ADVERTISEMENT

ADVERTISEMENT

അപകടാവസ്ഥയിലായ മരം മുറിച്ചു മാറ്റണം

പാമ്പാടി: വെള്ളൂർ അണ്ണാടിവയൽ ജംഗ്ഷനിൽ ഓട്ടോറിക്ഷ സ്റ്റാൻഡിനോട് ചേർന്ന് വഴിയരികിൽ നിൽക്കുന്ന പഞ്ഞിമരം അപകടഭീഷണി ഉയർത്തുന്നു.

മരത്തിൽനിന്നു കറ ഒഴുകി ദുർബലാവസ്ഥയിലായ പഞ്ഞി മരം ഏതു നിമിഷവും നിലംപൊത്താവുന്ന അവസ്ഥയിലാണ്. 11 കെവി ലൈൻ ഇതിന് തൊട്ടടുത്തുകൂടി കടന്നുപോകുന്നുണ്ട്.

ഇതിന് മുകളിലേക്കു വീഴാനും സാധ്യതയുണ്ട്. അപകടം ഒഴിവാക്കാൻ എത്രയും വേഗം മരം മുറിച്ചുമാറ്റാൻ ആവശ്യമായ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

ADVERTISEMENT

അതിരൂപത കുടുംബക്കൂട്ടായ്മ നേതൃസംഗമം

ചങ്ങനാശേരി: നൂറുമേനി സീസണ്‍ 3 അതിരൂപതാതല മത്സരത്തിന്‍റെ ഭാഗമായി അതിരൂപത കുടുബക്കൂട്ടായ്മ നേതൃസംഗമം വിദ്യാനികേതന്‍ ഹാളില്‍ നടത്തി. ബൈബിള്‍ അപ്പൊസ്‌തലേറ്റ്-കുടുംബക്കൂട്ടായ്മ ഡയറക്ടര്‍ ഫാ. ജോര്‍ജ് മാന്തുരുത്തില്‍ ഉദ്ഘാടനം ചെയ്തു. സെപ്റ്റംബര്‍ 12,13 തീയതികളിലായി ക്രമീകരിച്ചിരിക്കുന്ന മത്സരത്തിന്‍റെ സമാപനത്തില്‍ 5000 ജേതാക്കള്‍ പങ്കെടുക്കും. സെപ്റ്റംബര്‍ 14 മുതല്‍ എല്ലാ ഇടവകകളിലും ആരംഭിക്കുന്ന ജൂബിലി ജ്യോതി പ്രയാണം, കെരിഗ്‌മ, ഫൊറോന കണ്‍വന്‍ഷനുകള്‍, ബസാലേല്‍ ഇടവക സംഗമങ്ങള്‍ എന്നിവ വിജയകരമാക്കാന്‍ സമ്മേളനം തീരുമാനിച്ചു. അതിരൂപത മുന്‍ വികാരി ജനറാൾ ഫാ. ജോസഫ് കുറിഞ്ഞിപ്പറമ്പിലിന്‍റെ നിര്യാണത്തില്‍ സമ്മേളനം അനുശോചനം രേഖപ്പെടുത്തി. ബൈബിള്‍ അപ്പൊസ്‌തലേറ്റ് കണ്‍വീനര്‍ ഡോ. റൂബിള്‍രാജ് അധ്യക്ഷത വഹിച്ചു. ഫാ. മാത്യു അഞ്ചില്‍, ഡോ. സോണി കണ്ടങ്കരി, പ്രഫ. ജോസഫ് ടിറ്റോ, ജോസി കടന്തോട്, ആന്‍റണി മലയില്‍, ലാലി ഇളപ്പുങ്കല്‍, അഡ്വ. ഡെന്നീസ് ജോസഫ്, ജോഷി കൊല്ലാപുരം, സിബി മുക്കാടന്‍, മറിയം പൊട്ടംകുളം, ടോമിച്ചന്‍ കൈതക്കളം, സിസ്റ്റര്‍ ചെറുപുഷ്പം, ജിക്കു ഇണ്ടിപ്പറമ്പില്‍ എന്നിവര്‍ പ്രസംഗിച്ചു.

റവ.ഡോ. സേവ്യര്‍ ജെ. പുത്തന്‍കളത്തിന്‍റെ പൗരോഹിത്യ സുവര്‍ണ ജൂബിലി ആഘോഷം

ചങ്ങനാശേരി: റവ.ഡോ. സേവ്യര്‍ ജെ. പുത്തന്‍കളത്തിന്‍റെ പൗരോഹിത്യ സുവര്‍ണ ജൂബിലി ആഘോഷവും പുത്തന്‍കളം കുടുംബസംഗമവും ചങ്ങനാശേരി സെന്‍റ് മേരീസ് മെത്രാപ്പോലീത്തന്‍ പള്ളി പാരിഷ് ഹാളില്‍ നടത്തി. കര്‍ദിനാള്‍ മാര്‍ ജോര്‍ജ് ആലഞ്ചേരി ഉദ്ഘാടനം ചെയ്തു. വിശ്വാസീസമൂഹത്തിന്‍റെ ആവശ്യങ്ങളറിഞ്ഞ് ത്യാഗനിര്‍ഭരമായ ശുശ്രൂഷകള്‍ ചെയ്ത വൈദികനാണ് ഫാ. സേവ്യര്‍ ജെ. പുത്തന്‍കളമെന്നും പുത്തന്‍കളം കുടുംബയോഗത്തിന്‍റെ പ്രവര്‍ത്തനങ്ങള്‍ മാതൃകാപരമാണെന്നും മാര്‍ ആലഞ്ചേരി പറഞ്ഞു. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിച്ചു. വികാരി ജനറാള്‍ മോണ്‍. ആന്‍റണി എത്തയ്ക്കാട്ട്, ജോബ് മൈക്കിള്‍ എംഎല്‍എ, കുടുംബയോഗം പ്രസിഡന്‍റ് റവ.ഡോ. ടോം പുത്തന്‍കളം, ഡോ. സിസ്റ്റര്‍ പ്രസന്ന സിഎംസി, എന്‍.സി. തോമസ് എന്നിവര്‍ പ്രസംഗിച്ചു. രാവിലെ ജൂബിലേറിയന്‍റെ മുഖ്യ കാര്‍മികത്വത്തില്‍ വിശുദ്ധ കുര്‍ബാന അര്‍പ്പിച്ചു. ആര്‍ച്ച്ബിഷപ് എമരിറ്റസ് മാര്‍ ജോസഫ് പെരുന്തോട്ടം കുര്‍ബാനമധ്യേ സന്ദേശം നല്‍കി.

ചങ്ങനാശേരി റെയില്‍വേ ബൈപാസ് ജംഗ്ഷനില്‍ റോഡ് തകര്‍ന്നു

ചങ്ങനാശേരി: ചങ്ങനാശേരി-വാഴൂര്‍, ചങ്ങനാശേരി ബൈപാസ് റോഡുകള്‍ സംഗമിക്കുന്ന റെയില്‍വേ ബൈപാസ് ജംഗ്ഷനില്‍ റോഡ് തകര്‍ന്നു. ചെറുവാഹനങ്ങള്‍ ഉള്‍പ്പെടെ വാഹനങ്ങള്‍ക്കു റോഡിലെ ഗട്ടര്‍ വിനയാകുന്നു. നൂറുകണക്കിനു വാഹനങ്ങള്‍ സഞ്ചരിക്കുന്ന റോഡിലാണ് ഗട്ടര്‍ അപകടക്കെണിയാകുന്നത്. ബൈപാസിന്‍റെ മധ്യത്തിലുള്ള വൈദ്യുതി പോസ്റ്റിനോടു ചേര്‍ന്നുള്ള ഭാഗത്താണ് ഗട്ടര്‍ രൂപപ്പെട്ടത്. അനുദിനം ഈ ഗട്ടറിന്‍റെ വിസ്തൃതി വര്‍ധിച്ചുകൊണ്ടിരിക്കുകയാണ്. ട്രാഫിക് അടിയന്തരമായി റോഡില്‍ അറ്റകുറ്റപ്പണികള്‍ നടത്തിയാല്‍ റോഡിന്‍റെ തകര്‍ച്ചയും വാഹനങ്ങള്‍ക്കുണ്ടാകുന്ന ബുദ്ധിമുട്ടും പരിഹരിക്കാനാകും.

ഇത് നന്നാകാനോ? ചങ്ങനാശേരി, തൃക്കൊടിത്താനം, കറുകച്ചാൽ വില്ലേജ് ഓഫീസര്‍മാരുടെ നിയമനം നീളുന്നു

ചങ്ങനാശേരി: ചങ്ങനാശേരിയിലും തൃക്കൊടിത്താനത്തും കറുകച്ചാലിലും വില്ലേജ് ഓഫീസര്‍മാരെ നിയമിക്കുന്നത് നീളുന്നു. ഈ വില്ലേജ് ഓഫീസുകളില്‍ വിവിധ ആവശ്യങ്ങള്‍ക്കെത്തുന്ന ആളുകള്‍ ബുദ്ധിമുട്ടുന്നു. ചങ്ങനാശേരി വില്ലേജ് ഓഫീസർ സ്ഥലം മാറിപ്പോയിട്ട് ഒന്നരമാസമായി. പകരം ആളെ നിയമിച്ചില്ല. തൃക്കൊടിത്താനം വില്ലേജ് ഓഫീസര്‍ കഴിഞ്ഞ ഏപ്രിലിൽ വിരമിച്ച ഒഴിവിലും‍ പുതിയ ഓഫീസറെ നിയമിച്ചിട്ടില്ല. കറുകച്ചാലില്‍ വില്ലേജ് ഓഫീസര്‍ ഇല്ലാതായിട്ടു രണ്ടുമാസം പിന്നിട്ടു. സ്‌കൂള്‍, കോളജ് പ്രവേശനത്തിനുള്ള സര്‍ട്ടിഫിക്കറ്റുകള്‍, വരുമാന സര്‍ട്ടിഫിക്കറ്റുകള്‍, പ്രകൃതിക്ഷോഭ കാര്യങ്ങളുടെ പരിശോധന തുടങ്ങി വില്ലേജ് ഓഫീസര്‍മാർ ചെയ്യേണ്ട ജോലികളാണ് ആളുകള്‍ക്ക് നിഷേധിക്കപ്പെടുന്നത്. ചങ്ങനാശേരി ലാൻഡ് റിക്കോര്‍ഡ്‌സ് വിഭാഗം തഹസില്‍ദാർക്ക് കോട്ടയത്തുള്ള വോട്ടിംഗ് യന്ത്രം സൂക്ഷിക്കുന്ന കേന്ദ്രത്തിന്‍റെ ഫസ്റ്റ് ലെവല്‍ ഓഫീസറുടെ ചുമതലകൂടി നല്‍കിയിരിക്കുകയാണ്. സ്ഥലം അളവ്, അതിര്‍ത്തി നിര്‍ണയം, നിലം/പുരയിടം തരംമാറ്റം, പോക്കുവരവ് തുടങ്ങിയ ചുമതലകളാണ് ലാൻഡ് റിക്കോര്‍ഡ്‌സ് വിഭാഗം തഹസില്‍ദാര്‍ക്കുള്ളത്. ഇദ്ദേഹത്തിന് അധികച്ചുമതല നല്‍കിയതോടെ ചങ്ങനാശേരി ലാൻഡ് റിക്കോര്‍ഡ്‌സ് വിഭാഗത്തിലെ സേവനങ്ങള്‍ക്കു തടസം നേരിടാന്‍ ഇടയുണ്ടെന്നു ചൂണ്ടിക്കാണിക്കപ്പെടുന്നത്. കളക്ടറേറ്റിലെ സീനിയര്‍ സൂപ്രണ്ടുമാർക്കോ കോട്ടയം സ്‌പെഷല്‍ തഹസില്‍ദാർമാർക്കോ വോട്ടിംഗ് യന്ത്രം സൂക്ഷിക്കുന്ന കേന്ദ്രത്തിന്‍റെ ചുമതല നല്‍കി ബുദ്ധിമുട്ടുകള്‍ പരിഹരിക്കാവുന്നതെയുള്ളൂവെന്ന് ചൂണ്ടിക്കാണിക്കപ്പെടുന്നു.

മരം വീണ് വീട് തകർന്നു

വൈക്കം: ശക്തമായ കാറ്റിൽ തേക്കുമരം കടപുഴകിവീണ് വീടിനു ഭാഗികമായി തകർന്നു. നഗരസഭയിലെ കമ്പിവേലിക്കകം ഭാഗത്തെ കണ്ണന്തറ രാജേഷിന്‍റെ വീടിനു മുകളിലാണ് കഴിഞ്ഞ രാത്രി12ന് മരം വീണത്. വീടിന്‍റെ അടുക്കളഭാഗം തകർന്നു. കൂലിപ്പണിക്കാരനായ രാജേഷും ഭാര്യയും മക്കളും മാതാവും അപകടസമയത്ത് വീട്ടിൽ ഉണ്ടായിരുന്നെങ്കിലും പരിക്കേൽക്കാതെ രക്ഷപ്പെട്ടു.വില്ലേജ് അധികൃതരും കൗൺസിലർ ബി. ചന്ദ്രശേഖരനും സ്ഥലത്തെത്തി നാശനഷ്ടം വിലയിരുത്തി.

പിതൃമോക്ഷ പ്രാപ്തിക്കായി ആയിരങ്ങൾ ബലിതർപ്പണം നടത്തി

വൈക്കം: പിതൃക്കളുടെ മോക്ഷ പ്രാപ്തിക്കായി ഉറ്റവർ ക്ഷേത്രാങ്കണങ്ങളിൽ പിതൃതർപ്പണം നടത്തി. വൈക്കം പിതൃകുന്നം തുറുവേലിക്കുന്ന് ധ്രുവപുരം മഹാദേവ ക്ഷേത്രം, ടി.വി. പുരം ശ്രീരാമക്ഷേത്രം, വാഴേകാട് മഹാവിഷ്ണു ക്ഷേത്രം തുടങ്ങിയ ക്ഷേത്രങ്ങളിൽ ആയിരങ്ങളാണ് ബലിതർപ്പണം നടത്തിയത്. ക്ഷേത്രങ്ങളിൽ പിതൃതർപ്പണത്തിനായി വിപുലമായ സൗകര്യമാണ് ഏർപ്പെടുത്തിയിരുന്നത്. രാവിലെ 5.30 മുതൽ ബലിതർപ്പണം ആരംഭിച്ചു. തുറുവേലിക്കുന്നു ധ്രുവപുരം മഹാദേവ ക്ഷേത്രത്തിൽ വിശേഷാൽ പൂജകൾ നമസ്കാര വഴിപാടുകൾ എന്നിവ മേൽശാന്തിയുടെ കാർമികത്വത്തിൽ നടന്നു. ക്ഷേത്രം ദേവസ്വം പ്രസിഡന്‍റ് കെ. ദിവാകരൻ, സെക്രട്ടറി കെ.ജി. രാമചന്ദ്രൻ, വൈസ് പ്രസിഡന്‍റ് എം.വി.ബിനേഷ്, കമ്മിറ്റി അംഗങ്ങളിയ കെ.രാധാകൃഷ്ണൻ, അജീഷ്, ഡി. ഷിബു, ചന്ദ്രിക, ശോഭ, യൂണിയൻ കൗൺസിലർ എസ്.സെൻ, യൂത്ത് മൂവ്മെന്‍റ് പ്രസിഡന്‍റ് ലിബിൻ, സെക്രട്ടറി രാഹുൽ, വനിതാസംഘം സെക്രട്ടറി സിനി തുടങ്ങിയവർ നേതൃത്വം നൽകി.

ദൈവദാസന്‍ മാർ മാത്യു മാക്കീലിന്‍റെ ധന്യന്‍ പദവി പ്രഖ്യാപനം നാളെ

കോട്ടയം: ദൈവദാസന്‍ മാർ മാത്യു മാക്കീലിന്‍റെ ധന്യന്‍ പദവി പ്രഖ്യാപനവും മാര്‍ തോമസ് തറയിലിന്‍റെ 50-ാം ചരമവാര്‍ഷിക ആചരണത്തിന്‍റെ സമാപനവും നാളെ നടക്കും. കോട്ടയം ക്രിസ്തുരാജ ക്നാനായ കത്തോലിക്കാ കത്തീഡ്രലില്‍ രാവിലെ 9.30ന് തിരുക്കർമങ്ങൾ ആരംഭിക്കും. സീറോമലബാർ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ ഉദ്ഘാടനം ചെയ്തു സന്ദേശം നല്കും. ആര്‍ച്ച്ബിഷപ് മാര്‍ മാത്യു മൂലക്കാട്ട് സ്വാഗതം ആശംസിക്കും. ദൈവദാസന്‍ മാര്‍ മാത്യു മാക്കീലിനെ ധന്യനായി പ്രഖ്യാപിച്ചുള്ള ഡിക്രി അതിരൂപത ചാന്‍സലര്‍ ഫാ. തോമസ് ആദോപ്പിള്ളില്‍ വായിക്കും. മാര്‍ മാത്യു മൂലക്കാട്ടിന്‍റെ മുഖ്യകാര്‍മികത്വത്തില്‍ കൃതജ്ഞതാബലി അര്‍പ്പിക്കും. അതിരൂപത സഹായ മെത്രാന്‍മാരായ മാര്‍ ജോസഫ് പണ്ടാരശേരില്‍, ഗീവര്‍ഗീസ് മാര്‍ അപ്രേം, അതിരൂപതയിലെ വൈദികര്‍ എന്നിവര്‍ സഹകാര്‍മികരാകും. ശുശ്രൂഷകളില്‍ അതിരൂപതയിലെ വൈദിക, സന്യസ്ത, അല്‍മായ പ്രതിനിധികള്‍ പങ്കെടുക്കും. തുടര്‍ന്ന് ബിസിഎം കോളജ് ഓഡിറ്റോറിയത്തില്‍ നടത്തുന്ന അനുസ്മരണ പ്രാര്‍ഥനകള്‍ക്കുശേഷം ധന്യന്‍ മാക്കീൽ, മാര്‍ തോമസ് തറയിൽ എന്നിവരെക്കുറിച്ചുള്ള ഡോക്യുമെന്‍ററി പ്രദര്‍ശിപ്പിക്കും. പ്രൊക്യുറേറ്റര്‍ ഫാ. ഏബ്രാഹം പറമ്പേട്ട്, ക്നാനായ കത്തോലിക്ക കോണ്‍ഗ്രസ് പ്രസിഡന്‍റ് ബാബു പറമ്പടത്തുമലയില്‍, വിസിറ്റേഷന്‍ കോണ്‍ഗ്രിഗേഷന്‍ സുപ്പീരിയര്‍ ജനറല്‍ സിസ്റ്റര്‍ ഇമ്മാക്കുലേറ്റ് എസ്‌വിഎം, കാരിത്താസ് സെക്കുലര്‍ ഇന്‍സ്റ്റിറ്റ്യൂട്ട് ഡയറക്‌ട്രസ് ജനറല്‍ സിസ്റ്റര്‍ ലിസി മുടക്കോടില്‍, അതിരൂപത പ്രൊ-പ്രോട്ടോസിഞ്ചെല്ലൂസ് ഫാ. തോമസ് ആനിമൂട്ടില്‍ എന്നിവര്‍ പ്രസംഗിക്കും. മാര്‍ മാത്യു മാക്കീല്‍ 2009 ജനുവരി 26നാണ് ദൈവദാസനായി പ്രഖ്യാപിക്കപ്പെട്ടത്. ഈ വർഷം മേയ് 22ന് ലെയോ പതിനാലാമൻ മാർപാപ്പ ധന്യൻ പദവിയിലേക്ക് ഉയർത്തി.

വി.എസ് അനുസ്മരണം നടത്തി

വൈക്കം: മുൻ മുഖ്യമന്ത്രിവി.എസ്. അച്യുതാനന്ദന്‍റെ വിയോഗത്തിൽ സിപിഎം വൈക്കം ഏരിയ കമ്മിറ്റിയുടെ നേതൃത്വത്തിൽ വൈക്കത്ത്‌ മൗനജാഥയും അനുശോചന യോഗവും നടത്തി.വൈക്കം തെക്കേനട പി. കൃഷ്ണപിള്ള സ്മാരക മന്ദിരത്തിൽനിന്ന് ആരംഭിച്ച മൗനജാഥയിൽ പാർട്ടി പ്രവർത്തകരും ബഹുജനങ്ങളും ഉൾപ്പെടെ നൂറുകണക്കിനാളുകൾ അണിനിരന്നു. തുടർന്ന് വൈക്കം സത്യഗ്രഹ സ്മാരക മന്ദിരത്തിൽ നടന്ന അനുശോചന യോഗത്തിൽ രാഷ്‌ട്രീയ, സാമൂഹിക, സാംസ്കാരിക രംഗത്തെ നിരവധി വ്യക്തികൾ പങ്കെടുത്തു. സിപിഎം വൈക്കം ഏരിയ സെക്രട്ടറി പി ശശിധരൻ അനുശോചന യോഗത്തിൽ അധ്യക്ഷതവഹിച്ചു. സിപിഎം ജില്ലാ കമ്മിറ്റി അംഗം അഡ്വ.കെ.കെ.രഞ്ജിത്ത് അനുശോചനപ്രമേയം അവതരിപ്പിച്ചു.സി.കെ. ആശ എംഎൽഎ, വിവിധ രാഷ്‌ട്രീയപാർട്ടി നേതാക്കളായ പി.ഡി. ഉണ്ണി,പോൾസൺ ജോസഫ്,ടി.എൻ. രമേശൻ,പി. സുഗതൻ, ഏബ്രഹാം പഴയകടവന്‍, കെ.കെ. ഗണേശൻ, എം. അബു, പി. അമ്മിണിക്കുട്ടൻ, കെ.കെ. രാജു, എം.കെ. രവീന്ദ്രൻ തുടങ്ങിയവർ സംബന്ധിച്ചു.

കാത്തോലിക്ക കോണ്‍ഗ്രസ് പ്രതിഷേധിച്ചു

കടുത്തുരുത്തി: ഉദയംപേരൂര്‍ സൂന്നഹദോസ് പള്ളിയില്‍ കഴിഞ്ഞ ദിവസം പരിശുദ്ധ കുര്‍ബാനയെയും ബലിപീഠത്തെയും അവഹേളിക്കുയും നിന്ദിക്കുകയും ചെയ്ത വിമതരുടെ നടപടിക്കെതിരേ മാന്നാര്‍ സെന്‍റ് മേരീസ് ഇടവക കാത്തോലിക്ക കോണ്‍ഗ്രസ് പ്രതിഷേധിച്ചു. യൂണിറ്റ് പ്രസിഡന്‍റ് മനോജ് കടവന്‍ കാലായില്‍ അധ്യക്ഷത വഹിച്ച യോഗം വികാരി ഫാ. സിറിയക് കൊച്ചുകൈപ്പെട്ടിയില്‍ ഉദ്ഘാടനം ചെയ്തു. സെക്രട്ടറി സിറിയക് താഴത്തുവീട്ടില്‍, ട്രഷര്‍ ജെറി ജോസഫ്, സീന ജിന്‍സ് പീടികപ്പറമ്പില്‍, ജോര്‍ജ് കൊച്ചുവടകര, വില്‍സണ്‍ പീറ്റര്‍ തയ്യില്‍ എന്നിവര്‍ പ്രസംഗിച്ചു.

തലയോലപ്പറന്പിൽ ലൈഫ് ‘ഫ്ളാറ്റായി’

തലയോലപ്പറമ്പ്: നിർധന ഭൂരഹിതർക്കായി ലൈഫ്‌മിഷൻ പദ്ധതിയുടെ ഭാഗമായി തുടങ്ങിയ ഫ്ലാറ്റ് സമുച്ചയത്തിന്‍റെ നിർമാണം പുനരാരംഭിക്കണമെന്ന ആവശ്യം ശക്തമായി. പദ്ധതി തൂണിലൊതുങ്ങി കാടുകയറി നശിക്കുകയാണ്. തലയോലപ്പറമ്പ് ദേവസ്വം ബോർഡ് കോളജിനു സമീപം ഇറിഗേഷൻ വകുപ്പിന്‍റെ 3.25 ഏക്കർ സ്ഥലത്ത് ആരംഭിച്ച ഫ്ലാറ്റ് സമുച്ചയത്തിന്‍റെ നിർമാണമാണ് തൂണുകൾ നിർമിച്ചതോടെ മുടങ്ങിയത്. മൂന്ന് ഘട്ടമായി നിർമാണം പൂർത്തീകരിക്കുമെന്നാണ് അധികൃതർ അറിയിച്ചിരുന്നത്. ഗുജറാത്തിലെ സ്വകാര്യ കമ്പനിയാണ് നിർമാണ കരാർ ഏറ്റെടുത്തത്. ആദ്യ ഘട്ടത്തിൽ മൂന്ന് നിലകളിലായി 36 കുടുംബങ്ങൾക്കു താമസിക്കുന്നതിനു സൗകര്യമൊരുക്കുന്നതിനായിരുന്നു പദ്ധതി വിഭാവനം ചെയ്തത്. കെട്ടിടത്തിനായി തൂണുകളുടെ കോൺക്രീറ്റിംഗ് നടത്തിയെങ്കിലും പിന്നീട് നിർമാണ പ്രവർത്തനങ്ങൾ മുടങ്ങി. ഫ്ലാറ്റ് സമുച്ചയത്തിന്‍റെ നിർമാണം പൂർത്തിയാക്കി നിർധന കുടുംബങ്ങൾക്ക് താമസ സൗകര്യമൊരുക്കാൻ സർക്കാർ നടപടി സ്വീകരിക്കണമെന്ന് ഗുണഭോക്താക്കൾ ആവശ്യപ്പെട്ടു.

തൊഴിലുറപ്പുകാർക്ക് പണിയില്ല; ഐഎൻടിയുസി സമരത്തിന്

വൈക്കം: തൊഴിലുറപ്പ് പദ്ധതിയിൽ പുതുതായി ഏർപ്പെടുത്തിയ നിയന്ത്രണങ്ങളെത്തുടർന്ന് രണ്ടു മാസമായി തൊഴിലുറപ്പ് തൊഴിലാളികൾക്ക് തൊഴിൽ ഇല്ലാതായതിൽ പ്രതിഷേധിച്ച് മഹാത്മഗാന്ധി തൊഴിലുറപ്പ് തൊഴിലാളി കോൺഗ്രസ് ഐഎൻടിയുസി വൈക്കം ബ്ലോക്ക് കമ്മിറ്റി സമരം ആരംഭിക്കാൻ തീരുമാനിച്ചു. കേന്ദ്ര-സംസ്ഥാന സർക്കാരുകൾ തമ്മിലുള്ള ശീതസമരമാണ് പാവപ്പെട്ട കുടുംബങ്ങളുടെ ജീവിതമാർഗമായ തൊഴിലുറപ്പ് പദ്ധതിക്ക് തിരിച്ചടിയായതെന്നു യോഗം കുറ്റപ്പെടുത്തി.ഓഗസ്റ്റ് ആദ്യവാരം ബ്ലോക്ക് പഞ്ചായത്ത് ഓഫീസ് മാർച്ചും കളക്‌ടറേറ്റ് ധർണയും സെക്രട്ടേറിയറ്റ് മാർച്ചും വിജയിപ്പിക്കാൻ യോഗം തീരുമാനിച്ചു. തൊഴിലുറപ്പ് തൊഴിലാളി കോൺഗ്രസ് ബ്ലോക്ക് പ്രസിഡന്‍റ് യു.ബേബി യുടെ അധ്യക്ഷതയിൽ നടന്ന യോഗം ഐഎൻടിയുസി സംസ്ഥാന സെക്രട്ടറി പി.വി. പ്രസാദ് ഉദ്ഘാടനം ചെയ്തു.അക്കരപ്പാടംശശി, നഗരസഭാ ചെയർപേഴ്സൺ പ്രീത രാജേഷ്, ഐഎൻടി യുസിബ്ലോക്ക് പ്രസിഡന്‍റ് അഡ്വ.പി.വി. സുരേന്ദ്രൻ തുടങ്ങിയവർ പ്രസംഗിച്ചു.

ഫാ. ജോര്‍ജ് ചൂരക്കാട്ട്: കടുത്തുരുത്തി ഇടവകയ്ക്ക് മറക്കാന്‍ കഴിയാത്ത ഇടയശ്രേഷ്ഠൻ

കടുത്തുരുത്തി: കടുത്തുരുത്തി ഇടവകയ്ക്ക് ഒരിക്കലും മറക്കാന്‍ കഴിയാത്ത ഇടയശ്രേഷ്ഠനാണ് ദൈവസന്നിധിയിലേക്ക് വിടവാങ്ങിയ ഫാ. ജോര്‍ജ് ചൂരക്കാട്ട്. കടുത്തുരുത്തി സെന്‍റ് മേരീസ് ഫൊറോന താഴത്തുപള്ളിക്ക് പുതിയ ദേവാലയം നിര്‍മിച്ചതും ഇടവകയുടെ ആധ്യാത്മിക വളര്‍ച്ചയില്‍ പ്രധാന പങ്ക് വഹിച്ചതുമായ വൈദികശ്രേഷ്ഠനാണ് ഫാ. ജോർജ് ചൂരക്കാട്ട്. 2000 ഫെബ്രൂവരി 19നാണ് ഫാ. ജോര്‍ജ് ചൂരക്കാട്ട് താഴത്തുപള്ളിയുടെ വികാരിയായി എത്തുന്നത്. തുടര്‍ന്ന് നാലു വര്‍ഷക്കാലം ഇവിടെ സേവനം ചെയ്തു.ഇടവകയിലെ ഓരോ കുടുംബത്തെയും കുടുംബാംഗത്തെയും പേരു ചൊല്ലി വിളിക്കാന്‍ കഴിയുമായിരുന്നു ചൂരക്കാട്ടച്ചന്. നര്‍മം തുളുമ്പുന്ന സംസാരശൈലിയും ഹൃദ്യമായ പെരുമാറ്റവുമായിരുന്നു ചൂരക്കാട്ടച്ചന്‍റെ പ്രത്യേകത. നാലു വർഷംകൊണ്ട് ഇടവകയുടെ ചരിത്രത്തില്‍ ചൂരക്കാട്ടച്ചന്‍ പൂര്‍ത്തിയാക്കിയത് ഒട്ടനവധി പ്രവര്‍ത്തനങ്ങളാണ്. താഴത്തുപള്ളിയുടെ പുതിയ പള്ളിയെന്ന് അറിയപ്പെടുന്ന ടൗണ്‍പള്ളിയുടെ നിര്‍മാണം നടത്തിയത് അദ്ദേഹമായിരുന്നു. 2001 ഓഗസ്റ്റ് 15നു പുതിയ ദേവാലയത്തിന് തറക്കല്ലിട്ടു. വികാരി ജനറാളായി സ്ഥലം മാറി പോയെങ്കിലും ദേവാലയനിര്‍മാണം പൂര്‍ത്തിയാകുന്നതുവരെ അച്ചന്‍റെ സാന്നിധ്യം കടുത്തുരുത്തിയിലുണ്ടായിരുന്നു. താഴത്തുപള്ളിയുടെ കുരിശുപള്ളിയായിരുന്ന പൂഴിക്കോല്‍ സെന്‍റ് ആന്‍റണീസ് പള്ളിയെ ഇടവകയാക്കിയതും പിന്നീട് ദേവാലയം നിര്‍മിക്കാന്‍ സ്ഥലം വാങ്ങിയതും ദേവാലയത്തിന്‍റെ പ്രാരംഭ നിര്‍മാണപ്രവര്‍ത്തനങ്ങള്‍ നടത്തിയതും ഫാ. ജോര്‍ജ് ചൂരക്കാട്ടാണ്. ഫാ. ജോര്‍ജ് ചൂരക്കാട്ടിനു വേണ്ടി ഇന്നു രാവിലെ വിശുദ്ധ കുര്‍ബാനയും തുടര്‍ന്ന് ഓപ്പീസും ഉണ്ടായിരിക്കുമെന്ന് വികാരി ഫാ. മാത്യു ചന്ദ്രന്‍കുന്നേല്‍ അറിയിച്ചു.

ഹാഷിഷ് ഓയിലുമായി രണ്ട് യുവാക്കൾ അറസ്റ്റിൽ

കോട്ടയം: എക്സൈസ് റേഞ്ച് ടീം ഈരയിൽക്കടവ് ബൈപാസ് റോഡിൽ നടത്തിയ പരിശോധനയിൽ ഹാഷിഷ് ഓയിലുമായി രണ്ടു യുവാക്കൾ അറസ്റ്റിലായി. എക്സൈസ് ഇൻസ്പെക്ടർ ഫിലിപ് തോമസിന്‍റെ നേതൃത്വത്തിൽ പട്രോളിംഗിനിടെ സംശയകരമായ സാഹചര്യത്തിൽ കണ്ട യുവാക്കളെ കേന്ദ്രീകരിച്ചു നടത്തിയ പരിശോധനയിൽ രണ്ടു ഗ്രാം ഹാഷിഷ് ഓയിൽ, ഒസിബി പേപ്പർ എന്നിവ കണ്ടെടുത്തു. മൂലേടം വെടുകയിൽ വി. അർജുൻ, തൊണ്ടിൽകരോട്ട് അനൂപ് കുമാർ എന്നിവരാണ് അറസ്റ്റിലായത്. എറണാകുളത്തുനിന്നാണ് ഇവർ ഹാഷിഷ് എത്തിച്ചത്. മയക്കുമരുന്നിന്‍റെ ഉറവിടം കണ്ടെത്തുന്നതിന് ഊർജിത അന്വേഷണം നടന്നുവരികയാണ്.

ഓട്ടോറിക്ഷയ്ക്കു മുകളിൽ മൺതിട്ട ഇടിഞ്ഞുവീണു

വാഴൂർ: ചാമംപതാലിൽ സ്വകാര്യ വ്യക്തിയുടെ വക സ്ഥലത്ത് നിർത്തിയിട്ടിരുന്ന ഓട്ടോറിക്ഷയുടെ മുകളിൽ മൺതിട്ട ഇടിഞ്ഞുവീണു. കനത്ത മഴയിൽ ഇന്നലെ ഉച്ചയ്ക്ക് 12.30നായിരുന്നു സംഭവം. ചാമംപതാൽ പോസ്റ്റ് ഓഫീസിനു സമീപം സ്വകാര്യവ്യക്തിയുടെ സ്ഥലത്ത് പാർക്ക് ചെയ്തിരുന്ന സ്വകാര്യ ബസ് കണ്ടക്ടറായ കുരുവിക്കൂട് സ്വദേശി തോക്കനാട് സനോജിന്‍റെ ഓട്ടോയ്ക്കു മുകളിലേക്കാണ് മൺതിട്ട ഇടിഞ്ഞുവീണത്. സനോജ് ജോലി ചെയ്യുന്ന ബസ് ഇവിടെയാണ് രാത്രി കാലങ്ങളിൽ പാർക്ക് ചെയ്യുന്നത്. ഓട്ടോറിക്ഷ പാർക്ക് ചെയ്ത ശേഷം സനോജ് ബസിൽ പോയ സമയത്താണ് അപകടം. ഈ സമയം ഇവിടെ വാഹനങ്ങളോ ആൾക്കാരോ ഇല്ലാത്തതിനാൽ അപകടം ഒഴിവായി. മഴയിൽ കുതിർന്നുനിൽക്കുന്ന കൂറ്റൻ മൺതിട്ട ഏതു നിമിഷവും നിലംപൊത്താവുന്ന അവസ്ഥയിലാണ്. അപകടത്തിൽ ഓട്ടോറിക്ഷയുടെ മുൻഭാഗം പൂർണമായും തകർന്നു. 25 അടിയിലേറെ ഉയരമുള്ള മൺതിട്ടയുടെ ഒരു ഭാഗമാണ് ഇടിഞ്ഞു വീണത്. മണ്ണു മാന്തിയന്ത്രം ഉപയോഗിച്ച് മണ്ണു നീക്കം ചെയ്താണ് ഓട്ടോറിക്ഷ സ്ഥലത്തുനിന്നു മാറ്റിയത്.

ചെങ്ങളം കുന്നുംപുറത്ത് തിട്ടയിടിഞ്ഞ് രണ്ടു വീടുകൾക്കു വിള്ളൽ

തിരുവാർപ്പ്: ശക്തമായ മഴയെത്തുടർന്ന് രണ്ട് വീടുകളുടെ പിന്നിലെ തിട്ട ഇടിഞ്ഞ് 40 അടി താഴ്ചയിൽ പതിച്ചു. കഴിഞ്ഞ രാത്രി 7.30 നായിരുന്നു വലിയ ശബ്ദത്തോടെ വീടിന്‍റെ പിൻഭാഗം നിലം പൊത്തിയത്. തിരുവാർപ്പ് മൂന്നാം വാർഡിൽ ചെങ്ങളം കുന്നുംപുറത്ത് ഇടക്കരി ഭാഗത്ത് പഴയ മെറീനാ തിയറ്ററിനു സമീപത്താണ് സംഭവം. വീടുകൾ രണ്ടും വാസയോഗ്യമല്ലാതെ തകർച്ചയുടെ വക്കിലാണ്. മജു കുന്നുംപുറത്ത്, രാജാമണി അഖിൽ ഭവൻ എന്നിവരുടെ വീടുകളാണ് വിള്ളൽ വീണ് ഏതു നിമിഷവും നിലം പൊത്താമെന്ന നിലയിലായത്. രാജാമണിയുടെ വീടിനോട് ചേർന്നുള്ള മോനിയുടെ വീട് ഉൾപ്പെടെ ഏഴു വീടുകളും തകർച്ചാഭീഷണിയിലാണ്. 2011ലും 2022ലും ഇവിടെയുള്ള വീടുകൾ മണ്ണിടിഞ്ഞ് ഭാഗികമായി തകർന്നിരുന്നു. ഇവിടെ വീടുകൾ പണിയുമ്പോൾ പിന്നിൽ ആവശ്യത്തിന് സ്ഥലം ഉണ്ടായിരുന്നു. ഓരോ മഴയ്ക്കും വെള്ളത്തോടൊപ്പം മണ്ണ് ഒഴുകിപ്പോകുന്നതാണ് വീടുകൾ ഭീഷണിയിലാകാൻ കാരണം. രണ്ടു വീടുകളും വാസയോഗ്യമല്ലാതായതോടെ കുടുംബങ്ങളെ ചെങ്ങളം സെന്‍റ് തോമസ് യാക്കോബായ സുറിയാനി പള്ളിയുടെ പാരീഷ് ഹാളിലേക്ക് മാറ്റി പാർപ്പിച്ചതായി വാർഡ് മെംബർ റെയ്ച്ചൽ ജേക്കബ് പറഞ്ഞു. ഏഴു വീടുകളും സുരക്ഷിതമാക്കി പുനർ നിർമിക്കേണ്ടത് അനിവാര്യമാകയാൽ മന്ത്രി വി.എൻ. വാസവനുമായി ചർച്ച ചെയ്തു നടപടി സ്വീകരിക്കാമെന്ന് സ്ഥലം സന്ദർശിച്ച ഡെപ്യൂട്ടി തഹസീൽദാറും തിരുവാർപ്പ് പഞ്ചായത്ത് പ്രസിഡന്‍റ് ഒ.എസ്. അനീഷ് കുമാറും നാലാം വാർഡ് മെംബർ രശ്മി പ്രസാദും അറിയിച്ചു.

കുറിച്ചി ഔട്ട്‌പോസ്റ്റ് ജംഗ്ഷനു സമീപം വാഹനങ്ങളുടെ കൂട്ടയിടി

ചങ്ങനാശേരി: എന്‍എച്ച്-183 ല്‍ കുറിച്ചി ഔട്ട്‌പോസ്റ്റ് ജംഗ്ഷനു സമീപം വാഹനങ്ങള്‍ കൂട്ടിയിടിച്ചു. ഇന്നലെ രാവിലെ 11നാണ് അപകടം. മുന്പില്‍ പോയ കാര്‍ പെട്ടെന്ന് ബ്രേക്കിട്ടപ്പോള്‍ പിന്നാലെ എത്തിയ കാറും ബ്രേക്ക് ഇട്ടു. തുടര്‍ന്ന് ഈ കാറിനു പിന്നാലെ എത്തിയ വാഹനങ്ങള്‍ കൂട്ടിയിടിക്കുകയായിരുന്നു. പിക്കപ്പ് അടക്കം നാല് വാഹനങ്ങളാണ് അപകടത്തില്‍പ്പെട്ടത്. ആര്‍ക്കും പരുക്കില്ല. പോലീസ് സ്ഥലത്തെത്തി വാഹനങ്ങള്‍ നീക്കം ചെയ്തു.

റോഡരികിൽ അപകടാവസ്ഥയിലായിരുന്ന വീട് നിലംപൊത്തി

അതിരമ്പുഴ: റോഡരികിൽ അപകടാവസ്ഥയിലായിരുന്ന വീട് ഇടിഞ്ഞുവീണു. മാർക്കറ്റ് ജംഗ്ഷനു സമീപം അതിരമ്പുഴ-യൂണിവേഴ്സിറ്റി റോഡരികിലുള്ള ആൾത്താമസമില്ലാത്ത വീടാണ് ഇന്നലെ പകൽ സമയം ഇടിഞ്ഞു വീണത്. വീട് ദുർബലാവസ്ഥയിലായിരുന്നു. ഓട്ടോറിക്ഷാ സ്റ്റാൻഡിനോടു ചേർന്നുള്ള ഭാഗമാണിത്. ഇവിടെ ഓട്ടോറിക്ഷകൾ പാർക്ക് ചെയ്യാറുള്ളതാണ്. എന്നാൽ സംഭവസമയത്ത് ഇവിടെ ഓട്ടോറിക്ഷകളോ ആളുകളോ ഇല്ലാതിരുന്നതിനാൽ അപകടം ഒഴിവായി. വീടിന്‍റെ ഒരു ഭാഗം മാത്രമാണ് ഇടിഞ്ഞു വീണത്. ബാക്കി ഭാഗം ഏതുനിമിഷവും നിലംപൊത്താവുന്ന സ്ഥിതിയിലാണ്. വീട് അടിയന്തരമായി പൊളിച്ചുനീക്കിയില്ലെങ്കിൽ വലിയ അപകടത്തിനു തന്നെ സാധ്യതയുണ്ട്.

ദൈവദാസന്‍ മാർ മാത്യു മാക്കീലിന്‍റെ ധന്യന്‍ പദവി പ്രഖ്യാപനം നാളെ

കോട്ടയം: ദൈവദാസന്‍ മാർ മാത്യു മാക്കീലിന്‍റെ ധന്യന്‍ പദവി പ്രഖ്യാപനവും മാര്‍ തോമസ് തറയിലിന്‍റെ 50-ാം ചരമവാര്‍ഷിക ആചരണത്തിന്‍റെ സമാപനവും നാളെ നടക്കും. കോട്ടയം ക്രിസ്തുരാജ ക്നാനായ കത്തോലിക്കാ കത്തീഡ്രലില്‍ രാവിലെ 9.30ന് തിരുക്കർമങ്ങൾ ആരംഭിക്കും. സീറോമലബാർ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ ഉദ്ഘാടനം ചെയ്തു സന്ദേശം നല്കും. ആര്‍ച്ച്ബിഷപ് മാര്‍ മാത്യു മൂലക്കാട്ട് സ്വാഗതം ആശംസിക്കും. ദൈവദാസന്‍ മാര്‍ മാത്യു മാക്കീലിനെ ധന്യനായി പ്രഖ്യാപിച്ചുള്ള ഡിക്രി അതിരൂപത ചാന്‍സലര്‍ ഫാ. തോമസ് ആദോപ്പിള്ളില്‍ വായിക്കും. മാര്‍ മാത്യു മൂലക്കാട്ടിന്‍റെ മുഖ്യകാര്‍മികത്വത്തില്‍ കൃതജ്ഞതാബലി അര്‍പ്പിക്കും. അതിരൂപത സഹായ മെത്രാന്‍മാരായ മാര്‍ ജോസഫ് പണ്ടാരശേരില്‍, ഗീവര്‍ഗീസ് മാര്‍ അപ്രേം, അതിരൂപതയിലെ വൈദികര്‍ എന്നിവര്‍ സഹകാര്‍മികരാകും. ശുശ്രൂഷകളില്‍ അതിരൂപതയിലെ വൈദിക, സന്യസ്ത, അല്‍മായ പ്രതിനിധികള്‍ പങ്കെടുക്കും. തുടര്‍ന്ന് ബിസിഎം കോളജ് ഓഡിറ്റോറിയത്തില്‍ നടത്തുന്ന അനുസ്മരണ പ്രാര്‍ഥനകള്‍ക്കുശേഷം ധന്യന്‍ മാക്കീൽ, മാര്‍ തോമസ് തറയിൽ എന്നിവരെക്കുറിച്ചുള്ള ഡോക്യുമെന്‍ററി പ്രദര്‍ശിപ്പിക്കും. പ്രൊക്യുറേറ്റര്‍ ഫാ. ഏബ്രാഹം പറമ്പേട്ട്, ക്നാനായ കത്തോലിക്ക കോണ്‍ഗ്രസ് പ്രസിഡന്‍റ് ബാബു പറമ്പടത്തുമലയില്‍, വിസിറ്റേഷന്‍ കോണ്‍ഗ്രിഗേഷന്‍ സുപ്പീരിയര്‍ ജനറല്‍ സിസ്റ്റര്‍ ഇമ്മാക്കുലേറ്റ് എസ്‌വിഎം, കാരിത്താസ് സെക്കുലര്‍ ഇന്‍സ്റ്റിറ്റ്യൂട്ട് ഡയറക്‌ട്രസ് ജനറല്‍ സിസ്റ്റര്‍ ലിസി മുടക്കോടില്‍, അതിരൂപത പ്രൊ-പ്രോട്ടോസിഞ്ചെല്ലൂസ് ഫാ. തോമസ് ആനിമൂട്ടില്‍ എന്നിവര്‍ പ്രസംഗിക്കും. മാര്‍ മാത്യു മാക്കീല്‍ 2009 ജനുവരി 26നാണ് ദൈവദാസനായി പ്രഖ്യാപിക്കപ്പെട്ടത്. ഈ വർഷം മേയ് 22ന് ലെയോ പതിനാലാമൻ മാർപാപ്പ ധന്യൻ പദവിയിലേക്ക് ഉയർത്തി.

കോണത്താറ്റ് പാലം: ഐഎന്‍ടിയുസി രണ്ടാം ഘട്ട സമരത്തിന്

കോട്ടയം: കുമരകം കോണത്താറ്റ് പാലം പണി ഉടന്‍ പൂര്‍ത്തിയാക്കണമെന്നാവശ്യപ്പെട്ട് ഐഎന്‍ടിയുസി ജില്ലാ കമ്മിറ്റിയുടെ നേതൃത്വത്തില്‍ രണ്ടാം ഘട്ട സമരം ആരംഭിക്കാന്‍ തീരുമാനിച്ചു. ലോംഗ് മാര്‍ച്ചുകളും ധര്‍ണയും നടത്തിയ ഒന്നാം ഘട്ട സമരത്തെത്തുടര്‍ന്ന് ഉടന്‍ പണി പൂര്‍ത്തിയാക്കുമെന്ന് അധികൃതര്‍ ഉറപ്പ് നല്‍കിയെങ്കിലും മാസങ്ങള്‍ കഴിഞ്ഞിട്ടും യാതൊരു തീരുമാനവും ഉണ്ടാകാത്തതുകൊണ്ടാണ് തുടര്‍സമരം ആരംഭിക്കുന്നത്. വേമ്പനാട്ട് കായലിന് ആഴം കൂട്ടി ജില്ലയുടെ പടിഞ്ഞാറന്‍ മേഖലയിലെ വെള്ളക്കെട്ട് ഒഴിവാക്കി ജനങ്ങളുടെ ദുരിതത്തിനു പരിഹാരം ഉണ്ടാക്കണമെന്ന ആവശ്യംകൂടി ഉന്നയിച്ചാണ് രണ്ടാം ഘട്ട സമരം. സമര പരിപാടികള്‍ ചര്‍ച്ച ചെയ്യുന്നതിന് അടിയന്തര ജില്ലാ കമ്മിറ്റി ചേരുമെന്ന് ഐഎന്‍ടിയുസി ജില്ലാ പ്രസിഡന്‍റ് ഫിലിപ്പ് ജോസഫ് അറിയിച്ചു.

മെഡിക്കൽ കോളജ് ആശുപത്രിയിൽ ഇഎൻടിയിലെ ശുചിമുറി തകർച്ചയിൽ

ഗാന്ധിനഗർ: കോട്ടയം മെഡിക്കൽ കോളജ് ആശുപത്രിയിലെ ഇഎൻട‌ി ശസ്ത്രകിയാ വിഭാഗത്തിനു സമീപത്തെ ശുചിമുറി ശോച്യാവസ്ഥയിൽ. ഒപി വിഭാഗത്തിനു മുകളിൽ രണ്ടാം നിലയിലാണ് ഇഎൻടി തിയറ്ററും വാർഡും പ്രവർത്തിക്കുന്നത്. തിയറ്ററിനു സമീപത്തെ ശുചിമുറിയുടെ പുറത്തെ ഭിത്തി പൊട്ടി വീണ്ടുകീറിയ നിലയിലാണ്. ഇത് അപകടകരമായ സാഹചര്യം സൃഷ്ടിക്കുന്നുണ്ട്. ശുചിമുറി ഉപയോഗിക്കുന്നത് തടഞ്ഞിട്ടുണ്ട്. മൂന്നാം നിലയുടെ മുകളിൽ വാട്ടർ ടാങ്ക് സ്ഥാപിച്ചിട്ടുണ്ട്. കെട്ടിടത്തിന്‍റെ ബലക്ഷയം കണക്കിലെടുത്ത് ടാങ്കിലേക്ക് വെള്ളം പമ്പ് ചെയ്യരുതെന്ന് പൊതുമരാമത്ത് അധികൃതർ അറിയിച്ചിട്ടുണ്ട്. ഇഎൻടി വിഭാഗത്തിനു താഴെയാണ് ഗ്യാസ്ട്രോളജി, റുമറ്റോളജി, ജനറൽ സർജറി, അസ്ഥിരോഗ വിഭാഗം തുടങ്ങിയവയുടെ ഒപികൾ പ്രവർത്തിക്കുന്നത്, അസ്ഥിരോഗ വിഭാഗത്തിന്‍റെ അനുബന്ധ വിഭാഗമായ പ്ലാസ്റ്റർ ഇടുന്ന മുറിയുടെ മുകൾഭാഗവും ശോച്യാവസ്ഥയിലാണ്. മുറിയു ടെ കതക് പൊട്ടിപ്പൊളിഞ്ഞ നിലയിലാണ്. ഈ മാസം ആദ്യവാരം 14-ാം വാർഡിനു സമീപത്തെ ശുചി മുറി ഇടിഞ്ഞുവീണ് തലയോലപ്പറമ്പ് സ്വദേശിനിയായ വീട്ടമ്മ മരിച്ചതോടെ ആശുപത്രിയിലെ പഴയ കെട്ടിടങ്ങളിൽ പ്രവർത്തിക്കുന്ന ചികിത്സാ കേന്ദ്രങ്ങളിൽ രോഗികൾ ചികിത്സ തേടുന്നതും ഡോക്ടർമാർ അടക്കമുള്ള ജീവനക്കാർ ജോലി ചെയ്യുന്നതും ഭീതിയുടെ നിഴലിലാണ്.

പുതിയ ചുവടുവയ്പുമായി കുടുംബശ്രീ

കോട്ടയം: 50 ലക്ഷം കുടുംബങ്ങളെ കുടുംബശ്രീ സംഘടനാ സംവിധാനത്തിന്‍റെ ഭാഗമാക്കുക എന്ന ലക്ഷ്യത്തോടെ കുടുംബശ്രീ മിഷന്‍ 50 പ്ലസ് കാമ്പയിന്‍ സംഘടിപ്പിക്കും. ജില്ലയില്‍ നിലവില്‍ 15,627 അയല്‍ക്കൂട്ടങ്ങളിലായി 2,32,303 അംഗങ്ങളാണുള്ളത്. നിലവില്‍ 48 ലക്ഷം കുടുംബങ്ങള്‍ കുടുംബശ്രീയുടെ ഭാഗമായിട്ടുണ്ട്. നിര്‍ജീവമായ അയല്‍ക്കൂട്ടങ്ങളെ സജീവമാക്കുക, കൊഴിഞ്ഞുപോയ അയല്‍ക്കൂട്ടങ്ങളെ തിരികെ കൊണ്ടുവരിക, ഇതുവരെ അയല്‍ക്കൂട്ടങ്ങളില്‍ അല്ലാത്ത കുടുംബങ്ങളെ ചേര്‍ക്കുക, പ്രത്യേക അയല്‍ക്കൂട്ട രൂപീകരണം എന്നിവ ലക്ഷ്യമിടുന്നു. എഡിഎസുകളുടെ നേതൃത്വത്തിലാണ് കാമ്പയിന്‍ നടക്കുന്നത്. 941 ഗ്രാമ സിഡിഎസ് കുടുംബങ്ങള്‍ ഉള്‍പ്പെടെ 1070 സിഡിഎസുകളാണ് കുടുംബശ്രീയിലുള്ളത്. അയല്‍ക്കൂട്ടങ്ങള്‍ ഗണ്യമായി കുറവുള്ള തീരദേശ മേഖല, ആദിവാസി മേഖല, ഭാഷാ ന്യൂനപക്ഷമായ തമിഴ്, കന്നഡ മേഖലകള്‍, അയല്‍ക്കൂട്ടങ്ങള്‍ കുറവുള്ള സിഡിഎസ് എന്നിവിടങ്ങളില്‍ പ്രത്യേക പരിഗണന നല്‍കിയാണ് ഈ കാമ്പയിന്‍ സംഘടിപ്പിക്കുന്നത്. കാമ്പയിനിന്‍റെ ഭാഗമായി ഇതുവരെ അയല്‍ക്കൂട്ടത്തില്‍ അംഗത്വം എടുക്കാത്തവരുടെയും കൊഴിഞ്ഞുപോയ അംഗങ്ങളുടെയും വീടുകളില്‍ നേരിട്ട് സന്ദര്‍ശനം നടത്തും. ജില്ലയിലെ അര്‍ഹരായ എല്ലാ കുടുംബങ്ങളെയും സംഘടനയുടെ ഭാഗമാക്കുന്നതിനുള്ള എല്ലാ പ്രവര്‍ത്തനങ്ങളും ജില്ലാ സിഡിഎസുകളില്‍ നടക്കുന്നുണ്ട്. കുടുംബശ്രീ അടുക്കളവിഭവങ്ങള്‍ വീട്ടില്‍ എത്തിക്കും കോട്ടയം: ഓണത്തിന് അടുക്കളയിലേക്ക് വേണ്ട ഏഴിനം വിഭവങ്ങളുടെ കിറ്റ് കുടുംബശ്രീ വീട്ടുവാതിലില്‍ എത്തിച്ചുതരും. കുടുംബശ്രീ ഉത്പന്നങ്ങള്‍ ഓണ്‍ലൈനില്‍ ലഭ്യമാക്കാനുള്ള മൊബൈല്‍ ആപ് 'പോക്കറ്റ് മാര്‍ട്ട്' ഓഗസ്റ്റ് അവസാനം സജ്ജമാകും. ഇതോടെ കേരളത്തിലെവിടെയും കുടുംബശ്രീ ഉത്പന്നങ്ങള്‍ ഓണ്‍ലൈനായി ഓര്‍ഡര്‍ ചെയ്യാം. ചിപ്‌സ്, ശര്‍ക്കരവരട്ടി, പായസം മിക്‌സ്, സാമ്പാര്‍ മസാല, മുളകുപൊടി, മല്ലിപ്പൊടി, വെജ് മസാല, മഞ്ഞള്‍പ്പൊടി എന്നിവയടങ്ങിയ അയ്യായിരം കിറ്റുകളുമായാണ് പോക്കറ്റ് മാര്‍ട്ട് എത്തുന്നത്. നിലവില്‍ ഓണ്‍ലൈനിലല്ലാതെ പോക്കറ്റ് മാര്‍ട്ട് പ്രവര്‍ത്തിക്കുന്നുണ്ട്. കുടുംബശ്രീയുടെ വിവിധ സേവനങ്ങളും ആപ്പില്‍ ലഭ്യമാകും. അവശതയുള്ളവര്‍ക്ക് പരിചരണം നല്‍കുന്ന കെഫോര്‍ കെയര്‍ പദ്ധതിയിലെ വോളണ്ടിയര്‍മാരുടെ സേവനം ബുക്ക് ചെയ്യാം. അടുക്കളക്കാര്യം മുതല്‍ പ്രസവശുശ്രൂഷ വരെയുള്ള സഹായവും തേടാം. പ്രീമിയം കുടുംബശ്രീ കഫേകളും ജനകീയ ഹോട്ടലുകളും ആപ്പില്‍ മാപ്പ് ചെയ്യും. യാത്രക്കാര്‍ക്ക് അടുത്തുള്ള കുടുംബശ്രീ കഫേകള്‍ ആപ്പിലൂടെ കണ്ടെത്താം.

പാലാ പഴയ ബസ് സ്റ്റാഡിനു മുമ്പിലെ സ്റ്റോപ്പില്‍ യാത്രക്കാര്‍ക്ക് ദുരിതം; വെയിറ്റിംഗ് ഷെഡ് ഇല്ല

പാലാ: തിരക്കേറിയ പാലാ ടൗണ്‍ ബസ് സ്റ്റാന്‍ഡിനു മുന്‍വശത്തെ ബസ് സ്റ്റോപ്പില്‍ യാത്രക്കാര്‍ക്ക് ദുരിതം. വെയിറ്റിംഗ് ഷെഡ് ഇല്ലാത്തതിനാല്‍ യാത്രക്കാര്‍ മഴയും വെയിലുമേറ്റ് നില്‍ക്കേണ്ട അവസ്ഥയാണുള്ളത്. വിദ്യാര്‍ഥികളും സിവില്‍ സ്റ്റേഷന്‍ ഉള്‍പ്പെടെയുള്ള വിവിധ സര്‍ക്കാര്‍ സ്ഥാപങ്ങളില്‍ എത്തുന്ന പൊതുജനങ്ങളും ജീവനക്കാരും ഈരാറ്റുപേട്ട, തൊടുപുഴ ഭാഗത്തേക്കും കിഴക്കന്‍ മലയോര മേഖലകളിലേക്കും യാത്ര ചെയ്യേണ്ടവര്‍ക്കു ദുരിതപൂര്‍ണമായ സാഹചര്യമാണ് ഇപ്പോഴുള്ളത്. ഇവിടെ ബസ് കാത്തിരിപ്പ് കേന്ദ്രം സ്ഥാപിക്കുമെന്ന് പല തവണ പ്രഖ്യാപിച്ചിട്ടും നടപ്പിലാക്കിയില്ല. മൂന്നുവര്‍ഷം മുന്‍പ് വരെ ഇവിടെ ബസ് സ്റ്റോപ്പ് ഇല്ലായിരുന്നു. ജനറല്‍ ആശുപത്രി ജംഗ്ഷന്‍ കഴിഞ്ഞാല്‍ ളാലം പാലം ജംഗ്ഷനിലായിരുന്നു ബസ് റ്റോപ്പ് ഉണ്ടായിരുന്നത്. യാത്രക്കാരുടെ സൗകര്യാര്‍ഥം ബസ് കാത്തിരിപ്പു കേന്ദ്രം സ്ഥാപിക്കണമെന്ന ആവശ്യം ശക്തമായി.

മുന്‍ വികാരി ജനറാള്‍ ഫാ. ജോര്‍ജ് ചൂരക്കാട്ട് ഓര്‍മയായി

പാലാ: പാലാ രൂപത മുന്‍ വികാരി ജനറാള്‍ ഫാ. ജോര്‍ജ് ചൂരക്കാട്ട് ഓര്‍മയായപ്പോള്‍ നാടിനും സമൂഹത്തിനും രൂപതയ്ക്കും നഷ്ടമാവുന്നത് മനുഷ്യസ്നേഹിയായ മുതിര്‍ന്ന വൈദികനെ. രൂപത സെമിനാരി റെക്ടറായും വികാരി ജനറാളായും പാലാ കത്തീഡ്രലടക്കം വിവിധ പള്ളികളില്‍ വികാരിയായും സേവനമനുഷ്ഠിച്ചിട്ടുള്ള ഫാ. ചൂരക്കാട്ട് എല്ലായിടത്തും മനുഷ്യസ്നേഹത്തിന്‍റെ അടയാളപ്പെടുത്തലുകള്‍ ചാര്‍ത്തിയാണ് നിത്യജീവിതത്തില്‍നിന്നു മടങ്ങുന്നത്. വാര്‍ധക്യസഹജമായ അസുഖത്തെത്തുടര്‍ന്നാണ് അദ്ദേഹത്തിന്‍റെ വിയോഗം. ചെറുപ്പത്തിലേതന്നെ തന്‍റെ ചുറ്റുപാടുമുള്ള എല്ലാവരോടും ഏറെ സ്നേഹബന്ധം പുലര്‍ത്തിയിരുന്ന വ്യക്തിയായിരുന്നു അദ്ദേഹം. കുടുംബങ്ങള്‍ തമ്മിലുള്ള ബന്ധങ്ങള്‍ നിലനിര്‍ത്തുന്നതിലും അതു പരിപോഷിപ്പിക്കുന്നതിലും അതീവ ശ്രദ്ധാലുവായിരുന്നു. നാനാജാതി മതസ്ഥരായ കുടുംബങ്ങളുമായും വ്യക്തികളുമായും സ്നേഹബന്ധം കാത്തുസൂക്ഷിക്കുകയും രൂപതയുടെ ഉന്നത ശ്രേണിയിലുള്ള പദവികളിലെത്തിയപ്പോള്‍ പോലും നാട്ടിലുള്ളവരെ ഓര്‍ക്കുകയും ഉഷ്മളത പങ്കുവയ്ക്കുകയും ചെയ്തിരുന്നു. കുരുന്നിന്‍റെ ജീവന്‍ രക്ഷിച്ച ചൂരക്കാട്ടച്ചൻ കാര്‍ ഓടിച്ചുവരവേ തോട്ടില്‍ ഒഴുക്കില്‍പ്പെട്ട സ്‌കൂള്‍ വിദ്യാര്‍ഥിയായ കുരുന്നിനെകണ്ട് വാഹനം നിര്‍ത്തി ഓടിയെത്തി തോട്ടില്‍നിന്ന് കുട്ടിയെ വലിച്ചെടുത്ത് ജീവന്‍ രക്ഷിച്ച സംഭവവും ഫാ. ജോര്‍ജ് ചൂരക്കാട്ടിന്‍റെ ജീവിതത്തിലെ മനുഷ്യസ്നേഹത്തിന്‍റെ നേര്‍സാക്ഷ്യമാണ്. സംസ്‌കാരം ഇന്ന് ഉച്ചകഴിഞ്ഞ് 1.30ന് പാദുവ സെന്‍റ് ആന്‍റണീസ് പള്ളിയില്‍.

ഇവിടുത്തെ ലൈബ്രറിയിൽ പുസ്തകങ്ങളല്ല, അനുഭവസാക്ഷ്യങ്ങളാണ് അറിവ്

ഉഴവൂർ: കലാലയങ്ങളിൽ അറിവുതേടി വിദ്യാർഥിക്കൂട്ടം ലൈബ്രറിയിൽ തമ്പടിക്കുന്നത് ഇനി പഴയ കാഴ്ച. ഇവിടെ ഇപ്പോൾ വിദ്യാർഥികൾ ജ്ഞാനസമ്പാദനം നടത്തുന്നത് വ്യക്തികളുടെ മുഖത്തുനിന്നാണ്. അനുഭവങ്ങളുടെ തീച്ചൂളയിലും ശീതളിമയിലും ജീവിതം പടുത്തുയർത്തിയവരുടെ അനുഭവങ്ങളിലൂടെ അറിവ് സമ്പാദനത്തിനു വഴിതുറന്നിട്ടുള്ളത് സെന്‍റ് സ്റ്റീഫൻസ് കോളജിലാണ്. കോളജിൽ വിജ്ഞാനവിതരണത്തിനായി കണ്ടെത്തിയ പുതിയ ശ്രമമാണ് ഹ്യൂമൻ ലൈബ്രറി പ്രോജക്റ്റിന്‍റെ ഉദ്ഘാടനം. ആദ്യദിനത്തിൽ പൂർവവിദ്യാർഥിയും ഇന്ത്യൻ റെയിൽവേ ട്രാഫിക് സർവീസിൽനിന്നു വിരമിച്ച ഇന്ത്യൻ സിവിൽ സെർവന്‍റുമായ പി.എൽ. കുര്യൻ പങ്കെടുത്തു. 1973 ബാച്ചിലെ ബി.എ ഇക്കണോമിക്‌സ് പൂർവ വിദ്യാർഥിയായിരുന്നു പി.എൽ. കുര്യൻ. വിദ്യാർഥികൾ, അധ്യാപകർ എന്നിവർക്കൊപ്പം പൊതുജനങ്ങളും പങ്കെടുത്തു. വ്യക്തികൾ അവരുടെ വ്യക്തിഗത കഥകൾ, അനുഭവങ്ങൾ, കാഴ്ചപ്പാടുകൾ എന്നിവ പരമ്പരാഗത ലൈബ്രറിയിലെ പുസ്തകങ്ങൾ പോലെ പങ്കിടുന്ന പദ്ധതിയാണ് ഹ്യൂമൻ ലൈബ്രറി.

ഹാഗിയ സോഫിയ ദിനം ആചരിച്ച് എസ്എംവൈഎം പാലാ രൂപത

പാലാ: വര്‍ത്തമാനകാല സാമൂഹ്യ-സാമുദായിക തലങ്ങളിലെ നിരവധി പുനര്‍ വിചിന്തനങ്ങള്‍ക്ക് കാരണമായ തുര്‍ക്കിയിലെ ഹാഗിയ സോഫിയ ക്രിസ്ത്യന്‍ പള്ളി, മോസ്‌ക്കാക്കി മാറ്റിയ ഉണങ്ങാത്ത മുറിവിന് അഞ്ചു വര്‍ഷം പൂര്‍ത്തിയായതിന്‍റെ ഓര്‍മ പുതുക്കി പാലാ രൂപത എസ്എംവൈഎം -കെസിവൈഎം പാലാ ഫൊറോനയുടെ സഹകരണത്തോടെ ഹാഗിയ സോഫിയ ദിനം ആചരിച്ചു. ലോകമെമ്പാടും ആക്രമിക്കപ്പെടുന്ന ക്രൈസ്തവരെയും ക്രൈസ്തവ സ്ഥാപനങ്ങളെയും അനുസ്മരിച്ച് യുവജനങ്ങള്‍ ഒന്നുചേര്‍ന്നു ദീപം തെളിച്ചു. പാലാ ളാലം സെന്‍റ് മേരീസ് പഴയ പള്ളിയില്‍ നടന്ന സമ്മേളനം വികാരി ഫാ. ജോസഫ് തടത്തില്‍ ഉദ്ഘാടനം ചെയ്തു. എസ്എംവൈഎം പാലാ രൂപത പ്രസിഡന്‍റ് അന്‍വിന്‍ സോണി ഓടച്ചുവട്ടില്‍ അധ്യക്ഷത വഹിച്ച യോഗത്തില്‍ എസ്എംവൈഎം ഗ്ലോബല്‍ പ്രസിഡന്‍റ് അഡ്വ. സാം സണ്ണി മുഖ്യപ്രഭാഷണം നടത്തി. യൂണിറ്റ് ഡയറക്ടര്‍ ഫാ. ആന്‍റണി നങ്ങാപറമ്പില്‍, രൂപത ജനറല്‍ സെക്രട്ടറി റോബിന്‍ താന്നിമല, ഫൊറോന പ്രസിഡന്‍റ് ഡിന്‍റോ ഡേവിസ്, ഫാ. ആന്‍റണി വില്ലന്താനത്ത്, എഡ്വിന്‍ ജെയ്‌സ്, റിച്ചു എസ്. കാപ്പന്‍, സാം സണ്ണി, ബിയോ ബെന്നി, ജിബിന്‍ സാബു തുടങ്ങിയവര്‍ പ്രസംഗിച്ചു.

പച്ചിലത്തോരനും ചേമ്പിലച്ചാറും കൂട്ടി കർക്കടക ഊണ്

കുറവിലങ്ങാട്: നാട്ടറിവുകളുടെ പിൻബലത്തിൽ പച്ചിലത്തോരനും ചേമ്പിലച്ചാറും കൂട്ടി ഉച്ചയൂണ്. തൊടിയിലും പുരയിടത്തിലുമുള്ള പച്ചിലകളേറെയും ഔഷധഗുണമുള്ളവയാണെന്ന തിരിച്ചറിവുമായാണ് എല്ലാവരും മടങ്ങിയത്. ദശപുഷ്പങ്ങളും പത്തിലകളുമൊക്കെ അടുത്തുകണ്ടും തൊട്ടറിഞ്ഞും ആരോഗ്യസുരക്ഷ ഉറപ്പാക്കാനുള്ള തീരുമാനവുമെടുത്തു. ഗാന്ധിജി വിചാരവേദിയുടെ നേതൃത്വത്തിൽ കോട്ടയം ജൈവകർഷക സമിതി, സ്വരുമ പാലിയേറ്റീവ് കെയർ, മാതൃവേദി, പിതൃവേദി, എകെസിസി, ലീജിയൻ ഓഫ് മേരി, എൻഎസ്എസ് വനിതാവേദി, ആൻസിയൻ ക്ലബ്, സിറ്റിസൺസ് ഫോറം, ജെസിഐ എന്നിവയുടെ സഹകരണത്തോടെയായിരുന്നു നാട്ടറിവുകൾ ഇലയറിവുകൾ എന്ന പേരിൽ സെമിനാർ ഒരുക്കിയത്. സെമിനാർ മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന കേന്ദ്രം ആർച്ച്പ്രീസ്റ്റ് റവ.ഡോ. തോമസ് മേനാച്ചേരി ഉദ്ഘാടനം ചെയ്തു. ഗാന്ധിജി വിചാരവേദി പ്രസിഡന്‍റ് ഡോ. ജോസ് മാത്യു അധ്യക്ഷത വഹിച്ചു. മോൻസ് ജോസഫ് എംഎൽഎ, പഞ്ചായത്ത് പ്രസിഡന്‍റ് മിനി മത്തായി, ജൈവകർഷക സമിതി സംസ്ഥാന നിർവാഹകസമിതിയംഗം എൻ.കെ. രാജു, സ്വരുമ പാലിയേറ്റീവ് കെയർ കോ-ഓർഡിനേറ്റർ ബെന്നി കോച്ചേരി, ഗാന്ധിജി വിചാരവേദി സെക്രട്ടറി ഡോ. എ.ആർ. അശോക്, ട്രഷറർ ജോസ് മാത്യു കുന്നേൽ, ജോജോ നിധീരി എന്നിവർ പ്രസംഗിച്ചു. വേദരത്‌നം ഡോ. ശിവകരൻ നമ്പൂതിരി, നട്ടാശോരി ഗാന്ധി സേവാകേന്ദ്രം പ്രസിഡന്‍റ് എം. കുര്യൻ, ജോബി കെ. മാത്യു എന്നിവർ ക്ലാസിന് നേതൃത്വം നൽകി.

നവോദയ വിദ്യാലയത്തിൽ ഫീൽഡ് ഗെയിംസ് മീറ്റ് ആരംഭിച്ചു

വെച്ചൂച്ചിറ: ജവഹർ നവോദയ വിദ്യാലയത്തിലെ രണ്ടുദിവസത്തെ ഫീൽഡ് ഗെയിംസ് മീറ്റ് വോളിബോൾ അന്താരാഷ്ട്ര പരിശീലകൻ അഹമ്മദ് ഫൈസ് ഉദ്ഘാടനം ചെയ്തു. പഞ്ചായത്ത് മുൻ പ്രസിഡന്‍റ് ടി.കെ. ജയിംസ്, സ്റ്റാൻഡിംഗ് കമ്മിറ്റി ചെയർപേഴ്സൺ രമാദേവി, വാർഡ് മെംബർ പ്രസന്നകുമാരി, ഗവൺമെന്‍റ് എച്ച്എസ്എസ് പ്രിൻസിപ്പൽ ജി. ബീന, നവോദയ പ്രിൻസിപ്പൽ വി. സുധീർ, വൈസ് പ്രിൻസിപ്പൽ പി.ജി. രശ്മി തുടങ്ങിയവർ പ്രസംഗിച്ചു. തിരുവനന്തപുരം മുതൽ തൃശൂർ വരെയുള്ള എട്ട് ജവഹർ നവോദയ വിദ്യാലയങ്ങളിലെ തെരഞ്ഞെടുക്കപ്പെട്ട കുട്ടികളാണ് യോഗ,ചെസ്, ടേബിൾ ടെന്നീസ്, ബാഡ്മിന്‍റൺ മത്സരങ്ങളിൽ പങ്കെടുക്കുന്നത്.

കാൻസർ ബോധവത്കരണ സെമിനാറും രോഗപരിശോധനാ ക്യാമ്പും

കൂവപ്പള്ളി: കൂവപ്പള്ളി വികസനസമിതിയുടെ ആഭിമുഖ്യത്തിൽ നാളെ രാവിലെ 9.30 മുതൽ വൈകുന്നേരം നാലു വരെ കൂവപ്പള്ളി സെന്‍റ് ജോസഫ്സ് പള്ളി പാരിഷ് ഹാളിൽ കാൻസർ ബോധവത്കരണ സെമിനാറും രോഗപരിശോധനാ ക്യാമ്പും നടക്കും. കൂവപ്പള്ളി സെന്‍റ് ജോസഫ്സ് പള്ളി വികാരി ഫാ. മാത്യു പുതുമനയുടെ അധ്യക്ഷതയിൽ സമിതി രക്ഷാധികാരി സെബാസ്റ്റ്യൻ കുളത്തുങ്കൽ എംഎൽഎ ക്യാമ്പ്‌ ഉദ്ഘാടനം ചെയ്യും. കോട്ടയം മെഡിക്കൽ കോളജ് കമ്യൂണിറ്റി ഓങ്കോളജി ഡിവിഷൻ മേധാവി ഡോ.കെ. സുരേഷ്‌കുമാർ സെമിനാറിനും രോഗപരിശോധനയ്ക്കും നേതൃത്വം നൽകും. പാറത്തോട് പഞ്ചായത്ത്‌ പ്രസിഡന്‍റ് കെ.കെ. ശശികുമാർ, കാഞ്ഞിരപ്പള്ളി പഞ്ചായത്ത് പ്രസിഡന്‍റ് കെ.ആർ. തങ്കപ്പൻ, ജില്ലാ പഞ്ചായത്ത്‌ മെംബർ പി.ആർ. അനുപമ, ബ്ലോക്ക്‌ മെംബർ ടി.ജെ. മോഹനൻ, പഞ്ചായത്ത്‌ മെംബർമാരായ ബിജോജി പൊക്കാളശേരിൽ, ഏലിയാമ്മ വാന്തിയിൽ, ആന്‍റണി മുട്ടത്തുകൂന്നേൽ, അനിറ്റ് പി. ജോസ്, സർവീസ് ബാങ്ക് പ്രസിഡന്‍റ് ഏബ്രഹാം തോമസ്, ഞർക്കലക്കാവ് ക്ഷേത്രം പ്രതിനിധി മണിലാൽ നമ്പൂതിരി, ജമാ അത്ത് ഇമാം സുനീർ മൗലവി, ആംഗ്ലിക്കൻ ചർച്ച് വികാരി റവ. ബിനോയ്‌ പടച്ചിറ, എസ്എൻഡിപി ശാഖാ സെക്രട്ടറി എം.പി. മനോജ്‌ തുടങ്ങിയവർ പ്രസംഗിക്കും. ആദ്യം പേര് രജിസ്റ്റർ ചെയ്യുന്ന നൂറു പേർക്കാണ് രോഗപരിശോധന സൗകര്യമെന്ന് വികസനസമിതി പ്രസിഡന്‍റ് ബാബു ടി. ജോൺ, സെക്രട്ടറി ജോസ് കൊച്ചുപുര, ഭാരവാഹികളായ ഏബ്രഹാം ജേക്കബ് പയ്യനാട്ട്, ബിനോയ്‌ കൊച്ചുകരിപ്പാപ്പറമ്പിൽ, സീമ കുന്നത്ത്, ബെന്നി വടശേരി എന്നിവർ അറിയിച്ചു.

പകര്‍ച്ചപ്പനി: സ്വയംചികിത്സ അരുത്

കോട്ടയം: ഏതുതരം പനിയായാലും സ്വയം ചികിത്സ ഒഴിവാക്കി ആശുപത്രികളില്‍ എത്തി ചികിത്സ തേടണമെന്നും ആരോഗ്യവകുപ്പിന്‍റെ നിര്‍ദേശങ്ങള്‍ പാലിക്കണമെന്നും ജില്ലാ മെഡിക്കല്‍ ഓഫീസര്‍ ഡോ. എന്‍. പ്രിയ. മാസത്തില്‍ ഇതുവരെ 8004 പേര്‍ പനി ബാധിച്ച് ചികിത്സ തേടിയതായി ജില്ലാ മെഡിക്കല്‍ ഓഫീസര്‍ അറിയിച്ചു. 10 ഡെങ്കിപ്പനി കേസുകളും 14 എലിപ്പനി കേസുകളും റിപ്പോര്‍ട്ട് ചെയ്തു. ജില്ലയില്‍ ചിലയിടത്ത് ഇന്‍ഫ്‌ളുവന്‍സ വിഭാഗത്തില്‍പ്പെട്ട വൈറല്‍ പനിയും കണ്ടുവരുന്നുണ്ട്. വൈറല്‍ പനി പടരാനുള്ള സാധ്യത നിലനില്‍ക്കുന്നതിനാല്‍ ഗര്‍ഭിണികള്‍, കിടപ്പുരോഗികള്‍, മറ്റു ഗുരുതര രോഗമുള്ളവര്‍, കുട്ടികള്‍ തുടങ്ങിയവര്‍ പ്രത്യേകം ശ്രദ്ധിക്കണം. ജലദോഷം, ചുമ, പനി, തൊണ്ടവേദന, തലവേദന, ശരീരവേദന, ക്ഷീണം, വിറയല്‍ എന്നിവയാണ് പ്രധാന രോഗലക്ഷണങ്ങള്‍, ചുമയ്ക്കുമ്പോഴും തുമ്മുമ്പോഴും തൂവാല ഉപയോഗിച്ച് വായും മൂക്കും മറയ്ക്കുക, കൈകള്‍ സോപ്പിട്ട് കൂടെക്കൂടെ കഴുകുക, മാസ്‌ക് ഉപയോഗിക്കുക, ധാരാളം വെള്ളം കുടിക്കുക, പോഷകങ്ങള്‍ അടങ്ങിയ ഭക്ഷണം കഴിക്കുക തുടങ്ങിയ കാര്യങ്ങള്‍ ശ്രദ്ധിക്കണം. പകര്‍ച്ചപ്പനി ബാധിതരായ കുട്ടികളെ സ്‌കൂളില്‍ വിടരുത്. വീട്ടില്‍ വിശ്രമിക്കുകയും ആവശ്യത്തിനു വെള്ളം കുടിക്കുകയും പോഷകങ്ങള്‍ അടങ്ങിയ ഭക്ഷണം കഴിക്കുകയും വേണം. എലിപ്പനി കേസുകളും കൂടിവരുന്നതിനാല്‍ മലിനജലവുമായി സമ്പര്‍ക്കത്തില്‍ ഏര്‍പ്പെടുന്നവരും തൊഴിലുറപ്പ് ജോലികള്‍ ചെയ്യുന്നവരും പ്രതിരോധ ഗുളികയായ ഡോക്‌സി സൈക്ലിന്‍ ജോലിക്ക് ഇറങ്ങുന്നതിന്‍റെ തലേദിവസം ആരോഗ്യപ്രവര്‍ത്തകരുടെ നിര്‍ദേശാനുസരണം കഴിക്കണം. ആറു മുതല്‍ എട്ട് ആഴ്ചവരെ ആഴ്ചയിലൊരിക്കല്‍ 100 മില്ലി ഗ്രാമിന്‍റെ രണ്ടു ഗുളികവീതം തുടര്‍ച്ചയായി കഴിക്കാം. ഓടകളിലും തോടുകളിലും വയലുകളിലും ഇറങ്ങി ജോലി ചെയ്യുന്നവര്‍ പ്രത്യേകം ശ്രദ്ധിക്കണം. ഡെങ്കിപ്പനി, ജലജന്യ രോഗങ്ങള്‍ എന്നിവയ്‌ക്കെതിരേയും ജാഗ്രത പാലിക്കണമെന്നു ജില്ലാ മെഡിക്കല്‍ ഓഫീസര്‍ അറിയിച്ചു.

ഓട്ടോറിക്ഷയ്ക്കു മുകളിൽ മൺതിട്ട ഇടിഞ്ഞുവീണു

വാഴൂർ: ചാമംപതാലിൽ സ്വകാര്യ വ്യക്തിയുടെ വക സ്ഥലത്ത് നിർത്തിയിട്ടിരുന്ന ഓട്ടോറിക്ഷയുടെ മുകളിൽ മൺതിട്ട ഇടിഞ്ഞുവീണു. കനത്ത മഴയിൽ ഇന്നലെ ഉച്ചയ്ക്ക് 12.30നായിരുന്നു സംഭവം. ചാമംപതാൽ പോസ്റ്റ് ഓഫീസിനു സമീപം സ്വകാര്യവ്യക്തിയുടെ സ്ഥലത്ത് പാർക്ക് ചെയ്തിരുന്ന സ്വകാര്യ ബസ് കണ്ടക്ടറായ കുരുവിക്കൂട് സ്വദേശി തോക്കനാട് സനോജിന്‍റെ ഓട്ടോയ്ക്കു മുകളിലേക്കാണ് മൺതിട്ട ഇടിഞ്ഞുവീണത്. സനോജ് ജോലി ചെയ്യുന്ന ബസ് ഇവിടെയാണ് രാത്രി കാലങ്ങളിൽ പാർക്ക് ചെയ്യുന്നത്. ഓട്ടോറിക്ഷ പാർക്ക് ചെയ്ത ശേഷം സനോജ് ബസിൽ പോയ സമയത്താണ് അപകടം. ഈ സമയം ഇവിടെ വാഹനങ്ങളോ ആൾക്കാരോ ഇല്ലാത്തതിനാൽ അപകടം ഒഴിവായി. മഴയിൽ കുതിർന്നുനിൽക്കുന്ന കൂറ്റൻ മൺതിട്ട ഏതു നിമിഷവും നിലംപൊത്താവുന്ന അവസ്ഥയിലാണ്. അപകടത്തിൽ ഓട്ടോറിക്ഷയുടെ മുൻഭാഗം പൂർണമായും തകർന്നു. 25 അടിയിലേറെ ഉയരമുള്ള മൺതിട്ടയുടെ ഒരു ഭാഗമാണ് ഇടിഞ്ഞു വീണത്. മണ്ണു മാന്തിയന്ത്രം ഉപയോഗിച്ച് മണ്ണു നീക്കം ചെയ്താണ് ഓട്ടോറിക്ഷ സ്ഥലത്തുനിന്നു മാറ്റിയത്.

സഹനവഴികളില്‍ അല്‍ഫോന്‍സാമ്മ ദൈവത്തിന്‍റെ മുഖം കണ്ടു: മാര്‍ പുളിക്കല്‍

ഭരണങ്ങാനം: അല്‍ഫോന്‍സാമ്മ ലോകത്തിനു നല്‍കുന്ന മഹത്തായ സന്ദേശം സഹനവഴികളില്‍ ദൈവത്തിന്‍റെ മുഖം തെളിമയോടെ കണ്ടെത്തിയവള്‍ എന്നതാണെന്ന് കാഞ്ഞിരപ്പള്ളി ബിഷപ് മാര്‍ ജോസ് പുളിക്കല്‍. ഭരണങ്ങാനത്ത് വിശുദ്ധ അല്‍ഫോന്‍സാമ്മയുടെ തിരുനാളില്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കുകയായിരുന്നു ബിഷപ്. അല്‍ഫോന്‍സാമ്മയെക്കുറിച്ചുള്ള പ്രധാനപ്പെട്ട ദര്‍ശനവും ഇതാണ്. സമകാലിക ജീവിതസാഹചര്യങ്ങളില്‍ വിട്ടുകൊടുക്കാന്‍ സാധിച്ചാല്‍, ക്ഷമിക്കാന്‍ സാധിച്ചാല്‍, ത്യജിക്കാന്‍ സാധിച്ചാല്‍, നമ്മുടെ ജീവിതം അത്രമാത്രം സമാധാനപൂര്‍ണമാകുമെന്നും ബിഷപ് പറഞ്ഞു. ഇന്നലെ രാവിലെ ഫാ. ഏബ്രാഹം ഏരിമറ്റം, ഫാ. ജോണ്‍ കണ്ണന്താനം, ഫാ. കുരുവിള തുടിയംപ്ലാക്കല്‍, ഫാ. മാത്യു പുല്ലുകാലായില്‍, ഫാ. ജോര്‍ജ് തെരുവില്‍, ഫാ. സെബാസ്റ്റ്യന്‍ വലിയവീട്ടില്‍ കളപ്പുര, ഫാ. കുര്യന്‍ കാലായില്‍, ഫാ . ജോസ് കിഴക്കേതില്‍ എന്നിവര്‍ വിശുദ്ധ കുര്‍ബാന അര്‍പ്പിച്ചു. ഫാ. ജോസഫ് കുഴിഞ്ഞാലില്‍ റംശാ പ്രാര്‍ഥനയ്ക്കും ഫാ. ജോസഫ് കുറുപ്പശേരില്‍ ജപമാല പ്രദക്ഷിണത്തിനും നേതൃത്വം വഹിച്ചു. അല്‍ഫോന്‍സ തീര്‍ഥാടനം ഇന്നലെ ഉച്ചകഴിഞ്ഞ് പാലാ രൂപത ഫ്രാന്‍സിസ്‌കന്‍ മൂന്നാം സഭാംഗങ്ങള്‍ വിശുദ്ധ അല്‍ഫോന്‍സാമ്മയുടെ കബറിടത്തിലേയ്ക്ക് തീര്‍ത്ഥാടനം നടത്തി, ഫാ. ആന്‍റണി വെച്ചൂര്‍ ഒഎഫ്എം നേതൃത്വം നല്‍കി. ഇന്നത്തെ തിരുക്കർമങ്ങൾ രാവിലെ 5.30നും 6.45നും 8.30നും പത്തിനും വിശുദ്ധ കുര്‍ബാന. 11.30ന് വിശുദ്ധ കുര്‍ബാന- മാര്‍ സെബാസ്റ്റ്യന്‍ വടക്കേല്‍. ഉച്ചകഴിഞ്ഞ് 2.30നും 3.30നും 4.30നും അഞ്ചിനും വിശുദ്ധ കുര്‍ബാന. 6.15ന് ജപമാല പ്രദക്ഷിണം. രാത്രി ഏഴിന് വിശുദ്ധ കുര്‍ബാന.

സംസ്ഥാനം സ്ഥലം ഏറ്റെടുത്തു നൽകിയാൽ‍ ശബരി റെയില്‍വേ വരും

കോട്ടയം: ശബരി റെയില്‍ പദ്ധതി ഒരിഞ്ചു മുന്നോട്ടുനീങ്ങണമെങ്കില്‍ സംസ്ഥാന സര്‍ക്കാര്‍ സ്ഥലം ഏറ്റെടുത്തുകൊടുക്കണമെന്ന് കേന്ദ്ര റെയില്‍വേ മന്ത്രി അശ്വിനി വൈഷ്ണവ് വ്യക്തമാക്കി. ആകെ ചെലവിന്‍റെ 50 ശതമാനം സംസ്ഥാനം വഹിക്കാമെന്നും ഈ തുകയില്‍പ്പെടുത്തി സ്ഥലം ഏറ്റെടുത്ത് റെയില്‍വേക്ക് കൈമാറാമെന്നും കേരള സര്‍ക്കാര്‍ സമ്മതിച്ചിരുന്നതാണ്. അങ്കമാലിയില്‍ നിന്നും എരുമേലി വരെയുള്ള പാതയില്‍ അങ്കമാലി മുതല്‍ കാലടി വരെ ഏഴു കിലോമീറ്റര്‍ നിര്‍മാണം പൂര്‍ത്തിയായിട്ടുണ്ട്. കാലടി മുതല്‍ പെരുമ്പാവൂര്‍ വരെ 10 കിലോമീറ്റര്‍ പ്രാരംഭ ജോലിയും പൂര്‍ത്തിയായി. ഇവിടെ നിന്നും എരുമേലി വരെ 100 കിലോമീറ്ററില്‍ പാത കടന്നുപോകുന്ന സ്ഥലം ഏറ്റെടുത്തു കൊടുക്കുന്നതില്‍ നയാ പൈസ റെയില്‍വേ മുടക്കില്ല. 1997-98 ബജറ്റില്‍ അനുമതിയായ പദ്ധതിയില്‍ അവ്യക്തത തുടരുകയാണ്. പെരുമ്പാവൂര്‍ മുതല്‍ പിഴക് വരെ സ്ഥലം ഏറ്റെടുക്കാന്‍ കുറ്റിയടിച്ചിട്ടുണ്ട്. സ്ഥലം ഏറ്റെടുക്കുന്നതില്‍ പ്രദേശവാസികളുടെ എതിര്‍പ്പും ചിലയിടങ്ങളില്‍ കേസുകളും നിലവിലുണ്ട്. അന്തിമ അലൈന്‍മെന്‍റ് ഇപ്പോഴുമായിട്ടില്ല. പദ്ധതി നടത്തുന്നതില്‍ സംസ്ഥാന സര്‍ക്കാരിന്‍റെ പൂര്‍ണമായ സഹകരണം ലഭിക്കുന്നില്ല. എംപിമാരായ ബെന്നി ബഹനാന്‍, ഡീന്‍ കുര്യാക്കോസ്, അടൂര്‍ പ്രകാശ്, ആന്‍റോ ആന്‍റണി എന്നിവരുടെ ചോദ്യങ്ങള്‍ക്ക് മറുപടിയായി ലോക്‌സഭയില്‍ മന്ത്രി അശ്വിനി വൈഷ്ണവ് വ്യക്തമാക്കി. പദ്ധതിയുടെ നിര്‍മാണത്തുക 3801 കോടിയാകുമെന്നാണ് 2023 ഡിസംബറില്‍ വിലയിരുത്തിയിരിക്കുന്നത്. ഇതില്‍ പകുതി സംസ്ഥാനം വഹിക്കാമെന്ന് ധാരണയായിരുന്നു. കഴിഞ്ഞ വര്‍ഷം ഓഗസ്റ്റിലും റെയില്‍വേ സംസ്ഥാനത്തിന്‍റെ തീരുമാനം ആരാഞ്ഞിരുന്നു. ശബരി റെയില്‍വേ എരുമേലിയില്‍ നിന്നും വിഴിഞ്ഞം തുറമുഖം വരെ നീട്ടാന്‍ ആലോചനയുണ്ടോ എന്നും എംപിമാര്‍ ചോദിച്ചിരുന്നു. ശബരി റെയില്‍ പദ്ധതിക്കു വിഴിഞ്ഞം അന്താരാഷ്ട്ര തുറമുഖവുമായി ബന്ധമില്ലെന്നും ശബരി പദ്ധതി അതിന്‍റെ ചെലവില്‍ പെടുത്താനാവില്ലെന്നും മന്ത്രി വ്യക്തമാക്കിയിട്ടുണ്ട്. എറണാകുളം, ഇടുക്കി, കോട്ടയം ജില്ലകളെ ബന്ധിക്കുന്ന പദ്ധതിയില്‍ അങ്കമാലി, കാലടി, പെരുമ്പാവൂര്‍, ഓടക്കാലി, കോതമംഗലം, മൂവാറ്റുപുഴ, വാഴക്കുളം, തൊടുപുഴ, കരിങ്കുന്നം, രാമപുരം, ഭരണങ്ങാനം, ചെമ്മലമറ്റം, കാഞ്ഞിരപ്പള്ളി, എരുമേലി എന്നീ സ്റ്റേഷനുകളാണുള്ളത്. പുതിയ സ്ഥലമെടുപ്പ് നിയമം അനുസരിച്ചു മതിപ്പുവിലയുടെ മൂന്നിരട്ടി വരെ സ്ഥലം വില ലഭിക്കാന്‍ ഉടമസ്ഥർ അര്‍ഹരാണ്. അങ്കമാലി - എരുമേലി 111 കിലോമീറ്റര്‍ പാതയുടെ ഭൂമി ഏറ്റെടുക്കല്‍ നടപടികളുമായി ബന്ധപ്പെട്ട് റെയില്‍വേയുടെ വിദഗ്ധ സംഘം ഈ മാസം കേരളത്തിലെത്തുമെന്നായിരുന്നു മുന്‍ പ്രഖ്യാപനം. എന്നാല്‍ സ്ഥലം ഏറ്റെടുത്തുകൊടുക്കാതെ കേന്ദ്രസംഘം എത്തില്ലെന്ന് വ്യക്തമാണ്. സംസ്ഥാനത്തിന്‍റെ മെല്ലെപ്പോക്കും കെടുകാര്യസ്ഥതയുമാണ് പദ്ധതി ഇഴയാന്‍ കാരണമെന്ന് മുന്‍പും റെയില്‍വേ വ്യക്തമാക്കിയിരുന്നു. ഭൂമി അളന്നുതിരിച്ച 2,862 കുടുംബങ്ങള്‍ നഷ്ടപരിഹാരം ലഭിക്കാതെ കാല്‍ നൂറ്റാണ്ടിലേറെയായി പ്രതിസന്ധിയിലാണ്. സര്‍വേക്കല്ല് സ്ഥാപിച്ച ഭൂമി വില്‍ക്കാനോ പണയപ്പെടുത്താനോ കഴിയാത്ത സ്ഥിതിയുണ്ട്. എറണാകുളം ജില്ലയിലെ അങ്കമാലി മുതല്‍ കോട്ടയം ജില്ലയിലെ രാമപുരം വരെ 70 കിലോമീറ്ററിലാണ് സര്‍വേക്കല്ലുകളുള്ളത്. 416 ഹെക്ടര്‍ ഭൂമിയാണു സംസ്ഥാന സര്‍ക്കാര്‍ ഇനി ഏറ്റെടുക്കേണ്ടത്. എയര്‍പോര്‍ട്ട് സര്‍വേ: കനത്ത മഴ തടസം കോട്ടയം: മഴ കനത്തതോടെ എരുമേലി ശബരി എയര്‍പോര്‍ട്ട് സ്ഥലം സര്‍വേ ഇഴയുന്നു. മണിമല വില്ലേജില്‍ അതിര്‍ത്തി തര്‍ക്കമുള്ള രണ്ടു പ്ലോട്ടുകള്‍ ഒഴികെയുള്ള സര്‍വേ പൂര്‍ത്തിയായി. എരുമേലി തെക്ക് വില്ലേജിലെ സര്‍വേ തുടങ്ങിവച്ചെങ്കിലും മഴ തടസമായി. സെപ്റ്റംബറിനു മുന്‍പ് നടപടികള്‍ പൂര്‍ത്തിയാക്കാനാണ് ശ്രമം. ബിലീവേഴ്‌സ് ചര്‍ച്ചിനു കീഴിലുള്ള ചെറുവള്ളി എസ്റ്റേറ്റിലെ താമസക്കാര്‍ ഉള്‍പ്പെടെ പ്രദേശത്തെ 352 കുടുംബങ്ങളെ പുനരധിവസിപ്പിക്കാനുള്ള നടപടികള്‍ പുരോഗമിക്കുന്നു. ഇവര്‍ക്ക് തൊഴില്‍, പാര്‍പ്പിടം, സൗജന്യറേഷന്‍ തുടങ്ങിയ സൗകര്യങ്ങള്‍ ഏര്‍പ്പാടാക്കണം. ചെറുവളളി എസ്റ്റേറ്റില്‍ ഇരുന്നൂറിലേറെ ടാപ്പിംഗ് തൊഴിലാളികള്‍ക്ക് വരുമാനം ഇല്ലാതാകും. എയര്‍പോര്‍ട്ട് നിര്‍മാണത്തിന് പ്രതിരോധ, വ്യോമയാന, പരിസ്ഥിതി മന്ത്രാലയങ്ങളുടെ അനുമതി ലഭിച്ചിരിക്കെ നടപടികള്‍ വേഗത്തിലാക്കാനാണ് റവന്യൂ വകുപ്പിന്‍റെ തീരുമാനം. പ്രദേശവാസികള്‍ക്ക് നല്‍കാവുന്ന നഷ്ടപരിഹാര പാക്കേജ് സംബന്ധിച്ച് രണ്ടു മാസത്തിനുള്ളില്‍ തീരുമാനമുണ്ടാകും.

ലഹരിവിരുദ്ധ ബോധവത്കരണ ക്ലാസ്

കടനാട്: ലയണ്‍സ് ക്ലബ് ഓഫ് കൊല്ലപ്പള്ളിയുടെ നേതൃത്വത്തില്‍ കടനാട് സെന്‍റ് സെബാസ്റ്റ്യന്‍സ് ഹയര്‍ സെക്കൻ‌ഡറി സ്‌കൂളില്‍ ലഹരിവിരുദ്ധ ബോധവത്കരണ ക്ലാസ് നടത്തപ്പെട്ടു. സ്‌കൂള്‍ മാനേജര്‍ ഫാ. ജോസഫ് പാനാമ്പുഴ ഉദ്ഘാടനം നിര്‍വഹിച്ചു. ഹെഡ്മാസ്റ്റര്‍ വി.ജെ. അജി അധ്യക്ഷത വഹിച്ചു. ലയണ്‍സ് ജില്ലാ ചീഫ് പ്രോജക്ട് കോ-ഓര്‍ഡിനേറ്റര്‍ സിബി മാത്യു പ്ലാത്തോട്ടം, ലയണ്‍സ് ക്ലബ് പ്രസിഡന്‍റ് ലോയിഡ് ജോസഫ്, പിടിഎ പ്രസിഡന്‍റ് ജയ്‌മോന്‍ സെബാസ്റ്റ്യന്‍ നടുവിലെക്കുറ്റ്, എംപിടിഎ പ്രസിഡന്‍റ് ഡെയ്‌സി ജിബു, ബിനു വള്ളോംപുരയിടം, ജാന്‍സി തോട്ടക്കര, റോയി ഫ്രാന്‍സിസ്, ടോമി സി. ഏബ്രഹാം, കെ.സി സെബാസ്റ്റ്യന്‍, സിബി ആന്‍റണി തെക്കേടത്ത് തുടങ്ങിയവര്‍ പ്രസംഗിച്ചു. പാലാ മാര്‍ സ്ലീവാ മെഡിസിറ്റിയിലെ സീനിയര്‍ ക്ലിനിക്കല്‍ സൈക്കോളജിസ്റ്റ് ഡോ. എയ്ഞ്ചല്‍ തോമസ് ബോധവത്കരണ ക്ലാസ് നയിച്ചു.

കെഎസ്ആര്‍ടിസി മൊബൈല്‍ നമ്പരുകൾ

കോട്ടയം: യാത്രക്കാരുടെ അന്വേഷണങ്ങള്‍ക്ക് കെഎസ്ആര്‍ടിസി ഡിപ്പോകളിലും സ്‌റ്റേഷന്‍ മാസ്റ്റര്‍ ഓഫീസുകളിലും മൊബൈൽ നന്പരുകൾ പ്രാബല്യത്തിൽ വന്നു. എല്ലാ ഡിപ്പോകളിലെയും ലാന്‍ഡ് ഫോണുകള്‍ നേരത്തെ നിര്‍ത്തലാക്കിയിരുന്നു. ഡിപ്പോകൾ കോട്ടയം- 9188933760 വൈക്കം- 9188933765 പൊന്‍കുന്നം- 9188933764 പാലാ- 9188933762 ചങ്ങനാശേരി- 9188933757 ഈരാറ്റുപേട്ട- 9188933758 എരുമേലി- 9188933759 സ്റ്റേഷന്‍ മാസ്റ്റര്‍ ഓഫീസ് ഏറ്റുമാനൂര്‍- 9188933766 മുണ്ടക്കയം- 9188933764 ജില്ലയോടു ചേര്‍ന്നുള്ള ഡിപ്പോകള്‍ ചേര്‍ത്തല- 9188933751 കുമളി- 9188933769 കട്ടപ്പന- 9188933766 തൊടുപുഴ- 9188933775 കൂത്താട്ടുകുളം- 9188933782 തിരുവല്ല- 9188933746 റാന്നി- 9188933745 ബംഗളൂരു സാറ്റലൈറ്റ്- 9188933820 മൈസൂര്‍- 9188933821

മഴ ശക്തമായതോടെ പുനലൂർ-മൂവാറ്റുപുഴ ഹൈവേയിൽ അപകടം പതിവ്

പൊൻകുന്നം: മഴ ശക്തമായതോടെ പുനലൂർ - മൂവാറ്റുപുഴ സംസ്ഥാനപാതയിൽ അപകടം പതിവായി. തേഞ്ഞ ടയറുകളുമായി ഓടുന്ന വാഹനങ്ങൾ മഴയിൽ തെന്നിമറിയുന്നതും രാത്രികാല ഡ്രൈവർമാരുടെ ഉറക്കവുമാണ് കൂടുതൽ അപകടങ്ങൾക്കു കാരണമാകുന്നത്. ഒരുമാസത്തിനുള്ളിൽ ആറ് അപകടങ്ങൾ എലിക്കുളം മുതൽ തെക്കേത്തുകവല വരെയുള്ള ഭാഗത്ത് ഉണ്ടായി. ഹൈവേയുടെ ഭാഗമായ പാലാ - പൊൻകുന്നം റോഡും പൊൻകുന്നം - മണിമല റോഡും നിരവധി കൊടുംവളവുകൾ ഉള്ളതാണ്. റോഡ് വികസനത്തിന് സ്ഥലമേറ്റെടുത്ത് വീതികൂട്ടിയെങ്കിലും വളവുകൾ ഒഴിവായിട്ടില്ല. വളവുകളിൽ അമിതവേഗത്തിൽ വാഹനമെത്തിയാൽ മഴസമയത്ത് തെന്നുന്നതിനിടയാകുന്നുണ്ട്. രാത്രി കൂടുതലായി ഓടുന്ന ലോറികളുടെയും മിനിലോറികളുടെയും ഡ്രൈവർമാർ ഉറക്കച്ചടവോടെ ഓടിക്കുന്നതും അടുത്തിടെ നടന്ന പല അപകടങ്ങൾക്കും കാരണമായി. എലിക്കുളം ബാങ്ക്പടി, പൊൻകുന്നം അട്ടിക്കൽ എന്നിവിടങ്ങളിൽ കഴിഞ്ഞ ദിവസങ്ങളിൽ വാഹനാപകടമുണ്ടായി. അട്ടിക്കൽ പതിവായി അപകടം നടക്കുന്ന ഭാഗമാണ്. മേള കലാകാരനും സോപാന സംഗീതജ്ഞനുമായ ബേബി എം. മാരാർ മരിച്ചതുൾപ്പെടെ നിരവധി അപകടം നടന്ന ഭാഗമാണിത്. ഈ വർഷംതന്നെ ഇവിടെ ഒരുവീട്ടിലേക്കു വാഹനമിടിച്ചുകയറി വീട് തകർന്നിരുന്നു. ചിറക്കടവ് എസ്ആർവി കവലയിൽ നടപ്പാതയുടെ കൈവരി തകർത്ത് വാഹനങ്ങൾ പാഞ്ഞുകയറിയ മൂന്ന് അപകടം അടുത്തിടെ നടന്നിരുന്നു. വാഹനങ്ങളുടെ അമിത വേഗത നിയന്ത്രിക്കാൻ ആവശ്യമായ നടപടികൾ അധികൃതർ സ്വീകരിക്കണമെന്ന ആവശ്യം ശക്തമായി.

മാർ ക്ലീമിസ് വലിയ മെത്രാപ്പോലീത്തയുടെ നവതി ആഘോഷം നാളെ

വെച്ചൂച്ചിറ: മലങ്കര ഓർത്തഡോക്സ് സഭ വലിയ മെത്രാപ്പോലീത്തയും സഭ പരിസ്ഥിതി കമ്മീഷൻ മുൻ അധ്യക്ഷനുമായ വെച്ചൂച്ചിറ മാർ ബസേലിയോസ് ഗ്രിഗോറിയോസ് മേഴ്സി ഹോം ഉൾപ്പെടെ ഒട്ടേറെ ജീവകാരുണ്യ, പരിസ്ഥിതി സംരക്ഷണ സ്ഥാപനങ്ങളുടെ സ്ഥാപകനുമായ കുര്യാക്കോസ് മാർ ക്ലീമിസിന്‍റെ 90ാം ജന്മദിനം നാളെ വെച്ചൂച്ചിറ പെരുന്തേനരുവി മാർ ബസേലിയോസ് ഗ്രിഗോറിയോസ് മേഴ്സി ഹോം അങ്കണത്തിൽ നടക്കും. രാവിലെ 11ന് മേഴ്സി ഹോം ട്രസ്റ്റ് പൊതുയോഗം, 12.30ന് ജന്മദിന കേക്ക് മുറിക്കലും അന്തേവാസികൾക്കൊപ്പം ഉച്ചഭക്ഷണവും, 2.30ന് വിദ്യാർഥികളുമായി സംവദിക്കലും നവതിവൃക്ഷത്തൈ നടീലും. മൂന്നിന് പൊതുസമ്മേളനം റിട്ട. ഡിജിപി ഡോ. അലക്സാണ്ടർ ജേക്കബ് ഉദ്ഘാടനം ചെയ്യും. ഡോ. ജോഷ്വാ മാർ നിക്കോദിമോസ് മെത്രാപ്പോലീത്ത അധ്യക്ഷത വഹിക്കും. സഭാ സെക്രട്ടറി ബിജു ഉമ്മൻ മുഖ്യപ്രഭാഷണം നടത്തും. മംഗള പത്ര സമർപ്പണം, ആദരിക്കൽ എന്നിവയുണ്ടായിരുക്കും. സ്വാഗത സംഘം ചെയർമാൻ ടി.കെ. ജയിംസ്, മേഴ്സി ഹോം ഡയറക്ടർ സിസ്റ്റർ തബീഥ, സെക്രട്ടറി ഏബ്രഹാം മാരേട്ട് എന്നിവർ നേതൃത്വം നൽകും. ഓർത്തഡോക്സ് സഭ സുൽത്താൻ ബത്തേരി, തുന്പമൺ ഭദ്രാസനങ്ങളുടെ അധ്യക്ഷനായി പ്രവർത്തിച്ചിട്ടുള്ള കുര്യാക്കോസ് മാർ ക്ലീമിസ് നിലവിൽ മാരാമൺ സമഷ്ടിയിൽ വിശ്രമജീവിതം നയിക്കുകയാണ്. നിരവധി സാമൂഹിക പ്രസ്ഥാനങ്ങൾക്കും സ്ഥാപനങ്ങൾക്കും തുടക്കമിട്ട മെത്രാപ്പോലീത്ത പ്രകൃതി സ്നേഹി കൂടിയാണ്.

നൂറ്റാണ്ടുകൾ പഴക്കമുള്ള കടമാൻകുളം പാലത്തിന്‍റെ നവീകരണം ആരംഭിച്ചു

മുണ്ടക്കയം ഈസ്റ്റ്: തോട്ടംമേഖലയിലെ ജനങ്ങളുടെ കാത്തിരിപ്പിന് വിരാമമായി കടമാൻകുളം പാലത്തിന്‍റെ നവീകരണം ആരംഭിച്ചു. പെരുവന്താനം പഞ്ചായത്ത് പരിധിയിൽ ടിആർ ആൻഡ് ടി എസ്റ്റേറ്റിലെ നൂറ്റാണ്ടുകൾ പഴക്കമുള്ള കടമാൻകുളം പാലം ഏറെക്കാലമായി തകർന്ന അവസ്ഥയിലായിരുന്നു. ഇരുമ്പുകേഡറിൽ നിർമിച്ചിട്ടുള്ള പാലത്തിൽ പാകിയിരുന്ന തടികളെല്ലാം കാലപ്പഴക്കത്താൽ ദ്രവിച്ചു പോയി. തുടർന്ന് പാലത്തിലൂടെ ഭാരമേറിയ വാഹനങ്ങൾക്ക് യാത്ര നിരോധനവും ഏർപ്പെടുത്തിരുന്നു. ഇതോടെ സ്കൂൾ വാഹനങ്ങളുൾപ്പെടെ ഇതുവഴി കടന്നുപോകാതെയായി. സഞ്ചാരസ്വാതന്ത്ര്യം തടസപ്പെട്ടതോടെ ദിവസേന നിരവധി വാഹനങ്ങൾ കടന്നുപോകുന്ന പാലം നവീകരിക്കണമെന്നാവശ്യപ്പെട്ട് വിവിധ കോണുകളിൽനിന്നു പ്രതിഷേധവും ശക്തമായി. ഇതോടെയാണ് മാനേജ്മെന്‍റ് പാലത്തിന്‍റെ നവീകരണപ്രവർത്തനങ്ങൾ നടത്താൻ ആരംഭിച്ചത്. പാലത്തിന്‍റെ ഇരുമ്പുകേഡറുകളിൽ മുകളിൽ പാകിയിരുന്ന ദ്രവിച്ച തടികൾ നിക്കം ചെയ്ത് പുതിയ ആഞ്ഞിലിത്തടികൾ നിരത്തി പുനരുദ്ധാരണ പ്രവർത്തനങ്ങൾ ആരംഭിച്ചു. പാലം പണി പൂർത്തിയാകുന്നതോടെ ഇതുവഴി വാഹനങ്ങൾക്ക് കടന്നുപോകാൻ കഴിയും. അതേസമയം പാലത്തിന്‍റെ കൈവരികളും ദ്രവിച്ച അവസ്ഥയിലാണെന്ന് നാട്ടുകാർ പറയുന്നു. വിദ്യാർഥികൾ ഉൾപ്പെടെ നിരവധി കാൽനടയാത്രകാരാണ് പാലത്തിലൂടെ ഓരോ ദിവസവും കടന്നുപോകുന്നത്. പാലത്തിന്‍റെ കൈവരികൾകൂടി ബലവത്താക്കിയാൽ പാലത്തിലൂടെയുള്ള യാത്ര കൂടുതൽ സുരക്ഷിതത്വമാകും.

പൈപ്പ് ലൈന്‍ സ്ഥാപിക്കുന്നതിന് പൊളിച്ച റോഡുകള്‍ പുനര്‍നിര്‍മിക്കണം: കേരള കോണ്‍ഗ്രസ്

ചങ്ങനാശേരി: ജൽജീവന്‍, അമൃത് പദ്ധതികളില്‍ ഉള്‍പ്പെടുത്തി പൈപ്പ് സ്ഥാപിക്കുന്നതിനായി പൊളിച്ച ചങ്ങനാശേരി നിയോജക മണ്ഡലത്തിലെ വിവിധ റോഡുകള്‍ പുനര്‍നിര്‍മിക്കാത്തത് പ്രതിഷേധാര്‍ഹമാണെന്ന് കേരള കോണ്‍ഗ്രസ് ചങ്ങനാശേരി നിയോജക മണ്ഡലം ഉന്നതാധികാര സമിതിയോഗം വിലയിരുത്തി. വിവിധ പഞ്ചായത്തുകളിലെയും നഗരസഭയിലേയും റോഡുകള്‍ പൂര്‍വസ്ഥിതിയില്‍ എത്തിക്കാത്തതുമൂലം കാല്‍നടപ്പും വാഹനസഞ്ചാരവും അതീവ ദുരിതമാണ്. റോഡുകള്‍ അടിയന്തരമായി പുനര്‍നിര്‍മിച്ചില്ലെങ്കില്‍ ശക്തമായ സമരപരിപാടികള്‍ സംഘടിപ്പിക്കുമെന്ന് യോഗം മുന്നറിയിപ്പുനല്‍കി. നിയോജകമണ്ഡലം ആക്ടിംഗ് പ്രസിഡന്‍റ് ജോസഫ് തോമസ് അധ്യക്ഷത വഹിച്ചു. സംസ്ഥാന ഉന്നതാധികാര സമിതി അംഗം വി.ജെ. ലാലി ഉദ്ഘാടനം ചെയ്തു. സി.ഡി. വത്സപ്പന്‍, ചെറിയാന്‍ ചാക്കോ, ജോര്‍ജുകുട്ടി മാപ്പിളശേരി, സിബിച്ചന്‍ ചാമക്കാല, കെ.എ. തോമസ്, വര്‍ഗീസ് വാരിക്കാടന്‍, മുകുന്ദന്‍ രാജു, കുഞ്ഞ് കൈതമറ്റം, ജോഷി കുറുക്കന്‍കുഴി, സന്തോഷ് ആന്‍റണി, മാത്യു തെക്കനാട്ട് എന്നിവര്‍ പ്രസംഗിച്ചു.

ലഹരിക്കെതിരേ പ്രവര്‍ത്തനവുമായി അമ്മമാരുടെ കൂട്ടായ്മ

ചങ്ങനാശേരി: കുട്ടികളില്‍ വര്‍ധിച്ചുവരുന്ന ലഹരിവസ്തുക്കളുടെ ഉപയോഗം അവരിലുണ്ടാക്കുന്ന മാറ്റങ്ങള്‍ പ്രാരംഭഘട്ടത്തില്‍ തന്നെ തിരിച്ചറിഞ്ഞ് അവരെ അതില്‍നിന്ന് പിന്തിരിപ്പിക്കാന്‍ അമ്മമാരെ പ്രാപ്തരാക്കുവാന്‍ ‘മദേഴ്സ് ഫ്രെട്ടേണിറ്റി എഗന്‍സ്റ്റ് സബ്സ്റ്റന്‍സ് അബ്യൂസ് ’ എന്ന പദ്ധതിക്ക് രൂപംകൊടുത്തു. വിദ്യാലയങ്ങളിലെ മദര്‍ പിടിഎ, വൈഡബ്ല്യുസിഎ, കുടുംബശ്രീ, മാതൃജ്യോതിസ് തുടങ്ങിയ വനിതാ കൂട്ടായ്മകളാണ് ഈ പദ്ധതിയുടെ ഭാഗമാകുന്നത്. ചങ്ങനാശേരി താലൂക്ക് റസിഡന്‍റ്സ് അപ്പെക്സ് കൗണ്‍സില്‍ തുടങ്ങിവയ്ക്കുന്ന ഈ പദ്ധതിയുടെ സംഘാടക സമിതിസമ്മേളനം ജോബ് മൈക്കിള്‍ എംഎല്‍എ ഉദ്ഘാടനം ചെയ്തു. ഡോ. റൂബിള്‍ രാജ് അധ്യക്ഷത വഹിച്ചു. അസോസിയേഷന്‍ പ്രസിഡന്‍റ് സി.ജെ. ജോസഫ് പദ്ധതി വിശദീകരണം നടത്തി. മീഡിയ വില്ലേജ് ഫിനാന്‍സ് ഡയറക്ടര്‍ ഫാ. ലിപിന്‍ തുണ്ടുകളം, വാഴപ്പള്ളി സെന്‍റ് തെരേസാസ് ഹയര്‍ സെക്കന്‍ഡറി സ്‌കൂള്‍ പ്രിന്‍സിപ്പല്‍ ഷിജി ജോണ്‍സണ്‍, ജോസുകുട്ടി കുട്ടംപേരൂര്‍, ഡോ. ജോര്‍ജ് പടനിലം, ഡോ. ജോര്‍ജ് പീടിയേക്കല്‍, മിനി വിന്‍സി, മരീന തരകന്‍, കൗണ്‍സിലര്‍ പ്രസന്ന കുമാരി ടീച്ചര്‍, വിനോദ് പണിക്കര്‍, വിജി ഫിലിപ്പ്, ഹബീബ്, രാജു രാഘവന്‍, ടോം കായിത്ര, ജോസ്നാ മോള്‍, സൗമ്യാ മോള്‍, ശോഭ ജോസ് എന്നിവര്‍ പ്രസംഗിച്ചു. അതിരൂപത കോര്‍പറേറ്റ് മാനേജ്മെന്‍റ് സ്‌കൂള്‍സ്, റേഡിയോ മീഡിയ വില്ലേജ്, ജിമ്പയര്‍, സമരിറ്റണ്‍ മെഡിക്കല്‍ ട്രസ്റ്റ് വൈഡബ്ല്യുസിഎ, പോലീസ്, എക്സൈസ്, ഡിപ്പാര്‍ട്ടുമെന്‍റുകള്‍, ചങ്ങനാശേരി ജംഗ്ഷന്‍ ഫേസ്ബുക്ക് കൂട്ടായ്മ എന്നിവര്‍ സഹകാരികളാണ്.

റോട്ടറി പ്രസ്ഥാനത്തിന്‍റെ സേവനം മഹത്തരം: ജോബ് മൈക്കിള്‍ എംഎൽഎ

ചങ്ങനാശേരി: പോളിയോ ഉന്മൂലനം ചെയ്യുന്നതിലും വികലാംഗ ക്ഷേമരംഗത്തും വികസനരംഗത്തും സ്ത്രീശക്തീകരണ രംഗത്തും റോട്ടറി പ്രസ്ഥാനങ്ങള്‍ ചെയ്യുന്ന സേവനങ്ങള്‍ മഹത്തരമാണെന്ന് ജോബ് മൈക്കിള്‍ എംഎല്‍എ. ചങ്ങനാശേരി ടൗണ്‍ റോട്ടറി ക്ലബ്ബിന്‍റെ സാമൂഹിക ക്ഷേമപദ്ധതികളുടെ ഉദ്ഘാടനം നിര്‍വഹിച്ചു പ്രസംഗിക്കുകയായിരുന്നു അദ്ദേഹം. പ്രസിഡന്‍റ് ബോബന്‍ ടി. തെക്കേല്‍ അധ്യക്ഷത വഹിച്ചു. എന്‍എസ്എസ് കോളജ് മുന്‍ പ്രിന്‍സിപ്പല്‍ ഡോ. ജി. പ്രമോദ് മുഖ്യാതിഥിയായിരുന്നു. റോട്ടറി അസി. ഗവര്‍ണര്‍ മാത്യു ഡൊമിനിക് മുഖ്യപ്രഭാഷണം നടത്തി. മനോജ് കുമാര്‍, ടെനി ജോയ്, രമേശ്കുമാര്‍, തോമസ് മാത്യു, ബിനോദ് അഞ്ചില്‍, ഡോ. ജിജി ബോബന്‍, ബിന്ദുമനോജ്, വിധു രമേശ്, ജോസ് കുമ്പക്കാട്, സാജു പൊട്ടുകളം, ജിഷ ടെനി, ജിനി ആന്‍റണി എന്നിവര്‍ പ്രസംഗിച്ചു.

കനത്ത മഴ : ചങ്ങനാശേരിയിൽ താഴ്ന്നപ്രദേശങ്ങളില്‍ ജലനിരപ്പുയരുന്നു

ചങ്ങനാശേരി: കനത്ത മഴയിൽ ചങ്ങനാശേരി താലൂക്കിന്‍റെ താഴ്ന്ന പ്രദേശങ്ങളില്‍ ജലനിരപ്പുയരുന്നു. പായിപ്പാട് പഞ്ചായത്തിന്‍റെ ഒന്നാം വാര്‍ഡില്‍പ്പെട്ട പൂവം, നക്രാല്‍, മൂലേപുതുവല്‍, അംബേദ്കര്‍ നഗര്‍, കോമങ്കേരിച്ചിറ ഭാഗങ്ങളിലും എസി കോളനിയിലുമാണ് ജനനിരപ്പില്‍ വര്‍ധനവുണ്ടായത്. എസി കനാലിലും ജലനിരപ്പ് ഉയര്‍ന്നിട്ടുണ്ട്. എസി റോഡില്‍ കിടങ്ങറയില്‍നിന്ന് മേപ്രാലിലേക്കുള്ള റോഡില്‍ ദൈവപ്പറമ്പ് ഭാഗത്ത് വെള്ളം കയറിയിട്ടുണ്ട്. ഇക്കഴിഞ്ഞ ജൂണില്‍ ഈ ഭാഗങ്ങളില്‍ മൂന്നുതവണ വെള്ളപ്പൊക്ക ദുരിതം നേരിട്ടിരുന്നു. മാടപ്പള്ളി വെങ്കോട്ടയില്‍ കൊരണ്ടിത്താനം സാജന്‍റെ വീടുനുമേല്‍ മരം കടപുഴകിവീണ് നാശം നേരിട്ടു. ഈ സമയം വീട്ടുകാര്‍ പുറത്തായിരുന്നതിനാല്‍ പരിക്കുകളില്ലാതെ രക്ഷപ്പെട്ടു. വീട് പൂര്‍ണമായും തകര്‍ന്നതോടെ സാജനും കുടുംബവും ബന്ധുവീട്ടിലേക്ക് താമസം മാറി.

നിവേദനം നല്‍കി

കുറുപ്പന്തറ: തോട്ടുവാ മുതല്‍ കല്ലറ പുത്തന്‍പള്ളി കവല വരെയുള്ള റോഡില്‍ പലയിടത്തും വന്‍ കുഴികള്‍ രൂപപ്പെട്ട് അപകടസാധ്യത നിലനില്‍ക്കുകയാണെന്നും റോഡിലെ കുഴികളടച്ചു ഗതാഗതയോഗ്യമാക്കുന്നതിനുള്ള നടപടികള്‍ സ്വീകരിക്കണമെന്ന് ആവശ്യപ്പെട്ടും മാഞ്ഞൂര്‍ പഞ്ചായത്ത് വൈസ് പ്രസിഡന്‍റ് ബിജു സെബാസ്റ്റ്യന്‍ കടുത്തുരുത്തി പിഡബ്ല്യുഡി എഎക്‌സ്ഇക്ക് നിവേദനം നല്‍കി. കുറുപ്പന്തറ കടവു ഭാഗത്ത് വാഹനങ്ങള്‍ ദിശതെറ്റി തോട്ടില്‍ വീഴാതിരിക്കാന്‍ മുന്‍കരുതല്‍ സ്വീകരിക്കണമെന്നും നിവേദനത്തിലുണ്ട്.

ഭായിക്ക് തലയോലപ്പറമ്പിന്‍റെ കണ്ണീരിൽ കുതിർന്ന യാത്രാമൊഴി

തലയോലപ്പറമ്പ്: പതിറ്റാണ്ടുകളായി തലയോലപ്പറമ്പിലെ ജനജീവിതത്തിന്‍റെ ഭാഗമായിരുന്ന ഭായിക്ക് (ബൽകിഷൻ സിംഗ്-80) തലയോലപ്പറമ്പ് നിവാസികൾ കണ്ണീരോടെ യാത്രാമൊഴിയേകി. പഞ്ചാബ് സ്വദേശിയായ ഭായി വാർദ്ധക്യസഹജമായ അസുഖത്തെത്തുടർന്ന് കഴിഞ്ഞദിവസമാണ് മരിച്ചത്. നാലു വർഷമായി ഭായി വല്ലകം ജീവനിലയത്തിലായിരുന്നു. ഇന്നലെ വൈക്കം ആശുപത്രി മോർച്ചറിയിൽനിന്ന് ജീവനിലയം സെക്രട്ടറി ജേക്കബ് പൂതവേലി, ജയിംസ്, ഷിഹാബ് പാറയിൽ, ഫിറോസ് മാവുങ്കൽ എന്നിവർ ചേർന്ന് മൃതദേഹം ഏറ്റുവാങ്ങി. ജീവനിലയത്തിൽ പ്രാർഥനയ്ക്കുശേഷം മൃതദേഹം തലയോലപ്പറമ്പിൽ പൊതുദർശനത്തിനു കൊണ്ടുവന്നപ്പോൾ നൂറുകണക്കിനാളുകൾ അന്ത്യോപചാരമർപ്പിച്ചു. തുടർന്ന് വൈക്കം നഗരസഭാ പൊതു ശ്മശാനത്തിൽ സംസ്കരിച്ചു.

വാഷും വാറ്റുപകരണങ്ങളും കണ്ടെടുത്തു

കടുത്തുരുത്തി: മാന്‍വെട്ടം മേമുറിയില്‍ വീടിനു സമീപം സൂക്ഷിച്ചിരുന്ന 30 ലിറ്റര്‍ വാറ്റുചാരായം നിര്‍മിക്കുന്നതിന് പാകപ്പെടുത്തിയ കോടയും വാറ്റുപകരണങ്ങളും എക്സൈസ് സംഘം പിടികൂടി. മേമ്മുറി തേവര്‍കാലായില്‍ വീട്ടില്‍ ഒ.അജികുമാര്‍ എന്നയാളുടെ വീടിന്‍റെ പിറകുവശത്ത് കുളിമുറിക്കു സമീപത്തുനിന്നാണ് ഇവ എക്‌സൈസ് സംഘം കണ്ടെടുത്തത്. അജികുമാര്‍ സംഭവസ്ഥലത്ത് ഇല്ലാതിരുന്നതിനാല്‍ ഇയാള്‍ക്കെതിരേ കേസെടുത്ത് അന്വേഷണം ആരംഭിച്ചു. കടുത്തുരുത്തി എക്സൈസ് ഇന്‍സ്പെക്ടര്‍ കെ.എസ്. അനില്‍കുമാറിന്‍റെ നേതൃത്വത്തിലുള്ള സംഘമാണ് രഹസ്യവിവരത്തെത്തുടര്‍ന്ന് പരിശോധന നടത്തിയത്. അസിസ്റ്റന്‍റ് എക്സൈസ് ഇന്‍സ്പെക്ടര്‍മാരായ വി.ആര്‍. രാജേഷ്, ജി. രാജേഷ്, കെ. മനോഷ് കുമാര്‍, പി.ബി. ബിജു, കെ. സുരേഷ്, പ്രിവന്‍റീവ് ഓഫീസര്‍ എം.ആര്‍. രജനീഷ്, സിവില്‍ എക്സൈസ് ഓഫീസര്‍മാരായ മനു മധു, കെ.എച്ച്. ഹരികൃഷ്ണന്‍, എം.എ. അമൃത് എന്നിവരും സംഘത്തിലുണ്ടായിരുന്നു.

മാഞ്ഞൂര്‍ പോലീസ് സ്റ്റേഷന്‍ പ്രവര്‍ത്തനം തുടങ്ങാന്‍ എത്രകാലം കാത്തിരിക്കണം..!

കടുത്തുരുത്തി: മാഞ്ഞൂര്‍ പോലീസ് സ്റ്റേഷന്‍റെ പ്രവര്‍ത്തനം ആരംഭിക്കാന്‍ വൈകുന്നു. പോലീസ് സ്റ്റേഷന്‍ ആരംഭിക്കുന്നതിന് കല്ലറ പഞ്ചായത്തിന്‍റെ ഉടമസ്ഥതയിലുണ്ടായിരുന്ന 30 സെന്‍റ് സ്ഥലവും 37 ലക്ഷം രൂപ ചെലവില്‍ നിര്‍മിച്ച 2250 ചതുരശ്രയടി കെട്ടിടവും ആഭ്യന്തര വകുപ്പിനു കൈമാറിയിട്ടു മൂന്നു വര്‍ഷമായി. കെട്ടിടത്തില്‍ അടിസ്ഥാന സൗകര്യം ഒരുക്കുന്നതില്‍ വന്ന കാലതാമസമാണ് സ്റ്റേഷന്‍ പ്രവര്‍ത്തനം വൈകാനിടയാക്കുന്നത്. ഉന്നത പോലീസ് ഉദ്യോഗസ്ഥര്‍ സ്ഥലത്തെത്തി കെട്ടിടത്തിന്‍റെ പരിശോധന നടത്തി. കെട്ടിടം പോലീസ് സ്റ്റേഷന് അനുയോജ്യമാണെന്ന റിപ്പോര്‍ട്ടും നല്‍കി. കെട്ടിടത്തില്‍ പ്രതികളെ സൂക്ഷിക്കുന്നതിനുള്ള സെല്‍, പോലീസ് ഉദ്യോഗസ്ഥര്‍ക്കുള്ള മുറികള്‍, ഓഫീസ് മുറി, ശൗചാലയം, ഓഫീസ് ഉപകരണങ്ങള്‍ എന്നിവ ഒരുക്കുന്നതിനുള്ള എസ്റ്റി മേറ്റ് എടുക്കുകയും ആഭ്യന്തര വകുപ്പിനു കൈമാറുകയും ചെയ്തിട്ട് ഒരുവര്‍ഷം കഴിഞ്ഞു. സി.കെ. ആശ എംഎല്‍എയുടെ പ്രാദേശിക വികസനഫണ്ടില്‍നിന്ന് അനുവദിച്ച പണം ഉപയോഗിച്ച് അടിസ്ഥാന സൗകര്യങ്ങള്‍ ഒരുക്കുന്നതിനുള്ള ഭരണാനുമതി നല്‍കിക്കൊണ്ടുള്ള സര്‍ക്കാര്‍ ഉത്തരവ് കഴിഞ്ഞമാസം പുറത്തിറങ്ങി. എംഎല്‍എയുടെ പ്രാദേശിക വികസന ഫണ്ട് ലഭ്യമായതോടെ തുടര്‍നടപടികള്‍ വേഗത്തിലാക്കണമെന്ന് ജനപ്രതിനിധികള്‍ ഉള്‍പ്പെടെയുള്ളവര്‍ ആവശ്യപ്പെട്ടു.

ഗൂഗിള്‍ മാപ്പ് നോക്കി സഞ്ചരിച്ച കാര്‍ തോട്ടിൽ വീഴാതെ രക്ഷപ്പെട്ടത് തലനാരിഴയ്ക്ക്

കടുത്തുരുത്തി: ഗൂഗിള്‍ മാപ്പ് നോക്കി സഞ്ചരിക്കുന്നതിനിടെ ദിശതെറ്റിയ ഇലട്രിക് കാര്‍ കുറുപ്പന്തറ കടവിലെ തോട്ടില്‍ വീഴാതെ അദ്ഭുതകരമായി രക്ഷപ്പെട്ടത് തലനാരിഴയ്ക്ക്. തോട്ടിലെ വെള്ളക്കെട്ടിലേക്കു കാറിന്‍റെ മുന്‍ഭാഗം വീഴാന്‍ പോകുന്നതിനിടെ പെട്ടെന്ന് ഡ്രൈവര്‍ വാഹനം നിര്‍ത്തിയതാണ് അപകടം ഒഴിവാക്കാനായത്. പത്തനംതിട്ട സ്വദേശികളായ രണ്ടുപേരാണ് കാറിലുണ്ടായിരുന്നത്. സംഭവം കണ്ട് ഓടിക്കൂടിയ പരിസരവാസികള്‍ ചേര്‍ന്നാണ് കാറിനുള്ളിലുണ്ടായിരുന്നവരെ പുറത്തിറങ്ങാന്‍ സഹായിച്ചത്. സമീപത്തുള്ള സ്വകാര്യ വ്യക്തിയുടെ ക്രെയിന്‍ കൊണ്ടുവന്ന് വാഹനം ഇവിടെനിന്നു സുരക്ഷിത സ്ഥാനത്തേക്കു മാറ്റി. ഇന്നലെ രാവിലെ 11.15ന് കനത്ത മഴയുള്ള സമയത്തായിരുന്നു സംഭവം. കുറുപ്പന്തറ ഭാഗത്തുനിന്നു ഗൂഗിള്‍ മാപ്പ് നോക്കി വരുന്നതിനിടെ വാഹനം വളവു തിരിയുന്നതിനു പകരം നേരേ കടവിലേക്കു പോകുകയായിരുന്നു. വെള്ളക്കെട്ടിലൂടെ മുന്നോട്ടു നീങ്ങുന്നതിനിടെ കാറില്‍ വെള്ളം കയറി. ഉടന്‍തന്നെ കാര്‍ യാത്രികര്‍ വാതില്‍ തുറന്ന് പുറത്തിറങ്ങുകയായിരുന്നു. ഒന്നരയടി കൂടി മുന്നോട്ടു പോയിരുന്നെങ്കില്‍ നിറഞ്ഞൊഴുകുന്ന തോട്ടിലേക്കു വാഹനം വീണ് വന്‍ അപകടം സംഭവിക്കുമായിരുന്നു. കുറുപ്പന്തറ കടവില്‍ ദിശതെറ്റി വാഹനങ്ങള്‍ തോട്ടിലേക്കു പോകാതിരിക്കാന്‍ ഈ ഭാഗത്ത് സൂചനാ ബോര്‍ഡുകള്‍ സ്ഥാപിച്ചിട്ടുണ്ടെങ്കിലും ഗൂഗിള്‍മാപ്പ് നോക്കി ഡ്രൈവ് ചെയ്യുന്നവര്‍ ഇതു ശ്രദ്ധിക്കാതിരിക്കുന്നതാണ് അപകടത്തിന് കാരണമാകുന്നത്.

ബിസിനസ്‍ പങ്കാളിത്തം വാഗ്ദാനം ചെയ്ത് 17 ലക്ഷം തട്ടിയ കേസില്‍ മൂന്നു പ്രതികള്‍ അറസ്റ്റില്‍

ചിങ്ങവനം: ബിസിനസില്‍ പങ്കാളിയാക്കാം എന്ന് പറഞ്ഞു വിശ്വസിപ്പിച്ച് 17 ലക്ഷം രൂപ തട്ടിയ കേസില്‍ മൂന്ന് പ്രതികള്‍ അറസ്റ്റില്‍. കുഴിമറ്റം സ്വദേശിയായ ശ്രീകുമാര്‍ എന്നയാളെ നഴ്‌സറി ബിസിനസില്‍ പങ്കാളിയാക്കാം എന്ന് പറഞ്ഞു വിശ്വസിപ്പിച്ച് 17 ലക്ഷം രൂപ വാങ്ങിയെടുത്ത് പ്രതികള്‍ കബളിപ്പിക്കുകയായിരുന്നു. കേസില്‍ പാലക്കാട് കരയില്‍ മഠത്തില്‍ ബിജു പോള്‍(54), എറണാകുളം കുമ്പളങ്ങി ചെട്ടിപ്പറമ്പില്‍ സി.വി. വിനു(47), വയനാട് പുല്‍പ്പള്ളി മഠത്തില്‍ ലിജോ ജോണ്‍(45) എന്നിവരെയാണ് ചിങ്ങവനം പോലീസ് കോഴിക്കോട്ടുനിന്ന് അറസ്റ്റ് ചെയ്തത്. പ്രതികളെ കോടതിയില്‍ ഹാജരാക്കി.

പള്ളിച്ചിറ ക്ഷേത്രത്തിലെ മോഷണം: പ്രതി പിടിയിൽ

കുമരകം: പള്ളിച്ചിറ ഗുരുക്ഷേത്രത്തിൽ മോഷണം നടത്തിയ ഇതരസംസ്ഥാന ക്കാരൻ അറസ്റ്റിലായി. പശ്ചിമ ബംഗാൾ സൗത്ത് 24 പരഗണാസ് കെനിയിൽ മുഹമ്മദ് ഷംസുൾ ഷേയ്ഖ് ഖാൻ (32) ആണ് കുമരകം പോലീസിന്‍റെ പിടിയിലായത്. ചൊവ്വാഴ്ച പുലർച്ചെ 1.30-ന് ക്ഷേത്രത്തിൽനിന്ന് ആരാധനയ്ക്ക് ഉപയോഗിക്കുന്ന ഓട് കൊണ്ട് നിർമിച്ച ആറു വിളക്കുകളും നാല് ഉരുളികളും ഒരു മൊന്തയും ഉൾപ്പെടെ ഇരുപതിനായിരം രൂപയോളം വില വരുന്ന സാധനങ്ങൾ മോഷണം ചെയ്ത കേസിലാണ് അറസ്റ്റ്. ക്ഷേത്രം ജീവനക്കാരന്‍റെ മൊഴിയുടെ അടിസ്ഥാനത്തിൽ കുമരകം പോലീസ് കേസ് രജിസ്റ്റർ ചെയ്യുകയും അന്വേഷണം നടത്തുകയും ചെയ്തു. സിസിടിവി കാമറകളുടെയും സാക്ഷിമൊഴികളുടെയും സഹായത്തോടെ മോഷ്ടാവിന്‍റെ ഏകദേശം രൂപം മനസിലാക്കാൻ കഴിഞ്ഞ അന്വേഷണ സംഘം ഇന്നലെ ഉച്ചയ്ക്ക് ഇല്ലിക്കലിൽനിന്ന് പ്രതിയെ പിടികൂടുകയായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

മര്‍ത്തശ്മൂനി പള്ളിയില്‍ ഓര്‍മപ്പെരുന്നാള്‍

പേരൂര്‍: മര്‍ത്തശ്മൂനി പള്ളിയില്‍ മര്‍ത്തശ്മൂനി അമ്മയുടെയും ഏഴു മക്കളുടെയും മാര്‍ ഏലിയസറിന്‍റെയും ഓര്‍മപ്പെരുന്നാള്‍ ഇന്നു മുതല്‍ ഓഗസ്റ്റ് ഒന്നു വരെ ആഘോഷിക്കും. ദിവസവും രാവിലെ 8.30ന് വിശുദ്ധ മൂന്നിന്മേല്‍ കുര്‍ബാന, വിശുദ്ധ അഞ്ചിന്മേല്‍ കുര്‍ബാന. വിശുദ്ധ ഒമ്പതിന്മേല്‍ കുര്‍ബാന, 9.30നു മധ്യസ്ഥ പ്രാര്‍ഥന, 10ന് അനുഗ്രഹ പ്രഭാഷണം എന്നിവയുണ്ടായിരിക്കും. ഇന്നു രാവിലെ ഡോ. തോമസ് മാര്‍ തിമോത്തിയോസിന്‍റെ മുഖ്യകാർമികത്വത്തിൽ വിശുദ്ധ മൂന്നിന്മേല്‍ കുര്‍ബാന, തീര്‍ഥാടന പള്ളി പ്രഖ്യാപനം, കൊടിയേറ്റ് എന്നിവ നടക്കും. നാളെ രാവിലെ 11നു നടക്കുന്ന വനിതാ സമാജം മേഖലാ സമ്മേളനം സഖറിയാസ് മാര്‍ പീലക്‌സിനോസ് ഉദ്ഘാടനം ചെയ്യും. ഡോ. തോമസ് മാര്‍ തീമോത്തിയോസ് അധ്യക്ഷത വഹിക്കും. 31നു വൈകുന്നേരം ആഘോഷമായ റാസ നടക്കും. ഓഗസ്റ്റ് ഒന്നിനു രാവിലെ ഒന്‍പതിന്മേല്‍ കുര്‍ബാനയ്ക്കു ശ്രേഷ്ഠ കാതോലിക്കാ മാര്‍ ബസേലിയോസ് ജോസഫ് ബാവാ മുഖ്യകാര്‍മികത്വം വഹിക്കും. തുടര്‍ന്നു പരീക്ഷകളില്‍ മികച്ച വിജയം നേടിയവര്‍ക്ക് എന്‍ഡോമെന്‍റ് വിതരണം ചെയ്യും. ഉച്ചകഴിഞ്ഞു മൂന്നിനു പ്രദക്ഷിണം ആശീര്‍വാദം, പാച്ചോര്‍ നേര്‍ച്ച, കൊടിയിറക്ക്. തിരുനാളിനു വികാരി മാണി കോര്‍ എപ്പിസ്‌കോപ്പ കല്ലാപുറത്ത്, ഫാ. ഏബഹാം കരിമ്പന്നൂര്‍ എന്നിവര്‍ നേതൃത്വം നല്കും.

അല്‍ഫോന്‍സാമ്മ രക്ഷയുടെ സമയത്തിനായി കാത്തിരുന്നവള്‍: മാര്‍ ജോസഫ് കൊല്ലംപറമ്പില്‍

ഭരണങ്ങാനം: കര്‍ത്താവിന്‍റെ കുരിശിനോടുകൂടെ തന്‍റെ കുരിശും ചേര്‍ത്തുവച്ച് കുരിശിന്‍റെ വഴിയേ സഞ്ചരിച്ച വലിയ മാതൃകയാണ് അല്‍ഫോന്‍സാമ്മ നമുക്കു തരുന്നതെന്ന് ഷംഷാബാദ് രൂപത സഹായ മെത്രാന്‍ മാര്‍ ജോസഫ് കൊല്ലംപറമ്പില്‍. കര്‍ത്താവിനെയും ലോകത്തെയും ഒന്നിച്ചു സേവിക്കാന്‍ സാധിക്കുകയില്ലെന്ന് മനസിലാക്കിയ അല്‍ഫോന്‍സാമ്മ തന്‍റെ ജീവിതയാത്രയില്‍ കര്‍ത്താവിനോടുകൂടെ നടന്നു. അല്‍ഫോന്‍സാമ്മയുടെ തിരുനാളില്‍ വിശുദ്ധ കുര്‍ബാന അര്‍പ്പിച്ചു സന്ദേശം നല്‍കുകയായിരുന്നു ബിഷപ്. ഇന്നലെ രാവിലെ ഫാ. സെബാസ്റ്റ്യന്‍ നടുത്തടം, ഫാ. ജോസ് തറപ്പേല്‍, ഫാ. അമല്‍ ഇടത്തില്‍ സിഎംഐ, ഫാ. ജോസ് നെല്ലിക്കത്തെരുവില്‍, ഫാ. അലക്‌സ് തണ്ണിപ്പാറ സിഎംഐ, ഫാ. കുര്യാക്കോസ് വടക്കേതകിടിയേല്‍, ഫാ. മാത്യു തെക്കേല്‍, ഫാ. ജോസഫ് അരിമറ്റത്തില്‍ എന്നിവര്‍ വിശുദ്ധ കുര്‍ബാന അര്‍പ്പിച്ചു. ഫാ. ജോര്‍ജ് ഈറ്റക്കക്കുന്നേല്‍ റംശാ പ്രാര്‍ഥനയ്ക്കും ഫാ. ജോസഫ് മൂക്കന്‍തോട്ടത്തില്‍ ജപമാല പ്രദക്ഷിണത്തിനും നേതൃത്വം വഹിച്ചു. അല്‍ഫോന്‍സ തീര്‍ഥാടനം ഭക്തിസാന്ദ്രമായി പാലാ അല്‍ഫോന്‍സ കോളജില്‍നിന്നുള്ള വിദ്യാര്‍ഥിനികള്‍ ഭരണങ്ങാനത്ത് തീര്‍ഥാടനം നടത്തി. പ്രിന്‍സിപ്പല്‍ സിസ്റ്റര്‍ റിയ മാത്യു എഫ്‌സിസി, ഫാ. കുര്യാക്കോസ് വടക്കേതകിടിയേല്‍ എന്നിവര്‍ നേതൃത്വം നല്‍കി. ഇന്നത്തെ തിരുക്കർമങ്ങൾ രാവിലെ 5.30 നും 6.45നും 8.30 നും പത്തിനും വിശുദ്ധ കുര്‍ബാന. 11.30ന് വിശുദ്ധ കുര്‍ബാന - മാര്‍ ജോസ് പുളിക്കല്‍. 2.30നും 3.30നും 4.30നും അഞ്ചിനും 6.15നും ഏഴിനും വിശുദ്ധ കുര്‍ബാന.

തട്ടിപ്പുകേസില്‍ ഒളിവിലായിരുന്ന രണ്ടും മൂന്നും പ്രതികള്‍ അറസ്റ്റില്‍

പാമ്പാടി: തട്ടിപ്പുകേസില്‍ ഒളിവിലായിരുന്ന രണ്ടും മൂന്നും പ്രതികള്‍ അറസ്റ്റില്‍. പെരുമ്പാവൂരുള്ള ക്രഷറില്‍ ഓടിച്ച് ലോറിയുടെ സിസി തവണകളും ടെസ്റ്റിംഗ് ജോലികളും നടത്തിക്കൊള്ളാമെന്നു പറഞ്ഞു വിശ്വസിപ്പിച്ച് വാഹനത്തിന്‍റെ മാസത്തവണകള്‍ അടയ്ക്കാതെയും ടെസ്റ്റിംഗ് നടപടികള്‍ ചെയ്യാതെയും വാഹനം തിരികെ നല്‍കാതെയുമാണ് സംഘം തട്ടിപ്പു നടത്തിയത്. പൊന്‍കുന്നം കണ്ണുപറമ്പില്‍ കെ.എ. ഷാനവാസ് (41), തിരുനെല്‍വേലി കതിരവന്‍ നഗറില്‍ പി. തിരുമലൈ (40) എന്നിവരാണ് കേസില്‍ പാമ്പാടി പോലീസിന്‍റെ പിടിയിലായത്. ഒന്നാം പ്രതി സന്തോഷ് കുമാരനെ നേരത്തേ അറസ്റ്റ് ചെയ്തിരുന്നു. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

വാല്യുവേഴ്സിനെ ആദരിച്ചു

കോട്ടയം: ടെക്നിക്കൽ വാല്യുവേഴ്സ് അസോസിയേഷൻ കോട്ടയത്തെ പ്രമുഖ വാല്യുവേഴ്സിനെ ആദരിച്ചു. പബ്ലിക് ലൈബ്രറി ഹാളിൽ നടന്ന പരിപാടിയിൽ പ്രസിഡന്‍റ് ഏബ്രഹാം ഇട്ടിച്ചെറിയ അധ്യക്ഷത വഹിച്ചു. മുനിസിപ്പൽ ചെയർപേഴ്സൺ ബിൻസി സെബാസ്റ്റ്യൻ ഉദ്ഘാടനം ചെയ്തു. അസോസിയേഷൻ കോട്ടയം-ഇടുക്കി ചാപ്റ്റർ പ്രസിഡന്‍റ് ഉമ്മൻ സി. വേങ്ങൽ, ഡോ. വിവിഷ് തോമസ്, കെ.എ. തോമസ്, ഏബ്രഹാം പി. തോമസ്, ജോസ് ചാക്കോ, പ്രിൻസ് മാത്യു, മിനി കെ. ആന്‍റണി, ദീപ വിവിഷ്, മാത്യു തോമസ്, പ്രെട്ടി വർഗീസ് എന്നിവരെ ആദരിച്ചു.

ധന്യന്‍ മാര്‍ തോമസ് കുര്യാളശേരിയെ അടക്കം ചെയ്തിട്ട് നാളെ 90 വര്‍ഷം

ബെന്നി ചിറയില്‍ ചങ്ങനാശേരി: ചങ്ങനാശേരി രൂപതയുടെ പ്രഥമ തദ്ദേശീയ മെത്രാനും ആരാധനസന്യാസിനീ സമൂഹത്തിന്‍റെ സ്ഥാപകനുമായ ധന്യന്‍ മാര്‍ തോമസ് കുര്യാളശേരിയുടെ ഭൗതികശരീരം റോമില്‍നിന്നു നാട്ടിലെത്തിച്ച് ചങ്ങനാശേരി മെത്രാപ്പൊലിത്തന്‍ പള്ളിയുടെ മദ്ബഹായില്‍ അടക്കം ചെയ്തിട്ടു നാളെ 90 വര്‍ഷം. 1925 ജൂണ്‍ രണ്ടിന് റോമില്‍വച്ച് ദിവംഗതനായ അദ്ദേഹത്തിന്‍റെ ഭൗതികദേഹം ആദ്യം അവിടെ കബറടക്കം ചെയ്യുകയായിരുന്നു. പത്തുവര്‍ഷത്തിനുശേഷം ചങ്ങനാശേരി ബിഷപ് മാര്‍ ജയിംസ് കാളാശേരിയും സെക്രട്ടറിയായിരുന്ന ഫാ. മാത്യു പുരയ്ക്കലും ഒരുമിച്ച് റോമിലെത്തി പതിനൊന്നാം പീയൂസ് പാപ്പയെ സന്ദര്‍ശിച്ച് മാർ കുര്യാളശേരിയുടെ ഭൗതികാവശിഷ്ടങ്ങള്‍ മാതൃരൂപതയായ ചങ്ങനാശേരിയിലേക്കു കൊണ്ടുപോകുന്നതിന് അനുവാദം അപേക്ഷിച്ചു. ഇക്കാര്യത്തിന് ഇറ്റാലിയന്‍ സര്‍ക്കാരിന്‍റെ അനുമതി ആവശ്യമായിരുന്നു.1935 ജൂണ്‍ 21ന് മോണ്‍. പിസാനി, ഫാ. എല്‍.ജെ. ചിറ്റൂര്‍, സി.ടി. കൊട്ടാരം, തോമസ് മുത്തേടന്‍, തോമസ് നങ്ങച്ചിവീട്ടില്‍ തുടങ്ങിയ പ്രൊപ്പഗാന്താ വിദ്യാര്‍ഥികളുടെ സഹകരണത്തോടെ കല്ലറ തുറന്ന് പേടകമെടുത്ത് പ്രത്യേകം അലങ്കരിച്ച വണ്ടിയില്‍ പട്ടണ പ്രദക്ഷിണം നടത്തി ഇരുമ്പുപെട്ടിയിലാക്കി സ്‌പെഷല്‍ ട്രെയിനില്‍ നേപ്പില്‍സില്‍ എത്തിച്ചു. തുടര്‍ന്ന് കപ്പല്‍മാര്‍ഗം ഗോവവഴി കൊച്ചിയിലും തുടര്‍ന്ന് ചമ്പക്കുളം കല്ലൂര്‍ക്കാട് പള്ളിയിലും പൂജ്യാവശിഷ്ടം എത്തിച്ചു. 1935 ജൂലൈ 25ന് രാവിലെ ചങ്ങനാശേരിയിലെത്തിച്ച് മാർ കുര്യാളശേരി ഭൗതികശരീരം വലിയ ജനാവലിയുടെ ആദരവോടെയാണ് ചങ്ങനാശേരി മെത്രാപ്പോലീത്തന്‍പള്ളിയിലെ മദ്ബഹയില്‍ സംസ്‌കരിച്ചത്. 1985 ജനുവരി 25ന് മാര്‍ തോമസ് കുര്യാളശേരിയെ ദൈവദാസനായും 2011 ഏപ്രില്‍ രണ്ടിന് ധന്യപദവിയിലേക്കും ഉയര്‍ത്തി. മര്‍ത്ത്മറിയം കബറിടപള്ളി നിര്‍മാണം പൂര്‍ത്തിയായപ്പോള്‍ 2015 മാര്‍ച്ച് 25ന് മാര്‍ തോമസ് കുര്യാളശേരിയുടെ കബറിടം ഈ പള്ളിയിലേക്കു മാറ്റി സ്ഥാപിച്ചു. മാർ കുര്യാളശേരിയുടെ ചരമശതാബ്ദി ഇക്കഴിഞ്ഞ ജൂണ്‍ രണ്ടിന് വിപുലമായി ആഘോഷിച്ചിരുന്നു. വിശുദ്ധ യാക്കോബ് ശ്ലീഹായുടെ തിരുനാള്‍ ദിനമായ അന്ന് വൈകുന്നേരം അഞ്ചിന് കബറിടപ്പള്ളിയില്‍ വിശുദ്ധ കുര്‍ബാനയും പ്രത്യേക പ്രാര്‍ഥനയും ഉണ്ടായിരിക്കുമെന്ന് നാമകരണ നടപടികളുടെ വൈസ്‌പോസ്റ്റുലേറ്റര്‍ സിസ്റ്റര്‍ അനറ്റ് ചാലങ്ങാടി എസ്എബിഎസ് അറിയിച്ചു.

കെഎസ്ഇബി ജീവനക്കാരെ കുരുക്കി വൈദ്യുതി പോസ്റ്റുകളിൽ ഉപയോഗശൂന്യമായ കേബിളുകൾ

ഗാന്ധിനഗർ: വൈദ്യുതി പോസ്റ്റുകളിൽ ഉപയോഗശൂന്യമായ കേബിളുകൾ നിറയുന്നത് കെഎസ്ഇബി ജീവനക്കാർക്ക് ബുദ്ധിമുട്ടാകുന്നു. ഒരു പോസ്റ്റിൽ തന്നെ നിരവധി കേബിൾ ടിവി ക്കാരുടെ കേബിളുകളും നെറ്റ്‌വർക്ക് കേബിളുകളുമാണുള്ളത്. എന്നാൽ ഉപയോഗശൂന്യമായ നിരവധി കേബിളുകളാണ് ഓരോ പോസ്റ്റിലും ചുറ്റിപ്പിണഞ്ഞു കിടക്കുന്നത്. ഇത് ലൈൻമാൻമാർക്ക് പോസ്റ്റിൽ കയറുന്നതിനും മറ്റും തടസങ്ങൾ സൃഷ്ടിക്കുന്നതായി ആരോപണമുണ്ട്. ഉപയോഗശൂന്യമായ കേബിളുകൾ അഴിച്ചുമാറ്റി ഉപയോഗിക്കുന്നത് മാത്രം നിലനിർത്തിയാൽ പോസ്റ്റിലെ തടസങ്ങൾ ഒഴിവാക്കാം.

നായ്ക്കളെക്കൊണ്ട് പൊറുതിമുട്ടി കുമരകം നിവാസികൾ

കുമരകം: കുമരകത്തെ പല റോഡുകളും കടത്തിണ്ണകളും ബസ് കാത്തിരിപ്പുകേന്ദ്രങ്ങളും നായ്ക്കൂട്ടം സ്വന്തമാക്കിയതു പോലെ പാലങ്ങളും കൈയടക്കിത്തുടങ്ങി. ഭയപ്പെട്ടിട്ട് യാത്രക്കാർക്ക് പാലത്തിൽ കയറാൻ കഴിയാത്ത അവസ്ഥയാണിപ്പോൾ. ഗവ. ആശുപത്രി പാലം നായ്ക്കൾ താവളമാക്കിയതോടെ ആശുപത്രിയിലേക്ക് പോകുന്ന രോഗികൾ ബുദ്ധിമുട്ടിലായി. ഈ പാലത്തിലൂടെ യാത്ര ചെയ്യുന്ന ഇടവട്ടത്തിന്‍റെ പടിഞ്ഞാറെ ചിറയിലും സമീപത്തെ തുരുത്തുകളിലുള്ളവരും നായ്ക്കൂട്ടങ്ങളെ ഭയന്നാണ് ഇതിലെ സഞ്ചരിക്കുന്നത്. ഇടവട്ടത്തുള്ള കട്ടികൾക്ക് ഈ പാലം കയറി വേണം സ്കൂളിലെത്താൻ. നായ്കളെ ഭയന്ന് സ്കൂളിൽ പോകാൻ പല കുട്ടികളും മടിക്കുകയാണ്. കുമരകം ആറ്റാമംഗലം പള്ളിക്കു സമീപത്തെ താത്കാലിക ബസ് സ്റ്റാൻഡ്, ചന്തക്കവല, മത്സ്യമാർക്കറ്റ്, കുമരകം ബസ്ബേ, അപ്സര ജംഗ്ഷൻ, ഗവ. ഹൈസ്കൂൾ തുടങ്ങിയ പ്രദേശങ്ങളിലെല്ലാം നായ്ക്കൂട്ടങ്ങളുടെ വിളയാട്ടമാണ്. തെരുവുനായ്ക്കളുടെ എണ്ണം ക്രമാതീതമായി വർധിക്കുന്നത് കുമരകത്തിന്‍റെ വിനോദഞ്ചാരമേഖലയുടെ വളർച്ചയ്ക്കും ഗുണകരമല്ല.

ഉഴവൂർ വിജയന്‍റെ ഓർമകൾ പുതുക്കി പാർട്ടി പ്രവർത്തകരും സുഹൃത്തുകളും

കുറവിലങ്ങാട്: വാക്കുകളിൽ നർമം ചാലിച്ച് ജനസഹസ്രങ്ങളെ ചിരിപ്പിക്കുകയും ചിന്തിപ്പിക്കുകയും ചെയ്ത ഉഴവൂർ വിജയന്‍റെ ഓർമകൾ പുതുക്കി പാർട്ടി പ്രവർത്തകരും സുഹൃത്തുകളും. ഉഴവൂർ വിജയൻ അനുസ്മരണ സമ്മേളനവും വിദ്യാഭ്യാസ അവാർഡ് വിതരണവും വിജയന്‍റെ വസതിയിൽ നടത്തി. സ്‌മൃതി മണ്ഡപത്തിൽ മന്ത്രി എ.കെ. ശശീന്ദ്രൻ, എൻസിപി പ്രസിഡന്‍റ് തോമസ് കെ. തോമസ് എന്നിവർ പുഷ്‌പാർച്ചന നടത്തി. കെ. ചന്ദ്രശേഖരൻ അധ്യക്ഷത വഹിച്ചു. തോമസ് കെ. തോമസ് എംഎൽഎ ഉദ്ഘാടനം ചെയ്തു. വിവിധ പരീക്ഷകളിൽ ഏറ്റവും കൂടുതൽ മാർക്ക് വാങ്ങിയ വിദ്യാർഥികൾക്ക് മന്ത്രി എ. കെ ശശീന്ദ്രൻ അവാർഡ് വിതരണം ചെയ്തു. മോൻസ് ജോസഫ് എംഎൽഎ, പഞ്ചായത്ത് പ്രസിഡന്‍റ് ബെൽജി ഇമ്മാനുവൽ, ജില്ലാ പഞ്ചായത്തംഗം പി.എം. മാത്യു, സണ്ണി തോമസ്, ബ്ലോക്ക് പഞ്ചായത്ത് വൈസ് പ്രസിഡന്‍റ് ഡോ. സിന്ധുമോൾ ജേക്കബ്, രമേശ്‌ ബാബു, രാജൻ മാസ്റ്റർ, ലതിക സുഭാഷ്, മാത്യൂസ് ജോർജ്, കെ.ആർ രാജൻ, സുഭാഷ് പുഞ്ചക്കോട്ടിൽ എന്നിവർ പ്രസംഗിച്ചു.

അല്‍ഫോന്‍സാമ്മയുടെ മുറിയില്‍ പ്രാര്‍ഥിക്കാന്‍ വിശ്വാസികളുടെ തിരക്ക്

ഭരണങ്ങാനം: ഭാരതസഭയുടെ അനുഗ്രഹമായ വിശുദ്ധ അൽഫോൻസാമ്മയുടെ മാധ്യസ്ഥ്യം തേടി വിശ്വാസികള്‍ ഭരണങ്ങാനത്തേക്ക് ഒഴുകുന്നു. അല്‍ഫോന്‍സാമ്മയുടെ കബറിടത്തിലെത്തി പ്രാർഥിക്കാനും തങ്ങളുടെ യാചനകളും അർഥനകളും അൽഫോൻസാമ്മ വഴി ദൈവത്തിലേക്ക് അർപ്പിക്കാനുമായി നാടിന്‍റെ നാനാഭാഗത്തു നിന്നും തീർഥാടകപ്രവാഹമാണ്. അൽഫോൻസാമ്മ ജീവിച്ച് മരിച്ച മഠവും സന്ദർശിച്ചാണ് ആളുകൾ മടങ്ങുന്നത്. അല്‍ഫോന്‍സാമ്മയുടെ മുറിയില്‍, കട്ടിലിനരികേ ജീവിതദുഃഖങ്ങള്‍ പങ്കുവയ്ക്കുന്നു. നിയോഗങ്ങള്‍ എഴുതി സമര്‍പ്പിക്കുന്നു. നിറമിഴികളോടെ വരുന്നവര്‍ നിറമനസോടെയാണ് തിരികെ പോകുന്നത്. വിശുദ്ധയുടെ ജീവിതം കണ്ടു മനസിലാക്കാന്‍, അല്‍ഫോന്‍സാമ്മ ഉപയോഗിച്ച മേശ, കസേര, കുട, ചെരുപ്പ്, പേന തുടങ്ങിയവയെല്ലാം ഉള്‍പ്പെടുത്തിയ മ്യൂസിയം ഏറ്റവും മികച്ച രീതിയില്‍ ക്രമപ്പെടുത്തിയിരിക്കുന്നു. ക്ലാരമഠത്തില്‍ 1936 മുതല്‍ 1946 വരെ ജീവിച്ച അല്‍ഫോന്‍സാമ്മ ദൈവകരങ്ങളിലേക്ക് തന്‍റെ ആത്മാവിനെ സമര്‍പ്പിച്ചിട്ട് ഇത് എഴുപത്തിയൊമ്പതാമത്തെ വര്‍ഷം. വിശുദ്ധയെന്ന് ബനഡിക്ട് പതിനാറാമന്‍ പാപ്പ പ്രഖ്യാപിച്ചിട്ട് 17 വര്‍ഷം. ഇന്നും അല്‍ഫോന്‍സാ എന്ന നാമം ലോകമെമ്പാടും മാറ്റൊലികൊള്ളുന്നു. അല്‍ഫോന്‍സാമ്മ പ്രാര്‍ഥിച്ചിരുന്ന മഠം കപ്പേളയില്‍ പ്രാര്‍ഥിക്കുവാനുള്ള അവസരവും തീര്‍ഥാടകര്‍ക്ക് നല്‍കുന്നുണ്ട്. കൂടാതെ, അവരുടെ നിയോഗങ്ങള്‍ സമര്‍പ്പിച്ച് സിസ്റ്റർമാരും പ്രാര്‍ഥിക്കുന്നു. നിരവധി അത്ഭുത സാക്ഷ്യങ്ങളുമായിട്ടാണ് തീർഥാടകരുടെ മടക്കം.

തദ്ദേശ തെരഞ്ഞെടുപ്പ്: ജില്ലയില്‍ 15,39,188 വോട്ടര്‍മാര്‍

കോട്ടയം: തദ്ദേശ സ്വയംഭരണ സ്ഥാപനങ്ങളിലേക്കുള്ള കരട് വോട്ടര്‍പട്ടിക സംസ്ഥാന തെരഞ്ഞെടുപ്പു കമ്മീഷന്‍ പ്രസിദ്ധീകരിച്ചു. ഓഗസ്റ്റ് ഏഴുവരെ വോട്ടര്‍പട്ടികയില്‍ പേരു ചേര്‍ക്കാനും തിരുത്തല്‍ വരുത്താനും അവസരമുണ്ട്. കരട് വോട്ടര്‍പട്ടിക പ്രകാരം ജില്ലയില്‍ 15,39,188 വോട്ടര്‍മാരുണ്ട്. 8,000,85 സ്ത്രീവോട്ടര്‍മാരും 7,39,094 പുരുഷവോട്ടര്‍മാരും, ഒന്‍പതു ട്രാന്‍സ്ജെന്‍ഡര്‍ വോട്ടര്‍മാരും. അന്തിമവോട്ടര്‍പട്ടിക ഓഗസ്റ്റ് 30ന് പ്രസിദ്ധീകരിക്കും. 2024ല്‍ സമ്മറി റിവിഷന്‍ നടത്തിയ വോട്ടര്‍പട്ടിക പുതിയ വാര്‍ഡുകളിലേക്ക് ക്രമീകരിച്ചാണ് കരട് പട്ടിക തയാറാക്കിയിട്ടുള്ളത്. 2020ലെ പൊതുതെരഞ്ഞെടുപ്പിനുശേഷം നിലവിലുണ്ടായിരുന്ന വോട്ടര്‍പട്ടിക 2023 ഒക്ടോബറിലും 2024 ജൂലൈയിലും സമ്മറി റിവിഷന്‍ നടത്തിയിരുന്നു. കരടു വോട്ടര്‍പട്ടിക എല്ലാ തദ്ദേശ സ്വയംഭരണസ്ഥാപനങ്ങളിലും വില്ലേജ്, താലൂക്ക് ഓഫീസുകളിലും സംസ്ഥാന തെരഞ്ഞെടുപ്പ് കമ്മീഷന്‍റെ ec.kerala.gov.in വെബ് സൈറ്റിലും പരിശോധനയ്ക്കു ലഭിക്കും. 2025 ജനുവരി ഒന്നിനോ അതിനു മുന്‍പോ 18 വയസ് പൂര്‍ത്തിയായവര്‍ക്ക് ഓഗസ്റ്റ് ഏഴുവരെ വോട്ടര്‍പട്ടികയില്‍ പേരു ചേര്‍ക്കാം. വോട്ടര്‍പട്ടികയില്‍ പുതുതായി പേരുചേര്‍ക്കുന്നതിനും (ഫോറം 4) അപേക്ഷ, ഉള്‍ക്കുറിപ്പുകള്‍ തിരുത്തുന്നതിനും (ഫോറം 6), സ്ഥാനമാറ്റം വരുത്തുന്നതിനും (ഫോറം7) സംസ്ഥാന തെരഞ്ഞെടുപ്പ് കമ്മീഷന്‍റെ ec.kerala.gov.in വെബ് സൈറ്റില്‍ ഓണ്‍ലൈനായി അപേക്ഷിക്കണം. ഓണ്‍ലൈനായി അപേക്ഷിക്കുമ്പോള്‍ ഹിയറിംഗിനുള്ള കംപ്യൂട്ടര്‍ ജനറേറ്റഡ് നോട്ടീസ് ലഭിക്കും. നോട്ടീസില്‍ പറഞ്ഞിട്ടുള്ള തീയതിയില്‍ ആവശ്യമായ രേഖകള്‍ സഹിതം ഹിയറിംഗിനു നേരിട്ടു ഹാജരാകണം. വോട്ടര്‍പട്ടികയില്‍ പേര് ഒഴിവാക്കുന്നതു സംബന്ധിച്ച ആക്ഷേപങ്ങള്‍ (ഫോറം 5) ഓണ്‍ലൈനായി രജിസ്റ്റര്‍ ചെയ്യുകയും അതിന്‍റെ പ്രിന്‍റൗട്ടില്‍ അപേക്ഷകനും ആ വാര്‍ഡിലെ ഒരു വോട്ടറും ഒപ്പിട്ടു നേരിട്ടോ തപാലിലൂടെയോ ഇലക്ടറല്‍ രജിസ്ട്രേഷന്‍ ഓഫീസര്‍ക്ക് സമര്‍പ്പിക്കണം. ഓണ്‍ലൈന്‍ മുഖേന അല്ലാതെയും നിര്‍ദിഷ്ട ഫോറത്തില്‍ ഇലക്‌ഷന്‍ രജിസ്ട്രേഷന്‍ ഓഫീസര്‍ക്ക് അപേക്ഷിക്കാം. പഞ്ചായത്തുകളിലും മുനിസിപ്പാലിറ്റികളിലും അതത് സ്ഥാപനങ്ങളിലെ സെക്രട്ടറിമാരും കോര്‍പറേഷനുകളില്‍ അഡീഷണല്‍ സെക്രട്ടറിയുമാണ് ഇലക്ടറല്‍ രജിസ്ട്രേഷന്‍ ഓഫീസര്‍മാര്‍. അപേക്ഷകളിലും ആക്ഷേപങ്ങളിലും ഇലക്ടറല്‍ രജിസ്ട്രേഷന്‍ ഓഫീസര്‍മാര്‍ സ്വീകരിക്കുന്ന നടപടിക്കെതിരേ തദ്ദേശ സ്വയംഭരണവകുപ്പ് ജില്ലാ ജോയിന്‍റ് ഡയറക്ടര്‍ക്ക് അപ്പീല്‍ നല്‍കാം. ഉത്തരവ് തീയതി മുതല്‍ 15 ദിവസത്തിനകമാണ് അപ്പീല്‍ നല്‍കേണ്ടത്. ജില്ലാ പഞ്ചായത്ത് വാര്‍ഡുകള്‍ പുനര്‍നിര്‍ണയിച്ചു കോട്ടയം: തദ്ദേശ തെരഞ്ഞെടുപ്പിനു മുന്നോടിയായി ജില്ലാ പഞ്ചായത്തില്‍ വാര്‍ഡുകള്‍ പുനര്‍നിര്‍ണയിച്ച് വിജ്ഞാപനമിറക്കി. 22 ജില്ലാ പഞ്ചായത്ത് ഡിവിഷനുകളുണ്ടായിരുന്നത് ഒന്ന് വര്‍ധിച്ച് 23 ഡിവിഷനുകളായി. നിലവിലെ പൂഞ്ഞാര്‍ ഡിവിഷനിലെയും മുണ്ടക്കയം ഡിവിഷനിലെയും വിവിധ ബ്ലോക്ക് ഡിവിഷനുകള്‍ ചേര്‍ത്ത് തലനാട് ഡിവിഷന്‍ എന്ന പുതിയ ഡിവിഷനാണ് രൂപീകരിച്ചത്. മീനച്ചില്‍ താലൂക്കിലെ പൂഞ്ഞാര്‍ മേഖല, കാഞ്ഞിരപ്പള്ളി താലൂക്കിലെ മുണ്ടക്കയം, എരുമേലി, കാഞ്ഞിരപ്പള്ളി മേഖലകള്‍ കേന്ദ്രീകരിച്ച് പുതിയ ഡിവിഷന്‍ വരുമെന്നായിരുന്നു പ്രതീക്ഷ. വിജ്ഞാപനം സംബന്ധിച്ച ആക്ഷേപങ്ങളും അഭിപ്രായങ്ങളും 26ന് മുന്‍പായി ഡീലിമിറ്റേഷന്‍ കമ്മീഷന്‍ സെക്രട്ടറിക്കോ, ജില്ലാ തെരഞ്ഞെടുപ്പ് ഉദ്യോഗസ്ഥനോ രജിസ്റ്റേർഡ് തപാല്‍ മുഖേനയോ നേരിട്ടോ സമര്‍പ്പിക്കാം. പരാതികളും മറ്റും സ്വീകരിച്ചുകഴിഞ്ഞാല്‍ അന്തിമ വിജ്ഞാപനം ഇറങ്ങും. തുടര്‍ന്ന് ഡിവിഷനുകള്‍ നറുക്കിട്ട് സംവരണം നിശ്ചയിക്കും. വൈക്കം, കുറവിലങ്ങാട്, കാഞ്ഞിരപ്പള്ളി, കങ്ങഴ, പാമ്പാടി, വാകത്താനം, തൃക്കൊടിത്താനം, കുമരകം, അതിരമ്പുഴ, തലയാഴം എന്നീ ഡിവിഷനുകളാണ് നിലവില്‍ വനിതാ സംവരണം. പൊന്‍കുന്നം ഡിവിഷന്‍ പട്ടികജാതി സംവരണവും മുണ്ടക്കയം ഡിവിഷന്‍ പട്ടികജാതി വനിതാ സംവരണവുമാണ്. നിലവില്‍ ജില്ലാ പഞ്ചായത്ത് പ്രസിഡന്‍റ് സ്ഥാനം വനിതയ്ക്കായിരുന്നു. ഇത്തവണ ജനറലാകാനാണ് സാധ്യത. സംവരണ സാധ്യതയുമുണ്ട്. ബോക്‌സില്‍ കൊടുക്കണം..... പുതിയ ഡിവിഷനുകള്‍ ഇപ്രകാരം (ജില്ലാ പഞ്ചായത്ത് ഡിവിഷന്‍, ഡിവിഷനില്‍ ഉള്‍പ്പെടുന്ന ബ്ലോക്ക് പഞ്ചായത്ത്, ബ്ലോക്ക് പഞ്ചായത്ത് ഡിവിഷനുകള്‍ എന്ന ക്രമത്തില്‍) 1-വൈക്കം: വൈക്കം ബ്ലോക്ക് പഞ്ചായത്തിലെ വിജയോദയം, ബ്രഹ്‌മമംഗലം, ഏനാദി, മറവന്‍തുരുത്ത്, വാഴമന, ഉദയനാപുരം, കുലശേഖരമംഗലം, ചെമ്മനാകരി. 2-വെള്ളൂര്‍: കടുത്തുരുത്തി ബ്ലോക്കിലെ വടകര, വെള്ളൂര്‍, മുളക്കുളം, കീഴൂര്‍, തലയോലപ്പറമ്പ്, ആപ്പാഞ്ചിറ, പൊതി. 3-കടുത്തുരുത്തി: കടുത്തുരുത്തി ബ്ലോക്കിലെ ഞീഴൂര്‍, കാട്ടാമ്പാക്ക്, മുട്ടുചിറ, കടുത്തുരുത്തി, ആയാംകുടി, മധുരവേലി. ഉഴവൂര്‍ ബ്ലോക്കിലെ മാഞ്ഞൂര്‍, കുറുപ്പന്തറ 4-കുറവിലങ്ങാട്: ഉഴവൂര്‍ ബ്ലോക്കിലെ കടപ്ലാമറ്റം, വെമ്പള്ളി, കാണക്കാരി, കോതനല്ലൂര്‍, കുറവിലങ്ങാട്, കോഴ. 5-ഉഴവൂര്‍: ഉഴവൂര്‍ ബ്ലോക്കിലെ വെളിയന്നൂര്‍, പഴമല, രാമപുരം, ഉഴവൂര്‍, മരങ്ങാട്ടുപിള്ളി, മോനിപ്പള്ളി. 6-ഭരണങ്ങാനം: ളാലം ബ്ലോക്കിലെ വലവൂര്‍, കരൂര്‍, കടനാട്, നീലൂര്‍, ഉള്ളനാട്, പ്രവിത്താനം, ഭരണങ്ങാനം, പൂവരണി, പൈക. 7-തലനാട്: ഈരാറ്റുപേട്ട ബ്ലോക്കിലെ മേലുകാവ്, മൂന്നിലവ്, തലനാട്, തീക്കോയി, കല്ലേക്കുളം, പാതാമ്പുഴ, കളത്തൂക്കടവ്, കാഞ്ഞിരപ്പള്ളി ബ്ലോക്കിലെ കൂട്ടിക്കല്‍. 8- പൂഞ്ഞാര്‍: ഈരാറ്റുപേട്ട ബ്ലോക്കിലെ വളതൂക്ക്, പൂഞ്ഞാര്‍, കൊണ്ടൂര്‍, പിണ്ണാക്കനാട്, തിടനാട്, തലപ്പലം, പ്ലാശനാല്‍, പാമ്പാടി ബ്ലോക്കിലെ മഞ്ചക്കുഴി. 9-മുണ്ടക്കയം: കാഞ്ഞിരപ്പള്ളി ബ്ലോക്കിലെ പാറത്തോട്, ചോറ്റി, മുണ്ടക്കയം, പുലിക്കുന്ന്, പുഞ്ചവയല്‍, വണ്ടന്‍പതാല്‍. 10-എരുമേലി: കാഞ്ഞിരപ്പള്ളി ബ്ലോക്കിലെ കോരുത്തോട്, മുക്കൂട്ടുതറ, എരുമേലി,പൊന്തന്‍പുഴ, മണിമല, വാഴൂര്‍ ബ്ലോക്കിലെ മണിമല. 11-കാഞ്ഞിരപ്പള്ളി: കാഞ്ഞിരപ്പള്ളി ബ്ലോക്കിലെ ആനക്കല്ല്, ചേനപ്പാടി, കാഞ്ഞിരപ്പള്ളി, മണ്ണാറക്കയം, വാഴൂര്‍ ബ്ലോക്കിലെ ചെറുവള്ളി, പാമ്പാടി ബ്ലോക്കിലെ ഇളങ്ങുളം. 12- പൊന്‍കുന്നം: പാമ്പാടി ബ്ലോക്കിലെ കാഞ്ഞിരമറ്റം, പള്ളിക്കത്തോട്, വാഴൂര്‍ ബ്ലോക്കിലെ പുളിക്കല്‍കവല, കൊടുങ്ങൂര്‍, തെക്കേത്തുകവല, പൊന്‍കുന്നം, ചിറക്കടവ്. 13-കങ്ങഴ: വാഴൂര്‍ ബ്ലോക്കിലെ കറുകച്ചാല്‍, നെടുംകുന്നം, കാനം, വെള്ളാവൂര്‍, പത്തനാട്, ചേലക്കൊമ്പ്, കൂത്രപ്പള്ളി. 14-പാമ്പാടി: പാമ്പാടി ബ്ലോക്കിലെ അരുവിക്കുഴി, കൂരോപ്പട, പാമ്പാടി, ഇലക്കൊടിഞ്ഞി, മീനടം, ഗ്രാമറ്റം. 15- കിടങ്ങൂര്‍: പാമ്പാടി ബ്ലോക്കിലെ കിടങ്ങൂര്‍, കിടങ്ങൂര്‍ സൗത്ത്, മറ്റക്കര, ളാലം ബ്ലോക്കിലെ തോടനാല്‍, ചേര്‍പ്പുങ്കല്‍, മുത്തോലി, പുലിയന്നൂര്‍, വള്ളീച്ചിറ. 16-അയര്‍ക്കുന്നം: പള്ളം ബ്ലോക്കിലെ അയര്‍ക്കുന്നം, തിരുവഞ്ചൂര്‍, വടവാതൂര്‍, നട്ടാശേരി, നീറിക്കാട്, പാമ്പാടി ബ്ലോക്കിലെ മാലം. 17-പുതുപ്പള്ളി: പള്ളം ബ്ലോക്കിലെ പുതുപ്പള്ളി, കൈതേപ്പാലം, മാങ്ങാനം, പാമ്പാടി ബ്ലോക്കിലെ മണര്‍കാട്, മാടപ്പള്ളി ബ്ലോക്കിലെ മണികണ്ഠപുരം, തോട്ടയ്ക്കാട്. 18- വാകത്താനം: മാടപ്പള്ളി ബ്ലോക്കിലെ തുരുത്തി, വെരൂര്‍ചിറ, ഇന്‍ഡസ്ട്രിയല്‍ നഗര്‍, വാകത്താനം, മാമ്മൂട്, തെങ്ങണ. 19- തൃക്കൊടിത്താനം: മാടപ്പള്ളി ബ്ലോക്കിലെ മാടപ്പള്ളി, കോട്ടമുറി, മണികണ്ഠവയല്‍, തൃക്കൊടിത്താനം, പായിപ്പാട്, പൂവം. 20-കുറിച്ചി: പള്ളം ബ്ലോക്കിലെ ഇത്തിത്താനം, മലകുന്നം, കുറിച്ചി, കുഴിമറ്റം, പരുത്തുംപാറ, കൊല്ലാട്. 2-കുമരകം: ഏറ്റുമാനൂര്‍ ബ്ലോക്കിലെ പരിപ്പ്, അയ്മനം, തൊണ്ടംബ്രാല്‍, തിരുവാര്‍പ്പ്, കുമരകം, കവണാറ്റിന്‍കര. 22-അതിരമ്പുഴ: ഏറ്റുമാനൂര്‍ ബ്ലോക്കിലെ പ്രാവട്ടം, അതിരമ്പുഴ, യൂണിവേഴ്‌സിറ്റി, മാന്നാനം, കരിപ്പൂത്തട്ട്, മെഡിക്കല്‍ കോളജ്, കുടമാളൂര്‍. 23-തലയാഴം: വൈക്കം ബ്ലോക്കിലെ തോട്ടകം, ഉല്ലല, ഇടയാഴം, ബണ്ട് റോഡ്,ടിവിപുരം, ചെമ്മനത്തുകര, കടുത്തുരുത്തി ബ്ലോക്കിലെ കല്ലറ, ഏറ്റുമാനൂര്‍ ബ്ലോക്കിലെ നീണ്ടൂര്‍.

സ്നേഹദീപം കേരളമാകെ മാതൃകയാക്കാവുന്ന പദ്ധതി: ചാണ്ടി ഉമ്മന്‍ എംഎല്‍എ

പാലാ: സ്നേഹദീപം ഭവനപദ്ധതി കേരളമാകെ മാതൃകയാക്കാവുന്ന കാരുണ്യപ്രവൃത്തിയാണെന്ന് ചാണ്ടി ഉമ്മന്‍ എംഎല്‍എ. ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ നേതൃത്വം നൽകുന്ന സ്നേഹദീപം ഭവന പദ്ധതി പ്രകാരമുള്ള അമ്പതാം സ്നേഹവീടിന്‍റെ താക്കോല്‍ സമര്‍പ്പണം മീനച്ചില്‍ പഞ്ചായത്തിലെ പൂവരണിയില്‍ നിര്‍വഹിക്കുകയായിരുന്നു അദ്ദേഹം. സഹജീവികളിലെ ബുദ്ധിമുട്ട് അനുഭവിക്കുന്നവര്‍ക്കായി സമയവും പണവും ചെലവഴിക്കാനും മറ്റുള്ളവരെ ഈ പ്രവര്‍ത്തനങ്ങളിലേക്ക് കണ്ണിയാക്കാനും ജോസ്മോന്‍ മുണ്ടയ്ക്കല്‍ നടത്തുന്ന പ്രവര്‍ത്തനങ്ങള്‍ പൊതുപ്രവര്‍ത്തകരെല്ലാം മാതൃകയാക്കേണ്ടതാണെന്നും എംഎല്‍എ പറഞ്ഞു. യോഗത്തില്‍ ബ്രില്യന്‍റ് സ്റ്റഡി സെന്‍റര്‍ ഡയറക്ടര്‍ സ്റ്റീഫന്‍ ജോസഫ് അധ്യക്ഷത വഹിച്ചു. സ്റ്റീഫന്‍ ജോസഫാണ് അമ്പതാം സ്നേഹവീട് നിര്‍മിക്കുന്നതിന് നാലുലക്ഷം രൂപ സ്നേഹദീപം മീനച്ചിലിന് നൽകിയത്. പൂവരണി പള്ളി വികാരി ഫാ. ജോസ് മഠത്തിക്കുന്നേല്‍, ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍, തിരുഹൃദയ സന്യാസസമൂഹം പ്രൊവിന്‍ഷ്യല്‍ സിസ്റ്റര്‍ മെര്‍ലിന്‍ എസ്എച്ച്, മുൻ പ്രൊവിൻഷ്യൽ സിസ്റ്റര്‍ ലിസ്ബത്ത് എസ്എച്ച്, മദര്‍ സുപ്പീരിയര്‍ സിസ്റ്റര്‍ റോസ് സെബാസ്റ്റ്യന്‍, ബ്ലോക്ക് പഞ്ചായത്ത് മെംബര്‍ ഷിബു പൂവേലില്‍, പഞ്ചായത്ത് മെംബര്‍ ബിജു കുമ്പളന്താനം, എന്‍എന്‍എസ് കരയോഗം പ്രസിഡന്‍റ് ശശി നെല്ലാല, സാബു മുകളേല്‍, ജോസ് കെ. രാജു കാഞ്ഞമല, ബെന്നി ഗണപതിപ്ലാക്കല്‍, ജഗന്നിവാസന്‍ പിടിക്കാപ്പറമ്പില്‍, എം. ജോസഫ് മുത്തുമന, എ.കെ. ചന്ദ്രമോഹനന്‍, ഷൈജു വാതല്ലൂര്‍, ഷാജി വെള്ളാപ്പാട്ട്, സന്തോഷ് കാപ്പന്‍, ടോമി മാമ്പക്കുളം എന്നിവര്‍ പ്രസംഗിച്ചു.

അല്‍ഫോന്‍സാമ്മ രക്ഷയുടെ സമയത്തിനായി കാത്തിരുന്നവള്‍: മാര്‍ ജോസഫ് കൊല്ലംപറമ്പില്‍

ഭരണങ്ങാനം: കര്‍ത്താവിനെയും ലോകത്തെയും ഒന്നിച്ചു സേവിക്കാന്‍ സാധിക്കുകയില്ലെന്ന് മനസിലാക്കിയ അല്‍ഫോന്‍സാമ്മ തന്‍റെ ജീവിതയാത്രയില്‍ കര്‍ത്താവിനോടുകൂടെ നടന്ന് കര്‍ത്താവിന്‍റെ കുരിശിനോടുകൂടെ തന്‍റെ കുരിശും ചേര്‍ത്തുവച്ച് കുരിശിന്‍റെ വഴിയേ സഞ്ചരിച്ച വലിയ മാതൃകയാണ് നമുക്കു തരുന്നതെന്ന് ഷംഷാബാദ് രൂപത സഹായ മെത്രാന്‍ മാര്‍ ജോസഫ് കൊല്ലംപറമ്പില്‍. വിശുദ്ധ അല്‍ഫോന്‍സാമ്മയുടെ തിരുനാളില്‍ വിശുദ്ധ കുര്‍ബാന അര്‍പ്പിച്ചു സന്ദേശം നല്‍കുകയായിരുന്നു ബിഷപ്. ഇന്നലെ രാവിലെ ഫാ. സെബാസ്റ്റ്യന്‍ നടുത്തടം, ഫാ. ജോസ് തറപ്പേല്‍, ഫാ. അമല്‍ ഇടത്തില്‍ സിഎംഐ, ഫാ. ജോസ് നെല്ലിക്കത്തെരുവില്‍, ഫാ. അലക്‌സ് തണ്ണിപ്പാറ സിഎംഐ, ഫാ. കുര്യാക്കോസ് വടക്കേതകിടിയേല്‍, ഫാ. മാത്യു തെക്കേല്‍, ഫാ. ജോസഫ് അരിമറ്റത്തില്‍ എന്നിവര്‍ വിശുദ്ധ കുര്‍ബാന അര്‍പ്പിച്ചു. ഫാ. ജോര്‍ജ് ഈറ്റക്കക്കുന്നേല്‍ റംശാ പ്രാര്‍ഥനയ്ക്കും ഫാ. ജോസഫ് മൂക്കന്‍തോട്ടത്തില്‍ ജപമാല പ്രദക്ഷിണത്തിനും നേതൃത്വം വഹിച്ചു. അല്‍ഫോന്‍സ തീര്‍ഥാടനം ഭക്തിസാന്ദ്രമായി പാലാ അല്‍ഫോന്‍സ കോളജില്‍നിന്നുള്ള വിദ്യാര്‍ഥിനികള്‍ ഭരണങ്ങാനത്ത് തീര്‍ഥാടനം നടത്തി. പ്രിന്‍സിപ്പല്‍ സിസ്റ്റര്‍ റിയ മാത്യു എഫ്‌സിസി, ഫാ. കുര്യാക്കോസ് വടക്കേതകിടിയേല്‍ എന്നിവര്‍ നേതൃത്വം നല്‍കി. ഇന്നത്തെ തിരുക്കർമങ്ങൾ രാവിലെ 5.30 നും 6.45നും 8.30 നും പത്തിനും വിശുദ്ധ കുര്‍ബാന. 11.30ന് വിശുദ്ധ കുര്‍ബാന - മാര്‍ ജോസ് പുളിക്കല്‍. 2.30നും 3.30നും 4.30നും അഞ്ചിനും 6.15നും ഏഴിനും വിശുദ്ധ കുര്‍ബാന.

ഇലക്കറികളെ അടുത്തറിയാൻ സെമിനാർ

കുറവിലങ്ങാട്: നാട്ടറിവുകളെയും ഭക്ഷണക്രമങ്ങളെയും ചേർത്തൊരുക്കി സെമിനാർ. ഔഷധസസ്യങ്ങളെ അടുത്തറിഞ്ഞ് രോഗങ്ങളിൽനിന്ന് മോചനം നേടാനുള്ള വഴികളൊരുക്കുന്നത് ഗാന്ധിജി വിചാരവേദിയാണ്. ഇന്ന് 9.30 മുതൽ മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ഇടവകയുടെ മാർത്തോമ്മാ നസ്രാണി ഭവനിലാണ് സെമിനാർ. ഔഷധഗുണമുള്ള ഇലകളെ വൈദ്യരത്‌നം ഡോ. തോട്ടം ശിവകരൻ നമ്പൂതിരി പരിചയപ്പെടുത്തും. ഇലകൾ ഭക്ഷണത്തിലും രോഗപ്രതിരോധത്തിനും എന്ന വിഷയത്തിൽ നട്ടാശേരി ഗാന്ധിസേവാകേന്ദ്രം പ്രസിഡന്‍റ് എം. കുര്യൻ ക്ലാസ് നയിക്കും. നാട്ടുഭക്ഷണത്തെക്കുറിച്ച് ജോബി കെ. മാത്യുവും ബദൽജീവിതത്തെകുറിച്ച് ഡോ. ജോസ് മാത്യുവും ക്ലാസ് നയിക്കും. സെമിനാർ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി ഉദ്ഘാടനം ചെയ്യും. ഗാന്ധിജി വിചാരവേദി പ്രസിഡന്‍റ് ഡോ. ജോസ് മാത്യു അധ്യക്ഷത വഹിക്കും. മോൻസ് ജോസഫ് എംഎൽഎ, പഞ്ചായത്ത് പ്രസിഡന്‍റ് മിനി മത്തായി, ജൈവ കർഷകസമിതി സംസ്ഥാന കമ്മിറ്റിയംഗം എൻ.കെ. രാജു, ഗാന്ധിജി വിചാരവേദി സെക്രട്ടറി ഡോ. എ.ആർ. അശോക്, സ്വരുമ പാലിയേറ്റീവ് കെയർ കോ-ഓർഡിനേറ്റർ ബെന്നി കോച്ചേരി, ഗാന്ധിജി വിചാരവേദി ട്രഷറർ ജോസ് മാത്യു കുന്നേൽ എന്നിവർ പ്രസംഗിക്കും.

ഫ്രാന്‍സിസ്‌കന്‍ അല്മായ സഭ രൂപത സമ്മേളനവും അനുസ്മരണവും

പാലാ: വിശുദ്ധ അല്‍ഫോന്‍സാമ്മയുടെ തിരുനാളിനോടനുബന്ധിച്ച് ഫ്രാന്‍സിസ്‌കന്‍ അല്മായ സഭയുടെ വിവിധ യൂണിറ്റ്, റീജന്‍, രൂപതാസമിതികളുടെ ആഭിമുഖ്യത്തില്‍ അല്‍ഫോന്‍സ തീര്‍ഥാടനവും രൂപത സമ്മേളനവും ഇന്നു നടത്തും. പാലാ രൂപത സെക്രട്ടറി, ഫോര്‍മേറ്റര്‍ എന്നീ നിലകളില്‍ സേവനം ചെയ്ത റോസിലിന്‍ കെ. ജോര്‍ജ് കുരുവിനാകുന്നേലിന്‍റെ ഏഴാമത് ചരമവാര്‍ഷിക അനുസ്മരണവും ഇതോടനുബന്ധിച്ചു നടത്തപ്പെടും. ഇന്നു രാവിലെ പത്തിന് ഇടമറ്റം സെന്‍റ് മൈക്കിള്‍സ് പള്ളിയിൽ വിശുദ്ധ കുര്‍ബാന. തുടര്‍ന്ന് രൂപത സമ്മേളനവും അനുസ്മരണയോഗവും നടക്കും. ഉച്ചകഴിഞ്ഞ് 1.30ന് ഭരണങ്ങാനം അസീസി ആശ്രമ ദേവാലയത്തില്‍നിന്ന് അല്‍ഫോന്‍സ തീര്‍ഥാടന കേന്ദ്രത്തിലേക്ക് ജപമാലറാലി ഉണ്ടായിരിക്കും. എസ്എഫ്ഒ പാലാ രൂപത പ്രസിഡന്‍റ് സോജന്‍ മാത്യുവിന്‍റെ അധ്യക്ഷതയില്‍ ചേരുന്ന സമ്മേളനത്തില്‍ ഫാ. മൈക്കിള്‍ പറുശേരില്‍, ഫാ. ആന്‍റണി വെച്ചൂര്‍, ഫാ. മാത്യു കിഴക്കേഅരഞ്ഞാണി പുത്തന്‍പുര, ഫാ. മനോജ് പൂത്തോട്ടാല്‍, ടോമി സേവ്യര്‍ തെക്കേല്‍, റ്റിസി രാജു കടലംകാട്ട് എന്നിവര്‍ പ്രസംഗിക്കും.

റബര്‍ ഡീലേഴ്‌സ് അസോസിയേഷന്‍ കുടുംബസംഗമം ഹൃദ്യമായി

പാലാ: മീനച്ചില്‍ താലൂക്ക് റബര്‍ ഡീലേഴ്‌സ് 40-ാമത് പൊതുയോഗവും കുടുംബസംഗമവും പാലാ ചെത്തിമറ്റത്തുള്ള റോട്ടറി ക്ലബ്ബില്‍ നടത്തി. പ്രസിഡന്‍റ് ജോര്‍ജ് വാലി സമ്മേളനം ഉദ്ഘാടനം ചെയ്തു. അസോസിയേഷന്‍ പ്രസിഡന്‍റ് സോജന്‍ തറപ്പേല്‍ അധ്യക്ഷത വഹിച്ചു. കാഞ്ഞിരപ്പള്ളി താലൂക്ക് പ്രസിഡന്‍റ് സിനോള്‍ തോമസ്, ജോസുകുട്ടി പൂവേലില്‍, പി.എം. മാത്യു ചോലിക്കര, ഗില്‍ബി നെച്ചിക്കാട്ട്, സുരിന്‍ പൂവത്തിങ്കല്‍, വി.എ. സിബി, ബിജു പി. തോമസ് പ്രസംഗിച്ചു. എന്നിവര്‍ പ്രസംഗിച്ചു. കുടുംബ സംഗമത്തില്‍ അംഗങ്ങളും കുടുംബാംഗങ്ങളും ചേര്‍ന്ന് കലാപരിപാടികള്‍ അവതരിപ്പിക്കുകയും വിജയികള്‍ക്ക് സമ്മാനങ്ങള്‍ നല്‍കുകയും ചെയ്തു. തുടര്‍ന്ന് എം.ഒ. ദേവസ്യ മറ്റത്തിലിന്‍റെ സ്മരണാര്‍ഥം ദേവസ്യാച്ചന്‍ മറ്റത്തില്‍ ഏര്‍പ്പെടുത്തിയ കാഷ് അവാര്‍ഡുകള്‍ വിതരണം ചെയ്തു. സമ്മേളനത്തിൽ മുതിർന്ന വ്യാപാരികളെ ആദരിച്ചു.

ഹരിതവനം പദ്ധതി ഉദ്ഘാടനം ചെയ്തു

പാലാ: പരിസ്ഥിതി സംരക്ഷണ പ്രവര്‍ത്തനങ്ങളിലും സാമൂഹ്യ വനവത്കരണ മേഖലയിലും ലയണ്‍സ് ക്ലബ്ബുകളുടെ പ്രവര്‍ത്തനം മാതൃകാപരവും അഭിനന്ദനാര്‍ഹവുമാണെന്ന് വനംമന്ത്രി എ.കെ. ശശീന്ദ്രന്‍. പാലാ ടൗണ്‍ റോയല്‍ ലയണ്‍സ് ക്ലബ്ബിന്‍റെ ഹരിതവനം പദ്ധതിയുടെ ഭാഗമായി നടത്തിയ 1001 ഫലവൃക്ഷത്തൈകള്‍ വച്ചുപിടിപ്പിക്കുന്ന പരിപാടി ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ക്ലബ് പ്രസിഡന്‍റ് ബെന്നി മൈലാടൂര്‍ അധ്യക്ഷത വഹിച്ചു. തോമസ് കെ. തോമസ് എംഎല്‍എ, മോന്‍സ് ജോസഫ് എംഎല്‍എ, ലയണ്‍സ് ഡിസ്ട്രിക്‌ട് ജിഇടി കോ-ഓര്‍ഡിനേറ്റര്‍ അഡ്വ. ആര്‍. മനോജ് പാലാ, കെ.ആര്‍. രാജന്‍, സുഭാഷ് പുഞ്ചക്കോട്ടില്‍, വി.എം. അബ്ദുള്ളാഖാന്‍, ശ്രീകുമാര്‍ പാലയ്ക്കല്‍, ജയ്സണ്‍ കൊല്ലപ്പള്ളി, ഡോ. സിന്ധുമോള്‍ ജേക്കബ് എന്നിവര്‍ പ്രസംഗിച്ചു.

മുത്തോലിയില്‍ 25 ജംഗ്ഷനുകള്‍കൂടി പ്രകാശപൂരിതമാകുന്നു

പാലാ: മുത്തോലി പഞ്ചായത്തിലെ 25 ജംഗ്ഷനുകളില്‍ കൂടി പുതിയ മിനിമാസ്റ്റ് ലൈറ്റുകള്‍ സ്ഥാപിക്കുന്നു. ജില്ലാ പഞ്ചായത്തിന്‍റെ പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ അനുവദിച്ച 25 ലക്ഷം രൂപ ഉപയോഗിച്ചാണ് ലൈറ്റുകള്‍ സ്ഥാപിക്കുന്നത്. പുതിയ ലൈറ്റുകള്‍ കൂടെ സ്ഥാപിക്കുന്നതോടെ മുത്തോലി പഞ്ചായത്തില്‍ ജില്ലാ പഞ്ചായത്ത് ഈ ഭരണസമിതിയുടെ കാലയളവില്‍ സ്ഥാപിച്ച മിനിമാസ്റ്റ് ലൈറ്റുകളുടെ എണ്ണം 90 ആയി മാറുകയാണ്. മുത്തോലി പഞ്ചായത്ത് മുഖേനയാണ് പദ്ധതി നിര്‍വഹണം നടത്തുന്നത്. മുത്തോലി പഞ്ചായത്ത് പ്രസിഡന്‍റ് രഞ്ജിത്ത് ജി. മീനാഭവനും പഞ്ചായത്ത് ഭരണസമിതിയും പദ്ധതി നടപ്പിലാക്കുന്നതിനാവശ്യമായ എല്ലാ പിന്തുണയും ജില്ലാ പഞ്ചായത്തിന് നല്കി. കടപ്പാട്ടൂര്‍ ക്ഷേത്രം ജംഗ്ഷന്‍, പുലിയന്നൂര്‍ ഇന്‍ഡ്രസ്ട്രിയല്‍ എസ്റ്റേറ്റ് ജംഗ്ഷന്‍, മുത്തോലി ആശ്രമം, ഇടത്തേട്ടുകാവ് ക്ഷേത്രം ജംഗ്ഷന്‍, വെള്ളിയേപ്പള്ളി ലക്ഷംവീട് നഗര്‍, തെക്കുംമുറി പൂവത്തിനാടി പാലം, മലേക്കാവ് ക്ഷേത്രം ജംഗ്ഷന്‍, ഇൻഡ്യാര്‍ ഫാക്ടറി ജംഗ്ഷന്‍, ശ്രീകുരുമ്പക്കാവ് ചെമ്പനാനിക്കല്‍ ഭാഗം, കൊമ്പനാല്‍ ജംഗ്ഷന്‍, മുത്തോലി പിഎച്ച്സി ജംഗ്ഷന്‍, പന്തത്തല റേഷന്‍കട ജംഗ്ഷന്‍, കടപ്പാട്ടൂര്‍ ചിറകാട്ടുകവല, ബ്രില്യന്‍റ് ജംഗ്ഷന്‍, മരോട്ടിച്ചുവട് ജംഗ്ഷന്‍, പുലിയന്നൂര്‍ വില്ലേജ് ഓഫീസ് ജംഗ്ഷന്‍, മുത്തോലി സെന്‍റ് ജോസഫ് സ്‌കൂള്‍ ജംഗ്ഷന്‍, അള്ളുങ്കല്‍കുന്ന് ജംഗ്ഷന്‍, കോഴിമലക്കുന്ന്, വെള്ളിയേപ്പള്ളി-പന്തലാനി കവല, പാളയം പള്ളി ജംഗ്ഷന്‍, മുത്തോലി കവല ഭാഗം, ഊരാശാല, പുളിക്കപ്പാലം, പുലിയന്നൂര്‍-കാവനാല്‍ ജംഗ്ഷന്‍, തെക്കുംമുറി ഭാഗം എന്നിവിടങ്ങളിലാണ് പുതുതായി മിനിമാസ്റ്റ് ലൈറ്റുകള്‍ സ്ഥാപിക്കുന്നത്. മിനി മാസ്റ്റ് ലൈറ്റ് ഉദ്ഘാടനം നാളെ ഭരണങ്ങാനം: ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ചൂണ്ടച്ചേരി എന്‍ജിനിയറിംഗ് കോളജിന് മുന്‍വശം സ്ഥാപിച്ച മിനി മാസ്റ്റ് ലൈറ്റിന്‍റെ ഉദ്ഘാടനം നാളെ വൈകുന്നേരം അഞ്ചിന് എന്‍ജിനിയറിംഗ് കോളജ് മാനേജര്‍ റവ. ഡോ. ജയിംസ് മംഗലത്ത് നിര്‍വഹിക്കും. ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ അധ്യക്ഷത വഹിക്കും. ഉള്ളനാട്: ജില്ല പഞ്ചായത്ത് പദ്ധതിയില്‍ ഉള്‍പ്പെടുത്തി ഭരണങ്ങാനം പഞ്ചായത്തിലെ ആലമറ്റം ജംഗ്ഷനില്‍ സ്ഥാപിച്ച മിനി മാസ്റ്റ് ലൈറ്റിന്‍റെ ഉദ്ഘാടനം നാളെ വൈകുന്നേരം ആറിന് നടത്തപ്പെടും. ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ ഉദ്ഘാടനം നിര്‍വഹിക്കും. പഞ്ചായത്ത് പ്രസിഡന്‍റ് ബീന ടോമി അധ്യക്ഷത വഹിക്കും.

ഉഴവൂരിനെ മാവിൻതോട്ടമാക്കാൻ തൊഴിലുറപ്പ് പദ്ധതി

ഉഴവൂർ: നാടിനെ മാവിൻതോട്ടമാക്കാൻ പഞ്ചായത്ത്. ഉഴവൂർ പഞ്ചായത്തിലെ ദേശീയ ഗ്രാമീണ തൊഴിലുറപ്പ് പദ്ധതിയോട് ചേർത്താണ് പദ്ധതി തയാറാക്കുന്നത്. പദ്ധതിയുടെ ഭാഗമായി മാവിൻ തൈകളുടെ വിതരണം പ്രസിഡന്‍റ് ഇൻ ചാർജ് കെ.എം. തങ്കച്ചൻ ഉദ്ഘാടനം ചെയ്തു. പഞ്ചായത്ത് വൈസ് പ്രസിഡന്‍റ് അഞ്ചു പി. ബെന്നി, അംഗങ്ങളായ ബിനു ജോസ് തൊട്ടിയിൽ, വി.ടി. സുരേഷ്, സിറിയക് കല്ലട, റിനി വിൽസൺ, ബിൻസി അനിൽ, മേരി സജി, ഏലിയാമ്മ കുരുവിള, അസിസ്റ്റന്‍റ് സെക്രട്ടറി കെ.ആർ. സുരേഷ് എന്നിവർ പ്രസംഗിച്ചു.

റവ.ഡോ. ആന്‍റണി നിരപ്പേല്‍ അനുസ്മരണം

പെരുവന്താനം: പ്രമുഖ വിദ്യാഭ്യാസ വിചക്ഷണനും സെന്‍റ് ആന്‍റണീസ് ഗ്രൂപ്പ് ഓഫ് കോളജുകളുടെ സ്ഥാപകനുമായ റവ.ഡോ. ആന്‍റണി നിരപ്പേലിന്‍റെ നാലാം ചരമവാർഷികം ചെങ്ങളം സെന്‍റ് ആന്‍റണീസ് തീർഥാടന ദേവാലയത്തിൽ നടത്തി. വിശുദ്ധ കുർബാനയ്ക്കും അനുസ്മരണ പ്രാര്‍ഥനകള്‍ക്കും വികാരി ഫാ. വര്‍ഗീസ്‌ പരിന്തിരിക്കല്‍, ഫാ. ജോസഫ് വാഴപ്പനാടി, ഫാ. ജോസഫ് മൈലാടി എന്നിവർ മുഖ്യകാർമികത്വം വഹിച്ചു. തുടര്‍ന്നു നടന്ന അനുസ്മരണ സമ്മേളനത്തിൽ പെരുവന്താനം സെന്‍റ് ആന്‍റണീസ് കോളജ് ചെയർമാൻ ബെന്നി തോമസ്, പ്രിൻസിപ്പൽ ഡോ. ആന്‍റണി ജോസഫ്‌ കല്ലമ്പള്ളി, എ.ആര്‍. മധുസൂദനന്‍, കോളജ് സെക്രട്ടറി ടിജോമോന്‍ ജേക്കബ്‌, സുപര്‍ണ രാജു, പി.ആർ. രതീഷ്, ബോബി കെ. മാത്യു, ജോസ് ആന്‍റണി, ജസ്റ്റിന്‍ ജോസ് എന്നിവർ പ്രസംഗിച്ചു.

സെന്‍റ് ഡൊമിനിക്സ് കത്തീഡ്രൽ ദ്വിശതാബ്ദി ആഘോഷം: ബിസിനസ് കോൺക്ലേവ് 27ന്

കാഞ്ഞിരപ്പള്ളി: സെന്‍റ് ഡൊമിനിക്സ് കത്തീഡ്രൽ ദ്വിശതാബ്ദി ആഘോഷങ്ങളുടെ ഭാഗമായി 27ന് വൈകുന്നേരം 4.30ന് കത്തീഡ്രൽ മഹാജൂബിലി ഹാളിൽ ബിസിനസ് കോൺക്ലേവ് സംഘടിപ്പിക്കുമെന്ന് എകെസിസി ഭാരവാഹികൾ പത്രസമ്മേളനത്തിൽ അറിയിച്ചു. കേരള റബർ ലിമിറ്റഡ് എംഡിയും ചെയർമാനുമായ ഷീല തോമസ് ഉദ്ഘാടനം ചെയ്യും. കത്തീഡ്രൽ വികാരിയും ആർച്ച്പ്രീസ്റ്റുമായ റവ.ഡോ. കുര്യൻ താമരശേരി അധ്യക്ഷത വഹിക്കും. ഇൻഫാം ദേശീയ ചെയർമാനും മലനാട് ഡെവലപ്മെന്‍റ് സൊസൈറ്റി ഡയറക്ടറുമായ ഫാ. തോമസ് മറ്റമുണ്ടയിൽ മുഖ്യപ്രഭാഷണം നടത്തും. ഇടവകയിലെ സംരംഭകരുടെ സംഗമവും പരിപാടിയുടെ ഭാഗമായി നടക്കും. 50 വർഷം പൂർത്തിയാക്കിയ കാഞ്ഞിരപ്പള്ളി കത്തീഡ്രലിൽപ്പെട്ട ബിസിനസ് സംരംഭകരെ അന്നേദിവസം ആദരിക്കും. കാഞ്ഞിരപ്പള്ളി മേഖലയിൽനിന്നു ബിസിനസ് രംഗത്ത് മികച്ച നേട്ടം കൈവരിച്ച ആറ് പ്രമുഖ വ്യക്തിത്വങ്ങൾക്കും ഇതോടൊപ്പം ആദരവ് നൽകും. അവരുടെ ബിസിനസ് വിജയത്തെക്കുറിച്ചും അനുഭവങ്ങളെക്കുറിച്ചും പാനൽ ഡിസ്കഷനും ചോദ്യോത്തരവേളയും ഉണ്ടായിരിക്കും. ഓക്സിജൻ ഗ്രൂപ്പ് സിഇഒ ഷിജോ കെ. തോമസ്, എസ്എംആർ ലാറ്റക്സ് സിഇഒ സണ്ണി ജേക്കബ്, ഡിബിഎഫ്എസ് സിഇഒ പ്രിൻസ് ജോർജ്, റൈഗര്‍ ഫൗണ്ടർ അജീഷ് ജോർജ്, ഇലോയിറ്റ് ഫൗണ്ടർ ഡോ. തോംസൺ ഫിലിപ്പ്, എപിഎസി ഹോങ്കോംഗിന്‍റെ എംഡി സാവിയോ ജോസഫ് പുൽപ്പേൽ എന്നിവരെയാണ് ബിസിനസ് എക്സലൻസ് അവാർഡ് നൽകി ആദരിക്കുന്നത്. മുതിർന്ന മാധ്യമപ്രവർത്തകനും അധ്യാപകനും എഴുത്തുകാരനുമായ ജോ എ. സ്കറിയ പാനൽ ഡിസ്കഷൻ നിയന്ത്രിക്കും. ഇടവകയിൽ പുതിയതായി സംരംഭം തുടങ്ങാൻ ആഗ്രഹിക്കുന്നവർക്ക് പ്രചോദനമേകുക എന്നതാണ് ബിസിനസ് കോൺക്ലേവിന്‍റെ ലക്ഷ്യം. എകെസിസി കത്തീഡ്രൽ യൂണിറ്റാണ് സംഘാടകർ. കത്തീഡ്രൽ ദേവാലയം രൂപീകൃതമായിട്ട് 200 വർഷം പൂർത്തീകരിക്കുന്ന വേളയിലാണ് ദ്വിശതാബ്ദി ആഘോഷങ്ങൾ സംഘടിപ്പിച്ചിരിക്കുന്നത്. കത്തോലിക്ക കോൺഗ്രസ് കാഞ്ഞിരപ്പള്ളി യൂണിറ്റ് പ്രസിഡന്‍റ് ജിജി പുത്തേട്ട്, പ്രോഗ്രാം ഡയറക്ടർ ഫിലിപ്പ് നിക്കോളാസ് പള്ളിവാതുക്കൽ, സെക്രട്ടറി റെജി കൊച്ചുകരിപ്പാപ്പറമ്പിൽ, രൂപത ജനറൽ സെക്രട്ടറി ജോസഫ് പണ്ടാരക്കുളം, വൈസ് പ്രസിഡന്‍റ് സാബു കൊച്ചുപുരയ്ക്കൽ പറമ്പിൽ, എക്സിക്യൂട്ടീവ് അംഗങ്ങളായ ജയിംസുകുട്ടി ആശാരിപ്പറമ്പിൽ, ജിജി പുതിയിടം, ജോഷി പുൽപ്പേൽ എന്നിവർ പത്രസമ്മേളനത്തിൽ പങ്കെടുത്തു.

പൊളിയാറായി മുക്കൂട്ടുതറയിലെ പഞ്ചായത്ത്‌ കെട്ടിടം; പൊളിക്കാൻ കോടതി കനിയണം

മുക്കൂട്ടുതറ: എരുമേലി പഞ്ചായത്തിന്‍റെ മുക്കൂട്ടുതറയിലുള്ള അപകടത്തിലായ വ്യാപാര സമുച്ചയം പൊളിക്കണമെന്ന ആവശ്യത്തിൽ മുഖ്യമന്ത്രിക്ക് ലഭിച്ച പരാതിയിൽ അനുകൂല നടപടികൾ സ്വീകരിക്കാനാവാതെ പഞ്ചായത്ത്‌ വകുപ്പ്. വിഷയം ഹൈക്കോടതിയുടെ പരിഗണനയിൽ ആയതിനാലാണ് നടപടികൾ സ്വീകരിക്കാൻ കഴിയാത്തതെന്ന് തദ്ദേശ സ്വയംഭരണ വകുപ്പ് ജോയിന്‍റ് ഡയറക്ടറുടെ കോട്ടയം ജില്ലാ ഓഫീസിൽനിന്ന് പറയുന്നു. അതേസമയം, കെട്ടിടം പൊളിച്ചാൽ എന്നു പുതിയത് പണിത് തീരുമെന്നുള്ള ഉറപ്പ് നൽകാൻ പഞ്ചായത്ത്‌ തയാറല്ലെന്ന് വ്യാപാരികൾ പറയുന്നു. പുതിയത് പണിയുമ്പോൾ പഴയ കടമുറികൾ നടത്തിയവർക്ക് പുതിയ കെട്ടിടത്തിൽ കടമുറികൾ അനുവദിക്കുന്ന കാര്യത്തിലും ഉറപ്പില്ല. ഇതേച്ചൊല്ലിയാണ് ഹൈക്കോടതിയിൽ വ്യാപാരികൾ കേസ് നൽകിയത്. ഈ കേസിൽ ഇനിയും തീർപ്പായിട്ടില്ല. കെട്ടിടം പൊളിക്കുന്നതിനായി കടമുറികൾ ഒഴിയാൻ പഞ്ചായത്ത്‌ നോട്ടീസ് നൽകിയതിനെത്തുടർന്നാണ് വ്യാപാരികൾ ഒരു വർഷം മുമ്പ് ഹൈക്കോടതിയെ സമീപിച്ചത്. കഴിഞ്ഞ വർഷം ജൂൺ 12ന് ഒഴിപ്പിക്കൽ തടഞ്ഞ് ഇടക്കാല ഉത്തരവിട്ട കോടതി കഴിഞ്ഞ മാസം 13ന് കേസിൽ വീണ്ടും ഹിയറിംഗ് നടത്തിയിരുന്നു. ഈ ഹിയറിംഗിൽ വീണ്ടും നാലു മാസത്തേക്ക് ഒഴിപ്പിക്കൽ നടപടി തടഞ്ഞ് ഉത്തരവ് നൽകിയതോടെ പഞ്ചായത്തിന്‍റെ നീക്കം നിലച്ചിരിക്കുകയാണ്. ഭരണകാലാവധി തീരാനിരിക്കേ പഞ്ചായത്ത്‌ തെരഞ്ഞെടുപ്പ് അടുത്തതിനാൽ ഇനി നടപടികൾ സ്വീകരിക്കാൻ മടിക്കുകയാണ് പഞ്ചായത്ത്‌. ‌ കെട്ടിടം പൊളിഞ്ഞുവീഴാവുന്ന നിലയിലേക്ക് കൂടുതൽ ദുർബലമായ അവസ്ഥയിലാണ്. പഴക്കമേറിയ കോൺക്രീറ്റ് മേൽക്കൂരയുടെ കീഴിൽ 40ഓളം കടമുറികളാണുള്ളത്. അപകടാവസ്ഥ പരിഹരിക്കാൻ നേരത്തേ പഞ്ചായത്ത്‌ ഫണ്ടിൽ മേൽക്കൂരയിൽ റൂഫിംഗ് നടത്തിയിരുന്നെങ്കിലും പ്രയോജനമുണ്ടായില്ല. വീണ്ടും അറ്റകുറ്റപ്പണികൾക്ക് പഞ്ചായത്ത്‌ പദ്ധതി തയാറാക്കിയിരുന്നു. എന്നാൽ, കാലപ്പഴക്കമേറിയ കെട്ടിടമായതിനാൽ പൂർണമായും പൊളിച്ചുനീക്കിയില്ലങ്കിൽ അപകടം സംഭവിച്ചേക്കാമെന്നും അറ്റകുറ്റപ്പണികൾകൊണ്ട് ഗുണമില്ലെന്നും പഞ്ചായത്ത്‌ എൻജിനിയറിംഗ് വിഭാഗം കഴിഞ്ഞ വർഷം മേയ് ഏഴിന് നടത്തിയ ഫിറ്റ്‌നസ് പരിശോധനയിൽ അറിയിച്ചു. ഇതോടെയാണ് കടമുറികൾ ഒഴിയാൻ നോട്ടീസ് നൽകിയത്. ഒപ്പം കടമുറികളിൽനിന്ന് വാടക ഈടാക്കുന്നത് പഞ്ചായത്ത്‌ നിർത്തുകയും ചെയ്തു. പുതിയ കെട്ടിടത്തിൽ പഴയ വാടകക്കാർക്ക് കടമുറികൾ നൽകുന്നതിന് പഞ്ചായത്ത്‌ രാജ് നിയമപ്രകാരം കരാർ എഴുതി ഉറപ്പ് നൽകാനാവില്ലെന്ന് പഞ്ചായത്ത്‌ സെക്രട്ടി നിയമോപദേശം നൽകിയിരുന്നു. പൊളിച്ചുമാറ്റിയ ശേഷം പുതിയ കെട്ടിടം നിർമിക്കുമ്പോൾ ബസ് സ്റ്റാൻഡ്, ശുചിമുറികൾ, പഞ്ചായത്ത്‌ വിഭജനം നടന്നാൽ മുക്കൂട്ടുതറയിൽ ഓഫീസ് നിർമിക്കേണ്ടി വന്നാൽ അതിനുള്ള സൗകര്യം ഉൾപ്പെടെ വിവിധ ആവശ്യങ്ങൾ പരിഹരിക്കാവുന്ന സമഗ്രമായ പ്ലാൻ വേണമെന്ന് നിർദേശങ്ങളും ഉയർന്നിരുന്നു. ഇനി ഹൈക്കോടതിയിൽ കേസിന്‍റെ തീർപ്പ് ഉണ്ടാകുമ്പോൾ കോടതി തീരുമാനം നടപ്പിലാക്കാൻ അടുത്ത ഭരണസമിതിയുടെ മുന്നിലേക്കാണ് വിഷയം എത്തുക. അതും വീണ്ടും നിയമപ്രശ്നങ്ങളിലേക്ക് കടന്നേക്കാം. നിലവിൽ അപകട ഭീഷണിയിൽ തുടരേണ്ട സ്ഥിതിയിലാണ് കെട്ടിടം.

ബസില്‍നിന്നു വീണ് വിദ്യാര്‍ഥിനിക്കു പരിക്കേറ്റ സംഭവം; ഡ്രൈവറുടെയും കണ്ടക്ടറുടെയും ലൈസന്‍സ് സസ്‌പെന്‍ഡ് ചെയ്തു

കാഞ്ഞിരപ്പള്ളി: ബസില്‍നിന്നു വീണ് വിദ്യാര്‍ഥിനിക്കു പരിക്കേറ്റ സംഭവത്തില്‍ ഡ്രൈവറുടെയും കണ്ടക്ടറുടെയും ലൈസന്‍സ് ആറു മാസത്തേക്ക് സസ്‌പെന്‍ഡ് ചെയ്തു. ഡ്രൈവര്‍ അര്‍ജുന്‍ പി. ചന്ദ്രന്‍, കണ്ടക്ടര്‍ റോജി പോള്‍ എന്നിവര്‍ക്കെതിരേയാണ് നടപടി. യാത്രക്കാരെ ഇറക്കിയശേഷം വാതില്‍ അടയ്ക്കാതെ അശ്രദ്ധമായി ഡ്രൈവര്‍ ബസ് മുന്നോട്ടെടുത്തതാണ് അപകടകാരണമായി കണ്ടെത്തിയിരിക്കുന്നത്. കണ്ടക്ടര്‍ ശ്രദ്ധിക്കാതിരുന്നതിനും അപകടത്തിന് കാരണമായതായി അന്വേഷണ റിപ്പോര്‍ട്ടില്‍ പറയുന്നു. ഇത്തരത്തില്‍ അശ്രദ്ധമായി ബസുകള്‍ ഡ്രൈവിംഗ് നടത്തുന്നതായി പൊതുജനങ്ങളില്‍നിന്നും വിവരം ലഭിച്ചു. ജോയിന്‍റ് ആര്‍ടിഒ കെ. ശ്രീജിത്തിന്‍റെ നിര്‍ദേശപ്രകാരം അസിസ്റ്റന്‍റ് മോട്ടോര്‍ ഇന്‍സ്‌പെക്ടറാണ് സംഭവത്തെക്കുറിച്ച് അന്വേഷണ റിപ്പോര്‍ട്ട് സമര്‍പ്പിച്ചത്. കഴിഞ്ഞ 11ന് കാഞ്ഞിരപ്പള്ളി-ഈരാറ്റുപേട്ട റോഡില്‍ ആനിത്തോട്ടത്ത് വച്ചായിരുന്നു അപകടമുണ്ടായത്. ഡ്രൈവറും കണ്ടക്ടറും ഡ്രൈവര്‍ റിഫ്രഷര്‍ പരിശീലനത്തില്‍ പങ്കെടുത്തതിന്‍റെ സര്‍ട്ടിഫിക്കറ്റും ഏതെങ്കിലും ഗവൺമെന്‍റ് മെഡിക്കല്‍ കോളജില്‍ ഏഴു ദിവസം സാമൂഹ്യസേവനം നടത്തിയതിന്‍റെ സര്‍ട്ടിഫിക്കറ്റും ഹാജരാക്കിയ ശേഷമാകും ലൈസന്‍സ് തിരികെ നല്‍കുക. ബസുകളുടെ ഡോര്‍ തുറന്നുവച്ചുള്ള അപകടകരമായ യാത്ര പരിശോധിക്കുന്നതിന് പ്രത്യേക ടീമിനെ നിയോഗിച്ചിട്ടുണ്ട്. വരും ദിവസങ്ങളില്‍ പരിശോധന കര്‍ശനമാക്കുമെന്നും ജോയിന്‍റ് ആര്‍ടിഒ പറഞ്ഞു.

പൊൻകുന്നം ഫൊറോന മാതൃവേദി മെസഞ്ചർ മീറ്റ്

പൊൻകുന്നം: തിരുക്കുടുംബ ഫൊറോന പള്ളി പാരിഷ് ഹാളിൽ മാതൃവേദി ഫൊറോന മെസഞ്ചർ മീറ്റ് നടത്തി. ഫൊറോന വികാരി റവ.ഡോ. തോമസ് പൂവത്താനിക്കുന്നേൽ മെസഞ്ചർ മീറ്റ് ഉദ്ഘാടനം ചെയ്തു. ഫൊറോന ഡയറക്ടർ ഫാ. ജോയ്സ് തെക്കേവയലിൽ അധ്യക്ഷത വഹിച്ചു. രൂപത ഡയറക്ടർ ഫാ. മാത്യു ഓലിക്കൽ ആമുഖസന്ദേശം നൽകി. രൂപത അനിമേറ്റർ സിസ്റ്റർ റോസ്‌മി എസ്എബിഎസ്, രൂപത പ്രസിഡന്‍റ് ജിജി പുളിയംകുന്നേൽ എന്നിവർ പ്രസംഗിച്ചു. രൂപത ഭാരവാഹികളും ഫൊറോനയിലെ എല്ലാ ഇടവകയിൽനിന്നുമുള്ള ഭാരവാഹികളും അനിമേറ്റേഴ്‌സും സമ്മേളനത്തിൽ പങ്കെടുത്തു.

പാലാ സെന്‍റ് തോമസ് കോളജില്‍ ആര്‍ സോഫ്‌റ്റ്‌വേര്‍ പരിശീലനം

പാലാ: സെന്‍റ് തോമസ് ഓട്ടോണമസ് കോളജില്‍ ബയോസ്റ്റാറ്റിസ്റ്റിക്സ് വിഭാഗം ഡേറ്റാ അനാലിസിസിലും സ്റ്റാറ്റിസ്റ്റിക്കല്‍ മോഡലിംഗിലും വിദ്യാര്‍ഥികള്‍ക്ക് പ്രായോഗിക പരിചയം നല്‍കുന്നതിനു വേണ്ടി ആര്‍ സോഫ്റ്റ്‌വേറിലെ തീവ്ര പരിശീലന പരിപാടിക്ക് തുടക്കം കുറിച്ചു. എംഎസ്‌സി ബയോസ്റ്റാറ്റിസ്റ്റിക്സ്, എംകോം, ബികോം വിദ്യാര്‍ഥികളാണ് ഇത്തവണ പരിശീലനത്തില്‍ പങ്കെടുത്തത്. ഓട്ടോണമസ് കോളജിന്‍റെ പുതുക്കിയ സിലബസ് ആര്‍ട്ടിഫിഷ്യല്‍ ഇന്‍റലിജന്‍സ്, മെഷീന്‍ ലേണിംഗ്, ബിഗ് ഡാറ്റ, ക്ലൗഡ് കംപ്യൂട്ടിംഗ് തുടങ്ങിയ ഏറ്റവും പുതിയ സാങ്കേതിക പ്രവണതകള്‍ക്ക് ഊന്നല്‍ നല്‍കുന്നുണ്ട്. ഇതിന്‍റെ ഭാഗമായി പഠിച്ചിറങ്ങുന്ന വിദ്യാര്‍ഥികള്‍ക്ക് അധിക നൈപുണ്യങ്ങള്‍ നേടുന്നതിനായി സര്‍ട്ടിഫിക്കറ്റ് കോഴ്സുകളും ഹ്രസ്വകാല പരിശീലന പരിപാടികളും കോളജ് ഒരുക്കുന്നുണ്ട്.ആദ്യഘട്ട പരിശീലന സെഷനുകള്‍ക്ക് കുഫോസില്‍നിന്നുള്ള സി.എസ്. അങ്കിത, ഐഐടി ഇന്‍ഡോറില്‍നിന്നുള്ള ഡോ. സ്വരൂപ് ജോര്‍ജി സക്കറിയ എന്നിവരാണ് നേതൃത്വം നല്‍കുന്നത്. പരിശീലന പരിപാടികളിലൂടെ വിദ്യാര്‍ഥികള്‍ക്ക് ഗവേഷണത്തിലും ഡേറ്റാ സയന്‍സ്, ക്ലിനിക്കല്‍ ട്രയല്‍ മോഡലിംഗ്, ഫിനാന്‍സ്, മാര്‍ക്കറ്റിംഗ് തുടങ്ങിയ വിവിധ മേഖലകളില്‍ മികച്ച തൊഴിലവസരങ്ങള്‍ നേടാന്‍ സഹായകമാകും. ആധുനിക സാങ്കേതികവിദ്യകളില്‍ പരിശീലനം ലഭിക്കുന്നത് വിദ്യാര്‍ഥികളുടെ കരിയറിന് പുതിയ ദിശാബോധം നല്‍കുകയും ആഗോളതലത്തില്‍ മത്സരക്ഷമത വര്‍ധിപ്പിക്കുകയും ചെയ്യും. പ്രിന്‍സിപ്പല്‍ ഡോ. സിബി ജയിംസ്, വൈസ് പ്രിന്‍സിപ്പല്‍ വ. ഡോ. സാല്‍വില്‍ കെ. തോമസ് കാപ്പിലിപ്പറമ്പില്‍, ബര്‍സാര്‍ ഫാ. മാത്യു ആലപ്പാട്ടുമേടയില്‍, ബയോസ്റ്റാറ്റിസ്റ്റിക്‌സ് വകുപ്പ് മേധാവി മീനു ടോം, കോ-ഓര്‍ഡിനേറ്റര്‍ എം.എസ്. അനീന എന്നിവരും നേതൃത്വം നല്‍കി.

വി.എസുമായി ചേനപ്പാടിക്കുമുണ്ടൊരു ബന്ധം

കാഞ്ഞിരപ്പള്ളി: അച്ഛന്‍റെ ബാല്യകാലസുഹൃത്തായ വി.എസ്. അച്യുതാനന്ദനെ കാഞ്ഞിരപ്പള്ളി പാര്‍ട്ടി ഓഫീസില്‍ വച്ച് അച്ഛനോടൊപ്പം കണ്ട വൈകാരിക നിമിഷങ്ങൾ ഓർത്തെടുക്കുകയാണ് ചേനപ്പാടി കടമ്പനാട്ടുമഠം രാജീവ് എന്‍. പ്ലാപ്പള്ളി. ചേനപ്പാടി കടമ്പനാട്ടുമഠം കെ.എസ്. നാരായണ പ്ലാപ്പള്ളിയാണ് വി.എസ്. അച്യുതാനന്ദനൊപ്പം ആലപ്പുഴ പുന്നപ്ര സ്‌കൂളില്‍ ഒന്നാം ക്ലാസ് മുതല്‍ നാലുവരെ പഠിച്ചത്. ഭാര്യ കെ. ലക്ഷ്മിക്കുട്ടിയമ്മയ്ക്ക് ചേനപ്പാടി സ്‌കൂളിലായിരുന്നു ജോലി. ഇതോടെ ആലപ്പുഴ വിട്ടുപോരേണ്ടി വന്നു. വി.എസിനൊപ്പമുള്ള കുട്ടിക്കാലത്തെ സൗഹൃദം കൊണ്ടാകണം അച്ഛനും കമ്യൂണിസ്റ്റുകാരനായിരുന്നെന്ന് മകന്‍ ആരാധന ബസിന്‍റെ ഉടമ കൂടിയായ രാജീവ് പറയുന്നു. പുന്നപ്ര വയലാര്‍ സമരകാലത്ത് വി.എസ് ഒളിവില്‍ പോയതും പഠനത്തിന് ശേഷം തയ്യല്‍ ജോലി ചെയ്തതുമായ കഥകള്‍ അച്ഛനില്‍ പറഞ്ഞു കേട്ടിട്ടുണ്ട്. ആലപ്പുഴയില്‍നിന്ന് പോന്നശേഷം പിന്നീട് വി.എസുമായി കൂടിക്കാഴ്ചകളുണ്ടായിട്ടില്ല. എന്നാല്‍, വി.എസിന്‍റെ സഹപാഠിയായിരുന്നുവെന്ന കാര്യം പൊതുപ്രവര്‍ത്തകനായ ടി.പി. രാധാകൃഷ്ണന്‍ നായരുമായി അച്ഛന്‍ പങ്കുവച്ചിരുന്നു. പിന്നീട് 1996ൽ കാഞ്ഞിരപ്പള്ളി പേട്ടക്കവലയില്‍ നടന്ന സിപിഎം ജില്ലാ സമ്മേളനത്തില്‍ അന്ന് സിപിഎം ഏരിയാ കമ്മിറ്റിയംഗം കൂടിയായിരുന്ന ടി.പി. രാധാകൃഷ്ണന്‍ നായര്‍ ഇക്കാര്യം ഓര്‍ത്തെടുത്ത് ഇവര്‍ തമ്മിലുള്ള കൂട്ടിക്കാഴ്ചയ്ക്ക് സൗകര്യമൊരുക്കുകയായിരുന്നു. കാഞ്ഞിരപ്പള്ളി പാര്‍ട്ടി ഓഫീസില്‍വച്ചു പഴയ ചങ്ങാതി നാരായണനെ കണ്ടെപ്പോള്‍ വി.എസ് ആലിംഗനം ചെയ്താണ് സ്വീകരിച്ചത്. ഇതോടെ നാട്ടുകാര്‍ക്കിടയിലും വി.എസിന്‍റെ സഹപാഠി എന്ന നിലയിലുള്ള ആദരവും നാരയാണ പ്ലാപ്പള്ളിക്ക് ലഭിച്ചിരുന്നു. 2012ല്‍ 92-ാമത്തെ വയസില്‍ അദ്ദേഹം അന്തരിച്ചു.

വി.എസിന്‍റെ ഒളിവുജീവിതത്തിന്‍റെ ഓർമകളുമായി രവീന്ദ്രൻ വൈദ്യർ

കോരുത്തോട്: അന്തരിച്ച മുൻ മുഖ്യമന്ത്രിയും പ്രമുഖ കമ്യൂണിസ്റ്റ് നേതാവുമായിരുന്ന വി.എസ്. അച്യുതാനന്ദന്‍റെ ഒളിവുകാല ജീവിതം ഓർത്തെടുക്കുകയാണ് കോട്ടയം ജില്ലയിലെ ജീവിച്ചിരിക്കുന്ന ഏക സ്വാതന്ത്ര്യ സമരസേനാനിയായ രവീന്ദ്രൻ വൈദ്യർ. ‌വർഷങ്ങൾക്കു മുമ്പ് കോരുത്തോട് ഗ്രാമത്തിലേക്ക് കുടിയേറിയ രവീന്ദ്രൻ വൈദ്യരുടെ ചെറുപ്പകാല ജീവിതം പൂഞ്ഞാറിലായിരുന്നു. തന്‍റെ കുടുംബവീടായിരുന്ന വലാനിക്കൽ തറവാട്ടിൽ അന്നത്തെ കമ്യൂണിസ്റ്റ് നേതാക്കളായിരുന്ന പി.പി. ജോർജ്, സി.എസ്. ഗോപാലപിള്ള എന്നിവരോടൊപ്പമാണ് വി.എസ്. അച്യുതാനന്ദൻ പൂഞ്ഞാറിൽ എത്തിയത്. പുന്നപ്ര വയലാർ സമരവുമായി ബന്ധപ്പെട്ടായിരുന്നു ഒളിവുജീവിതം. ദിവസങ്ങളോളം വാലാനിക്കൽ തറവാട്ടിൽ അച്യുതാനന്ദൻ താമസിച്ചു. പോലീസ് വിവരം മണത്തറിഞ്ഞതോടെ ഇട്ടുണ്ടൻ വൈദ്യരുടെ വലാനിക്കല്‌ തറവാട്ടിൽനിന്നു സഹോദരിയുടെ കരിവാലിപ്പുഴ വീട്ടിലേക്ക് ഒളിവുജീവിതം മാറ്റി. ഇവിടെവച്ച് വി.എസ്. അച്യുതാനന്ദനെ പോലീസ് പിടികൂടി ഈരാറ്റുപേട്ട ജയിലിൽ അടച്ചു. അതിക്രൂരമായ പീഡനങ്ങളാണ് വി.എസ്. അച്യുതാനന്ദന് ജയിലിൽ അനുഭവിക്കേണ്ടിവന്നത്. പോലീസിന്‍റെ മർദനത്തിൽ വി.എസ്. അച്യുതാനന്ദൻ മരിച്ചെന്നു കരുതി പൊന്തക്കാട്ടിൽ ഉപേക്ഷിക്കാനായി ജയിലിലെ ക്രിമിനൽ പുള്ളിയായിരുന്ന തടവുകാരൻ കോലപ്പനെ ഏൽപ്പിച്ചു. വി.എസിനെ ഉപേക്ഷിക്കുന്നതിന് തൊട്ടുമുമ്പ് അനക്കം ശ്രദ്ധിച്ച കോലപ്പൻ ജീവനുണ്ടെന്ന് മനസിലാക്കി അദ്ദേഹത്തെ പാലാ സർക്കാർ ആശുപത്രിയിൽ എത്തിക്കുകയായിരുന്നു. പിന്നീട് ലോകംകണ്ട മഹാനായ കമ്യൂണിസ്റ്റ് നേതാവായി വി.എസ്. അച്യുതാനന്ദൻ മാറിയപ്പോഴും ചെറുപ്പകാലത്തിൽ അദ്ദേഹവുമായി ഇടപഴകാൻ കഴിഞ്ഞതിന്‍റെ ഓർമകൾ രവീന്ദ്രൻ വൈദ്യർ കാത്തുസൂക്ഷിച്ചിരുന്നു. അന്ന് അച്യുതാനന്ദൻ നൽകിയ പ്രചോദനമാണ് സ്വാതന്ത്ര്യസമരത്തിൽ പങ്കെടുക്കുവാൻ തന്നെ പ്രേരിപ്പിച്ചതെന്നും രവീന്ദ്രൻ വൈദ്യർ പറയുന്നു. സാധാരണക്കാർക്കുവേണ്ടി ജീവിച്ച മനുഷ്യസ്നേഹിയായ കമ്യൂണിസ്റ്റ് നേതാവ് വി.എസ്. അച്യുതാനന്ദന്‍റെ വിയോഗം ഏറെ വേദനയോടെയാണ് രവീന്ദ്രൻ വൈദ്യർ ഉൾക്കൊണ്ടത്.

അഖില കേരള കവിതാരചനാ മത്സരം നടത്തി

കോതനല്ലൂര്‍: ഇമ്മാനുവല്‍സ് എച്ച്എസ്എസില്‍ മഹാകവി കോതനല്ലൂര്‍ ജോസഫിന്‍റെ സ്മരണാര്‍ഥം അഖില കേരള കവിതാരചനാ മത്സരം നടത്തി. സ്‌കൂള്‍ മാനേജര്‍ ഫാ. സെബാസ്റ്റ്യന്‍ പടിക്കക്കുഴിപ്പിലിന്‍റെ അധ്യക്ഷതയില്‍ നടന്ന യോഗം റിട്ട. എച്ച്ഒഡി വി.എം. മാത്യു ഉദ്ഘാടനം ചെയ്തു. ഹെഡ്മാസ്റ്റര്‍ പി.എം. വര്‍ഗീസ്, പ്രോഗ്രാം കണ്‍വീനര്‍ ജിനു ജോര്‍ജ് എന്നിവര്‍ പ്രസംഗിച്ചു. വിവിധ ജില്ലകളില്‍നിന്നുള്ള വിദ്യാര്‍ഥികള്‍ പങ്കെടുത്ത കവിതാരചനാ മത്സരത്തിന്‍റെ ജൂറി അംഗങ്ങളായത് വി.എം. മാത്യു, റോസമ്മ സെബാസ്റ്റ്യന്‍ (റിട്ട. പ്രിന്‍സിപ്പല്‍, മലയാള അധ്യാപിക) എന്നിവരാണ്. ജേതാക്കള്‍ക്കുള്ള സമ്മാനവിതരണം 26ന് കന്തീശങ്ങളുടെ ഓഡിറ്റോറിയത്തില്‍ നടക്കുന്ന മഹാകവി കോതനല്ലൂര്‍ ജോസഫ് സ്മൃതിദിനത്തില്‍ നടക്കും.

സിഡിഎസ് വാർഷികം നടത്തി

വൈക്കം: ടിവിപുരം പഞ്ചായത്ത് സിഡിഎസിന്‍റെ 26-ാം വാര്‍ഷികാഘോഷം നടത്തി. പഞ്ചായത്ത് പ്രസിഡന്‍റ് ശ്രീജി ഷാജിയുടെ അധ്യക്ഷതയില്‍ നടന്ന വാര്‍ഷികാഘോഷം സി.കെ. ആശ എംഎല്‍എ ഉദ്ഘാടനം ചെയ്തു. ബ്ലോക്ക് പഞ്ചായത്ത് പ്രസിഡന്‍റ് എസ്. ബിജു മുഖ്യപ്രഭാഷണം നടത്തി. സെക്രട്ടറി കെ.ജെ. മാത്യു റിപ്പോര്‍ട്ട് അവതരിപ്പിച്ചു. മുന്‍ സിഡിഎസ് അംഗങ്ങളെ പഞ്ചായത്ത് വൈസ് പ്രസിഡന്‍റ് വി.കെ. ശ്രീകുമാര്‍ ആദരിച്ചു. ജില്ലാ മിഷന്‍ കോ-ഓര്‍ഡിനേറ്റര്‍ അഭിലാഷ് കെ. ദിവാകര്‍ കുടുംബശ്രീ പദ്ധതി വിശദീകരണം നടത്തി. ബ്ലോക്ക് മെംബര്‍ എം.കെ. റാണിമോള്‍, പഞ്ചായത്ത് അംഗങ്ങളായ സെബാസ്റ്റ്യന്‍ ആന്‍റണി, കവിതാ റെജി, എ.കെ. അഖില്‍, ടി.എ. തങ്കച്ചന്‍, ലേവിച്ചന്‍ കാട്ടേത്ത്, സിനിഷാജി, സിഡിഎസ് ചെയര്‍പേഴ്സണ്‍ ആശ അഭിഷേക് തുടങ്ങിയവര്‍ പ്രസംഗിച്ചു.

തലപ്പാറ-എറണാകുളം റോഡിൽ വൻകുഴി; വാഹനാപകടം പതിവാകുന്നു

തലയോലപ്പറമ്പ്: തലപ്പാറ-എറണാകുളം റോഡിൽ രൂപപ്പെട്ട വൻകുഴി വാഹനാപകടം പതിവാക്കുന്നു. വടകര അമ്മംകുന്ന് വളവിൽ വടകര ജുമാ മസ്ജിദിന് സമീപം രൂപപ്പെട്ട വൻകുഴിയിൽ ചാടി നിയന്ത്രണം വിട്ട് നിരവധി വാഹനങ്ങളാണ് അപകടത്തിൽപ്പെടുന്നത്. ഇന്നലെ വൈകുന്നേരം കറിപൗഡർ കയറ്റിവന്ന ട്രാവലർ കുഴിയിൽ ചാടിയതിനെത്തുടർന്ന് നിയന്ത്രണംവിട്ട് മറിഞ്ഞിരുന്നു. അപകടത്തിൽ വാഹനത്തിന് സാരമായ കേടുപാടുകൾ സംഭവിച്ചെങ്കിലും ഡ്രൈവർ പരിക്കേൽക്കാതെ രക്ഷപ്പെട്ടു.കഴിഞ്ഞ ദിവസം വെട്ടിക്കാട്ടുമുക്ക് സ്വദേശികളായ ദമ്പതികൾ സഞ്ചരിച്ച ബൈക്ക് കുഴിയിൽ ചാടി നിയന്ത്രണംവിട്ട് മറിഞ്ഞിരുന്നു. അമിത വേഗത്തിൽ തുടർച്ചയായി വാഹനങ്ങൾ കടന്നുപോകുന്ന റോഡിൽ ആ സമയം മുന്നിലും പിന്നിലും മറ്റു വാഹനങ്ങൾ ഇല്ലാതിരുന്നതിനാലാണ് താഴെവീണ ദമ്പതികൾ രക്ഷപ്പെട്ടത്. ഒരു വശത്ത് ഇറക്കത്തിലുള്ള റോഡായതിനാൽ ഗർത്തം കാണാൻ കഴിയാതെ ഇരുചക്രവാഹനങ്ങൾ ഉൾപ്പെടെയുള്ള വാഹനങ്ങൾ ഇവിടെ അപകടത്തിൽപ്പെടുന്നത് നിത്യസംഭവമാണെന്നു നാട്ടുകാർ പറയുന്നു. അപകടത്തിൽപ്പെടുന്ന പലരും ഭാഗ്യംകൊണ്ട് മാത്രമാണ് രക്ഷപ്പെടുന്നത്. വെള്ളം ഒഴുകിപ്പോകാനുള്ള കാന ഇല്ലാത്തതും റോഡിലെ കുഴിയും ഒരുപോലെ അപകടഭീഷണിയാണ്. കുഴിമൂടുന്നതിന് അധികൃതർ നടപടി സ്വീകരിക്കണമെന്നു നാട്ടുകാർ ആവശ്യപ്പെട്ടു.

കാണക്കാരി ഗവ. ഹോമിയോ ആശുപത്രിക്ക് ആയുഷ് കായകല്‍പ് പുരസ്‌കാരം

കടുത്തുരുത്തി: പ്രഥമ സംസ്ഥാന ആയുഷ് കായകല്‍പ് പുരസ്‌കാരം കോട്ടയം ജില്ലയില്‍ ഹോമിയോപ്പതി വിഭാഗത്തില്‍ കാണക്കാരി ഗവണ്‍മെന്‍റ് ഹോമിയോ ആശുപത്രിക്ക്. കായകല്‍പ് പുരസ്‌കാരങ്ങള്‍ മന്ത്രി വീണാ ജോര്‍ജ് പ്രഖ്യാപിച്ചപ്പോള്‍ കോട്ടയം ജില്ലയില്‍ ഹോമിയോപ്പതി വിഭാഗത്തില്‍ കാണക്കാരി ഹോമിയോ ആശുപത്രി 93.33 ശതമാനം മാര്‍ക്കോടെയാണ് ഒന്നാം സ്ഥാനം നേടിയത്. ആരോഗ്യസ്ഥാപനങ്ങളിലെ ശുചിത്വം, ഫലപ്രദമായ മാലിന്യസംസ്‌കരണം, അണുബാധ നിയന്ത്രണം എന്നിവ പ്രോത്സാഹിപ്പിക്കുവാന്‍ സര്‍ക്കാര്‍ ആവിഷ്‌കരിച്ചതാണ് കായകല്‍പ് പുരസ്‌കാരം. കാണക്കാരി ഹോമിയോ ഡിസ്പെന്‍സറി നിലവില്‍ എന്‍എബിഎച്ച് എന്‍ട്രി സര്‍ട്ടിഫിക്കേഷനും ആയുഷ് ഹെല്‍ത്ത് ആൻഡ് വെല്‍നസ് സെന്‍ററും ഹോമിയോപ്പതി വകുപ്പിന്‍റെ മോഡല്‍ ഡിസ്പെന്‍സറിയുമാണ്. ആശുപത്രി ജീവനക്കാരുടെ കൂട്ടായ പ്രവര്‍ത്തനമാണ് ജില്ലയില്‍ ഒന്നാം സ്ഥാനം നേടാന്‍ സഹായിച്ചതെന്നു കാണക്കാരി പഞ്ചായത്ത് പ്രസിഡന്‍റ് അംബിക സുകുമാരന്‍, മെഡിക്കല്‍ ഓഫീസര്‍ ഡോ. എസ്.അഭിരാജ് എന്നിവര്‍ പറഞ്ഞു.

ഓര്‍മകളുടെ തീരാവേദനയിൽ ഏഴാണ്ട്

കടുത്തുരുത്തി: തോരാമഴയെത്തുടര്‍ന്നുണ്ടായ വെള്ളപ്പൊക്കം തീര്‍ത്ത നാടിന്‍റെ സങ്കടങ്ങളും ദുരിതങ്ങളുടെ നേര്‍ക്കാഴ്ചകളും പുറംലോകത്തെത്തിക്കുന്നതിനിടെ മുണ്ടാറിലെ എഴുമാംകായലില്‍ വള്ളം മറിഞ്ഞ് മുങ്ങിമരിച്ച സജിയുടെയും ബിബിന്‍റെയും മരിക്കാത്ത ഓര്‍മകള്‍ക്കു മുന്നില്‍ മുണ്ടാറും സമീപ നാടുകളും. മുണ്ടാറിലെ വെള്ളപ്പൊക്കബാധിത പ്രദേശങ്ങിലെ ദുരിതത്തിന്‍റെ വാര്‍ത്ത റിപ്പോര്‍ട്ട് ചെയ്യാന്‍ പോയ മാധ്യമപ്രവകര്‍ത്തകർ യാത്ര ചെയ്ത വള്ളം മറിഞ്ഞു രണ്ടുപേര്‍ മരിച്ചിട്ട് ഇന്ന് ഏഴുവര്‍ഷം. കടുത്തുരുത്തി പൂഴിക്കോല്‍ പട്ടശേരില്‍ സജി (46), ചാനല്‍സംഘവുമായി എത്തിയ കാറിന്‍റെ ഡ്രൈവര്‍ തിരുവല്ല ഓതറ കോഴിമല ഉഴത്തില്‍ കൊച്ചിരാമുറിയില്‍ ബിബിന്‍ (27) എന്നിവരാണ് തോണി മറിഞ്ഞ് മരിച്ചത്. കല്ലറ പഞ്ചായത്തിലെ മുണ്ടാറില്‍ വെള്ളപ്പൊക്കത്തെത്തുടര്‍ന്നുണ്ടായ ദുരിതം റിപ്പോര്‍ട്ട് ചെയ്തശേഷം തിരികെ എഴുമാംകായലിലൂടെ വരുമ്പോഴാണ് 2018 ജൂലൈ 23-ന് ഉച്ചയ്ക്ക് ഒന്നോടെ വള്ളം മറിഞ്ഞത്. തുഴച്ചില്‍കാരന്‍ ഉള്‍പ്പെടെ അഞ്ചുപേരാണ് വള്ളത്തിലുണ്ടായിരുന്നത്. തൃശൂര്‍ കുടപ്പുഴമന കെ.ബി. ശ്രീധരന്‍ (29), ചിറക്കടവ് അടിച്ചുമാക്കല്‍ അഭിലാഷ് (29), വള്ളം നിയന്ത്രിച്ചിരുന്ന നാട്ടുകാരനായ എഴുമാന്തുരുത്ത് അനീഷ്ഭവനില്‍ അഭിലാഷ് (40) എന്നിവരെ നാട്ടുകാര്‍ രക്ഷപ്പെടുത്തി. വെള്ളപ്പൊക്കത്തെത്തുടര്‍ന്ന് ജില്ലയിലെ പടിഞ്ഞാറന്‍ മേഖലയില്‍ വ്യാപക നാശനഷ്ടമാണ് അന്നുണ്ടായത്. വേനല്‍ക്കാലത്തുപോലും വെള്ളക്കെട്ടായ സ്ഥലമാണ് മുണ്ടാര്‍. തീര്‍ത്തും ഒറ്റപ്പെട്ട സ്ഥലമായ മുണ്ടാറിലേക്ക് യാത്രാസൗകര്യങ്ങള്‍ തീരെക്കുറവാണ്. പ്രദേശവാസികള്‍ അവരവരുടെ വള്ളങ്ങളിലും കാല്‍നടയായും ചിലയിടങ്ങളില്‍മാത്രം വാഹനങ്ങളിലുമാണ് യാത്ര ചെയ്യുന്നത്. മഴക്കാലമായാല്‍ കിലോമീറ്ററുകള്‍ ചുറ്റിവേണം ഇവര്‍ക്ക് പുറംലോകത്തെത്താന്‍. ഇവരുടെ തീരാദുരിതം റിപ്പോര്‍ട്ട് ചെയ്യാനാണ് ചാനല്‍സംഘം മുണ്ടാറിലെത്തിയത്. അവിടത്തെ ജനങ്ങളുടെ ദുരിതം നേരില്‍കണ്ടറിഞ്ഞതിനുശേഷം ഇവര്‍ തിരികെ എഴുമാന്തുരുത്തിലേക്ക് വരുമ്പോഴായിരുന്നു അപകടം. കടത്തുരുത്തി പഞ്ചായത്തിലെ കൊല്ലങ്കേരിയും കല്ലറ പഞ്ചായത്തിലെ മുണ്ടാറുമായി ബന്ധപ്പെടുന്നതിന് എഴുമാംകായലിന് കുറുകെ നിര്‍മിക്കുന്ന പാലത്തിന്‍റെ ആദ്യഘട്ടം പൂര്‍ത്തിയായതും താത്കാലിക നടപ്പാലം നിര്‍മിച്ചതും മാത്രമാണ് രണ്ടുപേരുടെ മരണം നടന്ന് ഏഴുവര്‍ഷം പിന്നിടുമ്പോള്‍ ഇവിടെ വന്നിട്ടുള്ള മാറ്റം. ഈ പാലം നിര്‍മാണവും നാളുകളായി മുടങ്ങിയിരിക്കുകയാണ്.

കാഞ്ഞിരത്താനത്ത് കുട്ടികള്‍ ഒരുക്കുന്ന സ്‌കൂള്‍ റേഡിയോ

കടുത്തുരുത്തി: റേഡിയോ അവതാരകരാകുന്നതിന്‍റെ ആവേശത്തിലാണ് കാഞ്ഞിരത്താനം സെന്‍റ് ജോണ്‍സ് ഹൈസ്‌കൂളിലെ വിദ്യാര്‍ഥികള്‍. റേഡിയോ എന്നത് പഴയ തലമുറയുടെ വാര്‍ത്താവിനിമയ-വിനോദോപാധി എന്ന സങ്കല്‍പത്തെ മാറ്റിമറിച്ചു കൊണ്ടാണ് സ്‌കൂള്‍ റേഡിയോയുമായി സ്‌കൂളിലെ ഇംഗ്ലീഷ് ക്ലബ് കടന്നുവരുന്നത്. ഇംഗ്ലീഷ് ഭാഷയിലെ നൈപുണ്യ വികസനമാണ് ലക്ഷ്യംവയ്ക്കുന്നതെങ്കിലും വിദ്യാര്‍ഥികളുടെ വിവിധങ്ങളായ കഴിവുകളും ഇതിലൂടെ പരിപോഷിപ്പിച്ചെടുക്കാനാണ് ലക്ഷ്യമിടുന്നത്. ഓരോ ദിനത്തിനും ഊര്‍ജമേകി രാവിലെ പ്രഭാത ചിന്തകളോടെയാണ് റോഡിയോയുടെ തുടക്കം. ഉച്ചയ്ക്കത് അന്താരാഷ്‌ട്ര വാര്‍ത്തകളും കഥകളും സംഭാഷണങ്ങളും ഗാനങ്ങളുമെല്ലാമായിട്ടാവും റേഡിയോ പരിപാടിയിലൂടെ ക്ലാസ് മുറികളിലെത്തുന്നത്. ദി വൈബ് ലോഞ്ച് എന്നാണ് ഭാവങ്ങളുടെ ഈ തിരയൊഴുക്കിന് കുട്ടിക്കൂട്ടം പേര് നല്‍കിയിരിക്കുന്നത്. റേഡിയോ അവതരണത്തിലൂടെ ലഭിക്കുന്ന ആത്മവിശ്വാസം വലുതാണെന്നാണ് കുട്ടികളുടെ അഭിപ്രായം. സ്‌കൂള്‍ റേഡിയോ കുട്ടികളുടെ ഭാവിയുടെ വേദിയാണെന്ന് പരിപാടിയുടെ ഉദ്ഘാടനം നിര്‍വഹിച്ചുകൊണ്ട് സ്‌കൂള്‍ മാനേജര്‍ ഫാ. ജയിംസ് വയലില്‍ പറഞ്ഞു. വിജയദിനാഘോഷത്തോടും രക്ഷാകര്‍തൃസംഗമത്തോടും അനുബന്ധിച്ചായിരുന്നു റേഡിയോയുടെ ഉദ്ഘാടനം. പാലാ അഡാര്‍ട്ട് ഡയറക്ടര്‍ ഫാ. ജയിംസ് പൊരുന്നോലില്‍ മുഖ്യപ്രഭാഷണം നടത്തി. പഞ്ചായത്തംഗം ലിസി പാളിത്തോട്ടം പ്രസംഗിച്ചു. ഹെഡ്മാസ്റ്റര്‍ ബിജു മാത്യു. അധ്യാപകരായ സിസ്റ്റര്‍ ലിനറ്റ് ജോസ്, അക്ഷയ സി. ജോസ്, വിദ്യാര്‍ഥി പ്രതിനിധി സെരൂഗ് എം. ഷിബു എന്നിവര്‍ നേതൃത്വം നല്‍കി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]