ് പറഞ്ഞു. ജില്ലാ പഞ്ചായത്ത് ഓഡിറ്റോറിയത്തിൽ നടന്ന ചടങ്ങിൽ കണ്ണൂർ ജില്ലയെ അതിദാരിദ്ര്യമുക്തമായി പ്രഖ്യാപിച്ച് പ്രസംഗിക്കുകയായിരുന്നു മന്ത്രി. 2021ൽ ചുമതലയേറ്റ സംസ്ഥാന സർക്കാർ ആദ്യമെടുത്ത തീരുമാനം സംസ്ഥാനത്തെ അതിദാരിദ്ര്യത്തിൽനിന്ന് മുക്തമാക്കുക എന്നതായിരുന്നു. ഇതിനായി സർവേ നടത്തി 64,006 കുടുംബങ്ങളെ കണ്ടെത്തി. ഓരോ കുടുംബങ്ങൾക്കും ദാരിദ്ര്യമുക്തിക്കായി പ്രത്യേക മൈക്രോപ്ലാനുകൾ തയാറാക്കി. അഞ്ച് വർഷം കൊണ്ട് 94.47 ശതമാനം പേരെയും അതിദാരിദ്ര്യത്തിൽനിന്ന് കരകയറ്റാനായെന്നും മന്ത്രി പറഞ്ഞു. കേരളത്തിൽ മുൻഗണന ജനങ്ങളുടെ പ്രശ്‌നങ്ങൾക്കും മനുഷ്യരുടെ ജീവിതത്തെ എങ്ങനെ മെച്ചപ്പെടുത്താം എന്നതിനുമാണ്. ഇത്തരത്തിൽ കേരളം ഇന്ത്യയ്ക്ക് ഒരു മാതൃകയാണ്. രാജ്യത്ത് ആദ്യമായി ഒരു സംസ്ഥാനം അതിദാരിദ്ര്യ മുക്തമായി പ്രഖ്യാപിക്കാൻ ഒരുങ്ങുകയാണ്. സർക്കാരും സംവിധാനങ്ങളും ഏകോപിതമായി പ്രയത്‌നിച്ചാണ് ഈ നേട്ടം കൈവരിച്ചത്. ലോകത്ത് ചൈന കഴിഞ്ഞാൽ ഈ നേട്ടം കൈവരിക്കുന്ന ആദ്യപ്രദേശമാണ് കേരളം എന്നത് ലോകത്തിന് കൂടി മാതൃകയാകുന്നുവെന്ന് മന്ത്രി പറഞ്ഞു. മന്ത്രി കടന്നപ്പള്ളി രാമചന്ദ്രൻ അധ്യക്ഷനായി. ജില്ലാ കളക്‌ടർ അരുൺ കെ.വിജയൻ റിപ്പോർട്ട് അവതരിപ്പിച്ചു. എംഎൽഎമാരായ കെ.കെ. ശൈലജ, കെ. വി. സുമേഷ്, ജില്ലാ പഞ്ചായത്ത് പ്രസിഡന്‍റ് കെ.കെ രത്‌നകുമാരി, വൈസ് പ്രസിഡന്‍റ് ബിനോയ് കുര്യൻ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്‌സൺ വി.കെ. സുരേഷ് ബാബു, പൊതുമരാമത്ത് സ്ഥിരം സമിതി ചെയർപേഴ്‌സൺ ടി. സരള, എൽഎസ്ജിഡി ജില്ലാ ജോയിന്‍റ് ഡയറക്ടർ ടി.ജെ. അരുൺ, ആസൂത്രണ സമിതി അംഗം കെ.വി. ഗോവിന്ദൻ, ഗ്രാമപഞ്ചായത്ത് അസോസിയേഷൻ ജില്ലാ പ്രസിഡന്‍റ് എം. ശ്രീധരൻ, ബ്ലോക്ക് പഞ്ചായത്ത് അസോസിയേഷൻ ജില്ലാ പ്രസിഡന്‍റ് പി.പി. ഷാജിർ, ജില്ലാ പ്ലാനിംഗ് ഓഫീസർ നെനോജ് മേപ്പടിയത്ത്, ജില്ലാ സാമൂഹ്യ നീതി ഓഫീസർ പി. ബിജു തുടങ്ങിയവർ പങ്കെടുത്തു.

പി. ബാലകൃഷ്ണന്‍ നായര്‍ക്ക് രാഷ്‌ട്രപതിയുടെ പോലീസ് മെഡല്‍

കാസര്‍ഗോഡ്: കണ്ണൂര്‍, കാസര്‍ഗോഡ് ക്രൈംബ്രാഞ്ച് എസ്പി പി. ബാലകൃഷ്ണന്‍ നായര്‍ക്ക് രാഷ്ട്രപതിയുടെ പോലീസ് മെഡല്‍. 2003ല്‍ എസ്‌ഐ ആയി പോലീസ് സേനയില്‍ ചേര്‍ന്ന ബാലകൃഷ്ണ്‍നായര്‍ പരിശീലനത്തിനു ശേഷം എറണാകുളം, കൊല്ലം, കണ്ണൂര്‍ എന്നീ ജില്ലകളില്‍ എസ്‌ഐയായി സേവനമനുഷ്ടിച്ചു. 2008 ല്‍ സര്‍ക്കിള്‍ ഇന്‍സ്പെക്ടര്‍ ആയി വെള്ളരിക്കുണ്ട്, കണ്ണൂര്‍ ടൗണ്‍, കണ്ണൂര്‍ സിറ്റി, വളപട്ടണം, കാസര്‍ഗോഡ് എന്നീ സര്‍ക്കിളുകളിലും വിജിലന്‍സിലും ജോലി ചെയ്തു. തുടര്‍ന്ന് 2017 ല്‍ ഡിവൈഎസ്പി ആയി സ്റ്റേറ്റ് സ്‌പെഷല്‍ ബ്രാഞ്ചിലും കാസര്‍ഗോഡ്, കാഞ്ഞങ്ങാട്, തളിപ്പറമ്പ്, കണ്ണൂര്‍ ടൗണ്‍ എന്നീ സബ്ഡിവിഷനുകളിലും ജോലി ചെയ്തു. തുടര്‍ന്ന് 2004 ജൂലൈ മുതല്‍ കാസര്‍ഗോഡ് അഡിഷണല്‍ എസ്പിയായി ജോലി ചെയ്തുവരവേ 2025 ജൂണ്‍ മാസം എസ്പി ആയി പ്രമോഷന്‍ ലഭിച്ചു. സര്‍വീസില്‍ ഇതു വരെ മികച്ച സേവനത്തിനു മൂന്നു ബാഡ്ജ് ഓഫ് ഓണറും നൂറിലധികം ഗുഡ് സര്‍വീസ് എന്‍ട്രികളും ഉന്നത ഉദ്യോഗസ്ഥരില്‍ നിന്നും 22 പ്രശംസപത്രവും ലഭിച്ചിട്ടുണ്ട്. വിശിഷ്ട സേവനത്തിനുള്ള മുഖ്യമന്ത്രിയുടെ പോലീസ് മെഡല്‍ 2018 ല്‍ ലഭിച്ചിട്ടുണ്ട്. വിജിലന്‍സിലെ മികച്ച സേവനത്തിനു 2016 വര്‍ഷത്തിലെ ബാഡ്ജ് ഓഫ് ഓണര്‍ ലഭിച്ചു. ഇന്‍റലിജിന്‍സ് രംഗത്തെ മികച്ച സേവനത്തിനു 2017ലും 2018 ലും തുടര്‍ച്ചയായി ബാഡ്ജ് ഓഫ് ഓണര്‍ ലഭിച്ചിട്ടുണ്ട്. സര്‍വീസ് കാലയളവില്‍ പ്രമാദമായ നിവധികേസുകള്‍ക്ക് തുമ്പുണ്ടാക്കിയിട്ടുണ്ട് വെള്ളരിക്കുണ്ട് എസ്‌ഐ ആയിരിക്കെ ചിറ്റാരിക്കാല്‍, രാജപുരം, വെള്ളരിക്കുണ്ട് എന്നീ സ്റ്റേഷനുകളില്‍ നിന്നും റിപ്പോര്‍ട്ട് ചെയ്യപ്പെട്ട മൂന്നു കൊലപാതകകേസുകളിലും പ്രതികള്‍ക്ക് ജീവപര്യന്തം തടവുശിക്ഷ ലഭിച്ചിട്ടുണ്ട്. കാസര്‍ഗോഡ് ജില്ലയില്‍ കഴിഞ്ഞ 30 വര്‍ഷത്തിനിടയില്‍ റിപ്പോര്‍ട്ട് ചെയ്യപ്പെട്ട 11 വര്‍ഗീയ കൊലപാതക കേസുകളില്‍ ആദ്യമായി പ്രതികളെ ശിക്ഷിച്ചത് ബാലകൃഷ്ണന്‍ നായര്‍ അന്വേഷണം നടത്തിയ കേസിലാണ് പ്രമാദമായ നിരവധി മോഷണകേസുകള്‍ കണ്ടെത്തിയ സംഘത്തിലെ അംഗമായിരുന്നു. ബേക്കല്‍ പോലീസ് സ്റ്റേഷന്‍ പരിധിയില്‍ 2010 ല്‍ മാരുതി ഫിനാന്‍സ് എന്ന സ്ഥാപനത്തില്‍ 111 പവന്‍ സ്വര്‍ണം കവര്‍ന്നു രക്ഷപ്പെട്ട കുപ്രസിദ്ധ കുറ്റവാളികള്‍ ആയിരുന്ന കാലിയ റഫീഖ്, ടി.എച്ച്.റിയാസ്, ഗുജ്രി അമ്മി, അട്ടഗോളി ആസിഫ് എന്നിവര്‍ അടങ്ങിയ സംഘത്തെ പിടികൂടിയത് ഇദ്ദേഹത്തിന്‍റെ നേതൃത്വത്തിലാണ്. കണ്ണൂര്‍ എസിപി ആയി ജോലി ചെയ്തു വരവേ കണ്ണപുരം പോലീസ് സ്റ്റേഷന്‍ പരിധിയില്‍ നിന്നും ഒരേ ദിവസം മൂന്ന് എടിഎം മെഷീനുകള്‍ കുത്തിതുറന്നു ലക്ഷക്കണക്കിന് രൂപ കവര്‍ച്ചു ചെയ്തു ഹരിയാനയിലേക്ക് രക്ഷപ്പെടുകയായിരുന്ന കപ്രസദ്ധരായ കവര്‍ച്ചാസംഘത്തെ പിടികൂടിയ പ്രത്യേക അന്വേഷണ സംഘത്തിന്‍റെ തലവന്‍ ആയിരുന്നു. കേരളം, കര്‍ണാടക, തമിഴ്‌നാട് എന്നീ സംസ്ഥാനങ്ങളില്‍ 75 ല്‍ അധികം മോഷണ കേസില്‍ പ്രതിയായി 20 വര്‍ഷത്തിലധികമായി ഒളിവില്‍ കഴിയുകയായിരുന്ന മടിക്കേരി ഇബ്രാഹിമിനെ പിടികൂടിയത് ഇദ്ദേഹത്തിന്‍റെ നേതൃത്വത്തിലുള്ള സംഘമാണ്. വിജിലന്‍സില്‍ ജോലി ചെയ്തു വരവേ ഉദ്യോഗസ്ഥ തലത്തിലുള്ള നിരവധി അഴിമതികള്‍ കണ്ടെത്തുന്നതിന് നേതൃത്വ നല്‍കി. റോഡ് വര്‍ക്കുമായി ബന്ധപ്പെട്ടു ഉദ്യോഗസ്ഥരും കരാറുകാരും തമ്മിലുള്ള അവിശുദ്ധ കൂട്ടുകെട്ട് ഇല്ലാതാക്കാന്‍ ഇവര്‍ക്കതിരെ വിജിലന്‍സ് കേസ് രജിസ്റ്റര്‍ ചെയ്തു ശക്തമായ നടപടികള്‍ സ്വീകരിച്ചു. വിജിലന്‍സില്‍ ആയിരിക്കെ അന്വേഷിച്ച ട്രാപ്പ് കേസില്‍ പ്രതികള്‍ക്കു ശിക്ഷ വാങ്ങിച്ചു കൊടുത്തു. കാഞ്ഞങ്ങാട് സബ്ഡിഷനില്‍ ഏറ്റവും കൂടുതല്‍ ഹവാല പണം പിടികൂടിയത് ബാലകൃഷ്ണന്‍ നായര്‍ ഡിവൈഎസ്പി ആയ സമയത്താണ്.പോലീസും ജനങ്ങളും ഒത്തു ചേര്‍ന്നുള്ള നിരവധി ജനമൈത്രി പ്രവര്‍ത്തങ്ങള്‍ക്ക് ബാലകൃഷ്ണന്‍ നായര്‍ നേതൃത്വം നല്‍കി. കാഞ്ഞങ്ങാട് ഡിവൈഎസ്പി ആയിരിക്കെ ഒരു ഗ്രാമത്തെ മുഴുവന്‍ ലഹരി മുക്തമാക്കി മാറ്റാനുള്ള ശ്രമത്തിന്റെ ഭാഗമായി ലഹര മുക്ത കൊളവയല്‍ പദ്ധതി ആരംഭിച്ചു നടപ്പാക്കി. ഈ പദ്ധതി നടപ്പാക്കിയതിന് എക്‌സൈസ് വകുപ്പ് മന്ത്രിയുടെ പ്രത്യേക അഭിനന്ദനം ലഭിച്ചിട്ടുണ്ട്. ഉദുമ പാലക്കുന്നിലെ പരേതരായ മുങ്ങത്ത് നാരായണ്‍ നായരുടെയും ലീലയുടെയും മകനാണ്. ഭാര്യ: നിഷ. മക്കള്‍: ശിവദ, കാര്‍ത്തിക്.

കണ്ണൂര്‍ ആസ്റ്റര്‍ മിംസില്‍ രണ്ടാമത്തെ അഡ്വാന്‍സ്ഡ് എംആര്‍ഐ യൂണിറ്റ് പ്രവര്‍ത്തനം ആരംഭിച്ചു

കണ്ണൂര്‍: രോഗനിര്‍ണയ സംവിധാനങ്ങളില്‍ കൂടുതല്‍ സൗകര്യങ്ങള്‍ ഉള്‍പ്പെടുത്തിക്കൊണ്ട് കണ്ണൂര്‍ ആസ്റ്റര്‍ മിംസില്‍ രണ്ടാമത്തെ അഡ്വാന്‍സ്ഡ് എംആര്‍ഐ യൂണിറ്റ് പ്രവര്‍ത്തനം ആരംഭിച്ചു. വളരെ ചുരുങ്ങിയ സമയത്തിനുള്ളിൽ സ്കാനിംഗ് പൂർത്തിയാക്കാനും ഹൃദയം, കരൾ, സന്ധികൾ, ന്യൂറോ, സ്തനങ്ങൾ എന്നിവയുടേത് ഉൾപ്പെടെയുള്ള ദൃശ്യങ്ങൾ ഏറ്റവും മികച്ച രീതിയിൽ ലഭ്യമാക്കാനും സാധിക്കുമെന്നതും കുറഞ്ഞ അളവിലുള്ള കോൺട്രാസ്റ്റിന്‍റെ ഉപയോഗം മാത്രമേ ആവശ്യമായി വരുന്നുള്ളൂവെന്നതും സവിശേഷതകളാണ്. അപകടങ്ങളില്‍ ഉള്‍പ്പെടെ അടിയന്തര രോഗനിര്‍ണയം ആവശ്യമായി വരുന്ന സന്ദര്‍ഭങ്ങളില്‍ സമയനഷ്ടമില്ലാതെ ചികിത്സയ്ക്ക് യൂണിറ്റ് യാഥാര്‍ഥ്യമാകുന്നതോടെ സാധ്യമാകുമെന്ന് ഉദ്ഘാടനം നിര്‍വഹിച്ചുകൊണ്ട് കണ്ണൂർ റേഞ്ച് ഡിഐജി യതീഷ് ചന്ദ്ര പറഞ്ഞു. കൂടുതല്‍ മികവുറ്റതും ലോകോത്തര നിലവാരമുള്ളതും രോഗീസൗഹൃദമായ അന്തരീക്ഷം നിലനിര്‍ത്തുന്നതുമാണ് പുതിയ യൂണിറ്റെ കണ്ണൂര്‍ ആസ്റ്റര്‍ മിംസ് സിഒഒ ഡോ. അനൂപ് നമ്പ്യാര്‍ പറഞ്ഞു. റേഡിയോളജി വിഭാഗം മേധാവി ഡോ.വരദരാജ് , ഡോ. ദീപ, ഡോ. തുഷാര, ആസ്റ്റർ മിംസ് ഡെപ്യൂട്ടി സിഎംഎസ് ഡോ. അമിത് ശ്രീധരൻ, ഡോ.മുരളിഗോപാൽ തുടങ്ങിയവർ പങ്കെടുത്തു.

മുദ്രാകിരണം സിവിൽ സർവീസ് വിദ്യാർഥികളുമായി സംവദിച്ച് ഡോ. ദിവ്യ എസ്. അയ്യർ

കണ്ണൂർ: തന്‍റെ ഐഎഎസ് യാത്രയുടെ വിവിധ ഘട്ടങ്ങൾ കുട്ടികളുമായി പങ്കുവച്ച് പത്തനംതിട്ട മുൻ കളക്ടറും കേരള ഖരമാലിന്യ പരിപാലന പദ്ധതി പ്രോജക്ട് ഡയറക്ടറുമായ ഡോ. ദിവ്യ എസ് അയ്യർ. മുദ്രാകിരണം സിവിൽ സർവീസ് പരീശീലന പരിപാടിയുടെ ഭാഗമായി മുണ്ടേരി ഗവ. ഹയർ സെക്കൻഡറി സ്‌കൂളിലെ സിവിൽ സർവീസ് പരിശീലനത്തിൽ പങ്കെടുക്കുന്ന വിദ്യാർഥികളുമായാണ് അവർ സംവദിച്ചത്. ഐഎഎസ് പരിശീലനം ഭാരതത്തിന്‍റെ ഹൃദയത്തിലേക്കുള്ള യാത്രയാണെന്ന് അവർ പറഞ്ഞു. ജീവിതത്തിന്‍റെ വിവിധ ഘട്ടങ്ങൾ നേരിടാൻ വിദ്യാർഥികൾ തയാറാകണം. സ്‌കൂൾ കാലയളവിൽ അധ്യാപകരും എംബിബിഎസിന് പഠനകാലത്ത് രോഗികളുമായിരുന്നു കരുത്ത്. മുദ്ര വിദ്യാഭ്യാസ സമിതി ചെയർമാൻ കെ.കെ രാഗേഷ് അധ്യക്ഷത വഹിച്ചു.

മലമ്പനി പരിശോധന ക്യാമ്പ് നടത്തി

കണ്ണൂർ: പോലീസ് ഡിപ്പാർട്ട്മെന്‍റിന്‍റെ സഹകരണത്തോടെ സ്പോർട്സ് കൗൺസിൽ ഹാളിൽ കണ്ണൂർ പോലീസ് അക്ഷയപാത്രത്തിൽ എത്തിച്ചേരുന്ന ആൾക്കാർക്കിടയിൽ മലമ്പനി പരിശോധന ക്യാമ്പ് സംഘടിപ്പിച്ചു. ജില്ലാ മെഡിക്കൽ ഓഫീസർ ഡോ. പിയുഷ് എം. നമ്പൂതിരിപ്പാടിന്‍റെ നിർദേശാനുസരണം മലമ്പനി നിവാരണ പ്രവർത്തനങ്ങൾ ഊർജിതമാക്കുന്നതിന്‍റെ ഭാഗമായാണു ക്യാമ്പ് സംഘടിപ്പിച്ചത്. ജില്ലാ സർവെയിലൻസ് ഓഫീസർ ഡോ. കെ.സി. സച്ചിന്‍റെ നേതൃത്വത്തിൽ ജില്ലാ വിബിഡി കൺട്രോൾ ഓഫീസർ ഡോ. കെ.കെ. ഷിനി, മെഡിക്കൽ ഓഫീസർ ഡോ. എം.വി. മാനസ്, അക്ഷയപാത്രം കോ-ഓഡിനേറ്റർ എ.വി. സതീഷ്, ഫീൽഡ് അസിസ്റ്റന്‍റ് പി.വി. മഹേഷ്, വിബിടി കൺസൾട്ടന്‍റ് ടി.പി. ഹരിത, ജെഎച്ച്ഐ അശ്വിനി, കെ.പി. ജാസ്മിൻ, ലിജി, ഫീൽഡ് വർക്കേഴ്സ് തുടങ്ങിയവർ ക്യാമ്പിൽ പങ്കെടുത്തു.

ജെറ്റർ കം സംക്‌ഷൻ മെഷീൻ ഫ്ലാഗ് ഓഫ് ചെയ്തു

കണ്ണൂർ: കോർപറേഷൻ സീവേജ് ട്രീറ്റ്മെന്‍റ് പ്ലാന്‍റിലേക്കുള്ള നെറ്റ്‌വർക്ക് ശുചീകരണത്തിനായി വാങ്ങിയ ജെറ്റർ കം സംക്‌ഷൻ മെഷീൻ, ഓട്ടോമാറ്റിക് ഗ്രാബർ മെഷീൻ എന്നിവയുടെ ഫ്ലാഗ് ഓഫ് മേയർ മുസ്‌ലിഹ് മഠത്തിൽ നിർവഹിച്ചു. സീവർ നെറ്റ്‌വർക്കിലെ തടസങ്ങൾ, മാൻ ഹോളുകളിൽ അടിഞ്ഞ് കൂടുന്ന മാലിന്യങ്ങൾ എന്നിവ നീക്കം ചെയ്യുന്നതിന് മനുഷ്യനെ ഉപയോഗിക്കാൻ പാടില്ല എന്നൊരു നിർദേശം നിലവിലുണ്ട്. ഇത്തരം സ്ഥലങ്ങളിൽ ശുചീകരണം നടത്തുമ്പോൾ അപകട സാധ്യത കൂടുതലാണ്. പലപ്പോഴും പടന്ന പാലം മലിനജല ശുചീകരണ പ്ലാന്‍റിലേക്കുള്ള പൈപ്പ് ലൈനുകളിലും മാൻ ഹോളുകളിലും മാലിന്യങ്ങൾ കെട്ടി നിന്ന് മലിനജലം പുറത്തേക്ക് ഒഴുകുന്ന സാഹചര്യം ഉണ്ടായി ട്ടുണ്ട്. അടുത്തിടെ ഇങ്ങനെയുണ്ടായ തടസം നീക്കം ചെയ്യുന്നതിന് തിരുവനന്തപുരത്ത് നിന്ന് വാഹനം എത്തിക്കേണ്ടി വന്നു ആയതിന് നല്ലൊരു തുക കോർപറേഷന് ചെലവഴിക്കേണ്ടി വന്നിട്ടുണ്ട്. ഇതിനൊരു ശാശ്വത പരിഹാരം എന്ന നിലയിലാണ് രാജ്യത്തെ വിവിധ നഗരങ്ങളിൽ നടപ്പാക്കിയ ജെൻ റോബോട്ടിക്കിന്‍റെ സാങ്കേതിക വിദ്യ ഉപയോഗിച്ച് ഇത്തരത്തിലുള്ള യന്ത്ര സംവിധാനം ഒരുക്കിയിട്ടുള്ളതെന്ന് മേയർ പറഞ്ഞു. കോർപറേഷന്‍റെ അമൃത് പദ്ധതിയിൽ ഉൾപ്പെടുത്തി 98,96000 രൂപ (ജിഎസ്ടി ഉൾപ്പെടെ) ചെലവഴിച്ചാണ് പദ്ധതി നടപ്പിലാക്കിയിട്ടുള്ളത്.

പടിയൂരിൽ കാറും മിനിലോറിയും കൂട്ടിയിടിച്ച് ഒരാൾക്കു പരിക്ക്

ഇരിട്ടി: പടിയൂർ എസ്റ്റേറ്റിന് സമീപം കാറും മിനിലോറിയും കൂട്ടിയിടിച്ച് ഒരാൾക്ക് പരിക്കേറ്റു. ഇരിക്കൂർ ഭാഗത്തു നിന്നും ഇരിട്ടി ഭാഗത്തേക്ക് പോകുകയായിരുന്ന മിനിലോറിയും പടിയൂരിൽ നിന്നും ഇരിക്കൂർ ഭാഗത്തേക്ക് വരികയായിരുന്ന കാറുമാണ് അപകടത്തിൽപ്പെട്ടത്. അപകടത്തിൽ മിനിലോറി ഡ്രൈവർ പാപ്പിനിശേരി സ്വദേശി നൗഫലിനാണ് (42) പരിക്കേറ്റത്. ഇയാളെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. വാഹനത്തിൽ കുരുങ്ങിയ നൗഫലിനെ ഇരിട്ടിയിൽ നിന്നും ആഗ്നിരക്ഷാ സേനയെത്തി ഹൈഡ്രോളിക് കട്ടർ ഉപയോഗിച്ച് വാഹനത്തിന്‍റെ ഡോർ മുറിച്ചു മാറ്റിയാണ് പുറത്തെടുത്തത്. ഇരിട്ടി ഡിവൈഎസ് പി. ധനഞ്ജയബാബു, പടിയൂർ പഞ്ചായത്ത് പ്രസിഡന്‍റ് ബി. ഷംസുദ്ദീൻ, വാർഡംഗം ആർ. രാജൻ എന്നിവരും സിവിൽ ഡിഫൻസ് അംഗങ്ങളും അഗ്നി രക്ഷാ സേന അംഗങ്ങളും നേതൃത്വം നല്കി.

"എനിക്കും വേണം ഖാദി' പദ്ധതിയെ സ്വീകരിച്ച് ജനം

കണ്ണൂർ: കേരള ഖാദി ഗ്രാമ വ്യവസായ ബോർഡ്-പയ്യന്നൂർ ഖാദി കേന്ദ്രം ഓണം മേളയോട് അനുബന്ധിച്ച് ഖാദി വസ്ത്ര പ്രചാരണത്തിന്‍റെ ഭാഗമായിട്ടുള്ള "എനിക്കും വേണം ഖാദി' കാമ്പയിൻ വൻ ഹിറ്റിലേക്ക്. കണ്ണൂർ ഖാദി ഗ്രാമ സൗഭാഗ്യയിൽ നല്ല കച്ചവടമാണ് നടക്കുന്നത്. ഏറ്റവും മികച്ച കോട്ടണിലും സിൽക്കിലും നിർമിച്ച ഈടുനില്ക്കുന്ന പോച്ചംപള്ളി സാരി മുതൽ കോട്ടൺ കലങ്കാരി സാരി വരെയും ഖാദി ലിനെൻ ഷർട്ടിംഗും ഇത്തവണത്തെ മേളയിലെ പ്രത്യേകതയാണ്. സ്ഥിരം ഡിസൈനുകളിൽ നിന്നും മാറി കൂടുതൽ പ്രിന്‍റഡ് വസ്ത്രങ്ങളാണ് മേളയിൽ സജ്ജമാക്കിയി ട്ടുള്ളത്. മേൽത്തരം സിൽക്ക് നൂലുകൊണ്ട് നിർമിച്ച സിൽക്ക് സാരികൾക്ക് ആവശ്യക്കാരേറെയാണ്. സർക്കാർ റിബേറ്റ് ഉള്ളതിനാൽ ഉപഭോക്താക്കൾക്ക് വലിയ വിലക്കുറവും ലഭിക്കുന്നുണ്ട്. ഖാദി ഭവനുകളിൽ നേരിട്ടെത്തി ഓണക്കോടി വാങ്ങി പ്രിയപ്പെട്ടവർക്ക് നല്കാൻ അസൗകര്യമുള്ളവർക്ക് 7907436459 എന്ന ഫോൺ നമ്പറിൽ ബന്ധപ്പെട്ടുകൊണ്ട് തെരഞ്ഞെടുത്ത ഉത്പന്നം നിങ്ങളുടെ പ്രിയപ്പെട്ടവരിലേക്ക് കൊറിയർ മുഖേന എത്തിച്ചു നല്കുന്നതിനുള്ള സൗകര്യവും ഒരുക്കിയിട്ടുണ്ട്. ഖാദി വസ്ത്രങ്ങൾക്ക് പുറമേ ചൂരൽ ഫർണിച്ചറുകൾ, കോലാപുരി ചെരുപ്പുകൾ, ബാഗുകൾ, തേൻ തുടങ്ങിയ ഗ്രാമ വ്യവസായ ഉത്പന്നങ്ങളും കൂടാതെ പിഎംഇജിപി, എസ്ഇജിപി പവലിയനുകളും മേളയുടെ ഭാഗമായുണ്ട്. ഖാദി വസ്ത്രങ്ങൾക്ക് 30 ശതാമനം സർക്കാർ റിബേറ്റ് ലഭിക്കും. സർക്കാർ, അർധസർക്കാർ ജീവനക്കാർക്ക് ഒരു ലക്ഷം രൂപ വരെയുള്ള ക്രെഡിറ്റ് സൗകര്യവുമുണ്ട്. ഓണം ഖാദി മേള സെപ്റ്റംബർ നാലിന് സമാപിക്കും. കൈത്തറി ഉത്പന്നങ്ങൾക്ക് റിബേറ്റ് ഓണം റിബേറ്റിന്‍റെ ഭാഗമായി കൈത്തറി വികസന കോര്‍പറേഷന്‍ (ഹാന്‍വീവ്) കൈത്തറി ഉത്പന്നങ്ങള്‍ക്ക് 10 മുതല്‍ 20 ശതമാനം റിബേറ്റും തെരഞ്ഞെടുത്ത ഉത്പന്നങ്ങള്‍ക്ക് 10 മുതല്‍ 70 ശതമാനം വരെ പ്രത്യേക കിഴിവും ഏര്‍പ്പെടുത്തിയിട്ടുണ്ടെന്ന് ഹാന്‍വീവ് ചെയര്‍മാന്‍ ടി.കെ. ഗോവിന്ദന്‍ പത്രസമ്മേളനത്തില്‍ അറിയിച്ചു. മുണ്ട്, സാരി, സെറ്റ് മുണ്ട്, ബെഡ് ഷീറ്റ്, ടൗവ്വലുകള്‍, ചുരിദാര്‍ മെറ്റീരിയലുകള്‍ എന്നിവയാണ് ഹാന്‍വീവിന്‍റെ പ്രധാന ഉത്പന്നങ്ങള്‍. ഉത്പാദന വൈവിധ്യവത്കരണത്തിന്‍റെ ഭാഗമായി ശ്രേഷ്ഠം എന്ന പേരില്‍ ഇരട്ടക്കര ഡബിള്‍ മുണ്ട് ഇത്തവണ വിപണിയില്‍ ഇറക്കുന്നുണ്ട്. കേരള കൈത്തറി വികസന കോര്‍പറേഷന്‍ തമിഴ്നാട് കൈത്തറി വികസന കോര്‍പറേഷനുമായി സഹകരിച്ച് അവരുടെ ഉത്പന്നങ്ങളും ഓണക്കാലത്ത് വിപണിയിലെത്തിക്കുന്നുണ്ട്. ഇന്നുമുതല്‍ സെസെപ്റ്റംബർ നാലുവരെയാണ് റിബേറ്റ് സൗകര്യത്തില്‍ ഷോറൂമുകളില്‍ വില്പന നടക്കുന്നത്. ഒ.കെ സുധീപ്, അരുണ്‍ അഗസ്റ്റിന്‍ എന്നിവരും പത്രസമ്മേളനത്തില്‍ പങ്കെടുത്തു.

കയറ്റുമതി പ്രോത്സാഹിപ്പിക്കാൻ ചേംബർ സെമിനാർ നടത്തി

കണ്ണൂർ: പതിറ്റാണ്ടുകൾക്ക് മുമ്പേ തന്നെ ടെക്സ്റ്റൈൽ കയറ്റുമതി വിപണന രംഗത്തും മറ്റിതര മേഖലയിലും തിളങ്ങി നിന്ന മലബാറിന്‍റെ പേരും പ്രശസ്തിയും നിലനിർത്തുക, ചെറുകിട സംരംഭകരെ വാണിജ്യരംഗത്തും കയറ്റുമതിയിലും പ്രോത്സാഹിപ്പിക്കുക, ഒരു ജില്ലയ്ക്ക് ഒരു ഉത്പന്നം എന്ന കേന്ദ്രനയ തീരുമാനം നടപ്പിലാക്കുന്നതിന് പിന്തുണ നൽകുക എന്നീ ലക്ഷ്യങ്ങളോടെ ഡയറക്ടർ ജനറൽ ഓഫ് ഫോറിൻ ട്രേഡും ഫെഡറേഷൻ ഓഫ് ഇംപോർട്ട് എക്സ്പോർട്ട് ഓർഗനൈസേഷനും നോർത്ത് മലബാർ ചേംബർ ഓഫ് കോമേഴ്സും സംയുക്തമായി സെമിനാർ സംഘടിപ്പിച്ചു. കസ്റ്റംസ് ചീഫ് കമ്മീഷണർ എസ്.കെ. റഹ്മാൻ ഐആർഎസ് സെമിനാർ ഉദ്ഘാടനം ചെയ്തു. കയറ്റുമതി മേഖലയിൽ പ്രവർത്തിക്കുന്ന സംരംഭകരെ കൈപിടിച്ചുയർത്താനും അവർക്ക് ആവശ്യമായ പ്രോത്സാഹനം നൽകാനും അതുവഴി നമ്മുടെ സാമ്പത്തിക രംഗവും കയറ്റുമതിയും വളർത്തുക, അതിനാവശ്യമായ സഹായം നൽകി കൂടെ പ്രവർത്തിക്കുന്നവരാണ് കസ്റ്റംസ് ഡിപ്പാർട്ട്മെന്‍റ് എന്ന് അദ്ദേഹം അഭിപ്രായപ്പെട്ടു. ഡയറക്ടർ ജനറൽ ഓഫ് ഫോറിൻ ട്രേഡ് ഡപ്യൂട്ടി എൻ.എ. ഹസൻ ഹുസൈദ് നടത്തി. നോർത്ത് മലബാർ ചേംബർ ഓഫ് കോമേഴ്സ് പ്രസിഡന്‍റ് ടി.കെ. രമേഷ്കുമാർ അധ്യക്ഷത വഹിച്ചു. ചേംബർ ഡയറക്ടർ കെ.വി. ദിവാകർ, നോർത്ത് മലബാർ ചേംബർ ഓഫ് കോമേഴ്സ് വൈസ് പ്രസിഡന്‍റ് സച്ചിൻ സൂര്യകാന്ത് മക്കേച്ച, ഫെഡറേഷൻ ഓഫ് എക്സ്പോർട്ട് ഓർഗനൈസേഷൻ അസി. ഡയറക്ടർ എം.സി. രാജീവ് എന്നിവരും സംസാരിച്ചു. സെമിനാറിൽ നടന്ന വിവിധ സെക്ഷനുകളിൽ എൻ.എ. ഹസൻ ഉസൈദ്, എസ്.കെ. റഹ്‌മാൻ, ആർ. ദീപക്, അഭിലാഷ് ഗോപിനാഥൻ, എം.സി. രാജീവ് എന്നിവർ പ്രസംഗിച്ചു.

ലൈഫ് പദ്ധതിയിൽ ആറര ലക്ഷം വീടുകൾ പൂർത്തീകരിക്കും: എം.ബി. രാജേഷ്

കണ്ണൂർ: സംസ്ഥാന സർക്കാർ കാലാവധി പൂർത്തിയാക്കുമ്പോൾ ലൈഫ് ഭവന പദ്ധതിയിലൂടെ കേരളത്തിൽ ആറര ലക്ഷം വീടുകൾ പൂർത്തീകരിക്കുമെന്ന് മന്ത്രി എം.ബി രാജേഷ് പറഞ്ഞു. കോളയാട് പഞ്ചായത്ത് കെട്ടിടത്തിന്‍റെ ഉദ്ഘാടനവും ലൈഫ് ഭവന പദ്ധതിയിലൂടെ പൂർത്തീകരിച്ച 288 വീടുകളുടെ താക്കോൽ ദാനവും നിർവഹിച്ചു പ്രസംഗിക്കുകയായിരുന്നു മന്ത്രി. പശ്ചാത്തല വികസനത്തോടൊപ്പം സർക്കാർ സേവനങ്ങൾ വേഗത്തിൽ പൊതുജനങ്ങൾക്ക് ലഭ്യമാക്കുന്നതിനുള്ള വിപുലമായ പദ്ധതികളാണ് നടപ്പിലാക്കുന്നത്. കെ-സ്മാർട്ട് സംവിധാനത്തിലൂടെ ഓഫീസുകൾ കയറിയിറങ്ങാതെതന്നെ എല്ലാ സർക്കാർ സേവനങ്ങളും സ്മാർട്ട് ഫോണിൽ ലഭിക്കും. തദ്ദേശ സ്വയംഭരണ സ്ഥാപനങ്ങളിൽ നിന്നുള്ള സേവനങ്ങൾ ഡിജിറ്റലൈസ് ചെയ്ത ഏക സംസ്ഥാനമായി കേരളം മാറി. കൂടാതെ ഡിജിറ്റൽ സാക്ഷരത നേടുന്ന ആദ്യ സംസ്ഥാനമായും കേരളത്തെ പ്രഖ്യാപിക്കാനൊരുങ്ങുകയാണെന്ന് മന്ത്രി കൂട്ടിച്ചേർത്തു. കെ.കെ. ശൈലജ എംഎൽഎ അധ്യക്ഷത വഹിച്ചു. മുൻ എംഎൽഎ ഇ.പി. ജയരാജന്‍റെ ആസ്തി വികസന ഫണ്ടിൽ നിന്നുള്ള 90 ലക്ഷം രൂപ ഉപയോഗി ച്ചാണ് പുതിയ പഞ്ചായത്ത് കെട്ടിടം നിർമിച്ചത്. മൂന്നു നിലകളുള്ള കെട്ടിടത്തിന്‍റെ താഴത്തെ നിലയിൽ പ്രസിഡിന്‍റെ ഓഫീസ്, അനുബന്ധ ഓഫീസുകൾ എന്നിവയും ഒന്നാം നിലയിൽ കൃഷിഭവനും രണ്ടാം നിലയിൽ കുടുംബശ്രീ ഓഫീസും പ്രവർത്തിക്കുന്നു. പേരാവൂർ ബ്ലോക്ക് പഞ്ചായത്ത് പ്രസിഡന്‍റ് കെ. സുധാകരൻ, കോളയാട് പഞ്ചായത്ത് പ്രസിഡന്‍റ് എം. റിജി, വൈസ് പ്രസിഡന്‍റ് കെ.ഇ. സുധീഷ് കുമാർ, ജില്ലാപഞ്ചായത്തംഗം വി. ഗീത, ബ്ലോക്ക് പഞ്ചായത്ത് സ്ഥിരം സമിതി ചെയർമാൻ എ.ടി. കുഞ്ഞഹമ്മദ്, പഞ്ചായത്ത് സ്ഥിരം സമിതി അധ്യക്ഷരായ ഉമാദേവി, ടി. ജയരാജൻ, സിനിജ സജീവൻ, ബ്ലോക്ക് പഞ്ചായത്ത് അംഗം റീന നാരായണൻ, പഞ്ചായത്തംഗം കെ.വി. ജോസഫ്, സി.ഡി.എസ്. ചെയർപേഴ്‌സൺ സി. ശകുന്തള, വിവിധ രാഷ്‌ട്രീയ കക്ഷി, സംഘടനാ പ്രതിനിധികൾ, സർക്കാർ ഉദ്യോഗസ്ഥർ എന്നിവർ പങ്കെടുത്തു.

കാടുകയറിയ ദുരിത യാത്ര

ആലക്കോട്: മലയോര ഹൈവേയിൽ രയറോം പാലത്തിന് സമീപത്തെ പ്രദേശം കാടും വള്ളിപ്പടർപ്പുകളും നിറഞ്ഞതിനാൽ വാഹന-കാൽനടയാത്രയ്ക്കു ഭീഷണിയാകുന്നു. കാട് വളർന്നതിനാൽ എതിർദിശയിൽ നിന്ന് വാഹനങ്ങൾ വരുന്നത് കാണാൻ കഴിയാത്തത് വാഹന ഡ്രൈവർമാരെ ദുരിതത്തിലാക്കുകയാണ്. ഇത് അപകടസാധ്യതയും വർധിപ്പിക്കുന്നു. ഇഴജന്തുക്കളും കാട്ടുപന്നിയും വിളയാടുന്ന പുഴയോരത്തും ഇത്തരം കാടുകൾ വളർന്നുനിൽക്കുന്നുണ്ട്. കാട് ഉടൻ വെട്ടിത്തെളിക്കാൻ നടപടി സ്വീകരിക്കണമെന്ന് നാട്ടുകാർ പൊതുമരാമത്ത് അധികൃതരോട് ആവശ്യപ്പെട്ടു.

ശാസ്ത്ര-ചരിത്ര സംസ്ഥാന ശില്പശാല ആരംഭിച്ചു

തളിപ്പറമ്പ്: കേരള സംസ്ഥാന ശിശു ക്ഷേമ സമിതിയുടെ നേതൃത്വത്തിൽ മൂന്ന് ദിവസങ്ങളിലായി നടക്കുന്ന ശാസ്ത്ര-ചരിത്ര സംസ്ഥാന ശില്പശാല കാഞ്ഞിരങ്ങാട് ഇൻഡോർ പാർക്കിൽ ആരംഭിച്ചു. എം.വി. ഗോവിന്ദൻ എംഎൽഎ ഉദ്ഘാടനം ചെയ്തു. തളിപ്പറമ്പ് ബ്ലോക്ക് പഞ്ചായത്ത് പ്രസിഡന്‍റ് സി. എം. കൃഷ്ണൻ അധ്യക്ഷത വഹിച്ചു. കേരള സംസ്ഥാന ശിശുക്ഷേമ സമിതി ജനറൽ സെക്രട്ടറി ജി.എൽ. അരുൺഗോപി, മുൻ എംഎൽഎ പ്രകാശൻ, പരിയാരം പഞ്ചായത്ത് പ്രസിഡന്‍റ് ടി. ഷീബ, ശിശുക്ഷേമ സമിതി സംസ്ഥാന വൈസ് പ്രസിഡന്‍റ് പി. സുമേശൻ, ജോയിന്‍റ് സെക്രട്ടറി മീരാ ദർശക്, ട്രഷറർ കെ. ജയപാൽ, സംസ്ഥാന എക്സിക്യൂട്ടീവ് അംഗങ്ങളായ ബാലകൃഷ്ണൻ തുടങ്ങിയവർ പ്രസംഗിച്ചു. 14 ജില്ലകളിൽ നിന്നായി കുട്ടികളും മുതിർന്നവരും ഉൾപ്പെടെ 180 തിലതികം പേരാണ് പങ്കെടുക്കുന്നത്. പരിപാടി നാളെ അവസാനിക്കും.

സ്വാതന്ത്ര്യ ദിനം: ക്വിസ് മത്സരം സംഘടിപ്പിച്ചു

നെല്ലിക്കുറ്റി: കേരളോദയ വായനശാലയും നെല്ലിക്കുറ്റി സെന്‍റ് അഗസ്റ്റിൻസ് ഹൈസ്കൂളും സംയുക്തമായി സംഘടിപ്പിച്ച സ്വാതന്ത്ര്യ സമരചരിത്ര ക്വിസ് മത്സരം ഏരുവേശി പഞ്ചായത്ത് പ്രസിഡന്‍റ് മിനി ഷൈബി ഉദ്ഘാടനം ചെയ്തു. ലൈബ്രറി കൗൺസിൽ സംസ്ഥാന സമിതിയംഗം പി. ജനാർദനൻ അധ്യക്ഷത വഹിച്ചു. സെന്‍റ് അഗസ്റ്റിൻസ് ഹൈസ്കൂൾ മാനേജർ ഫാ. മാത്യു ഓലിയ്ക്കൽ സ്വാതന്ത്ര്യദിന സന്ദേശം നൽകി. ചെമ്പന്തൊട്ടി സെന്‍റ് ജോർജ് ഹൈസ്കൂൾ അധ്യാപകൻ ജോയ്സ് സഖറിയാസാണ് മത്സരം നയിച്ചത്. മത്സരത്തിൽ വീർപ്പാട് സെന്‍റ് സെബാസ്റ്റ്യൻസ് യുപി സ്കൂൾ, നെല്ലിക്കുറ്റി സെന്‍റ് അഗസ്റ്റിൻസ് ഹൈസ്കൂൾ, മണിക്കടവ് സെന്‍റ് തോമസ് ഹൈസ്കൂൾ എന്നിവർ യഥാക്രമം ഒന്നും രണ്ടും മൂന്നും സ്ഥാനങ്ങൾ കരസ്ഥമാക്കി. ഇരിക്കൂർ ബ്ലോക്ക് പഞ്ചായത്ത് മെംബർ സോജൻ കാരാമയിൽ സമ്മാനദാനം നിർവഹിച്ചു. സെന്‍റ് അഗസ്റ്റിൻസ് ഹൈസ്കൂൾ മുഖ്യാധ്യാപകൻ സോണി മാത്യു, സാവിയോ ഇടയാടിയിൽ എന്നിവർ പ്രസംഗിച്ചു. നെടുങ്ങോം: സ്വതന്ത്ര്യ ദിനാചരണത്തിന്‍റെ ഭാഗമായി ശാസ്ത്രവേദി ഇരിക്കൂർ മേഖലയുടെ ആഭിമുഖ്യത്തിൽ യുപി വിഭാഗം വിദ്യാർഥികൾക്കായി നെടുങ്ങോം ഗവ. ഹയർ സെക്കൻഡറി, പഴയങ്ങാടി ഗവ. യുപി, ചെങ്ങളായി എയുപി എന്നീ സ്കൂളുകളിൽ സ്വതന്ത്ര ഇന്ത്യയിലെ ശാസ്ത്ര പുരോഗതി എന്ന വിഷയത്തെ അടിസ്ഥാനമാക്കി ക്വിസ് മത്സരം സംഘടിപ്പിച്ചു. നെടുങ്ങോം ഗവ. ഹയർ സെക്കൻഡറി സ്കൂൾ മുഖ്യാധ്യാപിക പി.എൻ. ഗീത ഉദ്ഘാടനം ചെയ്തു. മത്സരത്തിൽ വിജയികളായവർക്ക് കാഷ് അവാർഡുകൾ സമ്മാനിച്ചു.

രാജ്യത്തെ വോട്ട് കൊള്ളക്കെതിരേ യൂത്ത് കോൺഗ്രസ് പ്രതിഷേധം

ചെമ്പേരി: രാജ്യത്തെ വോട്ട് കൊള്ള സംബന്ധിച്ച് രാഹുൽ ഗാന്ധി നടത്തിയ വെളിപ്പെടുത്തലുകളുടെ പശ്ചാത്തലത്തിൽ ഇന്ത്യയിലെ തെരഞ്ഞെടുപ്പ് സംവിധാനത്തെ അട്ടിമറിക്കുന്ന ബിജെപിയും അതിന് ബിജെപിക്ക് ഒത്താശ ചെയ്യുന്ന തെരഞ്ഞെടുപ്പ് കമ്മീഷനുമെതിരേ യൂത്ത് കോൺഗ്രസ് പ്രതിഷേധം സംഘടിപ്പിച്ചു. യൂത്ത് കോൺഗ്രസ് ഏരുവേശി മണ്ഡലം കമ്മിറ്റിയുടെ ആഭിമുഖ്യത്തിൽ ചെമ്പേരി പോസ്റ്റ് ഓഫീസിന് മുന്നിൽ നടന്ന പ്രതിഷേധ പരിപാടിയിൽ രാഹുൽ ഗാന്ധി ഉന്നയിച്ച അഞ്ചു ചോദ്യങ്ങൾ ഉൾപ്പെടുത്തി തെരഞ്ഞെടുപ്പ് കമ്മീഷന് കത്തയച്ചു. യൂത്ത് കോൺഗ്രസ്‌ സംസ്ഥാന നിർവാഹക സമിതി മുൻ അംഗം ജസ്റ്റിസൺ ചാണ്ടിക്കൊല്ലി പ്രതിഷേധ പരിപാടി ഉദ്ഘാടനം ചെയ്തു. മണ്ഡലം പ്രസിഡന്‍റ് വിനു കാഞ്ഞിരത്തിങ്കൽ അധ്യക്ഷത വഹിച്ചു. ഇരിക്കൂർ നിയോജക മണ്ഡലം ജനറൽ സെക്രട്ടറി ആൽബിൻ അറയ്ക്കൽ, നിയോജക മണ്ഡലം സെക്രട്ടറിമാരായ എം.വി. ജിനീഷ്, ബിനു അനന്തക്കാട്ട്, മണ്ഡലം സെക്രട്ടറിമാരായ ആൽബിൻ മരുതനാൽ, അമൃത മോഹനൻ, നവീൻ പുളിയ്ക്കൽ, സാനു നെടുന്താനം, മണ്ഡലം മുൻ പ്രസിഡന്‍റ് ലിജോ കുന്നേൽ തുടങ്ങിയവർ പങ്കെടുത്തു.

തളിപ്പറമ്പ് താലൂക്കിൽ പ്രത്യേക ജാഗ്രതാനിർദേശം

കണ്ണൂർ: ഓണാഘോഷത്തിന് മുന്നോടിയായി ജില്ലയിലെ മുഴുവൻ ഹോട്ടലുകളിലും തണുത്ത പാനീയങ്ങൾ വില്ക്കുന്ന കടകളിലും ആരോഗ്യവകുപ്പ് പരിശോധന ശക്തമാക്കുമെന്ന് ഡിഎംഒ (ആരോഗ്യം) ഡോ. പീയുഷ് എം. നമ്പൂതിരിപ്പാട് അറിയിച്ചു. മഞ്ഞപ്പിത്ത വ്യാപനം റിപ്പോർട്ട് ചെയ്ത തളിപ്പറമ്പിൽ താലൂക്ക് ജില്ലാ സർവേലൻസ് ഓഫീസർ ഡോ. കെ.സി. സച്ചിന്‍റെ നേതൃത്വത്തിലുള്ള സംഘം പ്രത്യേക പരിശോധന നടത്തും. പ്രദേശത്തെ ഭക്ഷണം, കുടിവെള്ളം എന്നിവയുടെ പരിശോധന ഊർജിതമാക്കും. കടക്കാർക്കും പൊതുജനങ്ങൾക്കും ആരോഗ്യവകുപ്പ് ജാഗ്രതാ നിർദേശം നൽകി. ജീവനക്കാർക്ക് ഹെൽത്ത് കാർഡ് ഉണ്ടായിരിക്കണമെന്നും കാർഡ് ഇല്ലാത്തവർക്കെതിരേ പിഴ ചുമത്തുമെന്നും ഭക്ഷണ വിതരണ സ്ഥാപനങ്ങൾക്ക് നിർദേശം നല്കി. ഉപയോഗിക്കുന്ന കുടിവെള്ളത്തിന്‍റെ പരിശോധനാ റിപ്പോർട്ട് സ്ഥാപനങ്ങളിൽ ഉണ്ടായിരിക്കണം. വ്യാജ കുടിവെള്ള പരിശോധന റിപ്പോർട്ട് ഹാജരാക്കിയാൽ കർശന നടപടി സ്വീകരിക്കും. അത്തരം കേസുകളിൽ ആരോഗ്യ വകുപ്പ് കുടിവെള്ള സാമ്പിൾ നേരിട്ട് ശേഖരിച്ച് പരിശോധന നടത്തി നടപടി സ്വീകരിക്കും. ഭക്ഷണ വിതരണശാലകളിൽ പൊതുജനങ്ങൾക്ക് കുടിക്കാൻ നല്കുന്ന വെള്ളം തിളപ്പിച്ചാറിയതിന് ശേഷം മാത്രം നല്കുക. വെള്ളം തണുപ്പിക്കാൻ പച്ചവെള്ളം ഉപയോഗിക്കാൻ പാടില്ല. ഇത് ശ്രദ്ധയിൽ പ്പെട്ടാൽ കർശന നടപടി സ്വീകരിക്കും. ഭക്ഷണം, കുടിവെള്ളം എന്നിവ വിതരണം ചെയ്യുന്ന സ്ഥാപനങ്ങളിലെ ജീവനക്കാർ നിർബന്ധമായും കൈയുറ ധരിക്കണം. തണുത്ത പാനീയങ്ങൾ തയാറാക്കുന്നതിന് തിളപ്പിച്ചാറ്റിയ വെള്ളമോ യുവി ഫിൽറ്റർ ചെയ്ത വെള്ളമോ മാത്രം ഉപയോഗിക്കണമെന്ന് തണുത്ത പാനീയങ്ങൾ വില്ക്കുന്ന സ്ഥാപനങ്ങൾക്കും നിർദേശം നല്കി. അല്ലാതെയുള്ള കുടിവെള്ള ഉപയോഗം പരിശോധനയിൽ തെളിഞ്ഞാൽ പൊതുജന നിയമപ്രകാരം കർശന നടപടി സ്വീകരിക്കും. ജീവനക്കാരുടെ ആരോഗ്യ പരിശോധന കാർഡ് കൈയിൽ കരുതണം. തൊഴിലാളികൾ നിർബന്ധമായും കൈയുറ ധരിക്കണമെന്നും നിർദേശിച്ചു. ജില്ലയിലെ വിവിധ ടെക്‌സ്‌റ്റൈൽ/ജ്വല്ലറികൾ ഉൾപ്പെടെയുള്ള സ്ഥാപനങ്ങൾ ഉപഭോക്താക്കൾക്ക് നല്കുന്ന തണുത്ത പാനീയങ്ങളുടെ ശുദ്ധിയും പാനീയം തയാറാറാക്കുന്ന ജീവനക്കാരുടെ ഹെൽത്ത് കാർഡും കട ഉടമകൾ ഉറപ്പുവരുത്തണം. ഭക്ഷണ വിതരണത്തിൽ ആരോഗ്യ മാനദണ്ഡങ്ങൾ പാലിക്കാത്ത സ്ഥാപനങ്ങൾക്കെതിരേ പൊതുജനങ്ങൾക്ക് 9846056161 എന്ന വാട്‌സാപ് നമ്പറിൽ പരാതി നല്കാം. പരാതികൾ ഫോട്ടോ, വീഡിയോ, മറ്റ് വിവരങ്ങൾ എന്ന ഫോർമാറ്റിലും അയയ്ക്കാം. അയയ്ക്കുന്ന വ്യക്തിയുടെ വിവരങ്ങൾ രഹസ്യമായി സൂക്ഷിക്കും. ജില്ലാ ആരോഗ്യ വകുപ്പിന്‍റെ പരിശോധനയിൽ കൃത്യമായ ആരോഗ്യ മാനദണ്ഡങ്ങൾ പാലിക്കാത്തതായി കണ്ടെത്തുന്ന ഭക്ഷണ, പാനീയ വിതരണ സ്ഥാപനങ്ങൾക്കെതിരേ പൊതുജനാരോഗ്യ നിയമ പ്രകാരം കർശനമായ നടപടി സ്വീകരിക്കുമെന്ന് ജില്ലാ മെഡിക്കൽ ഓഫീസർ അറിയിച്ചു.

"അമ്മയുടെ ഫോൺ എന്‍റേതും' പദ്ധതിക്ക് തുടക്കമായി

പയ്യാവൂർ: മൊബൈൽ ഫോൺ ഉപയോഗവും അതിലേറെ ദുരുപയോഗവും കുട്ടികളിൽ വർധിച്ചുവരുന്ന സാഹചര്യത്തിൽ അതു നിയന്ത്രിക്കുന്നതിനുവേണ്ടി പുതിയ പദ്ധതിയുമായി പയ്യാവൂർ പഞ്ചായത്ത്. "അമ്മയുടെ ഫോൺ എന്‍റേതും' പദ്ധതി പരീക്ഷണാടിസ്ഥാനത്തിൽ ചാമക്കാൽ ഗവ. എൽപി സ്കൂളിൽ തുടക്കം കുറിച്ചു. മേയ് 30ന് സമാപിക്കുന്ന രീതിയിൽ പത്ത് മാസത്തേക്കാണ് പദ്ധതി വിഭാവനം ചെയ്തിരിക്കുന്നത്. മുഴുവൻ കുട്ടികളേയും അമ്മമാരേയും ഉൾപ്പെടുത്തി പ്രത്യേക ബോധവത്കരണ ക്ലാസും ഫോൺ ഉപയോഗം രേഖപ്പെടുത്താൻ പ്രത്യേക വ്യക്തിഗത രജിസ്റ്ററും നൽകും. ഫോൺ ഉപയോഗിക്കാനുള്ള നിശ്ചിത സമയം തീരുമാനിച്ച് അമ്മയും കുട്ടിയും ക്ലാസ് അധ്യാപകന്‍റെ സാന്നിധ്യത്തിൽ ഉടമ്പടിയിൽ ഒപ്പുവയ്ക്കും. ദിവസേനയുള്ള ഉപയോഗം രേഖപ്പെടുത്തുകയും നിശ്ചിത ഇടവേളകളിൽ പദ്ധതി സ്കൂൾ അധികൃതർ അവലോകനം നടത്തുകയും ചെയ്യും. ഉടമ്പടിപ്രകാരം ഫോൺ ഉപയോഗം നിയന്ത്രിക്കുന്ന കുട്ടികൾക്കും അമ്മമാർക്കും സമ്മാനങ്ങളും നൽകും. കോവിഡാനന്തരം കുട്ടികളിൽ ഫോൺ ഉപയോഗം അനിയന്ത്രിതമായത് വീടുകളിൽ നിരവധി പ്രയാസങ്ങൾ ഉണ്ടാക്കുന്ന സാഹചര്യത്തിലാണ് ഇത്തരമൊരു പദ്ധതി നടപ്പാക്കുന്നത്. പ്രസ്തുത പദ്ധതിയിലൂടെ അമ്മമാരുടെ മേൽനോട്ടത്തിൽ ഫോൺ ഉപയോഗം കുട്ടികൾക്ക് ഉപകാരപ്രദമായ രീതിയിൽ നിയന്ത്രണ വിധേയമാക്കും. പയ്യാവൂർ പഞ്ചായത്ത് പ്രസിഡന്‍റ് സാജു സേവ്യർ പദ്ധതി ഉദ്ഘാടനം ചെയ്തു. വൈസ് പ്രസിഡന്‍റ് പ്രീത സുരേഷ് അധ്യക്ഷത വഹിച്ചു. സ്റ്റാൻഡിംഗ് കമ്മിറ്റി ചെയർപേഴ്സൺ ഷീന ജോൺ, വാർഡ് മെംബർ പ്രഭാവതി മോഹൻ എന്നിവർ പ്രസംഗിച്ചു. സ്കൂൾ മുഖ്യാധ്യാപകനും വിദ്യാഭ്യാസ നിർവഹണ ഉദ്യോഗസ്ഥനുമായ ഇ.പി. ജയപ്രകാശ്, സ്കൂൾ പിടിഎ പ്രസിഡന്‍റ് കെ.ജി. ഷിബു, മദർ പിടിഎ പ്രസിഡന്‍റ് സൗമ്യ ദിനേശ് എന്നിവർ പദ്ധതിക്ക് നേതൃത്വം നൽകും. പൈലറ്റ് പദ്ധതി പ്രാവർത്തികമായ ശേഷം പഞ്ചായത്തിലെ മുഴുവൻ വിദ്യാലയങ്ങളിലും നടപ്പാക്കാനാണ് ഉദേശിക്കുന്നതെന്ന് പഞ്ചായത്ത് പ്രസിഡന്‍റ് സാജു സേവ്യർ അറിയിച്ചു.

ഞാറ്റ്യേല ശ്രീധരന്‍റെ സംസ്കാരം നടത്തി

തലശേരി: തിരുവങ്ങാട്‌ പപ്പന്‍റെ പീടികക്കടുത്ത ഞാറ്റ്യേല ഹൗസിൽ ഞാറ്റ്യേല ശ്രീധരന്‍റെ (87) മൃതദേഹം സംസ്കരിച്ചു. രണ്ടാം ഗുണ്ടർട്ട്‌ എന്ന്‌ സാഹിത്യലോകം വിശേഷിപ്പിച്ച ചതുർഭാഷാനിഘണ്ടു രചയിതാവായ ശ്രീധരൻ ബുധനാഴ്ച രാത്രിയാണ് വിട പറഞ്ഞത്. നാലാംക്ലാസിൽ പഠനം അവസാനിപ്പിച്ച്‌ ബീഡി തൊഴിലാളിയായ ശ്രീധരൻ തമിഴ്‌, തെലുങ്ക്‌, കന്നഡ ഭാഷകൾ പഠിച്ചാണ്‌ മലയാള ഭാഷ എക്കാലവും ഓർമിക്കുന്ന അമൂല്യമായ നിഘണ്ടു രചിച്ചത്. 2020 ലാണ്‌ ചതുർഭാഷാ നിഘണ്ടു പ്രകാശിപ്പിച്ചത്‌. വാക്കുകൾ തേടിയുള്ള യാത്രയിലായിരുന്നു കാൽനൂറ്റാണ്ടിലേറെ കാലം ഞാറ്റ്യേല ശ്രീധരൻ. പാലക്കാട്‌ ബീഡിപ്പണിക്കാരനായി ജോലി ചെയ്യുന്ന കാലത്താണ്‌ തമിഴ്‌ ഭാഷയോട്‌ ഇഷ്‌ടം തോന്നിയതും പഠിച്ചതും. 22 വർഷം ബീഡിതൊഴിലാളിയായി ജോലിചെയ്‌തു. പൊതുമരാമത്ത്‌ വകുപ്പിൽ പ്യൂൺ ആയി 1970ൽ ജോലിയിൽ പ്രവേശിച്ചതോടെ താമസം കണ്ണൂർ കക്കാടേക്ക്‌ മാറി. കക്കാട്‌ ദേശാഭിവർധിനി വായനശാല കേന്ദ്രീകരിച്ച്‌ നിരവധി പേർക്ക്‌ അക്ഷരാഭ്യാസം പകർന്നു. സമ്പൂർണ സാക്ഷരത യജ്ഞകാലത്ത്‌ തമിഴരും തെലുങ്കരുമടങ്ങുന്നവർക്ക്‌ ക്ലാസ്‌ എടുക്കുന്നതിനിടയിലാണ്‌ മറ്റുഭാഷകൾ പഠിച്ചത്‌. 1956ൽ കമ്യൂണിസ്റ്റ് പാർട്ടി അംഗമായ ശ്രീധരൻ, കെഎസ്‌വൈഎഫ്‌ തലശേരി താലൂക്ക്‌ കമ്മിറ്റി ഭാരവാഹിയായും പ്രവർത്തിച്ചു. കമ്യൂണിസ്‌റ്റ്‌ പ്രസ്ഥാനം ഭിന്നിക്കുമ്പോൾ തലശേരി ബീഡിതൊഴിലാളി യൂണിയൻ ജോ. സെക്രട്ടറിയായിരുന്നു. സിപിഎം അവിഭക്ത തലശേരി ലോക്കൽകമ്മിറ്റി അംഗമാണ്‌. എൻജിഒ യൂണിയൻ സംസ്ഥാന കൗൺസിൽ അംഗവും പുരോഗമനകലാസാഹിത്യസംഘം കണ്ണൂർ മേഖല പ്രസിഡന്‍റുമായിരുന്നു. 1979ൽ ആർഎസ്‌എസ്‌ വധശ്രമത്തിൽനിന്ന്‌ അദ്‌ഭുതകരമായാണ്‌ രക്ഷപ്പെട്ടത്‌. പരേതരായ ചാത്തു-ദേവി ദമ്പതികളുടെ ഏകമകനാണ്‌. ഭാര്യ: യശോദ. മക്കൾ: ശ്രീവത്സൻ, ശ്രീധന്യൻ (എക്‌സിക്യൂട്ടീവ്‌ ഡയറക്‌ടർ ,ഐഐഎച്ച്‌ടി കണ്ണൂർ), ശ്രീജ, ശ്രീദയൻ (എസ്‌ഡി ഇൻഡസ്‌ട്രീസ്‌, കണ്ണൂർ). മരുമക്കൾ: ഷീജ, സ്‌മിത, സതീശൻ. ധന്യ.

മണ്ണറിഞ്ഞിറങ്ങിയ കുഞ്ഞിളം കൈകള്‍ക്ക് സർക്കാരിന്‍റെ സമ്മാനം

പയ്യന്നൂര്‍: കര്‍ഷക ക്ഷേമ വകുപ്പിന്‍റെ മികച്ച സ്‌കൂളിനുള്ള പുരസ്‌കാരം പയ്യന്നൂര്‍ പുഞ്ചക്കാട് പ്രവര്‍ത്തിക്കുന്ന സെന്‍റ് മേരീസ് യുപി സ്‌കൂളിന്. കേരള സര്‍ക്കാര്‍ കാര്‍ഷിക വികസന -കര്‍ഷക ക്ഷേമ വകുപ്പാണ് സംസ്ഥാനതലത്തില്‍ ഏര്‍പ്പെടുത്തിയ മികച്ച പുരസ്‌കാരം ഈ സ്‌കൂളിന് പ്രഖ്യാപിച്ചത്. കുട്ടികള്‍ക്കു വിഷരഹിതവും പോഷക സമൃദ്ധവുമായ പച്ചക്കറികള്‍ ഉറപ്പുവരുത്താനും കുട്ടികളില്‍ കാര്‍ഷിക സംസ്‌കാരം വളര്‍ത്തി കൃഷിയോടുള്ള ആഭിമുഖ്യം ശക്തിപ്പെടുത്തുന്നതിനും 60 സെന്‍റ് വരുന്ന കൃഷിയിടമാണ് ഇവര്‍ ഉപയോഗപ്പെടുത്തിയത്. വിവിധയിനം വിളകളായ തക്കാളി, വഴുതന, വെണ്ട, പയര്‍, പച്ചമുളക്, നരമ്പന്‍, വെള്ളരി, മത്തന്‍, ചീനിക്കിഴങ്ങ്, പടവലം, കോവല്‍, തണ്ണിമത്തന്‍, ചീര, പാവയ്ക്ക, കുമ്പളം എന്നിവയാണ് ഇവിടെ വിളഞ്ഞത്. "മണ്ണിനെ തൊട്ടറിഞ്ഞ് കുഞ്ഞു കൈകള്‍' എന്ന സ്‌കൂള്‍ കാര്‍ഷിക പദ്ധതിയിലൂടെ പയ്യന്നൂര്‍ കൃഷി വകുപ്പുമായി സഹകരിച്ചാണ് മാനേജ്‌മെന്‍റ്, പിടിഎ, അധ്യാപകര്‍, കുട്ടികള്‍ എന്നിവര്‍ സംയുക്തമായി പദ്ധതി നടപ്പാക്കിയത്. പരിചരണത്തിലെ കൃത്യത, കൃഷിരീതി, തുള്ളിനന എന്നിവ പരിചയപ്പെടുന്നതിനും അനുഭവിച്ച് അറിയുന്നതിനും ലക്ഷ്യം വച്ചായിരുന്നു കുട്ടി കര്‍ഷകരേയും ഉള്‍പ്പെടുത്തി ഈ പദ്ധതി നടപ്പിലാക്കിയത്. സ്‌കൂളില്‍ നടപ്പാക്കിയ പദ്ധതിയിലെ അറിവുകള്‍ കുട്ടികള്‍ അവരവരുടെ വീടുകളിലും നടപ്പിലാക്കിയതോടെ അദ്ഭുതാവഹമായ ഫലങ്ങളാണ് കുഞ്ഞു കൈകള്‍ക്ക് മണ്ണ് അറിഞ്ഞുനല്കിയത്. ഇതോടെ പദ്ധതിമൂലമുള്ള സ്‌കൂളിന്‍റെ നേട്ടം നൂറുമേനിയായി. അധ്യാപകരും വിദ്യാര്‍ഥികളും കനകം വിളയിക്കാന്‍ അരയും തലയും മുറുക്കി രംഗത്തിറങ്ങിയപ്പോള്‍ ഇവരുടെ പ്രവര്‍ത്തനങ്ങള്‍ക്ക് നേതൃത്വം നല്കാന്‍ മുഖ്യാധ്യാപിക സിസ്റ്റര്‍ ഷാന്‍റി ഫിലിപ്പും ഒപ്പമുണ്ടായിരുന്നു.

കശുമാവുകൾക്കായി കാസർഗോട്ടെത്തിയ സൂരജ്

ശ്രീജിത് കൃഷ്ണൻ കാസർഗോഡ്: സംസ്ഥാനത്ത് കശുമാവ് കൃഷിക്ക് ഏറ്റവും പേരുകേട്ട ജില്ലയാണ് കാസർഗോഡ്. പക്ഷേ കഴിഞ്ഞ ഏതാനും വർഷങ്ങളായി കശുമാവ് കൃഷിയെക്കുറിച്ച് ഓർക്കുമ്പോൾതന്നെ എൻഡോസൾഫാൻ വിഷബാധയുടെ കയ്പേറിയ അനുഭവങ്ങളും കാസർഗോട്ടുകാരുടെ മനസിൽ വന്നുനിറയാറുണ്ടായിരുന്നു. എന്നാൽ പുതിയ കാലത്ത് കീടനാശിനികളോ രാസവളങ്ങളോ ഒന്നും ഉപയോഗിക്കാതെതന്നെ തികച്ചും ജൈവരീതിയിൽ കശുമാവിൻ തൈകൾ ഉത്്പാദിപ്പിക്കാനും നട്ടുവളർത്തി മികച്ച വിളവുണ്ടാക്കാനും കഴിയുമെന്ന് പഠിപ്പിച്ച സ്ഥാപനമാണ് കാസർഗോഡിന് കിഴക്ക് സംസ്ഥാന അതിർത്തിക്കു സമീപം കൃഷിവകുപ്പിനു കീഴിൽ പ്രവർത്തിക്കുന്ന ആദൂർ-ഗാളിമുഖ കാഷ്യു പ്രൊജനി ഓർച്ചാഡ്. ജന്മനാടായ കോഴിക്കോട്ടുനിന്നും സ്വന്തം ആഗ്രഹപ്രകാരം സ്ഥലംമാറ്റം വാങ്ങിയെത്തി നാലുവർഷമായി ഇവിടുത്തെ എല്ലാ പ്രവർത്തനങ്ങളെയും മുന്നിൽനിന്നു നയിക്കുകയാണ് ഫാം ഓഫീസറായ എൻ. സൂരജ്. സംസ്ഥാന കൃഷിവകുപ്പിന്‍റെ ഈ വർഷത്തെ മികച്ച ഫാം ഓഫീസർക്കുള്ള പുരസ്കാരം ഈ പ്രവർത്തനമികവിനുള്ള അംഗീകാരമാണ്. കശുമാവ് വികസന ഓഫീസറുടെ അധിക ചുമതല കൂടി ഏറ്റെടുത്തുകൊണ്ടാണ് സൂരജ് ഇവിടെയെത്തിയത്. 250 ഏക്കറോളം സ്ഥലത്ത് വ്യാപിച്ചുകിടക്കുന്ന ആദൂർ ഫാമിൽ ഉത്പാദിപ്പിക്കുന്ന മികച്ചയിനം കശുമാവിൻ തൈകൾ ഇന്ന് കേരളത്തിലെ എല്ലാ ജില്ലകളിലേക്കും കർണാടകയിലേക്കുമെല്ലാം വിതരണത്തിനെത്തുന്നുണ്ട്. കഴിഞ്ഞവർഷം ഒരു കോടിയിലേറെ രൂപയുടെ റിക്കാർഡ് വിറ്റുവരവാണ് ഈ സ്ഥാപനം നേടിയത്. വിവിധ ഇനങ്ങളിൽപ്പെട്ട 1.62 ലക്ഷം കശുമാവിൻ തൈകളാണ് ഇവിടെ ഉത്പാദിപ്പിച്ച് കശുമാവ് വികസന ഏജൻസി മുഖേന സംസ്ഥാനത്തുടനീളം വിതരണം ചെയ്യപ്പെട്ടത്. ഇന്ത്യൻ കാർഷിക ഗവേഷണ കൗൺസിലിനു കീഴിൽ കർണാടകയിലെ പുത്തൂരിലുള്ള കശുമാവ് ഗവേഷണകേന്ദ്രത്തിൽ പുതുതായി വികസിപ്പിച്ചെടുത്ത നേത്ര ജംബോ, നേത്രഗംഗ, ഉദയ, കർണാടകയിൽ നിന്നുള്ള ഭാസ്കര തുടങ്ങിയ സവിശേഷ ഇനങ്ങളും ഇവിടെ വിതരണത്തിനായി നട്ടുവളർത്തുന്നുണ്ട്. കശുമാവിന് പുറമേ ഒട്ടുമാവിൻ തൈകൾ, കുറിയ ഇനം തെങ്ങിൻതൈകൾ, ഒട്ടുപ്ലാവ്, പേര, കുരുമുളക് എന്നുതുടങ്ങി ഡ്രാഗൺ ഫ്രൂട്ട് വരെ തികച്ചും ശാസ്ത്രീയവും ജൈവവുമായ രീതിയിൽ ഇവിടെ വളർത്തിയെടുക്കുന്നുണ്ട്. വിവിധതരം അലങ്കാരച്ചെടിയും ചെണ്ടുമല്ലികൃഷിയും വേറെയും. അതതു സീസണുകളിൽ ഇവയിൽ നിന്നെല്ലാമുള്ള ഉത്പന്നങ്ങളും വില്പന നടത്താറുണ്ട്. ഒരുകാലത്ത് പുല്ലുമാത്രം വളർന്നുനിന്നിരുന്ന പാറപ്രദേശമാണ് ഇപ്പോൾ വിനോദസഞ്ചാരകേന്ദ്രങ്ങളെ വെല്ലുന്ന തരത്തിൽ മനോഹരമായത്. കേന്ദ്രസർക്കാരിന്‍റെ രാഷ്‌‌ട്രീയ കൃഷിവികാസ് യോജനയിൽ 2.77 കോടി രൂപയുടെ പുതിയ പദ്ധതികളാണ് അടുത്തിടെ ഈ സ്ഥാപനത്തെ തേടിയെത്തിയത്. ഇതിന്‍റെ ഭാഗമായി കശുവണ്ടി സംസ്കരണ യൂണിറ്റ്, വില്പനകേന്ദ്രം, മ്യൂസിയം, പരിശീലനകേന്ദ്രം, ജലസംഭരണി, ഫാം ടൂറിസം എന്നിവ നടപ്പാക്കാനാണ് പദ്ധതി. കാർഷിക സർവകലാശാലയുടെ സഹകരണത്തോടെ സ്വന്തമായി ഒരു കാലാവസ്ഥാ നിരീക്ഷണകേന്ദ്രവും ഫാമിൽ സ്ഥാപിച്ചിട്ടുണ്ട്. കീടനാശിനികൾക്കു പിന്നാലെ രാസവളങ്ങളുടെയും ഉപയോഗം പൂർണമായും അവസാനിപ്പിച്ച് കാർബൺ ന്യൂട്രൽ പദവി നേടുന്നതിനുള്ള പ്രവർത്തനങ്ങൾ അവസാനഘട്ടത്തിലാണ്. കശുമാവുകളുമായി ബന്ധപ്പെട്ട മേഖലയിൽ തന്നെ പഠനം നടത്തിയ ഭാര്യ അശ്വതി ചന്ദ്രകുമാർ ഇപ്പോൾ പുത്തൂരിലെ കേന്ദ്ര കശുമാവ് ഗവേഷണകേന്ദ്രത്തിൽ ശാസ്ത്രജ്ഞയാണ്. ഏക മകൾ നിഹാരികയ്ക്ക് രണ്ടര വയസ്. കോഴിക്കോട് പൊറ്റമ്മലിലെ എൻ.ജയാനന്ദന്‍റെയും സജിതയുടെയും മകനാണ് സൂരജ്. സഹോദരി: സൂര്യ.

കൂൺ താരം രാഹുൽ തന്നെ

ഇരിട്ടി: കൂൺ കൃഷിയിൽ പെല്ലറ്റ് കൃഷിരീതി വിജയകരമായി നടപ്പാക്കി വരുന്ന പുന്നാട് സ്വദേശി രാഹുൽ ഗോവിന്ദിന് മികച്ച കൂൺ കർഷകനുള്ള സംസ്ഥാനപുരസ്കാരം. മികച്ച കർഷകനുള്ള ദീപിക അഗ്രി എന്‍റർപ്രണർ പുരസ്കാര ജേതാവ് കൂടിയാണ് രാഹുൽ ഗോവിന്ദ്. മറൈൻ എൻജിനിയറായിരുന്ന രാഹുൽ ഗോവിന്ദ് ഒരു അവധിക്ക് നാട്ടിലെത്തിയപ്പോൾ അമ്മയ്ക്കു വേണ്ടി വീടിനോട് ചേർന്നു നിർമിച്ച ചെറിയ ഫാമിൽനിന്നാണ് കൂൺ കൃഷി ആരംഭിച്ചത്. പിന്നീട് മർച്ചന്‍റ് നേവിയിലെ ജോലി ഉപേക്ഷിച്ച് മുഴുവൻസമയ കർഷകനായി മാറുകയായിരുന്നു. "മൺസൂൺ മഷ്റും' എന്ന രാഹുൽ ഗോവിന്ദിന്‍റെ ബ്രാൻഡ് ഇന്ന് കേരളത്തിലെങ്ങും അറിയപ്പെടുന്ന ഉത്പന്നമാണ്. അറിയപ്പെടുന്ന കൂൺ കർഷകനായി വളരുകയെന്ന സ്വപ്നവുമായി സഞ്ചരിച്ച രാഹുലിനെ ആദ്യം കണ്ടെത്തി ജനങ്ങളിലേക്ക് എത്തിച്ചത് ദീപികയും കർഷകൻ മാസികയും ആയിരുന്നു. ഹൈടെക്ക് ഫാം കൃഷി രീതികൾ, വിത്ത് തുടങ്ങി കേരളത്തിന് അകത്തും പുറത്തും രാഹുൽ വിപണനവും നടത്തുന്നുണ്ട്. കൃഷിയെ അഗ്രി ബിസനസ് ആയി കാണുന്ന രാഹുൽ കൂടുതൽ മൂല്യവർധിത ഉത്പന്നങ്ങൾ നിർമിക്കുന്നതിൽ വിജയിച്ച സംരംഭകൻ കൂടിയാണ്. പുതുതായി ആരംഭിച്ച മഷ്റൂം എക്‌സ്‌പ്ലൊറേഷൻ ആൻഡ് റിസർച് സെന്‍റർ (കൂൺകൃഷി ഗവേഷണ- വിത്തുത്പാദന-പഠനകേന്ദ്രം) ഏപ്രിലിൽ മന്ത്രി പി. പ്രസാദാ‍യിരുന്നു ഉദ്ഘാടനം ചെയ്‌തത്. കേരളത്തിലെ ആദ്യ "കൂൺ ബിരിയാണി'യുടെ ലോഞ്ചിംഗും അന്നു മന്ത്രി നടത്തി. പുതിയ കൂൺ ഇനങ്ങളുടെ ഗവേഷണം, പഠനം, കൃഷി രംഗത്തു താത്പര്യമുള്ളവർക്കുള്ള പരിശീലനം എന്നിവയാണ് ഗവേഷണ കേന്ദ്രത്തിൽ ക്രമീകരിക്കുന്നത്. വിത്തിട്ടു വിളവ് ശേഖരിക്കുന്നതു വരെ താമസിച്ചു പഠനം നടത്തി പോകാനുള്ള സൗകര്യം കൂടി കേന്ദ്രത്തിൽ സ്ഥാപിക്കുന്നതിനുള്ള ഒരുക്കത്തിലാണ് ഈ യുവ കർഷകൻ. ആറളം ഫാമിൽ പങ്കാളിത്ത പദ്ധതിയുടെ ഭാഗമായി നടത്തുന്ന ഹൈടെക് ഫാമിൽനിന്നു കൂൺ അച്ചാറും നിർമിച്ച് പുറത്തിറക്കിയിട്ടുണ്ട്. മഷ്റൂം മസാലയും ഉടൻ പുറത്തിറക്കും. കൃഷി ജാഗരൺ കൃഷിക്കൊപ്പം ആവശ്യമുള്ളവർക്ക് പരിശീലനവും ഫാം നിർമാണവും ഏറ്റെടുത്തു നടത്തുന്നുണ്ട്. മീത്തലെ പുന്നാട് രമ്യാ നിവാസിൽ പി.എം. ഗോവിന്ദൻ നമ്പ്യാരുടെയും രമാദേവിയുടെയും മകനാണ്. ഭാര്യ: അനുശ്രീ. മകൻ: റയാൻ.

കാർഷികമേഖലയിലും ഇടച്ചേരി ടച്ച്

കണ്ണൂർ: സംസ്ഥാനത്തെ മികച്ച റസിഡന്‍റ്സ് അസോസിയേഷൻ പുരസ്കാര നേട്ടത്തിനു പിന്നാലെ കാർഷിക പുരസ്കാരവും സ്വന്തമാക്കി ഇടച്ചേരി റസിഡന്‍റ്സ് അസോസിയേഷൻ. വിഷരഹിത പച്ചക്കറി കൃഷി, ചെണ്ടുമല്ലി, പൂ കൃഷി എന്നീ മേഖലയിലടക്കം അസോസിയേഷന്‍റെ പ്രവർത്തന മികവാണ് ഇടച്ചേരി റസിഡന്‍റ്സ് അസോസിയേഷനെ കാർഷിക പുരസ്കാരത്തിന് അർഹമാക്കിയത്. പള്ളിക്കുന്ന് ഹൈവേയിൽ അസോസിയേഷൻ കൃഷിഭവൻ അനുവദിച്ച ഇക്കോഷോപ്പും വിജയകരമായി നടത്തിവരുന്നുണ്ട്. 2017 ൽ സംസ്ഥാനതലത്തിൽ രണ്ടാം സ്ഥാനവും 50,000 രൂപയുടെയും പുരസ്കാരവും നേടിയിരുന്നു. മലയാള മനോരമയുടെ മികച്ച റസിഡന്‍റ്സ് അസോസിയേഷനുള്ള ഒരു ലക്ഷം രൂപയുടെ പുരസ്കാരം, ഹരിത കേരള മിഷനും ശുചിത്വ മിഷനും ഫെറയും സംയുക്തമായി നടത്തിയ നവകേരള ജനകീയ കാന്പയിനിൽ സ്റ്റാർ ഗ്രേഡ് പരിശോധനയിൽ ഏറ്റവും കൂടുതൽ പോയിന്‍റ് നേടി ഫൈവ് സ്റ്റാർ പദവി, കൂടാതെ ആസ്റ്റർ മിംസ് കണ്ണൂരിന്‍റെ മികച്ച റസിഡന്‍റ്സ് അസോസിയേഷനുള്ള ഒരു ലക്ഷം രൂപയുടെ ഒന്നാം സമ്മാനം എന്നിവയും നേടിയിട്ടുണ്ട്. പാതയോര ശുചീകരണം, പാതയോരങ്ങളിൽ വൃക്ഷത്തൈ നട്ട് സംരക്ഷിക്കൽ, മാലിന്യ കൂമ്പാരങ്ങൾ നീക്കി പൂന്തോട്ടവും അക്ഷരക്കൂടും ഒരുക്കൽ, ബോട്ടിൽ ബൂത്തുകൾ സ്ഥാപിക്കൽ, പ്ലാസ്റ്റിക്കിന്‍റെയും പേപ്പർ ഗ്ലാസുകളുടെയും ഉപയോഗം കുറയ്ക്കുന്നതിനായി അംഗങ്ങൾക്ക് സൗജന്യമായി സ്റ്റീൽ പ്ലേറ്റുകൾ, ഗ്ലാസുകൾ എന്നിവയുടെ വിതരണവും നടത്തിയിരുന്നു. ലഹരിക്കെതിരെയുള്ള പ്രവർത്തനങ്ങൾ, ശുചിത്വ റാലി, ജീവകാരുണ്യ പ്രവർത്തനങ്ങൾ, കലാ കായിക മത്സരങ്ങളും പരിശീലനങ്ങൾ തുടങ്ങി നിരവധി പ്രവർത്തനങ്ങൾ അസോസിയേഷന്‍റെ നേതൃത്വത്തിൽ നടത്തിവരുന്നുണ്ട്. ജോർജ് തയ്യിൽ പ്രസിഡന്‍റായും ആർ. അനിൽകുമാർ ജനറൽ സെക്രട്ടറിയുമായുള്ള കമ്മിറ്റിയാണ് പ്രവർത്തനങ്ങൾക്ക് നേതൃത്വം നൽകുന്നത്. എം.കെ. സജേന്ദ്രൻ-ട്രഷറർ , ഹനീഷ് വാണിയങ്കണ്ടി, പദ്മിനി സന്തോഷ്-വൈസ് പ്രസിഡന്‍റുമാർ, കെ.എം. പ്രകാശൻ, ടി.കെ. ദിവാകരൻ-ജോയിന്‍റ് സെക്രട്ടറിമാർ എന്നിവരാണ് മറ്റു ഭാരവാഹികൾ.

വിമൽജ്യോതിയിൽ ബിരുദ ദാന ചടങ്ങ്

ചെന്പേരി: വിമൽ ജ്യോതി എൻജി നിയറിംഗ് കോളജില്‌നിന്ന്2025 വർഷം ബിടെക് പൂർത്തിയായ വിദ്യാർഥികൾക്ക് കണ്ണൂർ യൂണിവേഴ്സിറ്റി വൈസ് ചാൻസലർ പ്രഫ. ഡോ. കെ.കെ. സാജു ബിരുദ സർട്ടിഫിക്കറ്റുകൾ വിതരണം ചെയ്തു. മക്കൾ നേടുന്ന ജീവിത വിജയത്തിൽ മാതാപിതാക്കൾ സന്തോഷിക്കുന്നത് കാണുന്നതായിരിക്കണം പുതിയ തലമുറയുടെ ലഹരി എന്ന് വൈസ് ചാൻസലർ കെ.കെ. സാജു വിദ്യാർഥികളെ ഉത്‌ബോധിപ്പിച്ചു. വിമൽജ്യോതി സ്ഥാപനങ്ങളുടെ രക്ഷാധികാരിയായ തലശേരി ആർച്ച്ബിഷപ് മാർ ജോസഫ് പാംപ്ലാനി അധ്യക്ഷത വഹിച്ചു. മാതാപിതാക്കളെയും ഗുരുജനങ്ങളെയും ആദരിക്കുന്ന വിദ്യാർഥി സമൂഹത്തിനു മാത്രമേ ജീവിതത്തിൽ യഥാർഥ വിജയം നേടാൻ കഴിയൂവെന്ന് മാർ ജോസഫ് പാംപ്ലാനി ഓർമിപ്പിച്ചു. വിമൽ ജ്യോതി കോളജ് മാനേജർ ഫാ. ജയിംസ് ചെല്ലങ്കോട്ട് ബിരുദ വിദ്യാർഥികൾക്ക് പ്രതിജ്ഞ വാചകം ചൊല്ലിക്കൊടുത്തു. പ്രിൻസിപ്പൽ ഡോ. ബെന്നി ജോസഫ്, പ്രോഗ്രാം കോ-ഓർഡിനേറ്റർ പ്രഫ. ബി. ദിവ്യ എന്നിവർ പ്രസംഗിച്ചു.

വോളിബോൾ കിറ്റ് വിതരണം ചെയ്തു

ഇരിട്ടി: അയ്യൻകുന്ന് പഞ്ചായത്ത് ഈന്തുംകരി പട്ടികവർഗ സങ്കേതത്തിലെ യുവാക്കൾക്ക് വോളിബോൾ കിറ്റ് വിതരണം ചെയ്തു. കേരളാ പോലീസിന്‍റെ പ്രത്യേക ഫണ്ട് വിനിയോഗിച്ച് വാങ്ങിയ നെറ്റ്, മൂന്ന് ബോളുകൾ, ഏഴ് ജഴ്സി, ഏഴു ബൂട്ടുകൾ എന്നിവ അടങ്ങിയ കിറ്റാണ് വിതരണം ചെയ്തത്. ഈന്തുംകരി വാർഡ്‌ മെംബർ എ വൺ ജോസിന്‍റെ സാന്നിധ്യത്തിൽ കരിക്കോട്ടക്കരി എസ്എച്ച്ഒ കെ.ജെ. വിനോയ് കിറ്റ് ഈന്തുംകരി പട്ടികവർഗ സങ്കേതത്തിലെ യുവാക്കൾക്ക് കൈമാറി.

വീണ്ടും അംഗീകാര നിറവിൽ മാങ്ങാട്ടിടം കൃഷിഭവൻ

കൂത്തുപറമ്പ്: വീണ്ടും അംഗീകാരത്തിന്‍റെ നിറവിൽ മാങ്ങാട്ടിടം കൃഷിഭവൻ. കൃഷിവകുപ്പിന്‍റെ പ്രത്യേക പദ്ധതികൾ മികവോടെ നടപ്പിലാക്കിയ കൃഷിഭവനുള്ള സംസ്ഥാന സർക്കാരിന്‍റെ അവാർഡ് മാങ്ങാട്ടിടം കൃഷിഭവന് ലഭിച്ചു. ഒരു ലക്ഷം രൂപയും ഫലകവും പ്രശസ്തിപത്രവും അടങ്ങുന്നതാണ് അവാർഡ്. കർഷകരുടെ ആവശ്യങ്ങൾ മനസിലാക്കി അതിനനുസരിച്ച് പ്രവർത്തിക്കുകയും ഓരോ പ്രദേശത്തിന്‍റേയും പ്രത്യേകതകൾക്കനുസരിച്ച് കാർഷിക പദ്ധതികൾ ആവിഷ്കരിക്കുകയും അത് നടപ്പാക്കാൻ കർഷകർക്ക് എല്ലാവിധ പിന്തുണയും പ്രോത്സാഹനവും നല്കി വരുന്ന കൃഷി ഭവനാണ് മാങ്ങാട്ടിടം. മാതൃകാപരമായ വേറിട്ട പ്രവർത്തനങ്ങളാണ് തുടർച്ചയായ അംഗീകാരം മാങ്ങാട്ടിടം കൃഷിഭവനെ തേടിയെത്തുന്നത്. കൃഷിവകുപ്പിന്‍റെ കൃഷി സമൃദ്ധി പഞ്ചായത്താണ് മാങ്ങാട്ടിടം. റെഡ് ചില്ലിസ്, മാങ്ങാട്ടിടം ഹണി, മാങ്ങാട്ടിടം ഗോൾഡ് മഞ്ഞൾ, മാങ്ങാട്ടിടം റൈസ്, എന്നീ ഉത്പന്നങ്ങൾ കേരള അഗ്രോ ബ്രാൻഡിൽ ഇറക്കാൻ സാധിച്ചതും കൂടാതെ ഫ്രൂട്ട് ഗ്രാമം പദ്ധതി നടപ്പിലാക്കിയതും മാങ്ങാട്ടിടം കൃഷി ഭവനെ ഈ അവാർഡിലേക്ക് നയിച്ചു. ഇതിന് മുന്പ് മികച്ച കൃഷിഭവനുള്ള അവാർഡും കൃഷി വകുപ്പിന്‍റെ ജൈവ പഞ്ചായത്ത് അവാർഡും മാങ്ങാട്ടിടത്തിന് ലഭിച്ചിട്ടുണ്ട്. കൂടാതെ മികച്ച കൃഷി അസിസ്റ്റന്‍റിനുള്ള കൃഷി വകുപ്പിന്‍റെ അവാർഡും മാങ്ങാട്ടിടം കൃഷിഭവനിലെ ആർ. സന്തോഷ്കുമാർ നേടിയിട്ടുണ്ട്. കൃഷിഭവന്‍റെയും പഞ്ചായത്തിന്‍റെയും കർഷകരുടെയും പൊതുജനങ്ങളുടെയും കൂട്ടായ്മയുടെ വിജയമാണ് ഈ അംഗീകാരം.

ചെടിക്കുളത്ത് കടുവ‍?

ഇരിട്ടി: ആറളം പഞ്ചായത്തിലെ ചെടിക്കുളത്ത് കൃഷിയിടത്തിൽ കടുവയെ കണ്ടതായുള്ള അഭ്യൂഹം ശക്തമായി. പ്രദേശവാസി സേവി തേക്കേക്കരയുടെ വീടിനോട് ചേർന്നുള്ള കൃഷിയിടത്തിലാണ് കടുവയെന്ന് തോന്നിക്കുന്ന ജീവിയെ അദ്ദേഹം കണ്ടത്. അരയാൾ പൊക്കത്തിൽ നീണ്ട വാലുകളോട് കൂടിയ ജീവിയെ കൃഷിയിടത്തിൽ അഞ്ചു മീറ്റർ അകലെനിന്ന് കണ്ടെന്നാണ് സേവി(60) പറയുന്നത്. മേഖലയിലെ ലോട്ടറി വില്പനക്കരനായ മറ്റൊരാളും പശുകിടാവിന്‍റെ വലിപ്പം തോന്നിക്കുന്ന ഏതോ ഒരു ജീവി കൃഷിയിടത്തിലെ മതിൽ ചാടിക്കടന്ന് ഓടുന്നതായി കണ്ടതായും പറഞ്ഞിരുന്നു. കീഴ്പളളി സെക്ഷൻ ഫോറസ്റ്ററുടെ നേതൃത്വത്തിൽ വനം വകുപ്പ് മേഖലയിൽ പരിശോധന നടത്തി. കനത്ത മഴയായതിനാൽ കാൽപ്പാടുകൾ തിരിച്ചറിയാൻ കഴിഞ്ഞില്ല. ജീവി ഏതെന്ന് സ്ഥിരീകരിച്ചില്ലെങ്കിലും പ്രദേശവാസികളോട് മുൻകരുതൽ എടുക്കണമെന്ന് വനം വകുപ്പ് നിർദേശിച്ചു. ഒറ്റയ്ക്ക് കൃഷിയിടത്തിൽ പോകരുതെന്നുമുള്ള മുന്നറിയിപ്പാണ് വനം വകുപ്പ് നല്കിയതെന്ന് പ്രദേശവാസികൾ പറഞ്ഞു. കഴിഞ്ഞ ദിവസം രാവിലെ സേവി വീടിനോട് ചേർന്നുള്ള തെങ്ങിൻ തോപ്പിൽ വീണ് കിടക്കുന്ന തേങ്ങയെടുക്കാൻ പോയതായിരുന്നു. പോകുന്ന വഴിയരികിൽ വാഴക്കുല ഒടിഞ്ഞു വീണത്ത് ശ്രദ്ധയിൽപ്പെട്ടു. ഇത് മാറ്റുന്നതിനായി പോകുന്നതിനിടയിലാണ് ചെറിയ കാട്ടിനുളളിൽ നിന്ന് മുരൾച്ചയോടെ വലിയ ജീവി പിന്നീട് മാറി പോവുകയുമാണ് ചെയ്തതെന്ന് സേവി പറഞ്ഞു. ചെടിക്കുളം -കല്ലറ റോഡിനും ചെടിക്കുളം -വീർപ്പാട് റോഡിനും ഇടയിലുള്ള പ്രദേശമാണിത്. ഇവിടെ റോഡിനോട് ചേർന്നുള്ള ഭാഗം ഒഴിച്ച് കശുമാവും റബറുമുള്ള കൃഷിയിടമാണ്. ഇവിടങ്ങളിൽ താമസക്കാരും തീരേയില്ല. മേഖലയിൽ കാട്ടുപന്നിയുടേയും കുരങ്ങിന്‍റേയും മയിലിന്‍റേയും ശല്യം രൂക്ഷമാണ്. ഇവയുടെ സാന്നിധ്യമാണ് വന്യമൃഗങ്ങളെ ജവാസമേഖലയി ലേക്കും കൃഷിയിടത്തിലേക്കും ആകർഷിക്കുന്നതെന്നാണ് നാട്ടുകാർ പറയുന്നത്. ഇവിടെ കൃഷിയിറക്കാൻ പറ്റാത്ത അവസ്ഥയാണെന്നും ഇപ്പോൾ വന്യമൃഗങ്ങൾ ജനങ്ങളുടെ ജീവനും ഭീഷണിയായിക്കൊണ്ടിരിക്കുകയാണെന്ന് കർഷകനും പ്രദേശവാസിയുമായി ബിനുപന്നിക്കോട്ടിൽ പറഞ്ഞു.

എടക്കാനം കേസിലെ ഒരു പ്രതിക്കെതിരേ കാപ്പ

ഇരിട്ടി: എടക്കാനം അക്രമസംഭവത്തിൽ ഉൾപ്പെട്ട് റിമാൻഡിലായ ഒരു പ്രതിക്കെതിരേ കാപ്പ ചുമത്തി അറസ്റ്റു ചെയ്തു. എടക്കാനം അക്രമക്കേസ് ഉൾപ്പടെ നിരവധി ക്രിമിനൽ കേസിൽ പ്രതിയായ മുഴക്കുന്ന് ഗുണ്ടികയിലെ കൈമടയൻ ഹൗസിൽ അക്ഷയ് (25)ക്കെതിരേയാണ് മുഴക്കുന്ന് പോലിസ് കാപ്പ ചുമത്തി അറസ്റ്റു ചെയ്തത്. എടക്കാനം ആക്രമസംഭവത്തിൽ മൂന്നാം പ്രതിയായ അക്ഷയ് ഈ കേസിൽ അറസ്റ്റ് ചെയ്യപ്പെട്ട് റിമാൻഡലാണ്. മുഴക്കുന്ന് പോലിസ് ജയിലിലെത്തിയാണ് അറസ്റ്റു രേഖപ്പെടുത്തിയത്. എടക്കാനം അക്രമത്തെ തുടർന്ന് സംഭവത്തിൽ ഉൾപ്പെട്ട നാലു പേർക്കെതിരേയാണ് കാപ്പ ചുമത്തുന്നതിനായി പോലിസ് കോടതിയിൽ റിപ്പോർട്ടു നല്കിയത്. മറ്റു മൂന്നു പേർക്കെതിരേയും കാപ്പ ചുമത്തി അറസ്റ്റു രേഖപ്പെടുത്തുമെന്നാണ് പോലിസ് നല്കുന്ന സൂചന.

ഇരിട്ടി പാലത്തിന് സമീപം ഡിവൈഡറുകളിൽ ബാരിക്കേഡുകൾ സ്ഥാപിച്ചു തുടങ്ങി

ഇരിട്ടി: തലശേരി-മൈസൂരു അന്തർസംസ്ഥാന പാതയിൽ ഇരിട്ടി പുതിയ പുതിയ പാലം സിഗ്നലിലെ ഡിവൈഡറിൽ ബാരിക്കേഡുകൾ സ്ഥാപിക്കുന്ന പ്രവൃത്തി ആരംഭിച്ചു. ഡിവൈഡറിന് മുകളിൽ വാഹനങ്ങൾ കയറി ഇവിടെ അപകടം പതിവായതയോടെ ദീപികയിൽ വാർത്ത പ്രസിദീകരിച്ചിരുന്നു. വാർത്തയെ തുടർന്ന് ഇരിട്ടിയിലെ സ്വകാര്യസ്ഥാപനമാണ് ഇവിടെ ഡിവൈഡർ സ്ഥാപിക്കാൻ മുന്നോട്ട് വന്നത്. പഞ്ചായത്തിന്‍റെയും ഇരിട്ടി പോലീസിന്‍റെയും പൊതുമരാമത്തിന്‍റെയും അനുവാദത്തോടെയാണ് ബാരിക്കേഡുകൾ സ്ഥാപിക്കുന്നത്. സ്ഥലത്തെ അപകടാവസ്ഥ ചൂണ്ടിക്കാണിച്ച് പലതവണ വാർത്തകൾ വന്നിട്ടും പൊതുമരാമത്ത് വകുപ്പ് യാതൊരു നടപടിയും സ്വീകരിക്കാതെ വന്നതോടെയാണ് സ്വകാര്യ സ്ഥാപന ഉടമ സന്നദ്ധത പ്രകടിപ്പിച്ച് മുന്നോട്ടുവന്നത്. ഇവിടുത്തെ അപകട സാധ്യത പരിഗണിച്ച് പോലീസും പായം പഞ്ചായത്തും പച്ചകൊടി കാണിച്ചതോടെയാണ് പ്രവൃത്തികൾ വേഗത്തിൽ ആയത്. സമാനമായ അവഗണനയാണ് ഇരിട്ടി ടൗണിലെ വഴിവിളക്കുകളുടെ കാര്യത്തിലും പൊതുമരാമത്ത് വകുപ്പിന്‍റെ ഭാഗത്തുനിന്നും ഉണ്ടായത്. ഒടുവിൽ നഗരസഭ ഇടപെട്ട് അനുമതി വാങ്ങി സ്വകാര്യ സ്ഥാപനത്തിന്‍റെ സഹായത്തോടെ പുതിയ വഴിവിളക്കുകൾ ഇപ്പോൾ സ്ഥാപിച്ചിരിക്കുന്നത്. രണ്ടു ദിവസത്തിനുള്ളിൽ പ്രവൃത്തികൾ പൂർത്തിയാകുമെന്ന് ബന്ധപ്പെട്ട കരാറുകാരൻ അറിയിച്ചു.

വ്യാപാരി കൗൺസിലും നേതൃസംഗമവും

ചെറുപുഴ: വ്യാപാരി വ്യവസായി ഏകോപന സമിതി (കെവിവിഇഎസ്) ചെറുപുഴ മേഖലാ കൗൺസിലും നേതൃസംഗമവും അരവഞ്ചാൽ വ്യാപാര ഭവനിൽ നടന്നു. സംസ്ഥാന ജനറൽ സെക്രട്ടറി ദേവസ്യ മേച്ചേരി ഉദ്ഘാടനം ചെയ്തു. മേഖലാ പ്രസിഡന്‍റ് റോയി ജോസ് അധ്യക്ഷത വഹിച്ചു. മേഖലാ ജനറൽ സെക്രട്ടറി ജോൺസൻ സി. പടിഞ്ഞാത്ത് വാർഷിക റിപ്പോർട്ടും മേഖലാ ട്രഷറർ സുജിത് നമ്പ്യാർ വരവ് ചെലവ് കണക്കും അവതരിപ്പിച്ചു. സംസ്ഥാന വൈസ് പ്രസിഡന്‍റ് ബാബു കോട്ടയിൽ മുഖ്യപ്രഭാഷണം നടത്തി. ജില്ലാ ജനറൽ സെക്രട്ടറി പി. ബാഷിത്, ജിലാ സെക്രട്ടറിമാരായ ജെ. സെബാസ്റ്റ്യൻ, എൻ.വി. കുഞ്ഞിരാമൻ, മേഖല വൈസ് പ്രസിഡന്‍റുമാരായ വിൽസൻ ഇടക്കര, റോയി ജോസഫ്, എ. രാജേഷ്, യൂത്ത് വിംഗ് മേഖലാ പ്രസിഡന്‍റ് വിനോഷ് മാത്യു, വനിതാ വിംഗ് മേഖലാ പ്രസിഡന്‍റ് വൽസാ ജോൺ എന്നിവർ പ്രസംഗിച്ചു. വനിതാ വിംഗ് അംഗങ്ങൾ അവതരിപ്പിച്ച സൂംബാ ഡാൻസും നടന്നു.

വോട്ട് കൊള്ളയ്ക്കെതിരേ പ്രതിഷേധം

ആലക്കോട്: ഇലക്ഷൻ കമ്മീഷന്‍റെ നടപടിക്കെതിരേ ആലക്കോട് ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ ആലക്കോട് ടൗണിൽ പ്രതിഷേധ പ്രകടനം നടത്തി. യുഡിഎഫ് ജില്ലാ ചെയർമാൻ പി.ടി. മാത്യു ഉദ്ഘാടനം ചെയ്തു. ബ്ലോക്ക് കോൺഗ്രസ് പ്രസിഡന്‍റ് ജോസ് വട്ടമല അധ്യക്ഷത വഹിച്ചു. ഡിസിസി ജനറൽ സെക്രട്ടറിമാരായ ജോഷി കണ്ടത്തിൽ, ബിജു പുളിയൻതൊട്ടി, മണ്ഡലം പ്രസിഡന്‍റുമാരായ ബാബു പള്ളിപുറം, ജോയിച്ചൻ പള്ളിയാലിൽ, റോയി ചക്കാനിക്കുന്നേൽ, ഷാജി പാണംകുഴി, കർഷക കോൺഗ്രസ് സംസ്ഥാന ജനറൽ സെക്രട്ടറി ജോസഫ് പറയൻകുഴി, ജിൻസ് മാത്യു, ജോജി കന്നിക്കാട്ട്, ഐസക്ക് മുണ്ടിയാക്കൽ, സിബിച്ചൻ കളപ്പുര, കെ.കെ. ചന്ദ്രൻ, ജോൺസൺ ചിറവയൽ, അപ്പുക്കുട്ടൻ സാമിമഠം എന്നിവർ പ്രസംഗിച്ചു. നടുവിൽ: രാജ്യത്തെ വോട്ട് കൊള്ളയിൽ രാഹുൽ ഗാന്ധിയുടെ വെളിപ്പെടുത്തലുകളുടെ പശ്ചാത്തലത്തിൽ ജനാധിപത്യത്തെ അട്ടിമറിക്കാൻ കൂട്ടുനിൽക്കുന്ന തെരഞ്ഞെടുപ്പ് കമ്മീഷനെതിരെ രാഹുൽ ഗാന്ധി ഉയർത്തിയ ചോദ്യങ്ങൾ കേന്ദ്ര തെരഞ്ഞെടുപ്പ് കമ്മീഷന് തപാൽവഴി അയച്ചുനൽകി യൂത്ത് കോൺഗ്രസ്‌ പ്രതിഷേധം. നടുവിൽ മണ്ഡലം കമ്മിറ്റിയുടെ നേതൃത്വത്തിൽ നടുവിൽ ഹെഡ് പോസ്റ്റ്‌ ഓഫീസിനു മുന്നിൽ നടന്ന പരിപാടി ഡിസിസി ജനറൽ സെക്രട്ടറി ജോഷി കണ്ടത്തിൽ ഉദ്ഘാടനം ചെയ്തു. വി.എം. നന്ദകിഷോർ അധ്യക്ഷത വഹിച്ചു. ഷാജി പണക്കുഴി, അഖിൽ ജോസഫ്, അഭിജിത് മഠത്തിക്കുളം, അഭിജിത് അജയകുമാർ, അരുൺ മാത്യു, ശരത് കുമാർ, കെ.കെ. സനുഷ, അതുൽ നടുവിൽ, വിനോദ് നടുവിൽ, നിവേദ് നടുവിൽ തുടങ്ങിയവർ നേതൃത്വം നൽകി. പയ്യാവൂർ: പയ്യാവൂർ മണ്ഡലം യൂത്ത് കോൺഗ്രസ് കമ്മിറ്റിയുടെ നേതൃത്വത്തിൽ പൈസക്കരി പോസ്റ്റ് ഓഫീസിന് മുന്നിൽ നടന്ന പ്രതിഷേധ പരിപാടിയിൽ നിന്ന് തെരഞ്ഞെടുപ്പ് കമ്മീഷന് കത്തയച്ചു. ടി.പി. അഷ്റഫ് പ്രതിഷേധ പരിപടി ഉദ്ഘാടനം ചെയ്തു. മണ്ഡലം പ്രസിഡന്‍റ് ആൽബിൻ മാത്യു അയ്യങ്കാനാൽ അധ്യക്ഷത വഹിച്ചു. മണ്ഡലം സെക്രട്ടറി നിയാസ്, ആനീസ് നെട്ടനാനിയിൽ, സിന്ധു ബെന്നി എന്നിവർ പ്രസംഗിച്ചു. ചെറുപുഴ: യൂത്ത് കോൺഗ്രസ് ചെറുപുഴ മണ്ഡലം കമ്മിറ്റിയുടെ നേതൃത്വത്തിൽ ഇലക്ഷൻ കമ്മീഷന് കത്ത് അയച്ച് പ്രതിഷേധിച്ചു. പയ്യന്നൂർ നിയോജക മണ്ഡലം വൈസ് പ്രസിഡന്‍റ് ദിലിൻ വിത്തൻ ഉദ്ഘാടനം ചെയ്തു. മണ്ഡലം പ്രസിഡന്‍റ് പ്രണവ് കരാള അധ്യക്ഷത വഹിച്ചു. എം.ബി. ബിൻരാജ്, പി. മിഥുൻ, എം. രാഹുൽ, അമൽ ശശീന്ദ്രൻ, ആൽബിൻ, അതുൽ റോയി എന്നിവർ പ്രസംഗിച്ചു. തളിപ്പറമ്പ്: തളിപ്പറമ്പ് ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ തളിപ്പറമ്പിൽ പ്രതിഷേധ പ്രകടനം നടത്തി. എം.എൻ. പൂമംഗലം ടി. ജനാർദ്ദനൻ, രജനി രമാനന്ദ്, എ.ഡി. സാബൂസ്, ഇ.ടി. രാജീവൻ, നൗഷാദ് ബ്ലാത്തൂർ, രാജീവൻ കപ്പച്ചേരി, എ.എൻ. ആന്തൂരാൻ, സി.വി. സോമനാഥൻ, രാഹുൽ വെച്ചിയോട്ട്, കെ. രമേശൻ, പി.എം. മാത്യു, സണ്ണി പോത്തനാംതടം, പി.ജെ. മാത്യു, പ്രമീള രാജൻ, ഇ. വിജയൻ, സജി ഓതറ, അഡ്വ. ടി.ആർ. മോഹൻദാസ് എന്നിവർ നേതൃത്വം നൽകി.

കുറ്റിക്കോൽ അടിപ്പാതയിലെ വെള്ളക്കെട്ട് പ്രശ്നം പരിഹരിക്കും: എം.വി. ഗോവിന്ദൻ

തളിപ്പറമ്പ്: ദേശീയപാത കുറ്റിക്കോൽ അടിപ്പാതയിൽ മഴക്കാലത്തെ വെള്ളക്കെട്ട് ഉൾപ്പടെയുള്ള പ്രശ്നത്തിന് ശാശ്വത പരിഹാരം കാണുന്നതിന് ഒരാഴ്ചയ്ക്കകം നിർദേശം സമർപ്പിക്കാൻ എം.വി. ഗോവിന്ദൻ എംഎൽഎ റവന്യൂ -ദേശീയപാതാ വിഭാഗത്തോട് ആവശ്യപ്പെട്ടു. ഇന്നലെ കുറ്റിക്കോലിലെ അടിപ്പാത സന്ദർശിച്ച ശേഷമായിരുന്നു അദ്ദേഹം ഇക്കാര്യം വ്യക്തമാക്കിയത്. പുതിയ ദേശീയ പാതയിലൂടെ തളിപ്പറമ്പിലേക്ക് വരുന്ന വാഹനങ്ങൾക്ക് തടസങ്ങളില്ലാതെ നഗര ത്തിലേക്ക് എത്തിച്ചേരാൻ കഴിയുന്ന വിധത്തിൽ ഗതാഗതം സജ്ജീകരിക്കണം. മഴക്കാലത്ത് അടിപ്പാതയിൽ വെള്ളക്കെട്ട് ഉണ്ടാകാതിരിക്കാൻ നടപടി ഉണ്ടാവണമെന്നും എംഎൽഎ ആവശ്യപ്പെട്ടു നിലവിലെ അലൈൻമെന്‍റ് പ്രകാരം സർവീസ് റോഡിലൂടെ വരുന്ന വാഹനങ്ങൾ അടിപ്പാത വഴിയും വലിയ വാഹനങ്ങൾ കുറ്റിക്കോൽ നിന്ന് ജംഗ്ഷനിൽ സർക്കിൾ വഴി നേരിട്ടും പഴയ ദേശീയപാതയിലേക്ക് പ്രവേശിക്കാനുമാണ് സൗകര്യമൊരുക്കുന്നതെന്ന് ദേശീയപാതാ വിഭാഗം ഉദ്യോഗസ്ഥർ അറിയിച്ചു. അടിപ്പാതയുടെ ഇരുവശത്തുകൂടെയും മഴവെള്ളമുൾപ്പടെ ഒഴുക്കി വിടാൻ ഡ്രെയ്നേജ് ഉണ്ടാകുമെന്നും അറിയിച്ചു. തളിപ്പറമ്പ് ആർഡിഒ സി.കെ. ഷാജി, തഹസിൽദാർ കെ. സജീവൻ, ദേശീയപാത വിഭാഗം ഉദ്യോഗസ്ഥൻ, കരാർ കമ്പനിയുടെ ഉദ്യോഗസ്ഥർ തുടങ്ങിയവരും സംഘത്തിലുണ്ടായിരുന്നു.

വിസിക്കെതിരേ ചെമ്പേരിയിൽ എസ്എഫ്ഐ പ്രതിഷേധം

ചെമ്പേരി: കണ്ണൂർ യൂണിവേഴ്സിറ്റി വൈസ് ചാൻസലർക്കെതിരേ ചെമ്പേരിയിൽ എസ്എഫ്ഐ പ്രതിഷേധം. ചെമ്പേരി വിമൽ ജ്യോതി എൻജിനിയറിംഗ് കോളജിലെ ബിരുദദാന ചടങ്ങിൽ പങ്കെടുത്ത് മടങ്ങുമ്പോൾ കോളജ് ഗേറ്റിനു പുറത്ത് വിസിയുടെ വാഹനം തടയാൻ ശ്രമിച്ച പ്രവർത്തകരെ പോലീസ് ബലം പ്രയോഗച്ച് നീക്കുകയാണുണ്ടായത്. കണ്ണൂർ യൂണിവേഴ്സിറ്റിയിലെ പാലയാട് കാമ്പസിൽ 'ആർട്ടിക്കിൾ 158' എന്ന പരിപാടി നടത്തിയതിന് വൈസ് ചാൻസലർ വിശദീകരണം ചോദിച്ചതിനും 14 ന് മുഴുവൻ കോളജുകളിലും വിഭജനഭീതി ദിനമാചരിക്കണമെന്ന നിർദേശത്തിനുമെതിരെയാണ് പ്രതിഷേധിച്ചത്. എസ്എഫ്ഐ ശ്രീകണ്ഠപുരം ഏരിയ കമ്മിറ്റിയുടെ ആഭിമുഖ്യത്തിൽ ഭരണഘടന ഉയർത്തിപ്പിടിച്ച് നടത്തിയ പ്രതിഷേധത്തിന് എസ്എഫ്ഐ സംസ്ഥാന കമ്മിറ്റിയംഗം ജോയൽ തോമസ്, ശ്രീകണ്ഠപുരം ഏരിയ സെക്രട്ടറി അശ്വന്ത് കൃഷ്ണൻ, ഏരിയ പ്രസിഡന്‍റ് ടി.വി. സ്വാതി എന്നിവർ നേതൃത്വം നൽകി. വൈസ് ചാൻസലറുടെ വാഹനത്തിന് മാർഗതടസമുണ്ടാക്കിയതിന് കേസെടുത്ത കുടിയാന്മല പോലീസ് ജോയൽ തോമസ്, അശ്വന്ത് കൃഷ്ണൻ, ആദിഷ് സജീവ്, ജോയൽ ഡൊമിനിക്ക് എന്നിവരെ അറസ്റ്റ് ചെയ്ത് സ്റ്റേഷൻ ജാമ്യത്തിൽ വിട്ടയച്ചു.

സ്കൂൾ പ്രവേശന കവാടം ഉദ്ഘാടനം ചെയ്തു

എടക്കോം: എടക്കോം ക്രൈസ്റ്റ് നഗർ എൽപി സ്കൂളിന് പുതുതായി നിർമിച്ച പ്രവേശന കവാടം തലശേരി കോ-ഓപ്പറേറ്റീവ് എഡ്യുക്കേഷൻ ഏജൻസി മാനേജർ ഫാ. സോണി വടശേരി ഉദ്ഘാടനം ചെയ്തു. സ്കൂൾ പിടിഎയുടെ നേതൃത്വത്തിലാണ് നിർമാണം പൂർത്തീകരിച്ചത്. സ്കൂൾ മാനേജർ ഫാ. ജോസഫ് പവ്വത്തിൽ അധ്യക്ഷത വഹിച്ചു. മുഖ്യാധ്യാപിക ഇ.ടി. സാലി, മുൻ പിടിഎ പ്രസിഡന്‍റ് ജോസുകുട്ടി ചുക്കനാനിയിൽ, വൈസ് പ്രസിഡന്‍റ് ജസ്റ്റിൻ എന്നിവർ പ്രസംഗിച്ചു.

നാടൻ തോക്ക്: പ്രതി കോടതിയിൽ കീഴടങ്ങി

പയ്യാവൂര്‍: വീട്ടില്‍ രഹസ്യമായി സൂക്ഷിച്ച നാടന്‍ തോക്കും സ്‌ഫോടകവസ്തുക്കളും പിടികൂടിയ കേസിൽ ഒളിവിൽപോയ പ്രതിയെ കോടതി മുമ്പാകെ കീഴടങ്ങി. കാഞ്ഞിരക്കൊല്ലി കുട്ടിമാവ് നഗറിലെ ചപ്പിലിവീട്ടില്‍ ബാബു (55) വാണ് തളിപ്പറമ്പ് കോടതിയിൽ കീഴടങ്ങിയത്. രഹസ്യ വിവരത്തിന്‍റെ അടിസ്ഥാനത്തില്‍ ജൂലൈ 29ന് രാത്രി 8.30ന് പയ്യാവൂര്‍ പോലീസ് ബാബുവിന്‍റെ നടത്തിയ റെയിഡിലാണ് ഒരു നാടന്‍തോക്കും, അതില്‍ നിറയ്ക്കുവാന്‍ ഉപയോഗിക്കുന്ന സ്‌ഫോടക വസ്തുക്കളും പിടികൂടിയത്. പ്രതി ബാബുവിനെ കണ്ടെത്താന്‍ പോലീസ് അന്വേഷണം നടത്തുന്നതി നിടെ ഇന്നലെ ഉച്ചയോടെയാണ് കോടതിയിൽ കീഴടങ്ങിയത്. ഇയാൾ ജാമ്യത്തിനായി അപേക്ഷ നൽകിയിരുന്നു. അപേക്ഷ കോടതി നിരസിച്ചതോടെയാണ് കീഴടങ്ങിയത്. കോടതി ബാബുവിനെ റിമാൻഡ് ചെയ്തു.

മികച്ച കൃഷി അസിസ്റ്റന്‍റിനുള്ള അവാർഡ് സുരേഷ് കുറ്റൂരിന്

ചെറുപുഴ: സംസ്ഥാന കാർഷിക വികസന കർഷക ക്ഷേമ വകുപ്പിന്‍റെ മികച്ച കൃഷി അസിസ്റ്റന്‍റിനുള്ള സംസ്ഥാന അവാർഡിൽ മൂന്നാം സ്ഥാനം സുരേഷ് കുറ്റൂരിന്. കൃഷിമന്ത്രി പി. പ്രസാദ് നടത്തിയ വാർത്താ സമ്മേളനത്തിലാണ് അവാർഡ് പ്രഖ്യാപിച്ചത്. ചെറുപുഴ ഗ്രാമപഞ്ചായത്തിലെ കാർഷിക മേഖലയിൽ നടത്തിയ സ്ലാഘനീയമായ പ്രവർത്തനം മുൻ നിർത്തിയാണ് അവാർഡ്. രണ്ടാം തവണയാണ് സുരേഷ് സംസ്ഥാന അവാർഡിന് അർഹനാകുന്നത്. കഴിഞ്ഞ വർഷം ഒന്നാം സ്ഥാനമായിരുന്നു ലഭിച്ചിരുന്നത്. നൂതന കാർഷിക സാങ്കേതിക വിദ്യ കർഷകരിൽ എത്തിക്കുകയും കാർഷിക മേഖലയിൽ അഭൂതപൂർവമായ മാറ്റം വരുത്തുകയും ചെയ്യുന്നതിനായി നടത്തിയ പ്രവർത്തനം ശ്രദ്ധേയമാണ്. ഹരിത കേരളമിഷൻ നടപ്പാക്കുന്ന പച്ചത്തുരുത്ത്, ഹരിത വാർഡ്‌, കാർബൺ ന്യുട്രൽ തുടങ്ങിയ പദ്ധതികളുടെ സാങ്കേതിക ഉപദേഷ്ടാവും പ്രയോഗിക പരിശീലകനും ആണ്. കിലയുടെ റിസോഴ്സ് പേഴ്സൺ ആയും പ്രവർത്തിക്കുന്നു. പയ്യന്നൂർ കൃഷി അസിസ്റ്റന്‍റ് ഓഫീസിൽ ജോലിചെയ്യുന്ന സി.പി. ജിഷയാണ് ഭാര്യ. മക്കൾ: ഗോപിക, ആരവ്.

ദേവസ്വം ബോർഡ് ചെയർമാനും കമ്മീഷണറും പരിശോധനയ്ക്കെത്തും

ചപ്പാരപ്പടവ്: ചുഴലി വില്ലേജിലെ മാവിലമ്പാറയിൽ അനധികൃത ചെങ്കൽ ഖനനം നടക്കുന്ന പ്രദേശം ദേവസ്വം അസി.കമ്മീഷണർ കെ.പി . പ്രദീപ് കുമാറിന്‍റെ നേതൃത്വത്തിലുള്ള സംഘം പരിശോധിച്ചു. നേരത്തെ ആക്ഷൻ കമ്മിറ്റിയുടെ നേതൃത്വത്തിൽ എം.വി. ഗോവിന്ദൻ എംഎൽഎയ്ക്ക് നിവേദനം നൽകിയതിന്‍റെ അടിസ്ഥാനത്തിലായിരുന്നു പരിശോധന. പടപ്പേങ്ങാട് ദേവസ്വം എക്സികുട്ടീവ് ഓഫീസർ കെ.കെ. ഗംഗാധരൻ, ആക്ഷൻ കമ്മറ്റി ചെയർമാനും ചപ്പാരപ്പടവ് ഗ്രാമപഞ്ചായത്ത് പ്രസിഡന്‍റുമായ സുനിജ ബാലകൃഷ്ണൻ, ചെങ്ങളായി പഞ്ചായത്ത് അംഗം കെ. ശിവദാസൻ, ചുഴലി വില്ലേജ് ഓഫീസർ എ.പി. രാജൻ, വില്ലേജ് അസിസ്റ്റൻഡ് പ്രഭാകരൻ, ആക്ഷൻ കമ്മറ്റി കൺവീനർ എ. എൻ. വിനോദ്, കമ്മിറ്റി അംഗങ്ങളായ മനോജ് ശാസ്താംപടവിൽ , വിൽസൺ കിഴക്കേക്കര എന്നിവരും സ്ഥലത്തെത്തിയിരുന്നു. ദേവസ്വം ബോർഡ് ചെയർമാനും കമ്മീഷണറും ഈ മാസം അവസാനം സ്ഥലം സന്ദർശിച്ച് തുടർ നടപടികൾ സ്വീകരിക്കുമെന്ന് അസി. കമ്മീഷണർ അറിയിച്ചു. 1300 ഏക്കർ ഭൂമി ടിടികെ ദേവസ്വം, പടപ്പേങ്ങാട് ദേവസ്വം എന്നിവരുടേതാണ്. ഇതിൽ ഏകദേശം 150 ഏക്കറോളം ഭൂമി കൈയേറി ചെങ്കൽപ്പണ നടത്തി എന്നാണ് പ്രാഥമിക വിലയിരുത്തൽ. ഈ അടുത്ത കാലത്ത് റീ സർവേ നടന്നെങ്കിലും രേഖയില്ലാതെ ഉദ്യോഗസ്ഥരുടെ ഒത്താശയോടെ കൈവശമാക്കിയവരുടെ ഭൂമിയെ കുറിച്ചും ആക്ഷൻ കമ്മിറ്റി ഭാരവാഹികൾ കമ്മീഷന്‍റെ ശ്രദ്ധയിൽ പെടുത്തിയിട്ടുണ്ട്. മാവിലമ്പാറയിലെ ചെങ്കൽ പണയിൽ നിന്നും ഉണ്ടാവുന്ന ദുരിതങ്ങൾ അനുഭവിക്കുന്നത് താഴ്ന്ന പ്രദേശമായ ചപ്പാരപ്പടവ് പഞ്ചായത്തിലെ പടപ്പേങ്ങാട് ബാലേശുഗിരി നിവാസികളാണ്.

റോഡ് മുറിച്ചു കടക്കുന്നതിനിടെ കാറിടിച്ച് സ്ത്രീക്ക് ദാരുണാന്ത്യം

കൂത്തുപറമ്പ്: മൂന്നാംപീടികയിൽ റോഡ് മുറിച്ചു കടക്കുന്നതിനിടെ കാറിടിച്ച് വീട്ടമ്മയ്ക്ക് ദാരുണാന്ത്യം. മൂന്നാംപീടിക റാസിലെ ആമിനയാണ് (58) മരിച്ചത്. ഇന്നലെ രാവിലെ അഞ്ചോടെയായിരുന്നു സംഭവം. ബംഗളൂരുവിലെ സഹോദരി റസിയയുടെ മകളുടെ വീട്ടിൽ പോയി മടങ്ങിവരവെയാണ് അപകടം. ബംഗളൂരു ബസിൽ നിന്നും സഹോദരി റസിയയോടൊപ്പം മൂന്നാംപീടികയിൽ ഇറങ്ങി റോഡ് മുറിച്ചുകടക്കവെ മട്ടന്നൂർ ഭാഗത്തേക്ക് പോകുകയായിരുന്ന കാർ ഇടിച്ചുതെറിപ്പിക്കുകയായിരുന്നു. അപകട ദൃശ്യം സമീപത്തെ സിസിടിവി യിൽ നിന്നും ലഭിച്ചിട്ടുണ്ട്. ഗുരുതരമായി പരിക്കേറ്റ ആമിനയെ കണ്ണൂരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഭർത്താവ്: പരേതനായ കാദർ. മകൻ: സമീർ (ബംഗളൂരു).

ഗൃഹനാഥൻ ട്രെയിൻ തട്ടി മരിച്ച നിലയിൽ

പഴയങ്ങാടി: ചെറുകുന്ന് റെയിൽവേ ഗേറ്റിനു സമീപം ഗൃഹനാഥനെ ട്രെയിൻ തട്ടി മരിച്ച നിലയിൽ കണ്ടെത്തി. കവിണിശേരി മുച്ചിലോട്ട് കാവിന് സമീപം താമസിക്കുന്ന കെ.വി. കൃഷ്ണനാണ് (73) മരിച്ചത്. ഇന്നലെ രാവിലെയോടെയായിരുന്നു സംഭവം. കണ്ണപുരം പോലീസ് സ്ഥലത്തെത്തി മൃതദേഹം പരിയാരത്തെ കണ്ണൂർ ഗവ. മെഡിക്കൽ കോളജ് മോർച്ചറിയിലേക്ക് മാറ്റി. ബന്ധുക്കൾ എത്തി തിരിച്ചറിഞ്ഞ മൃതദേഹം കണ്ണപുരം പോലീസ് ഇൻക്വസ്റ്റ് നടത്തി പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടുനൽകി. ഭാര്യ: വസന്ത. മക്കൾ: രേഖ, രതീഷ്, രജിഷ, മരുമക്കൾ: പ്രശാന്ത് (കീഴറ), നിത (മട്ടന്നൂർ), മഹേഷ് (ഇരിവേരി). സഹോദരങ്ങൾ: രാമചന്ദ്രൻ, പദ്മ (കിഴുന്ന).

പ്രതിഷേധ നില്പുസമരവുമായി കെസിവൈഎം

തലശേരി: രാജ്യത്ത് ക്രൈസ്തവ സന്യസ്തർക്കും ന്യൂനപക്ഷങ്ങൾക്കുമെതിരെനിരന്തരമായി നടക്കുന്ന ആക്രമണങ്ങളിൽ പ്രതിഷേധിച്ച് കെസിവൈഎം-എസ്എം വൈഎം തലശേരി അതിരൂപത സമിതിയുടെ നേതൃത്വത്തിൽ തലശേരിയിൽ നില്പ് സമരം സംഘടിപ്പിച്ചു. നാനാജാതി മതസ്ഥർക്കും വേണ്ടി ജീവിതം സമർപ്പിച്ച സമർപ്പിതരുടെ ചിത്രങ്ങൾ ഉയർത്തിപിടിച്ചായിരുന്നു സമരം. പ്രതിഷേധ കൂട്ടായ്മ കെസിവൈഎം സംസ്ഥാന സെക്രട്ടറി വിപിൻ ജോസഫ് ഉദ്ഘാടനം ചെയ്തു. തലശേരി അതിരൂപത പ്രസിഡന്‍റ് അബിൻ വടക്കേക്കര അധ്യക്ഷത വഹിച്ചു. ഡയറക്‌‌ടർ ഫാ. അഖിൽ മാത്യു മുക്കുഴി, ജനറൽ സെക്രട്ടറി അമൽ പേഴുംകാട്ടിൽ, വൈസ് ഡയറക്‌ടർ സിസ്റ്റർ ജോസ്ന എസ്എച്ച് എന്നിവർ പ്രസംഗിച്ചു. അതിരൂപത ഭാരവാഹികളായ ബിബിൻ പീടിയേക്കൽ, ശ്രേയ ശ്രുതിനിലയം, അഖിൽ നെല്ലിക്കൽ, സാൻജോസ് കളരിമുറിയിൽ, സോന ചവണിയാങ്കൽ, എഡ്വിൻ തെക്കേമുറി, അഞ്ജു വരിക്കാനിക്കൽ എന്നിവർ നേതൃത്വം നൽകി.

വീടിനുളളിൽ പെരുമ്പാമ്പ്, വിദ്യാർഥിനി രക്ഷപ്പെട്ടത് തലനാരിഴയ്ക്ക്

മട്ടന്നൂർ: പെരുമ്പാമ്പിന്‍റെ മുന്നിൽനിന്ന് പത്തു വയസുകാരി രക്ഷപ്പെട്ടത് തലനാരിഴയ്ക്ക്. നീർവേലിയിലെ ഫൗസിയ മൻസിലിൽ പി.പി. സഫിയയുടെ വീട്ടിനുള്ളിലാണു പെരുമ്പാമ്പ് കയറിയത്. തിങ്കളാഴ്ച രാത്രി എട്ടോടെയാണ് പത്തു വയസുകാരി നഷ്ഫ പഠിക്കാൻ വേണ്ടി ഒരുങ്ങുന്ന സമയത്താണ് കസേരയിൽ പാമ്പിനെ കണ്ടത്. വിദ്യാർഥിനി ഭയന്നുനിലവിളിച്ചതോടെ പാമ്പിനെ കണ്ട് വീട്ടുകാരും ഞെട്ടി. വീട്ടുകാർ സമീപവാസികൾ വിവരം അറിയിക്കുകയും തുടർന്ന് വനംവകുപ്പ് ഉദ്യോഗസ്ഥർ സ്ഥലത്തെത്തി പാമ്പിനെ പിടികൂടുകയും ചെയ്തു. വീടിനു സമീപത്തെ പറമ്പിൽ കാടുകയറി വീട്ടുകാർക്ക് ഭീഷണിയായിരിക്കുകയാണ്. പാന്പ് ഇവിടെ നിന്നെത്തിയതെന്നാണു നിഗമനം.

60 റെയിൽവേ മേൽപ്പാലങ്ങൾക്കായി 2028 കോടി രൂപ വകയിരുത്തി: മുഖ്യമന്ത്രി

തലശേരി: തടസമില്ലാത്ത റോഡ് ശൃംഖല എന്ന ലക്ഷ്യം സാക്ഷാത്കരിക്കുന്നതിന്‍റെ ഭാഗമായി സംസ്ഥാനത്ത് ആകെ 60 റെയിൽവേ മേൽപ്പാലങ്ങളുടെ നിർമാണത്തിനായി 2028 കോടി രൂപ വകയിരുത്തിയിട്ടുണ്ടെന്ന് മുഖ്യമന്ത്രി പിണറായി വിജയൻ. തലശേരി കൊടുവള്ളി റെയിൽവേ മേൽപ്പാലം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കേരളത്തിൽ റോഡ് ഗതാഗതത്തിന്‍റെ വേഗത വർധിപ്പിക്കാൻ റെയിൽവേ മേൽപ്പാലങ്ങൾ ഒഴിച്ചുകൂടാത്തതാണ്. ആ കാഴ്ചപ്പാടോടെയാണ് ലെവൽ ക്രോസ് ഇല്ലാത്ത കേരളം എന്ന പദ്ധതി സംസ്ഥാന സർക്കാർ ആവിഷ്‌ക്കരിച്ചത്. വികസന പ്രവർത്തനങ്ങൾ സമയബന്ധിതമായി പൂർത്തീകരിക്കുന്ന ഒരു ഭരണ സംവിധാനമാണ് കേരളത്തിലുള്ളത്. അതിൽ ജനങ്ങളുടെ വിശ്വാസവും വർധിച്ചുകൊണ്ടിരിക്കുകയാണ്. വാഗ്ദാനങ്ങൾ നൽകുക മാത്രമല്ല അവ കാലതാമസം കൂടാതെ പൂർത്തീകരിക്കുകയാണ് സർക്കാർ. ജനവിശ്വാസം അല്പം പോലും മുറിയാതെ കാത്തുസൂക്ഷിക്കാനുള്ള പ്രതിജ്ഞാബദ്ധമായ നിലപാടാണ് സർക്കാർ സ്വീകരിക്കുന്നതെന്നും മുഖ്യമന്ത്രി പറഞ്ഞു. ജനങ്ങൾ ആഗ്രഹിക്കുന്ന തരത്തിലുള്ള വികസന പദ്ധതികൾ യാഥാർഥ്യമാക്കാൻ ആവശ്യമുള്ളത്ര പണം നമ്മുടെ കൈയിൽ ഉണ്ടായിരുന്നില്ല. സംസ്ഥാന ഖജനാവ് അത്തരത്തിൽ ശേഷിയുള്ള ഒന്നായിരുന്നില്ല. എന്നാൽ ജനങ്ങൾ ആഗ്രഹിക്കുന്ന വിധം വികസനത്തിന്‍റെ പുതിയ മാറ്റങ്ങൾ കണ്ടെത്തണമെന്ന ആലോചനയിൽ നിന്നാണ് കിഫ്ബി പുനരുജ്ജീവിപ്പിച്ചത്. ഇന്ത്യൻ റെയിൽവേയുടേയും കിഫ്ബിയുടെയും സഹായത്തോടെ 36 കോടി 37 ലക്ഷം രൂപ വിനിയോഗിച്ചാണ് കൊടുവള്ളി റെയിൽവേ മേൽപ്പാലം യാഥാർഥ്യമാക്കിയത്. 26.31 കോടി രൂപ സംസ്ഥാന വിഹിതവും 10 കോടി രൂപ റെയിൽവേ വിഹിതവുമാണ്. 16.25 ലക്ഷം രൂപ സ്ഥലമെടുപ്പിന് മാത്രം ചെലവിട്ടു. 123.6 സെന്‍റ് സ്ഥലം 27 പേരിൽനിന്നും ഏറ്റെടുത്തു. സ്ഥലം ഏറ്റെടുക്കലുമായി ബന്ധപ്പെട്ട് പലതരത്തിലും പ്രയാസമുണ്ടായിരുന്നു. പദ്ധതി നാടിന് ഉപകാരപ്രദമാണെങ്കിലും ചിലർ തടസപ്പെടുത്താൻ ശ്രമിച്ചു. എന്നാൽ പ്രതിസന്ധികളെ മറികടന്ന് സമയബന്ധിതമായി പ്രവൃത്തി പൂർത്തിയാക്കാൻ സാധിച്ചെന്നും മുഖ്യമന്ത്രി പറഞ്ഞു. മന്ത്രി പി.എ. മുഹമ്മദ് റിയാസ് അധ്യക്ഷത വഹിച്ചു. സ്പീക്കർ എ. എൻ ഷംസീർ വിശിഷ്ടാതിഥിയായിരുന്നു.തലശേരി മുനിസിപ്പൽ ചെയർപേഴ്സൺ കെ.എം. ജമുനാറാണി, കൗൺസിലർ ടി. കെ. സാഹിറ, ആർബിഡിസികെ. മാനേജിംഗ് ഡയറക്ടർ എസ്. സുഹാസ്, ആർബിഡിസികെ ഡെപ്യൂട്ടി ജനറൽ മാനേജർ സി.ദേവേശൻ, രാഷ്‌ട്രീയപാർട്ടി പ്രതിനിധികൾ പങ്കെടുത്തു.

ഓര്‍മകളും അനുഭവങ്ങളും പങ്കുവച്ച്‌ സെമിനാരിയിലെ പൂർവവിദ്യാർഥികൾ

ഇരിട്ടി: ദൈവശാസ്ത്ര പഠനത്തിന്‍റെ ഓർമകളുടെ മുറ്റത്ത് ഒരിക്കൽ കൂടി ഒത്തുകൂടി വൈദികർ . കുന്നോത്ത് ഗുഡ് ഷെപ്പെർഡ് മേജർ സെമിനാരിയുടെ സിൽവർ ജൂബിലിയോട് അനുബന്ധിച്ച് സംഘടിപ്പിച്ച പൂർവ വിദ്യാർഥി സംഗമത്തിലാണ് വൈദികർ ഒത്തുകൂടിയത്. ഓർമകളും അനുഭവങ്ങളും പഠന കാലത്തിന്‍റെ ഓർമകളും പങ്കുവച്ച് വൈദികർ തങ്ങളുടെ അധ്യാപകരുടെയും റെക്ടർ അച്ചൻമാരുടെയും മുന്നിൽ പഴയ വിദ്യാർഥികളായി മാറി.വർഷങ്ങൾക്ക് ശേഷം ലോകത്തിന്‍റെ വിവിധ കോണുകളിൽ ശുശ്രൂഷ ചെയ്യുന്ന വൈദികരാണ് കുന്നോത്ത് മേജർ സെമിനാരിയിൽ ഒത്തു ചേർന്നത്. 2008 മുതൽ സീറോ മലബാർ സഭയുടെ വിവിധ രൂപതകൾ, സന്യാസ ഭവനങ്ങൾ എന്നിവിടങ്ങളിൽ നിന്നായി കുന്നോത്ത് സെമിനാരിയിൽ പഠിച്ചിറങ്ങി വൈദിക പട്ടം സ്വീകരിച്ച 200 ഓളം വൈദികർ സംഗമത്തിൽ പങ്കെടുത്തു. സെമിനാരിയിലെ പ്രഫസറായിരുന്ന മാർ തോമസ് പാടിയത്ത്, സെമിനാരിയുടെ പ്രഥമ റെക്ടർ റവ.ഡോ.ജോസഫ് കുഴിഞ്ഞാലിൽ, റെക്ടർമാറായിരുന്ന റവ.ഡോ.ജോർജ് പുളിക്കൽ,റവ.ഡോ.തോമസ് ആനിക്കുഴിക്കാട്ടിൽ, റവ.ഡോ. മാണി ആട്ടേൽ, ഫാ. സൈമൺ വള്ളോപ്പള്ളിൽ , ഇപ്പോഴത്തെ റെക്ടർ റവ.ഡോ.മാത്യു പട്ടമന എന്നിവർ പ്രസംഗിച്ചു. റവ. ഡോ. ആന്‍റണി തറേക്കടവിൽ, റവ. ഡോ. ജോസ് കൂടപ്പുഴ എന്നിവർ നേതൃത്വം നൽകി.

കുന്നോത്ത് ഗുഡ് ഷെപ്പേർഡ് മേജർ സെമിനാരി രജത ജൂബിലിയാഘോഷം സമാപിച്ചു

ഇരിട്ടി: ഇന്ത്യ മതേതരത്വത്തിന്‍റെ കാവൽരാജ്യമെന്ന് മന്ത്രി റോഷി അഗസ്റ്റിൻ. മതരാഷ്‌‌ട്രമല്ല ഇന്ത്യ. എന്നാൽ, മതേതരത്വം കാത്തുസൂക്ഷിക്കുന്ന രാജ്യമാണ്. ക്രൈസ്തവ വിശ്വാസത്തിന്‍റെ ആണിക്കല്ല് തീക്ഷ്ണമായ വിശ്വാസമാണ്. വിശ്വാസം പ്രചരിപ്പിക്കുവാനും വിശ്വസിക്കാനുമുള്ള സ്വാതന്ത്ര്യം ഭരണഘടന നമുക്ക് നൽകുന്നുണ്ട്.- മന്ത്രി പറഞ്ഞു. കുന്നോത്ത് ഗുഡ് ഷെപ്പേർഡ് മേജർ സെമിനാരിയുടെ സിൽവർ ജൂബിലിയാഘോഷ സമാപന സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. സഭയെ നയിക്കാനും പ്രാപ്തരാക്കാനുമുള്ള വലിയൊരു സമൂഹത്തെ കുന്നോത്തെ വിശ്വാസ പരിശീലന കേന്ദ്രത്തിൽനിന്ന് ലഭിച്ചു. വിശ്വാസത്തെ സംരക്ഷിക്കുകയെന്നതാണ് ഇവരുടെ മുഖ്യലക്ഷ്യമാണെന്നും റോഷി അഗസ്റ്റിൻ പറഞ്ഞു. മാനുഷികമായിട്ടുള്ള ബന്ധങ്ങൾ ദൈവിക കാഴ്ചപ്പാടിലൂടെ കാണേണ്ട പരിശീലനമാണ് വൈദികർക്ക് ലഭിക്കേണ്ടതെന്ന് ചടങ്ങിൽ അധ്യക്ഷത വഹിച്ച സീറോ മലബാർ സഭ മേജർ ആർച്ച്ബിഷപ് മാർ റാഫേൽ തട്ടിൽ പറഞ്ഞു. വൈദിക പരിശീലനത്തിന് കാലഘട്ടത്തിനനുസരിച്ചുള്ള മാറ്റം പരിശീലന കേന്ദ്രങ്ങളിൽ ആവശ്യമാണ്. ക്രിസ്തുവിന്‍റെ സഭയുടെ വൈദികർ ക്രിസ്തുവിന്‍റെ സഭയുടെ അംബാസഡർമാരാണ്. വൈദികർ എപ്പോഴും സന്തോഷത്തിന്‍റെ വാർത്ത ദൈവജനത്തെ അറിയിക്കുന്നവരാകണം. മനുഷ്യന്‍റെ പ്രതിസന്ധികളിൽ അവന്‍റെ കൂടെ നിൽക്കണം. വെല്ലുവിളികളെ അതിജീവിപ്പിക്കാൻ പഠിപ്പിക്കണം. വൈദികന്‍റെ പെരുമാറ്റത്തിൽ വേണ്ടത് കുലീനത്വമാണ്. കഴിവുകൾ വളർത്തിയെടുക്കാനുള്ള സ്ഥലമാണ് ഓരോ പരിശീലന കേന്ദ്രവുമെന്നും മാർ റാഫേൽ തട്ടിൽ പറഞ്ഞു. ചടങ്ങിൽ സെമിനാരി കമ്മീഷൻ മുൻ ചെയർമാൻ മാർ ജോർജ് വലിയമറ്റം അനുഗ്രഹ പ്രഭാഷണം നടത്തി. ജോർജ് ഞറളക്കാട്ട് സമ്മാനദാനം നിർവഹിച്ചു. മുൻ പ്രഫസർ മാർ തോമസ് പാടിയത്ത് പുസ്തക പ്രകാശനവും പ്രഥമ റെക്‌ടർ റവ. ഡോ. ജോസഫ് കുഴിഞ്ഞാലിൽ സുവനീർ പ്രകാശനവും നടത്തി. അഡ്ഹോക് കമ്മിറ്റി മുൻ അംഗം മാർ ജോസഫ് കല്ലറങ്ങാട്ട്, കണ്ണൂർ ബിഷപ് ഡോ. അലക്സ് വടക്കുംതല, കണ്ണൂർ രൂപത സഹായ മെത്രാൻ ഡോ. ഡെന്നിസ് കുറുപ്പുശേരി, കോട്ടയം അതിരൂപത സഹായ മെത്രാൻ മാർ ജോസഫ് പണ്ടാരശേരിൽ, ബത്തേരി രൂപത ബിഷപ് ജോസഫ് മാർ തോമസ്, മാനന്തവാടി രൂപത സഹായമെത്രാൻ മാർ അലക്സ് താരാമംഗലം, മാർ ജോസഫ് സ്രാന്പിക്കൽ, മുൻ റെക്ടർമാരായ റവ. ഡോ. മാണി ആട്ടേൽ, റവ.ഡോ. ജിയോ പുളിക്കൽ, സെമിനാരി കമ്മീഷൻ അംഗം മാർ പീറ്റർ കൊച്ചുപുരക്കൽ, സണ്ണി ജോസഫ് എംഎൽഎ, സിസ്റ്റർ ജസീന്ത സെബാസ്റ്റ്യൻ (മദർ ജനറൽ, നസ്രത്ത് സിസ്റ്റേഴ്സ്), പായം ഗ്രാമപഞ്ചായത്ത് പ്രസിഡന്‍റ് പി. രജനി, പൂർവ വിദ്യാർഥി പ്രതിനിധി ഫാ. സെബാൻ ഇടയാടിയിൽ, പായം ഗ്രാമപഞ്ചായത്തംഗം ഷൈജൻ ജേക്കബ് എന്നിവർ പ്രസംഗിച്ചു. സെമിനാരി കമ്മീഷൻ ചെയർമാൻ തലശേരി ആർച്ച്ബിഷപ് മാർ ജോസഫ് പാംപ്ലാനി സ്വാഗതവും റെക്‌ടർ റവ. ഡോ. മാത്യു പട്ടമന നന്ദിയും പറഞ്ഞു. സെമിനാരി വിദ്യാർഥികളുടെ ജൂബിലി ഗാനവും ഉണ്ടായിരുന്നു. സിൽവർ ജൂബിലിയാഘോഷ സമാപന സമ്മേളനത്തിന് മുന്നോടിയായി പൂർവ വിദ്യാർഥി സംഗമവും മേജർ ആർച്ച്ബിഷപ് മാർ റാഫേൽ തട്ടിലിന്‍റെ മുഖ്യകാർമികത്വത്തിൽ വിശുദ്ധ കുർബാനയും നടന്നു.വിശുദ്ധ കുർബാനയ്ക്ക് തലശേരി ആർച്ച്ബിഷപ് മാർ ജോസഫ് പാംപ്ലാനി, എമിരറ്റസുമാരായ മാർ ജോർജ് വലിയമറ്റം, മാർ ജോർജ് ഞറളക്കാട്ട്, മാർ ജോസഫ് കല്ലറങ്ങാട്ട്, മാർ ജോസഫ് പണ്ടാരശേരിൽ, മാർ പീറ്റർ കൊച്ചുപുരയ്ക്കൽ, മാർജോസഫ് സ്രാന്പിക്കൽ, മാർ തോമസ് പാടിയത്ത്, മാർ അലക്സ് താരാമംഗലം, റെക്‌ടർ റവ.ഡോ.മാത്യു പട്ടമന എന്നിവർ സഹകാർമികരായിരുന്നു. സീറോ മലബാർ സഭാ സിനഡിന്‍റെ കീഴിൽ 2000 സെപ്റ്റംബർ ഒന്നിനാണ് തലശേരി അതിരൂപതയുടെ സാന്തോം എസ്റ്റേറ്റിൽ മേജർ സെമിനാരി പ്രവർത്തനം ആരംഭിച്ചത്. 25 വർഷത്തിനുള്ളിൽ 500 വൈദിക വിദ്യാർഥികളാണ് പഠനം പൂർത്തിയാക്കിയത്. നല്ല ഇടയനായ ഈശോ സഭയ്ക്ക് നൽകിയ ദൃശ്യമായ സമ്മാനമാണ് ഗുഡ് ഷെപ്പേർഡ് മേജർ സെമിനാരി. സഭയ്ക്ക് വേണ്ടി വിശ്വാസവും അറിവും സ്നേഹവും ഉള്ള നല്ല ഇടയൻമാരെ രൂപീകരിക്കാൻ കഴിഞ്ഞ 25 വർഷം സെമിനാരിക്ക് കഴിഞ്ഞിട്ടുണ്ട്. -മാർ ജോർജ് വലിയമറ്റം സഭയുടെ ഹൃദയത്തിൽ നിന്ന് ഉത്ഭവിക്കുന്ന യാഥാർഥ്യമാണ് കുന്നോത്ത് ഗുഡ് ഷെപ്പേർഡ് മേജർ സെമിനാരി.കുടിയേറ്റ സുറിയാനി ക്രൈസ്തവരുടെ ദൈവ വിശ്വാസത്തിന്‍റെ നാഴികക്കല്ലു കൂടിയാണ് സെമിനാരി. എളുപ്പവഴികളേക്കാൾ ബുദ്ധിമുട്ടുള്ള വഴികളിലൂടെ നടക്കണം. എങ്കിൽ വഴി തെറ്റുകയില്ല. പാരമ്പര്യത്തേകുറിച്ച് സംസാരിച്ചുകൊണ്ട് കൈകെട്ടി പിന്നിലേക്ക് മാറുകയല്ല വേണ്ടത്. സത്യസന്ധമായ വിശ്വാസത്തെ ആർക്കും തോല്പിക്കാൻ കഴിയില്ല.അത് പരിശീലനത്തിലൂടെ സാധിക്കും. -മാർ ജോസഫ് കല്ലറങ്ങാട്ട് അഞ്ഞൂറോളം ഇടയന്മാരെ വളർത്തിയെടുത്ത ഒരു അധ്യാത്മിക പവർ ഹൗസാണ് കുന്നോത്ത് സെമിനാരി. 25 വർഷത്തെ യൗവനത്തിൽ മുന്നേറുന്ന സെമിനാരിയുടെ സാന്നിധ്യം ഈ പ്രദേശത്തിന്‍റെ അനുഗ്രഹമാണ്. -സണ്ണി ജോസഫ് എംഎൽഎ

മാർ വള്ളോപ്പിള്ളിയുടെ പ്രതിമയൊരുക്കാൻ കുടിയേറ്റ മക്കളുടെ വെങ്കലങ്ങളെത്തി

ചെമ്പന്തൊട്ടി: ചെമ്പന്തൊട്ടി മലബാർ സ്മാരക കുടിയേറ്റ മ്യൂസിയത്തിൽ സ്ഥാപിക്കുന്ന തലശേരി രൂപതയുടെ പ്രഥമ ബിഷപ് മാർ സെബാസ്റ്റ്യൻ വള്ളോപ്പിള്ളിയുടെ വെങ്കല പ്രതിമ നിർമാണത്തിന് കത്തോലിക്ക കോൺഗ്രസ് തലശേരി അതിരൂപത കമ്മിറ്റിയുടെ നേതൃത്വത്തിൽ കണ്ണൂർ, കാസർഗോഡ് ജില്ലകളിലെ യൂണിറ്റുകളിൽനിന്നും പൊതുജനങ്ങളിൽ നിന്നും ശേഖരിച്ച അസംസ്കൃത വസ്തുക്കളായ ഓട്, വെങ്കലം, പിച്ചള തുടങ്ങിയവ പ്രതിമ നിർമാണ കമ്മിറ്റിയെ ഏല്പിച്ചു. അസംസ്കൃത വസ്തുക്കൾ കൂടുതലും ലഭിച്ചത് ചെമ്പന്തൊട്ടി, കുടിയാന്മല മേഖലകളിൽ നിന്നാണെന്ന് കമ്മിറ്റി ഭാരവാഹികൾ പറഞ്ഞു. കാസർഗോഡ്, പനത്തടി, മാലോം, ചിറ്റാരിക്കൽ, തേർത്തല്ലി, ആലക്കോട്, വായാട്ടുപറമ്പ്, തളിപ്പറമ്പ്, ചെമ്പേരി, പൈസക്കരി, നെല്ലിക്കാംപൊയിൽ, കുന്നോത്ത്, എടൂർ, പേരാവൂർ മേഖലകളിൽനിന്ന് 16 ക്വിന്‍റൽ അസംസ്കൃത വസ്തുക്കൾ ലഭിച്ചു. വെള്ളരിക്കുണ്ട്, ചെറുപുഴ, മണിക്കടവ് മേഖലകളിൽ നിന്നുള്ള സാധനങ്ങൾ അടുത്തദിവസം എത്തിക്കും. ചെമ്പന്തൊട്ടി ഫൊറോന പള്ളി പരിസരത്ത് ചേർന്ന യോഗത്തിലാണ് സാധനങ്ങൾ കൈമാറിയത്. കത്തോലിക്കാ കോൺഗ്രസ് തലശേരി അതിരൂപത പ്രസിഡന്‍റ് ഫിലിപ്പ് വെളിയത്ത്, മറ്റു ഭാരവാഹികളായ ജിമ്മി ആയിത്തമറ്റം, സുരേഷ് ജോർജ് കാഞ്ഞിരത്തിങ്കൽ, ബെന്നിച്ചൻ മഠത്തിനകം, ഷിനോ പാറക്കൽ എന്നിവർ ചേർന്ന് വെങ്കല പ്രതിമ നിർമാണ കമ്മിറ്റി ഭാരവാഹികളായ ചെമ്പന്തൊട്ടി ഫൊറോന വികാരി ഫാ. ആന്‍റണി മഞ്ഞളാംകുന്നേൽ, ശ്രീകണ്ഠപുരം നഗരസഭാധ്യക്ഷ ഡോ. കെ.വി. ഫിലോമിന, നടുവിൽ പഞ്ചായത്ത് മുൻപ്രസിഡന്‍റ് പി.ടി. മാത്യു, ജോസഫ് മാത്യു കൈതമറ്റം, ജോയ് തടത്തിൽ എന്നിവർക്ക് അസംസ്കൃത വസ്തുക്കൾ കൈമാറി. ബിജു മണ്ഡപത്തിൽ, കെ.എ. ജോസഫ് കൊച്ചു കുന്നത്തുപറമ്പിൽ, ജയ്സൺ അട്ടാറിമാക്കൽ, സജീവ്, കത്തോലിക്കാ കോൺഗ്രസിന്‍റെ ചെമ്പന്തൊട്ടി യൂണിറ്റ് ഭാരവാഹികൾ എന്നിവർ വിവിധ മേഖലകളിൽനിന്നായി എത്തിച്ച സംസ്കൃത വസ്തുക്കൾ ചെമ്പന്തൊട്ടിയിൽ ശേഖരിക്കുന്നതിന് നേതൃത്വം വഹിച്ചു.

ടിഎസ്എസ്എസ് ചെമ്പേരി റീജിയൺ വാർഷിക പൊതുയോഗം

ചെമ്പേരി: തലശേരി സോഷ്യൽ സർവീസ് സൊസൈറ്റി (ടിഎസ്എസ്എസ്) ചെമ്പേരി റീജിയൺ വാർഷിക പൊതുയോഗം ചെമ്പേരി മദർ തെരേസ ഓഡിറ്റോറിയത്തിൽ നടന്നു. ടിഎസ്എസ്എസ് അതിരൂപത ഡയറക്ടർ ഫാ. ബിബിൻ വരമ്പകത്ത് ഉദ്ഘാടനം ചെയ്തു. ചെമ്പേരി ലൂർദ് മാതാ ബസിലിക്ക റെക്ടർ റവ.ഡോ. ജോർജ് കാഞ്ഞിരക്കാട്ട് അധ്യക്ഷത വഹിച്ചു. ടിഎസ്എസ്എസ് റീജിണൽ ഡയറക്ടർ ഫാ. ജോബി ചെരുവിൽ ആമുഖ പ്രഭാഷണവും അതിരൂപതാ പ്രസിഡന്‍റ് ജോഷി കുന്നത്ത് മുഖ്യപ്രഭാഷണവും നടത്തി. റീജണൽ സെക്രട്ടറി ജോയിസി ജോസഫ് വാർഷിക റിപ്പോർട്ടും സിസ്റ്റർ ആലീസ് മാത്യു എഫ്സിസി സംഘനിധി ഓഡിറ്റ് റിപ്പോർട്ടും റീജണൽ ജോയിന്‍റ് സെക്രട്ടറി ജെസി തങ്കച്ചൻ ചെമ്പേരി റീജണൽ ഓഡിറ്റ് റിപ്പോർട്ടും അവതരിപ്പിച്ചു. ചെമ്പേരി റീജിയൻ പരിധിയിലുള്ള ഇരുപത് ഇടവക യൂണിറ്റുകളുടെ പ്രവർത്തന റിപ്പോർട്ട് പ്രോഗ്രാം മാനേജർ ലിസി ജിജി അവതരിപ്പിച്ചു. ബേബി മുല്ലൂർ, ലിറ്റിന മനോജ് എന്നിവർ പ്രസംഗിച്ചു. മികച്ച ടിഎസ്എസ്എസ് ട്രസ്റ്റുകളായി അരീക്കമല ഒന്നാം സ്ഥാനവും നടുവിൽ രണ്ടാം സ്ഥാനവും കരസ്ഥമാക്കി. ചെമ്പേരി, കുടിയാന്മല ട്രസ്റ്റുകൾക്കാണ് മൂന്നാം സ്ഥാനം. മികച്ച മഹിളാ സേവാ സംഘം (എംഎസ്എസ്) യൂണിറ്റുകളായി ചെമ്പന്തൊട്ടി സംയുക്ത എംഎസ്എസ്, മണ്ടളം ട്രസ്റ്റ്, ചെമ്പേരി വിമൽ ജ്യോതി എംഎസ്എസ് എന്നിവർ യഥാക്രമം ഒന്നും രണ്ടും മൂന്നും സ്ഥാനങ്ങൾ നേടി. മികച്ച യൂണിറ്റ് പ്രസിഡന്‍റായി നടുവിൽ ക്രെഡിറ്റ് യൂണിയൻ പ്രസിഡന്‍റ് സിബി ചെരുവുപുരയിൽ, ബെസ്റ്റ് സെക്രട്ടറിയായി അരീക്കമല ട്രസ്റ്റിലെ ജോജോ പുല്ലാട്ട്, ബെസ്റ്റ് മഹിളാ സേവാ സംഘം പ്രസിഡന്‍റായി ജെസി തങ്കച്ചൻ, സെക്രട്ടറിയായി ലിസ ടോമി എന്നിവർ തെരഞ്ഞെടുക്കപ്പെട്ടു. ബെസ്റ്റ് പെർഫോമൻസ് അവാർഡ് ജെയ്സൺ മേക്കലാത്ത്, ഷീന ചാക്കോ, സാഹിത അബൂബക്കർ, ലൂസി ഏബ്രഹാം എന്നിവർ കരസ്ഥമാക്കി. ചെമ്പേരി റീജനിലെ 20 ഇടവകകളിൽ നിന്നായി 180 പ്രതിനിധികൾ പങ്കെടുത്തു.

പടിയൂരിൽ പന്നിപ്പനി; കാട്ടുപന്നി ചത്ത സംഭവത്തിൽ ആശങ്ക വേണ്ടെന്ന് കളക്‌ടർ

ഇരിട്ടി: ആറളം ഫാമിൽ കാട്ടുപന്നി ചത്ത സംഭവത്തിലും പടിയൂർ പഞ്ചായത്തിലെ കുയിലൂരിലെ പന്നി ഫാമിൽ ആഫ്രിക്കൻ പന്നിപ്പനി റിപ്പോർട്ട് ചെയ്ത‌ സംഭവത്തിലും ജനങ്ങൾ ആശങ്കപ്പെടേണ്ട സാഹച ര്യമില്ലെന്ന് കളക്ടർ അരുൺ കെ.വിജയൻ അറിയിച്ചു. ബന്ധപ്പെട്ട വകുപ്പുകൾ സംയുക്തമായി ആവശ്യ മായ സുരക്ഷ, പ്രതിരോധ നടപടികൾ സ്വീകരിച്ചിട്ടുണ്ട്. കഴിഞ്ഞ നാലിന് ആറളം ഫാമിൽ കാട്ടുപന്നി ചത്ത സംഭവം റിപ്പോർട്ട് ചെയ്തിരുന്നു. ഇന്നലെ പടിയൂർ പഞ്ചായത്തിലെ കുയിലൂരിൽ വളർത്തു പന്നികൾക്ക് ആഫ്രിക്കൻ പന്നിപ്പനിയും റിപ്പോർട്ട് ചെയ്തു. ആറളം ഫാമിൽ ജില്ല മൃഗ സംരക്ഷണ ഓഫീസറുടെ നേതൃത്വത്തിൽ സാമ്പിളുകൾ ശേഖരിച്ച് തിരുവ നന്തപുരത്തെ സ്‌റ്റേറ്റ് ഇൻസ്റ്റ‌ിറ്റ്യൂട്ട് ഫോർ ആനിമൽ ഡിസീസിലേക്ക് പരിശോധനയ്ക്ക് അയച്ചിട്ടുണ്ട്. പടിയൂർ പഞ്ചായത്തിൽ ഇന്നലെയാണ് ആഫ്രിക്കൻ പന്നിപ്പനി സ്ഥിരീകരിച്ചത്. ഫാമിനു ചുറ്റുമുള്ള ഒരു കിലോമീറ്റർ രോഗബാധിത പ്രദേശമായും 10 കിലോമീറ്റർ ചുറ്റളവ് രോഗ നിരീക്ഷണ മേഖലയായും പ്രഖ്യാപിച്ചു. ഈ പ്രദേശങ്ങളിൽ പന്നിമാംസം വിതരണം ചെയ്യുന്നതും പന്നികളെ ജില്ലയിലെ മറ്റ് പ്രദേശങ്ങളിലേക്ക് കൊണ്ടുപോകുന്നതും മറ്റ് പ്രദേശങ്ങളിൽ നിന്ന് നിരീ ക്ഷണ മേഖലയിലേക്ക് കൊണ്ടുവരുന്നതും മൂന്നു മാസത്തേക്ക് നിരോധനിച്ചു. മറ്റ് സംസ്ഥാനങ്ങളിൽ നിന്നും ജില്ലകളിൽ നിന്നും പന്നി മാംസവും പന്നികളേയും ജില്ലയിലേക്ക് കടത്തികൊണ്ടുവരാതിരിക്കാൻ പരിശോധന ശക്‌തമാക്കും. പരിശോധനയുടെ ഭാഗമായി പയ്യാവൂർ, കൂടാളി, ഉളിക്കൽ, ഇരിക്കൂർ, പായം, മലപ്പട്ടം, കൂടാളി, കീഴല്ലൂർ കുറ്റ്യാട്ടൂർ, മാലൂർ, ശിവപുരം, തില്ലങ്കേരി പഞ്ചായത്തുകളേയും മട്ടന്നൂർ, ശ്രീകണ്ഠപുരം, ഇരിട്ടി നഗരസഭകളെയും നിരീക്ഷണ വലയത്തിൽ ഉൾപ്പെടുത്തിയിട്ടുണ്ട്.

"ട്രീബ്യൂട്ട്' പദ്ധതി ഉദ്ഘാടനം ചെയ്തു

കണ്ണൂർ: പ്രകൃതിയോടു മനുഷ്യൻ കാണിച്ച ക്രൂരത പ്രകൃതി തിരിച്ചു കാണിച്ചിരുന്നെങ്കിൽ മനുഷ്യൻ ഇന്നു ഭൂമുഖത്തുണ്ടാകില്ലായിരുന്നുവെന്ന് നിയമസഭാ സ്പീക്കർ എ.എൻ. ഷംസീർ. കേരളത്തിലുടനീളം ഒരുലക്ഷം മരങ്ങൾ നട്ടുപരിപാലിക്കുകയെന്ന ലക്ഷ്യവുമായുള്ള സ്റ്റോറീസിന്‍റെ "ട്രീബ്യൂട്ട്' പദ്ധതി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജവഹർ ലൈബ്രറി ഹാളിൽ നടന്ന ചടങ്ങിൽ വെബ്സൈറ്റ് പ്രകാശനം കെ.വി. സുമേഷ് എംഎൽഎ നിർവഹിച്ചു. സ്റ്റോറീസ് സിഇഒ സഹീർ. കെ.പി പദ്ധതി വിശദീകരിച്ചു. മേജർ മനേഷ്, ഷമീമ, ആർക്കിടെക്‌ട് സജോ ജോസഫ്, ഇമ്രാൻ, ഫിറോസ് ലാൽ, മഹേഷ്, ഫൈസൽ മുഴപ്പിലങ്ങാട്, ജോബി ജോസഫ്, ശബാബ്, അഖിൽ മാരാർ തുടങ്ങിയവർ പ്രസംഗിച്ചു. മരം നടാൻ സ്ഥലമുള്ളവർക്കും രക്ഷാധികാരിയാകാൻ താത്പര്യമുള്ളവർക്കും www.treebute.in എന്ന വെബ്‌സൈറ്റിൽ രജിസ്റ്റർ ചെയ്യാവുന്നതാണ്.

കാറ്ററിംഗ് മേഖലയ്ക്ക് ‌ഇളവുകൾ അനുവദിക്കണം: എകെസിഎ

കണ്ണൂർ: കാറ്ററിംഗ് മേഖലയുടെ സംരക്ഷണത്തിനായി സർക്കാരിന്‍റെ ഭാഗത്ത് നിന്ന് അനുഭാവ പൂർണമായ നടപടികൾ ഉണ്ടാകണമെന്ന് ഓൾ കേരള കാറ്ററേഴ്സ് അസോസിയേഷൻ ജില്ലാ സമ്മേളനം ആവശ്യപ്പെട്ടു. സാധനങ്ങളുടെ വിലക്കയറ്റം കാറ്ററിംഗ് മേഖലയെ കടുത്ത പ്രതിസന്ധിയിലേക്ക് തള്ളിവിടുന്നുണ്ട്. ഈ സാഹചര്യത്തിൽ വിലക്കയറ്റം പിടിച്ചു നിർത്താനും കാറ്ററിംഗ് മേഖലയ്ക്ക് പ്രത്യേക ഇളവുകൾ നൽകാനും സർക്കാരുകളുടെ ഭാഗത്ത് നിന്ന് നടപടികൾ ഉണ്ടാവണമെന്ന് സമ്മേളനം ആവശ്യപ്പെട്ടു. അമാനി ഓഡിറ്റോറിയത്തിൽ നടന്ന പ്രതിനിധി സമ്മേളനം എകെസിഎ സംസ്ഥാന പ്രസിഡന്‍റ് പ്രിൻസ് ജോർജ് ഉദ്ഘാടനം ചെയ്തു. ജില്ലാ പ്രസിഡന്‍റ് പി. ജോയ് അധ്യക്ഷത വഹിച്ചു. ജില്ലാജനറൽ സെകട്ടറി വിൻസെന്‍റ് ഗോമസ്, കെ.ജെ ടോമി എന്നിവർ പ്രസംഗിച്ചു. മേഖലാ ഭാരവാഹികൾക്ക് സംസ്ഥാന സെക്രട്ടറി ഷാഹുൽ ഹമീദ്, പ്രേംചന്ദ് വള്ളിൽ, പി. ഉമ്മർ രഞ്ജു ചാണ കാട്ടിൽ എന്നിവർ സ്വീകരണം നൽകി. സമാപന സമ്മേളനം മന്ത്രി കടന്നപ്പള്ളി രാമചന്ദ്രൻ ഉദ്ഘാടനം ചെയ്തു. ജില്ലാപഞ്ചായത്ത് പ്രസിഡന്‍റ് കെ.കെ. രത്നകുമാരി, കളക്ടർ അരുൺ കെ. വിജയൻ, സിറ്റി പോലീസ് കമ്മീഷണർ പി. നിധിൻരാജ്, ഡിഎംഒ പിയൂഷ് നന്പൂതിരിപ്പാട് എന്നിവർ പ്രസംഗിച്ചു.

കോൺഗ്രസ് പ്രതിഷേധ പ്രകടനം നടത്തി

ഇരിട്ടി: വോട്ടർ പട്ടികയിലെ ക്രമകേടിനെതിരേ പ്രതികരിച്ച രാഹുൽ ഗാന്ധിയെ അറസ്റ്റ് ചെയ്തതിൽ പ്രതിഷേധിച്ച് കോൺഗ്രസ് ഇരിട്ടി ബ്ലോക്ക് കമ്മിറ്റിയുടെ നേതൃത്വത്തിൽ ഇരിട്ടിയിൽ പ്രതിഷേധ പ്രകടനം നടത്തി. ചന്ദ്രൻ തില്ലങ്കേരി, പി.കെ. ജനാർദ്ദനൻ, പി.എ. നസീർ, വി.ടി. തോമസ്, കെ. വേലായുധൻ, ഡെയ്സി മാണി, തോമസ് വർഗീസ്, പി.വി. മോഹനൻ, കെ വി പവിത്രൻ തുടങ്ങിയവർ നേതൃത്വം നല്കി. ഉളിക്കല്ലിലിൽ ഇരിക്കൂർ ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ കോൺഗ്രസ് പ്രവർത്തകർ ഉളിക്കൽ ടൗണിൽ പ്രതിഷേധ പ്രകടനം നടത്തി. ബ്ലോക്ക് പ്രസിഡന്‍റ് എ.ജെ. ജോസഫ്, നേതാക്കളായ ചാക്കോ പാലക്കലോടി, ബേബി തോലാനി, ജോജി വർഗീസ്, ടോമി ജോസഫ്, ഇ.കെ. കുര്യൻ, കെ.കെ. ഷഫീഖ്, കുര്യാക്കോസ് മണപ്പാടം, ജോസ് പൂമല, ലിസമ്മ ബാബു തുടങ്ങിയവർ നേതൃത്വം നല്കി. തുടർന്ന് നടന്ന പ്രതിഷേധയോഗം കെപിസിസി മെംബർ പി.സി. ഷാജി ഉദ്ഘാടനം ചെയ്തു. പേരാവൂർ: പേരാവൂർ ബ്ലോക്ക് കോൺഗ്രസ്‌ കമ്മിറ്റിയുടെ നേതൃത്വത്തിൽ ടൗണിൽ പ്രതിഷേധ പ്രകടനം നടത്തി. നേതാക്കളായ പി.സി. രാമകൃഷ്ണൻ, ബൈജു വർഗീസ്, സി.ജെ. മാത്യു, സന്തോഷ് ജോസഫ് മണ്ണാർകുളം, ഷഫീർ ചെക്ക്യാട്ട്, ജോയി വേളുപുഴ, ജോസ് നടപ്പുറം തുടങ്ങിയവർ മാർച്ചിന് നേതൃത്വം നല്കി. മട്ടന്നൂർ: കോൺഗ്രസ് ബ്ലോക്ക് കമ്മിറ്റിയുടെ നേതൃത്വത്തിൽ മട്ടന്നൂരിൽ പ്രതിഷേധ പ്രകടനം നടത്തി. കോൺഗ്രസ് ഭവൻ പരിസരത്ത് നിന്നാരംഭിച്ച പ്രകടനം നഗരം ചുറ്റി ബസ് സ്റ്റാൻഡ് പരിസരത്ത് സമാപിച്ചു. തുടർന്നു നടന്ന യോഗം മുഹമ്മദ് ബ്ലാത്തൂർ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് സുരേഷ് മാവില അധ്യക്ഷത വഹിച്ചു. ഡിസിസി സെക്രട്ടറി വി.ആർ. ഭാസ്കരൻ, എ.കെ. രാജേഷ്, ടി.വി. രവീന്ദ്രൻ, ഒ.കെ. പ്രസാദ്, ആർ.കെ. നവീൻ കുമാർ, കെ.വി. ജയചന്ദ്രൻ, ജിതിൻ കൊളപ്പ തുടങ്ങിയവർ നേതൃത്വം നൽകി.

ബഫർസോണിൽ ശാശ്വത പരിഹാരം ഉറപ്പാക്കും: മന്ത്രി റോഷി അഗസ്റ്റിൻ

ഇരിട്ടി: കേരളത്തിലെ അണക്കെട്ടുകൾക്കും ജലസംഭരണികൾക്കും ബഫർസോൺ പ്രഖ്യാപിച്ചു പുറത്തിക്കിയ ഉത്തരവ് സർക്കാർ പിൻവലിച്ചിട്ടും ജലസേചന വിഭാഗം ഉദ്യോഗസ്ഥർ വീട് നിർമാണ ങ്ങൾക്ക് ഉൾപ്പെടെ നിരാക്ഷേപ പത്രം നല്കാത്ത സംഭവത്തിൽ ശാശ്വത പരിഹാരം ഉണ്ടാക്കുമെന്ന് മന്ത്രി റോഷി അഗസ്റ്റിൻ. ഇക്കാര്യം ചർച്ച ചെയ്യാനായി നാളെ തിരുവനന്തപൂരത്ത് സർവകക്ഷി യോഗം വിളിച്ചിട്ടുണ്ടെന്നും മന്ത്രി റോഷി അഗസ്‌റ്റിൻ അറിയിച്ചു. വിവിധ കേന്ദ്രങ്ങളിൽ നിന്നു പരാതി ഉയർന്ന സാഹചര്യത്തി ലാണ് സർവകക്ഷിയോഗം വിളിച്ചത്. ബഫർസോൺ ഉത്തരവ് പിൻവലിച്ചു നാലുമാസം പിന്നിടുമ്പോഴും തങ്ങൾക്കു ഉത്തരവ് ലഭിച്ചില്ലെന്നു പറഞ്ഞു പഴശി പദ്ധതി സ്ഥലത്തിനു സമീപം അളപ്ര മാവില വീട്ടിൽ എം.സുരേഷ്‌കുമാറിനു നിർമിച്ച വീടിനും വട്ടപ്പാറ മഹേഷിന്‍റെ (ഭാര്യ കോരമ്പേത്ത് ഹൗസിൽ വി.എസ്. ദീപയുടെ പേരിലാണ് വീട്) നിർമാണം തുടങ്ങിയ വീടിനും നിരാക്ഷേപ പത്രം പഴശി അധികൃതർ നിഷേധിച്ചതു ചൂണ്ടിക്കാട്ടി പായം പഞ്ചായത്ത് പ്രസിഡന്‍റ് പി. രജനിയും നെല്ലിക്കാംപൊയിൽ പള്ളിവക സ്ഥലത്തെ ഗോഡൗണിന് നിരാക്ഷേപ പത്രം തടഞ്ഞത് ഉന്നയിച്ച് നെല്ലിക്കാംപൊയിൽ സെന്‍റ് സെബാസ്റ്റ്യൻസ് ഫൊറോന ആർക്കി എപ്പിസ്കോപ്പൽ തീർഥാടന പളളി വികാരി ഫാ. ജോസഫ് കാവനാടിയിലും നല്കിയ നിവേദനങ്ങൾക്ക് മറുപടിയായാണ് മന്ത്രി ഇക്കാര്യം അറിയിച്ചത്. ഇക്കാര്യത്തിൽ കേരള കോൺഗ്രസ് ജില്ലാ പ്രസിഡന്‍റ് ജോയി കൊന്നയ്ക്കൽ, സംസ്ഥാന ജനറൽ സെക്രട്ടറി സജി കുറ്റ്യാനിമറ്റം, പേരാവൂർ നിയോജക മണ്ഡലം പ്രസിഡന്‍റ് വിപിൻ തോമസ് എന്നിവരും മന്ത്രിക്ക് നിവേദനം നല്കിയിരുന്നു.

ഓപ്പറേഷൻ ഗജമുക്തി ദൗത്യത്തിൽ ഒരാനയെ കൂടി കാട്ടിലേക്ക് എത്തിച്ചു

ഇരിട്ടി: ഓപ്പറേഷൻ ഗജമുക്തി ദൗത്യത്തിന്‍റെ രണ്ടാം രണ്ടാം ദിവസം ഒരു കൊമ്പനെ കാട്ടിലേക്ക് തുരത്തി. ആറളം ഫാം രണ്ടാം ബ്ലോക്ക് ഭാഗത്തുനിന്നും മോഴയനയെ ഡ്രൈവിംഗ് ടീം ട്രാക്ക് ചെയ്ത് തുരത്താൻ ആരംഭിച്ചെങ്കിലും മൊഴയാന പൊട്ടിയ മല ഭാഗത്തേക്ക് തിരിഞ്ഞു പോയി. തുടർന്ന് ടിആർഡിഎം ഏരിയയിൽപ്പെട്ട ബ്ലോക്ക് 13 ഓടച്ചാൽ ഭാഗത്ത് തമ്പടിച്ച ഒരു കൊമ്പനെ പുതുതായി നിർമിച്ച ഹാഗിംഗ് ഫെൻസിംഗ് കടത്തി ഉരുപ്പുകുന്ന് ഭാഗത്തേക്ക് കടത്തിവിട്ടു. ദൗത്യ സംഘത്തിൽ കൊട്ടിയൂർ റേഞ്ചർ നിതിൻ ലാൽ, ആറളം അസിസ്റ്റന്‍റ് വൈൽഡ് ലൈഫ് വാർഡൻ രമ്യ രാഘവൻ എന്നിവരുടെ നേതൃത്വത്തിൽ 35 ഫോറസ്റ്റ് ജീവനക്കാരും, 10 ആറളം ഫാം ജീവനക്കാരും ഇരിട്ടി താലൂക്ക് റവന്യൂ, ആറളം പോലീസ്, ആറളം ഫാം മെഡിക്കൽ എന്നിവരും ദൗത്യത്തിന് നേതൃത്വം നല്കി.

ഗോവിന്ദൻ കണ്ണപുരത്തിന് പുരസ്കാരം

കണ്ണൂർ: സി.കെ. പണിക്കർ സ്മാരക ട്രസ്റ്റിന്‍റെ വൈഖരി പുരസ്കാരം ചിത്രകാരൻ ഗോവിന്ദൻ കണ്ണപുരത്തിന്. 10001 രൂപയും പ്രശംസാ പത്രവും അടങ്ങിയതാണ് പുരസ്കാരം. ‌നാടക രംഗ സജ്ജീകരണം, മേക്കപ്പ്, ചുവരെഴുത്ത് മേഖലകളിലും 60 വർഷമായി പ്രവർത്തിക്കുന്നു. 15-ന് ഉച്ചകഴിഞ്ഞ് 2.30-ന് ന‌ടക്കുന്ന 23-ാമത് സി.കെ. പണിക്കർ ഭാഗവതർ അനുസ്മരണ ചടങ്ങിൽ ട്രസ്റ്റ് ഭാരവാഹികൾ അവാർഡ് സമ്മാനിക്കും. ആനക്കൈ ബാലകൃഷ്ണൻ അധ്യക്ഷത വഹിക്കും. കല്യാശേരി ബ്ലോക്ക് പഞ്ചായത്ത് പ്രസിഡന്‍റ് പി.പി. ഷാജിർ ഉദ്ഘാടനം ചെയ്യും. കാഞ്ഞങ്ങാട് സി. രാമചന്ദ്രൻ അനുസ്മരണ പ്രസംഗം നടത്തും. തുടർന്ന് കലാപരിപാടികൾ അവതരിപ്പിക്കും. പത്രസമ്മേളനത്തിൽ ട്രസ്റ്റ് ചെയർമാൻ ഡോ. കാഞ്ഞങ്ങാട് സി. രാമചന്ദ്രൻ, ലിനി കരുൺ, സദാനന്ദൻ അന്പലപ്പുറം എന്നിവർ പങ്കെടുത്തു.‌

പടിയൂരിൽ പന്നിപ്പനി; കാട്ടുപന്നി ചത്ത സംഭവത്തിൽ ആശങ്ക വേണ്ടെന്ന് കളക്‌ടർ

ഇരിട്ടി: ആറളം ഫാമിൽ കാട്ടുപന്നി ചത്ത സംഭവത്തിലും പടിയൂർ പഞ്ചായത്തിലെ കുയിലൂരിലെ പന്നി ഫാമിൽ ആഫ്രിക്കൻ പന്നിപ്പനി റിപ്പോർട്ട് ചെയ്ത‌ സംഭവത്തിലും ജനങ്ങൾ ആശങ്കപ്പെടേണ്ട സാഹച ര്യമില്ലെന്ന് കളക്ടർ അരുൺ കെ.വിജയൻ അറിയിച്ചു. ബന്ധപ്പെട്ട വകുപ്പുകൾ സംയുക്തമായി ആവശ്യ മായ സുരക്ഷ, പ്രതിരോധ നടപടികൾ സ്വീകരിച്ചിട്ടുണ്ട്. കഴിഞ്ഞ നാലിന് ആറളം ഫാമിൽ കാട്ടുപന്നി ചത്ത സംഭവം റിപ്പോർട്ട് ചെയ്തിരുന്നു. ഇന്നലെ പടിയൂർ പഞ്ചായത്തിലെ കുയിലൂരിൽ വളർത്തു പന്നികൾക്ക് ആഫ്രിക്കൻ പന്നിപ്പനിയും റിപ്പോർട്ട് ചെയ്തു. ആറളം ഫാമിൽ ജില്ല മൃഗ സംരക്ഷണ ഓഫീസറുടെ നേതൃത്വത്തിൽ സാമ്പിളുകൾ ശേഖരിച്ച് തിരുവ നന്തപുരത്തെ സ്‌റ്റേറ്റ് ഇൻസ്റ്റ‌ിറ്റ്യൂട്ട് ഫോർ ആനിമൽ ഡിസീസിലേക്ക് പരിശോധനയ്ക്ക് അയച്ചിട്ടുണ്ട്. പടിയൂർ പഞ്ചായത്തിൽ ഇന്നലെയാണ് ആഫ്രിക്കൻ പന്നിപ്പനി സ്ഥിരീകരിച്ചത്. ഫാമിനു ചുറ്റുമുള്ള ഒരു കിലോമീറ്റർ രോഗബാധിത പ്രദേശമായും 10 കിലോമീറ്റർ ചുറ്റളവ് രോഗ നിരീക്ഷണ മേഖലയായും പ്രഖ്യാപിച്ചു. ഈ പ്രദേശങ്ങളിൽ പന്നിമാംസം വിതരണം ചെയ്യുന്നതും പന്നികളെ ജില്ലയിലെ മറ്റ് പ്രദേശങ്ങളിലേക്ക് കൊണ്ടുപോകുന്നതും മറ്റ് പ്രദേശങ്ങളിൽ നിന്ന് നിരീ ക്ഷണ മേഖലയിലേക്ക് കൊണ്ടുവരുന്നതും മൂന്നു മാസത്തേക്ക് നിരോധനിച്ചു. മറ്റ് സംസ്ഥാനങ്ങളിൽ നിന്നും ജില്ലകളിൽ നിന്നും പന്നി മാംസവും പന്നികളേയും ജില്ലയിലേക്ക് കടത്തികൊണ്ടുവരാതിരിക്കാൻ പരിശോധന ശക്‌തമാക്കും. പരിശോധനയുടെ ഭാഗമായി പയ്യാവൂർ, കൂടാളി, ഉളിക്കൽ, ഇരിക്കൂർ, പായം, മലപ്പട്ടം, കൂടാളി, കീഴല്ലൂർ കുറ്റ്യാട്ടൂർ, മാലൂർ, ശിവപുരം, തില്ലങ്കേരി പഞ്ചായത്തുകളേയും മട്ടന്നൂർ, ശ്രീകണ്ഠപുരം, ഇരിട്ടി നഗരസഭകളെയും നിരീക്ഷണ വലയത്തിൽ ഉൾപ്പെടുത്തിയിട്ടുണ്ട്.

ജില്ലയില്‍ വിപുലമായ ഓണാഘോഷം സംഘടിപ്പിക്കും: മന്ത്രി രാമചന്ദ്രന്‍ കടന്നപ്പള്ളി

കണ്ണൂർ: കണ്ണൂരിന്‍റെ പരമ്പരാഗത കലകള്‍ക്ക് മുന്‍തൂക്കം നല്‍കി വൈവിധ്യങ്ങള്‍ കൊണ്ടും വര്‍ണപ്പൊലിമ കൊണ്ടും ജില്ലാതല ഓണാഘോഷം വ്യത്യസ്തമാക്കുമെന്ന് മന്ത്രി കടന്നപ്പള്ളി രാമചന്ദ്രന്‍. സംസ്ഥാന വിനോദസഞ്ചാര വകുപ്പിന്‍റെ ആഭിമുഖ്യത്തില്‍ ജില്ലാ ആസ്ഥാനത്ത് സംഘടിപ്പിക്കുന്ന ഓണാഘോഷ പരിപാടിയുടെ സംഘാടക സമിതി രൂപീകരണ യോഗത്തില്‍ പ്രസംഗിക്കുകയായിരുന്നു മന്ത്രി. ഓണാഘോഷ വാരത്തില്‍ കണ്ണൂര്‍ ടൗണ്‍ സ്‌ക്വയര്‍ കേന്ദ്രീകരിച്ച് വൈകുന്നേരങ്ങളില്‍ കലാപരിപാടികള്‍ സംഘടിപ്പിക്കും. കലാപരിപാടികള്‍ അവതരിപ്പിക്കാന്‍ താത്പര്യമുള്ളവരില്‍ നിന്നും ഇതിനായി അപേക്ഷ ക്ഷണിക്കും. സൗജന്യമായി കലാപരിപാടികള്‍ അവതരിപ്പിക്കാന്‍ താത്പര്യമുള്ളവര്‍ക്ക് പ്രധാന പരിപാടിക്ക് മുമ്പ് അവതരണം നടത്താനുള്ള സൗകര്യവും ലഭിക്കും. ജില്ലയിലെ കലാസംഘങ്ങള്‍ക്ക് പ്രത്യേക പ്രാമുഖ്യം നൽകും. ഇതോടൊപ്പം സിനിമ, സീരിയല്‍ താരങ്ങളെ ഉള്‍പ്പെടുത്തി നൃത്തം, കോമഡി ഷോ എന്നിവയും പ്രശസ്ത ഗായകരെ ഉള്‍പ്പെടുത്തി സംഗീത പരിപാടികളും സംഘടിപ്പിക്കും. സ്‌കൂള്‍, കോളജ് വിദ്യാര്‍ഥികള്‍ക്കായി ചിത്രരചനാ മത്സരം, മെഹന്ദി ഇടല്‍ മത്സരം എന്നിവയും നടത്തും. ടൗണ്‍ സ്‌ക്വയറില്‍ പുല്‍ത്തകിടിക്ക് പുറകിലുള്ള മൈതാനം ഭാഗത്ത് പ്രത്യേക സ്റ്റേജ്, പന്തല്‍, ഗ്രീന്‍ റൂം എന്നിവ നിര്‍മിച്ചാണ് പരിപാടി. കളക്ടറേറ്റ് ഓഡിറ്റോറിയത്തില്‍ ചേര്‍ന്ന യോഗത്തില്‍ കളക്ടര്‍ അരുണ്‍ കെ. വിജയന്‍ അധ്യക്ഷത വഹിച്ചു. കെ.വി. സുമേഷ് എംഎല്‍എ, എഡിഎം കലാഭാസ്‌കര്‍, ഡിടിപിസി സെക്രട്ടറി പി.കെ. സൂരജ്, അസിസ്റ്റന്‍റ് ടൂറിസം ഇന്‍ഫര്‍മേഷന്‍ ഓഫീസര്‍ കെ.സി ശ്രീനിവാസന്‍ എന്നിവര്‍ പങ്കെടുത്തു.

അഞ്ചു വർഷംകൊണ്ട് കിഫ്ബി വഴി 62,000 കോടിയുടെ വികസനം: മുഖ്യമന്ത്രി

കണ്ണൂർ: സംസ്ഥാനത്ത് അടിസ്ഥാന സൗകര്യവികസനത്തിൽ 62,000 കോടിയുടെ വികസനം കിഫ്ബി പദ്ധതികൾ വഴി കൊണ്ടുവരാനായെന്ന് മുഖ്യമന്ത്രി പിണറായി വിജയൻ പറഞ്ഞു. കിഫ്ബി ഫണ്ടിൽ പിണറായി പഞ്ചായത്തിലെ ഉമ്മൻചിറ പുഴയ്ക്ക് കുറുകെ നിർമിച്ച ചേക്കൂ പാലം റെഗുലേറ്റർ കം ബ്രിഡ്ജ് (ആർസിബി) ഉദ്ഘാടനം ചെയ്തു പ്രസംഗിക്കുകയായിരുന്നു മുഖ്യമന്ത്രി. അഞ്ചരക്കണ്ടി പുഴയുടെ കൈവഴി ആയ ഉമ്മഞ്ചിറ പുഴയിൽ പിണറായി, എരഞ്ഞോളി പഞ്ചായത്തുകളെ ബന്ധിപ്പിച്ചാണ് റെഗുലേറ്റർ കം ബ്രിഡ്ജ് നിർമിച്ചിരിക്കുന്നത്. 36.77 കോടി രൂപയാണ് പദ്ധതിക്ക് വേണ്ടി ചെലവിട്ടത്.ജലവിഭവ മന്ത്രി റോഷി അഗസ്റ്റിൻ അധ്യക്ഷത വഹിച്ചു. സംസ്ഥാനത്തൊട്ടാകെ 12 റെഗുലേറ്റർ കം ബ്രിഡ്ജുകളാണ് പ്രവൃത്തി നടക്കുന്നതെന്നും അവയിൽ ചേക്കൂ പാലം ഉൾപ്പെടെ നാലെണ്ണത്തിന്‍റെ നിർമാണം പൂർത്തിയായെന്നും മന്ത്രി പറഞ്ഞു. സ്പീക്കർ എ.എൻ. ഷംസീർ മുഖ്യാതിഥിയായിരുന്നു.

എഇഒ ഓഫീസിൽ മന്ത്രിയുടെ മിന്നൽ പരിശോധന

കണ്ണൂർ: കണ്ണൂർ നോർത്ത് എഇഒ ഓഫീസിൽ മന്ത്രി വി. ശിവൻകുട്ടിയുടെ മിന്നൽ പരിശോധന. എയ്ഡ്‌ഡ് സ്കൂളുകളിലെ അധ്യാപകരുടെ നിയമനം തടഞ്ഞുവച്ചെന്നതുമായി ബന്ധപ്പെട്ട് ലഭിച്ച പരാതിയെ തുടർന്നായിരുന്നു ഇന്നലെ രാവിലെ മന്ത്രി മിന്നൽ സന്ദർശനം നടത്തി ഫയലുകൾ പരിശോധിച്ചത്. പരാതി സംബന്ധിച്ച് ഒരാഴ്ചയ്ക്കുള്ളിൽ അന്വേഷണ റിപ്പോർട്ട് സമർപ്പിക്കാൻ ജില്ലാ വിദ്യാഭ്യാസ ഡയറക്ടറോട് മന്ത്രി നിർദേശിച്ചു. ഇന്നലെ രാവിലെ കണ്ണൂർ മുണ്ടേരി ഗവ. ഹയർ സെക്കൻഡറി സ്‌കൂളിൽ നടന്ന പരിപാടിക്കിടെയാണ് വാരം യുപി സ്‌കൂളിലെ അധ്യാപകരായ അഞ്ജു, ശുഭ, അർജുൻ എന്നിവർ മന്ത്രിയെ നേരിട്ട് കണ്ട് പരാതി നൽകിയത്. തങ്ങളുടെ നിയമനം എട്ടു വർഷമായി തടഞ്ഞു വച്ചിരിക്കുകയായിരുന്നുവെന്നായിരുന്നു പരാതി. ഉടൻ തന്നെ മന്ത്രി ഉദ്യോഗസ്ഥരോടൊപ്പം ഉപജില്ലാ വിദ്യാഭ്യാസ ഓഫീസിലെത്തുകയായിരുന്നു. ഉദ്യോഗസ്ഥരിൽനിന്ന് മന്ത്രി വിവരങ്ങൾ തേടി. 2017 മുതൽ അധ്യാപികയായി ജോലി ചെയ്യുന്ന ശുഭയും 2018 മുതൽ ജോലി ചെയ്യുന്ന അഞ്ജു, അർജുൻ എന്നിവരും നിയമന പ്രശ്‌നം കാരണം ശമ്പളമോ മറ്റ് ആനുകൂല്യങ്ങളോ ഇല്ലാതെയാണ് ജോലി ചെയ്യുന്നത്. ഈ വിഷയത്തിൽ സ്‌കൂൾ മാനേജ്മെന്‍റിന്‍റെയോ ഉദ്യോഗസ്ഥരുടെയോ ഭാഗത്ത് വീഴ്ച സംഭവിച്ചിട്ടുണ്ടെങ്കിൽ ശക്തമായ നടപടിയെടുക്കാൻ മന്ത്രി നിർദേശിച്ചു.

കുന്നോത്ത് ഗുഡ് ഷെപ്പേർഡ് മേജർ സെമിനാരി സിൽവർ ജൂബിലി സമാപന ‌സമ്മേളനം ഇന്ന്

ഇരിട്ടി: കുന്നോത്ത് ഗുഡ് ഷെപ്പേർഡ് മേജർ സെമിനാരിയുടെ സിൽവർ ജൂബിലിയാഘോഷ സമാപന സമ്മേളനം ഇന്ന്. രാവിലെ10 ന് പൂർവവിദ്യാർഥി സംഗമം നടക്കും. 2.30 ന് മേജർ ആർച്ച്ബിഷപ് മാർ റാഫേൽ തട്ടിലിന്‍റെ മുഖ്യകാർമികത്വത്തിൽ വിശുദ്ധ കുർബാന. വൈകുന്നേരം 4.30ന് നടക്കുന്ന സമാപന സമ്മേളനം മന്ത്രി റോഷി അഗസ്റ്റിൻ ഉദ്ഘാടനം ചെയ്യും. മാർ റാഫേൽ തട്ടിൽ കൃതജ്ഞ താബലി അർപ്പിക്കും. സെമിനാരി കമ്മീഷൻ മുൻ ചെയർമാൻ മാർ ജോർജ് വലിയമറ്റം അനുഗ്രഹപ്രഭാഷണം നടത്തും. സെമിനാരി കമ്മീഷൻ മുൻ ചെയർമാൻ മാർ ജോർജ് ഞറളക്കാട്ട് സമ്മാനദാനം നിർവഹിക്കും. മാർ തോമസ് പടിയത്ത് പുസ്തക പ്രകാശനം നിർവഹിക്കും. പ്രഥമ റെക്ടർ ഫാ. ജോസഫ് കുഴിഞ്ഞാലിൽ സുവനീർ പ്രകാശനം നിർവഹിക്കും. സെമിനാരി കമ്മീഷൻ ചെയർമാൻ ആർച്ച് ബിഷപ് മാർ ജോസഫ് പാംപ്ലാനി, അഡ്‌ഹോക് കമ്മിറ്റി മുന്‍ അംഗം മാര്‍ ജോസഫ് കല്ലറങ്ങാട്ട്, കണ്ണൂർ ബിഷപ് ഡോ. അലക്‌സ് വടക്കുംതല, ബത്തേരി രൂപത ബിഷപ് ജോസഫ് മാര്‍ തോമസ്, കെപിസിസി പ്രസിഡന്‍റ് സണ്ണി ജോസഫ് എംഎല്‍എ, സെമിനാരി കമ്മീഷൻ അംഗം മാര്‍ ജോസഫ് പണ്ടാരശേരില്‍, സജീവ് ജോസഫ് എംഎല്‍എ, സെമിനാരി കമ്മീഷന്‍ അംഗം മാര്‍ പീറ്റര്‍ കൊച്ചുപുരക്കല്‍, മുന്‍ റെക്ടര്‍ റവ. ഡോ. മാണി ആട്ടേല്‍, നസ്രത്ത് സിസ്റ്റേഴ്‌സ് മദര്‍ ജനറല്‍ സിസ്റ്റര്‍ ജസീന്ത സെബാസ്റ്റ്യന്‍, പായം പഞ്ചായത്ത് പ്രസിഡന്‍റ് പി. രജനി, പൂര്‍വ വിദ്യാര്‍ഥി പ്രതിനിധി ഫാ. സെബാൻ ഇടയാടിയില്‍, പായം പഞ്ചായത്തംഗം ഷൈജന്‍ ജേക്കബ്, റെക്ടർ റവ. ഡോ. മാത്യു പട്ടമന എന്നിവർ പ്രസംഗിക്കും. സീറോ മലബാർ സഭാ സിനഡിന്‍റെ കീഴിൽ 2000 സെപ്റ്റംബർ ഒന്നിനാണ് തലശേരി അതിരൂപതയുടെ സാന്തോം എസ്റ്റേറ്റിൽ മേജർ സെമിനാരി പ്രവർത്തനം ആരംഭിച്ചത്. 25 വർഷത്തിനുള്ളിൽ 500 വൈദിക വിദ്യാർഥികളാണ് പഠനം പൂർത്തിയാക്കിയത്. ഒരു വർഷം നീണ്ട ജൂബിലി ആഘോഷത്തിൽ ക്രിസ്മസ്ഗാന മത്സരം, അഗതിമന്ദിരം അന്തേവാസികൾക്കൊപ്പം ഒരു ദിവസം, ദേശീയ ദൈവശാസ്ത്ര സെമിനാർ ഇന്‍റർ സെമിനാരി അത്‌ലറ്റ് മീറ്റ്, ഒക്ടോബറിൽ ദേശീയ തത്വശാസ്ത്ര സെമിനാർ, നിർമാണം പുരോഗമിക്കുന്ന ഭവനം എന്നിവ ഉൾപ്പെടുന്നു.

കത്തോലിക്കാ കോൺഗ്രസ് യൂത്ത് കൗൺസിൽ നേതൃസംഗമം നടത്തി

ചെറുപുഴ: സമുദായ സ്നേഹമുള്ള യുവജന നേതാക്കളെ മുൻനിരയിലെത്തിക്കാൻ കത്തോലിക്ക കോൺഗ്രസ് യൂത്ത് കൗൺസിൽ നേതൃത്വം നൽകണമെന്ന് അതിരൂപത ചാൻസലർ റവ. ഡോ. ജോസഫ് മുട്ടത്തുകുന്നേൽ പറഞ്ഞു. തലശേരി അതിരൂപത കത്തോലിക്ക കോൺഗ്രസ് യൂത്ത് കൗൺസിൽ നേതൃസംഗമം-നെയോലാലിയ -2025 ചെറുപുഴ സെന്‍റ് മേരീസ് ഫൊറോന പാരിഷ് ഹാളിൽ ഉദ്ഘാടനം ചെയ്തു പ്രസംഗിക്കുകയായിരുന്നു റവ. ഡോ. ജോസഫ് മുട്ടത്തുകുന്നേൽ. സമുദായത്തോടും സഭയോടും സ്നേഹമുള്ള യുവജനങ്ങൾ ക്രൈസ്തവ മൂല്യങ്ങൾ കളയാതെ സമൂഹത്തിലും രാഷ്‌ട്രീയത്തിലും പ്രവർത്തിക്കണമെന്നും അദ്ദേഹം പറഞ്ഞു. ഗ്ലോബൽ യൂത്ത് കൗൺസിൽ കോ-ഓർഡിനേറ്റർ സിജോ കണ്ണേഴത്ത് അധ്യക്ഷത വഹിച്ചു. സെന്‍റ് മേരിസ് ഫൊറോന പള്ളി വികാരി ഫാ. ഫിലിപ്പ് ഇരുപ്പക്കാട്ട് മുഖ്യപ്രഭാഷണം നടത്തി. ഗ്ലോബൽ ട്രഷറർ അഡ്വ. ടോണി പുഞ്ചക്കുന്നേൽ, അതിരൂപത യൂത്ത് കൗൺസിൽ ജനറൽ കോ-ഓർഡിനേറ്റർ പാട്രിക് കുരുവിള, കോ-ഓർഡിനേറ്റർമാരായ ബിജു ഈട്ടിക്കൽ, ഷിന്‍റോ കൈപ്പനാനിക്കൽ, എബിൻ കുമ്പുക്കൽ, ജോബിൻ വള്ളിയാംതടത്തിൽ, അതിരൂപത പ്രസിഡന്‍റ് ഫിലിപ്പ് വെളിയത്ത്, ജനറൽ സെക്രട്ടറി ജിമ്മി അയിത്തമറ്റം, ട്രഷറർ സുരേഷ് ജോർജ്, ഫൊറോനാ ഡയറക്ടർ ഫാ.തോമസ് പൂവമ്പുഴയിൽ, ഫൊറോനാ പ്രസിഡന്‍റ് സാജു പുത്തൻപുരയിൽ, സാജു പടിഞ്ഞാറേട്ടിൽ, ജയിംസ് ഇമ്മാനുവൽ എന്നിവർ പ്രസംഗിച്ചു.

കേരളത്തിന്‍റെ ആരോഗ്യ മേഖലയെ താറടിക്കാനുള്ള ശ്രമങ്ങള്‍ക്ക് പിന്നില്‍ കോര്‍പ്പറേറ്റ് ഭീമന്‍മാര്‍: മുഖ്യമന്ത്രി

കണ്ണൂര്‍: കേരളത്തിലെ മികവാര്‍ന്ന ആരോഗ്യമേഖലയെ തകര്‍ക്കാനുള്ള ശ്രമം രാജ്യാന്തര കോര്‍പ്പറേറ്റ് ഭീമന്‍മാരുടെ ഇടപെടലിന്‍റെ ഭാഗമാണെന്ന് മുഖ്യമന്ത്രി പിണറായി വിജയന്‍. ജില്ലാ ആശുപത്രി സൂപ്പര്‍ സ്‌പെഷാലിറ്റി ബ്ലോക്ക് ഉദ്ഘാടനം ചെയ്ത് പ്രസംഗിക്കുകയായിരുന്നു മുഖ്യമന്ത്രി. നല്ല സൗകര്യം സര്‍ക്കാര്‍ ആശുപത്രിയില്‍ ഉള്ളപ്പോള്‍ മറ്റു സ്ഥലങ്ങളിലേക്കു പോകുന്നതെന്തിനെന്ന് ആളുകള്‍ ചോദിക്കും. അതു തകര്‍ക്കണം എന്നതാണ് രാജ്യാന്തര ഭീമന്‍മാരുടെ ലക്ഷ്യം. അതിനായി വിലയ്‌ക്കെടുക്കേണ്ടവരെ അവര്‍ വിലയ്‌ക്കെടുക്കും. പല മാര്‍ഗങ്ങളും പല വഴികളും അവര്‍ തേടും. കേരളത്തിലെ മികവാര്‍ന്ന ആരോഗ്യരംഗത്തെ താറടിക്കാനുള്ള ശ്രമം അതിന്‍റെ ഭാഗമാണ്. കേരളത്തിലെ സ്വകാര്യ ആശുപത്രികള്‍ രാജ്യാന്തര കമ്പനികള്‍ സ്വന്തമാക്കുന്നതിനെക്കുറിച്ച് മുഖ്യമന്ത്രി പറഞ്ഞു: ബോര്‍ഡും ജീവനക്കാരും പഴയതായിരിക്കും. നിരക്ക് പുതിയതാകും. ലാഭം വര്‍ധിപ്പിക്കാനുള്ള ഇടം എന്ന തരത്തിലേക്ക് ആശുപത്രി മാറി. കാശ് ഈടാക്കാന്‍ പറ്റിയ ഏതെല്ലാം പരിശോധന ഉണ്ടോ അതെല്ലാം നടക്കട്ടെ എന്ന നിലയാണ്. ടാര്‍ഗറ്റും ക്വാട്ടയും നിശ്ചയിച്ചു നല്‍കുകയാണ്. ആ ക്വാട്ടയിലേക്ക് എത്താത്ത ഡോക്ടർമാർക്ക് അവിടെ തുടരാനാകില്ല. ഇതിന്‍റെയൊക്കെ ചെറിയ രൂപം ഏതാനും സ്വകാര്യ ആശുപത്രികളില്‍ ഉണ്ടായിരുന്നു. എന്നാല്‍ അന്താരാഷ്ര്ട ഭീമന്മാര്‍ വരുമ്പോള്‍ അതിന്‍റെ രൂപവും ഭാവവും മാറുകയാണ്. അത്തരം ശക്തികള്‍ ഇങ്ങോട്ടു വരുമ്പോള്‍ ആ ശക്തികള്‍ക്ക് നല്ല ഒരന്തരീക്ഷം ഇവിടെ വേണം. അതിന് ആവശ്യമായിട്ടുള്ളത് മറ്റു പ്രധാനപ്പെട്ട സമാന്തര മേഖലകള്‍ ഇല്ലാതിരിക്കലാണെന്ന് അദ്ദേഹം പറഞ്ഞു.കഴിഞ്ഞ സാമ്പത്തിക വർഷം മാത്രം 1,498.5 കോടി രൂപയാണ് സൗജന്യ ചികിത്സയ്ക്ക് സർക്കാർ ചെലവിട്ടത്. പൊതുജനങ്ങൾക്ക് സൗജന്യമായി മരുന്ന് നൽകാൻ മെഡിക്കൽ സർവീസസ് കോർപറേഷനിലൂടെ മാത്രം 3,300 കോടിയോളം രൂപ ചെലവഴിച്ചു. 42.5 ലക്ഷം കുടുംബങ്ങളാണ് സൗജന്യ ചികിത്സാ പദ്ധതിയിൽ ഉൾപ്പെട്ടിട്ടുള്ളതെന്ന് മുഖ്യമ ന്ത്രി പറഞ്ഞു. മന്ത്രി വീണ ജോർജ് അധ്യക്ഷത വഹിച്ചു. സ്പീക്കർ എ.എൻ ഷംസീർ, മന്ത്രി കടന്നപ്പള്ളി മന്ത്രി രാമചന്ദ്രൻ, ജില്ലാ പഞ്ചായത്ത് പ്രസിഡന്‍റ് കെ.കെ.രത്നകുമാരി, ജനപ്രതിനിധികൾ, ഉദ്യോഗസ്ഥർ എന്നിവർ പങ്കെടുത്തു.

സമുചിത വിള നിർണയ പദ്ധതി നെൽ, റബർ കർഷകർക്ക് പ്രയോജനകരം: പിണറായി വിജയൻ

കണ്ണൂർ: ഭൂവിനിയോഗ വകുപ്പ് ആവിഷ്‌കരിച്ച "സമുചിത വിള നിർണയം' പദ്ധതി നെൽ, റബർ കർഷകർക്ക് പ്രയോജനകരമെന്ന് മുഖ്യമന്ത്രി പിണറായി വിജയൻ. കണ്ണൂർ ചേംബർ ഓഫ് കൊമേഴ്സ് ഹാളിൽ ഭൂവിനിയോഗ വകുപ്പ് തദ്ദേശ സ്വയംഭരണ സ്ഥാപനങ്ങൾക്കായി നടത്തുന്ന സമുചിത വിള നിർണയ പദ്ധതിയുടെ സംസ്ഥാനതല ഉദ്ഘാടനവും ലാൻഡ് റിസോഴ്‌സ് ഇൻഫർമേഷൻ സിസ്റ്റം (എൽആർഐ) വെബ്‌സൈറ്റ് പ്രകാശനവും നിർവഹിച്ച് പ്രസംഗിക്കുകയായിരുന്നു മുഖ്യമന്ത്രി. പദ്ധതി കേരളത്തിന്‍റെ മണ്ണിന്‍റെയും ജലസ്രോതസുകളുടെയും സമ്പന്നത പാഴാക്കാതെ കൂടുതൽ മെച്ചപ്പെട്ട ഉത്പാദനശേഷിയിലേക്ക് കാർഷിക മേഖലയെ നയിക്കാൻ സഹായിക്കും. ഓരോ പ്രദേശത്തിന്‍റെയും മണ്ണിന്‍റെ സ്വഭാവം, ജല ലഭ്യത, കാലാവസ്ഥാ വ്യതിയാനങ്ങളുടെ സാധ്യതകൾ എന്നിവ ശാസ്ത്രീയമായി പഠിച്ച് ഏറ്റവും അനുയോജ്യമായ വിള ഏതെന്ന് കർഷകർക്ക് കൃത്യമായി നിർദേശിക്കാൻ ഉപകാരപ്രദമാണ്. കാലാവസ്ഥാ മാറ്റങ്ങൾ മൂലം നെൽകൃഷിക്ക് അനുയോജ്യമല്ലാത്ത ഒരു പ്രദേശത്ത് പകരം ചെയ്യാൻ കഴിയുന്ന മറ്റു കാർഷിക വിളകളെക്കുറിച്ച് കർഷകന് കൃത്യമായ മാർഗനിർദേശം ഇതുവഴി ലഭിക്കും.ശരിയായ വിള തെരഞ്ഞെടുക്കുന്നത് മികച്ച വിളവ് നേടാനും കർഷകരുടെ വരുമാനം വർധിപ്പിക്കാനും സഹായിക്കും. മണ്ണിന്‍റെ ഘടന മനസിലാക്കി കൃഷി ചെയ്യുന്നതിലൂടെ മണ്ണിന്‍റെ ആരോഗ്യം സംരക്ഷിക്കാനും കാർഷിക ഉത്പാദനം ഉറപ്പാക്കാനും സാധിക്കും. കാലാവസ്ഥാ വെല്ലുവിളികളെ അതിജീവിക്കാൻ ശേഷിയുള്ള വിളകൾ തെരഞ്ഞെടുക്കുന്നതിലൂടെ കാർഷിക നഷ്ടം ഒഴിവാക്കാനാകും. ഈ സംവിധാനം ഉപയോഗിക്കാൻ തദ്ദേശഭരണ സ്ഥാപനങ്ങളും കർഷകരും തയാറാകണം. പ്രകൃതിവിഭവങ്ങളുടെ വിവേകപൂർവമായ ഉപയോഗവും സുസ്ഥിര കാർഷിക പരിപാലനവുമാണ് 'സമുചിത വിള നിർണയ പദ്ധതി' ലക്ഷ്യമിടുന്നത്. ജിഐഎസ് സാങ്കേതികവിദ്യയുടെ സഹായത്തോടെയും, ഫീൽഡ് സർവേകളിലൂടെയും നിലവിലെ ഭൂവിനിയോഗക്രമം പഠനവിധേയമാക്കി, പഞ്ചായത്ത് തലത്തിൽ വിളഭൂപടങ്ങൾ തയാറാക്കി, ഓരോ പ്രദേശത്തിനും അനുയോജ്യമായ വിളയിനങ്ങൾ ശിപാർശ ചെയ്യുകയാണ് ഈ പദ്ധതി വഴി ഉദ്ദേശിക്കുന്നത്. ഓരോ പ്രദേശത്തെയും കാർഷിക വികസന സാധ്യതകൾ, ഭൂവിനിയോഗത്തിൽ വന്നിട്ടുള്ള മാറ്റങ്ങൾ, അവിടങ്ങളിലെ കാർഷിക മേഖല നേരിടുന്ന പ്രശ്നങ്ങളും പരിഹാരമാർഗങ്ങളും സർവേ നമ്പർ തലത്തിൽ ഇതിൽ വിശകലനം ചെയ്തിട്ടുണ്ടെന്ന് മുഖ്യമന്ത്രി പറഞ്ഞു. മന്ത്രി രാമചന്ദ്രൻ കടന്നപ്പള്ളി അധ്യക്ഷതവഹിച്ചു.

കെസിയുബി വിദ്യാഭ്യാസ അവാര്‍ഡുകള്‍ സമ്മാനിച്ചു

കണ്ണൂര്‍: കണ്ണൂര്‍ കോ-ഓപ്പറേറ്റീവ് അര്‍ബന്‍ ബാങ്കിന്‍റ പ്രഥമ പ്രസിഡന്‍റായിരുന്ന സി. കരുണാകരന്‍റെ സ്മരണാര്‍ഥം ബാങ്ക് ഏര്‍പ്പെടുത്തിയ കെസിയുബി വിദ്യാഭ്യാസ അവാര്‍ഡുകള്‍ വിതരണം ചെയ്തു. കെ. സുധാകരൻ എംപി അവാർഡുകൾ വിതരണം ചെയ്തു. കണ്ണൂരിലെ ജനങ്ങളുട‌െ വിശ്വാസ്യത കാത്തു സൂക്ഷിച്ച് കണ്ണൂരിന്‍റെ സ്വന്തം ബാങ്കായി നിലകൊള്ളാൻ കണ്ണൂർ കോ-ഓപ്പറേറ്റീവ് ബാങ്കിന് സാധിച്ചിട്ടുണ്ടെന്ന് കെ. സുധാകരൻ എംപി പറഞ്ഞു. ബാങ്ക് ചെയർമാൻ രാജീവൻ എളയാവൂർ അധ്യക്ഷത വഹിച്ചു. വൈസ് ചെയർമാൻ എം.പി. മുഹമ്മദലി, ഡയറക്ടര്‍ ടി. ജയകൃഷ്ണന്‍, കായക്കൂൽ രാഹുൽ, ബോര്‍ഡ് ഓഫ് മാനേജ്‌മെന്‍റ് ചെയര്‍മാന്‍ ടി. മുകുന്ദന്‍, കെ. മോഹനൻ, ജനറല്‍ മാനേജര്‍ പി.രൂപ, ഒ.പി. പ്രമോദ്, ടി. പ്രദീപന്‍ എന്നിവർ പങ്കെടുത്തു. മെംബർമാർക്ക് ഈ വർഷവും പത്തു ശതമാനം ഡിവിഡന്‍റ് നൽകാൻ ബാങ്ക് ചെയർമാൻ രാജീവൻ എളയാവൂരിന്‍റെ അധ്യക്ഷതയിൽ വാർഷിക പൊതുയോഗം തീരുമാനിച്ചു. ജനറൽ മാനേജർ പി. രൂപ റിപ്പോർട്ട് അവതരിപ്പിച്ചു. വൈസ് ചെയർമാൻ എം.പി. മുഹമ്മദലി, ബോർഡ് ഓഫ് മാനേജ്മെന്‍റ് ചെയർമാൻ ടി. മുകുന്ദൻ എന്നിവർ പ്രസംഗിച്ചു. കഴിഞ്ഞ മാർച്ചിൽ അവസാനിച്ച സാന്പത്തിക വർഷത്തിൽ ബാങ്കിന്‍റെ അറ്റാദായം 1.25 കോടി രൂപയാണെന്ന് ചെയർമാൻ രാജീവൻ എളയാവൂർ അറിയിച്ചു.

എംആർഎ ബേക്കറിയിൽ സാമ്പത്തിക തട്ടിപ്പ്: രണ്ട് മാനേജർമാർ അറസ്റ്റിൽ

തലശേരി: എംആർഎ ബേക്കറിയിൽ 45 ലക്ഷം രൂപയുടെ സാമ്പത്തിക തട്ടിപ്പ് നടത്തിയെന്ന പരാതിയിൽ സ്ഥാപനത്തിലെ രണ്ട് മാനേജർമാർ അറസ്റ്റിൽ. കാഷ്യറായ യുവതി ഉൾപ്പടെ മൂന്ന് പേർക്കെതിരേയാണ് സംഭവത്തിൽ തലശേരി പോലീസ് കേസെടുത്തിട്ടുള്ളത്. നാരങ്ങാപ്പുറം എംആർഎ റസ്റ്റോറന്‍റ്, ബേക്കറി ആൻഡ് കഫേയിലാണ് തട്ടിപ്പ് നടന്നത്. റസ്റ്ററന്‍റ് മാനേജർ കാസർഗോഡ് ജില്ലയിലെ ഉപ്പള സീ പേൾ അപ്പാർട്ടുമെന്‍റിൽ താമസിക്കുന്ന മംഗൽപാടി സ്വദേശി മല്ലങ്കൈ വീട്ടിൽ ബണ്ടസാലെ അബ്ദുൾ റഹ്മാൻ (44), ബേക്കറി മാനേജർ മാഹി ഐ.കെ. കുമാരൻ മാസ്റ്റർ റോഡ് ആനവാതുക്കൽ ക്ഷേത്രത്തിന് സമീപം സിമിനാൻ മയലക്കര വളപ്പിൽ മുഹമ്മദ് അൻഷാദ് (29) എന്നിവരാണ് അറസ്റ്റിലായത്. സ്ഥാപനത്തിലെ കാഷ്യർ കരിയാട് സൗത്ത് എരോത്ത് വീട്ടിൽ എം.പി. ഷിബിന (39) എന്നിവർക്കെതിരേയാണ് കേസ്. 2022 മുതൽ 2025 വരെയുള്ള കാലയളവിൽ 45 ലക്ഷം രൂപ തട്ടിയെടുത്തെന്നാണ് പരാതി. അക്കൗണ്ട് ഓഡിറ്റിംഗിലാണ് തട്ടിപ്പ് പുറത്തായത്. പലതിനും വൗച്ചർ വയ്ക്കാതെ കണക്കിൽ കൃത്രിമം കാണിക്കു കയായിരുന്നു. സ്ഥാപനത്തിന്‍റെ അധികൃതർ നല്കിയ പരാതിയിലാണ് തലശേരി പോലീസ് കേസെടുത്ത് അന്വേഷണമാരംഭിച്ചത്. പ്രതികളെ സ്ഥാപനത്തിലെത്തിച്ച് പോലീസ് തെളിവെടുത്തു.

‘സ്റ്റെം അറ്റ് സ്കൂൾ' രണ്ടാംഘട്ടം പരിശീലനം സംഘടിപ്പിച്ചു

പയ്യാവൂർ: മടമ്പം പികെഎം കോളജ് ഓഫ് എഡ്യൂക്കേഷൻ സൃഷ്ടി റോബോട്ടിക്സ് ആൻഡ് ടെക്നോളജീസുമായി സഹകരിച്ച് അക്കാദമിക് പ്രോജക്ടായ സ്റ്റെം അറ്റ് സ്‌കൂൾ പദ്ധതിയുടെ ഭാഗമായി സ്കൂൾ വിദ്യാർഥികൾക്ക് രണ്ടാം ഘട്ട പരിശീലനം നൽകി. ഒമ്പതാം ക്ലാസിലെ 22 വിദ്യാർഥികൾക്കാണ് നൂതന സാങ്കേതിക വിദ്യകളായ റോബോട്ടിക്സ്, കോഡിംഗ് എന്നിവയിൽ പരിശീലനം നൽകിയത്. സ്റ്റെം അറ്റ് സ്കൂൾ കോ-ഓർഡിനേറ്റർ സോണിമ കൃഷ്ണൻ, സ്റ്റെം മെന്‍റർ അക്ഷയ സിബി, മേരിഗിരി ഇംഗ്ലീഷ് മീഡിയം സ്കൂൾ അറ്റൽ ടിങ്കറിംഗ് ലാബ് ഇൻസ്ട്രക്ടർ രേഷ്‌മി ബഞ്ചമിൻ എന്നിവർ ടെക്നിക്കൽ സെക്ഷന് നേതൃത്വം നൽകി. പരിശീലനം നേടിയ 13 സ്റ്റെം മെൻഡേഴ്സിന്‍റെ സാന്നിധ്യത്തിൽ ആർഡിനോ കിറ്റ് ഉപയോഗിച്ച് സിമ്പിൾ എൽഇഡി, മൾട്ടിപ്പിൾ എൽഇഡി, ട്രാഫിക് ലൈറ്റ്, ബസർ സെൻസർ തുടങ്ങിയവ വിദ്യാർഥികൾ പ്രവർത്തിപ്പിച്ചു. സൃഷ്ടി റോബോട്ടിക്സ് ആൻഡ് ടെക്നോളജീസ് സിഇഒ സുനിൽ പോളുമായി വിദ്യാർഥികൾ ഓൺലൈനിലൂടെ സംവാദം ന‌ടത്തി. പികെഎം കോളജ് ഓഫ് എഡ്യൂക്കേഷനിലെ സ്റ്റെം ലബോറട്ടറിയിൽ കോളജ് പ്രിൻസിപ്പൽ ഡോ.എൻ.സി. ജെസി ഉദ്ഘാടനം ചെയ്തു. കോഴ്‌സ് ഡയറക്ടർ ഡോ. പ്രശാന്ത് മാത്യു അധ്യക്ഷത വഹിച്ചു. സ്റ്റെം അറ്റ് സ്കൂൾ കോ ഓർഡിനേറ്റർ എം. ഫാത്തിമത്തുൽ സുഹറ നേതൃത്വം നൽകി.

സുരക്ഷാ ബോധവത്കരണ ക്ലാസും മോക്ഡ്രില്ലും

ചെറുപുഴ: പെരിങ്ങോം അഗ്നിരക്ഷാസേനയുടെ നേതൃത്വത്തിൽ തിരുമേനി എസ്എൻഡിപി എൽപി സ്കൂളിൽ സുരക്ഷാബോധവത്കരണ ക്ലാസും മോക്ഡ്രില്ലും നടത്തി. പിടിഎ പ്രസിഡന്‍റ് കെ.സി. പ്രസൂൺ അധ്യക്ഷത വഹിച്ചു. സീനിയർ ഫയർ ആൻഡ് റെസ്ക്യൂ ഓഫീസർ കെ.സി. ഷെറിൽ ബാബു, ഫയർ ആൻഡ് റെസ്ക്യൂ ഓഫീസർ കെ. വിശാൽ, എസ്. അനുരാഗ്, രഞ്ജിത് ബാബു എന്നിവർ നേതൃത്വം നൽകി. വിവിധ സുരക്ഷാ ഉപകരണങ്ങൾ പരിചയപ്പെടുത്തി. അപകടങ്ങളിൽ ചെയ്യേണ്ട കാര്യങ്ങളും രക്ഷാമാർഗങ്ങളും കുട്ടികൾക്ക് മുന്നനിൽ അവതരിപ്പിച്ചു. മുഖ്യാധ്യാപകൻ പി.എം. സെബാസ്റ്റ്യൻ, സജി പുളിക്കലേടത്ത്, എൻ.ജെ. വർഗീസ്, മഞ്ജു മധു, കെ.ആർ. രമ്യ എന്നിവർ പ്രസംഗിച്ചു.

വെള്ളാട് വില്ലേജ് ഓഫീസ് നിർമാണം നാളെ നാളെ നീളെ നീളെ

ആലക്കോട്: സംസ്ഥാനത്തെ ഭൂരിഭാഗം വില്ലേജ് ഓഫീസുകളും സ്‌മാർട്ടാകുന്പോൾ വെള്ളാട് സ്‌മാർട് വില്ലേജ് ഓഫീസ് കെട്ടിട നിർമാണം നീണ്ടു പോകുന്നു. നിർമാണത്തിന് അനുമതി നൽകി തുകയും അനുവദിച്ച് വർഷം ഒന്നര കഴിഞ്ഞിട്ടും പ്രവൃത്തി അനന്തമായി നീളുകയാണ്. ടെൻഡർ നൽകിയ ശേഷം എസ്റ്റ‌ിമേറ്റ് പുതുക്കിയതാണ് നിർമാണം നീണ്ടു പോകാൻ കാരണം. അപകടാവസ്ഥയിലായിരുന്ന വില്ലേജ് ഓഫീസ് കെട്ടിടം ഒഴിവാക്കി വാടക കെട്ടിടത്തിലാണ് ഇപ്പോൾ പ്രവർത്തിക്കുന്നത്. എസ്റ്റ‌ിമേറ്റ് പ്രകാരം 50 ലക്ഷം രൂപയുടെ ഭരണാനുമതിയാണ് കെട്ടിടനിർമാണത്തിന് അനുവദിച്ചത്. 48 ലക്ഷം രൂപയ്ക്ക് ടെൻഡർ എടുക്കുകയും ചെയ്തു. എന്നാൽ തുക കുറവാണെന്നും എസ്‌റ്റിമേറ്റ് കൂട്ടണമെന്നുമാണ് കരാറുകാരന്‍റെ ആവശ്യം. കെട്ടിടം നിർമിക്കേണ്ട സ്ഥലത്തിന് സമീപം പുഴയും താഴ്ന്ന പ്രദേശവും ഉള്ളതിനാൽ ഫൗണ്ടേഷൻ ഉയർത്താനായി എട്ടു ലക്ഷം അധികം വേണമെന്നാണ് ആവശ്യം. അതിനാൽ 58 ലക്ഷം രൂപയുടെ പുതിയ എസ്‌റ്റിമേറ്റ് തയാറാക്കി നൽകിയിരിക്കുകയാണ്. 50 ലക്ഷം രൂപ അനുവദിക്കുകയും പുതിയ എസ്‌റ്റിമേറ്റിൽ 58 ലക്ഷം രൂപ വരികയും ചെയ്‌ത സാഹചര്യത്തിൽ ചുറ്റുമതിൽ, ഗേറ്റ്, ഇന്‍റർലോക്, ബോർവെൽ എന്നിവ ഒഴിവാക്കിക്കൊണ്ട് നിർമിക്കാനുള്ള നീക്കവും നടക്കുന്നുണ്ട്. നിർമാണത്തിന് ആവശ്യമായ സാമഗ്രികൾ മലയോരത്ത് യഥേഷ്ടം ഉള്ളപ്പോൾ കെട്ടിടം നിർമിക്കുന്നതിന് വലിയ തുകയാണ് എസ്‌റ്റിമേറ്റിൽ ഉൾപ്പെടുത്തിയതെന്നും ആക്ഷേപമുണ്ട്.

മഹിളാ കോൺഗ്രസ് കാമ്പയിൻ നടത്തി

ചെറുപുഴ: മഹിളാ കോൺഗ്രസ് മണ്ഡലംതല കാമ്പയിൻ ചെറുപുഴയിൽ നടന്നു. പാടിയോട്ടുചാൽ സർവീസ് സഹകരണ ബാങ്ക് ഹാളിൽ നടന്ന കാമ്പയിന്‍റെ ഉദ്ഘാടനം ചെറുപുഴ ബ്ലോക്ക് കോൺഗ്രസ് പ്രസിഡന്‍റ് മഹേഷ് കുന്നുമ്മൽ നിർവഹിച്ചു. ചെറുപുഴ മണ്ഡലം മഹിളാ കോൺഗ്രസ് പ്രസിഡന്‍റ് ലളിതാ ബാബു അധ്യക്ഷത വഹിച്ചു. മഹിളാ കോൺഗ്രസ് ജില്ലാ പ്രസിഡന്‍റ് ശ്രീജ മഠത്തിൽ മുഖ്യപ്രഭാഷണം നടത്തി. ഉഷ അരവിന്ദ്, അത്തായി പദ്മിനി, ഇ.പി. ശ്യാമള, ഉഷ മുരളി, കെ.കെ. സുരേഷ് കുമാർ, തങ്കച്ചൻ കാവാലം, എ. ബാലകൃഷ്ണൻ, ജോയിസി ഷാജി, മിനി വേണുഗോപാൽ, സബീന, കെ. കോമളവല്ലി, ടി.പി. ചന്ദ്രൻ, മനോജ് വടക്കേൽ, സലീം തേക്കാട്ടിൽ, പി.പി. ബാലകൃഷ്ണൻ, റോജി ബെന്നി, പ്രണവ് കരേള എന്നിവർ പ്രസംഗിച്ചു.

ഉത്രാട നാളിൽ വടംവലി മത്സരം

കരുവഞ്ചാൽ: കരുവഞ്ചാൽ വൈഎംസിഎ സംഘടിപ്പിക്കുന്ന ഇത്തവണത്തെ ഉത്തരമേഖലാ വടംവലി മത്സരം ഉത്രാടദിനമായ സെപ്റ്റംബർ നാലിന് നടക്കും. വൈകുന്നേരം നാലിന് കരുവഞ്ചാൽ ടൗണിലെ കട്ടക്കൽ കോംപ്ലക്സിൽ നടക്കുന്ന മത്സരത്തിൽ പ്രമുഖ ടീമുകൾ പങ്കെടുക്കും. ജനറൽ വിഭാഗം ആൺകുട്ടികൾ, പെൺകുട്ടികൾ എന്നീ വിഭാഗങ്ങളിലായാണ് മത്സരം. ജനറൽ വിഭാഗത്തിൽ വിജയിക്ക് 15,001രൂപ കാഷ് അവാർഡും ട്രോഫിയും സമ്മാനിക്കും. രണ്ടാം സമ്മാനമായി 10001 രൂപ‍യും ട്രോഫിയും മൂന്നാം സമ്മാനമായി 5001രൂപയും നാലാം സമ്മാനം 3001 രൂപയും നൽകും. കുട്ടികളുടെ വിഭാഗത്തിൽ 5001 രൂപയാണ് ഒന്നാം സമ്മാനം. രണ്ടാം സ്ഥാനക്കാർക്ക് 3001 രൂപ കാഷ് അവാർഡും മൂന്നാം സമ്മാനം 1501 രൂപ കാഷ് അവാർഡും നൽകും. കഴിഞ്ഞ 26 വർഷമായി വൈഎംസിഎ ഓണത്തോടനുബന്ധിച്ച് നടത്തി വരുന്നതാണ് ഉത്തരമേഖല വടംവലി മത്സരം. സംഘാടക സമിതി രൂപീകരണ യോഗം പ്രസിഡന്‍റ് പോൾ ജോർജ് മേച്ചേരിയുടെ അധ്യക്ഷതയിൽ നടന്നു. ഭാരവാഹികൾ: സാബു ചാണാക്കാട്ടിൽ-കൺവീനർ, ടോണിസ് ജോർജ്, ജയ്സൺ ഓണംകുളം -ജോയിന്‍റ് കൺവീനർമാർ. ‌രജിസ്ട്രേഷനും കൂടുതൽ വിവരങ്ങൾക്കും ഫോൺ: 9447482301, 9946582618, 9447852389

ചെമ്പേരി ബസിലിക്ക ഒന്നാം വാർഷികാഘോഷത്തിന് ഇന്നു തുടക്കം

ചെമ്പേരി: ലൂർദ് മാതാ ബസിലിക്ക പ്രതിഷ്ഠാകർമത്തിന്‍റെ ഒന്നാം വാർഷികാഘോഷം ഇന്നു മുതൽ 15 വരെ നടക്കും. ഇന്നും നാളെയും ജാഗരണ ദിനങ്ങളായിരിക്കും. രാവിലെ ആറിനും വൈകുന്നേരം നാലിനും ജപമാല പ്രാർഥന, വിശുദ്ധ കുർബാന, നൊവേന എന്നിവയുണ്ടായിരിക്കും. 14ന് പ്രാർഥനാദിനമായി ആചരിക്കും. രാവിലെ 6.30 ന് വിശുദ്ധ കുർബാനയും നൊവേനയും. 7.30 മുതൽ 3.30 വരെ സോൺ അടിസ്ഥാനത്തിൽ പരിശുദ്ധ കുർബാനയുടെ ആരാധന. 3.30 മുതൽ 4.30 വരെ പൊതുവായ ആരാധന. 4.30 ന് വിശുദ്ധ കുർബാനയും നൊവേനയും. 15 ന് പരിശുദ്ധ കന്യാമറിയത്തിന്‍റെ സ്വർഗാരോഹണ ദിനം കൃതജ്ഞതാ ദിനമായി ആചരിക്കും. രാവിലെ 7.15 ന് ആഘോഷമായ തിരുനാൾ കുർബാനയ്ക്ക് തലശേരി അതിരൂപത ഫിനാൻസ് ഓഫീസർ റവ.ഡോ.ജോസഫ് കാക്കരമറ്റത്തിൽ മുഖ്യകാർമികത്വം വഹിക്കുമെന്ന് ബസിലിക്ക റെക്ടർ റവ.ഡോ.ജോർജ് കാഞ്ഞിരക്കാട്ട് അറിയിച്ചു.

ലൈഫ് മിഷനിലൂടെ നാലര ലക്ഷത്തിലേറെ വീടുകള്‍ പൂര്‍ത്തിയായി: മുഖ്യമന്ത്രി

കണ്ണൂർ: സ്വന്തം വീട് സ്വപ്നം മാത്രമായി കൊണ്ടുനടന്ന സംസ്ഥാനത്തെ 4,57,055 കുടുംബങ്ങള്‍ക്ക് സ്വന്തമായൊരു വീട് നല്കുന്നതിന് ലൈഫ് മിഷൻ പദ്ധതിയിലൂടെ സംസ്ഥാന സര്‍ക്കാരിന് കഴിഞ്ഞെന്ന് മുഖ്യമന്ത്രി പിണറായി വിജയന്‍. വേങ്ങാട് പഞ്ചായത്ത് ലൈഫ് പദ്ധതിയില്‍ പൂര്‍ത്തിയായ 50 വീടുകളുടെ താക്കോല്‍ദാന ചടങ്ങ് ഉദ്ഘാടനം ചെയ്യുകയായിരുന്നു മുഖ്യമന്ത്രി. ലൈഫ് പദ്ധതിയുടെ തുടക്കത്തില്‍ കേന്ദ്ര സര്‍ക്കാരുമായി ചര്‍ച്ച നടത്തി വിവിധ പദ്ധതികള്‍ ഏകോപിപ്പിച്ച് നടത്തുന്നത് അറിയിച്ചിരുന്നു. തുടക്കത്തില്‍ ഇത് അംഗീകരിക്കുകയും പിന്നീട് വീടുകള്‍ക്ക് മുന്നില്‍ ലോഗോ വയ്ക്കണമെന്നുള്‍പ്പെടെ നിബന്ധനകള്‍ വയ്ക്കുകയും ചെയ്തു. കേരളത്തില്‍ പൂര്‍ത്തിയായ 4.5 ലക്ഷം വീടുകളുടെ മുന്നില്‍ ലോഗോ വച്ച് കുടുംബങ്ങളുടെ അഭിമാന ബോധത്തെ വ്രണപ്പെടുത്തില്ലെന്ന് സംസ്ഥാന സര്‍ക്കാര്‍ തീരുമാനിച്ചു. ലോഗോ അംഗീകരിക്കാതെ പണം തരില്ലെന്ന നിര്‍ബന്ധത്തിന് വഴങ്ങാനോ പദ്ധതി മുടക്കുന്നതിനോ സര്‍ക്കാര്‍ തയാറല്ലെന്നും മുഖ്യമന്ത്രി പറഞ്ഞു. തദ്ദേശ സ്ഥാപനങ്ങള്‍ വലിയ പങ്കാണ് ലൈഫ് പദ്ധതിയുടെ പൂര്‍ത്തീകരണത്തില്‍ വഹിക്കുന്നത്. അതിദാരിദ്ര്യമുക്ത കേരളം പ്രഖ്യാപനം നവംബര്‍ ഒന്നിന് നടക്കാനിരിക്കെ ഈ നേട്ടം കൈവരിക്കുന്നതില്‍ തദ്ദേശസ്ഥാപനങ്ങള്‍ വലിയ പങ്ക് വഹിച്ചു. അതിദരിദ്രരില്ലാത്ത രാജ്യത്തെ ആദ്യ സംസ്ഥാന മായി കേരളം മാറും. മാലിന്യ നിര്‍മാര്‍ജനത്തില്‍ ഹരിത കര്‍മസേന വഹിക്കുന്ന പങ്ക് സ്തുത്യര്‍ഹമാണ്. തദ്ദേശസ്ഥാപനങ്ങള്‍ നടത്തുന്ന പ്രവര്‍ത്തനങ്ങളോട് ജനങ്ങളും നല്ല രീതിയിലാണ് പ്രതികരി ക്കുന്നത്. ലഹരിമുക്ത കേരളം എന്ന ലക്ഷ്യവും നാം ഒന്നാകെ ഏറ്റെടുത്ത് പൂര്‍ത്തിയാക്കേണ്ട ദൗത്യമാണെന്നും മുഖ്യമന്ത്രി പറഞ്ഞു. അഞ്ച് കുടുംബങ്ങള്‍ക്കുള്ള താക്കോല്‍ മുഖ്യമന്ത്രി വേദിയില്‍ കൈമാറി. ജില്ലാപഞ്ചായത്ത് പ്രസിഡന്‍റ് കെ.കെ. രത്‌നകുമാരി അധ്യക്ഷത വഹിച്ചു.

അൻവർ വധക്കേസിൽ വിചാരണ തുടങ്ങി

തളിപ്പറമ്പ്: പട്ടുവം കാവുങ്കല്‍ അന്‍വര്‍ വധക്കേസില്‍ വിചാരണ തുടങ്ങി. തളിപ്പറമ്പ് അഡീഷണല്‍ സെഷന്‍സ് കോടതിയിലാണ് ഇന്നലെ വിചാരണ തുടങ്ങിയത്. വാദിഭാഗം ആവശ്യപ്പെട്ട പ്രോസിക്യൂ ട്ടറെ നിയമിക്കാന്‍ സാധിക്കില്ലെന്ന് ആഭ്യന്തര വകുപ്പ് അറിയിച്ചിട്ടുണ്ട്. കേസ് വീണ്ടും ഈ മാസം 29ന് പരിഗണിക്കും. പ്രതികള്‍ക്കു വേണ്ടി നിക്കോളോസ് ജോസഫാണ് ഹാജരാവുന്നത്. സിപിഎം പ്രവര്‍ത്തകരായ പട്ടുവം, മംഗലശേരി, ആന്തൂര്‍ സ്വദേശികളായ നീലാങ്കല്‍ എന്‍. കണ്ണന്‍ (53) തിരച്ചില്‍ വീട്ടില്‍ എന്‍. അനൂപ് (38) ചരമഞ്ചേരി വളപ്പില്‍ സി.വി. മനീഷ് (38) നടുവിലെ പുരയില്‍ സി.പി. അമിത്ത് (39), കേളോത്ത് സുനില്‍കുമാര്‍ (51), ചക്കര വളപ്പില്‍ സി.വി. ബാബുരാജ് (52) ഏഴോത്തെ പി.വി. രാമകൃഷ്ണന്‍ (62) എന്‍. അനില്‍കുമാര്‍ (50), മുറിയം തോട്ടില്‍ എന്‍ ഡെന്നീസ് (40) മുതുകുടയില്‍ പി. ബാലകൃഷ്ണന്‍ (65) തുടങ്ങി 22 പേരാണ് കേസിലെ പ്രതികള്‍. 2011 ജൂലൈ അഞ്ചിന് വൈകുന്നേരം അഞ്ചരയോടെ കാവുങ്കല്‍ ബസ് കാത്തിരിപ്പ് കേന്ദ്രത്തിനടുത്തു നില്ക്കുകയായിരുന്ന അനവറിനെ പ്രതികൾ സംഘം ചേർന്ന് ആയുധങ്ങൾ ഉപയോഗിച്ച് വെട്ടികൊല പ്പെടുത്തി എന്നായിരുന്നു കേസ്. ആക്രമണത്തിൽ കൂടെ ഉണ്ടായിരുന്നവർക്കും പരിക്കേറ്റിരുന്നു. ഒരു വീടിന്‍റെ പെയിന്‍റിംഗ് ജോലി കഴിഞ്ഞ് മടങ്ങുകയായിരുന്നു കൊല്ലപ്പെട്ട അന്‍വറും സുഹൃത്തുക്കളും. രാഷ്ട്രീയ വിരോധമാണ് കൊലയ്ക്ക് കാരണമായി പറയുന്നത്. പട്ടുവത്തെ സി.കെ. ദില്‍ഷാദിന്‍റെ പരാതി പ്രകാരമാണ് പോലീസ് കേസെടുത്തത്. പരിക്കേറ്റ ജസീല്‍, സി.കെ. റഷീദ്, കെ.പി. അഷ്റഫ്, സി.കെ. റാഷിദ്, പി.പി. പ്രമോദ്, കെ. ഇബ്രാഹിം, എം.പി. മുസ്തഫ, കണ്ണൂര്‍ ഫസ്റ്റ് ക്ലാസ് മജിസ്ട്രേറ്റ് ആയിരുന്ന സി. മുജീബ് റഹ്മാന്‍, ഫോറന്‍സിക് സര്‍ജന്‍ ഡോ.എസ്. ഗോപാലകൃഷ്ണപിള്ള ഉൾപ്പെടെയുള്ളവർ പ്രോസിക്യൂഷന്‍ സാക്ഷികളാണ്.

ആലക്കോട് രാജ ജനഹൃദയങ്ങളിലെ തമ്പുരാൻ: സണ്ണി ജോസഫ് എംഎൽഎ

ആലക്കോട്: പൊതുപ്രവർത്തകൻ - ഭരണാധികാരി, വികസന ശില്പി എന്ന നിലകളിൽ ജനഹൃദയ ങ്ങളിൽ സ്ഥാനം പിടിച്ച പി.ആർ. രാമവർമ രാജ ജനഹൃദയങ്ങളിലെ തമ്പുരാൻ ആണെന്ന് കെപിസിസി പ്രസിഡന്‍റ് സണ്ണി ജോസഫ് എംഎൽഎ. പി.ആർ. രാമവർമ രാജയുടെ ചരമവാർഷിക ത്തോടനുബന്ധിച്ച് രാമവർമ രാജ ചാരിറ്റബിൾ ട്രസ്റ്റ് ആഭിമുഖ്യത്തിൽ സംഘടിപ്പിച്ച അനുസ്മരണ സമ്മേളനം ആലക്കോട് കൊട്ടാരത്തിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദേഹം. മലയോര മണ്ണിൽ വികസനത്തിന്‍റെ വിത്ത് പാകാനും അത് തഴച്ചു വളർത്താനും രാജയ്ക്ക് സാധിച്ചെന്നും വരും തലമുറയ്ക്ക് വെളിച്ചം നൽകിയാണ് ആലക്കോട് രാജ കടന്നുപോയതെന്നും സണ്ണി ജോസഫ് പറഞ്ഞു. അജിത്ത് വർമ അധ്യക്ഷത വഹിച്ചു. പദ്മശ്രീ കൈതപ്രം ദാമോദരൻ നമ്പൂതിരി മുഖ്യ പ്രഭാഷണം നടത്തി. കെ.പി. കേശവൻ രചിച്ച പി.ആർ. രാമവർമ രാജ ജീവചരിത്ര ഗ്രന്ഥത്തിന്‍റെ പ്രകാശനം മുൻ മന്ത്രി കെ.സി. ജോസഫ് നിർവഹിച്ചു. രാമവർമ്മ രാജയുടെ മകൾ കുമാരി വർമ പുസ്തകം ഏറ്റുവാങ്ങി. വി.കെ. മധു, പഞ്ചായത്ത് പ്രസിഡന്‍റുമാരായ ബേബി ഓടംമ്പള്ളിൽ, ജോജി കന്നിക്കാട്ട്, കെ.എസ്. ചന്ദ്രശേഖരൻ, ആലക്കോട് ഫൊറോന പള്ളി വികാരി ഫാ. ആന്‍റണി പുന്നൂർ, നാരായണൻ നമ്പൂതിരി, ഡോ. എം. അസൈനാർ തുടങ്ങിയവർ പ്രസംഗിച്ചു.

സ്കൂളിൽ കർക്കടക കഞ്ഞിയൊരുക്കി

കൊളക്കാട്: ആരോഗ്യ സംരക്ഷണത്തിൽ കർക്കിടക മാസത്തിന്‍റെ പ്രാധാന്യം ബോധ്യപ്പെടുത്തി കൊളക്കാട് സെന്‍റ് സെബാസ്റ്റ്യൻസ് യുപി സ്കൂളിൽ കർക്കിടകത്തിലെ മരുന്നു കഞ്ഞി നിർമാണവും വിതരണവും നടന്നു. ഔഷധ കഞ്ഞിയുടെ വിതരണോദ്ഘാടനം പിടിഎ പ്രസിഡന്‍റ് സന്തോഷ് പെരേപ്പാടൻ നിർവഹിച്ചു. സ്കൂൾ പിടിഎ യുടെ നേതൃത്വത്തിൽ നവരയരി, ആശാളി, മുതിര, ഗോതമ്പ്, ചെറുപയർ, ഉലുവ എന്നീ ധാന്യങ്ങളും ആയുർവേദ മരുന്നുകളും ചേർത്താണ് കഞ്ഞി തയാറാക്കിയത്. സ്കൂൾ മുഖ്യാധ്യാപിക ജാൻസി തോമസ്, പി.എ. ജെയ്സൺ, റീന ചെറിയാൻ, ജോബി മാത്യു, ജിസ്ന ടോബിൻ തുടങ്ങിയവർ നേതൃത്വം നല്കി.

ആർഎസ്എസിന്‍റേത് ക്രിമിനലുകളെ എംപിമാരാക്കുന്ന മാതൃക: എം.വി. ജയരാജൻ

മട്ടന്നൂർ: ക്രിമിനലുകളെ എംപിമാരും എംഎൽഎമാരുമാക്കി ആർഎസ്എസ് പുതിയ മാതൃക സൃഷ്ടിക്കുകയാണെന്ന് സിപിഎം സംസ്ഥാന സെക്രട്ടേറിയറ്റംഗം എം.വി. ജയരാജൻ. സിപിഎം പഴശി സൗത്ത് ലോക്കൽ കമ്മിറ്റി ഉരുവച്ചാലിൽ സംഘടിപ്പിച്ച രാഷ്ട്രീയ വിശദീകരണ പൊതുയോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സിപിഎം ബ്രാഞ്ച് സെക്രട്ടറിയായിരുന്ന ജനാർദ്ദനനെ ക്രൂരമായി ആക്രമിച്ച് വധിക്കാൻ ശ്രമിച്ച കേസിലെ പ്രതിയാണ് സി. സദാനന്ദൻ. കമ്യൂണിസ്റ്റുകാരെ ജയിലിലടച്ച് എംപിയായി വിലസാമെന്ന് ആരും കരുതേണ്ട. മലേഗാവ് സ്‌ഫോടനക്കേസിലെ പ്രതി പ്രഗ്യാ സിംഗ് താക്കൂറിന്‍റെ സ്ഥാനം ഇപ്പോൾ പാർലമെന്‍റിൽ ഒഴിവുണ്ട്. ഈ അഭാവം പരിഹരിക്കാനാണ് സദാനന്ദനെ എംപിയാക്കിയ തെന്ന് എം.വി.ജയരാജൻ പറഞ്ഞു. 30 വർഷത്തിന് ശേഷം കള്ളക്കേസിൽ ജയിലിലടച്ച സിപിഎം പ്രവർത്തകർ തെറ്റു ചെയ്തവരല്ലെന്ന് നാട്ടിൽ എല്ലാവർക്കുമറിയാം. നാടിന് കൊള്ളരുതാത്തവരാണ് ആർഎസ്എസ്. കോൺഗ്രസും ആർഎസ്എസിന്‍റെ പാതയിലാണെന്നും കോൺഗ്രസിലേക്ക് പോകുന്നത് പിന്നീട് ആർഎസ്എസി ലേക്ക് ചേക്കേറാനാണെന്നും അദ്ദേഹം പറഞ്ഞു. സിപിഎം ഏരിയാ സെക്രട്ടറി എം.രതീഷ് അധ്യക്ഷത വഹിച്ചു. പി.പുരുഷോത്തമൻ, എൻ.വി.ചന്ദ്ര ബാബു, സി.വി. ശശീന്ദ്രൻ, കെ.ഭാസ്‌കരൻ, എ.കെ. ബീന, പി.എം. ജനാർദനൻ, എ.കെ.സുരേഷ്‌കുമാർ തുടങ്ങിയവർ പങ്കെടുത്തു. കരേറ്റയിൽ നിന്ന് ഉരുവച്ചാലിലേക്ക് ബഹുജനപ്രകടനവും നടന്നു.

അധികൃതരുടെ അനാസ്ഥയിൽ പൊലിഞ്ഞത് ഒരു കുടുംബത്തിന്‍റെ അത്താണി

ചാണപ്പാറ: ജപ്പാൻ കുടിവെള്ളത്തിനായി പൈപ്പിടാൻ കുഴിച്ച കുഴിയിൽ ചാടി ബുള്ളറ്റ് നിയന്ത്രണം വിട്ട് വൈദ്യുത തൂണിൽ ഇടിച്ച് കണിച്ചാർ ചാണപ്പാറയിലെ അജേഷ് (39) മരണപ്പെടാൻ ഇടയായത് അധികൃതരുടെ അനാസ്ഥ മൂലമെന്ന് ആരോപണം. പൈപ്പിടാനായി എടുത്ത കുഴി കൃത്യമായി മൂടുകയോ കോൺക്രീറ്റ് ചെയ്യുകയോ ചെയ്യാത്തതിനാൽ ഇതിലൂടെ മഴവെള്ളം കുത്തിയൊഴുകി വലിയ കുഴികൾ റോഡിന്‍റെ ഇരുവശത്തും രൂപപ്പെട്ടിട്ടുണ്ട്.ഇത്തരം കുഴികളാണ് അപകടത്തിന് വഴിവയ്ക്കുന്നതെന്നാണ് തദ്ദേശവാസികൾ പറയുന്നത്. നിരവധിതവണ അധികൃതരുടെ ശ്രദ്ധയിൽ ഇക്കാര്യം പെടുത്തിയെങ്കിലും ഒരു നടപടിയും ഉണ്ടായില്ല. വീതി കുറവുള്ള അമ്പായത്തോട് മണത്തണ മലയോര ഹൈവേയിൽ വാഹനങ്ങൾക്ക് സൈഡ് നല്കാൻ പലപ്പോഴും റോഡിൽനിന്ന് ഇറക്കേണ്ട അവസ്ഥ ഇരുചക്ര വാഹനങ്ങൾക്കും മറ്റു ചെറിയ വാഹനങ്ങൾക്കും ഉണ്ടാവാറുണ്ട്. ഇത്തരം വാഹനങ്ങൾ അപകടത്തിൽപെടുന്നതും യാത്രക്കാർക്ക് പരിക്കേൽക്കുന്നതും പതിവാണ്.

ആയുർവേദ ചികിത്സാരംഗത്ത് കേരളം മാതൃക: മന്ത്രി വീണാ ജോർജ്

പരിയാരം: ആയുർവേദ ചികിത്സാ രംഗത്ത് ഗുണമേന്മ ഉറപ്പുവരുത്താൻ സംസ്ഥാനം നടത്തുന്ന പ്രവർത്തനങ്ങൾ രാജ്യത്തിന് മാതൃകയാണെന്ന് മന്ത്രി വീണാ ജോർജ്. പരിയാരത്തെ കണ്ണൂർ ഗവ. ആയുർവേദ കോളജിലെ ലേഡീസ് ഹോസ്റ്റൽ കെട്ടിടത്തിന്‍റെയും ഓപ്പൺ എയർ സ്റ്റേജിന്റെയും ഉദ്ഘാടനം നിർവഹിച്ചു പ്രസംഗിക്കുകയായിരുന്നു മന്ത്രി. ആയുർവേദ ചികിത്സാരംഗത്ത് അക്രഡിറ്റേഷൻ സമ്പ്രദായം കൊണ്ടുവന്ന് 250ഓളം എൻഎബിഎച്ച് അക്രഡിറ്റഡ് ആയുഷ് സ്ഥാപനങ്ങൾ പ്രവർത്തിക്കുന്ന രാജ്യത്തെ ഏക സംസ്ഥാനമായി മാറാൻ കേരളത്തിന് കഴിഞ്ഞിട്ടുണ്ട്. ആയുർവേദ മരുന്നുകളുടെ ഗുണനിലവാരം ഉറപ്പിക്കാനുള്ള പ്രവർത്തനങ്ങളുമായാണ് സർക്കാർ മുന്നോട്ടു പോകുന്നത്. ആയുർവേദ മേഖലയ്ക്ക് സർക്കാർ പ്രത്യേക പരിഗണന നൽകുന്നുണ്ട്. സംസ്ഥാനത്തിന്‍റെ സ്വപ്ന പദ്ധതിയായ കല്യാട് അന്താരാഷ്ട്ര ആയുർവേദ ഗവേഷണ കേന്ദ്രത്തിന്‍റെ പ്രവൃത്തി അതിവേഗം മുന്നോട്ടു പോകുകയാണെന്നും മന്ത്രി പറഞ്ഞു. എം.വിജിൻ എംഎൽഎ അധ്യക്ഷത വഹിച്ചു. ജനപ്രതിനിധികൾ, വിവിധ വകുപ്പുദ്യോഗസ്ഥർ എന്നിവർ പങ്കെടുത്തു.

വൈഎംസിഎ ഡയാലിസിസ് സഹായതാ പദ്ധതി തുടങ്ങി

ഇരിട്ടി: ഇരിട്ടി വൈഎംസിഎയുടെയും വൈഎംസിഎ ദേശീയ കൗൺസിലിന്‍റേയും നേതൃത്വത്തിൽ ഇരിട്ടി അമല ആശുപത്രിയുടെ സഹകരണത്തോടെ നടത്തുന്ന ഡയാലിസിസ് സഹായതാ പദ്ധതി ആർച്ച്ബിഷപ് എമരിറ്റസ് മാർ ജോർജ് ഞറളക്കാട്ട് ഉദ്ഘാടനം ചെയ്തു. ഇരിട്ടി വൈഎം സിഎ പ്രസിഡന്‍റ് ഷിന്‍റോ മൂക്കനോലി അധ്യക്ഷത വഹിച്ചു. അമല എംഡി മാത്യു കുന്നപ്പള്ളി, നെഫ്രോളജിസ്‌റ്റ് ഡോ. ടോം ജോസ് കാക്കനാടൻ എന്നിവർ മുഖ്യാതിഥികളായിരുന്നു. വൈഎംസിഎ ഇരിട്ടി സബ് റീജയൺ വൈസ് ചെയർമാൻ ഡോ. എം.ജെ. മാത്യു, ബേബി തോലാനി, ഷാജി കുറ്റിയിൽ, റോബിൻ എം. ഐസക്, ചാൾസ് തോമസ് എന്നിവർ പ്രസംഗിച്ചു.

ലൈഫ് മിഷനിലൂടെ നാലര ലക്ഷത്തിലേറെ വീടുകള്‍ പൂര്‍ത്തിയായി: മുഖ്യമന്ത്രി

കണ്ണൂർ: സ്വന്തം വീട് സ്വപ്നം മാത്രമായി കൊണ്ടുനടന്ന സംസ്ഥാനത്തെ 4,57,055 കുടുംബങ്ങള്‍ക്ക് സ്വന്തമായൊരു വീട് നല്കുന്നതിന് ലൈഫ് മിഷൻ പദ്ധതിയിലൂടെ സംസ്ഥാന സര്‍ക്കാരിന് കഴിഞ്ഞെന്ന് മുഖ്യമന്ത്രി പിണറായി വിജയന്‍. വേങ്ങാട് പഞ്ചായത്ത് ലൈഫ് പദ്ധതിയില്‍ പൂര്‍ത്തിയായ 50 വീടുകളുടെ താക്കോല്‍ദാന ചടങ്ങ് ഉദ്ഘാടനം ചെയ്യുകയായിരുന്നു മുഖ്യമന്ത്രി. ലൈഫ് പദ്ധതിയുടെ തുടക്കത്തില്‍ കേന്ദ്ര സര്‍ക്കാരുമായി ചര്‍ച്ച നടത്തി വിവിധ പദ്ധതികള്‍ ഏകോപിപ്പിച്ച് നടത്തുന്നത് അറിയിച്ചിരുന്നു. തുടക്കത്തില്‍ ഇത് അംഗീകരിക്കുകയും പിന്നീട് വീടുകള്‍ക്ക് മുന്നില്‍ ലോഗോ വയ്ക്കണമെന്നുള്‍പ്പെടെ നിബന്ധനകള്‍ വയ്ക്കുകയും ചെയ്തു. കേരളത്തില്‍ പൂര്‍ത്തിയായ 4.5 ലക്ഷം വീടുകളുടെ മുന്നില്‍ ലോഗോ വച്ച് കുടുംബങ്ങളുടെ അഭിമാന ബോധത്തെ വ്രണപ്പെടുത്തില്ലെന്ന് സംസ്ഥാന സര്‍ക്കാര്‍ തീരുമാനിച്ചു. ലോഗോ അംഗീകരിക്കാതെ പണം തരില്ലെന്ന നിര്‍ബന്ധത്തിന് വഴങ്ങാനോ പദ്ധതി മുടക്കുന്നതിനോ സര്‍ക്കാര്‍ തയാറല്ലെന്നും മുഖ്യമന്ത്രി പറഞ്ഞു. തദ്ദേശ സ്ഥാപനങ്ങള്‍ വലിയ പങ്കാണ് ലൈഫ് പദ്ധതിയുടെ പൂര്‍ത്തീകരണത്തില്‍ വഹിക്കുന്നത്. അതിദാരിദ്ര്യമുക്ത കേരളം പ്രഖ്യാപനം നവംബര്‍ ഒന്നിന് നടക്കാനിരിക്കെ ഈ നേട്ടം കൈവരിക്കുന്നതില്‍ തദ്ദേശസ്ഥാപനങ്ങള്‍ വലിയ പങ്ക് വഹിച്ചു. അതിദരിദ്രരില്ലാത്ത രാജ്യത്തെ ആദ്യ സംസ്ഥാന മായി കേരളം മാറും. മാലിന്യ നിര്‍മാര്‍ജനത്തില്‍ ഹരിത കര്‍മസേന വഹിക്കുന്ന പങ്ക് സ്തുത്യര്‍ഹമാണ്. തദ്ദേശസ്ഥാപനങ്ങള്‍ നടത്തുന്ന പ്രവര്‍ത്തനങ്ങളോട് ജനങ്ങളും നല്ല രീതിയിലാണ് പ്രതികരി ക്കുന്നത്. ലഹരിമുക്ത കേരളം എന്ന ലക്ഷ്യവും നാം ഒന്നാകെ ഏറ്റെടുത്ത് പൂര്‍ത്തിയാക്കേണ്ട ദൗത്യമാണെന്നും മുഖ്യമന്ത്രി പറഞ്ഞു. അഞ്ച് കുടുംബങ്ങള്‍ക്കുള്ള താക്കോല്‍ മുഖ്യമന്ത്രി വേദിയില്‍ കൈമാറി. ജില്ലാപഞ്ചായത്ത് പ്രസിഡന്‍റ് കെ.കെ. രത്‌നകുമാരി അധ്യക്ഷത വഹിച്ചു.

ബിഷപ് വള്ളോപ്പള്ളി പ്രതിമ നിർമാണം: ശേഖരിച്ച് ചെമ്പ് വസ്തുക്കൾ കൈമാറി

കൊളക്കാട്: ബിഷപ് മാർ സെബാസ്റ്റ്യൻ വള്ളോപ്പള്ളിയുടെ പ്രതിമ നിർമാണവുമായി ബന്ധപ്പെട്ട് പേരാവൂർ ഫൊറോനയിലെ വിവിധ ഇടവകകളിൽ നിന്ന് ശേഖരിച്ച് ചെമ്പ്, ഓട് തുടങ്ങിയ വസ്തുക്കൾ തലശേരി അതിരൂപത കത്തോലിക്ക കോൺഗ്രസ് ഭാരവാഹികൾക്ക് കൈമാറി. ഫൊറോന വികാരി ആർച്ച് പ്രീസ്റ്റ് ഫാ. മാത്യു തെക്കേമുറി, കത്തോലിക്ക കോൺഗ്രസ് ഫൊറോനാ ഡയറക്ടർ ഫാ. തോമസ് പട്ടാംകുളം, മേഖലാ പ്രസിഡന്‍റ് ജോർജ് കാനാട്ട്, കത്തോലിക്ക കോൺഗ്രസ് ഫൊറോന ഭാരവാഹികൾ തുടങ്ങിയവർ ചേർന്ന് അതിരൂപതാ ഭാരവാഹികളായ ജിമ്മി അയിത്തമറ്റം, സുരേഷ് ജോർജ് കാഞ്ഞിരത്തിങ്കൾ, ബെന്നിച്ചൻ മഠത്തിനകം തുടങ്ങിയവർക്ക് കൈമാറി. ഉളിക്കൽ: ബിഷപ് മാർ സെബാസ്റ്റ്യൻ വള്ളോപ്പിള്ളിയുടെ വെങ്കല പ്രതിമയുടെ നിർമാണത്തിനായി ഓട്ടുപാത്രങ്ങൾ ശേഖരിക്കുന്നതിന്‍റെ നെല്ലിക്കാംപൊയിൽ ഫൊറോനതല ഉദ്ഘാടനം വികാരി ഫാ. ജോസഫ് കാവനാടി നിർവഹിച്ചു. തോമസ് വർഗീസ് അധ്യക്ഷത വഹിച്ചു. ഫാ. ജോസഫ് കളരിക്കൽ, ജിമ്മി ഐയിത്തമറ്റം, സുരേഷ് ജോർജ്, ബെന്നിച്ചൻ മഠത്തിനകം, സ്‌കറിയ വലിയമറ്റം, ലിസി കല്ലട, മേരിക്കുട്ടി ബെന്നി, ജോയി മണ്ണാപറമ്പിൽ, ജയിംസ് മന്നാകുളത്തിൽ, ബിനോയി കൂനിങ്കൽ തുടങ്ങിയവർ പ്രസംഗിച്ചു.

ഓപ്പറേഷൻ ഗജമുക്‌തി; ആദ്യ ദിനം തുരത്തിയത് ഒമ്പത് ആനകളെ

ഇരിട്ടി: ആറളം ഫാമിലും പുനരധിവാസ മേഖലയിലും ജനങ്ങളുടെ ജീവനും കൃഷിക്കും ഭീഷണിയായ കാട്ടാനകളെ വനത്തിലേക്കു തുരത്താനുള്ള ഓപ്പറേഷൻ ഗജമുക്‌തി പദ്ധതി തുടങ്ങി. ഇന്നലെ ഫാമിനുള്ളിൽ നിന്നും കണ്ടെത്തിയ ഒമ്പത് ആനകളെ ആറളം വന്യജീവി സങ്കേതത്തിൽ കയറ്റിവിട്ടു. വിവിധ വകുപ്പുകളുടെ സഹകരണത്തോടെയാണു ആന തുരത്തൽ ദൗത്യം ഏകോപിക്കുന്നത് . ഞായറാഴ്‌ചയും ഇന്നലെ പുലർച്ചയും ആറളം പഞ്ചായത്തിന്‍റെ നേതൃത്വത്തിൽ പുനരധിവാസ മേഖലയിലെ ജനങ്ങൾക്ക് മൈക്ക് അനൗൺസ്മെന്‍റിലൂടെ മുന്നറിയിപ്പ് സന്ദേശം നല്കി. ഇന്നലെ രാവിലെ ഏഴിന് ദൗത്യം ആരംഭിച്ചു. രണ്ട് ഗ്രൂപ്പുകളായി തിരിഞ്ഞ സംഘം ഫാമിലെ ബ്ലോക്ക് രണ്ടിൽ തമ്പടിച്ച കാട്ടാനകളെ നിരീക്ഷിച്ചു കണ്ടെത്തി. തുടർന്ന് പുനരധിവാസ മേഖലയിലുള്ളവർക്ക് ജോലി സ്ഥലത്തേക്ക് പോകുവാനുള്ള സുരക്ഷിതത്വവും ഫാം സ്‌കൂൾ കുട്ടികൾക്കുള്ള സുരക്ഷയും കണക്കിലെടുത്തു രാവിലെ പത്തോടെകാട്ടാന തുരത്തൽ ആരംഭിച്ചു. പടക്കം പൊട്ടിച്ചും മറ്റും കൃഷിയിടത്തിലെ പൊന്തക്കാടുകളിൽ നിന്നും ആനക്കൂട്ടത്തെ പാലപ്പുഴ - കീഴ്പ്പള്ളി റോഡ് കടത്തി പുനരധിവാസ മേഖലയിലേക്കാണു ആദ്യംതുരത്തിയത്. ആറ് വലിയ ആനകളും മൂന്ന് കുട്ടിയാനുകളുമാണു റോഡ് കടന്ന് പുനരധിവാസ മേഖലയിലേക്ക് പ്രവേശിച്ചത്. പിന്നീട് അവിടെ നിന്നും താളിപ്പാറ കോട്ടപ്പാറ വഴി അഞ്ചു മണിക്കൂർ കൊണ്ട് ആറളം വന്യജീ സങ്കേതത്തിലേക്കു സോളർ തൂക്കുവേലി തുറന്നു ഓടിച്ചു വിട്ടു. തിരിച്ചു വരാതിരിക്കാൻ വേലി പുനസ്ഥാപിച്ചു. കാവലും ഏർപ്പെടുത്തി. ആറളം വൈൽഡ് ലൈഫ് വാർഡൻ വി. രതീശൻ, റേഞ്ചർമാരായ ടി. നിധിൻരാജ് (കൊട്ടിയൂർ), സുധീർ നേരോത്ത് (കണ്ണവം), ജയപ്രകാശ് (ഫ്ലൈയിംഗ് സ്ക്വാഡ്), ആറളം അസിസ്റ്റന്‍റ് വൈൽഡ് ലൈഫ് വാർഡൻ രമ്യ രാഘവൻ, ആറളം ആർആർടി ഡെപ്യൂട്ടി റേഞ്ചർ എം. ഷൈനികുമാർ, തോലമ്പ്ര ഫോറസ്‌റ്റർ സി.കെ. മഹേഷ്, ബീറ്റ് ഫോറസ്‌റ്റ് ഓഫിസർ പ്രജീഷ് എന്നിവരുടെ നേതൃത്വത്തിൽ 50 അംഗ വനപാലക സംഘമാണ് ദൗത്യം നടത്തിയത്. ആറളം പഞ്ചായത്ത് പ്രസിഡന്‍റ് കെ.പി. രാജേഷ്, ഫാം വാർഡ് അംഗം മിനി ദിനേശൻ, ഇരിട്ടി താലൂക്ക് ഡെപ്യൂട്ടി തഹസിൽദാർമാരായ ബിജി ജോൺ, മനോജ് കുമാർ, ആറളം എസ്ഐ രാജീവൻ, ആറളം ഫാം സെക്യൂരിറ്റി ഓഫിസർ എം.കെ. ബെന്നി എന്നിവരുടെ നേതൃത്വത്തിൽ വിവിധ സംഘങ്ങളും സ്ഥലത്ത് നിലയുറപ്പിച്ചിരുന്നു. കളക്ടറുടെയും സബ് കളക്‌ടറുടെയും ഏകോപനത്തിലാണ ഓപ്പറേഷൻ ഗജമുക്‌തി നടപ്പിലാക്കിയത്. കാട്ടാന പ്രവേശിക്കാൻ സാധ്യതയുള്ള റോഡുകൾ വനം വകുപ്പിന്‍റെ നിർദേശപ്രകരം പോലീസ് അടച്ചിരുന്നു . അത്യാഹിതം ഉണ്ടായാൽ പ്രഥമ ശുശ്രൂഷ ഉൾപ്പെടെ നല്കുന്നതിനുള്ള ആംബുലൻസ് സൗകര്യവും ഒരുക്കിയിരുന്നു. വനത്തിലേക്കു കയറ്റിവിടുന്ന കാട്ടാനകൾ പൂക്കുണ്ട് മേഖല വഴിയാണു വീണ്ടും തിരിച്ചു ജനവാസ മേഖലയിലേക്ക് ഇറങ്ങുന്നത്. ഇതു തടയുന്നതിനായി 24 മണിക്കൂർ നിരീക്ഷണവും ഈ മേഖലയിൽ ഒരുക്കിയിട്ടുണ്ട്.

ബൈക്ക് വൈദ്യുത തൂണിലിടിച്ച് യുവാവ് മരിച്ചു

കണിച്ചാർ: മല‍യോര ഹൈവേയിൽ ബൈക്ക് നിയന്ത്രണം വിട്ട് വൈദ്യുത തൂണിലിടിച്ച് ടാപ്പിംഗ് തൊഴിലാളിയായ യുവാവ് മരിച്ചു. കണിച്ചാർ ചാണപ്പാറ സ്വദേശി കുന്നത്ത് നാരായണൻ നായർ-പരേതയായ ലീല ദന്പതികളുടെ മകൻ അജേഷാണ് (37) മരിച്ചത്. ഞായറാഴ്ച രാത്രി പത്തോടെ ചാണപ്പാറയിലെ ഇറക്കത്തിലെ വലിയ വളവിലായിരുന്നു അപകടം. ഉടൻ നാട്ടുകാർ പേരാവൂരിലെ സ്വകാര്യ ആശുപത്രിയിലെത്തിച്ചെങ്കിലും മരിച്ചു. തലശേരി ജില്ലാ ആശുപത്രിയിലെ പോസ്റ്റുമോർട്ടത്തിന് ശേഷം വീട്ടിലെത്തിച്ച മൃതദേഹം ഇന്നലെ ഉച്ചകഴിഞ്ഞ് വീട്ടുപറന്പിൽ സംസ്കരിച്ചു. സഹോദരങ്ങൾ: ആശ, അനിൽകുമാർ, അഭിലാഷ്.

ബൈക്കുകൾ കൂട്ടിയിടിച്ച് യുവാവ് മരിച്ചു

കണ്ണൂർ: മുണ്ടയാട് എളയാവൂർ പഞ്ചായത്ത് ഓഫീസ് പരിസരത്ത് ബൈക്കുകൾ കൂട്ടിയിടിച്ചുണ്ടായ അപകടത്തിൽ ബൈക്ക് യാത്രികനായ യുവാവ് മരിച്ചു. രണ്ടു പേർക്ക് ഗുരുതരമായി പരിക്കേറ്റു. പുല്ലൂപ്പിക്കടവ് കണ്ടന്‍റവിട ഉമ്മറിന്‍റെ മകൻ അബ്ദൂൾ അസീസാണ് (40) മരിച്ചത്. അബ്ദു റഹിമാൻ (36) എടക്കാട് സ്വദേശി ഗോകുൽ (25) എന്നിവർക്കാണ് പരിക്കേറ്റത്. ഞായറാഴ്ച രാത്രിയായിരുന്നു അപകടം. വാരം ഭാഗത്തേക്ക് പോകുകയായിരുന്ന അബ്ദുൾ അസീസും അബ്ദുറഹിമാനും സഞ്ചരിച്ച ബൈക്ക് എതിരേ വന്ന ഗോകുലിന്‍റെ ബൈക്കുമായി കൂട്ടിയിടിക്കുകയായിരുന്നു. സമീപത്തുണ്ടായിരുന്നവർ മൂവരെയും കണ്ണൂരിലെ സ്വകാര്യ ആശുപത്രിയിലെത്തിച്ചെങ്കിലും അബ്ദുൾ അസീസ് മരിച്ചു. സഫ്രീനയാണ് അബ്ദുൾ അസീസിന്‍റെ ഭാര്യ. മക്കൾ: നൂറ, നൂഹ്, ഹസ്ന.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]